འདུལ་བ་རྣམ་པར་འབྱེད་པ

Sanskrit title (Tibetan script, as in the text) བི་ན་ཡ་བི་བྷང་ག

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 7 · folio 115b

བར་བྱེད། དགའ་མགུར་སྤྱོད་པར་བྱེད་པ་དེའི་བུ་བྱུང་ནས་དེས་ཆུང་མ་ལ་སྨྲས་པ། བཟང་མོ་བདག་ཅག་ནོར་འཕྲོག་པ། ལོངས་སྤྱོད་འཕྲོག་པ་བྱུང་གིས་ཁོ་བོ་ཟོང་ཐོགས་ཏེ་རྒྱ་མཚོ་ཆེན་པོར་འཇུག་གོ། །རྗེའི་སྲས་དེ་ལྟར་མཛོད་ཅིག །དེ་ཟོང་ཐོགས་ཏེ་རྒྱ་མཚོ་ཆེན་པོར་

ཞུགས་པ་དང་། དེ་དེ་ཉིད་དུ་ཚུལ་མ་ཡིན་པར་སྡུག་བསྔལ་བར་གྱུར་ཏོ། །ཆུང་མ་དེས་ཁྱེའུ་དེ་ཉེ་དུའི་སྟོབས་དང་། ལག་སྟོབས་ཀྱིས་བསྙོད་ཅིང་གསོས་ཏེ་བསྐྱེད་ནས་དེས་དེ་ཡི་གེ་དང་། ཡིག་འབྲུ་དག་སློབ་ཏུ་བཅུག་ནས་དེས་འཇིག་རྟེན་གྱི་གཏམ་རྒྱུད་ལ་ཤིན་ཏུ་མཁས་པར་

གྱུར་ཏོ། །ཁྱེའུ་དེ་ནེའུ་ལྡངས་དང་ལྷན་ཅིག་འོད་མའི་ཚལ་དུ་སོང་སྟེ་གཙུག་ལག་ཁང་དུ་ཞུགས་པ་དང་། དེས་སྒོ་ཁང་ན་ཆ་ལྔ་པའི་འཁོར་ལོ་བྲིས་པ་མཐོང་ནས་དེས་དགེ་སློང་ལ་དྲིས་པ། འཕགས་པ་བྲིས་པ་འདི་ཅི་ལགས། དགེ་སློང་དེས་སྨྲས་པ། བཞིན་བཟངས་འདི་དག་ནི་

འགྲོ་བ་ལྔ་སྟེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དང་། ལྷ་དང་། མི་དག་གོ། །དེས་ཡང་དྲིས་པ། འཕགས་པ་འདི་དག་གིས་ལས་ཅི་བགྱིས་ན་ལས་དེའི་རྣམ་པར་སྨིན་པས་སེམས་ཅན་དམྱལ་བ་དག་ཏུ་སྐྱེས་ཤིང་དེས་ད་ལྟར་དབྱུང་བ་དང་། གཏུབ་པ་དང་།

གཅད་པ་དང་། གཤེག་པ་ལ་སོགས་པའི་སྡུག་བསྔལ་ཉམས་སུ་མྱོང་བར་གྱུར། བཞིན་བཟངས་འདི་དག་གིས་མི་དགེ་བ་བཅུའི་ལས་ཀྱི་ལམ་དག་ཆེར་ཀུན་དུ་བསྟེན་ཅིང་གོམས་པར་བྱས་ལན་མང་དུ་བྱས་པས་ལས་དེའི་རྣམ་པར་སྨིན་པས་སེམས་ཅན་དམྱལ་བ་རྣམས་སུ་སྐྱེས་ཤིང་།

དེ་ད་ལྟར་དབྱུང་བ་དང་། གཏུབ་པ་དང་། གཅད་པ་དང་། གཤེག་པ་ལ་སོགས་པའི་སྡུག་བསྔལ་དག་ཉམས་སུ་མྱོང་བར་གྱུར་ཏོ། །འཕགས་པ་འདི་དག་གིས་ཀྱང་ལས་ཅི་བགྱིས་ན་ལས་དེའི་རྣམ་པར་སྨིན་པས་དུད་འགྲོ་རྣམས་སུ་སྐྱེས་ཤིང་དེས་ད་ལྟར་གཅིག་ལ་གཅིག་འཚལ་

བ་ལ་སོགས་པའི་སྡུག་བསྔལ་དག་ཉམས་སུ་མྱོང་བར་གྱུར། བཞིན་བཟངས་འདི་དག་གིས་ནི་མི་དགེ་བ་བཅུའི་ལས་ཀྱི་ལམ་དག་ཆེས་སྲབ་པ་དང་། ཆེས་ཆུང་བ་དག་ཀུན་དུ་བསྟེན་ཅིང་གོམས་པར་བྱས་ལན་མང་དུ་བྱས་པས་ལས་དེའི་རྣམ་པར་སྨིན་པས་དུད་འགྲོ་རྣམས་སུ་

Vol. 7 · folio 116a

སྐྱེས་ཤིང་། དེ་ད་ལྟར་གཅིག་ལ་གཅིག་ཟ་བའི་སྡུག་བསྔལ་དག་ཉམས་སུ་མྱོང་བར་གྱུར་ཏོ། །འཕགས་པ་འདི་དག་གིས་ཀྱང་ལས་ཅི་བགྱིས་ན་ལས་དེའི་རྣམ་པར་སྨིན་པས་ཡི་དགས་རྣམས་སུ་སྐྱེས་ཤིང་དེས་ད་ལྟར་བཀྲེས་པ་དང་། སྐོམ་པ་ལ་སོགས་པའི་

སྡུག་བསྔལ་དག་ཉམས་སུ་མྱོང་བར་གྱུར། བཞིན་བཟངས་འདི་དག་གིས་ནི་སེར་སྣ་ཀུན་དུ་བསྟེན་ཅིང་གོམས་པར་བྱས་ལན་མང་དུ་བྱས་པས་ལས་དེའི་རྣམ་པར་སྨིན་པས་ཡི་དགས་རྣམས་སུ་སྐྱེས་ཤིང་། དེས་ད་ལྟར་བཀྲེས་པ་དང་། སྐོམ་པ་ལ་སོགས་པའི་སྡུག་བསྔལ་དག་

ཉམས་སུ་མྱོང་བར་གྱུར་ཏོ། །འཕགས་པ་འོ་ན་འདི་དག་གིས་ལས་ཅི་བགྱིས་ན་ལས་དེའི་རྣམ་པར་སྨིན་པས་ལྷ་རྣམས་སུ་སྐྱེས་ཤིང་དེས་ད་ལྟར་ལྷའི་བདེ་བ་དག་ཉམས་སུ་མྱོང་བར་གྱུར། བཞིན་བཟངས་འདི་དག་གིས་ནི་དགེ་བ་བཅུའི་ལས་ཀྱི་ལམ་ཆེར་ཀུན་དུ་བསྟེན་ཅིང་གོམས་

པར་བྱས་ལན་མང་དུ་བྱས་པས་ལས་དེའི་རྣམ་པར་སྨིན་པས་ལྷ་རྣམས་སུ་སྐྱེས་ཤིང་དེས་ད་ལྟར་ལྷའི་བདེ་བ་དག་ཉམས་སུ་མྱོང་བར་གྱུར་ཏོ། །འཕགས་པ་འདི་དག་གིས་ལས་ཅི་བགྱིས་ན་ལས་དེའི་རྣམ་པར་སྨིན་པས་མི་རྣམས་སུ་སྐྱེས་ཤིང་དེས་ད་ལྟར་བདེ་བ་ཆུང་ངུ་ཉམས་སུ་

མྱོང་བར་གྱུར། བཞིན་བཟངས་འདི་དག་གིས་ནི་དགེ་བ་བཅུའི་ལས་ཀྱི་ལམ་ཆུང་ངུ་ཀུན་དུ་བསྟེན་ཅིང་གོམས་པར་བྱས་ལན་མང་དུ་བྱས་པས་ལས་དེའི་རྣམ་པར་སྨིན་པས་མི་རྣམས་སུ་སྐྱེས་ཤིང་། དེས་ད་ལྟར་བདེ་བ་ཆུང་ངུ་ཉམས་སུ་མྱོང་བར་གྱུར་ཏོ། །འཕགས་པ་འདི་ལ་

བདག་འགྲོ་བ་གསུམ་པོ་སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནི་མི་འཚལ་ལོ། །འགྲོ་བ་གཉིས་པོ་ལྷ་དང་། མི་གཉིས་ནི་འཚལ་ལོ། །འཕགས་པ་བདག་གིས་ལས་ཅི་བགྱིས་ན་དེས་བདག་ལྷར་སྐྱེ་བར་འགྱུར་བ་མཆིས་སམ། བཞིན་བཟངས་ཡོད་དོ། །

གང་ལགས། བཞིན་བཟངས་བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་ལ་ཚངས་པར་སྤྱད་པ་སྤྱོད་ཅིག་དང་། གལ་ཏེ་ཚེ་འདི་ཉིད་ལ་ཀུན་ཤེས་པ་རྟོགས་པར་གྱུར་ན་དེ་ཉིད་ཁྱོད་ཀྱི་སྡུག་བསྔལ་གྱི་མཐའ་ཡིན་ནོ། །གལ་ཏེ་ཀུན་དུ་སྦྱོར་བ་ལྷག་མ་དང་བཅས་པས་དུས་བྱེད་པར་གྱུར་ན་

Vol. 7 · folio 116b

ཁྱོད་ལྷ་རྣམས་སུ་སྐྱེ་བར་འགྱུར་རོ། །འཕགས་པ་ཡུན་ཇི་སྲིད་དུ། བཞིན་བཟངས་ཇི་སྲིད་འཚོའི་བར་དུའོ། །དེ་ནི་རྔོ་མི་ཐོག་ན་ཐབས་གཞན་འགའ་མཆིས་སམ་ཡོད་དོ། །གང་ལགས། བཞིན་བཟངས་བཅོམ་ལྡན་འདས་ཀྱི་སྤྱན་སྔར་སྔར་ཚངས་པར་སྤྱོད་པའི་གཞི་དག་ལོང་ཤིག །

འཕགས་པ་ཡུན་ཇི་སྲིད་དུ། བཞིན་བཟངས་ཇི་སྲིད་འཚོའི་བར་དུའོ། །འཕགས་པ་དེ་ཡང་རྔོ་མི་ཐོག་ན་ཐབས་གཞན་ཅི་མཆིས། ཡོད་དོ། །གང་ལགས། བཞིན་བཟངས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ཅིག་དང་། ལྷ་རྣམས་སུ་སྐྱེ་བར་

འགྱུར་རོ། །འཕགས་པ་ཀཱར་ཥཱ་པ་ཎ་དུ་ཙམ་དག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་ཁྱེད་པར་འགྱུར། བཞིན་བཟངས་ཀཱར་ཥཱ་པ་ཎ་ལྔ་བརྒྱས་སོ། །འཕགས་པ་དེ་ནི་རྔོ་ཐོག་གོ་ཞེས་དེས་དགེ་སློང་དེའི་རྐང་པ་ལ་ཕྱག་འཚལ་ཏེ་སོང་ནས་རང་གི་ཁྱིམ་ག་

ལ་བ་དེར་སོང་སྟེ་ཕྱིན་ནས་མ་ལ་འདི་སྐད་ཅེས་སྨྲས་སོ། །ཡུམ་བདག་དེང་འོད་མའི་ཚལ་དུ་མཆིས་ནས་བདག་གིས་དེ་ན་ཆ་ལྔ་པའི་འཁོར་ལོ་བྲིས་པ་མཐོང་སྟེ། དེ་ན་འགྲོ་བ་ལྔ་པོ་སེམས་ཅན་དམྱལ་བ་དང་། དུད་འགྲོ་དང་། ཡི་དགས་དང་། ལྷ་དང་། མི་དག་བྲིས་ན། ཡུམ་ཁྱོད་

ངན་བུ་ལྷ་རྣམས་སུ་སྐྱེ་བར་བཞེད་དམ། བུ་ཁོ་མོ་སེམས་ཅན་ཐམས་ཅད་ལྷ་རྣམས་སུ་སྐྱེ་བ་ཡང་འདོད་ན་ཁྱོད་ལྟ་སྨོས་ཀྱང་ཅི་དགོས། ཡུམ་ཁྱོད་ཀྱིས་བདག་ལ་ཀཱར་ཥཱ་པ་ཎ་ལྔ་བརྒྱ་སྩོལ་ཅིག་དང་བདག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་

ལོ། །བུ་ཁྱོད་ཀྱང་ཁོ་མོས་ཉེ་དུའི་སྟོབས་དང་ལག་སྟོབས་ཀྱིས་བསྙོད་ཅིང་གསོས་ཏེ་བསྐྱེད་པ་ཡིན་པས་ཁོ་མོ་ལ་ཀཱར་ཥཱ་པ་ཎ་ལྔ་བརྒྱའི་འབྱོར་བ་ག་ལ་ཡོད། ཡུམ་བདག་གླ་རྔན་གྱི་སླད་དུ་ལས་བགྱིད་དུ་མཆིའོ། །བུ་ཁྱོད་ནི་ཤིན་ཏུ་གཞོན་པ་ཡིན་པས་ཁྱོད་ཀྱིས་གླ་རྔན་གྱི་

ཕྱིར་ལས་བྱེད་པར་མི་ནུས་སོ། །ཡུམ་རྔོ་ཐོག་གིས་མཆིའོ། །དེས་དེ་དུས་ཀྱིས་འཆུ་བར་ཤེས་ཏེ་གནང་ནས་ཁྱེའུ་དེ་གླ་མིའི་སྲང་དུ་སོང་སྟེ་བསྡད་པ་དང་། བྲམ་ཟེ་དང་ཁྱིམ་བདག་གིས་གླ་མི་གཞན་དག་ཁྲིད་ན་དེ་འགས་ཀྱང་མ་ཁྲིད་ནས་དེས་དེར་ཉི་མ་ནུབ་

Vol. 7 · folio 117a

པར་བྱས་ནས་ནམ་སྲོས་པ་དང་ཁྱིམ་དུ་འོངས་སོ། །མས་དེ་མཐོང་ནས་དྲིས་པ། བུ་ཁྱོད་ཀྱིས་དེང་གླ་རྔན་གྱི་ཕྱིར་ལས་བྱས་སམ། ཁྱེའུས་སྨྲས་པ། ཡུམ་བདག་སུས་ཀྱང་མ་ཁྲིད་དོ། །བུ་གླ་མི་དག་ནི་འདི་མི་འདྲ་སྟེ། གླ་མི་དག་ནི་སྐྲ་ཡེགས་ཤིང་

གོས་དྲི་མ་ཅན་དག་གྱོན་ནས་གླ་མིའི་སྲང་དུ་སོང་སྟེ་སྡོད་ཀྱིས་ཁྱོད་ཀྱང་གལ་ཏེ་གླ་རྔན་གྱི་ཕྱིར་ལས་བྱེད་པར་འདོད་ན་སྐྲ་ཡེགས་པར་གྱིས་ལ། གོས་དྲི་མ་ཅན་དག་གྱོན་ཏེ་གླ་མིའི་སྲང་དུ་སོང་ལ་སྡོད་ཅིག །དེས་ཕྱི་དེ་ཉིན་པར་སྐྲ་ཡེགས་པར་བྱས་ཤིང་གོས་དྲི་མ་ཅན་དག་

གྱོན་ནས་གླ་མིའི་སྲང་དུ་སོང་སྟེ་བསྡད་པ་དང་། ཚོང་དཔོན་ཞིག་ཁྱིམ་རྩིག་པར་བྱེད་པ་དེ་གླ་མི་དག་གི་ཕྱིར་གླ་མིའི་སྲང་དུ་འོངས་ནས། དེས་གླ་མི་གཞན་དག་ཁྲིད་དེ་ཁྱེའུ་དེ་མ་ཁྲིད་པ་དང་། ཁྱེའུས་སྨྲས་པ། ཡབ་བདག་གིས་ཀྱང་གླ་རྔན་གྱི་སླད་དུ་ལས་བགྱིའོ། །

ཚོང་དཔོན་གྱིས་སྨྲས་པ། བུ་ཁྱོད་ཤིན་ཏུ་གཞོན་པས་ཁྱོད་ཀྱིས་གླ་རྔན་གྱི་ཕྱིར་ལས་བྱེད་པར་མི་ནུས་སོ། །ཁྱེའུས་སྨྲས་པ། ཅི་ཁྱོད་ཀྱིས་བདག་ལ་དང་པོར་གླ་རྔན་སྩོལ་ཏམ། ཚོང་དཔོན་གྱིས་སྨྲས་པ། མཇུག་ཏུ་གླ་རྔན་སྦྱིན་ནོ། །ཁྱེའུས་སྨྲས་པ། བདག་གིས་

ཇེ་དེང་ལས་བགྱིའི་གལ་ཏེ་མཉེས་པར་གྱུར་ན་གླ་རྔན་སྩོལ་ཅིག །ཚོང་དཔོན་དེས་ཁྱེའུ་དེ་ཁྲིད་ནས་ཁྱེའུ་དེས་ཚོང་དཔོན་དེའི་ཁྱིམ་དུ་གླ་རྔན་གྱི་ཕྱིར་ལས་བྱ་བར་བརྩམས་སོ། །གླ་མི་གཞན་དག་གཡོས་ལས་བྱེད་པ་ན་ཁྱེའུ་དེ་མྱུར་བ་མྱུར་བར་ལས་བྱེད་ནས་དེ་དག་གིས་

དེ་ལ་སྨྲས་པ། ཚ་བོ་ཁྱོད་ཅིའི་ཕྱིར་གཡོས་ལས་མི་བྱེད། ཁྱེའུས་སྨྲས་པ། ཞང་པོ་དག་ཁོ་བོ་སྔོན་ཉེས་པར་སྤྱད་པས་དབུལ་པོའི་ཁྱིམ་དག་ཏུ་སྐྱེས་ཤིང་དེས་ད་ལྟར་གླ་རྔན་གྱི་ཕྱིར་ལས་བྱེད་པ་ཡིན་ན། གལ་ཏེ་ད་གཡོས་ལས་བྱས་པར་གྱུར་ན་འདི་ནས་ཤི་འཕོས་པ་

དག་གི་འགྲོ་བ་ཇི་ལྟར་འགྱུར། དེ་དག་གིས་སྨྲས་པ། ཚ་བོ་ཁྱོད་གསར་དུ་དུལ་བ་ཡིན་པས་ཐམས་ཅད་ཀྱི་ཐ་ན་ལས་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་དོ། །ཁྱེའུ་དེ་འཇིག་རྟེན་པའི་གཏམ་རྒྱུད་ལ་མཁས་པ་ཡིན་པས་དེས་གླ་མི་དེ་དག་ལ་གཏམ་

Vol. 7 · folio 117b

རྒྱུད་སྨྲ་ཞིང་མྱུར་བ་མྱུར་བར་སོང་བ་དང་། གླ་མི་དེ་དག་ཀྱང་གཏམ་རྒྱུད་མི་ཐོ་ཀྱིས་དོགས་ནས་དེའི་ཕྱི་བཞིན་མྱུར་བ་མྱུར་བར་ལྷགས་ནས་དེའི་ཉིན་མོ་གླ་མི་དེ་དག་གིས་ལས་མང་དུ་བྱས་སོ། །ཁྱིམ་བདག་གི་ཀུན་དུ་སྤྱོད་པ་ནི། ཕྱེ་མ་རེད་ཀྱི་དུས་ཀྱི་ལས་ཀྱི་མཐའ་དག་ལ་

སོ་སོར་རྟོག་པ་ཡིན་པས་ཚོང་དཔོན་དེ། དགོངས་ཀར་འོངས་ཏེ་ལས་ཀྱི་མཐའ་དག་ལ་སོ་སོར་བརྟགས་པ་དང་། ཅི་ཙམ་ན་དེ་ཉིས་གྱུར་གྱི་ལས་བྱས་པར་མཐོང་ནས་དེས་ལག་དཔོན་གྱི་མི་ལ་དྲིས་པ། ཅི་ཁྱོད་ཀྱིས་གླ་མི་གཞན་དག་ཀྱང་བཀུག་གམ། དེས་སྨྲས་པ་མ་

བཀུག་གོ། །ཚོང་དཔོན་གྱིས་སྨྲས་པ། འོ་ན་ཅིའི་ཕྱིར་དེང་ལས་མང་དུ་ཟིན། དེས་སྨྲས་པ། ཁྱིམ་བདག་གི་བུ་འདི་ནད་མེད་པར་གྱུར་ཅིག །འདི་འཇིག་རྟེན་གྱི་གཏམ་རྒྱུད་ལ་མཁས་པས། འདི་འཇིག་རྟེན་གྱི་གཏམ་རྒྱུད་ཟེར་ཞིང་མྱུར་བ་མྱུར་བར་ལས་བྱེད་

པ་ན་གླ་མི་གཞན་དག་ཀྱང་གཏམ་རྒྱུད་མི་ཐོས་ཀྱི་དོགས་པས་མྱུར་བ་མྱུར་བར་འདིའི་ཕྱི་བཞིན་འདོང་ཞིང་ལས་བྱེད་པས་དེས་ན་དེང་ལས་མང་དུ་ཟིན་ཏོ། །ཚོང་དཔོན་དེས་ཁྱེའུ་དེ་ལ་གླ་རྔན་ཉིས་སྒྱུར་སྦྱིན་པར་བརྩམས་པ་དང་། ཁྱེའུས་སྨྲས་པ། ཅི་ལགས་བདག་

ལ་གདུགས་གཉིས་ཀྱི་གླ་རྔན་ཅིག་ཅར་སྩལ་ཏམ། མ་ཡིན་ཏེ། འདི་ལྟར་ཁོ་བོ་ཁྱོད་ལ་དགའ་བས་བྱ་དགའ་སྦྱིན་ནོ། །ཁྱེའུས་སྨྲས་པ། གལ་ཏེ་ཁྱོད་བདག་ལ་དགྱེས་ན་ཇི་སྲིད་དུ་བདག་ཁྱོད་ཀྱི་སྡུམ་པ་ན་སུག་ལས་འཚལ་བ་དེ་སྲིད་དུ་བདག་གི་གླ་རྔན་ཁྱོད་ཀྱི་

ཕྱག་ཏུ་གཞག་ཏུ་གསོལ། ཚོང་དཔོན་གྱིས་སྨྲས་པ། དེ་ལྟར་གྱིས་ཤིག །གང་གི་ཚེ་དེའི་ཁྱིམ་ཟིན་པ་དེའི་ཚེ་ན་ཁྱེའུ་དེའི་གླ་རྔན་བརྩིས་ན་ཀཱར་ཥཱ་པ་ཎ་ལྔ་བརྒྱར་མ་ཆོག་ནས་ཁྱེའུ་དེས་ངུ་བར་བརྩམས་པ་དང་། ཚོང་དཔོན་དེས་སྨྲས་པ། བུ་ཅི་ངུ་། ཁོ་བོས་

བྲིད་པར་མ་གྱུར་ཏམ། ཡབ་ཁྱོད་བདག་ཉིད་ཆེན་པོ་ལགས་པས་ཁྱོད་ཀྱིས་བདག་ག་ལ་བྲིད་དེ། འདི་ལྟར་བདག་གིས་ཀཱར་ཥཱ་པ་ཎ་ལྔ་བརྒྱའི་ཆེད་དུ་གླ་རྔན་གྱི་སླད་དུ་ལས་བགྱིས་ཤིང་། སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་

Vol. 7 · folio 118a

ཏེ། བདག་ལྷ་རྣམས་ཀྱི་ནང་དུ་སྐྱེ་བར་བགྱིའོ་སྙམ་ན། དེ་དག་མ་འཚལ་བས་ཡང་བདག་གིས་གཞན་དུ་གླ་རྔན་གྱི་སླད་དུ་ལས་བགྱི་འཚལ་བར་འགྱུར་རོ། །ཚོང་དཔོན་དེ་དད་པ་ཅན་ཞིག་ཡིན་པས་དེས་སྨྲས་པ། བུ་ཁོ་བོས་ཁ་བསྐང་བར་བྱའོ། །

ཡབ་བདག་ལྷ་རྣམས་ཀྱི་ནང་དུ་སྐྱེ་བར་མི་འགྱུར་བ་སྙམ། བུ་ཁྱོད་བཅོམ་ལྡན་འདས་ལ་མངོན་པར་དད་དམ། མངོན་པར་དད་དོ། །སོང་ལ་བཅོམ་ལྡན་འདས་ལ་ཞུས་ཤིག །ཁྱེའུ་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་

ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཁྱིམ་བདག་གི་བུ་དེས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀཱར་ཥཱ་པ་ཎ་ལྔ་བརྒྱའི་ཆེད་དུ་གླ་རྔན་གྱི་ཆེད་དུ་ཚོང་དཔོན་ཆེ་གེ་ཞིག་གི་

སུག་ལས་བགྱིས་ན་དེ་དག་མ་འཚལ་ནས་ཚོང་དཔོན་དེས་དེའི་ཁ་སྐོང་བར་བགྱིད་ན་བླང་བར་བགྱི་འམ། བཞིན་བཟངས་ཚོང་དཔོན་དེ་དད་པ་ཅན་ཡིན་གྱིས་ལོང་ཤིག །བཅོམ་ལྡན་འདས་བདག་ལྷ་རྣམས་ཀྱི་ནང་དུ་སྐྱེ་བར་མི་འགྱུར་ལགས་པ་སྙམ། སྐྱེ་བར་འགྱུར་

རོ། །ཁྱེའུ་དེས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་སོང་ངོ་། །དེ་ནས་ཁྱིམ་བདག་གི་བུ་དེས་ཚོང་དཔོན་དེ་ལས་ཀཱར་ཥཱ་པ་ཎ་ལྔ་བརྒྱ་མནོས་ཏེ་མའི་གན་དུ་སོང་ནས་སྨྲས་པ། ཡུམ་ཀཱར་ཥཱ་པ་ཎ་ལྔ་བརྒྱ་པོ་འདི་དག་གིས་ཞལ་ཟས་སྟ་གོན་མཛོད་ཅིག་

དང་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ལོ། །བུ་ཁོ་མོ་ལ་སྣོད་སྤྱད་འགའ་ཡང་མེད་ཅིང་མི་བླས་དང་། གནས་མལ་འགའ་ཡང་མེད་ཀྱིས་ཚོང་དཔོན་དེ་ཉིད་སྣོད་སྤྱད་དང་། མི་བླས་དང་། གནས་མལ་མང་བ་ཡིན་ལ་དད་པ་

ཅན་ཡིན་གྱིས་སོང་ལ་དེ་ཉིད་ལ་གྱིས་ཤིག །ཁྱེའུ་དེ་ཚོང་དཔོན་དེའི་གན་དུ་སོང་སྟེ་སྨྲས་པ། ཡབ་བདག་གི་སྡུམ་པ་ན་སྣོད་སྤྱད་དང་། མི་བླས་དང་། གནས་མལ་ཅུང་ཟད་ཀྱང་མ་མཆིས་ཀྱིས་ཁྱོད་ཉིད་ཀྱིས་ཞལ་ཟས་སྟ་གོན་མཛོད་ཅིག་དང་བདག་མཆིས་ནས་

Vol. 7 · folio 118b

རང་གི་སུག་པ་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ལོ། །ཚོང་དཔོན་དེ་དད་པ་ཅན་ཡིན་པས་དེས་བསམས་པ། བདག་གི་ཁྱིམ་གསར་དུ་བརྩིགས་པ་དེར་སངས་རྒྱས་ལ་སོགས་པ་དགེ་སློང་གི་དགེ་འདུན་གྱིས་གདུགས་ཚོད་

གསོལ་བར་གྱུར་ན་ལེགས་སོ་སྙམ་ནས་དེས་སྨྲས་པ། བུ་ཞོག་སྟེ་སོང་ལ་སངས་རྒྱས་ལ་སོགས་པ་དགེ་སློང་གི་དགེ་འདུན་སང་གདུགས་ཚོད་ལ་སྤྱན་དྲོངས་ཤིག་དང་ཁོ་བོས་ཞལ་ཟས་སྟ་གོན་བྱའོ། །དེ་ནས་ཁྱིམ་བདག་གི་བུ་དེས་ཚོང་དཔོན་དེའི་ལག་ཏུ་ཀཱར་ཥཱ་

པ་ཎ་ལྔ་བརྒྱ་གཏད་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་རྒན་པའི་མཐའ་ལོགས་སུ་འདུག་ནས་གསོལ་པ། བཅོམ་ལྡན་འདས་སང་བདག་གིས་སངས་རྒྱས་ལ་སོགས་པ་དགེ་

སློང་གི་དགེ་འདུན་གདུགས་ཚོད་ལ་སྤྱན་འདྲེན་ཏོ། །བཅོམ་ལྡན་འདས་ཀྱིས་ཁྱིམ་བདག་གི་བུ་དེ་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་གི་བུ་དེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་

གཉིས་ལ་མགོ་བོས་ཕྱག་འཚལ་ཏེ་སོང་ངོ་། །ཚོང་དཔོན་དེས་ཀྱང་དེ་ཉིད་ཀྱི་མཚན་མོ་ཞལ་ཟས་སྟ་གོན་བྱས་ནས་ནང་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་

འཚལ་ན་བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་

གྱིས་མདུན་དུ་བདར་ནས་ཚོང་དཔོན་དེའི་ཁྱིམ་ག་ལ་བ་དེར་གཤེགས་སོ། །དྲུག་སྡེ་དག་གིས་དྲིས་པ། སུའི་ཁྱིམ་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲངས། ཁྱིམ་བདག་གི་བུ་ཆེ་གེ་མོ་ཞིག་གིའོ། །དྲུག་སྡེ་དག་གིས་སྨྲས་པ།

Vol. 7 · folio 119a

དེ་ནི་གླ་མི་ཡིན་པས་ཅི་ཞིག་སྦྱིན་པར་འགྱུར། ཁྱིམ་དུ་འགྲོ་བའི་ཁྱིམ་དག་ཏུ་དོང་ལ་གཡར་ཚུས་བཟས་འདོང་ངོ་ཞེས་དེ་དག་ཁྱིམ་དུ་འགྲོ་བའི་ཁྱིམ་དག་ཏུ་དོང་བ་དང་། དེ་དག་གིས་སྨྲས་པ། འཕགས་པ་དག་གདན་ཚུས་གསོལ་ཅིག །དེ་

ལྟར་བྱའོ། །ཞེས་དེ་དག་གིས་ཁྱེའུ་ཚུས་ཟོས་སོ། །དེ་ནས་བཅོམ་ལྡན་འདས་ཚོང་དཔོན་དེའི་བཀད་ས་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དྲུག་སྡེ་དག་ཀྱང་ཁྱིམ་དུ་འགྲོ་བའི་ཁྱིམ་དག་ཏུ་ཁྱེའུ་

ཚུས་ཟོས་ནས་དེ་ཉིད་དུ་དོང་སྟེ་འཁོད་དོ། །དེ་ནས་ཁྱིམ་བདག་གི་བུ་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད་ཅིང་སྟོབས་པར་བྱེད་དོ། །དེ་དེ་ན་

རྒྱུ་བ་ན་དྲུག་སྡེ་དག་གུས་པར་བྱས་ཏེ་མི་ཟ་བ་མཐོང་ངོ་། །མཐོང་ནས་ཀྱང་བཅོམ་ལྡན་འདས་ཀྱི་སྤྱན་སྔར་འདུག་སྟེ་གསོལ་པ། བཅོམ་ལྡན་འདས་འདི་ན་འཕགས་པ་ཁ་ཅིག་གུས་པར་བགྱིས་ཏེ་མི་འཚལ་ན་བདག་ལྷ་རྣམས་ཀྱི་ནང་དུ་སྐྱེ་བར་མི་འགྱུར་ལགས་པ་སྙམ།

བཅོམ་ལྡན་འདས་ཀྱིས་བཀའ་སྩལ་པ། བཞིན་བཟངས་རེ་ཞིག་གནས་མལ་གྱི་ལོངས་སྤྱོད་ཀྱིས་ཀྱང་ཁྱོད་ལྷ་རྣམས་ཀྱི་ནང་དུ་སྐྱེ་བར་འགྱུར་ན་ཁ་ཟས་ཀྱི་ལོངས་སྤྱོད་ཀྱིས་ལྟ་སྨོས་ཀྱང་ཅི་དགོས། དེ་ནས་བཅོམ་ལྡན་འདས་ཁྱིམ་བདག་གི་བུ་དེ་ལ་ཆོས་དང་ལྡན་པའི་བཀའ་

མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན།

ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །ཚོང་པ་ལྔ་བརྒྱ་ཙམ་རྒྱ་མཚོ་ཆེན་པོ་ནས་རྒྱལ་པོའི་ཁབ་ཏུ་ལྷགས་ནས་རྒྱལ་པོའི་ཁབ་ཏུ་དུས་སྟོན་བྱུང་བས་ཚོང་

Vol. 7 · folio 119b

ཅུང་ཟད་ཀྱང་མ་རྙེད་ནས་དེ་ན་ཚོང་པ་དགེ་སློང་གི་རྒྱུས་ཤེས་པ་ཞིག་འདུག་པ་དེས་སྨྲས་པ། ཤེས་ལྡན་དག་ཤེས་པར་གྱིས་ཤིག །ཁྱིམ་གང་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་གྱིས་གདུགས་ཚོད་གསོལ་བའི་ཁྱིམ་དེ་ན་གོར་མ་ཆག་པར་བཟའ་བ་དང་བཏུང་

བ་ལྷག་པའི་ཆོས་ཅུང་ཟད་ཡོད་ཀྱིས་དེར་དོང་ལ་རིན་གྱིས་བཙལ་ལོ། །དེ་དག་གིས་སྨྲས་པ་དང་། ཚོང་དཔོན་ཆེ་གེ་མོ་ཞིག་གི་ཁྱིམ་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་གྱིས་གདུགས་ཚོད་གསོལ་ཏོ་ཞེས་ཐོས་ནས་དེ་དག་ཟོང་ཐོགས་ཏེ་དེར་དོང་ནས་སྨྲས་པ།

ཚོང་དཔོན་བདག་ཅག་ཚོང་པ་ལྔ་བརྒྱ་ཙམ་རྒྱ་མཚོ་ཆེན་པོ་ནས་རྒྱལ་པོའི་ཁབ་ཏུ་ལྷགས་ནས་རྒྱལ་པོའི་ཁབ་ཏུ་དུས་སྟོན་བྱུང་བས་ཚོང་ཅུང་ཟད་ཀྱང་མ་རྙེད་ནས་བདག་ཅག་ལྟོགས་པར་གྱུར་ན་ཁྱོད་ཀྱི་ཁྱིམ་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་གྱིས་གདུགས་ཚོད་

དག་གསོལ་བས་བཟའ་བ་དང་བཏུང་བ་ལྷག་པའི་ཆོས་ཅུང་ཟད་ཡོད་ན་རིན་གྱི་ཕྱིར་བྱིན་ཅིག །ཚོང་དཔོན་གྱིས་སྨྲས་པ། བཞིན་བཟངས་དག་ཇེ་ལྟའོ་ཞེས་དེ་ཁྱིམ་བདག་གི་བུ་དེའི་གན་དུ་སོང་སྟེ་སྨྲས་པ། བུ་ཚོང་པ་ལྔ་བརྒྱ་ཙམ་རྒྱ་མཚོ་ཆེན་པོ་ནས་རྒྱལ་པོའི་

ཁབ་ཏུ་ལྷགས་ནས་རྒྱལ་པོའི་ཁབ་ཏུ་དུས་སྟོན་བྱུང་བས་ཚོང་ཅུང་ཟད་ཀྱང་མ་རྙེད་ནས་དེ་དག་ལྟོགས་པར་གྱུར་ཏེ་རིམ་གྱིས་བཟའ་བ་དང་བཏུང་བ་ཚོལ་དུ་འདིར་ལྷགས་ཀྱིས་ལྷག་པའི་ཆོས་མང་དུ་ཡོད་ན་རིན་གྱི་ཕྱིར་བྱིན་ཅིག །ཁྱེའུས་སྨྲས་པ། ཡབ་བདག་རིན་གྱི་

སླད་དུ་མི་སྩོལ་གྱི་སྦྱིན་པའི་ཆོས་ཀྱི་སླད་དུ་དེ་བཞིན་དུ་སྩོལ་གྱིས་དེ་དག་མཆིས་སུ་སྩོལ་ཅིག །ཚོང་དཔོན་དེས་ཚོང་པ་དེ་དག་འདུག་ཏུ་བཅུག་པ་དང་། ཁྱེའུ་དེས་བཟའ་བ་དང་བཏུང་བས་དེ་དག་ཚིམ་པར་བྱས་སོ། །ཚོང་པ་དེ་དག་ལུས་ཚིམ་པས་ཆེད་དུ་བརྗོད་པ་འདི་སྐད་

ཅེས་ཆེད་དུ་བརྗོད་དོ། །ཚོང་དཔོན་གང་གི་ཁྱིམ་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ཅིང་བདག་ཅག་ཚོང་པ་ལྔ་བརྒྱ་ཡང་བཟའ་བ་དང་བཏུང་བས་ཚིམ་པར་བྱས་པའི་ཚོང་དཔོན་དེ་ནི་རྙེད་པ་དག་ལེགས་པར་རྙེད་དོ། །ཚོང་དཔོན་

Vol. 7 · folio 120a

དེས་སྨྲས་པ། བཞིན་བཟངས་དག་འདི་ནི་ཁོ་བོའི་ཟས་མ་ཡིན་ཏེ། ཁྱིམ་བདག་གི་བུ་འདིའི་ཟས་ཡིན་ནོ། །དེ་དག་གིས་དྲིས་པ། འདི་ཁྱིམ་བདག་གང་གི་བུ་ཡིན། ཚོང་དཔོན་གྱིས་སྨྲས་པ། ཁྱིམ་བདག་ཆེ་གེ་མོ་ཞིག་གིའོ། །དེ་དག་གི་དེད་དཔོན་གྱིས་

སྨྲས་པ། འོ་ན་འདི་བདག་གི་ཆུང་པོ་གྲོགས་ཀྱི་བུ་ཡིན་ནོ། །གཞན་དག་གིས་སྨྲས་པ། དེ་ལྟ་ན་འདི་བདག་ཅག་གི་ཞང་པོ་ཡིན་ནོ། །གཞན་དག་གིས་ཀྱང་སྨྲས་པ། དེ་ལྟ་ན་འདི་བདག་ཅག་གི་ཚ་བོ་ཡིན་ནོ། །དེད་དཔོན་དེས་སྨྲས་པ། མང་པོ་དག་གིས་

ནི་གཅིག་དབྱུང་བར་ནུས་ལ་གཅིག་གིས་ནི་མང་པོ་དག་དབྱུང་བར་མི་ནུས་སོ་ཞེས་དེས་གཞི་བཏིང་སྟེ་རིན་པོ་ཆེ་བཞག་ནས་སྨྲས་པ། ཤེས་ལྡན་དག་གང་གིས་ཅི་ཡོངས་སུ་བཏང་བ་དེས་དེ་གཞི་འདིར་ཞོག་ཤིག །དེར་ལ་ལས་ནི་རིན་པོ་ཆེ་གཅིག་བཞག །ལ་

ལས་ནི་གཉིས་བཞག །ལ་ལས་ནི་མང་པོ་དག་བཞག་སྟེ། དེ་ལྟར་དེར་རིན་པོ་ཆེའི་ཕུང་པོ་རྣམ་པར་བཞག་ནས་དེད་དཔོན་གྱིས་ཁྱེའུ་དེ་ལ་སྨྲས་པ། བུ་ལོང་ཤིག་ཁྱེའུས་སྨྲས་པ། ཤེས་ལྡན་དག་བདག་གིས་རིན་གྱི་ཕྱིར་མ་བྱིན་ནོ། །དེད་དཔོན་གྱིས་

སྨྲས་པ། ཁོ་བོ་ཅག་ཁྱོད་ལ་རིན་སྦྱིན་པ་མ་ཡིན་ཏེ། འདི་ལྟར་རིན་པོ་ཆེ་གཅིག་གིས་ཀྱང་ཟས་འདི་ལྟ་བུ་བརྒྱ་རྙེད་འགྲུབ་པས་འདི་ལྟར་ཁོ་བོ་ཅག་ཁྱོད་ལ་དགའ་བས་དགའ་བའི་དབང་དུ་བྱས་པ་བྱའོ། །ཁྱེའུས་སྨྲས་པ། བདག་ལྷ་རྣམས་ཀྱི་ནང་དུ་སྐྱེ་

བར་མི་འགྱུར་བ་སྙམ། ཁྱོད་བཅོམ་ལྡན་འདས་ལ་མངོན་པར་དད་དམ། མངོན་པར་དད་དོ། །སོང་ལ་བཅོམ་ལྡན་འདས་ལ་ཞུས་ཤིག །དེ་ནས་ཁྱེའུ་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་

མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཁྱིམ་བདག་གི་བུ་དེས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ན་བདག་གིས་ཚོང་པ་ལྔ་བརྒྱ་ཙམ་ལ་བཟའ་བ་དང་བཏུང་བ་སྩལ་ནས་དེ་དག་

Vol. 7 · folio 120b

བདག་ལ་དགའ་བའི་དབང་དུ་བགྱིས་པ་བགྱིད་ན་བདག་གིས་བླང་བར་བགྱིའམ། བཞིན་བཟངས་ལོང་ཤིག །བཅོམ་ལྡན་འདས་བདག་ལྷ་རྣམས་ཀྱི་ནང་དུ་སྐྱེ་བར་མི་འགྱུར་ལགས་པ་སྙམ། བཅོམ་ལྡན་འདས་ཀྱིས་བཀའ་སྩལ་པ། བུ་དེ་ནི་མེ་ཏོག་ཡིན་གྱི་

ལོང་ཤིག །འབྲས་བུ་གཞན་འབྱུང་བར་འགྱུར་རོ། །ཁྱེའུ་དེས་རིན་པོ་ཆེ་དེ་དག་བླངས་སོ། །རྒྱལ་པོའི་ཁབ་ན་ཚོང་དཔོན་བུ་མེད་པ་ཞིག་དུས་ལ་བབ་ནས་ནོར་ཅན་དག་དང་། ཚོང་དཔོན་དག་དང་། དེད་དཔོན་དག་འདུས་ཏེ་སྨྲས་པ། ཤེས་ལྡན་དག་བདག་

ཅག་གིས་གང་ཞིག་གྲོང་ཁྱེར་གྱི་ཚོང་དཔོན་དུ་དབང་བསྐུར་བར་བྱ། བདག་ཅག་གི་ནང་ན་སེམས་ཅན་གང་བསོད་ནམས་ཆེ་བར་གྲགས་པའོ། །དེ་དག་གིས་སྨྲས་པ། བདག་ཅག་གིས་ཇི་ལྟར་ཤེས་པར་བྱ། དེ་དག་གིས་སྨྲས་པ། ས་བོན་ཁ་དོག་སྣ་ཚོགས་

དག་རྫ་མ་སོ་བཏང་བའི་ནང་དུ་བླུགས་ཤིང་གང་གིས་ཁ་དོག་གཅིག་པ་ཤ་སྟག་ཟིན་པར་འགྱུར་བ་དེ་བདག་ཅག་གིས་ཚོང་དཔོན་དུ་དབང་བསྐུར་བར་བྱའོ། །དེ་དག་གིས་ས་བོན་ཁ་དོག་སྣ་ཚོགས་དག་རྫ་མ་སོ་བཏང་བའི་ནང་དུ་བླུགས་ཏེ། དེ་དག་གིས་གཟུང་

བར་བརྩམས་པ་དང་། གཞན་ཐམས་ཅད་ཀྱིས་ནི་ས་བོན་ཁ་དོག་སྣ་ཚོགས་དག་ཟིན། ཁྱིམ་བདག་གི་བུ་དེས་ནི་ས་བོན་ཁ་དོག་གཅིག་པ་ཤ་སྟག་ཟིན་ནས་དེ་དག་གིས་སྨྲས་པ། བདག་ཅག་གིས་གླ་མི་ཚོང་དཔོན་དུ་དབང་བསྐུར་བར་ཇི་ལྟར་བྱ་ཞེས་དེ་དག་

གིས་ལན་གསུམ་གྱི་བར་དུ་དེ་ལྟར་བྱས་པ་དང་། གཞན་ཐམས་ཅད་ཀྱིས་ནི་ས་བོན་ཁ་དོག་སྣ་ཚོགས་དག་ཟིན། ཁྱིམ་བདག་གི་བུ་དེས་ནི་ས་བོན་ཁ་དོག་གཅིག་པ་ཤ་སྟག་ཟིན་ནས་དེ་དག་གིས་སྨྲས་པ། ཤེས་ལྡན་དག་མི་མ་ཡིན་པ་དག་གིས་ཆེ་བཞི་ཕྱེས་

ཁྱིམ་བདག་གི་བུ་འདི་ཉིད་ཚོང་དཔོན་དུ་དབང་བསྐུར་བར་བྱའོ་ཞེས་དེ་དག་གིས་ཁྱེའུ་དེ་གྲོང་ཁྱེར་གྱི་ཚོང་དཔོན་དུ་དབང་བསྐུར་ཏོ། །ཚོང་དཔོན་དེས་བསམས་པ། སེམས་ཅན་འདི་ནི་བསོད་ནམས་དང་དབང་ཆེ་བར་གྲགས་པ་ཡིན་གྱིས་འདི་ལ་གཅམ་གསག་

Vol. 7 · folio 121a

བྱའོ་སྙམ་ནས་ཚོང་དཔོན་དེས་ཀྱང་རང་གི་བུ་མོ་རྒྱན་ཐམས་ཅད་ཀྱིས་བརྒྱན་ཏེ་གྲོང་ཁྱེར་གྱི་ཚོང་དཔོན་དེའི་ཆུང་མར་བྱིན་ནས་དེའི་ཁྱིམ་ནོར་མང་ཞིང་ལོངས་སྤྱོད་དག་གིས་འཕྲལ་ལ་མངོན་པར་མཐོས་པར་གྱུར་ནས་དེའི་མིང་འཕྲལ་ལ་མཐོས་འཕྲལ་ལ་

མཐོས་ཞེས་བྱ་བར་གྱུར་ཏོ། །དེ་ནས་ཚོང་དཔོན་འཕྲལ་ལ་མཐོས་འདི་སྙམ་དུ་སེམས་ཏེ། བདག་གི་ཁྱིམ་ན་དཔལ་གྱི་འབྱོར་པ་ཕུན་སུམ་ཚོགས་པ་གང་ཡིན་པ་དེ་དག་ཐམས་ཅད་སངས་རྒྱས་བཅོམ་ལྡན་འདས་ལ་བརྟེན་ནས་བདག་གིས་སངས་རྒྱས་ལ་སོགས་པ་དགེ་

སློང་གི་དགེ་འདུན་ཁྱིམ་གཞན་དུ་སྤྱན་དྲངས་ཏེ་གདུགས་ཚོད་གསོལ་བ་ལས་གྱུར་པ་ཡིན་ནོ་སྙམ་ནས། དེ་ནས་ཚོང་དཔོན་འཕྲལ་ལ་མཐོས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་

གཅིག་ཏུ་འདུག་གོ། །མཐའ་གཅིག་ཏུ་འདུག་ནས། བཅོམ་ལྡན་འདས་ཚོང་དཔོན་འཕྲལ་ལ་མཐོས་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་

དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་

ཚོང་དཔོན་འཕྲལ་ལ་མཐོས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སང་བདག་གི་སྡུམ་པར་དགེ་སློང་གི་དགེ་འདུན་དང་

ཐབས་ཅིག་གདུགས་ཚོད་གསོལ་བར་ཅི་གནང་། བཅོམ་ལྡན་འདས་ཀྱིས་ཚོང་དཔོན་འཕྲལ་ལ་མཐོས་ལ་ཅང་མི་གསུང་བས་གནང་ངོ་། །དེ་ནས་ཚོང་དཔོན་འཕྲལ་ལ་མཐོས་ཀྱིས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་

Vol. 7 · folio 121b

གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་ཚོང་དཔོན་འཕྲལ་ལ་མཐོས་ཀྱིས་དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་སྟ་གོན་བྱས་ནས་ནང་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ།

བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ་ལྷུང་བཟེད་དང་ཆོས་གོས་

བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་ཚོང་དཔོན་འཕྲལ་ལ་མཐོས་ཀྱི་བཀད་ས་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་

ནས་ཚོང་དཔོན་འཕྲལ་ལ་མཐོས་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད་ཅིང་སྟོབས་པར་བྱེད་དོ། །རྣམ་གྲངས་དུ་མས་བཅའ་བ་དང་བཟའ་བ་

གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས་བཅོམ་ལྡན་འདས་གདུགས་ཚོད་གསོལ་ཅིང་ཕྱག་བཅབས་ཏེ་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ། ཁྱོ་ཤུག་གཉིས་བཅོམ་ལྡན་འདས་ཀྱི་སྤྱན་སྔར་ཆོས་མཉན་

པའི་ཕྱིར་འདུག་གོ། །བཅོམ་ལྡན་འདས་ཀྱིས་ཚོང་དཔོན་འཕྲལ་ལ་མཐོས་ཁྱོ་ཤུག་གཉིས་ཀྱི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས་ཅི་ནས་ཀྱང་ཚོང་དཔོན་འཕྲལ་ལ་མཐོས་ཁྱོ་ཤུག་གཉིས་ཀྱིས་འཇིག་ཚོགས་

ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་མཛད་དོ། །དེས་བདེན་པ་མཐོང་ནས་གསོལ་པ། བཙུན་པ་བདག་གིས་དགེ་བའི་བཤེས་གཉེན་བཅོམ་ལྡན་

Vol. 7 · folio 122a

འདས་ལ་བརྟེན་ནས་བཅོམ་ལྡན་འདས་ཀྱིས་བདག་ལ་ཕན་པ་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས་མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་

མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་། མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་

ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་

པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་

ལྡན་འདས་དང་ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་གློ་བ་ཐག་པ་ནས་སྐྱབས་སུ་མཆིའོ། །དེ་ནས་བཅོམ་ལྡན་འདས་ཚོང་དཔོན་འཕྲལ་ལ་མཐོས་ལ་ཆོས་དང་ལྡན་

པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན།

ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །འདི་ནི་རེ་ཞིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཞིག་འདུལ་བ་ལ་ཉན་ཐོས་རྣམས་ཀྱི་

Vol. 7 · folio 122b

བསླབ་པའི་གཞི་འཆའ་བར་ནི་མི་མཛད་དོ།། །།འདུལ་བ་རྣམ་པར་འབྱེད་པ། བམ་པོ་ལྔ་བཅུ་རྩ་གཅིག་པ། དེ་ནས་བཅོམ་ལྡན་འདས་རྒྱལ་པོའི་ཁབ་ཏུ་ཅི་དགྱེས་པར་བཞུགས་ནས་ཡངས་པ་ཅན་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་

སོ། །དེ་ནས་བཅོམ་ལྡན་འདས་སྤོང་བྱེད་དག་ཏུ་ལྗོངས་རྒྱུ་ཞིང་གཤེགས་པ་ན་ཡངས་པ་ཅན་དུ་བྱོན་ནས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟངས་ན་བཞུགས་སོ། །ཁྱིམ་བདག་དྲག་ཤུལ་ཅན་གྱིས་བཅོམ་ལྡན་འདས་སྤོང་བྱེད་དག་

ཏུ་ལྗོངས་རྒྱུ་ཞིང་གཤེགས་པ་ན་ཡངས་པ་ཅན་དུ་བྱོན་ནས་ཡངས་པ་ཅན་ན་སྤྲེའུ་རྫིང་གི་འགྲམ་དུ་ཁང་པ་བརྩེགས་པའི་ཁང་བཟངས་ན་བཞུགས་སོ་ཞེས་ཐོས་སོ། །ཐོས་ནས་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་

ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད།

ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་

རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་ཁྱིམ་བདག་དྲག་ཤུལ་ཅན་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས།

བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབས་ཅིག་ཏུ་གདུགས་ཚོད་གསོལ་བར་ཅི་གནང་། བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་ལ་ཅང་མི་གསུང་

Vol. 7 · folio 123a

བས་གནང་ངོ་། །དེ་ནས་ཁྱིམ་བདག་དྲག་ཤུལ་ཅན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་སྤྱན་སྔ་ནས་སོང་སྟེ། དེས་ཞོ་ཤས་འཚོ་བ་རྣམས་ལ་སྨྲས་པ། ཤེས་ལྡན་

དག་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཡོངས་སུ་མཉེལ་ཅིང་གཤེགས་ཀྱིས་ཞལ་ཟས་གཙང་ཞིང་བསོད་པ་མང་པོ་དག་སྟ་གོན་གྱིས་ཤིག །དེ་དག་གིས་ཞལ་ཟས་གཙང་ཞིང་བསོད་པ་མང་པོ་དག་སྟ་གོན་བྱས་སོ། །

དེ་ནས་ཁྱིམ་བདག་དྲག་ཤུལ་ཅན་ནང་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན་བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་

སྤྱན་དྲངས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ཁྱིམ་དུ་འགྲོ་བའི་ཁྱིམ་དག་ཏུ་འདོང་། དེ་ལྟར་བྱའོ། །དེ་དག་གིས་བསོད་སྙོམས་པ་ཞིག་མཐོང་ནས་སྨྲས་པ། ཚུར་ཤོག་ཁྱིམ་དུ་འགྲོ་བའི་ཁྱིམ་དུ་འདོང་ངོ་ཞེས་དེ་ཁྲིད་

ནས་དེ་དག་ཆེས་སྔར་ཡངས་པ་ཅན་དུ་ཞུགས་ནས་ཁྱིམ་དུ་འགྲོ་བའི་ཁྱིམ་དག་ཏུ་དོང་བ་དང་། དེ་དག་གིས་སྨྲས་པ། འཕགས་པ་དག་ཞལ་ཚུས་གསོལ་ཅིག །དྲུག་སྡེ་དག་གིས་སྨྲས་པ། ཁོ་བོ་ཅག་མགྲོན་དུ་བོས་སོ། །སུས། ཁྱིམ་

བདག་དྲག་ཤུལ་ཅན་གྱིས་སོ། །དེ་དག་གིས་སྨྲས་པ། འཕགས་པ་དག་འོ་ན་ཨ་མྲའི་ཁུར་བ་དག་གསོལ་ཅིག །དེ་ལྟར་བྱའོ་ཞེས་དེ་དག་གིས་ཨ་མྲའི་ཁུར་བ་དག་ཟོས་སོ། །བསོད་སྙོམས་པ་དེ་མི་ཟ་ནས་དེ་དག་གིས་སྨྲས་པ། འཕགས་པ་ཁྱོད་

ཀྱང་ཨ་མྲའི་ཁུར་བ་དག་གསོལ་ཅིག །དེས་སྨྲས་པ། ཁོ་བོ་སྟན་གཅིག་པ་ཡིན་ནོ། །དེ་དག་གིས་སྨྲས་པའོ། །འོ་ན་སྣོམས་ཏེ་བཞུད་ལ་དེ་ཉིད་དུ་གསོལ་ཅིག །དེས་ལྷུང་བཟེད་ཆུང་ངུ་བཀང་སྟེ་དེར་སོང་བ་དང་། དགེ་སློང་གི་དགེ་འདུན་ནི་བཞུགས་སོ། །

Vol. 7 · folio 123b

བཅོམ་ལྡན་འདས་ནི་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབས་སོ། །སངས་རྒྱས་བཅོམ་ལྡན་འདས་རྣམས་ནི་རྒྱུ་ལྔས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པར་མཛད་དེ། ལྔ་གང་ཞེ་ན། ནང་དུ་

ཡང་དག་པར་འཇོག་པར་བཞེད་པ་དང་། ལྷ་རྣམས་ལ་ཆོས་སྟོན་པར་བཞེད་པ་དང་། ནད་པ་ལ་ལྟ་བར་བཞེད་པ་དང་། གནས་མལ་ལ་རྟོག་པར་བཞེད་པ་དང་། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བཞེད་པའོ། །དོན་འདིར་ནི་བཅོམ་

ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་བཞེད་པས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པ་མཛད་དོ། །དེ་ནས་ཁྱིམ་བདག་དྲག་ཤུལ་ཅན་གྱིས་དགེ་སློང་གི་དགེ་འདུན་བདེ་བར་འཁོད་པར་རིག་ནས་བཅའ་

བ་དང་། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད་ཅིང་སྟོབས་པར་བྱེད་དོ། །དེ་ནས་ཁྱིམ་བདག་དྲག་ཤུལ་ཅན་བསོད་སྙོམས་པ་དེའི་མདུན་དུ་འདུག་པ་དང་། བསོད་སྙོམས་པ་དེས་བསམས་པ། ཁྱིམ་བདག་འདིས་བདག་ལ་འདི་

ལྟར་ཨ་མྲའི་ཁུར་བ་ཟོས་སོ་ཞེས་བྱ་བ་དེ་ལྟར་རིག་པར་གྱུར་གྱིས། ཇི་སྲིད་དུ་འདིས་བདག་ལ་ཀླན་ཀ་མ་རྙེད་པ་དེ་སྲིད་དུ་བདག་གིས་འདི་ལ་བརྗོད་པར་བྱའོ་སྙམ་ནས་དེས་ཁྱིམ་བདག་དྲག་ཤུལ་ཅན་ལ་འདི་སྐད་ཅེས་སྨྲས་སོ། །ཁྱིམ་བདག་བདག་འབའ་ཞིག་ཨ་

མྲའི་ཁུར་བ་ཟོས་པར་མ་ཟད་ཀྱི་དྲུག་སྡེ་འདི་དག་གིས་ཀྱང་ཨ་མྲའི་ཁུར་བ་དག་ཟོས་སོ། །ཁྱིམ་བདག་གིས་སྨྲས་པ། འཕགས་པ་ཅིའི་ཕྱིར་དེ་སྐད་ཅེས་བདག་འབའ་ཞིག་གིས་ཨ་མྲའི་ཁུར་བ་དག་ཟོས་པར་མ་ཟད་ཀྱི་དྲུག་སྡེ་འདི་དག་གིས་ཀྱང་ཨ་མྲའི་ཁུར་

བ་དག་ཟོས་སོ་ཞེས་ཟེར་ཞེས་དེས་སྤྱོས་ཏེ་སྨྲས་པ། འཕགས་པ་ཅི་ཁོ་བོ་ལ་ཨ་མྲའི་ཁུར་བ་དག་མེད་སྙམ་མམ། དེས་ཞོ་ཤས་འཚོ་བ་དག་ལ་སྨྲས་པ། ཤེས་ལྡན་དག་ཨ་མྲའི་ཁུར་བ་དག་གི་སྤྲོག་མ་དག་ཕྱེ་ཤིག །དེ་དག་གིས་ཕྱེའོ། །དེ་ནས་དགེ་སློང་

Vol. 7 · folio 124a

བསོད་སྙོམས་སྒྲུབ་པས་བསོད་སྙོམས་བླངས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །སངས་རྒྱས་བཅོམ་ལྡན་འདས་རྣམས་ནི་

ཆོས་ཉིད་ཀྱིས་བསོད་སྙོམས་སྒྲུབ་པའི་དགེ་སློང་ལ་དགེ་སློང་ཇི་ལྟ་ཟས་བསོད་དམ་དགེ་སློང་གི་དགེ་འདུན་ཚིམ་པར་བྱས་སམ་ཞེས་སོ་སོར་ཀུན་དགའ་བར་མཛད་པ་འདིས་སོ་སོར་ཀུན་དགའ་བར་མཛད་པ་ཡིན་པས་བཅོམ་ལྡན་འདས་ཀྱིས་དགེ་སློང་བསོད་སྙོམས་

སྒྲུབ་པ་ལ་དགེ་སློང་ཇི་ལྟ་ཟས་བསོད་དམ་དགེ་སློང་གི་དགེ་འདུན་ཚིམ་པར་བྱས་སམ། ཞེས་སོ་སོར་ཀུན་དགའ་བར་མཛད་པ་དང་། དེས་གསོལ་པ། བཙུན་པ་ཏེ་པོར་ཟས་བསོད་ཅིང་དགེ་སློང་གི་དགེ་འདུན་ཚིམ་པར་ནི་བགྱིས་ན། འདི་ལྟར་ཁྱིམ་བདག་དྲག་

ཤུལ་ཅན་གྱིས་དགེ་སློང་གི་དགེ་འདུན་སྤྱོས་སོ། །དོན་གང་ལ། དེས་སྐབས་དེ་བཅོམ་ལྡན་འདས་ལ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཁྱིམ་བདག་དྲག་ཤུལ་ཅན་གྱིས་དགེ་སློང་གི་དགེ་འདུན་གནས་སུ་སྤྱོས་སོ། །

དེ་ནས་བཅོམ་ལྡན་འདས་ཞལ་ཟས་ཀྱི་བྱ་བ་མཛད་ནས་གཙུག་ལག་ཁང་གི་སླད་རོལ་དུ་ཞབས་གཉིས་བསིལ་ཏེ་ནང་དུ་ཡང་དག་འཇོག་གི་སླད་དུ་གཙུག་ལག་ཁང་དུ་གཤེགས་སོ། །དེ་ནས་བཅོམ་ལྡན་འདས་ནང་དུ་ཡང་དག་འཇོག་ལས་བཞེངས་ནས་དགེ་སློང་གི་

དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་

རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ཁྱེད་ཡང་ཡང་ཟ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་

Vol. 7 · folio 124b

དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བའི་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་

བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་

པར་བྱ་སྟེ། ཡང་ཡང་ཟ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་དོ། །སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟངས་ན་བཞུགས་སོ། །

དགེ་སློང་ན་བ་ཞིག་སྨན་པའི་གནས་སུ་སོང་བ་དང་། དེས་དེ་མཐོང་ནས་སྨྲས་པ། བཞིན་བཟངས་ཁོ་བོ་ལ་སྨན་སྟོན་ཅིག །འཕགས་པ་ཇེ་ཞལ་ཚུས་གསོལ་ཅིག །བཞིན་བཟངས་བཅོམ་ལྡན་འདས་ཀྱིས་མ་གནང་ངོ་། །འཕགས་པ་དེ་ཁྱོད་ཀྱི་སྨན་ལགས་

ཏེ། གཞན་དུ་ན་ཁྱོད་ཀྱིས་འཚོ་བར་མི་སྤྱོད་དོ། །བཞིན་བཟངས་བཅོམ་ལྡན་འདས་ཀྱིས་བསླབ་པའི་གཞི་བཅའ་བར་མཛད་དོ། །འཕགས་པ་ཁྱོད་ཀྱི་སྟོན་པ་ཐུགས་རྗེ་ཅན་ལགས་པས་དེ་ཉིད་རྐྱེན་དུ་མཛད་ནས་གནང་བར་འགྱུར་བ་གང་ལགས་པ་དེ་ལྟ་བུའི་གནས་མཆིས་

པར་འགྱུར་རོ། །དགེ་སློང་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ན་བའི་དུས་མ་གཏོགས་སོ། །དགེ་སློང་དག་མཆོད་རྟེན་གྱི་ལས་དང་དགེ་འདུན་གྱི་ལས་དག་བྱས་པ་ན་དེ་དག་བཀྲེས་ནས་གློས་

ཕབ་སྟེ་ཉལ་ཞིང་དགེ་བའི་ཕྱོགས་ལ་ཏྲོན་བྱེད་པར་མི་ནུས་པ་ན་བྲམ་ཟེ་དང་ཁྱིམ་བདག་དད་པ་ཅན་དག་གཙུག་ལག་ཁང་དུ་ལྷགས་ནས་དེ་དག་གིས་སྨྲས་པ། འཕགས་པ་དག་བསྟན་པ་ལ་གཅིག་ཏུ་བརྩོན་པར་བགྱི་བ་ལགས་ན། ཅིའི་སླད་དུ་གློས་ཕབ་སྟེ་གཟིམས་ཤིང་དགེ་བའི་

Vol. 7 · folio 125a

ཕྱོགས་ལ་ཏྲོན་མི་མཛད། བཞིན་བཟངས་དག་ཁོ་བོ་ཅག་བཀྲེས་སོ། །འཕགས་པ་དག་ཞལ་ཚུས་གསོལ་ཅིག །བཞིན་བཟངས་དག་བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མཛད་དོ། །ཞེས་ཟེར་བའི་སྐབས་དེ་དགེ་སློང་རྣམས་

ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ལས་ཀྱི་དུས་མ་གཏོགས་སོ། །དགེ་སློང་གཞན་དག་ལམ་དུ་ཞུགས་པ་ན་བཀྲེས་པར་གྱུར་ནས་གློས་ཕབ་སྟེ་ཉལ་ཞིང་དགེ་བའི་ཕྱོགས་ལ་ཏྲོན་བྱེད་པར་མི་ནུས་པ་ན་

བྲམ་ཟེ་དང་ཁྱིམ་བདག་དད་པ་ཅན་དག་ལྷགས་ནས་དེ་དག་གིས་སྨྲས་པ། འཕགས་པ་དག་བསྟན་པ་ལ་གཅིག་ཏུ་བརྩོན་པར་བགྱི་བ་ལགས་ན་ཅིའི་སླད་དུ་གློས་ཕབ་སྟེ་གཟིམས་ཤིང་དགེ་བའི་ཕྱོགས་ལ་ཏྲོན་མི་མཛད། བཞིན་བཟངས་དག་ཁོ་བོ་ཅག་བཀྲེས་སོ། །

འཕགས་པ་དག་ཞལ་ཚུས་གསོལ་ཅིག །བཞིན་བཟངས་དག་བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མཛད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ལམ་གྱི་

དུས་མ་གཏོགས་སོ། །དེ་ནས་བཅོམ་ལྡན་འདས་ཡངས་པ་ཅན་དུ་ཅི་དགྱེས་པར་བཞུགས་ནས་མཉན་ཡོད་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །

མཉན་ཡོད་ན་ཁྱིམ་བདག་ཅིག་འདུག་པ་དེའི་ཀུན་དུ་སྤྱོད་པ་ནི་ཚེས་བརྒྱད་དང་། བཅུ་བཞི་ལ་བསྙེན་གནས་ལ་གནས་ཤིང་ཇི་སྲིད་དུ་དགེ་འདུན་བཀྲབས་པ་དག་ཟན་མ་ཟོས་པ་དེ་སྲིད་དུ་བདག་ཉིད་ཟན་ཟ་བར་མི་བྱེད་དོ། །ཁྱིམ་བདག་ཅིག་གིས་སངས་རྒྱས་

ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་སྤྱན་དྲངས་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་གཤེགས་སོ། །ཁྱིམ་བདག་དེས་གཙུག་ལག་ཁང་དུ་མི་མངགས་ཏེ་སོང་ལ་དགེ་སློང་དག་སྤྱན་དྲོངས་ཤིག་དང་གདུགས་ཚོད་གསོལ་ལོ། །

Vol. 7 · folio 125b

མི་དེ་གཙུག་ལག་ཁང་དུ་སོང་བ་དང་། ཇི་ཙམ་ན་དགེ་སློང་གཅིག་ཀྱང་མི་སྣང་ནས་དེ་ཕྱིར་ལོག་སྟེ་སྨྲས་པ། ཁྱིམ་བདག་དེ་ན་དགེ་སློང་མེད་དེ་བདག་གིས་གཅིག་ཀྱང་མ་མཐོང་ངོ་། །ཁྱིམ་བདག་དེས་སྨྲས་པ། སོང་ལ་གང་དུ་སངས་རྒྱས་ལ་སོགས་པ་དགེ་སློང་གི་དགེ་

འདུན་སྤྱན་དྲངས་པ་དེ་ནས་དགེ་སློང་དག་སྤྱན་དྲོངས་ཤིག་དང་གདུགས་ཚོད་གསོལ་ལོ། །མི་དེ་དེར་སོང་བ་དང་། ཇི་ཙམ་ན་དགེ་སློང་དག་ཟན་ཟོས་ཏེ་ཕྱིར་བྱུང་བ་མཐོང་ནས་དེས་སྨྲས་པ། འཕགས་པ་དག་ཚུར་གཤེགས་ཁྱིམ་བདག་ཆེ་གེ་མོ་ཞིག་གི་སྡུམ་པར་གདུགས་

ཚོད་གསོལ་པར་ཅི་གནང་། དགེ་སློང་རྣམས་ཀྱིས་སྨྲས་པ། ཁོ་བོ་ཅག་ཟན་ཟོས་ཟིན་ནོ། །མི་དེ་སོང་སྟེ་ཁྱིམ་བདག་དེ་ལ་སྨྲས་པ། ཁྱིམ་བདག་དགེ་སློང་དག་གི་ཞལ་ནས་ཁོ་བོ་ཅག་ཟན་ཟོས་ཟིན་ཏོ་ཞེས་བྱུང་ངོ་། །ཀྭའི་ནང་རྗེ་སོང་ལ་ཁྱིམ་བདག་གི་མཆིད་ནས་

ཚུར་སྤྱོན་གདུགས་ཚོད་གསོལ་དང་རས་ཡུག་ཆེན་འབུལ་ལོ་ཞེས་བྱོས་ཤིག །དེ་སོང་སྟེ་སྨྲས་པ། འཕགས་པ་དག་ཁྱིམ་བདག་གི་མཆིད་ནས་ཚུར་གཤེགས་གདུགས་ཚོད་གསོལ་དང་རས་ཡུག་ཆེན་འབུལ་ལོ་ཞེས་མཆིའོ། །དགེ་སློང་རྣམས་ཀྱིས་སྨྲས་པ།

ཁོ་བོ་ཅག་གིས་སྤངས་སོ། །མི་དེ་སོང་སྟེ་ཁྱིམ་བདག་ལ་སྨྲས་པ། ཁྱིམ་བདག་དགེ་སློང་རྣམས་ཀྱི་ཞལ་ནས་བདག་ཅག་གིས་སྤངས་སོ་ཞེས་བྱུང་ངོ་། །ཁྱིམ་བདག་དེས་བདག་གིས་བཀྲབས་པའི་དགེ་འདུན་གྱིས་བཤོས་མ་གསོལ་ཏོ་ཞེས་ཟན་བཅད་པ་བསྒྲུབས་པ་དང་།

དེའི་ངོས་ཀྱི་ཁྱིམ་ཚེས་དག་ཤཱཀྱའི་བུའི་དགེ་སྦྱོང་འདི་དག་གོས་བྱིན་ནའང་ལོངས་སྤྱོད་པར་མི་བཏུབ་པས་ཁྱིམ་བདག་འདིས་དགེ་སློང་དག་གིས་ཟན་མ་ཟོས་པའི་ཕྱིར་ཟས་བཅད་པ་བྱས་སོ། །ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་

སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་གོས་སྦྱིན་པའི་ཚེའི་དུས་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་བསླབ་པ་ལ་གུས་པ་དང་། བསླབ་

Vol. 7 · folio 126a

པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་

ན་སྔ་མ་ནི་བཅས་པ་ཡིན་ལ་འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་ཡང་ཟ་ན་དུས་མ་གཏོགས་ཏེ་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། ན་བ་དུས་སོ། །ལས་དུས་སོ། །ལམ་

དུས་སོ། །གོས་སྦྱིན་པའི་ཚེ་དུས་ཏེ། དེ་ལ་དེ་ནི་དུས་ཡིན་ནོ། །ཡང་ཡང་ཟ་ན་ཞེས་བྱ་བ་ནི་ཡང་དང་ཡང་དུ་ཟ་ནའོ། །དུས་མ་གཏོགས་ཏེ་ཞེས་བྱ་བ་ནི་དུས་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་

ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་

བྱེད་དོ་ཞེས་གསུངས་སོ། །དེ་ལ་དུས་ནི་འདི་ཡིན་ཏེ། ན་བ་དུས་སོ་ཞེས་བྱ་བ་ནི་འདི་ལྟ་སྟེ། དགེ་སློང་ཟས་གཅིག་གིས་འཚོ་བར་མི་ནུས་ནའོ། །ལས་དུས་སོ་ཞེས་བྱ་བ་ནི་འདི་ལྟ་སྟེ། དགེ་སློང་གིས་དགེ་འདུན་གྱིའམ། མཆོད་རྟེན་གྱི་ལས་དེ་ལས་

ཐ་ན་ཕྱག་དར་རེ་ལྡེ་ཙམ་བྱས་སམ། དཀྱིལ་འཁོར་བ་མལ་ཙམ་བྱས་ནའོ། །ལམ་དུས་སོ་ཞེས་བྱ་བ་ནི་འདི་ལྟ་སྟེ། དགེ་སློང་དཔག་ཚད་ཕྱེད་དུ་སོང་ངམ། དེའི་ཕྱེད་དུ་སོང་སྟེ་ཕྱིར་ལོག་ནའོ། །གོས་སྦྱིན་པའི་ཚེ་དུས་ཏེ་ཞེས་བྱ་བ་ནི་རས་ཡུག་ཕྲན་ནམ།

རས་ཡུག་ཆེན་ཐོབ་ནའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། གོས་དང་བཅས་པ་དང་། གོས་མེད་པ་དང་། གོས་དང་བཅས་ཤིང་གོས་ཀྱི་རིན་དང་ཡང་བཅས་པ་དང་། གོས་མེད་ཅིང་གོས་ཀྱི་རིན་ཡང་མེད་པ་ལས་ཏེ། དེ་ལ་དགེ་སློང་གོས་

Vol. 7 · folio 126b

དང་བཅས་པར་མགྲོན་དུ་བོས་ཤིང་དེ་གོས་དང་བཅས་པ་གཞན་དུ་ཡང་མགྲོན་དུ་བོས་ན་དགེ་སློང་དེས་གཉི་ག་ཡང་ཁས་བླང་བར་བྱ་ཞིང་གཉི་ག་ཡང་བཟའ་བར་བྱ་སྟེ། དེ་ཁས་ལེན་པ་ལ་ཡང་ལྟུང་བ་མེད་ལ་ཟ་བ་ལ་ཡང་ལྟུང་བ་མེད་དོ། །དགེ་སློང་གོས་

དང་བཅས་པ་མགྲོན་དུ་བོས་ཤིང་དེ་གོས་མེད་པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ་ཁས་བླང་བར་བྱ་ཞིང་གཉིས་པ་སྤང་བར་བྱ་བའམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་

བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་དང་བཅས་པར་མགྲོན་དུ་བོས་ཤིང་དེ་གོས་དང་བཅས་ཤིང་གོས་ཀྱི་རིན་དང་ཡང་བཅས་པ་གཞན་དུ་མགྲོན་དུ་བོས་ན་དགེ་སློང་དེས་གཉི་ག་ཁས་བླང་བར་

བྱ་ཞིང་གཉི་ག་བཟའ་བར་བྱ་སྟེ། དེ་ཁས་ལེན་པ་ལ་ཡང་ལྟུང་བ་མེད་ལ། ཟ་བ་ལ་ཡང་ལྟུང་བ་མེད་དོ། །དགེ་སློང་གོས་དང་བཅས་པར་མགྲོན་དུ་བོས་ཤིང་དེ་གོས་མེད་ཅིང་གོས་ཀྱི་རིན་ཡང་མེད་པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ་

ཁས་བླང་བར་བྱ་ཞིང་གཉིས་པ་སྤང་བར་བྱ་བའམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་

སློང་གོས་མེད་པར་མགྲོན་དུ་བོས་ཤིང་དེ་གོས་མེད་པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ་ཁས་བླང་བར་བྱ་ཞིང་གཉིས་པ་སྤང་བར་བྱ་བའམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་

ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་མེད་པར་མགྲོན་དུ་བོས་ཤིང་དེ་གོས་དང་བཅས་པ་གཞན་དུ་ཡང་མགྲོན་དུ་བོས་ན་དགེ་སློང་དེས་གཉི་ག་ཁས་བླང་བར་བྱ་ཞིང་གཉི་ག་བཟའ་བར་བྱ་སྟེ། དེ་ལ་

Vol. 7 · folio 127a

ཁས་ལེན་པ་ལ་ཡང་ལྟུང་བ་མེད་ལ། ཟ་བ་ལ་ཡང་ལྟུང་བ་མེད་དོ། །དགེ་སློང་གོས་མེད་པར་མགྲོན་དུ་བོས་ཤིང་དེ་གོས་དང་བཅས་ཤིང་གོས་ཀྱི་རིན་དང་ཡང་བཅས་པ་གཞན་དུ་ཡང་མགྲོན་དུ་བོས་ན་དགེ་སློང་དེས་གཉི་ག་ཁས་བླང་བར་བྱ་ཞིང་གཉི་ག་

བཟའ་བར་བྱ་སྟེ། དེ་ཁས་ལེན་པ་ལ་ཡང་ལྟུང་བ་མེད་ལ། ཟ་བ་ལ་ཡང་ལྟུང་བ་མེད་དོ། །དགེ་སློང་གོས་མེད་པར་མགྲོན་དུ་བོས་ཤིང་དེ་གོས་མེད་ཅིང་གོས་ཀྱི་རིན་ཡང་མེད་པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ་ཁས་བླང་བར་བྱ་ཞིང་གཉིས་པ་

སྤང་བར་བྱ་བའམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་དང་བཅས་ཤིང་གོས་ཀྱི་རིན་

དང་ཡང་བཅས་པར་མགྲོན་དུ་བོས་ཤིང་དེ་གོས་དང་བཅས་ཤིང་གོས་ཀྱི་རིན་དང་ཡང་བཅས་པ་ལ་གཞན་དུ་ཡང་མགྲོན་དུ་བོས་ན་དགེ་སློང་དེས་གཉི་ག་ཁས་བླང་བར་བྱ་ཞིང་གཉི་ག་བཟའ་བར་བྱ་སྟེ། དེ་ཁས་ལེན་པ་ལ་ཡང་ལྟུང་བ་མེད་ལ། ཟ་བ་ལ་ཡང་ལྟུང་བ་

མེད་དོ། །དགེ་སློང་གོས་དང་ཡང་བཅས་ཤིང་གོས་ཀྱི་རིན་དང་ཡང་བཅས་པར་མགྲོན་དུ་བོས་ཤིང་དེ་གོས་དང་བཅས་པ་གཞན་དུ་ཡང་མགྲོན་དུ་བོས་ན་དགེ་སློང་དེས་གཉི་ག་ཁས་བླང་བར་བྱ་ཞིང་གཉི་ག་བཟའ་བར་བྱ་སྟེ། དེ་ཁས་ལེན་པ་ལ་ཡང་ལྟུང་བ་མེད་ལ།

ཟ་བ་ལ་ཡང་ལྟུང་བ་མེད་དོ། །དགེ་སློང་གོས་དང་བཅས་ཤིང་གོས་ཀྱི་རིན་དང་བཅས་པར་མགྲོན་དུ་བོས་ཤིང་དེ་གོས་མེད་པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ་ཁས་བླང་བར་བྱ་ཞིང་གཉིས་པ་སྤང་བར་བྱ་བའམ། གཞན་ལ་སྦྱིན་པར་བྱའོ། །གཉི་ག་

ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་དང་བཅས་ཤིང་གོས་ཀྱི་རིན་དང་ཡང་བཅས་པར་མགྲོན་དུ་བོས་ཤིང་དེ་གོས་མེད་ཅིང་གོས་ཀྱི་རིན་

Vol. 7 · folio 127b

ཡང་མེད་པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ་ཁས་བླང་བར་བྱ་ཞིང་གཉིས་པ་སྤང་བར་བྱ་བའམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་

བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་མེད་ཅིང་གོས་ཀྱི་རིན་ཡང་མེད་པར་མགྲོན་དུ་བོས་ཤིང་དེ་གོས་མེད་ཅིང་གོས་ཀྱི་རིན་ཡང་མེད་པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ་ཁས་བླང་བར་བྱ་ཞིང་གཉིས་པ་སྤང་བར་བྱ་

བའམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་མེད་ཅིང་གོས་ཀྱི་རིན་ཡང་མེད་པར་མགྲོན་

དུ་བོས་ཤིང་དེ་གོས་དང་བཅས་པ་གཞན་དུ་ཡང་མགྲོན་དུ་བོས་ན་དགེ་སློང་དེས་གཉི་ག་ཁས་བླང་བར་བྱ་ཞིང་གཉི་ག་བཟའ་བར་བྱ་སྟེ། དེ་ཁས་ལེན་པ་ལ་ཡང་ལྟུང་བ་མེད་ལ། ཟ་བ་ལ་ཡང་ལྟུང་བ་མེད་དོ། །དགེ་སློང་གོས་མེད་ཅིང་གོས་ཀྱི་རིན་ཡང་མེད་པར་མགྲོན་དུ་

བོས་ཤིང་དེ་གོས་མེད་པ་གཞན་དུ་ཡང་མགྲོན་དུ་བོས་ན་དགེ་སློང་དེས་སྔ་མ་ཁས་བླང་བར་བྱ་ཞིང་གཉིས་པ་སྤང་བར་བྱ་བའམ། གཞན་ལ་སྦྱིན་པར་བྱའོ། །གཉི་ག་ཁས་ལེན་པར་བྱེད་ཅིང་གཉི་ག་ཟ་བར་བྱེད་ན་དེ་ཁས་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་

ལྟུང་བྱེད་དུ་འགྱུར་ཏེ། སྔ་མ་ལ་ནི་ལྟུང་བ་མེད་དོ། །དགེ་སློང་གོས་མེད་ཅིང་གོས་ཀྱི་རིན་ཡང་མེད་པར་མགྲོན་དུ་བོས་ཤིང་དེ་གོས་དང་བཅས་ཤིང་གོས་ཀྱི་རིན་དང་བཅས་པ་གཞན་དུ་ཡང་མགྲོན་དུ་བོས་ན་དགེ་སློང་དེས་གཉི་ག་ཁས་བླང་བར་བྱ་ཞིང་གཉི་ག་ཟ་བར་བྱ་སྟེ། དེ་

ཁས་ལེན་པ་ལ་ཡང་ལྟུང་བ་མེད་ལ། ཟ་བ་ལ་ཡང་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཡང་ཡང་ཟ་བའི་ལྟུང་བྱེད་དེ་སུམ་བཅུ་རྩ་གཅིག་པ་རྫོགས་སྷོ།། །།

Vol. 7 · folio 128a

སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ། མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །རི་བྲགས་ཤིག་ན་ཁྱིམ་བདག་གཅིག་འདུག་པ་དེས་ཕྱོགས་བཞིའི་དགེ་སྦྱོང་དང་། བྲམ་ཟེ་རྣམས་ཀྱི་དོན་དུ་འདུག་གནས་བྱེད་དུ་བཅུག་སྟེ། དེ་འདུག་

གནས་དེ་ན་ཕྱོགས་བཞིའི་དགེ་སྦྱོང་དང་། བྲམ་ཟེ་གང་འདུག་པ་དེ་ལ་བསོད་སྙོམས་ཀྱིས་མཁོ་བ་སྟོབས་པར་བྱེད་དོ། །གང་གི་ཚེ་བཅོམ་ལྡན་འདས་ཀྱིས་མཉན་ཡོད་དུ་ཆོ་འཕྲུལ་ཆེན་པོ་རྣམ་པར་བསྟན་ཏེ། གཞན་མུ་སྟེགས་ཅན་དག་ཚར་བཅད་ཅིང་ལྷ་དང་མི་རྣམས་ཀུན་དུ་དགའ་བར་མཛད། སྐྱེ་

བོ་མཛངས་པ་དག་གི་སྙིང་དག་རངས་པར་མཛད་པ་དེའི་ཚེ་ན་གཞན་མུ་སྟེགས་ཅན་དག་མཐའ་འཁོབ་དག་ན་རྟེན་ཅིང་གནས་སོ། །དུས་གཞན་ཞིག་ན་གཅེར་བུ་པ་དྲུག་བཅུ་རི་བྲགས་དེར་ལྷགས་ནས་དེ་དག་ཁྱིམ་བདག་དེའི་གན་དུ་དོང་སྟེ་འདི་སྐད་ཅེས་སྨྲས་སོ། །བཞིན་བཟངས་ཆོས་ཐོབ་པར་གྱུར་

ཅིག །ཆོས་ཐོབ་པར་གྱུར་ཅིག །ཁྱིམ་བདག་དེས་སྨྲས་པ། ཤེས་ལྡན་དག་རབ་ཏུ་བྱུང་བ་ཡིན་ནམ་ཅི། རབ་ཏུ་བྱུང་བ་དག་ཡིན་ནོ། །ཁྱིམ་བདག་གིས་སྨྲས་པ། མ་ནོངས་ཏེ་བདག་གིས་ཕྱོགས་བཞིའི་དགེ་སྦྱོང་དང་། བྲམ་ཟེ་རྣམས་ཀྱི་དོན་དུ་འདུག་གནས་བགྱིད་དུ་སྩལ་བ་དེར་བཞུགས་

ཤིག་དང་། བདག་གིས་ཁྱེད་ཅག་ལ་བསོད་སྙོམས་ཀྱིས་མཁོ་བ་བསྟབས་པར་བགྱིའོ། །དེ་དག་གིས་དེར་གནས་པར་བརྩམས་ནས། ཁྱིམ་བདག་དེ་དེ་དག་ལ་བསོད་སྙོམས་ཀྱིས་མཁོ་བ་སྟོབས་པར་བྱེད་དོ། །མཉན་ཡོད་ན་ཁྱིམ་བདག་དད་པ་ཅན་ཞིག་འདུག་པ་དེ་ཟོང་ཐོགས་ཏེ། རི་བྲགས་

དེར་འོངས་ནས་དེ་ཁྱིམ་བདག་དེའི་ཚོང་ཁང་དུ་ཞུགས་ནས། ཁྱིམ་བདག་དེ་དེ་དང་ལྷན་ཅིག་པ་ཤེས་པར་གྱུར་ཏོ། །ཁྱིམ་བདག་དེས་གཅེར་བུ་པ་དེ་དག་ལ་བྲིམ་པར་བརྩམས་ནས་དེས་ཁྱིམ་བདག་དེའི་གན་དུ་མི་མངགས་ཏེ། གྲོགས་པོ་ཚུར་ཤོག་དང་སྦྱིན་གནས་དག་ལ་བྲིམ་པར་བྱའོ་ཞེས་སྦྲན་

པ་དང་། ཁྱིམ་བདག་དེ་དད་པ་ཅན་ཡིན་པས་དེས་བསམས་པ། བཅོམ་ལྡན་འདས་ཀྱི་ཉན་ཐོས་དག་ཡིན་གོར་མ་ཆག་གིས་སོང་ལ་བལྟའོ་སྙམ་ནས། དེ་དེར་སོང་བ་དང་། ཇི་ཙམ་ན་གཅེར་བུ་པ་ངོ་ཚ་དང་ཁྲེལ་བོར་བ་ཤ་སྟག་ཡིན་པར་མཐོང་ནས་མངོན་སུམ་དུ་མི་སྙན་པ་བརྗོད་པ་ནི་སྡུག་

Vol. 7 · folio 128b

བསྔལ་བ་ཡིན་པས་དེ་ཅང་མི་སྨྲ་བར་འདུག་གོ། །གཅེར་བུ་པ་དག་གིས་ཟན་ཟོས་ཏེ་སོང་ནས་ཁྱིམ་བདག་དེས་དེ་ལ་སྨྲས་པ། གྲོགས་པོ་ས་བོན་བཟང་ཞིང་ཞིང་ས་བཟང་ངམ། དེས་སྨྲས་པ། གྲོགས་པོ་ས་བོན་བཟང་ན། ཞིང་ནི་གཅེར་བུ་པ་ངོ་ཚ་དང་ཁྲེལ་བོར་བ་སྡིག་པའི་ལྟ་བ་ཅན་

དགོན་དུང་ཚྭ་སྒོ་ཅན་ཐ་ཆད་སྡིག་པ་ཅན་གྱི་ས་གཞི་ཤ་སྟག་ཡིན་ནོ། །ཁྱིམ་བདག་གིས་སྨྲས་པ། གྲོགས་པོ་ཞིང་བཟང་པོ་གཞན་འགའ་ཡོད་དམ། དེས་སྨྲས་པ། ཡོད་དེ། བཅོམ་ལྡན་འདས་ཀྱི་ཉན་ཐོས་དག་གོ། །ཁྱིམ་བདག་གིས་སྨྲས་པ། གལ་ཏེ་དེ་དག་འདིར་བྱོན་ན་

བདག་གིས་དེ་དག་ལ་བསོད་སྙོམས་ཀྱིས་མཁོ་བ་བསྟབས་པར་བྱའོ། །ཁྱིམ་བདག་དེ་ཟོང་བསྒྱུར་ཏེ་རིན་བླངས་ནས་མཉན་ཡོད་དུ་ཕྱིན་པ་དང་། དེས་ཟོང་དག་ཚོང་ཁང་དུ་མཁོས་སུ་ཕབ་ནས་རྒྱལ་བྱེད་ཀྱི་ཚལ་དུ་སོང་ངོ་། །དྲུག་སྡེ་དག་གི་ཀུན་དུ་སྤྱོད་པ་ནི་འདིར་བདག་ཅག་གིས་བྲམ་ཟེ་

དང་ཁྱིམ་བདག་འོངས་ཤིང་ལྷགས་པ་རྣམས་ལ་ཡང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱའོ་སྙམ་པས་དྲུག་སྡེ་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས། ཚེ་དང་ལྡན་པ་ཉེ་དགའ་ནང་པར་སྔར་

ལངས་ཏེ་སོ་ཤིང་བོར་ནས་སྣམ་སྦྱར་དམར་སེར་གྱོན་ཏེ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་གོ། །ཉེ་དགའས་ཁྱིམ་བདག་དེ་ཐག་རིང་པོ་ཁོ་ན་ནས་མཐོང་ནས་སྨྲས་པ། ཁྱིམ་བདག་འོངས་པ་ལེགས་སོ་འོངས་པ་ལེགས་སོ། །ཁྱོད་གང་ནས་ཟླ་བ་བཞིན་དུ་ཡུན་རིང་མོ་རིང་མོ་ནས་

འཁོད་ཅིང་འོངས། དེས་སྨྲས་པ། འཕགས་པ་རི་བྲགས་ག་གེ་མོ་ཞིག་ན། ཁྱིམ་བདག་ཆེ་གེ་མོ་ཞིག་མཆིས་པ་དེས་ཕྱོགས་བཞིའི་དགེ་སྦྱོང་དང་བྲམ་ཟེ་རྣམས་ཀྱི་དོན་དུ་འདུག་གནས་བགྱིད་དུ་སྩལ་ནས། དེ་བཅོམ་ལྡན་འདས་ཀྱི་ཉན་ཐོས་དག་མཐོང་བར་འཚལ་ལོ། །ཉེ་དགའས་

བསམས་པ། གལ་ཏེ་ལྷུང་བཟེད་ནག་པོ་ཅན་འགའ་ཞིག་གིས་ཐོས་པར་གྱུར་ན། དེ་ཤིན་ཏུ་མྱུར་བར་དེར་འགྲོ་བར་འགྱུར་བས་བདག་གིས་ཁྱིམ་བདག་འདི་སྨད་ན་ལྷུང་བཟེད་ནག་པོ་ཅན་འགའ་ལ་ཡང་བརྗོད་པར་མི་འགྱུར་རོ་སྙམ་ནས། དེས་ཁྱིམ་བདག་དེ་ལ་སྨྲས་པ། ཁྱོད་ཀྱི་སྙིང་

Vol. 7 · folio 129a

ལམ་ན་ཁོ་བོ་ཅག་ཟན་སུས་སྦྱིན་པར་འགྱུར། གོས་སུས་སྦྱིན་པར་འགྱུར་སྙམ་པ་ལས་གཞན་པ་བསམ་གཏན་ནམ། ཀློག་པ་འགའ་ཡང་མི་སེམས་སྙམ་མམ། ཁྱིམ་བདག་དེས་བསམས་པ། འདོད་པའི་བདག་ཉིད་ཅན་གང་དག་ཡིན་པ་དེ་དག་གི་ནང་ན་ཉེ་དགའ་

ལས་ལྷག་པ་མེད་ན་འདིས་ཀྱང་རེ་ཞིག་བདག་སྨད་པར་གྱུར་ན། གལ་ཏེ་བདག་གིས་དགེ་སློང་རང་བཞིན་དུ་གནས་པ་གཞན་དག་ལ་བརྗོད་པར་གྱུར་ན། དེ་དག་གིས་བདག་རྒྱ་ཆེར་སྨད་པར་འགྱུར་རོ་སྙམ་ནས་དེ་ཅང་མི་སྨྲ་བར་འདུག་གོ། །ཉེ་དགའས་ཀྱང་ཁྱིམ་བདག་དེ་སྨད་ནས་དྲུག་སྡེ་

དག་གི་གན་དུ་སོང་སྟེ་སྨྲས་པ། ཚེ་དང་ལྡན་པ་དག་བདག་ཅག་གིས་ཡུན་ཇི་སྲིད་ཀྱིས་ཕོངས་པ་སྤང་བར་བྱ། དེ་དག་གིས་སྨྲས་པ། ཁྱོད་ཀྱིས་ཐོས་པ་ཅུང་ཞིག་ཡོད་དམ། ཡོད་དེ་རི་བྲགས་ག་གེ་མོ་ཞིག་ན་ཁྱིམ་བདག་ཆེ་གེ་མོ་ཞིག་འདུག་པ་དེས་ཕྱོགས་བཞིའི་དགེ་སྦྱོང་དང་། བྲམ་

ཟེ་རྣམས་ཀྱི་དོན་དུ་འདུག་གནས་བྱེད་དུ་བཅུག་ནས། དེ་ན་གང་དག་འདུག་པ་དེ་དག་ལ་དེ་ཆོས་གོས་དང་། བསོད་སྙོམས་ཀྱིས་མཁོ་བ་སྟོབས་པར་བྱེད་ཀྱིས་དེར་འདོང་ངོ་། །དེ་དག་གིས་སྨྲས་པ། ཅི་ཐམས་ཅད་འདོང་ངམ། ཉེ་དགའས་སྨྲས་པ། མི་དྲུག་ཁོ་ན་འདོང་ངོ་། །དེ་ལྟར་བྱའོ་

ཞེས་དྲུག་པོ་དེ་དག་རི་བྲགས་ག་ལ་བ་དེར་རྒྱུ་ཞིང་དོང་ངོ་། །གཅེར་བུ་པ་དེ་དག་གིས་སྨྲས་པ། ཤེས་པ་ཅན་དག་སྤྱོད་ཡུལ་རྗེས་སུ་འཇུག་པར་བྱས་འདོང་ངོ་ཞེས་དེ་དག་གིས་འདུག་གནས་དེར་སྲུང་མ་གཅེར་བུ་པ་གཅིག་བཞག་སྟེ་གཞན་དུ་དོང་ངོ་། །དྲུག་སྡེ་དག་ཀྱང་མཐར་གྱིས་རྒྱུ་ཞིང་འདོང་

བ་ན་རི་བྲགས་དེར་ཕྱིན་ནས་དེ་དག་ཁྱིམ་བདག་དེའི་གན་དུ་དོང་སྟེ་སྨྲས་པ། ཁྱིམ་བདག་ཨ་རོག་གྱ་ཨ་རོག་གྱ། ཁྱིམ་བདག་གིས་སྨྲས་པ། ཁྱེད་ཅག་སུ་ཡིན། བཅོམ་ལྡན་འདས་ཀྱི་ཉན་ཐོས་དག་གོ། །ཁྱིམ་བདག་གིས་སྨྲས་པ། མ་ནོངས་ཏེ་བདག་ཅག་ཀྱང་བཅོམ་ལྡན་

འདས་ཀྱི་ཉན་ཐོས་དག་མཐོང་བར་འཚལ་ན་ཁྱེད་ཅག་ཀྱང་བྱོན་ཏོ། །འཕགས་པ་དག་བདག་གིས་ཕྱོགས་བཞིའི་དགེ་སྦྱོང་དང་། བྲམ་ཟེ་རྣམས་ཀྱི་དོན་དུ་འདུག་གནས་བགྱིད་དུ་སྩལ་བ་དེར་བཞུགས་ཤིག་དང་བདག་གིས་ཁྱེད་ཅག་ལ་བསོད་སྙོམས་ཀྱིས་མཁོ་བ་བསྟབས་པར་བགྱིའོ། །དྲུག་

Vol. 7 · folio 129b

སྡེ་དག་གིས་སྨྲས་པ། གནས་མལ་ཁྲིའམ་ཁྲིའུ་ཅུང་ཟད་ཡོད་དམ། ཁྱིམ་བདག་གིས་སྨྲས་པ། མ་མཆིས་སོ། །དྲུག་སྡེ་དག་གིས་སྨྲས་པ། ཁྱིམ་བདག་ཁོ་བོ་ཅག་ས་ལ་གནས་མལ་འཆའ་བར་མི་བྱེད་དོ། །ཁྱིམ་བདག་དེས་དེར་གནས་མལ་བཙལ་ནས་ཁྲི་དང་ཁྲིའུ་དག་

འདུག་གནས་དེར་བསྐུར་རོ། །གཅེར་བུ་པ་དེས་སྨྲས་པ། ཀྱེ་ཤཱཀྱའི་བུའི་དགེ་སྦྱོང་དག་འདི་ཁྱེད་ཀྱི་གཙུག་ལག་ཁང་ཡང་མ་ཡིན་ལ། འདུག་གནས་ཀྱང་མ་ཡིན་ན་ཁྱེད་ཅག་འདིར་གར་འཇུག །དྲུག་སྡེ་དག་གིས་སྨྲས་པ། ཀྭའི་ཤེས་པ་ཅན་ཅི་ཟེར། འདི་ཁོ་བོ་ཅག་གི་གཙུག་

ལག་ཁང་ཡང་མ་ཡིན་ལ། འདུག་གནས་ཀྱང་མ་ཡིན་ནོ་ཞེས་མ་ཟེར་ཅིག །གལ་ཏེ་འདུག་ན་ནི་འདུག་ཏུ་ཟད། གལ་ཏེ་མི་འདུག་ན་ཁྱོད་ལ་མཚམས་ཆེན་པོ་གཅད་པར་བྱའོ། །གཅེར་བུ་པ་དེས་བསམས་པ། འདི་དག་ནི་མི་དྲུག་ཡོད་ལ། བདག་ནི་གཅིག་པུ་ཡིན་པས་བདག་གིས་

འདི་དག་ལ་ཅི་ཡང་བྱ་བར་མི་ནུས་པས། འདི་དག་གིས་བདག་ལ་གནོད་པ་བྱས་པར་གྱུར་ན་མི་རུང་ངོ་སྙམ་ནས་དེ་སྐྲག་སྟེ་བྲོས་སོ། །དྲུག་སྡེ་དག་ཉི་མ་རེ་རེ་ཞིང་ཁྱིམ་བདག་དེའི་ཁྱིམ་དུ་དོང་སྟེ་ཟ་བར་བྱེད་དོ། །དུས་གཞན་ཞིག་ན་ཁྱིམ་བདག་དེ་ལ་རི་བྲགས་གཞན་ཞིག་ཏུ་བྱ་བ་ཅུང་ཞིག་བྱུང་

ནས། དེས་དྲུག་སྡེ་དག་ལ་སྨྲས་པ། འཕགས་པ་དག་བདག་ལ་རི་བྲགས་གཞན་ཞིག་ཏུ་བགྱི་བ་ཅུང་ཞིག་བྱུང་སྟེ་བདག་དེར་མཆི་ཡིས། ཁྱེད་ཅག་བདག་གི་སྡུམ་པ་ན་ཇི་ལྟར་གསོལ་བ་དེ་བཞིན་དུ་བདག་སླར་མཆིས་ཀྱི་བར་དུ་གསོལ་ཅིག །དྲུག་སྡེ་དག་གིས་སྨྲས་པ། དེ་ལྟར་

བྱའོ། །ཁྱིམ་བདག་དེས་ནང་མི་ལ་སྨྲས་པ། ཁྱོད་ཀྱིས་འཕགས་པ་དག་ལ་ཇི་ལྟར་བསྙེན་བཀུར་བྱས་པ་དེ་བཞིན་དུ་ཁོ་བོ་ཕྱིར་འོངས་ཀྱི་བར་དུ་ཡང་གྱིས་ཤིག །དེ་རི་བྲགས་དེར་སོང་བ་དང་། དྲུག་སྡེ་དག་ཉི་མ་རེ་རེ་ཞིང་དེར་དོང་སྟེ་དེ་བཞིན་དུ་ཟ་བར་བྱེད་པ་ན་དེ་དག་གིས་སྨྲས་པ། དགའ་

བོ་ཉེ་དགའ་བདག་ཅག་གིས་ཡུན་ཇི་སྲིད་དུ་གཞན་གྱི་སྤྱོད་ལམ་གྱིས་འཁོད་པར་བྱ། རང་གིས་སྤྱོད་ལམ་བསྟན་པར་བྱའོ། །དེ་ལྟར་བྱའོ་ཞེས་དེ་དག་གིས་སྨྲས་པ། དགའ་བོ་ཉེ་དགའ་བུད་མེད་འདིའི་མིག་དག་དང་། རྣ་བ་དག་དང་། སོ་དག་དང་། མཆུ་དག་དང་། ནུ་མ་དག་དང་།

Vol. 7 · folio 130a

རྐེད་པ་དག་དང་། བརླ་དག་དང་། རྐང་པ་དག་མཛེས་པ་ལ་ལྟོས་ཤིག་ལྟོས་ཤིག །བུད་མེད་དེ་ངོ་ཚ་ནས་གནས་ཁང་དུ་ཞུགས་ཏེ་འདུག་གོ། །ཁྱིམ་བདག་དེ་ཡང་རི་བྲགས་དེ་ནས་འོངས་ནས་དེས་ནང་མི་ལ་དྲིས་པ། ཁྱོད་ཀྱིས་སྦྱིན་གནས་དག་བྱོན་ནས་དེ་བཞིན་དུ་

གསོལ་ཏམ། དེས་སྨྲས་པ། འདི་འདྲ་བའི་སྦྱིན་གནས་དག་ནི་འགའ་ཡང་མ་མཆིས་ཀྱང་མི་དངོའོ། །བདག་གིས་དྭ་དག་དང་རོལ་མོ་མཁན་དག་དང་། ནལ་གྱི་བུ་དག་ལས་ཀྱང་སྔོན་ལན་འགའ་ཡང་མ་ཐོས་པའི་ཚིག་དག་ཁྱོད་ཀྱི་སྦྱིན་གནས་དག་ལས་ཐོས་སོ། །ཁྱིམ་བདག་དེས་

བསམས་པ། བུད་མེད་ཀྱི་ཡུལ་དག་ནི་སྐྱེས་པ་ལ་སེམས་པ་ཡིན་པས་གཅེར་བུ་པ་སྒྲེན་མོ་དག་ཞུགས་པ། དེ་དག་མཐོང་བ་ན་ཆགས་པར་འགྱུར་གྱི། བཅོམ་ལྡན་འདས་ཀྱི་ཉན་ཐོས་ཤམ་ཐབས་ལེགས་པར་བགོས་པ། ཆོས་གོས་ལེགས་པར་བགོས་པ་དེ་དག་ལ་འདི་མི་དགའོ་

སྙམ་ནས་དེས་དེ་ལ་སྨྲས་པ། ཁྱོད་གཅེར་བུ་པ་སྒྲེན་མོ་དག་ལ་དགའི། བཅོམ་ལྡན་འདས་ཀྱི་ཉན་ཐོས་ཤམ་ཐབས་ལེགས་པར་བགོས་པ། ཆོས་གོས་ལེགས་པར་བགོས་པ་དག་ལ་ཁྱོད་དགའ་བར་ག་ལ་འགྱུར། ཆུང་མས་སྨྲས་པ། རྗེའི་སྲས་གལ་ཏེ་ཁྱོད་བདག་ལ་ཐུགས་

མི་ཆེས་ན་བདག་གིས་ཁྱོད་ཀྱི་མངོན་སུམ་དུ་འགྱུར་བར་བགྱིའོ། །ཁྱིམ་བདག་གིས་བསམས་པ། ཇེ་བགམ་པར་བྱའོ་སྙམ་ནས་དེ་ཉི་མ་ཉུང་ཤས་ཤིག་འདུག་ནས་དྲུག་སྡེ་དག་ལ་སྨྲས་པ། འཕགས་པ་དག་ཡང་བདག་ལ་རི་བྲགས་དེར་བགྱི་བ་ཅུང་ཞིག་བྱུང་སྟེ། བདག་དེར་

མཆི་ཡིས། ཁྱེད་ཅག་བདག་གི་སྡུམ་པ་ན་ཇི་ལྟར་གསོལ་བ་དེ་བཞིན་དུ་བདག་སླར་མཆིས་ཀྱི་བར་དུ་གསོལ་ཅིག །དྲུག་སྡེ་དག་གིས་སྨྲས་པ། དེ་ལྟར་བྱའོ། །ཁྱིམ་བདག་དེ་ཡང་གནས་ཁང་དུ་ཞུགས་ཏེ་འདུག་པ་དང་། དྲུག་སྡེ་དག་ཀྱང་དེ་བཞིན་དུ་དེའི་ཁྱིམ་དུ་ཞུགས་ཏེ་འཁོད་ནས།

དེ་དག་ལ་དེའི་ཆུང་མ་དེས་བྲིམ་པར་བརྩམས་པ་དང་། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་བུད་མེད་འདིའི་མིག་དག་དང་། རྣ་བ་དག་དང་། སོ་དག་དང་། མཆུ་དག་དང་། ནུ་མ་དག་དང་། རྐེད་པ་དག་དང་། བརླ་དག་དང་། རྐང་པ་དག་མཛེས་པ་ལ་ལྟོས་ཤིག་ལྟོས་

Vol. 7 · folio 130b

ཤིག །ཁྱིམ་བདག་དེས་དེ་ཐོས་ནས་བསམས་པ། བདག་གིས་འཕྲལ་ཁོ་ན་ལ་འདི་དག་གི་བསོད་སྙོམས་གཅད་པ་ནི་བདག་གི་ཚུལ་དང་མཐུན་པ་མ་ཡིན་གྱིས་ཐབས་ཀྱི་རྣམ་པ་ཞིག་བྱའོ་སྙམ་ནས་དེས་དེའི་ཉིན་མོ་ཁུར་བ་གཅིག་ཕྲི་བ་དང་། དྲུག་སྡེ་དག་གིས་སྨྲས་པ། དགའ་བོ་

ཉེ་དགའ་སྤྱོད་ཡུལ་ཚིག་གོ་ཞེས་དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་གིས་མུ་ལྟོ་བ་དག་ལ་ཁུར་བ་གཅིག་སྦྱིན་པར་བྱ་བ་དེ་དེང་ཕྱིན་ཅད་སྦྱིན་དུ་མེད་དོ། །དེ་ཕྱི་དེ་ཉིན་པར་ཁུར་བ་གཉིས་པ་ཕྲི་བ་དང་། དེ་དག་གིས་སྨྲས་པ། དགའ་བོ་ཉེ་དགའ་སྤྱོད་ཡུལ་ཚིག་གོ་ཞེས་

དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་གིས་ཁུར་བ་གཞན་གཅིག་ལྷུང་བཟེད་ཀྱི་འོག་གཞིར་དོར་བ་དེ་ཡང་དེང་ཕྱིན་ཅད་དོར་དུ་མེད་དོ། །དེ་བཞིན་དུ་རིམ་གྱིས་ཇི་ཙམ་ན་འབྲས་ཆན་རྩུབ་པོ་དང་། རྩབ་མོ་བསྐོལ་བ་དག་སྦྱིན་པར་བརྩམས་པ་དང་། དེ་དག་གིས་སྨྲས་པ།

དགའ་བོ་ཉེ་དགའ་སྤྱོད་ཡུལ་ཚིག་གོ། །ཡང་སྨྲས་པ། འདིར་ཇི་ལྟར་ཚིག །བདག་ཅག་སྒོ་འཕར་བརྒྱ་སྙེད་འདས་ཀྱང་ལྟོ་ཁེངས་པ་བསྒྲུབ་པར་དཀའ་ན། ད་ལྟར་འདི་ན་བདག་ཅག་གྲིབ་མ་བསིལ་བ་དག་ལ་འཁོད་དུ་ཡོད་ན་འབྲས་ཆན་རྩུབ་པོ་དང་། རྩབས་བསྐོལ་བ་ཡང་མི་འདོད་

དམ། གཅེར་བུ་པ་དེས་ཀྱང་འཁོར་འཁོར་ནས་གཅེར་བུ་པ་དེ་དག་མཐོང་ནས་སྨྲས་པ། ཤེས་པ་ཅན་དག་བདག་ཅག་གི་སྤྱོད་ཡུལ་ཕྲོགས་ཀྱིས་ཕྱིར་ཁུག་ཤིག །དེ་དག་གིས་སྨྲས་པ། ཁྱོད་འདུག་གནས་བོར་ཏེ་འདིར་གར་འོང་། དེས་སྨྲས་པ། ཁོ་བོ་དེ་ནས་བསྐྲད་དོ། །

སུས། ཤཱཀྱའི་བུའི་དགེ་སྦྱོང་དག་གིས་སོ། །དེ་དག་གིས་སྨྲས་པ། ཤཱཀྱའི་བུའི་དགེ་སྦྱོང་ཇི་སྙེད་ལྷགས། དེས་སྨྲས་པ། མི་དྲུག་གོ། །དེ་དག་གིས་སྨྲས་པ། བདག་ཅག་མི་དྲུག་བཅུ་ཡོད་ན་དེ་དག་ཤིན་ཏུ་བརྡེགས་ཏེ་བསྐྲད་པར་མི་ནུས་སམ། ཚུར་ཤེག་འདོང་ངོ་། །བདག་

ཅག་གིས་ཤེས་པ་ཅན་རེམ་ཤིག་ཅེས་བརྗོད་པ་ན་དྲུག་སྡེ་རེ་རེ་ལ་བདག་ཅག་མི་བཅུ་བཅུ་རུབ་སྟེ་ཤིན་ཏུ་བརྡེག་པར་བྱའོ། །དེ་དག་གིས་སྨྲས་པ། ཇེ་ཁྱིམ་བདག་ལ་དྲི་བར་བྱ་སྙམ། དེ་ལྟར་བྱའོ་ཞེས་དེ་དག་ཁྱིམ་བདག་གི་གན་དུ་དོང་སྟེ་སྨྲས་པ། ཁྱིམ་བདག་ཁྱོད་ཀྱི་འདུག་གནས་

Vol. 7 · folio 131a

སུ་ལ་ཕུལ། ཁྱིམ་བདག་གིས་སྨྲས་པ། སུ་ལ་ཡང་མ་ཕུལ་ཏེ། འདི་ལྟར་གང་དེ་ན་འདུག་པ་དེ་ལ་བདག་བསོད་སྙོམས་ཀྱིས་མཁོ་བ་སྟོབས་པར་བྱེད་དོ། །དེ་དག་གིས་སྨྲས་པ། ཁྱིམ་བདག་ནི་རེ་ཞིག་དབུས་ན་གནས་པ་ཡིན་ནོ་ཞེས་དེ་དག་འདུག་གནས་སུ་དོང་ནས་

དྲུག་སྡེ་དག་ལ་སྨྲས་པ། ཀྭའི་ཤཱཀྱའི་བུའི་དགེ་སྦྱོང་དག་ཁྱེད་གང་ནས་ལྷགས་ཏེ་འདིར་འཁོད། འདི་ཁྱེད་ཀྱི་གཙུག་ལག་ཁང་ཡང་མ་ཡིན་ལ། འདུག་གནས་ཀྱང་མ་ཡིན་གྱིས་ཕྱིར་བྱུང་ཤིག །གལ་ཏེ་བྱུང་ན་ནི་བྱུང་དུ་ཟད། མི་བྱུང་ན་ཁོ་བོ་ཅག་གིས་ཁྱེད་ལ་མཚམས་ཆེན་པོ་གཅད་

པར་བྱའོ། །དྲུག་སྡེ་དག་གིས་སྨྲས་པ། ཀྭའི་གཅེར་བུ་པ་སྒྲེ་བྱི་དག་ཅི་ཟེར། འདི་ཁྱེད་ཀྱི་གཙུག་ལག་ཁང་ཡང་མ་ཡིན་ལ། འདུག་གནས་ཀྱང་མ་ཡིན་གྱིས་ཕྱིར་བྱུང་ཤིག་ཅེས་མ་ཟེར་ཅིག །གལ་ཏེ་འཁོད་ན་ནི་འཁོད་དུ་ཟད། གལ་ཏེ་མི་འཁོད་ན་ཁོ་བོ་ཅག་གིས་ཁྱེད་ལ་མཚམས་

ཆེན་པོ་གཅད་པར་བྱའོ། །གཅེར་བུ་པ་དག་གིས་ཤེས་པ་ཅན་རེམ་ཤིག་ཅེས་སྨྲས་ནས། དྲུག་སྡེ་རེ་རེ་ལ་གཅེར་བུ་པ་བཅུ་བཅུ་རུབ་སྟེ། དེ་དག་གིས་བརྡེག་པར་བརྩམས་པ་དང་། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ཚངས་པ་མཚུངས་པར་སྤྱོད་པ་དག་གིས་སྨད་པར་

གྱུར་ན་མི་རུང་གིས་མིག་དག་དང་། རྣ་བ་དག་སྲུངས་ཤིག་ཅེས་དེ་དག་གིས་སྨྲས་པ། སྒྲེ་བྱི་དག་ཕོད་ཡང་དག་ན་ཕྱོགས་འདིར་སྣུན་ཅིག་ཅེས་རྐུབ་ཚོས་ལ་སོགས་པ་བསྟན་ཏེ་དེ་དག་བརྡེག་ཏུ་བཅུག་གོ། །གང་གི་ཚེ་གཅེར་བུ་པ་དག་ངལ་བར་གྱུར་ཅིང་རྡེག་མི་ནུས་པ་དེའི་ཚེ་ན་དྲུག་སྡེ་དག་གིས་

ཚེ་དང་ལྡན་པ་དག་ཤིན་ཏུ་རེམ་ཤིག་ཅེས་དྲུག་སྡེ་རེ་རེས་ཀྱང་ལག་ངར་བརྐྱང་པས་ཀྱང་གཅེར་བུ་པ་ལྔ་ལྔ་ས་ལ་བརྡབས་ཤིང་། ལག་ངར་བསྐུམས་པས་ཀྱང་གཅེར་བུ་པ་ལྔ་ལྔ་ས་ལ་བརྡབས་ནས་དེ་དག་ཤིན་ཏུ་བརྡེག་པར་བརྩམས་ཏེ་སྨྲས་པ། དགའ་བོ་ཉེ་དགའ་ཕམ་པར་འགྱུར་བའི་ལྟུང་བ་

བྱུང་བར་གྱུར་ན་མི་རུང་གིས་རྩ་བའི་ལྟུང་བ་སྲུངས་ཤིག་ཅེས་དྲུག་སྡེ་དག་གིས་དེ་དག་རྒྱ་ལྕག་དག་དང་། ཁུ་ཚུར་དག་དང་། རྡོག་པ་དག་དང་། ལྕུག་མ་དག་གིས་ཤིན་ཏུ་གཏལ་ཅིང་བྲིམས་ནས། དེ་དག་གིས་གཅེར་བུ་པ་དག་རྡེག་བཞིན་དུ་འདུག་གནས་ཀྱི་ནང་ནས་ཕྱི་རོལ་དུ་འཛིངས་ཏེ་

Vol. 7 · folio 131b

བྱུང་བ་དང་། བྲམ་ཟེ་དང་ཁྱིམ་བདག་དག་གིས་དེ་དག་མཐོང་ནས། དེ་དག་གིས་སྨྲས་པ། ཤེས་ལྡན་དག་ལྟོས་ཤིག་ལྟོས་ཤིག །དགེ་སྦྱོང་གཡུལ་འགྱེད་པས་ཆར་འབབས་པར་འགྱུར་རོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་སྤྱོད་ཡུལ་ཚིག་ཅིང་མེ་མདག་ཞི་བར་

མ་གྱུར་གྱི་ཚུར་ཤེག་མཉན་ཡོད་དུ་འདོང་ངོ་ཞེས་དེ་དག་མཉན་ཡོད་དུ་དོང་ངོ་། །ལྷོ་ལམ་ནས་འཇིག་རྟེན་རྒྱང་འཕེན་པའི་རྒོལ་བ་འཆར་ཀ་ཞེས་བྱ་བ་མཉན་ཡོད་དུ་འོངས་ནས། དེ་འགྱེད་འདོད་པའི་འགྱེད་པའི་ཡོ་བྱད་ཀྱི་ཕྱིར། ཚེ་དང་ལྡན་པ་ཀུན་ཤེས་ཀཽཎྜི་ནྱའི་དྲུང་དུ་སོང་སྟེ་སྨྲས་པ། ཀྱེ་

དགེ་སློང་ཁོ་བོས་བླ་མ་ལས་ཡི་གེ་ཉུང་ཤས་ཤིག་བླངས་ཏེ་དེའི་ཕྱིར་ཁོ་བོ་ཁྱོད་དང་ལྷན་ཅིག་གཏམ་རྣམ་པར་གཏན་ལ་དབབ་པ་བྱེད་པར་འདོད་དོ། །ཚེ་དང་ལྡན་པ་ཀུན་ཤེས་ཀཽཎྜི་ནྱས་སྨྲས་པ། བྲམ་ཟེ་ཁོ་བོ་ཁྱོད་དང་འགྱེད་པར་མི་འདོད་ཀྱིས་སོང་ཤིག །དེ་ནས་འཇིག་རྟེན་རྒྱང་འཕེན་པ་དེ་

ཚེ་དང་ལྡན་པ་རྟ་ཐུལ་དང་། བཟང་ལྡན་དང་། རླངས་པ་དང་། མིང་ཆེན་དང་། གྲགས་པ་དང་། གང་པོ་དང་། དྲི་མེད་དང་། བ་ལང་བདག་དང་། ལག་བཟངས་ག་ལ་བ་དེར་སོང་སྟེ་དེ་དག་ལ་སྨྲས་པ། ཀྱེ་དགེ་སློང་ཁོ་བོས་བླ་མ་ལས་ཡི་གེ་ཉུང་ཤས་ཤིག་བླངས་ཏེ། དེའི་ཕྱིར་

ཁོ་བོ་ཁྱོད་དང་ལྷན་ཅིག་གཏམ་རྣམ་པར་གཏན་ལ་དབབ་པར་བྱེད་པར་འདོད་དོ། །དེ་དག་གིས་སྨྲས་པ། བྲམ་ཟེ་ཁོ་བོ་ཅག་ཁྱོད་དང་འགྱེད་པར་མི་འདོད་ཀྱིས་སོང་ཤིག །དེ་ནས་འཇིག་རྟེན་རྒྱང་འཕེན་པ་དེ་ཚེ་དང་ལྡན་པ་ཤཱ་རིའི་བུ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཤཱ་རིའི་

བུ་ལ་འདི་སྐད་ཅེས་སྨྲས་སོ། །ཀྱེ་དགེ་སློང་ཁོ་བོས་བླ་མ་ལས་ཡི་གེ་ཉུང་ཤས་ཤིག་བླངས་ཏེ། དེའི་ཕྱིར་ཁོ་བོས་ཁྱོད་དང་ལྷན་ཅིག་གཏམ་རྣམ་པར་གཏན་ལ་དབབ་པ་བྱེད་པར་འདོད་དོ། །ཚེ་དང་ལྡན་པ་ཤཱ་རིའི་བུས་འདི་ལ་དགེ་བའི་རྩ་བ་དག་ཅུང་ཟད་ཡོད་དམ་སྙམ་དུ་བསམས་ན་ཡོད་

པར་མཐོང་ངོ་། །སུ་ལ་རག་ལས་སྙམ་ན། བདག་ཉིད་ལ་རག་ལས་པར་མཐོང་ངོ་། །འགྱེད་པས་འདུལ་བ་ཡིན་ནམ་སྙམ་ན། ཡིན་པར་མཐོང་ངོ་། །ཡུན་ཇི་སྲིད་ཀྱིས་འདུལ་བར་འགྱུར་སྙམ་ན། ཞག་བདུན་འདས་ནས་འདུལ་བར་འགྱུར་བར་མཐོང་ནས། ཚེ་དང་ལྡན་པ་

Vol. 7 · folio 132a

ཤཱ་རིའི་བུས་སྨྲས་པ། བྲམ་ཟེ་ཚུར་ཤོག་དེ་ལྟར་བྱའོ་ཞེས་དེ་ཉི་མ་དང་པོ་ལ་འགྱེད་པ་ལྷག་མ་དང་བཅས་པར་བཏང་ངོ་། །ཕྱི་དེ་ཉིན་པར་ཡང་འགྱེད་པ་ལྷག་མ་དང་བཅས་པར་བཏང་ངོ་། །དེ་བཞིན་དུ་ཉི་མ་བདུན་པའི་བར་དུ་ཡང་འགྱེད་པ་ལྷག་མ་དང་བཅས་པར་བཏང་ངོ་། །

ཐམས་ཅད་དུ་ལྷོ་ལམ་ནས་འཇིག་རྟེན་རྒྱང་འཕེན་པའི་རྒོལ་བ་འཆར་ཀ་ཞེས་བྱ་བ་འོངས་ནས། དེ་དང་འཕགས་པ་ཤཱ་རིའི་བུ་གཉིས་ཉི་མ་བདུན་པ་དེང་གི་བར་དུ་བཀྱེ་ན། གཅིག་གིས་ཀྱང་ཚར་མ་ཆོད་ལ་གཉིས་པས་ཀྱང་ཚར་མ་ཆོད་དོ་ཞེས་སྒྲ་གྲགས་ནས་སྲོག་ཆགས་འབུམ་ཕྲག་དུ་མ་དག་

ཁ་ཅིག་ནི་ལྟད་མོ་སྐྱེས་པ་དང་། ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་བ་ན་དེར་འདུས་པར་གྱུར་ནས། ཚེ་དང་ལྡན་པ་ཤཱ་རིའི་བུས་བསམས་པ། བདག་གིས་འགྱེད་པས་འདུལ་བ་དག་འདུས་སམ་སྙམ་ན། འདུས་པར་མཐོང་ནས་ཚེ་དང་ལྡན་པ་ཤཱ་རིའི་བུས་འཇིག་རྟེན་

རྒྱང་འཕེན་པ་དེ་ཕམ་པར་བྱས་ཤིང་། རྡུགས་པར་བྱས་ཏེ་འགྱེད་པ་ལྷག་མ་མ་ལུས་པར་བཏང་ནས་འཇིག་རྟེན་རྒྱང་འཕེན་པ་ཀུན་དུ་རྒྱུ་འཆར་ཀ་ཚར་བཅད་པ་དང་། དེ་ཡང་དད་པར་གྱུར་ནས་སྨྲས་པ། བཙུན་པ་ཤཱ་རིའི་བུ་བདག་གིས་བཅོམ་ལྡན་འདས་ཀྱིས་ལེགས་པར་གསུངས་པའི་

ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཐོབ་ན་བདག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་དོ། །ཚེ་དང་ལྡན་པ་ཤཱ་རིའི་བུས་དེ་རབ་ཏུ་ཕྱུང་ཞིང་རྫོགས་པར་བསྙེན་པར་བྱས་སོ། །དེ་དེ་ལྟར་རབ་ཏུ་ཕྱུང་ནས་གཅིག་པུ་དབེན་པ་བག་ཡོད་

པ་རྟུན་པ་དང་ལྡན་པ། བདག་ཉིད་བཏང་བར་གནས་པ་ན་རིགས་ཀྱི་བུ་གང་གི་ཕྱིར་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་

པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་དགྲ་བཅོམ་པ། ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་

Vol. 7 · folio 132b

པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུར་རིག་པས་སྒོ་ངའི་སྦུབས་དྲལ་བར་གྱུར་ཅིང་། རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་། འདོད་པའི་རྙེད་པ་དང་། བཀུར་སྟི་ལ་རྒྱབ་

ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེ་ནས་འཁོར་དེ་ཚེ་དང་ལྡན་པ་ཤཱ་རིའི་བུས་འདི་ལྟ་བུའི་རྒོལ་བ་ཚར་བཅད་དོ་ཞེས་ཡ་མཚན་སྐྱེས་པར་གྱུར་ཏོ། །དེ་ནས་ཚེ་དང་ལྡན་

པ་ཤཱ་རིའི་བུས་འཁོར་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཤེས་ནས་འདི་ལྟར་སྲོག་ཆགས་འབུམ་ཕྲག་དུ་མ་དག་གིས་བདེན་པ་དག་མཐོང་ཞིང་། ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་

ཕྱིར་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱས་པ་དེ་ལྟར་ཆོས་བསྟན་པ་བྱས་ཏེ། འཁོར་དེ་ལས་ཕལ་ཆེར་སངས་རྒྱས་ལ་

གཞོལ་བ་དང་། ཆོས་ལ་འབབ་པ་དང་། དགེ་འདུན་ལ་བབ་པར་རྣམ་པར་བཞག་གོ། །ཚེ་དང་ལྡན་པ་ཤཱ་རིའི་བུས་འཇིག་རྟེན་རྒྱང་འཕེན་པ་འཆར་ཀ་སྔ་དྲོ་ཚར་བཅད་ནས། ཕྱི་དྲོ་དྲུག་སྡེ་དག་མཉན་ཡོད་དུ་ལྷགས་ནས། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་

དག་འོངས་པ་ལེགས་སོ། །འོངས་པ་ལེགས་སོ། །ཁྱོད་ཅག་ག་ལས་འོངས། ཚེ་དང་ལྡན་པ་ཤཱ་རིའི་བུས་ལྷོ་ལམ་ནས་འཇིག་རྟེན་རྒྱང་འཕེན་པའི་རྒོལ་བ་བྲམ་ཟེ་ཀུན་དུ་རྒྱུ་འཆར་ཀ་ཞེས་བྱ་བ་འགྱེད་འདོད་ཅིང་འགྱེད་པའི་ཡོ་བྱད་ཀྱི་ཕྱིར་འོངས་པ་ཚར་བཅད་དེ་གཡུལ་ལས་རྣམ་པར་རྒྱལ་

ལོ། །དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་འདི་ལྟར་ཚེ་དང་ལྡན་པ་ཤཱ་རིའི་བུས་ཚོགས་ཅན་གཉིས་པ། ཆོས་ཀྱི་དམག་དཔོན། ཆོས་ཀྱི་འཁོར་ལོ་རྗེས་སུ་བསྐོར་བས་རྒོལ་བ་གཅིག་ཚར་བཅད་པ་འདི་ངོ་མཚར་ཅི་ཆེ། གལ་ཏེ་ཚེ་དང་ལྡན་པ་ཤཱ་རིའི་བུས་ཚར་བཅད་པར་མ་

Vol. 7 · folio 133a

གྱུར་ན་ཡང་། བཅོམ་ལྡན་འདས་སླད་ན་བཞུགས་པས་དེ་ངོ་མཚར་མི་ཆེའི། ཁོ་བོ་ཅག་མི་དྲུག་གིས་གཅེར་བུ་པ་དྲུག་བཅུ་ཚར་བཅད་པ་ངོ་མཚར་ཆེའོ། །རིག་པའི་གནས་གང་ལ་དབྱུག་པའི་རིག་པས་ལུས་ལ་ཆོས་བཤད་པས་སོ། །ཅི་འཚོའམ་འོན་ཏེ་ཤི། དེའི་

ཚེ་ན་ནི་འཚོ་ན་ད་ཙམ་འཚོའམ་ཤི་གཏོལ་མེད་དོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཡན་ལག་གང་གིས་ངོ་ཚ་བར་བྱ་བའི་ཡན་ལག་དེ་ཉིད་ཀྱིས་རློམ་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་

ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་

ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་

བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་

པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། འདུག་གནས་གཅིག་ཏུ་ཞག་ལོན་པའི་དགེ་སློང་གིས་བསོད་སྙོམས་གཅིག་བཟའ་

བར་བྱའོ། །དེ་ལས་ལྷག་པར་ཟ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ། མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །

Vol. 7 · folio 133b

དེ་ནས་ཁྱིམ་བདག་དེ་ཟོང་ཐོགས་ཏེ་རི་བྲགས་དེ་ཉིད་དུ་ཕྱིན་ནས་དེ་ཁྱིམ་བདག་དེའི་ཚོང་ཁང་དུ་ཞུགས་པ་དང་། ཁྱིམ་བདག་གིས་གཅེར་བུ་པ་དག་ལ་བྲིམ་པར་བརྩམས་ནས། དེས་ཁྱིམ་བདག་དེའི་གན་དུ་མི་མངགས་ཏེ། གྲོགས་པོ་སྦྱིན་གནས་དག་ལ་སྦྱིན་པར་བྱས། ཚུར་

ཤོག་ཅེས་སྦྲན་པ་དང་། ཁྱིམ་བདག་དེ་དད་པ་ཅན་ཡིན་པས། དེས་བསམས་པ། བཅོམ་ལྡན་འདས་ཀྱི་ཉན་ཐོས་དག་ཡིན་གོར་མ་ཆག་གིས་སོང་ལ་བལྟའོ་སྙམ་ནས་དེ་དེར་སོང་བ་དང་། ཇི་ཙམ་ན་གཅེར་བུ་པ་ངོ་ཚ་དང་ཁྲེལ་བོར་བ་དག་ཅིག་ཡིན་པར་མཐོང་ནས། མངོན་

སུམ་དུ་མི་སྙན་བརྗོད་པ་ནི་སྡུག་བསྔལ་བ་ཡིན་པས་དེ་ཅང་མི་སྨྲ་བར་འདུག་གོ། །དེ་དག་ཟོས་ཏེ་དོང་བ་དང་། ཁྱིམ་བདག་གིས་དེ་ལ་སྨྲས་པ། གྲོགས་པོ་ཞིང་བཟང་ཞིང་ས་བོན་བཟང་ངམ། ཁྱིམ་བདག་དེས་སྨྲས་པ། གྲོགས་པོ་ས་བོན་ནི་བཟང་ན། ཞིང་ནི་གཅེར་བུ་པ་ངོ་ཚ་

དང་ཁྲེལ་བོར་བ། སྡིག་པའི་ལྟ་བ་ཅན་དགོན་དུང་ཚྭ་སྒོ་ཅན་ཐ་ཆད་སྡིག་པ་ཅན་གྱི་ས་གཞི་ཤ་སྟག་ཡིན་ནོ། །ཁྱིམ་བདག་དེས་སྨྲས་པ། གྲོགས་པོ་ཞིང་ཆེས་བཟང་བ་གཞན་ཡོད་དམ། དེས་སྨྲས་པ། ཡོད་དེ་བཅོམ་ལྡན་འདས་ཀྱི་ཉན་ཐོས་དག་གོ། །ཁྱིམ་བདག་གིས་སྨྲས་

པ། གྲོགས་པོ་དེ་དག་གི་མིང་ཡང་མ་སྨོས་ཤིག །དེས་སྨྲས་པ། ཅི་དེ་དག་འདིར་ལྷགས་པར་གྱུར་ཏམ། ལྷགས་སོ། །གང་དག་དྲུག་སྡེ་དག་གོ། །དེ་དག་གིས་རེ་ཞིག་ཅི་བྱས། འདི་དང་འདི་ལྟའོ། །དེས་སྨྲས་པ། གྲོགས་པོ་ཁྱོད་ཀྱིས་རྒྱ་མཚོ་ཆེན་པོ་ནས་ནོར་བུ་

མཆིང་བུ་དག་བླངས་སོ། །ཁྱིམ་བདག་གིས་སྨྲས་པ། བཅོམ་ལྡན་འདས་ཀྱི་ཉན་ཐོས་བཟང་པོ་གཞན་དག་ཀྱང་ཡོད་དམ། ཡོད་དེ་གལ་ཏེ་ཁྱོད་ཀྱིས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་ཆེན་པོ་དང་། ནམ་གྲུ་དང་། མ་འགགས་པ་ལ་སོགས་པ་བཅོམ་ལྡན་འདས་

ཀྱི་ཉན་ཐོས་ཆེན་པོ་གཞན་དག་མཐོང་བར་གྱུར་ན། ཁྱོད་མངོན་པར་དད་པར་འགྱུར་བ་དེ་ལྟ་བུའི་གནས་ཡོད་དོ། །ཁྱིམ་བདག་གིས་སྨྲས་པ། གལ་ཏེ་དེ་དག་འདིར་བྱོན་པར་གྱུར་ན་བདག་གིས་དེ་དག་ལ་བསོད་སྙོམས་ཀྱིས་མཁོ་བ་བསྟབས་པར་བྱའོ། །ཁྱིམ་བདག་དེས་བསམས་

Vol. 7 · folio 134a

པ། ད་ནི་བདག་སོང་ལ་བཅོམ་ལྡན་འདས་ལ་གསོལ་བར་བྱའོ་སྙམ་ནས་ཁྱིམ་བདག་དེས་ཟོང་བསྒྱུར་ཏེ་རིན་བླངས་ནས་མཉན་ཡོད་ག་ལ་བ་དེར་སོང་སྟེ་མཐར་གྱིས་མཉན་ཡོད་དུ་ཕྱིན་ཏོ། །དེ་ནས་ཁྱིམ་བདག་དེས་ཟོང་ཚོང་ཁང་དུ་སྦས་ནས། བཅོམ་ལྡན་འདས་ག་

ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཁྱིམ་བདག་དེས་འདི་སྐད་ཅེས་གསོལ་ཏོ། །བཙུན་པ་རི་བྲགས་ག་གེ་མོ་ཞིག་ན་ཁྱིམ་བདག་ཆེ་གེ་མོ་ཞིག་མཆིས་པ་དེ་

ཕྱོགས་བཞིའི་དགེ་སྦྱོང་དང་བྲམ་ཟེ་རྣམས་ཀྱི་སླད་དུ་འདུག་གནས་བགྱིད་དུ་སྩལ་ཏེ། དེ་དེ་ན་གང་གནས་པ་དེ་ལ་བསོད་སྙོམས་ཀྱིས་མཁོ་བ་སྟོབས་པར་བགྱིད་ཅིང་། དེ་བཅོམ་ལྡན་འདས་ཀྱི་ཉན་ཐོས་དག་མཐོང་བར་འཚལ་ན། བཅོམ་ལྡན་འདས་ཀྱིས་དེ་ལ་ཐུགས་བརྩེ་བའི་སླད་དུ་

དེར་དགེ་སློང་དག་ཅིག་བཀའ་སྩལ་ན་ལེགས་སོ། །བཅོམ་ལྡན་འདས་ཀྱིས་ཁྱིམ་བདག་དེ་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་དེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་དགེ་སློང་གང་གིས་ཁྱིམ་བདག་དེ་འཁོར་དང་བཅས་པ་དང་། རི་བྲགས་དེ་ན་གནས་པའི་སྐྱེ་བོའི་ཚོགས་དག་འདུལ་བར་འགྱུར་སྙམ་དུ་དགོངས་ན། དགེ་སློང་ཤཱ་རིའི་བུས་འདུལ་བར་གཟིགས་ནས། དེ་ནས་

བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་ཁྱོད་ཀྱིས་རི་བྲགས་ག་གེ་མོ་ཞིག་ན་ཁྱིམ་བདག་ཆེ་གེ་མོ་འཁོར་དང་བཅས་པ་དང་། རི་བྲགས་ན་གནས་པའི་སྐྱེ་བོའི་ཚོགས་ལ་སོམས་ཤིག །ཚེ་དང་ལྡན་པ་ཤཱ་རིའི་བུས་བཙུན་པ་བཀའ་བཞིན་

འཚལ་ཞེས་བཅོམ་ལྡན་འདས་ལས་མཉན་ནས། འཁོར་ལྔ་བརྒྱ་དང་རི་བྲགས་དེ་ག་ལ་བ་དེ་ལོགས་སུ་ལྗོངས་རྒྱུ་ཞིང་སོང་ནས། མཐར་གྱིས་རྒྱུ་ཞིང་འགྲོ་བ་ན་རི་བྲགས་དེར་ཕྱིན་ནས་ཁྱིམ་བདག་དེའི་འདུག་གནས་སུ་ཞུགས་སོ། །ཁྱིམ་བདག་དེས་བཙུན་པ་ཤཱ་རིའི་བུ་འཁོར་ལྔ་བརྒྱ་

Vol. 7 · folio 134b

དང་རི་བྲགས་འདིར་འོངས་ཏེ་བདག་གི་འདུག་གནས་སུ་ཞུགས་སོ་ཞེས་ཐོས་སོ། །ཐོས་ནས་ཀྱང་ཚེ་དང་ལྡན་པ་ཤཱ་རིའི་བུ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཤཱ་རིའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་ཚེ་དང་

ལྡན་པ་ཤཱ་རིའི་བུས་ཁྱིམ་བདག་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེངས་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མས་ཆོས་དང་ལྡན་པའི་གཏམ་གྱིས་ཡང་

དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་སྨྲའོ། །དེ་ནས་ཁྱིམ་བདག་དེ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས། ཚེ་དང་ལྡན་པ་ཤཱ་རིའི་བུ་ག་ལ་བ་དེ་ལོགས་སུ་ཐལ་མོ་

སྦྱར་བ་བཏུད་ནས། ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུས་སང་བདག་གིས་སྡུམ་པར་དགེ་སློང་གི་དགེ་འདུན་དང་ཐབས་ཅིག་གདུགས་ཚོད་གསོལ་བར་ཅི་གནང་། ཚེ་དང་ལྡན་པ་ཤཱ་རིའི་བུས་ཁྱིམ་བདག་དེ་ལ་ཅང་མི་སྨྲ་བས་དང་དུ་བླངས་སོ། །དེ་

ནས་ཁྱིམ་བདག་དེས་ཚེ་དང་ལྡན་པ་ཤཱ་རིའི་བུས་ཅང་མི་སྨྲ་བས་དང་དུ་བླང་བར་རིག་ནས། ཚེ་དང་ལྡན་པ་ཤཱ་རིའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ། ཚེ་དང་ལྡན་པ་ཤཱ་རིའི་བུའི་དྲུང་ནས་སོང་ངོ་། །དེ་ནས་ཁྱིམ་བདག་དེས་དེ་ཉིད་ཀྱི་མཚན་མོ་བཅའ་བ་དང་བཟའ་བ་

གཙང་ཞིང་བསོད་པ་སྟ་གོན་བྱས་ནས། ནང་པར་སྔར་ལངས་ཏེ་སྟན་བཤམས་ནས་ཆུ་ར་བཞག་སྟེ། ཚེ་དང་ལྡན་པ་ཤཱ་རིའི་བུ་ལ་མངག་པས་བཙུན་པ་ཤཱ་རིའི་བུ། གདུགས་ཚོད་གཡར་དགོངས་འཚལ་ན་བཙུན་པ་ཤཱ་རིའི་བུས་ད་དེའི་དུས་ལ་བབ་པར་དགོངས་སུ་གསོལ་ཞེས་བསྐུལ་

ཏོ། །དེ་ནས་ཚེ་དང་ལྡན་པ་ཤཱ་རིའི་བུ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་ཁྱིམ་བདག་དེའི་ཁྱིམ་ག་ལ་བ་དེར་སོང་སྟེ་ཕྱིན་ནས། དགེ་སློང་གི་དགེ་

Vol. 7 · folio 135a

འདུན་གྱི་གོང་དུ་སྟན་བཤམས་པ་ཉིད་ལ་འདུག་གོ། །དེ་ནས་ཁྱིམ་བདག་དེས་ཚེ་དང་ལྡན་པ་ཤཱ་རིའི་བུ་ལ་སོགས་པ་དགེ་སློང་གི་དགེ་འདུན་བདེ་བར་འདུག་པར་རིག་ནས། བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད་ཅིང་སྟོབས་པར་བྱེད་དོ། །

རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ཏེ། ཚེ་དང་ལྡན་པ་ཤཱ་རིའི་བུ་ཟན་ཟོས་ཤིང་ལག་པ་བསྙལ། ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ། ཚེ་དང་ལྡན་པ་ཤཱ་རིའི་བུའི་མདུན་དུ་ཆོས་

མཉན་པའི་ཕྱིར་འདུག་གོ། །འདུག་ནས་ཁྱིམ་བདག་དེས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུ་ཆོས་བསྟན་དུ་གསོལ། ཁྱིམ་བདག་དེའི་ཕྱིར་ཁྱོད་ཀྱིས་ས་ཕྱོགས་གོ་སྐབས་ཡངས་པར་སྟན་འདིང་དུ་ཆུག་ལ། རི་བྲགས་འདིར་སྐྱེ་བོ་ཕལ་

པོ་ཆེའི་ཚོགས་ལ་སང་འཕགས་པ་ཤཱ་རིའི་བུ་ཆོས་སྟོན་པར་འགྱུར་གྱིས། ཁྱེད་ཅག་ལས་གང་ཆོས་ཉན་པར་འདོད་པ་དེ་ཤོག་ཤིག་ཅེས་དྲིལ་བསྒྲག་པ་བྱེད་དུ་ཆུག་ཤིག །ཚེ་དང་ལྡན་པ་ཤཱ་རིའི་བུ་ཡོན་བཤད་པ་བྱས་ནས་སྟན་ལས་ལངས་ཏེ་སོང་ངོ་། །ཁྱིམ་བདག་དེ་རི་བྲགས་དེ་ན་

གཙོ་བོར་གྲགས་པ་ཡིན་པས། དེས་ས་ཕྱོགས་གོ་སྐབས་ཡངས་པར་སྟན་ཤོམ་དུ་བཅུག་ནས་རི་བྲགས་དེར་སྐྱེ་བོ་ཕལ་པོ་ཆེའི་ཚོགས་ལ་སང་འཕགས་པ་ཤཱ་རིའི་བུ་ཆོས་སྟོན་པར་འགྱུར་གྱིས། ཁྱེད་ཅག་ལས་གང་ཆོས་ཉན་པར་འདོད་པ་དེ་ཤོག་ཤིག །ཁྱེད་ཅག་ལས་གང་གིས་དེར་

བདེན་པ་དག་མཐོང་བར་མ་གྱུར་པ་དེས་འཁོར་བར་ཡུན་རིང་དུ་འཁོར་བར་བྱ་དགོས་སོ་ཞེས་དྲིལ་བསྒྲག་པ་བྱེད་དུ་བཅུག་གོ། །དེ་ནས་ཚེ་དང་ལྡན་པ་ཤཱ་རིའི་བུ་ཕྱོགས་དེར་སོང་སྟེ་དགེ་སློང་གི་དགེ་འདུན་གྱི་གོང་དུ་སྟན་བཤམས་པ་ཉིད་ལ་འདུག་པ་དང་། སྲོག་ཆགས་འབུམ་ཕྲག་དུ་མ་དག་ཀྱང་

ཁ་ཅིག་ནི་ལྟད་མོ་སྐྱེས་པ་ན། ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་བ་ན་འདུག་པར་གྱུར་ནས། ཚེ་དང་ལྡན་པ་ཤཱ་རིའི་བུས་འཁོར་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཤེས་ནས་འདི་ལྟར་ཁྱིམ་བདག་དེ་འཁོར་དང་བཅས་པ་དང་། སྲོག་

Vol. 7 · folio 135b

ཆགས་ཁྲི་ཉིས་སྟོང་གིས་བདེན་པ་དག་མཐོང་ཞིང་ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་རབ་ཏུ་བྱུང་སྟེ་

ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས། ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་རང་སངས་རྒྱས་ཀྱི་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་ལྟར་

ཆོས་བསྟན་པ་བྱས་ཏེ། འཁོར་དེ་ལས་ཕལ་ཆེར་སངས་རྒྱས་ལ་གཞོལ་བ་དང་། ཆོས་ལ་འབབ་པ་དང་། དགེ་འདུན་ལ་བབ་པར་རྣམ་པར་བཞག་གོ། །ཚེ་དང་ལྡན་པ་ཤཱ་རིའི་བུས་ཧ་ཅང་ཡུན་རིང་དུ་ཆོས་བསྟན་པས་གདུགས་ཚོད་ཡོལ་ཞིང་རླུང་གིས་དེའི་རྒྱབ་ན་བར་གྱུར་ནས་ཁྱིམ་

བདག་དེས་སྨྲས་པ། བཙུན་པ་ཤཱ་རིའི་བུ་དེའི་སླད་དུ་བདག་གི་འདུག་གནས་སུ་བཞུགས་ཤིག་དང་། བདག་གིས་ཁྱོད་ལ་བསོད་སྙོམས་ཀྱིས་མཁོ་བ་བསྟབས་པར་བགྱིའོ། །ཁྱིམ་བདག་ཁྱོད་ཉིད་ལ་བརྟེན་ནས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་

གཞི་བཅའ་བ་མཛད་ཀྱིས་འགྲོའོ། །དེ་ནས་ཚེ་དང་ལྡན་པ་ཤཱ་རིའི་བུ་ན་བཞིན་དུ་ཟན་བཅད་དེ་རི་བྲགས་དེ་ནས་མཉན་ཡོད་ག་ལ་བ་དེ་ལོགས་སུ་རྒྱུ་ཞིང་སོང་སྟེ་མཐར་གྱིས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ནས། དགེ་སློང་རྣམས་ཀྱིས་ཚེ་དང་ལྡན་པ་ཤཱ་རིའི་བུའི་ལྷན་ཅིག་གནས་པ་དང་། ཉེ་

གནས་དག་ལ་དྲིས་པ། ཚེ་དང་ལྡན་པ་དག་ཇི་ལྟ་བདེ་བར་བརྒྱུས་སམ། ཚེ་དང་ལྡན་པ་དག་ཅུང་ཞིག་བདེ་བར་ཡང་བརྒྱུས། ཅུང་ཞིག་སྡུག་བསྔལ་བར་ཡང་བརྒྱུས་སོ། །ཅི་ཞིག་བདེ་བར་བརྒྱུས། མཁན་པོས་གདུལ་བར་བྱ་བ་འདི་སྙེད་ཅིག་མཛད་པ་གང་ཡིན་པ་དེ་ནི་བདེ་བར་

བརྒྱུས་པ་ཡིན་ནོ། །ཅི་ཞིག་སྡུག་བསྔལ་བར་བརྒྱུས། མཁན་པོ་བསྙུང་བཞིན་དུ་གདུགས་ཚོད་བཅད་དེ་རི་བྲགས་དེ་ནས་བཞུད་པ་གང་ཡིན་པ་དེ་ནི་སྡུག་བསྔལ་བར་བརྒྱུས་པ་ཡིན་ནོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་

Vol. 7 · folio 136a

འདས་ཀྱིས་བཀའ་སྩལ་པ། དེ་ལྟ་བས་ན་ན་བ་མ་གཏོགས་ཏེ། དགེ་སློང་གིས་པུས་འཁྱུད་བཅང་བར་རྗེས་སུ་གནང་ངོ་། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་

ནས། དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ་འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་

འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། འདུག་གནས་གཅིག་ཏུ་ཞག་ལོན་པའི་དགེ་སློང་མི་ན་བས་བསོད་སྙོམས་གཅིག་བཟའ་བར་བྱའོ། །དེ་ལས་ལྷག་པ་ཟ་ན་ལྟུང་བྱེད་དོ། །འདུག་གནས་གཅིག་ཏུ་ཞག་ལོན་པའི་ཞེས་བྱ་བ་ནི་མུ་སྟེགས་ཅན་གྱི་འདུག་གནས་སུ་ཞག་

ལོན་པའིའོ། །དགེ་སློང་ཞེས་བྱ་བ་ནི་ཆོས་འདི་པའོ། །མི་ན་བ་ཞེས་བྱ་བ་ནི་ན་བ་མ་གཏོགས་པས་སོ། །བསོད་སྙོམས་གཅིག་བཟའ་བར་བྱའོ་ཞེས་བྱ་བ་ནི་ཟན་ལན་གཅིག་གོ། །དེ་ལས་ལྷག་པ་ཟ་ན་ཞེས་བྱ་བ་ནི་དེ་ལས་མང་དུ་ཟ་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་།

དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་

དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དེར་གནས་ཤིང་དེར་ཟ་ན་དེར་གནས་པ་ལ་ཉེས་བྱས་སུ་འགྱུར་ལ། དེར་ཟ་བ་ལ་ལྟུང་བྱེད་དུ་འགྱུར་རོ། །དེར་གནས་ཤིང་གཞན་དུ་ཟ་ན་དེར་གནས་པ་ལ་ཉེས་བྱས་སུ་འགྱུར་ལ། གཞན་དུ་ཟ་བ་ལ་ལྟུང་བ་མེད་དོ། །གཞན་དུ་

གནས་ཤིང་དེར་ཟ་ན་གཞན་དུ་གནས་པ་ལ་ལྟུང་བ་མེད་ལ། དེར་ཟ་བ་ལ་ལྟུང་བྱེད་དུ་འགྱུར་རོ། །གཞན་དུ་གནས་ཤིང་གཞན་དུ་ཟ་ན་གཉི་ག་ལ་ལྟུང་བ་མེད་དོ། །ཚོགས་ཀྱི་དང་། ཉེ་དུའི་དང་། སྦྱིན་བདག་ན་རེ་དེ་ཉིད་དུ་འདུག་ཤིག་ཅེས་ཟེར་བ་ལ་ལྟུང་བ་མེད་དོ། །ལས་དང་པོ་པ་དང་།

Vol. 7 · folio 136b

སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །འདུག་གནས་གཅིག་ཏུ་ཟ་བའི་ལྟུང་བྱེད་དེ་སུམ་བཅུ་རྩ་གཉིས་པ་རྫོགས་སྷོ།། །།འདུལ་བ་རྣམ་པར་འབྱེད་པ། བམ་པོ་ལྔ་བཅུ་རྩ་གཉིས་པ། སངས་རྒྱས་བཅོམ་ལྡན་

འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བྱང་ལམ་ནས་དོན་མཐུན་དག་མཉན་ཡོད་དུ་ལྷགས་པ་ན་དྲུག་སྡེ་དག་གིས་དེ་ཐོས་ནས་སྨྲས་པ། དགའ་བོ་ཉེ་དགའ་བདག་ཅག་གིས་བྱང་ལམ་ནས་དོན་མཐུན་དག་མཉན་ཡོད་དུ་ལྷགས་ཞེས་

ཐོས་ཀྱིས། གལ་ཏེ་ན་ཅུང་ཟད་བསྒྲུབ་པར་ནུས་ཀྱང་སྲིད་ཀྱིས་འདོང་ངོ་། །གལ་ཏེ་བསོད་སྙོམས་ཟོ་ཤིག་ཅེས་ཟེར་ན་ལྟོ་གང་བས་ཆོག་གོ་ཞེས་བརྗོད་པར་བྱའོ། །གལ་ཏེ་གོས་ལོང་ཤིག་ཅེས་ཟེར་ན་བླང་བར་བྱའོ་ཞེས་དེ་དག་དོང་སྟེ་སྨྲས་པ། བཞིན་བཟངས་དག་འཁོད་ཅིག་དང་ཆོས་

བསྟན་པར་བྱའོ། །དེ་དག་གིས་རྐང་པ་ལ་ཕྱག་འཚལ་ཏེ་མདུན་དུ་ཆོས་མཉན་པའི་ཕྱིར་འཁོད་པ་དང་། དེ་དག་གིས་དེ་དག་ལ་ཆོས་བསྟན་ནས་དེ་དག་གིས་སྨྲས་པ། འཕགས་པ་དག་འདི་ཉིད་དུ་བསོད་སྙོམས་གསོལ་ཅིག །དྲུག་སྡེ་དག་གིས་སྨྲས་པ། བཞིན་བཟང་དག་ལྟོ་གང་

བས་ཆོག་གོ། །དྲུག་སྡེ་དག་ཡང་དང་ཡང་དུ་འོངས་ཏེ་ཆོས་བསྟན་པ་དང་། དོན་མཐུན་དག་གིས་ཀྱང་ཡང་དང་ཡང་དུ་སྨྲས་པ། འཕགས་པ་དག་འདི་ཉིད་དུ་བསོད་སྙོམས་གསོལ་ཅིག །དྲུག་སྡེ་དག་གིས་ཀྱང་ཡང་དང་ཡང་དུ་སྨྲས་པ། བཞིན་བཟངས་དག་ལྟོ་གང་བས་ཆོག་གོ། །

དུས་གཞན་ཞིག་ན་དོན་མཐུན་དག་གིས་སྨྲས་པ། ཤེས་ལྡན་དག་འདི་ན་གླང་དག་གི་རྩྭ་མེད་ཀྱིས། རེ་ཞིག་རི་བྲགས་གཞན་ཞིག་ཏུ་འདོང་ལ་གླང་དག་གཟན་ཞིང་འཁོད་པར་བྱ་སྟེ། ཇི་ཙམ་ན་ཟོང་བསྒྱུར་ཏེ་འགྲོ་བ་ན་མཉན་ཡོད་དུ་འདོང་བར་བྱའོ་ཞེས་དེ་དག་གིས་གླང་དག་དེད་ནས་རི་བྲགས་

ཤིག་ཏུ་གླང་དག་གཟོན་དུ་དོང་ངོ་། །དྲུག་སྡེ་དག་ཀྱང་ནང་པར་སྔར་ལངས་ཏེ་ཆོས་སྟོན་དུ་དོང་བ་དང་། ཇི་ཙམ་ན་དོན་མཐུན་དེ་དག་མི་སྣང་ནས་དེ་དག་སེམས་ཁོང་དུ་ཆུད་ཅིང་འཁོད་པ་དང་། ཇི་ཙམ་ན་དེར་མི་ཞིག་འོངས་ཏེ་སྨྲས་པ། འཕགས་པ་དག་ཅིའི་སླད་དུ་སེམས་ཁོང་དུ་ཆུད་ཅིང་

Vol. 7 · folio 137a

བཞུགས། དྲུག་སྡེ་དག་གིས་སྨྲས་པ། བཞིན་བཟངས་ཕྱོགས་འདི་ན་ཁོ་བོ་ཅག་གི་མཛའ་བོ་དོན་མཐུན་དག་ཅིག་འཁོད་འཁོད་ན་དེ་དག་གིས་ཁོ་བོ་ཅག་ལ་མ་བལྟས་པ་ཁོ་ནར་དོང་ངོ་། །དེས་སྨྲས་པ། འཕགས་པ་དག་དེ་དག་ནི་ཐམས་ཅད་ཀྱིས་ཐམས་ཅད་དུ་མཆིས་

པ་མ་ལགས་ཏེ། འདི་ལྟར་དེ་དག་གིས་གླང་དག་གི་རིན་མ་མཆིས་ནས་དེ་དག་རི་བྲགས་ཤིག་ན་གླང་དག་གསོན་ཅིང་མཆིས་ཏེ་སླར་ཡང་འདིར་མཆིས་པར་འགྱུར་རོ། །བཞིན་བཟངས་ནད་མེད་པར་གྱུར་ཅིག་ཅེས་དྲུག་སྡེ་དག་རི་བྲགས་དེར་འོང་བ་དང་། ཇི་ཙམ་ན་དེ་དག་གིས་དོན་མཐུན་དེ་

དག་ཐག་རིང་པོ་ཁོ་ན་ནས་མཐོང་ནས་ཚིགས་སུ་བཅད་པ་དག་སྨྲས་པ། རྩུབ་པའི་རི་ལ་འགྲོ་མི་བྱ། །སོང་ནའང་ཡུན་རིང་གནས་མི་བྱ། །རྩུབ་པའི་རི་དག་ཇི་བཞིན་དུ། །རི་ལ་འཁོད་པའང་དེ་བཞིན་ནོ། །རི་ལ་འཁོད་པ་དང་པོར་ནི། །གསེར་དག་བདར་བ་ཇི་བཞིན་ཏེ། །མི་ལ་འཚེ་བ་

རྣམ་བརྟགས་ན། །རི་དག་ཇི་ལྟ་དེ་བཞིན་ནོ། །དོན་མཐུན་དེ་དག་གིས་ཐོས་ནས་སྨྲས་པ། འཕགས་པ་དག་ཁྱེད་ཅག་ཅི་བཀྱོན། བཞིན་བཟངས་དག་ཁྱེད་ཅག་ཁོ་བོ་ཅག་གི་མཛའ་བོ་དག་ཡིན་པས་ཁོ་བོ་ཅག་གིས་དགེ་བའི་ཕྱོགས་དག་ཡོངས་སུ་ཉམས་པར་བྱས་ཏེ་ཁྱེད་ཅག་ལ་ཆོས་བསྟན་

ན་ཁྱེད་ཅག་ཁོ་བོ་ཅག་ལ་མ་བལྟས་པ་ཁོ་ནར་འདིར་དོང་ངོ་། །འཕགས་པ་དག་བདག་ཅག་ཐམས་ཅད་ཀྱི་ཐམས་ཅད་དུ་འདིར་མཆིས་པ་མ་ལགས་ཏེ། འདི་ལྟར་དེ་ན་བདག་ཅག་གི་གླང་དག་གི་རིན་མ་མཆིས་པས་དེའི་སླད་དུ་བདག་ཅག་འདི་ན་གླང་དག་གསོན་ཅིང་མཆིས་ཏེ། ཇི་ཙམ་ན་ཟོང་དག་

བསྒྱུར་ཏེ་མཆི་བ་ན་བདག་ཅག་སླར་ཡང་མཉན་ཡོད་དུ་མཆིའོ། །བཞིན་བཟངས་དག་འཁོད་ཅིག་དང་ཆོས་བསྟན་པར་བྱའོ། །དེ་དག་གིས་དྲུག་སྡེ་དག་གི་རྐང་པ་ལ་ཕྱག་འཚལ་ཏེ་སྟན་ཆེས་དམའ་བ་དག་བླངས་ནས་མདུན་དུ་ཆོས་མཉན་པའི་ཕྱིར་འཁོད་པ་དང་། དྲུག་སྡེ་དག་གིས་དེ་དག་ལ་

ཆོས་བསྟན་ནས་དེ་དག་གིས་སྨྲས་པ། འཕགས་པ་དག་འདི་ཉིད་དུ་བསོད་སྙོམས་གསོལ་ཅིག །བཞིན་བཟངས་དག་ལྟོ་གང་བས་ཆོག་གོ། །དེད་དཔོན་གྱིས་སྨྲས་པ། ཤེས་ལྡན་དག་འཕགས་པ་དག་ཡང་དང་ཡང་དུ་ལྟོ་གང་བས་ཆོག་གོ་ཞེས་གསུང་བ་ལས་ན། འདི་དག་ལ་ན་བཟའ་

Vol. 7 · folio 137b

མི་མངའ་གོར་མ་ཆག་གིས་འདི་དག་ལ་ན་བཟའ་དབུལ་བར་བྱའོ། །དེ་ལྟར་བགྱིའོ་ཞེས་དེ་དག་གིས་དྲུག་སྡེ་དག་ལ་ལ་བ་སྲིན་བུའི་མདོག་ལྟ་བུ་རེ་རེ་བསྐོན་ཏོ། །དེ་ནས་དྲུག་སྡེ་དག་གིས་སྨྲས་པ། བཞིན་བཟངས་དག་ཁྱེད་ཅག་ཡང་དང་ཡང་དུ་བསོད་སྙོམས་ཟོ་ཞིག་ཅེས་ཟེར་ན་བསོད་སྙོམས་

ཇི་ལྟ་བུ་སྦྱིན་པ་བལྟས་འོན་ཅིག །དྲུག་སྡེ་དག་ལས་གཅིག་གིས་ཐབ་སྣོད་ལྟ་བུ་བཟེད་ནས་འདིར་ལུགས་ཤིག་ཅེས་སྨྲས་པ་དང་། དོན་མཐུན་དེ་དག་གིས་བསམས་པ། སྣོད་འདི་རེ་ཆེ་ཞིག་སྟེ་འདི་བཀང་བས་འདི་དག་ཐམས་ཅད་ཀྱི་ལྟོ་ཁེངས་པའི་བསོད་སྙོམས་འབྱུང་བར་འགྱུར་རོ་སྙམ་ནས་

དེ་དག་གིས་ལམ་རྒྱགས་ལས་སྣོད་དེ་བཀང་སྟེ་ཕུལ་ལོ། །དྲུག་སྡེ་གཞན་གྱིས་ཀྱང་དེ་བཞིན་དུ་མཐར་གྱིས་རེ་རེ་ནས་ཐབ་སྣོད་ལྟ་བུ་རེ་རེ་བཟེད་པ་དང་། ཇི་ཙམ་ན་དོན་མཐུན་དེ་དག་གིས་ལམ་རྒྱགས་ལས་ཐབ་སྣོད་ལྟ་བུའི་སྣོད་དྲུག་བཀང་སྟེ་ཕུལ་བ་དང་། དོན་མཐུན་དེ་དག་གི་ལམ་རྒྱགས་

ཐམས་ཅད་ཟད་པར་གྱུར་ནས་དེ་དག་གིས་སྨྲས་པ། འཕགས་པ་དག་བདག་ཅག་གིས་འདིར་ཤུལ་རྒྱགས་ཉུང་ཤས་ཤིག་འཚལ་ཏེ་མཆིས་པ་དེ་དག་ཐམས་ཅད་བས་ཀྱིས། བདག་ཅག་གིས་མི་འདི་ཀཱར་ཥཱ་པ་ཎ་དག་བསྐུར་ཏེ་འཕགས་པ་དག་དང་ཐབས་ཅིག་མཉན་ཡོད་དུ་གཏང་གིས་འཕགས་

པ་དག་གིས་བདག་ཅག་གི་ཤུལ་རྒྱགས་དག་འཇོལ་ཏེ་སྩོལ་ལ་བསེལ་བ་དང་བཅས་ཏེ་གཏང་དུ་གསོལ། བཞིན་བཟངས་དག་དེ་ལྟར་བྱའོ། །དོན་མཐུན་དེ་དག་གིས་དྲུག་སྡེ་དག་གི་ཕྱི་བཞིན་མི་ཞིག་ཀཱར་ཥཱ་པ་ཎ་དག་བསྐུར་ཏེ་བཏང་བ་དང་། དྲུག་སྡེ་དག་གཙུག་ལག་ཁང་དུ་སོང་སྟེ་མི་

དེ་ལ་སྨྲས་པ། བཞིན་བཟངས་ཇེ་ལས་འདི་གྱིས་ཤིག །དེས་དེ་བྱས་ནས་དྲུག་སྡེ་དག་གིས་ཡང་སྨྲས་པ། བཞིན་བཟངས་ལས་གཞན་འདི་ཡང་གྱིས་ཤིག །དེས་དེ་ཡང་བྱས་པ་དང་། དྲུག་སྡེ་དག་གིས་མི་དེ་རིང་ཞིག་བཀོལ་བཀོལ་ནས་ཇི་ཙམ་ན་ཉི་མ་ཡོལ་བར་གྱུར་པ་

དང་། དེའི་འོག་ཏུ་བཏང་སྟེ་སྨྲས་པ། ད་ཉོས་ལ་སོང་ཤིག །མི་དེ་རང་གིས་ལམ་རྒྱགས་དག་ཉོས་ཏེ་འཕགས་པ་དང་། མཉན་ཡོད་ཀྱི་ཉེན་ཀོར་ཐིབས་པོར་སོན་པ་ན་ཆོམ་རྐུན་པ་དག་གིས་བཅོམ་ནས་དེ་གཅིག་པུ་དོན་མཐུན་དག་གི་ནང་དུ་སོང་ངོ་། །དོན་མཐུན་དག་གིས་མཐོང་ནས་

Vol. 7 · folio 138a

སྨྲས་པ། ཁྱོད་ཀྱིས་ཅི་ཁྱེར་ཏེ་འོངས། དེས་སྨྲས་པ། ཅི་ཡང་མ་འོངས་སོ། །ཅིའི་ཕྱིར། ཆོམ་རྐུན་པ་དག་གིས་བཅོམ་མོ། །དེ་དག་གིས་སྨྲས་པ། འཕགས་པ་དག་གིས་ཁྱོད་ཀྱི་བསེལ་བ་མ་བཏང་ངམ། དེས་སྨྲས་པ། ཤེས་ལྡན་དག་དོན་གྱིས་ན་དེ་དག་ཉིད་

ཀྱིས་བཅོམ་མོ། །དེ་དག་གིས་སྨྲས་པ། ཇི་ལྟར་གྱུར། དེས་སྨྲས་པ། དེ་དག་གིས་ཁོ་བོ་ལས་ཤ་སྟག་བྱེད་དུ་བཅུག་ནས་ཇི་ཙམ་ན་ཉི་མ་ཡོལ་བར་གྱུར་པ་དང་། དེའི་འོག་ཏུ་བཏང་སྟེ་ད་ཉོས་ལ་སོང་ཤིག་ཅེས་ཟེར་ནས། ཁོ་བོ་རང་གིས་ལམ་རྒྱགས་དག་ཉོས་ཏེ་འཕགས་པ་དང་མཉན་

ཡོད་ཀྱི་ཉེན་ཀོར་ཐིབས་པོར་སོན་པ་ན་ཆོམ་རྐུན་པ་དག་གིས་བཅོམ་མོ། །དེ་དག་ཤཱཀྱའི་བུའི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ་འདི་ལྟར་ཕན་པ་བྱའོ་ཞེས་ཟེར་ལ་གནོད་པ་ཁོ་ན་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་

བར་བྱེད་དོ། །འདི་ནི་རེ་ཞིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཞིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །

མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ལ་བུ་མོ་གཡས་ཞར་མ་ཞིག་བྱུང་ནས་དེ་བསྲིངས་ཤིང་བསྐྱེད་དེ་ཆེན་མོར་གྱུར་ཏོ། །བུ་མོ་དེའི་ན་ཟླ་

གཞན་ཐམས་ཅད་བག་མར་བཏང་ན། བུ་མོ་དེ་གཡས་ཞར་ཡིན་པའི་ཕྱིར་སློང་བ་འགའ་ཡང་མ་འོངས་སོ། །མཉན་ཡོད་ན་ཁྱིམ་བདག་གཞན་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེའི་ཆུང་མ་དེ་རང་གི་ལས་དག་གིས་དུས་ལ་བབ་བོ། །གཉིས་པ་བླངས་པ་དང་དེ་

ཡང་དུས་ལ་བབ་བོ། །དེ་བཞིན་དུ་ཆུང་མ་བདུན་པའི་བར་དུ་བླངས་པ་དང་དེ་ཡང་དུས་ལ་བབ་བོ། །ཁྱིམ་བདག་དེ་ཡང་སྐུར་པ་གདབ་པར་འགྱུར་བའི་ལས་དག་གིས་ཆུང་མ་གསོད་པ་ཆུང་མ་གསོད་པ་ཞེས་བྱ་བའི་མིང་དུ་གྱུར་ཏོ། །ཁྱིམ་བདག་དེ་ཡང་བུ་མོ་བསླངས་པ་དང་མི་སྟེར་ཅིང་། ངེད་

Vol. 7 · folio 138b

ཀྱིས་ཅིའི་ཕྱིར་བུ་མོ་ཡོངས་སུ་གཏང་། མི་སྦྱིན་ནོ་ཞེས་ཀྱང་ཟེར་རོ། །ཁྱིམ་བདག་དེས་ཡུགས་ས་མོ་དག་བསླངས་པ་དང་། ཡུགས་ས་མོ་དེ་དག་ཀྱང་ཁོ་མོ་ཅག་གིས་ཅིའི་ཕྱིར་བདག་ཡོངས་སུ་བཏང་ན་ཁྱོད་ཀྱི་ཁྱིམ་དུ་འཇུག་ཅེས་ཟེར་རོ། །ཁྱིམ་བདག་དེ་རྣམ་པ་ཐམས་ཅད་དུ་ཡི་ཆད་ནས་རང་ཉིད་

ཀྱིས་ཁྱིམ་གྱི་སོ་ཚིས་དག་བྱ་བར་བརྩམས་པ་དང་། དུས་གཞན་ཞིག་ན་ཁྱིམ་བདག་དེའི་ཆུང་པོ་གྲོགས་ཤིག་འོངས་ནས་དེས་ཁྱིམ་བདག་དེ་མཐོང་ནས་དྲིས་པ། ཁྱོད་ཅི་བྱེད། ཁྱིམ་བདག་གིས་སྨྲས་པ། ཁྱིམ་གྱི་སོ་ཚིས་དག་བྱེད་དོ། །དེས་སྨྲས་པ། ཁྱོད་ཅིའི་ཕྱིར་རང་ཉིད་ཀྱིས་ཁྱིམ་

གྱི་སོ་ཚིས་དག་བྱེད། ཁྱིམ་བདག་གིས་སྨྲས་པ། ཁོ་བོས་ཆུང་མ་གཅིག་བླངས་པ་དང་དེ་རང་གི་ལས་དག་གིས་དུས་ལ་བབ་བོ། །གཉིས་པ་བླངས་པ་དང་དེ་ཡང་དུས་ལ་བབ་བོ། །དེ་བཞིན་དུ་བདུན་པའི་བར་དུ་བླངས་པ་དང་དེ་ཡང་དུས་ལ་བབ་བོ། །དེས་སྨྲས་པ། གཞན་དག་ཅིའི་

ཕྱིར་མི་སློང་། ཁྱིམ་བདག་གིས་སྨྲས་པ། བསླངས་ན་མི་སྟེར་ཅིང་ངེད་ཀྱིས་ཅིའི་ཕྱིར་བུ་མོ་ཡོངས་སུ་གཏང་། མི་སྦྱིན་ནོ་ཞེས་ཟེར་རོ། །དེས་སྨྲས་པ། ཡུགས་ས་མོ་དག་ཅིའི་ཕྱིར་མི་སློང་། ཁྱིམ་བདག་གིས་སྨྲས་པ། བསླངས་ཏེ་དེ་དག་ཀྱང་ཁོ་མོ་ཅག་གིས་ཅིའི་ཕྱིར་བདག་

ཡོངས་སུ་བཏང་ན་ཁྱོད་ཀྱི་ཁྱིམ་དུ་འཇུག་ཅེས་ཟེར་རོ། །དེས་སྨྲས་པ། གཡས་ཞར་མ་ཅིའི་ཕྱིར་མི་སློང་། མི་སྟེར་རོ། །སོང་ལ་སློངས་ཤིག་དང་། དེ་དག་བུ་མོས་ཡོངས་སུ་དུབ་པ་ཡིན་པས་སྟེར་བར་འགྱུར་རོ། །ཁྱིམ་བདག་དེ་གཡས་ཞར་མའི་ཕའི་ཁྱིམ་དུ་སོང་སྟེ་བདེ་ལེགས་བདེ་

ལེགས་ཞེས་སྨྲས་པ་དང་། དེ་དག་གིས་སྨྲས་པ། ཅི་སློང་། དེས་སྨྲས་པ། བུ་མོའི་སློང་མོ་སློང་ངོ་། །བུ་མོ་གང་། གཡས་ཞར་མའོ། །དེ་དག་དེས་ཡོངས་སུ་སྐྱོ་བ་ཡིན་པས་སྨྲས་པ། སྦྱིན་ནོ། །དེས་སྨྲས་པ། ནམ་བག་མར་གཏང་། ཉི་མ་མང་གེ་མོ་ཞིག་ལའོ། །དེས་དེ་ལྟར་གྱིས་

ཤིག་ཅེས་སྨྲས་ཏེ་སོང་ངོ་། །དེའི་ཆུང་པོ་གྲོགས་དེ་ཡང་འགྱོད་པ་སྐྱེས་ཏེ། བདག་གི་གྲོགས་པོ་ལ་གཡས་ཞར་མ་སློངས་ཤིག་ཅེས་བསྐུལ་བ་དེ་དག་ནི་བདག་གིས་མ་ལེགས་པ་ཞིག་བྱས་ཏེ། དེ་མཚན་ངན་པ་ཡིན་པས་དེས་གྲོགས་པོ་བསད་པར་གྱུར་ན་མི་རུང་ངོ་སྙམ་ནས། དེ་ཁྱིམ་བདག་

Vol. 7 · folio 139a

དེའི་གན་དུ་སོང་སྟེ་སྨྲས་པ། ཁྱོད་ཀྱིས་གཡས་ཞར་མ་ཐོབ་བམ། ཁྱིམ་བདག་གིས་སྨྲས་པ། ཐོབ་བོ། །དེས་ཚིགས་སུ་བཅད་པ་དག་སྨྲས་པ། རྒྱ་སྐྱེགས་ཤིང་གི་སོ་ཤིང་དང་། །ནུབ་ཏུ་སྔས་བསྟན་ཉལ་བ་དང་། །ཤིན་ཏུ་གཉིད་ཆེ་ཞོ་འཐུངས་དང་། །ཆུང་མ་གཡས་

ཞར་ལེན་བྱེད་ན། །ཞི་བའང་གནས་ནས་ཉམས་པར་འགྱུར། །འགོག་ལ་འགོག་བྱེད་བབ་པ་དང་། །རྡོ་ལ་ལྕགས་ནི་བབ་པ་ལྟར། །ཁྱོད་ཀྱང་ཆུང་མ་གསོད་བྱེད་ལ། །དེ་ཡང་གཡས་ཞར་ཡིན་པས་ན། །ཁྱེད་གཉིས་གང་རྒྱལ་གང་ཕམ་བལྟའོ། །གྲོགས་པོ་བུ་མོ་དེ་མཚན་ངན་པ་

ཡིན་པས་ཁྱོད་དུས་བྱེད་པར་གྱུར་ན་མི་རུང་གིས། དེ་འོར་ལ་ཁོ་བོའི་སྲིང་མོ་ཡུགས་ས་མོ་ཞིག་ཡོད་པ་དེ་ལོང་ཤིག །ཁྱིམ་བདག་དེས་སྨྲས་པ། གྲོགས་པོ་ད་དོར་བར་མི་ནུས་ཏེ། འོན་ཀྱང་འདི་ལ་ཐབས་ཀྱི་རྣམ་པ་ཞིག་བྱའོ། །གཡས་ཞར་མའི་མ་དེས་ཀྱང་བག་རྫངས་སྟ་གོན་བྱ་བར་

བརྩམས་སོ། །ཁྱིམ་དེ་དྲུག་སྡེ་དག་གི་ཁྱིམ་དུ་འགྲོ་བའི་ཁྱིམ་ཡིན་པས་དྲུག་སྡེ་དག་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། མཐར་གྱིས་བསོད་སྙོམས་ལ་རྒྱུ་བ་ན་ཁྱིམ་དེར་ཞུགས་པ་དང་། ཇི་ཙམ་ན་ཁུར་བ་དག་སྲེག་པ་མཐོང་

ནས་དེ་དག་གིས་སྨྲས་པ། སྲིང་མོ་དུས་སྟོན་ལ་བབ་ཏུ་ཉེའམ་ཅི། དེས་སྨྲས་པ། འཕགས་པ་དག་ཁྱེད་ཀྱི་ལྕམ་མོ་བག་མར་མཆི་བ་ལ་ཐུག་ནས། དེའི་བག་རྫངས་སྟ་གོན་བགྱིད་དོ། །དྲུག་སྡེ་དག་གིས་སྨྲས་པ། སྲིང་མོ་ཁོ་བོ་ཅག་གིས་ཅུང་ཟད་མི་ཐོབ་བམ། འཕགས་པ་དག་ཁྱེད་ཅག་

ལ་སུ་ཞིག་གིས་དབུལ་འཚལ། འདི་ཁྱེད་ཉིད་ཀྱི་ལགས་སོ། །དྲུག་སྡེ་དག་གིས་སྨྲས་པ། སྲིང་མོ་རེ་ཞིག་ཕུགས་ན་ཡོད་པ་གཞན་ཐམས་ཅད་ལྟ་ཞོག་ཤིག །ད་འཕྲལ་དུ་ཅི་སྦྱིན་པ་བལྟས་འོན་ཅིག །དེས་བག་བརྐྱང་སྟེ་དེ་དག་གིས་ལྷུང་བཟེད་ཐམས་ཅད་ཁུར་བ་དག་གིས་བཀང་ནས་དྲུག་སྡེ་

དག་གིས་དེའི་ཁ་ཟས་ཐམས་ཅད་བསྡུས་ཏེ་དོང་ངོ་། །ཇི་ཙམ་ན་ཁྱིམ་བདག་དེ་འོངས་པ་དང་། ཆུང་མས་སྨྲས་པ། རྗེའི་སྲས་སྦྱིན་གནས་དག་བྱོན་པར་གྱུར་ནས་དེ་དག་གིས་ཁ་ཟས་ཐམས་ཅད་བཞེས་ཀྱིས་བཞུད་ལ། ཁྱོ་ག་དེ་ལ་བག་རྫངས་སྟ་གོན་བྱེད་ཀྱི་བར་དུ་རེ་ཞིག་ཉི་མ་ཉུང་ཤས་ཤིག་སྡོད་

Vol. 7 · folio 139b

ཅིག་ཅེས་གསུངས་ཤིག །ཁྱིམ་བདག་གིས་སྨྲས་པ། བཟང་མོ་དེས་སྡོད་པར་མི་ནུས་ཀྱིས་ཇེ་བུ་མོ་བག་མར་གཏང་བར་གྱིས་ཤིག་དང་ཕྱིས་ཉེ་དུ་དག་ཟན་སྦྱིན་པར་བྱའོ། །ཆུང་མས་སྨྲས་པ། རྗེའི་སྲས་དེ་ནི་ཆུང་མ་གསོད་པ་ལགས་པས་དེ་ལ་གཞན་སུས་ཀྱང་བུ་མོ་སྩལ་བར་མི་འགྱུར་གྱིས་

བཞུད་ཅིག་དང་སྡོད་པར་འགྱུར་རོ། །ཁྱིམ་བདག་དེ་དེའི་གན་དུ་སོང་སྟེ་སྨྲས་པ། བུ་བདག་ཅག་གིས་ཁ་ཟས་དག་སྟ་གོན་བྱས་པར་འགྱུར་བ་གང་ཡིན་པ་དེ་སྦྱིན་གནས་དག་གིས་བཞེས་ཀྱིས། ད་ཉེ་དུ་དག་གི་ཕྱིར་ཁ་ཟས་སྟ་གོན་བྱེད་ཀྱི་བར་དུ་ཉི་མ་ཉུང་ཤས་ཤིག་སྡོད་ཅིག །དེས་སྨྲས་པ། ཁོ་

བོ་མི་སྡོད་དེ་གལ་ཏེ་ཉི་མ་དེ་ཉིད་ལ་བག་མ་རྫོང་ཞིང་སྦྱིན་ན་བག་མར་བླང་ངོ་། །གལ་ཏེ་མི་སྦྱིན་ན་ཁོ་བོ་ཆུང་མ་གཞན་ལེན་གྱིས་ཁྱོད་ཀྱི་བུ་མོ་དོར་བར་བྱའོ། །ཁྱིམ་བདག་དེ་ཆུང་མའི་གན་དུ་སོང་སྟེ་སྨྲས་པ། བཟང་མོ་ཁྱོ་ག་དེ་ན་རེ་གལ་ཏེ་ཉི་མ་དེ་ཉིད་ལ་བག་མ་རྫོང་ཞིང་སྦྱིན་ན་བག་མར་བླང་བར་བྱའོ། །

གལ་ཏེ་མི་སྦྱིན་ན་ཁོ་བོ་ཆུང་མ་གཞན་ལེན་གྱིས་ཁྱོད་ཀྱི་བུ་མོ་དོར་བར་བྱའོ་ཞེས་ཟེར་རོ། །ཆུང་མས་སྨྲས་པ། རྗེའི་སྲས་དེ་ཆུང་མ་གསོད་པ་ལགས་པས་གཞན་སུ་ཞིག་གིས་དེ་ལ་བུ་མོ་སྩོལ་བར་འགྱུར་ཞེས་དེས་བག་རྫངས་སྟ་གོན་བྱ་བར་བརྩམས་སོ། །ཁྱོ་ག་དེས་ཀྱང་གྲོགས་པོའི་སྲིང་མོ་ཡུགས་

ས་མོ་དེ་བླངས་སོ། །གཡས་ཞར་མའི་མ་དེས་ཀྱང་ཁ་ཟས་སྟ་གོན་བྱས་ནས་ཡང་ཁྱིམ་བདག་དེ་ལ་སྨྲས་པ། རྗེའི་སྲས་ད་ཁྱོ་ག་དེའི་གན་དུ་བཞུད་ལ་བག་མ་ལེན་དུ་ཤོག་ཤིག་ཅེས་གསུངས་ཤིག །ཁྱིམ་བདག་དེ་དེའི་གན་དུ་སོང་སྟེ་སྨྲས་པ། བུ་ད་བག་མ་ལེན་དུ་ཤོག་ཤིག །དེས་

སྨྲས་པ། ཁྱེད་ཀྱིས་ཉི་མ་དེ་ལས་ཡོལ་བར་བྱས་པས་ད་ཁོ་བོ་མི་ལེན་ཏོ། །ཁྱིམ་བདག་དེས་ཁྱོ་ག་དེ་བཟུང་སྟེ་རྒྱལ་པོའི་ཕོ་བྲང་དུ་འོ་དོད་བོས་ནས་ཤགས་ལ་བཀུག་པ་དང་། ཁྱོ་ག་དེས་ཁྱིམ་བདག་དེ་ཕམ་པར་བྱས་སོ། །གཡས་ཞར་མའི་མ་དེ་བདག་གི་བུ་མོ་མ་ལོམ་མོ་ཞེས་ངུ་ཞིང་འདུག་

པ་དང་། དེའི་ངོས་ཀྱི་སྡུམ་ཚེས་དག་ཤཱཀྱའི་བུའི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་གོ། །བྲམ་ཟེའི་ཚུལ་ནི་ཚིག་སྟེ། འདི་ལྟར་བུ་མོ་བྱིན་ཟིན་པའི་བར་ཆད་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་

Vol. 7 · folio 140a

འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་

བ་ལ་སོགས་པ་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱོད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་

པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་

གཟིགས་པས། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་རབ་ཏུ་མང་པོ་དག་ཁྱིམ་རྣམས་སུ་དོང་བ་ལས་གལ་ཏེ་དེ་དག་ལ་བྲམ་ཟེ་

དང་། ཁྱིམ་བདག་དད་པ་ཅན་དག་གིས་ཕྱེ་དག་དང་། ཁུར་བ་དག་དུས་ཀྱིས་སྟོབས་པར་གྱུར་ལ། འདོད་ན་དགེ་སློང་དེ་དག་གིས་ལྷུང་བཟེད་གང་བ་གཉིས་སམ། གསུམ་བླང་བར་བྱའོ། །དེ་ལས་ལྷག་པར་ལེན་ན་ལྟུང་བྱེད་དོ། །ལྷུང་བཟེད་གང་བ་གཉིས་སམ། གསུམ་བླངས་ནས་ཕྱི་

རོལ་ཀུན་དགའ་ར་བར་དོང་ལ་དགེ་སློང་འཁོད་པ་རྣམས་ལའང་བགོ་བཤའ་བྱ། བདག་ཅག་ཀྱང་བཟའ་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །དགེ་སློང་ཞེས་བྱ་བ་ནི་དྲུག་སྡེ་དག་གོ། །རབ་ཏུ་མང་པོ་དག་ཅེས་བྱ་བ་ནི་གཉིས་ལས་ལྷག་པ་ནི་རབ་ཏུ་མང་པོ་དག་གོ། །ཁྱིམ་རྣམས་སུ་ཞེས་བྱ་བ་

ནི་བྲམ་ཟེ་དང་། ཁྱིམ་བདག་དག་གི་ཁྱིམ་རྣམས་སུའོ། །དོང་བ་ལས་ཞེས་བྱ་བ་ནི་སོང་བ་ལས་སོ། །གལ་ཏེ་དེ་དག་ལ་ཞེས་བྱ་བ་ནི་དགེ་སློང་དེ་དག་ལའོ། །བྲམ་ཟེ་དང་ཁྱིམ་བདག་དད་པ་ཅན་དག་གིས་ཞེས་བྱ་བ་ལ། དད་པ་ཅན་ཞེས་བྱ་བ་ནི་སངས་རྒྱས་ལ་མངོན་པར་དད་པ་དང་། ཆོས་

Vol. 7 · folio 140b

དང་། དགེ་འདུན་ལ་མངོན་པར་དད་པ་དང་། སངས་རྒྱས་ལ་སྐྱབས་སུ་སོང་བ་དང་། ཆོས་དང་། དགེ་འདུན་ལ་སྐྱབས་སུ་སོང་བ་དག་གོ། །ཕྱེ་དག་ཅེས་བྱ་བ་ནི་ཕྱེ་དང་འདེ་གུ་དག་གོ། །ཁུར་བ་དག་ཅེས་བྱ་བ་ནི་བག་ཆོས་དག་གོ། །དུས་ཀྱིས་སྟོབས་པར་གྱུར་ལ་ཞེས་བྱ་བ་ནི་ཡང་དང་ཡང་

དུ་སྟོབས་པར་གྱུར་ལའོ། །འདོད་ན་ཞེས་བྱ་བ་ནི་གལ་ཏེ་དོན་དུ་གཉེར་ནའོ། །དགེ་སློང་དེ་དག་གིས་ཞེས་བྱ་བ་ནི་དགེ་སློང་གང་ཡིན་པ་དག་གིས་སོ། །ལྷུང་བཟེད་གང་བ་གཉིས་སམ་གསུམ་བླང་བར་བྱའོ་ཞེས་བྱ་བ་ལ། ལྷུང་བཟེད་ནི་གསུམ་སྟེ། ཆེན་པོ་དང་། འབྲིང་དང་། ཆུང་ངུའོ། །

དེ་ལ་ཆེན་པོ་ནི་གང་དུ་འབྲས་ཐུག་པོ་ཆེ་མ་ག་དྷཱའི་བྲེའུ་ཆུང་དོ་བཙོས་པ་སྲན་ཚོད་དང་བཅས། ཚོད་མ་དང་བཅས་པ་བླུགས་ན་ཁའི་ཆའི་མཐའ་ཁོ་ན་ནས་མཐེ་བོའི་ལྟོ་གང་གིས་མི་རེག་པའོ། །ཆུང་ངུ་ནི་གང་དུ་འབྲས་ཐུག་པོ་མ་ག་དྷཱའི་བྲེ་ཆུང་གང་བཙོས་པ་སྲན་ཚོད་དང་བཅས། ཚོད་མ་དང་

བཅས་པ་བླུགས་ན་ཁའི་ཆའི་མཐའ་ཁོ་ན་ནས་མཐེ་བོའི་ལྟོ་གང་གིས་མི་རེག་པའོ། །འབྲིང་ནི་དེ་གཉིས་ཀྱི་བར་རོ། །དེ་ལས་ལྷག་པར་ལེན་ན་ཞེས་བྱ་བ་ནི་དེ་ལས་མང་དུའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་།

ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །ལྷུང་བཟེད་གང་བ་གཉིས་སམ་གསུམ་

བླངས་ནས་ཕྱི་རོལ་ཀུན་དགའ་ར་བར་དོང་ལ། དགེ་སློང་འཁོད་པ་རྣམས་ལ་ཡང་བགོ་བཤའ་བྱ་ཞེས་བྱ་བ་ནི་ཁྱིམ་གྱི་ཕྱི་རོལ་གཙུག་ལག་ཁང་དུ་དོང་ལ། དེ་ན་དགེ་སློང་གང་དག་འཁོད་པ་རྣམས་ལ་ཡང་སྦྱིན་པར་བྱའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ལྷུང་བཟེད་

ཆེན་པོ་གསུམ་ལེན་པར་བྱེད་ན། དེ་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་རོ། །དགེ་སློང་གིས་ལྷུང་བཟེད་ཆེན་པོ་གཉིས་དང་། འབྲིང་གཅིག་ལེན་པར་བྱེད་ན། དེ་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་རོ། །དགེ་སློང་གིས་

Vol. 7 · folio 141a

ལྷུང་བཟེད་ཆེན་པོ་གཉིས་དང་། ཆུང་ངུ་གཅིག་ལེན་པར་བྱེད་ན། དེ་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་ལྟུང་བྱེད་དུ་འགྱུར་རོ། །དགེ་སློང་གིས་ལྷུང་བཟེད་འབྲིང་གཉིས་དང་ཆེན་པོ་གཅིག་ལེན་པར་བྱེད་ན། དེ་ལེན་པ་ལ་ཉེས་བྱས་སུ་འགྱུར་ལ། ཟ་བ་ལ་

ལྟུང་བྱེད་དུ་འགྱུར་རོ། །དགེ་སློང་གིས་ཇི་ཙམ་དུ་བྲེའུ་ཆུང་ཕྱེད་དང་ལྔ་ལས་ལྷག་པའི་བསོད་སྙོམས་ལེན་ན་ཐམས་ཅད་དུ་ལྟུང་བྱེད་དུ་འགྱུར་རོ། །སྦྱིན་བདག་གིས་ཅི་བདེར་བྱས་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་

པ་ལ་ལྟུང་བ་མེད་དོ། །ལྷུང་བཟེད་དོ་གསུམ་ཙམ་ལས་ལྷག་པར་ལེན་པའི་ལྟུང་བྱེད་དེ་སུམ་བཅུ་རྩ་གསུམ་པ་རྫོགས་སྷོ།། །།བར་སྡོམ་ལ། སྟན་གཅིག་དང་ནི་ཆུ་བཞིན་སྤོང་། །འབགས་དང་ཟས་ཡོད་རུང་བ་དང་། །ཐོང་ཤིག་ལྷག་པོར་ཐུག་པ་དང་། །སྐྱོ་མའི་སྡེ་ཚན་བསྡུས་

པ་ཡིན། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ང་ནི་སྟན་གཅིག་པའི་ཟས་ཟ་སྟེ། ང་སྟན་གཅིག་པའི་ཟས་ཟ་བ་ན།

སྙིང་ལས་ཆུང་ངུར་འཚོ་ཞིང་། གནོད་པ་ཉུང་བ་དང་། ཉམ་ང་བ་ཆུང་བ་དང་། བསྐྱོད་པ་ཡང་བ་དང་། འཚོ་བ་དང་། སྟོབས་དང་ལྡན་པ་དང་། བདེ་བ་དང་། ཁ་ན་མ་ཐོ་བ་མེད་པ་དང་། བདེ་བ་ལ་རེག་པར་གནས་པར་འཚོའོ། །དགེ་སློང་དག་ཁྱེད་ཀྱང་ཚུར་ཤེག་ལ་སྟན་གཅིག་

པའི་ཟས་ཟོ་ཤིག་དང་། ཁྱེད་ཀྱང་སྟན་གཅིག་པའི་ཟས་ཟ་བ་ན་སྙིང་ལས་ཆུང་ངུར་འཚོ་ཞིང་། གནོད་པ་ཉུང་བ་དང་། ཉམ་ང་བ་ཆུང་བ་དང་། བསྐྱོད་པ་ཡང་བ་དང་། འཚོ་བ་དང་། སྟོབས་དང་ལྡན་པ་དང་། བདེ་བ་དང་། ཁ་ན་མ་ཐོ་བ་མེད་པ་དང་། བདེ་བ་ལ་རེག་པར་གནས་པར་

འཚོ་བར་འགྱུར་རོ། །དགེ་སློང་རྣམས་སྟན་གཅིག་པའི་ཟས་ཟ་བར་བྱེད་དེ། དེ་དག་སྟན་གཅིག་པའི་ཟས་ཟ་བ་ན་སློབ་དཔོན་མཐོང་ན་ཡང་ལྡང་བར་བྱེད། མཁན་པོ་དང་། བླ་མ་དང་། བླ་མ་ལྟ་བུ་མཐོང་ན་ཡང་ལྡང་བར་བྱེད་པས་དེ་དག་བདག་ཅག་གིས་སྤངས་སོ་ཞེས་ཟ་བར་མི་

Vol. 7 · folio 141b

བྱེད་པས་དེ་དག་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་ངས་དགེ་སློང་

དག་ང་ནི་སྟན་གཅིག་པའི་ཟས་ཟ་སྟེ། ང་སྟན་གཅིག་པའི་ཟས་ཟ་བ་ན་སྙིང་ལས་ཆུང་ངུར་འཚོ་ཞིང་། གནོད་པ་ཉུང་བ་དང་། ཉམ་ང་བ་ཆུང་བ་དང་། བསྐྱོད་པ་ཡང་བ་དང་། འཚོ་བ་དང་། སྟོབས་དང་ལྡན་པ་དང་། བདེ་བ་དང་། ཁ་ན་མ་ཐོ་བ་མེད་པ་དང་། བདེ་བ་ལ་རེག་པར་

གནས་པར་འཚོའོ། །དགེ་སློང་དག་ཁྱེད་ཀྱང་ཚུར་ཤེག་ལ་སྟན་གཅིག་པའི་ཟས་ཟོ་ཤིག་དང་། ཁྱེད་ཀྱང་སྟན་གཅིག་པའི་ཟས་ཟ་བ་ན་སྙིང་ལས་ཆུང་ངུར་འཚོ་ཞིང་གནོད་པ་ཉུང་བ་དང་། ཉམ་ང་བ་ཆུང་བ་དང་། བསྐྱོད་པ་ཡང་བ་དང་། འཚོ་བ་དང་། སྟོབས་དང་ལྡན་པ་དང་། བདེ་

བ་དང་། ཁ་ན་མ་ཐོ་བ་མེད་པ་དང་། བདེ་བ་ལ་རེག་པར་གནས་པར་འཚོ་བར་འགྱུར་རོ་ཞེས་བྱས་ན། གང་གིས་ད་ལྟར་དགེ་སློང་དག་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་གྱུར་པའི་རྒྱུ་ནི་གང་ཡིན། རྐྱེན་ནི་གང་ཡིན། བཙུན་པ་བཅོམ་

ལྡན་འདས་ཀྱིས་དགེ་སློང་དག་ང་ནི་སྟན་གཅིག་པའི་ཟས་ཟ་སྟེ། སྟན་གཅིག་པའི་ཟས་ཟ་བ་ན་སྙིང་ལས་ཆུང་ངུར་འཚོ་ཞིང་གནོད་པ་ཉུང་བ་དང་། ཉམ་ང་བ་ཆུང་བ་དང་། བསྐྱོད་པ་ཡང་བ་དང་། འཚོ་བ་དང་། སྟོབས་དང་ལྡན་པ་དང་། བདེ་བ་དང་། ཁ་ན་མ་ཐོ་བ་མེད་པ་དང་། བདེ་བ་

ལ་རེག་པར་གནས་པར་འཚོའོ། །དགེ་སློང་དག་ཁྱེད་ཀྱང་ཚུར་ཤེག་ལ་སྟན་གཅིག་པའི་ཟས་ཟོ་ཤིག་དང་། ཁྱེད་ཀྱང་སྟན་གཅིག་པའི་ཟས་ཟ་བ་ན་སྙིང་ལས་ཆུང་ངུར་འཚོ་ཞིང་གནོད་པ་ཉུང་བ་དང་། ཉམ་ང་བ་ཆུང་བ་དང་། བསྐྱོད་པ་ཡང་བ་དང་། འཚོ་བ་དང་། སྟོབས་དང་ལྡན་པ་དང་།

བདེ་བ་དང་། ཁ་ན་མ་ཐོ་བ་མེད་པ་དང་། བདེ་བ་ལ་རེག་པར་གནས་པར་འཚོ་བར་འགྱུར་རོ་ཞེས་བཀའ་སྩལ་ནས། དགེ་སློང་རྣམས་སྟན་གཅིག་པའི་འཚལ་མ་འཚལ་བར་བགྱིད་དེ། དེ་དག་སྟན་གཅིག་པའི་འཚལ་མ་འཚལ་བ་ན། སློབ་དཔོན་མཐོང་བ་ན་ཡང་ལྡང་བར་བགྱིད།

Vol. 7 · folio 142a

མཁན་པོ་དང་། བླ་མ་དང་། བླ་མ་ལྟ་བུ་མཐོང་ན་ཡང་ལྡང་བར་བགྱིད་པ་དེ་དག་བདག་ཅག་གིས་སྤངས་སོ་ཞེས་འཚལ་བར་མི་བགྱིད་པས་དེ་དག་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་གྱུར་ཏེ། བཙུན་པ་གང་གིས་ད་ལྟར་དགེ་སློང་

དག་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་གྱུར་པའི་རྒྱུ་ནི་དེ་ལགས། རྐྱེན་ནི་དེ་ལགས་སོ། །ཀུན་དགའ་བོ་དེ་ལྟ་བས་ན་མ་སྤངས་པས་ཇི་ཙམ་གྱིས་ཆོག་པ་བཟའ་བར་བྱ་ཞིང་། ཟས་བརྩམས་པས་སློབ་དཔོན་དང་། མཁན་པོ་དང་། བླ་མ་དང་། བླ་མ་

ལྟ་བུ་མཐོང་ན་ལྡང་བར་མི་བྱའོ། །བཅོམ་ལྡན་འདས་ཀྱིས་མ་སྤངས་པས་ཇི་ཙམ་གྱིས་ཆོག་པ་བཟའ་བར་བྱ་ཞིང་། ཟས་བརྩམས་པས་སློབ་དཔོན་དང་། མཁན་པོ་དང་། བླ་མ་དང་། བླ་མ་ལྟ་བུ་མཐོང་ན་ལྡང་བར་མི་བྱའོ་ཞེས་བཀའ་སྩལ་ནས་དེ་དག་ཆུ་བཞིན་དུ་སྤངས་པས་ལོ་མ་དང་། སྲན་

ཚོད་དང་། ལྡམ་ལྡུམ་དང་། སྐམ་ཚོད་ཀྱིས་ཀྱང་སྤོང་བར་བྱེད་ཅིང་། དེ་དག་བདག་ཅག་གིས་སྤངས་སོ་ཞེས་ཟ་བར་མི་བྱེད་པས་དེ་དག་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་

རྨེད་པར་མཛད་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་ངས་མ་སྤངས་པས་ཇི་ཙམ་གྱིས་ཆོག་པ་བཟའ་བར་བྱ་ཞིང་། ཟས་བརྩམས་པས་སློབ་དཔོན་དང་། མཁན་པོ་དང་། བླ་མ་དང་། བླ་མ་ལྟ་བུ་མཐོང་ན་ལྡང་བར་མི་བྱའོ་ཞེས་

བྱས་ན་གང་གིས་ད་ལྟར་དགེ་སློང་དག་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་གྱུར་པའི་རྒྱུ་ནི་གང་ཡིན། རྐྱེན་ནི་གང་ཡིན། བཙུན་པ་བཅོམ་ལྡན་འདས་ཀྱིས་མ་སྤངས་པས་ཇི་ཙམ་གྱིས་ཆོག་པ་བཟའ་བར་བྱ་ཞིང་། ཟས་བརྩམས་པས་སློབ་དཔོན་

དང་། མཁན་པོ་དང་། བླ་མ་དང་། བླ་མ་ལྟ་བུ་མཐོང་ན་ལྡང་བར་མི་བྱའོ་ཞེས་བཀའ་སྩལ་ནས། དེ་དག་ཆབ་བཞིན་དུ་སྤངས་པས་ལོ་མ་དང་། སྲན་ཚོད་དང་། ལྡམ་ལྡུམ་དང་། སྐམ་ཚོད་ཀྱིས་ཀྱང་སྤོང་བར་བགྱིད་ཅིང་དེ་དག་བདག་ཅག་གིས་སྤངས་སོ་ཞེས་འཚལ་བར་མི་བགྱིད་

Vol. 7 · folio 142b

པས་དེ་དག་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་གྱུར་ཏེ། བཙུན་པ་གང་གིས་ད་ལྟར་དགེ་སློང་དག་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་གྱུར་པའི་རྒྱུ་ནི་དེ་ལགས། རྐྱེན་ནི་དེ་ལགས་སོ། །ཀུན་

དགའ་བོ་དེ་ལྟ་བས་ན། བཅའ་བ་ལྔ་པོ་དག་གིས་ནི་སྤངས་པར་མི་འགྱུར་ལ། བཟའ་བ་ལྔ་པོ་དག་གིས་ནི་སྤངས་པར་འགྱུར་ཏེ། བཅའ་བ་ལྔ་པོ་གང་དག་གིས་སྤངས་པར་མི་འགྱུར་ཞེ་ན། བཅའ་བར་བྱ་བ་རྩ་བ་དང་། སྡོང་བུ་དང་། འདབ་མ་དང་། མེ་ཏོག་དང་། འབྲས་བུ་དག་སྟེ།

བཅའ་བ་ལྔ་པོ་དེ་དག་གིས་ནི་སྤངས་པར་མི་འགྱུར་རོ། །བཟའ་བ་ལྔ་པོ་གང་དག་གིས་སྤངས་པར་འགྱུར་བ་དག་གང་ཞེ་ན། བཟའ་བར་བྱ་བ་འབྲས་ཆན་དང་། ཟན་དྲོན་དང་། ཤ་དང་། སྣུམ་ཁུར་དང་། འདེ་གུ་དག་སྟེ། བཟའ་བ་ལྔ་པོ་དེ་དག་གིས་ནི་སྤངས་པར་འགྱུར་རོ། །བཅའ་

བ་ལྔ་པོ་དག་འཆོས་ནས་ནི་བཟའ་བ་ལྔ་པོ་དག་བཟའ་བར་བྱའི། བཟའ་བ་ལྔ་པོ་དག་ཟོས་ནས་ནི་བཅའ་བ་ལྔ་པོ་དག་བཅའ་བར་མི་བྱའོ། །དགེ་སློང་གིས་བཟའ་བ་ལྔ་པོ་དག་ཟོས་ནས་བཅའ་བ་ལྔ་པོ་དག་འཆའ་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་བཅའ་བ་ལྔ་པོ་

དག་གིས་ནི་སྤངས་པར་མི་འགྱུར་ལ། བཟའ་བ་ལྔ་པོ་དག་གིས་ནི་སྤངས་པར་འགྱུར་རོ་ཞེས་བཀའ་སྩལ་ནས། དེ་དག་དེས་འབགས་པའི་ལག་པ་དག་དང་། དེས་གོས་པའི་ལྷུང་བཟེད་དག་གིས་བདག་ཅག་གིས་སྤངས་སོ་ཞེས་ཟ་བར་མི་བྱེད་པས་དེ་དག་རིད་པ་དང་། ཉམ་ཆུང་བ་དང་།

རྐེ་བ་དང་། སྐམ་པ་དང་། ལུས་མ་ཐོབ་པར་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་ངས་བཅའ་བ་ལྔ་པོ་དག་གིས་ནི་སྤངས་པར་མི་འགྱུར་ལ། བཟའ་

བ་ལྔ་པོ་དག་གིས་ནི་སྤངས་པར་འགྱུར་རོ་ཞེས་བྱས་ནས། གང་དག་གིས་ད་ལྟར་དགེ་སློང་དག་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་གྱུར་པའི་རྒྱུ་ནི་གང་ཡིན། རྐྱེན་ནི་གང་ཡིན། བཙུན་པ་བཅོམ་ལྡན་འདས་ཀྱིས་བཅའ་བ་ལྔ་པོ་དག་གིས་ནི་

Vol. 7 · folio 143a

སྤངས་པར་མི་འགྱུར་ལ། བཟའ་བ་ལྔ་པོ་དག་གིས་ནི་སྤངས་པར་འགྱུར་རོ་ཞེས་བཀའ་སྩལ་ནས་དེ་དག་དེས་འབགས་པའི་སུག་པ་དག་དང་། དེས་གོས་པའི་ལྷུང་བཟེད་དག་གིས་བདག་ཅག་གིས་སྤངས་སོ་ཞེས་འཚལ་བར་མི་བགྱིད་པས་དེ་དག་རིད་པ་དང་། ཉམ་ཆུང་བ་

དང་། རྐེ་བ་དང་། སྐམ་པ་དང་། ལུས་མ་ཐོབ་པར་གྱུར་ཏེ། བཙུན་པ་གང་གིས་ད་ལྟར་དགེ་སློང་དག་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་གྱུར་པའི་རྒྱུ་ནི་དེ་ལགས། རྐྱེན་ནི་དེ་ལགས་སོ། །ཀུན་དགའ་བོ་དེ་ལྟ་བས་ན། རྒྱུ་ལྔས་ནི་

སྤངས་པར་བརྗོད་པར་བྱ་ཞིང་། རྒྱུ་ལྔས་ནི་མ་སྤངས་པར་བརྗོད་པར་བྱའོ། །རྒྱུ་ལྔ་པོ་གང་དག་གིས་སྤངས་པར་བརྗོད་པར་བྱ་ཞེ་ན། ཟས་ཡོད་པ་དང་། ཟས་སྟོབས་པ་ཡོད་པ་དང་། ཟས་བརྩམས་པ་ཡོད་པ་དང་། ཟས་སྤངས་པ་ཡོད་པ་དང་། སྤྱོད་ལམ་ལས་ཉམས་པས་སོ། །

ཇི་ལྟར་ཟས་ཡོད་པས་ཤེ་ན། བཅའ་བ་ལྔ་པོ་དང་། བཟའ་བ་ལྔ་པོ་དག་ཡོད་པས་ཏེ། དེ་ལྟར་ཟས་ཡོད་པས་སོ། །ཇི་ལྟར་ཟས་སྟོབས་པ་ཡོད་པས་ཤེ་ན། བུད་མེད་དམ། སྐྱེས་པའམ། མ་ནིང་ཡོད་པས་ཏེ། དེ་ལྟར་ཟས་སྟོབས་པ་ཡོད་པས་སོ། །ཇི་ལྟར་ཟས་བརྩམས་པ་

ཡོད་པས་ཤེ་ན། བཅའ་བ་ལྔ་པོ་དང་། བཟའ་བ་ལྔ་པོ་དག་ཀུན་དུ་བརྩམས་པ་ཡོད་པས་ཏེ། དེ་ལྟར་ཟས་བརྩམས་པ་ཡོད་པས་སོ། །ཇི་ལྟར་ཟས་སྤངས་པ་ཡོད་པས་ཤེ་ན། བཅའ་བ་ལྔ་པོ་དང་། བཟའ་བ་ལྔ་པོ་དག་སྤངས་པ་ཡོད་པས་ཏེ། དེ་ལྟར་ཟས་སྤངས་པ་ཡོད་པས་སོ། །

ཇི་ལྟར་སྤྱོད་ལམ་ལས་ཉམས་པས་ཤེ་ན། སྟན་གང་ལ་འདུག་པར་གྱུར་པའི་སྟན་དེ་ལས་ལངས་པར་གྱུར་པ་སྟེ། དེ་ལྟར་སྤྱོད་ལམ་ལས་ཉམས་པས་ཏེ། རྒྱུ་ལྔ་པོ་དེ་དག་གིས་ནི་སྤངས་པར་བརྗོད་པར་བྱའོ། །རྒྱུ་ལྔ་པོ་གང་དག་གིས་མ་སྤངས་པར་བརྗོད་པར་བྱ་ཞེ་ན། ཟས་མེད་པ་དང་།

ཟས་སྟོབས་པ་མེད་པ་དང་། ཟས་བརྩམས་པ་མེད་པ་དང་། ཟས་སྤངས་པ་མེད་པ་དང་། སྤྱོད་ལམ་ལས་མ་ཉམས་པས་སོ། །ཇི་ལྟར་ཟས་མེད་པས་ཤེ་ན། བཅའ་བ་ལྔ་པོ་དང་། བཟའ་བ་ལྔ་པོ་དག་མེད་པས་ཏེ། དེ་ལྟར་ཟས་མེད་པས་སོ། །ཇི་ལྟར་ཟས་སྟོབས་པ་མེད་

Vol. 7 · folio 143b

པས་ཤེ་ན། བུད་མེད་དམ། སྐྱེས་པའམ། མ་ནིང་མེད་པས་ཏེ། དེ་ལྟར་ཟས་སྟོབས་པ་མེད་པས་སོ། །ཇི་ལྟར་ཟས་བརྩམས་པ་མེད་པས་ཤེ་ན། བཅའ་བ་ལྔ་པོ་དག་དང་། བཟའ་བ་ལྔ་པོ་དག་ཀུན་དུ་བརྩམས་པ་མེད་པས་ཏེ། དེ་ལྟར་ཟས་བརྩམས་པ་མེད་པས་སོ། །ཇི་

ལྟར་ཟས་སྤངས་པ་མེད་པས་ཤེ་ན། བཅའ་བ་ལྔ་པོ་དག་དང་། བཟའ་བ་ལྔ་པོ་དག་སྤངས་པ་མེད་པས་ཏེ། དེ་ལྟར་ཟས་སྤངས་པ་མེད་པས་སོ། །ཇི་ལྟར་སྤྱོད་ལམ་ལས་མ་ཉམས་པས་ཤེ་ན། སྟན་གང་ལ་འདུག་པར་གྱུར་པའི་སྟན་དེ་ལས་ལངས་པར་མ་གྱུར་པས་ཏེ། དེ་ལྟར་སྤྱོད་

ལམ་ལས་མ་ཉམས་པས་ཏེ། རྒྱུ་ལྔ་པོ་དེ་དག་གིས་ནི་མ་སྤངས་པར་བརྗོད་པར་བྱའོ། །གཞན་ཡང་རྒྱུ་ལྔས་ནི་སྤངས་པར་བརྗོད་པར་བྱ་ཞིང་། རྒྱུ་ལྔས་ནི་མ་སྤངས་པར་བརྗོད་པར་བྱའོ། །རྒྱུ་ལྔ་པོ་གང་དག་གིས་སྤངས་པར་བརྗོད་པར་བྱ་ཞེ་ན། རུང་བས་སྤོང་བར་བྱེད་པ་དང་། རུང་བ་དང་

འདྲེས་པས་སྤོང་བར་བྱེད་པ་དང་། གསོག་འཇོག་མ་བྱས་པས་སྤོང་བར་བྱེད་པ་དང་། གསོག་འཇོག་མ་བྱས་པ་དང་འདྲེས་པས་སྤོང་བར་བྱེད་པ་དང་། སྤྱོད་ལམ་ལས་ཉམས་པས་ཏེ། རྒྱུ་ལྔ་པོ་དེ་དག་གིས་སྤངས་པར་བརྗོད་པར་བྱའོ། །རྒྱུ་ལྔ་པོ་གང་དག་གིས་མ་སྤངས་པར་བརྗོད་པར་བྱ་

ཞེ་ན། མི་རུང་བས་སྤོང་བར་བྱེད་པ་དང་། མི་རུང་བ་དང་འདྲེས་པས་སྤོང་བར་བྱེད་པ་དང་། གསོག་འཇོག་བྱས་པས་སྤོང་བར་བྱེད་པ་དང་། གསོག་འཇོག་བྱས་པ་དང་འདྲེས་པས་སྤོང་བར་བྱེད་པ་དང་། སྤྱོད་ལམ་ལས་མ་ཉམས་པས་ཏེ། རྒྱུ་ལྔ་པོ་དེ་དག་གིས་ནི་མ་སྤངས་པར་བརྗོད་

པར་བྱའོ། །གཞན་ཡང་ཚིག་ལྷག་མ་མེད་པ་ལྔས་ནི་སྤངས་པར་བརྗོད་པར་བྱ་ཞིང་། ཚིག་ལྷག་མ་དང་བཅས་པ་ལྔས་ནི་མ་སྤངས་པར་བརྗོད་པར་བྱའོ། །ཚིག་ལྷག་མ་མེད་པ་ལྔ་གང་ཞེ་ན། ཐོང་ཤིག་ཅེས་བྱ་བ་དང་། བྱིན་ཅིག་ཅེས་བྱ་བ་དང་། སོང་ཤིག་ཅེས་བྱ་བ་དང་། ཟོས་

ཟིན་ཏོ་ཞེས་བྱ་བ་དང་། ཆོག་གོ་ཞེས་བྱ་བ་སྟེ། ཚིག་ལྷག་མ་མེད་པ་ལྔ་པོ་དེ་དག་གིས་ནི་སྤངས་པར་བརྗོད་པར་བྱའོ། །ཚིག་ལྷག་མ་དང་བཅས་པ་ལྔ་གང་ཞེ་ན། རེ་ཞིག་ཐོང་ཤིག་ཅེས་བྱ་བ་དང་། རེ་ཞིག་བྱིན་ཅིག་ཅེས་བྱ་བ་དང་། རེ་ཞིག་སོང་ཤིག་ཅེས་བྱ་བ་དང་། རེ་ཞིག་ཟོས་ཟིན་ཏོ་

Vol. 7 · folio 144a

ཞེས་བྱ་བ་དང་། རེ་ཞིག་ཆོག་གོ་ཞེས་བྱ་བ་སྟེ། ཚིག་ལྷག་མ་དང་བཅས་པ་ལྔ་པོ་དེ་དག་གིས་ནི་མ་སྤངས་པར་བརྗོད་པར་བྱའོ། །བཅོམ་ལྡན་འདས་ཀྱིས་དགེ་སློང་གིས་སྤངས་པས་བཟའ་བར་མི་བྱའོ་ཞེས་བཀའ་སྩལ་ནས་དྲུག་སྡེ་དག་སྤངས་པས་ཀྱང་ཟ་བར་བྱེད། མ་སྤངས་

པས་ཀྱང་ཟ་བར་བྱེད་ནས་དགེ་སློང་དོན་ཉུང་ངུ་དག་བཅོམ་ལྡན་འདས་ཀྱིས་དགེ་སློང་གིས་སྤངས་པས་བཟའ་བར་མི་བྱའོ་ཞེས་བཀའ་སྩལ་ན། ཅིའི་ཕྱིར་དགེ་སློང་དག་སྤངས་པས་ཀྱང་ཟ་བར་བྱེད། མ་སྤངས་པས་ཀྱང་ཟ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་

སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་

རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ངས་དགེ་སློང་གིས་སྤངས་པས་བཟའ་བར་མི་བྱའོ་ཞེས་བཀའ་སྩལ་ན་ཁྱེད་སྤངས་པས་ཀྱང་ཟ་བར་བྱེད། མ་སྤངས་པས་ཀྱང་ཟ་བར་བྱེད་པ་

བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་

རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་

ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟས་ཟོས་ཟིན་ཅིང་སྤངས་པ་ལས་བཅའ་བའམ། བཟའ་བ་འཆའ་འམ་ཟ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words