ལྷ་མོ་སྒྱུ་འཕྲུལ་དྲ་བ་ཆེན་མོ་ཞེས་བྱ་བའི་རྒྱུད
ชื่อสันสกฤต (อักษรทิเบต ตามตัวบท) དེ་བཱི་ཛཱ་ལི་མ་ཧཱ་མཱ་ཡཱ་ཏནྟྲ་ནཱ་མ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๙๙ · หน้า 32b
ལ་ཧ་ལ་ཧཱུྃ། ཨོཾ་སརྦ་མ་ཧཱ་ཀཱ་རུ་ཎི་ཀཱ་ཡ། བུདྡྷ་ལོ་ཙ་ནཱ་ཌཱ་ཀི་ནི། ཧ་ན་ཧ་ན་ཧ་ན། ཧཱུྃ་ཧཱུྃ་ཧཱུྃ་ཕཊ། ཨོྃ་སརྦ་ཀཱ་རུ་ཎི་ཀཱ་ཡ། བཛྲ་ལོ་ཙ་ན་མ་ཧཱ་ཌཱ་ཀི་ནི་དྷ་ཀ་དྷ་ཀ་ཧཱུྃ་ཧཱུྃ་ཧཱུྃ་ཕཊ། ཨོྃ་སརྦ་མ་ཧཱ་ཀཱ་རུ་ཎི་ཀཱ་ཡ། རཏྣ་ལོ་ཙ་ན་ཌཱ་ཀི་ནི། པ་ཙ་པ་ཙ་ཧཱུྃ་ཧཱུྃ་ཧཱུྃ་ཕཊ། ཨོྃ་སརྦ་མ་ཧཱ་ཀཱ་རུ་ཎི་
ཀཱ་ཡ། མ་ཧཱ་པདྨ་ལོ་ཙ་ན་ཌཱ་ཀི་ནི་དྷ་ཧ་དྷ་ཧ་དྷ་ཧ། ཧཱུྃ་ཧཱུྃ་ཧཱུྃ་ཕཊ། ཨོྃ་སརྦ་མ་ཧཱ་ཀཱ་རུ་ཎི་ཀཱ་ཡ། ཀརྨ་ལོ་ཙ་ན་མ་ཧཱ་ཌཱ་ཀི་ནི་ཚིན་དྷ་ཚིན་དྷ་ཧཱུྃ་ཧཱུྃ་ཧཱུྃ། ཧྲཱུྃ་ཧྲཱུྃ་ཧྃ། ཧྲྃ་ཧྲྃ་ཧྲྃ། ཧ་ཧ་ཧ། ཕཊ་ཕཊ་ཕཊ། ཨོྃ་རུ་ལུ་གཽ་རཱི། ཨོྃ་རུ་ལུ་ཙཽ་རཱི། ཨོྃ་རུ་ལུ་པྲ་མོ་ཧཱ། ཨོྃ་རུ་ལུ་བེ་ཏ་ལཱི། ཨོྃ་
རུ་ལུ་ཙཎྜ་ལཱི། ཨོྃ་རུ་ལུ་གྷསྨ་རི། ཨོཾ་རུ་ལུ་སྨ་ཤཱ་ནཱི། བིན་དྷ་བིན་དྷ། གྷུ་མ་གྷུ་མ་གྷུ་མ། ཧ་ན་ཧ་ན་ཧ་ན། ཧཱུྃ་ཧཱུྃ་ཧཱུྃ་ཕཊ་ཕཊ། ཨོྃ་ཙཽ་ར་ཀ་ར་སིདྷ་ཧེ་ཧེ། ཨོྃ་གཽ་ར་ཀ་ར་བྱཱ་གྷྲི་ཧེ་ཧེ། ཨོྃ་ཙཻ་ར་ཀ་ཀ་ར་སྲི་གླ་ཧེ་ཧེ། ཨོྃ་ཤྭ་ན་ཀ་ར་གྲྀ་ཌྷ་ཧེ་ཧེ། ཨོྃ་ཀཱང་ཀ་ཀ་ར་ཀཱ་ཀ་ཕཊ་ཕཊ།
ཨོྃ་ག་ཏཱ་ཀ་ར་པཉྩ་མ་ཧེ་ཧེ་ཕཊ། ཧསྟ་ཀ་ར་ཨཱུ་ལུ་ཀ་ཧེ་ཧེ་ཧེ། ཧྲིཾ་ཧྲིཾ་ཧྲིཾ། ཕཊ་ཕཊ། མ་ཧཱ་ཙ་ཏུ་ར་ཡོ་གི་ནི་ཧ་ཧ་ཧ། ཧེ་ཧེ་ཧེ། ཧཱུྃ་ཧཱུྃ་ཧཱུྃ། ཕཊ་ཕཊ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ། རུ་ལུ་རུ་ལུ་རུ་ལུ་རུ་ལུ་
རུ་ལུ་རུ་ལུ་རུ་ལུ་རུ་ལུ་རུ་ལུ་རུ་ལུ་རུ་ལུ་རུ་ལུ། ཁཱ་ཧི་ཁཱ་ཧི་ཁཱ་ཧི་ཁཱ་ཧི་ཁཱ་ཧི་ཁཱ་ཧི། ཕཊ་ཕཊ་ཕཊ། ས་མ་ཡ་ས་མ་ཡ། ཡོ་ག་ཡོ་གི་ནི་ཕཊ་ཕཊ་ཕཊ། ཧཱུྃ་ཧཱུྃ་ཧཱུྃ་ཞེས་བརྗོད་པས་ཐམས་ཅད་རབ་ཏུ་བརྒྱལ། རབ་ཏུ་དངངས། རབ་ཏུ་མྱོས། རབ་ཏུ་བསྒྲལ་བར་གྱུར་ཏོ། །བསྣམས་
ཤིང་གསོལ་ནས་མི་གནས་པར་མཛད་དོ། །དེ་བཞིན་གཤེགས་པ་ཐམས་ཅད་ཀྱི་གསང་བ་མཉེས་པ་ལས་སྔགས་ཀྱི་ལེའུ་སྟེ་བཅུ་གཅིག་པའོ།། །།དེ་ནས་བཅོམ་ལྡན་འདས་སྐུ་གསུང་ཐུགས་རྔམ་པའི་སྟབས་ཀྱིས་ཛཿཛཿཛཿ ཧཱུྃ་ཧཱུྃ་ཧོཿཧོཿཞེས་པར་མཛད་དོ། །མངོན་
སྤྱོད་ཀྱི་ལས་ཀྱི་སྦྱོར་བ་སྦྱོར་བ་ཆེན་པོ་མཛད་དོ། །གསང་བའི་རྡོ་རྗེའི་མཛོད་ནས་གསང་བའི་ཡུམ་གྱི་པདྨ་ཡོངས་སུ་ཡངས་པའི་ནང་དུ་སེམས་ཅན་གྱི་ཚོགས་བྱང་ཆུབ་སེམས་སུ་མཛད་ནས་མཁའ་ཕབ་སྟེ་སྲས་སུ་བསྐྱེད་པར་མཛད་དེ་མཛད་ནས་དྲན་པ་རྙེད་དོ། །སངས་རྒྱས་
เล่ม ๙๙ · หน้า 33a
ཀྱི་སྐུ་བསམ་གྱིས་མི་ཁྱབ་པ་མེ་དཔུང་བསམ་གྱིས་མི་ཁྱབ་པ་མཚོན་ཆ་དང་དབུ་དང་ཞལ་མང་ཞིང་སྐྱི་བུང་ཞེས་བྱེད་པ་དངངས་ཤིང་གསོད་པར་མཐོང་སྟེ་སྨྲས་པ། རབ་ཏུ་འཇིགས་པའི་ཁྲོ་བོ་རྣམས། །ཤིན་ཏུ་བདེ་བའི་གནས་ཤིག་ནས། །བཏོན་པ་སྐལ་བ་རབ་ཏུ་
ཆུང་། །ད་ནི་ཅི་མཛད་ལ་གོར་མཛོད། །ལྷ་ཅིག་རྗེ་ཅིག་འོ་ན་ཞེས་སྨྲས་པའི་ཚིག་གིས་སེམས་ཅན་གྱི་མཚན་མ་འབྱོངས་བར་གྱུར་པར་མཁྱེན་ཏོ། །དེ་ནས་བཅོམ་ལྡན་འདས་དགྱེས་པ་ཆེན་པོས་རབ་ཏུ་སྨྲོས་ལ་གནོང་ལོང་ཤིག །རྗེ་ལ་གུས་པར་དམ་ནོས་ལ། །འདི་ལ་
གནས་ཕར་སྐལ་མེད་པས། །ཕྱི་ཡི་དཀྱིལ་འཁོར་ས་ལ་འདུག །ཅེས་བཀའ་སྩལ་པས་དངངས་པ་རྟས་པར་གྱུར་ཏེ། རྡོ་རྗེ་བྲན་མོའི་མནའ་བོར་ནས་སྨྲས་པ། སྐྱེས་མཆོག་ལྷ་རྗེས་སུ་ཞིག་ལགས། །འབངས་དང་བཀའ་སྩལ་བདག་ཅག་ཉན། །ཕྱི་ཡི་གནས་
སུ་གནས་སུ་བགྱི། །མ་སྲིང་བྲན་གཡོག་འཁོར་ཡུག་རྣམས། །འཇིགས་པའི་སྐུས་ནི་གཞེས་སུ་གསོལ། །ཅི་མཛད་ཁྱོད་མཁྱེན་གཞེས་སུ་གསོལ། །ཡུན་དུ་སྐལ་ལྡན་གཞེས་སུ་གསོལ། །བདག་ཅག་འཇིག་རྟེན་སྐྱོང་བའི་རྣམས། །དི་རིང་དམ་མནོས་
སླན་ཆད་དུ། །འཁོར་རྣམས་སྐྱོང་བར་མི་བགྱིད་དམ། །བཀའ་བཞིན་ལས་ཀུན་མི་སྒྲུབ་བམ། །ཐེག་པ་འཛིན་ལ་མི་སྟོང་ངམ། །བཞུགས་པའི་དཀྱིལ་འཁོར་མི་ཟིན་ན། །ད་ལྟ་བཞིན་དུ་འཇིགས་པ་དང་། །ཤི་ནས་དམྱལ་བར་ཤོག་ཅེས་སྨྲས་ཏེ་
མནའ་བོར་རོ། །དེ་ནས་ཁྲག་འཐུང་ཆེན་པོས་ཅང་མི་གསུང་བར་བཞུགས་པ་ལས་རབ་ཏུ་གསོད་བྱེད་མ་དང་། །ཚངས་བ་མོ་དང་། གཞོན་ནུ་མོ་དང་། དབང་མོ་དང་། གྲུབ་མོ་དང་། བསྐྱོད་ཆེན་མོ་དང་། རྡོ་རྗེར་གདོང་ཆེན་མོ་དང་། མི་མོ་རླག་པར་
བྱེད་པ་ཆེན་མོ་དང་། །ཕག་མོ་གསོད་བྱེད་མ་དང་། གཏུམ་པར་མཛད་མ་དང་། བརླན་པར་མཛད་མ་དང་། ཕག་ཆེན་མོ་དང་། ནག་མོ་རལ་པ་ཆེན་མོ་དང་། རྡོ་རྗེ་འཛིན་མ་ཆེན་མོ་དང་། རྡོ་རྗེ་ནག་མོ་ཆེན་མོ་དང་། རྡོ་རྗེ་རྒན་བྱད་ཆེན་མོ་དང་། རྡོ་རྗེ་ཡིད་
เล่ม ๙๙ · หน้า 33b
འཕྲོག་པར་བྱེད་མ་དང་། རབ་ཏུ་གཅིག་ཏུ་ཟབ་མོ་དང་། རྡོ་རྗེ་སྲིན་མོའི་ཆ་བྱད་ཆེན་མོ་དང་། སྔོ་གནག་ཆེན་མོ་དང་། ལྗང་ནག་ཆེན་མོ་དང་། བེ་ཅོན་ཆེན་མོ་དང་། ཞི་བ་བུམ་སྣ་ཆེན་མོ་དང་། ལས་ལ་གྲུབ་པ་མོ་དང་། བཀའ་ཉན་པར་བྱེད་མ་དང་། ཚམ་ངམ་གྱི་
གཟུགས་དང་། དྲག་ཤུལ་མ་དང་། ཉུལ་བ་མོར་ཚུལ་སྟོན་མ་དེ་དག་ལ་སོགས་པ་མ་དང་སྲིང་མོ་བུ་མོ་རྣམས་རབ་ཏུ་གུས་པར་བཀའ་ཉན་ཏེ། རྡོ་རྗེ་བྲན་མོར་བཀའ་ཉན་ཏེ། །རྡོ་རྗེ་བྲན་མོར་དམ་བླངས་ནས། །ཅི་འདོད་ལས་རྣམས་བདག་ཅག་བགྱིད། །ཅེས་མནའ་
བོར་ཏེ་འཇིགས་པའི་གཟུགས་དང་། མཚོན་ཆ་དང་། གནས་པའི་གཞིར་བཅས་ཏེ་ཕྱིའི་སྣམ་བུ་ལ་གནས་པའི་ལས་བྱེད་པར་གནས་སོ། །དེ་དག་གི་དཀྱིལ་འཁོར་བསྒྲུབ་པ་བཤད་དེ། དཀྱིལ་འཁོར་ཕྱི་རོལ་གྲུ་བཞིར་བཅས། །དབུས་སུ་ཟླ་གམ་རཀྟར་བཅས། །
བཱ་སུ་ཏྭཱ་ཡི་མཎྜ་ལ། །དྲི་ཆུ་རཀྟའི་ཚོམ་བུར་བྲི། །ཧྲཱིཿལས་དབུས་སུ་བཅྭ་བརྒྱད་གཟུགས། །ཡང་ན་དབུ་གསུམ་ཕྱག་དྲུག་པ། །ཐོད་པ་བྷན་དྷ་དམར་ཆེན་བཀང་། །བརྒྱད་དམ་ཉི་ཤུ་དགུ་རུ་ལྡན། །ཡང་ན་ལྔ་དང་ལྡན་པ་ལ། །ལྔ་པའི་ཡི་གེས་བྱིན་གྱིས་བརླབ། །
ཟད་འཕྲོ་ཕུད་དང་ལྡན་པ་ལ། །ཨུཙྪུཥྚ་ཡི་སྔགས་ཀྱིས་བཟླས། །ཐོད་པ་དམར་བླུགས་བཏུང་བྱ་ཞིང་། །མིང་ངམ་བྷྱོ་འམ་རུ་ལུ་ཡིས། །མངོན་སུམ་ཕྱིན་པར་བོས་ནས་ནི། །ཁ་ནས་རཀྟས་རབ་གཏོར་ཏེ། །ཧེ་རུ་ཀ་ཡི་ལས་རྣམས་ཀུན། །གོང་ནས་འབྱུང་བའི་ལས་
བཞིན་བྱ། །སྒེག་མོ་ན་ཆུང་དེ་དག་ལ། །དབང་གི་ཆགས་པས་འདོད་སྤྱད་དེ། །ཏ་མ་ལ་ཡི་ཕུར་བུས་གདབ། །ཅི་འདོད་ལས་རྣམས་གྲུབ་པར་སྦྱིན། །ཆགས་དང་གསོད་དང་རྒྱགས་པ་ཆེ། །མཉམ་པ་ཉིད་ཀྱི་ཏིང་འཛིན་གྱིས། །ཙཽ་ར་ཀ་རའི་འཁོར་རྣམས་ཀྱང་། །བཞི་
ཡི་ལས་ལ་འཇུག་པར་ནི། །མིང་ཙམ་འཛིན་པའི་རྣལ་འབྱོར་པས། །བསྐུལ་ན་རྩེ་གཅིག་ལས་རྣམས་འགྲུབ། །དེ་ནས་ཀུན་དུ་བཟང་མོ་ཆེན་མོས་མིང་ཙམ་དུ་ཆོས་ཐམས་ཅད་གནས་པར་མཁྱེན་ཏོ། །གསང་བ་སྒྱུ་འཕྲུལ་ཆེན་པོ་འདི་བསྡུ་བ་ཆེན་པོ་མཛད་དོ། །
เล่ม ๙๙ · หน้า 34a
དེ་ནས་སེམས་དཔའ་རྣལ་འབྱོར་མཆོག །ཀུན་ཀྱང་སེམས་དཔའ་རྣལ་འབྱོར་མཆོག །ཆོས་ཀུན་མིང་ཙམ་རྣལ་འབྱོར་ཡིན། །མིང་ཙམ་རྣལ་འབྱོར་མ་ཡིན་པར། །སེམས་དཔའ་རྣལ་འབྱོར་འགའ་ཡང་མེད། །དེ་ཉིད་དུས་གསུམ་རང་བཞིན་ཏེ། །དེ་ཉིད་
ཀུན་དུ་བཟང་མོ་མཆོག །སྒྱུ་འཕྲུལ་དྲ་བའི་རྒྱུད་དག་ལས། །སེམས་མ་རྡོ་རྗེ་དེ་དག་ལས། །གསང་བའི་ངེས་དོན་གང་ཡང་མེད། །ཅེས་ཆོས་ཐམས་ཅད་འདུས་པ་ཆེན་མོར་མཁྱེན་ཏོ། །དེ་བཞིན་གཤེགས་པ་ཐམས་ཅད་ཀྱི་ཧེ་རུ་ཀ་འདུས་པ་ཆེན་མོའི་དཀྱིལ་འཁོར་ཏེ་
ལེའུ་བཅུ་གཉིས་པའོ།། །།ཨ་ཧོཿརྒྱུ་ཉིད་སྟོང་པས་འབྲས་བུ་མངོན་སུམ་པ། །བྱིན་གྱིས་བརླབ་ཏུ་མེད་པས་བྱིན་གྱིས་བརླབ་པས་འགྲུབ། །སངས་རྒྱས་མཛད་པ་ཉིད་ཀྱང་སེམས་ཅན་ཡིན་ཞེས་རྒྱལ་བས་གསུངས། །དེ་ཉིད་མི་མཛད་མེད་པར་ཤེས་པ་ཀུན་གྱི་
ནང་ན་རབ་ཏུ་བསྔགས། །ཆགས་པ་མི་གཏོང་ཆགས་པ་མངོན་སུམ་དགོངས་པ་ཡིན་པས་དཀྱིལ་འཁོར་གོང་མ་ཀུན་གྱི་དང་། །སྒྲུབ་ལ་དགའ་བས་བསྒྲུབ་ཏུ་མེད་ཕྱིར་བསྒྲུབས་པས་འགྲུབ་ཅེས་རྒྱལ་བས་རབ་ཏུ་གསུངས། །ཕོ་མོ་མེད་ཕྱིར་ཕོ་མོ་སྣང་ལ་དགའ་བ་སྤྱོད་
བརྩོན་རྒྱལ་བས་འགྲུབ་ཅེས་བསྒྲུབ་པ་ཀུན་གྱིས་གསུངས། །སྟོང་པར་རྟོགས་ལ་སྤྱོད་ལ་གཡེལ་བ་རྣལ་འབྱོར་མིན་ཞེས་རྒྱལ་བས་གསུངས། །མེད་ལ་གཏོད་ཅིང་དགེ་སྡིག་འཆོལ་བ་སྡིག་ཅན་ཡིན་པར་རབ་ཏུ་གསལ། །དགེ་སྡིག་ཡོད་ཕྱིར་བརྩོན་པས་འགྲུབ་ཅེས་ཐེག་
པ་ཀུན་ལས་འབྱུང་། །བག་དང་མི་ལྡན་རང་བཞིན་མེད་པར་གནས་པ་ལ། །གཙོ་མཆོག་མི་བཀུར་ཁུངས་ཕྱིན་ཆོས་ལ་མི་བརྩོན་སེམས་ཅན་ཡིན་པར་མངོན་སུམ་གསལ་བར་སྣང་། །དེ་བས་སྒྱུ་འཕྲུལ་གསང་བ་མཆོག་འདི་བུ་རྣམས་གང་ཞིག་ཉན་བརྩོན་པས། །
འགྲུས་པ་བསླབས་པ་བག་དང་ལྡན་པ་ལོབས་པ་དང་པོར་ངོ་ཤེས་བྱ། །སྐད་ཅིག་གཟུགས་ལ་འཕངས་པ་མེད་པར་གུས་ལྡན་གསང་བའི་སྡུད་པ་ཡིན། །རྡོ་རྗེ་སློབ་དཔོན་མཆོག་ལ་དད་པས་སངས་རྒྱས་མ་ལུས་ཀུན་ལ་མཆོད་པ་ཆེན་པོ་ཡིན། །ལམ་ལ་
เล่ม ๙๙ · หน้า 34b
མཁས་པས་རྡོ་རྗེ་སློབ་དཔོན་བཀུར་བའོ། །དེ་སྐད་ཅེས་བཀའ་སྩལ་པ་དང་། རྣལ་འབྱོར་དང་། རྣལ་འབྱོར་མ་རྣམས་རབ་ཏུ་འདུན་པ་ཆེན་པོ་སྐྱེས་ཏེ། མཆོད་པ་ཆེན་པོ་བཀུར་སྟིས་མཆོད། །དཀྱིལ་འཁོར་དང་པོ་ཕུན་སུམ་ཚོགས། །གཉིས་པ་གསང་བའི་མཆོད་པ་ལ། །
གསུམ་པ་རོལ་པ་གླེང་སློང་བ། །ཁྲོས་པའི་སྤྲིན་ལས་བདུད་རྣམས་བཏུལ། །དོན་གཅིག་སྒྱུ་འཕྲུལ་བཀའ་སྩལ་པ། །ཚོགས་ཀྱི་མཆོད་པ་དགྱེས་པ་ཆེ། །དུས་གསུམ་རྟག་ཏུ་མ་བྱུང་བ། །ལམ་ལ་མཁས་པ་ཡིན་པར་བསྔགས། །བརྩོན་དང་ལྡན་པས་རབ་མཉན་དང་། །
གསང་བའི་སྒྲུབ་པ་འདི་བསྒྲུབ་པ། །ཀུན་ཀྱང་ཀུན་དུ་བཟང་པོ་ཡིན། །བཅོམ་ལྡན་འདས་རྨོངས་པ་སེལ་བ་ཞེས་བྱ་བ་སྒྱུ་འཕྲུལ་ཆེན་པོ་རྫོགས་སོ།། །།
ที่มาและสัญญาอนุญาต
ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด