དཔལ་འཁོར་ལོ་སྡོམ་པའི་སྙིང་པོའི་དེ་ཁོ་ན་ཉིད་བསྡུས་པ
ชื่อสันสกฤต (อักษรทิเบต ตามตัวบท) ཤྲཱི་ཙཀྲ་སམྦ་ར་ཏཏྟྭ་གརྦྷ་སཾ་གྲ་ཧ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๒๒ · หน้า 272a
༄༅༅། །རྒྱ་གར་སྐད་དུ། ཤྲཱི་ཙཀྲ་སམྦ་ར་ཏཏྟྭ་གརྦྷ་སཾ་གྲ་ཧ། བོད་སྐད་དུ། དཔལ་འཁོར་ལོ་སྡོམ་པའི་སྙིང་པོའི་དེ་ཁོ་
ན་ཉིད་བསྡུས་པ། དཔལ་འཁོར་ལོ་སྡོམ་པ་ལ་ཕྱག་འཚལ་ལོ། །གདོད་ནས་དག་ཅིང་གདོད་ནས་གྲོལ། །གདོད་ནས་ཞི་བའི་བདག་ཉིད་ཅན། །དངོས་པོ་ཀུན་གྱི་དེ་བཞིན་ཉིད། །གཟུང་འཛིན་བྲལ་ལ་ཕྱག་འཚལ་ལོ། །བལྟ་བར་དཀའ་ཞིང་རྟོགས་པར་དཀའ། །བརྗོད་འདས་ཚིག་
གིས་མཚོན་མིན་པར། །རང་གི་རིག་པའི་ཡེ་ཤེས་ནི། །གཉིས་མེད་གསལ་བའི་རང་བཞིན་ཅན། །གང་ཞིག་དྲི་མས་བསྒྲིབས་པའི་སེམས། །ཡུལ་དུ་སྣང་བའི་རྗེས་འཇུག་པ། །གཟུང་དང་འཛིན་པའི་རྟོག་པ་སྟེ། །ཆགས་སྡང་རྣམ་རྨོངས་ལས་ལ་ནི། །རྣམ་གཡེང་སྡུག་བསྔལ་དང་བཅས་པའི། །འཁོར་བ་
མངོན་པར་འགྲུབ་པའོ། །གང་གིས་བླ་མའི་དྲིན་ཐོབ་ནས། །སེམས་ཀྱི་དེ་ཉིད་རིག་པ་གང་། །རི་དབང་རྩེ་ནས་ལྷུང་བ་ལྟར། །གྲོལ་བའི་ཐབས་ནི་བླ་ན་མེད། །གཞན་དུ་དཀའ་ཐུབ་མི་བཟད་སོགས། །ལུས་ཉོན་མོངས་པར་བྱེད་པ་ཡིས། །ཐར་བའི་འབྲས་བུ་མི་རྙེད་པར། །སླར་
ཞིང་རྣམ་པར་འཁོར་བར་འགྱུར། །གང་གིས་སེམས་ཀྱི་དེ་ཉིད་རིག །དེ་ལས་གཞན་དུ་གྲོལ་བའི་ཐབས། །བཟླས་དང་བསམ་གཏན་ལ་སོགས་པ། །ཕ་རོལ་སྒྲོལ་བའི་གྲུ་བཞིན་འདོར། །དེ་བས་བཟླས་མེད་བསམ་གཏན་དང་། །དཀའ་ཐུབ་མེད་ཅིང་སྦྱིན་སྲེག་མེད། །
เล่ม ๒๒ · หน้า 272b
དཀྱིལ་འཁོར་དཀྱིལ་འཁོར་པ་མེད་པ། །རང་རིག་ཡེ་ཤེས་གཅིག་པུ་ཉིད། །རྣམ་ཐར་བཞི་ཡི་རང་བཞིན་དང་། །དུས་གསུམ་མཁྱེན་པའི་བདག་ཉིད་ཅན། །རྟེན་འབྲེལ་བཅུ་གཉིས་དག་པ་ཡིས། །ཞལ་ཕྱག་རྣམ་པའི་གཟུགས་ཅན་ཉིད། །ཐབས་དང་ཤེས་རབ་དབྱེར་མེད་སྐུ། །
བྱང་ཆུབ་ཕྱོགས་ཆོས་སུམ་ཅུ་བདུན། །གཅིག་པུའི་ཉམས་ནི་དུ་མའི་གར། །དཀྱིལ་འཁོར་འཁོར་ལོའི་རྣམ་པའོ། །གང་གིས་དེ་ཡོངས་ཤེས་པ་ཡིས། །རང་བཞིན་དེ་ནི་རྟོགས་འགྱུར་ན། །གཞན་དུ་སྤྲོས་པ་སྣ་ཚོགས་ཀྱང་། །གྲོལ་བའི་རྒྱུ་ཉིད་ཁོ་ནའོ། །དེ་ཕྱིར་རང་རིག་མཚོན་
པ་ཡི། །ཐབས་ཀྱི་སྤྲོས་པ་སྣ་ཚོགས་པ། །གངྒཱའི་རྒྱ་མཚོའི་རོ་བཞིན་དུ། །སྤྲོས་པ་མེད་པའི་རང་བཞིན་བྱེད། །དེ་བས་གང་གིས་ཐབས་རིག་པས། །བསམ་གཏན་ལ་ནི་མངོན་པར་གཞོལ། །གཟིངས་ལ་ལེགས་པར་སྦྱོར་བ་ལྟར། །སེམས་ཀྱི་དེ་ཉིད་མཐོང་བར་འགྱུར། །འདིར་
ནི་ཕུང་པོ་ཁམས་རྣམས་དང་། །སྐྱེ་མཆེད་དྲུག་ལས་རྣམ་གྲོལ་བ། །སྒྱུ་མའི་གཟུགས་ལ་ལེགས་གནས་པའི། །ཨེ་བཾ་རྩ་ཡི་འཁོར་ལོ་ལ། །བཅུ་དྲུག་ཐོག་མར་ཐིག་ལེར་བཅས། །དྲོ་བ་རྣམས་ཀྱི་བཞི་པ་ལ། །དབྱངས་ཀྱི་དྲུག་པ་དང་ལྡན་པ། །ཟླ་ཕྱེད་ཐིག་ལེས་རྣམ་པར་མཛེས། །
དབྱངས་ཡིག་བཅུ་གསུམ་ཐིག་ལེས་བརྒྱན། །ཡ་ཚོགས་བརྒྱད་པའི་མཐའ་གནས་པ། །གཞོམ་མེད་བདེ་བ་ཆེ་རང་བཞིན། །ནཱ་ད་ཐིག་ལེ་དང་བཅས་པའོ། །སྲོག་དང་རྩོལ་བ་ལེགས་བསྡམས་ཏེ། །སྤྲུལ་པར་རླུང་ལྔ་བཅིངས་པ་ཡིས། །དུ་བ་ལ་སོགས་རྟགས་མཐོང་
ནས། །ཡེ་ཤེས་མེ་ནི་རྣམ་པར་འབར། །གློག་གི་འོད་དང་མཚུངས་པ་ཡི། །གསལ་བའི་གཟུགས་ཅན་གྱེན་འགྲོ་བས། །སྟེང་ནས་བྱང་ཆུབ་སེམས་བླངས་ཏེ། །འོ་མའི་རྒྱུན་གྱི་རྣམ་པར་འབབ། །ལྟེ་བར་གསང་བའི་སྙོམས་འཇུག་ལས། །ཡེ་ཤེས་སྐྱེས་གང་རང་བཞིན་ནི། །
འདོད་ཆགས་མ་ཡིན་ཆགས་བྲལ་མིན། །དབུ་མར་ཡང་ནི་མི་དམིགས་ཤིང་། །ཆགས་དང་ཆགས་མེད་འདྲེས་གྱུར་པའི། །ལྷན་སྐྱེས་ཡང་དག་བྱང་ཆུབ་ཉིད། །ཟླ་བ་ཉི་མའི་དབུས་གནས་པའི། །ནམ་མཁའ་སེམས་གཅིག་གྱུར་པ་ལས། །རླུང་རྣམས་མ་ལུས་དེར་བཅིངས་
เล่ม ๒๒ · หน้า 273a
ཏེ། །ཡིད་ནི་རི་བོང་ལྟར་གནས་བྱེད། །ཉིན་དང་མཚན་མོ་རྣམས་སྤངས་ཤིང་། །འགྲོ་དང་འོང་བ་ལས་གྲོལ་བ། །དུས་གསུམ་མཉམ་པར་སྦྱོར་བའོ། །བསམ་གྱིས་མི་ཁྱབ་བདེ་བ་ཆེ། །རང་བཞིན་གཉུག་མ་ལྷན་ཅིག་སྐྱེས། །དངོས་པོ་ཀུན་གྱི་དེ་ཁོ་ན། །སེམས་
ཀྱི་དེ་ཉིད་མཐོང་བ་པོ། །རང་བཞིན་གྱིས་ནི་རྣམ་དག་པ། །གཟུང་འཛིན་དྲི་བྲལ་མངོན་སངས་རྒྱས། །དམིགས་མེད་སྙིང་རྗེའི་བདག་ཉིད་ཅན། །འཁོར་བ་ཇི་སྲིད་གནས་ཀྱི་བར། །འགྱུར་བ་མེད་པའི་ངོ་བོས་བཞུགས། །རིན་ཆེན་སེམས་ལས་གཞན་གྱུར་པ། །འཁོར་མེད་
མྱ་ངན་འདས་པ་མེད། །སེམས་ཀྱི་དེ་ཉིད་རིག་པ་ལ། །འཁོར་ཉིད་མྱ་ངན་འདས་པར་འགྱུར། །དཔལ་ལྡན་མགོན་པོ་སྤྱོད་འཆང་བའི། །དྲིན་གྱིས་རྟོགས་པ་དེ་ཉིད་གང་། །གཞུང་ལུགས་རྒྱ་མཚོའི་སྙིང་པོ་ཡིས། །འགྲོ་བའི་སྒྲིབ་ཤེས་སྒྲིབ་སེལ་ཤོག །དཔལ་འཁོར་ལོ་སྡོམ་པའི་སྙིང་
པོ་དེ་ཁོ་ན་ཉིད་བསྡུས་པ་སློབ་དཔོན་ཀུ་ས་ལི་པས་མཛད་པ་རྫོགས་སོ།། །།རྡོ་རྗེ་སློབ་དཔོན་ངག་གི་དབང་ཕྱུག་དང་། ཨཱ་ཙཱརྱ་མར་པ་ཆོས་ཀྱི་དབང་ཕྱུག་གིས་བསྒྱུར་བའོ།།
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด