འདུལ་བའི་མདོའི་འགྲེལ་པ
ชื่อสันสกฤต (อักษรทิเบต ตามตัวบท) བི་ན་ཡ་སཱུ་ཏྲ་བྲྀཏྟི
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๑๖๕ · หน้า 250b
ཀྱང་ཉེས་མེད་དོ། །རྒྱས་པར་འགྲུབ་པ་ཡང་ངོ་། །མཚམས་གཅིག་གི་ནང་ན་དགེ་འདུན་མང་ཞིང་གནས་པ་ལས་ཁ་ཅིག་ཆོས་ལོག་པ་ལ་ཕྱོགས་པས་གོང་སྡེ་གཉིས་སུ་བཅད་དེ་སོ་སོར་བསོད་སྙོམས་དང་ཡོན་ལེན་པར་བསྔོས་པ་ལས་ཆོས་མ་ཡིན་པ་ལ་ཕྱོགས་པའི་གྲོང་ནས་སྤྱིར་ཡོན་
འབུལ་དུ་འོངས་ནས་ཆོས་མ་ཡིན་པ་ལ་ཕྱོགས་དབང་ཆོས་ལ་ཕྱོགས་པའང་དེ་དང་འདྲ། དགེ་འདུན་གྱི་ཕྱིར་ཆད་པ་ལས་ཀྱི་མཚམས་ཀྱིས་གཅོད་དོ། །དེ་བཞིན་དུ་འདིར་གཅིག་པ་ལ་སོགས་པའོ། །གཙུག་ལག་ཁང་གཅིག་གི་ནང་ན་དགེ་སློང་མང་ཞིག་གནས་གནས་པ་ལས་གཞན་
ཐམས་ཅད་གཙུག་ལག་ཁང་བཏང་སྟེ་ཡན་མན་དུ་འདོང་པའི་འོག་ཏུ་གཙུག་ལག་ཁང་དེར་དགེ་འདུན་སྤྱིར་ཡོན་ཞིག་ཕུལ་ན་གཙུག་ལག་ཁང་དེ་ན་གནས་པའི་དགེ་སློང་དེ་སུ་ཡོད་པ་དབང་ངོ་། །ཆོས་ཀྱི་རྙེད་པ་དེའི་སྨྲ་བ་དག་གི་སྐལ་བ་ཡང་ངོ་། །དྷརྨ་ལ་ཡོན་ཞིག་ཕུལ་ན་དྷརྨ་ཀློག་
ཀློག་པའི་དགེ་སློང་དབང་ངོ་། །འདིའི་མཐའ་ནི་ཞལ་ནས་གསུངས་པའི་ཚིགས་སུ་བཅད་པ་གཅིག་འཛིན་པའོ། །ལྟག་མ་ལྟར་དྷརྨ་ཀློག་ཀློག་པའི་ཡོན་དབང་བའི་དགེ་སློང་ནི་ཞལ་ནས་གསུངས་པའི་ཚིགས་སུ་བཅད་པ་གཅིག་གི་ཁ་ཐོན་དུ་ཀློག་ཅིང་འཛིན་ནུས་པས་ཀྱང་དྷརྨ་
ལ་ཕུལ་བའི་ཡོན་བླངས་ཀྱང་ཉེས་མེད་དོ། །ཤི་བའི་ཡོ་བྱད་ལ་མི་རིགས་པ་ནི་མཚན་ཐ་དད་པ་དང་གཞན་འགོད་པའོ། །མཚམས་གཅིག་གི་ནང་གི་དགེ་འདུན་ལས་དགེ་སློང་གཅིག་ཤི་ན་དེའི་ཡོ་བྱད་དང་ནོར་མཚམས་ཐ་དད་པའི་དགེ་སློང་མ་དང་དེ་བ་དཏྟའི་སྡེ་ལྟ་བུ་དང་དེ་རྣམས་ནི་
མི་དབང་གི་མཚམས་གཅིག་གི་དགེ་འདུན་ཉི་ཚེ་དབང་ངོ་། །སྤངས་པ་ཡང་དེ་བཞིན་ནོ། །ལྟག་མའི་ལྟར་དགེ་སློང་ཤི་བའི་ནོར་ལས་མཚམས་གཅིག་གི་ནང་ནས་དགེ་སློང་འགའ་ཞིག་བསྐྲད་ན་དེས་ཀྱང་ཤི་བའི་ནོར་ལ་མི་དབང་ངོ་། །མི་འཁོར་ཀྱང་ངོ་། །མཚན་མ་ལས་སེམས་
མ་ལོག་ཀྱང་ངོ་། །མཚམས་གཅིག་གི་ནང་ན་དགེ་སློང་གཉིས་སམ་གསུམ་ཞིག་འཁོད་འཁོད་པ་ལས་ཀུན་ཤི་སྟེ་མེད་ན་དགེ་སློང་གཅིག་ཅིག་ལུས་ཤིང་བསྣམས་ཀུན་གྱི་ནོར་མ་ཤི་དགེ་སློང་མ་ཤི་བ་གཅིག་པུ་དེ་དབང་ངོ་། །ཟད་པར་ཤི་ན་གཙུག་ལག་ཁང་དེའི་ཉེ་འཁོར་ན་དགེ་
เล่ม ๑๖๕ · หน้า 251a
སློང་སྤངས་པ་འབའ་ཞིག་འདུག་པ་དེའི་ཡིད་ལ་སྔ་མའི་མཚན་མ་བཏང་ན་དབང་ངོ་། །མཚན་མ་མ་བཏང་ན་དེའི་ཉེ་འཁོར་ནའང་དགེ་སློང་མ་སུ་ཡོད་པ་དབང་ངོ་། །དེའི་བླང་བ་ཡོད་པ་ལ་ནི་ཐ་དད་པ་མ་ཡིན་ནོ། །སྤངས་པའི་དགེ་སློང་ཞིག་ཤི་ན་དེའི་ཡོ་བྱད་དང་
ནོར་ནི་དགེ་འདུན་དབང་ངོ་། །དགེ་འདུན་དེའི་ནང་ན་ཆད་པ་གཞན་ཞིག་ཡོད་ན་དེས་ནི་མི་འཐོབ་བོ། །བྱེ་བ་དང་ནི་ཐ་དད་དོ། །དགེ་འདུན་ཞིག་ལ་དགེ་མི་དགེ་སྡེ་གཉིས་སུ་བཅད་དེའི་ནང་ནས་འགའ་ཞིག་དགེ་བ་ལ་ཕྱོགས་པ་ལས་ཤི་ན་དགེ་བའི་དགེ་འདུན་དབང་ངོ་། །མི་དགེ་བ་ཤི་
ན་མི་དགེ་བའི་དགེ་འདུན་དབང་ངོ་། །རབ་ཏུ་བྱུང་བ་ཚངས་པ་མཚུངས་པར་སྤྱོད་པ་ལས་གཞན་མི་དབང་ངོ་། །དགེ་སློང་གི་རབ་ཏུ་བྱུང་བའི་ནང་ནས་འགའ་ཞིག་ཤི་ན་དེའི་ནོར་དང་ཡོ་བྱད་མུར་འདུག་དང་རྒྱལ་པོ་མ་གཏོགས་ཏེ་དགེ་སློང་གི་དགེ་འདུན་དབང་ངོ་། །གསོལ་བས་བསྔོས་
ཏེ་ཐོབ་པ་ལ་མ་ཡིན་ནོ། །དགེ་སློང་ཤི་བའི་ནོར་ལ་དགེ་འདུན་གྱི་གསོལ་བ་དང་ཞུ་བའི་ལས་ཀྱི་སྔགས་ཀྱིས་རྟོག་པ་ལས་དགེ་སློང་འགའ་ཞིག་མཚམས་ཀྱི་ཕྱི་རོལ་དུ་སོང་ན་མི་དབང་ངོ་། །དགེ་འདུན་གྱི་ལས་ཤིག་ལ་སོང་ན་བརྟག་པ་མ་སླེབས་ཀྱང་དབང་ངོ་། །གསོལ་བ་དང་ཞུ་
བའི་ལས་དགེ་སློང་འགྲོན་པོས་ཀྱང་དབང་ངོ་། །ཐོག་མ་དང་ཐ་མ་ཡང་ངོ་། །ཐོག་མ་དང་ཐ་མ་ཞེས་བྱ་བ་ནི་མདོ་འོག་ནས་འཆད་པ་ཡིན་ནོ། །དེ་ལས་འགའ་ཙམ་དགེ་འདུན་ལས་རྒན་པོ་དང་གསར་བུ་བྱིན་ནའོ་ཞེས་དེར་གསུངས་སོ། །དགེ་སློང་ཤི་བའི་ནོར་ལས་གནས་བརྟན་གཅིག་
དང་ཙེ་ལུ་ཐ་མ་ན་འདུག་པ་གཅིག་དང་གཉིས་ལ་སྨན་ཏམ་ནོར་ཆུང་ཤས་ཡན་ཆད་ཅིའང་རུང་སྟེ་སྣ་རེ་ཞིག་བྱིན་ན་མཚམས་དེས་ཆོད་པས་ན་ཕྱི་ནས་འོང་བ་མི་དབང་ངོ་། །གང་ནས་བསྔོ་བ་ཡོད་པ་དེའི་མཚམས་ཀྱི་ནང་དུ་བསྔོས་པའོ། །དགེ་སློང་གཅིག་ཅིག་གི་ནོར་གཙུག་ལག་ཁང་
གཞན་ཞིག་ན་གཏམས་ཏེ་བཞག་པ་ལས་དགེ་སློང་དེ་ཤི་བར་གྱུར་ན་དགེ་སློང་དེ་གནས་གནས་པའི་དགེ་སློང་མི་དབང་གི་ནོར་གང་ན་གཞག་གཞག་པའི་དགེ་འདུན་གྱིས་གསོལ་བ་དང་ཞུ་བའི་ལས་ཀྱིས་བརྟགས་ན་གོས་འདུག་འདུག་པའི་དགེ་འདུན་དེ་རྣམས་དབང་ངོ་། །འདི་ཤི་བའི་
เล่ม ๑๖๕ · หน้า 251b
གནས་སུ་ཞེས་པའི་ཕྱིར་མ་ཡིན་ནོ། །ལྟག་མ་ལྟར་དགེ་སློང་ཤི་བའི་ནོར་དགེ་འདུན་གྲོགས་པོ་ན་རེ་ནོར་བཞག་པའི་མཚམས་མི་བརྩན་གྱི་དགེ་སློང་ཉིད་ངེད་ཀྱི་མཚམས་སུ་ཤི་བ་ཡིན་གྱིས་ནོར་ངེད་དབང་གིས་བྱིན་ཅིག་ཅེས་ཟེར་ཞིང་ལེན་དུ་མི་དབང་ངོ་། །མཚམས་ཀྱི་བར་ན་འདུག་པ་ལུས་
ལ་ཆགས་པའམ་གཞན་ཡང་ཇི་སྙེད་དུ་ཆུད་པ་དེ་གཏོགས་སོ། །གཙུག་ལག་ཁང་དུ་མ་ཞིག་གི་བར་ན་དགེ་སློང་གཅིག་ཤི་ན་གཙུག་ལག་ཁང་དང་ཉེ་བའི་དགེ་འདུན་དགེ་སློང་ཤི་བ་དེའི་ནོར་དབང་ངོ་། །ཉེ་རིང་མེད་ན་ལུས་གང་ནི་མགོ་གང་ལོགས་སུ་ལྟ་བའི་དགེ་འདུན་དབང་ངོ་། །ལུས་
དང་བྲལ་བར་འདུག་པའི་ནོར་ནི་རོ་ནས་གཙུག་ལག་ཁང་གི་ཕྱོགས་ན་འདུག་པའི་དགེ་འདུན་དེ་དབང་ངོ་། །གཏམས་པ་ལ་ན་དེའི་ཡོ་བྱད་གང་ནའང་རུང་སྟེ་དེར་ཆུད་དོ། །དགེ་སློང་ཤི་བའི་ནོར་ཁྱིམ་པ་ལ་གཏམས་པ་ཞིག་ཡོད་ན་ཁྱིམ་པ་དེ་དང་གང་གི་དགེ་འདུན་དང་ཕྲད་ཅིང་ཟིན་པ་དེའི་
དགེ་སློང་དབང་བ་ལའང་བྱ། ཁྱིམ་པ་དེ་དང་དགེ་འདུན་དུ་ཉེ་བའི་དགེ་འདུན་དབང་པ་ལའང་བྱ། གཏམས་པས་དངོས་པོ་གཞན་དུ་གཞག་པ་བསྔོའོ། །དགེ་སློང་ཤི་བའི་རྫས་ཁྱིམ་པ་ལ་གཏམས་པ་ལས་ཁྱིམ་པ་དེ་ལྷ་ཁང་དུ་འོངས་ཀྱང་རུང་བཀུག་ཀྱང་རུང་སྟེ་མངོན་སུམ་དུ་འཕྲད་དེ་
བསྒོམ་ན་ནོར་བགོ་བའི་སྔག་བྱས་པ་ཡིན་ཏེ་དགེ་འདུན་གཞན་མི་དབང་ངོ་། །བསྐུར་བ་ལས་བྱིན་པས་མ་སྤངས་ན་དེའི་ཡིན་ནོ། །དགེ་སློང་གཅིག་ལ་ནོར་ཞིག་བསྐུར་པ་ལས་ནོར་འོངས་ཏེ་མི་འདོད་ཅེས་མ་བྱས་པར་དགེ་སློང་དེ་ཤི་ན་ནོར་དེ་ཤི་བའི་ཕྱོགས་ཀྱི་དགེ་འདུན་དབང་ངོ་། །སྤངས་
ན་བསྐུར་བའི་འོ། །མདོ་ལྟག་མ་ལྟར་ནོར་བསྐུར་ཏེ་འོངས་པ་ལས་མི་འདོད་ཅེས་བྱ་བའི་འོག་ཏུ་ཤི་ན་ཐོག་མ་བསྐུར་བསྐུར་བའི་དགེ་སློང་དེ་དབང་ངོ་། །དེས་སྤངས་ཀྱང་ངོ་། །མདོ་ལྟག་མ་ལྟར་མི་འདོད་ཅེས་བྱས་ཏེ་སླར་བསྐུར་བ་ལས་ཐོག་མ་བསྐུར་བསྐུར་བའི་དགེ་སློང་དེའང་མི་འདོད་ཅེས་
ཟེར་ན་དེ་བརྩན་ཏེ་དགེ་སློང་དེ་དབང་ངོ་། །ཕྱི་རོལ་ལ་མཚམས་ཀྱི་ནང་དུ་འདུ་ཤེས་ཏེ་གཅིག་པོས་བསྔོས་ཏེ་མི་སྐྱེའོ། །དགེ་སློང་ཤི་བའི་ནོར་ལ་འགོད་པ་ལ་མཚམས་ཀྱི་ནང་དེ་དགེ་སློང་ཀུན་ལ་དད་པ་མ་དྲིས་ཤིང་མ་བསྡུས་པར་དགེ་སློང་ཁ་ཅིག་གིས་ཁྱད་པར་བགོ་བའི་སྔགས་བྱས་པ་
เล่ม ๑๖๕ · หน้า 252a
དང་མཚམས་ཀྱི་ཕྱི་རོལ་ཏུ་བགོ་བའི་སྔགས་བྱས་པར་མི་ཆུད་དེ་མི་རུང་ངོ་། །དབྱུང་བ་དང་ནན་ཏན་དང་ཆོས་གོས་བསྟན་པ་དང་སྦྱིན་པའི་གཤེགས་པ་མ་བྱས་པར་མི་བསྔོའོ། །དགེ་སློང་ཤི་བའི་རོ་སྒོར་མ་ཕྱུང་ངམ་མ་བསྲེགས་སམ་མ་སྦས་སམ་ཆུར་མ་
བསྐུར་བའི་ཤི་བའི་ནོར་མི་བགོ །ཤི་བའི་རོ་སྦས་ཟིན་ནས་བགོ་བའི་སྔགས་བྱས་ཏེ་གདོད་ཤི་བའི་ནོར་བགོའོ། །ལྷུང་བཟེད་དང་ཆོས་གོས་ཁྱིམ་གནས་ཀྱི་ཁྱིམ་དུ་ན་ཁྱིམ་བདག་གང་གིས་བྱིན་པ་དབང་ངོ་། །ལྷུང་བཟེད་དང་ཆོས་གོས་ཁྱིམ་པ་ལ་གཏམས་པ་ལས་དགེ་སློང་
ཤི་སྟེ་ཁྱིམ་པ་དེས་ཁྱེར་ཏེ་འོངས་ན་དགེ་སློང་སུ་དང་འཕྲད་པ་བླངས་ཏེ་ཁྱེར་ཡང་ཉེས་མེད་དོ། །གཏམས་ཤིང་འདུག་པ་ཐོས་ན་བདག་གིས་བླངས་ཏེ་ཁྱེར་ཡང་ཉེས་མེད་དོ། །དེ་སྟེ་རིགས་ནའོ། །མདོ་ལྟག་མ་ལྟར་ཁྱེར་ཀྱང་ཉེས་མེད་པ་ནི་དགེ་སློང་མ་དང་ཆད་པ་ཡོད་པའི་དགེ་
སློང་ནི་མི་དབང་སྟེ་བླང་བར་མི་རིགས་སོ། །ཕོངས་ཏེ་དེས་སོ། །མདོ་ལྟག་མ་ལྟར་བླངས་ཀྱང་ཉེས་མེད་པ་ནི་དགེ་སློང་ཕོངས་ཤིང་མི་བདོག་པས་བླངས་ཤིང་ཁྱེར་ཡང་ཉེས་མེད་དོ། །མི་སྟེར་བ་ལ་བླངས་པས་སོ། །དགེ་སློང་ཤི་བའི་ནོར་ཁྱིམ་པ་ལ་གཏམས་ཤིང་འདུག་པ་ལས་
དགེ་སློང་ཕོངས་པས་བླངས་ཏེ་བྱིན་ན་ནི་ཉེས་མེད་དོ། །མི་སྟེར་བཞིན་དུ་མཐུས་བླངས་ན་ཉེས་བྱས། རིམ་གྱིས་ན་ཐོག་མའི་འོ། །ཤི་བའི་ནོར་གཏམས་ཤིང་འདུག་པ་ལེན་དུ་དབང་བ་དགེ་སློང་མ་ཞིག་ལེན་དུ་འོངས་ཏེ་ཁ་འདོམ་ན་ཁ་གང་སྔ་བ་དབང་ངོ་། །མེད་དམ་མ་བསྔོས་པར་བོར་ན་སོང་བའི་འོ། །དགེ་
སློང་ཤི་བའི་ནོར་ཁྱིམ་པ་ལ་གཏམས་ཤིང་འདུག་པ་ཁྱིམ་པས་བོར་ཞིང་འདུག་པ་ལ་དགེ་སློང་གིས་མཐོང་ན་བདག་ཕོངས་ན་བདག་གིས་ཁྱེར་ཅིག །མ་ཕོངས་ན་མ་ལེན་ཅིག །དགེ་འདུན་སྤྱིར་དབུལ་བར་བསམས་ཏེ་བླངས་པ་ནི་ཉེས་མེད་དོ། །དེ་བཞིན་རིམས་སུའོ། །མདོ་
ལྟག་མ་ལྟར་དགེ་སློང་ཤི་བའི་ནོར་ལ་དགེ་སློང་ཕོངས་པ་མང་ཞིང་འདོད་དེ་ལེན་ན་གང་མགྱོགས་པ་དབང་ངོ་། །ནོར་ཆགས་པར་གྱུར་ན་དེ་ལ་བཏང་བ་ཤི་བའི་ཡོ་བྱད་ལས་དེའི་ཚད་དུ་སྦྱིན། དགེ་སློང་ཤི་བ་དེ་ལ་གཞན་གྱི་བུ་ལོན་ཆགས་པ་ཞིག་ཡོད་ན་ཤི་བའི་ནོར་ལས་ཅི་ཆགས་པ་བྱིན་
เล่ม ๑๖๕ · หน้า 252b
ལ་ལྷག་མ་ལས་བགོ །བགོས་ཀྱང་ངོ་། །ཤི་བའི་ནོར་བགོས་ཟིན་པའི་འོག་ཏུ་ཤི་བ་ལ་བུ་ལོན་ཆགས་ཏེ་དེད་དུ་འོངས་ན་ཡང་བགོས་པ་ཀུན་སླར་བསྡུས་ཏེ་ཅི་ཆགས་པ་སྦྱིན་ནོ། །གང་དེ་དང་ལྷན་ཅིག་ཏུ་འཐམས་པ་དེ་ལ་སྦྱིན་ན་མ་བླང་། དགེ་སློང་ཤི་བ་དེ་དང་ཁྱིམ་པ་ཞིག་ཏུ་འཐམས་ཏེ་ཁྱིམ་
པའི་ནོར་ནི་སྔར་བླངས་ཀྱི་རིན་མ་བྱིན་པ་ཞིག་ཡོད་ནའང་འཐམས་པའི་ཚིག་བཞིན་དུ་རིན་བཅལ་ཞིང་སྦྱིན་ནོ། །རིན་བཅལ་དུ་མེད་ནའང་ཁོའི་ནོར་དངོས་སླར་སྦྱིན་ནོ། །དེས་ནི་མ་ཡིན་ནོ། །དགེ་སློང་ཤི་བ་ད་ལས་ཤིག་བྱེད་དུ་བཅུག་སྟེ་སླས་སྦྱིན་པར་བྱས་པ་ཞིག་ཡོད་ནའང་ཤི་བ་དང་
འཐམས་པ་བཞིན་དུ་གླ་སྦྱིན་ནོར་དངོས་ཀྱང་བླང་ངོ་། །འདི་ཚངས་པ་མཚུངས་པར་སྤྱོད་པ་ལ་ཆགས་པར་མི་འགྱུར། དགེ་སློང་ཤི་བ་ལ་གཞན་གྱི་བུ་ལོན་ཞིག་ཆགས་ཏེ་ཤི་བའི་ནོར་ཀུན་བཅལ་ཀྱང་མ་འཁོར་བ་ནི་མ་འཁོར་དུ་ཟད་ཚངས་པར་བྱིན་ཀྱང་ཉེས་མེད་དོ། །དཀོན་མཆོག་
གི་བླངས་ཏེ་ཡོད་ན་དེ་ཇི་རྙེད་པ་དེ་རྙེད་ལས་སར་པ་ལས་བསྙམས་ཏེ་བགོ །དགེ་སློང་ཤི་བ་དེ་ལ་གཞན་ཞིག་གིས་ཟོང་ཕོག་སྟེ་ལས་བྱེད་དུ་བཅུག་པ་ལས་མ་བྱས་སམ་རྐྱེན་ཆད་དུ་ལུས་ན་ཡང་ཤི་བའི་ནོར་ལས་ཅི་ཆོག་པ་སྤངས་ཏེ་གཞག་པ་ལ་ལྷག་མ་བགོ །ནད་པའི་གཡོག་དང་
བཅས་ན་དེ་འཐོབ་པའི་ཡོ་བྱད་དྲུག་ལ་མི་བསྔོ། །དགེ་སློང་ཤི་བའི་ནད་གཡོག་བྱེད་བྱེད་པ་ནི་ཤི་བའི་ནོར་བགོ་བའི་སྐལ་བ་ལ་མ་གཏོགས་པར་ཆོས་གོས་གསུམ་དང་ལྷུང་བཟེད་དང་ཆུ་ཚགས་དང་གདིང་བ་དྲུག་དབང་ངོ་། །རབ་དང་འབྲིང་དང་མཐའ་མར་བཅས་པའོ། །དགེ་སློང་ཤི་
བ་དེ་ལ་ཆོས་གོས་དང་ལྷུང་བཟེད་དང་གདིང་བ་མང་པོ་ཞིག་ཡོད་ན་ཐམས་ཅད་བཟང་པོ་ལས་མི་དབང་སྟེ་བཟང་ངན་སྤེལ་ལ་ཕམ་རྒྱལ་མེད་པར་དྲུག་སྦྱིན་ནོ། །དུ་མ་ན་དེའི་སྤྱིའོ། །ནད་གཡོག་མང་པོ་ཞིག་ཡོད་ནའང་གྲངས་མང་དུ་ལྷག་པར་མི་དབང་གི་དྲུག་ལས་སྤྱིར་བགོའོ། །
ནད་པ་ཤི་ནས་དེའི་ཕྱིར་སོང་ན་སྦྱིན། ནད་པ་ཤི་བའི་ཚེ་ནད་གཡོག་རང་དོན་ལ་མཚམས་ཀྱི་ཕྱི་རོལ་དུ་འཕྱན་དུ་སོང་ན་ཡོ་བྱད་དྲུག་དང་ཤི་བའི་ནོར་སྐལ་ལ་མི་དབང་ངོ་། །ནད་པའི་དོན་ལ་སོང་བ་ནི་དབང་ངོ་། །འདི་ལ་ཤི་བའི་ནོར་མི་རིགས་སོ། །དེ་ནད་གཡོག་དགེ་སློང་མ་དང་དགེ་
เล่ม ๑๖๕ · หน้า 253a
སློང་ཆད་པ་བཅད་པ་ཞིག་བྱེད་བྱེད་པ་ནི་ཡོ་བྱད་དྲུག་ལས་མི་དབང་ངོ་། །གཞན་ཚུལ་དུ་ཞུགས་པ་ལ་མ་ཡིན་ནོ། །དགེ་སློང་གཙུག་ལག་ཁང་གཞན་དུ་ཚུལ་དུ་ཞུགས་པ་ཞིག་གིས་ནད་གཡོག་བྱས་ནའང་ཡོ་བྱད་དྲུག་དང་ཤི་བའི་ནོར་སྐལ་དབང་ངོ་། །འདི་
བསྙེན་པར་རྫོགས་པ་ཐམས་ཅད་ལའང་རིགས་སོ། །ནད་གཡོག་དགེ་སློང་ཞིག་བྱེད་བྱེད་ནའང་ཤི་བའི་ནོར་སྐལ་ལ་ཐང་དགེ་སློང་གི་ཐང་བཞིན་དུ་དབང་། ཡོ་བྱད་དྲུག་ཀྱང་དབང་ངོ་། །ནད་པས་བྱིན་ཅིག་ཅེས་སྨྲས་པ་ལ་ཕྲིན་ཇི་ལྟར་སྨྲས་པ་ལྟར་བྱའོ། །དགེ་སློང་ཤི་བ་དེས་ཁ་ཆེམས་
བཞག་སྟེ་ནོར་བྱིན་ཅིག་ཅེས་སྨྲས་པ་ཞིག་ཡོད་པ་ལས་ནད་གཡོག་ལ་སོགས་པས་མ་བྱིན་ན་ནོར་འགོད་པའི་ཚེ་སྨྲས་ལ་ཁ་ཆེམས་བཞིན་དུ་སོ་སོར་སྦྱིན་ནོ། །དབང་མེད་པ་ནི་ཤི་བ་ན་འདི་ལ་ཤི་བ་དག་གི་ནོར་སྒྲུབས་ཤིག་ཅེ་ནའོ། །ནད་པའི་ཁ་ཆེམས་ལ་ང་ཤི་ན་མི་འདི་ནོར་འདི་
ཙམ་ཞིག་བྱིན་ཅིག་ཅེས་ཟེར་བ་ནི་ཁ་ཆེམས་མི་བཙན་ཏེ་སྤྱིར་བགོའོ། །ཁ་ཆེམས་ལྟག་ནས་བྱུང་བ་ནི་མ་ཤིའང་སྦྱིན་པར་ཆད་པ་ལ་བྱ། འདི་ནི་ཤི་ན་གདོད་བྱིན་གྱི་མ་ཤི་ན་མི་སྦྱིན་པར་བྱས་པ་ལ་བྱ། དབང་བ་ནི་ཁྱིམ་པའིའོ། །ཁྱིམ་པ་ཞིག་ཤི་བའི་ནོར་དགེ་འདུན་དང་དགེ་སློང་
ལ་ཕུལ་ཅིག་ཅེས་ཁ་ཆེམས་གཞག་པ་ནི་བླངས་ཀྱང་ཉེས་མེད་དོ། །ཕུལ་ནས་ཁྱིམ་པ་ཤི་ན་ཁྱེའུ་དང་ཆུང་མ་ནི་ཅི་བདེར་བྱ། ཁྱིམ་པས་ནད་པའི་ཁ་ཆེམས་ཀྱིས་སྐྱེས་པ་དང་བུད་མེད་ལ་སོགས་པ་མི་ཕུལ་བ་ནི་བཀོལ་དུ་བཏང་ངོ་། །བ་ལང་དང་རྟ་དང་རྔ་མོ་དང་བོང་བུ་དང་དྲེའུ་དང་
གོ་ཆ་དག་རྒྱལ་པོ་ལ་ཕུལ། མིང་གིས་སྨོས་པ་འདི་རྣམས་ཡོན་དུ་ཕུལ་བ་ནི་རྒྱལ་པོ་ལ་སྦྱིན་ནོ། །མཚོན་ཆ་ནི་མི་སྦྱིན་ནོ། །གསུམ་ལ་དབྱིག་དང་གསེར་དང་གཞན་དང་བྱས་པ་དང་མ་བྱས་པའོ། །རིན་པོ་ཆེ་དག་ཀྱང་ངོ་། །དབྱིག་དང་གསེར་དང་དངུལ་ལ་སོགས་པ་རིན་པོ་ཆེ་ཕུལ་བ་
ནི་སུམ་ཆ་གཅིག་སངས་རྒྱས་ལ་དབུལ། སུམ་ཆ་གཅིག་ཆོས་ལ་དབུལ། སུམ་ཆ་གཅིག་དགེ་འདུན་ལ་དབུལ་ལོ། །རྒྱལ་པོ་མ་བྱིན་ན་ཕམ་པར་ཡང་འགྱུར་རོ། །འོན་ཏེ་གཞན་ཡོད་དམ་དེའི་ཆ་ལས་ལྷག་ཀྱང་ངམ་དེ་སྟེ་མ་ཡིན་ཀྱང་དེ་བཞིན་དུ་སངས་རྒྱས་ལ་ནི་མུ་ཏིག་དག་གོ། །
เล่ม ๑๖๕ · หน้า 253b
ཁྱིམ་པས་ནོར་ཕུལ་བ་དེ་ལ་ནོར་གཞན་དང་མུ་ཏིག་འདྲེས་སམ་མུ་ཏིག་འབའ་ཞིག་ཡོད་ཀྱང་རུང་སྟེ་རིན་ཐང་བརྩིས་ཏེ་མུ་ཏིག་རྣམས་ནི་སངས་རྒྱས་ལ་དབུལ་ལོ། །མ་ཕུལ་ན་སྦོམ་པོར་ཀྱང་འགྱུར་རོ། །ཚོན་ཆེན་པོ་ཡང་ངོ་། །ཚོན་ཆེན་པོ་བརྒྱད་དུ་གཏོགས་པ་ཞིག་ཕུལ་
ནའང་དགེ་སློང་གིས་སྤྱད་དུ་མི་རུང་བའི་ཕྱིར་སངས་རྒྱས་ལ་དབུལ་ལོ། །བཏགས་ཏེ་དྲི་གཙང་ཁང་སྐྱང་ནུལ་བྱུག །སངས་རྒྱས་ལ་མུ་ཏིག་དང་ཚོན་ཆེན་པོ་ཕུལ་ན་བསྲེས་ཏེ་བཏགས་ལ་སངས་རྒྱས་ཀྱི་དྲི་གཙང་ཁང་གི་རི་མོ་དང་སྐྱང་ནུལ་དུ་བྱུག །དེ་ལས་གཞན་སངས་རྒྱས་ཀྱི་ནི་
གཟུགས་དང་དྲི་གཙང་ཁང་དང་མཆོད་རྟེན་གྱི་ཡོ་བྱད་དུ་བསྒོ། །ནོར་བུ་རིན་པོ་ཆེ་ལ་སོགས་པ་ནི་སངས་རྒྱས་ཀྱི་སྐུ་གཟུགས་ཀྱི་རྒྱན་ནམ་བཙོངས་ལ་གཟུགས་དང་མཆོད་རྟེན་དུ་བརྩིག །ཆོས་ཀྱི་ནི་སངས་རྒྱས་ཀྱི་ཚིག་བྲི་བ་དང་སེང་གེའི་ཁྲིའོ། །ཆོས་ཀྱི་སྐལ་བར་ཕུལ་བ་རྣམས་ནི་
ཆོས་ཀྱི་ཡི་གེ་བྲི་བ་དང་ཡི་གེ་ཀླག་པའི་ཁྲི་ལ་སོགས་པ་བྱ། ཐེག་པ་ནི་གཟུགས་ལའོ། །ཁྱོགས་དང་ཤིང་རྟ་ལ་སོགས་པ་ཕུལ་བའི་ཡུལ་བསྐོར་བའི་གཟུགས་བཞག་པའི་ཕྱིར་སྐུ་གཟུགས་ལ་དབུལ་ལོ། །རྒྱལ་མཚན་ལ་དེའི་འོད་མ་དང་ཡུ་བ་དག་དེ་ལ་རིགས་པའོ། །ཤིང་རིང་
པོ་དང་འོད་མ་ཕུལ་བ་ནི་འཕེན་ཤིང་དང་རྒྱལ་མཚན་གྱི་ཡུ་བ་བྱའོ། །གཞན་དང་ལག་ཆ་དག་ནི་དགེ་འདུན་ལའོ། །ཤིང་ཐུང་ངུ་དང་ལག་ཆ་ལ་སོགས་པ་ནི་དགེ་འདུན་ལ་དབུལ་ཏེ་སྤྱི་ལྟར་སྤྱད་པའི་ཐབས་ནི་འོག་ནས་འཆད། འཁར་གསིལ་དང་ཁབ་དང་མཚོན་དུ་བྱས་ཏེ་དེ་དག་
བྲིམ་ལྕགས་སམ། མཚོན་ཆ་ནི་ཁབ་དང་འཁར་གསིལ་དང་གྲི་ལ་སོགས་པ་བྱ་སྟེ་དགེ་འདུན་ལ་བྲིམ། གཞན་དགེ་འདུན་གྱི་ནི་གཞག་པ་དང་མཆོད་རྟེན་དང་བགོ་བ་ཅི་རིགས་པའོ། །དགེ་འདུན་ལ་ཕུལ་བའི་ནོར་ལ་ཁ་ཅིག་ནི་གཞག་ཁ་ཅིག་ནི་སོ་སོར་བགོ །ཁ་ཅིག་ནི་མཆོད་
རྟེན་དང་འདི་རྣམས་གསུམ་དུ་སྦྱར་ཏེ། གང་བཞག་ཅིང་བགོ་བ་ནི་འོག་ནས་འཆད། ཞིང་དང་ཁྱིམ་དང་ཚོང་དུས་དང་། མལ་སྟན་དང་མགར་པའི་དང་ལྕགས་ཀྱི་དང་སྐྲ་འདྲེག་གི་དང་། རྫ་མཁན་གྱི་དང་། ཤིང་མཁན་གྱི་དང་། རེ་ལྡེ་མཁན་དག་གི་ཡོ་བྱད་དང་བྲན་མོ་དང་
เล่ม ๑๖๕ · หน้า 254a
ལས་བྱེད་པ་དང་། མི་ལྷག་མ་དང་། བ་ལང་དང་། མ་ཧེ་དང་། ར་ལུག་དང་། སྨན་དང་། སངས་རྒྱས་ཀྱིས་བསྟན་པའི་གླེགས་བམ་དང་། མིང་གིས་སྨོས་པ་འདི་རྣམས་ནི་དགེ་འདུན་གྱི་སྤྱིར་སྤྱད་ཅིང་བཀོལ་བ་ཡིན་པས་མི་བགོ་བར་གཞག་གོ། །
མྱུར་དུ་བྲིམ་པར་མ་བསྒྲུབ་པ་ནི་སྔ་མར་རིགས་སོ། །ཁྱིམ་པ་དེ་གུད་དུ་བུ་ལོན་ཆགས་ཏེ་དཔང་རྒྱ་ཕུལ་ནས་དཔང་རྒྱ་འདི་དོས་ཤིག་ཅེས་ཟེར་ནའང་བླངས་ཏེ་བཞག་པ་ལ་བྱ། རས་ཡུག་ཆེན་དང་རེའུ་རས་དང་ལྷམ་བོལ་མེད་དང་། ལྷམ་སྒྲོ་གུ་ཅན་དང་། ཡུངས་མར་གྱི་
འབྲག་དང་། བུམ་བུ་དང་རིལ་བ་སྤྱི་ལུགས་དང་། མིང་གིས་སྨོས་པ་འདི་རྣམས་ནི་འཕྲལ་དུ་དགོས་ཏེ་སྤྱད་པ་ལ་བྱ། གཞན་གྱི་གླེགས་བམ་དང་། མུར་འདུག་གི་ཡི་གེ་ཏར་ཀ་དང་བྱཱ་ཀ་ར་ཎ་ལ་བྱ། ཡི་གེ་དང་། སྨན་དཔྱད་ཀྱི་ཡི་གེ་ལའང་བྱ་བུ་ལོན་འཕྲལ་དུ་ཁུགས་པའི་དཔང་
རྒྱའང་བྱ། ཁ་དོག་དག་ནི་གོས་བཙོས་པའི་ཚོན་རྩི་ལ་བྱ། གཉིས་སུའོ། །གསུམ་གྱིར་ནི་འབྲས་དང་ནས་དང་། ཏིལ་དང་བལ་སྲན་དང་དམ་པ་མ་ཡིན་པ་འབྲས་དག་ནི་ཟས་དང་སྐོམ་དུའོ། །མིང་གིས་སྨོས་པ་འདི་རྣམས་ནི་མཆོད་སྟོན་དུ་བྱ་ཞིང་སྤྱད་དོ། །གོས་ཀྱི་དངོས་པོའོ།། །།
ལེབ་ལེབ་པོ་དང་ལེབ་ལེབ་པོའི་ཕྱེད་དུ་མཉམ་པར་བྱ། ཆོས་གོས་ཀྱི་ཚལ་བུ་རིང་ཐུང་དུ་འདུག་པ་ལ་རིང་པོའི་ཕྱེད་ཀྱི་ཚད་དུ་ཐུང་ངུ་བྱའོ། །བཅལ་བའི་ཕྱིར་ཆག་ཤིང་བཅང་། ཀ་ཤ་དྲུབ་པའི་ཚལ་བུ་བཅལ་བའི་ཕྱིར་ཆག་ཤིང་བཅངས་ཀྱང་ཉེས་མེད་དོ། །འདབ་
མའི་དངོས་པོ་ཡང་ངོ་། །ཚལ་བུ་སྣོལ་མ་ཆུར་འགྲོ་བ་དང་ཞེང་དུ་འགྲོ་བ་དང་ཐ་མ་བསྐོར་བ་ཞེང་ཚད་ཆེ་ཆུང་མ་ཁྱེར་བར་མཉམ་པར་བྱ། དེ་ཙམ་དུ་ཆག་ཤིང་བཅང་། ཚལ་བུའི་ཞེང་ཚད་ཀྱི་ཆག་ཤིང་ཡང་བཅང་། འདིའི་མཐའ་ནི་རབ་ཏུ་ཆེ་ན་སོར་བཞིའོ། །ཚལ་བུའི་སྣེ་སྣོལ་
དུ་འགྲོ་བ་དང་མཐའ་བསྐོར་བའི་ཞེང་ཚད་ནི་སོར་བཞིར་བྱའོ། །བྱ་རོག་གི་མཐོ་ཡང་ངོ་། །ཚལ་བུའི་ཞེང་ཚད་བྱ་རོག་གི་རྐང་པའི་ཚད་དུ་བྱས་ཀྱང་རུང་། ཆུང་ངུ་ནི་ཕྱེད་དང་གསུམ་པའམ་མཐེ་བོའི་ངོས་སོ། །ཚལ་བུ་ཆུང་ངུ་ཕྱེད་དང་གསུམ་དང་ཚོན་གང་དུ་བྱས་ཀྱང་
เล่ม ๑๖๕ · หน้า 254b
ཉེས་མེད་དེ་ཞེང་ཚད། ས་ལ་གོས་མི་གདིང་། ཆོས་གོས་འཚེམ་བའི་ཚེ་གཞི་མེད་པར་མི་གདིང་། གདིང་བ་དེའི་ཕྱིར་བྱ། ཆོས་གོས་ས་ལ་མི་གཞག་པའི་ཕྱིར་གདིང་བ་བྱ། ཤིང་གིའམ་སྨྱིག་མའི་ལས་གྲུ་བཞིར་རོ། །གདིང་བ་བྱ་བ་ནི་ཤིང་ངམ་སྨྱིག་མ་ལས་གསེག་བྱ།
རེ་ལྡེ་དང་སྤར་ལས་བྱས་ཀྱང་རུང་། བྱས་པ་བཅིངས་པའི་ཕྱིར་སྲད་བུའི་སྐབས་ཀྱི་ཕྱིར་དེ་བུ་གུ་ཞེས་སོ། །ཆོས་ཀྱི་འོག་ཏུ་གདིང་བ་གྲུ་བཞི་ལ་ཐ་མ་གྲུ་བཞིར་བུ་གུ་ཕུག་སྟེ་བརྒྱངས་ལ་བཙེམས་ཀྱང་ཉེས་མེད་དོ། །ཆོས་གོས་ཅི་ཙམ་པར་རོ། །ཆོས་གོས་ཀྱི་འོག་ཏུ་གདིང་བ་
བྱ་བའི་ཚད་ནི་ཆོས་གོས་ཇི་ཙམ་པ་དང་མཉམ་པར་བྱ། མཚོན་གྱིས་དྲ། ཆོས་གོས་དྲ་བ་ནི་མཚོན་གྱིས་དྲས་ཀྱང་ཉེས་མེད་དེ་བཅང་། གྲི་བཅངས་ཀྱང་ཉེས་མེད། བྱ་རོག་གི་མཆུ་ལྟ་བུའམ་བྱ་གག་གི་སྒྲོ་ལྟ་བུར་རོ། །གྲིའི་གཟུགས་ནི་འདི་ལྟ་བུ་ལ་བྱ། ལྕགས་ལས་གཞན་
མ་ཡིན། གྲིའི་རྒྱུ་ནི་ལྕགས་ལས་བྱ། ཡུ་བ་ཚོན་གྱིས་བྱུགས་པ་རི་མོ་དང་ཉེ་བའི་རི་མོ་ཅན་མ་ཡིན། གྲི་ཡུ་བ་རི་མོ་ཅན་དུ་མི་བྱ། སོར་དྲུག་གི་ཚད་ལས་ལྷག་པ་མ་ཡིན། གྲིའི་ལྕགས་ཉི་ཚེ་བ་ལ་སོར་དྲུག་ལས་རིང་བར་མི་བྱ། བརྒྱད་ཕན་ཆད་ལས་མ་ཡིན་ནོ། །འདུལ་བ་འཛིན་པ་
ཁ་ཅིག་ན་རེ་གྲིའི་ལྕགས་ལས་སོར་བརྒྱད་ཙམ་དུ་བྱའོ་ཞེས་ཟེར་ཏེ་གང་ལྟར་བྱས་ཀྱང་ཉེས་མེད། སོར་བཞི་དང་ཆུང་ན་དགོས་པ་ཡང་མེད། གྲིའི་ལྕགས་སོར་བཞི་མན་ཆད་དུ་བྱས་ན་སྤྱད་དུ་མི་མཁོ་བའི་ཕྱིར་མི་བྱ། བ་ལང་གི་ལྕི་བས་བྱུགས་པར་བཙེམ། ཆོས་གོས་འཚེམ་པའི་ཚེ་
སའི་གཞི་བ་ལང་གི་ལྕི་བས་བྱུགས་པའི་སྟེང་དུ་བྱ། ལྕི་བ་མེད་ན་བཏབ་བྱུགས་ཏེའོ། །ས་སྔ་ནས་བསྐུས་པ་མེད་ན་འཕྲལ་ལ་བྱུགས་ཏེ་བཙེམ། དེ་བཙེམ། ཆོས་གོས་དགེ་སློང་གིས་བཙེམས་ཀྱང་ཉེས་མེད། ཁབ་ཀྱིས་ཀྱང་ངོ་། །ཆོས་གོས་བཙེམ་པ་ནི་ཁབ་ཀྱིས་བྱའོ། །དེ་
བཅང་། ཁབ་བཅངས་ཀྱང་ཉེས་མེད། ར་གན་དང་ཟངས་དང་ཁར་བ་དང་ལྕགས་ཀྱིས་ཏེ་གཞན་མ་ཡིན་ནོ། །ཁབ་བྱ་བའི་རྒྱུ་ནི་འདི་རྣམས་ལས་བྱའོ། །ཟངས་སམ་ལྕགས་རྣོན་པོ་ཞེས་གཞན་ལའོ། །འདུལ་བ་འཛིན་པ་ཁ་ཅིག་ན་རེ་ཟངས་དང་ལྕགས་གཉིས་ལས་ཁབ་བྱ་ཞེས་ཟེར་
เล่ม ๑๖๕ · หน้า 255a
ཏེ་གང་ལས་བྱས་ཀྱང་ཉེས་མེད། དེའི་སྣོད་སྦུ་བུ་འམ་ཆང་བ་བཅང་བ། ཁབ་རལ་ནི་ཕྱིང་བུ་དང་རས་མ་དང་སྨྱིག་མ་ལས་བྱ། འདི་གཡེལ་བ་དང་དགེ་སྦྱོང་ལ་དབང་དུ་མི་བྱ། ཁབ་རལ་དང་དགེ་སྦྱོང་དང་དགེ་སློང་ཁྲིམས་ལ་གཡེལ་བ་ལ་ཆུད་ཟ་བར་གྱུར་པའི་
ཕྱིར་མི་གཞག །སྦྲང་རྩིའི་ཚིགས་མས་བྱུགས་ཏེ་ཁབ་ཀྱི་ལྕགས་བཙས་མི་ཁྱེར་བའི་ཕྱིར་རས་མ་བཞག་དབྱར་ར་ད་ལ་སྤྲ་ཚིལ་གྱིས་བསྐུས་ལ་དེའི་ནང་དུ་ཁབ་དྲིལ་ན་མི་སྟོར་ཅིང་བཙའ་མི་འཇུག་གོ། །མི་སྙིལ་བའི་ཕྱིར་ཆོས་གོས་ལ་སྒྲོ་གུ་གདགས། ཆོས་གོས་མི་སྙིལ་བའི་ཕྱིར་
སྒྲོ་གུ། སྒྲོག་མཁར་བཏགས་ཏེའོ། །ཆོས་གོས་སྒྲོག་མཁར་གདབ། མདུད་པ་ཡང་ངོ་། །སྒྲོ་གུ་མདུད་པ་ཅན་དུ་བྱ། བཙོ་བླག་པས་བཙོས་ཀྱང་རུང་མ་བཙོས་ཀྱང་རུང་མི་བཀྲུ། ཆོས་གོས་ཁ་དོག་བསྒྱུར་ཀྱང་རུང་མ་བསྒྱུར་ཀྱང་རུང་དྲག་ཏུ་འདྲུབ་པའི་ཕྱིར་བཙོ་བླག་མཁན་མི་བཅོལ། དེ་བཞིན་
དུ་བདག་གིས་ཀྱང་མ་ཡིན་ནོ། །ཆོས་གོས་བདག་གིས་ཀྱང་མི་བརྡུང་། དེའི་གདིང་བར་མ་ཡིན། །བཙོ་བླག་མཁན་གྱི་རས་བརྡུང་བའི་སྤྱད་ཀྱི་སྟེང་དུ་མི་གཞག །ཤིང་ལེབ་ལ་མ་ཡིན། ཤིང་ལེབ་ཀྱི་སྟེང་དུ་ཡང་ཆོས་གོས་བཀྲུ་ཞིང་མི་བརྡུང་ཚོན་མཁན་གྱི་ཤིང་ལེབ་ལ་བྱ།
རྫ་འཇམ་པོར་བཀྲུས་ཏེ་ཆུ་འདེབས་དལ་གྱིས་སོ། །ཆོས་གོས་བཀྲུ་བ་ནི་ཆུ་འཇམ་ཙམ་གྱི་ནང་དུ་དལ་གྱིས་དགེ་སློང་ཉིད་ཀྱིས་བཀྲུ་ལག་པ་དག་གིས་བཟློག །འཁྲུ་བའི་ཚེ་ལག་པས་དལ་གྱིས་བཀྲུ། མི་ནུས་ན་རྐང་པས་སོ། །ལག་པས་བཀྲུ་མི་ནུས་ན་རྐང་པས་བཀྲུས་ཀྱང་ཉེས་མེད།
དེ་ལྟར་བཀྲུ་ན་ཁྱིམ་བདག་གིས་ཀྱང་བཏགས་སོ། །ལག་པས་བཀྲུས་ན་ཆོས་གོས་ཁྱིམ་པ་འཁྲུར་བཅུག་ཀྱང་ཉེས་མེད། གཞན་དུ་སྤྱོད་ན་དེ་བསྲུང་། ཁྱིམ་པ་ཆོས་གོས་འཁྲུར་གཞུག་པ་ནི་བདག་གིས་སྤྱན་བྱས་ལ་མངོན་སུམ་དུ་འཁྲུར་གཞུག་གི་ལྐོག་ཏུ་འཁྲུར་མ་བཏང་།
རབ་ཏུ་དག་རབ་ཏུ་བཙེམས་རབ་ཏུ་བཙོས་པའི་ཕྱག་དར་ཀུད་པ་བླང་། ཚེམ་བུ་ཕྱག་དར་ཀུད་པ་ལས་སྡུད་ཅིང་གོས་སུ་བྱེད་ན་རབ་ཏུ་བཀྲུས་ཤིང་བཙོས་ལ་བཙེམས་ལ་གོས་བྱ། མི་གཙང་བས་རེག་པའི་གོས་མ་ཡིན། ཚེམ་བུ་བསྡུ་བ་ནི་སྟུ་ཁྲག་དང་གཅིན་རྐྱག་ལ་སོགས་
เล่ม ๑๖๕ · หน้า 255b
པས་རེག་པའི་རྫས་བླངས་ཤིང་མི་སྤྱད། སྐབ་པ་མཛེས་པའི་ཕྱིར་བསྐུས་ཏེ་ཁ་དོག་ཉི་གྲིབ་ལའོ། །ཆོས་གོས་འཚེད་པ་ནི་ཚོན་གྱིས་བཙོས་ལ་བར་འགའ་ཉི་མ་ལ་གཞག །བར་འགའ་གྲིབ་མ་ལ་བཞག་ན་ཁ་དོག་བཟང་པོར་འགྱུར་རོ། །མ་བྱས་ཀྱང་ཉེས་མེད། གོས་མེད་
པར་བཙོ། ཚོན་རྩི་སྔར་བཙོས་ལ་དེ་ནས་གོས་བཙོ། །གསུམ་གྱི་བར་དུ་ནི་མཆོག་ཏུའོ། །ཚོན་རྩི་བཙོ་བ་ནི་ལན་གསུམ་གྱི་བར་དུ་བལྡབས་ཏེ་བཙོས་པའི་ཁུ་བ་ནི་མཆོག་གོ། །དེ་བས་ན་མང་པའི་ཕྱིར་ན་གསུམ་བླང་། ལྟག་ཏུ་ལན་གསུམ་དུ་བཙོ་བ་ནི་ཁུ་བ་མང་དུ་བྱ་བའི་
ཕྱིར་ཏེ་བཟང་ངན་རབ་གསུམ་དུ་དབྱུང་ངོ་། །ཕྱིར་ཞིང་འབྲི། ལན་གསུམ་དུ་བཙོས་པ་དང་པོ་ནི་བཟང་པོ་བར་མ་ནི་འབྲིང་པོ་ཐ་མ་ནི་ངན་ཏོ། །དེ་བས་ན་སོ་སོར་གཞག་གོ། །ཚོན་བཟང་ངན་ནི་རྣམ་གསུམ་མི་བསྲེ་བར་སོ་སོར་གཞག་གོ། །དེ་ནི་སྔ་མའོ་ལ་སོགས་པར་བྲི། ཚོན་
བཟང་ངན་རྣམ་གསུམ་ནོར་ཅིང་འཁྲུལ་ཏེ་མི་བདེ་བའི་ཕྱིར་སྣོད་ལ་ཁ་བྱང་བྲི། སྔ་མ་ནི་ཐོག་མར་བསྐོ། །འཚེད་པའི་ཚེ་ན་ཚོན་དང་པོར་ཕྱུང་བའི་ཁུ་བ་ནི་བཟང་པོས་ཐོག་མར་བཙོ། །ཆོས་གོས་དང་བཅག་ཚོན་གྱི་ནང་དུ་ཆོས་གོས་བཅུག་པའི་ཚེ་ར་རི་མ་ཁྱེར་བར་ལེགས་པར་
བཅག །དེ་བས་ན་བླངས་ཏེ་ལེབ་ལེབ་པོ་ལ་དེ་ཙམ་གྱི་ཐང་གིས་སྦྱིན། རས་ཅི་ཙམ་ཡོད་པ་ལས་ཚོན་གྱི་ཁུ་བ་རན་པར་བྱའི་མང་ཉུང་དུ་མི་བྱའོ། །གཤེར་བ་གཟག་གོ། །ཚོན་གྱི་ཁུ་བ་མང་ན་ཟག་པར་འགྱུར། རབ་ཏུ་བསྐམས་ན་འབྲིའོ། །ཚོན་གྱི་ཁུ་བ་ཉུང་ན་ཁ་དོག་མི་
འགྱུར་ཞིང་སྐམ་པོར་འགྱུར་རོ། །དེ་བས་ན་རན་པར་བྱའོ། །མདོ་ལྟག་མ་རྣམས་ལྟར་ཆེས་ན་མི་དགེ་བའི་ཕྱིར་རན་པར་བྱ། དགོན་པའི་ལ་བསྐམས་ན་དགེ་བྲེས་པ་ལའོ། །ཆོས་གོས་བསྐམ་པ་ནི་ཐག་བུ་བྲེས་ལ་བསྐམ་མོ། །མཐའ་བཏགས་ཏེ་གཟུགས་སོ། །ཆོས་གོས་
ཐག་བུ་ལ་བརྒྱངས་པ་ནི་ཤིང་བུ་ཁ་བྲག་འཛིན་དུ་གཞུག་གོ། །མི་ཐུབ་ན་རྩྭ་བཏིང་སྟེའོ། །ཤིང་བུ་ཁ་བྲག་གིས་མི་ཐུབ་ཅིང་འཆོར་ན་རྩྭ་དང་ལོ་མ་བཀྲམ་ལ་དེའི་སྟེང་དུ་སྐམ་དུ་མའི་ཕྱོགས་སུ་ཚོན་འགྲོ་བའི་ཕྱིར་ཡང་ཡང་དུ་བཟློག །ཐག་བུ་བརྒྱངས་ཏེ་སྐམ་པ་དེ་ཚོན་རྩི་ཕྱོགས་
เล่ม ๑๖๕ · หน้า 256a
གཅིག་ཏུ་འགྲོ་བའི་ཕྱིར་ཡང་ཐོག་མ་དང་མ་ཐོག་བསྣོར། གསར་པ་ལ་ཚོན་གསར་པས་དེ་བཞིན་དུ་ན་དགེའོ། །ཆོས་གོས་གསར་པ་ཞིག་འཚེད་ན་ཚོན་རྩིས་གསར་དུ་བལྡབས་པས་བཙོས་ན་དགེ །རྙིང་པ་ལ་རྙིང་པས་སོ། །ཆོས་གོས་རྙིང་པ་ན་
ཚོན་རྩི་རྙིང་པས་བཙོ། །གསར་པ་ནི་ཉི་མ་ལ་བསྐམ། གོས་གསར་པ་ཞིག་བཙོས་ན་ཉི་མ་ལ་བསྐམ། རྙིང་པ་ནི་གྲིབ་མ་ལའོ། །ཆོས་གོས་རྙིང་པ་ནི་གྲིབ་མ་ལ་བསྐམ། ཆུ་ཐང་གིས་མི་འབྲི་བའི་ཕྱིར་སྦྱིན། ཆོས་གོས་ཚོན་གྱི་ནང་དུ་ལན་དུ་བཙོས་པ་བཞིན་དུ་ཆུར་བཀྲུ །གཞན་
གྱི་ཉིན་མོ་ལའོ། །བཙོས་ནས་ཆུར་གཞུག་པ་ནི་བར་ཞག་གིས་བཅད་ལ་བཀྲུ། ཕྱིའི་ཁྱམས་སམ་འཆག་སར་བཙོ་བའི་ལས་མི་བྱ། དགེ་འདུན་གྱི་འཆག་ས་དང་ཁྱམས་ལ་སོགས་པར་ཆོས་གོས་བཙོ་བའི་ལས་མི་བྱ། གཙུག་ལག་ཁང་དུ་མ་ཡིན། གཙུག་ལག་
ཁང་གི་ནང་དུ་གོས་བཙོ་བའི་ལས་མི་བྱ། དེའི་སྟེང་དུ་བྱ། གོས་འཚེད་པ་གཙུག་ལག་ཁང་གི་ཡང་ཐོག་ཏུ་ཆོས་གོས་བཙོ་བའི་ལས་བྱས་ཀྱང་རུང་། བཤང་ཁང་གི་འཁོར་དུ་མ་ཡིན། བཤང་གཅིའི་སར་ཆོས་གོས་ཀྱི་ལས་མི་བྱ། དེའི་ཕྱོགས་སུ་བྱུག་པ་སྦྱིན། ཆོས་
གོས་འཚེད་པའི་ལས་གར་བྱེད་པའི་སར་རྡུལ་མི་འགོ་བའི་ཕྱིར་འཇི་བ་དང་ལྕི་བས་བསྐུ་ཞིང་བྱུག །དེ་སྟེ་རྡོ་རྗེས་བྱུགས་པ་ན་བཀྲུ །འོག་གཞི་སྐྱང་ནུལ་བཟང་པོ་འཚེར་བ་ཞིག་ན་ཆུས་བཀྲུ་བས་ཆོག་གོ། །དེ་སྟེ་བརྩམས་པ་ལས་རླུང་ངམ་ཆར་བབ་པ་འོང་ན་ཁྱམས་སུ་བྱ།
ཆོས་གོས་བཙོ་བར་བསམས་ཤིང་མགོ་བཙུགས་པ་ལས་རླུང་དང་ཆར་པ་ལ་སོགས་པ་བྱུང་ན་ཁྱམས་སུ་བཙོ་བླག་བྱས་ཀྱང་རུང་བྱས་ནས་དེའི་ཕྱོགས་སུ་བྱུག་པ་བྱ། ཁྱམས་སུ་བཙོ་བླགས་བྱས་ཟིན་པའི་འོག་ཏུ་མཎྜལ་བྱ། ལྕི་བའམ་སས་སོ། །མཎྜལ་བྱ་བ་ནི་ལྕི་བའམ་
སས་བྱུག་ཅིང་བསྐུ། བརྟག་པ་མ་བྱས་པར་བཅག་པ་དང་བཟླས་པའི་ཆོས་གོས་སྤྱད་པར་མི་བྱ། ཆོས་གོས་བརྡུངས་ཤིང་གནིགས་པ་ཁ་དོག་འཚེར་བ་ནི་མ་བཏགས་པ་ཡིན་ཏེ་སྤྱད་ཅིང་བགོ་བར་མི་བྱ། བྱུག་པ་གོགས་ན་དེ་བཏགས་པའོ། །ཆོས་གོས་ཁ་དོག་འཚེར་
เล่ม ๑๖๕ · หน้า 256b
བ་བྱེད་ཅིང་མེད་པར་བྱས་ན་བཏགས་པ་ཡིན་ཏེ་བགོས་ཀྱང་ཉེས་མེད་དོ། །ཆུས་བརླན་ནའོ། །ཁ་དོག་འཚེར་བར་བྱས་ན་ཆུས་བརླན་པར་བྱས་ན་ཉེས་པར་འགྱུར་རོ། །བ་མོ་ལ་སྦགས་པ་སླ་བའི་ས་ལག་པས་མཉེས་ཏེ་གོགས་ནའོ། །ཁ་དོག་འཚེར་བ་བ་མོའམ་ཟིལ་བ་ལ་
གོར་ལ་བསྲུབས་ན་མེད་པར་འགྱུར་རོ། །ཤམ་ཐབས་བགོས་ནས་སྟེང་དུ་ལུས་བཅིང་། ལུས་ལ་ཤམ་ཐབས་བགོ་བ་ལ་སྟེང་དུ་སྐ་རགས་ཀྱིས་བཅིང་། ཤུར་བུའམ་རྒྱ་ཅང་ངམ་ལྕག་པོད་དམ་དྲ་བས་བཅིང་། ཤམ་ཐབས་ཀྱི་སྐ་རགས་ཀྱི་རྒྱུ་ནི་འདི་རྣམས་སོ། །མི་བརྒྱན་
པ་མ་ཡིན་པ་ནི་ཕོ་སུམ་པ་དང་ནང་དུ་རུབ་པ་དང་ཟུར་གསུམ་དང་གསེར་གྱི་སྲད་བུའོ། །མིང་གིས་སྨོས་པ་འདི་རྣམས་ཀྱི་སྐ་རགས་མི་བཅིང་། རི་མོ་ཡང་དེ་བཞིན་ནོ། །སྐ་རགས་རི་མོ་ཅན་གྱིས་མི་བཅིང་མི་བཏིང་པའི་ས་ལ་མི་གཞག །ཆོས་གོས་གྱོན་ལ་སྟན་མེད་པར་ས་ལ་
མི་འདུག །གདིང་བ་མེད་པར་གཞག་པར་ཡང་མི་བྱ། མི་གཙང་བའི་ཕྱོགས་སུ་མ་ཡིན། ས་མི་གཙང་བར་ཆོས་གོས་གཞག་པར་མི་བྱ་སྟན་མི་གཙང་བ་ལའང་མི་གཞག་མི་འདུག །ཐབས་ཡོད་ན་ཁུར་ལྕི་བ་མི་བསྐྱ་ཆོས་གོས་གཟན་དུ་བོར་ཞིང་མི་བསྐྱ། གཞན་
སྤྱད་པར་མི་སྤྱད། ཆོས་གོས་དང་ཤམ་ཐབས་ལ་སོགས་པ་གོ་བསྣོར་ཅིང་མི་བགོ །བཤང་གཅི་བྱ་བ་དང་མི་གཙང་བ་ཕྱག་པའི་ལས་སུ་བླ་གོས་བགོས་ཏེ་མི་བྱ། བཤང་གཅི་བྱེད་པ་དང་ས་ཕྱག་པ་ལ་སོགས་པའི་ལས་བྱེད་པར་ཆོས་གོས་སྣམ་བདུན་པ་གྱོན་ཏེ་མི་
སྤྱད། འདི་ལ་མི་ཉལ། ཆོས་གོས་སྣམ་བདུན་པའི་འོག་ཏུ་ཡང་མི་གདིང་གྱོན་བཞིན་དུ་ཡང་མི་ཉལ། བསོད་སྙོམས་ལེན་པ་སྤྱོད་པ་དང་མཆོད་རྟེན་ལ་ཕྱག་འཚལ་བ་དང་དགེ་འདུན་ལ་འདུ་བ་དང་ཆོས་མཉན་པའི་ཆ་མནོད་པ་མྱོང་བ་ལས་གཞན་བྱེད་པ་ལ་སྦྱར་མས་མ་ཡིན། མིང་
གིས་སྨོས་པ་འདི་རྣམས་བྱེད་པར་ཆོས་གོས་ཆེན་པོ་བགོ་བའི་ལས་གཞན་བྱེད་པར་མི་བགོ །འདི་རྣམས་ལ་གྲོང་བར་དུ་མ་གྱོན་ན་ཉེས་མེད་དོ། །འདིའི་སྟེང་དུ་འདུག་གམ་འདུག་ཏུ་མི་གཞུག་ཆོས་གོས་ཆེན་པོ་འདིའི་སྟེང་དུ་བདག་ཀྱང་མི་འདུག་གཞན་ཀྱང་མི་གཞག །འདི་
เล่ม ๑๖๕ · หน้า 257a
ལ་མི་གནད། ཆོས་གོས་ཆེན་པོ་བལྟ་བ་སྟེ་ལུས་སམ་ལག་པས་མནན་པར་མི་བྱ། བཅུག་སྟེ་སུ་ལ་ཡང་མི་བསྐོ། །ཆོས་གོས་ཆེན་པོའི་ནང་དུ་ལན་ཚྭ་དང་མེ་ཏོག་ལ་སོགས་པ་ཅིའང་རུང་སྟེ་བདག་གིས་ཀྱང་མི་བླུགས་གཞན་བླུགས་སུ་ཡང་མི་གཞུག །
ལུས་ཀྱི་རེག་པར་ཡང་མི་སྤྱད་ལག་པ་མ་གཏོགས་པར་ལུས་ཀྱིས་རེག་པར་མི་བྱ། མཆན་ཁུང་གཡས་པའི་དུགས་ཀྱིས་འདི་མ་རུང་བར་འགྱུར་རོ། །ཆོས་གོས་ལག་པ་གཡས་པའི་མཆན་ཁུང་དང་དུགས་དང་རྔུལ་གྱིས་མ་རུང་བར་བྱེད་དེ་ཐབས་འོག་ནས་འཆད། དེ་
མི་འགྱུར་བར་དེའི་ཕྱོགས་སུ་དེ་ལ་གོས་སྦྱིན། མཆན་ཁུང་གཡས་པའི་ཐད་ཀར་དུགས་ཀྱིས་མ་རུང་བར་འགྱུར་བའི་ཕྱིར་དུགས་གཟན་གུད་ནས་གླན། ཁྲུ་ཕྱེད་དང་དོ་དང་མཐོ་གང་ངོ་། །རྔུལ་གཟན་གུད་ནས་གླན་པའི་ཚད་ནི་ཞེང་དུ་མཐོ་གང་ཆུར་ཁྲུ་ཕྱེད་དང་ངོ་། །
ངོས་གཉིས་སུ་ནན་བུས་མནན། རྔུལ་གཟན་གླན་པའི་དུས་སུ་ནན་བུས་མནན། དུས་དུས་སུ་འདི་བཀྲུ། རྔུལ་གཟན་གླན་པ་དེ་དུས་དུས་སུ་བཀྲུ། བཙོ་བ་ཡང་ངོ་། །རྔུལ་གཟན་དེ་བཀྲུས་ནས་བཙོ། །གླང་བཙག་གིས་དེ་དེ་བཞིན་དུའོ། །བཙོ་བ་ནི་གླང་བཙག་གིས་བཙོས་ཀྱང་
རུང་ངོ་། །གདོང་ཕྱིས་བཅང་། གདོང་ཕྱིས་བཅངས་ཀྱང་ཉེས་མེད། ལུས་ཟག་ན་ལུས་ལ་ཕྱི་བ་ཡང་ངོ་། །དགེ་སློང་སྡིག་པོ་ཆེ་དུགས་དང་རྔུལ་ཆེ་བ་ལུས་ཀྱི་ཕྱི་བ་བཅངས་ཀྱང་ཉེས་མེད། ཆོས་གོས་དེའི་ནང་དུ་དེ་བགོའོ། །རྔུལ་ཆེ་བ་དང་ཤུ་བ་དང་རྣག་ཁྲག་ཡོད་ན་ཆོས་
གོས་ཀྱི་འོག་ཏུ་རྣག་གཟན་བགོ །ཆགས་ན་གྲོའི་ཆུའམ་ཚིག་པ་ཆུ་དང་བསྲེས་ཏེ་བྱུགས་ལ་དལ་བུ་དལ་བུས་དགོག །རྣག་གཟན་དང་ལུས་སུ་འབྱར་ན་ནས་ཀྱི་ཕྱེ་དང་སོ་ཕག་བཏགས་པའི་ཕྱེ་ཆུ་དང་སྦྱར་ཏེ་བཀྲུས་ལ་དལ་བུས་དགོག་གོ། །རྣག་དང་ཁྲག་ལ་ཡང་ངོ་། །རྣག་དང་ཁྲག་ལ་
རྣག་གཟན་འབྱར་ན་དགོག་པའི་ཐབས་གོང་མ་ལྟར་བྱ། དུས་དུས་སུ་གདིང་བཀྲུ་བསྐམ་བཙོ། དེ་གླང་བཙག་གིས་ན་དགེ །རྣག་གཟན་བཅོ་བ་ན་ཤུ་བ་ལ་ཕན་པའི་ཕྱིར་གླང་བཙག་གིས་བསྐུས་ན་དགེ །གར་བབ་བབ་ཏུ་གོས་མི་གཞག །གོས་ལྷག་མ་ལ་སོགས་
เล่ม ๑๖๕ · หน้า 257b
པ་གར་བབ་བབ་ཏུ་མི་གཞག་གི་བལྟབ་ཅིང་ནན་ཏན་བྱ། དེའི་ཕྱིར་གདང་བཅའ། གོས་དགལ་བའི་ཕྱིར་གདང་བཅའ། ལུང་བུ་ཡང་དེའི་ཕྱིར་རོ། །གདང་ཤིང་གཞུག་པའི་གནས་རྩིག་པ་ལ་བུ་གུ་གཏོད་དེ་ཤིང་སྦུ་བུ་ཅན་གཞུག །གཙུག་ལག་ཁང་བྱེད་པ་ནའོ། །
གདང་ཤིང་བུ་གུ་གདོད་པ་ཐོག་མ་གཙུག་ལག་ཁང་བརྩིག་པ་ནས་བྱ། བུ་གུ་མི་བྱ། གདང་ཤིང་གིས་འཕྲལ་བུ་གུ་མི་གདོད། གཙུག་ལག་ཁང་ནི་དཔེ་སྟེ་ཁང་བུ་ཡང་དེ་བཞིན་ནོ། །གདང་ཤིང་གི་བྱ་བ་དང་བུ་གུ་མི་བརྐོ་གཙུག་ལག་ཁང་བཞིན་དུ་གང་ཟག་གི་ཁྱིམ་བུ་
ཡང་མི་བརྐོ་ཞིང་ཐོག་མ་ནས་གདོད། ལྕུག་མ་དང་ཐག་བུས་འདི་འགྲུབ་བོ། །གདང་ཤིང་གི་སྐྱིན་པར་ལྕུག་མའམ་ཐག་བུ་བཏགས་ཀྱང་རུང་ངོ་། །ཚང་ཐུར་གྱིས་གོས་བླངས་ན་དགེའོ། །ཆོས་གོས་ཀྱི་སྣོད་ཚང་ཐུར་གྱི་ནང་དུ་བཅུག་ན་དགེ །འདི་བྱ། ཚང་ཐུར་བྱས་
ཀྱང་ཉེས་མེད། གསུམ་དང་ཕྱེད་དང་དོར་སྦྱར་ཏེ་བཙེམ། ཚང་ཐུར་གྱི་ཚད་ནི་ཆུར་ཁྲུ་གསུམ་ཞེང་ཁྲུ་ཕྱེད་དང་དོ་བྱ། ཁ་དབུས་སུ་གདོད། སྒྲོག་བུ་སྦྱིན། ཚང་ཐུར་གྱི་ཁ་མི་བྱ་བའི་ཕྱིར་སྒྲོག་བུ་བྱ་སྲད་བུས་སོ། །སྒྲོག་པའི་རྒྱུ་སྲད་བུ་ལས་བྱ། གཞན་གྱིས་བཅིང་། ཚང་
ཐུར་གྱི་ཁ་གཅད་པའི་ཕྱིར་སྒྲོ་གུ་གཅིག་གི་མིག་ཏུ་གཅིག་བཅུག་སྟེ་ལུ་གུ་རྒྱུད་དུ་བཙེམ། བཅད་པ་ནི་སྟེང་དུ་བཅའ། ཆོས་གོས་རྟག་ཏུ་དབྱུང་། དགོས་ན་ཚང་ཐུར་གྱི་ཁ་ལོགས་སུ་གཞུག །སང་འགྲོ་ན་བླ་མ་ལ་གསོལ་ཏེ་གནང་ན་འགྲོ། །དགེ་སློང་གནས་བཅའ་
བ་ཞིག་གུད་དུ་འགྲོ་ན་གནས་བརྟན་ལ་སང་འགྲོའོ་ཞེས་ཞུ། གནས་མི་བཅའ་བ་ཞིག་ནའང་གྲོགས་ལ་འགྲོའོ་ཞེས་ཤེས་པར་བྱ། བདག་གི་གནས་སུ་ཆག་ཆག་ལ་སོགས་པ་བྱས་ཏེའོ། །དགེ་སློང་གུད་དུ་འགྲོ་ན་བདག་འདུག་འདུག་པའི་གནས་ཕྱག་དར་དང་ཆག་ཆག་
ལ་སོགས་པ་བྱས་ཏེ་འགྲོ། ལམ་དུ་འགྲོ་བས་ཆོས་ཀྱི་གཏམ་མམ་བསྲིངས་པའི་མི་སྨྲ་བས་སོ། །ལམ་དུ་ཞུགས་ནས་འགྲོ་བའི་ཚེ་གཏམ་ཅལ་ཅོལ་མི་སྨྲ་བའི་ཆོས་ཀྱི་གཏམ་མམ་ཆོས་ཀྱི་དོན་ལ་བསམ། ངལ་བསོ་བའི་གནས་ནས་ཞལ་ནས་གསུངས་པའི་ཚིགས་སུ་བཅད་པ་
เล่ม ๑๖๕ · หน้า 258a
བཀླགས་ཏེའོ། །ལམ་ན་ངལ་བསོ་བ་ལས་ལངས་པའི་ཚེ་ཞལ་ནས་གསུངས་པའི་ཚིགས་སུ་བཅད་པ་བཀླགས་ཏེ་འགྲོ། །ཆུ་བཅུ་བ་ན་ཡང་ངོ་། །ཆུ་བཅུ་བའི་ཚེའང་ཞལ་ནས་གསུངས་པའི་ཚིགས་སུ་བཅད་པ་བཤད། དེའི་ཆུ་གང་གི་བ་དེའི་ཕྱིར་རོ། །ཆུ་བཅུ་བའི་ཚེ་
ཚིགས་སུ་བཅད་པ་བཀླགས་པ་ནི་ཁྲོན་པའམ་ཡུར་བ་འདྲེན་འདྲེན་པའི་མི་དེ་ཉིད་ཀྱི་ཕྱིར་བསྔོ། །འབབ་ཆུའི་རྒྱལ་པོ་ལ་བསྔོ། གཞན་ལྷ་ལ་ཡང་ངོ་། །ཆུའི་ལྷ་ལ་ཚིགས་སུ་བཅད་པ་གཅིག་བཀླགས། གནས་སུ་གསུམ་རྒྱུད་དོ། །ལམ་དུ་ཞག་ལོན་ན་ནང་པར་གསུམ་རྒྱུད་བཀླགས་
ཏེ་འགྲོ། དགོན་པ་པའི་བཅང་། དགོན་པ་བས་ཆུ་བཅུ་བའི་སྲད་བུ་བཅངས་ཀྱང་ཉེས་མེད། དེའི་ཚད་ནི་ཁྲུ་བརྒྱ་ལྔ་བཅུ་ནས་བརྒྱ་ཡན་ཆད་དོ། །ཆུ་བཅུ་བའི་ཐག་བུའི་ཚད་ནི་ཁྲུ་བརྒྱ་ལྔ་བཅུ་མན་ཆད་བརྒྱ་ཡན་ཆད་དུ་བྱའོ། །ཡུལ་གྱི་རྣམས་ལས་སོ་ཞེས་གཞན་ལས་སོ། །འདུལ་
བ་འཛིན་པ་ཁ་ཅིག་ན་རེ་ཆུ་བཅུ་བའི་ཐག་བུ་ཁྲོན་པ་རིང་ཐུང་ཚད་བཞིན་དུ་བཅངས་པས་ཆོག་གོ་ཞེས་ཀྱང་བཤད། ཁྲོན་པ་མ་ཡིན་པའི་ཆུ་དཀོན་ན་འདི་མེད་པར་ཡུལ་རྒྱུ་བ་མི་སྤྱད། འབབ་ཆུ་མེད་དེ་ཁྲོན་པ་འབའ་ཞིག་ཡོད་ན་ཐག་བུ་བཅང་དགོས་ཀྱི་ཁྲོན་པ་མེད་ཀྱི་འབབ་ཆུ་ཡོད་པའི་
ཡུལ་དུ་ནི་ཐག་བུ་བཅངས་ཀྱང་ཉེས་མེད། ལམ་པས་ཆོས་གོས་སྤྲུགས་ལ་ཁྲུས་བྱས་པའམ་རྐང་ལག་བཀྲུ་བ་དང་ཆུ་བླངས་ནས། ལམ་དུ་ཞུགས་ཏེ་སོང་སོང་བ་ལས་གཙུག་ལག་ཁང་ཞིག་ཏུ་འགྲོ་ན་ཆོས་གོས་ལ་སོགས་པ་སྤྲུགས་ལུས་ཀྱི་དྲི་མ་ཡོད་ན་ཁྲུས་བྱས་ལ་ཁྲུས་མ་ནུས་
ནའང་ཡན་ལག་ལྔ་བཀྲུས་ཏེ་མཎྜལ་བྱ་བའི་ཆུ་དག་བླངས་ཏེ་བཏགས་ལ་ལྷམ་ཕྱི་སྟེ་ལྷམ་ལ་རྡུལ་མེད་པར་ཆུས་ཕྱིས་སྟེ། ཆོས་གོས་གསུམ་བགོ་སྟེ། གཙུག་ལག་ཁང་དུ་འགྲོ་བའི་ཚེ་ཆོས་གོས་གསུམ་བགོ་སྟེ། ཞི་བའི་སྤྱོད་ཡུལ་གྱིས་གཙུག་ལག་ཁང་དུ་འཇུག །མགོ་སྒྱུར་
དང་ལག་བརྒྱངས་མི་བྱ་བར་གཙུག་ལག་ཁང་དུ་འགྲོ། རྒན་པོ་བཞི་ལ་ཕྱག་འཚལ་ཏེ་འགྲེང་། གཙུག་ལག་ཁང་དུ་འོངས་ནས་ལོ་གྲངས་མ་དྲིས་ཀྱི་བར་དུ་དགེ་སློང་པའི་དགེ་འདུན་དུ་ལངས་པ་ལ་ཕྱག་བྱས་ཏེ་འགྲེང་ལ་བསྡད། གསང་བའི་ཕྱོགས་སུ་སྒྲ་བསྐྱུངས་ཏེ་མཛེས་ཤིང་
เล่ม ๑๖๕ · หน้า 258b
རབ་ཏུ་བསྡམ་པའི་སྤྱོད་པས་སོ། །འགྲེངས་ཏེ་འདུག་པ་ནི་ཀུན་གྱིས་མཐོང་ཞིང་གསལ་བའི་ཕྱོགས་སུ་སྒྲ་བསྐྱུངས་ལ་མཛེས་ཤིང་ཚུལ་བསྡམས་ཏེ་གཏོགས་འདོད་དང་ཤེས་འདོད་མི་བྱ་བར་འདུག་གོ། །རྒྱུས་དང་བཅས་པས་ངལ་བསོ། །མི་ཤེས་པར་ངལ་མི་བསོ། གུད་ནས་
དགེ་སློང་ཞིག་འོངས་ན་འདུག་པས་མཁན་པོ་དང་སློབ་དཔོན་ལ་སོགས་པའི་རྒྱུས་ཤེས་ཤིང་ངོ་ཤེས་ན་ངལ་སོར་གཞུག །རྒྱུས་དང་ངོ་མི་ཤེས་ན་ངལ་སོར་མི་གཞུག །མུ་གཅིག་པ་ཡང་ངོ་། །མུར་འདུག་ངོ་ཤེས་ཤིང་གཡོ་མི་བྱེད་པ་ཞིག་འོངས་ནའང་ངལ་སོར་གཞུག །སྒོ་གཅད།
སློང་ན་མི་སྦྱིན། དགེ་སློང་ངོ་མི་ཤེས་པ་ཞིག་གུད་ནས་འོངས་པ་ཞིག་ཡོད་ན་ཐུག་ཐུབ་བྱེད་པའི་ཕྱི་སྒོ་ཆོད་ཅིག་ཅེས་གདམས། གུད་ནས་འོངས་པ་ཁ་སུའང་སྲིད་ཀྱིས་ང་ན་རེ་བྱིན་ཅིག་ཅེས་ཟེར་ཞིང་འོངས་ནའང་མ་སྦྱིན་ཅིག་ཅེས་བསྒོ། །བླངས་ནས་ཟོ་ཅིག་ཅེས་བསྒོ་ནས། གུད་ནས་
འོངས་པའི་དགེ་སློང་དེ་རྫས་དག་ལས་ཐུག་ཐུབ་ཏུ་སྤྱོད་ན་མ་སྤྱོད་པར་ཞོག་ཤིག་ཅེས་བསྒོ། །ཁས་བླངས་ཏེ་ཡལ་བར་བཏང་ནས་སྟོར་ན། གྲོགས་ལ་སྒོ་ཆོད་ཅིག་རྫས་དག་སློང་ན་མ་སྦྱིན་ཅིག་ཅེས་གཏམས་ཏེ་བཞག་ནས་ཁས་བླངས་པ་ལས་སྟོར་བར་གྱུར་ན་དགེ་སློང་ཁས་ལེན་
པ་ལ་སྐྱིན་པ་དབབ་པོ། །ཡིད་བརྟན་པའི་གནས་བརྟན་འདི་དག་གི་གྲོགས་པོ་ཞེས་པ་ལ་སོགས་པ་བསྟན་ནས་སྦྱིན་དུ་གཞུག །ཚིག་ལྷག་མ་སྐད་དུ་གྲོགས་ལ་གཏམས་ཏེ་གུད་ནས་འོངས་པ་ཐུག་ཐུབ་བྱེད་ཅིང་རྐུ་ཡང་སྲིད་ཀྱིས་སྒོ་ཆོད་ཅིག །རྫས་དག་ལེན་དུ་མ་གཞུག་ཅིག་ཅེས་བསྒོ་བ་
ལས་གྲོགས་དེ་ན་རེ་མི་འདིའི་རྒྱུས་ངས་ཤེས་ཏེ་ཐུག་ཐུབ་ལ་སོགས་པ་མི་བྱེད་ཀྱི་ཡིད་རྟོན་ཅིག་ཅེས་ཟེར་ཏེ། བདག་གུད་དུ་སོང་བའི་འོག་ཏུ་རྫས་ཤིག་སྟོར་ན་དགེ་སློང་གྲོགས་དེ་ལ་སྐྱིན་པ་དབབ་པོ། །མངོན་རྟགས་ཀྱི་གནས་གཞན་གྱིས་མི་རིག་པའི་བྱེ་བྲག་གི་ཐབས་ཀྱིས་སོ། །
དགེ་སློང་གུད་ནས་འོངས་ཤིང་རྒྱུས་མི་ཤེས་པ་བདག་གི་གྲོགས་པོས་ནོར་འདི་བྱིན་གྱིས་ལོང་ཞིག་ཅེས་ཟེར་ཞིང་དན་རྟགས་ཀྱི་ཚིག་ཁྱེར་ཞིང་ལེན་དུ་འོངས་ན་བདག་དང་གཉིས་སུ་འཁོད་པའི་དན་རྟགས་ཤིག །ཁྱེར་ཏེ་འོངས་ན་ནི་བྱིན་ཀྱང་ཉེས་མེད། གཞན་ཞིག་དང་གསུམ་
เล่ม ๑๖๕ · หน้า 259a
འཁོད་པའི་དན་རྟགས་ཤིག་ཁྱེར་ཏེ་འོངས་པ་ནི་མི་སྦྱིན་ནོ། །བྱིན་པ་ལས་ལྷུང་ན་ཡང་ངོ་། །རྫས་ཤིག་ཕར་བྱིན་པ་ལས་ཟིན་ཏམ་ཞེས་མ་དྲིས་པར་བར་དུ་ལྷུང་སྟེ་ཆག་ན་སྐྱིན་པ་བདག་ལ་འབབ་པོ། །དེ་སྟེ་མ་བཟུང་བར་གཏམས་ནའོ། །རྫས་ཕར་བྱིན་ཏེ་ཟིན་ཏམ་
ཞེས་དྲིས་པ་ལས་ཟིན་ཏོ་ཞེས་ཟེར་བའི་འོག་ཏུ་ཤོར་ཏེ་ཆག་ན་སྐྱིན་པ་ཕ་རོལ་པོ་ལ་འབབ་པོ། །འདི་ལ་བག་མེད་པར་མ་གྱུར་ཏམ་ཞེས་འདྲི་བ་ལ་བྱ། སྣོད་སྤྱད་དམ་རྫས་མི་གཞན་གྱི་ལག་ཏུ་སྦྱིན་ན་ཟིན་ཏམ་མ་ཟིན་ཅེས་དྲིས་ལ་སྦྱིན་མ་དྲིས་པར་བྱིན་ཏེ་བཏང་ན་ཉེས་བྱས། བརྙས་པ་ལ་
སོགས་པ་དག་གིས་མ་རུང་བར་གྱུར་ན་བཀྲུ་བ་ལ་སོགས་པས་སེམས་མི་རངས་ན་རིན་སྦྱིན། ནོར་ཞིག་བརྙས་ཏེ་སྤྱོད་སྤྱོད་པ་ལས་སླར་བྱིན་ན་ངན་སྐྱུགས་ཀྱིས་རེག་གམ་ཁ་དོག་ལ་སོགས་པ་ཉམས་ཏེ། མ་འདོད་ན་བཅོས་ཤིང་བྱི་དོར་བྱས་ལ་སྦྱིན་ནོ། །བཅོས་ཏེ་བྱིན་ཀྱང་མ་འདོད་ན་ནོར་
དེ་ཅི་རི་བ་རིན་དུ་བྱས་ཏེ་སྦྱིན་ནོ། །ལྷུང་བཟེད་དང་ཆོས་གོས་བླངས། དགེ་སློང་ངོ་ཤེས་པ་ཡོན་ཏན་དང་ལྡན་པ་ཞིག་འོངས་ན་བསུ་ཞིང་ལྷུང་བཟེད་དང་ཆོས་གོས་བདག་གིས་བླང་། སྟན་གདིང་། བསུ་ནས་སྟན་བཏིང་སྟེ་གཞག །རྐང་པ་བཀྲུ་བར་སྤྱན་དྲངས། གུད་ནས་འོངས་པའི་དགེ་
སློང་རྐང་པ་བཀྲུ་ཞིང་མདོངས་གསོལ་བྱ། ཆུས་སོ། །མི་སྐོམ་མམ་ཞེས་དྲིས་ལ་ཆུ་བླུགས། ཕྱག་བྱ། ལོ་གྲངས་དྲིས་ཏེ་རྒན་ན་ཕྱག་བྱ། བདེ་བར་སྤྱད་དམ་ཞེས་དྲི། ལམ་ན་ཉོན་མོངས་པ་མེད་དམ་ཞེས་ནད་དྲི་ཅི་ནུས་པར་མགུ་བར་བྱ། གུད་ནས་འོངས་པ་ལ་ལུས་མཉེ་བ་དང་མར་གྱིས་བསྐུ་
བ་ལ་སོགས་པས་མགུ་བར་བྱ། མལ་སྟན་ཚུལ་བཞིན་དུ་བྱིན། གུད་ནས་འོངས་པ་རིམ་པ་ཇི་ཙམ་དུ་ཆུད་པ་བཞིན་མལ་སྟན་ཡང་སྦྱིན། དགེ་འདུན་གྱི་གནས་བརྟན་གྱི་གན་དུ་འགྲོ །གུད་ནས་འོངས་པའི་དགེ་སློང་དེ་གནས་བརྟན་གྱི་གན་དུ་སོང་ལ་ཕྱག་བྱའོ། །དེས་དེ་ལ་གནས་ལོང་
ཤིག་ཅེས་བསྒོ། གནས་བརྟན་གྱིས་ཀྱང་ཕ་རོལ་པོ་འོངས་པ་གནས་བཙལ་དགོས་པ་ཞིག་ན་གནས་བརྟན་གྱིས་ཡོན་ཏན་ལྡན་པ་འདི་ལ་གནས་ཆོས་ཤིག་ཅེས་བསྒོ། དེ་སྟེ་རྒན་ན་མལ་སྟན་འདི་ལ་བྱིན་གཅིག་ཅེས་བསྒོ། གུད་ནས་འོངས་པ་གནས་བཅའ་མི་དགོས་པ་ཞིག་
เล่ม ๑๖๕ · หน้า 259b
ནའང་མལ་སྟན་ཚུལ་བཞིན་བྱིན་ཅིག་ཅེས་བསྒོ། །མ་བརྟགས་པར་མལ་སྟན་མི་བརྙ་གུད་ནས་འོངས་པའི་དགེ་སློང་གིས་ཀྱང་གཞི་ལ་མལ་སྟན་ཡོད་དམ་མེད་དམ་མ་བརྟགས་པར་མལ་སྟན་མི་བརྙ་ཡོད་ན་གདོད་བརྙ། ཆོས་གོས་ཀྱི་ཐ་མ་མ་རུང་བར་གྱུར་ན་མཐའ་བསྐོར་བའི་ཐབས།
ཆོས་གོས་ཀྱི་ཐ་མ་ཟེགས་སམ་མ་རུང་བར་གྱུར་ན་མཐའ་བསྐོར་གྱིས་གླན། དེ་སྨྱུང་ཁམ་གྱིས་སྦྱར། མཐའ་བསྐོར་གྱིས་སྦྱར་བ་ནི་བཙོ་ཞིང་བཀྲུ་བ་ལ་བདེ་བའི་ཕྱིར་སྐབས་སུ་གཟུངས་གདབ་པ་ཙམ་དུ་བཙེམ། རོའི་གོས་འཆད་ན་བླ་གབ་མེད་པ་དང་ཤིང་གི་སྟེང་དུ་ཞག་བདུན་
བརྒྱད་དམ་ལྔ་དྲུག་ཏུའང་གཞན་ལས་དེ་བཀྲུས་ནས་ཀུན་དགེ་སློང་དུར་ཁྲོད་པའི་རོའི་རྫས་ཀྱི་བདག་པོ་ཡོད་དམ་མེད་བརྟགས་ལ་མེད་ན་བླངས་ཏེ་ཤིང་ངམ་རྩིག་པའི་ཁར་ཞག་བདུན་ནམ་བརྒྱད་དུ་གཞག་ལ་རོའི་དྲི་མི་ཞིམ་པ་མེད་པར་གྱུར་ན་བཀྲུས་ཏེ་གོས་སུ་བྱའོ། །དུར་ཁྲོད་
པ་མ་ཡིན་པར་རོའི་རྫས་བླངས་པ་ནི་ལེན་དུ་མི་དབང་སྟེ་བླངས་ན་ཉེས་བྱས་སོ། །གཙུག་ལག་ཁང་དང་གྲོང་དུ་འཇུག་པར་སྤྱན་དྲངས་པ་ལས་བདག་དུར་ཁྲོད་པའོ་ཞེས་སྨྲ་བ་ནི་མ་བཏང་བར་སྤྱོད་ཅིག་ཅེ་ན་བདག་དུར་ཁྲོད་པའོ་ཞེས་ནས་སྤྱད། དགེ་སློང་དུར་ཁྲོད་པ་གཙུག་
ལག་ཁང་དང་ཁྱིམ་དུ་མི་འགྲོའོ། །འགྲོ་ནའང་སྒོ་ན་བསྡད་དོ། །བསྡད་པ་ལས་སྤྱན་འདྲེན་ཅིང་འབོད་པ་ནའང་དུར་ཁྲོད་པ་ཡིན་ནོ་ཞེས་སྨྲོས་ཤིག །དེ་སྐད་སྨྲས་པ་དང་ཡོན་ཏན་དང་ལྡན་པ་བཙུན་པ་ཁྲོད་བཙོག་པ་མེད་ནང་དུ་བཞུད་སྟན་ལ་བཞུགས་ཞེས་ཟེར་ན་ནང་དུ་སོང་ཞིང་
སྟན་ལ་འདུག་ཀྱང་ཉེས་མེད་དོ། །དེ་སྐད་མི་ཟེར་བར་ནང་དུ་འགྲོ་ཞིང་སྟན་ལ་འདུག་པར་མི་བྱ། དགེ་འདུན་གྱི་མལ་སྟན་ལ་མི་སྤྱད། དུར་ཁྲོད་པའི་དགེ་འདུན་གྱི་སྟན་ལ་གཞག་ཅིང་སྤྱོད་དུ་བཅུག་ནའང་མི་སྤྱད། མཆོད་རྟེན་ལས་འདོམ་གྱིས་མཐའ་སྤང་། དགེ་སློང་དུར་
ཁྲོད་པས་མཆོད་རྟེན་ལ་མ་རེག་ཅིང་འདོམ་གང་ཙམ་ནས་བསྐོར། སྦྲང་ཡབ་བཅང་། སྦྲང་མ་ཟ་ན་དགེ་སློང་གིས་སྦྲང་ཡབ་བཅངས་ཀྱང་ཉེས་པ་མེད་དོ། །བལ་དང་ཤ་ན་དང་ཤིང་བལ་དང་རས་མ་དང་ལོ་མ་ལྷབ་ལྷུབ་པའོ། །སྦྲང་ཡབ་བཙང་བའི་རྒྱུ་བལ་ལས་སྐུད་པར་བཀལ་བ་
เล่ม ๑๖๕ · หน้า 260a
དང་ཤིང་གི་ལོ་མ་གཡག་རྔ་འདྲ་བ་དང་ཤིང་བལ་ལས་སྐུད་པར་བཀལ་བ་དང་རས་དང་སྣམ་བུའི་རས་མ་དང་ཤིང་གི་ལོ་མ་ཤད་ཤད་པོར་འདུག་པ་དང་། འདི་རྣམས་ཀྱིས་བྱའོ། །བ་ལང་དང་རྟ་དང་བ་ལང་གི་སྤུའི་མ་ཡིན། སྦྲང་ཡབ་རྟ་དང་གཡག་རྔ་ལ་
སོགས་པ་སྤུ་བྱས་པའི་སྦྲང་ཡབ་མི་བྱ། གང་ཟག་གིས་ཡུ་བ་ཐམས་ཅད་ཚོན་རྩིས་མ་ཡིན། སྦྲང་ཡབ་དང་སེག་ཅང་གི་ཡུ་བ་རི་མོ་ཅན་མི་བྱ། རི་མོ་མེད་ཀྱང་ཁ་དོག་འཚེར་བ་ལའང་མི་བྱ། རི་མོ་དང་རི་མོ་ཉེས་པས་མ་ཡིན། ཅིའང་རུང་སྟེ་རི་མོ་ཅན་གྱི་རྫས་མི་སྤྱད།
སྦྲང་བུའི་ཁང་བུ་ཡང་ངོ་། །སྦྲང་མ་ཟ་ན་རས་ཀྱི་ཁང་བུ་དབུབ། སྟེང་བུ་རས་བཏིང་སྟེའོ། །ཁང་བུའི་སྟེང་དུ་རས་གདིང་། རྒྱུག་པ་ལ་བཅིངས་ཏེའོ། །ཁང་བུའི་རས་རྒྱུག་པ་ལ་བཅིང་། ཁྲུ་བཞི་དང་གཉིས་སོ། །རས་ཁང་གི་ཚད་ནི་ཞེང་ཁྲུ་བཞིར་བྱ། མཐའ་སྣམ་
བུས་བསྐོར། རས་ཀྱི་ཁང་པའི་གློའང་རས་ཀྱིས་བསྐོར་ཅིང་གཡོགས་སོ། །ཁྲུ་བཅུ་གཉིས་ཀྱིས་སོ། །ཁང་བུའི་གློ་རས་ཀྱིས་བསྐོར་བ་ནི་ཆུར་ཁྲུ་བཅུ་གཉིས་སུ་བྱའོ། །མནན་པ་དང་བཅས་སོ། །དེ་མལ་སྟན་གྱི་འོག་ཏུ་མནན། ཁང་བུ་གློར་བསྐོར་བའི་རས་ཀྱི་མཐའ་མ་མལ་
འོག་ཏུ་ཆུད་པར་མནན། སྒོའི་སྒོ་ཡོལ་བྱ། རས་ཁང་གི་སྒོ་བཅད་པའི་ཕྱིར་རས་སྣེ་སྣོལ་དུ་གཏང་བར་བྱ། ཚ་ན་རྔུལ་ཡབ་ཀྱིས་ཐབས་སོ། །ཡུལ་ཚ་ན་བསིལ་ཡབ་ཀྱིས་གཡབས་ཀྱང་ཉེས་མེད། རྔུལ་ཡབ་བཅང་། བསིལ་ཡབ་བཅངས་ཀྱང་ཉེས་མེད། རེ་ལྡེ་མཁན་གྱིས་བྱས་
པ་ལའང་ཏ་ལའི་འདབ་མ་ལྟ་བུའོ། །བསིལ་ཡབ་ནི་ཏ་ལའི་འདབ་མའམ་སྨྱུག་མ་ལ་གདགས་པར་བྱ། རི་མོ་དང་རི་མོ་ཉེས་པས་མ་ཡིན། བསིལ་ཡབ་རི་མོ་ཅན་མི་བྱ། དགེ་འདུན་གྱིས་ན་གཞན་ཡང་ངོ་། །དགེ་འདུན་གྱིས་ནི་རི་མོ་ཅན་སྤྱད་ཅིང་བཅངས་ན་ཉེས་མེད་དོ། །རྩིད་
པའི་རྔུལ་ཡབ་ནོར་བུ་ཅན་བྱུང་ན་མཆོད་རྟེན་ལ་དབུལ། རྩིད་པའི་རྔུལ་ཡབ་ནོར་བུ་དང་གསེར་དངུལ་གྱིས་བརྒྱན་པ་ཞིག་རྙེད་ན་མཆོད་རྟེན་ལ་དབུལ་ལོ། །ཉན་ཐོས་ཀྱི་ཡང་ངོ་། །སྦྲང་ཡབ་རྒྱན་ཅན་ཉན་ཐོས་ཀྱི་མཆོད་རྟེན་ལ་ཕུལ་ནའང་ཉེས་མེད། ཆོངས་ཤིག །བེའུ་རས་
เล่ม ๑๖๕ · หน้า 260b
དང་སྔས་གྲུ་བཞི་ཡང་ངོ་། །བེའུ་རས་དང་སྔས་བར་ཚངས་ཅན་གང་ཟག་གིས་བཅངས་ཀྱང་ཉེས་མེད་དོ། །བུ་དང་ཆུང་མ་རྙེད་ན་སྦྱིན་བདག་གི་དབང་གིས་ནན་ཏན་བྱ། ཡོན་བདག་བསོད་ནམས་འདོད་པའི་ཕྱིར་བུ་དང་ཆུང་མ་དགེ་འདུན་ལ་ཡོན་དུ་ཕུལ་ན་ཁོས་ཅི་ལྟར་བསྔོས་
ཏེ་ཕུལ་བ་བཞིན་དུ་ནན་ཏན་དུ་སྤྱད། དེ་སྟེ་སླུ་བར་གྱུར་ན་དེ་ཅི་ཙམ་དུ་འདོད་པའི་རིན་གྱིས་སོ། །མདོ་ལྟག་མ་ལྟར་བུ་དང་ཆུང་མ་ཕུལ་བ་ལས་སླར་སླུ་ཞེས་ཟེར་ན་དགེ་འདུན་གྱིས་རིན་ཐང་མི་བཅད་ཀྱི་ཁོ་བོ་ཁ་ཐབས་བཞིན་དུ་སླུ་སྦྱིན། ཡང་ཕུལ་ཡང་བརྟགས་པའོ། །ཡོན་དུ་ཕུལ་
ཟིན་པ་ལས་བསོད་ནམས་སུ་འགྱུར་བའི་ཕྱིར་སླར་མ་བསླུས་ཀྱང་ལན་དུ་མར་བསླུས་ཤིང་འབུལ་ལོ་ཞེས་ཟེར་ཞིང་འབུལ་ནའང་མི་རུང་བ་མེད་དོ། །དེ་སྟེ་ཤིང་ཕུལ་བའི་རྒྱན་དུས་མཆོད་ཀྱི་ཚེ་བརྒྱན་པའི་ཕྱིར་གཞག །བཟའ་ཤིང་དང་གྲིབ་ཤིང་ལ་དགེ་འདུན་འདུ་ཞིང་སྤྱོད་པའི་
ཕྱིར་བརྒྱན་པ་རྒྱན་དུ་ཕུལ་ནའང་ཕྱིས་འདུ་བའི་ཚེ་བརྒྱན་པའི་ཕྱིར་གཞན་དུ་མི་སྤྱད་དོ། །དེ་སྟེང་ཁང་བུ་བརྩིག་པ་ལ་ནི་འབྲི་བའི་ཕྱིར་རོ། །ཁང་བུའི་རྒྱན་དང་རྩིག་པའི་རི་མོ་བྲི་བའི་ཕྱིར་བསྔོས་ཏེ་ཕུལ་ནའང་གཞན་དུ་མི་སྤྱད་པ་དེ་ཉིད་དུ་སྤྱད་དོ། །དེ་སྟེ་མ་ཡིན་ཏེ་ཀ་བ་ན་ལས་སར་པར་
རོ། །ཀ་བ་ལ་བསྔོས་ཏེ་ཕུལ་ནའང་ཀ་བའི་རི་མོ་དང་རྙིང་པ་བརྗེ་བའི་ཕྱིར་སྤྱད་དོ། །ས་ལའོ། །ས་ལ་བསྔོས་ཏེ་ཕུལ་ནའང་གཞན་དུ་མི་སྤྱད་དེ་འོག་ནས་འཆད་དོ། །མེའི་གནས་སུ་ན་འབུད་པ་བྱ། མེ་བུད་པའི་ཕྱིར་ཕུལ་ན་ཤིང་དང་མེ་མར་ལ་སོགས་པར་སྤྱད་དོ། །སྣུམ་འཐོབ་པ་ཡང་ངོ་། །
མེ་བུད་པའི་ཕྱིར་ཕུལ་བ་ལས་མི་དགོས་སམ་ལྷག་ན་ཁུར་བ་ལ་སོགས་པར་ཡང་བྱའོ། །ལུས་བསྐུ་བར་ཡང་བྱ། ནད་པའི་གནས་སུ་བརྟགས་པར་སྨན་དང་ཡོ་བྱད་དོ། །ནད་པ་རྣམས་ལ་བསྔོས་ཏེ་ཕུལ་ནའང་རྩི་སྨན་དུ་སྦྱར་ཏེ་སྦྱིན་ནོ། །ཟས་ཀྱི་གནས་སུ་ཟས་བྱའོ། །ཚང་མང་གི་
གནས་སུ་ཕུལ་བའི་རྣམས་ནི་ཟས་སུ་བྱ་ཞིང་སྤྱད་དོ། །སྐོམ་གྱིར་སྐོམ་གྱི་གནས་སུའོ། །གྲུང་ཚད་དུ་ཕུལ་བའི་རྣམས་ནི་སྐོམ་དུ་བཏུང་ཞིང་སྤྱད་དོ། །བསྲོ་གང་གི་གནས་སུ་བསྲོ་གང་ངོ་། །བསྲོ་གང་དུ་ཕུལ་བའི་རྣམས་ནི་བསྲོ་གང་མེ་བུད་པ་ལ་སོགས་པ་སྨན་དཔྱད་དུ་སྤྱད་
เล่ม ๑๖๕ · หน้า 261a
དོ། །སྣུམ་འཐོབ་པ་ཡང་ངོ་། །གོང་མ་ལྟར་བསྲོ་གང་ལ་ཡོན་ཕུལ་བ་མེ་འབུད་པར་མི་དགོས་ན་དགེ་འདུན་གྱི་སྣུམ་དང་ཁ་ཟས་བསོད་པའི་རྒྱུར་བྱ། སྣུམ་འཐོབ་པའི་གནས་སུ་ཟླུམ་པོར་ཡོ་བྱད་ཀྱི་གནས་སོ། །དགུན་མེ་འབུད་པའི་ཁྱིམ་ཁང་ཟླུམ་དུ་
ཡོན་ཕུལ་བ་ནི་ཤིང་དང་ལུས་དང་རྐང་པ་བསྐུ་བའི་སྣུམ་དུ་བྱ། དབྱར་ཡོན་དུ་ཕུལ་ཏེ་མེ་འབུད་མི་དགོས་ན་ལུས་ལ་བྱུག་པ་དང་བཤོས་ཀྱི་རྒྱུར་བྱ། སྐྱེས་པའི་རབས་བྲི་བ་ཡང་ངོ་། །དགེ་འདུན་གྱི་བཀད་སར་ཡོན་ཕུལ་ཏེ་བཀད་པའི་ཡོ་བྱད་དུ་སྤྱད་ཅིང་དགོས་པ་སྤྱད་ཀྱང་
ལྷག་ཡོད་ན་སངས་རྒྱས་འཇིག་རྟེན་དུ་བྱུང་བ་དང་བདུད་བཏུལ་བ་ལ་སོགས་པའི་གཏམ་རྒྱུད་བྲི། ཕྱི་ཁྱམས་དང་འཆག་ས་དང་སྒོ་ཕུགས་དང་ཁྱམས་སུ་བགོ །ཕྱི་རོལ་གྱི་ཁྱམས་དང་སྒོ་ཕུགས་དང་འཆགས་ས་ལ་སོགས་པ་ལ་བསྔོས་ཏེ་ཕུལ་བ་ནི་དགེ་འདུན་སྤྱིའི་བགོ །
དབུས་ཀྱང་ངོ་། །གཙུག་ལག་ཁང་གི་དབུས་ཀྱི་མཐོངས་སུ་ཕུལ་བ་ཡང་སྤྱིར་བགོ །ཕྱོགས་བཞིའི་དགེ་འདུན་གྱིར་འདི་གཞག་གོ་ཞེས་ཀྱང་གཞན་ལས་སོ། །སྒོ་ཕུགས་དང་དབུས་ཀྱི་མཐོངས་སུ་ཕུལ་བ་ལ་སོགས་པ་འདུལ་བ་འཛིན་པ་ཁ་ཅིག་ན་རེ་ཕྱོགས་བཞིའི་དགེ་འདུན་ལ་
བསྔོས་ཏེ་ཞོག་ཤིག་ཅེས་ཀྱང་བཤད་དོ། །དཀོན་མཆོག་གི་ཕྱིར་སློང་བ་ནི་བརྟགས་པའོ། །སངས་རྒྱས་དང་ཆོས་དང་དགེ་འདུན་གྱི་ཕྱིར་སློང་བ་ནི་ཉེས་མེད་དོ། །བརྗོད་པ་ཡང་ངོ་། །དཀོན་མཆོག་གསུམ་པོ་ལ་ཡོན་བདག་ཡོན་འབུལ་བའི་ཚེ། ཡོན་བདག་སེམས་བསྐྱེད་པའི་ཕྱི་སྟོད་
ཏྲ་བསྐྱེད་ཀྱང་ཉེས་མེད། བླངས་ཏེའོ། །སྟོད་ཏྲ་བྱ་བ་ནི་སྔར་མི་བྱའི་ལེན་པའི་ཚེ་བྱ། མཐོང་བའི་ཕྱིར་འཁོར་ལོ་བྱ། སྟོད་ཏྲ་བྱ་བ་ནི་དགའ་བར་བྱ་བའི་ཕྱིར་ཀུན་གྱིས་མཐོང་བར་ས་མཐོན་པོར་འདུག་སྟེ་བྱའོ། །ཚའམ་རླུང་ངམ་ཆར་པའི་གནོད་པས་མི་རེག་པའི་ཕྱིར་ཁང་བུ་
བརྩེགས་པ་སྒོ་བཞི་པ་བྱ། སྟོད་ཏྲ་ཀློག་པས་མཐོན་པོར་བྱ་བ་ནི་ཤིང་རྟའི་སྟེང་དུ་ཁང་བུ་ཤིང་ཁང་ཕུབ་ལ་སྒོ་བཞིར་བཏོད་དེ་དེའི་ནང་ནས་བཀླག །མཆོད་པ་ཟིན་ནས་འཁོར་ལོ་དབྱུང་། སྟོད་ཏྲའི་ཁ་དོན་ལ་སོགས་པ་ཟིན་ནས་ཁང་བུ་སོ་སོར་བཤིག་སྟེ་སྦས་ལ་གཞག །སྣོད་དུ་
เล่ม ๑๖๕ · หน้า 261b
སྦེད་པས་འཐོབ་པ་སྦ། སྟོད་ཏྲ་ཀློག་པས་ཁང་བུ་ནས་བྱེད་པའི་ཚེ་ཡོན་ཕལ་ཆེར་ཕུལ་ན་དེ་རྣམས་བསྡུ་ཞིང་བརྟུལ་བ་སྡུད་པའི་དགེ་སློང་ནི་གཞན་གཅིག་བསྐོ། །སྟོན་པ་མཆོད་པ་ནི་གཉིས་སུ་མ་དགོས་པར་སྦྱིན་པར་དགེ་སློང་མའི་དགེ་འདུན་མ་གཏོགས་སོ། །ལྟག་མ་ལྟར་
སྟོད་ཏྲ་བྱེད་ཅིང་མཆོད་པའི་ཚེ་ན་ཡོན་བདག་གིས་དགེ་སློང་ཕོ་མོའི་སྤྱིར་ཕུལ་བ་ནི་བགོ །དགེ་སློང་འབའ་ཞིག་ལ་བསྔོས་ཏེ་ཕུལ་བ་ནི་དགེ་སློང་མ་མི་དབང་ངོ་། །འདིར་གཅིག་པ་ལས་འཁོར་ལོ་སོ་སོར་བཙུགས་པ་ན་སྦོམ་པོར་ཉེས་པའོ། །ལྟག་མ་ལྟར་དགེ་སློང་གིས་འཁོར་
ལོའི་གནོད་པ་དང་བརྗེད་པར་བྱ་བ་དང་ཡོན་བདག་གིས་ཡོན་མང་དུ་ཕུལ་ཏེ་དགེ་སློང་མས་ཡོན་སྐལ་བླངས་ཏེ་མ་སྟེར་བ་དང་བསྡུ་ལ་ནན་དས་དེའི་ཉིན་མོ་དགེ་སློང་གིས་མཆོད་པ་འདྲ་བ་ཅིག་ཕྱུང་སྟེ་ཡོན་ཏན་ཐོབ་པ་ལས་དགེ་སློང་ལ་སྙོམས་པ་ལྟར་གྱུར་ཏེ་དེ་ལྟར་བྱེད་ན་
དགེ་སློང་མ་དབྱེན་གྱི་སྦོམ་པོར་འགྱུར། སྣོད་འགྱེད་པས་བགོ །སྟོད་ཏྲ་བྱས་པའི་ཕྱིར་ཡོན་ཕུལ་བའི་རྣམས་སོ་སོར་བགོ་བ་ནི་ཡོན་ཕུལ་བ་སྡུད་པར་བསྐོས་པའི་དགེ་སློང་དེས་བྱའོ། །འདི་བསྐོའོ། །སྟོད་ཏྲ་ཀློག་པའི་ཚེ་ཡོན་འབུལ་བ་སྡུད་པ་དང་སོ་སོར་འགོད་པའི་དགེ་
སློང་གཅིག་བསྐོ། །བཙོང་བའི་རིགས་པ་བཙོང་གཡུ་དང་རྟ་ལྟ་བུ་ཞིག་ཕུལ་ཏེ་བགོར་མི་བདེ་བ་ནི་བཙོངས་ཏེ་རིན་བགོ །དགེ་འདུན་གནས་པར་རོ། །བཙོང་བ་ནི་དགེ་འདུན་གྱི་ནང་དུ་རིན་ཐང་དྲིས་ཏེ་གང་གིས་རིན་ཆེར་བཏབ་པ་དེ་ལ་བཙོང་བསྐྱེད། དགེ་འདུན་ལ་མཐར་
གྱིས་དྲིས་ཏེ་གང་གིས་ཆེར་བཏབ་པ་ལ་བཙོང་། དེས་འདི་ལ་གདུག་པར་གཏོགས་པའི་ནན་ཏན་བྱ། ནོར་འགོད་པར་བསྐོས་པའི་དགེ་སློང་དེས་ནོར་འགོད་ཅིང་དགེ་འདུན་འདུ་བའི་སར་ཆག་ཆག་ཕྱག་དར་ལ་སོགས་པ་བྱ། དགེ་འདུན་གྱི་གནས་བརྟན་གྱིས་རིན་བྱ། ནོར་
རིན་གཅོད་པའི་ཕྱིར་དགེ་འདུན་ལ་སྟོན་པའི་ཚེ་ཐོག་མར་གནས་བརྟན་གྱིས་རིན་ཐང་གཅད་དོ། །རན་པར་རོ། །གནས་བརྟན་གྱིས་ནོར་རིན་ཐང་བཅད་པ་ན་སྲང་གཅིག་རི་བ་ཞོ་དྲུག་རི་བ་ཙམ་དུ་གདབ་པོ། །དེའི་ཕྱིར་དེ་ལ་མི་བསྟབས་གནས་བརྟན་གྱིས་རིན་བཅད་པ་ལས་ཆེར་
เล่ม ๑๖๕ · หน้า 262a
འབེབས་པ་གཞན་མ་བྱུང་ན་གནས་བརྟན་མི་ཉོར་མི་གནོང་བར་ནི་མི་བྱའོ། །ཆད་པར་བྱ་སྟེ་སླར་འཕེལ་བར་མི་འགྱུར་ན་དབྱུང་ནོར་བཙོང་བ་ནི་རིན་འདེབས་པའི་ཕྱིར་བརྟན་པ་ལས་རིན་གང་གིས་ཆེར་བཏབ་པ་དེ་ལས་བཟླས་ཏེ་དྲིས་ཀྱང་གཞན་ཆེར་འདེབས་པ་
མེད་ན་དེ་ཉིད་ལ་ཉོར་གཞུག་གོ། །མི་བཙོང་མི་སྤེལ། བདག་ཉོར་མི་འདོད་པ་ལས་རིན་བསྐྱེད་པའི་ཕྱིར་རིན་ཐང་ཆེར་མི་གདབ། བུད་མེད་ལ་མ་ཡིན། བུད་མེད་ནི་སྤྱད་བྲིམ་ཞིང་རིན་ཐང་མི་གཅད། རིན་མ་བླངས་པར་མི་སྤྱད། དགེ་འདུན་ལས་ནོར་ཉོ་བར་བླངས་པ་
ལས་རིན་མ་ཕུལ་གྱི་བར་དུ་སྤྱད་པར་མི་བྱ། བཅོས་པར་ཡང་ངོ་། །དགེ་འདུན་ལ་ནོར་ཉོ་བའི་ཕྱིར་བླངས་པ་ལས་རིན་མ་ཕུལ་གྱི་བར་དུ་མི་སྤྱད། ཁ་དོག་བསྒྱུར་བའམ་བཅོས་ལེགས་མི་བྱ། ལེན་པ་མང་ན་དུ་ལ་སོགས་པའི་སྡེར་བགོ །ཡོན་བདག་གིས་ཡོན་མང་མོ་ཞིག་ཕུལ་
ཏེ་འགོད་ན་བགོ་སླ་བའི་ཕྱིར་དགེ་སློང་ཡོད་པ་ལས་བཅུ་ཕུང་དུ་བཅད་དེ་སོ་སོར་བཅུ་སྡེར་བྱིན་ལ་འགོད་དུ་གཞུག་སྡེར་བྱིན་པ་ལས་མ་བགོས་པར་འགའ་ཞིག་ཤི་ན་དེའི་ཚེ་ཆ་སྡེར་གཏོགས་སོ། །མདོ་ལྟག་མ་ལྟར་བཅུ་ཞིག་བགོ་གཅིག་ཏུ་ནོར་སྐལ་བྱིན་པ་ལ་བཅུ་སྡེ་དེའི་ནང་ནས་
འགའ་ཞིག་ཤི་ན་དེའི་སྐལ་བ་བཅུ་སྡེ་དེར་གཏོགས་པའི་རྣམས་ཀྱིས་བགོས་ཀྱང་ཉེས་མེད། རིགས་པ་ནི་མྱ་ངན་ལས་འདའ་བའི་བསམ་པས་རབ་ཏུ་བྱུང་བ་ཚུལ་ཁྲིམས་དང་ལྡན་པ་ལ་གོས་སྟོང་ཕྲག་བརྒྱ་དང་ཁང་ཕ་བརྩེགས་མ་ལྔ་བརྒྱའོ། །མྱ་ངན་ལས་འདའ་བའི་ཕྱིར་དད་ཅིང་མོས་ཏེ་
རབ་ཏུ་བྱུང་བའི་དགེ་སློང་ཡོན་ཏན་དང་ཚུལ་ཁྲིམས་དང་ལྡན་པས་ནི་གོས་བཟང་པོ་སྣ་གྲངས་སྟོང་ཕྲག་བརྒྱ་དང་ཟས་ཞིམ་བཟང་པ་རོ་སྣ་བརྒྱ་དང་ཁང་པ་བརྩེགས་མ་ལྔ་བརྒྱ་ལ་སོགས་པ་བཟང་པོ་དང་མང་པོ་ཅི་སྤྱད་ཀྱང་རུང་སྟེ་ཡོན་ཏན་དང་ལྡན་པས་ཞུ་བར་འགྱུར་བས་སྤྱོད་དུ་དབང་སྟེ་
བརྟགས་པའོ། །དགེ་འདུན་གྱི་ནོར་ཀྱང་ངོ་། །མདོ་ལྟག་མ་ལྟར་ཡོན་ཏན་དང་ལྡན་པས་ནི་དགེ་འདུན་གྱི་ནོར་དང་ཟས་ལ་སྤྱད་ཀྱང་བརྟགས་པའོ། །མི་སློབ་པའི་བར་དུའོ། །མྱ་ངན་ལས་འདས་པར་སེམས་བསྐྱེད་ཅིང་ཚུལ་ཁྲིམས་དང་ལྡན་པས་ནི་དགྲ་བཅོམ་པ་མན་ཆད་གང་
เล่ม ๑๖๕ · หน้า 262b
ཟག་རིམ་པ་བདུན་གྱིས་ནོར་ལས་སྤྱད་ཀྱང་བརྟགས་པའོ། །མ་རབས་ཀྱང་ངོ་། །མདོ་ལྟག་མ་ལྟར་སྤྱད་ཀྱང་བརྟགས་པ་ནི་གང་ཟག་མ་རབས་ཡིན་ཀྱང་ཚུལ་ཁྲིམས་དང་ལྡན་ཞིང་མྱ་ངན་ལས་འདའ་བར་སེམས་བསྐྱེད་པ་ནི་སྤྱོད་པར་བརྟགས་པའོ། །ཚུལ་ཁྲིམས་ལོག་པ་
ལས་ནི་མ་ཡིན་ནོ། །དགེ་འདུན་གྱི་ཟས་དང་གོས་ཀྱི་ཤས་ཀྱི་སྐལ་བ་ལ་ཕས་ཕམ་པ་བཞི་བྱུང་བ་ནི་མི་དབང་ངོ་། །ཕས་ཕམ་པ་བཞིའི་ཚུལ་ཁྲིམས་ཕྲ་མོ་ཉམས་ཀྱང་ཤས་ཀྱི་སྐལ་བ་ནི་དབང་ངོ་། །ཕས་ཕམ་པ་དང་ཁྱིམ་པ་དགེ་འདུན་ལ་འཁོར་ཞིང་ཡོན་ཕུལ་བ་ནི་དགེ་འདུན་གྱིས་ཟ་
ཞིང་སྤྱོད་དུ་བཅུག་པ་ནི་དབང་ངོ་། །བུ་ལོན་དུ་འགྱུར་བ་ནི་ལེ་ལོ་ཅན་གྱི་བླངས་ཏེ་བཙོ་བའོ། །ཚུལ་ཁྲིམས་མ་ཉམས་སུ་ཟིན་ཀྱང་ལེ་ལོ་ཆེ་ཞིང་དགེ་བ་སྤྱོད་པའི་ཤས་ཆུང་ན་ཡོན་བདག་གི་ནོར་རྫས་ལ་སྤྱད་པ་མི་ཞུ་སྟེ་བུ་ལོན་དུ་འགྱུར་རོ། །དགེ་འདུན་གྱི་རྙེད་པ་ལས་རིགས་པ་
ནི་མཚམས་གཅིག་པའི་གང་ཟག་གི་གཙུག་ལག་ཁང་ན་སྡེ་པ་དེའི་རྙེད་པ་ལ་སྤྱོད་པ་ཡང་ངོ་། །ཚུལ་ཁྲིམས་དང་ལྡན་པས་ནི་དགེ་འདུན་གྱི་ཟན་སྐལ་ཡང་ཟོས་ལ་ཡོན་བདག་གཞན་ཞིག་གིས་ཟན་ཁྱེར་ཏེ་འོངས་ཏེ་བྱིན་ན་ཡང་ཟོས་ཀྱང་ཉེས་མེད་དོ། །གཅིག་ཟོས་ན་གཅིག་
བསགས་སུ་ནི་མི་དབང་ངོ་། །ཁང་བུ་བསྔོས་པ་ཡང་ངོ་། །ཡོན་བདག་གིས་ཁང་བུའི་རྐྱེན་དུ་ཁང་བུ་དེ་ན་སུ་འདུག་པ་ལོ་གཅིག་ཅིང་རྟག་ཏུ་གསེར་ལྟ་བུ་འབུལ་བ་ཞིག་ཡོད་ནའང་དེའང་བླངས་ལ་དགེ་འདུན་སྤྱིའི་ཡོན་སྐལ་བླངས་ཀྱང་ཉེས་མེད་དོ། །འདི་ལ་རེས་ཀྱིས་བསྒོ། །ཁང་
བུའི་རྐྱེན་རྟག་ཏུ་སྲང་གྲངས་འབུལ་བ་ཞིག་ཡོད་ན་ཁང་བུ་དེ་རྟག་ཏུ་དགེ་སློང་གཅིག་པུ་མི་གཞག་གི་རེས་ཀྱིས་དགེ་འདུན་ཀུན་འཁོད་དོ། །དགེ་སློང་གཅིག་གིས་མངན་རྣོགས་སུ་ཐེག་སྟེ་རྐུ་སེམས་དང་ལྡན་ན་ཕམ། ལྷུང་བཟེད་དང་། ལྷུང་བཟེད་ཆུང་ངུ་དང་ཕུར་བུ་དང་བུམ་
པ་དང་ཀྱོ་བ་ཏང་དང་གྲི་དང་ཁབ་དང་སེན་རེག་དང་གཟར་བ་དང་སོལ་བ་བསྡུ་བ་དང་སྟ་རེ་དང་སླ་ང་དང་ཁ་ཕྱིས་དང་། ལྕགས་ཀྱི་སྣོད་བགོ །ཡོན་བདག་གིས་མིང་གིས་སྨོས་པ་འདི་རྣམས་དགེ་འདུན་ལ་ཕུལ་ན་དགེ་འདུན་སོ་སོར་བགོ །སའི་སྣོད་དག་ཏུ་ལྷུང་བཟེད་ཆུང་
เล่ม ๑๖๕ · หน้า 263a
ངུ་དང་བུམ་བུ་དང་བླུགས་མ་དང་ཆབ་སྟོང་དང་རིལ་བ་སྤྱི་བླུགས་དང་ཆུ་སྣོད་དག་ཀྱང་ངོ་། །མིང་གིས་སྨོས་པ་འདི་རྣམས་ལྟ་བུ་ཞིག་ཡོན་བདག་གིས་ཕུལ་ནའང་དགེ་འདུན་སོ་སོར་བགོ །རིན་པོ་ཆེའི་ཁྲི་ལ་སོགས་པ་མཐར་ལྕགས་ཀྱང་ངོ་། །རིན་པོ་ཆེའི་ཁྲི་
མན་ཆད་ལྕགས་ཀྱི་ཁྲི་ཡན་ཆད་གཅིག་ཕུལ་ན་བཙོངས་ལ་རིན་ལ་བགོ །བརྗེ། མདོ་ལྟག་མ་ལྟར་ཁྲི་ཡོན་དུ་ཕུལ་བ་རིན་དུ་བརྗེས་ལ་བགོ །ཤིང་གི་ནི་མ་ཡིན་ནོ། །ཤིང་གི་ཁྲི་ཆེ་སྲ་ཤིག་ཕུལ་ན་མི་བགོ་བར་སྤྱི་ལ་གཞག །ཚོན་སྣ་ལྔ་ལས་གཞན་དག་ཀྱང་ངོ་། །ཚོན་
ཆེན་པོ་སྣ་བདུན་ཕུལ་ན་མཚལ་དང་ལི་གྲུ་དང་ནུ་མེད་གསུམ་ནི་བགོའི་གཞན་སྣ་ལྔའི་རི་མོ་བྲི་བའི་ཕྱིར་བཞག་གོ། །མ་བཅོས་པ་ཡང་ངོ་། །ཚོན་ཆེན་པོ་སྣ་བདུན་ལས་བཙོས་པ་ཞིག་ན་མི་བགོ །མ་བཅོས་པ་ནི་བགོ །བཅོས་པ་བཙོར་རུང་བ་ནི་བགོ །བཙོས་པའི་ཁུ་བ་དགེ་འདུན་
གྱི་གོས་བཙོར་རུང་བ་ཡོད་ན་ཕྱིར་གཞག་གོ། །གཞན་དགེ་འདུན་གྱིའོ། །ལྟག་མ་ལྟར་སྤྱིའི་བཙོ་བར་བཞག་པ་ནི་དགེ་འདུན་གྱི་སྤྱིའི་ཕྱིར་བཞག་གོ། །མི་བཙོ། །མིང་གིས་སྨོས་པ་འདི་རྣམས་ལྟ་བུ་ཞིག་ཡོན་ཕུལ་བ་ནི་བགོ་ཞིང་བཙོ་བར་མི་བྱ། ཀུན་དགའ་དང་། སྐྱེད་ཤིང་
དང་ལྡུམ་ར་ཕུལ་བ་དང་། གཙུག་ལག་ཁང་དང་། གཙུག་ལག་ཁང་གི་ཁང་པ་ཕུལ་བ་དང་། དེའི་དངོས་པོ་དང་། གཙུག་ལག་ཁང་གི་འཁོར་གྱི་ས་དང་། མལ་སྟན་དག་གོ། །ཁྲི་དང་ཁྲིའུ་དང་མལ་སྟན་དང་འདི་རྣམས་བགོ་བར་མི་བྱ། དབང་དུ་མི་བྱ། མདོ་ལྟག་མ་ལྟར་མིང་གིས་
སྨོས་པ་འདི་རྣམས་སྤྱིར་བཞག་པ་ལས་བུ་ལོན་ཆགས་པ་ལ་སོགས་པའི་གཏའ་འོག་ཏུ་མི་བཞག །མི་བསྔོ་བ་ཡང་ངོ་། །གཙུག་ལག་ཁང་ལ་སོགས་པ་སྤྱིར་བཞག་པ་ལས་དགེ་སློང་གང་ཟག་བདག་གི་ནོར་དུ་མི་བསྔོ་མི་བསྐུར་པ་དག་ལ་ཟས་དང་གོས་བསྟན་པར་བྱ། མ་དག་ལ་གོས་དང་
ཟས་ལས་སྦྱིན། དེ་སྟེ་གོས་དང་ལྷུང་བཟེད་ལྷག་པ་མེད་ན་བསླང་། ཕ་མ་ལ་སྦྱིན་དུ་ཆོས་གོས་དང་ལྷུང་བཟེད་ཙམ་ལས་མི་བདོག་ན་གཞན་ལས་བསླངས་ཏེ་བྱིན་ཀྱང་ཉེས་མེད། མ་གྲུབ་ན་ཟས་ཐོབ་པ་དེ་ལས་ཕྱེད་སྦྱིན་ཕ་མ་ལ་སྦྱིན་པར་བསླང་དུའང་མ་རྙེད་ན་བདག་གི་ཟས་དང་གོས་ཀྱི་
เล่ม ๑๖๕ · หน้า 263b
སྐལ་བ་ཅི་ཐོབ་པ་ལས་ཕྱེད་ཕ་མ་ལ་སྦྱིན་པར་བྱ། ཕྲ་མོ་ལ་སོགས་པར་ཆུད་པ་སྟེ་གོས་ཀྱི་དངོས་པོའོ།། །།བྱེ་བྲག་དབྱེ་བར་ཤེས་པའི་ཕྱིར་གོས་ལ་གདབ་གོས་ལ་མཚན་མ་མངོན་པར་གདབ། སངས་རྒྱས་དང་ནན་ད་འདྲ་ཞིང་བོང་མཉམ་སྟེ་ངོ་མི་ཤེས་པར་གྱུར་ཏེ་སངས་རྒྱས་སུ་
འཛིན་པའི་ཕྱིར་བཅས། དེ་ལ་གདབ་པ་སྦྱིན་སྣག་ཚའི་ཐིག་ལེ་ཞེས་སོ། །གོས་ངོ་མི་ཤེས་ཤིང་ནོར་གྱིས་དོགས་པའི་ཕྱིར་སྣག་ཚའི་ཐིག་ལེ་ཆོས་གོས་ཀྱི་གྲྭར་སྣག་ཚའི་ཐིག་ལེ་གདབ། སྤྱད་པ་ཡང་ངོ་། །ཆོས་གོས་སྐམ་ལ་ལྕི་སྟེ་ཐག་བུ་ལ་མི་འཆགས་ཏེ་ཐག་བུས་མཐའ་ལ་
བརྒྱུས་ཏེ་སྲད་བུ་ལ་གདགས། ཚར་ཚར་གྱི་ཁ་ཆག་བྱ། རས་ཁ་ཚར་བཅད་ལ་ཆག་བྱ་སྟེ་བགོ་ཞིང་སྤྱད་དོ། །སྦྱར་མ་མ་ཡིན་པ་དག་ཞིག་གཅད་པར་མ་ཆད་དོ། །ཆོས་གོས་ཆེན་པོ་མ་གཏོགས་པར་སྣམ་བུ་བདུན་པ་དང་ལྔ་པ་གཉིས་ནི་སྣམ་བུར་མ་དྲས་ཤིང་མ་བཙེམས་པ་ལ་
བསྔོས་ཀྱང་འཆགས་སོ། །དེ་ལྟ་བུའི་རྐྱེན་མེད་ན་མ་བཅད་པར་གྲོང་དང་ཁྱིམ་དུ་འཇུག་པ་དང་འདུག་པ་མ་ཡིན། ཆར་པ་ལ་སོགས་པ་བབ་པའི་རྐྱེན་མ་བྱུང་བར་གྲོང་ཁྱེར་དུ་ཆོས་གོས་ཆེན་པོ་མེད་པར་འདུག་པར་མི་བྱ། དེ་བཞིན་དུ་མུར་འདུག་གི་གནས་སུའོ། །ཆོས་གོས་
ཆེན་པོ་མེད་པར་མུར་འདུག་གི་གནས་སུ་མི་འགྲོ། །ཡོད་ན་འདུག་པར་མ་ཡིན། རྐྱེན་བྱུང་ཡང་ཆོས་གོས་ཆེན་པོ་མེད་པར་མུར་འདུག་དང་བཅས་པའི་གནས་སུ་འགྲོ་བའམ་འདུག་པར་མི་བྱ། སྤུ་ཅན་ཆོས་གོས་གསུམ་དུ་མི་བསྔོ། ལ་བ་དང་བེའུ་རས་ལ་སོགས་པ་སྤུ་ཅན་
ལ་ཆོས་གོས་གསུམ་གྱི་རྒྱུས་མི་བསྔོ། །དེ་བགོས་ཏེ་མཆོད་སྟོན་དུ་མི་སྤྱད། ཟན་ཟ་བ་དང་མཆོད་སྟོན་བྱེད་པའི་ཚེ་ལ་བ་དང་པགས་པ་ལ་སོགས་པ་སྤུ་ཅན་མི་བགོ །སྲབ་མོ་ནི་བདག་གིར་བྱ། སྡེ་རས་སམ་རས་སྲབ་མོ་ནི་ཆོས་གོས་སུ་བསྔོར་མི་རུང་གི་གོས་ལྷག་པར་སྤྱད་ཅིང་
བགོས་ཀྱང་ཉེས་མེད་སྲབ་མོ་ནི་རྒྱུ་འོག་ནས་འབྱུང་། འདི་ནི་རྣམ་པ་བཞི་སྟེ་བལ་གྱི་དང་ཟར་མའི་དང་དུ་གུ་ལའི་དང་ཤིང་བལ་གྱིའོ། །མིང་གིས་སྨོས་པ་འདི་རྣམས་གོས་ལྷག་ཏུ་བསྔོས་ཤིང་སྤྱད་ཀྱང་ཉེས་མེད་དེ་སེང་རས་དང་སྲབ་མོར་བྱས་པ་ལ་བྱ། གཞན་ཡང་སྣམ་བུའི་
เล่ม ๑๖๕ · หน้า 264a
རྣམ་པ་ཡང་བ་སྤུ་ཐུང་བ་ལ་སོགས་པ་དག་གོ། །གཞན་སྣམ་བུ་ལ་སྤུ་ཐུང་ངུར་བྱས་པའི་རྣམས་ནི་ཆོས་གོས་སུ་མི་རུང་གི་གོས་ལྷག་གི་སྔགས་ཀྱིས་བཏབ་པ་ལ་སྤྱད་དོ། །བ་ལ་ཡང་ངོ་། །ལ་བ་ཡང་གོས་ལྷག་གི་སྔགས་ཀྱིས་བཏབ་སྟེ་སྤྱད་ཀྱང་རུང་ངོ་། །
འཚོ་ལས་གཞན་དུ་ན་དེའི་ཕྱིར་ལོག་ཏུ་བགོ་བར་མི་སྤྱད། ཕྲུག་དང་བེའུ་རས་ལ་སོགས་པ་ལུས་ལ་རྩུབ་ཅིང་གཡའ་དང་ཤིག་ཟ་ན་བཟློག་སྟེ་བགོས་ཀྱང་ཉེས་མེད་དེ། དེ་བགོས་ཏེ་མི་བཅག །མདོ་ལྟག་མ་ལྟར་ཤིག་ཟ་བ་ལ་སོགས་པའི་རྐྱེན་བྱུང་ཡང་བཅག་པའི་ཚེ་བཟློག་ཏེ་མི་
བགོ །བསྲིངས་པའི་ལ་བ་དང་མེ་ཏོག་ཅན་གྱི་སྣམ་བུ་དང་དྲེའུ་རྔོག་ཁྲ་ཁྲ་བོ་གང་ཟག་གིས་བདག་གིར་བྱས་ཏེ་མི་སྤྱད། མིང་གིས་སྨོས་པ་འདི་རྣམས་དགེ་སློང་གང་ཟག་གིས་སྤྱད་ཅིང་བཅང་བར་མི་བྱ། འཆགས་སར་དྲེའུ་རྔོག་བཏིང་ན་ཁས་བླངས། ཁྱིམ་པ་བསོད་ནམས་
འདོད་པས་འཆགས་སར་དྲིའུ་རྔོག་བཏིང་ན་དེའི་སྟེང་དུ་བཅག་ཀྱང་ཉེས་མེད། རྟག་ཏུ་རྒྱུན་གཅིག་ཏུ་མི་བཅག །དྲེའུ་རྔོག་དེའི་སྟེང་དུ་འཆགས་པའི་རྒྱུན་གཅིག་ཏུ་མི་བཅག །ནུས་ན་བཅོས། དྲེའུ་རྔོག་དེ་རྡོལ་ལམ་རལ་ན་བཅོས། བཙེམ་པ་གཞུང་བུ་གླན་པ་སྦྱིན། དྲེའུ་རྔོག་
རལ་ན་གཞུང་བུ་གཞུག་ཅིང་གླན། མི་ནུས་ན་བ་ལང་གི་ལྕི་བ་དང་འཇི་བས་སྦྱར་ཏེ་འཆག་པར་བྱུག །དྲེའུ་རྔོག་རྙིངས་ཏེ་འདྲུབ་ཅིང་བཙེམ་དུ་མི་རུང་ན་འཇི་བ་དང་ལྕི་བ་བསྲེས་ཏེ་འཆག་སའི་སྐྱང་ནུལ་དུ་བྱས་ཀྱང་རུང་འཆག་སར་དྲེའུ་རྔོག་བཏིང་ལ་དེའི་སྟེང་དུ་འཇི་བས་
གཡོགས་ལ་བཅགས་ན་ཡོན་བདག་ལ་བསོད་ནམས་སུ་འགྱུར་བའི་ཕྱིར་སྤྱད་དུ་རུང་། དེ་བཞིན་དུ་བཅངས་ཏེ་སྦྱིན་བདག་ལ་བརྟེན་ཏེའོ། །དགེ་སློང་གི་གོས་སུ་མ་བཏགས་པ་དྲེའུ་རྔོག་དང་ཁྲ་བོ་ལ་སོགས་པ་ནི་སྦྱིན་བདག་ཁྱིམ་པ་ལ་བསྔོས་ཏེ་བཅངས་ཀྱང་ཉེས་མེད་དོ། །ཤམ་
ཐབས་ནང་ལོགས་མ་དང་རྔུལ་ཟན་དང་འཐེབ་བཅང་། མིང་གིས་སྨོས་པ་འདི་རྣམས་ཀྱིས་འཐེབ་རེ་རེ་བཅངས་ཀྱང་ཉེས་མེད། ཡོ་བྱད་ཀྱིས་ཀྱང་ངོ་། །སྨན་ཟོང་དུ་ཟས་སམ་གོས་བཅངས་ཀྱང་ཉེས་མེད། འདི་ནི་དཀར་པོའམ་ཁ་ཚར་དང་བཅས་ཀྱང་མ་ཉེས་སོ། །སྨན་ཟོང་གི་རྫས་
เล่ม ๑๖๕ · หน้า 264b
བཅང་བ་ནི་རས་དཀར་པོ་དང་ཁ་ཚར་མ་བཅད་ཀྱང་ཉེས་མེད། རིན་གྱི་ཚད་ནི་སྲང་འགའ་ཙམ་ཅི་རིན་པར་བཅང་། དགེ་འདུན་གྱི་ཡང་མ་ཡིན། དགེ་འདུན་སྤྱིའི་གོས་ལྷག་ན་ཁ་ཚར་མ་བཅད་དམ་ཁ་དོག་མ་བསྒྱུར་བར་བཅངས་ཀྱང་ཉེས་མེད་དོ། །གནང་བའི་གོས་དེར་བསྔོས་
ཏེ་བཅངས། ཡོ་བྱད་བཅུ་གསུམ་འཆང་དུ་གནང་བ་ནི་བདག་འཆང་བའི་སྔགས་ཀྱིས་བསྔོས་ལ་བཅང་། གཞན་བརྟགས་ཏེ་དུ་མའང་བཅང་། ཡོ་བྱད་བཅུ་གསུམ་ལ་མ་གཏོགས་པར་གོས་ལྷག་ཅིང་འཆང་ན་ལྷག་པའི་སྔགས་ཀྱིས་བརྟགས་ཏེ་བཅངས་ཀྱང་ཉེས་མེད།
སེམས་མི་བརྟན་པ་ལ་མི་བརྟག །གོས་ལྷག་མ་བརྟག་པ་ནི་མཁན་པོ་དང་སློབ་དཔོན་ཀླ་ཀློ་ཅན་ཚུལ་ཁྲིམས་ལ་དམ་ཞིང་ཀླ་ཀློ་མེད་ཅིང་བརྟན་པ་ལ་བརྟག །རབ་ཏུ་མ་རྫོགས་པ་ལ་མ་ཡིན། གོས་བརྟག་པའི་སྔགས་བྱ་བ་ནི་ཁྱིམ་པ་དང་དགེ་སློང་ལ་མི་བརྟག་གོ། །མངོན་
སུམ་དུ་མ་ཡིན། མཁན་པོ་དང་སློབ་དཔོན་ལ་གོས་བརྟག་པ་ཡང་མཐོང་ཞིང་ཤེས་པ་དང་ཐོས་པར་མི་བྱའི་ལྐོག་ཏུ་གྲོགས་གཅིག་གི་གམ་དུ་བརྟག །མཐོང་བ་དང་ཐོས་པར་སྔགས་བཏབ་ན་ཉེས་བྱས། ཡུལ་གཞན་དུ་འདུག་པ་ལ་བརྟགས་ན་མི་འཇིག །མཁན་པོའམ་
སློབ་དཔོན་ནམ་གོས་སུ་བརྟགས་པའི་མི་དེ་གུད་ན་འདུག་གམ་ཡུལ་གཞན་དུ་སོང་ནའང་ཞིག་པར་མི་འགྱུར། ཞིག་པ་ནི་འཕོས་ནའོ། །གོས་བརྟགས་པའི་མི་དེ་ཤིའམ་ཁྲིམས་ཕུལ་ན་བརྟགས་པའི་སྔགས་མེད་པར་འགྱུར་རོ། །ཤེས་ནའོ། །ཁྲིམ་ཕུལ་ལམ་ཤི་བར་མ་
ཤེས་ཀྱི་བར་དུ་སྔགས་འཆགས་སོ། །འདིའི་བདག་པོ་ནི་བརྟགས་པའོ། །གོས་སྔགས་ཀྱིས་འདེབས་པའི་ཚེ་ཕ་རོལ་གྱི་ཡིན་པར་བསམས་ཤིང་བརྟགས་མོད་ཀྱི་བདག་སྤྱོད་ཅིང་འཆང་དུ་དབང་ངོ་། །བཏང་བ་བདག་གིར་མི་བྱ། གོས་སྤང་བ་ལྷུག་པ་བྱིན་པ་ལས་ཕ་རོལ་པོས་ཐལ་
བྱུང་མི་བསྐུར། དགེ་སློང་ལ་གཏད། གོས་སྤང་ལ་ལྟུང་བ་བྱུང་བ་དགེ་སློང་ཚུལ་ཤེས་པ་གཅིག་ལ་སྦྱིན། དགེ་འདུན་གྱི་ལ་མ་ཡིན། གོས་སྤངས་པ་ནི་དགེ་འདུན་ལ་མི་སྦྱིན་གྱི་དགེ་སློང་གང་ཟག་གཅིག་ལ་སྦྱིན། བླུན་པོ་ལ་མ་ཡིན། དགེ་སློང་གང་ལ་སྤང་བའང་བླུན་
เล่ม ๑๖๕ · หน้า 265a
ཞིང་ཚུལ་མི་ཤེས་པ་མི་སྦྱིན་གྱི་ཟིན་པོ་ཚུལ་ཤེས་པ་ལ་སྤང་། མི་སྟེར་བསླང་། གོས་སྤངས་པ་ལས་ཕ་རོལ་པོ་དེས་མ་བྱིན་ན་མཐོལ་བ་གསོས་ཀྱི་འོག་ཏུ་བདག་གོས་ཀྱིས་བྲེལ་ཏོ་ཞེས་བསླང་། མཐུ་ཡིས་བླང་། གོས་སྤངས་པ་བདག་གིས་བསླངས་ཀྱང་མ་
སྟེར་ན་གྲོགས་པོ་བཟློག་ལ་དབྲོག་གོ། །གོས་ལ་བསུང་གིས་རེག་ན་བཀྲུས་ཏེ་སྤྱད། བདག་གི་གོས་ལ་སོགས་པ་བསུང་གིས་རེག་ན་མ་བརྟགས་པའི་ཕྱིར་སྤུ་བཀྲུ། ཕྱེ་མ་ན་སྤྲུག །བསུང་གི་ཕྱེ་མས་རེག་ན་སྤྲུག །སྣུམ་གྱིས་ན་དག་པར་རོ། །གོས་ལ་སྣུམ་གྱིས་རེག་ན་བཀྲུ།
ཆར་པ་བབ་ན་བླ་གབ་མེད་པ་ལ་དགེ་འདུན་གྱི་མ་ཡིན། ཆར་པ་བབ་པའི་ཁྲོད་དུ་དགེ་འདུན་གྱི་གོས་གྱོན་ཏེ་མི་འགྲོ། བཀྲུ་བ་དང་འཚེད་པ་དང་ལྷུང་བཟེད་ཀྱི་ལས་དང་ཤིང་གཤགས་པ་ལ་སོགས་པའི་བྱེད་པར་མ་ཡིན། མིང་གིས་སྨོས་པ་འདི་རྣམས་ལས་བྱེད་པའི་ཚེ་དགེ་འདུན་
གྱི་གོས་གྱོན་ཏེ་མི་བྱ། བཞག་པ་ལས་ལྷན་ཅིག་ནའོ་ཞེས་མ་སྨྲས་ན་གཞན་མེད་ཀྱང་སྦྱིན་ཏེ་ཡང་དག་པར་བགྲང་། མི་གསུམ་གྱིས་བདག་ལ་རྫས་ཞིག་གཏམས་ཏེ་ངེད་གསུམ་མ་ཚོགས་ཀྱི་བར་དུ་མ་སྦྱིན་ཅིག་ཅེས་ཟེར་བ་ལས་གཅིག་གམ་གཉིས་ལེན་དུ་འོངས་ནའང་མི་
སྦྱིན་ནོ། །ངེད་གསུམ་མ་ཚོགས་ཀྱི་བར་དུ་མ་སྦྱིན་ཅིག་ཅེས་མི་ཟེར་བར་གཏམས་པ་ནི་གཅིག་གམ་གཉིས་ལེན་དུ་འོངས་ཏེ་སྦྱིན་ཀྱང་ཉེས་མེད། གཞོག་པ་དང་མ་འགྲོགས་པར་མ་ཡིན། ནོར་གཞོག་པའི་ཚེ་ནོར་བདག་དང་འགྲོགས་པ་མ་ཡིན་པ་ཞིག་ལེན་དུ་འོངས་ཏེ་དན་རྟགས་
ཡོད་ཀྱང་མི་སྦྱིན། གཉེན་དང་བདག་གི་ཁྱིམ་མ་ཡིན་པ་སྨྱོན་པ་ལས་མི་བླང་། མི་སྨྱོན་པ་ཞིག་གིས་ཁོ་བདག་གི་ཁྱིམ་དང་ཕ་མའི་ཁྱིམ་ནས་བླངས་ཏེ་བདག་ལ་བྱིན་ན་བླངས་ཀྱང་ཉེས་མེད། བུ་བསྐྲད་པ་ལས་བླངས། ཕ་མས་བུ་བསྐྲད་པ་ལས་བུ་དེས་ཕ་མའི་ཁྱིམ་ནས་ནོར་ཞིག་
བླངས་ཏེ་བྱིན་ནའང་བླངས་ཀྱང་ཉེས་མེད། དུར་ཁྲོད་ནས་སླར་བཟློག་པ་ལས་ཡང་ངོ་། །དུར་ཁྲོད་ཀྱི་རོའི་རྫས་ཞིག་བླངས་ཏེ་བདག་ལ་བྱིན་ན་བླངས་ཀྱང་ཉེས་མེད། དེ་སླར་སློང་ན་སྦྱིན། མདོ་ལྟག་མ་ལྟར་རོའི་རྫས་བྱིན་པ་སླར་འདོད་ཅེས་ཟེར་ནའང་བྱིན་ཅིག །སླར་འཐོམ་ན་འང་
เล่ม ๑๖๕ · หน้า 265b
བླངས། མདོ་ལྟག་མ་ལྟར་སླར་སློང་སྟེ་བྱིན་པ་ལས་ཡང་སླར་འབུལ་ན་མ་ཁྲོ་བར་ལོང་ཞིག །མཆོད་རྟེན་གྱི་དཀོར། མཆོད་རྟེན་ལ་ཕུལ་བའི་དཀོར་རྣམས་ནི་དགེ་འདུན་གྱིས་བགོ་ཞིང་སྤྱད་པར་མི་བྱའོ། །རྩྭ་དང་བུ་རམ་ཤིང་དག་ལས། རྩྭ་བ་དང་འབྲས་བུ་ལ་སོགས་པ་བཅད་
པ་ཞིག་དགེ་འདུན་ལ་ཕུལ་ན་བགོས་ཤིང་སོ་སོར་སྦྱིན་ནོ། །གཞན་ཟས་ཀྱི་ཕྱིར་བསྔོས་པ། བཅའ་བ་ལ་མ་གཏོགས་པ་མར་དང་བག་ཕྱེ་ལ་སོགས་པ་ཕུལ་བ་ནི་མི་བགོ་བར་གཡོས་སུ་བྱས་ཏེ་སྤྱིར་བྲིམ་མོ། །ཉེ་བར་འཚོ་བ་དང་ནད་པ་ལ་བརྟགས་པ་བདག་གིར་བྱ་བའི་ཕྱིར་བགོ། །
མལ་ཆ་དང་ཁྲི་སྟན་ལ་སོགས་པ་དང་སྨན་ལ་སོགས་པ་ཕུལ་བ་ནི་སྤྱིས་སྤྱད་དགོས་པའི་ཕྱིར་མི་བགོ་བར་གཞག་གོ། །དབྱར་གྱི་མཚམས་རྙེད་ན་འཇུག །དབྱར་ཚུལ་དུ་ཞུགས་པས་ནི་ཚུལ་གྱི་ཡོན་སྐལ་གྱི་ནང་དུ་འཇུག་ཅིང་བླང་། མ་ཞུགས་ན་མི་བླང་། དབྱར་ཆད་པ་ལ་ཡང་
མི་རིགས་པ་མ་ཡིན། དབྱར་ཚུལ་དྲལ་བ་ནི་ཞག་བཞི་བཅུ་རྩ་དགུའི་བར་དུ་ཚུལ་བསྲུངས་པ་ནི་ཡོན་སྐལ་དབང་ངོ་། །བཞི་བཅུ་རྩ་ལྔ་བསྲུངས་པ་ནི་ཕྱེད་དབང་ངོ་། །བཞི་བཅུ་རྩ་བཞི་བསྲུངས་པ་ནི་མི་དབང་ངོ་། །བསྐྲད་པ་ནི་མ་ཡིན། དགེ་སློང་ཆད་པས་བཅད་དེ་བསྐྲད་པ་ནི་
ཚུལ་གྱིས་ཡོན་སྐལ་མི་དབང་ངོ་། །རྫས་ཀྱིས་ནོན་པར་དབྱར་གནས་པ་ལ་ཆ་གཅིག་གོ། །གཙུག་ལག་ཁང་མང་པོ་ཞིག་ཀུན་གྱི་མཚམས་སུ་རེ་ལྡེ་ལྟ་བུས་མནན་ཏེ་ཚུལ་དུ་ཞུགས་པ་ནི་གཙུག་ལག་ཁང་ཀུན་གྱི་ཡོན་སྐལ་མི་དབང་གི་གཙུག་ལག་ཁང་རེ་རེ་ནས་ཀྱང་ཆ་རེ་རེ་དབང་སྟེ་
ཅི་ལྟར་དབང་བ་འོག་ནས་འཆད་དེར་བདག་གིས་བགྲངས་ཏེ་མ་ནོན་པའི་སྐལ་བའོ། །གཙུག་ལག་ཁང་གཅིག་ནས་ཆ་རེ་རེ་དབང་བ་ནི་གཙུག་ལག་ཁང་དུ་ཡོད་པའི་གྲངས་ལས་གཙུག་ལག་ཁང་དེ་གཅིག་གི་དགེ་སློང་མི་གཅིག་གི་སྐལ་བ་ཅི་ཐོབ་པ་ལས་ལྷ་ཁང་ལྔ་ཡོད་ན་ནི་མི་གཅིག་
གི་སྐལ་བའི་ལྔ་ཆ་གཅིག་སྦྱིན་ནོ། །དྲུག་ཡོད་ནའང་དྲུག་ཆ་རེ་རེ་སྦྱིན་ནོ། །གཞན་དུ་དུ་མར་ཚུལ་དུ་ཞུགས་ན་རིང་དུ་གནས་པ་དེར་ཆོས་སོ། །ལྟག་མ་ལྟར་གཙུག་ལག་ཁང་དུ་མ་ཞིག་གི་མཚམས་སུ་མནན་ཏེ་ཚུལ་དུ་ཞུགས་པ་ལས་གཙུག་ལག་ཁང་དུ་ཟན་ཟ་བ་གཅིག་ཏུ་ཟན་གྱི་
เล่ม ๑๖๕ · หน้า 266a
ཕྱིར་ཡང་འདུག་རྙེད་པའི་ཡོན་ཆེ་བ་གཅིག་ཏུ་ཡང་ཡོན་འདོད་པའི་ཕྱིར་གནས་པ་ན་གང་དུ་རིང་དུ་གནས་པའི་གཙུག་ལག་ཁང་དེའི་ཡོན་སྐལ་ལ་དབང་ངོ་། །དགེ་སྦྱོང་ཕ་དང་དགེ་སྦྱོང་མའི་རྙེད་པ་ནི་སུམ་ཆ་མ་གཏོགས་པ་ལས་སོ། །གཙུག་ལག་ཁང་དུ་
རྟག་པར་ནར་མར་ཡོན་འབུལ་བ་ཞིག་ལས་འགོད་པ་ནི་དགེ་སློང་ཕ་དང་དགེ་སློང་མས་གསུམ་ཐོབ་ན་དགེ་སྦྱོང་ཕ་དང་དགེ་སྦྱོང་མ་གཉིས་སྦྱིན་ནོ། །ཡོན་བདག་གིས་འཕྲལ་དུ་ཕུལ་བ་ནི་དགེ་སློང་དང་མཉམ་པར་སྦྱིན་ནོ། །ཟས་ནི་མཉམ་མོ། །དགེ་འདུན་སྦྱིན་སྤྱིར་ཟས་ལྟ་བུ་
ཞིག་ཡོན་དུ་ཕུལ་བ་ལས་འགོད་པ་ནི་དགེ་སློང་དང་དགེ་སྦྱོང་མཉམ་པར་བགོ །བསྙེན་པར་རྫོགས་པར་འདོད་པ་དང་དགེ་སློང་མ་ཡང་ངོ་། །དགེ་སྦྱོང་ལོ་ཉི་ཤུ་ཚང་བ་དང་དགེ་སློང་ལོ་གཉིས་སྤྱད་ཟིན་ཏེ། བསྙེན་པར་རྫོགས་པ་རུང་བ་ཞིག་ན་ཡོན་ལ་སོགས་པ་བགོའོ། །ཅོག་མཉམ་
པར་བྱ། དགེ་སློང་དང་དགེ་སློང་མར་ན་ཆ་བླང་བ་ནི་དགེ་འདུན་གྱིས་མ་ཡིན་ཏེ་གང་ཟག་ཏུའོ། །དགེ་སློང་མའི་དགེ་འདུན་སྤྱིར་ཡོན་ཞིག་ཕུལ་བ་ལས་འགོད་པ་ནི་དགེ་འདུན་སྡེ་མཉམ་པར་མི་བགོའི་གྲངས་སུ་བགོ། །མ་བསྔོས་པར་མཆོད་སྟོན་གྱི་རྗེས་སུ་རྙེད་པ་ལ་དགེ་སློང་མས་
ཀྱང་ཟོས་ན་མ་གཏོགས་པ་མ་ཡིན་ནོ། །དགེ་འདུན་སྤྱན་དྲངས་ཏེ་དགེ་སློང་བཤོས་གསོལ་ཟིན་པའི་རྗེས་ལ་དགེ་སློང་མས་སླེབས་ན་དགེ་སློང་ཕྱིས་ཤོས་མི་དབང་བ་མ་ཡིན་ཏེ་དགེ་སློང་དང་མཉམ་པར་དབང་ངོ་། །སྟན་དང་ཆུ་དང་བསོད་སྙོམས་ལ་དགེ་སློང་དགེ་སློང་མ་བས་ཐུ་བོ་མ་
ཡིན་པ་མ་ཡིན་ནོ། །དགེ་སློང་གསར་དུ་ཁྲིམས་རྫོགས་ན་དགེ་སློང་མ་རྫོགས་ནས་ལོ་ཉི་ཤུ་ལོན་ཀྱང་སྟན་དང་ལག་ཆུ་འདྲིམ་པ་དགེ་སློང་ལས་སྔར་བྲིམ་མོ། །དགེ་སློང་མ་འཁོད་ན་རྒན་རིམས་ནས་སྟན་དོར། །དགེ་སློང་མ་འབའ་ཞིག་སྤྱན་དྲངས་ཏེ་བཤོས་གསོལ་བའི་ཚེ་ཕྱིས་
དགེ་སློང་ཕ་འོང་གིས་དོགས་པའི་ཕྱིར་དགེ་སློང་ཕའི་སྟན་གོང་དུ་གཉིས་གསུམ་ཙམ་གཞག་དགེ་སློང་ཕ་དེ་དག་གིས་སྦྱིན་པ་ལས་འཆགས་པ་བྱེད་མི་ནུས་ན་དགེ་སློང་མ་དག་གིས་སོ། །གཙུག་ལག་ཁང་དུ་ཡོན་བདག་གིས་དགེ་སློང་ཕ་དང་དགེ་སློང་མ་བཤོས་གསོལ་བའི་འོག་ཏུ་
เล่ม ๑๖๕ · หน้า 266b
ཚིགས་བཅད་དགེ་སློང་ཕས་ཀློག་མི་ནུས་ན་དགེ་སློང་མ་མཁས་པས་ཀྱང་རུང་། ཟས་འདྲིམ་པ་མངོན་པར་འདུག་ན་ཟས་སྙོམས་པར་བྲིམས་ཤིག་ཅེས་དགེ་འདུན་གྱི་གནས་བརྟན་གྱིས་ཐོག་མར་བསྒོ། །དགེ་འདུན་བཤོས་གསོལ་བའི་ཚེ་ཕྱག་ཚང་དང་ཐོང་ངན་གྱིས་འབྱོར་
ཚོགས་ཞེས་སྨྲས་ན་གནས་བརྟན་གྱིས་སྙོམས་པར་བྲིམས་ཤིག་ཅེས་བསྒོ། །འཁོར་དུ་བལྟས་ཏེ་མང་ལ་ཟས་ཉུང་ན་ཅི་འབྱོར་དུའོ་ཞེས་ཐོག་མར་རོ། །གཙུག་ལག་ཁང་ངམ་ཡོན་བདག་གི་གནས་སུ་དགེ་འདུན་བཤོས་གསོལ་བའི་ཚེ་གནས་བརྟན་གྱིས་དགེ་སློང་གྲངས་
ལས་ལྷག་པར་འོངས་ན་ཡོན་བདག་ལ་སྦྲན་ནས་དགེ་སློང་བཤོས་བཤུགས་ཏེ་ཐམས་ཅད་ཐོབ་པར་བྱ་བའི་ཕྱིར་བྲིམས་ཤིག་ཅེས་བསྒོ། །གཞན་དུ་ན་ཅི་ནུས་པས་སོ། །དགེ་སློང་གྲངས་བཅད་དེ་བཤོས་སྦྱར་བ་ལས་དེའི་ནང་ནས་ཁ་ཅིག་གུད་དུ་སྤྱན་དྲངས་ཏེ་དོང་ནས་ཟས་
ལྷག་པར་གྱུར་ན་དགེ་འདུན་ཁོང་རྟག་ཏུ་བཅིང་བ་དེར་བྲིམས་ཞེས་གནས་བརྟན་གྱིས་བསྒོ། །སམ་པྲ་ཏ་ཞེས་རྒན་རིམས་ལ་མ་བརྗོད་པའི་སྔོན་རོལ་དུ་མི་བླང་། བཤོས་འདྲིམ་པའི་ཚེ་ཐོང་ངན་གྱི་འབྱོར་ཚོགས་ཞེས་མ་སྨྲས་པར་བཤོས་བླངས་ན་གནས་བརྟན་ལ་འབྱོར་ཉེས་
བྱས་པའི་ཕྱིར་གནས་བརྟན་གྱིས་ཐོད་ངན་ལས་འབྱོར་ཚོགས་ཞེས་སྨྲོས་ཤིག་ཅེས་བསྒོ། །ཟས་སྟ་གོན་བྱས་ཏེ་སྤྱན་དྲངས་པ་ལས་གཞན་འོངས་ཏེ་དེ་ལ་སྦྲན། ཡོན་བདག་གཅིག་གིས་གྲངས་བཅད་དེ་སྤྱན་དྲངས་པ་ལས་ཡན་མན་ནས་དགེ་སློང་ལྷག་མ་ཞིག་འོངས་ན། ཡོན་
བདག་ལ་དགེ་སློང་འདི་སྙེད་ཅིག་འོངས་སོ་ཞེས་གནས་བརྟན་གྱིས་བསྒོ། ཆོས་གོས་གསུམ་བྱིན་ཅིག་ཅེས་དགེ་སློང་ལ་མི་བསྐྱུར། དགེ་སློང་ན་བ་ལ་དགེ་སློང་གྲོགས་ཀྱིས་ཆོས་གོས་གསུམ་བསྔོས་པ་ཁྱོད་སང་ངམ་ནམ་ཤི་ཏོལ་མེད་ན་ཆོས་གོས་དགེ་འདུན་ལ་དབུལ་བའི་
རིགས་སོ་ཞེས་མི་བསྒོ། བདག་མ་ཤི་ན་ཞག་རེ་ཉེས་བྱས་རེ་རེར་འགྱུར་བའི་ཕྱིར་རོ། །དགེ་འདུན་གྱིས་བླངས་ན་འདི་སོས་ན་སླར་སྦྱིན་ནོ་ཞེས་ཡིད་དེ་དག་ལས་གཞན་དུ་མ་ཡིན། མདོ་ལྟག་མ་ལྟར་དགེ་སློང་ནད་པས་ཆོས་གོས་བསྔོས་པ་དགེ་འདུན་ལ་ཡོན་དུ་ཕུལ་བ་དགེ་འདུན་གྱིས་
เล่ม ๑๖๕ · หน้า 267a
ཀྱང་ཁོ་སོས་ན་གོས་འདི་སླར་སྦྱིན་ནོ་སྙམ་དུ་བསམས་ཏེ་བླངས་ན་གོས་སླར་སྦྱིན། ཤི་ནས་བླ་འོག་ཏུ་བཅའ་བར་རོ། །དགེ་སློང་ཤི་ན་འོག་ཏུ་གདིང་བའི་རས་ཡུག་གཅིག་དང་སྟེང་དུ་གཡོགས་པའི་རས་ཡུག་གཅིག་གིས་གཡོགས་ལ་དོར། འབྲིང་པོ་ལྟག་མ་
ལྟར་རོ་ལ་གཡོགས་པའི་གོས་ནི་བཟང་པོ་ཡང་མ་ཡིན་ཏེ་འབྲིང་པོ་གཡོག །ལྟག་མ་ནི་མ་ཡིན་ནོ། །དགེ་སློང་ཕྱུག་པོ་ཤི་ན་དགེ་སློང་གྲོགས་ཀྱིས་གོས་བཟང་པོ་མང་པོ་ཞིག་གིས་གཡོགས་ཏེ་དོར་ཞེས་ཟེར་ནའང་ཅི་རན་པར་དཀྲིས་ཏེ་དོར་རོ། །དྲི་བ་དང་བཅས་པ་ཕྲན་ཚེགས་
ལ་སོགས་པར་ཆུད་པ་སྟེ་གོས་ཀྱི་དངོས་པོའོ། །དྲིས་པ་དང་ཕྲན་ཚེགས་ལ་སོགས་པའི་ནང་ནས་འབྱུང་བ་སྟེ་གོས་ཀྱི་དངོས་པོ་རྫོགས་སོ།། །།གོས་ཀྱི་དངོས་པོའོ། །འདི་མན་ཆད་པགས་པའི་དངོས་པོ་ལ་འཆད་དེ། ཡུལ་དབུས་མའི་མཚམས་ནི། ཡུལ་གྱི་དབུས་ནི་སངས་རྒྱས་སྔ་
རབས་ཀྱང་གནས་དེ་ནས་འདས་ཕྱིས་འདའ་བར་འགྱུར་བའང་མ་ཧཱ་བོ་དེ་ནས་འདས་པས་ན་རྡོ་རྗེའི་གདན་བཞུགས་ཏེ་ཡུལ་གྱི་དབུས་བྱ་སྟེ། གང་ཚུན་ཆད་དབུས་སུ་བརྩི་བ་འོག་ནས་འཆད། ཤར་ཕྱོགས་ཀྱི་མཚམས་ནས་པུན་ཏྲ་བརྟ་ནའི་མདུན་གྱི་ཚལ་བུ་འདའ་ཀ་ཞེས་བྱའོ། །པུན་
ཏྲ་བརྟན་ཞེས་བྱ་བའི་མཚམས་ཚུན་ཆད་དབུས་སུ་བརྩི། པུན་ཏྲ་བརྟ་ན་ཞེས་བྱ་བ་ཉིད་ནི་མཐའ་འཁོབ་ཏུ་བརྩི། དེའི་མདུན་ན་ཚལ་བུ་འདའ་ཀ་ཞེས་བྱ་བ་ཚུན་ཆད་ཡུལ་གྱི་དབུས་སུ་བརྩི་སྟེ། ལྷོ་ཕྱོགས་ཀྱི་ནི་ཤ་ར་བ་ཏི་ཞེས་བྱ་བའི་ཆུ་བོ་དེའོ། །ལྷོ་ཕྱོགས་ཀྱི་མཚམས་ནི་ཤ་ར་བ་ཏི་གཙང་
པོ་ཆེན་པོ་ཚུན་ཆད་ཡུལ་གྱི་དབུས་སུ་བརྩི། ནུབ་ཕྱོགས་ཀྱི་ནི་བྲམ་ཟེའི་གྲོང་ཏུ་ན་དང་ཨུ་པ་ཏུ་ནའོ། །ནུབ་ཕྱོགས་ཀྱི་བྲམ་ཟེ་སྤུན་གཉིས་ཏུ་ན་དང་ཨུ་པ་ཏུ་ན་དང་གཉིས་ཀྱི་གྲོང་ཁྱེར་ཚུན་ཆད་ཡུལ་གྱི་དབུས་སུ་བརྩི། བྱང་ཕྱོགས་ཀྱི་ནི་ཨུ་ཤི་རའི་རིའོ། །བྱང་ཕྱོགས་ཀྱི་ནི་ཨུ་ཤི་ར་
ཞེས་བྱ་བའི་ཡུལ་དེ་ན་རྩ་མན་མ་ཞིམ་པོ་ཞིག་སྐྱེ་བའི་ཡུལ་དེ་ཚུན་ཆད་དབུས་སུ་བརྩི། མཐའ་འཁོབ་ཏུ་ལྷམ་བོལ་མེད་བཅང་། ལྷག་མའི་ཕྱོགས་བཞིའི་མཚམས་ཕན་ཆད་ནི་ལྷམ་བོལ་མེད་གྱོན་དུ་དབང་། མལ་སྟན་སྦ་བའི་ཕྱིར་ཡང་ངོ་། །ཡུལ་གྱི་དབུས་ན་མལ་སྟན་ལ་རྡུལ་
เล่ม ๑๖๕ · หน้า 267b
མི་གོས་པར་བྱ་བའི་ཕྱིར་ལྷམ་བོལ་མེད་བཅངས་ཀྱང་ཉེས་མེད། ཚིག་རིམ་མོ། །ལྟག་མ་ལྟར་དབུས་སུ་ལྷམ་གྱོན་དུ་དབང་བ་ནི་ཆིག་རིམ་དུ་བྱ། ལྷན་པ་སྦྱིན་པས་བཅོས་ལྷམ་རྡོལ་ན་ལྷན་པ་གླན། རིམ་པ་གཞན་དུ་མི་བྱ། རྟིང་པའམ་བྲང་བ་གང་དུ་རྡོལ་བར་གླན་གྱི་ཆེར་ནི་མི་གླན་
ནོ། །ཁྱིམ་པས་གོམ་པ་བདུན་ཙམ་དུ་སྤྱོད་སྤྱོད་ན་རིམ་མང་པོ་ཡང་ངོ་། །ལྷམ་མཐིལ་རིམ་པ་བདུན་ཙམ་དུ་སྟུག་པོའང་ཁྱིམ་པས་གོམ་པ་དྲུག་བདུན་ཙམ་བགོས་པས་རྙིངས་པར་ཆུད་དེ་གྱོན་དུ་དབང་། བརྟགས་པ་ཙམ་གྱི་ཕྱིར་དེའི་དབང་གིས་སྦྱར་བར་བླངས་ནི་མ་བརྟགས་
པར་བླངས་པ་མ་ཡིན་ནོ། །བདག་ལ་ལྷམ་སར་པ་ཀོ་བ་རིམ་པ་མང་པོ་ཅན་ཡོད་ན་རིམ་པ་གཅིག་གཏོགས་པས་བརྟགས་པར་ཆུད་ཡང་གཅིག་ཏུ་ན་ཁྱིམ་པ་ལ་གོམ་པ་དྲུག་བདུན་ཙམ་གྱོན་དུ་འང་བརྟགས་པར་ཆུད་དེ་གྱོན་དུ་དབང་། རི་མོ་དང་ཉེ་བའི་རི་མོ་མ་ཡིན་པ། ལྷམ་
མདའ་ཚོན་གྱིས་བྲིས་པའི་རི་མོ་ཅན་གྱོན་དུ་མི་དབང་། ལུག་རུ་ལྟ་བུར་མ་ཡིན། ལྷམ་གྱི་བོལ་ལ་སྟེ་འཛོམ་གྱི་གོང་རས་འདྲ་བས་བརྒྱན་པའི་ལྷམ་མི་དབང་། ཤུ་བ་ཏ་དང་ཀ་རི་བྱའི་ལོ་མ་ལྟ་བུ་མ་ཡིན། ལྷམ་གྱི་བོལ་ལ་ཤིང་བོ་དེའི་ལོ་མ་དང་འདྲ་བ་དང་གོང་ནན་ཏན་གྱི་རི་
མོ་འདྲ་བ་རྟ་བག་ཏུ་འདུག་པས་བརྒྱན་པའི་ལྷམ་མི་བགོ །གསེར་དངུལ་གྱིས་སྤྲས་པ་མ་ཡིན། གསེར་དངུལ་དང་རིན་པོ་ཆེས་བརྒྱན་པའི་ལྷམ་མི་བགོ །ཙི་གི་ཙི་ཀི་མ་ཡིན། འདི་སྐད་ཅེས་ཟེར་བའི་ལྷམ་མི་བགོ །ཀི་ནི་ཀི་ནིར་མ་ཡིན། འདི་སྐད་སྒྲ་འབྱུང་བའི་ལྷམ་མི་
བགོ །ཁི་ནི་ཁི་ནིར་མ་ཡིན། འདི་སྐད་དུ་ཟེར་བའི་ལྷམ་མི་བགོ །ཛི་ནི་ཛི་ནིར་མ་ཡིན། དེ་སྐད་ཟེར་བ་ལ་སོགས་པའི་ལྷམ་གྱོན་ན་ཉེས་བྱས། གཞན་ཡན་ཏྲོག་ཏྲོག་པོར་སྐྱེ་བ་མ་ཡིན། ལྷམ་སྒྲོག་པོར་འགྱུར་བའི་ལྷམ་མི་བགོ །ཞིང་དུ་བྲེས་པ་མ་བརྟགས་པ་མ་ཡིན། ལྷམ་
གྱི་བོལ་འབྲིང་བུས་ཆུ་ཞེང་དུ་བྲེས་པ་བགོ་དབང་དེ་མདུན་དང་རྟིང་བར་རིམ་པ་ཅན་བཅང་། ལྷམ་སོར་མོའི་སྟེང་གཡོགས་པ་དང་རྟིང་པ་ཀོ་བ་འཁྱུད་པ་ནི་བྱ་རྒོད་ཀྱི་ཕུང་པོ་ལ་འཛེག་པའི་ཚེ་གྱེན་བུ་ལ་འགྲོ་བའི་ཚེ་མི་འབྱིན་པ་དང་ཐུར་བུ་ལ་མི་སྣད་པའི་ཕྱིར་བཅངས་ཀྱང་ཉེས་མེད།
เล่ม ๑๖๕ · หน้า 268a
ལ་ལའི་ཆུ་ལས་སྐྱེས་པའི་ཡང་ངོ་། །སྦྲུལ་ཡན་མན་དུ་སོང་བའི་མཆིལ་མ་དང་ཁ་ཆུས་སམ་རྩྭ་ལ་རེག་པ་ལ་རྐང་པ་ལ་རེག་ན་གདུག་པར་འགྱུར་བའི་ཕྱིར་བོལ་ཅན་གྱི་ལྷམ་བཅངས་ཀྱང་ཉེས་མེད་དོ། །ལྷམ་ཡུ་རྡུམ་ཡང་ངོ་། །ལྷམ་ཡུ་རྡུམ་གྱོན་དུ་དབང་
ངོ་། །ཆབ་བྲོམ་དུ་འགྱུར་བའི་ཡུལ་དུ་ཞྭ་དང་ཡུ་རིངས་ཀྱང་ངོ་། །ཡུལ་ལྷག་པ་ཆེ་སྟེ་ཆབ་བྲོམ་ཡོད་པའི་ཡུལ་དུ་ཞྭ་དང་ལྷམ་ཡུ་རིངས་བགོར་གནང་ངོ་། །དགེ་སློང་མ་ཡུལ་གྱི་དབུས་སུ་ན་ན་ཞྭ་དང་ལྷམ་དབང་ངོ་། །མཐའ་འཁོབ་ཆབ་བྲོམ་ཡོད་པའི་ཡུལ་དུ་ནི་ཞྭ་དང་ལྷམ་གྱོན་དུ་དབང་།
མཆོད་པའི་དྲུང་དུ་ལྷམ་བགོས་ཏེ་མི་སྤྱད། དཀོན་མཆོག་གསུམ་དང་མཁན་པོ་དང་སློབ་དཔོན་ལྔ་ལ་ཕྱག་འཚལ་ཞིང་མཆོད་པའི་ཚེ་གན་དུ་ལྷམ་གྱོན་ཏེ་མི་འགྲོ །སེང་གེ་དང་སྟག་དང་གཟིག་དང་བ་གླང་ཅང་ཤེས་ཀྱི་ཡན་ལག་ལས་ཅུང་ཟད་ཀྱང་ལུས་ལ་མི་ཐོགས། མིང་
གིས་སྨོས་པ་འདི་རྣམས་ཀྱི་པགས་པ་དང་སོ་དང་རུས་པ་དང་སྡེར་མོ་ལ་སོགས་པ་ལུས་ལ་བགོ་བའམ་ལྷམ་ལ་བརྒྱན་པར་མི་བྱ། བ་གླང་ཕལ་དང་རྟ་མ་རུང་བ་དང་དེ་ལས་གཞན་རི་དགས་ཁྲ་བོ་དག་ཀྱང་ཆུད་དོ། །མིང་གིས་སྨོས་པ་འདི་རྣམས་ཀྱང་མདོ་སྟེང་མ་དང་འདྲ་བར་བགོ་བ་དང་སྤྱད་
ཅིང་གདགས་པར་མི་བྱ། ལྷམ་མི་སྤྲུག །ལྷམ་རྡུལ་ཅན་ལ་ལ་བརྡབས་པའམ་ནང་མི་དྲུད་མི་བརྡབ། རས་མ་ལ་ཆུས་བརླན་ཏེ་འདི་ལ་རྡུལ་དབྱུང་བའི་ཕྱིར་བཅངས་ལྟག་མ་ལྟར་རྡུལ་ཅན་མི་བརྡེབ་པར་རས་མ་ལ་ཆུས་བརླན་ཏེ་ལྷམ་ཕྱི་ཞིང་འདར་བའི་ཕྱིར་རས་མ་དེས་ཕྱིས་ཀྱང་
དགོས་པའི་ཕྱིར་སྦས་ཏེ་གཞག །དེ་བཙེམ། ལྷམ་རལ་ན་བཙེམ་སྟེ་ཐབས་འོག་ནས་འཆད། མི་མཛེས་པའི་དངོས་པོ་བྱེད་ན་ཕྱོགས་དབེན་པར་རོ། །ལྷམ་བཙེམ་པ་མི་མང་པོས་མི་མཐོང་བའི་ཕྱིར་ལྐོག་དབེན་པར་རོ། །དེའི་ཕྱིར་བསྙུང་བུ་དང་གླ་རྒྱུན་བཅངས་ཡན་མན་ཡུལ་
རྒྱུ་བའམ་གནས་ན་འདུག་པའང་རུང་ལྷམ་རལ་ན་བཙེམ་པའི་ཕྱིར་གླ་རྒྱུན་དང་བསྙུང་བུ་བཅང་བཟོ་གྲི་མ་ཡིན། བཟོ་གྲི་ལྟག་དགྱེ་དགེ་སློང་གིས་མི་བཅང་། ཤིང་ལྷམ་མི་གོན། དགེ་སློང་ཤིང་ལྷམ་གྱོན་དུ་མི་གནང་སྟེ་གནང་བའི་སྐབས་འོག་ནས་འཆད། གྲོང་མི་གཙང་བའི་
เล่ม ๑๖๕ · หน้า 268b
གནས་ལས་གཞན་དུའོ། །གྲོང་བར་དུ་འདམ་ཡོད་པར་གྲོང་དུ་ཞག་ལོན་པ་ལ་ཁྱིམ་པས་མལ་སྟན་བསྲུང་བའི་ཕྱིར་ལྷམ་གྱོན་ཅིག་ཅེས་བགོ་བ་དང་། བཤང་ས་ཆེ་ཆུང་དུ་འགྲོ་བའི་ཚེ་གྱོན་དུ་དབང་། སྨྱིག་མའི་ལོ་མ་དང་མུན་ཛ་དང་སི་རི་དང་འདར་བ་ལས་མ་ཡིན། མིང་གིས་སྨོས་པ་འདི་
རྣམས་ཀྱི་རྒྱུ་ལས་ལྷམ་བྱས་ཏེ་མི་བགོ །སྐུད་པའི་ཡང་ངོ་། །རྩྭ་ལས་སྐུད་པར་བཀལ་བའི་ལྟམ་མི་བགོ །ཏྲག་ཡོད་ན་མ་ཡིན་ནོ། །ཏྲག་ཅན་གྱིས་གོང་མ་མིང་གིས་སྨོས་པ་རྣམས་ཀྱིས་རྩྭ་ལས་ལྷམ་བྱས་ཏེ་གྱོན་དུ་གནང་བ་ནི་ཏྲག་ཅན་གྱི་ཆོ་ག་བྱ་བའི་ཕྱིར་དྲོ་བར་རྐང་པ་དང་བཅས་ཏེ་གཞུག་པའི་ཕྱིར་
གནང་ངོ་། །གྲོང་དུ་གཞན་མེད་ན་པགས་པ་ལ་འདུག །གྲོང་དུ་སྤྱན་དྲངས་ཏེ་པགས་པ་སྟན་དུ་བཏིང་ན་སྟན་གཞན་མེད་དམ་ཞེས་སྨྲོས་ཏེ་སྟན་གཞན་མེད་ཅེས་ཟེར་ན་པགས་སྟན་ལ་འདུག་ཀྱང་ཉེས་མེད་དོ། །དེར་ཡང་དེ་ལ་འདི་ལྟ་བུའི་རྐྱེན་ཡང་མི་འདུག་གཙུག་ལག་ཁང་ན་ནི་རྐྱེན་ཡོད་ཀྱང་པགས་སྟན་
ལ་འདུག་པའམ་ཉལ་དུ་དབང་། མིག་གི་ཕྱིར་དོམ་ལྤགས་བཅང་། མིག་ལ་ཕན་པའི་ཕྱིར་དོམ་ལྤགས་བཅངས་ཀྱང་ཉེས་མེད། རྐང་པའི་གནས་སུ་གདིང་། ལྟག་མ་ལྟར་བཅང་བ་ནི་སྟན་དང་རྐང་པ་ཕྱི་བར་བྱ། སངས་རྒྱས་ཀྱི་ནི་དྲི་གཙང་ཁང་གི་སྒོར་རོ། །སངས་རྒྱས་ལ་དོམ་
ལྤགས་ཡོན་དུ་ཕུལ་ན་དྲི་གཙང་ཁང་གི་སྒོར་བཞག་སྟེ་ཡན་མན་དུ་དོང་བའི་མིག་ལ་ཕན་པའི་རྐང་པ་ཕྱིས་ཏེ་འགྲོ །ལྷམ་བོལ་མེད་བགོ །དོམ་ལྤགས་ཀྱི་ལྷམ་མིག་ལ་ཕན་པའི་ཕྱིར་བགོས་ཀྱང་ཉེས་མེད། རླུང་གིས་ནི་འདུག་ཅིང་ཉལ། རླུང་ནད་ཅན་དོམ་ལྤགས་ཀྱི་སྟེང་ཉལ་ལམ་
འདུག་ཀྱང་ཕན་པའི་ཕྱིར་དབང་ངོ་། །མཁྱེན་པས་བརྟགས་པ་ཐམས་ཅད་ལ་འདི་མཁོ། དོམ་ལྤགས་ཀྱི་སྟེང་ན་འདུག་ན་མཁྱེན་པས་བརྟགས་པ་བད་ཀན་བྱུང་བར་ཕན་པའི་ཕྱིར་བཅང་། སྤུས་རེག་ན་ཕན་པར་ཤེས་པར་བྱ། ལྟག་མ་ལྟར་དོམ་ལྤགས་བཅངས་པ་ནི་ཤ་ལ་རེག་པ་
ནི་མ་ཡིན་གྱི་སྤུ་ལ་རེག་པ་ནི་ཕན། ལྷམ་བོལ་མེད་རིམ་པ་མང་པོ་ན་ཡང་ངོ་། །ལྷམ་བོལ་མེད་ཀོ་བ་རིམ་པ་མང་དུ་བྱས་ཀྱང་རྐང་པ་འབྱར་བའི་རིམ་གཅིག །དོམ་ལྤགས་སྤུ་ཡང་བསྟན་ཏེ་བྱས་ན་རིམ་པ་མང་ཡང་ཉེས་མེད། མདོ་འོག་མའི་ཏི་ཀའོ། །དུ་མའི་སྟེང་དུ་གཅིག་བཞག་
เล่ม ๑๖๕ · หน้า 269a
ན་ཡང་ངོ་། །དོམ་ལྤགས་འབའ་ཞིག་ལས་ལྷམ་རིམ་པ་མང་པོ་ཞིག་བྱས་ཏེ་གྱོན་ཀྱང་ཉེས་མེད་དོ། །མདོ་སྟེང་མའི་ཏི་ཀའོ། །ཨ་སྨ་བ་རནྡ་ཀ་ལས་གཞན་དུ་མི་བཅང་། ཡུལ་ཨ་སྨ་བ་རནྡ་ཀ་ཞེས་བྱ་བ་ནི་སྟག་གཟིག་ལ་སོགས་པ་མ་གཏོགས་པར་གཞན་ཐམས་
ཅད་པགས་པ་བཅང་དུ་དབང་ངོ་། །སེང་གེ་ལ་སོགས་པའི་ཡང་མ་ཡིན། ཡུལ་ཨ་སྨ་པ་རནྡ་ཀ་ན་སེང་གེ་དང་སྟག་དང་གཟིག་གི་པགས་པ་གྱོན་དུ་མི་དབང་། རྒྱུས་པ་དང་རུས་པ་དང་སོ་དང་ཤ་དང་ཚིལ་དག་ཀྱང་གང་གི་པགས་པ་མ་བརྟགས་པ་དེའི་འོ། །ལྟག་མ་ལྟར་པགས་པ་
བཅད་དུ་མི་གནང་བ་རྣམས་ཀྱི་མིང་གིས་སྨོས་པ་འདི་རྣམས་མི་བཅང་། རྐྱལ་པ་བཅང་། རྐྱལ་པ་བཅངས་ཀྱང་ཉེས་མེད། ངུར་སྨྲིག་གམ་སྔོན་པོར་ཡང་ངོ་། །རྐྱལ་པའི་ཁ་དོག་འདི་འདྲ་བར་བྱ། རི་མོ་དང་རི་མོར་ཉེ་བ་མ་ཡིན། རྐྱལ་པ་རི་མོ་ཅན་མི་བཅང་། རྐྱལ་མི་ཤེས་པ་ཐམས་
ཅད་མ་སྦྱངས་པར་ཆུ་ཟབ་མོར་མི་འཇུག །བདག་རྐྱལ་མི་ཤེས་པར་གྲུའམ་གཟིངས་སམ་ཤིང་ལེབ་ལྟ་བུའི་ཐབས་མ་སྦྱར་བར་ཆུ་ཆེན་པོར་མི་འཇུག །དབེན་པའི་ཕྱོགས་སུ་རྐྱལ་བསླབ། དགེ་སློང་དབེན་པར་རྐྱལ་སློབས་ཤིག །གཏིང་ཟབ་ལ་གླང་པོ་མ་གཏོགས་ཏེ་བ་ལས་མི་
འཇུག་ཆུ་ཆེན་པོ་ལ་བའམ་གླང་བུ་མ་གཏོགས་པར་གླང་པོ་ཆེན་པོའི་མཇུག་མ་ལ་འཇུས་ཏེ་འགྲོ་བའི་མཇུག་མ་ལ་འཇུས་ན་ཉེས་བྱས། གླང་བུ་ལ་འཇུས་ན་སྟོབས་ཆུང་བའི་ཕྱིར། འཇུ་བ་ནི་བ་གླང་དང་རྟ་དང་མ་ཧེ་དང་གཡག་ལས་སོ། །མིང་གིས་སྨོས་པ་འདི་རྣམས་མ་ཡིན་པའི་
མཇུག་མ་ལ་མི་འཇུ། པགས་པའི་དངོས་པོའོ།། །།འདི་མན་ཆད་སྨན་དཔྱད་ལ་འཆད་དེ། སྨན་སྤྱད། དགེ་སློང་ནད་པས་སྨན་བཟའ་བར་སྤྱད་པ་དང་དགེ་བའི་བར་ཆད་དུ་མི་འགྱུར་བའི་ཕྱིར་སྤྱད་དོ། །འདི་ལ་རྣམ་པ་བཞི་སྟེ། ཟས་ཀྱི་སྨན་རྣམ་པ་བཞི་ལ་སྐད་ཅིག་པ་དང་ཕྱི་
དྲོ་བ་དང་ཞག་བདུན་པ་དང་ཚེ་གཅིག་པའོ། །སྐད་ཅིག་པ་ནི་སྐྱ་རེངས་བྱུང་ནས་དྲོའི་བར་དུའོ། །ཐུན་གྱི་སྐྱ་རེངས་བྱུང་ནས་ཉི་མ་ནུབ་ཀྱི་བར་དུའོ། །ཞག་བདུན་པ་དང་ཚེ་གཅིག་པ་ནི་དངོས་སུ་ཟད་དོ། །ནད་པ་ལ་དང་པོ་མ་ཡིན་པའོ། །སྐད་ཅིག་པའི་ཟས་ནི་ན་བ་དང་མི་ན་བ་དང་
เล่ม ๑๖๕ · หน้า 269b
མི་ན་བ་འདྲ་སྟེ་བཟར་རུང་སྟེ་ནད་པས་ཟས་ཞག་ཏུ་བཞག་ནི་མི་དབང་། གཞན་གསུམ་ནི་ནད་པས་བཅངས་ཀྱང་ཉེས་མེད། ཚོ་ཙ་དང་མོ་ཙ་ཏ་ཀོ་ལ་དང་ཀ་ཤུད་ཏའི་དང་ཨུ་དུམ་བཱ་ར་དང་པ་རུ་ཤ་ཀ་དང་རྒུན་འབྲུམ་དང་ཁ་ཟུ་རའི་ཆུ་ནི་ཐམས་ཅད་ལའོ། །མིང་གིས་སྨོས་པ་འདི་རྣམས་
ཀྱི་འབྲས་བུའི་ཁུ་བ་བཙགས་ཏེ་ན་བའང་རུང་མི་ནའང་རུང་བཙགས་ཏེ་འཐུང་ངུ་དབང་ངོ་། །སྔ་དྲོའང་འཐུང་ངུ་དབང་ངོ་། །དེ་བཞིན་དུ་འབྲས་བུའི་ཚ་དང་། ཚྭ་དང་ཞོ་ཁུ་དང་ཚུར་ཁུ་དང་རྩྭ་བ་མོ་དག་གོ། །མིང་གིས་སྨོས་པ་འདི་རྣམས་བཙགས་ཏེ་ནའང་རུང་མི་ནའང་རུང་ཕྱི་དྲོའང་འཐུང་ངུ་
དབང་ངོ་། །འདི་རྣམས་ཆུས་བརྟགས་དགོས་སོ། །ཆུ་དབྱེ་སྣམ་བུར་བཙགས་ཏེ་དང་བ་བཞིན་སྣང་བ་ཤར་བ་དེའི་ཁ་དོག་ལྟ་བུའོ། །མདོ་ལྟག་མའི་བཏུང་བ་རྣམས་ཚགས་སུ་བཙགས་ཏེ་དད་པར་བྱས་ལ་བཞིན་སྣང་ལ་ཆུས་བརྟགས་ལ་བཏུང་དུ་དབང་ངོ་། །དེའི་ཕྱིར་
སྔོན་དུ་བསྙེན་པར་རྫོགས་པར་རེག་པ་མི་རིགས་ཏེ་མཚན་མཚུངས་པས་ནའོ། །མདོ་ལྟག་མ་ལྟར་བཏུང་བ་རྣམ་པ་བཅུ་གསུམ་སྔ་དྲོ་དགེ་སློང་བདག་གིས་བཙིར་ཞིང་བཙགས་ན་བཏུང་དུ་རུང་། ཕྱི་དྲོ་ནི་བྱིན་ལེན་བྱས་ཀྱང་དགེ་སློང་གིས་བཙིར་ཞིང་བཙགས་ཀྱང་འཐུང་ངུ་
མི་དབང་གི །དགེ་སྦྱོང་ངམ་ཁྱིམ་པ་ཞིག་གིས་བཙིར་བཙགས་ལ་ཆུས་བརྟགས་ཏེ་བྱིན་ལེན་བྱས་ནས་འཐུངས་པ་ནི་ཉེས་མེད། ཨ་རུ་ར་ལ་སོགས་པ་ལྔ་ཡང་ངོ་། །ཨ་རུ་ར་དང་རེའུ་ར་དང་ཨ་མ་ལི་དང་། པི་པི་ལིང་དང་ན་ལེ་ཤམ་དང་ལྔ་ནི་དགེ་སློང་ནའང་རུང་སྔ་དྲོའང་རུང་
ཟར་དབང་ངོ་། །བུ་རམ་ཡང་ངོ་། །བུ་རམ་དང་ཁ་ར་ཕྱི་དྲོའང་བཟར་རུང་། བུ་རམ་དང་ཁ་ར་ཆུས་བྱས་ཏེ་བཏུང་དུའང་དབང་། འདི་བསྔོས་པ་ལས་བཟའ་བ་ནད་པ་བཞིན་པ་ནི་ལམ་པ་དང་རྫས་འཚོ་དང་ལས་སར་པ་པ་ཡང་ངོ་། །སྨན་ཞག་བདུན་དུ་བསྔོས་ཏེ་བཞག་པ་ནད་པ་བདག་
ཀྱང་བཟའ་གྲོགས་པོ་གཞན་ཡང་བཟར་རུང་བ་བཞིན་དུ་ལམ་རིང་པོ་ནས་ངལ་ཆད་དེ་འོངས་པ་དང་། དགེ་འདུན་གྱི་མལ་སྟན་རྫི་ལ་སོགས་པ་དང་གཙུག་ལག་ཁང་གསར་དུ་བརྩིག་པར་བསྐོ་བའི་དགེ་སློང་དང་འདི་རྣམས་བཟར་དབང་ངོ་། །ཟན་བཅད་པས་དུས་མ་ཡིན་པའི་འདི་
เล่ม ๑๖๕ · หน้า 270a
བཟའ། དགེ་སློང་དྲོ་ཡོལ་ཏེ་ཟན་མ་ཟོས་པའང་། སྨན་ཞག་བདུན་པ་བཟར་རུང་། སྐོམ་ནི་ཐུན་དུའོ། །ཕྱི་དྲོ་བཏུང་དུ་དབང་བ་རྣམས་ནང་པར་ནས་ཉི་མ་ནུབ་ཀྱི་བར་དུ་བཏུང་དུ་རུང་བ་ལས་བྱ། དང་པོའོ། །ཐུན་བཏུང་བའི་སྐོམ་དེ་རྙོག་མ་ཅན་མ་ཡིན་པ་
དང་བ་ལ་བྱ། དེར་མ་རེག་པའི་རྫས་ཏེ་འོ་ན་ཏེ་དུས་ཀྱི་ནི་བསྙེན་པར་མ་རྫོགས་པས་མཉེ་ཞིང་སྣམ་བུར་བཙག །ལྟག་ཏུ་ཕྱི་དྲོ་བཏུང་བ་རྣམ་པ་བརྒྱད་སྔ་དྲོ་དགེ་སློང་གིས་བྱིན་ལེན་བླངས་ཏེ་སྔ་དྲོ་བདག་གིས་མཉེས་ཏེ་བཏུང་དུ་རུང་བ་དང་ཕྱི་དྲོ་དགེ་སློང་གིས་མཉེ་ཞིང་བཙག་ཏུ་མི་རུང་ཞིང་
དགེ་སློང་གིས་བཙགས་ཤིང་བྱིན་ལེན་བྱ་བ་དེ་བཞིན་དུ་རྣམ་པ་བརྒྱད་པོ་འདི་ལ་མ་གཏོགས་པར་ཤོ་གམ་ལ་སོགས་པ་གཞན་ཡང་བརྩི། འོག་འདི་དང་འདྲ། བལ་པོ་སེའུ་དང་པི་ཟང་སུ་ར་ག་ལ་སོགས་པའི་རྫས་གཞན་ཡང་འདིར་རོ། །འདི་རྣམས་ཀྱང་ལྟག་ཏུ་བརྒྱད་མིང་གིས་
སྨོས་པའི་བརྩི་འོག་དང་འདྲ་སྟེ། ཕྱི་དྲོ་དགེ་སློང་གིས་བཙག་ཅིང་ལས་བྱར་མི་རུང་སྟེ་དགེ་སྦྱོང་གིས་བྱ། དུས་ཀྱིར་ན་ཐུན་གྱི་མཐར་རོ། །ལག་ཏུ་རྣམ་བརྒྱད་དང་བལ་པོ་སེའུ་ལ་སོགས་པ་དྲོ་ཟོས་ནས་དམར་ཐག་མ་ཆད་ཚུན་ཆད་དུ་དགེ་སྦྱོང་གིས་མཉེས་བཙགས་ཏེ་ངོ་སྣད་ན་དགེ་
སློང་འཐུང་དུ་དབང་ངོ་། །དམར་ཐག་གི་མཚམས་འདས་ཏེ་འཐུང་དུ་མི་དབང་ངོ་། །གཞན་ཡང་དེའོ། །ཞག་བདུན་པ་དང་ཚེ་གཅིག་གི་སྔགས་ཀྱིས་བརྟགས་པ་ལས་སྐོམ་དུ་བྱས་ནའང་དམར་ཐག་མ་ཆད་ཚུན་ཆད་འཐུང་དུ་རུང་། དེ་མ་གྱུར་ན་སྟེང་གང་དུ་གྱུར་ནའང་དེར་རོ་ཞེས་
འགའ་ལས་སོ། །སྐོམ་དུ་བཏུང་བ་ཉུག་པོར་སྦྱར་བ་ལས་སྐྱུར་པོར་གྱུར་པ་དང་། དང་བར་བྱས་པ་ལས་རྙོག་མ་ཅན་དུ་འགྱུར་བ་ཐུན་མ་འདས་ཀྱང་བཏུང་དུ་རུང་ངོ་ཞེས་འོག་ནས་འཆད། འདུལ་བ་འཛིན་པ་ཁ་ཅིག་ན་རེ་སྐོམ་བཏུང་བའི་རྣམས་ལ་ད་ལྟར་ར་མི་རོའང་དེའུ་རེ་ར་རོ་བར་
འགྱུར་བ་དང་ད་ལྟར་དང་ཡང་དེའུ་རེ་རྙོག་མ་ཅན་དུ་འགྱུར་བ་དང་། ད་ལྟར་མངར་ཀྱང་དེའུ་རེ་སྐྱུར་པོར་འགྱུར་བས་བཏུང་དུ་མི་རུང་ཞེས་བཤད། དེ་མི་བཟང་སྟེ་དུས་ལས་འདས་པར་གནས་ན་ནི་མི་སྐྱེ་བ་ཐོབ་དེ་ཡང་འོང་བ་ན་ཕལ་གྱིས་མི་ཆུད་པའི་ཕྱིར་མི་བསྔོས་པར་འཐོབ་
เล่ม ๑๖๕ · หน้า 270b
པས་སོ། །ལྟག་ཏུ་མངར་པོ་ལས་སྐྱུར་པོར་གྱུར་པ་དྭངས་པ་ལས་རྙོག་པོར་འགྱུར་བ་དང་ར་མི་རོ་བ་ལས་ར་རོ་བར་གྱུར་ན་ཐུན་པ་འདས་ཀྱང་བཏུང་དུ་མི་རུང་ངོ་ཞེས་འབྱུང་བ་དེའི་གཞུང་བཙན་པར་བྱས་ཏེ་གཟུང་གི་ལྟག་ཏུ་མཁན་པོའི་ཚིག་ཕྱིས་འགྱུར་ཞེས་ཟེར་བ་མི་བཙན་ཏེ་དེའི་
ཚིག་མི་གཟུང་ངོ་། །འདིར་རོ་ཞུགས་པའི་ཕྱིར་ཕྱེ་བའི་སྐོམ་བུ་རམ་ཤིང་དང་རྒུན་འབྲུམ་ལ་སོགས་པ་ཆུ་མ་བླུགས་ཀྱང་ཁུ་བ་རང་འབྱུང་བས་ཐུན་མ་འདས་ཚུན་ཆད་བཙགས་ཏེ་འཐུང་དུ་རུང་ཕྱེ་མའི་སྐོམ་ཡང་བཏུང་དུ་རུང་སྟེ་གང་ཡིན་པ་ནི་སྒ་དང་པི་པི་ལིང་ལ་སོགས་པ་བུར་མར་བྱས་ཏེ་
གླུམ་གྱི་རླངས་པ་ལ་བདུགས་ཏེ་རོ་ཡོད་པ་དང་ཆུ་དང་བསྲེས་ཏེ་ཐུན་གྱི་བར་དུ་བཏུང་དུ་དབང་། སོ་བི་རའི་ཡང་དང་ངོ་། །སོ་བི་ར་གང་ཡིན་པ་ནི་འོག་ནས་འཆད་དེ། སོ་བི་རས་བརླན་པའི་ཁུ་བའང་བཏུང་དུ་རུང་། འདི་ནི་འབྲས་བུ་ལ་སོགས་པའི་སྨན་བརྙན་ནས་སྐྱུར་ནའོ། །སོ་བི་
ར་ཞེས་བྱ་བ་ནི་ཆུ་བ་ཏི་ད་མ་ཏི་ལ་སོགས་པ་འབྲས་བུ་དང་མེ་ཏོག་ལས་སྐྱུར་བ་གང་ཡང་རུང་སྟེ་ཆུ་བར་སྦྱར་ན་ཐུན་གྱི་བར་དུ་བཏུང་དུ་རུང་ངོ་། །འདི་མན་ཆད་ནི་སྐད་ཅིག་མ་དང་ཐུན་གྱི་བར་དུ་ཆུ་ལས་བཤད། མར་དང་ཡུངས་མར་དང་སྦྲང་རྩི་དང་བུ་རམ་ནི་ཞག་བདུན་པའི། མིང་
གིས་སྨོས་པ་འདི་རྣམས་ནི་ཞག་བདུན་པའི་སྨན་ནོ། །ཁཎྜ་དང་བུ་རམ་དང་ཤ་ཁ་ར་ལ་སོགས་ཐམས་ཅད་ཀྱང་བུ་རམ་དུ་ཆུད་དོ། །འདི་རྣམས་ཀྱང་སྨན་བུ་རམ་ཞེས་བྱ་བའི་ནང་དུ་གཏོགས་ཏེ་ཞག་བདུན་དུ་འཆང་དུ་དབང་ངོ་། །མདོ་ཡང་མར་དུ་ཆུད་དོ། །མཐོ་རིས་ཀྱི་ཁམས་
ན་འདུག་པ་ཞིག་སྟེ་འདི་ཡང་མར་དུ་གཏོགས་ཏེ་ཞག་བདུན་པའོ། །ཡུངས་མར་དུ་ཚིལ་ལས་བཞུས་ཏེ་བཙགས་པའང་ཆུད་དོ། །ཚིལ་དང་ཆུ་གཉིས་བསྲེས་ཏེ་བསྐོལ་ནས་ཆུ་ནི་སྐམས་ཚིལ་གྱི་ཁུ་བ་ལུས་པ་ཚེགས་ཀྱིས་བཙགས་ནས་ཞག་བདུན་པའི་མར་གྱི་གོར་བཅད་དུ་རུང་།
ཉ་དང་སྦལ་པ་དང་དོམ་དང་ཕག་པའིའོ། །འདི་རྣམས་ཀྱི་ཚིལ་བཙགས་པའང་མར་གྱི་གོར་ཞག་བདུན་པར་བཅང་། འདི་རྣམས་ནི་ནད་པ་མང་པོ་ལ་མཁོ་བས་སོ། །མདོ་ལྟག་མའི་ཚིལ་རྣམས་ནད་པ་ལ་དགོས་པའི་ཕྱིར་བཅངས་ཀྱང་ཉེས་མེད། སོས་ནས་ནད་པའི་ཕྱིར་འདི་
เล่ม ๑๖๕ · หน้า 271a
རྣམས་ལས་སློང་ན་སྦྱིན་ནོ། །ཚིལ་འདི་རྣམས་ནད་པའི་ཡོ་བྱད་དུ་བྱས་ཏེ་གསོས་ནས་ལྷག་ན་ནད་པ་གཞན་ལ་སྦྱིན་ཀྱང་ཉེས་མེད། མེད་ན་ནད་ཀྱི་གསོས་པ་ལའོ། །བདག་ནད་སོས་ནས་ཚིལ་གྱི་སྨན་དགེ་སློང་ནད་པ་མེད་ན། དགེ་འདུན་གྱི་སྨན་ཁང་དུ་རུབ་པ་
ལ་གཏད་དོ། །གདུས་པ་དང་བསྐུལ་བ་ཡང་ངོ་། །འབྲས་བུ་དང་མེ་ཏོག་ལ་སོགས་པ་ལྟ་བུ་ལྕགས་ཀྱི་གཞོང་། ཀུན་དུ་ནད་ཀྱི་ཆོ་ག་བྱ་བ་དང་། མིག་ནག་པོར་བསྐུ་བའི་རྩིའང་ནད་སོས་ནས་དགེ་སློང་ནད་པ་ལ་བྱིན། གྲོགས་ནད་པ་མེད་ན་སྨན་ཁང་དུ་དབུལ། འདི་ཡན་ཆད་ཞག་
བདུན་པའི་སྨན་བཤད་པ། ནམ་འཚོ་བར་དུ་བ་ནི་རྩ་བ་དང་སྡོང་བུ་དང་ལོ་མ་དང་མེ་ཏོག་དང་འབྲས་བུའོ། །མིང་གིས་སྨོས་པ་འདི་ལྔ་ཚེ་གཅིག་གི་བར་དུ་བཅང་དུ་རུང་བའི་སྨན་ཡིན་ཏེ་ནད་པས་བརྟགས་ཏེ་བཅང་དུ་རུང་གནང་སྟེ་འོག་ནས་མིང་གིས་སྨོས་པ་རྣམས་ཡིན་ཟས་ཀྱི་དོན་
དུ་མི་ཆོག་པ་ལས་སོ། །མདོ་ལྟག་མ་ལྟ་བུར་རྣམ་པ་ལྔ་ཟས་ཀྱི་གོར་མི་ཆོག་པ་ནི་ཚེ་གཅིག་གི་བར་དུ་བཅང་དུ་གནང་ངོ་། །འདི་ལྟ་སྟེ་མུ་སྟ་དང་ཧ་རི་བྲ་དང་ཤུ་བ་དག་དང་སྒེའུ་གཤེར་དང་བོང་ངའོ། །མིང་གིས་སྨོས་པ་འདི་རྣམས་ནི་རྩ་བའི་སྨན་ཡིན་ནོ། །ཙན་དན་དང་རྩི་བྱི་ཀ་དང་
ཐང་ཤིང་དང་སྐྱེར་པ་འདི་རྣམས་ནི་སྡོང་བུའི་སྨན་ཏེ་ཚེ་གཅིག་ཏུ་བཅང་དུ་རུང་ངོ་། །བ་ཤ་ཀ་དང་ཀོ་ཤ་ཏ་གི་དང་པ་ཏོ་ལ་དང་ནིམ་པ་དང་འདབ་མ་བདུན་པའི་ལོ་མའོ། །མིང་གིས་སྨོས་པ་འདི་རྣམས་ནི་ལོ་མའི་སྨན་ཡིན་ཏེ་ནད་པས་ཚེ་གཅིག་ཏུ་བཅངས་ཀྱང་ཉེས་མེད། མེ་ཏོག་ནི་
བ་ཤ་ཀའི་དང་ནིམ་པའི་དང་འདའ་ཀའི་དང་ན་གའི་པད་ཏ་མོའི་སྙིང་པོ་དང་ངོ་། །མིང་གིས་སྨོས་པ་འདི་རྣམས་ནི་མེ་ཏོག་གི་སྨན་ཡིན་ཏེ་ནད་པས་ཚེ་གཅིག་ཏུ་བཅང་ངོ་། །ཨ་རུ་རའི་དང་ཨམ་ལའི་དང་བྱི་བྱི་ཏ་ཀའི་དང་ན་ལེ་ཤམ་དང་པི་པི་ལིང་ངོ་། །མིང་གིས་སྨོས་པ་འདི་རྣམས་
ནི་འབྲས་བུའི་སྨན་ཡིན་ཏེ་ནད་པས་ཚེ་གཅིག་ཏུ་བཅང་དུ་རུང་ངོ་། །ཛ་ཏུ་ཛ་ཏུ་ཞེས་བྱ་བ་ནི་སྨན་སྤྱིའི་མིང་ཡིན་ཏེ་འོག་ནས་འབྱུང་བའི་རྣམས་སོ། །འདི་ལྟ་སྟེ་ཤིང་ཀུན་དང་སར་པྲ་ར་ས་དང་རྒྱ་སྐྱེགས་དང་པྲ་ཚིལ་དང་སྟ་པ་ཀ་རའོ། །མིང་གིས་སྨོས་པ་འདི་རྣམས་ཀྱི་སྨན་ཀྱང་
เล่ม ๑๖๕ · หน้า 271b
ཚེ་གཅིག་ཏུ་བཅང་དུ་དབང་ངོ་། །ཛ་ཏུ་ནི་འདི་ཡན་ཆད་དོ། །ཐལ་བའོ། །འདི་ཡང་འོག་ནས་འབྱུང་བ་རྣམས་ཀྱི་སྤྱིའི་མིང་སྟེ་འོག་ནས་འཆད། འདི་ལྟ་སྟེ་ཏིལ་དང་བ་ལ་ཤ་དང་སརྫི་ཀ་དང་ནས་དང་གྲ་མ་དང་བ་ཤ་ཀ་དང་ཐལ་བའི་ཐལ་བའོ། །མིང་གིས་སྨོས་པ་འདི་རྣམས་
ཀྱི་ཐལ་བའང་སྨན་དུ་འགྱུར་ཏེ་ཚེ་གཅིག་ཏུ་འཆང་དུ་གནང་ཐལ་བའི་སྨན་འདི་ཡན་ཆད་དོ། །ལན་ཚྭའོ། །འདིའང་འོག་ནས་འབྱུང་བའི་སྤྱིའི་མིང་ངོ་། །འདི་ལྟ་སྟེ་སེན་ཏ་པ་དང་ལན་ཚྭ་ནག་པོ་དང་བྱི་ལྔ་དང་། རྒྱ་མཚོ་མཆིང་རྣམས་ཀྱི་དང་རོ་མ་ཁའི་འོ། །མིང་གིས་སྨོས་པ་འདི་
རྣམས་ཀྱང་ཚེ་གཅིག་གི་སྨན་དུ་བཅང་ངོ་། །འདུས་པའོ། །འདི་འང་འོག་ནས་འབྱུང་བ་རྣམས་ཀྱི་སྤྱིའི་མིང་། འདི་ལྟ་སྟེ་ཨ་པྲ་དང་ནིམ་པ་དང་ཀོ་ཤམ་པ་དང་ཤི་རི་ཤ་དང་འཛམ་བུ་དག་གོ། །མིང་གིས་སྨོས་པ་འདི་རྣམས་ཀྱི་ལོ་མའང་སྨན་དུ་རུང་སྟེ་ཚེ་གཅིག་ཏུ་བཅང་དུ་གནང་
ངོ་། །མཆོག་གི་བར་དུ་སྦྱིན། སྨན་སྟེང་མ་རྣམས་ཀྱི་ལོ་མ་གདུས་པའི་ཁུ་བ་ནམ་སྲོས་ཀྱི་བར་དུ་ལན་དུས་བཀྲུས་ཀྱང་རུང་ངོ་། །བཀྲུས་ཏེ་ཡང་ངོ་། །ལྟག་མའི་སྨན་གྱིས་བཀྲུས་པའི་འོག་ཏུ་ཡང་ཆུ་ཐ་མལ་པས་ཀྱང་བཀྲུ། མ་རེག་པར་བཀྲུ་བ་གཅིག་གོ། །ལྟག་མ་ལྟར་འདུས་
པའི་སྨན་གྱིས་བཀྲུ་བ་ནད་ཁ་ཅིག་ལ་བསྲུབ་ཅིང་མཉེ་སྟེ་སྨན་གྱི་ཆུས་བཀྲུས་ནའང་ཕན། གཅིག་ཏུ་ནད་པ་ཁ་ཅིག་ལ་མ་མཉེས་པར་སྤྱི་བོ་ནས་བླུགས་ནའང་ཕན། འདི་ལྟར་འདུས་པ་སྦྱིན། ལྟག་མ་ལྟ་བུ་སྨན་གདུས་པས་རྔོ་དང་གཡན་པ་ལ་སོགས་པ་ལ་ཕན་པའི་ཕྱིར་རྟག་
པར་བཀྲུ། ཟས་ཐལ་བ་དང་བླངས་ན་མ་བླངས་པ་མ་ཡིན་ནོ། །ཟས་ངན་པའི་སྨན་ཆེས་བྱ་བ་ཡང་འོག་ནས་འཆད་པ་རྣམས་ཡིན་ནོ། །འདི་དག་ནམ་འཚོ་བའི་བར་དུའོ། །འོག་ནས་འབྱུང་བའི་སྨན་དེའང་ཚེ་གཅིག་ཏུ་བཅང་དུ་གནང་ངོ་། །དེར་གསུངས་པ་ནི་ཡང་བཤད་པ་
དང་བཅིངས་པ་དང་བཤངས་ཏེ་ནུ་མས་འཚོ་བའི་འོ། །སྨན་དུ་བསྲུངས་པ་ནི་བེའུ་ནུ་མ་འཐུང་བའི་གཅིན་དང་ལྕི་བ་ནི་དུག་ལ་ཕན་པའི་ཕྱིར་བཅང་དུ་གནང་ངོ་། །འདི་ནི་དུག་ལ་ཕན་ནོ། །ལྟག་མའི་བེའུའི་ལྕི་བ་དང་གཅིན་དུག་འཐུངས་མ་ཐག་ཏུ་དེ་འཐུངས་ན་སླར་སྐྱུག་པའི་ཕྱིར་བཅང་ངོ་། །
เล่ม ๑๖๕ · หน้า 272a
ཐལ་བ་དང་ཤིང་ཀན་ཙན་དང་ཀ་པྱི་ཏལ་དང་། ཨ་ཤྭ་ཏ་དང་ཨུ་དུམ་བཱ་ར་དང་ནྱ་གྲོ་དྷ་དག་ཀྱང་ངོ་། །མིང་གིས་སྨོས་པ་འདི་རྣམས་ཀྱི་ཐལ་བ་དག་ཀྱང་དུག་ལ་ཕན་པའི་ཕྱིར་ཚེ་གཅིག་ཏུ་བཅངས་ཀྱང་ཉེས་མེད། དེ་ལའོ། །ལྟག་མའི་ཐལ་བ་རྣམས་དུག་འཐུངས་མ་
ཐག་ཏུ་འཐུང་ན་འཚོ་བའི་ཕྱིར་བཅང་ངོ་། །ས་སོར་བཞིའི་འོག་གི་ས་ལ་དགེའོ། །བཤང་གཅི་ལ་སོགས་པས་མ་འབབས་པའི་ས་གཙང་མ་ཟབ་ཏུ་སོར་བཞི་བརྐོས་པའི་འོག་མན་ཆད་ཀྱི་ས་དུག་ལ་ཕན་པའི་ཕྱིར་བཅངས་ཀྱང་ཉེས་མེད། འདི་དད་པའི་དགེ་བསྙེན་ལས་བླངས། མདོ་ལྟག་
མའི་བེའུའི་བཤང་གཅི་དང་སའི་སྨན་ནི་དད་པའི་དགེ་བསྙེན་ཕྱིར་མི་ནུར་བ་ལས་བླང་། ལེན་དུ་གཞུག །བྱིན་ལེན་བྱ། ལྟག་མའི་སྨན་དད་པའི་དགེ་བསྙེན་ལས་བྱིན་ལེན་བྱས་ཏེ་བླང་། ཤ་རློན་པའི་སྨན་ཀྱང་ངོ་། །དགེ་སློང་ན་ན་སྨན་དུ་དད་པའི་དགེ་བསྙེན་གྱིས་འབུལ་ན་ལེན་དུ་དབང་
ངོ་། །དད་པའི་དགེ་བསྙེན་མེད་ན་དགེ་སློང་ན་བ་ཤས་མི་གསོར་མི་རུང་ན་མ་དད་པ་ལས་ཀྱང་བླང་། ཤ་འཚོང་དག་ཀྱང་ཐམས་ཅད་བླང་། དགེ་སློང་ནད་པ་ཤའི་སྨན་གྱིས་མི་གསོར་མི་རུང་བར་གྱུར་ན་དགེ་བསྙེན་དད་པ་ཤ་འཚོང་ལ་ཉོར་བཏང་སྟེ་ཉོས་ལ་ཟོས་ཀྱང་ཉེས་མེད། འདི་དགོས་
སོ། །བདག་ན་བའི་སྨན་དུ་ཤ་དགོས་ན་ལྟག་མ་ལྟར་ཉོ་བའང་མི་རིགས་པ་མ་ཡིན་ཏེ་རིགས་སོ། །དེ་སྟེ་དུས་མ་ཡིན་པར་མཁོ་ན་བ་ལང་རྒན་པའི་བཤང་བ་ལས་ནས་ཀྱིས་བྱ་བའི་སྨན་དེའི་ཕྱིར་བྱ་སྟེ་གཞན་མི་བཟའ། གླང་རྒན་ནས་ཟར་བཅུག་སྟེ་མ་ཆོམས་པ་ལྕི་བའི་ནང་ནས་བཏུས་ཏེ་ཕྱིར་
བཏབ་ལ་ནད་པ་ཕྱི་དྲོ་ཟན་ནམ་ཐུག་པ་བྱས་ཏེ་བཟའ་ཞིང་བཏུང་དུ་གནང་ངོ་། །འདི་ལྟ་བུའི་སྨན་ནད་པས་བཟའ་མི་ནུས་ན་ཟན་དང་ཐུག་པ་གཞན་འཐུང་དུའང་དབང་ངོ་། །དེ་ཟ་ནུས་ན་གཞན་མི་བཟའ། དེ་སྟེ་སྐྱོན་སྣམ་བུར་བཙགས་ཏེ་གཞན་དུ་མ་ཡིན། བ་གླང་གི་ལྟོ་ནས་བྱུང་བའི་
ནས་དེ་བརྔོས་དེ་བཏགས་ལ་སྐྱོ་མར་བྱས་ནས་སྣམ་བུས་བཙགས་པའི་ཁུ་བ་ནད་པ་ལ་བླུད། དེས་མ་ངོམས་སམ་མ་འདྲངས་ན་སྐྱོ་མ་ཉིད་ཀྱང་བླུད། དེ་སྟེ་ཤའི་སྨན་ཀོ་ཀས་བཤངས་པའི་གཞན་དུ་མ་ཡིན། ནད་པའི་སྨན་དུ་སྨན་པས་ཤ་བཙོས་པའི་ཁུ་བ་འཐུངས་ན་ཕན་པར་
เล่ม ๑๖๕ · หน้า 272b
བསྒོ་ན་ཕྱི་དྲོ་ཤ་ཁུ་འཐུངས་ཀྱང་ཉེས་མེད། ཤ་ཁུས་སྙིང་མ་ཚིམ་ན་ཤ་གཞན་ཟོས་ཀྱང་ཉེས་མེད། དྲེད་མོའམ་འཕར་བས་ཕྱུགས་ཀྱི་ཤ་ཟོས་པ་དེ་བཞིན་ཐལ་བྱུང་བྱུང་བ་བཟར་རུང་ངོ་ཞེས་སྨན་པས་ཕན་པར་བསྒོ་ན་ཟོས་ཀྱང་ཉེས་མེད། དེ་མ་སོས་ན་སྨན་གཞན་ཀྱང་བྱ། དེ་སྟེ་ཁུ་བ་
ནི་གོས་ཀྱིས་བཙགས་པའི་གཞན་དུ་མ་ཡིན། ནད་པ་ལ་ཕན་པའི་ཕྱིར་ཤ་ཁུ་སྣམ་བུར་བཙགས་ཏེ་འཐུངས་ཀྱང་ཉེས་མེད། ཤ་ཁུས་མ་སོས་ན་སྨན་གཞན་གྱིས་གསོ་བའི་ཕྱིར་སྦྱིན། གཞན་དང་བཅས་ན་ཆོས་ཡོད་པའོ། །ཞག་བདུན་པའི་སྨན་དང་ཐུན་གྱི་སྨན་འདྲེས་ན་
གཉིས་ཀ་དོར་རམ་གཅིག་དོར་བ་བྱེ་བྲག་འོག་ནས་འཆད། དེ་བས་ན་སྔོན་དུ་བརྟགས་པ་དང་ལྷན་ཅིག་ཏུ་འཇུག་གོ། །སྐད་ཅིག་མ་དང་ཐུན་གྱི་སྨན་འདྲེས་ན་སྐད་ཅིག་མའི་དབང་དུ་བྱ། ཐུན་གྱི་སྨན་དང་ཞག་བདུན་པ་འདྲེས་ན་ཐུན་གྱི་དབང་དུ་བྱ། ཞག་བདུན་པ་དང་ཚེ་གཅིག་
པ་འདྲེས་ན་ཞག་བདུན་པ་བཙན་ནོ། །གཟུགས་མ་གྱུར་ན་སྔ་མའི་གཟུགས་མ་ཡིན་ནོ། །མདོ་ལྟག་མ་ལྟར་འདྲེས་ན་དབྱེར་རུང་ན་སྔ་མ་ལྟར་མི་བཙན་གྱི་ཕྱེ་ཤིག །དེ་སྟེའང་འདྲེས་ཏེ་དབྱེར་ཡང་མ་རུང་ན་སྔ་མ་དང་འདྲ་བར་བྱ། དེ་བས་ན་གཞན་ལ་སོ་སོར་བྱས་པ་དེ་ལ་
བདག་གིར་བརྟགས་པས་བརྟགས་ན་མི་འགྲུབ་པར་མི་འགྱུར་རོ། །མདོ་ལྟག་མ་ལྟར་སྨན་འདྲེས་པ་བདག་གི་སོ་སོར་དབྱེ་ནུས་ནས་ཕྱེ་ལ་ཐུན་དང་ཞག་བདུན་པ་དང་ཚེ་གཅིག་པའི་སྔགས་ཀྱིས་སོ་སོར་བཏབ་སྟེ་རིམ་པར་བཅང་ཞིང་བཟའ། ཕྱེ་དང་འབྲས་བུ་བུ་རམ་ཟླུམ་པོ་
གཞག་པ་བདག་ཙམ་གྱིས་བཀྲུས་ན་གྲངས་སུའོ། །འབྲས་སམ་ཕྱེའི་ནང་དུ་བུ་རམ་གཞག་པ་དབྱར་བུ་རམ་ཞུས་ཏེ་ཁ་ཟས་དང་འདྲེས་ན་འབྲས་སམ་ཕྱེ་བསལ་ཏེ་ལྷག་མ་བུ་རམ་གྱི་ནང་ཕྱེ་དང་འབྲས་ཅུང་ཟད་ཅིག་མ་མཐོང་སྟེ་ཁོང་དུ་ལས་པའང་ཕྱི་དྲོ་ཐུན་གྱི་བར་དུ་བཟར་རུང་
ངོ་། །བུ་རམ་དུ་གཏོགས་པའང་བུ་རམ་དུ་ཆུད་དོ། །བུ་རམ་བཙིར་ཏེ་བུ་རམ་དུ་གྱུར་པ་ལས་དབྱར་ཞུས་ཏེ་སླར་བུ་རམ་ལིང་དུ་བྱར་མི་རུང་པ་ལས་ཕྱེ་ཅུང་ཟད་ཅིག་གིས་བསྲེས་ཏེ་བསྐོལ་ནས་སླར་བུ་རམ་ལིང་དུ་ཕྱེས་གཟུངས་བྱས་པ་དང་། དེ་ལྟ་བུ་ཡང་ཕྱི་དྲོ་ཐུན་གྱི་བར་དུ་
เล่ม ๑๖๕ · หน้า 273a
བཟར་རུང་ངོ་། །བསྔོས་པ་ལ་སོགས་པ་མི་སྐྱེའོ། །ཞག་བདུན་པ་དང་ཚེ་གཅིག་པ་དང་ཐུན་ལྟ་བུའི་སྨན་ནི་སོ་སོའི་བརྟགས་པས་བརྟགས་ན་ཐུན་གྱི་ལྟུང་བར་མི་འགྱུར་རོ། །ནད་པའི་ཕྱིར་བཟའ་ཕྱིར་བསྔོས་ཤིག་མདོ་ལྟག་མ་ལྟར་ཞག་བདུན་པ་དང་
ཚེ་གཅིག་ཏུ་གནང་བ་ནི་ནད་པ་དབང་ངོ་། །བདག་གི་དུས་ཀྱི་མཐའ་པའི་བར་དུའོ། །ཐུན་གྱིར་བསྔོས་པ་ཞག་བདུན་པར་བསྔོར་མི་རུང་ཞག་བདུན་པའི་ཚེ་གཅིག་པར་མི་བསྔོ། །ནད་པར་མི་བཟའ། ཐུན་དང་ཞག་བདུན་པ་དང་ཚེ་གཅིག་གི་སྨན་བརྟགས་པ་ནི་སྔ་དྲོ་བརྟགས་ཏེ་
གཞག་གོ། །བྱིན་བླངས་པའོ། །བརྟགས་པ་རྣམས་བྱིན་ལེན་མ་བྱས་པར་མི་བརྟག་གོ། །བྱིན་ལེན་མ་བླངས་པ་དང་འདྲེས་པ་བསྲུང་། བྱིན་ལེན་བླངས་པ་ནི་བྱིན་ལེན་བྱས་པ་དང་མ་བྱས་པ་མི་བསྲེའི་བྱིན་ལེན་བྱས་ལ་སྔགས་གདབ་པོ། །དེ་བས་ན་ལག་བསྙལ། བྱིན་ལེན་
བྱ་བ་ལག་པ་དྲི་མ་ཅན་གྱིས་མི་བླང་བླངས་པ་དང་བདག་གི་ལག་ཏུ་བྱིན་ལེན་མ་བྱས་པར་ས་ལ་བཞག་ཏེ་སྔགས་ཀྱིས་བཏབ་པ་དང་། སྤོགས་པ་དང་། སྤགས་པ་དང་། བྱིན་ལེན་མ་བྱས་པ་དང་། བྱིན་ལེན་མ་བྱས་པར་བདག་ཉིད་ཀྱིས་བླངས་སྔགས་བཏབ་པ་དང་། ནང་དུ་བསྲུབས་
ཤིང་། མཚམས་ཀྱི་ནང་དུ་དགེ་སློང་དང་ཞག་ལོན་པའི་ཟས་དང་། བཙོས་པ་དང་། མཚམས་ཀྱི་ནང་ནས་བཙོས་པའི་ཁ་ཟས་དང་། བསྔོས་པ་མི་སྐྱེའོ། །མིང་གིས་སྨོས་པ་འདི་རྣམས་ཐུན་དང་ཞག་བདུན་པ་དང་ཚེ་གཅིག་པའི་སྔགས་ཀྱིས་གདབ་ཏུ་མི་རུང་། བཙོག་པ་
ནི་བྲོ་དང་བ་ལས་ལོག་ནའོ། །སྤགས་པ་སྟེ་ཐུན་གྱི་བཏུང་བར་སྦྱར་ལ་ཉུག་པོ་ལས་སྐྱུར་པོར་གྱུར་པ་དང་། དང་བ་ལས་རྙོག་མ་ཅན་ཀྱང་ཐུན་མ་འདས་ཀྱང་ཟོས་ན་སྤགས་པར་འགྱུར། བསྔོས་པ་འོག་མ་དང་ལྷན་ཅིག་ཏུ་མི་སྤྱད་ཐུན་དུ་བསྔོས་པ་དང་ཞག་བདུན་པ་
དང་ལྷན་ཅིག་བསྲེས་ཏེ་མི་སྤྱད་ཀྱིས་སྨན་གྱི་རིམ་པའི་དཔེར་རོ། །ཐུན་དང་ཞག་བདུན་པ་དང་ཚེ་གཅིག་པར་བསྔོས་པ་མ་གཏོགས་པར་མིག་གི་སྨན་དང་རྣ་བ་དང་སྣར་ལྡུགས་པ་ནི་སྔ་དྲོའང་རུང་ཕྱི་དྲོའམ་ནམ་ཡང་བསྐུར་རུང་ངོ་། །བྱུག་པ་བྱའོ། །ལྷག་མ་ལྟ་བུའི་སྨན་མིག་ན་
เล่ม ๑๖๕ · หน้า 273b
ན་སྨན་བྱུག་གོ། །སྨན་གྱི་ཕྱིར་མ་ཡིན་ན་མ་ཡིན། ལྟག་མ་ལྟར་སྨན་གྱིས་བསྐུ་བ་མིག་ན་ན་བསྐུའི་མི་ན་བར་མི་བསྐུའོ། །འདིའི་སྣོད་དུ་ཐུབ་པའོ། །ལྟག་མའི་མིག་སྨན་ཟངས་དང་ཁར་བའི་ནང་དུ་བླུགས་ན་གཡའ་འོང་བའི་ཕྱིར་རྭ་དང་གཡའ་མེད་པར་བླུག་གོ། །ཁུ་བ་བྱུག་ན་
གབ་ཚེའི་འོ། །མིག་ལ་སོགས་པའི་སྨན་ཁུ་བ་རྣམས་ནི་སྦའི་གབ་ཚེ་ནང་དུ་བླུགས་རྡོ་གུ་བྱུག་ན་སྒྱེའུ་འོ། །སྨན་རྡོ་གུ་རྣམས་ནི་སྣོད་སྒྱེའུ་ནང་དུ་བླུགས། མེ་ཏོག་དང་། མེ་མར་གྱི་དུ་བ་མིག་ལ་ཕན་པ་དང་། བཙོས་པ་དང་། སྨན་སྣ་ཚོགས་ལས་བཙོས་ཏེ་མིག་སྨན་དུ་འགྱུར་བ་དང་།
ཕྱེ་མའི་བྱུག་པར་ནི་བུ་གུའི་སྨན་ཕྱེ་མ་དང་རྣམ་པ་འདི་གསུམ་གྱི་སྣོད་ནི་སྨྱིག་མའི་དུམ་བུར་བླུགས་ཏེ་གཞག །ཐུར་མ་བཅང་། སྨན་མིག་ལ་བྱུག་པའི་རྣམས་ལག་པས་བྱུགས་ནའོ། །མི་གཟེ་བའི་ཕྱིར་ལྕགས་ཀྱི་ཐུར་མ་མདེའུ་རྔལ་མ་འདྲ་བས་བྱུག །ལྕགས་དང་ཟངས་དང་མིང་
བུ་མི་ལས་དགེ །ཐུར་མའི་རྒྱུ་ནི་ལྕགས་དང་ཟངས་ལ་དགེ་སྟེ་མིང་བུ་མི་ཞེས་བྱ་བ་བལ་ཡུལ་གྱི་ཟངས་སྦྲང་བུ་དང་ལྕགས་མཉེན་པོ་ལ་བྱས་ན་བཟང་ངོ་། །བཅང་བ་ནད་པས་སྨན་གཞན་པའི་ཕྱིར་སྣོད་ཁ་མངས་སོ། །དགེ་སློང་ནད་པས་སྨན་སྣ་ཚོགས་གཞག་པའི་ཕྱིར་རས་གཉིས་
སྦྱར་ལ་ཐད་ཀར་སྐུད་པས་བཙེམས་ཏེ་ཁ་མང་པོར་འདུག་པའི་ནང་དུ་སྨན་སོ་སོར་གཞག །དེར་མི་གྲུབ་ན་བཅེར་བའམ་ཐུམ་པོར་གཞག་སྨན་མང་སྟེ་ལྟག་མ་ལྟར་སྣོད་དུ་གཞུག་ཏུ་མི་རུང་ན་ཕྱི་མ་རྣམས་ནི་སོ་སོར་ཕུར་མར་བྱ། རྡོག་རྡོག་པོ་དང་ཆེན་པོའི་རྣམས་སོ་སོར་
གཞག་པ་ཕུར་མར་བྱས་ལགནམ་ལ་གདགས་པའམ་བཅེར་ཏེ་བཞག །མི་རུལ་བའི་ཕྱིར་དུས་དུས་སུ་བསྐམ་ཞིང་བཞག །སྨན་མི་རུལ་པ་དང་རླན་པར་མི་འགྱུར་བའི་ཕྱིར་དུས་དུས་སུ་བསྐམ། ཉི་གྲིབ་ལའོ། །སྨན་བསྐམ་པ་བར་བར་ཉི་མ་ལ་བསྐམ་ཞིང་གྲིབ་མ་ལ་བསྲད།
ཉི་མ་འབའ་ཞིག་ལ་བསྐམས་ན་མཐུ་འབྲི་བའི་ཕྱིར། བསྐམས་ན་མཐུ་འབྲིའོ། །ཉི་མ་འབའ་ཞིག་ལ་བསྐམ་ནའང་ནད་ལ་མི་ཕན་པའི་ཕྱིར། གྲིབ་མ་འབའ་ཞིག་ལ་བསྐམས་ནའང་ནད་ལ་མི་ཕན་པའི་ཕྱིར་སྔ་མ་ལྟར་བསྐམ་པར་བྱ། མ་རུང་བར་འགྱུར་བའི་ཕྱིར་འབབ་ན་
เล่ม ๑๖๕ · หน้า 274a
བདག་གིས་བརྟུལ། སྨན་སྐམ་དུ་བཅུག་པ་ལས་མེས་ཚིག་གམ་ཤ་བྱུང་བ་ལ་སོགས་པ་རྐྱེན་གཅིག་བྱུང་ངམ་ཆར་པ་བབ་ན་དགེ་སློང་བདག་གིས་བརྟུལ་ཀྱང་སྤགས་པའི་ཁ་ཟས་སུ་མི་འགྱུར་རོ། །བསྙེན་པར་རྫོགས་པ་མེད་ནའོ། །ལྟག་མ་ལྟར་བརྟུལ་
བའང་དགེ་སྦྱོང་དང་ཁྱིམ་པ་མེད་ན་གདོད་བདག་གིས་བརྟུལ་ལོ། །སྨན་གྱི་ཕོར་བུ་བཅང་། དགེ་སློང་ལྷུང་བཟེད་གཅིག་ལས་བཅང་དུ་མི་གནང་ན་སངས་རྒྱས་ཀྱིས་ཕན་པར་གསུངས་ཏེ་སྨན་བཏུང་བའི་ཕོར་བུ་ཟངས་དང་ཁར་བ་ལས་བྱས་པ་བཅང་། སྨན་གྱི་གཟར་བུ་ཡང་ངོ་། །
སྨན་དཀྲུག་ཅིང་བསྔོ་བ་དང་བཅུ་བ་ལག་པ་ཚ་བར་མི་འགྱུར་བར་བྱ་བའི་ཕྱིར་ལྕགས་སམ་ཟངས་ལས་གཟར་བུ་བྱས་ཏེ་བཅང་། བརྣངས་པས་ཕྱི་བཞིན་ཕོར་བུ་བཅང་། །ཟན་བཟའ་བའི་ཚེ་བརྣངས་པར་གྱུར་ན་ཆུས་འཕུལ་བར་བྱ་བའི་ཕྱིར་ཕོར་བུའི་ནང་ཆུས་བཀང་སྟེ་གམ་དུ་གཞག །
ནད་པ་ལན་ཚྭའོ། །ནད་པའི་བད་ཀན་ལ་ཕན་པའི་ཕྱིར་ཚ་རྡོག་ཟླུམ་པོར་བདར་ཏེ་མིད། བད་ཀན་གྱི་སྟེང་དུ་འཕོག་ན་བད་ཀན་སླར་བྱུང་བར་ཕན་ཏེ་རྒྱ་མཚོའི་ལན་ཚྭ་མ་རྙེད་ན་ཐ་མལ་བ་བཅང་། འདི་གཞག་པའི་སྦུ་བུ་དགེའོ། །ལན་ཚྭའི་སྨན་གཞག་པའི་སྣོད་ལས་བྱས་ཏེ་དེར་
གཞུག །གཅི་བས་བཙོས་པའོ། །ལྟག་མའི་སྨན་གྱི་སྣོད་ལས་བྱས་པ་ཁྲག་དང་མི་གཙང་བས་རེག་པ་བཀྲུ་བའི་ཕྱིར་ཟངས་ཀྱི་ནང་དུ་བ་ལང་གི་གཅི་བ་དང་བསྲེས་ཏེ་བཙོས་ན་འདག་པར་འགྱུར་རོ། །མེད་ན་ཉེས་མི་འབྱུང་བའི་ཕྱིར་ཁ་གབ་བྱ། ལྟག་མའི་སྨན་གྱི་སྣོད་ལ་རྡུལ་
མི་འོང་བའི་ཕྱིར་ཁ་གབ་བྱ། འདི་ལྟ་བུ་ལས་སོ། །ཁ་གབ་ཀྱི་རྒྱུ་ནི་རྭ་ལས་བྱ་སྟེ་བཀྲུ་བ་ནི་སྔ་མ་དང་འདྲ་སྟེ་བསུང་གིས་ཀུན་དུ་སྤགས་པའི་སའོ། །བཤང་བ་དང་ཁ་ལག་བཀྲུ་བ་ས་རང་ལས་བསུང་བྱུང་བ་དེ་ལྟ་བུས་བཀྲུས་ཀྱང་མི་རིགས་པ་མ་ཡིན་ཏེ་བཀྲུས་ཀྱང་གནང་འཆད་དུའང་གནང་།
ཆུ་བསྲོ་བའི་ཕྱིར་ལྕགས་ཀྱི་ཐུ་ལུམ་མོ། །ལྕགས་ཀྱི་ཐུ་ལུམ་བསྲེགས་ཏེ་ཆུར་བཅུག་ན་ཆུ་དྲོན་པོར་འགྱུར་བའི་ཕྱིར་བཅངས་ཀྱང་ཉེས་མེད་དོ། །ཐམས་ཅད་ལ་མཁོ། ལྕགས་ཀྱི་ཐུ་ལུམ་ནི་ནད་པ་དང་མི་ན་བ་གཉི་ག་ལ་བཅང་དུ་གནང་ངོ་། །དེ་བྱུང་བའི་དེ་ལ་ལྕགས་ཐག་གིས་
เล่ม ๑๖๕ · หน้า 274b
གདགས། ལྕགས་ཀྱི་ཐུ་ལུམ་མེར་བསྲེགས་ཏེ་དེ་ལ་སླར་དབྱུང་དུ་ལག་པ་མི་ཚ་བའི་ཕྱིར་ལྕགས་ཐག་ཕྲེའུས་བཏགས་ལ་དབྱུང་སྲེག་པའི་ཚེ་འཇི་བ་གཤེར་བས་གནན། ཐུ་ལུམ་བསྲེགས་པའི་ལྕགས་འཇི་བས་གཡོགས་ལ་ཐུ་ལུམ་བསྲེག །ཟས་ཀྱིས་རེག་པ་སྲེག་ན་གནས་
མེད་དོ། །ལྕགས་ཀྱི་ཐུ་ལུམ་ཟས་ཀྱིས་རེག་པ་དགེ་སློང་ནད་པ་ཞིག་ཆུ་དྲོན་པོར་བཏུང་དགོས་པར་གྱུར་ན་ཟས་ཀྱིས་འབགས་པའི་ཆུ་བསྲེས་ཏེ་འཐུངས་ཀྱང་ཉེས་མེད་པ་ནི་ཆུ་བསྲེས་པའི་ཚེ་སྤགས་པ་ཡང་བར་འགྱུར་རོ། །བརྟགས་པ་ནི་སྔར་བསྲོ། །བརྟགས་པའི་ཆུ་དང་ཕྱི་རོལ་
ཆེ་ཆུང་གི་ཆུ་བསྲོ་ན། ལྕགས་ཀྱི་ཐུ་ལུམ་བསྲེགས་པས་བརྟགས་པའི་ཆུ་འཐུང་བ་སྔར་བསྲོ། །ཕྱིས་སྤྱད་པའི་འོ། །ཕྱི་རོལ་ཆེ་ཆུང་གི་ཆུ་ཕྱིས་བསྲོ། །སྔར་བསྲོ་ན་ལྕགས་ཀྱི་ཐུ་ལུམ་མི་བཅང་བའི་ཕྱིར་རོ། །མས་གསོ་བའི་འཆང་ནད་པ་ལ་སྨན་པས་ཕན་པར་རྐུབ་ནས་གྱེན་དུ་
གཅེའུ་གཙུགས་པོའི་ནང་དུ་མར་བླུགས་ཏེ་གློ་བརྫང་བ་བཞིན་དུ་དེ་ལྟར་བྱས་ཀྱང་རུང་ངོ་། །གཞན་གྱིས་བསླང་ནུས་པ་ལས་འདི་བྱས་ན་སྦོམ་པོའོ། །མདོ་ལྟག་མ་ལྟར་སྨན་བྱ་བ་ཡང་གཞན་ཅིས་ཀྱང་གསོ་མ་ནུས་ན་གདོད་ལྟག་མའི་སྨན་ཐབས་སུ་བྱ། དེ་ལ་མི་ཚངས་པར་བྱ་
བའམ་དགའ་བར་འདོད་པའི་ཕྱིར་གཅེའུ་བཅུག་ཅིང་བྱེད་ན་ཕས་ཕམ་པའི་སྦོམ་པོའོ། །ཟངས་སམ་ཁར་བའི་སྦུ་གུ་ནི་དགེ་བའི་ལྕགས་ན་ཡིན་ནོ། །སྟེང་མའི་རྐུབ་ཏུ་གཞུག་པའི་སྦུ་གུའི་རྒྱུ་ནི་ཟངས་སམ། ལྕགས་མཉེན་པོ་ལས་བྱས་ཏེ་སྲིད་སོར་བཞི་བཅུ་ལ་རྐུབ་ཀྱི་ནང་དུ་སོར་བཞི་བཅུ་
ལ་ཕྱི་རོལ་དུ་སོར་བརྒྱད་བཞག་སྟེ། སྲང་དུ་འགྲོ་བ་དང་ཕྱི་རོལ་ན་འདུག་པའི་མཚམས་སུ་ཀུན་དེའི་མགོ་འདྲ་བར་བྱ། དེ་བཞིན་དུ་མཚོན་གྱིས་གསོ་བའོ། །ནད་པའི་སྨན་ནི་བྱས་ཀྱང་མ་སོས་ན་གཏར་ག་བྱ། སྨན་གྱིས་གསོར་རུང་བ་ལ་གཏར་ག་བྱས་ན་ཕས་ཕམ་པའི་སྦོམ་པོར་འགྱུར་རོ། །
འདི་ནི་གཏར་ག་གདབ་པ་ལས་གདོད་ལ་གཞན་མི་བྱ། གཏར་ག་གདོད་ལ་བྱ་ན་རྩ་ག་ལ་འདུག་པའི་སྟེང་དུ་བྱས་པ་ནི་ཉེས་མེད་དོ། །རྩ་མེད་པར་བྱས་ན་ཕས་ཕམ་པའི་སྦོམ་པོའོ། །ལུས་ལ་ནི་ཡོད་པ་དང་མེད་པ་གཉིས་ཀ་སྨན་པས་བསྒོ་བ་བཞིན་དུ་བྱས་ཀྱང་ཉེས་མེད་དོ། །མཁྲེན་
เล่ม ๑๖๕ · หน้า 275a
པ་ལས་བཅད་པར་མི་བྱ། དགེ་སློང་མཁྲེན་པས་བཏགས་ཏེ་གཞན་བྱུང་བ་སྨན་པ་ན་རེ་བཅད་ན་ཕན་ནོ་ཞེས་ཟེར་ཀྱང་སྨན་པའི་ངག་མི་ཉན་ཏེ་མི་བཅད་དོ། །མཚོན་གཞན་གང་གིས་ཀྱང་ངོ་། །ལྟག་མ་ལྟར་མཚོན་གྱིས་མི་བཅད་པ་བཞིན་དུ་མཚོན་མ་ཡིན་པ་རྒྱུས་
པ་དང་རྟ་རྔ་དང་སོ་ལ་སོགས་པས་མི་གཅད་དོ། །སྨན་དང་སྔགས་ཀྱིས་གསོ། །སྨན་དང་སྔགས་ཀྱི་ཆོ་ག་བྱ་ཞིང་གསོ། །གཏུམ་པོས། གཞན་འབྱུང་བ་ལ་སོགས་ཏེ་ནད་ཐམས་ཅད་བདག་དང་འཁོན་ཡོད་པའི་སྨན་པ་གསོར་མི་གཞུག །གསོ་བའི་ཕྱིར་ནུབ་མོ་ཟ་བ་མི་རིགས་
པ་མ་ཡིན། དགེ་སློང་ནད་པ་ལ་སྨན་པས་ཕན་པར་བསྒོ་ན་ཕྱི་དྲོ་བཟའ་བ་དང་བཅའ་བ་ཟོས་ཀྱང་ཉེས་མེད། འདི་ལ་བྱིན་ལེན་མ་བྱས་པས་རྩེག་པ་མ་བརྟགས་པར་མ་དོགས་ཤིག །དགེ་སློང་ནད་པ་ནི་ན་བའི་རྐྱེན་གྱིས་བྱིན་ལེན་མ་བྱས་པ་དང་སྤགས་པའང་ཟོས་ཀྱང་ཉེས་མེད་དོ། །
གསོ་བའི་ཕྱིར་དྲིལ་བའི་དུ་བ་བཏུང་། དགེ་སློང་གློ་དང་ཆམ་པ་ན་བ་ལ་གྱོ་མོའི་ནང་དུ་བ་མར་དང་ཕྱེ་གཉིས་བསྲེས་ཏེ་དེའི་དུ་བ་བཏང་ངོ་། །སྤུ་བུས་འདི་སྦྱར་རོ། །དུ་བ་བཏུང་བ་ནི་དུ་བ་འབྱུང་བར་གྱོ་མོ་བརྟོལ་བའི་ནང་དུ་སྦུ་བུ་བཅུག་ལ་སྦུ་བུ་དེའི་ཁར་བཅུག་ལ་དུ་བ་བཏུང་ངོ་། །ལྕགས་
ཀྱིས་བྱ། ལྟག་མ་ལྟར་བཏུང་བའི་སྦུ་བུ་ནི་ལྕགས་ལས་བྱས་ཏེ་ལྕགས་མེད་ན་སྨྱིག་མ་ལས་བྱས་ཀྱང་ཉེས་མེད་དོ། །སོར་བཅུ་གཉིས་ན་དགེ་སྟེ་མི་རྣོ་མི་རྩུབ་པར་རོ། །ལྟག་མ་ལྟར་དུ་བ་རྔུབ་པའི་སྦུ་བུ་སོར་བཅུ་གཉིས་མན་ཆད་བརྒྱད་ཡན་ཆད་གང་བྱས་ཀྱང་རུང་སྟེ་རྩེ་མོ་མི་རྣོ་བ་
དང་ཐག་ཐུག་མེད་པར་བྱ། སྣོད་མར་རམ་ཡུངས་མར་གྱིས་བསྐུས་ཤིང་གཞག །དུ་བ་རྔུབ་པའི་ལྕགས་ཀྱི་སྦུ་བུ་བཙས་མི་འཁྱེར་བའི་ཕྱིར་མར་གྱིས་བསྐུས་ལ་ཕྱིས་བདག་ནའམ་དགེ་སློང་གྲོགས་ན་བའི་ཕྱིར་མི་དོར་བར་སྦ། བ་ལང་གི་སོའམ་གོས་ཀྱི་གདང་དེ་ལ་གཞག །དུ་བ་
རྔུབ་པའི་སྦུ་བུ་སྒྱེའུར་བཅུག་ལ་བ་ལང་སོའི་གོས་ཀྱི་གདང་ངམ་གོས་ཀྱི་གདང་གང་ཡང་རུང་བ་ལ་གདགས། བཀྲུ་བའི་ཕྱིར་མེར་གཞུག །དུ་བ་རྔུབ་པའི་ལྕགས་ཀྱི་སྦུ་བུ་ཆུས་མི་འདག་གི་མེར་བསྲེགས་ན་འདག་གོ། །སྣའི་ལས་བྱ། མཚུལ་པ་སུབས་པ་དང་ཀླད་པ་ན་བའི་ཕྱིར་
เล่ม ๑๖๕ · หน้า 275b
སྨན་པ་ན་རེ་ཆུ་ནས་སྨན་འཐུང་ཞིག་ཅེས་ཟེར་ན་འཐུངས་ཀྱང་ཉེས་མེད། འདི་ནི་སྣའི་བྱ་བར་འགྱུར་རོ། །སྣའི་ནང་དུ་སྨན་བླུགས་པ་ནི་ལྕགས་ལས་བྱེའུ་འདྲ་བར་བྱས་ལ། ཆུ་ལ་གཅེའུ་གཉིས་འཛག་པར་བྱས་ལ། སྣ་བུ་ག་གཉིས་ཀྱི་ནང་དུ་སྨན་བླུགས། བཅུ་གཉིས་པ་མི་རྣོ་བ་
དགེའོ། །ལྟག་མ་ལྟར་སྣར་བླུགས་པའི་གཅེའུ་གཉིས་མི་རྣོ་བ་བྱ། འདི་བྱ། གོང་མ་ལྟར་སྣར་བླུགས་པའི་གཅེའུ་གཉིས་ལྕགས་སམ་ཟངས་ལས་བྱ། ཤ་རྗེན་པ་སྨན་གྱི་ཕྱིར་ཤ་རྗེན་བཟའ། དགེ་སློང་ནད་པ་སྨན་གཞན་གྱིས་མི་འཚོ་སྟེ་སྨན་པ་ན་རེ་ཤ་རྗེན་ཟོ་ཞེས་བསྒོ་ན་
ཟོས་ཀྱང་ཉེས་མེད། དེ་ཟ་མི་ཕོད་ན་ཐབས་སོ། །ནད་པ་ཤ་རྗེན་ཟ་མི་ནུས་ན་ཐབས་འོག་མ་ནས་འབྱུང་བ་ལྟར་བྱ། མིག་སྣམ་བུས་དགབ། ཤ་རྗེན་མིག་གིས་མི་མཐོང་བར་བྱ་བའི་ཕྱིར་ཤ་མ་འོངས་པའི་མདུན་དུ་མིག་སྣམ་བུས་གཡོགས་མི་ལྡང་བའི་ཕྱིར་བསུང་ཞིམ་པོ་དང་བསྲེས་ཏེའོ། །ཤ་རྗེན་ཟོས་པ་
སླར་སྐྱུགས་པར་དོགས་པའི་ཕྱིར་སྤོད་བསུང་ཞིམ་པོ་དང་བསྲེས་ཏེ་བཟའོ། །འབགས་པ་ཕྱུང་སྟེ་ཡིད་དུ་འོང་བའི་བཟའ་བ་དང་བཅའ་བ་མདུན་དུ་བཞག་སྟེ་དགོགས། ལྟག་མ་ལྟར་ཤ་རྗེན་ཟོས་ཟིན་ནས་ཕྱིས་མི་སྐྱུགས་པ་དང་། མི་དགའ་བར་མི་འགྱུར་བའི་ཕྱིར་མིག་གཡོགས་པ་མ་
ཤུས་པའི་མདུན་དུ་ཁ་ར་དང་ལ་དུ་བསུང་ཞིམ་པོ་བཀྲམ་ལ་མིག་གཡོགས་པ་སྣམ་བུ་བཤུ། འདི་ལས་གཞན་པའི་ཕྱིར་འདི་ནི་སྦོམ་པོའོ། །བདག་དང་མི་ན་སྨན་པས་ཀྱང་ཕན་པར་མ་བསྒོ་བར་ཤ་རྗེན་ཟོས་ན་དབྱེན་གྱི་སྦོམ་པོའོ། །མིའི་ཤ་ནི་ཐམས་ཅད་དུའོ། །མིའི་ཤ་ནི་དགེ་སློང་
ནའང་རུང་མི་ན་ནའང་རུང་སྨན་པས་བསྒོའང་རུང་ཟར་མི་གནང་ངོ་། །ཟོས་ན་དབྱེན་གྱི་སྦོམ་པོའོ། །ཕྱིར་བྱས་པས་ཤེས་ན་མི་བཟའ། བདག་གི་ཕྱིར་ཕ་རོལ་གྱི་ཕྱུགས་ཞིག་བསད་དེ་ཤ་བྱིན་ཏེ་ཤེས་བཞིན་དུ་ཟོས་ན་ནའང་རུང་མི་ན་ནའང་རུང་ཉེས་མེད། སྟག་གི་གོད་ལ་མ་ཡིན། སེང་གེ་མ་
གཏོགས་པ་སྟག་ལ་སོགས་པས་ཕྱུགས་སམ་གཅན་གཟན་གྱིས་ཟོས་པའི་ལྷག་མ་ཡང་བཟའ་བར་རེ་བའི་སེམས་ཡོད་པ་བདག་གིས་བླངས་ན་ཉེས་བྱས་བ་ལང་དང་རྟ་དང་ཀླུ་དག་མ་ཡིན། འདི་རྣམས་མིང་གིས་སྨོས་པའི་ཤ་ཟོས་ན་ཉེས་བྱས། རྨིག་པ་གཅིག་པའི་དང་། ཝ་དང་སྤྲེའུ་
เล่ม ๑๖๕ · หน้า 276a
དང་། ཤིང་རྟ་དང་བྱ་རོག་དང་སོ་བྱ་དང་ཁྱུང་དང་འོལ་བ་དང་འུག་པ་དང་དེ་ལས་གཞན་ཡང་རོ་ལ་ཟ་བའི་བྱ་བ་ཀ་དང་ཛ་ཏུ་ཀ་དང་། སྦལ་པ་དང་སྲིན་བུ་འགའ་འདུས་པ་ཀ་དག་གོ། །མིང་གིས་སྨོས་པ་འདི་རྣམས་ཀྱི་ཤ་ཟོས་ན་ཉེས་བྱས། འདི་བཅད་
པའི་ཤ་མ་ཡིན་ནམ་ཞེས་བྱིན་ལེན་བྲིམ་པ་ལ་དྲི། ཤ་ཞིག་གཞན་གྱིས་བྱིན་ན་མ་ཉོའམ་འདྲིམ་ན་ལྟག་མ་མིང་གིས་སྨོས་པ་འདི་རྣམས་ཀྱི་ཤ་མ་ཡིན་ནམ་ཞེས་དྲིས་ཏེ་ཡིན་ན་མི་བཟའ་བ་དང་། ལུག་དང་རའི་ཤ་ནི་བཟར་མི་རུང་། དུ་མ་ན་དང་པོ་པས་དེ་དྲི། ལྟག་མ་ལྟར་འདྲིམ་ན་འདྲི་
བ་ནི་གནས་བརྟན་གྱིས་བྱ། ཕྲི་ན་དྲུང་ན་པས་སོ། །གནས་བརྟན་གྱིས་བརྗེད་ན་དྲུང་ན་སུ་འདུག་པས་ཀྱང་དྲི། བ་གླང་དང་མིའི་འོ་མ་མི་བཏུང་། མིང་གིས་སྨོས་པ་འདི་རྣམས་ཀྱི་འོ་མ་དགེ་སློང་མི་ན་བས་མི་བཏུང་། ནད་པ་ནི་སྨན་པས་ཕན་པར་བསྒོ་ན་འཐུང་དུ་དབང་ངོ་། །མ་སྨད་
པ་ནི་པགས་པའི་རྨ་ལ་གླན་པས་ན་བླུགས་པ་ནེ་མིག་བྱུག་པ་སྟེ་མི་བཟའ་རྣམས་ཀྱིས་སོ། །ལྟག་ཏུ་ཤ་བཟར་མི་རུང་བའི་རྣམས་དང་འོ་མ་རྣམ་གཉིས་ཟོས་ན་ཉེས་བྱས་སུ་འགྱུར་གྱི་མི་བཟའ་བར་འབྲས་སམ་སྣ་ལ་ཕན་པའི་ཕྱིར་གླན་པ་དང་སྲབ་ཅིང་འདུག་པ་ལ་སོགས་པ་ལུས་ཀྱི་ཕྱིར་ལོགས་
སུ་སྤྱད་པ་ནི་ཉེས་མེད་དོ། །ནད་པས་ཆང་ངམ་ཡུངས་མར་རམ་མར་དང་བསྲེས་པ་བཏུང་། དགེ་སློང་ནད་པ་ལ་ཕན་པར་བྱ་བའི་ཕྱིར་མར་རམ་ཡུངས་མར་གྱི་ནང་དུ་ཆང་ཉུང་ཟད་ཅིག་བླུགས་ཏེ་འཐུངས་ཀྱང་ཉེས་མེད། ཉེས་མེད་པ་ནི་ཆང་མ་ཡིན་པ་ནའོ། །ལྟག་མ་ལྟར་མར་དང་
བསྲེས་པའི་ཆང་ཡང་ཁ་དོག་ཀྱང་ཆང་མི་འདྲ་རོ་དང་བསུང་ཡང་ཆང་མི་འདྲ་ན་བཏུང་དུ་རུང་ངོ་། །བསྐོལ་བས་འབྱོར་ཏོ། །ཆང་ཟངས་གང་ཙམ་བསྐོལ་ནས་ཕྱེད་ཙམ་དུ་གདུབས་བསུང་མི་བྲོ་རོ་དང་ཁ་དོག་ཀྱང་ཆང་མི་འདྲ་ན་འཐུང་དུ་རུང་། འདི་སར་བཅུག་པ་ལ་ནས་བརྔོས་པས་
བླུགས་ཏེ་ཚར་གྱུར་ནའོ། །ཆང་བུམ་གང་ཙམ་སའི་འོག་ཏུ་བཅུག་ལ་ཡོས་ཚིག་པར་བརྔོས་ཏེ་ཆང་གི་ནང་དུ་བླུགས་ཏེ་བྱིབས་ཏེ་བཞག་ན་ཚར་འགྱུར་ཏེ་ཁ་དོག་ཀྱང་ཆང་མི་འདྲ་རོའང་ཆང་མི་བྲོ་ན་ཉེས་མེད། རྒུན་ཆང་བསྐོལ་ན་ར་རོ་བར་མི་འགྱུར། རྒུན་ཆང་བསྐོལ་ཏེ་འཐུངས་
เล่ม ๑๖๕ · หน้า 276b
པས་རའང་མི་རོ་ལ་བསུང་ཆང་མི་བྲོ་ན་འཐུངས་ཀྱང་ཉེས་མེད། སོ་སོར་མ་བྱས་ན་ཡོད་པ་མ་ཡིན་ནོ། །རྒུན་འབྲུ་དང་བུ་རམ་ཤིང་དང་ཏིལ་ལྟ་བུ་དགེ་སློང་གྲོགས་ཀྱིས་རེག་པ་བྱིན་ལེན་མ་བྱས་པ་ཟོས་ན་ལྟུང་བར་འགྱུར་ནས་དེ་རྣམས་ཀྱི་ཁུ་བ་བཙིར་བ་དགེ་སློང་གྲོགས་ཀྱིས་བྱིན་
ལེན་མ་བྱས་པར་རེག་པ་འཐུངས་པ་ནི་ཉེས་བྱས་སོ། །བག་ཆགས་པར་གྱུར་ན་ཡོད་པའོ། །སྨོད་དམ་ཆུ་ཁ་ཟས་ཀྱིས་འབགས་པ་ཞིག་ལས་ཟས་བཙོས་ཏེ་ཟོས་པ་རྣམས་ཀྱིས་ཉེས་བྱས་སུ་འགྱུར། གཞན་གྱིས་འབགས་པར་མི་ཤེས་ན་གཞན་ལ་ནི་ཉེས་བྱས་མེད་ཀྱི་སུས་ཤེས་བཞིན་
དུ་བྱིན་པ་དེ་ལ་ཀུན་གྱི་ཉེས་བྱས། ཆང་ལ་བསྲེས་པ་འབྲལ་བའི་ཕྱིར་ཆང་གི་བསུང་གིས་སྤགས་པའི་རྩ་བ་དང་སྡོང་པོ་དང་ལོ་མ་དང་མེ་ཏོག་དང་འབྲས་བུ་དང་སྨན་སྐམ་པོའི་ཕྱེ་མའི་ཆུས་སོ། །དགེ་སློང་ཆང་དད་ཆེ་བ་ལ་ཆང་དང་འབྲལ་བའི་ཕྱིར་མིང་གིས་སྨོས་པ་འདི་རྣམས་
སྨོད་དུ་བཅུག་སྟེ་གླུམ་གྱི་རླངས་པ་ལས་གཏུགས་ཏེ་དེ་ཆུ་དང་བསྲེས་ཏེ་རོ་སྐྱུར་ཙམ་ཅུང་ཟད་ཆང་བྲོ་བ་འཐུངས་ཀྱང་ཉེས་མེད་དོ། །ཆང་གི་སྣོད་ལ་སྤྱད་པའི་གནས་ལ་སྤགས། གོང་མའི་ཕྱེ་མ་རྣམས་རས་དཀར་པོའི་ཐུམ་པོར་བྱས་ལ་ཆང་རླངས་པ་ལ་སྦྱང་། མ་རེག་པར་
བསྲུངས་ཏེ་དེ་བས་ན་བྲི་བ་བརྒྱལ་བ་ཞི་ནས་སོ། །གོང་མ་ལྟར་ཆང་ལ་སྦྱངས་པ་ནི་ཆང་ལ་མ་རེག་པར་ཆང་གི་སྤང་མ་ཁ་ནས་ཕྲིས་ཏེ་བྱས་ཀྱང་རུང་ཆང་གཞོན་ནུ་ནམ་མས་ཡར་རྒལ་བ་ཞིག་མེད་ན་གདོད་སྦྱང་། དེ་བཞིན་དུ་རོ་དང་འབྲལ་བར་བྱེད་པ་དང་དུས་མ་ཡིན་པའི་སྐོམ་ལ་ཟས་
ཀྱང་ངོ་། །མེ་ཏོག་དང་འབྲས་བུ་ལ་ལ་ལྟག་མ་ལྟར་ཕྱེ་མ་བྱ་བ་ནི་རོ་ཁ་བ་དང་མངར་བ་ལས་མི་བྱའི་ཉུག་པ་དང་སྐྱུར་པ་ལས་བྱ། འདི་འདྲ་བར་བཏུང་བ་ཚེ་གཅིག་པ་དང་ཞག་བདུན་པ་ལ་བྱའི་འཕྲལ་དུ་བཏུང་བ་མི་ལ་བྱ་སྟེ་ཁ་ཟས་ཀྱིས་འབགས་ན་ལྟུང་བའི་ཕྱིར་མ་འབགས་པར་བྱ།
མཛེས་པར་ན་དགེ །ཁ་བ་དང་མངར་བའང་རོ་མི་ཞིམ་པས་མི་མཛེས་པ་མ་ཡིན་རྣམ་པ་ཅིག་ཏུ་རྙོག་མ་དང་སྐྱོ་མ་ལྟ་བུ་ཡོད་ན་མཛེས་པའི་ཕྱིར་རས་ཀྱིས་བཙགས་ལ་གཙང་མར་བྱས་ཏེ་བཏུང་། དེ་བས་ན་རས་མ་དཀར་པོས་ཐུམ་པོ་བྱ། ལྟག་མ་ལྟར་གཙང་སྦྲ་དང་དང་བར་བྱ་བ་ནི་
เล่ม ๑๖๕ · หน้า 277a
རས་དཀར་པོའི་ནང་དུ་ལྟག་མའི་སྡོང་པོ་དང་མེ་ཏོག་དང་ལོ་མ་བཅུག་ལ་བཙིར་ན་དང་བ་དང་གཙང་སྦྲར་འགྱུར་བའི་ཕྱིར་དེ་ལྟར་བྱའོ། །ནད་པས་ཀྱང་ཆང་རྩྭའི་ཏོར་ཏོ་འང་མི་བཏུང་ངོ་། །ནད་པ་དང་མི་ན་བས་ཀྱང་རུང་ཏེ་ཆང་ཉིད་ནི་ཆུང་ངུ་དང་རྩྭ་མཆོག་ཙམ་ཡང་
འཐུང་དུ་མི་གནང་ངོ་། །དགེ་བསྙེན་དང་ཐམས་ཅད་ཀྱང་སྦྱིན། དགེ་སློང་རྣམ་བཞི་དང་དགེ་བསྙེན་མན་ཆད་ཁྱིམ་པ་སུ་ལ་ཡང་རུང་ཆང་བླུད་ན་ཉེས་བྱས། དགེ་སློང་རྣམ་བཞིས་ཀྱང་གཞན་ལ་ཆང་བླུད་ན་ཉེས་བྱས། དགེ་བསྙེན་མན་ཆད་ཀྱིས་གཞན་ལ་ཆང་བླུད་ན་བསོད་
ནམས་མ་ཡིན་པ་སྡིག་པ་སྐྱེའོ། །གསོ་བའི་ཕྱིར་མ་གཏོགས་པ་ནི་རང་བཞིན་གྱི་ཁ་ན་མ་ཐོ་བ་དང་བཅས་པ་སྟེ་ལྷག་མ་ཐམས་ཅད་དོ། །ཕས་ཕམ་པ་བཞི་དང་ཆང་ལྟ་བུ་ནི་སྲོག་ལ་བབ་ཀྱང་མི་བཏུང་ཞིང་མི་དྲལ་ལོ། །ལྟག་ཏུ་རྨེ་བ་ཅན་གྱི་ཤ་མི་བཟའ་བ་དང་མི་དང་རྟའི་འོ་མ་མི་
འཐུང་བ་དང་ཆང་མར་དང་བསྲེས་པ་དང་བསྐོལ་བ་ལ་སོགས་པ་ནི་གཞན་གྱིས་མི་འཚོ་ན་དབེན་པར་འཐུངས་ཀྱང་ཉེས་མེད་དོ། །བཙང་དང་སྒོག་སྐྱ་དང་རྒྱ་སྒོག་ཀྱང་མི་བཟའ། མིང་གིས་སྨོས་པ་འདི་རྣམས་མི་བཟའ་ཟོས་ན་ཉེས་བྱས་སོ། །ནད་པས་ནི་དབེན་པར་རོ། །ལྟག་མ་
ལྟ་བུའི་སྒོག་པ་རྣམས་ནད་པས་ནི་ཆོ་ག་ལ་ཕན་པའི་ཕྱིར་མཚམས་ཀྱི་ཕྱི་རོལ་དུ་དབེན་པར་བཟའ། ཟ་བ་དང་དེའི་འོག་ཏུ་བཙང་ནི་ཞག་བདུན་དགེ་སློང་གིས་སྒོག་པ་བཙང་ཟོས་ནས་ཞག་བདུན་པ་སོང་སྟེ་གཙུག་ལག་ཁང་དུ་འཇུག །སྒོག་སྐྱ་ནི་ཞག་གསུམ། སྒོག་སྐྱ་ཞག་ཏུ་ཟོས་
ན་རུང་ཟོས་ནས་ཞག་གསུམ་ཟོས་ཏེ་གཙུག་ལག་ཁང་དང་དགེ་འདུན་གྱི་ནང་དུ་འཇུག་གོ། །རྒྱ་སྒོག་ནི་ཞག་གཅིག་ལས་གཙུག་ལག་ཁང་དུ་མི་སྤྱད། དགེ་སློང་གིས་དབེན་པར་རྒྱ་སྒོག་ནི་ལྟག་མ་བས་རོ་ཆུང་བའི་ཕྱིར་ཞག་གཅིག་བསངས་ཏེ་གཙུག་ལག་ཁང་དུ་འགྲོ། མལ་སྟན་ལ་
མི་སྤྱད། ལྟག་ཏུ་སྒོག་པ་རིམ་པ་གསུམ་ལ་ཞག་ཏུ་བསངས་པ་བཞིན་དུ་དགེ་འདུན་གྱི་མལ་སྟན་ལ་ཞག་གཅིག་གི་རིམ་པ་བཞིན་མི་སྤྱད། བཤང་སར་མི་འཇུག །ལྟག་མའི་ཞག་གྲངས་རིམ་པ་བཞིན་དུ་དགེ་འདུན་གྱི་བཤང་སར་མི་འཇུག །གཟགས་པར་མ་ཡིན། ལྟག་མའི་
เล่ม ๑๖๕ · หน้า 277b
ཞག་རིམ་པ་བཞིན་གཅིན་གཅི་བའི་སར་ཀྱང་མི་འཇུག །དགེ་འདུན་གྱི་ནང་དུ་མི་འཇུག །ལྟག་མའི་སྒོག་པ་རྣམས་ཟོས་ཏེ་ཞག་གྲངས་མ་ཚང་བར་དགེ་འདུན་གྱི་ནང་དུ་མི་འགྲོ། མཆོད་རྟེན་གྱི་མཚམས་སུ་མ་ཡིན། སྒོག་པ་ཟོས་ཏེ་ཞག་གྲངས་མ་ཚངས་པར་མཆོད་རྟེན་ལ་
ཕྱག་འཚལ་དུ་མི་འགྲོ །དེའི་ཚད་ནི་འདོམ་མོ། །བདག་དང་པའི་ཤས་ཆེ་སྟེ་མཆོད་རྟེན་ལ་ཕྱག་མི་འཚལ་དུ་མི་རུང་ན་མཆོད་རྟེན་དང་བར་འདོམ་གང་ཙམ་གྱིས་བཅད་ལ་བསྐོར། ཁྱིམ་པ་ལ་ཆོས་མི་བཤད། སྒོག་པ་ཟོས་པའི་ཞག་གྲངས་མ་ཚང་པར་ཁྱིམ་པ་ལ་ཆོས་མི་བཤད།
དད་པའི་དགེ་བསྙེན་ཕྱིར་མི་ནུར་བ་ལ་བཤད་ཀྱང་ཉེས་མེད། གྲོང་དུ་མི་འགྲོ །སྒོག་པ་ཟོས་པའི་ཞག་གྲངས་མ་ཚང་བར་གྲོང་དང་ཁྱིམ་དང་ཁྱིམ་དུ་མི་འགྲོ །འགྲོ་བ་མང་པོའི་ཕྱོགས་སུ་མ་ཡིན་སྒོག་པ་ཟོས་ཏེ་ཞག་མ་ཚང་བར་དགེ་འདུན་འདུ་བའི་སའམ་མི་མང་པོ་འདུ་བའི་སར་མི་
འགྲོ །མཐར་ཁྲུས་སོ། །སྒོག་པ་ཟོས་ཏེ་ཞག་གྲངས་ཚང་ན་ཁྲུས་བྱ། གོས་ལ་བསུང་བ་བསལ། བདག་སྒོག་པ་ཟ་བའི་ཚེ་གོས་ལ་རེག་པ་རྣམས་མེད་པར་བྱས་ཏེ་ཐབས་འོག་ནས་འཆད། བཀྲུ་བ་དང་བདུགས་སོ། །གོང་མ་ལྟར་གོས་སྒོག་པས་རེག་པ་ནི་བཀྲུས་ལ་སྒོག་
པའི་རོ་མེད་པར་བྱ་བའི་ཕྱིར་པོག་གམ་སྤོས་ཀྱིས་བདུག །རྫིང་བུ་ཚུན་ཆད་ལ་ལོ་ཉེས་པའོ། །འོག་ནས་མདོ་རྫིང་བུ་ཞེས་བྱུང་བ་ཡན་ཚད་ལོ་ཉེས་པའི་ཚེ་དབང་བ་ལ་འཆད་དེ། ཕྱི་རོལ་བཞིན་དུ་བཙོ་གནས་པ་ལ་ཡང་བསྔོས་ཏེ་བརྟགས་ནའོ། །ལོ་ཉེས་ཀྱི་ཚེ་མཚམས་ཀྱི་ནང་དུ་
བཙོས་པ་དང་། མཚམས་ཀྱི་ནང་དུ་ཞག་གཅིག་ལོན་པའི་ཟས་དང་དགེ་སློང་གིས་བཙོས་པ་དང་བྱིན་ལེན་མ་བྱས་པ་དང་། དགེ་སློང་གིས་ཚང་མང་ནས་བླངས་ཏེ་གུད་དུ་ཟ་བ་དང་ཕྱི་དྲོ་འབྲས་བུ་རྒུན་འབྲུ་ལ་སོགས་པ་དང་། ཤིང་ཏོག་པུ་ཀ་རེ་ལ་སོགས་པ་ཕྱི་དྲོ་ཡང་ཡང་ཟ་བ་དང་།
བདག་གིས་བཙོས་པ་དང་ཕྱི་དྲོ་རྒུན་དང་འབྲས་བུ་པ་ཀ་རེ་ལ་སོགས་པ་འདི་བརྒྱད་ཀྱང་ཕྱི་དྲོ་ལོ་ཉེས་པའི་ཚེ་བཟར་དབང་ངོ་། །བསྔོའོ། །ལོ་ཉེས་པའི་ཚེ་མཚམས་ཀྱི་ནང་དུ་ཚང་མང་དང་སྲིས་འཚོད་བསྔོར་རུང་ངོ་། །ལོ་ཉེས་མ་བྱུང་བའི་ཚེ་བསྔོར་མི་དབང་ངོ་ཞེས་ཏི་ཀ་ལས་འཆད་
เล่ม ๑๖๕ · หน้า 278a
དོ། །ལོ་ཉེས་པ་མ་བྱུང་ཡང་སྔགས་ཀྱིས་གདབ་ཅིང་བསྔོར་རུང་ངོ་ཞེས་འདུལ་བ་འཛིན་པས་བཤད་དོ། །ཤིང་དྲུང་དང་བ་ལང་གི་གནས་དང་མུར་འདུག་གི་གནས་དང་རྒྱལ་པོའི་གྲོང་གི་དངོས་པོ་དང་དགེ་སློང་མའི་དབྱར་མོ་ཐང་གཙུག་ལག་ཁང་གི་ཕྱི་རོལ་གྱི་ཁྱིམ་ས་
དང་སྒོ་ཕུབས་དང་ཁྱམས་དང་བསྲོ་གང་གི་གནས་སུ་ཡང་མ་ཡིན་ནོ། །མི་དགེ་སློང་གི་ཚང་མང་དང་སྲིས་མཛོད་མིང་གིས་སྨོས་པ་འདི་རྣམས་ཀྱི་གནས་སུ་ལོ་ཉེས་པ་དང་མ་ཉེས་པ་འདྲ་སྟེ་བསྔོར་མི་དབང་། བླ་གབ་མེད་པ་དང་མིའི་གནས་དང་མཆོད་རྟེན་གྱི་གནས་དང་། ཁྱིམ་གྱི་
གནས་སུ་ཡང་ངོ་ཞེས་གཞན་ལས་སོ། །མིང་གིས་སྨོས་པ་འདི་རྣམས་ཀྱི་གནས་སུ་ཚང་མང་དང་སྲིས་མཛོད་བྱར་མི་རུང་ངོ་ཞེས་འདུལ་བ་འཛིན་པ་ཁ་ཅིག་གིས་བཤད། བསྒྲུབ་པ་དང་བཙོ་བ་དེར་མི་བྱ། ལྟག་ཏུ་ཤིང་དྲུང་དང་ཞེས་བྱ་བ་མན་ཆད་གཞན་ལས་སོ་ཞེས་བྱ་བ་ཡན་
ཆད་མི་གནས་སུ་ཚང་མང་དང་སྲིས་མཛོད་བསྔོ་བ་མ་གཏོགས་ཀྱི་སྣོད་སྤྱད་གཞག་པ་དང་ཁ་ཟས་བཙོ་བའང་གནས་དེར་མི་བྱའོ། །བཙོ་བ་བཟླས་པ་མི་བྱ་བ་ཡང་ངོ་། །ལྟག་ཏུ་མིང་གིས་སྨོས་པ་འདི་རྣམས་ཀྱི་གནས་སུ་ཁ་ཟས་བཙོས་ཟིན་པ་ཞིག་སླར་བཙོ་བའམ་མ་ཚོས་པ་བཙོ་བའི་
གནས་ཀྱང་དེར་མི་བྱ། དེ་ལ་དུས་བཞི་སྟེ། ཚང་མང་དང་སྲིས་མཛོད་བརྟགས་ན་རུང་བའི་གནས་བཞི་ཡོད་དེ་འོག་ནས་འཆད་པ་ཡིན་ནོ། །ཐོག་མའི་ཕ་གུ་འཇོག་པ་ནའོ། །ཐོག་མ་གཙུག་ལག་ཁང་རྩིག་ཅིང་རྨང་འདིང་བ་ན་ཚང་མང་དང་སྲིས་མཛོད་དུ་བསྔོས་ནའང་རུང་། སྟེང་དུ་
ལས་སར་པ་དང་བཅས་པ་ནའོ། །ཁང་པ་བརྩིགས་ཏེ་གཞག་ཀུན་ཟིན་ལ་སྐྱང་ནུལ་ལམ་རི་མོ་ཙམ་མ་ཟིན་པར་བསྔོས་ནའང་རུང་ངོ་། །གཞན་གྱི་དུས་དགེ་སློང་གི་གནས་མ་བྲལ་བའོ། །གཙུག་ལག་ཁང་ཟིན་ཏེ་དགེ་སློང་ནང་དུ་ལྷགས་ནས་ཟླ་བ་དང་ཞག་དུ་ལོན་ཀྱང་རུང་སྟེ། གཙུག་
ལག་ཁང་དང་དགེ་སློང་གཅིག་ཀྱང་ཞག་དུ་མ་བྲལ་ན་བསྔོས་ན་རུང་ངོ་། །གནས་སུ་མ་གྱུར་པ་ནི་འདི་དག་མེད་པ་ལས་དགེ་སློང་དག་བྱིན་ནའོ། །དགེ་སློང་གིས་གཙུག་ལག་ཁང་ཡོང་མ་བཏང་སྟེ་སྟོང་པར་འགྱུར་བ་ལས་དགེ་སློང་ཁ་ཅིག་གུད་ནས་ལྷགས་ཏེ་ཞག་མ་ལོན་པར་ཚང་
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด