བྱ་བ་བསྡུས་པ་ཞེས་བྱ་བ
ชื่อสันสกฤต (อักษรทิเบต ตามตัวบท) ཀྲི་ཡ་སཾ་གྲ་ཧ་ནཱ་མ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๖๒ · หน้า 360b
སོ་སོར་དྲི་བཟངས་ཀྱི་ཐིག་ལེ་ཕུལ་ནས་དང་པོར་སྟོང་པའི་ངང་ལས་ཙོག་པུར་འདུག་ནས། དེ་ནས་སྐྱུར་མོ་དང་། དེ་ནས་མངར་མོ་དང་། སྤགས་ལ་སོགས་པ་རྣམས་ཕུལ་ནས་ཤཱ་ལིའི་ཟན་དབུལ་བར་བྱའོ། །དེ་ནས་ཞུན་མར་དང་། ཚོད་མ་དང་། སྣ་ཚོགས་པའི་
ཉ་དང་ཤའི་རྣམ་པ་རྣམས་དང་། བཟའ་བ་ལ་སོགས་པ་སྣ་ཚོགས་པ་པིཥྚ་བྷུ་པ་ཀ་དང་། ལ་དུ་ལ་སོགས་པ་ཁུར་བའི་རྣམ་པ་རྣམས་དབུལ་བར་བྱའོ། །སོ་སོར་རེ་རེ་ནས་ཕུང་པོ་ལས་གསར་པ་རྣམས་གོ་རིམས་བཞིན་དུ་བླངས་ནས་ཆང་དང་ཆུ་དང་། སོ་རྩི་དང་
མེ་ཏོག་གི་ཕྲེང་བ་དང་། མར་མེ་ཡང་དེའི་སྟེང་དུ་ཕུལ་ནས་ལས་ཐམས་ཅད་པའི་སྔགས་བཟླས་ནས་སྒོ་ལ་མངོན་པར་ཕྱོགས་པའི་ས་ཕྱོགས་གཙང་མར་གཏོར་མའི་ཕུང་པོ་གཏང་བར་བྱའོ། །དེ་ནས་སྦྱིན་བདག་གིས་དྲི་བཟངས་ཀྱི་ཆུས་སྔོན་བཞིན་དུ་མཎྜལ་བྱས་ནས་
ཚིགས་སུ་བཅད་པ་གསུམ་པོ་འདིས་གསོལ་བ་གདབ་པར་བྱའོ། །རྣལ་འབྱོར་བདུད་རྩིའི་རོ་གཅིག་བཏུང་བ་རྣམ་དག་སེམས་ཀྱི་ནི། །གནས་ལ་སོགས་པའི་ཕྱོགས་སུ་འཇུག་པས་རྣམ་པར་དག་པའི་ལུས། །དཔལ་གྱི་གནས་དབུས་མཆོག་གི་དཀྱིལ་འཁོར་
འཁོར་ལོའི་མགོན་པོ་སྟེ། །མཆོག་གི་བླ་མ་ལ་ནི་མགོ་བོས་རྟག་ཏུ་ཕྱག་འཚལ་ལོ། །ལྷ་ཡི་ཕྲེང་བས་བརྒྱན་པའི་ལུས་ཅན་རིན་པོ་ཆེ། །ལུས་ཀུན་རྟག་ཏུ་རྣམ་པར་མཛེས་པ་དཔའ་བོ་ཡིས། །འཁོར་ལོ་ལ་གནས་མགོན་པོ་ལྷན་སྐྱེས་དྲི་མེད་པ། །རྟག་ཏུ་རྣལ་
འབྱོར་སྡོམ་པས་འཇུག་ལ་ཕྱག་འཚལ་ལོ། །རྣམ་པ་གཅིག་ཏུ་མཛད་པ་དེ་ཡང་ཁུ་བའི་གནས་ལ་པདྨའི་མཆོག་གི་སྙིང་པོ་ལ། །དེའི་དབུས་ལ་མཆོག་གི་ཧཾ་ས་ཀུནྡ་དཀར་པོ་རྣམ་པར་སྐྱེད་མཛད་ཀུན་གྱི་བདག །ཐམས་ཅད་མཁྱེན་པའི་ཤིན་ཏུ་རྣམ་དག་གནས་
ནི་ཤིན་ཏུ་མཛེས་པའི་ལྷ་མོའི་གནས་ལ་ནི། །ལྷན་སྐྱེས་དྲི་མེད་མཆོག་གི་བདེ་བ་ལྷན་སྐྱེས་འབྱུང་བའི་འདྲེན་པ་ཁྱེད་ལ་བདག་ཕྱག་འཚལ། །ཞེས་བརྗོད་ནས་ཇི་ལྟར་དགྱེས་པར་མཛད་དུ་གསོལ་ཞེས་བརྗོད་པར་བྱའོ། །དེ་ལ་རྗེས་སུ་ཆགས་པའི་སྡུག་བསྔལ་ལ་སོགས་ཡང་
เล่ม ๖๒ · หน้า 361a
དག་ལྡན་པའི་ལུས་ཀྱི་ཤིང་ནི་ཡེ་ཤེས་མི་ཡིས་ཡང་དག་བསྲེགས་ནས་དོན་དམ་སྦྱིན་སྲེག་བྱ། །གཟུགས་དང་སྒྲ་དང་དྲི་དང་རོ་དང་རེག་བྱས་ཞལ་དང་སྤྱན་དང་སྙན་དང་ཤངས་དང་སྐུ་རྣམས་བདེ་བར་ཚིམ་པར་བྱ། །དེ་ནས་ནང་དུ་ཕྲ་མོའི་སངས་
རྒྱས་དང་སངས་རྒྱས་ཀྱི་རྣམ་པའི་སྐུ་གཟུགས་ཁྱབ་བདག་ཆེན་པོ་དང་། །དཀྱིལ་འཁོར་པའི་ལྷ་རྣམས་དང་བཅས་པ་ལ་མཐེ་བོང་དང་མིང་མེད་དག་གིས་བདུད་རྩིའི་ཐིགས་པ་ཡང་དག་པར་བཟུང་ནས་ལེགས་པར་དབུལ་བར་བྱའོ། །དེ་ནས་ལྟེ་བའི་དཀྱིལ་འཁོར་
དུ་གྱུར་པའི་ཐུར་སེལ་གྱི་རླུང་གིས་བཅུད་རྣམས་བཀུ་གནས་ཧུབ་གསུམ་བཏུང་སྟེ་ཡེ་ཤེས་ཆེན་པོ་དང་ལྡན་པའི་སྔགས་པ་བདེ་བར་གནས་པར་བྱའོ། །དེ་ནས་བཟའ་བ་དང་། མྱང་བ་དང་། བལྡག་པ་དང་། གཞིབ་པ་དང་། བཏུང་བ་དང་། ཆང་ལ་སོགས་
པ་རྣམས་ཀྱིས་ཡང་དག་པར་ཚིམ་པར་བྱའོ། །མཚན་མོ་རིལ་པོ་གཉིད་ཉལ་བར་མི་བྱའོ། །དེ་ནས་གར་དང་གླུ་དང་རོལ་མོ་རྣམས་ཀྱིས་རྒྱལ་བའི་ཚོགས་པ་ཐམས་ཅད་མཆོད་པར་བྱའོ། །དེའི་རྗེས་ལ་བདག་མེད་པའི་ཡེ་ཤེས་ཀྱི་བདག་ཉིད་ཀྱིས་སངས་རྒྱས་དང་ལྡན་
པས་རང་རང་གི་སྤྱི་བོའི་སྟེང་དུ་མཐོ་གང་གི་ཚོད་ཀྱི་སྟེང་ནས་འཛག་པའི་མཐར་ཐུག་པར་གྱུར་པར་ཡེ་ཤེས་བདུད་རྩིའི་རྒྱུན་གྱི་ཟླ་བའི་དཀྱིལ་འཁོར་རྣམ་པར་བསྒོམས་ལ། དེའི་དབུས་སུ་རང་རང་གི་ལྷ་རྣམས་སུ་བོན་ལ་གནས་པར་གྱུར་ཏེ། སྙིང་གའི་མཐའ་དང་། རང་གི་
སྤྱི་བོར་གནས་པའི་ཟླ་བའི་དཀྱིལ་འཁོར་གྱི་སྟེང་དུ་རང་རང་གི་ལྷ་རྣམས་ཀྱི་མཚན་མ་ནས་ཀྱི་འབྲུའི་ཚད་ཙམ་རྣམ་པར་བསྒོམས་ལ་ཚིམ་པར་བྱའོ། །དེ་ནས་རྣལ་འབྱོར་དང་གཞན་རྣལ་འབྱོར་པ་ཐབས་དང་ཤེས་རབ་ཀྱི་ངོ་བོ་ཉིད་སྙིང་རྗེ་ཆེན་པོའི་ངོ་དང་ཡང་དག་པར་ལྡན་པས་
དངོས་པོ་ཐམས་ཅད་ཀྱི་རང་བཞིན་རྣམ་པར་ཐར་པ་གསུམ་གྱིས་རྣམ་པར་དག་པ་འགྱུར་བ་མེད་པ་དོན་དམ་པའི་བདེ་བས་ལས་ཐམས་ཅད་ལ་བྱེད་པ་ཐམས་ཅད་མཐའ་ཡས་པའི་དེ་བཞིན་གཤེགས་པའི་སྐུར་རྣམ་པར་བསམ་པར་བྱའོ། །གང་གི་ཚེ་ཟླ་བའི་ལམ་གྱིས་རླུང་
เล่ม ๖๒ · หน้า 361b
རབ་ཏུ་དབབ་པ་དེའི་ཚེ་སྦྱིན་བདག་ལ་ཡང་དག་པར་བསྟེན་པའི་ཤིས་པ་བརྗོད་པར་བྱའོ། །དེ་ནས་ཨོཾ་ཤྲཱི་བཛྲི་གྷེཾ་ཧཱུཾ་ཞེས་པ་འདི་རྣམས་ཀྱི་ས་བོན་ལས་སྐྱེས་པ་ཁ་དོག་ཐམས་ཅད་པའི་ཡི་གེ་གསུམ་གྱི་སྔགས་ཀྱིས་ལན་བདུན་ཡོངས་སུ་བཟླས་ནས་རབ་ཏུ་སྤྱད་པར་བྱའོ། །དེ་ནས་
སོ་རྩི་དང་མར་མེ་དང་སྤོས་ཀྱི་རེང་བུ་ལ་སོགས་པ་ཕུལ་ནས་རྩ་བའི་གཏོར་མ་ཤར་ཕྱོགས་སུ་གནས་པའི་གཏོར་མའི་སྟེགས་བུ་ལ་དབུལ་བར་བྱའོ། །ལྷག་མའི་སྔགས་རྣམས་བརྗོད་པར་བྱའོ། །དེ་ནས་ལས་ཀྱི་རྡོ་རྗེ་ཅན་གྱིས་འཁོར་ལོའི་དབང་ཕྱུག་ལ་སོགས་པ་
རྣམས་ལ་རིམ་པ་བཞིན་ཐལ་མོ་སྦྱར་ནས་གཤེགས་པའི་གསོལ་བ་གདབ་པར་བྱའོ། །འཁོར་ལོའི་དབང་ཕྱུག་ལ་སོགས་པ་རྣམས་ཀྱིས་ཡང་བགྱིའོ་ཞེས་བྱ་བ་ལ་སོགས་པས་དེ་ནས་སོ་སོའི་ལྷག་མ་རྣམས་བསྡུས་ཏེ། ཟན་དང་ཚོད་མ་ལ་སོགས་པ་བྱིན་ནས།
འཁོར་ལོའི་དབང་ཕྱུག་གི་མདུན་དུ་ཕུང་པོར་བཀོད་ནས་ཀ་རཾ་ཀ་ར་ཛཿའི་མེ་ཏོག་རྣམས་ཀྱང་སྣོད་ཆེན་པོའི་ནང་དུ་སྤུངས་ཏེ། །དེ་ནས་ཟས་གཙང་མའི་ལྷག་མ་རྣམས་ཀྱང་ཅུང་ཟད་བསྡུས་ནས་ཟན་དང་ཚོད་མ་ལ་སོགས་པ་བྱིན་ནས། འཁོར་ལོའི་དབང་ཕྱུག་གི་
ནམ་མཁའི་མཐིལ་དུ་དུད་པ་དང་སོལ་མེའི་ཕོ་ཉ་མོ་བལྟས་ནས་མེ་ཏོག་ལ་སོགས་པ་རྣམས་ཀྱིས་ཡང་དག་པར་མཆོད་ནས་སྔགས་ཀྱིས་བྱིན་གྱིས་བརླབས་ལ་རང་རང་གི་གནས་ལ་རབ་ཏུ་སྤྱད་པར་བྱའོ། །ཨོཾ་ཤུདྡྷ་དྷརྨ་ཨ་ཨཱ་ཨཾ་ཨཿསྭཱ་ཧཱ། ཧི་ལི་ཧུ་ལི་མ་ཧཱ་ཧཱུ་
ལི་ཧུ་ཕེཾ་ཧོ་སྭཱ་ཧཱ། ཞེས་པ་ནི་ལྷག་མའི་ཕུང་པོའི་སྔགས་སོ། །རྡོ་རྗེ་ཁུ་ཚུར་གཉིས་བཅིངས་ནས་ཁའི་ཟུར་དུ་མཆེ་བའི་རྣམ་པར་སྦྱར་བར་བྱའོ། །དེ་བཞིན་དུ་ཕྱག་རྒྱ་བཅིངས་ནས་སྔགས་བརྗོད་པར་བྱ་སྟེ། ཨོཾ་ཀུ་རུ་ཀུ་རུ། བཏྟ་ལི་བཏྟ་ལི། མ་ཧཱ་བཏྟ་ལི། སིདྡྷ་
ནུ་ཥེ་ཤཱ་ན་བཱ་ས་ནི་པྲེ་ཏ་མུ་ཁི་ཙཎྜ་ཀ་རཱ་ལི་རུ་དྷི་ར་པྲི་ཡེ་ས་མ་ཡཱ་ར་ཀྵི་ཏ་ཡོ་གཱ་པ་ཀི་རི་རཱ་བེ་པི་ཏྲི་བ་ན་མ་དྷྱེ་བྷུཾ་ཛ་ཧ་བཀྵ་ཧ་རི་གྷྲ་ཧ་ས་ཧ་ག་ཎ་དཱུ་ཏེ་དྷཱུ་མཱི་ག་རི་སུདྡྷ་ཀཱ་ར་ལི་ཏིཥྛ་སྭཱི་ཀུ་རུ་ཧཱུཾ་གྲྀཧྞ་སརྦ་དུཥྚཱ་ན་ན་བཀྵ་བཀྵ་ཧཱུཾ་ཕེཾ་ཧོཾ་ཧེཾ་ཕཊ་སྭཱ་ཧཱ། ཞེས་པ་ནི་ཀ་རཾ་ཀའི་གཏོར་མའི་སྔགས་སོ། །རྫོགས་
เล่ม ๖๒ · หน้า 362a
པའི་སངས་རྒྱས་ལྷ་རྣམས་དང་། །གང་ཡང་དེ་སྲས་ཚངས་ལ་སོགས། །འཇིག་རྟེན་སྐྱོང་བ་ཐེག་འབྱུང་རྣམས། །ཆོ་གའི་བྱ་རྣམས་བཟོད་པར་མཛོད། །ཅེས་པའི་ཚིགས་སུ་བཅད་པ་འདིས་བཟོད་པར་གསོལ་བར་བྱའོ། །ཨོཾ་ཨཱཏྨ་ཏིཥྛ་སྭཱ་ཧཱ། ཞེས་པའི་སྔགས་འདིས་
དཀྱིལ་འཁོར་བདག་ཉིད་ལ་བསྡུས་ནས་གཤེགས་སུ་གསོལ་བར་བྱའོ། །དེ་ནས་ལག་པ་བཀྲུས་ནས་དྲི་དང་སོ་རྩི་དང་མཆོད་ཡོན་ལ་སོགས་པ་ཕུལ་ནས་སྦྱིན་བདག་གིས་མཎྜལ་བྱས་ནས་མར་མེ་ཕུལ་ལ། ཨོཾ་ཨཱཿགཙྪ་གཙྪ། སརྦ་བ་ནཾ་པུ་ན་རཱ་ག་མ་ནཱ་ཡ་ཙ་ཧཱུཾ་ཕཊ་སྭཱ་ཧཱ། འདིས་གཤེགས་
སུ་གསོལ་ལོ་ཞེས་པ་ནི་ཚོགས་ཀྱི་འཁོར་ལོའི་ཆོ་གའོ།། །།དེ་ནས་གང་གི་ཚེ་སྦྱིན་སྲེག་གི་མེ་ཉེ་བར་ཞི་བར་གྱུར་ནས་རྒྱ་ཆེར་བསྡུས་ནས་ཆུ་རབ་ཏུ་དབབ་པ་ལས་གསུངས་པའི་ཆོ་གས་དེ་བཞིན་དུ་ཐལ་བ་རྣམས་ཆུ་བོ་ལ་གཤེགས་པར་བྱའོ་ཞེས་སོ། །འདི་ནི་བདག་གི་རྒྱུད་རྣམས་ཀུན་
ལས་ངེས་བརྟགས་ནས། ཤིན་ཏུ་ལེགས་པར་རྣམ་པར་དག་པར་ཉེ་བར་བསྡུས། སྔོན་མེད་སྒྲ་ཡིས་ཤིན་ཏུ་ལེགས་པར་མ་གྱུར་ཀྱང་། །དེ་ལྟ་ན་ཡང་བློ་ལྡན་མཁས་རྣམས་བཟོད་པར་གསོལ། །ཆུ་སྐྱེས་མཚོ་ནང་སྙན་པའི་གདངས་ཆགས་པའི། །དཔལ་ལྡན་རིགས་ཀྱིས་བྱིན་པའི་སྦྱར་
བའི་གཞུང་། །སྦྱིན་བདག་རྣམས་ཀྱི་ཡིད་ནི་འཕྲོག་བྱེད་པ། །སློབ་དཔོན་ཀུན་གྱི་རྒྱན་གྱི་མཆོག་གྱུར་པ། །ཆོ་གའི་རྣམ་པ་སྤྲོས་པ་ལས། །བདག་གིས་དགེ་བ་གང་བསགས་འདིས། །འཇིག་རྟེན་རྡོ་རྗེ་སེམས་གྱུར་ནས། །བཅིང་བྲལ་རང་བཞིན་མཆོག་གྱུར་ཅིག །ཅེས་པ་ནི་པཎྜི་ཏ་ཆེན་པོ་ནི་སཾ་ག་
ཨཱ་ཙཱརྱ་དཔལ་ལྡན་རིགས་ཀྱིས་བྱིན་པས་མཛད་པ་བྱ་བ་བསྡུས་པའི་པཉྩི་ཀཱ་ལས་རབ་ཏུ་བྱེད་པ་བརྒྱད་པ་རྫོགས་སོ།། །།བླ་མ་པཎྜི་ཏ་ཆེན་པོ་ཀཱིརྟ་ཙནྡྲའི་ཞལ་སྔ་ནས་ཞུས་ཤིང་གཞུང་སུམ་གཉིས་བལ་པོའི་མཐིལ་དུ་བསྒྱུར་ཞིང་། སུམ་ཆ་གཅིག་དུས་འཁོར་བ་ཆེན་པོ་ཤེས་རབ་སེང་གེས་བསྐུལ་ཞིང་
སྦྱིན་བདག་མཛད་པ་ལ་བརྟེན་ནས། ཤཱཀྱའི་དགེ་སློང་ཡར་ལུངས་པ་གྲགས་པ་རྒྱལ་མཚན་གྱིས་ཡོས་ལོ་དབོའི་ཟླ་བའི། དཀར་པོའི་ཕྱོགས་ཀྱི་ཚེས་བརྒྱད་ལ་གཞུའི་ཀུན་དགའ་ར་བའི་གཙུག་ལག་ཁང་ཆེན་པོར་ཡོངས་སུ་རྫོགས་པར་བསྒྱུར་ནས་བྲིས་སོ།། །།
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด