དཀྱིལ་འཁོར་གྱི་ཆོ་ག་རྡོ་རྗེ་ཕྲེང་བ་ཞེས་བྱ་བ
ชื่อสันสกฤต (อักษรทิเบต ตามตัวบท) བཛྲ་ཨཱ་བ་ལི་ནཱ་མ་མཎྜ་ལ་ཨུ་པཱ་ཡི་ཀཱ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๗๕ · หน้า 80a
ཏིཥྛ་ཨེ་ཥ་ཏྭཾ་དྷ་ར་ཡ་མི་བཛྲ་སཏྭ་ཧཱིཿཧི་ཧི་ཧི་ཧི་ཧཱུཾ་ཞེས་བརྗོད་ཅིང་གཟུང་བར་བྱའོ། །རྡོ་རྗེའི་བརྟུལ་ཞུགས་ཀྱི་ཆོ་གའོ།། །།དེ་ནས་སངས་རྒྱས་ཐོད་པ་དང་། བདེ་མཆོག་དང་། ཀྱེ་རྡོ་རྗེ་ལ་སོགས་པ་གང་ཡང་རུང་བའི་སྙིང་པོའི་སྔགས་ཀྱིས་ཁ་ཊྭཱཾ་ག་དང་། ཅང་ཏེའུ་དང་། པདྨའི་སྣོད་རྣམས་
ལ་ལན་གསུམ་བཟླས་ལ། རྡོ་རྗེ་སེམས་དཔའི་ཕྱག་རྒྱ་འདི། །ཕྱི་དང་ནང་དུ་ཡང་དག་གནས། །དེས་ན་ཁ་ཊྭཱཾ་ཅང་ཏེའུ་སྣོད། །བྱིན་པ་དཔའ་བོས་བཟུང་བར་གྱིས། །ཞེས་པའི་ཚིགས་སུ་བཅད་པ་བརྗོད་ཅིང་འཛིན་དུ་གཞུག་གོ། །ཁ་ཊྭཱཾ་ག་ལ་སོགས་པ་རྣམས་ལས་གཞན་སྤྱོད་པའི་ཡན་ལག་རྒྱུད་དུ་
གསུངས་པ་ཡང་དེ་དང་དེའི་འཁོར་ལོའི་དབང་ཕྱུག་གི་སྙིང་པོས་བསྔགས་ལ། རྡོ་རྗེ་སེམས་དཔའ་ཞེས་པ་ལ་སོགས་པས་འཛིན་དུ་གཞུག་གོ། །དེ་ལྟར་ཡང་དཔལ་གསང་བ་འདུས་པ་ལས། གཟུགས་ནི་ཐོར་ཚུགས་དབུ་རྒྱན་འཆང་། །ཆེན་པོ་ཁ་དོག་དཀར་པོ་འདྲ། །ཆོ་ག་བཞིན་དུ་ཐམས་ཅད་བྱ། །
སྔགས་ཀྱི་སྡོམ་པས་ཀུན་དུ་བསྡམས། །སྡོང་བུ་རྩ་བ་འབྲས་བུ་རྣམས། །བཟའ་དང་བཅའ་བ་ཐམས་ཅད་སྤྱད། །ཅེས་པ་ལ་སོགས་པ་རིག་པའི་བརྟུལ་ཞུགས་ཡང་དག་པར་བླངས་པས་སྤྱོད་པའི་བརྟུལ་ཞུགས་བྱ་བར་གསུངས་སོ། །གང་ཡང་བཙུན་མོའམ་སྐྱེས་པ་བསྐྱོད་པའི་བརྟུལ་ཞུགས་ཞུ་ན།
དེ་རྡོ་རྗེ་ཕག་མོའི་གཟུགས་སམ། བདག་མེད་མའི་གཟུགས་སམ། མེ་ཏོག་ལྷུང་བ་བསྟུན་པའི་རིགས་ཀྱི་ལྷ་མོའི་གཟུགས་སུ་དང་། སྐྱེས་པ་ནི་བདེ་མཆོག་དང་ཀྱེ་རྡོ་རྗེ་ལ་སོགས་པ་གར་ཡང་རུང་བའི་གཟུགས་སུ་བསམས་ནས། དེའམ་དེ་ལ་སྙིང་གའི་ས་བོན་གྱི་འོད་ཟེར་གྱིས་བཀུག་པའི་ཡེ་ཤེས་ཀྱི་
ལྷ་བཅུག་ལ། འཁོར་ལོའི་གཟུགས་ཀྱིས་མི་བསྐྱོད་པ། །རྣ་ཆའི་བདག་ཉིད་འོད་དཔག་མེད། །མགུལ་གྱི་ཕྲེང་བ་རིན་ཆེན་དབང་། །ལག་པར་རྣམ་པར་སྣང་མཛད་བརྗོད། །སྐ་རགས་ན་ནི་དོན་ཡོད་གནས། །ཞེས་གསུངས་པའི་ཕྱིར་འཁོར་ལོ་དང་རྣ་ཆ་དང་མགུལ་རྒྱན་དང་། གདུ་བུ་དང་སྐ་རགས་རྣམས་
རིམ་པ་བཞིན་དུ་མི་བསྐྱོད་པ་དང་། འོད་དཔག་མེད་དང་། རིན་ཆེན་འབྱུང་ལྡན་དང་། རྣམ་སྣང་དང་། དོན་ཡོད་གྲུབ་པའི་གཟུགས་སུ་སྐད་ཅིག་གིས་བསམས་ལ། དེར་དེ་དང་དེའི་ཡེ་ཤེས་སེམས་དཔའ་དེ་ལྟར་སྤྱན་དྲངས་པ་བཅུག་སྟེ། མི་བསྐྱོད་པ་ལ་སོགས་པ་ཡོངས་སུ་གྱུར་པ་ལས་འཁོར་ལོ་ལ་
เล่ม ๗๕ · หน้า 80b
སོགས་པའི་ཕྱག་རྒྱ་རྣམས་མི་བསྐྱོད་པ་ལ་སོགས་པའི་རང་བཞིན་ཁོ་ནའོ་ཞེས་མོས་ནས། ཨོཾ་དྷ་ར་དྷ་ར། དྷཱ་ར་ཡ་དྷཱ་ར་ཡ། མརྡ་མརྡ་བཛྲ་དྷྲྀཀ་ཕཊ་སྭཱ་ཧཱ་ཞེས་པའི་སྔགས་ལན་གསུམ་བཟླས་པའི་འཁོར་ལོ་དེའམ་དེའི་མགོ་བོར་རྡོ་རྗེ་སེམས་དཔའ་ཞེས་པ་ལ་སོགས་པའི་ཚིགས་སུ་བཅད་པ་བརྗོད་ཅིང་
གཞག་པར་བྱའོ། །ཨོཾ་བཛྲ་དྷརྨཱ་ས་མ་ཡ་སྟྭཾ་ཧུ་ལུ་ཧུ་ལུ་ཨཱ་རོ་ལྀ་ཀ་ཕཊ་སྭཱ་ཧཱ། ཞེས་ལན་གསུམ་བཟླས་པའི་རྣ་རྒྱན་གཉིས་རྣ་བ་དག་ལའོ། །ཨོཾ་བཛྲ་སུརྱཱ་ཏཱ་མོ་པི་དྷ་མ་ན་ས་མ་ཡ་སྟྭཾ་ཨ་ཧཾ་རཏྣ་དྷྲྀཀ་ཕཊ་སྭཱ་ཧཱ། ཞེས་ལན་གསུམ་བརྗོད་པའི་མགུལ་རྒྱན་མགུལ་བར་རོ། །ཨོཾ་ཤྭ་ཤྭ་ཏ་པ་ར་མ་ཤྭ་ཤྭ་ཏ་
ཨེ་ཧྱེ་ཧི་ཛི་ན་ཛིཀ་ཕཊ་སྭཱ་ཧཱ། ཞེས་ལན་གསུམ་བཟླས་པའི་ལག་རྒྱན་གདུ་བུ་བཞིན་ལག་པ་དག་ལའོ། །ཨོཾ་ཕུ་ཕུ་ཧི་ཧི་ཧི་པྲཛྙཱ་དྷྲྀཀ་ཕཊ་སྭཱ་ཧཱ། ཞེས་ལན་གསུམ་བརྗོད་པའི་སྐ་རགས་སྐེད་པ་ལའོ། །བུད་མེད་ཀྱི་ཕྱོགས་ལ་ཚིགས་སུ་བཅད་པ་ལ་དཔའ་བོ་ཞེས་པ་ཕྱུང་ལ་ལྷ་མོ་ཞེས་གཞུག་པར་བྱའོ། །ཡང་
དག་གནས་ཞེས་པའི་རྗེས་ལ་རིམ་པ་བཞིན་དུ། འཁོར་ལོ་མི་བསྐྱོད་པ་ཡི་གཟུགས། །ཞེས་པ་དང་། རྣ་རྒྱན་གཉིས་ནི་གསུང་རྡོ་རྗེ། །ཞེས་པ་དང་། མགུལ་པའི་ཕྲེང་བ་རིན་ཆེན་འབྱུང་། །ཞེས་པ་དང་། ལག་གདུབ་རྟག་པའི་བདག་ཉིད་དོ། །ཞེས་པ་དང་། སྐ་རགས་དོན་ཡོད་གྲུབ་པ་ནི། །ཞེས་
པ་བཅུག་ནས། རྡོ་རྗེ་སེམས་དཔའ་ཞེས་བྱ་བ་ལ་སོགས་པ་གདོན་པར་བྱའོ། །གང་ཡང་བུད་མེད་དང་སྐྱེས་པ་གང་ལྟ་སྟངས་ལ་སོགས་པའི་ནུས་པ་ཐོབ་པས་གཞན་དོན་དུ་དཔའ་བོའི་བརྟུལ་ཞུགས་བླང་བར་འདོད་ན་རྡོ་རྗེ་ཕག་མོ་གཟུགས་ཅན་མ་དེའམ། བདེ་མཆོག་མིག་གི་གཟུགས་ཅན་དེ་ཡེ་ཤེས་
སེམས་དཔའ་དང་རོ་གཅིག་ཏུ་བསམས་ནས་འཁོར་ལོ་ལ་སོགས་པ་སྔར་བཞིན་དུ་མོས་ཤིང་མགོ་བོའི་ཕྲེང་བ་ལ་སོགས་པ་རང་རང་གི་སྔགས་ཀྱིས་ལྷའི་རང་བཞིན་དུ་མོས་ཏེ། ཨོཾ་བཛྲ་བཻ་རོ་ཙ་ནི་ཡེ་ཧུཾ་ཧཱུཾ་ཕཊ་ཕཊ་སྭཱ་ཧཱ། ཞེས་ལན་གསུམ་དུ་བཟླས་པའི་འཁོར་ལོ་དེ་བཞིན་ཁོ་ནར་བསྐོར་བར་བྱའོ། །སངས་
རྒྱས་ལྔའི་རང་བཞིན་ཐོད་པ་ལྔ་ཡང་སྟེ། གང་གི་ཕྱིར། བཻ་རོ་ཙ་ནའི་སྔགས་གང་ཡིན། །མགོ་བོར་ཐོད་པས་བརྒྱན་པའོ། །ཞེས་གསུངས་སོ། །ཐོད་པ་ནི་འདིར་འཁོར་ལོའི་གཟུགས་ཀྱང་ངོ་། །ཨོཾ་ཧྲཱིཿཧ་ཧ་ཧུཾ་ཧཱུཾ་ཕཊ་ཅེས་ལན་གསུམ་བཟླས་པའི་རྣ་རྒྱན་གཉིས་ཏེ། ཡི་གེ་བདུན་པའི་རིག་སྔགས་
เล่ม ๗๕ · หน้า 81a
ཀྱིས། །རྣ་རྒྱན་གྱིས་ནི་རྣ་བ་མཛེས། །ཞེས་གང་གསུངས་པའོ། །རྡོ་རྗེ་ཕག་མོའི་རྩ་བའི་སྔགས་སམ་ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་བརྞ་ནཱི་ཡེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་ལན་གསུམ་བཟླས་པའི་མགུལ་རྒྱན་ཏེ། རྡོ་རྗེ་ཕག་མོའི་སྔགས་གང་ཡིན། །མགྲིན་པར་མགུལ་རྒྱན་རྣམ་
པར་བརྒྱན། །ཞེས་གང་གསུངས་པའོ། །ཨོཾ་ཧ། ན་མ་ཧི། སྭཱ་ཧཱ་ཧཱུ། པཽ་ཥཊ་ཧེ། ཧཱུཾ་ཧཱུཾ་ཧོ། ཕཊ་ཧཾ། ཞེས་ལན་གསུམ་བཟླས་པའི་གདུ་བུ་གཉིས་ཏེ། དཔའ་བོའི་གོ་ཆ་དྲུག་གིས་ནི། །ཕྱག་རྒྱ་འདི་ནི་ལུས་ལ་མཛེས། །ཞེས་གང་གསུངས་པའོ། །ཨོཾ་བཾ། ཧཾ་ཡོཾ། ཧྲིཾ་མོཾ། ཧེཾ་ཏྲཾ། ཧཱུཾ་ཧཱུཾ། ཕཊ་ཕཊ་ཅེས་
པ་ལན་གསུམ་བཟླས་པའི་སྐ་རགས་ཏེ། རྣལ་འབྱོར་མ་དྲུག་ཅེས་པ་ཡིས། །སྔགས་ཀྱི་སྐ་རགས་རྒྱན་དུ་བྱས། །ཞེས་གང་གསུངས་པའོ། །ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ་ཌཱ་ཀི་ནཱི་ཛཱ་ལ་སཾ་བ་རཾ་སྭཱ་ཧཱ། ཞེས་ལན་གསུམ་བཟླས་པའི་མི་མགོ་ལྔ་བཅུའི་ཕྲེང་བ་སྐེ་ལ་སྟེ། ལྷ་ཡི་སྙིང་པོའི་སྔགས་ཉིད་
ནི། །ཕྲེང་བ་བརྒྱ་ཕྱེད་བརྒྱན་པའོ། །ཞེས་གང་གསུངས་པའོ། །དེ་ནས་ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞ་ནཱི་ཡེ་ཧཱུཾ་ཧཱུཾ་ཕཊ་སྭཱ་ཧཱ། ཞེས་ལན་གསུམ་བཟླས་པའི་སྟག་གི་པགས་པ་ནི་ཤམ་ཐབས་ཀྱི་ཆེད་དུ་སྟེ། སངས་རྒྱས་ཀུན་གྱི་མཁའ་འགྲོ་མས། །པགས་པའི་གོས་ནི་འཛིན་པ་གཞན། །ཞེས་གང་
གསུངས་པའོ། །ཨོཾ་པྲཱ་ཙཎྜེ་ཧཱུཾ་ཧཱུཾ་ཕཊ་ཅེས་པ་ལ་སོགས་པ་ནས། ཨོཾ་རཱུ་པི་ཎཱི་ཡེ་ཧཱུཾ་ཧཱུཾ་ཕཊ་ཅེས་པའི་སྔགས་སུམ་ཅུ་རྩ་དྲུག་གིས་ལན་གསུམ་བཟླས་པའི་ཡེ་ཤེས་ཀྱི་བདུད་རྩིའི་བཏུང་བའི་སྣོད་ནི་ལག་པར་སྦྱིན་ནོ། །འཁོར་ལོ་ཀུན་གྱི་རྣལ་འབྱོར་མའི། །སྔགས་ཀྱིས་བཏུང་བའི་ཐོད་པའོ། །ཞེས་གང་
གསུངས་པའོ། །ཁ་ཊྭཱཾ་ག་དང་ཅང་ཏེའུ་ལ་བཅོམ་ལྡན་འདས་ཀྱི་རྩ་བའི་སྔགས་ལན་གསུམ་བཟླས་ཏེ་རྡོ་རྗེ་སེམས་དཔའ་ཞེས་པ་ལ་སོགས་པའི་ཚིགས་སུ་བཅད་པས་སོ། །དཔལ་བདེ་མཆོག་གི་རྩ་བའི་སྔགས་ལན་གསུམ་བཟླས་པའི་ཚངས་སྐུད་དང་མགྲིན་པར་འཆང་བའི་དོ་ཤལ་དང་རྡོ་རྗེའི་རྒྱན་དང་
རྐུན་པོའི་སྐྲ་ལས་བྱས་པའི་ཅོད་པན་དང་། སྐོར་གཉིས་པའི་སྐ་རགས་དང་ཐལ་བ་དང་། དཔུང་རྒྱན་དང་། རྐང་གདུབ་དང་། གཡེར་ཁ་རྣམས་ནི་རང་གི་གནས་སུའོ། །དཔའ་བོའི་རྩ་བའི་སྔགས་ཀྱིས་གང་། །ཚངས་སྐུད་ལ་སོགས་རྣམས་སུ་བཏགས། །ཞེས་གང་གསུངས་པའོ། །དེ་ལ་ཕྲེང་བ་
เล่ม ๗๕ · หน้า 81b
གཅིག་གིས་ཚངས་སྐུད་དོ། །ཕྲེང་བ་བརྒྱད་རྣམས་ཀྱིས་སྐ་རགས་སོ། །དེ་ཉིད་ཀྱི་བུད་མེད་ཀྱི་རྐེད་པར་བཅུ་དྲུག་གིས་སོ། །ཉི་ཤུ་རྩ་ལྔས་དོ་ཤལ་ལོ། །སྐུད་པ་གཅིག་གིས་ཚངས་སྐུད་འགྱུར། །སྐུད་པ་བརྒྱད་ཀྱིས་སྐ་རགས་སོ། །བུད་མེད་བཅུ་དྲུག་ཤེས་པར་བྱ། །ཉི་ཤུ་རྩ་ལྔའི་ཕྲེང་བ་ཅན། །
ཞེས་གང་གསུངས་པའོ། །ཡང་ན་མིའི་རྒྱུས་པ་ལས་བྱས་པའམ། སྐྲ་ལས་བྱས་པའི་ཚངས་སྐུད་དོ། །འདིར་འཁོར་ལོ་ལ་སོགས་པ་དང་རྡོ་རྗེའི་རྒྱན་རྣམས་ཇི་ལྟར་འོས་པར་མིའི་རུས་པ་ལས་བྱས་པའོ། །དེ་ལ་གཅིག་ནི་སྤྱི་བོར་ཏེ། དེ་སྐད་དུ། སོར་མོ་ལྔ་བྱས་དུམ་བུ་ནི། །ཅོད་པན་དག་ཏུ་འཛིན་
པའོ། །གཞན་ནི་རྣ་བ་དང་མགུལ་བ་དང་། སྙིང་ག་དང་། གསང་བ་དང་ལག་པའི་རྒྱན་ཡིན་ཏེ་ཇི་ལྟར་མཛེས་པར་བྱའོ། །སྔགས་སུམ་ཅུ་རྩ་དྲུག་རྣམས་དང་རྩ་བའི་སྔགས་གཉིས་ནི་ཁོ་བོས་དཔལ་བདེ་མཆོག་གི་མངོན་པར་རྟོགས་པའི་སྒྲུབ་ཐབས་སུ་བརྗོད་དོ། །དཔའ་བོའི་སྤྱོད་པའི་བརྟུལ་ཞུགས་
ཉིད་ལ་རྒྱལ་བུ་གཞོན་ནུའི་བརྟུལ་ཞུགས་ཀྱི་སྤྱོད་པ་དང་། རྡོ་རྗེ་ཐོད་པའི་སྤྱོད་པའི་བརྟུལ་ཞུགས་ཞེས་ཀྱང་དཔལ་སཾ་པུ་ཊའི་རྒྱུད་ལས་གསུངས་སོ། །དེ་ནས་ཕྱག་རྒྱ་ལ་སོགས་པས་མཆོད་པར་བྱའོ་ཞེས་པ་སྤྱོད་པའི་བརྟུལ་ཞུགས་སྦྱིན་པའི་ཆོ་གའོ། །དེ་ནས་དེ་བཞིན་གཤེགས་པའི་སྤྱོད་ལམ་གྱི་
ཚུལ་དུ་བྱས་ནས་ཆོས་གོས་ཀྱི་གྲྭ་བཟུང་བའི་ཁུ་ཚུར་གཡོན་པ་སྙིང་གར་བཟུང་ཞིང་གཡས་པས་མི་འཇིགས་པའི་ཕྱག་རྒྱས། སྲིད་པའི་ངན་འགྲོ་ལས་བཏོན་ནས། །སྲིད་པ་ཤིན་ཏུ་ཞི་བྱའི་ཕྱིར། །རྡོ་རྗེ་སེམས་དཔའ་དེ་བཞིན་གཤེགས། །བདག་གིས་ཁྱོད་ནི་ལུང་བསྟན་གྱིས། །ཀྱེ་ཆེ་གེ་མོ་རྡོ་རྗེ་
ཏ་ཐཱ་ག་ཏ་སིདྡྷྱ་ས་མ་ཡ་སྟྭཾ་བྷུར་བྷུ་བཿསྭཿཞེས་པའི་སྔགས་བརྗོད་ཅིང་མེ་ཏོག་ལྷུང་བ་དང་བསྟུན་པའི་དེ་བཞིན་གཤེགས་པའི་གཟུགས་ཅན་གྱི་སློབ་མ་ལུང་བསྟན་པར་བྱའོ། །གང་ཡང་འདི་ལྟར་ལུང་བསྟན་པ་དེ་དེ་བཞིན་གཤེགས་པ་ཐམས་ཅད་ཀྱིས་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་ཏོ་
ཞེས་དད་པར་བྱའོ། །ལུང་བསྟན་པའི་ཆོ་གའོ། །རིག་མ་དང་། རྡོ་རྗེ་དང་། སྤྱོད་པའི་བརྟུལ་ཞུགས་དང་། ལུང་བསྟན་པ་འདི་རྣམས་རྒྱུད་ལ་སོགས་པ་ཁ་ཅིག་ཏུ་དབང་བསྐུར་བ་ཉིད་ཀྱི་ཐ་སྙད་དུ་བྱས་སོ། །དེ་ནས་ཁ་སྦྱོར་གྱི་རྒྱུད་དུ། བཞི་པ་དེ་ནི་དེ་བཞིན་ཡང་། །ཞེས་པའི་རྗེས་ལ། བྱང་ཆུབ་
เล่ม ๗๕ · หน้า 82a
སེམས་ཀྱི་དབང་གིས་ནི། །སློབ་མའི་སྡིག་དང་བྲལ་བ་ལ། །དེ་ནས་རྗེས་སུ་གནང་བ་བྱིན། །ཞེས་གསུངས་པས། སློབ་མའི་གདན་གྱི་མདུན་ནམ་ལ་ལར་སྟན་ལ་བྷྲཱུཾ་ལས་སྐྱེས་པའི་ཆོས་ཀྱི་འཁོར་ལོ་ཨོཾ་བཛྲ་ཧེ་ཏུ་མཾ་ཞེས་བརྗོད་པ་དང་། ལག་པ་གཡས་སུ་ཨོཾ་བཛྲ་བྷཱ་ཥ་རཾ་ཞེས་
བརྗོད་ཅིང་ཡི་གེ་ཨཱཿལས་སྐྱེས་པའི་དུང་དང་། གཡོན་དུ་དབྱངས་དང་པོ་ལས་སྐྱེས་པའི་པོ་ཏི་དབྱངས་དང་པོ་བརྗོད་པ་དང་། དབྱངས་ཐ་མ་ལས་སྐྱེས་པའི་དྲིལ་བུ་དབྱངས་ཐ་མ་བརྗོད་ཅིང་བྱིན་ལ་དེ་དྲིལ་བུ་དཀྲོལ་དུ་གཞུག་ཅིང་། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་
མཚན་ཉིད་མེད། །ནམ་མཁའ་མཉམ་པ་ཉིད་སྦྱོར་ལས། །ཐམས་ཅད་མཆོག་ནི་མཉམ་ཉིད་གསལ། །དེང་ནས་བརྩམས་ཏེ་སེམས་བསྐྱེད་པ། །ཙམ་གྱིས་ཆོས་དུང་བླ་མེད་པ། །ཀུན་ནས་ཡོངས་སུ་བཀང་ནས་ནི། །ཆོས་ཀྱི་འཁོར་ལོ་བསྐོར་བར་གྱིས། །ཞེས་བརྗོད་པར་བྱའོ། །
ཐམས་ཅད་མཆོག་ཅེས་པ་ནི་ཆོས་ཐམས་ཅད་ཀྱི་མཆོག་སྟེ། སྒྲིབ་པ་ཐམས་ཅད་བྲལ་བ་ཉིད་ཀྱིས་ན་རང་བཞིན་མེད་པ་ཉིད་དོ། །གསལ་བ་ནི་བསྒོམས་པས་མངོན་སུམ་དུ་བྱ་བའོ། །ཆོས་ཀྱིས་ཀྱང་དེ་བཞིན་དུ་གྱིས་ཤིག་པའོ། །དེ་ལྟར་ཡང་དེ་ལ་མོས་པས་ཆོས་ཀྱི་འཁོར་ལོ་བསྐོར་བར་གྱིས་ཤིག་ཅེས་
དྲིལ་བུས་མཚོན་པར་བྱེད་དོ། །དེ་ལྟར་སྤྱིར་རྗེས་སུ་གནང་བ་བྱིན་ནས་རྗེས་སུ་གནང་བ་ལྷག་པར་སྦྱིན་པར་བྱ་བའི་ཆེད་དུ་རིམ་པ་བཞིན་སློབ་མ་རྣམ་པར་སྣང་མཛད་ལ་སོགས་པའི་གཟུགས་སུ་བསྒོམས་ནས། སེམས་ཅན་ཀུན་ལ་ཕན་དོན་ཕྱིར། །འཇིག་རྟེན་ཀུན་ཏུ་ཐམས་ཅད་ནས། །སྣ་ཚོགས་
ཇི་ལྟར་འདུལ་བ་ཡིས། །ཆོས་ཀྱི་འཁོར་ལོ་བསྐོར་བར་གྱིས། །ཤེས་རབ་ཐབས་ཀྱི་རང་བཞིན་དག །ཡིད་བཞིན་ནོར་བུ་ལྟར་མཐོ་བས། །སྐྱེ་མེད་དོགས་དང་བྲལ་བ་ཡིས། །དེ་ལྟར་སེམས་ཅན་དོན་གྱིས་ཤིག །ཅེས་པའི་ཆོས་ཀྱི་སྒྲའི་གནས་སུ་རྡོ་རྗེ་དང་རིན་པོ་ཆེ་དང་པདྨ་དང་ལས་ཀྱི་སྒྲ་
བཅུག་པའི་ཚིགས་སུ་བཅད་པ་ལྔས་རྗེས་སུ་གནང་བ་སྦྱིན་ནོ། །དེས་ཕྱག་བྱས་ལ། གཙོ་བོས་ཇི་ལྟར་བཀའ་བསྒོ་བ། །དེ་བཞིན་དུ་ནི་བདག་གིས་བགྱི། །ཞེས་བརྗོད་དོ། །རྗེས་སུ་གནང་བའི་ཆོ་གའོ། །དེ་ནས། སྤྱི་བོ་རུ་ནི་གདུགས་བཟུང་ནས། །བསྐོར་བ་བྱེད་དུ་བཅུག་ནས་ནི། །དཀྱིལ་འཁོར་
เล่ม ๗๕ · หน้า 82b
སྒོར་ནི་ཐལ་སྦྱོར་བ། །གདུགས་བཅས་དབབ་ཅིང་འདི་བརྗོད་བྱ། །རྒྱུད་རྣམས་འཛིན་པར་འགྱུར་བ་ཡི། །སློབ་མ་འདི་ནི་ཕུལ་བ་ལགས། །ཞེས་པས་དཀྱིལ་འཁོར་གྱི་དབང་ཕྱུག་ལ་གསོལ་བ་གདབ་ལ། གདུགས་གཞན་དུ་བཞག་སློབ་མའི་སྙིང་ལ་འབབ་པ་བརྗོད་པར་བྱ་སྟེ། ད་ནི་ཁྱོད་ཉིད་
དཀྱིལ་འཁོར་གྱི། །སློབ་དཔོན་སྔགས་དང་རྒྱུད་འཛིན་པར། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་དག་ཀྱང་དགོངས་པར་འགྱུར། །སེམས་ཅན་ཀུན་ལ་བརྩེ་དོན་དུ། །ཁྱོད་ཀྱིས་དཀྱིལ་འཁོར་ཆོ་ག་བཞིན། །རབ་ཏུ་འབད་དེ་བྲི་བར་བྱ། །སྒྲུབ་པ་པོ་རྣམས་རྒྱུད་ལ་སྦྱར། །མཆོག་ཏུ་
གསང་བ་དམ་པ་ཡི། །དཀྱིལ་འཁོར་མཐོང་བཞིན་ཞུགས་པས་ན། །སྡིག་པ་ཀུན་ལས་རྣམ་པར་གྲོལ། །དེ་རིང་ཁྱོད་ནི་བདེ་བར་གནས། །བདེ་ཆེན་ཐེག་པ་འདི་ལས་ནི། །ཕྱིན་ཆད་ཁྱོད་ལ་འཆི་བ་མེད། །སྲིད་པའི་སྡུག་བསྔལ་ལས་ཁྱོད་འདས། །སྲིད་པ་མཐའ་འདས་གྲུབ་ཆེད་དུ། །སངས་རྒྱས་
རྡོ་རྗེ་ཅན་ཀུན་གྱིས། །དེ་རིང་ཚེ་ལྡན་དབང་བསྐུར་རོ། །ཁམས་གསུམ་ཀུན་གྱི་རྒྱལ་སྲིད་ཆེ། །བདག་པོ་ཉིད་དུ་ཁྱོད་ངེས་སོ། །འདོད་ཆགས་བྲལ་བ་ལྟ་བུའི་སྡིག །ཁམས་གསུམ་ན་ནི་གཞན་མེད་དེ། །དེ་བས་འདོད་ལ་ཆགས་བྲལ་ཉིད། །ཁྱོད་ཀྱིས་ནམ་ཡང་མ་བྱེད་ཅིག །འདོད་པ་ཀུན་ལ་སྤྱོད་
པས་ཁྱོད། །གང་ལའང་འཇིགས་མེད་སྤྱད་པར་གྱིས། །ཤ་ལྔ་བདུད་རྩི་ལྔ་བཟའ་བྱ། །འདི་ལས་གཞན་ཡང་དམ་ཚིག་སྲུང་། །སྲོག་ཆགས་གསད་པར་མི་བྱ་ཞིང་། །བུད་མེད་རིན་ཆེན་སྤང་མི་བྱ། །སློབ་དཔོན་སྤང་བར་མི་བྱ་སྟེ། །དམ་ཚིག་ཤིན་ཏུ་འདའ་བར་དཀའ། །ཤེས་རབ་ཐབས་ཀྱིས་བསམ་
པ་ཡི། །མི་བྱ་ཅུང་ཟད་ཡོད་མ་ཡིན། །མ་འཇིགས་ཁྱོད་ལ་སྡིག་པ་མེད། །དེ་བཞིན་གཤེགས་པའི་གསུང་ཇི་བཞིན། །འདི་ལྟར་ཡིད་ནི་རབ་དང་རྡོ་རྗེ་ཉིད་དུ་གྱིས། །རང་གི་དམ་ཚིག་མི་བཟད་བདེ་སྟེར་བསྟེན་པར་གྱིས། །འགྲོ་བ་བདེ་བ་མྱོང་བར་རྡོ་རྗེ་སེམས་དཔའ་དང་། །མཚུངས་པའི་རྟག་པ་ཉིད་དུ་
ཁྱོད་རྣམས་ཕྱིན་པར་འགྱུར། །གཞན་ཡང་གང་དག་ཆོ་ག་ཇི་ལྟ་བ་བཞིན་དབང་བསྐུར་བ་ལ་དགེ་བའི་ཕྱིར། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་སྡུག་པའི་བུ་དང་འདྲ་བར་ཐུགས་དང་བས་ཡང་དག་པར་དགོངས་པར་མཛད་པ་འདི་ནི་ཆོས་ཉིད་ཡིན་ནོ་ཞེས་པ། དབུགས་དབྱུང་བའི་ཆོ་
เล่ม ๗๕ · หน้า 83a
གའོ། །དེ་ལྟར་དབང་ཐོབ་ཅིང་དབུགས་ཕྱུང་སྟེ། དགའ་བའི་སློབ་མས་དེ་ལྟར་བགྱིའོ། །དེང་བདག་སྐྱེ་བ་འབྲས་བུར་བཅས། །བདག་གི་གསོན་པའང་འབྲས་བུར་བཅས། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་དེང་བདག་འགྱུར། །ཞེས་བརྗོད་
དོ། །གླང་པོ་ཆེ་དང་། རྟ་དང་། རིན་པོ་ཆེ་དང་། ས་ལེ་སྦྲམ་དང་། དངུལ་དང་། གོས་དང་། རྒྱན་དང་། བ་ལང་དང་། མ་ཧེ་དང་། བྲན་པོ་དང་། བྲན་མོ་དང་། ལས་བྱེད་པ་ལ་སོགས་པ་དང་། གཅེས་པའི་ཆུང་མ་དང་། བུ་དང་། བུ་མོ་ལ་སོགས་པ་རྣམས་སམ་ཇི་ལྟར་ནུས་པར་བླ་མ་ལ་
བཀུར་སྟི་བྱས་ཏེ་ཡོན་དབུལ་བར་བྱའོ། །གཏོར་མ་དང་སྦྱིན་སྲེག་དང་སྟོན་མོ་ལ་སོགས་པ་ཡང་བྱའོ། །རྣམ་པར་གྲོལ་ཞེས་པ་ནི་སྡིག་པ་མི་བྱེད་པར་ངེས་པའི་ཕྱིར་རོ། །བདེ་བར་གནས་པ་ནི་བདེ་བ་དང་བདེ་འགྲོ་ལ་ངེས་པའི་ཕྱིར་རོ། །འདས་པ་ནི་ཆོས་ཀྱི་སྐུ་ཐོབ་པའི་ཕྱིར་རོ། །མཐའ་འདས་ཞེས་
པ་མཐའ་མ་མེད་པའི་སྲིད་པ་ལོངས་སྤྱོད་རྫོགས་པའི་སྐུ་སྟེ། རྒྱུན་མི་འཆད་པར་རྟག་པ་འདི་ཉིད་ཀྱིས་སོ། །རྡོ་རྗེ་ནི་མི་ཕྱེད་པའི་སེམས་རབ་ཏུ་དང་བ་སྟེ། བླ་མ་དང་སངས་རྒྱས་རྣམས་ལའོ། །རང་གི་དམ་ཚིག་ནི་རང་གི་ལྷ་ལ་སོགས་པའོ། །བདེ་བ་ཉུང་ཞིང་སྡུག་བསྔལ་མང་བའི་འགྲོ་བར་ཁྱེད་
ཅག་སྐྱེས་ཀྱང་ཁ་ན་མ་ཐོ་བ་མེད་པའི་བདེ་བ་ཆེན་པོ་རྟག་པ་ཉིད་ཐོབ་པའོ། །འདིར་མེ་ཏོག་ལྷུང་བས་ཉེ་བར་མཚོན་པའི་དེ་བཞིན་གཤེགས་པའི་རང་བཞིན་གྱིས་རྣམ་པར་དག་པ་གསལ་བར་བྱ་བའི་ཕྱིར་དུ་མགོ་བོ་ལ་ཕྲེང་བས་དབང་བསྐུར་རོ། །མ་རིག་པའི་དྲི་མ་འཁྲུང་པར་རུང་བ་ཉིད་དུ་སྒྲུབ་པའི་ཕྱིར་དུ་ཆུའི་
དབང་ངོ་། །དེ་བཞིན་གཤེགས་པས་རྒྱས་འདེབས་པ་འདུ་བྱ་བ་བསྐྱེད་པའི་ཆེད་དུ་གཙུག་ཏོར་བསྐྱེད་པར་རུང་བ་ཉིད་ཀྱི་ཆེད་དུ་ཅོད་པན་གྱི་དབང་ངོ་། །ཉོན་མོངས་པ་ལ་སོགས་པའི་དགྲ་རྩ་བ་ནས་འདོན་པ་ཉིད་ཀྱི་ཕྱིར་དུ་དཔའ་བོའི་དར་དཔྱངས་བཅིང་བ་སྟེ། ཅོད་པན་གྱི་དབང་གི་འཁོར་ཡིན་ནོ། །ཁ་ཅིག་ཏུ་ནི་
དབང་ཐ་དད་པར་བརྗོད་དོ། །ཁ་ཅིག་ཏུ་ནི་དར་དཔྱངས་བཅིང་བ་མ་གསུངས་ཏེ་འདིའི་དོན་བསམ་པའི་ཁྱད་པར་ལས་ཅོད་པན་གྱི་དབང་གིས་ཀྱང་འགྲུབ་པའི་ཕྱིར་རོ། །དབྱེར་མེད་པའི་ཡེ་ཤེས་སྐྱེ་བར་འགྱུར་བར་རུང་བ་ཉིད་དུ་སྒྲུབ་པའི་ཆེད་དུ་རྡོ་རྗེའི་དབང་ངོ་། །སྟོང་པ་དང་སྙིང་རྗེ་དབྱེར་མེད་པ་བླ་ན་མེད་པའི་ཡེ་ཤེས་
เล่ม ๗๕ · หน้า 83b
འབྱུང་བའི་བདག་པོ་ཆོས་འབྱུང་རྟོགས་པར་བྱ་བའི་ཆེད་དུ་ཆོས་འབྱུང་གསལ་བར་བྱེད་པའི་དྲིལ་བུ་སྒྲ་དང་བཅས་པས་དབང་བསྐུར་བའོ། །བདག་པོའི་ཆེད་དུ་དབང་ནི་བདག་པོའི་དབང་དུ་ཡང་བརྗོད་དོ། །མ་འོངས་པ་ན་ཐུབ་པའི་དབང་པོའི་གོ་འཕང་གི་མིང་དུ་འོས་པའི་ས་བོན་དགོད་པའི་དོན་དུ་མིང་གི་དབང་
ངོ་། །ཆུའི་དབང་ལ་སོགས་པ་ལྔ་པོ་འདི་རྣམས་རིམ་པ་བཞིན་ཆོས་ཀྱི་དབྱིངས་རྣམ་པར་དག་པ་དང་མཉམ་པ་ཉིད་དང་སོ་སོར་རྟོག་པ་དང་བྱ་བ་གྲུབ་པ་དང་། མེ་ལོང་ལྟ་བུའི་ཡེ་ཤེས་ཀྱི་ས་བོན་ཡོངས་སུ་རྒྱས་པར་བྱེད་པའི་ཕྱིར་དེའི་བདག་ཉིད་དུ་མོས་པར་བྱའོ། །ཆུའི་དབང་ནི་མེ་ལོང་ལྟ་བུའི་ཡེ་ཤེས་ཀྱི་བདག་
ཉིད་དུ་ཡང་དེ་ཉིད་བསྡུས་པ་ལས་གསུངས་ཏེ། མི་བསྐྱོད་པ་ཡང་མེ་ལོང་ལྟ་བུའི་ཡེ་ཤེས་ཀྱི་བདག་ཉིད་དུ་ཡང་ངོ་། །འདི་ནས་བརྩམས་ཏེ་རྣམ་པར་དག་པ་ཟུང་འཇུག་གི་བྱང་ཆུབ་རྟོགས་པར་བྱ་བའི་ཆེད་དུ་བརྩོན་པར་གྱིས་ཤིག་ཅེས་ངེས་པར་བྱ་བར་དགོངས་ནས་དེའི་རང་བཞིན་གྱི་རྡོ་རྗེ་འཛིན་པའི་ངེས་པ་ནི་རྡོ་རྗེའི་
དམ་ཚིག་གོ། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་རབ་ཏུ་སྟོན་པའི་རྒྱུ་དེ་བཞིན་ཉིད་རྟོགས་པ་ལ་སྦྱར་བའི་ཆེད་དུ་སྒྲ་དང་བཅས་པའི་དྲིལ་བུའི་དམ་ཚིག་གོ། །ཤེས་རབ་དང་ཐབས་ཀྱི་རང་བཞིན་བདེ་བ་ཆེན་པོའི་བདག་ཉིད་རྫོགས་པའི་སངས་རྒྱས་ཀྱི་རང་བཞིན་ཤིན་ཏུ་བརྟན་པར་རུང་བ་ཉིད་དུ་བསྒྲུབ་པའི་ཕྱིར་
ཕྱག་རྒྱའི་དམ་ཚིག་གོ། །དེ་ཉིད་ཀྱི་ཕྱིར་མཁའ་འགྲོ་མ་རྡོ་རྗེ་གུར་ལས་དམ་ཚིག་གཉིས་ཀྱི་འཁོར་ཅན་ཕྱག་རྒྱའི་དམ་ཚིག་ཁོ་ནས་རྫོགས་པའི་སངས་རྒྱས་ཀྱི་དབང་དུ་གསུངས་སོ། །རྒྱུད་གཞན་དུ་ནི་དམ་ཚིག་གསུམ་སློབ་དཔོན་གྱི་དབང་གི་འཁོར་དུ་གསུངས་སོ། །དེ་ལྟར་ཡང་སྔར་ཤེས་རབ་བཅུ་དྲུག་
ཅེས་པ་ལ་སོགས་པ་གསུངས་སོ། །དྲི་མ་འཁྲུད་པར་རུང་བ་ཉིད་ནི་དམ་ཚིག་རྣམ་པར་གཞག་པ་གཉིས་ཀ་ལ་ཡོད་པར་མི་འགལ་ལོ། །ཇི་ལྟར་ས་བཅུ་པ་ལ་ཕྱིར་མི་ལྡོག་པའི་བྱང་ཆུབ་སེམས་དཔའ་ཆེན་པོ་རྣམས་ཕྱོགས་བཅུའི་དེ་བཞིན་གཤེགས་པ་རྣམས་ཀྱིས་དབང་བསྐུར་བ་དེ་བཞིན་དུ་དམ་ཚིག་
གསུམ་དང་བཅས་པ་འདི་ཡང་དེ་རྣམས་དང་བླ་མས་སེམས་ཅན་གྱི་ཕུང་པོ་དཔག་ཏུ་མེད་པ་ལ་གཞལ་དུ་མེད་པའི་ཆོས་སྟོན་པ་ལ་སོགས་པས་སློབ་དཔོན་དུ་བྱ་བའི་ཆེད་དུ་ཁམས་གསུམ་པའི་ཆོས་ཀྱི་རྒྱལ་སྲིད་དུ་དབང་བསྐུར་བས་ན་སློབ་དཔོན་གྱི་དབང་དང་། ཕྱིར་མི་ལྡོག་པ་རྣམས་ཀྱི་དབང་དང་འདྲ་བས་
เล่ม ๗๕ · หน้า 84a
ན་ཕྱིར་མི་ལྡོག་པའི་དབང་ངོ་། །ཕྱིར་མི་ལྡོག་པ་ཉིད་ཀྱི་ས་བོན་ཉིད་ཀྱང་སྐྲུན་པར་བྱེད་དོ། །དེའི་ཕྱིར་དེ་ལ་ལྟོས་ནས་ཕྱིར་མི་ལྡོག་པར་བྱ་བའི་ཆེད་དུ་དབང་དང་། ཕྱིར་མི་ལྡོག་པ་དང་ལྡན་པའི་དབང་ནི། ཕྱིར་མི་ལྡོག་པའི་དབང་དུ་བརྗོད་དོ། །དེ་ཉིད་ཀྱི་ཕྱིར། རྡོ་རྗེ་གསང་བ་ཡེ་ཤེས་
ཀྱིས། །སློབ་དཔོན་ཞེས་བྱ་གསུམ་འདིར་བརྗོད། །ཅེས་པ་འདོད་པ་ནི་བློ་གྲོས་ངན་པ་རྣམས་ཁོ་ནའིའོ། །བགེགས་མེད་པ་ཉིད་ཀྱི་ཆེད་དང་ཞི་བ་ལ་སོགས་པའི་དངོས་གྲུབ་ཀྱི་ས་བོན་དགོད་པའི་ཆེད་དང་། དོན་དམ་པའི་སྔགས་ཀྱི་དངོས་གྲུབ་ཀྱི་ཞིང་དག་པར་བྱ་བའི་ཕྱིར་དུ་སྔགས་བརྗོད་དུ་གཞུག་པའོ། །མི་
ཤེས་པའི་ལིང་ཏོག་བསལ་བས་ལྷའི་མིག་གིས་མངོན་པར་ཤེས་པ་བསྐྱེད་པའི་ཆེད་དུ་མིག་སྨན་ནོ། །དེས་ཀྱང་སྣ་ཚོགས་གཟུགས་བརྙན་བཞིན་དུ་ལྟ་བ་འདུས་བྱ་བ་བསྒྲུབ་པའི་ཆེད་དུ་མེ་ལོང་གི་དབང་ངོ་། །བདུད་བཞི་ལས་རྣམ་པར་རྒྱལ་བའི་ཆོས་ཀྱི་དབྱིངས་ཤིན་ཏུ་ཕྲ་བའི་འབེམ་འབིགས་པའི་ས་བོན་
དགོད་པའི་ཆེད་དུ་མདའ་འཕངས་པའོ། །དད་པ་དང་ཤེས་རབ་ཀྱི་ཞིང་དུ་བྱ་བའི་དོན་ནམ། དམ་ཚིག་བསྲུང་བའི་དོན་དང་ངག་དག་པའི་དོན་དུ་གསང་བའི་དབང་ངོ་། །ཕུལ་དུ་ཕྱིན་པའི་ཤེས་པ་འདི་ལ་ཡོད་པས། ཤེས་རབ་ནི་ཕྱི་རོལ་གྱི་གཞོན་ནུ་མའོ། །དེ་ལས་ཡེ་ཤེས་ནི་སེམས་རྣམ་པར་རྟོག་པ་དང་
བྲལ་བ་ལས་རྣམ་པར་དག་པ་ལྷན་ཅིག་སྐྱེས་པའི་དགའ་བ་ནི་ཤེས་རབ་ཡེ་ཤེས་ཀྱི་དབང་ངོ་། །ཡེ་ཤེས་དེ་ཉིད་དྲི་མ་དང་བྲལ་ཞིང་ཡོངས་སུ་དག་པར་རྟོགས་པ་ནི་དབང་བཞི་པའོ། །འདི་དག་ནི་བདེ་བ་ཆེན་པོའི་རོས་ཡིད་འཁྲུད་པའི་ཕྱིར་དབང་ངོ་། །འདི་དག་དང་འབྲེལ་པ་ཁོ་ནར་ཤེས་རབ་ཉིད་ཟག་པ་མེད་
པའི་བདེ་བ་དམ་པ་ཕུན་སུམ་ཚོགས་པའི་དངོས་ཀྱི་ཐབས་ཡིན་པའི་ཕྱིར་ལས་དང་པོ་ལ་སོགས་པའི་གནས་སྐབས་སུ་ཡང་སྤང་བར་མི་བྱའོ་ཞེས་པ། རིག་མའི་བརྟུལ་ཞུགས་སོ། །གང་ཚེ་རྣམ་པར་མི་རྟོག་པས། །ལས་ཀུན་ཐབས་དང་བཅས་པར་སྤྱོད། །རྣམ་པར་མི་རྟོག་བསྒོམས་པ་ལས། །བརྟུལ་
ཞུགས་རྣམས་ཀྱི་མཆོག་གི་མཆོག །ཅེས་རྡོ་རྗེ་མཁའ་འགྲོ་ལས་གསུངས་པས་བརྟུལ་ཞུགས་གཞན་གྱིས་ཅི་ཞིག་བྱ། དེས་ན་ཡེ་ཤེས་ལྔའི་རང་བཞིན་གྱི་བྱང་ཆུབ་སེམས་ཀྱི་བརྟུལ་ཞུགས་ཁོ་ན་ལ་ཤིན་ཏུ་སྦྱར་བའི་ཕྱིར་དུ་རྡོ་རྗེའི་བརྟུལ་ཞུགས་སོ། །སྤྱོད་པ་དང་བྲལ་ན་ཡང་བྱང་ཆུབ་ཀྱི་སེམས་མི་རྟོག་གོ་ཞེས་
เล่ม ๗๕ · หน้า 84b
བསླབ་པའི་དོན་དུ་སྤྱོད་པའི་བརྟུལ་ཞུགས་ཏེ་དེ་ནི་རྣམ་པ་གསུམ་མོ། །དེ་ལ་དང་པོ་ནང་གི་ཕྱག་རྒྱ་གསུམ་ལ་སྦྱོར་བ་ལྷུར་བྱེད་པ་སྟེ་དེ་ལྟར་ཡང་། ཁ་ཊྭཱཾ་ག་ནི་ལྷ་ཡི་སྐུ།། །ཅང་ཏེའུ་ཤེས་རབ་ཏུ་ནི་བཏགས། །ཞེས་དང་། སྔགས་ནི་བཏུང་བའི་ཐོད་པའོ། །ཞེས་གསུངས་པས་སོ། །ལྷའི་སྐུ་ལུས་དང་། ཨ་
ན་ཧ་ཏིའི་ངོ་བོ་གཏུམ་མོའི་སྒྲ་དང་གཉིས་སུ་མེད་པའི་བདེ་བ་ཆེན་པོ་ཉམས་སུ་མྱོང་བའི་རྟེན་ཀུན་རྫོབ་བྱང་ཆུབ་ཀྱི་སེམས་ཏེ་དེ་ལྟར་གསུམ་མཚོན་པར་བྱེད་པའོ། །གཉིས་པ་ནི་རྣལ་འབྱོར་མ་དང་སྤྱོད་པའི་བརྟུལ་ཞུགས་དང་ལྡན་པ་ལས་ཆོས་ཀྱི་དབྱིངས་ཤིན་ཏུ་རྣམ་པར་དག་པའི་ཡེ་ཤེས་ལ་སོགས་པ་ལྔ་བསྐྱེད་པ་ལ་
སྦྱོར་བ་ལྷུར་བྱེད་པའོ། །གསུམ་པ་ནི་ལྟ་སྟངས་བཞི་དང་མངོན་པར་ཤེས་པ་ལ་སོགས་པའི་ནུས་པ་ཐོབ་པར་གྱུར་པ་ན་སེམས་ཅན་གྱི་དོན་སྒྲུབ་པ་ལ་ལྷུར་བྱེད་པ་འཇིག་རྟེན་ལས་ཕྱི་རོལ་དུ་གྱུར་པའི་རྣལ་འབྱོར་པའམ་རྣལ་འབྱོར་མ་ནང་གི་བདག་ཉིད་ཀྱི་རྒྱན་མ་ལུས་པའི་དོན་ནུས་པ་ལྷུར་བྱེད་པ་སྟོང་པ་ཉིད་དང་སྙིང་རྗེ་
ཆེན་པོ་དབྱེར་མེད་པའི་རང་བཞིན་བྱང་ཆུབ་ཀྱི་སེམས་འབྱུང་བ་ལ་སྦྱོར་རོ། །དེ་ལྟར་ཡང་རྣལ་འབྱོར་མ་ཀུན་ཏུ་སྤྱོད་པའི་རྒྱུད་ལས། དང་པོར་མཉམ་གཞག་རྣལ་འབྱོར་པས། །འབད་དེ་ནུས་པ་བསྐྱེད་པར་བྱ། །ནུས་པ་བསྐྱེད་པའི་རྗེས་ལ་ནི། །བརྟུལ་ཞུགས་སྤྱོད་པ་ཡིད་འོང་བ། །རིགས་ལྔ་མཉམ་
པར་ཀུན་སྤྱོད་པ། །རིགས་གཅིག་ཏུ་ནི་རྣམ་པར་བརྟག །མི་རྟོག་སེམས་གཅིག་བདག་ཉིད་ཀྱིས། །འདོད་པའི་ཡོན་ཏན་ལྔ་སྤྱད་པ། །དེ་ལྟར་དཔལ་ལྡན་ཧེ་རུ་ཀའི། །ཡེ་ཤེས་བསམ་པ་ཀུན་རྫོགས་མཛད། །ཤེས་རབ་ཆེ་ལྡན་དེ་ཡིས་ནི། །གཉིས་མེད་ཡེ་ཤེས་བརྟུལ་ཞུགས་བྱེད། །སྤྱོད་
པའི་བརྟུལ་ཞུགས་ལ་ཞུགས་པའི། །རྣལ་འབྱོར་རབ་ཏུ་ངེས་ཤེས་བྱ། །ཞེས་གསུངས་སོ། །ཁམས་གསུམ་དང་དབྱེར་མེད་པའི་ཆོས་ཉིད་རྟོགས་པའི་རིམ་པ་རུང་བ་ཁྱོད་ཡིན་ནོ་ཞེས་གཟེངས་བསྟོད་པའི་དོན་དུ་ལུང་བསྟན་པའོ། །དེ་ལྟར་ཡང་། བྷུར་ནི་རླུང་གི་དཀྱིལ་འཁོར་ལ་སོགས་པའི་འཁོར་
དང་བཅས་པའི་ས་འོག་གོ། །བྷུ་ཝཿཞེས་པ་ནི་ས་སྟེང་གི་འཇིག་རྟེན་ནོ། །སྭཿཞེས་པ་མཐོ་རིས་ཏེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་མཐར་ཐུག་པའོ། །དེ་གསུམ་ཆར་ཡང་ཁྱོད་ཡིན་ཏེ་གང་གི་ཕྱིར། དེ་རྣམས་ཀྱི་རང་བཞིན་གྱི་དེ་ཁོ་ན་ཉིད་ཀྱི་ས་མ་ཡ་སྟེ། ས་རབ་ཏུ་དགའ་བ་ལ་སོགས་པའི་
เล่ม ๗๕ · หน้า 85a
རིམ་པས་རྟོགས་པར་རུང་བ་ཉིད་ཀྱིས་སོ་ཞེས་པ་ནི་ས་མ་ཡ་སྟྭཾ་བྷུར་བྷུ་བཿསྭཿཞེས་པ་འདིའི་དོན་ནོ། །ཆོ་ག་ཇི་ལྟར་དངོས་གྲུབ་རབ་ཏུ་བསྒྲུབས་ནས་ཆོས་སྟོན་པ་ལ་སོགས་པ་རྣམས་ཀྱིས་སེམས་ཅན་གྱི་དོན་གྱིས་ཤིག་ཅེས་པ་ནི་རྗེས་སུ་གནང་བའོ། །ཁྱོད་ཀྱིས་འདོད་པ་རྣམས་ལ་ཉེ་
བར་ལོངས་སྤྱད་ཀྱང་སྒྲིབ་པ་ཐམས་ཅད་ལས་གྲོལ་བའི་སངས་རྒྱས་དེ་རིང་ཉིད་དོ་ཞེས་དཀྱིལ་འཁོར་དུ་འཇུག་པ་ལ་སོགས་པ་ཐོབ་པར་ནུས་པ་ཉིད་དུ་རྒྱས་པར་བྱ་བ་ལ་དགོངས་པར་རྟོགས་པར་བྱ་བའི་ཕྱིར་དབུགས་དབྱུང་བའོ། །རྡོ་རྗེའི་བརྟུལ་ཞུགས་ལ་སོགས་པ་ལྔ་པོ་འདི་རྣམས་ཀྱང་སློབ་དཔོན་གྱི་དབང་གི་
རྗེས་དང་། རིག་པའི་དབང་གི་རྗེས་ལ་དེ་དང་དེ་ཙམ་གྱིས་ཚིམ་པ་རྣམས་ལ་སྦྱིན་པར་བྱའོ་ཞེས་ཁ་ཅིག་གོ། །སྔགས་དང་། མིག་སྨན་དང་། མེ་ལོང་དང་། མདའ་འཕང་བ་རྣམས་ནི་རིག་པའི་དབང་གི་རྗེས་ལ་ཡང་ངོ་། །རིག་པའི་བརྟུལ་ཞུགས་ནི་ཤེས་རབ་ཡེ་ཤེས་ཀྱི་རྗེས་ལ་ཡང་ཁ་ཅིག་ཏུའོ། །
ཁ་ཅིག་ཏུ་ནི་སྔགས་ལ་སོགས་པ་དང་། སྤྱོད་པའི་བརྟུལ་ཞུགས་དང་། སྤྱིར་རྗེས་སུ་གནང་བ་དང་། དམ་ཚིག་གསུམ་དང་། སྐལ་བ་དང་ལྡན་པ་ཉིད་རྣམས་མ་གསུངས་ཏེ། ཇི་ལྟར་རིགས་པར་དབང་གཞན་རྣམས་སུ་དེ་དང་དེའི་དོན་དུ་འདུས་པར་དགོངས་པས་སོ། །ཁ་ཅིག་ཏུ་རྗེས་སུ་གནང་བ་
དང་། དབུགས་དབྱུང་བ་དག་ཕྱིར་མི་ལྡོག་པའི་དབང་དུ་བསྡུས་སོ། །འདིར་ནི་ཐམས་ཅད་ཐ་དད་དུ་བརྗོད་དོ། །གང་ཡང་མཁའ་འགྲོ་མ་རྡོ་རྗེ་གུར་གྱི་རྒྱུད་ལས། དང་པོར་ཆུ་ཡི་དབང་ཡིན་ཏེ། །གཉིས་པ་ལ་ནི་ཅོད་པན་དབང་། །གསུམ་པ་རྡོ་རྗེའི་དབང་གིས་སོ། །བཞི་པ་རང་གི་བདག་པོ་ཡིན། །
ལྔ་པ་ལ་ནི་མིང་དབང་བསྐུར། །དྲུག་པ་རྫོགས་པའི་སངས་རྒྱས་ཉིད། །བུམ་པའི་དབང་ནི་བདུན་པ་སྟེ། །བརྒྱད་པ་གསང་བའི་དབང་ཡིན་ནོ། །དགུ་པ་ཤེས་རབ་དབང་བསྐུར་ཏེ། །དེ་ཉིད་རྡོ་རྗེའི་སྦྱོར་བ་ཡིས། །ཐམས་ཅད་རྡོ་རྗེ་བརྟུལ་ཞུགས་སྦྱིན། །རང་ཉིད་སྟོན་པ་ལུང་སྟོན་ཏེ། །འདི་ནི་དབང་
མཆོག་རིམ་པའོ། །ཞེས་པ་གསུངས་སོ། །དེ་ལ་ཕྲེང་བའི་དབང་ནི་ཆུའི་དབང་ལ་སོགས་པའི་རྒྱུ་ཉིད་ཀྱིས་དང་། སྔགས་ལ་སོགས་པ་རྣམས་ནི་ཇི་ལྟར་རིགས་པར་སློབ་དཔོན་གྱི་དབང་དང་། དབང་བཞི་པ་དང་། འགའ་ཞིག་གི་ཚེ་གཞན་གྱིའང་འཁོར་ཉིད་དུ་རྒྱུད་གཞན་དུ་གསུངས་པ་ལས་རྟོགས་པར་
เล่ม ๗๕ · หน้า 85b
བྱ་བ་ཉིད་ཀྱི་ཕྱིར་མ་གསུངས་སོ། །དེ་ཉིད་ཀྱི་ཕྱིར་དཔལ་གསང་བ་འདུས་པ་ལས། དབང་བསྐུར་རྣམ་གསུམ་ཐ་དད་པ། །རྒྱུད་འདི་རུ་ནི་རབ་ཏུ་བརྟགས། །བུམ་པའི་དབང་ནི་དང་པོ་སྟེ། །གཉིས་པ་གསང་བའི་དབང་ཡིན་ནོ། །གསུམ་པ་ཤེས་རབ་ཡེ་ཤེས་ཏེ། །བཞི་པ་དེ་ཡང་དེ་བཞིན་ནོ། །ཞེས་སོ། །
དཔལ་ཁ་སྦྱོར་ལས་ཀྱང་། དབང་དེ་ཡང་ནི་རྣམ་པ་བཞི། །དང་པོ་བུམ་པའི་དབང་ཡིན་ཏེ། །གཉིས་པ་ལ་ནི་གསང་བའི་དབང་། །གསུམ་པ་ཤེས་རབ་ཡེ་ཤེས་ཏེ། །བཞི་པ་དེ་ནི་དེ་བཞིན་ཡང་། །ཞེས་སོ། །བརྟག་པ་གཉིས་པའི་རྒྱུད་ལས་ཀྱང་། །སློབ་དཔོན་གསང་བ་ཤེས་རབ་དང་། །བཞི་པ་དེ་
ཡང་དེ་བཞིན་ནོ། །ཞེས་གསུངས་སོ། །དེ་ལ་ཆུ་དང་། ཅོད་པན་དང་། རྡོ་རྗེ་དང་། བདག་པོ་དང་། མིང་དང་། སློབ་དཔོན་གྱི་དབྱེ་བས་རྣམ་པ་དྲུག་ནི་བུམ་པའི་དབང་སྟེ། ཐམས་ཅད་དུ་དེ་བཞིན་གཤེགས་པ་དང་། སྤྱན་མ་ལ་སོགས་པའི་རིག་མ་རྣམས་ཀྱིས་བུམ་པས་དབང་བསྐུར་བའི་ཕྱིར་རོ། །སློབ་
དཔོན་གྱི་དབང་ནི་མཆོག་ཏུ་ཉེ་བར་བླང་བར་བྱ་བ་ཉིད་ཀྱིས་ཕུལ་དུ་བྱུང་བ་དང་བཅས་པར་བསྐུར་བའི་ཕྱིར། བུམ་པའི་དབང་ནི་བདུན་པ་སྟེ། །ཞེས་གསུངས་སོ། །སློབ་དཔོན་གྱི་དབང་སྟེ་འབྱུང་བའི་རིམ་པའི་རྒྱུད་ཡིན་པའི་ཆུའི་དབང་ལ་སོགས་པ་ལྔ་ཡང་སློབ་དཔོན་གྱི་དབང་དུ་བརྗོད་དོ། །དེས་ན་ཐམས་ཅད་
མི་འགལ་ལོ། །དེ་ལྟ་བུ་འདི་ནི་གཞན་དབང་བསྐུར་བའི་ཆོ་གའོ།། །།རང་ཉིད་ཀྱང་དམ་ཚིག་ཉམས་ན་འདི་ལྟ་བུའི་དབང་ཉིད་ཇི་ལྟར་སློབ་དཔོན་འཇུག་པའི་ཆོ་གར་བླང་བར་བཤད་པ་དེ་ལྟར་བླང་བར་བྱའོ། །འོན་ཀྱང་གལ་ཏེ་བླ་མ་དམ་པ་ཤིན་ཏུ་རིང་བ་ན་ལམ་བགྲོད་དཀའ་བ་ལ་སོགས་པའི་ཉེ་བར་འཚེ་
བས་བགྲོད་པར་མི་ནུས་པའི་ཕྱོགས་ན་བཞུགས་ཏེ། གཞན་དུ་ནི་མ་ཡིན་ནོ། །རྟག་ཏུ་ཡི་དམ་བྱེད་པས་ནི་ཤེས་རབ་དང་ཐབས་རོ་གཅིག་པའི་རང་འདོད་པའི་ལྷའི་སྦྱོར་བས་ཡིད་ཀྱི་རང་བཞིན་གྱི་དཀྱིལ་འཁོར་བསྒོམ་པར་བྱ། དཀྱིལ་འཁོར་གྱི་དབང་ཕྱུག་ལས་ཆུའི་དབང་ལ་སོགས་པ་གསང་བ་དང་།
ཤེས་རབ་ཡེ་ཤེས་དང་། བཞི་པའི་མཐར་ཐུག་པ་དང་། དབུགས་དབྱུང་བའི་མཐར་ཐུག་པར་ཡང་བླང་བར་བྱའོ་ཞེས་པ། རང་དབང་བསྐུར་བའི་ཆོ་གའོ།། །།རྡོ་རྗེ་སེམས་དཔའི་སྡོམ་པ་དང་ལྡན་པ་འདིའི་ལྟུང་བ་ནི་རིགས་རྣམ་པ་གཉིས་ཏེ། རྩ་བའི་ལྟུང་བ་དང་། སྦོམ་པོའི་ལྟུང་བས་སོ། །
เล่ม ๗๕ · หน้า 86a
དེ་དག་ཀྱང་མན་ངག་གི་སྙེ་མར་རྣམ་པར་ཕྱེ་བའོ། །བླ་མ་ལ་བརྙས་པ་ལ་སོགས་པའི་ཉེས་པ་ལ་ནུས་པ་ཇི་ལྟ་བར་སྟོན་མོ་སྔོན་དུ་འགྲོ་བའི་དབུལ་བ་བྱས་ནས། བླ་མའི་མདུན་དུ་བཤགས་པ་སྔོན་དུ་འགྲོ་བས་སྡོམ་པ་སྔར་བཞིན་གཟུང་བར་བྱའོ་ཞེས་པ། དབང་གི་ཆོ་ག་གདམས་
པ་དང་བཅས་པ་འཁོར་དང་བཅས་པའོ། །འདིར་བགེགས་ལ་སོགས་པ་ཞི་བའི་དོན་དུ་སྦྱིན་སྲེག་བྱའོ་ཞེས་སྔར་བརྗོད་དོ། །དེས་ན། སྦྱིན་སྲེག་དང་བྲལ་ལས་རྣམས་ལ། །ཡང་དག་དངོས་གྲུབ་མི་འབྱུང་སྟེ། །ཞི་རྒྱས་ལ་སོགས་གྲུབ་དོན་དུ། །སྦྱིན་སྲེག་ལས་ནི་ཡང་དག་བརྩམ། །ཞེས་གསུངས་
པའི་ཕྱིར་སྐབས་ཇི་ལྟ་བར་སྦྱིན་སྲེག་བྱའོ། །དེ་ལ། སེམས་ཅན་དབྱེ་བས་མཐའ་ཡས་ཏེ། །རིགས་ཀྱི་དབྱེ་བས་རྣམ་པ་ལྔ། །ལས་ཀྱི་དབྱེ་བས་རྣམ་པ་བཞི། །ཐབ་ཁུང་རྣམས་སུ་ངེས་པ་འདི། །ཞེས་བཅོམ་ལྡན་འདས་ཀྱིས་གསུངས་སོ། །རྡོ་རྗེ་ཁྲོ་བོ་སྙོམས་པར་འཇུག་པ་གསང་བའི་རྒྱུད་ལས་ནི་
ལས་ཀྱི་དབྱེ་བས་ཐབ་ཁུང་གི་དབྱེ་བ་བརྒྱ་རྩ་བཅུ་བསྟན་ནོ། །འདི་ལྟ་སྟེ། ཞི་བ་ལ་ཡོངས་སུ་ཟླུམ་པོ། རྒྱས་པ་ལ་གྲུ་བཞི། མངོན་སྤྱོད་ལ་གྲུ་གསུམ། དགུག་པ་ལ་ལྕགས་ཀྱུའི་རྣམ་པ། དབང་དུ་བྱེད་པ་ལ་རྡོ་རྗེའི་རྣམ་པ། ནོར་དང་འབྲུ་དགུག་པ་ལ་རིན་པོ་ཆེའི་རྣམ་པ། འདོད་པའི་གཟུགས་ཅན་
ཉིད་ལ་རྟགས་ཀྱི་རྣམ་པ། མི་སྣང་བ་ལ་མདའ་གཞུའི་རྣམ་པ། བཀའ་བསྒོ་བ་ལ་རལ་གྲིའི་རྣམ་པ། སྡིག་པ་ཞི་བར་བྱེད་པ་ལ་རྟ་བབས་དང་བཅས་པའི་ཟླུམ་པོའི་རྣམ་པ་རིག་མ་ཆགས་པར་བྱ་བ་ལ་རང་གི་རིགས་ཀྱི་ཕྱག་རྒྱའི་རྣམ་པ། ནམ་མཁའ་ལ་འགྲོ་བ་ལ་ནམ་མཁའི་དཀྱིལ་འཁོར་གྱི་རྣམ་
པ། རིག་པ་གཟི་བརྗིད་བསྐྱེད་པ་ལ་འབར་བ་དང་བཅས་པའི་རྣམ་པ། དཀྱིལ་འཁོར་ཆེན་པོ་བསྒྲུབ་པ་ལ་འཁོར་ལོའི་རྣམ་པ། ལས་ཐམས་ཅད་པ་ལ་ཕྱིའི་དཀྱིལ་འཁོར་གྲུ་བཞི་པ་ལ་སྒོ་བཞི་པའི་ཐིག་བཏབ་ནས། ཤར་དུ་རྡོ་རྗེས་མཚན་པ། ལྷོར་རིན་པོ་ཆེས་མཚན་པ། ནུབ་ཏུ་པདྨས་མཚན་
པ། བྱང་དུ་ལས་ཀྱི་རྡོ་རྗེས་མཚན་པ་ཞེས་པ་ལ་སོགས་པ་དང་། སླར་ཡང་དབང་ལ་གྲུ་གསུམ་དང་། །མངོན་སྤྱོད་ལ་གྲུ་གསུམ་དང་། ཟླ་བ་ཕྱེད་པའོ་ཞེས་སོ། །ལེགས་པར་གྲུབ་པར་བྱེད་པ་དང་། རྡོ་རྗེ་དྲི་མ་མེད་པ་དང་། རྣམ་པར་སྣང་མཛད་མངོན་པར་བྱང་ཆུབ་པ་དང་། དམ་ཚིག་
เล่ม ๗๕ · หน้า 86b
གསུམ་གྱི་རྒྱལ་པོ་དང་། ཀུན་ནས་དབང་བསྐུར་སྐྱེད་པར་བྱེད་པ་དང་། །ཕྱག་ན་རྡོ་རྗེ་སྙིང་པོ་འབྱུང་གནས་དང་། །རྡོ་རྗེ་མངོན་པར་འབྱུང་བའི་རྒྱུད་དུ་ལས་ཐམས་ཅད་པའི་ཐབ་ཁུང་གྲུ་བཞི་པ། རྒྱར་ཁྲུ་གང་ཟབས་སུ་ཁྲུ་ཕྱེད་པའི་ཚད་ཀྱི་ཐབ་ཁུང་གི་སྟེང་དུ་ཞེས་པ་ལ་སོགས་པ་གསུངས་སོ། །དཔུང་
བཟངས་ཀྱིས་ཡོངས་སུ་ཞུས་པ་དང་། པདྨ་འབྱུང་གནས་དང་། ཤིན་ཏུ་རབ་ཏུ་གནས་པའི་རྒྱུད་ལས། ལས་ཐམས་ཅད་པའི་ཐབ་ཁུང་པདྨའི་རྣམ་པ་ཟླུམ་པོ་ཀུན་ཏུ་ཁྲུའི་ཚད་ལས་ཟབས་སུ་ཁྲུ་ཕྱེད་ཀྱི་ཚད་དུ་བརྐོས་ལ། དབུས་ཀྱི་པདྨ་བརྒྱད་ཀྱིས་ཡོངས་སུ་བསྐོར་བའི། ཐབ་ཁུང་གི་སྟེང་དུ་སོར་
བཞི་པའི་བར་དོར་ནས་རྒྱ་དང་དཔངས་སུ་སོར་བཞི་པ་ཐབ་ཁུང་ནས་འཐོན་པའི་པདྨ་རབ་ཏུ་རྒྱས་པའི་འདབ་མའི་རྣམ་པ་ལྟ་བུའི་ཁ་ཁྱེར་ཅན་ཁ་ཁྱེར་གྱི་ཕྱི་ངོས་སུ་པདྨའི་ཕྲེང་བས་ཡོངས་སུ་བསྐོར་བ། ཐབ་ཁུང་གི་ནང་གི་ཕྱོགས་ཀྱི་པདྨ་རྣམས་ལ་རྡོ་རྗེ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེ་རྣམས་
སོ། །མཚམས་ཀྱི་པདྨ་རྣམས་ལ་མིག་གཉིས་དང་། རྡོ་རྗེ་རྩེ་གསུམ་དང་། པདྨ་དང་། ཨུཏྤ་ལའོ། །དབུས་ཀྱི་པདྨ་ལ་འཁོར་ལོ་རྩིབས་བརྒྱད་པའོ། །ཐབ་ཁུང་གི་ནང་གི་མཐར་རྡོ་རྗེ་ཕྲེང་བས་ཡོངས་སུ་བསྐོར་བའི་ཐབ་ཁུང་ནི་ལས་ཐམས་ཅད་པའོ་ཞེས་པ་ལ་སོགས་པ་གསུངས་སོ། །དུས་ཀྱི་
འཁོར་ལོར་ནི་ཞི་བ་ལ་ཐབ་ཁུང་ཟླུམ་པོ་ཁྲུ་གཅིག་པའོ། །རྒྱས་པ་ལ་གྲུ་བཞི་པ་ཁྲུ་གཉིས་པའོ། །མངོན་སྤྱོད་ལ་གཞུའི་རྣམ་པ་ཁྲུ་ཕྱེད་པའོ། །དགུག་པ་ལ་གྲུ་གསུམ་པ་སོར་ཉི་ཤུ་པའོ། །དབྱེ་བ་ལ་ཟུར་ལྔ་པ་ཟླུམ་པའི་ཚད་དོ། །རྨོངས་པ་ལ་ཟུར་དྲུག་པ་སོར་སུམ་ཅུ་པའི་ཚད་དོ། །དབང་ལ་ཟུར་
བདུན་པ་སོར་བཞི་བཅུ་པའོ། །རེངས་པ་ལ་ཟུར་བརྒྱད་པ་སོར་དྲུག་ཅུ་པའོ། །ཐམས་ཅད་དུ་ཐབ་ཁུང་གི་ཕྱེད་ཀྱི་ཚད་ཟབས་སུའོ། །ལས་ཐམས་ཅད་པའི་ཐབ་ཁུང་ནི་ཟླུམ་པོ་ཞེས་པ་ལ་སོགས་པ་གསུངས་སོ། །དཔལ་སངས་རྒྱས་ཐོད་པའི་རྒྱུད་དུ་ནི། ཞི་བའི་ཐབ་ཁུང་ཟུར་བཞི་པ། །སྟེང་དང་འོག་ཏུ་མཐོ་
གང་ངོ་། །རྒྱས་པའི་ཐབ་ཁུང་ཟླུམ་པོ་སྟེ། །སྟེང་དང་འོག་ཏུ་མཐོ་གསུམ་མོ། །དབང་ལ་ཐབ་ཁུང་གྲུ་གསུམ་སྟེ། །སྟེང་དང་འོག་ཏུ་མཐོ་བརྒྱད་པ། །མངོན་སྤྱོད་ཐབ་ཁུང་ཟླ་ཕྱེད་དེ། །སྟེང་དང་འོག་ཏུ་ཁྲུ་ཡི་ཚད། །ཅེས་པ་ལ་སོགས་པ་གསུངས་སོ། །དེ་ལྟར་ལས་ཐམས་ཅད་པའི་ཐབ་ཁུང་དུ་ཞི་བ་དང་།
เล่ม ๗๕ · หน้า 87a
རྒྱས་པ་དང་། དབང་དང་། མངོན་སྤྱོད་ལ་སོགས་པ་རྣམས་འགྲུབ་ཀྱང་སོ་སོ་ལ་ཐབ་ཁུང་ཐ་དད་དུ་རྒྱུད་རྣམས་སུ་གསུངས་སོ། །དེ་བཞིན་དུ་རྒྱུད་ཁ་ཅིག་ཏུ་ཞི་བ་ལ་སོགས་པའི་ཐབ་ཁུང་རྣམས་དང་། ལས་ཐམས་ཅད་པའི་དཀྱིལ་འཁོར་དང་མཆུ་དང་ཁ་ཁྱེར་དང་དེའི་ཕྱི་ངོས་རྣམས་སུ་
དབྱིབས་དང་ཁ་དོག་དང་མཚན་མ་དགོད་པ་ཐ་དད་པ་དང་། སའི་ཁྱད་པར་དང་། ཕྱོགས་ཀྱི་ཁྱད་པར་དང་། བསྲེག་བྱ་དང་། མེ་ལྷ་དང་། འདུག་སྟངས་དང་། རྒྱན་དང་། དབྱིབས་དང་། ཕྱོགས་སུ་ལྟ་བ་ལ་སོགས་པའི་ཁྱད་པར་དང་། སྦྱིན་སྲེག་བྱ་བའི་དུས་ཀྱི་ཁྱད་པར་རྣམས་སོ་སོར་བསྟན་ལ། རྒྱུད་གཞན་
རྣམས་སུ་ནི་གཞན་དུ་བསྟན་ཏོ། །རྣལ་འབྱོར་པ་རྡོ་རྗེ་སེམས་དཔའི་སྐུར་མོས་པ་བརྟན་པས་ནི་སྒྱུ་མ་བཞིན་སྣ་ཚོགས་སྟོང་པ་ཉིད་དང་རོ་གཅིག་པར་སྣང་བ་བསྟན་པ་ཉིད་ལས། བརྩེ་བའི་རང་བཞིན་ཅན་གྱི་དོན་དུ་འཇུག་པ་འདི་ཐམས་ཅད་ཀྱིས་མངོན་པར་འདོད་པ་འགྲུབ་པར་འགྱུར་རོ་ཞེས་དགོངས་པ་དང་། །
གདུལ་བྱའི་བསམ་པ་སྣ་ཚོགས་པ་ལས་ཀྱང་སྟེ། ཐུགས་རྗེའི་རང་བཞིན་གྱི་སྐུ་རྣམས་ཀྱི་རྣམ་པར་གཞག་པ་འདི་སྣ་ཚོགས་པ་ཡིན་ནོ། །དེ་ལྟར་ཐམས་ཅད་རྟོགས་ནས་ཁོ་བོ་ཅག་གིས་དེ་ཁོ་ན་ཉིད་བསྡུས་པ་ལ་སོགས་པ་རྣལ་འབྱོར་དང་། རྣལ་འབྱོར་མའི་རྒྱུད་རྣམས་ཀྱི་རྗེས་སུ་འབྲངས་ནས་རབ་ཏུ་སྤྱོད་
པ་མང་པོ་གདམས་པ་དང་བཅས་པ་རྫོགས་ཤིང་གསལ་བར་གཏན་ལ་ཕབ་པའི་ཐབ་ཁུང་གི་མཚན་ཉིད་ལ་སོགས་པ་དང་། སྦྱིན་སྲེག་གི་ཆོ་ག་འོད་ཀྱི་སྙེ་མར་གསལ་བར་བྱས་སོ། །དེའི་ཕྱིར་དེ་ཉིད་ལས་དེ་ཐམས་ཅད་ངེས་པར་བཟུང་ནས་སྦྱིན་སྲེག་བྱ་སྟེ། འདིར་སླར་དེ་བརྗོད་པས་ཅི་ཞིག་བྱ་ངེས་ན་འདིར་
སྦྱིན་སྲེག་གི་ཆོ་ག་འོད་ཀྱི་སྙེ་མར་ཤེས་པར་བྱའོ། །དེ་ནས་ཆོ་ག་ཇི་ལྟ་བར་ཞི་བ་དང་རྒྱས་པའི་སྦྱིན་སྲེག་བྱ་སྟེ། རང་ཉིད་ཀྱི་དཀྱིལ་འཁོར་མཆོད་དེ་ཐམས་ཅད་ཀྱི་ནུས་པ་ཇི་ལྟ་བར་དེ་བཞིན་གཤེགས་པ་ལ་སོགས་པ་རྣམས་ལ་མཆོད་པར་གྱིས་ཤིག་ཅེས་པ་སློབ་མ་ལ་སོགས་པ་རྣམས་ལ་མཆོད་པ་བྱེད་
དུ་བཅུག་ལ་ཞུགས་པ་རྣམས་ཀྱང་བཟའ་བ་དང་བཅའ་བ་དང་བལྡག་པ་དང་ཆང་ལ་སོགས་པ་འཁོར་ལོ་ལ་ཕུལ་བ་རྣམས་ལ་ཚིམ་པར་བྱས་ཏེ། དེ་དག་ལྷན་ཅིག་ཏུ་མཚན་མོ་མི་ཉལ་བར་གླུ་གར་ལ་སོགས་པ་རྣམས་དང་། བྱང་ཆུབ་སེམས་ཀྱི་སྟོབས་ཀྱིས་ཡང་དག་པར་མཆོད་ནས་ཁྱེད་
เล่ม ๗๕ · หน้า 87b
རྣམས་ཀྱིས་འཇུག་པ་འདི་སུ་ལ་ཡང་སྨྲ་བར་མི་བྱའོ་ཞེས་བརྗོད་ལ། སློབ་མ་ལ་ནི་ཡོན་བླང་བྱ། །དེས་ཀྱང་གུས་པས་དབུལ་བྱ་སྟེ། །རིན་ཆེན་ཡིད་འོང་ཆུང་མ་དང་། །རང་གི་ལུས་དང་ས་གཞི་དང་། །མདོར་ན་བྱ་བ་དེ་འདྲ་བ། །ཇི་ལྟར་བླ་མ་མཉེས་འགྱུར་བྱ། །བླ་མ་མཉེས་ན་དངོས་
གྲུབ་འགྱུར། །གཞན་དུ་མིན་ཞེས་ཐུབ་པས་གསུངས། །སློབ་དཔོན་བླ་མེད་བྱེད་པ་པོ། །རྡོ་རྗེ་སེམས་དཔའ་མཆོད་པ་ལས། །དེ་ཡིས་བསོད་ནམས་མ་བྱས་ཅི། །དཀའ་ཐུབ་མ་སྤྱད་པ་ཡང་གང་། །ཞེས་སེམས་པས་སོ། །དེ་ནས་སློབ་མ་རྣམས་བཞག་སྟེ། །ཕྱི་རོལ་དུ་བྱུང་ནས་ཕྱོགས་ཀྱི་
གཏོར་མ་དང་། མཆོད་པ་ལ་སོགས་པ་བྱས་ལ། ནང་དུ་ཞུགས་ནས་འཁོར་ལོ་ལ་ཕྱག་འཚལ་ཏེ། འཁོར་ལོའི་དབང་པོ་ལ་ཨརྒྷ་ལ་སོགས་པ་ཕུལ་ནས་དགེ་བ་ཡོངས་སུ་བསྔོས་ཏེ་དཀྱིལ་འཁོར་ལ་ལན་གསུམ་བསྐོར་བ་བྱས་ལ། བཅོམ་ལྡན་འདས་ལ་ཕྱོགས་པས་ཤར་སྒོར་འདུག་སྟེ། ཡི་གེ་བརྒྱ་པ་ལན་
གསུམ་བརྗོད་ནས། མ་རྙེད་ཅེས་པ་ལ་སོགས་པས་བཟོད་པར་གསོལ་ཏེ། ཨོཾ་ཁྱེད་ཀྱིས་ཞེས་པ་ལ་སོགས་པ་དང་། ཨོཾ་ཨཱཿཧཱུཾ་བཛྲ་མུཿཞེས་པས་ཡེ་ཤེས་ཀྱི་དཀྱིལ་འཁོར་གཤེགས་སུ་གསོལ་ནས། རང་གིས་སྤྲུལ་པའི་དཀྱིལ་འཁོར་བདག་ཉིད་ལ་བསྟིམས་ཏེ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུཏྤནྣ་
ཏྭཏ་ཨོཾ་ཨཱཿཧཱུཾ་ཕཊ་སྭཱ་ཧཱ། ཨོཾ་ཨཱཿཧཱུཾ་མུཿཞེས་འདོན་ཞིང་ཆོས་ཐམས་ཅད་སྐྱེ་བ་མེད་པར་མོས་པས་དྲིལ་བུ་དཀྲོལ་ཞིང་ལག་པ་ན་གནས་པའི་རྡོ་རྗེས་ཤར་སྒོ་ནས་བརྩམས་ཏེ། ཚངས་པའི་ཐིག་གི་ལམ་ནས་གཙོ་བོའི་གནས་ཀྱི་བར་དབྱི་ཞིང་། རང་གི་མགོ་བོ་ལ་རྡུལ་ཚོན་ཅུང་ཟད་བླུགས་ནས་པདྨ་ལ་སོགས་
པ་དབྱི་བར་བྱའོ། །དེ་ནས་སྒོ་རྣམས་དང་ཟུར་རྣམས་ལག་པ་ན་གནས་པའི་རྡོ་རྗེའི་རྩེ་མོས་གཞིག་པར་བྱའོ། །དེ་ནས་ཨོཾ་བཛྲ་ཀཱི་ལ་ཡ་ཨུད་ཀཱི་ལ་ཡ་ཨུད་ཀཱི་ལ་ཡ་སརྦ་ཀཱི་ལན་བཛྲ་དྷ་ར་ཨཱ་ཛྙཱ་ཡ་ཧཱུཾ་ཧཱུཾ་ཧཱུཾ་ཧཱུཾ་ཕཊ་ཧོཿཞེས་པ་ཧཱུཾ་བཞི་པའི་སྔགས་ཀྱིས་ཕུར་པ་རྣམས་བཏོན་ལ། ཨོཾ་རུ་རུ་སྥུ་རུ་ཛྭ་ལ་ཏིཥྠ་སིདྡྷ་ལོ་ཙ་ནི་
སརྦ་ཨརྠ་སཱ་དྷ་ནི་སྭཱ་ཧཱ། ཞེས་པ་འོ་མ་ལ་བརྒྱ་རྩ་བརྒྱད་བཟླས་པས་བཀྲུའོ། །ཕུར་པའི་ལྷ་རྣམས་ཀྱང་གཤེགས་སུ་གསོལ་ལོ། །ཁུང་བུ་ཡང་དགང་ངོ་། །ཞི་བ་ལ་སོགས་པ་དོན་དུ་གཉེར་བ་ལ་རྡུལ་ཚོན་ཅུང་ཟད་བྱིན་ནས་རྡུལ་ཚོན་གཞན་ཐམས་ཅད་རྣམ་པར་རྒྱལ་བའི་བུམ་པ་གཞན་གསར་པ་གོས་
เล่ม ๗๕ · หน้า 88a
ཀྱིས་བརྒྱན་པར་བླུགས་ཏེ་གླང་པོ་ཆེའི་སྟེང་ངམ། ཁྱོགས་ལ་བཞག་ལ་ཡོན་བདག་གིས་བྱིན་པའི་རས་ཀྱིས་བརྒྱན་པའི་རྣལ་འབྱོར་མས་བཟུང་བའི་འདོ་ལི་ལ་ཞོན་པའི་སློབ་དཔོན་ནམ་སློབ་མས་དྲིལ་བུའི་སྒྲ་དང་། བཀྲ་ཤིས་ཀྱི་གླུ་དང་། རོལ་མོའི་སྒྲ་དང་། གདུགས་དང་། རྒྱལ་མཚན་
དང་། མཆོད་པ་རྣམས་དང་ལྡན་པས་ཁྱེར་ཏེ་འབབ་ཆུ་ཆེན་པོ་དང་། མཚོ་ཆེན་པོའམ། མཚོ་བྲན་ཆུ་ཟབ་མོའི་འགྲམ་དུ་འདུག་ལ། བ་ལྕིས་བྱུགས་ལ་དྲི་དཀར་པོས་མཎྜལ་བྱས་ཏེ། པདྨའི་ལྟེ་བ་ལ་རྡོ་རྗེ་སེམས་དཔའ་དང་། འདབ་མ་ལ་ཀླུ་རྣམས་སྔ་མ་བཞིན་མཆོད་དེ། ཀླུ་གཏོར་གྱི་སྔགས་ཀྱིས་འོ་མའི་
གཏོར་མ་ཕུལ་ནས་མཆོད་དེ། ཀླུ་རྣམས་ལ་བྱིན་གྱིས་བརླབས་པའི་རྡུལ་ཚོན་གཏད་དེ་ཆུ་ལ་བསྐུར་བར་བྱའོ། །ཀླུ་རྣམས་ཀྱིས་ཀྱང་བཀུར་སྟི་ཆེན་པོས་ས་འོག་གི་ཕྱོགས་བཞིར་ཁྱེར་བར་བསམ་མོ། །གང་དུ་རྡུལ་ཚོན་ཁྱེར་བའི་བུམ་པ་དེ་ཆུས་བཀང་ནས་དེ་ཁོ་ན་བཞིན་དུ་ཁྱེར་ཏེ། དེས་ཞི་བའི་དོན་དུ་དཀྱིལ་
འཁོར་ཁང་པ་ལ་སོགས་པར་གཏོར་བར་བྱའོ། །བ་ལྕིས་བྱུགས་པའི་དཀྱིལ་འཁོར་གྱི་ཁང་པར་གཞོན་ནུ་མ་རྣམས་ལ་འོ་ཐུག་གི་སྟོན་མོ་བྱའོ། །དེ་ནས་སློབ་དཔོན་གྱིས་ནི་ནོར་མཁོ་བའི་ཡོ་བྱད་ཀུན་བསྡུས་ནས། རང་ཉིད་ཀྱིས་ནི་སྤྱད་པར་བྱ། །སློབ་མ་སོགས་ཀྱིས་ཅུང་ཟད་མིན། །རྨང་འཛུགས་པ་དང་
རབ་གནས་དང་། སྦྱིན་སྲེག་འཁོར་ལོའི་ནོར་གང་ཡིན། །དེ་ཀུན་སློབ་མའི་ཁོ་ནའོ་ཞེས། །རྡོ་རྗེ་སེམས་དཔའ་མཆོག་ཉིད་གསུངས། །ཡོན་བདག་གིས་ནི་རབ་གནས་བྱས་པའི་སྐུ་གཟུགས་ལ་སོགས་པ་བསྐྱོད་དུ་རུང་བ་རོལ་མོའི་སྒྲ་ལ་སོགས་པའི་མཆོད་པས་རང་གི་གནས་སུ་ཁྱེར་ལ་མཆོད་པར་
བྱའོ། །སློབ་དཔོན་དང་། སྒོའི་སློབ་དཔོན་རྣམས་དང་། ལས་ཀྱི་རྡོ་རྗེ་ཅན་དང་། རྣལ་འབྱོར་མ་རྣམས་དང་། བཟོ་བོ་རྣམས་ཇི་ལྟར་རིགས་པར་ནུས་པ་ཇི་ལྟ་བར་གོས་ལ་སོགས་པ་རྣམས་དང་། སོ་རྩི་ལ་སོགས་པས་ཚིམ་པར་བྱའོ། །དགེ་འདུན་གྱི་སྟོན་མོ་དང་། ཚོགས་ཀྱི་འཁོར་ལོ་བྱའོ། །དམན་
པ་དང་མགོན་མེད་པ་རྣམས་ཀྱང་ཚིམ་པར་བྱའོ་ཞེས་པ། །དཀྱིལ་འཁོར་ཉེ་བར་བསྡུ་བ་ལ་སོགས་པའི་ཆོ་གའོ།། །།དེ་ལྟར་འདི་ནི་བྲི་བར་བྱ་བའི་དཀྱིལ་འཁོར་གྱི་ཆོ་གའོ། །བྲི་བར་བྱ་བའི་ཆོ་ག་འདི་ཡང་ཡིད་ཀྱིས་བསྒྲུབ་པའི་ཆོ་ག་ཁོ་ནས་འབྲས་བུ་དང་ལྡན་ནོ་ཞེས་བྱ་བས་ཡིད་ཀྱི་ཆོ་ག་ཁོ་ན་མཆོག་
เล่ม ๗๕ · หน้า 88b
ཡིན་ནོ། །དེ་ཉིད་ཀྱི་ཕྱིར་དཀྱིལ་འཁོར་གྱི་བདག་པོའི་གཟུགས་ཀྱིས་ས་ཡོངས་སུ་བཟུང་བ་ལ་སོགས་པ་དང་། སྐུ་གཟུགས་ལ་སོགས་པའི་རབ་གནས་དང་། སློབ་མ་དབང་བསྐུར་བ་དང་། གཤེགས་སུ་གསོལ་བ་དང་། ཞི་བའི་སྦྱིན་སྲེག་གི་མཐར་ཐུག་པ་ཐམས་ཅད་ཀྱི་ཡིད་ཀྱིས་བྱའོ། །དེ་
ཉིད་ཀྱི་ཕྱིར་གང་གི་ཚེ་འདི་ཐམས་ཅད་ཡོ་བྱད་འགའ་ཞིག་དང་བྲལ་བས། བྱ་བར་མི་ནུས་པའམ། མི་རིག་པའམ་མི་རྙེད་པ་དེའི་ཚེ་བསྒོམས་ལ་བྱའོ། །ཕྱི་རོལ་གྱི་དངོས་པོ་ཡོད་པ་ལ་ཡང་བསམ་གཏན་ཁོ་ན་གཙོ་བོ་ཡིན་ནོ། །འོན་ཀྱང་འཇིག་རྟེན་པའི་ལྟ་བ་དང་། སྦྱིན་པ་ལ་མངོན་པར་དང་བ་
ལ་སོགས་པས་བསོད་ནམས་འཕེལ་བའི་ཆེད་འབའ་ཞིག་ཏུ་ཕྱིའི་ཆོ་ག་འདོད་དོ། །ཚོགས་པ་དང་བྲལ་བ་ཡི་ནི་བསྒོམ་པ་ཁོ་ནས་ཆོ་ག་ཐམས་ཅད་བསྒྲུབ་པར་བྱའོ་ཞེས་སྔོན་གྱི་སློབ་དཔོན་རྣམས་ཀྱིས་གསུངས་སོ། །དེའི་ཕྱིར་ལས་དང་པོ་པས་ཀྱང་སེམས་བརྟན་པས་ཡིད་ཀྱིས་སྤྲུལ་པའི་
དཀྱིལ་འཁོར་དུ་སྔ་མ་བཞིན་རབ་གནས་དང་། སྐལ་པ་དང་ལྡན་པ་དབང་བསྐུར་བར་བྱའོ། །དེ་ལྟར་ཡང་དཔལ་སངས་རྒྱས་ཐོད་པའི་རྒྱུད་ལས། ཤེས་རབ་པདྨའི་ནང་དབུས་སུ། དཔག་ཚད་བྱེ་བའི་དཀྱིལ་འཁོར་ནི། །རིགས་གསུམ་དཀྱིལ་འཁོར་དེ་དབུས་སུ། །མཁས་པས་བློ་བཟང་
དབང་བསྐུར་བྱ། །ཞེས་གསུངས་སོ། །གཞན་དུ་ཡང་། ཡིད་ཀྱིས་འགའ་ཞིག་ཉིད་དུ་ནི། །རྒྱལ་བས་དཀྱིལ་འཁོར་བྱ་བར་བཞེད། །ཅེས་གསུངས་སོ། །ཡིད་ཀྱི་དཀྱིལ་འཁོར་གྱི་ཆོ་གའོ།། །།འདིར་བརྗོད་པའི་ཆོ་ག་རྣམས་དང་། བྱ་བ་གཞན་རྣམས་ལ་ཡང་དང་པོ་དང་མཐར་བགེགས་ཉེ་
བར་ཞི་བའི་ཆེད་དུ་གཏོར་མ་སྦྱིན་ནོ། །དེ་ལ་རིམ་པ་ནི་འདི་ཡིན་ཏེ། དང་པོར་སློབ་དཔོན་ཅོད་པན་ལ་སོགས་པ་ཇི་ལྟར་རྙེད་པས་བརྒྱན་པ། དཔལ་རྡོ་རྗེ་སེམས་དཔའི་གཟུགས་ཀྱི་མདུན་དུ་པི་ཌ་ལ་སོགས་པའི་སྣོད་ཆེན་པོ་རྣམས་སུ་ཟན་དང་། ཁུར་བ་དང་། འབྲས་ཁུར་དང་ལ་དུ་དང་། ཆན་ཐུག་ལ་
སོགས་པ་དང་ཉ་དང་ཤ་དང་། བཙོང་དང་། སྒོག་སྐྱ་དང་། ཆང་དང་། ཆུ་དང་། འོ་མ་ལ་སོགས་པའི་མེ་ཏོག་ལ་སོགས་པ་དང་ལྡན་པ་བླ་རེ་ལ་སོགས་པས་བརྒྱན་པ་རོལ་མོའི་སྒྲ་ལ་སོགས་པ་མདུན་དུ་བདར་ལ། ཟན་དང་ཆུ་ལ་སོགས་པ་ཙམ་ཡང་རུང་སྟེ། ཇི་ལྟར་རྙེད་པ་བཀོད་པ། བཟའ་བ་དང་།
เล่ม ๗๕ · หน้า 89a
བཅའ་བ་དང་། བལྡག་པ་དང་། བཏུང་བ་རྣམས་སྦྱང་བར་བྱའོ། །དེ་ལ་ཡཾ་ལས་བྱུང་བའི་རླུང་གི་དཀྱིལ་འཁོར་གྱི་སྟེང་དུ་རཾ་ལས་སྐྱེས་པའི་མེར། ཨཱཿལས་བྱུང་བའི་པདྨའི་སྣོད་དཀར་པོ་ཨོཾ་ཨཱཿཧཱུཾ་ལས་བྱུང་བའི་མགོ་བོ་གསུམ་པ་ལ་གནས་པ་དེར་ཟན་ལ་སོགས་པ་ཧཱུཾ་བཱུཾ་ཨཾ་
ཧྲཱིཿཁཾ་བྷྲཱུཾ་ཧཱུཾ་ཧྲཱིཿཏྲཱཾ་གི་ཡི་གེ་ལས་བྱུང་ཞིང་དེས་བྱིན་གྱིས་བརླབས་པའི་བདུད་རྩི་དང་སྒྲོན་མ་ལྔའི་ངོ་བོ་ཧ་ཧོཿཧྲིཿའི་ཡི་གེས་རིམ་པ་བཞིན་ཐ་མལ་པའི་ཁ་དོག་དང་དྲི་དང་། ནུས་པ་བསལ་ནས་རླུང་གིས་བསྐྱོད་པའི་མེ་འབར་བས་གདུངས་པས་ཡི་གེ་ལ་སོགས་པ་ཞུ་བར་གྱུར་ནས། དེའི་རླངས་པ་ལས་བྱུང་བའི་ཧཱུཾ་
ལས་སྐྱེས་པའི་རྡོ་རྗེས་མཚན་པའི་ཁ་ཊྭཱཾ་ག་ཞུ་ནས་དེར་ལན་གསུམ་དུ་ཕབ་པས་བདུད་རྩིར་གྱུར་པ་དེའི་སྟེང་དུ་ཨོཾ་ལས་བྱུང་བའི་ཟླ་བ་ལ་གནས་པའི་ཨོཾ་ཨཱཿཧཱུཾ་གི་ཡི་གེའི་འོད་ཟེར་རྣམས་ཀྱིས་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་རྣམས་ཀྱི་བྱང་ཆུབ་ཀྱི་སེམས་ཀྱི་བདུད་རྩི་དང་། རྒྱ་མཚོ་ལ་སོགས་
པར་གནས་པའི་བདུད་རྩི་དང་ཡི་གེ་གསུམ་དང་ཟླ་བ་དག་ཀྱང་དེར་བཅུག་ནས། ཡི་གེ་གསུམ་གྱིས་ལན་གསུམ་དུ་དངུལ་ཆུ་བཞིན་ཤིན་ཏུ་དངས་པར་བྱིན་གྱིས་བརླབ་པོ། །བདུད་རྩི་བསྒྲུབ་པའོ། །དེ་ནས་བསྡུས་པའི་རིམ་པའི་ཆོ་གའམ། ཡན་ལག་བཞི་པའི་ཆོ་གས་རིམ་གྱིས་སམ། སྐད་ཅིག་གིས་
རྡོ་རྗེ་སེམས་དཔའི་གཟུགས་ཀྱི་མདུན་དུ་དྲི་བཟང་པོ་ལ་སོགས་པས་མཎྜལ་བྱས་པར་རང་རང་གི་དཀྱིལ་འཁོར་གྱི་དབང་པོ་ལ་སོགས་པའི་དེ་བཞིན་གཤེགས་པ་ལ་སོགས་པ་ཐམས་ཅད་ཡང་དག་པར་མཆོད་ནས། མི་བསྐྱོད་རྡོ་རྗེ་ཞེས་པ་ལ་སོགས་པས་བསྟོད་དེ་རང་གི་སྙིང་གའི་ས་བོན་གྱི་འོད་ཀྱིས་ཁྲོ་བོ་དང་
བཅས་པའི་སྲུང་བའི་འཁོར་ལོ་རྩིབས་བཅུ་པའི་ལྟེ་བ་ལ་གནས་པའི་གཞལ་ཡས་ཁང་གི་ནང་ན་བཞུགས་པའི་དཀྱིལ་འཁོར་དང་། དབང་པོ་ལ་སོགས་པ་རྣམས་འཁོར་དང་བཅས་པ་དང་། ཀླུ་རྣམས་དང་། སེམས་ཅན་ཐམས་ཅད་བཀུག་ནས་དབང་པོ་ལ་སོགས་པ་རྣམས་སྐད་ཅིག་གིས་འོད་གསལ་
དུ་བཅུག་པའི་རྗེས་ལ་འདུས་པའི་ལྷ་ཤེས་རབ་དང་བཅས་པའི་གཟུགས་སུ་བསམས་ནས། མདུན་དུ་ཞབས་བསིལ་ལ་སོགས་པ་དབུལ་བ་སྔོན་དུ་འགྲོ་བས། དྲིལ་བུ་དཀྲོལ་ཞིང་རྡོ་རྗེ་གསོར་ཏེ་སྟོང་པ་ཉིད་དང་སྙིང་རྗེ་དབྱེར་མེད་པའི་བྱང་ཆུབ་ཀྱི་སེམས་སུ་ལྷག་པར་མོས་པ་དང་འཁོར་གསུམ་ཡོངས་སུ་
เล่ม ๗๕ · หน้า 89b
དག་པས་གཏོར་ལ། ཨོཾ་ཨཱཿཆེ་གེ་མོ་བཛྲ་ཞེས་རང་གི་འཁོར་ལོའི་དབང་པོ་ལ་སོགས་པ་གནོད་མཛེས་ཀྱི་བར་གྱི་ལྷ་རྣམས་རེ་རེ་ཞིང་བོས་ནས་དེའི་ས་བོན་ཡང་བརྗོད་དེ། སརྦ་དུཥྚཱ་ན་ས་མ་ཡ་མཱུ་ཏྲཱ་པྲ་བྷཾ་ཛ་ཀ་མ་མ་ཤཱནྟིཾ་ཀུ་རུ་ཙ་ཀུ་རུ་སྭཱ་ཧཱ་ཧཱུཾ་དང་། ཨོཾ་ཨཱཿསརྦ་ཏྲྱ་དྷྭ་ཛ་ད་ཤ་དིཀ །ལོ་ཀ་དྷཱ་ཏྭ་ནནྟ་ག་ག་ན། ས་མུ་
དྲ་མེ་གྷ་བྱཱུ་ཧ་པྲ་ས་ར། པ་ར་མཱ་ཎུ་ཛོ་མཎྜལ། པ་རཾ་པ་ར་ཨནྟ་རྒ་ག་ཏ། ས་མཱ་པཏྟི་ཨ་བསྠི་ཏཱ། དྷརྨ་དྷཱ་ཏུ་ས་མ་བ་ས་རནྟ། ཨཱ་ཀཱ་ཤཱ་དྷཱ་ཏུ་པརྱ་བ་སཱ་ནཱ། སརྦ་ཏྲྱ་དྷྭ་ཛ་ད་ཤ་དིཀ། ལོ་ཀཱ་དྷཱ་ཏྭ་ནནྟ། མེ་གྷ་བྱཱུ་ཧ་པྲ་ས་ར་ག་གན། ས་མཱཿསརྦ་ལོ་ཀ་པཱ་ལཱཿསརྦ་སཏྭཱ་ཤྩ། ཏདྱ་ཐཱ། བཛྲཱ་ཡུ་དྷ་མཱ་ཡཱ་བཛྲ་བཛྲཱ་
ན་ལ། བཛྲ་ཀཱ་ལ་བཛྲ་མུ་ཥ་ལ་ནཱ་ག་བཛྲ། བཛྲ་ཨ་ནཱ་ལི། བཛྲ་བྷཻ་ར་བ། བཛྲ་ཤཽཎྜ། བཛྲ་ཀྲོདྷ། བཛྲ་ཀུཎྜ་ལི། བཛྲ་པྲ་བྷ། མཽ་ན་བཛྲ། བེ་མ་ཙི་ཏྲི། པྲྀ་ཐི་བཱི་དེ་བ་ཏྲཿས་པ་རི་ཝཱ་རཿཨི་མཾ་པུཥྤ། དྷཱུ་པ། དཱི་པ། གནྡྷེ་ནཻ་བིཏྱ་ཨ་དཱི་སཾ་ཡུཀྟཾ། བ་ལི་ཨུ་པ་ཧ་རཾ། པྲ་ཏཱིཙྪ་ཨུ་པ་བྷུ་ཛྱ། མ་མ་ཧི་རཎྱ་སུ་
ཝརྞྞ་དྷ་ན་དྷཱ་ནྱ། ཨཱ་ཡུཿཡཽ་བ་ན་ཨ་རོགྱ། ས་ཏུ་ཁ་ཨ་པ་ཧ་ར་ཀཱ་སརྦ་བིགྷྣཱཾ་བི་ནཱ་ཡ་ཀཱན། སརྦ་དུཥྚ་པྲ་དུཥྚ་ན། མ་ནུ་ཥྱ་ཎ་ཨ་མ་ནུ་ཥྱ་ཎ་ཛཾ་བྷ་ཡཏ། སྟཾ་བྷ་ཡཏ། བནྡྷ་ཡཏ། བི་དྷྭཾ་ས་ཡཏ། མ་མ་ཧི་ར་ཎྱ་སུ་བརྞ་དྷ་ན་དྷཱ་ནྱ་ཨཱ་ཡུར་ཡཽ་བ་ན། ཨ་རོགྱ་ས་ཏཱུ་བཱ་ནི་མ་ཧཱ་སུ་ཁ་པྲ་པྲྀདྷ་ཡེ། ཡཱ་བད་ཨཱ་
བོ་དྷ་མཎྜ་པརྱནྟཾ། ཌྷོཀ་ཡ་ད་ས་ཏ་ས་ཧཱ་ཡ་ཏཾ། ཤཱནྟིཾ་རཀྵཉྩ་ཀུ་རུ་ཏ་ཧཱུཾ་ཞེས་པའི་སྔགས་དག་གིས་དང་། ཀླུ་གཏོར་གྱི་སྔགས་ཀྱིས་ཀྱང་དབུལ་ལོ། །དེ་རྣམས་ཀྱང་དཀྱིལ་འཁོར་གྱི་བདག་པོ་ནས་བརྩམས་ཏེ་གནོད་མཛེས་ཀྱི་བར་དང་། དེ་ནས་དབང་པོ་ལ་སོགས་པ་འཁོར་དང་བཅས་པ་དང་། དེ་
ནས་ཀླུ་རྣམས་དང་། དེ་ནས་སེམས་ཅན་ཐམས་ཅད་ལྕེ་ཧཱུཾ་ལས་བྱུང་བའི་རྡོ་རྗེ་རྩེ་གཅིག་པ་དམར་པོ་རྣམས་དེའི་འོད་ཟེར་གྱི་སྦུ་གུ་རྣམས་ཀྱིས་སམ། ཡིད་ཀྱིས་བདུད་རྩི་དྲངས་པ་གསོལ་བས་བདེ་བ་ཆེན་པོའི་རང་བཞིན་སྟོང་པ་ཉིད་དང་རོ་གཅིག་པར་ཇི་སྲིད་འདོད་ཀྱི་བར་བསམ་པར་བྱའོ། །ཞལ་བསིལ་
དང་། ཕྱག་བཀྲུ་བ་དང་། སོ་རྩི་ལ་སོགས་པ་བྱིན་ནས་མཆོད་དེ། བྱ་བ་སྒྲུབ་པ་ལ་ལྷུར་བྱེད་པ་རྣམས་ལ་བཟོད་པར་གསོལ་ཏེ། སྔར་བརྗོད་པའི་ཡི་གེ་བརྒྱ་པ་བཟླས་ནས། ཨོཾ་ཡོ་ག་ཤུདྡྷཿསརྦ་དྷརྨཱ་ཡོ་ག་ཤུདྡྷོ྅ཧཾ། ཞེས་བརྗོད་ཅིང་པད་སྐོར་དང་འཁྱུད་པའི་ཕྱག་རྒྱ་བྱེད་པས་རང་གི་ལྷའི་འཁོར་ལོ་
เล่ม ๗๕ · หน้า 90a
བདག་ཉིད་ལ་བཅུག་ནས། སྲུང་བའི་འཁོར་ལོ་ན་གནས་པའི་ཁྲོ་བོ་བཅུ་དང་། དབང་པོ་ལ་སོགས་པ་བསྲུང་བ་ལ་སོགས་པ་མངོན་པར་འདོད་པ་བསྒྲུབ་པ་ལྷུར་བྱེད་པ་རྣམས་དཀྱིལ་འཁོར་གྱི་ཁང་པའི་ཕྱི་ངོས་སུ་ཕྱོགས་བཅུར་དཀྱིལ་འཁོར་གྱི་ལས་རྩོམ་པ་ནས་བརྩམས་ཏེ། ཇི་
སྲིད་མཐར་ཐུག་པའི་བར་དུ་དགོད་པར་བྱའོ། །རྡུལ་ཚོན་གྱི་དཀྱིལ་འཁོར་གཤེགས་སུ་གསོལ་བའི་རྗེས་ལ་ནི་དེ་ལྟར་གཏོར་མ་བཏང་བ་ལ་སོགས་པ་བྱས་ནས་ཁྲོ་བོ་རྣམས་ཀྱང་བདག་ཉིད་ལ་བཅུག་ནས་སེ་གོལ་གསུམ་གཏོག་ཅིང་དབང་པོ་ལ་སོགས་པ་རྣམས་གནས་ཇི་ལྟ་བ་བཞིན་གཤེགས་སུ་
གསོལ་ལོ། །གཞན་དུ་ཡང་ཉི་མ་སོ་སོའམ་ཐུན་སོ་སོ་ལ་གཏོར་མ་སྟེར་བ་ན་དེ་ལྟར་རོ། །འདི་ནི་གཤེགས་སུ་གསོལ་བའི་སྔགས་ཏེ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་གནང་། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་
དུ་གསོལ། །མུཿཞེས་པ་དང་། ཨོཾ་ཨཱཿཧཱུཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཏ་ཧཱུཾ་མུཿཞེས་པའམ། ཨོཾ་ཨཱཿཧཱུཾ་བཛྲ་མུཿཞེས་པ་འདོན་ཞིང་གཤེགས་སུ་གསོལ་ལོ། །འདིར་ཞི་བ་ལ་སོགས་པ་བྱ་བ་གཙོ་བོའི་དབྱེ་བས་དུས་དང་ཕྱོགས་དང་། ཁ་དོག་གི་དབྱེ་བ་རྟོགས་པར་བྱའོ། །དཀྱིལ་འཁོར་
གྱི་ཁང་པ་ལ་སོགས་པའི་ཕྱི་ངོས་ཤར་ལ་སོགས་པའི་ཕྱོགས་སུ་ཁྲོ་བོ་བཅུའི་སའི་གོང་བུ་དང་ཉེ་བར་མདུན་དུ་གཏོར་མ་ཟན་ལ་སོགས་པ་བསྐོན་པ་ལ་སོགས་པ་བཀང་བའམ། ཁམ་ཕོར་རྣམས་སམ་སྙིམ་པས་དབུལ་བར་བྱའོ། །སའི་གོང་བུ་རྣམས་ལས་ཕྱི་ངོས་སུ་སའི་གོང་བུ་བཅོ་ལྔ་རྣམས་དང་། དེ་
མེད་ན་མཎྜལ་རྣམས་ཀྱི་སྟེང་དུ་དབང་པོ་ལ་སོགས་པ་བཅོ་ལྔ་རྣམས་ལ་ཕྱོགས་བརྒྱད་དུ་སྦྱིན་ནོ། །དབང་པོའི་གཡས་ཕྱོགས་སུ་སྒྱུ་མ་རྡོ་རྗེ་སྟེ་ཁྱབ་འཇུག་ལའོ། །རྡོ་རྗེ་འཇིགས་བྱེད་ནི་ལུས་ངན་ཏེ་དེའི་གཡས་ལོགས་སུ་ལོག་འདྲེན་ལའོ། །རྡོ་རྗེ་ཁྲོ་བོ་ནི་དབང་ལྡན་ཏེ་དབང་ལྡན་དང་ཉེ་དབང་གི་དབུས་སུ་
ཉི་མ་དང་ཟླ་བ་དང་ཚངས་པ་རྣམས་ལའོ། །ཆུ་ལྷ་དང་བདེན་བྲལ་གྱི་བར་དུ་ཐགས་བཟངས་རིས་དང་སའི་ལྷ་མོ་དག་ལའོ། །དབང་པོ་ལ་སོགས་པའི་འཕན་བཅོ་ལྔ་ནི་རང་རང་གི་ཁ་དོག་སྟེ་རང་རང་གི་ཕྱོགས་སུའོ། །དབང་པོ་ལ་སོགས་པའི་སའི་གོང་བུ་རྣམས་ལས་ཕྱི་རོལ་དུ་སའི་གོང་དབུ་བརྒྱད་དམ་
เล่ม ๗๕ · หน้า 90b
བ་ལྕིས་མཎྜལ་བྱས་པ་རྣམས་སུ་ཀླུ་རྣམས་ལ་ཁམ་ཕོར་དུ་འོ་ཐུག་ལ་སོགས་པ་སྦྱིན་ནོ། །ཕྱི་རོལ་དུ་ཡང་གཏོར་མ་ཟན་ལ་སོགས་པ་དང་། མར་དང་། སྦྲང་རྩི་དང་། ཆུ་དང་། འོ་མ་དང་། ཆང་གི་རྒྱུན་རྣམ་པ་ལྔ་གཡས་སུ་གཏོར་རོ། །གཞན་གྱི་དོན་དུ་གཏོར་མ་སྦྱིན་པ་ནི་སྔགས་ལ་ཇི་ལྟར་ཡོད་
པའི་བདག་ལའམ་བདག་གི་ཞེས་བྱ་བ་ནི་ཇི་ལྟར་གནས་པ་ཉིད་བཀླག་པར་བྱའོ། །དེ་ཡང་བདག་ཉིད་དུ་མོས་པར་བྱའོ། །འདི་ལ་ཕན་བཏགས་པ་ནི་བདག་ཉིད་ལ་ཕན་བཏགས་པར་འགྱུར་རོ་ཞེས་པའི་བསམ་པས་དེའི་བྱ་བ་འགྲུབ་པར་འགྱུར་རོ། །བར་དུ་ཡང་དེའི་དོན་དུ་གོ་བར་བྱའོ། །འདུས་པའི་
འབྱུང་པོ་ཐམས་ཅད་པའི་གཏོར་མའི་ཆོ་གའོ།། །།དྷརྨ་དྷཱ་ཏུ་ས་མ་བ་ས་ར་ཎཱ་ཞེས་པ་ལ་སོགས་པ་ནི་སྟོང་པ་ཉིད་དང་རོ་གཅིག་པ་དང་། སྟོང་པ་ཉིད་ཀྱི་མཐར་ཐུག་པ་ཞེས་པའི་དོན་ཏོ། །གཏོར་མའི་ཆོ་ག་འདི་ལ་ཁྲོ་བོ་བཅུ་པོ་རྣམས་ཀྱི་གཏོར་མ་ནི་སོ་སོ་རང་གི་སྔགས་རྒྱུད་དུ་གསུངས་པ་རྣམས་
ཀྱིས་ཤིན་ཏུ་ཁྱད་པར་དུ་བསྔགས་སོ། །སྔགས་དེ་རྣམས་ཀྱང་འདིར་མངས་པས་འཇིགས་པས་མ་བརྗོད་དོ། །ཡང་ན་དཔལ་འཁོར་ལོ་སྡོམ་པའི་གཟུགས་ཀྱིས་དྲི་ཞིམ་པོ་ལ་སོགས་པས་མཎྜལ་བྱས་པས་རང་གི་འཁོར་ལོ་མཆོད་ནས་རྐང་པ་བརྒྱད་པའི་སྔགས་ཀྱིས་བསྟོད་དེ། རང་
གི་སྙིང་གར་གནས་པའི་ཧཱུཾ་གི་འོད་ཟེར་རྣམས་ཀྱིས་ཁྲོ་བོ་དང་བཅས་པའི་སྲུང་བའི་འཁོར་ལོ་རྩིབས་བཅུ་པའི་ལྟེ་བར་ཆུད་པའི་གཞལ་ཡས་ཁང་གི་ནང་ན་གནས་པའི་དཀྱིལ་འཁོར་དང་། སྲུང་བའི་འཁོར་ལོའི་ཕྱི་ངོས་སུ་ཕྱོགས་རྣམས་སུ་དབང་པོ་ལ་སོགས་པ་འཁོར་དང་བཅས་པ་དང་།
སེམས་ཅན་དཔག་ཏུ་མེད་པ་རྣམས་ནམ་མཁར་བཀུག་ནས་དཔྲལ་བའི་སྟེང་དུ་འབར་བའི་ཕྱག་རྒྱ་བཅས་ཏེ་འགྱིང་བ་དང་བཅས་ནས་ཕཊ་ཅེས་ལན་གསུམ་བརྗོད་ནས། དཀྱིལ་འཁོར་གྱི་མདུན་དུ་སྤྱན་དྲང་ངོ་། །ཨོཾ་ཀཀྐ་ཀཌྜྷ་ན་བབྦ་བནྡྷ་ན། ཁཁྑ་ཁཱ་ད་ན་སརྦ་དུཥྚཱ་ནཱན་ཧ་ན་ཧ་ན། གྷ་གྷ་གྷཱ་ཏ་ན་ཆེ་
གེ་མོའི་ཤནྟིཾ་ཀུ་རུ་ཧཱུཾ་ཧཱུཾ་ཕཊ་ཕཊ་ཛཿསྭཱ་ཧཱ། ཞེས་པ་འདིས་དབང་པོ་ལ་སོགས་པ་བཀུག་ནས་སྐད་ཅིག་གིས་སྟོང་པ་ཉིད་དུ་བཅུག་པའི་རྗེས་ལ་ཤེས་རབ་དང་བཅས་པའི་བདེ་མཆོག་གི་ལྷའི་སྐུར་བསྒོམས་ནས་ཞབས་བསིལ་ལ་སོགས་པ་དབུལ་བ་སྔོན་དུ་འགྲོ་བས་སྔ་མ་བཞིན་འཁོར་གསུམ་ཡོངས་
เล่ม ๗๕ · หน้า 91a
སུ་དག་པས་ལག་པ་གཡོན་པའི་མཐིལ་དུ་ཟླ་བ་ལ་གནས་པའི་ཧཱུཾ་ལས་སྐྱེས་པའི་སྣ་ཚོགས་རྡོ་རྗེའི་ལྟེ་བར་སྔ་མ་ལྟ་བུའི་བདུད་རྩིའི་སྣོད་བཀོད་ནས་སམ་བསྒོམས་ཏེ། ལག་པ་གཡས་པ་རྡོ་རྗེ་ཁུ་ཚུར་བྱས་པའི་སྡིགས་མཛུབ་བརྐྱང་བས་དེ་སྟོན་ཞིང་། བཅོམ་ལྡན་འདས་དང་དེའི་
ཤེས་རབ་མ་དང་། མཁའ་འགྲོ་མ་ལ་སོགས་པ་དང་། ཁྭ་གདོང་མ་ལ་སོགས་པ་རྣམས་ལ་ཇི་ལྟར་རིགས་པར་ཕྱོགས་རྣམས་སུ་གཡོན་སྐོར་དང་། མཚམས་རྣམས་སུ་གཡས་སྐོར་དུ་མེ་ནས་བརྩམས་ཏེ་བསྐོར་ཞིང་། ཨོཾ་བཛྲ་ཌཱ་ཀ་ཨི་མཾ་བ་ལི་གྲྀཧྞ་གྲྀཧྞ་ཧཱུཾ་ཕཊ། ཨོཾ་ཛཿཧཱུཾ་བཾ་ཧོཿས་མ་ཡ་སྟྭཾ་དྲྀ་ཤྱ་ཧོཿ
ཞེས་པའི་སྔགས་ལན་གཅིག་དང་། གཉིས་དང་གསུམ་དང་། བཞི་དང་། ལྔ་བརྗོད་པས་ཕུལ་ནས། འཁོར་ལོ་གསུམ་གྱི་ལྷ་རྣམས་ལ། ཨོཾ་ཀ་ར་ཀ་ར། ཀུ་རུ་ཀུ་རུ། བནྡྷ་བནྡྷ། ཏྲཱ་ས་ཡ་ཏྲཱ་ས་ཡ། ཀྵོ་བྷ་ཡ་ཀྵོ་བྷ་ཡ། ཧྲཽཾ་ཧྲཽཾ་ཧྲཿཧྲཿཕེཾ་ཕེཾ། ཕཊ་ཕཊ། ད་ཧ་ད་ཧ། པ་ཙ་པ་ཙ། བྷཀྵ་བྷཀྵ་བ་ས་རུ་དྷི་ར་ཨནྟྲ་
མཱ་ལ་བ་ལཾ་བི་ནེ་གྲྀཧྞ་གྲྀཧྞ་སཔྟ་པཱ་ཏ་ལ་ག་ཏ་བྷུ་ཛཾ་ག་སཪྤཾ་ཝཱ་ཏརྫ་ཡ་ཏརྫ་ཡ། ཨཱ་ཀཌྜྷྱ་ཨཱ་ཀཌྜྷྱ། ཧྲིཾ་ཧྲིཾ། ཛྙཽཾ་ཛྙཽཾ། ཀྵྨཱཾ་ཀྵྨཱཾ། ཧཱཾ་ཧཱཾ། ཧཱིཾ་ཧཱིཾ། ཧཱུཾ་ཧཱུཾ། ཀི་ལི་ཀི་ལི། སི་ལི་སི་ལི། ཧི་ལི་ཧི་ལི། དྷི་ལི་དྷི་ལི། ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་པའི་སྔགས་ལན་ཅིག་བརྗོད་པས་དབུལ་ལོ། །དེ་ནས་སྲུང་བའི་འཁོར་ལོའི་
རྩིབས་ལ་གནས་པའི་ཁྲོ་བོ་བཅུ་ལ། ཨོཾ་བཛྲ་དྷྲྀཀ་བཛྲ་ཧཱུཾ་ཀཱ་ར་བཛྲ་ཧཱུཾ་ཕཊ། ཨོཾ་བཛྲ་དཎྜ་བཛྲ་ཧཱུཾ་ཕཊ། ཨོཾ་བཛྲ་ཨ་ན་ལཱརྐ་བཛྲ་ཧཱུཾ་ཕཊ། ཨོཾ་བཛྲ་ཀུཎྜ་ལི་བཛྲ་ཧཱུཾ་ཕཊ། ཨོཾ་བཛྲ་ཡཀྵ་བཛྲ་ཧཱུཾ་ཕཊ། ཨོཾ་བཛྲ་ཀཱ་ལ་བཛྲ་ཧཱུཾ་ཕཊ། ཨོཾ་བཛྲ་མ་ཧཱ་བཱ་ལ་བཛྲ་ཧཱུཾ་ཕཊ། ཨོཾ་བཛྲ་བྷཱི་ཥ་ན་བཛྲ་ཧཱུཾ་ཕཊ། ཨོཾ་བཛྲ་ཨུཥྞཱི་ཥ་ཙཀྲ་བརྟི་
བཛྲ་ཧཱུཾ་ཕཊ། ཨོཾ་བཛྲ་པཱ་ཏ་ལ་བཛྲ་ཧཱུཾ་ཕཊ་ཅེས་པའི་སྔགས་བཅུའི་ཧཱུཾ་ཕཊ་ཅེས་པའི་གོང་དུ། ཨི་མཾ་བ་ལིཾ་གྲྀཧྞ་གྲྀཧྞ་ཆེ་གེ་མོའི་ཤཱནྟིཾ་རཀྵ་ཙ་ཀུ་རུ་ཞེས་བཅུག་ལ་ལན་རེ་རེ་བརྗོད་པ་རྣམས་ཀྱི་བསྐོར་ཕྱོགས་གཉིས་དང་། སྟེང་དང་འོག་ཏུ་དབུལ་ལོ། །དེ་ནས་དེའི་ཕྱི་རོལ་དུ་དབང་པོ་ལ་སོགས་པ་རྣམས་ལ། ཨོཾ་
ཁ་ཁ་ཁཱ་ཧི་ཁཱ་ཧི་སརྦ་ཡཀྵ་རཱཀྵ་ས་བྷཱུ་ཏ་པྲེ་ཏ་པི་ཤཱ་ཙ་ཨུནྨཱ་ད་ཨ་བ་སྨཱ་ར་ཌཱ་ཀ་ཌཱ་ཀི་ནྱཱ་ད་ཡ། ཨི་མཾ་བ་ལིཾ་གྲྀཧྞནྟུ་ས་མ་ཡ་རཀྵནྟུ། སརྦ་སིདྡྷི་མྨེ་པྲ་ཡཙྪནྟུ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་འདི་ལན་བཞི་བརྗོད་པས་བསྐོར་ཕྱོགས་གཉིས་དང་། སྟེང་དང་འོག་ཏུ་དབུལ་ལོ། །འདིར་ཡང་དེ་རྣམས་དང་དཀྱིལ་
เล่ม ๗๕ · หน้า 91b
འཁོར་གྱི་བདག་པོ་ནས་བརྩམས་ཏེ་གནོད་མཛེས་ཀྱི་བར་དུ་ཞེས་པ་ལ་སོགས་པ་སྔར་བརྗོད་པ་ཤེས་པར་བྱའོ། །ཡི་གེ་བརྒྱ་པ་ནི་འདིར་གཞན་ཏེ། ཨོཾ་བཛྲ་ཧེ་རུ་ཀ་ས་མ་ཡ། མ་ནུ་པཱ་ལ་ཡ། ཧེ་རུ་ཀ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་
སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ཝཱན་བཛྲ་ཧེ་རུ་ཀ། མཱ་མེ་མུཉྩ་ཧེ་རུ་ཀོ་བྷ་ཝ། མ་ཧཱ་ས་མ་ཡ་སཏྭ་ཨཱཿཧཱུཾ་ཕཊ་ཅེས་པའོ། །འདིར་བརྗོད་པའི་ཁྲོ་བོ་བཅུ་མངོན་པར་བརྗོད་པ་བླ་མར་གསུངས་པ་རྣམས་ཀྱི་ཕྱག་དང་། ཕྱག་མཚན་ལ་སོགས་པ་རྫོགས་
པའི་དཀྱིལ་འཁོར་གྱི་ཕྲེང་བའི་བདེ་མཆོག་གི་དཀྱིལ་འཁོར་དུ་ཤེས་པར་བྱའོ། །རྒྱ་ཆེར་བཅོམ་ལྡན་འདས་ཀྱི་བསྒོམ་པའི་རིམ་པ་གདམས་པ་དང་བཅས་པ་ནི་བདག་གིས་བདེ་མཆོག་གི་མངོན་པར་རྟོགས་པའི་སྒྲུབ་ཐབས་སུ་གསལ་བར་བྱས་སོ་ཞེས་པ་བདེ་མཆོག་གི་འབྱུང་པོ་ཐམས་ཅད་
པའི་གཏོར་མའི་ཆོ་གའོ།། །།ཡང་ན་ཀྱེ་རྡོ་རྗེའི་གཟུགས་ཀྱི་སྙིང་གའི་ཧཱུཾ་གི་འོད་ཟེར་གྱིས་ཁྲོ་བོ་དང་བཅས་པའི་སྲུང་བའི་འཁོར་ལོ་རྩིབས་བཅུ་པའི་ལྟེ་བའི་ནང་ན་གནས་པའི་གཞལ་ཡས་ཁང་གི་ནང་ན་གནས་པའི་དཀྱིལ་འཁོར་དང་། སྲུང་བའི་འཁོར་ལོའི་ཕྱི་ངོས་སུ་ཕྱོགས་རྣམས་སུ་
དབང་པོ་ལ་སོགས་པ་འཁོར་དང་བཅས་པ་དང་། སེམས་ཅན་དཔག་ཏུ་མེད་པ་རྣམས་བཀུག་ནས་དབང་པོ་ལ་སོགས་པ་རྣམས་འོད་གསལ་དུ་བཅུག་སྟེ། ཤེས་རབ་དང་བཅས་པའི་ཧེ་རུ་ཀའི་གཟུགས་སུ་གསལ་བར་གྱུར་པར་བསམས་ནས། ཞབས་བསིལ་ལ་སོགས་པ་དབུལ་བ་སྔོན་དུ་
འགྲོ་བས་སྔ་མ་བཞིན་དུ་དག་པས་གཏོར་མ། ཨོཾ་དེ་བ་པི་ཙུ་བཛྲ་ཨི་མཾ་བ་ལིཾ་གྲྀཧྞ་གྲྀཧྞ་ཆེ་གེ་མོའི་ཤཱནྟིཾ་རཀྵ་ཙ་ཀུ་རུ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པའི་སྔགས་ཀྱིས་བཅོམ་ལྡན་འདས་ལ་དབུལ་ལོ། །ཨོཾ་ཨཱཿནེ་རཱཏྨ་ཡ་ཞེས་པ་ལ་སོགས་པ་མཚན་ནས་བརྗོད་ཅིང་དེ་རྣམས་ཀྱི་ས་བོན་ཡང་བརྗོད་དེ། ཨི་མཾ་བ་
ལིཾ་གྲྀཧྞ་གྲྀཧྞ་ཆེ་གེ་མོའི་ཤཱནྟིཾ་རཀྵ་ཙ་ཀུ་རུ་སྭཱ་ཧཱ་ཧཱུཾ་ཞེས་པ་འདིས་བདག་མེད་མ་ལ་སོགས་པ་རྣམས་ལའོ། །ན་མཿས་མནྟ་བུདྡྷེ་བྷྱོ། ན་མོ་བཛྲ་མུངྒ་ར་ཧ་ཏཱ་ཡ་ཙཎྜ་ལ་ཨཀྵེ་པ་ཀ་རཱ་ཡ་ཧཱུཾ་ཕཊ། ན་མཿས་མནྟ་བུདྡྷེ་བྷྱོ་མ་ཧཱ་དཎྜ་དྷ་ར་བི་བི་དྷ་སུ་ར་ཨ་སུ་ར་མརྡ་ན་བྷཱུ་ཏཱ་ན་ནིརྨ་ཐ་ཧཱུཾ་ཕཊ། ན་མཿས་མནྟ་བུདྡྷེ་བྷྱོ་ཧུ་ལུ་ཧུ་ལུ་
เล่ม ๗๕ · หน้า 92a
མ་ཧཱ་པདྨ་ཨ་མྲྀ་ཏི་ཀུ་རུ་མ་ཧཱ་བི་ཤཾ་ཀ་ཨཱཿན་མཿས་མནྟ་བུདྡྷེ་བྷྱོ་ན་མོ་བཛྲ་ཀྲོ་དྷཱ་ཡ་མ་ཧཱ་དཾ་ཥྚོཏྐཊ་བྷཻ་ར་བཱ་ཡ། བཛྲ་སནྡོ་ཧ་དརྤཱ་ཡ་ཨ་མྲྀ་ཏ་ཀུཎྜ་ལི་ཧཱུཾ། ན་མཿས་མནྟ་བུདྡྷེ་བྷྱོ་ན་མོ་ཨ་ལ་ལ་ཀཱ་ཎ་ཙེཊྚ་ཙེཊྚ་མོཊྚ་མོཊྚ་ཏུཊྚ་ཏུཊྚ། གྷ་གྷ་གྷཱ་ཏ་ཡ། གྷཱ་ཏ་ཡ་ཧཱུཾ་ཕཊ། ན་མཿས་མནྟ་བུདྡྷེ་བྷྱེ། །
ཊཀྐི་ཧཱུཾ་ཛཿན་མཿས་མནྟ་བུདྡྷེ་བྷྱཿཨོཾ་ཡ་མ་དཎྜཱ་ཡ། ནཱི་ལ་ཡ་ནཱི་ལ་དཎྜཱ་ཡ་ཏུ་རུ་ཏུ་རུ། མུ་རུ་མུ་རུ་སརྦ་དུཥྚཱཾ་མཱ་ར་ཡ་ཧཱུཾ་ཕཊ། ན་མཿས་མནྟ་བུདྡྷེ་བྷྱོ། ན་མཿམ་ཧཱ་བ་ལཱ་ཡ། ཨུ་ཙྪུཥྨ་ཀྲོ་དྷ་ར་ཛཱ་ཡ། སརྦ་ནཱ་ག་ནཱཾ་ཧྲི་ད་ཡཾ་ཏཱ་ཌ་ཡ་ཧཱུཾ་ཕཊ། ན་མཿས་མནྟ་བུདྡྷཱ་ནཱཾ། ན་མཿས་མནྟ་དྷརྨཱ་ཎཱཾ། ན་མཿས་མནྟ་སཾ་གྷཱ་
ནཱཾ། ཨོཾ་སི་ཏཱ་ཏ་པ་ཏྲེ། ཨོཾ་བི་མ་ལ། ཨོཾ་ཤཾ་ཀ་ར། ཨོཾ་ཕྲ་ཏྱཾ་གི་ར། བཛྲ་ཨུཥྞཱི་ཥ་ཙ་ཀྲ་ཝརྟི། སརྦ་ཡནྟྲ། མནྟྲ། མཱུ་ལ་ཀརྨཱ། བནྡྷ་ནཾ། ཏཱ་ཌ་ནཾ། ཀཱི་ལ་ནཱཾ་ཝཱ། མ་མ་ཀྲི་ཏེ། ཡེ་ན་ཀེ་ན་ཙི་ཏ་ཀྲི་ཏཾ་ཏཏ། སརྦཱནྟུ། ཙྪིནྡ་ཙྪིནྡ། བྷིནྡ་བྷིནྡ། ཙི་རི་ཙི་རི། གི་རི་གི་རི། མ་ར་མ་ར། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་
ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ། ཨཱ་ན་ཡ་ཧོཿབྷ་ག་ཝཱན་བིདྱཱ་རཱ་ཛ་ཧཱུཾ་ཕཊ། ཅེས་པའི་སྔགས་བཅུས་ཤར་ལ་སོགས་པ་དང་། དབང་ལྡན་ལ་སོགས་པར་གཡས་སྐོར་དུ་དང་། སྟེང་དང་འོག་ཏུ་གཤིན་རྗེ་གཤེད་ལ་སོགས་པའི་ཁྲོ་བོ་
བཅུ་པ་མཁའ་འགྲོ་མ་རྡོ་རྗེ་གུར་དུ་གསུངས་པ་རྣམས་ལའོ། །ཨོཾ་ཨིནྡ། ཛ་མ། ཛ་ལ། ཛཀྑ། བྷཱུ་ཏ། བཧྣི། བཱ་ཨུ། རཀྑ། ཙནྡ། སུཛྫ། མཱ་ད། པཔྤ། ཏ་ལ་པཱ་ཏཱ་ལེ། ཨཊྚ་སཔྤ་སྭཱ་ཧཱ། ཨི་དཾ་བ་ལིཾ། བྷུཉྫ། ཛི་གྷ་ཕུལླ། དྷཱུ་པ། མཱཾ་ས། པིཾ་གྷ། ཨཾ་བྷ། སཔྤ། ཀཛྫ་སཱ་ད། ཁནྟི་
ཁུ་ཎི་ཕེ་ཌ་གཱ་ད་སྭཱ་ཧཱ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ནཱཾ་ཨཱདྱ་ནུཏྤནྣ་ཏྭཱཏ་ཨོཾ་ཨཱཿཧཱུཾ་ཕཊ་སྭཱ་ཧཱ། ཞེས་པའི་སྔགས་ཀྱིས་དབང་པོ་ལ་སོགས་པ་རྣམས་ལའོ། །ཨིནྡ་ཞེས་པ་ལ་སོགས་པ་བོད་ཚིག་རྣམས་ནི་རང་རང་གི་ཕྱོགས་ཀྱི་སེམས་ཅན་དཔག་ཏུ་མེད་པ་མཚོན་པར་བྱེད་པའོ། །གཱ་ད་ཞེས་པ་
ནི་ལུས་ལའོ། །འདིར་ཡང་དེ་རྣམས་ཀྱི་དཀྱིལ་འཁོར་གྱི་བདག་པོ་ནས་བརྩམས་ཏེ་གནོད་མཛེས་ཀྱི་བར་དུ་ཞེས་པ་ལ་སོགས་པ་འདུས་པའི་གཏོར་མའི་ཆོ་གར་བརྗོད་པ་ནི་འདིར་ཡང་ཤེས་པར་བྱའོ། །འདིར་ཁྲོ་བོའི་སྔགས་རྣམས་ཀྱི་ཡི་གེ་ཧཱུཾ་རྣམས་དང་། ཡི་གེ་ཧཱུཾ་ཨཿའི་གོང་དུ་ཨི་མཾ་བ་ལིཾ་
เล่ม ๗๕ · หน้า 92b
གྲྀཧྞ་གྲྀཧྞ་ཞེས་བརྗོད་པར་བྱའོ། །ཁྲོ་བོ་རྣམས་ཀྱི་ཁ་དོག་དང་། ཕྱག་མཚན་ལ་སོགས་པ་རྣམས་ནི་རྫོགས་པའི་རྣལ་འབྱོར་གྱི་ཕྲེང་བར་འཇམ་པའི་རྡོ་རྗེའི་དཀྱིལ་འཁོར་ཇི་ལྟ་བ་བཞིན་ནོ། །ཀྱེ་རྡོ་རྗེའི་འབྱུང་པོ་ཐམས་ཅད་པའི་གཏོར་མའི་ཆོ་གའོ།། །།གཏོར་མའི་ཆོ་ག་རིམ་པ་གསུམ་
པ་འདི་ཡང་བསྐྱེད་པའི་རིམ་པ་ལའོ། །རྫོགས་པའི་རིམ་པ་ལ་ནི་ཤེས་རབ་དང་ཐབས་ལས་སེམས་མ་གཡོས་པ་བསམ་པ་ཙམ་གྱིས་སྤྱན་དྲངས་པའི་ཤེས་རབ་དང་ཐབས་ཀྱི་རང་བཞིན་རང་གི་འདོད་པའི་དཀྱིལ་འཁོར་གྱི་དབང་ཕྱུག་ལ་སོགས་པའི་ལྷ་དབང་པོ་ལ་སོགས་པ་དང་བཅས་པ་
རྣམས་ལ་ཡེ་ཤེས་ཀྱི་རོ་དང་ཐ་མི་དད་པའི་གཏོར་མ་དབུལ་བ་ནི་གཏོར་མའི་ཆོ་གའོ།། །།དཔལ་ཡང་དག་པར་སྦྱོར་བར་གསུངས་པའི་རྡོ་རྗེ་སེམས་དཔའ་དང་བདེ་མཆོག་དང་། ཡེ་ཤེས་ཀྱི་ཌཱ་ཀི་མ་རྣམས་ཀྱི་གཏོར་མའི་ཆོ་ག་རྒྱས་པ་དང་། ཁ་དོག་དང་། ཕྱག་རྒྱ་དང་། ཕྱག་མཚན་ལ་སོགས་
པ་ཤིན་ཏུ་རྒྱས་པར་མན་ངག་གི་སྙེ་མར་བརྗོད་དོ། །ཁྲོ་བོ་རྣམས་དང་དབང་པོ་ལ་སོགས་པ་རྣམས་ཀྱི་ཡང་ངོ་། །འདིར་གལ་ཏེ་རྡུལ་ཚོན་གྱི་དཀྱིལ་འཁོར་བྲི་བ་ལ་སོགས་པ་ནས་འོག་ནས་ཆུ་རྡོལ་བ་དང་མེ་དང་། རླུང་དང་། སྤྲིན་དང་ཐོག་དང་། མི་དང་ལྷ་དང་ལྷ་མ་ཡིན་གྱི་སྡེ་དང་
གླང་པོ་ལ་སོགས་པ་བགེགས་ཀྱི་རྣམ་པར་འཚེ་བ་ལྷས་བྱས་པའམ་མི་ལ་སོགས་པ་གཞན་གྱིས་བྱས་པ་འབྱུང་བ་སྲིད་དེ། དེའི་ཚེ་ཆོ་ག་བཞིན་དུ་རྡོ་རྗེའི་རང་བཞིན་གྱི་ས་གཞི་དང་། ར་བ་དང་དྲ་བ་དང་མདའི་ར་བ་དང་བླ་རེའི་ནང་གི་ནམ་མཁའ་ལ་གནས་པའི་རྩིབས་ཀྱི་རྩེ་མོ་ལ་བརྟན་པར་གནས་པའི་ཁྲོ་བོ་
བཅུ་ཤིན་ཏུ་འཇིགས་པར་བྱིན་གྱིས་བརླབས་པའི་རྩིབས་བཅུ་པའི་འཁོར་ལོ་སེར་པོ་གཡས་སྐོར་དུ་འཁོར་བའི་ལྟེ་བའི་དབུས་སུ་གནས་པའི་གཞལ་ཡས་ཁང་གི་རྣམ་པར་དཀྱིལ་འཁོར་གྱི་ཁང་པ་སྐད་ཅིག་གིས་སོ་སོར་ཤིན་ཏུ་བརྟན་པར་མོས་པར་བྱའོ། །རྡོ་རྗེའི་རང་བཞིན་གྱི་ས་གཞི་ལ་སོགས་པས་
བགེགས་ཐམས་ཅད་བཟློག་པར་བསྒོམ་མོ། །ཡང་ན་ཉེ་བར་འཚེ་བ་སོ་སོ་ལ་རྟ་མཆོག་ལ་སོགས་པའི་སྦྱོར་བ་རྣམས་བྱ་སྟེ། དེ་རྣམས་ཀྱང་མན་ངག་གི་སྙེ་མར་གསལ་བར་བསྟན་པས་གཞུང་མངས་ཀྱིས་དོགས་པས་འདིར་མ་བརྗོད་དོ། །གང་ཞིག་རྒྱུན་མི་འཆད་པར་སྙིང་རྗེ་ཆེན་པོ་དང་རོ་གཅིག་
เล่ม ๗๕ · หน้า 93a
པའི་སྟོང་པ་ཉིད་ཀྱི་ཏིང་ངེ་འཛིན་གོམས་པར་བྱེད་པ་དེ་ལ་ནི་བགེགས་དཔག་ཏུ་མེད་པ་རྣམས་ཀྱང་ཞི་བར་འགྱུར་ཏེ། དེའི་ཆེད་དུ་རིམ་པ་འདི་དག་མ་ཡིན་ནོ། །གང་ཡང་དཀྱིལ་འཁོར་གྱི་འཁོར་ལོ་སྟོང་པ་ཉིད་དང་རོ་གཅིག་པར་ཤིན་ཏུ་བརྟན་པར་སྒོམ་པར་བྱེད་པ་དེ་ལ་ནི་བགེགས་
ཐམས་ཅད་དང་། ཉེས་པ་གཞན་རྣམས་ཀྱང་འབད་པ་མེད་པར་འགྱུར་ཏེ། རྨི་ལམ་དུ་ཡང་མི་སྣང་ངོ་། །དེའི་དོན་དུ་ཡང་རིམ་པ་འདི་མ་ཡིན་ནོ། །བགེགས་བཟློག་པའི་ཆོ་གའོ།། །།འདི་གཏོར་མ་དང་དཀྱིལ་འཁོར་དང་ས་སྦྱང་བ་ལ་སོགས་པའི་བྱ་བ་ཀུན་ལ་རྡོ་རྗེ་ལ་སོགས་པ་བཟུང་བ་སྔོན་དུ་
འགྲོ་བས་དེ་དག་གི་མཚན་ཉིད་བརྗོད་པར་བྱའོ། །དེ་ལ་རྡོ་རྗེ་རྩེ་ལྔ་པ་ཆ་གསུམ་དུ་མཉམ་པའི་དབུས་ཀྱི་སུམ་ཆའི་ཚད་དུ་ལྟེ་བ་སྟེ་ཟུར་བརྒྱད་པའོ། །ར་རྣམས་ནི་བཞི་པ་རྩེ་མོ་གུག་པའོ། །རའི་དབུས་ཀྱི་འོག་ནི་ཟླུམ་པོའོ། །ར་དབུས་མ་ནི་དྲང་ཞིང་ཟུར་བཞི་པ་རྣོ་བ་རྐེད་དཀྲིས་གསུམ་དང་ལྡན་
པ་ནས་ཀྱི་དབྱིབས་སོ། །འདིའི་རྩེ་མོ་དང་ཕྱོགས་ཀྱི་རའི་རྩེ་མོ་རྣམས་ཀྱི་བར་ནི་ནས་ཙམ་སྟེ་ར་ཐམས་ཅད་ཕན་ཚུན་མཉམ་པའོ། །དབུས་མ་ནི་ཅུང་ཟད་ལྷག་པའོ། །ར་རྣམས་ཀྱི་འོག་ཆུང་ཟད་ཕྲ་བའོ། །དབུས་དེ་ལས་སྦོམ་པའོ། །སྟེང་གི་ར་འོག་གི་ཆ་བས་ཕྲ་བའོ། །དབུས་ཀྱི་ཆ་ཡང་
དབུས་སྦོམ་ཞིང་མཐའ་གཉིས་དེ་བས་ཕྲ་བའོ། །ཟླ་བ་ལ་གནས་པའི་རི་མོ་གསུམ་གྱིས་བསྐོར་བའི་རྩ་བ་ཅན་ར་དབུས་མ་མ་གཏོགས་པའི་ཤར་ལ་སོགས་པའི་རྭ་རྣམས་ནི་ཆུ་སྲིན་གྱི་སོའི་བར་རྣམས་སུ་གནས་པའོ། །འདིའི་སྣ་ནི་སྟེང་དུ་འབྲས་སོ་བའི་ལྐོགས་པའི་ཕྱེད་ཀྱི་ཚད་དོ། །
ཆུ་སྲིན་གྱི་གདོང་ནི་རྭའི་བཞི་ཆའོ། །ཆུ་སྲིན་གྱི་གདོང་ནི་ཕྱེད་དུ་འོད་ཟེར་དང་བཅས་པའི་ཟླ་བའི་སྟེང་དུ་བསྐོར་བའི་རེ་ཁཱའི་མུ་ཁྱུད་དོ། །སྐེ་རགས་དེའི་དབུས་ཀྱི་ཆ་ནི་ཅུང་ཟད་ལྷག་པར་བྱའོ། །ཆ་ལྷག་མ་དག་ནི་ཕན་ཚུན་མཉམ་ཞིང་རིམ་གྱིས་ཉིས་འགྱུར་དུ་མཐོ་བའོ། །བསྐོར་བ་ཡང་རྡོ་རྗེའི་ཕྱེད་ཀྱི་
ཆ་སྟེ་བསྐོར་བའི་ཚད་གཉིས་ཀྱང་རྡོ་རྗེའི་སྲིད་དུའོ། །ཟླ་བའི་འོག་ཏུ་པདྨའོ། །པདྨའི་འོག་ཏུ་རིན་པོ་ཆེའི་ཕྲེང་བ་ཕྲ་མོས་བསྐོར་བའོ། །དེའི་འོག་ཏུ་སྐ་རགས་ཀྱི་རི་མོ་དང་འོད་ཟེར་ཡང་ཇི་ལྟར་རིགས་པར་བལྟ་བར་བྱའོ། །རྣོ་བ་དང་རྟུལ་བ་དང་ཁ་གྱེས་པ་དང་། ཞི་བའི་དབྱེ་བས་རྣམ་པ་གཉིས་སོ། །
เล่ม ๗๕ · หน้า 93b
སོར་བཞི་ནས་བརྩམས་ཏེ་སོར་ཉི་ཤུའི་བར་དུ་རྡོ་རྗེ་རབ་ཏུ་གྲགས་སོ། །ཁ་ཅིག་ནི་ཇི་ལྟར་འདོད་པར་རོ་ཞེས་སོ། །དྲིལ་བུ་ནི་ཆ་གསུམ་མཉམ་པ་རྡོ་རྗེ་དང་རྗེས་སུ་མཐུན་པའི་ཚད་དོ། །དེའི་འོག་གི་ཆ་གསུམ་པ་ནི་ཁ་ནས་བརྩམས་ནས་ཁར་བའི་དག་པའི་རང་བཞིན་དུ་བྱའོ། །དེའི་སྟེང་གི་ཆ། །
གཉིས་ནི་གསེར་ལ་སོགས་པ་ལས་བྱས་པའོ། །དེའི་ཁར་བའི་དབུས་ཀྱི་ནམ་མཁའི་རྒྱ་དང་། མཆུར་མཉམ་པའོ། །མཆུ་ལས་སྟེང་དུ་སྐེ་རགས་ཀྱི་དབུས་སུ་རྡོ་རྗེ་ལ་སོགས་པའི་ཕྲེང་བའོ། །བདུད་རྩིའི་བུམ་པའི་འོག་ཏུ་གདན་གྲུ་བཞི་པའོ། །དེའི་འོག་ཏུ་ཕྲེང་བ་གསུམ་མོ། །དེའི་འོག་ཏུ་པདྨའོ། །
དེའི་འོག་ཏུ་སྐ་རགས་གཉིས་ཀྱི་དབུས་སུ་ཇི་ལྟར་རིགས་པར་རྡོ་རྗེ་ལ་སོགས་པའི་ཕྲེང་བའོ། །དེའི་འོག་ཏུ་རིན་པོ་ཆེ་སྣ་ཚོགས་པའི་དྲ་བ་དང་དྲ་བ་ཕྱེད་པའོ། །དྲ་བའི་ནང་བརྒྱད་ལ་མཚན་མ་བརྒྱད་དེ། ཤར་ལ་སོགས་པའི་ཕྱོགས་སུ་འཁོར་ལོ་དང་། རིན་པོ་ཆེ་དང་། པདྨ་དང་། རལ་གྲིའོ། །
མེ་ལ་སོགས་པའི་ཕྱོགས་མིན་དུ་སྤྱན་དང་། རྡོ་རྗེ་དང་། པདྨ་དང་། ཨུཏྤ་ལའོ། །བར་བར་དུ་ཀུ་མུ་ཏ་དང་། ཨུཏྤ་ལ་དང་། པདྨ་དང་། རིན་པོ་ཆེ་དང་། པ་ཏྲ་དང་། མྱུ་གུ་ལ་སོགས་པ་ཇི་ལྟར་མཛེས་པའོ། །བུམ་པའི་ཚད་དུ་ཤེས་རབ་ཀྱི་ཞལ་ལོ། །ཞལ་གྱི་སྟེང་དུ་
སྔར་གྱི་རྡོ་རྗེ་ཕྱེད་ལྟ་བུའི་རྡོ་རྗེ་ཕྱེད་དོ། །འདིར་དྲིལ་བུ་ཁ་ཅིག་ནི་ཁ་ཆུ་སྐྱེས་ཅུང་ཟད་ཁ་དབྱེ་བ་ཅན་ནོ། །ཁ་ཅིག་པདྨའོ། །ཁ་ཅིག་ནི་བའི་ཁ་ལྟ་བུའོ། །འདིར་རྡོ་རྗེ་དབུས་དང་ཤར་ལ་སོགས་པའི་ར་ལྟེ་བའི་མཐར་ཐུག་པ་རྣམས་ལ་མི་བསྐྱོད་པ་དང་། རྣམ་པར་
སྣང་མཛད་ལ་སོགས་པ་བསྒོམ་པར་བྱའོ། །ཡང་ན་དབུས་སུ་རྣམ་པར་སྣང་མཛད་དོ། །ཤར་ལ་སོགས་པའི་འདབ་མར་བྱམས་པ་དང་སའི་སྙིང་པོ་དང་། ཕྱག་ན་རྡོ་རྗེ་དང་། ནམ་མཁའི་སྙིང་པོ་དང་། འཇིག་རྟེན་དབང་ཕྱུག་དང་། འཇམ་པའི་དབྱངས་དང་། སྒྲིབ་པ་རྣམ་པར་སེལ་
བ་དང་། ཀུན་དུ་བཟང་པོ་རྣམས་ཏེ། ཆ་བརྒྱད་པ་ལ་རྡོ་རྗེ་སེམས་དཔའོ། །པདྨ་གཞན་གྱི་ཤར་ལ་སོགས་པའི་འདབ་མ་ལ་རྡོ་རྗེ་ལྕགས་ཀྱུ་མ་དང་། རྡོ་རྗེ་ཞགས་པ་མ་དང་། རྡོ་རྗེ་ལྕགས་སྒྲོག་མ་དང་། རྡོ་རྗེ་འབེབས་མའོ། །མེ་ལ་སོགས་པར་ཙུནྡ་དང་། རིན་ཆེན་སྐར་མདའ་དང་། རྡོ་རྗེ་ལྕགས་
เล่ม ๗๕ · หน้า 94a
སྒྲོག་མ་དང་། གཞན་གྱིས་མི་ཐུབ་མ་རྣམས་སོ། །ཕྱོགས་གཞན་གྱི་ར་རྣམས་ལ་ནི་དབུས་སུ་ཡེ་ཤེས་མཁའ་འགྲོ་མ་དང་། ཤར་དུ་རྡོ་རྗེ་མཁའ་འགྲོ་མ་དང་། བྱང་དུ་མཁའ་འགྲོ་མ་དྲག་མོ་དང་། ནུབ་ཏུ་རྡོ་རྗེ་རོ་ལངས་མ་དང་། ལྷོར་གཏུམ་མོའོ། །དྲིལ་བུའི་སྟེང་དུ་ཁ་འོག་ཏུ་
ཕྱོགས་པའི་པདྨའི་འདབ་མ་རྣམས་ལ་གཡས་སྐོར་དུ་ཕྱོགས་སུ་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་དང་། མཚམས་སུ་ནོར་རྒྱུན་མ་དང་། ཙུནྡ་དང་། ཁྲོ་གཉེར་ཅན་དང་། རྡོ་རྗེ་ཕྲེང་བ་མ་རྣམས་སོ། །བུམ་པའི་ནང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་སྐུ་དང་། སྟེང་དུ་ཞལ་ལོ། །དེའི་
སྟེང་དུ་པདྨ་དང་རྡོ་རྗེ་ནི་སྔ་མ་བཞིན་ནོ། །མི་བསྐྱོད་པ་ལ་སོགས་པ་ལྷ་འདི་རྣམས་ཀྱི་ས་བོན་དང་མཚན་མ་དང་། ཕྱག་ལ་སོགས་པ་ནི་མན་ངག་གི་སྙེ་མར་བརྗོད་དོ། །དེ་ནས་དམ་ཚིག་སེམས་དཔའི་ལྷ་བསྐྱེད་ནས་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་སེམས་དཔའི་ལྷ་རྣམས་སྤྱན་དྲངས་ནས། ཞལ་བསིལ་ལ་
སོགས་པ་སྔོན་དུ་འགྲོ་བས་དེ་རྣམས་ལ་བཅུག་སྟེ། ཆོ་ག་བཞིན་དུ་རབ་གནས་བྱས་ནས་མཆོད་པ་ལ་སོགས་པ་བྱས་ཏེ། ལྷ་རྣམས་ཡོངས་སུ་གྱུར་པ་ལས་རྭ་ལ་སོགས་པའི་གཟུགས་བཞུགས་ཤིང་། རྡོ་རྗེ་ཐབས་ཀྱི་རང་བཞིན་དང་། དྲིལ་བུ་ཤེས་རབ་ཀྱི་བདག་ཉིད་དང་གཉིས་ཀ་ཡང་དོན་དམ་པའི་བྱང་ཆུབ་ཀྱི་
སེམས་ཀྱི་རང་བཞིན་ཞེས་ཤིན་ཏུ་བརྟན་པར་མོས་པར་བྱས་ནས། ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡེ་ཏིཥྛ་ཨེ་ཥ་ཏྭཾ་དྷ་རཱ་ཡ་མི་ཧིཿཧི་ཧི་ཧི་ཧི་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་བརྗོད་ཅིང་རྡོ་རྗེ་གཡས་པའི་རྒན་པོ་དང་མིང་མེད་དག་གིས་དང་། ཨོཾ་བཛྲ་གྷཎྜ་ཧཱུཾ་ཞེས་བརྗོད་ཅིང་དྲིལ་བུ་གཡོན་པ་དག་གིས་བཟུང་ནས་དེ་གཡོན་
པའི་དཀུར་བཞག་སྟེ། རྡོ་རྗེ་སེམས་དཔའ་ལ་སོགས་པ་རྣམས་མཉེས་པར་བྱའོ་ཞེས་ལྷག་པར་མོས་ཤིང་ཡི་གེ་ཧཱུཾ་བརྗོད་པ་སྔོན་དུ་འགྲོ་བས། སོ་ཧི་ཨ་བཛྫ་མུལླ་ལུ་ཏཱ་ར་ཨ་སཏྭ་བི་མོཀྵ། དྷརྨ་བི་མོཀྵཾ་ཀཛྫ་ཧཱུཾ་བཛྫ་ཧུཙྪ་ཨ་དྷ་རནྟུ་ཧཱུཾ་ཧཱུཾ་ཧཱུཾ་ཧོ་ཧོ་ཧོ་ཞེས་བརྗོད་ཅིང་རྡོ་རྗེ་གསོར་བར་བྱའོ། །དེ་ནས་རྡོ་རྗེ་གཡས་
པའི་དཀུར་བཟུང་བའམ་གསོར་ཞིང་། ཨོཾ་བཛྲ་དྷརྨཱ་ར་ཎི་ཏ་པྲ་ར་ཎི་ཏ་སཾ་པྲ་ར་ནི་ཏ་སརྦ་བུདྡྷ་ཀྵེ་ཏྲ་པྲ་ཙཱ་ལི་ནི་པྲ་ཛྙཱ་པ་ར་མི་ཏཱ་ནཱ་ད་སཾ་བྷ་བེ་བཛྲ་སཏྭ་ཧྲྀ་ད་ཡཾ་སནྟོ་ཥ་ནི་ཧཱུཾ་ཧཱུཾ་ཧཱུཾ་ཧོ་ཧོ་ཧོ་སྭཱ་ཧཱ། ཞེས་བརྗོད་ཅིང་དྲིལ་བུ་དབུས་ཀྱི་ཕྱོགས་བརྒྱད་རྣམས་སུ་ལྕེ་བསྐྱོད་པས་དཀྲོལ་བར་བྱའོ། །དྲིལ་བུ་དང་རྡོ་རྗེའི་དབྱེ་བ་
เล่ม ๗๕ · หน้า 94b
རྣམས་ཀྱི་མཚན་ཉིད་ལ་སོགས་པ་རྒྱས་པར་ནི་མན་ངག་གི་སྙེ་མར་བརྗོད་དོ་ཞེས་པ། རྡོ་རྗེ་དང་དྲིལ་བུའི་མཚན་ཉིད་ལ་སོགས་པའི་ཆོ་གའོ། །དེ་ལྟར་ཐུབ་པ་མཆོག་རྣམས་ཀྱི་ནི་གསུང་གི་རྒྱ་མཚོ་ཟབ་མོ་རུ། །ཁ་ཅིག་ཐོས་པ་ཙམ་ཡང་མི་འཇུག་འགའ་ཞིག་གིས་ཀྱང་གཏིང་མ་རྙེད། །སྙིང་རྗེ་དང་བཅས་བློ་
གྲོས་རྒྱ་ཆེན་མཐུ་ཡིས་ཁོ་བོས་ནང་ཞུགས་ནས། །དགའ་བར་བྱ་ཕྱིར་བདུད་རྩི་འདི་ནི་ཉེར་བླངས་བསྟེན་པར་གྱིས། །འདིར་ནི་བསོད་ནམས་གང་ཞིག་ཤར་དང་འོད་ཆེན་གང་ཞིག་ནང་དུ་འབར། །གཉིས་པོ་དེ་ཡིས་མྱུར་དུ་ཕུན་སུམ་ཚོགས་པ་རྣམས་ཀྱི་འབྱུང་གནས་ནི། །འགྲོ་བ་གསུམ་པ་མི་
འཇིགས་མངའ་བདག་སྣ་ཚོགས་ལུས་ཅན་ཁྲོ་བོ་ནི། །དཀྱིལ་འཁོར་རྡོ་རྗེ་ལྷ་མོ་བདེ་བའི་གཞི་ལ་འདུ་ཞིང་རོལ་པར་ཤོག །དཀྱིལ་འཁོར་གྱི་ཆོ་ག་རྡོ་རྗེ་ཕྲེང་བ་ཞེས་བྱ་བ་པཎྜི་ཏ་ཆེན་པོ་གནས་བརྟན་ཨ་བྷ་ཡཱ་ཀ་ར་གུཔྟས་མཛད་པ་རྫོགས་སོ།། །།པཎྜི་ཏ་དེ་ཉིད་དང་ལོ་ཙཱ་བ་ཁེར་གད་བནྡེ་འཁོར་
ལོ་གྲགས་ཀྱིས་འགྱུར་ལ། དུས་ཕྱིས་ལོ་ཙཱ་བ་ཤེས་རབ་དཔལ་གྱིས་བཅོས་ཤིང་སླད་ནས་པཎྜི་ཏ་རཏྣ་རཀྵི་ཏ་དང་། རཱ་ཧུ་ལ་ཤྲཱི་བྷ་དྲ་དང་། མ་ཎི་ཀ་ཤྲཱི་ཛྙཱ་ན་དང་། ཆག་ཆོས་རྗེ་དཔལ་གྱིས་བཅོས་པ་ལ་སླད་ནས་དཔང་ལོ་ཙཱ་བ་བློ་བརྟན་གྱིས་མི་བཅོས་སུ་མི་རུང་བ་རྣམས་བཅོས་ནས་དག་པར་བྱས་པའོ།། །།
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด