རྒྱུད་ཀྱི་རྒྱལ་པོ་དཔལ་གསང་བ་འདུས་པའི་འགྲེལ་པ
ชื่อสันสกฤต (อักษรทิเบต ตามตัวบท) ཤྲཱི་གུ་ཧྱ་ས་མ་ཛ་ཏནྟྲ་རཱ་ཛ་བྲྀཏྟི
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๔๕ · หน้า 155a
༄༅༅། །རྒྱ་གར་སྐད་དུ། ཤྲཱི་གུ་ཧྱ་ས་མ་ཛ་ཏནྟྲ་རཱ་ཛ་བྲྀཏྟི། བོད་སྐད་དུ། རྒྱུད་ཀྱི་རྒྱལ་པོ་དཔལ་གསང་བ་འདུས་པའི་འགྲེལ་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སྟོབས་ཀྱིས་དྲེགས་པ་བཞི་བཅོམ་ཞིང་། །ལོངས་སྤྱོད་བཅུ་དང་མཉམ་ལྡན་པའི། །ཡེ་ཤེས་
ལྔ་དངོས་ཀུན་དོན་དང་། །བླ་མའི་ཞབས་ལའང་སྤྱིས་བཏུད་དེ། །འདུས་པ་ཞེས་བྱ་རྒྱུད་ཀྱི་མཆོག །འདོད་ཆགས་ཆེ་ལ་མངོན་ཕྱོགས་དང་། །བདག་ཉིད་བརྗེད་པ་བསལ་དོན་དུའང་། །དད་པའི་ཤུགས་ཀྱིས་བཤད་པར་བྱ། །དེ་ལ་རྒྱུད་འདིའི་དོན་ནི་དཀྱིལ་འཁོར་གསུམ་དང་དམ་ཚིག་དང་། སྡོམ་པ་
དང་། བརྟུལ་ཞུགས་གསུམ་དང་། ཐུན་མོང་དང་མཆོག་གི་དངོས་གྲུབ་ཀྱི་ཆོ་ག་དང་། དེའི་ཐབས་བཞི་པོའི་རིམ་པ་འདི་ལྟ་སྟེ། སྦྱོར་བ་གསུམ་གྱི་ཡན་ལག་དྲུག་པོ་ཆ་དང་བཅས་པས་བསྙེན་པ་དང་དྲག་ཤུལ་གྱིས་སྒྲུབ་པ་དག་ཡིན་ནོ། །དགོས་པ་ལ་སོགས་པ་ནི་ཤུགས་ཀྱིས་དཔག་གོ། །ད་ནི་ཐུན་མོང་དང་
ཐུན་མོང་མ་ཡིན་པའི་གླེང་གཞི་དག་བསྟན་པའི་ཕྱིར་འདི་སྐད་ཅེས་པ་ལ་སོགས་པ་སྨོས་ཏེ་དེ་ལ་འདི་སྐད་ཅེས་པ་ནི་སྒྲའི་རྣམ་པ་མཐའ་དག་བསྡུས་པ་སྟེ། དེས་ཐུན་མོང་མ་ཡིན་པའི་གླེང་གཞིའི་ངོ་བོ་བྱང་ཆུབ་ཀྱི་སེམས་རྡོ་རྗེ་ཉིད་མཚོན་པའོ། །དེ་ལྟར་ཡང་བཟང་པོ་ཞབས་ཀྱིས་གསུངས་པ། གཉིས་
མེད་ཐོག་མ་ཞིར་ལྡན་པ། །ཡི་གེ་གཉིས་ཀྱིས་དེ་བཞིན་མཚོན། །ཞེའོ། །དེ་ཁོ་ན་ཐུན་མོང་མ་ཡིན་པའི་གླེང་གཞིར་ཕྱི་མ་ལས་གསུངས་པ། ལེགས་པར་གསུངས་པའི་རྒྱུད་འདི་ནི། །ཞེས་པ་ནས་འདུས་པ་གསང་བ་ལས་བྱུང་བའོ་ཞེས་པའི་བར་དུའོ། །དེ་བས་ན་འདིའི་དོན་ནི་སྟོན་པ་བྱང་ཆུབ་ཀྱི་སེམས་རྡོ་རྗེ་
ཉིད་ཉན་པའི་སྐྱེ་བོ་རྣམས་ལ་སྒྱུ་མའི་རྣམ་པ་ལྟར་སྒྲའི་ངོ་བོར་སྣང་ངོ་ཞེས་པ་འདི་ཡིན་ནོ། །བདག་གིས་ཐོས་པ་ཞེས་པ་ལ་སོགས་པས་ནི་ཐུན་མོང་གི་གླེང་གཞིའི་ངོ་བོ་གསུངས་ཏེ། དེ་ལ་བདག་གིས་ཞེས་པ་ནི་གཞན་ལས་མ་བརྒྱུད་པ་སྟེ་དེས་ནི་དམ་ཚིག་མ་འཆོལ་བར་བསྟན་ཏོ། །ཐོས་པ་ཞེས་པ་ནི་སྒྲའི་རྣམ་
པའི་རྒྱུད་དོ། །དུས་གཅིག་ན་ཞེས་པ་ནི་དུས་མང་པོར་མ་ཡིན་ཏེ། དེས་ནི་རྙེད་པར་དཀའ་བར་བསྟན་ཏོ། །བཅོམ་ལྡན་འདས་ཞེས་པ་ནི་སྤངས་པ་ཕུན་སུམ་ཚོགས་པ་དང་། ལོངས་སྤྱོད་དུ་ལྡན་པའི་ཡེ་ཤེས་ཕུན་སུམ་ཚོགས་པ་སྟེ་དེས་ནི་ཚད་མའི་སྟོན་པ་གསུངས་སོ། །དེ་བཞིན་གཤེགས་པ་ཞེས་པ་ནི་བདེ་
เล่ม ๔๕ · หน้า 155b
བ་དམ་པ་བླ་ན་མེད་པར་གཤེགས་པ་སྟེ། བགྲོད་པར་བྱ་བ་ལ་ཕུལ་དུ་ཕྱིན་པའོ། །སྐུ་དང་གསུང་དང་ཐུགས་རྡོ་རྗེ་སྙིང་པོ་ཞེས་པ་ནི་རྡོ་རྗེ་སེམས་དཔའ་སྟེ། རྡོ་རྗེ་གསུམ་དང་ལྡན་ཞིང་ཐམས་ཅད་ཀྱི་རྒྱུར་གྱུར་པས་སོ། །ཕྱི་མ་ལས་ཀྱང་། སྙིང་པོ་ཕྱག་རྒྱ་གསང་སྔགས་རྣམས། །ཞེས་འདི་ལ་
སྙིང་པོའི་སྒྲར་གསུངས་སོ། །དེའི་བཙུན་མོ་ནི་རིག་མའོ། །དེའི་བྷ་ག་ནི་གཉིས་ཡོངས་སུ་གྱུར་པའི་ཆོས་ཀྱི་དབྱིངས་ཀྱི་ཕྱག་རྒྱ་སྟེ། གཉིས་ཀྱི་ཁྱད་པར་ཡིན་ཡང་ཆོས་ཀྱི་དབྱིངས་ཀྱི་ངོ་བོ་ཡིན་པས་བཙུན་མོའི་སྒྲ་གཙོར་བྱས་སོ། །འདིར་བཙུན་མོ་ལས་གྱུར་པའི་བྷ་ག་ལ་དེ་སྐད་དེ་འབྲུ་ལས་གྱུར་
པའི་ཆང་ལ་འབྲུའི་ཆང་བཞིན་ནོ། །དེ་ལྟར་ཡང་ཕྱི་མ་ལས། ལོངས་སྤྱོད་གཞི་དང་མཉམ་ལྡན་པའི། །ཞེས་པ་ལ་སོགས་པ་གསུངས་ཏེ། དེས་ནི་གནས་ཁྱད་པར་ཅན་བསྟན་ཏོ། །གཞན་དག་གིས་ནི་གསང་བའི་བྷ་ག་ཡིན་ནོ་ཞེས་སྨྲས་ཏེ། དེ་དག་གི་ལྟར་ན་ས་མ་ཡ་ཞེས་བྱ་བ་བྱང་ཆུབ་སེམས་
སུ་སྨྲ་སྟེ་དེའི་དོན་ནི་བྱང་ཆུབ་ཀྱི་སེམས་ལས་གྱུར་པའི་བཅོམ་ལྡན་འདས་གསང་བའི་བྷ་ག་ན་བཞུགས་ཞེས་པ་ཡིན་ནོ། །དེ་དག་གི་ཆོས་ཀྱི་དབྱིངས་ནི་ནམ་མཁའ་རྡོ་རྗེ་ཡང་ཇི་ལྟར་གནས་ཞེས་རྒོལ་ལོ། །དེ་ལ་བཤད་པ་འདི་ནི་མ་ཡིན་ཏེ། འདི་སྐད་བདག་གིས་ཐོས་པ་དུས་གཅིག་ན་ཞེས་པ་དང་འགལ་
ལོ། །ཇི་ལྟར་ཞེ་ན་ལེའུ་བཅུ་བདུན་པ་ལས་བཙུན་མོ་ལས་འདས་ནས་ཞེས་གསུངས་པས་ན། གསང་བའི་བྷ་ག་ལས་འདས་ནས་ཆོས་ཀྱི་དབྱིངས་ཀྱི་ཕོ་བྲང་དུ་ཆོས་གསུངས་པར་སྣང་ལ། བཟང་པོ་ཞབས་ཀྱིས་ཀྱང་མ་གསུངས་པས་ཤིན་ཏུ་མི་འབྱོར་རོ། །ཡང་རྒྱུད་ཉིད་ལས་ཀྱང་གསང་བའི་དཀྱིལ་འཁོར་ལ་ནི་
བྱང་ཆུབ་ཀྱི་སེམས་ཀྱི་དཀྱིལ་འཁོར་དང་། ཆོས་ཀྱི་དབྱིངས་ལ་བྷ་ག་ཞེས་གསལ་བར་གསུངས་ཏེ། བྱང་ཆུབ་སེམས་ཀྱི་དཀྱིལ་འཁོར་དང་། །དཀྱིལ་འཁོར་བྷ་གར་བསྟན་པ་དང་། །ཞེས་པ་ལ་སོགས་པའོ། །གཞན་ཡང་དམ་ཚིག་གི་སྒྲ་ནི་དུས་ན་ཞེས་པའི་སྒྲར་བརྗོད་དོ། །ནམ་མཁའ་རྡོ་རྗེ་ནི་ཆོས་ཀྱི་
དབྱིངས་ཀྱི་ནང་གི་ནམ་མཁའ་བས་དེ་ཡང་ཆོས་ཀྱི་དབྱིངས་ལ་གནས་པར་ཤིན་ཏུ་འཐད་དོ། །དེ་མི་འཐད་ན་ཁྱེད་ཀྱི་ལ་ཡང་ཇི་ལྟར་འཐད་དེ་མཚུངས་སོ། །གང་དག་དང་ཐོས་ཤེ་ན། དབང་པོ་བསྟན་པའི་ཕྱིར་བརྗོད་ཀྱིས་མི་ལང་བ་ཞེས་པ་ནི་བྱང་ཆུབ་སེམས་དཔའི་ཁྱད་པར་རོ། །ཡང་བརྗོད་ཀྱིས་མི་
เล่ม ๔๕ · หน้า 156a
ལང་བ་ཞེས་པ་ནི་ཡོན་ཏན་གྱི་ཁྱད་པར་ཏེ། དེ་ཁོ་ན་རྡུལ་ཕྲ་མོ་ཞེས་པས་བསྟན་ཏོ། །བྱང་ཆུབ་ནི་བདེ་བ་ཆེན་པོའོ། །དེ་ལ་སེམས་དཔའ་ནི་རྩེ་གཅིག་པའོ། །ཡང་སེམས་དཔའ་ཆེན་པོ་ཞེས་པ་ནི་དེ་དག་ཁོ་ན་སེམས་ཅན་གྱི་ཁམས་ཆེན་པོ་ལ་དམིགས་པའོ། །གནས་ཀྱི་ཁྱད་པར་
གསུངས་པ། སྙིང་པོ་རྡོ་རྗེ་ཞེས་པ་ལ་སོགས་པ་སྟེ་སྙིང་པོ་རྡོ་རྗེ་ནི་རྩེ་གསུམ་པའི་རྡོ་རྗེ་རྒྱ་གྲམ་སྟེ། དེ་ཕྱི་ནང་གི་དཀྱིལ་འཁོར་གྱི་གཞི་བྱེད་པས་སོ། །གཞན་དག་ན་རེ་སྙིང་པོ་བྷྲཱུཾ་དང་ལྡན་པས་སོ་ཞེས་སོ། །པདྨོ་ནི་དེའི་གཞིར་གྱུར་པ་ཆོས་ཀྱི་དབྱིངས་ཀྱི་མདོག་གིས་དག་པའི་འདབ་མ་བརྒྱད་པ་སྟེ། གསང་བའི་
པདྨ་ནི་མ་ཡིན་ནོ། །དེ་ནི་ཆོས་ཀྱི་དབྱིངས་ལ་གནས་པའི་རིག་པ་ལས་པདྨོ་ཁོ་ན་ཀུན་གྱི་གཞིར་གྱུར་པས་དེ་ཁོ་ན་ཉིད་གཙོར་གསུངས་སོ། །དེ་ཡང་བཟང་པོ་ཞབས་ཀྱིས་གསུངས་པ། མཁའ་དཀྱིལ་གཞི་ཡི་པདྨ་ལ། །རྒྱ་གྲམ་ཞེས་སོ། །བརྗོད་ཀྱིས་མི་ལང་བ་དེ་དག་གང་དག་ཡིན་ཞེ་ན། དམ་ཚིག་རྡོ་རྗེ་ཞེས་པ་ལ་
སོགས་པ་སྟེ། འདི་རྣམས་ནི་མདོ་སྡེ་སྤྱོད་པ་གང་དག་འདོད་ཆགས་ཀྱིས་འདུལ་བ་རྡོ་རྗེ་སེམས་དཔའི་བྱིན་གྱི་རླབས་ཀྱི་རྐྱེན་གྱིས་སངས་རྒྱས་ཐོབ་པ། སའི་སྙིང་པོ་ནས་ཀུན་དུ་བཟང་པོ་ལ་ཐུག་པ་སྟེ། དེ་ལྟར་ཡང་། དམ་ཚིག་ལུས་ངག་སེམས་ཏིང་འཛིན། །རྒྱལ་བ་རྣམས་ནི་གོ་རིམས་བཞིན། །སྙིང་ལ་
སོགས་པ་དྲུག་ཏུ་ངེས། །ཞེས་གསུངས་སོ། །ས་རྡོ་རྗེ་ལ་སོགས་པ་ནི་དེའི་ངོ་བོ་ཉིད་ཀྱིས་དག་པས་སྤྱན་ལ་སོགས་པའོ། །ནམ་མཁའི་ནི་གོང་དུ་བཤད་དོ། །གཞན་དག་ནི་ལེའུ་བཅུ་བདུན་པ་ལས། མཁའ་དབྱིངས་དམ་ཚིག་དེ་ཉིད་ནི། །རྡོ་རྗེ་འཛིན་པ་ཉིད་ཡིན་ནོ། །ཞེས་པས་ན་སྟོན་པར་སྨྲ་སྟེ།
དེ་ནི་འཁོར་གྱི་རིམ་པར་སྟོན་པར་མི་འབྱོར་རོ། །གཞན་ཡང་སྟོན་པ་ནི་གོང་དུ་བཤད་པ་དང་། ཡང་འོག་ནས། ནམ་མཁའ་རྡོ་རྗེ་དབུས་སུ་ནི། །ཞེས་པ་ཡང་ཇི་སྐད་དུ་འཆད། དེ་བས་ན་ནང་གི་ནམ་མཁའི་ཁོང་གཞི་ཡིན་པས་རྡོ་རྗེ་འཛིན་ཞེས་ཀྱང་འདོད་དོ། །ཡང་གཟུགས་ལ་སོགས་པ་ནི་དེས་
དག་པས་ནི་གཟུགས་རྡོ་རྗེ་མ་ལ་སོགས་པ་གཟུང་ངོ་། །དེ་དག་ལ་སོགས་པ་ཞེས་པ་ནི་སེམས་ཅན་ཕལ་པ་དེ་དག་དང་འདྲ་བ་རྣམས་ཞེས་བྱ་བའི་དོན་ཏོ། །དེ་ལྟར་བྱང་ཆུབ་སེམས་དཔའི་འཁོར་གསུངས་ནས། དེ་བཞིན་གཤེགས་པའི་འཁོར་གསུངས་པ། དེ་བཞིན་གཤེགས་པ་ཞེས་པ་ལ་
เล่ม ๔๕ · หน้า 156b
སོགས་པ་སྟེ། དེ་བཞིན་གཤེགས་པའི་སྒྲ་ནི་གོང་དུ་བཤད་དེ་ཐམས་ཅད་དུ་ཤེས་པར་བྱའོ། །འདི་ཡང་མདོ་སྡེ་སྤྱོད་པས་སངས་རྒྱས་པ་སྔགས་ཀྱི་ཆེ་བ་འབྱུང་བའི་དོན་དུ་རྡོ་རྗེ་སེམས་དཔའི་བྱིན་གྱི་རླབས་ཀྱིས་མི་འཁྲུགས་པ་ལ་སོགས་པར་གྱུར་པ་དང་། བྱང་ཆུབ་སེམས་ཀྱི་སྤྲུལ་པ་རྣམས་སོ། །དེ་དག་ལ་
སོགས་ཞེས་པ་ནི་སྔ་མ་དང་འདྲའོ། །ཏིལ་གྱི་གང་བུ་ཞེས་པ་ནི་བར་མཚམས་མེད་པའོ། །འདིར་དེ་བཞིན་གཤེགས་པ་བས་བྱང་ཆུབ་སེམས་དཔའ་སྔར་སྨོས་པ་ཅི་སྟེ་ཞེས་རྒོལ་བ་ལ་བཤད་པ། བྱང་ཆུབ་སེམས་དཔའ་ཡང་འདིར་རྡོ་རྗེ་སེམས་དཔའི་བྱིན་རླབས་ཀྱི་རྐྱེན་གྱིས་སངས་རྒྱས་ཐོབ་པས་མཉམ་པ་སྟེ་དེའི་
ཕྱོགས་ལ་བརྗོད་དོ། །ཁ་ཅིག་ཅིག་ནི་ཉེ་བར་བསྒྲུབ་པ་ལ་འདི་དག་གཙོར་སྔ་བས་སོ་ཞེས་འདོད་དེ་དེ་ནི་མ་ཡིན་ཏེ། འདི་ཉེ་བར་བསྒྲུབ་པའི་ལྷ་མ་ཡིན་པ་དང་། གཞན་ཡང་དེ་ལྟར་ན་ས་ལ་སོགས་པ་ཡང་གཟུགས་ལ་སོགས་པའི་འོག་ཏུ་འབྱུང་བར་རིགས་སོ། །ཉེ་བར་བསྒྲུབ་པའི་ལྷ་མ་ཡིན་ནི་ཁྲོ་བོ་བཞི་མ་
བྱུང་བ་ཅི་སྟེ་ཞེ་ན་དེ་ནི་ལས་དམན་པ་ཉིད་ཀྱིས་མ་སྨོས་ཏེ། ཉེ་བར་བསྒྲུབ་པའི་ལྷ་མ་ཡིན་པས་མ་སྨོས་པ་མ་ཡིན་ནོ། །དེས་ནི་འཁོར་ཁྱད་པར་ཅན་བསྟན་ཏོ། །དེ་བས་ན་དེ་རྣམས་ཀྱི་དོན་ནི་ཚད་མའི་སྐྱེས་བུ་དེ་ལས་གནས་ཁྱད་པར་ཅན་དུ་དབང་པོ་དེ་རྣམས་དང་བདག་ཉིད་ཀྱིས་ཐོས་སོ་ཞེས་གཞན་ཡིད་བརྟན་
དུ་རུང་བར་བྱས་པ་ཡིན་ནོ། །ད་ནི་འདོད་ཆགས་ཆེན་པོའི་སྣོད་དུ་གྱུར་པ་བཅོམ་ལྡན་འདས་ཉིད་ཀྱིས་མངོན་དུ་འདུལ་བ་རྣམས་ཀྱི་དོན་དུ་དེ་བཞིན་གཤེགས་པ་ཀུན་གྱི་ལྷ་ཞེས་གྲགས་པ་རྡོ་རྗེ་ཡེ་ཤེས་ཀྱི་སྤྱོད་པ་གསུངས་པ། དེ་ནས་ཞེས་པ་ལ་སོགས་པ་གསུངས་པ་སྟེ། དེ་ནས་ཞེས་པ་ནི་ལོངས་སྤྱོད་བཞི་དང་
ལྡན་པའི་རྡོ་རྗེ་སེམས་དཔའ་ཞལ་གསུམ་པ་ལྟ་བུར་གཟིགས་ཞེས་པའི་དོན་དེ་མ་ཐག་པའོ། །རྣམ་པར་སྣང་མཛད་ཅེས་པ་ནི་རྡོ་རྗེ་སེམས་དཔའ་སྟེ། བྱང་ཆུབ་ཀྱི་སེམས་རྡོ་རྗེ་ཞི་བ་ཆོས་ཀྱི་སྐུ་ལས་ལོངས་སྤྱོད་རྫོགས་པ་དང་། སྤྲུལ་པའི་སྐུ་ལྟར་སྣང་བ་ཉིད་ཀྱི་ཕྱིར་རོ། །འདོད་ཆགས་ཆེན་པོ་ཞེས་པ་ནི་བདེ་བ་དམ་
པའོ། །དེའི་ཚུལ་ནི་ཐབས་ཏེ་དེ་ཉིད་ནི་སེམས་ཅན་གྱི་དོན་ལ་གཙོར་གྱུར་པའོ། །དེ་བཞིན་གཤེགས་པའི་འཁོར་ཞེས་པ་ནི་བདག་ཉིད་གསོལ་བ་འདེབས་པ་གཙོར་གསུངས་པ་སྟེ། ཡེ་ཤེས་ཀྱི་འཁོར་ལོ་ཐམས་ཅད་སྦྱོར་བའི་སྒྲས་བསྐུལ་ཏེ་ཞེས་པ་ལ་སོགས་པའོ། །ཡང་དེ་རྣམས་བུད་མེད་དུ་སྤྲོ་བ་
เล่ม ๔๕ · หน้า 157a
གསུངས་པ། དེ་ནས་ཞེས་པ་ལ་སོགས་པ་སྟེ། དེ་ལ་ལ་ལ་ཞེས་པ་ནི་རྣམ་པར་སྣང་མཛད་དེ་དེ་ཁོ་ན་ཚད་མེད་པ་སྐུ་ལ་ཞུགས་པས་ནི་ལ་ལ་ཞེས་མང་པོའི་སྒྲས་བྱས་སོ། །དེ་ནི་སྤྱན་ལྟ་བུ་དང་གཟུགས་ལྟ་བུ་སྟེ་ཐམས་ཅད་དེ་ལྟར་ཤེས་པར་བྱའོ། །འདིར་ཆོས་ཀྱི་དབྱིངས་མ་བྱུང་བ་
ནི་དེའི་བདག་པོ་རྡོ་རྗེ་སེམས་དཔའི་ཉིད་སྐུ་ལ་མ་ཞུགས་པའི་ཕྱིར་རོ། །ཁ་ཅིག་ན་རེ་རེག་པའི་དགའ་བ་མེད་པས་མ་བྱུང་ཞེས་ཟེར་ཏེ། དེ་ནི་མ་ཡིན་ནོ། །ཅི་སྟེ་ཞེ་ན། བུད་མེད་ཀྱི་གཟུགས་སུ་སྤྲུལ་ཞེས་པའི་ཚིག་གིས་ན་རེག་པ་ཡང་ཡོད་ལ། དེ་ལས་བྱུང་བའི་དགའ་བ་ཡང་སྐྱེ་སྟེ། དེ་ལྟར་མ་ཡིན་
ན་རོ་ལ་སོགས་པ་ཡང་རེག་པ་མེད་པར་འགྱུར་རོ། །དེ་ལྟར་ཕྱུང་ནས་ཡང་དེའི་རིག་མ་ལ་བཙུད་པར་གྱུར་ཏེ། དེ་ལྟར་ཡང་ཕྱི་མ་ལས། འདོད་ཆགས་ཆེན་པོའི་ཚུལ་གྱིས་ནི། །ཞེས་པ་ནས། བསྒྲུབ་བྱའི་ལུས་ལ་གཟུད་པར་བྱ། །ཞེས་པའི་བར་དུ་གསུངས་སོ། །ལ་ལ་ན་རེ་ཉིད་ཀྱི་སྐུ་ལ་ཞུགས་པར་
མཛད་དོ་ཞེས་པ་ལ་སྙག་ཅེས་ཟེར་ཏེ། དེ་ནི་ཕྱི་མ་ལས་བསྒྲུབ་བྱའི་ལུས་ཞེས་འབྱུང་བས་ན་ཉིད་ཀྱི་སྐུ་ལ་ཞེས་པ་དང་མི་འབྱོར་རོ། །ཅིའི་ཕྱིར་མངོན་པར་རྟོགས་པའི་རིམ་པ་རྣམས་ལས་དང་པོར་འདོད་ཆགས་ཆེན་པོ་སྨོས་ཤེ་ན། ཏིང་ངེ་འཛིན་གསུམ་ལས་དེ་ཐོག་མར་གྱུར་པའི་ཕྱིར་རོ། །དེ་ནས་ཡང་
སེམས་ཅན་ཐམས་ཅད་གཟུད་པའི་དོན་དུ་སྦྱོར་བའི་སྒྲའི་དེ་ཁོ་ནས་བསྐུལ་ཏེ། ཡེ་ཤེས་ཀྱི་འཁོར་ལོ་ལས་བྱུང་བའི་བྱང་ཆུབ་སེམས་ཀྱི་དཀྱིལ་འཁོར་གསུངས་པ། དེ་ནས་ཞེས་པ་ལ་སོགས་པའོ། །དེ་ལ་མི་བསྐྱོད་པ་ཞེས་པ་ནི་རྡོ་རྗེ་སེམས་དཔའ་སྟེ། རྒྱུ་དང་འབྲས་བུའི་རྣམ་པར་དག་པ་དབྱེར་
མེད་པས་འདི་སྐད་ཅེས་བྱའོ། །དམ་ཚིག་ཆེན་པོ་ཞེས་པ་ནི་བདེ་བ་ཆེན་པོའི་བྱང་ཆུབ་ཀྱི་སེམས་སོ། །དེ་ལས་གྱུར་པའི་འཁོར་ལོ་ཞེས་ཏེ། གསལ་བ་ཞེས་པ་ནི་དྲི་མས་མ་གོས་པའོ། །དེའི་ངོ་བོ་ཉིད་ཅེས་པ་ནི་བྱང་ཆུབ་ཀྱི་སེམས་ཡེ་ཤེས་ཀྱི་ངོ་བོའི་དོན་ཏོ། །སྣ་ཚོགས་གཟུགས་ཀྱིས་ཀུན་དུ་ཁྱབ། །
ཅེས་པ་ནི་བྱང་ཆུབ་ཀྱི་ཕྱོགས་ཀྱི་ངོ་བོ་རྟ་བབས་ལ་སོགས་པས་མཛེས་པའོ། །སངས་རྒྱས་ཚོགས་ཀྱིས་ཀུན་དུ་རྒྱས། །ཞེས་པ་ནི་མི་བསྐྱོད་པ་ལ་སོགས་པ་བཅུ་དགུ་དང་ལྡན་པའོ། །གསལ་བ་ནི་ཟླ་བ་སྟེ། ལ་སོགས་པའི་སྒྲས་ནི་ཉི་མ་དང་པདྨར་ལྡན་པའོ། །དེ་ཁོ་ན་འོད་འཕྲོ་བ་དང་ལྡན་ཞིང་དེ་
เล่ม ๔๕ · หน้า 157b
བཞིན་གཤེགས་པའི་གནས་ཡིན་པས་དེ་སྐད་ཅེས་བྱའོ། །སྐུ་དང་གསུང་དང་ཐུགས་རྡོ་རྗེའི་བདག་པོ་ནི་རྡོ་རྗེ་སེམས་དཔའ་སྟེ། གསུམ་པོ་དེས་ལྡན་པས་དེ་སྐད་ཅེས་བྱའོ། །དེ་ལ་དབུས་སུ་བཞག་ཅེས་པ་ནི་དེའི་སྟོབས་ཀྱིས་སེམས་ཅན་ཐམས་ཅད་བཙུད་དོ་ཞེས་པའི་ཐ་ཚིག་གོ། །ཡང་དེ་རྣམས་
ཁོ་ན་ལ་དབང་བསྐུར་བ་གསུངས་པ། དེ་ནས་ཞེས་པ་ལ་སོགས་པ་སྟེ་བྱང་ཆུབ་ཀྱི་སེམས་རྡོ་རྗེ་ཞེས་པ་ནི་རྡོ་རྗེ་སེམས་དཔའ་སྔོན་བཏགས་པའི་མིང་ངོ་། །ཐུགས་ལ་ཞུགས་ཞེས་པ་ནི་སྦྱོར་བའི་སྒྲས་ཐུགས་སུ་ཞུགས་ཏེ་ཞུ་ནས་ཡུམ་གྱི་པདྨར་འཕྲོས་ཏེ་གསང་བའི་དབང་བསྐུར་རོ་ཞེས་པ་སྟེ་བཅུ་
བདུན་པའི་སྐབས་སུ་བཤད་པར་བྱའོ། །དེ་ལྟར་ཡང་བཟང་པོ་ཞབས་ཀྱིས། འདོད་ཆགས་ཆེན་པོས་འདུལ་བ་ཡི། །ཞེས་པ་ནས། ཕྱིར་མི་ལྡོག་པའི་དོན་དབང་བསྐུར། །ཞེས་པའི་བར་དུ་ཚིགས་སུ་བཅད་པ་བཞི་གསུངས་སོ། །དེ་གཞིའི་ཏིང་ངེ་འཛིན་གསུངས་པ་དེ་ནས་ཞེས་པ་ལ་སོགས་
པའོ། །དེ་ལ་དེ་ནས་ཞེས་པའི་བྱང་ཆུབ་ཀྱི་སེམས་རྡོ་རྗེ་ལ་གསོལ་བ་འདེབས་མ་ཐག་ལའོ། །བྱང་ཆུབ་ཀྱི་སེམས་རྡོ་རྗེ་དེ་བཞིན་གཤེགས་པ་སྙོམས་པར་ཞུགས་སོ་ཞེས་འབྲེལ་ཏེ། ཟིལ་གྱིས་གནོན་པ་རྡོ་རྗེ་ཞེས་པ་ནི་ཕྱོགས་མཚམས་བཅིང་བ་དང་། རབ་དང་དྲ་བ་ལ་སོགས་པས་གནོད་པ་ཐམས་
ཅད་ཟིལ་གྱིས་གནོན་ཅིང་དེས་མི་ཕྱེད་པའི་ངོ་བོ་བས་རྡོ་རྗེ་སྟེ། དེ་སྐད་ཅེས་བྱ་བའི་ཏིང་ངེ་འཛིན་ལ་ཞུགས་སོ། །དེའི་ལས་གསུངས་པ་རྡོ་རྗེའི་ངོ་བོར་གནས་པ་ཞེས་པ་སྟེ་གོང་མ་ལྟར་མི་ཕྱེད་པ་དང་ལྡན་པའི་གཞི་འགྲུབ་བོ་ཞེས་པའི་ཐ་ཚིག་གོ། །ལ་ལ་ནི་དེ་ཁོ་ནའི་དོན་དུ་ཕྱི་མ་ལས་བཤད་པ། གཞི་
དག་གི་ནི་ཐབས་དག་སྟེ། །ཞེས་སོ། །དེ་ཉིད་བཟང་པོ་ཞབས་ཀྱིས། ཧཱུཾ་མཛད་ཡང་ན་གཙུག་ཏོར་རམ། །ཞེས་པ་ནས། བརྩེགས་པའི་གཞལ་ཡས་ཁང་བསྒོམ་བྱ། །ཞེས་པའི་བར་དུ་ཚིགས་སུ་བཅད་པ་བཞི་གསུངས་སོ། །ད་ནི་གོང་དུ་བསྟན་པའི་དབང་བསྐུར་བའི་ལས་ཀྱི་ཡོན་ཏན་གསུངས་
པ་དེ་ནས་ཞེས་པ་ལ་སོགས་པའོ། །དེ་ལ་དེ་ནས་ཞེས་པ་ནི་རྡོ་རྗེ་དཔལ་གྱིས་རེག་པའི་དེ་མ་ཐག་པའོ། །རྡོ་རྗེ་སེམས་དཔའ་བྱིན་གྱིས་བརླབས། །ཞེས་པ་ནི་དེའི་ཕྲིན་ལས་ཀྱི་མཐུས་སོ། །བདེ་བ་ནི་ཤེས་རབ་ཡེ་ཤེས་སོ། །ཡིད་བདེ་བ་ནི་དེས་དྲི་མ་དག་པའི་ངོ་བོ་གསང་བའི་དབང་ཞེས་པའི་དོན་ཏོ། །
เล่ม ๔๕ · หน้า 158a
མངོན་པར་ཤེས་པ་ནི་བཅུ་བདུན་པར་སྦྱར་རོ། །གཞན་དག་ནི་ཕྱི་མ་ལས། དེ་བཞིན་འབྲས་བུ་འདུ་བ་མེད། །ཅེས་པས་བསྟན་ཏོ་ཞེས་སོ། །དེ་ནི་བཅོམ་ལྡན་འདས་རྡོ་རྗེ་སེམས་དཔའ་དེ་ཁོ་ན་བསྐྱེད་པ་གསུངས་པ། དེ་ནས་ཞེས་པ་ལ་སོགས་པ་སྟེ་དེ་ནས་ཞེས་པ་ནི་རྡོ་རྗེའི་
ངོ་བོར་གནས་གྱུར་པའི་དེ་མ་ཐག་གོ། །སྐུ་དང་གསུང་དང་ཐུགས་རྡོ་རྗེའི་མཉམ་པ་ཉིད་ནི་རྡོ་རྗེ་སེམས་དཔའ་སྟེ་དེ་གང་ལས་བྱུང་བའི་མི་ཕྱེད་པའི་ཏིང་ངེ་འཛིན་ནི་དེ་སྐད་ཅེས་བྱའོ། །དེ་ཡང་སྙིང་རྗེ་དང་ཤེས་རབ་ཀྱི་ཡེ་ཤེས་ཀྱི་ཟླ་བ་ལ་སོགས་པའི་མངོན་པར་བྱང་ཆུབ་པའི་ངོ་བོ་ཉིད་ལ་ཞུགས་པའོ་ཞེས་
ཁ་ཅིག་འདོད་དོ། །ཏིང་ངེ་འཛིན་དེའི་མཐུ་ནི་རིག་པའི་སྐྱེས་བུ་ཞེས་ཏེ་ལོངས་སྤྱོད་རྫོགས་པའི་སྐུ་བྱིན་གྱིས་བརླབས་ཞེས་པའི་དོན་ཏོ། །དེ་ཡང་ཁ་ཅིག་ནི་ཕྱི་མ་ལས་རང་བཞིན་མེད་པའི་རྒྱུ་ཞེས་པས་བསྟན་ཏེ། གོང་དང་འོག་ནས་འབྱུང་བའི་ལྷའི་སྐུའི་རྣམ་པ་ཐམས་ཅད་ལ་སྦྱར་རོ་ཞེས་པའི་དོན་ཏོ། །
ཞལ་གསུམ་པ་ཞེས་པ་ནི་རྣམ་པར་ཐར་པ་གསུམ་གྱི་རང་བཞིན་ནོ། །ལྟ་བུ་ཞེས་པ་ནི་སྒྱུ་མ་ལྟ་བུར་སྤྲུལ་ཞེས་པ་སྟེ་ཡང་དག་པར་ན་དེ་ལྟ་བུ་མ་ཡིན་ཞེས་པའི་དོན་ཏོ། །དེ་ལྟར་རྡོ་རྗེ་ཡེ་ཤེས་ཀྱི་སྤྱོད་པ་གསུངས་ནས། ཡང་སྤྲོས་པ་རྣམས་ཀྱི་དོན་བྱ་བའི་ཕྱིར་དེ་བསྐྱེད་པའི་རིམ་པ་ཉིད་ཀྱི་ངོ་མཚར་གསུངས་
པ། དེ་ནས་ཞེས་པ་ལ་སོགས་པའོ། །དེ་ནས་ཞེས་པ་ནི་དམ་ཚིག་གི་འཁོར་ལོས་འདོད་པ་སྤྱོད་ཅིག་ཅེས་པའི་དེ་མ་ཐག་པའོ། །ཐུགས་ཀ་ནས་ཕྱུང་ཞེས་པ་ནི་ཐུགས་ཀ་ནས་ཞུགས་ཏེ་གསང་བའི་རྡོ་རྗེ་ནས་ཕྱུང་ནས་གསང་བའི་དཀྱིལ་འཁོར་ཡང་བསྐྱེད་པའོ། །ཨེ་མ་ཞེས་པ་ནི་བྱང་ཆུབ་ཀྱི་སེམས་བྱུང་བ་བདེ་བ་ཞི་བ་
དེ་ལས་སྒྱུ་མའི་རྣམ་པ་ལྟར་ཕྱི་ནང་གི་འཁོར་ལོ་བསྐྱེད་པས་ངོ་མཚར་ཏེ། དེ་ཁོ་ན་དེ་བཞིན་གཤེགས་པ་ཀུན་གྱི་གསང་ཞེས་སོ། །རབ་ཏུ་མི་རྟོགས་གནས་མེད་ཅེས་པ་ནི་དེ་ཁོ་ན་ངོ་མཚར་བའི་སྒོ་ནས་ཟུར་གྱིས་ཞུས་པའི་དོན་ཏོ། །ད་ནི་བྱང་ཆུབ་ཀྱི་སེམས་རྡོ་རྗེ་རིགས་ཐམས་ཅད་ཀྱི་ཐོག་མ་ཞི་བ་མྱ་ངན་ལས་
འདས་པ་ཐམས་ཅད་དུ་ཁྱབ་པའི་བདག་ཉིད་ཆེན་པོ་ལ་དེས་སྤྲུལ་པའམ་གཞན་རིགས་ལྔའི་ངོ་བོས་སེམས་ཅན་གྱི་དོན་དུ་ཏིང་ངེ་འཛིན་གསུམ་གྱི་སྦྱོར་བ་ཐོག་མར་ཞུ་བས་གསུངས་པ། དེ་ནས་ཞེས་པ་ལ་སོགས་པ་སྟེ། དེ་ལ་དེ་ནས་ཞེས་པ་ནི་གསང་བའི་ཚུལ་གྱིས་ཐོག་མར་མངོན་པར་སངས་
เล่ม ๔๕ · หน้า 158b
རྒྱས་པའི་ཡེ་ཤེས་རྟེན་དང་སྣང་བ་མེད་པ་ཆོས་ཀྱི་སྐུ་བྱང་ཆུབ་ཀྱི་སེམས་རྡོ་རྗེ་གྲུབ་པའི་ངོ་བོ་ཉིད་ལ་བྱའི། སྐབས་ལས་བྱུང་བའི་དེ་མ་ཐག་པ་མ་ཡིན་ནོ། །རྡོ་རྗེ་རྣམ་པར་སྣང་མཛད་ཅེས་པ་ནི་བྱང་ཆུབ་ཀྱི་སེམས་རྡོ་རྗེ་སྟེ། དེ་ཉིད་ལོངས་སྤྱོད་རྫོགས་པ་དང་སྤྲུལ་པའི་སྐུས་སྣང་བར་མཛད་པ་པོ་ཡིན་པའི་ཕྱིར་རོ། །
གཞན་དག་ན་རེ་ཚིག་འདི་རྣམ་པར་བསྒྱུར་བའོ་ཞེས་ཟེར་རོ། །དེ་ཁོ་ན་ཉིད་ཅེས་པ་ནི་གསང་བའི་ངོ་བོའོ། །དམ་ཚིག་ནི་ནང་གིའོ། །རིན་པོ་ཆེ་ནི་ཕྱིའི་སྟེ། མཆོད་པ་ཐམས་ཅད་ཀྱིས་མཆོད་དེ་གུས་པའི་ཚུལ་གྱིས་ཕྱག་འཚལ་ནས་གསོལ་བ། འདུས་པ་གསང་བ་ལས་བྱུང་ཞེས་པ་ལ་སོགས་པ་སྟེ། དེ་ལ་
འདུས་པ་གསང་བ་ཞེས་པ་ནི་ཡི་གེ་གསུམ་དང་། དེའི་རིམ་པས་སངས་རྒྱས་ཐམས་ཅད་འདུས་པ་སྟེ། དེ་ལྟར་ཡང་ཕྱི་མ་ལས། གསང་བ་ཞེས་སུ་བསྟན་པ་ནི། །ཞེས་པ་ལ་སོགས་པས་ཐོག་མར་བཤད་དོ། །དེ་ལས་བྱུང་བ་ནི་སྙིང་པོ་དང་རྡོ་རྗེ་དང་ཐབས་དང་ཤེས་རབ་འདུས་པའི་སྐུ་རྣམས་ཏེ།
དེས་ནི་བསྙེན་པ་དང་པོ་ཞུས་ནས། གཞན་ཡང་གསུངས་པ་དེ་ཉིད་ཅེས་ཏེ། དེ་ཁོ་ན་གཉིས་སུ་མེད་པའི་ཐབས་དང་ཤེས་རབ་ཀྱི་སྦྱོར་བ་གསུམ་ཐུགས་ལ་བཞག་ནས་བཤད་དུ་གསོལ་ཞེས་ཞུ་བར་བྱེད་དོ། །གཞན་དག་ནི་གཞན་དུ་འཆད་དོ། །དེ་ཉིད་ཀྱང་ཤིན་ཏུ་ཟབ་པའི་ངོ་བོ་ཡིན་པས་སྣོད་དང་མི་
ལྡན་པ་རྣམས་ལ་དོན་དུ་མི་འགྱུར་རོ་ཞེས་སྟོན་པས་གསུངས་པ། དེ་ནས་ཞེས་པ་ལ་སོགས་པ་སྟེ། ལེགས་ནི་ལེགས་ན་ཞེས་པ་ནི་དོན་ཆེན་པོ་ལ་སྦྱོར་བའི་ཕྱིར་རོ། །དེ་བཞིན་གཤེགས་པ་ཞེས་པ་ནི་གསང་སྔགས་ཀྱི་ཚུལ་མ་བརྙེས་པའི་མདོ་སྡེ་པའོ། །ཐེ་ཚོམ་སྐྱེས་ཞེས་པ་ནི་སྔར་མ་ཐོས་པའི་ཕྱིར་རོ། །
བྱང་ཆུབ་སེམས་དཔའ་གཞན་ཞེས་པ་ནི་བྱང་ཆུབ་སེམས་དཔའ་དང་གཞན་རྣམས་ཞེས་པའི་ཐ་ཚིག་གོ། །དེ་ནས་ཡང་སྣོད་དང་ལྡན་པར་མཛོད་ཅེས་གསོལ་བ། དེ་ནས་ཞེས་པ་ལ་སོགས་པའོ། །ངོ་མཚར་དུ་གྱུར་ཞེས་པ་ནི་ཟབ་པ་ཉིད་ལ་བྱའོ། །རྨད་དུ་གྱུར་ཞེས་པ་སྔར་མ་ཐོས་པས་སོ། །དེ་ལ་
གསོལ་བའི་དོན་ནི་བྱིན་གྱིས་བརླབ་མཛད་དེ་ཞེས་པ་ལ་སོགས་པ་སྟེ། བྱིན་གྱིས་བརླབ་ནི་དཀྱིལ་འཁོར་དུ་གཞུག་པའོ། །རྡོ་རྗེའི་དམ་ཚིག་ནི་བྱང་ཆུབ་ཀྱི་སེམས་མི་འགྱུར་བ་སྟེ། དེས་རེག་པ་ཙམ་གྱིས་གང་བདེ་བ་དང་ཡིད་བདེ་བ་གོང་དུ་བཤད་པ་དང་། མངོན་པར་ཤེས་པར་འདོད་པ་བཞི་པོའི་ངོ་བོ་བཅུ་
เล่ม ๔๕ · หน้า 159a
བདུན་པར་བཤད་པ་དག་ཐོབ་པར་འགྱུར་བས་ཐོབ་པར་བགྱི་བའི་བར་དུ་ཞེས་སྨོས་ཏེ་འདིར་ཡང་མཛོད་ཅེས་སྦྱར་རོ། །དེའི་དོན་ནི་བྱིན་གྱིས་རློབས་ལ་བྱང་ཆུབ་སེམས་ཀྱིས་དབང་བསྐུར་བར་མཛོད་དེ་བསྟན་དུ་གསོལ་ཞེས་ནི་འདི་ཡིན་ནོ། །ད་ནི་འབྲས་བུའི་ངོ་བོ་རྡོ་རྗེ་འཆང་གི་བཙུན་མོའི་
བྷ་གར་གང་གོང་དུ་བསྐྱེད་པ་དེ་ཁོ་ན་སེམས་ཅན་གྱི་དོན་དུ་སྤྱན་དྲང་བ་གསུངས་པ། དེ་ནས་ཞེས་པ་ལ་སོགས་པའོ། །དེ་ལ་དེ་ནས་ཞེས་པ་ནི་བྱང་ཆུབ་སེམས་ཟུར་གྱིས་ཞུས་པའི་དེ་མ་ཐག་གོ། །སྐུ་དང་གསུང་དང་ཐུགས་རྡོ་རྗེ་དེ་བཞིན་གཤེགས་པ་ཞེས་པ་ནི་འབྲས་བུའི་རྡོ་རྗེ་སེམས་དཔའ་སྟེ་འབྲས་
བུ་ཡིན་ཡང་རྒྱུའི་ཚུལ་འཆང་བས་རྒྱུད་འདི་ལས་རྒྱུའི་མིང་བཏགས་སོ། །དེ་ཁོ་ན་སྙོམས་པར་ཞུགས་ཞེས་འབྲེལ་ཏོ། །གསོལ་བ་བཏབ་པ་མཁྱེན་ནས་ཞེས་པ་ནི་ཚིག་དེ་ཁོ་ན་ཟུར་གྱིས་ཞུ་བར་ཐུགས་སུ་ཆུད་བཞིན་དུ་ཞེས་པ་སྟེ། ནས་ཞེས་པའི་སྒྲ་ནི་གཞིག་ཏུ་ངེས་པར་སྦྱར་ཏེ། དེའི་ལན་
གསུངས་པར་རྩོམ་པ་ནི་མ་ཡིན་ནོ། །ཁ་ཅིག་ན་རེ་འདུས་པ་གསང་བ་ཞེས་པ་ལ་སོགས་པའི་གསོལ་བ་བཏབ་པ་ཡིན་ནོ་ཞེས་ཟེར་ཏེ། དེ་ལྟར་ན་མཁྱེན་ཞེས་པའི་ཚིག་མི་དགོས་པ་ཁོ་ན་སྟེ། མངོན་སུམ་ཉིད་དུ་གསོལ་བ་བཏབ་པའི་ཕྱིར་རོ། །གཞན་ཡང་ཚིག་དེ་ནི་འབྲེལ་པ་མེད་པ་ཡིན་
པས་ཁོ་བོ་ནི་མ་རངས་སོ། །ཡེ་ཤེས་ཀྱི་སྒྲོན་མ་རྡོ་རྗེ་ཞེས་པ་ནི་སྟོང་པ་ཉིད་ཀྱི་ཡེ་ཤེས་ཀྱི་སྒྲོན་མ་ལྟར་གསལ་བ་མི་ཕྱེད་པས་རྡོ་རྗེ། དེ་སྐད་ཅེས་པའི་ཏིང་ངེ་འཛིན་ལ་ཞུགས་ནས་བྱུང་ཞེས་པ་སྟེ་ཇི་འདྲ་བ་ཞེ་ན། ཞེ་སྡང་ཞེས་པ་ལ་སོགས་པ་སྟེ། དེ་ལ་ཞེ་སྡང་གི་རིགས་ཞེས་པ་ནི་རྣམ་པར་དག་པའི་
ཞེ་སྡང་ལོངས་སྤྱོད་པ་ལས་སྐྱེས་པའི་ཐ་ཚིག་སྟེ། དེ་ལྟར་ཡང་ཕྱི་མ་ལས་ཞེ་སྡང་ལོངས་སྤྱོད་པས་གསུངས་སོ། །མཆོག་ཀྱང་ཡིན་ལ་སྙིང་པོ་ཡང་ཡིན་ཞེས་པ་སྟེ་སྟོང་པ་ཉིད་ཀྱི་ཡེ་ཤེས་ཀྱི་རང་བཞིན་ཡིན་པས་དེ་སྐད་ཅེས་བྱའོ། །ཡང་སྙིང་པོ་ཞེས་པ་ནི་སྔགས་དེ་སྙིང་པོ་ཉིད་ནི་མ་ཡིན་ནོ། །སྙིང་
པོ་ནི་ས་བོན་ཏེ། བཟང་པོ་ཞབས་ཀྱིས་གསུངས་པ། སྙིང་པོ་ས་བོན་ཞེས་གསུངས་ཏེ། །ཞེས་སོ། །སྐུ་དང་གསུང་དང་ཐུགས་ལས་བྱུང་། །ཞེས་པ་ནི་གསུངས་སོ་ཞེས་པའི་ཐ་ཚིག་གོ། །བྱུང་མ་ཐག་ཏུ་ཞེས་པ་ནི་རྗེས་ཐོགས་ཏེ་ཞུགས་སོ་ཞེས་སྦྱར་རོ། །ཚུལ་ཇི་ལྟར་ཞེ་ན་བཅོམ་ལྡན་འདས་དེ་ཉིད་
เล่ม ๔๕ · หน้า 159b
ཅེས་པ་ལ་སོགས་པ་སྟེ། མི་བསྐྱོད་པའི་ཕྱག་རྒྱ་ཆེན་པོར་གྱུར་ཏེ་ཞེས་སྦྱར་རོ། །ཐབས་གང་གིས་ཚུལ་ཇི་ལྟར་ཞེ་ན་སྦྱོར་བའི་ཐབས་ཞེས་པ་ལ་སོགས་པ་སྟེ་རྡོ་རྗེ་འཆང་བ་ཡབ་ཡུམ་སྦྱོར་བ་ལས་བསྐྱེད་ཅེས་པ་སྟེ། དེ་ལྟར་ཡང་ཕྱི་མ་ལས། བསྙེན་དུས་གཙུག་ཏོར་ཆེན་པོ་ཡི། །གཟུགས་སུ་
དམིགས་པ་ཉིད་དུ་སྦྱར། །ཞེས་སོ། །ནག་པོ་དཀར་པོ་དམར་པོའི་ཚུལ། །ཞེས་པ་ནི་སྐུ་གསུང་ཐུགས་དང་ལྡན་པའི་ཕྱིར་རོ། །གྱུར་ཏེ་བྱུང་ནས་སེམས་ཅན་གྱི་དོན་བྱས་ཏེ་ཞེས་པ་ནི་ཚིག་ལྷག་མའོ། །དེ་ནས་བཅོམ་ལྡན་འདས་ཞེས་པ་ཡང་རྡོ་རྗེ་འཆང་དེ་ཉིད་དེ་ཐམས་ཅད་དུ་སྦྱར་རོ། །དམ་ཚིག་
ནི་རྣམ་པར་སྣང་མཛད་ཉིད་མི་འདའ་བའི་ངོ་བོ་སྟེ་དེ་འབྱུང་བའི་མེ་ལོང་ལྟ་བུ་ལ་ཏིང་ངེ་འཛིན་ཞུགས་ཞེས་པ་སྟེ། ལྷག་མ་དང་ལེའུའི་མིང་གི་དོན་རྣམས་ཀྱང་རང་རང་གིས་རྗེས་སུ་དཔག་སྟེ། ཁོ་བོ་ནི་ཚིག་མངས་ཀྱིས་དོགས་ནས་བཤད་པར་མི་སེམས་སོ། །གཏི་མུག་ནི་རྣམ་པར་དག་པའི་གཏི་མུག་སྟེ་
གོང་དུ་ཇི་ལྟར་སྦྱར་བའི་སྒྲ་དེ་རྣམས་ནི་འདི་མན་ཆད་ཀུན་ལ་སྦྱར་རོ། །ནོར་བུ་ཡིད་བཞིན་གྱི་རིགས་ཞེས་པ་ནི་ནོར་བུ་ནི་སེམས་ཏེ་དེ་ཡང་ཕྱི་མ་ལས། རིན་ཆེན་སེམས་སུ་བསྟན་པ་སྟེ། །ཞེས་སོ། །དེ་འཛིན་པའི་ང་རྒྱལ་རྣམ་པར་དག་པ་ལས་སྐྱེས་པའི་ཐ་ཚིག་གོ། །དམ་ཚིག་འགུགས་པ་ཞེས་པ་ནི་དོན་ཡོད་
གྲུབ་པ་སྟེ། དམ་ཚིག་བསླང་བའི་ཏིང་ངེ་འཛིན་ལ་གཙོ་བོར་གྱུར་པས་སོ། །དེའི་ངོ་བོའི་ཕྲག་དོག་རྣམ་པར་དག་པ་ལས་སྐྱེས་པའོ། །ཞེ་སྡང་གཏི་མུག་འདོད་ཆགས་དང་། །ཞེས་པ་ལ་སོགས་པའི་བསྡུས་པའི་དོན་ནི་ཕྱི་མ་ལས་བཤད་པས་དེ་ལས་ཤེས་པར་བྱའོ། །ད་ནི་བཙུན་མོ་བཞི་གསུངས་པ་དེ་
ནས་ཞེས་པ་ལ་སོགས་པའོ། །དེ་ལ་རྡོ་རྗེ་འཛིན་པ་ཐམས་ཅད་ཀྱི་བཙུན་མོ་ཞེས་པ་ནི་དེས་རང་གི་བདག་པོ་མཆོད་པས་མཉེས་པར་བྱེད་པས་དེ་སྐད་ཅེས་བྱ་སྟེ། དེ་ཡང་ལེའུ་བཅུ་གསུམ་པ་ལས། ལུས་ཀྱི་སྐུ་ཡི་ངོ་བོ་ཉིད། །ཅེས་བྱ་བ་ལ་སོགས་པ་གསུངས་སོ། །ཡང་དག་པར་བཙུན་
མོ་ཉིད་ནི་མ་ཡིན་ཏེ་རྣམ་པར་དག་པ་གཅིག་ཏུ་ཐལ་བར་འགྱུར་བའི་ཕྱིར་རོ། །དེ་བཞིན་འོག་ཏུ་ཡང་སྦྱར་རོ། །གོང་དུ་སྦྱོར་བའི་ཐབས་ཞེས་པ་ལ་སོགས་པ་སྨོས་པ་ནི་འདིར་ཡང་སྦྱར་ཏེ། དེ་ཡང་འོག་མར་ཡང་སྦྱར་རོ། །ཤར་ཕྱོགས་ཀྱི་གྲྭར་ཞེས་པ་ནི་འོག་མ་དང་བསྣོར་ནས་ལྷོ་ཕྱོགས་སུ་སྦྱར་
เล่ม ๔๕ · หน้า 160a
རོ། །ཤེས་རབ་འཛིན་པ་ཞེས་པ་ནི་དོན་ཡོད་གྲུབ་པའོ། །བཙུན་མོའི་མཆོག་ཕུན་སུམ་ཚོགས་པ་ཞེས་བྱ་བ་ཡང་ཕྱི་མ་ཁོ་ན་ལས་ཆེར་ཤེས་པར་བྱའོ། །ད་ནི་ཁྲོ་བོ་བཞིའི་འབྱུང་བ་གསུངས་པ། དེ་ནས་ཞེས་པ་ལ་སོགས་པའོ། །དེ་ལ་དེ་བཞིན་
གཤེགས་པ་ཐམས་ཅད་ཀྱི་དཀྱིལ་འཁོར་ནི་སྐུའི་དཀྱིལ་འཁོར་ཏེ། བྱིན་གྱིས་རློབ་པ་ནི་འགུགས་པའི་ལས་སུ་ཤེས་པར་བྱའོ། །དེ་བཞིན་དུ་དཀྱིལ་འཁོར་གཞན་ལ་ཡང་དགུག་པ་སྟེ་འདིར་ནི་གཙོར་གསུངས་པའོ། །འདིར་ཡང་གཤིན་རྗེ་གཤེད་ཀྱི་ཕྱག་རྒྱ་ཆེན་པོ་ཞེས་པ་ལ་སོགས་པའི་
ཚིག་ལྷག་མར་གྱུར་པ་སྟེ་དེ་ལྟར་འོག་ཏུ་ཡང་སྦྱར་རོ། །དེ་བཞིན་གཤེགས་པ་ཐམས་ཅད་བརྙེས་པར་བྱེད་ཅེས་པ་ནི་དེའི་མཐུན་པ་འགོག་པ་སྟེ་དེ་ཡང་ཕྱི་མ་ལས། གཏི་མུག་ཟད་ཕྱིར་གཤིན་རྗེའི་གཤེད། །ཅེས་པ་ལ་སོགས་པ་གསུངས་སོ། །འདི་ཡང་ཀུན་ལ་སྦྱར་རོ། །དེ་བཞིན་གཤེགས་
པ་ཐམས་ཅད་ཀྱི་སྐུ་དང་གསུང་དང་ཐུགས་མཉེས་པར་བྱེད་ཅེས་པ་ནི་བདུད་རྩི་ཐབ་སྦྱོར་ཏེ། རྣམས་ཞེས་པའི་ཚིག་གིས་འགུགས་པ་ལ་སོགས་པ་ཡང་སྦྱར་རོ། །དེ་ཡང་བཟང་པོ་ཞབས་ཀྱིས་གཤིན་རྗེ་གཤེད་ལ་སོགས་ཀྱིས་དགུག་དང་ཞེས་པ་ལ་སོགས་པ་རྐང་པ་གཉིས་གསུངས་སོ། །
དེ་རྣམས་ཐམས་ཅད་ཀྱི་སྔགས་ཀྱི་དོན་ནི་ཕྱི་མར་བཤད་པས་བདག་གིས་མ་ཕྱེའོ། །འོ་ན་གཟུགས་ཀྱི་རྡོ་རྗེ་མ་ལ་སོགས་པ་དཀྱིལ་འཁོར་གྱི་ལྷ་ལ་གཏོགས་པ་དྲུག་འདིར་མ་བྱུང་བ་ཅི་ལ་དགོངས་ཤེ་ན། བཤད་པ། དཀྱིལ་འཁོར་གྱི་ལྷ་མ་ཡིན་པས་མ་བྱུང་བ་ནི་མ་ཡིན་གྱི། ཐུན་མོང་གི་ཡི་གེ་ལས་མ་
གཏོགས་པ་སྤྱན་དྲང་བའི་སྔགས་མེད་པའི་ཕྱིར་སྡུད་པ་པོས་མ་སྨོས་པར་ཟད་དོ། །དེ་ཐམས་ཅད་ཀྱི་དོན་ཡང་བཟང་པོ་ཞབས་ཀྱིས། སྙིང་ལ་རལ་གྲི་སྙིང་འོད་ཀྱིས། །ཞེས་པ་ནས། རྫོགས་པའི་དཀྱིལ་འཁོར་མཐོང་ནས་སུ། །ཞེས་པའི་བར་དུ་རྩ་བ་ཕྱེད་དང་གཉིས་ཀྱིས་གསུངས་སོ། །འོ་ན་
སངས་རྒྱས་ཀྱི་ཏིང་ངེ་འཛིན་ནི་ལྷུན་གྱིས་གྲུབ་པས་མོས་པ་ཙམ་ལ་རག་ལས་པའི་ཕྱིར་ཇི་སྐད་སྨོས་པ་དེ་ཙམ་གྱིས་རྫོགས་པར་ཤེས་པར་བྱ་སྟེ་དེ་ཡང་། ཁྱོད་ཀྱིས་དོན་རྣམས་ལྷུན་གྱིས་གྲུབ་ཕྱིར་བཞེད་པ་ཙམ་ལ་རག་ལས་ལགས་ཞེས་པའི་ཕྱིར་རོ། །དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་
เล่ม ๔๕ · หน้า 160b
ནི་རྡོ་རྗེ་ཡེ་ཤེས་ཀྱི་སྤྱོད་པ་ལ་སོགས་པ་སྟེ། དེ་བཞིན་གཤེགས་པ་ཉིད་ཀྱི་ཕྲིན་ལས་སུ་གྱུར་པའོ། །དེ་ཁོ་ན་བྱིན་གྱིས་རློབ་པའི་ལེའུ་སྟེ་དང་པོའི་འགྲེལ་པ་རྫོགས་སོ།། །།ད་ནི་སྒྲའི་རྣམ་པའི་རྒྱུད་རྣམས་གོང་དུ་ཟུར་གྱིས་ཞུས་པ་དང་ཐམས་ཅད་ཀྱི་ཐོག་མར་འགྲོ་བ་ཉིད་ཀྱིས་བྱང་
ཆུབ་སེམས་ཀྱི་ལེའུ་གསུངས་པ། དེ་ནས་ཞེས་པ་ལ་སོགས་པའོ། །དེ་ལ་དེ་ནས་ཞེས་པ་ནི་དེ་བཞིན་གཤེགས་པ་ཉིད་ཀྱིས་མངོན་སུམ་དུ་འདུལ་བ་རྣམས་ཀྱི་དོན་བྱས་ཏེ་ཆོས་ཀྱི་དབྱིངས་ཀྱི་ཕོ་བྲང་ན་གནས་པ་དེ་མ་ཐག་ཏུ་ཡང་དག་བསྟན་པར་འདུལ་བའི་དོན་དུ་གསོལ་ཏོ་ཞེས་པའོ། །བཅོམ་ལྡན་འདས་
ཞེས་པ་དང་དེ་བཞིན་གཤེགས་པའི་སྒྲ་ནི་སྔར་བསྟན་པའོ། །ཐམས་ཅད་དུ་དེ་བཞིན་དུ་བལྟའོ། །སྐུ་དང་གསུང་དང་ཐུགས་ཀྱི་བདག་པོ་ཞེས་པ་ནི་རྡོ་རྗེ་འཆང་བ་སྟེ་ཐམས་ཅད་དུ་དེ་བཞིན་དུ་བལྟའོ། །ཐམས་ཅད་ཀྱིས་ཞེས་པ་ནི་གསོལ་ཏོ་ཞེས་འབྲེལ་ཏོ། །སྐུ་གསུང་ཐུགས་ཀྱི་བདག་
པོ་མཆོག །ཅེས་པ་ནི་བོད་པའོ། །ཞུ་བའི་དོན་ནི་བླ་ན་མེད་པའི་བྱང་ཆུབ་སེམས་ཞེས་པ་དང་སྙིང་པོ་ཞེས་པ་སྟེ། རྣམ་པ་གཉིས་སོ། །ལན་གསུངས་པ་དེ་ནས་ཤེའོ། །དེ་ལ་གསོལ་བ་བཏབ་པ་ཡང་མཁྱེན་ཞེས་པ་ནི་ཟུར་གྱིས་ཞུས་པ་ཉིད་ལ་བསྣན་ནོ་ཞེས་ཐུགས་སུ་ཆུད་པའོ། །བྱང་ཆུབ་
སེམས་དཔའི་ཡོངས་སུ་རྟོག་པ་ནི་ཞུ་བར་འདོད་པ་སྟེ། དེ་ནང་དུ་རིག་ནས་བཀའ་སྩལ་ཏོ་ཞེས་པའི་དོན་ཏོ། །བྱང་ཆུབ་སེམས་དཔའ་ཁོ་ན་ལ་བཀའ་སྩལ་ཞེས་པ་ནི་དེ་དག་ཀྱང་ཞུ་བར་འདོད་པའི་ཕྱིར་རམ། ཡང་ན་རྐྱེན་གྱིས་བྱང་ཆུབ་ཐོབ་པར་མཚུངས་ཀྱང་དབང་པོ་དམན་པ་ལྟ་བུར་བསྟན་
ནས་དེ་རྣམས་ལ་བཀའ་སྩལ་ཞེས་པའི་ཐ་ཚིག་གོ། །དེ་ལ་ཁྱེད་ཀྱིས་ཞེས་པ་ནི་བྱང་ཆུབ་སེམས་དཔའ་སྟེ། སེམས་ལ་སོགས་པ་དེ་ལྟ་བུར་སྐྱེད་ཅིག་ཅེས་པའི་དོན་ཏོ། །ཇི་ལྟར་ཞེ་ན། སེམས་ལུས་ལྟ་བུ་ཞེས་པ་ལ་སོགས་པ་སྟེ། དེ་ནི་སྙིང་པོའི་ལན་ཏེ། སེམས་ཉིད་བདེ་བ་ཆེན་པོ་དོན་དམ་པའི་
གཟུགས་དྲི་མ་མེད་པར་གྱུར་ཏོ་ཞེས་པའི་དོན་ཏོ། །ལུས་སེམས་ལྟ་བུ་ཞེས་པ་ལ་སོགས་པ་ནི་བླ་ན་མེད་པའི་ལན་ཏེ། ལུས་དང་ངག་སེམས་ལྟ་བུ་ཞེས་པ་ནི་ཀུན་རྫོབ་ཀྱི་གཟུགས་ལ་སོགས་པ་ཐམས་ཅད་སེམས་ཡིན་ཞེས་པ་སྟེ་ཚིག་དེ་གསུམ་གྱིས་ནི་དོན་དམ་པ་གཟུགས་ཀྱང་བྱང་ཆུབ་ཀྱི་སེམས་
เล่ม ๔๕ · หน้า 161a
ཡིན་ལ། ཀུན་རྫོབ་ཀྱི་གཟུགས་ལ་སོགས་པ་ཡང་མིག་གི་རྣམ་པར་ཤེས་པ་ལ་སོགས་པའི་སེམས་ཡིན་པས་ཐམས་ཅད་སེམས་ཙམ་དུ་བསྒྲུབས་ཏེ། དེ་ཡང་ལེའུ་བཅོ་ལྔ་པ་ལས། ནམ་མཁའ་ལ་ནི་ནམ་མཁའ་བསྒོམ། །ཞེས་པའི་རྗེས་ལ། དེ་ནས་ཞེས་པ་ནས་
འདི་ལྟ་སྟེ་སེམས་ཀྱི་ངོ་བོ་ཉིད་དོ་ཞེས་པ་དང་། དེ་དག་གཉིས་སུ་མེད་དོ་ཞེས་པའི་བར་གྱིས་གསུངས་སོ། །སེམས་ཚིག་བརྗོད་པ་ལྟ་ཞེས་པ་ནི་སེམས་ཙམ་དེ་ཡང་རང་བཞིན་མེད་དོ་ཞེས་པ་སྟེ། ཚིག་བརྗོད་པ་ལྟ་བུ་ཞེས་པ་ནི་དེ་ཡང་བརྗོད་པ་ཙམ་སྟེ་ནམ་མཁའ་ལྟ་བུ་ཞེས་པའམ། ཡང་ན་མི་
འགྱུར་བའི་ཡི་གེ་དམ་པའོ་ཞེས་པའི་དོན་ཏོ། །དེ་ཡང་དོན་དམ་པའི་སེམས་རང་བཞིན་མེད་པ་འདི་ཡང་བཅོ་ལྔ་པ་ལས་གསུངས་སོ། །གོང་མའི་རྗེས་ལས་བཅོམ་ལྡན་འདས་ཞེས་པ་ནས་བྱང་ཆུབ་སེམས་དེ་ཡང་ལུས་ལ་མི་གནས་ཞེས་པ་ལ་སོགས་པ་དང་། སངས་རྒྱས་ཀྱི་ཆོས་རྣམས་རྗེས་སུ་
འབྲང་བ་ངོ་མཚར་ཏོ་ཞེས་པའི་བར་དུའོ། །དེ་ཁོ་ན་ཕྱི་མ་ལས་ཀྱང་། སྐྱེ་རྒ་ཞི་བའི་ཞེས་པ་ལ་སོགས་པས་གསུངས་སོ། །མིག་གི་རྣམ་པར་ཤེས་པ་ལ་སོགས་པ་ཀུན་རྫོབ་པར་རང་བཞིན་མེད་པ་འདི་ཡང་བཅོ་ལྔ་པ་དེ་ཁོ་ནའི་རྗེས་ལས་དེ་ནས་ཞེས་པ་ལ་སོགས་པ་ནས། གང་ན་ཡང་མི་གནས་
སོ་ཞེས་པའི་བར་གྱིས་གསུངས་སོ། །ནམ་མཁའ་ལྟ་བུར་སྦྱར་ནས་ཤེས་པ་སྐྱེད་ཅིག་ཅེས་བཀའ་སྩལ་པ་དེ་རང་རང་དང་རྡོ་རྗེ་འཆང་བ་གཉིས་སུ་མེད་པར་སྦྱར་བས་བཀའ་མཉན་ཏེ་ཞེས་པའི་དོན་ཏོ། །ཀུན་དུ་བཟང་པོ་ཞེས་པ་ནི་གཡོ་བ་དང་མི་གཡོ་བ་ཐམས་ཅད་བྱང་ཆུབ་སེམས་ལས་བྱུང་བས་ན་
ཐམས་ཅད་བཟང་པོ་སྟེ་རྡོ་རྗེ་འཆང་བའོ། །སྐྱེ་བ་མེད་ཀྱང་དེ་ཁོ་ན་ལས་དོན་དམ་པ་དང་ཀུན་རྫོབ་ཀྱི་གཟུགས་ལ་སོགས་པ་སྐྱེ་བ་དེ་ཨེ་མའོ་ཞེའོ། །ཡང་སངས་རྒྱས་དྲུག་པོ་དག་གི་ཆོས་མ་སྐྱེས་པ་ཉིད་ཀྱིས་གོང་མ་དེ་གཙོར་གསུངས་པ། དེ་ནས་ཞེས་པ་ལ་སོགས་པའོ། །ད་ནི་དངོས་པོ་མེད་པའོ་
བསྒོམ་པའི་དངོས། །ཞེས་པ་ལ་སོགས་པས་ནི་འདི་ལྟར་སྟོན་ཏེ་དངོས་པོ་མེད་དོ་སྙམ་པའི་ངོ་བོ་དེ་ཡང་བསྒོམ་པར་བྱ་བ་མ་ཡིན་ཏེ་དེ་ནི་མེད་པའི་མཚན་མ་ལ་སྤྱོད་པ་ཁོ་ན་ཡིན་ཏེ། ཅིའི་ཕྱིར་ཞེ་ན། དངོས་པོ་དང་དངོས་པོ་མེད་པ་གཉི་ག་མེད་པའི་ཕྱིར་ཏེ། འཕགས་པ་ཀླུ་སྒྲུབ་ཀྱིས་ཀྱང་། དངོས་པོ་
เล่ม ๔๕ · หน้า 161b
དངོས་མེད་གཉི་ག་སྤངས། །ཞེས་པ་ལ་སོགས་པ་གསུངས་སོ། །དེ་བས་ན་བསྒོམ་པ་ནི་དམིགས་སུ་མེད་པར་བསྒོམས་ན་དེ་ཡིན་ནོ་ཞེས་པའོ། །ཡང་སྣང་མཛད་ཀྱི་སེམས་དེ་ལ། དངོས་པོ་ཐམས་ཅད་ཅེས་པ་ནི་ཡང་དག་པའི་གཟུགས་དང་གཏི་མུག་དང་། མེ་ལོང་ལྟ་བུ་དང་། སྙིང་རྗེ་དང་སྦྱིན་པའི་
ཕ་རོལ་ཏུ་ཕྱིན་པ་ལ་སོགས་ཏེ་དེ་ཁོ་ན་ཕུང་པོ་ཞེས་པ་ལ་སོགས་པའོ། །དོན་དམ་པར་དེ་དག་བདག་མེད་པར་མཉམ་པའི་ཕྱིར་མ་སྐྱེས་ལ། དེའི་ཕྱིར་སྟོང་པ་ཉིད་དོ་ཞེས་པའི་ཐ་ཚིག་གོ། །ཡང་མི་བསྐྱོད་པའི་སེམས་དེ་ལ་དངོས་པོ་འདི་རྣམས་ཞེས་པ་ནི་རྣམ་པར་དག་པའི་རྣམ་པར་ཤེས་པ་དང་ཞེ་
སྡང་དང་། སྟོང་པ་ཉིད་ཀྱི་ཡེ་ཤེས་ལ་སོགས་པ་དག་མ་སྐྱེས་པའི་ཕྱིར་ཆོས་ཅན་ལ་སོགས་པ་དོན་དམ་པར་མེད་ཅེས་པ་སྟེ། དཔེ་ནམ་མཁའ་ལྟ་བུ་ཞེས་པའི་དོན་ཏེ་བྱང་ཆུབ་སེམས་འདི་མི་འགྱུར་བའི་དོན་ཏོ། །དཀོན་མཆོག་དཔལ་གྱི་སེམས་དེ་ལ་ཆོས་རྣམས་ཐམས་ཅད་ཅེས་པ་ནི་གོང་མ་བཞིན་ཏེ།
རིན་པོ་ཆེའི་རིགས་ཀྱི་ཆོས་རྣམས་སོ། །དེ་ཁོ་ན་མཚན་ཉིད་སྤངས་པའི་ཕྱིར་དངོས་པོ་མེད་ཅེས་སོ། །འོ་ན་ཡོན་ཏན་དེ་དག་གང་ནས་བྱུང་ཞེ་ན། བདག་མེད་ཅེས་ཏེ་སྒྱུ་མ་ལྟ་བུའི་མཉམ་པ་ཉིད་ལས་བྱུང་ངོ་ཞེས་པ་སྟེ་བསྟན་པ་ནི་གོང་མ་བཞིན་ནོ། །ཚེ་དཔག་མེད་ཀྱི་སེམས་དེ་ལ་སྐྱེས་པའི་ཆོས་རྣམས་ཞེས་པ་ནི་
པདྨ་རིགས་ཀྱི་ཆོས་རྣམས་ཏེ། ངོ་བོ་མེད་ལ་དེ་མེད་པས་སྒོམ་དུའང་མེད་ཅེའོ། །འོ་ན་ཇི་ལྟར་བསྒོམ་ཞེ་ན། ནམ་མཁའི་ཐ་སྙད་ལྟར་ཐ་སྙད་བཏགས་པ་སྟེ་སྒྱུ་མ་ལྟ་བུའི་སྐུ་ལ་སོགས་པ་བསྒོམ་ཞེས་པའི་དོན་ཏོ། །ཡང་དོན་ཡོད་གྲུབ་པའི་སེམས་དེ་ལ་ཆོས་རྣམས་ཞེས་པ་ནི་ལས་ཀྱི་རིགས་ཀྱི་ཆོས་སོ། །
འོད་གསལ་ཞེས་པ་ནི་དངོས་པོ་དང་བྲལ་བའི་ཐ་ཚིག་གོ། །དག་པ་ཞེས་པ་ནི་ཉོན་མོངས་པ་ལ་སོགས་པའི་དྲི་མ་མེད་པ་སྟེ་དཔེ་ནམ་མཁའ་བཞིན་ནོ། །དེ་བས་ན་བྱང་ཆུབ་ཀྱང་མེད་ཅིང་དེ་རྟོགས་པ་ཡང་མེད་ཅེའོ། །ད་ནི་དེ་ལ་བསྟོད་པ་གསུངས་པ་དེ་ནས་ཞེས་པ་ལ་སོགས་པའོ། །ངོ་མཚར་ཞེས་པ་ནི་
བླ་ན་མེད་པ་ལའོ། །རྨད་དུ་གྱུར་ཞེས་པ་སྙིང་པོ་ལའོ། །ཨེ་མའོ་སངས་རྒྱས་ཞེས་པ་ནི་སྟོན་པ་ལ་ངོ་མཚར་བ་སྟེ། ཨེ་མའོ་སངས་རྒྱས་ཞེས་པ་ནི་རྩ་བ་སྐོར་བའོ། །ཆོས་བཤད་པ་ཞེས་པ་ནི་བསྟན་པ་སྟེ་དྲི་མ་མེད་པས་ངོ་མཚར་བའི་ཐ་ཚིག་གོ། །ཡང་དག་དོན་ནི་དག་པའི་དོན། །ཞེས་པ་ནི་བླ་
เล่ม ๔๕ · หน้า 162a
ན་མེད་པ་སྟེ་ནམ་མཁའ་ལྟར་དག་པས་ཕྱག་གི་འོས་ཡིན་ནོ། །ད་ནི་སྙིང་པོ་ལ་བསྟོད་པ། བདག་མེད་ཅེས་པ་ལ་སོགས་པ་སྟེ། དེ་ལ། བདག་མེད་པ་ཡི་ཆོས་ལས་བྱུང་། །ཞེས་པ་ནི། སངས་རྒྱས་ཀྱི་སྐུ་དེ་རང་བཞིན་མེད་པ་ལས་སྒྱུ་མ་ལྟ་བུར་བྱུང་བ་སྟེ། དེ་ཁོ་ན་ཐུགས་རྗེ་
དང་ལྡན་པས་བྱང་ཆུབ་ཅེས་པའོ། །རྫོགས་པར་བྱེད་ཅེས་པ་ནི་སྐུ་དེ་བསྐྱེད་པས་ན་སྙིང་པོ་བྱང་ཆུབ་ཀྱི་སེམས་དམིགས་སུ་མེད་པ་དེ་ལ་ཕྱག་འཚལ་ལོ་ཞེའོ། །ཀུན་དུ་བཟང་པོ་དག་པའི་དོན། །ཞེས་པ་ཡང་རང་བཞིན་མེད་པ་སྟེ་དེ་ལས་བྱུང་བའི་དོན་ཏོ། །བཟང་པོ་ཞེས་པ་ནི་གསུང་སྟེ། དེ་ཁོ་ན་
ཐུགས་དང་ལྡན་པས་བྱང་ཆུབ་ཅེའོ། །དེ་བསྐྱེད་པས་སྙིང་པོ་རྡོ་རྗེ་ལྟ་བུ་ཆེན་པོ་ལྟ་བུ་དེ་ལ་ཞེས་སོ། །དག་པ་ཞེས་པ་ནི་འདིར་ཡང་གོང་མ་བཞིན་ནོ། །ཐུགས་ཞེས་པ་དེ་ཡང་སྐུ་ལ་སོགས་པ་དང་ལྡན་པའི་ཕྱིར་སྐུ་དང་ཞེས་པ་ལ་སོགས་པ་སྨོས་ཏེ་སྟོན་པ་བྱང་ཆུབ་དེ་རྫོགས་པར་བྱས་པས་ཞེས་སྦྱར་རོ། །
བྱང་ཆུབ་སེམས་ཀྱི་ལེའུ་སྟེ་གཉིས་པའི་འགྲེལ་པ་རྫོགས་སོ།། །།ད་ནི་གོང་དུ་གསུངས་པའི་སྦྱོར་བ་གསུམ་པོ་དེ་དག་ལས་གཙོར་བསྙེན་པ་དང་པོ་ལ་གཏོགས་པ་སྟོན་པའི་ལེའུ་གསུངས་པ་དེ་ནས་ཞེས་པ་ལ་སོགས་པའོ། །དེ་ལ་དེ་ནས་ཞེས་པ་ནི་གཉིས་པ་ཉིད་ཀྱི་དེ་མ་ཐག་པ་སྟེ་
ལེའུ་འོག་མ་ཀུན་ལ་ཡང་དེ་བཞིན་ནོ། །ཨོཾ་ཤཱུ་ནྱ་ཏཱ་ཞེས་པའི་སྔགས་ནི་གཉིས་པའི་བྱང་ཆུབ་སེམས་དེ་ཉིད་བྱིན་གྱིས་རློབ་པ་སྟེ་དེའི་དོན་ཡང་བཟང་པོ་ཞབས་ཀྱིས་གསུངས་པ། བྱང་ཆུབ་སེམས་ལས་སངས་རྒྱས་ཉིད། །ཅེས་པ་ནས། ཨོཾ་ཤཱུ་ནྱ་ཏཱ་ཞེས་པའི་སྔགས་ཀྱི་བར་དུའོ། །ནམ་མཁའི་དབྱིངས་
ཀྱི་མཐས་ཀླས་པར། །ཞེས་པ་ལ་སོགས་པ་རྣལ་འབྱོར་པ་དག་གི་གཞིའི་ཏིང་ངེ་འཛིན་ཏེ་ཕོ་བྲང་ངོ་། །དེས་ནི་ཤིན་ཏུ་རྒྱ་ཆེ་བར་བྱའོ་ཞེས་བསྟན་ཏོ། །དེའི་ངོ་བོ་ཉིད་ཅི་འདྲ་ཞེ་ན་སངས་རྒྱས་དཀྱིལ་འཁོར་ཞེས་པ་ལ་སོགས་པ་སྟེ་སངས་རྒྱས་ནི་རྣམ་པར་སྣང་མཛད་དེ་འོག་ནས་འབྱུང་བའི་རིམ་པ་དེ་
ལས་གྱུར་པའི་དཀྱིལ་འཁོར་རོ། །དེ་ཁོ་ན་འོད་ཟེར་སངས་རྒྱས་དང་མཉམ་པའི་ཚོགས་ཅན་ནོ། །འོད་ཟེར་རྣམ་ལྔ་ཞེས་པ་ནི་རིན་པོ་ཆེ་སྣ་ལྔ་ལས་གྲུབ་པའི་ཐ་ཚིག་གོ། །ཟླུམ་པོ་ཞེས་བྱ་བ་ནི་ཕྱིའི་ར་བ་དང་ནང་གི་ཕྲེང་བ་དག་ཤིན་ཏུ་ཟླུམ་པའོ། །གཟུགས་ཀྱི་ལྷ་མོ་དག་ལ་སོགས། །ཞེས་པ་ནི་གཟུགས་ཀྱི་ལྷ་
เล่ม ๔๕ · หน้า 162b
མི་ལ་སོགས་པ་དང་རིན་པོ་ཆེའི་རྒྱན་དང་ཏྭ་ར་ན་ལ་སོགས་པས་བརྒྱན་པའོ། །མདོར་ན་ཞེས་པ་ནི་གཞལ་མེད་ཁང་པའི་རྒྱན་ཇི་ལྟ་བུ་སྟེ། དེ་བསྒོམས་ནས་འབྲས་བུའི་རྡོ་རྗེ་འཆང་བ་ལྷག་པའི་ལྷ་བསྒོམ་པ་སྟེ་རྒྱལ་བ་མཆོག་གི་ལྷར་སྨྲ་བ་ནི་མ་ཡིན་ནོ། །དེ་ལ་སྐུ་གསུང་ཐུགས་ཀྱིས་མཚན། །ཞེས་པ་
ནི་ཀུན་ལ་སྦྱར་རོ། །གཅིག་ཏུ་བསྡུ་བ་སྦྱར་བ་ཞེས་པ་ནི་རིག་མ་དང་སྦྱོར་བ་ཞེས་པ་སྟེ། དེ་ཡང་ཀུན་ལ་སྦྱར་རོ། །འོ་བྱེད་ཅེས་པ་ནི་ཕྱག་རྒྱ་ཆེན་པོ་ཞེས་པའི་དོན་ཏོ། །དེ་རྣམས་ཀྱི་ཁ་དོག་དང་ཕྱག་མཚན་ལ་སོགས་པ་སྟོན་པས་གསུངས་པ། སྐུ་གསུང་ཐུགས་ཀྱི་ཞེས་པ་ལ་སོགས་པ་སྟེ་སྐུ་རྡོ་རྗེ་
ཅན་ཞེས་པ་ནི་མི་བསྐྱོད་པ་སྟེ་དེ་ནི་སྔོན་པོའོ། །རབ་འབར་ཞེས་པ་ནི་འོད་འབར་རྡོ་རྗེ་སྟེ་ཐམས་ཅད་དུ་དེ་བཞིན་ནོ། །འཇིགས་ལྟར་ཞེས་པ་ནི་ཞེ་སྡང་གི་རང་བཞིན་པས་ཅུང་ཟད་ཁྲོ་བོའི་ཚུལ་ལོ། །ཤེས་དང་ཞེས་པ་ལ་སོགས་པ་ནི་རྟག་པ་སྟེ་ཐོར་ཚུགས་ནི་རལ་པའི་ཡིན་ནོ། །ཅོད་པན་ནི་རིན་པོ་ཆེའི་
དབུ་རྒྱན་ནོ། །སྣ་ཚོགས་རྒྱན་ནི་རྣ་བ་ལ་སོགས་པ་ཞི་བའི་རྒྱན་རྣམས་སོ། །རྡོ་རྗེ་འཆང་ཆེན་པོ་ནི་རྟག་པའི་མདོག་དང་མི་བསྐྱོད་པའི་ཕྱག་མཚན་ལས་ཤེས་པར་བྱའོ། །འཛམ་བུ་ན་ད་ཞེས་པ་ལ་སོགས་པ་ནི་རིན་ཆེན་འབྱུང་བ་སྟེ། སངས་རྒྱས་སྤྲིན་གྱིས་རབ་ཏུ་འཁྲིགས། །ཞེས་པ་ནི་འོད་ཟེར་གྱི་ཁ་
ནས་རིགས་ལྔ་འཕྲོ་བའོ། །རྡོ་རྗེ་ཆེན་པོ་ཞེས་པ་ནི་རིན་པོ་ཆེའོ། །ཅི་འདྲ་ཞེ་ན། མརྒཏ་ཅེས་པ་ལ་སོགས་པའོ། །པདྨ་རཱ་གའི་མདོག་འདྲ་བ། །ཞེས་པ་ལ་སོགས་པ་ནི་འོད་དཔག་མེད་དོ། །གཙོ་བོ་འདོད་ཆགས་ཞེས་པ་ནི་འདོད་ཆགས་རྡོ་རྗེ་ཞེས་པའི་དོན་ཏོ། །འོད་ཟེར་སྣ་ལྔ་ཞེས་པ་ལ་
སོགས་པ་ནི་གྲུབ་པ་གདོན་མི་ཟ་བ་སྟེ། སྣ་ལྔའི་འོད་ཅེས་པ་ནི་ལྗང་གུའོ། །ཚིག་དེ་ལས་ཐོར་ཚུགས་ཅོད་པན་ཞེས་པ་དང་སྣ་ཚོགས་རྒྱན་ཞེས་པ་དང་སངས་རྒྱས་སྤྲིན་ཞེས་པ་ནི་ཀུན་ལ་སྦྱར་རོ། །ཞི་བ་ཞེས་པ་ནི་མི་བསྐྱོད་པ་མ་གཏོགས་པ་ཀུན་ལ་སྦྱར་ཏེ་མི་བསྐྱོད་པ་ནི་དྲག་པོའི་ཚུལ་དུ་སྨྲས་སོ། །
རིག་པའི་ལྷའི་སྐུ་དེ་བྱིན་གྱིས་བརླབ་པ་ནི། དེ་ནས་ཞེས་པ་ལ་སོགས་པ་སྟེ། ཨོཾ་དྷརྨཱ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧཾ། ཞེས་པ་བྱ་བའི་དོན་ནི་དག་པ་འཇིག་རྟེན་པ་སྣང་བའི་སྐུ་དེ་ཞི་བའི་ཕྱིར་ན་ཆོས་ཀྱི་དབྱིངས་ནི་ང་ཡིན་ནོ་ཞེས་པ་འདི་ཡིན་ནོ། །དེ་ཡང་བཟང་པོ་ཞབས་ཀྱིས། གུར་གུམ་སྐུ་དང་དབུས་ཀྱི་
เล่ม ๔๕ · หน้า 163a
ཞལ། །ཞེས་པ་ནས། རྒྱུ་མཐུན་བྱེད་པའི་བཤེས་གཉེན་གྱིས། །ཞེས་པའི་བར་དུ་གསུངས་སོ། །ད་ནི་ཕྲ་མོའི་སྦྱོར་བ་ལ་གང་བསྟན་ནས་སྤྲོ་བ་གསུངས་པ། རིན་ཆེན་ཁ་དོག་ཅེས་པ་ལ་སོགས་པའོ། །རིན་ཆེན་ཁ་དོག་སྣ་ལྔ་ཞེས་པ་ལ་སོགས་པ་ནི་འོག་ནས་བཤད་
པར་བྱའོ། །སངས་རྒྱས་འབར་བ་ཞེས་པ་ལ་སོགས་པ་ནི་ལྷ་རྣམས་ཀྱི་སྤྲོ་བ་ཉིད་དོ། །མཚོན་ཆ་འཛིན་ཞེས་པ་ནི་གོང་དུ་སྨོས་པའི་མཚན་མ་དེ་རྣམས་ཉིད་མཚོན་ཆའོ། །དེ་ཡང་བཟང་པོ་ཞབས་ཀྱིས། མཚན་མ་བསྟན་པ་མཐོང་བ་དག །ཅེས་པ་ལ་སོགས་པའི་ཚིགས་སུ་བཅད་པ་གཅིག་གསུངས་
སོ། །ནམ་མཁའི་དབྱིངས་ཀྱི་དབུས་གནས་པར། །ཞེས་པ་ལ་སོགས་པ་ནི་གོང་དུ་གསུངས་པ་དེ་རྣམས་ཀྱི་གདན་གྱི་ཁྱད་པར་ཅན་སྟོན་པ་སྟེ། ནམ་མཁའི་དབྱིངས་ཞེས་པ་ནི་གནས་ཀྱི་རིམ་པ་རྣམས་ལས་གཙོར་གསུངས་ཏེ་ཐམས་ཅད་དུ་དེ་བཞིན་སྦྱར་རོ། །ཟླ་བའི་དཀྱིལ་འཁོར་ཞེས་པ་ནི་རྡོ་རྗེ་འཆང་
ཆེན་པོའོ། །ཡི་གེ་ཁ་ཅིག་ཏུ་ཟླ་བའོ་ཞེས་འབྱུང་སྟེ་དེ་ནི་རྒྱུ་འབྲས་གཉིས་ལ་ཟླ་བ་དང་ཉི་མ་ཞེས་སྟོན་ཏེ་ཤིན་ཏུ་འཐད་དོ། །གསལ་བ་ནི་ཟླ་བའོ། །འཁོར་ལོ་ཞེས་པ་ནི་རྟག་པའི་ངོ་བོ་ཉིད་སྟོན་པའོ། །པདྨོ་ཞེས་པ་ཡང་ཚེ་དཔག་མེད་དེ་འདྲ་ཞེས་པ་ནི་ཉི་མའི་དཀྱིལ་འཁོར་ལ་རེག་པའི་དོན་ཏོ། །དེ་
ལྟར་འོག་མ་ཀུན་ལ་ཡང་སྦྱར་རོ། །རྡོ་རྗེ་བསྒོམ་པ་ཞེས་པ་ནི་ལྷའི་རྣལ་འབྱོར་པས་ཞེས་པའི་དོན་ཏོ། །སྦྱོར་བ་ཞེས་པ་ནི་དོན་ཡོད་གྲུབ་པ་སྟེ། ལས་བྱུང་ཞེས་པ་ནི་འདྲ་བའི་དོན་ཏོ། །རྡོ་རྗེ་ལས་བྱུང་ཞེས་པ་ནི་རྡོ་རྗེ་རྒྱ་གྲམ་ལ་གནས་པའི་དོན་ཏོ། །ཐམས་ཅད་མཁྱེན་པའི་ཚུལ་ཐོབ་ཅེས་པ་ནི་རྟག་
པའི་ཡན་ལག་ལས་གྱུར་པའི་དོན་ཏོ། །དེའི་དོན་ཡང་བཟང་པོ་ཞབས་ཀྱིས་གསུངས་པ། ཟླ་བའི་དཀྱིལ་འཁོར་ཞེས་པ་དང་། །ཐམས་ཅད་པད་ཉིའི་གདན་ལ་བསྒོམ། །ཞེས་སོ། །ལེའུ་གསུམ་པའི་འགྲེལ་པ་རྫོགས་སོ།། །།ད་ནི་རང་གི་དོན་རྫོགས་པ་ཐུགས་ལ་བཞག་ནས། གཞན་གྱི་དོན་
དུ་སློབ་དཔོན་གྱི་ལས་ཞེས་གྲགས་པ་རི་མོའི་དཀྱིལ་འཁོར་ཞུ་བ་དང་པོར་བྱས་ཏེ་གསུངས་པ། དེ་ནས་ཞེས་པ་ལ་སོགས་པའོ། །ཡང་འདུས་ནས་ཞེས་པ་ནི་མཆོད་པ་བྱས་པ་དང་ཕྱག་འཚལ་བའི་དོན་ཏོ། །ཀུན་ཞི་བ་ཞེས་པ་མཚན་མ་དང་བྲལ་བ་སྟེ་དེས་ནི་སྒྱུ་མ་ལྟ་བུའི་དེ་བཞིན་གཤེགས་པ་ཞེས་པའི་དོན་ཏོ། །
เล่ม ๔๕ · หน้า 163b
ཆོས་ཀུན་བདག་མེད་པ་ཡི་མཆོག །ཅེས་པ་ནི་ཚོན་ལ་སོགས་པ་ཆོས་དེ་ཁོ་ན་བདག་མེད་པའི་ཐ་ཚིག་གོ། །དེ་ཁོ་ན་དམ་པ་བཤད་དུ་གསོལ་ཞེས་སྤྱིར་ཞུས་ནས་ཕྱེ་བའི་རྣམ་པས་ཞུས་གསུངས་པ། མཚན་ཉིད་ཐམས་ཅད་ཅེས་པ་ལ་སོགས་པའོ། །དེ་ལ་མཚན་ཉིད་ཐམས་ཅད་ཅེས་པ་ནི་མཚན་དང་དཔེ་
བྱད་དོ། །དེ་རྫོགས་པའི་སྐུའི་མཆོག་ཅེས་སྦྱར་རོ། །མཚན་ཉིད་སྤངས་ཞེས་པ་ནི་དེ་རྣམས་དོན་དམ་པར་ཞི་བའི་ཐ་ཚིག་གོ། །ཀུན་དུ་བཟང་པོ་ནི་སྔར་བཤད་པ་དེ་ཐམས་ཅད་དུ་ཤེས་པར་བྱའོ། །མཆོག་ནི་སྐུའི་ངོ་བོ་རྟག་ཏུ་མེ་ལོང་ལྟ་བུའི་ངོ་བོ་ཡིན་པས་དེ་སྐད་ཅེས་འོག་ནས་ཡང་སྦྱར་རོ། །ཞི་བའི་མཆོག་
ཅེས་པ་ནི་མཚན་ཉིད་དང་བྲལ་བས་དེ་ཁོ་ན་སོ་སོར་རྟོག་པའི་ཡེ་ཤེས་ལས་བྱུང་བས་མཆོག་ལས་བྱུང་ཞེས་བྱའོ། །ཡེ་ཤེས་སྤྱོད་པ་རྣམ་སྦྱོང་བ། །ཞེས་པ་སོ་སོར་རྟོག་པ་གཙོར་གྱུར་པའི་དཀྱིལ་འཁོར་དེས་སེམས་ཅན་གྱི་ཁམས་རྣམ་པར་གྲོལ་བར་བྱེད་དོ་ཞེས་བྱ་བའི་དོན་ཏོ། །སེམས་ཅན་ཀུན་གྱི་
སེམས་ཆེན་པོ། །ཞེས་པ་ནི་ཐུགས་ཏེ་སེམས་ཅན་ཞེས་པ་ནི་སངས་རྒྱས་ཐམས་ཅད་དེ་བྱང་ཆུབ་ཆེན་པོ་ལ་སེམས་དཔའ་དང་ལྡན་པའི་ཕྱིར་རོ། །རང་བཞིན་དག་པ་ནི་མཚན་ཉིད་དང་བྲལ་བའོ། །དྲི་མ་མེད་པ་ནི་ཉོན་མོངས་པ་ལ་སོགས་པ་དང་བྲལ་བའོ། །དེ་ལྟར་ཡོངས་སུ་དག་པའི་ཚིག་གིས་ཞུས་
ནས་ལན་གསུངས་པ། དེ་ནས་ཞེས་པ་ལ་སོགས་པའོ། །འཇིག་རྟེན་གསུམ་ཞེས་པ་ནི་ལྷ་ལ་སོགས་པའི་བཅུད་དོ། །ཁམས་གསུམ་ནི་འདོད་པའི་ཁམས་ལ་སོགས་པའི་སྣོད་དེ། གཡོ་བ་དང་མི་གཡོ་བ་ཐམས་ཅད་ཀྱི་རང་བཞིན་ཞེས་པའི་དོན་ཏོ། །རྡོ་རྗེ་གཙོ་ཞེས་པ་ནི་དེ་སངས་རྒྱས་
རྣམས་ཀྱི་ཡང་གཙོར་གྱུར་པའོ། །དེ་བཞིན་གཤེགས་པ་ཀུན་གྱི་གནས། །ཞེས་པ་ནི་བཤད་ཅེས་འབྲེལ་ཏེ། ཅི་འདྲ་ཞེ་ན་སེམས་དཔའ་ཞེས་པ་ལ་སོགས་པ་སྟེ། འཁོར་འདྲ་བ་ཞེས་པ་ནི་ཕྱི་ནང་གི་རྡོ་རྗེ་ར་བ་དང་ཕྲེང་བ་ཟླུམ་པོས་སོ། །ཉམས་དགའ་བ་ཞེས་པ་ནི་བྱང་ཆུབ་ཀྱི་ཕྱོགས་ཀྱི་ཆོས་ཀྱི་ངོ་
བོ་ཉིད་དོ། །བཤད་ཅེས་པ་ནི་སྟོན་པ་ཉིད་ཀྱིས་བཤད་ཀྱི། གཞན་གྱིས་མ་ཡིན་ཞེས་སྡུད་པ་པོའི་ཚིག་གོ། །ད་ནི་སྟོན་པ་ཉིད་ཀྱི་ཞལ་གྱིས་འཆེས་པ་གསུངས་པ་དེ་ནས་ཞེས་པ་ལ་སོགས་པ་སྟེ། དེ་ནས་ཞེས་པ་ནི་ད་ནི་ཞེས་པའི་དོན་ཏོ། །ཡང་ན་གཟུང་བ་ལ་སོགས་པའི་རིམ་པས་སའི་དབུས་
เล่ม ๔๕ · หน้า 164a
ན་འདུག་པའི་སློབ་དཔོན་ལ་གྲགས་པོས་གསོལ་བ་བཏབ་པའི་དེ་མ་ཐག་ཏུ་ཐིག་ལ་སོགས་པའི་ལས་བྱའོ་ཞེས་པའི་དོན་ཏོ། །སེམས་ཀྱི་རྡོ་རྗེ་རབ་འདྲ་བ། །ཞེས་པ་ནི་ཏིང་ངེ་འཛིན་གྱི་དཀྱིལ་འཁོར་བའི་དོན་ཏོ། །ཐུགས་ཀྱི་དཀྱིལ་འཁོར་དེ་ལ་ཡང་སྐུ་ལ་སོགས་
པ་དང་ལྡན་པའི་ཕྱིར་ན་སྐུ་དང་ཞེས་པ་ལ་སོགས་པ་སྨོས་སོ། །ད་ནི་དེ་ཁོ་ན་བཤད་པ། ལུས་དང་ངག་སེམས་རབ་བསྒོམས་པས། །ཞེས་པ་ལ་སོགས་པའོ། །དེ་ལ་ལུས་དང་ངག་སེམས་རབ་བསྒོམས་པས་ཞེས་པ་ནི་ཐུགས་ཀྱི་དཀྱིལ་འཁོར་ལ་སློབ་དཔོན་མི་བསྐྱོད་པའམ་རྡོ་རྗེ་འཆང་
ཆེན་པོ་ལྟ་བུར་བསྒོམས་པ་སྟེ། དེ་བཞིན་དུ་སྐུ་དང་གསུང་གི་དཀྱིལ་འཁོར་ལ་ཡང་རང་གི་བདག་པོ་སྟེ། དེ་ལྟར་ཡང་ཕྱི་མ་ལས། སྐུ་གསུང་ཐུགས་ཀྱི་རྡོ་རྗེ་ཡིས། །ཞེས་པ་ལ་སོགས་པ་ཚིགས་སུ་བཅད་པ་གསུངས་སོ། །ཤེས་རབ་ཅན་ཞེས་པ་ནི་ལས་ཀྱི་རིམ་པ་མཁས་པའོ། །ཐིག་
སྐུད་ཡོངས་སུ་དག་པ་གསུངས་པ་ཐིག་སྐུད་ཅེས་པ་ལ་སོགས་པའོ། །སར་པ་ཞེས་ནི་གཞན་དུ་ལོངས་མ་སྤྱད་པའོ། །རབ་ཏུ་གཙང་ཞེས་པ་ནི་རང་གི་རིགས་ཀྱི་བུ་མོ་གཙང་མས་བཀལ་བའོ། །ཚད་མ་ཞེས་པ་ནི་ཆུར་དཀྱིལ་འཁོར་ཉིས་འགྱུར་དང་སྦོམས་སུ་སྒོའི་ཉི་ཤུའི་ཆའོ། །རབ་ཏུ་མཛེས་ཞེས་
པ་ནི་ཕྲ་སྦོམ་དང་འཇུར་མདུད་མེད་པ་དང་སྔགས་ཆུས་དག་པར་བྱས་པའོ། །དེས་གདབ་པ་གསུངས་པ། ཁྲུ་ནི་ཞེས་པ་ལ་སོགས་པ་སྟེ། པཉྩ་རེག་དག་ངོས་རེ་ལ་ཁྲུ་གསུམ་ཞེས་པའི་དོན་ཏོ། །རབ་ཏུ་རྟག་ཅེས་པ་ནི་ཏྭ་ར་ན་ལ་སོགས་པའི་ཚུལ་དང་ལྡན་པར་བྱ་ཞེས་པའི་ཐ་ཚིག་གོ། །གཞན་ནི་གོ་
སླའོ། །དེ་ལྟར་ཐིག་བཏབ་ནས་ཚོན་དགྱེ་བ་གསུངས་པ། དེའི་དབུས་སུ་ཞེས་པ་ལ་སོགས་པའོ། །དེ་ལ་ཚོན་ནི་ནང་ནས་དགྱེ་བར་བྱ་བ་ཡིན་པས་ན་དེའི་དབུས་སུ་ཞེས་བརྩམས་སོ། །དེ་ལྟར་གནས་བྲིས་ནས་ཕྱག་རྒྱ་དགོད་པ་ནི། ལས་ཀྱི་ཆོ་ག་མཐོང་བ་ཡིས། །ཞེས་པ་ལ་སོགས་པ་སྟེ་དེ་ལ་ལས་ཀྱི་
ཆོ་ག་ཤིན་ཏུ་བརླབས་པས་མ་ནོར་བར་དགོད་པ་སྟེ་གོང་མ་ལ་ཡང་སྦྱར་རོ། །རྡོ་རྗེ་འབར་བས་རྣམ་པར་བརྒྱན། །ཞེས་པ་ནི་མུ་ཁྱུད་ལ་དེས་མཚོན་པའོ། །སྤྲིན་གྱི་མདོག་དང་འདྲ་བའི་སྤྱན། །ཞེས་པ་དེས་མཚོན་པ་སྟེ་སྤྱན་གྱི་ཕྱག་རྒྱ་ཁོ་ནས་འཁོར་ལོ་འཛིན་པས་ན་སྤྱན་གྱི་དེ་ཁོ་ན་བྲིའོ། །དེས་སྤྱན་མ་
เล่ม ๔๕ · หน้า 164b
ཞེས་བྱ་སྟེ་ཕྱག་རྒྱ་དེའི་བདག་མོ་ཡིན་པའི་ཕྱིར་རོ། །མཱ་མ་ཀཱི་ཞེས་བྱ་བ་ནི་བྱམས་པ་དང་སྙིང་རྗེའི་ངོ་བོ་ཡིན་པས་སངས་རྒྱས་ཀུན་གྱི་མ་ཡིན་ལ་ཀཱི་ཞེས་པ་ནི་སྙིང་རྗེར་སྟོན་ཏེ་དེ་ཡང་མི་འགལ་བའི་ཕྱིར་རོ། །དེའི་ཕྱིར་རིགས་འབྱུང་ཞེས་བྱའོ། །ཁ་ཅིག་ན་རེ་གསང་བའི་དབང་གི་སྡོམ་པ་ལེན་པའི་མ་ཡིན་པས་
ད་སྐད་བྱའོ་ཞེས་ཟེར་ཏེ། དེ་ཁོ་ན་གསང་བའི་དབང་གི་ཡུལ་དུ་ངེས་པ་མེད་པས་དེ་ནི་མི་རིགས་སོ། །རྡོ་རྗེ་ཞེས་པ་ནི་དེའི་རིགས་ཡིན་པས་དེ་ཁོ་ན་བྲིའོ། །རྡོ་རྗེ་འབར་བ་ཞེས་པ་ནི་བེ་ཅོན་ཁོ་ན་མི་མཐུན་པ་འཇོམས་པས་དེ་སྐད་ཅེས་བྱའོ། །བྱང་གི་ཕྱོགས་སུ་རྡོ་རྗེ་བྲི། །ཞེས་པ་ནི་ཁྲོ་བོའི་རྡོ་རྗེའོ། །རྡོ་རྗེའི་
བདག་པོ་རྣམས་དགོད་པ་གསུངས་པ་སེམས་ཀྱི་དཀྱིལ་འཁོར་ཞེས་པ་ལ་སོགས་པའོ། །དེ་ལ་ཁ་ཅིག་ན་རེ། སེམས་ཀྱི་དཀྱིལ་འཁོར་དམ་པ་དེ། །ཞེས་པ་ནས་རྫོགས་པ་ཡིན་ལ། དེ་ལ་ལྷ་བཅུ་གསུམ་དུ་སྨྲ་སྟེ། དེའི་ཕྱིར་ཁྲུ་ནི་བཅུ་གཉིས་སུ་བྱས་པ་ཡིན་ཏེ། འདི་ནས་མར་མཆོད་པ་ཡིན་ནོ་
ཞེས་ཟེར་རོ། །དེ་ནི་མ་ཡིན་ཏེ་བཟང་པོ་ཞབས་ཀྱིས་ཐུགས་དང་གསུང་དང་སྐུའི་དཀྱིལ་འཁོར་ལ་བྱེ་བྲག་མ་མཛད་དེ། ཐུགས་ཀྱི་དཀྱིལ་འཁོར་ཁོ་ན་ལ་ལྷ་བཅུ་དགུ་སྣང་བའི་ཕྱིར་དང་། རྣལ་འབྱོར་ངག་ལུས་འཁོར་ལོ་སྟེ། །གཉིས་ཀྱི་ཆོ་གའང་གོང་མ་བཞིན། །ཞེས་སོ། །དེ་བས་ན་འདི་ནི་མཆོད་
པ་མ་ཡིན་གྱི་ལྷ་མོ་དགོད་པར་ངེས་སོ། །ལྷག་མ་རྣམས་ནི་གསལ་བས་མ་ཕྱིའོ། །དེ་ནི་མཆོད་པ་གསུངས་པ་བུད་མེད་ཅེས་བྱ་བ་ལ་སོགས་པ་སྟེ། ལོ་གྲངས་བཅུ་དྲུག་ཅེས་པ་ནི་ཐུགས་ཀྱི་དཀྱིལ་འཁོར་ལ་ནི་བཅུ་གཉིས་མ་ཡིན་ཡང་ངེས་པ་མེད་པར་བསྟན་པའི་ཕྱིར་དེ་སྨོས་སོ། །དེ་ཡང་བཟང་པོ་
ཞབས་ཀྱིས། ཤེས་རབ་ཐབས་ལས་གྲུབ་པ་འབྱུང་། །རིགས་སོགས་ཚད་མ་དོན་མེད་དོ། །ཞེས་གསུངས་སོ། །བྱིན་གྱིས་དེ་བརླབས་ཞེས་པ་ནི་རང་གི་རིག་མའི་སྦྱོར་བས་བྱིན་གྱིས་བརླབས་པའོ། །དེ་ནས་ཤེས་རབ་ཅན་དག་གིས། །ཞེས་པ་ནི་བརྟུལ་ཞུགས་ཀྱི་ཆོ་ག་ཤེས་པའི་སློབ་དཔོན་གྱིས་ཞེས་
པའི་དོན་ཏོ། །མཱ་མ་ཀཱི་ཡང་ཞེས་པ་ནི་དེ་ཁོ་ན་ལས་གསང་བའི་དབང་བསྐུར་རོ་ཞེས་ལས་སུ་སྟོན་པ་ཡིན་གྱི་དེར་བྱིན་གྱིས་བརླབ་པ་ནི་མ་ཡིན་ཏེ། གོང་དུ་བྱིན་གྱིས་བརླབས་ཞེས་བསྟན་ཟིན་པའི་ཕྱིར་རོ། །དེ་བཞིན་དུ་སྐུ་དང་གསུང་གི་དཀྱིལ་འཁོར་ལ་ནི་སྤྱན་མ་དང་གོས་དཀར་མོ་ཡང་མཉེས་པར་བྱ་ཞེས་སྦྱར་
เล่ม ๔๕ · หน้า 165a
ཏེ། དེ་དང་འདྲ་བར་རང་གི་རིག་མ་ཞེས་པའི་ཐ་ཚིག་གོ། །མཆོད་པའི་ངོ་བོ་གསུངས་པ། སངས་རྒྱས་ཞི་བའི་ཞེས་པ་ལ་སོགས་པ་སྟེ། ཞི་བ་ཞེས་པ་ནི་བྱང་ཆུབ་སེམས་ཀྱི་འོད་ལས་རིག་མའི་བ་སྤུའི་བུ་ག་ལས་སྤྲོས་པའི་དོན་ཏོ། །དེ་ནི་གསང་བའི་མཆོད་པའོ་ཡང་
ནང་གི་གསུངས་པ། བཤད་དང་ཞེས་པ་ལ་སོགས་པའོ། །དེ་ཐམས་ཅད་ཀྱི་དོན་ཡང་བཟང་པོ་ཞབས་ཀྱིས་གསུངས་པ། བགེགས་བསྐྲད་དེ་ནས་ཕུར་བཏབ་སྟེ། །ཞེས་པ་ནས། བཟླས་དང་བསྒོམས་ནས་མགུ་བར་བྱ། །ཞེས་པའི་བར་གྱི་ཚིག་གང་དང་གང་ཡིན་པ་ལས་ཤེས་པར་བྱའོ། །ལེའུ་
བཞི་པའི་འགྲེལ་པ་རྫོགས་སོ།། །།ད་ནི་སྒྲུབ་པ་ཆེན་པོ་ཞེས་བཏགས་པ་སྔགས་ཀྱི་སྤྱོད་པ་དང་ཀུན་དུ་སྤྱོད་པའི་སྒོ་ནས་སྒྲུབ་པ་པོ་གསུངས་པ། དེ་ནས་ཞེས་པ་ལ་སོགས་པའོ། །གནས་ཀྱི་དབང་ཕྱུག་ཅེས་པ་ནི་ཐུགས་ཀྱི་དཀྱིལ་འཁོར་ལ་དེ་གཙོ་བོའམ་ཡང་ན་སྐུ་ལ་སོགས་པ་
ཡང་དེའི་རང་བཞིན་པས་དེ་སྐད་ཅེས་བྱའོ། །ཀུན་གྱི་མཆོག་ཅེས་པ་ནི་གཡོ་བ་དང་མི་གཡོ་བ་ཀུན་གྱི་མཆོག་ཡིན་གྱི་ལྷ་རྣམས་ཀྱི་མ་ཡིན་ཏེ། དེ་བཞིན་གཤེགས་པ་ཀུན་གྱི་རྒྱལ་བ་ཞེས་བསྟན་ཟིན་པའི་ཕྱིར་རོ། །ཆོས་ཀྱི་དོན་ཞེས་པ་ནི་རིགས་པའི་ཆོས་ཐོས་པར་བྱ་བ་ཁོ་ནའི་ཆེད་དུ་ཞེས་པའི་དོན་ཏོ། །རྣམ་
པར་མི་རྟོག་ལས་བྱུང་བ། །ཞེས་པ་ནི་ཕྱིན་ཅི་ལོག་གི་རྟོག་པ་སྤངས་ཏེ་བྱ་བ་ཁོ་ནའི་ཕྱིར་ཏེ་སྤྱོད་པའོ། །དེས་ཡོན་ཏན་ནི་འདོད་ཆགས་ལ་སོགས་པའི་རིགས་ལྔའི་རྡོ་རྗེའི་ཐེག་པ་མཆོག་དེ་ལྟ་བུ་འགྲུབ་པོ་ཞེས་པ་འདི་ཡིན་ཏེ། དེས་ནི་སྔགས་པ་རྣམས་བྲོད་པ་བསྐྱེད་པ་ཡིན་ནོ། །སྤྱོད་པ་དེ་ཁོ་ན་བསྡུས་ཏེ་
གསུངས་པ། རིགས་ངན་ཞེས་པ་ལ་སོགས་པ་སྟེ། སྨེ་ཤ་ཅན་ལ་སོགས་ཞེས་པ་ནི་ཟ་བའི་དམ་ཚིག་གི་ངོ་བོར་ཏེ། གསོད་པ་ཞེས་པ་ནི་སྤྱད་པའི་དམ་ཚིག་བསྟན་ཏེ། བརྫུན་ལ་སོགས་པ་ཡང་བསྡུ་སྟེ་སྲོག་གཅོད་པ་ནི་གཙོར་གསུངས་སོ། །དེས་ནི་དེ་ལྟ་བུ་ཅན་གྱི་གང་ཟག་ཅེས་སྒྲུབ་པ་པོ་བསྟན་པའོ། །
མཚམས་མེད་པ་བྱེད་པ་ཡང་འགྲུབ། །ཅེས་པ་ཡང་བར་བསྟན་པ་དང་། འོ་ན་སློབ་དཔོན་སྨོད་པ་ཡང་འགྲུབ་བམ་སྙམ་པ་ལ། དེ་ལས་ལྕི་བ་མེད་པས་ན་དེས་ནི་འགྲུབ་པར་མི་འགྱུར་ཞེའོ། །ད་ནི་གོང་མ་དེ་དག་ཕྱེ་ནས་གསུངས་པ། སྲོག་གཅོད་པའི་ཞེས་པ་ལ་སོགས་པས་གསུངས་སོ། །ཡང་འདོད་
เล่ม ๔๕ · หน้า 165b
པ་སྤྱོད་པའི་ཁྱད་པར་གསུངས་པ་མ་དང་སྲིང་མོ་ཞེས་པ་ལ་སོགས་པའོ། །དེ་ལ་མ་དང་བུ་མོ་སྲིང་མོ་རྣམས་ནི་ལོ་གྲངས་དང་དཀྱིལ་འཁོར་གྱི་རིམ་པ་ལས་སྨྲ་བ་དག་ལྟར་ན། ཉི་ཤུ་ལྔ་ལོན་པ་དང་། བཅུ་དྲུག་མ་དང་། བཅུ་གཉིས་མ་ནི་མ་ལ་སོགས་པ་གོ་རིམས་བཞིན་ནོ། །ཡང་ཐུགས་ཀྱི་དཀྱིལ་
འཁོར་དང་སྐུ་དང་གསུང་གི་རིམ་པ་ལས་མ་ལ་སོགས་པའི་གོ་རིམས་བཞིན་ཏེ། དེ་ཡང་ངེས་པ་ཁོ་ན་མ་ཡིན་ཏེ། དཀྱིལ་འཁོར་གྱི་རིམ་པ་ལས་བུ་མོ་འདོད་པ་དེ་ལ་གཟུངས་མ་ལོ་གྲངས་ཀྱི་ཚད་ལས་མའི་ངོ་བོ་བཞེད་པའི་ཕྱིར་དང་ཡང་དཀྱིལ་འཁོར་ལས་མར་འདོད་པ་ལ་ལོ་གྲངས་ལས་བུ་མོར་
བཞེད་དེ། ཁྲུ་བཅུ་གཉིས་པར་སྟོན་ལ། དེ་མ་ངེས་པའི་ཕྱིར་ལོ་བཅུ་དྲུག་ཅེས་བཤད་དོ། །དེ་བས་གང་ཡང་གསང་བའི་དབང་གི་སྡོམ་པ་ལེན་པ་ནི་དེའི་མ་ཡིན་ལ། རང་གི་ཤེས་རབ་ཡེ་ཤེས་ཐོབ་པ་ནི་སྲིང་མོ་དང་། གཞན་དག་ནི་བུ་མོ་ཞེས་པ་ནི་ངེས་པ་ཡིན་ནོ། །དེ་ལ་མི་སྤྱོད་དོ་ཞེས་པ་ནི་སློབ་
དཔོན་གྱི་གཟུངས་མ་ཡིན་པས་དེ་ལ་སྤྱད་པས་ན་སློབ་དཔོན་མི་མཉེས་པའི་རྒྱུ་ཡིན་པས་སྡིག་པས་གོས་པར་མི་འགྱུར་རམ་སྙམ་པ་ལ། སངས་རྒྱས་གཙོ་བོ་ཞེས་པ་ལ་སོགས་པ་གསུངས་ཏེ། སློབ་དཔོན་གྱིས་གནང་བའི་ཁུ་འཕྲིག་གི་རྟོག་པ་མེད་པས་མི་ཆགས་ཞེས་པའི་དོན་ཏེ་མ་གནང་བ་ལ་མི་
སྤྱོད་དོ་ཞེས་པའི་ཐ་ཚིག་གོ། །ད་ནི་ཚིག་དེ་རྣམས་ལ་དབང་པོ་དམན་པའི་སེམས་ཅན་དག་ཐེ་ཚོམ་སྐྱེ་བས་དེ་སྤང་བའི་ཕྱིར། བྱང་ཆུབ་སེམས་དཔའ་རྣམས་ཀྱི་གླན་ཀ་སྤང་བའི་རིམ་པ་གསུངས་པ། དེ་ནས་ཞེས་པ་ལ་སོགས་པའོ། །དེ་ལ་སྒྲིབ་པ་རྣམ་པར་སེལ་བ་ལ་སོགས་པ་ཞེས་པ་ནི་རྡོ་རྗེ་སེམས་
དཔའི་བྱིན་གྱི་རླབས་ཀྱི་རྐྱེན་གྱིས་སངས་རྒྱས་ཐོབ་པ་ཆོས་ཀྱི་དབྱིངས་ཀྱི་ཕོ་བྲང་ན་གནས་པ་ཡིན་གྱི། ཉེ་བར་བསྒྲུབ་པའི་ལྷ་མ་ཡིན་ཏེ་དེ་ནི་ཞུ་བ་ལ་མ་འབྱོར་བའི་ཕྱིར་རོ། །བྱང་ཆུབ་སེམས་དཔའི་སྒྲ་ནི་གོང་དུ་བསྟན་ཏེ་ཐམས་ཅད་དུ་ཤེས་པར་བྱའོ། །ངོ་མཚར་དང་སྨད་ཅེས་པ་ནི་ཚིག་དང་དོན་ལའོ། །
ཞུས་པ་དེ་ཁོ་ན་མི་རིགས་པར་མཐོང་ནས། འཁོར་གྱི་དེ་བཞིན་གཤེགས་པས་བཤུང་བ་བྱས་པ། དེ་ནས་ཞེས་པ་ལ་སོགས་པའོ། །དེ་ལ་ཐོང་ཞེས་པ་ནི་བསམ་པ་དེ་ཤིན་ཏུ་ངན་པས་ཐོང་ཞེས་ཞུས་པ་ཡིན་ནོ། །ཅིའི་ཕྱིར་ཞེ་ན་ཡེ་ཤེས་སྙིང་པོ་ཅན་རྣམས་ཀྱི། །ཞེས་པ་ལ་སོགས་པ་སྨོས་ཏེ། ཡེ་ཤེས་
เล่ม ๔๕ · หน้า 166a
ཁོ་ན་སྙིང་པོ་ཡིན་པའམ། ཡང་ན་ཡེ་ཤེས་ཀྱི་སྙིང་པོ་བྱང་ཆུབ་ཀྱི་སེམས་དང་ལྡན་པ་རྣམས་ཀྱི་ཞེས་པ་སྟེ། རྣམས་ཀྱི་ཆོས་ཉིད་འདི་ཞེས་སྦྱར་ཏེ་སྤྱོད་པ་ནི་རྣམ་པར་དག་པའི་ཆོས་ཉིད་ཡིན་ཞེས་པའི་དོན་ཏོ། །དེའི་འབྲས་བུ་ནི་སྙིང་པོ་ཞེས་པ་ལ་སོགས་པ་སྟེ་སྙིང་པོ་ཞེས་
པ་ནི་སྤྱོད་པ་ཁོ་ན་ཡེ་ཤེས་ཀྱི་རང་བཞིན་ཡིན་པས་དེ་སྐད་དོ། །ཆོས་ཞེས་པ་ནི་རིགས་པའི་ཆོས་ཏེ་རྣམ་པར་དག་པ་དེ་ལས་བྱུང་བ་འདི་ཞེས་སྦྱར་རོ། །བྱང་ཆུབ་ཀྱི་གནས་ཡིན་ཞེས་པའི་ཚིག་གིས་བསྟན་ཏོ། །དེ་ལྟར་རང་བཞིན་དང་འབྲས་བུ་ཐོབ་ནས་དེ་ལ་ངན་པ་ཞེས་གོང་དུ་སྨད་པ་ནི་བདག་ཅག་ནི་འགྱོད་
པའོ་ཞེས་འཇིགས་པ་གསུངས་པ་དེ་ནས་ཞེས་པ་ལ་སོགས་པའོ། །དེ་རྣམས་ཀྱི་དོན་ནི་གོ་སླ་བས་མ་བཤད་དོ། །དེ་ནས་རྡོ་རྗེ་འཆང་བའི་མཐུ་དང་བསྟན་པའི་ཆོས་དེ་ཁོ་ན་ལ་དམ་པ་སྐྱེས་ཏེ་བསྟོད་པ་གསུངས་པ་དེ་ནས་ཞེས་པ་ལ་སོགས་པའོ། །ཨེ་མའོ་ཆོས་ཞེས་པ་ནི་སྐྱེ་བ་མེད་པའི་ཚུལ་ཁོ་ན་སྟེ་ཚིག་འོག་
མ་ནི་རྩ་བ་བསྐང་བའོ། །ཆོས་ཀྱི་དོན་འབྱུང་བ་ཞེས་པ་ནི་དེ་ལས་བྱུང་བའི་སྤྱོད་པའོ། །ཆོས་དག་པ་ཞེས་པ་ནི་སྤྱོད་པའི་འབྲས་བུའོ། །རྒྱལ་པོ་ཞེས་པ་ནི་སྤྱོད་པ་དང་འབྲས་བུ་དེ་གཉི་ག་བདག་མེད་པ་ཤིན་ཏུ་རྒྱལ་བའོ། །དེ་ལྟར་སྤྱིར་གསུངས་ནས་སྐུ་ལ་སོགས་པ་ཕྱེ་སྟེ་གསུངས་པ། སྐུ་དང་ཞེས་པ་ལ་སོགས་
པའོ། །སྐུ་ཡང་གསུང་དང་ཐུགས་དང་ལྡན་པས་ན་གསུང་ཐུགས་ཞེས་སྨོས་སོ། །དེ་ཁོ་ན་མཚན་ཉིད་དང་བྲལ་བའི་དག་པ་ནམ་མཁའ་དང་འདྲ་བ་ལས་བྱུང་བས་དག་པ་དེ་ལ་གནས་ཞེས་བྱའོ། །མི་འགྱུར་ཞེས་པ་ནི་སྐུ་དེ་དུས་གསུམ་དུ་མི་འགྱུར་བ་སྟེ་མཚན་ལ་སོགས་པར་སྣང་བ་དེ་ཡང་དག་པར་མེད་ཅེའོ། །དུས་
གསུམ་དག་པའི་ལམ་དུ་བྱུང་། །ཞེས་པ་ནི་ཐུགས་དེ་ཡང་སྟོང་པ་ཁོ་ན་ལས་བྱུང་བའོ། །ནམ་མཁའ་ཆེན་པོ་ཞེས་པ་ནི་ཐུགས་སུ་དག་པའི་ཐུགས་ཏེ་གཙོར་དེ་ལས་གསུང་འབྱུང་བས་ན་དེ་ནི་དབྱིངས་ཞེས་བྱ་སྟེ། གསུང་དེ་ཡང་སྟོང་པ་ཁོ་ན་ལས་བྱུང་བས་ནམ་མཁའི་ལམ་ཞེས་བྱ་སྟེ་དེ་ནི་གསུང་ལ་བསྟོད་པའོ། །
ནམ་མཁའ་དང་འདྲ་བའི་སྐུ་ལས་བྱུང་བའི་གསུང་སྟོན་པའི་ཐུགས་ནི་རྡོ་རྗེ་གསུམ་མཆོག་སྟེ། ཐུགས་དེ་ཡང་སྟོང་པ་ལས་བྱུང་བས་ནམ་མཁའི་གནས་ཞེས་ཏེ། དེ་ནི་ཐུགས་ལ་བསྟོད་པའོ། །ལེའུ་ལྔ་པའི་འགྲེལ་པ་རྫོགས་སོ།། །།ད་ནི་སྦྱོར་བ་དང་པོ་ལ་གཏོགས་པ་ཉེ་བར་སྒྲུབ་པ་ཞེས་བཏགས་
เล่ม ๔๕ · หน้า 166b
པ་སྐུ་དང་གསུང་དང་ཐུགས་བྱིན་གྱིས་རློབ་པ་དང་། རྗེས་སུ་ཆགས་པ་གཙོར་སྟོན་པའི་ལེའུ་གསུངས་པ་དེ་ནས་ཞེས་པ་ལ་སོགས་པའོ། །དེ་ལ་མི་བསྐྱོད་པ་ཞེས་པ་ནི་རྡོ་རྗེ་འཆང་བ་ཆེན་པོ་སྟེ་མི་བསྐྱོད་པ་ལྟ་བུའི་ཐུགས་རྡོ་རྗེའི་ཏིང་ངེ་འཛིན་ལ་ཞུགས་པས་དེ་སྐད་ཅེས་བྱ་སྟེ་ཐམས་ཅད་དུ་དེ་བཞིན་དུ་
སྦྱར་རོ། །ཨོཾ་ཞེས་པ་ལ་སོགས་པ་ནི་ཐུགས་རྡོ་རྗེའི་ས་བོན་ལས་སངས་རྒྱས་ཐམས་ཅད་ཞུགས་པའི་དེ་མ་ཐག་བརྗོད་པ་སྟེ། དེ་ལྟར་འོག་མར་ཡང་སྦྱར་རོ། །དེ་རྣམས་ཀྱི་སྒོམ་པ་གསུངས་པ། དེ་བཞིན་གཤེགས་པའི་རྡོ་རྗེ་གསང་བ་གསུམ་ཞེས་པ་ལ་སོགས་པ་སྟེ་གསུམ་ཞེས་པ་དང་མཚན་ཞེས་
འབྲེལ་ཏོ། །ཐབས་ཀྱིས་ཞེས་པ་ནི་ཨོཾ་ལ་སོགས་པའི་ས་བོན་གྱིས་སོ། །ཐུགས་སུ་ཞེས་པ་ནི་སྐུ་རྡོ་རྗེ་ལ་སོགས་པ་སྟེ་དེ་བསྐྱེད་པ་ལ་ཡང་ཐུགས་ཀྱི་མཚན་མ་ཁོ་ན་མཚན་ནོ། །དེ་ལྟར་བསྐྱེད་པ་ཡང་བསྐུལ་བ་ལ་སོགས་པའི་རིམ་པས་བྱིན་གྱིས་བརླབ་པར་བྱའོ་ཞེས་མདོར་བསྟན་པའི་ཕྱིར་
མཆོག་རབ་འདི་དག་ཅེས་སྨོས་ཏེ། དེ་ཡང་། བཟང་པོ་ཞབས་ཀྱིས་སྐྱེས་བུར་འགྱུར། །ཞེས་པ་ནས། གསང་བ་གསུམ་མཚན་མཐོང་ནས་སུ། །ཞེས་པའི་བར་དུ་རྒྱས་པར་གསུངས་སོ། །དེ་ལ་རྗེས་སུ་ཆགས་པའི་སྔགས་ལ་དཀོན་མཆོག་དཔལ་ལྟ་བུའི་དེ་ཁོ་ན་ཆགས་པའི་རྒྱུ་ཚོར་བའི་ངོ་བོ་ཡིན་པའི་
ཕྱིར་རོ། །མཆོད་པ་ལ་ཡང་དོན་ཡོད་གྲུབ་པ་སྨོས་པ་དེ་ཁོ་ན་ལས་ཀྱི་ངོ་བོ་ཡིན་པས་སོ། །དེ་ལ་སྔགས་འདི་ཉིད་ཀྱང་གོང་དུ་བརྗོད་པ་ནི་མ་ཡིན་ཏེ། ཆགས་པ་དང་མཆོད་པའི་རྗེས་སུ་དེའི་མཉམ་པའི་དོན་བརྗོད་པའོ། །དེ་ལ་འདོད་པའི་ཡོན་ཏན་ལྔ་ཞེས་པ་ནི་གཙོར་གསུངས་ཀྱི་ལྷ་མོའི་ངོ་བོ་
ཐམས་ཅད་བཟུང་སྟེ་ལེའུ་བརྒྱད་པ་ལས་དེ་ལྟར་སྣོད་དོ། །མཆོད་པ་རྣམ་པ་ལྔ་ཞེས་པ་ནི་མེ་ཏོག་ལ་སོགས་པའོ། །དེ་ཡང་བཟང་པོ་ཞབས་ཀྱིས། དེ་ལྟར་དབང་བསྐུར་རང་སྙིང་འོད། །ཅེས་པ་ནས། ཨོཾ་སརྦ་ཏ་ཐཱ་ག་ཏ་པཱུ་ཛ་ཞེས་པའི་བར་དུ་ཚིགས་སུ་བཅད་པ་གཉིས་དང་སྔགས་གསུངས་
སོ། །ད་ནི་སྐུ་དང་གསུང་དང་ཐུགས་ཁོ་ན་བྱིན་གྱིས་བརླབ་པ་གསུངས་པ། དེ་ནས་ཞེས་པ་ལ་སོགས་པའོ། །སྔགས་ལ་དམིགས་པ་ཞེས་པའི་རྡོ་རྗེ་གསུམ་གྱི་ཏིང་ངེ་འཛིན་དང་ལྡན་པའི་རྣལ་འབྱོར་པའོ། །ལུས་ཞེས་པ་ནི་དེའི་ཀླད་པ་ལ་གནས་པའི་ཨོཾ་གྱི་ས་བོན་ལས་སྐྱེས་པའི་སྐུའི་རྡོ་རྗེ་ཁོ་ན་སྟེ་ངག་
เล่ม ๔๕ · หน้า 167a
དང་ཡིད་ཀྱང་དེ་ལྟར་རོ། །དེ་ལྟར་ཡང་། སྙིང་མགྲིན་སྤྱི་བོར་གང་གནས་པའི། །ཞེས་པ་ལ་སོགས་པས་བསྟན་ཏོ། །བསྐུལ་ཞེས་པ་ནི་ཤིན་ཏུ་གསང་བའི་མཆོད་པས་མཉེས་པའི་དེ་མ་ཐག །དཔལ་ལྡན་རྡོ་རྗེ་ཐུགས་འཆང་བ། །ཞེས་པ་ལ་སོགས་པས་བསྐུལ་བའོ། །དེ་
ནས་བྱིན་གྱིས་བརླབ་པ་ནི་ཡིད་ནི་དགའ་ཞིང་ཞེས་པ་སྟེ། སངས་རྒྱས་དག་ཐུགས་དགྱེས་ནས་བྱིན་གྱིས་རློབ་པ་ནི། དངོས་གྲུབ་རབ་མཆོག་སྩོལ་བར་མཛོད། །ཅེས་བྱའོ། །ད་ནི་གོང་དུ་བྱིན་གྱིས་མ་བརླབས་པར་བསྐྱེད་པ་དེ་རང་བཞིན་མེད་པར་བསྒོམ་པ་གསུངས་པ། སེམས་ལ་དམིགས་པ་བདག་མེད་
པར། །ཞེས་པ་ལ་སོགས་པ་སྟེ་སེམས་ཞེས་པ་ནི་ཐུགས་རྡོ་རྗེའོ། །དེ་བདག་མེད་པ་སྒྱུ་མ་འདྲ་བར་བསྒོམ་པ་དེ་ལྟར་ངག་དང་ལུས་ཀྱང་ངོ་། །དེ་ཡང་ཐོག་མར་རང་གི་ལུས་ལ་སོགས་པ་རང་བཞིན་མེད་པར་ཤེས་པ་ལས་བསྐྱེད་དོ་ཞེས་པ་གསུངས་པ། ནམ་མཁའ་བཞིན་དུ་མཉམ་པའི་གནས། །ཞེས་
ཏེ་ནམ་མཁའ་དང་འདྲ་བར་བསྒོམ་པ་ཡེ་ཤེས་ཉིད་ལས་དེ་གསུམ་བསྐྱེད་པས་ན་གནས་ཤེའོ། །སྦྱོར་བ་རྣམ་པ་གསུམ་ཞེས་པ་ནི་རིག་མ་དང་སྦྱོར་བའོ། །བསྒྲུབ་ཅེས་པ་ནི་སྟོང་པར་ཤེས་པ་དེ་ལས་བསྐྱེད་དོ་ཞེས་པ་སྟེ་དེ་ཁོ་ན་གསལ་བར་བྱེད་པ་གསུངས་པ། ལུས་དང་ངག་སེམས་མཚན་ཉིད་འདི། །ཞེས་
པ་ལ་སོགས་པ་སྟེ། དཔྱད་ཅེས་པ་ནི་རང་བཞིན་མེད་པར་བྱས་ནས་སྔགས་ཨོཾ་ལ་སོགས་པས་བསྐྱེད་པའི་རྡོ་རྗེ་གསུམ་རིག་མ་དང་སྦྱོར་བར་བསྒོམ་ཞེས་པའི་ཐ་ཚིག་གོ། །ད་ནི་བྱིན་གྱིས་བརླབ་པའི་དེ་མ་ཐག་རང་བཞིན་མེད་པར་བསྒོམ་པ་གསུངས་པ། ལུས་དང་ངག་དང་སེམས་དམིགས་ན། །ཞེས་པ་ལ་
སོགས་པའོ། །བྱང་ཆུབ་མེད་ཅེས་པ་ནི་དོན་དམ་པར་ཆོས་ཀྱི་སྐུ་ལ་སོགས་པ་མེད་པས་དེ་བསྒོམ་པ་ཡང་མེད་དོ། །ད་ནི་ཕྲ་མོའི་སྦྱོར་བ་རྫོགས་པར་གསུངས་པ་དེ་ནས་ཞེས་པ་ལ་སོགས་པའོ། །དེ་ལ་རྡོ་རྗེ་འཆང་ཆེན་པོའི་ཕྲ་མོའི་སྦྱོར་བ་ལ་སངས་རྒྱས་ཀྱི་གཟུགས་རྡོ་རྗེ་འཆང་བ་བསྒོམས་ནས་ཕྲ་མོའི་ངོ་བོར་
སྦྱོར་བ་བརྩམས་ཏེ། དེ་ཡང་གང་ཞེ་ན། ནམ་མཁའི་དབྱིངས་ཀྱི་དབུས་གནས་པར། །ཞེས་ཏེ་རིག་མའི་གསང་བའི་ནམ་མཁའ་ཁོ་ན་ལ་བྱང་ཆུབ་ཀྱི་སེམས་དང་ས་བོན་ལས་གྱུར་པའི་མཚན་མའི་གདན་ཟླ་བའི་དཀྱིལ་འཁོར་བསྒོམ་ཞེས་སོ། །ཡང་མཚན་མ་དེའི་ལྟེ་བ་ལ་གནས་པའི་ཡི་གེ་ཧཱུཾ་གིས་བསྐྱེད་པའི་
เล่ม ๔๕ · หน้า 167b
ཕྲ་མོའི་ངོ་བོ་གསུངས་པ། སྣའི་རྩེ་མོར་ཞེས་པ་ལ་སོགས་པའོ། །ཡུངས་ཀར་ཞེས་པ་ནི་ལེའུ་གསུམ་པ་ལས་བཤད་པ་དེ་ཞེས་དྲན་པར་བྱའོ། །འགྲོ་དང་མི་འགྲོ་ཞེས་པ་ནི་གཡོ་བ་དང་མི་གཡོ་བའི་ངོ་བོ་ལྷ་རྣམས་དང་དེའི་གནས་ཞེས་པའི་དོན་ཏོ། །ཡུངས་ཀར་ལ་ཞེས་པ་ནི་བསྒོམ་ཞེས་པའི་དོན་ཏོ། །དེའི་
གནས་ཀྱི་མཚན་མ་བསྐྱེད་པ་གསུངས་པ། གསང་བའི་སྔགས་ཀྱིས་བརྟགས་པ་ཞེས་ཏེ་གནས་ཞེས་པ་ནི་བྱང་ཆུབ་ཀྱི་སེམས་རང་གི་ངོ་བོ་ལས་བྱུང་བའི་མཚན་མའོ། །གསང་བའི་སྔགས་ཀྱིས་བརྟགས་པའི་ཞེས་པ་ནི་ཡུངས་ཀར་ལ་སོགས་པ་ལ་ཡང་སྦྱར་ཏེ་དོན་ནི་ཀུན་ལ་སྦྱར་རོ། །མི་བསྐྱོད་པའི་གསུངས་
པ་ནམ་མཁའི་དབྱིངས་ཞེས་པ་ལ་སོགས་པ་སྟེ་ནམ་མཁའི་དབྱིངས་ནི་སྔར་བཤད་པ་བཞིན་དུ་ཀུན་ལ་སྦྱར་རོ། །དེའི་མཚན་མ་ནི་ཉི་མའི་དཀྱིལ་འཁོར་ཞེས་བྱེ་བྲག་ཙམ་གཟུང་ངོ་། །སངས་རྒྱས་སྐུའི་གནས་ཞེས་པ་ནི་བྱང་ཆུབ་སེམས་ལས་བྱུང་བའི་མཚན་མའོ། །དེའི་སྟེང་དུ་ཞེས་པ་ནི་དེའི་ལྟེ་བའི་
ཉི་མའི་སྟེང་དུའོ། །གནས་ཞེས་པ་ནི་རང་གི་ས་བོན་ཞེས་པ་སྟེ་དེ་ཡང་ཀུན་ལ་སྦྱར་རོ། །རྟག་པའི་གསུངས་པ་སྤྱན་གྱི་ཚུལ་དུ་སྦྱོར་བ་ཞེས་པ་ལ་སོགས་པ་སྟེ། སྤྱན་གྱི་ཚུལ་ནི་ཐབས་ཏེ་རྟག་པའི་སྦྱོར་བ་དང་ལྡན་པས་སོ། །རྡོ་རྗེ་པདྨོ་ཞེས་པ་ནི་ཕྲ་མོ་དེ་ལ་སྦྱོར་ཞེས་པ་སྟེ་དེ་ཡང་ཀུན་ལ་སྦྱོར་རོ། །
དེས་ནི་མཚན་མའི་རྟེན་གསལ་བའི་དཀྱིལ་འཁོར་བསྒོམ་ཞེས་པ་འདི་བྱེ་བྲག་གོ། །ཡང་རིན་ཆེན་འབྱུང་ལྡན་གྱི་གསུངས་པ་ནམ་མཁའི་དབྱིངས་ཞེས་པ་ལ་སོགས་པ་སྟེ། རིན་ཆེན་དཀྱིལ་འཁོར་ཞེས་པའི་དོན་དུ་གསུངས་སོ། །དང་པོའི་སྦྱོར་བ་ཞེས་པ་ནི་བསྙེན་པ་དང་པོ་ནས་རྗེས་སུ་ཆགས་པའི་
མཐར་ཐུག་པའོ། །དེ་ཡང་ཀུན་ལ་སྦྱར་རོ། །པདྨོའི་དཀྱིལ་འཁོར་ཞེས་པ་ནི་སྣང་བ་མཐའ་ཡས་དང་དོན་ཡོད་གྲུབ་པའི་སྟེ་ཉི་མའི་དཀྱིལ་འཁོར་ཡིན་ནོ། །ཞི་བ་ཞེས་པ་ནི་འོད་ཟེར་ལས་སངས་རྒྱས་དང་བྱང་ཆུབ་སེམས་དཔའ་སྤྲོ་བ་ཡིན་པས་དེ་སྐད་དེ། ལྷ་སྤྲོ་བ་ནི་ཞིབ་ཏུ་གསུངས་པར་བསྟན་ཏོ། །
གོང་དུ་སངས་རྒྱས་སྐུའི་གནས་ཞེས་པ་དེ་ལ་བཤད་པ་ཨུཏྤལ་ཞེས་པ་ལ་སོགས་པ་སྟེ་མཚན་མ་ཡིན་ནོ། །དེ་ལ་འདི་ནི་མི་བསྐྱོད་པ་ཡིན་ནོ། །དེ་བཞིན་དུ་རྡོ་རྗེ་འཆང་ཆེན་པོ་ཡང་དེ་ལས་མདོག་བསྒྱུར་བར་ཟད་དོ། །ཙ་ན་ཀ་ཞེས་པ་ནི་སྣང་བ་མཐའ་ཡས་ཀྱི་ཡིན་ནོ། །འཁོར་ལོ་ལ་སོགས་ཞེས་པ་
เล่ม ๔๕ · หน้า 168a
ནི་ལྷག་མ་ཡིན་ནོ། །གོང་དུ་ལྷ་སྤྲོ་བ་གསུངས་ནས་ད་ནི་མཚན་མ་སྤྲོ་བ་གསུངས་པ། སངས་རྒྱས་བྱང་ཆུབ་གནས་རྣམས་ནི། །ཞེས་ཏེ་འོད་ཟེར་གྱི་ཁ་ལས་རྡོ་རྗེ་ལ་སོགས་པ་ཡང་སྤྲོ་བའི་དོན་ཏོ། །ཆོས་ཀྱི་ཚིག་རྣམས་རབ་ཏུ་བརྗོད། །ཅེས་པ་ནི་དབུགས་ཀྱི་ཡི་གེས་བསྐུལ་བ། སཾ་ཧ་ར་མི་བེ་ཧེ་ཞེས་པ་ལ་སོགས་པས་
སྤྲོ་ཞིང་བསྡུའོ་ཞེས་པའི་དོན་ཏོ། །དེ་ཡང་བཟང་པོ་ཞབས་ཀྱིས། རང་གི་མཚན་མ་ཕྲ་མོའམ། །ཞེས་པ་ལ་སོགས་པ་ཚིགས་སུ་བཅད་པ་གཅིག་གསུངས་སོ། །ད་ནི་བསྟན་པའི་མཚན་མ་ཐོབ་ནས་རིག་པའི་བརྟུལ་ཞུགས་སྤྱད་པའམ། གཞན་དང་འདོད་པ་ལྟ་བུ་རིག་པ་བརྟུལ་ཞུགས་ལ་གཏོགས་པ་གསུངས་
པ། དེ་ནས་ཞེས་པ་ལ་སོགས་པའོ། །གཟུགས་དང་སྒྲ་དང་རོར་ལྡན་པར། །ཞེས་པ་ནི་གསང་བའི་མཆོད་པའི་ལོངས་སྤྱོད་དོ། །ཤེས་རབ་ཅན་ཞེས་པ་ནི་བརྟན་པའི་མཚན་མ་ཐོབ་པའམ་གཞན་འདོད་པ་ལྟ་བུའོ། །ཟས་སུ་བཤང་གཅི་ཞེས་པ་ནི་གང་གི་མཆོད་པའོ། །ཟས་སུ་ཤ་རྣམས་ཞེས་པ་ནི་གཙང་སྨེའི་རྟོག་པ་གཞོམ་
པའམ། དེ་རྣམས་ལ་ཁྱད་པར་གྱི་ཡོན་ཏན་ཡོད་པའི་ཕྱིར་རོ། །དེའི་ཡོན་ཏན་ནི། བྱང་ཆུབ་སེམས་དཔའ་བློ་ཆེན་དང་། །ཞེས་པ་ལ་སོགས་པའོ། །ལས་ཀྱི་གོ་འཕང་ཞེས་པ་ནི་ཞི་བའི་ལས་ལ་སོགས་པའོ། །ལུས་ངག་སེམས་ལས་འདས་པའོ། །ཞེས་པ་ནི་དེ་རྣམ་པར་དག་པར་འགྱུར་ཞེས་པའོ་
ལེའུ་དྲུག་པའི་འགྲེལ་པ་རྫོགས་སོ།། །།ད་ནི་སྦྱོར་བ་གསུམ་ལ་གཏོགས་པ་ལས་དབང་པོ་དམན་པ་རྣམས་ཀྱི་དོན་དུ་བསྒྲུབ་པའི་སྡོམ་པ་རྗེས་སུ་དྲན་པ་བཅུ་དྲུག་གཙོར་སྟོན་པའི་ལེའུ་བདུན་པ་གསུངས་པ། དེ་ནས་ཞེས་པ་ལ་སོགས་པའོ། །དེ་ལ་དམ་ཚིག་ཆེན་པོ་ཞེས་པ་ནི་དམ་ཚིག་ཀྱང་ཡིན་ལ་
ཆེན་པོ་ཡང་ཡིན་པས་དེ་སྐད་དེ་ཀུན་དུ་སྤྱོད་པའོ། །དེ་ཁོ་ན་ཞེས་པ་ནི་ངེས་པའམ་རྣམ་པར་དག་པའི་དོན་ཏོ། །འདོད་པའི་ལོངས་སྤྱོད་ཅེས་པ་ནི་བཟའ་བ་དང་བགོ་བ་ལ་སོགས་པའོ། །ཇི་ལྟར་འདོད་པ་ཞེས་པ་ནི་སེམས་ཇི་ཙམ་འདོད་པའོ། །འདི་ལྟ་བུའི་སྦྱོར་བ་གསུམ་ཐུགས་ལ་གཞག་པའོ། །ཡང་།
འདོད་པའི་ལོངས་སྤྱོད་ཐམས་ཅད་ལ། །ཞེས་པ་ནི་གཟུགས་ལ་སོགས་པ་སྟེ། འདི་དག་ཀུན་དུ་སྤྱོད་པ་དང་མཉམ་པར་གཞག་པའི་རང་གི་ལྷའི་སྦྱོར་བ་ཕྱག་རྒྱའི་དམ་ཚིག་ལ་ཡང་སྦྱར་ཏེ། དེ་ལྟར་ཡང་བཟང་པོ་ཞབས་ཀྱིས། གཟུགས་སོགས་འདོད་པའི་ལོངས་སྤྱོད་ཀྱིས། །ཞེས་པ་ལ་སོགས་
เล่ม ๔๕ · หน้า 168b
པའི་ཚིགས་སུ་བཅད་པ་ཕྱེད་དང་དྲུག་གསུངས་སོ། །དཀའ་ཐུབ་སྡོམ་པ་ཞེས་པ་ལ་སོགས་པ་མ་བཀག་པ་ཁོ་ནས་འགྲུབ་ཀྱི། དཀའ་ཐུབ་ལ་སོགས་པས་ནི་མ་ཡིན་ཏེ་གཞན་དུ་དུས་མིན་ཞེས་པ་ལ་སོགས་པའི་སྐྱོན་དང་བཅས་པའི་ཕྱིར་རོ། །ཇི་ལྟར་འདོད་པ་བསྟེན་ཞེས་པས་སློང་མོ་ལ་སོགས་པ་ཡང་
བསྟེན་ནམ་སྙམ་པ་ལས། དེ་ཡང་གཡེང་བའི་རྒྱུ་ཡིན་པས་མི་བསླང་ངོ་ཞེས་ཏེ། མ་བསླངས་པའང་ཞེས་པ་ནི་རྐུ་བ་ལ་སོགས་པའི་བརྟུལ་ཞུགས་སམ། ཟས་ཀྱི་འདུ་ཤེས་བསྐྱུངས་པའི་དོན་ཏོ། །སྔགས་ཀྱི་ཡན་ལག་ཅེས་པ་ནི་ཡན་ལག་བཞིའམ་སྦྱོར་བ་གསུམ་ཞེས་བྱའོ། །ད་ནི་འདོད་པའི་
ལོངས་སྤྱོད་ཀྱི་ཡོན་ཏན་གསུངས་པ། ལུས་དང་ངག་དང་སེམས་རྣམས་ནི། །ཞེས་པ་ལ་སོགས་པ་སྟེ་ལོངས་སྤྱོད་ཀྱི་འབྲས་བུ་ནི་བདེ་བ་ཡིན་ལ། དེའི་འབྲས་བུ་ནི་སྦྱོར་བ་ལ་སྒྱིད་མི་ལུག་ཅིང་བརྟུལ་ཕོད་པ་ཡིན་ནོ། །དེའི་འབྲས་བུ་ནི་བྱང་ཆུབ་ཡིན་ནོ། །གཞན་དུ་ཞེས་པ་ནི་དཀའ་ཐུབ་ཀྱིས་ལུས་ལ་
སོགས་པ་མ་བདེ་ན་སྒྱིད་ལུག་པ་ཉིད་ཀྱིས་དམྱལ་བར་སྐྱེའོ། །ཆོས་མཆོག་མི་གཡོ་བ་ཞེས་པ་ནི་འགྱུར་བ་མེད་པའི་སྐུའོ། །ཆགས་པའི་ཡེ་ཤེས་ཞེས་པ་ནི་བདེ་བའི་ཡེ་ཤེས་སོ། །དེ་ཁོ་ནས་བྱང་ཆུབ་སེམས་དཔའ་ལ་སོགས་པ་མཉེས་པ་ཡིན་ཏེ་དཔའ་བོ་ཞེས་པ་ནི་སངས་རྒྱས་རྣམས་སོ། །ད་ནི་འདོད་
པའི་བརྟེན་པ་དག་གིས་སྒོམ་པ་གསུངས་པ་གཟུགས་ལ་རྣམ་གསུམ་ཞེས་པ་ལ་སོགས་པ་སྟེ། རྣམ་གསུམ་ཞེས་པ་ནི་མཚན་མ་མེད་པ་ལ་སོགས་པ་རྣམ་པར་ཐར་པའི་སྒོ་གསུམ་དུ་ཤེས་ནས་ཏེ། དེ་ཉིད་ཅེས་པ་ནི་གཟུགས་གསུམ་པོ་དེ་བཞི་རྣམ་པར་སྣང་མཛད་དུ་བསྒོམ་པ་སྟེ། སྣ་ཚོགས་ཞེས་པ་ནི་
གཟུགས་ཐམས་ཅད་ཀྱི་རྣམ་པ་ཡིན་པའི་ཕྱིར་རོ། །འོག་མ་ཀུན་ལ་ཡང་དེས་ཤེས་པར་བྱའོ། །འདོད་ཆགས་ཆོས་ཀྱི་འབྱུང་གནས་གཙོ། །ཞེས་པ་དང་། ཐོགས་མེད་རྡོ་རྗེ་འཛིན་ཞེས་པ་ནི་བསྒོམ་པ་སྟེ། སྒྲའི་བདག་པོ་ནི་མི་བསྐྱོད་པ་ཡིན་ཞིང་། རོའི་བདག་པོ་ནི་སྣང་བ་མཐའ་ཡས་ཡིན་པའི་ཕྱིར་རོ། །
དེ་ལྟར་ཕྱེ་བ་གསུངས་ནས་རྡོ་རྗེ་འཛིན་པའི་ངོ་བོ་བསྡུས་པ་གསུངས་པ། གཟུགས་སྒྲ་རོ་ལ་སོགས་པ་ལ། །ཞེས་པ་ལ་སོགས་པ་སྟེ་འདི་ནི་ཞེས་པ་ནི་འདིའི་སྒོམ་པ་ཞེས་པའི་དོན་ཏོ། །གསང་བའི་སྙིང་པོ་ཞེས་པ་ནི་རྡོ་རྗེ་འཆང་ཆེན་པོ་སྟེ་དེ་ནི་བསྡུས་པ་ཡིན་ནོ། །ཡང་ན་དེ་ལ་བསྒོམ་པ་ནི་ཞེས་པ་ནི་ཡང་ན་
เล่ม ๔๕ · หน้า 169a
ཕྱེ་བའི་རྣམ་པ་གཟུགས་ཀྱི་རྡོ་རྗེ་མ་ལ་སོགས་པའི་རིགས་ཀྱི་ལྷ་མོ་རྣམས་སུ་སྒོམ་མོ། །དེ་དང་ཀུན་དུ་སྤྱོད་པ་མཐའ་དག་གི་དོན་དེ་ཡང་བཟང་པོ་ཞབས་ཀྱིས། ཏིང་ངེ་འཛིན་ལས་ལངས་ནས་སུ། །ཞེས་པ་ནས། སངས་རྒྱས་ཀུན་གྱིས་མཆོད་པ་ཡིན། །ཞེས་པའི་བར་དུ་
ཚིགས་སུ་བཅད་པ་དགུ་གསུངས་སོ། །དེ་ནི་རྗེས་སུ་དྲན་པ་གསུངས་པ། སངས་རྒྱས་རྗེས་སུ་དྲན་པ་སྦྱར། །ཞེས་པ་ལ་སོགས་པ་སྟེ་དེ་ལ་སངས་རྒྱས་ནི་རྟག་པ་གཙོར་གྱུར་པའོ། །ཆོས་དང་རྡོ་རྗེ་ནི་གསུང་དང་ཐུགས་གཙོར་གྱུར་པ་སྟེ། དེས་ནི་སྐུ་དང་གསུང་དང་ཐུགས་རྣམས་བསྒོམ་པར་འགྱུར་རོ་
ཞེས་བསྡུས་པའོ། །རིགས་ནི་རིན་ཆེན་འབྱུང་བ་ལ་སོགས་པའོ། །ཁྲོ་བོ་ནི་གཤིན་རྗེའི་གཤེད་ལ་སོགས་པ་སྟེ་དེས་ན་རྣམ་པ་གཞན་བསྟན་ཏོ། །ལྷ་རྗེས་སུ་དྲན་པ་ནི་དེ་རྣམས་མ་ཡིན་པ་འོག་ནས་འབྱུང་བ་གཞན་ནོ། །དེ་དག་ནི་གང་ཕྲ་མོའི་སྦྱོར་བ་ལས་ཉམས་ཤིང་གཟུང་བ་ལས་ཀྱང་ཉམས་པ་དག་ལ་
ལས་ཀྱི་ཕྱག་རྒྱས་དངོས་སུ་སོ་སོར་དྲན་ནི་རྗེས་སུ་དྲན་པ་ཞེས་ཏེ་ཕྱི་མ་ལས་བསྒོམས་ནས་རྗེས་སུ་དྲན་པ་གང་ཞེས་པ་ལ་སོགས་པ་གསུངས་སོ། །དེ་རྣམས་ཀྱི་ཁྱད་པར་གསུངས་པ་བུད་མེད་ཅེས་པ་ལ་སོགས་པ་སྟེ། དེ་རྣམས་ཀྱི་སྤྱིའི་དོན་ནི་གཟུང་བ་ལས་ཉམས་པ་དེ་ནི་དབང་པོ་ཤིན་ཏུ་དམན་པ་ཡིན་
པས། སྐུ་དང་གསུང་དང་ཐུགས་དང་སེམས་ཅན་དང་སྐུ་གསུང་ཐུགས་བསྡུ་བ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། མ་སྐྱེས་པ་དང་། དམ་ཚིག་བཏུང་བ་དང་། མཆོད་པ་རྗེས་སུ་དྲན་པ་རྣམས་ཀྱིས་སྔར་བྲོད་པ་བསྐྱེད་པ་ལ་སོགས་པ་བྱས་ཏེ། ལས་ཀྱི་ཕྱག་རྒྱ་བཙལ་ནས་སངས་རྒྱས་རྗེས་
སུ་དྲན་པ་ལ་སོགས་པ་རང་གི་ཚུལ་དྲན་པར་བྱའོ་ཞེས་བྱ་བ་འདི་ཡིན་ནོ། །ལོ་གྲངས་བཅུ་དྲུག་ཅེས་པ་ནི་སྲིང་མོ་སྟེ་གོང་མ་དང་འོག་མར་ཡང་སྦྱར་རོ། །གནས་གསུམ་ཞེས་པ་ནི་བསྒྲུབ་པ་སྟེ་ཡན་ལག་གཞན་ཡང་ཤེས་པར་བྱའོ། །སྤྱན་ལ་སོགས་པ་ཞེས་པ་ནི་རང་གི་རིག་མའོ། །ཡེ་ཤེས་ཡི་གེ་ཧཱུཾ་དང་ཨོཾ་
དག་ཅེས་པ་ལ་སོགས་པ་ནི་གསང་གནས་ཀྱི་སྦྱོར་བ་སྟེ། ཧཱུཾ་གིས་གསང་བའི་རྡོ་རྗེ་དང་པདྨའི་འདབ་མ་བསྒོམ་མོ། །ཨོཾ་གྱིས་རྡོ་རྗེ་ནོར་བུའོ། ཨས་པདྨའི་ལྟེ་བ། ཕཊ་གཉིས་ཀྱིས་མན་ངག་ལུས་བསྟན་པའི་ལམ་དུའོ། །དེ་ལ་རྗེས་སུ་དྲན་པ་རེ་རེ་ནས་གསུངས་པ་དེ་ལ་ཞེས་པ་ལ་སོགས་པའོ། །སངས་རྒྱས་
เล่ม ๔๕ · หน้า 169b
གཟུགས་ཞེས་པ་ནི་དཀྱིལ་འཁོར་རྗེས་སུ་དྲན་པ་ལ་སོགས་པའི་རིམ་པ་རྟག་པ་གཙོ་བོར་གྱུར་པ་བསྒོམ་པ་སྟེ། དེའི་སྤྲིན་རྣམས་སྤྲོ་བ་དང་བསྡུ་བ་ལ་སོགས་པ་སྦྱར་བ་ནི་སངས་རྒྱས་རྗེས་སུ་དྲན་པ་སྟེ་དེ་འོག་མ་བཞི་ལ་ཡང་སྦྱར་རོ། །རྡོ་རྗེ་འཆང་ཆེན་པོའམ་མི་བསྐྱོད་པའོ། །དམ་ཚིག་རྗེས་སུ་དྲན་པ་ནི་དེ་རྣམས་ཀྱི་
སྐུ་བསྐྱེད་པ་སྟེ། ཁུ་བའི་ཐིགས་པའི་རིམ་པ་ལས་རྡོ་རྗེ་སེམས་དཔའ་ལ་སོགས་པ་བསྐྱེད་དོ་ཞེས་པའི་དོན་ཏོ། །ཁ་ཅིག་ནི་ཁུ་བ་ལས་རྡོ་རྗེ་སེམས་དཔའོ། །དེ་ལས་འདོད་པའི་ལྷའོ་ཞེས་རྐྱེན་དུ་སྨྲ་སྟེ། ཁོ་བོ་ནི་བརྒྱུད་པའི་རིམ་པ་ལས་གང་དུ་ཡང་གསང་བའི་གནས་སུ་བསྐྱེད་པ་རྣམས་ལས་རྡོ་རྗེ་སེམས་
དཔའི་རྐྱེན་དེ་མ་མཐོང་ངོ་། །དེ་ལས་ཕྱེ་བ་ནི་དཀྱིལ་འཁོར་རྗེས་སུ་དྲན་པ་སྟེ་རང་གི་ཁུ་བ་སྔ་མ་ཁོ་ན་ལས་རིན་པོ་ཆེ་ཡུངས་ཀར་ལྟ་བུ་ཤིན་ཏུ་ཟླུམ་པོའི་དཀྱིལ་འཁོར་བྱའོ་ཞེས་པའི་དོན་ཏོ། །དེ་ལ་སྐུ་རྗེས་སུ་དྲན་པ་ནི་སངས་རྒྱས་ཀྱི་སྐུ་ནི་རྣམ་པར་དག་པའི་ཕུང་པོ་ལྔས་རྒྱས་པ་སྟེ། བདག་གིས་ཀྱང་དེང་སང་ཡན་ཆད་
དུ་དེ་བཞིན་བསྒོམས་སོ་ཞེས་དྲན་པ་ནི་སྐུའི་རང་བཞིན་ཞེས་བྱའོ། དེས་ན་བདག་ཀྱང་དེ་འདྲ་བར་འགྱུར་རོ་སྙམ་དུ་བྲོད་པ་བསྐྱེད་པར་བྱའོ། །འོག་མར་ཡང་དེ་བཞིན་སྦྱར་ཏེ། དེ་དང་འདྲ་ཞེས་པ་ནི་དེ་བསྒོམ་པར་ཞེས་དོན་ཏོ། །རྡོ་རྗེ་འཛིན་པ་ལྟ་བུར་ནི། །ཞེས་པ་ནི་འགྱུར་ཞེས་སྦྱར་རོ། །སྐུ་དང་གསུང་དང་
ཐུགས་ཀྱིས་མཚན། །ཞེས་པ་ནི་སེམས་ཅན་ཐམས་ཅད་ཀྱི་སེམས་ནི་སྐུ་ལ་སོགས་པའི་རང་བཞིན་ནོ་ཞེས་གཅིག་ཏུ་བྲོད་པའོ། །དེ་ནི་ནམ་མཁའ་ལྟར་མཉམ་པའི་སྤྱོད་པ་ཡིན་ནོ། །དེ་ལ་སྔགས་ཐམས་ཅད་ཀྱི་སྐུ་དང་གསུང་དང་ཐུགས་ཞེས་པ་ནི་བསྒྲུབ་པའི་ངོ་བོ་སྟེ། རྡོ་རྗེ་སྔགས་ཀྱི་སྐུ་གང་ཡིན་ཞེས་པ་ནི་
སངས་རྒྱས་ཀྱི་རྡོ་རྗེ་གསུམ་པོ་དག་ཀྱང་བསྐུལ་བ་དང་སྔགས་ཀྱི་གསུང་དང་སྤྲོ་བའི་སྐུས་བསྒོམ་པ་ལྟར་བདག་གིས་ཀྱང་དེང་སང་ཡན་ཆད་བསྒོམས་པས་དེ་དང་འདྲ་བར་འགྱུར་ཞེས་བྲོད་པ་སྟེ་དེ་བཞིན་ཡན་ལག་གཞན་ལ་ཡང་དྲན་པར་བྱའོ། །ཡང་དམ་ཚིག་རྗེས་སུ་དྲན་པ་གསུངས་པ་ཁུ་བ་ཞེས་པ་ལ་སོགས་པའོ། །
ཆོ་ག་བཞིན་ཞེས་པ་ནི་བཟང་པོ་ཞབས་ལ་སོགས་པས་བཤད་པའི་བདུད་རྩིའི་སྦྱོར་བའོ། །དེ་བཞིན་གཤེགས་པའི་འཁོར་བསད་ན། །ཞེས་པ་ནི་དབང་པོ་དམན་པའི་རྣམ་པར་རྟོག་པ་བཅོམ་པ་སྟེ་གཉིས་སུ་མེད་ཅེས་པའི་དོན་ཏོ། །དངོས་གྲུབ་རབ་ཏུ་འཐོབ་པར་འགྱུར། །ཞེས་པ་ནི་དེའི་སྟོབས་ཀྱིས་ཉམས་པ་སླར་
เล่ม ๔๕ · หน้า 170a
གསོས་པར་འགྱུར་བའི་དོན་ཏོ། །རང་བཞིན་གྱིས་ནི་རབ་ཏུ་གསལ། །ཞེས་པ་ལ་སོགས་པ་ནི་འདི་ལྟར་གསུངས་ཏེ་ནམ་མཁའ་ལྟར་གསལ་བ་དང་། མ་སྐྱེས་པ་དང་། ཉོན་མོངས་པ་མེད་པ་དང་། དེ་རྟོག་པ་མེད་པ་དང་། རྒྱུ་མེད་པ་དང་། འབྲས་བུ་མེད་པ་
རྣམས་བསྒོམ་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། དེས་ནི་བསྒོམ་མོ་ཞེས་པ་ནི་འདི་ཡིན་ནོ། །དེ་ལས་ཕྱེ་བའི་ངོ་བོ་ནི་རབ་ཏུ་གསང་བ་དང་མཚན་མ་མེད་དང་མི་འགྱུར་བ་སྟེ། དཔེ་ནམ་མཁའ་ལྟ་བུ་དང་། གཉིས་སུ་མེད་པ་དང་། གཉིས་སུ་མེད་པ་མ་ཡིན་པ་དང་། ཞི་བ་དང་། ཤིན་ཏུ་དྲི་མ་མེད་པ་
སྟེ། དཔེ་ནམ་མཁའ་ལྟར་དེ་གཉིས་ནི་མ་སྐྱེས་པ་དེ་ཁོ་ན་ལ་གསུངས་པ་སྟེ་དེ་བསྒོམ་པའོ། །དེ་གཉིས་ཀྱི་སྟོབས་ཀྱིས་དབང་པོ་དམན་པ་དེ་མཆོག་ཏུ་འགྱུར་བ་ཡིན་ནོ། །ཞེ་སྡང་རིགས་ལ་སོགས་པའི་མཆོད་པ་ནི་དམ་ཚིག་རྗེས་སུ་དྲན་པ་སྟེ་ལོ་གྲངས་བཅུ་གཉིས་ཞེས་པ་ནི་ཐ་མ་གསུངས་པ་སྟེ་གོང་མ་
གཉིས་ཀྱང་སྦྱར་རོ། །རིགས་ཀྱི་སྦྱོར་བ་ཞེས་པ་ནི་རང་གི་རིག་མའི་སྦྱོར་བའོ། །འདིར་ནི་དེ་བཞིན་གཤེགས་པའི་སྐུ་ཞེས་པ་ལ་སོགས་པ་ནི་རྗེས་སུ་དྲན་པ་ཐམས་ཅད་ཀྱི་འབྲས་བུ་སྟེ་དེ་བཞིན་གཤེགས་པའི་སྐུ་ཞེས་པ་ལ་སོགས་པ་ནི་མཆོག་གོ། །སྐུ་དང་ཞེས་པ་ལ་སོགས་པ་ནི་རིགས་འཛིན་ནོ། །ཕྲ་མོ་
ཞེས་པ་ནི་མི་སྣང་བ་ལ་སོགས་པ་ཏེ་དེ་རྣམས་ཀྱི་རྒྱུད་ཀྱི་ཆོ་ག་སྦྱར་བ་ཙམ་གྱིས་འགྲུབ་ཅེས་པའི་དོན་ཏོ། །ལེའུ་བདུན་པའི་འགྲེལ་པ་རྫོགས་སོ།། །།ད་ནི་ཐུན་མོང་དུ་གྱུར་པའི་མཆོད་པའི་སྡོམ་པ་ཞེས་གསུངས་པ། དེ་ནས་ཞེས་པ་ལ་སོགས་པའོ། །དཀོན་མཆོག་དཔལ་ཞེས་པ་ནི་དེའི་བདག་པོ་
ཡིན་པས་དོན་ཡོད་གྲུབ་པ་གཟུང་བར་བྱའོ། །རྡོ་རྗེ་རྒྱལ་པོ་ཞེས་པ་ནི་ལྷ་རྣམས་ཀྱི་མཆོག་ཅེས་པའོ། །ཐེག་པ་ཆེ་ཞེས་པ་ནི་དེ་ཉིད་འབྲས་བུའི་ཐེག་པ་ཡིན་ནོ། །ནམ་མཁའི་སྤྱོད་པ་ནི་ནམ་མཁའ་ལྟར་དག་པའི་སྤྱོད་པ་སྟེ། དེ་རྣམ་པར་སྦྱོར་བར་མཛད་པའི་དོན་ཏོ། །རྡོ་རྗེ་ཀུན་གྱི་ཞེས་པ་ནི་ལྷ་ཐམས་ཅད་
ཀྱི་མཆེད་པའི་དབྱིངས་ནི་རྒྱུ་སྟེ་རྡོ་རྗེ་འཆང་དེ་ཡིན་ནོ། །རྒྱལ་མཆོག་ནི་བོད་པ་སྟེ་སྤྱིར་ཞུས་ནས་ཕྱེ་སྟེ་གསུངས་པ་འདོད་ཆགས་ཞེས་པ་ལ་སོགས་པའོ། །འདོད་ཆགས་ལ་སོགས་པ་དེ་ཁོ་ན་རྡོ་རྗེའི་ཐེག་པ་སྟེ་རབ་སྟོན་ཞེས་པ་ནི་སྟོན་པ་པོ་སྐུ་ཡིན་ནོ། །ནམ་མཁའི་དབྱིངས་དང་མཚུངས་ཞེས་པ་ནི་སྐུ་དེ་ཤིན་ཏུ་
เล่ม ๔๕ · หน้า 170b
དག་གོ་ཞེས་པའི་དོན་ཏོ། །ཐར་པའི་ལམ་ཞེས་པ་ནི་སྔགས་ཀྱི་ཚུལ་དཀྱིལ་འཁོར་ལ་སོགས་པ་སྟེ་སྟོན་པ་ཞེས་པ་ནི་གསུང་ཉིད་དོ། །ཐེག་པ་གསུམ་ནི་ཕྱི་ནང་གསང་བ་གསུམ་སྟེ་དེ་དང་མི་འབྲལ་བ་ནི་གནས་པ་ཡིན་གྱི་ཡང་དེ་ལ་སྩོལ་བ་ནི་མ་ཡིན་ནོ། །སངས་རྒྱས་སྐལ་མཆོག་ཅེས་པ་ནི་སྐལ་བ་
མཆོག་སྩོལ་བར་མཛད་ཅེས་པའི་དོན་ཏོ། །གསུང་དེ་ནམ་མཁའ་ལྟར་དག་ཅེས་བསྡུའོ། །སེམས་ཞེས་པ་ནི་ཐུགས་ཏེ་དེ་ནི་ཆེན་པོ་ལ་གཟིགས་པས་སྤྱན་ནོ། །ཆོས་ཀྱི་འཁོར་ལོ་རབ་བསྐོར་བ། །ཞེས་པའི་དོན་ཏོ། །ཐུགས་དེ་ཡང་སྐུ་ལ་སོགས་པ་དང་ལྡན་པ་སྐུ་དང་ཞེས་པ་ལ་སོགས་པ་སྨོས་སོ། །དེ་
མ་ཐག་ལན་གསུངས་པ་དེ་ནས་ཞེས་པ་ལ་སོགས་པའོ། །ཐམས་ཅད་ཅེས་པ་ནི་སྐུ་ལ་སོགས་པའོ། །ཀུན་དབང་པོ་ཞེས་པ་ནི་ཀུན་གྱི་བདག་པོའོ། །དེ་རྡོ་རྗེ་དང་རིན་པོ་ཆེ་འཛིན་ཞེས་སྦྱར་རོ། །ཐམས་ཅད་དབང་བསྐུར་ནི་རྡོ་རྗེ་ཡེ་ཤེས་ཀྱི་སྤྱོད་པའོ། །མཆོད་པའི་མཆོག་ཅེས་པ་ནི་བཤད་ཅེས་འབྲེལ་ཏེ། རྡོ་རྗེ་མི་
ཕྱེད་ཉིད་སྐུ་དང་གསུང་དང་ཐུགས་ཀྱི་སྐལ་བ་མཆོག་སྟེ། དེ་ལྟ་བུའི་རྒྱལ་བ་འབྱུང་བའི་མཆོད་པའོ། །དེའི་ངོ་བོ་གསུངས་པ་ན་ཆུང་ཞེས་པ་ལ་སོགས་པའོ། །བྱོལ་སོང་ནི་བུད་མེད་ཡིན་ལ་སྐྱེ་གནས་ནི་ཉི་ཤུ་ལྔ་པ་མ་རྙེད་ན་བྱང་ཆུབ་ཀྱི་སེམས་དང་ལྡན་ནམ་མི་ལྡན་པ་བརྟག་པ་སྟེ། ཇི་ཙམ་རོ་རྩ་བའི་མཚན་
མ་མིག་དང་སེན་མོ་ལ་སོགས་པ་བརྟག་གོ་ཞེས་པའམ། ཡང་དེ་ཉིད་ལས་རཀྟ་འབྱུང་བའི་འདུ་ཤེས་པར་བྱའོ། །དེ་ནི་ལོ་གྲངས་ལས་མ་ཡིན་ནོ། །ས་ཕྱོགས་གཙང་ཞིང་ཞེས་པ་ནི་གདུག་པ་རྣམས་མེད་པའོ། །དབེན་པ་ནི་སྐྱེ་བོ་ཉུང་བའོ། །རྒྱལ་བའི་བདག་ཉིད་ཞབས་ཀྱིས་བཅགས་པ་ཉིད་དོ། །
གནས་ཀྱི་ཁྱད་པར་འདི་ནི་ལེའུ་བཅུ་གཅིག་པ་ལས་ཤེས་པར་བྱའོ། །དེ་ཡང་བཟང་པོ་ཞབས་ཀྱིས། གང་ལ་ཡིད་དགའ་གནས་སུ་ནི། །ཞེས་པ་ནས་ཐོ་རངས་ཤར་བལྟས་ཞེས་པའི་བར་དུ་གསུངས་སོ། །ནུ་མ་དང་ཀླད་པ་དང་རྐང་པའི་བར་ཞེས་པ་ནི་སྙིང་ལ་སོགས་པའོ། །ལྟེ་བ་ཉིད་རྐེད་པའོ། །
ཁྱད་པར་གྱི་ཆོ་ག་དེ་རྣམས་དང་། གཞན་ཡན་ལག་བཞི་དང་ལྡན་པའི་རིག་མ་ནི་ཡེ་ཤེས་རྒྱ་མཚོ་སྟེ་ཟབ་པའི་བདག་ཉིད་ཀྱི་ཕྱིར་རོ། །བདག་ཉིད་ཅེས་པ་ནི་ཡེ་ཤེས་སེམས་དཔའ་སྟེ། གཟུགས་ནི་མ་ཡིན་ཏེ་དེ་ལྟར་ཡང་ཕྱི་མ་ལས། རིག་མ་ཡང་ནི་ཐབས་ཀྱིས་རྒྱལ། །ཞེས་གསུངས་སོ། །ཟླ་བ་ཞེས་པ་
เล่ม ๔๕ · หน้า 171a
ནི་ཉི་མ་ལ་བཟུང་སྟེ་འདོད་པའི་ཁྱད་པར་རོ། །དེའི་ཆོ་ག་ཡང་བཟང་པོ་ཞབས་ཀྱིས། དེ་བཞིན་འབྲིང་ལ་རྒྱུ་མཐུན་སོགས། །ཞེས་པ་ནས། སངས་རྒྱས་ལྔ་ཡིས་གང་བར་བསྒོམ། །ཞེས་པའི་བར་དུ་ཚིགས་སུ་བཅད་པ་ཕྱེད་དང་གཉིས་དང་སྙིང་པོ་ལྔ་གསུངས་པ་སྟེ།
ཞི་བ་རྡོ་རྗེ་འཛིན་འདོད་ན། །ཞེས་པ་ནི་ཞི་བ་ཆོས་ཀྱི་སྐུ་དེ་རྡོ་རྗེ་འཛིན་དུ་འདོད་ན། སངས་རྒྱས་བསྡུ་བ་དག་ཀྱང་བྱའོ་ཞེས་ཡེ་ཤེས་རྒྱ་མཚོ་དང་བདག་ལྷན་ཅིག་བསྐྱེད་དོ་ཞེས་པའི་དོན་ཏོ། །དེའི་གནས་གསུངས་པ་རིན་ཆེན་ཞེས་པ་ལ་སོགས་པའོ། །སྣ་བཞི་ཞེས་པ་ནི་ཕྱོགས་ལ་གསུངས་པ་སྟེ་རིན་པོ་ཆེ་ཉིད་ནི་སྣ་
ལྔ་ཡིན་ནོ། །དུས་གསུམ་གྱི་ཞེས་པ་ནི་དུས་གསུམ་གྱི་སེམས་ཅན་གྱི་འབྱུང་གནས་ཡེ་ཤེས་རྒྱ་མཚོ་ཡིན་ལ་གནས་མཆོད་རྟེན་ཡིན་ནོ། །བདག་གི་བ་སྤུ་བུ་ག་ཞེས་པ་ནི་བདག་གི་རིག་མ་ཞེས་པའི་དོན་ཏོ། །ཨུཏྤལ་ཞེས་པ་ནི་ཁ་དོག་བཞིའི་ལྷ་མོའོ། །དེ་བས་ན་བདག་ཅེས་མང་པོའི་ཚིག་བྱས་སོ། །པདྨ་
ནི་རཱ་ག་ཁོ་ན་སྟེ་དེ་ནི་རོའི་རྡོ་རྗེ་མའོ། །ཛཱ་ཏི་ཁ་དོག་ལས་ཆོས་ཀྱི་དབྱིངས་རྡོ་རྗེ་མ་ཡིན་ལ་རྣམ་གསུམ་ཞེས་པ་ནི་རྣམ་པར་ཐར་པའི་རང་བཞིན་ནོ། །ཀརྣི་ཀ་ལ་སོགས་པ་ནི་སྤྱན་མ་ལ་སོགས་པའོ། །ཁ་ཅིག་ན་རེ་མེ་ཏོག་ཉིད་ཡིན་ནོ་ཞེས་ཟེར་ཏེ་དེ་ནི་མ་ཡིན་ཏེ། ཕྱི་མ་ལས་འདི་ལ་མེ་ཏོག་ཅེས་
བརྗོད་པ། ནམ་མཁའི་ཁམས་ཀྱི་བུད་མེད་དོ། །ཞེས་བཤད་དོ། །གནས་ཀྱི་ཁྱད་པར་གསུངས་པ་དཔག་ཚད་ཅེས་པ་ལ་སོགས་པའོ། །འཁོར་ལོ་ཞེས་པ་ནི་རྟག་པའི་རྣལ་འབྱོར་པའོ། །གཞན་གྱི་གསུངས་པ། པདྨ་རྡོ་རྗེ་རིན་ཆེན་དང་། །ཞེས་པ་ལ་སོགས་པའོ། །དེ་ལྟར་གསང་བའི་
མཆོད་པ་གསུངས་ནས་ཕྱིའི་གསུངས་པ། རིན་ཆེན་མཆོད་པ་ལ་སོགས་པས། །ཞེས་པ་ལ་སོགས་པའོ། །དེ་ལྟར་མའི་གསུངས་ནས་སྲིང་མོའི་གསུངས་པ་རིན་ཆེན་འབྱུང་གནས་ཞེས་པ་ལ་སོགས་པ་སྟེ། ལོ་གྲངས་བཅུ་དྲུག་མ་ནི་མཆོད། །ཅེས་གསུངས་སོ། །གོང་དུ་གསུངས་པའི་བྱིན་
གྱིས་བརླབ་པ་དང་མཆོད་པ་ལ་སོགས་པ་ནི་འདིར་ཡང་སྦྱར་ཏེ་དེ་བཞིན་འོག་མ་ལ་ཡང་སྦྱར་རོ། །ཁྱད་པར་གསུངས་པ། རིན་ཆེན་སྣ་ཚོགས་མཆོག་གིས་བརྒྱན། །ཞེས་པ་ལ་སོགས་པ་སྟེ་དབུ་རྒྱན་ལ་སོགས་པས་བཀླུབས་པའོ། །བསྒྲུབ་ཚེ་ཞེས་པ་ནི་སྦྱོར་བ་གསུམ་གྱི་བསྙེན་པའི་ཚེ་ཞེས་སོ། །
เล่ม ๔๕ · หน้า 171b
རིན་ཆེན་རྣམས་ནི་ཞེས་པ་ནི་གསང་བའི་མཆོད་པའོ། །ཞིང་འདིར་ཞེས་པ་ལ་སོགས་པ་ནི་དེའི་འོད་ཟེར་ལས་སྤྲུལ་པའི་མཆོད་པ་སྟེ་སྦྱིན་པའི་ཕ་རོལ་ཏུ་ཕྱིན་པའི་ཚོགས་བསགས་པའི་ཕྱིར་ཉིན་རེ་དུས་བཞིར་དབུལ་ཞེས་པའི་དོན་ཏོ། །འདི་རྣམས་ཀྱང་ལྟག་འོག་ཏུ་སྦྱར་རོ། །གསང་བའི་མཆོད་པ་ལ་གཏོགས་
པ་རང་གི་རེག་པའི་དགའ་བ་ཁོ་ན་གཉིས་སུ་མེད་པར་ཀུན་ལ་དབུལ་བར་གསུངས་པ་བདག་པོའི་ཞེས་པ་ལ་སོགས་པའོ། །ད་ནི་ནང་གི་མཆོད་པ་གསུངས་པ། ནམ་མཁའི་དབྱིངས་ཀྱི་དབུས་གནས་པར། །ཞེས་པ་ལ་སོགས་པའོ། །ཡང་བུ་མོའི་གསུངས་པ། བཞིན་བཟངས་ཞེས་པ་ལ་སོགས་པ་སྟེ་
ལོ་བཅུ་གཉིས་མ་ཡིན་ནོ། །ཁྱད་པར་གསུངས་པ་མིག་བཟང་ཞེས་པ་ལ་སོགས་པ་སྟེ་དེ་ཡང་གོང་མ་གཉིས་ལ་ཡང་སྦྱར་རོ། །དེ་རྣམས་ཀྱི་དོན་ཡང་བཟང་པོ་ཞབས་ཀྱིས། དེ་ལྟར་དབང་བསྐུར་རང་སྙིང་འདོད། །ཅེས་པ་ནས་མཐར་ཐུག་པ་གསུངས་སོ། །དེའི་ཡོན་ཏན་གསུངས་པ་འདི་ནི་ཞེས་པ་ལ་
སོགས་པའོ། །ལེའུ་བརྒྱད་པའི་འགྲེལ་པ་རྫོགས་སོ།། །།ད་ནི་སྒྲུབ་པ་ཆེན་པོ་ལ་གཏོགས་པ་སྤྱད་པའི་དམ་ཚིག་གསུངས་པ་དེ་ནས་ཞེས་པ་ལ་སོགས་པའོ། །དེ་ལ་ཐམས་ཅད་ཅེས་པ་ནི་སྐུ་ལ་སོགས་པ་སྟེ་གོང་དུ་སྦྱར་བ་རྣམས་ལས་ཀུན་དུ་ཤེས་པར་བྱའོ། །སྐུ་དང་གསུང་དང་ཐུགས་
ལོངས་སྤྱོད། །ཅེས་པ་ནི་ངེས་པའི་བསམ་གཏན་དེ་ཁོ་ན་ཞེ་སྡང་ལ་སོགས་པའི་དཀྱིལ་འཁོར་ཏེ་གསུམ་ཞེས་པ་ནི་གཙོར་གསུངས་པའོ། །ཉམས་ནི་རབ་ཏུ་དགའ་བ་ཞེས་པ་ནི་དམྱལ་བ་ལ་སོགས་པའི་འགྲོ་བ་དགག་པའི་ཡོན་ཏན་ཡོད་པའི་ཕྱིར་རོ། །སངས་རྒྱས་དཀྱིལ་འཁོར་ཞེས་པ་ནི་རྟག་པ་ལས་
བྱུང་བའི་ཕོ་བྲང་ངོ་། །དེའི་དབུས་སུ་མི་བསྐྱོད་པ་བསྒོམས་ཏེ། འདིའི་སྐབས་སུ་ལག་ཏུ་རྡོ་རྗེ་རྩེ་ལྔ་པ་ཁ་བཞི་པ་བསྒོམ་ཞེས་ཇི་སྙེད་པའོ། །དུས་གསུམ་འབྱུང་བའི་སངས་རྒྱས་རྣམས། །ཞེས་པ་ནི་དཀྱིལ་འཁོར་གྱི་ལྷ་ཐམས་ཅད་སྒོམ་པ་སྟེ། ཕྱི་མ་ལས། ཞེ་སྡང་འཁོར་ལོ་བསྐྱེད་པར་བྱ། །ཞེས་ཏེ་འོག་
མར་ཡང་དེ་ལྟར་སྦྱར་རོ། །རྡོ་རྗེས་ཕྱེ་མར་རླག་ཅེས་པ་ནི་དེ་ནས་སྤྲོ་བ་དང་བསྡུ་བ་ལ་སོགས་པ་གདུག་པ་ཅན་དམྱལ་བར་འགྲོ་བའི་དོན་དུ་གཞོམ་པའི་སྦྱོར་བ་ལ་སོགས་པས་ཕྱེ་མར་རླག་གོ་ཞེས་ཇི་སྙེད་པའོ། །ཐུགས་ཀྱི་དངོས་གྲུབ་ཅེས་པ་སྒྲུབ་པ་པོ་དེ་ཡང་གསལ་བ་རྣམ་པར་དག་པ་ཉིད་ཀྱིས་ཐུགས་རྡོ་རྗེར་
เล่ม ๔๕ · หน้า 172a
འགྱུར་བ་སྟེ། ཕྱི་མ་ལས། བདག་ཉིད་ཞེ་སྡང་རྡོ་རྗེར་འགྱུར། །ཞེས་སོ། །བསྒྲུབ་བྱ་ཡང་ཡོན་ཏན་གསུངས་པ་རྡོ་རྗེ་གསད་པ་ཞེས་པ་ལ་སོགས་པ་སྟེ། སེམས་ཅན་ཐམས་ཅད་ཅེས་པ་ནི་དགྲ་རྣམས་ཁོ་ནའོ། །དེ་ཡང་ཕྱི་མ་ལས། རྣལ་འབྱོར་དེ་ཡིས་གཞག་བྱས་པའི། །
ཞེས་པ་ལ་སོགས་པ་གསུངས་སོ། །སེར་སྣ་ཅན་གྱི་དོན་དུ་གཏི་མུག་གིས་དོན་བྱ་བ་གསུངས་པ། དེ་ནས་ཞེས་པ་ལ་སོགས་པ་སྟེ། རབ་ཏུ་འཇུག་པས་ཞེས་པ་ནི་བཀའ་སྩལ་ཏོ་ཞེས་འབྲེལ་ཏོ། །རིན་ཆེན་ཀུན་གྱི་སྦྱོར་བ་ནི་རྐུ་བའི་རྣལ་འབྱོར་ཏེ། དེའི་རིམ་པས་ཕྲོགས་ནས་ཞེས་སྦྱར་རོ། །ཇི་ལྟར་ཞེ་ན།
རྡོ་རྗེ་གསུམ་དུ་རྣམ་བསྒོམས་ནས། །ཞེས་ཏེ་དེ་ཁོ་ན་རྡོ་རྗེ་གཟུགས་ཞེས་བྱ་སྟེ་དེ་ཡང་ཕྱི་མ་ལས། ཡན་ལག་ཐམས་ཅད་ཡི་གསུམ་བདག །ཅེས་གསུངས་སོ། །དེའི་ས་བོན་ལས་ཟླ་བ་དང་སྤྲོ་བ་ལ་སོགས་པའི་རིམ་པས་ཕྲོགས་ནས་བསྒྲུབ་བྱ་དང་སྒྲུབ་པ་པོ་གཉི་ག་ཇི་ལྟར་གསུངས་པར་འགྱུར་རོ། །རིགས་
རྒྱ་མཚོ་ཐམས་ཅད་ཅེས་པ་ནི་ཐུན་མོང་དུ་གྱུར་པ་སྟེ། རྟག་པ་མ་ཡིན་པས་ཀྱང་སྤྱད། །ཅེས་བྱ་སྟེ་གོང་འོག་གཞན་ལ་ཡང་དེ་བཞིན་དུ་སྦྱར་རོ། །ཡང་ཕྲག་དོག་ཅན་གྱི་དོན་དུ་འདོད་ཆགས་ཀྱིས་དོན་བྱ་བར་གསུངས་པ། དེ་ནས་ཞེས་པ་ལ་སོགས་པའོ། །བུད་མེད་ལྟ་བུ་ཞེས་པ་ནི་རང་གི་རིག་མར་
སྦྱར་ཞེས་སོ། །དམ་ཚིག་བཞི་ནི་བསྙེན་པ་ལ་སོགས་པའི་ཡན་ལག་བཞིའོ། །ཐམས་ཅད་ཅེས་པ་ནི་ཕྲག་དོག་ཅན་གྱི་བུད་མེད་དོ། །བསྒོམ་པར་བྱ་ཞེས་པ་ནི་དགུག་པ་ལ་སོགས་པའི་སྦྱོར་བས་ཞེས་ཇི་སྙེད་པའོ། །དེ་ལྟར་ལུས་ཀྱི་ལས་རྣམ་པར་དག་པ་གསུངས་ནས་ངག་གི་གསུངས་པ་དེ་ནས་ཞེས་པ་
ལ་སོགས་པའོ། །དེ་ལ་གང་བརྫུན་གྱིས་འདུལ་བ་དག་མཐོང་ནས་ཆོ་ག་ཐམས་ཅད་སྤྱད་དེ། ཕན་པའི་ཚིག་ནི་རྡོ་རྗེའི་ཚིག །ཅེས་བྱ་སྟེ་ཡང་དག་པར་བདེན་པ་ཞེས་བྱ་བའི་དོན་ཏོ། །དེ་ལྟར་ཡང་། གཞན་ལ་གཅིག་ཏུ་ཕན་པ་བདེན། །ཕན་པ་མེད་ཕྱིར་ཅིག་ཤོས་མེད། །ཅེའོ། །དེས་ན་ཉེས་
པས་མ་གོས་པས། །ནམ་མཁའི་གསུང་ནི་དྲི་མ་མེད། །ཅེས་བྱའོ། །དོན་ཇི་ལྟ་བ་བཞིན་དུ་སྤྲོ། །ཞེས་པ་ནི་རྡོ་རྗེ་གསུམ་གྱི་ས་བོན་ལས་དེའི་དོན་དུ་སྤྲོ་བ་དང་བསྡུ་བ་ལ་སོགས་པ་བྱ་སྟེ་ཕྱི་མ་ལས། ཉིད་ཀྱིས་བཟླ་ཞིང་སྤྲོ་བར་བྱའོ། །ཞེས་སོ། །ངག་གི་དམ་ཚིག་ལྷག་མ་གསུངས་པ། དེ་ནས་ཞེས་པ་
เล่ม ๔๕ · หน้า 172b
ལ་སོགས་པ་སྟེ། འདིར་ཡང་དེས་འདུལ་བ་རྣམས་ལ་ཆོ་ག་ཐམས་ཅད་སྤྱད་དེ་སྨྲ་བའོ། །སོགས་ཞེས་པ་ནི་ངག་རྐྱལ་པ་དང་ཕྲ་མ་བསྡུའོ། །ཡིད་ཀྱི་ལས་ནི་གཞན་གྱི་དོན་མ་ཡིན་ཏེ་མནར་སེམས་ལ་སོགས་པ་ནི་ཉོན་མོངས་པ་ཁོ་ན་ཡིན་པས་མི་བསྐྱེད་ལ་ཅི་སྟེ་རྐྱེན་གྱིས་བྱུང་ན་ཡང་ཕྱི་མ་ལས་བཤད་པ་བཞིན་
ལྷའི་རྣམ་པར་བསྒོམས་ཏེ། དེ་ནི་ཀུན་དུ་སྤྱོད་པ་ཡིན་གྱི་སྔགས་ཀྱི་སྤྱོད་པ་ནི་མ་ཡིན་ནོ། །དེ་རྣམས་ཀྱི་དོན་ཡང་བཟང་པོ་ཞབས་ཀྱིས། འགྲོ་བའི་དོན་ནི་ཅི་རིགས་པར། །ཞེས་པ་ནས། དེ་རྟོགས་ཡེ་ཤེས་ལ་ནི་མེད། །ཅེས་པའི་བར་དུ་ཚིགས་སུ་བཅད་པ་ཕྱེད་དང་བཞི་གསུངས་སོ། །ད་ནི་ལེའུ་ལྔ་
པར་ཐེ་ཚོམ་བསལ་ན་ཡང་ཡིད་ཆེས་པར་དཀའ་བའི་ཚུལ་གྱིས་ངོ་མཚར་གྱི་ཀླན་ཀ་སྤངས་པ་གསུངས་པ། དེ་ནས་ཞེས་པ་ལ་སོགས་པའོ། །དམ་ཚིག་རྡོ་རྗེ་ཞེས་པ་ནི་སའི་སྙིང་པོའོ། །དེ་བཞིན་གཤེགས་པ་ཐམས་ཅད་ཅེས་པ་ནི་འཁོར་རྣམས་སྔར་བཤད་དོ། །དངོས་སུ་དམན་པའི་ཚིག་མ་ཞུས་པས་
དམན་པའི་འདུ་ཤེས་གསུངས་སོ། །འདིའི་དོན་ནི་ནམ་མཁའ་ལྟར་མ་གོས་པ་དང་མི་གནས་པ་དང་སེམས་ཅན་གྱི་བསམ་པ་ཞེ་སྡང་ཅན་ལ་སོགས་པ་ལ་དོན་དུ་འགྱུར་བས་བཤད་དོ་ཟེར་བ་འདི་ཡིན་ནོ། །གཙུབ་ཤིང་ཞེས་པའི་དཔེ་ནི་མི་གནས་ཀྱང་འབྲས་བུའི་རྣམ་པ་ཇི་སྐད་གསུངས་པ་ཡང་མི་སླུ་བའོ་
ཞེས་སྟོན་པའོ། །དོན་དམ་པ་ཞེས་པ་ནི་བསམ་གཏན་གྱི་ལས་དེ་དག་རང་བཞིན་མེད་པས་ཟིན་པ་སྟེ། དེ་ཡང་ཕྱི་མ་ལས། སྒྱུ་མ་འདྲ་བའི་དངོས་པོ་ཀུན། །ཞེས་པ་དང་། གཞན་ཡང་འདི་ཉིད་ལས་ཡང་དང་ཡང་དུ་བཤད་དོ། །དེ་ཁོ་ན་ཞེས་པ་ནི་ངེས་པར་བྱ་བ་སྟེ་དེ་ལྟར་ཡང་། བདག་ཉིད་སྡིག་པས་
མ་གོས་པས། །གསང་བ་ལ་སོགས་ངེས་པར་གཉེར། །ཞེའོ། །ལེའུ་དགུ་པའི་འགྲེལ་པ་རྫོགས་སོ།། །།ད་ནི་ཞི་བའི་བསྙེན་པས་དམ་པའི་མཚན་མ་མ་ཐོས་པ་ལ་དྲག་ཤུལ་གྱི་གཙོར་སྟོན་པའི་ལེའུ་གསུངས་པ་དེ་ནས་ཞེས་པ་ལ་སོགས་པའོ། །འདུས་ཏེ་ཞེས་པ་ནི་མཆོད་
པ་བྱས་ཏེ་ཞེས་པའོ། །སྔགས་ཞེས་པ་ནི་ལྷ་རྣམས་ཏེ་དེའི་སྙིང་པོ་ཀུན་དུ་བསྡུས་པ་ནི་དྲག་ཤུལ་གྱི་ཆོ་ག་ཇི་སྙེད་པའོ། །དངོས་གྲུབ་ཆེན་པོ་ཞེས་པ་ནི་མཆོག་གི་དངོས་གྲུབ་པོ། །དེའི་ཚུལ་ནི་ཐབས་སོ། །དེའི་མཆོག་ནི་དྲག་ཤུལ་ཏེ་ཆེན་པོ་ཞེས་པ་ནི་གཙོར་གསུངས་པ་སྟེ། ཐུན་མོང་རྣམས་ཀྱི་ཚུལ་
เล่ม ๔๕ · หน้า 173a
གྱི་འང་མཆོག །ཅེས་ཤེས་པར་བྱའོ། །ཡང་དག་ཅེས་པ་ནི་རྒྱུ་དང་འབྲས་བུ་ཞེས་པའི་དོན་ཏེ། དེ་ནི་འོག་ནས་འབྱུང་བ་འབྲས་བུ་རྣམས་ཀྱང་ཞུས་པ་ཡིན་ཏེ། སངས་རྒྱས་རྣམས་ཀྱི་གསུང་གི་ནི་ཞུ་བ་སྔོན་དུ་མ་སོང་བར་ཚུལ་མ་ཡིན་ནོ། །ཉོན་མོངས་ཀུན་གྱི་རྒྱ་མཚོ་ནི་རིགས་
ལྔའོ། །དེའི་གཙོ་ཞེས་སོ། །དེ་ལ་ལུས་དང་ངག་དང་སེམས་ཞེས་པ་ལ་སོགས་པས་ནི་སྒྲུབ་པ་གཙོར་གསུངས་པ་སྟེ། དེ་བཞིན་དུ་ཐབས་གཞན་ལ་དེས་མཚོན་ནས་དེ་སྒྲུབ་པའི་རྣལ་འབྱོར་པ་གལ་ཏེ་མ་གྲུབ་ན་ཞེས་མཚམས་སྦྱར་བའི་དོན་ཏོ། །རིག་པ་བྱེ་བ་ཁྲག་ཁྲིག་ཅེས་པ་ནི་ཞི་བ་ལ་སོགས་པ་
སེམས་ཅན་གྱི་དོན་གྱི་ཐབས་ཏེ་དེ་ཡང་བཟང་པོ་ཞབས་ཀྱིས་གསུངས་པ། སོ་སོར་ཞི་བ་ལ་སོགས་བསྐུལ། །ཞེས་པ་དང་། ཕྲེང་སྔགས་ལ་ཡང་རིག་པར་གསུངས། །ཞེའོ། །ཀྱང་ཞེས་པ་ནི་སྔགས་ཀྱི་སྤྱོད་པ་བསྙེན་པའི་རྣལ་འབྱོར་པ་བརྩོན་པ་ཉིད་ཀྱི་ཕྱིར་སྤྱན་རས་ཀྱིས་མི་འཚོ་བ་སྲིད་ཅེས་ལྷག་
མ་ཅན་གྱི་དོན་ཏོ། །རྫོགས་པར་འགྱུར་སྙམ་པ་ནི་བརྩོན་པ་ཉིད་ཀྱི་ཕྱིར་རོ། །དེ་བཞིན་གཤེགས་པ་ནི་སྐུའི་ངོ་བོ་སྟེ་དམ་ཚིག་ནི་གྲུབ་པའོ། །དམིགས་པ་ནི་གསོལ་བར་མཛད་པ་སྟེ་དེ་ལྟར་འོག་མ་ལའང་སྦྱར་རོ། །འདི་ཉིད་ཀྱི་ཞེས་པ་ནི་འདས་པའི་སངས་རྒྱས་རྣམས་ཀྱིས་ཀྱང་གསུངས་ཞེས་སྟོན་
པ་སྟེ་སྡུད་པ་པོའི་ཚིག་གིས་ནི་མ་ཡིན་ནོ། །དེ་ནས་ཞེས་པ་ལ་སོགས་པ་ནི་ཡོན་ཏན་ཏེ་དེའི་དུས་ན་ཡང་དེ་ལྟར་གྱུར་ལ། རྣལ་འབྱོར་པ་འདི་ཟློས་པ་ཡང་ཡོན་ཏན་དེ་ཐོབ་པ་སྟེ། རྡོ་རྗེ་སེམས་དཔའ་རྗེས་སུ་དྲན། །ཞེས་པ་ནི་གྲུབ་པ་ལ་སོགས་པའི་དམ་ཚིག་དྲན་པའོ། །དེ་ལྟར་ཡིན་ན་གྲུབ་པའི་
རང་བཞིན་གྱི་སེམས་ཁོ་ནའི་བག་ཆགས་སྦྱངས་པ་ལས་བྱུང་བ་སྟེ། དེ་ལྟར་བཅོ་ལྔ་པ་ལས་ཡིད་བཞིན་གྱི་ནོར་བུའི་དཔེ་དང་བཟང་པོའི་ཞབས་ཀྱིས་ཀྱང་། སེམས་ལས་ཡང་དག་བྱང་ཆུབ་འབྱུང་། །ཞེས་པ་ལ་སོགས་པ་གསུངས་སོ། །ད་ནི་རྣལ་འབྱོར་པ་རྣམས་ཀྱི་སྦྱོར་བ་ལ་སེམས་ཅན་ཐམས་
ཅད་དབུགས་འབྱུང་བའི་སྦྱོར་བའི་དོན་དུ་རྡོ་རྗེ་སེམས་དཔའ་བསྐྱེད་པ་ལ་རྡོ་རྗེ་ང་རྒྱལ་མ་གཏོགས་པའི་མངོན་པར་བྱང་ཆུབ་པའི་རིམ་པ་གསུངས་པ་དེ་ནས་ཞེས་པ་ལ་སོགས་པ་སྟེ། དཀྱིལ་འཁོར་བཀོད་པ་ཞེས་པ་ནི་ཐབས་དང་ཤེས་རབ་ཀྱི་ཡེ་ཤེས་ཀྱི་ཟླ་བའོ། །དེའི་དབུས་ནས་ཞེས་པ་ནི་དབུས་ཀྱི་ཟླ་བའི་གདན་
เล่ม ๔๕ · หน้า 173b
ལའོ། །ཡི་གེ་ཧཱུྃ་ཞེས་པ་ཟླ་བ་གཉིས་ལས་གྱུར་པའི་ས་བོན་ནོ། །རང་གི་གཟུགས་ཞེས་པ་ནི་ས་བོན་ལས་གྱུར་པའི་རྡོ་རྗེའོ། །སངས་རྒྱས་ཀྱི་ནི་ཞེས་པ་ལ་སོགས་པ་ནི་དེ་ལས་གྱུར་པའི་སྐུའོ། །ཁ་ཅིག་ན་རེ་དེའི་དབུས་ནས་ཞེས་པ་ནི་ཟླ་བ་གཉིས། ཡང་གང་ས་བོན་བར་ན་གནས། །ཞེས་སྨྲ་བའོ། །
དེའི་དོན་དང་ང་རྒྱལ་དང་བཅས་པ་ཡང་བཟང་པོ་ཞབས་ཀྱིས། རང་གི་མཚན་དང་ལྡན་པ་ཡི། །ཞེས་པ་ནས། འོད་འཕྲོ་འབར་བ་བསྒོམ་པར་བྱ། །ཞེས་པའི་བར་དུ་ཚིགས་སུ་བཅད་པ་ཕྱེད་དང་ལྔ་གསུངས་སོ། །ད་ནི་རྒྱལ་བ་མཆོག་གི་ལྷ་རྣམས་བསྐྱེད་པའི་ས་བོན་གསུངས་པ། རང་གི་དཀྱིལ་འཁོར་
ཞེས་པ་ལ་སོགས་པ་སྟེ་དཔེར་ན། ཕག་མོ་ཅིག་གི་མངལ་དུ་ས་བོན་ཅིག་ལས་ཕྲུ་གུ་མང་པོར་འགྱུར་བ་ལྟར། རང་གི་ཡི་གེ་ཁོ་ན་ལས་ཐམས་ཅད་སྐྱེད་པ་སྟེ་དེ་ནི་སྙིང་པོ་བསྡུས་པ་ཡིན་ནོ། །དེ་ཡང་བཟང་པོ་ཞབས་ཀྱིས། སྙིང་ཟླའི་རལ་གྲི་སྙིང་འོད་ཀྱིས། །ཞེས་པ་ལ་སོགས་པ་གསུངས་པ་ལས་
ཤེས་པར་བྱའོ། །ད་ནི་དྲག་ཤུལ་གྱི་སྙིང་པོ་དང་འབྲེལ་པ་གསུངས་པ། རང་སྔགས་སྐྱེས་བུ་ཞེས་པ་ལ་སོགས་པའོ། །གནས་བཞི་ཞེས་པ་ནི་སྙིང་ག་ལ་སོགས་པ་སྟེ། དེས་ནི་སངས་རྒྱས་དགུག་པ་སྤྲོ་བའི་དོན་དུ་ཕྱག་རྒྱ་བཞི་གསུངས་པ་ཡིན་ནོ། །ཕྱག་རྒྱ་དེའི་ཐུགས་ཀ་ཡང་ཡི་གེ་དང་བཅས་
པའི་མཚན་མ་བསྐྱེད་པའི་དོན་དུ་ས་བོན་གསུངས་པ། སྙིང་གའི་ཞེས་པ་ལ་སོགས་པ་སྟེ་ཕྲ་མོའི་ཟླ་བ་དང་ཉི་མ་བསམས་ཏེ་དེ་ལ་ཡི་གེ་དགོད། དེ་ལས་མཚན་མ་རྡོ་རྗེ་ཆེན་པོ་རྩེ་ལྔ་པ་ལ་སོགས་པའོ། །དེའི་ས་བོན་ལས་འཕྲོ་བའི་ཀྱོ་བ་གསུངས་པ། རྡོ་རྗེ་ཀྱོ་བ་ཞེས་པ་ལ་སོགས་པ་སྟེ་
ཁྱད་པར་ཞེས་པ་ནི་འཁོར་ལོ་ལ་སོགས་པའི་ཀྱོ་བ་སྟེ་དེ་ཡང་བཅུ་བཞི་པ་ལས། འཁོར་ལོ་རྡོ་རྗེ་པདྨོ་ཆེ། །རྡོ་རྗེ་ཀྱོ་བའི་ཁྱད་པར་གྱིས། །ཞེས་སོ། །རྡོ་རྗེ་གསུམ་རྣམས་ཞེས་པ་ནི་སངས་རྒྱས་དགུག་པ་ལ་ནི་རྡོ་རྗེ་གསུམ་པོ་ལ་གཟུགས་གཉིས་སྤྲོ་བའི་དོན་ཏེ། འོག་ནས་ཤེས་པར་བྱའོ། །
ཧཱུཾ་ལ་སོགས་པའི་དབུས་ཀྱི་ཡི་གེ་སྟེ་དེས་གོང་དུ་བཤད་པའི་སྙིང་པོ་ལྔ་པོ་དག་བསྐུལ་བའོ། །ཛཿཞེས་པ་ནི་ཨངྐུ་ཤ་ཛཿཞེས་ཀྱོ་བས་དྲང་བའོ། །ཕཊ་ཅེས་པ་ནི་དྲག་ཏུ་བསྐུལ་བའམ། ཁ་ཅིག་ན་རེ་ཕུར་པ་གདབ་པ་ལ་མིང་དང་མཱ་ར་ཡ་ཕཊ་ཅེས་གདབ་པ་ཡིན་ནོ་ཞེས་ཟེར་རོ། །རྡོ་རྗེ་རིགས་ཀྱི་གསུངས་ནས།
เล่ม ๔๕ · หน้า 174a
འཁོར་ལོའི་རིགས་ལ་སོགས་པ་གསུངས་པ་འཁོར་ལོ་པདྨ་ཞེས་པ་ལ་སོགས་པའོ། །མཆོག་སྩོལ་བ་དག་རྣམ་པར་གཟིགས། །ཞེས་པ་ནི་སྤྱན་རས་ཀྱིས་འཚོ་ཞེས་པའི་དོན་ཏོ། །དེ་མ་ཐག་དངོས་གྲུབ་སྩོལ་བ་གསུངས་པ། ཡིད་འཇིགས་ཤིང་ཞས་པ་ལ་སོགས་པའོ། །
འགལ་བར་བྱས་ཞེས་པ་སྒྲུབ་པ་པོ་དེས་བསྐུལ་བའི་སེམས་མ་ཡིན་པར་ཞེ་སྡང་ཁོ་ནས། སངས་རྒྱས་ལ་དྲག་ཤུལ་བྱས་པས་འཚང་། དེ་ནས་ཞེས་པ་ལ་སོགས་པ་གསུངས་པའོ། །དེ་ལ་སྔགས་ཀྱིས་བསྐྱེད་པའི་སྐྱེས་བུ་ནི་སྔགས་ཀྱི་སྐྱེས་བུ་སྟེ་སྔགས་ཀྱི་སེམས་དཔའ་མ་ཡིན་པའི་དོན་ཏོ། །དེ་ནི་དང་
པོའི་ལས་ཅན་ནོ། །དེ་བཞིན་ནི་གཞན་དག་པའི་དོན་ཏོ། །ད་ནི་དང་པོའི་ལས་ཅན་ལ་སོགས་པ་དང་། རིག་པའི་བརྟུལ་ཞུགས་ལ་གཏོགས་པའི་དམ་ཚིག་དང་། དམ་ཚིག་གི་དཀྱིལ་འཁོར་ལ་སོགས་པ་གསུངས་པ་ནི་སྔགས་ཀྱི་སེམས་དཔའ་ཞེས་ཏེ། ཇི་སྙེད་པ་ཞེས་པ་ནི་རྣལ་འབྱོར་པ་ཐམས་
ཅད་དོ། །རྡོ་རྗེ་གསུམ་གྱི་ཡེ་ཤེས་རྫོགས། །ཞེས་པ་ནི་སྒྲུབ་པ་སྟེ་ལུས་ཀྱི་ལྷའི་མཆོག་ཡིན་ཏེ་གཙོར་སྨོས་ཀྱི་ཡན་ལག་ལྷག་མ་ཡང་སྦྱར་རོ། །དངོས་པོ་ཐམས་ཅད་བརྟག་པར་ཞེས་པ་ནི་བདེ་བ་ཆེན་པོའི་བྱང་ཆུབ་ཀྱི་སེམས་ཏེ་དེ་བརྟག་ཅེས་སོ། །དེ་ཡང་གཡོ་བ་དང་མི་གཡོ་བ་ཀུན་གྱི་རྣམ་པ་གཉིས་
སུ་མེད་པས་དངོས་པོ་ཐམས་ཅད་ཅེས་ཏེ། དེ་ནི་དམ་ཚིག་སྟེ་ཤེས་རབ་ཡེ་ཤེས་ཀྱི་དབང་དུ་སྨྲ་བ་ནི་མ་ཡིན་ནོ། །དེའི་ཐབས་དང་ཤེས་རབ་ཀྱི་དཀྱིལ་འཁོར་ནི་རིག་མ་དབང་ཕྱུག་ཅེས་པ་ལ་སོགས་པ་སྟེ། དེའི་དོན་ནི་ཧཱུཾ་གིས་རྡོ་རྗེ་བསྐྱེད་པ་ལ་སོགས་པ་ཐམས་ཅད་རྫོགས་པར་བྱས་ཏེ་ཤེས་རབ་ལ་
ཆགས་པའི་སེམས་ཀྱིས་བལྟའོ་ཞེས་པ་འདི་ཡིན་ནོ། །དེའི་བུད་མེད་གསུངས་པ། འཇིག་རྟེན་ཞེས་པ་ལ་སོགས་པ་སྟེ། བཅུ་དྲུག་པ་ལས། ལྷ་མོ་ཀླུ་མོ་གནོད་སྦྱིན་མོ། །ཞེས་པ་ལ་སོགས་པ་ལ་གསུངས་པ། དེར་སྤྲོ་བྱ་ཞེས་པ་ནི་སྤྲོ་བ་དང་བསྡུ་བ་དག་གིས་རིགས་ལྔར་བྱིན་གྱིས་བརླབ་པོ་ཞེའོ། །
དེའི་ཡོན་ཏན་གསུངས་པ་རྡོ་རྗེ་གསུམ་པོ་ཞེས་ཏེ་དེ་ནི་སྐུ་གསུམ་ཡིན་ནོ། །བྱང་ཆུབ་སེམས་ཞེས་པ་ནི་བདེ་བ་ཆེན་པོ་ཡིན་ནོ། །རྡོ་རྗེ་སེམས་དཔའི་ཚེ་ཞེས་པ་ནི་མི་འགྱུར་བའི་ཚེ་དེས་འཐོབ་ཅེའོ། །འདིའི་ཆོ་ག་ཞིབ་ཏུ་ནི་དྲུག་ཅུ་པས་བསྟན་ཏོ། །ལེའུ་བཅུ་པའི་འགྲེལ་པ་རྫོགས་སོ།། །།
เล่ม ๔๕ · หน้า 174b
ད་ནི་དངོས་གྲུབ་ཀྱི་ཞིང་ཞེས་པ་སྦྱོར་བ་རྣམས་ཀྱི་གནས་གཙོར་བསྟན་པའི་ལེའུ་གསུངས་པ་དེ་ནས་ཞེས་པ་ལ་སོགས་པའོ། །དེ་ལ་དྲུག་པ་ལས་ཐབས་ཀྱི་ཐབས་ཞེས་པ་དེའི་ས་བོན་དང་ངོ་བོ་གསལ་བར་གསུངས་པ། རྡོ་རྗེ་གསུམ་མཆོག་ཅེས་པ་ལ་སོགས་པ་སྟེ། ལུས་ཀྱི་ལྷའི་མཆོག་ཡིན་ན་རྡོ་རྗེ་གསུམ་མཆོག་
ཅེའོ། །བྱང་ཆུབ་ཐོབ་པའི་ཐབས་ཡིན་པས་རྡོ་རྗེ་གསུམ་གྱི་ཕྱག་རྒྱ་ཆེན་པོ་དེ་ནི་ཐབས་སུ་ཞེས་བྱའོ། །ཡི་གེའི་སྔགས་དེ་ཉིད་གསུངས་པ། ཨོཾ་གྱིས་སྐུ་རྡོ་རྗེ་བསྐྱེད་དེ། དེ་བཞིན་དུ་འོག་མར་ཡང་སྦྱར་བར་བྱའོ། །ད་ནི་བཞིའི་ཏིང་ངེ་འཛིན་ལ་གཏོགས་པ་རྡོ་རྗེ་རྒྱ་གྲམ་ལ་གནས་པའི་ཕོ་བྲང་གི་ས་བོན་
གསུངས་པ་དཀྱིལ་འཁོར་ཞེས་པ་ལ་སོགས་པ་སྟེ། རྡོ་རྗེ་ཀུན་ཞེས་པ་ནི་རྩེ་མོ་གསུམ་པའི་རྒྱ་གྲམ་མོ། །དེ་ལས་སྐྱེས་པའི་ཕོ་བྲང་གི་ས་བོན་ནི་བྷྲཱུཾ་སྟེ། རྡོ་རྗེ་སྤྲིན་ནི་ཀུན་བསྐྱེད་པ། །ཞེས་པ་ནི་རྡོ་རྗེ་རྒྱ་གྲམ་ཁོ་ན་ཡིན་ནོ། །རྡོ་རྗེ་དཀྱིལ་འཁོར་ཞེས་པ་ལ་སོགས་པས་ནི་གོང་དུ་གསུངས་པའི་རྡོ་རྗེ་གསུམ་གྱི་
ས་བོན་དེའི་གནས་གསུངས་པ་སྟེ། རྡོ་རྗེ་དཀྱིལ་འཁོར་ཞེས་པ་ནི་ཀླད་པ་ལ་གནས་པའི་ཨོཾ་གྱིས་བསྙེན་པའི་འཁོར་ལོ་སྟེ་མི་ཕྱེད་པའི་ཕྱིར་རོ། །དེའི་ལྟེ་བའི་ཟླ་བ་ལ་གནས་པའི་ཨོཾ་གྱི་རིམ་པས་སྐུའི་རྡོ་རྗེ་བསྐྱེད་པ་སྟེ་དེ་བཞིན་འོག་མར་ཡང་སྦྱར་རོ། །གསལ་བ་ཞེས་པ་ནི་པདྨ་སྟེ་དྲི་མ་མེད་པའི་ཕྱིར་རོ། །ཆོས་
ཞེས་པ་ནི་རྡོ་རྗེ་སྟེ་དེ་ཁོ་ན་རིག་པའི་ཆོས་ཡིན་པའི་ཕྱིར་རོ། །དེ་ལྟར་ཡང་ཟླ་བ་ལས། སྐུ་གསུང་ཐུགས་ཀྱི་རྡོ་རྗེ་ཅན། །རྡོ་རྗེ་གསལ་ཆོས་འཁོར་ལོ་ཡི། །གནས་དེ་ལ་ནི་བརྟག་བྱས་ནས། །ཞེས་སོ། །ད་ནི་ལེའུ་དང་པོར་ཞུས་པ་ལས། བསྙེན་པ་དང་པོ་ཉིད་ཀྱི་ངོ་བོ་ལ་གཏོགས་པའི་ལྷ་མོ་བཞིས་
བསྐོར་བ་དང་། བསྐུལ་བ་ལ་སོགས་པ་མ་ཡིན་པའི་ཡི་གེ་དང་། བདུད་རྩིའི་རིམ་པ་གསུངས་པ། ཡི་གེ་བྷྲཱུཾ་གྱིས་ཞེས་པ་ལ་སོགས་པའོ། །རྡོ་རྗེ་གསུམ་འབྱུང་ཞེས་པ་ནི་ཡི་གེ་གསུམ་ཧོ་དང་བཅས་པ་དང་། དེ་ལས་བྱུང་བའི་དམ་ཚིག་བསྒོམ། །ཞེས་པའི་དོན་ཏོ། །དེ་ཁོ་ན་གསུངས་པ་སྙིང་པོ་
དུས་གསུམ་ཞེས་པ་ལ་སོགས་པའོ། །མཉེས་བྱེད་ཅེས་པ་ནི་རྡོ་རྗེ་སེམས་དཔའ་བྱང་ཆུབ་སེམས་ལས་གྱུར་པར་པདྨའི་ནང་ན་གནས་པ་ཐབས་དང་ཤེས་རབ་ཀྱི་ངོ་བོ་ཧོ་གཉིས་གསུངས་སོ། །སྐུ་གསུང་ཐུགས་ནི་དེའི་བར་ན་གནས་པའི་ཨོཾ་ལ་སོགས་པ་སྟེ། ཨོཾ་ནི་སངས་རྒྱས་སྐུ་ཡི་མཆོག །ཅེས་
เล่ม ๔๕ · หน้า 175a
པ་ལ་སོགས་པའོ། །སངས་རྒྱས་རྒྱུ་དང་འབྲས་བུ་འབྱུང་། །ཞེས་པ་ནི་དེས་རྡོ་རྗེ་འཆང་ཆེན་པོ་འམ་མི་བསྐྱོད་པ་ལ་སོགས་པའི་རིག་པའི་ལྷ་བསྐྱེད་དོ་ཞེས་པའི་དོན་ཏོ། །རྡོ་རྗེ་མི་ཕྱེད་གསུམ་བསྒོམས་པས། །ཞེས་པ་ནི་དེ་ཞུ་བ་ལས་གྱུར་པའི་ཡེ་ཤེས་ཀྱི་བདུད་རྩི་སྟེ་དེ་ཁོ་ན་
དམ་ཚིག་གོ། །རྫོགས་པར་འགྱུར་ཞེས་པ་ནི་དེ་ལ་བསྐུལ་བ་ལ་སོགས་པའི་རིམ་པས་སྐུ་ཡོངས་སུ་རྫོགས་པར་འགྱུར་ཞེའོ། །ཡང་བཟང་པོ་ཞབས་ཀྱིས། ཨོཾ་ཨཱཿཧཱུཾ་ཞེས་བྱ་བས་སེམས་དཔར་ཧོ་ཞེས་པ་ནས། སྐུ་གཉིས་ཞུ་བར་བྱས་པ་ལ། །ཞེས་པའི་བར་དུ་ཚིགས་སུ་བཅད་པ་ཕྱེད་དང་གཉིས་
གསུངས་སོ། །ད་ནི་ཐུན་མོང་གི་སྒྲུབ་པའི་ཆོ་ག་དག་ལས་བསམ་གཏན་ལ་བརྟེན་པ་གསུངས་པ། དབེན་ཞིང་ཞེས་པ་ལ་སོགས་པ་སྟེ་ཉམས་དགའ་བ་ཞེས་པ་ནི་མེ་ཏོག་དང་འབྲས་བུ་ལ་སོགས་པས་བརྒྱན་པ་སྟེ། རིགས་བསྒྲུབ་པ་ལ་བསྔགས་པའི་ཕྱིར་རོ། །རང་གི་སྔགས་ཀྱི་དམ་ཚིག་ཅེས་པ་ནི་རྟག་པའི་
དམ་ཚིག་སེམས་དཔའོ། །ཡི་གེ་ཨོཾ་ནི་སྙིང་གར་གཞག །ཅེས་པ་ནི་ཡེ་ཤེས་སེམས་དཔའི་མཚན་མ་ལ་བྷྲཱུཾ་གསལ་ཏེ་ཨོཾ་ཁོ་ན་གཞག་ཅེས་པའི་དོན་ཏོ། །འོད་ཟེར་ལྔ་ཡི་སྤྲིན་ཆེན་པོ། །ཞེས་པ་ནི་ཡེ་ཤེས་སེམས་དཔའ་སྟེ་རྣམ་པར་སྣང་མཛད་ཀྱི་ངོ་བོའོ། །ཨོཾ་ཡང་ཁ་དོག་ལྔ་པ་ཡིན་ནོ། །རྡོ་རྗེའི་སྐུ་ཞེས་
པ་ནི་རྣམ་པར་དག་པའི་སྐུ་ནི་མ་ཡིན་གྱི་མདོག་ལ་སོགས་པ་འདྲ་བའོ། །ཡེ་ཤེས་ལྔ་ལྡན་ཞེས་པ་ནི་དེའི་རིག་མ་སྟེ། ཡེ་ཤེས་ལྔས་བྱིན་གྱིས་བརླབས་པའི་ཕྱིར་རོ། །ཆོ་ག་འདི་རྣམས་ནི་འོག་ཏུ་ཡང་ཤེས་པར་བྱ་སྟེ། འདི་རྣམས་ཀྱི་ཐུན་མོང་གི་ཆོ་ག་ལེའུ་བཅུ་གཉིས་པར་བཤད་པར་བྱ་སྟེ་དེ་ཁོ་ན་སྐབས་ཡིན་པའི་
ཕྱིར་རོ། །དམ་ཚིག་ཡེ་ཤེས་པ་ལ་དམ་ཚིག་ཅེས་པ་ནི་དམ་ཚིག་གི་ཕྱག་རྒྱ་ཡེ་ཤེས་ཞེས་པ་ནི་ཡེ་ཤེས་སེམས་དཔའ་སྟེ། དེའི་ཐུགས་ཀར་ཡང་ཨོཾ་སྟེ་ཚིག་གི་དམ་ཚིག་ནི་ཨོཾ་ཡིན་ནོ། །ཚིག་གི་ལམ་གནས་ཞེས་པ་ནི་ངག་གི་ལམ་ལ་གནས་པ་ཉིད་དོ། །ད་ནི་ཆོས་ཀྱི་དབྱིངས་ལ་གནས་པའི་པདྨ་དང་རྡོ་རྗེ་རྒྱ་གྲམ་
གསུངས་པ་རྡོ་རྗེ་ཀུན་དང་ཞེས་ཏེ་རྡོ་རྗེ་ཀུན་ནི་རྒྱ་གྲམ་མོ། །རྒྱལ་བའི་གནས་ནི་པདྨ་སྟེ་རྣམ་པར་དག་པའི་གནས་ཡིན་ནོ། །འདིར་གང་གཙོ་བོ་གསུམ་གྱི་རིག་འཛིན་གསུངས་པ་ལྟར་རང་རང་གི་ཡི་གེས་ཀུན་ལ་སྦྱར་བར་བྱ་སྟེ་འདིར་ནི་གཙོར་གསུངས་པ་ཡིན་ནོ། །དེ་བཞིན་དུ་འོག་མ་ཀུན་ལ་ཡང་སྦྱར་རོ། །མི་སྣང་བ་སྒྲུབ་པ་
เล่ม ๔๕ · หน้า 175b
པ་ལས་དུམ་བུར་བཅད་དེ་དེའི་བདག་པོ་ཉིད་ཀྱི་སྒྲུབ་པ་གསུངས་པ། ཡེ་ཤེས་དཀྱིལ་འཁོར་དབུས་སུ་ནི། །ཞེས་པ་ལ་སོགས་པའོ། །ཡེ་ཤེས་དཀྱིལ་འཁོར་ནི་རྟག་པའི་ཕོ་བྲང་ངོ་། །རྡོ་རྗེ་ཆེན་པོ་ནི་ནམ་མཁའི་སྙིང་པོ་སྟེ་མི་སྣང་བའི་ཡེ་ཤེས་ཀྱི་རྡོ་རྗེ་དེའི་བདག་པོ་ཡིན་པས་ཆེན་པོའོ། །ལུས་རྣམས་ཀུན་ལ་ཞེས་
པ་ནི་གནས་བཞི་ལ་རང་གི་མཚན་མ་ཁཾ་བསམ་མོ། །མཁའ་འདྲ་ཞེས་པ་ནི་མི་སྣང་བའོ། །བྱང་ཆུབ་སེམས་དཔའ་རྣམས་ཀྱི་རིག་འཛིན་གསུངས་པ་རྡོ་རྗེ་ཞེས་པ་ལ་སོགས་པ་སྟེ། འོད་ཟེར་ཞེས་པ་ནི་ཡེ་ཤེས་སེམས་དཔའ་ཁ་དོག་ལྔ་པ་ཞེས་པའི་དོན་ཏོ། །བསམ་གཏན་དེ་ཁོ་ན་ལོངས་སྤྱོད་ཡིན་ནོ། །དེ་
བཞིན་དུ་བྱང་ཆུབ་སེམས་དཔའ་གཞན་རྣམས་ཀྱི་ལོངས་སྤྱོད་རྗེས་སུ་དཔག་གོ། །འོད་ཟེར་འབར་བའི་ཡི་གེ་ཐྷིཾ་ཞེས་པ་ནི། མངོན་པར་ཤེས་པའི་ས་བོན་དུ་གསུངས་ཏེ། ལྷ་གང་ཡང་རུང་བའི་སྦྱོར་བ་ཅན་གྱིས་རང་དང་འདྲ་བའི་སྐུའི་རྡུལ་ཕྲ་རབ་ལས་གྲུབ་པའི་ལུས་ལ་བསམ་ཞེས་ཏེ། ངག་ལ་ཞེས་བྱ་བ་
ནི་དེ་ཁོ་ན་རང་གི་གནས་ལྔ་ལ་གཞག་པར་བྱས་པ་སྟེ་ཆོ་ག་ནི་འོག་ནས་བཤད་དོ། །སངས་རྒྱས་མངོན་ཤེས་དམ་ཚིག་མཆོག །ཅེས་པ་ནི་དེའི་བསམ་གཏན་དེ་ཁོ་ན་དམ་ཚིག་སྟེ་དེས་སངས་རྒྱས་ཀྱི་མངོན་པར་ཤེས་པ་དང་མཚུངས་པར་འགྱུར་ཞེས་བསྔགས་པའོ། །ཡང་རིག་འཛིན་གྱི་ཁྱད་པར་གསུངས་པ།
ནམ་མཁའི་དབྱིངས་ཞེས་པ་ལ་སོགས་པའོ། །རྡོ་རྗེ་སེམས་དཔའ་ནི་རྡོ་རྗེ་འཆང་ཆེན་པོ་འམ་མི་བསྐྱོད་པའོ། །རྡོ་རྗེ་དམ་ཚིག་གསུམ་བསྒོམས་པས། །ཞེས་པ་ནི་སྟོང་པ་ཉིད་ཀྱི་ཡེ་ཤེས་ཀྱི་ཨོཾ་སྐུ་གསུང་ཐུགས་རྡོ་རྗེ་མཚན་མ་ལ་རང་གི་ཡི་གེ་གསལ་ནས་དགོད་པར་བྱའོ། །དེ་བཞིན་དུ་འོག་མ་ཀུན་ལ་ཡང་སྦྱར་
རོ། །ལུས་དང་ངག་སེམས་རྡོ་རྗེ་ཡིས། །ཞེས་པ་ནི་གོང་མའི་བསམ་གཏན་དེས་ཞེས་པའི་དོན་ཏོ། །ཡེ་ཤེས་གསང་བར་ཞེས་པ་ནི་སྟོང་པ་ཉིད་ལ་སོགས་པ་བཞིའོ། །འདིར་བརྟག་པ་ཐ་མར་བྱུང་བ་ནི་དེའི་གཞི་ཡིན་པའི་ཕྱིར་རོ། །འདིར་ཡང་ལྷ་ཐམས་ཅད་ལ་ཨོཾ་སྦྱར་རོ། །ད་ནི་དངོས་གྲུབ་ཀྱི་ཞིང་ཉིད་
གསུངས་པ་ཤིན་ཏུ་དབེན་པའི་ཞེས་པ་ལ་སོགས་པ་སྟེ་ཤིན་ཏུ་དབེན་པའི་རི་ཕུག་ནི་མི་སྣང་བའི་གནས་ཡིན་ནོ། །རྣམ་པ་སྣ་ཚོགས་ཞེས་པ་ནི་མེ་ཏོག་ལ་སོགས་པ་ཅན་ནི་རིག་འཛིན་གྱི་ཡིན་ནོ། །རླུང་དང་འབབ་ཆུ་ནི་རྒྱ་མཚོ་རྐང་པས་བཅགས་པ་ཡིན་ནོ། །དུར་ཁྲོད་ནི་མངོན་སྤྱོད་ཀྱི་ཡིན་ནོ། །སོགས་ཞེས་
เล่ม ๔๕ · หน้า 176a
པ་ནི་དགུག་པ་ལ་ནི་ལམ་གྱི་གཞི་མདོ་ལ་སོགས་པའོ། །མངོན་ཤེས་ལ་ནི་དྲང་སྲོང་གི་གནས་ལ་སོགས་པ་ཡིན་ནོ། །བསྙེན་པའི་དུས་སུ་ནི་ཞི་བའི་གནས་དེ་ཐམས་ཅད་ཡིན་ཏེ་བརྒྱད་པ་ལས། ཞི་བའི་གནས་རྣམས་སུ་ཞེས་བསྟན་ཏོ། །འདི་རྣམས་ནི་ཉེ་བར་
བརྟགས་པ་སྟེ་ཐམས་ཅད་དུ་མ་ངེས་པའི་ཕྱིར་རེ་རེ་ལ་ཡང་གནས་ཀྱི་ཁྱད་པར་མང་པོ་སྨྲ་བ་ཡིན་ནོ། །བསམ་གཏན་བསྡུས་པ་ཞེས་བྱ་བས་ནི་དངོས་གྲུབ་ཐམས་ཅད་ཡིན་ནོ། །མངོན་པར་ཤེས་པ་རྫོགས་པ་གསུངས་པ། མི་བསྐྱོད་ཡེ་ཤེས་དག་ལ་སོགས། །ཞེས་པ་ལ་སོགས་པ་སྟེ་སངས་རྒྱས་མཆོག་ཅེས་
པ་ནི་ཞབས་ཀྱིས་བཅགས་པ་དང་། དྲང་སྲོང་མཆོག་རྣམས་ཀྱི་གནས་སུ་མངོན་པར་ཤེས་པ་སྦྱར་བ་སྟེ། རྡོ་རྗེ་ཆེན་པོ་རྩེ་ལྔ་པ། །ཞེས་པ་ལ་སོགས་པའི་དོན་ནི་རྡོ་རྗེ་སེམས་དཔའི་སྦྱོར་བས་མིག་དང་རྣ་བ་དང་དཔྲལ་བ་དང་སྙིང་ག་དང་ལྟེ་བ་དག་ལ་རང་གི་ས་བོན་ལས་བསྐྱེད་པའི་རྡོ་རྗེ་ལྔ། དེའི་ལྟེ་བ་ལ་
ཐྷིཾ་ལྔ་སྦྱར་བས་དེ་ལྟར་འགྱུར་ཏེ་ཞེས་པ་ཡིན་ནོ། །འཁོར་ལོ་ལ་སོགས་པ་ཡང་དེ་བཞིན་སྦྱར་རོ། །ད་ནི་བཞིའི་ཏིང་ངེ་འཛིན་ལ་གོང་དུ་བཤད་པའི་བྷྲཱུཾ་ལས་གྱུར་པའི་འཁོར་ལོ་དང་། དེ་ལས་གྱུར་པའི་རྟག་པའི་སྐུ་གསུངས་པ། རྡོ་རྗེ་ནམ་མཁའ་ཞེས་པ་ལ་སོགས་པ་སྟེ་སངས་རྒྱས་འདུག་པ་ཞེས་
པ་ནི་སྤྲོ་བ་དང་བསྡུ་བས་སོ། །སངས་རྒྱས་མཆོག་དང་འདྲ་ཞེས་པ་ནི་རྟག་པའི་སྐུ་དེ་ཁོ་ནའོ། །ད་ནི་ལས་ཀྱི་མཆོག་གི་སྦྱོར་བ་ལ་ཐིག་ལེའི་སྦྱོར་བ་གསུངས་པ་སངས་རྒྱས་དཀྱིལ་འཁོར་ཞེས་པ་ལ་སོགས་པ་སྟེ། བདག་གི་ལུས་ལ་སྣང་མཛད་གཞག །ཅེས་པ་ནི་ཡེ་ཤེས་སེམས་དཔའོ། །ཨོཾ་
ཞེས་པ་ནི་འདོད་པས་ཨོཾ་ཉིད་དང་བྷྲཱུཾ་མོ། །སྔགས་ཀྱི་རྣམ་པ་ཤེས་པས་བསྒོམ་སྟེ་དེ་ཁོ་ན་འགོག་པས་རྡོ་རྗེ་ཞེས་ཏེ་འགོག་པ་ནི་དབུགས་འགོག་པའོ། །རྡོ་རྗེ་ནི་ཐིག་ལེའི་ལྷ་རྣམས་སོ། །དེ་ཁོ་ན་སྤྲོ་བ་དང་བསྡུ་བ་སྟེ་རང་གི་སེམས་ཉིད་དང་གཉིས་སུ་མེད་པར་བསྒོམས་ཏེ་འོག་མར་ཡང་དེ་བཞིན་སྦྱར་རོ། །
ཨོཾ་ཞེས་པ་དང་ཛྲྀཾ་ངམ་ཨཾ་ཉིད་ཡིན་ནོ། །འདི་དང་བཟླས་པ་དག་ནི་སྦྱོར་བའི་ཆ་ཞེས་བྱ་སྟེ་བཟང་པོ་ཞབས་ཀྱིས་གསུངས་པ། ཡེ་ཤེས་སེམས་དཔའི་སྙིང་པོ་ཡི། །ཐིག་ལེ་རང་སེམས་འོད་དགོད་དོ། །སྔགས་ཀྱི་རྣམ་ཤེས་བསྒོམ་པ་ནི། །སྦྱང་བའི་ཆ་ཞེས་བྱ་བར་བཤད། །བྱིང་བའི་སེམས་ལས་སློང་
เล่ม ๔๕ · หน้า 176b
བ་ཡི། །དེ་བཞིན་བཟླས་པའི་ངོ་བོ་ཡང་། །ཞེའོ། །འདིར་གཙོ་བོ་གསུམ་ལ་སྦྱར་བ་ལྟར་ཀུན་ལ་སྦྱར་རོ། །དེའི་ཆོ་ག་ཡང་བཟང་པོ་ཞབས་ཀྱིས། སྙིང་འོད་སྤྲུལ་པའི་འགོག་པའི་ས། །ཞེས་པ་ནས། འགྲོ་བའི་དོན་དུ་གང་ཡང་སྤྲོ། །ཞེས་པའི་བར་དུ་ཚིགས་སུ་བཅད་པ་བཞི་གསུངས་སོ། །
ཡང་རིག་འཛིན་གསུངས་པ། རྡོ་རྗེ་ནམ་མཁའི་ཞེས་པ་ལ་སོགས་པའོ། །ལུས་ངག་སེམས་ལ་ཞེས་པ་ནི་རྡོ་རྗེ་གསུམ་གྱི་གཡས་སུ་འམ་ཡང་ན་དེའི་ཐུགས་ཀའི་གཡས་སུ་སྟེ། དེའི་ཐུགས་ཀ་ཉིད་ནི་མ་ཡིན་ཏེ་གོང་དུ་བཤད་པའི་ཕྱིར་རོ། །སྐུ་དང་གསུང་དང་ཐུགས་རྡོ་རྗེའི་ཞེས་པ་ནི་འདས་མ་ཐག་
པའི་ཡོན་ཏན་ནོ། །ལེའུ་བཅུ་གཅིག་པའི་འགྲེལ་པ་རྫོགས་སོ།། །།ད་ནི་འབྲས་བུའི་ངོ་བོ་ལས་ཐུན་མོང་གི་སྒྲུབ་པ་རྣམས་གསུངས་པ་དེ་ནས་ཞེས་པ་ལ་སོགས་པའོ། །སྐྱེད་པ་ཞེས་པའི་རྒྱུའི་རྣམ་པ་ཡིན་པའི་ཕྱིར་རོ། །མཁའ་དང་མཚུངས་པ་ཉམས་འགྱུར་བ། །ཞེས་པ་ནས། རོལ་མོ་འདི་དག་
རབ་ཏུ་བསྒོམ། །ཞེས་པའི་བར་དུ་ནམ་མཁའ་ལྟ་བུའི་ངོ་བོ་དག་ལས་ཐུན་མོང་གི་སྒྲུབ་པ་དང་བསྒོམ་མོ་ཞེས་སྤྱིར་གསུངས་པ་ཡིན་ནོ། །དེ་དག་ཀྱང་གང་དག་ཡིན་ཞེ་ན་རིག་འཛིན་དང་། མི་སྣང་བ་དང་། མངོན་པར་ཤེས་པ་དང་། ལས་ཀྱི་ཁྱད་པར་དང་། རྒྱ་མཚོ་རྐང་པས་བཅགས་པ་དང་། སྔགས་ཀྱི་ཁྱད་
པར་རྣམས་ཀྱི་སྒྲུབ་པ་དང་། མངག་པ་དང་། མིག་རྣོན་ཏེ་བརྒྱད་པོ་དེ་དག་གི་ཐུན་མོང་གི་སྒྲུབ་པ་ཡིན་ཏེ། དེ་ལྟར་ཡང་། ཐུན་མོང་སྒྲུབ་པ་བརྒྱད་དང་ནི། །མཆོག་གི་སངས་རྒྱས་དངོས་པོ་ཡིན། །ཞེས་སོ། །དེ་དག་གི་ཁྱད་པར་གྱི་དབྱེ་བ་ནི་རང་རང་གི་སྐབས་སུ་དབྱེའོ། །དེ་ལ་འདི་རྣམས་ཀྱི་ཐུན་མོང་གི་
ཆོ་ག་ནི་ཐོག་མར་བསྙེན་པ་དང་སྒྲུབ་པ་དག་གིས་རྣལ་འབྱོར་བཞིའི་རིམ་པས་གྲུབ་པ་དམ་པའི་མཚན་མ་ཐོབ་ནས། རང་གི་སྔགས་ལ་དེ་ཁོ་ན་གསུམ་གྱི་མཆོད་པ་འབུམ་བྱས་ནས། རང་དང་མཐུན་པའི་གནས་སུ་ལྷ་རྣམས་ཀྱི་གནས་ནས་ལྷ་རེ་རེ་འམ་ཚང་བ་གང་ལ་ཇི་ལྟར་རིགས་པས་ཉེ་བའི་སྒྲུབ་པ་
ལ་སོགས་པ་བྱས་ཏེ་དེ་ལ་མ་གཏོགས་པར་ཇི་སྐད་བཤད་པའི་ཆོ་ག་དག་གིས་བསྒྲུབ་པར་བྱ་བ་འདི་ཡིན་ནོ། །དེ་ལྟར་བཟང་པོ་ཞབས་ཀྱིས། ཡང་ན་གྲུབ་པའི་མཚན་མ་ནི། །ཞེས་པ་ལ་སོགས་པ་དང་། དོན་བསྡུས་པའི་ཚིགས་བཅད་གསུངས་པ་ལས་ཤེས་པར་བྱའོ། །ད་ནི་དེ་རྣམས་ཀྱི་
เล่ม ๔๕ · หน้า 177a
ཆོ་ག་བཤད་པ་གསུངས་པ་དགོན་པ་ཆེན་པོ་ཞེས་པ་ལ་སོགས་པ་སྟེ་མི་སྣང་བའི་གནས་ཡིན་ནོ། །འོག་མ་ནི་རིག་འཛིན་གྱི་ཡིན་ནོ། །ལུས་དང་ངག་སེམས་རྡོ་རྗེ་ལ། །ཞེས་པ་ནི་རྡོ་རྗེ་སེམས་དཔའ་སྟེ་རྐྱེན་ནོ། །རྡོ་རྗེ་འཇམ་པ་ཞེས་པ་ནི་དེ་ཞུ་བས་མུཾ་ལས་བསྐྱེད་པའི་འཇམ་
དཔལ་ཡེ་ཤེས་ཀྱི་མཛོད་བསྒོམ་པ་སྟེ། རྐྱེན་དེ་ནི་གཞན་འདིར་སྒྱུར་ན་དགོས་ཀྱི་རང་ལ་ནི་མ་ཡིན་ཏེ་འོག་ནས་སྟོན་ཏོ། །དེ་ནས་རང་གི་སྔགས་ཀྱིས་བསྐྱེད་པའི་རལ་གྲི་ལ་གནས་བཞིར་ཁཾ་བསྒོམ་པར་བྱའོ། །སྤྲོ་བ་ལ་སོགས་པ་ནི་རང་གི་ས་བོན་ཁོ་ན་ལས་བྱའོ་ཞེས་ཏེ་དེ་ཡན་ཆད་དུ་བསམ་གཏན་ལས་
བྱུང་བའི་རིག་འཛིན་དང་། མངོན་པར་ཤེས་པ་དང་མི་སྣང་བ་རྫོགས་སོ། །རྫས་ལ་བརྟེན་པའི་མི་སྣང་བ་གསུངས་པ། རྡོ་རྗེ་མི་ཕྱེད་གསུམ་ལས་བྱུང་། །ཞེས་པ་ལ་སོགས་པའོ། །རྣལ་འབྱོར་པ་དེ་ཁོ་ན་ལས་བྱུང་བའི་བཤང་གཅིའི་རི་ལུ་གསེར་དང་དངུལ་དང་གསུམ་གྱིས་ལྡན་པར་བྱ་སྟེ་གསང་
བར་བཅུག་ནས་རང་གི་སྔགས་ཀྱིས་བསྐྱེད་པའི་རང་གི་དཀྱིལ་འཁོར་གྱི་འཁོར་ལོ་དེར་བསྒོམ་པ་ན་ཞེས་ཏེ། འདིར་མ་སྨོས་པ་ནི་འོག་ཏུ་ཤེས་པར་བྱའོ། །ཡང་རྫས་ལ་བརྟེན་པའི་རིག་འཛིན་གསུངས་པ། འཁོར་ལོ་འོད་འཕྲོ་ཞེས་པ་ལ་སོགས་པ་སྟེ། རྟག་པའི་སྦྱོར་བ་ཅན་གྱིས་རང་གི་མཚན་མ་
རང་གི་སྔགས་ལས་བྱུང་བའི་སངས་རྒྱས་ཀུན་གྱི་གནས་སུ་བསྒོམས་ནས་ཞེས་ཏེ་དེ་བཞིན་དུ་གཞན་ལ་ཡང་སྦྱར་རོ། །རི་རབ་སུམ་ཅུ་དྲུག་ཅེས་པ་ནི་སྟོང་གསུམ་གྱི་སྟོང་ཆེན་པོ་སྟེ་སུམ་ཅུ་ཞེས་པ་ནི་སྟོང་གསུམ་མོ། །རྩ་དྲུག་ནི་དེའི་ཕྱོགས་དྲུག་གི་ངོ་བོ་ཞེས་ཏེ། དེའི་ཕྱིར་དོན་ཡོད་གྲུབ་པ་
ལ། སྟོང་གསུམ་ན་ནི་མཆོག་ཏུ་དཔའ། །ཞེས་སྨོས་པ་ཡིན་ནོ། །ཡེ་ཤེས་ལྔ་ལྡན་ཞེས་པ་ནི་གོང་དུ་བཤད་པ་བཞིན་ཏེ་ཀུན་ལ་ཤེས་པར་བྱའོ། །འདིར་མ་རྫོགས་པ་ནི་འོག་ཏུ་སྦྱར་རོ། །ད་ནི་རི་ལུའི་འཕྲོ་འདུ་གསུངས་པ། ཨོཾ་གྱིས་ཞེས་པ་ལ་སོགས་པ་སྟེ་རྡོ་རྗེ་འཇམ་པའི་སྦྱོར་བས་གོང་དུ་བཤད་
པའི་རིམ་གྱིས་རྡོ་རྗེ་མི་ཕྱེད་པ་ལས་བྱུང་བའི་བཤང་གཅིའི་ཆོ་ག་བཞིན་སྤྱད་དོ། །ཨོཾ་མམ་མུཾ་ལས་བྱུང་བའི་ཕྱི་ནང་དཀྱིལ་འཁོར་རང་གི་ལྷ་བདག་པོར་བྱས་པ་དང་ལྡན་པའི་རི་ལུ་ཙན་ཀ་ཙམ་གསང་བར་བཅུག་ནས། ཡི་གེ་གསུམ་གྱིས་བསྐུལ་བ་རང་གི་སྔགས་བཟླས་ཏེ་འཕར་ནས་ཟོས་ནས་ཞེས་
เล่ม ๔๕ · หน้า 177b
ཏེ། འདི་ཡང་མ་རྫོགས་པའི་ཆོ་ག་ནི་བཅོ་ལྔ་པ་ལས་ཤེས་པར་བྱའོ། །ཡང་རིག་འཛིན་གྱི་འཕྲོ་གསུངས་པ། མཁའ་དབྱིངས་གསལ་བའི་དཀྱིལ་འཁོར་གནས་པར་ཞེས་པ་ལ་སོགས་པའོ། །རྟག་པའི་སྦྱོར་བ་ལས་གོང་དུ་བཤད་པའི་རིམ་པས་གསེར་ལ་སོགས་པའི་འཁོར་ལོ་རང་གི་
སྔགས་ཀྱིས་བསྐྱེད་པའི་ནང་གི་དཀྱིལ་འཁོར་རང་གིས་གཙོ་བོར་བྱས་པ་དག་དཀྱིལ་འཁོར་གྱི་དབུས་སུ་གཞུག་སྟེ། གོང་མ་བཞིན་དུ་སྔགས་བཟླས་ནས་འཁོར་ལོ་དེ་འཕག་གམ་འཕར་ནས་ལག་ཏུ་བླངས་ན་ཇི་སྐད་གསུངས་པའི་ཡོན་ཏན་དུ་འགྱུར་ཏེ་དེ་བཞིན་ཀུན་ལ་སྦྱར་རོ། །ཏྲི་ཤཱུ་ཞེས་པ་ལ་
སོགས་པ་ནི་མཚན་མ་དེ་དང་ལྡན་པ་རྣམས་ཏེ་རྡོ་རྗེ་ཁྱད་པར་ཞེས་པ་ནི་ལྷའི་ཁྱད་པར་ཏེ། དེའི་ཁོད་མ་བཞིན་ནོ། །གྲུབ་པ་དེ་དག་ཐམས་ཅད་ལ་ལྷ་ནི་རང་གཅིག་པུའི་སྦྱོར་བ་ཡིན་ནོ་ཞེས་ཤེས་པར་བྱའོ། །ད་ནི་བསམ་གཏན་ལ་བརྟེན་པའི་དགུག་པ་ལས་སངས་རྒྱས་དགུག་པ་གསུངས་པ། ལམ་གྱི་
བཞི་མདོ་ཞེས་པ་ལ་སོགས་པའོ། །དགུག་པའི་ཁྱད་པར་ཞེས་པ་དགུག་པར་བྱ་བའི་ཁྱད་པར་ཏེ་གང་འདོད་པ་དགུག་གོ་ཞེས་པའོ། །དེ་ལས་སངས་རྒྱས་དགུག་ན་དང་པོ་ལ་སོགས་པའི་སྦྱོར་བ་གསུམ་དང་ལྡན་པའི་སྔགས་ཀྱིས་སྐྱེས་བུ་དཀྱིལ་འཁོར་ཆེན་པོའི་འཁོར་ལོ་དང་ལྡན་པས་འཁོར་ལོའི་
ཀྱོ་བ་ལ་སོགས་པ་དག་གིས་རླུང་ལ་གནས་པ་དགུག་གོ་ཞེས་གསུངས་ནས་རྣམ་པར་སྣང་མཛད་ཅེས་པ་ལ་སོགས་པའོ། །རྒྱལ་བ་དག་གནས་ཞེས་པ་ནི་རྡོ་རྗེ་ལ་སོགས་པ་རྡོ་རྗེ་གསུམ་གྱི་ཐུགས་ཀ་ན་གནས་པ་དེ་ཉིད་དོ། །དགུག་པའི་དོན་དུ་འཕྲོ་བའི་ལྷ་གསུངས་པ། རྣམ་པའི་མཆོག་རྣམས་
ཞེས་པ་ལ་སོགས་པ་སྟེ། སངས་རྒྱས་དགུག་པ་ལ་རྡོ་རྗེ་གསུམ་པོ་ཉིད་སྤྲོ་ཞེས་པའི་དོན་ཏོ། །ཀྱོ་བ་ལ་སོགས་ཞེས་པ་ནི་ཞགས་པ་ཡང་ཞེས་པའི་དོན་ཏོ། །འདིར་མ་རྫོགས་པ་ནི་བཅུ་བཞི་པ་ལས་ཤེས་པར་བྱའོ། །བརྒྱད་པར་བཤད་པའི་ནང་གི་མཆོད་པའི་དོན་དུ་ལྕེའི་སྦྱོར་བ་བྱ་བ་དང་དེའི་
རིམ་པ་གསུངས་པ། རྣམ་པའི་མཆོག་རྣམས་ཞེས་པ་ལ་སོགས་པ་སྟེ། རྣམ་པ་མཆོག་རྣམས་ནི་སྣའོ། །སྣའི་རྣམ་པ་ཐམས་ཅད་ཀྱི་མཆོག་ཐབས་དང་ཤེས་རབ་ཀྱི་བདག་ཉིད་དོ། །ཀུན་ཞེས་པ་ནི་ལུས་ཀྱི་ལྷ་མ་ལུས་པ་སྟེ་ཐམས་ཅད་དུ་དེ་ལྟར་ཤེས་པར་བྱའོ། །སྐུ་ཞེས་པ་ནི་རྟག་པའོ། །རྡོ་རྗེ་
เล่ม ๔๕ · หน้า 178a
སྦྱོར་བས་ཞེས་པ་ནི་འོག་ནས་འབྱུང་བའི་སྦྱོར་བའོ། །མཆོད་པ་གསང་བ་རབ་ཏུ་བསྒྲུབ། །ཅེས་པ་ནི་གསང་བའི་མཆོད་པ་དང་ཕྱིའི་ཡང་བྱས་ཏེ་བསྟོད་ནས་ནང་གི་མཆོད་པ་བྱའོ་ཞེས་པའོ། །ཤ་ཆེན་ཞེས་པ་ལ་སོགས་པ་ནི་གོང་དུ་གསུངས་པའི་སྒྲུབ་པ་རྣམས་ཀྱི་མཐུན་པའི་ཟས་
བསྟན་པ་སྟེ། རྡོ་རྗེ་གསུམ་མཆོག་ཅེས་པ་ནི་བསམ་གཏན་ལ་བརྟེན་པའི་གཙོ་བོ་གསུམ་གྱི་རིག་འཛིན་ནོ། །རྡོ་རྗེ་སྦྱོར་བ་འདི་བྱས་ནས། །ཞེས་པ་ནི་འོག་ནས་འབྱུང་བའི་བདུད་རྩིའི་སྦྱོར་བའོ། །ད་ནི་སྐུའི་རྡོ་རྗེ་སྒྲུབ་པ་དང་། སྒྲུབ་པ་ཆེན་པོའི་ཕྱག་རྒྱ་གསུངས་པ་རྡོ་རྗེ་ཅན་གྱི་ཞེས་པ་ལ་སོགས་
པའོ། །དེ་ལ་སྐུའི་རྡོ་རྗེ་དང་། གསུང་གི་རྡོ་རྗེ་དང་། ཐུགས་ཀྱི་རྡོ་རྗེ་དང་། ཡེ་ཤེས་སེམས་དཔའ་བཞི་ནི་རིམ་བཞིན་དུ་ལས་དང་ཆོས་དང་ཆེན་པོ་དང་དམ་ཚིག་གི་ཕྱག་རྒྱ་དག་སྟེ་དེ་ཡང་བཟང་པོ་ཞབས་ཀྱིས་གསུངས་པ། སྐུ་གསུང་ཐུགས་ཀྱི་རྡོ་རྗེ་རྣམས། །ལས་ཆོས་ཆེན་པོའི་བདག་ཉིད་
བརྗོད། །ཅེས་པ་ལ་སོགས་པ་སྟེ་དབུ་རྒྱན་དང་ལྔའོ། །དེ་ཡང་ཕྱི་མ་ལས། སངས་རྒྱས་བྱང་ཆུབ་སེམས་དཔའ་དང་། །ཁྲོ་རྒྱལ་ཕྱག་རྒྱ་ལྔས་རྒྱས་གདབ། །ཅེས་སོ། །ལྕེ་དག་པར་བྱ་བའི་སྦྱོར་བ་ཁོ་ན་གསུངས་པ། ལྕེའི་དམ་ཚིག་ཅེས་པ་ལ་སོགས་པ་སྟེ། ལྕེ་ལ་ཧཱུཾ་ལས་བྱུང་
བའི་རྡོ་རྗེ་ནས་ཙམ་ཧཱུཾ་གིས་བྱིན་གྱིས་བརླབས་པའོ། །དེས་བཟའ་བའི་བདུད་རྩིའི་སྦྱོར་བ་གསུངས་པ། ཨ་དང་ཞེས་པ་ལ་སོགས་པ་སྟེ་ཨས་བྷནྡྷ་བསྐྱེད་པའོ། །ཨོཾ་ནི་རྡོ་རྗེས་བྱིན་གྱིས་བརླབས་པའི་དེ་མ་ཐག་ཡེ་ཤེས་ཀྱི་བདུད་རྩིར་བྱིན་གྱིས་རློབ་པའོ། །དམ་ཚིག་ནི་བཟའ་བ་ལྔའོ། །
འདི་ཡང་ཕྱི་མ་ལས་ཞིབ་ཏུ་གསུངས་པ་ལ་བཟང་པོ་ཞབས་ཀྱིས་ཀྱང་། ཉི་མ་ཟླ་བ་ཆུ་སྨན་དྲི། །ཞེས་པ་ནས། དཀྱིལ་འཁོར་དེ་ཡིས་ཚིམ་པར་བྱ། །ཞེས་པའི་བར་དུ་ཚིགས་སུ་བཅད་པ་གཉིས་གསུངས་སོ། །ད་ནི་གོང་དུ་གསུངས་པའི་གྲུབ་པ་རྣམས་ཀྱི་ཡོན་ཏན་གསུངས་
རྡོ་རྗེ་དམ་ཚིག་གསུམ་གྲུབ་མཆོག །ཅེས་པ་ལ་སོགས་པའོ། །དེ་ལ་རྡོ་རྗེ་དམ་ཚིག་གསུམ་བསམ་གཏན་ལ་བརྟེན་པའི་གཙོ་བོ་གསུམ་གྱི་རིག་འཛིན་ཏེ། དེ་གྲུབ་ན་སྐུ་ལ་སོགས་པ་དང་འདྲ་བར་འགྱུར་ཞེས་པ་སྟེ་བསམ་གཏན་ལ་བརྟེན་པ་གཞན་ཡང་དེས་ཤེས་པར་བྱའོ། །འཁོར་
เล่ม ๔๕ · หน้า 178b
ལོའི་དམ་ཚིག་ཅེས་པ་ནི་རྫས་ལ་བརྟེན་པ་ཡིན་ནོ། །དམ་ཚིག་དམ་པ་ཐམས་ཅད་ཀྱི། །ཞེས་པ་ནི་རྒྱུད་གཞན་གྱི་ཆོ་གས་གྲུབ་པ་དག་ལས་འདི་མཆོག་ཏུ་གྱུར་པ་ཞེས་པ་སྟེ་ཅི་སྟེ་ཞེ་ན། འདིའི་ཆོ་གས་རྡོ་རྗེ་བསྒོམ་པས་སོ། །དེ་བཞིན་རྫས་ལ་བརྟེན་པ་གཞན་ཡང་ཤེས་པར་བྱའོ། །སྟོང་
ཁམས་དག་ནི་སྣང་བར་བྱེད། །ཅེས་པ་ནི་སྟོང་དང་པོ་ལ་སྤྱོད་པ་སྟེ། དེ་ལ་རིག་འཛིན་ནི་རི་རབ་སུམ་ཅུ་རྩ་དྲུག་ཅེས་པ་དང་། སྟོང་གསུམ་ན་ནི་ཞེས་པས་སྟོང་གསུམ་ལ་སྤྱོད་ལ་མི་སྣང་བ་ནི་སྟོང་དང་པོ་ལ་སྤྱོད་དོ། །མངོན་ཤེས་ནི་རྗེས་སུ་དཔག་ནས་སྟོང་འབྲིང་པོར་ཤེས་པར་བྱ་སྟེ་དེ་ལྟར་ཡང་
བཟང་པོ་ཞབས་ཀྱིས། མི་སྣང་བ་ནི་ཀུན་གྱི་མཆོག །ཅེས་པ་ལ་སོགས་པ་གསུངས་སོ། །ལྷག་མ་ནི་དོན་གསལ་བས་མ་ཕྱེའོ། །ད་ནི་དངོས་གྲུབ་དེ་དག་གི་ཐབས་ཀྱི་བྱེ་བྲག་གསུངས་པ། བསྙེན་པའི་དམ་ཚིག་སྦྱོར་བ་དང་། །ཞེས་པ་ལ་སོགས་པའོ། །དེ་ལ་བསྙེན་པ་ནི་ལྷ་མཆོག་
གི་ཆོ་གའོ། །ཉེ་བར་སྒྲུབ་པ་ནི་དེའི་རིག་མའི་ཆོ་གའོ། །སྒྲུབ་པ་ནི་དངོས་གྲུབ་མཆོག་གི་ཆོ་གའོ། །སྒྲུབ་པ་ཆེན་པོ་ནི་རྒྱལ་བ་མཆོག་གི་ལྷ་རྣམས་ཀྱི་སྟེ་དེ་ལྟར་ཡང་ཕྱི་མ་ལས། འདོད་ཆགས་ཆེན་པོའི་ཚུལ་གྱིས་ནི། །ཞེས་པ་ནས། བདག་འདྲ་དཀྱིལ་འཁོར་འབྱིན་པ་ནི། །སྒྲུབ་པ་ཆེན་པོ་
ཞེས་བྱའོ། །ཞེས་པ་དང་གཞན་ཡང་བཟང་པོ་ཞབས་ཀྱིས་ཀྱང་དོན་བསྡུས་པ་ལས་གསལ་བར་བཤད་པ་བཞིན་ནོ། །རྡོ་རྗེ་བྱེ་བྲག་ཅེས་པ་ནི་གོང་མ་དེ་དག་ཆུང་ངུ་ལ་སོགས་པའི་བདག་ཉིད་དེ། དེ་ལ་ཡང་ཚུལ་བཞི་བཞིར་གནས་པའི་བཅུ་དྲུག་སྟེ། དེ་ལྟར་ཡང་ཕྱི་མ་ལས། ཐུན་མོང་མཆོག་གི་
བྱེ་བྲག་གིས། །ཞེས་པ་དང་། དེ་ལྟར་ཡང་ཆེན་པོའི་སྒྲུབ་པ་ཆེན་པོའི་མཐར་ཐུག་ནས་དེ་ལྟར་བྱེ་བྲག་ཤེས་པར་བྱས་ནས་ཞེས་སོ། །དེ་ལ་ལྷ་མཆོག་གི་ངོ་བོ་ཡེ་ཤེས་དམན་པས་ཆུང་ངུ་དེའི་ཚུལ་བཞིན་གསུངས་པ། བསྙེན་པའི་ཏིང་འཛིན་རབ་སྦྱོར་བ། །ཞེས་པ་ལ་སོགས་པའོ། །
དེ་ལ་བསྙེན་པའི་ཏིང་ངེ་འཛིན་ནི་རྡོ་རྗེ་སེམས་དཔའ་ཡབ་ཡུམ་སྦྱོར་བའི་བྱང་ཆུབ་སེམས་ལས་བྱུང་བའི་ཡི་གེ་ལྔ་པོ་ནས། མི་གནས་པའི་མྱ་ངན་ལས་འདས་པ་མཆོག་ལ་ཐུག་པ་བསྒོམ་པ་སྟེ། དེ་ཡང་བཟང་པོ་ཞབས་ཀྱིས་གསུངས་པ། ཨོཾ་ཨཱཿཧཱུཾ་ཞེས་པ་དེའི་སེམས། །ཞེས་པ་ནས།
เล่ม ๔๕ · หน้า 179a
རྒྱུ་མཐུན་བྱེད་བ་བཤེས་གཉེན་གྱིས། །ཞེས་པའི་བར་དུ་སྟེ་རང་དང་འདྲ་བའི་འོད་ཀྱིས་བཤེས་གཉེན་ལས་གྱུར་པར་ཆུང་ངུའི་རྒྱུ་མཐུན་པའི་འབྲས་བུའོ། །ཉེ་བའི་སྒྲུབ་པ་ནི་ལྷ་མཆོག་དེ་ལ་སའི་སྙིང་པོ་ལ་སོགས་པའི་རྡོ་རྗེ་དག་གིས་སྐྱེ་མཆེད་ལ་སོགས་པའི་སྤྱོད་པ་སྟེ་སྐྱེ་
མཆེད་ཅེས་པ་ནི་ཉེ་བར་མཚོན་པ་སྟེ་འདི་ནི་ཐམས་ཅད་ཤེས་པ་ཡིན་པས་ཁམས་ལ་སོགས་པ་ཡང་སྦྱར་རོ། །དེ་ཡང་བཟང་པོ་ཞབས་ཀྱིས་གསུངས་པ། རྣམ་སྨིན་ལས་ནི་ཀུན་ཤེས་འགྲོ། །ཞེས་པ་ནས། ས་བོན་རྣམས་ཀྱིས་ཞེས་པའི་བར་དུ་སྟེ་མི་འདྲ་བར་སྨིན་པ་ཉིད་ཀྱིས་ན་ཆུང་ངུའི་རྣམ་པར་སྨིན་
པའི་འབྲས་བུའོ། །སྒྲུབ་པའི་ཚེ་ན་སྔགས་ཀྱི་བདག་པོ་རིག་པའི་ལྷ་བསྒོམ་པའི་ཚིགས་སུ་བཅད་པས་བསྐུལ་བར་བྱ་སྟེ། བསྐུལ་བ་ནི་འབྲིང་པོའི་སྒྲུབ་པ་ལ་སོགས་པས་བྱ་བ་མ་ཡིན་པས་ཁྱད་པར་དུ་གསུངས་ཀྱི་བསྐྱེད་པ་ལ་སོགས་པའི་ཆོ་ག་ཡང་ཤེས་པར་བྱ་སྟེ། དེ་ཡང་བཟང་པོ་ཞབས་ཀྱིས་
གསུངས་པ་གོང་དུ་སྨོས་པ་སྟེ་སྐྱེས་བུར་འགྱུར་ཞེས་པ་ནས། གསང་བ་གསུམ་མཚན་མཐོང་ནས་སུ། །ཞེས་པའི་བར་དུའོ། །རང་གི་འོད་ཀྱིས་ལུས་དང་ངག་གི་ལས་གཙོ་བས་ན་ཆུང་ངུའི་སྐྱེས་བུ་བྱེད་པའི་འབྲས་བུའོ། །སྒྲུབ་པ་ཆེན་པོ་བྱེད་པའི་ཚེ། རང་སྔགས་རྡོ་རྗེ་ཅན་གྱི་དེས་དབུ་རྒྱན་ལ་བདག་
པོ་བསམ་པ་སྟེ། དེ་ཡང་བཟང་པོ་ཞབས་ཀྱིས་གསུངས་པ། དྲི་མ་ཆུང་བྲལ་དག་དོན་དུ། །ཞེས་པ་ནས། རིག་མ་དབང་ཕྱུག་དབུ་རྒྱན་མཆོག །ཅེས་པའི་བར་ཏེ་དྲི་མ་དང་བྲལ་བ་ཉིད་ཀྱིས་ན་ཆུང་ངུའི་བྲལ་བའི་འབྲས་བུའོ། །གོང་མའི་བསྙེན་པ་ཁོ་ནར་འདུས་པའི་ངོ་བོར་གསུངས་པ། བསྙེན་
པའི་ཞེས་པ་ལ་སོགས་པ་སྟེ་ཐམས་ཅད་ཅེས་པ་ནི་དབྱངས་ཀྱིས་བསྐུལ་བའི་དེ་མ་ཐག་འོད་ཀྱིས་བསྡུས་ཏེ་སངས་རྒྱས་ཐམས་ཅད་ཀྱི་རང་བཞིན་དུ་བརྟག་ཅེས་པའོ། །ད་ནི་ལྷ་ཐམས་ཅད་པས་ཐུན་མོང་ལ་ཡེ་ཤེས་ཀྱི་སྟོབས་ཀྱིས་ཆེ་བའི་ཚུལ་བཞིན་གསུངས་པ། ཡང་ན་ཞེས་པ་ནི་རྡོ་རྗེ་བཞིའི་ཡང་
ཞེས་པའི་དོན་ཏོ། །དེ་ལ་རྡོ་རྗེ་བཞི་ནི་ཕྱི་མ་ལས། དང་པོ་སྟོང་པའི་བྱང་ཆུབ་སྟེ། །དེས་བསྙེན་པའོ། །སྐུ་གསུམ་ཞེས་པ་ནི་སྒྲུབ་པ་སྟེ། དེ་བཞིན་ཉེ་བར་སྒྲུབ་ལ་སོགས་པ་ཡང་ཤུགས་ཀྱིས་ཤེས་པར་བྱ་སྟེ། གཙོ་བོའི་ཆོ་ག་ལ་ལྟོས་པའི་ཕྱིར་མ་སྨོས་སོ། །དེ་ཡང་བཟང་པོ་ཞབས་ཀྱིས་
เล่ม ๔๕ · หน้า 179b
གསུངས་པ། སྙིང་གའི་རལ་གྲིའི་སྙིང་འོད་ཀྱིས། །ཞེས་པ་ནས། ཐུགས་ཀྱི་དབང་ཕྱུག་འཛིན་པར་འདོད། །ཅེས་པའི་བར་དུ་སྟེ་ཆེན་པོའི་རྒྱུ་མཐུན་པའི་འབྲས་བུ་ལ་སོགས་པ་ནི་སྔ་མ་བཞིན་ནོ། །ཡེ་ཤེས་ཀྱི་ནུས་པ་འབྲིང་དུ་གྱུར་པའི་རིག་མའི་ཚུལ་གསུངས་པ། དུས་བཞི་ཞེས་པ་ལ་
སོགས་པ་སྟེ། གནས་ལྔར་ནི་ཞེས་པ་ནི་སངས་རྒྱས་ལྔས་བྱིན་གྱིས་བརླབ་ཅེས་པ་སྟེ། ཁྱད་པར་དུ་གྱུར་པའི་ཆོ་ག་སྨོས་ནས་ཡན་ལག་བཞི་པ་ནི་རང་གི་ཆོ་ག་ལ་ལྟོས་པར་ཤེས་པར་བྱ་སྟེ་དེ་ཡང་བཟང་པོ་ཞབས་ཀྱིས་གསུངས་པ། འབྲིང་ལ་དེ་བཞིན་རྒྱུ་མཐུན་སོགས། །ཞེས་པ་ནས།
སངས་རྒྱས་ལྔ་ཡིས་གང་བར་བསྒོམ། །ཞེས་པའི་བར་དུའོ། །དེ་ཡང་འབྲིང་པོའི་རྒྱུ་མཐུན་པ་ལ་སོགས་པ་ནི་སྔ་མ་ལྟར་རོ། །དངོས་གྲུབ་མཆོག་ལ་གཉིས་སུ་མེད་པའི་སྒྲུབ་པ་སྦྱོར་བ་ཐམས་ཅད་ལ་ཐུན་མོང་གི་ཆོ་ག་གསུངས་པ། ཡེ་ཤེས་རྡོ་རྗེ་ཡི་གེ་ཨོཾ། །ཞེས་པ་སྟེ་ཨོཾ་ཞེས་པ་ནི་མཚོན་པ་
སྟེ། ཨཱཿདང་ཧཱུཾ་ཡང་ཤེས་པར་བྱའོ། །དེའི་ཨོཾ་གྱིས་ནོར་བུའི་ཆ་བསྐྱེད་པ་ལ་སོགས་པའི་རིམ་པས་བསྙེན་པ་ལ་སོགས་པ་བྱའོ་ཞེས་པ་སྟེ་ཕྱི་མ་ལས། བསྒྲུབ་བྱ་སྒྲུབ་པའི་སྦྱོར་བ་གང་། །ཞེས་པ་ལ་སོགས་པའོ། །དེ་ཡང་བཟང་པོ་ཞབས་ཀྱིས་གསུངས་པ། ཧཱུཾ་ཨཱཿའདབ་བརྒྱད་ཅེས་པ་ནས།
ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཞེས་པའི་བར་དང་། དོན་བསྡུས་པ་ལས་ཀྱང་གསལ་བས་གསུངས་སོ། །ད་ནི་དངོས་གྲུབ་དག་གི་དུས་གསུངས་པ། ཞག་བདུན་དང་ནི་ཞེས་པ་ལ་སོགས་པ་སྟེ། རྒྱས་པར་ཞེས་པ་ནི་རྒྱུད་གཞན་དག་ལས་ཤེས་པའི་དོན་ཏོ། །གསང་བ་མཆོག་ཅེས་པ་ནི་རྒྱུད་འདི་
སྟེ་གོང་དུ་ཟླ་བ་ཕྱེད་ཀྱིས་འགྲུབ་ཅེས་གསུངས་སོ། །གཞན་དག་ན་རེ་འདི་ནི་དྲག་ཤུལ་གྱིས་བསྒྲུབ་པའི་དུས་ཏེ། རབ་བསྐུལ་བཞེས་པས་དེའི་ཕྱིར་ཏེ། གོང་དུ་བདུན་གྱིས་འགྲུབ་པར་གསུངས་པས། དེ་ནི་མཆོག་ཟླ་ཕྱེད་པ་ཡིན་ནོ། །ཞེས་ཟེར་རོ། །ད་ནི་ཆུང་ངུའི་སྒྲུབ་པ་ལ་སྐུལ་བའི་ཚིགས་སུ་བཅད་
པ་གསུངས་པ། དེ་ལ་འདི་ནི་ཞེས་པ་ནི་སྤྲུལ་པའི་སྐུ་ཁོ་ན་ཉེ་བར་སྒྲུབ་པ་སྟེ་སྡོམ་པ་ནི་དེའི་བསམ་གཏན། དེའི་ཡུལ་ནི་གསོལ་བ་གདབ་པར་བྱ་བ་སྟེ་ཡུལ་ལོ་ཞེས་སྦྱར་རོ། །དེའི་དོན་ནི་སྐུ་རྡོ་རྗེའི་བསམ་གཏན་གྱིས་གསོལ་བ་གདབ་པར་བྱ་བའི་ཡུལ་ཚིགས་སུ་བཅད་པ་འོག་ནས་འབྱུང་བ་
เล่ม ๔๕ · หน้า 180a
དང་པོ་འདི་གཉིས་བརྗོད་དོ་ཞེས་པ་འདི་ཡིན་ནོ། །དེ་བཞིན་དུ་འོག་མ་གཉིས་ལ་སྦྱར་རོ། །ཚིགས་སུ་བཅད་པ་དེ་ལས་ཀྱང་དང་པོ་ནི་རང་གི་སྤྲུལ་པ་ལའོ། །འོག་མ་ནི་ཕྱོགས་བཅུ་ནས་སྤྱན་དྲངས་པ་ལའོ། །སྒྲུབ་པ་ཞེས་པ་ནི་ལོངས་སྤྱོད་རྫོགས་པའི་སྐུ་ཁོ་ན་བསྒྲུབ་
པའོ། །དེ་ལྟར་སྒྲུབ་པ་ཆེན་པོར་ཡང་ཤེས་པར་བྱའོ། །ཚལ་པར་འགས་པ་གདོན་མི་ཟ། །ཞེས་པ་ནི་བྱིན་གྱིས་རློབ་པ་ཁོ་ནའོ་ཞེས་མི་སྲིད་པའི་དོན་ཏོ། །ལེའུ་བཅུ་གཉིས་པའི་འགྲེལ་པ་རྫོགས་སོ།། །།ད་ནི་སྒྲུབ་པ་ཆེན་པོ་ཞེས་གྲགས་པའི་བཟླས་པ་གཙོར་སྟོན་པའི་ལེའུ་གསུངས་པ།
དེ་ནས་ཞེས་པ་ལ་སོགས་པ་སྟེ་དང་པོ་འདིར་ནི་གོང་མའི་དངོས་གྲུབ་ཀྱི་ཐབས་བཞི་ལ་བསྟོད་པ་སྟེ་ཡེ་ཤེས་ཉིད་རྡོ་རྗེ་སྟེ་དེ་ཉིད་མཆོག་གོ། །འཛིན་པ་ནི་མངའ་བའི་དོན་ཏོ། །ཐུབ་པ་ཞེས་པ་ནི་ལུས་ལ་སོགས་པའི་ལས་ཡོངས་སུ་དག་པའོ། །དོན་ཀུན་ནི་ཀུན་དོན་ནོ། །དེ་ལ་བྱང་ཆུབ་ཆེན་པོའི་
ཚུལ་ཞེས་པ་ནི་ཐབས་བཞི་པོ་ཉིད་དོ། །སངས་རྒྱས་ནི་སྐུའོ། །ཆོས་ནི་གསུང་ངོ་། །སྔགས་ནི་ཐུགས་ཏེ་དེའི་ཚུལ་དུ་གྱུར་པས་ན་བཞི་པོ་སྟེ་བཟང་པོ་དང་ཤེས་པ་དང་བརྟན་པ་སྟེ་ཨེ་མའོ་ཞེའོ། །མ་སྐྱེས་པའི་ཆོས་རྣམས་ཀྱང་ཐབས་བཞི་པོ་འདི་དག་སྟེ་འབྲས་བུ་དང་བཅས་པས་ཁྱད་པར་ཅན་
ཞེའོ། །ད་ནི་དེ་དག་གི་སེམས་ལ་འདོད་པ་ཞུས་པ་གསུངས་པ། སྔགས་རྣམས་ཐམས་ཅད་བསྡུས་པའི་མཆོག །ཅེས་པ་ལ་སོགས་པ་སྟེ། ལྷ་རྣམས་ཀྱི་མཆོག་རྡོ་རྗེ་མི་ཕྱེད་པ་གསུམ་བསྒོམས་པས་སྐུ་གསུམ་དང་བདེ་བ་ཆེན་པོའི་ཡེ་ཤེས་འཐོབ་པར་འགྱུར་ཞེས་ཏེ། བཟླས་པའི་སྔོན་དུ་
འགྲོ་བ་ཐམས་ཅད་ལས་སྒྲུབ་པ་གཙོར་གསུངས་པ་ཡིན་ནོ། །རིགས་དང་ཞེས་པ་ནི་ཕྲེང་བའི་སྔགས་སོ། །སྔགས་རྣམས་ཞེས་པ་ནི་རང་གི་ས་བོན་དང་སྤྱན་དྲང་བའི་སྔགས་ཏེ་ཡང་གསུངས་པ། སྒྲ་ཡིག་ཐིག་ལེར་ལྡན་པ་ཡི། །མཚན་གྱི་སྔགས་ཀྱིས་དབྱུང་བར་བྱ། །ཞེས་པ་དང་།
ཕྲེང་སྔགས་ལ་ཡང་རིགས་པར་གསུངས་ཞེས་ཏེ་དེ་ཟློ་བ་ནི་རྡོ་རྗེ་ལྷ་རྣམས་ཀྱི་བཟླས་པའོ། །དེ་ཉིད་དོན་ཆེན་པོ་བྱེད་པས་ཡེ་ཤེས་མཆོག་སྟེ་དེའི་སྦྱོར་བས་སངས་རྒྱས་ཀུན་གྱི་བྱིན་གྱིས་རློབ་པ་སྟེ་དེ་བཤད་དུ་གསོལ་ཞེས་སྦྱར་རོ། །ཡང་ལས་ཀྱི་རྒྱལ་བ་མཆོག་ལ་གཏོགས་པའི་རྡོ་རྗེ་བཟླས་
เล่ม ๔๕ · หน้า 180b
པ་ཞུ་བ་གསུངས་པ། ཡེ་ཤེས་རྒྱ་མཚོ་གནས་པའི་ཞེས་པ་ལ་སོགས་པ་སྟེ། ཡེ་ཤེས་རྒྱ་མཚོ་ནི་རིག་མ་སྟེ་དེ་དང་ལྷན་ཅིག་གནས་པའི་སྐུ་གསུང་ཐུགས་ཀྱི་རྡོ་རྗེའི་མཚན་མ་ཡི་གེ་གསུམ་སྟེ་དེའི་བཟླས་པ་དང་སྦྱོར་བ་ཇི་སྙེད་པ་བཤད་དུ་གསོལ་ཞེས་སོ། །སོགས་ཞེས་པ་ནི་ཡེ་ཤེས་སེམས་དཔའོ། །
དེའི་ཡོན་ཏན་གསུངས་པ། སངས་རྒྱས་དུས་གསུམ་ལས་བྱུང་རྣམས། །ཞེས་པ་ལ་སོགས་པའོ། །ལན་གསུངས་པ་དེ་ནས་ཞེས་པ་ལ་སོགས་པ་སྟེ་ཐོག་མར་ལས་ཀྱི་མཆོག་བཟླས་པ་སྟོན་ཏེ། དེ་ལ་སྔགས་ལྷ་རྣམས་ཀྱི་དོན་ཀུན་ཞེས་པ་ནི་ལས་ཀྱི་མཆོག་གི་བཟླས་པ་སྟེ། དེ་ནི་རྡོ་རྗེ་
གསུམ་གྱི་མཚན་མ་ཡི་གེ་གསུམ་རྡོ་རྗེ་དབྱེ་བ་གསུམ་གྱི་ཐུགས་ཀར་བཀོད་པ་ཉིད་རྡོ་རྗེ་གསུམ་སྟེ་དེ་ལས་སྤྲོ་བ་ལ་སོགས་པ་འདི་ཡིན་ནོ། །སྐུ་གསུང་ཐུགས་ཀྱི་གནས་གསུམ་ལས། །སྤྲོ་བ་རྣམ་པ་གསུམ་དག་བྱ། །ཞེས་ཏེ། རིམ་པས་ས་བོན་རེ་རེ་ལས་དེ་གསུངས་པས་གཟུགས་སྤྲོ་བ་ཞེས་སོ། །
དེ་ལ་མཆོད་པ་གསུངས་པ་སངས་རྒྱས་རྣམས་ཀྱི་ཞེས་པ་ལ་སོགས་པ་སྟེ། ནམ་མཁའ་ཐམས་ཅད་ཁྱད་པར་སྤྲོ་བའི་སངས་རྒྱས་དེ་དག་ལ་རང་གི་རིག་མ་ལ་ཐིམ་པའི་ཤིན་ཏུ་བདེ་བའི་མཆོད་པས་མཆོད་ཅེས་པའོ། །ཅིས་ཐིམ་ཞེ་ན། གཟུགས་ཀྱི་མཆོག་ཅེས་ཏེ་ས་བོན་དེ་ལས་འཕྲོས་པ་གཞན་ཡང་
གཟུགས་ཀྱི་རྡོ་རྗེ་མ་ལ་སོགས་པ་རང་གི་རིག་མ་ལ་ཐིམ་སྟེ་བདེ་བ་དམ་པས་མཆོད་པའི་དོན་ཏོ། །ཡེ་ཤེས་རྡོ་རྗེ་ཞེས་པ་ནི་གཉིས་སུ་མེད་པའི་སེམས་དང་ལྡན་པའོ། །ཡང་ན་དབྱེ་བ་རྣམ་གསུམ་གྱིས་ཞེས་པའི་དུས་གཅིག་ཏུ་སྤྲོ་བའོ། །སོ་སོ་ཞེས་པ་ནི་རང་རེའི་ས་བོན་ལས་རང་ཁོ་ན་སྤྲོ་བའོ། །ཡེ་ཤེས་སེམས་དཔའི་སྤྲོ་བ་
གསུངས་པ། ལུས་དང་ངག་སེམས་བདག་མེད་པར། །ཞེས་ཏེ། འདི་ལ་ནི་ལུས་ལ་སོགས་པའི་སྤྲོ་བའི་བདག་ཉིད་དང་མི་འདྲའོ་ཞེས་པ་སྟེ་དུས་ཅིག་ཁོ་ནར་རིགས་ལྔ་སྤྲོ་བའོ། །ཤེས་པ་ནི་ཡེ་ཤེས་སེམས་དཔའོ། །སེམས་ནི་ས་བོན་ནོ། །སྤྲོ་བ་རྣམས་ཀྱི་དུས་གསུངས་པ་བརྗོད་ནས་ཞེས་ཏེ་དབུགས་ཀྱི་ཡི་གེ་དང་པོ་
བརྗོད་ནས་སྤྲོའོ། །བསྡུ་བའི་དུས་ནི་རྫོགས་ནས་ཞེས་ཏེ་མཆོད་པ་ལ་སོགས་པའི་ལས་རྫོགས་ནས་བསྡུ་ཞེས་ཏེ། དེ་ནི་སྙིང་པོ་ལ་བཟླས་པའོ། །དེ་ལྟར་ཡང་བཟང་པོ་ཞབས་ཀྱིས། སྐུ་གསུང་ཐུགས་ཀྱི་རྡོ་རྗེ་ལས། །ཞེས་པ་ནས། བདག་ཉིད་དབུས་སུ་ཐིམ་པར་བྱ། །ཞེས་པའི་བར་དུ་
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด