དཔལ་གསང་བ་འདུས་པའི་དཀྱིལ་འཁོར་གྱི་ལྷའི་སྐུ་ལ་བསྟོད་པ་ཞེས་བྱ་བ
ชื่อสันสกฤต (อักษรทิเบต ตามตัวบท) ཤྲཱི་གུ་ཧྱ་ས་མཱ་ཛ་དེ་ཝ་མཎྜལ་ཀཱ་ཡ་སྟོ་ཏྲ་ནཱ་མ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๓๖ · หน้า 115a
༄༅༅། །རྒྱ་གར་སྐད་དུ། ཤྲཱི་གུ་ཧྱ་ས་མཱ་ཛ་དེ་ཝ་མཎྜལ་ཀཱ་ཡ་སྟོ་ཏྲ་ནཱ་མ། བོད་སྐད་དུ། དཔལ་གསང་བ་འདུས་པའི་དཀྱིལ་འཁོར་གྱི་ལྷའི་སྐུ་ལ་བསྟོད་པ་ཞེས་
བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གང་ཞིག་ཁམས་གསུམ་ལས་གྲོལ་དངོས་ཉིད་སྐུ། །དག་ཅིང་རབ་ཞི་རྣལ་འབྱོར་ཡུལ་གྱུར་པ། །མཉམ་མེད་བདེ་བས་བརྒྱན་པ་འགྲོ་བའི་མགོན། །འདུས་པའི་དཀྱིལ་འཁོར་ལྷ་ཚོགས་བསྟོད་པར་བགྱི། །ཞལ་
གསུམ་ཕྱག་དྲུག་བཻ་ཌཱུརྱ་ལྟར་དངས། །དཀར་དམར་གཡས་པ་རྡོ་རྗེ་འཁོར་ལོ་དང་། །པདྨ་དྲིལ་བུ་རིན་ཆེན་རལ་གྲི་འཛིན། །མི་བསྐྱོད་རྡོ་རྗེ་གཙོ་ལ་ཕྱག་འཚལ་ལོ། །རབ་དཀར་གཡས་ནི་མཐིང་ག་གཡོན་དམར་ཞལ། །ཕྱག་གཡས་འཁོར་ལོ་རྡོ་རྗེ་པདྨ་འཛིན། །གཡོན་པས་དྲིལ་བུ་
རིན་ཆེན་རལ་གྲི་བསྣམས། །རྡོ་རྗེ་རྣམ་སྣང་མཛད་ལ་ཕྱག་འཚལ་ལོ། །མཐིང་དང་དཀར་བའི་ཞལ་དབུས་གསེར་གྱི་མདོག །ནོར་བུ་རྡོ་རྗེ་འཁོར་ལོ་གཡས་ན་འཛིན། །དྲིལ་བུ་པདྨ་རལ་གྲིས་ཕྱག་གཡོན་བརྒྱན། །རྡོ་རྗེ་རིན་ཆེན་ཏོག་ལ་ཕྱག་འཚལ་ལོ། །རབ་ཆགས་དྲག་པོ་ཞི་
เล่ม ๓๖ · หน้า 115b
བའི་ཞལ་མངའ་བ། །པདྨ་ཁ་འབྱེད་རྡོ་རྗེ་འཁོར་ལོ་དང་། །གཡོན་པ་དྲིལ་བུ་པད་སྡོང་རིན་ཆེན་གྲི། །མཐའ་ཡས་རྡོ་རྗེ་དེ་ལ་ཕྱག་འཚལ་ལོ། །དབུས་ལྗང་གཡས་མཐིང་གཡོན་པ་དཀར་བའི་ཞལ། །རལ་གྲི་སྣ་ཚོགས་རྡོ་རྗེ་འཁོར་ལོ་དང་། །དྲིལ་བུ་པད་ལྗང་ནོར་
བུ་ཕྱག་ན་བསྣམས། །དོན་གྲུབ་རྡོ་རྗེ་དེ་ལ་ཕྱག་འཚལ་ལོ། །དབུས་ཞི་གཡས་དྲག་གཡོན་པ་དབང་གི་ཞལ། །འཁོར་ལོ་རྡོ་རྗེ་ཨུཏྤལ་གཡས་ན་འཛིན། །གཡོན་པའི་ཕྱག་ན་དྲིལ་བུ་རིན་ཆེན་གྲི། །ནད་ཞི་ལྷ་མོ་སྤྱན་ལ་ཕྱག་འཚལ་ལོ། །ཆར་སྤྲིན་ལྟ་བུའི་
གཡས་གཡོན་དཀར་དམར་ཞལ། །རྡོ་རྗེ་འཁོར་ལོ་དེ་བཞིན་ཨུཏྤལ་གཡས། །དྲིལ་བུ་རིན་ཆེན་རལ་གྲི་གཡོན་ན་འཛིན། །བགེགས་འཇོམས་མཱ་མ་ཀཱི་ལ་ཕྱག་འཚལ་ལོ། །དམར་མཐིང་དཀར་བའི་ཞལ་གསུམ་གོ་རིམས་བཞིན། །པད་སྡོང་དྲིལ་བུ་རིན་ཆེན་རལ་གྲི་གཡོན། །
གཡས་པས་ཁ་འབྱེད་རྡོ་རྗེ་འཁོར་ལོ་འཆང་། །གདོན་འཇོམས་གོས་དཀར་ཅན་ལ་ཕྱག་འཚལ་ལོ། །ལྗང་མཐིང་དཀར་བའི་དབུས་དང་གཡས་གཡོན་ཞལ། །སྣ་ཚོགས་རྡོ་རྗེ་འཁོར་ལོ་ཨུཏྤལ་དང་། །དྲིལ་བུ་རིན་ཆེན་རལ་གྲི་རྟག་ཏུ་འཛིན། །འགྲོ་ཀུན་དབང་
མཛད་སྒྲོལ་མར་ཕྱག་འཚལ་ལོ། །སྤྱན་དང་སྐུ་མདོག་ཕྱག་མཚན་མཚུངས་པ་ལ། །ཁྱད་པར་གཟུགས་ཕུང་གསལ་བའི་མེ་ལོང་འཛིན། །མཆོག་གཟུགས་མཆོད་པས་མགོན་ཀུན་མཉེས་མཛད་མ། །རྡོ་རྗེ་གཟུགས་མ་དེ་ལ་ཕྱག་འཚལ་ལོ། །རྩ་བའི་ཕྱག་གཉིས་རྒྱུད་
མངས་སྒྲ་སྒྲོགས་ཤིང་། །སྐུ་དང་ཕྱག་རྒྱ་གཞན་ནི་བདག་མ་མཚུངས། །མཚུངས་མེད་སྒྲ་ཡིས་སྐྱོབ་རྣམས་རབ་མཆོད་མ། །རྡོ་རྗེ་སྒྲ་མ་དེ་ལ་ཕྱག་འཚལ་ལོ། །གོས་དཀར་ལྷ་མོ་ཇི་བཞིན་གསལ་བ་ལ། །མཆོག་ཏུ་རྩ་བའི་ཕྱག་གཉིས་དུང་ཆོས་འཛིན། །སངས་རྒྱས་
རྣམས་ནི་དྲི་ཡིས་ཚིམ་མཛད་མ། །རྡོ་རྗེ་དྲི་མ་དེ་ལ་ཕྱག་འཚལ་ལོ། །ཞལ་གསུམ་ཕྱག་དྲུག་སྒྲོལ་མ་ལྟ་བུ་ལ། །མཚུངས་མེད་རོ་མཆོག་དག་པའི་སྣོད་འཆད་ཞིང་། །མཁའ་ཁྱབ་རྒྱལ་བ་རོ་ཡིས་མཉེས་མཛད་མ། །རྡོ་རྗེ་རོ་མ་དེ་ལ་ཕྱག་འཚལ་ལོ། །སྔོ་སྐྱ་དཀར་དང་
เล่ม ๓๖ · หน้า 116a
དམར་བའི་ཞལ་གསུམ་མངའ། །དཀྱིལ་འཁོར་བདག་པོ་ཇི་བཞིན་ཕྱག་རྒྱ་གསལ། །བདེ་ཆེན་རེག་མཆོག་རྣམས་ཀྱིས་མགོན་མཆོད་མཛད། །རྡོ་རྗེ་རེག་མ་དེ་ལ་ཕྱག་འཚལ་ལོ། །རྒྱལ་བའི་ཞལ་དང་སྐུ་མདོག་ཕྱག་མཚན་རྣམས། །གཏི་མུག་རྣམ་པར་
སྤྱོད་དང་མཚུངས་པ་ལ། །ཕྱག་གཡས་ཀླུ་ཤིང་མེ་ཏོག་མཛེས་པ་འཛིན། །རྡོ་རྗེ་བྱམས་པ་མགོན་ལ་ཕྱག་འཚལ་ལོ། །གཟུགས་ཕུང་རྣམ་དག་མེ་ལོང་ཡེ་ཤེས་ཅན། །དེ་དང་སྐུ་མདོག་ཕྱག་མཚན་ཁྱད་མེད་ཅིང་། །མིག་དབང་ཐོགས་མེད་རྡོ་རྗེ་སྩོལ་མཛད་པ། །རྡོ་རྗེ་ས་སྙིང་པོ་ལ་
ཕྱག་འཚལ་ལོ། །ང་རྒྱལ་སྦྱོང་མཛད་མགོན་པོ་ལྟ་བུའི་སྐུ། །ཞལ་གསུམ་ཕྱག་དྲུག་ཕྱག་རྒྱ་དྲུག་དང་ལྡན། །སྒྲ་གསུམ་ཐོགས་མེད་མི་ཕྱེད་རང་བཞིན་ཉིད། །ཕྱག་ན་རྡོ་རྗེ་དེ་ལ་ཕྱག་འཚལ་ལོ། །ཚོར་བདག་མཉམ་ཉིད་ཡེ་ཤེས་མངའ་བརྙེས་པའི། །རྒྱལ་བ་ཇི་བཞིན་སྐུ་
ཡི་ཕྱག་རྒྱ་འཆང་། །སྣ་དབང་རང་ཞི་མི་ཕྱེད་རང་བཞིན་སྐུ། །རྡོ་རྗེ་མཁའ་སྙིང་དེ་ལ་ཕྱག་འཚལ་ལོ། །ཞལ་མདོག་ཕྱག་དང་དེ་བཞིན་མཚན་མ་རྣམས། །འདོད་ཆགས་སྦྱོང་བར་མཛད་པའི་མགོན་པོ་བཞིན། །མི་ཐོགས་མི་ཕྱེད་ལྕེ་དབང་རབ་སྩོལ་བ། །རྡོ་རྗེ་འཇིག་རྟེན་དབང་ལ་
ཕྱག་འཚལ་ལོ། །འདུ་ཤེས་རྣམ་དག་ཀུན་རྟོག་ཡེ་ཤེས་ལ། །མངའ་བརྙེས་སྐྱོབ་པ་ལྟ་བུའི་ཆ་ལུགས་ཅན། །ཆགས་ཐོགས་མི་མངའ་མི་ཕྱེད་ཤེས་རབ་ཉིད། །རྡོ་རྗེ་འཇམ་པའི་དབྱངས་ལ་ཕྱག་འཚལ་ལོ། །ལོག་པའི་དད་ཅན་སྦྱོང་མཛད་བཅོམ་ལྡན་འདས། །ཇི་བཞིན་
སྐུ་ཡི་རྣམ་པར་འཕྲུལ་བཀོད་ནས། །མི་ཕྱེད་རྡོ་རྗེའི་སྐུ་མཆོག་རང་བཞིན་ཅན། །རྡོ་རྗེ་སྒྲིབ་ཀུན་སེལ་ལ་ཕྱག་འཚལ་ལོ། །གང་ཞིག་སྐུ་ནི་འདུ་བྱེད་རྣམ་དག་ནས། །བྱ་གྲུབ་ཡེ་ཤེས་མངའ་བརྙེས་དང་མཚུངས་ཏེ། །ཤེས་དང་ཤེས་བྱ་རབ་ཞི་འོད་གསལ་དག །རྡོ་རྗེ་
ཀུན་དུ་བཟང་པོར་ཕྱག་འཚལ་ལོ། །འབར་བའི་དབུས་བཞུགས་གནག་དཀར་དམར་ཞལ་ཁྲོ། །དབྱུག་པ་འཁོར་ལོ་རྡོ་རྗེ་གཡས་ན་འཛིན། །སྡིགས་མཛུབ་ཞགས་པ་དྲིལ་བུ་དགྲ་སྟ་གཡོན། །རྡོ་རྗེ་གཤིན་རྗེ་གཤེད་ལ་ཕྱག་འཚལ་ལོ། །མདོག་དཀར་གནག་
เล่ม ๓๖ · หน้า 116b
དང་དམར་པོ་གཡས་གཡོན་ཞལ། །ཕྱག་དྲུག་རྡོ་རྗེ་དབྱུག་པ་སྡིགས་མཛུབ་ཞགས། །དྲིལ་བུ་དགྲ་སྟ་འཛིན་མཛད་ཁྲོ་ཆེན་སྐུ། །རྡོ་རྗེ་གཞན་གྱིས་མི་ཐུབ་ཕྱག་འཚལ་ལོ། །ཁྲོ་རྒྱལ་གང་ཞིག་དམར་གནག་དཀར་བའི་ཞལ། །པདྨ་རལ་གྲི་གཏུན་ཤིང་གཡས་པས་
འཛིན། །གཡོན་པ་བསྙེམས་བཅས་དྲིལ་བུ་དགྲ་སྟ་ཞགས། །རྡོ་རྗེ་རྟ་མགྲིན་དེ་ལ་ཕྱག་འཚལ་ལོ། །དབུས་གནག་གཡས་དཀར་གཡོན་པ་དམར་བའི་ཞལ། །སྣ་ཚོགས་རྡོ་རྗེ་འཁོར་ལོ་གཏུན་ཤིང་དང་། །སྡིགས་མཛུབ་དྲིལ་བུ་དགྲ་སྟ་འཆང་བྱེད་ཁྲོ། །རྡོ་རྗེ་
བདུད་རྩི་འཁྱིལ་ལ་ཕྱག་འཚལ་ལོ། །གནག་དམར་དཀར་ཞལ་རབ་ཏུ་བཞད་མཛད་ཅིང་། །རལ་གྲི་རྡོ་རྗེ་འཁོར་ལོ་གཡས་ན་འཛིན། །སྡིགས་མཛུབ་དགྲ་སྟ་ཞགས་པ་གཡོན་ན་བསྣམས། །རྡོ་རྗེ་མི་གཡོ་མགོན་ལ་ཕྱག་འཚལ་ལོ། །ཁྲོ་ཆེན་མཐིང་གནག་དཀར་
དང་དམར་བའི་ཞལ། །རྩ་བའི་ཕྱག་གཉིས་ཧཱུཾ་མཛད་ཕྱག་རྒྱ་མཛད། །རྡོ་རྗེ་རལ་གྲི་ཞགས་པ་ལྕགས་ཀྱུ་འཛིན། །རྡོ་རྗེ་འདོད་པའི་རྒྱལ་ལ་ཕྱག་འཚལ་ལོ། །སྔོ་དམར་དཀར་བའི་ཞལ་མངའ་ཁྲོ་རྒྱལ་ནི། །དབྱུག་པ་རལ་གྲི་འཁོར་ལོ་གཡས་ན་འཛིན། །སྡིགས་
མཛུབ་རལ་གྲི་དགྲ་སྟ་གཡོན་ན་མདའ། །རྡོ་རྗེ་དབྱུག་སྔོན་ཅན་ལ་ཕྱག་འཚལ་ལོ། །གཏུམ་ཆེན་གནག་དམར་དཀར་བའི་ཞལ་གསུམ་མངའ། །དབྱུག་པ་རལ་གྲི་འཁོར་ལོ་ཕྱག་གཡས་འཛིན། །སྡིགས་མཛུབ་རལ་གྲི་དགྲ་སྟ་གཡོན་ན་བསྣམས། །རྡོ་རྗེ་སྟོབས་པོ་
ཆེ་ལ་ཕྱག་འཚལ་ལོ། །སྔོ་དམར་དཀར་བའི་ཞལ་མངའ་ཁྲོ་བོའི་གཙོ། །རྩ་བའི་ཕྱག་གཉིས་སྤྱི་བོར་གཙུག་ཏོར་འཛིན། །གཞན་རྣམས་རྡོ་རྗེ་པདྨ་སྡིགས་མཛུབ་གྲི། །རྡོ་རྗེ་གཙུག་ཏོར་རྒྱལ་ལ་ཕྱག་འཚལ་ལོ། །གནག་དམར་དཀར་བའི་ཞལ་ལྡན་ཁྲོ་རྒྱལ་ནི། །
རྡོ་རྗེ་འཁོར་ལོ་ནོར་བུ་ཕྱག་གཡས་འཆང་། །གཡོན་པ་སྡིགས་མཛུབ་ཞགས་པ་པདྨ་གྲི། །རྡོ་རྗེ་གནོད་མཛེས་རྒྱལ་ལ་ཕྱག་འཚལ་ལོ། །དཀྱིལ་འཁོར་མཚོར་གནས་ལྷ་སྐུའི་མེ་ཏོག་སུམ་ཅུ་རྩ་གཉིས་ལ། །རབ་དང་བུང་བས་བསྟོད་པའི་ལྕེས་བླངས་དགེ་ཆེན་སྦྲང་རྩི་
เล่ม ๓๖ · หน้า 117a
འདི། །འགྲོ་བ་དངོས་འཛིན་རླུང་ནད་གཟིར་བ་རྣམས་ཀྱིས་ལེགས་བསྟེན་པས། །ཉོན་མོངས་གདུང་བསལ་གཞན་དོན་མདངས་རྒྱས་ཡེ་ཤེས་སྐུ་ཐོབ་ཤོག །དཔལ་གསང་བ་འདུས་པའི་དཀྱིལ་འཁོར་གྱི་ལྷའི་སྐུ་ལ་བསྟོད་པ་ཞེས་བྱ་བ་རྣལ་འབྱོར་གྱི་དབང་ཕྱུག་
མི་གནས་རྡོ་རྗེས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཨཱ་ཙཱརྱ་ཤྲདྡྷཱ་ཀ་ར་ཝརྨ་དང་ཞུ་ཆེན་གྱི་ལོ་ཙཱ་བ་བནྡེ་རིན་ཆེན་བཟང་པོས་བསྒྱུར་བའོ།།
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด