དཔལ་ཁམས་གསུམ་རྣམ་པར་རྒྱལ་བའི་དཀྱིལ་འཁོར་གྱི་ཆོ་ག་འཕགས་པ་དེ་ཁོ་ན་ཉིད་བསྡུས་པའི་རྒྱུད་ལས་བཏུས་པ

ชื่อสันสกฤต (อักษรทิเบต ตามตัวบท) ཤྲཱི་ཏྲཻ་ལོཀྱ་བི་ཛ་ཡ་མཎྜ་ལོ་པ་ཡི་ཀ་ཨཱརྱ་ཏཏྟྭ་སཾ་གྲ་ཧ་ཏནྟྲོ་དྡི་དྷི་ཏ

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

เล่ม ๖๒ · หน้า 67a

༄༅༅། །རྒྱ་གར་སྐད་དུ། ཤྲཱི་ཏྲཻ་ལོཀྱ་བི་ཛ་ཡ་མཎྜ་ལོ་པ་ཡི་ཀ་ཨཱརྱ་ཏཏྟྭ་སཾ་གྲ་ཧ་ཏནྟྲོ་དྡི་དྷི་ཏ། བོད་སྐད་དུ། དཔལ་ཁམས་གསུམ་རྣམ་པར་རྒྱལ་བའི་དཀྱིལ་འཁོར་གྱི་ཆོ་ག་འཕགས་པ་དེ་ཁོ་ན་ཉིད་བསྡུས་པའི་རྒྱུད་ལས་བཏུས་

པ། མགོན་པོ་འཇམ་པའི་དབྱངས་ལ་ཕྱག་འཚལ་ལོ། །བཅོམ་ལྡན་འདས་རྡོ་རྗེ་སེམས་དཔའ་ལ་ཕྱག་འཚལ་ལོ། །ཁྱབ་བདག་གདུལ་དཀའ་འདུལ་བ་པོ། །རྡོ་རྗེ་ཧཱུྃ་མཛད་ཕྱག་འཚལ་ཏེ། །འཇིག་རྟེན་གསུམ་རྒྱལ་འབྱུང་བ་ཡི། །དཀྱིལ་འཁོར་ཆོ་ག་བཤད་པར་བྱ། །དེ་ལ་རེ་ཞིག་

སློབ་དཔོན་གསང་བའི་དཀྱིལ་འཁོར་དུ་ཞུགས་ཤིང་དབང་ཐོབ་པ་རིགས་པའི་སྡོམ་པ་ཡོངས་སུ་བཟུང་བ། གསང་བའི་ཆོ་ག་ཐམས་ཅད་ཀྱི་བྱ་བ་ཤེས་པ། དཔའ་བ་བརྟན་པ། སྤྲོ་བ། ཆེ་བ། མཁས་པ། དུལ་བ། འདུལ་བའི་ཀུན་དུ་སྦྱོར་བ་ལ་གནས་པ། དད་པ་དང་ལྡན་པ། ཆོས་

ཟབ་མོ་ལ་ལྷག་པར་མོས་པ། སེམས་ཅན་ཐམས་ཅད་ཡོངས་སུ་སྐྱོབ་པའི་བློ་ཅན། ལུས་དང་སྲོག་ལ་ལྟོས་པ་མེད་པ། གྲོགས་ཀྱི་དཀྱིལ་འཁོར་མཐོང་བ། དད་པས་བྱང་ཆུབ་ཏུ་སེམས་བསྐྱེད་པ། གསང་བའི་ཚུལ་གྱིས་ཆོ་གའི་བྱ་བ་ཤེས་པ། གཙང་ཞིང་གཙང་མར་སྤྱོད་པ།

གསང་བའི་ཆོ་གའི་བྱ་བ་ལ་མཁས་པ། སྙིང་སྟོབས་དང་ལྡན་པ། བློ་བརྟན་པ་དང་ལྷན་ཅིག་གམ། ཡང་ན་གྲོགས་བཟང་མེད་པ་རི་བོའམ། ནགས་སམ། ཆུ་འགྲམ་མམ། སྐྱེད་མོས་ཚལ་ལམ། གཙུག་ལག་ཁང་ལ་སོགས་པའི་ཡིད་དང་རྗེས་སུ་མཐུན་པའི་གནས་སུ་སྔོན་དུ་བསྙེན་

เล่ม ๖๒ · หน้า 67b

པ་བྱའོ། །དེ་ལ་དང་པོར་རེ་ཞིག་རིམ་པ་འདིས་རྣམ་པར་རྟོག་པ་ལ་སྤྱོད་པའི་ཁྲུས་བརྩམ་པར་བྱའོ། །ཁྲོ་བོ་ཏི་རཱིནྟི་རིའི་ཕྱག་རྒྱ་བཅིངས་ལ། སྙིང་གར་བཞག་སྟེ། ཨོཾ་དྷུ་པེ་དྷུ་པེ་པི་ཀཱ་ཡ་དྷུ་པི་པྲ་ཛྭ་ལ་ནི་སྭཱ་ཧཱ། ཞེས་ཟློས་ཤིང་བདག་ཉིད་འབར་བར་བྱའོ། །ཨོཾ་ཊུཾ་ཞེས་བྱ་བས་གོ་

བགོས་ལ་རྡོ་རྗེ་གནོད་སྦྱིན་གྱི་མཆེ་བའི་ཕྱག་རྒྱ་བཅིངས་ཏེ། བགེགས་ཐམས་ཅད་བཟའ་བར་བྱའོ། །ཡང་དེ་ཉིད་དང་ཨ་ཞེས་བྱ་བ་ཟློས་ཤིང་བདུད་རྩི་ཐབ་སྦྱོར་གྱིས་ཡང་ཨོཾ་བྷུ་ར་ཛྭ་ལ་ཧཱུྃ་སྭཱ་ཧཱ། ཞེས་ཟློས་ཤིང་སྤྱི་བོར་ཆུ་ཁྱོར་བ་གསུམ་བླུགས་པར་བྱའོ། །རིག་པ་འདི་ཉིད་

ཀྱིས་ས་གཙང་མ་བླངས་ལ་ཆ་གསུམ་དུ་བྱས་ཏེ། ཆ་གཅིག་གིས་རྐེད་པ་མན་ཆད་བཀྲུ། གཉིས་པས་ལུས་ཐམས་ཅད་བཀྲུའོ། །གསུམ་པས་ལག་པ་བཀྲུས་ལ་ཉེ་རེག་བྱས་ཏེ། རང་གི་སྔགས་དང་ཕྱག་རྒྱས་སྤྱི་བོར་ཆུ་བླུགས་ལ། བདག་ཉིད་རྡོ་རྗེ་ཧཱུྃ་མཛད་དུ་བྱིན་གྱིས་བརླབས་ཏེ། ཆུ་

ལས་ལངས་ནས་རྡོ་རྗེ་སེམས་དཔའ་ཟློས་ཤིང་ཆུའི་བསྲུང་བ་བསལ་ལ། ཧཱུཾ་བཞི་རྡོ་རྗེའི་ཚིག་གིས་ཡིད་ལ་ཟློས་ཤིང་ལྷའི་ཁང་པའམ། རི་བོ་ལ་སོགས་པའི་གནས་སུ་འང་ཁྲུས་དང་ཉེ་རེག་བྱས་ཏེ། རྡོ་རྗེ་རྩེ་མོ་མངོན་པར་བཟླས་པའི་ཆུས་གོས་ལ་སོགས་པ་ལ་བསང་གཏོར་བྱས་ལ།

གནས་ཁང་ལ་སོགས་པར་ཆུ་དེ་ཉིད་ཀྱིས་ལྷའི་ཁང་པའི་ནང་ཀུན་དུ་བགེགས་བསལ་བར་བྱས་ནས་སྟན་བདེ་བ་ལ་སོགས་པར་ཇི་ལྟར་བདེ་བར་འདུག་སྟེ། རྡོ་རྗེ་བསྡམས་པ་ནང་དུ་བཅིངས་ལ། མཛུབ་མོ་གཉིས་གཤིབས་ཏེ་རྩེ་མོར་བྱས་ནས། མཐེ་བོང་གཉིས་གྱེན་དུ་བལྟས་པར་གཤིབས་ཏེ།

སྐྱིལ་མོ་ཀྲུང་གི་སྟེང་དུ་བཞག་ལ། ཨོཾ་སརྦ་བི་ཤུདྡྷེ་དྷརྨ་ཏཱ་བཛྲ་སིདྡྷི་ཧཱུྃ་ཞེས་ལན་གསུམ་བཟླས་པར་བྱའོ། །དེ་ནས་ལྐོག་མའི་ཕྱོགས་སུ་ཧྲཱིཿལས་པདྨ་འདབ་མ་བརྒྱད་པ་བསམས་པའི་ལྕེའི་པདྨའི་འདབ་མར་ཧཱུྃ་ལས་རྡོ་རྗེ་རྩེ་ལྔ་པ་དཀར་པོ་བསམས་ལ། བཛྲ་ཛི་ཧྭ་ཞེས་བྱ་བའི་རིག་པ་

འདིས་བྱིན་གྱིས་བརླབ་པར་བྱའོ། །ལག་པ་གཉིས་སུ་ཡང་ཨ་ལས་ཟླ་བའི་དཀྱིལ་འཁོར་གཉིས་བསམས་ལ། དེ་གཉིས་ཀྱི་སྟེང་དུ་ཧཱུྃ་གཉིས་ལ་རྡོ་རྗེ་བསམ་ཞིང་ལག་པའི་སོར་མོ་ཡང་རྡོ་རྗེ་རྩེ་མོར་བསྐྱེད་ལ། འོག་ནས་བཤད་པའི་རིམ་པས་བགེགས་གཞོམ་པ་ལ་སོགས་པ་བྱས་

เล่ม ๖๒ · หน้า 68a

ནས་རྡོ་རྗེ་འཁོར་ལོའི་ཕྱག་རྒྱ་བཅིངས་ལ། ཨོཾ་བཛྲ་ཙཀྲ་ཧཱུྃ་ཞེས་བརྗོད་པར་བྱའོ། །དེ་ལ་ཕྱག་རྒྱ་ནི་འདི་ཡིན་ཏེ། རྡོ་རྗེ་ཁུ་ཚུར་གཉིས་བཅིངས་ནས། །མཛུབ་མོ་མཐེའུ་ཆུང་རྡོ་རྗེ་མདུད། །རྡོ་རྗེ་འཁོར་ལོ་ཞེས་གྲགས་ཏེ། །དཀྱིལ་འཁོར་ཐམས་ཅད་སྒྲུབ་

བྱེད་ཡིན། །རིགས་ཐམས་ཅད་ཀྱི་འཁོར་ལོ་བསྐོར་བ་འདིས་ཕྱོགས་ཐམས་ཅད་དུ་གཡས་ནས་བསྐོར་ལ་ཁར་བཞག་ནས་ལྟ་བཞིན་དུ་སྔགས་ལན་བརྒྱ་རྩ་བརྒྱད་དུ་བཟླས་ན། རིགས་ཐམས་ཅད་ཀྱི་དཀྱིལ་འཁོར་དུ་ཞུགས་པར་འགྱུར་རོ། །དེ་ནས་དཀྱིལ་འཁོར་བློས་མངོན་སུམ་

ལྟ་བུར་དམིགས་ལ་མེ་ཏོག་ལ་སོགས་པས་ལྷ་ཐམས་ཅད་ཡང་དག་པར་མཆོད་དེ་ཕྱོགས་ཐམས་ཅད་ནས་དཀྱིལ་འཁོར་ལྔ་པ་དང་འདིས་ཕྱག་བྱའོ། །ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་པྲ་ཎ་མེ་ན་བཛྲ་བནྡ་ནཾ་ཀ་རོ་མི། དེ་ནས་ཕྱག་བཞི་བྱ་སྟེ། འདི་ལྟར་རྡོ་རྗེ་ཐལ་མོ་བརྐྱང་ལ་སྔགས་

འདི་དང་ལུས་ཐམས་ཅད་ཀྱིས་ཕྱག་བྱའོ། །ཨོཾ་སརྦ་ཏ་ཐཱ་ག་ཏ་པུ་ཛོ་པསྠ་ནཱ་ཡ་ཨཱཏྨ་ནཱཾ་ནིརྱཱ་ཏ་ཡཱ་མི་སརྦ་ཏ་ཐཱ་ག་ཏ་བཛྲ་སཏྭ་ཨ་དྷི་ཏིཥྛ་སྭ་མཱཾ། དེ་ནས་དེ་བཞིན་དུ་གནས་པ་ལས་རྡོ་རྗེ་ཐལ་མོ་སྙིང་གར་སྦྱར་ལ། འདིས་དཔྲལ་བས་ཕྱག་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་ཨ་བྷི་ཥེ་ཀ་

ཨཱཏྨ་ནཱཾ་ནིརྱཱ་ཏ་ཡཱ་མི་སརྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥིཉྩ་མཱཾ། དེ་ནས་དེ་བཞིན་དུ་གནས་པ་ལ་རྡོ་རྗེ་ཐལ་མོ་སྤྱི་བོར་བཞག་སྟེ་འདི་དང་ཁས་ཕྱག་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་པྲ་བརྟ་ནཱ་ཡ་ཨཱཏྨ་ནཱཾ་ནིརྱཱ་ཏ་ཡཱ་མི་སརྦ་ཏ་ཐཱ་ག་ཏ་བཛྲ་དྷརྨྨ་པྲ་བརྟ་ཡ་མཱཾ། དེ་ནས་དེ་བཞིན་དུ་གནས་པ་ལས་

རྡོ་རྗེ་ཐལ་མོ་སྤྱི་བོ་ནས་ཕབ་སྟེ་སྙིང་གར་སྦྱར་ལ་བྱང་ཕྱོགས་སུ་སྤྱི་བོ་ས་ལ་རེག་པར་བྱས་ནས་འདིས་ཕྱག་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་ཀརྨྨ་ཎེ་ཨཱཏྨ་ནཱཾ་ནིརྱཱ་ཏ་ཡཱ་མི་སརྦ་ཏ་ཐཱ་ག་ཏ་བཛྲ་ཀརྨྨ་ཀུ་རུ་མཱཾ། ཕྱག་འཚལ་བའི་ཕྱག་རྒྱ་བཅིངས་ནས་སྡིག་པ་ཐམས་ཅད་བཤགས་པར་

བགྱིའོ། །ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་སུ་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷ་ཐམས་ཅད་

เล่ม ๖๒ · หน้า 68b

བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་ཕྱོགས་བཅུའི་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་སུ་བཞུགས་པ་ཐམས་ཅད་དང་། སྙིང་པོ་དང་ཕྱག་རྒྱ་དང་།

གསང་སྔགས་དང་རིག་སྔགས་ཀྱི་ལྷ་ཐམས་ཅད་ཀྱི་སྤྱན་སྔར་སྡིག་པ་ཐམས་ཅད་བླ་ན་མེད་པས་སོ་སོར་བཤགས་པར་བགྱིའོ། །ཕྱོགས་བཅུ་ན་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་དང་བྱང་ཆུབ་སེམས་དཔའ་རྣམས་དང་། རང་སངས་རྒྱས་དང་།

འཕགས་པ་ཉན་ཐོས་ཡང་དག་པར་སོང་བ་དང་། ཡང་དག་པར་ཞུགས་པ་རྣམས་དང་། སེམས་ཅན་གྱི་ཚོགས་ཐམས་ཅད་ཀྱི་བསོད་ནམས་ཐམས་ཅད་ལ་རྒྱ་ཆེར་རྗེས་སུ་ཡི་རང་བར་བགྱིའོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཆོས་ཀྱི་འཁོར་ལོ་བསྐོར་བར་མི་

མཛད་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་བྱ་བའི་ཕྱིར་བསྐུལ་བར་བགྱིའོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདའ་བར་བཞེད་པ་གང་ཡིན་པ་དེ་ཐམས་ཅད་ལ་མྱ་ངན་ལས་མི་འདའ་བར་གསོལ་བར་འཚལ་ལོ། །དེ་ནས་མེ་ཏོག་གི་

ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། གང་ཡང་འཇིག་རྟེན་ཁམས་འདིའམ། །གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་མེ་ཏོག་གི་བྱེ་བྲག་ཡིད་ལས་བྱུང་བའམ། ཆུ་ལས་སྐྱེས་པའམ། ཐང་ལས་སྐྱེས་པ་གང་དག་

ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་།

གསང་སྔགས་དང་། རིག་སྔགས་ཀྱི་ལྷ་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བདུག་པའི་ཕྱག་རྒྱ་བཅིངས་ཏེ་འདི་སྐད་ཅེས་བརྗོད་པར་བྱ་སྟེ། གང་ཡང་འཇིག་རྟེན་གྱི་ཁམས་འདི་འམ། གང་ཡང་ཕྱོགས་

เล่ม ๖๒ · หน้า 69a

བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་བདུག་པའི་བྱེ་བྲག་ལྷན་ཅིག་སྐྱེས་པའམ། ཡང་དག་པར་སྦྱར་བའམ། ཡོངས་སུ་གྱུར་པ་ཅན་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་

ཐམས་ཅད་ལ་མཆོད་པའི་ལས་བྱ་བའི་ཕྱིར་ཕྱོགས་བཅུའི་སངས་རྒྱས་དང་། བྱང་ཆུབ་སེམས་དཔའ་ཞེས་བྱ་བ་ལ་སོགས་པ་སྔ་མ་བཞིན་ནོ། །ཨོཾ་སརྦ་ཏ་ཐཱ་ག་ཏ་དྷཱུ་པེ་པཱུ་ཛ་མེ་གྷ་ས་མུ་དྲ་སྥ་ཎ་ས་མ་ཡེ་ཧཱུཾ། མར་མེའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། གང་ཡང་འཇིག་

རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་སྣང་བའི་བྱེ་བྲག་ཡིད་ལས་བྱུང་བའམ། རིན་པོ་ཆེའི་འོད་དམ། མར་མེའི་སྣང་བ་ལ་སོགས་པ་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་

དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཞེས་བྱ་བ་ལ་སོགས་པ་སྔ་མ་བཞིན་ནོ། །ཨོཾ་སརྦ་ཏ་ཐཱ་ག་ཏ་ཨཱ་ལོ་ཀེ་པཱུ་ཛ་མེ་གྷ་ས་མུ་དྲ་སྥ་ཎ་ས་མ་ཡེ་ཧཱུཾ། དྲིའི་ཕྱག་རྒྱ་བཅིངས་ལ། འདི་སྐད་ཅེས་བརྗོད་པར་བྱ་སྟེ།

གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་དྲིའི་བྱེ་བྲག་ལྷན་ཅིག་སྐྱེས་པའམ། ཡང་དག་པར་སྦྱར་བའམ། ཡོངས་སུ་གྱུར་པ་ཅན་གང་དག་ཡོད་པ་དེ་རྣམས་འདི་ལྟ་སྟེ། ཞེས་བྱ་བ་ལ་སོགས་

པའོ། །ཨོཾ་སརྦ་ཏ་ཐཱ་ག་ཏ་གནྡྷེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་ཡེ་ཧཱུཾ། ཕྱག་འཚལ་བའི་ཐལ་མོ་སྤྱི་བོར་བཞག་ལ་འདི་སྐད་ཅེས་བརྗོད་པར་བྱ་སྟེ། གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་རིན་པོ་

ཆེའི་རི་བོའམ། རྒྱ་མཚོ་ཆེན་པོའི་ཚོགས་གང་དག་ཡོད་པ་དེ་ཐམས་ཅད་ཅེས་བྱ་བ་ལ་སོགས་པའོ། །ཨོཾ་སརྦ་ཏ་ཐཱ་ག་ཏ་བོ་དྷྱཾ་ག་རཏྣ་ཨཱ་ལཾ་ཀ་ར་པཱུ་ཛ་མེ་གྷ་ས་མུ་དྲ་སྥ་ཎ་ས་མ་ཡེ་ཧཱུཾ། དེ་ནས་བཞད་པའི་ཕྱག་རྒྱ་བཅིངས་ལ། འདི་སྐད་ཅེས་བརྗོད་པར་བྱ་སྟེ། གང་ཡང་འཇིག་རྟེན་གྱི་

เล่ม ๖๒ · หน้า 69b

ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་དགོད་པ་དང་། སྒེག་པ་དང་། དགའ་བ་དང་། རྩེད་འཇོའི་བདེ་བའི་བྱེ་བྲག་གང་དག་ཡོད་པ་དེ་དག་འདི་ལྟ་སྟེ་ཞེས་བྱ་བ་ལ་སོགས་པའོ། །ཨོཾ་སརྦ་ཏ་ཐཱ་ག་ཏ་ཧ་སྱ་ལཱ་སྱ་རཱ་ཏི་ཀྲཱི་ཌ་སཽ་ཁྱ་

ཨ་ནུཏྟ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བཞད་པའི་ཕྱག་རྒྱ་དེ་ཉིད་རྡོ་རྗེ་ཐལ་མོ་བསྐོར་བ་སྤྱི་བོར་བཞག་ལ། ཡང་ཐལ་མོ་ཁོང་སྟོང་དུ་སྦྱར་བ་བཅིངས་ནས་འདི་སྐད་ཅེས་བརྗོད་པར་བྱ་སྟེ། གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་

རྟེན་གྱི་ཁམས་ཐམས་ཅད་ན། དཔག་བསམ་གྱི་ཤིང་ངམ་གོས་ཀྱི་ཤིང་གང་དག་ཡོད་པ་དེ་ཐམས་ཅད་འདི་ལྟ་སྟེ་ཞེས་བྱ་བ་ལ་སོགས་པའོ། །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་བོ་དྷི་ཨཱ་ལཾ་ཀ་ར་ཝསྟྲ་པཱུ་ཛ་མེ་གྷ་ས་མུ་དྲ་སྥ་ཎ་ས་མ་ཡེ་ཧཱུཾ། དེ་ནས་བཅོམ་ལྡན་འདས་རྡོ་རྗེ་སེམས་དཔའི་

ལས་ཀྱི་ཕྱག་རྒྱ་བཅིངས་ལ། སེམས་ཅན་ཐམས་ཅད་ཀྱི་འཁོར་བའི་སྡུག་བསྔལ་རྗེས་སུ་དྲན་པར་བྱས་ནས། སྙིང་རྗེའི་དབང་གིས་སེམས་ཅན་ཐམས་ཅད་བསྒྲལ་བར་བྱ་བའི་ཕྱིར་བྱང་ཆུབ་ཀྱི་སེམས་བསྐྱེད་དེ། མ་བསྒལ་བ་རྣམས་བསྒྲལ་བར་བྱ་བའི་ཕྱིར་དང་། མ་གྲོལ་བ་རྣམས་

དགྲོལ་བར་བྱ་བའི་ཕྱིར་དང་། དབུགས་མ་ཕྱུང་བ་རྣམས་དབུགས་དབྱུང་བར་བྱ་བའི་ཕྱིར་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལ་འདའ་བར་བྱ་བའི་ཕྱིར་དང་། སེམས་ཅན་གྱི་ཁམས་མ་ལུས་པ་འཁོར་བའི་རྒྱ་མཚོ་ལས་ཡང་དག་པར་བསྒྲལ་བར་

བྱ་བའི་ཕྱིར་བྱང་ཆུབ་ཏུ་སེམས་བསྐྱེད་པར་བགྱིའོ། །ཨོཾ་སརྦ་ཏ་ཐཱ་ག་ཏ་བཛྲ་བོ་དྷི་ཙིཏྟ་པཱུ་ཛ་མེ་གྷ་ས་མུ་དྲ་སྥ་ཎ་ས་མ་ཡེ་ཧཱུཾ། སྒེག་མོའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་ཡོ་བྱད་ཐམས་ཅད་ཀྱིས་ཡང་དག་པར་འབྱོར་ཅིང་། ཕུན་

སུམ་ཚོགས་པ་ཐམས་ཅད་འདོད་པ་ཙམ་ལ་རག་ལུས་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་མ་ཧཱ་བཛྲོད་བྷ་བ་དཱ་ན་པཱ་ར་མི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། རྡོ་རྗེ་ཕྲེང་བ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་ཀྱི་མི་དགེ་བའི་ལུས་

เล่ม ๖๒ · หน้า 70a

དང་ངག་དང་ཡིད་ཀྱི་ལས་ཀྱི་མཐའ་ཐམས་ཅད་དང་ཡང་དག་པར་བྲལ་བར་གྱུར་ཅིག །དགེ་བའི་ལུས་དང་ངག་དང་ཡིད་ཀྱི་ལས་ཀྱི་མཐའ་ཐམས་ཅད་དང་ཡང་དག་པར་ལྡན་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་མ་ཧཱ་བོ་དྷྱ་ཧཱ་ར་ཤཱི་ལ་པཱ་ར་མི་ཏ་པཱུ་ཛ་མེ་གྷ་ས་

མུ་དྲ་སྥ་ར་ཎ་ས་མ་ཡེ་ཧཱུཾ། རྡོ་རྗེ་གླུ་མཁན་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་མཚན་དང་དཔེ་བྱད་ཐམས་ཅད་ཀྱིས་ཡང་དག་པར་བརྒྱན་པར་བྱས་པ་དང་། རྟག་ཏུ་ཕན་ཚུན་འཇིགས་པ་མེད་པ་དང་། ཞེ་འགྲས་པ་མེད་པར་ཞུགས་

ཤིང་མིག་དང་ཡིད་མངོན་པར་དགའ་བ་དང་། ཆོས་ཟབ་མོ་ལ་བཟོད་པ་ཐོབ་པ་དང་ལྡན་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་མཧཱ་དྷརྨྨ་ཨ་བ་བོ་དྷི་ཀྵཱནྟི་པཱ་ར་མི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། གར་མཁན་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་

ཅན་ཐམས་ཅད་བྱང་ཆུབ་སེམས་དཔའི་སྤྱོད་པ་ལ་མངོན་པར་བརྩོན་པ་དང་ལྡན་པ་དང་། སངས་རྒྱས་ཉིད་དུ་ཡོངས་སུ་གཞོལ་ཞིང་འཁོར་བ་ཡོངས་སུ་སྤོང་བའི་བརྩོན་འགྲུས་དང་ལྡན་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་སན་སཱ་རཱ་པ་རི་ཏྱཾ་ཀ་ཨ་ནུཏྟ་ར་མཧཱ་བཱིརྱ་པཱ་ར་མེ་ཏ་པཱུ་ཛ་མེ་གྷ་ས་མུ་

དྲ་སྥ་ར་ཎ་ས་མ་ཡེ་ཧཱུཾ། དེ་ནས་མེ་ཏོག་གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་ཐམས་ཅད་ཉོན་མོངས་པ་དང་ཉེ་བའི་ཉོན་མོངས་པ་རྣམས་དང་བྲལ་བར་གྱུར་ཅིག །བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་།

མངོན་པར་ཤེས་པ་རྣམས་དང་། རིག་པ་ཐམས་ཅད་དབང་དུ་གྱུར་པ་ཕུན་སུམ་ཚོགས་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་མ་ཧཱ་སཽ་ཁྱ་བི་ཧཱ་ར་དྷྱཱ་ན་པཱ་ར་མི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བདུག་སྤོས་ཀྱི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱ་སྟེ། སེམས་ཅན་

ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་ཤེས་རབ་དང་ཡེ་ཤེས་རྣམས་དང་ཡང་དག་པར་ལྡན་པར་གྱུར་ཅིག །སོ་སོ་ཡང་དག་པར་རིག་པ་བཞི་ཐོབ་སྟེ། བཟོ་དང་བསྟན་བཅོས་ཐམས་ཅད་ཤེས་ཤིང་སྒྱུ་རྩལ་དང་ལྡན་ལ་གསང་བའི་ཆོ་ག་ཤེས་པ་དང་། དེ་ཁོ་ན་ཉིད་མཐོང་སྟེ།

เล่ม ๖๒ · หน้า 70b

ཉོན་མོངས་པ་དང་ཤེས་བྱའི་སྒྲིབ་པ་ཐམས་ཅད་ཡང་དག་པར་གཅོད་པའི་ཡེ་ཤེས་ཐོབ་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་ཀླེ་ཤཙྪེ་ད་སརྦ་དྷརྨྨ་ས་མནྟ་ཛྙཱ་ན་མཧཱ་པྲཛྙཱ་པཱ་ར་མི་ཏ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུྃ། ལུས་ཀྱིས་བསྙེན་བཀུར་བྱ་བའི་ཕྱིར་བདག་ཉིད་ཕྱོགས་བཅུའི་འཇིག་

རྟེན་གྱི་ཁམས་མ་ལུས་པའི་དེ་བཞིན་གཤེགས་པ་ཐམས་ཅད་ཀྱི་ཞབས་དྲུང་དུ་ཕྱིན་པར་ལྷག་པར་མོས་པ་བྱས་ལ། ཨོཾ་སརྦ་ཏ་ཐཱ་ག་ཏ་ཀཱ་ཡ་ནིརྱཱ་ཏ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། རྡོ་རྗེ་ཐལ་མོ་བསྐོར་བ་ཤིས་པ་རྗོད་པར་བྱེད་པའི་ཚུལ་དུ་བཅིངས་ལ་ཐམས་ཅད་དུ་ལྕེ་བརྒྱ་སྟོང་

ཕྲག་སྙེད་ཀྱི་སྒོ་ནས་མཉམ་ཉིད་མི་གཡོ་ཞེས་བྱ་བ་ལ་སོགས་པའི་བསྟོད་པའི་མཆོད་པས་ལྷག་པར་མོས་པར་བྱས་ལ་འདི་སྐད་ཅེས་བརྗོད་པར་བྱ་སྟེ། ཨོཾ་སརྦ་ཏ་ཐཱ་ག་ཏ་ཝཱཀ་ནིརྱཱ་ཏ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། བྱང་ཆུབ་སེམས་དཔའ་ཐམས་ཅད་དང་བསམ་པ་གཅིག་པའི་

སྦྱོར་བས་ཆོས་ཐམས་ཅད་མཉམ་པ་ཉིད་ལ་ལྷག་པར་མོས་པར་བྱས་ལ། ཨོཾ་སརྦ་ཏ་ཐཱ་ག་ཏ་ཙིཏྟ་ནིརྱཱ་ཏ་ན་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཆོས་ཐམས་ཅད་ནི་དངོས་པོ་མེད་པའི་ངོ་བོ་ཉིད་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་རྣམ་པས་ལྷག་

པར་མོས་པར་བྱས་ལ་འདི་སྐད་ཅེས་བརྗོད་པར་བྱ་སྟེ། ཨོཾ་སརྦ་ཏ་ཐཱ་ག་ཏ་གུ་ཧྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་ལྟར་དེ་བཞིན་གཤེགས་པ་ཐམས་ཅད་ཡང་དག་པར་མཆོད་ནས་བདག་ཉིད་དབུལ་བར་བྱའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བདག་

ཉིད་འབུལ་གྱིས། བདག་དུས་ཐམས་ཅད་དང་རྣམ་པ་ཐམས་ཅད་དུ་སོ་སོར་བཞེས་སུ་གསོལ། ཐུགས་རྗེ་ཆེན་པོ་དང་ལྡན་པའི་མགོན་པོ་ཁྱེད་རྣམས་ཀྱིས། དམ་ཚིག་ཆེན་པོའི་དངོས་གྲུབ་བདག་ལ་སྩལ་དུ་གསོལ། ཞེས་བརྗོད་ལ། དགེ་བའི་རྩ་བ་དེ་ཡང་སེམས་ཅན་

ཐམས་ཅད་དང་ཐུན་མོང་དུ་བྱས་ཏེ། དགེ་བའི་རྩ་བ་འདི་བདག་དང་སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་རྒུད་པ་ཐམས་ཅད་བྲལ་བར་གྱུར་ཅིག །འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་དང་ཡང་དག་པར་ལྡན་པའི་

เล่ม ๖๒ · หน้า 71a

བདེ་བ་ཉིད་དང་། ཡིད་བདེ་བ་ཉིད་ཀྱིས་མིའི་མཆོག་སངས་རྒྱས་ཉིད་དུ་ཚེ་འདི་ཉིད་ལ་གྱུར་ཅིག །བདག་ནི་དགེ་བའི་ལས་རྣམས་འདི་དག་གིས། །འཇིག་རྟེན་དུ་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་

མང་པོས་གཟིར་ལས་དགྲོལ། །ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ལ། སྡོམ་པ་གཟུང་བར་བགྱིའོ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་མེད་པས། །དམ་པ་བདག་གིས་བསྐྱེད་

པར་བགྱི། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་

མཆོག་གསུམ། །དེང་ནས་བརྩམས་ཏེ་གཟུང་བར་བགྱི། །ནམ་དུ་ཡང་ནི་མི་སྤང་ངོ་། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་

ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བ། །པདྨའི་རིགས་མཆོག་དམ་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་

ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་པས། །དམ་པ་བདག་གིས་བསྐྱེད་བགྱི་ཞིང་། །སེམས་ཅན་ཀུན་གྱི་དོན་གྱི་ཕྱིར། །བདག་གི་སྡོམ་པ་མ་ལུས་གཟུང་། །མ་གྲོལ་བ་ནི་དགྲོལ་བར་བགྱི། །མ་

རྒལ་བ་ནི་བསྒྲལ་བར་བགྱི། །དབུགས་མ་ཕྱུང་བ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །ཅེས་བརྗོད་དོ། །དེ་ནས་དེ་བཞིན་གཤེགས་པ་དང་། ལྷ་མོ་རྣམས་ཀྱི་སྐུ་བདག་ཉིད་ལ་གཟུགས་བརྙན་དུ་སྣང་བས་རྒྱལ་པོའི་བཀའ་ལྟར་འདའ་བར་དཀའ་ཞིང་གཞིག་མི་ནུས་

เล่ม ๖๒ · หน้า 71b

པས་ཕྱག་རྒྱ་བཅིང་བ་དང་། སྔགས་བརྗོད་པ་ཐམས་ཅད་ལ་རྒྱལ་བ་ཐམས་ཅད་ཀྱིས་ཀྱང་རྡོ་རྗེ་ལྟར་འདའ་བར་མི་མཛད་པའི་ལྷའི་ང་རྒྱལ་མངོན་དུ་བསྐྱེད་ཅིང་ཕྱག་རྒྱ་བཅིང་བར་བགྱིའོ། །དེ་ལ་ཕྱག་རྒྱ་བཅིང་བ་ནི་འདི་ཡིན་ཏེ་ཐལ་མོ་སྦྱར་བར་བྱེད་པ་ན། འདི་སྐད་ཅེས་བརྗོད་པར་བྱའོ། །

ཨ་ནྱོ་ནྱ་ཨ་ནུ་ག་ཏ་སརྦ་དྷརྨཱཿསོར་མོ་ཕན་ཚུན་བཅེར་བ་ན། སྥ་ར་སྥ་ར་ཨ་ནུ་པྲ་བིཥྚ་སརྦ་དྷརྨཱཿབཛྲ་ཨཉྫ་ལི། རབ་ཏུ་བསྡམས་ཕྱིར་རྡོ་རྗེ་བསྡམས། །ཨ་ཏྱན་ཏ་ཨ་ནུ་པྲ་བིཥྚ་སརྦ་དྷརྨ་བཛྲ་བནྡྷ། ཞེས་བྱ་བ་འདིས་ལྷ་རྣམས་རེག་པ་དང་། ཕན་ཚུན་རྗེས་སུ་ཞུགས་པ་དང་། གཅིག་ཏུ་གྱུར་

པར་མོས་པས་སྤྱོད་པའི་ངེས་པར་འབྱེད་པའི་སའི་ཆའི་རང་བཞིན་དུ་ལྷག་པར་མོས་པར་བྱའོ། །དེ་ནས་བཛྲ་བནྡྷ་ཏྲཊ་ཞེས་ཟློས་ཤིང་སྙིང་གར་རྡོ་རྗེ་བཅིང་བ་དྲལ་བར་བྱའོ། །དེ་བཞིན་གཤེགས་པ་ཐམས་ཅད་ཀྱང་བགེགས་རྣམས་གཞོམ་པའི་ཕྱིར་ཁྲོས་པར་གྱུར་ཅིག །

ཧཱུཾ་ཊཀྐི་སྥོ་ཊ་ཡ་མ་ཧཱ་བཱི་ར་ག་ཙཀྲཾ་བཛྲ་དྷ་ར་སརྱ་ན་ཐཱ་ཞེས་བྱ་བས་དམ་པའི་ཆོས་ཀྱི་འཁོར་ལོའི་ཕྱག་རྒྱ་དྲལ་བར་བྱའོ། །རྡོ་རྗེ་བསྡམས་ལས་མཐེ་བོང་དང་། །མཐེའུ་ཆུང་གཉིས་ནི་སྙོམས་ཏེ་བསྒྲེང་། །དབུས་མ་གསུམ་བསྒྲེང་ཁ་ཕྱེ་ལ། །འཁོར་ལོ་དམ་ཆོས་འཁོར་ལོ་ཡིན། །དེ་ནས་ལྔ་པོ་

བསྡུས་པ་བཅིངས་ལ་འདི་སྐད་ཅེས་བརྗོད་དོ། །ཨོཾ་མ་ཧཱ་སུ་ཁ་བཛྲ་ས་དྷཱ་ཡ་སརྦ་སཏྭ་བྷྱོ་ཛཿཧཱུཾ་བཾ་ཧོཿ རྡོ་རྗེ་བསྡམས་པ་བཅིངས་ནས་སུ། །མཛུབ་མོ་མཐེ་བོའི་སྐྱེ་གནས་སུ། །གཡས་པའི་མཐེ་བོའི་མཚན་མ་ནི། །བཅུག་ལ་བསྐྱོད་དེ་བཙིར་བར་བྱ། །ཞེས་བྱ་བ་འདི་ནི་ལྔ་པོ་བསྡུས་

པའོ། །ཨོཾ་བཛྲ་ཨཱ་བེ་ཤ་ཞེས་བྱ་བས་རྡོ་རྗེ་དབབ་པའི་ཕྱག་རྒྱ་བཅིངས་ལ་ཨ་ཞེས་བྱ་བས་བདག་ཉིད་ལ་དབབ་པར་བྱའོ། །རྡོ་རྗེ་ཁུ་ཚུར་གྱི་རྩེ་མོ་གཉིས་སྦྱར་བ་ནི་རྡོ་རྗེ་དབབ་པའོ། །དབབ་པ་དེ་ཡང་འདིས་བརྟན་པར་བྱའོ། །ཏིཥྛ་བཛྲ་དྲྀ་ཌྷོ་མེ་བྷ་བ་ཤཱ་ཤྭ་ཏོ་མེ་བྷ་བ། ཧྲྀ་ད་ཡ་མེ་ཨ་དྷི་ཏིཥྛ་སརྦ་

སིདྡྷཾི་མེ་པྲ་ཡཙྪ་སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ་ཧ་ཧ་ཧ་ཧ་ཧོཿ། །དེ་ནས་བཛྲ་མུཥྚི་ཞེས་བྱ་བས་རྡོ་རྗེ་ཁུ་ཚུར་གྱི་ཕྱག་རྒྱ་བཅིངས་ལ། ཨོཾ་བཛྲ་མུཥྚི་བཾ་ཞེས་བརྗོད་པར་བྱའོ། །རྡོ་རྗེ་བསྡམས་པའི་མཛུབ་མོ་གཉིས་ཀྱི་བར་དུ་མཐེ་བོང་རྩེ་མོ་བཅུག་ལ་མཛུབ་མོ་གཉིས་ཀྱིས་བཙིར་བ་ནི་རྡོ་རྗེ་ཁུ་

เล่ม ๖๒ · หน้า 72a

ཚུར་གྱི་མཚན་ཉིད་དོ། །དེ་དག་སྡིག་པ་དྲལ་བའི་ཕྱག་རྒྱས་སྡིག་པ་ཇི་ལྟ་བ་བཞིན་དུ་ཡང་དག་པར་དྲལ་བར་བྱའོ། །དེ་ནས་དཔལ་རྣམ་པར་སྣང་མཛད་ལ་སོགས་པའི་དམ་ཚིག་གི་ཕྱག་རྒྱ་བཅིངས་ལ། དེའི་སྔགས་ལན་གསུམ་བརྗོད་ཅིང་ཨོཾ་བཛྲ་མུཿཞེས་པས་རང་གི་སྙིང་

གར་དགྲོལ་བར་བྱའོ། །དེ་ནས་རང་གི་སྙིང་གར་གནས་པའི་སེམས་དཔའི་རྡོ་རྗེ་ལ་ཡི་གེ་ཧཱུཾ་ཡིད་ཀྱིས་མངོན་པར་བྲིས་ལ་དེ་ཉིད་ཡིད་ལ་ཟློས་ཤིང་བདག་མེད་པར་བསྒོམ་པར་བྱའོ། །དེ་ཉིད་ལས་སྟོང་གསུམ་པའི་སངས་རྒྱས་ཀྱི་ཞིང་གི་ཚད་ཙམ་གྱི་ཟླ་བའི་དཀྱིལ་འཁོར་དེའི་སྟེང་དུ་དེ་ཉིད་ལས་ཟླ་བའི་

དཀྱིལ་འཁོར་གཉིས་པ། ཡང་དེ་ཧཱུྃ་དང་བཅས་པ་ལས་རྡོ་རྗེ་རྩེ་ལྔ་པ་འབར་བ་ལས། དེའི་དབུས་སུ་ཡང་ཡི་གེ་ཧཱུྃ་བཀོད་ལ་དེ་ཉིད་ཟློས་ཤིང་། སེམས་དཔའ་ཇི་ལྟ་བའི་ཕྱག་རྒྱ་དེ་བཞིན་ཏེ་བདག་ཀྱང་དེ་བཞིན་ནོ་ཞེས་རྡོ་རྗེའི་ང་རྒྱལ་སྒོམ་ཞིང་རྡོ་རྗེ་དེ་ལས་དེའི་རིགས་ཐམས་ཅད་སྤྲོས་ལ། དེས་

གདུག་པ་ཐམས་ཅད་བཏུལ་ནས། དེ་ཐམས་ཅད་རྡོ་རྗེ་དེར་བཅུག་ལ། སེམས་དཔར་གྲགས་པ་ཀུན་གྱི་བདག །བདག་ཉིད་བདག་ལ་ཡང་དག་གནས། །དེ་བས་ན་བཛྲ་ཧཾ་ཞེས་ཟློས་ཤིང་། རྡོ་རྗེ་དེ་རྡོ་རྗེ་སེམས་དཔའ་བསྙེམས་པ་དང་བཅས་པས་རྡོ་རྗེ་བསོར་ཞིང་བཛྲ་སཏྭ་ཧཾ་ཞེས་བརྗོད་པར་བྱའོ། །

ཡང་ཡི་གེ་ཧཱུྃ་ཟློས་ཤིང་དེ་ཉིད་རྡོ་རྗེ་ཧཱུྃ་མཛད་དུ་ལྷག་པར་མོས་ལ། མ་ཧཱ་ས་ཡ་སཏྭ་ཧཾ་ཞེས་བརྗོད་པར་བྱའོ། །འདི་ནི་ཐོག་མ་དང་ཐ་མ་མེད་པའི་སེམས་སྒོམ་པའོ། །དེ་ནས་ཁམས་གསུམ་རྣམ་པར་རྒྱལ་བའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱའོ། །ས་མ་ཡ་ཧཾ། འདི་ཡང་སྐུར་

བསྒོམ་པ་སྟེ། ཡང་ཁམས་གསུམ་རྣམ་པར་རྒྱལ་བའི་ཕྱག་རྒྱ་དེ་ཉིད་ཀྱིས་སྙིང་ག་དང་། དཔྲལ་བ་དང་། ལྐོག་མ་དང་། སྤྱི་བོ་བྱིན་གྱིས་བརླབས་ལ། ས་མ་ཡ་སྟྭཾ་ཨ་དྷི་ཏིཥྛ་སྭ་མཱཾ་ཞེས་བརྗོད་པར་བྱའོ། །དེ་ནས་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་མ་ཡ་ཨ་ཞེས་བརྗོད་དེ་མདུན་དུ་ཟླ་

བའི་དཀྱིལ་འཁོར་སྤྲུལ་ལ། ཧཱུྃ་ཨ་ཞེས་བྱ་བ་འདིས་དེའི་སྟེང་དུ་རྡོ་རྗེ་འབར་བ་བདག་ཉིད་དབབ་པར་བྱའོ། །དེ་ནས་བཛྲོ་ཞེས་རྡོ་རྗེའི་ང་རྒྱལ་དུ་རྣམ་པར་བསྒོམས་ལ། རྡོ་རྗེ་དེ་ཉིད་བཛྲ་ཧཱུྃ་ཀ་རོ་ཧཾ། ཞེས་ཟློས་ཤིང་རྡོ་རྗེ་ཧཱུྃ་མཛད་དུ་བསྒོམས་པར་བྱའོ། །དེ་ནས་དེ་ཉིད་དུ་བཅོམ་ལྡན་འདས་ཁྲོ་བོ་

เล่ม ๖๒ · หน้า 72b

རྡོ་རྗེ་ལྕགས་ཀྱུ་ལ་སོགས་པ་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ནས་ཁམས་གསུམ་རྣམ་པར་རྒྱལ་བའི་ཕྱག་རྒྱ་བཅིངས་ལ། ཨོཾ་སུམྦྷ་ནི་སུམྦྷ་ཧཱུྃ། གྲྀཧྞ་གྲྀཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ། ཨཱ་ན་ཡ་ཧོ། །བྷ་ག་བཱན་བཛྲ་ཧཱུཾ་ཕཊ། དྲྀ་ཤྱ་ཞེས་པས་བལྟ་བར་བྱའོ། །

ཡེ་ཤེས་སེམས་དཔའ་དེ་མཐོང་ནས། །རང་གི་ལུས་ལ་རབ་ཏུ་བསྒོམ། །དགུག་ཅིང་བཅུག་ལ་བཅིང་བ་དང་། །དབང་དུ་བྱས་ཏེ་བསྒྲུབ་པར་བྱ། །ཛཿཧཱུྃ་བཾ་ཧོཿཞེས་ཟློས་ཤིང་ཁམས་གསུམ་རྣམ་པར་རྒྱལ་བའི་ཕྱག་རྒྱ་བཅིངས་ལ། དེ་ཉིད་དང་ས་མ་ཡ་སྟྭཾ་ཧྲཱིཿཞེས་བརྗོད་ཅིང་རྒྱབ་ཏུ་ཟླ་བའི་

དཀྱིལ་འཁོར་བསྐྱེད་ལ། དེ་ཉིད་དང་ས་མ་ཡ་སྟྭཾ་ཨ་ཧཾ་ཞེས་བརྗོད་དེ། དེར་བདག་ཉིད་དཔལ་རྡོ་རྗེ་ཧཱུྃ་མཛད་དུ་བསྒོམ་པར་བྱའོ། །གཡོན་བརྐྱང་བ་ཡིས་ལེག་པར་བཞུགས། །འབར་བའི་ཕྲེང་བ་འཁྲུགས་པའི་འོད། །ཤིན་དུ་གདུལ་དཀའ་དྲག་པོའི་ལུས། །གཡོན་པའི་ཞབས་ཀྱིས་ཡང་

དག་མནན། །གཡས་པ་ཡིས་ནི་ཨུ་མ་ཡི། །ནུ་མ་རྒྱས་པ་གནོན་པར་བསམ། །སྤྱན་འབར་འཇིགས་སུ་རུང་བ་སྟེ། །ཨུཏྤལ་སྔོན་པོ་ཆེན་པོའི་མདོག །རྡོ་རྗེ་ཧཱུྃ་མཛད་བསྡུས་པ་ཡིན། །ཞལ་གདངས་མཆེ་བ་ཅུང་ཟད་གཙིགས། །ཁྲོ་བཅས་ཞལ་ནི་བཞད་པ་ཡིན། །ཞལ་བཞི་པ་ལ་

ཕྱག་བརྒྱད་པ། །ཕྱག་གཉིས་ཀྱིས་ནི་ཐུགས་ཀ་རུ། །ཁམས་གསུམ་རྣམ་རྒྱལ་ཕྱག་རྒྱ་ཡིས། །རྡོ་རྗེ་དྲིལ་བུ་བསྡམས་པར་མཛད། །ཕྱག་གཉིས་ན་ནི་མདའ་གཞུ་བསྣམས། །གཉིས་ན་རལ་གྲི་ལྕགས་ཀྱུ་བསྣམས། །གཉིས་ན་རྡོ་རྗེ་ཞགས་པ་བསྣམས། །སངས་རྒྱས་ཆུན་འཕྱང་

ཕྲེང་བ་ཅན། །དེ་བཞིན་གཤེགས་པ་རིན་ཆེན་ཕྲེང་། །པདྨ་རྡོ་རྗེ་དར་དཔྱངས་ཀྱི། །དབང་བསྐུར་དང་ལྡན་སྣ་ཚོགས་པའི། །རྒྱན་རྣམས་ཀུན་གྱིས་རབ་བརྒྱན་པའོ། །ཡང་ན་ཀྲོ་དྷ་དྲྀཥྚི་ཧྲཱིཿཞེས་བྱ་བ་མིག་ཏུ་བཀོད་ལ། ཞལ་གཅིག་པ་ཁམས་གསུམ་རྣམ་པར་རྒྱལ་བའི་ཕྱག་རྒྱ་དང་ལྡན་པར་

བྱའོ། །སྔ་མ་བཞིན་དུ་ལྕེ་ལ་རྡོ་རྗེ་ཧཱུྃ་དང་བཅས་པར་བསམ་པར་བྱའོ། །དེ་ནས་བཅོམ་ལྡན་འདས་ཀྱི་ལས་ཀྱི་ཕྱག་རྒྱ་དང་། ཕྱག་རྒྱ་ཆེན་པོ་ཡང་ཇི་ལྟ་བ་བཞིན་དུ་བཅིང་བར་བྱའོ། །དེའི་རྗེས་ལ་བསྡུ་བའི་ཕྱག་རྒྱ་བཅིངས་ལ། ཛཿཧཱུྃ་བཾ་ཧོཿཞེས་བརྗོད་དོ། །ཡིད་ཀྱི་ལེགས་པའི་སྦྱོར་བས་

เล่ม ๖๒ · หน้า 73a

རང་གི་ལུས་ལ་སངས་རྒྱས་ཐམས་ཅད་གཞུག་པར་བྱ་སྟེ། བཛྲ་དྷཱ་ཏུ་དྲྀ་ཤྱ་ཛཿཧཱུཾ་བཾ་ཧོཿས་མ་ཡ་སྟྭཾ་ས་མ་ཡ་སྟྭཾ་ཨ་ཧཾ་ཞེས་བྱ་བ་དང་། རང་གི་སྔགས་ཀྱང་ལེན་གསུམ་བརྗོད་ལ། དམ་ཚིག་གི་ཕྱག་རྒྱ་བསྒྲུབ་པར་བྱའོ། །ཨོཾ་སརྦ་ཏ་ཐཱ་ག་ཏ་མཧཱ་ཡོ་གཱི་ཤྭ་ར་ཧཱུྃ། ཞེས་བྱ་བ་ནི་

བཅོམ་ལྡན་འདས་རྣམ་པར་སྣང་མཛད་ཀྱི་སྔགས་སོ། །ཨོཾ་བཛྲ་སཏྭ་ཧཱུྃ་ཞེས་བྱ་བ་ནི་མི་བསྐྱོད་པའི་སྔགས་སོ། །ཨོཾ་བཛྲ་རཏྣ་ཧཱུྃ་ཞེས་བྱ་བ་ནི་རིན་ཆེན་འབྱུང་ལྡན་གྱི་སྔགས་སོ། །ཨོཾ་བཛྲ་དྷརྨ་ཧཱུྃ་ཞེས་བྱ་བ་ནི་སྣང་བ་མཐའ་ཡས་ཀྱི་སྔགས་སོ། །ཨོཾ་བཛྲ་ཀརྨ་ཧཱུྃ་ཞེས་བྱ་བ་ནི་དོན་ཡོད་གྲུབ་པའི་སྔགས་

སོ། །དེ་ནས་དེ་རྣམས་ཀྱི་དམ་ཚིག་གི་ཕྱག་རྒྱ་བཤད་དེ། །རྡོ་རྗེ་བསྡམས་པ་ལས་བྱུང་བའི་སེམས་མ་རྡོ་རྗེ་མ་བསྟན་པར་བྱས་ལ། གུང་མོ་གཉིས་བསྒྲེངས་ཏེ་མྱུ་གུ་ལྟར་མཉམ་པར་བསྒྲེང་བ་ནི་རྣམ་པར་སྣང་མཛད་ཀྱིའོ། །གུང་མོ་ནང་དུ་གཤིབས་པ་ནི་མི་བསྐྱོད་པའིའོ། །གུང་མོ་དང་མཐེ་བོང་

གཉིས་རིན་པོ་ཆེ་ལྟར་བྱས་པ་ནི་རིན་ཆེན་འབྱུང་ལྡན་གྱིའོ། །གུང་མོ་པདྨ་འདྲ་བར་བྱས་པ་ནི་འོད་དཔག་ཏུ་མེད་པའིའོ། །དེ་བཞིན་དུ་མཛུབ་མོ་བཀུག་པ་ནི། དོན་ཡོད་གྲུབ་པའི་དམ་ཚིག་གི་ཕྱག་རྒྱའོ། །མི་བསྐྱོད་པ་ལ་སོགས་པའི་ཕྱག་རྒྱ་བཞི་པོ་འདི་དག་ནི་རྣམ་པར་སྣང་མཛད་ཀྱི་ཕྱག་རྒྱ་

ལས་བྱུང་བ་ཡིན་ནོ། །དེ་ནས་བཛྲ་ཛྙཱ་ན་ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱི་ལྗགས་ལ་བསམ་པར་བྱའོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་ལས་ཀྱི་ཕྱག་རྒྱ་བཅིང་བར་བྱའོ། །དེ་ལ་འདི་ནི་རྡོ་རྗེ་ཁུ་ཚུར་ལས་བྱུང་བ་སྟེ། གཡོན་པའི་རྡོ་རྗེ་མཛུབ་མོ་ནི། །གཡས་

པའི་ནང་དུ་བསྒྲེང་བར་བྱ། །བྱང་ཆུབ་མཆོག་གི་ཕྱག་རྒྱ་ཆེ། །སངས་རྒྱས་བྱང་ཆུབ་སྦྱིན་བྱེད་པའོ། །རྣམ་པར་སྣང་མཛད་ཀྱིའོ། །གཡོན་པའི་ཁུ་ཚུར་གྱིས་ཆོས་གོས་ཀྱི་མཐའ་མ་འཛིན་པའི་ཚུལ་དུ་སྙིང་གར་བཞག་ལ། གཡས་པའི་སོར་མོ་བརྐྱང་བས་ས་ལ་རེག་པའི་ཚུལ་དུ་

བྱ་བ་ནི་མི་བསྐྱོད་པའིའོ། །འདི་ཉིད་ལག་པ་གཡས་པ་མཆོག་སྦྱིན་པ་ནི་རིན་ཆེན་འབྱུང་ལྡན་གྱིའོ། །རྡོ་རྗེ་ཁུ་ཚུར་གཉིས་ཀྱི་ལག་པ་གཉིས་ཀྱི་སོར་མོ་བརྐྱང་ལ་ལྷུང་བཟེད་འཛིན་པའི་ཚུལ་དུ་པང་བར་བཞག་པ་འདི་ནི་ཏིང་ངེ་འཛིན་མཆོག་ཅེས་བྱ་སྟེ། འོད་དཔག་ཏུ་མེད་པའིའོ། །མི་བསྐྱོད་

เล่ม ๖๒ · หน้า 73b

པའི་ཕྱག་རྒྱ་ལས་ལག་པ་གཡས་པ་མི་འཇིགས་པའི་ཚུལ་དུ་བྱས་ནས་བཞག་པ་ནི་དོན་ཡོད་གྲུབ་པའིའོ། །དེ་ནས་རང་གི་སྙིང་གར་རྡོ་རྗེ་བསམས་ལ། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཆེན་པོ་བཅིང་བར་བྱའོ། །ཇི་སྐད་དུ་བཤད་པའི་བྱང་ཆུབ་མཆོག་གི་ཕྱག་རྒྱ་ནི་རྣམ་

པར་སྣང་མཛད་ཀྱིའོ། །ཏིང་འཛིན་མཆོག་གི་ཕྱག་རྒྱ་བཅིངས་ལ། ལག་པ་གཡས་པ་ས་ལ་རེག་པ་ནི་མི་བསྐྱོད་པའིའོ། །དེ་ལས་ཕྱག་གཡས་པ་མཆོག་སྦྱིན་པ་ནི་རིན་ཆེན་འབྱུང་ལྡན་གྱིའོ། །ཏིང་ངེ་འཛིན་མཆོག་ནི་འོད་དཔག་ཏུ་མེད་པའིའོ། །མི་བསྐྱོད་པའི་ཕྱག་རྒྱ་ལས་

ཕྱག་གཡས་པ་མི་འཇིགས་པ་སྦྱིན་པའི་ཚུལ་དུ་བྱ་བ་ནི་དོན་ཡོད་གྲུབ་པའི་ཕྱག་རྒྱ་ཆེན་པོ་སྟེ། འདི་དག་ནི་ཕྱག་མཚན་དང་བཅས་པ་ཡིན་ནོ། །དེ་ནས་ཁམས་གསུམ་རྣམ་པར་རྒྱལ་བའི་ཕྱག་རྒྱ་དང་། ཧཱུྃ་བཞིས་སྙིང་ག་དང་། དཔྲལ་བ་དང་། ལྐོག་མ་དང་། སྤྱི་བོར་བདག་ཉིད་བྱིན་གྱིས་

བརླབ་པར་བྱའོ། །དེ་ནས་སྙིང་གར་རྡོ་རྗེ་སེམས་མའི་ཕྱག་རྒྱས་དཔྲལ་བར་རྡོ་རྗེ་རིན་ཆེན་མས། ལྐོག་མར་རྡོ་རྗེ་ཆོས་མས། སྤྱི་བོར་རྡོ་རྗེ་ལས་མས་བྱིན་གྱིས་བརླབས་ལ། ཨོཾ་བཛྲ་སཏྭ་ས་མ་ཡ་མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་

བ། སུ་པོ་ཥྱོ་མེ་བྷ་བ། སརྦ་སིདྡྷི་མྨེ་པྲ་ཡཙྪཿསརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུྃ། ཧ་ཧ་ཧ་ཧ་ཧོཿབྷ་ག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲི་བྷ་བ་མཧཱ་ས་མ་ཡ་སཏྭ་ཨཱཿཞེས་བྱ་བ་ཡི་གེ་བརྒྱ་བ་ལན་གསུམ་བཟླས་པས་བརྟན་པར་བྱས་ནས་སྲུང་བ་ཆེན་པོ་བྱ་བའི་ཕྱིར། ཨོཾ་བཛྲ་ཨུཥྚི་ཥ་

ཧཱུྃ་ཕཊ། ཅེས་བྱ་བའི་རིག་པ་འདིས་ཕྱག་རྒྱ་དང་བཅས་པ་གཙུག་ཏོར་དུ་དགོད་པར་བྱའོ། །རྡོ་རྗེ་བཅིང་བ་དམ་བཅིངས་ཏེ། །མཐེ་བོང་ནང་དུ་སྦྱར་ནས་ནི། །མཛུབ་མོ་བཀུག་སྟེ་གཉི་གས་དགབ། །སེམས་དཔའི་གཙུག་ཏོར་ཞེས་བྱའོ། །ཞེས་བྱ་བ་ནི་འདིའི་ཕྱག་རྒྱའོ། །ཡང་

གཙུག་ཏོར་གྱི་སྟེང་དུ་སྔགས་འདིའི་ཕྱག་རྒྱ་དང་ལྡན་པས་གཟི་བརྗིད་ཕུང་པོ་འབར་བའི་འཁོར་ལོའི་ཕྱག་རྒྱ་གཞག་པར་བྱའོ། །ཨོཾ་ན་མཿསརྦ་ཏ་ཐཱ་ག་ཏ་ཨུཥྞཱི་ཥ་ཏེ་ཛོ་ར་ཤི་ཨ་ན་པ་ལི་ཀི་ནཱ་མུརྡྷ་ཧཱུྃ། ཛ་ལ་ཏ་ཀ་བི་དྷ་ཀ་དྷ་ར་བི་དྷ་ར་ཚིནྡྷ་བིནྡྷ་ཧཱུྃ་ཕཊ། རྡོ་རྗེ་བཅིང་བ་བྱས་ནས་ནི། །མཐེ་བོང་

เล่ม ๖๒ · หน้า 74a

གུང་མོ་མཐེའུ་བསྒྲེང་། །གཟི་བརྗིད་ཕུང་པོ་ཞེས་བྱ་སྟེ། །དངོས་གྲུབ་མྱུར་དུ་སྦྱིན་བྱེད་པའོ། །དེ་ནས་རྡོ་རྗེ་དབྱིངས་ཀྱི་དབང་ཕྱུག་མ་བཅིངས་ལ། སྤྱི་གཙུག་ཏུ་ཨ་ལས་རྣམ་པར་སྣང་མཛད་བསྐྱེད་ལ་འདི་སྐད་ཅེས་བརྗོད་པར་བྱའོ། །ཨོཾ་བཛྲ་དྷཱ་ཏྭཱི་ཤྭ་རི་ཧཱུྃ་བཛྲི་ཎི་ཨ་བྷི་ཥིཉྩ་

མཱཾ། མི་བསྐྱོད་པའི་ཕྱག་རྒྱ་བཅིངས་ལ། ཡི་གེ་ཧཱུྃ་ལས་དཔྲལ་བའི་སྟེང་དུ་མི་བསྐྱོད་པ་སྟེ། ཨོཾ་བཛྲ་བཛྲི་ཎི་ཧཱུྃ་ཨ་བྷི་ཥིཉྩ་མཱཾ། རིན་ཆེན་འབྱུང་ལྡན་གྱི་ཕྱག་རྒྱ་བཅིངས་ལ། ཡི་གེ་ཏྲཱཾ་ལས་རྣ་བ་གཡས་པའི་སྟེང་དུ་རིན་ཆེན་འབྱུང་ལྡན་ནོ། །ཨོཾ་རཏྣ་བཛྲི་ཎི་ཧཱུྃ་ཨ་བྷི་ཥིཉྩ་མཱཾ། འོད་དཔག་ཏུ་མེད་པའི་ཕྱག་

རྒྱ་བཅིངས་ལ། ཡི་གེ་ཧྲཱིཿལས་རྒྱབ་ཏུ་ནི་འོད་དཔག་ཏུ་མེད་པའོ། །ཨོཾ་དྷརྨ་བཛྲི་ཎི་ཧཱུྃ་ཨ་བྷི་ཥིཉྩ་མཱཾ། དོན་ཡོད་གྲུབ་པའི་ཕྱག་རྒྱ་བཅིངས་ལ། རྣ་བ་གཡོན་པའི་སྟེང་དུ་ཡི་གེ་ཨ་ལས་དོན་ཡོད་གྲུབ་པ་བསྐྱེད་ལ་འདི་སྐད་ཅེས་བརྗོད་དོ། །ཨོཾ་ཀརྨ་བཛྲི་ཎི་ཧཱུྃ་ཨ་བྷི་ཥིཉྩ་མཱཾ། རྡོ་རྗེ་ཐལ་མོ་བཅིངས་

ལ། མཐེ་བོ་གཉིས་ནི་བསྣོལ་བྱས་ལ། །མཛུབ་མོ་རྩེ་མོ་བཀུག་པས་ནི། །གུང་མོ་སྙམ་པའི་ཚིགས་སུ་སྦྱར། །རྡོ་རྗེ་དབྱིངས་ཀྱི་དབང་མོར་བཤད། །དེ་ཉིད་གུང་མོ་རྡོ་རྗེར་བྱ། །གུང་མོ་གཉིས་ནི་ནོར་བུར་བྱ། །པདྨོར་སྲིན་ལག་མཐེའུ་ཆུང་གུང་། ལག་པ་སོར་མོ་རབ་ཏུ་བརྐྱང་། །ཞེས་

བྱའོ། །ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ་ཨ་བྷི་ཥིཉྩ་མཱཾ་ཞེས་བརྗོད་ལ། རྡོ་རྗེ་ཏི་རཱིནྟི་རིའི་ཕྱག་རྒྱས་རྡོ་རྗེ་མེ་ལྟར་འབར་བའི་དབང་བསྐུར་བ་བླང་བར་བྱའོ། །རྡོ་རྗེ་བསྡམས་པ་ནང་བཅིངས་ནས། །ཡིད་ཀྱིས་ཁྲོས་ནས་དགབ་བྱ་བ། །རྡོ་རྗེ་མཐེ་བོ་དམ་པོ་སྟེ། །ཁྲོ་བོ་ཏི་རཱིནྟི་རིར་བཤད། །འདིས་སྤྱི་བོ་

ནས་བརྩམས་ཏེ་ཕྱོགས་བཞི་རྡོ་རྗེ་ཕྲེང་བ་བཅིང་པའི་ཚུལ་དུ་བྱས་ལ། དཔྲལ་བར་གཞག་གོ། །ཨོཾ་ཊུཾ་ཞེས་བྱ་བ་ནི་ཕྱག་རྒྱ་དང་ལྡན་པས་གོ་ཆ་བཅིང་བར་བྱའོ། །རྡོ་རྗེ་ཁུ་ཚུར་གཉིས་ཀྱིས་སྙིང་གར་འདུད་པའི་ཚུལ་དུ་བྱ་བ་དང་། དེ་བཞིན་དུ་མགྲིན་པ་དང་། ལྟག་པ་དང་ཡང་སྙིང་ག་དང་།

ནུ་མའི་བར་དང་སླར་ཡང་སྙིང་ག་དང་། མགྲིན་པ་དང་། རྟག་པ་དང་དཔྲལ་བའི་སྟེང་དུ་མདུད་པའི་ཚུལ་དུ་བྱས་ལ། མགོ་བོར་ཕྲེང་བ་བཅིང་བའི་ཚུལ་དུ་བྱས་ལ། མཐའ་མ་ལ་སོགས་པ་ནས་དགྲོལ་བའི་ཚུལ་གྱིས་དར་དཔྱངས་བྱ་བའི་ཐབས་སུ་བྱས་ལ། དེ་མཉམ་པའི་ཐལ་

เล่ม ๖๒ · หน้า 74b

མོ་བཛྲ་ཏུ་ཥྱ་ཧོཿཞེས་བྱ་བས་མཉེས་པར་བྱའོ། །དེ་ནས་རྡོ་རྗེ་ཐལ་མོ་བསྐོར་ལ་བཅོམ་ལྡན་འདས་རྡོ་རྗེ་ཧཱུྃ་མཛད་ལ་ཕྱག་བྱས་ནས། ཡི་གེ་ཧཱུྃ་ལས་བསྐྱེད་པའི་རྡོ་རྗེ་གཟུང་བར་བྱའོ། །སངས་རྒྱས་ཀུན་གྱི་རྡོ་རྗེའི་དབང་། །དེང་འདིར་ཁྱོད་ལ་བསྐུར་བར་བྱ། །སངས་རྒྱས་ཀུན་དུ་རབ་བསྒྲུབ་ཕྱིར། །

རྡོ་རྗེ་འདི་ནི་ཁྱོད་ཀྱིས་ལོང་། །ཨོཾ་བཛྲ་ཨ་དྷི་པ་ཏི་ཏྭཾ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ། ཨོཾ་བཛྲ་པཱ་ཎི་བཛྲ་ཀརྨ་ཀ་རོདྦྷ་ཞེས་བྱ་བ་འདིས། རྡོ་རྗེ་སྤྱི་བོར་བཞག་ལ་མིང་གི་དབང་བསྐུར་བ་བླང་བར་བྱའོ། །ཨོཾ་བཛྲ་ཀྲོ་དྷ་ཏྭཾ་ཨ་བྷི་ཥིཉྩཱ་མི་བཛྲ་ནཱ་མ་ཨ་བྷི་ཥེ་ཀ་ཏ། ཀྱེ་ཧཱུྃ་མཛད་རྡོ་རྗེ་ཞེས་བྱ་

བ་ལ་སོགས་པས་སོ། །དེ་ནས་སྒེག་མོ་ལ་སོགས་པའི་གསང་བའི་མཆོད་པ་བཞིས་བདག་ཉིད་ཇི་ལྟ་བ་བཞིན་དུ་ཡང་དག་པར་མཆོད་ལ་ཡང་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ་དེ་ཁོ་ན་ཉིད་ཀྱི་རྡོ་རྗེ་གཟུང་བར་བྱའོ། །རྡོ་རྗེ་སེམས་དཔའ་བཏུལ་བས་ན། །ཁྲོ་བོ་རྟག་ཏུ་

ཆགས་ལས་བྱུང་། །རྡོ་རྗེ་མེ་ལྟར་འབར་བ་ནི། །བདག་ནི་རབ་ཏུ་འཇིགས་བྱེད་པའོ། །ཞེས་བྱ་བ་ནི་དེ་ཁོ་ན་ཉིད་དོ། །ཨ་ལས་བྱུང་བའི་ཆོས་ཀྱི་དྲིལ་བུ་དཀྲོལ་བར་བྱའོ། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་མཉམ་རྣལ་

འབྱོར་པས། །ཐམས་ཅད་མྱུར་བ་ཉིད་དུ་འགྲུབ། །ཅེས་བྱ་བ་ནི་ཆོས་སོ། །དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབ་པར་བྱ་སྟེ། ཐམས་ཅད་ནམ་མཁར་སྦྱོར་བ་ཡིས། །ཐམས་ཅད་ནམ་མཁའ་ཞེས་སྨྲ་ཞིང་། །རྡོ་རྗེ་ཕྱག་རྒྱས་རྒྱས་བཏབ་ལ། །ཁམས་གསུམ་པ་ནི་བཟའ་

བར་བྱ། །ཞེས་པ་ནི་དམ་ཚིག་གོ། །དེ་ནས་འདིས་རྡོ་རྗེ་བརྟུལ་ཞུགས་བླང་བར་བྱ་སྟེ། འདི་དེ་སངས་རྒྱས་ཐམས་ཅད་དེ། །ཕྱག་ན་རྡོ་རྗེའི་ལག་ན་འདུག །ཁྱོད་ཀྱིས་ཀྱང་ནི་རྟག་ཏུ་བཅང་། །ཕྱག་ན་རྡོ་རྗེའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་ཏྭཾ་དྷ་ར་ཡ་

མི་བཛྲ་སཏྭ་ཧི་ཧི་ཧི་ཧི་ཧཱུྃ། གལ་ཏེ་རྣལ་འབྱོར་ཆེན་པོ་བྱེད་འདོད་ན། །སྔ་མ་བཞིན་དུ་དམ་ཚིག་སེམས་དཔར་བྱིན་གྱིས་བརླབས་པ་དང་། ཕྱག་རྒྱ་ཆེན་པོ་བཅིངས་པའི་བར་གྱི་ཆོ་གའི་རྗེས་སུ་སྤྱད་ལ། རང་གི་ལུས་ལ་ཡིད་ཀྱིས་ནམ་མཁའ་དང་མཉམ་པའི་སྦྱོར་བས་སྙིང་གར་སྟོང་གསུམ་པའི་ཆ་

เล่ม ๖๒ · หน้า 75a

དང་མཉམ་པའི་སངས་རྒྱས་ཀྱི་ཞིང་གི་ཚད་ཙམ་གྱི་ཟླ་བའི་དཀྱིལ་འཁོར་དེའི་སྟེང་དུ་ཁམས་གསུམ་རྣམ་པར་རྒྱལ་བའི་ཕྱག་རྒྱ་བཞི་པའི་དཀྱིལ་འཁོར་ལས་གསུངས་པའི་སྙིང་པོ་ལྔས་ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོ་ཇི་ལྟ་བ་བཞིན་དུ་སྤྲུལ་ལ།

བདག་ཉིད་རྡོ་རྗེ་ཧཱུྃ་མཛད་དུ་བསམས་ཏེ། ཁྲོ་བོ་ཏི་རཱིནྟི་རིའི་ཕྱག་རྒྱ་ཇི་ལྟ་བ་བཞིན་དུ་བཅིངས་ནས། དེ་ཉིད་ཀྱིས་མེ་ཏོག་གི་ཕྲེང་བ་བཟུང་ལ། འཇུག་པའི་སྔགས་ཟློས་ཤིང་རང་གི་སྙིང་གར་གནས་པའི་དཀྱིལ་འཁོར་དེར་འཇུག་པར་བྱའོ། །དེ་ནས་མེ་ཏོག་དོར་བའི་སྔགས་ཀྱིས་རང་གི་

སྤྱི་བོར་མེ་ཏོག་གི་ཕྲེང་བ་དོར་ལ། ཕྲེང་བའི་དབང་བསྐུར་བའི་སྔགས་ཀྱིས་རང་གི་མགོ་ལ་བཅིངས་ནས་གདོང་གཡོགས་དགྲོལ་བའི་སྔགས་ཀྱིས་གདོང་གཡོགས་བཀྲོལ་ལ། རྡོ་རྗེ་ལྕགས་ཀྱུ་ནས་བརྩམས་ཏེ་རང་གི་སྙིང་གའི་དཀྱིལ་འཁོར་བལྟས་ལ། ཏིཥྛ་བཛྲ་ཞེས་བྱ་བ་ལ་སོགས་པའི་

འཇུག་པའི་ཕྱག་རྒྱ་སྙིང་གར་བཀྲོལ་ལ་ཆུའི་དབང་བསྐུར་བ་དེའི་སྙིང་པོ་ཡིད་ཀྱིས་བླངས་ནས། སངས་རྒྱས་ལྔའི་ཅོད་པན་གྱིས་དབང་བསྐུར་བའི་ཕྱག་རྒྱས་བདག་ཉིད་དབང་བསྐུར་ལ། རྡོ་རྗེ་ཕྲེང་བའི་དབང་བསྐུར་བའི་ཕྱག་རྒྱས་དབང་བསྐུར་བར་བྱའོ། །དེ་ནས་རྡོ་རྗེ་དང་བདག་པོ་དང་

མིང་གི་དབང་བསྐུར་བ་བླངས་ཏེ། རྡོ་རྗེ་བརྟུལ་ཞུགས་བཟུང་ནས་དཀྱིལ་འཁོར་དེ་རང་གི་སྙིང་གའི་ཟླ་བར་ཐིམ་པར་བསམ་པར་བྱའོ། །དེ་ནས་ས་མ་ཡ་ཨ་ཞེས་ཟློས་ཤིང་རང་གི་ལུས་ལ་ལྷ་ཐམས་ཅད་ཀྱི་གནས་སུ་ཟླ་བའི་དཀྱིལ་འཁོར་བསྐྱེད་ལ་ཕྱག་རྒྱ་ཆེན་པོ་བཅིངས་ཏེ། མདུན་གྱི་

ནམ་མཁའི་ཕྱོགས་སུ་ཡང་དེ་བཞིན་དུ་ཟླ་བའི་དཀྱིལ་འཁོར་དེའི་སྟེང་དུ། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུྃ། གྲྀཧྞ་པ་ཡ་གྲྀཧྞཱ་པ་ཡ་ཧཱུྃ། ཨཱ་ན་ཡ་ཧོ། བྷ་ག་བཱན་བཛྲ་ཧཱུྃ་ཕཊ་ཨཱཿཞེས་བྱ་བས་དེ་བཞིན་དུ་འབར་བའི་རྡོ་རྗེ་བདག་ཉིད་དབབ་པར་བྱས་ཏེ། རྡོ་རྗེའི་ང་རྒྱལ་རྣམ་པར་

བསྒོམས་ནས། རྡོ་རྗེ་ཧཱུཾ་མཛད་དུ་བསྒོམ་པ་ཡང་བྱས་ནས། དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བ་དང་། བལྟ་བ་བྱས་ནས་རང་གི་ལུས་ལ་བཅུག་ལ་འོད་ཀྱི་དཀྱིལ་འཁོར་བསྐྱེད་དེ། ས་མ་ཡ་སྟྭཾ་ཧྲཱིཿས་མ་ཡ་སྟྭཾ་ཨ་ཧཾ་ཞེས་བྱ་བ་དང་། ཧཱུཾ་བཞི་ཡང་བརྗོད་ལ། རྡོ་རྗེ་

เล่ม ๖๒ · หน้า 75b

ཧཱུཾ་མཛད་བསྒྲུབ་པར་བྱའོ། །དེ་བཞིན་དུ་ཁྲོ་བོ་རྡོ་རྗེ་འབེབས་པའི་ཕྱག་རྒྱ་ཆེན་པོ་བཅིངས་ལ། ཨོཾ་བཛྲ་ཨཱ་བེ་ཤ་མ་ཧཱ་ཀྲོ་དྷ་ཨཱ་བེ་ཤ་ཡ་སརྦ་ས་མ་ཡཾ་ཧཱུྃ་ཨཿཞེས་བྱ་བ་འདིས་མདུན་དུ་རྡོ་རྗེ་དྲིལ་བུའི་གཟུགས་སུ་བདག་ཉིད་དབབ་པར་བྱས་ནས། བཛྲ་གྷཎྜོ་ཧཾ་ཞེས་བྱ་བས་དྲིལ་བུའི་ང་རྒྱལ་

བསྒོམ་པར་བྱའོ། །དེ་ནས་ཡང་བཛྲ་ཨཱ་བེ་ཤ་མཧཱ་ཀྲོ་དྷོ་ཧཾ། ཞེས་བྱ་བས་ཁྲོ་བོ་རྡོ་རྗེའི་འབེབས་པའི་ང་རྒྱལ་བྱས་ལ། དེ་ཉིད་རྡོ་རྗེ་ལྕགས་ཀྱུ་ལ་སོགས་པས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ནས་ཁྲོ་བོ་ཆེན་པོ་རྡོ་རྗེ་འབེབས་པའི་ཕྱག་རྒྱ་

བཅིངས་ལ། འདི་སྐད་ཅེས་བརྗོད་དོ། །བཛྲ་ཨཱ་བེ་ཤ་མཧཱ་ཀྲོ་དྷ་ཨཱ་བེ་ཤ་ཡ་སརྦ་ས་མ་ཡཾ་ཧཱུྃ་ཨ་དྲྀ་ཤྱ། ཡང་དམ་ཚིག་གི་ཕྱག་རྒྱ་དེ་ཉིད་དང་། ཛཿཧཱུཾ་བཾ་ཧོཿཞེས་བརྗོད་དོ། །རྡོ་རྗེ་འབེབས་པ་རང་གི་གནས་སུ་དགུག་པ་དང་། གཞུག་པ་དང་། བཅིང་བ་དང་། དབང་དུ་

བྱས་ལ། ས་མ་ཡ་སྟྭཾ་ཧྲི་ཞེས་ཟློས་ཤིང་རྒྱབ་ཏུ་འབར་བའི་ཕྲེང་བ་འཁྲུགས་པའི་འོད་ཀྱི་དཀྱིལ་འཁོར་བསྐྱེད་ལ། ས་མ་ཡ་སྟྭཾ་ཞེས་བྱ་བ་དང་། དེའི་སྔགས་ཀྱང་ཟློས་ཤིང་དེར་བདག་ཉིད་ཁྲོ་བོ་རྡོ་རྗེ་འབེབས་པར་བསྒོམ་པར་བྱའོ། །དེ་བཞིན་དུ་རྡོ་རྗེ་སེམས་དཔའ་དང་ཆོས་དང་ལས་དང་

ཕྱག་རྒྱ་ཆེན་པོ་རྣམས་ཀྱིས་རྒྱས་གདབ་བོ། །དེ་ནས་སྔ་མ་བཞིན་དུ་ལྷ་རྣམས་ཀྱི་སྐུ་དང་། རང་གི་ལུས་ལ་ཡིད་ཀྱིས་ལེགས་པའི་སྦྱོར་བ་དེ་བཞིན་གཤེགས་པ་ཐམས་ཅད་བཅུག་ལ། ཕྱག་རྒྱ་བཞིས་རྒྱས་གདབ་པར་བྱའོ། །དེའི་རྗེས་ལ་ཁམས་གསུམ་རྣམ་པར་རྒྱལ་བའི་ཕྱག་རྒྱས་སྔ་མ་

བཞིན་དུ་བདག་ཉིད་བྱིན་གྱིས་བརླབས་ལ་ཡི་གེ་བརྒྱ་པས་བརྟན་པར་བྱའོ། །དེ་ནས་རྡོ་རྗེ་སེམས་དཔའི་གཙུག་ཏོར་དང་གཟི་བརྗིད་ཕུང་པོའི་གཙུག་ཏོར་ཡང་བཀོད་ལ། ཡི་གེ་བརྒྱ་པ་ཡང་བཟླས་ནས་རྡོ་རྗེ་བརྟུལ་ཞུགས་ཀྱི་བར་གྱི་ཆོ་ག་རྗེས་སུ་སྤྱད་པར་བྱའོ། །དེ་ནས་གནས་ཀྱི་ངེས་པ་བཤད་པར་བྱ་སྟེ།

སྒྲུབ་པ་པོའི་མདུན་གྱི་སྙིང་གའི་ཟླ་བར་རྡོ་རྗེ་ཧཱུྃ་མཛད་དང་ཁྲོ་བོ་རྡོ་རྗེ་སེམས་དཔའ། གཡས་ལོགས་སུ་ཁྲོ་བོའི་རྒྱལ་པོ། གཡོན་ལོགས་སུ་ཆགས་པ། རྒྱབ་ཏུ་ལེགས་པ། དཔྲལ་བར་རིན་ཆེན་ཧཱུྃ་མཛད་དང་། ཁྲོ་བོ་ཁྲོ་གཉེར་ཅན། རྒྱབ་ཏུ་ཉི་མ། ཕྲག་པ་དག་ཏུ་རྒྱལ་མཚན། སོའི་

เล่ม ๖๒ · หน้า 76a

ཕྲེང་བ་གཉིས་ལ་བཞད་པ། ལྐོག་མར་ཆོས་ཀྱི་ཧཱུྃ་མཛད་དང་ཁྲོ་བོ་རྡོ་རྗེ་ཆོས། ནུ་མ་གཉིས་ཀྱི་བར་དུ་རྣོན་པོ། ལྟེ་བར་རྒྱུ། ལྕེ་ལ་སྨྲ་བ། སྤྱི་བོར་ལས་ཀྱི་ཧཱུྃ་མཛད་དང་། ཁྲོ་བོ་རྡོ་རྗེ་ལས། ནམ་ཚོང་དུ་རྡོ་རྗེ་སྲུང་བ། ཁར་རྡོ་རྗེ་གནོད་སྦྱིན། དཀུར་ཁྲོ་བོ་རྡོ་རྗེ་ཁུ་ཚུར། ཁྲོ་བོ་རྡོ་རྗེ་

སེམས་དཔའ་དང་། རིན་ཆེན་དང་། ཆོས་དང་། ལས་ཀྱི་གཡོན་ལོགས་སུ་སྒེག་མོ་དང་། ཕྲེང་བ་མ་དང་། གླུ་མ་དང་། གར་མ་བཞུགས་སོ། །ཡང་སྔགས་པའི་གསང་བའི་གནས་ཀྱི་ཕྱོགས་སུ་བདུག་སྤོས་མ། མགོ་བོར་མེ་ཏོག་མ། མིག་གཉིས་སུ་མར་མེ་མ། ནུ་མ་

དང་བྲང་དང་། སྙིང་གར་བྱུག་པ་མ། ལག་པ་གཡས་སུ་རྡོ་རྗེ་ལྕགས་ཀྱུ། གཡོན་དུ་ཞགས་པ། བྱིན་པ་གཡས་སུ་ལྕགས་སྒྲོག །བྱིན་པ་གཡོན་དུ་འབེབས་པའོ། །དེ་བཞིན་གཤེགས་པ་རྣམས་ནི་ཡན་ལག་གི་ཆ་ཐམས་ཅད་དུ་བཞུགས་སོ། །དེ་ནས་ཕྱག་བཞི་བྱས་ལ།

ཨོཾ་བཛྲ་ཨཱཏྨ་ཀོ྅ཧཾ། ཨོཾ་སྭ་བྷཱ་བ་ཤུདྡྷོ྅ཧཾ། ཨོཾ་སརྦ་ས་མོ྅ཧཾ། ཞེས་བྱ་བའི་སྙིང་པོ་གསུམ་ཟློས་ཤིང་རྡོ་རྗེའི་བདག་ཉིད་ཅན་དང་། རང་བཞིན་ཅན་གྱི་དག་པ་དང་། བདག་མེད་པའི་མཉམ་པ་ཉིད་ཀྱི་ལྷ་ཐམས་ཅད་དང་མཉམ་པར་བདག་ཉིད་བསྒོམ་པར་བྱའོ། །ཡང་ན་རྡོ་རྗེ་ཧཱུྃ་མཛད་

ཀྱི་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བཅིངས་ལ་འོག་ནས་བཤད་པའི་ཚུལ་དུ་ལྷ་ཆེན་པོའི་ཆུང་མ་དང་བཅས་པ་བཀུག་སྟེ། རྐང་པ་གཉིས་ཇི་ལྟ་བ་བཞིན་མནན་ལ་རང་གི་སྙིང་གར་གནས་པའི་རྡོ་རྗེ་དབུས་སུ་བཟླས་པར་བྱ་བའི་སྔགས་ཡིད་ཀྱིས་བྲིས་ནས། དེ་བཞིན་གཤེགས་པ་ཐམས་

ཅད་འདུས་པའི་དབུས་ན་གནས་ཤིང་བཟླས་པའི་དོན་ཡིད་ལ་སེམས་བཞིན་དུ་རྡོ་རྗེའི་ཚིག་གམ། ཁྲོ་བོའི་ཚིག་གིས་ཟློས་ཤིང་། འདོད་ཆགས་ཉིད་ལས་ཡང་དག་བྱུང་། །ཁྲོ་བོ་བདག་ཅེས་བསྒོམ་པར་བྱ། །སྙིང་པོ་ཕྱག་རྒྱ་སྔགས་རིག་པ། །མྱུར་དུ་འགྲུབ་པར་བྱེད་པ་ཡིན། །ཞེས་བྱ་

བའི་ཏིང་ངེ་འཛིན་འདི་བསྒོམ་པར་བྱའོ། །ཡང་ན་རང་གི་སྙིང་གར་གནས་པའི་ཟླ་བ་ལ་སྔར་བཤད་པའི་རྡོ་རྗེ་འཁོར་ལོས་ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོ་སྤྲུལ་ལ། ཨོཾ་བཛྲ་ཛྭ་ལཱགྣི་པྲ་ཏི་བ་ཏ་ཨཱ་ཀཪྵ་ཡ་སརྦ་ཏ་ཐཱ་ག་ཏ་མ་ཧཱ་བཛྲ་ས་མ་ཡེ་ཧཱུཾ་ཛཿཞེས་བྱ་བ་ནས་ཨོཾ་

เล่ม ๖๒ · หน้า 76b

བཛྲ་ཨཱ་བེ་ཤམ་ཧཱ་ཀྲོ་དྷ་ཨཱ་བེ་ཤ་ཡ་སརྦ་ས་མ་ཡཾ་ཧཱུྃ་ཨཿཞེས་བྱ་བའི་བར་གྱི་སྔགས་ཀྱིས་དཔལ་རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེབས་པའི་བར་དུ་སེང་གེའི་གདན་ལ་སོགས་པ་ལ་བཞུགས་པ་དང་། ནམ་མཁའ་དང་མཉམ་པའི་སྦྱོར་བས་དེ་རྣམས་དང་བདག་ཉིད་ལྷན་ཅིག་ཏུ་གྱུར་

པར་རྣམ་པར་བསམས་ལ། བཛྲ་ཨཱཏྨ་ཀོ་ལ་སོགས་པའི་སྙིང་པོ་གསུམ་ཟློས་ཤིང་། དེའི་དོན་གསུམ་བསྒོམས་ལ་ཁམས་གསུམ་རྣམ་པར་རྒྱལ་བའི་དཀྱིལ་འཁོར་ནི་བདག་ཡིན་ནོ་ཞེས་ང་རྒྱལ་བསྐྱེད་པར་བྱའོ། །དེ་ནས་དེ་བཞིན་དུ་སྔགས་ཟློས་ཤིང་བསྒོམ་པར་བྱའོ། །ལྷ་ཐམས་

ཅད་ཀྱི་ཞལ་ནས་ཀྱང་སྔགས་ཀྱི་སྒྲ་མངོན་པར་སྒྲོགས་པར་མཛད་པར་ལྷག་པར་བསམ་པར་བྱ་སྟེ། དེ་ལྟ་བུས་ནི་བཟླས་པ་ཐམས་ཅད་བཟླས་པར་འགྱུར་རོ། །དེ་ནས་བཟླས་པའི་དོན་ནི་ཨོཾ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་དོ། །སུམྦྷ་ཞེས་བྱ་བ་ནི་བོད་པའོ། །ནི་སུམྦྷ་

ནི་ཞེས་བྱ་བ་ནི་དེ་རྣམས་རྗེས་སུ་ཐུལ་ཅིག་པའོ། །ཧཱུཾ་ཞེས་པ་ནི་དེས་སོད་ཅིག་པའོ། །ཕཊ་ཅེས་བྱ་བ་ནི་ངན་འགྲོའི་འགྲོ་བ་འཕོ་བར་བྱའོ། །ལྷག་མ་ནི་གོ་བར་ཟད་དོ། །ཧཱུྃ་བཞི་པ་ནི་ལན་བཞི་བརྗོད་པར་སྟོན་པའི་རང་བཞིན་ནོ། །དེ་ཡང་ཨོཾ་ནི་དེ་བཞིན་གཤེགས་པའོ། །སུམྦྷ་ནི་

སུམྦྷ་ཞེས་བྱ་བ་ནི་དེ་བཞིན་གཤེགས་པས་རྗེས་སུ་ཐུལ་ཅིག་ཅེས་གསུངས་པའོ། །འདིས་ནི་འདི་སྐད་སྟོན་ཏེ། བཅོམ་ལྡན་འདས་ནི་དེ་བཞིན་གཤེགས་པ་རྣམས་ཀྱང་འདུལ་བར་མཛད་ན་ལྷ་ལ་སོགས་པ་ལྟ་སྨོས་ཀྱང་ཅི་དགོས། འདུལ་བའི་སྡུག་བསྔལ་འཇིག་པ་སྟེ། །སྲིད་པའི་

སྡུག་བསྔལ་གཅོད་པ་ཡིན། །ཧཱུྃ་ཞེས་བྱ་བ་གསོད་པའི་མཆོག །གདུག་པ་སྐྲག་པ་གསོད་པ་ཡིན། །ཞེས་པ་དང་། ཉོན་མོངས་གདུག་པ་ལྟུང་བྱེད་ཅིང་། །ཞི་བས་འགུགས་པ་ཡིན་པར་བཤད། །ཕཊ་ཅེས་བྱ་བ་ལྟུང་བའི་སྒྲ། །ངན་འགྲོའི་འགྲོ་བ་ལྟུང་བའོ། །ཡང་ན་ཏིང་ངེ་འཛིན་

གསུམ་བསྒོམ་པར་བྱ་སྟེ། དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་མཐར་ཐུག་པའི་ཆོ་ག་རྣམས་རྗེས་སུ་སྤྱད་ལ། རྣལ་འབྱོར་ཆེན་པོ་དང་ལྡན་པའམ། རྣལ་འབྱོར་གཅིག་དང་ལྡན་པའི་ཕྱག་རྒྱ་ཆེན་པོ་བཅིངས་ལ། བློས་ནམ་མཁའི་ཕྱོགས་སུ་གནས་ཏེ། སྟོང་གསུམ་པའི་

เล่ม ๖๒ · หน้า 77a

སངས་རྒྱས་ཀྱི་ཞིང་ཐམས་ཅད་ཡི་གེ་ཨའི་དོན་བསྒོམ་པས། ནམ་མཁའ་དང་མཉམ་པར་བསམས་ལ། ནམ་མཁའི་ཕྱོགས་དེར་ཡི་གེ་ཡཾ་ལས་རླུང་གི་དཀྱིལ་འཁོར། དེའི་སྟེང་དུ་ཡི་གེ་བཾ་ལས་ཆུའི་དཀྱིལ་འཁོར། དེའི་སྟེང་དུ་ཡི་གེ་ལཾ་ལས་གསེར་གྱི་དཀྱིལ་

འཁོར། དེའི་སྟེང་དུ་ཡི་གེ་བཾ་ལས་རྒྱ་མཚོ་ཆེན་པོ། །ཆུ་དང་གསེར་གྱི་དཀྱིལ་འཁོར་དེར། །ཧཱུཾ་སུཾ་ཧཱུཾ་ཞེས་བྱ་བ་ལས་རིའི་རྒྱལ་པོ་རི་རབ་ཟུར་བཞི་པ་རིན་པོ་ཆེ་སྣ་བཞིའི་རང་བཞིན་ཅན། རིན་པོ་ཆེ་ཐམས་ཅད་ཀྱིས་བརྒྱན་པར་བསམས་ལ། ཨོཾ་བཛྲ་དྲྀ་ཌྷོ་མེ་བྷ་བ། རཀྵ་སརྦཾ་

སྭཱ་ཧཱ། ཞེས་ཟློས་ཤིང་རྡོ་རྗེ་བསྡམས་པས་གཞི་ལ་རེག་པས་རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱའོ། །དེ་ནས་སྔར་བཤད་པའི་རྡོ་རྗེ་འཁོར་ལོས་གཞལ་ཡས་ཁང་སྤྲུལ་ལ། བགེགས་གཞོམ་པ་ལ་སོགས་པ་ནས། རྣམ་པར་སྣང་མཛད་ཀྱི་གནས་སུ་ཨ་སིཾ་ཞེས་བྱ་བ་ལས་

སེང་གེའི་གདན་མི་བསྐྱོད་པའི་གནས་སུ་ཧཱུྃ་གཾ་ཧཱུྃ་ཞེས་བྱ་བ་ལས་གླང་པོ་ཆེའི་གདན། རིན་ཆེན་འབྱུང་ལྡན་གྱི་གནས་སུ་ཏྲཱ་བཾ་ཏྲཱ་ཞེས་བྱ་བ་ལས་རྟའི་གདན། འོད་དཔག་ཏུ་མེད་པའི་གནས་སུ་ཧྲཱིཿམཾ་ཧྲཱིཿཞེས་བྱ་བ་རྨ་བྱའི་གདན། དོན་ཡོད་གྲུབ་པའི་གནས་སུ་ཨཿམཾ་ཨཱཿཞེས་བྱ་

བ་ལས་ནམ་མཁའ་ལྡིང་གི་གདན་ལ་ཨ་ལས་བྱུང་བའི་ཟླ་བའི་དཀྱིལ་འཁོར་གྱིས་མནན་པ་རྣམ་པར་བསམས་ནས་སེམས་དཔའི་སྐྱིལ་མོ་ཀྲུང་བཅས་ཏེ་འདུག་ལ། དེ་བཞིན་གཤེགས་པ་ཐམས་ཅད་ཀྱི་གཟུགས་ཀྱི་སྐུ་ཉིད་དང་། ཆོས་ཉིད་དང་། ཐེག་པ་ཆེན་པོས་ངེས་པར་འབྱུང་

བའི་ཆོས་དང་། ཕྱིར་མི་ལྡོག་པའི་བྱང་ཆུབ་སེམས་དཔས་ཡང་དག་པར་བསྡུས་པའི་དགེ་འདུན་རྗེས་སུ་དྲན་པར་བྱའོ། །དེ་ནས་འཇིག་རྟེན་གྱི་ཁམས་ཐམས་ཅད་འགྲོ་བ་ཐམས་ཅད་ཀྱིས་བསྡུས་པའི་སེམས་ཅན་ཐམས་ཅད་ལ་ལྷག་པར་བྱམས་པ་བསྐྱེད་པར་བྱ་བ་དང་། ངན་འགྲོ་ལ་

སོགས་པའི་སྡུག་བསྔལ་གྱིས་བསྡུས་པ་ཐམས་ཅད་ལ་སྙིང་རྗེ་བ་དང་། འཕགས་པ་ཐམས་ཅད་ལ་དགའ་བ་དང་། འཇིག་རྟེན་གྱི་ཆོས་ཐམས་ཅད་ཡང་བཏང་སྙོམས་སུ་བྱ་བ་དང་། ཆོས་ཐམས་ཅད་ཀྱང་དངོས་པོ་མེད་པའི་ངོ་བོ་ཉིད་དང་། སྒྱུ་མ་དང་མཚུངས་པ་ཉིད་དང་།

เล่ม ๖๒ · หน้า 77b

མིག་ཡོར་དུ་མཚུངས་པ་ཉིད་དུ་ལྷག་པར་མོས་པར་བྱ་བ་དང་། བྱང་ཆུབ་ཀྱི་སེམས་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཐབས་ལ་མཁས་པའི་སྤྱོད་པ་དང་། རིགས་ལྔ་དང་། རྡོ་རྗེ་དང་། དྲིལ་བུ་དང་ཕྱག་རྒྱ་དང་། སློབ་དཔོན་ཉིད་དང་། བྱམས་པ་དང་། མི་འཇིགས་

པ་དང་། ཟང་ཟིང་དང་ཆོས་ཀྱི་སྦྱིན་པ་མངོན་དུ་བྱ་བ་དང་། གསང་སྔགས་ཀྱི་སྒོའི་སྤྱོད་པ་རྣམས་དང་བཅས་པའི་ཆོས་ཐམས་ཅད་ཀྱི་ཚུལ་ཐམས་ཅད་སྟོན་པ་དང་། བསླབ་པ་དང་། སྡོམ་པ་ཐམས་ཅད་ནན་ཏན་དུ་བྱས་ཤིང་ཆོ་གས་ཡོངས་སུ་རྫོགས་པ་དང་། སེམས་ཅན་རྣམས་

བསྐྱབ་པ་དང་། དེ་བཞིན་གཤེགས་པ་རྣམས་མཆོད་ཅིང་བསྙེན་བཀུར་བྱ་བ་ཡང་མངོན་དུ་བྱས་ནས་བདག་ཉིད་ཅོད་པན་གྱི་དབང་བསྐུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཐམས་ཅད་གྲུབ་པར་ལྷག་པར་མོས་པས་འོག་མིན་དུ་མངོན་པར་བྱང་ཆུབ་པ་

མངོན་དུ་བྱས་ནས་མི་བསྐྱོད་པ་ལ་སོགས་པས་ཡོངས་སུ་བསྐོར་ཏེ། རིའི་རྒྱལ་པོ་རི་རབ་ཀྱི་རྩེ་མོ་ན་གནས་པའི་རྡོ་རྗེ་དང་། ནོར་བུ་དང་རིན་པོ་ཆེ་ལས་བྱས་པའི་ཁང་པ་བརྩེགས་པ་ན་དེ་བཞིན་གཤེགས་པ་ཐམས་ཅད་ཀྱི་བསོད་ནམས་ལས་ངེས་པར་འབྱུང་བའི་སེང་གེའི་གདན་ལ་ཞལ་

ཐམས་ཅད་པས་བཞུགས་པར་བསམས་ལ། རྡོ་རྗེ་དབྱིངས་ཀྱི་དབང་ཕྱུག་མས་བདག་ཉིད་བྱིན་གྱིས་བརླབས་ནས་བྱང་ཆུབ་མཆོག་གི་ཕྱག་རྒྱ་བཅིངས་ཏེ། བཛྲ་སཏྭ་ཞེས་ཟློས་ཤིང་ཟླ་བའི་དཀྱིལ་འཁོར་རྣམས་རང་གི་སྙིང་ག་ནས་ཕྱུང་ལ་ལྷ་ཐམས་ཅད་ཀྱི་གནས་སུ་ཇི་ལྟ་བ་

བཞིན་དུ་ཡང་དག་པར་བཞག་ནས། རྡོ་རྗེ་སེམས་དཔའ་ཉིད་བདག་བྱིན་གྱིས་བརླབ་པའི་བར་དུ་བྱས་ནས་ཆེད་དུ་བརྗོད་པ་འདིས་ཆེད་དུ་བརྗོད་པར་བྱའོ། །འདི་དེ་སངས་རྒྱས་ཐམས་ཅད་ཀྱིས། །གྲུབ་པའི་རྡོ་རྗེ་བླ་ན་མེད། །བདག་དེ་བདག་གི་ལག་ཏུ་བྱིན། །རྡོ་རྗེ་ལ་ནི་རྡོ་རྗེ་

གནས། །དང་པོ་སྦྱོར་བའི་ཏིང་འཛིན་ནོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་ཁམས་གསུམ་ལས་རྣམ་པར་རྒྱལ་བར་བྱ་བའི་ཕྱིར། རྡོ་རྗེ་སེམས་དཔའ་རྡོ་རྗེ་ཆེ། །ཞེས་བྱ་བ་ནས་བརྩམས་ཏེ། རང་གི་རིགས་ནི་བསྐྱེད་པར་མཛོད། །ཅེས་བྱ་བའི་བར་གྱི་མཚན་བརྒྱ་རྩ་བརྒྱད་

เล่ม ๖๒ · หน้า 78a

པས་བདག་ཉིད་ལ་གསོལ་བ་གདབ་པར་བསམ་པར་བྱའོ། །དེ་ནས་རྡོ་རྗེ་བདག་ཉིད་ཀྱི་སྙིང་གར་བཞག་སྟེ། དེ་བཞིན་གཤེགས་པ་ཐམས་ཅད་ལ་བོས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་མ་འཚལ་ཏོ། །དེ་བཞིན་

གཤེགས་པ་ཐམས་ཅད་ཀྱིས་བཀའ་སྩལ་པ། ཅིའི་ཕྱིར་རྡོ་རྗེ་འཛིན་པས་སྨྲས་པ། བཅོམ་ལྡན་འདས་དབང་ཕྱུག་ཆེན་པོ་ལ་སོགས་པ་མ་རུངས་པའི་སེམས་ཅན་དག་ཀྱང་མཆིས་ཏེ། དེ་བཞིན་གཤེགས་པ་ཁྱེད་རྣམས་ཀྱིས་ཀྱང་ཞི་བས་འདུལ་བར་མི་སྤྱོད་པ་དེ་དག་ལ་བདག་གིས་

ཇི་ལྟར་བསྒྲུབ་པར་བགྱི། དེ་ནས་བདག་ཉིད་བཅོམ་ལྡན་འདས་རྣམ་པར་སྣང་མཛད་དང་ཐ་མི་དད་པ་ལྷག་པར་མོས་པར་བྱས་ལ། དེ་བཞིན་གཤེགས་པ་ཐམས་ཅད་རང་གི་སྙིང་གར་ཞུགས་པར་བསམ་པར་བྱའོ། །དེ་ནས་བྱང་ཆུབ་མཆོག་གི་ཕྱག་རྒྱ་བཅིངས་ནས་ཧཱུྃ་ཞེས་བྱ་བས་རྡོ་རྗེ་

སེམས་དཔའ་བསྐུལ་བར་བྱའོ། །དེ་ནས་ཕྱག་ན་རྡོ་རྗེའི་ཐུགས་ཀའི་རྡོ་རྗེ་ལ་ཀུན་དུ་འབར་བའི་སྙིང་པོ་ཁྲོ་གཉེར་ཅན་སྨིན་མ་བཙུམས་ཤིང་དཔྲལ་བ་གཉེར་བ། མཆེ་བ་ལྷག་གེ་ཕྱུང་ཞིང་སོ་གཙིགས་པ། རྡོ་རྗེ་དང་ལྕགས་ཀྱུ་དང་། རལ་གྲི་དང་། ཞགས་པ་ལ་སོགས་པའི་རྡོ་རྗེའི་མེ་ལྕེ་འབར་

བའི་མཚོན་ཆ་ལག་ན་ཐོགས་པ་རྣམ་པ་དུ་མའི་ཁ་དོག་དང་། རྒྱན་སྣ་ཚོགས་ཀྱི་ཆ་ལུགས་འཛིན་པའི་ཕྱག་ན་རྡོ་རྗེའི་སྐུར་གྱུར་ནས་སྐུ་ལས་བྱུང་སྟེ། འཇིག་རྟེན་གྱི་ཁམས་ཐམས་ཅད་དུ་ཤིན་ཏུ་མ་རུངས་པ་ཐམས་ཅད་འདུལ་བར་བྱས་ནས། བཅོམ་ལྡན་འདས་རྣམ་པར་སྣང་མཛད་ཀྱི་

ཕྱོགས་ཀུན་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ཚུལ་དུ་ཟླ་བའི་དཀྱིལ་འཁོར་ལ་འདུག་སྟེ་ཆེད་དུ་བརྗོད་པ་འདི་ཆེད་དུ་བརྗོད་དོ། །ཀྱེ་མ་ཐམས་ཅད་འདུལ་བ་ཡིས། །ཐབས་ཆེན་ལྡན་པ་བདག་ཡིན་ཏེ། །གང་ཕྱིར་སེམས་ཅན་གདུལ་ཐབས་ཕྱིར། །དྲི་མ་མེད་པའི་ཁྲོ་བོར་གྱུར། །

ཡང་བདག་ཉིད་བཅོམ་ལྡན་འདས་རྣམ་པར་སྣང་མཛད་དང་ཐ་མི་དད་པར་ལྷག་པར་མོས་ལ། བྱང་ཆུབ་མཆོག་གི་ཕྱག་རྒྱ་བཅིངས་ཏེ། ཨོཾ་སུམྦྷ་ནི་སུམྦྷ་ཧཱུྃ། གྲྀཧྞ་གྲྀཧྞ་ཧཱུྃ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུྃ། ཨཱ་ན་ཡ་ཧོ། བྷ་ག་བཱན་བཛྲ་ཧཱུྃ་ཕཊ། ཅེས་ཟློས་ཤིང་དེ་བཞིན་གཤེགས་

เล่ม ๖๒ · หน้า 78b

པ་ཐམས་ཅད་ཀྱི་ཐུགས་ཀ་ནས་ཕྱག་ན་རྡོ་རྗེའི་གཟུགས་སུ་གྱུར་ཏེ་བྱུང་ནས། འཇིག་རྟེན་གྱི་ཁམས་རབ་འབྱམས་རྒྱ་མཚོའི་སྤྲིན་ཐམས་ཅད་ན་དེ་བཞིན་གཤེགས་པ་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པ་ཐམས་ཅད་ཀྱིས་བྱིན་གྱིས་བརླབས་ཏེ་སྤྱན་དྲངས་ནས། རྡོ་

རྗེ་དམ་ཚིག་གི་དཀྱིལ་འཁོར་ཆེན་པོར་བཅུག་སྟེ། དམ་ཚིག་བཅིངས་ནས་ཡང་གཅིག་ཏུ་འདུས་ཏེ། རྡོ་རྗེ་ཁྲོ་བོ་ཆེན་པོའི་ལུས་སུ་གྱུར་ནས་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ཀར་འདུག་སྟེ་ཆེད་དུ་བརྗོད་པ་འདི་ཆེད་དུ་བརྗོད་དོ། །ཨེ་མའོ་བྱང་ཆུབ་སེམས་འདི་ནི། །

ཀུན་དུ་གཟུང་ཞིང་སྡིག་མེད་དེ། །གང་ཕྱིར་སེམས་ཅན་འདུལ་དོན་དུ། །ཁྲོ་བོ་ཡང་ནི་ཡིད་འོང་འགྱུར། །དེ་ནས་བཅོམ་ལྡན་འདས་ཀྱི་ཐུགས་ཀ་ནས་བྱུང་སྟེ། དེ་བཞིན་གཤེགས་པ་ཐམས་ཅད་ཀྱི་སྤྱན་སྔར་ཟླ་བའི་དཀྱིལ་འཁོར་ལ་གནས་ཏེ་བཀའ་ནོད་ཅིང་འདུག་གོ། །བཅོམ་ལྡན་

འདས་དེ་བཞིན་གཤེགས་པ་ཐམས་ཅད་བདག་ནི་ཁྲོ་བོའི་དབང་དུ་བགྱིས་ལ་ཚར་གཅད་པར་འོས་པ་རྣམས་ཚར་བཅད་པར་བགྱི་ན། བཅོམ་ལྡན་འདས་དེ་ལ་ཇི་ལྟར་འགྲུབ་པར་བགྱི་བ་བཀའ་སྩལ་དུ་གསོལ། དེ་ནས་ཧཱུྃ་ཊཀྐི་ཛཿཞེས་བྱ་བའི་རྣམ་པར་སྣང་མཛད་ཀྱི་བཀས་ཁྲོ་བོའི་འཁོར་

ལོ་ཐམས་ཅད་ཀྱང་རང་གི་སྙིང་ག་ནས་ཕྱུང་སྟེ། གནས་ཇི་ལྟ་བ་བཞིན་དུ་བཞག་ལ། ཧཱུྃ་ཊཀྐི་ཛཿཞེས་བྱ་བ་འདིས་ཕྱག་རྒྱ་དང་ལྡན་པས་ལྷ་ཆེན་པོ་ལ་སོགས་པ་འཇིག་རྟེན་གསུམ་པོ་ཐམས་ཅད་དགུག་པར་བྱའོ། །ཕྱག་རྒྱ་ནི་འདི་ཡིན་ཏེ། མཐེའུ་ཆུང་གཉིས་ལྕགས་ཀྱུར་བཅིང་། །

རྡོ་རྗེ་གཉིས་ཀ་བླ་འོག་ཏུ། །དམ་ཚིག་ལྕགས་ཀྱུའི་ཕྱག་རྒྱ་འདིས། །སྐད་ཅིག་གིས་ནི་ཐམས་ཅད་འགུགས། །ཨོཾ་ནི་སུམྦྷ་བཛྲ་ཧཱུྃ་ཕཊ། ཅེས་བྱ་བའི་དེ་བཞིན་གཤེགས་པའི་བཀས་ཁམས་གསུམ་རྣམ་པར་རྒྱལ་བ་བཅིངས་ལ། ཧཱུྃ་ཞེས་བྱ་བས་ཐམས་ཅད་ཀུན་དུ་བརྒྱལ་ཞིང་

ཁ་སྦུབ་ཏུ་འགྱེལ་ལ་ལྷ་ཆེན་པོ་ནི་ཤི་བར་བསམ་པར་བྱའོ། །ལྷ་ཆེན་པོ་གྲགས་པ་ཁྱབ་འཇུག་ལ་སོགས་པ་ནི། ཨོཾ་བཛྲོ་ཏིཥྛ་ཞེས་བྱ་བའི་ཕྱག་རྒྱ་དང་བཅས་པས་གསུམ་ལ་སྐྱབས་སུ་འགྲོ་བ་ལ་བཞག་སྟེ་བླང་ངོ་། རྡོ་རྗེ་མཛུབ་མོ་གཉིས་ལེགས་པར། །རབ་མཉམ་བཞག་ལ་

เล่ม ๖๒ · หน้า 79a

སྙོམས་ན་ནི། །ཤི་བ་ཐམས་ཅད་སློང་བ་སྟེ། །རྡོ་རྗེ་སློང་བ་ཞེས་བྱའོ། །གསོས་ན་འདི་ཡང་སྐྱེས་བུ་དམ་པར་འགྱུར་རོ། །ཞེས་བྱ་བའི་རྣམ་པར་སྣང་མཛད་ཀྱི་བཀས་བཛྲ་ཨཱ་ཡུ་ཞེས་བྱ་བའི་སྙིང་པོ་དང་བཅས་པས་ལྷ་ཆེན་པོ་གསོ་བར་བྱའོ། །རྡོ་རྗེ་མཛུབ་མོ་གཉིས་

ལེགས་པར། །རྡོ་རྗེ་བཅིང་པ་བཅིངས་ནས་སུ། །བསྒྱུར་ཏེ་གཙུག་ཏུ་གཞག་པ་ནི། །ཚེ་དང་ནད་མེད་འཕེལ་བའོ། །ཨོཾ་པཱ་ད་ཨཱ་ཀཪྵ་ཎ་བཛྲ་ཧཱུྃ་ཞེས་བྱ་བས་རྐང་པའི་མཐིལ་ནས་ཁྲོ་བོ་རྐང་པས་འགུགས་པའི་ཀུན་དུ་འབར་བའི་རྡོ་རྗེའི་སྙིང་པོའི་ཁྲོ་གཉེར་བྱས་པས་མཆེ་བ་རྣམ་པར་

གཙིགས་པ། གདོན་ཆེན་པོ་ཕྱུང་ནས་བཀའ་ནོད་ཅིང་འདུག་པར་བསམ་པར་བྱའོ། །ཨོཾ་པཱ་ད་ཨཱ་ཀཪྵ་ཡ་སརྦ་བཛྲ་དྷ་ར་ཨ་ནུ་ར་ཙ་ཀདྡྷ་བཛྲ་ཧཱུྃ་ཛཿཞེས་བྱ་བ་འདི་ཕྱག་རྒྱ་དང་བཅས་པས་ལྷ་ཆེན་པོ་ཆུང་མ་དང་བཅས་པ་བཀུག་སྟེ་སྔགས་པའི་རང་གི་རྐང་པའི་དྲུང་དུ་གཞག་གོ། །རྡོ་རྗེ་བཅིངས་

བ་དམ་བྱས་ཏེ། །མཐེ་བོ་སྙོམས་པའི་ནང་དུ་གཞུག །མཛུབ་མོ་དང་པོར་བཀུག་ནས་སུ། །གཅུས་པ་ཞབས་སུ་བཀུག་པའོ། །ཨོཾ་བཛྲ་མ་ཧཱ་ཀྲོ་དྷ་ཞེས་ཟློས་ཤིང་ཁམས་གསུམ་རྣམ་པར་རྒྱལ་བའི་ཕྱག་རྒྱ་བཅིངས་ལ། རྐང་པ་གཡོན་པས་ལྷ་ཆེན་པོ་མནན་ལ། གཡས་པས་ཨུ་མའི་ནུ་མའི་

བར་སྟེང་ནས་བཙིར་བ། ཨོཾ་བཛྲ་ཨཱ་བེ་ཤ་ཧ་ན་པ་ཊ་ཏ་ཊ་ཞེས་བྱ་བ་ལྷ་ཆེན་པོ་འབབ་པའི་ཕྱག་རྒྱ་དང་བཅས་པས་དབབ་པར་བྱའོ། །རྡོ་རྗེ་ཕྱག་རྒྱ་གཉིས་བཅིངས་ཏེ། །གཅིག་ལ་གཅིག་ནི་གདབ་པ་ནི། །སེམས་ཅན་གང་གི་ལུས་ལ་ཡང་། །བབས་ནས་དེ་ཡང་རྡོབ་པར་བྱེད། །ཨོཾ་བུདྡྷ་མཻ་ཏྲི་

བཛྲ་རཀྵ་ཧཾ། ཞེས་བྱ་བ་འདིས་ཕྱག་རྒྱ་དང་བཅས་པས་བབས་པའི་སྡུག་བསྔལ་བསལ་བར་བྱའོ། །རྡོ་རྗེ་ཕྱག་རྒྱ་གཉིས་བཅིངས་ཏེ། །བདག་གམ་ཕ་རོལ་གོ་ཆར་བྱ། །མཛུབ་མོ་གཉིས་ཀྱིས་བཅིངས་བྱས་ནས། །རྟག་པ་ཉིད་དུ་སྲུང་བར་འགྱུར། །དེ་ནས་ལྷ་ཆེན་པོའི་ལུས་ལས་ཆེད་དུ་

བརྗོད་པ་འབྱུང་བར་མོས་པར་བྱའོ། །ཨེ་མའོ་སངས་རྒྱས་ཐམས་ཅད་ཀྱི། །སངས་རྒྱས་ཡེ་ཤེས་བླ་ན་མེད། །ཡི་གེའི་ཚིག་གིས་མནན་ནས་སུ། །མྱ་ངན་ལས་ནི་འདས་པར་གཞག །ཡང་ཐམས་ཅད་གསུམ་ལ་སྐྱབས་སུ་འགྲོ་བ་དང་། བསླབ་པ་དང་། དམ་ཚིག་དང་སྡོམ་པ་དང་། བྱང་

เล่ม ๖๒ · หน้า 79b

ཆུབ་ཀྱི་སེམས་ཉིད་བཀོད་ནས། འཇུག་པའི་དམ་ཚིག་ཆེན་པོའི་ཕྱག་རྒྱ་བཅིང་བ་བྱས་ནས་འདིས་འཆིང་དུ་གཞུག་གོ། །ཨོཾ་བཛྲ་ས་མ་ཡ་གྲྀཧྞ་བནྡྷ་ས་མ་ཡ་མ་ནུ་སྨ་ར་སརྦ་ཏ་ཐཱ་ག་ཏ་ས་མ་ཡ་སྟྭཾ། དྲྀ་ཌྷོ་མེ་བྷ་བ་ཨ་ཧྱ་རོ་མེ་བྷ་བ་ཨ་པྲ་ཏི་ཧ་རྱོ་མེ་བྷ་བ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧ་ཧ་ཧ་ཧ་ཧོཿ

དེ་བཞིན་དུ་འདིས་ཁྲོ་བོ་ཏིརཱིནྟི་རིའི་ཕྱག་རྒྱ་བཅིངས་ལ། ལག་པ་གཉིས་སུ་དབབ་པར་བྱའོ། །ཨོཾ་ས་མ་ཡ་པྲ་བེ་ཤ་མི། དེ་ནས་དཀྱིལ་འཁོར་ཆེན་པོ་ཐམས་ཅད་གོ་རིམས་ཇི་ལྟ་བ་བཞིན་དུ་བསྟན་ཏེ། ཨོཾ་བཛྲ་རཏྣ་ཨ་བྷི་ཥིཉྩ་ཞེས་བྱ་བ་འདིའི་འོག་ནས་བཤད་པའི་རྡོ་རྗེ་རིན་ཆེན་གྱི་དམ་

ཚིག་གི་ཕྱག་རྒྱ་དང་ལྡན་པས་ལྷ་ཆེན་པོ་ལ་སོགས་པ་ལ་དབང་བསྐུར་བར་བྱའོ། །དེ་ནས་འདིས་ཁམས་གསུམ་རྣམ་པར་རྒྱལ་བ་ལ་སོགས་པས་རྡོ་རྗེའི་མཚན་མ་ལག་ཏུ་སྦྱིན་ནོ། །ཨོཾ་བཛྲ་ཨ་བྷི་ཥིཉྩ་སརྦ་ཏ་ཐཱ་ག་ཏ་བཛྲ་དྷ་ར་ཏྲེ་བཛྲ་པཱ་ཎི་ཧི་ཧ་ཧ་ཧ་ཧ། དེའི་རྗེས་ལ་མིང་གི་དབང་བསྐུར་

བ་སྦྱིན་པར་བྱའོ། །དེ་ནས་མིང་རྣམས་བཤད་པར་བྱ་སྟེ། འདི་ལྟ་སྟེ་དབང་ཕྱུག་ཆེན་པོ་ནི་རིག་པའི་རྒྱལ་པོའི་ཁྲོ་བོའོ། །ཁྱབ་འཇུག་ནི་རིག་པའི་རྒྱལ་པོའི་སྒྱུ་མའོ། །གཞོན་ནུ་ཀཱརྟི་ཀ་ནི་རིག་པའི་རྒྱལ་པོའི་དྲིལ་བུའོ། །ཚངས་པ་ནི་རིག་པའི་རྒྱལ་པོའི་ཐུབ་པའོ། །དབང་པོ་ནི་

རིག་པའི་རྒྱལ་པོའི་མཚོན་ཆ་ཞེས་བྱའོ། །བར་སྣང་ལ་སྤྱོད་པ་རྣམས་ལ་ཉི་མ་ནི་ཁྲོ་བོ་རྡོ་རྗེ་འཁྱིལ་པའོ། །ཟླ་བ་ནི་ཁྲོ་བོ་རྡོ་རྗེ་འོད་དོ། །སྤེན་པ་ནི་ཁྲོ་བོ་རྡོ་རྗེ་དབྱུག་པའོ། །མིག་དམར་ནི་ཁྲོ་བོ་རྡོ་རྗེ་གསེར་སྨུག་ཅེས་བྱའོ། །ནམ་མཁའ་ལ་སྤྱོད་པ་རྣམས་ལ་སྟོབས་བཟང་ནི་ཚོགས་ཀྱི་བདག་པོ་

རྡོ་རྗེ་གླང་པོའི་སྣའོ། །སྦྲང་རྩི་བྱེད་པ་ནི་ཚོགས་ཀྱི་བདག་པོ་རྡོ་རྗེ་ཕྲེང་བའོ། །རྒྱལ་བ་ནི་ཚོགས་ཀྱི་བདག་པོ་རྡོ་རྗེ་དབང་པོའོ། །རྒྱལ་བར་བྱེད་པ་ནི་ཚོགས་ཀྱི་བདག་པོ་རྣམ་པར་རྒྱལ་བ་ཞེས་བྱའོ། །ས་བླ་བ་རྣམས་ལ་ནོར་སྦྱིན་ནི་ཕོ་ཉ་རྡོ་རྗེ་ཐོབ་པའོ། །རླུང་ལྷ་ནི་ཕོ་ཉ་རྡོ་རྗེ་རླུང་ངོ་། །མེ་ལྷ་ནི་ཕོ་ཉ་རྡོ་རྗེ་མེའོ། །ལུས་ངན་ནི་

ཕོ་ཉ་རྡོ་རྗེ་འཇིགས་པ་ཞེས་བྱའོ། །ས་འོག་ན་གནས་པ་རྣམས་ལ་ཕག་ནི་བྲན་རྡོ་རྗེ་ལྕགས་ཀྱུའོ། །གཤིན་རྗེ་ནི་བྲན་རྡོ་རྗེ་དུས་སོ། །ཚོགས་ཀྱི་བདག་པོ་ནི་བྲན་རྡོ་རྗེ་བགེགས་ཀྱི་གཙོ་བོའོ། །ཆུ་ལྷ་ནི་བྲན་ཀླུའི་རྡོ་རྗེ་ཞེས་བྱའོ། །ཨུ་མ་ནི་རྡོ་རྗེའི་རྒྱལ་མོ་ཁྲོ་མོ་རྡོ་རྗེ་མེའོ། །རུག་མ་ནི་རྡོ་རྗེ་རྒྱལ་མོའི་

เล่ม ๖๒ · หน้า 80a

རྡོ་རྗེ་གསེར་རོ། །དྲུག་ལྡན་མ་ནི་རྡོ་རྗེ་རྒྱལ་མོ་རྡོ་རྗེ་གཞོན་ནུ་མའོ། །ཚངས་མ་ནི་རྡོ་རྗེ་རྒྱལ་མོ་རྡོ་རྗེ་ཞི་བ་མའོ། །དབང་མོ་ནི་རྡོ་རྗེ་རྒྱལ་མོའི་རྡོ་རྗེ་ཁུ་ཚུར་ཞེས་བྱའོ། །བར་སྣང་ལ་སྤྱོད་པའི་བུད་མེད་རྣམས་ལ་མི་འམ་ཅི་ནི་ཁྲོ་བོ་རྡོ་རྗེ་མི་འཆི་མའོ། །རྡོ་རྗེ་རོ་ཧི་མ་ནི་ཁྲོ་

བོ་རྡོ་རྗེ་མདངས་སོ། །དབྱུག་འཛིན་མ་ནི་ཁྲོ་བོ་རྡོ་རྗེ་དབྱུག་མཆོག་མའོ། །སྐྱེ་བ་འཕྲོག་མ་ནི་ཁྲོ་བོ་རྡོ་རྗེ་རྐེད་འཆི་མ་ཞེས་བྱའོ། །ནམ་མཁའ་ལ་སྤྱོད་པ་རྣམས་ལ་གསོད་མ་ནི་གཙོ་མོ་རྡོ་རྗེ་འཛུམ་མའོ། །ཟ་བ་མ་ནི་གཙོ་མོ་རྡོ་རྗེ་ཟ་བ་མའོ། །མགོ་བ་མ་ནི་གཙོ་མོ་རྡོ་རྗེ་མགོ་བ་མའོ། །

དགའ་བ་མ་ནི་གཙོ་མོ་རྡོ་རྗེ་དབང་མོ་ཞེས་བྱའོ། །ས་ལ་སྤྱོད་པ་རྣམས་ལ་ཞི་བ་མོ་ནི་ཕོ་ཉ་མོའོ། །རླུང་མོ་ནི་ཕོ་ཉ་རྡོ་རྗེ་མགྱོགས་མའོ། །མེ་མོ་ནི་ཕོ་ཉ་མོ་རྡོ་རྗེ་འབར་མའོ། །ལུས་ངན་མོ་ནི་ཕོ་ཉ་མོ་རྡོ་རྗེ་འཁྱོར་མའོ། །ས་འོག་ན་གནས་པའི་མ་མོ་རྣམས་ལ། ཕག་མོ་ནི་བྲན་མོ་རྡོ་རྗེ་ཅན་མའོ། །

ཙ་མུཎྜཱི་ནི་བྲན་མོ་རྡོ་རྗེ་དུས་མའོ། །སྣ་ཅན་མ་ནི་རྡོ་རྗེ་རུལ་པ་མའོ། །ཆུ་ལྷ་མ་ནི་རྡོ་རྗེ་ཆུ་སྲིན་མ་ཞེས་བྱའོ། །དེ་ནས། རྡོ་རྗེ་འདི་ནི་རྡོ་རྗེ་ཆེ། །སངས་རྒྱས་ཀུན་གྱིས་བྱིན་གྱིས་བརླབས། །དམ་ཚིག་འདི་ལས་འདས་ན་ནི། །རིགས་རྣམས་མྱུར་དུ་ཐལ་བར་བྱེད། །ཨོཾ་ཧ་ན་ས་མ་ཡ་ཧཱུྃ་ཕཊ། ཅེས་

བྱ་བ་དང་། ཕྱག་རྒྱ་དང་བཅས་པ་འདིས་ལྷ་ཆེན་པོ་ལ་སོགས་པ་མ་མོའི་ཚོགས་དང་བཅས་པ་རྣམས་དམ་ཚིག་འཛིན་དུ་གཞུག་གོ །སེམས་དཔའ་རྡོ་རྗེ་དམ་བྱ་སྟེ། །མཐེ་བོང་གཉིས་ནི་བར་གནན་ཅིང་། །མཐེ་ཆུང་རྡོ་རྗེ་རྩེ་མོར་ནི། །རྣོན་པོ་དམ་ཚིག་འཛིན་པའོ། །ཨོཾ་བ་ལི་ཏ་བ་ལི་ཏ་བཛྲ་ཨཱ་ཀཪྵ་ཡ་ཧཱུྃ་ཛཿ

ཞེས་བྱ་བ་ཕྱག་རྒྱ་དང་བཅས་པས་ལྷ་ཆེན་པོ་ལ་སོགས་པའི་རྒྱལ་པོ་རྣམས་བཀའ་བསྒོ་བ་ལ་སྦྱར་བར་བྱའོ། །དེ་ལ་ཕྱག་རྒྱ་ནི་འདི་ཡིན་ཏེ། རྡོ་རྗེའི་ཕྱག་རྒྱ་གཉིས་བཅིངས་ཏེ། །མཛུབ་མོ་ལྕགས་ཀྱུར་བཅིངས་ནས་ནི། །གཅུ་ཞིང་ཕྱིར་ཡང་གཅུ་བར་བྱ། །ལྷ་རྣམས་དགུག་པ་དམ་པ་ཡིན། །

ཧཱུཾ་བཛྲ་ཨ་ཀྲི་པ་ཏ་ཡ་ས་མ་ཡ་ཧཱུཾ་ཞེས་བྱ་བས་ནི་ཁྲོ་བོ་རྣམས་སོ། །འདིའི་ཕྱག་རྒྱ་ནི། རྡོ་རྗེ་བཅིང་བ་དམ་བྱས་ཏེ། །མཛུབ་མོ་བཀུག་ནས་རབ་ཏུ་མནན། །མཐེ་བོང་གཉིས་ཀ་མཚམས་སྦྱར་ནས། །གུང་མོ་གཉིས་ཀ་རབ་ཏུ་མནན། །ཨོཾ་བཛྲ་མ་ལ་ཨ་ཀྲ་བཾ་ཞེས་བྱ་བ་ཕྱག་རྒྱ་དང་བཅས་པ་ནི་ཚོགས་

เล่ม ๖๒ · หน้า 80b

རྣམས་སོ། །ཕྱག་རྒྱ་ནི་འདི་ཡིན་ཏེ། རྡོ་རྗེ་ཕྱག་རྒྱ་གཉིས་ཀ་ཡི། །མཐེའུ་ཆུང་སོར་མོ་བཅིངས་ནས་ནི། །མཛུབ་མོ་སོར་མོ་རྒྱབ་ནས་མདུད། །བཟློག་སྟེ་མགོ་བོར་གཞག་པར་བྱ། །ཨོཾ་བཛྲ་བྷནྡྷ་ཧཾ་ཞེས་བྱ་བ་ཕྱག་རྒྱ་དང་བཅས་པས་ནི་ཕོ་ཉ་རྣམས་སོ། །ཕྱག་རྒྱ་ནི་འདི་ཡིན་ཏེ། རྡོ་རྗེ་

བསྲུང་བ་དམ་བཅིངས་ཏེ། རྡོ་རྗེ་བསྡམས་པ་དེས་མནན་པ། །འདི་ནི་ས་ཡི་དམ་ཚིག་སྟེ། །སེམས་ཅན་ཐམས་ཅད་བསྲུང་བའོ། །ཨོཾ་བཛྲ་པཱ་ལཱ་བྷཉྩ་བྷཉྩ་ཧཱུྃ་ཕཊ། ཅེས་བྱ་བ་ནི་བྲན་རྣམས་སོ། །འདིའི་ཕྱག་རྒྱ་ནི། རྡོ་རྗེ་ཕྱག་རྒྱ་གཉིས་བཅིངས་ཏེ། །གཡོན་པའི་རྡོ་རྗེ་མཛུབ་མོས་མནན། །

གཅུ་ཞིང་སླར་གཅུ་བྱས་ནས་ནི། མཐེའུ་ཆུང་གཉིས་ནི་བརྡབ་པར་བྱ། །ཨོཾ་ཧེ་རུ་ཀ་བཛྲ་ས་མ་ཡེ་ཧཱུྃ་ཕཊ། སརྦ་དུཥྚ་ས་མ་ཡ་མུཛྫ་པྲ་བྷཉྩ་ཀ་ཧཱུྃ་ཕཊ། འདི་ནི་དབུ་མ་ལ་སོགས་པའི་མ་མོའི་ཚོགས་རྣམས་སོ། །འདིའི་ཕྱག་རྒྱ་ནི། རྡོ་རྗེ་བཅིང་བ་སྦྲེལ་པ་ནི། །མཛུབ་མོ་གཉིས་ནི་

དམ་པོར་བྱ། །མཐེ་བོང་གུང་མོ་རྩེ་མོ་གཉིས། །རྡོ་རྗེ་ཕྱག་རྒྱ་བཅིངས་ནས་ཀྱང་། །ཡོངས་སུ་བཟློག་སྟེ་དཔྲལ་བར་གཞག །མཐེ་བོ་ཁར་ནི་གཞག་པར་བྱ། །ཨོཾ་སུམྦྷ་ནི་སུམྦྷ་ཧཱུྃ་ཕཊ། ཅེས་བྱ་བ་དེ་བཞིན་གཤེགས་པའི་བཀའ་དང་། ཨོཾ་བཛྲ་ས་མ་ཡ་ཨཱ་ཀཪྵ་ཡ་སརྦ་དུཥྚ་མཎྜ་ལཾ་

བཛྲ་དྷ་ར་ས་ཏྱཾ་མཱ་ཏི་ཀྲ་མ་ཧཱུྃ་ཕཊ། ཅེས་བྱ་བ་འདི་ཕྱག་རྒྱ་དང་བཅས་པས་མ་རུངས་པའི་དཀྱིལ་འཁོར་དགུག་པར་བྱའོ། །རྡོ་རྗེ་ལྕགས་ཀྱུ་གཉིས་བཅིངས་ཏེ། །སྙིང་གར་ཡོངས་སུ་བསྐོར་བར་བྱ། །མཛུབ་གཉིས་ལྕགས་ཀྱུ་ཕྱི་རོལ་གྱི། །དཀྱིལ་འཁོར་དགུག་པའི་མཆོག་

ཡིན་ནོ། །ཡང་ཨོཾ་སུམྦྷ་ནི་སུམྦྷ་ཧཱུཾ་ཕཊ། ཅེས་བྱ་བའི་རྣམ་པར་སྣང་མཛད་ཀྱི་བཀའ་དང་། ཨོཾ་དུཥྚ་བཛྲ་ཀྲོ་དྷ་ཧ་ན་ད་ཧ་པ་ཙ་པིདྷྭནྶ་ཡ་བི་ཀི་ར་སརྦ་དུཥྚཱཾ་ས་མ་ཡ་མུ་དྲ་ན་མཎྜ་ལ་བྷཉྫ་བྷཉྫ་མརྡ་མརྡ་ཁ་དྷ་ཁ་དྷ་བ་ར་མནྟྲཾ་བཛྲ་ཧཱུཾ་ཕཊ། ཅེས་བྱ་བ་ནི་ཕྱག་རྒྱ་དང་བཅས་པས་མ་རུངས་པའི་

དཀྱིལ་འཁོར་རྣམ་པར་གཞིག་པར་བྱའོ། །རྡོ་རྗེ་ཁྲོ་བོ་མཛུབ་ལེགས་པར། །སེན་མོ་སྤྲད་དེ་དཀྲིས་ནས་ཀྱང་། །རྩེ་མོ་གཉིས་ནི་དམ་སྦྱར་བ། །ཕྱག་རྒྱ་འདི་ནི་མ་རུངས་འཇོམས། །ཨོཾ་ནི་སུམྦྷ་ཧ་ན་ད་ཧ་པ་ཙ་གྲྀཧྞ་བྷནྡྷ་ཧཱུྃ་ཕཊ། ཅེས་བྱ་བ་དེ་བཞིན་གཤེགས་པའི་བཀའ་དང་།

เล่ม ๖๒ · หน้า 81a

ཨོཾ་མཧཱ་བཛྲ་ཀྲཱུ་ར་ཀྲོ་དྷ་པ་ཏ་ཡེ་སརྦ་དུཥྚཱཾ་མཎྜལཾ་བི་ནཱ་ཤ་ཡ། སརྦ་དུཥྚ་ས་མ་ཡཾ་བ་ཀི་ར་བི་དྷྭནྶ་ཡ་སྥོ་ཊ་ཡ། བྷཉྫ་སརྦ་དུཥྚཱཾ་ས་མ་ཡ་མུ་དྲ་བནྡྷ། གྲྀཧྞ་ཧ་ན་ད་ཧ་པ་ཙ་སརྦ་དུཥྚཱཾ་ས་མ་ཡ་ས་ཏྭཱཾ་བཛྲ་ས་མ་ཡ་ཧཱུཾ་ཕཊ་ཅེས་བྱ་བ་དང་ཁྲོ་བོ་ཆེན་པོ་གདུག་པ་ཕྱག་དང་ཞལ་སྟོང་མངའ་བས་མ་

རུངས་པ་ཐམས་ཅད་བཅོམ་ནས་རྒྱ་མཚོ་ཆེན་པོར་ལྟུང་བར་བྱས་པར་བསམ་མོ། །དེ་ནས་འདིའི་ཕྱག་རྒྱ་བཤད་དེ། གཡོན་པའི་རྡོ་རྗེ་མཛུབ་མོ་ལ། །གཡས་པའི་མཛུབ་མོ་བཀུག་པས་གཟུང་། །རབ་ཏུ་ཁྲོས་ནས་དྲག་གཏོགས་ནས། །རི་རབ་ཀྱང་ནི་ལྷུང་བར་བྱེད། །ཨོཾ་ཧ་ན་ཧ་ན་བཛྲ་

ཧཱུཾ་ཕཊ། ཅེས་བྱ་བའི་དེ་བཞིན་གཤེགས་པའི་བཀའ་དང་། ཨོཾ་བཛྲ་ཨཱ་ཀཪྵ་ཡ་ཤཱི་གྷྲཾ་སརྦ་དུཥྚཱཾ་ད་ཧ་ན་བཛྲ་དྷ་ར་སཏྱེ་ན་ཧཱུཾ་ཛཿཞེས་བྱ་བའི་ཕྱག་རྒྱ་དང་བཅས་པས་ཕྲ་མེན་ལ་སོགས་པ་གདོན་མ་རུངས་པ་ཐམས་ཅད་དགུག་པར་བྱའོ། །ཕྱག་རྒྱ་ནི་འདི་ཡིན་ཏེ། གཡོན་པའི་རྡོ་རྗེ་མཛུབ་མོ་ལ། །

གཡས་པའི་མཛུབ་མོ་ལྕགས་ཀྱུས་གཟུང་། །རབ་ཏུ་ཁྲོས་ཤིང་དགུག་པ་ཡིས། །གདོན་རྣམས་ཐམས་ཅད་དབང་དུ་བྱེད། །ཨོཾ་བཛྲ་པྲ་ཏི་གྲྀ་ཧྣཧྲྀ་ད་ཡ་ཨཱ་ཀཪྵ་ཨཱདྱ་ཡན་སཏྭ་ཨརྡྷེ་ན་མྲི་ཡ་ཏེ་ཏ་སྱ་ཧྲྀ་ད་ཡཾ་ནིཥྛ་མ་ཏུ་ས་མ་ཡ་ཧཱུྃ་ཛ་ཞེས་བྱ་བ་དང་། ཕྱག་རྒྱ་འདིས་འཆི་བར་གྱུར་པ་དེ་རྣམས་

ཀྱི་མཚན་མོ་སྙིང་ཆུང་བ་ལ་ཕྲ་མན་མ་གདོན་རྣམས་ལ་སྦྱིན་ནོ། །དེ་རྣམས་དགའ་སྟེ་ཐམས་ཅད་མཁྱེན་པའི་ཡེ་ཤེས་གྲུབ་པར་བྱེད་དོ། །ཕྱག་རྒྱ་དེ་ནི་འདི་ཡིན་ཏེ། རྡོ་རྗེ་བཅིང་བ་བྱས་ནས་ནི། །ལག་ངར་སྙིང་གར་ཤིན་ཏུ་བསྡམས། །རྡོ་རྗེ་མཛུབ་མོ་རང་མཆན་ཁུང་། །བྲུད་པ་ཡི་ནི་

སྙིང་སྦྱིན་ནོ། །ཨོཾ་ཧཱུཾ་ཕཊ་ཅེས་བྱ་བ་དེ་བཞིན་གཤེགས་པའི་བཀའ་དང་། ཨོཾ་བཛྲ་ས་མ་ཡ་ཨ་ན་ཡ་སརྦ་དུཥྚ་ཛྭ་རཱ་དི་ན་ཨཱ་ཀཪྵ་ཡ་ཧཱུཾ་ཕཊ། ཅེས་ཟློས་ཤིང་ཕྱག་རྒྱ་དང་བཅས་པས་རིམས་ལ་སོགས་པ་དགུག་པར་བྱའོ། །ཕྱག་རྒྱ་ནི་འདི་ཡིན་ཏེ། མཛུབ་མོ་གཉིས་ཀྱི་རྩེ་མོ་ནི། །མཐེ་བོང་

གཉི་གའི་དྲུང་དུ་ནི། །ཡིད་ཀྱིས་ཁྲོས་ནས་བཙིར་བར་བྱ། །རིམས་ལ་སོགས་པར་དགུག་པར་བྱ། །ཨོཾ་བཛྲ་ཀརྨ་བི་ཤོ་དྷ་ཡ་སརྦ་ཨཱ་བ་ར་ཎ་ནི་བུདྡྷ་སཏྱེ་ན་ས་མ་ཡ་ཧཱུཾ་ཞེས་བྱ་བ་འདིས་ཕྱག་རྒྱ་དང་བཅས་པས་རང་ངམ་གཞན་གྱི་རིམས་ལ་སོགས་པའི་ནད་བསལ་བར་བྱའོ། །དེ་ལ་ཕྱག་

เล่ม ๖๒ · หน้า 81b

རྒྱ་ནི་འདི་ཡིན་ཏེ། རྡོ་རྗེ་ཐལ་མོ་དམ་སྦྱར་ཏེ། །གུང་མོ་གཉིས་ཀ་བཀུག་ནས་སུ། །མཐེ་བོ་རབ་ཏུ་མཉམ་སྦྱར་བས། །མནན་པ་དེ་ནི་སྡིག་འཕྲོག་པའོ། །ཨོཾ་ཀྵ་པ་ཡ་བཛྲ་སྭཱ་ཧཱ། ཞེས་བྱ་བ་དེ་བཞིན་གཤེགས་པའི་བཀའ་དང་། ཨོཾ་སརྦ་ཨ་པ་ཡ་ཨཱ་ཀཪྵ་ཎ་བི་ཤྭ་དྷ་ན་བཛྲ་ས་མ་ཡ་

ཧཱུཾ་ཕཊ་ཅེས་བྱ་བ་འདིས་ཕྱག་རྒྱ་དང་བཅས་པས་ངན་སོང་གསུམ་པོ་དགུག་པར་བྱའོ། །ཕྱག་རྒྱ་ནི་འདི་ཡིན་ཏེ། རྡོ་རྗེ་ཕྱག་རྒྱ་གཉིས་ནང་དུ། །མཛུབ་མོ་གཉིས་ནི་བཅིངས་ནས་ཀྱང་། །ལེགས་པར་གྱེན་དུ་འཕངས་པ་ནི། །ལྟུང་བ་སློང་བའི་དམ་པའོ། །ཨོཾ་བཛྲ་པཱ་ཎི་

བི་སྥོ་ཊ་ཡ་སརྦ་ཨཱ་པ་ཡ་བནྡྷ་ནཱ་ནི་པྲ་མོ་ཀྵ་ཡ་སརྦ་ཨཱ་པ་ཡ་ག་ཏི་བྷྱཿསརྦ་སཏྭ་ན་སརྦ་ཏ་ཐཱ་ག་ཏ་བཛྲ་ས་མ་ཡ་ཏྲཊ་ཅེས་བྱ་བ་འདིས་ངན་འགྲོའི་འགྲོ་བ་ཐམས་ཅད་རྣམ་པར་སྦྱངས་ལ། བཅོམ་ལྡན་འདས་རྣམ་པར་སྣང་མཛད་ཀྱི་ཞབས་དྲུང་དུ་སྐྱེས་པར་བསམ་པར་བྱའོ། །དེ་ནས་འདིའི་

ཕྱག་རྒྱ་བཤད་དེ། རྡོ་རྗེ་བཅིང་བ་དམ་བཅིངས་ཏེ། །གུང་མོ་ག་ཉི་ག་ངོས་སྦྱར་ནས། །ཐ་མ་བཞི་ཡང་རྩེ་ཕྲད་པ། །སྐད་ཅིག་དུ་ནི་སྡིག་དྲལ་ལོ། །རྡོ་རྗེ་ཁྲོ་བོའི་དཀྱིལ་འཁོར་གྱི་རྒྱལ་པོའི་མཆོག་ཅེས་བྱ་བའི་ཏིང་ངེ་འཛིན་ཏོ། །དེ་ནས་བསྡུ་བ་བྱས་ལ་སངས་རྒྱས་ཐམས་ཅད་ཀྱིས་བདག་

ཉིད་ཇི་ལྟ་བ་བཞིན་དུ་དབང་བསྐུར་བར་བྱའོ། །ཡང་དགུག་པ་དང་གཞུག་པ་དང་། བཅིང་བ་དང་། དབང་དུ་བྱས་ལ། ཇི་ལྟར་ཡོངས་སུ་བསྒོམ་པའི་དཀྱིལ་འཁོར་གྱི་གནས་སུ་ལྷ་ཐམས་ཅད་ཕྱག་རྒྱ་བཞིས་རྒྱས་གདབ་པར་བྱས་ནས་ཕྱག་རྒྱ་ཆེན་པོས་རང་གི་ལས་མཛད་པ་ལ་སྦྱར་བར་

བྱའོ། །རྡོ་རྗེ་ཁྲོ་བོ་ལས་ཀྱི་མཆོག །ཅེས་བྱ་བའི་ཏིང་ངེ་འཛིན་ཏོ། །དང་པོར་སྦྱོར་བ་དང་དཀྱིལ་འཁོར་གྱི་རྒྱལ་པོ་མཆོག་དང་ལས་ཀྱི་རྒྱལ་པོའི་མཆོག་གི་ཏིང་ངེ་འཛིན་ལ་མཉམ་པར་གཞག་པས་སྙོམས་པར་འཇུག་པར་བྱའོ་ཞེས་གསུངས་པས་ཏིང་ངེ་འཛིན་གསུམ་པོ་འདི་དག་ནི་ངེས་

པར་བསྒོམ་པར་བྱའོ། །ཡང་བསྡུ་བ་བྱས་ལ་མཚན་བརྒྱ་རྩ་བརྒྱད་པས་ཇི་ལྟ་བ་བཞིན་དུ་བསྟོད་པར་བྱའོ། །དེ་ནས་ལྕགས་ཀྱུ་ལ་སོགས་པས་ལས་བྱས་ལ་མཆོད་ཡོན་ཕུལ་ནས་ཐམས་ཅད་རང་གི་ཕྱག་རྒྱ་བཞིས་རྒྱས་བཏབ་ལ། དབང་བསྐུར་ལ་མེ་ཏོག་ལ་སོགས་པ་དམ་པ་བརྒྱད་

เล่ม ๖๒ · หน้า 82a

དམ་མཆོད་པ་བཅུ་དྲུག་གིས་ཡང་དག་པར་མཆོད་ལ། ཕྱག་བཞི་བྱས་ནས་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བཅིངས་ནས་རྡོ་རྗེ་བདག་ཉིད་ཅན་དང་རང་བཞིན་གྱིས་དག་པ་དང་། བདག་མེད་པའི་མཉམ་པ་ཉིད་ཀྱིས་སེམས་དཔའ་ཐམས་ཅད་དང་བདག་ཉིད་རྣམ་པར་

བསྒོམས་ནས། ཁྲོ་བོའི་ཚིག་གམ་རྡོ་རྗེའི་ཚིག་གམ། ཡིད་ཉིད་ཀྱིས་ཧཱུཾ་བཞི་ཟློས་ཤིང་ཆོས་བདག་མེད་པའི་མཉམ་པ་ཉིད་ཀྱིས་ཡེ་ཤེས་ཀྱི་དབང་དུ་བྱས་ལ། ཇི་སྲིད་སོ་སོར་སྣང་བའི་སྦྱོར་བས་ཁྲོ་བོའི་འཁོར་ལོར་གཏོགས་པ་ཐམས་ཅད་བསྒོམ་པར་བྱའོ། །ལྷ་ཐམས་

ཅད་ཀྱི་ཞལ་ནས་ཀྱང་ཧཱུཾ་བཞིའི་སྒྲ་བྱུང་བར་ལྷག་པར་མོས་པར་བྱའོ། །བསྒོམ་པ་ཉེ་བར་སྡུད་པའི་དུས་སུ་ཡང་དེ་བཞིན་དུ་ཡིད་ཀྱིས་ལེགས་པར་སྦྱོར་བས་རང་གི་ལུས་ལ་གཞུག་པར་བྱ་ཞིང་བདག་ཉིད་དེ་བཞིན་གཤེགས་པ་ཐམས་ཅད་འདུས་པའི་དབུས་ན་བཞུགས་

བའམ། རྡོ་རྗེ་ཧཱུཾ་མཛད་གཅིག་པོར་བསྒོམ་པར་བྱ་བའམ། མདུན་དུ་དེ་བཞིན་གཤེགས་པ་ཐམས་ཅད་འདུས་པའི་དབུས་ན་གནས་པའི་བཅོམ་ལྡན་འདས་རྡོ་རྗེ་ཧཱུཾ་མཛད་བསྒོམ་པར་བྱའོ། །སྦྱོར་བ་འདིས་ནི། །སངས་རྒྱས་བཀའ་ཡི་འགྲོ་ཀུན་དོན། །དངོས་གྲུབ་ཀུན་

གྱི་ཆོ་ག་ཡིས། །ཕྱག་རྒྱ་ཆེན་པོ་བསྒོམས་ན་ནི། །ཚེ་འདི་ཉིད་ལ་འཚང་རྒྱའོ། །གལ་ཏེ་གང་གི་ཚེ་ཕྱག་རྒྱར་བྱིན་གྱིས་བརླབས་པ་ལྷོད་པར་གྱུར་ཏམ་བདག་ཉིད་གཏོང་བར་འདོད་པར་གྱུར་ན་དའི་ཚེ་ཡི་གེ་བརྒྱ་པས་བརྟན་པར་བྱའོ། །བསྒོམ་པས་དུབ་པར་གྱུར་ན་མཚན་བརྒྱ་

རྩ་བརྒྱད་ཀྱིས་བསྟོད་པ་དང་། མཆོད་པ་རྣམ་པ་བརྒྱད་དང་ཕྱག་བཞི་བྱའོ། །དེ་ལྟར་ཇི་སྲིད་སྐྱོ་བར་མ་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །སྐྱོ་བར་གྱུར་ན་མཚན་རྩ་བརྒྱད་ཀྱིས་བསྟོད་པ་དང་མཆོད་པ་ཐམས་ཅད་དང་། ཕྱག་བཞི་བྱས་ནས། ཨོཾ་བཛྲ་ས་ཏྭ་ཧཱུྃ་ཛཿ

ཞེས་བྱ་བ་ཕྱག་རྒྱ་དང་ལྡན་པས་ལྷ་ཆེན་པོ་གསོ་བར་བྱའོ། །དེ་ཡང་འདི་ཡིན་ཏེ། གསང་བའི་ལྕགས་ཀྱུ་བསྡམས་བྱས་ཏེ། །ཐ་མ་མཉམ་དུ་བརྐྱང་ནས་ནི། །ཤི་བའི་མགོ་བོར་བཞག་ན་ནི། །སྲོག་ནི་ཕྱིར་ཡང་ཐོབ་པར་འགྱུར། །རྡོ་རྗེ་བསྡམས་པ་ནང་དུ་གཞིབས་ནས་

เล่ม ๖๒ · หน้า 82b

མཛུབ་མོ་གཉིས་ལྕགས་ཀྱུར་བྱ་བ་ནི་གསང་བའི་ལྕགས་ཀྱུའོ། །དེ་ནས་ཨོཾ་བཛྲ་མུཿཞེས་བྱ་བ་འདི་ཕྱག་རྒྱ་དང་ལྡན་པས་ལྷ་ཆེན་པོ་ཆུང་མ་དང་བཅས་པ་རྐང་པའི་འོག་ནས་གཏང་བར་བྱའོ། །དེ་ནི་འདི་ཡིན་ཏེ། རྡོ་རྗེ་ཁྲོ་བོ་མཛུབ་ལེགས་པར། །ཟུར་སྤྲད་བསྡམས་ཏེ་གཞག་པ་ནི། །

རྡོ་རྗེ་དེ་དག་བསྒྱུར་བྱས་ཤིང་། །འོག་ནས་ཡང་དག་འབྱིན་པར་བྱེད། །བཛྲོ་ཏྟིཥྛ་ཞེས་བྱ་བས་ཀྱང་སླར་དབང་བསྐུར་བར་བྱའོ། །ཨོཾ་ཙནྡྲོ་ཏྟ་རེ་ས་མནྟ་བྷ་དྲ་ཀིར་ཎི་མཧཱ་བཛྲཱ་ནི་ཧཱུྃ་ཞེས་བྱ་བ་ནི་ཕྱག་རྒྱ་དང་བཅས་པ་བྱ་སྟེ། དེ་ནི་འདི་ཡིན་ཏེ། རྡོ་རྗེ་བཅིང་བ་དམ་བྱས་ཏེ། །མཐེ་བོང་མཐེའུ་

ཆུང་མཉམ་པོར་ནི། །མཉམ་ནས་ལེགས་པར་བརྐྱང་བ་ནི། །ཟླ་བའི་རི་མོ་ཞེས་ཀྱང་གྲགས། །ལྷ་མོ་ཨུ་མ་ཡང་སྔར་བཤད་པའི་རྡོ་རྗེ་རིན་ཆེན་གྱི་དབང་བསྐུར་བས་དབང་བསྐུར་ལ། ལྷ་ཆེན་པོ་གསང་བའི་མཆོད་པ་བཞིས་ལེགས་པར་མཆོད་དེ། མངོན་པར་འདོད་པའི་དངོས་གྲུབ་

ཀྱི་ཕྱིར་དགེ་བའི་རྩ་བ་བསྔོས་ནས་མཆོད་ཡོན་ཕུལ་ལ། ཕྱག་རྒྱ་དེ་དགྲོལ་བར་བྱས་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་དང་བཅས་པ་ལ་བཟོད་པར་གསོལ་བར་བྱའོ། །བཅོམ་ལྡན་འདས་བདག་སོ་སོའི་སྐྱེ་བོར་གྱུར་པས་ཆོ་ག་ལྷག་ཆད་དུ་གྱུར་པ་གང་ཅི་བགྱིས་པ་

དེ་ཐམས་ཅད་བདག་ལ་བཟོད་པར་མཛོད་ཅིག་ཅེས་བཟོད་པ་གསོལ་བར་བྱའོ། །དེ་ནས་གཤེགས་སུ་གསོལ་བའི་ཕྱིར་བསྐུལ་བར་བྱ་སྟེ། ཨོཾ་ཁྱོད་ཀྱིས་འགྲོ་བའི་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་སུ་གསོལ། །སླར་ཡང་

གཤེགས་པར་མཛད་དུ་གསོལ། །ཞེས་པ་དང་ཁྲོ་བོ་ཏི་རཱིནྟ་རིའི་ཧཱུྃ་བཞིས་མུཿཞེས་བྱ་བའི་མཐའ་དང་ལྡན་པ་གྱེན་དུ་དགྲོལ་ལོ། །དེ་ལྟ་བུས་ནི་ཐམས་ཅད་གཤེགས་སུ་གསོལ་བར་འགྱུར་རོ། །ཇི་ལྟར་སྤྲུལ་པའི་རིགས་ཀྱི་དཀྱིལ་འཁོར་དང་བཅས་པ་ཐམས་ཅད་ཀྱང་དེ་བཞིན་དུ་ཡིད་

ཀྱིས་ལེགས་པར་སྦྱོར་བས། རང་གི་ལུས་ལ་བཅུག་ལ་ཡི་གེ་བརྒྱ་པས་བརྟན་པར་བྱ་སྟེ། རྡོ་རྗེ་སེམས་དཔའ་ལན་ཅིག་བཟླས་ཤིང་། རྡོ་རྗེ་གོ་ཆ་དང་། རྡོ་རྗེ་གནོད་སྦྱིན་དང་། རྡོ་རྗེ་སེམས་པའི་གཙུག་ཏོར་དང་། རྡོ་རྗེ་ཁུ་ཚུར་གྱི་བདག་ཉིད་སྲུང་བ་བྱས་ནས། རང་གི་ལྷའི་

เล่ม ๖๒ · หน้า 83a

ང་རྒྱལ་དང་ལྡན་པ་ཉིད་ཀྱིས་ལྡང་བར་བྱའོ། །དེ་ལྟར་ཉིན་རེ་བཞིན་ཐུན་བཞིར་ཟླ་བ་གཅིག་གམ་ཟླ་བ་དྲུག་གམ། ལོ་གཅིག་གམ། དུས་ཇི་སྲིད་ཀྱི་ལྷ་རྣམས་ཀྱི་རྗེས་སུ་གནང་བ་སྩལ་བ་དེ་སྲིད་ཀྱི་བར་དུ་བསྒོམ་པར་བྱའོ། །མི་ནུས་པས་ནི་རྣལ་འབྱོར་ཆེན་

པོ་ཉིན་རེ་བཞིན་ལན་ཅིག་བསྒོམས་ལ་སྔགས་ཐམས་ཅད་ཀྱི་བཟླས་བརྗོད་འབུམ་བྱའོ། །སྔོན་དུ་བསྙེན་པའི་ཆོ་གའོ། །དེའི་རྗེས་ལ་དཀྱིལ་འཁོར་བྲི་བར་བྱ་སྟེ། ཉིན་རེའམ་ནི་ཟླ་བ་རེ། །ལོ་ནི་རེ་རེ་ཉིད་དག་ཏུ། །ཡར་གྱི་ངོ་ལ་ཆོ་ག་བཞིན། །བསྒྲུབ་བྱ་ཇི་ལྟར་མངོན་འདོད་བྲི། །དེ་

ལ་རྒྱལ་པོ་ནི་ཁྲུ་བརྒྱའམ་ལྔ་བཅུ་པའོ། །བློན་པོའམ་བློན་པོ་ཆེན་པོ་ནི་ཁྲུ་ལྔ་བཅུ་པའམ་ཉི་ཤུ་རྩ་ལྔ་པའོ། །ཚོང་དཔོན་ནམ་དེད་དཔོན་གྱི་ནི་ཁྲུ་ཉི་ཤུ་རྩ་ལྔའམ་དེའི་ཕྱེད་དོ། །སྒྲུབ་པ་པོ་ཁྲུ་བཅུ་གཉིས་སམ། ཁྲུ་དྲུག་གམ་ཇི་ཙམ་ནུས་པ་ལ་བྱའོ། །དེ་ལ་དང་པོ་རེ་ཞིག་ཡོ་བྱད་

ཐམས་ཅད་དང་ལྡན་པས། མངོན་པར་འདོད་པའི་དཀྱིལ་འཁོར་གྱི་སའི་དབུས་སུ། མི་རུས་ཀྱི་ཕྱེ་མས་དཀྱིལ་འཁོར་གྱི་བགེགས་བསལ་ནས། བདག་དང་སློབ་མ་ལ་སོགས་པ་ཞི་བར་བྱེད་པའི་སྦྱིན་སྲེག་བྱའོ། །དེ་ནས་ས་སྦྱང་བར་བྱ་སྟེ། ཟབས་སུ་འདོམ་གང་ཙམ་ལ་ཁྲུ་

གང་ཙམ་བརྐོས་ལ། དྲི་ཞིམ་པོས་བྲན་པའི་སས་བཀང་ནས། རྡོ་རྗེ་རྩེ་མོ་མངོན་པར་བཟླས་པའི་ཆུས་ཆག་ཆག་བཏབ་ལ་ལེགས་པར་བཅགས་ཏེ། ཤིན་ཏུ་མཉམ་པར་བྱས་ལ་སྒོ་བཞི་དང་སྐར་ཁུང་གིས་ཡོངས་སུ་བསྐོར་བ་རྟ་བབས་བཞིས་མཛེས་པར་བྱས་པའི་ཁང་པ་

བརྩེགས་པའི་ནང་དུ་ཆུད་པར་བྱས་ལ་མཐའ་མར་ལེགས་པར་བྲིས་ཤིང་དྲིལ་བུ་བཏགས་པའི་རྒྱལ་མཚན་དམ་པ་དང་། བླ་རེ་མཆོག་བྲེས་པ། སངས་རྒྱས་རིན་པོ་ཆེ་ལ་སོགས་པའི་རས་རིས་ཀྱིས་མཛེས་པར་བྱས་ལ། བའི་ལྕི་བས་ལེགས་པར་སྦྱངས་ལ། དྲིས་བྱུགས་ནས་མཚམས་

བཞིར་སྤོད་སྣོད་བཞི་དང་མེ་ཏོག་དང་མར་མེ་ལ་སོགས་པས་ཉེ་བར་མཛེས་པར་བྱས་ལ། ས་ལ་ལག་པས་རེག་པར་བྱ་སྟེ། ཧཱུྃ་བཞི་དང་ཡི་གེ་བརྒྱ་པ་ལན་བདུན་ཡོངས་སུ་བཟླས་པར་བྱའོ། །དེ་ནས་བདག་ཉིད་ཁྲུས་བྱས་ཤིང་དྲིས་བྱུགས་ལ་གོས་དང་སྟོད་གཡོགས་སྔོན་པོ་བགོས་

เล่ม ๖๒ · หน้า 83b

ཤིང་སེམས་དཔའི་གཙུག་ཏོར་དང་། མེ་ཏོག་གི་ཕྲེང་བ་བཏགས་པ་ཁ་དྲི་ཞིམ་པར་བྱ་བ་དང་། གདུ་བུ་དང་། རྣ་ཆ་ལ་སོགས་པས་བརྒྱན་པར་བྱས་ལ། ཟླ་བའི་ཉ་ནས་ཕྱི་མའི་ཉའི་བར་དུ་དཀྱིལ་འཁོར་གྱི་ལས་བྱ་བའམ། ཡར་གྱི་ངོའི་ཚེས་གཅིག་ནས་བརྩམ་པའམ། དེ་

བཞིན་དུ་ཚེས་བརྒྱད་དམ་དགུ་འམ་བཅུ་འམ་བཅུ་གསུམ་མམ། བཅུ་བཞི་ལ་བརྩམས་ནས་ཉའི་བར་བྱ་བའམ། སྔ་དྲོའི་དུས་ནས་བརྩམས་ཏེ་བྱའོ། །གལ་ཏེ་ནུས་པར་གྱུར་ན་ནི་སྨྱུང་བར་བྱའོ། །འོན་ཏེ་མ་ནུས་ན་དེའི་ཚེ་རྡོ་རྗེ་ཆོས་ཡོངས་སུ་བཟླས་པའི་སྤོས་ཆུས་བསངས་པའི་

དཀར་གསུམ་བཟའ་བར་བྱ་སྟེ། སྤྱན་འདྲེན་པའི་ཞག་སྨྱུང་བར་གནས་པའམ། ཆོས་དང་ལྡན་པའི་ཟས་ལ་བརྟེན་པར་བྱའོ་ཞེས་བཅོམ་ལྡན་འདས་རྡོ་རྗེ་འཛིན་པས་གསུངས་སོ། །དེ་ལ་རེ་ཞིག་དཀྱིལ་འཁོར་གྱི་སའི་དབུས་སུ་འདུག་ལ། བགེགས་གཞོམ་པ་ལ་སོགས་

པ་ཇི་ལྟ་བ་བཞིན་དུ་བྱའོ། །དེ་ནས་རྡོ་རྗེ་འཁོར་ལོའི་ཕྱག་རྒྱས་དེ་བཞིན་དུ་དཀྱིལ་འཁོར་སྤྲུལ་ལ། ཕྱག་བྱ་བ་ལ་སོགས་པ་སྔོན་དུ་འགྲོ་བས་སྡོམ་པ་བཟུང་ནས་ལྷའི་རྣལ་འབྱོར་དང་ཁང་པ་བརྩེགས་པ་དང་། གདན་རྣམས་བསྐྱེད་ལ་དཀྱིལ་འཁོར་གྱི་སའི་དབུས་སུ་སེམས་

དཔའི་སྐྱིལ་མོ་ཀྲུང་གིས་འདུག་ལ། བདག་ཉིད་སྤྲོ་བ་བསྐྱེད་པར་བྱའོ། །དེང་དུ་བདག་ཚེ་འབྲས་བུ་ཡོད། །བདག་གི་གསོན་པའང་འབྲས་བུར་བཅས། །ལྷ་དང་དམ་ཚིག་གིས་མཉམ་པར། །གྱུར་པར་བདག་ཉིད་སོམ་ཉི་མེད། །བྱང་ཆུབ་སེམས་དང་སེམས་གཅིག་ལས། །

མི་ལྡོག་པར་ནི་བདག་གྱུར་ཏེ། །དེ་བཞིན་གཤེགས་པའི་རིགས་སུ་ནི། །དེང་བདག་སྐྱེ་བར་ཐེ་ཚོམ་མེད། །དེང་བདག་ཉི་མ་དམ་པ་སྟེ། །བདག་གི་མཆོད་སྦྱིན་བླ་ན་མེད། །སངས་རྒྱས་ཐམས་ཅད་སྤྱན་འདྲེན་པས། །དེང་བདག་འདུས་པའི་མཆོག་ཡིན་ནོ། །དེ་ནས་ཡན་ལག་

ཐམས་ཅད་ཀྱིས་ཕྱག་བྱས་ལ་སྤོས་སྣོད་ལག་ཏུ་ཐོགས་ཏེ། སངས་རྒྱས་ཐམས་ཅད་སྤྱན་དྲང་བར་བྱའོ། །མ་ལུས་ཕྱོགས་ན་བཞུགས་པ་ཡི། །སངས་རྒྱས་ཐམས་ཅད་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །རྡོ་རྗེ་ཅན་གྱི་དཀྱིལ་འཁོར་བྲི། །དེང་འདིར་

เล่ม ๖๒ · หน้า 84a

སངས་རྒྱས་ཀུན་གཤེགས་ཏེ། དངོས་གྲུབ་འདི་ནི་སྩལ་དུ་གསོལ། །དེའི་རྗེས་ལ་སྔར་བཤད་པའི་རིམ་པས་དེ་བཞིན་དུ་ཏིང་ངེ་འཛིན་གསུམ་བསྒོམ་པར་བྱའོ། །དེ་ནས། དེ་ཉིད་ཀྱིས་ནི་རྡོ་རྗེ་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གི་ནི་ཕྱག་

རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །དེ་ལྟར་དམ་ཚིག་གསུམ་མཆོག་ཏུ་ཐོབ་པའི་སློབ་དཔོན་གྱིས་རང་གི་ཕྱག་རྒྱས། འཁོར་ལོ་ཀུན་གྱི་ཆོ་ག་ནི། །རྡོ་རྗེ་དྲིལ་བུ་འཛིན་པས་བྱ། །དཀྱིལ་འཁོར་ཐམས་ཅད་སྒྲུབ་བྱེད་པའི། །རྟོག་པ་ཀུན་ལ་ཡང་དག་འཇུག །

དམ་ཚིག་ཆེ་གསུམ་ཞེས་བྱ་བ། །རྒྱ་འདི་གསང་སྔགས་སྒྲུབ་བྱེད་ཡིན། །དངོས་གྲུབ་ཀུན་གྱི་ཆོ་ག་ལ། །རྡོ་རྗེ་དྲིལ་བུ་རབ་སྒྲུབ་ཡིན། །ཆོ་ག་ལྷག་གམ་མ་ཚང་ཡང་། །འགྲུབ་འགྱུར་སྨད་པར་མི་བྱའོ། །བཅོམ་ལྡན་འདས་ལ་ཡང་གསོལ་བ་གདབ་པར་བྱ་སྟེ། །བཅོམ་ལྡན་

འདས་སེམས་ཅན་གྱི་ཁམས་མ་ལུས་པ་ལུས་པ་མེད་པའི་སྐྱབས་དང་། ཕན་པ་དང་། བདེ་བ་ཐམས་ཅད་མྱོང་བར་བགྱི་བ་ནས། དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་ཀྱི་གྲུབ་པ་དམ་པའི་འབྲས་བུ་ཐོབ་པར་བགྱི་བའི་བར་དུ་སྩོལ་ཅིག་པར་བདག་ལ་བཅོམ་

ལྡན་འདས་དེ་བཞིན་གཤེགས་པ་ཐམས་ཅད་ཀྱིས་གྲུབ་པའི་རྡོ་རྗེ་སྩལ་ཏེ། དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་ན། མི་འདི་རྣམས་ཇི་ལྟར་བགྱི་བ་དེ་བཞིན་གཤེགས་པ་ཐམས་ཅད་ཀྱིས་བཀའ་སྩོལ་ཅིག །དེ་ནས་དེ་བཞིན་གཤེགས་པ་ཐམས་ཅད་ཡང་གཅིག་

ཏུ་འདུས་ནས་འདི་སྐད་ཅེས་བཀའ་སྩལ་ཏོ། །ཨོཾ་བཛྲ་པཱ་ཎི་མ་ཧཱ་མ་ད་ལཾ། པྲ་བེ་ཤ་ཡ་སརྦཾ་དུཥྚཱཾ་རོ་ཏྲན་ནི་བ་ར་ཡ་བ་བེ་བྱ། པྲ་མོ་ཀྵ་ཡ་དུར་དྲྀཥྚ་པརྱ་བནྡྷ་བི་ཤོ་དྷ་ཡ་ནཱ་ཤ་ཡ། བི་ནཱ་ཤ་ཡ་ཧ་ཧ་ཧ་ཧ་ཧཱུྃ། དེ་ལྟར་རྗེས་སུ་གནང་བ་ཐོབ་པ་དང་། །ཁམས་གསུམ་རྣམ་པར་རྒྱལ་བའི་

ཕྱག་རྒྱས་དཀྱིལ་འཁོར་སྟེང་དུ་ནམ་མཁའ་ལ་བཞག་ནས། དེ་ཉིད་ཀྱི་བདག་ཉིད་བྱིན་གྱིས་བརླབས་ཏེ། ཕྱག་རྒྱ་དེ་ཉིད་རང་གི་སྙིང་གར་བཞག་ལ་དེའི་ང་རྒྱལ་དང་ལྡན་པས་ཁྲོ་བོའི་ལྟ་བས་བལྟ་ཞིང་དབང་ལྡན་ནས་བརྩམས་ཏེ། བགེགས་ཐམས་ཅད་བསྐྲད་པ་ལ་བརྩོན་པར་བྱའོ། །ཡི་གེ་ཨ་

เล่ม ๖๒ · หน้า 84b

ལས་རང་གི་རྐང་མཐིལ་གཉིས་སུ་སྣ་ཚོགས་རྡོ་རྗེ་བཀོད་ལ། རང་གི་རྐང་མཐིལ་གྱིས་ཡོངས་སུ་བཟུང་ནས། རླུང་གི་དཀྱིལ་འཁོར་ནས་བརྩམས་ཏེ་རི་རབ་ཀྱི་སྟེང་གི་བར་དུ་དཀྱིལ་འཁོར་གྱི་གནས་དེ་རྡོ་རྗེའི་རང་བཞིན་དུ་གྱུར་པར་མོས་པས་ཧཱུྃ་བཞི་ཟློས་ཤིང་། གཡས་ནས་

བསྐོར་བས་འགྲོ་བར་བྱའོ། །དེ་ནས་ཁྲོ་བོའི་ལྟ་བས་དཀྱིལ་འཁོར་བཅིང་བ་དང་། ར་བ་དང་། རྡོ་རྗེ་དྲ་བ་བྱའོ། །ཡང་ཧཱུྃ་ཞེས་ཟློས་ཤིང་རྡོ་རྗེ་ཧཱུྃ་མཛད་ཀྱི་གཟུགས་ཉིད་ཀྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་བྱུང་སྟེ། འཇིག་རྟེན་གྱི་ཁམས་ཐམས་ཅད་

རྡོ་རྗེ་སེམས་དཔའི་ཁྲོ་བོ་ལ་སོགས་པ་རྡོ་རྗེ་འབར་བ་འཇིགས་སུ་རུང་བ་ཀུན་དུ་འཁྲུགས་པ། ཧཱུྃ་ཞེས་བྱ་བའི་དགྲ་འཇིགས་སུ་རུང་བས་ལྐོག་མའི་ཕྱོགས་ཀུན་དུ་གང་བ་དང་། ཁྲོ་བོའི་སྐུ་མཆོག་གིས་མི་གཡོ་བ་རྡོ་རྗེ་འབེབས་པའི་ཚུལ་གྱིས་ནམ་མཁའ་ནས་བབས་ཏེ། གར་

ལས་བྱུང་བའི་མེ་ཏོག་གི་ཐལ་མོས་དེ་བཞིན་གཤེགས་པ་ཐམས་ཅད་ཡང་དག་པར་མཆོད་ལ། དཀྱིལ་འཁོར་གྱི་ལྟེ་བར་གཡོན་བརྐྱང་པས་འདུག་སྟེ། བསྐལ་པའི་མེ་དཔུང་ལྟར་འབར་བའི་ཁྲོ་བོའི་ཚོགས་འབྱིན་པས་བདུད་ཐམས་ཅད་ཀུན་དུ་སྐྲག་པར་བྱའོ། དེ་ནས་

དགའ་བས་ཡོངས་སུ་བསྐོར་བའི་ཚུལ་གྱིས་ཤར་ཕྱོགས་སུ་འགྲོ་བར་བྱའོ། །དེ་ནས་དེས་གཡོན་བརྐྱང་བའི་གནས་པ་ཉིད་ཀྱིས་འདུག་ལ། བགེགས་ཐམས་ཅད་བསྐྲད་པར་བྱའོ། །དེ་ནས་གནས་དེ་ནས་ལྷོ་ཕྱོགས་སུ་སོང་ལ་གཡས་བརྐྱང་བའི་གནས་པས་དེ་བཞིན་དུ་བགེགས་

རྣམས་རྗེས་སུ་བསྐྲད་པར་བྱའོ། །དེ་ནས་གནས་དེ་ནས་གཡས་བརྐྱང་བ་དང་། གཡོན་བརྐྱང་བདག་གིས་ནུབ་ཕྱོགས་སུ་སོང་ལ། ཟླུམ་པོའི་འདུག་སྟངས་བཅས་ནས་དེ་བཞིན་དུ་བགེགས་རྣམས་བསྐྲད་པར་བྱའོ། །དེ་ནས་གནས་དེ་ནས་ནམ་མཁའི་ཁམས་མ་ལུས་པར་ཁྱབ་པར་

གཏོགས་པའི་འཇིག་རྟེན་གྱི་ཁམས་རྣམས་གཡོ་བར་བྱེད་པའི་རྡོ་རྗེའི་འགྲོས་ཀྱིས་བྱང་ཕྱོགས་སུ་འགྲོ་བར་བྱའོ། །དེ་ནས་གཡས་བརྐྱང་བ་དང་མཐུན་པའི་རྐང་སྟབས་དང་། ཟླུམ་པོའི་འདུག་སྟངས་དང་། ས་གའི་འདུག་སྟངས་རྣམས་ཀྱིས་བགེགས་རྣམས་ངེས་པར་བསྐྲད་

เล่ม ๖๒ · หน้า 85a

པར་བྱས་ནས། རྡོ་རྗེའི་འགྲོས་ཀྱིས་ཤར་ཕྱོགས་སུ་འགྲོ་བར་བྱའོ། །དེ་ལྟར་ན་སྟང་སྟབས་བཞིས་བགེགས་ཐམས་ཅད་གཞོམ་པར་བྱའོ། །ཡང་རྡོ་རྗེའི་འགྲོས་ཀྱིས་དཀྱིལ་འཁོར་གྱི་ལྟེ་བ་བསྐོར་བར་བྱས་ལ། ཤར་ཕྱོགས་སུ་མངོན་པར་བལྟས་ཏེ།

མཆོད་ནས་དཀྱིལ་འཁོར་གྱི་ལྟེ་བ་ཕུར་བུའི་འགྲོས་སུ་འགྲོ་བར་བྱའོ། །དེ་བཞིན་དུ་གཞན་གྱིས་མི་ཐུབ་པ་ཞེས་བྱ་བའི་ཁྲོ་བོའི་ཕུར་བུས་དཀྱིལ་འཁོར་གྱི་གནས་སུ་ཕུར་བུས་གདབ་པར་བྱའོ། །སྟང་སྟབས་བྱེད་པའི་དུས་འདིར་ཁྲོ་བོའི་ཚིག་གིས་ཧཱུྃ་ཞེས་བྱ་བའི་སྒྲ་རྒྱུན་མི་འཆད་

པར་གདོན་པར་བྱའོ། །དེ་ནས་རྡོ་རྗེའི་འདུག་སྟངས་ཕྱེད་ཀྱིས་འདུག་ལ། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུྃ་ཞེས་ཟློས་ཤིང་གཡོན་པའི་རྡོ་རྗེ་ཁུ་ཚུར་སྙིང་གར་བཞག་ནས། གཡས་པས་རྡོ་རྗེ་བསོར་ཞིང་བགེགས་རྣམས་ལ་བསྣུན་པར་བྱའོ། །ཡང་རྡོ་རྗེ་མེའི་ཕྱག་རྒྱ་དང་བཅས་པས་ཀྱང་བགེགས་

རྣམས་བསྲེག་པ་ལ་སོགས་པ་བྱ་སྟེ། ཧཱུྃ་བཛྲ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུྃ་ཕཊ་རྡོ་རྗེ་བསྡམས་པ་ནང་དུ་བཅིངས་ལ། སོར་མོ་རྣམས་ནང་དུ་འབར་བ་ལྟར་བྱས་ལ་མཐེ་བོ་རྡོ་རྗེ་ལྟར་བསྒྲེང་བ་ནི་རྡོ་རྗེ་མེའི་ཕྱག་རྒྱའོ། །ཨོཾ་བཛྲ་ནཻ་ཏྲི་བནྡྷ་སརྦ་བིགྷྣཱན་ཞེས་བྱ་བ་ཕྱག་རྒྱ་དང་ལྡན་པས་བགེགས་

རྣམས་བཅིང་བར་བྱའོ། །རྡོ་རྗེ་བསྡམས་པ་ལས་མཐེ་བོང་གཉིས་བརྐྱང་སྟེ་སྙོམས་ལ་བཞག་པ་ནི་རྡོ་རྗེ་སྤྱན་དང་ལྡན་པའི་ཕྱག་རྒྱའོ། །རྡོ་རྗེ་བསྡམས་པ་བརྐྱང་ལ་བཞག་སྟེ། ཨོཾ་བཛྲ་དྲྀ་ཌྷོ་མེ་བྷ་བ་རཀྵ་སརྦཾ་སྭཱ་ཧཱ། ཞེས་བྱ་བ་དང་འོག་བཅིང་བར་བྱའོ། །རྡོ་རྗེ་གནོད་སྦྱིན་གྱི་ཕྱག་རྒྱ་དང་སྔགས།

ཨོཾ་བཛྲ་ཡཀྵ་ཧཱུྃ་ཞེས་བྱ་བ་ཕྱག་རྒྱ་དང་བཅས་པས་ནམ་མཁའ་བཅིང་བར་བྱའོ། །རྡོ་རྗེ་ཐལ་མོ་མཐེ་བོང་གཉིས་བརྐྱང་ལ་མཛུབ་མོ་གཉིས་མཆེ་བ་ལྟ་བུར་བྱ་བ་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ། །ཡང་རྡོ་རྗེ་འཇིགས་བྱེད་ཀྱི་སྤྱན་གྱིས་རྡོ་རྗེ་གནོད་སྦྱིན་གྱི་སྟེང་དུ་ནམ་མཁའ་བཅིང་བར་བྱའོ། །

ཨོཾ་ཧུ་ལུ་ཧུ་ལུ་ཧཱུྃ་ཕཊ། རྡོ་རྗེ་ཁུ་ཚུར་གཉིས་བཅིངས་ལ། །མགལ་མེའི་འཁོར་ལོ་བཞིན་དུ་བསྐོར་ཏེ། མགོ་བོའི་སྟེང་དུ་མཛུབ་མོ་གཉིས་ལྕགས་ཀྱུའི་ཚུལ་དུ་གཞག་པ་ནི་རྡོ་རྗེ་འཇིགས་བྱེད་ཀྱི་སྤྱན་གྱི་ཕྱག་རྒྱའོ། །རྡོ་རྗེ་གཙུག་ཏོར་གྱི་ཕྱག་རྒྱ་དང་བཅས་པས་ཤར་ཕྱོགས་བཅིང་བར་

เล่ม ๖๒ · หน้า 85b

བྱ་སྟེ། ཨོཾ་ཧཱུྃ་ཞེས་བྱ་བའི་སྔགས་སོ། །རྡོ་རྗེ་ཁུ་ཚུར་གཉིས་བཅིངས་ལ། མཐེའུ་ཆུང་གཉིས་ལུ་གུ་རྒྱུད་དུ་སྦྲེལ། མཛུབ་མོ་གཉིས་རྩེ་མོ་སྦྱར་ལ་བཟློག་སྟེ་སྤྱི་བོར་གཞག་པ་འདི་ནི་རྡོ་རྗེ་གཙུག་ཏོར་གྱི་ཕྱག་རྒྱའོ། །ཡང་རྡོ་རྗེ་ཞགས་པས་དེ་ཉིད་བཅིང་བར་བྱ་སྟེ། ཧཱུྃ་བཛྲ་པཱ་ཤ་ཧྲཱིཿརྡོ་རྗེ་

ཁུ་ཚུར་གཉིས་ཀྱི་མཁྲིག་མ་མདུད་པ་བྱས་པ་ནི་རྡོ་རྗེ་ཞགས་པའོ། །རྡོ་རྗེ་བ་དན་གྱིས་ནུབ་ཕྱོགས་བཅིང་བར་བྱ་སྟེ། ཨོཾ་བཛྲ་པཱ་ཏང་ཀི་པཱ་ཏང་ཀི་ནི་ར་ཊ་རྡོ་རྗེ་བསྡམས་པའི་མཐེ་བོང་གཉིས་སེམས་དཔའི་སྐྱིལ་མོ་ཀྲུང་དུ་བྱས་ལ། མཛུབ་མོ་གཉིས་མཉམ་ནས་སྲིན་ལག་ཕྱེ་སྟེ། མཐེའུ་ཆུང་

གཉིས་བ་དན་གྱི་རྩེ་མོ་ལྟར་བྱས་པ་ནི་བ་དན་གྱི་ཕྱག་རྒྱའོ། །དེ་ནས་རྡོ་རྗེ་ནག་མོས་བྱང་ཕྱོགས་བཅིང་བར་བྱ་སྟེ། ཨོཾ་ཧྲཱིཿབཛྲ་ཀཱ་ལི་རུ་ཊ་མ་ཊ་རྡོ་རྗེ་གནོད་སྦྱིན་གྱི་ཕྱག་རྒྱ་ཉིད་སྙིང་གར་བཞག་ལ་བརྟན་པར་བྱས་པ་ནི་རྡོ་རྗེ་ནག་མོའིའོ། །རྡོ་རྗེ་རྩེ་མོས་ལྷོ་ཕྱོགས་བཅིང་བར་བྱ་སྟེ། ཨོཾ་བཛྲ་ཤི་ཥ་

ར་རུ་ཊ་མ་ཊ་རྡོ་རྗེ་ཁུ་ཚུར་གཉིས་ཀྱིས་རི་བོ་འདེགས་པའི་ཚུལ་དུ་བྱ་བ་ནི་རྡོ་རྗེ་རྩེ་མོའི་ཕྱག་རྒྱའོ། །རྡོ་རྗེ་ལས་ཀྱི་དཀྱིལ་འཁོར་བཅིང་བར་བྱའོ། །ཧཱུྃ་བཛྲ་ཀརྨ་ཡཾ་ཧཱུྃ་ཞེས་བྱ་བ་རྡོ་རྗེ་ཧཱུྃ་མཛད་ཀྱི་རབ་བྱས་ནས་རྡོ་རྗེ་བསྡམས་པས་རྡོ་རྗེ་དྲ་བ་བྱའོ། །སྔགས་ནི་བཛྲ་བྷནྡྷ་བཾ། དེའི་རྗེས་ལ་སྒོ་དབྱེ་

བའི་ཕྱག་རྒྱས་སྒོ་ཕྱེ་ལ། རྡོ་རྗེའི་རྒྱུའི་རང་བཞིན་ཅན་གྱི་གསང་བའི་དཀྱིལ་འཁོར་ཞལ་བཞི་པ། ཕྱག་བཞི་པ་བཛྲ་མཎྜ་ལ་ཧཱུྃ་ཛཿཞེས་བྱ་བའི་ཕྱག་རྒྱ་དང་བཅས་པས་དགུག་པར་བྱའོ། །རྡོ་རྗེ་ཁུ་ཚུར་གཉིས་ཀྱི་མཛུབ་མོ་དང་མཐེ་བོང་རྡོ་རྗེར་བྱ་བ་ནི་དཀྱིལ་འཁོར་ཐམས་ཅད་འགུགས་

པའོ། །རྡོ་རྗེ་འཁོར་ལོའི་ཕྱག་རྒྱ། ཨོཾ་མ་ཧཱ་བཛྲ་ཙཀྲ་ཨ་དྷི་ཏིཥྛ་སིདྡྷ་ཧཱུྃ་ཞེས་བྱ་བ་དང་བཅས་པས་དགུག་པ་ནི་དཀྱིལ་འཁོར་དེས་བྱིན་གྱིས་བརླབ་པར་བྱའོ། །རྡོ་རྗེ་ཁུ་ཚུར་གཉིས་འཁོར་ལོ་བསྐོར་བའི་ཚུལ་གྱིས་བསྐོར་བ་ནི་འདིའི་ཕྱག་རྒྱའོ། །དེ་ནས་སེང་ལྡེང་གི་རྡོ་རྗེ་ཕུར་

བུ་ཡི་གེ་ཧཱུྃ་ལས་མཐའ་ཡས་དང་རྣམ་པར་རྒྱལ་བ་དང་། སྤྲིན་སྒྲ་དང་། གསུས་པོ་ཆེ་ཞེས་བྱ། སྟོད་ཁྲོ་བོའི་གཟུགས་ལ་སྨད་རྡོ་རྗེ་རྩེ་གཅིག་པའི་རྣམ་པར་བསམས་ལ་ཙནྡན་དམར་པོའི་བྱུག་པས་བྱུགས་ཤིང་། སྲད་བུ་དམར་པོས་བཅིང་བར་བྱས་ལ། ཨོཾ་ཀྲོ་དྷ་ཡ་ས་ཧི་ཊ་ཊ་ཊ་ཊ་

เล่ม ๖๒ · หน้า 86a

ཏྲི་ཏ་མ་ཊ་ཞེས་བྱ་བ་བརྒྱ་རྩ་བརྒྱད་ཟློས་ཤིང་གཡོན་པའི་རྡོ་རྗེ་ཁུ་ཚུར་གྱིས་བཟུང་ལ། དཀྱིལ་འཁོར་གྱི་གྲྭ་བཞིར་རྡོ་རྗེས་བརྡུང་བར་བྱ་བའམ། གཡོན་པའི་རྡོ་རྗེ་ཁུ་ཚུར་གྱིས་རྡོ་རྗེ་རྩེ་ལྔ་པ་བླངས་ལ། ལག་པ་གཡས་པ་རྡོ་རྗེ་རྩེ་གསུམ་པ་ལྟ་བུར་བྱས་

པས་དབང་ལྡན་གྱི་ཕྱོགས་ནས་བརྩམས་ཏེ། དཀྱིལ་འཁོར་གྱི་གྲྭ་བཞིར་ཇི་སྐད་དུ་བཤད་པའི་ཕུར་བུ་བཞི་སྔགས་འདིས་སྐྱེད་ཅིང་བརྡུང་པར་བྱའོ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ་སརྦ་དུཥྚཱཾ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། བཛྲ་ཀཱི་ལ་ཡ་བཛྲ་དྷ་རོ་ཨཱ་ཛྙཱ་པ་ཡ་ཏི་

སྭཱ་ཧཱ། ཡང་ན་ཨོཾ་བཛྲ་ཀཱི་ལི་ཀཱི་ལཱ་ཡ་སརྦ་བིགྷྣཱ་ཧཱུྃ་ཕཊ། ཅེས་བྱ་བ་ཕུར་བུ་བཞི་ལ་ཡོངས་སུ་བཟླས་ལ་འདི་ཉིད་ཟློས་ཤིང་གཡོན་པའི་རྡོ་རྗེ་ཁུ་ཚུར་གྱིས་བཟུང་ལ་གཡས་པའི་འབར་བའི་རྡོ་རྗེས་བརྡུང་ཞིང་དཀྱིལ་འཁོར་གྱི་གྲྭ་བཞིར་གདབ་པར་བྱའོ། །དེ་ནས་རྡོ་རྗེ་གནོད་སྦྱིན་གྱིས་

བགེགས་བསལ་བ་དང་། ར་བ་དང་དྲ་བ་ཡང་བྱས་ལ། དམ་ཚིག་གི་རྡོ་རྗེ་ཁུ་ཚུར་གྱིས་སྒོ་བཅད་དེ། རྡོ་རྗེ་གོ་ཆའི་ཕྱག་རྒྱ་ཨོཾ་ཏྲུཾ་ཞེས་བྱ་བའི་སྔགས་དང་བཅས་པས་ལྷ་རྣམས་དང་བསྲུང་བ་ཐམས་ཅད་ཡང་དག་པར་བསྲུངས་ནས། རྡོ་རྗེ་གནོད་སྦྱིན་བཟླས་པའི་བུམ་པས་བསང་

གཏོར་བྱ་བའི་ཕྱིར་དཀྱིལ་འཁོར་གྱི་ཁང་པའི་སྒོར་བཞག་ལ་རྡོ་རྗེ་གནོད་སྦྱིན་ཟློས་ཤིང་བདག་ཉིད་དམ། གྲོགས་དང་བཅས་པས་དཀྱིལ་འཁོར་གྱི་ཤར་ནས་བརྩམས་ཏེ་བྱུག་པར་བྱའོ། །དེ་ནས་སློབ་དཔོན་གྱིས་བདག་པོ་ལྔའི་གནས་སུ་ཙནྡན་དང་གུར་གུམ་ལ་སོགས་པས་དཀྱིལ་

འཁོར་གྲུ་བཞི་པ་བྱ། ལྷ་ལྷག་མ་རྣམས་ཀྱི་གནས་སུ་ནི་དཀྱིལ་འཁོར་ཟླུམ་པོར་བྱ་ཞིང་རང་རང་གི་སྔགས་ལན་བདུན་བདུན་བཟླས་པར་བྱའོ། །དེ་ནས་དཀྱིལ་འཁོར་གྱི་དབུས་སུ་འདུག་ལ་ཡིད་ཀྱིས་དཀྱིལ་འཁོར་ཐམས་ཅད་ཡོངས་སུ་བརྟག་པར་བྱས་ནས་ནམ་མཁའི་ཕྱོགས་ནས་དེ་བཞིན་

གཤེགས་པ་ལ་སོགས་པ་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ལ་གུར་གུམ་ལ་སོགས་པའི་ཐིག་ལེ་དེ་རྣམས་སུ་རྣམ་པར་སྣང་མཛད་ལ་སོགས་པའི་རང་རང་གི་སྔགས་ཀྱིས་བཞུགས་སུ་གསོལ་ལ་མཆོད་པ་རྣམ་པ་ལྔས་ཡང་དག་པར་མཆོད་པར་བྱའོ། །

เล่ม ๖๒ · หน้า 86b

དེ་ནས་ཕྱི་རོལ་དུ་གཏོར་མ་བྱིན་ལ་ཉེ་རེག་བྱས་ནས། མཆོད་ཡོན་ལ་མཆོད་ཡོན་གྱི་ཕྱག་རྒྱ་དང་། ཡི་གེ་ཧཱུྃ་བརྒྱ་རྩ་བརྒྱད་བཟླས་ནས། འདི་སྐད་དུ་བཤད་པའི་མཚན་ཉིད་དང་ལྡན་པའི་བུམ་པར་སྤོས་ཆུ་ཅུང་ཟད་བླུགས་ལ། ཧཱུྃ་ལས་རྡོ་རྗེ་གནོད་སྦྱིན་བསྐྱེད་དེ། རང་གི་ཕྱག་རྒྱ་བཞིས་

རྒྱས་བཏབ་ལ་དབང་བསྐུར་བའི་ཕྱག་རྒྱས་དབང་བསྐུར་ནས། མཆོད་ཡོན་ཕུལ་ནས་མཆོད་པ་རྣམ་པ་ལྔ་དང་། སྒེག་མོ་ལ་སོགས་པའི་ཕྱག་རྒྱ་རྣམས་ཀྱིས་ཀྱང་ཡང་དག་པར་མཆོད་ནས། རྡོ་རྗེ་གནོད་སྦྱིན་གྱི་ཕྱག་རྒྱས་ཡོངས་སུ་བཟུང་བའི་རྡོ་རྗེ་དང་མེ་ཏོག་གི་ལྕུག་མ་ལས་ཨོཾ་བཛྲ་ཡཀྵ་

ཧཱུྃ་ཞེས་བརྒྱ་རྩ་བརྒྱད་བཟླས་ནས་མེ་ཏོག་གིས་སིལ་མར་གཏོར་ནས་སྤོས་ཀྱང་གཏུལ་བར་བྱའོ། །དེ་བཞིན་དུ་རྡོ་རྗེ་མེ་དང་རྡོ་རྗེ་ཧཱུྃ་མཛད་གཉིས་ཡོངས་སུ་བཟླས་པའི་བདུག་སྤོས་དབུལ་བར་བྱ་ཞིང་། དཀྱིལ་འཁོར་གྱི་ཞག་ནི་ཐུན་གསུམ་དུ་བཟླའོ། །དེ་ནས་རྡོ་རྗེ་ཧཱུཾ་མཛད་ཀྱི་སྤྱན་སྔར་

གཞག་པར་བྱའོ། །བུམ་པ་ལྷག་པར་གནས་པའི་ཆོ་གའོ། །དེ་ནས་རྡོ་རྗེ་གནོད་སྦྱིན་དང་། རྡོ་རྗེ་མེ་དང་། རྡོ་རྗེ་ཧཱུྃ་མཛད་དང་། མཱ་མ་ཀཱི་ལ་རེ་རེ་ཞིང་མར་ལ་སོགས་པའི་རྫས་ལས་བརྒྱ་རྩ་བརྒྱད་དབུལ་བར་བྱའོ། །ལྷག་པར་གནས་པའི་སྦྱིན་སྲེག་གི་ཆོ་གའོ། །དེ་ནས་བཅོམ་ལྡན་འདས་

འཁོར་དང་བཅས་པ་ལ་མཚན་བརྒྱ་རྩ་བརྒྱད་པས་བསྟོད་དེ། སྒེག་མོ་ལ་སོགས་པའི་མཆོད་པ་བརྒྱད་དང་། མེ་ཏོག་ལ་སོགས་པས་ཀྱང་ཡང་དག་པར་མཆོད་ལ་ཕྱག་བྱས་ནས་མཆོད་ཡོན་ཕུལ་ལ། སློབ་མ་ལྷག་པར་གནས་པར་བྱའོ། །དེ་ལ་རེ་ཞིག་དང་པོར་ལེགས་པར་ཁྲུས་

བྱས་ལ། གོས་གཙང་མ་བགོས་ཤིང་ལག་པར་མེ་ཏོག་ཐོགས་པའི་སློབ་མས། སློབ་དཔོན་ལ་ཕྱག་བྱས་ལ་འདི་སྐད་ཅེས་བརྗོད་དུ་གཞུག་གོ། །དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོས་ཚུལ་བརྟན་པ། །མགོན་པོ་ཆེན་

པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །བྱང་ཆུབ་སེམས་ཀྱང་སྩལ་དུ་གསོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་སྩལ་དུ་གསོལ། །ཐར་པ་ཆེན་པོས་གྲོང་མཆོག་ཏུ། །མགོན་པོ་བདག་ནི་འཇུག་པར་བགྱི། །དེ་ནས་སློབ་

เล่ม ๖๒ · หน้า 87a

དཔོན་གྱིས་སློབ་མའི་སྙིང་གར་ཧཱུྃ་ལས་རྡོ་རྗེ་བསྐྱེད་ལ། ཁུ་ཚུར་གཡས་པས་རྡོ་རྗེ་བཟུང་སྟེ། སྙིང་པོ་དེའི་སྙིང་གར་གཞག་པར་བྱའོ། །སུ་ར་ཏ་ས་མ་ཡ་སྟྭཾ་ཧོ་སིདྡྷི་བཛྲ་ཡ་ཐཱ་སུ་ཁཾ་ཞེས་བྱ་བ་བརྗོད་ནས་དེ་ནས་སྡིག་པ་བཤགས་པ་ལ་སོགས་པ་བྱེད་དུ་གཞུག་

པར་བྱ་སྟེ། རྟོག་པ་མ་ལུས་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོ་ལྡན་པས་གསོན། །བརྗོད་ངས་བློ་ལ་རྡོ་རྗེ་སེམས་སོགས་པའི། །བདེ་བར་གཤེགས་པ་རྣམས་ཀྱིས་བྱིན་མི་རློབ། །དབང་མེད་བདག་གིས་མི་དགེ་བགྱིས་པ་དང་། །རྗེས་སུ་ཡི་རང་ཡང་

ན་བགྱིད་སྩལ་གང་། །དེ་དག་ཐམས་ཅད་བྱང་ཆུབ་མཆོག་གི་ནི། །སྤྱན་སྔར་མ་ལུས་སོ་སོར་བཤགས་པར་བགྱི། །བདེ་གཤེགས་སྲས་ཀྱི་ཚོགས་གཉིས་ཟབ་པ་དང་། །རྒྱ་ཆེན་འགྲོ་བ་མ་ལུས་པ་ཡི་དོན། །སྒྲུབ་པར་བྱེད་དང་དེ་ལས་གཞན་པ་ལའང་། རྟག་ཏུ་བདག་ནི་རྗེས་

སུ་ཡི་རང་ངོ་། །ཐུགས་རྗེས་ཁྱབ་པའི་ཐུགས་དང་ལྡན་གྱུར་ཅིང་། །བློ་གྲོས་སྡིག་བྲལ་གཏི་མུག་ཚོགས་ཀུན་བཅོམ། །མ་ལུས་རིགས་ཀྱི་པདྨའི་ནང་བཞུགས་པ། །བདེ་བར་གཤེགས་པ་རྣམས་ལ་སྐྱབས་སུ་མཆི། །བློ་མཆོག་རྣམས་ཀྱི་ཀུན་དགའ་ར་བ་སྟེ། །དམན་པའི་

འཇིགས་པ་ཉིད་ཀྱི་རྒྱལ་བྱེད་ཚལ། །སྲིད་པའི་འབྱོར་པ་ཟིལ་གྱིས་གནོན་པའི་མཆོག །གསུང་མཆོག་ཆོས་ལ་བདག་ནི་སྐྱབས་སུ་མཆི། །འདོད་ཆགས་ལ་སོགས་སྦྲུལ་གྱི་དུག་བཅོམ་ཞིང་། །བློ་གྲོས་རྣམ་རྒྱལ་ཐུགས་རྗེ་ཆེར་ལྡན་པའི། །བརྟུལ་ཞུགས་བཟང་པོའི་ཚོགས་ལ་

སྐྱབས་སུ་མཆི། །སྲིད་དང་བྲལ་བ་རྣམས་ལ་བདག་ཕྱག་འཚལ། །རྒྱུ་ཡི་རྗེས་ལ་བདག་པོའི་ཡུལ་བདག་ཉིད། །འབྲས་བུའི་སྟོབས་ཀྱིས་དགྲ་ལས་རྒྱལ་གྱུར་པ། །སྙིང་རྗེའི་རྩ་བ་ཟུག་ཅིང་ཡང་དག་རྟོགས། །མཉམ་མེད་བྱང་ཆུབ་རྣམ་གསུམ་གཟུང་བར་བགྱི། །

སེམས་ཅན་རྣམས་ནི་ཡོངས་སུ་སྨིན་པའམ། །ཡང་ན་ཡོངས་སུ་བསྐྱབ་པར་བྱ་ཕྱིར་རམ། །རང་གི་སེམས་ནི་དག་པར་བྱ་བའི་ཕྱིར། །འདི་དག་ཐམས་ཅད་རྩྭ་སོགས་བཞིན་དུ་བཏང་། །དེ་བཞིན་ཚུལ་ཁྲིམས་བཟོད་དང་བརྩོན་འགྲུས་དང་། །བསམ་གཏན་ཤེས་རབ་བླ་ན་

เล่ม ๖๒ · หน้า 87b

མེད་པ་ནི། །བདག་དང་གཞན་རྣམས་དག་པར་བྱ་བའི་ཕྱིར། །སྐད་ཅིག་རེ་རེ་ཞིང་ཡང་བསྒོམ་པར་བགྱི། །བདེ་བར་གཤེགས་པའི་སྔགས་ལ་མཁས་པ་ཡི། །ཆོས་རྒྱལ་རྟག་ཏུ་ལྷུན་གྱིས་གྲུབ་པ་ནི། །འགྲོ་བ་འདི་ཡིས་ཐོབ་པར་བྱ་བའི་ཕྱིར། །ཁྱད་འཕགས་གནས་ལ་བདག་

ནི་གནས་པར་བགྱི། །ཞེས་བྱ་བ་ལན་གསུམ་བརྗོད་དོ། །བདག་ནི་དེ་སྐད་ཅེས་བརྗོད་པའི་དགེ་བའི་རྩ་བ་འདིས། བདག་གིས་ལོག་པའི་བསམ་པ་ཐམས་ཅད་ཡོངས་སུ་གཏང་བར་བགྱིའོ། །བདག་གིས་སེམས་ཅན་ཐམས་ཅད་ལ་སྙོམས་པའི་སེམས་བསྐྱེད་པར་བགྱིའོ། །

བདག་གིས་སེམས་ཅན་ཐམས་ཅད་ཐེག་པ་ཐམས་ཅད་དང་། ཐབས་ཀྱི་བྱེ་བྲག་ཐམས་ཅད་ཀྱིས་བཏུལ་ནས། མི་གནས་པའི་མྱ་ངན་ལས་འདས་པའི་དབྱིངས་ལ་རབ་ཏུ་གཞག་པར་བགྱིའོ། །བདག་གིས་སེམས་ཅན་ཐམས་ཅད་ཡོངས་སུ་མྱ་ངན་ལས་འདས་པར་གྱུར་ཀྱང་།

སེམས་ཅན་འགའ་ཡང་ཡོངས་སུ་མྱ་ངན་ལས་འདས་པ་མེད་དོ་ཞེས་སེམས་བསྐྱེད་པར་བགྱིའོ། །བདག་གིས་ཆོས་ཐམས་ཅད་སྐྱེ་བ་མེད་པ་ཉིད་དུ་རྗེས་སུ་རྟོགས་པར་བགྱིའོ། །བདག་གིས་མ་ཡེངས་པའི་སེམས་དང་ཐམས་ཅད་མཁྱེན་པའི་ཡེ་ཤེས་ཀྱི་སེམས་ཀྱིས་ཕ་རོལ་ཏུ་ཕྱིན་

པ་དྲུག་ལ་བསླབ་པར་བགྱིའོ། །བདག་གིས་ཐེག་པ་གཅིག་གི་ཚུལ་དུ་གནས་པར་ཡང་རྟོགས་པར་བགྱིའོ། །བདག་གིས་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལ་གནས་པའི་སོ་སོར་རྟོགས་པར་བྱ་བའི་ཕྱིར་བསླབ་པར་བགྱིའོ། །བདག་ནི་སྟོབས་བཅུ་དང་། མི་འཇིགས་པ་བཞི་དང་།

སོ་སོ་ཡང་དག་པར་རིག་པ་དང་། སངས་རྒྱས་ཀྱི་ཆོས་མ་འདྲེས་པ་རྣམས་སོ་སོར་རྟོགས་པར་བྱ་བའི་ཕྱིར་མངོན་པར་བརྩོན་པར་བགྱིའོ། །དེ་བཞིན་དུ་བདག་གིས་སངས་རྒྱས་ཀྱི་ཆོས་ཚད་མེད་པ་མ་ལུས་པའི་བར་ལ་མངོན་པར་གནས་པར་བྱ་བའི་ཕྱིར་མངོན་པར་བསྒྲུབ་པར་བགྱིའོ། །

འདི་ཉིད་ནི་བྱང་ཆུབ་སེམས་དཔའ་རྣམས་ཀྱིས་བྱང་ཆུབ་ཆེན་པོར་སེམས་བསྐྱེད་པ་རྡོ་རྗེ་ལྟ་བུ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་ཡབ་དང་། དེ་བཞིན་གཤེགས་པ་ཐམས་ཅད་ཀྱི་བཀའ་བཞིན་བྱེད་པ་དང་། དེ་བཞིན་གཤེགས་པ་ཐམས་ཅད་ཀྱི་སྲས་ཀྱི་ཐུ་བོ་

เล่ม ๖๒ · หน้า 88a

སྟེ། འདི་ཉིད་ནི་བཅོམ་ལྡན་འདས་དཔལ་ཀུན་དུ་བཟང་པོའོ། །དེའི་དགེ་བའི་རྩ་བ་རྣམས་ཀྱིས་ཇི་ལྟ་བ་བཞིན་དུ་ཡང་དག་པར་རྫོགས་པར་བྱས་པའི་སྟོབས་ཀྱིས་བདག་སེམས་བསྐྱེད་པ་འདི་ལ་གནས་པས་ཀུན་དུ་བཟང་པོའི་སྤྱོད་པ་ཞེས་བྱ་བ་སྒོ་མཐའ་ཡས་པ་ལ་

གནས་པ་མཐའ་མེད་པར་གྱུར་པ་རྫོགས་པར་བྱས་ནས་གདུལ་བྱའི་འགྲོ་བའི་ཚོགས་མ་ལུས་པ་རྣམས་ལ་སྤྱོད་པའི་རབ་ཏུ་དབྱེ་བའི་སྒོ་མང་པོ་བསྟན་པས་ཡང་དག་པར་མགུ་བར་བྱ་བ་དང་། ཡང་དག་པར་དགའ་བར་བྱ་བ་དང་། ཡང་དག་པར་གཟེངས་བསྟོད་པ་ལ་

ངེས་པར་སྦྱར་བར་བགྱིའོ། །སྡོམ་པ་དོན་དུ་གཉེར་བ་ལ་བསླབ་པའི་གཞི་ལྔ་འཛིན་དུ་གཞུག་གོ། །དེ་ནས་སློབ་མའི་ལག་ཏུ་རྡོ་རྗེ་དྲིས་དྲི། མེ་ཏོག་གིས་མེ་ཏོག་སྦྱིན་ཞིང་བདུག་པས་ཀྱང་སློབ་མ་ཡང་དག་པར་བདུགས་ལ། མར་མེ་མས་མར་མེས་སྣང་བར་བྱའོ། །དེ་ནས་ཨུ་དུམ་

བཱ་རའམ་ཨ་ཤྭདྠའི་སོ་ཤིང་སྤོས་དང་། མེ་ཏོག་ལ་སོགས་པ་དང་ལྡན་པ་ལ་ཁྲོ་བོ་རྡོ་རྗེ་བཞད་པ་བཟླས་པ་དང་། ཀུ་ཤ་སར་པ་མ་ཉམས་པ་ལ་ཁྲོ་བོ་རྡོ་རྗེ་རྣོན་པོ་བཟླས་ལ་དེ་ལ་སྦྱིན་པར་བྱའོ། །དེ་ནས་ཁྲོ་བོ་རྡོ་རྗེ་སྲུང་བ་བཟླས་པའི་སྲུང་སྐུད་མདུད་པ་གསུམ་དང་ལྡན་པ། དེའི་

དཔུང་པ་གཡོན་པར་བདག་ཉིད་ཀྱིས་བཅིང་བར་བྱ་ཞིང་། རྡོ་རྗེ་སེམས་དཔའི་གཙུག་ཏོར་གྱིས་ཡང་དག་པར་བསྲུང་བ་དང་། བྱམས་པའི་གོ་ཆ་བསྐོན་ལ་འདི་སྐད་ཅེས་བརྗོད་པར་བྱ་སྟེ། བཞིན་བཟངས་ལོངས་ལ་དེ་བཞིན་གཤེགས་པ་ཐམས་ཅད་ལ་ཕྱག་བྱོས་ཤིག །ནང་པར་

དཀྱིལ་འཁོར་ཆེན་པོ་མཐོང་བར་འགྱུར་རོ། །དེ་ནས་ཉི་མ་འཆར་ཀའི་དུས་སུ་ལྷ་ཐམས་ཅད་དེ་བཞིན་དུ་བར་སྣང་ལ་བཞག་སྟེ། དཀྱིལ་འཁོར་གྱི་གནས་སྤོས་ཆུས་བྱུགས་ལ་མེ་ཏོག་ལ་སོགས་པས་ཀྱང་མཛེས་པར་བྱས་ནས། ཚོན་སྔོན་པོ་དང་། སེར་པོ་དང་། དམར་པོ་དང་།

ལྗང་གུ་དང་། དཀར་པོ་དྲི་ཞིམ་པོས་བསྒོས་པས་སྲད་བུ་སོ་སོར་ཁ་བསྒྱུར་ལ་གོ་རིམས་འདི་ཉིད་ཀྱིས་བཞག་ནས་ཧཱུཾ་ཏྲཱཾ་ཧྲཱིཿཨ་ཨཱ་ཞེས་བྱ་བ་རང་གི་ས་བོན་འདི་ལས་བྱུང་བའི་ཐིག་གི་འོད་ཟེར་གྱིས་མི་བསྐྱོད་པ་ལ་སོགས་པ་རང་རང་གི་ཕྱོགས་ན་བཞུགས་པར་ཡང་དག་པར་བཏང་

เล่ม ๖๒ · หน้า 88b

བ་དང་། འབར་བའི་ལྕགས་ཀྱུས་དྲངས་ཏེ་རང་གི་ལག་ན་གནས་པའི་སྲད་བུ་ལེགས་པར་དགང་བར་བྱ་ཞིང་། ཨོཾ་ཨ་ནྱོ་ནྱ་ཨ་ནུ་ག་ཏ་སརྦ་དྷརྨཱཿསྥ་ར་སྥ་ར་ཨ་ནུ་པྲ་བིཥྚ་སརྦ་དྷརྨཱཿཨ་ཏྱནྟ་ཨ་ནུ་པྲ་བིཥྚ་སརྦ་དྷརྨཱ་ཧཱུྃ་ཞེས་ཟློས་ཤིང་བསྒྲིལ་བར་བྱའོ། །དེ་ནས་སྲད་བུ་དེ་ཙནྡན་བཟང་

པོ་ལ་སོགས་པས་བྱུགས་པའི་གསེར་གྱི་སྣོད་ལ་སོགས་པར་བཞག་ལ། མེ་ཏོག་གིས་མཆོད་དེ་རྡོ་རྗེ་བསྡམས་པས་བཟུང་ལ་ཐིག་གདབ་པའི་སྔགས་ལན་བརྒྱ་རྩ་བརྒྱད་བཟླས་པར་བྱའོ། །དེ་ནས་རྡོ་རྗེ་ཧཱུྃ་མཛད་ལ་སོགས་པ་བདག་པོ་རྣམས་ཀྱི་སྔགས་ཀྱང་བརྒྱ་རྩ་བརྒྱད་བཟླ་བར་

བྱའོ། །དེ་ནས་ཡང་དེ་བཞིན་གཤེགས་པ་ཐམས་ཅད་ལ་མཆོད་ལ་ཕྱག་བྱས་ནས་ལངས་ཏེ་ཡིད་ཀྱིས་རྣམ་པར་སྣང་མཛད་དུ་གྱུར་ནས། ཕྱག་ན་རྡོ་རྗེའི་ཐུགས་ཀ་ནས་རྡོ་རྗེའི་གྲོགས་མཆོག་ཧཱུཾ་ཞེས་བྱ་བ་འདིས་ཁྲོ་བོའི་རྡོ་རྗེ་ལས་ཀྱི་གཟུགས་སུ་དབྱུང་བར་བྱའོ། །ཡང་དེ་ཉིད་

རྡོ་རྗེ་ཧཱུྃ་མཛད་དུ་གྱུར་པ་ལ་མིག་གཡས་དང་གཡོན་གཉིས་སུ་ཡི་གེ་ཛ་ལས་ཟླ་བ་དང་ཉི་མ་སེར་པོ་སྣང་བ་བསྐྱེད་ལ། ཛ་ཞེས་བྱ་བས་སྒྲུབ་པའི་གྲོགས་མཆོག་གི་ལག་དུ་སྲད་བུ་དེ་བཏང་ལ། སྲད་བུ་དང་པོ་གཡོན་པའི་རྡོ་རྗེ་ཁུ་ཚུར་གྱིས་བཟུང་ལ་ཕྱིས་ནི་ཅི་བདེར་བྱ་ཞིང་ཕྱོགས་

ཐམས་ཅད་མཉམ་པ་ཉིད་དུ་བསམ་མོ། །ཕྱོགས་ཀུན་མཉམ་པ་ཉིད་དམིགས་ལ། །མཁས་པས་དཀྱིལ་འཁོར་ཐིག་གདབ་སྟེ། །ཤར་དང་ནུབ་དང་བྱང་དང་ལྷོར། །ཐིག་བཞི་བཏབ་པས་དཀྱིལ་འཁོར་བརྒྱད། །ཨོཾ་བཛྲ་སཱུ་ཏྲ་མཱ་ཏི་ཀྲ་མ་ཧཱུྃ་ཞེས་བྱ་བ་འདི་དང་། སངས་རྒྱས་

ཀྱི་ཞིང་ཐམས་ཅད་ན་བཞུགས་པའི་དེ་བཞིན་གཤེགས་པ་རྣམས་སེམས་ཅན་གྱི་དོན་གྱི་ཕྱིར་འདིར་གཤེགས་སུ་གསོལ་ཞེས་བསྐུལ་བར་བྱའོ། །གྲྭ་བཞིར་བྱ་ཞིང་སྒོ་བཞིར་གདོད། །རྟ་བབས་བཞིས་ཀྱང་རབ་ཏུ་བརྒྱན། །སྲད་བུ་བཞི་དང་ལྡན་པ་སྟེ། །དར་དང་ཕྲེང་

བས་ཤིན་ཏུ་བརྒྱན། །ཟླ་བ་ཕྱེད་པར་རབ་གནས་པའི། །ཁྱམས་ཀྱིས་ཡོངས་སུ་བསྐོར་བ་དང་། །དྲ་བ་དྲ་ཕྱེད་དག་གིས་སྤྲས། །སྒོ་རྣམས་དང་ནི་རྒྱན་ཆ་ཅན། །རླུང་གིས་བསྐྱོད་པ་སྣ་ཚོགས་མཆོག །བ་དན་དྲིལ་བུ་སྒྲ་སྒྲོགས་པ། །ཁྱམས་ནི་མེད་པར་གྱུར་པའི་སྒོ། །མེ་ཏོག་

เล่ม ๖๒ · หน้า 89a

ཆུན་འཕྱང་རྒྱན་གྱིས་བསྐོར། །དཀྱིལ་འཁོར་ཀུན་གྱི་གྲྭ་རྣམས་དང་། །སྒོ་ཁྱུད་ཀྱི་ནི་མཚམས་རྣམས་སུ། །རྡོ་རྗེ་རིན་ཆེན་བརྒྱན་པར་ནི། །དཀྱིལ་འཁོར་ཕྱི་རིམ་སྲད་བུ་བྲེ། །ཤེས་རབ་ཅན་གྱིས་དེ་ནང་དུ། །རྡོ་རྗེ་རིན་ཆེན་གྱིས་བརྒྱན་ཏེ། །གྲུ་བཞི་

པ་ལ་སྒོ་བཞི་པ། །ཀ་བ་བརྒྱད་དང་རྟ་བབས་བཅས། །རྡོ་རྗེ་ཀ་བའི་ནང་ལོགས་སུ། །དཀྱིལ་འཁོར་ལྔ་ཡིས་བརྒྱན་པ་སྟེ། །དེ་ལྟར་དཀྱིལ་འཁོར་སྲད་བུ་བྲེ། །སྲད་བུ་བྲེས་པ་ཚོན་གྱིས་དགང་། །ལྷག་མ་ནི་ཕྱིའི་དཀྱིལ་འཁོར་ཡིན་པར་བལྟའོ། །གལ་ཏེ་བགེགས་ཟློག་

པར་བྱེད་འདོད་པར་གྱུར་ན་སེང་ལྡེང་གི་ཕུར་བུ་སྟོད་རྡོ་རྗེ་རྩེ་ལྔ་པའི་རྣམ་པ་ལ། སྨད་རྡོ་རྗེ་རྩེ་གཅིག་པ་ལྟ་བུ་ལ་སྔ་མ་བཞིན་དུ་རྡོ་རྗེ་ཕུར་བུའི་སྔགས་བཟླས་ཏེ་དཀྱིལ་འཁོར་གྱི་ལྟེ་བར་རྡོ་རྗེས་བརྡུང་བར་བྱའོ། །ཡང་དཀྱིལ་འཁོར་གྱི་ལྟེ་བའི་དབུས་སུ་སྔར་བསྟན་པའི་ཕུར་བུ་

དང་འདྲ་བའི་ཕུར་བུ་གཞན་དག་ལ་ཕུར་བུའི་སྔགས་ལན་བརྒྱ་རྩ་བརྒྱད་བཟླས་པས་གོ་རིམས་འདི་བཞིན་དུ་བགེགས་ཐམས་ཅད་ལ་ཕུར་བུས་གདབ་པར་བྱའོ། །ཇི་སྐད་དུ་བཤད་པའི་དཀྱིལ་འཁོར་གྱི་ལྟེ་བ་ལ་བཏགས་པའི་སྲད་བུས་བསྐོར་ཕྱོགས་སུ། ཕྱིའི་དཀྱིལ་འཁོར་

ཟླུམ་པོ་དང་། འོད་ཀྱི་དཀྱིལ་འཁོར་ཐིག་གདབ་པའི་ཡང་ཕྱི་རོལ་དུ། དེ་བཞིན་དུ་འཁོར་ཡུག་ཆེན་པོར་ཟླུམ་པོར་ཐིག་ལེགས་པར་གདབ་པར་བྱའོ། །འོད་ཀྱི་དཀྱིལ་འཁོར་དེར་གྲོག་མཁར་གྱི་ས་ལ་སོགས་པས་བགེགས་ཀྱི་གཟུགས་བརྙན་བྱས་ནས་བརྒྱ་བྱིན་གྱི་གཟུགས་

བརྙན་རང་གི་ཕྱོགས་ན་གནས་པ་ལ་ཨི་ལས་བརྒྱ་བྱིན་སེར་པོ། མེ་ལ་སོགས་པའི་གཟུགས་བརྙན་ལའང་དེ་བཞིན་ཏེ། རཾ་ལས་མེ་ལྷ་དམར་པོའོ། །ཨོཾ་ཧཾ་ལས་གཤིན་རྗེ་ནག་པོའོ། །ཀྲཾ་ལས་སྲིན་པོ་ནག་པོ། བམ་ལས་ཆུ་ལྷ་དཀར་པོ། ཡང་ལས་རླུང་ལྷ་དུད་ཀ །ཕཊ་ལས་

ལུས་ངན་པོ་སེར་པོ། སུམྦྷ་ལས་དབང་ལྡན་དཀར་པོ་བསྐྱེད་ལ་འདོད་པའི་རྒྱལ་པོས་བཀུག་སྟེ། རྡོ་རྗེ་ལྕགས་ཀྱུ་ལ་སོགས་པས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ནས་ཕུར་བུས་གདབ་བོ། །ཤིན་ཏུ་ཡུན་རིང་དུ་བགེགས་མེད་པར་བྱེད་འདོད་ནས་ས་

เล่ม ๖๒ · หน้า 89b

དགབ་པར་བྱའོ། །དེ་ལྟར་ན་ཡང་གལ་ཏེ་བགེགས་བྱེད་ན་རྡོ་རྗེ་ཧཱུྃ་མཛད་ཀྱི་སྦྱོར་བ་བྱས་ལ་འདོད་པའི་རྒྱལ་པོས་བཀུག་ནས་རྡོ་རྗེ་ལྕགས་ཀྱུ་ལ་སོགས་པས་ཀྱང་དགུག་པ་ལ་སོགས་པ་བྱས་ལ། རྡོ་རྗེ་ཧཱུྃ་མཛད་ཀྱི་ཕྱག་རྒྱ་བཅིངས་ཏེ། རྐང་པ་གཡོན་པས་བགེགས་ཀྱི་གཟུགས་བརྙན་

མནན་ཏེ། ཧཱུྃ་བཾ་ཧཱུྃ་ཞེས་བྱ་བ་ལ་སོགས་པ་སྤེལ་བའི་ཚུལ་གྱིས་ཟློས་ཤིང་གཡོན་བརྐྱང་བའི་གནས་པས་གནས་ན། དེ་ལྟ་བུས་བགེགས་བཅོམ་པར་འགྱུར་རོ། །ཡང་ན་སྟོང་པ་ཉིད་ཀྱི་ཏིང་ངེ་འཛིན་སྔོན་དུ་བྱ་བའི་རྗེས་ཐོགས་ལ། ཨ་ལས་རྣམ་པར་སྣང་མཛད་དུ་གྱུར་ནས། རྒྱུད་

ལས་གསུངས་པའི་རྣམ་པར་སྣང་མཛད་ཀྱི་སྐུར་ངེས་པར་བསམས་ལ། རང་གི་སྙིང་ག་ནས་ཧཾ་ལས་འཕགས་པ་མི་གཡོ་བ་ཡིད་ཀྱིས་ཕྱུང་སྟེ། བཛྲ་ཧཾ་བནྡྷ་ཞེས་ཡིད་ལ་ཟློས་ཤིང་། ཕྱིའི་དཀྱིལ་འཁོར་གྱི་ཕྱི་རོལ་དུ་རླུང་གི་མཚམས་སུ་དྲིས་ཐིག་ལེ་བདུན་བྱས་ཏེ། ཐིག་ལེ་རེ་རེ་ཞིང་

ཡང་ནང་དུ་ཆུད་པར་བྱས་ལ། དབུས་མ་དང་ཐིག་ལེ་བདུན་དང་ལྡན་པར་བྱའོ། །ཐིག་ལེ་བདུན་པོ་དེ་དག་ཀྱང་རླུང་ལྷ་བདུན་པོ་མདོག་ནག་པོ་རི་དྭགས་ལ་ཞོན་པར་བསམས་ལ། འཕགས་པ་མི་གཡོ་བས་བཀུག་ནས་ཞགས་པས་བཅིངས་པར་གྱུར་པར་བསམ་མོ། །དེ་རྣམས་ཀྱི་དབུས་

མ་གཅིག་ནི་གཙོ་བོ་ཡིན་ལ། ལྷག་མ་རླུང་ལྷ་དྲུག་ནི་དེའི་འཁོར་དུ་ཀུན་ནས་གནས་པ་ཡིན་ནོ། །དེ་ནས་ཁམ་ཕོར་ཨ་ལས་རི་རབ་ཏུ་བསམས་ལ། དེའི་སྟེང་དུ་ཨ་ཉིད་ལས་དབང་ཆེན་གྱི་དཀྱིལ་འཁོར་ཐམས་ཅད་དུ་རྡོ་རྗེས་གཡོགས་ལ། དབུས་སུ་ཡི་གེ་ཧཱུྃ་གི་ས་བོན་ལས་

བྱུང་བའི་རྡོ་རྗེ་རྩེ་ལྔ་པ་མཚམས་རྣམས་སུ་མདུང་རྩེ་རྣམ་པར་བསམས་ལ། དེ་བཞིན་དུ་བཛྲ་ཧཾ་བནྡྷ་ཞེས་ཟློས་ཤིང་ཁམ་ཕོར་དེས་ཇི་སྐད་བཤད་པའི་ཡི་གེ་ཡཾ་བདུན་པོ་དགབ་པར་བྱའོ། །དེ་ནས་ཁམ་ཕོར་དང་རི་རབ་ཀྱི་སྟེང་དུ་ཡི་གེ་ཨོཾ་ལས་སྔར་བཤད་པའི་བཅོམ་ལྡན་འདས་རྣམ་

པར་སྣང་མཛད་བསམས་ལ། འཕགས་པ་མི་གཡོ་བ་ཡང་བཅོམ་ལྡན་འདས་ཀྱི་སྤྱན་སྔར་གཡོན་བརྐྱང་བའི་གནས་པས་རི་རབ་བཟུང་ནས་རལ་གྲི་དང་ཞགས་པས་རླུང་ལྷ་རྣམས་ལ་བསྡིགས་པ་མཛད་པར་བསམ་པར་བྱ་སྟེ། དེ་ལྟ་བུས་ནི་རླུང་ལྷ་ཐམས་ཅད་བཅིང་བར་

เล่ม ๖๒ · หน้า 90a

བྱས་པར་འགྱུར་རོ། །དེ་ནས་ཆུ་ལ་སོགས་པའི་བགེགས་བཟློག་པ་བཤད་པར་བྱ་སྟེ། ཡི་གེ་ཧཱུྃ་ལས་འཕགས་པ་མི་གཡོ་བ་རླུང་དང་མེའི་དཀྱིལ་འཁོར་ལ་གནས་པར་བདག་ཉིད་བསྐྱེད་ལ། གྲོག་མཁར་གྱི་སའམ། བའི་ལྕི་བ་ས་ལ་མ་ལྷུང་བ་ལས་

བགེགས་ཀྱི་གཟུགས་བརྙན་བྱས་ནས། ཡི་གེ་ཁཾ་ལས་རལ་གྲི་དང་། རཾ་ལས་ནང་ན་མེ་ཡོད་པར་བསྐྱེད་ཅིང་། ཀྵཾ་ལས་ཞགས་པ་དང་། ལྕགས་ཀྱུ་བསྐྱེད་དེ། དེ་ལག་པ་གཡོན་པས་བཟུང་ལ། ལག་པ་གཡས་པས་རལ་གྲི་དང་། ཞགས་པས་དྲངས་ནས་བགེགས་ཀྱི་

གཟུགས་བརྙན་གྱི་ནང་དུ་བཅུག་སྟེ། གཡོན་བརྐྱང་བའི་གནས་པས་གནས་ལ། རྐང་པ་གཡོན་པས་སྤྱི་བོ་ནས་བཙིར་ནས། ན་མཿ ས་མནྟ་བཛྲཱ་ཎཱཾ་ཙཎྜ་མ་ཧཱ་རོ་ཥ་ན་སྥོ་ཊ་ཡ་ཧཱུྃ་ཊ་ག་ཧཾ་མཾ་ཞེས་ཟློས་ཤིང་གཟུགས་བརྙན་དེ་རལ་གྲིས་གཏུབ་པར་བྱ་བའམ། དུག་དང་སྐེ་ཚེ་དང་

ལན་ཚྭ་ལ་སོགས་པས་གཟུགས་བརྙན་ལ་བསྐུས་ལ་མེ་ཡིས་གདུང་བར་བྱའོ། །མེ་ཡིས་གདུངས་པས་དེ་ཉིད་ཀྱང་། །ཞི་བར་འགྱུར་བར་ཐེ་ཚོམ་མེད། ཚངས་པའམ་བརྒྱ་བྱིན་ཡིན་ན་ཡང་། །དེའི་མོད་ལ་མྱུར་དུ་ཚིག །ཅེས་བཅོམ་ལྡན་འདས་རྣམ་པར་སྣང་མཛད་ཀྱིས་གསུངས་སོ། །

ལས་འདི་ཡང་འཕགས་པ་མི་གཡོ་བའི་རྣལ་འབྱོར་གྱིས་གསང་སྔགས་འདི་ཁྲི་བཟླས་པའི་སྔོན་དུ་བསྙེན་པ་བྱས་ནས་དེའི་འོག་ཏུ་ལས་བརྩམ་པར་བྱའོ། །ཡང་ན་ཨོཾ་ཨཱཿཧཱུྃ་ཞེས་བྱ་བ་འདིས་འཕགས་པ་འཇམ་དཔལ་གཤིན་རྗེ་གཤེད་སྐུ་མདོག་ནག་པོ་ཞལ་བཞི་པ་ཕྱག་བཞི་

པ་ཞབས་དྲུག་པ། ཕྱག་གཡས་གཉིས་ན་རལ་གྲི་དང་དགྲ་སྟ་བསྣམས་པ། ཕྱག་གཡོན་གཉིས་ན་ཞགས་པ་དང་གཏུན་ཤིང་བསྣམས་པ། ལྷོ་ཕྱོགས་སུ་ཁྲོ་བོའི་ཚོགས་རྣམས་ཀྱིས་ནམ་མཁའི་གཏོས་ཀུན་དུ་གང་བར་མཛད་པ་བསམས་ལ། མདུང་ཐུང་གི་ཕྱག་རྒྱ་

བཅིངས་ཏེ། སྤྲིན་ལ་སོགས་པ་བཟློག་པའི་བསམ་པས་ཚམ་རྔམ་དང་བཅས་པས་རབ་ཏུ་སྦྱར་བར་བྱའོ། །རྡོ་རྗེ་བསྡམས་པ་ནང་དུ་བཅིངས་ལ། མཛུབ་མོ་གཉིས་ནང་སྦྱར་བ་ནི་མདུང་ཐུང་གི་ཕྱག་རྒྱའོ། །དེ་ལྟར་ན་ཡང་གལ་ཏེ་བགེགས་རྣམས་ཞི་བར་མ་གྱུར་ན། ཁམ་ཕོར་སོ་

เล่ม ๖๒ · หน้า 90b

མ་བཏང་བ་གཉིས་ཀྱི་ནང་དུ་ཁྲག་དང་དུར་ཁྲོད་ཀྱི་སོལ་བ་དང་། དུག་དང་། སྐེ་ཚེ་དང་། ད་དུ་རའི་ལོ་མའི་ཁུ་བས་གསང་སྔགས་བྲིས་ལ། ཡུངས་ཀར་ལ་ལན་བརྒྱ་རྩ་བརྒྱད་བཟླས་བརྗོད་བྱས་ལ། ཁམ་ཕོར་ཁ་སྦྱར་ཏེ་དེའི་ནང་དུ་བཞག་ལ། མིའི་བགེགས་ལ་སོགས་པ་

བསམས་ཏེ། སྲེག་བླུགས་བརྒྱའམ་སྲེག་བླུགས་བདུན་སྦྱིན་སྲེག་བྱའོ། །དེ་ནས་དེ་དག་འཇིགས་པའམ། འཆི་བའམ། མི་མ་ཡིན་པས་གཟུང་བར་འགྱུར་རོ། །ཡང་ན་རྡོ་རྗེ་ཧཱུྃ་མཛད་ཀྱི་སྦྱོར་བས་ཡི་གེ་ཧཱུྃ་བཟླས་བརྗོད་འབུམ་བྱས་ལ། མི་རུས་ཀྱི་རྒྱུ་ལས་བྱས་པའི་ཕུར་བུ་སོར་བཞི་

པའི་ཚད་ཙམ་ལ་ལན་བརྒྱ་རྩ་བརྒྱད་བཟླས་ནས་དེ་བཞིན་དུ་རྡོ་རྗེ་ལྕགས་ཀྱུ་ལ་སོགས་པས་དགུག་པ་དང་། གཞུག་པ་དང་། བཅིང་བ་བྱས་ནས་གཟུགས་བརྙན་ཕུར་བུས་གདབ་པར་བྱའོ། །དེ་ནས་མེའི་ཚ་བ་ཞི་བ་བཤད་པར་བྱ་སྟེ། མེའི་སྟེང་དུ་ཡི་གེ་བཾ་ལས་ཆུའི་དཀྱིལ་

འཁོར། དེའི་སྟེང་དུ་པདྨའི་དབུས་ན་གནས་པའི་འཁོར་ལོ་དེའི་སྟེང་དུ་ཡི་གེ་བཾ་དེ་ཉིད་ལས་བཅོམ་ལྡན་འདས་རྣམ་པར་སྣང་མཛད་དུང་དང་ཀུན་ད་ལྟར་དཀར་བ་སྟེང་ན་བཞུགས་ཏེ། མཚོ་ཆེན་པོ་མ་དྲོས་པ་འདྲ་བའི་རྒྱ་མཚོ་ཆེན་པོ་བཞི་ལས་ཆུ་བོ་ཆེན་པོ་བཞི་འབབ་པ་ལྟ་བུའི་ཆར་གྱི་

རྒྱུན་སར་པས་ཕྱོགས་བཅུར་འགེངས་པར་འགྱུར་བར་བསམ་པར་བྱའོ་རྡོ་རྗེ་སྤྱན་ཅན་དང་རྡོ་རྗེ་མེ་ལྟར་འབར་བས་ཀྱང་ཁམ་ཕོར་གྱི་རི་རབ་དང་ཕུར་བུས་ཡང་དག་པར་བསྲུངས་ལ་རྡོ་རྗེ་གནོད་སྦྱིན་དང་རྡོ་རྗེ་འཇིགས་བྱེད་ཀྱི་སྤྱན་དག་གིས་དེ་རྣམས་ཀྱི་ནམ་མཁའ་བཅིང་བར་བྱས་ལ་རྡོ་རྗེ་བསྡམས་

པས་རྡོ་རྗེ་དྲལ་བར་བྱའོ། །ཡང་ན་མངོན་སྤྱོད་ཀྱི་སྦྱིན་སྲེག་གིས་བགེགས་རྣམས་བཟློག་པར་བྱའོ། །དེ་ནས་དཀྱིལ་འཁོར་གྱི་དབུས་ན་གནས་པའི་ཕུར་བུ་ཧཱུྃ་བཞིས་བཏོན་ལ། རང་གི་ལག་ན་གནས་པའི་རྡོ་རྗེ་བཅུག་སྟེ་འོག་ནས་བཤད་པའི་ཚོན་སྣ་ལྔས་ཕུར་བུའི་བུ་ག་བཀང་ལ་མཉམ་

པོར་བྱས་ནས་ཐིག་སྐུད་ཚོན་དཀར་པོ་དྲི་ཞིམ་པར་སྤངས་པ་གདབ་པར་བྱའོ། །དེ་ལྟར་ཐིག་ལེགས་པར་བཏབ་ནས་ཧི་ཞེས་བྱ་བ་ལས་མིག་གཡས་པ་དང་གཡོན་པར་ཉི་མ་དང་ཟླ་བ་བསྐྱེད་ལ་ཁྲོ་བོའི་ལྟ་བས་ཀུན་དུ་བལྟས་ལ་སྒོ་རྣམས་དབྱེའོ། །དེ་ནས་ཚོན་རྩི་བྱིན་གྱིས་བརླབ་པར་

เล่ม ๖๒ · หน้า 91a

བྱ་སྟེ། ཨོཾ་བཛྲ་ཙི་ཏྲ་ས་མ་ཡེ་ཧཱུཾ། ཞེས་བྱ་བ་འདིས་ཕྱག་རྒྱ་དང་ལྡན་པས་ཚོན་རྩི་ཐམས་ཅད་ལ་ལན་བདུན་བཟླས་ན་རྡོ་རྗེའི་དབང་བཞིན་དུ་འགྱུར་རོ་ཞེས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །ཕྱག་རྒྱ་ནི་འདི་ཡིན་ཏེ། རྡོ་རྗེའི་ཕྱག་རྒྱ་གཉིས་ལས་ནི། །

མཛུབ་མོའི་རྩེ་མོ་མཉམ་སྦྱར་བ། །བྱས་ནས་ཚོན་རྩི་ཐམས་ཅད་ནི། །འབར་བའི་ལྟ་བས་དགུག་པར་བྱའོ། །ཧི་ཞེས་བྱ་བ་དང་རྡོ་རྗེ་ཉི་མའི་དམ་ཚིག་གི་ཕྱག་རྒྱ་མཐར་སྤར་བར་བྱའོ། །དེ་ལ་འབར་བའི་ལྟ་བ་ནི་འདི་ཡིན་ཏེ། །རབ་ཏུ་འབར་བ་མིག་བསྒུལ་ཞིང་། །མིག་གི་རྫི་མ་འགུགས་

བྱེད་པ། །ལྟ་བ་གཟི་ཅན་ཡིན་པར་བཤད། །འགྲོ་བ་ཐམས་ཅད་འགུགས་བྱེད་པའོ། །དཱིཔྟི་དྲྀཥྚ་ཨཾ་ཀུ་ཤ་ཛཿཞེས་བྱ་བ་འདི་ཡང་མིག་ཏུ་དགོད་དོ། །ཨོཾ་བཛྲ་ཙི་ཏྲ་ས་མ་ཡ་ཧཱུྃ་ཞེས་ཟློས་ཤིང་གཡོན་པའི་རྡོ་རྗེ་ཁུ་ཚུར་གྱིས་དབང་ལྡན་གྱི་ཕྱོགས་ནས་བརྩམས་ཏེ་གཡས་ནས་བསྐོར་བས་

ཚོན་རྩི་དགྱེ་བར་བྱ་སྟེ། ཕྱིས་ཅི་བདེ་བར་བྱའོ། །དེ་ལ་རིམ་པ་ནི་འདི་ཡིན་ཏེ། སྔོན་པོ་དང་། སེར་པོ་དང་། དམར་པོ་དང་། ལྗང་གུ་དང་། དཀར་པོའོ། །དེ་ཡང་། སྔོན་པོ་རྡོ་རྗེ་རྩེ་རང་བཞིན། །གཉིས་པ་གསེར་ལ་དམིགས་པ་སྟེ། །པདྨ་རཱ་གའི་རང་བཞིན་གཞན། །དེ་བཞིན་

གཞན་དག་མརྒད་འདྲ། །དཀར་པོ་ནང་དུ་ཤེས་བྱ་སྟེ། །འདི་ནི་ཚོན་གྱི་རིམ་པར་བཤད། །ཅེས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །ཤར་ཕྱོགས་སུ་ནི་སྔོན་པོ་སྟེ། །ལྷོར་ནི་སེར་པོ་དང་ལྡན་པ། །ནུབ་ཀྱི་ཆ་ནི་དམར་པོ་སྟེ། །བྱང་ནི་ལྗང་གུ་ཡང་དག་ལྡན། །

དབུས་ཀྱི་ས་ཡི་ཆ་ཉིད་ནི། །ཤེལ་ལྟར་སྣང་བ་བླ་ན་མེད། །རྟག་ཏུ་རྡོ་རྗེ་དྲིལ་འཆང་ཞིང་། །རབ་མཉམ་གཞག་པས་བྲི་བར་བྱའོ། །ཡང་ན་སྔ་མ་བཞིན་དུ་རྡོ་རྗེ་ལྕགས་ཀྱུ་ལ་སོགས་པས་ལས་བྱས་ནས། གསེར་རམ་དངུལ་ལས་བྱས་པའམ། ས་ཡང་རུང་སྟེ་ལེགས་བྲིས་པའི། །ཕ་

གུ་གྲུ་བཞིར་བྱས་པ་ལ། །སངས་རྒྱས་གཟུགས་ནི་གཞག་པར་བྱ། །ཨོཾ་བཛྲ་ཛྭ་ལ་ཨགྣི་པྲ་དཱིཔྟ་ཨཱ་ཀཪྵ་ཡ་སརྦ་ཐཱ་ག་ཏ་མ་ཧཱ་བཛྲ་ས་མ་ཡ་ཧཱུྃ་ཛཿ སངས་རྒྱས་སྤྱན་སྔར་རྡོ་རྗེ་ནི། །འབར་བས་བསྐོར་བ་གཞག་པར་བྱ། །དེ་བཞིན་རིན་ཆེན་འོད་བསྐོར་བ། །པདྨོ་རྡོ་རྗེ་ཀུན་དེ་བཞིན། །

เล่ม ๖๒ · หน้า 91b

སྙིང་པོ་ནི་འདིས་བྱའོ། །ཨོཾ་བཛྲ་སཏྭ་བཛྲི་ཛྭ་ལ་མཱ་ལ་ཧཱུྃ་ཕཊ། ཨོཾ་རཏྣ་བཛྲི་ཛྭ་ལ་མཱ་ལ་ཧཱུྃ་ཏྲཱཾ། ཨོཾ་དྷརྨ་བཛྲི་ཛྭ་ལ་མཱ་ལ་ཧཱུྃ་ཧྲཱིཿ། ཨོཾ་ཀརྨ་བཛྲི་ཛྭ་ལ་མཱ་ལ་ཧཱུྃ་ཨཱཿརྡོ་རྗེ་ཤུགས་ཀྱིས་བརྒལ་ནས་ནི། །སངས་རྒྱས་སྤྱན་སྔར་དེ་བཞིན་དུ། །མཁས་པས་ཆོ་ག་བཞིན་བྲི་བ། །རྡོ་རྗེ་ཧཱུྃ་མཛད་དཀྱིལ་

འཁོར་རོ། །དེ་ལ་རྡོ་རྗེ་ཤུགས་ཀྱི་སྙིང་པོ་ནི་འདི་ཡིན་ནོ། །ཨོཾ་བཛྲ་བེ་གཱ་ཀྲ་མ་ཧཱུྃ། དེ་ནས་འདི་ཡི་ཕྱག་རྒྱ་བཤད། །ཡིད་ཀྱིས་རི་མོ་བཏེག་ནས་ནི། །རྡོ་རྗེ་སྲད་བུའམ་གཞན་ཡང་རུང་། །ཕྱིར་བྱུང་ནང་དུ་ཞུགས་ཀྱང་ནི། །དམ་ཚིག་འགལ་བར་དེ་མི་འགྱུར། །དེ་ཡི་དབུས་སུ་སེམས་

དཔའ་ཆེ། །ཕྱག་ན་རྡོ་རྗེ་བྲི་བ་ནི། །ཨུཏྤལ་ཆེ་སྔོ་མཚེར་བའི་མདོག །རྡོ་རྗེ་ཧཱུྃ་མཛད་བསྡུས་པ་ནི། །ཁྲོ་དང་བཅས་པས་འཛུམ་པའི་ཞལ། །གཡོན་བརྐྱང་ཚུལ་དུ་གནས་པ་སྟེ། །འབར་བའི་ཕྲེང་བས་འཁྲིགས་པའི་འོད། །གཡོན་པའི་ཞབས་ཀྱི་མཐིལ་གྱིས་ནི། །དབང་ཕྱུག་

ཆེན་པོ་མནན་པར་བྱ། །གཡས་པའི་ཞབས་ཀྱིས་ཨུ་མ་ཡི། །ནུ་མའི་སྟེང་དུ་གནོན་པ་བྲི། །འདི་ཡི་སྙིང་པོ་འདི་ཡིན་ནོ། །ཧཱུྃ་ཨོཾ་ནི་སུམྦྷ་བཛྲ་བིདྱོཏྟ་མ་ཧཱུྃ་ཕཊཿཅེས་བྱ་བ་དང་། ཨོཾ་བཛྲ་ཤཱུ་ལ་ཞེས་བྱ་བའི་སྙིང་པོ་གཉིས་ནི་ལྷ་ཆེན་པོའིའོ། །ཨོཾ་ཀྲོ་དྷ་བཛྲ་ཨགྣི་ཛྭཱལ་ཡ་ཏྲི་ཤཱུ་

ལཾ་བྷིནྡ་བཛྲ་ཧྲྀ་ད་ཡཾ་བཛྲེ་ཎ་ཧཱུྃ་ཕཊ། ཅེས་པ་ནི་ཨུ་མའིའོ། །དེ་ཡི་ཕྱོགས་ནི་ཐམས་ཅད་དུ། །རྡོ་རྗེ་ཁྲོ་བོ་གཞག་པ་ནི། །ཁྲོས་པ་མཆེ་བ་འབྱུང་བ་སྟེ། །འབར་བའི་ཕྲེང་བས་འཁྲིགས་པའི་འོད། །དེ་ནས་དེ་དག་གི་སྙིང་པོ་ནི་འདི་ཡིན་ནོ། །ཨོཾ་བཛྲ་སཏྭ་ཀྲོ་དྷ་ཧཱུྃ་ཕཊ།

ཨོཾ་བཛྲ་ཀྲོ་དྷ་ཨཱ་ཀཪྵ་ཡ་ཧཱུྃ་ཕཊ། ཨོཾ་བཛྲ་ཀརྨ་ཀྲོ་དྷ་རཱ་གཱ་ཡ་ཧཱུྃ་ཕཊ། ཨོཾ་བཛྲ་ཏུཥྚི་ཀྲོ་དྷ་སཱ་དྷུ་སཱ་དྷུ་ཧཱུྃ་ཕཊ། རྡོ་རྗེ་ཤུགས་ཀྱིས་བརྒལ་ནས་ནི། །དཀྱིལ་འཁོར་དམ་པ་གཉིས་པར་ཡང་། །དེར་ནི་རྡོ་རྗེ་དབང་བསྐུར་བ། །རྡོ་རྗེ་ཁྲོ་བོས་བསྐོར་བ་བྲི། །དེ་ནས་དེ་རྣམས་ཀྱི་

སྙིང་པོ་ནི་འདི་ཡིན་ནོ། །ཏྲཱཾ་ཨོཾ་བཛྲ་བི་ཤུདྡྷེ་ཀྲོ་དྷ་ཧ་ར་ཧ་ར་ཧཱུྃ་ཕཊ། ཨོཾ་བཛྲ་སཱུརྱ་མ་ཧཱ་ཛྭ་ལ་མ་ལ་ཀྲོ་དྷ་ཛྭ་ལ་ཡ་སརྦན་ཧཱུྃ་ཕཊ། ཨོཾ་བཛྲ་ཀྲོ་དྷ་ཀེ་ཏུ་དེ་ཧི་ཧཱུྃ་ཕཊ། ཨོཾ་བཛྲ་ཨཱཏྟ་ས་ཏ་ཀྲོ་དྷ་ཧ་ཧ་ཧ་ཧ་ཧཱུྃ་ཕཊ། རྡོ་རྗེ་ཤུགས་ཀྱིས་བརྒལ་ནས་ནི། །དཀྱིལ་འཁོར་དམ་པ་གསུམ་པ་

เล่ม ๖๒ · หน้า 92a

ཡང་། །རྡོ་རྗེའི་སྡེ་ནི་བྲི་བར་བྱ། །ཁྲོ་བོ་བདག་ཉིད་ཆེན་པོས་བསྐོར། །དེ་ནས་དེ་རྣམས་ཀྱི་སྙིང་པོ་བཤད་དོ། །ཧྲཱིཿཨོཾ་བཛྲ་དྷརྨ་ཀྲོ་དྷ་བི་ནཱ་ཤ་ཡ་བི་ཤོ་དྷ་ཡ་ཧཱུྃ་ཕཊ། ཨོཾ་བཛྲ་ཏཱིཀྵྞ་ཀྲོ་དྷ་ཙྪིནྡ་ཙྪིནྡ་ཧཱུྃ་ཕཊ། ཨོཾ་བཛྲ་ཀེ་ཏུ་ཀྲོ་དྷ་པྲ་བེ་ཤ་ཡ་མཎྜ་ལེ་སརྦན་ཧཱུྃ་

ཕཊ། ཨོཾ་བཛྲ་ཀྲོ་དྷ་བྷཱ་ཥ་བ་ད་བ་ད་ཧཱུྃ་ཕཊ། རྡོ་རྗེ་ཤུགས་ཀྱིས་བརྒལ་ནས་ནི། །དཀྱིལ་འཁོར་དམ་པ་བཞི་པར་ཡང་། །རྡོ་རྗེ་དབབ་པ་བྲི་བ་ནི། །རྡོ་རྗེ་ཁྲོ་བོའི་ཚོགས་ཀྱིས་བསྐོར། །དེ་ནས་དེ་རྣམས་ཀྱི་སྙིང་པོ་བཤད་དོ། །ཨཿཨོཾ་བཛྲ་ཀརྨ་ཧཱུྃ་ཕཊ། ཨོཾ་བཛྲ་ཀ་པ་ཙ་

ཀྲོ་དྷ་རཀྵ་ཧཱུྃ་ཕཊ། ཨོཾ་བཛྲ་ཡཀྵ་ཀྲོ་དྷ་ཁཱ་ད་ཁཱ་ད་ཧཱུྃ་ཕཊ། ཨོཾ་བཛྲ་ཀྲོ་དྷ་མུཥྚི་སཱ་དྷ་ཡ་ས་མ་ཡ་ཧཱུྃ་ཕཊ། དཀྱིལ་འཁོར་གྱི་ནི་གྲྭ་རྣམས་སུ། །རྡོ་རྗེ་དབྱིངས་ཀྱི་ཚུལ་བཞིན་དུ། །ཇི་ལྟར་གོ་རིམས་བཞིན་དུ་ནི། །གསང་བའི་མཆོད་པ་ཀུན་བྲིའོ། །དེ་ནས་དེ་རྣམས་ཀྱི་སྙིང་པོ་ནི་འདི་ཡིན་ནོ། །

ཨོཾ་བཛྲ་ལཱ་སྱ་རཱ་ག་ཡེ་ཧཱུྃ་ཕཊ། ཨོཾ་བཛྲ་མཱ་ལེ་ཨ་བྷིཥིཉྩ་ཧཱུྃ་ཕཊ། ཨོཾ་བཛྲ་གཱི་ཏེ་ག་ཏ་ཧཱུྃ་ཕཊ། ཨོཾ་བཛྲ་ནྲྀ་ཏྱེ་བ་ཤཾ་ཀུ་རུ་ཧཱུྃ་ཕཊ། རྡོ་རྗེ་ཤུགས་ཀྱིས་བརྒལ་ནས་ནི། །དཀྱིལ་འཁོར་དམ་པའི་ཕྱི་རོལ་དུ། །དེ་ཡི་གྲྭ་རྣམས་ཉིད་དུ་ནི། །མཆོད་པའི་ལྷ་མོ་བཞི་རྣམས་བཞག །དེ་ནས་དེ་

རྣམས་ཀྱི་སྙིང་པོ་ནི་འདི་ཡིན་ནོ། །ཨོཾ་བཛྲ་དྷཱུ་པེ་པཱུ་ཛ་སྥ་ར་ཎ་ས་མ་ཡེ་ཧཱུྃ་ཕཊ། ཨོཾ་པུཥྤེ་པཱུ་ཛ་སྥ་ར་ཎ་ས་མ་ཡེ་ཧཱུྃ་ཕཊ། ཨོཾ་བཛྲ་ཨཱ་ལོ་ཀེ་པཱུ་ཛ་སྥ་ར་ཎ་ས་མ་ཡེ་ཧཱུྃ་ཕཊ། ཨོཾ་བཛྲ་གནྡྷེ་པཱུ་ཛ་སྥ་ར་ཎ་ས་མ་ཡེ་ཧཱུཾ་ཕཊ། སྒོ་རྣམས་ཀུན་གྱི་དབུས་སུ་ནི། །ལྕགས་ཀྱུ་ལ་སོགས་གཞག་པར་བྱ། །དཀྱིལ་

འཁོར་ཕྱི་རོལ་གནས་རྣམས་སུ། །ཕྱིའི་རྡོ་རྗེའི་རིགས་རྣམས་སོ། །དེ་ནས་དེ་དག་གི་སྙིང་པོ་བཤད་དེ། ཨོཾ་བཛྲ་ཨྃ་ཀུ་ཤ་མ་ཧཱ་ཀྲོ་དྷ་ཨཱ་ཀཪྵ་ཡ་སརྦ་ས་མ་ཡ་ན་ཧཱུྃ་ཛཿ། ཨོཾ་བཛྲ་མ་ཧཱ་ཀྲོ་དྷ་པྲ་བེ་ཤ་ཡ་སརྦ་ས་མ་ཡ་ན་ཧཱུྃ་ཧཱུྃ་ཨོཾ་བཛྲ་སྥོ་ཊ་མ་ཧཱ་ཀྲོ་དྷ་བནྡྷ་བནྡྷ་སརྦ་ས་མ་ཡ་ན་ཧཱུྃ་བཾ། ཨོཾ་བཛྲ་ཨཱ་བེེ་ཤ་

ཡ་མ་ཧཱ་ཀྲོ་དྷ་ཨཱ་བེ་ཤ་ཡ་སརྦ་ས་མ་ཡ་ན་ཧཱུྃ་ཧོཿ། ཕྱིའི་དཀྱིལ་འཁོར་གྱི་ཁྱམས་ལ། ཤར་ཕྱོགས་སུ་བྱམས་པ་དང་། མཐོང་བ་དོན་ཡོད་དང་། ངན་སོང་ཐམས་ཅད་སྦྱོང་བ་དང་། མྱ་ངན་དང་མུན་པ་ཐམས་ཅད་ངེས་པར་འཇོམས་པའི་བློ་གྲོས་རྡོ་རྗེ་རྩེ་ལྔ་པ་བསྣམས་པར་བྲིའོ། །

เล่ม ๖๒ · หน้า 92b

ལྷོ་ཕྱོགས་སུ་སྤོས་ཀྱི་གླང་པོ་དང་། དཔའ་བར་འགྲོ་བ་དང་། ནམ་མཁའ་མཛོད་དང་། ཡེ་ཤེས་ཏོག་རིན་པོ་ཆེ་བསྣམས་པར་བྲིའོ། །ནུབ་ཕྱོགས་སུ་འོད་དཔག་ཏུ་མེད་པ་དང་། ཟླ་བའི་འོད་དང་། བཟང་སྐྱོང་དང་། དྲ་བ་ཅན་གྱི་འོད་པདྨ་བསྣམས་པར་བྲིའོ། །བྱང་གི་ཆར་རྡོ་རྗེ་

སྙིང་པོ་དང་། བློ་གྲོས་མི་ཟད་པ་དང་། སྤོབས་པ་བརྩེགས་པ་དང་། ཀུན་དུ་བཟང་པོ་སྣ་ཚོགས་རྡོ་རྗེ་བསྣམས་པར་བྲིའོ། །ཡང་ན་འཁོར་བ་འཇིག་དང་། གསེར་ཐུབ་དང་། འོད་སྲུངས་དང་། ཤཱཀྱ་ཐུབ་པ་ཞེས་བྱ་བའི་དེ་བཞིན་གཤེགས་པ་བཞི་པོ་མ་གཏོགས་པ། བྱམས་པ་ལ་

སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་བཞིས་སྟོང་དུ་མ་ཚང་བར་ཤར་ཕྱོགས་ནས་བརྩམས་ཏེ་ཁྱམས་ལའོ། །ཨོཾ་སརྦ་སཾ་སྐཱ་ར་པ་རི་ཤུདྡྷ་དྷརྨ་ཏེ་མཧཱ་ན་ཡ་པ་རི་བཱ་རེ་སྭཱ་ཧཱ། ཞེས་བྱ་བའི་རིག་པ་འདིས་རྡོ་རྗེ་དབྱིངས་ཀྱི་དཀྱིལ་འཁོར་བྲི་བར་བྱའོ། །ཡང་ཕྱིའི་དཀྱིལ་

འཁོར་གྱི་ཁྱམས་ལ་ཤར་ཕྱོགས་སུ་སྒྱུ་མའི་རྡོ་རྗེ། རྡོ་རྗེ་དྲིལ་བུ། ཐུབ་པའི་རྡོ་རྗེ། རྡོ་རྗེ་མཚོན་ཆ་ཆུང་མ་དང་བཅས་པ། ལྷོར་བདུད་རྩི་འཁྱིལ་པ། རྡོ་རྗེ་འོད། རྡོ་རྗེ་དབྱིག་པ། རྡོ་རྗེ་གསེར་སྨུག་ཆུང་མ་དང་བཅས་པའོ། །ནུབ་ཏུ་རྡོ་རྗེ་གླང་པོ་སྣ། རྡོ་རྗེ་ཕྲེང་བ། རྡོ་རྗེ་དབང་། རྡོ་རྗེ་

རྣམ་པར་རྒྱལ་བ། རྡོ་རྗེ་གཏུན་ཤིང་། རྡོ་རྗེ་རླུང་། རྡོ་རྗེ་མེ། རྡོ་རྗེ་འཇིགས་པ་ཆུང་མ་དང་བཅས་པར་རོ། །བྱང་ཕྱོགས་སུ་ནི་རྡོ་རྗེ་ལྕགས་ཀྱུ། རྡོ་རྗེ་དུས། རྡོ་རྗེ་བགེགས་ཀྱི་གཙོ་བོ། རྡོ་རྗེ་ཆུ་ཀླུང་ཆུང་མ་དང་བཅས་པ་བྲི་བར་བྱའོ། །ཁྱབ་འཇུག་ལ་སོགས་པ་འདི་དག་ཐམས་ཅད་

འཇིག་རྟེན་ལས་འདས་པའི་ལྷ་རྣམས་ཀྱི་སྐུའི་ཕྱེད་ཀྱི་ཚད་ཙམ་དུ་ཐམས་ཅད་ཁྱམས་ལ་བརྟེན་པར་བྱའོ་ཞེས་རྡོ་རྗེ་རྩེ་མོ་ལས་གསུངས་པ་ཡིན་ནོ། །དེ་ནས་རྡོ་རྗེ་གསེར་ལ་སོགས་པ་འདི་རྣམས་ཀྱི་སྙིང་པོ་དང་རིག་པ་རྣམས་བཤད་དོ། །ཨོཾ་བཛྲ་ཙཀྲ་ཧཱུཾ། ཨོཾ་བཛྲ་ཧེ་མེ་ཚིནྡྷ་ཙཀྲེ་ན་

བཛྲི་ཎི་ཧཱུྃ་ཕཊ། ཨོཾ་བཛྲ་གྷཎྜ་ཀེ་ཧཱུྃ། ཨོཾ་བཛྲི་ནི་ཀཽ་མ་རཱི་ཤཱི་གྷྲཾ་ཨཱ་བེ་ཤ་ཡ་གནྡྷ་ཤབྡེ་ན། བཛྲ་པཱ་ཎི་པཱི་ཡེ་བཛྲ་ས་མ་ཡེ་མ་ནུ་སྨ་ར་ར་ཎ་ཧཱུྃ་ཕཊ། ཨོཾ་བཛྲ་དནྟ་ཏིཥྛ་ཧཱུྃ། ཨོཾ་བཛྲ་ཤཱནྟི་ཛ་པ་ཛེ་པ་ཨཀྵ་མ་ལ་ཡ་སརྦ་ན་མཱ་ར་ཡ་ཤཱནྟ་ཏིཥྛ་ཧཱུྃ་ཕཊ། ཨོཾ་བཛྲ་ཨ་ཡུ་དྷ་ཧཱུྃ་ཕཊ། ཨོཾ་བཛྲ་མུཥྚི་ཧ་ན་ཧ་ན་

เล่ม ๖๒ · หน้า 93a

བཛྲེ་ཎ་བྷིནྡ་བྷིནྡ་པི་ཌ་ཡ་སརྦ་དུཥྚཱཾ་ཧྲྀ་ད་ཡ་ནི་ཨོཾ་སུམྦྷ་ཧཱུྃ་ཕཊ། ཨོཾ་སུམྦྷ་ནི་སུམྦྷ་ཧཱུྃ་ཕཊ། ཨོཾ་ཛྭ་ལི་ཏ་དཱིཔྟ་བཛྲ་ཧཱུྃ་ཕཊ། ཨོཾ་ཨ་མྲྀ་ཏེ་སརྦ་དུ་ཥྚཱཾ་གྲྀཧྣ་བནྡྷ་ན་ཧ་ན་པ་ཙ་བིདྷྭནྶ་ཡ་བི་ནཱ་ཤ་ཡ་ཚིནྡ་བྷིནྡ་བྷསྨི་ཀུ་རུ་མུརྟ་ན་ཧ་ད་ཡ། བཛྲེ་ཎ་ཡེ་ཀེ་ཙིཏ་མ་མ་ཨ་མུ་ཀ་སྱ་

བི་གྷྣ་བི་ནཱ་ཡ་ཀ་སྟྭཾ་ད་མ་ཡ་དཱིཔྟ་ཀྲོ་དྷ་བཛྲི་ཎི་ཧཱུྃ་ཕཊ། ཨོཾ་བཛྲ་སོ་མྱ་ཧཱུྃ། ཨོཾ་བཛྲ་ཀནྟི་མཱ་ར་ཡ་སོ་མྱ་རཱུ་པེ་པྲ་དཱིཔྟ་རཱ་གེ་ན་ཤཱི་གྷྲཾ་སྥོ་ཊ་ཡ་ཧྲྀ་ད་ཡཾ། བཛྲ་དྷ་ར་སཏྱེ་ན་མ་ཧཱ་བཛྲྱོད་ན་ཀ་ར་ལི་ཤི་ཏ་རཤྨི་བཛྲི་ཎི་ཧཱུྃ་ཕཊ། ཨོཾ་བཛྲ་དཎྜ་ཧཱུྃ་ཕཊ། ཨོཾ་བཛྲ་དཎྜ་ཨགྣི་གྷ་ཏ་ཡ་ཧཱུྃ་ཕཊ། ཨོཾ་བཛྲ་བི་

ཀྲྀ་ཏ་ཧཱུྃ་ཕཊ། ཨོཾ་བཛྲ་མེ་ཁ་ལེ་ཁ་ཎི་ཁ་ཎུཤབྡེ་ན་བི་ཤ་ཀུ་རུ་ཏྲིཥྚ་མཱ་ར་ཡ་བི་ཤ་ནི་ཧཱུྃ་ཕཊ། ཨོཾ་བཛྲ་མ་དེ་ཧཱུྃ་ཕཊ། ཨོཾ་བཛྲ་བི་ལ་ཡེ་ཧཱུྃ། ཚིནྡ་ཨ་སི་ན་བྷིནྡ་བཛྲེ་ཎ་མཱ་ར་ཡ་ཨུནྨ་ད་ཡ་བི་བ་པི་བ་ཧཱུྃ་ཕཊ། ཨོཾ་བཛྲ་མཱ་ཡ་ཧཱུྃ། ཨོཾ་བཛྲ་ཨཱ་ཤ་ན་ནི་བྷཀྵ་ཡ་སརྦ་དུཥྚཱན་བཛྲ་ད་ཤ་ནི་ཤཀྟི་

ད་ར་ཎི་མ་ནུ་ཥ་མཱཾ་ས་ཨཱ་ཧ་རེ་ན། ན་ར་རུ་དྷི་ར་བ་ས་པྲི་ཡ་མཛྫ་ས་མུ་ལེ་བ་ཎ་བི་ལིཔྟ་ག་ཏེ་ཨ་ན་ཡ་སརྦ་དྷ་ན་དྷ་ནྱ་ཧི་ར་ཎྱ་སུ་བརྞ་ཨ་ཏྲི་ཎི་སཾ་ཏྲ་མ་ཡ་བ་ར་ཏེ་བཀྵི་ནི་ཧཱུྃ་ཕཊ། ཨོཾ་བཛྲ་མ་དྷ་ཧཱུྃ། ཨོཾ་བཛྲ་བ་ཤི་ནི་ཨ་ན་ཡ་བྷསྨིཾ་ཀུ་རུ་སརྦ་པུ་རུ་ཥ་དྷ་སི་ཀུ་རུ་ཏྲུཾ་དྷ་མ་པྲ་སཱ་ད་ཡ་བྱ་བ་ཧ་ར་བྷྱོ།

བྷཱུ་ཏ་བ་ར་བི་ཛ་ཡཾ་ཀ་རི་བཛྲ་པ་ཏི་ཀ་ར་ཎི་ཧཱུྃ་ཕཊ། ཨོཾ་བཛྲ་མ་སི་ཧཱུྃ། ཨོཾ་བཛྲ་བ་སི་ནི་ཨ་ན་ཡ་སརྦ་བསྟྲཾ། ཨཎྞ་བ་ན་དི་ཏྱུ་པ་ཀ་ར་ཎཱ་ཎི་ཤཱི་གྷྲཾ་བ་ཤཱི་ཀུརྦི་དམྨེ་པྲ་ཡཙྪ་ཨ་བི་ཤ་ས་ཏྱཾ་ཀ་ཐ་ཡ། བཛྲ་ཀོ་ཤ་དྷ་རི་ཎི་ཧཱུྃ་ཕཊ། ཨོཾ་མུ་ས་ལ་ཧཱུྃ་ཕཊ། ཨོཾ་བཛྲ་དྷུ་ཏི་ཨ་ན་ཡ་སརྦཾ་མཎྜ་ལཾ་པྲ་

བེ་ཤ་ཡ། ཨཱ་བེ་ཤ་ཡ། བནྡྷ་ཡ་བནྡྷ་ཡ། སརྦ་ཀརྨ་ཎི་མེ་ཀུ་རུ་ཤཱི་གྷྲཾ་ཤཱི་གྷྲཾ། ལ་གྷུ་ལ་གྷུ་ཏྲཱ་ས་ཡ་མཱ་ར་ཡ། ན་རཱ་བེ་ཎ་བཛྲ་ཁ་ཊྭཱཾ་ག་དྷ་རི་ཎི་ཧཱུྃ་ཕཊ། ཨོཾ་བཛྲ་པ་ཏ་ཧཱུྃ་ཕཊ། ཨོཾ་བཛྲ་བི་ག་བཛྲི་ནི་གྷུ་གྷུ་གྷུ་གྷུ་ཤབྡེ་ན་མཱ་ར་ཡ། བི་ག་རི་བི་དྷྭནྶ་ཡ་བཛྲ་པ་ཏ་དྷ་རི་ཎི་ཧཱུྃ་ཕཊ། ཨོཾ་བཛྲ་

ཛྭ་ལ་ནི་ཧཱུཾ། ཨོཾ་བཛྲ་ཛྭ་ལ་ཡ་སརྦཾ་བཛྲ་ཛྭ་ལ་ཡ་ད་ཧ་ད་ཧ་བྷསྨིཾ་ཀུ་རུ་ཧཱུྃ་ཕཊ། ཨོཾ་བཛྲ་གྲ་ཧ་ཧཱུྃ། ཨོཾ་བཛྲ་བ་ཀྟེ་པྲ་བཀྟ་དཾཥྚྲ་ཀ་ར་ཡ་བྷི་ཥ་ཎ་ན་བཀྟེ་ཤཱི་གྷྲཾ་གྲྀཧྞ་ཨཱ་བེ་ཤ་ཡ། བྷཀྵ་ཡ་རུ་དྷི་ར་ཎ་པི་བ་མ་ཧཱ་ཡཀྵ་ཎི་བཛྲ་པཱ་ཤ་དྷ་རི་ཎི་ཧཱུྃ་ཕཊ། ཨོཾ་བཛྲ་དཾཥྚ་ཧཱུྃ། ཨོཾ་བཛྲ་མུ་ཁ་ཨ་ན་ཡ་

เล่ม ๖๒ · หน้า 93b

བཛྲ་དཾཥྚྲེ་བ་ཡ་ཎ་ཀེ་པཱ་ཏཱ་ལ་ནི་བ་སི་ནི་ཁ་ཁ། ཁཱ་ཧི་ཁཱ་ཧི། སརྦ་མུ་ཁེ། པྲ་བེ་ཤ་ཡ། སྥོ་ཊ་ཡ། མརྨ་ཎཱི་སརྦ་དུཥྚཱན་བཛྲི་ཎི་སིདྡྷ་ཨ་དྷ་རི་ཎི་ཧཱུྃ་ཧཱུྃ་ཕཊ། ཨོཾ་བཛྲ་མ་ར་ཎ་ཧཱུྃ། ཨོཾ་བཛྲ་ཀཱ་ལི་མ་ཧཱ་པྲེ་ཏ་རཱུ་པི་ནི་མ་ནུ་ཥ། མཱཾ་ས་རུ་དྷི་ར་པྲི་ཡེ་ཨེ་ཧྱེ་ཧི་གྲྀཧྞ་གྲྀཧྞ་བྷཀྵ་ཡ་བཛྲ་ཌཱ་ཀི་ནི་

བཛྲ་ཤཾ་ཀ་ལེ་སརྦ་དེ་བ་ག་ཎ་མ་ཏྲ་བྷཱུ་ཏེ་ཧ་ར་ཧ་ར་པྲཱ་ཎཱན་ཨ་མུ་ཀ་སྱ་ཀ་པཱ་ལ་ཨ་ལཾ་ཀྲྀ་ཏ་སརྦ་ཀཱ་ཡེ་ཀིཉྩི་ར་ཡ་སི། བཛྲ་ཁ་ཊྭཱཾ་ག་དྷ་རི་ཎི་པྲེ་ཏ་མ་ཎུ་ཥ། ཤ་རཱི་རེ་ཤཱི་གྷྲཾ། ཨཱ་བེ་ཤ་ཡ། པྲ་བེ་ཤ་ཡ། བནྡྷ་ཡ་བ་ཤི་ཀུ་རུ་མཱ་ར་ཡ་བཛྲ་རཀྵ་སི་ཧཱུྃ་ཧཱུྃ་ཧཱུྃ་ཧཱུྃ་ཕཊ། ཨོཾ་བཛྲ་བིགྷྣཱཾ་ཧཱུྃ། ཨོཾ་བཛྲ་བྷཱུ་

ཏ་ནེ་མ་ནུ་ཥ་མཱནྶ་བ་ས་རུ་དྷི་ར་མུ་ཏྲ་པུ་རི་ཤླེ་ཥྨ་ཤིཾ་གྷ་ན། ཀ་རེ་ཏོ་གརྦྷ་ཧཱ་རི་ཎཱ་ཡ་ཧི་ཤཱི་གྷྲཾ་ཨི་དཾ་ཨ་མུ་ཀ་སྱ་ཀུ་རུ་བཛྲ་ཤོ་དྷ་ནི་ཀ་ད་རི་ནི་སརྦ་ཀརྨ་ཎི་མེ། ཀུ་རུ་ཀུ་རུ་ཧཱུྃ་ཕཊ། ཨོཾ་བཛྲ་ཧ་ར་ཎ་ཧཱུྃ་ཕཊ། ཨོཾ་བཛྲ་མ་ཀ་རེ་གྲ་ས་ཤཱི་གྷྲཾ། པྲ་བེ་ཤ་ཡ། པཱ་ཏཱ་ལཾ་བྷཀྵ་ཡ་བཛྲ་མ་ཀ་ར་

དྷ་ར་ནི་ཧཱུྃ་ཕཊ། མེའི་མཚམས་ནས་བརྩམས་ཏེ། བསྐོར་ཕྱོགས་སུ་བྷི་མ་དང་། དཔལ་མོ་དང་། དབང་ལྡན་མ་དང་། དཀའ་ཐུབ་བཟློག་མ་ཡང་འདིས་བྲི་བར་བྱའོ། །ཨོཾ་སརྦ་ག་མི་ནི་སརྦ་བྷཀྵེ་སཱ་དྷ་ཡ་གུ་ཧྱ་བཛྲ་ཎི་ཧཱུྃ་ཕཊ། བཅོམ་ལྡན་འདས་རྣམ་པར་སྣང་མཛད་ཟླ་

བའི་མདོག་ཅན་ཞལ་བཞི་པ། རྡོ་རྗེ་སྐྱིལ་མོ་ཀྲུང་དང་། ཕྱག་གཉིས་བྱང་ཆུབ་མཆོག་གི་ཕྱག་རྒྱ་ཅན། བཅོམ་ལྡན་འདས་རྡོ་རྗེ་ཧཱུྃ་མཛད་སྔོན་པོ་ཇི་སྐད་བཤད་པའི་ཕྱག་རྒྱས་རྡོ་རྗེ་དང་དྲིལ་བུ་བསྣམས་པ། ཁྲོ་བོ་རྡོ་རྗེ་སེམས་དཔའ་ཡང་སྐུ་མདོག་སྔོན་པོ། རྒྱལ་པོ་གསེར་གྱི་མདོག་

ཅན། ཆགས་པ་དམར་པོ། ལེགས་པ་མརྒད་ཀྱི་མདོག་ཅན། རིན་ཆེན་ཧཱུྃ་མཛད་དང་། རྡོ་རྗེ་རིན་ཆེན་གསེར་གྱི་མདོག་ཅན། ཉི་མ་མདོག་དམར་པོ། རྒྱལ་མཚན་ནམ་མཁའི་མདོག་ཅན་བཞད་པ་དཀར་སེར། ཆོས་ཀྱི་ཧཱུྃ་མཛད་དང་། རྡོ་རྗེ་ཆོས་ཀྱང་སྐུ་མདོག་དཀར་

དམར། རྣོན་པོ་ནམ་མཁའི་མདོག་ཅན། རྒྱུ་གསེར་གྱི་མདོག་ཅན། སྨྲ་བ་ཟངས་ཀྱི་མདོག་ཅན། ལས་ཀྱི་ཧཱུྃ་མཛད་དང་། ཁྲོ་བོ་རྡོ་རྗེ་ལས་སྣ་ཚོགས་པའི་མདོག་ཅན། སྲུང་བ་གསེར་གྱི་མདོག་ཅན་གནོད་སྦྱིན་ནག་པོ། ཁུ་ཚུར་སེར་པོ། ཁྲོ་བོ་སྒེག་མོ་སྔོན་མོ། ཁྲོ་མོ་ཁུ་

เล่ม ๖๒ · หน้า 94a

ཚུར་གཉིས་ཀྱིས་རྡོ་རྗེ་གཉིས་བསྣམས་ཏེ། རྡོ་རྗེ་བསྙེམས་པའི་ཚུལ་གྱིས་ཆུང་ཟད་འདུད་པ། ཆ་ལང་བརྡུང་བ་ལ་སོགས་པའི་ལྷ་མོ་བཞིས་བསྐོར་བ། ཕྲེང་བ་མ་སེར་མོ་ཁུ་ཚུར་གཉིས་ཀྱིས་རྡོ་རྗེ་ཕྲེང་བ་འཛིན་པ། མན་ཏ་ལི་ཀ་བརྡུང་བའི་ལྷ་མོ་བཞིས་བསྐོར་

བ། གླུ་མ་མདོག་དམར་གྱི་པི་ཝང་ལེན་པ་ལ་བརྩོན་པས་གནས་པའི་ལྷ་མོ་བཞིས་བསྐོར་བ། གར་མ་སྣ་ཚོགས་པའི་མདོག་ཅན། ཕྱག་གཉིས་ཀྱིས་རྡོ་རྗེ་རྩེ་གསུམ་པ་བསྣམས་ཏེ་གར་བྱེད་པ་ལ་བརྩོན་པ། མུ་ཀུན་ད་ཐོགས་པ་གནས་པའི་ལྷ་མོ་བཞིས་བསྐོར་ཏེ་གནས་པའོ། །བདུག་

པ་མ་མདོག་སྔོ་བ་གཡོན་པའི་ཁྲོ་བོ་ཁུ་ཚུར་སྡིགས་མཛུབ་བསྒྲེང་བ། གཡས་པའི་རྡོ་རྗེ་ཁུ་ཚུར་གྱིས་སྤོས་ཁང་བསྣམས་པ། རུ་དུང་འབུད་པ་ལ་བརྩོན་པའི་ལྷ་མོ་བཞིས་བསྐོར་བ། མེ་ཏོག་མ་སེར་བ། ཕྱག་གཡོན་པ་མེ་ཏོག་གི་སྣོད་ཐོགས་ནས། གཡས་ཀྱིས་མེ་ཏོག་གི་

ཆར་འབེབས་པ། པ་ཊ་ཧ་ཐོགས་པའི་ལྷ་མོ་བཞིས་བསྐོར་ཏེ་བཞུགས་པ། མར་མེ་མ་མདོག་དཀར་དམར། གཡོན་པའི་ཁུ་ཚུར་སྡིགས་མཛུབ། གཡས་པའི་རྡོ་རྗེ་ཁུ་ཚུར་གྱིས་མར་མེའི་སྡོང་བུ་བསྣམས་པ། ཏི་མི་ལ་བདུག་པ་ལ་བརྩོན་པའི་ལྷ་མོ་བཞིས་བསྐོར་བ།

བྱུག་པ་མ་སྣ་ཚོགས་པའི་མདོག་ཅན། ཕྱག་གཡོན་པས་དྲིས་གང་བའི་དུང་ཆོས་བསྣམས་པ། གཡས་པས་དྲི་འཐོར་བ་དྷ་ཀ་བརྡུང་བ་ལ་བརྩོན་པའི་ལྷ་མོ་བཞིས་བསྐོར་བ། ལྕགས་ཀྱུ་སྔོན་པོ་ཞགས་པ་སེར་པོ། ལྕགས་སྒྲོག་དཀར་དམར། དྲིལ་བུ་སྣ་ཚོགས་པའི་མདོག་

ཅན། བསྐལ་པ་བཟང་པོའི་མཐར་ཐུག་པ་འདི་དག་ཐམས་ཅད་ཀྱང་གང་ལ་ཁྱད་པར་གྱི་བདག་མེད་པ་དེར་ནི་གཡོན་བརྐྱང་བའི་གནས་པས་བཞུགས་པ། ཐུགས་ཀར་ཁྲོ་བོའི་སྡིགས་མཛུབ་བསྒྲེང་བ་ལ་བརྩོན་པ། གཡས་པ་རྡོ་རྗེ་ཁུ་ཚུར་གྱིས་རང་གི་མཚན་མ་བསྣམས་ཏེ་

ཚམ་ངམ་གྱི་ཚུལ་གྱིས་བཞུགས་པའོ། །གཞན་ཡང་དྲག་པོ་ལ་སོགས་པ་ཕྱི་རོལ་གྱི་རྡོ་རྗེའི་རིགས་ཡང་དག་པར་བྲི་བར་བྱའོ། །དེ་ལ་དྲག་པོ་ནི་མདོག་དཀར་པོ་ལག་པ་བཞི་པ། གཡས་ཀྱི་ལག་པ་གཅིག་གིས་ཨུ་མ་ལ་འཁྱུད་པ། གཉིས་པ་རྡོ་རྗེ་རྩེ་གསུམ་པ་དང་བཅས་པས་

ที่มาและสัญญาอนุญาต

ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ

สัญญาอนุญาต Public Domain · หลักฐาน

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

  • หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
  • ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด