ตัวบทไม่มีชื่อ — ประโยคแรก: གསང་ལྡན་གྱི་ཐོ་ཡིག་བཞུགས
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๖๖ · หน้า 32b
༄༅། །གསང་ལྡན་གྱི་ཐོ་ཡིག་བཞུགས། ༄༅༅། །འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །རིགས་ཀུན་བདག་པོ་འཇམ་དཔལ་དང་། །བླ་མ་དེ་ལ་ཕྱག་འཚལ་ལོ། །མཆོག་དང་ཐུན་མོང་སྒྲུབ་འདོད་པ། །གང་
ཟག་རྣམས་ལ་ཕན་པའི་ཕྱིར། །བླ་མ་རིམ་པ་བརྒྱུད་པ་ཡི། །ཆོ་གའི་རིམ་པ་བརྗོད་པར་བྱ། །དཀྱིལ་འཁོར་བདུན་གྱི་ཆོ་ག་ལ། །བསྙེན་པ་ས་དང་སྟ་གོན་དང་། །དཀྱིལ་འཁོར་ཞག་གི་ཆོ་གའོ། །བསྙེན་པའི་ལས་སུ་བྱ་བ་ལ། །དང་པོ་ལས་དང་སྦྱོར་བ་གསུམ། །མཆོད་བསྟོད་
བསྙེན་པ་བྱ་བའོ། །དང་པོའི་ལས་སུ་བྱ་བ་ལ། །ཉེ་རེག་འཐོར་འཐུང་སྟོང་པར་བསྒོམ། །སྐུར་གྱུར་ལྕེ་དང་ལག་པ་བརླབ། །བསྲུང་དང་ཚོགས་བསགས་ཕྱག་ལྔ་བྱ། །སྡོམ་བཟུང་ལུས་བསྲེགས་སྐུར་ལྡང་ངོ་། །སྲུང་ལ་བདག་དང་གནས་བསྲུང་སྟེ། །བདག་ཉིད་བསྲུང་བ་བྱ་བ་ཡང་། །
བསྐྱེད་བརླབ་དབང་དང་གོ་བགོའོ། །གནས་བསྲུང་པ་ཡི་རིམ་པ་ལ། །བསྣུན་དང་བསྲེག་དང་བཅིང་བ་བྱ། །ཁྲོ་བོ་རྡོ་རྗེའི་ར་བ་སྒོམ། །ཚོགས་བསགས་པ་ཡི་རིམ་པ་ཡང་། །སྦྱིན་སྲེག་བྱ་ཞིང་མཆོད་པ་བརླབ། །རྟེན་སྤྲུལ་བསྟོད་དེ་གསལ་བོར་སྒོམ། །དགའ་བར་གྱུར་པས་བསྟོད་པ་
བྱ། །ཕྱག་མཆོད་སྡིག་བཤགས་ཡི་རང་བྱ། །བསྐུལ་དང་གསོལ་གདབ་དགེ་བ་བསྔོ། །སྐྱབས་འགྲོ་ལམ་བསྟན་སེམས་བསྐྱེད་དོ། །བསྟོད་བྱ་གནང་སྦྱིན་སླར་བསྟོད་བྱ། །སྦྱོར་བ་གསུམ་ལ་དང་པོ་དང་། །རྒྱལ་མཆོག་དང་ནི་ལས་དག་གོ། །དང་པོའི་སྦྱོར་བ་བྱ་བ་ལ། །ཡེ་
ཤེས་བཞི་དང་གཙོ་བོ་བསྐྱེད། །ཡེ་ཤེས་མེ་ལོང་མཉམ་ཉིད་དང་། །སོ་སོར་ཆོས་དབྱིངས་ནན་ཏན་ནོ། །གཞི་ལ་རྡོ་རྗེ་མཆོད་རྟེན་དང་། །ཆོས་འབྱུང་རྒྱ་གྲམ་བསྒོམ་པ་དང་། །གཞལ་ཡས་གདན་དང་བཅས་པའོ། །གཙོ་བོ་བསྐྱེད་པ་དག་ལ་ཡང་། །ཆོ་ག་རྣམ་པ་གསུམ་
ལས་སུ། །གཞི་ཡི་སངས་རྒྱས་བསྐྱེད་པ་དང་། །དང་པོའི་སངས་རྒྱས་འཁོར་ལོ་དང་། །ཡེ་ཤེས་སེམས་དང་ཟླ་བ་ཨའོ། །དཀྱིལ་འཁོར་རྒྱལ་མཆོག་བསྒོམ་པ་ཡང་། །དང་པོར་ཡིག་འབྲུ་བསྐྱེད་པ་དང་། །དེ་ལས་ཕྱག་མཚན་སྐུ་ཕྲ་མོ། །ཐིག་ལེར་གྱུར་ཏེ་སྐུ་རྣམས་བསྐྱེད། །
เล่ม ๖๖ · หน้า 33a
ལས་ཀྱི་རྒྱལ་པོ་མཆོག་ལ་ནི། །སྒོ་དབྱེ་བསྡུ་བསྐྲད་ཡོན་དབུལ་བསྟོད། །བསྟིམས་ལ་བསྐྲད་དེ་སྒོ་ཡང་བཅད། །རྒྱས་གདབ་དབང་བསྐུར་ལས་ལ་སྦྱར། །མཆོད་ཅིང་བསྟོད་པ་བྱ་བ་ཡང་། །དང་པོའི་སངས་རྒྱས་བྱེ་བྱས་ལ། །མཆོད་བརླབ་སྒོ་དབྱེ་སྙན་གསན་
དབབ། །སྤྱན་དྲང་བསྐྲད་ལ་ཡོན་དབུལ་བསྟོད། །ནང་དུ་དགུག་གཞུག་བྱ་བ་དང་། །བསྐྲད་ཅིང་སྒོ་བཅད་གོ་ཡང་བགོ། །རྒྱས་གདབ་དབང་དང་ལྡན་པར་བྱ། །མཆོད་དང་བསྟོད་པ་རྒྱས་པར་བྱའོ། །བསྙེན་པ་བྱ་བའི་རིམ་པ་ཡང་། །ཕྱག་བྱས་ཐུགས་ཞུགས་ལ་སྔགས་བརྗོད། །
སྔགས་དགོད་བརྟན་བྱས་བཟླས་པ་བྱ། །ཐུན་མཚམས་དག་ཏུ་རང་བྱ་ལ། །མཆོད་བསྟོད་ཕྱག་རྒྱ་དགེ་བ་བསྔོ། །བཟོད་གསོལ་ལྷ་བསྡུས་སྤྱོད་ལམ་བྱ། །ཐུན་ལ་བབ་ན་ནང་ཞུགས་བསྐྲད། །སྒོ་བཅད་ལྷ་དགོད་མཆོད་པ་བརླབ། །མཆོད་བསྟོད་ཕྱག་བྱ་ཡོན་ཆབ་དབུལ། །ཐུགས་ཀར་
ཞུགས་ཏེ་གོང་ལྟར་བྱ། །ཐུན་གསུམ་དག་ལ་དེ་དང་འབར། །ཐུན་བཞི་པ་ཡི་ཐ་མ་རུ། །གོང་ལྟར་བྱས་ལ་དོན་གསོལ་གདབ། །སྨོན་ལམ་བཏབ་ལ་ཡེ་ཤེས་གཤེགས། །དཀྱིལ་འཁོར་བསྡུས་ཏེ་རང་ལ་བསྲུང་། །བརྒྱ་པ་བཟླས་ཏེ་སྤྱོད་ལམ་བྱའོ། །དེ་ནི་བསྙེན་པ་རྒྱས་པའོ། །བསྙེན་
པ་བསྡུས་པ་བྱ་བ་ཡང་། །གཙོ་བོ་ཡན་ཆད་བསྒོམ་བྱས་ལ། །སྦྱོར་བ་རྣམ་གཉིས་གཞག་པ་སྟེ། །ཕྱི་མ་གོང་ལྟར་བྱ་བ་ཡིན། །གྲངས་དང་མཚན་མའི་བསྙེན་པ་ཡང་། །བཟླས་དང་བསྒོམ་པའི་ཁྱད་པར་རོ། །དེ་ལྟར་བྱས་པའི་རྗེས་དག་ལ། །ཕྲན་ཚེགས་པ་ནི་ཅི་རིགས་གདགས། །
དེ་རྣམས་སྔོན་དུ་བསྙེན་པའོ། །དེ་ནས་ས་ཡི་ཆོ་ག་སྟེ། །བརྟག་དང་བསླང་དང་སྦྱང་བ་དང་། །གཟུང་དང་རྡོ་རྗེའི་སྒྲུབ་པའོ། །བརྟག་པ་ཕྱོགས་དང་མཚན་ཉིད་དང་། །གནས་དང་ལྟོ་འཕྱེ་བརྟག་པའོ། །བསླང་བ་སྣང་དང་མི་སྣང་སྟེ། །མི་སྣང་བ་ལ་བསླང་བ་ཡང་། །མཎྜལ་
བྱས་ལ་དྲི་ཚོམ་དགོད། །བདག་ཉིད་ལྷར་བསྐྱེད་ལྷ་ཚོགས་སྤྲུལ། །དེ་ལ་མཆོད་བསྟོད་གཏོར་མ་སྦྱིན། །ལྷ་མོ་བསྐྱེད་ལ་སྤྱན་དྲངས་ཏེ། །བསྐྲད་བསྟིམ་རྒྱས་གདབ་དབང་བསྐུར་བྱ། །མཆོད་དང་གཏོར་དབུལ་ས་བསླང་བྱ། །ཡེ་ཤེས་གཤེགས་ལ་དམ་ཚིག་བསྟིམ། །སྦྱང་བ་
เล่ม ๖๖ · หน้า 33b
ལས་དང་བྱ་བ་དང་། །སྔགས་དང་ཕྱག་རྒྱས་སྦྱང་བྱས་ཏེ། །པྲ་བརྟག་བུམ་གཞུག་འཐས་པར་བཅག །རྡོ་རྗེ་བསྒྲུབ་པར་བྱ་བ་ནི། །སློབ་དཔོན་རྒྱན་གྱིས་བརྒྱན་བྱས་ལ། །སྟེགས་བུའི་དབུས་སུ་གནས་བྱས་ཏེ། །དང་པོར་ཉེ་རེག་བྱ་བ་ནས། །བཟླས་ལ་ཐུག་པ་ཡན་ཆོད་བྱ། །
མཆོད་ཅིང་བསྟོད་ལ་གསོལ་བ་གདབ། །དཀྱིལ་འཁོར་བཏེག་ལ་རང་ཡང་བབས། །གནས་གསུམ་བརླབས་ལ་སྤྲོ་བ་བསྐྱེད། །ཕྱག་བྱས་སྤོས་ཐོགས་སྤྱན་ཡང་དྲང་། །བཀའ་བསྒོ་བསྐོར་ཏེ་བསྲུང་བ་བྱ། །བྷྲཱུཾ་མམ་ཁཾ་ལས་དཀྱིལ་འཁོར་བསྐྱེད། །ཁྲོ་བོ་གསང་བ་བསྟིམ་བྱས་
ལ། །ཕུར་བུས་གདབ་པའི་ལས་བྱའོ། །སྟ་གོན་བྱ་བའི་རིམ་པ་ནི། །ལྷ་དང་བུམ་པ་སྦྱིན་སྲེག་དང་། །ལྷ་མོ་དང་ནི་སློབ་མའོ། །ལྷ་ཡི་སྟ་གོན་བྱ་བ་ལ། །གནས་སུ་དྲི་དང་མེ་ཏོག་དགོད། །དེ་ལས་ལྷར་བསྐྱེད་བསྟིམས་ལ་མཆོད། །བུམ་པ་མཚན་ཉིད་ལྡན་བྱས་ལ། །མཚོན་
བྱ་མགུལ་ཆིངས་ཁ་རྒྱན་ཏེ། །བསྐྲད་བདུག་བསངས་ལ་བཅུད་བླུག་གོ། །བུམ་པ་བཾ་ལས་བསྐྱེད་བྱས་ལ། །ནང་དུ་ལྷ་བསྐྱེད་སྤྱན་ཡང་དྲང་། །བསྟིམས་ལ་རྒྱས་གདབ་དབང་ལྡན་བྱ། །མཆོད་ཅིང་བསྟོད་ལ་བཟླས་པ་བྱའོ། །སྦྱིན་སྲེག་ཤར་དུ་ཐབ་བྱས་ལ། །ཤིང་བཅེར་
མེ་སྤར་མེ་ལྷ་བསྐྱེད། །དེ་ལ་མཆོད་ལ་ཐུགས་ཀར་ནི། །སུམ་བརྩེགས་བསྐྱེད་ལ་སྤྱན་དྲངས་བསྟིམ། །མཆོད་ཅིང་བསྟོད་ལ་བསྲེག་རྫས་དབུལ། །སྤྱན་མ་གནོད་སྦྱིན་དག་ལ་ཡང་། །སྦྱིན་སྲེག་རིམ་བཞིན་དབུལ་བར་བྱ། །ས་ཡི་ལྷ་མོའི་སྟ་གོན་ནི། །གོང་ལྟར་
བྱས་ཏེ་མི་གཤེགས་སོ། །དེ་ནས་སློབ་མ་སྟ་གོན་ནི། །ཕྱི་རོལ་གཏོར་མ་བྱིན་བྱས་ལ། །ཁྲུས་བྱས་གོས་གོན་མེ་ཏོག་ཐོགས། །ཕྱག་བྱས་གསོལ་གདབ་སྣ་གཏོད་བསྐུལ། །སྡིག་བཤགས་ཡི་རང་སྐྱབས་སུ་འགྲོ། །སེམས་བསྐྱེད་ལམ་གནས་རྡོ་རྗེ་ལྟ་བུ་བྱ། །
ལྷར་བསྐྱེད་བྱིན་བརླབས་དེ་ལ་མཆོད། །སོ་ཤིང་ཀུ་ཤ་སྲུང་སྐུད་གདགས། །གཟེངས་བསྟོད་ཉལ་གཞུག་སྤྲོ་བ་བསྐྱེད། །ལྷ་ལ་མཆོད་ཅིང་བསྟོད་པ་བྱ། །ཕྱག་བྱས་གསོལ་བ་ལན་གསུམ་གདབ། །དགེ་བ་བསྔོ་ཞིང་བཟོད་གསོལ་བྱ། །གསོལ་ཅིང་བཀྲ་ཤིས་སྨོན་
เล่ม ๖๖ · หน้า 34a
ལམ་གདབ། །སངས་རྒྱས་དང་པོར་མཚན་འདོན་གནས། །དཀྱིལ་འཁོར་ཞག་གི་ཆོ་ག་ལ། །ཐིག་དང་ཚོན་དང་བསྒྲུབ་པ་དང་། །འཇུག་ཅིང་དབང་བསྐུར་བྱ་བའོ། །ཐིག་ལ་ལས་དང་ཡེ་ཤེས་ཏེ། །ཡེ་ཤེས་སྣལ་མ་སར་པ་ལ། །བྱིན་བརླབས་བསྒྲིལ་ཏེ་སྣོད་
བཅུག་མཆོད། །བཟླས་ཏེ་རིམ་པས་གདབ་པར་བྱ། །གདབ་པ་དང་པོ་གནམ་ཐིག་སྟེ། །དེ་ནས་ས་ཐིག་གདབ་པའོ། །ཚོན་ནི་བྱིན་བརླབས་བཟླས་ཏེ་དགྱེ། །པན་ཙ་ར་ཀ་ཕྱོགས་ཚོན་དང་། །མཚན་མའི་བྱེ་བྲག་བྲི་བར་བྱ། །བསྒྲུབ་པ་བྱ་བའི་རིམ་པ་ཡང་། །དཀྱིལ་འཁོར་བརྒྱན་
ཏེ་མདོ་གདོན་གཞག །ཁྲུས་བྱས་བརྒྱན་ལ་ཤར་སྒོར་གནས། །བསྲུང་དང་བསང་གཏོར་དཀྱིལ་འཁོར་བསླང་། །སྒོ་དབྱེ་བུམ་དགོད་ལྷར་བསྐྱེད་དེ། །ནམ་མཁའི་ལྷ་ཚོགས་ཕབ་ལ་བསྲེ། །བདག་ཉིད་དང་པོའི་ལྷར་བསྐྱེད་དེ། །སྔགས་བཟླས་ཕར་སྤྲོ་ཚུར་བསྡུ་བྱ། །ལྷ་རྣམས་
སྟོང་བསྒོམས་སླར་ལ་བསྐྱེད། །དེ་ནས་སྒོ་དབྱེ་ལ་སོགས་པ། །སྔོན་དུ་བསྟན་པ་བཞིན་དུ་བྱ། །ཕྱི་རོལ་དག་ཏུ་བྱུང་བྱས་ལ། །འཇིག་རྟེན་པ་ལ་གཏོར་མ་སྦྱིན། །སླར་ལ་ནང་དུ་ཞུགས་བྱས་ལ། །སྦྱིན་སྲེག་དག་གིས་ཚིམ་པར་བྱས། །དེ་ནས་སློབ་མ་འཇུག་པ་ཡང་། །ལྷ་ལ་
གསོལ་གདབ་གནང་བར་བསམ། །སློབ་མས་ཁྲུས་བྱས་མེ་ཏོག་ཐོགས། །ཡོལ་བས་བཅད་ལ་ཕྱི་རོལ་དགུག །སློབ་མས་ཕྱག་བྱས་གསོལ་བ་གདབ། །གདོང་དང་སྟོད་གཡོགས་སྨད་གཡོགས་ཏེ། །ནང་བཀུག་ཕྱག་བྱ་སྡིག་པ་བཤགས། །ཡི་རང་བསྐུལ་དང་གསོལ་
བ་བདག །སློབ་དཔོན་འདོད་ཕྱིར་ཡང་གསོལ་གདབ། །དེ་ནས་དམ་ཚིག་དག་ནི་དཔོག །དམ་ཚིག་འཛིན་པར་ཁས་ལེན་གཞུག །སེམས་བསྐྱེད་པ་དང་ལྷར་བསྐྱེད་བརླབ། །དམ་ཚིག་བསྒྲག་ཅིང་དེ་ལ་མཆོད། །ལས་ཀྱི་བུམ་པས་དབང་ཡང་བསྐུར། །སྒོ་བཞིར་བཅུག་
ལ་སླར་ཡང་ནི། །ཤར་སྒོར་བཞག་ལ་མནའ་ཡང་བསྒགས། །མནའ་ཆུ་བླུད་ལ་ཡེ་ཤེས་དབབ། །མཆོད་ཅིང་སྨྲར་གཞུག་ཕྲེང་བ་དོར། །མགོ་ལ་བཅིངས་ཏེ་སྣང་བ་བརྟག །མིག་དབྱེ་བ་དང་དཀྱིལ་འཁོར་བསྟན། །དབང་བསྐུར་བ་ཡི་རིམ་པ་ཡང་། །སྒྲུབ་པ་པོ་དང་སློབ་
เล่ม ๖๖ · หน้า 34b
དཔོན་ནི། །སྒྲུབ་པ་པོ་རུ་དབང་བསྐུར་ན། །རང་གི་ལྷར་བསྐྱེད་དེ་ལ་མཆོད། །དང་པོ་རིག་པའི་དབང་བསྐུར་ཏེ། །བཀྲ་ཤིས་བརྗོད་ཅིང་ཆུ་དབང་བསྐུར། །དབུ་རྒྱན་དང་ནི་རྡོ་རྗེ་སྦྱིན། །དྲིལ་བུ་དང་ནི་མིང་ཡང་གདགས། །གསང་བའི་ཡེ་ཤེས་སྔགས་ཀྱང་སྦྱིན། །ཕྱག་རྒྱ་
བཞི་བརླབ་བརྟུལ་ཞུགས་སྦྱིན། །སློབ་དཔོན་དག་ཏུ་དབང་བསྐུར་ན། །ཤར་སྒོར་སྣ་ཚོགས་པདྨ་བྲི། །སློབ་མ་སངས་རྒྱས་དང་པོར་བསྐྱེད། །རིག་པའི་དབང་ལྔ་བསྐུར་བར་བྱ། །དམ་ཚིག་གསུམ་དང་གསང་བ་དང་། །གསང་རྒྱལ་དང་ནི་ངེས་པའི་དབང་། །རིམ་པ་
བཞིན་དུ་བསྐུར་བར་བྱའོ། །དམ་ཚིག་གསུམ་ལ་རྡོ་རྗེ་དང་། །དྲིལ་བུ་དང་ནི་ཕྱག་རྒྱའོ། །གསང་བའི་དབང་ལ་དཀྱིལ་འཁོར་དང་། །ལྷ་དང་སློབ་དཔོན་ལས་རྣམས་སོ། །གསང་རྒྱལ་དག་གི་དབང་བསྐུར་བ། །དེ་བཞིན་རིགས་དང་རྡོ་རྗེ་དང་། །རིན་པོ་ཆེ་དང་པདྨ་དང་། །ལས་
ཀྱི་རིགས་ཀྱི་གསང་བའོ། །ངེས་པའི་དབང་ལ་གཞན་དོན་དང་། །རང་དོན་ངེས་པའི་དབང་བསྐུར་རོ། །གཞན་དོན་ངེས་པའི་དབང་བསྐུར་ན། །བྱེ་བྲག་དག་དང་སྤྱི་དག་གོ། །བྱེ་བྲག་ལ་ཡང་འདི་ལྟ་སྟེ། །དེ་བཞིན་རིགས་དང་རྡོ་རྗེ་དང་། །རིན་ཆེན་རིགས་དང་པདྨ་དང་། །ལས་
ཀྱི་རིགས་ཀྱི་ངེས་པའོ། །རང་དོན་ངེས་པའི་དབང་བསྐུར་བ། །གསང་བའི་ཡེ་ཤེས་བརླབ་ཅིང་སྔགས་ཀྱང་སྦྱིན། །ཕྱག་རྒྱ་བཞི་བརླབ་ལུང་ཡང་བསྟན། །གཟེངས་བསྟོད་པ་དང་དབུགས་དབྱུང་བའོ། །དེ་མཐར་དབང་བསྟན་བྱ་བའི་ཕྱིར། །བརྟུལ་ཞུགས་དག་གི་དབང་
བསྐུར་རོ། །དེ་ལྟར་དབང་བསྐུར་རྫོགས་པ་དང་། །དཀྱིལ་འཁོར་ལྷ་ལ་མཆོད་ཅིང་བསྟོད། །དགེ་བ་བསྔོ་ཞིང་བཟོད་གསོལ་བྱ། །སྨོན་ལམ་བཏབ་ལ་དོན་གསོལ་གདབ། །ཡེ་ཤེས་གཤེགས་ལ་དཀྱིལ་འཁོར་བསྡུ། །བརྒྱ་པ་བཟླས་ཤིང་གཟུགས་བརྙན་བཀྲུ། །ལྷག་
ཆད་བསྐང་ཕྱིར་སྦྱིན་སྲེག་བྱ། །མཚན་བརྗོད་པ་ཡི་གསུང་རབ་བསྒྲགས། །གསང་ལྡན་མ་ཡི་པུཎྜརྠ། །དཀྱིལ་འཁོར་བདུན་གྱི་ཐོ་ཡིག་འདི། །བདག་གིས་བསྡེབས་པའི་དགེ་བ་ཡིས། །ཀུན་གྱིས་འཇམ་མགོན་ཐོབ་པར་ཤོག །གསང་ལྡན་མའི་ཐོ་ཡིག་པུཎྜརྠ་བྱས་
เล่ม ๖๖ · หน้า 35a
པ་སྨྲྀ་ཏི་ཛྙཱ་ན་ཀཱིརྟིས་མཛད་པ་རྫོགས་སོ།།
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด