འདུལ་བ་གཞུང་དམ་པ
ชื่อสันสกฤต (อักษรทิเบต ตามตัวบท) བི་ན་ཡ་ཨུད་ཏ་ར་གྲན་ཐ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๑๒ · หน้า 92b
༄༅༅། །རྒྱ་གར་སྐད་དུ། བི་ན་ཡ་ཨུད་ཏ་ར་གྲན་ཐ། བོད་སྐད་དུ། འདུལ་བ་གཞུང་དམ་པ། བཀྲ་ཤིས་ཐམས་ཅད་མཁྱེན་པ་ལ་ཕྱག་འཚལ་ལོ། བམ་པོ་དང་པོ། མདོར་ན། བྱོལ་སོང་གསུམ་དང་ལམ་གསུམ་དང་། །གཤེགས་དང་བཅད་དང་རྣམ་པ་
གཉིས། །འཛིན་པ་དང་ཡང་བལྟབ་པ་དང་། །སོ་དང་མ་རེག་ཕག་མོ་བཞིན། །དེ་ནས་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགེ་སློང་གིས་མིའི་བུད་མེད་སྨན་ཏམ། སྔགས་ཀྱིས་བྱོལ་སོང་གི་སྐྱེ་གནས་སུ་སྐྱེས་པར་བསྒྱུར་ཏེ་མི་ཚངས་པར་
སྤྱོད་པ་བགྱིད་ན་ཅིར་འགྱུར། མཐར་འགྱུར་རོ། །བཙུན་པ་དགེ་སློང་གིས་སྔགས་སམ། སྨན་གྱིས་བདག་ཉིད་བྱོལ་སོང་གི་སྐྱེ་གནས་སུ་སྐྱེས་པར་བསྒྱུར་ཏེ་མིའི་བུད་མེད་དང་ལྷན་ཅིག་ཏུ་མི་ཚངས་པར་སྤྱོད་པར་བགྱིད་ན་ཅིར་འགྱུར། དེ་སྟེ་དགེ་སློང་དུ་འདུ་ཤེས་ཡོད་ན་འཁྲིག་པར་སྦྱོར་
བ་བྱ་བ་ཡིན་པས་མཐར་འགྱུར་རོ། །དེ་སྟེ་དགེ་སློང་དུ་འདུ་ཤེས་མེད་ན་ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་སྔགས་སམ། སྨན་གྱིས་བདག་དང་མིའི་བུད་མེད་གཉིས་བྱོལ་སོང་གི་སྐྱེ་གནས་སུ་སྐྱེས་པར་བསྒྱུར་ཏེ་གཅིག་ལ་གཅིག་མི་ཚངས་པར་སྤྱོད་པ་བགྱིད་ན་ཅིར་
འགྱུར། དེ་སྟེ་དགེ་སློང་དུ་འདུ་ཤེས་ཡོད་ན་འཁྲིག་པར་སྦྱོར་བར་བྱ་བ་ཡིན་པས་མཐར་འགྱུར་རོ། །དགེ་སློང་དུ་འདུ་ཤེས་མེད་ན་ཉེས་པ་སྦོམ་པོར་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་བཅུག་མ་ཐག་
ཏུ་མཐར་འགྱུར་རོ་ཞེས་གསུངས་ན། ཇི་ཙམ་གྱིས་ན་ཁར་བཅུག་པ་ཞེས་བགྱི། ཨུ་པཱ་ལི་སོ་ལས་དཀྲེ་འདས་ནའོ། །ཇི་ཙམ་གྱིས་ན་བཤང་བའི་ལམ་དུ་བཅུག་པ་ཞེས་བགྱི། རྐུབ་ཁར་དཀྲེ་འདས་ནའོ། །ཇི་ཙམ་གྱིས་ན་གཅི་བའི་ལམ་དུ་བཅུག་པ་ཞེས་བགྱི། ཁ་ཤུན་ལས་
དཀྲེ་འདས་ནའོ། །བཙུན་པ་བུད་མེད་ཕྱེད་དུ་གཤེགས་པར་གྱུར་པ་ལ་སྒོ་གསུམ་གྱི་བུ་གུ་ཡང་ཉམས་པར་གྱུར་པ་དེ་དགེ་སློང་གིས་ཕྱེད་ཚལ་གྱིས་ཕྱེད་ཚལ་སྦྱར་ཏེ་མི་ཚངས་པར་སྤྱོད་པ་བགྱིད་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་བུད་མེད་རྐེད་དུ་བཅད་པར་
เล่ม ๑๒ · หน้า 93a
གྱུར་པ་ཞིག་སྒོ་གསུམ་གྱི་བུ་གུ་ལས་སྒོའི་བུ་གུ་གང་ཡང་རུང་སྟེ་མ་ཉམས་པར་གྱུར་པ་དེར་མི་ཚངས་པར་སྤྱོད་པ་བགྱིད་ན་ཅིར་འགྱུར། མཐར་འགྱུར་རོ། །བཙུན་པ་མགོ་བཅད་པའི་བུད་མེད་ལ་མི་ཚངས་པར་སྤྱོད་ན་ཅིར་འགྱུར། དེ་སྟེ་བཤང་བའི་ལམ་མམ། གཅི་བའི་
ལམ་དུ་བྱེད་ན་མཐར་འགྱུར་རོ། །འོན་ཏེ་ཁའི་ལམ་མམ། སྦུ་བུའམ། སྒྲོག་རུས་ཀྱི་བུ་གུར་བྱེད་ན་ཉེས་པ་སྦོམ་པོར་འགྱུར་རོ། །བཅོམ་ལྡན་འདས་ཀྱིས་མི་མ་ཡིན་པའི་བུད་མེད་དང་ལྷན་ཅིག་ཏུ་མི་ཚངས་པར་སྤྱོད་པ་འཁྲིག་པའི་ཆོས་བྱེད་ན་མཐར་འགྱུར་རོ་ཞེས་གསུངས་པ་མི་མ་ལགས་
པ་ཇི་ལྟ་བུ། ཡན་ལག་ཐམས་ཅད་དང་མཉམ་པར་གྱུར་པའོ། །དེ་བཞིན་དུ་བྱོལ་སོང་དུ་གྱུར་པ་རྣམས་ལ་ཡང་ཤེས་པར་བྱའོ། །བཙུན་པ་བལྟབ་སྟེ་བཅུག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་སོའི་ཕྱི་རོལ་མཆུའི་ནང་དུ་མི་ཚངས་པར་སྤྱོད་པ་བགྱིད་ན་ཅིར་
འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་བཤང་བའི་ལམ་མམ། གཅི་བའི་འམ། ཁའི་ལམ་རྣམས་སུ་མ་རེག་པར་བཅུག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་ཕག་མོའི་རོ་བསྲེགས་པ་སྤུ་མེད་པ་ལ་མི་ཚངས་པར་སྤྱོད་པ་
བགྱིད་ན་ཅིར་འགྱུར། ཉེས་པ་སྦོམ་པོར་འགྱུར་ཏེ། །བྱོལ་སོང་གི་སྐྱེ་གནས་ཐམས་ཅད་ལ་ཡང་འདི་བཞིན་དུ་བརྗོད་པར་བྱའོ།། །།མདོར་ན། གཞན་གྱི་ཡན་ལག་སྐྱེས་པ་དང་། །སྤྱིལ་བུ་གཉིས་ཀྱང་དེ་བཞིན་ཏེ། །ཉམས་པ་གཉིས་དང་དཀྲིས་པ་དང་། །བཞི་པ་གཉིས་
དང་བདུན་པའོ། །བཙུན་པ་དགེ་སློང་གིས་གཞན་གྱི་མོ་མཚན་དུ་གཞན་གྱི་ཕོ་མཚན་བཅུག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་ཞིག་དགེ་སློང་གཅིག་པུ་མི་ཚངས་པར་སྤྱོད་པའི་སླད་དུ་སྤྱིལ་བུར་ཞུགས་ན་མཐར་འགྱུར་བ་མཆིས་སམ། ཨུ་པཱ་ལི་ཇི་
ལྟར་མཚན་རིངས་སམ། རྒྱབ་མཉེན་ལྟ་བུའོ། །བཙུན་པ་དགེ་སློང་སྦྲང་སྐྱབས་ཀྱི་སྐྱིལ་བུར་ཞུགས་པ་ལས་བུད་མེད་དེ་ཕྱི་ན་འདུག་པ་ལ་དེ་ན་འདུག་བཞིན་དཀྲིས་ནས་ལོག་པར་སྤྱད་ན་ཅིར་འགྱུར། མཐར་འགྱུར་རོ། །བཙུན་པ་བཅོམ་ལྡན་འདས་ཀྱིས་གསོན་པོར་ཉམས་པའོ་ཞེས་
เล่ม ๑๒ · หน้า 93b
གསུངས་ན། ཇི་ཙམ་གྱིས་ན་གསོན་པོར་ཉམས་པ་ཞེས་བགྱི། ཇི་ལྟར་རྨ་བྱུང་ངམ། རུལ་པའམ། ཞིགས་པའམ། སྲོག་ཆགས་ཀྱིས་ཟོས་པར་གྱུར་པ་དེ་ཙམ་གྱིས་ན་དེ་དག་གསོན་པོར་ཉམས་པ་ཞེས་བྱའོ། །ཇི་ཙམ་གྱིས་ན་གསོན་པོར་མ་ཉམས་པ་ཞེས་བགྱི།
ཇི་ལྟར་དེའི་མུ་གཉི་ག་མཉམ་པར་གྱུར་པ་ནི་མ་ཉམས་པ་སྟེ། ཤི་བ་ལ་ཡང་དེ་བཞིན་དུ་བརྗོད་པར་བྱའོ། །དེ་བཞིན་དུ་མི་མ་ཡིན་པ་དང་། བྱོལ་སོང་གི་སྐྱེ་གནས་སུ་སྐྱེས་པར་གྱུར་པ་དང་། སྐྱེས་པ་དང་། མ་ནིང་དང་། མ་ནིང་ཕོ་རྣམས་ལ་ཡང་དེ་བཞིན་དུ་བརྗོད་པར་བྱའོ། །
དཀྲིས་ཏེ་བཅུག་ན་མཐར་མི་འགྱུར་རོ། །ཞེས་བཙུན་པ་བཅོམ་ལྡན་འདས་ཀྱིས་གསུངས་ན། དགེ་སློང་དག་གིས་ཕྱིང་བུའམ་གྲོ་ག་སྟུག་པོ་ཞིག་གིས་དཀྲིས་ཏེ་བཅུག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དེ་སྟེ་སེང་རས་སམ། དར་ལའམ། གོས་སྲབ་མོ་རྣམས་
ཀྱིས་དཀྲིས་ཏེ་བཅུག་ན་ཅིར་འགྱུར། མཐར་འགྱུར་རོ། །བཙུན་པ་དགེ་སློང་གིས་ལམ་ལ་ལམ་དུ་འདུ་ཤེས་ཏེ་བཅུག་ན་ཅིར་འགྱུར། མཐར་འགྱུར་རོ། །ལམ་ལ་ལམ་མ་ལགས་པར་འདུ་ཤེས་ཏེ་བཅུག་ན་ཅིར་འགྱུར། མཐར་འགྱུར་རོ། །ལམ་མ་ལགས་པ་ལ་ལམ་མ་
ལགས་པར་འདུ་ཤེས་ཏེ་བཅུག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །ལམ་མ་ལགས་པ་ལ་ལམ་དུ་འདུ་ཤེས་ཏེ་བཅུག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློང་གིས་དཀྲིས་པ་ལ་དཀྲིས་པར་འདུ་ཤེས་ཏེ་བཅུག་ན་ཅིར་འགྱུར། ཉེས་པ་སྦོམ་པོར་
འགྱུར་རོ། །དཀྲིས་པ་ལ་མ་དཀྲིས་པར་འདུ་ཤེས་ཏེ་བཅུག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མ་དཀྲིས་པ་ལ་དཀྲིས་པར་འདུ་ཤེས་ཏེ་བཅུག་ན་ཅིར་འགྱུར། སྦོམ་པོར་འགྱུར་རོ། །མ་དཀྲིས་པ་ལ་མ་དཀྲིས་པར་འདུ་ཤེས་ཏེ་བཅུག་ན་ཅིར་འགྱུར། མཐར་
འགྱུར་རོ། །བཙུན་པ་བསྙེན་པར་མ་རྫོགས་པ་ན་མི་ཚངས་པར་སྤྱད་པར་བཤམས་ནས་བསྙེན་པར་མ་རྫོགས་པར་བཅུག་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པ་ན་བཤམས་ནས་བསྙེན་པར་རྫོགས་ཀར་བཅུག་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་
เล่ม ๑๒ · หน้า 94a
པར་བཤམས་ནས་བསྙེན་པར་རྫོགས་ཏེ་བཅུག་ན་ཅིར་འགྱུར། མཐར་འགྱུར་རོ། །བསྙེན་པར་རྫོགས་ཀར་བཤམས་ནས་བསྙེན་པར་རྫོགས་ཀར་བཅུག་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་པར་བཤམས་ནས་བསྙེན་པར་རྫོགས་ཏེ་བཅུག་
ན་ཅིར་འགྱུར། མཐར་འགྱུར་རོ། །བསྙེན་པར་རྫོགས་ནས་བཤམས་ལ་བསྙེན་པར་རྫོགས་ནས་བཅུག་ན་ཅིར་འགྱུར། མཐར་འགྱུར་རོ། །བསྙེན་པར་རྫོགས་ནས་བཤམས་ཏེ་བསྙེན་པར་མ་རྫོགས་པར་བཅུག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །ཇི་ལྟར་
དགེ་སློང་གིས་མི་ཚངས་པར་སྤྱད་པའི་རྒྱུ་རྐྱེན་གྱིས་མཐར་གྱུར་པ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་མཐར་འགྱུར་རོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་ལ་ནི་ཉེས་བྱས་སོ།། །།མདོར་ན། བརྒྱད་བཅུའི་སྡེ་དང་མཚན་མ་
དང་། །མི་མཉམ་རིན་ཐང་འོན་ཏེ་མཚན། །བསྙེན་པར་རྫོགས་པ་བདུན་པ་བྱས། །ཤོ་གམ་བཅུ་གཅིག་དེ་བཞིན་ནོ། །བཙུན་པ་དགེ་སློང་གིས་བརྒྱད་བཅུའི་སྡེ་གཉིས་ཀར་བདག་ཉིད་གཏོགས་པར་བགྲང་དུ་བཅུག་ན་ཅིར་འགྱུར། ཉེས་བྱས་སོ། །དེ་ལ་ཆོས་དང་ལྡན་
པའི་སྐལ་བ་གང་ལགས། དང་པོའོ། །དེ་སྟེ་བླངས་ནས་བཅབས་ན་ཤེས་བཞིན་དུ་བརྫུན་དུ་སྨྲས་པས་ལྟུང་བའོ། །ནམ་གྲུབ་པར་གྱུར་པ་ན་རིན་ཐང་བརྩི་བར་བྱའོ། །བཙུན་པ་མི་རྣམས་ཀྱི་མཚན་མ་བཙུགས་ཏེ་བཞག་པ་དེ་ལས་དགེ་སློང་གིས་རིན་ཆེ་བའི་མཚན་མ་རིན་ཆུང་
བའི་གནས་སུ་བསྐྱོད་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དེ་སྟེ་རིན་ཆུང་བའི་མཚན་མ་རིན་ཆེན་པོའི་གནས་སུ་བསྐྱོད་ན་ཅིར་འགྱུར། མཐར་འགྱུར་རོ། །བཙུན་པ་དགེ་སློང་གིས་རིན་ཐང་མ་མཆིས་པའི་དངོས་པོ་ཞིག་བརྐུས་ན་ཅིར་འགྱུར། མཐར་འགྱུར་རོ། །
རིན་ཐང་མེད་པའི་དངོས་པོ་གང་ཞེ་ན། རིན་ཆེ་བར་གྱུར་པས་དེ་ལ་རིན་ཐང་གཅད་དུ་མི་ཆོད་པའོ། །དེ་སྟེ་རིན་ཐང་མ་མཆིས་པའི་དངོས་པོ་ཞིག་བརྐུས་ན་ཅིར་འགྱུར། ཉེས་པ་སྦོམ་པོར་འགྱུར་རོ། རིན་ཐང་མེད་པའི་དངོས་པོ་གང་ཞེ་ན། གང་ཆུང་བར་གྱུར་པས་རིན་གཅད་
เล่ม ๑๒ · หน้า 94b
དུ་མི་ནུས་པའོ། །བཙུན་པ་དགེ་སློང་གིས་གཞལ་དུ་མི་རུང་བའི་དངོས་པོ་ཞིག་བརྐུས་ན་ཅིར་འགྱུར། མཐར་འགྱུར་རོ། །དེ་སྟེ་གཞལ་དུ་རུང་བའི་དངོས་པོ་ཞིག་བརྐུས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་བརྐུ་བའི་ཕྱིར་བཤམས་པ་
ལས་མཚན་འཕོས་ཏེ་དགེ་སློང་མར་གྱུར་ནས་བརྐུས་ན་ཅིར་འགྱུར། མཐར་འགྱུར་རོ། །བཙུན་པ་དགེ་སློང་མས་བརྐུ་བར་བཤམས་པ་ལས་མཚན་འཕོས་ཏེ་དགེ་སློང་དུ་གྱུར་ན་ཅིར་འགྱུར། མཐར་འགྱུར་རོ། །བཙུན་པ་བསྙེན་པར་མ་རྫོགས་པར་བརྐུ་བར་བཤམས་ནས་
བསྙེན་པར་མ་རྫོགས་པར་བརྐུས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བརྐུ་བར་བཤམས་ནས་བསྙེན་པར་རྫོགས་ཀར་བརྐུས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བརྐུ་བར་བཤམས་ཏེ། བསྙེན་པར་རྫོགས་ནས་བརྐུས་ན་ཅིར་
འགྱུར། མཐར་འགྱུར་རོ། །བསྙེན་པར་རྫོགས་ཀར་བརྐུ་བར་བཤམས་ནས་བསྙེན་པར་རྫོགས་ཀར་བརྐུས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བརྐུ་བའི་སླད་དུ་བཤམས་ནས་བསྙེན་པར་རྫོགས་ཏེ་བརྐུས་ན་ཅིར་འགྱུར། མཐར་འགྱུར་རོ། །བཙུན་
པ་དགེ་སློང་གིས་བསྙེན་པར་རྫོགས་ཏེ་བརྐུ་བར་བཤམས་ལ་བསྙེན་པར་རྫོགས་ནས་བརྐུས་ན་ཅིར་འགྱུར། མཐར་འགྱུར་རོ། །བསྙེན་པར་རྫོགས་ནས་བརྐུ་བར་བཤམས་ཏེ་བསྙེན་པར་མ་རྫོགས་པར་བརྐུས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་
དགེ་སློང་གིས་ནམ་མཁའ་ལ་ཤོ་གམ་བཟླས་ན་ཅིར་འགྱུར། དངོས་པོ་ཇི་ལྟ་བ་བཞིན་ནོ། འོན་ཏེ་རྫུ་འཕྲུལ་གྱིས་བཟླས་ན་ཉེས་པ་མེད་དོ། །བཙུན་པ་དགེ་སློང་གིས་ལམ་མ་ལགས་པ་ནས་ཤོ་གམ་བཟླས་ན་ཅིར་འགྱུར། དེ་སྟེ་དེའི་ས་ལས་འདས་ན་ཉེས་པ་སྦོམ་པོར་
འགྱུར་རོ། །བཙུན་པ་དགེ་སློང་གིས་ཚོང་པ་རྣམས་འགྲོའོ་ཞེས་སྨྲས་ན་ཅིར་འགྱུར། ཉེས་བྱས་སོ། །བཙུན་པ་འདི་ལྟར་ཚོང་པ་རྣམས་ཀྱིས་ཤོ་གམ་དུ་གཏོགས་པའི་རྫས་རྣམས་ཤོ་གམ་གྱི་སར་མ་ཕྱིན་པར་ཚོང་པ་རྣམས་ཀྱིས་དགེ་སློང་ལ་འཕགས་པ་ཤོ་གམ་གྱི་གནས་
เล่ม ๑๒ · หน้า 95a
ལས་སྒྲོལ་ཏེ་སྩོལ་ཅིག་ཅེས་སྨྲས་པ་ལས་དེ་དགེ་སློང་གིས་བཟླས་ན་ཅིར་འགྱུར། ཉེས་བྱས་སོ། །བཙུན་པ་འདི་ལྟར་ཚོང་པ་རྣམས་ཀྱིས་ཤོ་གམ་དུ་གཏོགས་པའི་རྫས་རྣམས་ཤོ་གམ་གྱི་སར་མ་ཕྱིན་པར་ཚོང་པ་རྣམས་ཀྱིས་དགེ་སློང་ལ་འཕགས་པ་ཤོ་གམ་གྱི་གནས་
ལས་སྒྲོལ་ཏེ་སྩོལ་ཅིག །དེའི་ཤོ་གམ་ཅི་མཆིས་པའི་ཕྱེད་ནི་ཁྱེད་སྣོམས་ཤིག་ཅེས་དེ་སྐད་སྨྲས་པ་ལས་དེ་དགེ་སློང་གིས་བཟླས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་ཚོང་པ་རྣམས་ཀྱིས་ཤོ་གམ་དུ་གཏོགས་པའི་རྫས་རྣམས་ཤོ་གམ་གྱི་སར་མ་ཕྱིན་པར་ཚོང་པ་
རྣམས་ཀྱིས་དགེ་སློང་ལ་འཕགས་པ་ཤོ་གམ་གྱི་གནས་ལས་སྒྲོལ་ཏེ་སྩོལ་ཅིག །དེ་ལ་ཤོ་གམ་ཅི་མཆིས་པ་ཁྱོད་ཉིད་སྣོམས་ཤིག་ཅེས་དེ་སྐད་སྨྲས་པ་ལས་དེ་དགེ་སློང་གིས་བཟླས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་ཚོང་པ་རྣམས་ཀྱིས་ཤོ་གམ་དུ་གཏོགས་
པའི་རྫས་ཤོ་གམ་གྱི་སར་མ་ཕྱིན་པར་དགེ་སློང་གིས་ལམ་གཞན་དུ་བསྟན་ན་ཅིར་འགྱུར། ཉེས་བྱས་སོ། །བཙུན་པ་འདི་ལྟར་ཚོང་པ་རྣམས་ཀྱིས་ཤོ་གམ་དུ་གཏོགས་པའི་རྫས་རྣམས་ཤོ་གམ་གྱི་སར་མ་ཕྱིན་པར་ཚོང་པ་རྣམས་ཀྱིས་དགེ་སློང་ལ་འཕགས་པ་ཤོ་གམ་གྱི་གནས་
ལས་སྒྲོལ་ཏེ་སྩོལ་ཅིག་ཅེས་དེ་སྐད་སྨྲས་པ་ལས་དེ་དགེ་སློང་གིས་བཟླས་ན་ཅིར་འགྱུར། ཉེས་བྱས་སོ། །བཙུན་པ་ཚོང་པ་རྣམས་ཀྱིས་ཤོ་གམ་དུ་གཏོགས་པའི་རྫས་རྣམས་ཤོ་གམ་གྱི་སར་ཕྱིན་ནས་ཚོང་པ་རྣམས་ཀྱིས་དགེ་སློང་ལ་འཕགས་པ་ཤོ་གམ་གྱི་གནས་ལས་སྒྲོལ་ཏེ་
སྩོལ་ཅིག་དང་། འདིར་ཤོ་གམ་ཅི་སྙེད་པའི་ཕྱེད་ཁྱོད་སྣོམས་ཤིག་ཅེས་དེ་སྐད་སྨྲས་པ་ལས་དགེ་སློང་གིས་དེ་བཟླས་ན་ཅིར་འགྱུར། ཤོ་གམ་གྱི་རིན་ཐང་བརྩི་བར་བྱའོ། །བཙུན་པ་ཚོང་པ་རྣམས་ཀྱིས་ཤོ་གམ་དུ་གཏོགས་པའི་རྫས་རྣམས་ཤོ་གམ་གྱི་སར་ཕྱིན་ནས་
ཚོང་པ་རྣམས་ཀྱིས་དགེ་སློང་ལ་འཕགས་པ་ཤོ་གམ་གྱི་གནས་ལས་སྒྲོལ་ཏེ་སྩོལ་ཅིག་དང་། འདིར་ཤོ་གམ་ཇི་སྙེད་པ་དེ་ཐམས་ཅད་ཁྱེད་སྣོམས་ཤིག་ཅེས་དེ་སྐད་སྨྲས་པ་ལས་དེ་དགེ་སློང་གིས་བཟླས་ན་ཅིར་འགྱུར། ཤོ་གམ་གྱི་རིན་ཐང་བརྩི་བར་བྱའོ།། །།མདོར་ན།
เล่ม ๑๒ · หน้า 95b
ཆོས་གོས་གདང་ཤིང་བཞི་པ་དང་། །བརྐུ་བ་པ་ན་གསུམ་པ་དང་། །སྦྱོར་བ་གསུམ་དང་ཐེ་ཚོམ་དང་། །གླིང་དང་གཞན་ཕྱིར་མི་མ་ཡིན། །བཙུན་པ་དགེ་སློང་གིས་དང་པོར་རྐུ་སེམས་ཀྱིས་ཆོས་གོས་ཀྱི་གདང་ཤིང་གི་ཐོག་མ་བཅད་དེ་ཕྱི་མ་ལ་བདག་གིར་འདུ་ཤེས་
ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་དང་པོར་ཆོས་གོས་ཀྱི་གདང་ཤིང་གཅོད་པའི་ཚེ་བདག་གིར་འདུ་ཤེས་ལ་ཕྱིས་རྐུ་བར་འདུ་ཤེས་ན་ཅིར་འགྱུར། རིན་ཐང་བརྩི་བར་བྱའོ། །བཙུན་པ་དགེ་སློང་གིས་ཆོས་གོས་ཀྱི་གདང་
ཤིང་བརྐུ་སེམས་ཀྱིས་བརྐུས་པ་ལས་ཆོས་གོས་ཀྱི་གདང་ཤིང་དེ་ལ་ཆོས་གོས་བཀལ་ཅིང་མཆིས་པ་དང་ཆོས་གོས་དང་བཅས་ཏེ་བརྐུས་ན་ཅིར་འགྱུར། ཆོས་གོས་ཀྱི་གདང་ཤིང་གི་རིན་ཐང་བརྩི་བར་བྱའོ། །བཙུན་པ་ཆོས་གོས་ཀྱི་གདང་ཤིང་ལ་ཆོས་གོས་
བཀལ་ཏེ་བཞག་པ་དེ་དགེ་སློང་བཞིའམ་དེ་བས་མང་བས་བརྐུས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །འོན་ཏེ་སོ་སོར་བགོས་པ་ལས་རེ་རེ་ལ་ཡང་མ་ཤ་ལྔ་ཐོབ་ན་མཐར་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་
པ་རྐུ་བ་ལ་རྣམ་པ་དུ། ཨུ་པཱ་ལི་དྲུག་སྟེ། སྒྱུས་རྐུ་བ་དང་། མཐུས་རྐུ་བ་དང་། བསྐྱིས་པ་ལས་བརྣོགས་ཏེ་རྐུ་བ་དང་། བཏམས་པ་ལས་བརྣོགས་ཏེ་རྐུ་བ་དང་། སྐྱོང་ཞིང་རྐུ་བ་དང་། ཆོས་རྐུ་བའོ། །བཙུན་པ་བཅོམ་ལྡན་འདས་ཀྱིས་བརྐུ་བ་རྣམ་པ་དྲུག་གསུངས་
ན། བརྐུ་བ་གང་གིས་མཐར་འགྱུར། ཆོས་རྐུ་བ་མ་གཏོགས་པའི་ལྷག་མ་རྣམས་ཀྱིས་མཐར་འགྱུར་རོ། །བཙུན་པ་བཅོམ་ལྡན་འདས་ཀྱིས་མ་ཤ་ལྔ་བརྐུས་ན་མཐར་འགྱུར་རོ་ཞེས་གསུངས་ན། བཙུན་པ་དགེ་སློང་གིས་མ་ཤ་གསུམ་བརྐུས་པས་མཐར་འགྱུར་བ་
མཆིས་སམ། ཨུ་པཱ་ལི་ཡོད་དེ། མ་ཤ་གསུམ་གྱིས་བཞི་ཆ་གཅིག་ཏུ་གྱུར་པའོ། །བཙུན་པ་དགེ་སློང་གིས་མ་ཤ་ལྔ་བརྐུས་ཀྱང་མཐར་མི་འགྱུར་བ་མཆིས་སམ། ཡོད་དེ། མ་ཤ་ལྔ་ལས་ལྷག་པས་བཞི་ཆ་གཅིག་ཏུ་གྱུར་པའོ། །བཙུན་པ་བཅོམ་ལྡན་འདས་ཀྱིས་
เล่ม ๑๒ · หน้า 96a
མ་ཤ་ལྔ་བརྐུས་ཀྱང་མཐར་མི་འགྱུར་རོ་ཞེས་གསུངས་ན། ན་ན་ཀ་ཇི་ལྟ་བུའི་མ་ཤ་ལྔ་བརྐུས་ན་མཐར་འགྱུར། ན་ན་ཀ་མ་ཤ་ཉི་ཤུ་པའོ། །མ་ཤ་ཀ་ཇི་ལྟ་བུ། ཀ་ཀ་ནི་བཞི་པའོ། །ཀཱཪྵཱ་པ་ཎ་ཇི་ལྟ་བུ། རྒྱན་ཐམས་ཅད་ཀྱིས་བྱས་པའོ། །བཙུན་
པ་བཅོམ་ལྡན་འདས་ཀྱིས་མ་ཤ་ལྔ་བརྐུས་ཀྱང་མཐར་མི་འགྱུར་རོ་ཞེས་གསུངས་ན། བཙུན་པ་དགེ་སློང་གིས་ཀཱཪྵཱ་པ་ཎ་སྟོང་བརྐུས་ཀྱང་མཐར་མི་འགྱུར་བ་མཆིས་སམ། ཡོད་དེ། བོར་བར་འདུ་ཤེས་ནས་བླངས་པའོ། །བཙུན་པ་བཅོམ་ལྡན་འདས་ཀྱིས་མ་ཤ་ལྔ་
བརྐུས་པས་མཐར་འགྱུར་རོ་ཞེས་གསུངས་ན། བཙུན་པ་དགེ་སློང་གིས་མ་ཤ་ལྔ་བརྐུས་ཀྱང་མཐར་མི་འགྱུར་བ་མཆིས་སམ། ཡོད་དེ། འདི་ལྟར་རེ་རེའམ། གཉིས་གཉིས་སམ། གསུམ་གསུམ་མམ། བཞི་བཞི་བརྐུས་ཀྱི་ནམ་ཡང་ལྔར་མ་ཚང་ནའོ། །
བཙུན་པ་དགེ་སློང་གིས་ཡོ་བྱད་ཆེན་པོ་བདག་གིར་འདུ་ཤེས་པས་བླངས་ལ་བརྐུ་སེམས་ཀྱིས་སྦས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དེ་སྟེ་བརྐུ་སེམས་ཀྱིས་བླངས་ལ་བདག་གིར་འདུ་ཤེས་པས་སྦས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །
བཙུན་པ་དགེ་སློང་གིས་ཅི་འདི་དེའི་འམ་ཞེས་ཐེ་ཚོམ་དང་ཡིད་གཉིས་ཀྱིས་དེ་བརྐུས་སམ་དེ་འདི་ཡིན་ནམ་དེ་འདིའི་མ་ཡིན་ཞེས་དེ་ཡང་བརྐུས་ན་ཅིར་འགྱུར། དངོས་པོ་ཇི་ལྟ་བ་བཞིན་ནོ། །བཙུན་པ་དགེ་སློང་གིས་ནུབ་ཀྱི་བ་གླང་སྤྱོད་ཀྱི་གླིང་དུ་མ་སྩལ་བར་བརྐུས་ན་ཅིར་འགྱུར།
དེ་སྟེ་དེ་དག་གི་གྲངས་ལྟར་མ་ཤ་ཀ་ལྔ་བརྐུས་ན་མཐར་འགྱུར་རོ། །བཙུན་པ་ཤར་གྱི་ལུས་འཕགས་གླིང་དུ་མ་སྩལ་བར་བརྐུས་ན་ཅིར་འགྱུར། དེ་སྟེ་དེ་དག་གི་གྲངས་ལྟར་མ་ཤ་ཀ་ལྔ་བརྐུས་ན་མཐར་འགྱུར་རོ། །བཙུན་པ་བྱང་གི་སྒྲ་མི་སྙན་གྱི་གླིང་དུ་མ་སྩལ་བར་བརྐུས་ན་ཅིར་འགྱུར།
ཨུ་པཱ་ལི་དེ་ན་མ་བྱིན་པར་ལེན་པ་མེད་དེ། དེ་སྟེ་རྐུ་སེམས་བསྐྱེད་ན་ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་གཞན་གྱི་སླད་དུ་མ་སྩལ་བར་བརྐུས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དེ་སྟེ་དེའི་ཡིན་ནོ་སྙམ་དུ་སེམས་ན་ཉེས་པ་མེད་དོ། །བཙུན་པ་དགེ་སློང་
เล่ม ๑๒ · หน้า 96b
གིས་མི་མ་ལགས་པ་ལ་མི་མ་ལགས་པར་འདུ་ཤེས་ནས་མ་སྩལ་བར་བརྐུས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ཡིན་པ་ལ་མིར་འདུ་ཤེས་ན་ཉེས་པ་སྦོམ་པོར་འགྱུར་རོ། །མི་ལ་མི་མ་ཡིན་པར་འདུ་ཤེས་ན་ཉེས་པ་སྦོམ་པོར་འགྱུར་རོ། །མི་ལ་མིར་
འདུ་ཤེས་ན་མཐར་འགྱུར་རོ།། །།མདོར་ན། མཆོད་རྟེན་རིང་བསྲེལ་གླེགས་བམ་དང་། །དགེ་འདུན་བསྔོས་དང་གཅིག་དང་གཅིག །འདུ་ཤེས་གཉིས་དང་དེ་ལྟར་གནས། །མ་རྙེད་ཁྱིམ་ནི་ཐ་མའོ། །བཙུན་པ་དགེ་སློང་གིས་མཆོད་རྟེན་དང་མཆོད་རྟེན་གྱི་ཉེན་
འཁོར་གྱི་རྒྱན་བརྐུས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློང་གིས་རིང་བསྲེལ་བརྐུས་ན་ཅིར་འགྱུར། མཐར་འགྱུར་རོ། །བཙུན་པ་དགེ་སློང་གིས་གླེགས་བམ་བརྐུས་ན་ཅིར་འགྱུར། གླེགས་བམ་གྱི་རིན་ཐང་བརྩི་བར་བྱའོ། །བཙུན་པ་དགེ་སློང་
གིས་ཕྱོགས་བཞིའི་དགེ་འདུན་གྱི་མ་སྩལ་བར་བརྐུས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་གང་ཟག་མང་པོ་རྣམས་ཀྱི་མ་སྩལ་བར་བརྐུས་ན་ཅིར་འགྱུར། ཉེས་པ་སྦོམ་པོར་འགྱུར་ཏེ། དེ་ལས་སོ་སོའི་སྐལ་བ་ལ་མ་ཤ་ཀ་ལྔ་བྱུང་བ་བརྐུས་
ན་མཐར་འགྱུར་རོ། །བཙུན་པ་དགེ་སློང་གིས་བསྔོས་པ་ལས་མ་སྩལ་བར་བརྐུས་ན་ཅིར་འགྱུར། མཐར་འགྱུར་རོ། །བཙུན་པ་དགེ་སློང་མང་པོས་གཅིག་ནས་གཅིག་ཏུ་བརྒྱུད་དེ་མ་སྩལ་བར་བརྐུས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །འོན་ཏེ་སོ་སོར་བསྒོ་ནས་
ཇི་སྙེད་ཀྱིས་བདག་གིར་བྱས་པ་དེ་སྙེད་ལ་རིན་ཐང་བརྩི་བར་བྱའོ། །བཙུན་པ་དགེ་སློང་གིས་གཞན་གྱི་ལགས་པར་འདུ་ཤེས་ཏེ་མ་སྩལ་བར་བརྐུས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་ཡོངས་སུ་བཟུང་བ་ལ་ཡོངས་སུ་བཟུང་བར་འདུ་ཤེས་ཏེ་མ་སྩལ་
བར་བརྐུས་ན་ཅིར་འགྱུར། མཐར་འགྱུར་རོ། །ཡོངས་སུ་མ་བཟུང་བ་ལ་ཡོངས་སུ་བཟུང་བར་འདུ་ཤེས་ཏེ་མ་སྩལ་བར་བརྐུས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །ཡོངས་སུ་བཟུང་བ་ལ་ཡོངས་སུ་མ་བཟུང་བར་འདུ་ཤེས་ཏེ་མ་སྩལ་བར་བླངས་ན་ཅིར་འགྱུར། ཉེས་པ་སྦོམ་
เล่ม ๑๒ · หน้า 97a
པོར་འགྱུར་རོ། །ཡོངས་སུ་མ་བཟུང་བ་ལ་ཡོངས་སུ་མ་བཟུང་བར་འདུ་ཤེས་ན་ཉེས་པ་མེད་དོ། །བཙུན་པ་བཅོམ་ལྡན་འདས་ཀྱིས་ཡོ་བྱད་ཆེན་པོ་མ་བྱིན་པར་བརྐུས་ན་མཐར་འགྱུར་རོ་ཞེས་གསུངས་ན། བཙུན་པ་དགེ་སློང་གིས་ཡོ་བྱད་ཆེན་པོ་མ་སྩལ་བར་བརྐུས་
ན་མཐར་མི་འགྱུར་བ་མཆིས་སམ། ཡོད་དེ། གནས་གང་དུ་བཞག་པར་གྱུར་པའི་གནས་དེ་ཉིད་ནས་བརྐུས་པའོ། །བཙུན་པ་དགེ་སློང་གིས་རྙེད་པ་མི་དབང་བར་དེ་བདག་ཉིད་དབང་ངོ་ཞེས་དེ་སྐད་མཆི་ན་ཅིར་འགྱུར། དེ་ཤེས་བཞིན་དུ་བརྫུན་སྨྲས་པས་ལྟུང་བའོ། །དེ་སྟེ་སེམས་
ཉེ་བར་བཞག་པ་ཡིན་ན་ནི་ཉེས་པ་སྦོམ་པོར་འགྱུར་རོ། །མངོན་དུ་གྲུབ་ན་རིན་ཐང་བརྩི་བར་བྱའོ། །བཙུན་པ་དགེ་སློང་གཅིག་པུ་ཁྱིམ་དུ་ཞུགས་པ་ལས་མ་སྩལ་བར་བླངས་པའི་སླད་དུ་མཐར་འགྱུར་བ་མཆིས་སམ། ཨུ་པཱ་ལི་ཡོད་དེ་ཇི་ལྟར་དགེ་སློང་གིས་མ་བྱིན་པར་བླངས་པའི་རྐྱེན་
གྱིས་བརྐུ་བའི་ཕྱིར་བཤམས་ནས་ནང་དུ་ཞུགས་སམ་ནང་དུ་ཞུགས་ཏེ་བཤམས་ན་མཐར་འགྱུར་རོ། །དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་མཐར་འགྱུར་རོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ནི་ཉེས་བྱས་སོ།། །།མདོར་ན།
བྱོལ་སོང་གསུམ་དང་ལས་སྲིད་དང་། །སྲིད་པ་མ་དང་བཞི་པ་དང་། །མངལ་གཉིས་དང་ནི་གསོ་བ་དང་། །འདུ་ཤེས་དང་ནི་བཞི་པའོ། །བཙུན་པ་དགེ་སློང་གིས་སྔགས་སམ་སྨན་གྱིས་མི་བྱོལ་སོང་གི་སྐྱེ་གནས་སུ་བསྒྱུར་ཏེ་འཚོ་བ་དང་ཕྲལ་ན་ཅིར་འགྱུར། མཐར་འགྱུར་
རོ། །བཙུན་པ་དགེ་སློང་གིས་སྔགས་སམ་སྨན་གྱིས་བདག་ཉིད་བྱོལ་སོང་གི་སྐྱེ་གནས་སུ་བསྒྱུར་ཏེ་མིའི་འཚོ་བ་དང་ཕྲལ་ན་ཅིར་འགྱུར། དེ་སྟེ་དགེ་སློང་དུ་འདུ་ཤེས་ཡོད་ན་མི་ཆགས་པར་བྱ་བ་ལ་དེས་བྱེད་པས་ན་མཐར་འགྱུར་རོ། །དགེ་སློང་དུ་འདུ་ཤེས་མེད་ན་ཉེས་པ་སྦོམ་
པོར་འགྱུར་རོ། །བཙུན་པ་དགེ་སློང་གིས་ཕ་དང་མ་འཚོ་བ་དང་ཕྲལ་ན་མཐར་ཡང་མི་འགྱུར་ལ་མཚམས་མེད་པའི་ཁ་ན་མ་ཐོ་བར་ཡང་མི་འགྱུར་བ་མཆིས་སམ། ཡོད་དེ། གང་གི་ཕ་མ་བྱོལ་སོང་གི་སྐྱེ་གནས་སུ་གྱུར་པའོ། །བཙུན་པ་དགེ་སློང་གིས་ཕ་བཀུམ་ཡང་མཐར་ཡང་
เล่ม ๑๒ · หน้า 97b
མི་འགྱུར་ལ་མཚམས་མེད་པའི་ཁ་ན་མ་ཐོ་བར་ཡང་མི་འགྱུར་བ་མཆིས་སམ། ཨུ་པཱ་ལི་ལས་ཀྱི་སྲིད་པ་ནི་མངོན་པར་སྐྱེད་པའི་ཕྱིར་ཕ་ཞེས་བྱ་བས་ན་དེ་སྟེ་ཟག་པ་དང་བཅས་པའི་ལས་ཀྱི་སྲིད་པ་བསད་པར་གྱུར་པའོ། །དགེ་སློང་གིས་མ་བཀུམ་ན་མཐར་ཡང་མི་འགྱུར་ལ་མཚམས་
མེད་པའི་ཁ་ན་མ་ཐོ་བར་ཡང་མི་འགྱུར་བ་མཆིས་སམ། ཨུ་པཱ་ལི་སྲེད་པ་ནི་སྐྱེད་པའི་ཕྱིར་མ་ཞེས་བྱ་བས་ན་སྲེད་པ་བསད་པར་གྱུར་པའོ། །བཙུན་པ་དགེ་སློང་གིས་མ་བཀུམ་པར་འཚལ་བ་ལས་བུད་མེད་གཞན་བཀུམ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་
པ་དགེ་སློང་གིས་བུད་མེད་གཞན་དགུམ་པར་འཚལ་བ་ལས་མ་བཀུམ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་མ་བཀུམ་པར་བཤམས་པ་ལས་བུད་མེད་གཞན་འཚོ་བ་དང་ཕྲལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་
གིས་བུད་མེད་གཞན་དགུམ་པར་བཤམས་པ་ལས་མའི་འཚོ་བ་དང་ཕྲལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་མིའི་བུད་མེད་ཀྱི་མངལ་དུ་བྱོལ་སོང་གི་སྐྱེ་གནས་བཀུམ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་
བྱོལ་སོང་མོའི་མངལ་དུ་མི་བཀུམ་ན་ཅིར་འགྱུར། དེ་སྟེ་མངལ་ན་མིར་འདུ་ཤེས་ན་ནི་མཐར་འགྱུར་རོ། །དེ་ལྟ་མ་ཡིན་ན་ལྟུང་བའོ། །བཙུན་པ་མ་ནི་སྐྱེད་པ་ལགས་ལ། གཞན་ནི་གསོ་བ་ལགས་ན། དེ་གཉིས་གང་འཚོ་བ་དང་ཕྲལ་ན་མཐར་ཡང་འགྱུར་ལ་མཚམས་
མེད་པའི་ཁ་ན་མ་ཐོ་བར་ཡང་འགྱུར། གང་གིས་བསྐྱེད་པའོ། །བཙུན་པ་དགེ་སློང་གིས་མི་ལ་མིར་འདུ་ཤེས་ཏེ་བཀུམ་ན་ཅིར་འགྱུར། མཐར་འགྱུར་རོ། །མི་ལ་མི་མ་ལགས་པར་འདུ་ཤེས་ཏེ་བཀུམ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་
ལ་མིར་འདུ་ཤེས་ཏེ་བཀུམ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མི་མ་ལགས་པར་འདུ་ཤེས་ཏེ་བཀུམ་ན་ཅིར་འགྱུར། ཉེས་པ་སྦོམ་པོར་འགྱུར་རོ།། །།མདོར་ན། ཐེ་ཚོམ་རྣམ་པ་གཉིས་པ་དང་། །བདག་དང་དགྲ་བཅོམ་གཉིས་དེ་བཞིན། །
เล่ม ๑๒ · หน้า 98a
རྐུན་པོ་གཉིས་དང་གཞན་འདུ་ཤེས། །བདུན་པ་དང་ཡང་ཐ་མའོ། །བཙུན་པ་དགེ་སློང་གིས་དེ་འདི་ཡིན་ནམ་དེ་འདི་མ་ཡིན་ཞེས་ཡིད་གཉིས་དང་ཐེ་ཚོམ་འཚལ་བཞིན་དུ་དེ་ཡང་འཚོ་བ་དང་ཕྲལ་ན་ཅིར་འགྱུར། མཐར་འགྱུར་རོ། །བཙུན་པ་དགེ་སློང་
གིས་བདག་ཉིད་འཚོ་བ་དང་ཕྲལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་ཕ་དང་མ་དགུམ་པར་བཤམས་ནས་བདག་ཉིད་བཀུམ་ན་ཅིར་འགྱུར། དེ་སྟེ་ཕ་མ་སྔར་དུ་དུས་བྱས་ན་མཐར་ཡང་འགྱུར་ལ་མཚམས་མེད་པའི་ཁ་ན་མ་ཐོ་བར་ཡང་འགྱུར་རོ། །
འོན་ཏེ་བདག་ཉིད་སྔར་དུས་བྱས་ན་ཉེས་པ་སྦོམ་པོར་འགྱུར་ཏེ། མཚམས་མེད་པའི་ཁ་ན་མ་ཐོ་བར་ཡང་མི་འགྱུར་རོ། །བཙུན་པ་དགེ་སློང་གིས་དགྲ་བཅོམ་པ་དགུམ་པར་འཚལ་བ་ལས་སོ་སོའི་སྐྱེ་བོ་ཞིག་བཀུམ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་
པ་དགེ་སློང་གིས་སོ་སོའི་སྐྱེ་བོ་ཞིག་དགུམ་པར་འཚལ་བ་ལས་དགྲ་བཅོམ་པ་ཞིག་བཀུམ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་དགྲ་བཅོམ་པ་དགུམ་པར་བཤམས་ནས་སོ་སོའི་སྐྱེ་བོ་ཞིག་བཀུམ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །
བཙུན་པ་དགེ་སློང་གིས་སོ་སོའི་སྐྱེ་བོ་ཞིག་དགུམ་པར་བཤམས་པ་ལས་དགྲ་བཅོམ་པ་འཚོ་བ་དང་ཕྲལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་རྐུན་པོ་ཞིག་དགུམ་པར་བཀྲི་བ་ལས་བྲོས་ཏེ་དེ་ལ་གྲོང་གི་སྙེགས་མའམ་རྒྱལ་པོའི་སྙེགས་མ་ཡང་རུང་ཕྱི་
བཞིན་དུ་བསྙེགས་པ་དང་། དགེ་སློང་ཞིག་ཤུལ་གྱི་མདུན་ནས་མཆི་བ་དེ་ལ་དེ་དག་གིས་ཁྱོད་ཀྱིས་རྐུན་པོ་ཞིག་བྲོས་པ་མཐོང་ངམ་ཞེས་དྲིས་པ་དང་། དགེ་སློང་དེས་རྐུན་པོ་དེ་ལ་གསོད་སེམས་ཉེ་བར་གནས་པར་གྱུར་ནས་དེས་དེ་དག་ལ་བསྟན་ན་ཅིར་འགྱུར། མཐར་འགྱུར་རོ། །
བཙུན་པ་རྐུན་པོ་ཞིག་དགུམ་པར་བཀྲི་བ་ལས་བྲོས་ཏེ་དེ་ལས་གྲོང་གི་སྙེགས་མ་འམ་རྒྱལ་པོའི་སྙེགས་མ་ཡང་རུང་ཕྱི་བཞིན་དུ་བསྙེགས་པ་དང་། དགེ་སློང་ཞིག་ཀྱང་ཤུལ་གྱི་མདུན་ནས་མཆིས་པ་དེ་ལ་དེ་དག་གིས་ཁྱོད་ཀྱིས་རྐུན་པོ་ཞིག་བྲོས་པ་མཐོང་ངམ་ཞེས་དྲིས་པ་དང་། དགེ་
เล่ม ๑๒ · หน้า 98b
སློང་དེས་རྐུན་པོ་དེ་ལ་ཡང་གསོད་སེམས་ཉེ་བར་གནས་པར་གྱུར་ཏེ། དེས་དེ་དག་མ་བསྟན་ནས་དེ་དག་གིས་འཚོ་བ་དང་ཕྲལ་ན་ཅིར་འགྱུར། ཉེས་བྱས་སོ། །བཙུན་པ་གཉིས་ལྷན་ཅིག་མཆིས་པ་ལ་གཞན་དགུམ་མོ་སྙམ་པ་ལས་གཞན་བཀུམ་ན་ཅིར་འགྱུར། ཉེས་པ་སྦོམ་
པོར་འགྱུར་རོ། །བསྙེན་པར་མ་རྫོགས་པར་དགུམ་པར་བཤམས་ཏེ་བསྙེན་པར་མ་རྫོགས་པར་བཀུམ་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་དགུམ་པར་བཤམས་པ་ལས་བསྙེན་པར་རྫོགས་ཀར་བཀུམ་ན་ཅིར་འགྱུར། ཉེས་བྱས་སོ། །བསྙེན་པར་
མ་རྫོགས་པར་དགུམ་པར་བཤམས་པ་ལས་བསྙེན་པར་རྫོགས་ཏེ་བཀུམ་ན་ཅིར་འགྱུར། མཐར་འགྱུར་རོ། །བསྙེན་པར་རྫོགས་ཀར་དགུམ་པར་བཤམས་ཏེ་བསྙེན་པར་རྫོགས་ཀར་བཀུམ་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་དགུམ་པར་བཤམས་
ཏེ་བསྙེན་པར་རྫོགས་ནས་བཀུམ་ན་ཅིར་འགྱུར། མཐར་འགྱུར་རོ། །བསྙེན་པར་རྫོགས་ནས་དགུམ་པར་བཤམས་པ་ལས་བསྙེན་པར་རྫོགས་ནས་བཀུམ་ན་ཅིར་འགྱུར། མཐར་འགྱུར་རོ། །བསྙེན་པར་རྫོགས་ནས་དགུམ་པར་བཤམས་པ་ལས་བསྙེན་པར་མ་
རྫོགས་པར་བཀུམ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གཅིག་པུ་འཚོ་བ་དང་དབྲལ་བའི་སླད་དུ་ཁྱིམ་དུ་ཞུགས་ན་མཐར་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་དགེ་སློང་དེས་བསད་པར་བཤམས་ནས་ནང་དུ་ཞུགས་པའོ། །
ཇི་ལྟར་དགེ་སློང་གིས་འཚོ་བ་དང་ཕྲལ་བའི་རྐྱེན་གྱིས་མཐར་གྱུར་པ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་མཐར་འགྱུར་རོ། །དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་རྣམས་ལ་ཉེས་བྱས་སོ།། །།མདོར་ན། དག་དང་སྟོན་པ་རྣམ་
པར་གཟིགས། །མི་སློབ་སློབ་དཔོན་ཉོན་མོངས་དང་། །ཉམས་དང་གྲོལ་དང་འཇིགས་པ་དང་། །སྐྱེ་དང་རྙེད་དང་འདི་འདྲའོ། །བཙུན་པ་དགེ་སློང་གིས་འདི་སྐད་དུ་བདག་ནི་དག་པའོ་ཞེས་མཆི་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་འདི་
เล่ม ๑๒ · หน้า 99a
སྐད་དུ་བདག་ནི་སྟོན་པའོ་ཞེས་མཆི་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་འདི་སྐད་དུ་བདག་ནི་རྣམ་པར་གཟིགས་དང་། སྤྱི་ཐོར་དང་། བསོད་སྐྱབས་དང་། ལོག་པར་དད་སེལ་དང་། གསེར་ཐུབ་དང་། འོད་སྲུང་
རྣམས་ཀྱི་ཉན་ཐོས་པའོ་ཞེས་མཆི་ན་ཅིར་འགྱུར། དེ་སྟེ་སྔོན་གྱི་གནས་སུ་ལུང་སྟོན་ན་ནི་མཐར་འགྱུར་རོ། །འོན་ཏེ་དེས་འདི་སྐད་དུ་གང་གི་ཚེ་ཤཱཀྱ་ཐུབ་པ་ལ་སྐྱབས་སུ་སོང་བ་ནས་བཟུང་སྟེ་ཡང་དག་པར་རྫོགས་པའི་སངས་རྒྱས་ཐམས་ཅད་ལ་སྐྱབས་སུ་སོང་ངོ་ཞེས་སྨྲས་ན་ཉེས་
པ་སྦོམ་པོར་འགྱུར་རོ། །བཙུན་པ་དགེ་སློང་གིས་འདི་སྐད་དུ་བདག་ནི་མི་སློབ་པའོ་ཞེས་མཆི་ན་ཅིར་འགྱུར། དེ་སྟེ་ཉོན་མོངས་པ་སྤངས་པར་ལུང་སྟོན་ན་མཐར་འགྱུར་རོ། །འོན་ཏེ་དེ་འདི་སྐད་དུ་བདག་བཟོ་གང་ཡང་མི་སློབ་བོ་ཞེས་སྨྲས་ན་ཉེས་པ་སྦོམ་པོར་འགྱུར་རོ། །བཙུན་པ་
དགེ་སློང་གིས་འདི་སྐད་དུ་བདག་ནི་སློབ་པའོ་ཞེས་མཆི་ན་ཅིར་འགྱུར། དེ་སྟེ་སློབ་པའི་སྤྱོད་པར་ལུང་སྟོན་ན་མཐར་འགྱུར་རོ། །འོན་ཏེ་དེ་འདི་སྐད་དུ་ཚངས་པར་སྤྱོད་པ་ལ་སློབ་བོ་ཞེས་སྨྲས་ན་ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་འདི་སྐད་དུ་བདག་ལ་ཉོན་
མོངས་པ་མེད་དོ་ཞེས་མཆི་ན་ཅིར་འགྱུར། དེ་སྟེ་ཉོན་མོངས་པ་སྤངས་པར་ལུང་སྟོན་ན་མཐར་འགྱུར་རོ། འོན་ཏེ་འདི་སྐད་དུ་བདག་ལ་ལྷུང་བཟེད་དམ་ཆོས་གོས་སམ་དགེ་སློང་གི་འཚོ་བའི་ཡོ་བྱད་གང་ཡང་རུང་བ་རྣམས་མེད་དོ་ཞེས་སྨྲས་ན་ཉེས་པ་སྦོམ་པོར་འགྱུར་རོ། །བཙུན་
པ་དགེ་སློང་གིས་འདི་སྐད་དུ་བདག་ནི་ཉམས་པའོ་ཞེས་མཆི་ན་ཅིར་འགྱུར། དེ་སྟེ་འདི་སྐད་དུ་དགེ་སྦྱོང་གི་འབྲས་བུ་ལས་ཉམས་པའོ་ཞེས་སྨྲས་ན་མཐར་འགྱུར་རོ། །བཙུན་པ་དགེ་སློང་གིས་འདི་སྐད་དུ་བདག་ནི་གྲོལ་བའོ་ཞེས་མཆི་ན་ཅིར་འགྱུར། དེ་སྟེ་འདི་སྐད་
དུ་བདག་ནི་སྦྱོར་བ་དང་། བཅིངས་པ་དང་། བག་ལ་ཉལ་བ་དང་། ཉེ་བའི་ཉོན་མོངས་པ་དང་། ཀུན་ནས་དཀྲིས་ཏེ་འདས་པ་ལས་གྲོལ་ལོ་ཞེས་སྨྲས་ན་མཐར་འགྱུར་རོ། །བཙུན་པ་དགེ་སློང་གིས་འདི་སྐད་དུ་བདག་ལ་འཇིགས་པ་མེད་དོ་ཞེས་མཆི་ན་ཅིར་འགྱུར།
เล่ม ๑๒ · หน้า 99b
དེ་སྟེ་འཇིགས་པ་སྤངས་པར་ལུང་སྟོན་ན་མཐར་འགྱུར་རོ། །དེ་སྟེ་འཇིགས་པས་ཅུང་ཟད་ཀྱང་མི་འཇིགས་སོ་ཞེས་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་འདི་སྐད་དུ་འདི་ནི་བདག་གི་སྐྱེ་བ་ཐ་མའོ་ཞེས་མཆི་ན་ཅིར་འགྱུར། དེ་སྟེ་སྐྱེ་བ་
ཟད་པར་ལུང་སྟོན་ན་མཐར་འགྱུར་རོ། །འོན་ཏེ་དེ་འདི་སྐད་དུ་སྐྱེ་བ་ཟད་འགགས་བྲལ་རྣམ་པར་བྲལ་བ་སྟེ་དེ་ལྟར་འདི་ནི་སྐྱེ་བའི་ཐ་མའོ་ཞེས་སྨྲས་ན་ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་འདི་སྐད་དུ་བདག་གིས་རབ་ཏུ་ཐོབ་བོ་ཞེས་མཆི་ན་ཅིར་འགྱུར།
དེ་སྟེ་དགེ་སློང་གི་འབྲས་བུ་ཐོབ་བོ་ཞེས་སྨྲས་ན་མཐར་འགྱུར་རོ། །འོན་ཏེ་འཇིག་རྟེན་གྱི་དངོས་པོར་ལུང་བསྟན་ན་ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་འདི་སྐད་དུ་ཨེ་མའོ་བདག་ཅི་འདྲ་བ་དེ་འདྲ་བར་ཁྱོད་གྱུར་པ་ངོ་མཚར་ཆེའོ་ཞེས་མཆི་ན་ཅིར་འགྱུར། ཉེས་
པ་སྦོམ་པོར་འགྱུར་རོ།། །།མདོར་ན། མ་སྨིན་བཟོད་དང་རང་འདྲི་དང་། །སྤངས་དང་འབྲས་བུ་གཉིས་པ་དང་། །འདུ་ཤེས་བཞི་དང་ཐོབ་བྱ་དང་། །འཇིག་རྟེན་གྱི་ནི་ཐ་མའོ། །བཙུན་པ་དགེ་སློང་ཞིག་ལ་ཚེ་དང་ལྡན་པ་ཁྱོད་ཟག་པ་ཟད་པའི་འབྲས་
བུ་ཡོད་དམ་ཞེས་དྲིས་པ་དང་། དེས་ཀྱང་ཞིབ་ཏུ་ཤིང་ཐོག་མ་སྨིན་པ་ཞིག་བཅངས་པར་གྱུར་ནས་དེ་འདི་སྐད་དུ་མ་སྨིན་ཏོ་ཞེས་མཆི་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་འདི་སྐད་དུ་རྒྱུན་དུ་ཞུགས་པའི་འབྲས་བུ་དང་། ལན་ཅིག་
ཕྱིར་འོང་བ་དང་། ཕྱིར་མི་འོང་བ་དང་། མཆོག་གི་འབྲས་བུ་བདག་གིས་ཐོབ་བོ་ཞེས་མཆི་ན་ཅིར་འགྱུར། མཐར་འགྱུར་རོ། །བཙུན་པ་དགེ་སློང་གིས་བདག་ཉིད་ཀྱིས་བྲིས་ལ་འདི་སྐད་དུ་བདག་དགྲ་བཅོམ་པའོ་ཞེས་འདི་སུས་བྲིས་ཞེས་མཆི་ན་ཅིར་འགྱུར།
ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་ལ་ཁྱིམ་བདག་ཅིག་གིས་ཁྱོད་ཀྱིས་འབྲས་བུ་ཐོབ་བོ་ཞེས་དྲིས་པ་དང་། དེས་ཀྱང་མེ་ཏོག་དང་འབྲས་བུ་སྨིན་པ་རྣམས་བཅངས་ནས་དེ་འདི་སྐད་དུ་མ་སྨིན་ནོ་ཞེས་མཆི་ན་ཅིར་འགྱུར། ཉེས་པ་སྦོམ་པོར་འགྱུར་རོ། །
เล่ม ๑๒ · หน้า 100a
བཙུན་པ་དགེ་སློང་གིས་འདི་སྐད་དུ་བདག་ནི་ཉམས་སོ་ཞེས་མཆི་ན་ཅིར་འགྱུར། དེ་སྟེ་ཐོབ་པ་ལས་ཉམས་པར་ལུང་སྟོན་ན་མཐར་འགྱུར་ཏེ། བཙུན་པ་དགེ་སློང་གིས་བདག་ནི་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་
པ་རྣམས་མ་ཡིན་ནོ་ཞེས་མཆི་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་འགྲོ་བ་ཞེས་བྱ་བའི་རི་ལ་རྒྱུན་དུ་ཞུགས་པའི་འབྲས་བུ་ཐོབ་བོ། རི་དགུ་པོ་ཞེས་བྱ་བའི་ངོས་ལ་ལན་ཅིག་ཕྱིར་འོང་བའི་འབྲས་བུ། བྱ་རྒོད་སྤུངས་པ་ཞེས་བྱ་བ་ལ་ཕྱིར་མི་འོང་བའི་འབྲས་བུ། འོད་
མའི་ཚལ་དུ་མཆོག་གི་འབྲས་བུ་ཐོབ་བོ་ཞེས་མཆི་ན་ཅིར་འགྱུར། མཐར་འགྱུར་རོ། །བཙུན་པ་དགེ་སློང་གིས་མི་ལ་མི་མ་ལགས་པར་འདུ་ཤེས་ཏེ་མི་ལས་བླ་མར་གྱུར་པའི་ཆོས་ཤིག་ལུང་སྟོན་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ཡིན་པ་ལ་མིར་འདུ་ཤེས་ན་ཉེས་པ་
སྦོམ་པོར་འགྱུར་རོ། །མི་མ་ཡིན་པ་ལ་མི་མ་ཡིན་པར་འདུ་ཤེས་ན་ཉེས་པ་སྦོམ་པོར་འགྱུར་རོ། །མི་ལ་མིར་འདུ་ཤེས་ན་མཐར་འགྱུར་རོ། །བཙུན་པ་དགེ་སློང་གིས་འདི་སྐད་དུ་ཉན་ཐོས་ཀྱིས་ཐོབ་པར་བྱ་བ་གང་ཡིན་པ་དེ་བདག་གིས་ཐོབ་བོ་ཞེས་མཆི་ན་ཅིར་འགྱུར། ཉེས་པ་སྦོམ་པོར་
འགྱུར་རོ། །བཙུན་པ་དགེ་སློང་གིས་འདི་སྐད་དུ་དེང་བདག་གིས་འཇིག་རྟེན་པའི་བསམ་གཏན་ལ་སྙོམས་པར་མ་ཞུགས་ཏེ། སྲོད་ལ་ནི་མ་ཡིན། དེ་ཕན་ཅད་མ་ཡིན་ནོ་ཞེས་མཆི་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་འདི་སྐད་དུ་ལུང་བསྟན་གྱིས་ཚུར་
ཤོག་ཅེས་མཆི་ན་ཅིར་འགྱུར། ཉེས་པ་སྦོམ་པོར་འགྱུར་རོ།། །།མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པ་གང་དང་སེམས་འཁྲུགས་པ། །ན་བ་འོན་པ་གླེན་པའོ། །བཙུན་པ་དགེ་སློང་གིས་ཕོ་ཉ་ལས་མི་ལས་བླ་མར་
གྱུར་པའི་ཆོས་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ལ་བསྒོ་བ་དང་། གཅིག་དང་གཅིག་ཏུ་བརྒྱུད་ན་ཐམས་ཅད་ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་སྨྱོན་པ་ཞིག་ལ་མི་ལས་བླ་མར་གྱུར་པའི་
เล่ม ๑๒ · หน้า 100b
ཆོས་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། འོན་པ་དང་། གླེན་པ་ཐམས་ཅད་ལ་ཉེས་པ་སྦོམ་པོར་འགྱུར་རོ།། །།མདོར་ན། གཉིད་ལོག་ར་རོ་མྱོས་པ་དང་། །སྙོམས་ཞུགས་འགྲོ་བ་དེ་བཞིན་
ཏེ། །སྐད་དང་ལུས་དང་དབེན་པ་སྔགས། །གཞན་གྱིས་གཞན་ལ་ཐ་མའོ། །བཙུན་པ་དགེ་སློང་གིས་གཉིད་ཀྱིས་ལོག་པ་ཞིག་གི་དྲུང་དུ་མི་ལས་བླ་མར་གྱུར་པའི་ཆོས་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དེ་བཞིན་དུ་ར་རོ་བ་དང་། མྱོས་པ་དང་། འགྲོ་བ་གཞན་དུ་
གྱུར་པ་རྣམས་ཀྱི་དྲུང་དུ་སྨྲས་པ་ཐམས་ཅད་ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་འཕགས་པས་འཕགས་པའི་སྐད་དུ་དགེ་སློང་ཞིག་ལ་མི་ལས་བླ་མར་གྱུར་པའི་ཆོས་སྨྲས་ན་དགེ་སློང་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །
འཕགས་པ་ཞིག་གིས་མཐའ་འཁོབ་པའི་སྐད་དུ་སྨྲས་པ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མཐའ་འཁོབ་པ་ཞིག་གིས་མཐའ་འཁོབ་པའི་སྐད་དུ་སྨྲས་པ་དང་། དགེ་སློང་དེས་ཀྱང་མཐའ་འཁོབ་པའི་
སྐད་མ་འཚལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མཐའ་འཁོབ་པ་ཞིག་གིས་འཕགས་པའི་སྐད་དུ་མི་ལས་བླ་མར་གྱུར་པའི་ཆོས་སྨྲས་པ་དང་། དགེ་སློང་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་
སློང་གིས་ལུས་ཀྱི་དམིགས་པས་མི་ལས་བླ་མར་གྱུར་པའི་ཆོས་སྟོན་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་དབེན་པ་ལ་མི་དབེན་པར་འདུ་ཤེས་ཏེ་མི་ལས་བླ་མར་གྱུར་པའི་ཆོས་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་
གིས་སྔགས་སམ་སྨན་གྱིས་བདག་ཉིད་མི་སྣང་བར་བགྱིས་ཏེ་མི་ལས་བླ་མར་གྱུར་པའི་ཆོས་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་གཞན་ལས་མི་ལས་བླ་མར་གྱུར་པའི་ཆོས་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་
เล่ม ๑๒ · หน้า 101a
སློང་གིས་གཞན་ཞིག་གི་སླད་དུ་མི་ལས་བླ་མར་གྱུར་པའི་ཆོས་སྨྲས་ན་ཅིར་འགྱུར། ཉེས་བྱས་སོ། །ཇི་ལྟར་དགེ་སློང་གིས་སྨྲས་པའི་རྐྱེན་གྱིས་མཐར་གྱུར་པ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་རྣམས་ཀྱི་ཡང་མཐར་འགྱུར། དགེ་སློབ་མ་དང་།
དགེ་ཚུལ་མ་དང་། དགེ་ཚུལ་ཕ་རྣམས་ལ་ཉེས་བྱས་སོ། །ཨུ་པཱ་ལིས་ཞུས་པའི་ནང་ནས་ཕས་ཕམ་པ་དང་ལྡན་པ་རྫོགས་སོ།། །།མདོར་ན། མ་ལོག་སྦུ་བུ་དེ་བཞིན་གཡོས། །མི་རྩོལ་མེད་པ་རྣམས་དང་མཚན། །གཞན་དང་བདུན་ནི་དེ་བཞིན་ཏེ། །སྡེར་བཅས་བསྡུས་
པར་གྱུར་པའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་གཉིད་ཀྱིས་མ་ལོག་པར་བརྩལ་ནས་ལོག་སྟེ་ཁུ་བ་ཕྱུང་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་གཉིད་ཀྱིས་ལོག་པའི་ཚེ་བརྩལ་ན་མ་ལོག་པའི་ཚེ་ཁུ་བ་བྱུང་ན་ཅིར་
འགྱུར། དེ་སྟེ་བརྩལ་ན་ཉེས་པ་སྦོམ་པོར་འགྱུར་རོ། །མ་བརྩལ་ན་ཉེས་པ་མེད་དོ། །བཙུན་པས་ནི་སྦུ་བུར་འོངས་པའི་ཁུ་བ་ཕྱུང་ན་ཉེས་པ་སྦོམ་པོའོ་ཞེས་གསུངས་ན། ཇི་ཙམ་གྱིས་ན་སྦུ་བུར་མཆིས་པ་ལགས། གནས་ནས་འཕགས་མ་ཐག་ཏུ་སྦུ་བུར་བཀག་པའོ། །བཙུན་
པ་བཅོམ་ལྡན་འདས་ཀྱིས་གཡོས་པ་ལས་བཀག་པའོ་ཞེས་གསུངས་ན། ཇི་ཙམ་གྱིས་གཡོས་པ་ལས་བཀག་པ་ལགས། གནས་ནས་གཡོས་མ་ཐག་ཏུ་བཀག་པའོ། །བཙུན་པ་མ་བརྩལ་བར་ཁུ་བ་བྱུང་ན་ཅིར་འགྱུར། དེ་སྟེ་དགའ་བར་མ་ཚོར་ན་ཉེས་པ་མེད་དོ། །བཙུན་པ་
དགེ་སློང་གིས་ཁུ་བ་འབྱིན་པ་ལས་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། དགེ་འདུན་གྱི་ལྷག་མ་ལས་བྱུང་བའི་ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་མ་ཞིག་ཁུ་བ་འབྱིན་པ་ལས་མཚན་འཕོས་ཏེ་དགེ་སློང་དུ་གྱུར་ན་ཅིར་འགྱུར། ལྟུང་བ་ལས་བྱུང་བའི་ཉེས་བྱས་སོ། །
བཙུན་པ་དགེ་སློང་གིས་གཞན་གྱི་ཕོ་མཚན་ལས་ཁུ་བ་ཕྱུང་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་བསྙེན་པར་མ་རྫོགས་པར་བརྩལ་ནས་བསྙེན་པར་མ་རྫོགས་པར་ཕྱུང་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བརྩལ་ནས་བསྙེན་པར་རྫོགས་ཀར་
เล่ม ๑๒ · หน้า 101b
ཕྱུང་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བརྩལ་ནས་བསྙེན་པར་རྫོགས་ནས་ཕྱུང་ན་ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ཀར་བརྩལ་ནས་བསྙེན་པར་རྫོགས་ཀར་ཕྱུང་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་
བརྩལ་ནས་བསྙེན་པར་རྫོགས་པ་དང་ཕྱུང་ན་ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ཏེ་བརྩལ་ནས་བསྙེན་པར་རྫོགས་ནས་ཕྱུང་ན་ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ནས་བརྩམས་ཏེ་བསྙེན་པར་མ་རྫོགས་པར་ཕྱུང་ན་ཅིར་འགྱུར།
ཉེས་པ་སྦོམ་པོར་འགྱུར་རོ། །ཇི་ལྟར་དགེ་སློང་ཁུ་བ་འབྱུང་བའི་རྐྱེན་གྱིས་དགེ་འདུན་གྱི་ལྷག་མར་གྱུར་པ་དེ་བཞིན་དུ་བསླབ་པ་བྱིན་པ་ལ་ཡང་དགེ་འདུན་གྱི་ལྷག་མའོ། །དགེ་སློང་མ་ལ་ནི་ཇི་ལྟར་དངོས་པོ་བཞིན་ནོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་
རྣམས་ལ་ནི་ཉེས་བྱས་སོ།། །།མདོར་ན། ལུས་དང་ཐེ་ཚོམ་སོ་དང་ནི། །རྨ་སྤུ་སེན་མོ་དེ་བཞིན་ཏེ། །བཞི་པ་གཉིས་དང་བདུན་པ་རྣམས། །སྡེ་དག་ཏུ་ཡང་བསྡུས་པའོ། །བཙུན་པ་བུད་མེད་ཀྱི་དབང་པོ་ཉམས་པ་དེ་དང་ལྷན་ཅིག་ཏུ་དགེ་སློང་གིས་ལུས་ཀྱིས་ཀུན་ཏུ་
རེག་པར་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་ལུས་ཀྱི་དབང་པོ་ཉམས་པར་གྱུར་པ་ཞིག་གིས་བུད་མེད་དང་ལྷན་ཅིག་ཏུ་ལུས་ཀྱིས་ཀུན་ཏུ་རེག་པར་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་གཉིས་ཀའི་ལུས་ཀྱི་དབང་པོ་
ཉམས་པར་གྱུར་པ་དེ་གཉིས་གཅིག་ལ་གཅིག་ཀུན་ཏུ་རེག་པར་བགྱིས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་འདི་བུད་མེད་ལ་བུད་མེད་མ་ལགས་ཞེས་ཐེ་ཚོམ་དང་ཡིད་གཉིས་དང་དོགས་པ་སྐྱེས་བཞིན་དུ་དེ་དང་དེ་ལྷན་ཅིག་ཏུ་ལུས་ཀྱིས་ཀུན་ཏུ་རེག་པར་བགྱིས་ན་
ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་སོས་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་སོ་ལ་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་རྨས་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་སྤུས་རེག་ན་ཅིར་
เล่ม ๑๒ · หน้า 102a
འགྱུར། ཉེས་པ་སྦོམ་པོར་འགྱུར་རོ། །བཙུན་པ་སྤུ་ལ་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་སེན་མོ་ལ་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་སེན་མོས་རེག་ན་ཅིར་འགྱུར། ཉེས་པ་སྦོམ་པོར་འགྱུར་
རོ། །བཙུན་པ་དགེ་སློང་གིས་མིའི་བུད་མེད་ལ་མིར་འདུ་ཤེས་ཏེ་རེག་ན་ཅིར་འགྱུར། དགེ་འདུན་གྱི་ལྷག་མའོ། །མི་ལ་མི་མ་ཡིན་པར་འདུ་ཤེས་ཏེ་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མིར་འདུ་ཤེས་ཏེ་རེག་ན་ཅིར་འགྱུར། ཉེས་པ་སྦོམ་པོར་
འགྱུར་རོ། །མི་མ་ལགས་པ་ལ་མི་མ་ལགས་པར་འདུ་ཤེས་ཏེ་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་གཡོགས་པ་ལ་གཡོགས་པར་འདུ་ཤེས་ཏེ་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །གཡོགས་པ་ལ་མ་གཡོགས་པར་འདུ་
ཤེས་ཏེ་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མ་གཡོགས་པ་ལ་གཡོགས་པར་འདུ་ཤེས་ཏེ་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མ་གཡོགས་པ་ལ་མ་གཡོགས་པར་འདུ་ཤེས་ཏེ་རེག་ན་ཅིར་འགྱུར། དགེ་འདུན་གྱི་ལྷག་མའོ། །བཙུན་
པ་བསྙེན་པར་མ་རྫོགས་པར་ལུས་ཀྱིས་ཀུན་ཏུ་རེག་པར་བཤམས་ནས་བསྙེན་པར་མ་རྫོགས་པར་རེག་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཤམས་ལ་བསྙེན་པར་རྫོགས་ཀར་རེག་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་
བཤམས་ལ་བསྙེན་པར་རྫོགས་པ་དང་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ཀར་བཤམས་ལ་བསྙེན་པར་རྫོགས་ཀར་རེག་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བཤམས་ལ་བསྙེན་པར་རྫོགས་ནས་རེག་ན་ཅིར་འགྱུར།
ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ནས་བཤམས་ལ་བསྙེན་པར་རྫོགས་པ་ན་རེག་ན་ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ནས་བཤམས་ལ་བསྙེན་པར་མ་རྫོགས་པར་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ།། །།མདོར་
เล่ม ๑๒ · หน้า 102b
ན། གཞན་དུ་འདུ་ཤེས་རོ་རུས་པ། །མཚན་དང་སྐྱེས་པ་མཉེན་པ་དང་། །མ་ནིང་ཕ་དང་མ་ནིང་མ། །སྙོམས་ཞུགས་ཉལ་དང་འགྲོ་བའོ། །བཙུན་པ་དགེ་སློང་གིས་བུད་མེད་གཞན་ཞིག་ལ་ཆགས་པ་ལས་གཞན་དང་ལྷན་ཅིག་ཏུ་ལུས་ཀྱིས་ཀུན་ཏུ་རེག་པར་བགྱིད་ན་ཅིར་
འགྱུར། ཉེས་པ་སྦོམ་པོར་འགྱུར་རོ། །བཙུན་པ་བུད་མེད་ཀྱི་རོ་དང་ལྷན་ཅིག་ཏུ་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་བུད་མེད་ཀྱི་ཀེང་རུས་ཤ་མེད་པ་ལ་རེག་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བུད་མེད་དང་ལྷན་ཅིག་ཏུ་
ལུས་ཀྱིས་ཀུན་ཏུ་རེག་པར་བགྱིད་པ་ལས་དེའི་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་མ་སྐྱེས་པ་དང་ལྷན་ཅིག་ཏུ་ལུས་ཀྱིས་ཀུན་ཏུ་རེག་པར་བགྱིད་པ་ལས་མཚན་འཕོས་ཏེ། དགེ་སློང་ཕར་གྱུར་ན་ཅིར་འགྱུར། ཉེས་པ་སྦོམ་
པོར་འགྱུར་རོ། །བཙུན་པ་དགེ་སློང་གིས་སྐྱེས་པ་དང་ལྷན་ཅིག་ཏུ་ལུས་ཀྱིས་ཀུན་ཏུ་རེག་པར་བགྱིད་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་འཇམ་མམ་སྙམ་དུ་བསམས་ཏེ་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མཉེན་ནམ་དྲོའམ་སྙམ་དུ་བསམས་པའང་
དེ་བཞིན་ནོ། །བཙུན་པ་དགེ་སློང་གིས་མ་ནིང་ཕ་དང་ལྷན་ཅིག་ཏུ་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མ་ནིང་མ་དང་ལྷན་ཅིག་ཏུ་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་སྙོམས་པར་ཞུགས་པ་མོ་དང་ལྷན་ཅིག་ཏུ་རེག་ན་ཅིར་འགྱུར། དགེ་འདུན་གྱི་ལྷག་མའོ། །བཙུན་པ་དགེ་
སློང་གིས་བུད་མེད་ཉལ་བ་དང་ལྷན་ཅིག་ཏུ་རེག་ན་ཅིར་འགྱུར། དགེ་འདུན་གྱི་ལྷག་མའོ། །བཙུན་པ་དགེ་སློང་གིས་འགྲོ་བ་གཞན་དུ་གནས་པ་མོ་དང་ལྷན་ཅིག་ཏུ་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །ཇི་ལྟར་དགེ་སློང་གིས་ལུས་ཀྱིས་ཀུན་ཏུ་རེག་པར་བྱས་པ་ལས་དགེ་
འདུན་གྱི་ལྷག་མར་གྱུར་པ་དེ་བཞིན་དུ་བསླབ་པ་བྱིན་པ་ལ་ཡང་དགེ་འདུན་གྱི་ལྷག་མར་འགྱུར་རོ། །དགེ་སློང་མ་རྣམས་ལ་ནི་ཕས་ཕམ་པར་འགྱུར་རོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ཉེས་བྱས་སོ།། །།མདོར་ན། སྐད་དང་ལུས་དང་
เล่ม ๑๒ · หน้า 103a
དབེན་སྔགས་དང་། །གཞན་ལས་གཞན་ཕྱིར་སྤྲུལ་པ་དང་། །ཕྲིན་པ་སྤྲིང་ཡིག་ལག་བརྡ་དང་། །གཞན་ཞིག་ཟེར་དང་བདུན་པ་སྟེ། །བགོ་བ་མ་ནིང་སྐྱེས་པ་དང་། །མ་ནིང་བཟང་པོ་སྡིག་ཅན་ནོ། །བཙུན་པ་དགེ་སློང་འཕགས་པ་ཞིག་གིས་འཕགས་
པའི་སྐད་དུ་བུད་མེད་ལ་གནས་ངན་ལེན་གྱི་ཚིག་སྨྲས་པ་ལས་བུད་མེད་དེས་འཕགས་པའི་སྐད་མ་འཚལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །འཕགས་པས་མཐའ་འཁོབ་པའི་སྐད་སྨྲས་པ་དང་། བུད་མེད་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་
པ་སྦོམ་པོར་འགྱུར་རོ། །མཐའ་འཁོབ་པས་མཐའ་འཁོབ་པའི་སྐད་དུ་སྨྲས་པ་དང་བུད་མེད་དེས་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མཐའ་འཁོབ་པས་འཕགས་པའི་སྐད་དུ་བུད་མེད་ལ་གནས་ངན་ལེན་གྱི་སྐད་སྨྲས་པ་དང་བུད་མེད་
དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་ལུས་ཀྱིས་དམིགས་པས་གནས་ངན་ལེན་པའི་ཚིག་བུད་མེད་ལ་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་དབེན་པ་ལ་དབེན་པར་འདུ་
ཤེས་ཏེ་བུད་མེད་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་སྔགས་སམ་སྨན་གྱིས་བདག་ཉིད་མི་སྣང་བར་བགྱིས་ཏེ་བུད་མེད་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་
པ་དགེ་སློང་གིས་བུད་མེད་ལ་གཞན་ཞིག་སྨྲར་བཅུག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་བུད་མེད་ལ་གཞན་གྱི་སླད་དུ་གནས་ངན་ལེན་གྱི་ཚིག་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་སྤྲུལ་པའི་བུད་མེད་ལ་
གནས་ངན་ལེན་གྱི་ཚིག་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་བུད་མེད་ལ་ཕྲིན་པ་སྨྲར་བཅུག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་
เล่ม ๑๒ · หน้า 103b
ཏུ་བརྒྱུད་པ་ཐམས་ཅད་ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་བསྙེན་པར་མ་རྫོགས་པས་གནས་ངན་ལེན་གྱི་ཚིག་བཤམས་ལ་བསྙེན་པར་མ་རྫོགས་པར་སྨྲས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཤམས་ནས་བསྙེན་པར་རྫོགས་ཀར་
སྨྲས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཤམས་ནས་བསྙེན་པར་རྫོགས་ཏེ་སྨྲས་ན་ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ཀར་བཤམས་ནས་བསྙེན་པར་རྫོགས་ཀར་སྨྲས་ན་ཅིར་འགྱུར། ཉེས་བྱས་སོ། །བསྙེན་པར་
རྫོགས་ཀར་བཤམས་ནས་བསྙེན་པར་རྫོགས་ཏེ་སྨྲས་ན་ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ནས་བཤམས་ཏེ་བསྙེན་པར་རྫོགས་པར་སྨྲས་ན་ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ཏེ་བཤམས་ནས་བསྙེན་པར་མ་རྫོགས་པ་ན་
སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་བུད་མེད་ལ་འདི་སྐད་དུ་ཆེ་ཞེ་མཉམ་པར་བགོས་ཤིག་ཅེས་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་མ་ནིང་ལ་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་
རོ། །སྐྱེས་པ་ལ་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མ་ནིང་མོ་ལ་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་བུད་མེད་ལ་འདི་སྐད་དུ་བཟང་ངོ་ཞེས་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་
བུད་མེད་ལ་འདི་སྐད་དུ་སྡིག་ཅན་ནོ་ཞེས་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ།། །།མདོར་ན། སྨྱོན་མ་དང་ཡང་སེམས་འཁྲུགས་མ། །ན་བ་འོན་མ་གླེན་མ་དང་། གཉིད་ལོག་ར་རོ་མྱོས་མ་དང་། །དགེ་སློང་མ་དང་སྙོམས་ཞུགས་མའོ། །སངས་
རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགེ་སློང་གིས་བུད་མེད་སྨྱོན་མ་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་ཏེ། སེམས་འཁྲུགས་པ་དང་། ནད་ཀྱིས་གཟིར་བ་དང་། འོན་མ་དང་། གླེན་མ་དང་།
เล่ม ๑๒ · หน้า 104a
གཉིད་ལོག་པ་དང་། ར་རོ་བ་དང་། མྱོས་མ་རྣམས་ལ་ཡང་དེ་བཞིན་ནོ། །བཙུན་པ་དགེ་སློང་གིས་བུད་མེད་ལ་གནས་ངན་ལེན་གྱི་ཚིག་སྨྲས་པ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློང་མས་སྐྱེས་པ་ལ་
གནས་ངན་ལེན་གྱི་ཚིག་སྨྲས་པ་ན་མཚན་འཕོས་ཏེ་དགེ་སློང་ཕར་གྱུར་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་བུད་མེད་ལ་གནས་ངན་ལེན་གྱི་ཚིག་སྨྲས་ན་དགེ་འདུན་གྱི་ལྷག་མའོ་ཞེས་གསུངས་ན། དགེ་སློང་གིས་
བུད་མེད་ལ་གནས་ངན་ལེན་གྱི་ཚིག་ཏུ་སྨྲས་པ་ལ་དགེ་འདུན་གྱི་ལྷག་མར་མི་འགྱུར་བ་མཆིས་སམ། ཡོད་དེ། དེ་སྟེ་གཞན་གྱི་ཕྱིར་ནའོ། །བཙུན་པ་དགེ་སློང་གིས་སྐྱེས་པ་ལ་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློབ་མ་དང་། དགེ་ཚུལ་མ་
རྣམས་ལ་སྨྲས་ན་ཅིར་འགྱུར། དགེ་འདུན་གྱི་ལྷག་མའོ། །དགེ་སློང་གིས་དགེ་ཚུལ་ཕ་ལ་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློང་མས་སྐྱེས་པ་ལ་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློབ་མས་སྐྱེས་པ་དང་། དགེ་སློང་དང་། དགེ་
ཚུལ་ཕ་ལ་སྨྲས་ན་ཉེས་བྱས་སུ་འགྱུར་རོ། །དགེ་ཚུལ་མས་སྐྱེས་པ་དང་། དགེ་སློང་དང་། དགེ་ཚུལ་ཕ་ལ་སྨྲས་ན་ཉེས་བྱས་སུ་འགྱུར་རོ། །དགེ་ཚུལ་ཕས་བུད་མེད་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་མ་དང་། དགེ་སློང་དང་། དགེ་ཚུལ་ཕ་
རྣམས་ལ་སྨྲས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་སྙོམས་པར་ཞུགས་པའི་བུད་མེད་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ།། །།མདོར་ན། བཞི་པ་གཉིས་དང་འདུ་ཤེས་གཞན། །གནས་ངན་ལེན་
དུ་དེ་དག་བརྗོད། །ཀུན་སྤྱོད་པ་ཡང་དེ་བཞིན་ཏེ། །རྒྱས་པར་བསྒྲགས་པར་བྱའོ། །བཙུན་པ་དགེ་སློང་གིས་མི་མ་ལགས་པའི་བུད་མེད་ལ་མི་མ་ལགས་པར་འདུ་ཤེས་ཏེ་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མིར་འདུ་ཤེས་ན་ཅིར་འགྱུར།
เล่ม ๑๒ · หน้า 104b
ཉེས་པ་སྦོམ་པོར་འགྱུར་རོ། །མི་ལ་མི་མ་ལགས་པར་འདུ་ཤེས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མི་ལ་མིར་འདུ་ཤེས་ན་ཅིར་འགྱུར། དགེ་འདུན་གྱི་ལྷག་མའོ། །བཙུན་པ་དགེ་སློང་གིས་མིའི་བུད་མེད་ལ་བུད་མེད་དུ་འདུ་ཤེས་ཏེ་སྨྲས་ན་ཅིར་འགྱུར། དགེ་
འདུན་གྱི་ལྷག་མའོ། །བུད་མེད་ལ་སྐྱེས་པར་འདུ་ཤེས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །སྐྱེས་པ་ལ་བུད་མེད་དུ་འདུ་ཤེས་ནའང་ཉེས་པ་སྦོམ་པོར་འགྱུར་རོ། །སྐྱེས་པ་ལ་སྐྱེས་པར་འདུ་ཤེས་ཏེ་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་
སློང་གིས་གཞན་དུ་འདུ་ཤེས་པ་ལས་བུད་མེད་གཅིག་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་འདུན་གྱི་ལྷག་མ་གསུམ་པ་དང་བཞི་པ་རྫོགས་ཏེ་ཇི་ལྟར་གནས་ངན་ལེན་པ་དེ་བཞིན་དུ་ཀུན་ཏུ་སྤྱོད་པ་ལའང་བྱའོ།། །།འདུལ་
བ་གཞུང་དམ་པ། བམ་པོ་གཉིས་པ། མདོར་ན། ཆོས་གཉིས་བཞི་པ་རྣམ་པ་དྲུག །དབང་པོ་ཉོ་བར་བྱ་བ་གཉིས། །བདུན་པ་དང་ཡང་ཆད་པ་དང་། །བཞི་པ་གཉིས་དང་གཅིག་ནས་གཅིག །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ།
བཙུན་པ་ཆོས་གང་འདས་པ་ཡང་མ་ལགས། མ་འོངས་པ་ཡང་མ་ལགས། ད་ལྟར་བྱུང་བ་ཡང་མ་ལགས་ལ། ལས་ཀུན་རྫོགས་པའི་མཐར་ཐུག་པའི་ཆོས་དེ་གང་ལགས། ཨུ་པཱ་ལི་མྱ་ངན་ལས་འདས་པའོ། །བཙུན་པ་ཆོས་གང་སོང་ཞིང་འོངས་ལ་ལས་ཀུན་
རྫོགས་པའི་མཐར་ཐུག་པ་དེ་གང་ལགས། ཨུ་པཱ་ལི་སྨྱན་བྱེད་པའོ། །དེ་བསྐྱལ་ན་ཅིར་འགྱུར། དགེ་འདུན་གྱི་ལྷག་མའོ། །བཙུན་པ་དགེ་སློང་གིས་སྨྱོན་པ་ཞིག་ལས་ཕྲིན་བླངས་ཏེ་སྨྱོན་པ་ལ་བསྐྱལ་ལ་སྨྱོན་པ་ལ་ལན་སླར་སྩལ་ན་ཅིར་འགྱུར། ཉེས་པ་སྦོམ་པོར་འགྱུར་
རོ། །སྨྱོན་པ་ཞིག་ལས་ཕྲིན་བླངས་ཏེ། སྨྱོན་པ་ལ་བསྐྱལ་ལ་སླར་ལན་རང་བཞིན་དུ་གནས་པ་ཞིག་ལ་སྩལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །སྨྱོན་པ་ལས་ཕྲིན་བླངས་ཏེ་རང་བཞིན་དུ་གནས་པ་ལ་བསྐྱལ་ལ་སྨྱོན་པ་ལ་སླར་ལན་སྩལ་ན་ཅིར་འགྱུར།
เล่ม ๑๒ · หน้า 105a
ཉེས་པ་སྦོམ་པོར་འགྱུར་རོ། །སྨྱོན་པ་ལས་ཕྲིན་བླངས་ཏེ་རང་བཞིན་དུ་གནས་པ་ལ་བསྐྱལ་ལ་རང་བཞིན་དུ་གནས་པ་ལ་ལན་སླར་སྩལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་རང་བཞིན་དུ་གནས་པ་ལས་ཕྲིན་བླངས་ཏེ་
རང་བཞིན་དུ་གནས་པ་ལ་བསྐྱལ་ལ་རང་བཞིན་དུ་གནས་པ་ལ་སླར་ལན་སྩལ་ན་ཅིར་འགྱུར། དགེ་འདུན་གྱི་ལྷག་མར་འགྱུར་རོ། །རང་བཞིན་དུ་གནས་པ་ལས་ཕྲིན་བླངས་ཏེ་རང་བཞིན་དུ་གནས་པ་ལ་བསྐྱལ་ལ་སྨྱོན་པ་ལ་ལན་སླར་སྩལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །
རང་བཞིན་དུ་གནས་པ་ལས་ཕྲིན་བླངས་ཏེ་སྨྱོན་པ་ལ་བསྐྱལ་ལ་རང་བཞིན་དུ་གནས་པ་ལ་ལན་སླར་སྩལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །རང་བཞིན་དུ་གནས་པ་ལས་ཕྲིན་བླངས་ཏེ་སྨྱོན་པ་ལ་བསྐྱལ་ལ་སྨྱོན་པ་ལ་ལན་སླར་སྩལ་ན་ཅིར་འགྱུར། ཉེས་པ་སྦོམ་པོར་
འགྱུར་རོ། །ཇི་ལྟར་སྨྱོན་པ་ལ་བཞི་བརྒྱུད་གཉིས་པ་དེ་བཞིན་དུ་སེམས་འཁྲུགས་པ་ལའང་བཞི་བརྒྱུད་གཉིས་ཏེ་ནད་ཀྱིས་གཟིར་བ་དང་། དབང་བ་དང་མི་དབང་བ་རྣམས་ལ་ཡང་བཞི་བརྒྱུད་གཉིས་པར་བྱའོ། །བཙུན་པ་དགེ་སློང་གིས་དབང་བ་ལས་ཕྲིན་བླངས་ཏེ་དབང་བ་ལ་
བསྐྱལ་ལ་དབང་བ་ལ་ལན་སླར་སྩལ་ན་ཅིར་འགྱུར། དགེ་འདུན་གྱི་ལྷག་མའོ། །དབང་བ་ལས་ཕྲིན་བླངས་ཏེ་དབང་བ་ལ་བསྐྱལ་ལ་མི་དབང་བ་ལ་ལན་སླར་སྩལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དབང་བ་ལས་ཕྲིན་བླངས་ཏེ་མི་དབང་བ་ལ་བསྐྱལ་ལ་དབང་བ་ལ་ལན་
སླར་སྩལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དབང་བ་ལས་ཕྲིན་བླངས་ཏེ་མི་དབང་བ་ལ་བསྐྱལ་ལ་མི་དབང་བ་ལ་ལན་སླར་སྩལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་མི་དབང་བ་ལས་ཕྲིན་བླངས་ཏེ་མི་དབང་བ་ལ་བསྐྱལ་ལ་མི་དབང་བ་ལ་ལན་སླར་སྩལ་ན་
ཅིར་འགྱུར། ཉེས་པ་སྦོམ་པོར་འགྱུར་རོ། །མི་དབང་བ་ལས་ཕྲིན་བླངས་ཏེ་མི་དབང་བ་ལ་བསྐྱལ་ལ་དབང་བ་ལ་ལན་སླར་སྩལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མི་དབང་བ་ལས་ཕྲིན་བླངས་ཏེ་དབང་བ་ལ་བསྐྱལ་ལ་དབང་བ་ལ་ལན་སླར་བསྐྱལ་ན་ཅིར་འགྱུར།
เล่ม ๑๒ · หน้า 105b
ཉེས་པ་སྦོམ་པོར་འགྱུར་རོ། །མི་དབང་བ་ལས་ཕྲིན་བླངས་ཏེ་དབང་བ་ལ་བསྐྱལ་ལ་མི་དབང་བ་ལ་ལན་སླར་སྩལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་ཁྱིམ་བདག་ཅིག་ལ་འདི་སྐད་དུ་བུད་མེད་ཉོས་ལ་ཤོག་ཅེས་སྨྲས་ན་ཅིར་འགྱུར། ཉེས་
བྱས་སོ། །བཙུན་པ་དགེ་སློང་གིས་ཁྱིམ་བདག་ཅིག་ལ་འདི་སྐད་དུ་བུད་མེད་འདི་ཞེས་བྱ་བ་ཉོས་ཤིག་ཅེས་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བསྙེན་པར་མ་རྫོགས་པར་ཕྲིན་བླངས་ཏེ་བསྙེན་པར་མ་རྫོགས་པར་བསྐྱལ་ལ་བསྙེན་པར་རྫོགས་པར་སླར་ལན་
བསྐྱལ་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་ཕྲིན་བླངས་ཏེ་བསྙེན་པར་མ་རྫོགས་པར་བསྐྱལ་ལ་བསྙེན་པར་རྫོགས་ཀར་སླར་ལན་བསྐྱལ་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་ཕྲིན་བླངས་ཏེ་བསྙེན་པར་རྫོགས་ཀར་བསྐྱལ་ལ་བསྙེན་
པར་རྫོགས་ཏེ་ལན་སླར་བསྐྱལ་ན་ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ཀར་ཕྲིན་བླངས་ཏེ་བསྙེན་པར་རྫོགས་ཀར་བསྐྱལ་ལ་བསྙེན་པར་རྫོགས་ཀར་སླར་ལན་བསྐྱལ་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་ཕྲིན་བླངས་ཏེ་བསྙེན་པར་
རྫོགས་ཀར་བསྐྱལ་ལ་བསྙེན་པར་རྫོགས་ཏེ་སླར་ལན་བསྐྱལ་ན་ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་མ་རྫོགས་པས་ཕྲིན་བླངས་ཏེ་བསྙེན་པར་རྫོགས་ཀར་བསྐྱལ་ལ་བསྙེན་པར་རྫོགས་ཏེ་སླར་ལན་བསྐྱལ་ན་ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་
རྫོགས་པས་ཕྲིན་བླངས་ཏེ་བསྙེན་པར་རྫོགས་པས་བསྐྱལ་ལ་བསྙེན་པར་མ་རྫོགས་པ་ན་སླར་ལན་བསྐྱལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་གང་ཟག་དེ་ཉིད་ཆད་པ་བཅད་པ་ལགས་ལ་དེ་ཉིད་ཀྱིས་ཆད་པ་ཡང་བགྱིས་ཤིང་དེ་ཉིད་ཡིད་མགུ་བར་སྤྱོད་པ་ཡང་
ལགས་ལ། དེ་ཉིད་ཀྱིས་མགུ་བར་བགྱི་བ་སྤྱད་ལགས་པར་འགྱུར་བ་མཆིས་སམ། ཡོད་དེ། དེའི་ནི་འདི་ལྟར་མགུ་བར་སྤྱད་པ་སྤྱད་ཟིན་པའི་གང་ཟག་དེ་ལ་དགེ་འདུན་གྱི་ལྷག་མའི་ཉེས་པ་ཞིག་བྱུང་ནས་མ་བཅབས་པར་དགེ་འདུན་གྱི་དྲུང་དུ་སོང་ནས་ཡིད་མགུ་བར་བྱ་བ་གསོལ་
เล่ม ๑๒ · หน้า 106a
པ་དང་། དེས་དགེ་འདུན་གྱི་ཡིད་མགུ་བར་བྱ་བ་བྱིན་ཏེ་དེས་ཡང་མགུ་བར་བྱ་བ་སྤྱད་ཟིན་པ་དང་། དགེ་འདུན་གྱི་ལྷག་མའི་ཉེས་པ་གཉིས་བྱུང་སྟེ་ཉེས་པ་གཅིག་ནི་ཞག་གཅིག་བཅབས། ཉེས་པ་གཅིག་ནི་ཞག་གཉིས་བཅབས་ནས་དེས་དགེ་འདུན་ལ་ཆད་
པ་གསོལ་བ་དང་། དེས་དགེ་འདུན་གྱིས་ཀྱང་ཆད་པ་བྱིན་ཏེ་དེས་ཞག་གཅིག་ཆད་པ་བྱས་པས་ཉེས་པ་གཅིག་གི་ཆད་པ་ནི་བྲལ། གཉིས་པའི་ཆད་པ་ནི་བྱེད། གསུམ་པ་ནི་ཡིད་མགུ་བར་སྤྱོད་པ། བཞི་པ་ནི་ཡིད་མགུ་བར་སྤྱད་ཟིན་པའོ། །བཙུན་པ་མིའི་བུད་མེད་དང་
མིའི་སྐྱེས་པ་དེ་གཉིས་ཀྱི་སྨྱན་བགྱིས་ན་ཅིར་འགྱུར། དགེ་འདུན་གྱི་ལྷག་མའོ། །མིའི་བུད་མེད་དང་མི་མ་ལགས་པའི་སྐྱེས་པ་དེ་གཉིས་ཀྱིས་སྨྱན་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པའི་བུད་མེད་དང་། མིའི་སྐྱེས་པ་དེ་གཉིས་
ཀྱི་སྨྱན་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པའི་བུད་མེད་དང་། མི་མ་ལགས་པའི་སྐྱེས་པ་དེ་གཉིས་ཀྱི་སྨྱན་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་མི་ལ་མིར་འདུ་ཤེས་ཏེ་སྨྱན་བགྱིས་ན་ཅིར་འགྱུར། དགེ་འདུན་གྱི་ལྷག་
མའོ། །མི་ལ་མི་མ་ལགས་པར་འདུ་ཤེས་ཏེ་སྨྱན་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མིར་འདུ་ཤེས་ཏེ་སྨྱན་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་གཅིག་ནས་གཅིག་ཏུ་བརྒྱུད་དེ་སྨྱན་བགྱིས་
ན་ཅིར་འགྱུར། དགེ་འདུན་གྱི་ལྷག་མའོ།། །།མདོར་ན། གཞོན་ནུ་མ་དང་བུད་མེད་མངལ། །ཟ་མ་མ་ནིང་མ་ནིང་མོ། །དགེ་འདུན་ཐམས་ཅད་བརྟུལ་ཞུགས་ནས། །མཚན་གཉིས་དང་ནི་འདྲ་བའོ། །བཙུན་པ་གཞོན་ནུ་མའི་སྨྱན་བགྱིས་ན་ཅིར་འགྱུར། ཉེས་པ་
སྦོམ་པོར་འགྱུར་རོ། །བཙུན་པ་ཁྱིམ་བདག་གི་བུ་མ་མཆིས་པར་སྨྱན་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་མངལ་ན་གནས་པའི་སྨྱན་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་ཟ་མའི་སྨྱན་བགྱིས་ན་ཅིར་འགྱུར། ཉེས་པ་སྦོམ་
เล่ม ๑๒ · หน้า 106b
པོར་འགྱུར་རོ། །མ་ནིང་དང་མ་ནིང་མོའི་སྨྱན་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་འདུན་ཐམས་ཅད་ཚོགས་པ་དང་། ཁྱིམ་བདག་ཅིག་མཆིས་ནས་འདི་སྐད་དུ་འཕགས་པ་རྣམས་བདག་གི་ཚིག་གིས་ཁྱིམ་བདག་འདི་ཞེས་བགྱི་བ་ལ་སྲིང་
མོའམ། ཚ་མོའམ། ཡང་ཚ་མོ་བྱིན་ཅིག་ཅེས་གསུང་སྤྱོད་དམ་ཞེས་སྨྲས་པ་དང་། གལ་ཏེ་དགེ་འདུན་ཐམས་ཅད་ཀྱིས་ཕྲིན་བླངས་ཏེ་ལན་སླར་བསྐྱལ་ན་དགེ་འདུན་ཐམས་ཅད་ལ་ཅིར་འགྱུར། དགེ་འདུན་གྱི་ལྷག་མའོ། །དེ་སྟེ་དགེ་འདུན་ཐམས་ཅད་བགྲོས་ནས་དགེ་
སློང་གཅིག་གིས་བསྐྱལ་ཏེ་ལན་སླར་བསྐྱལ་ན་དགེ་འདུན་ཐམས་ཅད་ལ་ཅིར་འགྱུར། དགེ་འདུན་གྱི་ལྷག་མའོ། །འོན་ཏེ་དགེ་སློང་ཅིག་གིས་རང་གི་བློས་བསྐྱལ་ཏེ་ལན་བྱིན་ན་ཡང་དགེ་འདུན་གྱི་ལྷག་མར་འགྱུར་རོ། །དགེ་སློང་མ་དང་བརྟུལ་ཞུགས་ལ་གནས་པ་ཚངས་
པར་སྤྱོད་པ་གཞན་གྱི་སྨྱན་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། བཙུན་པ་དགེ་སློང་གིས་ཕྲིན་བླངས་པ་དང་། དེ་བླངས་མ་ཐག་ཏུ་མཚན་འཕོས་ཏེ་དགེ་སློང་མར་གྱུར་ནས་བསྐྱལ་ཏེ་ལན་སླར་བསྐྱལ་ན་ཅིར་འགྱུར། དགེ་འདུན་གྱི་ལྷག་མའོ། །བཙུན་པ་
དགེ་སློང་མས་ཕྲིན་བླངས་ནས་བསྐྱལ་ཏེ་ལན་སླར་བསྐྱལ་བ་དང་། དེའི་མཚན་འཕོས་ཏེ་དགེ་སློང་ཕར་གྱུར་ན་ཅིར་འགྱུར། དགེ་འདུན་གྱི་ལྷག་མའོ། །བཙུན་པ་དགེ་སློང་གིས་ཕྲིན་བླངས་ནས་བསྐྱལ་བ་དང་། དེའི་མཚན་འཕོས་བཞིན་དུ་ལན་སླར་བསྐྱལ་ན་ཅིར་འགྱུར།
ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་ཕྲིན་བླངས་པ་དང་། སྐྱེས་པ་དེའི་མཚན་འཕོས་ནས་མཚན་འཕོས་བཞིན་དུ་བསྐྱལ་ཏེ་ལན་སླར་བསྐྱལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་ཕྲིན་བླངས་པ་དང་། བུད་མེད་ལ་ནི་སྐྱེས་
པའི་མཚན་སྐྱེས་པ་ལ་བུད་མེད་ཀྱི་མཚན་འཕོས་པ་ལ་འཕོས་བཞིན་དུ་བསྐྱལ་ནས་ལན་སླར་བསྐྱལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་སྐྱེས་པས་བུད་མེད་དང་ལྷན་ཅིག་དུས་བརྡ་
เล่ม ๑๒ · หน้า 107a
བགྱིས་པར་གྱུར་པ་ལས་སྐྱེས་པས་དགེ་སློང་ཞིག་ལ་འདི་སྐད་དུ་འཕགས་པ་བུད་མེད་གཅིག་གཟིགས་སམ་ཞེས་སྨྲས་པ་དང་། དགེ་སློང་གིས་འཚལ་བཞིན་དུ་འདི་སྐད་རྩིག་པ་འདིའི་དྲུང་ན་འདུག་གོ་ཞེས་མཆི་ན་ཅིར་འགྱུར། ཉེས་པ་སྦོམ་པོར་འགྱུར་རོ། །
དེ་སྟེ་དེས་འདི་སྐད་དུ་འཕགས་པ་བཞུད་ལ་བུད་མེད་དེ་ཚུར་ཤོག་ཅེས་གསུངས་ཤིག་ཅེས་སྨྲས་པ་དང་། དགེ་སློང་དེ་སོང་སྟེ་དེ་ལ་སྨྲས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །ཇི་ལྟར་དགེ་སློང་གིས་སྨྱན་བྱས་པས་དགེ་འདུན་གྱི་ལྷག་མར་འགྱུར་བ་དེ་བཞིན་དུ་
བསླབ་པ་བྱིན་པ་དང་། དགེ་སློང་མ་ལ་ཡང་དགེ་འདུན་གྱི་ལྷག་མར་འགྱུར་རོ། །དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་རྣམས་ལ་ནི་ཉེས་བྱས་སུ་འགྱུར་རོ།། །།མདོར་ན། མ་གནང་བ་དང་ཚད་བྱ་དང་། །བདག་དང་གཞན་དང་
མ་གཡོགས་པ། །ཕྱིར་བབས་བདུན་བརྒྱུད་དེ་བཞིན་ཏེ། །མཚན་ནི་ཐ་མར་གྱུར་པའོ། །བཙུན་པ་དགེ་སློང་གིས་དངོས་པོ་མ་གནང་བར་ཁང་པ་བརྩིགས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དངོས་པོ་གསོལ་ནས་ཁང་པ་མ་བརྩིགས་ན་ཅིར་འགྱུར། ཉེས་བྱས་སོ། །
ཁང་པ་བརྩིགས་པར་གནང་ནས་ཚད་ལས་འདས་པར་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བདག་གིས་བརྩམས་ནས་མ་ལགས་པར་བོར་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་གཞན་གྱིས་མ་ལགས་པ་ལགས་པར་བགྱིས་ན་ཅིར་འགྱུར།
ཉེས་པ་སྦོམ་པོར་འགྱུར་རོ། །སྟེང་མ་གཡོགས་པ་ཞིག་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བརྩམས་ནས་སླར་བབས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དེ་བཞིན་དུ་བདག་ཉིད་ཀྱི་འཚོ་བ་དང་བྲལ་བ་དང་། དགེ་ཚུལ་ཕར་ཁས་ལེན་
པ་ཐམས་ཅད་ཉེས་པ་སྦོམ་པོར་འགྱུར་རོ། །དེ་བཞིན་དུ་མ་ནིང་ལ་སོགས་པ་རྒྱས་པར་ནི་ཇི་ལྟར་བསླབ་པ་ཕུལ་བ་བཞིན་ནོ། །བསྙེན་པར་མ་རྫོགས་པར་བརྩམས་ནས་བསྙེན་པར་མ་རྫོགས་པར་ལགས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བརྩམས་
เล่ม ๑๒ · หน้า 107b
ནས་བསྙེན་པར་རྫོགས་ཀར་ལགས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བརྩམས་ནས་བསྙེན་པར་རྫོགས་ཏེ་ལགས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ཀར་བརྩམས་ནས་བསྙེན་པར་རྫོགས་ཀར་ལགས་ན་ཅིར་འགྱུར།
ཉེས་བྱས་སོ། །བསྙེན་པར་རྫོགས་པ་ན་བརྩམས་ནས་བསྙེན་པར་རྫོགས་པ་ན་ལགས་ན་ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་པ་ན་བརྩམས་ནས་བསྙེན་པར་མ་རྫོགས་པ་ན་ལགས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་
སློང་གིས་ཁང་པ་བརྩིག་པར་བརྩམས་པ་དང་། དེའི་མཚན་འཕོས་ཏེ་དགེ་སློང་མར་གྱུར་ནས་ལགས་པར་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་མས་ཁང་པ་བརྩིག་པར་བརྩམས་པ་དང་། མཚན་འཕོས་ནས་དགེ་སློང་ཕར་གྱུར་ཏེ་ལགས་
པར་བགྱིས་ན་ཅིར་འགྱུར། ཉེས་བྱས་སོ། །བསླབ་པ་སྩལ་བས་བགྱིས་ན་ཅིར་འགྱུར། དགེ་འདུན་གྱི་ལྷག་མའོ། །དགེ་སློང་མས་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་ལ་ནི་ཉེས་བྱས་
སོ། །གཙུག་ལག་ཁང་ཆེན་པོ་ཡང་དེ་བཞིན་དུ་བྱའོ།། །།མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པ་སེམས་འཁྲུགས་ན་བ་དང་། །འོན་པ་གླེན་པ་གཉིད་ལོག་དང་། །ར་རོ་བ་དང་མྱོས་པ་དང་། །
སྙོམས་ཞུགས་འགྲོ་བ་ཕྱི་རོལ་པའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་གིས་འཁོན་ཏེ་འཁོན་མ་བཏང་བས་དགེ་སློང་གཙང་མ་ཉེས་པ་མེད་པ་ལ་བྱ་བ་མེད་པར་ཕས་ཕམ་པའི་ཆོས་
ཀྱིས་སྐུར་ན་དགེ་འདུན་གྱི་ལྷག་མའོ་ཞེས་གསུངས་ན། དགེ་སློང་གིས་བྱ་བ་མ་མཆིས་པར་ཕས་ཕམ་པའི་ཆོས་ཀྱིས་སྐུར་ཀྱང་དགེ་འདུན་གྱི་ལྷག་མར་མི་འགྱུར་བ་མཆིས་སམ། ཡོད་དེ། དགེ་སློང་གིས་ཕྲིན་གྱིས་སྐུར་ན་ཉེས་པ་སྦོམ་པོར་འགྱུར་རོ། །དེ་བཞིན་དུ་སྤྲིང་ཡིག་
เล่ม ๑๒ · หน้า 108a
དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་བརྒྱུད་དེ་སྐུར་ན་ཐམས་ཅད་ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་དགེ་སློང་སྨྱོན་པ་ལ་སྐུར་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དེ་བཞིན་དུ་སེམས་
འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་དང་། གཉིད་ལོག་པ་དང་། ར་རོ་བ་དང་། མྱོས་པ་དང་། སྙོམས་པར་ཞུགས་པ་དང་། འགྲོ་བ་གཞན་དུ་གནས་པ་རྣམས་ལའང་སྐུར་ན་ཐམས་ཅད་ཉེས་པ་སྦོམ་པོར་འགྱུར་རོ། །
བཙུན་པ་དགེ་སློང་གིས་འདི་ལས་ཕྱི་རོལ་གྱི་མུ་སྟེགས་ཅན་གཞན་དགེ་སྦྱོང་དང་། བྲམ་ཟེ་དང་། ཀུན་ཏུ་སྤྱོད་པ་པ་དང་། ཀུན་ཏུ་རྒྱུ་བ་རྣམས་ལ་སྐུར་ན་ཅིར་འགྱུར། ཉེས་བྱས་སོ།། །།མདོར་ན། སྐད་དང་ལུས་དང་དབེན་པ་དང་། །སྔགས་དང་གཞན་གྱིས་
གཞན་ལ་བདུན། །ཁྱིམ་པ་ལ་ནི་སོགས་པ་དང་། །མཚན་ཀྱང་རྣམ་པ་བཞི་བརྒྱུད་འགྱུར། །བཙུན་པ་དགེ་སློང་འཕགས་པས་འཕགས་པའི་སྐད་དུ་དགེ་སློང་ལ་སྐུར་པ་དང་། དགེ་སློང་དེས་འཕགས་པའི་སྐད་མ་འཚལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །
འཕགས་པས་མཐའ་འཁོབ་པའི་སྐད་དུ་སྐུར་པ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མཐའ་འཁོབ་པས་མཐའ་འཁོབ་པའི་སྐད་དུ་སྐུར་པ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་
འགྱུར། ཉེས་པ་སྦོམ་པོར་འགྱུར་རོ། །མཐའ་འཁོབ་པས་འཕགས་པའི་སྐད་དུ་སྐུར་པ་དང་། དགེ་སློང་དེས་འཕགས་པའི་སྐད་མ་འཚལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་དགེ་སློང་ལ་ལུས་མི་དམིགས་པས་སྐུར་ན་ཅིར་འགྱུར།
ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་དབེན་པ་ལ་དབེན་པར་འདུ་ཤེས་ཏེ་སྐུར་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་སྔགས་སམ་སྨན་གྱིས་བདག་ཉིད་མི་སྣང་བར་བསྒྱུར་ཏེ་དགེ་སློང་ལ་སྐུར་ན་ཅིར་འགྱུར། ཉེས་པ་སྦོམ་
เล่ม ๑๒ · หน้า 108b
པོར་འགྱུར་རོ། །བཙུན་པ་དགེ་སློང་གིས་དགེ་སློང་ལ་གཞན་ཞིག་སྐུར་པ་འདེབས་སུ་བཅུག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་དགེ་སློང་ལ་གཞན་གྱི་སླད་དུ་སྐུར་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་བསྙེན་པར་
མ་རྫོགས་པར་སྐུར་པ་གདབ་པར་བཤམས་ནས་བསྙེན་པར་མ་རྫོགས་པར་གྲུབ་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཤམས་ནས་བསྙེན་པར་རྫོགས་ཀར་གྲུབ་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཤམས་ནས་བསྙེན་པར་
རྫོགས་ཏེ་གྲུབ་ན་ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ཀར་བཤམས་ནས་བསྙེན་པར་རྫོགས་ཀར་གྲུབ་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བཤམས་ནས་བསྙེན་པར་རྫོགས་ཏེ་གྲུབ་ན་ཅིར་འགྱུར། དགེ་འདུན་གྱི་ལྷག་མའོ། །
བསྙེན་པར་རྫོགས་པ་ན་བཤམས་ཏེ་བསྙེན་པར་རྫོགས་པ་ན་གྲུབ་ན་ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་པ་ནས་བཤམས་ཏེ་བསྙེན་པར་མ་རྫོགས་པ་ན་བགྱིས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་ཁྱིམ་པ་ལ་
སྐུར་ན་ཅིར་འགྱུར། ཉེས་བྱས་སོ། །དེ་བཞིན་དུ་མ་ནིང་དང་། དགེ་སློང་མ་སུན་ཕྱུང་བ་དང་། ཕ་དང་། མ་དང་། དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་
གནས་དང་། སྔར་འཁྲུགས་པ་དང་། སྔར་ཉེས་པ་བྱུང་བ་རྣམས་ལ་སྐུར་ན་ཐམས་ཅད་དུ་ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་དགེ་སློང་ལ་སྐུར་ན་ཅིར་འགྱུར། དགེ་འདུན་གྱི་ལྷག་མའོ། །དེ་བཞིན་དུ་དགེ་འདུན་ཕྱེ་བ་དང་། མི་གནས་པ་དང་། རྗེས་སུ་
ཕྱོགས་པ་དང་། བསླབ་པ་བྱིན་པའི་དགེ་སློང་རྣམས་ལ་སྐུར་ན་ཐམས་ཅད་དགེ་འདུན་གྱི་ལྷག་མར་གྱུར་ཏོ། །བཙུན་པ་དགེ་སློང་གིས་བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་སྐུར་ན་ཅིར་འགྱུར། དགེ་འདུན་གྱི་ལྷག་མའོ། །བཙུན་པ་དགེ་སློང་གིས་དགེ་
เล่ม ๑๒ · หน้า 109a
སློང་ལ་སྐུར་པ་དང་དེའི་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། དགེ་འདུན་གྱི་ལྷག་མའོ། །བཙུན་པ་དགེ་སློང་མས་དགེ་སློང་མ་ལ་སྐུར་པ་དང་། མཚན་འཕོས་ཏེ་དགེ་སློང་དུ་གྱུར་ན་ཅིར་འགྱུར། དགེ་འདུན་གྱི་ལྷག་མའོ། །བཙུན་པ་དགེ་
སློང་གིས་བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་སྐུར་ན་ཅིར་འགྱུར། དགེ་འདུན་གྱི་ལྷག་མའོ། །དགེ་སློང་གིས་བསྙེན་པར་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ཏེ་སྐུར་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བསྙེན་པར་མ་
རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་སྐུར་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བསྙེན་པར་མ་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་སྐུར་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་མི་ལ་མིར་འདུ་ཤེས་ཏེ་སྐུར་ན་ཅིར་
འགྱུར། དགེ་འདུན་གྱི་ལྷག་མའོ། །མི་ལ་མི་མ་ལགས་པར་འདུ་ཤེས་ཏེ་སྐུར་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མིར་འདུ་ཤེས་ཏེ་སྐུར་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མི་མ་ལགས་པར་འདུ་ཤེས་
ཏེ་སྐུར་ན་ཅིར་འགྱུར། །ཉེས་པ་སྦོམ་པོར་འགྱུར་རོ།། །།མདོར་ན། མཐའ་དང་འོན་ཏེ་མཚམས་མེད་པ། །གསད་པར་མི་བྱ་གཅིག་ལ་གཅིག །བྲིས་དང་ཆས་སྐུར་དེ་བཞིན་ཏེ། །རྒྱས་པར་བྱེད་དང་དེ་བཞིན་ནོ། །བཙུན་པ་དགེ་སློང་ཞིག་བདག་ཉིད་འདི་སྐད་
དུ་བདག་གིས་མི་ཚངས་པར་སྤྱོད་པ་འཁྲིག་པའི་ཆོས་བགྱིས་སོ་ཞེས་མཆི་བའི་དགེ་སློང་དེ་ལ་དགེ་སློང་གིས་རྩ་བ་མ་མཆིས་པར་རྐུ་བ་དང་། གསོད་པ་དང་། བརྫུན་རྣམས་ཀྱིས་སྐུར་ན་ཅིར་འགྱུར། དགེ་འདུན་གྱི་ལྷག་མར་འགྱུར་རོ། །བཙུན་པ་དགེ་སློང་ཞིག་བདག་ཉིད་འདི་
སྐད་བདག་གིས་ཡོ་བྱད་ཆེན་པོ་ཞིག་བརྐུས་སོ་ཞེས་མཆི་བའི་དགེ་སློང་དེ་ལ་དགེ་སློང་གིས་རྩ་བ་མ་མཆིས་པར་གསོད་པ་དང་། བརྫུན་དང་། མི་ཚངས་པར་སྤྱོད་པ་རྣམས་ཀྱིས་སྐུར་ན་ཅིར་འགྱུར། དགེ་འདུན་གྱི་ལྷག་མའོ། །བཙུན་པ་དགེ་སློང་ཞིག་བདག་ཉིད་འདི་སྐད་དུ་
เล่ม ๑๒ · หน้า 109b
བདག་གིས་མི་ཞིག་འཚོ་བ་དང་ཕྲལ་ལོ་ཞེས་མཆི་བའི་དགེ་སློང་དེ་ལ་དགེ་སློང་གིས་རྩ་བ་མ་མཆིས་པར་བརྫུན་དང་། མི་ཚངས་པར་སྤྱོད་པ་དང་། རྐུ་བ་རྣམས་ཀྱིས་སྐུར་ན་ཅིར་འགྱུར། དགེ་འདུན་གྱི་ལྷག་མའོ། །བཙུན་པ་དགེ་སློང་ཞིག་བདག་ཉིད་འདི་སྐད་དུ་བདག་གིས་མི་ལས་
བླ་མར་གྱུར་པའི་ཆོས་སྨྲས་སོ་ཞེས་མཆིས་པའི་དགེ་སློང་དེ་ལ་དགེ་སློང་གིས་རྩ་བ་མ་མཆིས་པར་མི་ཚངས་པར་སྤྱོད་པ་དང་། རྐུ་བ་དང་། གསོད་པ་རྣམས་ཀྱིས་སྐུར་ན་ཅིར་འགྱུར། དགེ་འདུན་གྱི་ལྷག་མའོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་དགེ་སློང་ལ་རྩ་བ་
མེད་པར་ཕས་ཕམ་པའི་ཆོས་ཀྱིས་སྐུར་ན་དགེ་འདུན་གྱི་ལྷག་མར་འགྱུར་རོ་ཞེས་གསུངས་ན་བཙུན་པ་དགེ་སློང་གིས་དགེ་སློང་ལ་རྩ་བ་མ་མཆིས་པར་མཚམས་མེད་པས་སྐུར་ན་ཅིར་འགྱུར། དེ་སྟེ་ཕ་དང་མ་དང་། དགྲ་བཅོམ་པ་བསད་པ་རྣམས་ཀྱིས་སྐུར་ན་དགེ་འདུན་
གྱི་ལྷག་མར་འགྱུར་རོ། །གང་ལ་རྩ་བ་མེད་པར་དགེ་འདུན་གྱི་དབྱེན་དང་། ངན་སེམས་ཀྱིས་ཁྲག་ཕྱུང་བས་སྐུར་ན་ཉེས་བྱས་སུ་འགྱུར་རོ། །དེ་ཅིའི་ཕྱིར་ཞེ་ན། ཨུ་པཱ་ལི་ཕ་དང་། མ་དང་། དགྲ་བཅོམ་པ་བསད་པས་སྐུར་པ་གང་ཡིན་པ་དེ་ནི་ཕས་ཕམ་པས་སྐུར་
པའོ། །དགེ་འདུན་གྱི་དབྱེན་དང་། ངན་སེམས་ཀྱིས་ཁྲག་ཕྱུང་བས་སྐུར་པ་གང་ཡིན་པ་དེ་ནི་ཉེས་པ་སྦོམ་པོས་སྐུར་པ་སྟེ། ཉེས་པ་སྦོམ་པོས་ནི་དགེ་སློང་མ་ཡིན་པར་མི་འགྱུར་གྱི་དེ་ནི་བཤགས་པར་འོས་སོ། །དགེ་སློང་གིས་དགེ་སློང་ལ་རྩ་བ་མེད་པར་ཕས་ཕམ་པའི་ཆོས་ཀྱིས་
སྐུར་ན་དགེ་འདུན་གྱི་ལྷག་མར་འགྱུར་རོ། །རྩ་བ་མེད་པར་དགེ་འདུན་གྱི་ལྷག་མས་སྐུར་ན་ལྟུང་བར་འགྱུར་རོ། །རྩ་བ་མེད་པར་ལྟུང་བ་དང་། སོ་སོར་མཐོལ་བ་རྣམས་དང་། ཉེས་བྱས་རྣམས་ཀྱིས་སྐུར་ན་ཉེས་བྱས་སུ་འགྱུར་རོ། །དེ་བཞིན་དུ་རྩ་བ་མེད་པར་ཉེས་པ་སྦོམ་པོས་སྐུར་ན་ཡང་ཉེས་བྱས་
སུ་འགྱུར་རོ། །བཙུན་པ་དགེ་སློང་གིས་དགེ་སློང་མ་ལ་སྐུར་ན་ཅིར་འགྱུར། དགེ་འདུན་གྱི་ལྷག་མའོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་དགེ་སློང་ལ་སྐུར་ན་དགེ་འདུན་གྱི་ལྷག་མར་འགྱུར་རོ་ཞེས་གསུངས་ན་དགེ་སློང་གིས་དགེ་སློབ་མ་དང་། དགེ་ཚུལ་ཕ་
เล่ม ๑๒ · หน้า 110a
དང་། དགེ་ཚུལ་མ་རྣམས་ལ་སྐུར་ན་ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློང་མས་དགེ་སློང་མ་ལ་སྐུར་ན་ཅིར་འགྱུར། དགེ་འདུན་གྱི་ལྷག་མའོ། །དགེ་སློང་མས་དགེ་སློང་ལ་སྐུར་ན་ཅིར་འགྱུར། དགེ་འདུན་གྱི་ལྷག་མའོ། །དགེ་ཚུལ་
ཕས་དགེ་སློབ་མ་དང་། དགེ་ཚུལ་མ་ལ་སྐུར་ན་ཉེས་བྱས་སུ་འགྱུར་རོ། །དགེ་སློབ་མས་དགེ་སློང་མ་དང་། དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་རྣམས་ལ་སྐུར་ན་ཉེས་བྱས་སུ་འགྱུར་རོ། །དགེ་ཚུལ་གྱིས་དགེ་སློང་དང་། དགེ་སློང་མ་དང་། དགེ་སློབ་མ་
དང་། དགེ་ཚུལ་མ་རྣམས་ལ་སྐུར་ན་ཉེས་བྱས་སུ་འགྱུར་རོ། །དགེ་ཚུལ་མས་དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་རྣམས་ལ་སྐུར་ན་ཉེས་བྱས་སུ་འགྱུར་རོ། །བཙུན་པ་དགེ་སློང་བདག་ཉིད་ཀྱིས་བྲིས་ལ་འདི་སྐད་དུ་ཡི་གེ་འདི་ནི་འདི་སྐད་ཟེར་ཏེ།
ཁྱོད་ནི་མི་ཚངས་པར་སྤྱད་པའི་ཕས་ཕམ་པ་བྱུང་ངོ་ཞེས་མཆི་ན་ཅིར་འགྱུར། ཉེས་པ་སྦོམ་པོར་འགྱུར་རོ། །ཇི་ལྟར་རྩ་བ་མེད་པ་དེ་བཞིན་དུ་ཆས་སྐུར་ནའང་དེ་བཞིན་དུ་རྒྱས་པར་བརྗོད་པར་བྱའོ།། །།མདོར་ན། བསྡུམ་པའི་གསོལ་བ་བཏང་སྙོམས་དང་། །གླེང་བ་
དྲན་པར་བྱ་བ་དང་། །བཞི་པ་འདུག་དང་རྟག་པར་དང་། །དད་དང་གཅིག་པུ་ནམ་མཁའ་དང་། །ཁྱེར་བ་རྒྱས་པ་དེ་བཞིན་བྱ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགེ་སློང་བསྡུམ་པར་མ་བསྒོ་བར་གསོལ་བ་དང་བཞིའི་ལས་
ཀྱིས་བསྒོ་ན་བསྒོ་བ་ཞེས་བགྱིའམ། མ་བསྒོ་བ་ཞེས་བགྱི། བསྒོ་བ་འཆགས་སམ་མི་འཆགས། ཨུ་པཱ་ལི་མི་འཆགས་ཏེ། དགེ་འདུན་ལ་ཡང་འདས་པ་དང་བཅས་པར་འགྱུར་རོ། །བཙུན་པ་བསྡུམ་པར་བསྒོ་བས་གསོལ་བ་དང་བཞིའི་ལས་ཀྱིས་བསྒོ་བ་ན་བསྒོ་བ་ཞེས་
བགྱི་འམ། མ་བསྒོ་བ་ཞེས་བགྱི། བསྒོ་བ་འཆགས་སམ་མི་འཆགས། ཨུ་པཱ་ལི་འཆགས་ཏེ་དགེ་འདུན་ལ་ཡང་འདས་པ་དང་བཅས་པར་མི་འགྱུར་རོ། །བཙུན་པ་བསྐྲད་པའི་ལས་མ་བགྱིས་པར་བསྡུམ་པར་བསྒོ་ན་བསྒོ་བ་ཞེས་བགྱིའམ། མ་བསྒོ་བ་ཞེས་བགྱི། བསྒོ་
เล่ม ๑๒ · หน้า 110b
བ་འཆགས་སམ། མི་འཆགས། ཨུ་པཱ་ལི་མི་འཆགས་ཏེ། དགེ་འདུན་ལ་ཡང་འདས་པ་དང་བཅས་པར་འགྱུར་རོ། །བཙུན་པ་བསྐྲད་པའི་ལས་བགྱིས་ལ་བསྡུམ་པར་བསྒོ་ན་བསྒོ་བ་ཞེས་བགྱིའམ། མ་བསྒོ་བ་ཞེས་བགྱི། བསྒོ་བ་འཆགས་སམ་མི་འཆགས་
ཨུ་པཱ་ལི་འཆགས་ཏེ། དགེ་འདུན་ལ་འང་འདས་པ་དང་བཅས་པར་མི་འགྱུར་རོ། །བཙུན་པ་བསྐྲད་པའི་ལས་མ་བགྱིས་པར་གསོལ་བ་དང་བཞིའི་ལས་ཀྱིས་བསྒོ་ན་བསྒོ་བ་ཞེས་བགྱིའམ། མ་བསྒོ་བ་ཞེས་བགྱི། བསྒོ་བ་འཆགས་སམ་མི་འཆགས། ཨུ་པཱ་ལི་མི་
འཆགས་ཏེ། དགེ་འདུན་ལ་ཡང་འདས་པ་དང་བཅས་པར་འགྱུར་རོ། །བཙུན་པ་བསྐྲད་པའི་ལས་བགྱིས་ནས་གསོལ་བ་དང་བཞིའི་ལས་ཀྱིས་བསྒོ་ན་བསྒོ་བ་ཞེས་བགྱིའམ། མ་བསྒོ་བ་ཞེས་བགྱི། བསྒོ་བ་འཆགས་སམ། མི་འཆགས། ཨུ་པཱ་ལི་འཆགས་ཏེ་
དགེ་འདུན་ལ་ཡང་འདས་པ་དང་བཅས་པར་མི་འགྱུར་རོ། །བཙུན་པ་མ་གླེངས་ཤིང་དྲན་པར་མ་བགྱིས་ལ་བདག་ཉིད་ཚིག་བཀའ་བློ་མི་བདེ་བ་ལ་གནས་ན་བསྒོ་བར་བགྱིའམ། ཨུ་པཱ་ལི་མ་ཡིན་ནོ། །བསྒོ་བ་འཆགས་སམ། ཨུ་པཱ་ལི་མི་འཆགས་སོ། །བཙུན་པ་
གླེངས་ཤིང་དྲན་པར་བགྱིས་ལ་བདག་ཉིད་ཚིག་བཀའ་བློ་མི་བདེ་བ་ལ་གནས་ན་ཅིར་འགྱུར། ཉེས་བྱས་སོ། །བསྒོ་བར་བགྱིའམ། ཨུ་པཱ་ལི་བསྒོ་བ་ཞེས་བྱའོ། །བསྒོ་བ་འཆགས་སམ། ཨུ་པཱ་ལི་འཆགས་སོ། །བཙུན་པ་གླེངས་ཤིང་དྲན་པར་བགྱིས་ལ་བདག་
ཉིད་ཚིག་བཀའ་བློ་མི་བདེ་བ་ལ་གནས་ན་ཅིར་འགྱུར། ཉེས་བྱས་སོ། །བསྒོ་བར་བགྱིའམ། ཨུ་པཱ་ལི་བསྒོ་བ་ཞེས་བྱའོ། །བསྒོ་བ་འཆགས་སམ། ཨུ་པཱ་ལི་འཆགས་སོ། །བཙུན་པ་མཚམས་ཀྱི་ནང་ན་མཆིས་པས་མཚམས་ཀྱི་སླད་རོལ་ན་མཆིས་པ་རྣམས་
ལ་བསྒོ་ན་བསྒོ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །མཚམས་ཀྱི་སླད་རོལ་ན་མཆིས་པས་མཚམས་ཀྱི་ནང་ན་མཆིས་པ་རྣམས་ལ་བསྒོ་ན་བསྒོ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་ལས་བགྱིད་པ་མཚམས་ཀྱི་ནང་ན་མཆིས་པས་མཚམས་ཀྱི་
เล่ม ๑๒ · หน้า 111a
སླད་རོལ་ན་མཆིས་པ་རྣམས་ལ་བསྒོ་ན་བསྒོ་བ་ཞེས་བགྱི་འམ། ཨུ་པཱ་ལི་མ་ཡིན་ནོ། །བཙུན་པ་ལས་བགྱིད་པ་མཚམས་ཀྱི་སླད་རོལ་ན་མཆིས་པས་མཚམས་ཀྱི་ནང་ན་མཆིས་པ་རྣམས་ལ་བསྒོ་ན་བསྒོ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །
བཙུན་པ་ལས་བགྱིས་པས་མཚམས་མནན། མཚམས་བཟུང་། མཚམས་སུ་འགྲེང་ངམ། འདུག་སྟེ་བསྒོ་ན་བསྒོ་བ་ཞེས་བགྱིའམ། བསྒོ་བ་འཆགས་སམ། ཨུ་པཱ་ལི་བསྒོ་བ་ཞེས་བྱ་སྟེ། བསྒོ་བ་འཆགས་སོ། །བཙུན་པ་དགེ་སློང་ལས་བགྱིད་པ་
མ་བསྒོས་པས་མཚམས་ཀྱི་ནང་ནས་གང་ཟག་བཞི་ཞིག་སྤངས་ན་སྤངས་པ་ཞེས་བགྱི་འམ། ཨུ་པཱ་ལི་མ་ཡིན་ནོ། །བཙུན་པ་དགེ་སློང་ལས་བགྱིད་པར་བསྐོས་པས་མཚམས་ཀྱི་ནང་ནས་གང་ཟག་བཞི་ཞིག་སྤངས་ན་སྤངས་པ་ཞེས་བགྱིའམ། འོན་ཏེ་རེ་རེ་ནས་སམ།
གཉིས་གཉིས་ནས་སམ། གསུམ་གསུམ་ནས་སྤངས་ན་སྤངས་པ་ཞེས་བྱའོ། །བཙུན་པ་མཚམས་གཅིག་པའི་ཕྱོགས་བཞི་ན་མཚུངས་པར་གནས་པའི་དགེ་སློང་དག་གིས་དགེ་སློང་བཞི་ལ་བསྒོ་ན་བསྒོ་བ་ཞེས་ཀྱང་བགྱི་ལ་ནོངས་པ་ཅུང་ཟད་དུ་ཡང་མི་འགྱུར་ཞིང་
དེས་དགེ་འདུན་མི་མཐུན་པར་ཡང་མི་འགྱུར་བ་ཡང་མཆིས་སམ། ཨུ་པཱ་ལི་ཡོད་དེ། གཅིག་ལ་གཅིག་དད་པ་བྱིན་ལ་དེ་སྟེ་རེ་རེ་འམ། གཉིས་གཉིས་སམ། གསུམ་གསུམ་ལ་བསྒོ་སྟེ། བཞིར་མ་ཚང་ནའོ། །དེ་ཅིའི་ཕྱིར་ཞེ་ན། མང་པོས་མང་པོ་ལ་
ལས་བྱར་མི་རུང་ངོ་། །བཙུན་པ་ལས་བགྱིད་པ་ཕྱོགས་གཅིག་ཏུ་མཆིས་པ་གནས་བཞིའི་ལས་ཐམས་ཅད་བགྱི་བར་རུང་ངམ། ཨུ་པཱ་ལི་རུང་སྟེ། ཇི་ལྟར་དེ་ཡང་དགེ་སློང་ལས་བྱེད་པ་དེས་གནས་བཞི་ཆར་གྱི་མཚམས་ཀྱི་མདོར་ཁྲིའམ། ཁྲིའུའམ། སྨྱུག་མའམ།
རེ་ལྡེ་ལ་མནན་ཏེ་འདུག་པར་གྱུར་ལ་གནས་དེ་དག་ཏུ་འདི་ལྟ་སྟེ། བཞི་སྡེས་བྱ་བའི་ལས་སམ། ལྔ་སྡེས་བྱ་བའི་ལས་སམ། བཅུ་སྡེས་བྱ་བའི་ལས་སམ། ཉི་ཤུ་སྡེས་བྱ་བའི་ལས་ཀྱང་རུང་སྟེ། ལས་འདི་ལྟ་བུ་དག་ཉེ་བར་བྱུང་བར་གྱུར་པ་སྟེ། དེ་ཅིའི་ཕྱིར་ཞེ་ན། དེ་
เล่ม ๑๒ · หน้า 111b
ནི་དེ་དག་གི་ལས་བྱེད་པའོ། །དེ་ནི་དེ་དག་གི་གྲངས་སུ་སྐོང་བའོ། །ས་ལ་མཆིས་པས་ནམ་མཁའ་ལ་མཆིས་པ་རྣམས་ལ་བསྒོ་ན་བསྒོ་བ་ཞེས་བགྱི་འམ། ཨུ་པཱ་ལི་མ་ཡིན་ནོ། །བཙུན་པ་ལས་བགྱིད་པ་ནམ་མཁའ་ལ་མཆིས་ལ་ས་ལ་མཆིས་པ་རྣམས་ལ་བསྒོ་ན་བསྒོ་བ་
ཞེས་བགྱི་འམ། ཨུ་པཱ་ལི་མ་ཡིན་ནོ། །དགེ་འདུན་གྱི་ལྷག་མ་བཞི་པོ་ལུས་པ་ལ་ཡང་དེ་བཞིན་དུ་བརྗོད་པར་བྱའོ། །དགེ་སློང་ལ་ཇི་ལྟ་བ་བཞིན་དུ་བསླབ་པ་བྱིན་པ་དང་། དགེ་སློང་མ་རྣམས་ལ་ཡང་དགེ་འདུན་གྱི་ལྷག་མར་འགྱུར་རོ། །དགེ་སློབ་མ་དང་། དགེ་ཚུལ་ཕ་
དང་། དགེ་ཚུལ་མ་རྣམས་ལ་ཉེས་བྱས་སོ། །ཨུ་པཱ་ལིས་ཞུས་པའི་ནང་ནས་དགེ་འདུན་གྱི་ལྷག་མ་རྫོགས་སོ།། །།མདོར་ན། ཐ་མ་ལམ་དང་རྒྱལ་རིགས་དང་། །ཕུང་པོ་ལྷག་མ་དེ་བཞིན་ཏེ། །ཁ་དང་ཤ་ཀ་ར་དང་ཧྭགས། །བུ་རམ་མར་དང་མི་
མངོན་པའོ། །བཙུན་པ་དགེ་བསྙེན་མ་དད་པ་ཞིག་དགེ་སློང་དེའི་དྲུང་དུ་མཆིས་ནས་འདི་སྐད་དུ་བཙུན་པ་བདག་གིས་དགེ་སློང་ཞིག་ལ་ཐ་མ་དང་པོ་བགྱིད་པ་མཐོང་ངོ་ཞེས་མཆི་ན་དགེ་བསྙེན་མ་དད་པའི་ཚིག་བཞིན་བགྱི་འམ་མི་བགྱི་མི་བྱའོ། །དེ་དེའི་ངོ་བོ་ཚོལ་དུ་སྩལ་
ཏམ། མི་སྩལ། མི་གཞུག་སྟེ་དེ་ན་ཟླ་ལྟ་ཡོད་དམ་ཞེས་དེ་ལ་དྲི་བར་བྱའོ། །དེ་སྟེ་ཡོད་དོ་ཞེས་ཟེར་ན་གཉི་ག་ལ་དྲིས་པ་ལ་དེ་སྟེ་མཐུན་ན་དགེ་བསྙེན་མ་དད་པའི་ཚིག་བཞིན་དུ་གྱིས་ཤིག །དེ་དེའི་ངོ་བོ་ཚོལ་དུ་ཡང་ཆུག་ཤིག །འོན་ཏེ་དེས་འདི་སྐད་སྨྲ་སྟེ། ཐ་མ་དང་
པོའི་ཉེས་པ་ནི་མ་བྱུང་གི་བདག་གིས་གཉིས་པའམ། གསུམ་པའམ། བཞི་པའང་རུང་། ཉེས་པ་བྱུང་བ་ནི་མཐོང་ངོ་ཞེས་སྨྲས་ན་དགེ་སློང་དམ་འཆར་ཆུག་ཤིག །ཇི་ལྟར་དང་པོ་པ་དེ་བཞིན་དུ་གཉིས་པ་དང་། གསུམ་པ་དང་། བཞི་པའི་ཐ་མ་རྣམས་ལ་ཡང་དེ་ལྟར་བྱའོ། །
བཙུན་པ་དགེ་བསྙེན་མ་དད་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས་འདི་སྐད་དུ། བཙུན་པ་དགེ་སློང་ཞིག་གིས་ཁའི་སྒོར་མ་རུང་བར་བགྱིས་པ་བདག་གིས་མཐོང་ངོ་ཞེས་མཆི་ན་དགེ་བསྙེན་མ་དད་པའི་ཚིག་བཞིན་དུ་བགྱིའམ། མི་བྱའོ། །དེ་དེའི་ངོ་བོ་ཚོལ་དུ་སྩལ་ཏམ།
เล่ม ๑๒ · หน้า 112a
མི་གཞུག་གོ། །དེ་ལ་ཅི་དེ་ན་ཟླ་ལྟ་ཡོད་དམ་ཞེས་དྲིས་ལ་དེ་སྟེ་ཡོད་དོ་ཞེས་ཟེར་ན་གཉི་ག་ལ་དྲིས་ཤིག །དེ་སྟེ་མཐུན་ན་དགེ་བསྙེན་མ་དད་པའི་ཚིག་བཞིན་དུ་བྱ་སྟེ། དེ་དེའི་ངོ་བོ་ཚོལ་དུ་ཡང་ཆུག་ཤིག །འོན་ཏེ་དེས་འདི་སྐད་དུ་འདིས་ཁའི་སྒོར་ནི་མ་རུང་
བར་མ་གྱུར་མོད་ཀྱི་བཤང་བའི་སྒོར་མ་རུང་ངོ་ཞེས་ཟེར་ན་དགེ་སློང་དེ་དམ་འཆར་ཆུག་ཤིག །ཁའི་སྒོ་ཇི་ལྟ་བ་དེ་བཞིན་དུ་གཅི་བའི་སྒོ་དང་། བཤང་བའི་སྒོར་ཡང་དེ་བཞིན་དུ་བྱའོ། །བཙུན་པ་དགེ་བསྙེན་མ་དད་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས་འདི་སྐད་དུ།
བཙུན་པ་དགེ་སློང་ཞིག་རྒྱལ་རིགས་མ་ཞིག་དང་ལྷན་ཅིག་ཏུ་མ་རུང་བར་གྱུར་པ་བདག་གིས་མཐོང་ངོ་ཞེས་མཆི་ན། དགེ་བསྙེན་མ་དད་པའི་ཚིག་བཞིན་དུ་བགྱིའམ། མི་བྱའོ། །དེའི་ངོ་བོ་ཚོལ་དུ་སྩལ་ཏམ། མི་གཞུག་གོ། །དེ་ལ་དེ་ན་ཇི་ཟླ་ལྟ་ཡོད་དམ་ཞེས་དྲིས་ཤིག །
དེ་སྟེ་ཡོད་དོ་ཞེས་ཟེར་ན་གཉི་ག་ལ་དྲིས་ལ་དེ་སྟེ་མཐུན་ན་དགེ་བསྙེན་མ་དད་པའི་ཚིག་བཞིན་དུ་བྱ་སྟེ། དེ་དེའི་ངོ་བོ་ཚོལ་དུ་གཞུག་གོ། །འོན་ཏེ་དེས་འདི་སྐད་དུ་འདི་རྒྱལ་རིགས་མ་དང་ལྷན་ཅིག་ཏུ་མ་རུང་བར་ནི་མ་གྱུར་གྱི་འདི་ནི་བྲམ་ཟེ་མོ་དང་། མ་རུང་བར་གྱུར་ཏོ་ཞེས་
ཟེར་ན་དགེ་སློང་དམ་འཆར་ཆུག་ཤིག །རྒྱལ་རིགས་མ་ལ་ཇི་ལྟ་བ་དེ་བཞིན་དུ་བྲམ་ཟེ་མོ་དང་། རྗེའུ་རིགས་མོ་དང་། དཀར་མོ་དང་། སྔོན་མོ་དང་། སེར་སྐྱ་མོ་དང་། རིང་མོ་དང་། ཐུང་ངུ་མ་དང་། ཤིན་ཏུ་ལེགས་པ་མོ་དང་། རིད་དེ་མ་དང་། ཚོན་མོ་དང་།
ལུས་མཉམ་པ་དང་། འགྲོ་བ་དང་། འདུག་པ་དང་། འགྲེང་བ་དང་། འཕྲེས་པ་རྣམས་ལ་ཡང་རྒྱས་པར་བྱའོ། །བཙུན་པ་དགེ་བསྙེན་མ་དད་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས་འདི་སྐད་དུ། བཙུན་པ་དགེ་སློང་ཞིག་གིས་ལྟུང་བའི་ཕུང་པོ་དང་། ཉེས་
པ་བྱུང་བ་བདག་གིས་མཐོང་ངོ་ཞེས་མཆི་ན། དགེ་བསྙེན་མ་དད་པའི་ཚིག་བཞིན་བགྱིའམ། མི་བྱའོ། །དེའི་ངོ་བོ་ཚོལ་དུ་སྩལ་ཏམ། མི་གཞུག་གོ། །དེ་ལ་དེ་ན་ཇི་ཟླ་ལྟ་ཡོད་དམ་ཞེས་དྲིས་ཤིག །དེ་སྟེ་ཡོད་དོ་ཞེས་ཟེར་ན་གཉི་ག་ལ་དྲིས་ལ་དེ་སྟེ་མཐུན་པར་ཟེར་ན་
เล่ม ๑๒ · หน้า 112b
དགེ་བསྙེན་མ་དད་པའི་ཚིག་བཞིན་དུ་བྱ་སྟེ། དེ་དེའི་ངོ་བོ་ཚོལ་དུ་ཡང་ཆུག་ཤིག །འོན་ཏེ་དེས་འདི་སྐད་དུ་འདིས་ལྟུང་བའི་ཕུང་པོ་དང་པོ་ནི་མ་བྱུང་གི་གཉིས་པ་དང་། གསུམ་པ་དང་། བཞི་པ་དང་། ལྔ་པའི་ཕུང་པོ་རྣམས་ནི་བྱུང་ངོ་ཞེས་ཟེར་ན་དེ་བཞིན་དུ་ལྔ་པའི་བར་དུ་སྨྲོས་ཤིག
བཙུན་པ་དགེ་བསྙེན་མ་དད་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས་འདི་སྐད་དུ། བཙུན་པ་དགེ་སློང་ཞིག་གིས་དགེ་འདུན་གྱི་ལྷག་མ་དང་པོ་བྱུང་བ་བདག་གིས་མཐོང་ངོ་ཞེས་མཆི་ན། དགེ་བསྙེན་མ་དད་པའི་ཚིག་བཞིན་དུ་བགྱིའམ། མི་བྱའོ། །དེ་དེའི་ངོ་བོ་ཚོལ་དུ་སྩལ་
ཏམ། མི་གཞུག་གོ། །དེ་ལ་ཅི་དེ་ན་ཟླ་ལྟ་ཡོད་དམ་ཞེས་དྲིས་ཤིག །དེ་སྟེ་ཡོད་དོ་ཞེས་ཟེར་ན་གཉི་ག་ལ་དྲིས་ལ་དེ་སྟེ་མཐུན་པར་སྨྲས་ན་ནི་དགེ་བསྙེན་མ་དད་པའི་ཚིག་བཞིན་དུ་བྱོས་ཤིག །དེ་དེའི་ངོ་བོ་ཚོལ་དུ་ཆུག་ཤིག །འོན་ཏེ་དེས་འདི་སྐད་དུ་དགེ་འདུན་གྱི་ལྷག་མ་དང་
པོ་ནི་མ་བྱུང་གི །གཉིས་པ་དང་། གསུམ་པ་དང་། བཞི་པ་ནས་དགེ་འདུན་གྱི་ལྷག་མ་བཅུ་གསུམ་གྱི་བར་དུ་བྱུང་ངོ་ཞེས་ཟེར་ན་དགེ་སློང་དམ་འཆར་ཆུག་ཤིག །དང་པོ་ལ་ཇི་ལྟ་བ་བཞིན་གཉིས་པ་དང་། གསུམ་པ་ནས་དགེ་འདུན་གྱི་ལྷག་མ་བཅུ་གསུམ་གྱི་བར་དུ་ཡང་
དེ་བཞིན་ནོ། །དགེ་བསྙེན་མ་དད་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས། འདི་སྐད་དུ་བཙུན་པ་དགེ་སློང་ཞིག་གིས་ཁར་ཁུ་བ་ཕྱུང་བ་བདག་གིས་མཐོང་ངོ་ཞེས་མཆི་ན། དགེ་བསྙེན་མ་དད་པའི་ཚིག་བཞིན་དུ་བགྱི་འམ། མི་བྱའོ། །དེའི་ངོ་བོ་ཚོལ་དུ་སྩལ་ཏམ།
མི་གཞུག་གོ། །དེ་ལ་ཅི་དེ་ན་ཟླ་ལྟ་ཡོད་དམ་ཞེས་དྲིས་ཤིག །དེ་སྟེ་ཡོད་དོ་ཞེས་ཟེར་ན་དེ་གཉི་ག་ལ་ཡང་དྲིས་ལ་དེ་སྟེ་མཐུན་པར་སྨྲ་ན་དགེ་བསྙེན་མ་དད་པའི་ཚིག་བཞིན་དུ་བྱ་སྟེ། དེའི་ངོ་བོ་ཚོལ་དུ་ཡང་གཞུག་གོ། །འོན་ཏེ་དེས་འདི་སྐད་དུ་ཁར་ནི་མ་རུང་བར་ནི་མ་གྱུར་གྱི་སོའི་ཕྱི་
རོལ་མཆུར་ཁུ་བ་ཕྱུང་ངོ་ཞེས་ཟེར་ན། དགེ་སློང་དམ་འཆར་ཆུག་ཤིག །བཙུན་པ་དགེ་བསྙེན་མ་དད་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས། འདི་སྐད་དུ་དགེ་སློང་ཞིག་གཅི་བའི་ལམ་དུ་ཁུ་བ་ཕྱུང་བར་བདག་གིས་མཐོང་ངོ་ཞེས་མཆི་ན། དགེ་བསྙེན་མ་དད་པའི་
เล่ม ๑๒ · หน้า 113a
ཚིག་བཞིན་དུ་བགྱིའམ། མི་བྱའོ། །དེའི་ངོ་བོ་ཚོལ་དུ་སྩལ་ཏམ། མི་གཞུག་གོ། །དེ་ལ་ཅི་དེ་ན་ཟླ་ལྟ་ཡོད་དམ་ཞེས་དྲིས་ཤིག །དེ་སྟེ་ཡོད་དོ་ཞེས་ཟེར་ན། དེ་གཉི་ག་ལ་ཡང་དྲིས་ལ་དེ་སྟེ་མཐུན་པར་སྨྲ་ན། དགེ་བསྙེན་མ་དད་པའི་ཚིག་བཞིན་དུ་བྱ་སྟེ།
དེ་དེའི་ངོ་བོ་ཚོལ་དུ་ཡང་གཞུག་གོ། །འདི་ཡིས་གཅི་བའི་ལམ་དུ་ནི་མ་རུང་བར་མ་བྱས་ཀྱི་བརླའི་ནང་དུ་ཁུ་བ་བླུགས་སོ་ཞེས་ཟེར་ན། དགེ་སློང་དམ་འཆར་ཆུག་ཤིག །བཙུན་པ་དགེ་བསྙེན་མ་དད་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས་འདི་སྐད་དུ། དགེ་སློང་ཞིག་
གིས་བཤང་བའི་ལམ་དུ་ཁུ་བ་ཕྱུང་བར་བདག་གིས་མཐོང་ངོ་ཞེས་མཆི་ན། དགེ་བསྙེན་མ་དད་པའི་ཚིག་བཞིན་དུ་བགྱི་འམ། མི་བྱའོ། །དེ་དེའི་ངོ་བོ་ཚོལ་དུ་སྩལ་ཏམ། མི་གཞུག་གོ། །དེ་ལ་ཅི་དེ་ན་ཟླ་ལྟ་ཡོད་དམ་ཞེས་དྲིས་ཤིག །དེ་སྟེ་ཡོད་དོ་ཞེས་ཟེར་ན་དེ་གཉི་ག་ལ་ཡང་དྲིས་
ལ་དེ་སྟེ་མཐུན་པར་སྨྲ་ན། དགེ་བསྙེན་མ་དད་པའི་ཚིག་བཞིན་དུ་བྱ་སྟེ། དེ་དེའི་ངོ་བོ་ཚོལ་དུ་ཡང་གཞུག་གོ། །འོན་ཏེ་དེ་འདི་སྐད་དུ་བཤང་བའི་ལམ་དུ་ནི་མ་རུང་བར་མ་གྱུར་གྱི་འདིས་སྣའི་ནང་དུ་ཁུ་བ་ཕྱུང་ངོ་ཞེས་ཟེར་ན། དགེ་སློང་དམ་འཆར་ཆུག་ཤིག །བཙུན་པ་དགེ་
སློང་མ་དད་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས། འདི་སྐད་དུ་བཙུན་པ་བདག་གིས་དགེ་སློང་ཞིག་དུས་མ་ཡིན་པར་སྐྱོ་མ་འཐུང་བ་མཐོང་ངོ་ཞེས་མཆི་ན། དེ་དེའི་ངོ་བོ་ཚོལ་དུ་སྩལ་ཏམ། མི་གཞུག་གོ། །དེ་ལ་ཅི་དེ་ན་ཟླ་ལྟ་ཡོད་དམ་ཞེས་དྲིས་ཤིག །དེ་སྟེ་ཡོད་དོ་ཞེས་
ཟེར་ན་གཉི་ག་ལ་ཡང་དྲིས་ལ་དེ་སྟེ་མཐུན་པར་སྨྲས་ན། དགེ་བསྙེན་མ་དད་པའི་ཚིག་བཞིན་དུ་བྱ་སྟེ། དེ་དེའི་ངོ་བོ་ཚོལ་དུ་ཆུག་ཤིག །འོན་ཏེ་དེས་འདི་སྐད་དུ་འདིས་དུས་མ་ཡིན་པར་སྐྱོ་མ་ནི་མ་འཐུངས་ཀྱི་ཤ་ཁ་རའི་ཆུ་ཞིག་ནི་འདིས་འཐུངས་སོ་ཞེས་ཟེར་ན། དགེ་སློང་དམ་
འཆར་ཆུག་ཤིག །བཙུན་པ་དགེ་བསྙེན་མ་དད་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས་འདི་སྐད་དུ། བཙུན་པ་དགེ་སློང་གིས་བུ་རམ་ཆང་ཞིག་འཐུངས་པ་བདག་གིས་མཐོང་ངོ་ཞེས་མཆི་ན། དགེ་བསྙེན་མ་དད་པའི་ཚིག་བཞིན་དུ་བགྱིའམ། མི་བྱའོ། །དེའི་ངོ་བོ་
เล่ม ๑๒ · หน้า 113b
ཚོལ་དུ་སྩལ་ཏམ། མི་གཞུག་གོ། །དེ་ལ་ཅི་དེ་ན་ཟླ་ལྟ་ཡོད་དམ་ཞེས་དྲིས་ཤིག །དེ་སྟེ་ཡོད་དོ་ཞེས་ཟེར་ན་དེ་གཉི་ག་ལ་དྲིས་ལ་དེ་སྟེ་མཐུན་པར་སྨྲ་ན། དགེ་བསྙེན་མ་དད་པའི་ཚིག་བཞིན་དུ་བྱ་སྟེ། དེའི་ངོ་བོ་ཚོལ་དུ་ཆུག་ཤིག །འོན་ཏེ་དེས་འདི་སྐད་དུ་འདིས་བུ་
རམ་ཆང་ནི་མ་འཐུངས་ཀྱི་འདིས་ཧྭགས་ཀྱི་ཆུ་ཞིག་འཐུངས་སོ་ཞེས་ཟེར་ན། དགེ་སློང་དམ་འཆར་ཆུག་ཤིག །བཙུན་པ་དགེ་བསྙེན་མ་དད་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས་འདི་སྐད་དུ་བཙུན་པ་དུས་མ་ལགས་པར་ཤ་ཟ་བ་བདག་གིས་མཐོང་ངོ་ཞེས་མཆི་ན། དགེ་
བསྙེན་མ་དད་པའི་ཚིག་བཞིན་དུ་བགྱིའམ། མི་བྱའོ། །དེ་དེའི་ངོ་བོ་ཚོལ་དུ་སྩལ་ཏམ། མི་གཞུག་གོ། །དེ་ལ་ཅི་དེ་ན་ཟླ་ལྟ་ཡོད་དམ་ཞེས་དྲིས་ཤིག །དེ་སྟེ་ཡོད་དོ་ཞེས་ཟེར་ན་གཉི་ག་ལ་འང་དྲིས་ལ་དེ་སྟེ་མཐུན་པར་སྨྲ་ན། དགེ་བསྙེན་མ་དད་པའི་ཚིག་བཞིན་དུ་བྱ་སྟེ།
དེའི་ངོ་བོ་ཚོལ་དུ་ཆུག་ཤིག །འོན་ཏེ་དེས་འདི་སྐད་དུ་འདིས་དུས་མ་ཡིན་པར་ཤ་ནི་མ་ཟོས་ཀྱི། འདིས་བུ་རམ་ཞིག་ཟོས་སོ་ཞེས་ཟེར་ན། དགེ་སློང་དམ་འཆར་ཆུག་ཤིག །བཙུན་པ་དགེ་བསྙེན་མ་དད་པ་ཞིག་དགེ་སློང་རྣམས་ཀྱི་དྲུང་དུ་མཆིས་ནས་འདི་སྐད་དུ་བཙུན་པ་དགེ་
སློང་ཞིག་གིས་དུས་མ་ལགས་པར་ཁ་ཟས་ཟ་བ་བདག་གིས་མཐོང་ངོ་ཞེས་མཆི་ན། དགེ་བསྙེན་མ་དད་པའི་ཚིག་བཞིན་དུ་བགྱིའམ། མི་བྱའོ། །དེ་དེའི་ངོ་བོ་ཚོལ་དུ་སྩལ་ཏམ། མི་གཞུག་གོ། །དེ་ལ་ཅི་དེ་ན་ཟླ་ལྟ་ཡོད་དམ་ཞེས་དྲིས་ཤིག །དེ་སྟེ་ཡོད་དོ་ཞེས་ཟེར་ན་དེ་གཉི་
ག་ལའང་དྲིས་ལ་དེ་སྟེ་མཐུན་པར་སྨྲ་ན། དགེ་བསྙེན་མ་དད་པའི་ཚིག་བཞིན་དུ་བྱ་སྟེ། དེ་དེའི་ངོ་བོ་ཚོལ་དུ་ཆུག་ཤིག །འོན་ཏེ་དེས་འདི་སྐད་དུ་འདིས་དུས་མ་ཡིན་པར་ཁ་ཟས་ནི་མ་ཟོས་ཀྱི་འདིས་མར་ཞིག་ཟོས་སོ་ཞེས་ཟེར་ན་དགེ་སློང་དམ་འཆར་ཆུག་ཤིག །དགེ་བསྙེན་
མ་དད་པའི་བདེན་པ་མཐོང་བས་མི་མངོན་པའི་དངོས་པོ་གང་སྨྲས་ཀྱང་རུང་སྟེ། དགེ་སློང་དམ་འཆར་ཆུག་ཤིག །མི་མངོན་པ་རྫོགས་སྷོ།། །།འདུལ་བ་གཞུང་དམ་པ། བམ་པོ་གསུམ་པ། མདོར་ན། དེ་ཉིད་སྟོར་དང་ཚིག་པ་དང་། །སེམས་འཁྲུགས་
เล่ม ๑๒ · หน้า 114a
བྱིན་གྱིས་མ་བརླབས་པ། །མི་རུང་བ་དང་དུས་ལས་འདས། །མཚན་དང་བཞི་བརྒྱུད་གསུམ་པའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགུང་བཅུ་ལས་འདས་པའི་གོས་ཀྱང་དེ་ཉིད་ལགས་ལ་དེ་ཉིད་དགུང་
གཅིག་གིས་བྲལ་བར་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟ་ཡང་དགེ་སློང་དེས་གོས་ཀྱི་རྒྱུན་མ་ཆད་པར་ཞག་བཅུ་པོའི་ཐ་མ་ལ་གོས་ཤིག་རྙེད་དེ་དེས་གོས་དེ་བྱིན་གྱིས་བརླབས་ནས། མཚམས་ཀྱི་ཕྱི་རོལ་དུ་གོས་དེ་མེད་པར་སྐྱ་རེངས་ཤར་ན་གོས་དེ་ནི་ཞག་
བཅུ་འདས་ཤིང་ནུབ་གཅིག་བྲལ་བའོ། །བཙུན་པ་དགེ་སློང་གིས་སྤང་བའི་གོས་སྟོར་བར་གྱུར་ན་ནོངས་པ་བཤགས་པར་བགྱིའམ། ཨུ་པཱ་ལི་བཤགས་པར་བྱའོ། །ནོངས་པ་བཤགས་ནས་རྙེད་པ་སྤང་ངམ། ཨུ་པཱ་ལི་མ་ཡིན་ནོ། །བཙུན་པ་དགེ་སློང་གིས་སྤང་
བའི་གོས་མེས་ཚིག་གམ། ཟོས་པར་གྱུར་ན་དུམ་བུ་དེ་ཡང་སྤང་བར་བགྱིའམ། ཨུ་པཱ་ལི་མ་ཡིན་ཏེ། ཉེས་པ་འབའ་ཞིག་བཤགས་པར་བྱའོ། །འོན་ཏེ་ཁྲུ་གང་གྲུ་བཞི་ཡན་ཆད་ལུས་པར་གྱུར་ན་སྤང་བར་བྱའོ། །བཙུན་པ་དགེ་སློང་གིས་གོས་རྙེད་མ་ཐག་ཏུ་སེམས་
འཁྲུགས་པར་གྱུར་ན་གང་ནས་བཟུང་སྟེ། དེའི་དགུང་བཅུར་བགྲང་བར་བགྱི། ནམ་རང་གི་སེམས་ཕྱིར་རྙེད་པ་ནས་གཟུང་ངོ་། །བཙུན་པ་དགེ་སློང་གིས་གོས་བརྒྱད་དམ་དགུ་ཞིག་བྱིན་གྱིས་མ་བརླབས་མ་བསྔོས་པར་ནམ་འཚོའི་བར་དུ་བཅངས་ན་ནོངས་པར་མི་འགྱུར་
བ་མཆིས་སམ། ཨུ་པཱ་ལི་ཡོད་དེ། ཇི་ལྟར་དགེ་སློང་གིས་ཉི་མ་རེ་རེ་ཞིང་གོས་ལས་སླར་ཕྱུང་སྟེ་གཞན་ལ་བྱིན་གྱིས་རློབ་པའོ། །བཙུན་པ་བཅོམ་ལྡན་འདས་ཀྱིས་དགུང་བཅུ་འདས་ན་གོས་སྤང་བར་འགྱུར་རོ་ཞེས་གསུངས་ན། བཙུན་པ་དགེ་སློང་གིས་གོས་
དགུང་བཅུ་ལས་ལྷག་པར་བཅངས་ཀྱང་ལྟུང་བར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་གོས་ཀྱི་རྒྱུ་རུང་བར་གྱུར་ལ་སྤུན་མི་རུང་བར་གྱུར་པ་དང་། རྒྱུ་མ་རུང་བར་གྱུར་ལ་སྤུན་རུང་བར་གྱུར་པ་དང་། གཉི་ག་མི་རུང་བར་གྱུར་པ་སྟེ། མི་རུང་བ་ནི་རྔ་མོའི་
เล่ม ๑๒ · หน้า 114b
བལ་དང་། བ་ལང་གི་བལ་དང་། རའི་བལ་དང་། རི་དགས་ཀྱི་བལ་དང་། འདྲེས་པ་དང་། ཐགས་སུ་མ་བཏགས་པ་དེ་ལྟ་བུའི་གོས་ཞག་བཅུ་ལས་ལྷག་པར་བཅངས་ན་ཉེས་བྱས་སུ་འགྱུར་རོ། །བཙུན་པ་བཅོམ་ལྡན་འདས་ཀྱིས་དགེ་སློང་ཞིག་གིས་ཞག་བཅུའི་བར་དུ་
གོས་ལྷག་པ་བཅང་བར་བྱའོ་ཞེས་གསུངས་ན། བཙུན་པ་དགེ་སློང་གིས་ནམ་འཚོའི་བར་དུ་གོས་ལྷག་པར་བཅངས་ན་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དོ། །ཞག་བཅུ་ཚུན་ཆད་དུ་དུས་འདས་པར་གྱུར་ནའོ། །བཙུན་པ་བཅངས་ན་ནོངས་པར་མི་འགྱུར་
བའི་གོས་ཀྱང་དེ་ཉིད་ལགས་ལ། བཅངས་ན་ནོངས་པར་འགྱུར་བའི་གོས་ཀྱང་དེ་ཉིད་ལགས་པ་མཆིས་སམ། ཨུ་པཱ་ལི་ཡོད་དེ། ཇི་ལྟར་དགེ་སློང་དེས་རིན་ཆེ་བའི་གོས་ཤིག་བཅངས་པ་ལས་མཚན་འཕོས་ནས་དགེ་སློང་མར་གྱུར་ཏེ་བཅངས་ན་ཉེས་པར་འགྱུར་རོ། །བཙུན་
པ་དགེ་སློང་གིས་གོས་རྙེད་ནས་དགུང་བཅུ་འདས་པ་དང་མཚན་འཕོས་ཏེ་དགེ་སློང་མར་གྱུར་ནས་དགུང་བཅུ་འདས་ན་ཅིར་འགྱུར། སྤང་བའི་ལྟུང་བར་འགྱུར་རོ། །བཙུན་པ་དགེ་སློང་མས་གོས་རྙེད་ནས་དགུང་བཅུ་འདས་པ་དང་མཚན་འཕོས་ནས་དགེ་སློང་ཕར་གྱུར་ཏེ།
དགུང་བཅུ་འདས་ན་ཅིར་འགྱུར། སྤང་བའི་ལྟུང་བར་འགྱུར་རོ། །བཙུན་པ་དགེ་སློང་གིས་དགུང་བཅུ་ལ་དགུང་བཅུར་འདུ་ཤེས་ཏེ་སྐྱ་རེངས་ཤར་ན་ཅིར་འགྱུར། སྤང་བའི་ལྟུང་བར་འགྱུར་རོ། །བཙུན་པ་དགུང་བཅུ་མ་ལགས་པར་འདུ་ཤེས་ན་ཅིར་འགྱུར། ཉེས་པ་མེད་
དོ། །དགུང་བཅུ་མ་ལགས་པ་ལ་དགུང་བཅུར་འདུ་ཤེས་ན་ཅིར་འགྱུར། ཉེས་བྱས་སོ། །ཞག་བཅུ་མ་ལོན་པ་ལ་ཞག་བཅུ་མ་ལོན་པར་འདུ་ཤེས་ན་ལྟུང་བ་མེད་དོ། །བཙུན་པ་གཏན་པ་གདིང་བའི་གནས་སུ་དགེ་སློང་གིས་གོས་ཤིག་རྙེད་ན། གོས་དེ་སྤང་བར་འགྱུར་
བ་མཆིས་སམ། ཨུ་པཱ་ལི་ཡོད་དེ། ཇི་ལྟར་དགེ་སློང་དེའི་གོས་སྤང་བར་གྱུར་ནས་དགེ་སློང་དེས་གོས་དེ་མ་སྤངས། བྲལ་བར་མ་བྱས། ཉེས་པ་མ་མཐོལ་བའི་བར་དུ་དགེ་འདུན་གྱིས་གཏན་པ་གདིང་བ་དང་། དགེ་སློང་དེས་གོས་རྙེད་ན་སྤང་བར་འགྱུར་རོ། །བཙུན་པ་
เล่ม ๑๒ · หน้า 115a
བསླབ་པ་སྩལ་བ་རྣམས་ཀྱིས་དགུང་བཅུ་པས་ལྷག་པར་གོས་ལྷག་པ་བཅངས་ན་ཅིར་འགྱུར། སྤང་བའི་ལྟུང་བར་འགྱུར་རོ། །བཙུན་པ་དགེ་སློང་མས་དགུང་བཅུ་ལས་འདས་པར་གོས་ལྷག་པ་བཅངས་ན་ཅིར་འགྱུར། སྤང་བའི་ལྟུང་བར་འགྱུར་རོ། །དགེ་སློབ་
མ་དང་། དགེ་ཚུལ་ཕ་དང་། དགེ་ཚུལ་མ་རྣམས་ཀྱིས་གོས་ཞག་བཅུ་ལས་འདས་པར་གོས་ལྷག་པ་བཅངས་ན་ཉེས་བྱས་སུ་འགྱུར་རོ།། །།མདོར་ན། དགེ་འདུན་གྱི་དང་ས་དང་མཚམས། །མནན་དང་བསྐོར་བར་མ་བྱས་དང་། །མཚམས་མ་བཅད་དང་མ་གཡོགས་དང་། །
བཞི་རྒྱུད་མཚན་ཡང་དེ་བཞིན་ནོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགེ་འདུན་གྱི་ཆོས་གོས་བྱིན་གྱིས་བརླབས་པར་གནང་ངམ། ཨུ་པཱ་ལི་མི་གནང་ངོ་། །བཙུན་པ་དེ་འདྲ་བའི་རྐྱེན་བྱུང་ན་གནང་ངམ། ཨུ་པཱ་ལི་གནང་ངོ་། །
བཙུན་པ་དགེ་སློང་གིས་དགེ་འདུན་གྱི་ཆོས་གོས་བྱིན་གྱིས་བརླབས་ཏེ། ཆོས་གོས་མ་མཆིས་པར་མཚམས་ཀྱི་སླད་རོལ་དུ་བྲལ་བར་བགྱིས་ན་ཆོས་གོས་དང་བྲལ་བ་ཞེས་བགྱིའམ། བྲལ་བ་ཞེས་བྱའོ། །ཆོས་གོས་དེ་སྤང་བར་བགྱིའམ། ཨུ་པཱ་ལི་མ་ཡིན་ནོ། །ནོངས་
པ་མཐོལ་བར་བགྱི་འམ། མཐོལ་བར་བྱའོ། །བཙུན་པ་དགེ་སློང་གིས་ཆོས་གོས་ས་ལ་བཞག་སྟེ་ནམ་མཁའ་ལ་སྐྱ་རེངས་ཤར་རམ། ཆོས་གོས་ནམ་མཁའ་ལ་བཞག་སྟེ་ས་ལ་སྐྱ་རེངས་ཤར་ན་ཆོས་གོས་དང་བྲལ་བའམ་མ་བྲལ་བ་ཞེས་བགྱི། བྲལ་བ་ཞེས་བྱའོ། །
བཙུན་པ་དགེ་སློང་གིས་ཆོས་གོས་མཚམས་ཀྱི་ནང་དུ་བཞག་སྟེ་མཚམས་ཀྱི་སླད་རོལ་དུ་སྐྱ་རེངས་ཤར་རམ། མཚམས་ཀྱི་སླད་རོལ་དུ་ཆོས་གོས་བཞག་ལ་མཚམས་ཀྱི་ནང་དུ་སྐྱ་རེངས་ཤར་ན་ཆོས་གོས་དང་བྲལ་བ་ཞེས་བགྱིའམ། བྲལ་བ་ཞེས་བྱའོ། །བཙུན་པ་
དགེ་སློང་གིས་མཚམས་མནན་ནས་མཚམས་སུ་བཟུང་མཚམས་སུ་འགྲེང་ངམ་འདུག་ལ་མཚམས་ཀྱི་བར་དུ་ཆོས་གོས་བཞག་སྟེ་སྐྱ་རེངས་ཤར་ན་ཆོས་གོས་དང་བྲལ་བ་ཞེས་བགྱིའམ། བྲལ་བ་ཞེས་བྱའོ། །བཙུན་པ་དགེ་སློང་མཚམས་ཀྱི་ནང་དུ་མཆིས་ལ་ཆོས་གོས་ཀྱང་
เล่ม ๑๒ · หน้า 115b
མཚམས་ཀྱི་ནང་དུ་བཞག་པ་ལས་ཆོས་གོས་དེ་དང་འབྲལ་བར་འགྱུར་བ་མཆིས་སམ། ཨུ་པཱ་ལི་ཡོད་དོ། ཆོས་གོས་ཀྱི་སྡོམ་པ་མ་བསྒོས་པའོ། །བཙུན་པ་མཚམས་མ་བཅད་པའི་གནས་སུ་ཇི་ཙམ་གྱིས་ན་དགེ་སློང་ཆོས་གོས་དང་བྲལ་བ་ཞེས་བགྱི། ཨུ་པཱ་ལི་ཇི་ཙམ་
གཙུག་ལག་ཁང་གི་ཉེན་ཀོར་ཏམ། ཁང་པའམ། སྒོ་འཁྱམས་སམ། བསྐོར་བའི་ཁང་པའམ། དགེ་སློང་གིས་ཀུན་ཏུ་སྤྱད་པའི་ཀུན་དགའ་ར་བའམ། ཕྱི་ར་འམ། ཤིང་ཐགས་སམ། འོབས་རྣམས་ཤེས་པར་བྱའོ། །བཙུན་པ་དགེ་སློང་གིས་གནས་
གཅིག་ལ་ཐོག་ཀྱང་གཅིག་པར་གནས་ལ་དེ་ཉིད་དུ་ཆོས་གོས་ཀྱང་བཞག་ན་དེ་ཆོས་གོས་ཀྱང་འབྲལ་བར་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་གནས་དེར་མུ་སྟེགས་ཅན་སྣ་ཚོགས་དང་། དགེ་སྦྱོང་དང་། བྲམ་ཟེ་དང་། སྤྱོད་པ་པ་དང་། ཀུན་ཏུ་སྤྱོད་པས་རྒྱུ་
བ་རྣམས་གནས་པ་དང་། སྤུན་སོ་སོར་བགོས་པ་རྣམས་སུའོ། །བཙུན་པ་དགེ་སློང་གིས་མཚམས་ཀྱི་སླད་རོལ་ལ་མཚམས་ཀྱི་སླད་རོལ་དུ་འདུ་ཤེས་ན་ཅིར་འགྱུར། སྤང་བའི་ལྟུང་བར་འགྱུར་རོ། །མཚམས་ཀྱི་ནང་ལ་མཚམས་ཀྱི་སླད་རོལ་དུ་འདུ་ཤེས་ན་ཅིར་
འགྱུར། ཉེས་བྱས་སོ། །མཚམས་ཀྱི་སླད་རོལ་ལ་མཚམས་ཀྱི་ནང་དུ་འདུ་ཤེས་ན་ཅིར་འགྱུར། ཉེས་པ་མེད་དོ། །མཚམས་ཀྱི་ནང་ལ་མཚམས་ཀྱི་ནང་དུ་འདུ་ཤེས་ན་ཅིར་འགྱུར། ཉེས་པ་མེད་དོ། །བཙུན་པ་དགེ་སློང་གིས་མཚམས་ཀྱི་ནང་དུ་ཆོས་གོས་
བཞག་སྟེ་མཚམས་ཀྱི་སླད་རོལ་དུ་སྐྱ་རེངས་ཤར་བ་དང་། མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། སྤང་བའི་ལྟུང་བར་འགྱུར་རོ། །བཙུན་པ་དགེ་སློང་མས་མཚམས་ཀྱི་ནང་དུ་ཆོས་གོས་བཞག་ལ་མཚམས་ཀྱི་སླད་རོལ་དུ་སྐྱ་རེངས་ཤར་བ་དང་མཚན་འཕོས་ཏེ་དགེ་
སློང་དུ་གྱུར་ན་ཅིར་འགྱུར། སྤང་བའི་ལྟུང་བར་འགྱུར་རོ། །བཙུན་པ་དགེ་སློང་གིས་སུའི་མདུན་དུ་ཆོས་གོས་བྱིན་གྱིས་བརླབ་པར་བགྱི། ཨུ་པཱ་ལི་དགེ་སློང་གིས་དགེ་སློང་དང་། དགེ་ཚུལ་ཕའི་མདུན་དུ་ཆོས་གོས་བྱིན་གྱིས་བརླབ་པར་བྱའོ། །དགེ་ཚུལ་ཕས་ནི་དགེ་སློང་
เล่ม ๑๒ · หน้า 116a
དང་། དགེ་ཚུལ་ཕའི་མདུན་དུ་ཆོས་གོས་བྱིན་གྱིས་བརླབ་པར་བྱའོ། །དགེ་སློང་མས་ནི་དགེ་སློབ་མ་དང་། དགེ་ཚུལ་མའི་མདུན་དུ་ཆོས་གོས་བྱིན་གྱིས་བརླབ་པར་བྱའོ། །དགེ་སློབ་མས་ནི་དགེ་སློང་མ་དང་། དགེ་སློབ་མ་དང་། དགེ་ཚུལ་མ་རྣམས་ཀྱི་
མདུན་དུ་ཆོས་གོས་བྱིན་གྱིས་བརླབ་པར་བྱའོ། །དགེ་ཚུལ་མས་ནི་དགེ་སློང་མ་དང་། དགེ་སློབ་མ་དང་། དགེ་ཚུལ་མ་རྣམས་ཀྱི་མདུན་དུ་ཆོས་གོས་བྱིན་གྱིས་བརླབ་པར་བྱ་སྟེ། སླར་དབྱུང་བ་དང་བསྔོ་བ་ཡང་དེ་བཞིན་དུ་བྱའོ། །བཙུན་པ་བསླབ་པ་སྩལ་བས་ཆོས་གོས་མ་
མཆིས་པར་མཚམས་ཀྱི་སླད་རོལ་དུ་སྐྱ་རེངས་ཤར་ན་ཅིར་འགྱུར། སྤང་བའི་ལྟུང་བར་འགྱུར་རོ། །དེ་བཞིན་དུ་དགེ་སློང་མ་ལ་ཡང་སྤང་བའི་ལྟུང་བ་རྒྱས་པར་བརྗོད་དོ། །དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་རྣམས་ལ་ཉེས་བྱས་སོ།། །།མདོར་ན། སེམས་
འཁྲུགས་པ་དང་དུས་ལས་འདས། །རུང་བ་དག་ཀྱང་དེ་བཞིན་ཏེ། །མི་རུང་བ་དང་གདིང་བ་ཡང་། །དེ་བཞིན་རྫོགས་པ་བཞི་དང་མཚན། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་དགེ་སློང་གིས་རིང་ན་ཡང་ཟླ་བ་
གཅིག་ཏུ་གོས་ཞོག་ཤིག་ཅེས་གསུངས་ན། བཙུན་པ་དགེ་སློང་གིས་གོས་རྙེད་མ་ཐག་ཏུ་སེམས་འཁྲུགས་པར་གྱུར་ན། གང་ནས་བཟུང་སྟེ་དེའི་ཟླ་བ་བགྲང་བར་བགྱི། ནམ་རང་གི་སེམས་ཕྱིར་རྙེད་པ་ཚུན་ཆད་དོ། །བཙུན་པ་བཅོམ་ལྡན་འདས་ཀྱིས་ནི་དགེ་སློང་གིས་
རིང་ན་ཟླ་བ་གཅིག་ཏུ་གོས་ཆོངས་ཤིག་ཅེས་གསུངས་ན། བཙུན་པ་དགེ་སློང་གིས་ནམ་འཚོའི་བར་དུ་གོས་བཞག་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། ཟླ་བ་གཅིག་ཚུན་ཆད་དུས་བྱས་ནའོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་
རིང་ན་ཡང་ཟླ་བ་གཅིག་ཏུ་གོས་ཞོག་ཤིག་ཅེས་གསུངས་ན། གོས་ཇི་ལྟ་བུ་ལགས། རུང་བ་བདུན་པོ་ལས་གང་ཡང་རུང་སྟེ། བཅོམ་ལྡན་འདས་ཀྱིས་ཀྱང་མ་བཀག་སྟེ་གནང་བའོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་རིང་ན་ཡང་ཟླ་བ་གཅིག་ཏུ་གོས་
เล่ม ๑๒ · หน้า 116b
ཞོག་ཤིག་ཅེས་གསུངས་ན། དགེ་སློང་གིས་ཟླ་བ་གཅིག་ལས་ལྷག་པར་བཞག་པའི་ལྟུང་བར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་གོས་དེ་རྒྱུ་རུང་བར་གྱུར་ལ་སྤུན་མི་རུང་བ་དང་། སྤུན་རུང་བར་གྱུར་ལ་རྒྱུ་མི་རུང་བ་དང་། གཉི་ག་མི་རུང་བ་སྟེ། མི་རུང་
བ་ནི་རྔ་མོའི་བལ་དང་། བ་ལང་གི་བལ་དང་། རའི་བལ་དང་། རི་དགས་ཀྱི་བལ་དང་། འདྲེས་པ་དང་། ཐགས་སུ་མ་བཏགས་པ་དེ་ལྟ་བུའི་གོས་ནི་ཟླ་བ་གཅིག་ལས་ལྷག་པར་བཞག་ཀྱང་ཉེས་བྱས་སུ་འགྱུར་རོ། །བཙུན་པ་བཅོམ་ལྡན་འདས་ཀྱིས་རིང་ན་ཡང་དགེ་སློང་གིས་
གོས་ཟླ་བ་གཅིག་ཞོག་ཤིག་ཅེས་གསུངས་ན། བཙུན་པ་དགེ་སློང་གིས་ཟླ་བ་དྲུག་ཏུ་གོས་བཞག་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། གོས་རྙེད་ནས་ཞག་སུམ་བཅུ་ལོན་པ་དང་དགེ་འདུན་གྱི་གཏན་པ་གདིང་བར་གྱུར་པའོ། །བཙུན་པ་བཅོམ་
ལྡན་འདས་ཀྱིས་ཆོས་གོས་གསུམ་དུ་མ་ལངས་པ་ཟླ་བ་གཅིག་ཏུ་ཞོག་ཤིག་ཅེས་གསུངས་ན། བཙུན་པ་དགེ་སློང་གང་ཆོས་གོས་གསུམ་ལངས་པར་ཡང་གྱུར་ལ་དེས་ཆོས་གོས་གསུམ་དུ་མ་ལངས་པ་ཞིག་རྙེད་ན། དེ་ཡང་རིང་ན་ཟླ་བ་གཅིག་ཏུ་བཞག་པར་བགྱིའམ། ཨུ་
པཱ་ལི་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་གོས་གསུམ་ཚང་ན་གང་གོས་གཞན་རྙེད་པ་དག་ལངས་ཀྱང་རུང་། མ་ལངས་ཀྱང་རུང་སྟེ། དེ་ཐམས་ཅད་ཀྱང་རིང་ན་ཡང་ཞག་བཅུར་ཞོག་ཤིག །ཆོས་གོས་གསུམ་མ་ལངས་པ་ཞིག་ལ་གལ་ཏེ་ཆོས་གོས་སུ་ལངས་པ་
རྙེད་ན་དེའང་རིང་ན་ཞག་བཅུར་ཞོག་ཤིག །འོན་ཏེ་མ་ལངས་པ་ཞིག་རྙེད་ན་རིང་བའང་ཟླ་བ་གཅིག་ཏུ་གཞག་པར་བྱའོ། །དེ་ལས་འདས་པར་བཞག་ན་སྤང་བའི་ལྟུང་བར་འགྱུར་རོ། །བཙུན་པ་དགེ་སློང་གིས་ཟླ་བ་གཅིག་ལ་ཟླ་བ་གཅིག་ཏུ་འདུ་ཤེས་ཏེ་སྐྱ་རེངས་ཤར་ན་
ཅིར་འགྱུར། སྤང་བའི་ལྟུང་བར་འགྱུར་རོ། །ཟླ་བ་གཅིག་ལ་ཟླ་བ་གཅིག་མ་ལགས་པར་འདུ་ཤེས་ན་ཅིར་འགྱུར། ཉེས་པ་མེད་དོ། །ཟླ་བ་གཅིག་མ་ཡིན་པ་ལ་ཟླ་བ་གཅིག་ཏུ་འདུ་ཤེས་ན་ཉེས་བྱས་སུ་འགྱུར་རོ། །ཟླ་བ་གཅིག་མ་ལོན་པ་ལ་ཟླ་བ་གཅིག་
เล่ม ๑๒ · หน้า 117a
མ་ལོན་པར་འདུ་ཤེས་ན་ཉེས་པ་མེད་དོ། །བཙུན་པ་དགེ་སློང་གིས་གོས་རྙེད་ནས་ཟླ་བ་གཅིག་ཏུ་བཞག་པ་ན་མཚན་འཕོས་ཏེ་དགེ་སློང་མར་གྱུར་ནས་ཟླ་བ་གཅིག་འདས་ན་ཅིར་འགྱུར། སྤང་བའི་ལྟུང་བར་འགྱུར་རོ། །བཙུན་པ་དགེ་སློང་མས་ཆོས་གོས་རྙེད་ན་
ཟླ་བ་གཅིག་ཏུ་བཞག་པ་ན་མཚན་འཕོས་ཏེ་དགེ་སློང་དུ་གྱུར་ནས་ཟླ་བ་གཅིག་འདས་ན་ཅིར་འགྱུར། སྤང་བའི་ལྟུང་བར་འགྱུར་རོ། །བཙུན་པ་བསླབ་པ་སྩལ་བས་རིང་ན་ཟླ་བ་གཅིག་ཏུ་གོས་བཞག་པ་ལས་འདས་ན་ཅིར་འགྱུར། སྤང་བའི་ལྟུང་བར་འགྱུར་རོ། །བཙུན་པ་དགེ་
སློང་མས་རིང་ན་ཟླ་བ་གཅིག་ཏུ་གོས་བཞག་པ་ལས་འདས་ན་ཅིར་འགྱུར། ཉེས་བྱས་སུ་འགྱུར་རོ། །དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་རྣམས་ཀྱིས་རིང་ན་ཟླ་བ་གཅིག་འདས་པར་གོས་བཅངས་ན་ཅིར་འགྱུར། ཉེས་བྱས་སོ།། །།མདོར་ན།
ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པར་གྱུར་དང་སེམས་འཁྲུགས་དང་། །ན་བ་འོན་པ་གླེན་པ་དང་། །ཁྱིམ་པ་དག་ལ་སོགས་པ་སྟེ། །བསླབ་པ་བྱིན་པ་ཐ་མའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་
པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་གིས་གཉེན་མ་ལགས་པའི་དགེ་སློང་མ་ལ་གོས་རྙིང་པ་འཁྲུར་སྩལ་ན། སྤང་བའི་ལྟུང་བར་འགྱུར་རོ་ཞེས་གསུངས་ན། བཙུན་པ་དགེ་སློང་གིས་གཉེན་མ་ལགས་པའི་དགེ་སློང་མ་ལ་ཕྲིན་
གྱིས་གོས་འཁྲུར་སྩལ་ན་ཅིར་འགྱུར། ཉེས་བྱས་སོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་བརྒྱུད་དེ་འཁྲུར་བཅུག་ན་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་དགེ་སློང་མ་སྨྱོན་མ་ལ་འཁྲུར་སྩལ་
ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་མ་དང་། ལྐུགས་མ་དང་། འོན་མ་རྣམས་ལ་འཁྲུར་བཅུག་ན་ཐམས་ཅད་ཀྱང་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་མ་ནིང་མ་ལ་འཁྲུར་སྩལ་ན་ཅིར་འགྱུར།
เล่ม ๑๒ · หน้า 117b
ཉེས་བྱས་སོ། །དེ་བཞིན་དུ་དགེ་སློང་མ་སུན་ཕྱུང་བ་དང་། ཕ་དང་། མ་དང་། དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། སོ་སོར་གནས་པ་
དང་། མི་གནས་པ་དང་། སྔར་འཁྲུགས་པ་དང་། སྔར་ཉེས་པ་བྱུང་བ་རྣམས་ལ་འཁྲུར་བཅུག་ན་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་དགེ་འདུན་གྱི་དབྱེན་མ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ལ་འཁྲུར་སྩལ་ན་ཅིར་འགྱུར།
སྤང་བའི་ལྟུང་བར་འགྱུར་རོ།། །།མདོར་ན། ཐུན་མོང་བཀྲུས་དང་དགེ་འདུན་དང་། །མཚན་གཉིས་དང་ནི་མི་རུང་དང་། །སྤངས་དང་གཞན་དང་གྱོན་པ་དང་། །བདུན་པ་བཞི་པ་དེ་བཞིན་ཏེ། །དགེ་སློང་མ་དང་ཐ་མའོ། །བཙུན་པ་དགེ་སློང་གིས་གོས་ཐུན་མོང་
བ་འཁྲུར་སྩལ་ན་ཅིར་འགྱུར། ཉེས་བྱས་སོ། །བཀྲུས་པ་འཁྲུར་སྩལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་འདུན་གྱི་གོས་འཁྲུར་སྩལ་ན་ཅིར་འགྱུར། ཉེས་བྱས་སོ། །དེ་སྟེ་གང་ཟག་གིས་སྤྱད་པར་འགྱུར་བ་ཞིག་ཡོངས་སུ་སྤྱད་དེ་དྲི་མ་ཅན་ཡང་
ཉེས་བྱས་སུ་འགྱུར་རོ། །འོན་ཏེ་མལ་སྟན་གྱི་དངོས་པོ་འཁྲུར་བཅུག་ན་ཉེས་པ་མེད་དོ། །བཙུན་པ་དགེ་སློང་གིས་གཉེན་མ་ལགས་པའི་དགེ་སློང་མ་ལ་གོས་རྙིང་པ་འཁྲུར་སྩལ་བ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མ་ལ་
གཉེན་མ་ལགས་པའི་དགེ་སློང་གིས་གོས་འཁྲུར་སྩལ་བ་ན་མཚན་འཕོས་ཏེ་དགེ་སློང་དུ་གྱུར་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་གཉེན་མ་ལགས་པའི་དགེ་སློང་མ་གོས་འཁྲུར་སྩལ་བ་ན་དགེ་སློང་མ་མཚན་འཕོས་ཏེ་དགེ་སློང་དུ་གྱུར་ནས་བཀྲུས་ན་
ཅིར་འགྱུར། ཉེས་བྱས་སོ། །དེ་བཞིན་དུ་དགེ་སློང་ལ་ཡང་བྱའོ། །བཙུན་པ་དགེ་སློང་གིས་གཉེན་མ་ལགས་པའི་དགེ་སློང་མ་ལ་གོས་རྙིང་པ་འཁྲུར་སྩལ་ན་སྤང་བའི་ལྟུང་བར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་གོས་དེ་ཡང་རྒྱུ་རུང་བར་གྱུར་ལ་
เล่ม ๑๒ · หน้า 118a
སྤུན་མི་རུང་བ་དང་། སྤུན་རུང་བར་གྱུར་ལ་རྒྱུ་མི་རུང་བར་གྱུར་པ་དང་། གཉི་ག་མི་རུང་བར་གྱུར་པ་སྟེ། མི་རུང་བ་ནི་རྔ་མོའི་བལ་དང་། རའི་བལ་དང་། བ་ལང་གི་བལ་དང་། རི་དགས་ཀྱི་བལ་དང་། འདྲེས་པ་དང་། ཐགས་སུ་མ་བཏགས་པ་དེ་ལྟ་
བུའི་གོས་རྣམས་འཁྲུར་བཅུག་ན་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་གོས་སྤངས་པ་ཞིག་འཁྲུར་སྩལ་ན་ཅིར་འགྱུར། ཉེས་བྱས་སོ། །དེ་སྟེ་སྤངས་པ་མ་ཡིན་པ་ཞིག་འཁྲུར་བཅུག་ན་སྤང་བའི་ལྟུང་བར་འགྱུར་རོ། །འོན་ཏེ་སྤངས་པ་ཞིག་འཁྲུར་བཅུག་ན་ཉེས་
བྱས་སུ་འགྱུར་རོ། །བཙུན་པ་དགེ་སློང་གིས་གཞན་གྱི་གོས་འཁྲུར་སྩལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་གོས་རུང་བ་དང་གྲོང་དུ་ཞུགས་པ་ལས་གོས་དེ་ལུས་ལས་མ་བྲལ་བཞིན་དུ་སྤང་བར་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་
ཡང་དགེ་སློང་དེས་ཁྱིམ་གྱི་ནང་ཞུགས་པ་དང་། གོས་ལ་བཤང་བ་དང་། གཅི་བའམ། གཞན་ཡང་མི་གཙང་བས་རེག་པར་གྱུར་པ་དང་། དེས་གཉེན་མ་ཡིན་པའི་དགེ་སློང་མ་ལ་འཁྲུར་བཅུག་ན་སྤང་བའི་ལྟུང་བར་འགྱུར་རོ། །བསྙེན་པར་མ་རྫོགས་པར་འཁྲུར་བཅུག་
ནས་བསྙེན་པར་མ་རྫོགས་པར་ལགས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་འཁྲུར་སྩལ་ནས་བསྙེན་པར་རྫོགས་ཀར་ལགས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་འཁྲུར་སྩལ་ནས་བསྙེན་པར་རྫོགས་ནས་ལགས་ན་ཅིར་འགྱུར།
ཉེས་བྱས་སོ། །བསྙེན་པར་མ་རྫོགས་པར་འཁྲུར་སྩལ་ནས་བསྙེན་པར་རྫོགས་ཀར་ལགས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་པར་འཁྲུར་སྩལ་ནས་བསྙེན་པར་རྫོགས་པ་དང་ལགས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་པས་འཁྲུར་
སྩལ་ནས་བསྙེན་པར་རྫོགས་ནས་ལགས་ན་ཅིར་འགྱུར། སྤང་བར་འགྱུར་རོ། །བསྙེན་པར་རྫོགས་པས་འཁྲུར་སྩལ་ནས་བསྙེན་པར་མ་རྫོགས་པར་ལགས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བསྙེན་པར་རྫོགས་པ་ལ་བསྙེན་པར་རྫོགས་པར་འདུ་
เล่ม ๑๒ · หน้า 118b
ཤེས་ཏེ་གོས་རྙིང་པ་འཁྲུར་སྩལ་ན་ཅིར་འགྱུར། སྤང་བར་འགྱུར་རོ། །བསྙེན་པར་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ན་ཉེས་བྱས་སུ་འགྱུར་རོ། །བསྙེན་པར་མ་རྫོགས་པ་ལ་བསྙེན་པར་རྫོགས་པར་འདུ་ཤེས་ན་ཉེས་བྱས་སུ་འགྱུར་རོ། །བསྙེན་པར་
མ་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ན་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་གཉེན་མ་ལགས་པའི་དགེ་སློང་མ་ལ་གཉེན་མ་ལགས་པར་འདུ་ཤེས་ཏེ་གོས་རྙིང་པ་འཁྲུར་སྩལ་ན་ཅིར་འགྱུར། སྤང་བར་འགྱུར་རོ། །གཉེན་མ་ཡིན་པ་ལ་གཉེན་
ཡིན་པར་འདུ་ཤེས་ན་ཉེས་པ་མེད་དོ། །གཉེན་ལ་གཉེན་མ་ཡིན་པར་འདུ་ཤེས་ན་ཉེས་བྱས་སུ་འགྱུར་རོ། །གཉེན་ལ་གཉེན་དུ་འདུ་ཤེས་ན་ཉེས་པ་མེད་དོ། །བཙུན་པ་དགེ་སློང་གིས་གཉེན་མ་ལགས་པའི་དགེ་སློང་མ་ལ་གོས་རྙིང་པ་འཁྲུར་སྩལ་ན་ཅིར་འགྱུར། སྤང་
བར་འགྱུར་རོ། །དགེ་སློབ་མ་དང་། དགེ་ཚུལ་མ་དང་། ཁྱིམ་པ་མོ་དང་། མུ་སྟེགས་ཅན་གཞན་དགེ་སྦྱོང་དང་། བྲམ་ཟེ་དང་། སྤྱོད་པ་པ་དང་། ཀུན་དུ་རྒྱུ་བ་རྣམས་ལ་འཁྲུར་སྩལ་ན་ཅིར་འགྱུར། ཉེས་བྱས་སོ། །དེ་བཞིན་དུ་འགྲོ་བ་གཞན་དུ་གནས་པ་ལ་
འཁྲུར་བཅུག་ནའང་ཉེས་བྱས་སུ་འགྱུར་རོ། །དགེ་སློང་མས་དགེ་སློང་དང་། དགེ་ཚུལ་དང་། མུ་སྟེགས་ཅན་གཞན་དགེ་སྦྱོང་དང་། བྲམ་ཟེ་དང་། སྤྱོད་པ་པ་དང་། ཀུན་དུ་རྒྱུ་བ་རྣམས་དང་། འགྲོ་བ་གཞན་དང་གཞན་དུ་གནས་པ་ལ་འཁྲུར་སྩལ་ན་ཅིར་འགྱུར།
ཉེས་བྱས་སུ་འགྱུར་རོ། །ཁྱིམ་པ་དང་ཁྱིམ་པ་མོ་ལ་འཁྲུར་སྩལ་ན་ཅིར་འགྱུར། ཉེས་བྱས་སུ་འགྱུར་རོ། །དགེ་སློབ་མ་དང་། དགེ་ཚུལ་མ་ལ་ཉེས་བྱས་སོ། །བཙོ་བ་དང་། བརྡུང་བ་རྣམས་ལ་ཡང་དེ་བཞིན་དུ་རྒྱས་པར་བྱའོ།། །།མདོར་ན། སྨྱོན་པར་
གྱུར་དང་སེམས་འཁྲུགས་དང་། །ན་བ་འོན་པ་གླེན་པ་དང་། །མ་ནིང་མ་ལ་སོགས་པ་དང་། །བསླབ་པ་བྱིན་པ་ཐ་མའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་གིས་གཉེན་
เล่ม ๑๒ · หน้า 119a
མ་ལགས་པའི་དགེ་སློང་མ་ལས་གོས་བསླངས་ན་སྤང་བའི་ལྟུང་བར་འགྱུར་རོ་ཞེས་གསུངས་ན། བཙུན་པ་དགེ་སློང་གིས་དགེ་སློང་མ་སྨྱོན་མ་ལས་གོས་ཤིག་བསླངས་ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་
དང་། ལྐུགས་པ་དང་། གླེན་པ་དང་། འོན་པ་དང་། མ་ནིང་མོ་དང་། དགེ་སློང་མ་སུན་ཕྱུང་བ་དང་། ཕ་དང་། མ་དང་། དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་
སོང་བ་དང་། རྐུན་གནས་དང་། སྔར་ཉེས་པ་བྱུང་བ་དང་། སྔར་འཁྲུགས་པ་མོ་རྣམས་ལས་གོས་བསླངས་ན་ཅིར་འགྱུར། ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་དགེ་སློང་མ་དགེ་འདུན་གྱི་དབྱེན་བགྱིད་པ་དང་། སོ་སོར་གནས་པ་དང་། ཉེ་
བར་ཕྱོགས་པ་དང་། བསླབ་པ་སྩལ་བ་རྣམས་ལས་གོས་ཤིག་བསླངས་ན་ཅིར་འགྱུར། སྤང་བའི་ལྟུང་བར་འགྱུར་རོ།། །།མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་མར་གྱུར་དང་སེམས་འཁྲུགས་དང་། །
ན་བ་འོན་མ་གླེན་མ་དང་། །གཉིད་ལོག་ར་རོ་མྱོས་མ་དང་། །སྙོམས་ཞུགས་འགྲོ་བ་མ་ནིང་མའོ། །བཙུན་པ་དགེ་སློང་གིས་གཉེན་མ་ལགས་པའི་དགེ་སློང་མ་ལས་ཕྲིན་གྱིས་གོས་བསླངས་ཏེ་གོས་ཐོབ་ན་ཅིར་འགྱུར། ཉེས་བྱས་སོ། །དེ་བཞིན་དུ་སྤྲིང་ཡིག་དང་།
ལག་བརྡ་དང་། གཅིག་ནས་གཅིག་ཏུ་བརྒྱུད་པ་རྣམས་ནི་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་དགེ་སློང་མ་སྨྱོན་མ་ལ་གོས་བསླངས་ཏེ་གོས་ཐོབ་ན་ཅིར་འགྱུར། ཉེས་བྱས་སུ་འགྱུར་རོ། །བཙུན་པ་དགེ་སློང་གིས་དགེ་སློང་མ་སྨྱོན་མ་ལ་སོགས་
པ་ལས་གོས་བསླངས་ཏེ་གོས་ཐོབ་ན་ཅིར་འགྱུར། ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་དགེ་སློང་མ་དགེ་འདུན་གྱི་དབྱེན་བགྱིས་པ་དང་། སོ་སོར་གནས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ལས་གོས་བསླངས་ཏེ་གོས་
เล่ม ๑๒ · หน้า 119b
ཐོབ་ན་ཅིར་འགྱུར། སྤང་བའི་ལྟུང་བར་འགྱུར་རོ།། །།མདོར་ན། མི་རུང་བ་དང་བཞི་པ་གཉིས། །བདུན་པ་དང་ཡང་མཚན་དེ་བཞིན། །དགེ་སློང་དགེ་སློང་མ་དེ་བཞིན། །སྡེར་འགྱུར་བ་ནི་བསྡུས་པའོ། །བཙུན་པ་དགེ་སློང་གིས་གཉེན་མ་ལགས་པའི་དགེ་སློང་མ་ལས་
གོས་བསླངས་ཀྱང་སྤང་བའི་ལྟུང་བར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་གོས་དེ་རྒྱུ་རུང་བར་གྱུར་ལ་སྤུན་མི་རུང་བ་དང་། སྤུན་རུང་བར་གྱུར་ལ་རྒྱུ་མི་རུང་བ་དང་། གཉི་ག་མི་རུང་བར་གྱུར་པ་སྟེ། མི་རུང་བ་ནི་བ་ལང་གི་བལ་དང་། རྔ་མོའི་བལ་དང་། རའི་བལ་
དང་། རི་དགས་ཀྱི་བལ་དང་། འདྲེས་པ་དང་། ཐགས་སུ་མ་བཏགས་པའི་གོས་དེ་འདྲ་བ་ཞིག་བསླངས་ན་ཉེས་བྱས་སོ། །བཙུན་པ་དགེ་སློང་གིས་གཉེན་མ་ལགས་པའི་དགེ་སློང་མ་ལས་གཉེན་མ་ལགས་པར་འདུ་ཤེས་ཏེ་གོས་བསླངས་ན་ཅིར་འགྱུར། སྤང་བའི་ལྟུང་བར་འགྱུར་
རོ། །གཉེན་མ་ཡིན་པ་ལ་གཉེན་མ་ཡིན་པར་འདུ་ཤེས་ན་ཉེས་པ་མེད་དོ། །གཉེན་ལ་གཉེན་མ་ཡིན་པར་འདུ་ཤེས་ན་ཉེས་བྱས་སུ་འགྱུར་རོ། །གཉེན་ལ་གཉེན་དུ་འདུ་ཤེས་ན་ཉེས་པ་མེད་དོ། །བཙུན་པ་དགེ་སློང་གིས་བསྙེན་པར་རྫོགས་པའི་དགེ་སློང་མ་ལ་བསྙེན་པར་མ་རྫོགས་
པར་འདུ་ཤེས་ཏེ། བསླངས་ན་ཅིར་འགྱུར། སྤང་བའི་ལྟུང་བར་འགྱུར་རོ། །བསྙེན་པར་རྫོགས་མ་ལ་བསྙེན་པར་མ་རྫོགས་པར་འདུ་ཤེས་ན་ཉེས་བྱས་སོ། །བསྙེན་པར་མ་རྫོགས་མ་ལ་བསྙེན་པར་རྫོགས་པར་འདུ་ཤེས་ན་ཉེས་བྱས་སོ། །བསྙེན་པར་མ་རྫོགས་པ་ལ་
བསྙེན་པར་མ་རྫོགས་མར་འདུ་ཤེས་ན་ཉེས་བྱས་སོ། །བཙུན་པ་བསྙེན་པར་མ་རྫོགས་པས་གཉེན་མ་ལགས་པའི་དགེ་སློང་མ་ལ་གོས་བསླངས་ནས་བསྙེན་པར་མ་རྫོགས་པར་བསླངས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པས་བསླངས་ནས་བསྙེན་
པར་རྫོགས་ཀར་བསླངས་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བསླངས་ནས་བསྙེན་པར་རྫོགས་ཏེ་བསླངས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བསླངས་ནས་བསྙེན་པར་རྫོགས་ཀར་བསླངས་ན་ཅིར་འགྱུར། ཉེས་བྱས་སོ། །
เล่ม ๑๒ · หน้า 120a
བསྙེན་པར་རྫོགས་ཀར་བསླངས་ནས་བསྙེན་པར་རྫོགས་ཏེ་བསླངས་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཏེ་བསླངས་ནས་བསྙེན་པར་རྫོགས་ཏེ་བསླངས་ན་ཅིར་འགྱུར། སྤང་བར་འགྱུར་རོ། །བསྙེན་པར་རྫོགས་ཏེ་བསླངས་ནས་བསྙེན་པར་
མ་རྫོགས་པར་བསླངས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་གཉེན་མ་ལགས་པའི་དགེ་སློང་མ་ལས་གོས་ལེན་པ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མས་གཉེན་མ་ལགས་པའི་དགེ་སློང་ཕ་ལས་གོས་
ལེན་པ་ན་མཚན་འཕོས་ཏེ་དགེ་སློང་ཕར་གྱུར་ནས་བསླངས་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མས་གཉེན་མ་ལགས་པའི་དགེ་སློང་ཕ་ལས་གོས་ལེན་པ་ན་དགེ་སློང་མ་དེ་ཡང་མཚན་འཕོས་ཏེ་དགེ་སློང་ཕ་ལས་བསླངས་ན་ཅིར་འགྱུར། ཉེས་བྱས་སོ། །བཙུན་
པ་དགེ་སློང་མས་གཉེན་མ་ལགས་པའི་དགེ་སློང་ལས་གོས་ལེན་པ་ན་དགེ་སློང་དེ་ཡང་མཚན་འཕོས་ཏེ་དགེ་སློང་མ་ལས་བསླངས་ན་ཅིར་འགྱུར། ཉེས་བྱས་སོ། །དགེ་སློབ་མ་དང་། དགེ་ཚུལ་མ་ལས་བསླངས་ན་ཅིར་འགྱུར། ཉེས་བྱས་སོ། །དགེ་སློང་མས་དགེ་
སློང་དང་། དགེ་ཚུལ་ཕ་ལས་བསླངས་ན་ཅིར་འགྱུར། ཉེས་བྱས་སོ། །དེ་བཞིན་དུ་དགེ་སློབ་མ་དང་། དགེ་ཚུལ་མ་ལས་བསླངས་ནའང་ཉེས་བྱས་སུ་འགྱུར་རོ། །དགེ་ཚུལ་ཕས་དགེ་སློང་མ་དང་། དགེ་ཚུལ་མ་དང་། དགེ་སློབ་མ་ལས་བསླངས་ན་ཡང་ཉེས་
བྱས་སུ་འགྱུར་རོ།། །།མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པར་གྱུར་དང་སེམས་འཁྲུགས་དང་། །ན་བ་འོན་པ་གླེན་པ་དང་། །གཉིད་ལོག་པ་དང་ར་རོ་བ། །མྱོས་པ་འགྲོ་བ་ཕྱི་རོལ་པའོ། །བཙུན་པ་
བཅོམ་ལྡན་འདས་ཀྱིས་ཡང་དགེ་སློང་གང་གིས་གཉེན་མ་ལགས་པའི་ཁྱིམ་བདག་གམ་ཁྱིམ་བདག་གིས་མཆིས་འབྲང་ལས་གོས་བསླངས་ན་སྤང་བར་འགྱུར་རོ་ཞེས་གསུངས་ན། དགེ་སློང་གིས་ཁྱིམ་བདག་གམ་ཁྱིམ་བདག་གི་མཆིས་འབྲང་ལ་གོས་བསླངས་ཀྱང་སྤང་བའི་ལྟུང་
เล่ม ๑๒ · หน้า 120b
བར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་ཡང་ཕྲིན་གྱིས་བསླངས་ན་ཉེས་བྱས་སུ་འགྱུར་ཏེ། ཐོབ་ན་ཡང་ཉེས་བྱས་སུ་ཟད་དོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་བརྒྱུད་པ་ཐམས་ཅད་ཉེས་
བྱས་སུ་འགྱུར་རོ། །བཙུན་པ་དགེ་སློང་གིས་ཁྱིམ་བདག་སྨྱོན་པ་ལས་བསླངས་ཏེ་གོས་ཐོབ་ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། འོན་པ་དང་། གླེན་པ་དང་། ལྐུགས་པ་དང་། གཉིད་ལོག་པ་དང་།
ར་རོ་བ་དང་། མྱོས་པ་དང་། འགྲོ་བ་གཞན་དུ་གནས་པ་རྣམས་ལ་བསླངས་ཏེ་གོས་ཐོབ་ན་ཅིར་འགྱུར། ཉེས་བྱས་སོ། །འདི་ལས་ཕྱི་རོལ་གྱི་མུ་སྟེགས་ཅན་གཞན་དགེ་སྦྱོང་དང་། བྲམ་ཟེ་དང་། སྤྱོད་པ་པ་དང་། ཀུན་དུ་རྒྱུ་བ་རྣམས་ལས་བསླངས་ཏེ་གོས་ཐོབ་
ན་ཅིར་འགྱུར། ཉེས་བྱས་སོ།། །།མདོར་ན། མི་རུང་བཞི་པ་གཉིས་པ་དང་། །བདུན་པ་མཚན་ཀྱང་དེ་བཞིན་ཏེ། །ཉུང་རུམ་དེ་བཞིན་མ་ནིང་མོ། །མ་ནིང་དགེ་སློང་དེ་བཞིན་ནོ། །བཙུན་པ་དགེ་སློང་གིས་གཉེན་མ་ལགས་པའི་ཁྱིམ་བདག་གི་མཆིས་འབྲང་
ལ་གོས་བསླངས་ཀྱང་སྤང་བར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་ཡང་གོས་དེའི་རྒྱུ་རུང་བར་གྱུར་ལ་སྤུན་མི་རུང་བ་དང་། སྤུན་རུང་བར་གྱུར་ལ་རྒྱུ་མི་རུང་བ་དང་། གཉི་ག་མི་རུང་བ་སྟེ། མི་རུང་བ་ནི་རྔ་མོའི་བལ་དང་། རའི་བལ་དང་། བ་
ལང་གི་བལ་དང་། རི་དགས་ཀྱི་བལ་དང་། འདྲེས་པ་དང་། ཐགས་སུ་མ་བཏགས་པ་དེ་འདྲ་བའི་གོས་ཤིག་བསླངས་ཏེ་གོས་རྙེད་ན་ཉེས་བྱས་སོ། །བཙུན་པ་དགེ་སློང་གིས་གཉེན་མ་ལགས་པ་ལ་གཉེན་མ་ལགས་པར་འདུ་ཤེས་ནས་གོས་བསླངས་ཏེ་གོས་ཐོབ་
ན་ཅིར་འགྱུར། སྤང་བའི་ལྟུང་བར་འགྱུར་རོ། །གཉེན་མ་ཡིན་པ་ལ་གཉེན་དུ་འདུ་ཤེས་ན་ཉེས་པ་མེད་དོ། །གཉེན་ལ་གཉེན་མ་ཡིན་པར་འདུ་ཤེས་ན་ཉེས་བྱས་སུ་འགྱུར་རོ། །གཉེན་ལ་གཉེན་དུ་འདུ་ཤེས་ན་ཉེས་པ་མེད་དོ། །བཙུན་པ་དགེ་སློང་གིས་
เล่ม ๑๒ · หน้า 121a
མི་ལ་མིར་འདུ་ཤེས་ཏེ་གོས་བསླངས་པ་ལས་གོས་ཐོབ་ན་ཅིར་འགྱུར། སྤང་བར་འགྱུར་རོ། །མི་ལ་མི་མ་ཡིན་པར་འདུ་ཤེས་ན་ཉེས་བྱས་སུ་འགྱུར་རོ། །མི་མ་ཡིན་པ་ལ་མིར་འདུ་ཤེས་ན་ཡང་ཉེས་བྱས་སུ་འགྱུར་རོ། །མི་མ་ཡིན་པ་ལ་མི་མ་ཡིན་པར་འདུ་
ཤེས་ན་ཡང་ཉེས་བྱས་སུ་འགྱུར་རོ། །བསྙེན་པར་མ་རྫོགས་པར་བསླངས་ཏེ་བསྙེན་པར་མ་རྫོགས་པར་ཐོབ་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བསླངས་ཏེ་བསྙེན་པར་རྫོགས་ཀར་ཐོབ་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་
པར་བསླངས་ནས་བསྙེན་པར་རྫོགས་ཏེ་ཐོབ་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བསླངས་ཏེ་བསྙེན་པར་རྫོགས་ཀར་ཐོབ་ན་ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བསླངས་ཏེ་བསྙེན་པར་རྫོགས་ནས་ཐོབ་ན་ཅིར་འགྱུར། ཉེས་
བྱས་སོ། །བསྙེན་པར་རྫོགས་ཏེ་བསླངས་ནས་བསྙེན་པར་རྫོགས་ཏེ་ཐོབ་ན་ཅིར་འགྱུར། སྤང་བར་འགྱུར་རོ། །བསྙེན་པར་རྫོགས་ནས་བསླངས་ཏེ་བསྙེན་པར་མ་རྫོགས་པར་ཐོབ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་གཉེན་མ་ལགས་
པའི་ཁྱིམ་བདག་གམ། ཁྱིམ་བདག་གི་མཆིས་འབྲང་ལས་གོས་བསླངས་པ་ན་མཚན་འཕོས་ཏེ་དགེ་སློང་མར་གྱུར་ནས་ཐོབ་ན་ཅིར་འགྱུར། སྤང་བར་འགྱུར་རོ། །བཙུན་པ་དགེ་སློང་མས་གཉེན་མ་ལགས་པའི་ཁྱིམ་བདག་གམ། ཁྱིམ་བདག་གི་མཆིས་
འབྲང་ལས་གོས་བསླངས་པ་ན་མཚན་འཕོས་ནས་དགེ་སློང་ཕར་གྱུར་ཏེ་ཐོབ་ན་ཅིར་འགྱུར། སྤང་བར་འགྱུར་རོ། །བཙུན་པ་དགེ་སློང་གིས་ཁྱིམ་བདག་ལ་གོས་བསླངས་པ་ལས་ཁྱིམ་བདག་དེ་ཡང་མཚན་འཕོས་ཏེ་བུད་མེད་ལས་བསླངས་ན་ཅིར་འགྱུར། སྤང་བར་འགྱུར་
རོ། །བཙུན་པ་དགེ་སློང་གིས་ཁྱིམ་བདག་གི་མཆིས་འབྲང་ལ་བསླངས་པ་ན་ཁྱིམ་བདག་གི་མཆིས་འབྲང་དེ་ཡང་མཚན་འཕོས་ཏེ་སྐྱེས་པ་ལས་བསླངས་ན་ཅིར་འགྱུར། སྤང་བར་འགྱུར་རོ། །དེ་བཞིན་དུ་དགེ་སློང་མ་ལ་ཡང་བརྗོད་པར་བྱའོ། །བཙུན་པ་དགེ་སློང་གིས་
เล่ม ๑๒ · หน้า 121b
ཉུང་རུམ་ལས་གོས་བསླངས་ཏེ་གོས་ཐོབ་ན་ཅིར་འགྱུར། ཉེས་བྱས་སོ། །དེ་བཞིན་དུ་མ་ནིང་དང་། མ་ནིང་མོ་ཐམས་ཅད་ལ་ཉེས་བྱས་སུ་འགྱུར་རོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་གཉེན་མ་ལགས་པའི་ཁྱིམ་བདག་གམ། ཁྱིམ་བདག་གི་
མཆིས་འབྲང་ལས་གོས་བསླངས་ན་སྤང་བའི་ལྟུང་བར་འགྱུར་རོ་ཞེས་གསུངས་ན། བཙུན་པ་དགེ་སློང་གིས་དགེ་སློང་མ་ལ་བསླངས་ཏེ་གོས་ཐོབ་ན་ཅིར་འགྱུར། སྤང་བར་འགྱུར་རོ། །དགེ་སློབ་མ་དང་། དགེ་ཚུལ་མ་དང་། དགེ་སློང་དང་། དགེ་ཚུལ་མ་རྣམས་ལ་
བསླངས་ཏེ་གོས་ཐོབ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མས་ཁྱིམ་བདག་གམ། ཁྱིམ་བདག་གི་མཆིས་འབྲང་ལ་བསླངས་ཏེ་གོས་ཐོབ་ན་ཅིར་འགྱུར། སྤང་བར་འགྱུར་རོ། །དགེ་སློང་མས་དགེ་སློང་མ་དང་། དགེ་སློབ་མ་དང་། དགེ་ཚུལ་མ་
དང་། དགེ་ཚུལ་ཕ་རྣམས་ལ་བསླངས་ཏེ་གོས་ཐོབ་ན་ཅིར་འགྱུར། ཉེས་བྱས་སོ། །དེ་བཞིན་དུ་དགེ་སློབ་མ་དང་། དགེ་ཚུལ་ཕ་རྣམས་ལའང་ཉེས་བྱས་ཏེ་རྒྱས་པར་བརྗོད་པར་བྱའོ། །བསླངས་པ་ལ་ཇི་ལྟ་བ་བཞིན་དུ་སྟོད་གཡོགས་དང་། མཐང་གོས་ལ་ཐ་དད་ཅི་
ཡོད་ཅེ་ན། སྟོད་གཡོགས་དང་མཐང་གོས་ལ་གཉིས་ཏེ། དགེ་སློང་གི་སྟོད་གཡོགས་དང་། མཐང་གོས་དང་། ཁྱིམ་པའི་སྟོད་གཡོགས་དང་། མཐང་གོས་སོ། །དགེ་སློང་གིས་ཁྱིམ་པའི་སྟོད་གཡོགས་དང་། །མཐང་གོས་ཐོབ་ནས་ཁྱིམ་པའི་མཐང་གོས་
དང་། སྟོད་གཡོགས་བསླངས་པ་ལས་དེ་སྟེ་མཆོག་པར་གྱུར་ན་མ་སློངས་ཤིག །འོན་ཏེ་ལྷག་ནའང་མ་སྦྱིན་ཞིག །དགེ་སློང་གིས་ཁྱིམ་བདག་གི་སྟོད་གཡོགས་དང་། མཐང་གོས་མ་ཆོག་གམ། ལྷག་ནས་བསླངས་ན་དེ་ནི་ཉེས་བྱས་སུ་འགྱུར་རོ། །ཐོབ་ན་སྤང་བའི་
ལྟུང་བའོ། །དགེ་སློང་གིས་དགེ་སློང་གི་སྟོད་གཡོགས་དང་། མཐང་གོས་ཐོབ་ནས་སྟོད་གཡོགས་དང་མཐང་གོས་བསླངས་པ་ལས་དེ་སྟེ་མ་ཆོག་པར་གྱུར་ན་བསླང་བར་བྱའོ། །འོན་ཏེ་ལྷག་པར་གྱུར་ན་ཕྱིར་སྦྱིན་པར་བྱའོ། །དགེ་སློང་གིས་མཐང་གོས་དང་། སྟོད་
ที่มาและสัญญาอนุญาต
ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด