དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ཐེག་པ་ཆེན་པོ་མངོན་པར་རྟོགས་པ་ཞེས་བྱ་བའི་རྒྱུད་ཀྱི་བཤད་པ་དེ་ཁོ་ན་ཉིད་སྣང་བར་བྱེད་པ་ཞེས་བྱ་བ
ชื่อสันสกฤต (อักษรทิเบต ตามตัวบท) སརྦ་ཏ་ཐཱ་ག་ཏ་ཏཏྟྭ་སྃ་གྲ་ཧ་མ་ཧཱ་ཡཱ་ན་ཨ་བྷི་ས་མ་ཡ་ནཱ་མ་ཏནྟྲ་ཏཏྟྭ་ཨཱ་ལོ་ཀ་ཀཱ་རི་ནཱ་མ་བྱཱ་ཁྱཱ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๕๘ · หน้า 186b
དགོས་པ་ཤེས་པར་འདོད་པ་དེའི་ཚེ་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། རང་གི་སྙིང་གའི་ཟླ་བར་སྔ་མ་བཞིན་དུ་རྡོ་རྗེའི་རྣམ་པར་བསམས་ཏེ། རྡོ་རྗེའི་དབུས་སུ་སྙིང་པོ་བཀོད་ལ་དེ་ཉིད་བརྗོད་ཅིང་སྔ་མ་བཞིན་དུ་བདེན་པའི་བྱིན་རླབས་བྱས་ནས། རང་གི་ལྷའི་གཟུགས་སུ་བསྒོམས་ན་ངེས་པར་ཐམས་ཅད་
ཀྱིས་མཐོང་ཞིང་ཐོས་པར་འགྱུར་རོ། །ཁྲོས་པར་གྱུར་ན་དཀྱིལ་འཁོར་ནི། །ཞེས་བྱ་བ་ནི་དེ་ལ་ནམ་མཁའ་ནི་རབ་ཏུ་གྲགས་པའོ། །རས་སམ་རྩིག་པའམ་ལུགས་སུ་བླུགས་པ་ལ་སོགས་པ་ཕྱོགས་གཞན་དག་ཏུའོ། །དེ་ལ་ཁྲོས་པར་དཀྱིལ་འཁོར་ནི། །ཞེས་བྱ་བ་ནི་ཁྲོ་བའི་ལྷའི་ཉམས་མངོན་དུ་བྱེད་པ་ནི་ཁྲོ་བོ་
སྟེ། ཁྲོ་བོའི་རྣལ་འབྱོར་པས་དེས་ཁྲོ་བོ་དེ་བདག་ཉིད་དུ་གྱུར་པ་ནམ་མཁའ་ལ་སོགས་པ་ལ་དཀྱིལ་འཁོར་དཀར་པོ་ལ་སོགས་པར་མཐོང་བར་གྱུར་ཏེ། ཁྲོ་བའི་ཏིང་ངེ་འཛིན་གྱི་མཐུས་དེ་ལྟ་བུས་ཡིད་ཀྱིས་ཤེས་ཤིང་རང་དང་གཞན་གྱི་ཡིད་ཤེས་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་འཇིག་
རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རྡོ་རྗེ་ཧཱུཾ་མཛད་ལ་སོགས་པའི་རྣལ་འབྱོར་བྱས་ལ། ཇི་ལྟ་བ་བཞིན་དུ་མཆོད་པ་དང་ཕྱག་བཞི་བྱས་ཏེ། ཕྱག་རྒྱ་ཆེན་པོ་ལ་སོགས་པ་བཅིངས་ནས། རང་གི་སྙིང་གར་རྡོ་རྗེ་ལ་སྙིང་པོ་བཀོད་ཅིང་དེ་ཉིད་བརྗོད་པར་བྱའོ། །བདེན་པའི་བྱིན་
གྱི་རླབས་ཀྱིས་སྔ་མ་བཞིན་དུ་རང་གི་ལྷའི་ངོ་བོ་ཇི་སྲིད་ནམ་མཁའ་ལ་སོགས་པར་མཚན་མ་སྟོན་པར་གྱུར་པའི་ཟླ་བའི་དཀྱིལ་འཁོར་ལ་སོགས་པའི་གཟུགས་སུ་མཐོང་བ་དང་། སྒྲ་ཐོས་པར་འགྱུར་བ་དེ་སྲིད་ཀྱི་བར་དུ་བསྒོམ་པར་བྱའོ། །ནམ་མཁའི་ས་ཕྱོགས་ཕྲ་མོའམ། །ཞེས་བྱ་བ་ནི་རྡོ་རྗེ་ཕྲ་མོའོ། །ཡི་གེ་
ཕྲེང་བ་མཐོང་གྱུར་ན། །ཞེས་བྱ་བ་ནི་མངོན་པར་འདོད་པའི་དངོས་པོ་སྟོན་པར་བྱེད་པའི་ཡི་གེ་ཕྲེང་བ་བྲིས་པ་ནམ་མཁའ་ལ་སོགས་པར་བསྒོམ་པའི་ཤེས་པས་མཐོང་བར་གྱུར་པས་མདོར་ན་ཁ་དོག་ཅི་འདྲ་བར་ཤེས་པ་དེ་འདྲར་དེ་སེམས་ཤེས་ཞེས་བྱའོ། །འདི་སྐད་དུ་སྟོན་པ་ཡིན་ཏེ། སྔ་མ་བཞིན་དུ་
འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་ཉིད་འཇིག་རྟེན་དབང་ཕྱུག་གི་རྣལ་འབྱོར་བྱས་ཏེ་ཆོ་ག་ཐམས་ཅད་རྗེས་སུ་སྤྱད་ལ་རང་གི་སྙིང་གར་རྡོ་རྗེ་པདྨ་དེའི་སྟེང་དུ་སྙིང་པོ་བཀོད་ལ། དེ་ཉིད་བརྗོད་ཅིང་བདེན་པའི་བྱིན་གྱིས་བརླབས་པར་བྱས་ནས་རང་ཉིད་འཇིག་རྟེན་དབང་ཕྱུག་ཏུ་བསྒོམ་པར་
เล่ม ๕๘ · หน้า 187a
བྱའོ། །དེ་ནས་རྡོ་རྗེ་ཕྲ་མོའམ་ཡི་གེ་ཕྲེང་བ་ཁ་དོག་ཅི་འདྲ་བར་མཐོང་བ་དེ་བཞིན་དུ་དེའི་འབྲས་བུ་ཤེས་པར་འགྱུར་རོ། །འཇིག་རྟེན་ཡང་ཡིན་ལ་ཀུན་ཀྱང་འདི་ཡིན་པས་ན་འཇིག་རྟེན་ཀུན་ཏེ། བཅོམ་ལྡན་འདས་ནམ་མཁའི་སྙིང་པོའོ། །བལྟས་ནས་ཀྱང་ནི་བསྒོམས་ནས་
ཀྱང་ངོ་། །ཅི་འདྲ་བ་ཞིག་ཅེ་ན། ཇི་ལྟ་བུར་ནི་སྣང་འགྱུར་ཞིང་། །ཞེས་བྱ་བ་སྨོས་ཏེ། རང་གི་ལྷའི་སྐུ་མདོག་དང་དབྱིབས་ཅི་འདྲ་བ་དེ་འདྲ་ཉིད་དུ་དེ་བསྒོམ་པར་བྱའོ། །མཐོང་བར་འགྱུར་བ་དེ་འདྲ་བར། །འགྲོ་བའི་སེམས་ནི་ཤེས་པར་བྱ། །ཞེས་བྱ་བ་ནི་རྣལ་འབྱོར་པས་རང་གི་ལྷའི་གཟུགས་
ཁ་དོག་དཀར་པོ་ལ་སོགས་པའི་རང་བཞིན་དུ་ཅི་འདྲ་བར་བསྒོམས་ནས། འགྲོ་བའི་སེམས་ཀྱང་དེ་དང་འདྲ་བ་ཉིད་དུ་བསྒོམས་པའི་སྟོབས་ཀྱིས་མཐོང་བར་འགྱུར་རོ། །དེ་བཞིན་དུ་མཐོང་བ་དེའི་འབྲས་བུ་ཤེས་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། ནོར་བུའི་རིགས་ཀྱི་རྣལ་འབྱོར་
སྔ་མ་བཞིན་དུ་བྱས་ནས་ཆོ་ག་ཐམས་ཅད་རྗེས་སུ་སྤྱད་དེ། རང་གི་སྙིང་གར་རྡོ་རྗེ་ཆེན་པོའི་དབུས་སུ་བཟླས་པའི་སྙིང་པོ་ཡིད་ཀྱིས་བྲིས་ཏེ། ཆོས་ཐམས་ཅད་གཟུགས་བརྙན་དང་མཚུངས་པའི་བདེན་པ་གང་ཡིན་པ་དང་སྒྲ་བརྙན་དང་མཚུངས་པའི་བདེན་པ་གང་ཡིན་པ་དེས་འབྲས་བུ་འདི་བཅོམ་ལྡན་
འདས་ནམ་མཁའི་སྙིང་པོ་དང་འདྲ་བར་གྱུར་ཅིག་ཅེས་བྱ་བའི་བདེན་པའི་བྱིན་རླབས་བྱས་ནས། ཇི་ལྟར་བྲིས་པའི་བཟླས་པ་བརྗོད་ཅིང་རང་གི་ལྷ་བསྒོམ་པ་དེས་ཐམས་ཅད་ཀྱིས་མཐོང་བར་འགྱུར་རོ། །དེ་ཉིད་ནི་སྙོམས་ཞུགས་ཞེས་བྱ་བ་ནི་རྣམ་པར་སྣང་མཛད་ལ་སོགས་པ་ནས་ནོར་བུའི་རིགས་ཀྱི་
མཐར་ཐུག་པའི་དངོས་གྲུབ་ཀྱི་ཡེ་ཤེས་བསྒོམས་པ་ལས་བྱུང་བའི་ལུས་ཀྱི་སོ་སོར་སྣང་བའི་གཟུགས་ཀྱིས་འགྲོ་བར་བྱེད་པས་འགྲོ་བར་སྟོན་པ་དང་། འོང་བར་བྱེད་པས་འོང་བར་རབ་ཏུ་སྟོན་པའོ། །འཆགས་པ་ལའང་ཞེས་བྱ་བ་ནི་ཇི་ལྟར་མཐོང་བའི་རྣལ་འབྱོར་དེས་དེ་ལྟར་འབྲས་བུ་བརྟགས་
པ་ནི་འབྲས་བུ་ཐོབ་པའོ། །སྙོམས་པར་ཞུགས་ཏེ་བསམས་ན་ནི། །ཞེས་བྱ་བ་ནི་རྣལ་འབྱོར་པས་ཇི་ལྟར་འདོད་པའི་དངོས་པོ་བསྒོམ་པའོ། །སེམས་ཅན་གང་དང་གང་ཡིན་པ། །ཞེས་བྱ་བ་ནི་རྣམ་པར་སྣང་མཛད་ལ་སོགས་པ་མོས་པ་ནི་སེམས་ཅན་དེ་དང་དེ་ནི་རྣམ་པར་སྣང་མཛད་ལ་སོགས་
เล่ม ๕๘ · หน้า 187b
པའོ། །དེ་བཞིན་དུ་བཤད་མ་ཐག་པའི་སྙོམས་པར་འཇུག་པའི་རྣམ་པ་དེས་སེམས་ཅན་ཐམས་ཅད་ཀྱི་སེམས་རྣམས་རྟོགས་ཤིང་ཁོང་དུ་ཆུད་པར་འགྱུར་རོ། །འདི་སྐད་སྟོན་པ་ཡིན་ཏེ། དཀར་པོ་ལ་སོགས་པའི་གཟུགས་འབའ་ཞིག་སྟོན་པ་ནི་མ་ཡིན་གྱི་ཇི་སྐད་བཤད་པའི་སྙོམས་པར་འཇུག་པ་སྔོན་
དུ་བྱས་པས་འདས་པ་དང་། མ་འོངས་པ་དང་། ད་ལྟར་བྱུང་བ་ཐམས་ཅད་ཀྱང་ཤེས་པར་འགྱུར་རོ། །དེ་ལྟར་རང་དང་གཞན་དག་ཕྱག་རྒྱ་ཆེན་པོ་ལ་སོགས་པ་བསྒྲུབས་ནས་སྐལ་བ་དང་ལྡན་པ་དང་། སྐལ་བ་དང་མི་ལྡན་པ་ཆོས་སུ་བརྟག་པའི་ཡེ་ཤེས་དང་། དངོས་པོ་ཐམས་ཅད་ལ་ཐེ་ཚོམ་སེལ་བའི་
ཡེ་ཤེས་མཁྱེན་པ་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཡེ་ཤེས་ཀྱི་ཕྱག་རྒྱའི་དངོས་གྲུབ་ཀྱི་རྒྱུད་བསྟན་ནས། ད་ནི་ཕྱག་རྒྱ་ཆེན་པོ་ལ་སོགས་པ་བསྒོམས་ནས་ཀྱང་། གང་གི་ཚེ་མཚན་མ་ཐོབ་པར་གྱུར་པ་དེའི་འགྲུབ་པར་འགྱུར་རོ་ཞེས་བསྟན་པའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་
ཆེན་པོ་ཕྱག་རྒྱ་ཆེན་པོ་ཞེས་བྱ་བ་ལ་སོགས་པ་སྨོས་ཏེ། དེ་བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་ཏེ། ཇི་སྐད་དུ་བཤད་པའི་དངོས་གྲུབ་དེ་དག་སྟོན་པའི་ཡེ་ཤེས་ནི་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱི་ཡེ་ཤེས་
སོ། །དེའི་ཆོ་ག་རྒྱས་པ་ནི་དེ་བཞིན་གཤེགས་པ་ལ་སོགས་པ་ཐ་དད་པས་བྱེ་བྲག་རྒྱས་པའོ། །དེ་སྟོན་པར་བྱེད་པའི་རྒྱུད་དོ། །གསུངས་པ་ནི་བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །དེ་ལ་ཞེས་བྱ་བ་ལ་སོགས་པ་ནི་གོ་སླའོ། །སེམས་དཔའི་བྱིན་གྱིས་བརླབས་ཚུལ་གྱིས། །ཞེས་བྱ་
བ་ནི་སེམས་དཔའི་རྡོ་རྗེ་རབ་ཏུ་སྣང་བའོ། །དེས་སེམས་དཔར་བྱིན་གྱིས་བརླབས་པའི་སྦྱོར་བས་སངས་རྒྱས་དངོས་གྲུབ་ཐོབ་པར་ཞེས་བྱ་བར་སྦྱར་རོ། །གང་ལས་སྐྱེ་བར་འགྱུར་ཞེ་ན། སངས་རྒྱས་གཟུགས་སུ་བདག་བསྒོམས་ན། །ཞེས་བྱ་བ་ལ་སོགས་པ་སྨོས་ཏེ། རྣམ་པར་སྣང་མཛད་ལ་སོགས་
པ་དེ་བཞིན་གཤེགས་པ་རྣམས་སོ། །བདག་ཉིད་བསྒོམས་པའི་རྣམ་པར་སྣང་མཛད་གང་ཡིན་པ་དེ་བདག་ཡིན་ནོ་ཞེས་བྱ་བ་ནས། དོན་ཡོད་གྲུབ་པ་གང་ཡིན་པ་དེ་བདག་ཡིན་ནོ་ཞེས་ང་རྒྱལ་བསྐྱེད་པར་བྱའོ། །སེམས་དཔར་བྱིན་གྱིས་བརླབས་པའི་སྦྱོར་བ་བསྒོམ་པ་གང་ཡིན་པ་དེ་བསྐྱེད་
เล่ม ๕๘ · หน้า 188a
པའོ། །ཡེ་ཤེས་ནི་ཚུལ་དེ་ཡིས་ཞེས་བྱ་བ་ནི་སེམས་དཔར་སྦྱོར་བའི་བྱིན་གྱིས་རློབ་པའི་སྦྱོར་བ་ཉིད། ཡེ་ཤེས་ཀྱི་ནི་ཚུལ་དེ་ཡིས། །ཞེས་བྱ་བ་སྨོས་ཏེ། ཚུལ་ནི་ཏིང་ངེ་འཛིན་གྱི་ཚུལ་ལོ་ཞེས་བསྟན་ཏོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དེ་བཞིན་གཤེགས་
པའི་རྣལ་འབྱོར་བསྒོམ་པའི་རྣལ་འབྱོར་པས། བསྒོམ་པའི་བདག་ཉིད་ཀྱི་ཡེ་ཤེས་ཀྱིས་གང་གི་ཚེ་སྙིང་གར་སེམས་དཔའི་རྡོ་རྗེ་ཉིན་རེ་བཞིན་ཐུན་བཞིའི་མཐོང་བར་གྱུར་པ་དེའི་ཚེ། མཚན་ཐོག་ཐག་དེ་བཞིན་གཤེགས་པའི་བདག་ཉིད་དུ་བསྒོམས་ནས་སངས་རྒྱས་ཉིད་མངོན་སུམ་དུ་བྱེད་པར་
འགྱུར་རོ། །དེའི་ཕྱིར། སངས་རྒྱས་དངོས་གྲུབ་ཐོབ་པར་འགྱུར། །ཞེས་བྱ་བ་གསུངས་སོ། །ནམ་མཁའ་ནི་གྲགས་པར་ཟད་དོ། །ཕྱོགས་གཞན་དུ་བཤད་ཟིན་ཏོ། །སེར་སྐྱའི་འོད་ཀྱི་དཀྱིལ་འཁོར་ནི་ཟླ་བའི་དཀྱིལ་འཁོར་སེར་སྐྱར་མཐོང་བ་ཡིན་ཏེ། འབའ་ཞིག་མཐོང་བ་ནི་མ་ཡིན་
ནོ། །ཇི་ལྟ་བུ་ཞེ་ན། སེམས་དཔའ་ཉིད་ཀྱི་ཕྱག་རྒྱ་ཉིད། །མངོན་སུམ་ཉིད་དུ་མཐོང་གྱུར་ནའོ། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་ཏེ། རྣལ་འབྱོར་པ་བསྒོམ་པ་ལ་སོགས་པ་ན།
སེམས་དཔའ་རང་ཉིད་ཀྱི་ཕྱག་རྒྱ་སྟེ། རྡོ་རྗེ་སེམས་དཔའ་ལ་སོགས་པ་ཇི་སྐད་དུ་བཤད་པའི་སེམས་དཔའ་དེ་ཉིད་ཀྱི་ཕྱག་རྒྱས་རྡོ་རྗེ་སེམས་དཔའ་ཉིད་ལ་སོགས་པའི་གཟུགས་སུ་རྣལ་འབྱོར་པ་བདག་ཉིད་མངོན་སུམ་དུ་མཐོང་བར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་སེམས་
དཔའ་ལ་སོགས་པའི་ཕྱག་རྒྱ་ཆེན་པོ་བཅིངས་ཏེ། ཇི་སྐད་དུ་བཤད་པའི་ཚུལ་གྱིས་རྡོ་རྗེ་སེམས་དཔའ་ལ་སོགས་པ་བསྒོམས་ནས་ཉིན་རེ་ཞིང་ཐུན་བཞིའི་སྦྱོར་བས་ནམ་མཁའི་ཕྱོགས་སུ་ཟླ་བའི་དཀྱིལ་འཁོར་སེར་སྐྱའི་གཟུགས་སུ་ངོ་བོ་ཇི་སྲིད་བདག་ཉིད་མཐོང་བར་གྱུར་པ་དེའི་ཚེ། ཇི་ལྟ་བ་
བཞིན་དུ་མཚན་ཐོག་ཐག་བཟླས་ཤིང་བསྒོམས་ན་འགྲུབ་པར་འགྱུར་རོ། །དེ་ལྟ་བུ་ཡི་དབྱིབས་གྱུར་པ། ཞེས་བྱ་བ་ནི་སེར་སྐྱའི་འོད་ཀྱིས་དཀྱིལ་འཁོར་དུ་སྣང་བ་གྲུབ་པས་ན་དབུས་སུ་སྔོ་བསངས་ནི་ཨུཏྤ་ལ་སྔོན་པོ་ལྟ་བུའོ། །སྣང་བ་ནི་ཞེས་བྱ་བ་ནི་མངོན་པ་དང་མཐོང་བ་ཞེས་བྱ་བའི་
เล่ม ๕๘ · หน้า 188b
ཐ་ཚིག་གོ། །རྡོ་རྗེ་རིགས་ཀྱི་རྣལ་འབྱོར་པ་འདི་དངོས་གྲུབ་ཀྱི་ཡེ་ཤེས་སོ། །རྡོ་རྗེ་རིགས་ཀྱི་མཆོག་གི་དངོས་གྲུབ་ནི་དམ་ཚིག་གོ། །ཅི་སྟེ་འདོད་ན་མྱུར་དུ་ཐོབ། །ཅེས་བྱ་བ་ནི་གལ་ཏེ་རྡོ་རྗེ་རིགས་ཀྱི་རྣལ་འབྱོར་པ་སྒྲུབ་པར་འདོད་ནས། དེ་སྲིད་པ་ནི་མཁའ་འདྲ་ཡི། །ཞེས་བྱ་བ་ནི་རྡོ་རྗེ་རིགས་ཀྱི་རྣལ་འབྱོར་
པ་བསྒོམས་པའི་སྟོབས་ཀྱིས་ནམ་མཁའ་དང་འདྲ་བའི་ཁ་དོག་སྔོན་པོའི་དཀྱིལ་འཁོར་མཐོང་བ་གང་ཡིན་པ་དེ་ལྟ་བུ་པདྨའི་རིགས་ཀྱི་རྣལ་འབྱོར་པས་གང་གི་ཚེ་ནམ་མཁའ་ལ་པདྨ་སྔོན་པོའི་ཁ་དོག་ཅན་གྱི་དཀྱིལ་འཁོར་བསྒོམས་པའི་སྟོབས་ཀྱིས་མཐོང་བ་དེའི་ཚེ། པདྨ་ཆེན་པོའི་རིགས་རིག་པའི། །དངོས་གྲུབ་
ཏུ་ནི་ལེགས་པར་འགྱུར། །ཞེས་བྱ་བ་དེ་ཤེས་པར་བྱའོ། །ནམ་མཁའ་འམ་ནི་ཕྱོགས་གཞན་ན། །ཞེས་བྱ་བ་ནི་ནོར་བུའི་རིགས་ཀྱི་རྣལ་འབྱོར་པའི་བསྒོམ་པའི་ཡེ་ཤེས་ཀྱིས་སེར་སྐྱའི་དཀྱིལ་འཁོར་དེ་ཉིད་སྟོན་ཀའི་ནམ་མཁའ་དྲི་མ་མེད་པ་ལས་འོད་ཟེར་གྱི་དཀྱིལ་འཁོར་འཕྲོ་ཞིང་གཡོ་བར་མཐོང་བ་ན། མཐོང་
ན་མྱུར་དུ་དངོས་གྲུབ་ཐོབ། །ཅེས་བྱའོ། །ད་ནི་ཇི་སྐད་དུ་བཤད་པའི་དེ་བཞིན་གཤེགས་པ་ལ་སོགས་པའི་རྣལ་འབྱོར་པ་རྣམས་ཀྱིས་དངོས་གྲུབ་ཀྱི་ཡེ་ཤེས་འདི་འབའ་ཞིག་མ་ཡིན་གྱི་གཞན་ཡང་ཡིན་ནོ་ཞེས་བསྟན་པར་བྱ་བའོ་ཞེས། རྡོ་རྗེ་སེམས་སོགས་སེམས་དཔའ་རྣམས། །ཞེས་བྱ་བ་ལ་སོགས་པ་སྨོས་ཏེ།
རྡོ་རྗེ་སེམས་དཔའ་དང་པོར་བྱ་བ་གང་ཡིན་པ་དེ་ནི་རྡོ་རྗེ་སེམས་དཔའ་ལ་སོགས་པའོ། །དེ་གང་ཡིན་ཞེ་ན། རྡོ་རྗེ་རྒྱལ་པོ་ནས་བརྩམས་ནས་རྡོ་རྗེ་འབེབས་པའི་མཐར་ཐུག་པའི་སེམས་དཔའོ། །ཁྱད་པར་ཇི་ལྟ་བུ་ཞིག་ཅེ་ན། ཟླ་བའི་དཀྱིལ་འཁོར་འོད་བཅས་ཏེ། ཟླ་བའི་དཀྱིལ་འཁོར་དང་མཚུངས་པའི་འོད་ཀྱི་དཀྱིལ་
འཁོར་རོ། །ཟླ་བའི་དཀྱིལ་འཁོར་དང་བཅས་པ་གང་ཡིན་པ་དེ་ནི་སྔར་བསྟན་ཟིན་ཏོ། །ནམ་མཁའ་འམ་ནི་ཕྱོགས་གཞན་དུ་བདག་ཉིད་ཇི་ལྟ་བུ་ཞེ་ན། མི་བརྟན་པའི་གཟུགས་ཀྱི་སྣང་བ་ཙམ་གྲུབ་པའི་དུས་སུ་མདུན་དུ་མཐོང་བ་ཡིན་ལ། དངོས་གྲུབ་ཀྱི་དུས་སུ་ནི་དཀྱིལ་འཁོར་གྲགས་པའི་ཁ་དོག་དང་
དབྱིབས་ཅན་གྱི་རང་བཞིན་གྱི་གཟུགས་བྱོན་ནས་སྒྲུབ་པ་པོ་ལ་བདག་ཉིད་སྟོན་པར་འགྱུར་རོ། །དེ་ནས་སྐད་ཅིག་མ་དེ་ཉིད་ལ་རྣལ་འབྱོར་པ་འདི་རྡོ་རྗེ་འཆང་ཆེན་པོ་ལ་སོགས་པའི་དངོས་གྲུབ་འགྲུབ་པར་འགྱུར་རོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དངོས་གྲུབ་ཀྱི་ཡེ་ཤེས་ཀྱི་རྒྱུད་བསྟན་ནས།
เล่ม ๕๘ · หน้า 189a
ད་ནི་ཕྱག་རྒྱ་ཆེན་པོ་ལ་སོགས་པའི་བསྒོམས་པ་ནས་མཚན་མ་ཐོབ་པར་གྱུར་པ་མངོན་པར་ཤེས་པ་ལྔ་བསྒྲུབ་པར་བྱའོ་ཞེས་བྱ་བ་ནི། དེ་ནས་ཞེས་བྱ་བ་ལ་སོགས་པ་མངོན་པར་ཤེས་པའི་དངོས་གྲུབ་ཀྱི་ཡེ་ཤེས་ཀྱི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ཀྱང་ཡིན་ལ་
རིགས་ཀྱང་ཡིན་པས་ན། དེའི་མངོན་པར་ཤེས་པའི་དངོས་གྲུབ་རྫོགས་པའོ། །དེའི་ཡེ་ཤེས་དེ་སྟོན་པའི་རྒྱུད་དོ། །གསུངས་པ་ནི་བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །རྡོ་རྗེ་སེམས་དཔའི་ཏིང་འཛིན་གནས། །ཞེས་བྱ་བ་ནི་སྙིང་གའི་ཟླ་བའི་རྡོ་རྗེའི་རྣམ་པར་སེམས་རྩེ་གཅིག་པ་ནི་རྡོ་རྗེ་སེམས་
དཔའི་ཏིང་ངེ་འཛིན་ཏོ། །དེ་ལ་གནས་ཞེས་བྱ་བ་ནི་རྡོ་རྗེ་སེམས་དཔའི་ཏིང་ངེ་འཛིན་ལ་གནས་ནས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ལྔའི་རྣལ་འབྱོར་པས་སྤྱི་གཙུག་ནས་བརྩམས་ཏེ། རྐང་མཐིལ་གྱི་བར་དུ་ལུས་ཐམས་ཅད་ལ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་
པའི་གཟུགས་དང་། རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་དཔའ་རྣམས་ཀྱང་བློས་བསྒོམས་ན་མཐོང་བ་ཡིན་ནོ། །དེ་བཞིན་ལུས་ལས་ཞེས་བྱ་བ་ནི་རང་གི་ལུས་ལ་བྱུང་བ་ཁོ་ནའོ། །འདི་སྐད་སྟོན་པ་ཡིན་ཏེ། མཚན་མ་ཐོབ་པའི་དེ་བཞིན་གཤེགས་པའི་རྣལ་འབྱོར་པས་སེམས་དཔའི་
རྡོ་རྗེ་ཏིང་ངེ་འཛིན་མངོན་དུ་བྱས་ནས། དེ་བཞིན་གཤེགས་པའི་ཕྱག་རྒྱ་ཆེན་པོ་ལ་སོགས་པ་མངོན་དུ་བྱས་ཏེ། དེའི་ཚེ་རང་གི་དེ་བཞིན་གཤེགས་པའི་སྐུ་ལ་དེ་བཞིན་གཤེགས་པའི་གཟུགས་བསྒོམས་ནས། ཡིད་ཀྱིས་ལེགས་པའི་སྦྱོར་བ་སྔ་མ་བཞིན་དུ་བཅུག་ལ་བ་སྤུའི་ཁུང་བུ་རེ་རེར་རྡོ་རྗེ་སེམས་དཔའ་
ལ་སོགས་པ་བྱང་ཆུབ་སེམས་དཔའ་རྣམས་བཞུགས་པར་བསྒོམ་པར་བྱའོ། །དེ་ནས་བརྟན་པར་གྱུར་པ་དང་རང་གི་ལུས་ལས་སྐུ་རྣམས་ཕྱུང་ནས། ནམ་མཁའ་ལ་སོགས་པར་སྤྲོས་པ་དེ་ལྟ་བུས་དེ་བཞིན་གཤེགས་པའི་རྣལ་འབྱོར་པའི་མངོན་པར་ཤེས་པའི་དངོས་གྲུབ་ཏུ་འགྱུར་བ་ཡིན་ནོ། །རྡོ་རྗེ་
སེམས་དཔའ་ཕྱག་རྒྱ་ཆེ། །ཞེས་བྱ་བ་ལ། རྡོ་རྗེ་སེམས་དཔའ་ནི་རྡོ་རྗེ་སེམས་དཔའ་ནས་བརྩམས་ནས། རྡོ་རྗེ་འབེབས་པའི་མཐར་ཐུག་པ་དེ་དག་གི་ཕྱག་རྒྱ་རྣམ་པ་བཞིའི་ཕྱག་རྒྱ་དེ་ཉིད་ཇི་སྐད་བཤད་པའི་ཚུལ་གྱིས་བཅིང་བའོ། །ནི་ཞེས་བྱ་བའི་སྒྲ་ནི་ངེས་པར་གཟུང་བའོ། །རབ་མཉམ་
เล่ม ๕๘ · หน้า 189b
གཞག་པས་བཅིངས་ནས་ནི། །ཞེས་བྱ་བ་ལ། རབ་ཏུ་མཉམ་པར་གཞག་པ་ནི་མཚན་མ་ཐོབ་པས་སེམས་གཡེང་བ་མེད་པའོ། །མངོན་ཤེས་ལྔ་ནི་ཐོབ་པར་འགྱུར། །ཞེས་བྱ་བ་ནི་མངོན་པར་ཤེས་པ་རྣམས་ནི་མངོན་ཤེས་ཏེ། ལྷའི་མིག་ལ་སོགས་པའི་ངོ་བོར་ངེས་པའི་ཡེ་ཤེས་དེ་ཐོབ་
པ་ནི་རྙེད་པའོ། །ཇི་ལྟར་ཐོབ་པར་འགྱུར་ཞེ་ན། སྒྲུབ་པའི་ཆོ་ག་འདི་ཡིས་ནི། །ཞེས་བྱ་བ་སྨོས་ཏེ། དེ་མ་ཐག་ཏུ་འཆད་པར་འགྱུར་བའི་རྣལ་འབྱོར་པ་སྒྲུབ་པ་པོའི་ཆོ་ག་འདིས་སོ། །དེ་ལ་འདི་ནི་འཕྲུལ་གྱི་སྤྱན་གྱི་ཡེ་ཤེས་བཤད་དོ་ཞེས་བྱ་བ་ནི་བློ་ལ་གནས་པས་ན་འདིའོ། །ཕྱག་རྒྱ་ཆེན་པོ་མཉམ་གཞག་
སྟེ། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་ཕྱག་རྒྱ་ཇི་སྐད་དུ་བཤད་པ་བཅིངས་ཏེ་བརྟན་པར་བྱས་པའོ། །མིག་གི་རྣམ་ཤེས་བསྐྱེད་ནས་ཀྱང་། །ཞེས་བྱ་བ་ནི་སྒོམ་པ་པོས་སོ། །ཇི་ལྟར་ཞེ་ན། ཡི་གེ་ཨོཾ་གྱིས་དེ་བཞིན་གཤེགས་པ་ཐམས་ཅད་ཀྱི་ལྷའི་
སྤྱན་བཀུག་ནས་རང་གི་མིག་ལ་བཞག་སྟེ། དེ་ནས་དེ་བཞིན་གཤེགས་པའི་ལྷའི་སྤྱན་རང་གི་མིག་དང་གཅིག་ཏུ་གྱུར་པར་བསམ་པར་བྱའོ། །དེ་ནས་ཅིར་འགྱུར་ཞེ་ན། གང་ཡང་རུང་བ་དེ་བསམས་ན། །ཞེས་བྱ་བ་སྨོས་ཏེ། གཟུགས་གང་ཅི་ཡང་རུང་བ་འཇིག་རྟེན་གྱི་ཁམས་གཞན་ན་གནས་པ་
རྣམས་ཤིན་ཏུ་རིང་བ་དང་། དེ་ལས་ཀྱང་ཆེས་ཤིན་ཏུ་རིང་བ་རྣམས་ཀྱང་སྣང་བ་དང་བཅས་པའི་མདུན་ཕྱོགས་ན་གནས་པ་བཞིན་དུ་མཐོང་བར་འགྱུར་རོ། །ཕྱག་རྒྱ་ཆེན་པོ་མཉམ་གཞག་སྟེ། །ཞེས་བྱ་བ་ནི་སྔ་མ་བཞིན་ནོ། །ཡི་གེ་ཨས་དེ་བཞིན་གཤེགས་པ་ལ་སོགས་པའི་ལྷའི་སྙན་བཀུག་ནས་རང་
གི་རྣ་བ་དང་ལྷན་ཅིག་ཏུ་གྱུར་པར་བསམ་པར་བྱའོ། །དེས་ཅིར་འགྱུར་ཞེ་ན། དེས་ནི་དགོས་པ་གང་བསམས་པ། །ཤིན་ཏུ་རིང་ན་གནས་པའང་ཐོས། །ཞེས་བྱ་བ་སྨོས་ཏེ། དེས་འཇིག་རྟེན་གྱི་ཁམས་གཞན་ན་གནས་པའི་སྒྲའི་ངོ་བོ་ཅི་ཡང་རུང་བ་ཡང་རྣལ་འབྱོར་པ་ལ་དགོས་པས་ཐོས་པར་འདོད་
ན་ཉེ་བའི་ཡུལ་ན་གནས་པ་བཞིན་དུ་བསམས་ན་དེས་ཐོས་པར་འགྱུར་རོ། །ཕྱག་རྒྱ་ཆེན་པོ་མཉམ་གཞག་སྟེ། །ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །ཡིད་ཀྱི་རྣམ་ཤེས་བསྐྱེད་ནས་ཀྱང་། །ཞེས་བྱ་བ་ནི་ཡི་གེ་ཧཱུཾ་གིས་དེ་བཞིན་གཤེགས་པ་ཐམས་ཅད་ཀྱི་ཡིད་ཀྱི་རྣམ་པར་ཤེས་པའི་རང་བཞིན་
เล่ม ๕๘ · หน้า 190a
རྡོ་རྗེ་སེམས་དཔའ་དང་། དེ་བཞིན་གཤེགས་པ་ཐམས་ཅད་ཀྱི་ཐུགས་ལས་སེམས་དཔའི་རྡོ་རྗེའི་གཟུགས་ཅན་གྱི་ཡིད་བཀུག་སྟེ། རང་གི་སྙིང་གར་གནས་པའི་སེམས་དཔའི་རྡོ་རྗེ་ལ་བཅུག་ནས་གཅིག་ཏུ་གྱུར་པར་བསམ་པར་བྱའོ། །དེས་ཅིར་འགྱུར་ཞེ་ན། སེམས་ཅན་གང་ལ་དེས་
བརྟགས་ན། །དེ་ཡི་སེམས་ནི་དེས་ཤེས་འགྱུར། །ཞེས་བྱ་བ་སྨོས་ཏེ། ཡིད་ཀྱི་རྣམ་པར་ཤེས་པ་དེ་སེམས་དཔའ་རྡོ་རྗེའི་གཟུགས་སུ་སེམས་ཅན་གང་གི་སེམས་ཤེས་པར་འདོད་པའི་སེམས་ཅན་དེ་ལ་བསམ་པར་བྱའོ། །དེ་ནས་སེམས་ཅན་དེའི་སེམས་རྣལ་འབྱོར་པས་ཤེས་པར་འགྱུར་རོ། །འདི་
སྐད་སྟོན་པ་ཡིན་ཏེ། ཡེ་ཤེས་ཀྱི་རྡོ་རྗེ་རང་གི་སྙིང་གར་རབ་ཏུ་བཞག་ལ་འདི་སྐད་བརྗོད་པར་བྱའོ། །ཆོས་ཐམས་ཅད་སྒྱུ་མ་ལྟ་བུའི་བདེན་པ་གང་ཡིན་པའི་བདེན་པ་དེས་བཅོམ་ལྡན་འདས་རྡོ་རྗེ་སེམས་དཔའ་དང་མཚུངས་པར་སེམས་ཅན་དེའི་སེམས་ཀྱང་དེ་དང་འདྲ་བ་དེ་ལྟ་བུའི་རྣམ་པར་ཤེས་པ་བདག་
ལ་སྐྱེ་བར་གྱུར་ཅིག་ཅེས་བྱའོ། །དེ་ནས་དེའི་སྙིང་གར་ཡེ་ཤེས་ཀྱི་རྡོ་རྗེ་ཉིད་རྣམ་པར་བསྒོམས་པ་དེས་གཞན་གྱི་སེམས་ཤེས་པ་རྣལ་འབྱོར་པ་ལ་སྐྱེ་བར་འགྱུར་རོ། །ཕྱག་རྒྱ་ཆེན་པོ་མཉམ་གཞག་སྟེ། །ཞེས་བྱ་བ་ལ་སོགས་པ་ནི་བཤད་ཟིན་ཏོ། །བདག་གམ་ཡང་ན་གཞན་ཡང་རུང་། །ཞེས་
བྱ་བ་ནི་གོ་སླའོ། །ཡིད་ཀྱིས་བལྟས་ནས་གར་སྐྱེས་པ། །ཞེས་བྱ་བ་ནི་སེམས་དཔྱད་ན་བདག་གང་ནས་འདིར་འོངས་པ་དང་། སེམས་ཅན་གང་ནས་འདིར་འོངས་པ་དང་། གཞན་གྱི་སྐྱེ་བ་ཤེས་པའོ། །དེས་ཅིར་འགྱུར་ཞེ་ན། གར་སྐྱེས་པའི་གཟུགས་ནི་དེའི་ཤེས་པར་འགྱུར། །ཞེས་བྱ་བ་སྨོས་སོ། །
གང་ནས་ཤི་འཕོས་ནས་འདིར་སྐྱེས་པར་གྱུར་པ་དེ་རྣལ་འབྱོར་པས་སྔོན་གྱི་གནས་རྗེས་སུ་དྲན་པའི་ཤེས་པ་བསྒྲུབས་པས་རང་དང་གཞན་གྱི་སྐྱེ་བའི་གནས་གང་ནས་འོངས་པ་ཤེས་པ་ཡིན་ནོ་ཞེས་བྱ་བའི་ཐ་ཚིག་གོ། །འདི་སྐད་སྟོན་པ་ཡིན་ཏེ། འགྲོ་བ་དྲུག་གི་འཁོར་ལོའི་དཀྱིལ་འཁོར་སྙིང་གར་
ཡིད་ཀྱིས་བྲིས་ལ་བཅོམ་ལྡན་འདས་ཆོས་ཐམས་ཅད་དང་རྨི་ལམ་མཚུངས་པའི་བདེན་པ་གང་ཡིན་པའི་བདེན་པ་དེས་སྐྱེ་བ་གང་ནས་བདག་གམ་གཞན་འདིར་སྐྱེས་པའི་སེམས་ཅན་སྣང་བར་གྱུར་ཅིག་ཅེས་སྨོན་ལམ་བཏབ་ནས་རང་གི་ལྷ་བསྒོམས་ན་དེའི་རྗེས་ལ་སྔོན་གྱི་གནས་རྗེས་སུ་དྲན་པའི་ཤེས་པ་
เล่ม ๕๘ · หน้า 190b
སྐྱེ་བར་འགྱུར་རོ། །ཕྱག་རྒྱ་ཆེན་པོ་བཅིངས་ནས་ཀྱང་། །ཞེས་བྱ་བ་ནི་སྔ་མ་བཞིན་ནོ། །རྫུ་འཕྲུལ་གང་དང་གང་འདོད་པ། །ཞེས་བྱ་བ་ནི་རྫུ་འཕྲུལ་ནི་རྣམ་པར་འཕྲུལ་ལོ། །སེམས་ཀྱི་རྫུ་འཕྲུལ་ནི་བདག་ཉིད་ཆེན་པོའི་མཐུ་ཡིན་ནོ་ཞེས་བྱ་བའི་དོན་ཏོ། །ནམ་མཁའ་ལ་འགྲོ་བ་དང་། མི་སྣང་བ་དང་།
གཟུགས་སུ་སྟོན་པ་དང་། རིང་ནས་མྱུར་དུ་འོང་བ་ལ་སོགས་པ་དེ་ལྟ་བུ་རྣམས་ཀྱི་ནང་ནས་གང་ཡང་རུང་བའི་རྫུ་འཕྲུལ་ཞིག་མངོན་དུ་བྱས་ཏེ་སྟོན་པར་འདོད་པའམ། ཡུལ་གང་དང་གང་དུ་སྒྲིབ་པ་དང་བཅས་པ་དང་སྒྲིབ་པ་མེད་པའི་ནམ་མཁའ་ལ་སོགས་པ་དེ་དང་དེར་འགྲོ་བ་རྣལ་འབྱོར་པས་སྟོན་པར་
འགྱུར་རོ། །གང་གིས་ཤེ་ན། སེམས་རྩེ་གཅིག་པའི་སྟོབས་ཀྱིས་སོ། །འདི་སྐད་སྟོན་པ་ཡིན་ཏེ། ཇི་སྐད་དུ་བཤད་པའི་ཚུལ་གྱིས་དེ་བཞིན་གཤེགས་པའི་རིགས་ལ་སོགས་པའི་རང་གི་ལྷའི་ཕྱག་རྒྱ་བཅིངས་ཏེ། རྣལ་འབྱོར་པས་མཚན་མ་ཐོབ་ནས་ནམ་མཁའི་ཕྱོགས་ཀྱི་གནས་སུ་ཡི་གེ་ལྃ་
ལས་ཟད་པར་ས་བསྒོམས་ལ་འཆགས་པ་ལ་སོགས་པ་བསྟན་པར་བྱའོ། །ཡི་གེ་བྃ་ལས་རི་བོ་ལ་སོགས་པའི་ཕྱོགས་སུ་ཟད་པར་ཆུ་བསྒོམས་ལ་འོག་ཏུ་འཛུལ་བ་དང་གྱེན་དུ་འབྱུང་བར་བྱའོ། །རྃ་ལས་ཕྱོགས་བཅུར་ཟད་པར་མེ་བསྒོམས་ལ་འབར་བར་བྱའོ། །ཡི་གེ་ཡྃ་ལས་རླུང་གི་ཕུང་པོ་བསྒོམས་
ཏེ་ནམ་མཁའ་ལ་ཁྱེར་བར་བྱའོ། །ཁྃ་ལས་ཟད་པར་ནམ་མཁའ་བསྒོམས་ལ་རྩིག་པ་ལས་ཀྱང་ཐལ། ར་བ་ལས་ཀྱང་ཐལ་ནས་འགྲོ་བ་དང་འོང་བ་ལུས་ཐོགས་པ་མེད་པས་མི་སྣང་བར་འགྱུར་རོ། །ཡི་གེ་ཧྲི་ལས་གཟུགས་ཐམས་ཅད་བསྟན་པར་བྱའོ། །དེ་ལ་དང་པོ་ལས་དང་རྗེས་སུ་མཐུན་པའི་ཡི་གེ་
དང་བཟླས་པའི་སྔགས་དང་ལྷན་ཅིག་སྦྱང་བས་རྫུ་འཕྲུལ་མཐའ་དག་སྟོན་པར་འགྱུར་རོ། །ཁམས་གསུམ་རྣམ་རྒྱལ་མཆོག་ཏུ་ནི། །ཞེས་བྱ་བ་རྡོ་རྗེ་རིགས་ཀྱི་ཕྱག་རྒྱ་རྣམ་པ་བཞི་ཡང་ཁམས་གསུམ་རྣམ་པར་རྒྱལ་བའི་ཕྱག་རྒྱ་མཆོག་ཡིན་ཏེ། རྡོ་རྗེ་རིགས་ཀྱི་ཕྱག་རྒྱ་ཐམས་ཅད་ནི་ཁམས་གསུམ་
རྣམ་པར་རྒྱལ་བ་ཞེས་བཤད་པས། མཉམ་པར་གཞག་པས་བཅིངས་ནས་ཀྱང་། །ཞེས་བྱ་བ་ནི་མཚན་མ་ཐོབ་པ་གཡེང་བ་མེད་པའི་སེམས་སོ། །མངོན་པར་ཤེས་པ་ལྔ་ཐོབ་པོ། །ཞེས་བྱ་བ་ནི་ཇི་སྐད་བཤད་པ་ཉིད་དོ། །ཇི་ལྟར་བྱ་ཞེ་ན། ཆོ་ག་འདིས་ནི་སྒྲུབ་པ་པོ། །ཞེས་བྱ་བ་སྨོས་ཏེ། ཆོ་ག་
เล่ม ๕๘ · หน้า 191a
གང་གིས་ཤེ་ན། ཁྲོས་ནས་དགོས་པ་ཐམས་ཅད་ནི། །ཞེས་བྱ་བ་སྨོས་ཏེ། དེ་བཞིན་གཤེགས་པའི་རིགས་སུ་བཤད་པའི་མངོན་པར་ཤེས་པ་ལྔ་བསྐྱེད་པར་བྱས་ནས་ཞེས་བྱ་བས་ལན་འདེབས་པ་ཡིན་ནོ། །ཇི་ལྟར་ཞེ་ན། ལྟག་འོག་གོ་རིམས་ཇི་བཞིན་བྱ། །ཞེས་བྱ་བ་སྨོས་
ཏེ། འདི་ཉིད་རྣམ་པར་འགྲེལ་པ་ནི། །འཕྲུལ་གྱི་མིག་ལ་སོགས་ཚུལ་གྱིས། །ཞེས་བྱའོ། །དེར་ཅིར་འགྱུར་ཞེ་ན། མངོན་ཤེས་ཀུན་དུ་སྐད་ཅིག་འགྱུར། །ཞེས་བྱ་བ་སྨོས་སོ། །འགྲོ་བ་སེམས་ཅན་གྱི་ཁམས་སོ། །དེ་འདིས་འདུལ་བས་ན་འགྲོ་བ་འདུལ་བ་སྟེ་པདྨའི་རིགས་སོ། །དེའི་ཕྱག་
རྒྱ་ནི་འགྲོ་བ་འདུལ་བ་ལ་སོགས་པ་ནས་པདྨ་འབེབས་པའི་མཐར་ཐུག་པའི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་དོ། །དེའི་མཆོག་ནི་དམ་པར་གྱུར་པ་སྟེ། འགྲོ་བ་འདུལ་བའི་ཕྱག་རྒྱ་མཆོག་དེ་བཅིངས་ནས་ཞེས་བྱ་བར་སྦྱར་རོ། །ཇི་ལྟར་བྱ་ཞེ་ན། རབ་མཉམ་བཞག་པས་ཞེས་
བྱ་བ་སྨོས་ཏེ། དེ་བཅིངས་པས་ཅི་ཞིག་ཐོབ་ཅེ་ན། མངོན་པར་ཤེས་པ་ལྔ་ཐོབ་པོ་ཞེས་བྱ་བ་སྨོས་ཏེ། ཇི་ལྟར་བཤད་པའི་མངོན་པར་ཤེས་པ་ལྔ་ཐོབ་པོ། །ཅི་ལྟར་ཐོབ་ཅེ་ན། ཆོ་ག་འདིས་ནི་སྒྲུབ་པ་པོ། །ཞེས་བྱ་བ་ནི་དེ་མ་ཐག་ཏུ་འཆད་པར་འགྱུར་བའི་དོན་གྱིས་སོ། །དེ་ཉིད་བསྟན་པ་ནི།
ལྟག་འོག་གོ་རིམས་ཇི་བཞིན་དུ། །ཆོ་ག་བཞིན་དུ་འདོད་པས་ཆགས། །ཞེས་བྱ་བ་སྨོས་ཏེ། རང་བཞིན་གྱིས་རྣམ་པར་དག་པའི་ཆོས་རྟོག་པས་སྲིད་པའི་འདོད་པས་དེ་དང་དེ་ལ་ཆགས་ཤིང་ཤིན་ཏུ་ཆགས་པས་བསྒོམས་པ་དེའི་ཕྱིར་འདོད་པས་ཆགས་པ་སྟེ། ཐབས་དང་ཤེས་རབ་ཀྱི་རང་བཞིན་གྱིས་
འཇིག་རྟེན་དབང་ཕྱུག་གི་ཆགས་པ་ཡིན་ནོ་ཞེས་བྱ་བའི་དོན་ཏོ། །ཆོ་ག་བཞིན་དུ་ནི་ཕྱག་རྒྱ་ཆེན་པོ་ལ་སོགས་པའོ། །འདོད་པས་ཆགས་པ་ནི་ཕྱག་རྒྱ་ཆེན་པོ་ལ་སོགས་པའི་སྦྱོར་བ་དེས་སོ། །འཕྲུལ་གྱི་མིག་ནི་ཡེ་ཤེས་ལ་སོགས་པ་སྔར་བཤད་པའི་གོ་རིམས་གང་དང་གང་ཡིན་པ་དེའི་གོ་རིམས་བཞིན་
དུའོ། །འདི་ཉིད་རྣམ་པར་འགྲེལ་པ་ནི། །འཕྲུལ་གྱི་མིག་ལ་སོགས་ཚུལ་གྱིས། །ཞེས་བྱ་བ་སྨོས་ཏེ། དེས་ཅིར་འགྱུར་ཞེ་ན། མངོན་ཤེས་ཐམས་ཅད་ཐོབ་པར་འགྱུར། །ཞེས་བྱ་བ་སྨོས་སོ། །དེའི་དོན་ཀུན་ནི་འཇིག་རྟེན་དང་འཇིག་རྟེན་ལས་འདས་པ་རྣམས་སོ། །གྲུབ་པ་ནི་རྫོགས་པའོ། །
เล่ม ๕๘ · หน้า 191b
འདི་ཡོད་པ་ལས་བྱུང་བ་ནི་དོན་ཐམས་ཅད་གྲུབ་པའི་ནོར་བུའི་རིགས་སོ། །དོན་ཐམས་ཅད་གྲུབ་པར་གྱུར་པས་མཛེས་པ་འདི་ནི་ཕྱག་རྒྱ་ཆེན་པོ་ལ་སོགས་པའི་དོན་ཐམས་ཅད་གྲུབ་པའི་ཕྱག་རྒྱའོ། །ཕྱག་རྒྱ་དེ་རབ་ཏུ་མཉམ་པར་བཞག་པས་བཅིངས་པ་ནི་མཚན་མ་ཐོབ་པའོ། །མངོན་པར་ཤེས་པ་
ལྔ་ཐོབ་བོ། །ཞེས་བྱ་བ་ནི་སྔར་བཤད་ཟིན་ཏོ། །ཆོ་ག་འདི་ནི་སྒྲུབ་པའོ། །ཞེས་བྱ་བ་ནི་དེ་མ་ཐག་ཏུ་འཆང་བར་འགྱུར་བའོ། །ཆོ་ག་དེ་གང་ཡིན་ཞེ་ན། སངས་རྒྱས་རྣམས་ནི་མཆོད་བྱས་ནས། །ཞེས་བྱ་བ་སྨོས་ཏེ། སངས་རྒྱས་རྣམས་ལ་མཆོད་པ་ནི་སངས་རྒྱས་རྣམས་ལ་མཆོད་པ་སྟེ།
ནམ་མཁའི་ཁམས་དང་མཉམ་པར་ནོར་བུའི་རིགས་གཟུགས་བརྙན་ཙམ་དུ་བསྒོམ་པ་འདི་ནི་སངས་རྒྱས་རྣམས་མཆོད་པའོ། །དེ་བྱེད་པ་ནི་ཤིན་ཏུ་མངོན་དུ་བྱེད་པའོ། །ནོར་བུའི་རིགས་ཀྱི་ཕྱག་རྒྱ་ཆེན་པོ་ལ་སོགས་པའི་གོ་རིམས་བཞིན་དུ་བསྒོམས་པའི་ཚུལ་གྱིས་སོ། །དེ་བཞིན་གཤེགས་པའི་རིགས་
སུ་བཤད་པའི་ཚུལ་དེས་ལྷའི་མིག་གིས་ཡེ་ཤེས་ལ་སོགས་པའི་བསྐྱེད་པའི་ཚུལ་གྱིས་ལྷའི་མིག་ལ་སོགས་པ་མངོན་པར་ཤེས་པ་ལྔའི་རང་བཞིན་ནོར་བུའི་རིགས་ཀྱི་རྣལ་འབྱོར་པས་མཐོང་ཞིང་ཐོས་པས་མངོན་དུ་བྱེད་དོ་ཞེས་བྱ་བའི་དོན་ཏོ། །དེ་ལྟར་མཚན་མ་ཐོབ་པས་མངོན་པར་ཤེས་པ་བསྒྲུབ་པ་
བསྟན་ནས། ད་ནི་མནའ་དོར་བའི་བརྟུལ་ཞུགས་ལ་རྗེས་སུ་འཇུག་པའི་ཕྱག་རྒྱ་ཆེན་པོ་ལ་སོགས་པ་འགྲུབ་པར་འགྱུར་རོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་བདེན་པའི་དངོས་གྲུབ་ཀྱི་རྒྱུད་འདི་གསུངས་
སོ། །མནའ་དོར་ནས་བདེན་པ་ཡོངས་སུ་སྐྱོང་ཞིང་བསྲུང་བ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་འགྲུབ་པའོ། །དེ་སྟོན་པར་བྱེད་པའི་རྒྱུད་དེ་ཕྱག་ན་རྡོ་རྗེས་གསུངས་པ་ཡིན་ནོ། །བདེན་པ་ནི་ཕྱིན་ཅི་མ་ལོག་པའོ། །རྗེས་སུ་བསྐོར་བའི་ངང་ཚུལ་གང་ལ་མངའ་བ་དེ་ནི་བདེན་པའི་རྗེས་སུ་འཇུག་
པའོ། །དེས་བདེན་པའི་རྗེས་སུ་འཇུག་པ་དང་། ཚིག་གིས་མནའ་ནི་འདོར་བྱེད་ཅིང་། །ཞེས་བྱ་བའི་མནའ་དོར་བའོ། །བདེ་བ་ཆེན་པོ་བསྲུངས་ན་ནི། །ཞེས་བྱ་བ་ལ་སྒྲུབ་ཅིང་ནན་ཏན་དུ་བྱེད་པས་ན་བསྲུང་བའོ། །བདེན་པ་ཡང་ཡིན་ལ་ཆེན་པོ་ཡང་དེ་ཡིན་པས་ན་དེ་ནི་དེ་བཞིན་གཤེགས་པའི་
เล่ม ๕๘ · หน้า 192a
མཐུའོ། །དེས་ཅིར་འགྱུར་ཞེ་ན། མྱུར་དུ་སངས་རྒྱས་ཉིད་དང་དེ་བཞིན་གཤེགས་པ་ཉིད་ཐོབ་བོ་ཞེས་བྱ་བ་སྨོས་སོ། །འདི་སྐད་སྟོན་པ་ཡིན་ཏེ། རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔའི་ནང་ནས་གང་ཡང་རུང་བའི་དེ་བཞིན་གཤེགས་པ་བསྒྲུབ་པར་འདོད་ན་
དཀྱིལ་འཁོར་དུ་འཇུག་པར་བྱའོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་པའི་ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་དུ་འགྲུབ་པ་ཡང་ཐོབ་ན་དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་རྡོ་རྗེ་ཡེ་ཤེས་བསྐྱེད་པར་བྱས་ཀྱིས། ཁྱོད་ཀྱིས་དཀྱིལ་
འཁོར་ཆེན་པོ་མ་མཐོང་བ་རྣམས་ལ་མ་སྨྲ་ཤིག །དམ་ཚིག་ཉམས་པར་གྱུར་ཏ་རེ། །འདི་ནི་ཁྱོད་ཀྱི་རྡོ་རྗེའི་དམ་ཚིག་ཡིན་གྱིས། གལ་ཏེ་འགའ་ཞིག་ལ་སྨྲས་ན་ཀླད་པ་འགས་པར་འགྱུར་རོ། །རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་འགྱུར། །གལ་ཏེ་ཚུལ་འདི་སྨྲས་ན་ནི། །
དེ་མ་ཐག་ཏུ་དྲལ་ཏེ་གཤེགས། །ཨོཾ་བཛྲ་ཨུ་ད་ཀ་ཋ། དེང་ནས་བརྩམས་ཏེ་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས་ངས་འདི་བྱོས་ཤིག་ཅེས་བསྒོ་བ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཁྱོད་དུས་བྱས་ནས་དམྱལ་བར་ལྟུང་བར་གྱུར་ཏ་རེ་ཞེས་སྨྲས་ལ། སློབ་
དཔོན་ནམ་བཅོམ་ལྡན་འདས་ལས་ངེས་པར་མངོན་པར་འདོད་པའམ་དངོས་གྲུབ་བླངས་ལ། དེ་སྔ་མ་བཞིན་དུ་ནན་ཏན་བྱས་ན་དེ་ལྟ་བུས་དམ་ཚིག་གི་དཀྱིལ་འཁོར་དུ་བླངས་པ་དེ་སྔ་མ་བཞིན་ནན་ཏན་བྱས་ན་དེ་ལྟ་བུས་འགྲུབ་པར་འགྱུར་རོ། །དམ་ཚིག་གི་དཀྱིལ་འཁོར་དུ་འཇུག་པའི་མནའ་བསྒགས་པས་
ཅི་ཞིག་བྱེད་ཅེ་ན། དེ་བཞིན་གཤེགས་པའི་རིགས་བྱུང་བ། །ཞེས་བྱ་བ་སྨོས་ཏེ། དེ་བཞིན་གཤེགས་པ་རྣམས་ཀྱི་རིགས་ནི་རྡོ་རྗེ་སེམས་དཔའ་ནས་བརྩམས་ནས། རྡོ་རྗེ་འབེབས་པའི་མཐར་ཐུག་པ་འབྱུང་ཞིང་བསྐྱེད་པའོ། །སྔ་མ་བཞིན་དུ་དཀྱིལ་འཁོར་དུ་ཞུགས་ཏེ། མངོན་པར་འདོད་
པའི་དོན་གྱིས་དངོས་གྲུབ་བཅོམ་ལྡན་འདས་སམ། སློབ་དཔོན་གྱི་མདུན་དུ་མནའ་དོར་ལ་ཇི་ལྟ་བ་བཞིན་དུ་ནན་ཏན་དུ་བྱའོ། །རྡོ་རྗེ་འཛིན་གྱིས་མནའ་དོར་ཞིང་། །ཞེས་བྱ་བ་ལ་སོགས་པ་ལ། རྡོ་རྗེ་རིགས་ཀྱི་རྣལ་འབྱོར་པས་རྡོ་རྗེའི་རིགས་ལས་གསུངས་པའི་དངོས་གྲུབ་སྒྲུབ་པར་འདོད་པས་
เล่ม ๕๘ · หน้า 192b
སྔ་མ་བཞིན་དུ་རྡོ་རྗེའི་རིགས་ཀྱི་དཀྱིལ་འཁོར་གྱི་རྡོ་རྗེ་གཟུངས་ཀྱི་ཕྱག་རྒྱ་བཅིངས་ནས། མནའ་འདོར་ལ་སྔ་མ་བཞིན་དུ་མངོན་པར་འདོད་པའི་དངོས་གྲུབ་དེ་ལྟ་བུས་རྡོ་རྗེའི་རིགས་ལས་བཤད་པའི་དངོས་གྲུབ་ཐོབ་པར་འགྱུར་རོ། །དམ་པའི་ཆོས་ལ་མནའ་དོར་ཞིང་། །ཞེས་བྱ་བ་ནི་དམ་པའི་ཆོས་
ནི་པདྨའི་རིགས་ཏེ། དེའི་མནའ་དོར་བ་བསྲུང་བར་བྱའོ། །འདི་སྐད་སྟོན་པ་ཡིན་ཏེ། པདྨའི་རིགས་ལས་བཤད་པའི་དངོས་གྲུབ་བསྒྲུབ་པར་འདོད་པས་པདྨ་རིགས་ཀྱི་དཀྱིལ་འཁོར་དུ་ཞུགས་ཏེ། མནའ་དོར་ནས་སྔ་མ་བཞིན་ནོ། །ནན་ཏན་དུ་བྱས་པ་དེ་ལྟ་བུས་པདྨའི་རིགས་ཀྱི་དངོས་གྲུབ་
ཏུ་འགྱུར་རོ། །སངས་རྒྱས་མཆོད་ལ་མནའ་དོར་ཞིང་། །ཞེས་བྱ་བ་ནི་སངས་རྒྱས་མཆོད་པ་ནི་ནོར་བུའི་རིགས་སོ། །དེའི་མནའ་ཤིན་ཏུ་དོར་བས་སངས་རྒྱས་ལ་མཆོད་པའི་མནར་འགྱུར་བས་དེ་བསྲུང་བར་ཡང་བྱའོ། །ཡང་སྔ་མ་བཞིན་དུ་ནོར་བུའི་རིགས་ཀྱི་དཀྱིལ་འཁོར་དུ་ཞུགས་ཏེ། དེ་ལས་
བཤད་པའི་གཟུགས་བྱས་ནས། སྔ་མ་བཞིན་བསྒྲུབ་པར་བྱས་པ་དེ་ལྟ་བུས་ནོར་བུའི་རིགས་ལས་བཤད་པའི་དངོས་གྲུབ་ཐོབ་པར་འགྱུར་རོ། །དེ་བས་ན། དབང་བསྐུར་བ་ནི་ཐོབ་པར་འགྱུར། །ཞེས་བཅོམ་ལྡན་འདས་སངས་རྒྱས་མཆོད་པས་གསུངས་སོ། །སངས་རྒྱས་མཆོད་པ་
ནི་བཅོམ་ལྡན་འདས་ནམ་མཁའི་སྙིང་པོའོ་ཞེས་བྱ་བའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་མནའི་དངོས་གྲུབ་ཀྱི་རྒྱུད་བསྟན་ནས། ད་ནི་ས་མ་ཡ་སྟྭཾ་ཞེས་བྱ་བ་ལ་སོགས་པས་ཕྱག་རྒྱ་ཐམས་ཅད་ཀྱི་དངོས་གྲུབ་དེ་ཁོ་ན་ཉིད་བསྐུལ་བའི་སྙིང་པོ་ཟློས་ཤིང་ཕྱག་རྒྱ་ཆེན་པོ་ལ་སོགས་
པའི་ཕྱག་རྒྱ་ཐམས་ཅད་བཅིང་བར་བྱ་བའི་ཆོ་ག་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་གི་དེ་ཁོ་ན་ཉིད་ཀྱི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ནི་ཇི་སྐད་དུ་བཤད་པའོ། །རིགས་ནི་དེ་
བཞིན་གཤེགས་པ་དང་། རྡོ་རྗེ་དང་པདྨ་དང་། ནོར་བུའི་རིགས་སོ། །དེ་བཞིན་གཤེགས་པ་ཐམས་ཅད་ཀྱི་རིགས་དེ་དག་གི་དམ་ཚིག་ནི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་སྟེ། ཕྱག་རྒྱ་ཆེན་པོ་ལ་སོགས་པའི་རྣམ་པ་བཞིའོ། །དེ་སྐད་དུ་ཡང་། ཕྱག་རྒྱ་དམ་ཚིག་
เล่ม ๕๘ · หน้า 193a
ཅེས་སུ་གྲགས། །ཞེས་གསུངས་སོ། །དེ་ཁོ་ན་ཉིད་ནི་ཀུན་རྫོབ་ཀྱི་བདེན་པའི་ངོ་བོའམ་དེ་ཁོ་ན་ཉིད་དེ། དེ་སྟོན་པར་བྱེད་པའི་སྙིང་པོ་ལ་ཡང་དམ་ཚིག་གི་དེ་ཁོ་ན་ཉིད་ཅེས་བྱའོ། །དེའི་དངོས་གྲུབ་ཀྱི་ཕྱག་རྒྱ་བཅིངས་པ་གྲུབ་པའོ། །དེ་སྟོན་པར་བྱེད་པའི་རྒྱུད་ནི་
བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བསྟན་པའོ། །ས་མ་ཡ་སྟྭཾ་ཞེས་བྱ་བ་ནི་བརྗོད་པས་དེ་ཁོ་ན་ཉིད་བསྐུལ་བའི་སྙིང་པོ་གསུངས་པ་ཟློས་པའོ། །ཕྱག་རྒྱ་ཀུན་ནི་དམ་ཚིག་དང་། ཆོས་དང་ལས་དང་། ཕྱག་རྒྱ་ཆེན་པོ་རྣམས་སོ། །རིགས་རྣམས་ལའང་ཞེས་བྱ་བ་ནི་དེ་བཞིན་གཤེགས་
པ་ཐམས་ཅད་ཀྱི་སྟེ། དེ་བཞིན་གཤེགས་པ་དང་། རྡོ་རྗེ་དང་། པདྨ་དང་། ནོར་བུའི་རིགས་ལ་ཡང་ངོ་། །ཉིད་ཀྱིས་བཅིངས་ནས་བརྟན་པར་འགྱུར། །ཞེས་བྱ་བ་ནི་དེ་ཁོ་ན་ཉིད་བསྐུལ་བས་མཉེས་པར་གྱུར་པས་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་རང་ཉིད་ཀྱིས་བཅིངས་པས་ན་དེ་ཁོ་ན་
ཉིད་བསྐུལ་བའི་དུས་སུ་ཇི་ལྟར་མངོན་པར་འདོད་པའི་དངོས་གྲུབ་སྒྲུབ་པ་དབང་དུ་བྱེད་པར་འགྱུར་རོ། །དེ་ནས་ཕྱིས་བསྒྲུབ་པ་བྱའོ། །དེའི་རྗེས་ལ་དེ་ཁོ་ན་ཉིད་བསྐུལ་བའི་དུས་ཕྱིས་དེའི་འོག་ཏུ་མ་བསྒྲུབས་པར་ཡང་དེ་ཁོ་ན་ཉིད་བསྐུལ་བར་གྱུར་ཏོ། །འདི་སྐད་སྟོན་པ་ཡིན་ཏེ། ས་མ་ཡ་སྟྭཾ་བརྗོད་ཅིང་། ཐོག་
མ་ཁོ་ན་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་ལ་ཕྱིས་སྔགས་བཟླས་པར་བྱའོ། །དེ་སྐད་དུ་ཡང་དེ་ཁོ་ན་ཉིད་བསྡུས་པའི་རྒྱུད་ཆེན་པོ་སྟོང་ཕྲག་བརྒྱ་པ་ལས་ས་མ་ཡ་སྟྭཾ་ཞེས་བརྗོད་པས་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་བཅིང་པར་བྱའོ་ཞེས་གསུངས་སོ། །དེ་ལྟར་དེ་བཞིན་
གཤེགས་པ་ལ་སོགས་པའི་རིགས་ཐམས་ཅད་ཀྱི་ཕྱག་རྒྱ་བཅིངས་པའི་སྤྱིའི་སྙིང་པོ་བཤད་ནས། དེ་བཞིན་གཤེགས་པའི་རིགས་ཀྱི་ཕྱག་རྒྱ་རྣམས་ཀྱི་བྱེ་བྲག་གི་སྙིང་པོ་ནི་ཞེས་བྱ་བ་ལ་སོགས་པ་གསུངས་སོ། །སུ་ར་ཏ་སྟྭཾ་ཞེས་བརྗོད་ན་ཞེས་བྱ་བ་ནི་བག་ཆགས་དང་བཅས་པའི་ཉོན་མོངས་
པ་སྤངས་པའི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ལས་བྱུང་བ་ཟག་པ་མེད་པའི་བདེ་བ་ཡང་ཡིད་བདེ་བའི་རང་བཞིན་རྒྱུན་མི་འཆད་པའི་དེ་བཞིན་གཤེགས་པ་ལྔའི་ཡེ་ཤེས་ནི་བདག་ཡིན་ནོ་ཞེས་བྱ་བའི་དོན་ཏོ། །དེ་སྐད་དུ་ཡང་། ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་
เล่ม ๕๘ · หน้า 193b
ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་གྲུབ་མཛོད། །ཅེས་གསུངས་སོ། །བརྗོད་ན་ཞེས་བྱ་བ་ནི་གོ་སླའོ། །ཕྱག་རྒྱ་ཀུན་ནི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་དེ། རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་
རྣམས་སོ། །མ་བསྒྲུབས་པར་ཡང་ཞེས་བྱ་བ་ནི། སུ་ར་ཏ་སྟྭཾ་ཞེས་བྱ་བའི་སྙིང་པོས་མ་བསྒྲུབས་ན་ཡང་ཉིད་ཀྱིས་བཅིང་བས་བརྟན་པར་འགྱུར་ཞེས་བྱ་སྟེ། ཅིའི་ཕྱིར་ཞེ་ན། དེ་ཉིད་བསྐུལ་བས་བདག་ཉིད་ཆེའི། །ཞེས་བྱ་བ་སྨོས་ཏེ། རྣམ་པར་སྣང་མཛད་ཆེན་པོའིའོ། །དམ་ཚིག་
ཀྱང་ཡིན་ལ་ཆེན་པོ་ཡང་ཡིན་པས་ན་དམ་ཚིག་ཆེན་པོ་སྟེ། ཐོག་མ་དང་ཐ་མ་མེད་པའི་རྡོ་རྗེ་འཆང་ཆེན་པོ་ནི་རྣམ་པར་སྣང་མཛད་ཆེན་པོ་སྟེ། དེ་ཁོ་ན་ཉིད་ནི་རབ་ཏུ་དགའ་བ་ཉིད་དང་། ཀུན་ཏུ་བཟང་པོ་ཉིད་དོ། །དེ་སྐད་དུ་ཡང་། དམ་ཚིག་ཆེན་པོའི་དེ་ཁོ་ན་ཉིད་སྨྲས་པ། རབ་དགའ་ཀུན་དུ་བཟང་
པོའོ། །ཞེས་གསུངས་སོ། །ཧཱུཾ་ཞེས་བྱ་བ་གཅིག་ཙམ་གྱིས། །ཞེས་བྱ་བ་ནི་རྡོ་རྗེའི་རིགས་ཐམས་ཅད་ཀྱི་ཕྱག་རྒྱ་ཡི་གེ་ཧཱུཾ་བརྗོད་པས་སློབ་དཔོན་རང་ཉིད་ཀྱིས་བཅིངས་པའམ། སློབ་མ་ལ་གདམས་ངག་བྱིན་ནས་ཧཱུཾ་ཞེས་བརྗོད་ཅིང་ཕྱག་རྒྱ་འཆིང་དུ་གཞུག་པར་བྱའོ། །པདྨའི་རིགས་
ལས་སརྦྦ་ཤུདྡྷ་ཞེས་བརྗོད་ཅིང་། སློབ་དཔོན་བདག་ཉིད་ཀྱིས་ཕྱག་རྒྱ་ཆེན་པོ་བཅིངས་པའམ། སློབ་མ་ལ་གདམས་ངག་བྱིན་ནས་འཆིང་དུ་གཞུག་པར་བྱའོ། །དེ་ལྟར་བྱས་པས་ཅི་ཞིག་ཏུ་འགྱུར་ཞེ་ན། བུད་མེད་ཆགས་ལ་སོགས་ལྡན་ལ། །ཐམས་ཅད་དུ་ནི་གྲོལ་མི་འགྱུར། །ཞེས་
བྱ་བ་སྨོས་ཏེ། ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་ནི་བུད་མེད་དོ། །དེ་རྣམས་དང་མཉམ་པར་སྦྱོར་ཞིང་རྣལ་འབྱོར་པས་འཇིག་རྟེན་དབང་ཕྱུག་གི་ཕྱག་རྒྱ་ཆེན་པོ་ལ་སོགས་པ་རྣམས་ལ་ཕྱག་རྒྱ་བཅིངས་པ་ལྷག་པར་མོས་པའོ། །སོགས་པ་
སྨོས་པས་ནི་སྟོང་པ་ཉིད་བཅུ་དྲུག་དང་། ཕ་རོལ་ཏུ་ཕྱིན་པ་བཅུ་དྲུག་དང་། བྱང་ཆུབ་སེམས་དཔའི་ས་བཅུ་དང་། སྟོབས་དང་མི་འཇིགས་པ་ལ་སོགས་པའི་ཆོས་ཀྱི་སྐུའི་ངོ་བོ་གཟུང་བར་བྱའོ་ཞེས་བྱ་བའི་དོན་དུ་བུད་མེད་དང་པོར་བྱས་པ་གང་ཡིན་པ་འདི་ནི་བུད་མེད་ལ་ཆགས་པའོ། །
เล่ม ๕๘ · หน้า 194a
ལྡན་པ་ནི་ཤིན་ཏུ་རྣལ་འབྱོར་གྱི་རང་བཞིན་ཆོས་ཀྱི་སྐུའི་ཏིང་ངེ་འཛིན་ཏོ། །དེ་ནི་རྣམ་པར་གྲོལ་བའི་ཏིང་ངེ་འཛིན་དང་ལྡན་པ་དང་བྲལ་བར་མི་འགྱུར་རོ། །དེ་ཉིད་ལ་སེམས་རྩེ་གཅིག་པ་དང་ལྡན་པའི་རྣལ་འབྱོར་པས་ཤིན་ཏུ་རྣལ་འབྱོར་གྱི་ངོ་བོ་ལ་ཉེ་བར་གནས་སོ་ཞེས་བྱ་བའི་
ཐ་ཚིག་གོ། །ནོར་བུ་ཆེན་པོའི་རིགས་ཀྱི་རྣལ་འབྱོར་པས། ཨོཾ་ཞེས་བརྗོད་པས་ཕྱག་རྒྱ་ཐམས་ཅད་བཅིང་བ་འགྲུབ་པར་འགྱུར་ཏེ་མ་ལུས་ཤིང་ལུས་པ་མེད་པའི་ཁམས་གསུམ་པའི་འཇིག་རྟེན་ཐམས་ཅད་ཀྱི་མཆོད་པ་དང་། དབང་བསྐུར་བ་ལ་སོགས་པའི་ངོ་བོ་གང་ཡིན་པ་དེ་མཆོག་ཏུ་གྱུར་པས་ན་དམ་
པའོ། །རང་བྱུང་བ་ཉིད་ནི་སངས་རྒྱས་བཅོམ་ལྡན་འདས་སོ། །མཆོད་པ་ཐམས་ཅད་གྲུབ་ཅིང་རྫོགས་པར་འགྱུར་རོ་ཞེས་བྱ་བའི་དོན་ཏོ། །རིགས་ཐམས་ཅད་ནི་དེ་བཞིན་གཤེགས་པ་ལ་སོགས་པ་ཐམས་ཅད་དོ། །དམ་ཚིག་ནི་དེ་ཁོ་ན་ཉིད་ཀྱི་དངོས་གྲུབ་སྟེ། དེ་ཉིད་ཀྱི་ཕྱག་རྒྱ་དེས་སེམས་ཅན་
གྱི་ཁམས་ལ་རྒྱས་འདེབས་པ་དེའི་ཆོ་ག་རྒྱས་པའོ། །བཤད་མ་ཐག་པ་སྟོན་པར་བྱེད་པའི་སྒྲའི་ཚོགས་ལ་རྒྱུད་ཅེས་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་དེ་ཁོ་ན་ཉིད་ཀྱི་དངོས་གྲུབ་ཀྱི་རྒྱུད་བཤད་ནས། ད་ནི་རང་གི་ལྷའི་རྣལ་འབྱོར་བྱས་ལ་རས་རིས་ལ་སོགས་པ་རྣམས་ལ་
ཡང་རང་གི་ལྷ་སྤྱན་དྲངས་ཏེ། ཟུང་དུ་འཇུག་པའི་རྣལ་འབྱོར་སྒོམ་པར་བྱེད་ཅིང་རང་གི་ལྷ་རྗེས་སུ་དྲན་པས་ཕྱག་རྒྱ་ཆེན་པོ་ལ་སོགས་པ་ཐམས་ཅད་ཉིས་འགྱུར་གྱི་དངོས་གྲུབ་ཏུ་འགྱུར་རོ་ཞེས་བྱ་བའི་ཆོ་ག་འདིས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་ནས། དེ་བཞིན་གཤེགས་པ་ཐམས་
ཅད་ཀྱི་རིགས་ཀྱིས་དངོས་གྲུབ་ཀྱི་ཕྱག་རྒྱའི་རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་ལ་སོགས་པ་ནས། དོན་ཡོད་པར་གྲུབ་པའི་མཐར་ཐུག་པ་ལྔའོ། །རིགས་ནི་དེ་བཞིན་གཤེགས་པ་དང་། རྡོ་རྗེ་དང་། པདྨ་དང་། ནོར་བུའི་རིགས་སོ། །དེ་དག་གི་དངོས་
གྲུབ་ནི་རྫོགས་པ་སྟེ། དེའི་ཕྱག་རྒྱ་ནི་བསྒོམ་པ་ཡིད་ཀྱི་ཕྱག་རྒྱ་ཞེས་བྱ་བའི་དོན་ཏོ། །སངས་རྒྱས་ཕྱག་རྒྱ་བཅིངས་ནས་ནི། །ཞེས་བྱ་བ་ལ་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་རྣམས་ཀྱིས་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་པའོ། །དེ་བཞིན་གཤེགས་པ་
เล่ม ๕๘ · หน้า 194b
དྲན་བྱེད་ཅིང་། །ཞེས་བྱ་བ་ནི་རང་གི་དེ་བཞིན་གཤེགས་པའི་མདུན་དུ་བདག་ཉིད་ཀྱིས་བསྒོམས་ན། རྣལ་འབྱོར་པ་འགྲུབ་པར་འགྱུར་རོ། །ཅི་ཞིག་བྱས་ན་འགྲུབ་པར་འགྱུར་ཞེ་ན། བསྒྲུབས་ནས་ཞེས་བྱ་བ་སྨོས་ཏེ། དེ་སྔར་བཤད་པའི་བསྒོམ་པའི་སྦྱོར་བས་མྱུར་དུ་འགྲུབ་པར་འགྱུར་བའོ། །
ཅི་ཞིག་བསྒྲུབས་ནས་ཤེ་ན། སངས་རྒྱས་བྱང་ཆུབ་བརྟན་པ་ཡང་། །ཞེས་བྱ་བ་སྨོས་ཏེ། མི་བརྟན་པའི་དངོས་པོ་ཙམ་གཅོད་པར་ཟད་ཀྱི། རིག་པ་འཛིན་པའི་དངོས་གྲུབ་ལ་སོགས་པ་བསྒྲུབས་ཀྱང་འགྲུབ་པར་འགྱུར་རོ། །མི་འགྱུར་བའི་དངོས་པོས་སངས་རྒྱས་དང་བྱང་ཆུབ་སེམས་དཔའ་རྣམས་
ཀྱང་འགྲུབ་པར་འགྱུར་རོ། །དེའི་ཕྱིར་གདོན་མི་ཟ་བའི་ངོ་བོ་ཉིད་དུ་འགྲུབ་པར་འགྱུར་ཏེ། ངེས་པར་སྐྱེས་པའི་སྒྲུབ་པ་པོས་དངོས་གྲུབ་འགྲུབ་པར་འགྱུར་ཞེས་བསྟན་པ་ཡིན་ནོ་ཞེས་རྡོ་རྗེ་སེམས་དཔའ་ལ་མངའ་བའི་ཕྱག་རྒྱ་ཆེན་པོ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་སྟེ། དེ་བཞིན་གཤེགས་པའི་
རིགས་ཀྱི་རྡོ་རྗེ་སེམས་དཔའ་ལ་སོགས་པའི་དམ་ཚིག་དང་། ཆོས་དང་། ལས་དང་། ཕྱག་རྒྱ་ཆེན་པོའི་ངོ་བོ་ཕྱག་རྒྱ་རྣམ་པ་བཞིའོ། །དེ་བཅིངས་པ་ནི་སྔར་བཤད་པའི་ཚུལ་གྱིས་རྣམ་པ་ཐམས་ཅད་ཀྱི་མཆོག་དང་ལྡན་པ་ཡོངས་སུ་རྫོགས་པའོ། །ཡང་དང་ཡང་མངོན་དུ་བྱས་ནས་མདུན་དུ་རྡོ་རྗེ་
སེམས་དཔའ་ཡོངས་སུ་བསྒོམས་པས་ཤིན་ཏུ་མྱུར་བར་དངོས་གྲུབ་ཏུ་འགྱུར་རོ་ཞེས་བྱ་བ་ནི། རྣལ་འབྱོར་གཅིག་ལ་ལྟོས་ནས། ཟུང་འཇུག་གི་རྣལ་འབྱོར་གྱིས་མྱུར་དུ་འགྲུབ་པར་འགྱུར་རོ་ཞེས་བྱ་བའི་ཐ་ཚིག་གོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའ་ལ་སོགས་
པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་བྱས་ཏེ། ཆོ་ག་ཐམས་ཅད་རྗེས་སུ་སྤྱད་ལ། རས་ལ་སོགས་པ་ལ་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་ཀྱི་ལྷ་རྣམས་བསྒོམས་ཏེ། བསྡུ་བ་ལ་སོགས་པའི་ཆོ་གས་རབ་ཏུ་བཞག་སྟེ། མཆོད་པ་ཐམས་ཅད་ཀྱིས་
ཆོ་ག་བཞིན་དུ་ཡང་དག་པར་མཆོད་ལ། ཕྱག་རྒྱ་བཞི་བྱས་ནས་བསྒོམས་ལ། དེས་རྣལ་འབྱོར་གཅིག་ལ་ལྟོས་ནས་མྱུར་དུ་འགྲུབ་པར་འགྱུར་རོ་ཞེས་ཐམས་ཅད་དུ་ཤེས་པར་བྱའོ། །རྡོ་རྗེའི་རིགས་ནི་རྡོ་རྗེ་ཧཱུཾ་མཛད་ལ་སོགས་པའི་སྔར་བཤད་པའི་ཚུལ་གྱིས་ཕྱག་རྒྱ་ཆེན་པོ་དང་། དམ་ཚིག་དང་།
เล่ม ๕๘ · หน้า 195a
ཆོས་དང་། ལས་ཀྱི་ཕྱག་རྒྱ་རྣམས་བྲི་བར་བྱའོ། །གང་གི་ཏིང་ངེ་འཛིན་བྱས་ནས་ཤེ་ན། རྡོ་རྗེ་སེམས་དཔའི་ཏིང་ངེ་འཛིན་གྱིས་ཞེས་བྱ་བ་སྨོས་ཏེ། རང་གི་ཁྲོ་བོ་བསྒོམས་པ་ནི། །རྡོ་རྗེ་སེམས་དཔའི་ཏིང་ངེ་འཛིན་ཏེ། རྡོ་རྗེ་སེམས་དཔའི་ཏིང་ངེ་འཛིན་དེས་རང་གི་ལྷའི་ཕྱག་རྒྱ་བཅིངས་ཏེ།
དེ་བཞིན་གཤེགས་པའི་རིགས་ཀྱི་སྔར་བཤད་པའི་ཆོ་གས་རང་གི་ཁྲོ་བོ་བསྡུ་བ་ལ་སོགས་པའི་ཆོ་གས་མདུན་དུ་རབ་ཏུ་བཞག་ལ་རང་གི་ལྷའི་རང་བཞིན་གྱིས་རྡོ་རྗེ་སེམས་དཔའ་བསྒོམ་པར་བྱའོ། །ཉིས་རིམ་དུ་ནི་དངོས་གྲུབ་ཐོབ། །ཅེས་བྱ་བ་ནི་གང་གི་ཚེ་བདག་ཉིད་ཀྱིས་རྣལ་འབྱོར་གཅིག་བསྒོམས་པ་ན་ལོ་གཅིག་
གིས་འགྲུབ་པར་འགྱུར་བ་དེ་ཟུང་གི་རྣལ་འབྱོར་གྱིས་ཟླ་བ་དྲུག་གིས་འགྲུབ་པར་འགྱུར་རོ། །ཆོས་ཀྱི་ཕྱག་རྒྱ་བཅིངས་ནས་ཀྱང་། །ཞེས་བྱ་བ་ལ་སོགས་པ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་ཉིད་འཇིག་རྟེན་དབང་ཕྱུག་གི་རྣལ་འབྱོར་བྱས་ལ་ཆོ་ག་ཐམས་ཅད་རྗེས་སུ་སྤྱད་
དེ། སྔ་མ་བཞིན་དུ་བསྡུ་བ་ལ་སོགས་པའི་ཆོ་གས་འཇིག་རྟེན་དབང་ཕྱུག་མདུན་གྱི་རས་རིས་ལ་སོགས་པ་ལ་བཀོད་དེ། དེའི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཅིངས་ཏེ། དེ་ཉིད་མདུན་དུ་བདག་གིས་བསྒོམས་ལ། དེ་མངོན་དུ་བྱས་ན་དངོས་གྲུབ་ཉིས་འགྱུར་དུ་འགྱུར་རོ། །ནོར་བུའི་རིགས་ཀྱི་
ཕྱག་རྒྱ་རྣམ་པ་བཞི་ནི་ལས་ཀྱི་ཕྱག་རྒྱ་ཞེས་བྱའོ། །དེ་བཅིང་བ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་བཅིང་བར་བྱའོ། །རྡོ་རྗེ་སྙིང་པོའི་ཏིང་འཛིན་གྱིས། །ཞེས་བྱ་བ་ནི་རང་གི་ལྷ་བསྒོམ་པ་དེ་ནི་རྡོ་རྗེ་སྙིང་པོའི་ཏིང་ངེ་འཛིན་ཡིན་ཏེ། དངོས་གྲུབ་ཉིས་འགྱུར་དུ་
འགྱུར་རོ། །ཇི་ལྟ་བ་ནི་ཞེ་ན། རྡོ་རྗེ་སྙིང་པོ་བསྒོམས་ནས་ནི། ཞེས་བྱ་བ་སྨོས་ཏེ། སྔ་མ་བཞིན་དུ་བསྡུ་བ་ལ་སོགས་པས་བཅོམ་ལྡན་འདས་རྡོ་རྗེ་སྙིང་པོའི་མདུན་དུ་བཞག་ལ་བསྒོམ་པར་བྱའོ། །དེ་ལྟར་ཟུང་གི་རྣལ་འབྱོར་རྒྱས་པ་ལ་དགའ་བའི་སེམས་ཅན་རྗེས་སུ་གཟུང་བའི་ཕྱིར། རང་གི་ལྷ་
རྗེས་སུ་དྲན་པའི་བསྒྲུབ་པ་བཤད་ནས། ད་ནི་ཕྱག་རྒྱ་ཆེན་པོ་ལ་སོགས་པའི་རང་གི་ལྷའི་ཕྱག་རྒྱ་རྣམ་པ་བཞི་པོ་ནི་རང་གི་ལྷའི་ང་རྒྱལ་གྱིས་སྙིང་པོ་བརྗོད་ཅིང་བསྒྲུབ་པར་བྱའོ་ཞེས་བྱ་བའི་ངེས་པ་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་རིགས་ཐམས་
เล่ม ๕๘ · หน้า 195b
ཅད་ཀྱི་དངོས་གྲུབ་སྒྲུབ་པའི་རྒྱུད་གསུངས་པའོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་སྔ་མ་བཞིན་ནོ། །དེ་དག་ནི་དངོས་གྲུབ་ཐམས་ཅད་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་ཀྱི་དངོས་གྲུབ་བོ། །དེ་བསྒྲུབ་པ་ནི་བསྐྱེད་པའོ། །བདག་ཉིད་དམ་
ཚིག་མདུན་དུ་ཡང་། །སངས་རྒྱས་རྗེས་སུ་དྲན་པར་བསྒོམ། །ཞེས་བྱ་བ་ནི་སྔར་བཤད་པའི་ཚུལ་གྱིས་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་དེ། ཇི་ལྟ་བ་བཞིན་དུ་བསྡུ་བ་ལ་སོགས་པ་མདུན་དུ་བཞག་ལ་
རང་གི་དེ་བཞིན་གཤེགས་པ་ཕྱག་རྒྱ་ཆེན་པོ་བཅིངས་ཏེ། དེའི་སྔགས་བརྗོད་ཅིང་། བདག་ཉིད་དམ་མདུན་དུ་བཞག་ན་དེ་བཞིན་གཤེགས་པ་བསྒོམ་པར་བྱའོ། །དེ་ནས་དེ་མ་ཐག་ཏུ་འགྲུབ། །ཅེས་བྱ་བ་ནི་གང་གི་ཚེ་དེ་ལྟར་བསྒོམས་ནས་མཚན་མ་ཐོབ་པར་གྱུར་པ་དེའི་ཚེ། སྔར་བཤད་པའི་ཆོ་
གས་མངོན་པར་ཤེས་པ་ལྔར་འགྱུར་རོ། །དེ་ནས་མཚན་ཐོག་ཐག་བསྒོམས་ནས་དེའི་རྗེས་ལ་བདག་ཉིད་དམ་མདུན་དུ་དེ་བཞིན་གཤེགས་པ་མངོན་སུམ་ལྟ་བུར་མཐོང་བར་འགྱུར་རོ། །དེ་ནས་སྐད་ཅིག་དེ་ཉིད་ལ་དེ་བཞིན་གཤེགས་པར་འགྱུར་རོ། །འདོད་པས་བདག་ཅེས་བསྒོམས་ནས་ཀྱང་། །
ཕྱག་རྒྱ་ཐམས་ཅད་བསྒྲུབས་ན་ནི། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་ཕྱག་རྒྱ་རྣམ་པ་བཞི་པོ་བསྒྲུབས་པས་ཀྱང་འདོད་པའི་བདག་ཉིད་བྱང་ཆུབ་ཀྱི་སེམས་ཆེན་པོ་བདག་ཡིན་ནོ་ཞེས་རྣམ་པར་སྣང་མཛད་ཆེན་པོའི་ང་རྒྱལ་བསྐྱེད་པར་བྱའོ། །རྡོ་རྗེ་
སེམས་དཔའི་ཚུལ་གྱིས་ནི། །ཞེས་བྱ་བ་ནི་རྡོ་རྗེ་བཟླས་པའི་ཚིག་གིས་བརྗོད་པའོ། །དེ་ནི་འདི་སྐད་སྟོན་པ་ཡིན་ཏེ། བཟླས་པའི་སྙིང་པོ་མེད་ན་ཕྱག་རྒྱའི་དངོས་གྲུབ་ཏུ་མི་འགྱུར་རོ་ཞེས་བྱ་བ་ཡིན་ནོ། །དངོས་གྲུབ་ཀུན་གྱི་མཆོག་གྲུབ་བོ། །ཞེས་བྱ་བ་ནི་དངོས་གྲུབ་ཀྱང་ཡིན་ལ་ཐམས་ཅད་
ཀྱང་དེ་ཡིན་པས་ན་དངོས་གྲུབ་ཐམས་ཅད་དེ་ཕྱག་རྒྱ་ཆེན་པོ་ལ་སོགས་པའི་ངོ་བོའི་དངོས་གྲུབ་ཐམས་ཅད་དོ། །དེ་འདི་རྣམས་ཀྱི་མཆོག་ཏུ་བསྒྲུབ་པས་ན་དམ་པའི་བསྒྲུབ་པའོ། །བདག་ཉིད་ཀྱིས་ནི་རྡོ་རྗེའི་དབྱིབས། །ཞེས་བྱ་བ་ནི་རྡོ་རྗེ་དག་གི་དབྱིབས་ནི་རྡོ་རྗེའི་དབྱིབས་ཏེ། རྡོ་རྗེ་ཧཱུཾ་མཛད་ལ་སོགས་
เล่ม ๕๘ · หน้า 196a
པ་རྡོ་རྗེ་རིགས་ཀྱི་ངོ་བོའི་བདག་ཉིད་ཀྱིས་ཞེས་བྱ་བ་ནི་བདག་ཉིད་ནི་བདག་ཉིད་རྣམས་ཏེ། རྡོ་རྗེ་ཧཱུཾ་མཛད་ལ་སོགས་པའི་ངོ་བོ་བསྒོམས་པས་ཡང་ནས་ཡང་མངོན་དུ་བྱས་ནས། དེའི་ང་རྒྱལ་བསྐྱེད་དེ། ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་བཅིང་བར་བྱའོ་ཞེས་བྱ་བར་
སྦྱར་རོ། །ཇི་ལྟར་བཅིངས་ཤེ་ན། མཉམ་པར་བཞག་པས་སོ། །དེའི་ཕྱིར། དེ་མ་ཐག་ཏུ་འགྲུབ་པར་འགྱུར། །ཞེས་བྱའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེའི་རིགས་ཀྱི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཕྱག་རྒྱ་ཆེན་པོ་ལ་སོགས་པ་དེའི་ང་རྒྱལ་གྱིས་
བཅིངས་ཏེ། རང་གི་སྙིང་པོ་བརྗོད་ཅིང་ཉིན་རེ་བཞིན་ཐུན་བཞིའི་སྦྱོང་བས་ཇི་སྲིད་བདག་ཉིད་རྡོ་རྗེ་ཧཱུཾ་མཛད་ཀྱི་གཟུགས་སུ་ཉིན་རེ་བཞིན་མངོན་སུམ་ལྟ་བུར་བདག་ཉིད་ཀྱིས་མངོན་སུམ་ལྟ་བུར་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམས་ནས་མངོན་སུམ་ལྟ་
བུར་མཐོང་ནས་དེའི་རྗེས་ལ་སྐད་ཅིག་དེ་ཉིད་ལ་རྡོ་རྗེ་ཧཱུཾ་མཛད་དུ་འགྱུར་རོ། །པདྨའི་དབྱིབས་སུ་བསྒོམས་ནས་ནི། །ཞེས་བྱ་བ་པདྨའི་དབྱིབས་ནི་འགྲོ་བ་འདུལ་བ་ལ་སོགས་པ་ནས། པདྨ་འབེབས་པའི་མཐར་ཐུག་པ་པདྨའི་རིགས་ཀྱི་གཟུགས་སོ། །བདག་ཉིད་ཀྱིས་ནི་འགྲོ་བ་འདུལ་བ་ལ་སོགས་
པའི་གཟུགས་སུ་བསྒོམས་པའོ། །གང་གིས་བསྒོམ་ཞེ་ན། བདག་ཉིད་ཀྱིས་ཞེས་བྱ་སྟེ། བདག་ཉིད་ལ་བདག་ཉིད་ཀྱིས་ཞེས་བྱ་བའི་དོན་ཏོ། །གང་བསྒོམ་པར་བྱ་ཞེ་ན། ཐམས་ཅད་ངེས་པའི་ངོ་བོའི་ཕྱག་རྒྱ་ཆེན་པོ་ལ་སོགས་པའི་ཡེ་ཤེས་ཀྱི་རང་བཞིན་གྱི་དངོས་གྲུབ་བོ། །པདྨའི་རིགས་ཆེན་འགྲུབ་
པར་བཤད། །ཅེས་བྱའོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་འགྲོ་བ་འདུལ་བ་ལ་སོགས་པའི་པདྨའི་རིགས་ཀྱི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཕྱག་རྒྱ་ཆེན་པོ་ལ་སོགས་པ་བཅིངས་ནས། རང་གི་སྔགས་བརྗོད་ཅིང་འཇིག་རྟེན་དབང་ཕྱུག་གི་
ཕྱག་རྒྱ་ཆེན་པོ་ལ་སོགས་པའི་རང་བཞིན་དུ་བདག་ཉིད་བསྒོམས་ན་འགྲུབ་པར་འགྱུར་རོ། །ནོར་བུ་ཆེན་པོ་འོད་ཟེར་འབར། །བདག་ཉིད་ཀྱིས་ནི་བསྒོམས་ན་ནི། །ཞེས་བྱ་བ་ལ་སོགས་པ་ནི་ནོར་བུའི་རིགས་ཀྱི་རྣལ་འབྱོར་པས་སྔ་མ་བཞིན་དུ་ནོར་བུའི་རིགས་ལས་བཤད་པའི་ཆོ་གས་རང་གི་
เล่ม ๕๘ · หน้า 196b
ལྷའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། དོན་ཐམས་ཅད་གྲུབ་པ་ལ་སོགས་པའི་ཕྱག་རྒྱ་ཆེན་པོ་བཅིངས་ཏེ། དོན་ཐམས་ཅད་གྲུབ་པའི་སྔགས་བརྗོད་ཅིང་དོན་ཐམས་ཅད་གྲུབ་པ་ལ་སོགས་པའི་གཟུགས་ཉིད་ནོར་བུ་ཆེན་པོའི་འོད་ཟེར་འབར་བར་བདག་ཉིད་བསྒོམ་པར་བྱའོ། །
ཅི་ཞིག་བསྒོམ་ཞིང་ཞེ་ན། ནོར་བུ་ཆེན་པོའི་རིགས་བཤད་པ། །མཆོད་པ་ཆེན་པོའི་རང་བཞིན་གྲུབ། །ཕྱག་རྒྱ་རྣམ་པ་བཞིའི་རང་བཞིན་གྱི་དངོས་གྲུབ་སྟེ་ནོར་བུ་ཆེན་པོའི་རིགས་བཤད་ཅིང་གྲགས་པ་ནི་བཅོམ་ལྡན་འདས་ནམ་མཁའི་སྙིང་པོའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་
རིགས་ཀྱི་ཕྱག་རྒྱ་དང་སྔགས་ཟློས་ཤིང་རང་གི་ལྷ་བསྒོམས་པས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དངོས་གྲུབ་ཐམས་ཅད་བསྒྲུབ་པའི་རྒྱུད་བསྟན་ནས། ད་ནི་ཕྱག་རྒྱ་ཆེན་པོ་ལ་སོགས་པའི་སྒྲུབ་པ་པོས་དང་པོས་བྱིན་གྱིས་བརླབ་པ་ལ་སོགས་པ་བྱས་ནས་བཟླས་པ་དང་བསྒོམ་པ་
བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་ཐོག་མར་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་བྱིན་གྱིས་བརླབ་པ་ལ་སོགས་པ་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་
རིགས་སོ། །དེ་དག་གིས་བྱིན་གྱིས་བརླབས་པ་ནི་སྙིང་ག་དང་། མཛོད་སྤུ་དང་། མགྲིན་པ་དང་། སྤྱི་བོ་སྟེ་རང་གི་རིགས་ཀྱི་ཕྱག་རྒྱ་བསྐྱེད་ནས་སྒྲུབ་པ་པོ་རྒྱུད་ལ་སྟོན་པར་བྱེད་པའོ། །དེ་ལ་ཕྱག་རྒྱ་རྡོ་རྗེ་དབྱིངས་ཀྱི་དབང་ཕྱུག་ལ་སོགས་པ་རྣམས་ཀྱིས་སོ། །བྱིན་གྱིས་བརླབས་པའི་དངོས་གྲུབ་
ནི་བསྐྱེད་པའོ། །དེ་སྟོན་པར་བྱེད་པའི་རྒྱུད་ནི་བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་ཀྱིས་སྒྲུབ་པ་པོའི་རྒྱུད་ལ་བྱིན་གྱིས་བརླབས་ནས། ཇི་སྐད་བཤད་པ་བསྟན་པར་བྱས་པ་དེའི་དངོས་གྲུབ་ནི་
བསྐྱེད་པའོ། །རྡོ་རྗེ་དབྱིངས་དང་ཕྱག་རྒྱ་ནི་རྡོ་རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་དུ་བསྟན་པའོ། །མཉམ་པར་གཞག་པའི་སེམས་ཀྱིས་སྙིང་ག་དང་། མཛོད་སྤུའི་ཕྱོགས་དང་། ལྐོག་མ་དང་། སྤྱི་བོའི་གནས་སུ་ཨོཾ་བཛྲ་དྷཱ་ཏྭི་ཤྭ་རི་ཧཱུཾ་བཛྲི་ནི་ཨ་དྷི་ཏིཥྛ་མཾ་ཞེས་བརྗོད་ཅིང་བྱིན་གྱིས་བརླབ་
เล่ม ๕๘ · หน้า 197a
པར་བྱའོ། །འདི་སྐད་སྟོན་པར་འགྱུར་ཏེ། སྔ་མ་བཞིན་དུ་སེམས་སོ་སོར་རྟོག་པ་ལས་བརྩམས་ཏེ། ཡ་ཐ་སརྦྦ་ཏསྟ་ཨ་ཧཾ་ཞེས་བྱ་བས་རང་གི་དེ་བཞིན་གཤེགས་པའི་ཕྱག་རྒྱ་ཆེན་པོ་བཅིངས་ཏེ། རང་གི་དེ་བཞིན་གཤེགས་པའི་བདག་ཉིད་དུ་རྣམ་པར་བསྒོམས་ལ་དེ་ནས་
ཡིད་ཀྱིས་ལེགས་སོའི་སྦྱོར་བས་ཛཿཧཱུཾ་བཾ་ཧོཿཞེས་བརྗོད་ཅིང་ལུས་ལ་སངས་རྒྱས་ཀུན་གཞུག་གོ། །དམ་ཚིག་གི་ཕྱག་རྒྱ་བསྒྲུབས་ལ། ཆོས་དང་། ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་སྟེ། རང་གི་སྙིང་གར་སེམས་མ་རྡོ་རྗེ་མའི་རྡོ་རྗེ་བསྐྱེད་ལ་དཔྲལ་བར་རྡོ་རྗེ་རིན་ཆེན་མའི་རིན་པོ་ཆེ་དང་། ལྐོག་མར་
རྡོ་རྗེ་ཆོས་མའི་པདྨ་དང་། སྤྱི་བོར་རྡོ་རྗེ་ལས་མའི་སྣ་ཚོགས་རྡོ་རྗེ་བསྐྱེད་པར་བྱའོ། །རྡོ་རྗེ་དབྱིངས་ཀྱི་དབང་ཕྱུག་མའི་ཕྱག་རྒྱ་ཆེན་པོ་བཅིངས་ཏེ་སྙིང་ག་དང་། མཛོད་སྤུ་དང་། ལྐོག་མ་དང་། སྤྱི་བོར་བྱིན་གྱིས་བརླབ་པར་བྱའོ། །དེ་ལྟར་བྱས་པས་ཅི་ཞིག་ཏུ་འགྱུར་ཞེ་ན། བཞག་ནས་སངས་རྒྱས་བྱིན་གྱིས་
བརླབ་པའོ་ཞེས་བྱ་བས་སངས་རྒྱས་བཅོམ་ལྡན་འདས་ཀྱིས་གསུངས་པའོ། །སེམས་མ་རྡོ་རྗེ་བརྟན་བྱས་ནས། །ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་བསྡམས་པ་ལས་གུང་མོ་མྱུ་གུ་ལྟར་བྱས་པའི་སེམས་མ་རྡོ་རྗེ་བརྟན་པར་བྱས་པ་བཅིངས་པའི་མཚན་ཉིད་དོ། །ཇི་ལྟར་
བྱ་ཞེ་ན། རྡོ་རྗེ་སེམས་དཔའི་ཏིང་འཛིན་གྱིས། །ཞེས་བྱ་བ་ནི་རང་གི་སྙིང་གར་ཟླ་བར་རྡོ་རྗེ་བསྒོམ་པར་བྱའོ་ཞེས་བྱ་བའི་དོན་ཏེ། དེ་ལྟར་སེམས་དཔའ་རྡོ་རྗེ་བཅིངས་ནས་སྙིང་ག་དང་། མཛོད་སྤུ་དང་། དེ་བཞིན་དུ་ལྐོག་མ་དང་། སྤྱི་བོར་གཞག་སྟེ་བྱིན་གྱིས་བརླབ་པར་བྱའོ། །རྡོ་རྗེ་སེམས་དཔའ་ལ་
སོགས་པ་རྣམས་ལ་བྱིན་གྱིས་བརླབ་པར་བྱའོ་ཞེས་བྱ་བའི་དོན་ཏོ། །སྔ་མ་བཞིན་དུ་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་ཀྱི་རྣལ་འབྱོར་བྱས་ལ་ཡེ་ཤེས་སེམས་དཔའ་བཅུག་ལ། ཡིད་ཀྱིས་ལེགས་སོ་ཞེས་སྦྱོར་བས། དེ་བཞིན་གཤེགས་པ་ལ་སོགས་པ་བཅུག་ལ།
དམ་ཚིག་གི་ཕྱག་རྒྱ་རྣམས་ཀྱིས་རབ་ཏུ་བསྒྲུབས་ཏེ། ཆོས་དང་། ལས་དང་། ཕྱག་རྒྱ་ཆེན་པོ་རྣམས་ཀྱིས་ཐམས་ཅད་རྒྱས་བཏབ་ལ་སཏྭ་བཛྲི་ནི་ཨ་དྷི་ཏིཥྛ་མི་ཞེས་བྱ་བ་དང་། སྙིང་ག་དང་། མཛོད་སྤུ་དང་། ལྐོག་མ་དང་། སྤྱི་བོར་བྱིན་གྱིས་བརླབ་པར་བྱའོ། །དེའི་རྗེས་ལ་རྡོ་རྗེ་རིན་ཆེན་མས་
เล่ม ๕๘ · หน้า 197b
དཔྲལ་བ་དང་། རྡོ་རྗེ་ཆོས་མས་ལྐོག་མ་དང་། རྡོ་རྗེ་ལས་མས་སྤྱི་གཙུག་ཏུ་བྱིན་གྱིས་བརླབ་པར་བྱའོ། །རྡོ་རྗེ་ཧཱུཾ་མཛད་ཕྱག་རྒྱས་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཁམས་གསུམ་རྣམ་པར་རྒྱལ་བའི་ཕྱག་རྒྱ་བཅིངས་ཏེ། སྙིང་ག་དང་། མཛོད་སྤུ་
དང་། མགྲིན་པ་དང་། སྤྱི་བོར་རྡོ་རྗེའི་རིགས་ཀྱི་རྣལ་འབྱོར་བྱས་པས་བྱིན་གྱིས་བརླབ་པར་བྱའོ། །འདི་སྐད་སྟོན་པ་ཡིན་ཏེ། རྡོ་རྗེ་ཧཱུཾ་མཛད་ལ་སོགས་པའི་རྡོ་རྗེ་རིགས་ཀྱི་རྣལ་འབྱོར་བྱས་ལ། ཡེ་ཤེས་སེམས་དཔའ་བཅུག་ནས། དེ་བཞིན་གཤེགས་པ་རྣམས་ལུས་ལ་བཅུག་ལ།
དམ་ཚིག་གི་ཕྱག་རྒྱས་བསྒྲུབས་ཏེ། ཆོས་དང་། ལས་དང་། ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ། འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་བཅིངས་ཏེ། ཧཱུཾ་བཞིས་སྙིང་ག་དང་། མཛོད་སྤུ་དང་། ལྐོག་མ་དང་། སྤྱི་བོར་བྱིན་གྱིས་བརླབ་པར་བྱའོ། །ཡང་ན་རྡོ་རྗེ་
སེམས་དཔའ་རྡོ་རྗེའི་ཕྱག་རྒྱས་སྙིང་ག་དང་། རྡོ་རྗེ་རིན་ཆེན་མའི་ཕྱག་རྒྱས་དཔྲལ་བ་དང་། རྡོ་རྗེ་ཆོས་མའི་ཕྱག་རྒྱས་ལྐོག་མ་དང་། རྡོ་རྗེ་ལས་མའི་ཕྱག་རྒྱས་སྤྱི་བོར་བྱིན་གྱིས་བརླབ་པར་བྱའོ། །རྡོ་རྗེ་པདྨོ་དམ་བྱས་ལ། །ཞེས་བྱ་བ་ནི། རྡོ་རྗེ་བསྡམས་པ་དམ་བྱས་ལ། །གུང་མོ་པདྨོ་རྡོ་རྗེར་
སྦྱར། །རྡོ་རྗེ་པདྨ་ཞེས་གྲགས་ཏེ། །དངོས་གྲུབ་ཐམས་ཅད་སྟེར་བྱེད་པའོ། །དེ་བརྟན་པར་བྱས་ལ། འཇིག་རྟེན་དབང་ཕྱུག་ཏིང་འཛིན་གྱིས། །ཞེས་བྱ་བ་ནི་འཇིག་རྟེན་དབང་ཕྱུག་གི་རྣལ་འབྱོར་གྱིས་སོ། །སྙིང་ག་མཛོད་སྤུ་མགྲིན་སྤྱི་བོ། །ཞེས་བྱའོ། །དེའི་དོན་ནི་འདི་སྐད་སྟོན་པ་ཡིན་
ཏེ། སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཚུལ་གྱིས་པདྨའི་རིགས་ཀྱི་རང་གི་ལྷའི་རྣལ་འབྱོར་བྱས་ལ། ཡེ་ཤེས་སེམས་དཔའ་བཅུག་ནས། དེ་བཞིན་གཤེགས་པའི་ཁམས་ལུས་ལ་བཅུག་སྟེ། དམ་ཚིག་གི་ཕྱག་རྒྱས་བསྒྲུབས་ནས། ཆོས་
དང་། ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་སྟེ། ཇི་སྐད་དུ་བཤད་པའི་མཚན་ཉིད་ཅན་གྱིས་རྡོ་རྗེ་པདྨའི་ཕྱག་རྒྱ་སྙིང་ག་དང་། མཛོད་སྤུ་དང་། ལྐོག་མ་དང་། སྤྱི་བོར་བྱིན་གྱིས་བརླབ་པར་བྱ་སྟེ། ཨོཾ་དྷརྨྨཱ་ས་མ་ཡེ་བཛྲ་པདྨེ་ནི་ཧཱུཾ། ཨོཾ་ཨ་དྷི་ཏིཥྛ་མཾ། རིན་ཆེན་རྡོ་རྗེ་མའི་གནས་
เล่ม ๕๘ · หน้า 198a
སུ་བཤད་པའི་དཔྲལ་བར་རིན་ཆེན་པདྨའི་ཕྱག་རྒྱ་ཧཱུཾ། ཨོཾ་བུདྡྷ་ཨ་བྷི་ཥེ་ཀ་ས་མ་ཡེ། ཨ་དྷི་ཏིཥྛ་སྭ་མཾ། རྡོ་རྗེ་ཆོས་མའི་གནས་སུ་བཤད་པའི་ལྐོག་མར་པདྨའི་པདྨ། ཨོཾ་ཏྲ་ར་ས་མ་ཡེ་ཧཱུཾ་དྷི་ཨ་དྷི་ཏིཥྛ་མཾ། ལས་ཀྱི་རྡོ་རྗེ་མའི་གནས་སུ་བཤད་པའི་སྤྱི་བོར་སྣ་ཚོགས་པདྨའི་ཕྱག་རྒྱས་བྱིན་
གྱིས་བརླབ་པར་བྱའོ། །ཨོཾ་བྷི་ཥ་མུ་ཁེ་ཀྲོ་དྷ་ཨ་དྷི་ཏིཥྛ་མཾ། རྡོ་རྗེ་ནོར་བུ་ཆེ་བཅིངས་ཞེས་བྱ་བ་ནི་དོན་ཐམས་ཅད་གྲུབ་པའི་དཀྱིལ་འཁོར་དུ་སེམས་མའི་རྡོ་རྗེ་མའི་གནས་སུ་བཤད་པའི་རྡོ་རྗེ་ནོར་བུ་ཆེན་མོ་དེའི་དམ་ཚིག་གི་ཕྱག་རྒྱ་བཅིང་ངོ་། །རྡོ་རྗེ་སྙིང་པོའི་ཏིང་འཛིན་གྱི། །ཞེས་བྱ་བ་ནི་ནོར་བུའི་
རིགས་ཀྱི་ལྷའི་རྣལ་འབྱོར་བྱས་པའི་སྙིང་གའི་ཟླ་བ་ལ་རྡོ་རྗེ་རིན་པོ་ཆེ་ཡོད་པ་ལ་དམིགས་པའི་སེམས་ནི་རྡོ་རྗེ་སྙིང་པོའི་ཏིང་ངེ་འཛིན་ཏོ། །ལྷག་མ་ནི་གོ་སླའོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ཏེ། ཡེ་ཤེས་སེམས་
དཔའ་ལུས་ལ་བཅུག་ནས། ཡིད་ཀྱིས་ལེགས་སོའི་སྦྱོར་བས་དེ་བཞིན་གཤེགས་པ་རང་གི་ལུས་ལ་བཅུག་ནས། དམ་ཚིག་གི་ཕྱག་རྒྱ་རྣམས་ཀྱིས་ཐམས་ཅད་བསྒྲུབས་ཏེ། དེ་ནས་ཆོས་དང་། ལས་དང་། ཕྱག་རྒྱ་ཆེན་པོ་རྣམས་ཀྱིས་རྒྱས་གདབ་པར་བྱའོ། །ཨོཾ་བཛྲ་མ་ཎི་ས་མ་ཡེ་ཞེས་དེ་སྐད་
དུ་བརྗོད་ཅིང་རྡོ་རྗེ་ནོར་བུ་ཆེན་མོའི་དམ་ཚིག་གི་ཕྱག་རྒྱ་བཅིངས་ནས་སྙིང་གར་རྡོ་རྗེ་རིན་པོ་ཆེ་བསྒོམ་པར་བྱའོ། །དེ་ལ་ཕྱག་རྒྱ་ནི་འདི་ཡིན་ཏེ། རྡོ་རྗེ་བསྡམས་པ་ལས་མཛུབ་མོ་གཉིས་ཀྱི་རྒྱབ་བསྐུམས་ཏེ་རྡོ་རྗེ་མཐེ་བོ་གཉིས་དང་སྤྲད་པ་འདི་ནི་རྡོ་རྗེ་ནོར་བུ་ཆེན་མོའི་དམ་ཚིག་གི་ཕྱག་རྒྱ་སྟེ། འདི་དང་ཨོཾ་
བཛྲ་མ་ཎི་ཧཱུཾ། ཨ་དྷི་ཏིཥྛ་མཾ་ཞེས་བྱ་བས་སྙིང་ག་དང་། མཛོད་སྤུ་དང་། ལྐོག་མ་དང་། སྤྱི་བོར་བྱིན་གྱིས་བརླབ་པར་བྱའོ། །དེའི་རྗེས་ལ་མཛོད་སྤུའི་ཕྱོགས་སུ་རྡོ་རྗེ་རིན་ཆེན་གྱི་མྱུ་གུ་སྙིང་གར་རྡོ་རྗེ་རིན་ཆེན། ལྐོག་མར་རྡོ་རྗེ་རིན་ཆེན་པདྨ། སྤྱི་བོར་རྡོ་རྗེ་རིན་ཆེན་ཆར་འབེབས་མས་བྱིན་གྱིས་བརླབ་
པར་བྱའོ། །གང་གི་ཕྱིར་རིགས་ཀྱི་ཕྱག་རྒྱ་རྣམ་པ་བཞིས་རིགས་སུ་བྱིན་གྱིས་རློབ་པར་བཅོམ་ལྡན་འདས་ཀྱིས་བཤད་པ་དེ་བས་ན་ཐེ་ཚོམ་མི་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་བྱིན་གྱིས་བརླབས་པའི་རྒྱུད་བཤད་ནས། ད་ནི་དབང་བསྐུར་བའི་རྒྱུད་ལས་ཞེས་བྱ་བ་གསུངས་
เล่ม ๕๘ · หน้า 198b
ཏེ། དེ་བཞིན་གཤེགས་པ་ཐམས་ཅད་ཀྱི་རིགས་རྣམས་ཀྱིས་དབང་བསྐུར་བ་ནི་རིན་པོ་ཆེའི་ཅོད་པན་ལ་སོགས་པ་བསྐྱེད་པ་ན་ཕྱག་རྒྱ་དེས་ཅོད་པན་བསྐྱེད་པའི་དངོས་གྲུབ་ཀྱི་རྒྱུད་དོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱའི་
རིན་ཆེན་རྡོ་རྗེ་བཅིངས་པ་དཔྲལ་བའི་ཕྱོགས་སུ་བཞག་སྟེ་བསྒྲུབ་པར་བྱའོ། །དཔྲལ་བའི་སྟེང་དུ་རྡོ་རྗེ་རིན་པོ་ཆེ་རབ་ཏུ་གཞག་པར་བཤད་པས་ཅིར་འགྱུར་ཞེ་ན། རྒྱལ་བའི་རྡོ་རྗེ་རིན་ཆེན་གྱིས། །དབང་བསྐུར་བར་ནི་དེར་འགྱུར་རོ། །ཞེས་སངས་རྒྱས་བཅོམ་ལྡན་འདས་ཀྱིས་གསུངས་སོ། །
དེ་ལྟར་དེ་བཞིན་གཤེགས་པ་ལྔའི་དབང་བསྐུར་བ་བསྟན་ནས། ད་ནི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་དབང་བསྐུར་བ་ནི། རྡོ་རྗེ་དབྱིངས་དབང་ལ་སོགས་པ། །ཞེས་བྱ་བ་ལ་སོགས་པ་སྨོས་ཏེ། དེ་ལ་རྡོ་རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་
རྡོ་རྗེ་དབྱིངས་ཀྱི་དབང་ཕྱུག་མ་བཅིངས་ལ། ཨོཾ་བཛྲ་དྷཱ་ཏྭི་ཤྭ་རི་ཧཱུཾ། བཛྲ་ནི་ཨ་བྷི་ཥིཉྩཱ་མི་ཞེས་བྱ་བས་སྤྱི་གཙུག་ཏུ་བསམ་པར་བྱའོ། །རྡོ་རྗེ་ཐུགས་བཅིངས་ལ་བཛྲ་བཛྲི་ནི་ཧཱུཾ། ཞེས་བྱ་བས་དཔྲལ་བའི་སྟེང་དུ་མི་བསྐྱོད་པ་བྱའོ། །དབང་བསྐུར་བ་བཅིངས་ལ། ཨོཾ་རཏྣ་བཛྲི་ནི་ཧཱུཾ། ཞེས་བྱ་བས་
རྣ་བ་གཡས་པའི་སྟེང་དུ་རིན་ཆེན་འབྱུང་ལྡན་བསམ་པར་བྱའོ། །རྡོ་རྗེ་མཚོན་ཆ་བཅིངས་ལ། ཨོཾ་དྷརྨྨཱ་བཛྲི་ནི་ཧཱུཾ། ཞེས་བྱ་བས་སྤྱི་བོའི་རྒྱབ་ཏུ་འོད་དཔག་ཏུ་མེད་པའོ། །རྡོ་རྗེ་ཀུན་མ་བཅིངས་ལ། རྣ་བ་གཡོན་པའི་སྟེང་དུ་བཅོམ་ལྡན་འདས་དོན་ཡོད་གྲུབ་པ། ཨོཾ་ཀརྨྨཱ་བཛྲི་ནི་ཧཱུཾ། ཞེས་བྱ་བ་
འདིས་བསམ་པར་བྱའོ། །དེ་ལྟར་རྡོ་རྗེ་དབྱིངས་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་ཕྱག་རྒྱ་རྣམས་ཀྱིས། རྣམ་པར་སྣང་མཛད་ལ་སོགས་པ་རྣམས་སྤྱི་གཙུག་ནས་བརྩམས་ཏེ། ཕྱོགས་བཞིར་སངས་རྒྱས་ཀྱི་ཕྲེང་བའི་དབང་བསྐུར་བར་
འགྱུར་རོ། །དེ་ལྟར་དེ་བཞིན་གཤེགས་པའི་རིགས་ཀྱི་དབང་བསྐུར་བཤད་ནས། ད་ནི་རྡོ་རྗེ་རིགས་ཀྱི་དབང་བསྐུར་བ་ནི། རྡོ་རྗེ་དབང་གི་ཕྲེང་བ་ནི། ཞེས་བྱ་བ་ལ་སོགས་པ་གསུངས་པ་ནི་རྡོ་རྗེ་རྩེ་ལྔ་པ་འབར་བ་ནི་ཕྲེང་བས་མཚན་པའི་ཅོད་པན་བསྐྱེད་པའི་ཕྱག་རྒྱས་རྡོ་རྗེའི་དབང་གི་ཕྲེང་བ་ནི་སྔར་བཤད་
เล่ม ๕๘ · หน้า 199a
པའི་རྡོ་རྗེ་ཏི་རཱིནྟི་རིའི་ཕྱག་རྒྱས་བྱའོ། །དེ་སྐད་དུ་ཡང་། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ་ཞེས་བྱ་བ་འདི་དང་། རྡོ་རྗེ་ཏི་རཱིནྟི་རིའི་ཕྱག་རྒྱས་བདག་ཉིད་དབང་བསྐུར་བར་བྱའོ་ཞེས་བྱ་བ་ནི་བཤད་ཟིན་ཏོ། །རྡོ་རྗེ་རིགས་ཀྱི་དབང་བསྐུར་བའི་དབང་དུ་བྱས་ནས་རྡོ་རྗེ་དབང་གི་ཕྲེང་བ་དེ་བྱའོ། །
ནི་ཞེས་བྱ་བ་ནི་ངེས་པར་གཟུང་བ་སྟེ། དེ་ནི་ཞེས་བྱ་བ་ནི་ཕྱག་རྒྱ་བཅིང་བའོ། །དཔྲལ་བར་བཞག་ན་ཡང་ཞེས་བྱ་བ་ནི་དཔྲལ་བར་བཅིང་བའོ། །བཅིངས་ནས་དཔྲལ་བར་བཞག་པས་ཅི་ཞིག་ཏུ་འགྱུར་ཞེ་ན། ཕྲེང་བའི་དབང་བསྐུར་དེ་ཡིས་ནི། །རྡོ་རྗེ་རྣམས་ཀྱིས་དེ་དབང་བསྐུར། །ཞེས་བྱ་
བ་སྨོས་ཏེ། དེས་སྔགས་པའི་དཔྲལ་བའི་སྟེང་དུ་བཅིངས་ཏེ་བཞག་ན། རྡོ་རྗེ་ཕྲེང་བའི་ཅོད་པན་གྱིས་དབང་བསྐུར་བ་ནི་རྡོ་རྗེ་འཛིན་མས་རྡོ་རྗེ་ཧཱུཾ་མཛད་ཀྱིས་སྒྲུབ་པ་པོ་ལ་དབང་བསྐུར་བར་བྱའོ། །སངས་རྒྱས་ལྔའི་ཅོད་པན་གྱིས་དབང་བསྐུར་བ་ཡང་བྱས་ན། རྡོ་རྗེའི་རིགས་ཐམས་ཅད་ལ་
རྡོ་རྗེ་ཕྲེང་བའི་དབང་བསྐུར་བར་བྱའོ་ཞེས་བཤད་པའི་རྒྱུད་ལས་བསྟན་པ་ཡིན་ནོ། །དེ་ལྟར་རྡོ་རྗེའི་རིགས་ཀྱི་དབང་བསྐུར་བ་བསྟན་ནས། ད་ནི་པདྨའི་རིགས་ཀྱི་དབང་བསྐུར་བ་ནི། ཆོས་ཀྱི་རྡོ་རྗེ་བཅིངས་ནས་ཀྱང་། །ཞེས་བྱ་བ་ལ་སོགས་པ་གསུངས་ཏེ། དེ་ལ་ཆོས་ཀྱི་རྡོ་རྗེ་ནི་རྡོ་རྗེ་བསྡམས་པ་
ལས་གུང་མོ་གཉིས་མྱུ་གུ་ལྟར་བྱས་པའི་མཚན་ཉིད་ནི་འགྲོ་བ་འདུལ་བའི་དཀྱིལ་འཁོར་ཆེན་པོར་བསྟན་པའི་ཆོས་ཀྱི་རྡོ་རྗེ་མ་བཅིངས་ནས་ཀྱང་། མགོ་བོར་བཞག་སྟེ་དབང་བསྐུར་ཞེས་བྱ་བ་ནི། དེ་ལ་དཔྲལ་བའི་སྟེང་དུ་དེ་རབ་ཏུ་བཞག་ནས་ཅོད་པན་གྱི་དབུས་སུ་གཙོ་བོ་སངས་རྒྱས་འོད་
དཔག་ཏུ་མེད་པ་ཨོཾ་གྱིས་བསྐྱེད་པར་བྱའོ། །ཨོཾ་དྷརྨྨ་ས་མ་ཡེ་བཛྲ་པདྨ་ནི་ཧཱུཾ། ཨ་བྷི་ཥིཉྩ་མཱཾ་ཞེས་བརྗོད་པར་བྱའོ། །དེ་ལྟར་ཅིར་འགྱུར་ཞེ་ན། སངས་རྒྱས་ཀྱིས་ནི་འཇིག་རྟེན་གྱི་དབང་ཕྱུག་དེ་ནི་དབང་བསྐུར་རོ་ཞེས་བྱ་བ་སྨོས་ཏེ། འཇིག་རྟེན་དབང་ཕྱུག་ནི་སྤྱན་རས་གཟིགས་དབང་ཕྱུག་
གིས་དབང་བསྐུར་བའོ། །ད་ནི་ནོར་བུའི་རིགས་ཀྱི་དབང་བསྐུར་བ་ནི། རྡོ་རྗེ་རིན་ཆེན་མྱུ་གུར་བཅིངས། །ཞེས་བྱ་བ་ལ་སོགས་པ་སྨོས་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་རིན་ཆེན་མའི་གནས་ཀྱི་ཕྱག་རྒྱ་གང་ཡིན་པ་དེ་ནི་རྡོ་རྗེ་རིན་ཆེན་མྱུ་གུའོ། །དེའི་མཚན་
เล่ม ๕๘ · หน้า 199b
ཉིད་ནི་འདི་ཡིན་ཏེ། རྡོ་རྗེ་རིན་ཆེན་བཅིངས་ལ་གུང་མོ་གཉིས་མྱུ་གུ་ལྟར་བྱས་པ་ནི་རྡོ་རྗེ་རིན་ཆེན་མྱུ་གུའོ། །དེ་བཅིངས་ནས་དཔྲལ་བར་བཞག་སྟེ་ཞེས་བྱ་བ་ནི་དཔྲལ་བའི་སྟེང་དུ། ཨོཾ་བཛྲ་རཏྣ་ཨ་གུ་རུ་ཧཱུཾ། ཨ་བྷི་ཥིཉྩ་མི་ཞེས་བརྗོད་ཅིང་གཞན་པ་ནི་རྣལ་འབྱོར་པས་རབ་ཏུ་གཞག་པའོ། །དེ་དཔྲལ་བར་རབ་
ཏུ་བཞག་པས་ཅི་ཞིག་ཏུ་འགྱུར་ཞེ་ན། དཔྲལ་བར་བཞག་སྟེ་དབང་བསྐུར་ཞེས་བྱ་བ་སྨོས་ཏེ། རྡོ་རྗེ་རིན་པོ་ཆེའི་གཟུགས་ཀྱིས་སངས་རྒྱས་ཀྱི་དབང་བསྐུར་བའོ། །ཁྱད་པར་ཅི་ལྟ་བུ་ཞིག་ཅེ་ན། མཆོད་པ་ཡིས་ཞེས་བྱ་བ་སྨོས་ཏེ། ནོར་བུའི་རིགས་ཀྱི་བདག་པོར་འགྱུར་རོ་ཞེས་བྱ་བའི་དོན་ཏོ། །དེ་ལྟར་དེ་
བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཏིང་ངེ་འཛིན་གྱི་དངོས་གྲུབ་ཀྱི་རྒྱུད་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་དེ་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་ཏེ། དེ་དག་གི་ཏིང་ངེ་འཛིན་ནི་རང་གི་ལྷའི་
དངོས་གྲུབ་སྒྲུབ་པའི་རྣམ་པར་སེམས་རྩེ་གཅིག་པའོ། །དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བསྒྲུབ་པའོ། །དེ་སྟོན་པར་བྱེད་པའི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། །རྒྱལ་བ་ཀུན་གྱི་རྣམ་པ་ནི། །ཞེས་བྱ་བ་ལ་སོགས་པའམ། སྐྱེས་བུ་ཆེན་པོའི་
མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་ནི་རྣམ་པ་སྟེ། རྣམ་པ་དེ་རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་པར་གྲུབ་པ་རྣམས་ནི་རྒྱལ་བ་ཀུན་ནོ། །ཕྱག་རྒྱ་ནི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་།
ལས་ཀྱི་ཕྱག་རྒྱའོ། །མཉམ་པར་བཞག་པས་བཅིངས་ཞེས་བྱ་བ་ནི་སེམས་ཡིད་རྩེ་གཅིག་པས་སོ། །མྱུར་དུ་དངོས་གྲུབ་ཐོབ་པར་འགྱུར་བའོ། །ཅི་ཞིག་བྱས་ཤེ་ན། སྔགས་ཀྱི་རིག་པ་བཟླས་ནས་ནི། །ཞེས་བྱ་བ་སྨོས་ཏེ། དཀྱིལ་འཁོར་ཆེན་པོ་ལས་བཤད་པ་དང་། ཆོས་ཀྱི་དཀྱིལ་འཁོར་ལས་
བཤད་པ་དང་། གཟུངས་དང་ལས་ཀྱི་དཀྱིལ་འཁོར་ལས་བཤད་པའི་སྔགས་ཀྱི་ནང་ནས་འདིར་དེ་བཞིན་གཤེགས་པའི་དབང་དུ་བྱས་པའི་རིག་པ་བརྗོད་པ་ཡིན་ནོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་གི་དེ་བཞིན་གཤེགས་པའི་རྣལ་
เล่ม ๕๘ · หน้า 200a
འབྱོར་བྱས་ལ། ཇི་ལྟ་བ་བཞིན་དུ་མཆོད་པ་ཐམས་ཅད་ཀྱིས་ཡང་དག་པར་མཆོད་དེ། ཕྱག་རྒྱ་བཞི་བྱས་ནས་རང་གི་དེ་བཞིན་གཤེགས་པའི་ཕྱག་རྒྱ་བཅིངས་ལ། དེའི་ངོ་བོར་བདག་ཉིད་རྣམ་པར་བསམས་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་སྙིང་པོ་
པོའམ། ཆོས་ཀྱི་དཀྱིལ་འཁོར་ལས་བཤད་པའི་དེ་བཞིན་གཤེགས་པའི་སྔགས་བཟླ་བར་བྱའོ། །གཟུངས་ཀྱི་དཀྱིལ་འཁོར་ལས་བཤད་པའི་རིག་པའམ། ལས་ཀྱི་དཀྱིལ་འཁོར་ལས་བཤད་པའི་རང་གི་དེ་བཞིན་གཤེགས་པའི་རིག་པ་ཡང་བཟླ་བར་བྱའོ། །དེའི་དོན་ནི་འདི་སྐད་སྟོན་
པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་ལ་བྱིན་གྱིས་བརླབས་པ་ལ་སོགས་པ་བྱས་ནས། དུམ་བུ་ཐམས་ཅད་ལས་བཤད་པའི་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་རྣམས་ཟློས་པས་དེ་བཞིན་གཤེགས་པ་རྣམས་སྤྲུལ་པར་བྱེད་པ་ནི་བྱིན་གྱིས་
བརླབ་པ་ལ་སོགས་པ་དེ་དག་སོ་སོར་མི་བྱའོ། །ཏིང་ངེ་འཛིན་གྱི་རྡོ་རྗེ་ཆོས་ཀྱིས་ཀྱང་། །ཞེས་བྱ་བ་ནི་རྡོ་རྗེ་ཡང་ཡིན་ལ་ཆོས་ཀྱང་དེ་ཡིན་པས་རྡོ་རྗེ་ཆོས་ཏེ། རྡོ་རྗེ་རྩེ་ལྔ་པའི་ཏིང་ངེ་འཛིན་དེས་དེ་ལ་དམིགས་པ་ཡིན་ནོ་ཞེས་བྱ་བའི་དོན་ཏོ། །སེམས་དཔར་བྱིན་རླབས་ཚུལ་གྱིས་
ནི། །ཞེས་བྱ་བ་ནི་སེམས་དཔའ་ནི་དེ་བཞིན་གཤེགས་པའི་རིགས་ཀྱི་རྣལ་འབྱོར་པའི་སྙིང་གའི་ཟླ་བ་དེ་ལ་བྱིན་གྱིས་བརླབས་པ་ནི་དངོས་པོར་འཛིན་པ་ཉེ་བར་སྤངས་པ་མཚོན་པ་རྡོ་རྗེ་རྩེ་ལྔ་པ་སྟེ། སྟོང་པ་ཉིད་ཀྱི་རྡོ་རྗེ་ཡོངས་སུ་གཟུང་ངོ་། །དེ་བསྒོམ་པའི་ཚུལ་ནི་དེ་བསྒོམ་པའི་སྦྱོར་བ་དང་
ལྡན་པའོ། །སེམས་དཔར་བྱིན་གྱིས་བརླབས་པའི་ཚུལ་གྱིས་ཏིང་ངེ་འཛིན་དེ་ལྟར་གྱུར་པས་དེས་ཅིར་འགྱུར་ཞེ་ན། སྙིང་པོ་ཕྱག་རྒྱ་སྔགས་རིག་རྣམས། །ཞེས་བྱ་བ་སྨོས་ཏེ། དེ་ལ་སྙིང་པོ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་སྙིང་པོའོ། །ཕྱག་རྒྱ་ནི་གཟུངས་ཀྱི་དཀྱིལ་
འཁོར་ལས་བཤད་པའི་རིག་པ་རྣམས་སོ། །སྔགས་ནི་ཆོས་ཀྱི་དཀྱིལ་འཁོར་ལས་བཤད་པའོ། །རིག་པ་ནི་ལས་ཀྱི་དཀྱིལ་འཁོར་ལས་བཤད་པའི་རིག་པའོ། །འདིས་མྱུར་དུ་འགྲུབ་པར་འགྱུར་ཏེ། ཏིང་ངེ་འཛིན་དང་དེ་བཞིན་གཤེགས་པའི་རིག་སྔགས་བཟླས་པར་བྱའོ། །སངས་རྒྱས་ཀྱི་ཏིང་
เล่ม ๕๘ · หน้า 200b
ངེ་འཛིན་རྡོ་རྗེ་འཛིན་པ་ཆེན་པོ་ཉིད་ཀྱིས་གསུངས་པའོ། །འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་པ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་ལ་བྱིན་གྱིས་བརླབས་པ་ལ་
སོགས་པ་བྱས་ནས། རང་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་རྩེ་ལྔ་པ་འགྲེང་བ་བསམས་ལ། ལྟེ་བའི་དབུས་སུ་གཟུགས་བརྙན་གྱི་སྦྱོར་བ་བྱས་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་སྙིང་པོའམ། གཟུངས་ཀྱི་དཀྱིལ་འཁོར་ལས་བཤད་པའི་
རང་གི་རིག་པའམ། ཆོས་ཀྱི་དཀྱིལ་འཁོར་ལས་བཤད་པའི་སྔགས་སམ། ཡང་ན་ལས་ཀྱི་དཀྱིལ་འཁོར་ལས་བཤད་པའི་རང་གི་རིག་པའི་ཡི་གེའི་ཕྲེང་བ་མགོ་གྱེན་དུ་བསྟན་པ་བྲི་བར་བྱའོ། །རྡོ་རྗེ་དབྱིངས་ཀྱི་དཀྱིལ་འཁོར་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་རང་གི་ཕྱག་རྒྱ་བཅིངས་
ལ། སེམས་དཔའ་རྡོ་རྗེ་མངོན་སུམ་ལྟ་བུར་བསྒོམས་ནས་བཟླས་པ་བྱའོ། །དེའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་བྱིན་གྱིས་བརླབ་པ་ལ་སོགས་པ་བྱས་ནས། རྡོ་རྗེ་དབྱིངས་ཀྱི་དུམ་བུ་ལས་བཤད་པའི་དངོས་གྲུབ་རྣམས་བསྒྲུབ་པར་བྱའོ། །ད་ནི་
རྡོ་རྗེ་རིགས་ཀྱི་ཏིང་འཛིན་ནི། །འདོད་ཆགས་ལས་ནི་ཁྱོད་བྱུང་སྟེ། །ཞེས་བྱ་བ་ལ་སོགས་པ་སྨོས་ཏེ། དེ་ལ་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་མཚན་ཉིད་ཀྱི་ཐུགས་རྗེ་ཆེན་པོ་ནི་འདོད་ཆགས་སོ། །དེའི་ཕྱིར་དེ་ལྟར་གྱུར་པའི་མི་དམིགས་པ་ལ་ཐུགས་རྗེ་ཆེན་པོའི་འདོད་ཆགས་ལས་ཡང་
དག་པར་བྱུང་བའི་ཁྲོ་བོ་སྟེ། འདོད་ཆགས་ལས་བྱུང་བའི་ཁྲོ་བོ་གང་ཡིན་པ་དེ་བདག་ཡིན་ཏེ། ཁྱེད་གང་ཡིན་པ་དེ་བདག་ཡིན་ནོ་ཞེས་དེ་ལྟར་ཆུ་དང་འོ་མ་བཞིན་གཅིག་ཏུ་གྱུར་པར་མོས་པར་བྱའོ། །དེ་ལྟར་བསྒོམས་པར་གྱུར་པ་དེས་ཅི་ཞིག་ཏུ་འགྱུར་ཞེ་ན། སྙིང་པོ་ཕྱག་རྒྱ་སྔགས་རིག་རྣམས། །
ཞེས་བྱ་བ་སྨོས་ཏེ། རྡོ་རྗེའི་རིགས་ལས་བཤད་པ་རྣམས་སོ། །མྱུར་དུ་དངོས་གྲུབ་ཐོབ་པར་འགྱུར། །དེ་བསྒྲུབས་ན་ཞེས་བྱ་བ་ཚིག་ལྷག་མའོ། །དེ་ལྟར་རྡོ་རྗེ་རིགས་ཀྱི་ཏིང་ངེ་འཛིན་བསྟན་ནས། ད་ནི་པདྨའི་རིགས་ཀྱི་ཏིང་ངེ་འཛིན་ནི། བྱམས་པ་འགེངས་པའི་ཚུལ་གྱིས་ནི། །ཞེས་བྱ་བ་སྨོས་
เล่ม ๕๘ · หน้า 201a
ཏེ། དེ་ལ་ཕྱོགས་བཅུའི་སེམས་ཅན་གྱི་ཁམས་ཐམས་ཅད་པདྨའི་རིགས་ཀྱི་ངོ་བོས་ཕན་པ་དང་། བདེ་བ་བསྡུས་པའི་ཕན་པའི་རིགས་ཀྱི་ངོ་བོར་བསྒྲུབས་ནས་བསྒོམ་པར་བྱའོ། །བྱམས་པས་འགེངས་པའི་ཚུལ་ཅན་ཏེ། པདྨའི་རིགས་ཀྱི་ཏིང་ངེ་འཛིན་ཏོ། །དེ་ལྟར་བྱས་པས་
འགྱུར་ཞེ་ན། སྙིང་པོ་ལ་སོགས་བསྒྲུབས་ན་ཡང་། །ཞེས་བྱ་བ་སྨོས་ཏེ། པདྨའི་རིགས་ལས་བཤད་པའི་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་རྣམས་སོ། །བསྒྲུབ་པ་ནི་ནན་ཏན་བྱེད་པ་སྟེ། སྒྲུབ་པ་པོ་ཡི་ཏིང་ངེ་འཛིན་འདི་ཡིས། །ཞེས་བྱ་བའི་ཐ་ཚིག་གོ། །དེ་ཅིའི་ཕྱིར་འཇིག་
རྟེན་དབང་ཕྱུག་གི་རིགས་ནི་པདྨའི་རིགས་ཏེ། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་པ་ཟློས་པའོ། །ཇི་ལྟར་མངོན་པར་འདོད་པའི་སྒྲུབ་པ་པོ་ལ་དངོས་གྲུབ་མྱུར་དུ་ཐོབ་པར་འགྱུར་རོ། །ད་ནི་ནོར་བུའི་རིགས་ཀྱི་ཏིང་ངེ་འཛིན་ལ་ནམ་མཁའ་ཀུན་གྱི་ཏིང་ངེ་འཛིན་ནི་ཞེས་བྱ་བ་ལ་སོགས་
པ་སྨོས་ཏེ། ནམ་མཁའ་ཡང་དེ་ཡིན་ལ་ཀུན་ཀྱང་དེ་ཡིན་པས་ན་ནམ་མཁའ་ཀུན་ཏེ། ནོར་བུའི་རིགས་དེ་ལ་དམིགས་པའི་ཏིང་ངེ་འཛིན་ནི་ནམ་མཁའ་ཀུན་གྱི་ཏིང་ངེ་འཛིན་ཏེ། ཡང་དང་ཡང་མངོན་དུ་བྱས་ནས་བསྒོམས་ན་ཡང་ངོ་། །ཇི་ལྟར་ཞེ་ན།
རབ་མཉམ་གཞག་ཅེས་བྱ་བ་སྨོས་ཏེ། གཡེང་བ་མེད་པའི་སེམས་ཀྱིས་ཡིད་གཞན་དུ་མ་གྱུར་པའོ། །ནོར་བུ་ཆེན་པོའི་རིགས་ཀྱི་རྣལ་འབྱོར་པས་དེ་ལྟར་བསྒོམས་ན། སྙིང་པོ་ཕྱག་རྒྱ་སྔགས་རིག་རྣམས་བསྒྲུབ་པར་བྱའོ། །བསྒྲུབས་ནས་ཅིར་འགྱུར་ཞེ་ན། ཀུན་ཏུ་འགྲོ་བར་འགྱུར་ཞེས་བྱ་བ་སྨོས་
ཏེ། འདི་སྐད་སྟོན་པ་ཡིན་ཏེ། སྔ་མ་བཞིན་དུ་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་ནོར་བུའི་རིགས་ཀྱི་ལྷའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། རང་གི་སྙིང་གའི་ཟླ་བར་རྡོ་རྗེ་རིན་ཆེན་ཏྲཾ་ལས་བསྐྱེད་ནས། དེ་ལ་བཟླས་པའི་ཡི་གེ་རྣམ་པར་བཀོད་
དེ། ཕྱག་རྒྱ་ཆེན་པོ་བཅིངས་ལ། དེ་ཉིད་བརྗོད་ཅིང་དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་ལ་ནོར་བུའི་རིགས་ཀྱི་དབང་བསྐུར་བས་དབང་བསྐུར་ལ། ནོར་བུའི་རིགས་ཀྱི་རང་བཞིན་དུ་བསྒྲུབས་ཏེ་བསྒོམ་པར་བྱའོ། །དེ་ལྟར་རང་གི་རིགས་ཀྱི་མཚན་མ་
เล่ม ๕๘ · หน้า 201b
རྣམས་ཀྱི་རིག་པའི་ཡི་གེ་བསྒོམ་པ་ནི་ཐམས་ཅད་ལ་ཡང་ཤེས་པར་བྱའོ། །དེ་ལྟར་རིགས་ཐམས་ཅད་ཀྱི་ཏིང་ངེ་འཛིན་བསྒྲུབ་པ་བསྟན་ནས། དེ་ནི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་མཆོད་པའི་ཕྱག་རྒྱའི་དངོས་གྲུབ་ཀྱི་རྒྱུད་གསུངས་པ་ནི། དེ་ནས་ཞེས་བྱ་བ་ལ་སོགས་པ་སྨོས་ཏེ། དེ་
བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་ན། དེ་བཞིན་གཤེགས་པ་ཐམས་ཅད་ཀྱི་རིགས་ཏེ། ཇི་སྐད་བཤད་པ་བཞིན་ནོ། །དེ་དག་མཆོད་པའི་རྣལ་འབྱོར་གྱི་ཕྱག་རྒྱར་འགྱུར་བ་གང་ཡིན་པ་དེ་ནི་མཆོད་པའི་ཕྱག་རྒྱ་སྟེ། དེ་རྣམས་གྲུབ་པ་ནི་མཆོད་པའི་ཕྱག་རྒྱའི་དངོས་གྲུབ་སྟེ།
ཕྱག་རྒྱ་ཆེན་པོ་ལ་སོགས་སྒྲུབ་པོ། །མཉམ་པར་གཞག་པ་དང་པོར་ནི། །བདུག་པ་ལ་སོགས་མཆོད་བྱས་ལ། །ཞེས་བྱ་བ་ལ་སོགས་པ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་རྣལ་འབྱོར་པ་དཔའ་བོ་གཅིག་པུར་བདག་ཉིད་བྱས་ནས་ཕྱག་རྒྱ་ཆེན་པོ་བཅིངས་ཏེ། ཛཿཧཱུཾ་བཾ་ཧོཿཞེས་
བརྗོད་ཅིང་། ཇི་ལྟ་བ་བཞིན་དུ་དེ་བཞིན་གཤེགས་པ་རང་གི་ལུས་ལ་བཅུག་པ་ཕྱག་རྒྱ་བཞིས་རྒྱས་བཏབ་ནས་བྱིན་གྱིས་བརླབ་པ་དང་དབང་བསྐུར་ལ། དེ་ནས་དེ་དག་གི་སྙིང་གར་སྣ་ཚོགས་རྡོ་རྗེ་བསམས་ནས། གར་ལས་བྱུང་བ་བདུག་པ་ལ་སོགས་པའི་ཕྱག་རྒྱ་རྣམ་པ་བཞིས་བདག་ལ་མཆོད་པར་བྱའོ། །
དེ་ནས་སྔ་མ་བཞིན་དུ་བདུག་པ་ལ་སོགས་པའི་མཆོད་པ་དང་ཕྱག་བཞི་བྱའོ། །དེ་ནས་ཡི་གེ་ཨ་ལས་རྒྱལ་བ་ཐམས་ཅད་ཀྱི་ཕྱག་རྒྱ་བཅིངས་ཏེ་མཉམ་པར་བཞག་པས་བསྒོམ་མོ། །བསྒྲུབས་ན་དངོས་གྲུབ་ཐོབ་པར་འགྱུར། །ཞེས་བྱ་བ་ནི་སློབ་མའི་དབང་དུ་བྱས་ནས་མཆོད་པའི་ཆོ་ག་ཤེས་པར་བྱ་བ་དང་། བདག་ཉིད་
ཀྱི་རྣལ་འབྱོར་ཙམ་དང་། མདུན་གྱི་རྣལ་འབྱོར་གྱི་དབང་དུ་བྱས་ནས་ཀྱང་མཆོད་པའི་ཆོ་ག་ཐམས་ཅད་ཤེས་པར་བྱའོ། །སློབ་དཔོན་རྣལ་འབྱོར་ཆེན་པོ་དང་ལྡན་པ་རྣམས་རང་གི་ལྷའི་རྣལ་འབྱོར་ལས་བཤད་པའི་མཆོད་པ་ཐམས་ཅད་རིགས་ཐམས་ཅད་ལ་ཡང་ཤེས་པར་བྱ་བ་ཡིན་ནོ། །གསང་བའི་མཆོད་པ་རྣམ་བཞི་
ཡིས། །ཞེས་བྱ་བ་ལ་སོགས་པའི་མཆོད་པ་རྣམ་པ་བཞི་ནི་སྒེག་མོ་ལ་སོགས་པའི་མཆོད་པ་རྣམ་པ་བཞི་ཡིན་ནོ་ཞེས་བྱ་བའི་དོན་ཏོ། །གསང་བའི་མཆོད་པ་རྣམ་པ་བཞི་པོ་འདི་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་གསང་བ་སྟེ་དེ་བརྗོད་པའོ། །ཨོཾ་རྡོ་རྗེ་སེམས་དཔའ་བསྡུས་པས་ན། །རྡོ་རྗེ་
เล่ม ๕๘ · หน้า 202a
རིན་ཆེན་བླ་ན་མེད། །རྡོ་རྗེ་ཆོས་ནི་གླུར་བླངས་པས། །རྡོ་རྗེ་ལས་རྣམས་བྱེད་པར་འགྱུར། །ཞེས་བརྗོད་ཅིང་། རྡོ་རྗེ་སྒེག་མོ་ལ་སོགས་པས་གར་བྱེད་ཅིང་སྒེག་མོ་ལ་སོགས་པའི་སྙིང་པོ་འདི་ཡང་བརྗོད་པར་བྱའོ་ཞེས་བྱ་བའི་དོན་ཏོ། །དེ་ལྟར་སྒེག་མོ་ལ་སོགས་པའི་གསང་བའི་མཆོད་པ་རྣམ་པ་
བཞིས་བདག་ཉིད་ཡང་དག་པར་མཆོད་ནས་ལས་ཀྱི་དཀྱིལ་འཁོར་ལས་གསུངས་པའི་མཆོད་པ་རྣམ་པ་བཅུ་དྲུག་གིས་བདག་ཉིད་མཆོད་པར་བྱས་ནས་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། བདག་དབུལ་བའི་ཞེས་བྱ་བ་སྨོས་ཏེ། འམ་ཞེས་བྱ་བའི་སྒྲ་ནི་བསྡུ་བའོ། །བདག་དབུལ་བ་ལ་སོགས་པ་ཡང་། །
ཞེས་བྱ་བའོ། །དེ་ལྟར་དེ་བཞིན་གཤེགས་པའི་རིགས་ཀྱི་མཆོད་པ་བསྟན་ནས། ད་ནི་རྡོ་རྗེའི་རིགས་ཀྱི་མཆོད་པ་ནི། །ཁྲོ་བོ་རྡོ་རྗེ་མཆོད་ཆེན་པོ། །ཞེས་བྱ་བ་ལ་སོགས་པ་སྨོས་ཏེ། ཁྲོ་བོ་རྡོ་རྗེ་ནི་རྡོ་རྗེའི་རིགས་སོ། །དེའི་མཆོད་པ་ཆེན་པོ་ནི་སྒེག་མོ་ལ་སོགས་པའི་གསང་བའི་གསང་བ་རྣམ་པ་བཞིའོ། །ཁྲོ་
བོའི་གསང་བ་རྗོད་བྱེད་ཅིང་། །ཞེས་བྱ་བ་ནི་སྔ་མ་བཞིན་དུ་རྡོ་རྗེའི་གླུ་བརྗོད་ཅིང་རྡོ་རྗེའི་ཁུ་ཚུར་གཉིས་སུ་བྱས་ནས་ཡང་དང་ཡང་དུ་གར་བྱས་ཏེ། ཁྲོ་བོའི་རྡོ་རྗེ་ཁུ་ཚུར་གཉིས་སུ་བྱས་པ་ལས་རྡོ་རྗེ་སྒེག་མོ་ལ་སོགས་པའི་ལས་ཀྱི་ཕྱག་རྒྱ་རྣམ་པ་བཞི་བཅིངས་ནས། ཨོཾ་བཛྲ་ལཱ་སྱ་རཱ་ག་ཡ་ཧཱུཾ་ཕཊ་ཅེས་བྱ་བ་ལ་སོགས་
སྒེག་མོ་ལ་སོགས་པའི་གསང་བའི་མཆོད་པ་རྣམ་པ་བཞིའི་སྙིང་པོ་བརྗོད་ཅིང་ཁྲོ་བོའི་གསང་བ་ཡང་བརྗོད་ནས། ཁྲོ་བོའི་ཁུ་ཚུར་གྱིས་གར་བྱེད་ཅིང་བརྗོད་པས་སོ། །ཅིར་འགྱུར་ཞེ་ན། རྡོ་རྗེ་ཁུ་ཚུར་རབ་བྱས་ནས། །ཞེས་བྱ་བ་སྨོས་ཏེ། རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་གཉིས་སྡིགས་མཛུབ་ཏུ་བྱས་
ཏེ། བསྐྱེད་པ་ནི་ཁྲོ་བོའི་ཁུ་ཚུར་རོ། །དེ་བྱས་ནས་མཆོད་པའི་དངོས་གྲུབ་མྱུར་དུ་རྣལ་འབྱོར་པས་འགྲུབ་པར་འགྱུར་རོ། །དེ་བས་ན། མྱུར་དུ་བདག་གི་རིགས་སྒྲུབ་བོ། །ཞེས་བཅོམ་ལྡན་འདས་རྡོ་རྗེ་འཛིན་པས་གསུངས་སོ། །ད་ནི་པདྨའི་རིགས་ཀྱི་མཆོད་པའི་དངོས་གྲུབ་ནི། མདོ་སྡེ་ཟབ་མོ་རྒྱ་ཆེ་བའི། །ཞེས་
བྱ་བ་ལ་སོགས་པ་སྨོས་ཏེ། དེ་ལ་ཟབ་པ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བསྟན་པའི་ཕྱིར་རོ། །རྒྱ་ཆེ་བ་ནི་ནམ་མཁའི་ཁམས་ཁྱབ་པའི་གཟུགས་དུ་མ་སྟོན་པའི་ཕྱིར་རོ། །མདོར་བསྟན་པས་ན་མདོ་སྡེ་སྟེ། དེའི་དོན་མདོར་བསྟན་པ་བརྗོད་པའི་སྟོབས་ཀྱིས་སེམས་ལ་ངེས་པ་བསྐྱེད་
เล่ม ๕๘ · หน้า 202b
པའོ། །པདྨའི་སྒེག་མོ་ལ་སོགས་པ་གསང་བའི་མཆོད་པ་རྣམ་པ་བཞིས་མདོར་བསྡུས་པ་སྟོན་པའི་མདོ་སྡེ་བརྗོད་པ་དང་། པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་གིས་ཀྱང་མདོར་བསྡུས་པ་བརྗོད་པའོ། །ཟབ་པ་ཡང་ཡིན་ལ་རྒྱ་ཆེ་བ་ཡང་དེ་ཡིན་པས་ན་མདོ་སྡེ་སྟེ།
མདོ་སྡེ་ཟབ་ཅིང་རྒྱ་ཆེ་བའོ། །དེ་དག་གི་རྒྱུད་འབུམ་པ་ལ་སོགས་པ་རྒྱ་ཆེར་བསྟན་པ་དེ་ལས་མདོར་བསྡུས་ནས་བརྗོད་ཅིང་། རབ་ཏུ་སྟོན་པའི་མཆོད་པ་དེ་དེ་བཞིན་གཤེགས་པ་ལ་སོགས་པ་པདྨའི་རིགས་ཐམས་ཅད་ལ་དབུལ་ཞིང་རབ་ཏུ་མཆོད་པའོ། །དབུལ་བ་དེ་གང་ཡིན་ཞེ་ན། ཡིད་དང་ངག་གིས་ཕུལ་ནས་
ནི། །ཞེས་བྱ་བ་སྨོས་ཏེ། ཡིད་ཀྱི་ཐབས་དང་ཤེས་རབ་ཀྱི་གཟུགས་ཀྱིས་ནམ་མཁའི་ཁམས་ཐམས་ཅད་མཐའ་ཡས་པ་བཀང་བའི་གླུ་དང་། སྒེག་མོ་ལ་སོགས་པའི་སྙིང་པོ་ཕུལ་བས། །དངོས་གྲུབ་མྱུར་དུ་ཐོབ་པར་འགྱུར། །ཞེས་བྱའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་འགྲོ་བ་འདུལ་བའི་
དཀྱིལ་འཁོར་ཆེན་པོ་ལས་བཤད་པའི་སྦྱོར་བས་རང་གི་འཇིག་རྟེན་དབང་ཕྱུག་གི་རྣལ་འབྱོར་བྱས་ལ། ཡེ་ཤེས་སེམས་དཔའ་དང་དེ་བཞིན་གཤེགས་པ་ཐམས་ཅད་རང་གི་ལུས་ལ་བཅུག་ལ། ཆོ་ག་ཐམས་ཅད་རྗེས་སུ་སྤྱད་དེ། པདྨའི་སྒེག་མོ་ལ་སོགས་པའི་གསང་བའི་མཆོད་པ་གར་ལས་བྱུང་བ་
རྣམས་ཀྱིས་བདག་ཉིད་མཆོད་ལ། པདྨའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གིས་ལས་ཀྱི་ཕྱག་རྒྱ་དེ་རྣམས་དང་། ཐམས་ཅད་ཤེས་རབ་ཀྱི་རང་བཞིན་གྱིས་ཐམས་ཅད་དུ་ཁྱབ་པར་བསམ་པར་བྱའོ། །དེ་ལྟར་པདྨའི་རིགས་ཀྱི་མཆོད་པ་བསྟན་ནས། ད་ནི་ནོར་བུའི་རིགས་ཀྱི་མཆོད་
པ་ནི། །གདུགས་དང་རྒྱལ་མཚན་འཕན་རྣམས་ཀྱིས། །ཞེས་བྱ་བ་ལ་སོགས་པ་སྨོས་ཏེ། གདུགས་དང་། རྒྱལ་མཚན་དང་། འཕན་རྣམས་ནི་གདུགས་དང་། རྒྱལ་མཚན་དང་། འཕན་དེ་རྣམས་ཀྱིས་མཆོད་ན་འགྲུབ་པར་འགྱུར་རོ། །གདུགས་ལ་སོགས་པ་ནི་ཉེ་བར་མཚོན་པ་སྟེ། གདུ་
བུ་དང་། རྣ་ཆ་དང་། དཔུང་རྒྱན་དང་། རིན་པོ་ཆེ་སྣ་བདུན་ལ་སོགས་པའི་གཟུགས་དེ་རྣམས་ཀྱིས་མཆོད་ན་རྣལ་འབྱོར་པས་འགྲུབ་པར་འགྱུར་རོ། །མཆོད་པ་གང་ཡིན་ཞེ་ན། སྦྱིན་པ་ཐམས་ཅད་སྦྱིན་ན་ནི། །ནོར་བུའི་རིགས་ནི་འགྲུབ་པར་འགྱུར། །ཞེས་བྱ་བ་སྨོས་ཏེ། སངས་རྒྱས་རྣམས་
เล่ม ๕๘ · หน้า 203a
ཀྱིས་སྦྱིན་པ་མ་ལུས་པ་སྦྱིན་ན་འགྲུབ་པར་འགྱུར་བའོ། །འདི་སྐད་སྟོན་པ་ཡིན་ཏེ། ནོར་བུའི་རིགས་ཀྱི་རྣལ་འབྱོར་བྱས་ལ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་མཐར་ཐུག་པའི་ཆོ་ག་ཐམས་ཅད་རྗེས་
སུ་སྤྱད་ལ་རིན་ཆེན་སྒེག་མོ་ལ་སོགས་པ་མཆོད་པ་རྣམ་པ་བཞི་དང་། ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་དང་། ནོར་བུའི་རིགས་ཀྱི་མཆོད་པ་ཐམས་ཅད་ཀྱིས་བདག་ཉིད་མཆོད་ལ། གདུགས་དང་། རྒྱལ་མཚན་དང་། བ་དན་རྣམས་ཀྱིས་མཆོད་པ་རེ་
རེ་ཞིང་ཡང་ཕྱག་རྒྱ་བཅིངས་ལ། རྒྱལ་བའི་མཆོད་པ་རྣམས་སྤྲུལ་ལ་དེ་བཞིན་གཤེགས་པ་ལ་སོགས་པས་སེམས་ཅན་ཐམས་ཅད་ཀྱི་ཁམས་ཐམས་ཅད་ལ་ནོར་བུའི་རིགས་སུ་བསྐྱེད་ལ། དབང་བསྐུར་བ་ལ་སོགས་པ་སྦྱིན་པས་མཆོད་པར་བྱའོ། །ད་ནི་རང་ལ་བྱིན་གྱིས་བརླབ་པ་ལ་སོགས་
པའི་ཕན་ཡོན་ནི། རང་ལ་བྱིན་གྱིས་བརླབ་སོགས་ལྡན། །རྡོ་རྗེ་སེམས་དཔར་མཉམ་པར་འགྱུར། །ཞེས་བྱ་བ་གསུངས་ཏེ། རང་ལ་བྱིན་གྱིས་བརླབ་པ་ལ་སོགས་པ་བྱས་ནས་གྲུབ་པར་མ་གྱུར་ཀྱང་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ནས། རིན་ཆེན་འབེབས་པའི་མཐར་
ཐུག་པའི་དེ་བཞིན་གཤེགས་པའི་རིགས་ཐམས་ཅད་དང་འདྲ་བར་རིགས་ངེས་པར་གནས་པར་གྱུར་ནས། རྣལ་འབྱོར་པ་མངོན་པར་བྱང་ཆུབ་པའི་མཐར་ཐུག་པར་འགྱུར་རོ་ཞེས་བྱ་བའི་དོན་ཏོ། །ཆོ་འཕྲུལ་རྣམ་པ་བཞི་ཡིས་ནི། །རྡོ་རྗེ་སྣ་ཚོགས་འགྲུབ་བྱེད་ཅིང་། །ཞེས་བྱ་བ་ནི་ཆོ་འཕྲུལ་གྱི་ཕན་
ཡོན་བསྟན་པས་བྱིན་གྱིས་བརླབ་པ་ལ་སོགས་པའི་ཆོ་འཕྲུལ་རྣམ་པ་བཞིས་བཤད་པས་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱའི་རང་བཞིན་གྱི་ལྷའི་གཟུགས་ཀྱི་རྣལ་འབྱོར་པར་བདག་ཉིད་བྱིན་གྱིས་བརླབ་པ་ལ་སོགས་པས་སྣ་ཚོགས་རྡོ་རྗེར་བསྒྲུབས་ན་འགྲུབ་པར་
འགྱུར་རོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་བྱིན་གྱིས་བརླབ་པ་དང་། དབང་བསྐུར་བ་དང་། ཏིང་ངེ་འཛིན་དང་མཆོད་པ་བསྟན་ནས། ད་ནི་སྔར་བཤད་པའི་ཚུལ་གྱིས་མངོན་པར་ཤེས་པ་སྒྲུབ་པར་བྱེད་པའི་དཀྱིལ་འཁོར་ལ་སོགས་པར་རང་གི་ལྷའི་ཕྱག་རྒྱ་ཆེན་པོ་ལ་སོགས་པས།
เล่ม ๕๘ · หน้า 203b
མཚན་ཐོག་ཐག་ཡང་བཟླས་ཤིང་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་མངོན་པར་ཤེས་པའི་ཡེ་ཤེས་ཀྱི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་རིགས་ནི་སྔ་མ་བཞིན་ནོ། །
དེ་དག་གི་མངོན་པར་ཤེས་པ་ནི་ལྔའོ། །དེའི་ཡེ་ཤེས་ནི་ཁོང་དུ་ཆུད་པའོ། །དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པ་གྲུབ་པའོ། །དེ་སྟོན་པར་བྱེད་པའི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། །ལུས་ལ་སངས་རྒྱས་ཏིང་འཛིན་ནི། །སངས་རྒྱས་ཀྱི་རྣམ་པར་སེམས་རྩེ་གཅིག་པའོ། །
ན་ཞེས་བྱ་བའི་སྒྲ་ནི་ངེས་པར་གཟུང་བའོ། །སངས་རྒྱས་ཀྱི་རྣམ་པ་ཁོ་ནར་སེམས་རྩེ་གཅིག་པའོ། །མཛེས་པར་གཤེགས་པའི་མངོན་པར་ཤེས་པ་ནི་བདེ་གཤེགས་ཉིད་མངོན་པར་ཤེས་ཏེ། མཛེས་པར་གཤེགས་པ་འདི་ནི་བདེ་བར་གཤེགས་པའོ། །འདི་ནི་ཞེས་བྱ་བ་ནི་བཤད་མ་ཐག་པའི་སེམས་
རྩེ་གཅིག་པའོ། །དེས་དེ་ཅིར་འགྱུར་ཞེ་ན། འདི་ལ་རབ་ཏུ་རྟོགས་ན་ནི། །སངས་རྒྱས་པ་ཡི་དངོས་གྲུབ་ཐོབ། །ཅེས་བྱ་བ་སྨོས་ཏེ། དེའི་སངས་རྒྱས་ནི་མངོན་པར་ཤེས་པའོ། །རབ་ཏུ་རྟོགས་པར་གྱུར་པ་དེ་ནི་རབ་ཏུ་རྟོགས་པར་གྱུར་པ་ཉིད་དེ། དེའི་ཕྱིར་རབ་ཏུ་རྟོགས་པ་ཉིད་ཀྱིས་དེ་རྣམས་ཀྱི་དེ་ཁོ་ན་ཉིད་དོ་
ཞེས་བྱ་བའི་དོན་ཏོ། །དེ་སྐད་དུ། སངས་རྒྱས་གཟུགས་བརྙན་རྟོགས་པ་ནི། །མངོན་སུམ་ལྟ་བུར་མཐོང་བར་འགྱུར། །བདག་ཉིད་ཀྱང་ནི་མི་ཤེས་ཤིང་། །དེ་འདྲའི་སྒྲ་ཡང་ཐོས་མི་འགྱུར། །ཞེས་གསུངས་སོ། །དེའི་དོན་ནི་འདི་སྐད་སྟོན་པ་ཡིན་ཏེ། སྔར་བཤད་པའི་ཚུལ་གྱིས་དེ་བཞིན་
གཤེགས་པའི་རྣལ་འབྱོར་བསྒོམས་ལ། གང་གི་ཚེ་མཚན་མ་ཐོབ་པར་གྱུར་པ་དེའི་ཚེ་མངོན་པར་ཤེས་པ་བསྒྲུབ་པར་བྱའོ། །རྡོ་རྗེ་སེམས་དཔའི་ཏིང་འཛིན་གནས། །ལུས་ཀུན་དེ་བཞིན་གཤེགས་རྣམས་དང་། །བྱང་ཆུབ་སེམས་དཔའ་རྣམས་བསྒོམས་ལ། །དེ་བཞིན་ལུས་ལ་
བྱུང་མཐོང་ན། །ཞེས་བྱ་བ་ཇི་སྲིད་དུ་རྣམ་པར་སྣང་མཛད་ལ་སོགས་པའི་གཟུགས་སུ་མངོན་སུམ་ལྟ་བུར་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ལྟ་བུས་མངོན་པར་ཤེས་པ་འགྲུབ་པར་འགྱུར་རོ། །དེ་ནས་སྔ་མ་བཞིན་དུ་མཚན་ཐོག་ཐག་དེ་བཞིན་གཤེགས་པའི་བདག་
เล่ม ๕๘ · หน้า 204a
ཉིད་དུ་བསྒོམས་ན་འགྲུབ་པར་འགྱུར་ན་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐོབ་པར་འགྱུར་རོ། །དེ་ལྟར་དེ་བཞིན་འགྲུབ་པའི་དེ་བཞིན་གཤེགས་པའི་མངོན་པར་ཤེས་པ་ཐོབ་པའི་སྒྲུབ་པ་བསྟན་ནས། ད་ནི་དེ་བཞིན་གཤེགས་པའི་རིགས་ཀྱི་རྣལ་འབྱོར་པས་
སྔར་བཤད་པའི་ཚུལ་གྱིས་དེ་བཞིན་གཤེགས་པའི་རིགས་ཀྱི་མངོན་པར་ཤེས་པ་བསྐྱེད་ནས། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་ལ་སོགས་པ་བསྒྲུབ་པར་བྱའོ་ཞེས་བསྟན་པའི་ཕྱིར། དེ་ལ་ཞེས་བྱ་བ་ལ་སོགས་པ་གསུངས་ཏེ། འཕྲུལ་གྱི་མིག་སོགས་མངོན་ཤེས་ནི། །
ཞེས་བྱ་བ་ལ་སོགས་པ་ལ་ལྷའི་མིག་དང་། ལྷའི་རྣ་བ་དང་། གཞན་གྱི་སེམས་ཤེས་པ་དང་། སྔོན་གྱི་གནས་རྗེས་སུ་དྲན་པ་ཤེས་པ་དང་རྫུ་འཕྲུལ་གྱི་ཡུལ་མངོན་པར་ཤེས་པ་ལྔའོ། །རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་པས་སྔར་བཤད་པའི་
ཚུལ་གྱིས་ཇི་སྲིད་དུ་གྲུབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་ཕྱིས་དཀྱིལ་འཁོར་བྲིས་ལ་མཚན་ཐོག་ཐག་བསྒོམས་ན་རྡོ་རྗེ་འཆང་ཆེན་པོར་འགྱུར་རོ། །དེ་བས་ན། མངོན་ཤེས་ལྔར་ནི་བདག་གྱུར་ནས། །རྡོ་རྗེ་སེམས་དཔའ་ཉིད་ཐོབ་འགྱུར། །ཞེས་གསུངས་སོ། །
དེ་བཞིན་དུ་རྡོ་རྗེ་རིགས་ཀྱི་རྣལ་འབྱོར་པས་སྔར་བཤད་པའི་ཚུལ་གྱིས་ཁྲོ་བོའི་མངོན་པར་ཤེས་པ་བསྐྱེད་པར་བྱའོ། །དེ་ནས་མངོན་པར་ཤེས་པ་ལྔ་ཐོབ་པའི་དཀྱིལ་འཁོར་བྲིས་ཏེ། མཚན་ཐོག་ཐག་རང་གི་ལྷའི་ཁྲོ་བོ་བསྒོམ་པར་བྱའོ། །དེའི་རྗེས་ལ་རྡོ་རྗེ་རིགས་ཀྱི་དངོས་གྲུབ་འགྲུབ་
པར་འགྱུར་རོ། །དེ་བས་ན། མངོན་ཤེས་ལྔར་ནི་བདག་གྱུར་ནས། །དངོས་གྲུབ་མཆོག་ནི་ཐོབ་པར་འགྱུར། །ཞེས་གསུངས་སོ། །འདོད་ཆགས་མངོན་ཤེས་བསྐྱེད་ནས་ཀྱང་། །ཞེས་བྱ་བ་ནི་འདོད་ཆགས་ནི་པདྨའི་རིགས་ཏེ། དེའི་མངོན་པར་ཤེས་པ་ལྔ་ནི་སྔ་མ་བཞིན་ནོ། །
དེ་བསྐྱེད་པ་ནི་མཚན་ཐོག་ཐག་སྔར་བཤད་པའི་ཚུལ་གྱིས་བསྒོམ་པར་བྱའོ། །དེ་ནས། དག་པའི་དངོས་གྲུབ་ཐོབ་པར་འགྱུར། །ཞེས་བྱ་བ་ནི་རང་བཞིན་གྱིས་དག་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ནས་མངོན་སུམ་དུ་བྱེད་པའི་མཚན་ཉིད་དངོས་གྲུབ་ཐོབ་པར་འགྱུར་ཏེ། འཇིག་རྟེན་
เล่ม ๕๘ · หน้า 204b
དབང་ཕྱུག་ཉིད་དུ་འགྱུར། །ཞེས་བྱ་བའི་དོན་ཏོ། །མཆོད་པ་ནི་ནོར་བུའི་རིགས་སོ། །དེའི་མངོན་ཤེས་ནི་སྔ་མ་བཞིན་ནོ། །དེ་བསྐྱེད་པ་ནི་སྔར་བཤད་པ་ཉིད་ཀྱི་ཆོ་གས་མངོན་སུམ་དུ་བྱས་པའོ། །མཉམ་པར་བཞག་པས་བསྒོམས་ན་ནི། །ཞེས་བྱ་བ་ལ་ནོར་བུའི་རིགས་ཀྱི་དཀྱིལ་འཁོར་
བྲིས་ལ། རང་གི་ལྷའི་མཚན་ཐོག་ཐག་བསྒོམ་མོ། །མངོན་ཤེས་ལྔར་ཡང་བདག་གྱུར་ནས། །ཞེས་བྱ་བ་ནི་མངོན་པར་ཤེས་པ་ལྔ་དང་ལྡན་པ་ཉིད་དུ་འགྱུར་རོ་ཞེས་བྱ་བའི་དོན་ཏོ། །དངོས་གྲུབ་ཀུན་གྱི་མཆོག་ཏུ་འགྱུར། །ཞེས་བྱ་བ་ནི་ནོར་བུའི་རིགས་ཀྱི་རང་བཞིན་གྱི་དོན་
ཐམས་ཅད་གྲུབ་པའི་དངོས་གྲུབ་ཐམས་ཅད་ཀྱི་དམ་པ་ཉིད་དུ་དེ་འགྱུར་རོ་ཞེས་བྱ་བའི་དོན་ཏོ། །དེ་ལྟར་མངོན་པར་ཤེས་པ་ལྔ་བསྐྱེད་པའི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དངོས་གྲུབ་བསྒྲུབ་པ་བསྟན་ནས། ད་ནི་སྔོན་དུ་བསྙེན་པ་ལ་སོགས་པའི་དུས་སུ་ཡང་བྱང་ཆུབ་
ཆེན་པོའི་ཡེ་ཤེས་ཀྱི་ཕྱག་རྒྱ་ཆེན་པོ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་རྣལ་འབྱོར་པས་བསྒྲུབ་པར་བྱའོ་ཞེས་བསྟན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་བྱང་ཆུབ་ཀྱི་ཡེ་ཤེས་ཀྱི་དངོས་གྲུབ་ཀྱི་རྒྱུད་ནི། དེ་ནས་ཞེས་བྱ་བ་ལ་སོགས་
པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱང་ཡིན་ལ་རིགས་ཀྱང་ཡིན་པས་ཏེ། ཇི་སྐད་དུ་བཤད་པའི་རང་གི་ལྷའི་རྗེས་སུ་དྲན་པས་རྡོ་རྗེ་ལ་སོགས་པའི་ངེས་པའི་བྱང་ཆུབ་ཀྱི་ཡེ་ཤེས་སོ། །དེའི་དངོས་གྲུབ་ཀྱི་ཕྱག་རྒྱ་ཆེན་པོ་ལ་སོགས་པ་སྒྲུབ་པའོ། །དེ་སྟོན་པར་
བྱེད་པ་ནི་རྒྱུད་དེ་བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། །རྡོ་རྗེ་སེམས་དཔའི་ཏིང་འཛིན་གནས། །ཞེས་བྱ་བ་ནི་ཟླ་བ་རྡོ་རྗེའི་རྣམ་པར་རྩེ་གཅིག་པས་ན་རྡོ་རྗེ་སེམས་དཔའི་ཏིང་ངེ་འཛིན་ཏོ། །དེ་ལ་གནས་པ་ནི་རྡོ་རྗེ་སེམས་དཔའི་ཏིང་ངེ་འཛིན་ལ་གནས་པའོ། །
སྦྱོར་བ་གང་གིས་རྡོ་རྗེ་སེམས་དཔའི་ཏིང་ངེ་འཛིན་ལ་གནས་ཤེ་ན། བདག་གིས་སངས་རྒྱས་དྲན་བྱེད་ཅིང་། །ཞེས་བྱ་བ་སྨོས་ཏེ། བདག་ཉིད་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་སྒོམ་པ་པོས་སངས་རྒྱས་རྗེས་སུ་དྲན་པར་བྱེད་ཅིང་
เล่ม ๕๘ · หน้า 205a
ངོ་། །སངས་རྒྱས་བྱང་ཆུབ་ཅེས་བྱ་བ་ནི་སྙིང་གའི་ཟླ་བའི་རྡོ་རྗེར་དེ་བཞིན་གཤེགས་པ་དྲན་པ་དང་བཅས་པ་གང་ཡིན་པ་འདི་ནི་སངས་རྒྱས་བྱང་ཆུབ་བོ། །དེ་ཉིད་ཀྱི་ཡེ་ཤེས་ནི་དོན་ངེས་པ་སྟེ། གང་གིས་དོན་ཤེས་པ་འདིས་ཅིར་འགྱུར་ཞེ་ན། ཡེ་ཤེས་
འདི་བསྒོམས་ན་དངོས་གྲུབ་ཐོབ་པར་འགྱུར་ཞེས་བྱ་བ་སྨོས་སོ། །དེའི་ཕྱིར་སྔར་བསྙེན་པ་ལ་སོགས་པའི་དུས་སུ་དེ་བཞིན་གཤེགས་པའི་སྒྲུབ་པ་པོས་རྒྱུད་ཕྱི་མ་ལ་སོགས་པའི་དངོས་གྲུབ་སྒྲུབ་པར་འདོད་ན། རང་གི་སྙིང་གའི་ཟླ་བ་ལ་རྡོ་རྗེ་རྩེ་ལྔ་པ་རྣམ་པར་བསམས་ཏེ།
རྡོ་རྗེའི་དབུས་སུ་རིག་པའི་ཡི་གེ་བཀོད་ལ། དེ་བཞིན་གཤེགས་པའི་ཕྱག་རྒྱ་ཆེན་པོ་ལ་སོགས་པ་སྒོམ་ཞིང་བཟླས་པ་བརྗོད་ན་རྡོ་རྗེ་སེམས་དཔའི་ཏིང་ངེ་འཛིན་གྱི་འབྲས་བུ་ཡིན་ནོ་ཞེས་གསུངས་པ་ཡིན་ནོ། །རྡོ་རྗེ་སེམས་དཔའ་ཏིང་འཛིན་གནས། །ཞེས་བྱ་བ་ནི་སྔ་མ་
བཞིན་ནོ། །ཕྱག་རྒྱ་ཆེན་པོ་སྒོམ་བྱེད་ཅིང་། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་འབེབས་པའི་མཐར་ཐུག་པ་དེའི་སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་པ་རྣམས་དང་། ཕྱག་རྒྱ་བཞི་པོ་རྣམས་དང་། དེའི་ཕྱག་རྒྱ་ཆེན་
པོ་ཡང་དང་ཡང་མངོན་དུ་བྱེད་ཅིང་བསྒོམ་པའོ། །བྱང་ཆུབ་ཆེན་པོའི་ཡེ་ཤེས་འདི། །ཞེས་བྱ་བ་ནི་སེམས་དཔའི་རྡོ་རྗེ་འདི་དང་བཅས་པའི་རྡོ་རྗེ་སེམས་དཔའ་ལ་སོགས་པ་བསྒོམ་པ་གང་ཡིན་པ་འདི་ནི་བྱང་ཆུབ་ཆེན་པོ་འདིའོ། །དེ་ཉིད་ཀྱི་ཡེ་ཤེས་ཞེས་བྱ་བ་ལ་སོགས་པ་ནི་
སྔ་མ་བཞིན་ནོ། །འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་ཀྱི་རྣལ་འབྱོར་པས་ཀྱང་རྒྱུད་ཕྱི་མ་ལས་བཤད་པའི་དངོས་གྲུབ་སྒྲུབ་པར་འདོད་ན་རང་གི་ལྷའི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་ལས་རྣམས་ཇི་ལྟ་བ་བཞིན་
དུ་བཅིངས་ལ་རང་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་རྩེ་ལྔ་པ་བསྐྱེད་དེ། རྡོ་རྗེའི་ལྟེ་བའི་དབུས་སུ་བཟླས་པའི་ཡི་གེ་རྣམ་པར་བསམས་ལ། དེ་ཉིད་བརྗོད་ཅིང་སེམས་དཔའི་རྡོ་རྗེའི་ཏིང་ངེ་འཛིན་གྱི་ཕྱག་རྒྱ་ཆེན་པོ་བསྒོམ་པར་བྱའོ། །ཁྲོ་བོའི་རྒྱལ་པོ་ཏིང་འཛིན་
เล่ม ๕๘ · หน้า 205b
གནས། །ཞེས་བྱ་བ་ནི། འདོད་ཆགས་ལས་ནི་ཁྱོད་བྱུང་སྟེ། །བདག་ནི་ཁྲོ་བོའི་ཡིད་བསྒོམས་ན། །ཞེས་བྱ་བ་ནི་ཁྲོ་བོའི་ཏིང་ངེ་འཛིན་ཏེ། སྙིང་གར་ཟླ་བ་ལ་རྡོ་རྗེ་འབར་བ་བསྒོམ་ཞེས་བྱ་བའི་དོན་ཏོ། །ལག་པས་དམ་ཚིག་མཆོག་བཅིངས་ལ། །ཞེས་བྱ་བ་ནི་རྡོ་རྗེའི་རིགས་
ཐམས་ཅད་ཀྱི་ཕྱག་རྒྱ་ལ་དམ་ཚིག་མཆོག་ཅེས་བཤད་དོ། །རེ་ཞིག་ལག་པས་བཅིངས་པ་གང་ཡིན་པ་འདི་ནི་སྒྲུབ་པ་པོའི་ལག་པས་དམ་ཚིག་མཆོག་བཅིངས་པའོ། །བྱང་ཆུབ་ཆེན་པོའི་ཡེ་ཤེས་འདི། །ཞེས་བྱ་བ་ནི་སྔ་མ་བཞིན་ནོ། །འདི་སྐད་སྟོན་པ་ཡིན་ཏེ། སྔ་མ་
བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་ལ་བྱིན་གྱིས་བརླབ་པ་ལ་སོགས་པ་བྱས་ནས། རྡོ་རྗེ་ཧཱུཾ་མཛད་ལ་སོགས་པའི་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་གའི་ཟླ་བར་ཧཱུཾ་ལས་རྡོ་རྗེ་འབར་བ་བསམ་པར་
བྱའོ། །དེའི་དབུས་སུ་བཟླས་པའི་སྙིང་པོ་བཀོད་དེ། དེ་ཉིད་བརྗོད་ཅིང་སེམས་དཔའི་ང་རྒྱལ་བསྐྱེད་ལ་མངོན་དུ་བྱས་ཏེ། དེ་ལ་དམིགས་ཏེ་ཕྱག་རྒྱ་ཆེན་པོ་ལ་སོགས་པ་བསྒྲུབ་པར་བྱའོ། །འཇིག་རྟེན་དབང་ཕྱུག་ཏིང་འཛིན་གནས་ནི་འཇིག་རྟེན་དབང་ཕྱུག་གི་སྙིང་གའི་ཟླ་
བར་རྡོ་རྗེ་པདྨའི་རྣམ་པར་སེམས་རྩེ་གཅིག་པར་བྱའོ། །དེ་བཞིན་ཆོས་ཀྱི་ཕྱག་རྒྱར་བཟླས། །ཞེས་བྱ་བ་ནི་པདྨའི་རིགས་ཀྱི་ཕྱག་རྒྱ་ཐམས་ཅད་ལ་ཆོས་ཀྱི་ཕྱག་རྒྱ་ཞེས་བྱ་བ་ལ་སོགས་པ་ནི་བཤད་ཟིན་ཏོ། །དེའི་དོན་ནི་འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་
འཁོར་ཆེན་པོ་ལས་བཤད་པའི་རང་གི་འཇིག་རྟེན་དབང་ཕྱུག་གི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། རང་གི་ལྷའི་ཕྱག་རྒྱ་ཆེན་པོ་ལ་སོགས་པ་བཅིངས་ནས། རང་གི་ལྷའི་སྙིང་གར་ཟླ་བ་ལ་ཡི་གེ་ཧྲི་ལས་རྡོ་རྗེ་པདྨ། དེའི་དབུས་སུ་སྙིང་པོ་བཀོད་དེ། དེ་ཉིད་
བརྗོད་ཅིང་པདྨ་ལ་དམིགས་པའི་ཏིང་ངེ་འཛིན་གྱིས་ཕྱག་རྒྱ་ཆེན་པོ་ལ་སོགས་པ་བསྒོམ་པར་བྱའོ། །རྡོ་རྗེ་སྙིང་པོའི་ཏིང་འཛིན་གནས། །ཞེས་བྱ་བ་ནི་རྡོ་རྗེ་སྙིང་པོའི་སྙིང་གར་ཟླ་བའི་ནོར་བུ་དེའི་རྣམ་པར་སེམས་རྩེ་གཅིག་པའོ་ཞེས་བྱ་བའི་ཐ་ཚིག་གོ། །ལས་ཀྱི་ཕྱག་རྒྱ་ལས་ལེགས་
เล่ม ๕๘ · หน้า 206a
བྱེད། །ཅེས་བྱ་བ་ནི་ནོར་བུའི་རིགས་ཀྱི་ཕྱག་རྒྱ་ཐམས་ཅད་ནི་ལས་ཀྱི་ཕྱག་རྒྱ་ཞེས་བཤད་དེ་སྔ་མ་བཞིན་ནོ། །དེའི་ལེགས་པ་ནི་དབང་བསྐུར་བ་ལ་སོགས་པ་ནོར་བུ་ཆེན་པོའི་རིགས་ཀྱི་གཟུགས་ཀྱི་དེ་བཞིན་གཤེགས་པ་ལ་སོགས་པ་སེམས་ཅན་ཐམས་ཅད་ཀྱི་ཁམས་ཐམས་
ཅད་བསྐྱེད་པའི་མཚན་ཉིད་ཅན་གྱི་ལས་བྱེད་པ་ནི། ལས་ཀྱི་ཕྱག་རྒྱ་ལས་ལེགས་བྱེད། །ཅེས་བྱའོ། །བྱང་ཆུབ་ཆེན་པོའི་ཡེ་ཤེས་འདི། །ཞེས་བྱ་བ་ལ་སོགས་པ་ནི་བཤད་ཟིན་ཏོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་
ལས་བཤད་པའི་ཆོ་གས་ནོར་བུའི་རིགས་ཀྱི་རང་གི་ལྷའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། རང་གི་སྙིང་གའི་ཟླ་བ་ལ་ཡི་གེ་ཏྲཾ་ལས་ནོར་བུ་ཆེན་པོ་རྣམ་པར་བསམས་ཏེ། དེའི་དབུས་སུ་བཟླས་པའི་ཡི་གེ་རྣམ་པར་བཀོད་ནས། དེ་ཉིད་བརྗོད་ཅིང་ལྷའི་ཕྱག་རྒྱ་ཆེན་
པོ་བཅིངས་ཏེ། རྡོ་རྗེ་ནོར་བུའི་ཏིང་ངེ་འཛིན་བསྒོམ་པར་བྱའོ། །རང་གི་ལྷའི་རྣལ་འབྱོར་བྱས་ལ་སྙིང་གའི་ཟླ་བའི་དཀྱིལ་འཁོར་ལ་རྡོ་རྗེ་དང་། རིན་ཆེན་དང་། པདྨ་དང་། སྣ་ཚོགས་རྡོ་རྗེ་དེ་རྣམས་ལ། དེ་རྣམས་ཀྱི་རིག་པའི་ཡི་གེ་བསྒོམ་པར་བྱའོ་ཞེས་བྱ་བའི་དོན་འདི་བཤད་པའི་
རྒྱུད་ལས་བཅོམ་ལྡན་འདས་ཀྱིས་བཤད་པ་ཡིན་ནོ། །ཁ་ཅིག་ནི་དེ་ལྟར་གྱུར་ན་ནོར་བུའི་རིགས་ཀྱི་ཆོས་ཉིད་ཀྱི་རྒྱུད་ལས་ཀྱང་འགལ་བར་འགྱུར་ཏེ། གང་གི་ཕྱིར་ཐམས་ཅད་ཀྱི་རྡོ་རྗེའི་བདག་ཉིད་ཀྱི་རྡོ་རྗེ་སྙིང་གར་བསྒོམ་པར་བྱའོ་ཞེས་བྱ་བ་དེས་ནི་འདིར་ནི་ནོར་བུ་ཆེན་པོར་བསྒོམས་
ནས་རྡོ་རྗེ་ནོར་བུའི་རིགས་ཐམས་ཅད་ཀྱི་ཕྱག་རྒྱ་བསྒྲུབ་པར་བྱ་བ་དང་འགལ་བར་འགྱུར་རོ་ཞེས་ཟེར་རོ། །གཞན་ནི་འགལ་བ་མེད་དེ། ཅིའི་ཕྱིར་ཞེ་ན། སྨྲས་པ། འདི་ནི་རིགས་པའི་ཁྱད་པར་གཞན་སྒྲུབ་པའི་ངོ་བོ་ཡིན་པའི་ཕྱིར་རོ། །གལ་ཏེ་དེ་ལྟར་ཁས་མི་ལེན་ན་རྩ་བའི་རྒྱུད་
དང་ཆོས་ཉིད་ལ་སོགས་པའི་རྒྱུད་དང་འགལ་བར་འགྱུར་ཏེ། དེ་ལ་དམ་ཚིག་གི་ཕྱག་རྒྱ་དང་། ཆོས་དང་ལས་དང་། ཕྱག་རྒྱ་ཆེན་པོ་རྣམས་སོ་སོར་སྒྲུབ་པར་བཤད་པས། ལས་ལེགས་བྱེད་པའི་རྡོ་རྗེ་ནི་རྡོ་རྗེ་སྣ་ཚོགས་པ་བསྒོམ་པའི་མཚན་ཉིད་མ་ཡིན་པས་འདིར་ཆོས་ཉིད་
เล่ม ๕๘ · หน้า 206b
ཀྱི་བྱང་ཆུབ་ཆེན་པོའི་ཡེ་ཤེས་ཀྱི་དངོས་གྲུབ་ཀྱི་རྒྱུད་ནི་སྙིང་གར་ཟླ་བ་རྡོ་རྗེ་བསྒོམ་པའི་མཚན་ཉིད་ཅན་དུ་འདི་འདོད་པ་ཡིན་ནོ། །གང་གི་ཕྱིར་སྒྲུབ་པ་བྱེད་པའི་ཁྱད་པར་བསྟན་པའི་ཕྱིར། རྒྱུད་ཕྱི་མ་ལ་སྒྲུབ་པ་རྣམ་པ་དུ་མ་གསུངས་པ་ཡིན་ནོ། །དེ་ལྟར་དེ་བཞིན་གཤེགས་པའི་
རིགས་ཀྱི་བྱང་ཆུབ་ཆེན་པོ་ཡེ་ཤེས་ཀྱི་དངོས་གྲུབ་ཀྱི་རྒྱུད་བསྟན་ནས། ད་ནི་མཚན་མ་ཐོབ་པ་རྣམས་ཀྱིས་སྔར་བཤད་པའི་ཚུལ་གྱིས་མངོན་པར་ཤེས་པ་སྐྱེས་པར་གྱུར་ནས། དེ་བཞིན་གཤེགས་པ་ཐམས་ཅད་ལ་སོགས་པའི་ཆ་ལུགས་ཀྱིས་དེའི་བརྟུལ་ཞུགས་སྤྱོད་པས་
དེ་བཞིན་གཤེགས་པ་ལ་སོགས་པའི་རིགས་ཐམས་ཅད་རྗེས་སུ་མཉེས་པར་བྱ་བ་དང་། དབང་དུ་བྱས་ནས་དེ་བཞིན་གཤེགས་པ་ཐམས་ཅད་ལ་སོགས་པ་ཐམས་ཅད་བསྒྲུབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་
པའི་རིགས་ཐམས་ཅད་རྗེས་སུ་མཉེས་པ་དང་། དབང་དུ་བྱེད་པའི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །དེ་བཞིན་གཤེགས་པའི་རིགས་ཐམས་ཅད་ནི་སྔར་བཤད་ཟིན་ཏོ། །ཇི་སྐད་བཤད་པ་དེ་དག་གི་སྔོན་དུ་བསྙེན་པས་མངོན་པར་ཤེས་པར་བསྐྱེད་པ་ལ་ཆགས་པ་མེད་
པ་དེ་ལ་རྗེས་སུ་ཆགས་པ་ནི་བརྟུལ་ཞུགས་སོ། །དེའི་དངོས་གྲུབ་ནི་དེ་བཞིན་གཤེགས་པ་ལ་སོགས་པའི་ཕྱག་རྒྱ་ཆེན་པོ་ལ་སོགས་པ་བསྐྱེད་པའོ། །དེ་སྟོན་པར་བྱེད་པའི་རྒྱུད་ནི་བཅོམ་ལྡན་འདས་ཕྱག་ན་རྡོ་རྗེས་གསུངས་པའོ། །ཉིད་ཀྱི་སངས་རྒྱས་བྱང་ཆུབ་ཕྱིར། །སེམས་
ཅན་དོན་རྣམས་རབ་བྱེད་ཅིང་། །ཞེས་བྱ་བ་ནི་མངོན་པར་ཤེས་པ་ལྔ་ཐོབ་ནས་རྫུ་འཕྲུལ་གྱི་སྟོབས་ཀྱིས་སེམས་ཅན་གྱི་དོན་ཅི་ནུས་པ་བྱེད་པའམ། རང་བཞིན་གྱི་ནུས་པས་སྟོབས་སྟོན་པར་བྱེད་པ་ལ་སོགས་པ་བྱེད་ཅིང་། སེམས་ཅན་གྱི་དོན་ནི་ཕན་པ་དང་བདེ་བ་དམ་པ་འགྲུབ་པའི་ཕྱིར། སངས་
རྒྱས་སུ་འགྱུར་བར་བྱའོ་ཞེས་བྱ་བ་མངོན་དུ་བྱས་ལ་ཐུན་བཞིའི་དེ་བཞིན་གཤེགས་པ་བསྒོམ་པ་ཇི་སྐད་བཤད་པ་བཞིན་དུ་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་སྒྲུབ་པ་པོས་སངས་རྒྱས་ཐམས་ཅད་རྗེས་སུ་མཉེས་པར་འགྱུར་རོ། །འདི་སྐད་སྟོན་པ་ཡིན་ཏེ། དེ་བཞིན་གཤེགས་པའི་རྣལ་
เล่ม ๕๘ · หน้า 207a
འབྱོར་པས་སྔར་བཤད་པའི་ཚུལ་གྱིས་དེ་བཞིན་གཤེགས་པའི་མངོན་པར་ཤེས་པ་བསྐྱེད་ལ། ཟླ་བ་གཅིག་རབ་ཏུ་བྱུང་ནས་བསླབ་པ་ཐམས་ཅད་ཀྱི་སྡོམ་པ་ཡང་དག་པར་བསྲུངས་ལ། རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་ཆ་ལུགས་འཛིན་པས་ཏིང་ངེ་འཛིན་རྣམ་པ་གསུམ་
བསྒོམ་པ་བརྩམ་པར་བྱའོ། །རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་གྱི་སྒྲུབ་པ་པོས་རྡོ་རྗེ་དབྱིངས་ལ་སོགས་པའི་དཀྱིལ་འཁོར་ཕྱི་དང་ནང་གི་མཆོད་པ་ཐམས་ཅད་ཀྱིས་ཡང་དག་པར་མཆོད་ལ། ཉིན་རེ་ཞིང་ཐུན་བཞིའི་སྦྱོར་བས་བསྒོམ་པར་བྱའོ། །སེམས་ཅན་ཐམས་ཅད་སངས་རྒྱས་དང་། །ཀུན་གྱི་གཟི་བརྗིད་
ཅན་ཉིད་དོ། །ཇི་བཞིན་པ་ནི་འདུལ་བ་ཉིད། །ལས་ཀྱི་སེམས་དཔའི་དངོས་གྲུབ་བྱེད། །ཅེས་བཤད་པ་གང་ཡིན་པ་དེ་རྗེས་སུ་སྤྱད་པར་བྱའོ། །ཇི་སྐད་དུ་བཤད་པའི་བསམས་པས་དེ་བཞིན་གཤེགས་པ་ཐམས་ཅད་བསམ་པར་བྱའོ། །དེ་ལྟ་བུ་ཟླ་བ་གཅིག་གི་སྦྱོར་བས་དེ་བཞིན་གཤེགས་པ་ཐམས་ཅད་རྗེས་སུ་ཆགས་པའི་དངོས་གྲུབ་ཏུ་འགྱུར་
རོ། །ཇི་ལྟར་ཡུལ་དང་ལྡན་གྱུར་ནས། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་རྣམས་ལ་སངས་རྒྱས་ཀྱི་པདྨ་ལ་སོགས་པ་ཐམས་ཅད་ཀྱིས་བརྒྱན་པའི་ཡུལ་དེས་ཡུལ་དང་ལྡན་པར་བྱས་པའོ། །ཇི་ལྟ་བུའི་ཡུལ་དང་ལྡན་པར་འགྱུར་བའི་རྣལ་འབྱོར་པས་རྡོ་རྗེ་སེམས་དཔའ་ལ་སོགས་པ་
དེ་བཞིན་གཤེགས་པའི་རིགས་ཏེ། རྡོ་རྗེ་སེམས་དཔའ་ནས་བརྩམས་ཏེ་རྡོ་རྗེ་འབེབས་པའི་མཐར་ཐུག་པའི་བདག་ཉིད་བསྒོམ་ཞིང་བསྒྲུབ་པར་བྱ་སྟེ་བཛྲ་སཏྭ་སུ་ར་ཏ་སྟྭཾ་ཞེས་བྱ་བ་ནས། བཛྲ་ཨཱ་བེ་ཤ་སུ་ར་ཏ་སྟྭཾ་ཞེས་བྱ་བའི་བར་དུ་ཟློས་ཤིང་། དེ་ཁོ་ན་ཉིད་བསྐུལ་བ་ཉིད་འདིས་མྱུར་དུ་མཉེས་པར་གྱུར་ནས་དེ་
བཞིན་གཤེགས་པའི་རིགས་ཀྱི་རང་བཞིན་རྡོ་རྗེ་སེམས་དཔའ་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔར་བཤད་པའི་ཚུལ་གྱིས་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་མངོན་པར་ཤེས་པ་ལྔ་བསྐྱེད་དེ། དེ་བཞིན་གཤེགས་པ་ལྔའི་ཅོད་པན་དང་། ལག་གདུབ་དང་། རྣ་ཆ་དང་། དཔུང་རྒྱན་
ལ་སོགས་པའི་རྡོ་རྗེ་སེམས་དཔའི་རྒྱན་གྱིས་བདག་ཉིད་བརྒྱན་པར་བྱས་ལ་རྡོ་རྗེ་སེམས་དཔའི་ཆ་ལུགས་སུ་བདག་ཉིད་བསྐྱེད་ལ། མཆོད་པ་ཐམས་ཅད་ཀྱིས་ཇི་ལྟ་བ་བཞིན་དུ་ཡང་དག་པར་མཆོད་ལ། རྡོ་རྗེ་དབྱིངས་ལ་སོགས་པའི་དཀྱིལ་འཁོར་ཟླ་བ་ཕྱེད་དུ་བསྒོམ་པར་བྱའོ། །ཕྱིས་གནང་བ་མནོས་ལ་ཇི་
เล่ม ๕๘ · หน้า 207b
སྐད་བཤད་པའི་དེ་ཁོ་ན་ཉིད་ཀྱིས་བསྐུལ་བར་བྱ་སྟེ། དེ་ལྟར་ན་ཟླ་བ་ཕྱེད་ཀྱི་སྦྱོར་བས་དེ་བཞིན་གཤེགས་པའི་རིགས་མཉེས་པར་འགྱུར་རོ། །སངས་རྒྱས་བཀའ་ནི་བསྲུང་བ་དང་། །ཞེས་བྱ་བ་ནི་ཇི་སྐད་བཤད་པའི་གནང་བ་དེ་ལྟར་བྱེད་དོ་ཞེས་བྱ་བའི་དོན་ཏོ། །མ་རུངས་པ་རྣམས་ལ་མངོན་སྤྱོད་བྱས་ཤིང་བསད་
པས་དགེ་བ་བཅུ་ལ་སོགས་པའི་ལས་ཀྱི་ལམ་འཇུག་པའོ། །གང་གིས་གསོད་པར་བྱེད་ཅེ་ན། ཁྲོས་པ་ཡི་ནི་ཞེས་བྱ་བ་སྨོས་ཏེ་རྡོ་རྗེ་ཧཱུཾ་མཛད་ལ་སོགས་པའི་བྱེད་པ་པོར་འགྱུར་བའི་ཁྲོ་བོས་མ་རུངས་པའི་སེམས་ཅན་རྣམས་སྦྱོང་ཞིང་བསད་པར་བྱས་པར་གྱུར་པས་རྡོ་རྗེའི་རིགས་སུ་མཉེས་པར་འགྱུར་རོ། །འདི་སྐད་
སྟོན་པ་ཡིན་ཏེ། སྔར་བཤད་པའི་ཚུལ་གྱིས་རྡོ་རྗེ་རིགས་ཀྱི་རྣལ་འབྱོར་པས་མངོན་པར་ཤེས་པ་བསྐྱེད་དེ། ཁྲོས་པར་གྱུར་པའི་རྣལ་འབྱོར་ཆེན་པོ་དང་ལྡན་པས་དེ་བཞིན་གཤེགས་པ་ཐམས་ཅད་དང་། རྡོ་རྗེའི་རིགས་རྣམས་ཀྱིས་ནམ་མཁའི་ཁམས་ཀུན་དུ་བཀང་ལ་དེ་ནས་དེ་རྣམས་ཕྱག་བྱ་སྟེ། ཕྱག་ན་རྡོ་རྗེ་མཆོད་
ནས་མགོ་བསྒྱུར་བ་དང་། མགོ་གསིག་པ་དང་། གོས་མེད་པའམ་གོས་དང་བཅས་པས་འཇིག་རྟེན་པ་ཐམས་ཅད་ལ་ཁྲོས་ཏེ་ཁྲོ་བོའི་ཚིག་བརྗོད་ཅིང་། སྒེག་མོ་ལ་སོགས་པའི་ཕྱག་རྒྱས་གར་བྱས་ནས། དེ་བཞིན་གཤེགས་པ་ཐམས་ཅད་ཡིད་ཀྱིས་བྲིས་ཏེ། མཚམས་བཅིང་བ་ལ་སོགས་པ་བྱས་ནས། སྲོད་ཀྱི་དུས་
སུ་ཁྲུས་བྱས་ཏེ། དཔལ་རྡོ་རྗེ་ཧཱུཾ་མཛད་ལ་སོགས་པའི་ཆ་ལུགས་ཀྱིས་གདུ་བུ་དང་། རྣ་ཆ་དང་། ཅོད་པན་དང་། སངས་རྒྱས་ཀྱི་ཕྲེང་བས་བདག་ཉིད་བརྒྱན་པར་བྱས་ཏེ། འཇིག་རྟེན་གསུམ་ལས་རྣམ་པར་རྒྱལ་བ་ལ་སོགས་པའི་དཀྱིལ་འཁོར་གྱི་ཁང་པར་ཏིང་ངེ་འཛིན་རྣམ་པ་གསུམ་བསྒོམ་པ་ནས་བརྩམས་ཏེ། བསྒྲུབས་ལ་
མཆོད་པ་ཐམས་ཅད་ཀྱིས་ཡང་དག་པར་མཆོད་ལ། དཀྱིལ་འཁོར་པའི་སྔགས་བརྒྱ་རྩ་བརྒྱད་བཟླས་ཏེ། གདུག་པའི་སེམས་ཅན་རྣམས་ལ་དེ་བཞིན་གཤེགས་པའི་བཀའ་ཡིས་རྣམ་པར་སྦྱངས་ཏེ། ཐུགས་རྗེ་ཆེན་པོའི་ཁྲོ་བོས་བསད་པ་དེ་ལྟ་བུ་ཟླ་བ་ཕྱེད་ཙམ་གྱི་སྦྱོར་བས་རྡོ་རྗེའི་རིགས་མཉེས་པར་བྱེད་དོ། །ཆགས་པའང་
ཀུན་དུ་བལྟས་པ་དང་། །ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བདག་མེད་པའི་མཚན་ཉིད་ཅན་གྱི་པདྨའི་རིགས་ཀྱི་ལྟ་བས་སོ་སོར་བལྟ་བ་ཡིན་ནོ་ཞེས་བྱ་བའི་དོན་ཏོ། །དེ་བཞིན་གཤེགས་པ་དང་པདྨའི་རིགས་ཀྱིས་ཕྱོགས་བཅུའི་དེ་བཞིན་གཤེགས་པ་ལ་སོགས་པ་དང་། སེམས་
เล่ม ๕๘ · หน้า 208a
ཅན་གྱི་ཁམས་རྣམས་པདྨའི་རིགས་སུ་བྱེད་པ་འདི་ནི་འདིར་བྱས་པའོ། །སེམས་ཅན་ཐམས་ཅད་ལ་ཕན་པ་དང་བདེ་བས་སྡུད་པའི་མཚན་ཉིད་ཅན་འདི་བསྒོམ་པའོ། །སྙིང་རྗེས་ཞེས་བྱ་བ་ནི་སྙིང་བརྩེ་བ་ཉིད་ཀྱིས་ནི་སྙིང་རྗེ་སྟེ། པདྨའི་རིགས་དེ་ཉིད་ཀྱིས་སེམས་ཅན་
གྱི་ཁམས་ཐམས་ཅད་པདྨའི་རིགས་ཀྱི་རང་བཞིན་དུ་བསྐྱེད་ཅིང་བསྒོམས་ཏེ་དམྱལ་བ་ལ་སོགས་པའི་སྡུག་བསྔལ་རྫུ་འཕྲུལ་གྱི་སྟོབས་ཀྱིས་བསལ་ནས། བཅིང་བ་ལ་སོགས་པ་དང་བྲལ་བར་བྱ། །ཞེས་བྱ་བའི་དོན་ཏོ། །ཆོས་སྨྲ་དང་ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་རྣམ་
པར་དག་པའོ་ཞེས་བརྗོད་པའི་ངང་ཚུལ་གྱིས་ཆོས་སྨྲའོ། །མི་འཇིགས་ཀུན་ལ་སྦྱིན་བྱེད་རྣམས། །ཞེས་བྱ་བ་ནི་འཇིགས་པའི་སེམས་ཅན་ཀུན་ལ་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་བསྟན་པས་དམྱལ་བ་ལ་སོགས་པའི་འཇིགས་པ་སེལ་བ་འདི་ནི་མི་འཇིགས་པའི་སྦྱིན་པའོ། །
སྔགས་ཀྱི་དངོས་གྲུབ་ཀྱི་སྟོབས་ཀྱིས་གསོད་པ་དང་འཆིང་བ་ལ་སོགས་པའི་འཇིགས་པ་སེལ་བ་འདི་ནི་པདྨའི་རིགས་ཀྱི་རྣལ་འབྱོར་པས་སངས་རྒྱས་མཉེས་པར་བྱེད་པའོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་སྔ་མ་བཞིན་དུ་
འཇིག་རྟེན་དབང་ཕྱུག་གི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ་མངོན་པར་ཤེས་པ་ལྔ་བསྐྱེད་ནས། རང་གི་ལྷའི་རྣལ་འབྱོར་པའམ། པདྨའི་རིགས་ཀྱི་རྣལ་འབྱོར་པས་རང་གི་སྙིང་གའི་ཟླ་བ་ལ་ཡི་གེ་ཧྲི་དང་། དེའི་སྟེང་དུ་ཧཱུཾ་བཀོད་ལ། དེའི་སྟེང་དུ་ཟླ་བའི་དཀྱིལ་འཁོར།
དེ་ནས་རང་གི་སྔགས་བརྗོད་ཅིང་། བྱང་ཆུབ་སེམས་ཀྱི་ཡི་གེ་ཧཱུཾ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་ཡི་གེ་ཧྲི་རྣམ་པར་བསམས་ཏེ། བྱང་ཆུབ་ཀྱི་སེམས་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་རང་གི་ལྷའི་གཟུགས་སམ། རིགས་ཀྱི་རང་བཞིན་དུ་བསྒོམ་པར་བྱའོ། །
དེ་ནས་དགོངས་ཀའི་དུས་ནས་བརྩམས་ཏེ། སྟོང་རྩ་བརྒྱད་བཟླས་པར་བྱའོ། །པདྨའི་རིགས་དང་རྗེས་སུ་མཐུན་པའི་ཅོད་པན་ལ་སོགས་པའི་རྒྱན་ཐམས་ཅད་ཀྱིས་བདག་ཉིད་བརྒྱན་པར་བྱས་ལ། ཆགས་པ་ཀུན་དུ་ལྟ་བ་དང་། བྱམས་པ་དང་སྙིང་རྗེ་ཆོས་སྨྲ་བ་དང་། སེམས་
เล่ม ๕๘ · หน้า 208b
ཅན་ཀུན་ལ་མི་འཇིགས་པ་སྦྱིན་པར་བྱེད་པ་རྣམས་རྗེས་སུ་སྤྱད་ལ་བཟླས་པ་བྱའོ། །དེ་ལྟ་བུའི་སྦྱོར་བ་འདིས་ཞག་བདུན་ནི་པདྨའི་རིགས་རྗེས་སུ་མཉེས་པར་འགྱུར་རོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་རིན་ཆེན་གྱི་ཕྱག་རྒྱས། དེ་བཞིན་གཤེགས་པ་ཐམས་ཅད་
ལ་དབང་བསྐུར་བ་རབ་ཏུ་སྦྱིན་པ་དང་། ནམ་མཁའ་ཐམས་ཅད་མཉམ་པའི་ཏིང་ངེ་འཛིན་གྱི་གཟུང་བ་དང་འཛིན་པའི་རྣམ་པར་རྟོག་པ་སྤངས་ཏེ། ཕུལ་དུ་བྱུང་བའི་སྦྱིན་པ་ནི་རབ་ཏུ་སྦྱིན་པའོ། །ནོར་བུའི་རིགས་ཀྱི་རང་བཞིན་གྱི་བདག་ཉིད་དུ་བསྒོམས་ལ། ནོར་བུའི་རིགས་ཀྱི་ངོ་བོའི་ནོར་བུ་
བསྡུས་པས་སྦྱིན་པ་བསགས་པའོ། །ཐམས་ཅད་ལ་དབང་བསྐུར་བ་ལ་སོགས་པ་བྱིན་པས་སངས་རྒྱས་ཉིད་ཐོབ་པའི་རྒྱུ་མཚན་རྗེས་སུ་སྒྲུབ་པ་ཡིན་པ་དེའི་ཕྱིར། དེ་ཡང་སངས་རྒྱས་དོན་དུ་སྦྱོར། །ཞེས་གསུངས་སོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ནོར་བུའི་
རིགས་ཀྱི་རྣལ་འབྱོར་པས་ནོར་བུའི་རིགས་ཀྱི་མངོན་པར་ཤེས་པ་བསྐྱེད་དེ། ནོར་བུའི་རིགས་ཀྱི་རྣལ་འབྱོར་བྱས་ལ་དེ་བཞིན་གཤེགས་པ་དང་ནོར་བུའི་རིགས་ཀྱིས་ནམ་མཁའི་ཁམས་གང་བར་བསམ་པར་བྱའོ། །དེ་ནས་དེ་བཞིན་གཤེགས་པ་ཐམས་ཅད་དང་། ནོར་བུའི་རིགས་ཀྱི་རྡོ་རྗེའི་
ནོར་བུའི་ཕྱག་རྒྱས་དབང་བསྐུར་བ་ཐམས་ཅད་གཟུགས་བརྙན་ཙམ་དུ་ངེས་པར་བསྒོམ་སྟེ། ཕྱི་རོལ་གྱི་མཆོད་པའམ་ཡིད་ཀྱིས་མཆོད་ལ། བཅོམ་ལྡན་འདས་ནམ་མཁའི་སྙིང་པོ་མདུན་དུ་བཞག་ལ། བརྒྱ་རྩ་བརྒྱད་བཟླས་ཤིང་བཅོམ་ལྡན་འདས་ཐམས་ཅད་ཀྱི་རྒྱལ་པོའི་བདག་པོ་ནམ་
མཁའི་སྙིང་པོ་ནི་བདག་ཡིན་ནོ་ཞེས་རྒྱལ་པོར་བསྒོམ་པར་བྱའོ། །རིམ་པ་འདི་ཉིད་ཀྱིས་ཞག་བརྒྱད་བཟླས་པ་དེ་ལྟ་བུས་ནོར་བུའི་རིགས་རྗེས་སུ་མཉེས་པར་འགྱུར་རོ། །ནོར་བུའི་རིགས་དང་མཐུན་པའི་རྒྱན་ཐམས་ཅད་ཀྱིས་བདག་ཉིད་བརྒྱན་པར་བྱས་ནས་ཆོ་ག་ཐམས་ཅད་རྗེས་
སུ་སྤྱད་པར་བྱའོ། །དེ་ལྟར་དེ་བཞིན་གཤེགས་པའི་རིགས་ཐམས་ཅད་རྗེས་སུ་མཉེས་པར་བྱེད་པ་བཤད་ནས། ད་ནི་དེ་དག་དབང་དུ་བྱེད་པ་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ་དེ་ལ་དབང་དུ་བྱེད་པ་ནི་རང་ཉིད་དང་། ནོར་དང་བཅས་པ་དབང་དུ་བྱེད་པ་སྟེ། རྗེས་སུ་
เล่ม ๕๘ · หน้า 209a
ཆགས་པས་མངོན་པར་བྱེད་པ་དང་། དགའ་བ་སྐྱེད་པར་བྱེད་དོ་ཞེས་བྱ་བའི་དོན་ཏོ། །འདོད་ཆགས་ལ་ནི་བརྙས་མི་བྱ། །ཞེས་བྱ་བ་ནི་དེ་ལ་འདོད་ཆགས་ནི་ཆོས་བདག་མེད་པའི་ཆགས་པའོ། །སེམས་ཅན་སྨིན་ཅིང་གྲོལ་བར་བྱེད་པའི་ཆགས་པ་ནི་བཅོམ་
ལྡན་འདས་རྡོ་རྗེ་འཛིན་པ་ཆེན་པོ་དེ། དེ་བཞིན་གཤེགས་པའི་རིགས་ཀྱི་ངོ་བོ་རྡོ་རྗེ་སེམས་དཔའ་དེ་ལ་བརྙས་པར་མི་བྱ་སྟེ། སངས་རྒྱས་བྱང་ཆུབ་དོན་དུ་གཉེར་བས་བསྒོམ་པར་བྱ་ཞིང་རྒྱུན་མི་འཆད་པར་མངོན་དུ་བྱའོ། །ཅིའི་ཕྱིར་བརྙས་པར་མི་བྱ་ཞེ་ན། གང་གི་ཕྱིར་ཆོས་བདག་མེད་
པའི་ཆགས་པ་གཟུང་བ་དང་འཛིན་པའི་དྲི་མ་དང་བྲལ་བས་སེམས་ཅན་སྨིན་ཅིང་གྲོལ་བར་བྱེད་པའི་ཆགས་པས་མི་དགེ་བ་བཅུའི་ལས་ཀྱི་ལམ་ལས་སློང་བར་བྱེད་པ་དེ་ཉིད་ཀྱི་ཕྱིར་རོ། །དེ་ལྟར་རྣམ་པར་དག་པ་དེ་སྦྱིན་པའོ། །འདི་ལྟར་རྣམ་པར་དག་པའི་སྦྱོར་བ་དང་ལྡན་པ་ལ་སྨད་
པར་མི་བྱ་བ་དེ་བཞིན་དུ་བདེ་བ་སྦྱིན་པ་ལ་ཡང་ཡིན་ནོ། །གང་གི་ཕྱིར་ཡོན་ཏན་དེ་དང་ལྡན་པས་མངོན་དུ་བྱེད་པའི་རྣལ་འབྱོར་པ་འདི་ནི་འཇིག་རྟེན་དང་འཇིག་རྟེན་ལས་འདས་པའི་བདེ་བ་སྐྱེད་པར་བྱེད་པས་ན་འདི་བདེ་བ་སྦྱིན་པའོ། །སེམས་ཅན་ཀུན་གྱི་དོན་དུ་སྦྱོར། །ཞེས་བྱ་བ་ནི་སེམས་ཅན་ཐམས་ཅད་
ལ་སངས་རྒྱས་ལ་སོགས་པའི་བསྒོམ་པ་ནི་སེམས་ཅན་ཐམས་ཅད་ཀྱི་དོན་ཏོ། །རྒྱུའི་སྦྱོར་བ་དེས། འདི་ནི་སངས་རྒྱས་དབང་དུ་བྱེད། །ཅེས་བྱ་བ་ནི་འདིར་འདོད་ཆགས་ཀྱི་བདག་ཉིད་བསྒོམས་པའི་བསོད་ནམས་དང་ཡེ་ཤེས་དག་སེམས་ཅན་ཐམས་ཅད་ཀྱི་དོན་དུ་བསྒོམ་པ་གང་ཡིན་པ་
དེ་ནི་སངས་རྒྱས་དབང་དུ་བྱེད་པ་སྟེ། སྦྱོར་བ་དེས་སངས་རྒྱས་རང་དབང་དུ་བྱེད་དོ་ཞེས་བྱ་བའི་ཐ་ཚིག་གོ། །འདི་སྐད་སྟོན་པ་ཡིན་ཏེ། དེ་བཞིན་གཤེགས་པའི་རྣལ་འབྱོར་བྱས་ལ། རྗེས་སུ་ཆགས་པའི་ཏིང་ངེ་འཛིན་ལ་གནས་ཏེ། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་
འབེབས་པའི་མཐར་ཐུག་པའི་རྡོ་རྗེ་དབྱིངས་ལ་སོགས་པའི་དཀྱིལ་འཁོར་གཟུགས་བརྙན་ཙམ་གྱི་སྦྱོར་བས་བསྒོམ་པར་བྱའོ། །སེམས་ཅན་ཐམས་ཅད་སངས་རྒྱས་ལ་སོགས་པའི་གཟུགས་ཀྱི་བདག་ཉིད་དུ་བསྐྱེད་པར་བྱའོ། །དེ་ལྟར་ན་དེ་བཞིན་གཤེགས་པ་དེས་དབང་དུ་བྱེད་
เล่ม ๕๘ · หน้า 209b
པར་འགྱུར་རོ། །འདོད་བསྟན་བདེ་བའི་བདག་ཉིད་ཀྱིས། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་འདོད་པ་སྟེ། བཅོམ་ལྡན་འདས་འདོད་པ་སེམས་དཔའ་ནི་ཞེས་གསུངས་པའི་ཕྱིར་དེ་ནི་དེ་བཞིན་གཤེགས་པའི་རིགས་ཀྱི་རང་བཞིན་བཅོམ་ལྡན་འདས་རྡོ་རྗེ་
སེམས་དཔའ་བསྟན་པ་ནི་བསྒོམས་པའོ། །བདེ་བའི་བདག་ཉིད་ནི་སེམས་བདེ་བའོ། །སུ་ར་ཏ་སྟྭཾ་ཞེས་བྱ་བ་ནི་དེ་ཁོ་ན་ཉིད་བསྐུལ་བའི་སྙིང་པོ་ཟློས་ཤིང་བསྒྲུབས་ནས་སོ། །ཇི་ལྟར་སྒྲུབ་ཅེ་ན། དེ་ཉིད་བསྐུལ་ན་དབང་བསྐུར་འགྱུར། །ཞེས་བྱ་བ་སྨོས་ཏེ། སུ་ར་ཏ་སྟྭཾ་ཞེས་བྱ་བའི་དེ་ཁོ་
ན་ཉིད་བརྗོད་པས་རྡོ་རྗེ་སེམས་དཔའ་དབང་དུ་བྱེད་ཅེས་བྱ་བའི་དོན་ཏོ། །དེའི་དོན་འདི་སྐད་སྟོན་པ་ཡིན་ཏེ། སྔར་བཤད་པའི་རྗེས་སུ་ཆགས་པའི་སྦྱོར་བས་རྗེས་སུ་ཆགས་པར་བྱེད་པ་ཉིད་བསྒོམ་ཞིང་སེམས་ཀྱིས་མངོན་དུ་བྱེད་པ་ལ། སུ་ར་ཏ་སྟྭཾ་ཞེས་བྱ་བས་ཇི་སྲིད་བཅོམ་ལྡན་འདས་མངོན་
སུམ་ལྟ་བུར་མཐོང་བར་གྱུར་པ་དེ་སྲིད་ཀྱི་བར་དུ་བསྐུལ་བར་བྱའོ། །དེ་ནས་དཀྱིལ་འཁོར་ལ་སོགས་པ་རྣམས་ལ་མཚན་ཐོག་ཐག་བསྒོམས་ན་ངེས་པར་འགྲུབ་པར་འགྱུར་རོ། །སངས་རྒྱས་བཀའ་ནི་ཐོབ་པར་འགྱུར། །སངས་རྒྱས་བཀའ་ཡིས་སེམས་ཅན་རྣམས། །དག་བྱ་ཞེས་
བྱ་བ་ནི་བཤད་ཟིན་ཏོ། །ལུས་ཅན་སྐྱབས་སྦྱིན་དང་ཞེས་བྱ་བ་ནི་ལྷ་ལ་སོགས་པའི་སེམས་ཅན་ཆོས་དང་མི་ལྡན་པ་རྣམས་དང་། ལྷ་མ་ཡིན་ལ་སོགས་པ་གདུག་ཅིང་མ་རུངས་པའི་སེམས་ཅན་རྣམས་གསོད་པ་ནི་སྐྱབས་སྦྱིན་པའི་དོན་ཏོ། །སངས་རྒྱས་བསྟན་པ་བསྲུང་བའི་ཕྱིར། །
ཞེས་བྱ་བ་ནི་སངས་རྒྱས་རྣམས་ཀྱི་བསྟན་པའི་བཀའ་དེ་སེམས་ཅན་གང་གིས་ཁྱད་དུ་གསོད་པར་བྱེད་ཅིང་བསླབ་པར་མི་བྱའོ་ཞེས་འགོག་པར་བྱེད་ཅིང་། འཇིག་རྟེན་རྒྱང་ཕན་ལ་སོགས་པའི་བསྟན་བཅོས་ལ་རབ་ཏུ་འཇོག་པར་བྱེད་པ་དང་། གཙུག་ལག་ཁང་དང་དགེ་སློང་དང་དགེ་
སློང་མ་དང་། དམ་པའི་ཆོས་ལ་སོགས་པ་འཇིག་པར་བྱེད་པ་དེ་ལྟ་བུ་ལ་སོགས་པ་གདུག་ཅིང་མ་རུངས་པ་རྣམས་བསད་པ་ནི་སངས་རྒྱས་ཀྱི་བསྟན་པ་བསྲུང་བའོ། །བསད་ན་ཡང་ནི་དབང་དུ་འགྱུར། །ཞེས་བྱ་བ་ནི་དེ་ལྟར་རྡོ་རྗེ་རིགས་ཀྱི་རྣལ་འབྱོར་པས་ཞེ་སྡང་མེད་པ་དང་ཕན་
เล่ม ๕๘ · หน้า 210a
པའི་དོན་དུ་བསད་ན་རྡོ་རྗེའི་རིགས་དབང་དུ་བྱེད་ཅིང་རང་དབང་དུ་འགྱུར་རོ། །འདི་སྐད་སྟོན་པ་ཡིན་ཏེ། ཇི་སྐད་བཤད་པའི་ཚུལ་གྱིས་རྡོ་རྗེའི་རིགས་ཀྱི་རྗེས་སུ་ཆགས་པའི་ཏིང་ངེ་འཛིན་བསྒོམས་ནས་ཕྱག་རྒྱ་དང་སྔགས་ཀྱིས་གདུག་པ་བསད་ན་རང་གི་རྡོ་རྗེའི་རིགས་
དབང་དུ་བྱེད་པར་འགྱུར་རོ། །པདྨའི་རིགས་ནི་རང་བཞིན་གྱིས་རྣམ་པར་དག་པ་སྟེ། འདོད་ཆགས་དག་པ་ཀུན་རྟོག་ལ། །ཞེས་བྱ་བ་ནི་བསྒོམ་པའོ། །ཇི་ལྟར་ཞེ་ན། པདྨའི་འདབ་མ་ཁ་འབྱེད་ཅིང་། །ཞེས་བྱ་བ་ལ་སོགས་པ་སྨོས་ཏེ། ལག་པ་གཡོན་པ་སྙེམས་པས་པདྨ་བླངས་
ལ་ལག་པ་གཡོན་པའི་མཛུབ་མོ་དང་། མཐེ་བོ་དག་གིས་སྙིང་གར་པདྨའི་འདབ་མ་ཁ་འབྱེད་ཅིང་བསྒོམས་ནའོ། །ཇི་ལྟར་པདྨ་དམར་པོ་ཡང་། །ཚོན་གྱི་ཉེས་པས་མི་གོས་བཞིན། །ཐམས་ཅད་དག་པར་བསྒོམས་ན་ནི། །སྡིག་པའི་ཉེས་པས་གོས་མི་འགྱུར། །ཞེས་བྱའོ། །དེ་ལྟར་
འདོད་ཆགས་རྣམ་པར་དག་པ་པདྨའི་འདབ་མ་ཁ་འབྱེད་ཅིང་བསྒོམས་པས་ཅི་ཞིག་བྱེད་ཅེ་ན། རྣལ་འབྱོར་པ་རང་ཉིད་པདྨའི་རིགས་ཀྱི་ཆགས་པ་བསྒོམས་ན་སངས་རྒྱས་ལ་སོགས་པ་སེམས་ཅན་གྱི་ཁམས་ལ་ཆགས་པར་བྱེད་དོ། །དེ་ཅིའི་ཕྱིར་ཞེ་ན། གདུལ་བའི་ཕྱིར་ཞེས་བྱ་བ་སྨོས་ཏེ།
པདྨའི་རིགས་ཀྱི་ཏིང་ངེ་འཛིན་གྲུབ་པས་རང་དང་གཞན་དག་དེས་འདུལ་བར་བྱེད་དོ། །འདོད་ན་དབང་དུ་བྱེད་པར་འགྱུར། །ཞེས་བྱ་བ་ནི་རང་ངམ་གཞན་འདི་རྣམ་པར་དག་པའི་བསྒོམ་པའི་ཆགས་པ་གང་ཡིན་པ་འདི་ནི་པདྨའི་རིགས་དབང་དུ་བྱེད་པ་ཡིན་ནོ། །དེའི་དོན་ནི་འདི་སྐད་སྟོན་པ་
ཡིན་ཏེ། སྔར་བཤད་པའི་ཆོ་གས་པདྨའི་རིགས་ལ་རྗེས་སུ་ཆགས་པའི་ཏིང་ངེ་འཛིན་བསྒོམ་ཞིང་། པདྨའི་འདབ་མ་ཁ་འབྱེད་པའི་སྦྱོར་བས་དེ་བཞིན་གཤེགས་པ་ལ་སོགས་པས་སེམས་ཅན་གྱི་ཁམས་འཇིག་རྟེན་དབང་ཕྱུག་ཏུ་བསྐྱེད་ནས་ཇི་སྲིད་དུ་དེའི་རྣམ་པར་སྣང་བ་ཐོབ་པར་འགྱུར་
བ་དེ་སྲིད་ཀྱི་བར་དུ་བྱའོ། །དེ་ནས་བསྒྲུབ་པའི་ཆོ་གས་མཚན་ཐོག་ཐག་བསྒོམས་ན་འགྲུབ་པར་འགྱུར་རོ། །སངས་རྒྱས་ཐམས་ཅད་དབང་བསྐུར་ཕྱིར། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་ནོར་བུའི་རིགས་ལ་རྗེས་སུ་ཆགས་པའི་ཏིང་ངེ་འཛིན་རྣམ་པར་བསྒོམས་པས་ཉིན་རེ་ཞིང་རྡོ་རྗེ་
เล่ม ๕๘ · หน้า 210b
རིན་ཆེན་གྱི་ཕྱག་རྒྱས་དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ལ་རིན་པོ་ཆེ་མྱུ་གུའི་དབང་བསྐུར་བ་བྱིན་ན་དེ་ནས་ནོར་བུའི་རིགས་སུ་ཡོངས་སུ་བསམ་པར་བྱའོ། །དེ་ལྟར་ན་ནོར་བུའི་རིགས་རྣམས་དབང་དུ་གྱུར་པ་དང་། དེ་ནས་སྔ་མ་བཞིན་དུ་མཚན་ཐོག་ཐག་
བསྒོམས་ན་ནོར་བུའི་རིགས་ཀྱི་དངོས་གྲུབ་ཐོབ་པར་འགྱུར་རོ། །དེ་ལྟར་རྗེས་སུ་ཆགས་པ་དང་། དབང་དུ་བྱེད་པའི་དངོས་གྲུབ་ཀྱི་རྒྱུད་བཤད་ནས། ད་ནི་གང་གི་ཚེ་འདི་སྐད་དུ་བཤད་པའི་ཆོ་གས་ལན་བདུན་བསྒྲུབས་ན་ཡང་དངོས་གྲུབ་དམ་པ་ཐོབ་པར་མ་གྱུར་ན། དེའི་ཚེ་རྣལ་འབྱོར་པས་
མངོན་སྤྱོད་བྱ་བའི་རིགས་པའི་ཆོ་གས་རང་གི་ལྷ་ལ་མངོན་སྤྱོད་བྱས་ན་དེས་འགྲུབ་པར་འགྱུར་རོ་ཞེས་བྱ་བའི་དོན་འདི་བསྟན་པའི་ཕྱིར་རོ། །དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་གསང་བའི་ལས་ཀྱི་དངོས་གྲུབ་ཀྱི་རྒྱུད་གསུངས་སོ། །དེ་བཞིན་གཤེགས་པ་
ཐམས་ཅད་ཀྱི་རིགས་པ་རྣམས་གསོད་པ་ནི་མངོན་སྤྱོད་ཀྱི་ཆོ་གས་བསད་པའོ། །དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པ་གྲུབ་པའོ། །དེ་སྟོན་པར་བྱེད་པའི་རྒྱུད་ནི་ཕྱག་ན་རྡོ་རྗེས་གསུངས་པའོ། །སེམས་ཅན་ཀུན་དོན་མ་མཐོང་ཞིང་། །ཞེས་བྱ་བ་ནི་དེ་བཞིན་གཤེགས་པའི་
རྣལ་འབྱོར་པས་སྒྲུབ་པ་ལ་འཇུག་པ་ནི་ལན་བདུན་གྱི་བར་དུ་བསྒྲུབས་ན་ཡང་དེ་བཞིན་གཤེགས་པ་ལ་སོགས་པའི་དངོས་གྲུབ་ཐོབ་པ་དང་། སེམས་ཅན་ཐམས་ཅད་ཀྱི་དོན་བྱེད་པར་གང་གི་ཚེ་མི་གུས་པ་དེའི་ཚེ། སེམས་ཅན་ཀུན་དོན་མ་མཐོང་བའོ། །སངས་རྒྱས་རྣམས་ཀྱིས་དེ་ཉིད་
དེ་སྐད་དུ་བཤད་པའི་ཕྱག་རྒྱ་ཆེན་པོ་ལ་སོགས་དབང་དུ་བྱེད་པའི་མཐར་ཐུག་པའི་དེ་བཞིན་གཤེགས་པའི་དངོས་གྲུབ་ཀྱི་རྒྱུ་དང་འབྲས་བུའི་ངོ་བོ་དེ་མ་སྦྱངས་པ་ནི་དམིགས་པ་ལྟ་བར་གསལ་བའོ། །ཡིད་ལ་སེམས་གོམས་པའོ། །ལུས་ནི་ཕྱག་རྒྱ་སྤོང་བ་ལ་སོགས་པ་ལ་ཕྱག་རྒྱ་འབེབས་པ་ལ་
སོགས་པའི་སྦྱོར་བའོ། །ངག་ནི་བརྗོད་པའི་སྦྱོར་བས་སྔགས་བརྗོད་པའོ། །བསད་པ་ནི་སངས་རྒྱས་བཅོམ་ལྡན་འདས་བསད་པའོ། །ཅིར་འགྱུར་ཞེ་ན། དངོས་གྲུབ་ཐོབ་པར་འགྱུར་ཞེས་བྱ་བ་སྨོས་ཏེ། དེ་ལྟར་མངོན་སྤྱོད་བྱ་བའི་རིགས་པའི་ཆོ་གས་དེ་བཞིན་གཤེགས་པ་གསད་
เล่ม ๕๘ · หน้า 211a
ལ། ཕྱིས་སྔོན་དུ་བསྙེན་པ་བྱས་ནས་བསྒྲུབ་པ་བྱས་ན་ངེས་པར་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། རས་རིས་ལ་སོགས་པའི་དེ་བཞིན་གཤེགས་པ་རྣམས་གསད་པར་བྱ་བ་ལ་བསྡུ་བ་ལ་སོགས་པའི་ཆོ་གས་མདུན་དུ་གཞག་པ་རྡོ་རྗེ་ཧཱུཾ་མཛད་ལ་སོགས་
པའི་སྦྱོར་བ་བྱས་ནས་ཡིད་ཀྱིས་གསད་པར་བྱའོ། །སྦྱོར་བ་ནི་འདི་ཡིན་ཏེ། རྡོ་རྗེ་ཕྲ་མོ་བརྟན་བྱས་ལ། །རྡོ་རྗེ་ཧཱུཾ་མཛད་སྦྱོར་བ་ཡིས། །ཧཱུཾ་ཞེས་བྱ་བ་གང་ལ་བཟླས། །དེ་ཡི་སྲོག་ནི་འཇིག་པར་འགྱུར། །ཞེས་བྱ་བའོ། །དེའི་དོན་ནི་འདི་སྐད་སྟོན་པ་ཡིན་ཏེ། སྣའི་རྩེ་མོར་ཡི་གེ་ཧཱུཾ་
ལས་རྡོ་རྗེ་འབར་བ་དེའི་དབུས་སུ་དེ་བཞིན་གཤེགས་པ་བསྒོམས་ཏེ། ཇི་སྲིད་ཐལ་བ་ལྟ་བུར་མཐོང་བ་དེ་སྲིད་ཀྱི་བར་དུ་བསྒོམས་ནས་མངོན་སྤྱོད་ཀྱི་སྦྱིན་སྲེག་གིས་བསྒྲུབས་ཏེ་གསད་པར་བྱའོ། །དེ་ལྟར་ན་རྒྱུད་དེ་དང་དེ་རྣམས་ལ་བསད་པའི་ཆོ་ག་གཞན་ལ་ཡང་ཤེས་པར་བྱའོ། །དེ་ལྟར་
དེ་བཞིན་གཤེགས་པ་བསད་པའི་དངོས་གྲུབ་ཀྱི་རྒྱུད་བཤད་ནས་ད་ནི་དེ་བཞིན་གཤེགས་པའི་རིགས་ཀྱི་དངོས་གྲུབ་གསུངས་པ་ནི། དངོས་གྲུབ་ཐམས་ཅད་ཐོབ་པ་ལས། །ཞེས་བྱ་བ་ལ་སོགས་པ་སྨོས་ཏེ། ཕྱག་རྒྱ་ཆེན་པོ་ལ་སོགས་པའི་དངོས་གྲུབ་རྣམས་ལན་བདུན་བསྒྲུབས་
ཀྱང་མངོན་སུམ་དུ་མཐོང་བར་མ་གྱུར་ནའོ། །རིགས་རྣམས་ཀྱང་ནི་མི་བརྩོན་ཞིང་། །ཞེས་བྱ་བ་ནི་འདིར་སྦྱོར་བའི་བརྩོན་འགྲུས་སོ། །མི་བརྩོན་པ་ནི་མི་འབད་པ་སྟེ། བསྒོམ་པའི་སྦྱོར་བ་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །གང་དང་འབྲེལ་བའི་བསྒོམ་པ་མེད་པ་ཡིན་ཞེ་ན།
རིགས་རྣམས་དང་ཞེས་བྱ་བ་སྨོས་ཏེ། དེ་བཞིན་གཤེགས་པའི་རིགས་དང་འབྲེལ་པའི་བསྒོམས་པ་རྣལ་འབྱོར་པ་ལ་མེད་དོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། ཡོ་ཛིར་ཡོ་ག་ཞེས་བྱ་བ་ཁམས་སོ། །བརྩོན་པ་ནི་འབད་པ་ཞེས་བྱ་བའི་དོན་ཏོ། །གང་ལ་བརྩོན་ཞེ་ན།
གང་གི་ལྷ་རྗེས་སུ་དྲན་པ་བརྩོན་པ་ཞེས་བྱའོ། །རྡོ་རྗེ་ཀུན་དུ་བརྡེག་ན་ནི། །ཞེས་བྱ་བ་ནི་རྡོ་རྗེ་དང་འབྲེལ་པའི་བརྡེག་པ་ནི་བསྣུན་པ་སྟེ། རྡོ་རྗེ་དེས་བསྒྲུབ་པར་བྱ་བ་ལ་བསྣུན་པར་བྱའོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ནས་དེ་
เล่ม ๕๘ · หน้า 211b
བཞིན་གཤེགས་པ་ཐམས་ཅད་འདུས་པའི་ནང་དུ་གནས་ཏེ། བསྒྲུབ་པར་བྱ་བའི་ལྷ་མདུན་དུ་ཇི་སྐད་བཤད་པའི་ཆོ་གས་སྤྱན་དྲངས་ལ་ཆོ་ག་ཐམས་ཅད་རྗེས་སུ་སྤྱད་ནས། ཁྲོ་བོའི་གནས་པས་བསྙེམས་པ་དང་བཅས་པས་རྡོ་རྗེ་གསོར་ཞིང་བསྒྲུབ་པར་བྱ་བའི་སྟེང་དུ་ཡིད་ཀྱིས་
འཕངས་པས་བསྐལ་པའི་མེ་དང་མཚུངས་པའི་རྡོ་རྗེ་ལྷུང་བས་བསྒྲུབ་པར་བྱ་བ་ལ་བསྣུན་པར་བསམ་པར་བྱའོ། །ཨོཾ་བཛྲ་སཏྭ་ཧཱུཾ། ཨ་མུ་ཀཾ་ག་ཏ་ཡ་ཧཱུཾ། དེ་ནས་བསྒྲུབ་པར་བྱ་བ་དེ་ཕྱི་རོལ་གྱི་ཐོག་གིས་བརྒྱབ་པའི་རི་བོ་བཞིན་དུ་བརྡེག་པར་བསྣུན་ཞིང་གསོད་པར་འགྱུར་རོ། །བསད་
ན་དངོས་གྲུབ་ཐོབ་པར་འགྱུར། །ཞེས་བྱ་བ་ནི་དེ་ལྟ་བུའི་སྦྱོར་བ་འདིས་བསྒྲུབ་པར་བྱ་བའི་ལྷ་སྣང་བ་མེད་པར་བྱས་ཤིང་དངོས་པོར་འཛིན་པ་མེད་པར་བྱས་པའོ། །སྒྲུབ་པོས་སྟོང་པ་ཉིད་ཀྱི་ཏིང་ངེ་འཛིན་གྱི་དངོས་གྲུབ་ཐོབ་པས་ཕྱག་རྒྱ་ཆེན་པོ་ལ་སོགས་པ་མྱུར་དུ་འགྲུབ་པར་འགྱུར་རོ། །དེ་
ལྟར་དེ་བཞིན་གཤེགས་པའི་རིགས་ཀྱི་དངོས་གྲུབ་བསྟན་ནས། ད་ནི་རྡོ་རྗེའི་རིགས་གསུངས་པ་ནི། དེ་ལ་ཞེས་བྱ་བ་ལ་སོགས་པ་སྨོས་ཏེ། མ་རུང་མི་འདུལ་ཁྲོ་མེད་ཅིང་། །ཞེས་བྱ་བ་ནི་ཇི་སྐད་བཤད་པའི་ལྷ་ཆེན་པོ་ལ་སོགས་པ་འདུལ་བར་བྱེད་པ་སྟེ། ཆོས་དང་ལྡན་པའི་སེམས་
ཅན་ཅུང་ཟད་ཅིག་ཀྱང་གནོད་པ་མི་བྱེད་པས་མི་འདུལ་ཁྲོ་མེད་པའོ། །དེའི་ཕྱིར་དེ་ལྟར་གྱུར་པའི་ཁྲོ་བ་མེད་པའི་ཁྲོ་བོ་མངོན་དུ་བྱེད་པས་ཉོན་མོངས་པ་ལ་ཁྲོ་བ་མངོན་དུ་བྱས་ཞེས་བྱ་བའི་དོན་ཏོ། །དེ་བཞིན་སེམས་ཅན་མི་འདུལ་ལ། །ཞེས་བྱ་བ་ནི་སེམས་ཅན་ནི་གྲགས་པར་ཟད་དོ། །དེ་
དག་འདུལ་བའི་ཁྲོ་བས་བསྒྲག་པར་བྱས་ནས་སྡིག་པ་དང་བྲལ་ཏེ། ལུང་དང་རྟོགས་པའི་བདག་ཉིད་ལ་སྦྱོར་བའོ། །སེམས་ཅན་མི་འདུལ་བ་ནི་གདུལ་བྱ་མ་ཡིན་པའི་སེམས་ཅན་གདུལ་བར་མི་ནུས་པའོ། །བདག་ཉིད་འདུལ་ལ་ཐོབ་བྱེད་ན། །ཞེས་བྱ་བ་ནི་ནད་ལ་སོགས་པའི་
སྡུག་བསྔལ་སྒྲུབ་པ་པོ་ལ་སྐྱེས་པ་ནི་དེ་དག་དངོས་གྲུབ་མི་ཐོབ་པའི་རྒྱུ་ཡིན་པའི་ཕྱིར་རོ། །རྡོ་རྗེ་ཧཱུཾ་མཛད་ཀྱི་བསྒྲུབ་པར་བྱ་བའི་ལྷའི་སྟེང་དུ་ཡི་གེ་ཧཱུཾ་ལས་རྡོ་རྗེ་འབར་བ་ལྷུང་བས་དེས་བསད་པར་གྱུར་པར་བསམ་པར་བྱའོ། །ད་ནི་པདྨའི་རིགས་ཀྱི་དངོས་གྲུབ་ཀྱི་བསད་པ་ནི། དེ་ལ་ཞེས་
เล่ม ๕๘ · หน้า 212a
བྱ་བ་ལ་སོགས་པ་གསུངས་ཏེ། སྙིང་རྗེ་མེད་ཅིང་སྙིང་རྗེ་མི་སྲིད་པའོ། །སྙིང་རྗེ་མི་འདོགས་པ་སྟེ། སེམས་ཅན་རྣམས་བསྒྲལ་བར་མི་འདོད་པའོ། །མཛའ་བོ་ཡོད་པ་དེ་བས་ན་བྱམས་པ་སྟེ་སེམས་ཅན་ལ་ཕན་པ་དང་བདེ་བ་བསྡུས་པའོ། །བྱམས་
པ་མེད་པ་ནི་བྱམས་པ་མི་འདོགས་པ་སྟེ། དེ་བས་ན་སེམས་ཅན་ངན་པ་དམིགས་པ་ལ་སྤྱོད་པ་དང་། འཇིག་རྟེན་རྒྱང་ཕན་པ་དང་། མ་སྦྱངས་པ་དེ་དག་གི་རྗེས་སུ་འཛིན་པ་མ་བསལ་བས་ཡང་དག་པའི་ལྟ་བ་ལ་ངེས་པར་མི་སྦྱོར་བའོ། །བདག་ཉིད་ལ་ནི་བསླུས་ནས་ནི། །
ཞེས་བྱ་བ་ལ། ལོག་པར་ལྟ་བ་བསྐྱེད་པས་ན་སྔགས་དང་། ལྷ་རྣམས་དང་སྔགས་ཀྱི་དངོས་གྲུབ་རྣམས་དོན་མེད་པས་འཇིག་རྟེན་པ་ལ་གནོད་པར་བྱེད་པའོ་ཞེས་བྱ་བ་ལ་སོགས་པའོ། །དེ་ལྟར་དངོས་གྲུབ་མི་ཐོབ་པའི་རྒྱུར་ཤེས་ནས་སྔ་མ་བཞིན་དུ་བསྒྲུབ་པར་བྱ་བའི་ལྷ་སྤྱན་
དྲངས་ཏེ། མངོན་སྤྱོད་ཀྱི་སྦྱོར་བས་གསད་པར་བྱའོ། །ད་ནི་ནོར་བུའི་རིགས་ཀྱི་གསད་པའི་དངོས་གྲུབ་ནི། དེ་ལ་འདི་ནི་ཞེས་བྱ་བ་སྨོས་ཏེ། མི་གཏོང་བདག་ལ་ནོར་མེད་ཅིང་། །ཞེས་བྱ་བ་ནི་གཏོང་བ་ནི་ཕྱི་རོལ་གྱི་རྒྱལ་སྲིད་ལ་སོགས་པ་ཆོས་ཐམས་ཅད་མཉམ་པ་ཉིད་ཀྱི་
ཡེ་ཤེས་ཀྱིས་སྤངས་པ་ནི་བཏང་བའོ། །མི་གཏོང་བ་ནི་གཏོང་བ་མེད་པ་སྟེ། །དེའི་ཕྱིར་ནོར་བུའི་རིགས་ཀྱི་རྣལ་འབྱོར་པས་ནོར་བུའི་རིགས་ཀྱི་ཏིང་ངེ་འཛིན་ཐོབ་པ་བདག་ཉིད་ཀྱིས་མི་གཏོང་ངོ་ཞེས་བྱ་བའི་དོན་ཏོ། །བདག་ལ་ནོར་མི་བདོག་པས་ན་བདག་ལ་ནོར་མེད་ཅིང་ངོ་། །ནོར་
བུའི་རིགས་ཀྱི་ཏིང་ངེ་འཛིན་ཐོབ་པའི་ནོར་འདི་བདག་ལ་མེད་པའོ། །ནོར་སྟེར་བ་ནི་ནོར་བུའི་རིགས་ཀྱི་ཏིང་ངེ་འཛིན་ཐོབ་པ་དེ་ལས་ཉམས་པའོ། །ཅིའི་ཕྱིར་ཞེ་ན། གནོད་བྱེད་ལ་ཞེས་བྱ་བ་སྨོས་ཏེ། དམ་ཚིག་ཉམས་པས་གནོད་པ་དེའི་ཕྱིར་ན་ནོར་མེད་པས་གནོད་པའོ། །
སེམས་ཅན་རྣམས་ནི་དབུལ་གྱུར་ན། །ཞེས་བྱ་བ་ནི་སེམས་ཅན་རྣམས་ནོར་ལ་སོགས་པ་དང་། འབྱོར་པས་དབུལ་བ་བསལ་བར་མི་ནུས་པའི་དབུལ་པོ་དེ་དག་དངོས་གྲུབ་མི་ཐོབ་པའི་རྒྱུ་ཉིད་དུ་ཤེས་ནས་ནོར་བུའི་རིགས་ཀྱི་རྣལ་འབྱོར་པས་བསྒྲུབ་པར་བྱ་བའི་ལྷ་སྤྱན་དྲངས་ཏེ།
เล่ม ๕๘ · หน้า 212b
མངོན་སྤྱོད་ཀྱི་སྦྱོར་བས་འདི་གསད་པར་བྱའོ། །དེ་ཅིའི་ཕྱིར་དེ་ལྟར་བཅོམ་ལྡན་འདས་ཀྱིས་གསད་པའི་ལས་གསུངས་ཞེས་ཕྱོགས་སྔ་མ་སེམས་པས་ཁ་ཅིག་ནི་སངས་རྒྱས་ཀྱི་ཞེས་བྱ་བ་སྨོས་ཏེ། ཁ་ཅིག་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་འདོད་པ་རྣམས་རྣལ་འབྱོར་པས་
མ་ཐོབ་ན་ཇི་སྐད་གསུངས་པའི་སངས་རྒྱས་དང་། དེ་བཞིན་གཤེགས་པ་རྣམས་དང་། རིགས་ཐམས་ཅད་དངོས་སུ་གསོད་པ་ནི་བདག་ཏུ་འཛིན་པའི་སེམས་ཅན་དེ་ལ་གནོད་པ་མེད་དོ་ཞེས་བྱ་བའི་དོན་ཏོ། །གསོད་པའི་སེམས་དེ་དག་དང་བྲལ་བར་བྱ་བའི་ཕྱིར་གསོད་པའི་སེམས་
ཀྱིས་བསད་ནས་ཐབས་ཀྱིས་དྲང་བར་བྱ་བའི་ཕྱིར་རོ། །ཁོ་བོ་ཅག་གིས་བསྟན་པའི་བསད་པའི་དངོས་གྲུབ་ཀྱི་སྦྱོར་བ་འདིས་མྱུར་དུ་འདི་དངོས་གྲུབ་སྦྱིན་པར་བྱའོ་ཞེས་བཅོམ་ལྡན་འདས་འཕགས་པ་ཀུན་དུ་བཟང་པོས་གསུངས་སོ། །དེ་ལྟར་བསད་པའི་དངོས་གྲུབ་ཀྱི་རྒྱུད་བསྟན་ནས།
ད་ནི་དེ་བཞིན་གཤེགས་པའི་རིགས་ཀྱི་རྣལ་འབྱོར་པ་རྣམས་ཀྱིས་སྔོན་དུ་བསྙེན་པ་ལ་སོགས་པའི་དུས་སུ་རང་དང་གཞན་དག་བསྲུང་བར་བྱའོ་ཞེས་བྱ་བའི་དོན་བསྟན་པའི་ཕྱིར་དེ་ནས་ཞེས་བྱ་བ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱུའི་བསྲུང་བའི་དངོས་གྲུབ་ཀྱི་
རྒྱུད་གསུངས་སོ། །དེ་བཞིན་གཤེགས་པ་ཐམས་ཅད་དང་རིགས་རྣམས་ནི་དེ་བཞིན་གཤེགས་པ་ཐམས་ཅད་དེ། དེ་དག་བསྲུང་བའི་ཕྱག་རྒྱ་ནི་འདོད་ཆགས་ལ་སོགས་པའི་ཉོན་མོངས་པ་དང་ཉེ་བའི་ཉོན་མོངས་པ་རྣམས་དང་། རྣལ་འབྱོར་པའི་སེམས་བྲལ་བ་དང་། རྒྱུད་
གཞན་ལ་གནོད་པ་སེལ་བའི་ཕྱག་རྒྱ་གང་དང་གང་བྱེད་པ་དེ་དང་དེ་ལ་དེ་སྐད་ཅེས་བྱའོ། །དངོས་གྲུབ་དེས་ཕྱག་རྒྱ་ཆེན་པོ་ལ་སོགས་པ་གྲུབ་པ་དེ་སྟོན་པའི་རྒྱུད་དེ། བཅོམ་ལྡན་འདས་ཕྱག་ན་རྡོ་རྗེས་གསུངས་ཤིང་བཤད་པའོ། །སེམས་ཅན་ཐམས་ཅད་མི་གཏོང་ཞིང་། །ཞེས་
བྱ་བ་ནི་སེམས་ཅན་ཡང་ཡིན་ལ་ཐམས་ཅད་ཀྱང་དེ་ཡིན་པས་སེམས་ཅན་ཐམས་ཅད་དེ། མ་ལུས་ཤིང་ལུས་པ་མེད་པའི་ཁམས་གསུམ་པ་ན་སྤྱོད་པའི་ལྷ་ལ་སོགས་པའི་སེམས་ཅན་དེ་དག་ཡོངས་སུ་མི་གཏོང་ཞིང་། བདག་གིས་འདི་ཐམས་ཅད་བླ་ན་མེད་པ་ཡང་དག་པར་རྫོགས་
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด