རྡོ་རྗེ་སློབ་དཔོན་གྱི་བྱ་བ་ཀུན་ལས་བཏུས་པ
ชื่อสันสกฤต (อักษรทิเบต ตามตัวบท) བཛྲ་ཙཱ་ཪྻ་ཀྲྀ་ཡ་ས་མུཙྪ་ཡ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๗๖ · หน้า 74b
རྣམས་ནི་འདུ་བ་ཡོངས་སུ་སྤངས་མིན་དམ་པའི་རེག་མིན་རྣམས་དང་ལྡན། །འགའ་ཞིག་སྲད་བུ་དག་དང་སྣོད་ལྡན་པད་པར་གནས་པའི་རྒྱུད་མངས་རོལ་མོ་ལ་བརྟེན་རོ་མྱང་ཞིང་། །རང་གི་འདུན་པས་དཔལ་ལྡན་ཀུན་དུ་རུ་ནི་ཡོངས་སུ་བསགས་ཀྱང་ངོམས་པ་མེད་པས་གླུ་དབྱངས་ལེན། །གང་
ཞིག་སྣ་ཚོགས་རྣམས་ནི་རྟག་ཏུ་མེ་ལོང་ལ་གནས་གཟུགས་བརྙན་འདྲ་བར་གཟུང་དུ་མེད། །དེ་དང་མཚུངས་པར་དཀྱིལ་འཁོར་འཁོར་ལོ་གཉིས་མེད་དེ་ཡང་མཐའ་གསུམ་སྤངས་པར་མངོན་སུམ་དུ། །དེ་ཡིས་ཡང་དག་རིག་ཅིང་དབུ་མར་ཆགས་པ་ལས་བྱུང་རྟག་ཏུ་དཔལ་ལྡན་དཔའ་
བོར་བཅས། །སྟོན་པ་གང་ཞིག་ནམ་མཁའ་དག་དང་མཉམ་ཡང་སྙིང་རྗེ་དང་བཅས་དེ་ལ་ཀུན་དུ་འདུད། །དེའི་རྗེས་སུ་དཀྱིལ་འཁོར་གྱི་དབུས་སུ་ཤིན་ཏུ་འཇམ་ཞིང་མཐོ་བའི་གདན་ལ་བསྡད་དེ། ཧཱུཾ་ཡིག་བརྗོད་པ་སྔོན་དུ་འགྲོ་བས་གདན་བཅུ་བཅིང་བར་བྱའོ། །དེ་ལ་རྡོ་རྗེའི་སྐྱིལ་
ཀྲུང་དང་ས་གནོན་གྱི་ཕྱག་རྒྱ་བཅིངས་པ་ནི་རྡོ་རྗེའི་གདན་ནོ། །ཏིང་ངེ་འཛིན་གྱི་ཕྱག་རྒྱ་བཅིངས་པ་ནི་བསམ་གཏན་གྱིའོ། །གཡས་པའི་བརླ་དང་བྱིན་པའི་དབུས་སུ་རྐང་པ་གཡོན་པ་བཞག་ནས་དེའི་སྟེང་དུ་གཡོན་པའི་བརླ་དང་བྱིན་པའི་དབུས་སུ་གཡས་པ་གཞག་པ་ནི་རྡོ་རྗེའི་སྐྱིལ་ཀྲུང་ངོ་། །
བྱིན་པ་གཡོན་པར་བྱིན་པ་གཡས་པ་བཞག་སྟེ་པུས་མོ་གཉིས་སྨད་པ་ནི་པདྨའི་གདན་ནོ། །བརླ་གཡོན་པའི་སྟེང་དུ་རྐང་པ་གཡས་པ་བཞག་ནས་གཡོན་པ་བརླ་གཡས་པའི་འོག་ཏུ་བཞག་པ་ནི་སེམས་དཔའི་སྐྱིལ་ཀྲུང་ངོ་། །རྐང་པ་གཡོན་པ་སྐྱིལ་ཀྲུང་ཕྱེད་པར་བྱས་ཏེ་དེ་དང་ཉེ་
བར་པུས་མོ་གཡས་པ་སྟེང་དུ་དྲང་པོར་བཞག་པ་ནི་དཔའ་བོའི་འདུག་སྟངས་སོ། །གཡོན་པ་སྐྱིལ་ཀྲུང་ཕྱེད་པར་བྱས་ནས་དེའི་སྟེང་དུ་པུས་མོ་གཡས་པ་བསྙལ་ཏེ་བཞག་ལ་རྐང་པ་གཡས་པ་བརླ་གཡོན་པའི་མཐིལ་དུ་གན་རྐྱལ་དུ་བཞག་པ་ནི་དཔའ་བོའི་འདུག་སྟངས་སོ་ཞེས་ཁ་
ཅིག་གོ། །སྟན་མཐོན་པོ་ལ་གནས་ཏེ་རྐང་པ་གཉིས་དྲང་པོར་གཟུང་བ་བཟང་པོའི་འདུག་སྟངས་སོ། །རྐང་པ་གཉིས་མཐོ་གང་གི་བར་དུ་སྟན་ལ་བཀོད་ནས་ཙོག་པུར་གནས་པ་ནི་ཙོག་པུའི་འདུག་སྟངས་སོ། །རྐང་པ་གཡས་པ་སེམས་དཔའི་སྐྱིལ་ཀྲུང་གིས་ཡང་དག་པར་གནས་
เล่ม ๗๖ · หน้า 75a
ཤིང་གཡོན་པ་འགྱིང་བ་དང་བཅས་པས་རབ་ཏུ་བརྐྱང་བ་ནི་རལ་པའི་འདུག་སྟངས་སོ། །རྐང་པ་གཉིས་ཁ་སྦྱར་ཏེ་སྡོད་པ་བདེ་ལེགས་ཅན་ནོ། །རྡོ་རྗེའི་རྐང་སྟབས་ལ་སོགས་པ་འདི་རྣམས་སུ་ཇི་ལྟར་རིགས་པར་རྡོ་རྗེའི་ལྟ་བ་དག་སྟེ། མདུན་དུ་ལྟ་བ་ནི་མངོན་དུ་ཕྱོགས་པ་དང་
རྒྱབ་ཏུ་ནི། ཕྱིར་ཕྱོགས་པ་སྟེ་ཞེས་ལྟ་བ་རྣམ་གཉིས་གསུངས་སོ། །དེ་ལ་སྔགས་ནི་འདི་ཡིན་ཏེ། ཨོཾ་བཛྲ་ཨཱ་ས་ན་བཛྲ་མ་ཧཱ་ཀྲོ་དྷ་པྲ་མརྡ་ཡ་བྲརྡ་ཡ་སརྦ་བིགྷྣཱན་ཧཱུཾ་ཕཊ། ཨོཾ་དྷྱཱ་ན་ཨཱ་ས་ན་བཛྲ་མ་ཧཱ་ཀྲོ་དྷ་སྠི་ར་ཡ་སྠི་ར་ཡ་སརྦ་ཙེ་ཏཱན་སི་ཧཱུཾ་ཕཊ། ཨོཾ་བཛྲ་པཪྻཾ་ཀ་བཛྲ་མ་ཧཱ་ཀྲོ་དྷ་ནཱ་ཤ་ཡ་ནཱ་
ཤ་ཡ་སརྦ་བིགྷྣཱན་ཧཱུཾ་ཕཊ། ཨོཾ་པདྨ་ཨཱ་ས་ན་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་བི་དྷྭནྶ་ཡ་བི་དྷྭནྶ་ཡ་སརྦ་ཤ་ཏྲཱུཾ་ཧཱུཾ་ཕཊ། ཨོཾ་སཏྭ་པཪྻ་ཀ་ཨཱ་སཱ་ན་བཛྲ་མ་ཧཱ་ཀྲོ་དྷ་ཏརྫ་ཡ་ཏརྫ་ཡ་སརྦ་མ་ཧོ་རཱ་གཱན་ཧཱུཾ་ཕཊ། ཨོཾ་བཱི་ར་ཨཱ་ས་ན་བཛྲ་མ་ཧཱ་ཀྲོ་དྷ་ཏྲཱ་ས་ཡ་ཏྲཱ་ས་ཡ་སརྦ་དུཥྚཱན་ཧཱུཾ་ཕཊ། ཨོཾ་བྷ་དྲ་ཨཱ་ས་ན་
ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་སུ་ག་ཏ་སུ་ག་ཏ་སརྦ་སཏྭཱན་ཧཱུཾ་ཕཊ། ཨོཾ་ཨུངྐུ་ཊུ་ཀ་ཨཱ་ས་ན་བཛྲ་མ་ཧཱ་ཀྲོ་དྷ་ཨུངྐུ་ཊུ་ཊ་ཡ་ཨུངྐུ་ཊ་ཡ་སརྦ་མཱ་རཱ་ན་ཧཱུཾ་ཕཊ། ཨོཾ་ས་ལཱི་ལ་ཨཱ་ས་ན་བཛྲ་མ་ཧཱ་ཀྲོ་དྷ་ཨཱ་བེ་ཤ་ཡ་ཨཱ་བེ་ཤ་ཡ་སརྦ་མཱ་རཱ་ན་ཧཱུཾ་ཕཊ། ཨོཾ་སྭསྟི་ཀ་ཨཱ་ས་ན་བཛྲ་མཧཱ་ཀྲོ་དྷ་སྭསྟི་
སྭསྟི་སརྦ་སཏྭཱ་ནཱཾ་ཧཱུཾ་ཕཊ། ཨོཾ་ཨཱ་བྷི་མུ་ཁ་བཛྲ་མ་ཧཱ་ཀྲོ་དྷ་ཨཱ་བེ་ཤ་ཡ་སརྦ་དུཥྚ་སཏྭཱ་ན་ཧཱུཾ་ཕཊ། ཨོཾ་པ་རཾ་མུ་ཁ་བཛྲ་མ་ཧཱ་ཀྲོ་དྷ་པ་རཾ་མུ་ཁ་ཡ་པ་རཾ་མུ་ཁ་ཡ་སརྦ་བིགྷྣཱན་ཧཱུཾ་ཕཊ། དེ་ལ་རྡོ་རྗེ་སྐྱིལ་ཀྲུང་ལ་ཕྱག་རྒྱ་འདི་རྣམས་བཅིང་བར་བྱའོ། །འདི་ལྟ་སྟེ་རྡོ་རྗེ་ཁུ་ཚུར་གཉིས་
བཅིངས་ནས་ལག་པ་གཡོན་པ་ལྟེ་བར་བྱས་ཏེ་གཡས་པས་སྙིང་གར་གསོར་བའི་སྦྱོར་བས་རྡོ་རྗེ་འཛིན་པའི་ཚུལ་བྱ་བ་ནི་རྡོ་རྗེ་སེམས་དཔའི་ཕྱག་རྒྱའོ། །སྙིང་གར་གཡོན་པའི་རྡོ་རྗེ་ཁུ་ཚུར་གྱི་སྡིགས་མཛུབ་རབ་ཏུ་བརྐྱང་བ་གཡས་པའི་ཁུ་ཚུར་གྱིས་ཀུན་ནས་གཟུང་བ་ནི་རྣམ་པར་
སྣང་མཛད་ཀྱིའོ། །ལག་པ་གཡོན་པ་པང་པར་ཡང་དག་པར་བཞག་སྟེ་ལག་པ་གཡས་པ་ས་ལ་རེག་པར་གཟུང་བ་ནི་མི་བསྐྱོད་པའིའོ། །དེ་ཁོ་ན་བཞིན་ལ་གཡས་པ་མཆོག་སྦྱིན་བྱས་པ་ནི་རིན་ཆེན་འབྱུང་ལྡན་གྱིའོ། །དེ་ཁོ་ན་བཞིན་ལ་ལག་པ་གཡས་པང་པར་བཅིངས་ཏེ་
เล่ม ๗๖ · หน้า 75b
བསམ་གཏན་གྱི་ཚུལ་དུ་གཟུང་བ་ནི་འོད་དཔག་མེད་ཀྱིའོ། །དེ་ཁོ་ན་བཞིན་ལ་གཡས་པ་མི་འཇིགས་པ་བྱེད་པ་ནི་དོན་ཡོད་གྲུབ་པའི་འོ། །ཨོཾ་བཛྲ་སཏྭ་ཧཱུཾ། ཨོཾ་ཨོཾ་ཨོཾ། ཨོཾ་ཧཱུཾ། ཨོཾ་ཏྲཱཾ། ཨོཾ་ཧྲཱིཿ། ཨོཾ་ཁཾ་ཞེས་པ་ནི་རིམ་པ་ཇི་ལྟ་བ་བཞིན་དུ་རྡོ་རྗེ་སེམས་དཔའ་ལ་སོགས་པའི་
ཕྱག་རྒྱའི་སྔགས་སོ། །པདྨའི་གདན་ལ་སྒེག་མོ་ལ་སོགས་པའི་ཕྱག་རྒྱ་བཅིང་བར་བྱ་སྟེ། ཧཱུཾ་གི་ཡི་གེ་དང་གླུ་བླང་བ་དང་གར་བྱ་བ་སྔོན་དུ་འགྲོ་བས་དཀུའི་གནས་སུ་གཡོན་པ་དང་གཡས་པའི་རྡོ་རྗེ་ཁུ་ཚུར་གཉིས་བཞག་ནས་འགྱིང་བ་དང་བཅས་པས་གཡོན་དུ་མགོ་ཅུང་ཟད་སྨད་པར་བྱ་
བ་ནི་རྡོ་རྗེ་སྒེག་མོའི་འོ། །དེ་ཁོ་ན་བཞིན་དུ་ཕྲེང་བ་འཆིང་བ་ནི་ཕྲེང་བ་མའི་འོ། །གཡོན་པའི་རྡོ་རྗེ་ཁུ་ཚུར་གྱི་མཛུབ་མོ་དབྱུག་པ་ལྟར་བླང་བ་དང་གཡས་པའི་མཛུབ་མོས་གར་གྱི་རྣམ་པར་བྱས་ནས་གླུ་བླངས་ཏེ་སྒེག་ཅིང་རྣམ་པར་གཡོ་བས་པི་ཝང་དཀྲོལ་བ་ནི་གླུ་མའི་འོ། །
ལག་པ་གཉིས་བསྐོར་ཞིང་བཀྲོལ་ནས་གཞོགས་གཉིས་སུ་བསྐོར་ཏེ་སྒེག་ཅིང་སྤྲོ་བ་དང་བཅས་པ་ཉིད་ཀྱིས་སྤྱི་བོའི་གནས་སུ་གར་གྱི་སྦྱོར་བ་བྱ་བ་ནི་གར་མའི་འོ། །དེ་ལ་ཕྱག་རྒྱའི་སྔགས་ནི་འདི་རྣམས་ཏེ། ཨོཾ་བཛྲ་ལཱ་སྱེ་ཧཱུཾ། ཨོཾ་བཛྲ་མཱ་ལེ་ཧཱུཾ། ཨོཾ་བཛྲ་གཱིརྟི་ཧཱུཾ། ཨོཾ་བཛྲཾ་ནྲི་ཏྱ་ཧཱུཾ།
སེམས་དཔའི་སྐྱིལ་ཀྲུང་ལ་རྡོ་རྗེ་སེམས་དཔའ་ལ་སོགས་པ་བྱང་ཆུབ་སེམས་དཔའ་རྣམས་ཀྱི་སྟེ། སྙིང་པོར་བཅས་པ་འགུགས་པ་དང་། །གཉིས་ཀས་ལྕགས་ཀྱུ་འཛིན་པར་གནས། །མདའ་འགེངས་པ་ཡི་སྦྱོར་བ་དང་། །ལེགས་པར་བྱེད་པ་ཐུགས་ཀར་གནས། །རྡོ་རྗེ་གཉིས་
ཀྱི་དབང་བསྐུར་དང་། །སྙིང་གར་ཉི་མ་བཏོན་པ་སྟེ། །གཡོན་གནས་དཔུང་པར་དབྱུག་པ་དང་། །དེ་བཞིན་གདོང་དུ་ཡོངས་བསྐོར་བའོ། །གཡས་གཡོན་རྣམ་པར་གྱེས་པ་དང་། །སྙིང་གར་གཡོན་པ་རལ་གྲི་གཡས། །མགལ་མེའི་འཁོར་ལོ་བཞིན་དུ་བསྐོར། །རྡོ་རྗེ་
གཉིས་ནི་གདོང་དུ་བསླང་། །རྡོ་རྗེ་གར་གྱིས་བསྐོར་ནས་ནི། །བཀྲོལ་བའི་ཐལ་མོ་གཙུག་ཏོར་གནས། །གོ་ཆ་མཐེ་ཆུང་མཆེ་བའི་རྩེ། །ཁུ་ཚུར་གཉིས་ནི་ངེས་བཙིར་བའོ། །ཨོཾ་བཛྲ་སཏྭ་ཧཱུཾ། ཨོཾ་བཛྲ་རཱ་ཛ་ཛཿ། ཨོཾ་བཛྲ་རཱ་ག་ཧོཿ། ཨོཾ་བཛྲ་སཱ་དྷུ་སཿ། ཨོཾ་བཛྲ་རཏྣ་ཧཱུཾ། ཨོཾ་
เล่ม ๗๖ · หน้า 76a
བཛྲ་ཏེ་ཛ་ཨཱཿ། ཨོཾ་བཛྲ་ཀེ་ཏུ་ཏྲཾ། ཨོཾ་བཛྲ་ཧཱ་ས་ཧཿ། ཨོཾ་བཛྲ་དྷརྨ་ཧྲཱིཿ། ཨོཾ་བཛྲ་ཏཱིཀྵྞ་དྷཾ། ཨོཾ་བཛྲ་ཧེ་ཏུ་མཾ། ཨོཾ་བཛྲ་བྷཱ་ཥ་རཾ། ཨོཾ་བཛྲ་ཀརྨ་ཀཾ། ཨོཾ་བཛྲ་རཀྵ་ཧཾ། ཨོཾ་བཛྲ་ཡཀྵ་ཧཱུཾ། ཨོཾ་བཛྲ་སནྡྷི་བཾ། ཞེས་པ་ནི་རིམ་པ་ཇི་ལྟ་བ་བཞིན་དུ་རྡོ་རྗེ་སེམས་དཔའ་ལ་
སོགས་པ་རྣམས་ཀྱི་སྔགས་སོ། །དཔའ་བོའི་འདུག་སྟངས་ལ་རྡོ་རྗེ་ཁྲོ་བོ་ལ་སོགས་པ་རྣམས་ཀྱི་ཕྱག་རྒྱ་བྱས་ཏེ། ལག་པ་གཉིས་ཀྱིས་ཁུ་ཚུར་བྱས་ནས། གུང་མོའི་རྩེ་མོ་དང་མིང་མེད་ཀྱང་དེ་བཞིན་དུ་རྡོ་རྗེ་བསྡམས་པ་ལ་གནས་པ་དང་། མཛུབ་མོ་དག་འཁྱིལ་པའི་རྣམ་
པས་བཅིངས་པ་མཐེ་བོང་ལ་མངོན་པར་ཕྱོགས་པས་ཅུང་ཟད་ཡོན་པོའི་རྣམ་པར་བཀུག་པ་ནི་གཤིན་རྗེ་མཐར་བྱེད་ཀྱིའོ། །གཡོན་པ་ཁྲོ་བོའི་ཁུ་ཚུར་སྙིང་གར་བཞག་སྟེ། གཡས་པའི་འགྲམ་པ་ལག་པར་བརྡེག་པའི་རྣམ་པར་བསླང་བ་ནི་གཞན་གྱིས་མི་ཐུབ་པའི་འོ། །ལག་
པ་གཉིས་ཀྱིས་རྡོ་རྗེ་ཁུ་ཚུར་བྱས་ལ་མཐེ་ཆུང་དག་ལྕགས་སྒྲོག་གི་མདུད་པར་བཅིངས་ཏེ་མཛུབ་མོ་དག་གི་རྩེ་མོ་སྦྱར་བ་ཡོངས་སུ་བསྐོར་ནས་སྨིན་ཕྲག་དུ་གཟུང་བ་ནི་རྟ་མགྲིན་གྱིའོ། །མཐེ་བོང་དག་གིས་མཐེ་ཆུང་གི་སེན་མོ་མནན་ཏེ་སོར་མོ་ལྷག་མ་རྣམས་རྡོ་རྗེའི་མཚན་ཉིད་ཅན་དཔུང་པར་
རྡོ་རྗེ་བསྡམས་པས་མཆན་ཁུང་གི་རྩ་བར་གཟུང་བ་ནི་བདུད་རྩི་འཁྱིལ་པའི་འོ། །ཨོཾ་ཡ་མཱནྟ་ཀྲྀཏ་ཧཱུཾ། ཨོཾ་པྲཛྙཱནྟ་ཀྲྀཏ་ཧཱུཾ། ཨོཾ་པདྨཱནྟ་ཀྲྀཏ་ཧཱུཾ། ཨོཾ་ཨ་མྲྀ་ཏ་ཀུཎྜ་ལི་བིགྷཱནྟ་ཀྲྀཏ་ཧཱུཾ། ཞེས་པ་ནི་གཤིན་རྗེ་མཐར་བྱེད་ལ་སོགས་པ་རྣམས་ཀྱི་ཕྱག་རྒྱའི་སྔགས་སོ། །བཟང་པོའི་
འདུག་སྟངས་ལ་ནི་བྱམས་པ་ལ་སོགས་པ་རྣམས་ཀྱི་ཕྱག་རྒྱ་བཅའ་སྟེ། རྡོ་རྗེ་ཁུ་ཚུར་གཉིས་བཅིངས་ནས་མཛུབ་མོ་དང་མཐེ་བོང་གུང་མོ་རྣམས་སོ་སོར་ཕན་ཚུན་མངོན་དུ་ཕྱོགས་པས་ནཱ་ག་གེ་སར་གྱི་མེ་ཏོག་དང་འདྲ་བར་གཟུང་བ་ནི་བྱམས་པའི་འོ། །ཐལ་མོ་ཡང་དག་པར་སྦྱར་
བ་བྱས་ནས་མཛུབ་མོ་དག་གིས་མིང་མེད་མནན་ཏེ་རྣམ་པར་རྒྱས་པའི་ཨུཏྤ་ལའི་རྣམ་པར་གཟུང་བ་ནི་འཇམ་དཔལ་གྱིའོ། །ལག་པ་གཡོན་པ་པང་པར་གན་རྐྱལ་དུ་གཞག་སྟེ་ལག་པ་གཡས་པ་རབ་ཏུ་བརྐྱང་པས་གླང་པོ་ཆེའི་སྣའི་ཚུལ་དུ་བྱས་པ་ནི་སྤོས་ཀྱི་གླང་པོའི་འོ། །
เล่ม ๗๖ · หน้า 76b
གཡོན་པའི་རྡོ་རྗེ་ཁུ་ཚུར་སྟེང་དུ་བཀུག་ལ་དེའི་འོག་ཏུ་ལག་པ་གཡས་པས་བ་དན་འཛིན་པའི་ཚུལ་བྱས་པ་ནི་ཡེ་ཤེས་ཏོག་གིའོ། །ཐལ་མོ་ཡང་དག་པར་སྦྱར་བ་སྙིང་གར་བཟང་སྐྱོང་གིའོ། །ལག་པ་གཉིས་རབ་ཏུ་བརྐྱང་ནས་སོར་མོ་ཐམས་ཅད་རིམ་པས་དགུག་པའི་ཚུལ་བྱ་བ་ནི་རྒྱ་
མཚོའི་བློ་གྲོས་གྱིའོ། །གཡོན་པའི་རྡོ་རྗེ་ཁུ་ཚུར་སྙིང་གར་བཞག་སྟེ་ལག་པ་གཡས་པས་མཆོག་སྦྱིན་བྱ་བ་ནི་བློ་གྲོས་མི་ཟད་པའི་འོ། །གཡོན་པའི་རྡོ་རྗེ་ཁུ་ཚུར་པང་པར་བཞག་ནས་ལག་པ་གཡས་པས་རྡོ་རྗེ་ཁུ་ཚུར་བྱས་ཏེ་མཐེ་བོང་དང་མཛུབ་མོ་དག་གིས་སེ་གོལ་སྦྱིན་པར་བྱ་
བ་ནི་སྤོབས་པ་བརྩེགས་པའིའོ། །ལག་པ་གཉིས་ཅུང་ཟད་རྣམ་པར་ཕྱེ་ནས་པདྨའི་ཚུལ་བྱ་བ་ནི་མཐུ་ཆེན་ཐོབ་ཀྱིའོ། །ལག་པ་གཉིས་ཀྱིས་སྡིག་པ་རབ་ཏུ་བསྐྱོད་པའི་ཚུལ་བྱ་བ་ནི་དྲ་བ་ཅན་གྱིའོ། །ལག་པ་གཡས་མཆོག་སྦྱིན་བྱས་ཏེ་གཡོན་པའི་རྡོ་རྗེ་ཁུ་ཚུར་གྱི་མཛུབ་
མོ་དང་མཐེ་བོང་རབ་ཏུ་བརྐྱང་བའི་བར་ཟླ་ཚེས་ཀྱི་རྣམ་པར་བྱས་པ་ནི་ཟླ་འོད་ཀྱིའོ། །ལག་པ་གཉིས་ཀྱིས་བུམ་པའི་ཚུལ་བྱས་ནས་དབང་བསྐུར་བའི་གནས་སུ་གཟུང་བ་ནི་འོད་དཔག་མེད་ཀྱིའོ། །གཡོན་པའི་རྡོ་རྗེ་ཁུ་ཚུར་བསྙེམས་པའི་ཚུལ་གྱིས་དཀུར་བཞག་སྟེ་གཡས་པའི་རྡོ་
རྗེ་ཁུ་ཚུར་ནམ་མཁར་ཡོངས་སུ་བསྐོར་བ་ནི་ནམ་མཁའི་མཛོད་ཀྱིའོ། །ལག་པ་གཡོན་པས་ལ་རེག་པའི་རྣམ་པར་བཞག་ནས་གཡས་པའི་རྡོ་རྗེ་ཁུ་ཚུར་གྱི་མཛུབ་མོ་དང་མཐེ་བོང་སྦྱར་བས་འདྲི་བའི་རྣམ་པར་གཟུང་བ་ནི་སྒྲིབ་པ་ཐམས་ཅད་རྣམ་པར་སེལ་བའིའོ། །ཨོཾ་མཻཿ། ཨོཾ་མུཿ། ཨོཾ་
གནྡྷ་ཧསྟི་ནེ་ཧཱུཾ། ཨོཾ་ཛྙཱ་ན་ཀེ་ཏུ་ཛྙཱ་ན་བ་ཏི་ཧཱུཾ། ཨོཾ་བྷ་དྲ་བ་ཏི་བྷ་དྲ་པཱ་ལེ་ཧཱུཾ། ཨོཾ་སཱ་ག་རེ་མ་ཧཱ་སཱ་ག་རེ་ཧཱུཾ། ཨོཾ་ཀྵ་ཡེ་ཧཱུཾ། ཨཀྵ་ཡ་ཀརྨ་ཨཱ་བ་ར་ཎ་པ་རི་ཤོ་དྷ་ནེ་སྭཱ་ཧཱ། ཨོཾ་པྲ་ཏི་བྷཱ་ནེ་པྲ་ཏི་བྷཱ་ན་ཀུ་ཊྚེ་ཧཱུཾ། ཨོཾ་སྠཱ་མེ་མ་ཧཱ་སྠཱ་མ་ར་ཏི་སྭཱ་ཧཱ། ཨོཾ་སརྦ་ཨ་པཱ་ཡ་ཛི་ཏ་སརྦ་ཨ་པཱ་ཡ་བི་ཤོ་དྷ་ནེ་ཧཱུཾ།
ཨོཾ་སརྦ་ཤོ་ཀ་ཏ་མོ་ནིརྒྷཱ་ན་མ་ཏི་ཧཱུཾ། ཨོཾ་ཛྭ་ལི་ནི་མ་ཧཱ་ཛཱ་ལི་ནེ་ཧཱུཾ། ཨོཾ་ཙནྡྲེ་ཙནྡྲ་བྱ་བ་ལོ་ཀི་ནི་ཏེ་སྭཱ་ཧཱ། ཨོཾ་ཨ་མི་ཏ་པྲ་བྷེ་ཨ་མི་ཏ་མ་ཏ་མ་ཏི་ཧཱུཾ། ཨོཾ་ག་ག་ནེ་ག་ག་ན་པ་ར་ལོ་ཙ་ནེ་ཧཱུཾ། ཨོཾ་སརྦ་ནི་བ་ར་ཎ་བིཥྐཾ་བྷི་ནི་ཧཱུཾ། ཞེས་པ་ནི་རིམ་པ་ཇི་ལྟ་བ་བཞིན་དུ་བྱམས་པ་ལ་སོགས་པའི་ཕྱག་རྒྱའི་
เล่ม ๗๖ · หน้า 77a
སྔགས་སོ། །ཙོག་པུའི་འདུག་སྟངས་ལ་ཕོ་ཉ་དང་ཕོ་ཉ་མོ་དང་བྲན་པོ་དང་བྲན་མོའི་ཕྱག་རྒྱ་བཅིང་བར་བྱ་སྟེ། རྡོ་རྗེ་ཁུ་ཚུར་གཉིས་ཀྱི་མཛུབ་མོ་ལྕགས་ཀྱུ་བཅིངས་ནས་མཐེ་ཆུང་ལྕགས་ཀྱུ་ཆེན་པོ་དང་། ལག་པ་དག་མདུད་པ་དང་གྲི་གུག་གི་རྩེ་མོ་དག་དང་རྒྱབ་དག་ཀྱང་
བསྡམ་པར་བྱའོ། །ཨོཾ་བཛྲ་ཨངྐུ་ཤ་ཧཱུཾ་ཛཿ། ཨོཾ་བཛྲ་པཱ་ཤ་ཧཱུཾ་ཧཱུཾ། ཨོཾ་བཛྲ་སྥོ་ཊ་ཧཱུཾ་བཾ། ཨོཾ་བཛྲ་ཨཱ་བེ་ཤ་ཧཱུཾ་ཧོཿཞེས་པ་ནི་ཕོ་ཉ་རྡོ་རྗེ་ལྕགས་ཀྱུ་ལ་སོགས་པ་རྣམས་ཀྱི་ཕྱག་རྒྱའི་སྔགས་སོ། །ཐལ་མོ་སྦྱར་བ་བྱས་ནས་མཛུབ་མོ་དང་གུང་མོའི་ཚིགས་དབུ་མར་གདུབ་བུའི་རྣམ་པར་བཞག་སྟེ་མཐེ་བོ་
མཛུབ་མོའི་ལོགས་ཀྱི་རྩ་བར་གཟུང་བ་ནི་སྐུལ་བྱེད་མའིའོ། །རྡོ་རྗེ་བསྡམས་པར་བྱས་ནས་མཛུབ་མོ་གཉིས་སྦྱར་བ་བསྒྲེངས་ཏེ་མཐེ་བོང་གཉིས་སྟེང་དུ་རིན་པོ་ཆེའི་རྣམ་པར་གཟུང་བ་ནི་རིན་ཆེན་སྐར་མདའ་མའིའོ། །ལག་པ་གཉིས་རབ་ཏུ་བརྐྱང་ནས་ཐལ་མོ་སྦྱར་བར་བྱས་པའི་བར་དུ་རང་
རང་གི་མཐེ་ཆུང་གི་སེན་མོ་མཐེ་བོང་དག་གིས་བསྒྲིབས་ཤིང་སོར་མོ་ལྷག་མ་རྣམས་སོ་སོར་རྩེ་མོ་སྦྱར་བར་བྱ་སྟེ་གཟུང་བ་ནི་ཁྲོ་གཉེར་ཅན་གྱིའོ། །ལག་པ་གཉིས་སོ་སོ་རེ་རེར་བརྐྱང་ཞིང་རྡོ་རྗེ་ཁུ་ཚུར་བྱས་ནས་མཐེ་ཆུང་དང་མཛུབ་མོ་དག་ལྕགས་སྒྲོག་ལྟར་བཅིངས་ཏེ་ཁྱེར་བ་ནི་རྡོ་རྗེ་ལྕགས་
སྒྲོག་མའི་འོ། །ཨོཾ་ཙ་ལེ་ཙུ་ལེ་ཙུནྡེ་སྭཱ་ཧཱ། ཨོཾ་རཏྣོ་ལྐེ་རཏྣ་ཛྭཱ་ལི་ནི་སྭཱ་ཧཱ། ཨོཾ་བྷྲྀ་ཀུ་ཊི་བྷྲྀཿསྭཱ་ཧཱ། ཨོཾ་བཛྲ་ཤྲྀདྑ་ལེ་ཧཱུཾ་ཕཊ་སྭཱ་ཧཱ། ཞེས་པ་ཕོ་ཉ་མོ་རྣམས་ཀྱི་ཕྱག་རྒྱའི་སྔགས་སོ། །ལག་པ་དག་རབ་ཏུ་བརྐྱང་ནས་མཐེ་བོང་གིས་རང་གི་མཐེ་ཆུང་དང་མིང་མེད་ཀྱི་སེན་མོ་
མནན་པ་ལག་པ་གཡོན་པའི་དབུས་སུ་ལག་པ་གཡས་པའི་གུང་མོ་དང་མཛུབ་མོ་དག་བཞག་ཅིང་སྙིང་གར་བཟུང་ནས་གཡོན་པའི་ཁུ་ཚུར་གྱི་སྦུབས་ནས་ལག་པ་གཡས་པས་རལ་གྲི་འབྱིན་པའི་ཚུལ་གྱིས་འདྲེན་ཅིང་བཟུང་བ་ནི་མི་གཡོ་བའི་འོ། །རྡོ་རྗེ་ཁུ་ཚུར་གཉིས་ཕན་ཚུན་
རྒྱབ་སྦྱར་བར་བྱས་ནས་མཐེ་ཆུང་ལྕགས་སྒྲོག་ལྟར་མདུད་མཛུབ་མོ་དག་རབ་ཏུ་བརྐྱང་བས་ཞགས་པ་བྱ་བ་ནི་འདོད་པའི་རྒྱལ་པོའི་འོ། །གཡོན་པ་ཁྲོ་བོའི་སོར་མོ་སྙིང་གར་བཞག་སྟེ་གཡས་པ་ཁྲོ་བོའི་ཁུ་ཚུར་དབྱུག་པའི་རྣམ་པས་བསླང་ནས་གཟུང་བ་ནི་དབྱུག་པ་སྔོན་པོའིའོ། །
เล่ม ๗๖ · หน้า 77b
གཡོན་པའི་རྡོ་རྗེ་ཁུ་ཚུར་སྙིང་གར་བཞག་པའི་རྡོ་རྗེ་ཁུ་ཚུར་རབ་ཏུ་བསྣུན་པའི་ཚུལ་གྱིས་བསླང་བ་ནི་སྟོབས་པོ་ཆེའི་འོ། །འདོད་པའི་རྒྱལ་པོའི་ཕྱག་རྒྱ་བཞིན་ལ་མཛུབ་མོ་གཉིས་བསླང་བ་ནི་གནོད་མཛེས་རྒྱལ་པོའིའོ། །ལག་པ་གཉིས་པོ་དག་གི་མཐེ་ཆུང་དང་མཐེ་བོང་
ཕན་ཚུན་ལྕགས་སྒྲོག་ལྟར་བྱས་ནས་སོར་མོ་ལྷག་མ་རྣམས་བ་དན་གསུམ་པའི་རྣམ་པས་སྟེང་དུ་བརྐྱང་སྟེ་གཡོ་བ་དང་བཅས་པས་ཧཱུཾ་ཞེས་བྱ་བ་ནི་རྡོ་རྗེ་ས་འོག་གིའོ། །བྲན་པོ་དེ་རྣམས་ཀྱི་ཕྱག་རྒྱའི་སྔགས་ཀྱི་ཚིག་རྣམས་ནི་འདི་དག་སྟེ། ཨོཾ་ཨ་ཙ་ལ་ཧཱུཾ་ཧཱུཾ། ཨོཾ་ཊཀྐི་ཧཱུཾ་ཛཿ། ཨོཾ་ནཱི་ལ་དཎྜ་མ་ཧཱ་
དཎྜ་ཧཱུཾ། ཨོཾ་ཀྲོ་དྷ་ཧཱུཾ་ཛཿ། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ། ཨཱ་ནཱ་ཡ་ཧོ་བྷ་ག་ཝཱན་བིདྱཱ་རཱ་ཛ་ཧཱུཾ་ཕཊ། ཨོཾ་བཛྲ་པཱ་ཏཱ་ལ་བྷཉྫ་བྷཉྫ་ཧཱུཾ། པད་ཀོར་གྱི་གར་སྔོན་དུ་འགྲོ་བས་རྡོ་རྗེ་ཐལ་མོ་སྤྱི་བོར་བཟུང་ཞིང་སྙིང་གར་བླངས་ཏེ་མེ་ཏོག་འབུལ་བའི་ཚུལ་
བྱ་བ་ནི་མེ་ཏོག་མའིའོ། །དེ་ཁོ་ན་བཞིན་དུ་རྡོ་རྗེ་ཁུ་ཚུར་གཉིས་རྒྱབ་བསྟན་ཏེ་གུང་མོའི་སོར་མོ་བླངས་ནས་སྤོས་འབུལ་བའི་ཚུལ་བྱ་ཞིང་ལག་པ་བསྐོར་བ་ནི་བདུག་སྤོས་མའིའོ། །དེ་ཁོ་ན་བཞིན་དུ་རྡོ་རྗེ་བསྡམས་པ་ལས་བྱུང་བའི་མཐེ་བོང་གཉིས་བསླང་སྟེ་སྣང་གསལ་འབུལ་བའི་
ཚུལ་བྱ་ཞིང་གར་བསྐོར་བ་ནི་སྣང་གསལ་མའི་འོ། །རྡོ་རྗེ་བསྡམས་པའི་མཐིལ་བསྟན་ཞིང་མཐེ་བོང་གདུ་བུ་ལྟར་བྱ་ཞིང་མཐེ་ཆུང་རབ་ཏུ་བརྐྱང་བའི་རྩེ་སྦྱར་བས་ཡོངས་སུ་བསྐོར་ཞིང་དྲི་ཆབ་འབུལ་བའི་ཚུལ་གྱི་གར་སྔོན་དུ་འགྲོ་བའི་ལག་པ་གཉིས་ཀྱིས་བྱུག་པར་བྱ་བ་ནི་དྲི་ཆབ་མའིའོ། །
བྲན་མོ་དེ་རྣམས་ཀྱི་ཕྱག་རྒྱའི་སྔགས་ཀྱི་ཚིག་རྣམས་ནི་འདི་དག་ཏུ་འགྱུར་རོ། །ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་དཱི་པེ་ཧཱུཾ། ཨོཾ་བཛྲ་གནྡྷེ་ཧཱུཾ། རོལ་པའི་འདུག་སྟངས་ལ་འཇིག་རྟེན་སྐྱོང་བ་ལ་སོགས་པ་རྣམས་ཀྱི་ཕྱག་རྒྱ་བྱ་སྟེ། ལག་པ་གཡོན་པའི་རྡོ་རྗེ་ཡང་དག་པར་
བསྟན་ནས་ལག་པ་གཡས་པའི་རྡོ་རྗེ་དཀུའི་གནས་སུ་བཟུང་སྟེ་བསྟན་པ་ནི་བརྒྱ་བྱིན་གྱིའོ། །ལག་པ་གཡས་པའི་མཛུབ་མོ་ཐབ་ཀྱི་རྣམ་པས་བཀུག་ནས་གུང་མོའི་རྩེ་མོའི་ཚིགས་གསུམ་པར་བཟུང་སྟེ་མཐེ་བོང་མཛུབ་མོའི་ལོགས་ལ་བརྟེན་ནས་བསྟན་པ་ནི་མེ་ལྷའིའོ། །ལག་པ་
เล่ม ๗๖ · หน้า 78a
དག་ཁ་ནང་དུ་མངོན་པར་ཕྱོགས་པའི་རྡོ་རྗེ་བསྡམས་པ་བྱས་ནས་ནང་དུ་མཐེ་བོང་ཟུང་དང་ཕྱི་རོལ་དུ་མིང་མེད་ཀྱི་རྩེ་མོ་བྱས་ཏེ་སྙིང་གར་བཟུང་བ་ནི་གཤིན་རྗེའིའོ། །ལག་པ་གཡས་པ་ཁུ་ཚུར་བྱས་ལ་གུང་མོ་དང་མཛུབ་མོ་བཀུག་ནས་ལག་པ་གཡོན་པ་དཀུའི་གནས་སུ་
བཞག་སྟེ་རལ་གྲིའི་རྣམ་པར་གཟུང་བ་ནི་བདེན་བྲལ་གྱིའོ། །ལག་པ་གཡས་པའི་མཛུབ་མོ་དང་མཐེ་བོང་སྦྱར་ནས་གཡོན་པའི་ཁུ་ཚུར་སྙིང་གར་བཟུང་སྟེ་ཞགས་པའི་ཕྱག་རྒྱ་ནི་ཆུ་ལྷའི་འོ། །གཡོན་པའི་ཁུ་ཚུར་གུང་མོའི་རྩེ་མོ་དང་ལྡན་པ་ལ་མཛུབ་མོ་འཁྱིལ་བའི་རྣམ་པས་ཚིགས་གསུམ་
པར་གཟུང་སྟེ་མངོན་དུ་ཕྱོགས་པས་རབ་ཏུ་བརྐྱང་སྟེ་དཀུའི་གནས་སུ་ལག་པ་གཡས་པ་བཞག་ནས་བསྟན་པ་ནི་རླུང་ལྷའི་འོ། །ལག་པ་གཉིས་ནང་དུ་མངོན་པར་ཕྱོགས་པའི་རྡོ་རྗེ་བསྡམས་པ་བྱས་ལ་དེའི་རྒྱབ་ཏུ་མཐེ་ཆུང་གཉིས་ཀྱི་རྩེ་མོ་མིང་མེད་སོ་སོ་ལ་ཡང་དག་པར་སྦྱར་བ་ནི་
ལུས་ངན་པོའི་འོ། །ལག་པ་གཉིས་གཅིག་ཏུ་སྦྱར་ཏེ་ཐལ་མོ་སྦྱར་བ་བྱས་ལ་མཐེ་ཆུང་དང་མིང་མེད་མཐིལ་དུ་རྡོ་རྗེ་བསྡམས་པ་བྱ་ཞིང་མཐེ་བོང་ཟུང་གུང་མོ་ལ་བརྟེན་ནས་གུང་མོའི་རྩེ་མོ་མཛུབ་མོ་གཉིས་རྡོ་རྗེའི་རྣམ་པས་བཀུག་སྟེ་གཟུང་བ་ནི་དབང་ལྡན་གྱིའོ། །ལག་པ་ཐལ་མོ་སྦྱར་བའི་
རྣམ་པས་ཡང་དག་པར་བཟུང་སྟེ་སྟེང་དུ་བལྟ་བ་ནི་ཚངས་པ་ལ་སོགས་པ་རྣམས་ཀྱིའོ། །ལག་པ་གཉིས་གཅིག་ཏུ་སྦྱར་ནས་རྣམ་པར་ཕྱེ་ལ་སོར་མོའི་རྩེ་མོ་རྣམས་ཕན་ཚུན་ཡང་དག་པར་སྦྱར་ནས་མཐེ་བོང་ཟླུམ་པོའི་རྣམ་པར་བྱ་ཞིང་འོག་ཏུ་བལྟ་བ་ནི་སའི་ལྷ་མོ་ལ་སོགས་པ་
རྣམས་ཀྱི་ཕྱག་རྒྱའོ། །དེ་ནས་ཕྱག་རྒྱའི་སྔགས་ཀྱི་ཚིག་རྣམས་སུ་འགྱུར་ཏེ། ན་མོ་བཛྲ་ལཱ་སྱ་དེ་ཤི་དེ་ཤི་བཛྲ་པཱ་ཎི་རཀྵ་རཀྵ་སྭཱ་ཧཱ། ཨོཾ་ཨགྣེ་ཨེ་ཧྱེ་ཧི་ཀ་པི་ལ་ཨཱ་ཀ་པི་ལ་ཛྭ་ལ་ཨཱ་ཀ་པི་ལ་ཛྭ་ལ་ཧ་ཧ་ཤི་ཁི་ཏོ་ལི་བི་རཱུ་པ་ཨཀྵ་སྭཱ་ཧཱ། ཨོཾ་ཡ་མཱ་ཡ་སྭཱ་ཧཱ། ཨོཾ་སརྦ་བྷཱུ་ཏ་བྷ་
ཡངྐ་ར་ཀུ་རུ་ཀུ་རུ་སྭཱ་ཧཱ། ཨོཾ་ཏྲི་ཏྲི་པུ་ཊ་དྲི་དྲི་ཤི་ཁི་ཏོ་ལི་བི་རཱུ་པ་ཨཀྵ་སྭཱ་ཧཱ། ཨོཾ་སུ་ས་ཁཱ་ཁ་ཁུ་ཁཿསྭཱ་ཧཱ། ཨོཾ་ཀུ་བཻ་རཱ་ཡ་སྭཱ་ཧཱ། ཨོཾ་ཥྫྷྲུཾ་ཥྫྷྲུཾ་ཤི་བ་སྭཱ་ཧཱ། ཞེས་པ་ནི་བརྒྱ་བྱིན་ལ་སོགས་པ་བརྒྱད་པོ་རྣམས་ཀྱི་ཕྱག་རྒྱའི་སྔགས་སོ། །ཨོཾ་ཨཱུརྡྷ་བྲཧྨ་ཎེ་སྭཱ་ཧཱ། ཨོཾ་སཱུརྱ་གྲ་ཧ་ཨ་དྷི་
เล่ม ๗๖ · หน้า 78b
པ་ཏ་ཡེ་སྭཱ་ཧཱ། ཨོཾ་ཙནྡྲ་ན་ཀྵ་ཏྲ་ཨ་དྷི་པ་ཏ་ཡེ་སྭཱ་ཧཱ། ཞེས་པ་ནི་ཚངས་པ་ལ་སོགས་པ་རྣམས་ཀྱི་ཕྱག་རྒྱའི་སྔགས་སོ། །ཨོཾ་ཨ་དྷྭཱཿཔྲྀ་ཐི་བྱཻ་སྭཱ་ཧཱ། ཨོཾ་ཨ་སུ་རེ་བྷྱཿསྭཱ་ཧཱ། ཨོཾ་ནཱ་གེ་བྷྱཿསྭཱ་ཧཱ། ཞེས་པ་ནི་སའི་ལྷ་མོ་ལ་སོགས་པ་རྣམས་ཀྱི་ཕྱག་རྒྱའི་སྔགས་སོ། །དེ་ལྟར་སྒྱུ་
འཕྲུལ་དྲ་བ་ལས་གསུངས་པ་སྟེ་དཀྱིལ་འཁོར་ཐམས་ཅད་ཀྱི་ཐུན་མོང་པའི་འདུག་སྟངས་དང་ཕྱག་རྒྱ་དང་སྔགས་ཀྱི་ཚིག་རྣམས་ཀྱིས་ངེས་པ་ཉིད་བཅིངས་པའོ། །དེ་ནས་དཀྱིལ་འཁོར་གྱི་ས་གཞི་དྲིའི་ཆུས་བྱུགས་ལ་མེ་ཏོག་དང་སྤོས་ལ་སོགས་པ་དང་། ཟུར་བཞི་དང་སྒོ་བཞིར་སྤོས་ཕོར་
ལ་སོགས་པ་དང་གར་དང་གླུ་ལ་སོགས་པས་ཡང་དག་པར་མཆོད་ནས་ལག་པས་རེག་ཅིང་དཀྱིལ་འཁོར་གྱི་བདག་པོའི་སྔགས་བརྒྱ་རྩ་བརྒྱད་དང་ཡི་གེ་བརྒྱ་པ་ལན་བདུན་ཡོངས་སུ་བཟླས་ཏེ་དེ་ཉིད་དུ་ལྷའི་འཁོར་ལོ་སྤྲོ་ཞིང་བསྡུ་བས་ཉལ་བར་བྱའོ་ཞེས་པ་ས་ཡོངས་སུ་གཟུང་
བའི་ཆོ་གའོ།། །།དེ་ནས་སྔ་བར་ལངས་ལ་རྡོ་རྗེ་འཆང་གི་གོ་འཕང་ལ་དགོད་པའི་ཆེད་དུ་སླར་ཡང་བགེགས་མེད་པར་བྱའོ་ཞེས་རྣམ་པར་བསམ་སྟེ་སྐད་ཅིག་གིས་སྟོང་པ་ཉིད་ཀྱི་རྗེས་ལ། རེ་ཕས་སྔོན་དུ་ཉི་མ་རྣམ་པར་བསྒོམས་ནས། །ཉི་དེར་ཧཱུཾ་བྱུང་སྣ་ཚོགས་རྡོ་རྗེ་སྟེ། །རྡོ་རྗེ་དེ་
ཉིད་ལས་ནི་ར་བ་དང་། །གུར་བཅིང་བ་ཡང་རྣམ་པར་བསྒོམ་པ་ཉིད། །ཅེས་པ་འདིས་རྡོ་རྗེའི་གུར་ལ་སོགས་པ་བསྒོམས་ཏེ། དེའི་དབུས་སུ་རང་ཉིད་དཀྱིལ་འཁོར་གྱི་དབང་ཕྱུག་གི་རྣལ་འབྱོར་དང་ལྡན་པས་སྙིང་གར་གནས་པའི་ཧཱུཾ་ཡིག་ལས་རྣམ་པར་སྤྲོས་པའི་འོད་ཟེར་གྱིས་ཕྱོགས་
བཅུའི་བགེགས་ཐམས་ཅད་བཀུག་ནས་ཧཱུཾ་ཡིག་ལས་སྤྲོས་པའི་ཁྲོ་བོ་བཅུ་ལ་གཏད་པར་བྱའོ། །ཁྲོ་བོ་དེ་རྣམས་ཀྱང་སྲིད་དུ་སོར་བཅོ་བརྒྱད་པའམ། སོར་བཅུ་གཉིས་པའམ། སོར་བརྒྱད་པ་རིམ་པ་ཇི་ལྟ་བ་བཞིན་སྦོམས་སུ་སོར་དྲུག་པ་དང་། བཞི་པ་དང་གསུམ་པ་སེང་ལྡེང་ངམ་
རུས་པའམ་ལྕགས་ལས་བྱས་པའི་ཕུར་བུ་སྣོད་གསར་པར་གནས་ཤིང་ཡུངས་ཀར་དང་ཙནྡན་དཀར་པོ་བྱུགས་པ་ཚོན་སྣ་ལྔའི་སྲད་བུས་དཀྲིས་ཤིང་ཡང་དག་པར་མཆོད་པ་ཡི་གེ་གསུམ་གྱིས་སྔགས་ཤིང་། མེ་ཏོག་དམར་པོའི་ཕྲེང་བ་བཅིངས་པའི་ཕུར་བུ་བཅུ་པོ་དེ་རྣམས་ལྟེ་བའི་
เล่ม ๗๖ · หน้า 79a
འོག་མན་ཆད་རྩེ་གཅིག་པའི་རྣམ་པར་རྣོ་བ་དང་། སྟེང་དུ་བདག་ཉིད་ཀྱི་གཟུགས་བརྙན་ཁྲོ་བོའི་རྣམ་པ་བསྐལ་པའི་མཐའི་མེ་ལྟར་འབར་བ་རྣམ་པར་བསྒོམས་ཏེ། གཡོན་པའི་རྡོ་རྗེ་ཁུ་ཚུར་གྱིས་བཟུང་ཞིང་ཕྱག་གཡས་པས་གཙོ་བོའི་མཚན་མ་ཡོངས་སུ་གྱུར་པའི་རྡོ་
རྗེའི་ཐོ་བ་མེ་ཏོག་དམར་པོའི་ཕྲེང་བས་སྤྲས་པ་བཟུང་སྟེ། སྒྲ་རིང་པོར་བརྗོད་པའི་ཧཱུཾ་ལས་བྱུང་བའི་ཁྲོན་པ་བཅུར་དབང་པོ་ལ་སོགས་པ་བཅུའི་གཟུགས་བརྙན་གྱི་བགེགས་འཁོར་དང་བཅས་པ་རྣམས་རབ་ཏུ་བཅུག་ལ་སྤྱི་བོར་ཕུར་བུས་གདབ་པར་བྱའོ། །སྔགས་ནི་འདི་ཡིན་ཏེ།
ཨོཾ་ཨཱཿཧཱུཾ་ཡ་མཱནྟ་ཀྲྀཏ་སརྦ་དུཥྚ་ཨིནྡྲ་ཨུ་པེནྡྲྭཱན། ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་པྲ་ཛྙཱནྟ་ཀྲྀཏ་སརྦ་དུཥྚ་ཡ་མཱ་ན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་པདྨཱནྟ་ཀྲྀཏ་སརྦ་དུཥྚ་ནཱ་གཱ་ན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་བིགྷྣཱནྟ་ཀྲྀཏ་སརྦ་དུཥྚ་ཀུ་བེ་རཱ་ན་
ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་ཨ་ཙ་ལ་སརྦ་དུཥྚ་ཨཱི་ཤ་ནཱན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་ཊཀྐི་རཱ་ཛ་སརྦ་དུཥྚ་ཨགྣིན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་ནཱི་ལ་དནྜ་སརྦ་དུཥྚ་ནཻ་རི་ཏྱཱ་ན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་མ་ཧཱ་བ་ལ་
སརྦ་དུཥྚ་བཱ་ཡུན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་ཨུཥྞཱི་ཥ་ཙཀྲ་བརྟིན་སརྦ་དུཥྚ་ཨརྐ་ཙནྡྲ་པ་ཏི་མ་ཧཱ་ན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་སུམྦྷ་རཱ་ཛ་སརྦ་དུཥྚ་བེ་མ་ཙི་པྲྀ་ཐི་བི་དེ་བ་ཏཱཿས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཅེས་པའི་སྔགས་རྣམས་ཀྱིས་དཀྱིལ་
འཁོར་གྱི་ཁང་པའི་ཕྱིའི་ཕྱོགས་བཅུ་པོ་རྣམས་སུ་འཇིམ་པའི་གོང་བུ་བྱས་པར་སློབ་དཔོན་གྱིས་གདབ་ཅིང་བརྡུང་བར་བྱ་སྟེ། མི་ནུས་ན་སྒོའི་སློབ་དཔོན་རྣམས་ཀྱིས་སོ། །གཙུག་ཏོར་གྱི་ནི་ཤར་གྱི་ཕུར་བུ་ལས་ཤར་དུ་སྟེ། གནོད་མཛེས་ཀྱི་ནི་ནུབ་ཀྱི་ཕུར་བུ་ལས་ནུབ་ཏུ་གདབ་
ཅིང་བརྡུང་བར་བྱའོ། །ཕུར་བུའི་གཟུགས་བརྙན་གྱི་ཁྲོ་བོ་རྣམས་གདུགས་དང་རྒྱལ་མཚན་དང་བ་དན་ལ་སོགས་པས་མཉེས་པར་བྱ་ཞིང་། ཉི་མ་སོ་སོ་ལ་ཐུན་གསུམ་དུ་གཏོར་མ་དང་ལྷ་བཤོས་དང་རོལ་མོ་དང་མེ་ཏོག་དང་བདུག་སྤོས་ལ་སོགས་པ་རྣམས་ཀྱིས་མཆོད་པར་བྱའོ། །
เล่ม ๗๖ · หน้า 79b
ཡང་ན་སེང་ལྡེང་ལ་སོགས་པའི་ཕུར་བུ་མེད་ན་ཡང་ཇི་ལྟར་བརྗོད་པའི་བསྒོམ་པ་ཁོ་ནས་ཕུར་བུ་གདབ་པ་དང་བརྡུང་བར་བྱ་སྟེ་ལག་པ་གན་རྐྱལ་དུ་གནས་པ་བསྒྱུར་ནས་ཨོཾ་བཛྲ་ཧཱུཾ་ཞེས་བརྗོད་ཅིང་ས་གཞིར་བགེགས་ལ་བསྣུན་ཏེ་དེ་ལྟར་ལྷག་པར་མོས་པར་བྱའོ་ཞེས་པ་བགེགས་ལ་ཕུར་བུས་
གདབ་པའི་ཆོ་གའོ།། །།དེའི་རྗེས་ལ་དཀྱིལ་འཁོར་ལ་འཆད་པར་འགྱུར་བའི་ཆོ་གས་དཀྱིལ་འཁོར་ཇི་ལྟ་བའི་རྗེས་སུ་འབྲངས་ཏེ་ཐིག་འདེབས་པ་དང་འབྲི་བའི་དཀྱིལ་འཁོར་གྱིས་གཞིར་བསྡད་ལ་དབུས་སུ་དྲིའི་མཎྜལ་བྱས་པར་བཾ་ལས་བྱུང་བའི་སའི་ལྷ་མོ་རྣམ་པར་བསྒོམས་
ནས་ལག་པ་གཡས་པར་ཟླ་བ་ལ་ཧཱུཾ་གསུམ་བསམས་ཏེ། སོར་མོའི་རྩེ་མོ་ས་ལ་ལན་གསུམ་བསྣུན་པ་དང་དེའི་སྒྲ་དང་ཧཱུཾ་གི་འོད་ཟེར་རྣམས་ཀྱིས་ཡང་དག་པར་བསྐུལ་བ་ལས་འཐོན་པའི་སའི་ལྷ་མོ་ཡེ་ཤེས་སེམས་དཔའ་དང་གཅིག་ཏུ་གྱུར་པ་དགྱེས་པའི་ཐུགས་ཅན་སེར་མོ་ཞི་
ཞིང་གོས་དཀར་མོ་མནབས་པ་རྒྱན་ཐམས་ཅད་དང་ལྡན་པ། ཞལ་གཅིག་ཕྱག་གཉིས་མ་གཡོན་པས་བུམ་པ་བཟང་པོ་འཛིན་ཅིང་ཅིག་ཤོས་ཀྱིས་མི་འཇིགས་པ་མཛད་པ་མདུན་དུ་གནས་པ་ལ་མཆོད་ཡོན་ལ་སོགས་པ་སྔོན་དུ་འགྲོ་བས་ཡང་དག་པར་མཆོད་པས་དེ་མ་ཐག་ཏུ། ཨོཾ་
ཚུར་བྱོན་ཚུར་བྱོན་ས་ཡི་ནི། །ལྷ་མོ་ཆེན་མོ་འཇིག་རྟེན་ཡུམ། །རིན་ཆེན་ཀུན་གྱིས་རབ་གང་མ། །བཟང་པོའི་རྒྱན་གྱིས་རྣམ་བརྒྱན་མ། །དོ་ཤལ་རྐང་གདུབ་སྒྲ་ལྡན་མ། །རྡོ་རྗེ་སེམས་དཔའ་རབ་མཆོད་མ། །མཆོད་ཡོན་འདི་ནི་བཞེས་ནས་སུ། །དཀྱིལ་འཁོར་འདི་ནི་ལེགས་
གྲུབ་མཛོད། །ཧྲི་ཧཱི་ཧཱི་ཧཱི་ཧཾ་སྭཱ་ཧཱ། ཞེས་ལན་གསུམ་བརྗོད་ལ་ལྷག་པར་གནས་པར་བྱའོ། །དེ་ཡང་དེ་བཞིན་དུ་གྱིས་ཤིག་ཅེས་གསུངས་ནས་དེ་ཉིད་དུ་ཐིམ་པར་བསམ་མོ་ཞེས་པ་ནོར་འཛིན་མ་ལྷག་པར་གནས་པའི་ཆོ་གའོ།། །།དེ་ནས་དཀྱིལ་འཁོར་གྱི་ས་གཞིར་བདུད་
རྩི་ལྔ་དང་བཅས་པའི་དྲི་བཟངས་ལ་ཨོཾ་ཨཱཿཧཱུཾ་གིས་བསྔགས་པས་ཉེ་བར་བྱུགས་ཅིང་མེ་ཏོག་བཟང་པོ་གཅལ་དུ་བཀྲམ་དུ་བཅུག་སྟེ། ཕྱི་དྲོའི་དུས་སུ། ཁྲུས་དང་གཙང་སྦྲ་དྲི་ཞིམ་ལུས། །སྣ་ཚོགས་རྒྱན་གྱིས་རྣམ་པར་བརྒྱན། །དཀར་པོ་གསར་པའི་གོས་འཛིན་པ། །
เล่ม ๗๖ · หน้า 80a
དེ་ཡི་གཙུག་ཏོར་རྣམ་པར་བརྒྱན། །ཞེས་པའི་གསུང་གི་ཕྱིར་སྦྱིན་པའི་བདག་པོས་ཕུལ་བའི་དོ་ཤལ་དང་རྐང་གདུབ་དང་དཔུང་རྒྱན་དང་ལག་གདུབ་དང་། རྐེད་རྒྱན་དང་། སོར་གདུབ་ལ་སོགས་པའི་རྒྱན་གྱིས་བརྒྱན་ནས། རིམ་པ་ཇི་ལྟ་བ་བཞིན་དུ་ཨོཾ་ཨཱཿཧཱུཾ་
སྭཱ་ཧཱ། ཨོཾ་བཛྲ་ཨུཥྞཱི་ཥ་ཧཱུཾ་ཕཊ། ཅེས་པ་དག་ལན་བདུན་བཟླས་པའི་གསེར་གྱི་དབུ་རྒྱན་དང་གོས་ལ་སོགས་པས་བརྒྱན་ཅིང་། དཀྱིལ་འཁོར་གྱི་སའི་དབུས་སུ་འདུག་ལ་ཤར་དུ་མངོན་པར་ཕྱོགས་པའམ་ཕྱོགས་གཞན་ལ་ནི་དཀྱིལ་འཁོར་གྱི་ཤར་ནུབ་ཏུ་མངོན་པར་
ཕྱོགས་པས་འདུག་སྟེ། འཁོར་ལོའི་དབང་ཕྱུག་གི་རྣལ་འབྱོར་དང་ལྡན་པས་ལྷ་རྣམས་ཀྱི་གནས་སུ་ཙནྡན་ལ་སོགས་པའི་མཎྜལ་བྱས་ལ། ཇི་ལྟ་བར་དམ་ཚིག་གི་འཁོར་ལོ་རྣམ་པར་བསྒོམས་ནས། དེར་སྙིང་གའི་ས་བོན་གྱི་འོད་ཟེར་གྱིས་སྤྱན་དྲངས་པའི་ཡེ་ཤེས་ཀྱི་
དཀྱིལ་འཁོར་རབ་ཏུ་བཅུག་སྟེ། མཆོད་པ་དང་བསྟོད་པ་དང་བདུད་རྩི་མྱང་བ་ཇི་སྙེད་པ་བྱའོ། །བསྒོམས་པའི་དཀྱིལ་འཁོར་གྱི་ཕྱི་རོལ་དུ་ཤར་ལ་སོགས་པའི་ཕྱོགས་སུ་གནས་པའི་བུམ་པ་རྣམས་སམ། ཕྱོགས་གཞན་ལ་ནི་བྱང་དུ་ཕྱོགས་པས་དབང་ལྡན་གྱི་མཚམས་ན་
གནས་པའི་བུམ་པ་རྣམས་ལྷག་པར་གནས་པར་བྱའོ། །དེ་ལ་ཞི་བ་ལ་སོགས་པའི་དབྱེ་བས་དེ་རྣམས་ཀྱི་མཚན་ཉིད་བརྗོད་པར་བྱ་སྟེ། དེ་ལྟར་ཡང་ཞི་བ་དང་རྒྱས་པ་དག་གི་བུམ་པའི་ལྟོ་བའི་ཟླུམས་སུ་ནི་སོར་བཅུ་དྲུག་གོ། །ལྟོ་བའི་འོག་ནས་ཁ་དང་མཆུའི་བར་ཇི་སྲིད་
པར་དཔངས་སུ་ནི་སོར་ཉི་ཤུའོ། །འོག་ཏུ་འཕྱར་བའི་མཆུའི་ཚད་ནི་སོར་གཉིས་སོ། །མགྲིན་པ་ནི་སོར་དྲུག་གོ། །མཆུའི་མཐའ་ནས་མཆུའི་མཐའི་བར་ཇི་སྲིད་པའི་ཁ་ནི་སོར་བརྒྱད་དོ། །སོར་བརྒྱད་ཀྱི་ཆ་གཉིས་ནི་ཁའི་བུག་པའོ། །ཆ་གཅིག་གིས་ནི་མཆུ་གཉིས་
ཀྱི་ཞེང་ངོ་། །དབྱེ་བ་དང་བསྐྲད་པ་དག་གི་བུམ་པའི་ལྟོ་བའི་ཟླུམ་པོ་ནི་སོར་བཅུ་གཉིས་སོ། །དཔངས་སུ་ནི་སོར་ཉི་ཤུ་རྩ་བཞིའོ། །མགྲིན་པ་ཡོན་པོ་སྟེ་སོར་བརྒྱད་དོ། །ཁ་ནི་སོར་དྲུག་གོ། །མཆུ་དག་ནི་སོར་རེ་རེའོ། །དབང་དང་དགུག་པ་དག་གི་བུམ་པ་ནི། བཟོ་
เล่ม ๗๖ · หน้า 80b
པོས་ཇི་ལྟར་བྱས་པའོ། །རེངས་པའི་བུམ་པ་ནི་ཐུང་བ་སྟེ་ཟླུམས་དང་དཔངས་སུ་སོར་བཅུ་དྲུག་གོ། །མགྲིན་པ་ནི་སོར་བཞིའོ། །ཁ་ནི་སོར་དྲུག་གོ། །མཆུ་ནི་སྦོམ་ཞིང་སོར་གཉིས་པའོ། །ལས་ཐམས་ཅད་པ་ལ་ནི་ཞི་བ་ལ་སོགས་པའི་ལས་ལ་བརྗོད་པའི་བུམ་པ་རྣམས་གཟུང་བར་
བྱའོ། །རྩ་བ་དང་ནི་ནག་པོ་མེད། །མཆུ་འཕྱང་མགྲིན་རིངས་ལྟོ་བ་ཆེ། །ཞེས་རྒྱུད་གཞན་ལས་གསུངས་པ་ཡང་སོར་བཅུ་དྲུག་པ་ལ་སོགས་པ་རྣམས་ལ་རིག་པར་བྱའོ། །དེའི་ཕྱིར་མཚན་ཉིད་དང་ལྡན་པ་གསུངས་པ། གསེར་རམ་དངུལ་ལམ་ཟངས་མ་འམ། །ཡང་ན་ས་
ལས་བྱས་པ་ཉིད། །ཇི་ལྟར་རྙེད་པའི་བུམ་པ་ནི། །བརྟུལ་ཞུགས་ཅན་གྱིས་དཀྱིལ་འཁོར་དགོད། །བྱི་རུ་དང་ནི་གསེར་དང་དངུལ། །པདྨ་རཱ་ག་མུ་ཏིག་སྟེ། །རིན་ཆེན་ལྔར་ནི་ལྡན་པ་རྣམས། །བུམ་པའི་ལྟོ་བར་རབ་ཏུ་གཞུག །ནས་དང་གྲོ་དང་མོན་སྲན་དང་། །ཏིལ་དང་
དེ་བཞིན་སོ་བ་སྟེ། །འབྲུ་ལྔ་རྣམས་སུ་བསྟན་པ་ནི། །བུམ་པའི་ལྟོ་བར་གཞག་པར་བྱ། །བྲྀ་ཧ་ཏི་དང་ཀཎྜ་ཀ་རི། །ཧ་ས་དེ་བ་ཨ་པ་ར་ཛི་ཏ། །དཎྜོད་པ་ལའི་རྩ་བ་སྟེ། །སྨན་ལྔ་རྣམས་ཀྱང་གཞུག་པར་བྱ། །ཨ་མྲ་ཨུ་དུམྦཱ་ར་དང་། །ཨ་ཤོ་ཀ་དང་ཨ་ཤྭདྠ། །དེ་བཞིན་
ནཱ་ག་གེ་སར་ཏེ། །ཡལ་འདབ་ལྔ་རྣམས་བྱིན་པ་ཡིས། །བུམ་པའི་ཁ་ནི་བརྒྱན་པར་བྱ། །བུམ་པ་རྣམས་ཀྱི་མགྲིན་པ་ནི། །གོས་དཀར་ཆེན་པོས་བཅིང་བར་བྱ། །ཆོ་ག་མཁས་པས་གོས་སྟེང་དུ། །སྲད་བུ་ལྔ་རྣམས་དགོད་པར་བྱ། །དཀྱིལ་འཁོར་པ་ནི་ཐམས་
ཅད་ཀྱི། །ས་བོན་ཡང་ན་མཚན་མ་འང་རུང་། །མངོན་པར་འདུས་བྱས་ཙནྡན་སོགས། །མཁས་པས་བུམ་པའི་ལོགས་ལ་བྲི། །རིན་ཆེན་ལ་སོགས་ལྡན་པར་འདིར། །རང་རང་རྒྱུད་ལས་མངོན་བསྔགས་པའི། །ཆུ་དང་ལྡན་པ་བློ་ལྡན་གྱིས། །ལྷ་ཡི་གྲང་བཞིན་
དགོད་པར་བྱ། །ཞེས་པ་དེ་ལྟ་བུའི་རང་བཞིན་ཅན་གྱི་བུམ་པ་རྣམས་བླ་རེའི་འོག་ཏུ་འཆད་པར་འགྱུར་བའི་རྡུལ་ཚོན་གྱི་དཀྱིལ་འཁོར་ལ་མཚན་མ་དགོད་པའི་རིམ་པས་སོ་སོར་རེ་རེར་དྲི་བཟང་པོ་ལ་སོགས་པའི་མཎྜལ་གྱི་སྟེང་དུ་རྗེས་སུ་མཐུན་པའི་གདན་ལ་དཀྱིལ་འཁོར་གྱི་རྣམ་པའམ་
เล่ม ๗๖ · หน้า 81a
གྲལ་དུ་དངར་ཏེ། ཨོཾ་བཛྲ་ཤི་ཁ་ར་རུ་ཊ་མ་ཊ་དི་ཤཾ་བནྡྷ་ཧཱུཾ་ཞེས་ལན་བདུན་བཟླས་པའི་སྲད་བུ་དཀར་པོ་སོགས་ཀྱིས་མགྲིན་པར་དཀྲིས་ནས་མདུན་དུ་དགོད་པར་བྱ་ཞིང་། དང་པོར་སྟོང་པ་ཉིད་དུ་བྱས་པའི་མཐར་བཾ་གྱི་ཡི་གེ་ལས་རིན་པོ་ཆེའི་རང་བཞིན་དུ་བསྒོམ་པར་བྱའོ། །ཇི་སྐད་
གསུངས་པའི་རིན་པོ་ཆེ་ལྔ་རྣམས་མེད་ན་རིན་པོ་ཆེ་གཞན་རབ་ཏུ་གཞུག་པར་བྱའོ། །ཁ་ཅིག་ཏུ་ནི་སོ་བའི་གནས་སུ་སྲན་མ་སྟེ་ཡལ་འདབ་ལྔ་རྣམས་མེད་ན་ཆོ་ག་རྗེས་སུ་ཤེས་པ་རྣམས་ཀྱིས་བྱང་ཆུབ་ཀྱི་ཤིང་གི་ཡལ་འདབ་གཅིག་པུས་ཀྱང་ངོ་ཞེས་བཅོམ་ལྡན་འདས་ཀྱིས་གསུངས་སོ། །
ཇི་སྐད་གསུངས་པའི་སྨན་རྣམས་མེད་ན་སྨན་གཞན་དག་རབ་ཏུ་གཞུག་པར་བྱའོ། །འབྱོར་པ་ཆུང་ན་རྣམ་པར་རྒྱལ་བ་དང་ལས་ཐམས་ཅད་པ་དག་ལ་རིན་པོ་ཆེའི་སྙིང་པོར་བྱའོ། །དེར་ཡང་རྣམ་པར་རྒྱལ་བའི་བུམ་པ་ལ་ནི་ངེས་པར་རིན་པོ་ཆེའི་སྙིང་པོར་བྱའོ། །རྣམ་པར་རྒྱལ་
བའི་བུམ་པ་ལ་ནི་ཆོས་ཀྱི་འབྱུང་གནས་ཀྱི་དབུས་སུ་སྣ་ཚོགས་ཆུ་སྐྱེས་ལ་གནས་པའི་ཟླ་བ་འམ་ཉི་མ་ལ་ཇི་ལྟར་རིགས་པར་བདག་པོའི་མཚན་མ་འམ་ས་བོན། དེ་ལས་གཞན་པའི་བུམ་པ་རྣམས་ལ་ནི་སྣ་ཚོགས་ཆུ་སྐྱེས་ལ་གནས་པའི་ཟླ་བ་འམ་ཉི་མར་རང་གི་མཚན་མའམ་
ས་བོན་ནམ། ལྷ་རྣམས་ཇི་ལྟ་བར་བྲི་བར་བྱའོ། །དཀྱིལ་འཁོར་གང་དུ་ལྷ་ཇི་སྙེད་པ་དེ་སྲིད་དེ་རྣམས་ཀྱི་བུམ་པའོ། །ཡང་ན་ཕོ་བྲང་གི་སྙིང་པོར་གནས་རྣམས་ཁོ་ནའི་འོ། །དེ་ལ་རིགས་ཀྱི་ཡུམ་རྣམས་ཀྱི་ནི་བཞིའོ། །དེ་བཞིན་གཤེགས་པ་རྣམས་ཀྱི་ནི་ལྔའོ། །ཡང་
ན་དེ་བཞིན་གཤེགས་པ་རྣམས་ཁོ་ནའི་ལྔའོ། །ཡང་ན་བདག་པོའི་གཅིག་དང་དེ་བཞིན་གཤེགས་པ་བཞིའི་གཅིག་དང་། རིགས་ཀྱི་ཡུམ་བཞིའི་གཅིག་དང་། གཟུགས་རྡོ་རྗེ་མ་ལ་སོགས་པ་དྲུག་གི་གཅིག་དང་། ཁྲོ་བོ་བཞིའི་གཅིག་སྟེ་ལྔའོ། །ཡང་ན་གཙོ་བོ་ཁོ་ནའི་
གཅིག་གོ། །ཕྱོགས་འདི་རྣམས་ལ་ནི་ལས་ཐམས་ཅད་པའི་བུམ་པར་ལྷག་པོར་བྱ་སྟེ་སློབ་མ་ལ་སོགས་པ་བསང་བའི་དོན་དུའོ། །ཁ་ཅིག་ནི་འདི་མི་འདོད་ཅིང་བུམ་པ་གཉིས་ཡང་མེད་ན། རྣམ་པར་རྒྱལ་བའི་བུམ་པ་ལ་གཙོ་བོའི་མཚན་མའི་གཡོན་དུ་ལས་ཐམས་ཅད་པའི་
เล่ม ๗๖ · หน้า 81b
མཚན་མ་བྲི་བར་བྱའོ་ཞེས་པ་ནི་ཕྱོགས་གཞན་ཏེ། །དེའི་མཚན་མ་ནི་བགེགས་མཐར་བྱེད་ཀྱིའོ། །རྣམ་པར་སྣང་མཛད་ལ་སོགས་པའི་ཡང་མཚན་མ་བཞི་ཕྱོགས་བཞིར་བྲིའོ་ཞེས་པའི་ཕྱོགས་ལ་ནི་གཙོ་བོའི་མཚན་མ་རྣམ་པར་སྣང་མཛད་ཀྱི་མཚན་མའི་སྟེང་དུའོ། །ཁ་ཅིག་ཏུ་ནི་
དེར་གནས་པ་ཉིད་མཆུའི་སྟེང་དུའོ་ཞེས་བཤད་དོ། །སྤྱན་མ་ལ་སོགས་པ་རྣམས་ཀྱིའང་ཕྱོགས་བྲལ་བཞིན་དུའོ་ཞེས་པ་ནི་ཕྱོགས་གཞན་ནོ། །ཡང་ན། སངས་རྒྱས་ལྔ་དང་ལྷ་མོ་བཞི། །ཁྲོ་བོ་བཞི་ཡི་བུམ་པ་རྣམས། །སོ་སོའི་འཁྱིལ་པའི་གཅིག་དང་ནི། །གཟུགས་
ཀྱི་རྡོ་རྗེ་སོགས་དྲུག་ལ། །གཅིག་སྟེ་མཚན་མ་ལྡན་པའོ། །ཞེས་པས་བཅོ་ལྔའོ། །དེ་ལྟར་བརྗོད་པའི་ཕྱོགས་རྣམས་ལས་ཕྱོགས་གཞན་དུ་འགའ་ཞིག་བརྗོད་པ་དེ་དག་ནི་རིག་པ་མ་ཡིན་ནོ། །དེ་ལྟར་འཇམ་པའི་རྡོ་རྗེ་ལ་དཀྱིལ་འཁོར་ཉི་ཤུ་དང་། བཅུ་དང་། དྲུག་དང་།
གཉིས་དང་། གཅིག་དང་བཅོ་ལྔ་སྟེ་བུམ་པའི་གྲངས་རྣམ་པར་གཞག་པའོ། །བསྡུས་པའི་རིམ་པའི་དཀྱིལ་འཁོར་དུ་ལྔ་པ་གཉིས་ཀྱི་ཕྱོགས་ལ་ནི་དེ་བཞིན་གཤེགས་པ་རྣམས་ཀྱི་གཅིག་དང་། ཡུམ་རྣམས་ཀྱི་གཅིག་དང་། གཟུགས་རྡོ་རྗེ་མ་ལ་སོགས་པ་བཞིའི་གཅིག་
དང་། བྱང་ཆུབ་སེམས་དཔའ་བརྒྱད་ཀྱི་གཅིག་དང་། ཁྲོ་བོ་བཅུའི་གཅིག་གོ་ཞེས་པ་ནི་ཁྱད་པར་རོ། །ཡང་ན། རང་ཕྱོགས་སྲས་གཉིས་དག་གི་གཅིག །ཁྲོ་དྲུག་བཙུན་མོ་རྣམས་ཀྱི་ཡང་། །སྙིང་པོར་གནས་དང་སྒོ་སྐྱོང་དང་། །བགེགས་དགྲའི་རེ་རེ་ཉི་ཤུའོ། །ཞེས་པ་
ཁ་ཅིག་གིའོ། །ཁ་སྦྱོར་ལས་གསུངས་པའི་རྡོ་རྗེ་དབྱིངས་ཀྱི་དཀྱིལ་འཁོར་དུ་ཕྱོགས་གཉིས་པའི་ལྔ་པ་ནི། ཕོ་བྲང་གི་སྙིང་པོར་གནས་པ་རྣམས་ཀྱི་གཅིག་དང་། ཕོ་བྲང་གཉིས་པར་གནས་པ་རྣམས་ཀྱི་གཅིག་དང་། ཕྱོགས་བརྒྱད་ཀྱི་ལྷ་མོ་རྣམས་ཀྱི་གཅིག་དང་། ཟུར་གྱི་ལྷ་མོ་
རྣམས་ཀྱི་གཅིག་དང་། སྒོ་སྐྱོང་རྣམས་ཀྱི་གཅིག་གོ་ཞེས་པ་ནི་ཁྱད་པར་རོ། །ཡང་ན་དེ་བཞིན་གཤེགས་པ་རྣམས་དང་། རིགས་ཀྱི་ཡུམ་རྣམས་དང་སྒོ་སྐྱོང་རྣམས་ཀྱི་བུམ་པ་རེ་རེ་དང་། རིམ་པ་གཉིས་པའི་ཕྱོགས་ཀྱི་ལྷ་མོ་རྣམས་ཀྱི་གཅིག་དང་། ཕྱོགས་བྲལ་གྱི་ལྷ་མོ་རྣམས་
เล่ม ๗๖ · หน้า 82a
ཀྱི་གཅིག་དང་། རིམ་པ་གསུམ་པའི་ཕྱོགས་ཀྱི་གཡོན་ན་གནས་པ་རྣམས་ཀྱི་གཅིག་དང་། གཡས་ན་གནས་པ་རྣམས་ཀྱི་གཅིག་དང་། ཟུར་ན་གནས་པ་རྣམས་ཀྱི་གཅིག་དང་། དེའི་ཕྱི་རོལ་གྱི་ཟུར་ན་གནས་པ་རྣམས་ཀྱི་གཅིག་དང་། ལས་ཐམས་ཅད་པའི་
གཅིག་སྟེ། དེ་ལྟར་ཉི་ཤུའོ་ཞེས་པ་ནི་ཁ་ཅིག་གིའོ། །དཔལ་བདེ་མཆོག་གི་དཀྱིལ་འཁོར་ལ་ནི་འཁོར་ལོ་ལྔ་ལ་སོ་སོར་རེ་རེ་སྟེ་ལྔའོ། །ཡང་ན་སྙིང་པོའི་ཕོ་བྲང་དུ་གནས་པ་ཁོ་ནའི་ལྔའོ། །ཡང་ན་འདི་རྣམས་ཀྱི་རྣམ་པ་ལྔ་དང་། འཁོར་ལོ་བཞིའི་བཞི་སྟེ་དགུའོ། །ཡང་ན་དབུས་ཀྱི་ཕོ་བྲང་དང་
དམ་ཚིག་གི་འཁོར་ལོ་ལ་གནས་པ་རྣམས་ཀྱི་གཅིག་སྟེ་བཅུ་གསུམ་མོ། །ཐུགས་ཀྱི་འཁོར་ལོ་ལ་ཕྱོགས་སུ་གནས་པ་རྣམས་ཀྱི་གཅིག་དང་། ཕྱོགས་བྲལ་དུ་གནས་པ་རྣམས་ཀྱི་གཅིག་གོ། །དེ་བཞིན་དུ་གསུང་གི་འཁོར་ལོ་དང་སྐུའི་འཁོར་ལོ་ལ་ཡང་སྟེ་བཅུ་དགུའོ། །ཕྱོགས་འདི་རྣམས་
སུ་ལྷ་སོ་སོའི་དགོད་པ་ཡང་ལས་ཐམས་ཅད་པ་དུམ་སྐྱེས་མའི་ལྷག་པར་དགོད་པར་བྱའོ། །འདིའི་རྗེས་སུ་འབྲངས་ནས་དཀྱིལ་འཁོར་གཞན་རྣམས་ལ་ཡང་ཇི་ལྟར་རིགས་པར་བུམ་པའི་གྲངས་རིག་པར་བྱའོ། །དེ་ལ་གཙོ་བོ་ཡིན་པའི་ཕྱིར་དང་། བྱ་བ་མང་བའི་ཕྱིར་རྣམ་རྒྱལ་བུམ་པའི་
སྟེང་དུ། ཨོཾ་བཛྲ་ཨ་མྲྀ་ཏ་ཨུ་ད་ཀ་ཧཱུཾ་ཞེས་པ་འདི་དང་ཡི་གེ་གསུམ་གྱིས་ཀྱང་ལན་བདུན་བསྔགས་པས་ཡེ་ཤེས་ཀྱི་བདུད་རྩིར་བྱ་ཞིང་། རྡོ་རྗེའི་རྡུལ་ཕྲ་རབ་ཀྱི་རང་བཞིན་དང་། ཇི་ལྟར་རྙེད་པའི་བདུད་རྩི་ལྔ་དང་། དྲི་བཟང་པོའི་ཆུ་དང་ལྡན་པ་ཧཱུཾ་གིས་བསྔགས་ནས་དུང་ཆོས་སམ་པདྨའི་སྣོད་
དུ་མེ་ཏོག་གི་ཕྲེང་བ་བཅིངས་པའི་རྡོ་རྗེ་དང་བཅས་པ་བཞག་ལ་ནང་དུ། ཨོཾ་ཏཔྟེ་མ་ཧཱ་ཏཔྟེ་སྭཱ་ཧཱ། ཞེས་པས་བཀུག་པའི་གོང་གི་ལྷའི་ཆུའི་ངོ་བོ་ལས་ལྷའི་འཁོར་ལོ་གདན་དང་བཅས་པ་སྐད་ཅིག་གིས་རྣམ་པར་བསམས་ཏེ་རང་གི་སྙིང་གའི་ས་བོན་གྱིས་ཡེ་ཤེས་ཀྱི་བདུད་རྩི་སྤྱན་དྲངས་པའི་
མདུན་དུ་ཞབས་བསིལ་དང་། ཞལ་བསིལ་དང་མཆོད་ཡོན་རྣམས་དབུལ་བར་བྱའོ། །དེ་ནས་དམ་ཚིག་གི་འཁོར་ལོ་ལ་རབ་ཏུ་བཅུག་སྟེ། ཆགས་པ་ཆེན་པོས་ཞུ་བར་གྱུར་ནས་སྔར་བླུགས་པའི་ཆུ་དང་བྱང་ཆུབ་ཀྱི་སེམས་ཀྱི་ངོ་བོར་རོ་གཅིག་ཏུ་གྱུར་པར་བསྒོམ་མོ། །མཚན་མ་ཡང་དམ་ཚིག་གི་
เล่ม ๗๖ · หน้า 82b
ལྷ་ཡེ་ཤེས་ཀྱི་ལྷ་དང་གཅིག་ཏུ་གྱུར་པར་བསམ་མོ། །དེ་ནས་རྡོ་རྗེ་དང་འབྲེལ་བའི་མེ་ཏོག་གི་མཐར་གཡོན་པའི་ཁུ་ཚུར་གྱིས་བཟུང་ནས་ཧཱུཾ་གིས་བསྔགས་ཏེ་འཁོར་ལོའི་དབང་ཕྱུག་གི་སྙིང་པོ་བརྒྱ་རྩ་བརྒྱད་དམ། ཨོཾ་བཛྲ་ཨུ་ད་ཀ་ཧཱུཾ། ཞེས་པ་འདིས་ཆུ་ལ་མངོན་པར་བསྔགས་ལ་དེར་
འཁྱིལ་པས་བསྔགས་པའི་མེ་ཏོག་དཀར་པོ་གསུམ་གཞུག་པར་བྱའོ། །གཞན་ཡང་བུམ་པ་གང་ཞིག་ལྷ་གང་གི་ཡིན་པ་དེ་ལ་ནི། དེའི་སྔགས་བརྒྱ་རྩ་བརྒྱད་དམ་ཉི་ཤུ་རྩ་གཅིག་གམ་བདུན་གྱིས་བསྔགས་པར་བྱ་སྟེ། རྡོ་རྗེའི་མེ་ཏོག་གི་ཕྲེང་བའི་མཐར་བཟུང་ནས་སོ། །
དེ་བཞིན་དུ་མེ་ཏོག་ཀྱང་གཞུག་པར་བྱའོ། །དེ་ནས་རྣམ་པར་རྒྱལ་བ་ལ་སོགས་པའི་བུམ་པ་རྣམས་མེ་ཏོག་ལ་སོགས་པས་ཡང་དག་པར་མཆོད་ལ། སྲུང་བའི་དོན་དུ་ལས་ཐམས་ཅད་པའི་ཆུས་དེའི་ཡལ་འདབ་ཀྱིས་བསངས་ཏེ། འདིར་ཇི་སྲིད་དཀྱིལ་འཁོར་གྱི་བྱ་བ་མ་རྫོགས་པ་དེ་སྲིད་
དུ་བགེགས་རྣམས་བཟློག་པར་མཛོད་ཅིག་ཅེས་བརྗོད་ཅིང་གཏོར་མ་ཕུལ་ནས་ཉེ་བར་རེག་ལ། མི་བསྐྱོད་རྡོ་རྗེ་ཞེས་པ་ལ་སོགས་པའི་བསྟོད་པ་སྔོན་དུ་འགྲོ་བས་དྲིལ་བུ་དཀྲོལ་བར་བྱའོ། །བུམ་པ་དེ་རྣམས་ལས་ཆུ་ཉུང་ཟད་ཉུང་ཟད་བླངས་ལ་དཀྱིལ་འཁོར་གྱི་ཁང་པའི་ཤར་སྒོའི་བྱང་གི་ཆར་
མན་འཇི་ལ་གནས་པའི་དུང་ཆོས་ལ་སོགས་པ་གཞག་པར་བྱ་སྟེ། བདག་ཉིད་དང་སློབ་མ་རྣམས་ལ་བསང་གཏོར་བྱ་བའི་དོན་དུའོ། །ལས་ཐམས་ཅད་པའི་བུམ་པ་ཉིད་ཀུ་ཤའི་ཆུན་པོ་དང་ལྡན་པ་དེའི་དོན་དུ་དེར་གཞག་པར་བྱའོ་ཞེས་པ་ནི་གཞན་ལས་སོ། །བུམ་པ་རྣམས་ལ་
མངོན་པར་བསྔགས་པ་དང་མཆོད་པ་ལ་སོགས་རྣམས་ནི་ཉི་མ་སོ་སོར་ཐུན་གསུམ་མམ་གཅིག་ཏུ་བྱའོ། །འཁོར་ལོའི་དབང་ཕྱུག་ལ་སོགས་པའི་སྔགས་ནི་དཀྱིལ་འཁོར་སོ་སོའི་སྒྲུབ་ཐབས་ལ་སོགས་པ་རྣམས་སུ་བལྟ་བར་བྱའོ། །མདོར་བསྡུས་པ་ནི་སླར་ཡང་འདི་ཉིད་དུ་
འཆད་པར་འགྱུར་བ་སྟེ། དཀྱིལ་འཁོར་གྱི་ལྷའི་གཟུགས་དང་ཁ་དོག་དང་མཚན་མ་ལ་སོགས་པ་བརྗོད་པའི་དུས་སུའོ། །འདི་དཀྱིལ་འཁོར་ལ་སོགས་པའི་ལས་ལ་ཉེ་བར་མཁོ་བའི་དོན་དུ་དང་པོར་རྡུལ་ཚོན་དཀར་པོ་ལ་སོགས་པས་པདྨ་འདབ་མ་བརྒྱད་པ་བྲིས་པའི་ལྟེ་བ་ལ་རྣམ་པར་
เล่ม ๗๖ · หน้า 83a
རྒྱལ་བའི་བུམ་པ་འམ་ལས་ཐམས་ཅད་པའི་བུམ་པ་གཞག་པར་བྱའོ། །ཤར་གྱི་འདབ་མ་ལ་འཆད་པར་འགྱུར་བའི་ཆོ་གས་ལྷག་པར་གནས་པ་བྱས་པའི་ཚོན་སྣ་ལྔའི་ཐིག་སྐུད་གསེར་ལ་སོགས་པའི་སྣོད་དུ་གནས་པའོ། །ལྷོར་རྡོ་རྗེའོ། །བྱང་དུ་རྡོ་རྗེའི་དྲིལ་
བུའོ། །ནུབ་དང་ཟུར་གྱི་འདབ་མ་རྣམས་ལ་ཇི་ལྟར་རིགས་པར་རྡུལ་ཚོན་ལྔའི་སྣོད་རྣམས་སོ། །དེར་འཁྱིལ་པའི་སྔགས་བཟླས་ཏེ་བུམ་པའི་ཆུས་རྡུལ་ཚོན་དང་ཐིག་སྐུད་རྣམས་བསང་གཏོར་བྱའོ་ཞེས་པ་བུམ་པ་ལྷག་པར་གནས་པའི་ཆོ་གའོ།། །།དེ་ནས་དཀྱིལ་འཁོར་གྱིས་
གཞི་དྲི་བཟངས་ལ་སོགས་པས་བྱུགས་ཤིང་མེ་ཏོག་གཅལ་དུ་འགྲེམས་སུ་བཅུག་སྟེ། དེར་ཇི་ལྟར་འབྱུང་བའི་བདག་པོ་ལྔའི་ལེ་ཚེ་རྣམས་སུ་མཎྜལ་གྲུ་བཞི་པ་བྱ་ཞིང་ལྷ་གཞན་རྣམས་ལ་ཟླུམ་པོ་སྟེ། བདུད་རྩི་ལྔ་དང་བཅས་པའི་དྲི་བཟང་པོ་རྣམས་ཀྱིས་བྱའོ། །ནུབ་ཏུ་ཕྱོགས་པས་
མཎྜལ་དེ་རྣམས་སུ་རང་གི་སྙིང་གའི་ས་བོན་གྱི་འོད་ཟེར་གྱིས་འདྲི་བར་འགྱུར་བའི་དཀྱིལ་འཁོར་གྱི་འཁོར་ལོ་ཇི་ལྟར་རིགས་པར་ཆུ་སྐྱེས་ལ་གནས་པའི་ཟླ་བའམ་ཉི་མ་ལ་བཞུགས་སུ་གསོལ་ལ། ཞབས་བསིལ་ལ་སོགས་པ་སྔོན་དུ་འགྲོ་བའི་མཆོད་པ་དང་། བསྟོད་པ་དང་བདུད་རྩི་མྱང་
བ་བྱས་ཏེ། པུས་མོ་གཡས་པ་ས་ལ་བཙུགས་ཤིང་ལྕེ་ཧཱུཾ་ལས་སྐྱེས་པའི་རྡོ་རྗེ་རྩེ་གཅིག་པར་བྱས་པ་ཧཱུཾ་བཀོད་ནས་ལག་པ་གཡས་པས་སྤོས་ཕོར་ཐོགས་ཏེ། གཡོན་པས་རྡོ་རྗེ་དྲིལ་བུ་དཀྲོལ་ཞིང་། བཅོམ་ལྡན་རྡོ་རྗེ་ཆེ་གེ་མཆོག །རིག་པའི་རྒྱལ་པོ་ཁྱོད་ལ་འདུད། །མགོན་པོ་
ཐུགས་རྗེའི་བདག་ཉིད་ཅན། །དཀྱིལ་འཁོར་བྲི་བར་བདག་འཚལ་ལོ། །སློབ་མ་རྣམས་ལ་བརྩེ་དོན་དང་། །ཁྱེད་རྣམས་ལ་ཡང་མཆོད་ཕྱིར་དང་། །སེམས་ཅན་བསོད་ནམས་སྤེལ་དོན་དང་། །བྱང་ཆུབ་སེམས་ནི་བསྐྱེད་པའི་ཕྱིར། །དེ་བས་བཅོམ་ལྡན་བདག་གུས་ལ། །བཀའ་
དྲིན་གནང་བར་མཛད་པའི་རིགས། །སངས་རྒྱས་འགྲོ་འཁོར་བྱ་དོན་སྩོལ། །བྱང་ཆུབ་སེམས་དཔའ་འབྲས་གནས་དང་། །གཞན་ཡང་གང་དག་གསང་སྔགས་ལྷ། །ལྷ་དང་འཇིག་རྟེན་སྐྱོང་བ་དང་། །འབྱུང་པོ་བྱང་ཆུབ་བསྟན་གནས་དང་། །སེམས་ཅན་བསྟན་ལ་མངོན་དགའ་དང་། །
เล่ม ๗๖ · หน้า 83b
གང་སུ་རྡོ་རྗེའི་སྤྱན་ལྡན་རྣམས། །བདག་ལ་ཡང་དག་དགོངས་སུ་གསོལ། །བདག་ནི་ཆེ་གེ་རྡོ་རྗེ་ཆེ། །ཆོ་ག་འབྱུང་བའི་དཀྱིལ་འཁོར་ནི། །ཇི་ལྟར་ནུས་པར་ཉེར་སྤྱོད་པས། །འགྲོ་བ་སྦྱང་ཕྱིར་བྲི་བར་བྱ། །ཞེས་དོན་མངོན་དུ་བྱེད་ཅིང་ལན་གསུམ་བརྗོད་པས་གསོལ་བ་གདབ་པར་བྱའོ། །
ཞེས་པ་ལྷ་ལྷག་པར་གནས་པའི་ཆོ་གའོ།། །།དེའི་རྗེས་ལ་ཡེ་ཤེས་ཀྱི་ཐིག་ལ་སོགས་པའི་དོན་དུ་དཀྱིལ་འཁོར་གྱི་ས་གཞིའི་སྟེང་གི་ནམ་མཁར་དཀྱིལ་འཁོར་གྱི་འཁོར་ལོ་བློས་བཀོད་ནས་ཡང་དག་པར་མཆོད་དེ་ཤར་དུ་མངོན་པར་ཕྱོགས་ཤིང་དཀྱིལ་འཁོར་གྱི་དབང་ཕྱུག་གི་རྣལ་
འབྱོར་དང་ལྡན་པས་གཞོན་ནུ་མ་མ་ཉམས་པས་བཀལ་བ་འམ་དཔའ་བོའི་རིན་གྱིས་ཉོས་པའི་སྐུད་པ་ལྔ་པ་ལྔ་སྣོད་ལྔར་གནས་པ་རྣམས་དྲི་ཞིམ་པོ་དང་ལྡན་པའི་ཁ་དོག་དཀར་པོ་དང་སེར་པོ་དང་དམར་པོ་དང་ལྗང་གུ་དང་ནག་པོ་རྣམས་དང་ཡུངས་ཀར་གྱི་ཕྱེ་མ་དང་བདུད་རྩི་ལྔ་བསྲེས་པ་རྣམས་
ཀྱིས་སོ་སོར་ཁ་བསྒྱུར་ལ་ལག་པ་གཡོན་པའི་མཐིལ་དུ་སོར་མོའི་རྩེ་མོ་ནས་བརྩམས་ཏེ་མཐེ་བོང་གི་བར་ཇི་སྲིད་པར་རྣམ་པར་བཀོད་ལ། བྷྲཱུཾ་ཨཱཾ་ཛྲཱྀཾ་ཁཾ་ཧཱུཾ་གི་ཡི་གེ་རྣམས་ལས་བསྐྱེད་པའི་དེ་བཞིན་གཤེགས་པ་ལྔའི་ངོ་བོར་གྱུར་པར་བསྒོམས་ཏེ། ནམ་མཁའ་ལ་བཞུགས་སུ་གསོལ་
བའི་རང་རང་གི་ཕྱོགས་ཀྱི་དེ་བཞིན་གཤེགས་པ་བསྡུས་པར་གྱུར་པ་དེ་བཞིན་གཤེགས་པ་ལྔའི་ཐུགས་ཀར་བྷྲཱུཾ་ཡིག་ལ་སོགས་པ་ལས་གྲུབ་པའི་ཡེ་ཤེས་ཀྱི་སྐུད་པ་འོད་ཟེར་དང་བཅས་པར་བལྟ་ཞིང་། ཨོཾ་ཨཱཿཤཱ་ཤྭ་ཏ་བཛྲ་སཱུ་ཏྲམྨེ་པྲ་ཡཙྪ་མ་ཧཱ་མཎྜལ་སཱུ་ཏྲ་ཎཱ་ཡ་ཧཱུཾ། ཞེས་པ་
འདིས་རྣམ་པར་སྣང་མཛད་ལ་གསོལ་བ་གདབ་པར་བྱ་སྟེ། མིང་ཡོངས་སུ་བསྒྱུར་ནས་རིན་ཆེན་འབྱུང་ལྡན་ལ་སོགས་པ་ལ་ཡང་ངོ་། །མིག་གཉིས་ཛཿཡིག་ལས་སྐྱེས་པའི་ཟླ་བ་དང་ཉི་མ་སེར་པོའི་རང་བཞིན་དུ་བྱས་ཏེ། ཨོཾ་དཱི་པྟ་དྲྀཥྚི་ཨཾ་ཀུ་ཤ་ཛཿཞེས་བརྗོད་ཅིང་རབ་ཏུ་མྱུར་བར་
གཡོ་བའི་མིག་གི་རྫི་མ་འདེགས་ཤིང་འགུགས་པ་འབར་བའི་ལྟ་སྟངས་ལྕགས་ཀྱུ་ལྟ་བུས་རྣམ་པར་སྣང་མཛད་ལ་སོགས་པ་བསྐུལ་བས་དེ་རྣམས་རང་གི་ཁ་དོག་ཅན་གྱི་ཐིག་སྐུད་ལག་པར་གནས་པ་རྣམས་ལ་ཐིམ་པར་བསྒོམ་མོ། །དེ་ཉིད་ཀྱི་ཕྱིར་དེ་རྣམས་ནི་མེ་ལོང་ལྟ་བུ་ལ་
เล่ม ๗๖ · หน้า 84a
སོགས་པ་ཡེ་ཤེས་ལྔའི་རང་བཞིན་ཅན་ནོ་ཞེས། རྣམ་པ་བརྒྱའི་དབྱེ་བས་ཕྱེ་བར་གྱུར་པའི་ཐིག་སྐུད་རྣམས་སོ། །དེ་ནས་རྣམ་པར་སྣང་མཛད་ལ་སོགས་པའི་གཟུགས་སམ་བགེགས་མཐར་བྱེད་ལ་སོགས་པའི་གཟུགས་ཀྱིས་སློབ་མ་ཐིག་སྐུད་འཛིན་པ་དང་ལྷན་
ཅིག་དང་པོར་སྐུད་པ་ལྔ་ལྔ་རེ་རེར་བསྒྲིལ་བའི་ཐིག་སྐུད་བྱ་ཞིང་། དེའི་རྗེས་ལ་དེ་བཞིན་དུ་ལྔ་རྣམས་གཅིག་ཏུ་བསྒྲིལ་བའི་ཐིག་སྐུད་བྱ་སྟེ། ཨོཾ་ཨཱཿཨ་ནྱོ་ནྱ་ཨ་ནུ་ག་ཏཱཿསརྦ་དྷརྨཱཿཔ་ར་སྤཱ་ར། ཨ་ནུ་པྲ་བིཥྚ་སརྦ་དྷརྨཱཿཨ་དི་ཨནྟ་ཨ་ནུ་པྲ་བིཥྚཿསརྦ་དྷརྨཱཿཨོཾ་ཨཱཿཧཱུཾ་ཞེས་བརྗོད་ཅིང་བསྒྲིལ་བའི་
ཐིག་སྐུད་སློབ་དཔོན་དང་སློབ་མའི་ལག་པ་གཡོན་པ་དག་གི་མཛུབ་མོ་ནས་བརྩམས་ཏེ་སོར་མོ་བཞིའི་ནང་དུ་བཅུག་ཅིང་རྒྱབ་ནས་དཀྲིས་ལ་སླར་ཡང་བཅུག་ཅིང་དཀྲིས་ནས་རྡོ་རྗེ་ཁུ་ཚུར་བྱས་པའི་མཐེ་བོང་དང་མཛུབ་མོའི་རྒྱབ་ཀྱིས་ས་ལ་སྦྱར་ཏེ། མནན་པའི་བར་གྱི་ལྷག་མ་མ་གཏོགས་
པ་ཇི་ལྟ་བར་སྲིད་དུ་དཀྱིལ་འཁོར་གྱི་ཉིས་འགྱུར་དང་སྦོམས་སུ་ནས་ཉི་ཤུ་ཆས་ལྷག་པའི་སློབ་དཔོན་གྱི་ནས་ཀྱི་ཚད་དུ་འགྱུར་རོ། །ནས་བདུན་གྱིས་སོར་ཚིགས་སོ་ཞེས་ཆོས་མངོན་པ་ལས་བཤད་པའོ། །སྦོམས་སུ་འཁོར་ལོའི་བརྒྱད་ཆའི་ཉི་ཤུ་ཆར་བཤད་པ་ནི་སོར་ཉི་ཤུ་རྩ་བཞིའི་བདག་ཉིད་ཁྲུ་
གང་བའི་དཀྱིལ་འཁོར་ཁོ་ནའི་ཡིན་ཏེ། ཁྲུ་གཉིས་ལ་སོགས་པའི་དཀྱིལ་འཁོར་གྱི་ཚད་ཀྱང་དེས་ཉེ་བར་མཚོན་ནས་ཚད་དང་ལྡན་པར་རིག་པར་བྱའོ། །དེ་བཞིན་དུ་ཁྲུ་དྲུག་པའི་ཚད་ཅན་གྱི་དཀྱིལ་འཁོར་ལ་ནི་ཐིག་སྐུད་སྦོམས་སུ་མཐེའུ་ཆུང་གི་ཚད་དུ་བྱ་ཞིང་གཞན་དུ་རྗེས་སུ་མཐུན་པ་བྱའོ་
ཞེས་པ་ནི་ཀུན་དགའ་སྙིང་པོ་ལ་སོགས་པའིའོ། །ཐིག་སྐུད་བསྒྲིལ་བའི་མཐར་དཀྱིལ་འཁོར་གྱི་ས་གཞིར་དྲིའི་ཆུ་དང་བདུད་རྩི་ལྔ་དང་ཙནྡན་ལ་སོགས་པའི་དྲི་བཟངས་ཀྱིས་བྱུགས་ལ་ཡི་གེ་གསུམ་གྱིས་བྱིན་གྱིས་བརླབས་ཏེ། གསེར་ལ་སོགས་པའི་སྣོད་གཙང་མར་བཞག་ཅིང་། མེ་ཏོག་དང་
བདུག་སྤོས་ལ་སོགས་པ་རྣམས་ཀྱིས་ཡང་དག་པར་མཆོད་ནས་ལག་པས་རེག་ལ་ལས་ཐམས་ཅད་པའི་སྔགས་ཀྱིས་བསྲུང་བར་བྱའོ། །གཡས་པ་དང་ཅིག་ཤོས་ཀྱི་མིག་དག་མ་དང་ཊའི་ཡི་གེ་དག་ལས་ཉི་མ་དང་ཟླ་བ་དག་ཏུ་བལྟས་ཏེ། སྔར་གསུངས་པའི་བཛྲ་དྲྀཥྚི་མ་ཞེས་པས་བརྟན་པར་
เล่ม ๗๖ · หน้า 84b
བྱས་ལ། འཁྱིལ་པ་བཟླས་པའི་བདུད་རྩིའི་ཆུ་དང་ཡུངས་ཀར་དང་དྲིའི་ཆུས་གཏོར་ནས་རྡོ་རྗེ་དང་བསམ་པའི་ལག་པ་གཡས་པས་ཡང་དག་པར་རེག་ཅིང་། ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ་ཞེས་པ་འདིས་ལན་ཉི་ཤུ་རྩ་གཅིག་བཟླས་ཏེ་ལྷག་པར་གནས་པ་བྱའོ་ཞེས་པ། ཐིག་སྐུད་ལྷག་པར་
གནས་པའི་ཆོ་གའོ།། །།སླར་ཡང་དཀྱིལ་འཁོར་གྱི་ས་ལ་ཨོཾ་སརྦ་སཾ་ཤོ་དྷ་ནི་ཧཱུཾ་ཕཊ། ཅེས་པའི་སྔགས་ཀྱིས་བུམ་པ་ཐམས་ཅད་ཀྱི་ཆུས་བསང་གཏོར་བྱས་པའི་གཙང་མར་དྲིས་བྱུགས་ནས་མེ་ཏོག་གཅལ་དུ་བཀྲམ་ལ། ནམ་མཁའི་མཐིལ་དུ་གནས་པར་ཡང་འདྲི་བར་འགྱུར་བའི་དཀྱིལ་འཁོར་
ཡང་དག་པར་དམིགས་ཏེ་མཆོད་ཡོན་དབུལ་བ་སྔོན་དུ་འགྲོ་བས་ཡང་དག་པར་མཆོད་ཅིང་བསྟོད་ནས་རང་ཉིད་དེའི་རྣལ་འབྱོར་དང་ལྡན་པས་བསྒྲུབ་པའི་གྲོགས་པོ་རྣམ་པར་སྣང་མཛད་ལ་སོགས་པའི་གཟུགས་སུ་བསྒོམ་ཞིང་། རང་དང་དེའི་གཡས་པ་དང་ཅིག་ཤོས་ཀྱི་མིག་དག་ཛྫཿཡིག་ལས་སྐྱེས་
པའི་ཟླ་བ་དང་ཉི་མ་འོད་ཟེར་སེར་པོ་ཅན་དུ་བསམ་མོ། །མཉམ་པའི་རྐང་སྟབས་ཀྱིས་ཐིག་སྐུད་དེ་གཡོན་པའི་རྡོ་རྗེ་ཁུ་ཚུར་གྱིས་གཟུང་བ་ལྟེ་བར་གཟུང་ཞིང་། བསྒྲུབ་པའི་གྲོགས་པོ་དེ་དེ་ལྟར་ཐིག་སྐུད་གཟུང་བ་ལ་ཛྫཿཛྫཿཛྫཿཞེས་པའི་ཛྫཿཡིག་གསུམ་གྱིས་བསྐུལ་ཏེ། སྒྲུབ་པའི་གྲོགས་པོས་ཀྱང་
ཛྫཿཛྫཿཛྫཿཞེས་པའི་ཛྫཿཡིག་གསུམ་གྱིས་དྲངས་ནས་དེ་ཁོ་ན་བཞིན་དུ་མངོན་དུ་ཕྱོགས་ཤིང་གནས་པས་ནུབ་ཕྱོགས་སུ་གནས་ཏེ་ཁ་ཤར་དུ་བལྟ་བ་དང་ལྷོར་གནས་ཏེ་བྱང་དུ་ཁ་བལྟ་བས་ཚངས་ཐིག་གཉིས་ལྟེ་བ་དང་མཉམ་པའི་བར་སྣང་ལ་བརྐྱང་སྟེ། རྡོ་རྗེ་དང་བཅས་པའི་ལག་པ་
གཡས་པའི་མཐེ་བོང་དང་སོར་མོ་དག་གིས་ཐིག་སྐུད་གཟུང་བ་འདེབས་ཤིང་སེ་གོལ་གྱི་སྒྲ་བྱའོ། །ཐིག་གདབ་པ་ཐམས་ཅད་དུ་ཡང་། ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ་ཧཱུཾ་ཨོཾ་སྭཱ་ཧཱ་ཨཱ་ཞེས་བརྗོད་པར་བྱའོ། །སྒྲ་འདི་ནི། སེམས་ཅན་དོན་དུ་ཁྱེད་རྣམས་ཀྱི། །དུས་ཡིན་དེ་ཕྱིར་
འདིར་བྱོན་ཅིག །ཅེས་པ་ལ་སོགས་པ་སྟེ། ཐིག་གི་སྒྲས་སྤྱན་དྲངས་པའི་དེ་བཞིན་གཤེགས་པ་ཐམས་ཅད་མཉམ་པར་བྱོན་ནས་ཐིག་རྣམས་ལ་ཐིམ་པར་བསྒོམ་མོ་ཞེས་པའི་བརྡ་དོན་ནོ། །ཐམས་ཅད་དུ་ཡང་སློབ་དཔོན་དང་སྒྲུབ་པའི་གྲོགས་པོ་གཡས་སྐོར་གྱིས་འགྲོ་ཞིང་དཔལ་
เล่ม ๗๖ · หน้า 85a
བདེ་མཆོག་གི་དཀྱིལ་འཁོར་དང་དཔལ་རྡོ་རྗེ་ཕག་མོའི་དཀྱིལ་འཁོར་ལ་ནི་གཡོན་སྐོར་གྱིས་ཏེ་ཕྱོགས་ཐམས་ཅད་མཉམ་པ་ཉིད་དུ་ལྷག་པར་མོས་པར་བྱའོ་ཞེས་པ་ནམ་མཁའ་ལ་ཐིག་གདབ་པའི་ཆོ་གའོ།། །།དེ་ལ་དང་པོ་དཀྱིལ་འཁོར་གྱི་ཁང་པ་བྱ་བ་བརྩམ་པའི་དུས་སུ་ཡོངས་
སུ་དག་པའི་ས་ལ་ཚངས་པའི་ཐིག་གཉིས་པོ་ཆོ་ག་འདིས་བརྟན་པར་བྱས་ཏེ་བཏབ་ལ་ཕྱི་ནས་ཟླ་བའི་གདན་ལ་མཚན་མ་བྱ་ཞིང་། མཚན་མའི་རྗེས་སུ་འབྲངས་ནས་དཀྱིལ་འཁོར་ལ་ཚངས་པའི་ཐིག་གཉིས་གདབ་པར་བྱའོ། །དེ་ལ་འདི་ནི་རིམ་པ་སྟེ། དང་པོ་ཕུར་བུ་མཉམ་པར་གཟུགས། །
མཐོ་གང་བ་ཡི་ཟླུམ་པོ་གཅིག །བྱས་ནས་ཉི་མའི་རིམ་པ་ཡིས། །གྲིབ་མ་འགྲོ་དང་འོང་བ་ཉིད། །དེར་ནི་ཐིག་ལེ་གཉིས་སྦྱིན་ཞིང་། །ཚད་དེ་དེ་བཞིན་གཞན་དུ་ཡང་། །ཐིག་ལེར་བཟུང་ནས་ཐིག་གདབ་སྟེ། །བྱ་རོག་རྗེས་དེར་མཚན་མ་བྱ། །དང་པོར་ནུབ་དང་ཤར་དག་སྟེ། །སླར་
ཡང་ལྷོ་དང་བྱང་དག་ཏུ། །མཁའ་ཡི་ཐིག་ལེ་བཞིན་དུ་དེར། །ཚངས་པའི་ཐིག་གཉིས་འགྲོ་བར་བྱ། །དེ་དག་མཉམ་པར་སྨད་པ་ཡི། །ལག་པ་དག་གིས་རབ་ཏུ་གདབ། །སླར་ཡང་ཚངས་ཐིག་ལག་བཟུང་ནས། །བྱ་རོག་རྗེས་དེར་མཚན་མ་བྱ། །དེར་ནི་ཟུར་གྱི་ཐིག་གཉིས་ཏེ། །
རྩ་བའི་ཐིག་ཀྱང་རིམ་པས་གདབ། །གཡོན་པ་སྐྱིལ་ཀྲུང་ཕྱེད་པ་དང་། །རྐང་པ་གཡས་པ་འདུས་པས་སོ། །དེ་ལས་བཟློག་སྟེ་འདུག་པ་ཡི། །སློབ་མ་ལྷན་ཅིག་བློ་ལྡན་གྱིས། །དཀྱིལ་འཁོར་ཐིག་གདབ་རྡོ་རྗེ་ཅན། །ནམ་མཁའི་ཐིག་གི་མོས་པ་བྱ། །དེ་བཞིན་ཐིག་
གདབ་གཞན་རྣམས་ལ་ཡང་ངོ་། །མཚན་མ་མེད་པས་འགྲུབ་མི་འགྱུར། །ཐིག་སྐུད་ཆད་ན་བླ་མ་ཟད། །དམན་དང་ལྷག་པ་ལས་ནི་ནད། །ཕྱོགས་རྨོངས་ན་ནི་སློབ་མ་འཁྲུལ། །ཞེས་པ་དེ་ལྟར་ཤེས་ནས་འབད་པར་བྱ་ཞིང་། གལ་ཏེ་ཐིག་འདེབས་པ་ན་འགའ་ཞིག་ཏུ་འབྱོར་པ་
མེད་པ་དང་། །གྲོགས་པོ་མེད་པ་དང་མི་དགའ་བར་གྱུར་ན་དེའི་ཚེ་ཕུར་བུ་ལ་བཅིངས་ནས་རང་ཉིད་ཀྱིས་ཐིག་གདབ་པར་བྱའོ། །དེར་ཡང་ཤིན་ཏུ་མཉམ་གཞག་པའི། །སློབ་དཔོན་སློབ་མ་ལྷན་ཅིག་ཏུ། །རིམ་འདིས་བློ་དང་ལྡན་པ་ཡིས། །དཀར་པོའི་ཐིག་ནི་གདབ་པར་བྱ། །ཆུ་
เล่ม ๗๖ · หน้า 85b
བདག་གནས་པའི་སློབ་དཔོན་དང་། །མངོན་པར་ཕྱོགས་པའི་སློབ་མ་ནི། །དབང་པོའི་ཕྱོགས་སུ་གནས་པས་ཀྱང་། །འདིར་ནི་ཚངས་པའི་ཐིག་གདབ་བྱ། །གཤིན་རྗེའི་ཕྱོགས་དང་ལུས་ངན་པོར། །གནས་པའི་གསང་སྔགས་རིག་པ་དང་། །ལྷན་ཅིག་པ་ཡི་སློབ་མ་ཡིས། །ཡང་དག་ཚངས་
ཐིག་གཉིས་པ་གདབ། །མེ་མཚམས་གནས་པའི་སློབ་དཔོན་དང་། །རླུང་དུ་གནས་ཤིང་རང་གི་ནི། །ལྷག་པའི་ལྷ་ཡི་སྦྱོར་ལྡན་པས། །ཟུར་གྱི་ཐིག་ནི་གདབ་པར་བྱ། །དབང་ལྡན་ཕྱོགས་ནས་བླ་མ་དང་། །བདེན་བྲལ་སོང་བའི་སློབ་མ་ཡིས། །ཟུར་གྱི་ཐིག་ནི་གཉིས་པ་ཡང་། །ཡང་དག་
པ་ནི་གདབ་པར་བྱ། །མེ་མཚམས་གནས་པའི་སློབ་དཔོན་དང་། །ངེས་པར་མངོན་ཕྱོགས་སློབ་མ་ནི། །དབང་ལྡན་མཚམས་སུ་གནས་པ་ཡིས། །རྩ་བའི་ཐིག་གཉིས་གདབ་པར་བྱ། །དེ་ཉིད་དུ་ནི་རྡོ་རྗེ་ཅན། །བདེན་བྲལ་དུ་ནི་གནས་པའི་བུ། །མཁས་པ་ཐིག་རྣམས་ཤེས་པ་ཡིས། །
ལྷོ་ཡི་ཐིག་ནི་གདབ་པར་བྱ། །དེ་ཉིད་དུ་གནས་སློབ་མ་དང་། །རླུང་དུ་གནས་པའི་སྔགས་པ་དག །བདེན་བྲལ་རླུང་དུ་གནས་པ་ཡི། །གསུམ་པའི་ཐིག་ནི་གདབ་པར་བྱ། །དེ་ཉིད་དུ་གནས་རྡོ་རྗེ་ཅན། །ཞི་བའི་ཕྱོགས་སུ་གནས་པའི་བུ། །ལས་རྣམས་ཤེས་པས་ཕྱིན་ནས་ནི། །རྩ་ཐིག་
བཞི་པ་གདབ་པར་བྱ། །བཅོམ་ལྡན་འདས་ཀྱིས་མཁའ་འགྲོ་མ་རྡོ་རྗེ་གུར་ལས་ཇི་ལྟ་བ་བཞིན་དུ་གསུངས་པ། དང་པོར་ཚངས་པའི་ཐིག་ཡིན་ཏེ། །གཉིས་པ་ཟུར་གྱི་ཐིག་ཡིན་ནོ། །གསུམ་པ་ལ་ནི་ངོས་བཞི་རུ། །ཐིག་བཞི་རབ་ཏུ་གདབ་པར་བྱ། །ཞེས་སོ། །དེ་ལ་འདིར་རྩ་བའི་ཐིག་གི་བརྒྱད་ཆ་ནི་སྒོའོ། །
སྒོའི་ཆ་ནི་ཆ་ཆུང་སྟེ་ཆ་ཆུང་དང་པོ་དང་ཀྲྀ་ཤ་དང་ཆ་ཤས་ཞེས་རྣམ་གྲངས་སོ། །ཆ་ཆུང་གཉིས་ཀྱི་བདག་ཉིད་ནི་ཆ་སྟེ་ཆ་ཆུང་བཞི་ནི་ཆ་ཆེན་ནོ། །ཞི་བ་ཞེས་པ་ནི་ཆ་ཆུང་ཕྱེད་ལ་རྣམ་པར་བལྟ་བར་བྱའོ་ཞེས་པ་དཀར་པོས་ཐིག་གདབ་པའི་ཆོ་གའོ།། །།ད་ནི་དཀྱིལ་འཁོར་ཐམས་ཅད་
ལ་ཐུན་མོང་བའི་དཀྱིལ་འཁོར་གྱི་ཐིག་བརྗོད་པར་བྱ་སྟེ། ཆ་གཅིག་དང་ནི་ཆ་ཆུང་བདུན། །གསུམ་པའི་མཐར་ནི་བཞི་པ་ལ། །ཆ་ཆུང་ཆ་དང་ཆ་ཆུང་ཆ། །ཆ་ཆུང་རེ་རེ་མཉམ་པར་བྲི། །ར་ཡི་རྩེ་མོའི་མཐར་ཐུག་པ། །དེ་ནས་གེ་སར་ཟླུམ་པོའི་ཐིག །པདྨའི་ཕྲེང་བའི་ཆ་ཆུང་
เล่ม ๗๖ · หน้า 86a
གཉིས། །རྡོ་རྗེ་ཕྲེང་བའི་ཆ་ཆུང་གཉིས། །འོད་ཟེར་ཕྲེང་བའི་ཆ་ཆུང་བཞི། །ཐམས་ཅད་ཀྱང་ནི་ཟླུམ་པོར་བྱ། །དེ་ལྟར་བརྐྱང་བའི་ཐིག་བར་ཆ། །དཀྱིལ་འཁོར་ཀུན་ལ་ཡང་དག་འགྲོ། །ལྷ་ཡི་དབྱེ་བ་ཅུང་ཟད་ཀྱིས། །རྩ་བའི་དཀྱིལ་འཁོར་ནང་དུ་ནི། །ཐིག་གི་དབྱེ་དང་ཕྱི་རོལ་དུ། །དབྱེར་
མེད་བློ་ལྡན་གྱིས་རེག་བྱ། །ད་ནི་རིམ་པ་ཇི་ལྟ་བར། །སྒོ་སོགས་དབྱེ་བ་བརྗོད་པར་བྱ། །སྟེང་དུ་བདུན་ཏེ་གཉིས་ངོས་སུ། །གཉིས་ནི་སྟེང་དུ་ངོས་གཉིས་སུའོ། །སྟེང་དུ་གསུམ་གསུམ་སྟོང་པ་ལ། །བཞི་ནི་སྟེང་དུ་དེ་བཞིན་སླར། །སྟེགས་བུར་དྲུག་ཀྱང་དེ་བཞིན་དབྱི། །གོས་དང་ཀ་བར་
གསུམ་གསུམ་མོ། །ཚངས་པའི་གཉིས་སུ་རེ་ཁཱ་བཞི། །ཕྱོགས་སུ་ཡང་ནི་གཉིས་གཉིས་དབྱི། །གོས་ཀྱི་མཐར་ཡང་དེ་བཞིན་དབྱི། །རིན་ཆེན་དྲ་ཕྱེད་དབུས་གནས་དང་། །ཤར་བུ་དང་ནི་མདའ་ཡབ་དང་། །ཚོན་དང་སྟེགས་བུའི་སར་དེ་བཞིན། །ཟུར་ལས་ལྷག་པའི་རེ་ཁཱ་ཡི། །ཐིག་རྣམས་
ཐམས་ཅད་ཀུན་ནས་དབྱི། །འདིས་ནི། སྒོ་ནི་འཁོར་ལོའི་བརྒྱད་ཆ་སྟེ། །སྟེགས་བུ་དང་ནི་བྲལ་བར་འདོད། །སྒོ་ཡི་ཚད་ཀྱིས་སྒོ་ཁྱུད་དེ། །དེ་བཞིན་ལྷ་ཡི་སྣམ་བུའོ། །སྟེགས་བུ་ཀུན་ནས་སྒོ་ཡི་ཕྱེད། །དེ་བཞིན་འགྲམ་དང་ལོགས་དང་ནི། །དྲ་བར་དྲ་ཕྱེད་ཉི་ཟླ་དང་། །མེ་ཏོག་ཕྲེང་བའི་
སྣམ་བུའོ། །ཚོན་གྱི་ས་ནི་དེ་ཕྱེད་དེ། །རྩ་ཐིག་ས་ལས་ཕྱི་རོལ་དུའོ། །ཞེས་པ་འདི་བཤད་པ་ཡིན་ནོ། །ལྷའི་སྣམ་བུ་ནི་རྩ་བའི་ཐིག་གི་ནང་དུའོ། །སྟེགས་བུ་ལ་ནི་གཟུངས་ཀྱི་སྣམ་བུ་དང་བར་གྱི་སྣམ་བུ་ཞེས་ཀྱང་བརྗོད་དོ། །འཕགས་པ་ཀླུའི་བློའི་ཞབས་ནི་མིག་སྨན་གྱི་སྣམ་བུ་བར་གྱི་
སྣམ་བུ་དང་ཡ་ཕུབས་ཀྱི་སྣམ་བུ་ཡང་མི་བཞེད་དེ། དེ་ཡང་། སྒོ་ནི་འཁོར་ལོའི་བརྒྱད་ཆ་སྟེ། །ལྷ་ཡི་སྣམ་བུ་དེ་བཞིན་ནོ། །སྒོ་ཡི་ཚད་ཀྱི་སྒོ་ཁྱུད་དེ། །འགྲམ་དང་ལོགས་ཀྱང་དེ་བཞིན་ནོ། །ཞེས་པའི་ལུང་ལས་སོ། །འདིར་ནི་སྒོ་དང་རྟ་བབས་དག་གི་དབུས་སུ་བར་གྱི་ས་ལ་
བར་གྱི་སྣམ་བུ་དང་མུན་པའི་སྣམ་བུ་དང་སྟོང་པ་ཞེས་ཀྱང་བརྗོད་དོ། །རྟ་བབས་སྒོ་ལས་སུམ་འགྱུར་ཏེ། །དེ་ཡང་སྣམ་བུ་བཅུ་གཅིག་པ། །བྲེ་ཕུལ་ཤར་བུ་རིན་ཆེན་དང་། །རྨིག་པ་རྣམས་ནི་ཆ་ཆུང་བཞི། །མུན་པའི་ཆ་ཆུང་ཕྱེད་དང་གཉིས། །བ་རན་ལ་ནི་ཆ་ཆུང་གཅིག །དེ་
เล่ม ๗๖ · หน้า 86b
བཞིན་སླར་ཡང་མུན་པ་སྟེ། །ཤར་བུ་དེ་བཞིན་ནོར་བུ་དང་། །རྨིག་པ་ཆ་ཆུང་རེ་རེར་འགྱུར། །མངའ་ཡབ་ཀྱང་ནི་དེ་བཞིན་ནོ། །འདི་རྣམས་དཔངས་ཀྱི་ཚད་དུ་ནི། །བཤད་དེ་རྒྱར་ཡང་བརྗོད་པར་བྱ། །བཅུ་དྲུག་བྲེ་ཕུལ་ཚད་དུ་འགྱུར། །ཤར་བུ་ལ་ནི་བཅོ་བརྒྱད་བཤད། །རིན་ཆེན་རྨིག་པ་དེ་བཞིན་བྱ། །
མུན་པ་ལ་ནི་བཅུ་བཞིར་འགྱུར། །བ་རན་ལ་ནི་བཅུ་དྲུག་ཡིན། །སླར་ཡང་མུན་པ་བཅུ་གཉིས་ཡིན། །ཤར་བུ་ལ་ནི་བཅུ་བཞི་དང་། །ནོར་བུ་རྨིག་པ་དེ་བཞིན་ཉིད། །མདའ་ཡབ་ལ་ནི་བཅུར་འགྱུར་ཏེ། །ཆོས་ཀྱི་འཁོར་ལོ་ཆ་ཆུང་གཉིས། །ར་ལ་ཆ་ཆུང་གཉིས་དེ་རྣམས། །དཀྱིལ་འཁོར་
ཀུན་ལ་ཀུན་དུ་འགྲོ། །ཆ་ཆུང་ཕྱེད་དང་བཞི་པའི་ཐིག །ཚངས་པ་ལ་ནི་གཟུང་བྱས་ནས། །ཆ་ཆུང་བདུན་པའི་ཟླུམ་པོ་དེར། །འཁྱོག་པོའི་དོན་དུ་རབ་མཛེས་བྱ། །ཚངས་པའི་གཡས་དང་གཡོན་དག་ཏུ། །སླར་ཡང་ཆ་ཆུང་གསུམ་གྱི་བར། །དེ་བཞིན་ཉིད་དུ་ཟླུམ་པོ་བསྐོར། །ཟླ་ཕྱེད་ལྟ་བུར་
མཛེས་པ་བྱ། །དེ་ཉིད་ནང་དུ་ཟླུམ་པོ་ནི། །སླར་ཡང་ཆ་ཆུང་ཕྱེད་ཀྱི་བར། །རིན་ཆེན་ལ་སོགས་བྲི་དོན་དུ། །བློ་བཟང་ཀྱིས་ནི་དེ་བཞིན་བསྐོར། །ནང་དུ་ལྷག་པའི་རེ་ཁཱ་ཀུན། །ཀུན་ནས་རབ་ཏུ་དབྱི་བར་བྱ། །སྣམ་བུ་རྣམས་ཀྱི་སྟེང་འོག་ཏུ། །ཐིག་ནི་སྦྱིན་བྱ་གཉིས་པ་ལས། །མཛེས་པའི་དོན་དུ་
འབད་པས་དེར། །འཁྱོག་པོ་ཡི་ནི་ནང་དུ་ཡང་། །ཚངས་པ་ལ་ནི་ཆ་ཆུང་བཞིར། །བཟུང་ནས་སླར་ཡང་སྒོ་གསུམ་བར། །རྭ་ཡི་དོན་དུ་མཛེས་པའི་ཐིག །ཟླ་བ་ཕྱེད་པ་ལྟ་བུར་བསྐོར། །དེ་ཉིད་གཡས་དང་གཡོན་དག་ཏུ། །ཆ་ཆུང་གསུམ་གྱི་བར་དུ་ཡང་། །དེ་བཞིན་ཉིད་དུ་ཟླུམ་པོ་
བསྐོར། །རྡོ་རྗེ་སློབ་དཔོན་མཁས་པས་སོ། །ཆུ་སྲིན་ཁ་ལས་ཐོན་པའི་རྭ། །འབར་བའི་ཕྲེང་བས་བརྒྱན་པར་བྱ། །རྟ་བབས་སྟེང་དུ་འཁོར་ལོའི་ངོས། །གཉིས་སུ་རི་དགས་རི་དགས་མོ། །ཆ་ཆུང་ཕྱེད་ལས་རིང་བར་ནི། །མགྲིན་པ་གྱེན་དུ་འགྲེང་བ་བྲི། །དེ་དག་གི་ནི་མཇུག་མ་རུ། །
མཛེས་པའི་གདུགས་གཉིས་བྲི་བར་བྱ། །རྟ་བབས་འོག་ཏུ་བླ་རེ་ནི། །དྲིལ་བུར་བཅས་ཤིང་རྔ་ཡབ་ལྡན། །གྲུབ་པ་རིག་པ་འཛིན་པ་འམ། །སྙིང་པོར་མཁའ་འགྲོ་མ་ཉིད་གཉིས། །ལག་པར་མཆོད་རྫས་འཛིན་པ་དག །སླར་ཡང་དཀྱིལ་འཁོར་འཇུག་པར་བྱ། །དད་པ་བྱ་ཁྱུང་མི་
เล่ม ๗๖ · หน้า 87a
འམ་ཅི། །སེང་གེ་ལ་སོགས་རབ་མཛེས་བྱ། །སྣམ་བུ་རྣམས་ཀྱི་མཐར་བྲི་ཞིང་། །དེ་བཞིན་བ་དན་ཕྲ་མོ་རྣམས། །རྭ་ཡི་གཡས་དང་གཡོན་དུ་ཡང་། །བུམ་པར་གནས་པའི་དཔག་བསམ་ཤིང་། །རིན་ཆེན་བརྒྱད་དང་མཉམ་པར་ལྡན། །འཁྲི་ཤིང་རྣམས་ཀྱིས་ཡོངས་སུ་གང་། །
སྣ་ཚོགས་མེ་ཏོག་འབྲས་བུ་དང་། །སྣ་ཚོགས་བྱ་ཀུན་སྒྲ་སྒྲོགས་དང་། །གྲུབ་པ་རིག་པ་འཛིན་རྣམས་ཀྱིས། །ཀུན་ནས་ཡོངས་སུ་བསྐོར་བ་དང་། །སྤྲིན་ལ་ངེས་པར་གནས་པའི་གཟུགས། །དེ་རྣམས་ཐམས་ཅད་བྲི་བྱ་ཞིང་། །སྒོ་རྣམས་སུ་ནི་རྒྱལ་མཚན་བྱ། །བུམ་པ་གནས་པའི་
གཡས་གཡོན་དུ། །སེང་གེ་ངང་པ་རྨ་བྱ་དང་། །ཆུ་སྲིན་ཉ་རྣམས་ཀྱིས་མཚན་ཅིང་། །བ་དན་སྣ་ཚོགས་གཡོ་བ་ཅན། །དྲིལ་བུ་སིལ་སིལ་སྒྲོགས་པའོ། །ཟུར་རྣམས་སུ་ནི་གདུགས་བྱ་ཞིང་། །གཞན་ཡང་བ་དན་ཕྲ་མོ་རྣམས། །མཚན་མ་སོགས་དང་བྲལ་བ་སྟེ། །སྣ་ཚོགས་མདོག་
ཅན་ཀུན་ནས་བྱ། །གཞན་ཡང་དུར་ཁྲོད་རྣམས་ཀྱི་ནི། །ཁྱད་པར་དཀྱིལ་འཁོར་རྣམས་ལ་ཡང་། །འོད་ཟེར་ཕྲེང་བ་ཆ་ཆུང་གཉིས། །རྡོ་རྗེ་ཕྲེང་བ་ཆ་ཆུང་གཅིག །པདྨའི་ཕྲེང་བ་དེ་བཞིན་བྱ། །དུར་ཁྲོད་ལ་ནི་ཆ་ཆུང་བཞི། །སྐལ་ལྡན་མཉམ་པར་འོངས་པ་ན། །རབ་ཏུ་འབད་པས་བྲི་བྱ་
སྟེ། །སྐལ་མེད་ཡང་དག་འོངས་པ་ན། །དམ་ཚིག་བསྲུང་བས་མི་བྱ་ཉིད། །དེ་ནི་རྡོ་རྗེ་མཁའ་འགྲོའི་རྒྱུད་ལས་ཀྱང་གསུངས་ཏེ། །ཚོན་གྱི་ས་ཡི་ཉིས་འགྱུར་ཚད། །ཕྱི་རོལ་འོད་ཀྱི་དཀྱིལ་འཁོར་ཏེ། །འཁོར་ས་དེ་ཡི་ཕྱི་རོལ་དུ། །ཤིང་སོགས་དུར་ཁྲོད་བརྒྱད་པོའོ། །ཞེས་པའི་གསུང་
གིས་སོ། །གཞན་ཡང་ཀུན་དགའ་སྙིང་པོའི་རྟ་བབས་ཀྱང་བརྗོད་པར་བྱ་སྟེ། མི་བདག་ཉེས་པ་གསུམ་ཉི་མ། །མི་བདག་ཕྱོགས་དང་མི་བདག་གསུམ། །ཕྱོགས་ཏེ་ཐད་ཀར་ཆ་ཆུང་རྣམས། །རྟ་བབས་སྣམ་བུའི་རིམ་པ་ཡིན། །ཞེས་པའང་ཀུན་དུ་གྲོལ་བའོ། །གཞན་ཡང་ཕྱོགས་
གང་ལ་སྒོ་འཁོར་ལོའི་བཅུ་ཆའམ་འཁོར་ལོའི་དགུ་ཆར་འགྱུར་བ་ལ་ནི། དཀྱིལ་འཁོར་ལ་ཡང་མདའ་ཡབ་ཀྱི་མཐར་ཐུག་པ་ལ་ཆ་ཆུང་དྲུག་ཅུ་རྩ་བཞི་སྟེ། །ཕྱོགས་དེ་ལ་ནི་རྟ་བབས་ཀྱི་རྒྱར་ཆ་ཆུང་བཅུ་གཉིས་དང་། དཔངས་སུ་ཆ་ཆུང་བཞིར་འགྱུར་རོ། །འོན་ཀྱང་སྣམ་བུ་ནི་བཅུ་
เล่ม ๗๖ · หน้า 87b
གཅིག་སྟེ། དེ་ལྟར་ཡང་། །ཤར་བུ་རིན་ཆེན་གནས་དང་གསེར། །ཆུ་སྲིན་དེ་ནས་གསེར་དང་ནི། །གནས་དང་རིན་ཆེན་ཡང་དག་གནས། །གསེར་དང་མདའ་ཡབ་དེ་དག་གོ། །གནས་ཞེས་བྱ་བ་ནི་རྨིག་པའི་རྣམ་གྲངས་སོ། །ཆ་ཆེན་ཆ་ཡི་དབྱེ་བ་ཡིས། །དཔངས་ཀྱི་ཚད་རྣམས་ཞེས་བྱ་སྟེ། །
ནོར་དང་ནོར་དང་ཉི་མ་དང་། །རྒྱལ་བ་ནོར་དང་རྒྱལ་བ་དང་། །ཉི་མ་ནོར་དང་ཉི་མ་དང་། །རྒྱལ་བ་ནོར་རྣམས་རིམ་པ་བཞིན། །དཔངས་ཀྱི་ཚད་དུ་བཤད་པ་སྟེ། །རྒྱར་ནི་འདི་རྣམས་བརྗོད་པར་བྱ། །ཚངས་པའི་གཡས་དང་གཡོན་དག་ཏུ། །ཆ་ཆུང་ཕྱེད་བཅས་ཆུ་གཏེར་མཐར། །ཆ་ཆུང་ཕྱེད་དང་གཉིས་
པའི་ཐིག །དེ་བཞིན་ཆ་ཆུང་གཉིས་ནས་ནི། །སྣམ་བུ་གཉིས་པ་གསུམ་པ་དག །ཆ་ཆུང་གཉིས་དང་ཆ་ཆུང་བཞི། །ཆ་ཆུང་བཞི་དང་བཞི་པ་ནི། །ཆ་ཆུང་གཉིས་ཏེ་ཕྱེད་དང་ནི། །བཞི་ནས་ཕྱེད་དང་གསུམ་པ་དང་། །གསུམ་ནས་དྲུག་པ་ཆ་ཆུང་གསུམ། །དེ་ནས་ཆ་ཆུང་བརྒྱད་པ་
གསུམ། །བདུན་པ་གཅིག་དང་མཐར་དྲུག་པའོ། །དེའི་ཕྱིར་ཆ་ཆུང་རིག་བྱེད་མཐར། །ཟླུམ་པོ་ཆ་ཆུང་གཉིས་དེ་བཞིན། །ཆ་ཆུང་གཉིས་པ་ཟླུམ་པོའི་ཐིག །དེ་ནི་ཆ་ཆུང་བཞི་པའི་མཐར། །ཞེས་པ་རྒྱར་རྟ་བབས་སྒོ་ལས་སུམ་འགྱུར་གྱི་ཕྱོགས་ཀྱང་ངོ་། །དེ་ལྟར་ཕྱོགས་གཉིས་
ཀ་ཡང་བདག་གིས་བརྗོད་དོ། །ཕྱོགས་གཉིས་པ་ལ་སྙིང་པོའི་དཀྱིལ་འཁོར་ལས་ཉིས་འགྱུར་དུ་ཕྱིའི་དཀྱིལ་འཁོར་གསུངས་པ་ནི། །པདྨའི་གེ་སར་གྱི་ཟླུམ་པོའི་ཐིག་ཚུན་ཆད་དོ། །ཕྱོགས་དང་པོ་ལས་ནི་འཁོར་དང་བཅས་པའི་སྙིང་པོའི་དཀྱིལ་འཁོར་ལས་འོད་ཟེར་ཕྲེང་བའི་བར་ཇི་
སྲིད་པའོ། །རྟ་བབས་ཀྱི་ཀ་བ་ལས་ཕ་རོལ་པདྨའི་གེ་སར་ཟླུམ་པོའི་ཐིག་ལས་ཚུ་རོལ་དུ་ཆ་ཆུང་བཞི་པའི་རྟ་བབས་སོ་ཞེས་པ་ནི་ཕྱོགས་གཉི་ག་དང་ཡང་མི་མཐུན་པས་སྤངས་སོ། །འདིར་སྒོ་དང་སྒོ་ཁྱུད་ཀྱི་མཚམས་སུ་ཆ་ཆུང་གཅིག་ལ་ཟླ་ཚེས་ལ་གནས་པའི་རིན་པོ་ཆེ་དམར་པོ་འམ་སེར་
པོ་འམ་ལྗང་གུ་འམ་ནག་པོ་ཡང་རུང་སྟེ། །སྟེང་དུ་རྡོ་རྗེ་ཕྱེད་པས་མཚན་པ་འམ་ཡོངས་སུ་རྫོགས་པའི་རྡོ་རྗེས་མཚན་པ་བྲིའོ། །དེ་ལྟར་ཡང་། །ཚོན་གྱི་ས་ལས་ཕྱི་ཡི་ཟུར། །སྒོ་དང་སྒོ་ཁྱུད་མཚམས་རྣམས་སུ། །ཟླ་བ་རིན་ཆེན་རྡོ་རྗེས་མཚན། །ཀུན་ནས་ཡོངས་སུ་འབར་བ་ཡིན། །
เล่ม ๗๖ · หน้า 88a
ཞེས་གསུངས་པའི་ཕྱིར་རོ། །རྟ་བབས་ཀྱི་ཀ་བ་རྣམས་ནི་སྟེགས་བུ་གྲུ་བཞི་པ་ལ་གནས་པའི་བུམ་པ་ལ་གནས་པའོ། །དེ་ལྟར་ཡང་། ཆུ་སྲིན་ཁ་ནས་ར་ཡི་བར། །རྟ་བབས་སྒོ་ལས་སུམ་འགྱུར་ཏེ། །སྟེགས་བུ་བུམ་པ་ལས་བྱུང་བའི། །རྟ་བབས་ཀ་བ་ངེས་པར་གནས། །
ཞེས་གསུངས་སོ། །དེ་རྣམས་ཀྱི་རྩ་བ་དང་རྩེ་མོ་ལ་ནོར་བུས་སྤྲས་པའོ། །དབུས་སུ་གླང་པོ་ཆེའི་སྟེང་དུ་དཔུང་པས་བཏེག་པའི་སེང་གེའོ། །རྟ་བབས་ཀྱི་གདུང་ལས་འཕྱང་བའི་རིན་པོ་ཆེའི་པ་ཏྲ་འཕྲོ་བ་ལས་ཇི་ལྟར་མཛེས་པར་དཔྱངས་པའི་ཁ་དོག་དམར་པོ་དང་སེར་པོ་ལ་སོགས་པའམ། སྣ་ཚོགས་
པའི་གོས་དང་རིན་པོ་ཆེའི་ཡུ་བ་ཅན་གྱི་རྔ་ཡབ་རྣམས་སོ། །ཁ་ཅིག་ཏུ་ནི་དར་དཔྱངས་ཀྱི་སྣམ་བུ་ལ་གླང་པོ་ཆེའི་སྟེང་དུ་སེང་གེའི་ཁ་ནས་འཕྱང་བའི་དོ་ཤལ་དང་ཀ་བའི་དབུས་སུ་མེ་ལོང་ཉིད་དོ་ཞེས་གསུངས་སོ། །རིན་པོ་ཆེའི་སྣམ་བུ་ལ་ནི་ཟུར་ལ་གྲུ་གསུམ་དང་། གྲུ་བཞི་དང་། ཐིག་ལེ་དང་། ཟླུམ་
པོ་རྣམས་གོ་རིམས་བཞིན་དུ་རིན་པོ་ཆེས་སྤྲས་པ་ནི་ཀ་བ་སོ་སོའི་གཞོགས་སུའོ། །དྲ་བ་དང་དྲ་བ་ཕྱེད་པའི་སྣམ་བུ་ལ་ནི་གསེར་གྱི་སྐ་རགས་ཀྱི་ཕྱི་ངོས་སུ་ཆུ་སྲིན་གྱི་ཁ་ནས་བྱུང་བའི་མུ་ཏིག་གི་དོ་ཤལ་སྐུད་པ་དམར་པོས་བརྒྱུས་ཤིང་ངོས་གཉིས་དང་སྟེང་དང་འོག་ཏུ་གསེར་གྱིས་སྤྲས་པའི་ནོར་བུ་དབུས་ན་
ཡོད་པ་དང་། དོ་ཤལ་གྱི་ངོས་དག་ཏུ་ཅུང་ཟད་འཕྱང་བའི་རིན་པོ་ཆེའི་ཕྲེང་བ་འཕྱང་ཞིང་རྩེ་མོ་ལ་གསེར་གྱིས་བཅིངས་པའི་ནོར་བུ་སྦོམ་པོ་དང་ལྡན་ཞིང་མཛེས་པའི་དྲ་བ་ཕྱེད་པའོ། །ཁ་ཅིག་ཏུ་ནི་རིན་པོ་ཆེའི་ཡུ་བ་ཅན་གྱི་རྔ་ཡབ་དང་དྲིལ་བུའི་མཐར་རྔ་ཡབ་འཕྱང་བའོ། །ཁ་ཅིག་ཏུ་ནི་དྲ་བ་ཕྱེད་པའི་
ངོས་དག་ཏུ་ཡིད་དུ་འོང་བའི་མེ་ཏོག་གི་ཕྲེང་བའི་དྲ་བ་ཕྱེད་པ་འཕྱང་ཞིང་། དེའི་ངོས་སུ་སྣ་ཚོགས་པའི་གོས་ཀྱི་དྲ་བ་ཕྱེད་པའོ་ཞེས་གསུངས་སོ། །གཞན་ནི་ཟུར་རྣམས་སུ་ཡིད་དུ་འོང་བའི་མེ་ཏོག་གི་ཕྲེང་བའི་དོ་ཤལ་ཕྱེད་པ་དང་། དར་གྱི་ཆུན་པོའི་དོ་ཤལ་རྣམས་སོ། །ཁ་ཅིག་ཏུ་ནི་དོ་ཤལ་
གྱི་ནང་དུ་པདྨ་ལ་ཟླ་ཚེས་དང་རྡོ་རྗེ་ཕྱེད་པས་མཚན་པའི་ཉི་མའི་དཀྱིལ་འཁོར་རོ། །ཁ་ཅིག་ཏུ་ནི་རིན་པོ་ཆེའོ། །ཁ་ཅིག་ཏུ་ནི་པདྨ་ལ་གནས་པའི་རྡོ་རྗེའོ། །དེ་ལྟ་བུ་འདི་ནི་རྩ་བའི་དཀྱིལ་འཁོར་ལས་ཕྱི་རོལ་དུ་ཐིག་གདབ་ཅིང་བྲི་བའི་རིམ་པ་སྟེ། དཀྱིལ་འཁོར་ཐམས་ཅད་ཀྱི་ཐུན་མོང་བའོ། །ད་ནི་
เล่ม ๗๖ · หน้า 88b
ནང་གི་ཁྱད་པར་རྣམས་བརྗོད་པར་བྱ་སྟེ། སྔར་གྱི་ཐིག་རྣམས་རབ་བརྐྱང་ལ། །ཚངས་ལས་ཆ་ཆུང་ཐུབ་པ་ནས། །ཟླུམ་པོ་ཅིག་ནི་སྦྱིན་བྱ་སྟེ། །དེ་ནས་ཆ་ཆུང་ནོར་མཐར་ཡང་། །དེར་ནི་རྡོ་རྗེའི་ཕྲེང་བ་བྱ། །འོད་ཟེར་མཐར་ནི་ཆ་ཆུང་ཉིད། །ཚངས་པའི་གཡས་དང་གཡོན་དག་ཏུ། །ཆ་ཆུང་གཉིས་གཉིས་
བར་དུ་སླར། །ཀ་བའི་སྣམ་བུ་ཆ་ཆུང་རེ། །ཡང་དག་བསྲུངས་ནས་གཞན་རྣམས་དབྱི། །རེ་མིག་རྣམས་ཀྱི་སྙིང་པོ་ནི། །གྲུ་བཞིའོ་ཕྱོགས་རྣམས་དེ་ཉིད་ནི། །ཕྱོགས་བྲལ་སྤྱན་མ་ལ་སོགས་པའི། །གྲུ་གསུམ་དུ་ཡང་འགྱུར་བ་ཡིན། །གང་ཞིག་མཐར་ནི་ལྷ་སྣམ་ལ། །གཟུགས་ཀྱི་རྡོ་རྗེ་མ་ལ་
སོགས། །ལྷག་པའི་རེ་ཁཱ་གང་ཡིན་པ། །དེ་རྣམས་ཐམས་ཅད་ཀུན་ནས་དབྱི། །དེ་ལྟ་བུ་ཡི་རིམ་པ་ཡིས། །འཇམ་པའི་རྡོ་རྗེ་དཀྱིལ་འཁོར་གྱུར། །གཙོ་བོ་གཞན་དུ་འགོད་པའི་ཐིག་ཀྱང་འདིའོ། །འདིས་ནི། གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་བརྒྱན་པ་སྟེ། །ཐིག་བཞི་དང་
ནི་མཉམ་པར་ལྡན། །ཕྱི་ཡི་དཀྱིལ་འཁོར་ཐིག་གདབ་བྱ། །དེ་ཡི་ནང་དུ་འཁོར་ལོ་ནི། །དཀྱིལ་འཁོར་བརྒྱད་པ་ལྟ་བུ་ཡིན། །ཕྱི་ཡི་འཁོར་ལོའི་ཕྱེད་དུ་ནི། །ཀུན་ནས་ཡོངས་སུ་ཟླུམ་པོ་སྟེ། །འཁོར་ལོའི་ཀ་བ་སོགས་ཀྱིས་བརྒྱན། །རྡོ་རྗེ་ཕྲེང་བས་བསྐོར་ཞིང་མཛེས། །འཁོར་ལོའི་ཀ་སོགས་
ཐིག་རྣམས་ཀྱི། །ས་ནི་ཚོན་གྱི་ས་དང་མཉམ། །ཞེས་པའང་བཤད་པ་ཡིན་ནོ། །བསྡུས་པའི་རིམ་པར་གསུངས་པའི་དཀྱིལ་འཁོར་ལ་ཡང་ཐིག་གི་ཚུལ་འདི་ཉིད་དོ། །སླར་ཡང་ཁྱད་པར་བརྗོད་པར་བྱ་སྟེ། །སྙིང་པོར་ཟླུམ་པོ་གཉིས་བྱིན་ནས། །ཚངས་དང་ཟུར་གྱི་ཐིག་དག་གི །བར་དུ་ཀ་བ་ཆ་
ཆུང་རེ། །ནམ་མཁའི་ཐིག་གིས་བརྒྱད་དུ་འགྱུར། །ཕྱོགས་དང་མཚམས་སུ་གྲུ་གསུམ་མོ། །བར་གྱི་ཟླུམ་པོ་གཉིས་ལ་ཡང་། །གཟུགས་ཀྱི་རྡོ་རྗེ་མ་སོགས་དང་། །རིན་ཆེན་བྱང་ཆུབ་སེམས་གནས་རྣམས། །ནང་ན་གནས་པའི་རེ་ཁཱ་དང་། །སྣམ་བུར་གནས་པའི་རེ་ཁཱ་དབྱི། །ཞེས་པའོ། །དཔལ་
ལྡན་ཁ་སྦྱོར་རྒྱུད་གསུངས་པའི། །རྡོ་རྗེ་སེམས་དཔའི་དཀྱིལ་འཁོར་ནི། །སོ་བདུན་བདག་ཉིད་འཁོར་ལོ་ལ། །ཚངས་པའི་གཡས་དང་གཡོན་དག་ཏུ། །ཕྱེད་བཅས་ཆ་ཆུང་བར་དོར་ནས། །ཆ་ཆུང་ཕྱེད་པའི་ཐིག་གཉིས་གདབ། །ཆ་ཆུང་གསུམ་དོར་ཟླུམ་པོ་ནི། །ཆ་ཆུང་ཕྱེད་པར་རྡོ་རྗེའི་ཕྲེང་། །
เล่ม ๗๖ · หน้า 89a
ཕྱེད་ལ་འོད་ཟེར་ཕྲེང་བར་འགྱུར། །ཆ་ཆུང་གསུམ་གྱི་བར་ནས་སླར། །ཆ་ཆུང་ཕྱེད་པར་ཟླུམ་པོ་དེའི། །དབུས་སུ་པདྨའི་ཕྲེང་བ་ཡང་། །ཆ་ཆུང་གསུམ་ནས་ཟླུམ་པོ་སྟེ། །སླར་ཡང་ཆ་ཆུང་ཕྱེད་པར་དེའི། །དབུས་སུ་འཁོར་ལོའི་ཕྲེང་བའོ། །གཞན་གྱི་ས་ལ་ཆ་ཆུང་གསུམ། །
དཔལ་ལྡན་ཡེ་ཤེས་མཁའ་འགྲོ་མའི། །འཁོར་ལོ་བཅུ་གསུམ་བདག་ཉིད་མཛེས། །ཚངས་པའི་ཐིག་ལས་ཆ་ཆུང་ནི། །གསུམ་ལས་ཐིག་གཉིས་ཆ་ཆུང་འགྱུར། །སླར་ཡང་ཆ་ཆུང་དྲུག་དོར་ནས། །ཟླུམ་པོ་གཅིག་ནི་བསྐོར་བར་བྱ། །སླར་ཡང་ཆ་ཆུང་ཟླུམ་པོ་ལ། །རྡོ་རྗེའི་ཕྲེང་བའི་མཚན་མ་
སྟེ། །འོད་ཟེར་ཕྲེང་བའི་དོན་དུ་གཞན། །ཆ་ཆུང་བར་ནས་སླར་ཡང་ངོ་། །གཞན་གྱི་ས་ལ་ཆ་ཆུང་བཞི། །ལྷག་པའི་རེ་ཁཱ་དབྱི་བར་བྱ། །གང་ཞིག་བཅུ་བདུན་གྱི་ནི་བདག་ཉིད་ཅན། །ཀྱེ་ཡི་རྡོ་རྗེ་རྒྱལ་པོ་རྣམ་བཞི་དང་། །རྡོ་རྗེ་བདུད་རྩི་བཞི་དང་དཔག་མེད་མ། །ཀུ་རུ་ཀུ་ལླེའི་དཀྱིལ་འཁོར་རྣམས་ལ་
ནི། །ཚངས་པའི་ཐིག་ལས་ཕྱི་ངོས་སུ། །ཟླུམ་པོའི་ཐིག་བཞི་སྦྱིན་བྱ་སྟེ། །ཆ་ཆུང་བརྒྱད་ཆ་དང་བཅས་པའི། །ཆ་ཆུང་ཕྱེད་དང་གསུམ་མཐའ་དང་། །རྐང་པར་བཅས་པའི་ཆ་ཆུང་ལྔར། །འདབ་མའི་དོན་དུ་གཉིས་པ་དང་། །གསུམ་པ་རྡོ་རྗེའི་ཕྲེང་བ་ནི། །བརྒྱད་ཆར་བཅས་པའི་ཆ་ཆུང་དང་། །
བཞི་པ་འོད་ཕྲེང་ཆ་ཆུང་ངོ་། །ལྷག་མའི་ས་ནི་ཆ་ཆུང་དྲུག །ནང་དུ་ཚངས་པའི་ཐིག་དང་ནི། །ཟུར་གྱི་ཐིག་རྣམས་དབྱི་བར་བྱ། །ཀྱེ་ཡི་རྡོ་རྗེ་དགུ་ཡི་བདག་ཉིད་ཅན། །རྣམ་བཞི་འདི་ཡི་སྐུ་ཡི་དཀྱིལ་འཁོར་ལ། །ཚངས་པ་དོར་ནས་ཀྱང་ནི་ཆ་ཆུང་ལྔར། །ཟླུམ་པོའོ་གཞན་ནི་ཉིས་འགྱུར་ཚད་
ཡིན་ནོ། །དེ་ཡི་ཕྱི་རོལ་ཆ་ཆུང་ཟླུམ་པོ་ལ། །རྡོ་རྗེ་ཕྲེང་བ་ཡིས་ནི་མཚན་པ་སྟེ། །དེ་ཉིད་ལ་ནི་བུམ་པའི་ཕྲེང་བའོ། །ཞེས་སོ། །གསང་སྔགས་རིག་པ་འགའ་ཞིག་སྨྲ་བར་བྱེད། །སངས་རྒྱས་ཐོད་པའི་སྐུ་དང་ནི། །སྒྱུ་མ་ཆེན་མོ་ཞེས་བྱ་ལའང་། །དེ་མཉམ་དཀྱིལ་འཁོར་རབ་གསུངས་ཏེ། །
ཚད་འདི་ལ་ནི་ལྷག་ཆད་མེད། །མགོན་པོ་རྡོ་རྗེ་ཧཱུཾ་མཛད་ཀྱི། །དཀྱིལ་འཁོར་ཐིག་ལ་ངེས་པར་ནི། །ཚངས་པའི་ཐིག་གི་ངོས་གཉིས་སུ། །ཆ་ཆུང་ཕྱེད་དང་གསུམ་དོར་ནས། །གེ་སར་གྱི་ནི་ཟླུམ་པོར་འགྱུར། །ཆ་ཆུང་ལྔ་ནས་འདབ་མའི་འོ། །དེ་ནས་ཆ་ཆུང་ཡོངས་དོར་ཏེ། །ཕྱོགས་དང་
เล่ม ๗๖ · หน้า 89b
ཕྱོགས་བྲལ་རྣམས་སུ་ཡང་། །ཆ་ཆུང་ཕྱེད་དང་བརྒྱད་པ་ཡི། །པདྨ་བརྒྱད་དུའང་འགྱུར་བ་ཡིན། །ཤར་དང་ནུབ་ཀྱི་སྒོ་ཉིད་དུ། །ཆ་ཆུང་གསུམ་པའི་པདྨ་བྱ། །འཁོར་ལོ་བདེ་མཆོག་ཕག་མོ་ཡི། །དཀྱིལ་འཁོར་ཐིག་ནི་ཇི་ལྟ་བར། །རྩ་ཐིག་ནས་ཕྱེད་ཕྱེད་དང་བཞི། །ཕྱེད་ཕྱེད་ཕྱེད་དང་བཞི་དང་
ཕྱེད། །ཕྱེད་དང་བཞི་དང་བཞི་ཆ་དང་། །འདབ་མའི་ཕྱེད་དང་གསུམ་ནས་ནི། །དེར་ནི་བླ་མའི་ཟླུམ་པོ་རྣམས། །བསྐོར་བར་བྱ་ཞིང་དེ་ནས་ནི། །རྩིབས་ཀྱི་དོན་དུ་ཐིག་བཏབ་སྟེ། །ཚངས་པའི་གཡས་དང་གཡོན་དག་ཏུ། །ཆ་ཆུང་ཕྱེད་དང་གཉིས་ཀྱི་བར། །སྤངས་ནས་ཐིག་ནི་རབ་སྦྱིན་བྱ། །རྩ་
ཐིག་དག་གི་བར་དུའོ། །ཆ་ཆུང་ཕྱེད་ཀྱི་བར་དོར་ནས། །སླར་ཡང་ཐིག་ནི་དེ་བཞིན་གདབ། །ཟུར་དུ་ཡང་ནི་དེ་བཞིན་ཉིད། །སྔགས་པས་ཐིག་བཞི་སྦྱིན་པར་བྱ། །ཚངས་པ་ལས་ནི་ངེས་སོང་ཐིག །ཇི་སྲིད་ཆ་ཆུང་གཉིས་ཀྱི་ཕྱིར། །སླར་ཡང་དེ་ལས་རྣམ་སོང་སྟེ། །དེ་ཉིད་དུ་ནི་དེ་བཞིན་
འཇུག །དེ་ལས་ཀྱང་ནི་ངེས་སོང་ཐིག །སླར་ཡང་ཆ་ཆུང་གཉིས་ཀྱི་བར། །དེ་ལས་སླར་ཡང་རྣམ་སོང་ནས། །ཐིག་དེ་ལ་ནི་རབ་ཏུ་འཇུག །སླར་ཡང་དེ་ལས་དེ་སོང་ནས། །ཇི་སྲིད་ཆ་ཆུང་གཉིས་ཀྱི་བར། །སླར་ཡང་དེ་ལས་རྣམ་སོང་སྟེ། །ཚངས་པ་དེར་ནི་རབ་ཏུ་འཇུག །ཇི་
ལྟར་གཡས་སུ་དེ་བཞིན་གཡོན། །ཕྱོགས་སུ་དེ་བཞིན་མཚམས་སུ་ཡང་། །དེ་ཡི་ཡང་ནི་ནང་དུ་ཐིག །ཆ་ཆུང་ཕྱེད་ཀྱི་བར་དེ་བཞིན། །དེ་ཉིད་རིམ་པའི་སྦྱོར་བ་ཡིས། །གཡས་དང་གཡོན་མིན་དག་ལ་བྱ། །ཐིག་ལེའི་དཀྱིལ་འཁོར་དགའ་བ་ཅན། །བདེ་མཆོག་རྒྱ་མཚོ་ལས་
འབྱུང་བའོ། །རྩིབས་ཀྱི་ངོས་སུ་ཤིན་ཏུ་ནི། །མི་བཟད་རྡོ་རྗེ་བཞི་ཡིས་བསྐོར། །ལྷག་མ་པདྨ་འདབ་བརྒྱད་དེ། །ཚད་འདི་ལས་ནི་ལྷག་ཆད་མེད། །ཐུགས་སོགས་འཁོར་ལོའི་མུ་ཁྱུད་ལ། །རྡོ་རྗེ་པདྨ་འཁོར་ལོ་ཕྲེང་། །ཟླུམ་པོའི་ཐིག་དང་རྩིབས་ཀྱིས་བསྐོར། །ཡང་
དག་བསྲུངས་ནས་གཞན་རྣམས་དབྱི། །ཉི་ཤུ་རྩ་ལྔའི་བདག་ཉིད་ཅན། །མགོན་པོ་སངས་རྒྱས་ཐོད་པ་ལ། །དེ་རྣམས་དཀྱིལ་འཁོར་རབ་བསྲུངས་ཏེ། །སླར་ཡང་ཁྱད་པར་ཅུང་ཟད་ནི། །ཟླུམ་པོ་དྲུག་པའི་ནང་དོར་ནས། །འདབ་མའི་དེན་དུ་ཆ་ཆུང་ལྔའི། །ཟླུམ་པོ་
เล่ม ๗๖ · หน้า 90a
གཅིག་ནི་སྦྱིན་བྱ་སྟེ། །གེ་སར་དོན་དུ་རབ་མཛེས་པའོ། །དཔལ་ལྡན་རྣལ་འབྱོར་ནམ་མཁའ་ཡི། །འཁོར་ལོར་རྩ་ཐིག་ནང་དུ་ཡང་། །ཆ་ཆུང་ཕྱེད་དང་བཞི་དོར་ནས། །ཟླུམ་པོ་གཅིག་ནི་བསྐོར་བར་བྱ། །སླར་ཡང་ཆ་ཆུང་ཟླུམ་པོ་ལ། །རྡོ་རྗེ་ཕྲེང་བ་རབ་མཛེས་པའོ། །
དེ་ནས་ཆ་ཆུང་གསུམ་དོར་ནས། །ཟླུམ་པོ་གཅིག་ནི་སྦྱིན་བྱ་སྟེ། །བསྡུས་པའི་རིམ་པའི་དཀྱིལ་འཁོར་ལ། །ཐིག་རྣམས་བཤད་པ་ཇི་བཞིན་ནོ། །གཞན་གྱི་ཐིག་རྣམས་ཐམས་ཅད་ནི། །དཀྱིལ་འཁོར་འདིར་ཡང་དེ་བཞིན་ཉིད། །རྩ་བའི་ཐིག་གི་ནང་དུ་གཞལ་ཡས་ཁང་གཉིས་པའི་
ཐིག་ཀྱང་འཆད་པར་འགྱུར་བའི་བཞི་བཅུ་རྩ་གསུམ་གྱི་བདག་ཉིད་འཇམ་པའི་རྡོ་རྗེའི་དཀྱིལ་འཁོར་ལྟ་བུའོ་ཞེས་པ་ནི་གཞན་དག་གོ། །སྙིང་པོའི་གཞལ་ཡས་ཁང་ལས་གཞལ་ཡས་ཁང་གཉིས་པ་ནི་ཟླུམ་པོའོ་ཞེས་པ་ཁ་ཅིག་གིའོ། །གཞན་དག་ནི་འདིར་གཞལ་ཡས་ཁང་མེད་དེ། རྡོ་རྗེའི་ཕྲེང་བ་སྔར་
བཞིན་ནོ། །ཞེས་པའོ། །བཅུ་གསུམ་གྱི་ནི་བདག་ཉིད་ཅན། །ཁྲོ་རྒྱལ་གཤིན་རྗེ་གཤེད་ལ་ཡང་། །ཚངས་ལས་ཆ་ཆུང་བདུན་མཐའ་དང་། །བརྒྱད་ཀྱི་མཐར་ཡང་རིག་གདབ་སྟེ། །ཀུན་ནས་ཟུར་གྱི་ཐིག་ལའོ། །རྡོ་རྗེ་ཕྲེང་བའི་མཚན་མ་སྟེ། །ཕྱོགས་སུ་རྡོ་རྗེའི་ར་ལྔ་སྟེ། །ཀུན་ནས་ཆ་
ཆུང་བརྒྱད་པའོ། །དཔལ་ལྡན་རྡོ་རྗེ་སྒྲོལ་མའི་ལྷའི། །དཀྱིལ་འཁོར་ཐིག་གི་ངེས་པ་ནི། །ཚངས་ལས་ཆ་ཆུང་གསུམ་གྱི་མཐར། །གེ་སར་རྩེ་མོའི་ཟླུམ་པོ་སྟེ། །དེའི་ཕྱིར་ཆ་ཆུང་དྲུག་ནས་བསྐོར། །འདབ་མའི་ཕྲེང་བའི་མཚན་མའོ། །དེར་གནས་ཚངས་དང་དེ་བཞིན་སླར། །ཟུར་
གྱི་ཐིག་ཀྱང་དབྱི་བར་བྱ། །དཔལ་ལྡན་འཇམ་པའི་རྡོ་རྗེ་ཡི། །དཀྱིལ་འཁོར་ཐིག་ནི་ཇི་བཞིན་སླར། །ཉེར་ལྔའི་བདག་ཉིད་འོད་ཟེར་ཅན། །དཀྱིལ་འཁོར་ལ་ཡང་དེ་བཞིན་ནོ། །བཅུ་གསུམ་གྱི་ནི་བདག་ཉིད་ཅན། །སྲུང་བ་ལྔ་ཡི་དཀྱིལ་འཁོར་ཡང་། །ཚངས་པའི་ཐིག་ལས་
ཆ་ཆུང་གཉིས། །གེ་སར་རྩེ་མོའི་ཟླུམ་པོ་སྟེ། །དེ་ནས་ཆ་ཆུང་བཞི་ནས་བསྐོར། །འདབ་མའི་དོན་དུ་རབ་མཛེས་པའོ། །དེ་ནས་ཆ་ཆུང་བར་ཕྱོགས་སུ། །ཆ་ཆུང་བརྒྱད་པའི་པདྨ་སྟེ། །ཐིག་དེ་རྣམས་ཀྱི་ཕྱི་རོལ་དུ། །ཀུན་ནས་གྲུ་བཞི་སྦྱིན་པར་བྱ། །ཚངས་པའི་ཐིག་དང་དེ་བཞིན་
เล่ม ๗๖ · หน้า 90b
དུ། །སླར་ཡང་ཟུར་གྱི་ཐིག་རྣམས་དབྱི། །གསུམ་ལྷག་པ་ཡི་བརྒྱ་ཕྱེད་ཅན། །རྡོ་རྗེ་དབྱིངས་ཀྱི་དཀྱིལ་འཁོར་ལའང་། །རྩ་བ་ཡི་ནི་ནང་དུ་ཐིག །ཆ་ཆུང་བརྒྱད་དུ་སྦྱིན་པར་བྱ། །དེ་ཉིད་གཉིས་པ་ནང་མ་ཡི། །དཀྱིལ་འཁོར་གྱི་ནི་རྩ་ཐིག་ཡིན། །རྟ་བབས་མེད་ཅིང་སྒོ་ཁྱུད་བཅས། །
སྒོ་རྣམས་དང་ནི་མཉམ་པར་ལྡན། །རྩ་བའི་ནང་གི་མཐར་ཐུག་པར། །ཀུན་ནས་ཟླུམ་པོ་སྦྱིན་པར་བྱ། །སླར་ཡང་ཆ་ཆུང་ཟླུམ་པོ་ལ། །རྡོ་རྗེ་ཡི་ནི་མཚན་མ་སྟེ། །ཚངས་པའི་གཡས་དང་གཡོན་དག་ཏུ། །ཆ་ཆུང་གཉིས་གཉིས་ཀྱི་ནི་བར། །སྤངས་ནས་ཐིག་ནི་རབ་སྦྱིན་བྱ། །ཟླུམ་
པོའི་ཐིག་གཉིས་བར་དུའོ། །ཆ་ཆུང་བར་ནས་སླར་ཡང་ཐིག །ཀ་བའི་དོན་དུ་དེ་བཞིན་སྦྱིན། །རེ་མིག་དགུར་ནི་འགྱུར་བ་ཡིན། །ཚངས་པའི་ཐིག་ལ་སོགས་པ་དབྱི། །དེ་ཉིད་བསྡུས་ལས་ཁམས་གསུམ་རྣམ་རྒྱལ་གྱི་དཀྱིལ་འཁོར་ལ་ནི་ནང་གི་གཞལ་ཡས་ཁང་རྟ་བབས་དང་བཅས་
པའོ་ཞེས་གསུངས་སོ། །བཞི་བཅུ་རྩ་གསུམ་བདག་ཉིད་ཅན། །འཇམ་པའི་རྡོ་རྗེའི་དཀྱིལ་འཁོར་ལ། །རྩ་བའི་ཐིག་གི་ནང་དུ་ཐིག །རང་གི་སྒོ་ཚད་གཉིས་ཀྱི་བར། །དེར་ཡང་སྔགས་པས་སྦྱིན་པར་བྱ། །ཟུར་ཐིག་གཉིས་ཀྱི་བར་དུའོ། །ད་ཉིད་གཉིས་པ་ནང་གི་ནི། །དཀྱིལ་
འཁོར་གྱི་ཡང་རྩ་ཐིག་ཡིན། །རྟ་བབས་མེད་ཅིང་སྒོ་དང་ནི། །སྒོ་འགྲམ་སོགས་དང་ཡང་དག་ལྡན། །དཀྱིལ་འཁོར་གསུམ་པའང་དེ་བཞིན་དུ། །དེ་ཡི་ཡང་ནི་ནང་དུ་བྱ། །ཇི་ལྟར་རྡོ་རྗེ་དབྱིངས་བཞིན་ནང་། །དེ་བཞིན་འདིར་ཡང་རེའུ་མིག་དགུ། །དེ་ཉིད་སྔགས་པ་རྣམས་
ཀྱིས་བྱ། །རྡོ་རྗེ་ཕྲེང་བས་ལེགས་པར་བསྐོར། །གསུང་གི་དབང་ཕྱུག་དཀྱིལ་འཁོར་ལའང་། །འཁོར་ལོ་ཐམས་ཅད་མཚུངས་པར་ཕྱིའི། །ཐིག་གདབ་པ་ནི་ཤེས་བྱ་སྟེ། །ཁྱད་པར་སླར་ཡང་བརྗོད་པར་བྱ། །ཀུན་ནས་ཟླུམ་པོ་བཟང་པོ་ཡིས། །ཕྱི་རོལ་གྱི་ནི་འཁོར་ལོ་
བྱ། །གོས་འོག་རྩ་བ་ནས་བཟུང་སྟེ། །ཕ་རོལ་གོས་ཀྱི་འོག་ནས་ཐིག །ཐིག་གི་རིམ་པ་མ་འདས་པར། །ཟླུམ་པོ་བདུན་ནི་བསྐོར་བར་བྱ། །རྩ་བའི་ཐིག་གི་ནང་དག་ཏུ། །སྒོ་གཉིས་ཀྱི་ནི་བར་སྤངས་ནས། །ཐིག་གཅིག་རབ་ཏུ་སྦྱིན་བྱ་སྟེ། །ཟུར་ཐིག་གཉིས་ཀྱི་བར་དུའོ། །
เล่ม ๗๖ · หน้า 91a
ཐིག་དེ་ཡང་ནི་དཀྱིལ་འཁོར་ནི། །གཉིས་པ་ཡི་ཡང་རྩ་བ་ཡིན། །རྟ་བབས་མེད་ཅིང་སྒོ་ཁྱུད་བཅས། །སྒོ་རྣམས་དང་ནི་མཉམ་པར་ལྡན། །དེ་ཡི་ནང་དུ་གསུམ་པ་ཡི། །དཀྱིལ་འཁོར་གྱི་ནི་རྩ་བ་སྟེ། །སྒོ་གཉིས་ཡོངས་སུ་དོར་བས་ན། །ཐིག་ཀྱང་དེ་བཞིན་
གདབ་པར་བྱ། །རྟ་བབས་མེད་ཅིང་སྒོ་འགྲམ་དང་། །སྒོ་དང་སྒོ་ཁྱུད་སོགས་ཀྱིས་བརྒྱན། །དེ་ཡི་ཡང་ནི་ནང་དག་ཏུ། །དཀྱིལ་འཁོར་བཞི་པའང་དེ་བཞིན་ཉིད། །རྡོ་རྗེ་དབྱིངས་ཀྱི་ནང་ཇི་བཞིན། །དེ་བཞིན་འདིར་ཡང་རེ་མིག་དགུའོ། །རྭ་ཡི་ཕྱི་རོལ་གྱུར་པ་འདིར། །གསེར་གྱི་ས་
ལ་སོར་བཞི་སྟེ། །རྡོ་རྗེའི་ཕྲེང་བ་དེ་བཞིན་བྱ། །རིན་ཆེན་ཕྲེང་བ་དེ་བཞིན་སླར། །པདྨའི་ཕྲེང་བའང་དེ་བཞིན་ཉིད། །འཁོར་ལོའི་ཕྲེང་བ་སླར་དེ་བཞིན། །ལྷག་མའི་གནས་ལ་དེ་བཞིན་དུ། །ཕྱི་རོལ་འོད་ཟེར་སོར་བཅུ་གཉིས། །ཞེས་པ་ནི་འཁོར་དང་བཅས་པ་འོད་ཟེར་གྱི་མཐར་ཐུག་
པ་ལ་ཁྲུ་བཅུ་དྲུག་གི་ཚད་དང་ལྡན་པའི་དཀྱིལ་འཁོར་གྱི་ཐིག་བརྗོད་པར་བྱ་སྟེ། གཞན་དུ་ཡང་འདིའི་རྗེས་སུ་འབྲངས་ནས་རྟོགས་པར་བྱའོ། །སུམ་ཅུ་རྩ་གཉིས་བདག་ཉིད་ལྷ། །འཕགས་ལུགས་འཁོར་ལོ་ཇི་ལྟ་བར། །དེ་ཉིད་རིམ་པའི་སྦྱོར་བ་ཡིས། །ངན་སོང་སྦྱོང་བའི་འཁོར་
ལོའོ། །ཁྱད་པར་རྡོ་རྗེའི་ཕྲེང་བ་ཡི། །ནང་དུ་རིག་པར་བྱ་བ་ནི། །རྡོ་རྗེ་ཕྲེང་བ་སོགས་སྤངས་ནས། །འཁོར་ལོ་སེར་པོ་རྩིབས་བརྒྱད་པའོ། །རྩ་བའི་ཐིག་གི་ནང་དག་ཏུ། །འདི་ནི་སྒོ་ཡི་བར་སྤངས་ནས། །ཐིག་གསུམ་རབ་ཏུ་སྦྱིན་བྱ་སྟེ། །ཟུར་ཐིག་གཉིས་ཀྱི་བར་དུའོ། །
ཆ་ཆུང་རིག་བྱེད་སྤངས་ནས་ཀྱང་། །ཐིག་གཅིག་སླར་ཡང་བྲི་བར་བྱ། །སླར་ཡང་ཆ་ཆུང་བཞི་སྤངས་ནས། །དེ་བཞིན་དུ་ཡང་ཐིག་སྦྱིན་ནོ། །དབུས་སུ་རེ་ཁ་དགུ་པ་སྟེ། །འཇམ་པའི་རྡོ་རྗེའི་ཟླུམ་པོ་ཡི། །ཕོ་བྲང་བཞིས་ནི་ཤེས་པར་བྱ། །འབྱུང་པོ་འདུལ་བའི་དཀྱིལ་
འཁོར་རོ། །ད་ནི་མཁའ་འགྲོ་ལྔ་རྣམས་ཀྱི། །དཀྱིལ་འཁོར་ཐིག་ནི་བརྗོད་པར་བྱ། །སོ་སོའི་ངོས་སུ་ཚངས་པ་ལས། །ཆ་ཆུང་ཕྱེད་དང་ལྔ་སྤངས་པར། །བྱ་སྟེ་དེ་ལ་ཆ་ཆུང་གཉིས། །ཆ་ནི་གཉིས་གཉིས་ངོས་དག་ཏུ། །སྤངས་པར་རྩ་བའི་ཐིག་བྱ་ཞིང་། །ནང་གི་ཆ་ཡི་
เล่ม ๗๖ · หน้า 91b
བརྒྱད་ཆ་ཡི། །ཚད་དེས་སྒོ་དང་སྒོ་ལོགས་སོགས། །བྱ་སྟེ་རྟ་བབས་མེད་པའོ། །ཆ་ཆུང་སྤངས་ནས་ཕྱོགས་རྣམས་སུ། །དཀྱིལ་འཁོར་བཞི་པོ་རྣམས་ལ་ཡང་། །རིམ་པ་འདི་ཡི་སྦྱོར་བ་ཡིས། །མཁས་པས་ཐིག་རྣམས་སྦྱིན་པར་བྱ། །ཕྱོགས་སུ་དཀྱིལ་འཁོར་ཕྱི་ཡི་
ས། །ཆ་ཆུང་ཕྱེད་དང་གཉིས་པར་ཤེས། །རྡོ་རྗེ་མཁའ་འགྲོ་འཁོར་ལོར་ཡང་། །རྩ་བའི་དཀྱིལ་འཁོར་ནང་དུ་ནི། །ཐིག་གཅིག་རབ་ཏུ་སྦྱིན་བྱ་སྟེ། །ཀུན་ནས་གྲུ་བཞི་པ་ཉིད་དོ། །སླར་ཡང་ཆ་ཆུང་གཅིག་ནས་ཐིག །རྡོ་རྗེ་ཕྲེང་བའི་མཚན་མ་སྟེ། །ཟླ་ཕྱེད་མཉམ་པའི་རྣམ་པ་
ཡིས། །དབུས་སུ་ལེགས་པར་མཛེས་པར་བྱ། །སངས་རྒྱས་མཁའ་འགྲོའི་འཁོར་ལོ་ནི། །འཁོར་ལོའི་ཕྲེང་བར་ཟླུམ་པོ་ཉིད། །རིན་ཆེན་མཁའ་འགྲོའི་རིན་ཆེན་གྱིས། །ཀུན་ནས་ལེགས་པར་བསྐོར་བ་ནི། །རིན་ཆེན་ཆ་བརྒྱད་ལྟ་བུ་སྟེ། །དེ་ཡི་དབུས་སུ་སླར་ཡང་བྱ། །པདྨ་
མཁའ་འགྲོའི་འཁོར་ལོར་ནི། །ཆ་ཆུང་དག་ལ་པདྨའི་ཕྲེང་། །གྲུ་བཞི་པ་དང་པདྨ་ཡི། །རྣམ་པ་དེ་ཡི་དབུས་སུ་བྱ། །སྣ་ཚོགས་མཁའ་འགྲོའི་འཁོར་ལོར་ཡང་། །རལ་གྲིའི་ཕྲེང་བ་ཆ་ཆུང་སྟེ། །དེ་ཡི་དབུས་སུ་གྲུ་གསུམ་བྱ། །རྡོ་རྗེ་སློབ་དཔོན་མཁས་པས་སོ། །རང་རང་
དཀྱིལ་འཁོར་ཚད་ཀྱིས་ནི། །སྒོ་ལ་སོགས་པ་རབ་ཏུ་བརྟག །འཁོར་ལོས་སྒྱུར་དྲུག་དཀྱིལ་འཁོར་ལ། །མཁས་པས་རིག་རྣམས་སྦྱིན་བྱ་སྟེ། །ཚངས་ལས་གཡས་དང་གཡོན་དག་ཏུ། །ཆ་ཆུང་བཞི་བཞི་སྤངས་ནས་སུ། །ཆ་ཆུང་བརྒྱད་པོ་འདི་རྣམས་ལ། །དཀྱིལ་འཁོར་རྣམ་
པར་རྫོགས་པར་བྱ། །བཅུ་གཉིས་ཆར་ནི་མཉམ་བྱས་ནས། །ཆ་ནི་གཉིས་གཉིས་ངོས་དག་ཏུ། །སྤངས་ཏེ་སྒོ་ལ་སོགས་པ་བྱ། །སླར་ཡང་རྟ་བབས་མེད་པའོ། །དཀྱིལ་འཁོར་ཆེན་པོའི་ཚད་ཀྱིས་ནི། །ཆ་ཆུང་གཉིས་ཉིད་སྤངས་པར་ཡང་། །ཚད་ཀྱི་དོན་དུ་སྒྲུབ་པ་པོས། །
ཟླུམ་པོའི་ཐིག་ཀྱང་བསྐོར་བར་བྱ། །སླར་ཡང་དེ་བཞིན་ཕྱི་རོལ་དུ། །ཆ་ཆུང་བཅུ་ཡི་བར་ནས་བསྐོར། །ཆ་ལྔ་རྣམས་སུ་བྱས་པ་ལ། །དཀྱིལ་འཁོར་ལྔ་པོ་དེ་བཞིན་བྱ། །ཕྱི་ནས་ཟླུམ་པོ་དག་དང་ནི། །གཞན་ཡང་ལྷག་པའི་རེ་ཁཱ་དབྱི། །ནང་མ་དང་ནི་ལྷན་ཅིག་ཏུ། །དཀྱིལ་
เล่ม ๗๖ · หน้า 92a
འཁོར་དྲུག་ཏུ་འགྱུར་བ་ཡིན། །དཀྱིལ་འཁོར་རྣམས་ཀྱི་ནང་ཉིད་དུ། །ལྟེ་བའི་དོན་དུ་ཆ་ཆུང་གསུམ། །དེ་ཕྱིར་འདབ་མའི་དོན་དུ་ཡང་། །ཆ་ཆུང་དྲུག་གིས་ཟླུམ་པོ་བྱ། །ཕྱི་རོལ་ཕྱོགས་དང་ཕྱོགས་བྲལ་དུ། །ཆ་ཆུང་དྲུག་པའི་པདྨ་བརྒྱད། །དེ་ཡི་ཕྱི་ནས་
ཟླུམ་པོ་གཅིག །ཆ་ཆུང་བར་ནས་སླར་དེ་བཞིན། །རང་རང་དཀྱིལ་འཁོར་ཚད་ཀྱིས་ནི། །སྒོ་སོགས་མཚན་ཉིད་ཤེས་པར་བྱ། །གཞན་ཕོ་བྲང་བདུན་པའི་དཀྱིལ་འཁོར་ལ་སོགས་པའི་གཞལ་ཡས་ཁང་གི་ཁྱད་པར་རྣམས་ཀྱང་བཤད་པའི་རྗེས་སུ་འབྲངས་ཏེ་དཔགས་ལ་མཁས་
པ་རྣམས་ཀྱིས་ཐིག་གདབ་པར་བྱའོ། །སླར་ཡང་དཔལ་དུས་ཀྱི་འཁོར་ལོར་གསུངས་པའི་དཀྱིལ་འཁོར་ནི་འདིར་བརྗོད་པའི་རྒྱུད་གཞན་མཐའ་དག་ཏུ་གསུངས་པའི་ཆོ་ག་རྣམས་ལས་ཉི་མའི་ཤིང་རྟ་ལ་སོགས་པ་གདུལ་བར་བྱ་བའི་དོན་དུ་བྱ་བ་མི་འདྲ་བར་གསུངས་པའོ། །དེའི་
ཕྱིར་རྫོགས་པའི་རིམ་པའི་རྣལ་འབྱོར་པ་རྣམས་ཀྱིས་ནི་བཅོམ་ལྡན་འདས་དཔལ་རྡོ་རྗེ་འཆང་ཉིད་སྣ་ཚོགས་པའི་སྐུས་དཀྱིལ་འཁོར་མ་ལུས་པའི་དབང་ཕྱུག་ཡིན་པས་མངོན་པར་འདོད་པ་ཐམས་ཅད་བསྐྱེད་ཅིང་འབྱུང་བའོ་ཞེས་བརྟན་པར་ལྷག་པར་མོས་པ་བྱས་ན་རྒྱུད་
གཞན་གྱི་ཚོགས་ཀྱང་རབ་ཏུ་གནས་པ་ལ་སོགས་པ་རྗེས་སུ་གནང་ཞིང་མི་འགལ་བས་མངོན་པར་འདོད་པ་སྒྲུབ་པར་བྱེད་དོ། །དེས་ན་དུས་ཀྱི་འཁོར་ལོའི་བྱ་བ་རབ་ཏུ་སྤྲོས་པ་རྣམས་ཡོངས་སུ་དོར་ནས་དཀྱིལ་འཁོར་གྱི་ཐིག་གདབ་པ་ཙམ་བརྗོད་པར་བྱའོ། །རྡུལ་
ཚོན་དགྱེ་བ་ཙམ་ཡང་འཆད་པར་འགྱུར་བའི་རྡུལ་ཚོན་དགྱེ་བའི་སྐབས་སུ་བརྗོད་པར་བྱའོ། །འདིར་སློབ་དཔོན་གྱི་མཐེབ་སོར་ཉི་ཤུ་རྩ་བཞི་ནི་ཁྲུ་སྟེ་ཁྲུ་བཞི་ནི་དཀྱིལ་འཁོར་རོ། །དེ་ཉིས་འགྱུར་སྲིད་དུ་ཁྲུ་བརྒྱད་པའི་ཚངས་ཐིག་གཉིས་གདབ་པར་བྱའོ། །དེའི་རྗེས་ལ་དེ་བཞིན་
དུ་ཟུར་ཐིག་གཉིས་སོ། །ཐིག་སྐུད་ཀྱི་སྦོམས་སུ་ནི་སློབ་དཔོན་གྱི་ནས་ཀྱི་ཚད་དོ། །དེ་ལ་ཐུགས་ཀྱི་དཀྱིལ་འཁོར་གྱི་སྒོའི་དྲུག་ཆ་ནི་མཐེབ་སོར་ཕྱེད་ཀྱི་ཚད་དེ་ཆ་ཆུང་དུ་ཐ་སྙད་གདགས་པར་བྱའོ། །སྙིང་པོ་ཉིད་དུ་ཐིག་གཟུང་ནས། །ལྟེ་བའི་དོན་དུ་ཆ་ཆུང་གཉིས། །དེ་ནས་
เล่ม ๗๖ · หน้า 92b
འདབ་མའི་ཆ་ཆུང་བཞིར། །རྡོ་རྗེ་ཅན་གྱིས་ཟླུམ་པོ་བྱ། །དེ་ནས་བར་མེད་པར་ནི་ཐིག །ཀུན་ནས་གྲུ་བཞི་པ་ཡིན་ཏེ། །ཆ་ཆུང་བར་ནས་སླར་ཡང་སྦྱིན། །རྡོ་རྗེ་ཕྲེང་བས་མཚན་པའོ། །ཆ་ཆུང་བཞི་ཡི་བར་སྤངས་ནས། །ཟུར་གཉིས་དག་ལ་ཐུག་པའི་ཐིག །སླར་ཡང་ཆ་ཆུང་བར་
དོར་ནས། །རྡོ་རྗེ་ཕྲེང་བའི་ཐིག་གདབ་པོ། །འདི་ཡི་དབུས་སུ་པདྨ་ནི། །རབ་མཛེས་ཆ་ཆུང་བཞི་པ་སྟེ། །ངོས་ནི་གཉིས་པོ་དག་ཏུ་ཡང་། །ཆ་ཆུང་རེ་རེའི་ཀ་བ་བྱ། །དེ་དག་གི་ནི་ངོས་སུ་རྒྱར། །ཆ་ཆུང་གསུམ་པའི་བུམ་པ་སྟེ། །སླར་ཡང་ཀ་བ་ཆ་ཆུང་ཉིད། །སྲིད་དུ་ཆ་ཆུང་བཞི་
པའོ། །ཕྱི་ནས་དེ་ཡི་མཐའ་མ་ཡི། །ཕྱི་རོལ་དུ་ནི་ཐིག་གདབ་སྟེ། །ཆ་ཆུང་ཐུབ་པ་ཡོངས་དོར་ནས། །ཟུར་ཐིག་གཉིས་ཀྱི་བར་དུའོ། །དེ་ཡི་ཕྱི་རོལ་ལྷ་སྣམ་ལ། །ཆ་ཆུང་བཞི་ནི་སྤངས་པར་ཏེ། །དེ་ནས་ཆ་ཆུང་བར་སྤངས་ནས། །རྩ་ཐིག་རབ་ཏུ་གདབ་པར་བྱ། །རྩ་བའི་
ཐིག་གི་མཐར་ཐུག་པ། །ཐུགས་ཀྱི་དཀྱིལ་འཁོར་མཆོག་ཡིན་ཞིང་། །འཁོར་ལོའི་བརྒྱད་ཆ་སྒོ་ཡིན་ཏེ། །དེ་ཡི་དྲུག་ཆ་ཆ་ཆུང་ངོ་། །དེ་ལ་ཐ་སྙད་བྱས་པ་ནི། །དུས་ཀྱི་འཁོར་ལོའི་དཀྱིལ་འཁོར་ལའོ། །སྒོ་ཡི་ཚད་ཀྱིས་སྒོ་ཁྱུད་དེ། །འགྲམ་དང་ལོགས་ཀྱང་དེ་བཞིན་ནོ། །དེ་ཡི་
ཕྱེད་ཀྱིས་སྟེགས་བུར་འགྱུར། །སྟེགས་བུའི་ཕྱེད་ཀྱིས་ཚོན་གྱི་ས། །དྲ་བ་སྟེགས་བུའི་ཚད་དུ་འགྱུར། །རིན་ཆེན་ས་ནི་དེ་ཡི་ཕྱེད། །ཤར་བུ་དང་ནི་མདའ་ཡབ་ས། །ཚོན་གྱི་ས་དང་མཉམ་པ་སྟེ། །ཀ་བ་ཆ་ཆུང་ཕྱེད་དང་གཉིས། །བར་ནི་རིན་ཆེན་ལ་སོགས་བདུན། །ཆ་
ཆུང་ཕྱེད་དང་བརྒྱད་པ་ཡི། །དཔངས་སུ་ཡང་དག་གནས་པ་སྟེ། །དེ་ཡི་སྟེང་དུ་གནས་པ་ཡི། །རྟ་བབས་བརྩེགས་མ་གསུམ་པར་འགྱུར། །སྟེང་དུ་སྒོ་ལས་སུམ་འགྱུར་གྱི། །ཚད་ལྡན་མཛེས་པར་གྱུར་པ་དེར། །བརྩེགས་མ་དང་པོ་ཆ་ཆུང་དྲུག །གཉིས་པ་ལ་ནི་
ཕྱེད་དང་ལྔ། །གསུམ་པ་ཆ་ཆུང་ཕྱེད་དང་བཞི། །རྒྱ་ཕུབས་ཆ་ཆུང་གཉིས་པར་བརྗོད། །དེ་ཉིད་སྟེང་དུ་གནས་པ་ཡི། །བུམ་པ་ཆ་ཆུང་གཉིས་པར་འགྱུར། །དེ་ལ་བརྩེགས་མ་དང་པོར་ནི། །སྣམ་བུ་དང་པོ་ཆ་ཆུང་གཅིག །ཉི་ཤུ་རྩ་བཞི་རིང་བའོ། །དེ་ཡི་སྟེང་
เล่ม ๗๖ · หน้า 93a
དུ་ཆ་ཆུང་གཅིག །མྱོས་པ་བསྲུང་བའི་སྣམ་བུ་སྟེ། །རིངས་སུ་ཆ་ཆུང་བཅུ་དྲུག་པའོ། །དེ་ཡི་སྟེང་གི་དབུས་སུ་ནི། །མཆོད་པའི་ལྷ་མོའི་གནས་ཉིད་ཀྱང་། །ཆ་ཆུང་བཞི་པ་རབ་མཛེས་པ། །རྡོ་རྗེ་སློབ་དཔོན་མཁས་པས་བྱ། །དེ་ཡི་ཡང་ནི་ངོས་དག་ཏུ། །ཆ་ཆུང་རེ་རེའི་
ཀ་བ་བྱ། །སླར་ཡང་མཆོད་པའི་ལྷ་མོའི་གནས། །ངོས་གཉིས་དག་ཏུ་དེ་བཞིན་ཏེ། །ཕྱིར་ཞིང་ཆ་ཆུང་ཀ་བ་དག །ངོས་དག་ཏུ་ཡང་དེ་བཞིན་ཉིད། །ངོས་གཉིས་དག་ཏུ་སོ་ལྡན་གྱི། །དབང་པོ་གནན་པའི་སེང་གེ་སྟེ། །སེང་གེའི་མགོ་བོའི་སྟེང་དུ་འདེགས། །དེ་དག་སྤྱི་བོར་དེ་བཞིན་
སླར། །སྣམ་བུ་ཆ་ཆུང་ཕྱེད་པར་འགྱུར། །བཅོ་བརྒྱད་དུ་ཡང་རིང་བའོ། །དེ་སྟེང་སྣམ་བུར་གྱུར་པ་ནི། །མྱོས་པ་བསྲུང་བ་ཞེས་བྱ་བ། །བར་ནི་ཆ་ཆུང་གཅིག་པར་འགྱུར། །རིངས་སུ་ཆ་ཆུང་བཅུ་གཉིས་པའོ། །དེ་སྟེང་དེ་བཞིན་རིང་བ་ཡི། །སྣམ་བུའི་བར་ལ་ཆ་ཆུང་གསུམ། །
དེར་ནི་རྐང་པས་དམན་པ་ཡི། །ཆ་ཆུང་གིས་ཀྱང་ཀ་བཞི་བྱ། །ལྷ་མོ་རྣམས་ཀྱི་གནས་རྣམས་ཀྱང་། །ཀ་བའི་བར་དུ་ཡང་དག་གནས། །ཆ་ཆུང་གསུམ་དང་ལྡན་པ་ཡི། །གནས་གསུམ་སླར་ཡང་སྔགས་པས་བྱ། །ཀ་བའི་ཕྱི་རོལ་ངོས་དག་ཏུ། །གདུང་འདེགས་པ་ཡི་ལྷ་མོ་བྱ། །
དེ་ཡི་སྤྱི་བོར་སླར་ཡང་དཔངས། །ཆ་ཆུང་ཕྱེད་པའི་སྣམ་བུར་འགྱུར། །དེ་ཉིད་ཆ་ཆུང་བཅོ་ལྔ་ཡི། །རིངས་སུ་ཡང་དག་གནས་པ་ཡིན། །དེ་སྟེང་མྱོས་པ་བསྲུང་བ་ཡི། །སྣམ་བུ་ལ་ནི་ཆ་ཆུང་སྟེ། །རིངས་སུ་ཆ་ཆུང་བརྒྱད་པར་འགྱུར། །དེ་སྟེང་ཆ་ཆུང་གཉིས་པ་སྟེ། །དེ་ཡང་རིངས་སུ་
དེ་བཞིན་ཉིད། །འདི་ལ་ཡང་ནི་ཀ་བ་བཞི། །ཆ་ཆུང་ཕྱེད་པའི་ཚད་དང་ལྡན། །རིངས་སུ་ཆ་ཆུང་གཉིས་པར་ལྡན། །གནས་གསུམ་ཆ་ཆུང་གཉིས་པ་ཡང་། །ཀ་བའི་བར་དུ་ཡང་དག་གནས། །ཕྱི་རོལ་ཀ་བའི་ངོས་དག་ཏུ། །སྔར་བཞིན་གདུང་འདེགས་ལྷ་མོའོ། །དེ་སྟེང་ཆ་
ཆུང་ཕྱེད་པ་ཡི། །སྣམ་བུ་ཆ་ཆུང་བཅུ་གཉིས་སུ། །དེ་ནི་རིང་བར་གྱུར་པ་ཡིན། །དེ་སྟེང་རྒྱ་ཕུབས་ཡང་དག་གནས། །ཆ་ཆུང་བརྒྱད་དུ་རིང་བ་སྟེ། །དེ་ཡི་སྟེང་དུ་བུམ་པའི་གནས། །དེ་ཡི་གཡས་དང་གཡས་མིན་དུ། །རྒྱལ་མཚན་དང་ནི་བ་དན་བྱ། །སྣམ་བུ་ཀུན་གྱི་
เล่ม ๗๖ · หน้า 93b
རྩེ་མོ་ལ། །དྲིལ་བུ་མེ་ལོང་རྔ་ཡབ་དང་། །རྒྱལ་མཚན་ལ་སོགས་ཁྱད་པར་གྱིས། །དེར་ཡང་བརྒྱད་པར་བྱ་བ་ཡིན། །ཐུགས་ཀྱི་དཀྱིལ་འཁོར་ཕྱི་རོལ་དུ། །གསུང་གི་དཀྱིལ་འཁོར་བྱ་བ་སྟེ། །ཐུགས་ཀྱི་ཉིས་འགྱུར་ཚད་ཀྱིས་ནི། །དེ་ཡི་ཚད་རྣམས་རབ་ཏུ་བརྟག །
སོ་སོའི་ཕྱོགས་ཀྱི་ཆ་རྣམས་སུ། །དེ་ལ་ཆ་ཆུང་བཅུ་གཉིས་ནི། །ཐུགས་ཀྱི་དཀྱིལ་འཁོར་རྩིག་སོགས་དང་། །མདའ་ཡབ་རྣམས་ཀྱིས་བསྒྲིབས་པའོ། །དེ་ཡི་ཕྱི་རོལ་ཐིག་གཅིག་ནི། །ཆ་ཆུང་བདུན་གྱི་བར་དུ་སླར། །ཆ་ཆུང་དག་ནི་བཞི་རྣམས་ཀྱིས། །སླར་ཡང་ལྷ་ཡི་སྣམ་
བུའོ། །ཆ་ཆུང་བཞི་པའི་པདྨར་འགྱུར། །དེ་ཡི་ཕྱོགས་སུ་གྱུར་པ་ཡང་། །ཐུགས་ཀྱི་རྟ་བབས་འོག་རྣམས་སུ། །ཤེས་པར་བྱ་སྟེ་མདོར་བསྡུ་ན། །མྱོས་པ་བསྲུང་བའི་སྣམ་བུ་སོགས། །བརྩེགས་མ་གཉིས་པ་དག་ལ་ཡང་། །ཆ་ཆུང་བཞི་ཡི་བར་དུ་ནི། །ཀུན་ནས་འབད་
པས་བྲི་བར་བྱ། །ཀ་བ་གཉིས་ཀྱི་བར་ལ་ཡང་། །ཆ་ཆུང་ཕྱེད་དག་བསྣུར་ནས་སོ། །ལྷ་ཡི་སྣམ་བུའི་ཐིག་ལས་ནི། །ཕྱི་རོལ་ཆ་ཆུང་བར་རྣམས་སུ། །རྩ་ཐིག་རབ་ཏུ་སྦྱིན་བྱ་སྟེ། །ཟུར་ཐིག་གཉིས་ཀྱི་བར་དུའོ། །སྒོ་དང་རྟ་བབས་དག་ཀྱང་དེར། །སྔར་གྱི་རིམ་པས་བྲི་བར་བྱ། །འོན་
ཀྱང་ཐུགས་ཀྱི་དཀྱིལ་འཁོར་ཚད། །ཉིས་འགྱུར་གྱི་ནི་ཚད་ཀྱིས་སོ། །གསུང་གི་དཀྱིལ་འཁོར་རྩ་བ་ལས། །ཕྱི་རོལ་སྒྲ་ཡི་དཀྱིལ་འཁོར་མཆོག །དེ་ལ་གཉིས་འགྱུར་ཚད་ཀྱིས་ནི། །དེ་ཡི་ཚད་རྣམས་རབ་གཞལ་བྱ། །སོ་སོའི་ཕྱོགས་ཀྱི་ཆ་རྣམས་སུ། །ཆ་ཆུང་ཉི་ཤུ་
རྩ་བཞི་ནི། །གསུང་གི་དཀྱིལ་འཁོར་ཐིག་སོགས་དང་། །མདའ་ཡབ་རྣམས་ཀྱིས་བསྒྲིབས་པའོ། །ཆ་ཆུང་དྲག་པོ་དེར་སྤངས་ནས། །ཐིག་ནི་ཟུར་གཉིས་བར་དུ་སྟེ། །སླར་ཡང་ཆ་ཆུང་ཉི་མ་ནི། །སྤངས་ནས་ལྷ་རྣམས་དེ་བཞིན་ནོ། །སྣམ་བུ་འདི་དེ་ཉིད་ལ་ནི། །པདྨ་ཡང་
ནི་བཅུ་གཉིས་ཏེ། །དེ་རྣམས་ཆ་ཆུང་བཅུ་གཉིས་པའོ། །དེ་ལས་ཡང་ནི་ཆ་ཆུང་གི། །དབུས་ཀྱི་ཆ་ཡི་ལྟེ་བ་སྟེ། །དེ་ཡི་གཡས་དང་གཡས་མིན་དུ། །འདབ་མ་རྣམས་ནི་བཞི་བྱ་ཞིང་། །དེ་ཡི་གཡས་དང་གཡོན་དག་ཏུ། །འདབ་མ་རྣམས་ནི་བརྒྱད་དུ་བྱ། །དེ་ཡང་གཡས་
เล่ม ๗๖ · หน้า 94a
དང་གཡོན་རྣམས་སུ། །འདབ་མ་རྣམས་ནི་བཅུ་དྲུག་འགྱུར། །དེ་ཡང་རིམ་པ་གསུམ་པ་སྟེ། །རིམ་པ་གསུམ་དུ་གྱུར་པས་ཀྱང་། །འདབ་མ་ཉི་ཤུ་རྩ་བརྒྱད་དོ། །ལྷ་ཡི་སྣམ་བུའི་ཐིག་ལས་ནི། །ཕྱི་རོལ་དུ་ཡང་རྩ་བའི་ཐིག །ཆ་ཆུང་བར་ནས་སྦྱིན་བྱ་སྟེ། །ཟུར་གྱི་
ཐིག་གི་བར་དུའོ། །སྒོ་དང་རྟ་བབས་དག་གི་ཚད། །སྔར་བརྗོད་ཇི་བཞིན་འདིར་ཡང་སྟེ། །འོན་ཀྱང་གསུང་གི་དཀྱིལ་འཁོར་ཚད། །ཉིས་འགྱུར་དག་གིས་རབ་གཞལ་བྱ། །ཆུ་ཡི་ཁོར་ཡུག་ཕྱེད་དུ་ཡང་། །རྟ་བབས་ཀྱིས་ཀྱང་ཁྱབ་པའོ། །གསུང་གི་དཀྱིལ་འཁོར་རྟ་བབས་ལས། །ཕྱི་
རོལ་སྐུ་ཡི་དཀྱིལ་འཁོར་གྱི། །སྒོ་ཡི་དབུས་སུ་ཤིང་རྟ་ནི། །ཆ་ཆུང་བཅུ་གཉིས་པ་རྣམས་བྱ། །ས་ཡི་ཁོར་ཡུག་ལ་ཡང་ནི། །ཆ་ཆུང་དག་ནི་བཅུ་གཉིས་བྱ། །དེ་ཡི་ཕྱི་ནས་ཆུ་ཡི་ནི། །ཁོར་ཡུག་ཆ་ཆུང་ཉེར་བཞི་སྟེ། །དེ་ཕྱིར་མེ་ཡི་ཁོར་ཡུག་ལ། །སླར་ཡང་ཆ་ཆུང་ཉེར་
བཞིའོ། །དེ་ནས་རླུང་གི་ཁོར་ཡུག་ལ། །ཆ་ཆུང་ཉི་ཤུ་རྩ་བཞིར་འགྱུར། །དེ་ལས་ཕྱི་རོལ་ནམ་མཁའ་ཡི། །ཁོར་ཡུག་ཆ་ཆུང་བཅུ་གཉིས་སོ། །ས་སོགས་ཁོར་ཡུག་དྲུག་པོ་ཡི། །དང་པོར་ཟླུམ་པོ་རབ་ཏུ་སྦྱིན། །འོད་ཕྲེང་མཐར་ཡང་ཟླུམ་པོ་སྟེ། །ཟླུམ་པོ་བདུན་དུ་འགྱུར་བ་ཡིན། །
ཐུགས་ཀྱི་རྡོ་རྗེའི་དཀྱིལ་འཁོར་ཏེ། །དཀྱིལ་འཁོར་གསུམ་གྱི་བདག་ཉིད་མཆོག །འདི་ཡི་ཐིག་སྐུད་ཁྲུ་བརྒྱད་དེ། །འཛིན་མའི་ཟླུམ་པོ་ཇི་སྲིད་དུའོ། །ཞེས་པ་ནི་ཕྱོགས་གཅིག་གོ། །གང་གི་ཚེ་འདིར་ཐུགས་ཀྱི་དཀྱིལ་འཁོར་གྱི་སྒོའི་ཚད་དང་གསུང་གི་དཀྱིལ་འཁོར་གྱི་སྒོའི་ཚད་བསྡོམས་
ནས་སྒོ་ཆ་ཆུང་བཅོ་བརྒྱད་དུ་ཡོངས་སུ་བརྟགས་ཏེ་དེའི་དྲུག་ཆ་ལ་ཆ་ཆུང་གི་ཐ་སྙད་བྱེད་པ་དེའི་ཚེ་ཆ་ཆུང་དེས་གཙོ་བོའི་པདྨའི་ལྟེ་བ་ལ་སོགས་པ་ནས་འོད་ཀྱི་ཁོར་ཡུག་གི་མཐར་ཐུག་པར་ཆ་ཆུང་གི་གྲངས་བྱའོ། །དེའི་ཚེ་ནི་ཐུགས་རྡོ་རྗེ་གཙོ་བོ་སྟེ་དཀྱིལ་འཁོར་གསུམ་གྱི་བདག་ཉིད་ཀྱི་དཀྱིལ་
འཁོར་ལ་ཁྲུ་བཅུ་གཉིས་དང་། དེའི་ཉིས་འགྱུར་གྱི་ཐིག་སྐུད་ཁྲུ་ཉི་ཤུ་རྩ་བཞི་ནི་སའི་ཁོར་ཡུག་གི་དང་པོ་ཇི་སྲིད་དུའོ། །ཞེས་པ་ཕྱོགས་གཉིས་པའོ། །གང་གི་ཚེ་བཅོམ་ལྡན་འདས་ཐུགས་རྡོ་རྗེ་གསུང་རྡོ་རྗེའི་གནས་སུ་གྱུར་ན་གསུང་རྡོ་རྗེ་ནི་གཙོ་བོ་སྟེ། དེ་ལས་གཞན་པའི་ལྷ་ལ་སོགས་
เล่ม ๗๖ · หน้า 94b
པ་དགོད་པ་ནི་ཕྱོགས་དང་པོ་བཞིན་ནོ། །གང་གི་ཚེ་ཡང་དབུས་ཀྱི་དཀྱིལ་འཁོར་ཁྲུ་བཞི་པ་དང་དེའི་ཉིས་འགྱུར་གཉིས་པ་དང་། དེའི་ཉིས་འགྱུར་གསུམ་པ་ཡིན་པ་དེའི་ཚེ་ཁྲུ་བཅུ་དྲུག་གི་དཀྱིལ་འཁོར་གསུམ་གྱི་བདག་ཉིད་གསུང་གི་དཀྱིལ་འཁོར་དང་། དེའི་ཉིས་འགྱུར་གྱི་ཐིག་སྐུད་ཁྲུ་སུམ་ཅུ་སོ་གཉིས་
ནི་སའི་ཁོར་ཡུག་གི་དང་པོ་ཇི་སྲིད་དུའོ་ཞེས་པ་ཕྱོགས་གསུམ་པའོ། །གང་གི་ཚེ་དང་པོར་བརྗོད་པའི་ཐུགས་ཀྱི་དཀྱིལ་འཁོར་གྱི་སྒོའི་ཚད་དང་པོར་བརྗོད་པའི་སྐུའི་དཀྱིལ་འཁོར་གྱི་སྒོའི་ཚད་བསྡོམས་ནས་སྒོ་ཆ་ཆུང་སུམ་ཅུར་ཡོངས་སུ་བརྟགས་ཏེ་དེའི་དྲུག་ཆ་ལ་ཆ་ཆུང་དུ་ཐ་སྙད་བྱེད་པ་དེའི་ཚེ་
ཆ་ཆུང་དེས་གཙོ་བོའི་པདྨའི་ལྟེ་བ་ལ་སོགས་པ་ནས་འོད་ཀྱི་ཁོར་ཡུག་གི་མཐར་ཐུག་པར་ཆ་ཆུང་གི་གྲངས་བྱ་ཞིང་། བཅོམ་ལྡན་འདས་ཐུགས་རྡོ་རྗེ་ཡང་སྐུ་རྡོ་རྗེའི་གནས་སུ་བྱའོ། །སྐུ་རྡོ་རྗེ་ནི་གཙོ་བོ་སྟེ་དེ་ལས་གཞན་པའི་ལྷ་ལ་སོགས་པ་དགོད་པ་ནི་ཕྱོགས་དང་པོ་བཞིན་ནོ། །དེའི་ཚེ་སྐུ་
རྡོ་རྗེ་ནི་གཙོ་བོའི་དཀྱིལ་འཁོར་གསུམ་གྱི་བདག་ཉིད་ཀྱི་དཀྱིལ་འཁོར་ལ་ཁྲུ་ཉི་ཤུ་དང་དེའི་ཉིས་འགྱུར་གྱི་ཐིག་སྐུད་ཁྲུ་བཞི་བཅུ་ནི་སའི་ཁོར་ཡུག་གི་དང་པོ་ཇི་སྲིད་དུའོ་ཞེས་པ་ཕྱོགས་བཞི་པའོ། །དེ་ལྟར་ཡང་དྲི་མ་མེད་པའི་འོད་ལས་ཐིག་སྐུད་ཁྲུ་བརྒྱད་པ་ཞེས་པ་ནི་རྩ་བ་ལ་ཁྲུ་བརྒྱད་ཅེས་བྱ་
བ་སྟེ། དཀྱིལ་འཁོར་གྱི་ནི་ཉིས་འགྱུར་རོ། །ཞེས་རྣམ་པར་བཀྲལ་ནས་དེ་ལ་དང་པོའི་སངས་རྒྱས་སུ་ཐུགས་ཀྱི་དཀྱིལ་འཁོར་ལ་ཁྲུ་བཅུ་གཉིས་བྱ་ཞིང་། དེ་ཉིས་འགྱུར་གྱི་ཐིག་སྐུད་ནི་ཁྲུ་ཉི་ཤུ་རྩ་བཞིའོ། །དེ་བཞིན་དུ་གསུང་གི་དཀྱིལ་འཁོར་ལ་ཁྲུ་བཅུ་དྲུག་གོ། །སྐུའི་དཀྱིལ་འཁོར་ལ་
ཁྲུ་ཉི་ཤུའོ་ཞེས་པ་ནི་ངེས་པ་སྟེ་ཐིག་སྐུད་ནི་དེའི་ཉིས་འགྱུར་རོ་ཞེས་གསུངས་སོ། །དབང་གི་དོན་དུ་ནི་དབུས་ཀྱི་དཀྱིལ་འཁོར་ཙམ་ཡང་བསྐོར་བར་རྗེས་སུ་གནང་སྟེ། ཇི་སྐད་དུ། དབང་གི་དོན་དུ་དཀྱིལ་འཁོར་རམ་ནི་རིགས་ཀྱི་དབང་གིས་ཕྱི་ཡི་འཁོར་ལོས་རབ་ཏུ་དམན་པར་འགྱུར། །ཞེས་གསུངས་
སོ། །གང་ཡང་ཁམས་གསུམ་རྣམ་པར་རྒྱལ་བའི་རྒྱུད་ལས། སྒོ་འཁོར་ལོའི་དགུ་ཆ་དང་། དཀྱིལ་འཁོར་ཆེན་པོ་བཀོད་པའི་རྒྱུད་ལས། སྒོ་འཁོར་ལོའི་བཅུ་ཆར་གསུངས་པ་དེ་དག་ནི། སློབ་དཔོན་རྣམས་ད་ལྟ་ཐ་སྙད་མི་མཛད་མོད། བདག་གིས་ནི་ཡོངས་སུ་བྱས་སོ། །དཀྱིལ་
เล่ม ๗๖ · หน้า 95a
འཁོར་གྱི་ཆད་རྣམས་ཀྱང་རབ་ཏུ་གྲགས་པ་བརྗོད་ཀྱི་འདི་ཙམ་ཁོ་ན་ནི་མ་ཡིན་ནོ། །དེ་ལྟར་ཡང་བཅོམ་ལྡན་འདས་ཀྱིས། འཛམ་བུའི་གླིང་གི་དབང་ཕྱུག་གམ། །འཁོར་ལོས་སྒྱུར་བའི་རྒྱལ་པོ་ཡིས། །ཕྱི་རོལ་དཀྱིལ་འཁོར་བྲི་བྱ་སྟེ། །ཀུན་ནས་དཔག་ཚད་རབ་ཏུའོ། །གདུལ་
བྱའི་སྐྱེ་བོའི་བསམ་པ་ལ། །མཁས་པས་མཉམ་པར་བལྟས་ནས་ནི། །འདོད་པས་ཚད་ནི་བྱས་པ་ལ། །ཉེས་པ་ཅུང་ཟད་ཡོད་མ་ཡིན། །རང་གི་འདོད་པས་དཀྱིལ་འཁོར་ཀུན། །ལག་པའི་མཐིལ་དུ་བྲིས་བྱས་ནས། །བསྟན་བཅོས་ལས་གསུངས་དོན་བྱེད་དེ། །ས་སྟེངས་སོགས་སུ་
སྨོས་ཅི་དགོས། །ཞེས་གསུངས་སོ། །དཔག་ཏུ་མེད་པའི་དབྱེ་བས་ཐ་དད་པའི་དཀྱིལ་འཁོར་རྣམས་ཇི་ཙམ་ཞིག་མངོན་པར་བརྗོད་པར་བྱ་བར་ནུས། གང་གི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། དཀྱིལ་འཁོར་ཇི་ལྟ་དེ་བཞིན་དུ། །རབ་ཏུ་བརྟགས་པ་སུ་ཡིས་ནུས། །རང་གི་
ལྷ་ཡི་རྣལ་འབྱོར་གྱིས། །དཀྱིལ་འཁོར་བརྟག་པ་འགྲུབ་པ་ཡིན། །ཞེས་པ་དཀྱིལ་འཁོར་ལ་ཐིག་གདབ་པའི་ཆོ་གའོ།། །།དེ་ནས་གཏོར་མ་བྱིན་ལ། བཾ་ལཾ་རཾ་ཡཾ་ཧཾ་རྣམས་ཀྱི་ས་བོན་ལས་གྲུབ་པའི་དཀར་པོ་དང་སེར་པོ་དང་དམར་པོ་དང་ལྗང་གུ་དང་ནག་པོའི་ཚོན་རྣམས་རིམ་པ་ཇི་
ལྟ་བ་བཞིན་དུ་ཟླ་བ་ཆུ་ཤེལ་དང་། ཀརྐེ་ཊ་ཎ་དང་། པདྨ་རཱ་ག་དང་། ཨིནྡྲ་ནཱི་ལ་ལས་བྱུང་བ་རྣམས་སམ་ཡང་ན་མུ་ཏིག་དང་གསེར་དང་བྱི་རུ་དང་བསྲེས་པ་མུ་མེན་ལས་བྱུང་བ་རྣམས་སམ། བསྲེས་པ་ནི་འདིར་མུ་ཏིག་ལ་སོགས་པ་བཞི་པོ་རྣམས་སོ། །ཡང་ན་ཁམས་ལས་བྱུང་བ་འམ། འབྲས་
ལས་བྱུང་བ་འམ། མེ་ཏོག་ལས་བྱུང་བ་འམ། ཇི་ལྟར་རིགས་པར་སོལ་བ་དང་སོ་ཕག་དང་རུས་པའི་ཕྱེ་མ་ལ་སོགས་པས་ཀྱང་རུང་། ལེགས་པར་འདུས་བྱས་པའི་བཟང་པོ་རྣམས་བྷྲཱུཾ་ཨཾ་ཧྲཱིཾ་ཁཾ་ཧཱུཾ་རྣམས་ལས་གྲུབ་པའི་རྣམ་པར་སྣང་མཛད་ལ་སོགས་པའི་ངོ་བོར་བསམས་ནས། ནམ་མཁའ་ལ་བཀོད་
པའི་དེ་བཞིན་གཤེགས་པ་ཐམས་ཅད་ཐུགས་ཀར་བྷྲཱུཾ་ལ་སོགས་པ་ལས་གྲུབ་པའི་ཡེ་ཤེས་ཀྱི་ཚོན་རྣམས་ཐིག་སྐུད་འདུ་བྱ་བར་བརྗོད་པའི་འབར་བའི་ལྟ་སྟངས་ཀྱིས་བཀུག་སྟེ་བཅུགས་པས་ཡེ་ཤེས་ཀྱི་ཚོན་དང་ལྷན་ཅིག་རོ་གཅིག་ཏུ་གྱུར་པ་རྣམས་ལ་བྷྲཱུཾ་ཞེས་པ་ལ་སོགས་པས་
เล่ม ๗๖ · หน้า 95b
མངོན་པར་བསྔགས་ཤིང་། ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་པའི་སྔགས་ཀྱིས་བརྒྱ་རྩ་བརྒྱད་དུ་བསྔགས་སོ། །དེ་བཞིན་དུ་འབར་བའི་ལྟ་བས་ཡང་དག་པར་གཟི་བརྗིད་བསྐྱེད་ཅིང་། རེ་རེ་ལ་ཧཱིཿཡིག་བཀོད་ནས། བདེན་པ་གང་གིས་སེམས་ཅན་རྣམས་རྡུལ་ཚོན་མང་ཞིང་སངས་རྒྱས་བཅོམ་ལྡན་འདས་
རྣམས་ནི་སེམས་ཅན་རྣམས་ལ་ཆགས་པས་རྗེས་སུ་ཆགས་པར་གྱུར་པའི་བདེན་པ་དེས་རྡུལ་ཚོན་རྣམས་འབར་བར་གྱུར་ཅིག །ཅེས་བདེན་པའི་བྱིན་གྱི་རླབས་ཀྱིས་སྦར་བར་བྱ་སྟེ། ལྷ་སྒོམ་པ་ཕུལ་དུ་བྱུང་བ་ལས་ནི་འབར་བར་འགྱུར་རོ། །དྲི་དང་མེ་ཏོག་ལ་སོགས་པས་མཆོད་ནས་
སྣོད་གསར་པར་གཞག་པར་བྱའོ་ཞེས་པ་རྡུལ་ཚོན་གྱི་བཟླས་པའི་ཆོ་གའོ།། །།དེ་ནས་དཀྱིལ་འཁོར་གྱི་ལྟེ་བར་གནས་པའི་ཕུར་བུ་དཀྱིལ་འཁོར་ཇི་ལྟ་བར་འཆད་པར་འགྱུར་པའི་ལས་ཐམས་ཅད་པའི་སྔགས་ཀྱིས་བཏོན་ནས་རང་གི་ལག་པའི་རྡོ་རྗེ་ལ་བསྟིམ་སྟེ་ཕུར་བུའི་ཁུང་བུ་རིན་པོ་ཆེ་ལྔ་
དང་ཚོན་སྣ་ལྔས་བཀང་བས་མཉམ་པོར་བྱས་ལ། དྲིལ་བུའི་སྒྲ་དང་རྡོ་རྗེའི་གླུས་མཚན་མ་ངན་པ་བསལ་བར་བྱའོ། །ཆོས་དབྱིངས་འདི་ནི་དག་པ་སྟེ། །སེམས་ཅན་ཁམས་ནི་རབ་གྲོལ་མཛད། །རང་ཉིད་རྒྱལ་པོ་རྡོ་རྗེ་འཆང་། །དེ་བཞིན་གཤེགས་པ་ཀུན་གྱི་གནས། །ཉེས་པ་
ཀུན་ལས་རྣམ་གྲོལ་བའི། །འཁོར་ལོའི་ནང་དུ་ཡང་དག་ཞུགས། །སེམས་ཅན་ཀུན་གྱི་དོན་གྱི་ཕྱིར། །དཀྱིལ་འཁོར་བདག་གིས་བྲི་བར་བྱ། །ཞེས་པ་ཆོས་ཀྱི་དབྱིངས་རྣམ་པར་དག་པར་མོས་ལ། ལག་པ་གཡས་པ་རྡོ་རྗེས་མཚན་ཞིང་གཡོན་པའི་ཁུ་ཚུར་གྱིས་ཨོཾ་བཛྲ་རཾ་ག་ས་མ་ཡ།
ཨོཾ་ཨཱཿཧཱུཾ་ཞེས་པའམ། ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་བརྗོད་ཅིང་དཀྱིལ་འཁོར་གྱི་ནང་དུ་ཤར་དུ་ཕྱོགས་པར་འདུག་པས་དབང་ལྡན་གྱི་མཚམས་ནས་བརྩམས་ཏེ་གཡས་སྐོར་དུ་ཚོན་དགྱེ་བར་བྱའོ། །ཕྱི་ནས་ཇི་ལྟ་བ་བཞིན་དུ་སྒོའི་སློབ་དཔོན་ལ་སོགས་པ་གཞན་གྱིས་ཀྱང་ངོ་། །སྦོམས་
སུ་སྒོ་ཡི་ཉི་ཤུ་ཆའི། །རེ་ཁཱ་ཡང་དག་དྲང་བྱ་སྟེ། །མཉམ་ཞིང་དྲང་པོ་མ་ཆད་པ། །ཇི་ལྟར་རིགས་པའོ་ཕན་ཚུན་གྱི། །བར་གྱི་ཚད་ནི་ནས་ཙམ་ལ། །འོག་དང་སྟེང་ནི་ཅི་མཛེས་བྱ། །སྦོམ་པོར་བཀྱེ་ན་ནད་འབྱུང་སྟེ། །ཕྲ་མོ་ཡི་ནི་ནོར་རྣམས་ཉམས། །ཡོན་པོ་ཡིས་ནི་རྣམ་པར་སྡང་། །
เล่ม ๗๖ · หน้า 96a
ཆད་ན་བླ་མ་སློབ་མ་འཆི། །གཡས་སྐོར་མིན་པར་བཀྱེ་ན་ནི། །ཚོན་རྣམས་ཕུར་བུས་བཏབ་པར་འགྱུར། །ཕུར་བུས་བཏབ་པ་ནི་དངོས་གྲུབ་ཀྱི་རྒྱུ་མ་ཡིན་པ་སྟེ། ཕན་ཚུན་འདྲེས་པས་ནི་རིགས་འཆད་པར་འགྱུར་རོ། །ཉེས་པ་ཞི་བར་བྱ་བའི་ཕྱིར་བཅོམ་ལྡན་འདས་
ཀྱིས་གསུངས་པ། དེ་ཉིད་མེད་པའི་བསམ་སྦྱོར་ལས། །གང་ཞིག་ཚོན་བཀྱེའི་ཉེས་པ་སྟེ། །བཟང་པོ་དེ་ཉིད་བསམ་སྦྱོར་ལས། །སུས་ཀྱང་བར་ཆད་བྱ་མི་ནུས། །དཀྱིལ་འཁོར་ཇི་ལྟ་བ་དེ་བཞིན། །ཇི་སྲིད་དུ་ནི་དེ་ཉིད་བརྟག །ཅེས་སོ། །ཚོན་གྱི་རེ་ཁཱ་རྣམས་ཀྱང་རིན་པོ་ཆེ་དཀར་པོ་ལ་
སོགས་པའི་རང་བཞིན་གྱི་ཐུར་མ་ལ་སོགས་པའི་ངོ་བོར་ལྷག་པར་མོས་པར་བྱའོ། །འཇུག་པ་དང་འབྱུང་བ་ལ་ཐིག་དང་ཚོན་ལ་འགོམས་པའི་སྡིག་པས་འཇིགས་པའི་ཕྱིར་རྡོ་རྗེ་ཤུགས་ཀྱི་ཡེ་ཤེས་ཀྱི་ཚོན་གྱི་རེ་ཁཱ་ཡིད་ཀྱིས་ནམ་མཁའ་ལ་བཏེག་ལ། ཨོཾ་བཛྲ་བེ་གཱ་ཀྲ་མ་ཧཱུཾ་ཞེས་བཟླ་ཞིང་། རྩ་བའི་
ཐིག་གི་ནང་དུ་དཀྱིལ་འཁོར་བྲི་བའི་ཕྱིར་འཇུག་པ་དང་འབྱུང་བར་བྱའོ། །དེ་ལ་དང་པོར་ལྷ་ཐམས་ཅད་ཀྱི་དཀྱིལ་འཁོར་ལ་ཕྱི་དང་ནང་གི་དཀྱིལ་འཁོར་གྱི་སྤྱིའི་ཁ་དོག་གི་རིམ་པ་བརྗོད་པར་བྱའོ། །ཤར་དང་ལྷོ་དང་ནུབ་དང་བྱང་གི་ཕྱོགས་ཀྱི་དེ་བཞིན་གཤེགས་པ་དང་དབུས་ཀྱི་གཙོ་བོའི་
ཁ་དོག་གི་རིམ་པ་ཇི་ལྟ་བ་བཞིན་དུ་ཕྱིའི་རེ་ཁཱ་ནས་བརྩམས་ཏེ། ནང་གི་རེ་ཁཱའི་བར་དུ་ཚོན་སྣ་ལྔའི་རྩིག་པའི་རེ་ཁཱ་རྣམས་ཀྱི་ཁ་དོག་གོ། །ཕྱོགས་དང་དབུས་སུ་ལྷ་གཞན་འགོད་པ་ན་རྒྱས་འདེབས་ཀྱི་དེ་བཞིན་གཤེགས་པའི་ཁ་དོག་གི་རིམ་པའོ། །བསྒོམ་བྱའི་དཀྱིལ་འཁོར་ལ་
རྩིག་པ་ལྔ་པོ་འདི་དག་རིན་པོ་ཆེ་ཁ་དོག་ལྔ་ལས་གྲུབ་ཅིང་བར་ནི་ནས་ཙམ་མོ་ཞེས་པ་ཁ་ཅིག་གོ། །རྩིག་པ་འདི་ནི་གཅིག་ཉིད་རིམ་གྱིས་སྟེང་ནས་སྟེང་དུ་ཁ་དོག་ལྔའི་རིན་པོ་ཆེ་ལས་བྱས་པའོ་ཞེས་པ་ནི་གཞན་དག་གོ། །འདིར་འདོད་པ་དང་པོ་ལ་རིན་པོ་ཆེའི་སྣམ་བུའི་ས་གཞི་དམར་
པོ་དང་དྲ་བ་དང་དྲ་བ་ཕྱེད་པའི་ས་གཞི་ནག་པོའོ། །འདོད་པ་གཉིས་པ་ལ་ནི་དང་པོའི་ཁ་དོག་གི་རིན་པོ་ཆེའི་རང་བཞིན་གྱི་ཆ་ཉིད་རྣམ་པར་བཀྲ་བའི་རིན་པོ་ཆེའི་སྣམ་བུ་སྟེ། ཡང་ན་དེ་ལ་ཁ་དོག་གཞན་གྱིས་རིན་པོ་ཆེ་ལས་གྲུབ་པ་བཀོད་པ་ནི་རིན་པོ་ཆེའི་སྣམ་བུའོ། །ལྔ་པའི་ཁ་དོག་གི་
เล่ม ๗๖ · หน้า 96b
རིན་པོ་ཆེའི་རང་བཞིན་གྱི་ཆ་ཉིད་སྣ་ཚོགས་པའི་དྲ་བ་དང་དྲ་བ་ཕྱེད་པའི་སྣམ་བུའམ་ཡང་ན་དེ་ལ་ཁ་དོག་གཞན་གྱི་རིན་པོ་ཆེ་ལས་གྲུབ་པ་བཀོད་པ་ནི་དྲ་བ་དང་དྲ་བ་ཕྱེད་པའི་སྣམ་བུའོ། །ཕྱོགས་གཞན་བརྗོད་པ་ནི་དེའི་སྟེང་དུ་རིན་པོ་ཆེའི་སྣམ་བུ་དོ་ཤལ་གྱི་སྣམ་བུའོ། །འདོད་པ་གཉིས་ཀ་ལ་ཡང་སྟེགས་
བུ་ནི་ཤེལ་ལམ་གསེར་གྱི་རང་བཞིན་ནམ་པདྨ་རཱ་གཱའི་རང་བཞིན་ནམ། རིན་པོ་ཆེ་གཞན་ཡང་རུང་སྟེ་ཇི་ལྟར་མཛེས་པའོ། །རིན་པོ་ཆེའི་ཤར་བུ་དང་མདའ་ཡབ་རྣམས་ནི་དཀར་པོའོ། །རིན་པོ་ཆེའི་ཤར་བུ་དང་མདའ་ཡབ་དང་དར་དཔྱངས་ཀྱི་བར་གྱི་ས་གཞི་ནི་སྔོན་པོ་སྟེ། ནམ་མཁའི་ངོ་བོ་ཡིན་
པའི་ཕྱིར་རོ། །དེ་ཉིད་ཀྱི་ཕྱིར་བར་གྱི་སྣམ་བུ་ལ་མུན་པའི་སྣམ་བུ་ཞེས་བརྗོད་དོ། །གདུང་ནི་ཇི་ལྟར་མཛེས་པའི་རིན་པོ་ཆེ་ལས་བྱས་པ་སྟེ། རྣམ་པ་སྣ་ཚོགས་པའི་རིན་པོ་ཆེའི་པ་ཏྲ་འཕྲོ་བ་ལ་སོགས་པས་བརྒྱན་པའོ། །རྟ་བབས་ཀྱི་ཀ་བ་རྣམས་ནི་རང་རང་གི་ཕྱོགས་ཀྱི་དེ་བཞིན་གཤེགས་
པའི་ཁ་དོག་གོ། །ཀྱོག་པོའི་ནང་གི་བླ་རེའི་འོག་གི་ཡང་དེ་རང་གི་དེ་བཞིན་གཤེགས་པའི་ཁ་དོག་གི་འོད་ཀྱིས་སྤྲས་པའི་ནམ་མཁའི་རང་བཞིན་ནོ། །རྟ་རྨིག་དང་བ་རན་གྱི་ཁ་དོག་ནི་ཇི་ལྟར་མཛེས་པ་སྟེ་ཆུ་སྲིན་གྱི་སྣམ་བུ་ཡང་ངོ་། །འཁོར་ལོ་རྣམས་ནི་གསེར་གྱི་ཁ་དོག་སྟེ་རིན་པོ་ཆེ་གཞན་
ལས་ཀྱང་བྱས་པའོ་ཞེས་ཁ་ཅིག་གོ། །རི་དགས་དང་རི་དགས་མོ་ནི་གསེར་གྱི་རང་བཞིན་ལ་རིན་པོ་ཆེ་གཞན་གྱིས་སྤྲས་པའོ། །སྣ་ཚོགས་རྡོ་རྗེའི་ལྟེ་བ་ནི་ནག་པོ་སྟེ་ཁ་ཅིག་ཏུ་ནི་གཙོ་བོའི་དེ་བཞིན་གཤེགས་པའི་མདོག་གོ། །ར་དབུས་མ་རྣམས་ནི་རང་རང་གི་ཕྱོགས་ཀྱི་དེ་བཞིན་གཤེགས་
པའི་ཁ་དོག་སྟེ་དེ་ལས་གཞན་པ་རྣམས་ནི་དེ་དག་གི་ངོས་ཀྱི་དེ་བཞིན་གཤེགས་པའི་ཁ་དོག་གོ། །ར་ལྔ་པ་ལས་ནི་དེ་ལས་གཞན་པའི་ཕྱོགས་དང་དབུས་ཀྱི་དེ་བཞིན་གཤེགས་པའི་མདོག་སྟེ་ཇི་ལྟར་རིགས་པར་རོ། །ཕྱོགས་གཅིག་གི་ར་ཐམས་ཅད་ཀྱང་རང་གི་ཕྱོགས་ཀྱི་དེ་བཞིན་གཤེགས་པའི་
མདོག་གོ་ཞེས་པ་ཁ་ཅིག་སྟེ། འཁོར་ལོའི་དབང་པོ་ཞལ་བཞི་པ་ཉིད་ལ་རང་རང་གི་ཕྱོགས་ཀྱི་ཞལ་གྱི་མདོག་གོ་ཞེས་པ་ནི་ཕྱོགས་གཞན་ནོ། །བུམ་པ་བཟང་པོ་རྣམས་ནི་གསེར་ལས་བྱས་པའོ། །དཔག་བསམ་གྱི་ཤིང་རྣམས་ནི་དེ་ལས་གཞན་པའི་ཤིང་ལྟ་བུའོ། །པདྨའི་ལྟེ་བ་ནི་ལྗང་གུ་
เล่ม ๗๖ · หน้า 97a
སྟེ་གེ་སར་ནི་སེར་པོ་ཡིན་ལ་འདབ་མ་རྣམས་ནི་སྣ་ཚོགས་པའི་མདོག་གོ། །དེའི་ས་གཞི་ནི་དམར་པོ་ཤས་ཆེ་བའི་དཀར་པོ་སྟེ་ཆོས་འབྱུང་གི་ཆའི་རེ་ཁཱ་ནི་དཀར་པོའོ། །ཁོར་ཡུག་གི་ཕྱོགས་ལ་ཡང་ཤེལ་ཉིད་ཡིན་ན་རེ་ཁཱ་དཀར་པོའམ་གསེར་གྱི་མདོག་ཡིན་ན་སེར་པོའོ། །རྡོ་རྗེ་རྣམས་
དང་དེའི་རེ་ཁཱ་ཡང་ནག་པོ་སྟེ་གཞན་དུ་དཀར་པོའམ་སེར་པོ་ཞེས་གསུངས་སོ། །རྡོ་རྗེའི་ས་གཞིའི་མདོག་ནི་ཇི་ལྟར་མཛེས་པ་སྟེ། བསྒོམ་བྱའི་དཀྱིལ་འཁོར་ལ་འོག་རླུང་གི་དཀྱིལ་འཁོར་གྱི་མཐའ་ནས་སྟེང་དུ་ཡང་འོག་མིན་གྱི་མཐའ་ཇི་སྲིད་པར་རྡོ་རྗེའི་ར་བ་གནས་པའི་ཕྱིར་དང་། རླུང་ལ་སོགས་པ་རྣམས་ཀྱང་
ཇི་ལྟར་རིགས་པར་ཁ་དོག་སྣ་ཚོགས་པ་ཡིན་པའི་ཕྱིར་རོ། །འོད་ཟེར་རྣམས་ནི་ཁ་དོག་ལྔ་པ་སྟེ་འཕྲོ་བའི་ཚུལ་ལོ། །འཇམ་པའི་རྡོ་རྗེའི་ནི། རྫོགས་སངས་ཡེ་ཤེས་སྐུ་ཡིན་ཕྱིར། །ངག་དབང་རྡོ་རྗེའི་རིགས་སུ་བརྗོད། །ཆོས་སྐུའི་བདག་ཉིད་ལེགས་དག་པ། །འདི་ནི་ཐུགས་ཀྱི་དཀྱིལ་འཁོར་
རོ། །ཞེས་བྱ་བའི་རིགས་པས། དཀར་པོ་སེར་པོ་དེ་བཞིན་དམར། །ལྗང་གུ་དང་ནི་ནག་པོ་ཉིད། །རྩིག་པ་ཡི་ནི་ཚོན་ཡིན་ནོ། །ཞེས་གསུངས་སོ། །གང་གི་ཚེ། ཆོས་རྣམས་རང་བཞིན་གྱིས་ནི་དཀར། །དེས་ན་ངག་དབང་འདི་དཀར་ཉིད། །ཅེས་གསུངས་པས། གསུང་རྡོ་རྗེ་དཀར་པོ་གཙོ་
བོར་གྱུར་པ་དེའི་ཚེ་ནི། དཀར་པོ་དང་སེར་པོ་དང་ནག་པོ་དང་ལྗང་གུ་དང་དཀར་པོའི་ཚོན་གྱི་རེ་ཁཱའོ། །ཁ་སྦྱོར་དུ་གསུངས་པའི་རྡོ་རྗེ་སེམས་དཔའ་དཀར་པོ་ཡིན་ནའང་མི་བསྐྱོད་པ་དང་ལྷན་ཅིག་རོ་གཅིག་པ་ཉིད་དུ་བསྟན་པའི་ཕྱིར་ནང་གི་རྩིག་པ་ནག་པོ་ཉིད་དོ། །གཞན་དུ་ནི་དཀར་པོ་ཁོ་
ན་ཡིན་ཏེ། ཇི་ལྟར་གསུང་རྡོ་རྗེ་གཙོ་བོར་གྱུར་པས་ཁ་ཅིག་ཏུ་དཀར་པོ་ཉིད་དུ་འགྱུར་རོ་ཞེས་སོ། །རྩ་བའི་ཐིག་གི་ནང་གི་དཀྱིལ་འཁོར་དུ་ཡང་ཟུར་ཐིག་གཉིས་གཉིས་ཀྱིས་ཡོངས་སུ་བཅད་པའི་ཕྱོགས་བཞིའི་ས་གཞི་རྣམས་རང་རང་གི་ཕྱོགས་ཀྱི་དེ་བཞིན་གཤེགས་པའི་ཁ་དོག་གོ། །
བསྒོམ་བྱའི་དཀྱིལ་འཁོར་གྱི་ཕྱོགས་བཞིའི་ཐོག་རྣམས་ཀྱང་དེ་བཞིན་ནོ། །ཀ་བ་རྣམས་ཀྱང་དེ་བཞིན་ཏེ་རང་རང་གི་རེ་མིག་ནི་དེ་བཞིན་གཤེགས་པའི་མཚན་མའི་ཕྲེང་བས་མཚན་པའོ། །གཙོ་བོའི་ས་གཞི་ནི་གཙོ་བོའི་མདོག་གོ། །སྣ་ཚོགས་པདྨའི་འདབ་མ་ནི། །བདེན་བྲལ་ལྗང་
เล่ม ๗๖ · หน้า 97b
གུ་དབང་ལྡན་གནག །མེ་དང་རླུང་ནི་སེར་པོ་སྟེ། །ཕྱོགས་རྣམས་ཀྱི་ནི་དམར་པོའོ། །གཙོ་བོའི་སྣམ་བུ་ལ་ནི་གཙོ་བོའི་མཚན་མའི་ཕྲེང་བ་སྟེ་རེ་ཁཱ་གཞན་གྱི་ལེགས་པའི་ཡོན་ཏན་དང་ཁ་དོག་ནི་ཇི་ལྟར་མཛེས་པའོ། །དཔལ་ལྡན་བདེ་མཆོག་གི་དཀྱིལ་འཁོར་ལ་ནི་ཐུགས་ཀྱི་འཁོར་ལོ་ནག་
པོའོ། །དེའི་རྩིབས་ཀྱི་བར་རྣམས་ནི་དམར་པོ་སྟེ་གསུང་གི་འཁོར་ལོའི་ལྟེ་བ་ཡིན་པའི་ཕྱིར་རོ། །གསུང་གི་འཁོར་ལོ་ནི་དམར་པོའོ། །དེའི་རྩིབས་ཀྱི་བར་རྣམས་ནི་དཀར་པོ་སྟེ། སྐུའི་འཁོར་ལོའི་ལྟེ་བ་ཡིན་པའི་ཕྱིར་རོ། །སྐུའི་འཁོར་ལོ་ནི་དཀར་པོའོ། །དེའི་རྩིབས་ཀྱི་བར་རྣམས་ནི་ཤར་
ལ་སོགས་པའི་ཕྱོགས་སུ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་ཁ་དོག་གོ། །མུ་ཁྱུད་གསུམ་ནི་གོ་རིམས་ཇི་ལྟ་བ་བཞིན་དུ་རྡོ་རྗེ་ནག་པོ་དང་། པདྨ་དམར་པོ་དང་འཁོར་ལོ་དཀར་པོའི་ཕྲེང་བ་རྣམས་ཀྱིས་བསྐོར་བའོ། །དེའི་ཕྱི་རོལ་ནས་བརྩམས་ཏེ་ནང་གི་བར་དུ་ལྗང་གུ་དང་
དཀར་པོ་དང་དམར་པོ་དང་སེར་པོ་དང་ནག་པོའི་ཁ་དོག་གི་རེ་ཁཱ་ལྔའོ། །ཤར་དང་བྱང་དང་ནུབ་དང་ལྷོ་དང་དབུས་ཀྱི་ས་གཞི་དང་ཐོག་རྣམས་ཀྱང་དཀར་པོ་དང་ལྗང་གུ་དང་དམར་པོ་དང་སེར་པོ་དང་ནག་པོའི་ཁ་དོག་གོ། །གཞན་དག་ནི་རེ་ཁཱ་ལྔ་དང་ས་གཞི་དང་ཐོག་རྣམས་ནག་པོ་དང་ལྗང་གུ་དང་དམར་པོ་དང་སེར་པོ་
དང་དཀར་པོ་དང་བསྲེས་པའི་སྔོན་པོའི་མདོག་གོ་ཞེས་ཟེར་རོ། །དེ་ལྟར་སྔ་མ་དང་ཕྱི་མར་ཁ་དོག་གི་རིམ་པ་ཡོངས་སུ་བསམས་ནས་རྡུལ་ཚོན་དགྱེ་བར་བྱའོ། །དེ་ལ་སྐལ་བར་མི་ལྡན་པ་འདུས་པ་ན་མཚན་མ་དང་ཕྱག་རྒྱ་ཉིད་ཇི་ལྟར་རིགས་པར་བྲི་བར་བྱའོ། །སྐལ་བ་དང་ལྡན་པ་འདུས་པ་ན་ནི་ལྷའི་སྐུ་
བྲི་བར་བྱ་ཞིང་། བྲིས་སྐུའམ་ལུགས་མའམ་འབུར་དུ་བཏོད་པའམ་ལེགས་པར་འདུས་པ་བྱས་པ་གཞག་པར་བྱའོ། །ད་ལྟར་ཡང་ཀླུའི་བློའི་ཞབས་ཀྱིས། ཇི་ལྟར་ནུས་པས་དཀྱིལ་འཁོར་དུ། །ས་བོན་དགོད་བྱ་ཡང་ན་ནི། །མཚན་མའམ་ལྷ་ཡི་གཟུགས་ཉིད་དེ། །ལུགས་མའམ་
འབུར་མ་བཞག་པར་བྱ། །ཞེས་གསུངས་སོ། །ཕྱག་རྒྱ་བྲི་བར་ནི་མངོན་པར་བརྗོད་པ་བླ་མའི་རྒྱུད་ལས་གསུངས་སོ། །མི་ནུས་ན་ནི་བྲིས་པའི་ཕྱག་རྒྱ་འམ་མཚན་མ་གཞག་པར་བྱ་སྟེ། ཚོན་ནམ་ཡང་ན་པིར་རྣམས་ཀྱིས། །བྲིས་པ་རྣམས་ཀྱིས་རྣམ་པར་སྤྲས། །ཞེས་སོ། །དེའི་
เล่ม ๗๖ · หน้า 98a
ཕྱིར་འཇམ་པའི་རྡོ་རྗེའི་དཀྱིལ་འཁོར་ལ་ནི་ལྟེ་བར་ཟླ་བ་ལ་བཅོམ་ལྡན་འདས་འཇམ་པའི་རྡོ་རྗེའི་རལ་གྲི་སྔོ་བསངས་སོ། །ཤར་དུ་ཟླ་བ་ལ་རྣམ་པར་སྣང་མཛད་ཀྱི་འཁོར་ལོ་དཀར་པོ་རྩིབས་བརྒྱད་པའོ། །ལྷོར་ཉི་མ་ལ་རིན་ཆེན་འབྱུང་ལྡན་གྱི་རིན་པོ་ཆེ་ལྗང་གུ་ཆ་དགུ་པའོ། །ནུབ་
ཏུ་ཉི་མ་ལ་འོད་དཔག་མེད་ཀྱི་པདྨ་དམར་པོ་འདབ་མ་བརྒྱད་པའོ། །བྱང་དུ་ཉི་མ་ལ་དོན་ཡོད་གྲུབ་པའི་རལ་གྲི་ལྗང་གུའོ། །མེར་ཟླ་བ་ལ་སྤྱན་མའི་མིག་འབྲས་ནག་པོ་ཅན་གྱི་མིག་དཀར་པོ་གཉིས་སྤྲིན་ལ་གནས་པའོ། །བདེན་བྲལ་དུ་ཟླ་བ་ལ་མཱ་མ་ཀཱིའི་རྡོ་རྗེ་ནག་པོ་རྩེ་ལྔ་པ་སྟེ་རྒྱུད་དུ་དེ་ལྟར་
གསུངས་པའི་ཕྱིར་རོ། །རླུང་དུ་ཟླ་བ་ལ་གོས་དཀར་མོའི་པདྨ་དམར་པོ་ཁ་བྱེ་ཞིང་ཡུ་བ་རྩ་བ་དང་བཅས་པའོ། །དབང་ལྡན་དུ་ཟླ་བ་ལ་སྒྲོལ་མའི་ཨུཏྤ་ལ་ཁ་དོག་སྔོ་སེར་རོ། །མེ་ལ་སོགས་པའི་ཟུར་བཞི་དང་ཤར་སྒོའི་གཡོན་དང་གཡས་སུ་ཆ་ཆུང་གཉིས་སྤངས་པའི་འགྲམ་དག་ཏུ་ཟླ་བ་རྣམས་
ལ་རིམ་པ་ཇི་ལྟ་བ་བཞིན་དུ་གཟུགས་དང་སྒྲ་དང་དྲི་དང་རོ་དང་རེག་བྱ་དང་ཆོས་ཀྱི་དབྱིངས་ཀྱི་རྡོ་རྗེ་མ་རྣམས་ཀྱི་མེ་ལོང་དཀར་པོ་དང་དྲི་ཟའི་པི་ཝང་སྔོན་པོ་དང་། དྲི་སེར་པོའི་དུང་དང་རོའི་སྣོད་དམར་པོ་དང་། སྣ་ཚོགས་པའི་གོས་དང་ཆོས་འབྱུང་དཀར་པོ་རྣམས་སོ། །ཤར་ལ་སོགས་པའི་སྒོར་ཉི་མ་
རྣམས་ལ་གཤིན་རྗེ་མཐར་བྱེད་དང་། ཤེས་རབ་མཐར་བྱེད་དང་། པདྨ་མཐར་བྱེད་དང་། བགེགས་མཐར་བྱེད་རྣམས་ཀྱི་གོ་རིམས་ཇི་ལྟ་བ་བཞིན་དུ་རྡོ་རྗེའི་ཐོ་བ་ནག་པོ་དང་རྡོ་རྗེས་མཚན་པའི་དབྱུག་པ་དཀར་པོ་དང་པདྨ་དམར་པོ་དང་རྡོ་རྗེ་ཁ་གྱེས་པ་སྔོན་པོའོ། །འདིར་ཟླ་བ་དང་ཉི་མ་བཅུ་
དགུ་ནི་སྣ་ཚོགས་པདྨ་ལ་གནས་པའོ། །མཚན་མ་ཐམས་ཅད་ནི་འོད་ཟེར་དང་བཅས་པ་རང་རང་གི་ཕྱོགས་སུ་མགོ་བསྟན་ནས་གནས་ཏེ། འཁོར་ལོའི་དབང་ཕྱུག་གི་ནི་ནུབ་ཏུ་མགོ་བསྟན་པའོ། །དེ་ལྟར་ཕྱི་མ་རྣམས་སུ་ཡང་ངོ་། །རྡོ་རྗེ་སེམས་དཔའ་འཁོར་ལོའི་དབང་ཕྱུག་ཉིད་ལ་ནི། དབུས་
སུ་ཆུ་སྐྱེས་དང་ཟླ་བ་ལ་ཞི་བའི་རྡོ་རྗེ་སྔོན་པོའོ། །ཁ་ཅིག་ནི་སྣ་ཚོགས་རྡོ་རྗེའོ་ཞེས་སོ། །དབུས་ཀྱི་འོད་ཟེར་གྱི་ཐིག་ཟླུམ་པོ་ལ་ཚོན་གྱི་རེ་ཁཱ་མི་བྱའོ་ཞེས་པ་མན་ངག་གོ། །ཟླུམ་པོའི་ཐིག་གི་ཕྱི་རོལ་དུ་ཚངས་ཐིག་གི་ངོས་སོ་སོར་ཆ་ཆུང་བཞི་སྤངས་ནས་བུམ་པ་ཆ་ཆུང་བཞི་པ་སྟེ་བདུད་རྩིས་གང་བའི་
เล่ม ๗๖ · หน้า 98b
གསེར་གྱི་བུམ་པ་བརྒྱད་དོ་ཞེས་ཕྱོགས་གཅིག་གི་སྟེ། གཞན་དག་ནི་རིན་པོ་ཆེའི་རང་བཞིན་རང་རང་གི་ཕྱོགས་ཀྱི་དེ་བཞིན་གཤེགས་པའི་ཁ་དོག་གོ་ཞེས་པའོ། །འདི་དང་ཕྱི་མ་རྣམས་ལ་ཡང་དབུས་སུ་དེ་བཞིན་གཤེགས་པ་གཞན་གྱི་མཚན་མ་འགོད་ནས་དེའི་གནས་སུ་དབུས་ཀྱི་མཚན་མ་བྲི་བར་
བྱའོ། །བསྡུས་པའི་རིམ་པར་གསུངས་པའི་དཀྱིལ་འཁོར་ལ་དབུས་སུ་ཉི་མ་ལ་མི་བསྐྱོད་པའི་རྡོ་རྗེ་རྩེ་ལྔ་པ་ཁ་གྱེས་པ་ཨིནྡྲ་ནཱི་ལ་ལྟ་བུ་དང་། རེག་བྱ་རྡོ་རྗེ་མའི་སྣ་ཚོགས་པའི་གོས་སོ། །རྣམ་པར་སྣང་མཛད་ལ་སོགས་པའི་རིམ་པ་དང་གཉིས་པར་གནས་པ་བཅུ་གཉིས་པོ་རྣམས་ཀྱི་མཚན་མ་
རྣམས་ནི་སྔ་མ་བཞིན་ནོ། །རིམ་པ་གསུམ་པར་སྒོའི་འགྲམ་གྱི་སྣམ་བུ་ལ་ཚངས་པའི་ཐིག་ལས་ཆ་ཆུང་བཞི་སྤངས་པར་གཡོན་དུ་བྱམས་པའི་ཀླུ་ཤིང་མེ་ཏོག་འཁོར་ལོ་དང་བཅས་པ་དང་། གཡས་སུ་སའི་སྙིང་པོའི་འཁོར་ལོ་དཀར་པོ་རྩིབས་བརྒྱད་པའོ། །ལྷོར་དེ་བཞིན་དུ་ཕྱག་ན་རྡོ་རྗེ་དང་
ནམ་མཁའི་སྙིང་པོའི་རྡོ་རྗེ་དང་ཆ་དགུ་པའི་རིན་པོ་ཆེ་མ་ར་ཀ་ཏའོ། །ནུབ་ཏུ་འཇིག་རྟེན་དབང་ཕྱུག་དང་འཇམ་པའི་དབྱངས་ཀྱི་པདྨ་དམར་པོ་དང་རལ་གྲིའོ། །བྱང་དུ་དེ་བཞིན་དུ་སྒྲིབ་པ་རྣམ་པར་སེལ་བ་དང་ཀུན་དུ་བཟང་པོའི་རལ་གྲི་དང་རྡོ་རྗེའོ། །ཤར་ལ་སོགས་པའི་སྒོ་རྣམས་སུ་རིམ་པ་ཇི་ལྟ་བ་
བཞིན་དུ་གཤིན་རྗེ་གཤེད་ལ་སོགས་པ་རྣམས་ཀྱི་རྡོ་རྗེ་ཐོ་བ་དང་རྡོ་རྗེས་མཚན་པའི་དབྱུག་པ་དཀར་པོ་དང་པདྨ་དམར་པོ་དང་སྣ་ཚོགས་རྡོ་རྗེའོ། །མེ་ལ་སོགས་པའི་ཟུར་རྣམས་སུ་མི་གཡོ་བ་དང་འདོད་པའི་རྒྱལ་པོ་དང་དབྱུག་པ་སྔོན་པོ་དང་སྟོབས་པོ་ཆེ་རྣམས་ཀྱི་རལ་གྲི་དང་རྡོ་རྗེ་དང་རྡོ་རྗེས་
མཚན་པའི་དབྱུག་པ་སྔོན་པོ་དང་རྡོ་རྗེས་མཚན་པའི་དབྱུག་པ་ནག་པོའོ། །གཙུག་ཏོར་འཁོར་ལོས་སྒྱུར་བའི་རྡོ་རྗེ་སྔོན་པོ་ནི་གཤིན་རྗེ་གཤེད་ཀྱི་མཚན་མའི་ཕྱི་ངོས་སུ་སྟེ། གཞན་དག་ནི་འཁོར་ལོ་སེར་པོའོ་ཞེས་སོ། །གནོད་མཛེས་ཀྱི་རྡོ་རྗེ་ནི་པདྨ་མཐར་བྱེད་ཀྱི་མཚན་མའི་ཕྱི་
ངོས་སུའོ། །བྱམས་པ་ལ་སོགས་པ་བརྒྱད་ཀྱི་མཚན་མ་ནི་ཟླ་བ་ལ་གནས་པ་སྟེ། གཤིན་རྗེ་གཤེད་ལ་སོགས་པ་བཅུའི་མཚན་མ་ནི་ཉི་མ་ལ་གནས་པའོ། །འདིར་ཉི་མ་དང་ཟླ་བ་སུམ་ཅུ་རྩ་གཅིག་ནི་སྣ་ཚོགས་པདྨ་ལ་གནས་པ་སྟེ་བུམ་པ་བྲི་བ་ནི་སྔ་མ་བཞིན་ནོ། །ཁ་སྦྱོར་དུ་
เล่ม ๗๖ · หน้า 99a
གསུངས་པའི་རྡོ་རྗེ་སེམས་དཔའི་དཀྱིལ་འཁོར་ལ་དབུས་སུ་ཟླ་བ་སེམས་དཔའི་རྡོ་རྗེ་རྩེ་ལྔ་པ་སྔོན་པོའོ། །ཤར་དུ་ཟླ་བ་ལ་རྣམ་པར་སྣང་མཛད་ཀྱི་འཁོར་ལོ་དང་། ལྷོར་ཉི་མ་ལ་རིན་ཆེན་དབང་པོའི་རིན་པོ་ཆེ་དང་། ནུབ་ཏུ་ཉི་མ་ལ་སྣང་བ་མཐའ་ཡས་ཀྱི་མདའ་དང་། བྱང་དུ་
ཉི་མ་ལ་དོན་ཡོད་གྲུབ་པའི་སྣ་ཚོགས་རྡོ་རྗེའོ། །སྤྱན་མའི་སྤྲིན་ལ་གནས་པའི་མིག་དང་། མཱ་མ་ཀཱིའི་མདའ་དང་གོས་དཀར་མོའི་མདའ་དང་སྒྲོལ་མའི་ཨུཏྤ་ལ་དམར་པོའོ། །རིམ་པ་གཉིས་པ་ལ་ཤར་ཕྱོགས་སུ་དྲག་མོའི་མདའ་དང་། བདེན་བྲལ་དུ་སྒྲ་རྡོ་རྗེ་མའི་ཤཀྟི་དང་། རླུང་དུ་ས་
རྡོ་རྗེ་མའི་བུམ་པ་དཀར་ལྗང་ངོ་། །རིམ་པ་གསུམ་པ་ལ་ཤར་ཕྱོགས་སུ་བཞད་མའི་རྡོ་རྗེ་དང་། ལྷོར་སྒེག་མོའི་རྡོ་རྗེ་དང་། ནུབ་ཏུ་གླུ་མའི་འཁར་རྔ་དང་། བྱང་དུ་གར་མའི་རྡོ་རྗེ་རྩེ་གསུམ་པ་ལྗང་གུ་དང་། དབང་ལྡན་དུ་གླིང་བུ་མའི་གླིང་བུ་དང་། མེར་པི་ཝང་མའི་པི་ཝང་དང་། བདེན་
བྲལ་དུ་རྔ་ཟླུམ་མའི་རྔ་ཟླུམ་དང་། རླུང་དུ་རྫ་རྔ་མའི་རྫ་རྔའོ། །ཕྱིའི་སྣམ་བུ་ལ་མེར་མེ་ཏོག་མའི་མེ་ཏོག་གི་ཕྲེང་བ་དང་། བདེན་བྲལ་དུ་བདུག་སྤོས་མའི་སྤོས་མེ་དང་། རླུང་དུ་མར་མེ་མའི་མར་མེའི་མཆོད་སྡོང་དང་། དབང་ལྡན་དུ་དྲི་མའི་དྲིའི་དུང་ཆོས་དང་། ཤར་དུ་མེ་ལོང་མའི་མེ་ལོང་དང་།
ལྷོར་རོ་མའི་རོའི་སྣོད་དང་། ནུབ་ཏུ་རེག་བྱ་མའི་གོས་སྣ་ཚོགས་དང་། བྱང་དུ་ཆོས་མའི་ཆོས་འབྱུང་དཀར་པོའོ། །ཤར་ལ་སོགས་པའི་སྒོ་རྣམས་སུ་རིམ་པ་ཇི་ལྟ་བ་བཞིན་དུ་རྡོ་རྗེ་ལྕགས་ཀྱུ་མ་དང་། རྡོ་རྗེ་ཞགས་པ་མ་དང་། རྡོ་རྗེ་ལྕགས་སྒྲོག་མ་དང་། རྡོ་རྗེ་དྲིལ་བུ་མ་རྣམས་ཀྱི་རྡོ་རྗེ་
ལྕགས་ཀྱུ་དང་། རྡོ་རྗེ་ཞགས་པ་དང་། རྡོ་རྗེ་ཕྲེང་བའི་བདག་ཉིད་ཀྱི་རྡོ་རྗེ་ལྕགས་སྒྲོག་དང་རྡོ་རྗེ་དྲིལ་བུ་རྣམས་ཏེ་ཉི་མ་ལ་གནས་པའོ། །འདིར་བརྗོད་པའི་ཉི་མའི་གདན་ལ་གནས་པའི་མཚན་མ་བདུན་ལས་གཞན་པའི་མཚན་མ་རྣམས་ནི་ཟླ་བའི་གདན་ལ་གནས་པ་སྟེ། ཉི་མ་དང་
ཟླ་བ་སུམ་ཅུ་རྩ་བདུན་པོ་འདི་རྣམས་ནི་སྣ་ཚོགས་པདྨའི་སྟེང་དུ་ཐོད་པ་རྣམས་ལ་གནས་པའོ། །བུམ་པ་བྲི་བ་ནི་སྔ་མ་བཞིན་ཏེ་ཐིག་ཟླུམ་པོ་དྲུག་པ་ལས་ཕྱི་རོལ་དུའོ་ཞེས་པ་ནི་ཁྱད་པར་རོ། །ཡེ་ཤེས་མཁའ་འགྲོ་མའི་དཀྱིལ་འཁོར་ལ་དབུས་དང་ཤར་དང་བྱང་དང་ནུབ་དང་ལྷོ་རྣམས་སུ་
เล่ม ๗๖ · หน้า 99b
རིམ་པ་ཇི་ལྟ་བ་བཞིན་དུ་ཡེ་ཤེས་མཁའ་འགྲོ་མ་དང་རྡོ་རྗེ་མཁའ་འགྲོ་མ་དང་མི་བཟད་མཁའ་འགྲོ་མ་དང་རོ་ལངས་མ་དང་གཏུམ་མོ་རྡོ་རྗེས་མཚན་པའི་ཁ་ཊྭཱཾ་ག་རྣམས་སོ། །དབང་ལྡན་དང་མེ་དང་བདེན་བྲལ་དང་རླུང་རྣམས་སུ་སེང་གེ་མོ་དང་སྟག་མོ་དང་ཅེ་སྤྱང་མོ་དང་འུག་པ་མོ་རྣམས་ཀྱི་རྡོ་རྗེ་
ལྕགས་ཀྱུ་རྣམས་སོ། །ཤར་དང་བྱང་དང་ནུབ་དང་ལྷོའི་སྒོ་རྣམས་སུ། རྒྱལ་དབང་མོ་དང་གསལ་བྱེད་མོ་དང་འཇིབ་བྱེད་མོ་དང་འདར་བྱེད་མོ་རྣམས་ཀྱི་རིམ་པ་ཇི་ལྟ་བ་བཞིན་དུ། ལག་པ་གཉིས་སྙིམ་པ་ཕྱེ་བ་དང་སྙིམ་པ་ཁྲག་གིས་བཀང་བ་དང་རྡོ་རྗེ་ཐལ་མོ་ལས་མཐེ་བོའི་རྩེ་མོ་གཉིས་
དང་མཛུབ་མོའི་རྩེ་མོ་གཉིས་སྦྱར་བའོ། །འདིར་མཚན་མ་དང་ཕྱག་རྒྱ་རྣམས་ནི་སྣ་ཚོགས་པདྨ་དང་ཉི་མ་ལ་གནས་པའོ། །བསྒོམ་བྱའི་དཀྱིལ་འཁོར་ལ་ཡེ་ཤེས་མཁའ་འགྲོ་མ་ལ་སོགས་པའི་སྣ་ཚོགས་པདྨ་རྣམས་ནི་གོ་རིམས་ཇི་ལྟ་བ་བཞིན་དུ། སེང་གེ་ལྔ་དང་སོ་ལྡན་དཀར་པོ་དང་རིན་པོ་ཆེ་སྣ་
བདུན་གྱི་ཕུང་པོ་དང་མ་ཧེ་དང་གདེངས་ཅན་གྱི་དབང་པོ་བརྒྱད་ཀྱི་མཇུག་མ་དང་རོ་བཞི་ལ་གནས་པ་སྟེ། སོ་སོའི་རྡུལ་ཚོན་གྱི་དཀྱིལ་འཁོར་དུ་ནི་སྐལ་བ་དང་མི་ལྡན་པ་འདུས་པ་ན་བྲི་བར་མི་བྱའོ། །གཞན་དུ་ནི་ངལ་བས་འཇིགས་པའི་ཕྱིར་དང་སྦྱིན་བདག་བསྡུས་པ་ལ་དགའ་བས་སོ། །སྐལ་བ་
ལྡན་པ་རབ་ཏུ་དང་བར་བྱ་བའི་དོན་དང་སྦྱིན་བདག་གི་དབང་ལས་ནི་བྲི་བར་བྱའོ། །དེ་བཞིན་དུ་ཕྱི་མ་རྣམས་ལ་ཡང་ཇི་ལྟར་འབྱུང་བར་བྲི་བ་དང་མི་བྲི་བར་རིག་པར་བྱའོ། །ཕྱི་ངོས་ཀྱི་ཐིག་ཟླུམ་པོའི་ཕྱི་རོལ་དུ་བུམ་པ་བྲིའོ། །བཅུ་བདུན་གྱི་བདག་ཉིད་ཀྱེའི་རྡོ་རྗེ་གསུམ་གྱི་དཀྱིལ་འཁོར་
ལ་སྣ་ཚོགས་ཆུ་སྐྱེས་ཀྱི་ལྟེ་བར་ཁྲོ་བོའི་རྡོ་རྗེ་སྔོན་པོའོ། །ཤར་དང་ལྷོ་ལ་སོགས་པ་དང་བྱང་དང་མེ་ལ་སོགས་པའི་འདབ་མ་རྣམས་ལ་རིམ་པ་ཇི་ལྟ་བ་བཞིན་དུ་རྡོ་རྗེ་དྲག་མོ་དང་རྡོ་རྗེ་གཟུགས་མ་དང་རྡོ་རྗེ་འདོད་ཆགས་མ་དང་རྡོ་རྗེ་ཞི་བ་མོ་དང་རྡོ་རྗེ་གནོད་སྦྱིན་མོ་དང་རྡོ་རྗེ་མཁའ་འགྲོ་མ་དང་སྒྲ་རྡོ་རྗེ་མ་དང་
ས་རྡོ་རྗེ་མ་རྣམས་ཀྱི། གླིང་བུ་དང་པི་ཝང་དང་རྔ་ཟླུམ་དང་རྫ་རྔ་རྣམས་སོ། །ཤར་ལ་སོགས་པའི་སྒོ་རྣམས་སུ་རྡོ་རྗེ་ལྕགས་ཀྱུ་མ་དང་རྡོ་རྗེ་ཞགས་པ་མ་དང་། རྡོ་རྗེ་ལྕགས་སྒྲོག་མ་དང་རྡོ་རྗེ་དྲིལ་བུ་མ་རྣམས་ཀྱི་རྡོ་རྗེ་ལྕགས་ཀྱུ་དང་རྡོ་རྗེ་ཞགས་པ་དང་རྡོ་རྗེ་ལྕགས་སྒྲོག་དང་རྡོ་རྗེ་དྲིལ་བུ་རྣམས་སོ། །
เล่ม ๗๖ · หน้า 100a
མཚན་མ་བཅུ་བདུན་པོ་འདི་རྣམས་ནི་ཐོད་པ་དང་ཉི་མ་ལ་གནས་པ་སྟེ། གླིང་བུ་མ་ལ་སོགས་པ་བརྒྱད་ཀྱི་ནི་ཐོད་པའི་འོག་ཏུ་སྣ་ཚོགས་པདྨའོ། །ཕྱག་གཉིས་པ་དང་ཕྱག་བཞི་པ་ལ་ནི་ཐོད་པ་མེད་དོ། །ཕྱག་བཅུ་དྲུག་པའི་དཀྱིལ་འཁོར་ལ་སྣ་ཚོགས་པདྨའི་ལྟེ་བར་ཁྲོ་བོའི་རྡོ་རྗེ་
སྔོན་པོའོ། །ཤར་ལ་སོགས་པ་དང་དབང་ལྡན་ལ་སོགས་པའི་འདབ་མ་རྣམས་ལ་གོ་རིམས་ཇི་ལྟ་བ་བཞིན་དུ་གཽ་རཱི་དང་ཙཽ་རཱི་དང་རོ་ལངས་མ་དང་གྷསྨ་རཱི་དང་པུཀྐ་སཱི་དང་རི་ཁྲོད་མ་དང་གཏུམ་མོ་དང་རབ་ཏུ་རྨོངས་བྱེད་མ་རྣམས་ཀྱི་མདའ་དང་རྡོ་རྗེ་དང་ཐོད་པ་ཁྲག་དང་བཅས་པ་ལ་གནས་པའི་རུས་སྦལ་དང་།
ཚིལ་གྱིས་གང་བའི་ཐོད་པ་ལ་གནས་པའི་སྦྲུལ་དང་ཤས་གང་བའི་ཐོད་པ་ལ་གནས་པའི་སེང་གེ་དང་ཁུ་བ་དང་བཅས་པའི་ཐོད་པ་ལ་གནས་པའི་དགེ་སློང་དང་ཁྲག་དང་བཅས་པའི་ཐོད་པ་ལ་གནས་པའི་སྟག་དང་ཆང་གི་སྣོད་རྣམས་སོ། །རིམ་པ་གཉིས་པའི་ཟུར་རྣམས་སུ་གླིང་བུ་མ་ལ་སོགས་པའི་
མཚན་མ་རྣམས་ནི་སྔ་མ་བཞིན་ནོ། །ཤར་ལ་སོགས་པའི་སྒོ་རྣམས་སུ་རྟ་གདོང་མ་དང་ཕག་གདོང་མ་དང་ཁྱི་གདོང་མ་དང་སེང་གེ་མོ་རྣམས་ཀྱི་རྡོ་རྗེ་ལྕགས་ཀྱུ་དང་རྡོ་རྗེ་ཞགས་པ་དང་རྡོ་རྗེ་ལྕགས་སྒྲོག་དང་རྡོ་རྗེ་དྲིལ་བུ་རྣམས་སོ། །མཚན་མ་བཅུ་བདུན་པོ་འདི་རྣམས་ནི་ཉི་མ་ལ་གནས་པ་སྟེ། གླིང་
བུ་མ་ལ་སོགས་པ་བརྒྱད་ཀྱི་ནི་ཉི་མའི་འོག་ཏུ་སྣ་ཚོགས་པདྨ་རྣམས་སོ། །དབུས་ཀྱི་འོད་ཟེར་གྱི་ཕྱི་རོལ་དུ་བུམ་པ་རྣམས་ནི་སྔ་མ་བཞིན་ནོ། །བདག་མེད་མའི་དཀྱིལ་འཁོར་ལ་སྣ་ཚོགས་པདྨའི་ལྟེ་བ་དང་ཤར་ལ་སོགས་པའི་འདབ་མ་རྣམས་ལ་གོ་རིམས་ཇི་ལྟ་བ་བཞིན་དུ་བདག་མེད་མ་དང་རྡོ་རྗེ་མ་དང་
དཀར་མོ་དང་ཆུ་མ་དང་རྡོ་རྗེ་མཁའ་འགྲོ་མ་རྣམས་དང་། རིམ་པ་གཉིས་པར་ཕྱག་བཅུ་དྲུག་པའི་དཀྱིལ་འཁོར་དུ་བརྗོད་པའི་དཀར་མོ་ལ་སོགས་པ་རྣམས་ཀྱི་རྡོ་རྗེའོ། །གླིང་བུ་མ་ལ་སོགས་པའི་མཚན་མ་ནི་སྔ་མ་བཞིན་ཏེ། རྟ་གདོང་མ་ལ་སོགས་པའི་གྲི་གུག་རྣམས་སོ། །རྟ་གདོང་མའི་ཕྱི་ངོས་
སུ་མཁའ་སྤྱོད་མའི་རྡོ་རྗེ་སྟེ་ཁྱི་གདོང་མ་ལ་སོགས་པའི་ཕྱི་ངོས་སུ་ས་སྤྱོད་མའི་རྡོ་རྗེའོ། །འདིར་གྲི་གུག་བཞི་ནི་ཉི་མ་ལ་གནས་པ་སྟེ་མཚན་མ་གཞན་ནི་ཟླ་བ་དང་ཉི་མ་ནི་སྣ་ཚོགས་པདྨ་ལ་གནས་པའོ། །གླིང་བུ་མ་ལ་སོགས་པ་བརྒྱད་མེད་པ་ན་ལྷག་མ་ལྷ་མོ་བཅོ་ལྔ་པོ་རྣམས་ཀྱི་ནི་ཟླ་བ་ལ་གྲི་གུག་
เล่ม ๗๖ · หน้า 100b
རྣམས་སོ། །དཀར་མོའི་ཕྱི་ངོས་སུ་མཁའ་སྤྱོད་མའི་མཚན་མ་སྟེ་རོ་ལངས་མའི་ཕྱི་ངོས་སུ་ས་སྤྱོད་མའི་འོ། །དེ་བཞིན་དུ་ཀུ་རུ་ཀུལླེའི་དཀྱིལ་འཁོར་ལ་ཡང་ཡིན་ཏེ། ཁྱད་པར་ནི་ཟླ་བ་ལ་ཡུ་བ་དང་བཅས་པའི་ཨུཏྤ་ལ་དམར་པོ་ཁ་འབུས་པ་ཡོད་པའི་མདའོ། །འདིར་ལྷ་མོ་བཅོ་ལྔ་པོ་རྣམས་ཀྱང་ཀུ་རུ་
ཀུལླེའི་བཞིན་དུ་ཁ་དོག་དམར་པོའོ། །རྡོ་རྗེ་བདུད་རྩིའི་དཀྱིལ་འཁོར་དང་པོ་ལ་སྣ་ཚོགས་ཆུ་སྐྱེས་ཀྱི་ལྟེ་བ་དང་ཤར་ལ་སོགས་པ་དང་དབང་ལྡན་ལ་སོགས་པའི་འདབ་མ་རྣམས་ལ་གོ་རིམས་ཇི་ལྟ་བ་བཞིན་དུ་རྡོ་རྗེ་བདུད་རྩི་དང་ཞི་བ་མོ་དང་། ཞི་བ་གདོང་མ་དང་ཟླ་ལྡན་མ་དང་རི་བོང་ཅན་མ་དང་ཟླ་བའི་དཀྱིལ་
འཁོར་མ་དང་ཟླ་ཚེས་མ་དང་ཡིད་འོང་མ་དང་ཡིད་ཚིམ་པར་བྱེད་པ་རྣམས་ཀྱི་རྡོ་རྗེའོ། །ཁྱད་པར་ནི་ཟླ་ཚེས་མའི་ཟླ་བ་ཆ་གཅིག་གོ། །རིམ་པ་གཉིས་པ་ལ་དབང་ལྡན་ལ་སོགས་པ་རྣམས་སུ་མེ་ཏོག་མ་དང་བདུག་སྤོས་མ་དང་མར་མེ་མ་དང་དྲི་ཆབ་མ་རྣམས་ཀྱི་མེ་ཏོག་གི་ཟ་མ་ཏོག་དང་སྤོས་ཕོར་དང་མར་མེའི་
མཆོད་སྡོང་དང་དྲིའི་དུང་ཆོས་རྣམས་སོ། །ཤར་ལ་སོགས་པའི་སྣམ་བུ་ལ་གླིང་བུ་མ་ལ་སོགས་པ་རྣམས་ཀྱི་གླིང་བུ་ལ་སོགས་པ་བཞིའོ། །ཤར་ལ་སོགས་པའི་སྒོ་རྣམས་སུ་ཁྲོ་གཉེར་རིམ་པར་ལྡན་དང་འཇིགས་བསྡིགས་དང་རྟ་གཟུགས་དང་ཚོགས་ཀྱི་གཙོ་བོ་རྣམས་ཀྱི་རྡོ་རྗེ་ལྕགས་ཀྱུ་དང་རྡོ་རྗེ་
ཞགས་པ་དང་རྡོ་རྗེ་ལྕགས་སྒྲོག་དང་རྡོ་རྗེ་དྲིལ་བུ་རྣམས་སོ། །མཚན་མ་ཉི་ཤུ་རྩ་གཅིག་པོ་འདི་རྣམས་ནི་ཟླ་བ་ལ་གནས་པ་སྟེ། མེ་ཏོག་མ་ལ་སོགས་པ་བཅུ་གཉིས་ཀྱི་ཟླ་བའི་འོག་ཏུ་སྣ་ཚོགས་འདམ་སྐྱེས་རྣམས་སོ། །ཡང་ན་དཀྱིལ་འཁོར་པ་ཐམས་ཅད་ལ་ཆོས་འབྱུང་བྲི་བར་བྱའོ། །འདི་
ཉིད་ཁོ་ན་བྲི་བར་བྱའོ་ཞེས་པ་ནི་གཞན་དག་གོ། །རྡོ་རྗེ་བདུད་རྩི་གཞན་གསུམ་གྱི་དཀྱིལ་འཁོར་གྱི་མཚན་མ་ནི་རྡོ་རྗེ་བདུད་རྩིའི་རྒྱུད་དུ་རིག་པར་བྱའོ། །དགུའི་བདག་ཉིད་ཀྱི་ཀྱེའི་རྡོ་རྗེ་གསུམ་གྱི་དཀྱིལ་འཁོར་ལ་སྣ་ཚོགས་ཆུ་སྐྱེས་ཀྱི་ལྟེ་བར་ཉི་མ་ལ་རྡོ་རྗེ་སྔོན་པོ་ཁ་གྱེས་པའོ། །ཤར་ལ་སོགས་
པ་དང་དབང་ལྡན་ལ་སོགས་པའི་འདབ་མར་ཟླ་བ་རྣམས་ལ་གོ་རིམས་ཇི་ལྟ་བ་བཞིན་དུ་གཽ་རཱི་དང་ཆོམ་རྐུན་མ་དང་རོ་ལངས་མ་དང་གྷསྨ་རཱི་དང་པུཀྐ་སཱི་དང་རི་ཁྲོད་མ་དང་གཏུམ་མོ་དང་གཡུང་མོ་རྣམས་ཀྱི་གྲི་གུག་དང་ཅང་ཏེའུ་དང་རུས་སྦལ་དང་སྦྲུལ་དང་སེང་གེ་དང་དགེ་སློང་དང་འཁོར་ལོ་དང་རྡོ་རྗེ་
เล่ม ๗๖ · หน้า 101a
རྣམས་སོ། །ཕྱག་བཅུ་དྲུག་པའི་ཉི་མ་ལ་སྣ་ཚོགས་རྡོ་རྗེས་མཚན་པའི་ཐོད་པ་དཀར་པོའོ་ཞེས་པ་ནི་ཁྱད་པར་རོ། །དེའི་ཟླུམ་པོ་ལས་ཕྱི་རོལ་དུ་བུམ་པ་རྣམས་སོ། །སྒྱུ་མ་ཆེན་མོའི་དཀྱིལ་འཁོར་ལ་པདྨ་དམར་པོའི་ལྟེ་བར་ཉི་མ་ལ་བཅོམ་ལྡན་འདས་སྒྱུ་མ་ཆེན་མོའི་
ངོ་བོ་པདྨའི་སྣོད་དོ། །ཤར་ལ་སོགས་པའི་འདབ་མར་ཟླ་བ་རྣམས་ལ་གཡས་སྐོར་དུ་རྡོ་རྗེ་མཁའ་འགྲོ་མ་དང་རིན་ཆེན་མཁའ་འགྲོ་མ་དང་པདྨ་མཁའ་འགྲོ་མ་དང་སྣ་ཚོགས་མཁའ་འགྲོ་མ་རྣམས་ཀྱི་རྡོ་རྗེ་དང་རིན་པོ་ཆེའི་སྙེ་མ་དང་སྣ་ཚོགས་ཆུ་སྐྱེས་དང་རལ་གྲིའོ། །སངས་རྒྱས་མཁའ་འགྲོ་མ་ནི་རྡོ་རྗེ་
སེམས་དཔའ་ལ་འཁྱུད་ནས་གནས་པའི་ཕྱིར་དེའི་མཚན་མ་ཐ་དད་དུ་མི་དགོད་དོ། །དགུའི་བདག་ཉིད་སངས་རྒྱས་ཐོད་པའི་དཀྱིལ་འཁོར་ལ་སྣ་ཚོགས་ཆུ་སྐྱེས་ཀྱི་ལྟེ་བར་ཉི་མ་ལ་ཅང་ཏེའུ་འོ། །ཤར་དང་བྱང་དང་ནུབ་དང་དབང་ལྡན་དང་མེ་དང་བདེན་བྲལ་དང་རླུང་གི་འདབ་མར་ཉི་མ་རྣམས་ལ། སྣ་
ཚོགས་སྡེ་མ་དང་འདོད་མ་དང་ས་འོག་གནས་མ་དང་ལེགས་བཟང་མ་དང་ཆང་འཚོང་མ་དང་འབྱུང་མོ་དང་ཕྱག་བཞི་མ་དང་ནམ་མཁའ་ལ་གནས་མ་རྣམས་ཀྱི་གྲི་གུག་གོ། །རྡོ་རྗེ་ཧཱུཾ་མཛད་ཀྱི་དཀྱིལ་འཁོར་ལ་དབུས་སུ་རྡོ་རྗེ་ཧཱུཾ་མཛད་ཀྱི་རྡོ་རྗེའོ། །ཤར་ལ་སོགས་པར་གཡས་སྐོར་དུ་རྡོ་རྗེ་དབྱུག་པ་
དང་རྡོ་རྗེ་མེ་དང་རྡོ་རྗེ་གཙུག་ཏོར་དང་རྡོ་རྗེ་འཁྱིལ་པ་རྣམས་དང་མེ་ལ་སོགས་པར་གཡས་སྐོར་དུ་རྡོ་རྗེ་གནོད་སྦྱིན་དང་རྡོ་རྗེ་དུས་དང་ནག་པོ་ཆེན་པོ་དང་རྡོ་རྗེ་བསྡིགས་པ་དང་གཙུག་ཏོར་དང་རྡོ་རྗེ་ས་འོག་རྣམས་ཀྱི་རྡོ་རྗེ་ཐོ་བ་དང་རྡོ་རྗེ་དབྱུག་པ་དང་ཆུ་སྐྱེས་དམར་པོ་དང་སྣ་ཚོགས་རྡོ་རྗེ་དང་ལྕགས་ཀྱུ་དང་དགྲ་སྟ་
དང་རྩེ་གསུམ་དང་རལ་གྲི་དང་འཁོར་ལོ་དང་རྡོ་རྗེ་གཏུན་ཤིང་རྣམས་ཏེ། མཚན་མ་ཐམས་ཅད་ནི་སྣ་ཚོགས་ཆུ་སྐྱེས་དང་ཉི་མ་ལ་གནས་པའོ། །ཡང་ན་ཤར་ལ་སོགས་པའི་ཕྱོགས་སུ་གཡས་སྐོར་དུ་གཤིན་རྗེ་མཐར་བྱེད་དང་། ཤེས་རབ་མཐར་བྱེད་དང་པདྨ་མཐར་བྱེད་དང་བགེགས་མཐར་བྱེད་
རྣམས་ཀྱི་རྡོ་རྗེ་ཐོ་བ་དང་རྡོ་རྗེས་མཚན་པའི་དབྱུག་པ་དང་པདྨ་དམར་པོ་དང་སྣ་ཚོགས་རྡོ་རྗེ་སྟེ། མེ་ལ་སོགས་པའི་མཚམས་སུ་མི་གཡོ་བ་དང་འདོད་པའི་རྒྱལ་པོ་དང་དབྱུག་སྔོན་ཅན་དང་སྟོབས་པོ་ཆེ་རྣམས་ཀྱི་རལ་གྲི་དང་རྡོ་རྗེ་དང་རྡོ་རྗེས་མཚན་པའི་དབྱུག་པ་སྔོན་པོ་དང་རྡོ་རྗེས་མཚན་པའི་དབྱུག་པའོ། །
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด