དཔལ་རྡོ་རྗེ་སེམས་དཔའི་གསང་བའི་དོན་རྣམ་པར་དགོད་པ་ཞེས་བྱ་བ
ชื่อสันสกฤต (อักษรทิเบต ตามตัวบท) ཤྲཱི་བཛྲ་སཏྭ་གུ་ཧྱཱཪྠ་དྷ་རོ་བྱཱུ་ཧ་ནཱ་མ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๒๗ · หน้า 116a
༄༅༅། །རྒྱ་གར་སྐད་དུ། ཤྲཱི་བཛྲ་སཏྭ་གུ་ཧྱཱཪྠ་དྷ་རོ་བྱཱུ་ཧ་ནཱ་མ། བོད་སྐད་དུ། དཔལ་རྡོ་རྗེ་སེམས་དཔའི་གསང་བའི་དོན་རྣམ་པར་དགོད་པ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དཔལ་ལྡན་སངས་རྒྱས་ཀུན་
གྱི་དངོས། །རྡོ་རྗེ་སེམས་དཔའ་བདེ་ཆེན་པོ། །གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་ལ་ཕྱག་འཚལ། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་མཆོག་ལས། །སྣ་ཚོགས་ལས་ཀྱི་སྦྱོར་བ་ཡིས། །ཆོ་ག་སྣ་ཚོགས་འདོད་པ་ཡི། །
སེམས་ཅན་རྣམས་ནི་འདུལ་བ་དང་། །བདེ་བ་ཐམས་ཅད་བསྒྲུབ་པའི་ཕྱིར། །ཅི་རིགས་པར་ནི་སྤྲུལ་བྱས་པའི། །གཏམ་དག་རབ་ཏུ་བཤད་པར་བྱ། །ཡང་དག་གྲུབ་པ་གཅིག་པུ་ཉིད། །ཇི་ལྟར་འདོད་པ་བཞིན་དུ་སྦྱར། །རྟོག་པའི་ཆོ་ག་ཐམས་ཅད་ལ། །གྲུབ་པ་དམ་པ་མཆོག་གི་
เล่ม ๒๗ · หน้า 116b
མཆོག །སངས་རྒྱས་བསྟན་པ་རྣམ་འཕྲུལ་བས། །རང་བཞིན་གཞི་ལས་འཁྲུལ་པ་དང་། །དམ་ཆོས་སྤྱོད་ལ་འཁྲུལ་པ་དག །རྒྱུས་རྐྱེན་ལས་འབྲས་གདུལ་དོན་དུ། །རྡོ་རྗེ་སེམས་དཔའ་དེ་བཞིན་གཤེགས། །དབུགས་དབྱུང་རྣམ་པ་དྲུག་གི་ཚུལ། །དེ་ལས་མཐའ་ཡས་
རྣམ་འཕྲུལ་བས། །སྣ་ཚོགས་དཀྱིལ་འཁོར་ལྷ་རྣམས་དང་། །སྣ་ཚོགས་རྒྱུད་དོན་གསུངས་པ་དང་། །སྣ་ཚོགས་ལས་ཀྱི་འདུལ་མཛད་པས། །དེ་བས་འདི་ནི་རྒྱུད་ཀུན་གྱི། །རྩ་བའི་དོན་དུ་ཤེས་པར་བྱ། །གང་ཞིག་སྔོན་འགྲོ་ཕུན་སུམ་ཚོགས། །ཤེས་བྱ་དངོས་གནས་ལྟ་གཞི་
ཤེས། །གནས་མཆོག་ཕུན་ཚོགས་གཞི་ལྡན་པས། །དཀྱིལ་འཁོར་དབང་དང་དམ་ཚིག་དང་། །ཏིང་འཛིན་ཕྲིན་ལས་སྤྱོད་པའི་དོན། །ཚོགས་ཀྱི་འཁོར་ལོ་སྒྲུབ་པའི་ཐབས། །བདག་གཞན་དོན་གྱི་དབྱེ་བ་ཡིས། །རིམ་པ་གཉིས་སུ་ཤེས་པར་བྱ། །ལམ་གཉིས་ཉམས་
སུ་བླངས་བྱས་པས། །འབྲས་བུ་མཛད་དང་བཅས་པར་སྣང་། །དེ་དག་རྣལ་འབྱོར་དོན་སྣང་བའི། །རྣལ་འབྱོར་ཚིག་གིས་རྣམ་པར་གྲོལ། །མུ་སྟེགས་སོགས་སྦས་གསང་བའི་བརྡ། །སྒྲ་ཚད་རྟོག་གེས་ཤེས་པ་མིན། །བཞིན་བཟངས་རང་བཞིན་ཞི་བའི་ཆོས། །སྐྱེ་བོ་ཀུན་དགའ་
མཁའ་འདྲའི་བློ། །དྲི་མེད་རས་དཀར་ལེགས་གནས་ལ། །སྔོན་པོའི་ཚོན་ཞེན་འགྱུར་བ་མེད། །ལ་ལར་རྒྱལ་རིགས་བྲམ་ཟེ་དང་། །རིགས་ངན་མཚོན་ཆའི་འཁོར་ལོ་ཅན། །དྲང་སྲོང་སློབ་སྦྱོང་དཔོན་པོ་ལྟར། །བྱང་ཆུབ་སེམས་ལྡན་དོན་སྤྱོད་པ། །མ་ལྟར་བྱམས་ཤིང་ཕ་ལྟར་
སློབ། །བྲན་དང་རྒྱལ་པོ་ལྟ་བུའི་ཚུལ། །ཁྱིམ་བདག་རིག་བྱེད་སྨྲང་འདོན་དང་། །བློན་པོ་ལས་མཁན་བཞིན་དུ་གནས། །བྱ་བ་རྣམ་པ་བཅུ་བཞི་ཡིས། །བདག་དང་གཞན་གྱི་དོན་སྤྱོད་པ། །ཡིད་བཞིན་ནོར་བུའི་སྒྲོམ་འབྱེད་ཅིང་། །འོད་ཀྱི་སྣང་བ་གསུམ་ལ་སྤྱོད། །ཐེག་ཆེན་གསང་
དོན་གནས་མཐོང་ནས། །གཞུང་བཞིན་ཁང་པར་ཞུགས་པ་དང་། །གནས་གསུམ་དག་ཅིང་རྩལ་རྫོགས་པའི། །སྨིན་བྱེད་ཕྱི་ནང་གསང་མཐར་ཕྱིར། །རང་གནས་འདའ་བ་མེད་པའི་ཆོས། །ཐུན་མོང་ཁྱད་པར་རིམ་པ་བཞིན། །མ་ཉམས་རྒྱུད་ལ་གནས་བྱ་སྟེ། །བསྐང་སོའི་ལས་
เล่ม ๒๗ · หน้า 117a
ལ་བརྩོན་ལྡན་པས། །བདག་གཞན་དོན་གྱི་བྱ་བ་རྣམས། །གཞུང་བཞིན་བསྒྲུབ་པར་བསྟན་པ་ཡིན། །སྲོག་ཆགས་གསད་པར་མི་བྱ་ཞིང་། །དཀོན་མཆོག་གསུམ་ནི་ཡོང་མི་སྤང་། །བྱང་ཆུབ་སེམས་ཀྱང་མི་བཏང་སྟེ། །སློབ་དཔོན་སྐལ་བཟང་ཡོང་མི་སྤང་། །
ཀུན་དུ་སྣ་ཚོགས་སྐལ་བཟང་པོར། །བདག་རང་སྒྲུབ་པས་སྐལ་བ་བཟང་། །རང་གི་ངོ་བོ་ཡོངས་སྤངས་པའི། །དཀའ་ཐུབ་ཀྱིས་ནི་གཟིར་མི་བྱ། །ཅི་བདེ་བར་ནི་བདེ་བར་སྤྱད། །འདི་ནི་ཕྱི་དུས་སངས་རྒྱས་ཡིན། །རྣལ་འབྱོར་ལོངས་སྤྱོད་ཐམས་ཅད་ལ། །ཅིས་ཀྱང་མི་འཇིགས་དགའ་
བར་སྤྱད། །དཀྱིལ་འཁོར་ཀུན་དུ་མ་ཞུགས་ཤིང་། །དམ་ཚིག་རྣམས་ནི་སྤངས་པ་དང་། །གསང་བ་ཡང་དག་མི་ཤེས་པས། །སྒྲུབ་པ་ཅི་ཡང་མི་འགྲུབ་པོ། །བདག་མེད་ཆོས་ཉིད་དང་ལྡན་པས། །དམ་ཚིག་ལ་སྡང་སྐལ་བ་ངན། །སྲིད་པ་ཤིན་ཏུ་བསྒྲུབས་པས་ན། །སྐལ་བཟང་
སངས་རྒྱས་བཅོམ་ལྡན་འདས། །ཆོས་ཀུན་རང་བཞིན་གནས་པའི་ཚུལ། །རྟོག་ཐབས་ཡོན་ཏན་སྐྱོན་དག་དང་། །ལོག་རྟོག་སྙིང་རྗེའི་གནས་བསྟན་པའི། །དངོས་པོ་དེ་ཉིད་དོན་བསྟན་མཛད། །འདི་ནི་རང་འབྱུང་བཅོམ་ལྡན་འདས། །གཅིག་པུ་རབ་ཏུ་ཆེ་བའི་ལྷ། །སངས་རྒྱས་
ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་བའི་མཆོག །བུད་མེད་ཀུན་གྱི་སྒྱུ་མའི་རྒྱ། །འདི་ནི་གཉིས་མེད་ཐེག་པའི་མཆོག །སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་ཆེ། །ངོ་བོ་ཉིད་ཀྱི་མཐུ་དག་དང་། །རང་བཞིན་གྱིས་ནི་དེ་འགྲུབ་བོ། །ཌཱ་ནི་ནམ་མཁར་འགྲོ་
མ་ཞེས། །ཁམས་ལས་མངོན་དུ་བརྟག་པ་སྟེ། །ནམ་མཁའ་ཀུན་དུ་སྤྱོད་འགྲུབ་པས། །མཁའ་འགྲོ་མ་ཞེས་རབ་ཏུ་གྲགས། །ཆགས་མིན་ཆགས་དང་བྲལ་བ་ཡིན། །དབུ་མར་ཡང་ནི་མི་དམིགས་སོ། །ཐམས་ཅད་མ་ལུས་ཕྱག་རྒྱ་ཡིས། །ཐམས་ཅད་མ་ལུས་བདེ་མཆོག་གི། །
སྒྱུ་མ་ཐམས་ཅད་རབ་སྦྱོར་བ། །མཆོག་ཏུ་བདེ་བས་བདེ་བའི་མཆོག །དེ་ཉིད་འདོད་ཆགས་འདོད་ཆགས་བྲལ། །འདོད་པ་དང་ནི་འགྲོ་བ་ཡིན། །དུས་གསུམ་སྲིད་གསུམ་མཆོག་གསུམ་དང་། །འཇིག་རྟེན་གསུམ་དང་ཁམས་གསུམ་དང་། །རྣམ་པ་སྣ་ཚོགས་ཐ་དད་པའི། །གནས་
เล่ม ๒๗ · หน้า 117b
པ་ཐམས་ཅད་དེ་ཉིད་དོ། །འགྲོ་བ་དག་ནི་མ་ལུས་ཀུན། །ཐམས་ཅད་དུ་ནི་འདི་འགྱུར་རོ། །དེ་ལ་སོགས་པ་མཐའ་ཡས་མཆོག །ཆོས་ཉིད་མཉམ་དང་མི་མཉམ་པ། །ནམ་མཁའ་དབྱིངས་ཀྱི་མཐའ་ཀླས་པའི། །དངོས་པོ་ཐམས་ཅད་དེ་ཡིན་ནོ། །སྐུ་མཆོག་མཚན་དང་དཔེ་བྱད་
དང་། །ཡོན་ཏན་མ་འགགས་རྩལ་རྫོགས་ཤིང་། །དཀྱིལ་འཁོར་ལ་སོགས་རྫོགས་པར་ལྡན། །གསུང་ཐུགས་ཕྲིན་ལས་གསལ་བར་ལྡན། །ནམ་མཁའ་ཀུན་གྱི་སྐབས་ན་དཔལ། །རྡོ་རྗེ་སེམས་དཔའ་དེ་བཞིན་གཤེགས། །སངས་རྒྱས་ཐམས་ཅད་མཉམ་སྦྱོར་བས། །མཁའ་
འགྲོ་སྒྱུ་མ་བདེ་མཆོག་གོ། །དུས་གསུམ་སྒྲིབ་པ་མི་མངའ་བའི། །མགོན་རྣམས་བདེ་ཆེན་གནས་བཞུགས་ཏེ། །གསལ་བ་སྟོབས་དང་མི་འཇིགས་ཐོགས། །བདག་གཞན་གཉིས་མེད་སྣ་ཚོགས་སྣང་། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །
ཁམས་གསུམ་དག་ནི་མ་ལུས་པའི། །ཐམས་ཅད་སྒྱུ་མ་ལྟ་བུ་སྟེ། །ཇི་ལྟར་སྒྱུ་མ་ཐམས་ཅད་དུ། །མཐོང་བ་དང་ནི་རེག་པར་འགྱུར། །དམིགས་སུ་ཡོད་པ་མ་ཡིན་ཏེ། །དེ་བཞིན་འགྲོ་བ་ཀུན་གྱི་ཚུལ། །ཡོད་པ་མ་ཡིན་མེད་པ་མིན། །དབུ་མར་ཡང་ནི་དམིགས་སུ་མེད། །ཤེས་རབ་ཕ་
རོལ་ཕྱིན་སྦྱོར་བ། །སངས་རྒྱས་བྱང་ཆུབ་རབ་བསྒྲུབ་པའོ། །ཐབས་ཀྱི་སྒོ་ནས་བདེ་བ་ཆེ། །ཐིག་ལེ་ཕྲ་མོ་ལས་འདས་ཤིང་། །རླུང་གི་གནས་ལའང་གནས་མི་མཛད། །གསང་བ་སྔགས་ཀྱི་དམིགས་བྲལ་བའོ། །ཤེས་རབ་ལས་ལ་བརྟེན་པའི་མཐུས། །འཁོར་ལོའི་བྱང་སེམས་
འབེབས་དང་གཟུང་། །རང་གི་གནས་སམ་གཞན་དུ་སྤྲོ། །རྩ་སོགས་དམན་པ་དབྱིབས་ལས་འདས། །གཉིས་མེད་ཕྱག་རྒྱ་ཆེན་པོའི་ངང་། །སྣང་བ་ཉིད་ན་སྟོང་པ་སྟེ། །སྟོང་པ་ཉིད་ན་སྣང་བ་ཡིན། །དབང་པོ་དྲུག་གི་ཡུལ་ལ་རོལ། །ཆོས་རྣམས་མངོན་སུམ་བདེ་ཆེན་པོ། །གཟུགས་
སོགས་རབ་འབྲིང་ཐ་མ་མེད། །སྣང་བདེ་སྟོང་པའི་རྒྱས་བཏབ་པས། །དམིགས་པ་ཀུན་ལས་རྣམ་པར་གྲོལ། །རྣལ་འབྱོར་དབང་ཕྱུག་བདེ་བ་ཆེ། །བདེ་བས་བདེ་བ་ཀུན་ཐོབ་བོ། །སངས་རྒྱས་ཐམས་ཅད་མཉམ་སྦྱོར་བ། །རྣལ་འབྱོར་མཚན་མས་གཡེངས་མེད་པ། །འདི་
เล่ม ๒๗ · หน้า 118a
ལ་ཁྲུས་དང་བསྡམ་མི་དགོས། །དཀའ་ཐུབ་དཀའ་བ་སྤྱད་མི་དགོས། །དཀའ་ཐུབ་སྡོམ་པ་མེད་པ་དང་། །བདེ་བ་དང་ནི་དགའ་བས་འགྲུབ། །དེ་བས་ཇི་ལྟར་འདོད་སྤྱོད་ཅིང་། །ཀུན་ཟ་དེ་བཞིན་ཐམས་ཅད་སྤྱོད། །སྤྱོད་པ་ཅི་དགར་སྤྱོད་པར་བྱེད། །གཡོ་བ་
དག་ཀྱང་ཅི་དགར་བྱེད། །གང་ལ་ཅི་དགར་སྤྱོད་ཀྱང་རུང་། །གཉིས་མེད་བདེ་ཆེན་གྲོགས་སུ་འགྱུར། །དཀྱིལ་འཁོར་ཀུན་དུ་མ་ཞུགས་ཤིང་། །སྒྲིབ་པ་ཀུན་དང་ལྡན་པ་ཡང་། །རང་གི་ལྷར་ནི་བདག་སྦྱོར་ན། །བསོད་ནམས་ཆུང་ཡང་འགྲུབ་པར་འགྱུར། །བསྐལ་པ་བྱེ་བར་མི་ཐོབ་པ། །
སངས་རྒྱས་དམ་པ་ཐམས་ཅད་དེ། །ཕྱག་རྒྱའི་ཆོ་ག་གང་དག་གིས། །བསྒྲུབས་ན་ཀུན་དུ་ཐོབ་པར་འགྱུར། །བདག་ཉིད་སྒྲུབ་པར་བྱེད་པའི་མཆོག །དེ་ནི་བདག་གིས་བརྟག་པར་བྱ། །རང་གི་རང་བཞིན་མ་རྟོགས་ཤིང་། །གཞན་དུ་འཁྲུལ་པའི་འགྲོ་བ་དག །ཡུལ་དྲུག་རང་རྒྱུད་
བརྟགས་པ་ཡིས། །སྣ་ཚོགས་གཉིས་ཀྱིས་ཆོས་སུ་སྣང་། །མི་མཐུན་བདེ་སྡུག་གནས་ལ་སྤྱོད། །ཆོས་བརྒྱད་མཚན་མས་གཡེངས་གྱུར་ཞིང་། །ཉོན་མོངས་ཡན་ལག་དང་བཅས་པས། །འགྲོ་དྲུག་གནས་རྣམས་སོ་སོར་སྣང་། །སྡུག་བསྔལ་གསུམ་དང་བརྒྱད་ཀྱིས་གདུངས། །
ལས་ཀྱི་འབྲེལ་པའི་དངོས་ལ་ཆགས། །ཀྱེ་མ་འདི་དག་སྙིང་རེ་རྗེ། །བདེ་ཆེན་གནས་ལས་འདི་ལྟར་གྱུར། །སྡུག་བསྔལ་འདི་གཞན་ག་ལས་འགྱུར། །ནམ་ཞིག་རང་གི་དེ་ཉིད་མཐོང་། །ནམ་ཞིག་རང་འབྱུང་ཡེ་ཤེས་འཆར། །ནམ་ཞིག་བདེ་བ་ཆེན་པོས་རྒྱས། །ཀྱེ་མའོ་ལོག་པར་
རྟོག་པ་ཡིས། །ཁ་ཅིག་ལམ་ངན་ལོག་ཞུགས་པའི། །རྒྱུ་ལས་འཁྲུལ་དང་ལམ་ལས་འཁྲུལ། །འབྲས་བུའི་དངོས་ལས་འཁྲུལ་གྱུར་པ། །འཇིག་རྟེན་འདིར་ཡང་སྡུག་བསྔལ་ཏེ། །ཁྱི་དང་བ་ལང་དབྱི་གུ་གསུམ། །མེ་ལྔ་སོགས་ཀྱིས་ལུས་གདུངས་ཏེ། །ཚེ་ཟད་ངན་སོང་
གསུམ་དུ་འགྲོ། །རིགས་ངན་དམན་པའི་ལམ་ཞུགས་པས། །བདེ་འདོད་དེ་ཉིད་ལམ་ལས་གོལ། །སྡུག་བསྔལ་ཀུན་འབྱུང་སྤོང་ཤེས་འདོད། །ཕྱིར་ཞིང་སྡུག་བསྔལ་ཀུན་འབྱུང་གནས། །འགོག་ལམ་མངོན་པར་སྒོམ་བྱེད་ཀྱང་། །འཕགས་པའི་ལམ་ལ་རྒྱབ་ཀྱིས་ཕྱོགས། །
เล่ม ๒๗ · หน้า 118b
ཀྱེ་མའོ་ཡང་དག་བདེ་ལས་གཞན། །འཁྲུལ་པའི་བདེན་པ་བཞི་རུ་བརྟག །རྐྱེན་རྟོག་དགྲ་བཅོམ་ས་འདོད་པས། །རྟེན་འབྲེལ་ལ་བརྗོད་དེ་ཉིད་སྤོང་། །ཉོན་མོངས་ལས་དང་སྡུག་བསྔལ་གྱིས། །རང་བཞིན་རྨོངས་ལས་བདེ་སྤྱོད་པ། །དེ་ཉིད་མཚན་མས་འཁྲུལ་འགྱུར་ཏེ། །ཐམས་
ཅད་མ་རིག་ལས་བྱུང་ན། །དེ་ཉིད་རྒྱུད་གཞན་གང་ལས་བྱུང་། །ཐམས་ཅད་རང་བྱུང་ཡེ་ཤེས་ཡིན། །ཀྱེ་མའོ་དགྲ་བཅོམ་ས་འདོད་པས། །རྒྱུན་ཞུགས་ལན་ཅིག་འོང་བ་དང་། །མི་ལྡོག་སྤྱོད་སོགས་དཀའ་བ་ཡིས། །དགྲ་བཅོམ་ལམ་ཞུགས་གྲོལ་མི་འགྱུར། །ཡང་དག་
བདེན་པའི་དོན་མེད་པར། །ཀུན་དུ་བརྟགས་པས་གཉིས་འཛིན་པ། །བསྐལ་པ་མང་པོར་དཀའ་སྤྱད་ཀྱང་། །ཡང་དག་སངས་རྒྱས་ཐོབ་མི་འགྱུར། །ཀྱེ་མ་ངེས་དོན་མ་རྙེད་པས། །ལམ་གཞན་གཡེངས་པས་ཚི་ཆད་དེ། །གྱད་ཀྱི་ནོར་བཞིན་ཀུན་དུ་ཚོལ། །སྐུ་གསུམ་འབྲས་བུ་སྐྱེ་
མི་འགྱུར། །གང་ཞིག་ཕུན་སུམ་ཚོགས་ལྡན་ཞིང་། །བར་ཆད་མེད་ཅིང་ཉམས་དགའ་བའི། །དབེན་པ་ཡི་ནི་གནས་དག་གམ། །རང་གི་སྐྱེད་མོས་ཚལ་སོགས་པར། །ཀུན་དུ་སྣ་ཚོགས་སྐལ་བཟང་པོར། །ཀུན་དུ་སྣ་ཚོགས་བདེ་མཆོག་གིས། །ཀུན་དུ་སྣ་ཚོགས་དགོས་པ་
རྣམས། །ཅི་བདེ་བར་ནི་བསྒྲུབ་པར་བྱ། །དེ་ནི་དཀྱིལ་འཁོར་ལེགས་པ་ལ། །དྲི་སྣ་ལྔ་ཡིས་བྱུགས་བྱས་ནས། །ཤེས་རབ་ལྡན་པས་སྲད་བུ་གདབ། །ཆ་དབྱེ་ལྷ་ཡི་གདན་སོགས་དགོད། །ལུགས་མ་འམ་རས་བྲིས་སོགས་བཀྲམ་ནས། །མཆོད་པ་སྣ་ཚོགས་སྦྱོར་བར་བྱ། །
དེ་བཞིན་གཤེགས་པའི་ལྷ་རྫས་མཆོག །རིན་ཆེན་རྒྱན་ལ་སོགས་པས་སྤྲས། །དྲིལ་བུ་རྒྱལ་མཚན་མཆོག་ལྡན་པའི། །བླ་རེ་དམ་པ་བྲེས་པ་དང་། །རྡོ་རྗེ་ཚིག་དང་མཆོད་ལ་སོགས། །གླུ་དང་སིལ་སྙན་རྣམ་པར་འཕྲུལ། །མེ་ཏོག་བདུག་པའི་སྦྱོར་བ་དང་། །མར་མེ་དྲི་ལ་སོགས་
ལྡན་པར། །དེར་ནི་དང་པོར་གདན་བཤམས་ཏེ། །འཇམ་ཞིང་རེག་ན་བདེར་འགྱུར་བའི། །སྣ་ཚོགས་པདྨ་རས་ཀྱིས་གཡོགས། །དེ་ནི་ཐམས་ཅད་དག་པའི་གདན། །གཟུགས་སྒྲ་དྲི་རོ་རེག་བྱ་དང་། །བཟའ་བཏུང་མྱང་དང་ལྡན་པ་ཡི། །འཚོ་བའི་ཟས་དང་རྐྱེན་བཟློག་སྨན། །
เล่ม ๒๗ · หน้า 119a
དམ་རྫས་མི་འཆི་གསང་བ་ལྔ། །ལྕགས་ཀྱུ་ལྔ་པོ་གྲོགས་དང་བཅས། །གསང་ལྡན་དཔའ་བོས་སྤྱད་པར་བྱ། །རིགས་བཟང་གཟུགས་སོགས་མཚན་ལྡན་པའི། །དེ་ཅི་གསང་བའི་གནས་ཐུབ་པ། །རྟོག་མེད་ཐེག་ཆེན་ལ་དགའ་ཞིང་། །གཙོ་བོ་མཉེས་
པའི་ལས་ལ་མཁས། །ཁྲུས་བྱས་དྲིས་བྱུགས་རྒྱན་དང་བཅས། །དབང་བསྐུར་བྱིན་བརླབས་སྤྲོ་བ་བསྐྱེད། །རྫས་རྣམས་འཚོགས་པ་སྦྱང་བྱ་ཞིང་། །བྱིན་བརླབས་བསྡུས་ནས་གནས་སུ་དགོད། །ཆ་ལུགས་རྣམ་པ་སྣ་ཚོགས་དང་། །སྒྲུབ་པ་རྣམ་པ་སྣ་ཚོགས་ཀྱིས། །རྡོ་རྗེ་སེམས་
དཔའི་དགོངས་པ་ལས། །དཀྱིལ་འཁོར་ལ་སོགས་རབ་ཏུ་བསྒྲུབ། །ཀྱེ་མའོ་རང་གིས་བསླང་བྱས་པ། །རྨོངས་རྣམས་འཁྲུལ་ཞིང་གདུངས་པ་ལ། །ཚད་མེད་ཁྱབ་པས་བཀབ་བྱས་ནས། །མྱུར་དུ་སྒྲོལ་བར་དམ་བཅའོ། །བདག་ཀྱང་གོམས་པར་མ་གྱུར་ཏེ། །འདོད་ཀྱང་ནུས་
མེད་ཡོད་ཅི་ཕན། །དེ་ཕྱིར་དང་པོ་བསྒྲལ་བྱས་ཏེ། །གྲུབ་པས་གཞན་དོན་རྒྱ་ཆེར་བསམ། །སྤྲོས་བྲལ་དེ་བཞིན་ཉིད་དབྱིངས་ལས། །འགྲོ་ལ་ཁྱབ་པའི་ཐུགས་རྗེ་འབྱུང་། །རྡོ་རྗེ་སེམས་དཔའི་སྦྱོར་ལྡན་པས། །རྣམ་གསུམ་དག་ཅིང་མཐུ་བསྐྱེད་ཕྱིར། །ཡན་ལག་ཉིང་ལག་དག་
པ་ལ། །ཧཱུཾ་སོགས་བསལ་བས་མཚན་མར་གནས། །ལྕེ་ལ་ན་མོ་སརྦ་དྷརྨྨ། །བུདྡྷེ་བྷེ་སྔགས་མཚན་དང་བཅས། །ཐུགས་ཀར་སེམས་དཔའ་གསུམ་ལྡན་པ། །སྔགས་དང་བཅས་ཏེ་བདག་བྱིན་བརླབ། །ལུས་དང་ངག་སེམས་རྡོ་རྗེ་ཡིས། །མཚན་མའི་ཕྱག་རྒྱ་ལྡན་བྱས་ཏེ། །ཐམས་
ཅད་འབྱུང་བའི་སྦྱོར་བ་ཡིས། །བདག་གི་ལྷར་ནི་བདག་ཉིད་བྱ། །མཛོད་གནས་ལས་བྱུང་དེ་ཉིད་གསལ། །སྲིད་གསུམ་རང་གི་གནས་སུ་དག །དེ་ལས་སྤྲོས་པ་རྟེན་སོགས་དང་། །འགྲོ་གཞན་གནས་སོགས་རྣམ་པར་སྦྱང་། །བསྐལ་པ་གསུམ་གྱི་སྡིག་བྲལ་ཞིང་། །
རང་གནས་སྐུ་གསུང་ཐུགས་སུ་དག །དངོས་གྲུབ་རྒྱལ་བ་བསྐུལ་བྱས་པས། །ཚངས་བུག་སྒྲ་གནས་མཛོད་གསལ་བྱས། །ཡང་སྤྲུལ་མ་ལུས་ཁྱབ་བྱས་ཤིང་། །སྣ་ཚོགས་གར་ལས་བྱུང་བ་ཡི། །རྡོ་རྗེ་སེ་གོལ་གཏོགས་པ་དང་། །ཛཿཧཱུཾ་བཾ་ཧོཿའི་སྦྱོར་ལྡན་པས། །ཐུན་མོང་
เล่ม ๒๗ · หน้า 119b
ཁྱད་པར་སྤྲོས་དང་བཅས། །བླ་མ་ལྷག་པའི་ལྷ་བསྐུལ་ནས། །རང་གི་གནས་ནས་བསྐྱོད་མཛད་དེ། །ཆགས་མེད་རི་བོང་ཅན་རྣམས་བསམ། །ཨོཾ་ཕྱོགས་བཅུ་ཀུན་ནས་ལེགས་བཞུགས་པའི། །བཅོམ་ལྡན་རྒྱལ་བ་སྲས་བཅས་ཀུན། །ཐུགས་རྗེ་ཆེན་པོས་དགོངས་མཛོད་
ལ། །སྨོན་ལམ་དབང་གིས་གཤེགས་སུ་གསོལ། །ཨོཾ་བཛྲ་ས་མཱ་ཛཿཧཱུཾ། །ཡང་དག་ཉིད་དུ་དག་མོད་ཀྱང་། །འགྲོ་བ་ཀུན་གྱི་དོན་སླད་དུ། །ཕྱག་དང་ཞབས་ནི་བསིལ་བར་མཛོད། །གནས་འདི་ཉིད་དུ་བཞུགས་སུ་གསོལ། །མ་ཧཱ་ས་མ་ཡ་སྟྭཾ། ཨོཾ་ཐུགས་རྗེ་ཆེན་པོ་གཟིགས་ནས་
ཀྱང་། །སྣ་ཚོགས་རྒྱུད་རྣམས་འཕྲུལ་མཛད་པའོ། །གར་མཁན་འཁོར་ལོའི་རྒྱུད་མངའ་བ། །འགྲོ་བའི་དོན་དུ་མཆོད་བཞེས་མཛོད། །གསང་སྔགས་རྒྱལ་པོ་ལས་བྱུང་བའི། །སྣ་ཚོགས་མཚོན་ཆའི་ཚོགས་སྤྲོས་ཏེ། །བགེགས་ཀུན་བཤིག་ཅིང་གཏོར་ནས་ནི། །ས་གཞི་ར་
བ་གུར་དུ་གྱུར། །ཡི་གེ་གསུམ་སོགས་རྣམ་སྤྲོས་པས། །མཆོད་སོགས་རྫས་རྣམས་སྦྱང་བ་དང་། །བྱིན་བརླབས་ལྷ་མོ་དང་བཅས་པ། །མང་དུ་སྤྲོས་ཏེ་དབུལ་བར་བྱ། །ཨོཾ་རྡོ་རྗེ་སེམས་དཔའ་བསྡུས་པ་ན། །རྡོ་རྗེ་རིན་ཆེན་བླ་ན་མེད། །རྡོ་རྗེ་ཆོས་ནི་གླུར་བླངས་པས། །རྡོ་རྗེ་ལས་
ནི་བྱེད་པར་འགྱུར། །མེ་ཏོག་ལ་སོགས་ལྷ་མོ་དང་། །གླིང་བུ་ལ་སོགས་ལྷ་མོ་ཡི། །སོ་སོའི་སྔགས་དང་ཕྱག་རྒྱ་དང་། །ཏིང་འཛིན་དབྱངས་སུ་བཅས་པས་དབུལ། །སྣ་ཚོགས་གཟུགས་མཛེས་སྒྲ་སྙན་ཅིང་། །དྲི་ཞིམ་རོ་མཆོག་བརྒྱ་ལྡན་པ། །རེག་བྱའི་བདེ་བ་སྤྲིན་ཕུང་བཞིན། །
ནམ་མཁའ་གང་བར་འབྱུང་བ་དང་། །གཞན་ཡང་འགྲོ་བ་དྲུག་པོ་དག །ལྷ་དང་ལྷ་མོའི་ཚོགས་གྱུར་པས། །རྒྱན་རྣམས་ཀུན་གྱིས་ལེགས་པར་མཛེས། །གླུ་དབྱངས་ཚིགས་སུ་བཅད་པ་དང་། །བྲོ་དང་གར་གྱིས་བསྐྱོད་བྱས་ཏེ། །སྟོང་གསུམ་རྡུལ་སྙེད་སྤྲུལ་བྱས་པས། །དཀྱིལ་
འཁོར་ཀུན་ལ་ལེགས་འབུལ་ན། །མགོན་པོ་ཐུགས་རྗེ་ཅན་གྱིས་བཞེས། །ཨོཾ་བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱལ་མཚོ་ཡེ་ཤེས་ཀྱི། །སྲིད་པའི་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ཨོཾ་ན་མཿསརྦ་ཏ་ཐཱ་ག་ཏེ་བྷྱོ། །བི་ཤྭ་མུ་ཁེ་
เล่ม ๒๗ · หน้า 120a
བྷྱཿསརྦ་ཏཏྑཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། དེ་ལས་བྱུང་བའི་འབྲས་བཟང་མཆོག །ཀུན་མཁྱེན་གནས་མཆོག་སྙོམས་མཛད་པའི། །དོན་རྣམས་གང་ལ་ཆགས་མེད་དེ། །བྱང་ཆུབ་སེམས་དཔའི་ལམ་ཆེན་པོས། །འགྲོ་བ་ཐམས་ཅད་བཅོམ་ལྡན་
འདས། །རྡོ་རྗེ་འཛིན་པའི་གནས་ཐོབ་ཤོག །སྣ་ཚོགས་སྣང་གྲགས་རྣམ་གྲོལ་བ། །དབྱིངས་སྣང་ཆོ་འཕྲུལ་དཔག་མེད་ཀྱང་། །དེ་ཡི་རང་བཞིན་དེ་ཉིད་ལས། །ནམ་མཁའི་ཁམས་ལྟར་སྔོ་དང་བྲལ། །འཁོར་གསུམ་ཡོངས་སུ་དག་པ་ཡི། །མཉམ་ཉིད་བདེ་བ་ཆེན་པོའི་དང་།
ཐམས་ཅད་ཀུན་དུ་འབྲལ་མེད་པའི། །དོན་གཉིས་ངོ་བོ་ལྷུན་འགྲུབ་ཤོག །ཨོཾ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲི་ཡཿཀུ་རུ་ཧཱུཾ།
ཧ་ཧ་ཧ་ཧ་ཧོཿ བྷ་ག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿ ཨོཾ་ཨཱཿཧཱུཾ། རྡོ་རྗེ་ཁུ་ཚུར་གཉིས་བཅིངས་ཏེ། །མཐེབ་ཆེན་བསྒྲེངས་ནས་གཡོབ་པར་བྱ། །རྡོ་རྗེ་ཐལ་མོ་ལན་གསུམ་དུ། །མི་དྲག་སྨད་གཉིས་བརྡབ་པར་བྱ། །ཨོཾ་བཛྲ་གཙྪ་མུཿ ཨོཾ་བཛྲ་
ཏུཥྱ་ཧོ། །རྡོ་རྗེ་སེམས་དཔའི་སྦྱོར་བ་ཡིས། །དཔུང་པ་གཉིས་ནི་རྡོ་རྗེར་བཅིངས། །རྡོ་རྗེ་སེ་གོལ་བརྡབས་པ་ཡིས། །སངས་རྒྱས་ཐམས་ཅད་བསྡུ་བར་བྱ། །ཤིན་ཏུ་གདུག་ཅིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ངོ་བོ་ཡི། །ཁྲོ་བོར་དེ་བཞིན་
གཤེགས་ཀུན་མཛད། །ཁྲོ་བོའི་ཚུལ་ཅན་ཁྲོས་པས་ཀྱང་། །འཇིག་རྟེན་གསུམ་དག་སྲེག་བྱེད་ན། །སངས་རྒྱས་ཐམས་ཅད་ཁྲོས་པ་ཡིས། །ཁམས་གསུམ་མ་ལུས་སྨོས་ཅི་དགོས། །དེ་ནས་སྣ་ཡི་རྩེ་མོ་ལ། །ཡིད་ནི་ཡང་དག་བརྟེན་པར་གཟུང་། །སྣ་ཡི་དབུགས་རིང་དྲོ་བ་
ལས། །རྒྱལ་བས་སྦྱོར་བའི་ཕྱག་རྒྱ་འབྱུང་། །བཅོམ་ལྡན་དེ་ཉིད་རྣལ་འབྱོར་པས། །རྡོ་རྗེ་ཁྲོ་བོར་བསྒྱུར་ནས་འབྱུང་། །རྡོ་རྗེ་ཆེན་པོ་ཧེ་རུ་ཀ །འབར་བས་ཐལ་བར་རབ་ཏུ་འཇིག །སེམས་དཔའ་སྔོན་པོ་འབར་བའི་ངང་། །འོད་ཀྱི་དཀྱིལ་འཁོར་དམར་པོ་འབར། །འཇིག་པ་
เล่ม ๒๗ · หน้า 120b
ཆེན་པོའི་དུས་ལྟར་དྲག །དུར་ཁྲོད་ཀྱི་ནི་མེ་དང་འདྲ། །འབར་བ་ཆེན་པོ་སྐུ་འབར་བ། །ཐོད་པ་མང་པོའི་དབུ་རྒྱན་ཅན། །འཇིག་པ་ཆེན་པོའི་དུས་ལྟར་དྲག །དུར་ཁྲོད་བཞིན་དུ་རབ་ཏུ་འཇིགས། །ཁྲོ་ལ་སོགས་པའི་ཚུལ་ལྡན་པ། །ཞལ་རྣམས་སྣ་ཚོགས་བསྒྱུར་བ་དང་། །སྨིན་
མ་ཁྲོ་གཉེར་བཅས་པར་བསྒྱུར། །འབར་བའི་ཐལ་བས་གར་བྱས་པ། །གུ་ལང་དབང་ཆེན་ཉེ་དབང་བཅས། །ཉི་ཟླ་གཤིན་རྗེ་ཚངས་པར་བཅས། །གནས་གསུམ་དག་ནི་འབར་བྱས་ནས། །ཐལ་བ་བཞིན་དུ་རབ་ཏུ་བཤིག །རྡོ་རྗེ་རྡོ་རྗེ་ཁ་ཊྭཱཾ་ག །དྲིལ་བུའི་སྒྲ་ནི་གསིལ་བ་ཡིས། །
ཐམས་ཅད་ཕབ་ནས་སླར་ཡང་ནི། །ཐལ་བར་གྱུར་པའང་འཚོ་བར་བྱེད། །འདོད་པའི་རྒྱལ་པོ་དྲག་པོ་ཡིས། །ཕྱོགས་བཅུའི་བགེགས་རྣམས་བཀུག་མཛད་ནས། །ཕོ་མོར་བསྣོལ་ཏེ་ཉི་མར་དགོད། །སོ་སོའི་ཚོགས་བཅས་མྱོས་པར་འགྱུར། །སུམྦྷ་ནི་ཡི་སྔགས་བརྗོད་
ཅིང་། །བརྗིད་གནོན་ཁྲོ་བོ་ཆེན་པོའི་སྐུ། །ཨོཾ་སུམྦྷ་ནི་སུམྦྷ་ཧཱུཾ། །གྲྀ་ཧྞ་གྲི་ཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ། ཨཱ་ན་ཡ་ཧོ། །བྷ་ག་བཱན་བིདྱཱ་རཱ་ཛ་ཧཱུཾ་ཕཊ། ཨོཾ་ཨིནྡྲ་ཡེ་སྭཱ་ཧཱ། རྣམ་རྒྱལ་ལ་སོགས་ཁྲོ་བོ་བཅུ། །མཐིང་ནག་ཞལ་གསུམ་ཕྱག་དྲུག་པ། །ཕྱག་མཚན་རྒྱན་དང་མཚན་མ་
ཀུན། །ཧེ་རུ་ཀ་བཞིན་རྣམ་པར་གནས། །ཨོཾ་བཛྲ་ཀྲོ་དྷ་བྷི་ཛཱ་ཡ་ཧ་ན་ཧ་ན་ཧཱུཾ། ཨོཾ་བཛྲ་ཀྲོ་དྷ་ཡ་མཱནྟ་ཀ་པ་ཙ་པ་ཙ་ཧཱུཾ། ཨོཾ་བཛྲ་ཀྲོདྷ་ཧ་ཡ་གྲྀ་བ་ཧུ་ལུ་ཧུ་ལུ་ཧཱུཾ། ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཙྪིནྡ་ཙྪིནྡ་ཧཱུཾ། ཨོཾ་བཛྲ་ཀྲོ་དྷ་ནཱི་ལ་དཎྜ་ད་ཧ་ད་ཧ་ཧཱུཾ། ཨོཾ་བཛྲ་ཀྲོ་དྷ་ཨཱརྱ་ཨ་ཙ་ལ་བནྡྷ་བནྡྷ་ཧཱུཾ།
ཨོཾ་བཛྲ་ཀྲོ་དྷ་ཨ་པ་རཱ་ཙིཏྟ་ཏིཥྛ་ཏིཥྛ་ཧཱུཾ། ཨོཾ་བཛྲ་ཀྲོ་དྷ་ཏྲཻ་ལོཀྱ་བྷི་ཛཱ་ཡ། བྷིནྡྷ་བིནྡྷ་ཧཱུཾ། ཨོཾ་བཛྲ་ཀྲོ་དྷ་ཧཱུཾ་ཀ་ར་ཧཱུཾ་གརྫ་གརྫ་ཧཱུཾ། ཨོཾ་བཛྲ་ཀྲོ་དྷ་མ་ཧཱ་བ་ལ་སྥོ་ཊ་སྥོ་ཊ་ཧཱུཾ། རྡོ་རྗེ་བདུད་རྩི་རྣམ་འཕྲུལ་པས། །རྡོ་རྗེ་ཐོ་བ་ཕྱག་བསྣམས་ཤིང་། །སྟེང་འོག་ཕྱོགས་མཚམས་བཏབ་ནས་ནི། །
རང་གི་གནས་སུ་ངེས་པར་གདབ། །ཨོཾ་བཛྲ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྚཱན་ཕཊ། ཀཱི་ལི་ཀཱི་ལ་ཡ། བཛྲ་དྷ་རོད་ཨཱ་ཛྙཱ་པ་ཡ་ཏི། ཀཱ་ཡ་ཝ་ག་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། ཕྱོགས་བཅུ་ཡང་དག་བྱུང་བ་ཡི། །བགེགས་ཀྱི་ཆུ་བོ་ཀུན་བཅོམ་ནས། །འོད་ཟེར་གནོན་པོ་འཁྲུག་ཅིང་
เล่ม ๒๗ · หน้า 121a
འབར། ཤིན་ཏུ་བགེགས་མེད་ས་མཐོང་ནས། །མཚམས་དང་ར་བ་དྲ་སོགས་ཀྱི། །རྡོ་རྗེ་འཁོར་ལོའི་རྩིབས་རྣམས་ལ། །ཁྲོ་བོའི་ཚོགས་ཀྱི་སྤྲུལ་པར་བཅས། །ཡང་སྤྲུལ་མཚོན་ཆ་འཕྲོ་བའོ། །དམིགས་པའི་ཡུལ་བྲལ་ཐམས་ཅད་སེམས་ཀྱི་དབྱིངས། །མཚན་
རྟོག་ཀུན་ལས་འདས་པས་ཡེ་ཤེས་ཆེ། །མ་བཅོས་བྱང་ཆུབ་སེམས་ཀྱི་དཀྱིལ་འཁོར་ལ། །སྣང་སྟོང་བཏང་སྙོམས་ཆེན་པོའི་ངང་དུ་གསོལ། །ཨོཾ་དྷརྨ་དྷཱར་ཏུ་སྭ་བྷཱ་ཝ་ཨཱཏྨ་ཀོ྅ཧཾ། འགྲོ་ལ་ཁྱབ་པའི་ཐུགས་རྗེ་ཆེན་པོ་ནི། །རྩོལ་བྲལ་གསལ་བའི་ཡེ་ཤེས་ལྔ་ལས་བྱུང་། །
སྟོང་གསལ་བྱང་ཆུབ་སེམས་ཀྱིས་ཀུན་དུ་ཁྱབ། །དམིགས་མེད་ཀུན་དུ་སྙིང་རྗེས་ཅིར་ཡང་སྣང་། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། འཕྲུལ་དགའི་ཚུལ་འབྱུང་རྡོ་རྗེ་སེམས་དཔའ་ནི། །སྟོང་གསུམ་ཡང་ཐོག་དག་ཏུ་གནས་མཛད་དེ། །ཨ་ནུ་རཱ་ག་ཡ་མིའི་སྔགས་
བརྗོད་པས། །སྟོང་གསུམ་འབྱུང་བའི་དཀྱིལ་འཁོར་རིམ་བརྩེགས་ཆགས། །སྟོང་གསལ་ནམ་མཁའི་རང་བཞིན་གྲུ་གསུམ་དཀར། །ཡུམ་ཆེན་ཀུན་དུ་བཟང་མོའི་སྣང་བ་གྲུབ། །རླུང་དཀྱིལ་གཞུ་ཡི་དབྱིབས་སྔོ་བ་དན་བཅས། །སྲ་མཁྲེགས་རྡོ་རྗེ་རྒྱ་གྲམ་གྲོལ་བའི་མཁའ། །
ཆུ་དཀྱིལ་ཟླུམ་ཞིང་དཀར་བ་བུམ་པས་མཚན། །དབུ་བ་འོ་མར་འཁྱིལ་པ་མཱ་མ་ཀཱི། །དབང་ཆེན་གསེར་གྱི་ས་གཞི་གྲུ་བཞི་ས། །རྩེ་མོ་རྡོ་རྗེས་མཚན་པ་སངས་རྒྱས་སྤྱན། །དེ་སྟེང་རྒྱ་མཚོ་ལ་གནས་རི་རབ་མཆོག །ཀར་ཏི་བཻཌཱུརྱ་མདོག་མཚེར་བ་དང་། །པདྨ་རཱ་ག་ཨིནྡྲ་ལྗང་
མདོག་ཅན། །ཁ་ཁྱེར་བང་རིམ་མཚོ་དང་རི་བྲགས་བཅས། །ཡེ་ཤེས་གསལ་བའི་མེ་དཀར་འོད་འབར་ཞིང་། །རྩེ་གསུམ་རས་མཚན་ན་བཟའ་དཀར་མོའི་དབྱིབས། །ལྗོན་ཤིང་བྱ་ཚོགས་དགའ་ཚལ་ལྕོག་བཞི་དང་། །བང་རིམ་ངོས་ལ་ཉི་ཟླའི་རྒྱན་དང་བཅས། །
དེ་སྟེང་རྒྱལ་བའི་ཡོན་ཏན་སྣང་བའི་གནས། །རིན་ཆེན་ལས་གྲུབ་སྣ་ཚོགས་པདྨ་ལ། །གསེར་གྱི་འཁོར་ལོ་སྣ་ཚོགས་རྡོ་རྗེའི་དབུས། །གྲུ་བཞི་སྒོ་ཁྱུད་རྟ་བབས་བཞི་ཡིས་མཚན། །རིན་ཆེན་སྣ་ལྔ་ཕྱོགས་ཀྱི་རྩིག་པ་ལ། །རང་འབྱུང་ཉི་ཤུ་རྩ་ལྔའི་འོད་དང་བཅས། །རྡོ་རྗེས་
เล่ม ๒๗ · หน้า 121b
མཚན་པའི་ཀ་བ་མཆོག་བརྒྱད་སྤྲས། །རིན་ཆེན་མེ་ཏོག་མུ་ཏིག་ཕྲེང་བས་མཛེས། །གཟུགས་སྒྲ་དྲི་རོ་རེག་གི་ལྷ་མོར་འཁྱུག །གདུགས་དང་རྒྱལ་མཚན་བླ་རེ་རྔ་ཡབ་དང་། །ཟླ་ཕྱེད་རྡོ་རྗེ་རིན་ཆེན་བ་དན་དཔྱངས། །དྲིལ་བུ་སྙན་པའི་སྒྲ་སྙན་མཐའ་དག་སྒྲོགས། །རེའུ་ཆ་
བརྒྱད་པའི་ཐིག་བཞི་ཕྱེ་བ་ལ། །སྣ་ཚོགས་པད་མཚན་མྱུ་ཁྱུད་རྡོ་རྗེ་ཅན། །མཚམས་ཀྱི་རེའུ་ཆར་བུམ་པ་གང་བ་བཞི། །བདུད་རྩིའི་བཅུད་ལྡན་རྒྱན་དང་མཚན་མས་མཛེས། །རེའུ་མིག་ཕྱི་མ་ཀུན་དུ་འཁོར་ལོའི་ཚུལ། །མཚམས་མེད་རྡོ་རྗེའི་ཕྲེང་བ་དག་དང་ལྡན། །ཕྱི་རོལ་ར་
བ་རིམ་གསུམ་གནས་པའི་རྒྱབ། །ཕྱི་ཡི་ལྕགས་རི་རྡོ་རྗེ་ར་བའི་ནང་། །ཕྱོགས་དང་མཚམས་སུ་དུར་ཁྲོད་ཆེན་པོ་བརྒྱད། །ཤིང་བརྒྱད་ངོས་ནི་ཞིང་སྐྱོང་ལུས་ཕྱེད་སྟོན། །གདོང་པ་ཕྱོགས་སྐྱོང་བརྒྱད་ཀྱི་གདན་དང་མཐུན། །གཡས་ཀྱིས་གྲི་གུག་གཡོན་ན་ཐོད་པ་འཛིན། །
མཚོ་བརྒྱད་ནང་ན་ཀླུ་བརྒྱད་ལུས་ཕྱེད་སྟོན། །ཐལ་མོ་སྦྱར་ཏེ་བཅོམ་ལྡན་ཕྱོགས་སུ་གུས། །ཤིང་བརྒྱད་དྲུང་དུ་རྣལ་འབྱོར་འཁོར་བཅས་གནས། །སྤྲིན་དང་མཆོད་རྟེན་རང་འབྱུང་མཁའ་འགྲོའི་ཚོགས། །རོ་ལངས་ཤ་ཟ་འབྱུང་པོ་མང་གནས་ཤིང་། །རོ་དང་བྱ་ཁྱི་ཅེ་སྤྱང་
རྣམ་པར་འདྲེས། །དེ་དུས་དྲག་བྱེད་མཁའ་འགྲོ་ལྷ་ཚོགས་ལ། །འཛམ་བུའི་གླིང་བཞིན་དུར་ཁྲོད་རྣམ་པར་སྣང་། །ཕྱི་རོལ་དཔག་བསམ་བུམ་པ་བྱ་དང་ཤིང་། །འདོད་པའི་ལོངས་སྤྱོད་ཀུན་གྱིས་རྣམ་པར་མཛེས། །དབུས་ཀྱི་པདྨའི་གདན་དག་ལ། །དཔལ་མཆོག་དང་པོ་
བཞུགས་མཛད་དེ། །ཆོས་ཀུན་སྟོང་ཉིད་མཚན་མར་བྲལ། །སྨོན་མེད་རང་བཞིན་འོད་གསལ་བའི། །ཏིང་འཛིན་ལ་བཞུགས་བྱམས་པར་གནས། །འགོག་པའི་རང་བཞིན་ལ་གནས་པ། །ཕྱོགས་བཅུའི་རྒྱལ་བས་བསྐུལ་མཛད་དེ། །མངོན་བྱང་ལྔ་ཡིས་རྫོགས་སྐུར་
གྱུར། །རང་སེམས་ཟླ་བའི་དཀྱིལ་འཁོར་ལ། །ཨ་ཡིག་བཅུ་དྲུག་གནས་པ་ལ། །ཐུགས་རྗེ་ཆེན་པོ་ཤར་བྱེད་པའི། །ཉི་དཀྱིལ་ཀ་ཡིག་སུམ་ཅུ་བཞི། །ལྕེ་རྩ་ཅན་བཞི་མི་གསལ་གཉིས། །སྐར་མའི་གཟུགས་འདྲ་བསྒོམ་པར་བྱ། །དེ་དག་འཕྲོ་ཞིང་འདུས་པ་ཡིས། །
เล่ม ๒๗ · หน้า 122a
ཚོགས་གཉིས་མཚན་དང་དཔེ་བྱད་རྫོགས། །ཡེ་ཤེས་དང་པོ་གཉིས་སྟོན་ཅིང་། །བྱང་ཆུབ་སེམས་གཉིས་མཚན་ཉིད་དོ། །གསུམ་པ་རྡོ་རྗེ་རྩེ་ལྔ་པ། །དཀར་གསལ་དམར་བའི་མདངས་དང་ལྡན། །བུམ་པར་ཧཱུཾ་མཚན་རྣམ་གསལ་བ། །ཚོགས་གཉིས་འབྲས་
བུ་ཡོངས་རྫོགས་རྟགས། །ཁ་དོག་ལྔ་ནི་སྣང་བ་ལས། །རིགས་དྲུག་དཀྱིལ་འཁོར་བསམ་བྱས་པས། །རང་གི་གནས་རྣམས་སྦྱོང་མཛད་ཅིང་། །དཀྱིལ་འཁོར་སོ་སོའི་འཁོར་བཅས་ལ། །སླར་འདུས་སྐུ་གསུང་ཐུགས་ཞུགས་པས། །རྡོ་རྗེའི་འོད་བཅས་ཆེན་པོར་གྱུར། །ཡེ་
ཤེས་བར་པ་གཉིས་སྟོན་ཅིང་། །བྱང་ཆུབ་སེམས་ཉིད་མཚན་ཉིད་དོ། །ལྔ་པ་ཆོ་ག་རྫོགས་པ་ལས། །རྡོ་རྗེ་སེམས་དཔའི་ཀུར་བཞེངས་ཏེ། །ཡེ་ཤེས་བྱང་སེམས་ལྔ་པ་ལས། །ཕྱག་རྒྱ་ཆེན་པོར་གསལ་བ་ཡིན། །ཨོཾ་བཛྲ་ཨ་ཧཾ། ཨོཾ་མ་ཧཱ་སུ་ཁ་བཛྲ་སཏྭ་ཨ། ཛཿཧཱུཾ་
བཾ་ཧོཿ སུ་ར་ཏ་སྟྭཾ། གངས་རི་རྡུལ་བྲལ་མེ་ཤེལ་འོད། །རིན་ཆེན་ལྔ་ཡི་གཟེར་ཕྲེང་མཛེས། །སྒེག་དགྱེས་འཛུམ་མིག་བཅས་པའི་བཞིན། །དཀར་མཐིང་སེར་མཆོག་འབར་བའི་མདངས། །ཞལ་མང་ཕྱག་བཞི་སྒེག་བཞད་འཆང་། །གཡས་ན་རྡོ་རྗེ་རྩེ་ལྔ་འབར། །སྙེམས་
བཅས་གསོར་ཞིང་ཐུགས་ཀར་བརྟན། །གཡོན་པ་ཁ་ཊྭཱཾ་རྒྱ་གྲམ་ཅན། །དྲིལ་བུ་བ་དན་བཅས་པ་འཁྲོལ། །འོག་མ་གཉིས་ཀྱིས་མདའ་དང་གཞུ། །མཚན་དཔེ་ཕྱག་རྒྱ་ལྔ་ཡིས་མཛེས། །སྟོད་གཡོགས་དར་ཀར་གསེར་རིས་ཅན། །སྐུ་སྨད་ཚི་གུའི་ན་བཟའ་གསོལ། །རིན་ཆེན་
ཕྲེང་བའི་རྐེད་ཆིངས་ཅན། །མགུལ་གདུབ་དོ་ཤལ་དཔུང་རྒྱན་དང་། །ཕྱག་ཞབས་གདུ་བུ་སེ་མོ་དོ། །རྡོ་རྗེ་རྩེ་ལྔའི་ཕྱག་རྒྱ་ནི། །གནས་ལྔ་དག་ཏུ་བཏུགས་བྱ་སྟེ། །སྔགས་ཀྱིས་བདེ་གཤེགས་ཐམས་ཅད་ཀྱི། །སྐུ་གསུང་ཐུགས་སོགས་རྣམ་པར་བསམ། ཨོཾ་ན་མོ་སརྦ་ཏ་ཐཱ་
ག་ཏ་ཀཱ་ཡ་ཝཱཀ་ཙིཏྟ་གུ་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ལུས་ཀྱི་བ་སྤུའི་གནས་རྣམས་སུ། །དཀྱིལ་འཁོར་དྲུག་གི་རྡུལ་ཕྲན་གནས། །མཁའ་དབྱིངས་དབང་ཕྱུག་ཕྱག་རྒྱ་ཡིས། །གནས་ཀུན་བྱིན་གྱིས་བརླབ་པར་བྱ། །མཐེ་བོང་སེམས་དཔའི་སྐྱིལ་མོ་ཀྲུང་། །མཛུབ་མོ་གཉིས་ཀྱི་རྩེ་མོ་
เล่ม ๒๗ · หน้า 122b
དགུག །གུང་མོ་གཉིས་ནི་མཉམ་པར་སྦྱར། །ལྷག་མ་རྡོ་རྗེ་ཐལ་མོར་བྱ། །སོར་མོ་ཐམས་ཅད་ནང་དུ་བསྣོལ། །རྩེ་མོ་ནང་དུ་སྤྲད་བྱས་ནས། །མཐེ་བོང་རྡོ་རྗེས་མནན་པ་ནི། །སྣ་དང་མིག་ཕུག་ལྟ་བུ་སྟེ། །འདི་གཉིས་མགོ་བོའི་གནས་ལྔར་གཏུགས། །དར་དཔྱངས་
བཅིང་ཞིང་མཐའ་ནས་འགྲོལ། །ཨོཾ་ཨ་བྷི་ཥིཉྩ་མཾ། ཧཱུཾ་ཨ་བྷི་ཥིཉྩ་མཾ། རཏྣ་མཱ་ལེ་ཨ་བྷི་ཥིཉྩ་ཏྲཱཾ། པ་ཊ་ལཾ་ཨ་བྷི་ཥིཉྩ་ཧཱུཾ། བཛྲ་ཏུ་ཥྱ་ཧོ། ཡོན་ཏན་ཆ་ལ་རྣ་བ་ཡི། །ཟབ་མོ་བདེ་མཆོག་སྐུ་ལྟ་བུར། །ཕྱུང་ནས་བྱིན་གྱིས་བརླབས་མཛད་དེ། །ཐབས་དང་ཤེས་རབ་ལྡན་པར་
གྱུར། །ལུས་དང་ངག་སེམས་རྡོ་རྗེ་ཡིས། །མཚན་མའི་ཕྱག་རྒྱ་ལྡན་བྱས་ཏེ། །ཨོཾ་ཨཱཿཧཱུཾ། ཐུགས་གསལ་ཉི་མ་ལ་གནས་པའི། །ཡེ་ཤེས་སེམས་དཔའ་ཧཱུཾ་དང་བཅས། །དཀྱིལ་འཁོར་སྤྱན་དྲངས་ལྷ་མོ་ཡིས། །ཁྲུས་བྱས་དྲི་མ་གསུམ་དག་ནས། །དབང་བསྐུར་འབྲས་
བུ་བསམ་པར་བྱ། །སངས་རྒྱས་གཙུག་གི་ནོར་བུའོ། །ཁམས་གསུམ་དག་ན་རིན་ཆེན་གཞན། །སངས་རྒྱས་རིན་ཆེན་ལྟ་བུ་མེད། །སངས་རྒྱས་ཀུན་གྱི་རིན་པོ་ཆེ། །དབུ་རྒྱན་དུ་ནི་བདེ་བས་མཆོག །གཞན་གྱི་ནོར་མིན་མི་འཕྲོགས་པ། །ལྷ་ཡི་ཆུ་ནི་དག་པ་སྟེ། །ཐོད་པའི་
ཕྲེང་བའི་དབུ་རྒྱན་དང་། །དར་དཔྱངས་སོགས་ཀྱིས་བརྒྱན་པའོ། །མཁའ་གསང་ཧཱུཾ་ལས་བྱུང་བ་ཡི། །རྡོ་རྗེ་པད་བཅས་ནོར་བུས་མཚན། །པདྨ་འདབ་བརྒྱད་ཨ་དང་བཅས། །མདོག་སེར་ལྟེ་བ་ཟེའུ་འབྲུ་དམར། །ཤ་ཏ་པ་ལ་སོགས་བརྡ་ཡིས། །ཛཿཧཱུཾ་བཾ་ཧོཿའི་སྦྱོར་ལྡན་
བྱ། །ལྷ་མོའི་རོལ་སྤྱོད་གསང་བྱས་པས། །དཀྱིལ་འཁོར་མཉེས་པའི་ལས་བྱའོ། །ཨོཾ་པྲ་བེ་ཤ་ཕཊ། ཨ་ལ་ལ་ལ་ཧོ། ལིང་ག་བགྲེང་བ་རང་འབྱུང་སྟེ། །བརླ་ཡི་དབུས་སུ་ཞུགས་བྱས་ནས། །ལིང་ག་རྡོ་རྗེར་བྱིན་བརླབས་ནས། །རྡོ་རྗེ་སེམས་དཔའ་བདག་སྔོན་སྐྱེས། །
བྱང་ཆུབ་སེམས་དཔའ་ཀུན་དུ་དག །མ་ལུས་ཉེ་བར་ཁྱབ་བྱས་ནས། །འདོད་དགུར་བྱ་བ་རབ་ཏུ་མཉེས། །འོད་འདུས་ཐོགས་མའི་གཟུགས་ལ་གཟུང་། །བདེ་བ་ཆེན་པོའི་འོད་ཟེར་ལས། །ལྷ་མོ་བཅུ་གཉིས་ཚུལ་འདྲ་བར། །ཕྱོགས་དུས་སངས་རྒྱས་ཡབ་ཡུམ་རྣམས། །དགའ་བ་
เล่ม ๒๗ · หน้า 123a
ཆེན་པོས་མཉེས་པར་མཛད། །རྡུལ་ཕྲན་ཡི་གེའི་དབྱིབས་སུ་གྱུར། །གང་ཞིག་ཞལ་དུ་ཞུགས་པ་ལས། །བདེ་བ་ཆེན་པོའི་གནས་སུ་འདུས། །འཁོར་ལོ་བཞི་ནས་རིམ་བཞིན་སྤྲོ། །འབར་ཏ་ཀ་ཏའི་གནས་འབྱུང་སྟེ། །བདེ་ཆེན་ཆགས་དང་གཉིས་
མེད་འདྲེས། །ཁམས་གསུམ་འགྲོ་བའི་རྒྱུད་བསྲེགས་ནས། །རིགས་དྲུག་སོ་སོའི་དཀྱིལ་འཁོར་བསྒྲུབ། །རྣལ་འབྱོར་དག་པའི་རྒྱུད་བསྐུལ་ཞིང་། །རྣམ་གསུམ་དཀྱིལ་འཁོར་གསལ་བར་སྣང་། །སླར་འདུས་གནས་སུ་གཞལ་ཡས་ཁང་། །རྒྱན་དང་གདན་བཅས་སྔོན་
བཞིན་འབྱུང་། །ཐིག་ལེས་གནས་སུ་མཚན་བྱས་ནས། །སྤྲོས་པས་ཡེ་ཤེས་དཀྱིལ་འཁོར་གསལ། །ཧཱུཾ་ལས་རྡོ་རྗེ་སེམས་དཔའ་སྟེ། །གསང་གནས་དབུས་ཀྱི་པདྨ་ལའོ། ཛཿལས་ལྷ་མོ་བདེ་མཆོག་མ། །ཧཱུཾ་ལས་ཨེ་མ་བདེ་བའོ། །བཾ་ལས་ལྷ་མོ་སྣང་མཛད་མ། །ཧོཿ
ལས་སློབ་མ་མོ་ཡི་རྒྱ། །དེ་དག་སེམས་པའི་ཕྱོགས་བཞི་ནས། །འཁྲིལ་བའི་ཚུལ་དུ་བཞུགས་པའོ། །ཨོཾ་ལས་སངས་རྒྱས་བྱང་ཆུབ་མ། །བྷྲཱུཾ་ལས་ཆོས་ཀྱི་འཁོར་ལོ་ཡིན། །ཧ་ལས་ཁམས་གསུམ་རྣམ་རྒྱལ་ཏེ། །ཁཾ་ལས་འདོད་པ་ཀུན་མཛད་མའོ། །དེ་དག་ཤར་
ལ་སོགས་པ་ཡི། །ཕྱོགས་བཞི་ཡི་ནི་རེའུ་ཆ་ལའོ། །ཨོཾ་ལས་གླིང་བུ་ཏྲཾ་པི་ཝང་། །བཾ་ལས་རྔ་ཆེན་ཛྫ་རྫ་རྔ། །མེ་མཚམས་ལ་སོགས་རེའུ་མིག་ཏུ། །ལྷ་མོ་བཞི་ནི་རིམ་བཞིན་བཞུགས། །ཨ་ཨཱ་མེ་ཏོག་སྤོས་མེ་མ། །ཨཾ་ཨཿམར་མེ་དྲི་ཆབ་མའོ། །བར་ཁྱམས་
མཚམས་ཀྱི་གནས་བཞི་རུ། །ལྷ་མོ་བཞི་ནི་གནས་པ་ཡིན། ཛཿལས་རྟ་མགྲིན་འཕང་མཐོ་མ། །ཧཱུཾ་ལས་ཕག་གདོང་མཆེ་བ་ཅན། །བཾ་ལས་ཉི་ཟླ་མེ་འབར་མ། །ཧོཿལས་ཐལ་བྱེད་སྒོ་བཞིར་གནས། །བྷ་གའི་གནས་ནས་སྤྲོ་བྱ་ཞིང་། །སླར་འདུས་ཕྱི་རོལ་
གནས་ལ་འཁོད། །རྡོ་རྗེ་སེམས་དཔའི་གཟུགས་འདྲ་བ། །སྐུ་གཉིས་འཕྲོ་འདུས་རང་ལག་ཞུག །ཛ་བཛྲ་ཏྲི་ས་མ་ཡ་ཕཊ། ལྷ་མོ་བདེ་མཆོག་འགྱིང་བག་ཅན། །དཀར་མོ་སྣ་ཚོགས་རྒྱན་དང་གོས། །ཕྱག་གཉིས་མདའ་གཞུ་འགེངས་པ་སྟེ། །འཕྲོ་འདུའི་ལས་མཛད་
เล่ม ๒๗ · หน้า 123b
ཤར་དུ་བཞུགས། །ཨོཾ་བཛྲ་ཀཱི་ལི་ཀི་ལ་ཧཱུཾ། ཨེ་མ་བདེ་བ་གསེར་གྱི་མདོག །གཡས་པས་བདག་པོ་ལ་འཁྱུད་ཅིང་། །གཡོན་པས་རྡོ་རྗེ་རིན་ཆེན་འཛིན། །འགྱིང་བཅས་ལྷོ་ཡི་ཕྱོགས་སུ་གནས། །བཾ་བཛྲ་ཎྀ་སྨར་ར་ཕཊ། སྣང་མཛད་དམར་མོ་གཡས་པ་ན། །སྣ་
ཚོགས་རྡོ་རྗེ་གཡོན་དག་གིས། །འགྱིང་བཅས་ཐོད་པའི་སྣོད་ཐོགས་ཤིང་། །ཁ་ཊྭཱཾ་ལ་བརྟེན་ནུབ་ཕྱོགས་གནས། །ཧོཿབཛྲ་ཀཱ་མེ་ཤྭ་རི་ཏྲཾ། །སློབ་མ་མོ་འགྱིང་ལྗང་གུའི་མདོག །གཡས་པས་བདག་པོའི་སྐུ་ལ་འཁྱུད། །གཡོན་གྱི་བདུད་རྩིའི་བུམ་པ་ནས། །སངས་རྒྱས་
སྐུ་འབྱུང་བྱང་གི་ཕྱོགས། །ཨོཾ་ཨཾ་མ་དུ་བཛྲི་གྷུཾ་གྷུཾ། སངས་རྒྱས་བྱང་ཆུབ་དཀར་དམར་གསལ། །ཚངས་པའི་མགོ་བཞིས་མཚན་པ་ཡིས། །མདའ་བཞི་དུས་གཅིག་འཕན་པའི་ཚུལ། །འགྱིང་བཅས་ཤར་གྱི་རེའུ་ཆར་གནས། །ཨོཾ་བཛྲ་མེ་གེ་གུ་ལུ་ཧཱུཾ། ཆོས་ཀྱི་འཁོར་
ལོ་དཀར་སེར་མདངས། །གཡས་ཀྱི་གུང་མོའི་རྩེ་མོ་ལ། །འཁོར་ལོ་རྩེ་བརྒྱད་འདེགས་ཚུལ་འཛིན། །འགྱིང་བཅས་ལྷོ་ཡི་རེའུ་ཆར་གནས། །ཨོཾ་ཧ་ཤ་ར་ཏ་བཛྲི་ཨིཾ་ཨིཾ། ཁམས་གསུམ་རྣམ་རྒྱལ་དམར་སྐྱའི་མདོག །གཡས་ན་ཏྲི་ཤཱུལ་རྩེ་གསུམ་དང་། །གཡོན་པས་
རྡོ་རྗེ་རྩེ་ལྔ་འཛིན། །གར་མཛད་ནུབ་ཀྱི་རེའུ་ཆར་གནས། །ཨོཾ་ཁཾ་བཛྲ་ཤི་རི་ཧཱུཾ་ཧཱུཾ། འདོད་པའི་དབང་མོ་ལྗང་གུའི་མདོག །ཕྱག་གཉིས་དཔག་བསམ་ལྗོན་ཤིང་ལ། །མེ་ཏོག་དང་བཅས་རླུང་བསྐྱོད་འཛིན། །གར་མཛད་བྱང་གི་ངོགས་སུ་གནས། །ཨོཾ་དེ་ར་ཏི་བཛྲི་བི་ལ་སི་ཏྲ་ཐ།
གླིང་བུ་སྔོན་མོ་རྡོ་རྗེས་མཚན། །སྣ་ཚོགས་སྒྲ་སྒྲོགས་མེ་ཡི་ཕྱོགས། །ཧེ་བཛྲ་གྷི་ཏེ་ཏེ་ཏེ་ཏེ། །པི་ཝང་སེར་མོ་རྡོ་རྗེས་མཚན། །གླུ་དབྱངས་དྲུག་ལྡན་བདེན་བྲལ་ཕྱོགས། །ཧེ་ར་ཏི་བཛྲ་ཧ་སི་ཧ་ས་བཾ། །རྔ་ཆེན་དམར་པོས་རྡོ་རྗེ་རྔ། །བརྡུང་མཛད་རླུང་མཚམས་ལ་གནས་པའོ། །
ཧེ་ར་ཏེ་བཛྲ་ནེ་ཏྲེ་པེ་པ་ས་ཛ། རྫ་རྔ་ལྗང་གུ་རྫ་རྔ་ལ། །རྡོ་རྗེས་མཚན་བརྡུང་དབང་ལྡན་ཕྱོགས། །ཨོཾ་བཛྲ་པུཥྤེ། མེ་ཏོག་དམར་སེར་རྡོ་རྗེས་མཚན། །གཞོང་ཐོགས་མི་ཡི་མཚམས་སུ་གནས། །བཛྲ་དྷཱུ་པེ། སྤོས་མེ་དཀར་སྔོ་རྡོ་རྗེས་མཚན། །སྤོས་ཐོགས་བདེན་བྲལ་
เล่ม ๒๗ · หน้า 124a
མཚམས་སུ་གནས། །ཨ་བཛྲ་ཨཱ་ལོ་ཀེ། མར་མེ་དམར་མོ་རྡོ་རྗེས་མཚན། །གསལ་འཛིན་རླུང་གི་མཚམས་སུ་གནས། །ཨ་བཛྲ་གནྡྷེ། དྲི་ཆབ་ལྗང་གུ་རྡོ་རྗེས་མཚན། །གང་འཐོར་དབང་ལྡན་མཚམས་སུ་གནས། །ཨོཾ་བཛྲ་ཨཾ་ཀུ་ཤ་ཛཿ། རྟ་
གདོང་དཀར་མོ་ལྕགས་ཀྱུ་དང་། །ཐོད་པ་རྟ་མགོ་ལྗང་གུ་ཤར། །ཨོཾ་བཛྲ་པཱ་ཤེ་ཧཱུཾ། ཕག་གདོང་སྔོན་མོ་གཡས་མཆེ་བ། །གཡོན་ཞགས་ལྷོ་ཡི་སྒོ་ལ་གནས། །ཨོཾ་བཛྲ་ཤྲིཾ་ཁ་ལེ་བཾ། སྣང་བ་མོ་དམར་ཕྱག་གཉིས་ཀྱིས། །ཉི་ཟླ་ལྕགས་སྒྲོག་ནུབ་ཀྱི་ཕྱོགས། །ཨོཾ་བཛྲ་
གྷཎྜེ་ཧོཿ། ཐལ་བྱེད་ལྗང་གུ་གཡས་དྲིལ་བུ། །གཡོན་པས་བྷནྡྷ་ཀུ་བཅས་བྱང་། །ཡང་ན་ལྷ་མོ་ཐམས་ཅད་ཀྱང་། །ཟླ་བའི་ཁ་དོག་འཛུམ་པའི་ཞལ། །བརླ་ཡི་དབུས་ནི་དམར་ལ་དཀར། །ཕྱག་མཆོག་ལོ་མ་སྔོན་མོ་འདྲ། །དཀར་ཞིང་སེར་བའི་བརླ་དང་ལྡན། །
ལྷ་རྫས་ཁ་ཟས་སྣ་ཚོགས་མཆོག །འབར་བ་སྣ་ཚོགས་འཁྲིགས་པའི་འོད། །པདྨ་སྣ་ཚོགས་ལ་གནས་པ། །སངས་རྒྱས་པདྨ་ལ་སོགས་མཆོག །རིན་ཆེན་སྣ་ཚོགས་རྒྱན་དང་གོས། །མུ་ཏིག་མེ་ཏོག་ལ་སོགས་མཆོག །མཛེས་པའི་རྒྱན་ཆ་སྣ་ཚོགས་འཆང་།
མགོན་པོ་རོ་མཉམ་གནས་བཞུགས་ནས། །ཆོས་དབྱིངས་ཡེ་ཤེས་སྙོམས་འཇུག་ལས། །ལྷ་མོ་བདག་པོ་བསྐུལ་མཛད་དེ། །སེམས་ཅན་དོན་ཀུན་རྣམ་འཕྲུལ་མཛད། །རྗེས་སུ་ཆགས་པའི་རྣམ་མང་དགའ་བའི་པདྨོ་རྣམས། །དག་པའི་མཆོད་པས་གསལ་བར་
རྗེས་སུ་མཆོད་བྱས་པ། །མཆོག་ཏུ་རྟག་པའི་རྣལ་འབྱོར་བདེ་བས་བདེ་བ་གྲུབ་པར་མཛོད། །ཨེ་མའོ་མཆོག་ཏུ་བདེ་བའི་དམ་ཚིག་ངོ་བོ་ཉིད། །མཆོག་ཏུ་བདེ་བའི་ཤིན་ཏུ་རྣལ་འབྱོར་སྐལ་བཟང་མཆོག་དགྱེས་པ། །རང་གི་དམ་ཚིག་སྐྱོན་མེད་རྟག་ལ་རོལ་ཅིག་རོལ་ཅིག་ཧོ། །གློ་བུར་
འཁྲུལ་པས་འཁོར་བ་ཡི། །འགྲོ་བ་ཀུན་ལ་དགོངས་ནས་བཞེངས། །དཀྱིལ་འཁོར་ཚོགས་རྣམས་གསལ་བའི་ཕྱིར། །དབང་བསྐུར་བྱིན་གྱིས་བརླབ་པར་མཛད། །གཟུགས་ཕུང་ཆོས་དབྱིངས་ཡེ་ཤེས་ཆེ། །མིག་ལ་སངས་རྒྱས་རྣམ་སྣང་མཛད། །རྣམ་གསུམ་གཟུགས་
เล่ม ๒๗ · หน้า 124b
དང་རོལ་མཛད་དེ། །བརྟན་གཡོའི་དངོས་པོ་རྣམ་པར་འཕྲུལ། །ཚོར་བ་ཀུན་རྟོག་ཡེ་ཤེས་ཆེ། །རྣ་བ་རྡོ་རྗེ་ཉི་མ་ཡིན། །རྣམ་གསུམ་སྒྲ་དང་རོལ་མཛད་དེ། །བརྟན་གཡོའི་དངོས་པོ་རྣམ་པར་འཕྲུལ། །འདུ་ཤེས་མཉམ་ཉིད་ཡེ་ཤེས་ཆེ། །ལྕེ་ལ་པདྨ་དབང་ཕྱུག་རྒྱལ། །
རྣམ་གསུམ་རོ་དང་རོལ་མཛད་དེ། །བརྟན་གཡོའི་དངོས་པོ་རྣམ་པར་འཕྲུལ། །འདུ་བྱེད་བྱ་བ་གྲུབ་པའི་གནས། །སྣ་ལ་རྟ་མཆོག་རོལ་པ་སྟེ། །རྣམ་གསུམ་དྲི་དང་རོལ་མཛད་ཅིང་། །བརྟན་གཡོའི་དངོས་པོ་རྣམ་པར་འཕྲུལ། །རྣམ་ཤེས་མེ་ལོང་ཡེ་ཤེས་ཆེ། །ཡིད་ལ་རྡོ་རྗེ་ཧེ་རུ་
ཀ །རྣམ་གསུམ་ཆོས་དང་རོལ་མཛད་དེ། །བརྟན་གཡོའི་དངོས་པོ་རྣམ་པར་འཕྲུལ། །ཀུན་ཁྱབ་སྟོང་པའི་ཡེ་ཤེས་ཆེ། །ལུས་ལ་རྡོ་རྗེ་སེམས་དཔའ་གནས། །རྣམ་གསུམ་རེག་དང་རོལ་མཛད་དེ། །བརྟན་གཡོའི་དངོས་པོ་རྣམ་པར་འཕྲུལ། །རྣམ་གསུམ་ཕྱག་
རྒྱའི་ཚོགས་ལྡན་ཞིང་། །ཐུགས་ཀར་ཡེ་ཤེས་སེམས་དཔའ་གནས། །རང་རིག་དཀྱིལ་འཁོར་སྤྱན་དྲངས་ནས། །དབང་བསྐུར་རིགས་ཀྱི་མཚན་མ་བསམ། །དེ་ལྟར་གཙོ་དང་སྤྲུལ་བཅས་པ། །དབང་བསྐུར་བྱིན་བརླབས་རྫོགས་བྱས་ནས། །ཕྱག་རྒྱ་བཞི་ལ་གནས་སྤྲོ་
ཞིང་། །ཕྱག་རྒྱའི་སྐུ་རྣམས་གསལ་བར་མཛད། །སྦྱོར་བ་བཞི་ཡི་བྱེ་བྲག་གིས། །དཀྱིལ་འཁོར་རྫོགས་པར་བྱས་ནས་ནི། །རྗེས་སུ་འགྲོ་བའི་ལས་དག་གིས། །དཀྱིལ་འཁོར་བསྒྲུབ་པར་བྱ་བ་ཡིན། །ཡེ་ཤེས་ཙམ་ལ་སྙོམས་འཇུག་པ། །སྦྱོར་བ་ཞེས་ནི་བྱ་བར་
བཤད། །ཡུམ་ལྡན་བྱིན་བརླབས་རོལ་པས་མཆོད། །གཞུག་པ་རྗེས་སུ་སྦྱོར་བའོ། །དག་མཛད་དཀྱིལ་འཁོར་རྫོགས་མཛད་ནས། །འཕྲོ་འདུ་ཤིན་ཏུ་སྦྱོར་བ་ཡིན། །བྱིན་བརླབས་དབང་བསྐུར་ལས་རྫོགས་པ། །སྦྱོར་བ་ཆེན་པོ་ཞེས་བྱའོ། །ཐུགས་ཀའི་འོད་ཟེར་
འཕྲོ་འདུ་ཡིས། །ཡེ་ཤེས་དཀྱིལ་འཁོར་སྤྲུལ་མཛད་ཅིང་། །ཛཿཧཱུཾ་བཾ་ཧོཿའི་སྦྱོར་ཚོགས་དང་། །རྡོ་རྗེ་བསྡུ་བའི་ཕྱག་རྒྱ་བཅིང་། །སྟོང་པ་ཤིན་ཏུ་རྣལ་འབྱོར་ཡོད་མེད་མཐུས། །ནམ་མཁའ་ཉིད་དུ་དམ་ཚིག་ཉེ་བར་གནས། །བདེ་གཤེགས་བདེ་བར་གཤེགས་པ་
เล่ม ๒๗ · หน้า 125a
བཞེངས་སུ་གསོལ། །རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག །ཛཿཧཱུཾ་བཾ་ཧོཿ ཨེ་ཧྱེ་ཧི་བྷ་ག་ཝཱ་ན་མ་ཧཱ་ཀ་རུ་ཎི་ཀཱ་ཏྲི་ཤྱ་ཧོ། །ས་མ་ཡ་སྟྭཾ། བདེ་གཤེགས་ཕོ་བྲང་དཀྱིལ་འཁོར་འདིར། །འགྲོ་བ་མ་ལུས་བསྒྲལ་བའི་ཕྱིར། །དོན་གྱི་དབང་དུ་
དགོངས་ནས་ཀྱང་། །འཁོར་བཅས་གཤེགས་ཤིང་བཞུགས་སུ་གསོལ། །ཀཱ་ཡ་ཝཱཀ་ཙིཏྟ་ཧཱུཾ། སྒྱུ་འཕྲུལ་དགའ་བའི་རྡོ་རྗེ་རོལ་མོའི་ཚོགས། །གཞན་ལ་སྣང་བའི་དཀྱིལ་འཁོར་རྣམ་པར་མཛེས། །ཨ་ལ་ལ་ཧོ། །ཚངས་པའི་མཆོག་རྣམས་ཟིལ་གྱིས་གནོན་མཛད་ཅིང་། །
རྟོག་པ་དུ་མའི་སྒྲོ་འདོགས་གཅོད་པར་མཛད། །ཨ་ལ་ལ་ཧོ། གཉིས་མེད་ཡེ་ཤེས་གཉིས་ཅན་རྣམ་མཐའ་ཡས། །སྣང་སྟོང་བདེ་ཆེན་མཉམ་ཉིད་དབྱིངས་ལ་རོལ། །ཨ་ལ་ལ་ཧོ། །ཀུན་འབྱུང་ཡོན་ཏན་རྩོལ་མེད་ལྷུན་གྲུབ་སྣང་། །རྒྱན་གྱི་དཀྱིལ་འཁོར་རྣམས་བཀོད་
རང་ལས་བྱུང་། །ཨ་ལ་ལ་ཧོ། །མཛད་པ་རྒྱ་ཆེན་འགོག་མེད་ཀུན་བསྒྲུབས་པས། །ཚོགས་བཅས་རོལ་པས་བྱ་བ་ཀུན་རྫོགས་ནས། །ཨ་ལ་ལ་ཧོ། །སྐུ་གསུང་ཐུགས་མཆོག་ཡོན་ཏན་ཕྲིན་ལས་རྒྱན། །དཀྱིལ་འཁོར་མཛེས་པའི་ལྷ་ལ་ཕྱག་འཚལ་ལོ། །ཨ་ལ་ལ་
ཧོ། །དཔལ་ལྡན་གཡོན་པ་འགྱིང་བའི་ཐབས། །གཡས་པ་བ་དན་གསུམ་པར་བྱ། །སྲི་ཞུར་བྱས་ཤིང་བཏེག་པའི་མཆོག །བདག་ཉིད་རྡོ་རྗེ་སེམས་དཔའི་དཔལ། །འཛུམ་དང་བཅས་པའི་མིག་གིས་བལྟ། །བསམ་གཡོས་ཐལ་མོ་སྦྱར་བར་བྱ། །ཨོཾ་ཨཱཿཧཱུཾ། ཨ་ཏི་པུ་ཧོ།
བནྡྷ་ནཱཾ་ཀཱ་རོ་ཡ་མི། གུ་རུ་པ་ཏི། ཨ་ལ་ལ་ཧོ། ཨོཾ་འབྱུང་བ་ཆེན་པོ་ཐམས་ཅད་འབྱུང་། །སྟོང་གསུམ་རྡུལ་སྙེད་མ་ལུས་པའི། །གཟུགས་སྒྲ་དྲི་རོ་རེག་བྱ་ཆོས། །ལྷ་མོའི་ཚོགས་རྣམས་མ་ལུས་སྤྲོ། །མེ་ཏོག་བདུག་པ་མར་མེ་མ། །དྲི་སོགས་ཀུན་གྱིས་མཆོད་པར་བྱ། །ཨོཾ་པ་ན་པེ་ན། པ་ནུ་སུ་ར་ཏ།
ཏི་པུ་པ་ར་མུ། སརྦ་ཏ་ཐཱ་ག་ཏ། ས་མ་ཡོ་གི་སི་དྡྷི་ཧཱུཾ། ཨོཾ་བཛྲ་པུཥྤེ། ཨོཾ་བཛྲ་དྷཱུ་པེ། ཨོཾ་བཛྲ་ཨཱ་ལོ་ཀེ། ཨོཾ་བཛྲ་གནྡྷེ། པྲ་ཏཱིཙྪ་ཧོ། །ཤཱི་བྷ་ག་བཱན་ཁ་ཁ་ཁཱ་ཧི། སྐད་ཀྱི་གསངས་ནི་མཐོ་དམན་དང་། །གྲེ་འགྱུར་བཅས་ཤིང་བཟླས་པ་ཡིས། །དུས་གསུམ་རང་བཞིན་མཆོག་
เล่ม ๒๗ · หน้า 125b
རྣམས་ཀྱིས། །ཧཱུཾ་ལ་སོགས་པའི་གླུ་བླང་ཞིང་། །ཚིག་རྣམས་ཀུན་གྱིས་ཅི་འདོད་པར། །ཇི་ལྟར་སྤྲོས་པའི་གླུ་ཀུན་གྱིས། །ཧཱུཾ་གི་གླུ་ཡིས་ཕྱག་རྒྱ་དཔལ། །རྡོ་རྗེ་སེམས་དཔའ་རབ་བསྒྲུབ་པའོ། །གླིང་བུ་དང་ནི་རྒྱུད་གཅིག་དང་། །དེ་བཞིན་དུ་ནི་རྒྱུད་མངས་སོགས། །གྱེན་
དུ་འཐོར་དང་ཐུར་དུ་བླུགས། །གཡས་པ་མི་འདེགས་སོ་སོའི་རྒྱ། །སྦྱོར་བ་རྣམ་པ་གསུམ་ལྡན་པས། །རང་གི་གནས་ལ་སྦྱར་བར་བྱ། །ཛཿཧཱུཾ་བཾ་ཧོཿ། བདེ་བ་ཀུན་ལ་ཞེན་པ་དང་། །དངོས་གྲུབ་ཐམས་ཅད་རྣམ་དག་ཕྱིར། །རྡོ་རྗེ་སེམས་དཔའ་བདེ་བའི་མཆོག །ཟླ་བ་
ཉ་ལྟར་རྩ་དམར་སྐུ། །གཡས་གཡོན་རྡོ་རྗེ་དྲིལ་འཛིན་པས། །བདེ་བའི་ཆ་ལུགས་གར་བྱེད་ཅིང་། །སེམས་དཔའི་སྐྱིལ་ཀྲུང་སྙེམས་བཅས་ནས། །དཔུང་འཇོམས་དངོས་གྲུབ་ཐམས་ཅད་འགྲུབ། །ཨོཾ་མ་ཧཱ་སུ་ཁ་བཛྲ་སཏྭ་ཨཱཿཛཿཧཱུཾ་བཾ་ཧོཿ། སུ་ར་ཏ་སྟྭཾ། ཟླ་བའི་ཁ་དོག་འཛུམ་པའི་
ཞལ། །པད་གནས་བཅས་པའི་གར་བཅས་འཁྱུད། །མདའ་འཛིན་སངས་རྒྱས་པདྨ་སོགས། །རིན་ཆེན་སྣ་ཚོགས་རྒྱན་གོས་ཅན། །བྱ་བ་དང་ནི་བཟློག་པ་དང་། །འཕྲོག་པ་དག་ཀྱང་ལྷག་པ་མཛད། །བདག་ལ་འབྱུང་བའི་ཕྱག་རྒྱ་ཡིས། །ཡན་ལག་ཐམས་ཅད་འཕྲོག་པ་
འགྲུབ། །རྣམ་པ་སྣ་ཚོགས་དམ་ཚིག་ཆགས། །བདེ་བ་འབར་བའི་གར་བྱེད་པས། །བདག་ལ་འཁྱུད་པའི་ཕྱག་རྒྱ་མཆོག །དབུས་ཀྱི་ལྷ་མཆོག་ཆེན་པོའོ། །སེ་རལ་ཁ་ཡི་ཚུལ་བཞིན་དུ། །རྡོ་རྗེ་ཁ་ཊྭཱཾ་ག་བཟུང་སྟེ། །བདག་ལ་འཁྱུད་པའི་ཕྱག་རྒྱ་ནི། །པད་བཅས་རྡོ་རྗེ་རྒྱ་
གྲམ་མཆོག །རྫོགས་སངས་རྒྱས་ཀྱི་ཁམ་ཕོར་གྲུབ། །བདག་འཁྱུད་པ་ཡི་ཕྱག་རྒྱ་ཡིས། །རྡོ་རྗེ་སེམས་དཔའ་དཔལ་སྦྱོར་བ། །དབུས་ཀྱི་ལྷ་མོ་མཆོག་ཆེན་པོའི། །གཙུག་ལག་ཇི་ལྟའི་རྗེས་མཐུན་པར། །དཔལ་རྫོགས་རྒྱ་ཆེར་གར་དག་གིས། །མདའ་བཞི་ཡོངས་སུ་
འཕང་བ་ནི། །བདུད་བཞི་དག་ལས་རྒྱལ་བར་འགྱུར། །རྐང་པ་བཏེག་ཅིང་འཕང་བ་དང་། །གཞིབས་ཏེ་འཕང་པའི་སྟབས་དག་གིས། །འཁོར་ལོའི་ཕྱག་རྒྱ་སྟོན་པ་ནི། །ཁམས་གསུམ་དག་ལ་མཆོད་པར་འགྱུར། །བྱ་བ་དང་ནི་བཟློག་པ་དང་། །དབྲོག་པ་དག་གིས་ཁྱད་
เล่ม ๒๗ · หน้า 126a
པར་དུ། །སྣ་ཚོགས་ཕྱག་རྒྱས་གར་བྱེད་ཅིང་། །ཁམས་གསུམ་དག་ནི་བསྡུ་བར་བྱ། །ལྕུག་མ་གང་ཡང་རུང་བཟུང་ནས། །བདག་ལ་འཁྱུད་པའི་ཕྱག་རྒྱ་ཡིས། །བུད་མེད་ཐམས་ཅད་རྩེན་ནས་ནི། །དཔག་བསམ་ཤིང་དག་ཡོངས་སུ་འགྲུབ། །གླིང་བུ་
ལེན་པའི་ཚུལ་སྟོན་ནོ། །པི་ཝཾ་ལེན་པའི་ཚུལ་སྟོན་དང་། །ཅང་ཏེའུ་ཚུལ་སྟོན་རྣལ་འབྱོར་དང་། །རྫ་རྔ་ཚུལ་སྟོན་རྣལ་འབྱོར་པའོ། །མྱང་བ་བཏུང་ལྟར་བྱེད་པ་དང་། །སྣ་ཡི་མྱང་བ་རྔུབ་པ་དང་། །མིག་བཙུམ་ཞེན་པ་བལྟ་བ་དང་། །ཐམས་ཅད་བདག་གིས་མྱང་བའོ། །རང་
འབྱུང་ལྷ་མོ་དང་བཅས་པའི། །ཕྱག་རྒྱ་སྔགས་ཀྱིས་གཉིས་མེད་འགྱུར། །རྡོ་རྗེ་སེམས་དཔའ་བདེ་ཆེན་སྐལ་བཟང་དཔལ་ཁྱོད་བདག་ཅག་སྒྲུབ་ལ་རྟོགས་པར་མཛད་དུ་གསོལ། །ཀྱེ་དེ་བཞིན་གཤེགས་པ་ཀུན་གྱི་བདག་ཉིད་བདེ་བ་མཁའ་འགྲོ་སྒྱུ་མའི་ཚོགས་རྣམས་བདེ་བའི་
མཆོག །འགྲོ་བའི་རྒྱུད་རྣམས་རྣམ་པ་སྣ་ཚོགས་འདུལ་མཆོག་གྲུབ་པ་བདག་ལ་གྲུབ་པར་མཛད་དུ་གསོལ། །ཨ་ལ་ལ་ཧོ། །དེ་བཞིན་གཤེགས་པའི་སྦྱོར་བ་རྣམ་པ་སྣ་ཚོགས་གར་རྣམས་བསྟན་དུ་གསོལ། །ཛཿཧཱུཾ་བཾ་ཧོཿ ཀྱེ་མ་བདེ་མཆོག་བདེ་བས་ཟུང་ལ་རྣམ་པར་སྤྲུལ་
ཧཱུཾ་སྣང་བར་མཛད་དུ་གསོལ། །ཨ་ལ་ལ་ལ་ལ་ཧོ། དེ་བཞིན་གཤེགས་པ་ཀུན་གྱི་མཁའ་འགྲོ་སྒྱུ་མས་སློབ་མ་གཟུང་དུ་གསོལ། །མཛུབ་མོས་མཐེབ་མོ་མནན་ནས་ནི། །རང་གི་མཐེབ་མོས་མཛུབ་མོ་མནན། །དཔལ་གྲུབ་སྤྱན་གྱི་ཕྱག་རྒྱ་སྟེ། །མཛུབ་མོ་མིག་གི་འབྲས་བུར་
བྱ། །རྡོ་རྗེ་ཐལ་མོ་མཉམ་སྦྱར་ནས། །ཁོང་སྟོང་དུ་ནི་སྦྱར་ནས་སུ། །སྔགས་བཅས་གནས་སུ་གཞག་བྱ་སྟེ། །རིམ་བཞིན་མཐའ་ནས་དགྲོལ་བར་བྱ། །རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་བདག་ལ་ཕྱག་འཚལ་ལོ། །དེ་བཞིན་གཤེགས་
པའི་དམ་པ་གྲུབ་པར་མཛོད། །ཨོཾ་ཨཱཿཧཱུཾ། དམ་ཚིག་དམ་པ་གྲུབ་པར་མཛད་དུ་གསོལ། །མཆོད་པ་ཆེན་པོ་ཐམས་ཅད་དག་པར་མཛད། །མཉམ་པ་ཆེན་པོའི་གནས་ལ་རོལ་དུ་གསོལ། །རབ་ཏུ་དགའ་བ་རྗེས་སུ་ཆགས་པའི་མདའ་གཞུ་རབ་ཏུ་ཕྲ་བའི་རྒྱས་
เล่ม ๒๗ · หน้า 126b
བཏབ་པའི། །རབ་ཏུ་དགའ་བའི་སྦྱོར་བའི་བདེ་བས་མྱོས་པའི་བདེ་བས་ཐམས་ཅད་བདག་ལ་གྲུབ་པར་མཛོད། །རབ་ཏུ་བདེ་མཆོག་རྣམ་པ་སྣ་ཚོགས་རྣམ་པར་རྒྱལ་བའི་རྒྱལ་མཚན་བསྒྲེང་བའི་ལོངས་སྤྱོད་དང་། །རབ་ཏུ་དགའ་བའི་དབང་ཕྱུག་ཆེ་མཆོག་གྲུབ་པ་དེ་བཞིན་
གཤེགས་པ་རབ་ཏུ་སྣ་ཚོགས་བདེ་བའི་མཆོག་རོལ་ཅིག་ཧོ། །བདེ་བས་བདེ་བ་སློང་ཞིང་རྣམ་པར་རོལ་ཧཱུཾ་སྣང་བར་མཛོད། །ཨ་ལ་ལ་ལ་ལ་ཧོ། །དེ་བཞིན་གཤེགས་པ་ཀུན་གྱི་མཁའ་འགྲོ་སྒྱུ་མ་སྣ་ཚོགས་ཀུན་གྱིས་སློབ་མ་གཟུང་དུ་གསོལ། །ཀྱེ་བདེ་བའི་མཆོག་གྲུབ་པར་
མཛོད། །ཨེ་མའོ་བདེ་བ་གསོལ། །དམ་པ་རབ་ཏུ་ཞུགས་པར་མཛོད། །བདག་ལ་རབ་ཏུ་བདེ་བར་འགྱུར། །ཨ་ལ་ལ་ལ་ལ་ཧོ། །ཨེ་མའོ་ཤི་ཤི་ཞུགས་ཤིང་། །མཁའ་འགྲོ་བདེ་མཆོག་ཀུན་དུ་ཞུགས། །ལ་ལར་རབ་ཏུ་དྲག་ཅིང་སྐྱེ་བོ་དྲག་ལ་དྲག་པའི་བུད་མེད་སྐུ་ལྟར་
རབ་ཏུ་སྣང་། །འགྲོ་བ་མཐའ་དག་འདུལ་ཕྱིར་ལ་ལར་རབ་ཏུ་རྣོ་བའི་འཁོར་ལོ་ཕྱག་ན་བསྣམས་པའི་སྐུ། །ལ་ལར་རབ་ཏུ་དེས་ཤིང་ཞི་བར་མི་འགྱུར་སྦྱིན་པ་ཚངས་པའི་སྐུར་ཡང་སྟོན་པར་མཛད། །ལ་ལར་རབ་ཏུ་འབར་བའི་ཆགས་པ་པདྨོའི་དམ་ཚིག་བདག་ལ་གྲུབ་པར་མཛོད། །ཐམས་
ཅད་དབང་བསྐུར་དབང་ཕྱུག་དམ་པ་མི་ཟད་གཏེར་མཆོག་བདག་ལ་གྲུབ་པར་མཛད་དུ་གསོལ། །ཀུན་མཆོག་རྒྱལ་མཚན་བསྒྲེང་བའི་རྡོ་རྗེ་རིན་ཆེན་ཤིན་ཏུ་ཆེ་བ་བདག་ལ་སྩོལ། །ལྷ་མོ་ཀུན་གྱི་བདེ་བའི་མཆོག །མཛེས་པའི་ཞལ་ནི་རྣམ་པར་འགྱུར། །བདེ་བ་མྱོང་བར་རབ་སྦྱོར་
བ། །མཛེས་པར་བལྟ་ཞིང་གར་བྱེད་པའོ། །ལྷ་མོ་ཀུན་གྱི་བདེ་བ་མཆོག །མཛེས་པའི་མ་མཆུ་སོས་མནན་པའི། །འཛུམ་པའི་ཕྱག་རྒྱ་མཆོག་འདི་ནི། །སངས་རྒྱས་ཐམས་ཅད་དགྱེས་པར་བྱེད། །སྣ་ཚོགས་བྷནྡྷ་བརྟག་པ་ལས། །སྣ་ཚོགས་བདུད་རྩིའི་རྣམ་པར་
དག །ལྔ་ལྔ་ལྔ་ཡི་འཕྲོ་འདུ་ཡིས། །མཚན་མ་རྣམ་པ་ལྔ་དང་ལྡན། །འོད་དང་དུ་བ་དྲི་དང་སྒྲ། །ལྷ་མོའི་གཟུགས་སྟོན་བདུད་རྩིར་འགྲུབ། །རང་བྱུང་གདོད་ནས་རྣམ་པར་དག །མཉམ་པའི་དོན་ལྡན་རོལ་བར་མཛད། །བྱིན་བརླབས་མཚན་དང་རྒྱན་ལྡན་པའི། །མི་མོ་
เล่ม ๒๗ · หน้า 127a
རྣམས་ཀྱི་རེག་བྱའི་མཆོག །བྱིན་གྱིས་རློབས་ཤིག་རྣལ་འབྱོར་པ། །གསང་བ་ཆེན་པོ་རྣམ་པར་རོལ། །གྲུབ་པའི་རྫས་འདི་ཐམས་ཅད་ལ། །ཧཱུཾ་དང་ཕཊ་ཀྱིས་ལྡན་པར་མཛོད། །མཉམ་ཉིད་མི་གཡོ་མཉམ་ཉིད་མཆོག་གི་ཆོས་ཉིད་ཅན། །ཐུགས་
རྗེའི་བདག་ཉིད་འགྲོ་བའི་སྡུག་བསྔལ་སེལ་བར་མཛད། །ཡོན་ཏན་མཐའ་ཡས་དངོས་གྲུབ་ཐམས་ཅད་སྦྱིན་མཛད་པ། །དྲི་མེད་མི་གཡོ་མཉམ་མེད་དམ་པའི་མཆོག་ཆོས་ཅན། །ཡོན་ཏན་ཤིན་ཏུ་ཕྲ་བའི་ཆ་ལའང་ཚད་མེད་དེ། །དཔེ་ནི་ནམ་མཁའ་དང་ཡང་བསྐྲུན་དུ་
ཡོད་མ་ཡིན། །དངོས་གྲུབ་མཐའ་ཡས་མཉམ་མེད་དཔེ་དང་བྲལ་བ་རྣམས། །སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། །རྟག་ཏུ་དྲི་མ་མེད་པའི་ཐུགས་རྗེའི་ཤུགས་ལས་བྱུང་། །སྨོན་ལམ་གྲུབ་པ་འགག་པ་མེད་པའི་ཆོས་ཉིད་ཅན། །འགྲོ་བའི་
དོན་སྒྲུབ་རབ་ཏུ་བརྩོན་པ་མཐའ་ཡས་པ། །ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་སྣང་། །ཚད་མེད་ཚད་དང་བྲལ་བ་ཤིན་ཏུ་རྫོགས་པ་ཡི། །བདེ་བར་གཤེགས་པའི་གོ་འཕང་དམ་པ་བརྙེས་གྱུར་ཀྱང་། །ཁམས་གསུམ་རྣམས་ལ་དངོས་གྲུབ་མཆོག་སྩོལ་མཛད་
པ་ཡི། །ཐུགས་རྗེའི་སྤྱོད་པ་མི་གཡོ་འགག་པར་ཡོང་མི་འགྱུར། །ཨེ་མའོ་ཤིན་ཏུ་བཟང་པོའི་ཆོས་ཉིད་མཆོག་དང་ལྡན། །མཆོག་སྦྱིན་རྣམས་ཀྱི་ནང་ནས་གོ་འཕང་མཆོག་བརྙེས་པ། །ཁམས་གསུམ་རྣམས་ལ་དངོས་གྲུབ་མཆོག་སྩོལ་མཛད་པ་ཡི། །མགོན་པོ་དུས་
གསུམ་སྒྲིབ་པ་མེད་པར་རབ་མཁྱེན་པས། །དམ་ཚིག་མཆོག་གསུམ་དངོས་གྲུབ་དམ་པ་བདག་ལ་སྩོལ། །ཛཿཧཱུཾ་བཾ་ཧོཿརུ་ཊ་མ་ཊ། སྨ་ར་ར་ཊ། ཧུ་ལུ་ཧུ་ལུ། པྲ་སི་དྡྷ། ཊཀྐི་ཧཱུཾ་ཛ། ཀ་ནི་ཀུ་ནི། ཧཱུཾ་ཧཱུཾ། ཊཀྐི་ནི་ཧཱུཾ་ཛཿ ཧུ་ལུ་ཧུ་ལུ། ཨ་ལ་ལ་ལ་ལ་ཧོ། ཤུདྡྷ་སིདྡྷ། དཪྴ་ཡ་།
སརྦ་ཏ་གྷན་གྷེ། ཏ་གྷེ་གྷེ། ཊ་ཊ་གྷེ་གྷེ་གྷེ། ཏ་གྷེ་ཏ་གྷེ། གྷེ་གྷེ་ཏ་ཏ། ཏ་གྷེ་ཏ་གྷེ། ཧེན་དོན་ཊཀྐི་ཧཱུཾ་ཛ། གྷེ་ཏ། གྷེ་དོན་ཊཀྐི་ཧཱུཾ་ཛ། ཊ་ཨ་ལ་ལ་ལ་ལ་ཧོ། །རུ་ཊ་མ་ཊ། ཐལ་མོ་བརྡབ་པ་བརྟག་པའོ། །ཏ་གྷེ་གྷེ། ཏ་གྷེ་ན་ཏ་གྷེ་ན། གྷེ་ན་གྷེ་ཏ། གྷེ་ན་གྷེ་ན་གྷེ་ན། རྒྱུན་གྱི་རྔའོ། །བདག་
เล่ม ๒๗ · หน้า 127b
ཅག་དམ་ཚིག་འདི་ལ་མངོན་དུ་ཞུགས་པ་རྣམས། །བཅད་གཏུབས་ལུས་ལ་འབྱུང་བར་མི་འགྱུར་ཞིང་། །གྲིབ་མས་ཕོག་པའི་སྡུག་བསྔལ་མི་བཟད་པའི། །སྐུ་ཡི་ཕྱོགས་ཙམ་མཐོང་བས་སྨོན་ལམ་འཚོ་བ་དང་། །གཟི་མདངས་ལུས་ལ་འཇུག་པ་བྱེ་བ་སྟོང་ཕྲག་གི། །
འོད་ཀྱིས་ཕོག་པས་འཇིག་རྟེན་ཁམས་ཀུན་སྣང་བ་དང་། །ལུས་ངག་སེམས་དང་ཚེ་ནི་རྡོ་རྗེ་རབ་བརྟན་ཏེ། །རེ་སྨོན་ཐམས་ཅད་དུས་འདིར་འགྲུབ་པར་མཛད་དུ་གསོལ། །དཀྱིལ་འཁོར་རྒྱས་པ་ལ་དམིགས་ནས། །ཐུན་མོང་འདས་དང་པོ་བརྩམ། །སེམས་དཔའ་རྣམ་
པ་གསུམ་ལྡན་པར། །རང་རང་སྐུ་གསུང་ཐུགས་ཀྱི་རྟགས། །ཉི་དཀྱིལ་ཐབས་དང་ཤེས་རབ་ཀྱི། །ཕྲེང་བ་གཉིས་དང་ལྡན་པ་ལས། །སྐུ་གསུང་ཐུགས་ཀྱི་མཚན་མས་བརྒྱན། །གཙོ་བོས་ཇི་ལྟར་བཟླས་པ་བཞིན། །འཁོར་གྱི་དཀྱིལ་འཁོར་རྣམ་པར་གནས། །
གནས་དང་འཁོར་དང་འཕྲོ་བ་ཡིས། །མཐུན་པའི་ལྷ་ཚོགས་མཉེས་མཛད་ཅིང་། །རིགས་བསྡུས་འགྲོ་བའི་ལས་ལ་སྦྱར། །གཙོ་བོའི་ཞལ་ནས་སྦྱོར་སྔགས་ནི། །རང་གི་གསང་སྔགས་བཅུ་བཞི་པའོ། །དེ་བཞིན་ལྷ་མོ་སོ་སོ་ཡི། །སྔགས་དང་འཕྲོ་འདུ་ལས་ལྡན་
པའོ། །རྫོགས་ནས་མཆོད་བསྟོད་བསྐུལ་བ་དང་། །གསོལ་གདབ་འགྲོ་བའི་ལས་ལ་སྦྱར། །གཉིས་པ་སོ་སོའི་ལས་བྱ་བ། །གཙོ་སོགས་རིམ་པ་བཞིན་དུ་ནི། །ཕྱག་རྒྱ་བཞི་དང་ལྡན་བྱས་ཏེ། །འོད་ཀྱི་རིག་མ་དང་བཅས་ཤིང་། །གསལ་བ་རྣམ་པ་གཉིས་ལྡན་
པར། །རང་གི་གསང་སྔགས་བརྗོད་པར་བྱ། །ཨོཾ་མ་ཧཱ་སུ་ཁ་བཛྲ་སཏྭ་ཨཱཿཛཿཧཱུཾ་བཾ་ཧོཿ། རྡོ་རྗེ་སེམས་དཔའི་སྙིང་པོའི་གསང་སྔགས་ཡི་གེ་བཅོ་བརྒྱད་པའོ། །འཁོར་གྱི་ལྷ་མོ་མ་ལུས་པའི། །བཟླས་རྫོགས་མཆོད་བསྟོད་བསྐུལ་བྱ་ཞིང་། །རང་གི་ལས་ལ་སྦྱར་ནས་
ཀྱང་། །སོ་སོའི་གནས་སུ་བསྡུ་བར་བྱ། །མཉམ་ཉིད་དཀྱིལ་འཁོར་ཀུན་གྱི་མཆོག །དོན་དམ་བདེ་བ་ཆེན་པོའི་སྐུ། །དེ་བཞིན་ཉིད་དབྱིངས་ཡེ་ཤེས་ཀྱི། །ལྷ་ཉིད་བརྩོན་པས་བསྒོམ་པར་བྱ། །སྣ་རྩེ་ཐིག་ལེ་ཕྲ་མོ་ལ། །ཕྱི་ཡི་དཀྱིལ་འཁོར་བསྡུ་བྱ་སྟེ། །ཡི་གེ་
เล่ม ๒๗ · หน้า 128a
མཚན་མ་ཕྲ་མོའི་བར། །མཚན་མ་ལྔ་གསལ་བར་དུ་གནས། །ཡི་གེ་ཀ་སོགས་ད་ཡིག་མཐའ། །ང་ཉ་སྤངས་ནས་འཇུག་པར་བྱའོ། །ཡི་གེ་དྷ་སོགས་ཀྵ་ཡིག་མཐའ། །ཕྲེང་བ་གཉིས་པ་ཡང་དག་བྲི། །དབུས་གནས་པར་ནི་ཨ་ཡིག་ཕྲེང་།
ཟླ་བའི་དཀྱིལ་འཁོར་ལ་བཀོད་དེ། །ཐིག་ལེ་ཟླ་ཚེས་དང་ལྡན་པར། །ཚེག་དྲག་ཟླ་བ་གཉིས་ཡིན་ཏེ། །ཨ་ཡིག་མི་འགྱུར་བསྒོམ་པར་བྱ། །དབུས་སུ་རྡོ་རྗེ་ངོ་བོར་གནས། །དེ་དབུས་རྟག་ཏུ་བསྒོམ་པ་ནི། །འདོད་ཆགས་ཆེན་པོ་བདེ་བ་ཆེ། །འདི་དེ་སངས་རྒྱས་
ཐམས་ཅད་ཀྱི། །སངས་རྒྱས་རི་མོར་གྲགས་པ་ཡིན། །ལིང་ག་འགྲེང་བ་རང་འབྱུང་སྟེ། །བརླ་ཡི་དབུས་སུ་གཞུག་བྱས་ནས། །ལིང་ག་རྡོ་རྗེར་བྱིན་བརླབས་ཏེ། །རྡོ་རྗེ་སེམས་དཔའ་བདག་སྔོན་བསྐྱེད། །བྷ་གར་ལིང་ག་བཅུག་ནས་ནི། །དེར་ནི་ཧཱུཾ་ཡིག་བསྒོམ་པར་
བྱ། །ཤིན་ཏུ་དགའ་འདྲའི་གཟུགས་དག་ནི། །སྐུ་གཉིས་ལྡན་པར་སྤྲོ་བྱའོ། །ཀུན་ཀྱང་ཁྱབ་ཅིང་དྲི་མེད་པས། །བྱང་ཆུབ་སེམས་དག་བརྟན་པའོ། །མཚན་མ་རྣམ་པ་ལྔ་ཡི་བར། །གསལ་བའི་དཀྱིལ་འཁོར་རྣམ་པར་བསྒོམ། །རྟེན་དང་བརྟེན་པའི་ཚོགས་རྣམས་
ཀྱིས། །རྣམ་དག་དེ་ཉིད་གསལ་བར་བརྟག །དགེ་བཅུ་དག་ལ་རྟེན་བཅས་ཤིང་། །བདེན་བཞི་དངོས་པོ་གཅིག་ཏུ་གནས། །རྟེན་འབྲེལ་ཡན་ལག་བཅུ་གཉིས་ཚོགས། །རྒྱུ་འབྲས་སྣ་ཚོགས་དག་པའི་དབྱིངས། །ཡོན་ཏན་ཚོགས་རྣམས་ཀུན་རྒྱས་ཤིང་། །
ཚངས་པའི་གནས་བཞི་ཁྱབ་མཛད་ནས། །ཆོས་ཚོགས་སུམ་ཅུ་རྩ་བདུན་ལས། །ཏིང་འཛིན་བཞི་པོར་འཇུག་པར་མཛད། །རང་བཞིན་ཡེ་ཤེས་དྲུག་དག་ལས། །རིགས་ཀྱི་མཚན་མ་སྣ་ཚོགས་སྣང་། །རྣམ་ཐར་བརྒྱད་པོ་རྟེན་བཅས་ཤིང་། །རྡོ་རྗེ་ཐེག་པའི་
ཚུལ་ཉིད་མཛེས། །མཛད་པ་རྒྱ་ཆེན་ཕྲིན་ལས་རྣམས། །ཡུལ་དྲུག་དག་གི་ཕྱག་རྒྱ་ཆེ། །མཉམ་ཉིད་དཀྱིལ་འཁོར་ཆེན་པོར་སྤྱོད། །ཐུགས་རྗེ་ཆེན་པོའི་ཆར་ཁེབས་དང་། །བདུད་བཞི་ལས་རྒྱལ་ཐེག་ཆེན་མཆོག །མཉམ་པར་སྦྱོར་བས་ཚུལ་འཇུག་ཅིང་། །
เล่ม ๒๗ · หน้า 128b
རྟོག་པའི་སྒྲིབ་པ་སེལ་བར་མཛད། །སྨོན་ལམ་ལས་གྲུབ་མཛད་འཕྲོ་ལས། །ཐེག་ཆེན་ཡོན་ཏན་ཅི་ཡང་འབྱུང་། །མཚན་དང་དཔེ་བྱད་རྫོགས་པའི་སྐུ། །བརྟེན་པའི་ཐེག་པ་སྣ་ཚོགས་སྒྲོགས། །དབང་ཕྱུག་ལ་སོགས་ཡོན་ཏན་བརྒྱ། །ཕྲིན་ལས་བཞི་ཡིས་རྣམ་
ཕྱེ་ཞིང་། །རྟེན་གནས་རྒྱུ་དང་སྤྱོད་མཛད་པའི། །གནས་ཀྱི་མཚན་མ་འགྲུབ་པ་ཡིན། །ཆགས་མེད་མཛད་པས་སྤྱོད་ཀུན་དང་། །ཉོན་མོངས་མཚན་མས་གོས་པ་མེད། །བདེ་ཆེན་དབྱིངས་ལས་མ་འཕྲོས་ཤིང་། །སྐུ་གསུང་ཐུགས་ཀྱི་ཐེག་པ་ཅན། །ཡོན་ཏན་འབྱུང་
གནས་འཆི་མེད་ལྔས། །གང་བ་ཕྱོགས་བཞིར་གནས་དགོད་པ། །ཤེས་ལྔའི་འདོད་པའི་ལོངས་སྤྱོད་ཚོགས། །ཉི་ཤུ་བདུན་གྱི་རྒྱན་གྱིས་སྤྲས། །ཕྲིན་ལས་མཆོད་པའི་གནས་གྱུར་པའི། །འཁོར་ལོ་རང་རྟགས་མཚན་མས་མཛེས། །ཕྱི་ཡི་མཚན་མ་ཚོགས་དག་གིས། །
ཐམས་ཅད་ཡོན་ཏན་སྣང་བས་སྤྲས། །སྐུ་གསུམ་རྡོ་རྗེའི་རང་བཞིན་གྱིས། །སྣ་ཚོགས་ཕྲིན་ལས་དཔག་མེད་ཚོགས། །ཡེ་ཤེས་འབར་བའི་བྱིན་རླབས་ཀྱིས། །ལོག་རྟོག་མཚན་མ་སྲེག་པར་བྱེད། །མཚན་ཉིད་ཐེག་སོགས་གཞན་དག་ལས། །ཁྱད་པར་
འཕགས་པ་ཐེག་པའི་མཆོག །ཁམས་གསུམ་གཞན་རྟོག་སྦྱོང་མཛད་ཅིང་། །ལུས་སོགས་རྣམ་པར་དག་པའི་ཕྱིར། །ཡོན་ཏན་རྒྱན་གྱི་རྟེན་དག་ལས། །སངས་རྒྱས་བརྒྱད་པོ་སྐུ་སྣང་མཛད། །དྲེགས་བྱེད་འདུལ་ཕྱིར་རིགས་མཚན་མནན། །སྣོད་བཅུད་སྒྲོལ་
མཛད་ཤེས་རབ་མཚོན། །སྲིད་གནས་ལས་བྱུང་རྟོག་པའི་ཚོགས། །གཉིས་མེད་རང་གི་ངོ་བོར་མོས། །དབྱིངས་དང་ཡེ་ཤེས་མཉམ་པའི་ལྷ། །སྣང་སྲིད་གཉིས་མེད་བསྒོམ་པའི་ལྷ། །ཐུགས་རྗེ་ཆེ་ལ་སྤྲུལ་པའི་ཆར། །ཐ་བ་ལས་བྱུང་སྨིན་པར་མཛད། །རང་
བྱུང་ཡེ་ཤེས་ཆེན་པོ་ལས། །ཚོགས་བརྒྱད་སྣང་བ་སྣ་ཚོགས་ཉིད། །ཐུགས་རྗེའི་སྤྲུལ་པ་དཔག་མེད་ཀྱིས། །སྟོང་གསུམ་ཁམས་ལས་འགྲོ་བར་བྱེད། །འབྱུང་བའི་སྣང་བ་ཐ་དད་རྣམས། །ཐམས་ཅད་རྣམ་དག་དཀྱིལ་འཁོར་ཆེ། །འཁོར་བའི་རྟོག་
เล่ม ๒๗ · หน้า 129a
པས་མ་གོས་ཤིང་། །བྱང་ཆུབ་ཐུགས་རྗེ་ཆགས་པའི་རྟགས། །རྡོ་རྗེ་སེམས་དཔའ་བདེ་ཆེན་སྐུ། །ཟླ་འདྲ་དམར་བའི་མདངས་དང་ལྡན། །ཆོས་དབྱིངས་སྟོང་པའི་ཡེ་ཤེས་ལས། །རིགས་ཀྱི་མཚན་མ་བཞིར་སྣང་ཞིང་། །ཕྲིན་ལས་ཚད་
མེད་རྣམ་སྤྱོད་པས། །འབྲེལ་པའི་དོན་བཞིན་སྤྱོད་པར་མཛད། །ཁམས་གསུམ་རྒྱལ་བའི་རྒྱན་བཅས་པས། །ཆ་ལུགས་སྦྱོང་ཞིང་འགྱིང་བར་མཛད། །ཡེ་ཤེས་ལྔ་ལྡན་ཟབ་མོ་དང་། །རྒྱ་ཆེན་རིགས་ལྔའི་སྐུ་སྣང་མཛད། །རང་གི་ཐུགས་བསྐུལ་དྲན་
ཚོགས་ཀྱི། །ལས་ལ་རྣམ་པར་རོལ་མཛད་དོ། །སྣ་ཚོགས་ཀུན་གྲུབ་སྐུ་གསུང་ཐུགས། །ཁམས་གསུམ་ལས་རྒྱལ་གསུང་སྒྲོགས་ཤིང་། །ཆགས་ཕྱིར་ཞི་གནས་ལྷག་མཐོང་གི། །མཚན་ཉིད་འབྲེལ་པ་སྟོན་པར་མཛད། །མཚན་བཟང་སུམ་ཅུ་རྩ་གཉིས་དང་། །
དཔེ་བྱད་བརྒྱད་ཅུས་རྣམ་སྤྲས་པས། །ཐུན་མོང་ལས་གྲུབ་ཟིལ་གནོན་པའི། །དབྱིངས་དང་ཡེ་ཤེས་འབྲེལ་པའི་རྒྱན། །བྱང་ཆུབ་སེམས་སོགས་བླ་གབ་ལ། །ཐུགས་རྗེའི་རིམ་པས་ལེགས་སྤྲས་ཤིང་། །མཛད་པའི་ལས་མང་སྣ་ཚོགས་པས། །འགྲོ་བའི་རྣམ་རྟོག་
སྤྱོད་པར་སྟོན། །གཡས་སུ་བསྡུ་བ་བཞི་དག་དང་། །གཡོན་དུ་ཚད་མེད་བཞི་སྣང་མཛད། །སྤྱི་བོར་ཕ་རོལ་ཕྱིན་དྲུག་དང་། །གཟུངས་དང་ཏིང་འཛིན་རྟགས་སྣ་ཚོགས། །ཕྱོགས་བཅུའི་སངས་རྒྱས་ཀུན་འདུས་པས། །ཡོན་ཏན་རྒྱན་གྱི་རིན་ཆེན་ལ། །རྣམ་པ་
ལྔ་ཡི་ཚུལ་ཞུགས་ཤིང་། །ཡོན་ཏན་རྒྱན་གྱིས་སྤྲས་པ་ཡིས། །རིགས་ཀྱི་མཚན་མ་མི་ནུབ་ཕྱིར། །གཟུགས་མཐུན་པ་ཡི་དོ་ཀེར་ཅན། །ཡོན་ཏན་སྣ་ཚོགས་རྒྱན་བཅས་པས། །དེ་ཉིད་ཀུན་གྱིས་གཟུགས་སུ་སྟོན། །དགེ་བཅུ་ཡན་ལག་རྣམ་སྤྲས་ཤིང་། །ཞབས་
ལ་རྣམ་ཐར་བརྒྱད་ཀྱིས་བརྒྱན། །བདེན་བཞིས་གདུ་བུས་མཛེས་བྱས་པས། །རྣམ་ཐར་བཞི་ཡི་རང་བཞིན་ཡིན། །དགེ་དང་ཕ་རོལ་ཕྱིན་བཅུ་ཡི། །རྐེད་ཆིངས་ཕྲེང་བ་ཉི་རིམ་མཛེས། །ཆོས་བཟང་སུམ་ཅུ་རྩ་བདུན་གྱིས། །ཚངས་སྐུད་བཞིན་དུ་རྒྱན་བཅས་ཤིང་། །མ་
เล่ม ๒๗ · หน้า 129b
འདྲེས་ཆོས་བཟང་བཅོ་བརྒྱད་པོས། །རིམ་གཉིས་ཕྲེང་བར་ལྡན་པ་ཡིན། །ཕྱག་རྒྱ་རྣམ་པ་བཞི་ལྡན་ཞིང་། །འགྲོ་ལ་དེ་དོན་སྟོན་པར་མཛད། །ཕུང་པོ་ལྔ་རྣམས་རྣམ་དག་པས། །རིགས་ལྔའི་རྒྱན་གྱིས་མཛེས་པར་བྱས། །འབྱུང་བ་ཆེ་རྣམས་རྣམ་དག་ཕྱིར། །ལྷ་མོ་བཞི་
དང་ཀུན་དུ་འཁྲིལ། །སྐྱེ་མཆེད་བཅུ་གཉིས་རྣམ་དག་པས། །ནང་གི་ལྷ་མོའི་ཚོགས་སུ་བྱུང་། །ཁམས་སོགས་སྤྱོད་པ་རྣམ་དག་ཅིང་། །ཐུགས་རྗེའི་ཕྲིན་ལས་རྒྱ་ཆེན་པོས། །ལྷ་མོའི་ཚོགས་རྣམས་དགོད་བྱས་ནས། །ཉོན་མོངས་ཉི་ཤུ་དག་པར་མཛད། །ཡེ་ཤེས་
སྣང་བ་བསམ་ཡས་པས། །སྣ་ཚོགས་དཀྱིལ་འཁོར་ཅིར་ཡང་སྣང་། །བར་ཆད་བགེགས་བཞི་བསྲུང་བ་དང་། །དངོས་གྲུབ་ལྷག་པར་གནས་པའི་ཕྱིར། །བརྩོན་པས་ཐུན་མཚམས་རྣམ་པ་བཞིར། །གཏོར་མའི་ལས་དག་བརྩམ་པར་བྱ། །སྒྲིབ་པ་ཐམས་ཅད་སྦྱོང་བྱེད་
ཅིང་། །ཚོགས་ཀྱི་ལས་རྣམས་རྫོགས་བྱེད་པ། །དེ་ཉིད་སྤྱོད་དང་མཐུན་པའི་ལས། །དེས་ནི་མཛད་པ་རྒྱ་ཆེན་འགྱུར། །ཕྱི་རོལ་དཀྱིལ་འཁོར་ཟླ་གམ་ལ། །དམར་པོའི་ཚོན་གྱིས་ཁ་བསྒྱུར་ཏེ། །མཁའ་འགྲོའི་དཀྱིལ་འཁོར་རྣམ་ལྔ་ཡི། །ཐིག་ལེ་དབུས་དང་ཕྱོགས་བཞི་
རུ། དབུས་སུ་རྟ་ཡི་རྒྱལ་པོ་ལ། །ལྷ་ཆེན་ལྔ་ཡི་མཚན་མས་བསྐོར། །ཤར་དུ་ཕྱོགས་སྐྱོང་ཞིང་སྐྱོང་ལ། །ལྷོ་རུ་མངོན་སྤྱོད་མ་མོའི་ཚོགས། །ནུབ་དུ་དབང་ལ་ཀླུ་ཆེན་བརྒྱད། །བྱང་དུ་རྒྱས་པའི་འགྲོ་བ་རྣམས། །རང་གི་གསང་སྔགས་ཀྱིས་བསྐྱེད་ཅིང་། །སྐུར་གྱུར་ཡེ་ཤེས་
འོད་ཚོགས་སྦྱང་། །སྒེག་མོ་དང་ནི་ན་ཆུང་དང་། །མྱོས་དང་དེ་བཞིན་བདུད་རྩི་དང་། །གཅིག་པུ་དཔའ་དང་འདོད་ཆགས་སྲ། །གཡོན་ཅན་བྲན་མོ་དེ་བཞིན་ཏེ། །ལན་ཚ་ལ་སོགས་རོ་ཀུན་དང་། །ཀ་ར་ལ་སོགས་བདུད་རྩི་བཞིན། །བདག་ཉིད་ཀུན་གྱི་རོ་གྲུབ་པ། །མ་ལུས་
ལུས་པ་མེད་པར་འགྲུབ། །ཤ་དང་ཆང་དང་ལྡན་པ་ཡི། །བཟའ་བ་སྣ་ཚོགས་གྲུབ་པ་ནི། །དགའ་བའི་ལོངས་སྤྱོད་སྐལ་མཆོག་སྟེ། །ཚེ་ཡི་དམ་པ་རབ་ཏུ་འགྲུབ། །ཨ་མྲ་སྨིན་དང་རྒུན་འབྲུམ་དང་། །པ་ན་སེ་དང་ན་ལེ་ཀེར། །ཨ་རུ་ར་ལ་སོགས་པ་ཡི། །འབྲས་བུའི་ཕྱག་
เล่ม ๒๗ · หน้า 130a
རྒྱ་མཆོག་རྣམས་དང་། །ཁ་ར་སྦྲང་རྩི་བྱུག་པ་ཡིས། །ཨ་མྲ་ལ་སོགས་ཚི་གུས་བྱུག །ཧ་ས་ཀ་རའི་མར་ལ་སོགས། །མཉམ་པའི་དྲི་ཡིས་བསྐུ་བར་བྱ། །ཡུངས་དང་རྒྱ་སྐྱེགས་ལ་སོགས་པའི། །ཚོན་གྱིས་མཐུན་པར་ཁ་བསྒྱུར་ནས། །ཤུན་པ་དྲོ་བ་ལ་
སོགས་བྱས། །མཆོད་པའི་ཚེ་ན་དབུལ་བར་བྱ། །ཐོད་པའི་ནང་དུ་སྦྱར་བྱས་པའི། །བཟའ་བཏུང་བཅའ་བ་ལ་སོགས་རྣམས། །ཧ་ཧོཿཧྲཱིཿཡིས་སྲེག་སྦྱང་བརླབ། །མཁའ་འགྲོའི་འཁོར་ལ་བསྔོ་བར་བྱ། །གཏོར་མ་རྫས་ཆེན་མ་ལུས་པ། །དང་པོ་དྲི་ཡི་ཆུས་སྦྱངས་ཤིང་། །
སྣ་ཚོགས་སྒྲ་སྙན་བ་དན་སོགས། །བཀོད་པའི་མཆོད་གཏོར་བརླབས་ལ་སྤེལ། །སངས་རྒྱས་རྡོ་རྗེ་སེམས་དཔའ་ཉིད། །རྟ་མཆོག་གཟུགས་སུ་སྤྲུལ་བྱས་ནས། །མཛེས་པའི་ཕྱག་རྒྱ་སྔགས་ལྡན་པ། །མཁའ་འགྲོའི་ཚོགས་རྣམས་བསྡུ་བར་བྱ། །ཨོཾ་བཛྲ་ཊཱ་ཀི་ནཱི་བྷྱོ། །ཨེ་ཨ་ར་
ལི་ཛ་ཛ། འཁོར་བཅས་བསྡུ་བར་འོངས་པ་དང་། །དམ་ཚིག་ཕྱག་རྒྱ་རྣམ་གསུམ་བསྟན། །ཨོཾ་བཛྲ་གུ་ཧྱེ་དྲྀ་ཤྱ་ཧོ། །ས་མ་ཡ་སྟྭཾ། ཨོཾ་བཛྲ་གུ་ཧྱེ་དྲྀ་ཤྱ་ཧོ། །ས་མ་ཡ་སྟྭཾ། ཨོཾ་བཛྲ་གུ་ཧྱེ་དྲྀ་ཤྱ་ཧོ། །ས་མ་ཡ་ཕཊ། ཨོཾ་ཨརྒྷཾ་པུཥྤེ་དྷཱུ་པེ་གནྡྷེ་པཱུ་ཛཱ་སྥ་ར་ཎ་ཨི་དཾ་བ་ལིཾ་ཁ་ཁ་ཁཱ་ཧི། ཡཾ་
ལས་སྐྱེས་པའི་གཞུ་འདྲའི་དབྱིབས། །བ་དན་གཡོ་བས་མཚན་པ་སྟེ། །རཾ་བྱུང་མེ་ཡི་དཀྱིལ་འཁོར་འབར། །དམར་པོ་གྲུ་གསུམ་རཾ་གྱིས་མཚན། །ཀཾ་བྱུང་ཐོད་པ་མཚན་ལྡན་ནང་། །འོད་གསལ་ཆགས་མེད་གནས་པ་ཡི། །མི་ཤ་ལ་སོགས་ཕྱོགས་དང་མཚམས། །ཨ་ལས་
བྱུང་བའི་ཟླ་བ་དང་། །ཧཱུཾ་བྱུང་རྡོ་རྗེས་བཀབ་བྱས་ནས། །ཧཱུཾ་ཨོཾ་ཧྲཱིཿཏྲཱཾ་བཞི་རྣམས་སོ། །ཨོཾ་ཨཱཿཧཱུཾ། སརྦ་པཉྩ་ཨ་མྲྀ་ཏ་ཧཱུཾ་ཧྲཱིཿཐཱ། རིམ་བཞིན་སྔགས་དང་ཕྱག་མཚན་དང་། །སྐུར་འགྱུར་འཕྲོ་དང་འདུ་བ་ཡིས། །ཡེ་ཤེས་བདུད་རྩི་དགུག་བྱ་སྟེ། །རྡོ་རྗེ་བཞུགས་ནས་སྣོད་བཟང་
བལྟམས། །ཟླ་འདྲ་འོད་ཟེར་ལྔ་བཅས་པས། །དཀྱིལ་འཁོར་འཁོར་བཅས་ཚོགས་མཉེས་བྱ། །ཨོཾ་འཇིག་རྟེན་ཀུན་གཙོ་མངའ་མཛད་པའི། །འཇིགས་བྱེད་དྲེགས་བྱེད་སྟོབས་ལྡན་པ། །བདེ་གཤེགས་སྲས་སོགས་བྲན་མཛད་པའི། །བྱང་ཆུབ་སེམས་ལྡན་སྙིང་རྗེ་ཅན། །
เล่ม ๒๗ · หน้า 130b
དབང་ཕྱུག་ཆེན་པོ་ཆུང་མར་བཅས། །དེ་བཞིན་ཁྱབ་འཇུག་ཚངས་པ་དང་། །བརྒྱ་བྱིན་འདོད་དགའ་ཆུང་མར་བཅས། །ལྷ་ཆེན་འཁོར་བཅས་ཚོགས་རྣམས་དང་། །ཕྱོགས་སྐྱོང་བརྒྱད་པོ་འཁོར་དང་བཅས། །ཀླུ་ཆེན་བརྒྱད་པོ་འཁོར་དང་བཅས། །མཁའ་འགྲོ་དྲག་མོ་གསུས་
འཛིན་མ། །དུར་ཁྲོད་མ་ཚོགས་འཁོར་བཅས་དང་། །གཞན་ཡང་ལྷ་སྲིན་སྡེ་བརྒྱད་དང་། །འགྲོ་བ་དྲུག་པོ་འཁོར་བཅས་རྣམས། །སྐུ་གསུང་ཐུགས་སོགས་སྦྱང་བྱས་ནས། །རང་གི་ལྷ་ཡི་གཟུགས་འཛིན་རྣམས། །གནས་འདིར་འདུས་པའི་དམ་ཚིག་ཅན། །མཆོད་གཏོར་རྒྱུན་
དང་བཅས་པ་བཞེས། །དམ་ཚིག་སྲུངས་ཤིག་དམ་ཚིག་ཅན། །ལས་ལ་བརྩོན་པའི་མཁའ་འགྲོ་རྣམས། །མཁའ་འགྲོ་དྲག་མོ་འཁོར་བཅས་རྣམས། །རྣལ་འབྱོར་སྒྲུབ་པའི་གྲོགས་མཛོད་ཅིག །ལས་མཁན་རྡོ་རྗེ་བྲན་བཅས་པས། །ཞི་རྒྱས་དབང་དྲག་ལས་གྲུབ་ཅིང་། །ཐེག་
ཆེན་གསང་སྔགས་བསྲུང་བ་དང་། །ནད་དང་གདོན་སོགས་ཞི་བ་དང་། །ཚེ་དབང་བཀྲ་ཤིས་སྤེལ་བ་དང་། །བདེ་ལེགས་འབྲས་བུ་གྲུབ་པར་མཛོད། །ཨོཾ་ཨཱཿཧཱུཾ་པདྨ་མུ་ཀ་ཧཱུཾ་ཧཱུཾ། རྟ་མགྲིན་ཕྱག་རྒྱ་རྣམ་གཉིས་ཀྱིས། །ལས་རྣམས་དངོས་གྲུབ་ཚོགས་གྱུར་ཅིག །དངོས་གྲུབ་དབང་
དུ་བྱས་ནས་ནི། །རང་གི་གནས་ལ་དགོད་པར་བྱ། །ཨོཾ་ཧྲཱིཿཌཱ་ཀི་ནཱི་ཨི་མཾ་བ་ལིཾ་ཏ་པྲ་ཏཱིཙྪ་ཧཱུཾ་ཁཱ་ཧི། ཨོཾ་ཨཱཿཧྲཱིཿཁཱ་ཧི། ཐུགས་རྗེ་ཆེན་པོས་གཟིགས་ནས་ཀྱང་། །སྣ་ཚོགས་རྒྱུད་རྣམས་སྤྲུལ་མཛད་པའི། །གར་མཁན་འཁོར་ལོའི་རྒྱུད་མངའ་བ། །དྲག་པོ་ཞི་མཛད་ཁྱོད་ཕྱག་འཚལ། །
སྣ་ཚོགས་གར་གྱི་རྣམ་པར་སྤྲུལ་ལ་ཕྱག་འཚལ་ལོ། །རྡོ་རྗེ་ལ་སོགས་མཚོན་ཆས་རོལ་ལ་ཕྱག་འཚལ་ལོ། །མ་ལུས་ལྷ་ཡི་ལྷ་མཆོག་སྐྱོང་ལ་ཕྱག་འཚལ་ལོ། །དཔའ་བོ་རྩལ་རྫོགས་སྟོབས་བཅུའི་ཤུགས་ལ་ཕྱག་འཚལ་ལོ། །ཨོཾ་ཨ་ཏི་བྷཱུ་ཧོ། །ཨ་ལ་ལ་ལ་ལ་ཧོ། །ཐུན་བཞིས་
དུས་སུ་བྱ་བ་ལས། །རྫོགས་ནས་དཀྱིལ་འཁོར་མཆོད་བསྟོད་ཅིང་། །རང་ལས་བྱུང་ཏེ་མདུན་གཞག་ནས། །གསོལ་བཏབ་ལས་ལ་བསྐུལ་བར་བྱ། །ཨོཾ་ཁྱོད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་
เล่ม ๒๗ · หน้า 131a
ཀྱང་། །སླར་ཡང་འགྲོ་བའི་དོན་ལ་དགོངས། །ཨོཾ་བཛྲ་གཙྪ་མུཿ། དེ་ནས་ཕྱག་རྒྱ་རྣམས་དགོད་པ། །རིམ་བཞིན་བདག་ལ་བསྡུ་བྱས་ནས། །རྣམ་གསུམ་སེམས་དཔའ་ཧཱུཾ་ལ་ཐིམ། །རིམ་བཞིན་ཐིག་ལེ་མཉམ་པའི་དབྱིངས། །རྗེས་འབྱུང་མཚན་
མའི་སྐུར་གནས་ཏེ། །མཚན་མེད་རྒྱན་དང་ཆ་ལུགས་གསལ། །གོ་ཆ་གོ་བཅིངས་བསྲུང་བྱ་ཞིང་། །དབང་བསྐུར་དབུ་རྒྱན་ཅོད་པན་ལྡན། །ཀཾ་ཧཾ་ཨོཾ་ཏུཾ་རཏྣ་མཱ་ལེ་ཨ་བྷི་ཥིཉྩ། པཊ་ལཾ་བ། ཨ་བྷི་ལཾ་བ་ཧཱུཾ། སྤྱོད་ལམ་ཀུན་དུ་མ་ཉམས་པར། །ལྷ་ཉིད་དུ་ནི་བསྒོམ་པར་བྱ། །དབང་
པོའི་སྣང་བ་ཡུལ་དུས་རྣམས། །དཀྱིལ་འཁོར་རོལ་པའི་ཚུལ་དུ་བརྟག །བཟའ་བཏུང་བྱིན་བརླབས་མ་ཉམས་བཟླས། །སྒྱུ་མ་གཉིས་མེད་ཡེ་ཤེས་རོལ། །བྱེད་སྤྱོད་ཚོགས་གཉིས་རྒྱུ་རུ་བརྟག །ཐམས་ཅད་འགྲོ་བའི་དོན་དུ་སྤྱད། །བློ་མཆོག་མཁས་ཤིང་རྩལ་ལྡན་པས། །
བླ་མ་མཉེས་ལས་བྱུང་བའི་དོན། །ཚོགས་གཉིས་དུས་གཅིག་རྫོགས་པ་ཡིན། །རྒྱལ་བ་རྣམས་ཀྱི་ཡུལ་ལ་སྦྱོར། །གང་ཞིག་ཕྱི་ཡི་གཡེང་བྲལ་ཞིང་། །ནང་གི་བདག་ཉིད་གསལ་འདོད་པས། །མཉམ་བསམས་ལས་རྣམས་གདུངས་བསལ་ནས། །བླ་མའི་བདུད་རྩིའི་རོ་མྱང་
བྱ། །ལས་དང་པོ་ཡིས་བརྩམ་བྱ་བ། །ཞི་གནས་མི་མཐུན་རྒྱུ་སྤོང་ཞིང་། །ལུས་སེམས་བདེ་བར་བཞུགས་བྱས་ནས། །སྐྱེ་བའི་མཚན་ཉིད་བསམ་པར་བྱ། །ཀྱེ་མའོ་རང་བཞིན་ལ་རྨོངས་རྣམས། །བློ་བུར་རྟོག་པས་ཀུན་དུ་བསླད། །དེ་བཞིན་ཡུན་རིང་གོམས་ཤུགས་ལས། །བདེ་
སྡུག་གཉིས་ཚོགས་དབང་སྤྱོད་པས། །འཁོར་བའི་ཉོན་མོངས་ཚོགས་སུ་སྣང་། །ལ་ལས་ཞེན་ཆགས་རྣམ་པར་འཁྲུལ། །ལ་ལས་སྤོང་འདོད་སྡུག་བསྔལ་རྒྱུ། །ལ་ལས་སྤྱོད་འདོད་གནས་མ་དག །དགའ་བ་ཀུན་ལ་སྤྱོད་རྣམས་ཀྱང་། །ལུས་ངག་གཡེང་ཞིང་སྡུག་བསྔལ་རྒྱུ། །སྣང་བདེ་
མཉམ་པའི་དོན་གནས་ན། །སྐུ་གསུང་གཉིས་སུ་མེད་པའི་ལམ། །གྲོལ་ལམ་ཐབས་ལ་བརྟེན་པ་དག །བདེ་བའི་ཡེ་ཤེས་རྟོགས་བྱའི་ཕྱིར། རྩ་རླུང་སོ་སོའམ་ཐུན་མོང་གིས། །ཉམས་མྱོང་བསྐྱེད་པར་བྱ་བ་ཡིན། །འགྲོ་བ་ཀུན་གྱི་ཕུང་པོ་ལ། །འཁོར་ལོ་དཀྱིལ་འཁོར་བདེ་
เล่ม ๒๗ · หน้า 131b
ཆེན་བཞུགས། །རྣལ་འབྱོར་མཐོང་བར་འདོད་པ་ཡིས། །ཕུང་པོའི་དཀྱིལ་འཁོར་བལྟ་བར་བྱ། །འོག་ཏུ་བསྐྱེད་པའི་རྐྱེན་དབང་གིས། །གཏུམ་མོ་རཾ་བཅས་ཡང་དག་སྦྱོར། །དབྱིངས་སྣང་རི་བོང་འཛིན་པ་ལ། །ཡེ་ཤེས་རྡོ་རྗེ་རྩེ་ལྔ་གནས། །དམར་པོ་ཨོཾ་སོགས་ཡིག་བཅས་པའི། །དབྱིབས་
ཅན་སྤྲུལ་སྐུ་གྱེན་དུ་ཕྱོགས། །དཀར་པོ་ཧཱུཾ་སོགས་ཐུར་བལྟས་པའི། །ཆོས་སྐུས་མངོན་དུ་ཕྱོགས་པར་མཛད། །སྒྲ་གནས་ཨོཾ་སོགས་ཡི་གེ་ཚོགས། །ལོངས་སྐུ་དམར་པོ་གྱེན་དུ་ཕྱོགས། །ཚངས་བུག་འོག་ཏུ་བདེ་བ་ཆེ། །ཧཾ་སོགས་དཀར་པོ་ཐུར་བལྟས་པའོ། །སྟེང་གི་ཡུད་
ཙམ་དགག་བྱས་པས། །རྒྱུན་མི་འཆད་པར་རྡོ་རྗེར་བསྟིམ། །བསྐྱོད་པའི་བ་དན་གཉིས་བསྐུལ་བས། །འོག་ནས་ཡུད་ཙམ་ཡུད་ཙམ་དགག །རྒྱུན་མི་འཆད་པར་འདྲེན་བྱས་ཏེ། །རི་བོང་འཛིན་པའི་ཁམས་ཞུས་བརྒྱན། །བར་སྐབས་སྟོད་སྨད་ཡན་ལག་རྣམས། །ཉམ་ཆུང་
འབར་སོགས་དྲགས་གྱུར་ན། །ཅུང་ཞིག་སྦྱོར་བ་གློད་བྱ་ཞིང་། །གཡས་གཡོན་སྟེང་འོག་སྤྲོ་བ་དང་། །སྤྱོད་ལམ་སོགས་ཀྱིས་བཅོས་བྱས་ནས། །བདེ་འགྱུར་གང་བཞིན་བསླབ་པར་བྱ། །དེ་བཞིན་དབང་པོ་གཞན་དག་དང་། །ཚངས་བུག་རྟེན་གནས་དག་ཀྱང་བསྡུ། །དབྱེ་བ་
བཞི་འབུམ་བརྟེན་ནུས་ན། །བུམ་པ་གང་བར་གནས་པ་ཡིན། །འབྱུང་འཇུག་གནས་པའི་འཕྲོ་འདུ་ཡིས། །མཚན་མ་གསལ་བར་བརྟག་པར་བྱ། །ཟླ་བ་རྡོ་རྗེས་རྒྱས་པ་ན། །འཁོར་བའི་གནས་སུ་རིམ་པ་བཞིན། །གཡས་གཡོན་སྡང་མིག་གསུམ་བསྒྱུར་ཞིང་། །སྡིགས་
མཛུབ་ཧྲི་ཡི་སྩོལ་བས་སྤེལ། །དེ་བཞིན་གླིང་བཞི་གནས་སྤྲོ་ཞིང་། །སླར་ཉིད་བདེ་ཆེན་གནས་སུ་བསྡུ། །ཧཾ་ལས་འཛག་པའི་བདུད་རྩི་ཡིས། །དགའ་བ་བཞི་ཡི་རིམ་སྐྱེད་ཅིང་། །ཕུང་པོ་བཅུད་བསྡུས་ཀྵ་རྩེར་གཟུང་། །དགའ་བ་ཆེན་པོས་རྣམ་མྱོས་པར། །ཧཱུཾ་གསུམ་ཕྱག་རྒྱས་
འདྲེན་བྱས་ནས། །ཕྱི་ཡི་དཀྱིལ་འཁོར་སྤྲོ་བར་བྱ། །དངོས་ཀུན་བདེ་བའི་རོས་རྒྱས་ཏེ། །སྟོང་ཉིད་ཟག་མེད་ཡེ་ཤེས་གསལ། །དེ་ལྟར་འཁོར་བ་མྱ་ངན་འདས། །བདེ་ཆེན་སྟོང་ཉིད་རྒྱས་བཏབ་ནས། །རང་གི་མཚན་ཉིད་རྣམ་གསལ་ཅིང་། །རྟོག་པའི་མཐའ་ལས་རྣམ་པར་
เล่ม ๒๗ · หน้า 132a
གྲོལ། །ལྷན་ཅིག་སྐྱེས་དགའི་ཡེ་ཤེས་ཏེ། །སྤྲིན་མེད་ནམ་མཁའ་དྲི་བྲལ་ཞིང་། །བརྟན་ཞིང་འབིགས་བྱེད་མེད་པར་གནས། །ཚེ་འདིས་སངས་རྒྱས་མངོན་དུ་འགྱུར། །ཆགས་ལམ་གཞན་ལ་བརྟེན་པ་ཡིས། །མཚན་ལྡན་རིགས་དང་མཐུན་པ་
ལ། །དབང་བསྐུར་བྱིན་བརླབས་གདམས་ངག་འབོགས། །གླུ་དབྱངས་སྨན་དང་བརྡས་བསྐུལ་ནས། །བྷ་གའི་མཚན་མར་རྣམ་བརྟགས་ཏེ། །ཕྱག་རྒྱ་སོ་སོའི་སྦྱོར་བ་དག །ལྔ་ནས་དྲུག་ཅུ་རྩ་བཞིའི་བར། །སྦྱོར་ཐབས་དྲུག་ཅུ་རྩ་བཞིར་བཅས། །ཕུང་པོའི་དཀྱིལ་འཁོར་བརྟག་
བྱ་སྟེ། །བསྒྲུབ་གནས་རོལ་པའི་གནས་ཤེས་བྱ། །སྤྱོད་པས་གཏུམ་མོ་ལེགས་སྦར་བས། །སྲུབ་ཐབས་སྦྱོར་བ་འདྲེས་པ་ཡིས། །ལྔ་ཕུང་སྦྱིན་སྲེག་བྱས་ནས་སུ། །སྤྲུལ་སྐུས་ལུས་རྟོག་སྦྱོང་བར་མཛད། །གོང་ནས་གོང་དུ་སྦྱོར་བ་ཡིས། །ཆོས་དང་ལོངས་སྤྱོད་གནས་སྤྱོད་
པས། །སེམས་དག་དྲི་མ་རྣམ་པར་སྤངས། །བདེ་བ་ཆེན་པོ་གནས་རྒྱས་པས། །དགའ་དང་མཆོག་དགའ་རྣམ་དགའ་དང་། །ལྷན་ཅིག་སྐྱེས་དགའ་ལུགས་སུ་འབྱུང་། །རྡོ་རྗེ་དབྱིངས་མཚམས་སྦྱོར་བའམ། །འབར་ཏ་ཀ་ཏའི་རྩེ་མོར་གཟུང་། །གླིང་བཞིས་རྩེ་རྣམས་བསྡུ་
བྱ་སྟེ། །སྟེང་གི་མཚན་མས་བལྟ་བར་བྱ། །དགའ་བ་མ་སྐྱེས་བར་དག་ཏུ། །མ་ཟིན་ཟིན་པར་བརྟེན་གནས་བྱ། །ལུགས་བཟློག་ཧཱུཾ་དང་ཀྵཿཡིས་འདྲེན། །གཏུམ་མོ་ནས་བཟུང་བདེ་ཆེན་འབར། །དགའ་བ་བཅུ་དྲུག་འཕེལ་གྱུར་ནས། །ཕྱི་ཡི་གླིང་བཞིར་སྤྲོ་བར་བྱ། །
ཤེས་རབ་ལ་ལ་ཐུར་བལྟས་པའི། །ཡི་གེ་ལས་བྱུང་དཀར་པོ་ཡིས། །འཁོར་ལོ་བཞི་དང་སྦྱོར་བྱས་ནས། །ཀྵཿརྩེའི་གནས་གཟུང་གོང་མ་བཞིན། །ཐབས་ལྡན་ས་དང་གྱེན་བལྟས་ལ། །གཅིག་འགྱུར་ཨ་ཝ་དྷཱུ་ཏཱིར་ཞུགས། །དེ་ལ་སྤྲུལ་པའི་འཁོར་ལོ་ཡིས། །ལུས་ཀྱི་དཀྱིལ་
འཁོར་རྒྱས་པར་བྱས། །སླར་ཉིད་ཆོས་ཀྱི་འཁོར་ལོའི་གནས། །བདེ་བའི་ཡེ་ཤེས་གཟུང་བྱས་ཏེ། །ཟིན་དང་བརྟན་དང་བོགས་དབྱུང་དང་། །དབྱུང་དུ་མེད་པའི་གནས་འཇོག་པའོ། །ཕྱི་ཡི་གནས་ཀྱང་རྒྱས་བྱས་ཤིང་། །གཟུང་མེད་འཛིན་དང་བྲལ་བར་གཞག །ཁམས་
เล่ม ๒๗ · หน้า 132b
གསུམ་དངོས་པོ་དེ་ལྟ་བུར། །བདེ་བ་ཆེ་ལས་གཞན་མ་ཡིན། །བློ་མཆོག་སྦྱངས་པའི་འཕྲོ་ལྡན་པས། །ཕྱི་ནང་ཆོས་ཀུན་མཁའ་བཞིན་གསལ། །སྣང་སྲིད་རང་ལས་རྣམ་གྲོལ་ཞིང་། །འབྱུང་འཇུག་མེད་པར་ཡེ་ཤེས་ཆེ། །དབང་པོ་དྲུག་གི་ཡུལ་སྣང་བས། །དེ་ལས་
གཞན་མེད་བྱང་ཆུབ་སེམས། །རྟོག་པ་མཐའ་རྣམས་འཛིན་མེད་པའི། །སྣང་གསལ་བདེ་བ་ཆེན་པོའི་ཆོས། །གནས་མེད་བཏང་སྙོམས་ཆེན་པོའི་གནས། །རྩོལ་བྲལ་བྱང་སེམས་རྩོལ་བའི་དོན། །བཅོས་མེད་དྲན་པ་རང་དགར་གནས། །ཆོས་ཉིད་མཉམ་པའི་རྒྱན་དང་བཅས། །
བྱུང་ཚོར་འགོག་དང་རྗེས་དྲན་མེད། །མ་བཅོས་མཐའ་བྲལ་བདེ་བའི་རྒྱུན། །མངོན་སུམ་གསལ་བ་ཉམས་མྱོང་བ། །སྣང་སྲིད་མ་གཡོས་ཕྱག་རྒྱའི་ཚོགས། །ཆོས་ཀུན་རང་བཞིན་དེ་ལྟ་བུར། །བདེ་ཆེན་རྡོ་རྗེ་སེམས་དཔའི་སྐུ། །གསུང་ཐུགས་ཡོན་ཏན་ཕྲིན་ལས་བརྒྱན། །
མ་རྩོལ་རྒོད་པ་ཆེན་པོའི་དབྱིབས། །དེ་དུས་མཚན་མ་རྣམ་མྱོང་བ། །ལུས་རྟོག་སྒྲ་སོགས་སྣང་ཞིང་སྟོང་། །གསལ་བའི་དོན་ལས་གཞན་མི་འགྱུར། །ཆོས་རྣམས་གང་ལ་ཆགས་སྡང་མེད། །མཁའ་ལ་ཁྱུང་ཆེན་གནས་པ་དང་། །ཆུ་ལ་ཉ་ཆེན་འཕྱོ་བ་བཞིན། །བྱིས་པ་
རྣམས་ནི་གཟུགས་སོགས་ཆགས། །འབྲིང་པོའི་བློ་ལྡན་ཆགས་བྲལ་སྤྱོད། །གཟུགས་སོགས་ངོ་བོ་ཉིད་ཤེས་པས། །བློ་མཆོག་རྣམས་ནི་གྲོལ་བར་འགྱུར། །གཟུགས་བརྙན་ལུགས་མ་ལ་སོགས་ལ། །རྣལ་འབྱོར་འབྱུང་བར་མི་འགྱུར་གྱི། །བྱང་ཆུབ་སེམས་ལ་རབ་བརྩོན་
ན། །དེ་ལས་རྣལ་འབྱོར་ལྷར་འགྱུར་རོ། །བྱང་ཆུབ་སེམས་ནི་རྡོ་རྗེ་སྟེ། །སངས་རྒྱས་ཀུན་གྱི་བདག་ཉིད་ཡིན། །དེ་བས་ཐམས་ཅད་བདག་སྦྱོར་བས། །སངས་རྒྱས་ཐམས་ཅད་ཐོབ་པར་འགྱུར། །དེ་བས་བདག་ཉིད་ལྷར་སྦྱོར་བས། །བདག་ཉིད་རབ་ཏུ་བསྒྲུབ་པར་བྱ། །འདི་ཡིས་
སངས་རྒྱས་ཐམས་ཅད་དང་། །དཔའ་བོ་རྣམས་དང་ཐམས་ཅད་ཀྱང་། །རྡོ་རྗེ་འཛིན་པ་ཐམས་ཅད་དུ། །ཚེ་འདི་ཉིད་ལ་འགྲུབ་པར་འགྱུར། །སྦྱོར་བ་བཞི་ལ་ལེགས་གནས་ཤིང་། །ཏིང་འཛིན་ཉམས་པ་མེད་པའི་བློས། །སེང་གེ་རི་བྲགས་རྒྱུ་བ་བཞིན། །འཇིགས་མེད་ཐམས་ཅད་
เล่ม ๒๗ · หน้า 133a
ཟིལ་གྱིས་གནོན། །ཐམས་ཅད་མཉམ་པས་སྤྱད་བྱ་སྟེ། །འདོད་པའི་ལོངས་སྤྱོད་ཀུན་གྱིས་བརྒྱན། །བཟའ་སྤྱོད་ཀུན་ལ་རོལ་བྱ་ཞིང་། །རིགས་ཀྱི་དཀྱིལ་འཁོར་མཆོད་པར་བྱ། །རྣལ་འབྱོར་ཐམས་ཅད་ཉེར་སྤྱོད་པས། །དཔལ་ནི་བཞིར་འགྱུར་འགྲུབ་པར་
འགྱུར། །རྣལ་འབྱོར་ཀུན་ནི་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །དེ་ཡི་ཉེ་བར་སྦྱོར་བ་ནི། །ཁམས་གསུམ་མ་ལུས་ཐམས་ཅད་དོ། །རྣལ་འབྱོར་ཀུན་གྱིས་ལོངས་སྤྱོད་ཀྱིས། །ཇི་ལྟར་བདེ་བར་རྟེན་བྱེད་ཅིང་། །རང་གི་ལྷ་ཡི་རྣལ་འབྱོར་གྱིས། །བདག་
ཉིད་རབ་ཏུ་མཆོད་པར་བྱ། །རྗེས་སུ་སྦྱོར་བས་མཆོད་བྱེད་ཅིང་། །རྣལ་འབྱོར་ཀུན་གྱི་བདེ་བ་དག །བདག་ཉིད་རབ་ཏུ་མྱོང་བྱེད་ན། །ཤིན་ཏུ་སྦྱོར་བས་འགྲུབ་པར་འགྱུར། །སངས་རྒྱས་ཀུན་གྱི་བདག་ཉིད་ཀྱི། །ར་ས་ཡ་ནའི་བདེ་བ་འདིས། །རྡོ་རྗེ་སེམས་དཔའི་དཔལ་ཚེ་དང་། །ལོང་ཚོ་
ནད་མེད་བདེ་བ་འགྲུབ། །སངས་རྒྱས་ཀུན་དང་མཉམ་སྦྱོར་བས། །སངས་རྒྱས་ཀུན་དང་མཉམ་པར་འགྱུར། །སངས་རྒྱས་ཀུན་དང་མཉམ་པས་ན། །སངས་རྒྱས་ཐམས་ཅད་རབ་ཏུ་འགྲུབ། །རྡོ་རྗེ་སེམས་དཔའི་དཔལ་སྦྱོར་བའི། །མཐུ་འདི་ཉིད་ཀྱིས་ཐམས་ཅད་དུ། །མདོར་ན་ཕྱག་རྒྱ་
ཐམས་ཅད་ནི། །སོ་སོ་དག་ནས་རབ་འགྲུབ་འགྱུར། །ལྟ་བས་མི་ངོམས་པ་ཡི་སྐུ། །ཐམས་ཅད་བདག་ཉིད་སྟོན་པར་མཛད། །ལེགས་སོ་ཞེས་པ་གྲུབ་པ་ནི། །དམ་པ་དག་ཀྱང་རབ་ཏུ་སྩོལ། །སྐུ་གསུམ་དབྱེར་མེད་ལས་བྱུང་བས། །སེམས་ཅན་ཀུན་དོན་རྣམ་འཕྲུལ་ཞིང་། །མཛད་པ་རྒྱ་ཆེན་
སྣ་ཚོགས་ཀྱིས། །དོན་བཞིན་སྤྲུལ་པ་མཛད་པ་ཡིན། །བརྩོན་ལྡན་ཤེས་རབ་མཆོག་གྱུར་པའི། །མཁས་མཆོག་རྣམས་ཀྱིས་རྙེད་དཀའི་དོན། །སངས་རྒྱས་ཐམས་ཅད་མཉམ་པར་སྦྱོར། །མཁའ་འགྲོ་སྒྱུ་མ་བདེ་མཆོག་ལས། །སྐྱེས་མཆོག་གང་གིས་དྲིན་རྙེད་པའི། །རྒྱ་མཚོ་ལས་བྱུང་
རིན་པོ་ཆེ། །འགྲོ་བའི་དོན་དུ་བརྟག་བྱས་པས། །འཇུག་པ་པོ་རྣམས་དགའ་བར་གྱིས། །རྒྱུད་རྒྱལ་རྣམས་ཀྱི་རྩ་བའི་དོན། །གསང་བའི་དེ་ཉིད་བཞི་བཅུ་གཉིས། །གཅེས་བསྡུས་རྟོག་པ་བཅུ་པ་དང་། །ཕྱི་མའི་ཕྱི་མ་ཕྱི་མ་ལས། །གསང་དོན་རྣམ་པར་དགོད་བྱས་པས། །འཁྲུལ་རྟོག་མི་
เล่ม ๒๗ · หน้า 133b
ཚིག་བསླད་བྲལ་ཞིང་། །རྒྱུད་གཞན་ཚིག་ཕྲད་ཙམ་བཀོད་དེ། །རྒྱལ་བའི་གསུང་བཞིན་རྣམ་པར་བསྡེབས། །ཅུང་ཟད་བསགས་ལས་བྱུང་བ་ཡི། །དྲི་མེད་སྟོན་ཀའི་ཟླ་འདྲ་བས། །འགྲོ་བའི་ཡེ་ཤེས་གསལ་མཛད་ནས། །དཔལ་ལྡན་སྐུ་གསུམ་ཐོབ་པར་ཤོག །དཔལ་རྡོ་རྗེ་སེམས་
དཔའི་གསང་བའི་དོན་རྣམ་པར་དགོད་པ་ཞེས་བྱ་བ། །སློབ་དཔོན་ཀུ་ཀུ་རཱ་ཛས་མཛད་པ་རྫོགས་སོ།། །།རྒྱ་གར་གྱི་མཁན་པོ་བིདྱཱ་ཀ་ར་སིཾཧྷ་དང་། ཞུ་ཆེན་གྱི་ལོ་ཙཱ་བ་བནྡེ་ལྷ་རིན་པོ་ཆེས་རྒྱུད་འགྲེལ་དང་གཏུགས་ཏེ་གཏན་ལ་ཕབ་པའོ།།
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด