ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པའི་ཚིག་གི་དོན་གྱི་ཟླ་ཟེར་ཞེས་བྱ་བ
ชื่อสันสกฤต (อักษรทิเบต ตามตัวบท) པ་དཱརྠ་ཙནྡྲ་ཀ་པྲ་བྷཱ་བ་ཏི་ནཱ་མ་ཨཥྚཱཾ་ག་ཧྲྀ་ད་ཡ་བྲྀཏྟི
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๒๐๑ · หน้า 203a
ཏྲེས་ཀྱི་ཁུ་བ་མར་གྱི་བཞི་འགྱུར་གཞུག་པར་བྱ་ཞིང་། དེ་བཞིན་དུ་ཆུ་དང་བཅས་པའི་ལྡེ་གུ་བྱ་ན་ཡང་མར་གྱི་བཞི་འགྱུར་བྱའོ། །དེ་བཞིན་དུ་བ་ཤ་ཀའི་ཁུ་བ་དང་ལྡེ་གུ་དང་། འབྲས་བུ་གསུམ་གྱི་ཁུ་བ་དང་ལྡེ་གུ་དང་། བ་ལེའི་ཁུ་བ་དང་ལྡེ་གུ་སོ་སོར་མར་དང་
བསྐོལ་བའི་སྨན་མར་ནི་རིམས་ནད་འཇོམས་པར་བྱེད་པ་ཡིན་ཏེ། སྨན་མར་འདི་དག་ནི་མར་ཁོ་ན་དང་སྦྱར་བར་བྱ་སྟེ། དེས་ནི་རིམས་ལ་ཕན་པ་ཡིན་པའི་ཕྱིར་དང་། ཞུན་མར་གྱི་སྐབས་ཡིན་པའི་ཕྱིར་རོ། །མར་ཞུ་ནས་ནི་ཤ་འཇམ་ཁུ། །ཁ་ཟས་བཅས་པ་བཟའ་བར་བྱ། །དེས་
ནི་སྟོབས་རབ་སྐྱེད་བྱེད་ཅིང་། །ནད་ནི་ཤིན་ཏུ་ཟད་བྱེད་ཡིན། །ཞེས་བྱ་བ་ལ། སྔར་སྨོས་པའི་སྨན་མར་དེ་དག་གང་ཡང་རུང་བ་བྱིན་ནས་དེ་ཞུ་བར་གྱུར་ཅིང་ལེགས་པར་ཞུ་ཟིན་པ་དང་། ཤ་འཇམ་ཞིང་སྙི་བ་ལས་བྱས་པའི་ཤ་ཁུ་ཡང་པ་སྦྱིན་པར་བྱ་སྟེ། གང་གི་ཕྱིར་ཤ་ཁུ་དེས་
ནི་སྟོབས་རབ་ཏུ་སྐྱེད་ཅིང་འབྱུང་བར་བྱེད་པ་ཡིན་ལ། སྟོབས་སྐྱེད་པས་ནི་ནད་ཟད་པར་བྱེད་པ་ཡིན་ནོ། །ཀ་ར་བེ་ལ་སོགས་ཁུ་དང་། །མུངྒ་བད་ཀན་མཁྲིས་འཇོམས་པས། །ཕལ་ཆེར་རླུང་ཤས་ཆེ་རིམས་ལ། །གཟེར་དང་བཤང་བ་འགགས་པ་ནི། །སྐྱེད་ཅིང་རིམས་ནི་
འཕེལ་བར་བྱེད། །དེ་ཕྱིར་དེ་ནི་བསྔགས་མ་ཡིན། །ཞེས་བྱ་བ་ལ། སྨན་ཀར་བེེ་ལ་ལ་སོགས་པའི་ཁུ་བ་གང་དག་ཡིན་པ་དེ་ནི་བད་ཀན་དང་མཁྲིས་པ་སེལ་ཞིང་ཤས་ཆེར་རླུང་འཕེལ་བར་བྱེད་པ་ཡིན་པས། དེའི་ཕྱིར་རིམས་རྙིང་པ་རླུང་གི་ཤས་ཆེ་བ་ལ་སྦྱིན་པར་མི་བྱ་སྟེ། དེ་ཅིའི་
ཕྱིར་ཞེ་ན། གཟེར་ལ་སོགས་པ་འཕེལ་བར་བྱེད་པས་དེའི་ཕྱིར་བསྔགས་པ་མ་ཡིན་ནོ། །གལ་ཏེ་དེ་ལྟར་བྱས་ཀྱང་ནི། །རིམས་ནི་ཞི་བར་མ་གྱུར་ན། །སྦྱང་འོས་ལ་ནི་སྦྱང་བར་བྱའོ། །ཞེས་བྱ་བ་ལ། དེ་ལྟར་རིམ་བཞིན་དུ་བཅོས་ཤིང་སྨན་མར་བླུད་དུ་ཟིན་ཀྱང་གལ་ཏེ་རིམས་ཞི་
ཞིང་བྱང་བར་མ་གྱུར་ན། དེའི་འོག་ཏུ་སྦྱང་བར་བྱ་བར་མི་འོས་པ་སྦྲུམ་མ་དང་། ཁོང་རྩུབ་པ་དང་། མེ་དྲོད་ཆུང་བ་ལ་སོགས་པ་མ་གཏོགས་པ་སྐྱུག་སྨན་ལ་སོགས་པས་སྦྱང་བར་བྱ། སྐྱུག་སྨན་ནམ་འཁྲུ་སྨན་གང་ཡིན་པ་བྱའོ། །དེ་ལ་སྐྱུག་སྨན་སྔར་བཤད་པ། །མ་ཞུ་བར་
เล่ม ๒๐๑ · หน้า 203b
ནི་གནས་ནད་ལ། །སྟོབས་ཅན་སྟོབས་ནི་བསྲུང་སྟེ་གཏང་། །ཞེས་བྱ་བ་ལ། རིམས་ནད་ཅན་དེ་ལ་སྔར་བཤད་པའི་སྐྱུག་སྨན། པོ་སོན་ཆ་ཡི་སྙིང་པོར་བཅས། །ཞེས་བྱ་བ་ལ་སོགས་པས་ལེའུ་འདི་ཉིད་ཀྱི་ནང་དུ་སྔར་བསྟན་པ་དག་བླུད་པར་བྱ་ལ། དེ་ཡང་མ་ཞུ་བའི་གནས་ལ་
གནས་ཤིང་། དེ་ལ་བརྟེན་པའི་ནད་ཕལ་ཆེར་བད་ཀན་གྱི་ཤས་ཆེ་བའི་ནད་ལ་གཏང་བར་བྱ་ལ། དེ་ཡང་ནད་པ་ཉམས་སྟོབས་དང་ལྡན་པའི་ཉམས་སྟོབས་དེ་མ་ཉམས་པར་བསྲུངས་ལ་སྨན་གཏང་བར་བྱའོ། །སྨིན་ཞིང་ནད་ནི་ལྷོད་གྱུར་བའམ། །ཆང་དང་དུག་ལས་བྱུང་རིམས་
ལ། །ཤ་མ་དུར་བྱིད་འབྲས་བུ་གསུམ། །པི་པི་ལིང་དང་གེ་སར་དང་། །ཡང་ན་ཚ་བ་གསུམ་སོགས་སྨན། །ཁ་ར་སྦྲང་རྩིར་བཅས་པ་སྦྱིན། །ཞེས་བྱ་བ་ལ། ནད་སྨིན་ཅིང་མ་ཞུ་བ་མེད་པ་དང་། ལྷོད་ཅིང་གནས་ལས་གཡོས་པར་གྱུར་པའམ། ཡང་ན་ཆང་ནད་དང་དུག་
ལས་གྱུར་པའི་རིམས་ལ། ཤ་མ་དུར་བྱིད་ལ་སོགས་པའི་ཕྱེ་མ་ལས་སྦྲུས་པའི་བཀྲུ་སྨན་སྦྱིན་པར་བྱའོ། །ཡང་ན་ཚ་བ་གསུམ་ལ་སོགས་པའི་སྨན་ཆོ་ག་གྲུབ་པ་ལས། ཚ་གསུམ་དྲི་བཟང་གསུམ་གླ་སྒང་། །ཞེས་བྱ་བ་ལ་སོགས་པས་བཤད་པའི་སྨན་སྦྲང་རྩི་དང་ཁ་ར་
དང་བཅས་པ་སྦྱིན་པར་བྱའོ། །དེ་བཞིན་དུ། རྒུན་འབྲུ་སྐྱུ་རུ་རའི་ཁུ་བ། །ཨ་རུ་ར་ནི་རྒུན་ཆུར་བཅས། །ཞེས་བྱ་བ་ལ། ཡང་དེ་བཞིན་དུ་བཀྲུ་སྨན་གྱི་ཕྱིར་རྒུན་འབྲུའི་ཁུ་བ་དང་། སྐྱུ་རུ་རའི་ཁུ་བ་བླུད་པའམ། ཨ་རུ་རའི་ཕྱེ་མ་རྒུན་ཆུའི་ནང་དུ་བཏབ་སྟེ་བླུད་པར་བྱའོ། །དོང་ག་འོ་
མར་བཅས་པའམ། །རྒུན་ཆུ་དང་ནི་བཅས་པ་བླུད། །ཅེས་བྱ་བ་ལ། ཡང་ན་དོང་ག་དང་འོ་མར་སྦྱར་བའམ། རྒུན་ཆུ་དང་དོང་གར་སྦྱར་བའི་བཀྲུ་སྨན་བླུད་པར་བྱའོ། །འབྲས་བུ་གསུམ་མམ་ཀྱི་ལྕེ་བ། །འོ་མ་རིམས་དང་ལྡན་པས་བཏུང་། །ཞེས་བྱ་བ་ལ། ཡང་རིམས་
དང་ལྡན་པའི་མིས་འབྲས་བུ་གསུམ་དང་འོ་མ་སྦྱར་བའམ། ཀྱི་ལྕེ་བ་དང་འོ་མར་སྦྱར་བ་བཏུང་བར་བྱའོ། །བཀྲུ་སྨན་བཏང་བའི་སྐབས་སུ་ཡང་། །ཐུག་སླ་ལ་སོགས་རིམ་བཞིན་བླུད། །ཅེས་བྱ་བ་ལ། བཀྲུ་སྨན་བཏང་བའི་སྐབས་སུ་ཡང་ཞེས་བྱ་བའི་ཡང་གི་སྒྲས་
เล่ม ๒๐๑ · หน้า 204a
སྐྱུག་སྨན་བཏང་བའི་སྐབས་སུ་ཡང་ཐུག་པ་སླ་བ་ལ་སོགས་པ་སྦྱིན་པར་བྱ་སྟེ། དེ་ཡང་དང་པོར་འབྲས་ཐུག་སླ་བ་རྐྱང་རྐྱང་པོར་བྱིན་ནས། དེའི་འོག་ཏུ་ཐུག་པ་དང་ཐུག་པ་གར་པོ་ལ་སོགས་པ་རིམ་པ་ཇི་ལྟ་བ་བཞིན་དུ་སྦྱིན་པར་བྱའོ། །རིམ་གྱིས་དྲི་མ་གློངས་
གཡོས་ཚེ། །དེ་ལ་རྟག་ཏུ་དགག་མི་བྱ། །ནད་ནི་ཁོང་པར་གནས་སྙེག་ནས། །སྨིན་ཀྱང་གནོད་པ་སྐྱེད་པར་འགྱུར། །ཞེས་བྱ་བ་ལ། རིམས་ཀྱི་ཚ་བ་ལ་སོགས་པས་ནད་གློངས་ཤིང་བསྐྱོད་པས་སྟོད་དང་སྨད་དུ་གཡོས་ཤིང་བསྐྱོད་ནས་རིམ་གྱིས་བཤང་བ་ཞེས་བྱ་བའི་དྲི་མ་འབྱུང་
བར་བྱེད་པ་དེ་ལ་རྟག་ཏུ་དགག་ཅིང་བརྣག་པར་མི་བྱ་སྟེ། གང་གི་ཕྱིར་ནད་སྨིན་པར་གྱུར་ཀྱང་ཞེས་བྱ་བའི་སྒྲས་མ་སྨིན་པ་ལྟ་སྨོས་ཀྱང་ཅི་དགོས་ཏེ། དེ་དག་བཀག་པར་གྱུར་ན་ཁོང་པ་ཞེས་བྱ་བ་ལུས་ཀྱི་ཕྱོགས་སུ་གནས་སྙེག་ཅིང་འདུག་པའི་སྐབས་རྙེད་པས་དེས་ངེས་པར་ནད་ཀྱིས་
གནོད་པ་སྐྱེད་པར་འགྱུར་རོ། །ཤིན་ཏུ་ཚབས་ཆེར་བྱུང་གྱུར་ན། །སྨིན་ནས་གཅད་པར་བྱ་བ་ཡིན། །ཞེས་བྱ་བ་ལ། ཡང་ན་བཤང་བ་ཚབས་ཆེར་འབྱུང་བའི་ནད་དེ་ཤིན་ཏུ་ཚབས་ཆེར་བྱུང་བར་གྱུར་ན་མ་སྨིན་པ་སྨིན་པར་བྱས་ནས། བཅད་ཅིང་དགག་པའི་ཉེས་པ་བྱའོ། །མ་
སྨིན་བཀག་པའི་ཉེས་པ་ནི། །ནད་བཅོས་ཐབས་སུ་བཤད་པ་ཡིན། །ཞེས་བྱ་བ་ལ། འཁྲུ་བམ་སྨིན་པ་རང་ཉིད་འབྱུང་བར་གྱུར་པ་བཀག་ཅིང་བཅད་པ་ལས། ནད་ཀྱི་ཉེས་པ་གང་དག་བྱུང་བ་དེ་ནི་ནད་གསོ་བའི་ལེའུའི་སྐབས་སུ་བཤད་པ་ཡིན་ཏེ། དེ་ཡང་དེ་ལས། སྟེང་ངམ་
འོག་ཏུ་འབྱུང་བར་རྩོམ། །ནད་ནི་རང་ཉིད་བྱུང་བ་ན། །སྨན་ནི་ནད་ཀྱིས་མི་དགག་སྟེ། །བཀག་ན་དེ་ཉིད་ནད་སྐྱེད་འགྱུར། །ཞེས་བཤད་པ་ཡིན་ནོ། །གང་ཞིག་རྨོངས་པས་མ་སྨིན་པའི། །རིམས་ལ་ནད་འབྱིན་སྨན་གཏོང་བ། །དེ་ནི་སྦྲུལ་ནག་གཉིད་ལོག་ལ། །
ལག་པའི་རྩེ་མོས་རེག་དང་མཚུངས། །ཞེས་བྱ་བ་ལ། སྨན་པ་གང་ཞིག་རྨོངས་ཤིང་མི་ཤེས་པས་ནད་མ་སྨིན་པའི་རིམས་ལ་ནད་འབྱིན་པའི་སྨན་བཀྲུ་སྨན་གྱི་རྣམ་པ་གཏོང་ཞིང་ལྡུད་པར་བྱེད་ན། སྨན་པ་དེ་ནི་བདག་ཉིད་ཕུང་ཀྲོལ་བསྐྱེད་པ་ཡིན་ཏེ། དཔེར་ན་སྦྲུལ་ནག་པོ་
เล่ม ๒๐๑ · หน้า 204b
ཉིད་ཀྱིས་གཉིད་ལོག་པར་གནས་པ་ལ། ལག་པའི་རྩེ་མོས་རེག་ན་དེ་སད་ནས་མ་རུངས་པར་བྱེད་པ་དང་མཚུངས་སོ། །རིམས་ཟད་པ་ལ་སློན་སྨན་དང་། །བཀྲུ་སྨན་ཕན་པ་མ་ཡིན་ཏེ། །དེ་ལ་འམ་དག་གིས་ནི། །མས་གཏོང་བས་ནི་ནད་བསལ་བྱ། །ཞེས་བྱ་བ་ལ། རིམས་ཀྱིས་ཉམས་
ཟད་པར་གྱུར་པའམ། རིམས་ཟད་པའི་མི་ལ་སློན་སྨན་དང་བཀྲུ་སྨན་གཏང་བ་དག་ཕན་པ་མ་ཡིན་ཏེ། བཀྲུ་སྨན་གྱིས་བཅོས་དགོས་པའི་གནས་སྐབས་ལ་བབ་ན་དེ་ལ་འོ་མ་མས་གཏོང་བའི་ནི་རུ་ཧའམ། འཇམ་རྩི་མས་གཏོང་པས་ནད་བསལ་བར་བྱའོ། །འོ་མ་ལ་གོམས་བད་ཀན་
ཟད། །ལུས་ཚ་སྐོམ་དད་གཉིས་ཡོད་ན། །རླུང་དང་མཁྲིས་པས་ཉེན་པ་ནི། །ཚད་པར་འཁྲུ་ཡང་འོ་མ་ཕན། །ཞེས་བྱ་བ་ལ། ནད་པ་འོ་མ་ལ་གོམས་ཤིང་དེ་སྦྱིན་པར་འོས་པ་དང་། ཁྱད་པར་དུ་བད་ཀན་ཟད་ཅིང་བྱང་བ་གང་ཡིན་པ་དེ་ལ་ལུས་ཚ་བ་དང་སྐོམ་དད་ཀྱི་ནད་གཉིས་
ཡོད་པ་དང་། དེ་བཞིན་དུ་རླུང་དང་མཁྲིས་པས་ཉེན་པར་གྱུར་ན་དེ་ལ་འོ་མ་བླུད་ན་ཕན་ཏེ། དེ་ནི་གལ་ཏེ་ཚད་པར་འཁྲུ་བའི་ནད་ཡོད་པ་ལ་ཡང་ཕན་ན། གཞན་ལྟ་སྨོས་ཀྱང་ཅི་དགོས། །དེ་ལུས་སྨྱུང་བས་གདུངས་པ་དག། །མེས་ཚིག་པ་ཡི་ནགས་ལ་ནི། །ཆར་ཆུ་འབབ་པས་སྐྱེད་པ་
ལྟར། །རིམས་ནི་མྱུར་དུ་སེལ་བར་བྱེད། །ཅེས་བྱ་བ་ལ། འོ་མ་དེས་ལུས་སྨྱུང་བས་གདུངས་ཤིང་ལེན་པར་གྱུར་པ་དག་མྱུར་དུ་འཚོ་ཞིང་བརྟས་པར་བྱེད་དེ། དཔེར་ན་མེས་ཚིག་ཅིང་བསྲེགས་པའི་ནགས་ལ་ཆར་པའི་ཆུ་འབབ་པས་སྐྱེད་ཅིང་སླར་མྱུ་གུ་སྐྲུན་པར་བྱེད་པ་དང་འདྲ་བར་འོ་
མ་བླུད་པར་འོས་པའི་ནད་པ་རིམས་ཀྱིས་ལུས་ཟད་པར་བྱས་པ་ལ། འོ་མ་བླུད་ན་ནི་རིམས་དེ་མྱུར་དུ་སེལ་ཞིང་འཇོམས་པར་བྱེད་དོ། །དེ་བས་འོ་མ་སྦྱར་ཏེ་བསྐོལ། །དྲོ་བའམ་བསྒྲངས་པའམ་བཞོས་མ་ཐག །དུས་ཀྱི་དབྱེ་བ་ཤེས་ཏེ་སྦྱིན། །དེ་ལས་གཞན་དུ་རིམས་ཅན་
གསོད། །ཅེས་བྱ་བ་ལ། དེ་བས་འོ་མ་དེ་ནི་རྫས་གཞན་དང་སྦྱར་ཏེ་བསྐོལ་བ་དྲོ་བའམ་བསྒྲངས་པ། ཡང་ན་བཞོས་མ་ཐག་གང་ཡིན་པ་དེ་ཇི་ལྟར་འོས་ཤིང་རིགས་པ་དང་དུས་ཀྱི་དབྱེ་བ་ཤེས་ཤིང་བརྟགས་པ་བྱས་ལ། དེ་ལྟ་བུའི་ཚུལ་གྱིས་སྦྱིན་པར་འོས་པའི་ཡུལ་ལ་སྦྱིན་པར་
เล่ม ๒๐๑ · หน้า 205a
བྱའི། དེ་ལས་གཞན་དུ་དེ་དང་མི་འཚམ་ཞིང་གནོད་པར་འགྱུར་བའི་ཕྱིན་ཅི་ལོག་གི་ཡུལ་ལ་འོ་མ་བླུད་པར་གྱུར་ན། རིམས་ནད་ཅན་གྱི་ནད་པ་དེ་གསོད་པར་འགྱུར་རོ། །འོ་མ་བཅའ་སྒ་འབྲ་གོར་བཅས། །རྒུན་འབྲུ་ཁ་ར་མར་ལྡན་པར། །བསྐོལ་ཏེ་བསྒྲངས་
པར་སྦྲང་རྩི་བཏབ། །སྐོམ་དད་ལུས་ཚ་རིམས་འཇོམས་བྱེད། །ཅེས་བྱ་བ་ལ། འོ་མ་བཅའ་སྒ་ལ་སོགས་པ་དང་བསྐོལ་ཞིང་བཙོས་ཏེ་བསྒྲངས་པར་སྦྲང་རྩི་བཏབ་པ་ནི་སྐོམ་དད་ལ་སོགས་པ་འཇོམས་པར་བྱེད་པ་ཡིན་ནོ། །དེ་བཞིན་པ་ལ་རྒུན་ཤིང་མངར། །ཙནྡན་ཐལ་ཏྲེས་པི་
པི་ལིང་། །ཞེས་བྱ་བ་ལ། སྔར་བཤད་པའི་འོ་མ་དེ་དང་འདྲ་བ་ཡིན་པས་དེ་བཞིན་ཏེ། བ་ལ་དང་རྒུན་འབྲུ་ལ་སོགས་པ་དང་བསྐོལ་བའི་འོ་མ་བསྒྲངས་པ་སྦྲང་རྩི་བཏབ་པས་ནི་སྐོམ་དད་ལ་སོགས་པ་འཇོམས་པར་བྱེད་པ་ཡིན་ནོ། །འོ་མའི་བཞི་འགྱུར་ཆུར་བསྐོལ་བའམ། །
པི་པི་ལིང་དང་བསྐོལ་བ་ནི། །རིམས་ཀྱིས་བཏབ་པས་འཐུངས་ན་ནི། །ཀླད་གཟེར་ལུད་པ་དབུགས་མི་བདེ། །རྩིབ་ལོགས་གཟེར་རིམས་རྙིང་ལས་ཐར། །རྩ་བ་ལྔ་བསྐོལ་དེ་དང་འདྲ། །ཞེས་བྱ་བ་ལ། ཡང་བརྟག་པ་གཞན་དུ་ན་འོ་མའི་བཞི་འགྱུར་གྱི་ཆུའི་ནང་དུ་བསྐོལ་
ནས་གདུས་པའི་འོ་མ་བཏུང་བའམ། པི་པི་ལིང་དང་བསྐོལ་བའི་འོ་མ་བཏུང་བར་བྱ་སྟེ། འོ་མ་དེ་འཐུངས་ན་རིམས་ནད་ཅན་དེ་ཀླད་གཟེར་ལ་སོགས་པ་ལས་ཐར་བར་འགྱུར་རོ། །དེ་བཞིན་དུ་རྩ་བ་ལྔ་དང་བསྐོལ་བའི་འོ་མ་སྨན་པ་མཁས་པའི་ལུང་བཞིན་དུ་འཐུངས་ན་ཡང་ཀླད་པ་
གཟེར་བ་ལ་སོགས་པ་ལས་ཐར་བར་འགྱུར་རོ། །ཡང་ན་རྩ་བ་ཆེན་པོ་ལྔ་དང་བསྐོལ་བའི་འོ་མ་འཐུངས་ན་ཡང་ཡོན་ཏན་དེ་དང་འདྲ་བ་ཡིན་ནོ། །རིམས་རྙིང་པ་ནི་རིང་ཞིག་ཏུ་གནས་པའི་རིམས་ལ་བྱའོ། །ཨེ་རཎྜའི་རྩ་བསྐོལ་བའམ། །བིལ་བ་གཞོན་ནུ་དང་བསྐོལ་བའམ། །
བཞོས་མ་ཐག་གི་འོ་མ་འཐུངས། །རླུང་གི་རིམས་ཀྱིས་ཕྱི་ས་འགགས། །ཁྲག་བཅས་སྦྱིན་བག་ཚད་འཁྲུ་དང་། །སྐོམ་དད་གཟེར་བཅས་འཁྲུ་ལས་ཐར། །ཞེས་བྱ་བ་ལ། ཡང་ན་འོ་མ་ཨེ་རཎྜའི་རྩ་བ་དང་བསྐོལ་བའམ། བིལ་བ་གཞོན་ནུ་དང་ལྷན་ཅིག་བསྐོལ་བའམ། །
เล่ม ๒๐๑ · หน้า 205b
བཞོས་མ་ཐག་པའི་འོ་མ་འཐུངས་ན་མི་དེ་རིམས་ལས་ཐར་བར་འགྱུར་བ་དང་། ཡང་རླུང་གི་རིམས་ཀྱིས་ཕྱི་ས་འགགས་ཤིང་སྲི་བར་གྱུར་པ་དེ་ལས་ཐར་བ་དང་། དེ་བཞིན་རིམས་གང་ཁྲག་དང་བཅས་པའི་སྦྱིན་བག་ནལ་ནལ་བོར་འཁྲུ་བ་དང་། དེ་བཞིན་དུ་ཚད་པར་འཁྲུ་བ་དང་། དེ་
བཞིན་དུ་སྐོམ་དད་ལ་སོགས་པ་དང་བཅས་པའི་འཁྲུ་བ་ལས་ཀྱང་ཐར་བར་འགྱུར་རོ། །བཅའ་སྒ་བ་ལ་བྱ་གྲི་དང་། །གཟེ་མ་བུ་རམ་འོ་མར་བཙོས། །བསྐོལ་འཐུངས་སྐྲངས་བཤང་གཅིན་དང་འཕྱེན། །འགགས་དང་རིམས་དང་ལུད་པ་འཇོམས། །ཞེས་བྱ་བ་ལ། དེ་བཞིན་དུ་
བཅའ་སྒ་ལ་སོགས་པ་དང་བསྐོལ་བའི་འོ་མ་འཐུངས་ན་ཡང་རིམས་ནད་ཅན་གྱི་སྐྲངས་པ་ལ་སོགས་པའི་ནད་འཇོམས་པར་འགྱུར་རོ། །བྲི་ཤྩི་བ་དང་བིལ་བ་དང་། །བར་ཤ་བྷུ་དང་བསྐོལ་བ་ཡིས། །རིམས་ཀྱི་སྐྲངས་ནད་སེལ་བ་ཡིན། །ཞེས་བྱ་བ་ལ། བྲིཤྩི་བ་ལ་སོགས་པ་
དང་བསྐོལ་བའི་འོ་མ་འཐུངས་ན་ཡང་རིམས་ལས་གྱུར་པའི་སྐྲངས་ནད་སེལ་ཞིང་འཇོམས་པ་ཡིན་ནོ། །དེ་ལ་བྲི་ཤྩི་བ་དང་བར་ཤ་བྷུ་གཉིས་ཀ་ཡང་བུ་ན་རྣ་བ་ཡིན་ཏེ། བྲི་ཤྩི་བ་ནི་པུ་ན་རྣ་བ་རྩ་བ་དཀར་བ་ཅན་ལ་བྱའོ། །བར་ཤ་བྷུ་ནི་པུ་ན་རྣ་བ་མེ་ཏོག་དམར་པོ་ཅན་ལ་བྱ་སྟེ། མིང་གི་
རྣམ་གྲངས་གཞན་དུ་ན་སི་ནི་ན་ཏི་ཀ་ཞེས་བྱའོ། །ཤིང་ཤ་པ་ཡི་སྙིང་པོ་དང་། །འོ་མ་དག་ཏུ་བསྐོལ་བ་ནི། །རིམས་ནི་མྱུར་དུ་འཇོམས་བྱེད་ཡིན། །ཞེས་བྱ་བ་ལ། ཤིང་ཤ་པའི་སྙིང་པོ་ནི་ནང་གི་སྙིང་པོའི་སྲ་བ་ལ་བྱ་སྟེ། སྙིང་པོ་དེ་དང་འོ་མར་བསྐོལ་བ་འཐུངས་ན་རིམས་མྱུར་
དུ་འཇོམས་པར་བྱེད་པ་ཡིན་ནོ། །འདིར་སྨན་རྣམས་ཀྱི་ཚད་དང་ཆུའི་ཚད་དང་བསྐོལ་བའི་ལྷག་མ་ལུས་པའི་ཚད་དང་འོ་མའི་ཚད་ནི་སྨན་པ་རྒན་པོ་མཁས་པའི་ཀུན་ཏུ་སྤྱོད་པའི་ལུང་དང་རིགས་པ་དང་། སྨན་དཔྱད་ཀྱི་བསྟན་བཅོས་ཀྱི་རྩ་བ་ལས་བཤད་པའི་ཚུལ་ལ་བརྟེན་ནས་
དཔྱད་པར་བྱ་སྟེ། དེས་ན་དང་པོར་སྨན་གྱི་ཆུ་དང་བསྐོལ་བར་བྱས་ལ། ཆུ་དེ་དང་ནི་འོ་མར་བསྐོལ་བར་བྱས་པ་ནི་རིགས་པ་ཡིན་ནོ། །འདིར་ཆུ་དང་སྨན་གྱི་ཚད་ནི་སྨན་དཔྱད་ཀྱི་བསྟན་བཅོས་ཀྱི་རྗེས་སུ་འབྲངས་པས་བརྟག་པར་བྱ་སྟེ། དེ་ཡང་རྒྱུད་གཞན་ལས། གང་དུ་ཟས་སྐོམ་
เล่ม ๒๐๑ · หน้า 206a
སྨན་རྣམས་ནི། །སྦྱོར་བ་བྱེད་པར་འདོད་པ་དང་། །ནས་ཐུག་ཤ་ཁུ་ཡུ་ཤ་དང་། །ཤ་ཁུ་ཡང་དང་བཏུང་བ་སོགས། །དེར་ནི་ཚད་དག་སྦྱར་བྱ་བ། །འཇིག་རྟེན་གྲགས་ལས་ཅི་རིགས་བྱ། །ཡང་ན་ཇི་ཙམ་རན་པ་དང་། །ཤིན་ཏུ་སྨན་རགས་མི་འགྱུར་
བྱ། །གང་དུ་ཟས་དང་སྐོམ་ལ་ནི། །ཁྱབ་དྲོ་དེ་ཙམ་སྨན་གཞུག་གོ། །དེ་ལས་གཞན་དུ་ནས་ཐུག་སོགས། །ཉེས་པ་སྐྱེད་པར་བྱེད་པ་ཡིན། །ཞེས་བཤད་པ་ཡིན་ནོ། །མཁས་པ་རྣམས་ཀྱི་བསྟན་བཅོས་ཤེས་པ་དག་འདི་སྐད་ཅེས་འཆད་དེ། འདིར་སྨན་གྱིས་ཤས་ཆེར་
ཁྱབ་ཅིང་གྲགས་པར་མི་འགྱུར་བ་དེ་ཙམ་དུ་བཞག་པ་ནི་རན་པ་ཡིན་ནོ་ཞེས་འཆད་དོ། །དེ་ནས་ཆུ་འོ་མའི་ཆིག་འགྱུར་རམ། ཉིས་འགྱུར་རམ། སུམ་འགྱུར་རམ། བཞི་འགྱུར་གྱིས་འོ་མའི་ལྕི་བ་ལ་སོགས་པའི་ནུས་པ་དབྲི་ཞིང་བསྐྱེད་པར་བྱ་བའི་ཕྱིར། ནད་དམིགས་ཇི་ལྟ་བ་ལས་
དཔྱད་དེ་འོ་མ་བསྐོལ་བར་བྱའོ། །དེ་ལ་འོ་མ་བསྐོལ་བའི་སྦྱོར་བའི་ཁྲོད་དུ་སྨན་གང་དག་སྨོས་པ་དེ་དག་ཐམས་ཅད་ཆུར་བསྐོལ་ནས། ཆུ་དེས་འོ་མ་བསྐོལ་བར་བྱ་བ་མ་ཡིན་གྱི། གཞན་དུ་ན་མར་དང་འོ་མ་ཤ་ཁ་ར་ལ་སོགས་པ་སྨན་ལ་ལ་ནི་མ་བསྐོལ་བར་དེ་ཉིད་དང་འོ་མ་བསྲེས་ལ་འོ་
མ་དེ་བསྐོལ་བར་བྱ་སྟེ། དེ་དག་ནི་འོ་མ་བསྐོལ་བའི་ཆོ་ག་བཤད་པ་ཡིན་ཏེ། །དེ་ལྟར་འོ་མ་བསྐོལ་བར་བྱའོ་ཞེས་འཆད་དོ། །དེ་ཡང་འདི་ལྟར། གླ་སྒང་འོ་མར་བསྐོལ་བ་ནི། །ཉི་ཤུ་འོ་མའི་སུམ་འགྱུར་ཆུར། །བསྐོལ་ཏེ་འོ་མ་ལུས་པ་བཏུང་། །མ་ཞུ་ནད་དང་བཅས་པ་འཇོམས། །
ཞེས་བཤད་པ་འདི་ལ་འོ་མ་ནི་དངོས་སུ་དགོས་པའི་ཕྱིར་དང་། སྦྱོར་བའི་དབང་དུ་བྱས་པའི་ཕྱིར་གཙོ་བོ་ཡིན་ནོ། །དེ་བཞིན་དུ། སྒོག་སྐྱ་སྐམ་པོ་འབའ་ཞིག་ནི། །སྲང་བཞི་བཙོས་པར་གྱུར་པ་ལ། །འོ་མ་ཆུ་ཡི་བརྒྱད་འགྱུར་བྱས། །འོ་མ་ལྷག་མ་ལུས་པ་བཏུང་། །ཞེས་
བཤད་པ་ཡིན་ནོ། །ནད་སྨིན་ཞུ་བའི་གནས་སོང་ལ། །མས་གཏོང་དྲག་པོས་མེ་སྟོབས་སྐྱེད། །རིམས་བྲལ་སེམས་དགའ་ཡི་ག་འབྱེད། །མྱུར་དུ་སྐྱེད་པར་བྱེད་པ་ཡིན། །ཞེས་བྱ་བ་ལ། ནད་སྨིན་པར་འགྱུར་བ་ཞུ་བའི་གནས་ལྟེ་བ་མན་ཆད་དུ་སོང་ཞིང་ཕྱིན་པ་ལ་བཀྲུ་
เล่ม ๒๐๑ · หน้า 206b
སྨན་དྲག་པོ་དང་ནི་རུ་ཧ་བཏང་བར་གྱུར་ན་མེའི་དྲོད་བསྐྱེད་པ་དང་། ལུས་ཀྱི་ཉམས་སྟོབས་བསྐྱེད་པ་དང་། རིམས་དང་བྲལ་ཞིང་སེལ་བ་དང་། སེམས་དགའ་ཞིང་རངས་པ་དང་། ཡི་ག་འབྱེད་ཅིང་ཟས་ལེན་པར་བྱེད་དོ། །བཀྲུ་སྨན་མཁྲིས་པའམ་བད་མཁྲིས་འདྲེས། །མཁྲིས་
པའི་གནས་སུ་ཞུགས་པ་སེལ། །ཞེས་བྱ་བ་ལ། བཀྲུ་སྨན་གྱི་སྦྱོར་བ་བཏུང་བས་ནི། མཁྲིས་པའི་ནད་མཁྲིས་པའི་གནས་ན་གནས་ཤིང་བརྟེན་པའམ། བད་ཀན་མཁྲིས་པའི་གནས་སུ་ཞུགས་པ་སེལ་བར་བྱེད་དོ། །འཇམ་རྩིས་ནད་ནི་གསུམ་ཆར་དག །ཞུ་བའི་གནས་
ལ་བརྟེན་པ་སེལ། །ཞེས་བྱ་བ་ལ། འཇམ་རྩི་བཏང་བས་ནི་རླུང་ལ་སོགས་པའི་ནད་གསུམ་ཆར་ཞུ་བའི་གནས་ལྟེ་བ་མན་ཆད་ལ་བརྟེན་པ་སེལ་ལོ། །འོ་མས་བད་ཀན་མཁྲིས་པ་དག །མཇུག་ཏོ་རྒྱབ་དང་རྐེད་པ་ན། །མེ་དྲོད་ཆེ་ལ་རྟུག་འགགས་པ། །འཇམ་རྩི་མས་གཏོང་སྦྱར་
བར་བྱ། །ཞེས་བྱ་བ་ལ། རིམས་ཀྱི་གནས་སྐབས་འདིར་འོ་མས་བད་ཀན་དང་མཁྲིས་པ་དང་ལྡན་པའི་ནད་པ་མཇུག་ཏོ་ལ་སོགས་པ་ན་བར་འགྱུར་གྱི། མེ་དྲོད་ཆེ་བར་གྱུར་པས་རྟུག་པ་འགགས་ཤིང་སྲི་བར་གྱུར་ན་སྣུམ་གྱི་འཇམ་རྩི་མས་གཏོང་བ་སྦྱར་བར་བྱའོ། །ནིམ་པ་པ་ཏོ་ལའི་
ལོ་མ། །པུ་ཙེ་ཤེལ་དང་དོང་ག་དང་། །སྠི་ར་བ་ལ་པོ་སོན་ཆ། །གཟེ་མ་པུ་ཤེལ་བ་ལ་ཀ །འོ་མའམ་ཆུར་ནི་བསྐོལ་བ་དང་། །འོ་མ་ལྷག་མ་ལུས་པ་ལ། །གླ་སྒང་ཤིང་མངར་པོ་སོན་ཆ། །པི་པི་ལིང་དང་དུག་མོ་ཡུངས། །མར་དང་སྦྲང་རྩི་བསྲེས་པ་ཡི། །འཇམ་རྩི་བཏང་ན་རིམས་
འཇོམས་སོ། །ཞེས་བྱ་བ་ལ། ནིམ་པའི་ལོ་མ་ལ་སོགས་པའི་སྨན་དང་འོ་མའམ་ཆུ་དང་བསྐོལ་བ་འོ་མ་ལྷག་མ་ལུས་པ་ལ་གླ་སྒང་ལ་སོགས་པའི་ལྡེ་གུ་དང་བསྲེས་ལ། མར་དང་སྦྲང་རྩི་དང་སྦྱར་བའི་འཇམ་རྩི་བཏང་བ་ནི་རིམས་ནད་ཐམས་ཅད་འཇོམས་ཤིང་སེལ་བ་ཡིན་ནོ། །
འདིར་ནིམ་པ་ལ་སོགས་པའི་སྨན་དེ་རྣམས་ཀྱི་བརྒྱད་འགྱུར་གྱི་འོ་མ་དང་། ཆུ་ཡང་ཚད་དེ་ཙམ་གཞུག་པར་བྱ་སྟེ། བསྐོལ་བའི་ལྷག་མ་སྨོས་པས་སྨན་གྱི་བཞི་འགྱུར་བྱ་བ་ཡིན་མོད་ཀྱི། འོ་མའི་ལྷག་མ་ཞེས་སྨོས་པས་བཞི་འགྱུར་དུ་མི་བྱའོ། །འདིར་ལྡེ་གུ་ནི་སྐ་བའི་བརྒྱད་
เล่ม ๒๐๑ · หน้า 207a
ཆ་གཞུག་པར་བྱའོ། །ཡང་ན་ཚོད་ཇི་ཙམ་གྱིས་ཤིན་ཏུ་སྐ་བ་འམ། སླ་བ་མ་ཡིན་པའི་ཚུལ་དུ་མར་དང་སྦྲང་རྩི་གཞུག་པར་བྱའོ། །ཡང་ན། །མར་དང་སྦྲང་རྩི་སོ་སོར་ནི། །སྲང་གསུམ་ཙམ་གྱི་ཚོད་དུ་བྱ། །ཞེས་སྨོས་པ་ལྟར་ཤེས་པར་བྱའོ། །ནིམ་པ་དང་པ་
ཏོ་ལ་གཉིས་ཀྱི་ནི་ལོ་མ་ལ་བྱའོ། །སྠི་ར་ནི་ས་ལ་པརྞིའོ། །པརྞི་བཞི་དང་ཤིང་མངར་དང་། །པོ་སོན་ཆ་དང་པུ་ཤེལ་ཙེ། །དོང་ག་རྣམས་ནི་བསྐོལ་བ་རུ། །ཤིང་མངར་ཤ་ཏ་པུཥྤ་དང་། །པྲི་ཡང་ཀུ་དང་པོ་སོན་ཆ། །གླ་སྒང་ལྡེ་གུར་བྱས་པ་ལ། །བུ་རམ་དང་ནི་སྦྲང་རྩིར་བཅས། །འཇམ་
རྩིས་རིམས་ནི་སེལ་བྱེད་ཡིན། །ཞེས་བྱ་བ་ལ། མ་ཤ་པརྞི་ལ་སོགས་པའི་སྨན་བསྐོལ་བའི་སྦྱོར་བས་བསྐོལ་བར་ཤིང་མངར་ལ་སོགས་པའི་སྨན་འཇམ་རྩིའི་ཆོ་ག་ལ་སོགས་པའི་རྣམ་པ་ལྟར་ལྡེ་གུ་བྱས་པ་དང་སྦྱར་ཞིང་བུ་རམ་དང་སྦྲང་རྩི་དང་མར་དང་བཅས་པའི་འཇམ་རྩིས་ནི་རིམས་
སེལ་བར་བྱེད་པ་ཡིན་ནོ། །དེ་ལ་པརྞི་བཞི་ནི་མ་ཤ་པརྞི་དང་། མུངྒ་པརྞི་དང་། ཀྲྀཥྞ་པརྞི་དང་། ས་ལ་པརྞིའོ། །པོ་སོན་ཆ་ནི་མ་ད་ལ་ན་ཕ་ལའོ། །དོང་ག་ནི་ཨ་རག་ག་ཏའོ། །ཛི་བན་ཏི་དང་པོ་སོན་ཆ། །མེད་ཤིང་མངར་པི་པི་ལིང་། །ཤུ་དག་རིད་དྷི་ར་སྣ་དང་། །བ་ལ་དང་ནི་བིལ་བ་དང་།
ཤུ་ཏི་དང་ནི་ཉེའུ་ཤིང་རྣམས། །མར་དང་ཏིལ་མར་འོ་མ་དང་། །ཆུ་དང་བཏགས་ཏེ་ལྷན་ཅིག་བསྐོལ། །སྣུམ་ནི་ནད་དང་རྗེས་མཐུན་པའི། །འཇམ་རྩི་རིམས་ལ་གཏང་བར་བྱ། །ཞེས་བྱ་བ་ལ། ཛི་བན་ཏི་ལ་སོགས་པའི་སྨན་རྣམས་མར་དང་ཏིལ་མར་དང་། འོ་མ་ཆུ་དང་ལྷན་ཅིག་
བཏགས་ཏེ་ལྡེ་གུར་བྱས་ཏེ་ལྷན་ཅིག་བསྐོལ་བའི་འཇམ་རྩི་རིམས་ནད་ལ་གཏང་བར་བྱའོ། །འདིར་ནི་ཏིལ་མར་དང་ཞུན་མར་ནི་ཆ་མཉམ་པར་བྱའོ། །ཆུ་དང་འོ་མ་ནི་སྣུམ་གྱི་ཉིས་འགྱུར་བྱའོ། །སྨན་སྤྱིར་བསྡུས་པའི་བཞི་ཆའི་སྣུམ་དང་སྦྱར་ལ་སྣུམ་གྱི་བཞི་ཆའི་ལྡེ་གུ་གཞུག་པར་བྱ་ཞིང་།
སྣུམ་དེ་ཡང་ནད་ཀྱི་ཤས་གང་ཆེ་བ་ལས་དཔགས་ཏེ་དེ་དང་རྗེས་སུ་མཐུན་པར་ཞུན་མར་རམ་ཏིལ་མར་གཞུག་པར་བྱའོ། །གང་ཡང་ཆོ་ག་གྲུབ་པ་ལས། །རིམས་སེལ་བར་ནི་བཤད་པ་ཡི། །འཇམ་རྩི་དག་ཀྱང་གཏང་བར་བྱ། །ཞེས་བྱ་བ་ལ། ཆོ་ག་གྲུབ་པའི་གནས་ལས་
เล่ม ๒๐๑ · หน้า 207b
འཇམ་རྩིའི་སྐབས་སུ་འཇམ་རྩི་གང་ཞིག་རིམས་སེལ་བར་བཤད་པ་དེ་ཡང་རིམས་ནད་ཅན་ལ་སྦྱིན་པར་བྱའོ། །སྣ་ཡི་བཀྲུ་སྨན་རིམས་རྙིང་ལ། །བཏང་ན་ཡི་ག་འབྱེད་བྱད་ཅིང་། །མགོ་ནི་ལྕི་ཞིང་བད་ཀན་ཆེ། །སེལ་ཞིང་དབང་པོ་གསལ་བྱེད་ལ། །སྣུམ་གྱི་སྣ་སྨན་མགོ་སྟོང་སྙམ། །
ལུས་ཚ་མཁྲིས་པ་སེལ་བྱེད་ཡིན། །ཞེས་བྱ་བ་ལ། རིམས་རྙིང་པར་གྱུར་པ་ལ་སྣའི་བཀྲུ་སྨན་གཏང་བར་བྱ་སྟེ། དེས་ནི་ཡི་ག་འབྱེད་པར་བྱེད་པ་དང་། མགོ་ནད་ལ་སོགས་པ་སེལ་བར་བྱེད་པ་ཡིན་ལ། རིམས་རྙིང་པར་གྱུར་པ་མགོ་བོ་སྟོང་པ་སྙམ་དུ་སེམས་པ་ལ་ནི་གནས་སྐབས་
ཀྱི་བྱེ་བྲག་ལ་མཁས་པའི་སྨན་པས་སྣུམ་གྱི་སྣ་སྨན་བཏང་ཞིང་། ལུས་ཆེ་བ་ལ་སོགས་པ་སེལ་བར་བྱེད་པའི་སྣ་སྨན་ཡང་གཏང་བར་བྱའོ། །དུད་བརྔུབ་མཁུར་བཀང་མཁུར་བ་སྤོ། །ནད་དམིགས་ཇི་བཞིན་སྦྱར་བར་བྱ། །ཆམ་པས་ཁས་རོ་མི་ཚེར་དང་། །མགོ་དང་ལྐོག་ནད་སེལ་
བྱེད་ཡིན། །ཞེས་བྱ་བ་ལ། དེ་བཞིན་དུ་རིམས་རྙིང་པ་ལ་ནི་དུད་པ་བརྔུབ་པ་ལ་སོགས་པའི་སྦྱོར་བ་མདོའི་གནས་ལས་ཇི་སྐད་བསྟན་པ་དག་ནད་དམིགས་ཀྱི་ཚུལ་དང་སྦྱར་ཞིང་གཏང་བར་བྱ་སྟེ། དེས་ནི་ཆམ་པ་ལ་སོགས་པ་སེལ་བར་བྱེད་པ་ཡིན་ནོ། །ཡི་ག་འཆུས་ལ་ཁ་ལུང་
གི། །གེ་སར་མར་དང་རྒྱམ་ཚར་བཅས། །ཡང་ན་རྒུན་འབྲུ་སྐྱུ་རུ་ར། །ཁ་རའི་ལྡེ་གུ་མཁུར་བར་བཅང་། །ཞེས་བྱ་བ་ལ། རིམས་རྙིང་པ་ལ་ཡི་ག་འཆུས་པའི་ནད་བྱུང་བར་གྱུར་པ་ན། ཁ་ལུང་ཞེས་བྱ་བ་མ་དུ་ལུང་གའི་གེ་སར་མར་དང་རྒྱམ་ཚར་སྦྱར་བའམ། རྒུན་འབྲུམ་ལ་སོགས་
པ་ཆུ་བཏགས་སུ་བྱས་པའི་ལྡེ་གུ་མཁུར་བར་བཅང་ཞིང་ཁར་གཞག་པར་བྱའོ། །རིམས་རྙིང་པགས་པ་ལ་བརྟེན་ལ། །རེག་ན་ཇི་ལྟར་བདེར་འགྱུར་བའི། །སྨན་པ་སིལ་དྲོ་བ་ལས་སྦྱར་བའི། །བསྐུ་བྱུག་ཆུ་བླུགས་ལ་སོགས་བྱ། །མིག་སྨན་དུད་པའི་སྦྱོར་བའང་བྱ། །
གློ་བུར་བྱུང་ལ་དེ་དེ་བཞིན། །ཞེས་བྱ་བ་ལ། རིམས་རྙིང་པ་པགས་པ་ཙམ་ལ་བརྟེན་ཞིང་གནས་པའི་ལྷག་མ་ལུས་པ་ལ་རེག་ན་ཅི་ནས་བདེ་ཞིང་ཕན་པར་འགྱུར་བའི་སྨན་བསིལ་བ་དང་། འཕྲོད་དམ་བདེ་བ་དང་འཕྲོད་པ་ཅི་རིགས་པ་ལས་བདེ་བ་སྐྱེད་པར་འགྱུར་བ་དང་མི་འགལ་
เล่ม ๒๐๑ · หน้า 208a
བའི་སྨན་གྱི་སྦྱོར་བ་བྱས་ལ། སྨན་དེ་བསྐུ་བ་ལ་སོགས་པ་ཅི་རིགས་པར་བྱའོ། །དེ་བཞིན་དུ་རིམས་རྙིང་པ་པགས་པ་ལ་གནས་པ་ལ་མིག་སྨན་དང་དུད་པའི་སྦྱོར་བ་ཇི་སྐད་བསྟན་པ་དག་ཀྱང་བྱའོ། །གློ་བུར་དུ་བྱུང་བའི་རིམས་གདོན་དང་དུག་ལས་བྱུང་བ་ལ་ཡང་རེག་
ན་ཇི་ལྟར་བདེ་བའི་སྨན་ལ་སྦྱར་བའི་བསྐུ་བ་དང་། བྱུག་པ་ལ་སོགས་པ་བྱའོ། །ཚ་ལ་ལན་སྟོང་བཀྲུས་པ་ཡི། །མར་གྱིས་བསྐུ་བ་སྤྱད་པར་བྱ། །ཞེས་བྱ་བ་ལ། རིམས་རྙིང་པ་ལུས་ཆེ་བ་དང་བཅས་པ་ལ་ལན་སྟོང་ཞེས་པའི་མཚོན་པ་ལན་མང་དུ་ཆུའི་ནང་དུ་བཀྲུས་ཤིང་མཉེས་པའི་
མར་གྱིས་བསྐུ་བར་བྱ་སྟེ། དེ་ཡང་དང་པོར་མ་བསྲུབས་པ་གང་ཡིན་པ་དེ་ཆུའི་ནང་དུ་བཅུག་ལ། ལག་པ་གཉིས་ཀྱིས་ལན་བརྒྱ་ཕྲག་དུ་མར་ཡང་དང་ཡང་དུ་མཉེ་བར་བྱའོ། །མདོ་གནས་ལས་བཤད་སྨན་གྱི་སྡེ། །མངར་དང་སྐྱུར་དང་བསྐ་བ་དང་། །དཱུར་བ་ལ་སོགས་རླུང་མཁྲིས་
འཇོམས། །སྐྱུག་སྨན་ལ་སོགས་སྡེ་ཚན་བཤད། །ནུས་པ་བསིལ་ཞིང་རེག་ན་གྲང་། །བསྐོལ་དང་ལྡེ་གུར་བྱས་པ་དང་། །ཏིལ་མར་འོ་མར་བཅས་བསྐོལ་བ། །བསྐུས་ན་འཕྲལ་དུ་ཚ་རིམས་སེལ། །ཞེས་བྱ་བ་ལ། སྔར་མདོའི་གནས་སུ་བཤད་པའི་སྨན་གྱི་སྡེ་ཚན་མངར་བ་དང་སྐྱུར་བ་
དང་བསྐ་བའི་སྨན་མངར་བའི་སྡེ་ཚན་ནི། མར་དང་བུ་རམ་དང་གསེར་ལ་སོགས་པ་དང་། སྐྱུར་བའི་སྡེ་ཚན་སྐྱུ་རུ་ར་དང་སྟར་བུ་ལ་སོགས་པ་དང་། བསྐ་བའི་སྡེ་ཆེན་ཨ་རུ་ར་ལ་སོགས་པ་སྟེ། སྡེ་ཚན་དེ་དག་བསྐོལ་བར་བྱ་བའམ། ལྡེ་གུར་བྱ་བའམ། ཏིལ་མར་བསྐོལ་བའམ། །ཡང་
ན་དཱུར་བ་ལ་སོགས་པའི་སྡེ་ཚན་ཏེ། དཱུར་བ་དང་ནི་བྱི་ཚེར་བ། །ཞེས་བྱ་བ་ལ་སོགས་པའི་གཞུང་གིས་བསྟན་པ་ཐལ་ཏྲེས་ཀྱིས་མཐར་ཐུག་པ་དང་། ཏིལ་མར་བསྐོལ་བར་བྱ་བའམ། །སྐྱུག་སྨན་ལ་སོགས་པའི་སྡེ་ཚན་བསྡུས་པའི་སྐབས་སུ་བཤད་པ་ནུས་པ་བསིལ་བ་རེག་ན་གྲང་
བ་སྟེ་འཕྲལ་གྱི་རེག་པ་དང་། ཞུ་བའི་ནུས་པ་གཉིས་ཀ་ཡང་བསིལ་བར་གྱུར་པ་དེ་བསྐོལ་བ་དང་། ལྡེ་གུར་བྱས་པ་དང་། ཏིལ་མར་འོ་མ་དང་བཅས་པར་བསྐོལ་བ་དེས་བསྐུས་ན་འཕྲལ་དུ་དེ་རིང་པོ་མི་ཐོགས་པའི་དུས་སུ་ཚ་བའི་རིམས་སེལ་བར་བྱེད་དོ། །འདིར་བསྐོལ་བ་
เล่ม ๒๐๑ · หน้า 208b
སྨོས་པས་ནི་སྨན་གྱི་ཁུ་བ་དང་སྦྱར་ལ། ལྡེ་གུ་སྨོས་པས་ནི་ལྡེ་གུ་དང་སྦྱར་ཏེ། ཏིལ་མར་གྱི་ཉིས་འགྱུར་གྱི་འོ་མ་དང་སྦྱར་ཏེ་བཙོས་པ་བསྐུ་བར་བྱའོ། །མགོ་དང་ལུས་ཀྱང་དེ་ཉིད་ནི། །ཅུང་ཟད་རྩིང་པར་བཏགས་པས་བསྐུ། །ཞེས་བྱ་བ་ལ། སྨན་གྱི་སྡེ་དེ་དག་དང་ཏིལ་མར་བསྐོལ་བ་
འབའ་ཞིག་ཏུ་མ་ཟད་ཀྱི། །ཚ་བའི་རིམས་དེ་དག་ཞི་བར་བྱ་བའི་ཕྱིར་སྨན་དེ་དག་ཅུང་ཟད་རྩིང་དུ་བཏགས་ཏེ། ཧ་ཅང་ཞིབ་མོར་བཏགས་པ་མ་ཡིན་པས་མགོ་དང་ལུས་བསྐུ་བར་བྱའོ། །གལ་ཏེ་སྨན་འདི་དག་ཤིན་ཏུ་ཞིབ་ཏུ་བཏགས་ཏེ་བསྐུས་ན་སླར་ཞིང་ཚ་བ་འཕེལ་བར་བྱེད་པ་ནི་རིགས་
པ་ཁོ་ན་ཡིན་ནོ། །དེ་ཡང་གཞུང་ལས། ཞིབ་ཏུ་བཏགས་ཤིང་རྟག་བསྐུས་ན། །ལྤགས་གནས་དྲོད་ནི་བཀག་པའི་ཕྱིར། །ཙནྡན་གྱིས་ཀྱང་ཚ་མི་སེལ། །གཞན་དུ་ཨ་ཀ་རུས་སེལ་བསྐྱེད། །དེ་བསྐོལ་ཆུ་ནི་བླུགས་པ་དང་། །ལུས་འབྱིང་ལ་ཡང་སྦྱར་བར་བྱ། །ཞེས་བྱ་བ་ལ།
སྡེ་ཚན་དེ་དག་ཉིད་བསྐོལ་བའི་ཆུ་དྲོ་འཇམ་ལུས་ལ་བླུགས་པ་དང་། སྨན་ཆུ་དེས་སྣོད་ཆེན་པོ་བཀང་ལ་དེར་ལུས་བྱིང་བ་ལ་ཡང་སྦྱར་བར་བྱའོ། །སྐྱུར་རྩབས་ཆུ་དང་འོ་མ་ཚ། །མར་ལ་སོགས་པའང་དེ་བཞིན་སྦྱར། །ཞེས་བྱ་བ་ལ། དེ་བཞིན་དུ་རང་སྐྱུར་ལ་སོགས་པ་དག་གིས་བླུགས་
པ་དང་། ལུས་འབྱིང་བའི་སྦྱོར་བ་ཡང་བྱ་སྟེ། དེས་ཀྱང་པགས་པར་གནས་པའི་རིམས་རྙིང་པ་སེལ་བར་བྱེད་དོ། །བིལ་རྐང་ཁ་ལུང་ཨ་མྲ་དང་། །སེའུ་འབྲུ་སེང་ཕྲོམ་བི་ད་རི། །ཤུ་དག་ལོ་མ་ལས་བྱུང་བའམ། །ལུང་ཐང་གི་ནི་ལྦུ་བ་ཡིས། །ལུས་བསྐུས་ཆེ་ན་རྨོངས་བག་
དང་། །སློན་དང་སྐོམ་དད་ཞི་བར་བྱེད། །ཅེས་བྱ་བ་ལ། བིལ་བའི་རྐང་དེ་བིལ་བའི་སྙིང་པོ་ཞེས་བྱ་བ་ལ་སོགས་པའི་སྨན་ཇི་སྙེད་པ་ལས་རེ་རེ་འམ། མ་ལུས་པའི་ལྡེ་གུས་ལུས་བསྐུས་ན། ཚ་བ་ལ་སོགས་པའི་ནད་སེལ་བར་འགྱུར་རོ། །གང་ཞིག་ནད་གསོའི་ཐབས་སུ་
བཤད། །མཁྲིས་པ་སེལ་བའི་རིམ་པ་དེ། །བསྟེན་པར་བྱས་ན་མྱུར་དུ་ནི། །ཚ་དང་བཅས་པའི་རིམས་སེལ་འགྱུར། །ཞེས་བྱ་བ་ལ། ནད་གསོ་བའི་ལེའུའི་སྐབས་སུ་མཁྲིས་པ་བསལ་བའི་ཆོ་ག་དག་སྔར་བཤད་པ། མཁྲིས་པ་ལ་ནི་མར་སར་བླུད། །ཅེས་བྱ་བ་ལ་སོགས་
เล่ม ๒๐๑ · หน้า 209a
པའི་གཞུང་གིས་བསྟན་པ་དེ་བ་སྟེན་ཅིང་གོམས་པར་བྱས་ནས་ཚ་བ་དང་བཅས་པའི་རིམས་སེལ་ཅིང་ཞི་བར་འགྱུར་རོ། །ནུས་པ་དྲོ་ཞིང་རེག་ན་དྲོ། །རྒྱ་སྤོས་གུར་གུམ་ཨ་ག་རུ། །རུ་རྟ་རྡོ་དྲེག་སྟོ་ན་ཡ། །སར་ལ་དང་ཐང་ཤིང་དང་། །ཆུ་སྲིན་སེན་མོར་སྣ་དང་། །གུ་གུལ་
ཤུ་དག་ལྕ་བ་དང་། །སུག་སྨེལ་གཉིས་དང་ཙ་རོང་དང་། །ཙནྡན་སིབ་དང་བྱེའུ་རུག་པ། །ཤི་ཀྲུ་སྤོང་སྤོས་བྱ་མ་ཀ །ཡུངས་ཀར་རྩ་བ་བཅུ་པ་དང་། །སླེ་ཏྲེས་ཨེ་རཎྜ་གཉིས་དང་། །བ་རུ་ར་དང་རོ་ཧི་ཤ།།ཏ་མ་ལ་ཡི་ལོ་མ་དང་། །པུ་ཏིག་དང་ས་ལ་ཀི །འུ་སུ་ཨ་ཟ་མོ་ཏ་དང་། །ཤུ་
ཏི་མ་ཤ་ཀུ་ལངྠ། །ཙིཏྲ་ཀ་དང་པྲ་ཀི་དྱ། །ན་ཀུ་ལ་ནི་རྣམ་གཉིས་དང་། །གཞན་ཡང་དེ་འདྲའི་བསིལ་བའི་སྨན། །བསྐོལ་དང་ལྡེ་གུར་བྱས་ནས་ནི། །ཆང་དང་སྐྱུར་རྩབས་ལ་སོགས་སྦྱར། །ཏིལ་མར་བསྐོལ་བ་གྲང་རིམས་སྦྱར། །ཞེས་བྱ་བ་ལ། ནུས་པ་ཡང་དྲོ་ཞིང་རེག་པ་ཡང་དྲོ་བ་སྟེ།
ཨ་ག་རུ་ལ་སོགས་པའི་སྨན་གང་ཡང་རུང་བ་ལ་ནུས་པ་དང་རེག་པ་གཉི་ག་དྲོ་བ་དང་ལྡན་པ་དེ་དག་བསྐོལ་བའི་སྨན་གྱི་ཆུ་དང་། ཆང་དང་སྐྱུར་རྩབས་ལ་སོགས་པ་དང་སྦྱར་ལ། ཏིལ་མར་དང་བསྐོལ་བ་དག་གྲང་བའི་རིམས་ལ་སྦྱར་ཞིང་གཏང་བར་བྱའོ། །དེ་ཡང་སྨན་ལྔ་ཡན་ཆད་
ནི་སྣུམ་དང་མཉམ་པར་བྱའོ། །ཆང་ལ་སོགས་པ་ནི་གང་རྙེད་པ་དང་སྦྱར་བར་བྱའོ། །སྟོ་ནེ་ཡ་ནི་ཙ་ར་ཏི་དང་ཏ་ལེ་པ་ཏ་ཀ་ཞེས་བྱ་བ་ལ་སོགས་པའི་མིང་གིས་བསྟན་པའོ། །རྡོ་དྲེག་ནི་ཤེ་ལ་པུཥྤའོ། །ས་ར་ལ་ནི་ཤིང་གི་དབྱེ་བ་ཅི་ལ་ཞེས་བྱའོ། །ཐང་ཤིང་ནི་དེ་བ་ད་རུ་ཞེས་བྱའོ། །སུག་
སྨེལ་གཉིས་ནི་སུག་སྨེལ་དང་ཨེ་ལ་སྦོམ་པོའོ། །ཙ་རོང་ནི་ཙོ་ར་ཀཻའོ། །སི་བ་ནི་ཧི་མ་གུ་བ་ཏྲའོ། །བྱ་མ་ཀ་ནི་བྲ་བ་དག་དའོ། །རྩ་བ་བཅུ་པ་ནི་རྩ་བ་ཆུང་ངུ་ལྔ་པོ་དང་། རྩ་བ་ཆེན་པོ་ལྔ་བསྡུས་པའོ། །ཨེ་རཎྜ་གཉིས་ནི་ཨེ་རཎྜ་དཀར་པོ་དང་། ཨེ་རཎྜ་དམར་པོའོ། །བ་རུ་ར་ནི་མ་
སྱ་ཀྵ་ཞེས་བྱའོ། །པུ་ཏི་ཀ་ནི་ཀ་ཏྲི་ནའོ། །ས་ལ་ཀི་ནི་མོ་ཙའི་ཐང་ཆུ་དྲི་ཞིམ་པའོ། །འུ་སུ་ནི་འུ་སུའི་འབྲས་བུའོ། །ཨ་ཟ་མོ་ཏ་ནི་དི་བྱ་ཀཻའོ། །ཤུ་ཏི་ནི་ཤ་ཏ་པུཥྤའོ། །པྲ་ཀི་དྱ་ནི་པུ་ཏི་ཀ་རཉྫའོ། །ན་ཀུ་ལ་གཉིས་ནི་ཙ་བི་ཀ་དང་། སར་པ་སུ་གནྡྷའོ། །དེ་དྲོ་འཇམ་གྱིས་བསྐུ་བ་དང་།
เล่ม ๒๐๑ · หน้า 209b
ཞིབ་ཏུ་བཏགས་པས་བྱུག་པར་བྱ། །ཞེས་བྱ་བ་ལ། སྨན་དེ་དང་སྦྱར་བའི་ཏིལ་མར་དེ་དྲོ་འཇམ་ཙམ་དུ་བྱས་པ་ནི་གྲང་བའི་རིམས་ལ་བསྐུ་བར་བྱ་ལ། རྒྱ་སྤོས་ལ་སོགས་པ་ཞིབ་ཏུ་བཏགས་པས་ནི་རིམས་ནད་ཅན་དེ་ལ་བྱུག་པར་བྱའོ། །ཅུང་ཟད་དྲོ་བས་བླུགས་པ་དང་། །ལུས་འབྱིང་
བར་ཡང་བྱ་བ་ཡིན། །ཞེས་བྱ་བ་ལ། རྒྱ་སྤོས་ལ་སོགས་པའི་སྨན་དེ་དག་ཉིད་བསྐོལ་བའི་ཆུ་དྲོ་འཇམ་ཙམ་དུ་བྱས་པས་ནི་གྲང་བའི་ལུས་ལ་བླུགས་པ་དང་། ལུས་འབྱིང་པའི་སྦྱོར་བ་ཡང་བྱའོ། །ཚ་དང་བ་གཅིན་ཞོ་ག་ཆུ། །འབའ་ཞིག་གིས་ཀྱང་དེ་བཞིན་བྱ། །ཞེས་
བྱ་བ་ལ། གྲང་བའི་རིམས་རྙིང་པ་ལ་ནི་ཚ་ལ་སོགས་པ་འདི་དག་འབའ་ཞིག་སྟེ། སྨན་གྱི་སྦྱོར་བ་མ་བྱས་པ་དག་གིས་ཀྱང་ལུས་ལ་བླུགས་པ་དང་། ལུས་འབྱིང་བའི་སྦྱོར་བདེ་བཞིན་དུ་བྱའོ། །དོང་ག་ལ་སོགས་སྡེ་ཡིས་ཀྱང་། །བཏུང་དང་བསྐུ་དང་བྱུག་པར་བྱའོ། །ཞེས་བྱ་
བ་ལ། སྔར་མདོའི་གནས་སུ་དོང་ག་དང་། དུག་མོ་ཡུངས་དང་། པ་ཏ་ལི་ཞེས་བྱ་བ་ལ་སོགས་པའི་སྡེ་ཚན་དག་གིས་ཀྱང་བཏུང་བལ་སོགས་པའི་སྦྱོར་བ་བྱའོ། །བསྐུ་བ་ཡང་དེ་ཉིད་དང་བསྐོལ་བའི་ཏིལ་མར་གྱིས་བསྐུལ། བྱུག་པ་ཡང་ཆུ་ལ་སོགས་པ་དང་བཏགས་པ་དག་
གིས་བྱའོ། །བདུག་པ་ཨ་ཀ་རུ་ལས་བྱུང་། །འོག་ནས་བཤད་པའི་རིམས་ལ་སྦྱར། །ཞེས་བྱ་བ་ལ། གྲང་བའི་རིམས་ལ་དུད་པས་བདུག་པ་ཨ་ཀ་རུའི་སྤོས་ལས་བྱུང་བའི་དུད་པས་བདུག་པར་བྱ་བ་དང་། འོག་ནས་བཤད་པའི་བདུག་པ་ལའང་། ཀ་ཤ་ཞེས་བྱ་བ་ལ་
སོགས་པའི་མི་བཟད་པའི་རིམས་ལ་གཏང་བར་བྱ་བ་དེ་ཡང་གྲང་བའི་རིམས་ལ་སྦྱར་བར་བྱའོ། །དུགས་ནི་མེས་བྱས་མེས་མ་བྱས། །དུགས་ཀྱི་སྨན་དང་ཁ་ཟས་བསྟེན། །ཞེས་བྱ་བ་ལ། དུགས་ཀྱི་ལེའུ་ལས་བཤད་པའི་དུགས་མེ་ལས་བྱུང་བ་དང་། མེས་མ་བྱས་པ་
དག་ཀྱང་སྦྱར་བར་བྱ་སྟེ། མེས་བྱས་པ་ནི་མི་བདེ་བ་དང་། ཁ་རླངས་དང་། ཆུའི་དུགས་ལ་སོགས་པའོ། །མེས་མ་བྱས་པ་ནི་རླུང་མེད་པའི་ཁང་པ་དང་། དྲག་ཤུལ་གྱི་རྩོད་པ་དང་། གོས་མཐུག་པོ་བགོ་བ་དང་། འཇིགས་པ་དང་། བཅིངས་པ་དང་། འཐབ་པ་དང་།
เล่ม ๒๐๑ · หน้า 210a
ཉི་ཚན་ལ་སོགས་པ་ལ་བསྟེན་པའོ། །དུགས་ཀྱི་བྱ་བ་བྱེད་པའི་སྨན་དང་ཁ་ཟས་ནི་མཁྲིས་པ་སྐྱེད་པར་བྱེད་པའི་ཟས་དང་། སྨན་རྒྱ་སྲན་ཀུ་ལངྠ་དང་། མོན་སྲན་གྲེའུ་དང་། ནིས་པ་པའི་ཁ་ཟས་དང་། རླན་ཅན་གྱི་ཤ་ལ་སོགས་པ་སྟེ་དེ་དག་བསྟེན་ཅིང་ཟར་
གཞུག་པར་བྱའོ། །ཁང་སྦྲུམ་ས་ཕུག་ཏུ་ཉལ་ཞིང་། །ལ་བ་དྲེའུ་རྡོག་རེའུ་སྣམ་བགོ། །ཞེས་བྱ་བ་ལ། ཡང་གྲང་བའི་རིམས་ཀྱིས་བཏབ་པ་དག་ནི། ཁང་པ་ཉིས་རིམ་དུ་བྱས་པའི་ཆང་སྦྲུམ་དང་། ཕུག་ཀྱི་ནང་དུ་ཉལ་དུ་ཞུགས་པ་དང་། དེ་བཞིན་དུ་ལ་བ་དང་། དྲེའུ་རྡོག་ལ་སོགས་
པ་འདིང་ཞིང་བགོ་བར་བྱའོ། །དུ་བ་མེད་པའི་མདག་མས་གང་། །ཞུགས་ཤིང་དག་ནི་བསྟེན་པ་དང་། །ཞེས་བྱ་བ་ལ། ཞུགས་ཤིང་དུ་བ་མེད་ཅིང་ཅུང་ཟད་འབར་བའི་མདག་མས་གང་བ་དག་བསྟེན་ཅིང་འདེ་བར་མི་བྱའོ། །ཆང་ནི་ཚ་བ་གསུམ་བཅས་དང་། །དར་བ་རྒྱ་སྲན་ཀུ་ལངྠ། །
འབྲུ་དང་ཀོ་ཏྲ་བ་དག་ཀྱང་། །འདར་བའི་རིམས་ཅན་དེ་ལ་སྦྱིན། །ཞེས་བྱ་བ་ལ། གྲང་བའི་རིམས་ནད་ཀྱིས་ལུས་འདར་ཞིང་གྲང་བའི་མི་དེ་ལ་ཚ་བ་གསུམ་དང་བཅས་པའི་སྨན་བླུད་པར་བྱ་སྟེ། ཚ་བ་གསུམ་ནི་པི་པི་ལིང་དང་། ན་ལེ་ཤམ་དང་། བཅའ་སྒའོ། །ཡང་ན་དར་བ་ལ་ཚ་བ་
གསུམ་བཏབ་པ་བླུད་པའམ། རྒྱ་སྲན་ཀུ་ལངྠ་ལ་སོགས་པ་དག་ཀྱང་ཚ་བ་གསུམ་དང་བཅས་པར་སྦྱིན་པར་བྱའོ། །གྲང་བའི་རིམས་ནད་ཅན་དེ་ལ། །ཆུང་མ་ནུ་མ་རྒྱས་པ་དང་། །རྒྱན་གྱིས་བརྒྱན་ཏེ་བཞག་པ་དང་། །ལང་ཚོས་རྒྱགས་ཤིང་ཆང་གིས་མྱོས། །བུད་མེད་ཀྱིས་དེ་
འཁྱུད་པར་བྱ། །ཞེས་བྱ་བ་ལ། གང་དེ་གྲང་བའི་རིམས་ཀྱིས་བཏབ་པ་དེ་ལ་ཆུང་མ་ནུ་མ་རྒྱས་པ་ལ་སོགས་པའི་ཁྱད་པར་དང་ལྡན་པ་དག་གིས་ཀྱང་འཁྱུད་པར་བྱའོ། །གྲང་དང་བྲལ་བར་ཤེས་ནས་ནི། །དེ་ནས་དེ་སླར་བསལ་བར་བྱ། །ཞེས་བྱ་བ་ལ། གྲང་བའི་
འདར་ནད་དང་ལྡན་པ་དེ་གྲང་བ་དང་བྲལ་ཞིང་གྲང་བས་ཉེན་པ་མེད་པར་ཤེས་ཤིང་རྟོགས་ནས། དེ་ནས་དེའི་འོག་ཏུ་བུད་མེད་དེ་ལས་བསལ་ཞིང་བྲལ་བར་བྱའོ། །ནད་གཅིག་འཕེལ་བར་འགྱུར་བ་དང་། །འགྲིབ་པའམ་ལྡང་བར་གྱུར་པའམ། །མཉམ་གནས་ནད་ནི་བད་ཀན་
เล่ม ๒๐๑ · หน้า 210b
གྱི། །གནས་ཀྱི་རིམ་པས་བསལ་བར་བྱ། །ཞེས་བྱ་བ་ལ། ནད་ཆ་མི་མཉམ་པ་དང་ནད་ཆ་མཉམ་པར་འདུས་པ་ལས། ནད་གཅིག་འཕེལ་བས་ནད་གཅིག་བྲི་བར་གྱུར་ན། ཤས་ཆེ་བའི་ནད་དེ་བསལ་བར་བྱའོ། །ཡང་ན་ནད་གཅིག་འཕེལ་བར་གྱུར་པ་དེར་ནི་གཉིས་འབྲི་བར་གྱུར་
ན་གཅིག་པུ་གསོ་བར་བྱ་སྟེ། གང་དུ་གཉིས་འཕེལ་བ་དེར་ནི་གཅིག་འབྲི་བར་གྱུར་ལ། གང་དུ་གཅིག་འཕེལ་བར་གྱུར་པ་དེར་ནི་གཉིས་འབྲི་བར་འགྱུར་རོ། །མཉམ་པར་གནས་པའི་བད་ཀན་གྱི་གནས་ཀྱི་རིམ་པས་བསལ་བར་བྱ་སྟེ། དང་པོ་ཁོ་ནར་ནི་བད་ཀན་གྱི་གཉེན་
པོར་གྱུར་པའི་སྨན་གཏང་བར་བྱའོ། །དེའི་འོག་ཏུ་ནི་མཁྲིས་པ་བསལ་བར་བྱའོ། །དེའི་འོག་ཏུ་ནི་རླུང་བསལ་བར་བྱ་སྟེ། བད་ཀན་གྱི་གནས་ན་གནས་པའི་རིམ་པ་དེས་མཉམ་པར་གནས་པའི་ནད་གསོ་བར་བྱའོ། །འདུས་པའི་རིམས་ཀྱི་ཐ་མར་ནི། །གང་གི་རྣ་བའི་རྩ་བ་
རུ། །མི་བཟད་སྐྲང་པ་བྱུང་གྱུར་ན། །འགའ་ཞིག་ཐར་བར་འགྱུར་བ་ཡིན། །ཞེས་བྱ་བ་ལ། འདུས་པའི་རིམས་ཀྱིས་བཏབ་པའི་ཐ་མ་དེར་འདུས་པའི་རིམས་ཀྱིས་ལུས་ཟད་པར་བྱས་པའི་མི་ལ་རྣ་བའི་རྩ་བར་མི་བཟད་པར་ན་བའི་སྐྲང་བ་ལས་སྣ་ཚོགས་པའི་དབང་གིས་འབྱུང་བར་
འགྱུར་ལ། འབྱུང་བ་དེ་ཡང་སྟེས་དབང་གིས་ནད་པ་འགའ་ཞིག་ཐར་ཞིང་མི་འཆི་བར་འགྱུར་བ་སྲིད་ཀྱི། ཕལ་ཆེར་ནི་འཆི་བ་ཁོ་ནར་འགྱུར་རོ་ཞེས་བྱ་བའི་དོན་ཏོ། །དེ་ནི་གཏར་གས་དབྱུང་བ་དང་། །ཞུན་མར་བླུད་པས་མྱུར་བསལ་ཏེ། །བད་མཁྲིས་སེལ་བའི་སྨན་བསྐུ་དང་། །
སྣ་སྨན་མཁུར་བ་བཀང་བས་གསོ། །ཞེས་བྱ་བ་ལ། སྐྲངས་པ་དེ་ལྟ་བུ་དེ་གཏར་ག་གདབ་སྟེ་ཁྲག་དབྱུང་བ་དང་། དེ་བཞིན་དུ་ཞུན་མར་བླུད་ཅིང་སྦྱིན་པ་དང་། དེ་བཞིན་དུ་བད་ཀན་དང་མཁྲིས་པ་སེལ་བའི་སྨན་གྱིས་བསྐུ་བ་དང་། སྨན་དེ་དག་གིས་སྣ་སྨན་གཏང་བ་དང་མཁུར་བ་བཀང་
ཞིང་སྤོ་བའི་ཐབས་ཀྱིས་མྱུར་ཞིང་རིངས་པར་གསོ་ཞིང་བསལ་བར་བྱའོ། །གང་གི་རིམས་ནི་བསིལ་དྲོད་དང་། །སྣུམ་རྩུབ་སོགས་ཀྱིས་ཞི་མི་འགྱུར། །ཡན་ལག་ཞེན་པ་དེ་རིམས་བཞིན། །ལག་ངར་ལས་ཁྲག་མྱུར་དུ་དབྱུང་། །ཞེས་བྱ་བ་ལ། མི་གང་གི་རིམས་ཡན་ལག་ལ་
เล่ม ๒๐๑ · หน้า 211a
ཞེན་ཞིང་ལུས་ཟུངས་ཀྱི་རྗེས་སུ་འབྲངས་པ་དེ་ནད་ཐམས་ཅད་ཀྱི་གཉེན་པོར་གྱུར་པ་བསིལ་བ་ལ་སོགས་པའི་སྨན་གྱིས་ཞི་བར་མ་གྱུར་ན། དེ་ལ་མྱུར་དུ་ལག་ངར་ལ་གཏར་ག་བྱ་ལ། དེ་ཡང་རིམ་གྱིས་བྱའི། ལག་ངར་གཉིས་ལ་ཅིག་ཅར་ནི་མི་བྱའོ། །ཆོ་ག་འདི་
ནི་མི་བཟད་པའི། །རིམས་ལའང་ནད་དམིགས་ཇི་བཞིན་བྱ། །རླུང་སོགས་རིམ་གྱིས་ཆ་ཕྱེ་ལ། །ཕྱིས་བཤད་གང་ཡིན་དག་ཀྱང་བྱ། །ཞེས་བྱ་བ་ལ། སྔར་བཤད་པའི་ཆོ་ག་དེ་ཉིད་ནི་མི་བཟད་པའི་རིམས་དང་རྟག་པའི་རིམས་ལ་སོགས་པ་དག་ལ་ཡང་ནད་དམིགས་ཇི་ལྟ་བ་བཞིན་ཏེ།
རླུང་ལ་སོགས་པའི་ནད་ཀྱི་བྱེ་བྲག་ཇི་ལྟ་བའི་ཚུལ་ལས་རྗེས་སུ་དཔགས་ནས་བྱ་སྟེ། གང་གི་ཕྱིར་བཤད་པ་དེ་དག་ཀྱང་སྦྱར་བར་བྱའོ། །པ་ཏོ་ལ་དང་པུ་ཙེ་ཤེལ། །གླ་སྒང་ཤིང་མངར་ཨ་རུ་ར། །གཉིས་སམ་གསུམ་མམ་ལྔ་བསྐོལ་བ། །མི་བཟད་རིམས་ནི་འཇོམས་བྱེད་ཡིན། །
ཞེས་བྱ་བ་ལ། པ་ཏོ་ལ་ལ་སོགས་པའི་སྨན་གསུམ་གསུམ་མམ། བཞི་བཞི་འམ། ལྔ་ལྔ་བསྐོལ་བ་གང་ཡིན་པ་དེས་མི་བཟད་པའི་རིམས་དང་རྟག་པའི་རིམས་ལ་སོགས་པ་སེལ་ཞིང་འཇོམས་པར་བྱེད་དོ། །འབྲས་བུ་གསུམ་དང་ཨ་རུ་ར། །སླེ་ཏྲེས་པི་པི་ལིང་སོ་སོར། །ཆོ་ག་
དེ་དང་སྦྱར་བའམ། །གོ་བྱེ་བུ་རམ་བཅས་པ་སྦྱིན། །ཞེས་བྱ་བ་ལ། འབྲས་བུ་གསུམ་པའི་སྨན་ཆོ་གའི་སྦྱོར་བའི་ཁུ་བ་ལྡེ་གུ་དང་བསྐོལ་བ་དང་། བསྒྲངས་པ་སྐྱོ་མར་བྱ་བ་དང་། དེ་བཞིན་དུ་སྨན་མར་དང་བལྡག་པ་དང་། ཕྱེ་མ་དང་རི་ལུར་བྱ་བ་བཅུད་ཀྱིས་ལེན་གྱི་ཆོ་ག་ལས་བཤད་པའི་སྦྱོར་
བས་ཀྱང་སོ་སོར་སྦྱར་བར་བྱ་སྟེ། ནད་དམིགས་ཀྱི་ཚུལ་ལ་དཔགས་ནས། ལན་འགའ་ནི་འབྲས་བུ་གསུམ་སྦྱིན་པར་བྱའོ། །ལན་འགའ་ནི་ཨ་རུ་ར་ཉི་ཚེ་སྦྱིན་པར་བྱའོ། །ལན་འགའ་ནི་སླེ་ཏྲེས་སྦྱིན་པར་བྱའོ། །ལན་འགའ་ནི་པི་པི་ལིང་སྦྱིན་པར་བྱ་སྟེ། དེ་དག་ནི་སོ་སོའི་སྒྲའི་
དོན་ཡིན་ནོ། །ཡང་ན་མི་བཟད་པའི་རིམས་ལ་བུ་རམ་དང་བཅས་པའི་གོ་བྱེ་སྟེ། གསེར་ཤིང་གི་འབྲས་བུ་སྦྱིན་པར་བྱའོ། །རིམས་ཀྱིས་ཐེབས་པའི་ཉིན་ཞག་ལ། །ཉམས་སྨད་པའམ་ཉམས་བརྟ་བྱ། །ཞེས་བྱ་བ་ལ། མི་བཟད་པའི་རིམས་རྟག་པ་ལ་སོགས་པ་བཞི་པོ་དག་ལ་
เล่ม ๒๐๑ · หน้า 211b
ཉིན་ཞག་གང་གི་ཚེ། རིམས་འོང་ཞིང་འབྱུང་བར་འགྱུར་བའི་ཉིན་ཞག་དེ་ལ་ཉམས་སྨད་ཅིང་སྨྱུང་བས་གསོ་བར་བྱ་བའམ། ཉམས་ཤིན་ཏུ་བརྟ་ཞིང་ལུས་འཕེལ་བར་འགྱུར་བའི་གསོ་བ་དག་ནད་དམིགས་ཀྱི་ཚུལ་ལས་ལྟོས་ཏེ་བྱའོ། །ནད་པར་ཏིལ་མར་སྒོག་སྐྱ་བཅས། །བཟའ་
བའམ་ཡང་ན་མར་རྙིང་ངམ། །དེ་བཞིན་ཞོ་དང་འོ་མ་སྦྱིན། །ཞུན་མར་སྲང་དྲུག་པ་དང་ནི། །དགེ་བ་ཆེན་པོའམ་བའི་རྣམ་ལྔ། །ཏིག་ཏ་དུག་དང་བསྐོལ་ཏེ་སྦྱིན། །ཞེས་བྱ་བ་ལ། མི་བཟད་པའི་རིམས་ལ་ནང་པར་རམ་ཟས་ཀྱི་ཐོག་མར་ཏིལ་མར་སྒོག་སྐྱ་དང་བཅས་པ་སྦྱིན་པར་
བྱའོ། །ཡང་ན་ནང་པར་རམ་ཟས་ཀྱི་སྔོན་ལ་མར་རྙིང་པ་སྦྱིན་པར་བྱའོ། །ཡང་ན་དེ་བཞིན་དུ་ཞོ་དང་འོ་མ་ནང་པར་རམ་ཟས་ཀྱི་སྔར་སྦྱིན་པར་བྱའོ། །ཡང་ན་ཞུན་མར་སྲང་དྲུག་དང་། ཚ་བ་ལྔ་དང་། ནས་ཚིག་འཁུས་པའི་ཐལ་བ་བཅོས་པ་སྨན་མར་གཅོང་ཆེན་པོ་གསོ་བའི་སྐབས་ནས་བཤད་
པའམ། དགེ་བ་ཆེན་པོའི་སྨན་མར་སྨྱོ་བྱེད་ཀྱི་གདོན་གསོ་བའི་སྐབས་སུ་བཤད་པའམ། བའི་རྣམ་ལྔའི་སྨན་མར་བརྗེད་བྱེད་ཀྱི་ནད་གསོ་བའི་སྐབས་སུ་བཤད་པའམ། །ཏིག་ཏའི་སྨན་མར་མཛེ་ནད་གསོ་བའི་སྐབས་སུ་བཤད་པའམ། དུག་གི་སྨན་མར་ཁྲག་མཁྲིས་གསོ་བའི་
སྐབས་སུ་བཤད་པ་དག་ཀྱང་དེ་བཞིན་དུ་ནང་པར་རམ་ཟས་ཀྱི་ཐོག་མར་ནད་ལ་སོགས་པའི་ཚུལ་ལས་བརྟགས་ཏེ་སོ་སོར་ཅི་རིགས་པར་སྦྱིན་པར་བྱའོ། །འབྲས་བུ་གསུམ་དང་རྒྱ་ཤུག་དང་། །ཨག་ནི་མན་ཐ་བསྐོལ་བ་རུ། །ཞོ་དང་བསྐོལ་བའི་མར་དག་ཏུ། །སེང་ཕྲོམ་ཤུན་ལྤགས་ལྡེ་
གུ་བཏབ། །མི་བཟད་རིམས་ནི་འཇོམས་པའི་མཆོག །ཅེས་བྱ་བ་ལ། འབྲས་བུ་གསུམ་ལ་སོགས་པའི་ཁུ་བ་མར་གྱི་ཉིས་འགྱུར་དང་ཞོའི་ཉིས་འགྱུར་དུ་བྱས་པ་དང་། མར་བསྐོལ་ཏེ་སེང་ཕྲོམ་གྱི་ཤུན་ལྤགས་ཀྱི་ལྡེ་གུ་མར་གྱི་བཞི་ཆ་བཅུག་ལ་མར་དེ་བླུད་པ་ནི་མི་བཟད་པའི་རིམས་
འཇོམས་པའི་མཆོག་ཡིན་ནོ། །འབྲུ་ཆང་དང་ནི་ཆང་རྙིང་རྣོ། །རྨ་བྱ་གོང་མོ་སྲེག་ཁྱིམ་བྱ། །རླན་ཅན་ཤ་ནི་དྲོད་སྐྱེད་པ། །ཟས་བཅས་དག་ནི་ཅི་འདོད་པར། །བསྟེན་ལ་དེ་བཞིན་གཉིད་ལོག་པའམ། །ཡང་ན་སླར་ནི་སྐྱུག་ཏུ་གཞུག །ཡང་ན་ཞུན་མར་ཚད་ཆེན་པོ། །བླུད་དེ་སླར་
เล่ม ๒๐๑ · หน้า 212a
ཡང་སྐྱུག་ཏུ་གཞུག །ཞེས་བྱ་བ་ལ། དེ་བཞིན་དུ་ཆང་ལ་སོགས་པ་འཐུངས་ཤིང་ཟོས་པར་བསྟེན་ལ། དེའི་ཉིན་ཞག་གཉིད་ལོག་པར་བྱ་བའམ། ཡང་ན་ཆང་ལ་སོགས་པ་འཐུངས་ཤིང་ཟོས་ནས་དེའི་ཞག་ཉིད་སླར་སྐྱུག་སློན་དུ་གཞུག་གོ། །ཡང་ན་ཞུན་མར་
ཚད་ཆེན་པོ་བླུད་དེ་ཉིན་ཞག་གཅིག་གིས་ཞུ་བར་འགྱུར་བ་དེ་ཙམ་གྱི་ཚད་འཐུངས་ལ་དེ་སླར་སྐྱུག་ཏུ་གཞུག་པར་བྱའོ། །ཨ་ཛ་གན་དྷ་ནི་ལི་ནི། །དུར་བྱིད་དང་ནི་པུ་ཙེ་ཤེལ། །རིམས་ཀྱིས་འདེབས་ཚེ་སྣུམ་དང་དུགས། །ལེགས་པར་བྱས་ཏེ་བླུད་པར་བྱ། །ཞེས་བྱ་བ་ལ། ཨ་ཛ་གནྡྷ་
ལ་སོགས་པའི་སྨན་དག་ཀྱང་རྟག་པའི་རིམས་ལ་སོགས་པ་འོང་ཞིང་འདེབས་པའི་དུས་སུ་ལྡེ་གུར་བྱས་ལ་བླུད་པར་བྱའོ། །དེ་ཡང་སྣུམ་དང་དུགས་ལེགས་པར་བྱས་ནས་དེའི་འོག་ཏུ་བླུད་པར་བྱའོ། །ལྡོང་རོས་རྒྱམ་ཚ་པི་པི་ལིང་། །ཏིལ་མར་དང་སྦྱར་མིག་སྨན་གཞུག །ཅེས་
བྱ་བ་ལ། མི་བཟད་པའི་རིམས་ལ་སོགས་པ་ལ་ལྡོང་རོས་ལ་སོགས་པའི་སྨན་ཏིལ་མར་དང་སྦྱར་བ་མིག་ཏུ་གཞུག་པར་བྱའོ། །ཤིང་ཀུན་སྟག་ཚིལ་ཆ་སྙོམས་བྱ། །རྒྱམ་ཚར་བཅས་པའི་སྣ་སྨན་བྱ། །ཞེས་བྱ་བ་ལ། ཤིང་ཀུན་དང་སྟག་གི་ཚིལ་ཆ་མཉམ་པར་བྱས་པ་ལ། རྒྱམ་ཚ་ཅུང་
ཟད་བཅུག་པའི་སྣ་སྨན་དུ་སྦྱར་རོ། །དེ་བཞིན་མར་རྙིང་སེང་གེའི་ཚིལ། །རྒྱམ་ཚ་དག་དང་སྦྱར་ཏེ་གཏང་། །ཞེས་བྱ་བ་ལ། དེ་བཞིན་དུ་མར་རྙིང་པ་གཅིག་པུ་དག་ཀྱང་སྣ་སྨན་དུ་གཏང་བར་བྱའོ། །དེ་བཞིན་དུ་སེང་གེའི་ཚིལ་རྒྱམ་ཚ་དང་སྦྱར་བ་ཡང་སྣ་སྨན་དུ་གཏང་བར་བྱའོ། །
པ་ལ་ཀ་ས་ནིམ་པའི་ལོ། །ཤུ་དག་རུ་རྟ་ཨ་རུ་ར། །ཡུངས་ཀར་ནས་བཅས་མར་སྦྱར་བའི། །བདུག་པའམ་བྱི་ལའི་རྟུག་པས་བདུག །ཅེས་བྱ་བ་ལ། །པ་ལ་ཀ་ས་ལ་སོགས་པའི་སྨན་མར་དང་སྦྱར་ཞིང་མར་གྱིས་བསྐུས་པ་ཡང་མི་བཟད་པའི་རིམས་ལ་སྦྱར་བར་བྱའོ། །ཡང་ན་བྱི་
ལའི་རྟུག་པ་འབའ་ཞིག་གི་བདུག་པས་བདུག་པར་བྱའོ། །གུ་གུལ་ཤུ་དག་བྱ་མ་ཀ །ས་རྫ་ར་ས་ནི་མ་པ་དང་། །ཨརྐ་དང་ནི་ཨ་རུ་ར། །ཐང་ཤིང་བཅས་པའི་སྤོས་སྦྱར་བ། །འདི་ནི་གཞན་གྱིས་མི་ཐུབ་པའི། །བདུག་པ་ཡིན་ཏེ་རིམས་ཀུན་སེལ། །ཞེས་བྱ་བ་ལ། གུ་གུལ་
เล่ม ๒๐๑ · หน้า 212b
ལ་སོགས་པ་དང་སྦྱར་བའི་བདུག་སྤོས་ནི་མིང་གཞན་གྱིས་མི་ཐུབ་པ་ཞེས་བྱ་སྟེ། དེས་ནི་རིམས་ནད་ཐམས་ཅད་སེལ་བ་ཡིན་པས་ཀུན་ལ་སྦྱར་བར་བྱའོ། །སྤོས་བདུག་སྣ་སྨན་གཏང་བྱ་བ། །སེམས་ཀྱིས་བསྒྱུར་བར་གང་བཤད་དང་། །འཕགས་པ་ལ་བརྟེན་སྨན་གྱིས་ནི། །རིམས་
ནད་ཐམས་ཅད་སེལ་བར་བྱེད། །ཅེས་བྱ་བ་ལ། གཞན་ཡང་སྤོས་ལ་སོགས་པ་སེམས་བསྒྱུར་བ་སྟེ། འབྱུང་པོའི་གདོན་དང་། བརྗེད་བྱེད་དང་སྨྱོ་བྱེད་ཀྱི་གསོ་བའི་སྐབས་སུ་གང་དག་བཤད་པ་དེ་དག་གིས་ཀྱང་རིམས་སེལ་བར་བྱེད་པ་ཡིན་པས་ཀུན་ལ་སྦྱར་བར་བྱའོ། །དེ་བཞིན་དུ་
འཕགས་པ་ལ་བརྟེན་པའི་སྨན་ཏེ་སྔགས་དང་། སྦྱིན་སྲེག་དང་། གཏོར་མ་སྦྱིན་པ་དང་། སྡོམ་པ་ལ་གནས་པ་དང་། སྨྱུང་བ་བྱ་བ་དང་། སྡིག་པ་བཤགས་པ་དང་། བཀྲ་ཤིས་ཀྱི་ཆོ་ག་བྱ་བ་དང་། ཕྱག་འཚལ་བ་དང་། སྐྱབས་སུ་འགྲོ་བ་ལ་སོགས་པའི་དགེ་བའི་ལས་རྣམས་ཀྱིས་རིམས་
ཐམས་ཅད་སེལ་ཞིང་འབྱུང་བར་མི་འགྱུར་རོ། །མཆོག་ཏུ་ཕལ་ཆེར་མི་བཟད་རིམས། །དེ་ནི་གློ་བུར་འོང་རྗེས་འབྲེལ། །ཞེས་བྱ་བ་ལ། མཆོག་གམ་ཁྱད་པར་དུ་རྟག་པའི་རིམས་ལ་སོགས་པ་ནི་འཕགས་པ་ལ་བརྟེན་པ་ལྟར་སྨན་གཞན་གྱིས་དེ་ལྟར་སེལ་བར་མི་འགྱུར་ཏེ། གང་གི་ཕྱིར་མི་
བཟད་པའི་རིམས་དེ་དག་ནི། གློ་བུར་དུ་འོང་བ་ཡིན་ཞིང་། །གདོན་ཞུགས་པ་དང་རྗེས་སུ་འབྲེལ་པ་ལས་བྱུང་བ་དེར་ནི་འཕགས་པ་ལ་བརྟེན་པའི་ལས་ཁོ་ན་སྟོབས་དང་ལྡན་ཞིང་མཐུ་ཆེ་བ་ཡིན་གྱི། གཞན་དག་ནི་དེ་ལྟ་མ་ཡིན་ནོ། །མི་བཟད་རིམས་ཞིར་མ་གྱུར་ན། །རང་གི་གཏར་ག་ཇི་
བཞིན་གདབ། །ཅེས་བྱ་བ་ལ། མི་བཟད་པའི་རིམས་གྲང་བ་དང་དྲོ་བ་ལ་སོགས་པའི་གསོ་བས་རྣམ་པ་ཐམས་ཅད་དུ་ཞི་བར་མ་གྱུར་ན། རང་གི་གཏར་ག་ཇི་སྐད་སྨོས་པ་བཞིན་དུ་གདབ་པར་བྱ་སྟེ། ཉིན་གསུམ་པར་ནི་ཁྲག་འཚམ་གདབ། །ཉིན་བཞི་པ་ལ་ལྷག་པའི་འོག །ཞེས་
བྱ་བ་ལ་སོགས་པ་སྔར་མདོའི་གནས་སུ་ཇི་སྐད་བཤད་པ་བཞིན་དུ་བྱའོ། །དྭངས་མ་ལ་གནས་ཐམས་ཅད་ལ། །སྐྱུག་སྨན་གཏང་དང་སྨྱུང་བ་བྱ། །ཞེས་བྱ་བ་ལ། མི་བཟད་པའི་རིམས་ཉིན་བཞི་པའི་བར་དུ་ལུས་ཟུངས་ཀྱི་ནང་ན་དྭངས་མ་ལ་གནས་པ་ཐམས་ཅད་ལ་ནི་སྐྱུག་
เล่ม ๒๐๑ · หน้า 213a
སྨན་གཏང་བ་དང་། སྨྱུང་བར་བྱ་བ་དག་བྱའོ། །ཁྲག་ལ་གནས་པ་སྨན་ཆུ་བླུགས། །བསྐུ་དང་བྱུག་དང་གཏར་ག་བྱ། །ཞེས་བྱ་བ་ལ། ཁྲག་ལ་གནས་པའི་རིམས་ཐམས་ཅད་ལ་ནི་སྨན་ཆུ་བླུགས་པ་ལ་སོགས་པ་བྱའོ། །ཤར་གནས་བཀྲུ་སྨན་རྣོན་པོ་བྱ། །
ཞེས་བྱ་བ་ལ། ཤ་ལ་གནས་པའི་རིམས་ཐམས་ཅད་ནི་བཀྲུ་སྨན་རྣོན་པོས་ཁྲུས་བྱའོ། །ཚིལ་གནས་ཚིལ་ནི་དབྲི་བར་བྱ། །ཞེས་བྱ་བ་ལ། ཚིལ་ལ་གནས་པའི་རིམས་ཐམས་ཅད་ལ་ནི་ཚིལ་དབྲི་བའི་ཆོ་ག་ཇི་སྐད་སྨོས་པ་བྱའོ། །རུས་པར་གནས་ལ་རླུང་ཞི་བའི། །བསྐུ་དང་
དུགས་དང་མཉེ་བ་བྱ། །རིམས་དེར་རླུང་ནད་ཞི་བྱ་དང་། །ཁྱད་པར་དུ་ནི་འཇམ་རྩི་བྱ། །ཞེས་བྱ་བ་ལ། རུས་པ་ལ་གནས་པའི་རིམས་རྣམས་ལ་ནི་རླུང་ནད་ཞི་བའི་ཐབས་བསྐུ་བ་ལ་སོགས་པ་བྱའོ། །དེ་ལས་ཀྱང་ཁྱད་པར་དུ་ནི་སྣུམ་གྱི་འཇམ་རྩི་མས་གཏོང་བའི་ཆོ་ག་བྱའོ། །མ་འདྲེས་
རླུང་དང་མེ་དབལ་དང་། །འབྲུམ་བུས་གནོད་གྱུར་རིམས་ལ་ནི། །ཞུན་མར་བླུད་ཅིང་ཙནྡན་བྱུག །སྨན་ཆུ་བླུགས་ཤིང་ཤ་ཁུ་སྦྱིན། །རང་གི་དཔྱད་ནི་ཇི་སྐད་བཤད། །གཏར་ག་ལ་སོགས་དག་གིས་གསོ། །ཞེས་བྱ་བ་ལ། རླུང་མ་འདྲེས་པ་འབའ་ཞིག་ལ་སོགས་པ་ལས་གྱུར་པའི་
རིམས་ལ་ནི་ཞུན་མར་བླུད་པ་ལ་སོགས་པ་བྱ་བ་དང་། རང་གི་དཔྱད་རང་རང་གི་ལེའུའི་སྐབས་སུ་ཇི་སྐད་བཤད་པ་མེ་དབལ་ལ་གཏར་ག་གདབ་པ་ལ་སོགས་པའི་གསོ་དཔྱད་གང་དག་ཡིན་པ་དེ་དག་གིས་གསོ་ཞེས་དཔྱད་དུ་བྱའོ། །གདོན་བྱུང་འབྱུང་པོའི་རིག་པར་བཤད། །གཏོར་
མ་སྔགས་ལ་སོགས་པས་གསོ། །ཞེས་བྱ་བ་ལ། གདོན་ལས་བྱུང་ཞིང་དེ་ལས་གྱུར་པའི་རིམས་ལ་ནི། འབྱུང་པོའི་རིག་པར་བཤད་ཅིང་འབྱུང་པོ་ལྡོག་པའི་རིག་སྔགས་ཀྱི་རྣམ་པ་གང་དག་ཡིན་པ་དང་། གཏོར་མ་དང་སྔགས་ཀྱི་སྦྱོར་བ་ལ་སོགས་པས་གསོ་བར་བྱའོ། །སྨན་དྲི་ལས་
བྱུང་མཁྲིས་པ་ནི། །ཞི་བྱ་དུག་སྐྱེས་དུག་གིས་གསོ། །ཞེས་བྱ་བ་ལ། སྨན་གྱི་དྲིས་ཕོག་པ་ལས་བྱུང་བའི་རིམས་ལ་ནི་མཁྲིས་པ་ཞི་བའི་ཐབས་གང་དག་ཡིན་པ་དེས་གསོ་བར་བྱའོ། །དུག་ལས་སྐྱེས་པའི་རིམས་ལ་ནི། །དུག་ཞི་བའི་ཐབས་གང་ཡིན་པས་གསོ་བར་བྱའོ། །
เล่ม ๒๐๑ · หน้า 213b
འདོད་དོན་ཇི་ལྟར་ཡིད་འཐད་དང་། །ནད་ནི་ཇི་ལྟར་ཞི་གྱུར་བ། །ཕན་དང་མི་ཕན་ལ་མཁས་པས། །ཁྲོས་སོགས་ལས་བྱུང་རིམས་བསལ་བྱ། །ཞེས་བྱ་བ་ལ། ཁྲོ་བ་དང་འཇིགས་པ་དང་། མྱ་ངན་དང་འདོད་པ་ལས་བྱུང་བའི་རིམས་ནི་མངོན་པར་འདོད་པའི་དོན་གང་དག་ཡིན་པ་དང་
ཕྲད་པ་དང་། དེ་བཞིན་དུ་ཇི་ལྟར་ཡིད་འཐད་ཅིང་སེམས་དགའ་བར་བྱས་པས་བསལ་བར་བྱ་བ་དང་། དེ་བཞིན་དུ་ནད་དམིགས་ཇི་ལྟར་ཞི་བའི་ཚུལ་གྱིས་སྨན་བསྟེན་པ་དང་། ཕན་པ་དང་མི་ཕན་པ་སྟེ་རིག་པའི་ཚུལ་ལ་མཁས་པས་རིམས་དེ་བསལ་བར་བྱའོ། །ཁྲོས་བྱུང་འདོད་
པས་ཞི་བར་འགྱུར། །འདོད་བྱུང་ཁྲོས་པས་ཞི་བར་འགྱུར། །མྱ་ངན་འཇིགས་བྱུང་དེ་གཉིས་ཀྱིས། །འཇིགས་དང་མྱ་ངན་བྱུང་ཅིག་ཤོས། །ཞེས་བྱ་བ་ལ། ཁྲོས་པ་ལས་བྱུང་བའི་རིམས་ནི་འདོད་པའི་ཡུལ་དང་ཕྲད་ཅིང་བསྟེན་པས་ཞི་བར་འགྱུར་རོ། །འདོད་པ་ལས་བྱུང་བའི་
རིམས་ནི་ཆགས་པའི་ཡུལ་གང་ཡིན་པ་དེ་ལ་ཁྲོ་བ་བསྐྱེད་པས་ཞི་བར་འགྱུར་རོ། །མྱ་ངན་དང་འཇིགས་པ་ལས་བྱུང་བའི་རིམས་ནི་ཁྲོས་པ་དང་འདོད་པ་ཞི་བས་ཞི་བར་འགྱུར་རོ། །འཇིགས་པའི་ཡུལ་དང་ཁྲོས་པའི་ཡུལ་ལ་ནི་ཡུལ་གྱི་རྣམ་པ་ལ་སོགས་པ་ལ་ལྟོས་ནས། ལན་
འགའ་ནི་ཁྲོ་བ་འབྱུང་། ལན་འགའ་ནི་འདོད་པ་འབྱུང་ལ། དེ་བཞིན་དུ་ཅིག་ཤོས་ཏེ་འདོད་པ་དང་ཁྲོ་བ་ལས་བྱུང་བའི་རིམས་ནི་མྱ་ངན་དང་འཇིགས་པ་ལས་ཞི་བར་འགྱུར་རོ། །དམོད་པ་མངོན་སྤྱོད་སྔགས་ལས་བྱུང་། །འཕགས་པའི་དོན་ལ་བརྟེན་པས་ཞི། །ཞེས་བྱ་བ་ལ།
དྲང་སྲོང་ལ་སོགས་པས་དམོད་པ་བཏབ་པ་ལས་བྱུང་བ་དང་། མངོན་སྤྱོད་ཀྱི་ལས་དྲག་པོའི་སྦྱིན་སྲེག་བྱས་པ་ལས་བྱུང་བའི་རིམས་ལ་ནི་འཕགས་པ་ལ་བརྟེན་པའི་ཆོ་ག་བཟླས་བརྗོད་དང་སྦྱིན་སྲེག་དང་ལྷ་ལ་མཆོད་པ་དང་། སྔགས་དང་ནོར་བུ་ལ་སོགས་པས་སེལ་བར་འགྱུར་
རོ། །རིམས་དེ་ཐོག་མར་མ་འདྲེས་ལ། །དེ་འོག་དྲི་མས་ཁྱབ་པར་བྱེད། །དེ་བས་ནད་དང་རྗེས་མཐུན་པར། །དེ་ལ་ཁ་ཟས་ལ་སོགས་སྦྱར། །ཞེས་བྱ་བ་ལ། གློ་བུར་བའི་རིམས་འདི་དག་ལ་ཁ་ཟས་ལ་སོགས་པ་སྟེ། ཁ་ཟས་དང་སྤྱོད་ལམ་དང་། སྨན་ནད་དང་རྗེས་སུ་མཐུན་
เล่ม ๒๐๑ · หน้า 214a
ཞིང་ནད་ལ་ཕན་པ་ཉིད་དུ་སྦྱར་ཞིང་བརྟག་པར་བྱའོ། །ཅིའི་ཕྱིར་ཞེ་ན། གློ་བུར་བའི་རིམས་དེ་ནི་ཐོག་མར་ཏེ་ཇེ་དང་པོར་ཚ་བའི་རྣམ་པ་འབའ་ཞིག་ཙམ་དུ་འབྱུང་བར་འགྱུར་བ་ལས། དེའི་འོག་ཏུ་རླུང་ལ་སོགས་པའི་ནད་ཀྱི་དྲི་མས་ཁྱབ་པར་བྱེད་པ་ཡིན་ནོ། །དེ་བས་
ན་ཁ་ཟས་ལ་སོགས་པ་ནད་དེ་སེལ་ཞིང་ཕན་པར་འགྱུར་བ་དང་། རྗེས་སུ་མཐུན་པར་སྦྱར་ཞིང་སྦྱིན་པར་བྱའོ། །རླུང་སོགས་རྒྱུ་ལ་མ་བརྟེན་པར། །རིམས་ནི་རྗེས་འབྲེལ་གནས་མི་བྱེད། །ཅེས་བྱ་བ་ལ། གང་གི་ཕྱིར་རིམས་ནི་རླུང་ལ་སོགས་པའི་ནད་ཀྱི་འགྱུར་བའི་རྒྱུ་ལ་མ་བརྟེན་
པར་རྗེས་སུ་འབྲེལ་ཞིང་ཡུན་རིང་དུ་གནས་པར་མི་འགྱུར་གྱི། རིམས་འདི་ལ་རླུང་ལ་སོགས་པ་རྗེས་སུ་འབྲེལ་བར་གནས་པ་ཉིད་ཡིན་ནོ། །རིམས་ཀྱི་དུས་དྲན་བྱུང་དེ་ལ། །ཡིད་འཕྲོག་ཡུལ་གྱིས་བརྗེད་པར་བྱ། །ཞེས་བྱ་བ་ལ། རིམས་ཀྱི་དུས་དང་། ཤུགས་སེམས་ཤིང་དྲན་པ་ན།
རིམས་འདི་འབྱུང་བར་འགྱུར་བ་དེ་ལ་ཡིད་འཕྲོག་པའི་ཡུལ་སྒྲ་ལ་སོགས་པ་སྣ་ཚོགས་པ་དག་གིས་རིམས་འབྱུང་བར་འགྱུར་བའི་དུས་དེ་བརྗེད་ཅིང་མི་དྲན་པར་ཡེངས་པར་བྱའོ། །སྙིང་རྗེས་བརླན་ཅིང་སེམས་དག་པ། །རིམས་ཀུན་འཇིག་པར་བྱེད་པ་ཡིན། །ཞེས་བྱ་བ་ལ། སེམས་
ཀྱི་རྒྱུད་སྙིང་རྗེ་བ་སྟེ། གཞན་ལ་སྙིང་བརྩེ་བའི་ཕྱིར་ཤུགས་ཀྱིས་བརླན་ཅིང་བརྩེ་བ་དང་ལྡན་པ་དག་ལ་ནི་རིམས་ཐམས་ཅད་འཇིག་ཅིང་ཉམས་པར་འགྱུར་རོ། །ཉམས་སྟོབས་རྫོགས་པར་འགྱུར་གྱི་བར། །རྩོལ་དང་ཁྲུས་དང་ཉལ་པོ་དང་། །ཟས་ལྕི་མ་གོམས་ཚ་བྱེད་དང་། །གང་
གཞན་རིམས་སྐྱེད་བྱེད་པ་སྤང་། །ཞེས་བྱ་བ་ལ། རིམས་ཀྱིས་བཏབ་ཅིང་ཉེན་པར་གྱུར་པའི་མིས་ནི་ལུས་ཀྱི་ཉམས་སྟོབས་ཇི་སྲིད་རྫོགས་ཤིང་བརྟས་པར་གྱུར་བ་དེ་སྲིད་ཀྱི་བར་དུ་རྩོལ་བའི་དྲག་ཤུལ་དང་། ལུས་ཁྲུས་བྱ་བ་དང་། བུད་མེད་ལ་ཉལ་པོ་བྱ་བ་དང་། ཟས་ལྕི་བ་དང་། སྔར་
མ་གོམས་པར་གྱུར་པ་དང་། ཚ་བ་སྐྱེད་པར་བྱེད་པ་དག་སྤང་བར་བྱའོ། །དེ་བཞིན་དུ་འདིར་མ་སྨོས་ཀྱང་སྤྱིར་རིམས་སྐྱེད་པར་བྱེད་པའི་ཟས་སྐོམ་དང་། སྤྱོད་ལམ་ལ་སོགས་པ་ཡང་སྤང་བར་བྱའོ། །རིམས་བྲལ་གྱུར་ཀྱང་འཕྲལ་དུ་ནི། །ཟས་ཀུན་བསྟེན་པར་མི་བྱ་སྟེ། །
เล่ม ๒๐๑ · หน้า 214b
རིམས་ནི་མྱུར་དུ་ཟློག་བྱེད་ནས། །ཉམ་ཆུང་མི་ནི་མྱུར་གསོད་བྱེད། །ཅེས་བྱ་བ་ལ། རིམས་དང་བྲལ་ཞིང་རིམས་ནད་བྱང་བར་གྱུར་ཀྱང་འཕྲལ་དུ་སྟེ། །དེའི་མོད་ལ་ཟས་ཀུན་འདྲེན་མར་བསྟེན་ཞིང་བཟའ་བར་མི་བྱ་སྟེ། གང་གི་ཕྱིར་ཟས་འཆོལ་བར་ཟོས་པས་རིམས་དང་བྲལ་དུ་ཟིན་
ཀྱང་དེ་སླར་ལྡོག་པར་བྱེད་ནས་སྔར་ལུས་དང་ཟུངས་ཉམ་ཆུང་བར་བྱས་པ་ལས་འདས་པའི་ཕྱིར་མི་དེ་མྱུར་དུ་གསོད་པར་བྱེད་དོ། །གང་ཕྱིར་མྱུར་དུ་གསོད་འགྱུར་བས། །དེའི་ཕྱིར་དེ་ནི་ཁྱད་པར་དུ། །གནས་སྐབས་དེ་དང་དེ་དག་ཏུ། །སྨན་དཔྱད་དེ་དང་དེ་དག་བྱ། །ཞེས་བྱ་བ་ལ། གང་
གི་ཕྱིར་དེའི་རིམས་ལྡོག་པར་གྱུར་པ་ཡིན་དུ་ཟིན་ཀྱང་། ཟས་སྐོམ་ལ་སོགས་པ་འཆོལ་བའི་རྒྱུས་སླར་བཟློག་ཅིང་ཟློས་པའི་རིམས་དེ་ནི་རིང་པོར་མི་ཐོགས་པར་མྱུར་དུ་གསོད་པར་བྱེད་པར་འགྱུར་བས། རྒྱུ་དེའི་ཕྱིར་ཟློས་པའི་རིམས་དེ་ནི་ཁྱད་པར་དུ་སྟེ་མཆོག་ཏུ་ནད་གཞན་དག་ལས་བྱེ་
བྲག་ཏུ་བྱ་བ་ཡིན་པས་མ་སྨིན་ཞིང་གཏིང་ནས་མཐོང་བའི་གནས་སྐབས་སམ། ནད་སྨིན་པ་དང་མ་སྨིན་པའི་གནས་སྐབས་ཀྱི་ཁྱད་པར་གྱིས་ཕྱེ་ལ། སྨན་དཔྱད་ཀྱི་རྣམ་པ་སྨྱུང་བ་དང་། དུགས་བྱ་བ་དང་། ནས་ཐུག་དང་། སྨན་ཁུ་བ་དང་། ཤ་ཁུ་དང་། སྨིན་པར་བྱ་བ་དང་། འོ་མ་དང་
ཞུན་མར་བཏུང་བར་བྱ་བ་ལ་སོགས་པ་འདིར་བཤད་པ་དང་། མ་བཤད་པའི་སྨན་དང་དཔྱད་ཀྱི་རྣམ་པ་གང་ཡོད་པ་དེ་དང་དེ་དག་འབད་དེ་བྱའོ། །སྨན་དང་ནོར་བུ་སྔགས་དང་བཅས་པ་དང་། །དམ་པ་བླ་མ་བྲམ་ཟེ་དཀོན་མཆོག་མཆོད། །ཡིད་ནི་དགའ་བར་བྱེད་པའི་ཡུལ་བརྟེན་པས། །
ཁྱབ་འཇུག་གིས་བྱས་མ་རུངས་རིམས་ཀྱང་འཇོམས། །ཞེས་བྱ་བ་ལ། སྨན་ལ་སོགས་པས་ནི་ཁྱབ་འཇུག་གིས་བྱས་པའི་རིམས་མ་རུངས་ཤིང་ཤིན་ཏུ་གདུག་པ་དག་ཀྱང་འཇོམས་པར་བྱེད་དོ། །དེ་ལ་སྨན་དང་ནོར་བུ་དང་སྔགས་ནི་སྤྱི་བོར་གདགས་པར་བྱའོ། །དེ་ལ་དམ་པ་ནི་ཆོས་
ཀྱི་ངང་ཚུལ་ཅན་དག་གོ། །བླ་མ་ནི་ཕ་མ་ལ་སོགས་པའོ། །དཀོན་མཆོག་ནི་འཇིག་རྟེན་ན་མཆོད་པར་འོས་པ་སངས་རྒྱས་ལ་སོགས་པ་སྟེ། དེ་དག་མཆོད་པ་དང་། ཡིད་དགའ་ཞིང་ཚིམ་པར་བྱེད་པའི་ཡུལ་གཟུགས་ལ་སོགས་པ་ཡིད་དུ་འོང་བ་ལ་བརྟེན་ཞིང་གནས་པར་
เล่ม ๒๐๑ · หน้า 215a
བྱེད་པའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། གསོ་བའི་གནས་ཀྱི་ལེའུ་དང་པོའི་རྣམ་པར་འགྲེལ་པའོ།། །།དེ་ནས་ཁྲག་མཁྲིས་
གསོ་བའི་ལེའུ་བཤད་པར་བྱའོ། །ཞེས་བྱ་བ་ལ། གསོ་བའི་རིམ་པས་འདིར་ཁྲག་མཁྲིས་བསྟན་པའི་ཕྱིར་ལེའུ་འདི་བརྩམས་པ་ཡིན་ནོ། །ཁྲག་མཁྲིས་བདེ་བའི་དུས་སུ་འབྱུང་། །སྟོབས་ལྡན་སྟོད་འབྱུང་ཤུགས་དལ་ལ། །ཉེས་གཅིག་ལས་བྱུང་གསར་དུ་བཏབ། །བླ་བརྣན་
མེད་པ་གསོ་བར་བྱ། །ཞེས་བྱ་བ་ལ། ཁྲག་དང་མཁྲིས་པའི་ནད་གང་བཅོས་ན་བདེ་བའི་དུས་དགུན་སྟོད་དང་དགུན་སྨད་ཀྱི་ཚེ་བྱུང་བར་གྱུར་པ་དང་། མི་ཉམས་སྟོབས་དང་ལྡན་པ་ལ་ལུས་ཀྱི་སྟོད་དུ་བྱུང་བར་གྱུར་པ་དང་། ནད་ཀྱི་ཤུགས་དལ་ཞིང་དྲག་ཏུ་བྱུང་བ་མ་ཡིན་པ་དང་། ནད་གཞིའི་
ཉེས་པ་གཅིག་ལས་བྱུང་གི། །གཉིས་ཡན་ཆད་ལས་བྱུང་བ་མ་ཡིན་པ་དང་། གསར་དུ་བཏབ་པ་དེ་བྱུང་ནས་རིང་པོ་མ་ལོན་པ་དང་། བླ་བརྣན་མེད་པ་སྟེ་ལུས་ཀྱི་འགྱུར་བ་ཤེས་པར་བྱ་བའི་ལེའུའི་སྐབས་སུ་ཁྲག་མཁྲིས་ཞེས་བྱ་བ་ལ་སོགས་པའི་གཞུང་གིས་བསྟན་པའི་ནད་ཀྱི་བླ་
ཐབས་ཀྱི་སྐྱོན་མེད་པ་དེ་ལྟ་བུའི་ཁྲག་མཁྲིས་ཀྱི་ནད་དེ་ལྟ་བུ་ནི་གསོ་སླ་བ་ཡིན་པས་གསོ་བར་བྱའོ། །ཁྲག་གང་ནད་གཞི་གཉིས་ལས་སྐྱེས། །ཞི་ཞིང་ཞི་ཞིང་སླར་ལྡང་དང་། །ལམ་ནས་ལམ་གཞན་འགྲོ་བ་གང་། །ཐུར་དུ་འབྱུང་བ་གསོ་བ་ཙམ། །ཞེས་བྱ་བ་ལ། ཁྲག་དང་
མཁྲིས་པའི་ནད་གཞི་གཉིས་ལས་སྐྱེས་པ་དེ་ཡང་མིན་ཙམ་དུ་གསོ་བར་བྱ་བ་ཡིན་ལ། དེ་བཞིན་དུ་ཞི་ཞིང་ཞི་ཞིང་ཞེས་བྱ་བ་སླར་ལྡོག་ཅིང་བདེ་བར་འགྱུར་ནས་ཡང་དང་ཡང་དུ་སླར་ལྡང་ཞིང་འཁྲུགས་པར་གྱུར་པ་དེ་ཡང་མི་ན་ཙམ་དུ་གསོར་རུང་བ་ཡིན་ནོ། །དེ་བཞིན་དུ་ལམ་
གཞན་ནས་གཞན་དུ་འགྲོ་བ་སྟེ། ཁ་དང་སྣ་དང་མིག་དང་རྣ་བ་དང་བྲང་དང་འོག་ནས་རྒྱུ་བའི་ལམ་བཤང་སྒོ་དང་། གཅིན་སྒོ་དང་། མངལ་གྱི་གནས་དག་ཏུ་སྤོ་ཞིང་འགྲོ་བ་སྟེ། སྟོད་ནས་ཐུར་དུ་རྒྱུ་ལ། ཐུར་དུ་འགོ་ནས་ཀྱང་སྟོད་དུ་འགྲོ་བ་དེ་དག་ཀྱང་གསོ་བ་ཙམ་དུ་བྱ་བ་ཡིན་
เล่ม ๒๐๑ · หน้า 215b
ལ། དེ་བཞིན་དུ་ཁྲག་མཁྲིས་ཀྱི་ནད་གང་ཐུར་དུ་འབྱུང་ཞིང་། འོག་གི་ལམ་ཉི་ཚེ་ནས་ཤུགས་རན་པར་འབྱུང་བ་གང་ཡིན་པ་དེ་ཡང་རེ་ཞིག་མི་ན་བར་འཚོ་བ་ཙམ་དུ་གསོར་རུང་ངོ་། །ཤས་ཆེར་འབྱུང་ཞིང་མེ་དྲོད་ཉམས། །ཉེས་གསུམ་ལམ་གཉིས་ལས་བྱུང་སྤང་། །ཞེས་བྱ་བ་ལ།
སྟོད་ཀྱི་ལམ་མམ། སྨད་ཀྱི་ལམ་ནས་ཤས་ཆེར་འབྱུང་ཞིང་འབྱུང་བའི་ཤུགས་དྲག་པོའི་ཁྲག་མཁྲིས་གང་ཡིན་པ་དེ་ཡང་གསོར་མི་རུང་སྟེ་སྤང་བར་བྱ་སྟེ། ཁྲག་ཤས་ཆེར་བྱུང་བས་མི་ལྡོག་པ་ཡིན་པའི་ཕྱིར་རོ། །ཁོང་པ་མེ་དྲོད་ཞན་པའི་སྐྱེས་བུ་ལ་སྟེང་ངམ་འོག་ནས་ཁྲག་ཤས་
ཆེར་བྱུང་བ་དེ་ཡང་སྤང་བར་བྱ་སྟེ། མི་དྲོད་ཞན་པ་ལ་ནི་སྨན་སྐྱུར་པ་དང་ཚ་བ་ཕན་ན། དེ་ཁྲག་དང་མཁྲིས་པ་ལ་གནོད་པས་ཕན་ཚུན་འགལ་བའི་ཕྱིར་དེ་ཡང་གསོར་མི་རུང་བ་ཡིན་ནོ། །དེ་བཞིན་དུ་ནད་གཞི་གསུམ་ཆར་ལས་བྱུང་བ་དང་། སྟེང་འོག་གི་ལམ་གཉིས་ཀ་ལས་དུས་གཅིག་
བྱུང་བ་དེ་ཡང་སྤང་བར་བྱ་སྟེ། གསོར་མི་རུང་ངོ་། །ནད་གཞི་ཟས་དང་གནས་དང་ནི། །ནད་ཀྱི་གྲོགས་དང་སྟོབས་དག་དང་། །ཡུལ་དང་དུས་ཀྱི་གནས་སྐབས་སོགས། །ཤེས་བྱ་དང་པོར་སྨྱུང་བ་འམ་བརྟ། །དེ་བཞིན་སྦྱང་དང་ཞི་བྱ་བས། །ཁྲག་དང་མཁྲིས་པ་གསོ་བར་བྱ། །
ཞེས་བྱ་བ་ལ། ནད་གཞི་ལ་སོགས་པའི་མཚན་ཉིད་ཤེས་པར་བྱས་ལ། དེའི་འོག་ཏུ་སྟོད་དུ་འབྱུང་བའམ། སྨད་དུ་འབྱུང་བའི་མཁྲིས་པ་ལ་ཐོག་མར་ཏེ་དང་པོ་ཁོ་ནར་སྨྱུང་བར་བྱས་པའམ། ཡང་ཉམས་བརྟས་པར་བྱ་བའམ། ཡང་སྦྱང་བའམ། ཞི་བའི་ཆོ་ག་བྱའོ། །དེ་ལ་ནད་
གཞི་ནི་ཤིན་ཏུ་ཚ་ཞིང་རྣོ་བའི་ཟས་ལ་སོགས་པའོ། །གནས་ནི་སྟེང་དང་འོག་གི་མཚན་ཉིད་ཅན་ནོ། །ནད་ཀྱི་གྲོགས་ནི་གཙོ་བོ་མཁྲིས་པ་ཞེས་བྱ་བ་དེའི་གྲོགས་རླུང་དང་བད་ཀན་གྱིས་བྱས་པའོ། །སྟོབས་ནི་རྣམ་པ་གསུམ་སྟེ། དེ་དག་དང་། ཡུལ་དང་། དུས་ཀྱི་གནས་སྐབས་ཀྱང་
ཤེས་པར་བྱའོ། །ཡུལ་ནི་གཉིས་ཏེ། ལུས་ཀྱི་གནས་ཀྱི་ཡུལ་དང་། ས་གཞིའི་ཡུལ་ཇི་སྐད་བཤད་པ་དག་གོ། །དུས་ནི་གྲང་བ་དང་། ཚ་བ་དང་། ཆར་གྱི་དུས་ཏེ་རྣམ་པ་གསུམ་མོ། །སོགས་པའི་སྒྲས་ནི་ཁོང་པའི་མེ་དྲོད་དང་། ཟས་ཀྱི་རྣམ་པ་དང་། ཉམས་སྟོབས་དང་།
เล่ม ๒๐๑ · หน้า 216a
གོམས་པའི་དབང་དང་། རང་བཞིན་དང་། སྙིང་སྟོབས་དང་། ན་ཚོད་ཀྱི་རྣམ་པའི་གནས་སྐབས་གང་དག་ཡིན་པ་ཤེས་པར་བྱས་ལ། སྨྱུང་བ་ལ་སོགས་པའི་གསོ་བའི་ལས་བྱའོ། །བརྟ་བ་ལས་བྱུང་སྟོབས་ལྡན་པ། །ནད་གཞི་མང་པོ་ལས་བྱུང་བ། །གྱེན་འབྱུང་
བཀྲུ་སྨན་གཏོང་བས་གསོ། །ཐུར་འབྱུང་སྐྱུག་སྨན་གྱིས་གསོ་བྱ། །ཞེས་བྱ་བ་ལ། ཉམས་བརྟ་བ་ལས་བྱུང་བའི་ཁྲག་དང་མཁྲིས་པ་རྒྱས་པར་གྱུར་པ་ཡང་ཡིན་ཞིང་ནད་པ་དེ་སྟོབས་དང་ལྡན་པ་ཡང་ཡིན་ལ། ནད་གཞི་མང་པོ་ལས་བྱུང་བ་ཡང་ཡིན་ནོ། །གྱེན་དུ་བྱུང་བ་ཡང་
ཡིན་ན་བཀྲུ་སྨན་བཏང་བས་གསོ་ཞིང་བཅོས་པར་བྱའོ། །ཡང་རྣམ་པ་དེ་ལྟ་བུ་དག་གིས་ཁྲག་མཁྲིས་ཐུར་དུ་བྱུང་ན་སྐྱུག་སྨན་བཏང་སྟེ་དྲངས་པས་གསོ་བར་བྱའོ། །སྨྱུང་བྱ་བརྟ་བྱ་ལ་ལྟོས་བྱ། །ཞེས་བྱ་བ་ལ། དེ་དག་ཀྱང་སྨྱུང་བ་བྱ་ཞིང་ཉམས་དབྲི་བར་བྱ་བའམ། བརྟ་བར་བྱ་ཞིང་
ཉམས་འཚག་བསྐྱེད་པར་བྱ་བར་འོས་པ་གང་དག་ཡིན་པ་དེ་ལ་ལྟོས་ནས་དེ་བསྐྱེད་པར་བྱའོ། །སྟོད་དུ་བྱུང་བ་ཁ་བ་དང་། །བསྐ་བའི་སྨན་ཁུ་སྨྱུང་བ་དང་། །ཡན་ལག་དྲུག་སྨན་བཅའ་སྒ་མེད། །འཐུངས་ན་ཞི་བར་འགྱུར་བ་ཡིན། །ཞེས་བྱ་བ་ལ། ཁྲག་དང་མཁྲིས་པའི་ནད་ལུས་ཀྱི་
སྟོད་དུ་བྱུང་བ་ལ་ནི་ཁ་བ་དང་། བསྐ་བའི་སྨན་གྱི་ཁུ་བས་ཞི་བར་བྱའོ། །དེ་བཞིན་དུ་སྨྱུང་བས་ཞི་བར་བྱ་བ་དང་། དེ་བཞིན་དུ་ཡན་ལག་དྲུག་པའི་སྨན་གྱི་ཁུ་བ་བཅའ་སྒ་མེད་པའི་ལྷག་མ་བསྐོལ་བ་འཐུངས་པས་ཞི་བར་འགྱུར་རོ། །ཐུར་དུ་འབྱུང་བའི་ཁྲག་མཁྲིས་ལ། །སྨན་ཁུ་མངར་བས་བརྟ་
བར་བྱ། །ཞེས་བྱ་བ་ལ། ལུས་ཀྱི་སྨད་དུ་ཐུར་དུ་འབྱུང་ཞིང་རྒྱུ་བའི་ཁྲག་མཁྲིས་གང་ཡིན་པ་དག་ལ་ནི། སྨན་གྱི་ཁུ་བ་མངར་བས་བརྟ་ཞིང་ཞི་བར་བྱའོ། །སྟོད་འབྱུང་དང་པོར་སྐྱོ་མ་བླུད། །སྨད་འབྱུང་དང་པོར་ཐུག་པ་བླུད། །ཅེས་བྱ་བ་ལ། ཁྲག་དང་མཁྲིས་པ་སྟོད་དུ་བྱུང་བ་
ལ་ནི་དང་པོ་ཁོ་ནར་སྨན་གྱི་སྦྱོར་བ་དང་ལྡན་པའི་སྐྱོ་མ་བླུད་པར་བྱའོ། །སྨད་དུ་བྱུང་བའི་ཁྲག་དང་མཁྲིས་པ་ལ་ནི་དང་པོར་ཐུག་པ་བླུད་པར་བྱའོ། །སྟོབས་ལྡན་ཟ་ནུས་མ་དག་ཁྲག །བྱུང་ཡང་མི་དགག་དེས་ནད་སྐྱེད། །ཅེས་བྱ་བ་ལ། མི་སྟོབས་དང་ལྡན་ཞིང་ཁ་ཟས་ཟ་བར་
เล่ม ๒๐๑ · หน้า 216b
ནུས་པའི་སྐྱེས་བུའི་ཁྲག་དང་མཁྲིས་པ་ནད་ཅན་འབྱུང་བ་ལ་རྒྱུ་བར་བྱེད་པ་དག་མ་དག་ཅིང་ཁྲག་ནད་ཅན་ཡིན་ན་འབྱུང་བ་དེ་དགག་ཅིང་གཅད་པར་མི་བྱ་སྟེ། ཅིའི་ཕྱིར་ཞེ་ན། ནད་ཁྲག་དེ་གཅད་པའི་སྦྱོར་བ་བྱས་ན་དེས་ནད་སྐྱེད་པར་འགྱུར་རོ། །དེ་ཡང་དྲང་སྲོང་ཙ་ར་ཀས། །སྟོབས་དང་
ཤ་ནི་མ་ཟད་ཅིང་། །ཟ་བར་ནུས་པའི་ཁྲག་མཁྲིས་དག །ནད་ཀྱིས་ཉེན་པས་གློངས་གྱུར་པ། །ཐོག་མ་ཉིད་དུ་གཅད་མི་བྱ། །ཐོག་མ་ཉིད་དུ་བཀག་ན་ནི། །ལྐོག་ནད་དང་ནི་ཤ་ལྷག་དང་། །རྨྱ་རིམས་དང་ནི་ཡི་ག་འཆུས། །སྐྲན་དང་མཁལ་ནད་ལྟོ་སྦོས་དང་། །ཤ་ཁྲག་གཅིན་
ནི་ཕྲི་བ་དང་། །མཛེ་དང་གཞང་འབྲུམ་མེ་དབལ་དང་། །མདོག་ཉམས་མཚན་པར་རྡོལ་བ་དང་། །གློ་དང་དབང་པོ་འགགས་པ་སྐྱེད། །དེ་བས་ལས་བསྒྲུབ་འདོད་པ་ཡིས། །དང་པོར་ཁྲག་མཁྲིས་འབྱུང་བ་ལ། །ཉམས་སྟོབས་ནད་དམིགས་བརྟགས་ནས་ནི། །སྟོབས་ཅན་
མི་ལ་དགག་མི་བྱ། །ཞེས་བཤད་པ་ཡིན་ནོ། །དེ་ནི་གཞན་དུ་མེ་ལྟ་བུར། །མྱུར་གསོད་བྱེད་པས་གཅད་པར་བྱ། །ཞེས་བྱ་བ་ལ། ཁྲག་དང་མཁྲིས་པའི་ནད་དེ་མ་ཉམས་ཤིང་སྟོབས་ཆུང་བ་དང་། ཟ་མི་ནུས་པ་དང་། ནད་ཁྲག་མེད་པ་རྣམས་ནི་གཅད་ཅིང་དགག་པར་བྱ་སྟེ། ཅིའི་
ཕྱིར་ཞེ་ན། དེ་མ་བཅོས་པར་ཡལ་བར་བོར་ན། མེ་ལྟར་མྱུར་དུ་གསོད་པར་བྱེད་པ་ཉིད་ཡིན་ནོ། །དུར་བྱིད་པྲི་ཡང་ཆུ་བསྐོལ་དང་། །ལྡེ་གུ་ཁ་རར་བཅས་པ་དག །ཆོ་ག་བཞིན་དུ་དེ་ལ་ནི། །ཞོ་གཉིས་ཙམ་དུ་བལྡག་པར་བྱ། །ཞེས་བྱ་བ་ལ། དུར་བྱིད་དང་པྲི་ཡང་ཀུ་ནི་དུར་བྱིད་དང་པྲི་ཡང་
ཀུ་སྟེ། དེ་གཉིས་བསྐོལ་བའི་ཁུ་བ་དང་། །དེ་བཞིན་དུ་གཉིས་ཀའི་ལྡེ་གུ་ཁ་ར་དང་བཅས་པ་ཆོ་ག་བཞིན་དུ་སྦྱར་ལ། ལྡེ་གུ་དེ་ལ་ཞོ་གཉིས་ཙམ་གྱི་ཚད་དུ་བྱས་པ་བལྡག་པར་བྱའོ། །དུར་བྱིད་བྲི་ཡང་འབྲས་བུ་གསུམ། །ཁ་ར་སྦྲང་རྩི་པི་པི་ལིང་། །སྦྲུས་པ་འདུས་བྱུང་སྟོད་དུ་བྱུང་། །
ཁྲག་རིམས་འོར་ནད་སེལ་བྱེད་ཡིན། །ཞེས་བྱ་བ་ལ། དུར་བྱིད་ལ་སོགས་པའི་སྨན་མཁྲིས་པ་བསལ་བའི་ཕྱིར་ཤ་ཁར་ཚད་ལས་ལྷག་པར་བཅུག་ལ་སྦྲང་རྩིས་སྦྲུས་ཏེ་སྦྱར་བ་ནི་འདུས་པ་ལས་བྱུང་བའི་ཁྲག་སྟོད་དུ་བྱུང་བ་དང་། རིམས་ནད་དང་འོར་ནད་སེལ་ཞིང་འཇོམས་པར་བྱེད་པ་
เล่ม ๒๐๑ · หน้า 217a
ཡིན་ནོ། །དེ་བཞིན་དུར་བྱིད་ཁ་རར་མཉམ། །པི་པི་ལིང་ནི་བཞི་ཆར་བཅས། །ཞེས་བྱ་བ་ལ། དུར་བྱིད་དང་ཁ་ར་ཆ་མཉམ་པར་བྱས་པ་ལ། པི་པི་ལིང་དུར་བྱིད་ཀྱི་བཞི་ཆ་དང་བཅས་པ་དེ་བཞིན་དུ་ཞེས་བྱ་བ་སྔ་མ་བཞིན་དུ་སྦྲུས་ཏེ་སྦྱར་བ་ནི་ཕན་ཡོན་གོང་མ་དང་འདྲ་བ་ཡིན་ནོ། །
སྐྱུག་སྨན་ཕྱིར་ནི་པོ་སོན་ཆ། །ཁར་སྦྲང་རྩིར་བཅས་སྐྱོ་མ་འམ། །ཁ་ར་སྦྲང་རྩི་པོ་སོན་ཆ། །ཆུར་བཅས་པའམ་ཤིང་མངར་ཆུ། །འོ་མའམ་བུ་རམ་ཤིང་ཁུ་བླུད། །ཅེས་བྱ་བ་ལ། སྨད་དུ་འབྱུང་བར་བྱེད་པའི་ཁྲག་དང་མཁྲིས་པ་ལ་སྐྱུག་སྨན་གྱི་དོན་དུ་པོ་སོན་ཆ་དང་། ཁ་ར་དང་སྦྲང་རྩིར་བཅས་
པའི་སྐྱོ་མ་བླུད་པར་བྱའོ། །ཡང་ན་ཁ་ར་དང་སྦྲང་རྩི་དང་པོ་སོན་ཆ་ཆུ་དང་བཅས་པར་སྦྱར་ཞིང་བླུད་པར་བྱའོ། །ཡང་ན་ཤིང་མངར་ཆུ་དང་སྦྱར་བ་བླུད་པར་བྱའོ། །ཡང་ན་འོ་མ་པོ་སོན་ཆ་དང་སྦྱར་བའི་སྐྱུག་སྨན་བླུད་པར་བྱའོ། །ཡང་ན་བུ་རམ་ཤིང་གི་ཁུ་བ་པོ་སོན་ཆའི་ཁུ་བ་དང་སྦྱར་
བའི་སྐྱུག་སྨན་བླུད་པར་བྱའོ། །སྦྱངས་པའི་རྗེས་ལ་ཆོ་ག་ནི། །ཐུག་སླ་ལ་སོགས་ཇི་བཞིན་དུ། །བླུད་ཅིང་སྟོབས་ནི་བསྲུང་བར་བྱ། །ཞེས་བྱ་བ་ལ། དེ་ལྟར་བཀྲུ་སྨན་བཏང་བར་བྱ་བའམ། སྐྱུག་སྨན་བཏང་བས་སྦྱངས་ཤིང་དག་པར་གྱུར་པ་དང་། དེའི་རྗེས་ལ་སྨད་དུ་འབྱུང་བའི་
ཁྲག་དང་མཁྲིས་པ་ལ་ནི་ཐུག་པ་སླ་བ་ལ་སོགས་པ་ཇི་ལྟ་བ་བཞིན་དུ་འོག་ནས་བཤད་པའི་ཆོ་གས་སྨན་པས་ཇི་ལྟ་བ་བཞིན་དུ་བླུད་ཅིང་ནད་པའི་སྟོབས་བསྲུང་བའི་ཕྱིར་སྦྱིན་པར་བྱའོ། །སྟོད་དུ་འབྱུང་བ་ལ་ནི་སྐྱོ་མ་ལ་སོགས་པ་བླུད་པར་བྱའོ། །སྐྱོ་མ་རིམས་སྐབས་བཤད་རྒུན་
སོགས། །ཡང་ན་མཁྲིས་འཇོམས་འབྲས་བུར་སྦྱར། །ཞེས་བྱ་བ་ལ། སྐྱོ་མ་ནི་རིམས་ནད་གསོ་བའི་སྐབས་སུ་བཤད་པ་རྒུན་འབྲུ་དང་། ཤིང་མངར་ལ་སོགས་པ་དང་སྦྱར་བ་དང་། ཡང་ན་མཁྲིས་པ་འཇོམས་པའི་འབྲས་བུ་རྒུན་འབྲུ་དང་། སྐྱུ་རུ་ར་དང་ཏང་པ་ལ་དང་། མ་དུ་ཀ་ལ་
སོགས་པ་དང་སྦྱར་བ་བླུད་པར་བྱའོ། །སྦྲང་རྩི་འབྲ་གོ་རྒུན་འབྲུ་དང་། །པ་རུ་ཤ་ཀ་ཁ་རའི་ཆུ། །སྙིང་པོ་ལྔ་ཡི་སྐྱོ་མ་ནི། །འབྲས་ཡོས་ཕྱེ་ནི་མར་བཅས་སྦྱིན། །ཞེས་བྱ་བ་ལ། ཡང་སྙིང་པོ་ལྔའི་སྐྱོ་མ་ཞེས་བྱ་བ་སྦྲང་རྩི་ལ་སོགས་པའི་ཆུ་རྒྱུར་བཅས་པ་འབྲས་ཡོས་ཀྱི་ཕྱེ་མ་མར་
เล่ม ๒๐๑ · หน้า 217b
དང་བཅས་པ་སྦྱར་བ་བཏབ་པའི་ཕྱེ་མ་སྦྱིན་པར་བྱའོ། །མེ་དྲོད་ཆུང་ཞིང་སྐྱུར་ལ་སྲེད། །སེའུ་འབྲུ་སྐྱུ་རུ་ར་སྐྱུར་བ། །ཞེས་བྱ་བ་ལ། ཁོང་པའི་མེ་དྲོད་ཆུང་ཞིང་སྐྱུག་བག་ལ་སྲེད་པ་དག་ལ་སེའུ་འབྲུ་དང་སྐྱུ་རུ་ར་དང་སྦྱར་བའི་སྐྱོ་མ་སྐྱུར་བ་སྦྱིན་པར་བྱའོ། །པདྨ་ཨུཏྤལ་གེ་སར་དང་། ཀྲྀཥྞ་པརྞི་
པྲི་ཡང་ཀུ། །པུ་ཤེལ་ཙེ་དང་སེང་ཕྲོམ་དཀར། །བཅའ་སྒ་དང་ནི་ཙནྡན་དམར། །བྱི་ཚེར་ད་ཏ་ཀའི་མེ་ཏོག །བ་ལ་ཀ་དང་བིལ་བའི་རྐང་། །ཚིགས་བཅད་ཕྱེད་བཤད་ཐུག་པ་བླུད། །ཅེས་བྱ་བ་ལ། ཐུག་པ་ནི་པདྨ་ལ་སོགས་པ་ཚིགས་བཅད་ཕྱེད་ཀྱིས་རྫོགས་པར་བྱས་པའི་སྨན་གྱི་སྡེ་ཚན་
གསུམ་དང་སྦྱར་བའི་ཐུག་པ་གསུམ་པོ་ནི། །ཐུར་དུ་འབྱུང་བའི་ཁྲག་དང་མཁྲིས་པ་ལ་བླུད་པར་བྱའོ། །གེ་སར་ནི་པད་མའི་གེ་སར་དང་། ཨུཏྤ་ལའི་གེ་སར་ཏེ་གཉིས་ཀ་དང་སྦྱར་བར་བྱའོ། །པྲི་ཡང་ཀུ་ནི་པྲི་ཡང་ཀུའོ། །བ་ལ་ཀ་ནི་དྷི་བ་རའོ། །གཞན་ནི་གོ་བར་ཟད་དོ། །རྩ་མཁྲིས་
གླ་སྒང་པུ་ཤེལ་ཙེ། །སྲན་ཆུང་ཀྲྀཥྞ་པརྞི་སྦྱར། །མུངྒ་གན་དྷ་བི་ད་རི། །ཧ་རེ་ཎུ་ཀ་བ་ལ་མར། །ཚིག་རྐང་གཅིག་གིས་བཤད་པ་བླུད། །ཅེས་བྱ་བ་ལ། རྩ་མཁྲིས་ལ་སོགས་པ་ཚིགས་སུ་བཅད་པའི་རྐང་པ་རེ་རེས་བཤད་པའི་ཐུག་པ་བཞི་བཤད་པ་དག་ཀྱང་བླུད་པར་བྱ་སྟེ། རྩ་མཁྲིས་
ནི་བུ་ནིམ་པ་དང་ཀ་ར་ཏ་ཏིག་ཏ་ཞེས་བྱ་བ་ཡིན་ནོ། །པུ་ཤེལ་ཙེ་ནི་ཨུ་ཤི་རའོ། །གན་དྷ་བི་ད་རི་ནི་ས་ལ་པརྞིའོ། །ཧ་རེ་ཎུ་ཀ་ནི་ས་ཏི་ནའོ། །ནུས་པ་བསིལ་བ་དེ་རྣམས་ནི། །སྐམ་སའི་སྲོག་ཆགས་ཤ་དག་དང་། །ཆུར་ནི་སོ་སོར་བསྐོལ་བ་ཡི། །ཁུ་བར་ནས་ཐུག་སྦྱར་བ་བསྒྲངས། །
ཁར་སྦྲང་རྩིར་སྦྱར་བ་བླུད། །ཅེས་བྱ་བ་ལ། ཐུག་པ་དང་སྦྱར་བའི་སྨན་དུ་བཤད་པ་དེ་དག་སྐམ་སའི་སྲོག་ཆགས་ཀྱི་ཤ་དང་ཆུར་སོ་སོར་བསྐོལ་ལ། དེའི་འོག་ཏུ་ཁུ་བ་དེ་ལས་ནས་ཐུག་སྦྱར་བར་བྱའོ། །དེ་བསྒྲངས་ལ་བསིལ་བར་གྱུར་བ་དང་། ཁ་ར་དང་སྦྲང་རྩི་བཏབ་པར་བྱའོ། །དེ་
བཞིན་དུ་ནི་ཤ་ཁུ་དང་། །ཅུང་ཟད་སྐྱུར་དང་སྐྱུར་མིན་པ། །མར་བརྔོས་ཁ་ར་བཅས་པ་སྦྱིན། །ཞེས་བྱ་བ་ལ། དེ་བཞིན་དུ་ཤ་ཁུ་བསྐོལ་བར་ཐུག་པ་ཅུང་ཟད་སྐྱུར་བར་བྱས་པ་ནི་སྐྱུར་བ་ལ་སེམས་པ་ལ་སྦྱིན་ལ། དེ་ལྟ་བུ་མ་ཡིན་པ་དག་ལ་ནི་སྐྱུར་བ་མ་ཡིན་པ་མངར་བ་ཉིད་སྦྱིན་པར་བྱ་
เล่ม ๒๐๑ · หน้า 218a
ཞིང་ཐུག་པ་དེ་ཡང་མར་དང་བརྔོས་པ་དང་ཁ་ར་དང་བཅས་ཤིང་བཏབ་པ་སྦྱིན་པར་བྱའོ། །ཟས་ཀྱི་ཚུལ་ནི་ཤེས་པ་རུ། །ཡང་དང་བསིལ་བར་གང་བཤད་པའི། །གྲ་མ་གང་བུ་ཅན་འབྲུ་དང་། །ཚོད་མ་ཁྲག་ལ་བསྔགས་པ་ཡིན། །ཞེས་བྱ་བ་ལ། ཟས་ཀྱི་ཚུལ་
ཤེས་པར་བྱ་བའི་ལེའུའི་ནང་དུ་གྲ་མ་ཅན་གྱི་འབྲུ་དང་། གང་བུ་ཅན་གྱི་འབྲུ་གང་དག་བཤད་པ་ལས་ཡང་བ་དང་བསིལ་བའི་མཚན་ཉིད་དང་ལྡན་པར་བཤད་པ་གང་ཡིན་པ་དང་། དེ་བཞིན་དུ་ཚོད་མ་ཡང་བ་དང་། བསིལ་བར་བཤད་པ་གང་དག་ཡིན་པ་དེ་ཁྲག་དང་མཁྲིས་པའི་ནད་ལ་
བསྔགས་ཤིང་ཕན་པ་ཡིན་ནོ། །སྔར་བཤད་པ་ཡི་ཆུ་དག་གམ། །རྩ་བ་ཆུང་ངུ་ལྔ་བསྐོལ་ཏེ། །བསྒྲངས་པའམ་སྦྲང་རྩིའི་ཆུའམ་ནི། །འབྲས་བུ་མཉེས་པའི་ཆུ་བླུད་བྱ། །ཞེས་བྱ་བ་ལ། སྔར་བཤད་པའི་ཡན་ལག་དྲུག་པའི་སྨན་ཆུ་ལས་བཅའ་སྒ་མེད་པ་དག་བཏུང་བར་བྱ་བའམ་ཡང་
ན་རྩ་བ་ཆུང་ངུ་ལྔ་དང་བསྐོལ་ཏེ་བསྒྲངས་པའི་ཆུའམ། ཆུ་འབའ་ཞིག་བསྐོལ་ཏེ་བསྒྲངས་པའམ། ཡང་ན་སྦྲང་རྩིའི་ཆུ་བླུད་པའམ། ཡང་ན་འབྲས་བུའི་ཆུ་སྟེ་མཁྲིས་པ་འཇོམས་པའི་འབྲས་བུ་རྒུན་འབྲུ་དང་། འབྲ་གོ་ལ་སོགས་པ་ཆུར་མཉེས་ཏེ་བཙགས་ནས་བསྐོལ་ཏེ་བསྒྲངས་
ནས་བླུད་པར་བྱའོ། །བཤང་འགགས་རྒྱ་སྣེའུ་རི་བོང་ཤ། །རླུང་ཤས་ཆེ་ལ་སྲེག་པའི་ཤ། །ཨུ་དུམ་ཝཱ་རའི་ཁུ་བ་ནི་བསྐོལ་བ་བླུད་ན་བསྔགས་པ་ཡིན། །ཞེས་བྱ་བ་ལ། ཁྲག་མཁྲིས་ཀྱི་ནད་བཤང་བ་འགགས་པར་གྱུར་པ་ལ་ནི། འགག་པ་བསལ་བའི་ཕྱིར་རྒྱ་སྣེའུ་དང་བཅས་
པའི་རི་བོང་གི་ཤ་བྱིན་ན་བསྔགས་པ་ཡིན་ནོ། །ཁྲག་མཁྲིས་ཀྱི་ནད་རླུང་ཤས་ཆེ་ཞིང་རྒྱས་པ་ལ་ནི་སྲེག་པའི་ཤ་ཨུ་དུམ་བཱ་རའི་ཁུ་བར་བསྐོལ་ཏེ་བླུད་པ་བསྔགས་པ་ཡིན་ནོ། །དེ་བཞིན་བླ་ག་ཤ་རྨ་བྱའི་ཤ །ནྱ་གྲོ་དྷ་དང་ཁྱིམ་བྱའི་ཤ །ཞེས་བྱ་བ་ལ། རླུང་ཤས་ཆེ་བའི་ཁྲག་མཁྲིས་
ཀྱི་ནད་ལ་ནི་ཤིང་བླག་ཤའི་ཁུ་བར་རྨ་བྱའི་ཤ་བཙོས་པ་བླུད་ན་ཕན་ནོ། །ཡང་དེ་བཞིན་དུ་ཤིང་ནྱ་གྲོ་དྷའི་ཁུ་བར་ཁྱིམ་བྱའི་ཤ་བཙོས་པ་ཡང་སྔ་མ་འདྲ་བར་བསྔགས་པ་ཡིན་ནོ། །ཁྲག་མཁྲིས་ཀྱི་ནི་ནད་གཞི་ནི། །གང་ཅིའང་རུང་བ་དེ་སྤང་བྱ། །ཞེས་བྱ་བ་ལ། ཁྲག་དང་མཁྲིས་
เล่ม ๒๐๑ · หน้า 218b
པའི་ནད་གཞིར་གྱུར་པ་ཤིན་ཏུ་ཆེ་ཞིང་རྣོ་བའི་ཁ་ཟས་གང་དག་ཡིན་པ་དེ་དག་ཐམས་ཅད་ཀྱང་སྤང་བར་བྱའོ། །བ་ཤ་ཀའི་ཁུ་པྲི་ཡང་ཀུ། །ས་ནག་དང་ནི་སྐྱེར་ཁཎྜ། །སེང་ཕྲོམ་དང་ནི་སྦྲང་རྩིར་སྦྱར། །འཐུངས་ན་ཁྲག་དང་མཁྲིས་པ་འཇོམས། །ཡང་ན་བ་ཤ་ཀ་ཡི་ནི། །ཁུ་བ་
ཁ་ར་སྦྲང་རྩི་དང་། །བཅས་པར་འཐུངས་པ་དེ་བཞིན་ཏེ། །བ་ཤ་ཀ་ནི་འབའ་ཞིག་དང་། །བསྐོལ་བས་ཁྲག་ནི་མྱུར་སེལ་ཏེ། །དེ་ནི་འདི་ཡི་སྨན་མཆོག་ཡིན། །ཞེས་བྱ་བ་ལ། བ་ཤ་ཀའི་ཁུ་བ་དང་བསྐོལ་བ་པྲི་ཡང་ཀུ་ལ་སོགས་པ་སྦྱར་བ་འཐུངས་ན་ཁྲག་དང་མཁྲིས་པའི་ནད་
འཇོམས་ཤིང་སེལ་བར་བྱེད་དོ། །ཚད་འབྲིང་དག་ཏུ་བསྟན་པ་ནི། །སྨན་གྱི་ཁུ་བ་སྲང་བཞི་ལ། །བཏགས་པ་ཞོ་གཉིས་བཏབ་བྱ་སྟེ། །གཤེར་བ་དེ་ནི་སྲང་གསུམ་བྱ། །ཞེས་སྨོས་པའི་ཚིག་འདི་ནི་སྨན་གྱི་ཁུ་བ་སྲང་བཞིར་ཕྱེ་མ་ཞོ་གཉིས་གཞུག་པར་བྱའོ། །ས་ནག་ནི་སོ་ར་ཏི་ཞེས་
བྱ་བའི་སའོ། །ཡང་ན་བ་ཤ་ཀ་བསྐོལ་བའི་ཁུ་བ་ཁ་ར་དང་སྦྲང་རྩི་དང་བཅས་པ་འཐུངས་ན་ཡང་སྔ་མ་བཞིན་དུ་ཁྲག་དང་མཁྲིས་པ་འཇོམས་པར་འགྱུར་རོ། །ཡང་ན་བ་ཤ་ཀ་འབའ་ཞིག་བསྐོལ་བའི་ཁུ་བ་འཐུངས་པས་ཀྱང་ཁྲག་དང་མཁྲིས་པ་སེལ་བར་བྱེད་དོ། །ཡང་ན་བ་ཤ་ཀ་
བརྡུངས་ཏེ་བཙིར་བའི་ཁུ་བས་ཀྱང་ཁྲག་སེལ་བར་འགྱུར་རོ། །དེ་ཅིའི་ཕྱིར་ཞེ་ན། བ་ཤ་ཀ་དེས་ནི་ཁྲག་དང་མཁྲིས་པ་སེལ་ཅིང་འཇོམས་པར་བྱེད་པའི་སྨན་ཐམས་ཅད་ཀྱི་ནང་ན་མཆོག་གམ་དམ་པ་ཡིན་པའི་ཕྱིར་རོ། །པ་ཏོ་ལ་དང་མ་ལ་ཏི། །ནིམ་པ་ཤུག་པ་ཙནྡན་གཉིས། །སེང་
ཕྲོམ་བ་ཤ་ཏན་ཏུ་ལི། །ས་ནག་མད་ཡན་ཏི་ཀ། །ཉེའུ་ཤིང་དང་ཐལ་ཏྲེས་དང་། །རམ་ཉེ་བ་གཉིས་ཤིང་མངར་རྣམས། །བསྐོལ་བ་གསུམ་པོ་ཁ་ར་དང་། །སྦྲང་རྩིར་བཅས་པས་ཁྲག་མཁྲིས་འཇོམས། །ཞེས་བྱ་བ་ལ། པ་ཏོ་ལ་ལ་སོགས་པའི་ཚིགས་སུ་བཅད་པ་གཉིས་ཀྱིས་བསྟན་
པའི་སྨན་གྱི་ཁུ་བ་གསུམ་པོ་ཁ་ར་དང་སྦྲང་རྩི་དང་བཅས་པ་ནི་ཁྲག་དང་མཁྲིས་པ་སེལ་ཞིང་འཇོམས་པར་འགྱུར་རོ། །མ་ལ་ཏི་ནི་མེ་ཏོག་ཛཱ་ཏིའོ། །ཙནྡན་གཉིས་ནི་ཙནྡན་དཀར་པོ་དང་དམར་པོའོ། །ཏན་ཏུ་ལི་ནི་ཚོད་མའི་རྩ་ཙ་བུ་ལ་ཡི་ཞེས་བྱའོ། །ས་ནག་པོ་ནི་སོར་ཏིའོ། །མད་
เล่ม ๒๐๑ · หน้า 219a
ཡན་ཏི་ཞེས་བྱ་བ་ནི་ཚིག་འདི་ཉིད་ཀྱི་མིང་དུ་གྲགས་པའོ། །བ་ཤ་ནི་བ་ཤ་ཀའོ། །ཐལ་ཏྲེས་ནི་ཤ་རི་བའོ། །ར་མཉེ་བ་གཉིས་ནི་ཀ་ཀོ་ལི་དང་། ཀྵི་ར་ཀ་ཀོ་ལི་ཞེས་བྱའོ། །རྒྱ་སྐྱེགས་ཤིང་ཀུན་བསྐོལ་བ་ནི། །ལེགས་བསྒྲངས་ཁ་ར་བཏབ་པ་ཕན། །ཞེས་བྱ་བ་
ལ། རྒྱ་སྐྱེགས་ཤིང་ནི་པ་ལའི་ཤིང་སྟེ། ཀིང་ཤུ་ཀ་ཞེས་ཀྱང་བྱ་སྟེ། དེའི་ཤུན་པ་བསྐོལ་བ་ལེགས་པར་བསྒྲངས་ནས་ཁ་ར་བཏབ་པ་ནི་ཁྲག་དང་མཁྲིས་པ་སེལ་བར་བྱེད་དོ། །ཡང་ན་སྦྲང་རྩི་མར་བཅས་པའམ། །ལྕི་བརྟ་སྤངས་བཙིར་ཁུ་བཏུང་། །ཞེས་བྱ་བ་ལ། ཡང་ན་བ་
ལང་གི་ལྕི་བ་དང་རྟ་སྤངས་བཙིར་བའི་ཁུ་བ་མར་དང་། སྦྲང་རྩི་དང་བཅས་པ་འཐུངས་ན་ཡང་ཁྲག་དང་མཁྲིས་པ་སེལ་བར་འགྱུར་རོ། །ཁྲག་ནད་མདུད་པ་ཅན་འདྲར་འབྱུང་། །ཕུག་རོན་རྟུག་པ་སྦྲང་རྩིས་ཕན། །ཞེས་བྱ་བ་ལ། ཁྲག་ནད་ཅེས་བྱ་བ་ཁྲག་དང་མཁྲིས་པའི་ནད་རྨེའུ་ལྟ་བུ་
འམ། མདུད་པ་ལྟ་བུར་བྱུང་བ་ལ། བྱ་ཕུག་རོན་གྱི་རྟུག་པ་སྦྲང་རྩི་དང་སྦྱར་བ་འཐུངས་ན་ཕན་པ་ཡིན་ནོ། །ཁྲག་ནི་ཤས་ཆེར་བྱུང་བ་ན། །སྐམ་སའི་སྲོག་ཆགས་ཁྲག་དང་ནི། །སྦྲང་རྩིར་སྦྱར་བའམ་ར་ཡི་ནི། །མཆིན་པ་མཁྲིས་བཅས་རློན་པ་བཟའ། །ཞེས་བྱ་བ་ལ། ཁྲག་ཤས་ཆེར་འབྱུང་
ཞིང་འཛག་པར་གྱུར་པ་ལ་སྐམ་སའི་སྲོག་ཆགས་ཀྱི་ཁྲག་དང་། སྦྲང་རྩིར་སྦྱར་བ་བཏུང་བར་བྱའོ། །ཡང་ན་ཁྲག་ཤས་ཆེར་འབྱུང་བ་ལ། རའི་མཆིན་པ་དེ་ཉིད་ཀྱི་མཁྲིས་པ་དང་བཅས་པ་རློན་པ་བཟའ་བར་བྱའོ། །ཙནྡན་གླ་སྒང་པུ་ཤེལ་ཙེ། །འབྲས་ཡོས་མུངྒ་པི་པི་ལིང་། །ནས་ནི་བ་ལའི་
ཆུར་སྦངས་པ། །ཁུ་བ་ཁྲག་མཁྲིས་སེལ་བྱེད་ཡིན། །ཞེས་བྱ་བ་ལ། སྨན་པ་ལ་བསྐོལ་བའི་ཆུ་བསྒྲངས་པ་སྲང་དྲུག་གི་ནང་དུ་ཙནྡན་ལ་སོགས་པའི་སྨན་སྲང་གཅིག་མཚན་མོ་སྦངས་ལ། ཕྱི་དེ་ཉིན་བཙགས་པའི་ཁུ་བ་གྲང་མོ་ནི་ཁྲག་དང་མཁྲིས་པ་སེལ་བར་བྱེད་པ་ཡིན་ནོ། །ཙནྡན་
པདྨ་པུ་ཤེལ་ཙེ། །ཁུ་བར་བོང་བ་བསྲེགས་བཅུག་ལ། །རབ་བསྒྲངས་ཁར་སྦྲང་རྩིར་བཅས། །ཁྲག་ནི་ཤས་ཆེར་འབྱུང་བ་སེལ། །ཞེས་བྱ་བ་ལ། ཙནྡན་ལ་སོགས་པའི་སྨན་དེ་དག་བཏགས་ཏེ་ཆུའི་ནང་དུ་བཅུག་ལ་དཀྲུགས་ཏེ་བཞག་ལ། དེའི་སྟེང་དུ་བྱུང་བའི་དྭངས་མ་ལེགས་པར་
เล่ม ๒๐๑ · หน้า 219b
བསྒྲངས་པ་ལ། ཁ་ར་དང་སྦྲང་རྩི་བཏབ་པ་ནི་ཁྲག་ཤས་ཆེར་འབྱུང་ཞིང་བདོ་བ་སེལ་བར་འགྱུར་རོ། །བོང་བ་བསྲེགས་པ་བཅུག་པ་ནི་སོ་ཕག་བསྲེགས་པ་བཅུག་པའོ། །བུ་རམ་ཤིང་ནི་ཆུ་མང་སྦངས། །རྫ་བུམ་གསར་པར་དེ་བཞག་ནས། །མཚན་མོ་ཕྱི་རོལ་དབེན་པར་བཞག །ནང་པར་ཆུ་ནི་བཙགས་ནས་སུ། །
སྦྲང་རྩི་བཏབ་ནས་པདྨ་ནི། །ཁ་ཕྱེའི་ཕྲེང་རྒྱན་ཆུ་དེ་འདྲ། །ཞེས་བྱ་བ་ལ། བུ་རམ་ཤིང་དུམ་བུར་གཏུབས་ཏེ་ཆུ་མང་པོའི་ནང་དུ་སྦངས་ལ། རྫ་མའི་བུམ་པ་གསར་པའི་ནང་དུ་ཆུ་དེ་བཞག་ནས། མཚན་མོ་ཕྱི་རོལ་དུ་དབེན་པའི་ཕྱོགས་སུ་དཔྱངས་ཏེ་བཞག་ལ། ནང་པར་རས་ལ་
སོགས་པས་བཙགས་ཏེ་སྦྲང་རྩི་དང་ལྡན་པར་བྱས་ལ། པདྨ་མེ་ཏོག་ཁ་ཕྱེ་བའི་ཕྲེང་བས་བརྒྱན་ལ་དྲི་ཞིམ་པོའི་ཕྲེང་བས་བརྒྱན་པར་བྱས་པའི་ཆུ་དེ་ཡང་ཡོན་ཏན་སྔར་བཤད་པ་དེ་དང་འདྲ་སྟེ་ཁྲག་ཤས་ཆེར་འབྱུང་བ་སེལ་བར་བྱེད་པ་ཡིན་ནོ། །གང་ཡང་མཁྲིས་པའི་རིམས་སྐབས་བཤད། །
སྨན་ཁུ་དེ་ཡང་བླུད་པར་བྱ། །ཞེས་བྱ་བ་ལ། སྨན་གྱི་ཁུ་བ་གང་རིམས་ནད་གསོ་བའི་སྐབས་སུ་མཁྲིས་པའི་རིམས་ལ་ཕན་པར་བསྟན་པ། མཁྲིས་པར་གླ་སྒང་དུག་མོ་ཡུངས། །ཞེས་བྱ་བ་ལ་སོགས་པས་བཤད་པའི་ཁུ་བ་དེ་ཡང་བླུད་པར་བྱའོ། །སྨན་ཁུ་སྣ་ཚོགས་འདི་ཡིས་ནི། །མེ་དྲོད་
བསྐྱེད་པས་བད་ཀན་ཟད། །གལ་ཏེ་ཁྲག་མཁྲིས་མ་ཞི་ན། །དེ་ལ་རླུང་ཤས་ཆེར་ཕན་པའི། །ར་ཡི་འོ་མ་བསྐོལ་བ་བླུད། །དེ་བཞིན་བ་ཡི་འོ་མ་ནི། །ལྔ་འགྱུར་ཆུས་བསྐོལ་གདུས་པ་བླུད། །ཅེས་བྱ་བ་ལ། སྔར་བཤད་པའི་སྨན་གྱི་ཁུ་བ་རྣམ་པ་སྣ་ཚོགས་པ་འདི་དག་གིས་མེ་དྲོད་
བསྐྱེད་པར་གྱུར་པས་བད་ཀན་བསལ་ཅིང་ཟད་པར་གྱུར་ལ། གལ་ཏེ་ཁྲག་དང་མཁྲིས་པ་ནི་ཟད་པར་མ་གྱུར་ན། ཁྲག་དང་མཁྲིས་པ་དེ་ལ་རླུང་ཤས་ཆེ་ཞིང་རྒྱས་པར་གྱུར་པ་ལ་ཕན་པར་འགྱུར་བའི་རའི་འོ་མ་བསྐོལ་བ་བླུད་པར་བྱ་ལ། དེ་བཞིན་དུ་བའི་འོ་མ་ཆུ་ལྔ་འགྱུར་དང་བསྲེས་པ་བསྐོལ་ཏེ་
གདུས་པ་བླུད་པར་བྱའོ། །རྩ་བ་ལྔ་པ་ཆུང་ངུ་དང་། །སྦྲང་རྩི་ཁ་ར་བསྐོལ་བའང་རུང་། །ཞེས་བྱ་བ་ལ། ཡང་ན་རྩ་བ་ཆུང་ངུ་ལྔ་དང་བསྐོལ་བའི་མར་ཁ་ར་དཀར་པོ་བཏབ་སྟེ་བླུད་པར་བྱའོ། །རྒུན་འབྲུ་བཅའ་སྒ་ཛི་བ་ཀ །བ་ལ་གཟེ་མ་ཟངས་རྩི་བ། །རེ་རེ་འོ་མར་བསྐོལ་བའམ། །འོ་མ་ཁ་
เล่ม ๒๐๑ · หน้า 220a
ར་མར་བསྐོལ་ཕན། །ཞེས་བྱ་བ་ལ། རྒུན་འབྲུ་ལ་སོགས་པའི་སྨན་རེ་རེ་དང་། བའམ་རའི་འོ་མར་བསྐོལ་བ་མར་དང་བཅས་པ་བླུད་ན་ཡང་ཕན་ཏེ། ལན་འགའ་ནི་རྒུན་འབྲུ་དང་བསྐོལ་བ་ནས། ལན་འགའ་ནི་ཟངས་རྩི་བའི་མར་དང་བསྐོལ་བར་བྱའོ། །ཡང་ན་མར་དང་
ཁ་ར་དང་། འོ་མ་མར་བསྐོལ་བ་བླུད་ན་ཕན་ནོ། །གཟེ་མ་ཉེའུ་ཤིང་བསྐོལ་བའམ། །དེ་བཞིན་འདབ་བཞི་འོ་མར་བསྐོལ། །ཁྲག་ནི་ནད་བཅས་མྱུར་དུ་སེལ། །མཆོག་ཏུ་མཚན་ནས་འབྱུང་ལ་ཕན། །ཞེས་བྱ་བ་ལ། གཟེ་མ་དང་ཉེའུ་ཤིང་འོ་མར་བསྐོལ་བའམ། ཡང་ན་འདབ་མ་
བཞི་པ་མ་ཤ་དང་། མུངྒ་དང་ཀྲིཥྞ་དང་། ས་ལ་པརྞི་བཞིའི་ལོ་མ་དང་བཅས་པར་བསྐོལ་བའི་འོ་མ་ནི་ཁྲག་དང་མཁྲིས་པའི་ནད་སེལ་བར་བྱེད་དོ། །དེ་ལས་ཀྱང་མཆོག་གམ་ཁྱད་པར་དུ་ནི་གཅིན་གྱི་ལམ་ཕོ་མཚན་དང་། མོ་མཚན་ལས་བྱུང་བ་ལ་ཕན་ནོ། །རྐུབ་ལས་བྱུང་ལ་ཁྱད་པར་དུ།
མོ་ཙ་ར་ས་བླུད་ན་ཕན། །ཞེས་བྱ་བ་ལ། བཤང་བའི་ལམ་ནས་བྱུང་བའི་ཁྲག་དང་མཁྲིས་པ་ལ་ནི་མོ་ཙ་ར་ས་དང་བསྐོལ་བའི་འོ་མ་བླུད་ན་ཕན་ནོ། །དེ་ལ་མོ་ཙ་ར་ས་ནི། །ཤལ་མ་ལིའི་ཐང་ཆུ་གང་། །དེ་ནི་མོ་ཙ་ར་སར་བཤད། །ཅེས་བྱ་བ་ཡིན་ནོ། །ནྱ་གྲོ་དྷ་ཡི་མྱུ་གུའམ། །འདབ་མ་
གཞོན་པའམ་བཅའ་སྒ་དང་། །ཨུ་ཤི་ར་དང་ཨུཏྤལ་ཕན། །ཞེས་བྱ་བ་ལ། ཡང་ན་ཤིང་ནྱ་གྲོ་དྷའི་མྱུ་གུ་གཞོན་ནུའམ། ནྱ་གྲོ་དྷའི་འདབ་མ་དང་པོ་བྱུང་བ་དང་། འོ་མར་བསྐོལ་བ་དེ་བཤང་བའི་ལམ་ནས་ཁྲག་འབྱུང་བ་ལ་ཕན་ནོ། །ཡང་ན་བཅའ་སྒ་དང་། ཨུ་ཤི་ར་དང་། ཨུཏྤལ་
འོ་མར་བསྐོལ་བ་དེ་ཐུར་དུ་འབྱུང་བའི་ཁྲག་མཁྲིས་ལ་ཕན་ནོ། །ཁྲག་གི་ཚད་འཁྲུ་གཞང་འབྲུམ་གྱི། །གསོ་བ་དག་ཀྱང་འདིར་སྦྱར་བྱ། །ཞེས་བྱ་བ་ལ། ཁྲག་དང་མཁྲིས་པ་བཤད་པའི་ལམ་ནས་འབྱུང་བའི་སྐབས་འདིར་ཁྲག་གི་ཚད་པར་འཁྲུ་བའི་གསོ་བ་གང་ཡིན་པ་དང་། ཁྲག་གི་
གཞང་འབྲུམ་གྱི་གསོ་བ་གང་ཡིན་པ་དག་ཀྱང་ནད་དམིགས་ཀྱི་ཚུལ་འདིར་སྦྱར་བར་བྱའོ། །སྨན་ཁུ་འོ་མ་འཐུངས་ནས་ནི། །བཟའ་བའང་འོ་མ་ཉིད་དང་བཟའ། །ཞེས་བྱ་བ་ལ། སྨན་ཁུའི་སྦྱོར་བ་སྔར་བཤད་པ་དང་། འོ་མ་འཐུངས་ནས་བཟའ་བའི་རྣམ་པ་ཡང་དེ་ཉིད་དང་བཟའ་
เล่ม ๒๐๑ · หน้า 220b
ཞིང་ལོངས་སྤྱད་པར་བྱའོ། །སྨན་ཁུའི་སྦྱོར་བ་འདི་དག་ཉིད། །བསྐོལ་བའི་མར་ནི་བླུད་པར་བྱ། །ཞེས་བྱ་བ་ལ། སྔར་བཤད་པའི་སྨན་ཁུ་བསྐོལ་བའི་སྦྱོར་བ་ཅི་རིགས་པར་བསྐོལ་བ་འདི་དག་ཉིད་དང་། མར་དུ་བསྐོལ་བའི་སྨན་མར་ཡང་བཏུང་ཞིང་ལོངས་སྤྱད་པར་བྱའོ། །བ་ཤ་ཀ་རྩ་རྩེར་
བཅས་བརྡུངས། །ཆུ་ནི་བརྒྱད་འགྱུར་ནང་དུ་ནི། །བསྐོལ་ཏེ་བརྒྱད་ཆ་ལུས་གྱུར་པ། །དེ་དང་མར་ནི་བཙོ་བར་བྱ། །དེ་ཡི་མེ་ཏོག་ནང་བཅུག་བསྒྲངས། །སྦྲང་རྩིར་བཅས་པས་ཁྲག་མཁྲིས་དང་། །མཁྲིས་སྐྲན་རིམས་དང་དབུགས་མི་བདེ། །ལུད་པ་སྙིང་ནད་མིག་སེར་དང་། །རབ་རིབ་མགོ་
འཁོར་མེ་དབལ་དང་། །སྐད་འགགས་པ་ནི་འཇོམས་པར་བྱེད། །ཅེས་བྱ་བ་ལ། བ་ཤ་ཀའི་རྩ་བ་དང་། ཡལ་ག་དང་ལོ་མ་དང་། རྩེ་མོར་བཅས་པ་དེ་གཏུན་གྱི་ནང་དུ་བརྡུངས་ལ། སྨན་སྲང་སུམ་ཅུ་རྩ་གཉིས། ཆུ་སྲང་ཉིས་བརྒྱ་ལྔ་བཅུ་རྩ་དྲུག་གི་ནང་དུ་བསྐོལ་ལ། དེ་ལས་བརྒྱད་ཆ་སྟེ།
སུམ་ཅུ་རྩ་གཉིས་ལུས་པ་དང་། དེའི་ནང་དུ་མར་སྲང་བརྒྱ་བཙོས་ལ་མར་གྱི་བཞི་ཆར་བ་ཤ་ཀའི་མེ་ཏོག་ནང་དུ་བཅུག་ལ། དེ་བསྒྲངས་པར་སྦྲང་རྩི་བཏབ་སྟེ་བཟའ་བར་བྱའོ། །ཟོས་པས་ནི་ཁྲག་མཁྲིས་ལ་སོགས་པའི་ནད་སྐྱེས་པ་འཇོམས་པར་བྱེད་དོ། །པ་ལ་ཤ་ཡི་མྱུ་གུའི་ཁུར། །དེ་
བཅུག་མར་ནི་བསྐོལ་བ་དག །སྦྲང་རྩིར་བཅས་པས་ཁྲག་ནད་སེལ། །ཀྱི་ལྕེ་བ་ཡང་དེ་བཞིན་ནོ། །ཞེས་བྱ་བ་ལ། པ་ལ་ཤའི་མྱུ་གུ་ཁམ་བྱེ་བ་བསྐོལ་བའི་ཁུ་བ་འདིར་ཁྱད་པར་གྱི་ཚིག་མ་སྨོས་པ་ལས་ནི་མར་གྱི་བཞི་འགྱུར་བྱས་པ་དེ་དག་ཉིད་ཀྱི་ནང་དུ་པ་ལ་ཤའི་ཕྱེ་མ་མར་གྱི་བཞི་ཆ་བཅུག་
ལ་དྲང་སྲོང་ཤན་ཀས་བཤད་པའི་ཚད་བཞིན་དུ། སྨན་གྱི་ལྡེ་གུ་མར་གྱི་བརྒྱད་ཆ་བཅུག་ལ། ཤ་ན་ཀས་བཤད་པའི་ཚུལ་དུ་བཏུང་བར་བྱ་སྟེ། དེ་ཡང་ཤན་ཀས་བཤད་པའི་ཚུལ་ནི། །སྨན་གྱི་ཁུ་བ་བསྐོལ་རིམ་གྱིས། །ཆུང་ངུ་སྣུམ་ནི་དག་པ་ཡིན། །ལྡེ་གུ་བཞི་ཆ་དྲུག་པ་དང་། །བརྒྱད་
ཆ་དང་ནི་སྦྱར་བར་བྱ། །ཞེས་བྱ་བ་ཡིན་ནོ། །དེ་ལྟ་བུའི་སྨན་མར་ཏེ་སྦྲང་རྩི་དང་བཅས་པ་ཟོས་པས་ནི་ཁྲག་མཁྲིས་ཀྱི་ནད་འཇོམས་པར་བྱེད་པ་ཡིན་ནོ། །ཡང་དེ་ཉིད་ཀྱི་ཚུལ་བཞིན་ཀྱི་ལྕེ་བའི་རང་གི་ཁུ་བ་དང་། ལྡེ་གུའི་ནང་དུ་མར་བཅུག་སྟེ་བསྐོལ་བ་དེ་ཡང་ཁྲག་དང་མཁྲིས་པ་འཇོམས་
เล่ม ๒๐๑ · หน้า 221a
པར་བྱེད་པ་ཡིན་ནོ། །ཁྲག་ནི་སྤྱི་བག་བད་ཀན་བཅས། །མདུད་པར་ཆགས་ནད་མགུལ་པར་བྱུང་། །ཨུཏྤལ་སྡོང་བུ་བསྲེགས་ཐལ་བ། །ཞུན་མར་སྦྲང་རྩིར་བཅས་པ་བལྡགས། །ཞེས་བྱ་བ་ལ། མགུལ་པའི་ལམ་ནས་བྱུང་བའི་ཁྲག་སྤྱི་བག་དང་བཅས་པར་
འབྱུང་ཞིང་བད་ཀན་དང་འདྲེན་མར་བྱུང་བ་དང་། དེ་བཞིན་དུ་མདུད་པར་ཆགས་པ་སྟེ། ཁྲག་གི་ནང་དུ་མདུད་པ་ཤའི་རྨེན་བུ་ལྟ་བུ་ཆགས་པའི་ནད་ལ་ནི། ཨུཏྤ་ལའི་སྡོང་བུ་བསྲེགས་པའི་ཐལ་བ་སྦྲང་རྩི་དང་ཞུན་མར་དུ་སྦྱར་ཏེ་བལྡགས་ན་སེལ་བར་འགྱུར་རོ། །པདྨ་ཨུཏྤ་ལ་གེ་སར་དང་། །པྲི་
ཡང་ཀུ་དང་མ་དུ་ཀ །རེ་རེའི་སྦྱོར་བ་དེ་བཞིན་བྱ། །ཞེས་བྱ་བ་ལ། དེ་བཞིན་དུ་པདྨ་གེ་སར་གྱི་ཐལ་བ་དང་། ཨུཏྤ་ལའི་གེ་སར་གྱི་ཐལ་བ་དང་། པྲི་ཡང་ཀུ་སྟེ་གན་དྷ་པྲི་ཡང་ཀུ་བསྲེགས་པའི་ཐལ་བ་དང་། མ་དུ་ཀའི་ཐལ་བ་སྣ་རེ་རེ་ཞིང་ཡང་ཞུན་མར་དང་། སྦྲང་རྩི་དང་སྦྱར་བའི་ལྡེ་གུ་
བལྡགས་ན་ཕན་ཡོན་སྔ་མ་དང་འདྲ་སྟེ། གྲེ་བ་ནས་ཁྲག་འབྱུང་བ་སྤྱི་བག་ལ་སོགས་པའི་མཚན་ཉིད་ཅན་གྱི་ནད་སེལ་བར་བྱེད་དོ། །ཁྲག་ནི་བཤང་བའི་ལམ་ནས་ནི། །འབྱུང་བར་བྱེད་ལ་ཁྱད་པར་དུ། །འཇམ་རྩི་བཏང་བ་བསྔགས་པ་ཡིན། །ཞེས་བྱ་བ་ལ། བཤང་བའི་ལམ་
ནས་འབྱུང་བའི་ཁྲག་གི་ནད་ལ་ཁྱད་པར་རམ་མཆོག་ཏུ་འཇམ་རྩི་མས་གཏོང་བའི་ཆོ་ག་བྱ་བ་བསྔགས་པ་ཡིན་ལ། འཇམ་རྩི་དེ་ཡང་ཁྲག་དང་མཁྲིས་པ་སེལ་བའི་སྨན་གྱི་སྦྱོར་བའི་ལས་བྱའོ། །སྣ་ནས་ནད་ཅན་ཁྲག་བྱུང་ན། །སྣ་སྨན་གཏང་ཞིང་བླུགས་པར་བྱ། །སྔར་བཤད་
སྨན་ཁུའི་སྦྱོར་བ་དང་། །འོ་མ་བུ་རམ་ཤིང་ཁུ་བླུགས། །འོ་མ་སོགས་ཆུ་ཁ་རར་བཅས། །ཡང་ན་ཆུ་ནི་འབའ་ཞིག་ཕན། །སེའུ་འབྲུའི་མེ་ཏོག་ཁུ་བའམ། །ཨ་མྲའི་རུས་པ་དཱུར་བ་ཕན། །ཞེས་བྱ་བ་ལ། སྣ་ནས་བྱུང་བའི་ཁྲག་ནད་བསལ་བ་ལ་ནི་སྨན་སྣ་ནས་གཏང་བའི་ཆོ་ག་
འོ་མ་བླུགས་པ་ལ་སོགས་པ་སྦྱར་བར་བྱའོ། །དེ་བཞིན་དུ་སྔར་བཤད་པའི་སྨན་ཁུའི་སྦྱོར་བ་དང་། གཅིག་ཏུ་སྦྱོར་བའི་སྨན་ཡང་གཏང་བར་བྱའོ། །དེ་བཞིན་དུ་འོ་མ་ལ་སོགས་པ་ཁར་དང་བཅས་པ་དང་། དེ་བཞིན་དུ་ཆུ་དང་ཁ་རར་བཅས་པའམ། ཡང་ཆུ་འབའ་ཞིག་བླུགས་པ་
เล่ม ๒๐๑ · หน้า 221b
བསྔགས་པ་ཡིན་ནོ། །ཡང་ན་སེའུ་འབྲུའི་མེ་ཏོག་གི་ཁུ་བ་སྣར་བླུད་ན་ཕན་པའམ། དེ་བཞིན་དུ་ཨ་མྲའི་རུས་པ་བསྐོལ་བའི་ཁུ་བའམ། ཡང་ན་རྩ་དཱུར་བའི་ཁུ་བ་སྣ་ལས་ནད་ཁྲག་ཕྱུང་བ་ལ་ཕན་ནོ། །བསིལ་སྨན་སྡེ་ཚན་གཏོགས་པ་དག །བསྐུ་དང་བྱུག་ལ་སོགས་ལས་སྦྱར། །
ཞེས་བྱ་བ་ལ། བསིལ་སྨན་གྱི་སྡེ་ཚན་དག་ཀྱང་ཁྲག་མཁྲིས་སེལ་བ་ཡིན་ཏེ། སྐྱུག་སྨན་ལ་སོགས་པའི་སྡེ་ཚན་ལས་སྨོས་པའི་དཱུར་བ་དང་བྱི་ཚེར་བ་ལ་སོགས་པའི་སྨན་གང་དག་ཡིན་པ་དེ་བསྐུ་བ་དང་བྱུག་པ་ལས་སྦྱར་བར་བྱའོ། །སོགས་པ་སྨོས་པས་ནི་སྨན་ཆུ་བླུགས་པ་དང་། ལུས་
བཅིང་བ་དང་། སྨན་མར་བཙོ་བ་ལ་སོགས་པ་བསྡུའོ། །མཁྲིས་པའི་རིམས་སེལ་བཤད་པ་གང་། །ཕྱི་ནང་ལས་བཏུང་སྨན་དེ་དང་། །གློ་རྡོལ་བར་ནི་གང་ཕན་པ། །དེ་ཡང་ཁྲག་དང་མཁྲིས་པར་ཕན། །ཞེས་བྱ་བ་ལ། རིམས་གསོ་བའི་སྐབས་སུ་མཁྲིས་པའི་རིམས་སེལ་བའི་སྨན་ཕྱི་
ནས་བསྐུ་བ་དང་ནང་ནས་བཏུང་བ་ལ་སོགས་པ་གང་དག་ཡིན་པ་དེ་ཡང་ཁྲག་དང་མཁྲིས་པའི་ནད་ལ་ཕན་ནོ། །དེ་བཞིན་དུ་གློ་རྡོལ་བ་ལ་ཕན་པའི་སྨན་གང་དག་ཡིན་པ་དེ་ཡང་ཁྲག་དང་མཁྲིས་པ་སེལ་བ་ཡིན་པས་ཕན་པ་ཡིན་ནོ། །ཡན་ལག་བརྒྱད་པའི་སྙིང་པོ་བསྡུས་པའི་རྣམ་པར་འགྲེལ་
པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས་གསོ་བའི་གནས་ཀྱི་ལེའུ་གཉིས་པའི་རྣམ་པར་འགྲེལ་པའོ།། །།དེ་ནས་ལུད་པ་གསོ་བའི་ལེའུ་བཤད་པར་བྱའོ། །ཞེས་བྱ་བ་ལ། ད་ནི་འདིའི་གསོ་བའི་རིམ་པ་འདི་སྐབས་
ཡིན་པས་ན། འདིའི་གསོ་བ་བརྩམས་པ་ཡིན་ནོ། །ལུད་པ་མ་འདྲེས་རླུང་ལས་བྱུང་། །དང་པོར་སྣུམ་གྱིས་གསོ་བྱ་ཞིང་། །ཤ་ཁུ་ཐུག་པ་ཡུ་ཤ་སོགས། །རླུང་འཇོམས་སྨན་བསྐོལ་སྣུམ་པ་དང་། །དུད་བདུགས་ལྡེ་གུ་བསྐུ་དང་དུགས། །ཆུ་བླུགས་ལུས་བཅིང་དག་གིས་གསོ། །
ཞེས་བྱ་བ་ལ། ལུད་པ་ནད་གཞི་གཞན་དང་མ་འདྲེས་པར་རླུང་འབའ་ཞིག་ལས་བྱུང་བ་ནི། དང་པོར་ཞུན་མར་ལ་སོགས་པའི་སྣུམ་གྱི་སྦྱོར་བས་གསོ་བར་བྱའོ། །དེ་བཞིན་དུ་ཤ་ཁུ་ལ་སོགས་པ་རླུང་འཇོམས་པའི་སྨན་དང་བསྐོལ་བ་སྣུམ་བག་དང་བཅས་པས་གསོ་བར་བྱ་བ་དང་།
เล่ม ๒๐๑ · หน้า 222a
དེ་བཞིན་དུ་དུད་པས་བདུགས་པ་དང་། ལྡེ་གུ་དང་བསྐུ་བ་ལ་སོགས་པ་དག་གིས་ཀྱང་ལུད་པའི་ནད་གསོ་བར་བྱའོ། །བཤང་རླུང་འགགས་ལ་འཇམ་རྩིས་གསོ། །ཞེས་བྱ་བ་ལ། བཤང་བ་དང་འཕྱེན་ཞེས་བྱ་བའི་རླུང་ཐུར་དུ་འབྱུང་བ་འགགས་པར་འགྱུར་བའི་ནད་
ལ་ནི། འཇམ་རྩི་མས་གཏོང་བས་གསོ་བར་བྱའོ། །མཁྲིས་བཅས་ཞུན་མར་འོ་མ་ནི། །ཟས་ཀྱི་སྔོན་བཏང་། ཞེས་བྱ་བ་ལ། མཁྲིས་པ་དང་བཅས་པའི་རླུང་ལས་གྱུར་བའི་ལུད་པ་ལ་ནི་ཞུན་མར་དང་འོ་མ་ཟས་ཀྱི་སྔོན་དུ་བཏང་ཞིང་འཐུངས་པས་གསོ་བར་བྱའོ། །བད་ཀན་བཅས།
སྣུམ་བཅས་བཀྲུ་སྨན་བཏང་བས་གསོ། །ཞེས་བྱ་བ་ལ། བད་ཀན་དང་བཅས་པའི་རླུང་ལས་གྱུར་པའི་ལུད་པ་ལ་ནི་སྣུམ་དང་བཅས་པའི་བཀྲུ་སྨན་བཏང་བས་གསོ་བར་བྱའོ། །སླེ་ཏྲེས་ཀཎྜ་ཀ་རི་གཉིས། །རེ་རེ་སྲང་སུམ་ཅུའི་ཁུ་བར། །མར་སྲང་སུམ་ཅུ་རྩ་གཉིས་བསྐོལ། །རླུང་
གི་ལུད་སེལ་མེ་དྲོད་སྐྱེད། །ཅེས་བྱ་བ་ལ། སླེ་ཏྲེས་དང་ཀཎྜ་ཀ་རི་གཉིས་པོ་རེ་རེ་ཞིང་སྲང་སུམ་ཅུ་སུམ་ཅུ་བསྐོལ་བའི་ཆོ་གས་བསྐོལ་ལ། བསྐོལ་བའི་ཁུ་བ་དེའི་ནང་དུ་མར་ཁུ་སྲང་སུམ་ཅུ་རྩ་གཉིས་བཅུག་ལ། བསྐོལ་བའི་ཁུ་བ་སྨན་མར་གྱིས་ནི་རླུང་ལས་གྱུར་པའི་ལུད་པ་སེལ་ཞིང་ཕོ་
བའི་མེ་དྲོད་སྐྱེད་པར་བྱེད་པ་ཡིན་ནོ། །ཀྵ་ར་ར་སྣ་ཤུ་དག་དང་། །ཤིང་ཀུན་པ་ཏ་ཤིང་མངར་དང་། །འུ་སུ་ཞོ་གཉིས་མར་བྲེ་གང་། །ཚ་བ་ལྔ་དང་བཅས་པ་དང་། །རྩ་བ་བཅུ་བའི་ཁུ་བར་བསྐོལ། །འཐུངས་རྗེས་ཐུག་པ་བླུད་གྱུར་ན། །ལུད་པ་དབུགས་མི་བདེ་བཅས་སྙིང་། །རྩིབ་ལོགས་ཕོ་
བའི་སྐྲན་ནད་སེལ། །ཞེས་བྱ་བ་ལ། ཡབ་ཀྵ་ར་ལ་སོགས་པའི་སྨན་ཞོ་གཉིས། ཞུན་མར་བྲེ་གང་ཞེས་པ་སུམ་ཅུ་རྩ་གཉིས་ཀྱི་ནང་དུ་བཅུག་ལ། ཚབ་ལྔ་དང་བཅས་པར་བསྐོལ་ཞིང་རྩ་བ་བཅུ་པའི་ཁུ་བར་མར་གྱི་བཞི་ཆ་སྲང་བརྒྱད་ཅུ་ལ་བསྐོལ་ཏེ་མར་སྲང་བརྒྱད་ཅུ་རྩ་གཉིས་པོ་
དེ་ལས་ཅི་རན་ཙམ་འཐུངས་པའི་རྗེས་ལ་ཐུག་པ་བླུད་པར་གྱུར་ན། དེས་ལུད་པ་ལ་སོགས་པའི་ནད་སེལ་བར་འགྱུར་བའོ། །འདིར་ཚ་བ་ལྔ་ནི་རེ་རེ་ཞིང་ཞོ་གཉིས་གཉིས་གཞུག་གོ། །ར་སྣ་ཉེའུ་ཤིང་རྩ་བ་བཅུ། །སྲང་ནི་བཅུ་གཉིས་ཚད་དུ་བྱ། །རྒྱ་སྲན་རྒྱ་ཤུག་ནས་དག་ནི། །
เล่ม ๒๐๑ · หน้า 222b
ར་ཤ་སྲང་ནི་ལྔ་བཅུ་དང་། །ཆུ་སྲང་ལྔ་བརྒྱ་བཅུ་གཉིས་བསྐོལ། །དེ་དང་མར་ནི་བྲེ་བཞི་བསྐོལ། །འོ་མ་མར་མཉམ་ཛི་བན་ཏི། །ལ་སོགས་སྲང་ཆར་བྱས་ཏེ་བརྟག །རླུང་གི་ནད་ལ་བླུད་པ་དང་། །སྣར་བཏང་འཇམ་རྩི་མས་གཏོང་སྦྱར། །ལུད་པ་རྣམ་ལྔ་མགོ་འདར་དང་། །མོ་མཚན་
ཆུ་སོར་ན་བ་དང་། །ལུད་ཀུན་ལུས་ནི་ཕྱོགས་གཅིག་ནད། །མཆིན་བཅས་སྟོད་ཀྱི་རླུང་ནད་སེལ། །ཞེས་བྱ་བ་ལ། སྨན་ར་སྣ་དང་། ཉེའུ་ཤིང་དང་། རྩ་བ་བཅུ་པ་སྟེ། སྨན་སྣ་བཅུ་གཉིས་པོ་སྲང་རེ་གཞལ་བའི་སྲང་བཅུ་གཉིས་དང་། རྒྱ་སྲན་ཀུ་ལངྠ་དང་། །རྒྱ་ཤུག་དང་། ནས་ཏེ་
གསུམ་པོ་སྲང་བརྒྱད་བརྒྱད་དང་། ར་ཤ་སྲང་ལྔ་བཅུ་ཆུ་སྲང་ལྔ་བརྒྱ་རྩ་བཅུ་གཉིས་ཀྱི་ནང་དུ་བསྐོལ་ལ། བསྐོལ་བ་དེ་ལས་བཞི་ཆ་ལུས་པ་དེ་དང་མར་དང་། འོ་མ་བྲེ་བཞི་བཞི་སྟེ། སྲང་བརྒྱ་ཉི་ཤུ་རྩ་བརྒྱད་དང་། ཛི་བན་ཏི། ར་མཉེ་བ་ལ་སོགས་པའི་སྨན་རེ་རེའི་ཆར་བྱས་པ་ལྡེ་གུར་བྱས་
པ་དང་བསྐོལ་བའི་མར་དེ་བརྟ་བར་བྱེད་ནུས་པ་ཉིད་དུ་ལེགས་པར་བརྟགས་ཤིང་ཤེས་པར་བྱས་ལ། རླུང་གི་ནད་ལ་བཏུང་བ་ལ་སོགས་པར་བྱིན་པས་ལུད་པ་རྣམ་པ་ལྔ་པོ་སེལ་བར་བྱེད་པ་དང་། མགོ་འདར་ཞིང་འདམ་པ་ལ་སོགས་པའི་ནད་དང་། ལུས་ཀྱི་ཡན་ལག་ཏུ་ཁྱབ་པ་དང་།
ལུས་ཀྱི་ཕྱོགས་གཅིག་ཏུ་ཁྱབ་པའི་རླུང་གི་ནད་སྣ་ཚོགས་དང་། མཆིན་པའི་ནད་དང་བཅས་པ་སེལ་བར་འགྱུར་རོ། །བི་ད་རི་སོགས་སྡེ་ཚན་བསྐོལ། །ལྡེ་གུ་མར་བསྐོལ་ལུད་པ་འཇོམས། །ཞེས་བྱ་བ་ལ། བི་ད་རི་ལ་སོགས་པའི་སྡེ་ཚན་བསྐོལ་བའི་ཁུ་བ་མར་གྱི་བཞི་འགྱུར་དང་། ལྡེ་
གུ་མར་གྱི་བཞི་ཆ་བསྐོལ་བའི་སྨན་མར་དེ་ནི་ལུད་པ་འཇོམས་པར་བྱེད་པ་ཡིན་ནོ། །ཤིང་མངར་ཨ་ཤྭ་ཀའི་ས་བོན། །བྱི་དང་ག་དང་སྐྱེར་ཁཎྜ། །ཤུག་པ་ཁ་རུ་ཚ་མར་བསྐོལ། །ཡང་ན་དེ་ཕྱེ་མར་དང་སྦྲུས། །ལྡེ་གུ་བྱིན་ལ་ར་ཡི་ནི། །འོ་མ་བླུད་ན་ལུད་པ་སེལ། །ཞེས་བྱ་བ་ལ།
ཤིང་མངར་དང་ཨ་ཤྭ་ཀའི་ས་བོན་ལ་སོགས་པ་སྨན་ཁ་རུ་ཚ་དང་བཅས་པར་བསྐོལ་བའི་ཁུ་བ་མར་གྱི་བཞི་འགྱུར་གྱི་ནང་དུ་བསྐོལ་བའི་སྨན་མར་འཐུངས་ལ། དེའི་རྗེས་ལ་འོ་མ་བླུད་ན་ལུད་པ་སེལ་བར་འགྱུར་རོ། །ཡང་ན་ཤིང་མངར་ལ་སོགས་པ་སྨན་གྱི་ཕྱེ་མ་མར་དང་སྦྲུས་ཏེ་
เล่ม ๒๐๑ · หน้า 223a
ལྡེ་གུར་བྱས་པ་བལྡགས་ལ། དེའི་རྗེས་ལ་རའི་འོ་མ་འཐུངས་ན་ཡང་ལུད་པ་སེལ་བར་འགྱུར་རོ། །དོང་ག་ར་སྣ་བྱི་དང་ག །ཤིང་ཀུན་རྒྱམ་ཚ་པི་པི་ལིང་། །བར་གྱི་ཀྵ་ར་དེའི་ཕྱེ་མའམ། །མར་དང་རན་ཙམ་བླུད་གྱུར་ན། །རླུང་གྱུར་བད་ཀན་བཅས་ལུད་པ། །
དབུགས་མི་བདེ་དང་སྐྱིགས་བུ་དང་། །མེ་དྲོད་ཆུང་བ་སེལ་བར་བྱེད། །ཅེས་བྱ་བ་ལ། དོང་ག་ལ་སོགས་པའི་ཕྱེ་མའམ། མར་གྱིས་ཚད་ནད་ཞི་བ་ལ་སོགས་པའི་ཚུལ་ལས་ལྟོས་ཏེ་བླུད་པར་གྱུར་ན། རླུང་ལས་གྱུར་བའི་བད་ཀན་བཅས་པའི་ལུད་པ་སེལ་བར་འགྱུར་རོ། །བྱི་ཚེར་
བ་དང་བཅའ་སྒ་དང་། །ཟུར་པ་རྒུན་འབྲུ་ཁར་དཀར། །ཀར་ཀ་ཏ་ཡི་སྲིང་གི་ནི། །ཏིལ་མར་དང་ནི་ལྡེ་གུར་སྦྱར། །རླུང་ལས་གྱུར་པའི་ལུད་པ་སེལ། །ཞེས་བྱ་བ་ལ། བྱི་ཚེར་བ་ལ་སོགས་པའི་སྨན་ཏིལ་མར་དང་ལྡེ་གུར་སྦྱར་བ་བལྡགས་པས་ནི་རླུང་ལས་གྱུར་པའི་ལུད་པ་སེལ་བར་
འགྱུར་རོ། །བྱི་ཚེར་གླ་སྒང་པི་པི་ལིང་། །བར་གྱི་ཟུར་པ་ཀར་ཀ་ཏི། །བུ་རམ་རྙིང་དང་ཏིལ་མར་དང་། །ལྡེ་གུར་བྱས་པ་བལྡག་པར་བྱ། །ཞེས་བྱ་བ་ལ། བྱི་ཚེར་བ་ལ་སོགས་པའི་སྨན་ཕྱེ་མར་བཏགས་པ་དང་། བུ་རམ་རྙིང་པ་དང་། ཏིལ་མར་དང་ལྡེ་གུར་སྦྱར་ཏེ་བལྡགས་ན་ཡང་རླུང་
ལས་གྱུར་པའི་ལུད་པ་སེལ་བར་འགྱུར་རོ། །བཅའ་སྒ་པི་པི་ལིང་དེ་བཞིན། །ཀར་ཀ་ཏ་སྲིང་དེ་བཞིན་ནོ། །ཞེས་བྱ་བ་ལ། བཅའ་སྒ་དང་པི་པི་ལིང་བུ་རམ་དང་སྦྱར་བའི་ལྡེ་གུས་ཀྱང་རླུང་ལས་གྱུར་པའི་ལུད་པ་སེལ་ཏོ། །ཀར་ཀ་ཏ་སྲིང་གི་ཞེས་བྱ་བའི་སྨན་ལྡེ་གུར་བྱས་པས་ཀྱང་དེ་
བཞིན་དུ་ལུད་པ་སེལ་ཏོ། །ཆུ་དྲོན་དག་དང་པི་པི་ལིང་། །ལྕེ་མྱང་ཚ་དང་བཅས་པ་བླུད། །ཅེས་བྱ་བ་ལ། པི་པི་ལིང་དང་ལྕེ་མྱང་ཚ་གཉིས་ཆུར་བསྐོལ་བ་དྲོ་འཇམ་ཙམ་དང་སྦྱར་བས་ཀྱང་རླུང་ལས་གྱུར་པའི་ལུད་པ་སེལ་ཏོ། །བཅའ་སྒ་ཁར་ཞོ་ག་ཆུའམ། །པི་པི་ལིང་ཕྱེ་ཞོར་བཏབ་
བླུད། །ཅེས་བྱ་བ་ལ། བཅའ་སྒ་ཁ་ར་དང་བཅས་པ་ཞོ་ག་ཆུ་དང་སྦྱར་བའམ། པི་པི་ལིང་གི་ཕྱེ་མ་ཞོར་བཏབ་པ་བླུད་ན་ཡང་རླུང་ལས་གྱུར་པའི་ལུད་པ་སེལ་ཏོ། །རྒྱ་ཤུག་ཚི་གུ་ཆང་ངམ་ཞོ། །ཞོ་ག་ཆུ་དང་སྦྱར་བ་བླུད། །ཅེས་བྱ་བ་ལ། རྒྱ་ཤུག་གི་རྩ་བ་ཚི་གུ་ཕྱེ་མར་བཏགས་
เล่ม ๒๐๑ · หน้า 223b
ལ། ཆང་ངམ་ཞོ་ག་ཆུ་དང་སྦྱར་ཏེ་བླུད་ན་ཡང་རླུང་ལས་གྱུར་པའི་ལུད་པ་འཇོམས་སོ། །ཡང་ན་པི་པི་ལིང་ལྡེ་གུ། །མར་བརྔོས་རྒྱམ་ཚར་བཅས་པའང་ཕན། །ཞེས་བྱ་བ་ལ། ཡང་ན་པི་པི་ལིང་གི་ལྡེ་གུར་བྱས་པ་མར་དང་བརྔོས་ཏེ་རྒྱམ་ཚར་བཏབ་པ་ཆང་ངམ་ཞོའམ་ཞོ་ག་ཆུ་དང་སྦྱར་
བས་ཀྱང་རླུང་ལ་ཕན་ནོ། །ལུད་པ་ཆམ་བཅས་དུད་པ་ནི། །སྣུམ་བཅས་ཆོ་གས་བདུག་པ་དང་། །སྐྱིགས་བུ་དབུགས་མི་བདེ་དུད་བརྔུབ། །འོ་མ་ཤ་ཁུར་བཅས་པ་བཟའ། །ཞེས་བྱ་བ་ལ། ལུད་པ་ཆམ་པ་ལ་ནི་འོ་མ་དང་ཤ་ཁུ་དང་ལྡན་པར་བཟའ་བ་དང་བཅས་པར་སྔར་དུད་པས་
བདུག་པའི་ཆོ་གའི་སྐབས་སུ་བཤད་པའི་སྣུམ་གྱི་དུད་པ་དེ་ཉིད་དུ་བཤད་པའི་ཆོ་གས་བརྔུབ་པར་བྱ་བ་དང་། དེ་བཞིན་དུ་སྐྱིགས་བུ་དང་དབུགས་མི་བདེ་བ་གསོ་བའི་སྐབས་སུ་འོག་ནས་བཤད་པའི་དུད་པ་དེ་ཡང་འོ་མ་དང་ཤ་ཁུ་དང་བཅས་པར་ཟོས་ལ་དེའི་འོག་ཏུ་བརྔུབ་པར་བྱའོ། །
གྲོང་ཆུ་རླན་ཅན་སྲོག་ཆགས་ཤ །སཱ་ལུ་ནས་གྲོ་དྲུག་ཅུ་པའམ། །མ་ཤ་ཨད་མ་ཀུབ་ཏ་ཡི། །ཡུ་ཤ་དག་དང་ཟོས་ན་ཕན། །ཞེས་བྱ་བ་ལ། གྲོང་ན་གནས་པའི་སྲོག་ཆགས་དང་ཆུ་ན་གནས་པའི་སྲོག་ཆགས་རྣམས་ཀྱི་ཤ་ཁུ་དང་། སཱ་ལུ་ལ་སོགས་པ་ཟོས་ན་ཡང་
ལུད་པ་ཆམ་པ་ཅན་ལ་ཕན་ནོ། །ལ་ལ་ཕུད་དང་པི་པི་ལིང་། །བྱིལ་རྐང་དོང་ག་ཙི་ཏྲ་ཀ །ར་སྣ་ཟི་ར་པ་ལ་ཤ། །ཀྲིཥྞ་པརྞི་ཟུར་པ་དང་། །མ་ནུ་བསྐོལ་བར་སྣུམ་སྐྱུར་དང་། །ལན་ཚྭར་བཅས་ཐུག་རླུང་གྱུར་བླུད། །རྐེད་པ་ལྟོ་སྙིང་རྩིབ་ལོགས་ན། །དབུགས་མི་བདེ་དང་
སྐྱིགས་བུ་སེལ། །ཞེས་བྱ་བ་ལ། ལ་ལ་ཕུད་ལ་སོགས་པ་དང་བསྐོལ་བའི་ཐུག་པ་དང་སྐྱུར་བག་དང་ལན་ཚྭར་བཅས་པའི་ཐུག་པ་རླུང་ལས་གྱུར་པའི་ལུད་པ་ཅན་ལ་བླུད་པར་བྱ་སྟེ། དེས་ནི་རླུང་ལས་གྱུར་པའི་ལུད་པ་དང་རྐེད་པའི་ནད་ལ་སོགས་པ་སེལ་བར་བྱེད་དོ། །རྩ་བ་
བཅུ་པའི་ཁུ་བར་ནི། །ཚ་བ་ལྔ་དང་བུ་རམ་བཅས། །ཏིལ་དང་བཅས་པའི་ཐུག་པ་བླུད། །ཡང་ན་འོ་ཐུག་རྒྱམ་ཚར་བཅས། །ཞེས་བྱ་བ་ལ། རྩ་བ་བཅུ་བསྐོལ་བའི་ཁུ་བའི་ནང་དུ་ཚ་བ་ལྔ་དང་བུ་རམ་བཏབ་པ་ལ་ཏིལ་མར་འབྲས་བཙོས་པའི་ཐུག་པ་དང་སྐྱུར་བ་དང་། །ལན་ཚྭ་དང་
เล่ม ๒๐๑ · หน้า 224a
བཅས་པ་ཡང་སྔ་མ་བཞིན་དུ་བླུད་པར་བྱ་སྟེ། དེས་ནི་རླུང་ལས་གྱུར་པའི་ལུད་པ་དང་། རྐེད་པ་ན་བ་ལ་སོགས་པ་སེལ་བར་བྱེད་པ་ཡིན་ནོ། །ཡང་ན་འབྲས་འོ་མར་བཙོས་པའི་འོ་ཐུག་ལ་རྒྱམ་ཚ་བཏབ་པ་བླུད་ན་ཡང་རླུང་ལས་གྱུར་པའི་ལུད་པ་དང་། རྐེད་པ་ན་བ་
ལ་སོགས་པ་སེལ་བ་ཡིན་ནོ། །ཉ་དང་ཁྱིམ་བྱ་ཕག་རྒོད་ཤ །མར་དང་རྒྱམ་ཚར་བཅས་པའང་ཕན། །ཞེས་བྱ་བ་ལ། ཉ་ལ་སོགས་པའི་ཤ་མར་དང་རྒྱམ་ཚ་དང་བཅས་པ་འཐུངས་ན་ཡང་ཕན་ཡོན་གོང་མ་དང་འདྲའོ། །ཚོད་མ་རྒྱ་སྣེའུ་པ་ཡ་སྱེ། །ནི་ཤན་ན་ཀ་ལུད་པ་འཇོམས། །
ཀཎྜ་ཀ་རིའི་ལོ་འབྲས་དང་། །ལ་ཕུག་གཞོན་ནུ་སྐོམ་པོའང་ཕན། །ཞེས་བྱ་བ་ལ། རྒྱ་སྣེའུ་ལ་སོགས་པའི་ཚོད་མ་ཡང་རླུང་ལ་སོགས་པའི་ལུད་པ་ལ་ཕན་ནོ། །ཏིལ་མར་སོགས་སྣུམ་འོ་མ་དང་། །བུ་རམ་བུ་རམ་ཤིང་ཁུའི་ཟས། །ཞེས་བྱ་བ་ལ། རླུང་ལས་གྱུར་པའི་ལུད་
པ་ལ་ཏིལ་མར་ལ་སོགས་པའི་སྣུམ་སྟེ། ཏིལ་མར་དང་། ཞག་དང་། རྐང་དང་། ཞུན་མར་དང་། འོ་མ་དང་། བུ་རམ་དང་། བུ་རམ་ཤིང་གི་ཁུ་བ་དང་གཡོས་པའི་ཁ་ཟས་ཟོས་ན་ཕན་ནོ། །ཞོ་ག་ཆུ་ཞོ་རང་སྐྱུར་ཆང་། །འབྲས་བུ་སྐྱུར་ཆུ་བླུད་པ་ཕན། །ཞེས་བྱ་བ་ལ། རླུང་ལས་གྱུར་
པའི་ལུད་པ་ལ་ནི་ཞོ་ག་ཆུ་དང་། ཞོ་དང་རང་སྐྱུར་ཏེ་ཀན་ཛི་དང་། ཆང་དང་འབྲས་བུ་སྐྱུར་པོ་སེའུ་འབྲུ་ལ་སོགས་པ་འབྲས་བུ་སྐྱུར་པོའི་ཁུ་བར་རྒྱམ་ཚ་བཏབ་པ་བླུད་ན་ཕན་པ་ཡིན་ནོ། །མཁྲིས་པའི་ལུད་པ་བད་ཀན་བཅས། །ཞུན་མར་གྱིས་ནི་སྐྱུག་སྨན་ཕན། །ཞེས་བྱ་བ་ལ།
མཁྲིས་པ་ལས་གྱུར་པའི་ལུད་པ་བད་ཀན་དང་བཅས་པ་ལ་ནི་སྐྱུག་སྨན་ཞུན་མར་བླུད་ལ་སློན་དུ་གཞུག་པ་ཕན་ནོ། །དེ་བཞིན་པོ་སོན་ཆ་ཏང་བལ། །མ་དུ་ཀ་ནི་བསྐོལ་ཆུས་སམ། །ཞེས་བྱ་བ་ལ། ཡང་རྣམ་པ་དེ་བཞིན་དུ་མཁྲིས་པ་ལས་གྱུར་བའི་ལུད་པ་བད་ཀན་དང་བཅས་
པ་ལ་ནི། པོ་སོན་ཆ་ལ་སོགས་པའི་སྨན་གྱི་ཆུ་བླུད་ལ་སློན་དུ་གཞུག་པ་ཕན་ནོ། །ཤིང་མངར་པོ་སོན་ཆའི་ལྡེ་གུ། །བི་དབུ་རམ་ཤིང་ཁུར་སྦྱར། །ཞེས་བྱ་བ་ལ། ཡང་ན་ཤིང་མངར་དང་པོ་སོན་ཆ་ལྡེ་གུ་བྱས་ཤིང་ཆུ་འཐགས་སུ་བྱས་པ་ལ། བི་ད་རིའི་ཁུ་བ་དང་། བུ་རམ་
เล่ม ๒๐๑ · หน้า 224b
ཤིང་གི་ཁུ་བ་དང་སྦྱར་བ་བླུད་དེ་སློན་དུ་གཞུག་པ་ཕན་ནོ། །མཁྲིས་ལུད་བད་ཀན་ཤས་ཆུང་ལ། །དུར་བྱིད་མངར་བའི་སྨན་སྦྱར་བཏང་། །བད་ཀན་ཤས་ཆེར་ཁ་བའི་སྨན། །སྐྱུག་སྨན་ཕྱིར་ནི་གཏང་བར་བྱ། །ཞེས་བྱ་བ་ལ། མཁྲིས་པ་ལས་གྱུར་པའི་ལུད་པ་བད་ཀན་ཤས་
ཆུང་ཞིང་སྲ་བ་ལ་ནི་དུར་བྱིད་རྒུན་འབྲུ་ལ་སོགས་པའི་སྨན་མངར་བ་དང་སྦྱར་བ་དག་བཀྲུ་སྨན་གྱི་དོན་དུ་བླུད་པར་བྱའོ། །དེ་བཞིན་དུ་མཁྲིས་པའི་ལུད་པ་བད་ཀན་གྱི་ཤས་ཆེ་བ་ལ་ནི་དུར་བྱིད་པུ་ཤེལ་ཙེ་ལ་སོགས་པའི་སྨན་ཁ་བ་དང་སྦྱར་བ་སྐྱུག་སྨན་གྱི་ཕྱིར་སྦྱར་བར་བྱའོ། །ནད་
སྦྱངས་ནས་ནི་ཐུག་པ་སོགས། །བསིལ་དང་མངར་དང་སྣུམ་པ་སྤྱད། །བད་ཀན་ཤས་ཆེར་ཁ་བ་དང་། །རྩུབ་པ་དང་སྦྱར་གྲང་ཐུག་བླུད། །ཅེས་བྱ་བ་ལ། སྐྱུག་སྨན་བཀྲུ་སྨན་གཉིས་ཀྱིས་ནད་སྦྱངས་པར་གྱུར་ནས་ཐུག་པ་ལ་སོགས་པའི་རིམ་པ་སྤྱད་པར་བྱ་ལ། དེ་ཡང་
བསིལ་བ་དེ་ལེགས་པར་བསྒྲངས་པ་དང་། མངར་བའི་རོ་དང་ལྡན་པ་དང་། སྣུམ་ཞིང་རྩུབ་བག་མེད་པར་སྤྱད་པར་བྱ་ལ། བད་ཀན་ཤས་ཆེ་བའི་མཁྲིས་པའི་ནད་ལ་ནི་ཐུག་པ་ལ་སོགས་པའི་རིམ་པ་སྨན་ཁ་བ་དང་སྦྱར་ཞིང་སྣུམ་མེད་པའི་རྩུབ་བག་བླུད་པར་བྱའོ། །མཁྲིས་གྱུར་ཁ་
ར་སྐྱུ་རུ་ར། །རྒུན་འབྲུ་ཨུཏྤལ་ཙནྡན་དཀར། །སྦྲང་རྩིར་སྦྱར་བའི་ལྡེ་གུ་སྦྱིན། །བད་ཀན་བཅས་ལ་ན་ལེ་ཤམ། །གླ་སྒང་དང་ནི་བཅས་པ་སྦྱིན། །ཞེས་བྱ་བ་ལ། མཁྲིས་པ་འབའ་ཞིག་ལས་གྱུར་པའི་ལུད་པ་ལ་ནི་ཁ་ར་དང་སྐྱུ་རུ་ར་ལ་སོགས་པའི་སྨན་ལྡེ་གུར་བཅས་པ་
སྦྱིན་པར་བྱའོ། །མཁྲིས་པ་ལས་གྱུར་པའི་ལུད་པ་བད་ཀན་དང་བཅས་པ་ལ་ནི་ན་ལེ་ཤམ་དང་གླ་སྒང་དང་བཅས་པའི་སྨན་ཁ་ར་ལ་སོགས་པ་དང་སྦྱར་ཏེ་ལྡེ་གུར་བྱས་པ་སྦྱིན་པར་བྱའོ། །རླུང་ནད་ལ་ནི་མར་བཅས་ཕན། །ཞེས་བྱ་བ་ལ། རླུང་ནད་དང་བཅས་པའི་མཁྲིས་པའི་ལུད་
པ་ལ་ནི་ན་ལེ་ཤམ་དང་གླ་སྒང་མེད་པའི་ཁ་ར་ལ་སོགས་པའི་སྨན་དེ་དག་མར་དང་བཅས་པ་སྦྱིན་ནོ། །མར་དང་ཏིལ་མར་དང་བུ་རམ་དང་ཤ་ཁ་ར་དང་སྦྲང་རྩི་དང་སྦྱར་བའི་ལྡེ་གུ་ནི་ནད་གཞི་ལ་སོགས་པའི་ཚུལ་ལས་ལྟོས་ཏེ་ཚད་ཅི་རིགས་སུ་སྦྱར་བར་བྱའོ། །རྒུན་འབྲུ་ལྔ་བཅུ་པི་པི་ལིང་། །
เล่ม ๒๐๑ · หน้า 225a
སུམ་ཅུ་ཁ་ར་སྲང་གཅིག་སྦྱར། །སྦྲང་རྩི་འམ་བ་ཡི་ལྕི་བའམ། །བེའུ་གཞོན་ལྕི་ཁུར་ལྡེ་གུར་སྦྱར། །ཞེས་བྱ་བ་ལ། རྒུན་འབྲུ་ནི་གོ་ཏ་ན་ཞེས་བྱ་བ་བ་ལང་གི་ནུ་སོར་འདྲ་བའི་རྒུན་འབྲུ་སྦོམ་པོ་ཞིག་ཡོད་པ་ལ་བྱ་སྟེ། དེའི་རྡོག་མ་ལྔ་བཅུ་དང་། པི་པི་ལིང་རྡོག་མ་
སུམ་ཅུ་དང་། ཁ་ར་སྲང་གཅིག་སྟེ་འདི་དག་སྦྱར་བ་སྦྲང་རྩི་དང་ལྡེ་གུར་བྱས་པ་སྦྱིན་པའམ། བའི་ལྕི་བའི་ཁུ་བའམ། བེའུ་གཞོན་ནུ་ནུ་ཞོ་འཐུངས་པའི་ལྕི་བའི་ཁུ་བ་དང་སྦྱར་བ་སྦྱིན་པར་བྱའོ། །ཤིང་ཚ་སུག་སྨེལ་ཚ་བ་གསུམ། །རྒུན་འབྲུ་པི་པི་ལིང་རྩ་བ། །མ་ནུ་འབྲས་ཡོས་གླ་
སྒང་དང་། །ཟུར་པ་དཀར་དང་ར་སྣ་དང་། །སྐྱུ་རུ་ར་དང་བ་རུ་ར། །ཁ་ར་སྦྲང་རྩི་ཞུན་མར་སྦྱར། །ལྡེ་གུས་སྙིང་ནད་ལུད་པ་སེལ། །ཞེས་བྱ་བ་ལ། ཤིང་ཚ་ལ་སོགས་པའི་སྨན་ལྡེ་གུར་སྦྱར་བ་ནི་སྙིང་ནད་ལ་སོགས་པའི་ལུད་པ་སེལ་བ་ཡིན་ནོ། །མངར་བའི་སྨན་དང་སྲོག་
ཆགས་ནི། །སྐམ་སའི་ཤ་དང་ནས་དང་ནི། །ཁྲེ་དང་ཁྲེ་རྒོད་མུངྒ་སོགས། །ཡུ་ཤ་དང་ནི་ཚོད་མ་དང་། །ཁ་བ་ཚད་ལྡན་སྦྱར་ལྡེ་གུ། །ཁ་བ་དང་ནི་སྦྲང་རྩིར་བཅས། །བད་ཀན་ཤས་ཆེའི་ནད་ལ་ཕན། །ཞེས་བྱ་བ་ལ། བད་ཀན་ཤས་ཆེ་བའི་ལུད་པ་ལ་ནི་སྐམ་སའི་སྲོག་ཆགས་ཀྱི་
ཤ་ཁུ་དང་། སྨན་མངར་པོ་རྒུན་འབྲུ་དང་། བུ་རམ་ཤིང་གི་ཁུ་བ་ལ་སོགས་པ་དང་། ནད་ལ་སོགས་པའི་ཚད་དང་ལྡན་པར་སྦྱར་བ་བྱིན་ན་ཕན་ལ། དེ་བཞིན་དུ་པུ་ཤེལ་ཙེ་ལ་སོགས་པའི་ཁུ་བ་དང་། མོན་སྲན་མུངྒ་ཞེས་བྱ་བ་མོན་སྲན་སྡེའུ་ཡུ་ཤ་ལ་སོགས་པའི་ཚོད་མ་དང་། དེ་བཞིན་
དུ་སྨན་ཁ་བ་དང་། སྦྲང་རྩི་དང་བཅས་པ་ཕན་པ་ཡིན་ནོ། །བད་ཀན་ཤས་ཆུང་སཱ་ལུ་དང་། །དྲུག་ཅུ་པའི་ཆན་ཤ་ཁུ་ཕན། །ཞེས་བྱ་བ་ལ། བད་ཀན་ཤས་ཆུང་བའི་མཁྲིས་པའི་ལུད་པ་ལ་ནི་འབྲས་སཱ་ལུ་དང་། འབྲས་དྲུག་ཅུ་པའི་སྨན་ཤ་ཁུ་དང་བཟའ་བ་ཕན་ནོ། །བཏུང་བར་
ཁ་རའམ་རྒུན་ཆུ་འམ། །བུ་རམ་ཤིང་ཁུའམ་འོ་མ་བླུད། །ཅེས་བྱ་བ་ལ། མཁྲིས་པ་ལས་གྱུར་པ་ལ་བཏུང་བ་ནི་ཁར་དང་རྒུན་འབྲུ་བསྲེས་པའི་ཆུ་བླུད་ན་ཕན་ནོ། །དེ་བཞིན་དུ་རྒུན་འབྲུ་དང་བུ་རམ་ཤིང་གི་ཁུ་བ་སྦྱར་བ་བླུད་པའམ་འོ་མ་བླུད་པ་ཕན་ནོ། །མཁྲིས་པའི་ལུད་པར་ར་
เล่ม ๒๐๑ · หน้า 225b
མཉེ་བ། །བྲི་ཧ་ཏི་གཉིས་མེ་ད་གཉིས། །བ་ཙ་ཀ་དང་ལི་དོང་གྲ། །ཤ་ཁུ་དང་ནི་འོ་མ་འམ། །ཐུག་པའམ་ཡུ་ཤར་སྦྱར་ཏེ་བླུད། །ཅེས་བྱ་བ་ལ། མཁྲིས་པ་ལས་གྱུར་པའི་ལུད་པ་ལ་ནི་ར་མཉེ་བ་ལ་སོགས་པའི་སྨན་དང་སྦྱར་བའི་ཤ་ཁུ་བླུད་ན་ཕན་ནོ། །རྒུན་འབྲུ་དང་ནི་པི་
པི་ལིང་། །རྩ་ཡི་རྩ་བ་ལྔར་བཤད་དང་། །ཆུར་བསྐོལ་བ་ཡི་ཁུ་བ་དང་། །དེ་དང་འོ་མ་བསྐོལ་ཏེ་བསྒྲངས། །སྦྲང་རྩི་ཁ་རར་བཅས་པ་བླུད། །ཡང་ན་དེ་ཡིས་ཐུག་པ་བསྐོལ། །ལེགས་བསྐོལ་སྦྲང་རྩིར་བཅས་པ་སྦྱིན། །ཞེས་བྱ་བ་ལ། ཡང་ན་མཁྲིས་པ་ལས་གྱུར་པའི་
ལུད་པ་ལ་ནི་རྒུན་འབྲུ་ལ་སོགས་པ་དང་བསྐོལ་བའི་ཐུག་པ་ལེགས་པར་བསྒྲངས་པ་ལ་སྦྲང་རྩི་དང་ཁ་རར་བཅས་པའམ། ཐུག་པ་བླུད་པར་བྱའོ། །ཟུར་པ་དང་ནི་བ་ལེ་ཀ །ཁ་ར་བཅའ་སྒ་བྲི་ཧ་ཏི། །བཏགས་པའི་ཁུ་བ་རས་ཀྱིས་བཙགས། མར་དང་བསྲེས་ཏེ་བླུད་པར་
བྱ། །ཞེས་བྱ་བ་ལ། ཟུར་པ་ལ་སོགས་པའི་སྨན་ཆུ་བཏགས་སུ་བྱས་ལ། དེའི་ཁུ་བ་རས་ཀྱིས་བཙགས་ཏེ་ཞུན་མར་དང་བསྲེས་ཏེ་བླུད་ན་ཡང་མཁྲིས་པ་ལས་གྱུར་པའི་ལུད་པ་སེལ་ཏོ། །ཁ་ར་དང་ནི་ཛི་བ་ཀ །མུངྒ་མ་ཤ་པརྞི་དང་། །བྱི་ཚེར་བ་ནི་ལྡེ་གུར་བྱས། །མར་
དང་འོ་མ་བརྒྱད་འགྱུར་བསྐོལ། །དེ་བཏུང་བཟའ་དང་བལྡག་པ་དང་། །སྦྱར་བས་མཁྲིས་པའི་ལུད་པ་སེལ། །ཞེས་བྱ་བ་ལ། ཤ་ཁ་ར་ལ་སོགས་པའི་སྨན་ལྡེ་གུར་བྱས་པ་ལ་མར་ཇི་ཙམ་ཡོད་པའི་བརྒྱད་འགྱུར་གྱི་འོ་མ་དང་བསྲེས་པའི་ནང་དུ་བསྐོལ་ལ། མར་དེ་བཏུང་བ་ལ་
སོགས་པ་དང་སྦྱར་ན་མཁྲིས་པའི་ལུད་པ་སེལ་བར་འགྱུར་རོ། །འདི་དག་ཕྱེ་མའི་ལྡེ་གུ་འམ། །བསྐོལ་བའི་ཁུ་བ་བླུད་པར་བྱ། །ཞེས་བྱ་བ་ལ། སྨན་མར་གྱི་སྦྱོར་བར་སྨོས་པའི་སྨན་བཤད་མ་ཐག་པའི་འདི་དག་གི་ཕྱེ་མ་ལྡེ་གུར་བྱར་ཡང་རུང་སྟེ། དེ་དག་ཀྱང་སྦྲང་རྩི་དང་ལྡེ་
གུར་བྱའོ། །ཞེས་བྱ་བའི་དོན་གྱིས་ཤེས་པར་བྱའོ། །ཡང་ན་སྨན་འདི་དག་བསྐོལ་བའི་ཁུ་བ་བླུད་ན་ཡང་ནད་དེ་དག་ལ་ཡང་ཕན་པར་འགྱུར་རོ། །བད་ཀན་ལུད་ཅན་གྱིས་དང་པོར། །ཐང་ཤིང་བསྲེགས་ནས་གཟགས་པའི་སྣུམ། །བ་ཤ་ཀ་དང་ནས་ཚིག་འཁུས། །
เล่ม ๒๐๑ · หน้า 226a
ཐལ་བའི་ཕྱེ་མ་བཏབ་པ་གཏང་། །ཞེས་བྱ་བ་ལ། བད་ཀན་ལས་གྱུར་པའི་ལུད་པ་དང་ལྡན་པའི་མི་ནི་དང་པོར་ཐང་ཤིང་བསྲེགས་ནས་དེའི་སྣུམ་གཟགས་སུ་བཅུག་པ་གང་ཡིན་པ་དང་། བ་ཤ་ཀ་དང་ནས་ཚིག་འཁུས་པའི་ཐལ་བའི་ཕྱེ་མ་བཏབ་པ་དེ་གཏང་
བར་བྱའོ། །སྣུམ་བཅས་བཀྲུ་སྨན་གྱིས་སྟེང་དང་། །འོག་དང་སྤྱི་བོར་ཅི་རིགས་པར། །ཉམས་སྟོབས་ལྡན་བཀྲུ་སྨན་རྣོ་གཏང་། །ཞེས་བྱ་བ་ལ། སྣུམ་དེས་སྣུམ་གྱི་ཆོ་ག་བྱས་པའི་ནད་པ་ལ་བཀྲུ་སྨན་བཏང་སྟེ་སྟེང་དང་འོག་དང་སྤྱི་བོ་སྟེ་ལན་གསུམ་ནས་ཅི་རིགས་པར་ནད་
ལ་སོགས་པའི་ཚུལ་ལས་ལྟོས་ལ་བཀྲུ་སྨན་གཏང་བར་བྱ་སྟེ། སྟེང་དུ་ནི་སྐྱུག་སྨན་གྱིས་སློན་པར་བྱ་བ་དང་། སྤྱི་བོར་སྣ་ནས་བཀྲུ་སྨན་གཏང་བ་དང་། འོག་ནས་ནི་བཀྲུ་སྨན་བཏང་སྟེ་གསུམ་ཆར་ཡང་ནད་སྦྱོང་བར་བྱེད་པས་ནི་བཀྲུ་སྨན་ཞེས་བྱའོ། །དེ་དག་གིས་ཀྱང་སྐྱེས་བུ་
ཉམས་སྟོབས་དང་ལྡན་པ་དག་ལ་ཁྲུས་བྱའི། ཉམས་སྟོབས་ཆུང་བ་དག་ལ་ནི་མ་ཡིན་ནོ། །ཐུག་པ་སོགས་ཀྱང་འདི་ལ་བླུད། །ནས་དང་མུངྒ་རྒྱ་སྲན་ཟས། །རྩུབ་དྲོ་ན་ལེ་ཤམ་གྱིས་ཚ། །ཀ་ས་མརྡ་བར་དག །བྱ་ཀྲི་ཡ་བཀྵ་ར་དང་། །པི་པི་ལིང་དང་བཅས་པ་སྦྱིན། །སྐམ་
ས་ཁུང་གནས་ཤ་ཁུ་སྣུམ། །ཏིལ་དང་ཡུངས་ཀར་བིལ་བའི་སྣུམ། །སྦྱར་བའི་ཐུག་པ་སྦྱིན་པར་བྱ། །ཞེས་བྱ་བ་ལ། དེ་ལྟར་སློན་ཁྲུས་བྱས་པའི་བད་ཀན་ལས་གྱུར་པའི་ལུད་པ་ཅན་ལ་ཐུག་པ་ལ་སོགས་པའི་རིམ་པ་བླུད་པར་བྱའོ། །དེ་ནས་ནས་ལ་སོགས་པ་ལས་གཟགས་
པའི་རྩུབ་པ་དང་དྲོ་བ་དང་། ན་ལེ་ཤམ་ལ་སོགས་པའི་སྨན་གྱིས་ཚ་ཞིང་རྣོ་བར་བྱས་པ་དང་། ཀ་ས་མརྡ་ལ་སོགས་པའི་ཚོད་མ་དང་ལྡན་པ་དང་། དེ་བཞིན་དུ་སྐམ་ས་དང་ཁུང་ན་ཡོད་པའི་སྲོག་ཆགས་རྣམས་ཀྱི་ཤ་ཁུའི་སྣུམ་དང་ཏིལ་ལ་སོགས་པ་ལས་སྨན་སྦྱར་བའི་ཐུག་པ་
སྦྱིན་པར་བྱའོ། །སྐོམ་ན་རྩ་བ་བཅུ་བསྐོལ་ཆུ། །ཆུ་ཚན་ཆང་ངམ་སྦྲང་ཆུ་བླུད། །ཅེས་བྱ་བ་ལ། བད་ཀན་ལས་གྱུར་པའི་ལུད་པ་ཅན་དེ་སྐོམ་པར་གྱུར་ན་རྩ་བ་བཅུ་བསྐོལ་བའི་ཆུ་བླུད་པའམ། ཡང་ཆུ་འབའ་ཞིག་བསྐོལ་བའི་ཆུ་ཚན་མང་ལ་གོམས་པའི་ཆང་རྙིང་བླུད་
เล่ม ๒๐๑ · หน้า 226b
པའམ། ཡང་ན་སྦྲང་རྩི་དང་སྦྱར་བའི་ཆུ་བླུད་པར་བྱའོ། །དོང་ག་མ་ནུའི་རྩ་བ་དང་། །པ་ཏོ་ལ་ཡི་རྩ་བར་བཅས། །ནུབ་གཅིག་ཆུར་སྦངས་སྦྲང་རྩི་བཏབ། །ཟས་དུས་གསུམ་མམ་ནང་པར་བླུད། །ཅེས་བྱ་བ་ལ། ཡང་དོང་ག་ལ་སོགས་པའི་སྨན་ནུབ་གཅིག་ཆུར་སྦངས་ལ་
སྦྲང་རྩི་བཏབ་སྟེ་ནང་པར་བཏུང་བའི་ཟས་ཟ་བའི་དུས་གསུམ་པོ་ཟས་ཀྱི་ཐོག་མ་དང་། ཟས་ཀྱི་བར་དང་། ཟོས་པའི་མཐའ་མ་སྟེ་གསུམ་ཆར་དུ་ཡང་བླུད་པར་བྱའོ། །པི་པི་ལིང་དང་དེ་རྩ་བ། །བཅའ་སྒ་དང་ནི་བ་རུ་ར། །རྨ་བྱ་ཁྱིམ་བྱའི་མཇུག་སྒྲོ་ནི། །སྣག་ཚར་བྱས་དང་ནས་
ཚིག་ཐལ། །བི་ཤ་གླ་སྒང་པི་པི་ལིང་། །དུར་བྱིད་སྦྲང་རྩིར་སྦྱར་བ་སྟེ། །ཚིགས་བཅད་ཕྱེད་ཀྱིས་རྫོགས་ལྡེ་གུ། །གསུམ་པོ་བད་ཀན་ལུད་པ་སེལ། །ཞེས་བྱ་བ་ལ། པི་པི་ལིང་ལ་སོགས་པའི་སྨན་ཚིགས་སུ་བཅད་པ་ཕྱེད་ཕྱེད་ཀྱིས་རྫོགས་པར་བྱས་པའི་ལྡེ་གུ་
གསུམ་པོ་སྦྲང་རྩི་དང་སྦྱར་བ་བྱིན་ན་བད་ཀན་གྱི་ལུད་པ་སེལ་བར་འགྱུར་རོ། །རྨ་བྱ་དང་ཁྱིམ་བྱའི་མཇུག་སྒྲོའི་སྣག་ཚ་ནི་དེ་གཉིས་བསྲེགས་པ་ལས་སྣག་ཚ་ལྟར་ནག་པོར་བྱས་པའོ། །ནས་ལས་བྱས་པའི་ཐལ་བ་ཡིན་པས་ན་ནས་ཚིག་ཐལ་བའོ། །སྦྲང་རྩི་ན་ལེ་ཤམ་སྦྱར་
བ་ལྡག །ཨ་ཀ་རུ་སྦྲང་རྩི་ཉིད་ཀྱིས། །ཀཎྜ་ཀ་རི་བར་ཏ་ཀ །བྲིང་ག་ར་ཛའི་ཁུ་བ་དང་། །ཀ་ས་མརྡ་རྟ་སྦངས་བ་ཙིར། །ཁུ་བའམ་བྱེའུ་རུག་ནག་པོའི་ཁུ། །སྦྲང་རྩི་སོ་སོར་སྦྱར་བ་བལྡག །ཅེས་བྱ་བ་ལ། བད་ཀན་ལས་གྱུར་པའི་ལུད་པ་ལ་ནི་སྦྲང་རྩི་དང་ན་ལེ་ཤམ་སྦྱར་ཏེ་
ལྡེ་གུར་བྱས་པ་བལྡག་པའམ། ཨ་ཀ་རུའི་ཕྱི་མ་སྦྲང་རྩི་དང་སྦྱར་ཏེ་བལྡག་པའམ། དེ་བཞིན་དུ་ཀཎྜ་ཀ་རིའི་ཁུ་བ་དང་། བར་ཏ་ཀའི་ཁུ་བ་དང་། བྲིང་ག་ར་ཛའི་ཁུ་བ་དང་། ཀ་ས་མར་དའི་ཁུ་བ་དང་། རྟ་སྦངས་ཀྱི་ཁུ་བ་དང་། བྱེའུ་རུག་པ་ནག་པོའི་ཁུ་བ་གང་ཡང་རུང་བའི་ཁུ་བ་
སྦྲང་རྩི་དང་སྦྱར་ཏེ་བལྡག་པར་བྱའོ། །ཐང་ཤིང་ཟུར་པར་སྣ་དང་། །བྱི་ཚེར་ཀར་ཀ་ཏ་སྲིང་གི། །གླ་སྒང་བཅའ་སྒ་པི་པི་ལིང་། །ཁ་ར་ཨ་རུ་སྐྱུ་རུ་ར། །འབྲས་ཡོས་ཁ་ར་དཀར་པོ་དང་། །སྐྱུ་རུ་ར་ཡི་པགས་པ་རྣམས། །སྦྲང་རྩི་ཏིལ་མར་སྦྱར་ལྡེ་གུ། །གསུམ་པོ་རླུང་
เล่ม ๒๐๑ · หน้า 227a
འདྲེས་བད་ཀན་སེལ། །ཞེས་བྱ་བ་ལ། རླུང་ནད་འདྲེས་ཤིང་རྗེས་སུ་འབྲེལ་བའི་བད་ཀན་གྱི་ལུད་པ་ལ་ནི་ལྡེ་གུ་གསུམ་པོ་སྦྲང་རྩི་དང་ཏིལ་མར་གཉིས་དང་སྦྱར་ཞིང་བསྲེས་པ་གཏང་བར་བྱ་ལ། སྨན་ནི་ཐང་ཤིང་ལ་སོགས་པ་ཚིགས་སུ་བཅད་པ་ཕྱེད་ཕྱེད་ཀྱིས་
རྫོགས་པར་བྱས་པའི་མཚན་གསུམ་དང་སྦྱར་བར་བྱའོ། །སྐྱུ་རུ་རའི་པགས་པ་ནི་སྐྱུ་རུ་ར་བཟང་པོ་སྐམས་པར་གྱུར་པའི་པགས་པ་ལྟར་འཆུས་པ་ལ་བྱའོ། །སེའུ་འབྲུ་སྲང་གཉིས་བུ་རམ་ནི། །སྲང་བརྒྱད་ཚ་བ་གསུམ་སྲང་རེས། །སྐད་སྙན་དྲོད་སྐྱེད་ཡི་ག་འབྱེད། །ལུད་པ་
དབུགས་མི་བདེ་ཆམ་སེལ། །ཞེས་བྱ་བ་ལ། སེའུ་འབྲུའི་ཁུ་བ་བཙིར་བ་སྲང་གཉིས་དང་། བུ་རམ་སྲང་བརྒྱད་དང་། ཚ་བ་གསུམ་སྲང་རེ་རེ་སྟེ། སྲང་བཅུ་གསུམ་པོ་འདི་དག་བསྲེས་ལ་ཕྱེ་མར་བྱས་པ་ནི། སྐད་སྙན་པར་བྱེད་པ་ནས་ཆམ་པ་སེལ་བའི་བར་དུ་བྱེད་དོ། །བུ་རམ་
ཡ་བཀྵ་ར་དང་། །ན་ལེ་ཤམ་དང་པི་པི་ལིང་། །སེའུ་འབྲུ་རིམ་གྱིས་སྲང་གཉིས་དང་། །ཞོ་རེ་སྲང་ཕྱེད་ཙམ་དུ་སྦྱར། །ལུད་པ་དབུགས་མི་བདེ་བ་སེལ། །ཞེས་བྱ་བ་ལ། བུ་རམ་སྲང་གཉིས། ཡ་བཀྵ་ར་ཞོ་གཅིག །པི་པི་ལིང་དང་ན་ལེ་ཤམ་ཞོ་རི། སེའུ་འབྲུ་སྲང་གཅིག་ཏུ་
བྱས་པ་ཕྱེ་མར་སྦྱར་བ་དེས་ནི་ལུད་པ་དང་དབུགས་མི་བདེ་བ་སེལ་བར་བྱེད་དོ། །རིམས་ཀྱི་སྐབས་བཤད་ཨ་རུ་ར། །སོགས་དང་ཀ་ར་ཀ་ཏ་སྲིང་གི །བསྐོལ་བའི་ཁུ་བ་བླུད་པར་བྱ། །ཞེས་བྱ་བ་ལ། རིམས་ཀྱི་སྐབས་སུ་བཤད་པའི་སྨན་གླ་སྒང་དང་། ཨ་རུ་ར་དང་འུ་སུའི་
འབྲས་བུ་ལ་སོགས་པ་དང་། ཀར་ཀ་ཏ་སྲིང་གི་དང་བཅས་པའི་ཁུ་བ་བླུད་ན་ཡང་ལུད་པ་སེལ་བར་བྱེད་དོ། །ཡང་ན་དུར་བྱིད་ལ་ལ་ཕུད། །གླ་སྒང་མ་ནུ་བི་ཤ་ལ། །པི་པི་ལིང་བཅས་བ་གཅིན་ནམ། །ཆུར་བསྐོལ་བ་གཅིན་ལུད་པ་སེལ། །ཞེས་བྱ་བ་ལ། ཡང་ན་དུར་
བྱིད་ལ་སོགས་པ་སྨན་པ་གཅིན་དང་ཆོ་ག་བཞིན་བསྐོལ་བ་ལ་པི་པི་ལིང་གི་ཕྱེ་མ་བཏབ་པའམ། དུར་བྱིད་ལ་སོགས་པའི་སྨན་ཆུ་དང་བསྐོལ་ཏེ། པི་པི་ལིང་གི་ཕྱེ་མ་བཏབ་པ་བླུད་ན་ཡང་བད་ཀན་ལས་གྱུར་པའི་ལུད་པ་སེལ་བར་བྱེད་དོ། །པི་པི་ལིང་ནི་ཏིལ་མར་བརྔོས། །
เล่ม ๒๐๑ · หน้า 227b
ལྡེ་གུ་ཞོ་གཉིས་ཁ་རར་བཅས། །རྒྱ་སྲན་བསྐོལ་བའི་ཁུ་བར་སྦྱར། །བླུད་ན་བད་ཀན་ལུད་པ་འཇོམས། །ཞེས་བྱ་བ་ལ། པི་པི་ལིང་གི་ལྡེ་གུ་ཞོ་གཉིས་ཁ་ར་དང་བཅས་པ་ཏིལ་མར་བརྔོས་ལ་རྒྱ་སྲན་ཀུ་ལངྠ་བསྐོལ་བའི་ཁུ་བ་དང་སྦྱར་ཞིང་བསྐོལ་བ་བླུད་ན་བད་ཀན་ལས་གྱུར་པའི་
ལུད་པ་འཇོམས་པར་བྱེད་དོ། །རྩ་བ་བཅུ་ཁུ་བྲེ་བཞི་དང་། །མར་བྲེ་གང་དང་མ་ནུ་དང་། །ཟུར་པ་བིལ་བ་བྱིའུ་རུག་པ། །ཤིང་ཀུན་ཚ་གསུམ་ཞོ་གཉིས་པ་སྐོལ། །བླུད་པའི་རྗེས་ལ་ཐུག་པ་བཏུང་། །དེ་ཀུན་བད་ཀན་རླུང་ནད་འཇོམས། །ཞེས་བྱ་བ་ལ། རྩ་བ་བཅུ་པ་སྨན་
བསྐོལ་བའི་ཁུ་བ་བྲེ་བཞི་མ་ནུ་ཞེས་བྱ་བ་པུཥྐར་མཱུ་ལ་ལ་སོགས་པའི་སྨན་ཞོ་གཉིས་ལྡེ་གུར་བྱས་པ་དང་བསྐོལ་བའི་མར་དེ་བླུད་ལ། དེའི་རྗེས་ལ་ཐུག་པ་འཐུངས་ན་དེ་ཐམས་ཅད་ཀྱིས་རླུང་དང་བད་ཀན་ལས་གྱུར་བའི་ནད་འཇོམས་པར་འགྱུར་རོ། །ནིར་གུན་ཐི་ལོ་བསྐོལ་བའི་
ཁུ། །མར་བསྐོལ་ལུད་པ་འཇོམས་བྱེད་ཡིན། །ཞེས་བྱ་བ་ལ། ནིར་གུན་ཐི་ནི་ཤེ་ཕལ་གྱི། །ཞེས་བྱ་བ་སྟེ། དེའི་ལོ་མ་བསྐོལ་བའི་སྨན་མར་གྱིས་ནི་ལུད་པ་སེལ་བར་བྱེད་པ་ཡིན་ནོ། །བྱི་དང་ག་ཡི་ཁུ་བའི་ནང་། །ཚ་བ་གསུམ་བཅུག་མར་བསྐོལ་ཕན། །ཞེས་བྱ་བ་ལ།
བྱི་དང་ག་བསྐོལ་བའི་ཁུ་བའི་ནང་དུ་ཚ་བ་གསུམ་གྱི་ལྡེ་གུ་བཅུག་པའི་མར་གྱིས་ཀྱང་ལུད་པ་སེལ་བར་བྱེད་དོ། །བ་སྤྲུ་བ་གཉིས་བྱེའུ་རུག་པ། །ཀ་ས་མརྡ་སླེ་ཏྲེས་དང་། །པ་ཏོ་ལ་དང་བྲི་ཧ་ཏི། །ཕ་ནིད་ཛ་ཀའི་ཁུ་བ་ནི། །འོ་མ་མར་དང་བཅས་པ་ལ། །ཚ་བ་གསུམ་དང་ལེགས་
བསྐོལ་འཐུངས། །ལུད་པའི་རིམས་དྲག་ཟད་བྱེད་དང་། །གཞང་འབྲུམ་ནད་ཀྱི་འཇིགས་པ་མེད། །ཅེས་བྱ་བ་ལ། བ་སྤྲུ་བ་སིན་ཏི་ཀ་དང་། །བར་ཤ་པུ་ཤེལ་བྱ་བ་རྩ་བ་དཀར་པོ་ཅན་དང་། མེ་ཏོག་དཀར་པོ་གཉིས་ནི་པུ་ན་རྣ་བ་རྣམ་གཉིས་ཏེ། དེ་ནི་བ་སྤྲུ་བ་གཉིས་ཡིན་ཏེ།
དེ་གཉིས་ལ་སོགས་པའི་སྨན་བསྐོལ་བའི་ཁུ་བའི་ནང་དུ་འོ་མ་དང་བཅུག་ལ་པི་པི་ལིང་དང་ན་ལེ་ཤ་མ་དང་བཅའ་སྒ་གསུམ་གྱི་ལྡེ་གུ་བཅུག་སྟེ་བསྐོལ་བའི་སྨན་མར་འཐུངས་ན་ལུད་པ་ལ་སོགས་པའི་ནད་ཀྱི་འཇིགས་པ་མེད་དོ། དེ་ལས་འབྱུང་བར་མི་འགྱུར་རོ། །ཀཎྜ་ཀ་རིའི་རྩ་
เล่ม ๒๐๑ · หน้า 228a
བ་དང་། །འབྲས་བུ་ལོ་མར་བཅས་པ་ཡི། །ཁུ་བ་བྲེ་བཞིའི་ཚད་ལ་ནི། །མར་བྲེ་གང་དང་བ་ལ་དང་། །ཚ་བ་གསུམ་དང་བྱི་ཏང་ཀ ། ཤུ་དག་དང་ནི་སེའུ་འབྲུ་དང་། །ཁ་རུ་ཚ་དང་ནས་ཚིག་ཐལ། །པི་པི་ལིང་གི་རྩ་བ་དང་། །སྐྱུར་རུ་ར་དང་མ་ནུ་དང་། །བྲི་ཤི་བ་དང་
བྲི་ཧ་ཏི། །ཨ་རུ་ར་དང་ཡ་བ་ཏི། །ཀྲུ་ཏྲུག་ཏྲེས་དང་རྒུན་འབྲུ་དང་། །དབྱི་མོ་བྱི་ཚེར་བར་ཤ་པུ། །སྟར་བུ་ཀར་ཀ་ཏ་སྲིང་གི །ཏམ་ལ་གི་ག་བྲའི་རྩ། །ར་སྣ་གཟེ་མའི་ལྡེ་གུ་དང་། །བསྐོལ་བའི་མར་དེས་ལུད་ཀུན་དང་། །སྐྱིགས་བུ་དབུགས་མི་བདེ་ལའང་ཕན། །ཀཎྜ་ཀ་
རིའི་སྨན་མར་འདི། །བད་ཀན་ནད་ནི་སེལ་བྱེད་ཡིན། །ཞེས་བྱ་བ་ལ། གཎྜ་ཀ་རིའི་རྩ་བ་དང་འབྲས་བུ་དང་ལོ་མར་བཅས་པ་བསྐོལ་བའི་ཁུ་བ་བྲེ་བཞིའི་ནང་དུ་མར་བྲེ་གང་བཅུག་ལ། བ་ལ་དང་། ཚ་བ་གསུམ་ལ་སོགས་པའི་སྨན་ལྡེ་གུའི་ཚད་ཀྱིས་སྤྱིར་མར་གྱི་བཞི་ཆ་གཅིག་
བཅུག་ལ་བསྐོལ་བའི་སྨན་མར་དེས་ནི་ལུད་པ་ལ་སོགས་པ་ལྔ་པོ་ཀུན་དང་། སྐྱིགས་བུ་ལྔ་དང་དབུགས་མི་བདེ་བ་ལྔ་པོ་སྔར་བཤད་པ་ལ་ཕན་པ་ཡིན་ནོ། །འདིར་ཆུ་སྲང་ཉིས་བརྒྱ་ཉི་ཤུ་རྩ་བརྒྱད་ཀྱི་ནང་དུ་མར་སྲང་སུམ་ཅུ་རྩ་གཉིས་བཅུག་ལ། ཚ་བ་གསུམ་ལ་སོགས་པའི་ལྡེ་
གུ་མར་གྱི་བཞི་ཆ་གཞུག་པར་བྱའོ། །མ་ནུ་ནི་པུཥྐ་ར་མཱུ་ལའོ། །བྲི་ཤི་ལྕི་བ་ནི་བ་སྦྲུ་བ་རྩ་བ་དཀར་པོ་ཅན་ནོ། །ཡང་བ་ནི་ལ་ལ་ཕུད་དོ། །ཀྲུ་ཏྲུག་ཏྲེས་ནི་ཙི་ཏྲ་ཀའོ། །དབྱི་མོ་ནི་རྩ་བ་ལ་བྱའོ། །བྱི་ཚེར་བ་ནི་དུར་ལ་ཝ་པའོ། །བར་ཤ་བུ་ནི་བ་སྤྲུ་བ་མེ་ཏོག་དམར་པོ་ཅན་ནོ། །
སྟར་བུ་ནི་ཨཾ་ལ་ཙེ་ཏ་སེའོ། །ཏ་མ་ལ་གི་ནི་ཨ་ཛ་ཏའོ། །ག་བྲའི་རྩ་བ་ནི་བར་གྱིའོ། །གཟེམ་ནི་གོ་ཀྵ་རའོ། །བྱ་ཀྲི་སྲང་བརྒྱད་བརྡུངས་ཆུ་སྲང་། །ཉིས་སྟོང་བཞི་བཅུ་བརྒྱད་ནང་བསྐོལ། །བཙགས་པར་ཚ་བ་གསུམ་ར་སྣ། །སླེ་ཏྲེས་ཀྲུ་ཏྲུག་ཕྱེ་མ་དང་། །ཀར་ཀ་ཏ་སྲིང་ག་
བྲའི་རྩ། །གླ་སྒང་པི་པི་ལིང་རྩ་བ། །བྱི་ཚེར་བ་རྣམས་སྲང་ཕྱེད་ཕྱེད། །ཞུན་མར་སྲང་ནི་བཅུ་དྲུག་དང་། །ཁར་དཀར་པོ་སྲང་བཞི་བཅུ། །སླར་ཡང་དེ་ནི་བསྐོལ་བར་བྱ། །གཟར་བུ་ལ་ཆགས་བསྒྲངས་ན་ནི། །པི་པི་ལིང་དང་སྨིག་རྐང་དང་། །སྦྲང་རྩི་རྙིང་པ་དག་ལས་ནི། །
เล่ม ๒๐๑ · หน้า 228b
སྲང་ནི་བརྒྱད་བརྒྱད་གཞུག་པར་བྱ། །ལྡེ་གུ་འདིས་ནི་སྙིང་ནད་སྐྲན། །གཞང་འབྲུམ་ལུད་དབུགས་མི་བདེ་སེལ། ཞེས་བྱ་བ་ལ། བྱ་ཀྲི་ཞེས་བྱ་བ་ཀཎྜ་ཀ་རི་སྲང་བརྒྱད་བརྡུངས་པ་ཆུ་སྲང་ཉིས་སྟོང་བཞི་བཅུ་རྩ་བརྒྱད་ཀྱི་ནང་དུ་བསྐོལ་ལ་སྲང་བརྒྱ་ཉི་ཤུ་རྩ་བརྒྱད་ལུས་པ་རས་ཀྱི་
ཚགས་ཀྱིས་བཙགས་པ་ཚ་བ་གསུམ་ལ་སོགས་པའི་ཕྱེ་མ་སྲང་ཕྱེད་ཕྱེད། ཞུན་མར་སྲང་བཅུ་དྲུག་བཅུག་ལ། དེའི་འོག་ཏུ་ཁ་ར་དཀར་པོ་སྲང་བཞི་བཅུ་བཅུག་ལ་དེ་ཡང་བསྐོལ་ལ་གཟར་བུས་དཀྲུགས་པས་ན་ལྡེ་གུ་སྟེ་གཟར་བུ་ལ་ཆགས་པར་འགྱུར་བ་དང་། པི་པི་ལིང་སྲང་
བརྒྱད་དང་། སྨིག་རྐང་སྲང་བརྒྱད་དང་། སྦྲང་རྩི་རྙིང་པ་སྲང་བརྒྱད་གཞུག་པར་བྱའོ། །དེ་ལྟ་བུའི་ལྡེ་གུར་སྦྱར་བ་འདིས་ནི་སྙིང་ནད་དང་སྐྲན་ལ་སོགས་པ་སེལ་བར་བྱེད་དོ། །བད་ཀན་ཞི་བ་དུད་པ་བརྔུབ། །ཤས་ཆེར་སྦྱངས་པའི་དུད་པ་བརྔུབ། །ཅེས་བྱ་བ་ལ། བད་ཀན་ལས་
གྱུར་པའི་ལུད་པ་ལ་ཞི་བར་བྱ་བའི་དུད་པ་བརྔུབ་པའི་ཆོ་གའི་སྐབས་སུ་བཤད་པ་བརྔུབ་པར་བྱ་ལ། གང་གི་ཚེ་བད་ཀན་གྱི་ཤས་ཆེ་བ་དེའི་ཚེ་སྦྱངས་པའི་དུད་པ་བརྔུབ་པར་བྱ་སྟེ། སྦྱངས་པ་ཞེས་བྱ་བ་ནི་བཀྲུ་སྨན་དུ་བྱ་བ་སྟེ། དེ་ཡང་དུད་པ་བརྔུབ་པའི་ཆོ་གའི་སྐབས་སུ་བསྟན་པ་ཡིན་
ནོ། །ལྡོང་རོས་བ་བླ་ཤིང་མངར་དང་། །སྤང་སྤོས་གླ་སྒང་ཨི་གུ་དའི། །ཤུན་ལྤགས་དུ་བ་ལུད་འཇོམས་པའི། །ཆོ་གས་དུད་པ་བརྔུབས་ནས་ནི། །མཆིལ་མང་མཐར་ནི་བུ་རམ་བཅས། །འོ་མ་འཐུངས་པའི་དུད་བརྔུབས་དེས། །རླུང་དང་བད་ཀན་ཤས་ཆེ་བའི། །ལུད་
པ་རྙིང་པའང་མྱུར་དུ་སེལ། །ཞེས་བྱ་བ་ལ། ལྡོང་རོས་ལ་སོགས་པའི་སྨན་སྦྱར་བའི་དུད་པ་ལུད་པ་འཇོམས་པའི་ཆོ་གར་བཤད་པའི་ཚུལ་དུ་དུད་པ་བརྔུབས་པ་ལས་མཆིལ་མ་མང་པོ་འབྱུང་བའི་མཐར་ཡང་བུ་རམ་དང་འོ་མ་དྲོ་འཇམ་འཐུངས་ན་དུད་པ་བརྔུབས་པ་དེས་ནི་རླུང་ནད་བད་
ཀན་གྱི་ཤས་ཆེ་བའི་ལུད་པ་རྙིང་པ་དེ་ཡུན་རིང་དུ་ལོན་པ་ཡང་མྱུར་བ་ཉིད་དུ་སེལ་བར་བྱེད་དོ། །བད་ཀན་ལུད་པ་མུན་ཞུགས་སྙམ། །གལ་ཏེ་མཁྲིས་པ་རྗེས་འབྲེལ་ལ། །དེར་ནི་གནས་སྐབས་ཇི་བཞིན་དུ། །མཁྲིས་པའི་ལུད་གསོའི་སྦྱོར་བ་བྱ། །ཞེས་བྱ་བ་ལ། བད་ཀན་
เล่ม ๒๐๑ · หน้า 229a
གྱི་ལུད་པ་མཁྲིས་པ་དང་རྗེས་སུ་འབྲེལ་པས་མུན་པར་ཞུགས་པ་སྙམ་པ་དེ་ལ་མཁྲིས་པའི་ལུད་པ་གསོ་བའི་སྦྱོར་བ་འདི་ཉིད་ནས་བཤད་པ་དག་གནས་སྐབས་ཇི་ལྟ་བ་བཞིན་དུ་སྦྱར་ཞིང་གཏད་བར་བྱའོ། །རླུང་ནི་བད་ཀན་འབྲེལ་བ་ལ། །བད་ཀན་བསལ་བའི་བྱ་བ་བྱ། །ཞེས་བྱ་བ་
ལ། རླུང་གི་ལུད་པ་བད་ཀན་དང་རྗེས་སུ་འབྲེལ་པ་ལས་བད་ཀན་གྱི་ལུད་པ་བསལ་བའི་ཐབས་སྔར་ཇི་སྐད་བཤད་པ་དག་བྱའོ། །མཁྲིས་པ་དང་འབྲེལ་རླུང་བད་ཀན། །ལུད་པར་མཁྲིས་པ་བསལ་བར་བྱ། །ཞེས་བྱ་བ་ལ། མཁྲིས་པ་དང་རྗེས་སུ་འབྲེལ་བའི་རླུང་
དང་བད་ཀན་གྱི་ལུད་པ་ལ་ནི། མཁྲིས་པ་གསོ་བ་སྔར་ཇི་སྐད་སྨོས་པ་དག་བྱའོ། །རླུང་དང་བད་ཀན་བདག་ཉིད་སྐམ། །གཤེར་ལ་སྣུམ་དང་རྩུབ་ཆོས་བྱ། །ལུད་པ་བད་ཀན་ལས་གྱུར་པ། །མཁྲིས་པར་བཅས་པ་ཁ་བས་གསོ། །ཞེས་བྱ་བ་ལ། རླུང་དང་བད་ཀན་གྱི་བདག་
ཉིད་ཅན་གྱི་ལུད་པ་སྐམ་ཞིང་བད་ཀན་གྱི་ལུད་པ་ལྗན་ལྗིན་མེད་པ་ལ་སྣུམ་ཆོས་ཀྱི་བྱ་བའི་ལས་ཀྱིས་གསོལ། རླུང་དང་བད་ཀན་གྱི་བདག་ཉིད་ཅན་གྱི་ལུད་པ་གཤེར་ཞིང་ལྗན་ལྗིན་དང་བཅས་པ་ལ་ནི་རྩུབ་ཆོས་སུ་བྱས་པའི་ལས་ཀྱིས་གསོ་བར་བྱའོ། །བད་ཀན་ལས་གྱུར་པའི་ལུད་པ་
མཁྲིས་པ་དང་རྗེས་སུ་འབྲེལ་པ་ལ་ནི་སྨན་ཁ་བ་དང་ལྡན་པ་སྦྱོར་བས་གསོ་བར་བྱའོ། །གློ་ནད་འགྲམས་ལ་འཕྲལ་དུ་ནི། །རྒྱ་སྐྱེགས་སྦྲང་རྩིའི་འོ་མ་བླུད། །ཞུ་ནས་སཱ་ལུའི་འབྲས་ཆན་ནི། །འོ་མཁར་ར་བཅས་པ་བཟའ། །ཞེས་བྱ་བ་ལ། གློའི་ནད་འགྲམས་ཤིང་རྡོལ་བར་
གྱུར་པ་འཕྲལ་དུ་དེ་ཉིད་ཀྱི་ཚེ་བྱུང་བར་གྱུར་ན། དེ་ལ་རྒྱ་སྐྱེགས་འོ་མ་དང་སྦྲང་རྩིར་བཅས་པ་བླུད་པར་བྱ་སྟེ། གློ་འགྲམས་པ་འབྱོར་པ་ནི་རྒྱ་སྐྱེགས་གཙོ་བོར་གྱུར་པ་ཡིན་ལ། རྒྱ་སྐྱེགས་སྦྲང་རྩི་དང་འོ་མའི་སྨན་དེ་ཞུ་བར་གྱུར་ནས། སཱ་ལུའི་འབྲས་འོ་མ་དང་ཁ་ར་དང་བཅས་པ་བཟའ་
བར་བྱའོ། །རྩིབ་ལོགས་ཆུ་སོན་བཅས་ཏེ། །མཁྲིས་དྲོད་ཤས་ཆུང་ཆང་སྦྱར་བཏུང་། །ཞེས་བྱ་བ་ལ། གློ་འགྲམས་པའི་རྩིབ་ལོགས་དང་ཆུ་སོ་ན་བ་དང་བཅས་ཤིང་མཁྲིས་པ་དང་ཁོང་པའི་མེ་དྲོད་ཤས་ཆུང་བ་ཡིན་ནོ། རྒྱ་སྐྱེགས་དེ་ཆང་དང་སྦྱར་ལ་བཏུང་བར་བྱའོ། །བཤང་འཁྲུ་གླ་
เล่ม ๒๐๑ · หน้า 229b
སྒང་བོང་ང་དཀར། །པ་ཏ་དུག་མོ་ཡུངས་བཅས་བཏུང་། །ཞེས་བྱ་བ་ལ། བཤང་བ་འཁྲུ་ཞིང་སླ་བར་གྱུར་པ་ན་སྐྱེགས་དེ་གླ་སྒང་ལ་སོགས་པའི་སྨན་དང་བཅས་པའི་ཆུ་བཏུང་བར་བྱའོ། །རྒྱ་སྐྱེགས་ཞུན་མར་སྦྲང་རྩི་དང་། །འཚོ་བྱེད་སྡེ་ཚན་ཁ་ར་དཀར། །སྨིག་རྐང་ཁ་ར་མཉམ་འོ་མར། །
བསྐོལ་བ་མེ་དྲོད་ཆེ་ལ་བླུད། །ཅེས་བྱ་བ་ལ། རྒྱ་སྐྱེགས་ལ་སོགས་པའི་སྨན་ཆ་མཉམ་པར་བྱས་པའོ། །མར་བསྐོལ་བ་ནི་ཁོང་པའི་མེ་དྲོད་ཆེ་བའི་ནད་ལ་བླུད་པར་བྱའོ། །འཚོ་བྱེད་ཀྱི་སྡེ་ཚན་ནི་ཛི་བན་ཏི་དང་ར་མཉེ་བ་ལ་སོགས་པ་སྐྱུག་སྨན་ལ་སོགས་པའི་སྡེ་ཚན་གྱི་ནང་དུ་བཤད་
པའོ། །སྨིག་རྐང་ནི་དུ་ཀྵི་རའོ། །བུ་རམ་ཤིང་དང་པདྨའི་ཚིགས། །པདྨ་གེ་སར་ཙནྡན་དམར། །འོ་མར་བསྐོལ་བ་སྦྲང་རྩིར་བཅས། །གློ་འགྲམས་འབྱོར་བར་བྱ་ཕྱིར་བླུད། །ཅེས་བྱ་བ་ལ། བུར་མ་ཤིང་ལ་སོགས་པའི་ཁུ་བ་སྦྲང་རྩི་དང་བཅས་པ་གློ་འགྲམས་པའི་རྡོལ་བ་
འབྱོར་བར་བྱེད་པའི་ཕྱིར་བླུད་པར་བྱའོ། །ནས་རྗེན་ཕྱེ་ནི་འོ་མ་རུ། །བཙོས་ཏེ་མར་དང་སྦྱར་བའམ། །ཁ་ར་སྦྲང་རྩི་འོ་མ་ཕྱེའི། །སྐྱོ་མ་རིམས་ཚད་ལྡན་ལ་བླུད། །ཅེས་བྱ་བ་ལ། ནས་རྗེན་པ་མེ་ལ་མ་བརྔོས་པའི་ཕྱེ་འོ་མར་བཙོས་ཏེ་ཐུག་པ་ལྟ་བུར་བྱས་ལ་མར་དང་ཀུན་ཏུ་སྦྱར་
བ་ནི་རིམས་ཀྱི་ཚ་བ་དང་ལྡན་པའི་གློ་འགྲམས་པ་ལ་སྦྱིན་པར་བྱའོ། །ཡང་ན་ཁ་ར་དང་སྦྲང་རྩི་དང་འོ་མ་ཕྱེ་དང་སྐྱོ་མར་བྱས་པ་བླུད་པར་བྱའོ། །ལུད་པ་ཅན་ལ་སྨན་མངར་དང་། །བསྐོལ་བའི་ཞུན་མར་བླུད་པར་བྱ། །ཞེས་བྱ་བ་ལ། ལུད་པ་ཞེས་བྱ་བ་འདིར་གནས་སྐབས་ཀྱིས་ན་
གློ་རྡོལ་བའི་ལུད་པ་ཅན་ལ་བྱ་སྟེ། དེ་ལ་སྨན་མངར་བ་ཞེས་བྱ་བ་རྒུན་འབྲུ་དང་ཤིང་མངར་དང་། མ་དུ་ཀ་ལ་སོགས་པ་མངར་བའི་སྡེ་ཚན་དུ་བསྟན་པའི་ཕྱིར་བཤད་པའི་སྨན་དང་བསྐོལ་བའི་ཞུན་མར་བླུད་པར་བྱའོ། །ཡང་ན་བུ་རམ་ཆུ་བསྐོལ་བསྒྲངས། །སྦྲང་རྩི་ན་ལེ་ཤམ་བཏབ་
བླུད། །ཅེས་བྱ་བ་ལ། ཡང་ན་ནད་དེ་ལྟ་བུ་ལ་བུ་རམ་དང་སྦྱར་བའི་ཆུ་བསྐོལ་ཏེ་བསྒྲངས་པའི་ནད་སྦྲང་རྩི་དང་ན་ལེ་ཤམ་བཏབ་སྟེ་བླུད་པར་བྱའོ། །ཡང་ན་སྐྱུ་རུ་རའི་ཕྱེ་མ། །འོ་མར་བསྐོལ་བ་མར་བཏབ་བླུད། །ཅེས་བྱ་བ་ལ། ཡང་གློ་འགྲམས་བའི་ནད་ལུད་པ་ཅན་གྱི་མི་ལ་
เล่ม ๒๐๑ · หน้า 230a
སྐྱུ་རུ་རའི་ཕྱེ་མ་འོ་མར་བསྐོལ་ཏེ་མར་བཏབ་ལ་བླུད་པར་བྱའོ། །ཡང་ན་བཅུད་ཀྱིས་ལེན་ཆོགས། །པི་པི་ལིང་ཡང་སྦྱིན་པར་བྱ། །ཞེས་བྱ་བ་ལ། ཡང་ན་བཅུད་ཀྱིས་ལེན་གྱི་ལེའུ་ལས་བཤད་པའི་ཆོགས་པི་པི་ལིང་གི་སྨན་གློ་འགྲམས་པའི་ལུད་པ་
ཅན་དེ་ལ་སྦྱིན་པར་བྱའོ། །ལུད་པ་ཅན་རུས་ཚིགས་གཟེར་ལ། །རྒུན་འབྲུ་ཤིང་མངར་མ་དུ་ཀ །སྨིག་རྐང་བ་ལ་པི་པི་ལིང་། །ཞུན་མར་སྦྲང་རྩིར་བཅས་པ་སྦྱིན། །ཞེས་བྱ་བ་ལ། གློ་འགྲམས་པའི་ལུད་པ་ཅན་ཀྱི་མི་རུས་པ་དང་ཚིགས་གཟེར་བའི་ནད་དང་ལྡན་པ་
ལ་རྒུན་འབྲུ་ལ་སོགས་པའི་སྨན་ཞུན་མར་དང་སྦྲང་རྩི་དང་སྦྱར་ཏེ་ལྡེ་གུར་བྱས་ལ་སྦྱིན་པར་བྱའོ། །དྲི་སྣ་གསུམ་ནི་ཞོ་རེ་དང་། པི་པི་ལིང་སྲང་ཕྱེད་ཁ་ར། །རྒུན་འབྲུ་འབྲ་གོམ་དུ་ཀ །སྲང་རེ་ཞིབ་ཏུ་བཏགས་ནས་ནི། །སྦྲང་རྩིས་རི་ལུ་བྱས་པ་ཡིས། །རོ་ཙ་བྱེད་ཅིང་ཁྲག་མཁྲིས་
དང་། །ལུད་པ་དབུགས་མི་བདེ་སློན་བྲོ། །བརྒྱལ་མྱོས་སྐྱིགས་བུ་མགོ་འཁོར་དང་། །གློ་རྡོལ་སྐད་ནི་འགགས་པ་དང་། །མཆིལ་མ་ལུས་སྐེམ་རླུང་འཁྱིལ་དང་། །མཆིལ་མར་ཁྲག་འབྱུང་རྩིབ་ལོགས་ན། །སྙིང་ནད་སྐོམ་དད་རིམས་ནད་འཇོམས། །ཞེས་བྱ་བ་ལ། དྲི་
སྣ་གསུམ་ནི་ཤིང་ཚ་དང་། །གནྡྷ་བྷ་དྲ་དང་སུག་སྨེལ་ཞེས་བྱ་བ་སྟེ་སྨན་དེ་དག་ཞོ་རེ་རེ་དང་། པི་པི་ལིང་སྲང་ཕྱེད་ཁ་ར་དང་རྒུན་འབྲུ་སྟེ་གོ་སྟ་ནི་དང་། འབྲ་གོ་སྟེ་ཁ་རྫུ་ར་དང་། མ་དུ་ཀ་སྟེ་བཞི་པོ་སྲང་རེའི་ཆར་བྱས་ཏེ། དེ་ནས་སྨན་ཐམས་ཅད་ཞིབ་ཏུ་བཏགས་ཏེ་སྦྲང་རྩིས་རི་ལུ་
བྱས་ལ། དེས་རོ་ཙ་བར་བྱེད་པ་དང་། ཁྲག་མཁྲིས་ལ་སོགས་པའི་ནད་འཇོམས་པར་བྱེད་དོ། །བར་ཤ་པུ་དང་ཁ་ར་དཀར། །སཱ་ལུ་ཙ་སྣར་བཏགས་པའི་ཕྱེ། །རྒུན་ཆུ་འོ་མ་མར་དུ་བསྐོལ། །མཆིལ་མ་ཁྲག་ཏུ་འབྱུང་ལ་བླུད། །ཅེས་བྱ་བ་ལ། བར་ཤ་པུ་ཞེས་བྱ་བ་བ་སྤྲུ་
བ་མེ་ཏོག་དམར་པོ་ཅན་ལ་སོགས་པའི་སྨན་བཏགས་པའི་ཕྱེ་མ་རྒུན་ཆུ་ལ་སོགས་པ་དང་ལྷན་ཅིག་བསྐོལ་བ་ནི་མཆིལ་མ་ཁྲག་ཏུ་འབྱུང་བའི་ནད་པ་ལ་བླུད་པར་བྱའོ། །ཤིང་མངར་དང་ནི་མ་དུ་ཀ །ཏན་དུ་ལི་ཡི་འོར་བཙོས་ཕན། །ཞེས་བྱ་བ་ལ། ཤིང་མངར་ལ་སོགས་
เล่ม ๒๐๑ · หน้า 230b
པའི་སྨན་བཏགས་པ་ཏན་དུ་ལི་ཡ་ཞེས་བྱ་བའི་ཚོད་མའི་ཁྱད་པར་གྱི་སྨན་འོ་མར་བཙོས་པའི་སྨན་ཡང་མཆིལ་མ་ཁྲག་ཏུ་འབྱུང་བ་ལ་ཕན་ནོ། །ཁྲག་ནི་གང་ཚེ་དྲག་ཏུ་འབྱུང་། །དེ་བཅོས་པ་ཡི་སྨན་བསྟེན་བྱ། །ཞེས་བྱ་བ་ལ། གློ་རྡོལ་བའི་ནད་པ་འདི་ལ་གང་གི་ཚེ་ཁྲག་དྲག་ཏུ་འབྱུང་
ཞིང་ཁ་དང་སྣ་དང་མིག་གི་བུ་གའམ། བཤང་སྒོ་ལ་སོགས་པ་ནས་སྟེང་དང་འོག་ཏུ་བྱུང་བར་གྱུར་ན་ནད་དེ་ལ་བཅོས་པའི་ཐབས་སྟེང་འོག་གང་ནས་འབྱུང་བའི་དབང་དུ་བྱས་ནས་ཁྲག་མཁྲིས་གསོ་བའི་ཚུལ་དུ་སྨན་བསྟེན་པར་བྱའོ། །རླུང་འཁྱིལ་པ་ལར་ཚིལ་ནི། །ཆང་
བརྔོས་རྒྱམ་ཚར་བཅས་པ་སྦྱིན། །ཞེས་བྱ་བ་ལ། གློ་རྡོལ་པའི་ལུད་པ་ཅན་གང་ཞིག་གི་རླུང་ནང་དུ་འཁྱིལ་ཞིང་ལུགས་བཞིན་དུ་འབྱུང་བར་མི་བྱེད་དེ་ལམ་ལོག་པར་ཞུགས་པའི་རླུང་ནད་སྟོབས་ཅན་དེ་ལ་རའི་ཚིལ་ཆང་ལ་བརྔོས་པ་རྒྱམ་ཚར་བཅས་པ་སྦྱིན་པར་བྱའོ། །སྐེམ་
ཞིང་ཉམ་ཆུང་གློ་འགྲམས་དང་། །གཉིད་ཆུང་མེ་དྲོད་ཆེ་བ་ལ། །འོ་མ་བསྐོལ་བའི་སྤྲིས་མར་ཆགས། །ཁ་ར་སྦྲང་རྩི་མར་བཅས་སྦྱིན། །ཞེས་བྱ་བ་ལ། ནད་པ་གང་སྐེམས་ཤིང་རིད་པ་ལ་སོགས་པ་དང་ལྡན་པ་ལ་རའི་ཚིལ་དང་འོ་མར་བསྐོལ་བ་ལས་སྟེང་དུ་སྤྲིས་མ་
མཐུག་པོར་ཆགས་པ་བཤུས་པ་དང་ཁ་ར་དང་སྦྲང་རྩིར་སྦྱར་ཏེ་སྦྱིན་པར་བྱའོ། །ཁ་ར་དཀར་དང་ནས་དང་གྲོ། །འཚོ་བྱེད་ཟངས་རྩི་སྦྲང་རྩིར་སྦྱར། །ཡང་ན་འོ་མར་བསྐོལ་ཏེ་བླུད། །གློ་འགྲམས་ཉམ་ཆུང་རིད་ལ་སྦྱིན། །ཞེས་བྱ་བ་ལ། ནད་པ་གང་གློ་འགྲམས་ཉམ་ཆུང་ལ་
རིད་པར་གྱུར་པ་ལ་ཁ་ར་དཀར་པོ་ལ་སོགས་པ་དང་བསྐོལ་བའི་འོ་མ་བླུད་པར་བྱའོ། །ཤ་ཟའི་ཤ་ཡི་ཁུ་བ་ནི། །མར་དང་བརྔོས་པའི་པི་པི་ལིང་། །སྦྲང་རྩིར་བཅས་པ་དེ་ལ་བླུད། །ཤ་དང་ཁྲག་ནི་འཕེལ་བྱེད་ཡིན། །ཞེས་བྱ་བ་ལ། གློ་རྡོལ་བའི་ནད་པ་སྐེམ་པ་ལ་
སོགས་པ་དང་ལྡན་པ་དེ་ལ་ཟས་སུ་ཤ་ཟ་བའི་སྲོག་ཆགས་ཀྱི་ཤའི་ཁུ་བ་མར་དང་བརྔོས་པ་ལ་པི་པི་ལིང་དང་སྦྲང་རྩི་དང་བཅས་པ་བླུད་པར་བྱ་སྟེ། དེས་ནི་ཤ་དང་ཁྲག་ལ་སོགས་པ་འཕེལ་བར་བྱེད་པ་ཡིན་ནོ། །ཨུ་དུ་མྺཱར་ནྱ་གྲོ་དྷ། །ཨ་ཤྭདྠ་དང་པླ་ག་ཤ་དང་། །
เล่ม ๒๐๑ · หน้า 231a
སཱ་ལའི་ཤིང་དང་པྲི་ཡང་ཀུ། །ཏ་ལའི་རྩེ་མོ་འཛམ་བུའི་ཤུན། །པི་པི་ལིང་དང་ཤུག་པར་བཅས། །ཨ་ཤྭ་ཀརྞ་ར་བཅས་པ་ནི། །འོ་མར་བསྐོལ་བ་ལས་བྱུང་བའི། །མར་དང་འབྲས་ཆན་བཟའ་བ་ནི། །གློ་འགྲམས་ཁུ་བ་ཉམས་སྟོབས་དང་། །
དབང་པོའི་ནུས་པ་ཟད་ལ་སྦྱིན། །ཞེས་བྱ་བ་ལ། ཨུ་དུམྺཱ་ར་ལ་སོགས་པ་དང་བསྐོལ་བ་འོ་མ་ལས་བྱུང་བའི་མར་དང་སྦགས་ཏེ་འབྲས་ཆན་གྱི་བཟའ་བ་གློ་འགྲམས་པ་ལ་སོགས་པའི་སྐྱེས་བུ་ལ་སྦྱིན་པར་བྱའོ། །རླུང་མཁྲིས་ཀྱིས་ཉེན་ཡན་ལག་ཞིག །ན་ལ་མར་དེས་
བསྐུས་པ་བསྔགས། །རླུང་ནད་ཀྱིས་ནི་ཉེན་པ་ལ། །རླུང་འཇོམས་སྨན་བསྐོལ་ཏིལ་མར་བསྐུ། །ཞེས་བྱ་བ་ལ། རླུང་དང་མཁྲིས་པ་ལས་གྱུར་པའི་ནད་ཀྱིས་ཡན་ལག་ཞིག་པ་སྙམ་དུ་སེམས་པའི་གློ་འགྲམས་པ་ལ་ནི་རླུང་དང་མཁྲིས་པ་སེལ་བར་བྱེད་པའི་མར་དེས་བསྐུ་
བ་ཡིན་ནོ། །རླུང་ནད་འབའ་ཞིག་གིས་ཉེན་ཅིང་གཟིར་བས་ཡན་ལག་ཞིག་པ་ལྟར་ན་བ་ལ་ནི་རླུང་ནད་འཇོམས་པའི་སྨན་དང་བསྐོལ་བའི་ཏིལ་མར་གྱིས་བསྐུ་བར་བྱའོ། །འཚོ་བྱེད་སྡེ་ཚན་ཞུན་མར་ནི། །སྙིང་དང་རྩིབ་ལོགས་ན་ལ་བླུད། །ཅེས་བྱ་བ་ལ། སྙིང་དང་རྩིབ་
ལོགས་ལ་སོགས་པ་ན་བ་ལ་ནི་འཚོ་བྱེད་ཀྱི་སྡེ་ཚན་དང་བསྐོལ་བའི་ཞུན་མར་བླུད་པར་བྱའོ། །ཡང་ན་རླུང་ནད་འཇོམས་པ་དང་། །ཁྲག་མཁྲིས་སེལ་བ་གང་ཡིན་བྱ། །ཞེས་བྱ་བ་ལ། ཡང་རླུང་དང་ཁྲག་མཁྲིས་སེལ་བའི་སྨན་བཏུང་བ་དང་ལས་སུ་བྱ་བ་དེ་དག་བྱའོ། །ཤིང་
མངར་ནཱ་ག་ཕ་ལ་གཉིས། །འོ་མ་དང་མཉམ་མར་བསྐོལ་བར། །པ་ཡ་སྱ་དང་པི་པི་ལིང་། །སྨིག་རྐང་ལྡེ་གུ་བསྐོལ་བས་ནི། །གློ་འགྲམས་པ་ཡི་ནད་ལ་ཕན། །ཞེས་བྱ་བ་ལ། ཤིང་མངར་དང་ནཱ་ག་ཕ་ལ་གཉིས་ཀྱི་སྨན་ཁུ་མར་གྱི་ཉིས་འགྱུར་དང་། འོ་མ་དེ་དང་
མཉམ་སྟེ། སྤྱིར་མར་གྱི་བཞི་འགྱུར་གྱི་ནང་དུ་བ་ཡ་སྱ་ལ་སོགས་པའི་ལྡེ་གུ་མར་གྱི་བཞི་ཆ་བཅུག་ལ་བསྐོལ་བའི་སྨན་མར་ནི་གློ་འགྲམས་པའི་ནད་ལ་ཕན་ནོ། །པ་ཡ་སྱ་ནི་ཀྵི་རི་ནི་ཞེས་བྱ་བ་སྨན་འོ་མ་ཅན་ཞིག་གོ། །འཚོ་བྱེད་སྡེ་ཚན་བཅའ་སྒ་དང་། ཉེའུ་ཤིང་པ་དང་ར་
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด