དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ཐེག་པ་ཆེན་པོ་མངོན་པར་རྟོགས་པ་ཞེས་བྱ་བའི་རྒྱུད་ཀྱི་བཤད་པ་དེ་ཁོ་ན་ཉིད་སྣང་བར་བྱེད་པ་ཞེས་བྱ་བ

ชื่อสันสกฤต (อักษรทิเบต ตามตัวบท) སརྦ་ཏ་ཐཱ་ག་ཏ་ཏཏྟྭ་སྃ་གྲ་ཧ་མ་ཧཱ་ཡཱ་ན་ཨ་བྷི་ས་མ་ཡ་ནཱ་མ་ཏནྟྲ་ཏཏྟྭ་ཨཱ་ལོ་ཀ་ཀཱ་རི་ནཱ་མ་བྱཱ་ཁྱཱ

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

เล่ม ๕๘ · หน้า 267b

ཞེས་གྲགས་ཀུན་བདག་ཉིད། །ཅེས་བྱ་བ་ནི་རྡོ་རྗེ་སེམས་དཔའོ། །ཞེས་ཀྱི་སྒྲ་ནི་གང་གི་ཕྱིར་གྱི་དོན་ཏོ། །གང་གི་ཕྱིར་རྡོ་རྗེ་སེམས་དཔའ་ནི་སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བའི་རང་བཞིན་ཡིན་པའི་ཕྱིར་དང་། སེམས་ཅན་ཐམས་ཅད་ཀྱི་རྒྱུད་ཀྱི་རྗེས་སུ་སོང་བ་ཡིན་

པ་དེའི་ཕྱིར་རོ། །གྲགས་པའི་སྒྲ་ནི་ལྐོག་ཏུ་མ་གྱུར་པའོ། །ཀུན་ཞེས་བྱ་བ་ནི་སེམས་ཅན་ཐམས་ཅད་ཀྱི་ཁམས་དང་སེམས་ལས་བྱུང་བའི་རང་བཞིན་ནི། །བདག་གི་ལུས་ལ་གནས་པ་སྟེ། །ཞེས་བྱ་བ་ནི་བདག་ཉིད་ཀྱང་བདག་ཉིད་ཀྱིས་དེའི་བདག་ཉིད་དུ་རབ་ཏུ་ཞུགས་པའི་སྦྱོར་བས་

ཡང་དག་པར་གནས་པའོ། །དེ་ལྟར། སེམས་དཔའ་བདག་ཅེས་བྱིན་བརླབས་པས། །ཞེས་བྱ་བ་ནི་མངོན་དུ་བྱས་པའོ། །རྡོ་རྗེ་སེམས་དཔའ་བདག་ཡིན་ནོ། །ཞེས་ང་རྒྱལ་བསྐྱེད་ནས། རྡོ་རྗེ་སེམས་དཔའི་བདག་ཉིད་དུ་བསྒོམས་ན་འགྲུབ་པར་འགྱུར་ཞེས་བྱ་བ་ནི་རྣལ་འབྱོར་པས་དངོས་

གྲུབ་འགྲུབ་པར་འགྱུར་རོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། སྔ་མ་བཞིན་མཉམ་པའི་ཐལ་མོ་དང་། རྡོ་རྗེ་ཐལ་མོ་དང་རྡོ་རྗེ་བསྡམས་པ་བཅིངས་པ་དང་། རྡོ་རྗེ་བསྡམས་པ་དྲལ་བ་དང་། དེ་ནས་དབབ་པ་བསྐྱེད་པ་དང་། རྡོ་རྗེ་ཁུ་ཚུར་གྱིས་དམ་ཚིག་གི་ཕྱག་རྒྱ་

བཅིངས་པ་དང་སྡིག་པ་དྲལ་བའི་ཕྱག་རྒྱ་བཅིངས་པ་དང་། རང་གི་སྙིང་གའི་རྡོ་རྗེ་ལ་རང་གི་ལྷའི་སྙིང་པོ་ཡིད་ཀྱིས་བྲིས་ལ། དེ་ཉིད་བརྗོད་ཅིང་ཆོས་བདག་མེད་པར་བསྒོམས་ཏེ། དེ་ནས་རང་གི་ལྷའི་སྙིང་པོ་དེ་ཉིད་དང་དབྱངས་ཀྱི་ཡི་གེ་བཅུ་དྲུག་ལས་སྙིང་གར་ཟླ་བའི་དཀྱིལ་འཁོར་གྱི་རྣམ་

པར་བསམ་པར་བྱ་སྟེ། དེ་ནས་དེའི་སྟེང་དུ་སྙིང་པོ་དེ་ཉིད་དང་། ཡི་གེ་ཀ་ལ་སོགས་པ་དང་བཅས་པ་ལ་སྔ་མ་བཞིན་དུ་ཟླ་བའི་དཀྱིལ་འཁོར་གཉིས་པ་བསམ་མོ། །ཟླ་བའི་དཀྱིལ་འཁོར་གཉིས་པ་དེ་ཉིད་རང་གི་ལྷའི་སྙིང་པོ་དང་བཅས་པ་ལ་རྡོ་རྗེ་རྩེ་ལྔ་པ་ཉིད་རང་གི་ལྷའི་མཚན་མའི་

གཟུགས་སུ་བསྒོམ་པར་བྱའོ། །དེ་ནས་རང་གི་ལྷའི་མཚན་མའི་དབུས་སུ་རང་གི་ལྷའི་སྙིང་པོ་རྣམ་པར་བསམས་ཏེ། རང་གི་ལྷའི་ཕྱག་རྒྱའི་ང་རྒྱལ་ཇི་ལྟ་བ་བཞིན་དུ་བསྒོམ་པར་བྱའོ། །དེ་ཉིད་བཛྲ་སཏྭ་ཨ་ཧཾ་ཞེས་བརྗོད་པས་རྡོ་རྗེ་སེམས་དཔའི་གཟུགས་སུ་བདག་ཉིད་བསྒོམ་པར་བྱའོ། །དེ་ནས་

เล่ม ๕๘ · หน้า 268a

བསྙེམས་པ་དང་བཅས་པས་རྡོ་རྗེ་གསོར་ཞིང་། ཡང་བཛྲ་སཏྭ་ཨ་ཧཾ་ཞེས་བསྒོམས་ལ། དེ་ནས་དེ་ཉིད་རྡོ་རྗེ་སེམས་དཔའི་ལྷའི་ངོ་བོར་བདག་ཉིད་སྔ་མ་བཞིན་དུ་བསྒོམ་པར་བྱའོ། །རྡོ་རྗེ་སེམས་དཔའི་རྣལ་འབྱོར་པའི་བསྒོམས་པ་ནི་སྔར་དེ་ཁོ་ན་ཉིད་སྟོན་པའི་རྒྱུད་དུ་བཤད་

ཟིན་ཏོ། །སེམས་དཔའ་ཇི་བཞིན་རྒྱ་དེ་བཞིན། །ཞེས་བྱ་བ་ནི་ཇི་ལྟར་རྡོ་རྗེ་ཧཱུཾ་མཛད་ལ་སོགས་པ་ནས་རྡོ་རྗེ་སེམས་དཔར་གྱུར་པ་དེ་བཞིན་དུ་རྡོ་རྗེ་ཧཱུཾ་མཛད་ལ་སོགས་པའི་མཚན་མའི་ཕྱག་རྒྱ་ཡང་བྱའོ། །ཇི་ལྟར་ཕྱག་རྒྱ་དེ་བཞིན་བདག །ཅེས་བྱ་བ་ནི་ཇི་ལྟར་རྡོ་རྗེ་ཧཱུཾ་མཛད་ལ་སོགས་པ་དང་

རྡོ་རྗེ་འབར་བ་ལ་སོགས་པའི་ཕྱག་རྒྱ་རྡོ་རྗེ་ཧཱུཾ་མཛད་ལ་སོགས་པའི་རང་བཞིན་དུ་བདག་ཡིན་ཞེས་གཟུགས་དང་ཐ་མི་དད་པར་ང་རྒྱལ་བསྐྱེད་ཅིང་བསྒོམ་པར་བྱའོ། །བསྒོམ་པ་འདི་ཡི་ཚུལ་གྱིས་ནི། །རྡོ་རྗེ་རིགས་ཀྱི་ཕྱག་རྒྱ་བསྒྲུབ་པར་བྱའོ་ཞེས་བྱ་བ་ཡིན་ནོ། །དེའི་ཆོ་ག་འདི་སྐད་

སྟོན་པ་ཡིན་ཏེ། སྔ་མ་བཞིན་དུ་སྡིག་པ་དྲལ་བའི་མཐར་ཐུག་པའི་ཆོ་ག་རྗེས་སུ་སྤྱད་ལ། སྙིང་གའི་རྡོ་རྗེ་འབར་བ་ལ་རང་གི་ཁྲོ་བོའི་ལྷའི་སྙིང་པོ་རྣམ་པར་བསམས་ཏེ། དེ་ཉིད་བརྗོད་ཅིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །སྔ་མ་བཞིན་དུ་ཟླ་བའི་དཀྱིལ་འཁོར་ལ་སོགས་པའི་

རིམ་པས་ཟླ་བའི་དཀྱིལ་འཁོར་གྱི་སྟེང་དུ་རང་གི་ལྷའི་མཚན་མ་བསྐྱོད་ལ། དེའི་དབུས་སུ་སྙིང་པོ་བཀོད་ནས། སེམས་དཔའ་ཇི་བཞིན་རྒྱ་དེ་བཞིན། །ཕྱག་རྒྱ་ཇི་བཞིན་དེ་བཞིན་བདག །ཅེས་བྱ་བས་ཕྱག་རྒྱ་དང་ལྷན་ཅིག་ཏུ་ཐ་མི་དད་པའི་བདག་ཉིད་དུ་ཟླ་བའི་དཀྱིལ་འཁོར་ལ་སོགས་པ་བསྒོམས་ཏེ།

དེའི་རིགས་ཐམས་ཅད་ཕྱག་རྒྱ་དེ་ལས་སྤྲུལ་ལ། གདུག་པ་ཐམས་ཅད་བཏུལ་ནས་དེ་ཐམས་ཅད་ཀྱི་ཕྱག་རྒྱའི་གཟུགས་དེ་ལས་བསམ་པར་བྱའོ། །ཆོས་ཀྱི་ཕྱག་རྒྱ་ནི་པདྨའི་རིགས་ཀྱི་ཕྱག་རྒྱ་ཆེན་པོའོ། །དེའི་ཚུལ་ནི་རང་གི་ལྷའི་མཚན་མའི་ང་རྒྱལ་བསྒོམ་པར་བྱའོ། །ཇི་ལྟར་བྱ་ཞེ་ན། རྡོ་རྗེ་

ཕྲ་མོ་བསྒོམ་བྱས་ལ། ཞེས་བྱ་བ་སྨོས་ཏེ། སྔར་བཤད་པའི་ཚུལ་གྱིས་རྡོ་རྗེ་ཕྲ་མོ་ཟླ་བ་གསུམ་བསྒོམས་ལ། ཕྱིས་ཆོས་ཀྱི་ཕྱག་རྒྱའི་སྦྱོར་བ་བསྒོམ་པར་བྱའོ། །གང་གི་ཕྱག་རྒྱ་དེ་དག་ཀུན། །སེམས་དཔའ་ཆེན་པོའི་ཏིང་ངེ་འཛིན། །ཞེས་བྱ་བ་ནི་སྙིང་པོའི་ཕྱག་རྒྱའི་སྔགས་ཀྱི་རིག་པ་

เล่ม ๕๘ · หน้า 268b

ཐམས་ཅད་ཀྱིས་རང་གི་དཀྱིལ་འཁོར་ཆེན་པོ་ལས་བཤད་པའི་ལྷའི་རྣལ་འབྱོར་བསྒོམ་པར་བྱའོ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་གཟུགས་སུ་བདག་ཉིད་བསྒོམས་ལ་སྙིང་གའི་ཕྱག་རྒྱ་ལ་

སྔགས་ཀྱི་རིག་པ་བཟླ་བར་བྱའོ། །སངས་རྒྱས་ཀུན་ལ་དབང་བསྐུར་དང་། །ཞེས་བྱ་བ་ནི། རིན་པོ་ཆེའི་ཅོད་པན་གྱིས། །སངས་རྒྱས་ཀུན་ལ་དབང་བསྐུར་རོ། །མཆོད་པའི་གདུགས་དང་། རྒྱལ་མཚན་དང་། བ་དན་དང་། རིན་པོ་ཆེ་སྣ་བདུན་པོ་དེ་དག་ཉིད་ཀྱིས་སངས་རྒྱས་ཐམས་ཅད་

ལ་མཆོད་པའོ། །དམ་ཚིག་གི་དངོས་གྲུབ་རྣམས་ནི་ནོར་བུའི་རིགས་ཀྱི་དཀྱིལ་འཁོར་ཐམས་ཅད་ཀྱི་དངོས་གྲུབ་བོ། །རྡོ་རྗེ་ལས་རྣམས་འགྲུབ་པར་བྱེད། །ཅེས་བྱ་བ་ནི་སངས་རྒྱས་ཀུན་ལ་དབང་བསྐུར་བ་དང་། མཆོད་པའི་དམ་ཚིག་གི་ལས་རྣམས་ཐ་མི་དད་པར་བསྒྲུབས་པས།

བཅོམ་ལྡན་འདས་འཕགས་པ་ནམ་མཁའི་སྙིང་པོའི་བདག་ཡིན་ནོ་ཞེས་ངེས་པར་བསྒོམ་པར་བྱའོ། །དེ་ནས་ནོར་བུའི་རིགས་ཀྱི་ལྷ་མོའི་དངོས་གྲུབ་འགྲུབ་པར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ཟླ་བའི་དཀྱིལ་འཁོར་གྱི་སྟེང་དུ་ལྷའི་ཕྱག་

རྒྱའི་མཚན་མ་རྣམ་པར་བསམས་ལ། ཕྱག་རྒྱའི་དབུས་སུ་བཟླས་པའི་ཡི་གེ་བཀོད་ནས་སྙིང་པོ་བརྗོད་ཅིང་། བདག་གི་མཚན་མའི་ཕྱག་རྒྱའི་གཟུགས་སུ་བསྒོམས་ལ། མཚན་མའི་ཕྱག་རྒྱ་དེ་ལས་ནོར་བུའི་རིགས་ཐམས་ཅད་སྤྲུལ་ཏེ། དེས་དེ་བཞིན་གཤེགས་པ་ལ་སོགས་

པ་སེམས་ཅན་གྱི་ཁམས་ཐམས་ཅད་དབང་བསྐུར་བས་དབང་བསྐུར་ཏེ། མཆོད་པ་ཐམས་ཅད་ཀྱིས་ཡང་དག་པར་མཆོད་དེ། ནོར་བུ་ཆེན་པོའི་རིགས་ཀྱི་རང་བཞིན་དུ་བྱས་ནས། ཕྱག་རྒྱ་དེ་ལ་གཞུག་པར་བྱའོ། །དེ་ནས་ཕྱག་རྒྱའི་གཟུགས་དེ་སེམས་དཔར་བྱིན་གྱིས་བརླབས་

པའི་སྦྱོར་བས་རྡོ་རྗེ་སེམས་དཔར་བསྒོམས་ལ། གང་གི་ལྷའི་ཕྱག་རྒྱ་ཆེན་པོའི་གཟུགས་སུ་ཡང་བསྒོམ་པར་བྱའོ་ཞེས་བྱ་བ་འདི་ནི་དེ་ཁོ་ན་ཉིད་མ་ཡིན་པ་ལ་མོས་པའི་རྣལ་འབྱོར་པའི་རིམ་པ་ཡིན་ནོ། །གང་ཞིག་ཤིན་ཏུ་དེ་ཁོ་ན་ཉིད་ལ་མོས་པའི་རྣལ་འབྱོར་པ་ནི། དེའི་ཕྱག་རྒྱ་

เล่ม ๕๘ · หน้า 269a

བཅིངས་ལ། སེམས་དཔའ་བྱིན་གྱིས་བརླབ་པའི་སྦྱོར་བ་ཙམ་སྔོན་དུ་བྱས་ལ། རང་གི་ལྷའི་ང་རྒྱལ་བསྐྱེད་ཅིང་བསྒོམ་པར་བྱའོ། །དེ་ལ་དེ་ཁོ་ན་ཉིད་ལ་མོས་པའི་རྣལ་འབྱོར་པའི་མཚན་ཉིད་ཡིན་ཏེ། གང་གི་ཚེ་ལས་དང་པོ་པའི་རྣལ་འབྱོར་པས་རང་ལ་བྱིན་གྱིས་

བརླབ་པ་ལ་སོགས་པའི་ཆོ་ག་རྒྱས་པ་ནས་བརྩམ་པར་བྱ་བའི་ཚོགས་ཐམས་ཅད་ཐུན་བཞིའི་སྦྱོར་བས་ཉིན་རེ་ཞིང་མཚན་མ་ཐོབ་པར་འགྱུར་བའམ། སྐྱེ་བ་གཞན་ལས་གོམས་པའི་མཐུས་སྐྱེས་བུའམ་འགའ་ཞིག་དགེ་བའི་བཤེས་གཉེན་ལས་ཐོབ་པའི་རྣལ་འབྱོར་པ་གདམས་ངག་བསྒོམས་

ནས། ཐོག་མ་བརྩམས་པ་ནས་བཟུང་ནས་རྒྱུན་མི་འཆད་པ་ཉིད་དུ་མཚན་མ་ཉེ་བར་སྐྱེ་བར་འགྱུར་རོ། །དེ་དག་གི་སྟོབས་ཀྱིས་ཕྱག་རྒྱ་བཅིངས་པ་ལ་སོགས་པ་རྣམས་ལ་མངོན་པར་ཞེན་པ་མེད་པར་བསྒོམས་པས་འགྱུར་བ་འདི་ནི་དེ་ཁོ་ན་ཉིད་ལ་གོམས་པའི་རྣལ་འབྱོར་པ་ཡིན་ཏེ། དང་པོར་ལྷག་པར་

མོས་པ་ཙམ་གྱིས་ནི་མ་ཡིན་ནོ། །དེ་སྐད་དུ་ཡང་། དེ་ཉིད་དམན་པའི་རྣལ་འབྱོར་པས། །ལྷ་ལ་དམིགས་པར་འགྱུར་བས་ན། །ལུགས་མ་ལ་སོགས་དག་པ་ལ། །གཟུགས་བརྙན་རྣལ་འབྱོར་ཉེ་བར་བསྐྱེད། །སྐུའམ་རས་རིས་མཆོད་རྟེན་རྣམས། །ཤིན་ཏུ་མཉམ་གཞག་རྣལ་འབྱོར་པས། །མངོན་

སུམ་དུ་ནི་མཐོང་བ་ན། །དེ་ནི་རྫོགས་པ་ཡིན་པར་བཤད། །དཀར་དང་སེར་པོའི་དཀྱིལ་འཁོར་ནི། །འོད་ཟེར་ཕྲེང་བ་འཁྲིགས་པ་ཡི། །ངོ་མཚར་བར་ནི་འགྱུར་བ་དེ། །བློ་ལྡན་གྱིས་ནི་མཁའ་ལ་མཐོང་། །བློ་ལྡན་ཁ་དོག་སྣ་ཚོགས་དེས། །གང་གིས་ཡིད་ནི་མཚོན་པར་བྱ། །

དཀར་པོ་དགེ་བར་ཤེས་པར་བྱ། །མི་ཤེས་པ་ལ་ནག་པོར་སྣང་། །ཆགས་ཅན་ཤིན་ཏུ་དམན་པར་བཤད། །ཤིན་ཏུ་དགའ་ལ་དེ་བཞིན་སེར། །སྤྲིན་གྱིས་ནོན་པ་ལྟ་བུ་ནི། །མཁས་པས་རྨོངས་པར་ཤེས་པར་བྱ། །བདག་ཉིད་ཡོངས་སུ་དག་པའི་ཆོ་གའོ། །མཚན་མ་འབྱུང་བར་འགྱུར་བ་

ན། །སེམས་ནི་བརྟན་པར་ཤེས་པར་བྱ། །དེ་ལྟར་མཚན་མ་ཉིད་རྣམས་ནི། །སངས་རྒྱས་རྒྱལ་བའི་བདེ་མཆོག་གི། །རྡོ་རྗེ་རིན་ཆེན་ཆུ་སྐྱེས་དང་། །སྣ་ཚོགས་ལྕགས་ཀྱུ་ཉི་མ་དང་། །རལ་གྲི་གོ་ཆ་མདའ་གཞུ་དང་། །རིན་ཆེན་རྒྱལ་མཚན་རྣམས་ཀྱིས་བརྒྱན། །འཁོར་ལོ་མཆེ་བ་དེ་བཞིན་མགུ། །

เล่ม ๕๘ · หน้า 269b

བཞད་པས་གསུངས་པ་ཁུ་ཚུར་བཅངས། །སྒེག་མོ་དེ་བཞིན་ཕྲེང་བ་མོ། །གླུ་མ་དང་ནི་གར་མ་བདག །མེ་ཏོག་བདུག་པ་མར་མེ་དང་། །དེ་བཞིན་དྲི་ཆབ་ལ་སོགས་ཚོགས། །མེ་ཏོག་ཀུན་དགའ་དྲི་གཙང་ཁང་། །དགེ་སློང་དེ་བཞིན་དགེ་སློང་མ། །དངོས་གྲུབ་དྲང་སྲོང་གཉེན་རྣམས་དང་། །རྒྱལ་

རིགས་སྐྱེ་བོས་བསྔགས་པ་དང་། །བུ་མོ་གཞོན་ནུས་བརྒྱན་པ་དང་། །ཆུ་བོ་རྒྱ་མཚོ་ནེའུ་སིང་དང་། །གདུགས་དང་རྒྱལ་མཚན་བ་དན་དང་། །རོལ་མོ་སྣ་ཚོགས་བརྡུང་བ་དང་། །ཤེས་རབ་ཕ་རོལ་ཕྱིན་ལ་སོགས། །ཤེས་པའི་སྒྲ་ནི་དྲི་མ་མེད། །ཉི་ཟླའི་དབྱིབས་དང་འདྲ་བ་ནི། །པདྨ་ས་གཞི་འོད་

དང་བཅས། །ནམ་མཁའི་གློག་ནི་སྣ་ཚོགས་མཚུངས། །རྣལ་འབྱོར་པ་ལ་རྟག་ཏུ་སྐྱེ། །དེ་དག་ཐམས་ཅད་རྣམ་སྤངས་པས། །མཚན་མ་མེད་ཅིང་འགྲིབ་པ་མེད། །རྟོག་པ་ཐམས་ཅད་རྣམ་སྤངས་ནས། །རྣལ་འབྱོར་རྟོག་པ་མེད་ལ་གནས། །དེ་ནས་རྣལ་འབྱོར་པ་དེ་ལ། །དགའ་བ་རྣམ་པ་ལྔ་

བསྐྱེད་དེ། །སྐད་ཅིག་ཐང་ཅིག་རྒྱུན་དག་ལ། །དེ་བཞིན་མཐར་ཐུག་འགྱུར་བ་དང་། །ཆོས་རྣམས་ཐམས་ཅད་ངེས་པས་ནི། །སངས་རྒྱས་ཀུན་ཞེས་རབ་ཏུ་གྲགས། །དེ་ལ་སྐད་ཅིག་མའི་དགའ་བ་ནི། །གང་ཚེ་སྐད་ཅིག་རེ་རེ་སེམས། །དམིགས་པ་ལ་ནི་གནས་པ་ན། །གཡེང་བ་འགོག་

པ་མེད་པས་ན། །དེ་ཕྱིར་སྐད་ཅིག་ཅེས་གྲགས་སོ། །དེ་ལ་ཐང་ཅིག་ཅེས་བྱ་བའི་བར་དུ་དགའ་བ་ནི། །གང་ཚེ་སྦྲང་མའི་ཁ་དག་ནས། །སྦྲང་རྩི་འབྱུང་བ་མྱངས་པ་ཡིས། །རྐང་པ་སྤྱི་བོའི་མཐར་ཐུག་པའི། །ལུས་ལ་ཁྱབ་པར་མཉམ་གཞག་པར། །བཀྲེས་དང་ནང་འབྱུང་བསལ་

ནས་ནི། །དེ་བཞིན་ལུས་ནི་ལས་རུང་དང་། །སེམས་ནི་དམིགས་པ་ལ་ཆགས་ནས། །རྟག་ཏུ་བརྟན་པར་གནས་པར་འགྱུར། །དེ་ལ་རྒྱུན་དུ་དགའ་བ་ནི། །དགའ་བས་མཆི་མ་འབྱུང་བ་དག། །མ་བསམས་ལུས་ལ་འབྱུང་བར་འགྱུར། །མགུ་བ་ཡི་ནི་ཏིང་ངེ་འཛིན། །དེ་ནི་རྒྱུན་ཞེས་བྱ་

བར་བཤད། །དེ་ནས་མཐར་ཐུག་པའི་དགའ་བ་ནི། གང་ཚེ་དམིགས་པ་ལ་ཆགས་པའི། །རྣལ་འབྱོར་པ་ལ་སེམས་འབྱུང་བ། །དེ་ཚེ་དགའ་བའི་ཁྱད་པར་ནི། །དོན་གཞན་ཉེ་བར་སྐྱེ་བར་འགྱུར། །གང་ཚེ་ལུས་ལ་སྐྱེས་པའི་རླུང་། །ལྷག་པར་རབ་ཏུ་ཞུགས་གྱུར་ན། །སེམས་ནི་རྣམ་པར་འཁྲུལ་

เล่ม ๕๘ · หน้า 270a

བ་དང་། །གཡེང་བ་སྐྱེ་བར་མི་འགྱུར་བ། །དེ་ཚེ་རྣལ་འབྱོར་སེམས་རིག་པས། །སྲང་མདའི་ཚུལ་དུ་སྦྱང་བར་བྱ། །དགེ་བ་སྲུང་བའི་ཚུལ་དུ་ནི། །ཇི་ལྟ་བ་བཞིན་ངེས་པར་སྦྱར། །དེ་ལ་ཆོས་ཐམས་ཅད་དུ་ངེས་པའི་དགའ་བ་ནི། སོས་ཀའི་ཚ་བས་གདུངས་པ་ཡི། །

ཇི་ལྟར་ལམ་དུ་འཇུག་པའི་མི། །གངས་ཀྱི་ཆུ་ནི་ལེན་པའི་ཚེ། །ཚ་བའི་དུས་ཀྱིས་སྡུག་བསྔལ་ཏེ། །གང་ཞིག་འགོག་པར་བྱེད་པ་ན། །ཐམས་ཅད་རྣམ་པར་འཇིགས་པར་འགྱུར། །དགའ་ཞིང་བདེ་བའི་ཁྱད་པར་ནི། །ཡང་དང་ཡང་དུ་འཕེལ་བར་གཞག །རྣམ་པ་ཐམས་ཅད་ངེས་པ་ན། །

ཆོས་རྣམས་བླ་ན་མེད་པ་འཐོབ། །ལུས་ནི་ཤིན་ཏུ་སྤངས་པ་དང་། །ཉོན་མོངས་གསུམ་ནི་རྣམ་དག་པས། །བསམ་གཏན་དགའ་བའི་ཏིང་ངེ་འཛིན། །གཟུགས་རྣམས་ཀྱང་ནི་བསགས་པ་དང་། །ས་དང་ཕ་རོལ་ཕྱིན་པ་དང་། །མངོན་ཤེས་རྣམས་ནི་འབྱུང་བ་དང་། །འདོད་ཆགས་

ལ་སོགས་ཉེས་པ་ཆེ། །ཞིག་འགྱུར་དེ་ཚེ་རྣལ་འབྱོར་པས། །དང་པོའི་སྤྱོད་པ་ལ་ཞུགས་པས། །འགྲུབ་འགྱུར་འདི་ནི་ཐེ་ཚོམ་མེད། །ཉོན་མོངས་དགྲ་རྣམས་ཞི་ཕྱིར་དང་། །ཏིང་འཛིན་འཕེལ་བར་བྱ་བའི་ཕྱིར། །རང་ལྷའི་རྣལ་འབྱོར་ལ་གནས་ནས། །དེ་ནས་སྦྱིན་སྲེག་བརྩམ་

པར་བྱ། །ཟླ་བའི་དཀྱིལ་འཁོར་དབུས་སུ་ནི། །བདག་ཉིད་རྟག་ཏུ་བསམ་པར་བྱ། །དེ་ཡི་ལུས་ཀྱི་སྙིང་ག་ལས། །འོད་ཟེར་འབར་བའི་ཚོགས་གསལ་བའི། །འོད་ཀྱི་དཀྱིལ་འཁོར་ཕྲེང་བ་ཡིས། །ཕྱོགས་བཅུར་བཞུགས་པའི་རྒྱལ་བ་དང་། །སྟོང་གསུམ་རྡུལ་དང་མཚུངས་པ་

ཡི། །ཁ་དོག་དཀར་པོ་ལ་སོགས་པ། །བསྡུས་ནས་ལུས་ལ་གཞུག་པར་བྱ། །ཞི་བའི་སྦྱིན་སྲེག་ཅེས་སུ་བཤད། །རྒྱས་པའི་ཆོ་ག་སེམས་ཅན་རྣམས། །མགུ་བའི་གཟུགས་སུ་བསམ་པར་བྱ། །ཤིན་ཏུ་ཉོན་མོངས་ཞི་བའི་ཕྱིར། །ཁྲོ་བོའི་གཟུགས་ཀྱི་ཁྱད་པར་བྱ། །རྗེས་སུ་ཆགས་པ་

བུད་མེད་ནི། །སྣ་ཚོགས་གཟུགས་ཅན་བསམ་པར་བྱ། །ལས་དང་པོ་པའི་སྦྱིན་སྲེག་འདི། །གཙོ་བོས་སྔར་ནི་བསྟན་པ་ཡིན། །དེ་ལྟར་བརྟན་པར་བྱས་ནས་ནི། །ཏིང་འཛིན་ཉམས་པར་མི་འགྱུར་རོ། །གཞན་ཡང་བཤད་པ། དེ་ཉིད་བསམས་པའི་རྣལ་འབྱོར་པས། །ལྷ་ལ་དམིགས་པར་

เล่ม ๕๘ · หน้า 270b

འགྱུར་བ་ན། །རྣལ་འབྱོར་རང་གི་དམ་ཚིག་བདག །དམ་པའི་ཡི་གེ་འགྲུབ་པར་འགྱུར། །ལུགས་མ་ལ་སོགས་གཟུགས་བརྙན་ལ། །རྣལ་འབྱོར་སྐྱེ་བར་མི་འགྱུར་གྱི། །བྱང་ཆུབ་སེམས་ལ་རབ་བརྩོན་པས། །དེ་ལས་རྣལ་འབྱོར་ལྷར་འགྱུར་རོ། །བྱང་ཆུབ་སེམས་ཀྱི་རྡོ་རྗེ་འདི། །སངས་རྒྱས་

ཀུན་གྱི་བདག་ཉིད་དེ། །དེ་ཕྱིར་རྣལ་འབྱོར་ཀུན་བདག་གིས། །སངས་རྒྱས་ཐམས་ཅད་ཐོབ་པར་འགྱུར། །བདག་ཉིད་སངས་རྒྱས་ཀུན་དང་ནི། །གཟི་ཅན་ཀུན་དུ་ངེས་འགྱུར་བས། །རང་གི་ལྷ་ཡི་སྦྱོར་བ་ཡིས། །དེ་ཕྱིར་བདག་ཉིད་བསྒྲུབ་པར་བྱ། །འདི་ནི་སངས་རྒྱས་ཐམས་ཅད་

དང་། །གཟི་ཅན་ཐམས་ཅད་ཉིད་དང་ནི། །རྡོ་རྗེ་འཛིན་པ་ཐམས་ཅད་དུ། །ཚེ་འདི་ཉིད་ལ་འགྲུབ་པར་འགྱུར། །ཞེས་བཅོམ་ལྡན་འདས་དཔལ་རྡོ་རྗེ་སེམས་དཔས་གསུངས་སོ། །དེ་བཞིན་གཤེགས་པའི་རིགས་ལ་སོགས་པའི་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་གྱི་

བཤད་པ་རྫོགས་སོ།། །།འཕགས་པ་དེ་ཁོ་ན་ཉིད་བསྡུས་པའི་འགྲེལ་པ་དེ་ཁོ་ན་ཉིད་སྣང་བར་བྱེད་པ་ཞེས་བྱ་བའི་རྒྱུད་ཕྱི་མའི་བཤད་པའོ། །དེ་ལྟར་མཆོག་ཏུ་གྱུར་པའི་སེམས་ཅན་རྣམས་རྗེས་སུ་གཟུང་བའི་ཕྱིར་རྒྱུད་ཕྱི་མ་བཤད་ནས། ད་ནི་བསྒོམས་པས་འཇིགས་ཤིང་

སྐྲག་པའི་བྱ་བ་ལ་མངོན་པར་ཞེན་པའི་སེམས་ཅན་ཐམས་ཅད་རྗེས་སུ་གཟུང་བའི་ཕྱིར། རྟོག་པ་ཐམས་ཅད་ཀྱི་རྒྱུད་ཕྱི་མའི་ཕྱི་མ་གསུངས་པ་ཡིན་ནོ། །འདིར་ཡང་རྟོག་པ་ཐམས་ཅད་ཀྱི་རྒྱུད་ཕྱི་མའི་ཕྱི་མར་ནི་རང་གི་རིགས་ཀྱི་དཀྱིལ་འཁོར་ཆེན་པོ་མཐོང་བ་ཙམ་གྱིས་རང་གི་རིགས་ལས་མཐོང་

བའི་སྙིང་པོ་དང་། ཕྱག་རྒྱ་དང་། སྔགས་དང་། རིག་སྔགས་བསྒྲུབ་པ་ནི་ཕྱག་རྒྱ་ཆེན་པོས་འཇིགས་ཤིང་སྐྲག་པ་བསོད་ནམས་ཆུང་བའི་སེམས་ཅན་རྗེས་སུ་གཟུང་བའི་ཕྱིར། བཅོམ་ལྡན་འདས་ཀྱིས་རྗེས་སུ་གནང་བར་མཛད་པ་ཡིན་ནོ། །རང་གི་རིགས་ཀྱི་དཀྱིལ་འཁོར་ཆེན་པོ་ལས་

གསུངས་པའི་བསྒྲུབ་པར་བྱ་བའི་དངོས་པོ་ཐམས་ཅད་ཀྱི་སྒྲ་ནི་སྙིང་པོ་ཞེས་བྱ་བའོ། །རང་གི་རིགས་ཀྱི་གཟུངས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ཐམས་ཅད་ཀྱི་སྒྲ་ནི་ཕྱག་རྒྱའོ། །རང་གི་རིགས་ཀྱི་ཆོས་ཀྱི་དཀྱིལ་འཁོར་ལས་གསུངས་པའི་བསྒྲུབ་པར་བྱ་བའི་དངོས་

เล่ม ๕๘ · หน้า 271a

གྲུབ་ཐམས་ཅད་ཀྱི་སྒྲ་ནི་སྔགས་སོ། །རང་གི་རིགས་ཀྱི་ལས་ཀྱི་དཀྱིལ་འཁོར་ལས་གསུངས་པའི་བསྒྲུབ་པར་བྱ་བའི་དངོས་གྲུབ་ཐམས་ཅད་ཀྱི་སྒྲ་ནི་རིགས་པ་ཡིན་ཞེས་བཅོམ་ལྡན་འདས་ཀྱིས་བསྟན་ཏོ། །དེ་ལ་དཀྱིལ་འཁོར་ཆེན་པོ་མཐོང་བའི་དུས་

ངེས་པ་དང་། བཟླས་པའི་གྲངས་དང་། རས་རིས་དང་། ཕྱིའི་མཆོད་པ་རྣམ་པ་ལྔ་ལ་སོགས་པའི་མཆོད་པ་དང་། ཕྱག་རྒྱའི་མཆོད་པ་དང་། སྐྱིལ་མོ་ཀྲུང་ལ་སོགས་པའི་ངེས་པ་ནི་ཡོ་བྱད་དེ། དེ་ལ་མངོན་པར་ཞེན་པ་རྣམས་ཀྱི་དོན་བསྟན་པའི་ཕྱིར། དེ་ནས་ཞེས་བྱ་བ་

ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་སྐབས་སུ་བབ་པ་སྟེ། ལྟ་བ་ངན་པ་ལ་སོགས་པའི་སེམས་ཅན་རྗེས་སུ་གཟུང་བའི་སྐབས་སུ་བབ་པ་ཡིན་ནོ་ཞེས་བྱ་བའི་དོན་ཏོ། །དེ་ལ་ལྟ་བ་ངན་པ་ནི་བྱ་བ་ཙམ་གྱིས་ཀུན་ལ་སྨད་པ་ཟབ་མོའི་ཆོས་ལ་མི་མོས་པའོ། །ཆགས་

བྲལ་ནི་གསང་བ་བསྒོམ་པ་རབ་ཏུ་སྤོང་བར་བྱེད་པ་དེ་ལྟ་བུར་གྱུར་པ་དེ་དག་རྒྱུད་ཕྱི་མ་ལས་བཤད་པའི་གསང་བ་འདི་ནི་མི་རིགས་ཏེ། ལྷག་པར་མོས་པའི་དོན་མི་འགྲུབ་པའི་ཕྱིར་རོ། །དེ་དག་སེམས་ཅན་ཀུན་ལ་ཕན་དོན་དུ་ནི་དེ་བཞིན་དུ་བདེ་བའི་འབྲས་བུ་ཐོབ་པའི་ཕྱིར་རོ། །དེ་བཞིན་ཆོ་ག་

བཤད་པར་བྱའོ་ཞེས་བྱ་བ་ནི། ཇི་ལྟར་མཆོག་ཏུ་གྱུར་པའི་སེམས་ཅན་རྗེས་སུ་གཟུང་བའི་ཕྱིར། མཆོག་ཏུ་གྱུར་པའི་སེམས་ཅན་དང་མཐུན་པའི་ཆོ་ག་བྱ་བ་བསྟན་ནས། དེ་ནས་ཡོངས་སུ་མ་སྨིན་པའི་སེམས་ཅན་ཡོངས་སུ་སྨིན་པར་བྱ་བའི་ཕྱིར། ལས་དང་པོ་པའི་སེམས་ཅན་དང་

རྗེས་སུ་མཐུན་པའི་ཆོ་ག་བཤད་པར་བྱའོ་ཞེས་བྱ་བའི་ཐ་ཚིག་གོ། །དེ་ནས་ཡང་ཞེས་བྱ་བའི་སྒྲ་ནི་དེ་མ་ཐག་པའོ། །ཕྱག་ན་རྡོ་རྗེ་ནི་རྡོ་རྗེ་སེམས་དཔའོ། །ཡང་གི་སྒྲ་ནི་རྒྱུད་ཕྱི་མ་ལ་ལྟོས་པའོ། །དེ་བཞིན་གཤེགས་པ་ཐམས་ཅད་ཀྱི་སྒྲ་ནི་བཤད་ཟིན་ཏོ། །རིགས་ནི་ཇི་སྐད་དུ་བཤད་པའི་

རིགས་རྣམས་སོ། །ཡོ་བྱད་ནི་དཀྱིལ་འཁོར་ཆེན་པོར་བསྟན་པའི་མཆོད་པ་ལ་སོགས་པ་དེ་དག་སྒྲུབ་པར་བྱེད་པའོ། །དེའི་ཆོ་ག་རྒྱས་པ་ནི་རྣམ་པ་སྣ་ཚོགས་པ་སྟེ། འདི་གསུངས་པ་ནི་བཅོམ་ལྡན་འདས་ཕྱག་ན་རྡོ་རྗེས་བཤད་པའོ། །དེ་ལ་ཞེས་བྱ་བའི་སྒྲ་ནི་ངག་ཉེ་བར་དགོད་པའོ། །འདི་

เล่ม ๕๘ · หน้า 271b

ཞེས་བྱ་བ་ནི་འཆད་པར་འགྱུར་བའི་བློ་ལ་གནས་པ་སྟེ། དཀྱིལ་འཁོར་ཆེན་པོར་བཤད་པའི་མཆོད་པ་ལ་སོགས་པའི་ཡོ་བྱད་དོ། །དེ་བཞིན་གཤེགས་པ་ཐམས་ཅད་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་ཏེ། དེ་དག་གི་ཡོ་བྱད་དང་། ཆོ་ག་ཐམས་ཅད་རྒྱས་པར་གྱུར་

པ་ནི་བསྟན་པའོ། །དེ་ནས་ཞེས་བྱ་བ་ནི་དམིགས་ཀྱིས་དགར་བའོ། །དེ་བཞིན་གཤེགས་པ་ལ་སོགས་པའི་རིགས་ཀྱི་སྙིང་པོ་དང་། ཕྱག་རྒྱ་དང་། སྔགས་དང་། རིགས་རྣམས་ཀྱི་ནང་ནས་རེ་ཞིག་དེ་བཞིན་གཤེགས་པ་རྣམས་དེའི་རིགས་ཀྱི་སྙིང་པོའི་ཡོ་བྱད་འབྱུང་བ་ཡིན་ནོ། །དཀྱིལ་འཁོར་

ཆེན་པོ་མཐོང་ནས་ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་སྔར་བཤད་པའི་ཆོ་ག་མཐོང་ནས་བདུག་པ་དང་མེ་ཏོག་དང་། མར་མེ་དང་། དྲིའི་ཕྱག་རྒྱ་རྣམས་ཀྱིས་མཆོད་པར་བྱ་སྟེ་ཞེས་བྱ་བ་ནི་རྡོ་རྗེ་བདུག་པ་མ་ལ་སོགས་པའི་ལས་ཀྱི་ཕྱག་རྒྱ་རྣམ་པ་བཞི་གང་ལས་བྱུང་བས་བདག་ཉིད་ཡང་

དག་པར་མཆོད་ལ། རྡོ་རྗེ་བཟླས་པས་བརྩམ་པར་བྱའོ་ཞེས་ཤེས་པར་བྱའོ། །ཇི་ལྟར་འདུག་སྟེ་ཞསབྱ་བ་ནི་དེ་བཞིན་གཤེགས་པའི་ཟློས་པ་པོས་བྱང་ཆུབ་ཀྱི་སྙིང་པོ་ལ་སོགས་པར་འདུག་པ་དང་། རྡོ་རྗེ་སེམས་དཔའ་ལ་སོགས་པ་ནི་ཀུན་དགའ་ར་བ་ལ་སོགས་པ་སྟེ། དེ་སྐད་དུ་ཡང་།

དེ་བཞིན་གཤེགས་པ་ཐམས་ཅད་འདུས་ནས་ཞེས་བྱ་བ་ལ་སོགས་པ་རྒྱུད་ལས་བཤད་པས་སོ། །དེ་ལ་ཇི་སྐད་བསྟན་པའི་གནས་སུ་གནས་པ་ནི་ཇི་ལྟ་བ་བཞིན་དུ་གནས་པའོ། །དུས་ཇི་ཙམ་ཞིག་ཏུ་གནས་ཤེ་ན། ཟླ་བ་བཞིར་ཞེས་བྱ་བ་སྨོས་ཏེ། ཟླ་བ་བཞིར་གནས་ཇི་ལྟ་བ་བཞིན་དུ་

འདུག་ཅིང་། དེ་ཟློས་ཤིང་གནས་ཏེ། དུས་བཞིར་བདུག་པ་ལ་སོགས་པས་མཆོད་པ་བྱའོ་ཞེས་བྱ་བ་ནི་སྔ་དྲོ་དང་། ཉི་མ་ཕྱེད་དང་། དགོངས་ཀ་དང་། མཚན་ཕྱེད་ཀྱི་དུས་སུ་བདུག་པ་ལ་སོགས་པའི་ཕྱག་རྒྱ་བཞིས་བདག་ཉིད་དང་། དེ་བཞིན་གཤེགས་པ་ཐམས་ཅད་ལ་ཡང་དག་པར་མཆོད་

པར་བྱའོ། །དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་མངོན་པར་རྟོགས་པའི་མཚན་བརྒྱ་རྩ་བརྒྱད་པ་ཕྱིས་འཆད་པར་འགྱུར་བའི་དེ་བཞིན་གཤེགས་པའི་མཚན་བརྒྱ་རྩ་བརྒྱད་པས་དེ་བཞིན་གཤེགས་པའི་རྣལ་འབྱོར་པས་དེ་བཞིན་གཤེགས་པ་ཐམས་ཅད་ལ་བསྟོད་པར་བྱའོ། །

เล่ม ๕๘ · หน้า 272a

རྡོ་རྗེ་སེམས་དཔའ་ལ་སོགས་པའི་ཟློས་པ་པོས་ནི་སྔར་བཤད་པའི། རྡོ་རྗེ་སེམས་དཔའ་སེམས་དཔའ་ཆེ། །ཞེས་བྱ་བ་ལ་སོགས་པ་རྡོ་རྗེ་སེམས་དཔའི་མཚན་བརྒྱ་རྩ་བརྒྱད་པས་བསྟོད་པར་བྱའོ། །ཕྱག་བཞིས་ཕྱག་བྱ་བའི་ཚུལ་གྱིས་ཕྱག་བྱས་ལ་ལུས་འབུལ་

བའི་མཆོད་པ་ཡང་བྱའོ་ཞེས་བཤད་པ་ཡིན་ནོ། །དེ་ལྟར་ཕྱག་རྣམ་པ་བཞི་བྱས་ནས། བཟླས་པའི་ཕྲེང་བ་བླངས་ཏེ་འདོད་པའི་ཡོན་ཏན་ཐམས་ཅད་ལ་ཆགས་པ་དང་བྲལ་བས་ཇི་ལྟ་བ་བཞིན་དུ་བཟླས་ན་མྱུར་དུ་དངོས་གྲུབ་ཏུ་འགྱུར་རོ་ཞེས་བྱ་བར་སྦྱར་རོ། །དེ་ནས་སྒེག་མོ་ལ་སོགས་པ་མཆོད་

པ་རྣམ་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་ནི་འདོད་པའི་ཡོན་ཏན་ཐམས་ཅད་དོ། །ཁ་ཟས་ཀུན་དང་ཞེས་བྱ་བ་ནི་ཉ་ཤ་དང་། ཤ་དང་། སྒོག་པ་དང་། བཙོང་དང་། ལྷག་མ་དང་། ལོག་སྲིད་ཀྱི་ལྷ་བཤོས་དང་། དཀོན་མཆོག་གསུམ་གྱི་

བཤོས་གཙང་སྤངས་པ་དང་། ཁ་ན་མ་ཐོ་བ་མེད་པ་ནི་བཟའ་བ་ཐམས་ཅད་དོ། །དེ་བཞིན་དུ་འདོད་པ་ཀུན་ལ་ཉེ་བར་སྤྱོད་ཀྱང་གང་ལ་ཡོང་ཁ་ན་མ་ཐོ་བའི་ཉེས་པར་མི་འགྱུར་རོ། །རང་གི་ལྷ་ནས་བརྩམས་ནས་སྒེག་མོ་ལ་སོགས་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་

པ་བཅུ་དྲུག་གིས་མཆོད་ལ་བསྒོམ་པ་ནི། ཀུན་ལ་ཉེ་བར་ལོངས་སྤྱོད་ཅིང་ངོ་། །སྙིང་པོའི་དོན་དུ་ཞེས་བྱ་བ་ནི། བཛྲ་དྷཱ་ཏུ་ཞེས་བྱ་བ་དེ་བཞིན་གཤེགས་པ་ལྔའི་སྙིང་པོའི་དོན་འདི་ལ་ལྷག་པར་མོས་པའོ། །བདག་ཉིད་དང་སངས་རྒྱས་ཀྱི་མདུན་དུ་ཚིག་ཙམ་གྱིས་ཀྱང་བསྒོམས་ལ་ཞེས་བྱ་བ་ནི་

བདག་ཉིད་དམ་རང་གི་དེ་བཞིན་གཤེགས་པ་དེ་མདུན་དུ་བསྒོམས་པའམ། རང་ཉིད་དེ་བཞིན་གཤེགས་པར་བསྒོམས་ནས་བཟླས་ན་མྱུར་བར་དངོས་གྲུབ་ཏུ་འགྱུར་རོ། །གང་ཞིག་དེ་བཞིན་གཤེགས་པ་རྣམ་པར་སེམས་རྩེ་གཅིག་པར་མི་ནུས་པ་དེ་ནི་ཚིག་ཙམ་གྱིས་ཀྱང་བདག་ཉིད་དེ་

བཞིན་གཤེགས་པར་བསྒོམས་པའམ་མདུན་དུ་བྱས་ལ། ཅི་དགར་བྱེད་ཅིང་ཞེས་བྱ་བ་ནི་སྟན་མི་འདྲ་བ་དང་། བཀྲེས་པ་མེད་པ་དང་། སྐོམ་པ་མེད་པ་དང་། སྐྱིགས་བུ་དང་། སྒྲེགས་པ་ལ་སོགས་པ་དང་། ཉེས་པར་མི་འགྱུར་རོ་ཞེས་བསྟན་པའི་ཕྱིར་རོ། །རྡོ་རྗེའི་ཚིག་གིས་ལེན་

เล่ม ๕๘ · หน้า 272b

བརྒྱ་རྩ་བརྒྱད་བཟླས་ནས། མྱུར་དུ་དངོས་གྲུབ་ཏུ་འགྱུར་ཞེས་བྱ་བ་ནི་བརྒྱ་རྩ་བརྒྱད་ནི་བརྒྱ་ལས་བརྒྱད་ལྷག་པའོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་དེ་བཞིན་གཤེགས་པའི་རྣལ་འབྱོར་པས་རང་ལ་བྱིན་གྱིས་བརླབས་པ་ལ་སོགས་པ་བྱས་

ནས། དེ་བཞིན་དུ་བདུག་པ་ལ་སོགས་པའི་ཕྱག་རྒྱ་རྣམ་པ་བཞིས་བདག་ཉིད་ཡང་དག་པར་མཆོད་ལ། གཞལ་ཡས་ཁང་དང་གདན་ཇི་ལྟ་བ་བཞིན་དུ་སྤྲུལ་ལ། རང་གི་གདན་ལ་སྔ་མ་བཞིན་དུ་ཕྱག་རྒྱ་ཆེན་པོས་འདུག་སྟེ། རང་གི་དེ་བཞིན་གཤེགས་པའི་མདུན་དུ་ཡོངས་སུ་

བརྟགས་ནས་རྣལ་འབྱོར་གྱི་གནས་ལ་བཛྲ་དྷཱ་ཏུ་ཞེས་བརྗོད་ཅིང་སྤྲུལ་ལ། བསྡུ་བ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་ལ་ཕྱིའི་མཆོད་པ་རྣམ་པ་ལྔ་དང་། སྒེག་མོ་ལ་སོགས་པའི་རྣམ་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་དག་ཅིང་བདེ་བ་མ་ལ་སོགས་པ་མཆོད་

པ་རྣམ་པ་བཅུ་དྲུག་གིས་ཡང་དག་པར་མཆོད་ལ་ཕྱག་བཞི་བྱས་ཏེ། གཡོན་པའི་ཁུ་ཚུར་གྱིས་ཆོས་གོས་འཛིན་པའི་ཚུལ་ཅན་གྱིས་དེ་བཞིན་གཤེགས་པའི་རྡོ་རྗེ་བླངས་ལ། ལག་པ་གཡས་པས་བགྲང་ཕྲེང་སྙིང་གར་བཟུང་ནས་བཟླས་པའི་དོན་གྱི་དེ་བཞིན་གཤེགས་པ་ཐམས་ཅད་ཀྱི་

བདག་ཉིད་དུ་བསྒོམས་ནས་བརྒྱ་རྩ་བརྒྱད་དམ་སྟོང་རྩ་བརྒྱད་ཟློས་ཤིང་དེ་བཞིན་གཤེགས་པ་མདུན་དུ་བསྒོམ་པར་བྱའོ། །ཆོ་ག་འདི་ནི་དེའི་གཟུགས་བརྙན་ལ་གུས་པས་གསོལ་བ་འདེབས་པར་འཇུག་པའམ། ལྟ་བའམ་ཐུན་བཞི་རུ་བཟླས་ན་རིང་པོ་མི་ཐོགས་ཞེས་བྱའོ། །ལྷག་

མ་ནི་ཕྱིས་འཆད་པར་འགྱུར་བས་ཤེས་པར་བྱའོ། །རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའམ། དེ་བཞིན་གཤེགས་པའི་རིགས་རྣམས་ནི་རང་ཉིད་ཀྱི་གཡོན་པའི་ཁུ་ཚུར་གྱིས་དང་པོའི་རྡོ་རྗེ་བླངས་ལ། ལག་པ་གཡས་པས་བགྲང་ཕྲེང་བགྲང་

ཞིང་བཟླས་པར་བྱའོ། །ཁྱད་པར་འདི་ཡིན་ཏེ། འདི་ལྟར་དེའི་རྣལ་འབྱོར་པས་སྒེག་མོ་ལ་སོགས་པའི་མཆོད་པ་རྣམ་པ་བཞིས་བདག་ཉིད་མཆོད་པར་བྱའོ། །དེ་ལྟར་ཟླ་བ་བཞི་བསྙེན་པ་བྱས་ནས། མཚན་ཐོག་ཐག་བསྒྲུབས་ན་དེའི་རྗེས་ལ་ལས་ཀྱི་དངོས་གྲུབ་འགྲུབ་པར་

เล่ม ๕๘ · หน้า 273a

འགྱུར་རོ། །དེ་ལ་དེའི་ལས་ནི་འདི་ཡིན་ཏེ། །སངས་རྒྱས་རྗེས་སུ་དྲན་འགྲུབ་ན། །སངས་རྒྱས་ཉིད་དུ་མྱུར་དུ་འགྱུར། །སེམས་དཔའི་རྡོ་རྗེ་མ་གྲུབ་ན། །ཕྱག་རྒྱ་ཀུན་གྱི་བདག་པོར་འགྱུར། །རྡོ་རྗེ་རིན་ཆེན་མའི་ཕྱག་རྒྱས། །དེའི་ནི་རྡོ་རྗེ་ཀུན་

དབང་འགྱུར། །ཆོས་ཀྱི་རྡོ་རྗེ་མ་གྲུབ་ན། །སངས་རྒྱས་ཆོས་ནི་འཛིན་པར་འགྱུར། །ལས་ཀྱི་རྡོ་རྗེ་མའི་ཕྱག་རྒྱས། །རྡོ་རྗེ་ལས་ནི་བྱེད་པར་འགྱུར། །སེམས་དཔའི་ཕྱག་རྒྱ་བཅིངས་པ་ཡིས། །རྡོ་རྗེ་སེམས་དཔའ་འགྲུབ་པར་འགྱུར། །རྡོ་རྗེ་འདྲེན་པའི་ཆོ་ག་ཡིས། །རྡོ་རྗེ་

འཛིན་པ་སྤྱན་འདྲེན་འགྱུར། །རྡོ་རྗེ་འདོད་པའི་ཕྱག་རྒྱ་ཡིས། །སངས་རྒྱས་ཐམས་ཅད་རྗེས་མཉེས་བྱེད། །རྡོ་རྗེ་ལེགས་པའི་ཆོ་ག་ཡིས། །སངས་རྒྱས་ཐམས་ཅད་དགྱེས་པར་བྱེད། །རིན་ཆེན་ཕྱག་རྒྱའི་ཆོ་ག་ཡིས། །སངས་རྒྱས་དབང་བསྐུར་སྦྱིན་པར་བྱེད། །རྡོ་རྗེ་གཟི་

བརྗིད་ཆོ་ག་ཡིས། །རྡོ་རྗེ་གཟི་བརྗིད་མྱུར་དུ་འགྲུབ། །རྡོ་རྗེ་དཔལ་འཛིན་བསྟེན་པས་ན། །རེ་བ་རྣམས་ནི་ཡོངས་སུ་སྐོང་། །རྡོ་རྗེ་བཞད་པའི་ཆོ་ག་ཡིས། །སངས་རྒྱས་ཀུན་དང་མཉམ་པར་བཞད། །རྡོ་རྗེ་ཆོས་ཀྱི་ཆོ་ག་ཡིས། །རྡོ་རྗེ་ཆོས་ནི་འཛིན་པར་འགྱུར། །རྡོ་རྗེ་རྣོན་པོའི་

ཆོ་ག་ཡིས། །སངས་རྒྱས་ཀུན་གྱི་ཤེས་རབ་མཆོག །རྡོ་རྗེ་འཁོར་ལོ་འཛིན་བསྟེན་ནས། །ཆོས་ཀྱི་འཁོར་ལོ་བསྐོར་བར་འགྱུར། །རྡོ་རྗེ་གསུངས་པའི་ཆོ་ག་ཡིས། །སངས་རྒྱས་གསུང་གི་དངོས་གྲུབ་ཐོབ། །རྡོ་རྗེ་ལས་མཆོག་བསྒྲུབས་པས་ན། །རྡོ་རྗེའི་ལས་

སུ་མྱུར་དུ་འགྲུབ། །རྡོ་རྗེ་གོ་ཆ་བསྐོན་པས་ན། །རྡོ་རྗེ་སྐུ་ནི་ཐོབ་པར་འགྱུར། །རྡོ་རྗེ་གནོད་སྦྱིན་བསྒྲུབས་པས་ན། །རྡོ་རྗེ་གནོད་སྦྱིན་མཉམ་པར་འགྱུར། །རྡོ་རྗེ་ཁུ་ཚུར་བཅིངས་པས་ན། །ཕྱག་རྒྱ་ཐམས་ཅད་འགྲུབ་པར་འགྱུར། །རྡོ་རྗེ་འཛིན་མ་བསྒྲུབས་པས་ན། །

རྡོ་རྗེ་ཆེན་མོའི་དགའ་བ་ཐོབ། །རྡོ་རྗེ་ཕྲེང་བ་བཅིངས་པས་ན། །སངས་རྒྱས་ཀུན་གྱིས་དབང་བསྐུར་འགྱུར། །རྡོ་རྗེ་གླུ་ཡི་ཆོ་ག་ཡིས། །རྡོ་རྗེ་གླུ་ནི་ལེན་པར་འགྱུར། །རྡོ་རྗེ་གར་ནི་སྦྱར་བ་ཡིས། །སངས་རྒྱས་ཀུན་གྱིས་དེ་མཆོད་དོ། །རྡོ་རྗེ་བདུག་པའི་ཆོ་ག་ཡིས། །འགྲོ་བ་ཐམས་ཅད་

เล่ม ๕๘ · หน้า 273b

ཚིམ་པར་བྱེད། །རྡོ་རྗེ་མེ་ཏོག་སྦྱོར་བྱེད་པས། །དེས་ནི་འགྲོ་བ་དབང་དུ་བྱེད། །རྡོ་རྗེ་སྣང་བ་ཕྱག་རྒྱ་ཆེས། །རབ་མཆོག་མིག་ནི་སྦྱིན་པར་བྱེད། །རྡོ་རྗེ་དྲི་ཡི་ཆོ་ག་ཡིས། །སྡུག་བསྔལ་ཐམས་ཅད་སེལ་བར་བྱེད། །རྡོ་རྗེ་ལྕགས་ཀྱུས་དྲངས་པས་ན། །འདྲེན་པ་ཀུན་གྱི་མཆོག་ཏུ་འགྱུར། །

རྡོ་རྗེ་ཞགས་པའི་ཆོ་ག་ཡིས། །ཐམས་ཅད་རབ་ཏུ་འཇུག་པར་འགྱུར། །རྡོ་རྗེ་ལྕགས་སྒྲོག་སྦྱོར་བ་ཡིས། །ཐམས་ཅད་འཆིང་བར་ནུས་པར་འགྱུར། །རྡོ་རྗེ་འབེབས་པའི་ཆོ་ག་ཡིས། །ཐམས་ཅད་འབབ་པར་རབ་ཏུ་འགྱུར། །སླར་ཡང་རྡོ་རྗེ་སེམས་དཔའ་ལ་སོགས་

པའི་ལས་ཀྱི་ཁྱད་པར་དུ་འགྱུར་བ་ནི། ལན་ཅིག་བཟླས་ན་བདག་ཉིད་བསྲུང་བར་འགྱུར། ལན་གཉིས་བཟླས་པས་གཞན་བསྲུང་བར་འགྱུར་རོ། །ལན་གསུམ་བཟླས་པས་འགྲོ་བ་ཐམས་ཅད་བསྲུང་བར་འགྱུར་རོ། །ལན་བཞི་བཟླས་པས་གྲོང་ཁྱེར་བསྲུང་

བར་འགྱུར་རོ། །ལན་ལྔ་བཟླས་པས་རྒྱལ་སྲིད་བསྲུང་བར་འགྱུར་རོ། །ལན་དྲུག་བཟླས་པས་གླིང་བཞིར་བསྲུང་བར་འགྱུར་རོ། །ལན་བདུན་བཟླས་པས་འཇིག་རྟེན་གྱི་ཁམས་ཐམས་ཅད་ཀྱི་མཐར་ཐུག་པའི་སེམས་ཅན་སྲུང་བར་བྱེད་དོ། །ཐོག་མར་བརྗོད་

པའི་བསྲུང་བའི་རིག་པ་ནི། གྲོ་ག་ལ་རིག་པའི་ཡི་གེ་བྲིས་ནས། བཛྲ་སཏྭ་ཕཊ་ཅེས་ལན་གཉིས་བརྗོད་པས་རིག་པ་གཅད་པར་བྱ་སྟེ། ཀུ་ཤ་འམ། སྲུང་སྐུད་བླངས་ལ་རིག་པས་བསྲུང་བར་བྱའོ། །ཨོཾ་བཛྲ་སཏྭ་ཞེས་ལན་གསུམ་བརྗོད་པའི་

རིག་པས་རྒྱལ་བར་འགྱུར་རོ། །ལན་བཞི་བརྗོད་པས་ག་ཕུར་དང་། ཙནྡན་དང་། ཨ་ཀ་རུ་རྣམས་ཀྱི་བདུག་པ་ཕུལ་ནས། མགོ་ལ་མེ་ཏོག་གི་ཕྲེང་བ་བཏགས་ཏེ། དཔྲལ་བར་ཙནྡན་གྱིས་ཐིག་ལེ་བྱས་ཏེ། ཆོས་ཐམས་ཅད་རྨི་ལམ་དང་

མཚུངས་པའི་བདེན་པ་འདིས་རྡོ་རྗེ་སེམས་དཔའ་བདག་ལ་རྨི་ལམ་སྟོན་ཅིག་ཅེས་བྱས་ན། དགེ་བ་དང་། མི་དགེ་བའི་རྨི་ལམ་ཐམས་ཅད་སྟོན་པར་འགྱུར་རོ། །མངོན་པར་འདོད་པའི་དངོས་པོ་ཤེས་པར་འདོད་ན། བཅོམ་ལྡན་

เล่ม ๕๘ · หน้า 274a

འདས་ཐང་ཅིག་བསྒོམས་ལ་སྙིང་པོ་ལན་ལྔ་བཟླས་ན་མཚན་མ་དགོས་པ་སྟོན་པར་འགྱུར་རོ། །སྟོང་ཕྲག་བརྒྱ་བཟླས་ན་ལས་ཐམས་ཅད་བྱེད་པར་འགྱུར་རོ། །ཡར་ངོའི་ཚེས་བརྒྱད་ལ་དཀྱིལ་འཁོར་བྲིས་ཏེ། ཞག་གསུམ་སྨྱུང་བ་བྱས་

པའམ། འོ་མ་དང་བུ་རམ་ཟོས་ནས་དེར་ཞུགས་ཏེ། སྟོང་ཕྲག་བརྒྱད་བཟླས་པར་བྱའོ། །དེ་ནས་བསམ་གཏན་དེ་ཐེ་ཚོམ་མེད་པར་འགྱུར་རོ། །ནད་པའི་སྟེང་དུ་ཡི་གེ་བ་ལས་ཟླ་བའི་དཀྱིལ་འཁོར་དཀར་པོ་རྣམ་པར་བསམས་ན་དུག་ཞི་བར་འགྱུར་རོ། །ལྟེ་བའི་སྟེང་དུ་ཡི་གེ་ཛ་ལས་

རིན་པོ་ཆེའི་དཀྱིལ་འཁོར་སེར་པོ་བསམས་པས་དུག་རེངས་པར་འགྱུར་རོ། །རིན་པོ་ཆེའི་རྒྱ་གྲམ་གྱི་སྟེང་དུ་རིན་པོ་ཆེ་དམར་སེར་གྱི་དཀྱིལ་འཁོར་དང་ཡི་གེ་ཛ་སེར་པོ་བསམས་པས་གཞན་གྱི་དུག་ཐེ་ཚོམ་མེད་པར་རེངས་པར་འགྱུར་རོ། །ཐོག་ཟློག་པར་བྱེད་དོ། །ཆར་གཅོད་པར་བྱེད་

དོ། །ཡི་གེ་བ་ལས་ཟླ་བའི་དཀྱིལ་འཁོར་དཀར་པོ་བསམས་ན་མཁྲིས་པའི་རིམས་སེལ་བར་བྱེད་དོ། །ཚ་བའི་རིམས་སེལ་བར་བྱེད་དོ། །ཁར་བསྒོམས་ན་མངག་གཞུག་བྱེད་དོ། །རིན་པོ་ཆེ་ཐམས་ཅད་ཀྱི་སྟེང་དུ་བསྒོམས་ན་མངག་གཞུག་བྱེད་དོ། །ཡན་ལག་ཉམས་པ་ལ་

བསྒོམས་ན་ཡོངས་སུ་རྫོགས་པར་འགྱུར་རོ། །མེའི་སྟེང་དུ་བསྒོམས་ན་མེའི་ཚ་བ་ཞི་བར་འགྱུར་རོ། །ཞི་བའི་ལས་ཐམས་ཅད་སྒྲུབ་པར་བྱེད་དོ། །ཡི་གེ་ཛས་རྒྱས་པའི་ལས་ཐམས་ཅད་སྐྱེད་པར་བྱེད་དོ། །དབང་བསྐུར་བའི་ཏིང་ངེ་འཛིན་གྱིས་དཔྲལ་བའི་ཕྱོགས་སུ་བསམས་ན་

དོན་ཆེན་པོ་བྱ་བར་བྱེད་པའོ། །མེ་ལྷའི་སྟེང་དུ་བསྒོམས་ན་ནོར་བུའི་ཕུང་པོ་སྐྱེད་པར་བྱེད་དོ། །བདག་གི་ལུས་ལ་བསྒོམས་ན་རྒྱས་པའི་ལས་ཐམས་ཅད་བྱེད་པར་འགྱུར་རོ། །ཡི་གེ་ས་ལས་ཉི་མའི་དཀྱིལ་འཁོར་དམར་པོ་བསམས་ན་འབེབས་པར་བྱེད་དོ། །སྣ་ཚོགས་རྡོ་རྗེ་བསམས་

ན་སྡུད་པར་བྱེད་དོ། །སྐྱེས་པ་དང་བུད་མེད་ཀྱི་སྙིང་གར་པདྨ་དམར་པོའི་སྟེང་དུ་པདྨ་བསྒོམས་ན་དབང་དུ་བྱེད་དོ། །ལྷའི་སྙིང་པོ་གང་དང་གང་བསམས་པ་དེ་དབང་དུ་བྱེད་པར་འགྱུར་རོ། །གདོང་ལ་བསམས་ན་ཆགས་ཤིང་སྐལ་བ་དང་ལྡན་པར་འགྱུར་རོ། །ལས་ཐམས་ཅད་བྱེད་

เล่ม ๕๘ · หน้า 274b

པས་ཡི་གེ་ས་ལས་དཀྱིལ་འཁོར་ལས་ཐམས་ཅད་དང་རྗེས་སུ་མཐུན་པར་བསྒོམ་པར་བྱའོ། །ནད་པའི་སྙིང་གར་བསམས་ན་སྲུང་བར་བྱེད་པར་འགྱུར་རོ། །བསམས་པ་ཤེས་པའི་ཆོ་གས་བསྒྲུབ་པར་བྱ་བའི་ཡིད་ཀྱི་ལས་ཐམས་ཅད་སྒྲུབ་པར་བྱེད་དོ། །ཡི་གེ་ཏས་མཉེས་པར་

བྱེད་དོ། །རྡོ་རྗེ་དཀྱིལ་འཁོར་ཐམས་ཅད་བསྒྲུབས་ན་སྲུང་བར་བྱེད་དོ། །དབྱིག་པར་བྱས་ནས་བསྒོམས་ན་སྣུན་པར་བྱེད་དོ། །རྡོ་རྗེའི་དཀྱིལ་འཁོར་ལྗང་གུར་བསྒོམས་ན་སྲུང་བར་བྱེད་དོ། །ཐལ་མོའི་སྒྲས་དུག་གིས་བརྒྱལ་བ་ལས་སད་པར་བྱེད་དོ། །ཡི་གེ་ཏ་ཁ་དོག་ལྔ་

པ་རྟག་ཏུ་བསྒོམས་ན་ལས་ཐམས་ཅད་བྱེད་དོ། །ཡི་གེ་བས་འཆིང་བར་བྱེད་དོ། །ཡི་གེ་ཛས་འགུགས་པར་བྱེད་དོ། །ཡི་གེ་མས་འབེབས་པར་བྱེད་དོ། །ཡི་གེ་ཏས་སྣུན་པར་བྱེད་དོ། །དེ་ཐམས་ཅད་ཚར་གཅོད་པར་བྱེད་དོ། །གདུག་པ་ཐམས་ཅད་ཡི་གེ་ཨའི་ལྕགས་

ཀྱུས་འགུགས་པར་བྱེད་དོ། །རྡོ་རྗེ་བསྒོམས་ན་གསལ་བར་བྱེད་དོ། །ཟླ་བའི་དཀྱིལ་འཁོར་གྱིས་ནི་མགུ་བར་བྱེད་དོ། །ལས་ཀྱི་དཀྱིལ་འཁོར་གྱིས་ནི་སྡུད་པར་བྱེད་དོ། །ཡི་གེ་ཨ་ལས་ཟླ་བའི་དཀྱིལ་འཁོར་བསམས་ན་དུག་ཞི་བར་བྱེད་དོ། །བཛྲ་སཏྭ་ཨཿཞེས་བྱ་བས་

རྟོག་པ་ཐམས་ཅད་ཀྱི་བྱེ་བྲག་ལས་སྦྱོར་བ་དང་ལས་ཐམས་ཅད་བྱེད་པར་འགྱུར་རོ། །དེ་ལྟར་བཟླས་པའི་ཆོ་གས་བསྒྲུབ་པ་བཤད་ནས། ད་ནི་རས་རིས་བསྒྲུབ་པའི་བླ་ན་མེད་པའི་དངོས་གྲུབ་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་

ཐག་པ་སྟེ། ཟླ་བ་བཞིའི་བར་དུ་སྔར་བཤད་པ་བཞིན་དུ་བསྙེན་པ་བྱས་པའི་རྗེས་ཐོགས་ཉིད་ལའོ། །དེའི་ཕྱག་རྒྱ་བཞི་པའི་བླ་ན་མེད་པའི་དངོས་གྲུབ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིའོ། །དེ་འདོད་པ་ནི་གལ་ཏེ་རྣལ་འབྱོར་པ་འདོད་ན་ཇི་སྐད་བཤད་པའི་རས་

ལ་བཅོམ་ལྡན་འདས་རྣམ་པར་སྣང་མཛད་ལ་སོགས་པ་ནས་དོན་ཡོད་པར་གྲུབ་པའི་བར་བྲི་བར་བྱ་སྟེ། དེའི་ཕྱག་རྒྱ་བཞི་པའི་དཀྱིལ་འཁོར་གྱི་ཚུལ་དུ་ཞེས་བྱ་བ་ནི་ཕྱག་རྒྱ་ཆེན་པོའི་དཀྱིལ་འཁོར་གྱི་དབྱིབས་དང་ཇི་ལྟར་འདོད་པའི་ཁ་དོག་དང་རྒྱན་དང་རྡོ་རྗེ་སེམས་དཔའ་ལ་

เล่ม ๕๘ · หน้า 275a

སོགས་པའི་སེམས་དཔའ་ཆེན་པོ་རྣམས་དང་། རྡོ་རྗེ་སྒེག་མོ་ལ་སོགས་པའི་ལྷ་མོ་རྣམ་པ་བརྒྱད་བྲི་བར་བྱའོ། །འདི་སྐད་སྟོན་པ་ཡིན་ཏེ། སྔར་བཤད་པའི་ཚུལ་གྱིས་སྔོན་དུ་བསྙེན་པ་ཟླ་བ་བཞི་བྱས་ལ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་

རྣལ་འབྱོར་པའམ། དེ་བཞིན་དུ་རྡོ་རྗེ་སེམས་དཔའ་ལ་སོགས་པ་དང་། རྡོ་རྗེ་འབེབས་པའི་མཐར་ཐུག་པའི་དེ་བཞིན་གཤེགས་པའི་རིགས་ཀྱི་རྣལ་འབྱོར་པས་རང་གི་ལྷར་བསྒོམས་ལ། དེའི་རྗེས་ལ་རས་མ་ཉམས་པ་ལ། དེ་བཞིན་གཤེགས་པ་ཟློས་ཤིང་སྲོག་ཆགས་ཀྱི་ཡན་ལག་རྣམས་

བསལ་ནས། རྡོ་རྗེའི་ཐིག་ཟླུམ་པོར་བཏབ་པའི་དབུས་ཀྱི་ཟུར་བཞིའི་དབུས་སུ་བཅོམ་ལྡན་འདས་རྣམ་པར་སྣང་མཛད་དཀར་པོ་ཟངས་མ་ག་བུར་དང་བསྲེས་ལ་བསྙེན་གནས་དང་ལྡན་པ་དམ་ཚིག་ཤེས་པའི་རི་མོ་མཁན་གྱིས་བཛྲ་དྷཱ་ཏུ་ཞེས་བྱ་བའི་སྙིང་པོ་འདི་བྲི་བར་བྱའོ། །དེའི་འོག་གི་ཆ་

ལ་མི་བསྐྱོད་པའི་གནས་སུ་རྡོ་རྗེ་སེམས་དཔའ། གཡས་ལོགས་སུ་རིན་ཆེན་འབྱུང་ལྡན་གྱི་གནས་སུ་རྡོ་རྗེ་རིན་ཆེན། སྟེང་དུ་འོད་དཔག་ཏུ་མེད་པའི་གནས་སུ་རྡོ་རྗེ་ཆོས། གཡས་ཕྱོགས་སུ་དོན་ཡོད་གྲུབ་པའི་གནས་སུ་རྡོ་རྗེ་ལས། མཚམས་ཀྱི་ཆ་རྣམས་སུ་སྒེག་མོ་ལ་སོགས་པའི་

ལྷ་མོ་བརྒྱད་རང་གི་སྙིང་པོ་བྲི་བར་བྱའོ། །རྣམ་པར་སྣང་མཛད་ཀྱི་རས་རིས་ཀྱི་ཆོ་གའོ། །རས་དེ་ཉིད་ཀྱི་དབུས་སུ་བཅོམ་ལྡན་འདས་མི་བསྐྱོད་པ་བྲིས་པའི་ཚེ་མི་བསྐྱོད་པའི་གནས་སུ་རྡོ་རྗེ་སེམས་དཔའ། རིན་ཆེན་འབྱུང་ལྡན་གྱི་གནས་སུ་རྡོ་རྗེ་རྒྱལ་པོ། དོན་ཡོད་གྲུབ་པའི་གནས་

སུ་རྡོ་རྗེ་ཆགས་པ། འོད་དཔག་ཏུ་མེད་པའི་གནས་སུ་རྡོ་རྗེ་ལེགས་པ། མཆོད་པའི་ལྷ་མོ་རྣམས་ཀྱང་སྔ་མ་བཞིན་དུ་བྱ་བ་ནི་མི་བསྐྱོད་པའི་རིགས་ཀྱི་ཆོ་གའོ། །དབུས་སུ་བཅོམ་ལྡན་འདས་རིན་ཆེན་འབྱུང་ལྡན་འདྲི་བའི་ཚེ་མི་བསྐྱོད་པའི་གནས་སུ་རྡོ་རྗེ་རིན་ཆེན། རིན་ཆེན་འབྱུང་ལྡན་གྱི་གནས་

གཟི་བརྗིད། དོན་ཡོད་གྲུབ་པའི་གནས་སུ་དཔལ། འོད་དཔག་ཏུ་མེད་པའི་གནས་སུ་རྡོ་རྗེ་བཞད་པ་བྲིས་ལ། ལྷག་མ་ནི་སྔ་མ་བཞིན་ཏེ། རིན་ཆེན་འབྱུང་ལྡན་གྱི་རས་རིས་ཀྱི་ཆོ་གའོ། །བཅོམ་ལྡན་འདས་འོད་དཔག་ཏུ་མེད་པ་དབུས་སུ་བྲི་བ་དེའི་ཚེ་མི་བསྐྱོད་པའི་གནས་སུ་རྡོ་རྗེ་ཆོས།

เล่ม ๕๘ · หน้า 275b

རིན་ཆེན་འབྱུང་ལྡན་གྱི་གནས་སུ་རྡོ་རྗེ་རྣོན་པོ། དོན་ཡོད་པར་གྲུབ་པའི་གནས་སུ་རྡོ་རྗེ་རྒྱུ། འོད་དཔག་ཏུ་མེད་པའི་གནས་སུ་རྡོ་རྗེ་གསུང་བ་བྲིས་ལ། ལྷག་མ་ནི་སྔ་མ་བཞིན་ཏེ། འོད་དཔག་ཏུ་མེད་པའི་རས་རིས་ཀྱི་ཆོ་གའོ། །དབུས་སུ་བཅོམ་ལྡན་འདས་དོན་ཡོད་གྲུབ་པ་འདྲི་བ་དེའི་

ཚེ་མི་བསྐྱོད་པའི་གནས་སུ་རྡོ་རྗེ་ལས། རིན་ཆེན་འབྱུང་ལྡན་གྱི་གནས་སུ་རྡོ་རྗེ་བསྲུང་བ། དོན་ཡོད་གྲུབ་པའི་གནས་སུ་རྡོ་རྗེ་གནོད་སྦྱིན། འོད་དཔག་ཏུ་མེད་པའི་གནས་སུ་རྡོ་རྗེ་ཁུ་ཚུར་རང་གི་སྙིང་པོས་བྲིས་ལ། ལྷག་མ་ནི་སྔ་མ་བཞིན་ཏེ། དོན་ཡོད་པར་གྲུབ་པའི་རས་རིས་

ཀྱི་ཆོ་གའོ། །རས་གང་ལ་རི་མོ་འདྲི་བ་དེའི་ཚེ་འབྲུ་དང་། རིན་པོ་ཆེ་དང་། སྨན་ཐམས་ཅད་ཀྱིས་ཡོངས་སུ་གང་བའི་བུམ་པ་གཅིག་དང་། ཟུར་བཞིར་བུམ་པ་བཞི་གཞག་པར་བྱའོ། །དེའི་སྟེང་དུ་བླ་རེ་བྲེས་པ་དང་། དེའི་འོག་ཏུ་གདུགས་དཀར་པོ་ལ་གཙུག་ཏོར་དཀར་མོ་

བཟླས་པ་དང་། དེ་ནས་རྩི་མར་གྱི་མར་སེར་དང་། སྤོས་ཀྱི་སྣོད་རྣམ་པ་བཞི་བཞག་ནས་རྒྱུན་མི་འཆད་པར་དབུལ་བར་བྱའོ། །དེ་ནས་ཙནྡན་དཀར་པོའི་ཆུ་ཡིས་མཆོད་ཡོན་ཕུལ་ལ། རྣམ་པར་སྣང་མཛད་ལ་སོགས་པའི་གཟུགས་བརྙན་གྱི་སྦྱོར་བ་བྱས་པའི་རས་རིས་དེ་ལ་བཞུགས་སུ་

གསོལ་བར་བྱའོ། །ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་རྡོ་རྗེ་སྙིང་པོ་དང་། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་སྙིང་པོས་དེ་རྣམས་ཀྱི་ཇི་ལྟ་བ་བཞིན་དུ་བྲི་བར་བྱའོ། །རྡོ་རྗེ་དབྱིངས་ཀྱི་ཁང་བུ་བརྩེགས་པ་དེའི་སྟེང་དུ་

གདུགས་དཀར་པོ་བྲི་བར་བྱའོ། །དེ་ལྟར་རས་ལ་ཇི་ལྟར་མངོན་པར་འདོད་པ་བཞིན་དུ་བྲིས་ནས། དེ་ནས་རི་མོའི་སྐུ་གཟུགས་ལ་མཆོད་པ་རྒྱ་ཆེར་བྱས་ལ། འཛབ་ཀྱི་ཚུལ་ཇི་ལྟ་བ་བཞིན་དུ་ཟླ་བ་བཞིའི་བར་དུ་བཟླས་པར་བྱའོ། །སྔ་མ་བཞིན་དུ་རང་ལ་བྱིན་གྱིས་བརླབས་པ་ལ་སོགས་

པ་བྱས་ནས། ཁང་བུ་བརྩེགས་པའི་གནས་དེ་རྫོགས་པ་དང་། རས་ལ་དེ་བཞིན་གཤེགས་པའི་སྙིང་པོ་སྤྲུལ་ལ། བསྡུ་བ་ལ་སོགས་པའི་ཆོ་ག་རྗེས་སུ་སྤྱད་ནས། ཕྱིའི་མཆོད་པ་རྣམ་པ་ལྔ་ལ་སོགས་པའི་མཆོད་པ་རྒྱ་ཆེ་བའི་ཁྱད་པར་རྣམས་ཀྱིས་ཡང་དག་པར་མཆོད་ལ། སྒེག་མོ་

เล่ม ๕๘ · หน้า 276a

ལ་སོགས་པ་མཆོད་པ་བརྒྱད་ཀྱི་ཕྱག་རྒྱ་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་གིས་ཡང་དག་པར་མཆོད་དེ། ཕྱག་བཞི་བྱས་ནས། སྔར་བཤད་པའི་བཟླས་པའི་ཆོ་གས་ཟླ་བ་བཞིར་ཐུན་བཞིའི་སྦྱོར་བས་བཟླས་ཏེ། མཚན་ཐོག་

ཐག་བཟླས་པར་བྱའོ། །དེ་ནས་ནམ་ལངས་པ་དང་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ཐམས་ཅད་འགྲུབ་པའམ། རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པའི་རིགས་ཀྱི་དངོས་གྲུབ་རྣམས་ཇི་ལྟར་བྲི་བ་བཞིན་དུ་འགྲུབ་པར་འགྱུར་རོ། །

དེ་ལྟར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་རྣམས་བཤད་ནས། ད་ནི་གཟུངས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ནི་དེ་ནས་ཕྱག་རྒྱ་བསྒྲུབ་པར་འདོད་ན་ཞེས་བྱ་བ་ལ་སོགས་པ་གསུངས་ཏེ། དེ་ལ་ཕྱག་རྒྱ་ནི་གཟུངས་ཀྱི་དཀྱིལ་འཁོར་གྱི་རིག་པ་

བརྗོད་པ་རྣམས་སོ། །དེ་ལ་བསྒྲུབ་པར་འདོད་པ་ནི་ཐོག་མར་སྔ་མ་བཞིན་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ་ཆོ་ག་ཐམས་ཅད་རྗེས་སུ་སྤྱད་དེ། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་གཟུངས་ཟློས་ཤིང་སྔ་མ་བཞིན་དུ་ཟླ་བ་བཞི་

བསྙེན་པ་བྱས་ལ། རས་ལ་དེ་བཞིན་དུ་བྲི་བར་བྱའོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་ག་ཐམས་ཅད་རྗེས་སུ་སྤྱད་ལ། རྡོ་རྗེ་སེམས་དཔའ་བཅིངས་ཏེ། ཐུན་བཞིའི་སྦྱོར་བས་སྟོང་ཕྲག་བརྒྱ་བཟླ་བར་བྱའོ། །དེ་ནས་མཚན་ཐོག་ཐག་རྡོ་རྗེ་སེམས་དཔའ་

བཅིངས་ཤིང་བཟླས་ལ། སྐྱོ་ན་ཕྱག་རྒྱ་བར་བར་དུ་དགྲོལ་བར་བྱའོ། །དེ་ནས་ཕྱག་རྒྱ་བཅིངས་ན་འབར་བ་ལ་སོགས་པའི་དངོས་གྲུབ་ཀྱི་རྟགས་འབྱུང་བ་དང་། དེ་ནས་ཕྱག་རྒྱ་བཅིངས་བཞིན་དུ། །ཞེས་བྱ་བ་འབྲས་བུ་གསུངས་སོ། །དེ་ལྟར་གཟུངས་ཀྱི་དངོས་གྲུབ་བཤད་ནས།

ཆོས་ཀྱི་དཀྱིལ་འཁོར་གྱི་དངོས་གྲུབ་ནི། དེ་ནས་ཏིང་ངེ་འཛིན་བསྒྲུབ་པར་འདོད་ན་ནི་ཞེས་བྱ་བ་ལ་སོགས་པ་སྨོས་ཏེ། དེ་ནས་བྱ་བའི་སྒྲ་ནི་སྐབས་སུ་བབས་པ་སྟེ། ཆོས་ཀྱི་དཀྱིལ་འཁོར་ལ་དངོས་གྲུབ་ཀྱི་གནས་སྐབས་སོ་ཞེས་བྱ་བའི་དོན་ཏོ། །རྣམ་པར་སྣང་མཛད་ལ་སོགས་

เล่ม ๕๘ · หน้า 276b

པའི་རྣམ་པར་སེམས་རྩེ་གཅིག་པ་ནི་ཏིང་ངེ་འཛིན་ཏོ། །ཏིང་ངེ་འཛིན་དེ་ཡང་རྣམ་པ་སུམ་ཅུ་རྩ་བདུན་ནོ། །དེའི་ཕྱིར་ཏིང་ངེ་འཛིན་གང་ལ་དགའ་བ་ཞེས་གསུངས་སོ། །གལ་ཏེ་འགའ་ཞིག་དེ་བསྒྲུབ་པར་འདོད་ན་རྡོ་རྗེ་ཕྲ་མོ་ནས་བརྩམས་ཏེ། རྡོ་རྗེ་ཕྲ་མོ་བསྒོམ་པར་བྱ་བའི་ཏིང་ངེ་འཛིན་གང་ལ་

དགའ་བ་དེ་ལའོ། །རྣམ་པར་སྣང་མཛད་ལ་སོགས་པ་གང་བསྒོམ་པར་འདོད་པས་སྙིང་པོ་རྣལ་འབྱོར་གོམས་པར་བྱའོ། །སྔ་མ་བཞིན་དུ་བཟླས་པའི་སྦྱོར་བས་ཉིན་རེ་ཞིང་ཐུན་བཞིའི་རང་གི་སྙིང་པོ་བརྗོད་ཅིང་རབ་ཏུ་སྦྱོར་བ་བྱས་ལ། བདག་ཉིད་དམ་མདུན་དུ་རང་གི་ལྷའི་གཟུགས་སུ་

བསྒོམ་པར་བྱའོ། །ཟླ་བ་བཞིར་བསྙེན་པ་བྱས་ལ། དེ་ནས་སྔ་མ་བཞིན་དུ་རས་ལ་བྲིས་ཏེ། ཆོ་ག་ཐམས་ཅད་ཇི་ལྟ་བ་བཞིན་དུ་རྗེས་སུ་སྤྱད་ལ། རས་རིས་ཀྱི་མདུན་དུ་ཟླ་བ་བཞིར་རང་གི་ཏིང་ངེ་འཛིན་བསྒོམ་པར་བྱའོ། །དེ་ནས་མཐར་མཚན་ཐོག་ཐག་བསྒོམས་ན། ཐོ་རངས་

བཀའ་དམ་ཚིག་གི་ཏིང་ངེ་འཛིན་ཐོབ་པར་འགྱུར་རོ། །དེ་ལྟར་ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྟན་ནས། ད་ནི་ལས་ཀྱི་དཀྱིལ་འཁོར་ལས་བཤད་པའི། དེ་ནས་ལས་བསྒྲུབ་པར་འདོད་ན་ནི་ཞེས་བྱ་བ་ལ་སོགས་པ་གསུངས་ཏེ། ལས་ཀྱི་དཀྱིལ་འཁོར་ལས་

བཤད་པའི་རིག་པ་རྣམས་བསྒྲུབ་པ་ནི་ལས་བསྒྲུབ་པར་འདོད་པའོ། །དེ་བཞིན་དུ་བཟླས་ཤིང་ཟླ་བ་གཅིག་གི་བར་དུ་བསྒྲུབས་ན་ཞེས་བྱ་བ་ནི་ལས་ཀྱི་དཀྱིལ་འཁོར་གྱི་རིག་པ་རྣམས་ཀྱི་ཕྱིར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་གས་རང་གི་ལྷའི་རྣལ་འབྱོར་བྱས་ལ།

སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ཐུན་བཞིའི་སྦྱོར་བས་ཟླ་བ་བཞིར་སྔ་མ་བཞིན་དུ་བཟླས་པ་བྱས་ནས་བྲི་བར་བྱའོ། །དེ་ནས་སྔ་མ་བཞིན་དུ་རས་ལ་ཆོ་ག་ཐམས་ཅད་རྗེས་སུ་སྤྱད་ལ། རས་རིས་ཀྱི་རང་གི་རིག་པའི་མདུན་དུ་སྟོང་ཕྲག་བརྒྱ་བཟླས་པར་བྱའོ། །ཟླ་བའི་མཐར་

མཚན་ཐོག་ཐག་བཟླས་པ་བྱས་ན་ལས་ཐམས་ཅད་འགྲུབ་པར་འགྱུར་རོ། །ལན་ཅིག་བརྗོད་པ་ཙམ་གྱིས་ཞེས་བྱ་བ་ལ་སོགས་པས་ནི་རང་གི་རིག་པ་ཇི་ལྟ་བ་བཞིན་དུ་བསྒྲུབས་ལ། ལན་ཅིག་བཟླས་པ་བྱས་ནས་བདག་ཉིད་ལ་སོགས་པས་བསྲུང་བར་འགྱུར་རོ། །ཇི་ལྟར་འགྱུར་ཞེ་ན། གྲོང་དང་།

เล่ม ๕๘ · หน้า 277a

གྲོང་ཁྱེར་རྣམས་གོ་ཆ་བཅིངས་པས་ཞེས་བྱ་བ་ལ་སོགས་པ་སྨོས་ཏེ། གོ་ཆ་བཅིངས་པའི་ཚུལ་གྱིས་རང་ངམ་གཞན་བསྲུང་བར་བྱའོ། །མཚམས་དང་། ཕྱོགས་དང་། དཀྱིལ་འཁོར་དང་། ནམ་མཁའ་དང་། ཕུར་བུ་དང་། ར་བ་དང་། དྲ་བ་རྣམས་ནི་སོགས་པ་

བྱུགས་ཤིང་དབབ་པར་བྱའོ། །ཁྱད་པར་ཇི་ལྟ་བུ་དབབ་པར་བྱ་སྟེ། ཙནྡན་དྲི་ཞིམ་པས་ཞེས་བྱ་བས་ཙནྡན་ནི་དཀར་པོའམ་ཤྲི་ཁཎྜ་ནི་ཙནྡན་དྲི་ཞིམ་པའོ། །དེས་བྱུགས་ནས་རང་གི་རིག་པ་མངོན་པར་བཟླས་ལ། རིག་པའི་ལྷའི་གཟུགས་སུ་བརྟགས་ལ། རྡོ་རྗེ་ལ་སོགས་པ་བྱུགས་ཤིང་དབབ་པར་

བྱའོ། །ཁྱད་པར་ཇི་ལྟ་བུ་ཞེ་ན། གཟུང་དུ་ཡོད་པ་དང་གཟུང་དུ་མེད་པའི་རྡོ་རྗེ་དང་ལྕགས་ཀྱུ་ལ་སོགས་པ་ཞེས་བྱ་བ་ལ། གཟུང་དུ་ཡོད་པ་ནི་ལག་པས་གཟུང་དུ་ཡོད་པའོ། །གཟུང་དུ་མེད་པ་ནི་ཡིད་ཀྱིས་དམིགས་པའོ། །ལན་ཅིག་བརྗོད་པས་ཞེས་བྱ་བ་ནི་རང་གི་རིག་པ་ཇི་ལྟ་བ་བཞིན་དུ་

བསྒྲུབས་པའོ། །སྒྱུ་མའི་ལས་ཀྱང་བྱེད་དེ་ཞེས་བྱ་བ་ལ་སོགས་པ་ནི་སྔ་མ་བཞིན་དུ་རིག་པ་བཟླས་ན། རྨ་བྱའི་མཇུག་སྒྲོའི་ནང་དུ་རྡོ་རྗེ་རྩེ་ལྔ་པ་བཅུག་སྟེ་བཅིངས་ནས། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའི་ཕྱག་རྒྱས་མནན་ལ། རས་རིས་ཀྱི་མདུན་དུ་བདག་

ལ་བྱིན་གྱིས་བརླབ་པ་ལ་སོགས་པའི་ཆོ་ག་ཐམས་ཅད་བྱས་ནས། ཇི་ལྟ་བ་བཞིན་དུ་བསྒྲུབས་ལ་རིག་པ་བཟླས་ཏེ། ཇི་སྲིད་དུ་དེ་བཞིན་གཤེགས་པའི་ཕྱག་རྒྱ་འབེབས་པར་འགྱུར་བ་དེ་སྲིད་ཀྱི་བར་དུ་བྱའོ། དེ་ནས་མཇུག་སྒྲོ་འགྲུབ་པར་འགྱུར་རོ། །དེ་ནས་རྨ་བྱའི་མཇུག་མ་བསྒྲུབ་པ་དང་།

གཟུགས་སྣ་ཚོགས་ལ་སྣང་བར་འགྱུར་ཏེ་ཞེས་བྱའོ། །ལྷག་མ་ནི་གོ་སླའོ། །དེ་ནས་དབང་དུ་བྱེད་པར་འདོད་ན་ཞེས་བྱ་བ་ལ་སོགས་པ་སྔ་མ་བཞིན་དུ་རང་གི་རིག་པ་བསྒྲུབས་ན། དེ་བཞིན་གཤེགས་པ་ལ་སོགས་པའི་རང་གི་རིག་པའི་ཐམས་ཅད་དབང་དུ་བྱེད་པར་འདོད་ན། རྡོ་རྗེ་དབྱིངས་ཀྱི་

དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་མ་བཅིངས་ཏེ། ཇི་ལྟ་བ་བཞིན་དུ་རིག་པ་ཟློས་ཤིང་བསྒྲུབས་ན་ཇི་སྲིད་དུ་སེམས་དཔའ་རྡོ་རྗེ་འབར་བར་འགྱུར་བ་དེ་སྲིད་ཀྱི་བར་དུའོ། །དེ་ནས་དེ་བཞིན་གཤེགས་པ་ལ་སོགས་པ་ལ་དབང་དུ་བྱེད་པར་འགྱུར་རོ། །ཅི་སྟེ་འཇིག་རྟེན་དང་

เล่ม ๕๘ · หน้า 277b

འཇིག་རྟེན་ལས་འདས་པའི་དངོས་གྲུབ་འགྲུབ་པར་འདོད་ན་ཡང་ཞེས་བྱ་བ་ལ་སོགས་པ་ལ། སྔ་མ་བཞིན་དུ་རིག་པ་ཟློས་ཤིང་བསྒྲུབས་ན་ཕྱིས་རང་གི་རིག་པའི་རས་རིས་ཀྱི་མདུན་དུ་ཐུན་བཞིར་ཟླ་བ་གཅིག་སྟོང་རྩ་བརྒྱད་བཟླས་པ་བྱས་ནས། དེ་ནས་མཐར་རྡོ་རྗེ་སེམས་མའི་ཕྱག་རྒྱ་

བཅིངས་ཏེ། མཐར་མཚན་ཐོག་ཐག་བཟླས་པ་བྱས་པས་རྡོ་རྗེ་འབབ་པར་འགྱུར་རོ། །དེ་ཕྱིན་ཆད་ཅེས་བྱ་བ་ནི་དེ་བརྩོན་ན་ཕྱག་རྒྱ་འཆིང་བའི་རྡོ་རྗེ་སེམས་དཔའི་ཕྱག་རྒྱ་ཇི་ལྟ་བ་བཞིན་དུ་བསྒྲུབས་ཏེ། རིག་པ་བརྗོད་ན་འཇིག་རྟེན་གྱི་དངོས་གྲུབ་ཀྱི་རིག་པ་འཛིན་པའི་དངོས་གྲུབ་གང་ཡང་རུང་

བ་ཅིག་འགྲུབ་པར་འགྱུར་རོ། །དེ་ལ་འཇིག་རྟེན་གྱི་དངོས་གྲུབ་ནི་རྐང་མགྱོགས་ཏེ། མི་སྣང་བ་དང་ནམ་མཁའ་ལ་འགྲོ་བ་དང་། རོ་ལངས་བསླང་བ་དང་། ས་འོག་ཏུ་འགྲོ་བ་དང་། གཏེར་ཆེན་པོ་འདོན་པ་དང་། ཆར་འབེབས་པ་དང་། སའི་དབང་ཕྱུག་ཉིད་ལ་སོགས་པའི་གཟུགས་

སོ། །རིག་པ་འཛིན་པའི་དངོས་གྲུབ་ནི་རྡོ་རྗེ་དང་། རིན་པོ་ཆེ་དང་། པདྨ་དང་། ལས་འཛིན་པ་དང་ཐ་དད་པ་དེ་ལྟ་བུར་གྱུར་པའི་དངོས་གྲུབ་ནི་དེའི་ནང་ནས། ཇི་ལྟར་མངོན་པར་འདོད་པ་གང་ཡང་རུང་བ་ཅིག་འགྲུབ་པར་འགྱུར་རོ། །དེ་ལྟར་དེ་བཞིན་གཤེགས་པའི་རིགས་ཀྱི་ཡོ་བྱད་ཀྱི་ཆོ་

ག་རྒྱས་པ་བསྟན་ནས། ད་ནི་རྡོ་རྗེ་རིགས་ཀྱི་དེ་ནས་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་ནས་ཞེས་བྱ་བ་ནི་བཤད་ཟིན་ཏོ། །དེ་ལ་ཞེས་བྱ་བ་ནི་ངག་ཉེ་བར་དགོད་པའོ། །དང་པོ་ནི་ཐོག་མ་ཉིད་དུའོ། །བསྙེན་པ་བྱ་བ་ནི་ཇི་ལྟར་ཞེ་ན། དེ་ལྟར་ཞེས་བྱ་བ་སྨོས་ཏེ། ཇི་ལྟར་རྡོ་རྗེ་

དབྱིངས་ཀྱི་དུམ་བུའི་དཀྱིལ་འཁོར་ཆེན་པོ་ལས་བཤད་པའི་བཟླས་པའི་ཆོ་ག་མཐོང་བ་དེ་བཞིན་དུ་འདིར་ཡང་ཤེས་པར་བྱའོ། །ཇི་ལྟར་འདོད་པ་བཞིན་དུ་ཞེས་བྱ་བ་ནི་ལངས་པའམ་འདུག་པའི་ཡི་གེ་འབུམ་བཟླས་པར་བྱའོ། །དེ་ནས་ཕྱག་རྒྱ་བཅིངས་པ་དེ་མེད་ཀྱང་མཚན་ཐོག་ཐག་བཟླས་

ནས་དེ་ཕྱིན་ཆད་སེམས་ཅན་ཐམས་ཅད་ལ་ཕན་གདགས་པ་དང་ཆད་པས་བཅད་ནུས་པར་འགྱུར་རོ། །འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ཧཱུཾ་མཛད་ལ་སོགས་པའི་རྣལ་འབྱོར་བྱས་ལ། སྔ་མ་བཞིན་དུ་ཆོ་ག་ཐམས་

เล่ม ๕๘ · หน้า 278a

ཅད་རྗེས་སུ་སྤྱད་དེ། བཅོམ་ལྡན་འདས་ཇི་ལྟ་བ་བཞིན་དུ་མདུན་དུ་བཞུགས་སུ་གསོལ་ལ། མཆོད་པ་ཐམས་ཅད་ཀྱིས་ཡང་དག་པར་མཆོད་ལ་ཕྱག་བཞི་བྱའོ། །གཡོན་པའི་ཁྲོ་བོའི་ཁུ་ཚུར་གྱིས་ཁྲོ་བོའི་རྡོ་རྗེ་བླངས་ལ། ལག་པ་གཡས་པས་བཟླས་པའི་ཕྲེང་བ་རང་ཉིད་

ཀྱི་སྙིང་གར་བཟུང་ནས། བཟླས་པའི་དོན་གྱི་བདག་ཉིད་དམ་མདུན་དུ་བཅོམ་ལྡན་འདས་བསྒོམས་ཏེ་ཁྲི་བཟླས་པར་བྱའོ། །ཉིན་རེ་ཞིང་ཐུན་བཞིའི་སྦྱོར་བས་ཡི་གེ་འབུམ་གྱི་བཟླས་པ་རྫོགས་ཀྱི་བར་དུ་བྱའོ། །དེ་ནས་མཚན་ཐོག་ཐག་བཟླས་ཏེ། དེ་ཕྱིན་ཆད་ཧཱུཾ་ཞེས་བྱ་བས་རི་བོ་ཡང་འགེགས་པར་

བྱེད་དོ། །ཆུ་བོ་ཡང་སྐེམས་པར་བྱེད་དོ། །བརྡེག་ཅིང་འབར་བར་བྱེད་པ་དང་། བྱ་རྣམས་ཀྱང་ལྟུང་བར་བྱེད་དོ། །བསྡམས་པས་གསོད་པར་བྱེད་དོ། །སོར་མོས་སྤྲིན་རྣམས་འཇིག་པར་བྱེད་དོ། །འབྲུ་རྣམས་འདོན་པར་བྱེད་དོ། །ཀླུ་རྣམས་རེངས་པར་བྱེད་དོ། །སྐྱེས་པ་དང་བུད་མེད་རྣམས་རེངས་པར་བྱེད་དོ། །བྱིས་པ་རྣམས་རེངས་

པར་བྱེད་དོ། །ཐོག་འཕེན་པ་ཟློག་པར་བྱེད་དོ། །ཐོག་འབེབས་པར་བྱེད་དོ། །སྡིགས་མཛུབ་ཙམ་གྱིས་འགྲོ་བ་རེངས་པ་དང་གླང་པོ་ཆེ་གསོད་པར་བྱེད་དོ། །དུག་གིས་བརྒྱལ་བ་ལས་སློང་བར་བྱེད་དོ། །དེ་ལྟ་བུ་ལ་སོགས་པས་སེམས་ཅན་ཐམས་ཅད་ལ་ཕན་འདོགས་པ་དང་། ཚར་

གཅོད་པར་བྱེད་དོ། །འོན་ཏེ་བསྒྲུབ་པར་འདོད་ན་ཡང་ཞེས་བྱ་བ་ལ། འཇིག་རྟེན་གསུམ་གྱི་དངོས་གྲུབ་གལ་ཏེ་བསྒྲུབ་པར་འདོད་ན་སྔར་བཤད་པའི་ཆོ་གས་ཡི་གེ་འབྲུ་འབུམ་རྣལ་འབྱོར་པས་བཟླས་ལ། རྡོ་རྗེ་ཧཱུཾ་མཛད་ལ་སོགས་པ་རང་གི་ཁྲོ་བོའི་སྔགས་ཇི་ལྟ་བ་བཞིན་དུ་བྱས་ནས་རས་ལ་རི་མོ་

བྲི་བར་བྱའོ། །འདི་སྐད་སྟོན་པ་ཡིན་ཏེ། སྤུ་དང་སྲོག་ཆགས་ཀྱི་ཡན་ལག་རྣམས་རས་བལ་ལ་རྣམ་པར་བསལ་ཏེ། རས་ལ་རྡོ་རྗེ་རི་མོ་གྲུ་བཞིར་བྲིས་ནས་བསྙེན་གནས་དང་ལྡན་པའི་རི་མོ་མཁན་གྱིས་དཀྱིལ་འཁོར་དུ་ཞུགས་པས། ཚོན་གཞན་དང་མ་འདྲེས་པར་སྣོད་རངས་པར་བཞག་

ལ་ཡི་གེ་འབུམ་བཟླས་ཏེ། བཅོམ་ལྡན་འདས་རྡོ་རྗེ་ཧཱུཾ་མཛད་རས་ཀྱི་དབུས་སུ་བྲི་བར་བྱའོ། །མི་བསྐྱོད་པའི་གནས་སུ་ཁྲོ་བོ་རྡོ་རྗེ་སེམས་དཔའ། རིན་ཆེན་འབྱུང་ལྡན་གྱི་གནས་སུ་ཁྲོ་བོ་རྒྱལ་པོ། དོན་ཡོད་པར་གྲུབ་པའི་གནས་སུ་ཁྲོ་བོ་རྡོ་རྗེ་ལེགས། འོད་དཔག་ཏུ་མེད་པའི་གནས་

เล่ม ๕๘ · หน้า 278b

སུ་ཁྲོ་བོ་རྡོ་རྗེ་ཆགས་པ། མཚམས་རྣམས་སུ་སྒེག་མོ་ལ་སོགས་པ་མཆོད་པའི་ལྷ་མོ་བརྒྱད་བྲི་བར་བྱའོ། །དཔལ་རྡོ་རྗེ་ཧཱུཾ་མཛད་ཀྱི་རས་ཀྱི་ཆོ་གའོ། །རས་ཀྱི་དབུས་སུ་རིན་ཆེན་ཧཱུཾ་མཛད་བྲི་བ་དེའི་ཚེ་མི་བསྐྱོད་པའི་གནས་སུ་ཁྲོ་བོ་རྡོ་རྗེ། ཁྲོ་གཉེར་རིན་ཆེན་འབྱུང་ལྡན་གྱི་གནས་སུ་ཁྲོ་

བོ་རྡོ་རྗེ་ཉི་མ། དོན་ཡོད་གྲུབ་པའི་གནས་སུ་ཁྲོ་བོ་རྡོ་རྗེ་དཔལ། འོད་དཔག་ཏུ་མེད་པའི་གནས་སུ་ཁྲོ་བོ་རྡོ་རྗེ་བཞད་པ་བྲིས་ལ། ལྷག་མ་ནི་སྔ་མ་བཞིན་ཏེ། རིན་ཆེན་ཧཱུཾ་མཛད་ཀྱི་རས་ཀྱི་ཆོ་གའོ། །དབུས་སུ་ཆོས་ཀྱི་ཧཱུཾ་མཛད་འདྲི་བའི་ཚེ་མི་བསྐྱོད་པའི་གནས་སུ་ཁྲོ་བོ་རྡོ་རྗེ་ཆོས། རིན་ཆེན་

འབྱུང་ལྡན་གྱི་གནས་སུ་ཁྲོ་བོ་རྡོ་རྗེ་རྣོན་པོ། དོན་ཡོད་གྲུབ་པའི་གནས་སུ་ཁྲོ་བོ་རྡོ་རྗེ་རྒྱུ། འོད་དཔག་ཏུ་མེད་པའི་གནས་སུ་ཁྲོ་བོ་རྡོ་རྗེ་གསུངས་ལ། ལྷག་མ་ནི་སྔ་མ་བཞིན་ཏེ། ཆོས་ཀྱི་ཧཱུཾ་མཛད་ཀྱི་རས་ཀྱི་ཆོ་གའོ། །ལས་ཀྱི་ཧཱུཾ་མཛད་ཀྱི་དབུས་སུ་ཆོས་ཀྱི་ཧཱུཾ་མཛད་འདྲི་བ་དེའི་ཚེ་མཆོད་

པའི་མཐར་ཐུག་པའི་ཆོ་གས་མི་བསྐྱོད་པའི་གནས་སུ་ཁྲོ་བོ་རྡོ་རྗེ་ལས། རིན་ཆེན་འབྱུང་ལྡན་གྱི་གནས་སུ་ཁྲོ་བོ་རྡོ་རྗེ་བསྲུང་བ། དོན་ཡོད་གྲུབ་པའི་གནས་སུ་ཁྲོ་བོ་རྡོ་རྗེ་གནོད་སྦྱིན། འོད་དཔག་ཏུ་མེད་པའི་གནས་སུ་ཁྲོ་བོ་རྡོ་རྗེ་ཁུ་ཚུར། ལྷག་མ་ནི་སྔ་མ་བཞིན་ནོ། །ལས་ཀྱི་ཧཱུཾ་མཛད་ཀྱི་

རས་ཀྱི་ཆོ་གའོ། །དེ་ལ་རྡོ་རྗེ་ཧཱུཾ་མཛད་ལ་སོགས་པ་རྣམ་པ་བཞིའི་དཀྱིལ་འཁོར་ལས་བཤད་པའི་རིགས་པས་སམ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་སེམས་དཔའ་ལ་སོགས་པའི་སྔགས་ཀྱིས་རས་ལ་བྲིས་ལ་ལས་རྣམས་ཀྱི་ཆོ་ག་ལྷག་

མ་ཡང་གཟུང་བར་བྱའོ། །དེ་བཞིན་གཤེགས་པའི་རས་ལ་བྲིས་པའི་ཆོ་ག་ལྟར་ནི་མ་སྨོས་སུ་ཟིན་ཡང་སྔ་མ་བཞིན་དུ་གཟུང་བར་བྱའོ། །དེ་ལྟར་མཆོད་པ་བྱས་ནས་ཞེས་བྱ་བ་ནི་དེ་བཞིན་དུ་རས་ལ་བྲིས་ལ་རང་བྱིན་གྱིས་བརླབས་པ་ལ་སོགས་པའི་ཆོ་ག་བྱས་ལ། སྔ་མ་བཞིན་དུ་

ཁང་བུ་བརྩེགས་པ་གདན་དང་བཅས་པ་སྤྲུལ་ལ། ཕྱག་རྒྱ་བཞི་པའི་དཀྱིལ་འཁོར་ལས་བཤད་པའི་རིག་པ་རྣམས་ཀྱིས་རྡོ་རྗེ་ཧཱུཾ་མཛད་ལ་སོགས་པ་བསྐྱེད་ལ། དེ་ནས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་སྙིང་པོས་ཧཱུཾ་གིས་རྡོ་རྗེ་སེམས་དཔའ་ལ་སོགས་

เล่ม ๕๘ · หน้า 279a

པ་རང་གི་གནས་སུ་བཞུགས་སུ་གསོལ་བ་ལ་བསྡུ་བ་ལ་སོགས་པ་བྱས་ཏེ། མཆོད་པ་རྣམ་པ་ལྔས་མཆོད་ནས། སྒེག་མོ་ལ་སོགས་པ་མཆོད་པ་རྣམ་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པའི་ཕྱག་རྒྱ་རྣམ་པ་བཅུ་དྲུག་གིས་མཆོད་པར་བྱའོ། །

དེ་བཞིན་དུ་མཆོད་པ་བྱས་ནས་ཞེས་བྱ་བའི་དོན་འདི་ཡིན་པར་ཤེས་པར་བྱ་སྟེ། ཟླ་བ་གཅིག་འདོད་པ་ཀུན་ལ་ལོངས་སྤྱོད་ཅིང་། སྒེག་མོ་ལ་སོགས་པས་མཆོད་པ་རྣམ་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་བསྒོམ་པ་ནི་འདོད་པ་ཀུན་ལ་ལོངས་སྤྱོད་པའོ། །

ཅི་དགའ་བ་བཞིན་དུ་ཞེས་བྱ་བ་ནི་བཤད་ཟིན་ཏོ། །བརྒྱ་སྟོང་དུ་མ་བཟླས་པ་ཞེས་བྱ་བ་སྟོང་རྩ་བརྒྱད་བཟླས་པ་སྟེ། སྟོང་རྩ་བརྒྱད་པ་དེ་ནི་བརྒྱ་སྟོང་དུ་བཟླས་སོ། །དུས་བཞིར་ཞེས་བྱ་བ་ལ་སོགས་པ་ནི་གོ་སླའོ། །དེའི་དོན་ནི་འདི་སྐད་སྟོན་པ་ཡིན་ཏེ། མཆོད་པའི་མཐར་ཐུག་པའི་ཆོ་ག་ཐམས་

ཅད་རྗེས་སུ་སྤྱད་ལ། ཕྱག་བཞི་བྱས་ནས། ཉིན་རེ་ཞིང་ཐུན་བཞི་རུ་སྟོང་བཟླས་ཤིང་ཟླ་བ་གཅིག་གི་མཐར་ཐུག་པ་དེ་སྲིད་ཀྱི་བར་དུ་བྱའོ། །དེ་མཐར་ཟླ་བ་ཉ་ལ་འཇིག་རྟེན་གསུམ་ལས་རྣམ་པར་རྒྱལ་བས་བཅིངས་ཏེ། ཆོ་ག་ཐམས་ཅད་རྗེས་སུ་སྤྱད་ནས། ཇི་སྲིད་དུ་རང་གི་ཁྲོ་བོའི་སྔགས་ཟློས་

ཤིང་ཕྱག་རྒྱ་བཅིངས་པ་དེ་ལ་ཧཱུཾ་ཞེས་བྱ་བའི་སྒྲ་བྱུང་གི་བར་དུ་བཟླས་པར་བྱའོ། །ལྷག་མ་ནི་གོ་སླའོ། །དེ་ལྟར་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་བསྒྲུབ་པ་ཡོ་བྱད་ཀྱི་ཆོ་ག་རྒྱས་པར་བསྟན་ནས། ད་ནི་འཇིག་རྟེན་གསུམ་ལས་རྣམ་པར་རྒྱལ་བའི་

གཟུངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་ག་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་ནི། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་སྐབས་སུ་བབ་པ་སྟེ། ཕྱག་རྒྱ་ནི་འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ལས་བཤད་

པའི་གཟུངས་རྣམས་སོ། །དེ་བསྒྲུབ་པ་ནི་ཕྱག་རྒྱ་བསྒྲུབ་པའོ། །དེ་ལ་གལ་ཏེ་འགའ་ཞིག་བཟླས་པའི་ཕྱག་རྒྱ་རྣམས་བསྒྲུབ་པར་འདོད་ན་ཡང་དེ་ནས་དེས་ཇི་ལྟ་བ་བཞིན་དུ་བཟླས་པ་བྱས་ལ་ཞེས་བྱ་བ་ནི་དེ་བཟླས་པའི་ཆོ་གས། རང་གི་གཟུངས་ཀྱི་རིག་པའི་ཡི་གེ་འབུམ་བཟླས་པར་བྱའོ། །

เล่ม ๕๘ · หน้า 279b

དེ་ནས་རྡོ་རྗེ་ཧཱུཾ་ཞེས་བྱ་བ་ལ་སོགས་པ་ཇི་ལྟ་བ་བཞིན་དུ་བཤད་པས་གཟུངས་ཀྱི་རིག་པའི་རས་ཀྱི་མདུན་དུ་སྔ་མ་བཞིན་དུ་སྟོང་རྩ་བརྒྱད་བཟླས་ལ་ཐུན་བཞིའི་སྦྱོར་བ་བྱས་ཏེ། ཇི་སྲིད་དུ་ཟླ་བ་གཅིག་གི་མཐར་ཐུག་པའི་བར་དུ་བྱས་ལ་མཐར་ཟླ་བ་ཉ་ལ། འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་

རྒྱ་བཅིངས་ཏེ། གཟུངས་ཀྱི་རིག་པ་མཚན་ཐོག་ཐག་བཟླས་ན་དེ་ལྟ་བུ་དེས་ཕྱག་རྒྱ་བྱས་པ་འགྲུབ་པར་འགྱུར་རོ། །དེ་ནས་གཟུངས་ཐམས་ཅད་འགྲུབ་པར་འགྱུར་རོ། །དེ་ལྟར་རྡོ་རྗེ་རིགས་ཀྱི་གཟུངས་ཀྱི་དཀྱིལ་འཁོར་བསྒྲུབ་པ་བསྟན་ནས། ད་ནི་རྡོ་རྗེ་རིགས་ཀྱི་ཆོས་ཀྱི་དཀྱིལ་འཁོར་ལས་

བཤད་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་རྒྱས་པར་བཤད་པ་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། སྔོན་དུ་བསྙེན་པ་ཉིད་ཀྱི་རྗེས་ཐོགས་ལའོ། །རྡོ་རྗེ་ཧཱུཾ་ཞེས་བྱ་བའི་ཏིང་ངེ་འཛིན་ནས་བརྩམས་ཏེ། བསྒོམ་ཞིང་ཞེས་བྱ་བ་ནི་

རྡོ་རྗེ་ཧཱུཾ་མཛད་ནས་བརྩམས་ནས་ཇི་སྲིད་དུ་རྡོ་རྗེ་འབེབས་པའི་མཐར་ཐུག་པའི་རྡོ་རྗེ་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་ཁྲོ་བོ་རྣམས་ཀྱི་ནང་ནས། ཁྲོ་བོ་གང་ཡང་རུང་བ་མངོན་པར་འདོད་པ་དེ་ཏིང་ངེ་འཛིན་བསྒོམ་པར་བྱའོ། །ཇི་ལྟར་ཞེ་ན། དེ་བཞིན་དུ་བཟླས་པའི་ཚུལ་གྱིས་

ཞེས་བྱ་བ་སྨོས་ཏེ། སྔ་མ་བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་སྤྱད་དེ། ཕྱིས་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཆོས་ཀྱི་ཕྱག་རྒྱ་བཅིངས་ཏེ། དེའི་རྗེས་ལ་

གཡོན་པའི་ཁྲོ་བོའི་ཁུ་ཚུར་གྱིས་རྡོ་རྗེ་བླངས་ཏེ། ལག་པ་གཡས་པས་བཟླས་པའི་ཕྲེང་བ་བཟུང་ནས་སྔ་མ་བཞིན་དུ་ཆོས་ཀྱི་དཀྱིལ་འཁོར་ལས་བཤད་པའི་རང་གི་རིག་པའི་ཡི་གེ་འབུམ་བཟླས་པར་བྱའོ། །དེ་ནས་ཇི་ལྟ་བ་བཞིན་དུ་རས་ལ་བྲིས་ཏེ། ཟླ་བ་གཅིག་ཐུན་བཞིའི་སྦྱོར་བས་རང་

གི་ཏིང་ངེ་འཛིན་བསྒོམ་པར་བྱའོ། །སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། དེ་ནས་ཟླ་བ་ཉ་ལ་ཏིང་ངེ་འཛིན་ཉིད་ཀྱིས་མཚན་ཐོག་ཐག་བཟླས་པ་བྱས་ན་མངོན་པར་ཤེས་པ་ལྔ་སྐྱེ་བར་འགྱུར་རོ། །དེ་ལྟར་ཆོས་ཀྱི་དཀྱིལ་འཁོར་གྱི་ཡོ་བྱད་ཀྱི་ཆོ་ག་བསྟན་ནས། ད་ནི་རྡོ་རྗེ་

เล่ม ๕๘ · หน้า 280a

རིགས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། སྔ་མ་བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ།

སྔ་མ་བཞིན་དུ་བསྡུ་བ་ལ་སོགས་པ་ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། གཡོན་པའི་ཁྲོ་བོའི་ཁུ་ཚུར་གྱིས་ཁྲོ་བོའི་རྡོ་རྗེ་བླངས་ཏེ། ལག་པ་གཡས་པས་སྔ་མ་བཞིན་དུ་བཟླས་པའི་ཕྲེང་བ་བཟུང་ལ་སྔར་བཤད་པའི་ཆོ་ག་ལས་བཤད་པའི་ཡི་གེ་འབུམ་བཟླ་བར་བྱའོ། །

དེ་ནས་སྔར་བཤད་པའི་རས་རིས་ཀྱི་མདུན་དུ་རྡོ་རྗེའི་ཚིག་གིས་རང་གི་རིག་པ་སྟོང་རྩ་བརྒྱད་བཟླ་བར་བྱའོ། །ཉིན་རེ་བཞིན་དུ་ཐུན་བཞི་སྦྱོར་བ་བྱས་ལ། དེ་ནས་ཟླ་བ་ཉ་ལ་མཚན་ཐོག་ཐག་བཟླས་པ་བྱས་ནས་ལས་ཐམས་ཅད་ལ་རིག་པའི་ཡི་གེ་ལན་ཅིག་བརྗོད་པས་འགྲུབ་པར་འགྱུར་རོ། །

དེ་ལྟར་རྡོ་རྗེ་རིགས་ཀྱི་ཡོ་བྱད་ཀྱི་རྒྱུད་བསྟན་ནས། ད་ནི་པདྨའི་རིགས་ཀྱི་ཡོ་བྱད་ནི་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་དང་པོ་འབུམ་བཟླས་པ་བྱས་ནས་ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། བསྡུ་བ་ལ་སོགས་

པའི་ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། གཡོན་པའི་པདྨའི་ཁུ་ཚུར་གྱིས་རྡོ་རྗེ་པདྨ་བླངས་ཏེ། ལག་པ་གཡས་པས་བཟླས་པའི་ཕྲེང་བ་བཟུང་ནས། འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ན་སྔོན་དུ་བསྙེན་པ་བྱས་པར་

འགྱུར་རོ། །དེ་ནས་པདྨའི་དཀྱིལ་འཁོར་ཟུར་བཞི་པའི་ཐིག་བཏབ་ལ། རས་ཀྱི་དབུས་སུ་བཅོམ་ལྡན་འདས་འགྲོ་བ་འདུལ་བ། མི་བསྐྱོད་པའི་གནས་སུ་སངས་རྒྱས་པདྨ། རིན་ཆེན་འབྱུང་ལྡན་གྱི་གནས་སུ་པདྨའི་རྒྱལ་པོ། དོན་ཡོད་པར་གྲུབ་པའི་གནས་སུ་པདྨའི་ཆགས་པ། འོད་

དཔག་ཏུ་མེད་པའི་གནས་སུ་པདྨའི་ལེགས་པ། མཚམས་ཀྱི་ཆར་པདྨའི་སྒེག་མོ་ལ་སོགས་པ་མཆོད་པའི་ལྷ་མོ་རྣམ་པ་བརྒྱད་སྔར་བཤད་པའི་ཆོ་གས་བྲི་བར་བྱའོ། །འགྲོ་བ་འདུལ་བའི་རས་ཀྱི་ཆོ་གའོ། །རས་ཀྱི་དབུས་སུ་ཐོར་ཚུགས་སངས་རྒྱས་བྲི་བ་དེ་ཉིད་ཀྱི་ཚེ་མི་བསྐྱོད་པའི་

เล่ม ๕๘ · หน้า 280b

གནས་སུ་པདྨའི་ཁྲོ་གཉེར། རིན་ཆེན་འབྱུང་ལྡན་གྱི་གནས་སུ་པདྨའི་ཉི་མ། དོན་ཡོད་པར་གྲུབ་པའི་གནས་སུ་པདྨའི་དཔལ། འོད་དཔག་ཏུ་མེད་པའི་གནས་སུ་པདྨའི་བཞད་པ། ལྷག་མ་ནི་སྔ་མ་བཞིན་ཏེ། ཏིང་ངེ་འཛིན་གཙུག་ཕུད་སངས་རྒྱས་ཀྱི་རས་ཀྱི་ཆོ་གའོ། །ཏིང་ངེ་འཛིན་པདྨའི་

དབུས་སུ་འདྲི་བའི་ཚེ་མི་བསྐྱོད་པའི་གནས་སུ་པདྨ་སྒྲོལ་མ། རིན་ཆེན་འབྱུང་ལྡན་གྱི་གནས་སུ་པདྨ་རྣོན་པོ། དོན་ཡོད་པར་གྲུབ་པའི་གནས་སུ་པདྨ་རྒྱུ། འོད་དཔག་ཏུ་མེད་པའི་གནས་སུ་པདྨའི་གཟུངས་བྲིས་ལ། ལྷག་མ་ནི་སྔ་མ་བཞིན་དུ་བྱས་ཏེ། ཏིང་ངེ་འཛིན་པདྨའི་རས་ཀྱི་ཆོ་གའོ། །

དབུས་སུ་བཅོམ་ལྡན་འདས་པདྨ་ངེས་པའི་དབང་ཕྱུག་འདྲི་བའི་ཚེ་མི་བསྐྱོད་པའི་གནས་སུ་པདྨ་གར་གྱི་དབང་ཕྱུག།རིན་ཆེན་འབྱུང་ལྡན་གྱི་གནས་སུ་པདྨ་བསྲུང་བ། དོན་ཡོད་པར་གྲུབ་པའི་གནས་སུ་པདྨ་གནོད་སྦྱིན། འོད་དཔག་ཏུ་མེད་པའི་གནས་སུ་པདྨའི་ཁུ་ཚུར་བྲིས་ལ་ལྷག་མ་ནི་སྔ་

མ་བཞིན་ཏེ། པདྨ་ངེས་པའི་དབང་ཕྱུག་གི་རས་ཀྱི་ཆོ་གའོ། །དེ་ལྟར་རས་ལ་བྲིས་ནས་སྔ་མ་བཞིན་དུ་རང་ལ་བྱིན་གྱིས་བརླབ་པ་ལ་སོགས་པ་བྱས་ལ། བསྡུ་བ་ལ་སོགས་པ་ཆོ་ག་རྗེས་སུ་སྤྱད་ནས། མཆོད་པ་རྣམ་པ་ལྔ་དང་། སྒེག་མོ་ལ་སོགས་པའི་མཆོད་པ་རྣམ་པ་བརྒྱད་དང་། པདྨའི་

རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་གིས་རས་རིས་ཀྱི་བཅོམ་ལྡན་འདས་འཁོར་དང་བཅས་པ་ལ་ཡང་དག་པར་མཆོད་ལ་ཕྱག་བཞི་བྱས་ཏེ། ཟླ་བ་གཅིག་ཉིན་རེ་ཞིང་ཐུན་བཞིའི་སྦྱོར་བས་སྟོང་རྩ་བརྒྱད་བཟླས་པར་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་

ཏུ་བཟླས་པར་བྱའོ། །དེ་ནས་བཅོམ་ལྡན་འདས་འགྲོ་བ་ཐམས་ཅད་འདུལ་བ་བྱོན་ནས་ཅི་འདོད་པའི་མཆོག་གི་སྐབས་འབྱེད་པར་འགྱུར་རོ། །དེ་ལྟར་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་བསྟན་ནས། ད་ནི་འགྲོ་བ་འདུལ་བའི་

གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་ནི། ཅི་སྟེ་ཕྱག་རྒྱ་བསྒྲུབ་པར་འདོད་ན་ཡང་། །ཞེས་བྱ་བ་ལ་སོགས་པ་གསུངས་པ་ཡིན་ནོ། །སྔ་མ་བཞིན་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ།

เล่ม ๕๘ · หน้า 281a

ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། གཡོན་པའི་པདྨའི་ཁུ་ཚུར་གྱིས་རྡོ་རྗེ་པདྨ་བླངས་ཏེ། གཡས་པས་བགྲང་ཕྲེང་སྙིང་གར་བཟུང་ནས། གཟུངས་ཀྱི་དཀྱིལ་འཁོར་གྱི་རིག་པ་འབུམ་བཟླས་པར་བྱའོ། །དེ་ནས་ཇི་སྐད་དུ་བཤད་པའི་རས་རིས་ལ་

ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ནས། རྡོ་རྗེ་ཆོས་མ་བཅིངས་ཏེ་རིག་པ་སྟོང་རྩ་བརྒྱད་དུ་བརྗོད་ཅིང་ཉིན་རེ་ཞིང་ཐུན་བཞིའི་སྦྱོར་བས་ཟླ་བ་གཅིག་སྔ་མ་བཞིན་དུ་བཟླས་པར་བྱའོ། །དེ་ནས་ཟླ་བ་ཉ་ལ་མཐར་མཚན་ཐོག་ཐག་ཆོས་ཀྱི་རྡོ་རྗེ་མའི་ཕྱག་རྒྱ་བཅིངས་ཏེ། བཟླས་

པ་བྱས་ལ་ནམ་ལངས་པ་ན་ཕྱག་རྒྱའི་དངོས་གྲུབ་ཏུ་འགྱུར་རོ། །དེ་ནས་ཕྱག་རྒྱ་བཅིངས་ལ་ཇི་ལྟ་བ་བཞིན་དུ་འགྲོ་བ་འདུལ་བར་བྱེད་དོ། །དེ་ལྟར་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་བསྟན་ནས། ད་ནི་འགྲོ་བ་འདུལ་བའི་

ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པར་འདོད་ན་ཡང་ཞེས་བྱ་བ་གསུངས་སོ། །དེ་བཞིན་དུ་ཞེས་བྱ་བ་ལ་སོགས་པ་སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་བཞི་པའི་རང་གི་ལྷའི་ཆོ་ག་རྗེས་སུ་སྤྱད་ནས། གཡོན་པའི་པདྨའི་ཁུ་ཚུར་

གྱིས་རྡོ་རྗེ་པདྨ་བླངས་ཏེ། ལག་པ་གཡས་པས་བགྲང་ཕྲེང་བཟུང་ནས། སྔ་མ་བཞིན་དུ་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་སྔགས་འབུམ་བཟླས་པར་བྱའོ། །དེ་ནས་ཇི་སྐད་བཤད་པའི་རས་རིས་ཀྱི་མདུན་དུ་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་ཕྱག་རྒྱ་བཅིངས་ཏེ།

ཉིན་རེ་ཞིང་ཐུན་བཞིའི་སྦྱོར་བས་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་སྔགས་ཟླ་བ་གཅིག་བཟླས་པར་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བཟླས་པ་བྱ་སྟེ། ནམ་ལངས་པ་དང་ཏིང་ངེ་འཛིན་ཐམས་ཅད་མངོན་དུ་བྱེད་པར་འགྱུར་རོ་ཞེས་རྡོ་རྗེ་ཆོས་ཀྱིས་གསུངས་སོ། །དེ་ལྟར་

ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་སྔགས་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་བསྟན་ནས། ད་ནི་འགྲོ་བ་འདུལ་བའི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་རྒྱས་པ་ནི། ཅི་སྟེ་ལས་བསྒྲུབ་པར་འདོད་ན་ཡང་ཞེས་བྱ་བ་གསུངས་སོ། །

เล่ม ๕๘ · หน้า 281b

དེ་བཞིན་དུ་བཟླས་པ་ཞེས་བྱ་བ་ལ་སོགས་པ། སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས་འགྲོ་བ་འདུལ་བའི་ལས་ཀྱི་དཀྱིལ་འཁོར་ལས་བཤད་པའི་རང་གི་རིག་པ་སྔར་

བཤད་པའི་ཆོ་ག་སྟོང་རྩ་བརྒྱད་བཟླས་པ་བྱས་ན་སྔོན་དུ་བསྙེན་པ་བྱས་པར་འགྱུར་རོ། །དེ་ནས་རས་རིས་ཀྱི་མདུན་དུ་ཆོས་ཀྱི་རྡོ་རྗེ་མ་བཅིངས་ཏེ། ཐུན་བཞིའི་སྦྱོར་བས་སྟོང་རྩ་བརྒྱད་བཟླས་ལ་ཟླ་བ་གཅིག་ཏུ་བཟླས་པར་བྱའོ། །མཐར་མཚན་ཐོག་ཐག་བཟླས་ལ་དེའི་རྗེས་ལ་ནམ་

ལངས་པ་ན་ལས་ཐམས་ཅད་འགྲུབ་པར་འགྱུར་རོ། །དེ་ལྟར་པདྨའི་རིགས་ཀྱི་ཡོ་བྱད་ཀྱི་ཆོ་ག་རྒྱས་པར་བསྟན་ནས། ད་ནི་ནོར་བུའི་རིགས་ཀྱི་ཡོ་བྱད་དང་ཆོ་ག་རྒྱས་པ་ནི་འདི་ཡིན་ཏེ་ཞེས་བྱ་བ་གསུངས་སོ། །དེ་ལ་དང་པོ་ཁོ་ནར་ཞེས་བྱ་བ་ནི་སྔ་མ་བཞིན་དུ་དོན་ཐམས་ཅད་གྲུབ་པའི་

དཀྱིལ་འཁོར་ཆེན་པོར་བཤད་པའི་རང་གི་ལྷའི་རྣལ་འབྱོར་བྱས་ལ་ཕྱག་བཞིའི་མཐར་ཐུག་པའི་ཆོ་ག་བསྡུ་བ་ལ་སོགས་པའི་རྗེས་སུ་སྤྱད་ནས། གཡོན་པའི་རིན་པོ་ཆེའི་ཁུ་ཚུར་གྱིས་རྡོ་རྗེ་རིན་པོ་ཆེ་བླངས་ལ། ལག་པ་གཡས་པས་བཟླས་པའི་བགྲང་ཕྲེང་སྙིང་གར་བཟུང་སྟེ། དོན་

ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་སྔགས་སྔ་མ་བཞིན་དུ་འབུམ་བཟླས་པར་བྱའོ། །དེ་ནས་རིན་པོ་ཆེ་ཟུར་བཞི་པའི་ཐིག་བཏབ་ལ། རས་རིས་ཀྱི་དབུས་སུ་བཅོམ་ལྡན་འདས་དོན་ཐམས་ཅད་གྲུབ་པ། མི་བསྐྱོད་པའི་གནས་སུ་ནོར་བུའི་

མཚན་མ། རིན་ཆེན་འབྱུང་ལྡན་གྱི་གནས་སུ་རིན་ཆེན་རྒྱལ་པོ། དོན་ཡོད་གྲུབ་པའི་གནས་སུ་རིན་ཆེན་ཆགས་པ། འོད་དཔག་ཏུ་མེད་པའི་གནས་སུ་རིན་ཆེན་ལེགས་པ། མཚམས་ཀྱི་ཆ་རྣམས་སུ་སྒེག་མོ་ལ་སོགས་པའི་མཆོད་པའི་ལྷ་མོ་བརྒྱད་སྔར་བཤད་པའི་ཆོ་གས་བྲི་བར་

བྱའོ། །དོན་ཐམས་ཅད་གྲུབ་པའི་རས་ཀྱི་ཆོ་གའོ། །རས་ཀྱི་དབུས་སུ་བཅོམ་ལྡན་འདས་རིན་ཆེན་ལྟ་བ་བྲི་བ་དེའི་ཚེ་མི་བསྐྱོད་པའི་གནས་སུ་རིན་ཆེན་ཕྲེང་བ། རིན་ཆེན་འབྱུང་ལྡན་གྱི་གནས་སུ་རིན་ཆེན་ཉི་མ། དོན་ཡོད་གྲུབ་པའི་གནས་སུ་རིན་ཆེན་དཔལ། འོད་དཔག་ཏུ་

เล่ม ๕๘ · หน้า 282a

མེད་པའི་གནས་སུ་རིན་ཆེན་བཞད་པ་བྲིས་ལ་ལྷག་མ་ནི་སྔ་མ་བཞིན་ནོ། །རིན་ཆེན་ལྟ་བའི་རས་ཀྱི་ཆོ་གའོ། །བཅོམ་ལྡན་འདས་རིན་ཆེན་པདྨ་དབུས་སུ་འདྲི་བ་དེའི་ཚེ། མི་བསྐྱོད་པའི་གནས་སུ་གཏོང་བའི་ཏིང་ངེ་འཛིན་གྱི་ཡེ་ཤེས་ཀྱི་སྙིང་པོ། རིན་ཆེན་

འབྱུང་ལྡན་གྱི་གནས་སུ་རིན་ཆེན་རྣོན་པོའོ། །དོན་ཡོད་གྲུབ་པའི་གནས་སུ་རིན་ཆེན་འཁོར་ལོ། འོད་དཔག་ཏུ་མེད་པའི་གནས་སུ་ནོར་བུ་གསུང་བ་བྲིས་ལ། ལྷག་མ་ནི་སྔ་མ་བཞིན་ཏེ་རིན་ཆེན་པདྨའི་རས་ཀྱི་ཆོ་གའོ། །དབུས་སུ་བཅོམ་ལྡན་འདས་རིན་ཆེན་ཆར་འབེབས་འདྲི་བའི་ཚེ་

མི་བསྐྱོད་པའི་གནས་སུ་ནོར་བུ་མཆོད་པ། རིན་ཆེན་འབྱུང་ལྡན་གྱི་གནས་སུ་ནོར་བུ་བསྲུང་བ། དོན་ཡོད་གྲུབ་པའི་གནས་སུ་ནོར་བུ་གནོད་སྦྱིན། འོད་དཔག་ཏུ་མེད་པའི་གནས་སུ་ནོར་བུ་ཁུ་ཚུར་བྲིས་ལ་ལྷག་མ་ནི་སྔ་མ་བཞིན་ཏེ། རིན་ཆེན་ཆར་འབེབས་ཀྱི་རས་ཀྱི་ཆོ་གའོ། །དེ་

ལྟར་རས་རིས་བྲིས་ནས་དེ་ནས་བསྡུ་བ་ལ་སོགས་པའི་ཆོ་ག་བྱས་ལ། རས་རིས་བཅོམ་ལྡན་འདས་ལ་མཆོད་པ་རྣམ་པ་ལྔ་དང་། རིན་ཆེན་སྒེག་མོ་ལ་སོགས་པ་མཆོད་པ་རྣམ་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་རིག་མ་བཅུ་དྲུག་གིས་ཡང་དག་པར་མཆོད་ལ་ཕྱག་

བཞི་བྱས་ནས། ཉིན་རེ་ཞིང་ཐུན་བཞིའི་རྣལ་འབྱོར་གྱིས་སྟོང་རྩ་བརྒྱད་ཟླ་བ་གཅིག་བཟླས་པར་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བཟླས་ལ། ནམ་ལངས་པ་དང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བའི་རིན་པོ་ཆེའི་བྱང་ཆུབ་སེམས་དཔའ་

ནམ་མཁའི་སྙིང་པོ་བྱོན་ནས་དབང་བསྐུར་བ་བྱིན་པར་མཛད་དོ། །དབང་བསྐུར་བ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེར་རིག་འཛིན་གྱི་འཁོར་ལོས་སྒྱུར་བར་འགྱུར་རོ། །དེ་ལྟར་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་ཀྱི་ཡོ་

བྱད་ཀྱི་ཆོ་ག་རྒྱས་པར་བསྟན་ནས། ད་ནི་ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་གྱི་ཡོ་བྱད་ཀྱི་ཆོ་ག་རྒྱས་པ་ནི། ཅི་སྟེ་ཕྱག་རྒྱ་བསྒྲུབ་པར་འདོད་ན་ཡང་། །ཞེས་བྱ་བ་གསུངས་སོ། །དེ་བཞིན་དུ་ཞེས་བྱ་བ་ལ་སོགས་པ་ལ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་

เล่ม ๕๘ · หน้า 282b

ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས་གཡོན་པའི་ཁུ་ཚུར་གྱིས་རྡོ་རྗེ་རིན་པོ་ཆེ་བླངས་ལ། ལག་པ་གཡས་པས་བཟླས་པའི་ཕྲེང་བ་སྙིང་གར་བཟུང་སྟེ། ནོར་བུའི་རིགས་སུ་བཤད་པའི་གཟུངས་ཀྱི་རིག་པ་སྔ་

མ་བཞིན་དུ་འབུམ་བཟླས་པར་བྱའོ། །དེ་ནས་བཤད་མ་ཐག་པའི་རས་ལ་བསྡུ་བ་ལ་སོགས་པའི་ཆོ་ག་བྱས་ལ་མཆོད་པ་རྣམ་པ་ལྔ་དང་། རིན་ཆེན་སྒེག་མོ་ལ་སོགས་པ་རྣམས་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པ་རྣམ་པ་བཅུ་དྲུག་གི་ཕྱག་རྒྱ་རྣམས་ཀྱིས་

མཆོད་ལ་ཕྱག་བཞི་བྱའོ། །དེ་ནས་རྡོ་རྗེ་དབྱིངས་ལས་བཤད་པའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་བཅིངས་ཏེ། རང་གི་གཟུངས་ཀྱི་རིག་པ་སྟོང་རྩ་བརྒྱད་བཟླས་ཤིང་། ཉིན་རེ་ཞིང་ཐུན་བཞིའི་སྦྱོར་བས་ཟླ་བ་གཅིག་གི་བར་དུ་བཟླས་པར་བྱའོ། །དེ་ནས་ཟླ་བ་ཉ་ལ་མཚན་ཐོག་

ཐག་བཟླས་པས་དེའི་རྗེས་ལ་གང་བསམ་པ་ཐམས་ཅད་ཀྱི་ལས་བྱེད་པར་འགྱུར་རོ། །དེ་ལྟར་ནོར་བུའི་རིགས་ཀྱི་གཟུངས་བསྒྲུབ་པའི་ཡོ་བྱད་ཀྱི་ཆོ་ག་རྒྱས་པར་བསྟན་ནས། ད་ནི་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་རྒྱས་

པ་ནི། ཅི་སྟེ་ནོར་བུའི་ཡེ་ཤེས་བསྒྲུབ་པར་འདོད་ན་ཡང་། །ཞེས་གསུངས་པ་ཡིན་ནོ། །ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་སྔགས་ཀྱི་དངོས་གྲུབ་ནི་ནོར་བུ་ཡེ་ཤེས་སོ། །གལ་ཏེ་བསྒྲུབ་པར་འདོད་ན་ཡང་སྒྲུབ་པ་པོ་དེས་དེ་བཞིན་དུ་རྡོ་རྗེ་རིན་པོ་ཆེ་

ལས་བྱུང་བའི་ཏིང་ངེ་འཛིན་ཇི་ལྟ་བར་རིམ་བཞིན་དུ་བསྒོམ་པར་བྱ་སྟེ། པདྨའི་རིགས་ཀྱི་ཏིང་ངེ་འཛིན་སྒྲུབ་པ་པོ་རྣལ་འབྱོར་པས་སྔ་མ་བཞིན་དུ་འཕགས་པ་ནམ་མཁའི་སྙིང་པོའི་ཐུགས་ཀའི་རྡོ་རྗེ་རིན་པོ་ཆེ་ལས་འབྱུང་བའོ། །ཏིང་ངེ་འཛིན་ནི་དོན་ཐམས་ཅད་གྲུབ་པ་ལ་སོགས་

པའི་ནོར་བུ་རིན་ཆེན་འབེབས་པའི་མཐར་ཐུག་པའི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོའི་གཟུགས་ཀྱིས་གོ་རིམས་ཇི་ལྟ་བ་བཞིན་དུ་བསྒོམ་པ་ནི་ཡང་ནས་ཡང་དུ་མངོན་དུ་བྱེད་པའོ། །ཇི་ལྟར་བསྒོམ་པར་བྱ་ཞེ་ན། དངོས་པོ་མེད་པའི་ནམ་མཁའ་ལས། །

เล่ม ๕๘ · หน้า 283a

ཞེས་བྱ་བ་སྨོས་ཏེ། ཇི་ལྟར་རིན་པོ་ཆེ་འབྱུང་ཞེ་ན། ནམ་མཁའ་དང་མཉམ་པ་ཉིད་ཀྱི་ཡེ་ཤེས་ལས་སོ། །ནམ་མཁའ་དེ་ཡང་གཟུང་བ་དང་འཛིན་པའི་རྣམ་པར་རྟོག་པ་སྤངས་པའི་ཕྱིར་དངོས་པོ་མེད་པའོ། །དེ་བས་ན་དངོས་པོ་མེད་པའི་ནམ་མཁའ་རྟོག་

པ་ཐམས་ཅད་སྤངས་པ་ལས་རིན་པོ་ཆེ་ཇི་ལྟར་འབྱུང་བར་འགྱུར། ཅིའི་ཕྱིར་ཞེ་ན། རྣམ་པར་རྟོག་པ་ལས་འབྱུང་བ་མེད་པར་འདོད་པའི་ཕྱིར་རོ། །ནམ་མཁའ་དང་མཉམ་པའི་ཡེ་ཤེས་དེ་ཡང་བག་ཆགས་དང་བཅས་པའི་ཉོན་མོངས་པ་སྤངས་ཤིང་། ཤིན་ཏུ་རྣམ་པར་རྟོག་

པ་མེད་པ་དེའི་ཕྱིར། རྡོ་རྗེ་རིན་པོ་ཆེ་དེ་ལས་སྐྱེས་པ་དོན་དམ་པར་ཡོད་པ་མ་ཡིན་ནོ་ཞེས་བསྟན་ཏོ། །རིན་པོ་ཆེ་ལས་བྱང་ཆུབ་སེམས་དཔའི་སྐུ་ཇི་ལྟར་འབྱུང་ཞེས་བྱ་བ་ནི། གདོད་མ་ནས་མ་སྐྱེས་པའི་ཕྱིར་ན་རིན་པོ་ཆེའི་རྒྱུ་ལས་བྱུང་བའི་དོན་ཐམས་ཅད་གྲུབ་པ་ལ་སོགས་

པའི་བྱང་ཆུབ་སེམས་དཔའི་སྐུ་ཇི་ལྟར་འབྱུང་ཞིང་སྐྱེ་བ་ཡིན་ཞེས་བྱ་བའི་དོན་ཏོ། །མཚན་ཐོག་ཐག་བཟླས་པར་བྱའོ། །རྡོ་རྗེ་རིན་པོ་ཆེ་ནི་དོན་དམ་པར་མ་སྐྱེས་ཤིང་དེ་ཡང་མེད་པའི་ཕྱིར་དེའི་རིགས་ཀྱང་དོན་དམ་པར་མ་སྐྱེས་པ་དེའི་ཕྱིར་ནོར་བུའི་རིགས་རྣམས་སྒྱུ་མ་དང་མཚུངས་པར་

བསྒོམ་ཞིང་བཟླས་པར་བྱའོ། །ཇི་ལྟ་བའི་རིམ་པ་བཞིན་དུ་ཞེས་བྱ་བའི་དོན་བཤད་པ་ནི་འདི་ཉིད་ཀྱིས་སྟོན་པ་ཡིན་ཏེ། ཏིང་ངེ་འཛིན་འདིའི་དུས་བཞིར་བསྒོམས་ལ། ཇི་ལྟར་གོང་དུ་སྨོས་པ་བཞིན་དུ་ཞེས་བྱ་བ་ནི་ཕྱག་བཞི་བྱས་ལ་སྟོང་ཕྲག་བརྒྱ་བཟླས་པར་བྱའོ་ཞེས་བྱ་བའི་དོན་

ཏོ། །གོང་དུ་སྨོས་པ་བཞིན་དུ་ཞེས་བྱ་བ་ནི་སྔ་མ་བཞིན་དུ་ཞེས་བྱ་བའི་དོན་ཡིན་ནོ། །དེ་ནས་ཞེས་བྱ་བ་ནི་དེ་མ་ཐག་པ་སྟེ། སྟོང་ཕྲག་བརྒྱ་བཟླས་པ་བྱས་པའི་རྗེས་ཐོགས་ཉིད་ལའོ། །མདུན་གྱི་རས་རིས་ལ་སྔ་མ་བཞིན་དུ་ཟླ་བ་གཅིག་ཙམ་བཟླས་པ་བྱས་ལ། དེ་ནི་འདི་

སྐད་སྟོན་པ་ཡིན་ཏེ། དེ་ནས་ནམ་ལངས་པ་དང་བཅོམ་ལྡན་འདས་རྣམས་ཀྱིས་དབང་བསྐུར་བར་འགྱུར་རོ། །འདི་སྐད་སྟོན་པ་ཡིན་ཏེ། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ནས། ཕྱག་བཞིའི་མཐར་ཐུག་པའི་

เล่ม ๕๘ · หน้า 283b

ཆོ་ག་རྗེས་སུ་སྤྱད་དེ། རང་གི་ལྷའི་ཕྱག་རྒྱ་ཆེན་པོ་བཅིངས་ནས། དེའི་སྔགས་བརྗོད་ཅིང་འདི་ལྟར་བསྒོམ་པར་བྱ་སྟེ། དངོས་པོ་མེད་པའི་ནམ་མཁའ་ལས་རིན་པོ་ཆེ་ཇི་ལྟར་འབྱུང་བར་འགྱུར། རིན་པོ་ཆེ་ལས་བྱང་ཆུབ་སེམས་དཔའི་སྐུ་ཇི་ལྟར་འབྱུང་ཞེས་དེ་ལྟར་བསྒོམས་ནས།

སྔར་བཤད་པའི་ཚུལ་གྱིས་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་བཤད་པའི་རང་གི་ལྷའི་སྔགས་སྟོང་ཕྲག་བརྒྱད་བཟླས་པར་བྱའོ། །དེ་ནས་རས་རིས་ཀྱི་མདུན་དུ་སྔར་བཤད་པའི་ཚུལ་གྱིས་རང་གི་ལྷའི་ཏིང་ངེ་འཛིན་བསྒོམས་ཏེ། ཉིན་རེ་ཞིང་ཐུན་བཞིའི་སྦྱོར་

བས་ཟླ་བ་གཅིག་བཟླས་པར་བྱའོ། །དེ་ནས་ཟླ་བ་ཉ་ལ་མཐར་མཚན་ཐོག་ཐག་བཟླས་ན་ནམ་ལངས་པ་དང་། དེ་བཞིན་གཤེགས་པ་ཐམས་ཅད་བྱོན་ནས། ཅི་དགའ་བ་བཞིན་དུ་དབང་བསྐུར་བར་བྱའོ་ཞེས་དེ་བཞིན་གཤེགས་པ་ནམ་མཁའི་སྙིང་པོས་གསུངས་

སོ། །དེ་ལྟར་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་བསྒྲུབ་པའི་ཡོ་བྱད་ཀྱི་ཆོ་ག་རྒྱས་པར་བསྟན་ནས། ད་ནི་ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པ་ནི་དེ་ནས་ལས་ཀྱི་བསྒྲུབ་པ་བཤད་དེ་ཞེས་བྱ་བ་གསུངས་སོ། །

དེ་བཞིན་དུ་བཟླས་ལ་ཞེས་བྱ་བ་ནི་སྔ་མ་བཞིན་དུ་ནོར་བུའི་རིགས་སུ་བཤད་པའི་ཕྱག་བཞིའི་མཐར་ཐུག་པ་ཁོ་ན་རྗེས་སུ་སྤྱད་ལ། གཡོན་པའི་རིན་པོ་ཆེའི་ཁུ་ཚུར་གྱིས་རྡོ་རྗེ་རིན་པོ་ཆེ་བླངས་ལ། ལག་པ་གཡས་པས་བཟླས་པའི་ཕྲེང་བ་སྙིང་གར་བཟུང་ལ། ནོར་

བུའི་རིགས་ཀྱི་དཀྱིལ་འཁོར་དུ་བཤད་པའི་རིག་པ་འབུམ་བཟླས་པར་བྱའོ། །དེ་ནས་རས་རིས་ཀྱི་མདུན་དུ་ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ལ། ཐུན་བཞིའི་སྦྱོར་བས་ཉིན་རེ་ཞིང་སྟོང་རྩ་བརྒྱད་ཟླ་བ་གཅིག་བཟླས་པར་བྱའོ། །དེ་བཞིན་དུ་བཟླས་ལ།

ཟླ་བ་ཉ་ལ་མཐར་མཚན་ཐོག་ཐག་བཟླས་པར་བྱའོ། །དེ་ནས་ནམ་ལངས་པ་དང་བཅོམ་ལྡན་འདས་ནམ་མཁའི་སྙིང་པོ་དོན་ཐམས་ཅད་འགྲུབ་པར་འགྱུར་ཏེ། དེའི་རྗེས་ལ་རིག་པ་རྣམས་ལན་ཅིག་བརྗོད་པས་ལས་ཐམས་ཅད་བྱེད་པར་འགྱུར་རོ། །དེ་ལྟར་དེ་བཞིན་

เล่ม ๕๘ · หน้า 284a

གཤེགས་པ་ལ་སོགས་པ་རིགས་ཐམས་ཅད་ཀྱི་ཡོ་བྱད་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་སྙིང་པོ་ཐམས་ཅད་བསྒྲུབ་པར་འདོད་ན་ཡང་ཞེས་བྱ་བ་ལ་སོགས་པ། རིགས་ཐམས་ཅད་ཀྱི་ཟློས་པ་པོས་ཞེས་པའི་སྒྲ་བརྗོད་ལ། རང་གི་སྙིང་

པོ་དང་། ཕྱག་རྒྱ་དང་། སྔགས་དང་། རིག་པ་བཟླས་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་རིགས་ཐམས་ཅད་ཀྱི་ཐུན་མོང་དུ་འགྱུར་བའི་ཡོ་བྱད་ཀྱི་ཆོ་ག་རྒྱས་པར་གསུངས་པ་ཡིན་ནོ། །དེ་བཞིན་གཤེགས་པ་ལ་སོགས་པའི་

རིགས་རྣམས་ཀྱི་ཐུན་མོང་ནི་སྤྱིར་རོ། །ཡོ་བྱད་ཀྱི་ཆོ་ག་རྒྱས་པ་ནི་ཤིས་པའི་སྒྲ་ལ་སོགས་པའི་མཚན་ཉིད་དོ། །གྲུབ་པར་གྱུར་ཅིག་ཅེས་བརྗོད་ལ། སྙིང་པོ་ཅི་དགར་ཟློས་ཤིང་ཞེས་བྱ་བ་ནི་སྙིང་པོ་ནི་སེམས་སོ། །དེ་ཅི་དགའ་བ་ནི་མངོན་པར་འདོད་པའོ། །དེ་བཞིན་གཤེགས་

པ་ཐམས་ཅད་ཅེས་བྱ་བ་ནི་ཡང་སྙིང་པོ་བསྒྲུབ་པར་འདོད་ན་དེ་བཞིན་གཤེགས་པ་ཐམས་ཅད་འགྲུབ་པར་གྱུར་ཅིག་ཅེས་བརྗོད་ལ། སྙིང་པོ་ཅི་དགར་ཟློས་ཤིང་བསྒྲུབ་པའི་ཆོ་ག་བྱའོ། །འདི་སྐད་དུ་སྟོན་པ་ཡིན་ཏེ། རིགས་སུ་ཡང་དཀྱིལ་འཁོར་ཆེན་པོ་ལས་བཤད་

པའི་དངོས་གྲུབ་བསྒྲུབ་པར་འདོད་ན། ཕྱག་བཞིའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ལ། སེམས་ཅན་ཐམས་ཅད་སངས་རྒྱས་དང་། བྱང་ཆུབ་སེམས་དཔའ་ཉིད་དུ་གྱུར་ནས་བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་ལས་ཀྱིས་ཚིམ་ཞིང་སྙིང་པོ་

འདོད་པས་དེ་བཞིན་གཤེགས་པ་ཐམས་ཅད་འགྲུབ་པར་གྱུར་ཅིག་ཅེས་བརྗོད་པར་བྱའོ། །དེ་ནས་རང་གི་རིགས་ཀྱི་དཀྱིལ་འཁོར་ཆེན་པོ་ལས་བཤད་པའི་སྔགས་བཟླ་བར་བྱའོ། །དེ་ལྟར་སྤྱིའི་སྙིང་པོའི་ཡོ་བྱད་བཤད་ནས། རིགས་ཐམས་ཅད་ཀྱི་ཐུན་མོང་བ་ཉིད་ཀྱི་ཕྱག་རྒྱའི་

ཡོ་བྱད་གསུངས་པ་ནི། དེ་ལ་འདི་ནི་ཕྱག་རྒྱའི་ཡོ་བྱད་ཆོ་ག་སྟེ་ཞེས་བྱ་བའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རང་གི་རིགས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་གྱི་ཆོ་ག་དང་། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ལ། རང་གི་རིགས་ཀྱི་

เล่ม ๕๘ · หน้า 284b

གཟུངས་ཀྱི་ཕྱག་རྒྱ་བཅིང་སྟེ་འདི་སྐད་བརྗོད་པར་བྱའོ། །ཕྱག་རྒྱ་ཐམས་ཅད་བདག་ལ་དགའ་བར་གྱུར་ཅིག་ཅེས་སྨྲས་ལ། དེ་ནས་རང་གི་རིགས་ཀྱི་གཟུངས་ཀྱི་རིག་པ་བཟླ་བར་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་གཟུངས་ཀྱི་དཀྱིལ་འཁོར་གྱི་ཡོ་བྱད་བསྟན་ནས། ད་ནི་

དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དཀྱིལ་འཁོར་ལས་བཤད་པའི་ཡོ་བྱད་གསུངས་པ་ནི། སྤྲོས་པ་མེད་པའི་ཚིག་གྲུབ་པར་གྱུར་ཅིག་ཅེས་བྱ་བ་ལ་སོགས་པའོ། །རང་གི་རིགས་ཀྱི་དེ་ལ་སྤྲོས་པ་ནི་རྣམ་པར་རྟོག་པ་ལས་བྱུང་བས་ན་སྤྲོས་པ་སྟེ། ངག་གི་རྣམ་པར་

རྟོག་པའི་སྤྲོས་པ་མེད་ཅེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་གྱིས་ཆོས་ཐམས་ཅད་རང་བཞིན་གྱིས་རྣམ་པར་རྟོག་པར་སེམས་རྩེ་གཅིག་པའོ། །འདི་སྐད་སྟོན་པ་ཡིན་ཏེ། རང་གི་རིགས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་

བྱས་ལ། སྔ་མ་བཞིན་དུ་ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ལ། རང་གི་རིགས་ཀྱི་ཆོས་ཀྱི་དཀྱིལ་འཁོར་ལ་བཤད་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། སྤྲོས་པ་མེད་པའི་ཚིག་འགྲུབ་པར་གྱུར་ཅིག་ཅེས་བརྗོད་ཅིང་། དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་

བདག་ལ་བསྐྱེད་པར་གྱུར་ཅིག་ཅེས་སྨྲས་ལ། དེ་ནས་ཆོས་ཀྱི་དཀྱིལ་འཁོར་ལས་སྨྲས་པའི་རང་གི་ལྷའི་སྔགས་སྔར་བཤད་པའི་ཚུལ་གྱིས་བཟླས་པར་བྱའོ། །དེ་ལྟར་དེ་བཞིན་གཤེགས་པའི་རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་ལས་བཤད་པའི་སྔགས་ཀྱི་སྤྱིའི་ཡོ་བྱད་ཀྱི་ཆོ་ག་རྒྱས་

པར་བསྟན་ནས། ད་ནི་དེ་བཞིན་གཤེགས་པ་ལ་སོགས་པ་ལ་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་ལས་བཤད་པའི་རིགས་གསུངས་པ་ནི། དེ་ལ་འདི་ནི་རིག་པའི་ཡོ་བྱད་ཀྱི་ཆོ་ག་སྟེ་ཞེས་བྱའོ། །དེ་ལ་མ་རིག་པའི་ཆོས་ཀྱི་མཚན་ཉིད་ནི་མངོན་པར་ཞེན་པ་དེས་མདོངས་པར་འགྱུར་

བའོ། །ཀྱེ་མ་ཞེས་བྱ་བ་ནི་སྙིང་བརྩེ་བའོ། །ཁམས་གསུམ་པ་ནི་གནས་པའི་སེམས་ཅན་དེ་དག་བློ་ལ་བཞག་ནས། ཀྱེ་མ་སེམས་ཅན་འདི་དག་ཅེས་བྱ་བ་སྨོས་སོ། །དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་དེ་ཡིན་པས་ན་དེ་བཞིན་གཤེགས་པ་ཐམས་ཅད་ནི་རང་བཞིན་གྱིས་

เล่ม ๕๘ · หน้า 285a

འོད་གསལ་བའི་སེམས་དང་སེམས་ལས་བྱུང་བའོ། །དེ་ནི་རིགས་པ་ཐུགས་སུ་ཆུད་ཅིང་སྡོམ་པར་གྱུར་ཏོ་ཞེས་བྱ་བ་ནི། དེ་ལ་རིག་པ་ནི་རྣམ་པར་ཐར་པའི་སྒོ་སུམ་ཅུ་རྩ་བདུན་གྱི་རིགས་ཀྱི་དཀྱིལ་འཁོར་ལས་བཤད་པའི་རང་བཞིན་གྱིས་འོད་གསལ་བ་རྣམ་པར་ཐར་པའི་

སྒོའི་རང་བཞིན་དེ་ལས་འབྱུང་བའི་རིག་པས་དཀྱིལ་འཁོར་ཡང་དག་པར་ཐུགས་སུ་ཆུད་ཅིང་མངོན་སུམ་དུ་མཛད་པའོ། །དེ་སྡོམ་པར་གྱུར་པ་ནི་མངོན་སུམ་དུ་བྱེད་པའི་རྒྱུར་གྱུར་པའོ། །དེ་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་རང་གི་རིགས་ཀྱི་དཀྱིལ་འཁོར་ཆེན་པོ་ལས་

བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས་ཕྱག་རྒྱ་ཆེན་པོ་བཅིངས་ཏེ། ཐུགས་རྗེ་ཆེན་པོ་དང་བྱམས་པའི་སྤྱན་གྱིས་སེམས་ཅན་གྱི་ཁམས་ཐམས་ཅད་ལ་གཟིགས་ནས། སེམས་ཅན་མགོན་མེད་པ་འདི་དག་ཐམས་ཅད་མ་རིག་

པས་མདོངས་པར་གྱུར་པའི་ཁམས་གསུམ་ཟོ་ཆུན་གྱི་རྒྱུན་མ་ལྟ་བུར་འཁོར་བ་དེས་ཇི་ལྟ་བ་བཞིན་གྱི་འོད་གསལ་བ་དེ་བཞིན་དུ་རང་བཞིན་གྱིས་འོད་གསལ་བའི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྐུའི་ལམ་གྱི་རིག་པ་ཁོང་དུ་ཆུད་ཅིང་སྡོམ་པར་འགྱུར་བ་མ་མཐོང་བ་རྣམས་ལ་

བདག་གིས་དེ་བཞིན་གཤེགས་པ་ཐམས་ཅད་ཀྱི་རིག་པ་ཁོང་དུ་ཆུད་ཅིང་སྡོམ་པར་གྱུར་པར་བྱའོ་ཞེས་བསམས་ནས་འདི་སྐད་ཅེས་བརྗོད་པར་བྱའོ། །སེམས་ཅན་འདི་དག་ཐམས་ཅད་མ་རིག་པས་མདོངས་པར་འགྱུར་བ་ལ། དེ་བཞིན་གཤེགས་པ་ཐམས་ཅད་ཀྱི་རིག་པ་ཐུགས་

སུ་ཆུད་ཅིང་སྡོམ་པར་འགྱུར་བ་ལ་བྱའོ་ཞེས་སྨྲས་ལ། དེ་ནས་རང་གི་རིགས་ཀྱི་ལས་ཀྱི་དཀྱིལ་འཁོར་ལས་བཤད་པའི་རང་གི་སྙིང་པོས་ལྷ་མོའི་ཚོགས་རྣམས་སྤྲུལ་ལ། སེམས་ཅན་གྱི་ཁམས་ཐམས་ཅད་དེ་བཞིན་གཤེགས་པ་ལ་སོགས་པའི་རིགས་ཀྱི་རང་བཞིན་དུ་བསྐྱེད་ལ། སྔར་

བཤད་པའི་ཚུལ་གྱིས་རིག་པ་བཟླ་བར་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་ཐམས་ཅད་ཀྱི་སྤྱིའི་ཡོ་བྱད་ཀྱི་ཆོ་ག་རྒྱས་པར་བསྟན་ནས། ད་ནི་རྡོ་རྗེ་སེམས་དཔའ་ལ་སོགས་པའི་སྒྲ་བརྗོད་ཅིང་།

เล่ม ๕๘ · หน้า 285b

དེའི་དོན་གྱིས་བདག་ཉིད་རང་གི་ལྷའི་སྐུར་བསྒོམ་པའམ་མདུན་དུ་བསྒོམས་ལ་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་བཟླས་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་ཞེས་བྱ་བས་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་སྙིང་པོ་དང་། ཕྱག་རྒྱ་

དང་། སྔགས་དང་། རིག་པ་རྣམས་ཀྱི་ཐུན་མོང་དུ་རྡོ་རྗེ་བཟླས་པའོ། །རྒྱས་པར་གསུངས་པ་ནི་ཅི་དགའ་བ་ཉིད་དུ་ཞེས་བྱ་བ་ལ་སོགས་པའོ། །སྦྲིད་པ་དང་སྐྱིགས་བུ་དང་སྒྲེགས་པ་དང་། སྐྱིལ་ཀྲུང་ཐ་དད་ཅི་དགའ་བ་ཉིད་དུ་བྱའོ། །སེམས་དཔའ་གང་གི་སྙིང་པོ་དང་། ཞེས་བྱ་བ་ལ་

སོགས་པ་གོ་སླའོ། །བཟླས་པའི་དོན་དུ་བསྒྲུབ་པར་བྱ་བ་དེ་ནི་བདག་གམ་ཞེས་བྱ་བ་ནི་རྣམ་པར་སྣང་མཛད་ལ་སོགས་པ་ནས་རིན་ཆེན་འབེབས་པའི་མཐར་ཐུག་པ་དེ་ཟློས་ཤིང་། སྙིང་པོ་དང་། ཕྱག་རྒྱ་དང་། སྔགས་དང་། རིག་པ་རྣམས་རང་ཉིད་ཟློས་ཤིང་། རྣམ་པར་སྣང་མཛད་ལ་སོགས་

པ་ལ། བཛྲ་དྷཱ་ཏུ་ཞེས་བྱ་བའི་དོན་ལ་སོགས་པས་བཟླས་པའི་དོན་ཤས་ནས་བསྒྲུབས་ལ་མངོན་པར་བྱ་བའམ། མདུན་དུ་བསྒོམ་པར་བྱ་བའི་དོན་ཏོ། །དེ་ལྟར་བྱས་ན་ཅིར་འགྱུར་ཞེ་ན། བསྒྲུབ་པར་བྱ་བ་འགྲུབ་པར་འགྱུར། །ཞེས་བྱ་བ་སྨོས་ཏེ། སྙིང་པོ་དང་། ཕྱག་རྒྱ་དང་། གསང་

སྔགས་དང་། རིག་སྔགས་རྣམས་ཀྱིས་བསྒྲུབ་པའི་བྱ་བ་འགྲུབ་པར་འགྱུར་རོ་ཞེས་བྱ་བའི་དོན་ཏོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཐུན་མོང་གི་བཟླས་པའི་ཆོ་ག་རྒྱས་པར་བསྟན་ནས། དེ་ནི་ཟློས་པ་པོ་རྣམས་སྤྲོ་བ་བསྐྱེད་པར་བྱ་བའི་ཕྱིར་བཟླས་བརྗོད་ཀྱི་འབྲས་བུ་བརྗོད་

པར་བྱའོ་ཞེས་བྱ་བའི་ཆོ་ག་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཐུན་མོང་གི་དངོས་གྲུབ་ཀྱི་ཆོ་ག་རྒྱས་པར་གསུངས་སོ། །དེ་ལ་ཞེས་བྱ་བ་ལ་སོགས་པ་ནི་གོ་སླའོ། །གང་ན་གཏེར་ཡོད་པ་དེར་ཞེས་བྱ་བ་ལ་

སོགས་པ་སྔ་མ་བཞིན་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། རྟོག་པ་ཐམས་ཅད་ཀྱི་རྒྱུད་ཕྱི་མའི་ཕྱི་མ་ལས་བཤད་པའི་ཚུལ་གྱིས་ཟླ་བ་བཞིར་སྔོན་དུ་བསྙེན་པ་བྱས་ལ། མཐར་མཚན་ཐོག་

เล่ม ๕๘ · หน้า 286a

ཐག་བཟླས་པ་བྱས་ནས་རྡོ་རྗེ་གཏེར་ལ་སོགས་པའི་སྦྱོར་བས་བསྒྲུབ་པར་བྱའོ། །ཤིང་སྐྱེས་དེ་ལྟ་བུར་མཐོང་ན་དེ་ན་གཏེར་ཡོད་པར་ཤེས་པར་བྱའོ། །གཏེར་དང་གཏེར་གྱི་ལྷ་དང་ཞིང་སྐྱོང་དང་ཕྱོགས་སྐྱོང་རྣམས་བཅིངས་ལ་གནས་དེར་སོང་སྟེ། བདག་ཉིད་གནས་

དེར་བཅས་པ་བསྲུང་བར་བྱས་ནས། ཇི་ལྟ་བ་བཞིན་དུ་རང་གི་ལྷ་དེ་ལ་ཕྱིའི་མཆོད་པ་ཐམས་ཅད་ཀྱིས་ཡང་དག་པར་མཆོད་དེ། ཕྱག་བཞི་བྱས་ནས་རྡོ་རྗེ་ལྕགས་སྒྲོག་གི་དམ་ཚིག་གི་ཕྱག་རྒྱ་བཅིང་བར་བྱའོ། །རྡོ་རྗེ་གཏེར་ཡོད་པས་ཞེས་བྱ་བ་ལ་སོགས་པ་ནི་བསྒྲུབ་པའི་སྙིང་པོ་བརྗོད་

ཅིང་གཏེར་གྱི་གནས་དེར་རྡོ་རྗེ་ལྟ་བས་བལྟས་ལ། རྡོ་རྗེ་འབར་བ་ལྟ་བུ་མཐོང་ན་དེ་ན་གཏེར་ཡོད་པར་ཤེས་པར་བྱའོ། །དེ་ནས་ལངས་ལ་བླང་བར་བྱ་བའོ། །དེ་ལ་འདི་ནི་ཞེས་བྱ་བ་ལ་སོགས་པ་ནི། རྫུ་འཕྲུལ་གྱི་དངོས་གྲུབ་གསུངས་པ་ཡིན་ཏེ། ཡང་རྡོ་རྗེ་དབྱིངས་ལས་བཤད་

པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། རྫུ་འཕྲུལ་གྱི་དངོས་གྲུབ་བསྒྲུབ་པར་འདོད་ན་ཆུའི་སྟེང་ནས་ཕར་འགྲོ་བ་ལ་སོགས་པ་ཡིད་ཀྱིས་བྱས་པས། དེ་ལྟར་ན་རྡོ་རྗེ་དངོས་གྲུབ་ཏུ་འགྱུར་རོ། །དེ་ལ་རྡོ་རྗེ་ཆུ་ཞེས་བྱ་བ་ལ་སོགས་པ་ནི་ཐུན་

བཞིའི་སྦྱོར་བས་ཟླ་བ་བཞིར་དེ་བཞིན་གཤེགས་པའི་རིགས་ཀྱི་ཡོ་བྱད་ཆོ་ག་བཞིན་དུ་བཟླས་ལ། དེ་ནས་དེ་བཞིན་གཤེགས་པའི་རས་རིས་ཀྱི་མདུན་དུ་ཡང་ཟླ་བ་བཞི་སྔ་མ་བཞིན་དུ་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བསྒོམས་ན་དེའི་རྗེས་ལ་འགྲུབ་པར་འགྱུར་རོ། །བཛྲ་སིདྡྷི་

ཞེས་ལན་གསུམ་བརྗོད་ཅིང་། བཛྲ་ཛྭ་ལ་ཞེས་ཀྱང་བརྗོད་ལ་ཆུའི་སྟེང་དུ་འཆགས་པ་ལ་སོགས་པའི་རྫུ་འཕྲུལ་བྱས་ལ། ཇི་ལྟ་བ་བཞིན་དུ་བསྒྲུབ་པར་བྱའོ། །ལྷག་མ་ནི་གོ་སླའོ། །དེ་ལ་འདི་ནི་ཞེས་བྱ་བ་ལ་སོགས་པ་ལ་རིག་པ་འཛིན་པའི་དངོས་གྲུབ་གསུངས་པ་ཡིན་ནོ། །ཕྱག་རྒྱ་བསྒྲུབས་ན་

ཞེས་བྱ་བ་སྔ་མ་བཞིན་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ་ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། རྡོ་རྗེ་འཛིན་པ་ལ་སོགས་པའི་རྡོ་རྗེ་རིག་པ་འཛིན་པའི་གཟུགས་སུ་བདག་ཉིད་བསམས་ལ། བཛྲ་བི་དྷ་ར་ཞེས་དེ་སྐད་དུ་

เล่ม ๕๘ · หน้า 286b

ལན་གསུམ་བརྗོད་པར་བྱའོ། །དེ་ནས་རྡོ་རྗེ་འཛིན་པ་ལ་སོགས་པའི་རིག་པ་འཛིན་པའི་དངོས་གྲུབ་ཀྱི་སྙིང་པོ་འདི་དེ་བཞིན་གཤེགས་པའི་རིགས་ཀྱི་ཡོ་བྱད་ཀྱི་ཆོ་གས་ཟླ་བ་བཞིར་བཟླས་པ་བྱས་ལ་དེ་ནས་དེ་བཞིན་གཤེགས་པའི་རིགས་ཀྱི་རས་རིས་ཀྱི་མདུན་དུ་སླར་ཡང་ཟླ་བ་བཞིར་སྔ་

མ་བཞིན་དུ་བཟླས་པ་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བཟླས་ན་དེའི་རྗེས་ལ་རྡོ་རྗེ་རིག་འཛིན་གྱི་འཁོར་ལོས་སྒྱུར་བའི་དངོས་གྲུབ་ཏུ་འགྱུར་རོ། །ལྷག་མ་ནི་གོ་སླའོ། །དེ་ནི་དངོས་གྲུབ་ཆེན་པོ་བསྒྲུབ་པ་ནི། དེ་ལ་འདི་ནི་ཞེས་བྱ་བ་ལ་སོགས་པ་སྨོས་ཏེ། སྔ་མ་བཞིན་དུ་རྡོ་རྗེ་དབྱིངས་

ཀྱི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས། བཛྲ་སཏྭ་ཞེས་བྱ་བ་ལ་སོགས་པ་རང་གི་ལྷའི་ཕྱག་རྒྱའི་སྙིང་པོ་ལན་གསུམ་བརྗོད་ཅིང་། བཛྲ་བཛྲ་ཞེས་ཀྱང་བརྗོད་ལ་ཐམས་ཅད་རྡོ་རྗེ་ལ་སོགས་པའི་

གཟུགས་སུ་ཏིང་ངེ་འཛིན་གྱི་བདག་ཉིད་རྣམ་པར་བསམས་ལ། བཛྲ་བཛྲ་ཞེས་བརྗོད་ཅིང་དངོས་གྲུབ་སྒྲུབ་པའི་སྙིང་པོ་དང་། དེ་བཞིན་གཤེགས་པའི་རིགས་ཀྱི་ཡོ་བྱད་ཀྱི་ཆོ་གས་ཟླ་བ་བཞིར་བཟླས་པར་བྱའོ། །དེ་ནས་དེ་བཞིན་གཤེགས་པའི་རིགས་ཀྱི་རས་རིས་ཀྱི་མདུན་དུ་ཡང་ཟླ་བ་

བཞིར་ཟློས་ཤིང་། དེའི་རྗེས་ལ་ཟླ་བ་ཉ་ལ་མཚན་ཐོག་ཐག་བཟླས་ན་ནམ་ལངས་པ་དང་སེམས་ཅན་ཕྱག་རྒྱའི་གཟུགས་སུ་འགྱུར་རོ། །ལྷག་མ་ནི་གོ་སླའོ། །དེ་བཞིན་གཤེགས་པའི་རིགས་ཀྱི་དངོས་གྲུབ་ཀྱི་ཆོ་ག་རྒྱས་པར་བསྟན་ནས། ད་ནི་རྡོ་རྗེ་རིགས་ཀྱི་གསུངས་པ་ནི། དེ་ལ་འདི་ནི་

རྡོ་རྗེ་རིགས་ཀྱི་དངོས་གྲུབ་སྟེ་ཞེས་བྱ་བའོ། །འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་ཞེས་བྱ་བ་ལ་སོགས་པ་ནི་སྔ་མ་བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་བཞིའི་མཐར་ཐུག་པའི་ཆོ་

ག་ཐམས་ཅད་རྗེས་སུ་སྤྱད་ནས། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་སྔགས་ཀྱི་ཡི་གེ་འབུམ་བཟླས་ལ། དེ་ནས་དབང་ཕྱུག་ཆེན་པོའི་གཟུགས་བརྙན་བཟོ་བོ་མཁས་པས་བྱེད་དུ་བཅུག་ལ། དེའི་ལྟོ་བར་སྔགས་དེ་བཅུག་སྟེ། སྔ་མ་བཞིན་དུ་

เล่ม ๕๘ · หน้า 287a

འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་འདོད་པའི་རྒྱལ་པོས་ལྷ་ཆེན་ཇི་ལྟ་བ་བཞིན་དུ་བཀུག་སྟེ། ཁྲོ་བོ་རྡོ་རྗེ་ལྕགས་ཀྱུ་ལ་སོགས་པ་རྣམས་ཀྱིས་ཀྱང་གཟུགས་བརྙན་ལ་ཇི་ལྟ་བ་བཞིན་དུ་དགུག་པ་དང་། གཞུག་པ་

དང་། བཅིང་བ་དང་། དབང་དུ་བྱས་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་བཅིངས་ལ། རས་རིས་ཀྱི་མདུན་དུ་ཐུན་བཞིའི་སྦྱོར་བས་ཟླ་བ་གཅིག་ཙམ་གྱི་བར་དུ་སྟོང་རྩ་བརྒྱད་ཟློས་ཤིང་། རྐང་པ་གཡོན་པས་མནན་པར་བྱའོ། །དེ་ནས་ཇི་སྲིད་དུ་ཟླ་བ་ཉ་ལ་

གཟུགས་བརྙན་དེ་སྐད་འབྱིན་པར་འགྱུར་བ་དེ་སྲིད་ཀྱི་བར་དུ་བཟླ་བར་བྱའོ། །ལྷག་མ་ནི་གོ་སླའོ། །ཕྱག་རྒྱ་བསྒྲུབ་པ་ན་ཞེས་བྱ་བ་ལ་སོགས་པ་ལ། སྔ་མ་བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ།

ཆོ་ག་ཐམས་ཅད་རྗེས་སུ་སྤྱོད་དེ། རྡོ་རྗེ་དབྱིངས་ལས་བཤད་པའི་རྡོ་རྗེ་རིན་ཆེན་གྱི་ཕྱག་རྒྱས་བདག་ཉིད་དབང་བསྐུར་ལ། སྔ་མ་བཞིན་དུ་ཡི་གེ་འབྲུ་འབུམ་བཟླས་པར་བྱའོ། །དེ་ནས་རས་རིས་ཀྱི་མདུན་དུ་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་ཆེན་པོ་བཅིངས་ཏེ།

ཉིན་རེ་ཞིང་ཐུན་བཞིའི་སྦྱོར་བས། སྟོང་རྩ་བརྒྱད་ཟློས་ཤིང་ཟླ་བ་གཅིག་གི་བར་དུ་བྱའོ། །དེའི་རྗེས་ལ་ཟླ་བ་ཉ་ལ་མཚན་ཐོག་ཐག་བཟླས་ན་འགྲུབ་པར་འགྱུར་ཏེ། །དེ་ནས་གྲུབ་པ་དང་དབང་བཞིར་གྱུར་ཏེ་ཞེས་བྱ་བ་ལ་སོགས་པ་ནི་གོ་སླའོ། །དེ་ལ་འདི་ནི་ཞེས་བྱ་བ་ལ་སོགས་པ་ལ།

སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ཡི་གེ་འབྲུ་འབུམ་བཟླས་པར་བྱའོ། །དེ་ནས་རས་རིས་ཀྱི་མདུན་དུ་སྒེག་མོ་ལ་སོགས་པ་གསང་བའི་མཆོད་པ་བཞིས་དེ་བཞིན་གཤེགས་པ་ཐམས་ཅད་ལ་ཐུན་བཞིའི་སྦྱོར་བས། ཇི་སྲིད་དུ་རྟག་ཏུ་མཆོད་པ་ཟླ་བ་གཅིག་གམ་གསུམ་

གྱི་བར་དུ་བྱས་ལ། དེ་ནས་མཚན་ཐོག་ཐག་མཆོད་ན་བདེ་བ་དང་ཡིད་བདེ་བ་ཐམས་ཅད་ཀྱི་དངོས་གྲུབ་ཐོབ་པར་འགྱུར་རོ། །དེ་ལ། འདི་ནི་དངོས་གྲུབ་དམ་པ་སྟེ། །ཞེས་བྱ་བ་ལ་སོགས་པ་ལ། སྔ་མ་བཞིན་དུ་རང་ལ་བྱིན་གྱིས་བརླབ་པ་ལ་སོགས་པ་བྱས་ནས། ཡིག་འབྲུ་

เล่ม ๕๘ · หน้า 287b

འབུམ་བཟླས་པར་བྱའོ། །དེ་ནས་རས་རིས་ཀྱི་མདུན་དུ་སྟོང་རྩ་བརྒྱད་ཟློས་ཤིང་། རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། ཐུན་བཞིའི་སྦྱོར་བས་སྔ་མ་བཞིན་དུ་ཟླ་བ་གཅིག་བཟླས་པར་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བྱས་ན། ནམ་ལངས་པ་དང་། རྡོ་རྗེ་ཧཱུཾ་མཛད་

ལ་སོགས་པ་དང་འདྲ་བར་འགྱུར་རོ། །དེ་ལྟར་རྡོ་རྗེ་རིགས་ཀྱི་དངོས་གྲུབ་ཀྱི་ཆོ་ག་རྒྱས་པར་བསྟན་ནས། ད་ནི་པདྨའི་རིགས་ཀྱི་དེ་ལ་འདི་དག་ནི་པདྨའི་དངོས་གྲུབ་སྟེ་ཞེས་བྱ་བ་ལ་སོགས་པ་གསུངས་ཏེ། སྔ་མ་བཞིན་དུ་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་བཤད་པའི་

ཆོ་གས་རང་གི་ལྷའི་རྣལ་འབྱོར་བྱས་ལ། ཕྱག་བཞི་པའི་མཐར་ཐུག་པའི་རྗེས་སུ་སྤྱད་ནས་ནང་གི་སྔགས་སྔ་མ་བཞིན་དུ་སྟོང་རྩ་བརྒྱད་བཟླས་པར་བྱའོ། །དེ་ནས་རས་རིས་ཀྱི་མདུན་དུ་རང་གི་ལྷའི་ཏིང་ངེ་འཛིན་གྱིས་གཡོན་པའི་བསྙེམས་པ་དང་བཅས་པས་པདྨ་བླངས་ལ་ལག་

པ་གཡས་པས་པདྨ་བཟུང་ལ། པདྨ་འབྱེད་ཅིང་པདྨ་རབ་ཏུ་དམར་བ་བསྒོམས་ནས་ཉིན་རེ་བཞིན་ཐུན་བཞིའི་སྦྱོར་བས་ཟླ་བ་གཅིག་ཙམ་གྱི་བར་དུ་སྟོང་རྩ་བརྒྱད་བཟླས་པར་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བཟླས་ན་དེ་བཞིན་གཤེགས་པ་ལ་སོགས་པ་དང་། སེམས་ཅན་

མཉེས་པར་བྱེད་ནུས་པར་འགྱུར་རོ། །སྔ་མ་བཞིན་དུ་དབང་བྱེད་པས་པདྨ་འདོད་པ་བསྒོམས་ཤིང་ཟླ་བ་ཉ་ལ་མཚན་ཐོག་ཐག་བསྒོམས་ན། ནམ་ལངས་པ་དང་། དེ་བཞིན་གཤེགས་པ་ལ་སོགས་པ་སེམས་ཅན་གྱི་ཁམས་ཐམས་ཅད་བདག་ཉིད་ཀྱིས་ནོར་དང་བཅས་པ་དབང་དུ་བྱེད་པར་འགྱུར་

རོ། །བྱམས་པས་བསྒོམས་པའི་ཏིང་ངེ་འཛིན་གྱིས་ཞེས་བྱ་བ་ནི། སྔོན་དུ་བསྙེན་པ་ལ་སོགས་པ་དང་བསྒྲུབ་པའི་ཆོ་ག་རྗེས་སུ་སྤྱད་ལ། དེ་ནས་མཚན་ཐོག་ཐག་བཟླས་ནས། ནམ་ལངས་པ་དང་། ཐམས་ཅད་བསྲུང་བ་ནུས་པར་འགྱུར་རོ། །སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་

ལ། པདྨའི་འདབ་མ་འབྱེད་པའི་ཚུལ་གྱིས་བདག་ཉིད་འཇིག་རྟེན་དབང་ཕྱུག་ཏུ་བསྒོམས་ལ། རས་རིས་ཀྱི་མདུན་དུ་མཚན་ཐོག་ཐག་བཟླས་ན་འཇིག་རྟེན་དབང་ཕྱུག་གི་གཟུགས་དང་ལྡན་པར་འགྱུར་རོ། །དེ་ལྟར་པདྨའི་རིགས་ཀྱི་དངོས་གྲུབ་ཀྱི་ཆོ་ག་རྒྱས་པར་བསྟན་ནས། ད་ནི་ནོར་བུའི་

เล่ม ๕๘ · หน้า 288a

རིགས་ཀྱི་རྣལ་འབྱོར་དེ་ལ་འདི་དག་ནི་ནོར་བུའི་རིགས་ཀྱི་དངོས་གྲུབ་རྣམས་ཏེ་ཞེས་བྱ་བ་ལ་སོགས་པ་གསུངས་སོ། །དེ་ལ་ཞེས་བྱ་བ་ལ། སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་བཤད་པའི་རང་གི་ལྷའི་རྣལ་འབྱོར་བྱས་ལ། ཕྱག་

བཞིའི་མཐར་ཐུག་པའི་ཆོ་ག་རྗེས་སུ་སྤྱད་ནས་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བས་དབང་བསྐུར་བ་སྟེ། རང་རང་གིས་བསྒོམ་པར་བྱའོ། །དེ་ནས་ཐུན་བཞིའི་སྦྱོར་བས་བཟླས་པ་འབུམ་བྱས་ལ། རས་རིས་ཀྱི་མདུན་དུ་ཡང་ཟླ་བ་གཅིག་བཟླས་པ་བྱའོ། །ཟླ་བ་ཉ་ལ་མཚན་

ཐོག་ཐག་བཟླས་ན་དབང་བསྐུར་བ་ཐམས་ཅད་ཐོབ་པར་འགྱུར་རོ། །སྔ་མ་བཞིན་དུ་ཆོ་ག་ཐམས་ཅད་སྤྱད་ནས་ཐུན་བཞིའི་སྦྱོར་བས་མར་མེའི་སྣང་བ་དེ་བཞིན་གཤེགས་པ་ལ་ཕུལ་ནས་བཟླས་པ་འབུམ་བྱའོ། །དེ་ནས་རས་རིས་ཀྱི་མདུན་དུ་སྔ་མ་བཞིན་དུ་ཐུན་བཞིའི་སྦྱོར་བས་སྟོང་རྩ་བརྒྱད་

བཟླས་ཏེ། ཇི་སྲིད་དུ་ཟླ་བ་གཅིག་བརྩམ་པ་དེ་སྲིད་ཀྱི་བར་དུ་བྱའོ། །དེ་ནས་ཟླ་བ་ཉ་ལ་མཚན་ཐོག་ཐག་བཟླས་པས་ནམ་ལངས་པ་དང་རིན་ཆེན་ཉི་མ་དང་གཟི་བརྗིད་མཉམ་པར་འགྱུར་རོ། །སྔ་མ་བཞིན་དུ་ཕྱག་བཞིའི་མཐར་ཐུག་པའི་ཆོ་ག་རྗེས་སུ་སྤྱད་ལ། ཐུན་བཞིར་དེ་བཞིན་གཤེགས་པ་

ཐམས་ཅད་ལ་ཕྱི་རོལ་གྱི་མཆོད་པ་དང་། ནོར་བུའི་རིགས་ཀྱི་ལས་ཀྱི་དཀྱིལ་འཁོར་ཆེན་པོ་ལས་བཤད་པའི་མཆོད་པ་བཅུ་དྲུག་གིས་ནམ་མཁའི་ཁམས་བཀང་ལ། དེ་བཞིན་གཤེགས་པ་ལ་སོགས་པ་དང་། སེམས་ཅན་གྱི་ཁམས་ཐམས་ཅད་ལ་དེ་རྣམས་ཀྱི་ནོར་བུའི་རིགས་ཀྱི་

བསམ་པ་ཐམས་ཅད་ཡོངས་སུ་རྫོགས་པར་ཚིམ་པར་བྱའོ། །ཉིན་རེ་ཞིང་ཐུན་བཞིའི་སྦྱོར་བས་ཇི་སྲིད་འབུམ་ཡོངས་སུ་རྫོགས་པ་དེ་སྲིད་ཀྱི་བར་དུ་བཟླས་པར་བྱའོ། །དེ་ནས་རས་རིས་ཀྱི་མདུན་དུ་སྔ་མ་བཞིན་དུ་ཟླ་བ་གཅིག་བཟླས་ལ། མཐར་མཚན་ཐོག་ཐག་བཟླས་ན་བསམ་པ་ཐམས་

ཅད་ཡོངས་སུ་རྫོགས་པའི་དངོས་གྲུབ་ཏུ་འགྱུར་རོ། །སྔ་མ་བཞིན་དུ་ཕྱག་བཞི་བྱ་བའི་མཐར་ཐུག་པའི་ཆོ་ག་རྗེས་སུ་སྤྱད་ནས། རྡོ་རྗེ་རིན་པོ་ཆེ་བླངས་ཏེ། རང་གི་ལྷའི་སྦྱོར་བས་འབུམ་བཟླས་པར་བྱའོ། །དེ་ནས་རས་རིས་ཀྱི་མདུན་དུ་སྔ་མ་བཞིན་ཟླ་བ་གཅིག་ཙམ་བྱས་ལ། མཐར་

เล่ม ๕๘ · หน้า 288b

མཚན་ཐོག་ཐག་བཟླས་ན་ཐོ་རངས་ཁ་རྡོ་རྗེ་སྙིང་པོ་དང་འདྲ་བར་འགྱུར་རོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དངོས་གྲུབ་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་ཐབས་མེད་པར་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་རྣམས་བསྒྲུབ་པར་མི་

འགྱུར་རོ་ཞེས་བྱ་བའི་དོན་འདི་བསྟན་པའི་ཕྱིར་རོ། །དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་རྟོག་པ་ཐམས་ཅད་ཀྱི་དངོས་གྲུབ་ཐབས་ཀྱི་རྒྱུད་གསུངས་པ་ཡིན་ནོ། །རྟོག་པ་ཡང་ཡིན་ལ་ཐམས་ཅད་ཀྱང་ཡིན་པས་ན་རྟོག་པ་ཐམས་ཅད་ཅེས་

རྣམ་པར་སྣང་མཛད་ལ་སོགས་པ་ནས། རྡོ་རྗེ་འབེབས་པའི་མཐར་ཐུག་པའི་ཕྱག་རྒྱ་ཐམས་ཅད་ནི་དེ་དག་གི་ཐབས་ཏེ། མངོན་སུམ་དུ་བྱེད་པའི་རྒྱུ་ཡིན་པའི་ཕྱིར་རོ། །དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པ་མངོན་སུམ་དུ་བྱེད་པའོ། །དེ་སྟོན་པར་བྱེད་པའི་རྒྱུད་དེ་བཅོམ་ལྡན་འདས་རྡོ་རྗེ་

སེམས་དཔས་བཤད་པའོ། །འཇིག་རྟེན་འདུལ་བ་ཇི་ལྟ་བ། །ཞེས་བྱ་བ་ནི་རྣམ་པ་གང་དང་གང་གིས་འདུལ་བར་འགྱུར་བའི་སེམས་ཅན་གྱི་ཁམས་ཀྱི་འཇིག་རྟེན་གྱི་ཁམས་དེ་དང་དེ་འདྲ་བའི་དོན་གྲུབ་པ་ལ་སོགས་པའི་དངོས་གྲུབ་འདོད་པའོ། །གང་དུ་ཞེ་ན། རྒྱུད་འདིར་ཏེ། དེའི་དངོས་གྲུབ་

ཐོབ་པའི་ཐབས་སོ། །གང་ཞེ་ན། དེ་ཡི་ཐབས་ནི་ཕྱག་རྒྱ་སྟེ། །ཞེས་བྱ་བ་སྨོས་ཏེ། ཕྱག་རྒྱ་ཆེན་པོ་ལ་སོགས་པའི་ཕྱག་རྒྱའོ། །དེའི་དངོས་གྲུབ་ཆེན་པོ་ཀུན་གྱི་རྒྱུར་གྱུར་པ་ཡིན་ནོ་ཞེས་བྱ་བའི་དོན་ཏོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དཀྱིལ་

འཁོར་ཆེན་པོ་ལས་བཤད་པའི་དངོས་གྲུབ་ཀྱི་ཐབས་བསྟན་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ཀྱི་ཐབས་ནི། འཇིག་རྟེན་ཆགས་དང་བྲལ་བས་འདུལ། །ཞེས་བྱ་བ་ལ་སོགས་པ་གསུངས་པ་

ཡིན་ཏེ། དེ་ལ་གཟུངས་ཀྱི་དཀྱིལ་འཁོར་ལ་ཆགས་པ་དང་བྲལ་བ་ནི་སེམས་ཕྱིར་ཕྱོགས་པ་སྟེ། ཉན་ཐོས་དང་། རང་སངས་རྒྱས་ལ་མོས་པ་དང་། ཐེག་པ་ཆེན་པོ་ལ་མོས་པ་མདོ་སྡེ་སྤྱོད་པ་ལ་སོགས་པ་འཇིག་རྟེན་ནོ། །དེ་ལྟར་གྱུར་པའི་འཇིག་རྟེན་ཆགས་པ་དང་བྲལ་བ་དེ་ནི་འདུལ་

เล่ม ๕๘ · หน้า 289a

བའོ། །ཉན་ཐོས་དང་རང་རྒྱལ་བའི་ལམ་བསྒོམ་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་རྣམས་ཀྱང་དེའི་མངོན་པར་འདོད་པའི་དོན་འགྲུབ་པར་འགྱུར་རོ་ཞེས་བྱ་བའི་དོན་ཏོ། །གཟུངས་ཀྱིས་འདུལ་བའི་འཇིག་རྟེན་རྣམས་གཟུངས་རྣམས་ལ་ཆགས་

ཤིང་འདོད་པ་དེ་ལས་སྐྱེས་པའི་ཕྱག་རྒྱའི་དངོས་གྲུབ་ནི་ཆགས་པ་ལས་སྐྱེས་པའོ། །ཆགས་པ་ལས་སྐྱེས་པའི་དངོས་གྲུབ་དེའི་ཐབས་གང་ཡིན་ཞེ་ན། དེ་ཡི་ཐབས་ནི་བསྒོམ་པ་དེ། །ཞེས་བྱ་བ་སྨོས་སོ། །གཟུངས་ཀྱི་དངོས་གྲུབ་ཐོབ་པ་ནི་གཟུངས་སྒོམ་པ་པོ་ཞེས་བྱ་བའི་དོན་ཏོ། །དེ་ལྟར་གཟུངས་ཀྱི་དངོས་

གྲུབ་ཀྱི་ཐབས་བསྟན་ནས། ད་ནི་རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་གྱི་དངོས་གྲུབ་ཀྱི་ཐབས་གསུངས་པ་ནི། བདེན་པས་འཇིག་རྟེན་འདི་ཉམས་པས། །ཞེས་བྱ་བ་ལ་སོགས་པའོ། །འཇིག་རྟེན་གསུམ་ན་སྤྱོད་པའི་སེམས་ཅན་གྱི་ཁམས་འདི་དག་བདེན་པ་ལས་ཉམས་པའོ། །

ཆོས་ཐམས་ཅད་རང་བཞིན་གྱིས་རྣམ་པར་དག་པའི་དོན་དམ་པའི་བདེན་པ་དེ་ལྟ་བུར་གྱུར་པ་ལས་དངོས་པོར་འཛིན་པའི་མངོན་པར་ཞེན་པའི་འཇིག་རྟེན་སྔགས་ཀྱི་དངོས་གྲུབ་མི་འདོད་དོ། །ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བྱ་བའི་བདེན་པས་བསྒོམ་པ་ནི་རིག་པས་

འདོད་པ་ཡིན་ནོ་ཞེས་བྱ་བའི་དོན་ཏོ། །དེ་བས་ན། །སྤྲོས་པ་མེད་པའི་ཐབས་ཀྱིས་ནི། །དངོས་གྲུབ་ཀུན་གྱི་མཆོག་ཏུ་འགྱུར། །ཞེས་གསུངས་སོ། །ཆོས་ཀྱི་དཀྱིལ་འཁོར་ལས་བཤད་པའི་རིགས་ཐམས་ཅད་ཀྱི་དངོས་གྲུབ་ཀྱི་ཐབས་ནི་གཉིས་སུ་མེད་པ་བསྒོམ་པས་ཐོབ་པ་ཡིན་ནོ་ཞེས་བྱ་བའི་དོན་ཏོ། །དེ་ལྟར་

རིགས་ཐམས་ཅད་ཀྱི་སྔགས་ཀྱི་དངོས་གྲུབ་ཀྱི་ཐབས་བཤད་ནས། ད་ནི་དེ་བཞིན་གཤེགས་པ་ལ་སོགས་པ་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ཀྱི་ཐབས་ནི། མ་རིག་མངོན་ཆགས་འདི་ལ་ནི། །ཞེས་བྱ་བ་ལ་སོགས་པ་གསུངས་ཏེ། གཟུང་བ་དང་

འཛིན་པའི་རྣམ་པར་རྟོག་པ་ནི་མ་རིག་པའོ། །དེ་ལ་མངོན་པར་ཞེན་པ་ནི་འཇིག་རྟེན་པའོ། །རིག་པའི་དངོས་གྲུབ་ཡོད་མིན་ཏེ། །ཞེས་བྱ་བ་ནི་གཟུང་བ་དང་འཛིན་པའི་མངོན་པར་ཞེན་པ་ནི་འཇིག་རྟེན་པ་དེ་ལ་ཆོས་ཐམས་ཅད་རང་བཞིན་གྱིས་སོ། །གསང་བའི་ཞེས་བྱ་བ་རྟོག་པ་མ་སྐྱེས་པའི་ཕྱིར་

เล่ม ๕๘ · หน้า 289b

ཞེས་བྱ་བའི་ཐ་ཚིག་གོ། །དེ་ཡི་ཐབས་ནི་རྒྱ་ཆེ་ལས། །དངོས་གྲུབ་ཀྱི་ནི་མཆོག་ཐོབ་བོ། །ཞེས་བྱ་བ་ནི་དེ་ལ་ཆོས་ཐམས་ཅད་རང་བཞིན་གྱིས་འོད་གསལ་བ་ཁོང་དུ་ཆུད་པར་གྱུར་པས་ཆོས་ཐམས་ཅད་རང་བཞིན་གྱིས་འོད་གསལ་བ་བསྒོམ་པའི་ཐབས་ནི་རྒྱ་ཆེ་བ་ཡིན་ནོ་ཞེས་བྱ་བའི་ཐ་ཚིག་

གོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་རྟོག་པ་ཐམས་ཅད་ཐབས་ཀྱི་དངོས་གྲུབ་ཀྱི་རྒྱུད་བཤད་ནས། ད་ནི་སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་པ་རྣམས་ཀྱི་བསོད་ནམས་མེད་པ་མ་ཡིན་ནོ་ཞེས་བྱ་བའི་དོན་བསྟན་པའི་ཕྱིར། དེ་ནས་

ཞེས་བྱ་བ་ལ་སོགས་པ་ལ་རྟོག་པ་ཐམས་ཅད་ཀྱི་རྒྱུད་གསུངས་པ་ཡིན་ནོ། །རྟོག་པ་ཐམས་ཅད་ནི་ཇི་སྐད་བཤད་པའོ། །བསོད་ནམས་ཀྱི་དངོས་གྲུབ་ཀྱི་རྒྱུད་ནི་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་རྣམས་མངོན་དུ་བྱེད་ཅེས་བྱ་བའི་དོན་ཏོ། །མཆོད་པ་རྣམ་བཞི་བྱས་ནས་ནི། །

ཞེས་བྱ་བ་ལ་སོགས་པ་ལ། རིགས་ཐམས་ཅད་ཀྱི་དཀྱིལ་འཁོར་ཆེན་པོ་རྣལ་འབྱོར་པས་རང་ལ་བྱིན་གྱིས་བརླབ་པ་ལ་སོགས་པ་བྱས་ནས་མཆོད་པ་ཆེན་པོ་དང་། དབང་བསྐུར་བ་དང་། ཆོས་དང་། ལས་ཀྱི་མཚན་ཉིད་ནི། མཆོད་པ་རྣམ་པ་བཞི་སྟེ་རང་གི་རིགས་ཀྱི་ལས་ཀྱི་དཀྱིལ་

འཁོར་ལས་བཤད་པའི་མཆོད་པ་བཅུ་དྲུག་གིས་མཆོད་པ་བྱས་ན་བསོད་ནམས་ཆེན་པོ་ཐོབ་པར་འགྱུར་རོ། །ལུས་དང་། ངག་དང་། སེམས་རྣམ་པར་དག་པ་ཐོབ་པར་འགྱུར་ཞེས་བྱ་བའི་ཐ་ཚིག་གོ། །དེ་བས་ན། བསོད་ནམས་མེད་ཀྱང་སངས་རྒྱས་མཆོད། །འགྲུབ་འགྱུར་འདི་ལ་ཐེ་

ཚོམ་མེད། །ཅེས་བྱ་བ་སྨོས་སོ། །སངས་རྒྱས་རྣམས་ཀྱི་མཆོད་པ་ནི་སངས་རྒྱས་མཆོད་པའོ། །ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་གི་ཕྱག་རྒྱས་མཆོད་ན་སྐྱེ་བ་གཞན་དུ་བསོད་ནམས་བསགས་པ་མེད་ཀྱང་། རིགས་ཐམས་ཅད་ཀྱི་དཀྱིལ་འཁོར་ཆེན་

པོ་ལས་བཤད་པའི་ཕྱག་རྒྱ་ཆེན་པོའི་དངོས་གྲུབ་འགྲུབ་པར་འགྱུར་རོ། །དེའི་དོན་ནི་འདི་སྐད་སྟོན་པ་ཡིན་ཏེ། བདག་ནི་བསོད་ནམས་མེད་པའོ། །ཞེས་བདག་ཉིད་ལ་བརྙས་ཤིང་སྨད་པར་མི་བྱའོ། །ཕྱག་རྒྱ་བཅུ་དྲུག་པོ་རྣམས་ཀྱིས་བསོད་ནམས་ཐམས་ཅད་ཐོབ་པར་འགྱུར་རོ། །དེ་

เล่ม ๕๘ · หน้า 290a

ལྟར་རིགས་ཐམས་ཅད་ཀྱི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐོབ་པའི་བསོད་ནམས་ཀྱི་དངོས་གྲུབ་ཀྱི་རྒྱུད་བཤད་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གཟུངས་ཀྱི་དཀྱིལ་འཁོར་ལས་བཤད་

པའི་དངོས་གྲུབ་ཐོབ་པའི་བསོད་ནམས་ཀྱི་དངོས་གྲུབ་ཀྱི་རྒྱུད་གསུངས་པ་ནི། དེ་ལ་འདིའི་ཕྱག་རྒྱའི་བསོད་ནམས་ཀྱི་རྒྱུད་དེ་ཞེས་བྱ་བའོ། །གསང་བ་བསྲུངས་ནས་ཞེས་བྱ་བ་ནི་ཡོངས་སུ་བསྐྱེད་པའོ། །ཅི་ཞིག་བསྲུངས་ཤེ་ན། དམ་ཚིག་ཅེས་བྱ་བ་ནི་སྐུ་དང་། གསུང་དང་། ཐུགས་རྡོ་རྗེ་

གཟུངས་ཀྱི་དཀྱིལ་འཁོར་དུ་ཞུགས་པ་རྣམས་སོ། །དེ་ཉིད་འཆད་པ་ནི་གསང་བ་ཞེས་བྱ་བ་བྲིས་པའི་ཕྱག་རྒྱའི་གཟུགས་ཅན་མཆོད་པར་འོས་པའི་རིག་པའི་ལྷ་མོའི་གཟུངས་འདི་དག་ནི་གསང་བའོ། །བསོད་ནམས་ཆེན་པོ་ཐོབ་པར་འགྱུར་རོ་ཞེས་བྱ་བ་ནི་གཟུངས་ཀྱི་དངོས་གྲུབ་བསྒྲུབ་པ་ན་སྐུ་

དང་། གསུང་དང་། ཐུགས་རྣམ་པར་དག་པ་ཐོབ་པར་འགྱུར་རོ་ཞེས་བྱ་བའི་དོན་ཏོ། །དེ་ནས། བསོད་ནམས་མེད་ཀྱང་མྱུར་བར་ནི། །དམ་ཚིག་བསྲུངས་ན་འགྲུབ་པར་འགྱུར། །ཞེས་གསུངས་སོ། །དེས་ལུས་དང་། ངག་དང་། ཡིད་རྣམ་པར་དག་པའི་བསོད་ནམས་སྐྱེ་བ་གཞན་

དུ་བསགས་པ་མེད་ཀྱང་གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་རྣམས་མྱུར་དུ་འགྲུབ་པར་འགྱུར་བས་བསྟན་པར་མི་བྱའོ། །དེ་ནི་འདི་སྐད་སྟོན་པ་ཡིན་ཏེ། གཟུངས་ཀྱི་སྒྲུབ་པ་པོས་སློབ་དཔོན་གྱིས་བཤད་པ་གཞན་ལ་བསྟན་པར་མི་བྱ་ཞིང་བདག་གཟུངས་བསྒྲུབས་པ་ཡིན་ནོ་

ཞེས་ཀྱང་སྨྲ་བར་མི་བྱའོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གཟུངས་ཀྱི་དངོས་གྲུབ་ཀྱི་བསོད་ནམས་ཀྱི་རྒྱུད་བཤད་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྒྲུབ་པ་ནི།

དེ་ལ་ཞེས་བྱ་བ་ལ་སོགས་པ་སྔགས་ཀྱི་དངོས་གྲུབ་ཀྱི་བསོད་ནམས་ཀྱི་རྒྱུད་གསུངས་པ་ཡིན་ནོ། །སངས་རྒྱས་མཚན་ལ་སོགས་བརྗོད་ན། །ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པའི་མདོ་སྡེ་ལས་བཤད་པའི། བསོད་ནམས་ཆེན་པོ་ཐོབ་པར་འགྱུར། །ཞེས་བྱ་བ་ནི་སྔ་མ་བཞིན་ནོ། །འདི་

เล่ม ๕๘ · หน้า 290b

གང་གིས་ཤེ་ན། ཆོས་སྦྱིན་པས་ན་དངོས་གྲུབ་ཐོབ། །ཅེས་བྱ་བ་སྨོས་ཏེ། སེམས་ཅན་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་སྟོན་པ་ཞེས་བྱ་བའི་ཐ་ཚིག་གོ། །དེ་ལྟར་སྔགས་ཀྱི་བསོད་ནམས་ཀྱི་དངོས་གྲུབ་ཀྱི་རྒྱུད་བཤད་ནས། ད་ནི་དེ་བཞིན་གཤེགས་པ་ལ་སོགས་པའི་ལས་ཀྱི་

དཀྱིལ་འཁོར་ལས་བཤད་པའི་རིག་པ་རྣམས་ཀྱི་བསོད་ནམས་ཀྱི་དངོས་གྲུབ་ནི་དེ་ལ་འདི་ནི་རིག་པའི་བསོད་ནམས་ཀྱི་རྒྱུད་གསུངས་པ་ཡིན་ནོ། །བསོད་ནམས་ང་ནི་སྦྱིན་པའི་མཆོག །ཅེས་བྱ་བ་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་རིག་པས་སྒྲུབ་པ་པོས་ཆོས་

ཐམས་ཅད་རང་བཞིན་གྱིས་འོད་གསལ་བར་བསྒོམས་པས་ཆོས་ཀྱི་མཚན་ཉིད་ལ་མངོན་པར་ཞེན་པ་ཡོངས་སུ་སྤང་བར་བྱའོ། །དེ་སྐད་དུ་ཡང་། ཆོས་ཐམས་ཅད་ཀྱི་མཚན་ཉིད་ལ་མངོན་པར་ཞེན་པ་སྤང་བར་བྱའོ་ཞེས་གསུངས་སོ། །སྦྱིན་པའི་ཕ་རོལ་ཕྱིན་རྫོགས་ན། །ཞེས་བྱ་བ་

གསུངས་པ་འདི་ནི་ཕྱིའི་དངོས་པོ་མེ་ཏོག་དང་བདུག་པ་ལ་སོགས་པ་ཅི་འབྱོར་པས་དེ་བཞིན་གཤེགས་པ་རྣམས་དང་སེམས་ཅན་རྣམས་ལ་སྦྱིན་པར་བྱའོ། །དེ་སྐད་དུ་ཡང་། སངས་རྒྱས་སེམས་ཅན་རྣམས་ལ་སྦྱིན། ཉིན་ཞག་དོན་མེད་མི་བྱའོ། །ཞེས་གསུངས་སོ། །དེའི་ནང་ན་སྦྱིན་པ་མཆོག་

ཡིན་ནོ། །གང་གིས་ཤེ་ན། བསོད་ནམས་ཀྱི་ནང་ནའོ། །ཅི་ཞིག་འགྱུར་ཞེ་ན། བྱིན་ན་བསོད་ནམས་ཐོབ་པར་འགྱུར། །ཞེས་བྱ་བ་སྨོས་ཏེ། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་ཞེས་བྱ་བའི་དོན་ཏོ། །དེས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པས་ཅིར་

འགྱུར་ཞེ་ན། སྦྱིན་པའི་ཕ་རོལ་ཕྱིན་རྫོགས་ན། །མྱུར་དུ་སངས་རྒྱས་ཉིད་དུ་འགྱུར། །ཞེས་བྱ་བ་སྨོས་སོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་བསོད་ནམས་ཀྱི་དངོས་གྲུབ་ཀྱི་རྒྱུད་གསུངས་ནས། ད་ནི་གདུལ་བྱ་དེ་རྣམས་དེ་ཉིད་ལ་ཤེས་རབ་མེད་

ན་སྙིང་པོ་དང་། ཕྱག་རྒྱ་དང་། སྔགས་དང་། རིག་པར་འགྲུབ་པར་མི་འགྱུར་རོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་རྟོག་པ་ཐམས་ཅད་ཀྱི་ཤེས་རབ་ཀྱི་དངོས་གྲུབ་ཀྱི་རྒྱུད་གསུངས་པ་ཡིན་ནོ། །རྟོག་པ་ཐམས་ཅད་ཀྱི་ལས་ཀྱི་དངོས་གྲུབ་

เล่ม ๕๘ · หน้า 291a

བསྒྲུབ་པ་སྟེ། སྔགས་ཀྱི་ཡི་གེ་རྣམས་སྐྱེ་བ་མེད་པར་ཞུགས་པས་ན་ཡི་གེ་ཨ་ལས་རབ་ཏུ་འཇུག་པ་ཡིན་ནོ། །དེས་ན་ཡི་གེ་ཐམས་ཅད་རྣམ་པར་བསྒོམས་ལ། སྔགས་ཀྱི་ཡི་གེ་རྣམས་གཅིག་ཏུ་འགྱུར་བ་ཞེས་བྱ་བ་རྣམ་པར་ཐར་པའི་སྒོ། རང་གི་ཁ་ནས་

གཞན་ཞལ་དུ། །ཞེས་བྱ་བ་ནི་རང་གི་ཁ་ནས་གཞན་གྱི་ཞལ་དུ་འཇུག་པར་བསྒོམས་ན་དངོས་གྲུབ་ཐོབ་པར་འགྱུར་རོ་ཞེས་བྱའོ། །དེ་ལྟར་རང་གི་ཁ་ནས་གཞན་གྱི་ཞལ་དུ་བསྒོམས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་དངོས་གྲུབ་ཐོབ་པར་འགྱུར་རོ། །འདི་སྐད་སྟོན་པ་ཡིན་ཏེ། རང་གི་

རིགས་ཀྱི་དཀྱིལ་འཁོར་ཆེན་པོ་ལས་བཤད་པའི་སྙིང་པོ་ཟློས་ཤིང་། ཆོས་ཐམས་ཅད་གདོད་མ་ནས་མ་སྐྱེས་པའོ་ཞེས་པ་བསྒོམས་ཏེ། བདག་ཉིད་ལྷའི་སྐུ་གཟུགས་བརྙན་དང་མཚུངས་པ་དང་། མདུན་དུ་ཡང་ལྷའི་གཟུགས་བཞག་ལ། དེ་ཡང་གཟུགས་བརྙན་དང་མཚུངས་པར་

བསམས་ཏེ། དངོས་པོ་ལ་མ་ཞེན་པར་འགྲུབ་པར་འགྱུར་རོ། །ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གཟུངས་ཀྱི་ཤེས་རབ་ཀྱི་དངོས་གྲུབ་ནི་ཤེས་རབ་དེས་འབིགས་ཞེས་བྱ་བ་ལ་སོགས་པ་གསུངས་པ་ཡིན་ནོ། །ངེས་པར་འབིགས་པ་ནི་ངེས་འབིགས་

སོ། །ཆོས་ཐམས་ཅད་བདག་མེད་པའི་ཡེ་ཤེས་ཀྱི་ལམ་གྱི་ཡི་གེ་ཨ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ་ཞེས་བྱ་བའི་དོན་ཏོ། །ངེས་པར་འབིགས་པས་ན་ངེས་འབིགས་ཏེ་ཤེས་རབ་བོ། །འཇིག་རྟེན་གསུམ་ན་སྤྱོད་པའི་བག་ཆགས་དང་བཅས་པའི་ཉོན་མོངས་པ་སྤངས་ནས་བླ་ན་མེད་

པ་ཡང་དག་པར་རྫོགས་པའི་བྱང་ཆུབ་ཀྱི་རང་བཞིན་གྱི་དེ་བཞིན་གཤེགས་པའི་ཡེ་ཤེས་སོ་ཞེས་བྱ་བ་ནི་བཤད་པ་ཡིན་ནོ་ཞེས་བྱ་བའི་སྒྲ་ནི་ངེས་པར་གཟུང་བའོ། །ཏིང་ངེ་འཛིན་ཞེས་གྲགས་པ་སྟེ། །ཞེས་བྱ་བ་ནི་ངེས་པར་འབིགས་པའི་ཤེས་རབ་ལ་ཏིང་ངེ་འཛིན་ཞེས་བཤད་དེ། དེ་

བཞིན་གཤེགས་པ་དེ་ལ་རྣམ་པར་གཡེང་བ་མི་མངའ་བའི་ཕྱིར་རོ། །དེ་ནས་ཕྱག་རྒྱ་མྱུར་འགྲུབ་པར། །ཞེས་བྱ་བ་ནི་དེས་དེ་ལྟ་བུའི་ངོ་བོ་ལ་ངེས་པར་འབིགས་པའི་ཤེས་རབ་ཀྱི་སྐལ་བ་དང་ལྡན་པ་ལ་ཕྱག་རྒྱའི་གཟུངས་ཐམས་ཅད་འགྲུབ་པར་འགྱུར་ཏེ། སྒྲུབ་པ་པོའི་རྒྱུད་ལ་མངོན་

เล่ม ๕๘ · หน้า 291b

སུམ་དུ་འགྱུར་ཞེས་བྱ་བའི་ཐ་ཚིག་གོ། །གང་གི་ཕྱིར་རྣལ་འབྱོར་པ་དེས་དེ་ལྟར་བསྒོམས་ན་འགྲུབ་པར་འགྱུར་རོ། །དེ་ལྟར་དེ་བཞིན་གཤེགས་པ་ལ་སོགས་པ་རིགས་ཐམས་ཅད་ཀྱི་གཟུངས་ཀྱི་ཤེས་རབ་ཀྱི་དངོས་གྲུབ་བསྟན་ནས། ད་ནི་དེ་བཞིན་གཤེགས་པ་ལ་སོགས་པ་

ཐམས་ཅད་ཀྱི་ཆོས་ཀྱི་དཀྱིལ་འཁོར་ལས་བཤད་པའི་སྔགས་ཀྱི་ཤེས་རབ་ཀྱི་དངོས་གྲུབ་གསུངས་པ་ནི། དེ་ལ་འདི་ནི་སྔགས་ཀྱི་ཤེས་རབ་ཀྱི་དངོས་གྲུབ་ཀྱི་རྒྱུད་དེ་ཞེས་བྱའོ། །ཤེས་རབ་སྒྲ་ཡི་རྗེས་འབྲངས་ལ། །ཞེས་བྱ་བ་ནི་ཆོས་དང་དོན་དང་ངེས་པའི་ཚིག་དང་སྤོབས་

པ་སོ་སོ་ཡང་དག་པར་རིག་པ་རྣམ་པར་ཤེས་པར་བྱའོ། །དེ་ཉིད་ཀྱི་ངོ་བོ་ཉིད་ནི་ཏིང་ངེ་འཛིན་ཏོ། །དེ་ཅིའི་ཕྱིར་ཞེ་ན། ཚིག་ནི་རབ་ཏུ་སྤྲོས་པས་ན། །ཞེས་བྱ་བ་སྨོས་ཏེ། ངག་གི་རྣམ་པར་རྟོག་པའི་སྤྲོས་པ་སྟེ། རྣམ་པར་རྟོག་པའི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་

ཞེས་བྱ་བའི་དོན་ཏོ། །དེས་ན་དངོས་པོའི་ཁྱད་པར་དེ་ལྟ་བུ་དང་། ངག་གི་རྣམ་པར་རྟོག་པ་ལ་དངོས་པོར་མངོན་པར་ཞེན་པ་མེད་པས། ཤེས་རབ་སྒྲ་ཡི་རྗེས་འབྲངས་ལ། །ཏིང་ངེ་འཛིན་ཞེས་རབ་ཏུ་གྲགས། །དེ་བསྒོམ་པར་ནི་མྱུར་བར་ཡང་། །སྔགས་ཀྱི་དངོས་གྲུབ་ཐོབ་པར་

འགྱུར། །ཞེས་བྱ་བའོ། །དེ་ནས་ཤེས་རབ་སྒྲའི་རྗེས་སུ་འབྲང་བ་བསྒོམས་པ་དེས་དེ་ལྟར་ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ཐོབ་པར་འགྱུར་རོ། །ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་ལས་བཤད་པའི་རིགས་རྣམས་ཀྱི་

ཤེས་རབ་ཀྱི་དངོས་གྲུབ་གསུངས་པ་ནི། དེ་ལ་འདི་ནི་རིག་པའི་ཤེས་རབ་ཀྱི་དངོས་གྲུབ་ཀྱི་རྒྱུད་དོ་ཞེས་བྱའོ། །རིག་པ་ནི་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་ལས་བཤད་པའི་རིག་པའི་ལྷའི་གཟུགས་སོ། །སྔགས་ནི་ཆོས་ཀྱི་དཀྱིལ་འཁོར་ལས་བཤད་པ་དང་ལས་ཀྱི་དཀྱིལ་འཁོར་ལས་བཤད་

པའི་རིག་པའི་སྔགས་དེ་རིག་པ་དང་སྔགས་དེ་གཉིས་ལ་ཁྱད་པར་དུ་མ་དེ་དག་ལ་ཡོད་པ་མ་ཡིན་ཏེ། ཆོས་ཐམས་ཅད་རང་བཞིན་གྱིས་འོད་གསལ་བས་ཐམས་ཅད་རོ་གཅིག་པའི་ཕྱིར་རོ། །ཤེས་རབ་བསྒོམས་ན་མྱུར་བར་ནི། །ངེས་པར་དངོས་གྲུབ་ཐོབ་པར་འགྱུར། །ཞེས་བྱ་བ་ལ།

เล่ม ๕๘ · หน้า 292a

དེ་ལྟར་ཆོས་ཐམས་ཅད་རང་བཞིན་གྱིས་འོད་གསལ་བའོ་ཞེས་ཆོས་ཐམས་ཅད་རང་བཞིན་གྱིས་འོད་གསལ་བའི་མཚན་ཉིད་དུ་ཤེས་རབ་ཀྱིས་རྣམ་པར་དཔྱད་ནས། ཡང་ནས་ཡང་དུ་མངོན་དུ་བྱས་ནས་རྣལ་འབྱོར་

པ་ལས་ཀྱི་དཀྱིལ་འཁོར་ལས་བཤད་པའི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་རིག་པའི་དངོས་གྲུབ་ཐོབ་པར་འགྱུར་རོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་རྟོག་པ་ཐམས་ཅད་ཀྱི་ཤེས་རབ་ཡེ་ཤེས་ཀྱི་

དངོས་གྲུབ་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་རྟོག་པ་ཐམས་ཅད་ཀྱི་ཚོགས་ཀྱི་དངོས་གྲུབ་ཀྱི་རྒྱུད་ནི། དེ་ནས་ཞེས་བྱ་བ་ལ་སོགས་པས་སྙིང་པོ་དང་། ཕྱག་རྒྱ་དང་། སྔགས་དང་། རིག་པ་རྣམས་ཀྱི་ཚོགས་

ཀྱི་དངོས་གྲུབ་ཏུ་འགྱུར་བ་ནི། ཚོགས་མེད་པར་མ་ཡིན་ནོ་ཞེས་བྱ་བའི་དོན་བསྟན་པའི་ཕྱིར། རྟོག་པ་ཐམས་ཅད་ཀྱི་ཚོགས་ཀྱི་དངོས་གྲུབ་ཀྱི་རྒྱུད་བསྟན་ཞིང་མངོན་སུམ་དུ་བྱེད་དོ་ཞེས་བྱ་བའི་དོན་ཏེ། མཆོད་པ་ཐམས་ཅད་རབ་བྱས་ན། །ཞེས་བྱ་བ་ནི་ཕྱི་རོལ་གྱི་མཆོད་པ་ལྔ་ལ་སོགས་པ་དང་།

སྒེག་མོ་ལ་སོགས་པ་བརྒྱད་དང་། ལས་ཀྱི་དཀྱིལ་འཁོར་ལས་བཤད་པའི་མཆོད་པ་བཅུ་དྲུག་ལ་སོགས་པའི་མཆོད་པ་ཐམས་ཅད་ཀྱིས་རབ་ཏུ་སེམས་རྩེ་གཅིག་པས་བྱས་ན་བཟླས་པ་དང་བཅས་པས་ཚོགས་རྣམས་འཕེལ་བར་འགྱུར་རོ། །གང་དག་ཅེ་ན། དག་པ་ནི་

ཆོས་རྣམས་ཀྱི་ཞེས་བྱ་བ་སྨོས་ཏེ། རྣམ་པར་སྣང་མཛད་ལ་སོགས་པ་ནས་རིན་ཆེན་འབེབས་པའི་མཐར་ཐུག་པའི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་རྣམས་ཐབས་དང་། ཤེས་རབ་ཡོངས་སུ་རྫོགས་པའི་རྣལ་འབྱོར་པས་བསྒྲུབ་པར་འགྱུར་རོ་ཞེས་བྱ་བའི་

དོན་ཏོ། །དེ་བས་ན་རྣལ་འབྱོར་པས་ཚོགས་ནི་འགྲུབ་པར་འགྱུར་རོ་ཞེས་བྱ་བའི་དོན་ཏོ། །དེ་ལྟར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དཀྱིལ་འཁོར་ཆེན་པོ་ལས་བཤད་པའི་དངོས་གྲུབ་བསྒྲུབ་པའི་ཚོགས་ཀྱི་དངོས་གྲུབ་ཀྱི་རྒྱུད་བཤད་ནས། ད་ནི་དེ་

เล่ม ๕๘ · หน้า 292b

བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གཟུངས་ཀྱི་དངོས་གྲུབ་བསྒྲུབ་པའི་ཚོགས་གསུངས་པ་ནི། དེ་ལ་འདི་ནི་ཕྱག་རྒྱའི་ཚོགས་ཀྱི་དངོས་གྲུབ་ཀྱི་རྒྱུད་དེ་ཞེས་བྱའོ། །དཀྱིལ་འཁོར་མང་པོ་ཞུགས་པ་དང་། །ཞེས་བྱ་བ་ནི་མང་པོ་དེ་རྣམས་སུ་ཞུགས་པ་

ནི་དཀྱིལ་འཁོར་གྱི་འཁོར་ལོ་མང་པོར་བཞུགས་པའོ། །དེ་སྐད་དུ་ཡང་། འཁོར་ལོ་དཀྱིལ་འཁོར་ཞེས་བཤད་དེ། །དེ་ཉིད་དམ་ཚིག་ཅེས་གྲགས་པའོ། །ཞེས་བྱ་བ་གསུངས་སོ། །དཀྱིལ་འཁོར་མང་པོ་བྲིས་པའི་ཕྱིར། །ཞེས་བྱ་བ་ནི་དཀྱིལ་འཁོར་ཡང་ཡིན་ལ་མང་

པོ་ཡང་ཡིན་པས་ན་དཀྱིལ་འཁོར་མང་པོ་སྟེ། དེ་དག་བརྟགས་ཤིང་བྲིས་པའི་ཕྱིར་ཚོགས་ཡོངས་སུ་རྫོགས་པར་འགྱུར་རོ་ཞེས་བྱའོ། །དེ་ལྟར་གྱུར་པས་ན་ཅིར་འགྱུར་ཞེ་ན། ཚོགས་ནི་རྫོགས་པར་བྱ་བ་གསུངས་ཏེ། ཚོགས་ཐམས་ཅད་རྫོགས་པས་ན་ཕྱག་རྒྱ་རྣམས་ཀྱི་དངོས་གྲུབ་

ཆེན་པོ་སངས་རྒྱས་ཉིད་དང་། བྱང་ཆུབ་སེམས་དཔའ་ཉིད་ཐོབ་པའི་རྒྱུ་རབ་ཏུ་འཕེལ་བར་འགྱུར་རོ། །ད་ནི་ཆོས་ཀྱི་དཀྱིལ་འཁོར་ལས་བཤད་པའི་རིགས་ཐམས་ཅད་ཀྱི་རྗེས་སུ་ཡི་རང་བ་ལ་སོགས་པའི་ཚུལ་དུ་ཞེས་བྱ་བ་གསུངས་པ་ནི་སངས་རྒྱས་དང་། བྱང་ཆུབ་

སེམས་དཔའ་ཐམས་ཅད་དང་། རང་སངས་རྒྱས་དང་། འཕགས་པ་ཉན་ཐོས་ཡང་དག་པར་སོང་བ་དང་། ཡང་དག་པར་ཞུགས་པ་དང་། སེམས་ཅན་ཐམས་ཅད་ཀྱི་དུས་གསུམ་དུ་ལུས་དང་ངག་དང་། ཡིད་ལས་བྱུང་བའི་བསོད་ནམས་གང་ཅི་ཡང་རུང་བ་དེ་ཐམས་ཅད་ལ་རྗེས་སུ་

ཡི་རང་བར་བགྱིད་དོ་ཞེས་ངག་ཏུ་བརྗོད་ཅིང་རྗེས་སུ་ཡི་རང་བ་དེ་དང་པོར་བྱས་པའི་ལྷག་མ་ནི་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་ཡིན་པས་རྗེས་སུ་ཡི་རང་བ་ལ་སོགས་པའི་སྒྲ་བརྗོད་དོ། །དེའི་ཚུལ་ནི་དེ་བཞིན་དུ་བརྗོད་དོ། །དེ་བཞིན་དུ་དམ་པའི་ཆོས་བཀླག་པ་དང་ཞེས་

བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་ཟབ་མོའི་མདོ་སྡེ་འདོན་པའོ། །ད་ནི་ལས་ཀྱི་དཀྱིལ་འཁོར་ལས་བཤད་པའི་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ལ་རིག་པའི་ཚོགས་ཀྱི་དངོས་གྲུབ་གསུངས་པ་ནི། མ་རིག་རབ་ཏུ་སྤངས་པ་དང་། །ཞེས་བྱ་བ་ལ་

เล่ม ๕๘ · หน้า 293a

སོགས་པ་ལ། དངོས་པོར་འཛིན་པའི་མངོན་པར་ཞེན་པ་ནི་མ་རིག་པའོ། །ཆོས་ཐམས་ཅད་རང་བཞིན་གྱིས་འོད་གསལ་བ་དེ་བསྒོམས་པས་ཤིན་ཏུ་ཕུལ་དུ་བྱུང་བས་ངེས་པར་གསལ་བ་ནི་རབ་ཏུ་སྤངས་པའོ། །དེའི་དངོས་པོ་ནི་དེ་ཁོ་ན་ཉིད་དེ། དེ་གང་

ལས་ཡིན་ཞེ་ན། སྦྱིན་པའི་ཕ་རོལ་ཕྱིན་ཚུལ་ལས། །ཞེས་བྱ་བ་སྨོས་ཏེ། ཤེས་རབ་ཀྱི་སྟོབས་ཀྱིས་ལེན་པ་པོ་དང་གཏོང་བ་པོ་དང་། གཏང་བར་བྱ་བ་མི་དམིགས་པ་དང་། མངོན་སུམ་དུ་བྱེད་པ་ནི་སྦྱིན་པའི་ཕ་རོལ་ཏུ་ཕྱིན་པའོ། །ཆོས་ཐམས་ཅད་ཀྱི་མཚན་ཉིད་ལ་མངོན་པར་

ཞེན་པ་སྤངས་པས་དེ་ཉིད་ཀྱི་ཚུལ་ནི་ཐོབ་པའི་ཐབས་སོ། །དེའི་ཕྱིར་སྦྱིན་པའི་ཕ་རོལ་ཏུ་ཕྱིན་པའི་ཚུལ་ལས། ཚོགས་ནི་ཡོངས་སུ་རྫོགས་ནས་ཀྱང་། །ཞེས་བྱ་བ་ནི་ལས་ཀྱི་དཀྱིལ་འཁོར་ལས་བཤད་པའི་རིག་པ་རྣམས་བཟླས་པས་དངོས་གྲུབ་ཐོབ་པོ་ཞེས་བྱའོ། །དེ་ལྟར་དེ་བཞིན་གཤེགས་པ་

ལ་སོགས་པའི་རིགས་ཐམས་ཅད་ཀྱི་རྟོག་པ་ཐམས་ཅད་ཀྱི་ཚོགས་ཀྱི་དངོས་གྲུབ་ཀྱི་རྒྱུད་བཤད་ནས། ད་ནི་དེ་རྣམས་ཀྱི་མཚན་མ་འབྱུང་བ་མེད་ན། ཡེ་ཤེས་ཀྱི་དངོས་གྲུབ་ཏུ་མི་འགྱུར་རོ་ཞེས་བསྟན་པའི་ཕྱིར། །དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ལ་སོགས་

པའི་རིགས་ཐམས་ཅད་ཀྱི་མཚན་མ་འབྱུང་བ་ཡེ་ཤེས་ཀྱི་དངོས་གྲུབ་ཀྱི་རྒྱུད་གསུངས་པ་ནི། དེ་བཞིན་གཤེགས་པ་ལ་སོགས་པའི་རིགས་རྣམས་དང་། རྡོ་རྗེ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེ་ལ་སོགས་པ་དེ་དག་ཡེ་ཤེས་གང་ལས་འབྱུང་བ་དེ་ནི་རིགས་ཐམས་ཅད་ཀྱི་

མཚན་མ་འབྱུང་བའི་ཡེ་ཤེས་སོ། །དེའི་དངོས་གྲུབ་ནི་ཕྱག་རྒྱ་ཆེན་པོ་ལ་སོགས་པ་མངོན་སུམ་དུ་བྱེད་པའོ། །དེ་ཇི་ལྟར་རྡོ་རྗེ་འབྱུང་ཞེ་ན་ཞེས་བྱ་བ་ནི་ཡེ་ཤེས་གང་གིས་རྡོ་རྗེ་ལ་སོགས་པ་བསྐྱེད་པ་ཡིན་ཞེས་བྱ་བའི་དོན་ཏོ། །དེ་ཉིད་བཅོམ་ལྡན་སེམས་དཔའ་སྟེ། །ཞེས་བྱ་བ་ནི་རྣམ་པར་སྣང་

མཛད་ཆེན་པོ་སྟེ། བཅོམ་ལྡན་འདས་ཀུན་དུ་བཟང་པོའི་བྱང་ཆུབ་ཆེན་པོའི་སེམས་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་བཞུགས་སོ་ཞེས་བྱ་བ་གང་ཡིན་པ་སྔར་བཤད་པའོ། །དེ་ཉིད་རྡོ་རྗེ་ལས་སྐྱེས་པས་ན་རྒྱུ་ཡིན་གྱི་གཞན་དུ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལྟར་འགྱུར་

เล่ม ๕๘ · หน้า 293b

བ་གང་ཡིན་ཞེ་ན། ཐམས་ཅད་སེམས་ཞེས་བྱ་བ་སྨོས་ཏེ། དེ་བཞིན་གཤེགས་པ་ལ་སོགས་པ་ནས། །སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བའི་རང་བཞིན་ཡིན་ནོ་ཞེས་བྱ་བའི་དོན་ཏོ། །འདིར་གང་ཡིན་ཞེ་ན། ཉིད་བདག་ཅེས་བྱ་བ་སྨོས་ཏེ། གཟུང་བ་དང་འཛིན་པའི་

རྣམ་པར་རྟོག་པ་གཞན་གྱི་དབང་མེད་པའི་ཕྱིར་རོ། །ཅིའི་ཕྱིར་གཟུང་བ་དང་འཛིན་པའི་རྣམ་པར་རྟོག་པ་གཞན་གྱི་དབང་མེད་པ་ཡིན་ཞེ་ན་གང་གི་ཕྱིར། སྐུ་གསུང་ཐུགས་ཀྱི་རྡོ་རྗེ་ནི། །ཞེས་བྱ་བ་ལ་སོགས་པ་སྨོས་ཏེ། དེ་ལ་སྐུ་དང་གསུང་དང་། ཐུགས་རྡོ་རྗེ་ནི་བཤད་ཟིན་ཏོ། །

དེའི་རང་བཞིན་གྱི་སེམས་བརྟན་པ་ནི་རྡོ་རྗེ་སེམས་དཔའ་ཡིན་ནོ་ཞེས་བྱ་བའི་དོན་ཏོ། །ཏིང་ངེ་འཛིན་དེ་གང་ཡིན་ཞེ་ན། རང་བྱུང་གི་ཞེས་བྱ་བ་སྨོས་ཏེ། སངས་རྒྱས་བཅོམ་ལྡན་འདས་ཀྱིའོ། །སེམས་དཔའ་ཀུན་གྱི་མཆོག་སེམས་དཔའ། །ཞེས་བྱ་བ་ནི་རྡོ་རྗེ་རྒྱལ་པོ་ལ་སོགས་

པ་གཞན་དག་ནི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་ངོ་བོ་རྡོ་རྗེ་སེམས་དཔའ་ལས་བྱུང་བ་དེའི་ཕྱིར་དེ་དག་གི་མཆོག་གོ། །རྡོ་རྗེ་སྙིང་གར་རབ་བསྒོམས་ན། །རྡོ་རྗེ་སེམས་དཔའ་ཞེས་གྲགས་ཏེ། །ཞེས་བྱ་བ་ནི་གང་གི་ཚེ་དེ་བཞིན་གཤེགས་པ་ལ་སོགས་པའི་རྣལ་འབྱོར་

པས་སྙིང་གའི་ཟླ་བ་ལ་རྡོ་རྗེ་རྩེ་ལྔ་པའི་རྣམ་པར་སྒོམ་པར་བྱེད་པ་དེའི་ཚེ། རྡོ་རྗེ་སེམས་དཔའ་ཞེས་གྲགས་སོ། །རྣལ་འབྱོར་གྱི་རྒྱུད་དུ་གྲགས་པ་ལ་ཕྱི་རོལ་དུ་ནི་སྐྱེས་བུའི་གཟུགས་སུ་ཡིན་ནོ་ཞེས་སེམས་ནི་འདི་ལ་རྡོ་རྗེ་རབ་ཏུ་གནས་ཞེས་བྱ་བ་སྟེ། སྙིང་གའི་སེམས་དཔའ་རྡོ་རྗེ་དེ་ལ་

ཐོག་མ་དང་ཐ་མ་མེད་པའི་རྡོ་རྗེ་སེམས་དཔའ་ཀུན་རྫོབ་ཀྱི་གཟུགས་ཀྱིས་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་ངོ་བོ་དངོས་པོ་ཐམས་ཅད་གཟུགས་བརྙན་ཙམ་དུ་རབ་ཏུ་གནས་པ་སྟོན་པར་བྱེད་པ་ཡིན་ནོ། །གཞུང་འདི་ཙམ་གྱིས་ནི་ཐོག་མ་དང་ཐ་མ་མེད་པའི་རྡོ་རྗེ་སེམས་དཔའི་རྡོ་རྗེ་

རྩེ་ལྔ་པའི་རྣམ་པར་བསྐྱེད་པ་བསྟན་ཏེ། དེ་ཉིད་སངས་རྒྱས་རྣམས་ཀྱི་ནི། །ཡེ་ཤེས་ཚུལ་དེ་མཉམ་མེད་དོ། །ཞེས་བྱ་བ་ནི་སེམས་དཔའ་རྡོ་རྗེར་གྱུར་པའི་རྡོ་རྗེ་སེམས་དཔའ་ཟླ་བའི་དཀྱིལ་འཁོར་དུ་བསྒོམ་པའི་ཡེ་ཤེས་ཀྱི་ཚུལ་ལོ། །ཡེ་ཤེས་ཀྱི་ཚུལ་དེ་གང་གི་ཡིན་ཞེ་ན། སངས་

เล่ม ๕๘ · หน้า 294a

རྒྱས་རྣམས་ཀྱི་ཞེས་བྱ་བ་སྨོས་ཏེ། སངས་རྒྱས་བཅོམ་ལྡན་འདས་རྣམས་ཀྱི་མཉམ་པ་མེད་པའི་འོད་ཅན་སེམས་དཔའི་རྡོ་རྗེར་ངེས་པར་འབྱུང་བ་བསྟན་པ་དང་། གཡོ་བའི་དངོས་པོ་ཐམས་ཅད་ཀྱི་རང་བཞིན་རྡོ་རྗེ་སེམས་དཔའ་སྣ་ཚོགས་པའི་གཟུགས་སུ་

འགྱུར་བའོ། །ཁམས་གསུམ་ཀུན་གྱི་རྡུལ་སྙེད་དུ། །དེ་ཉིད་ཀྱི་ནི་རྒྱལ་བ་ཡིན། །ཞེས་བྱ་བ་ནི་སེམས་དཔའ་འབྱུང་བའི་དུས་སུ་བཛྲ་སཏྭ་ཞེས་བྱ་བ་ལ་སོགས་པའི་སྒྲས་བསྐུལ་ནས། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་

རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་གཟུགས་བརྙན་ཏིང་ངེ་འཛིན་ལས་འབྱུང་བའོ། །དེ་དག་ཉིད་ཀྱི་རྒྱལ་བའི་རྡོ་རྗེའི་སྐུ་ནི་དེ་རྣམས་ལས། རྡོ་རྗེ་སེམས་དཔའ་ཡང་དག་འགྱུར། །ཞེས་བྱ་བ་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་

པར་སྣང་མཛད་ལ་སོགས་པའི་གཟུགས་བརྙན་གཅིག་ཏུ་འགྱུར་བ་དེ་ལ་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའི་བྱང་ཆུབ་སེམས་དཔའ་ཐམས་ཅད་ཀྱི་སྐུའི་ངོ་བོ་བསྐྱེད་པ་ཡིན་པ་དེའི་ཕྱིར། དེ་རྣམས་ལས་རྡོ་རྗེ་སེམས་དཔའ་ཡང་དག་པར་འགྱུར་རོ། །

སེམས་དཔའ་དང་པོ་དེ་ཉིད་ལས། །མཚན་མ་ཐམས་ཅད་ཡང་དག་འབྱུང་། །ཞེས་བྱ་བ་ནི་སེམས་དཔའི་རྡོ་རྗེར་འགྱུར་བ་ལས་རྡོ་རྗེ་སེམས་དཔའི་ངོ་བོ་དང་། རྡོ་རྗེ་ལྕགས་ཀྱུ་ལ་སོགས་པའི་ཕྱག་རྒྱ་ལས་རྡོ་རྗེ་རྒྱལ་པོ་ལ་སོགས་པ་སྐྱེ་བ་ཡིན་ནོ་ཞེས་བྱ་བའི་དོན་ཏོ། །དེ་སྐད་དུ་

ཡང་། ཇི་ལྟར་བཅོམ་ལྡན་རྟག་པ་ལས། །རྡོ་རྗེ་སེམས་དཔའ་ཀུན་འབྱུང་ལྟར། །རྡོ་རྗེའི་མཚན་མ་ལ་སོགས་ལས། །འབྱུང་བར་འགྱུར་བ་འགྲུབ་པ་ཡིན། །ཞེས་གསུངས་སོ། །མཚན་མ་ལས་ནི་སེམས་དཔའ་ཆེ། །ཞེས་བྱ་བ་ནི་རྡོ་རྗེ་སེམས་དཔའ་ནས་དྲིལ་བུའི་མཐར་ཐུག་པའི་

རང་གི་མཚན་མ་རྣམས་ཀྱིས་དཀྱིལ་འཁོར་རྡོ་རྗེར་བསྒྲུབས་ནས་ཡེ་ཤེས་སེམས་དཔའ་འཇུག་པའི་དུས་སམ། འོག་མིན་དུ་མངོན་པར་བྱང་ཆུབ་པ་མངོན་སུམ་དུ་བྱེད་པའི་དུས་སུ་རྡོ་རྗེ་སེམས་དཔའི་སྐུ་བསྐྱེད་པ་ཡིན་ནོ་ཞེས་བྱ་བའི་དོན་ཏོ། །དེ་ཉིད་གང་ལས་ཤེས་ཤེ་ན། །རང་གི་སེམས་

เล่ม ๕๘ · หน้า 294b

ཡོངས་སུ་སྦྱོང་བའི་དུས་སུ་སེམས་དཔའ་བྱིན་གྱིས་བརླབས་པའི་སྦྱོར་བས་རྡོ་རྗེ་སེམས་དཔའ་བསྐྱེད་ལ། རྡོ་རྗེ་སེམས་དཔའ་ལས་བྱུང་བ་ནི། རྡོ་རྗེ་རྒྱལ་པོ་ལ་སོགས་པ་བྱའོ་ཞེས་གསུངས་སོ། །དེའི་ཕྱིར་བདག་ཉིད་ཀྱི་རྣལ་འབྱོར་གྱི་དུས་སུ་རྡོ་རྗེ་རྒྱལ་པོ་ལ་སོགས་པ་རྣམས་རང་

གི་མཚན་མ་ལས་བསྐྱེད་པ་མ་ཡིན་ལ། སེམས་དཔའ་བསྐྱེད་པའི་དུས་སུ་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པ་ལས་འབྱུང་བ་ཡིན་པར་ཐེ་ཚོམ་མི་བྱའོ། །དེ་ལས་ཚུལ་འདི་ཐམས་ཅད་འབྱུང་། །ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་

པའི་ཐུགས་ཀའི་མཚན་མ་ལས་རྡོ་རྗེ་སེམས་དཔའ་ལ་སོགས་པ་བྱུང་ནས། དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པའི་མདོ་འདི་གསུངས་པ་ཡིན་ནོ་ཞེས་བྱ་བའི་དོན་ཏོ། །ད་ནི་ཕན་ཡོན་གསུངས་པ་ནི། །གང་ཞིག་གིས་ནི་ཐོས་འགྱུར་བ། །ཞེས་བྱ་བ་ལ་སོགས་པ་སྨོས་ཏེ།

ཐོས་འགྱུར་ཞེས་བྱ་བ་ནི་ཐོས་པ་བསྟན་ཏོ། །དད་ཅིང་ཞེས་བྱ་བ་ནི་དད་པ་སྐྱེས་པས་ལྷག་པར་སེམས་པ་ཡིན་ནོ་ཞེས་བྱ་བའི་ཐ་ཚིག་གོ། །འཛིན་བྱེད་ཅེས་བྱ་བ་ནི། ཇི་ལྟར་ཐོས་པའི་མདོ་མ་བརྗོད་པར་སེམས་ལ་བཞག་ནས་དེ་སྟོན་པའོ། །སྙིང་གར་ཡང་། རྟག་ཏུ་དགའ་བ་བསྒོམས་ནས་ནི། །ཞེས་བྱ་བ་ནི་

ཇི་ལྟར་ཐོས་པ་དང་། བསམ་པ་དང་། ཤེས་པས་ངེས་པར་བྱས་ནས། ཡང་དང་ཡང་མངོན་དུ་བྱེད་ཅིང་། རྟག་ཏུ་དགའ་བ་དང་ཡིད་མགུ་བར་སྦྱོར་བས་ན། དེ་ནི་མྱུར་དུ་གྲུབ་པ་ཐོབ། །ཅེས་བྱ་བ་ནི་སྒྲུབ་པ་པོས་མདོ་ཇི་ལྟར་ཐོས་པ་བསམ་པའི་ཤེས་པས་ངེས་པར་བྱས་ནས། ཡང་དང་ཡང་མངོན་

དུ་བྱས་པ་ཉིད་ཀྱིས་སངས་རྒྱས་ཀྱི་དངོས་གྲུབ་ཐོབ་པར་འགྱུར་རོ། །དེ་ལྟར་དེ་བཞིན་གཤེགས་པ་ལ་སོགས་པ་རིགས་ཐམས་ཅད་ཀྱི་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་འབྱུང་བའི་ཡེ་ཤེས་ཀྱི་ཆོ་ག་རྒྱས་པའི་རྒྱུད་བསྟན་ནས། ད་ནི་སྙིང་པོ་དང་། ཕྱག་རྒྱ་དང་། གསང་སྔགས་དང་རིག་

སྔགས་རྣམས་ཀྱི་རྟོག་པ་འབྱུང་བའི་ཡེ་ཤེས་མེད་ན་དངོས་གྲུབ་ཏུ་མི་འགྱུར་རོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པས་རྟོག་པ་ཐམས་ཅད་འབྱུང་བའི་ཡེ་ཤེས་ཀྱི་ཆོ་ག་རྒྱས་པའི་རྒྱུད་གསུངས་པ་ཡིན་ནོ། །དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་རྟོག་པ་ཐམས་ཅད་ནི་ཇི་

ที่มาและสัญญาอนุญาต

ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ

สัญญาอนุญาต Public Domain · หลักฐาน

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

  • หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
  • ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด