འདུལ་བ་ཕྲན་ཚེགས་ཀྱི་གཞི

Sanskrit title (Tibetan script, as in the text) བི་ན་ཡ་ཀྵུ་དྲ་ཀ་བསྟུ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 11 · folio 58b

ངོ་མཚར་དུ་གྱུར་ཏེ་སྨྲས་པ། བདག་ཅག་གི་བསོད་ནམས་ཀྱིས་དབང་ཆེ་བར་གྲགས་པའི་སེམས་ཅན་འདི་ལས་གཞན་བསོད་ནམས་ཀྱི་སྟོབས་དང་ལྡན་པ་མ་མཐོང་ངོ་། །ཡང་འདི་ནི་གཟུགས་བཟང་བ། བལྟ་ན་སྡུག་པ། མཛེས་པ། མཚན་དང་ལྡན་པ་ཞིག་པས་འདི་ནི་རྒྱལ་སྲིད་ལ་གཞག་

པར་འོས་སོ་ཞེས་གཅིག་ཏུ་ངེས་པར་བྱས་ནས་བུ་ལོངས་ལོངས་ཞེས་བསླང་ངོ་། །དེ་ཡང་ལངས་ཏེ་དྲིས་པ། ང་བསླང་སྟེ་ཅི་བྱ། དེ་དག་གིས་སྨྲས་པ། རྒྱལ་པོར་གཞུག་གོ། །དེས་སྨྲས་པ། རྒྱལ་པོ་ཉལ་བ་དེ་ལྟར་བསླང་ངམ། བློན་པོ་རྣམས་ཀྱིས་སྨྲས་པ། འོ་ན་ཇི་ལྟར་

བསླང་། གཞོན་ནུས་སྨྲས་པ། གླུ་དང་། སིལ་སྙན་དང་། རོལ་མོའི་སྒྲ་མི་གྲག་པས་བསླང་མོད། དེ་རྣམས་ཀྱིས་དེ་ཐོས་པ་དང་འདི་སྙམ་དུ་འདི་ནི་རིགས་དམའ་བ་ལས་བྱུང་བ་མ་ཡིན་གྱི་འདི་ངེས་པར་རིགས་མཐོན་པོ་ལས་སྐྱེས་པ་ཡིན་ནོ་སྙམ་ནས་དེ་དག་གིས་དྲིས་པ། ཁྱོད་སུ་ཞིག །

སུའི་བུ་ཡིན། དེ་ནས་ཁྱེའུ་གཞོན་ནུ་དེས་ཀྱང་སེང་གེའི་བཞིན་དུ་བསྒྱེངས་ནས་རང་གི་རིགས་སྨྲས་པ། ལུས་འཕགས་ཀྱི་རྒྱལ་པོ་སྐྱེད་པ་ཞེས་བྱ་བ་དེའི་བུ་ནི་བཟའ་བཏུང་ངོ་། །བཟའ་བཏུང་དེའི་བུ་ནི་བཟའ་བཏུང་མང་པོ་ཞེས་བྱ་སྟེ་ང་ཡིན་ནོ། །དེ་ནས་བློན་པོ་དྲུག་པོ་རྣམས་འཛུམ་

ཕྱུང་ནས་བདག་ཅག་གིས་ནི་བདག་ཅག་ཉིད་ཀྱི་གཞོན་ནུ་རྙེད་དོ་ཞེས་སྨྲས་སོ། །དེ་ནས་གནས་དེ་ཉིད་ནས་སྐྱེ་བོའི་ཚོགས་ཆེན་པོས་ཡོངས་སུ་བསྐོར་ཅིང་གླུ་དང་། སིལ་སྙན་དང་། རོལ་མོའི་སྒྲ་དང་། ཤིས་པར་བརྗོད་པ་ལ་སོགས་པས་མདུན་དུ་དྲངས་ཏེ་གྲོང་ཁྱེར་དུ་བཅུག་ནས་

རྒྱལ་པོར་དབང་བསྐུར་ཏོ། །གང་གི་ཕྱིར་འདིས་རྒྱལ་པོའི་རྒྱུད་ཆད་པ་བསབས་པ་དེའི་ཕྱིར་མིང་སྐྱེད་པ་ཁོ་ནར་བཏགས་ནས། དེའི་མིང་བཟའ་བཏུང་མང་པོ་ཞེས་བྱ་བ་གང་ཡིན་པ་དེ་མེད་པར་གྱུར་ཏོ། །དེ་ནས་དེ་རྒྱལ་སྲིད་བྱེད་དུ་འཇུག་པ་ན་བྱིས་པའོ་སྙམ་ནས་བློན་པོ་རྣམས་ཀྱིས་དེ་ཁྱད་དུ་

བསད་དེ་དེ་ལ་དབང་ཅུང་ཟད་ཀྱང་མེད་དོ། །དེ་ནས་དུས་གཞན་ཞིག་ན་རྒྱལ་པོ་བཟའ་བཏུང་མང་པོ་ཡུལ་བལྟར་སོང་སྟེ། དེས་གྲོང་དང་། གྲོང་ཁྱེར་དང་། ཚོང་དུས་རྣམས་བལྟས་ནས་གྲོང་དང་། གྲོང་ཁྱེར་དང་། རི་འོར་པ་འདི་རྣམས་སུའི་ཡིན་ཞེས་དྲིས་པ་དང་། དེ་དག་གིས་བློན་

Vol. 11 · folio 59a

པོ་དེ་དྲུག་ཁོ་ནའི་ལགས་སོ་ཞེས་སྨྲས་པ་དང་། དེ་གཅིག་པུས་བསམས་པ། གྲོང་དང་། གྲོང་ཁྱེར་དང་། རི་འོར་པ་འདི་སུའི་ཡིན་ཞེས་དེ་སྐད་དུ་གང་དང་གང་ལས་དྲིས་པ་དེ་དག་ཐམས་ཅད་དེ་སྐད་ཟེར་བས་བདག་ལྟ་ཞིག་བཟའ་བ་དང་བགོ་བ་ཙམ་ལ་དབང་ཕྱུག་བྱེད་

ཀྱི་གཞན་ཅི་ལ་ཡང་མ་ཡིན་ནོ་སྙམ་དུ་རང་གིས་རིག་ནས་དེ་སེམས་ཁོང་གི་རྒྱ་མཚོར་ཆུད་ནས་འདི་ཇི་ལྟར་བྱ་ཞེས་སེམས་སོ། །དེ་དེ་ལྟར་སེམས་པ་ན་ལྷ་ཞིག་གིས་རྒྱལ་པོ་མི་དགའ་བར་མ་བྱེད་ཅིག །འདི་ལྟར་ཁྱོད་ཉིད་ཀྱི་ཡུལ་ན་རི་འོར་གང་པོའི་མཚན་ཞེས་བྱ་བ་དེ་ན་སྣ་ལ་གཏོགས་པ་གང་

པོ་ཞེས་བྱ་བ་དེ་ལ་བུ་སྨན་ཆེན་པོ་ཞེས་བྱ་བ་ཞིག་ཡོད་པར་འགྱུར་གྱིས་དེ་ཁྱོད་ཀྱིས་བློན་པོར་ཆུག་ཤིག་དང་། དེས་ཡུལ་བདག་གིར་བྱས་ནས་ཁྱོད་ལ་འབུལ་བས་ཁྱོད་ལ་ཕན་པ་དང་། བདེ་བ་དང་། འདོད་པ་དང་ལྡན་པར་འགྱུར་རོ་ཞེས་བསྒོའོ། །དེ་ནས་བཟའ་བཏུང་མང་པོས་མི་

དག་མངགས་ཏེ་རི་འོར་གང་པོའི་མཚན་དེ་ན་སྣ་ལ་གཏོགས་པ་གང་པོ་ཞེས་བྱ་བ་དེ་ཚོལ་ཏོ། །གལ་ཏེ་རྙེད་དང་དེའི་ཆུང་མ་ལ་བུ་ཡོད་དམ་མེད་རྟོགས་ཤིག་ཅེས་བསྒོའོ། །དེ་དག་སོང་སྟེ་མཐོང་ནས་དྲིས་ན་དེས་བདག་གི་ཆུང་མ་ལ་བུ་ཡོད་དོ་ཞེས་སྨྲས་པ་དང་། དེ་དག་སླར་འོངས་ནས་

རྒྱལ་པོ་ལ་གསོལ་པ། རྒྱལ་པོ་སྣ་ལ་གཏོགས་པ་དེ་མཆིས་ཏེ་དེའི་མཆིས་འབྲང་ཡང་སྦྲུམ་ལགས་སོ། །དེ་ནས་རྒྱལ་པོས་ཡི་གེ་སྤྲིང་སྟེ། གང་པོ་བཀུག་ནས་བཤེས་པའི་ཚིག་གིས་དེ་ལ་རི་འོར་དེ་བྱིན་ནས་འདིར་རང་གི་བུ་མའི་ལྟོ་ན་འདུག་པ་དེ་དེང་ཕྱིན་ཆད་ཡོངས་སུ་

སྐྱོངས་ལ་ཅི་ནས་ཀྱང་དེ་ཡན་ལག་གང་ཡང་ཉམས་པར་མི་འགྱུར་བ་དེ་ལྟར་གྱིས་ཤིག་ཅེས་བསྒོའོ། །དེ་ནས་དེ་ཟླ་བ་དགུ་ཚང་བ་དང་ཁྱེའུ་གཟུགས་བཟང་བ། མཛེས་པ། བལྟ་ན་སྡུག་པ་ཞིག་བཙས་ནས་ཅི་འབྱོར་བའི་བཙས་སྟོན་རྒྱ་ཆེར་བྱས་ཏེ། ཁྱེའུ་འདི་མིང་ཅིར་གདགས་

ཞེས་བྱས་ན་དེའི་མས་སྨྲས་པ། བདག་འདི་ལྟར་ཡུན་རིངས་སུ་ནད་བུ་ཅན་དུ་གྱུར་ཏེ། སྨན་པ་དང་སྨན་དང་། ནད་གཡོག་རྣམས་ཀྱིས་ནད་ཞི་བར་བྱ་མ་ནུས་པ་ལས་གང་གི་ཚེ་ཁྱེའུ་འདི་ལྟོར་ཞུགས་པ་དེ་ཉིད་ནས་ནད་ཞི་བར་གྱུར་པས་དེས་ན་འདིའི་མིང་སྨན་ཆེན་པོར་གདགས་སོ། །སྨྲས་

Vol. 11 · folio 59b

པ། སྨན་རྣམས་ཀུན་གྱི་ནང་ན་ནི། །བདག་གི་བུ་ནི་སྨན་ཆེན་པོ། །འདི་ནི་སྨན་པས་ལྷག་པའི་སྨན། །དེ་ལྟས་འདིའི་མིང་སྨན་ཡིན་ནོ། །དེ་ནས་སྨན་ཆེན་པོ་ཕའི་ཕྲག་པ་ལ་ཞོན་ཏེ་ཁྲུས་བྱ་བའི་ཕྱིར་སྲང་གི་དབུས་ནས་རྫིང་བུར་ཁྱེར་ཏེ་སོང་བ་ལས་རེ་ཞིག་ན་སའི་སྟེང་ན་ཉའི་དུམ་

བུ་ཞིག་འདུག་པ་མཐོང་ནས། དེས་དེ་ལ་རིན་པོ་ཆེ་ཡིན་ནོ་སྙམ་ནས་དེ་རྐང་པའི་མཐེ་བོས་སའི་སྟེང་ནས་བླང་བར་བརྩམས་པ་དང་། ཇི་ཙམ་ན་སྨན་ཆེན་པོས་སྨྲས་པ། ཕ་གཅིག་གང་པོ་རིན་ཆེན་ལྷུང་སྙམ་སྟེ། །ལས་བཏང་མིག་མི་འཛུམས་པར་ཉ་དུམ་ལ། །རྟོག་ཅིང་དེ་ནས་རིན་

ཆེན་ཡིན་པར་སེམས། །ཕ་གཅིག་གང་པོ་རྟོགས་ཤིག་རིན་ཆེན་མིན། །ཉ་དུམ་དམར་པོ་རྐང་གིས་འདྲིལ་བར་ཟད། །རྣམ་ཐོས་བུ་དེ་བག་མེད་སྤྱོད་མ་ཡིན། །དེ་ནས་དེ་རྫིང་དུ་སོང་ནས་གང་པོས་སྨན་ཆེན་པོ་དང་། གོས་རྫིང་འགྲམ་དུ་བཞག་སྟེ་ཁྲུས་བྱ་བའི་ཕྱིར་ཆུར་ཞུགས་

པ་ན་པད་མའི་སྟེང་ན་ཆུ་སྐྱར་ཞིག་འདུག་པ་དང་དེས་ཆུ་སྐྱར་དེ་བཟུང་ངོ་སྙམ་ནས་དེ་དེའི་དྲུང་དུ་སོང་བ་དང་། དེ་ཡང་དེ་ནས་འཕུར་ཏོ། །དེ་ནས་སྨན་ཆེན་པོས་སྨྲས་པ། པད་མའི་སྟེང་ནས་ཆུ་སྐྱར་འཕུར། །ཆུ་སྐྱར་འཕུར་བས་པད་མ་ལྷགས། །པད་མའི་སྟེང་ནས་ཆུ་སྐྱར་མོ། །འཕུར་

བ་རེ་ཞིག་ཕ་གཅིག་གཟིགས། །དེ་ནས་ཡང་དུས་ཕྱི་ཞིག་ན་དེས་སྨན་ཆེན་པོ་ཕྲག་པ་ལ་ཁྱེར་ནས་ཆུ་བོ་གང་གཱར་ཁྲུས་བྱེད་དུ་སོང་སྟེ། དེས་དེ་དང་གོས་ཆུ་འགྲམ་དུ་བཞག་ནས་ཆུར་ཞུགས་ཏེ་ཁྲུས་བྱེད་པ་ན་ཁར་གཞོང་ཞིག་ཆུ་བོས་ཁྱེར་བ་དེའི་སྟེང་ན་ངང་མོ་ཞིག་འདུག་པ་མཐོང་ངོ་། །དེ་མཐོང་

ནས་སྨན་ཆེན་པོས་སྨྲས་པ། ཆུ་བོ་གང་གཱས་ཁར་གཞོང་ཁྱེར། །ཁར་གཞོང་དེ་སྟེང་ངང་མོ་འདུག །ཁར་གཞོང་ངང་མོ་ལྷན་ཅིག་ཏུ། །གང་གཱས་ཁྱེར་བ་ཕ་གཅིག་གཟིགས། །ཇི་ཙམ་དུ་དུས་གཞན་ཞིག་ན་ཡང་ཁྲུས་བྱེད་ཅིང་སྨན་ཆེན་པོ་ཆུ་འགྲམ་དུ་གཞག་པ་དང་། རེ་ཞིག་ན་ཆུ་

བོ་གང་གཱའི་རྒྱུན་ཕྱོགས་སུ་བུམ་པ་ཞིག་ཁྱེར་བ་དེའི་སྟེང་ན་ཆུ་སྲེགས་ཞིག་འདུག་པ་དེ་མཐོང་ནས་སྨན་ཆེན་པོས་ཕ་ལ་སྨྲས་པ། ཆུ་བོ་གང་གཱས་བུམ་པ་ཁྱེར། །དེ་ཡི་སྟེང་ན་ཆུ་སྲེགས་འདུག །རེ་ཞིག་ཕ་གཅིག་བུམ་པ་ནི། །ཆུ་སྲེགས་གང་གཱ་བཅས་ཏེ་གཟིགས། །ཇི་ཙམ་དུས་

Vol. 11 · folio 60a

གཞན་ཞིག་ན་ཡང་ཁྲུས་བྱེད་པར་འདོད་ནས་ཆུ་བོ་གང་གཱར་སོང་སྟེ། དེས་སྨན་ཆེན་པོ་ཆུ་འགྲམ་དུ་བཞག་ནས་དེར་ཁྲུས་བྱེད་པ་ལ་ཞུགས་པ་དང་། རེ་ཞིག་ན་ཆུ་བོ་གང་གཱའི་རྒྱུན་ཕྱོགས་སུ་ལུག་ཐུག་ཅིག་ཁྱེར་བ་དེའི་སྟེང་ན་བྱ་གར་ཞིག་འདུག་པ་མཐོང་ངོ་། །དེ་ནས་

དེ་སྨན་ཆེན་པོས་མཐོང་ནས་སྨྲས་པ། ཆུ་བོ་གང་གཱས་ལུག་ཐུག་ཁྱེར། །དེ་བཞིན་དེ་སྟེང་བྱ་གར་འདུག །ལུག་ཐུག་བྱ་གར་ལྷན་ཅིག་ཏུ། །གང་གཱས་ཁྱེར་བ་ཡབ་གཅིག་གཟིགས། །དེ་ནས་སྨན་ཆེན་པོ་དེ་ན་བྱིས་པ་རྣམས་དང་ལྷན་ཅིག་རྩེ་བ་ལས་རེ་ཞིག་ན་བྱིས་པ་དེ་

དག་འདུས་ནས་དེ་རྒྱལ་པོར་བཅུག་གོ། །དེས་ཀྱང་ཁ་ཅིག་བློན་པོར་བཅུག་ནས་དེ་དེ་དག་དང་ལྷན་ཅིག་རྩེ་ཞིང་འདུག་གོ། །ཅི་ཙམ་ན་བྲམ་ཟེ་རྒན་པོ་ཞིག་ཆུང་མ་གཞོན་ནུ་དར་ལ་བབ་པ་ཞིག་དང་ཁྱོ་ཤུག་ལྷན་ཅིག་ཏུ་ལམ་དུ་ཞུགས་ནས་ཡུལ་གཞན་དུ་འགྲོ་བ་ལས་རེ་ཞིག་ན་

བྲམ་ཟེ་བཤང་གཅིའི་སར་སོང་ངོ་། །དེ་ནས་གཡོན་ཅན་ཕོ་ཞིག་གིས་འཕྲིགས་ནས་བུད་མེད་དེའི་དྲུང་དུ་སོང་སྟེ་སྨྲས་པ། བཟང་མོ་ཁྱོད་ཀྱི་ཕ་དེ་གར་སོང་། བུད་མེད་ཀྱིས་སྨྲས་པ། གང་ཞིག །དེ་ནས་གཡོན་ཅན་གྱིས་སྨྲས་པ། དེ་མེས་པོ་ཡིན་པ་ལྟ་ཞིག །སྨྲས་པ། འདི་

ཅི་ཟེར་བ་ཞིག །དེ་ནས་གཡོན་ཅན་གྱིས་སྨྲས་པ། དེ་ཁྱོད་ཀྱི་ཡང་མེས་པོ་ཡིན་པ་ལྟ་ཞིག །བུད་མེད་ཀྱིས་སྨྲས་པ། ངའི་ཕ་ཡང་མ་ཡིན། མེས་པོ་ཡང་མ་ཡིན། ཡང་མེས་པོ་ཡང་མ་ཡིན་གྱི་དེ་ནི་ངའི་ཁྱོ་ཡིན་ནོ། །དེ་ནས་གཡོན་ཅན་གྱིས་ཅུང་ཟད་ཅིག་བགད་དེ་སྨྲས་པ། བླུན་

མོ་ཁྱོད་གྲོགས་མོའམ་ངོ་ཚ་ཤེས་པ་གཞན་གྱི་དྲུང་དུ་འདི་ལྟ་བུ་ངའི་ཁྱོ་ཡིན་ནོ་ཞེས་སྨྲ་བ་ངོ་མི་ཚའམ། ས་སྐལ་བ་ལྡན་པ་འདིའི་སྟེང་ན་སྐྱེས་བུ་ལྷའི་གཟུགས་འདྲ་བས་རབ་ཏུ་གང་བ་ཁྱོད་ཀྱིས་མ་མཐོང་ངམ། འདི་ལྟ་བུའི་གཟུགས་མཛེས་པ་ཆུད་ཟོས་སོ། །ངས་ཁྱོད་ཀྱི་ཁྱོ་བྱས་ཚུར་

བདག་ཅག་ལྷན་ཅིག་འདོང་། གལ་ཏེ་ཁྱོད་ཀྱི་ཕྱིར་བྲམ་ཟེ་རྒན་པོ་དང་ང་འཐབ་མོ་བྱུང་དང་དེར་ཡང་ཁྱོད་ཀྱིས་སྐྱེ་བོའི་ཚོགས་ཆེན་པོ་ལ་ངའི་ཁྱོ་འདི་ཡིན་ནོ་ཞེས་ང་ཁྱོ་ཡིན་པར་ཕྱེ་ཤིག་ཅེས་བྱས་པ་དང་དེ་དང་གཡོན་ཅན་འགྲོགས་ཏེ་སོང་ངོ་། །བྲམ་ཟེ་ཡང་བཤང་གཅི་དང་བཀྲུ་བཤལ་བྱས་ནས་

Vol. 11 · folio 60b

ལངས་པ་དང་། དེས་དེ་མ་མཐོང་ངོ་། །རེ་ཞིག་ན་སྒང་བུ་མཐོན་པོ་ཞིག་གི་སྟེང་དུ་འཛེགས་ནས་བལྟས་ན་སྐྱེས་པ་གཞན་ཞིག་དང་འགྲོགས་ཏེ་སོང་བ་མཐོང་ནས་བྲམ་ཟེ་དེས་བརྒྱུགས་ཏེ་ལག་པ་ཡ་གཅིག་ནས་བཟུང་ངོ་། །གཡོན་ཅན་གྱིས་ཀྱང་ལག་པ་ཡ་གཅིག་ནས་བཟུང་བ་དང་དེ་ནས་བྲམ་

ཟེས་སྨྲས་པ། ངའི་ཆུང་མ་ཅིའི་ཕྱིར་དབྲོག །གཡོན་ཅན་གྱིས་སྨྲས་པ། འདི་ངའི་ཆུང་མ་ཡིན་ན། ཀྱེ་མ་ཁྱོད་རེའོ་བརྒྱལ། བྲམ་ཟེས་ཀྱང་ངའི་ཡིན་ནོ། །ཞེས་སྨྲས་ནས་དེ་གཉིས་ལམ་ཀར་འཐབ་མོ་བྱུང་སྟེ་ཕར་དྲངས་ཚུར་དྲངས་པ་དང་། གཡོན་ཅན་དེ་དར་ལ་བབ་པས་

སྟོབས་ཆེ་ནས་བྲམ་ཟེ་ལས་དྲངས་ཏེ་ཕྲོགས་སོ། །དེ་ནས་བྲམ་ཟེ་བཅོམ་པས་འབྲོག་དེར་བྲམ་ཟེར་མ་བྱས་ཀྱིས་ར་མདའ་ལོག་ཅེས་བྱས་སོ། །དེའི་ཚེ་ན་སྨན་ཆེན་པོ་བྱིས་པ་རྣམས་དང་ལྷན་ཅིག་དགོན་པ་ན་རྩེ་ཞིང་འདུག་པ་ལས་བྲམ་ཟེར་མ་བྱས་སོ་ཞེས་བྱ་བ་དེ་ཡང་བྱིས་པ་དག་གིས་

ཐོས་སོ། །དེ་ནས་བྱིས་པ་དེ་དག་གིས་སྨྲས་པ། ཀྱེ་སྨན་ཆེན་པོ་ཁྱེད་ཅག་ན་རེ་ང་རྒྱལ་པོའོ་ཞེ་ན། བྲམ་ཟེ་ཕ་བི་བྲམ་ཟེར་མ་བྱས་སོ་ཞེས་འབོད་ན། དེ་ཅིའི་ཕྱིར་འཇིགས་པ་ལས་མི་སྐྱོབ། དེ་ནས་དེས་བྱིས་པ་རྣམས་ལ་སོང་སྟེ་ཁྲིད་དེ་ཤོག་ཤིག་ཅེས་བཀྱེ་བ་དང་། བྱིས་པ་དེ་དག་

གིས་དེ་ཀུན་ཁྲིད་དེ་འོངས་སོ། །འདི་ཅི་ཞིག་ཅེས་དྲིས་པ་དང་། བྲམ་ཟེས་སྨྲས་པ། བདག་གྲོགས་མ་མཆིས་ཤིང་ཉམ་ཆུང་བའི་ཆུང་མ་གཡོན་ཅན་སྟོབས་པོ་ཆེ་འདིས་ཕྲོགས་སོ། །གཡོན་ཅན་གྱིས་སྨྲས་པ། འདི་བརྫུན་མཆི་སྟེ། འདི་ནི་བདག་གི་ཆུང་མ་ལགས་སོ། །བུད་མེད་

དེས་ཀྱང་བདག་གི་ཁྱོ་འདི་ལགས་སོ་ཞེས་གཡོན་ཅན་དེ་ཉིད་ཡིན་པར་ཕྱེའོ། །དེ་ནས་སྨན་ཆེན་པོས་བྲམ་ཟེ་དེ་མ་འོས་པར་ཡི་ཆད་པར་ཤེས་ནས་བགམ་པར་བྱའོ་སྙམ་ནས། ཀྱེ་ནང་རྗེ་ཁྱོད་ད་གཟོད་བུད་མེད་འདི་དང་འགྲོགས་ཏེ་གང་ནས་འོངས། གཡོན་ཅན་གྱིས་སྨྲས་པ། གྱོས་

པོའི་ཁྱིམ་ནས་མཆིས་སོ། །དེར་ཅི་དག་ཟོས་སམ་འཐུངས། དེས་སྨྲས་པ། ཤ་དང་སྣུམ་ཁུར་དང་བེ་ཏང་དང་ཆང་དག་འཚལ་ཏོ།། །།འདུལ་བ་ཕྲན་ཚེགས་ཀྱི་གཞི། བམ་པོ་སུམ་བཅུ་རྩ་གསུམ་པ། སྨན་ཆེན་པོས་སྨྲས་པ། གལ་ཏེ་དེ་ལྟ་ན་སྐྱུགས་ཤིག་དང་།

Vol. 11 · folio 61a

བདེན་ནམ་བརྫུན་བལྟའོ་ཞེས་སྨྲས་པ་དང་། དེས་མཛུབ་མོ་ཁར་བཅུག་སྟེ། སྐྱུགས་ན་ཁ་ཟས་དེ་ལྟ་བུར་ཅང་མ་བྱུང་ངོ་། །བྲམ་ཟེ་དེ་ལ་གང་ནས་འོངས་ཞེས་དྲིས་པ་དང་། བྲམ་ཟེ་དེས་གྱོས་པོའི་ཁྱིམ་ནས་མཆིས་སོ་ཞེས་སྨྲས་སོ། །དེར་ཅི་ཟོས་དེས་དར་

བ་དང་ཟན་དང་ལ་ཕུག་དང་ནས་ཀྱི་ཁུ་བ་རྣམས་ཟོས་ཞེས་སྨྲས་སོ། །དེས་སྐྱུགས་ཤིག་ཅེས་བསྒོ་བ་དང་། དེས་སྐྱུགས་པ་དང་། ཅི་ཟོས་ཅི་འཐུངས་པ་མངོན་དུ་བྱུང་ངོ་། །དེ་ལྟ་བུར་གྱུར་ནས་སྨན་ཆེན་པོས་སྐྱེས་པ་གཡོན་ཅན་འདིས་ནི་གཞོན་ནུ་མ་བསླུས་ཏེ་བྲམ་ཟེའི་ཆུང་མ་

ཕྲོགས་སོ་སྙམ་བསམས་ནས་གཡོན་ཅན་དེ་དབྱུག་པ་དང་ཁུ་ཚུར་གྱིས་བརྡེགས་ནས་མི་ནུབ་པའི་དོང་བརྐོས་ཏེ་མགྲིན་པ་མན་ཆད་བཅུག་ནས་རྨ་བྱའི་མཁྲིས་པས་ཕྲལ་བར་བྲིས་ཏེ་གང་སུ་ཡང་རུང་། བུད་མེད་ལ་འདི་བཞིན་དུ་རྐུ་ན་སྨན་ཆེན་པོས་འདི་ལྟ་བུའི་ཆད་པས་གཅད་དོ། །གང་

གིས་བུད་མེད་བརྐུས་པ་བཞིན་དུ་རྒྱས་པར་བྱིས་པ་རྐུ་བ་དང་། གླང་རྐུ་བ་དང་། ལ་བ་རྐུ་བ་དང་། སྐུད་པ་རྐུ་བ་ལ་སོགས་པ་འདི་ལྟ་བུ་ལྔ་བརྒྱ་ཙམ་བཟུང་ནས་དབྱིག་པ་དང་། ཁུ་ཚུར་གྱིས་བརྡེགས་ཏེ་མགྲིན་པ་མན་ཆད་དོང་དུ་བཅུག་ནས་ཕྲལ་བར་རྨ་བྱའི་མཁྲིས་པས་དེ་རྣམས་ཀྱི་

མིང་དང་། གཞན་གང་ཡང་རུང་རྐུན་པོ་བྱེད་ན་ཐམས་ཅད་སྨན་ཆེན་པོས་འདི་ལྟར་ཆད་པས་གཅད་ཅེས་བྲིས་སོ། །དེ་ནས་བློན་པོ་དྲུག་གིས་ཡུལ་ས་མངོན་དུ་ཟོས་པར་རྒྱལ་པོས་མཐོང་ནས་འདི་སྙམ་དུ་བློ་སྐྱེས་སོ། །སྨན་ཆེན་པོ་དེ་ད་ལྟར་ཅི་འདྲ་བར་འདུག་པ་ལྟད་མོ་བལྟའོ་སྙམ་

ནས། བློན་པོ་རྣམས་ལ་ང་ནི་རི་དགས་ཤོར་དུ་འགྲོའོ་ཞེས་བྱས་ལ་རི་བྲགས་ཀྱི་གྲོང་རྡལ་དུ་བལྟའོ་སྙམ་ནས་རི་དགས་ཤོར་དུ་འགྲོ་བ་ལྟར་བྱས་ཏེ་འཁོར་མང་པོ་འདུས་པ་དང་རི་བྲགས་ཀྱི་གྲོང་རྡལ་ལོགས་སུ་ཆས་པ་དང་། གཡོན་ཅན་ལྔ་བརྒྱ་སའི་དོང་དུ་བཅུག་པས་རྒྱལ་པོ་དེ་མཐོང་

ནས་མང་པོ་ཀུན་གྱིས་རྒྱལ་པོ་ཞེས་བོས་སོ། །རྒྱལ་པོས་སྒྲ་དེ་ཐོས་ན་མི་མི་སྣང་ནས་ཀུན་དུ་བལྟས་ཀྱང་དེ་སྐད་ཀྱི་སྒྲ་གྲག་ནས་དེ་ལ་གཡོན་ཅན་གཅིག་གིས་མཐོང་ནས་རྒྱལ་པོ་ལ་བཟླས་ཏེ། རྒྱལ་པོས་བལྟས་པ་དང་ཕྲལ་བ་ལ་རྨ་བྱའི་མཁྲིས་པས་བྲིས་པ་བཀླགས་ན། གང་བུད་མེད་རྐུ་བ་དང་།

Vol. 11 · folio 61b

བྱིས་པ་རྐུ་བ་དང་། གླང་རྐུ་བ་དང་། ལ་བ་རྐུ་བ་ལ་སོགས་པ་རྣམས་སྨན་ཆེན་པོས་འདི་ལྟ་བུའི་ཆད་པས་གཅད་དོ་ཞེས་བྲིས་སོ། །སྨན་ཆེན་པོ་ལ་སོགས་པ་བྱིས་པ་དེ་རྣམས་རྒྱལ་པོ་འོང་བ་མཐོང་ནས་ཀུན་དུ་བྲོས་སོ། །དེ་ནས་རྒྱལ་པོ་དེས་དེའི་ལས་བྱས་པ་མཐོང་ནས་སེམས་ལ་དགའ་མགུ་

སྟེ་བྱིས་པ་ཡིན་མོད་ཀྱི་འདི་ལྟ་བུ་བྱེད་པ་ལ་བལྟས་ན་འདི་དག་ཉེས་པ་ནི་མ་ཡིན་ནོ་སྙམ་བསམས་ནས་རྒྱལ་པོས་དེ་དག་ཕྱུང་སྟེ་བཀྱེའོ། །པཱུརྞ་ཀཙྪ་ན་གང་པོས་རྒྱལ་པོ་དེར་ཕྱིན་པ་ཐོས་ནས་བུམ་པ་ཆུས་བཀང་བ་དང་། གདུགས་དང་། བ་དན་དང་། རྒྱལ་མཚན་ལ་སོགས་པས་བསུ་བ་དང་། རྒྱལ་

པོས་ཀྱང་མ་འཇིགས་ཤིག་ཅེས་བྱས་ནས་གང་པོ་ལ་ཁྱོད་ཀྱི་བུ་བལྟས་ཁྲིད་དེ་ཤོག་ཅེས་སྨྲས་པ་དང་། གང་པོས་ལྷ་བྱིས་པ་ཆུང་ཆེས་པས་ན་དེ་ལྷའི་སྤྱན་སྔར་མི་དགུག་གོ་ཞེས་གསོལ་ཏོ། །རྒྱལ་པོས་ཡང་ཁྲིད་དེ་ཤོག་ཅེས་སྨྲས་པ་དང་། དེ་ནས་ཕས་ཁྲིད་དེ་འོངས་ནས་རྒྱལ་པོས་

བལྟས་ན་གཟུགས་ལེགས་ཤིང་། བལྟ་ན་སྡུག་པ། བཟང་བ། དཔའ་བོ་ཞིག་ན། བྱིས་པ་སྟེ་ཤེད་མ་རྫོགས་ནས་དེའི་ཕ་ལ་རྣམ་པ་དུ་མར་བསྒོ་ཞིང་གཏང་ནས་སླར་ཆས་སོ། །དུས་ཕྱི་ཞིག་ན་རྒྱལ་པོས་སྨན་ཆེན་པོ་དེ་བློ་ཅི་བདོག་པ་བགམ་ན་ཅི་འདྲི་བར་བྱ་ཞེས་བསམས་ནས་

རྒྱལ་པོ་སྐྱེད་པས་པཱུརྞ་ཀཙྪའི་རི་བྲགས་ཀྱི་གྲོང་རྡལ་དུ་གྲོང་དཔོན་གང་པོ་ལ་ཕོ་ཉ་བཏང་ནས་བྱེ་མ་ལས་བྱས་པའི་ཐག་པ་ཁྲུ་བརྒྱ་པ་ཅིག་འདིར་སྐུར་ཅིག་ཅེས་སྤྲིང་སྟེ། ཕོ་ཉ་དེ་སོང་ནས་རི་བྲགས་ཀྱི་གྲོང་རྡལ་དུ་གང་པོའི་དྲུང་དུ་ཕྱིན་ནས་རྒྱལ་པོས་བཀའ་སྩལ་པ། བྱེ་མ་ལས་བྱས་པའི་

ཐག་པ་ཁྲུ་བརྒྱ་པ་ཅིག་བསྐུར་ཅིག་ཅེས་བྱས་པ་དང་། གྲོང་དཔོན་གང་པོས་དེ་ཐོས་ནས་རབ་ཏུ་སེམས་ཤིང་མི་དགའ་སྐྲག་སྔངས་ཏེ། བདག་འདི་ཙམ་དུ་སྐྱེས་ནས་མ་མཐོང་མ་ཐོས་པའི་ཀླན་ཀ་ཞིག་བདག་ལ་ཚོལ་ལོ་ཞེས་སྨྲས་ཏེ་ཤིན་ཏུ་མི་དགའ་བ་དང་། གང་པོ་ལ་སྨན་ཆེན་པོས་

ཕ་ཅི་ཉེས་ཏེ་མི་དགའ་ཞེས་དྲིས་པ་དང་། ཕས་བུ་བདག་གིས་ཚོར་ཀྱང་མ་ཐོས་མ་མཐོང་བ་རྒྱལ་པོས་ཕས་ནི་ཅིའི་ཐབས་ཞིག་གིས་ཆད་པས་གཅོད་པར་བྱེད་དམ་མི་ཤེས་སོ་ཞེས་སྨྲས་པ་དང་། དེ་ནས་སྨན་ཆེན་པོས་སྨྲས་པ། མི་དེ་བདག་དང་སྤྲོད་ཅིག་དང་རྒྱལ་པོ་སྐྱེད་པ་ལ་ལན་

Vol. 11 · folio 62a

བདག་གིས་སྤྲིང་ངོ་ཞེས་བྱས་པ་དང་། ཕས་ཕོ་ཉ་དང་སྤྲད་པ་དང་། སྨན་ཆེན་པོས་ཕོ་ཉ་ལ་བདག་གི་གསོལ་བ་འདི་རྒྱལ་པོ་ལ་མ་བརྗེད་པར་གྱིས་ཤིག །བདག་ཅག་ཡུལ་སྐོལ་བ་བློ་རྩིང་ལ་མི་མཁས་ཤིང་བླུན་པས་མ་འཚལ་ཏེ། རྒྱལ་པོ་བཀའ་སྩལ་ན་བཀལ་

བར་འཚལ་ན་ལྷས་དཔེ་ཁྲུ་གང་པ་ཅིག་བཀལ་ཏེ་བདག་ལ་སྐུར་ན་དཔེ་དེ་ལས་བལྟས་ཁྲུ་བརྒྱ་བས་སྟོང་ཡང་བཀལ་ཏེ་རྡོ་ཐོག་པར་བགྱིས་ནས་བསྐུར་བར་འཚལ་ལོ་ཞེས་སྤྲིང་བ་དང་། དེ་སོང་སྟེ་རྒྱལ་པོ་ལ་ལྷ་ཁོང་ཏ་འདི་སྐད་མཆིའོ་ཞེས་སྨྲས་པ་དང་། རྒྱལ་པོས་སྨྲས་པ། འདི་སྐད་

གང་པོ་ཟེར་རམ་བུ་ཟེར་ཞེས་དྲིས་ན་ཕོ་ཉས་ལྷ་སྨན་ཆེན་པོ་གཞོན་ནུ་འདི་སྐད་མཆིའོ་ཞེས་སྨྲས་པ་དང་། དེ་ནས་རྒྱལ་པོ་ངོ་མཚར་སྐྱེས་ཏེ་བསམས་པ། འདི་ནི་ལྷས་བསྟན་པ་ཡང་དག་སྟེ། འདིས་ནི་བདག་གི་རྒྱལ་སྲིད་རྒྱས་པར་བྱེད་པར་མངོན་ནོ། །དེ་ནས་ཡང་དུས་ཕྱིས་ཞིག་ན་

རྒྱལ་པོས་སྨན་ཆེན་པོ་བགམ་པར་འདོད་ནས་པཱུརྞ་ཀཙྪའི་རི་བྲགས་ཀྱི་གྲོང་རྡལ་དུ་གང་པོའི་དྲུང་དུ་ཕོ་ཉ་བཏང་སྟེ་འབྲས་ཆན་གཏུན་གྱིས་ཀྱང་མ་བརྡུངས་ལ་དུམ་བུར་ཆག་པ་ཡང་མེད་པར་གྱིས་ཏེ། ཁྱིམ་གྱི་ནང་ན་ཡང་མ་ཡིན། ཕྱི་རོལ་ཀྱང་མ་ཡིན། མེས་ཀྱང་མ་ཡིན། མེ་མེད་

པར་ཡང་མ་ཡིན་པར་ཚོས་ལ། ལམ་དུ་ཡང་ཁྱེར་ཏེ་མི་འོང་། ལམ་མ་ཡིན་པར་ཡང་ཁྱེར་ཏེ་མི་འོང་། ཉི་མས་ཀྱང་མ་ཕོག །གྲིབ་མ་ཡང་མ་ཡིན། བུད་མེད་ཀྱིས་ཀྱང་མི་བསྐུར། སྐྱེས་པས་ཀྱང་མ་ཡིན། བཞོན་པས་མི་བསྐུར། རྐང་པས་ཀྱང་མ་ཡིན་པར་

འབྲས་ཆན་ཞིག་བསྐུར་ཅིག་ཅེས་སྤྲིང་བ་དང་། རྒྱལ་པོའི་བཀའ་ཁྱེར་ནས་ཕོ་ཉ་དེ་རིམ་གྱིས་གྲོང་དང་། གྲོང་ཁྱེར་དང་། གྲོང་རྡལ་ལྟ་ཞིང་རིམ་གྱིས་རི་བྲགས་ཀྱི་གྲོང་རྡལ་ག་ལ་བ་དེར་སོང་སྟེ་ཕྱིན་ནས་གང་པོ་དེ་བོས་ཏེ། གང་པོ་དེ་དང་དགའ་བའི་གཏམ་སྣ་ཚོགས་བྱས་

ནས། དེ་ནས་རྒྱལ་པོའི་ཚིག་ཇི་ལྟ་བུ་ཀུན་བསྒོ་ནས་རྒྱལ་པོས་བཀའ་འདི་སྐད་ཅེས་སྩལ་ཏོ། །ཞེས་སྨྲས་པ་དང་། དེས་ཚིག་དེ་ཐོས་མ་ཐག་ཏུ་དེ་ཤིན་ཏུ་མི་དགའ་རབ་ཏུ་མི་དགའ་བ་དང་། སྨན་ཆེན་པོས་ཕ་ཅི་ཉེས་ཏེ་ཡི་མ་རངས་ཞེས་དྲིས་པ་དང་། གང་པོས་བུ་ཅི་ཉེས་ཏེ་

Vol. 11 · folio 62b

མི་སེམས། རྒྱལ་པོ་སྐྱེད་པས་རྣམ་པ་འདི་ལྟ་བུ་དག་བསྒོའོ་ཞེས་སྨྲས་སོ། །ཇི་ལྟ་བུ་ཞེས་དྲིས་པ་དང་། གང་པོས་སྔ་མ་བཞིན་དུ་ཐམས་ཅད་ཞིབ་ཏུ་སྨྲས་པ་དང་། དེ་ནས་སྨན་ཆེན་པོས་སྨྲས་པ། ཕ་མི་དགའ་བར་མ་བྱེད་ཅིག །བདག་གིས་ཀུན་ནུས་པར་བྱའོ། །དེ་

ནས་སྨན་ཆེན་པོས་འབྲས་ཉི་མ་ལ་བསྐམས་ནས་སྐྱེས་པ་དང་། བུད་མེད་ཕལ་པོ་ཆེ་སོགས་ཏེ་མི་གཅིག་ཀྱང་འབྲས་སྤར་རེ་རེ་བྱིན་ནས་སེན་མོས་ཤུས་ལ་མ་ཆག་པར་བྱོས་ཏེ་འབྲུ་རེ་རེ་ནས་སོལ་ཅིག །དེ་དག་གིས་མ་ཆག་པར་བསལ་ཏེ་རྫེའུར་བླུགས་ཏེ་སྒོའི་ཐེམ་པའི་སྟེང་དུ་བཙོས་

ནས་མེས་ཀྱང་མ་ཡིན། མེ་མེད་པར་ཀྱང་མ་ཡིན་པར་ཚོས་ཤིག་པ་དེ་ནི་དེའི་ངོས་སུ་ནི་མེ་སྟེང་དུ་ནི་ཉི་མས་བཙོས་སོ། །ལམ་དུ་མ་ཡིན། ལམ་མ་ཡིན་པར་ཡང་མ་ཡིན་པར་ཁྱེར་ཏེ་ཤོག་ཤིག་པ་ནི་སྐྱེས་བུ་ལ་བསྒོ་བ། རྐང་པ་ཡ་གཅིག་ལམ་དུ་སོང་ལ་རྐང་པ་ཡ་གཅིག་ལམ་མ་ཡིན་པར་

སོང་ཤིག །ཉི་མ་ལ་ཡང་མ་ཡིན། གྲིབ་མ་ལ་ཡང་ཁྱེར་ཏེ་མ་འོང་ཤིག་པ་ནི་མི་དེ་ལ་བསྒོ་བ་དབྱུག་པའི་རྩེ་མོ་ལ་རྫེའུ་ཆིངས་ལ་གོས་སྲབ་མོས་གཡོགས་ཏེ་སོང་ཤིག །བཞོན་པས་ཀྱང་མ་ཡིན། རྐང་པས་ཀྱང་མ་ཡིན་པར་ཁྱེར་ཏེ་ཤོག་ཤིག་པ་ནི་མི་དེ་ལ་བསྒོ་བ། རྐང་པ་ཡ་གཅིག་ལྷམ་

གྱོན་ཡ་གཅིག་ལྷམ་མེད་པར་བྱོས་ལ་སོང་ཤིག །སྐྱེས་པས་ཀྱང་མ་ཡིན། བུད་མེད་ཀྱིས་ཀྱང་མ་ཡིན་པས་ཁྱེར་ཏེ་ཤོག་ཤིག་པ་ནི་མ་ནིང་ལ་བསྐུར་རོ། །རྒྱལ་པོ་སྐྱེད་པའི་དྲུང་དུ་དེས་ཁྱེར་ཏེ་འོངས་ནས། རྒྱལ་པོ་སྐྱེད་པས་མི་དེ་ལ་དྲིས་པ། དེས་རྒྱལ་པོ་ལ་ཞིབ་ཏུ་སྨྲས་པ་དང་།

རྒྱལ་པོས་ཐོས་ནས་དགའ་སྟེ། ཅི་གང་པོས་བསྒོས་ཏེ་བསྐུར་རམ། འོན་ཏེ་སྨན་ཆེན་པོས་བསྒོ་ཞེས་དྲིས་པ་དང་། ཕོ་ཉས་སྨན་ཆེན་པོས་བསྐུར་རོ་ཞེས་སྨྲས་སོ། །དེ་ནས་རྒྱལ་པོས་སྨྲས་པ། སྨན་ཆེན་པོ་དེ་ནི་རྟོགས་པ་དང་། ལན་ལྡོན་པ་དང་། ཚུལ་དང་། ཆོ་ག་ལ་

སོགས་པར་ལྡན་ནོ། །དེ་ནས་དུས་ཕྱིས་ཞིག་ན་ཕོ་ཉ་གཞན་ཞིག་བཏང་སྟེ་འདི་ལྟར་སྐྱེད་མོས་ཚལ་ལྡུམ་ར་དང་། བཟའ་ཤིང་དང་། རྫིང་བུ་ལྡན་པ་སྐུར་ཅིག་ཅེས་སྤྲིང་བ་དང་། དེ་ནས་ཕོ་ཉ་དེ་པཱུརྞ་ཀཙྪའི་གྲོང་རྡལ་དུ་ཕྱིན་པ་དང་། གང་པོ་ལ་རྒྱལ་པོས་འདི་སྐད་ཅེས་བཀའ་སྩལ་

Vol. 11 · folio 63a

ཏོ། །སྐྱེད་མོས་ཚལ་ལྡུམ་ར་དང་། བཟའ་ཤིང་དང་། རྫིང་བུ་བཅས་པ་ཞིག་སྐུར་ཅིག་ཅེས་བསྒོ་བ་དང་། གང་པོས་དེ་ཐོས་ནས་མི་དགའ་སྟེ། སྐྱེད་མོས་ཚལ་འདི་སྔོན་མ་མཐོང་ན་ཐབས་ཇི་ལྟ་བུར་བྱ་ཞེས་རབ་ཏུ་སེམས་པ་དང་། དེ་ནས་སྨན་ཆེན་པོ་

གཞོན་ནུས་ཕ་སེམས་པ་མཐོང་ནས་སྨན་ཆེན་པོས་སྨྲས་པ། ཕ་ཅི་ཞིག་མི་དགའ་ཞེས་དྲིས་པ་དང་། གང་པོས་དེ་ལ་བུ་ཅིའི་ཕྱིར་མི་དགའ་བར་མི་འགྱུར། རྒྱལ་པོས་བདག་ལ་འདི་སྐད་དུ་བསྒོ་སྟེ། སྐྱེད་མོས་ཚལ་ལྡུམ་ར་དང་། བཟའ་ཤིང་དང་། རྫིང་བུར་ལྡན་པ་ཞིག་སྐུར་ཅིག་ཅེ་ན་

ཇི་ལྟ་བུར་སྦྱར་ཞེས་སྨྲས་པ་དང་། སྨན་ཆེན་པོས་སྨྲས་པ། བསམ་པ་མ་མཛད་ཅིག །རྒྱལ་པོ་ཇི་ལྟར་མཉེས་པར་འགྱུར་བ་བདག་གིས་དེ་ལྟར་བགྱིའོ། །དེ་ནས་ཕོ་ཉ་བོས་ནས་སྨན་ཆེན་པོས་སྨྲས་པ། རྒྱལ་པོ་ལ་སླར་འདི་སྐད་ཅེས་གསོལ་ཅིག །རི་བྲགས་ཀྱི་སྐྱེད་མོས་ཚལ་འདི་

དག་ནི་ལེགས་པར་ནི་ཅི་ཡང་མ་འཚལ་ན་ཇི་ལྟར་བགྱིས་ན་མཆི་བར་འགྱུར་བ་རྒྱལ་པོའི་ཕོ་བྲང་གི་སྐྱེད་མོས་ཚལ་ཞིག་རྒྱལ་པོས་བསྐུར་བར་གསོལ། ཕས་ཀྱི་སྐྱེད་མོས་ཚལ་དེ་ཇི་ལྟར་མཆི་བ་བལྟས་ཏེ་བསླབས་ནས། དེའི་རྗེས་བཞིན་དུ་གཏང་བར་འཚལ་ལོ་ཞེས་སྤྲིང་བ་དང་། དེ་ནས་

ཕོ་ཉ་དེ་སླར་བཏང་སྟེ་རྒྱལ་པོ་ལ་དེས་ཇི་ལྟར་སྤྲིང་བ་བཞིན་གསོལ་ཏོ། །རྒྱལ་པོ་དགའ་སྟེ་ཅི་གང་པོ་རང་གི་བློས་སྨྲས་པ་ཡིན་ནམ། འོན་ཏེ་སྨན་ཆེན་པོས་སྨྲས་པ་ཡིན་ཞེས་དྲིས་པ་དང་། དེ་ནས་ཕོ་ཉས་སྨན་ཆེན་པོས་སྤྲིང་བ་ལགས་སོ་ཞེས་སྨྲས་པ་དང་། རྒྱལ་པོས་སྨྲས་པ། འདི་

ལྟར་གཞོན་ནུ་དེ་ནི་ཤེས་རབ་དང་ལྡན་པ་ཞིག་གོ་ཞེས་བསམས་ནས། ཡང་དུས་ཕྱི་ཞིག་ན་ཕོ་ཉ་དེ་ལྟ་བུ་ཞིག་བཏང་ནས། རི་བྲགས་ཀྱི་གྲོང་རྡལ་དེར་ཤིང་སྐྱེད་ལ་ལོ་གཅིག་ལོན་པ་དེ་ལ་མེ་ཏོག་དང་ལྡན་པའི་འབྲས་བུར་ལྡན་པ་ཞིག་སྐུར་ཅིག་ཅེས་སྤྲིང་བ་དང་། ཕོ་ཉ་དེ་སོང་སྟེ་གང་པོ་ལ་

བསྒོ་བ་དང་། གང་པོ་སྔ་མ་བཞིན་དུ་རབ་ཏུ་སེམས་ནས་མི་དགའ་བ་སྨན་ཆེན་པོས་མཐོང་ནས་སྨྲས་པ། ཕ་མི་དགའ་བར་མ་མཛད་ཅིག་དོན་དེ་མི་དཀའོ་ཞེས་སྨྲས་ནས། དེས་ཨེ་རཎྜའི་ཤིང་ཞིག་བསྐྱེད་ནས་བསྐུར་ཏེ་དེའི་ལོ་ལ་འབྲས་བུ་དང་། མེ་ཏོག་བྱུང་བ་རྒྱལ་པོས་མཐོང་ནས་

Vol. 11 · folio 63b

ངོ་མཚར་བར་བསམས་ཏེ། ཕོ་ཉ་ལ་འདི་ཅི་གང་པོའི་ཐབས་སམ། སྨན་ཆེན་པོའམ་སུའི་ཞེས་སྨྲས་པ་དང་། ཕོ་ཉས་སྨྲས་པ། སྨན་ཆེན་པོའི་ལགས་སོ། །ལེགས་སོ་ལེགས་སོ་ཞེས་སྨྲས་ནས་ཅང་མི་ཟེར་བར་འདུག་གོ། །དེ་ནས་དུས་ཕྱི་ཞིག་ན་རྒྱལ་པོས་རི་བྲགས་ཀྱི་གྲོང་རྡལ་

དེར་གང་པོ་ལ་གླང་ལྔ་བརྒྱ་བདས་ནས་འདི་རྣམས་ལ་རྩྭ་བྱིན་ཏེ་ཞོས་ལ་འོ་མ་དང་། ཞོ་དང་། མར་དང་། པྲིས་མ་དང་། ཆུར་བ་རྣམས་བྱོས་ལ་སྐུར་ཅིག །ཕོ་ཉ་དེས་རྒྱལ་པོའི་བཀའ་མཉན་ཏེ་རིམ་གྱིས་གྲོང་དུ་སོང་ནས་གང་པོ་ལ་ཡིད་ཆེས་པའི་ཚིག་གིས་བྱས་ནས་བོས་ཏེ་

སྨྲས་པ། རྒྱལ་པོས་གླང་ལྔ་བརྒྱ་པོ་འདི་བདས་ཏེ་འདི་རྣམས་ཞོས་ལ་འོ་མ་དང་། ཞོ་དང་། མར་དང་། པྲིས་མ་དང་། ཆུར་བ་གྱིས་ལ་སྐུར་ཅིག་ཅེས་བྱུང་ངོ་། །གང་པོ་དེ་སྐད་དུ་ཐོས་ནས་ཡི་ཆད་དེ་གྲོང་མི་གཞན་དག་ལ་སྨྲས་པ། རྒྱལ་པོ་ནི་ཐབས་འདི་ལྟ་བུས་ཆད་པས་གཅད་

པར་ངེས་ནས་གླང་ལས་འོ་མ་གྱིས་ཤིག་ཅེས་བྱུང་ནས་རབ་ཏུ་སེམས་ཤིང་འདུག་པ་དང་། སྨན་ཆེན་པོས་སྨྲས་པ། ཕ་ཁྱོད་མི་དགའ་བར་མ་མཛད་ཅིག་དང་། བདག་གིས་དེའི་ལན་བསམས་ལ་ཇི་ནས་རྒྱལ་པོ་མཉེས་པར་གྱུར་ཅིང་དེ་རྣམས་ཀྱང་བྱེད་དུ་མི་གཞུག །དེ་ནས་སྨན་

ཆེན་པོས་སྤད་གཉིས་ཤིག་བསླབས་ཏེ་བཏང་ནས་ཁྱོད་གྲོང་ཁྱེར་ཆེན་པོར་རྒྱལ་པོ་ལས་མི་རིང་བ་ཞིག་ཏུ་སོང་ལ་ཤིང་གི་གཞོང་ཁུང་ཅིག་ལྟོར་ཆོར་ལ་གོས་ཀྱིས་དཀྲིས་ཏེ་ས་ལ་ཕར་འགྲེ་ཚུར་འགྲེ་ཞིང་ངུ་བ་ལྟར་བྱོས་ཤིག །དེ་ནས་ཁྱེའུ་ཁྱོད་ཀྱིས་ཕྱོགས་ཀུན་དུ་གསོལ་བ་ཐོབ་ལ་མེ་ཏོག་དང་།

སྤོས་དང་། བཤོས་ཀྱིས་ཕྱོགས་བཅུར་གཏོར་ལ་ཕ་འདི་བདེ་ཞིང་ལེགས་ལ་བཀྲ་ཤིས་པར་བུ་བྱུང་ཞིག་ཅེས་བརྗོད་ཅིག །དེ་སྤད་གཉིས་ཇི་ལྟར་བསྟན་པ་བཞིན་དུ་ཡུལ་པཱུརྞ་ཀཙྪའི་གྲོང་རྡལ་ནས་རྒྱལ་པོ་སྐྱེད་པའི་དྲུང་དུ་སོང་སྟེ། མི་རིང་བ་ཞིག་ཏུ་འདུག་ནས་ཇི་ལྟར་བསྟན་པའི་

ཆོས་དང་། སྨྲེ་ཞིང་ངུ་བ་ལ་སོགས་པ་བྱས་ཏེ། གང་འཇིག་རྟེན་ན་འཇིག་རྟེན་སྐྱོང་བས་བདག་གི་ཕ་འདི་སྲུང་ལ་བདེ་ཞིང་ལེགས་ལ་བཀྲ་ཤིས་པར་བུ་བཙས་པར་ཤོག་ཤིག་ཅེས་དེ་སྐད་དུ་བོས་པ་རྒྱལ་པོ་སྐྱེད་པས་ཐོས་ནས་དེ་ཅི་རྟོགས་ཤིག་ཅེས་མི་གཅིག་བཏང་ངོ་། །དེ་སོང་སྟེ་བལྟས་ན་སྐྱེས་

Vol. 11 · folio 64a

པ་ཞིག་གསུས་པ་ཆེ་ལ་ས་ལ་འགྲེ་ལྡོག་ཅིང་ངུ་བ་མཐོང་ངོ་། །དེའི་བུ་ཡང་གཤིན་རྗེ་དང་། ཀླུའི་རྒྱལ་པོ་དང་། ངལ་བསོ་པོ་དང་། བ་ས་ལ་སོགས་པ་ལྷའི་དབང་པོ་རྣམས་ལ་གསོལ་བ་འདེབས་པ་མཐོང་སྟེ། དེ་དག་གིས་དེ་ཅིའི་ཕྱིར་ཞེས་དྲིས་ན། དེ་ནས་ཁྱེའུས་

བདག་གིས་ཕ་ལས་བུ་འབྱུང་བར་བྱ་བའི་ཕྱིར་རོ། །དེ་དག་གིས་དོང་ནས་རྒྱལ་པོ་ལ་གསོལ་པ་དང་། རྒྱལ་པོས་དེ་སྤད་གཉིས་བོས་ནས་ཁྱེའུ་དེས་བདག་གི་ཕ་ལས་བུ་བྱུང་བར་ཤོག་ཤིག་ཅེས་དེ་བཞིན་དུ་སྨྲའོ། །དེ་ནས་རྒྱལ་པོས་བགད་དེ་ངས་གང་ན་ཡང་འདི་ལྟར་སྐྱེས་པ་ལས་བུ་བྱུང་བ་

ནི་མ་ཐོས་མ་མཐོང་ངོ་ཞེས་སྨྲས་པ་དང་། དེ་ནས་ཁྱེའུ་དེས་ལྷ་ཁྱོད་དེ་བཞིན་དུ་གསུང་བ་བཞིན་ལགས་སམ། དེ་བཞིན་ནོ། །དེ་ནས་ཁྱེའུ་དེས་དེ་ལྟར་ན་ཅིའི་སླད་དུ་པཱུརྞ་ཀཙྪའི་རི་བྲགས་ཀྱི་གྲོང་རྡལ་དུ་གླང་ལྔ་བརྒྱ་བདས་ཏེ་འདི་རྣམས་ལས་འོ་མ་དང་། ཞོ་དང་། མར་སར་དང་། ཆུར་བ་དག་སྐུར་

ཅིག་ཅེས་བྱུང་ན་ཁྱོད་ཀྱིས་གླང་སྦྲུམ་སྟེ་བུ་བྱུང་བ་གང་ན་གཟིགས། གང་ན་གསན་ཅེས་སྨྲས་པ་དང་། དེ་ནས་རྒྱལ་པོས་བགད་དེ་ཅི་གང་པོའི་ཡིད་བརྟན་པ་ཕ་ཟེར་རམ་འོན་ཏེ་སྨན་ཆེན་པོའི་འམ་སུའི་ཞེས་དྲིས་པ་དང་། ཕོ་ཉས་ལྷ་སྨན་ཆེན་པོ་ལགས་སོ་ཞེས་སྨྲས་པ་དང་། རྒྱལ་པོ་དང་། བློན་པོ་

རྣམས་ཀྱིས་ཤིན་ཏུ་ངོ་མཚར་དང་ལྡན་པར་བཟུང་ངོ་། །དེ་ནས་ཡང་དུས་ཕྱི་ཞིག་ན་རྒྱལ་པོས་བགམ་པའི་ཕྱིར་ཕོ་ཉ་དྲེའུ་ཅིག་བཀྲི་སྟེ་བཏང་ནས་པཱུརྞ་ཀཙྪའི་རི་བྲགས་ཀྱི་གྲོང་དུ་སོང་སྟེ། གང་པོ་ལ་དྲེའུ་འདི་མ་བཅིང་བར་སྲུང་ཤིག །བླ་གབ་ཡོད་པར་མ་གཞུག་པར་འཚོ་ཤིག་ཅེས་བསྒོ་ཤིག །

ཕོ་ཉ་དེ་རིམ་བཞིན་དུ་པཱུརྞ་ཀཙྪའི་རི་བྲགས་ཀྱི་གྲོང་རྡལ་དུ་སོང་སྟེ། གང་པོ་ལ་ཁྱོད་ཀྱིས་དྲེའུ་འདི་སྲུང་ཤིག །དེ་ལྟ་བུའི་ཚུལ་ལས་བརྒྱལ་ཤོར་ན་ལུས་ལ་ཆད་པས་ཆེར་གཅད་དོ་ཞེས་བསྒོ་བ་དང་། དེ་དེ་སྐད་ཐོས་ནས་སྐྲག་སྟེ། དེ་དག་ཐམས་ཅད་ནི་བྱར་རུང་གི་ད་ནི་འདི་ལ་མི་རུང་སྟེ།

དེས་བདག་ལ་འདི་འདྲ་བར་བཀའ་སྩལ་པ་ནི་ལྷས་ཀྱང་བདེ་བར་བྱེད་མི་ནུས་སོ་སྙམ་སྟེ་རབ་ཏུ་སེམས་ཤིང་འདུག་པ་དང་། སྨན་ཆེན་པོས་ཕ་རབ་ཏུ་སེམས་པར་མཐོང་ནས་མི་དགའ་བར་མ་བྱེད་ཅིག་ཅེས་སྨྲས་ཏེ་དྲེའུ་དེ་ཉིན་མོ་ནི་གཟས་ལ་ཅི་བདེར་བཙས་ནས་ནུབ་མོ་མི་ཉི་ཤུས་བསྐོར་ནས་མི་ལྔ་ལྔས་

Vol. 11 · folio 64b

མེལ་ཙེ་ཐུན་རེ་རེར་བྱས་ནས་རྐང་ལག་ལ་མི་རེ་རེས་བཟུང་དྲེའུ་དེའི་སྟེང་དུ་རྟག་པར་མི་གཅིག་ཞོན་ཏེ་འདུག་གོ། །ཐབས་དེ་ལྟ་བུར་མི་ཉི་ཤུས་བླ་གབ་མེད་པ་ལ་སྲུང་ཞིང་འདུག་གོ། །རྒྱལ་པོ་སྐྱེད་པས་མངག་གཞུག་བྱེད་པའི་མི་གཅིག་གང་པོའི་དྲུང་དུ་དེ་ཇི་ལྟར་འཚོ་ལྟོས་ཤིག་ཅེས་རྟོག་ཏུ་བཏང་ངོ་། །

དེས་མཐོང་སྟེ་རྒྱལ་པོ་ལ་ལྷ་འདི་ལྟ་བུའི་ཐབས་སུ་བགྱིད་དོ་ཞེས་གསོལ་པ་དང་། རྒྱལ་པོས་དེ་ལྟར་བསྲུངས་ན་འབྲོས་མི་ནུས་ཀྱིས་མི་དེ་རྣམས་ལས་གཅིག་ཁ་དྲང་ངོ་ཞེས་སྨྲས་པ་དང་། བློན་པོས་གང་ཁ་དྲང་བར་བགྱི་ཞེས་ཞུས་པ་དང་། རྒྱལ་པོས་ནུབ་མོ་སྟེང་ན་ཞོན་པ་དེ་ཁ་དྲངས་ན།

གཞན་གཉིད་ཀྱིས་ལོག་པ་དང་། དེ་ཁྲིད་དེ་འོང་ངོ་ཞེས་སྨྲས་ཏེ། དེ་ནས་རྒྱལ་པོས་སྟེང་ན་ཞོན་པ་དེ་ཁ་དྲངས་ནས་དེས་ཀྱང་དྲེའུ་ཁྱེར་ཏེ་འོངས་སོ། །ནམ་ལངས་པ་དང་གང་པོ་ལ་དྲེའུ་དེ་བྲོས་སོ་ཞེས་སྨྲས་པ་དང་། དེང་ནི་བདག་གི་འཚོ་བ་མ་རུང་བར་གྱུར་ཏོ་ཞེས་སྐྲག་ནས་སྨྲེ་

སྔགས་འདོན་པར་བྱེད་པ་ནི་གང་ཇི་ལྟར་བྱ་ཞེས་དེ་མི་དགའ་ཞིང་འདུག་པ་སྨན་ཆེན་པོས་མཐོང་ནས་དེ་ཡང་སེམས་པ་ལ་ཞུགས་ཏེ་ཐབས་དེ་དག་ཐམས་ཅད་ནི་ཐབས་ཀྱིས་བསྒྲུབས་ན་འདིའི་ཐབས་ནི་མི་སྣང་ངོ་ཞེས་མི་སྨྲ་སྟེ། དེ་ཡང་སྐྲག་ནས་དེའི་ཐབས་སེམས་པ་ལས་དེས་ཕ་ལ་ཁྱོད་ཀྱིས་

དོན་དེ་བསྒྲུབ་པར་ནུས་ན་ཐབས་གཅིག་ཡོད་དོ་ཞེས་སྨྲས་སོ། །ཕས་ཅི་ཞིག་ཡོད་ཅེས་དྲིས་པ་དང་། སྨན་ཆེན་པོས་ཇི་ནས་བདག་ཉིད་ལ་མཐོ་བཙམ་པར་བཟོད་ན་གདོད་དོན་སྒྲུབ་པར་འགྱུར་རོ་ཞེས་སྨྲས་པ་དང་། དེ་ནས་གང་པོས་སྨྲས་པ། ཇི་ནས་བདག་གི་འཚོ་བ་དང་བྲལ་བར་མི་འགྱུར་

བ་དེ་ལྟར་གྱིས་ཤིག །དེ་ནས་སྨན་ཆེན་པོས་ཕའི་མགོ་བོ་སྐྲ་ཁྲེམ་གཉེར་བདུན་དུ་བྲེགས་ཏེ་ལེ་ཀྲུ་དང་། སྣག་ཙ་དང་། མཐིང་ཤིང་དང་། དཀར་པོ་ལ་སོགས་པས་མགོ་རི་མོར་བྱས་ནས་བོང་བུ་ལ་བསྐྱོན་ཏེ། རིམ་གྱིས་གྲོང་ཁྱེར་ཆེན་པོར་དོང་བ་དང་། སྨན་ཆེན་པོ་འོང་ངོ་ཞེས་ཀུན་དུ་སྒྲ་

བསྒྲགས་སོ། །དེས་ཕའི་མགོ་བོ་ཁྲེམ་གཉེར་བདུན་དུ་བྲེགས་ཤིང་བོང་བུ་ལ་ཞོན་ཏེ་འོངས་སོ་ཞེས་ཀྱང་གྲགས་སོ། །དེ་ནས་རྒྱལ་པོ་དང་། བློན་པོ་དག་གིས་དེ་ལྟ་བུར་གྱུར་པ་ཐོས་ནས་སྨྲས་པ། དེ་མཁས་པའོ། །མཛངས་པའོ་ཞེས་གཏམ་སྙན་པ་ཐམས་ཅད་དུ་གྲགས་པ་ནི་

Vol. 11 · folio 65a

ལེགས་ན་ཅིའི་ཕྱིར་ན་མི་རིགས་པ་འདི་ལྟ་བུ་བྱས། དེ་ནས་རྒྱལ་པོ་སྐྱེད་པ་བློན་པོ་དང་འཁོར་དུ་བཅས་ནས་སྨན་ཆེན་པོ་ལྟར་དོང་སྟེ། ཅི་དེ་འདྲ་བ་དང་འོང་ངམ། འོན་ཏེ་བརྫུན། རྒྱལ་པོ་འཁོར་དང་བཅས་པས་དེ་ལྟ་བུ་མངོན་སུམ་དུ་མཐོང་བ་དང་། བློན་པོ་དག་

གིས་རྒྱལ་པོ་ལ་ལྷ་ཅིའི་ཕྱིར་སྨན་ཆེན་པོ་ལ་མཁས་པའོ། །གསལ་བའོ། །མཛངས་པའོ་ཞེས་བསྔགས། དེས་མི་རིགས་པ་འདི་ལྟ་བུ་བགྱིད་པ་གདའའམ་ཞེས་གསོལ་པ་དང་། དེ་ནས་རྒྱལ་པོས་སྨན་ཆེན་པོ་ལ་སྨན་ཆེན་པོ་ཅི་འདི་ལྟ་བུར་ཕ་ལ་མཐོ་བཙམ་པར་བྱས་ཞེས་དྲིས་པ་

དང་། དེས་སྨྲས་པ། ལྷ་འདི་ནི་མཐོ་བཙམ་པ་མ་ལགས་ཀྱིས་མཆོད་པར་བགྱིས་ཏེ་བདག་ཀྱང་ཕ་བས་ཤིན་ཏུ་མང་དུ་འཚལ་བས་ན་བདག་གིས་འདི་ལ་རྣམ་པར་མཆོད་པར་བགྱིས་སོ། །རྒྱལ་པོས་སྨྲས་པ། ཅི་ཁྱོད་བཟང་ངམ། འོན་ཏེ་ཕ་བཟང་། དེས་བདག་བཟང་གི་ཕ་ངན་

ཏོ་ཞེས་སྨྲས་པ་དང་། རྒྱལ་པོས་སྨྲས་པ། ཕ་བས་བུ་བཟང་བ་ནི་ངས་གང་དུ་ཡང་མ་ཐོས་མ་མཐོང་མོད་ཀྱི་ཕས་བུ་གྲགས་པར་བྱེད། མས་ནི་གསོ་བ་དང་སྐྱེད་པ་དང་སྲུང་བའི་ཕྱིར་ཏེ། དེ་བས་ན་ངེད་ཀྱིས་ནི་ཅི་ནས་ཕ་བཟང་བ་ཡིན་ནོ་སྙམ་དུ་བསམས་སོ། །དེ་ནས་སྨན་ཆེན་པོས་རྒྱལ་

པོ་ལ་ཡང་ཕ་དེ་ལྟར་ལགས་སམ་མ་ལགས་ཤིན་ཏུ་རྟོགས་ཤིག་ཅེས་སྨྲས་པ་དང་། རྒྱལ་པོ་དང་བློན་པོས་དེ་བཞིན་ཡིན་གྱི་གཞན་མ་ཡིན་ནོ་ཞེས་སྨྲས་པ་དང་། དེ་ནས་སྨན་ཆེན་པོས་རྒྱལ་པོའི་རྐང་པ་ལ་གཏུགས་ཏེ་ལྷ་དེ་ལྟར་ལགས་མད་ན། ལྷས་བདག་ཅག་ལ་དྲེའུ་འཚོར་སྩལ་པ་དེ་

བྲོས་ཏེ། ལྷ་དང་བློན་པོ་རྣམས་ཀྱིས་བཀའ་སྩལ་པ་ཡང་ཕ་རབ་ཏུ་བཟང་ངོ་ཞེས་བསྟོད་ན། དྲེའུ་དེའི་ཕ་ནི་བོང་བུ་འདི་ལགས་ན་སྐྱིན་པར་བཞེས་པར་གསོལ་ཞེས་སྨྲས་པ་དང་། དེ་ནས་རྒྱལ་པོ་དང་བློན་པོས་དེའི་ཚིག་གིས་ཐབས་དེ་ལྟ་བུར་སྦྱར་བ་ཐོས་ནས་ཡ་མཚན་དུ་བཟུང་ཞིང་ཨེ་མ་ཧོ་ཞེས་

ཏེ་རིགས་པ་དང་མི་རིགས་པར་བྱ་བ་འདི་ལྟ་བུ་མཁས་སོ། །དེ་ལྟ་བུར་ཁོང་དུ་ཆུད་དེ་རྒྱལ་པོ་མགུ་རངས་རབ་ཏུ་དགའ་བའི་སེམས་སྐྱེས་ནས་རྣམ་པ་མང་པོའི་རྒྱན་བཀླུབས་ཏེ་བློན་པོའི་དབང་བྱིན་ནོ། །ཕ་ལ་ཡང་རི་བྲགས་ཀྱི་གྲོང་དེ་བྱིན་ནོ། །བར་གྱི་སྡོམ་སྟེ། བྱེ་མ་བཀལ་བ་འབྲས་ཅན་དང་། །

Vol. 11 · folio 65b

ཨེ་རན་ཌ་ཡི་ཤིང་དང་གླང་། །དྲེའུ་དང་དེ་རུ་སོང་བ་དང་། །དེ་ལ་བློན་པོའི་ཐབས་བྱིན་པའོ། །དེ་ནས་སྨན་ཆེན་པོས་བློན་པོའི་དབང་བྱིན་པ་དང་ཅི་བྱ་བ་དང་། རྒྱལ་པོའི་དོན་ཇི་ལྟར་བྱ་ཞེས་རབ་ཏུ་བདེ་བར་སེམས་པ་ལ་ཞུགས་པ་དང་། གྲོང་ཁྱེར་ཀུན་ཏུ་ཡང་སྨན་ཆེན་པོ་བློན་པོར་

བཅུག་སྟེ་མཛངས་ལ་མཁས་པའི་སྒྲ་སྒྲོགས་སོ། །དེ་ནས་དུས་ཕྱི་ཞིག་ན་བྲམ་ཟེ་ཞིག་གིས་བུ་མོ་ཞིག་བག་མར་བླངས་པའི་ཡོ་བྱད་དུ་ནོར་མང་ཞིག་ཟད་ནས་དེ་དང་ལྷན་ཅིག་མང་ཞིག་ཏུ་ཡོངས་སུ་སྤྱད་དེ་བདག་གིས་བག་མ་བླངས་པའི་ཡོ་བྱད་དུ་ནོར་མང་དུ་ཟད་པས་ད་ནི་འདི་ལྟར་ནོར་དུ་

འགྱུར་བ་ཆེན་པོ་མེད་ལ་ཁྱིམ་ན་འདུག་ན་མ་ལེགས་པར་འགྱུར་རོ་སྙམ་དུ་བསམས་ཏེ། བྲམ་ཟེ་དེ་ཁ་ཏོན་མང་དུ་ལོབས་པ་སྨྲང་དང་སྨྲང་གི་ཡན་ལག་ཏུ་ལྡན་པས་ཕ་རོལ་ཏུ་ཕྱིན་པ་ནོར་བསྒྲུབས་པའི་ཕྱིར་ལྗོངས་གཞན་དུ་སོང་ངོ་། །དེ་ཡང་དེ་ན་མཐར་གྱིས་རྒྱུ་ཞིང་སོང་བ་ལས་དེས་གསེར་གྱི་དོང་

ཙེ་གནའ་མ་ལྔ་བརྒྱ་རྙེད་དེ་དེ་ཁྱེར་ནས་སླར་བདག་གི་ཁྱིམ་དུ་འོངས་སོ། །དེས་བདག་སྔར་ནོར་ཁྱེར་ལ་ཁྱིམ་དུ་མི་འཇུག་གོ། །བུད་མེད་ཀྱི་སེམས་ཀྱི་སྤྱོད་པ་སུས་ཀྱང་མི་རིག་སྟེ། བྲམ་ཟེ་མོ་དེ་ཡང་དབྱིབས་ལེགས་ཤིང་བལྟ་ན་སྡུག་པ་བཟང་བས་ན་བདག་མེད་པའི་ཕྱིན་སྐྱེས་པ་གཞན་དང་ཆགས་ཤིང་

འདུག་ཀྱང་སྲིད་ཀྱིས་སྙམ་དུ་བསམས་ནས། དེས་ནམ་སྲོས་པ་དང་། དུར་ཁྲོད་དུ་སོང་ནས་ཤིང་ནྱ་གྲོ་དྷཱའི་དྲུང་དུ་ཁུང་བརྐོས་ནས་དེའི་ནང་དུ་བཅུག་སྟེ་ནམ་སྲོས་ནས་ཁྱིམ་དུ་ཕྱིན་པ་དང་། ཆུང་མ་དེ་ཡང་སྐྱེས་པ་གཞན་བྲམ་ཟེ་རྣ་བོ་ཆེ་ཞེས་བྱ་བ་དེ་ལ་ཆགས་ཏེ། དེའི་ཚེ་ན་ལྷན་ཅིག་ཁ་ཟས་

ཞིམ་པོ་ཟོས་ནས་བསུང་ཞིམ་པོས་ལུས་བྱུགས་ཏེ་ཉལ། མལ་གྱི་སྟེང་ན་དེ་གཉིས་དགའ་བ་མྱོང་ཞིང་འཁོད་པ་ལས་བྲམ་ཟེ་དེ་ཡང་བདག་གི་ཁྱིམ་དུ་ཕྱིན་ནས་སྒོ་ཕྱེ་ཞེས་བོས་པ་དང་། བུད་མེད་དེས་སྨྲས་པ། ཀྱེ་ཁྱེད་སུ་ཞིག་ཅེས་སྨྲས་སོ། །དེས་བདག་གི་མིང་ཕྱུང་བ་དང་། མོ་

ཉིད་ཀྱིས་དགའ་དང་མགུ་བའི་སྒྲ་ཕྱུང་ནས་རྣ་བོ་ཆེ་ཉལ་ནས་བསླང་སྟེ། མལ་གྱི་འོག་ཏུ་སྦས་ནས་སྒོ་འབྱེད་དུ་འོངས་ཏེ། དེས་ཁྱོ་ལ་གཡོ་བྱེད་ཅིང་རྗེས་བྱས་ཏེ་འོངས་ནས། སྒོ་ཕྱེ་སྟེ་ངུས་ནས་མགྲིན་པ་ནས་འཇུས་མཆོད་པ་དང་ཡོན་འབུལ་ལོ། །ཟས་བསོད་པ་བྱིན་ནོ། །བྲམ་ཟེ་དེ་ཟ་ཞིང་འདི་

Vol. 11 · folio 66a

ནི་སྐྱེས་པ་གཞན་ཞིག་ལ་ཆགས་པར་ངེས་པས་ན་འདི་ལྟར་མཚན་མོ་ཁ་ཟས་འདི་ལྟ་བུ་སྦྱར་རོ་སྙམ་དུ་བསམས་སོ། །དེ་ཡང་དྲང་བའི་རང་བཞིན་ཅན་ཞིག་སྟེ། དེ་ལ་ཀྱེ་བཟང་མོ་ཚེས་གྲངས་ཅན་ནི་མ་ཡིན་དུས་ཀྱི་སྟོན་མོའམ། གྲོང་ཁྱེར་གྱི་དུས་ཀྱི་སྟོན་མོ་ལ་ནི་མ་

བབ་ན་བཟའ་འདི་ལྟ་བུ་ག་ལས་འོངས་ཞེས་དྲིས་པ་དང་། བདག་ལ་ལྷས་ཁྱོད་ཀྱི་ཁྱོ་དེང་འོང་ངོ་ཞེས་བསྟན་པས་ན། ཁྱོད་ཀྱི་ཕྱིར་འདི་ལྟར་སྟ་གོན་བགྱིས་སོ་ཞེས་སྨྲས་སོ། །བྲམ་ཟེས་ཨེ་མ་ཧོ་ང་ནི་བསོད་ནམས་ཅན་དུ་བས་ཏེ། བདག་གི་ཆུང་མའི་རྨི་ལམ་དུ་ཡང་ལྷས་བསྟན་པ་ལྟ་ཞེས་

སྨྲས་ཏེ། དེས་ཟན་ཟོས་ནས་ཁྲུས་བྱས་ཏེ་མལ་དུ་ཉལ་ནས་གཅིག་ལ་གཅིག་མཛའ་བས་དགེའམ། ཉོན་མ་མོངས་སམ་ཞེས་གཏམ་འདྲིའོ། །དེ་ནས་ཆུང་མས་ཇོ་བོས་ཅུང་ཟད་མཆིས་སམ་ཞེས་དྲིས་པ་དང་། དེས་སྨྲས་པ། ཅུང་ཟད་ཅིག་འོངས་སོ། །དེ་ནས་ཆུང་མས་བརྡ་ཚིག་

ཏུ་སྨྲས་པ། འདི་ནི་ཅི་ཟེར་བ་རྣས་ཉོན། རྣ་བོ་ཆེ་དེས་སྨྲས་པ། གསེར་གྱི་དོང་ཙེ་ལྔ་བརྒྱ་པོ་བདག་ལ་མ་བསྟན་ན་གར་བཞག །དེས་སྨྲས་པ། ནོགས་ཐུབ་པར་གྱིས་དང་ཡོད་དོ། །དེ་གང་དུ་བཞག །དེས་སྨྲས་པ། སང་བསྟན་ཏོ། །དེ་ནས་བུད་མེད་དེས་སྨྲས་པ། བདག་ཁྱོད་

ཀྱི་ལུས་ཕྱེད་ན་ཅིའི་ཕྱིར་གསང་། བྲམ་ཟེ་རང་བཞིན་གྱིས་དྲང་བས་ན་གྲོང་ཁྱེར་གྱི་ཕྱི་རོལ་དུ་བཞག་གོ་ཞེས་སྨྲས་པ་དང་། བུད་མེད་དེས་སྨྲས་པ། ཉོན་ཅིག་རྣ་བོ་ཆེ་ས་ཕྱོགས་གང་དུ་བཞག་ཅེས་སྨྲས་པ་དང་། བྲམ་ཟེ་དེས་དུར་ཁྲོད་ཀྱི་ཤིང་ནྱ་གྲོ་དྷཱའི་དྲུང་དུ་ས་བརྐོས་ཏེ་བཞག་གོ་ཞེས་སྨྲས་

པ་དང་། དེ་ནས་བྲམ་ཟེ་མོ་དེས་ཇོ་བོ་ལམ་ནས་བརྡབ་བརྡབ་སྟེ་མཉེལ་བ་བདག་གིས་ཀྱང་གཙེས་ཏེ། ད་ཁྱོད་མནོལ་ཅིག་ཅེས་སྨྲས་སོ། །དེ་ནས་དེ་གཉིད་ཀྱིས་ལོག་པར་རིག་ནས་རྣ་བོ་ཆེ་ལ་གང་ཁྱོད་ཀྱིས་ཐོས་པ་དེ་མྱུར་དུ་སྒྲུབས་ཞེས་བྱས་པ་དང་། དེ་ནས་རྣ་བོ་ཆེ་དལ་བུས་འཇབ་

ཅིང་ཁྱིམ་དེ་ནས་བྱུང་སྟེ་དུར་ཁྲོད་དུ་སོང་ངོ་། །དེས་ཇི་ལྟར་བསྟན་པ་བཞིན་དུ་དུར་ཁྲོད་ཀྱི་ཤིང་ནྱ་གྲོ་དྷཱའི་དྲུང་ནས་དེ་བླངས་ཏེ་རྣ་བོ་ཆེ་བདག་གི་ཁྱིམ་དུ་སོང་ངོ་། །བྲམ་ཟེ་དེ་དེའི་ཕྱི་དེ་ཉིན་བལྟས་ཏེ་དུར་ཁྲོད་དུ་སོང་ནས་བལྟས་ན་དེའི་ཕྱོགས་ནས་མ་རྙེད་དོ། །དེ་ནས་མགོ་དང་བྲང་རྡུང་ཞིང་ཁྱིམ་དུ་འོངས་

Vol. 11 · folio 66b

པ་དང་། ཆུང་མ་དང་། གཉེན་འདུན་དང་། གཞན་གྲོགས་པོ་དང་། ཕུ་ནུ་དག་གིས་ཅི་ཉེས་ཞེས་དྲིས་པ་དང་། དེས་གསེར་གྱི་དོང་ཙེ་ལྔ་བརྒྱ་བསླངས་ནས་ཁྱེར་ཏེ་འོངས་ནས་ཁར་རྩང་མི་རྒྱུན་ཆད་པའི་དུས་སུ་དུར་ཁྲོད་དུ་བརྐོས་ཏེ་བཞག་ནས་ཁྱིམ་དུ་སོང་ངོ་། །དེ་རིང་བདག་གིས་བཙལ་

ན་མི་སྣང་ངོ་ཞེས་སྨྲས་པ་དང་། དེ་དག་གིས་སྨན་ཆེན་པོའི་དྲུང་དུ་སོང་དང་། བློན་པོའི་མཆོག་དེ་མཁས་ཤིང་ཤེས་ལ་བརྟག་པ་དང་། དཔྱད་པ་ཡང་རྟོགས་ཤིང་དོན་རྣམས་ལ་རྗེས་སུ་དཔོག་པས་རིག་གིས་དེ་ལ་སྐྱབས་སུ་སོང་ཤིག་དང་། དེས་གལ་ཏེ་ཐོབ་པར་བྱེད་ཀྱང་

སྲིད་ཀྱིས་སྐྱབས་གཞན་མི་སྣང་ངོ་ཞེས་བསྟན་པ་དང་། དེ་ནས་བྲམ་ཟེ་དེ་གདོང་ལ་མཆི་མ་ཟག་ཅིང་ངུ་བཞིན་དུ་སྨན་ཆེན་པོའི་དྲུང་དུ་ཕྱིན་ནས་རྒྱལ་བ་དང་། ཚེ་རིང་བར་ཤོག་ཤིག་ཅེས་བརྗོད་ནས་གསོལ་པ། ལྷ་འདི་ལྟར་བདག་གིས་བསླངས་པ་འཚལ་ཏེ་མཆིས་ནས་ཁར་རྩང་མི་

རྒྱུན་ཆད་པའི་དུས་ན་དུར་ཁྲོད་དུ་བརྐོས་ཏེ་སྦས་ནས་ཁྱིམ་དུ་མཆིས། དེང་བདག་སླར་དེར་མཆིས་ན་མ་རྙེད་པར་གྱུར་ཏོ། །དེ་ནས་བློན་པོའི་མཆོག་སྨན་ཆེན་པོ་དེ་ཇི་ལྟ་བུ་ཞིག་ཅེས་སྐད་ཅིག་ཅང་མི་སྨྲ་བར་འདུག་ནས། བྲམ་ཟེ་དེ་ལ་ཀྱེ་བྲམ་ཟེ་ཁྱོད་ཀྱིས་ཕྱོགས་གང་དུ་བཞག །དུས་ནི་ཇི་

ཙམ་ན། ཁ་ཅིག་གིས་མཐོང་བའམ། ཁ་ཅིག་ལ་སྨྲས་པ་ལྟ་མེད་དམ་ཞེས་དྲིས་པ་དང་། དེས་ཇི་ལྟ་བུར་གྱུར་པ་ཞིབ་ཏུ་སྨྲས་སོ། །དེ་ནས་ཡང་བྲམ་ཟེ་མོ་དེ་སྐྱེས་པ་གཞན་ལ་ཆགས་ཏེ་དེའི་སྒྱུ་ཡིན་པར་གདོན་མི་ཟའོ་ཞེས་བསམས་ནས། བྲམ་ཟེ་དེ་དབུགས་དབྱུང་བའི་ཕྱིར་ཁྱོད་མི་དགའ་

བར་མ་བྱེད་ཅིག་དང་། དེ་མེད་ན་བདག་ཉིད་ཀྱི་ནོར་ལས་སྦྱིན་ནོ། །དེ་ལྟར་བྲམ་ཟེ་དབུགས་ཕྱུང་ནས་སྨྲས་པ། ཁྱོད་ཀྱི་ཁྱིམ་ན་ཁྱི་ལྟ་ཡོད་དམ། བྲམ་ཟེ་དེས་མཆིས་སོ་ཞེས་སྨྲས་སོ། །སོང་ལ་བྲམ་ཟེ་བརྒྱད་བོས་ཤིག །བཞི་ནི་ཁྱོད་ཉིད་ཀྱིས་བོས་ཤིག །བཞི་ནི་ཆུང་མ་ལ་ཁྱོད་ཀྱིས་ཀྱང་

བོས་ཤིག་ཅེས་བསྒོ་ལ་དེ་ནས་འདི་སྐད་སྨྲོས་ཤིག །བདག་ཁྱིམ་དུ་སླར་དགེ་ཞིང་བཀྲ་ཤིས་པར་འཁོར་ན་བྲམ་ཟེ་བརྒྱད་ཟན་སྦྱིན་པར་ལྷ་དབང་ཕྱུག་གི་སྤྱན་སྔར་ཁས་བླངས་སོ་ཞེས་བྱོས་ཤིག །དེ་ནས་དེ་ཁྱིམ་དུ་སོང་བ་ཆུང་མ་ལ་བདག་ལམ་དུ་ཞུགས་ཏེ་སོང་བའི་ཚེ་ལྷའི་སྤྱན་སྔར་ཇི་སྟེ་དགེ་ཞིང་

Vol. 11 · folio 67a

བཀྲ་ཤིས་ཏེ་སླར་འཁོར་ན་བྲམ་ཟེ་བརྒྱད་ཟན་སྦྱིན་པར་དམ་བཅས་པ་དེང་བོད་ཀྱིས་ཁྱོད་ཀྱིས་ནི་བཞི་བོས་ཤིག །བདག་གིས་ཀྱང་བཞི་བོད་དོ། །དེ་བཞིན་བྱའོ་ཞེས་མཉན་ནས་བྲམ་ཟེ་དེས་བཞི་བོས། བྲམ་ཟེ་མོས་ཀྱང་བཞི་མགྲོན་དུ་བོས་སོ། །དེ་ལྟར་མགྲོན་

དུ་བོས་ནས་སྨན་ཆེན་པོའི་དྲུང་དུ་སོང་སྟེ་དེ་དག་བོས་ལགས་སོ་ཞེས་སྨྲས་པ་དང་། དེ་ནས་ཡང་སྨན་ཆེན་པོས་སྨྲས་པ། ནམ་དེ་དག་ཁྱིམ་དུ་ཁྲིད་པ་ན་བདག་གི་དྲུང་ནས་མི་འདི་ཁྲིད་ལ་དེ་དག་ནང་དུ་འདོང་བའི་ཚེ་སྒོར་ཞོག་ཤིག །ཟན་ཟ་བའི་ཚེ་ཅི་ཡང་བྱེད་དུ་མ་གཞུག་པར་མདུན་དུ་ཞོག་ཤིག །

མི་དེ་ལ་ཡང་ཁྱོད་ཀྱིས་མཚན་མ་རྣམས་བཟུང་སྟེ། དེ་དག་ནང་དུ་འཇུག་པའི་ཚེ་བྲམ་ཟེ་གང་ལ་ཁྱི་ཟུགས་པ་དང་། གང་ལ་མཇུག་མ་འདྲིལ་བར་འགྱུར་བ་ལྟོས་ཤིག །ཁྱིའི་ཚུལ་ནི་འདི་ལྟ་བུའོ་ཞེས་དེ་ལ་བསྒོའོ། །བྲམ་ཟེ་དེ་ལ་ཡང་ཁྱོད་ཀྱིས་བྲམ་ཟེ་དེ་རྣམས་ལ་མ་འབྲིམ་པར་བྲམ་ཟེ་མོ་དེ་ཉིད་

འབྲིམ་དུ་ཆུག་ཤིག་ཅེས་བསྒོའོ། །མི་དེ་ཡང་ཁྱོད་ཀྱིས་བརྟག་པ་ནི་བྲམ་ཟེ་མོ་དེ་འབྲིམ་པའི་ཚེ། གང་ལ་མཚན་མར་བྱེད་མིག་བཙུགས་ཤིང་ལྟ་བ་དང་། དགོད་ཅིང་ཚིག་འབྱིན་ལ་ལྷག་པར་འབྲིམ་པ་རྣམས་ཤེས་པར་གྱིས་ཤིག་ཅེས་བསྒོའོ། །དེ་ལྟར་བསྟན་པ་དང་། བྲམ་ཟེ་

དེས་མི་དེ་ཁྲིད་དེ་སྒོ་དྲུང་དུ་བཞག་གོ། །བྲམ་ཟེ་མོ་ལ་ཁྱོད་ཀྱིས་བྲམ་ཟེ་གང་མགྲོན་དུ་བོས་པ་དེ་དག་ཁྱོད་ཉིད་ཀྱིས་བོས་ཤིག་ཅེས་བསྒོ་ནས་རང་གིས་གང་མགྲོན་དུ་བོས་པ་དེ་དག་ཀྱང་བདག་ཉིད་ཀྱིས་བོས་སོ། །དེ་དག་རིམ་གྱིས་ནང་དུ་དོང་བ་ལ་ཁྱི་ཟུགས་སོ། །ནམ་རྣ་བོ་ཆེ་དེ་འོངས་པ་དང་ཁྱི་དེས་

བལྟས་ནས་རྣ་བ་ཕབ་མཇུག་མ་དྲིལ་ནས་ཕྱི་བཞིན་དུ་འབྲངས་ཏེ། ནང་དུ་ཞུགས་ནས་ཁྱི་འདྲིས་པའི་སྒྲ་འབྱིན་པ་དང་། རྒྱལ་པོའི་མི་དེས་རྣ་བོ་ཆེ་འདི་ཡིན་པར་ཤེས་སོ། །དེ་ནས་དེས་ཟས་འབྲིམ་པ་ལ་བལྟས་ན་བྲམ་ཟེ་མོ་དེ་འབྲིམ་པ་ལ་ཞུགས་པ་དང་། རྣ་བོ་ཆེ་ལ་སྨིན་མའི་བརྡ་བྱེད་

ཅུང་ཟད་དགོད། མིག་དེར་ཆགས། དེ་དང་ལྷན་ཅིག་གཏམ་ཟེར་ལྷག་པར་ཡང་དེར་འབྲིམ་པ་དང་། དེ་ནས་རྒྱལ་པོའི་མི་དེས་ཇི་ལྟར་མཐོང་བ་བཞིན་དུ་ཇོ་བོ་ཚུལ་འདི་འདྲའོ་ཞེས་སྨན་ཆེན་པོ་ལ་བཟླས་པ་དང་། སྨན་ཆེན་པོས་དེ་ཐོས་མ་ཐག་ཏུ་རྣ་བོ་ཆེ་དེ་ཁུག་ཤིག་ཅེས་རྒྱལ་པོའི་མི་

Vol. 11 · folio 67b

བཏང་ངོ་། །དེ་འོངས་ནས་སྨན་ཆེན་པོས་དེ་ལ་གཞན་གྱི་ནོར་དབྲོག་པར་བྱ་བ་དེ་ལྟ་བུ་ཅི་བྲམ་ཟེའི་ཆོས་ཡིན་ནམ། ཁྱོད་ཀྱིས་ཁྱེར་བ་དེ་སླར་བྱིན་ཅིག་ཅེས་བསྒོ་ན། དེས་སྡིག་པ་ཞི་བར་གྱུར་ཅིག་བདག་གིས་ཡོང་མ་འཚལ་ཏོ་ཞེས་སྨྲས་པ་དང་། དེ་ནས་སྨན་ཆེན་པོས་མི་རྣམས་

ལ་ངན་པ་ཅན་འདི་བཙོན་རར་ཆུག་ལ་ཇི་ནས་རུས་པ་བྱུང་བ་དེ་ལྟ་བུར་ནན་ལ་འོར་ཅིག་ཅེས་བསྒོ་བ་དང་། དེ་དེ་ལྟ་བུས་བསྡིགས་པས་འཇིགས་སྐྲག་ཤིན་ཏུ་གདུངས་པས་ན་ལྷས་སྐྱོབས་ཤིག །བདག་གིས་དེ་སླར་འབུལ་ལོ་ཞེས་སྨྲས་སོ། །དེ་ནས་རྣ་བོ་ཆེ་དེ་བདག་གི་ཁྱིམ་

ནས་གསེར་གྱི་དོང་ཙེ་གནའ་མ་ལྔ་བརྒྱ་ཇི་ལྟར་བཅིངས་པ་བཞིན་དུ་ཁྱེར་ཏེ་འོངས་ནས་སྨན་ཆེན་པོ་ལ་ཕུལ་ལོ། །དེ་ནས་སྨན་ཆེན་པོས་ཀྱང་བྲམ་ཟེ་དེ་ལ་བྱིན་ནོ། །དེ་ནས་བྲམ་ཟེ་དེ་དགའ་མགུ་ནས། ཡིད་རབ་ཏུ་དགའ་བར་གྱུར་ཏེ། དེ་ནས་བྲམ་ཟེ་དེ་འདི་སྙམ་དུ་སེམས་པར་གྱུར་ཏོ། །

བདག་གི་གསེར་གྱི་དོང་ཙེ་གནའ་མ་ལྔ་བརྒྱ་མེད་པ་ལས་སླར་རྙེད་པ་ནི་ཐམས་ཅད་ཀྱང་སྨན་ཆེན་པོའི་མཐུ་ཡིན་ཏེ། ཇི་ནས་བདག་གིས་དེ་ལ་བཀུར་སྟི་བྱ་ཞིང་ལན་གླན་ནོ། །སྨན་ཆེན་པོ་བདག་ལ་བྱམས་པ་དང་། བདག་གིས་ཀྱང་ལན་གློན་པར་འགྱུར་རོ། །སྙམ་དུ་བསམས་

ནས། དེས་གསེར་གྱི་དོང་ཙེ་གནའ་མ་དེ་དག་ལས་ཕྱེད་ཁྱེར་ཏེ་སྨན་ཆེན་པོའི་དྲུང་དུ་སོང་ནས་སྐྱེས་འདི་བཞེས་ཤིག་ཅེས་ཕུལ་ལོ། །སྨན་ཆེན་པོས་ཀྱང་བླངས་ནས་དེ་ཉིད་ལ་སླར་བྱིན་ནོ། །དེའི་སྙན་པས་ཀྱང་གྲོང་ཁྱེར་དེར་ཁྱབ་པར་གྱུར། རྒྱལ་པོ་དང་། བློན་པོ་དང་། གྲོང་ཁྱེར་

པ་རྣམས་ཀྱིས་ཀྱང་དེ་མཁས་པ་དང་ལྡན་ནོ། །ཞེས་བྱ་བའི་སྒྲ་ཀུན་དུ་བསྒྲགས། བདག་ཅག་བསོད་ནམས་དང་ལྡན་པས་ན་འདི་འདྲ་བའི་བློན་པོ་བདོག་གོ་སྙམ་དུ་སེམས་སོ། །དེ་ནས་མི་གཞན་ཞིག་རང་གི་དོན་ཅིག་གི་ཕྱིར་ཡུལ་གཞན་དུ་སོང་སོང་བ་ལས་སླར་ལོག་སྟེ། རྫིང་

འགྲམ་ཞིག་ཏུ་འོངས་ནས་ཕྱེའི་རྐྱལ་པ་ཁ་ཕྱེ་སྟེ་ཕྱུང་ནས་ཟན་ཟོས་སོ། །ཟན་ཟོས་ནས་རྐྱལ་པ་ཁ་མ་བཅིངས་བཞིན་དུ་ཕྱི་རོལ་གྱི་སར་སོང་ངོ་། །དེ་དེར་འདུག་པ་དང་སྦྲུལ་རེག་ན་གདུག་པའི་དུག་ཅན་དེའི་རྐྱལ་པའི་ནང་དུ་ཞུགས་སོ། །མི་དེ་སླར་འོངས་ཏེ་དེས་མ་བརྟགས་པར་རྐྱལ་

Vol. 11 · folio 68a

པའི་ཁ་བཅིངས་ཏེ་ཕྲག་པ་ལ་ཐོགས་ནས་གྲོང་ཁྱེར་ཆེན་པོར་ཕྱིན་པ་དང་། དེ་ནས་ལྟས་མཁན་ཞིག་གིས་རིགས་ཀྱི་བུ་འདི་ནི་འཚོ་བ་དང་འབྲལ་དུ་ཉེའོ་ཞེས་ལུང་བསྟན་ཏོ། །མི་དེས་ཀྱང་སླར་ལོག་སྟེ་དེ་ལ་བལྟས་སོ། །དེ་ནས་དེ་ལ་ཚིག་དེ་སྐད་ཐོས་པའི་འོག་ཏུ་ཅིའི་ཕྱིར་

བདག་གིས་ལྟས་མཁན་དེ་ལ་མ་དྲིས་ཞེས་འགྱོད་པ་སྐྱེས་སོ། །དེ་ཐེ་ཚོམ་སྐྱེས་ནས་བདག་གིས་དོན་དེའི་ཕྱིར་བློན་པོ་སྨན་ཆེན་པོ་ལ་མ་དྲིས་ཀྱི་བར་དུ་ཁྱིམ་དུ་མི་འགྲོའོ་སྙམ་དུ་བསམས་ནས་ཚིག་ཏུ་ཡང་སྨྲས་སོ། །དེ་སྨན་ཆེན་པོའི་དྲུང་དུ་སོང་སྟེ། འདི་ལྟར་བདག་གྲོང་ཁྱེར་དུ་མཆི་

བའི་ཚེ་ལྟས་མཁན་གྱིས་འདི་ལྟར་ལུང་བསྟན་པའི་དོན་དེ་དག་སྨྲས་ནས། དེ་ལ་སླར་བདག་གིས་ནི་མ་དྲིས་ཏེ་དེ་བས་ན་ཁྱོད་ལ་གསོལ་ལོ་ཞེས་དྲིས་པ་དང་། སྨན་ཆེན་པོས་གང་ནས་འོངས་ཞེས་དྲིས་ནས་དེས་ཇི་ལྟ་བུར་གྱུར་པ་ཞིབ་ཏུ་སྨྲས་སོ། །དེས་བསམས་པ། རྐྱལ་པའི་ནང་

དུ་སྦྲུལ་རེག་ན་གདུག་པ་ཡོད་ཡང་དག་གིས་ལྟས་མཁན་དེས་ཀྱང་དེའི་ཕྱིར་སྨྲས་སོ་སྙམ་ནས། དེ་ནས་སྨན་ཆེན་པོས་སྐྱེ་བོ་མང་པོའི་མངོན་སུམ་དུ་རྐྱལ་པ་འདི་ཁ་ཁྲོལ་ལ་རྒྱང་མ་ནས་ཤིང་གིས་ཁ་ཕྱེ་ཤིག་དང་གདོད་ཤེས་པར་འགྱུར་རོ། །དེ་ལྟ་བུར་བྱས་པ་དང་། རེག་ན་གདུག་

པ་དེའི་ནང་ནས་མགོ་ནི་བཏེག །དབུགས་ནི་རྒོད། ལྕེ་ནི་བསྐྱོད་བཞིན་དུ་ཕྱིར་བྱུང་བ་དང་། སྨན་ཆེན་པོས་ཁྱོད་ཀྱི་དོགས་པ་དེ་ནི་འདི་ཡིན་ནོ་ཞེས་སྨྲས་སོ། །དེ་ནས་སྨན་ཆེན་པོ་ཡུལ་བལྟ་བའི་ཕྱིར་ཡན་ལག་བཞིའི་སྟོབས་མང་པོ་རྣམས་གོ་བསྐོན་ཏེ་ཕྱིར་བྱུང་ངོ་། །དེ་ནས་གྲོང་དང་།

གྲོང་ཁྱེར་དང་། ཚོང་དུས་དག་བལྟས་ན་གྲོང་དང་། གྲོང་ཁྱེར་དང་། གྲོང་འདབ་འདི་སུའི་ཡིན་ཞེས་དྲིས་ན། ཡུལ་ན་གནས་བདག་གིས་འདི་ནི་བློན་པོ་ཆེ་གེ་མོ་ཞིག་གི་ལགས་སོ། །འདི་ནི་འདི་དག་གིའོ་ཞེས་སྨྲས་པ་དང་། དེ་ནས་སྨན་ཆེན་པོས་བརྟགས་ཏེ་བལྟས་ན་འདི་

ལྟར་ཡུལ་ཐམས་ཅད་བློན་པོ་དྲུག་གིས་ཀུན་བསྣམས་ཏེ་རྒྱལ་པོ་སྐྱེད་པ་ནི་བཟའ་བ་དང་། བཏུང་བ་ཙམ་འབའ་ཞིག་ལ་དབང་ངོ་སྙམ་དུ་བསམས་སོ། །དེ་ནས་སྨན་ཆེན་པོས་ལྷ་གྲོང་དང་། རི་བྲགས་ཀྱི་གྲོང་དང་། གྲོང་ཁྱེར་རྣམས་སུ་དབང་ཞེས་གསོལ་པ་དང་། རྒྱལ་པོ་དེ་

Vol. 11 · folio 68b

ཇི་ལྟར་བྱ་དེའི་ཕྱིར་སྙིང་བརྩེ་བའི་ལྷ་རྣམས་ཀྱིས་བདག་ལ་བསྟན་པ་ནི་པཱུརྞ་ཀཙྪའི་རི་བྲགས་ཀྱི་གྲོང་ན་གང་པོ་ཞེས་བྱ་བའི་བུ་སྨན་ཆེན་པོ་ཁྱོད་ཀྱི་བློན་པོ་ཆེན་པོར་ཆུག་ཤིག་དང་། ཁྱོད་ཀྱི་ཡུལ་རྣམས་རྒྱས་པར་བྱས་པས་འབུལ་བར་འགྱུར་ཏེ། དེའི་ཚེ་ན་ཁྱོད་ཉིད་ཀྱང་ཐམས་ཅད་ལ་

དབང་བའི་རྒྱལ་པོར་འགྱུར་རོ་ཞེས་ལུང་བསྟན་ཏེ། ཁྱོད་ནི་འདི་ལྟ་བུར་དགོས་པའི་ཕྱིར་བདག་གིས་རུམ་ན་འདུག་ཚུན་ཅད་བདེ་བའི་ཡོ་བྱད་ཀྱིས་བསྐྱེད་པ་ཡིན། ད་ལྟར་ཡང་བློན་པོའི་མཆོག་ཏུ་བཅུག་ན་ད་ནི་ལྷའི་ཚིག་དང་། ཁྱོད་བདག་གི་བློས་ལྕོགས་པ་སྟོན་པ་ཅི་ནས་

བདག་རྒྱལ་པོའི་དབང་ཕྱུག་ཏུ་འགྱུར་བར་བྱོས་ཤིག་ཅེས་སྨྲས་པ་དང་། དེ་ནས་སྨན་ཆེན་པོས་རྒྱལ་པོ་སྐྱེད་པ་ལ་ཕྱག་བྱས་ནས་ཐུགས་བརྟན་པར་མཛོད་ཅིག་དང་། ཇི་ལྟར་བདག་གིས་ལྷ་མཉེས་པར་འགྱུར་བ་དེ་ལྟར་བགྱིའོ་ཞེས་སྨྲས་སོ། །དེ་ནས་སྨན་ཆེན་པོས་ཡུལ་དང་། གྲོང་

དང་། གྲོང་ཁྱེར་དང་། རི་བྲགས་ཀྱི་གྲོང་དེ་དག་ན་གཙོ་བོ་གང་ཡིན་པ་དེ་རྣམས་དབྱེན་བཅུག་སྟེ་སོ་སོར་ཕྱེ་ནས་ཅི་ནས་ཁྱེད་བདག་ལ་དགའ་བར་གྱུར་པ་དེ་ལྟ་བུར་བདག་གིས་བྱའོ། །བློན་པོ་དེ་དག་ནི་འདོད་ཆེན་ཆེ་བས་དཔྱ་ནར་མ་དང་། བླ་སྐྱེས་དག་ཀྱང་མི་རིགས་པར་འབེབས་ཏེ།

གནོད་པར་གྱུར་པས་ན་དེའི་ཕྱིར་རིག་པར་བྱས། འདི་ལྟར་བདག་གི་ཚིག་བཞིན་དུ་བྱས་ན་བདག་གིས་ཀྱང་ཁོང་དུ་ཆུད་པར་བསྟན་ཏེ་དཔྱ་ཡང་རིགས་པར་དབབ། གཞན་ཡང་བདེ་བར་དགོད་ཅིང་། བདེ་བའི་ཡོ་བྱད་རྣམས་ཀྱིས་ཀྱང་བསྐྱང་བར་བྱས། ཅི་ནས་ཁྱོད་ཅག་མི་མཐུན་

པར་བྱོས་ཤིག །ཁྱེད་མི་མཐུན་པར་བྱས་པ་ལས་ཇི་སྟེ་རྒྱལ་པོ་དང་། བློན་པོ་རྣམས་ལྷགས་ན་ཡང་བདག་མེད་ཀྱི་བར་དུ་དེ་དག་གི་དབང་དུ་མ་འགྲོ་བར་འདི་སྐད་སྨྲོས་ཤིག །དེ་སྟེ་བློན་པོའི་མཆོག་སྨན་ཆེན་པོ་འོངས་ན་དེ་ལ་བདག་ཅག་གིས་བློན་པོ་དེའི་དབང་དུ་བྱའི་གཞན་ལ་

མ་ཡིན་ནོ་ཞེས་སྨྲོས་ཤིག །དེ་ནས་དེས་འདི་ལྟ་བུའི་རིག་པ་སྔར་སྦྱར་ནས་ཡུལ་དེ་དག་ཀུན་མི་མཐུན་པར་བྱེད་ཅིང་བྱེད་དུ་བཅུག་པས་ན་བཀའ་རྣམས་ཀྱང་བཅོག་པར་གྱུར་ཏོ། །དེ་ནས་བློན་པོ་དེ་དག་གིས་རྒྱལ་པོ་ལ་གསོལ་པ་དང་། འདི་ལྟར་རྒྱལ་པོ་སྐྱེད་པས་བློན་པོ་དྲུག་པོ་དེ་དག་

Vol. 11 · folio 69a

ཉིད་ཡན་ལག་བཞིའི་སྟོབས་མང་པོ་དང་ལྷན་ཅིག་བཀྱེ་ཡང་དེ་དག་གིས་གྲོང་དང་རི་བྲགས་ཀྱི་གྲོང་གཅིག་ལ་ཡང་དབང་བྱེད་པར་མ་ནུས་སོ། །དེ་ནས་རྒྱལ་པོ་ལ་ལྷ་ཉིད་མ་བྱོན་ན་འདི་དག་དབང་དུ་བགྱིར་མི་ནུས་སོ་ཞེས་ཕོ་ཉ་བཏང་བ་དང་། དེ་ནས་རྒྱལ་པོ་ཉིད་འོངས་

ཀྱང་རི་བྲགས་ཀྱི་གྲོང་གཅིག་ཀྱང་དབང་བྱར་མ་ནུས་ཏེ། འཐབས་པས་མང་ཞིག་ཤི་བ་དང་། རྒྱལ་པོ་དང་། བློན་པོ་དྲུག་པོ་དེ་དག་ཀྱང་མི་དགའ་བར་གྱུར་ཏོ། །དེ་ནས་རི་བྲགས་ཀྱི་གྲོང་མི་དག་གིས་དེ་སྟེ་སྨན་ཆེན་པོ་འདིར་འོངས་ན་དེའི་ངག་མཉན་ཅིང་དེའི་དབང་བཞིན་དུ་བགྱིས་ཏེ་

བདག་ཅག་རྒྱལ་པོ་སྐྱེད་པ་དང་མི་མཐུན་པར་བགྱིད་པ་ནི་མ་ལགས་ཀྱི་བློན་པོ་རྣམས་བདག་ཅག་ལ་གནོད་པར་བགྱིད་པའི་ཕྱིར་རོ་ཞེས་སྨྲས་པ་དང་། དེ་ནས་རྒྱལ་པོས་སྨན་ཆེན་པོ་ལ་ངེད་ཀྱིས་ཡུལ་རྣམས་ཕེབས་པར་མ་ནུས་ཀྱིས་ཁྱོད་ཚུར་ཤོག་ཤིག་ཅེས་ཕོ་ཉ་བཏང་ངོ་། །དེ་ནས་སྨན་ཆེན་

པོས་ཡི་གེ་དེ་མཐོང་མ་ཐག་ཏུ་རྒྱལ་པོའི་དྲུང་དུ་འོངས་སོ། །དེ་མཐོང་ནས་ཡུལ་མི་ཀུན་གྱིས་ཕྱག་བྱས་ཏེ་ཡུལ་མི་དེ་རྣམས་ལ་མ་འཇིགས་ཤིག །དཔྱ་ཡང་ཆོས་བཞིན་དབབ། དམན་པ་དང་། དབུལ་བ་དང་། སྐྱབས་མེད་པ་རྣམས་ཀྱང་དབུགས་དབྱུང་བར་བྱས། ཡུལ་ན་གནས་པ་

དང་། གྲོང་ཁྱེར་པ་རྣམས་ལ་ཕ་མ་དང་། ཕུ་ནུ་དང་། རང་གི་སྐྱེ་བོ་བཞིན་བཀུར་སྟི་དང་བྱ་དགའས་ཀུན་སྙོམས་པར་བྱས་ནས་པང་ནས་འཁྱུད་དོ། །དེ་ནས་ཡུལ་ན་གནས་པའི་རྒན་པ་དང་། གཞོན་པ་དང་། བུད་མེད་དེ་དག་ཐམས་ཅད་ཀྱིས་ཀྱང་སྨན་ཆེན་པོ་ལ་བུ་དང་བདག་གི་མིང་པོ་

བཞིན་དུ་ལྟ་བར་གྱུར། །དེས་ཀྱང་ཐམས་ཅད་ལ་སེམས་དགའ་བར་བྱས་ཤིང་། དེ་ནས་མཐར་གྱིས་ཡུལ་ཐམས་ཅད་གཅིག་ཏུ་བསྡུས་ཏེ་རྒྱལ་པོ་སྐྱེད་པ་དང་ལྷན་ཅིག་སླར་རྒྱལ་པོའི་ཕོ་བྲང་དུ་འོངས་སོ། །དེ་ལྟ་བུའི་ལས་བྱས་པས་རྒྱལ་པོ་གཞན་དག་ལ་ཡང་སྙན་པའི་སྒྲ་གྲགས་པར་

གྱུར་ཏོ། །དེ་ནས་རྒྱལ་པོ་མཉེས་པས་ན་བདག་གི་བུ་མོ་སྨན་ཆེན་པོའི་ཆུང་མར་བྱིན་ཏེ་དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་དོ། །དེ་ནས་ཡང་ཡུལ་གཞན་ཞིག་ནས་རྒྱལ་པོ་ལོངས་སྤྱོད་ཉམས་པ་ཞིག་རྒྱལ་པོ་སྐྱེད་པའི་དྲུང་དུ་འོངས་ནས་རྒྱལ་པོ་སྐྱེད་པས་ཀྱང་དེ་མ་འདོད་ནས་དེ་སྨན་ཆེན་པོའི་དྲུང་

Vol. 11 · folio 69b

དུ་འོངས་སོ། །དེས་སྙིང་རྗེ་བའི་དབང་གིས་བླངས་ཏེ་ལོངས་སྤྱོད་ཀྱང་བྱིན་ནོ། །དེ་ནས་དུས་ཕྱི་ཞིག་ན་བྲམ་ཟེ་ཞིག་འོངས་ཏེ། དེ་ནས་བྲེ་གང་ཞིག་བསླངས་པ་དང་དེས་ཀྱང་ཁས་བླངས་ཏེ་བང་ཀ་བ་ལ་གཏད་ན་སང་སྦྱིན་གནངས་སྦྱིན་ལས་མ་བྱིན་ནོ། །དེ་ནས་དུས་ཕྱི་ཞིག་ན་རྒྱལ་པོ་ལ་བློན་པོ་རྣམས་

དང་། གྲོང་ཁྱེར་པ་དང་། ལྗོངས་པ་དག་གིས་བསྐོར་ཏེ་མི་མང་པོ་ཕྱག་འཚལ་བའི་གནས་ན་འདུག་གོ། །དེས་བློན་པོ་རྣམས་ལ་ཀྱེ་བློན་པོ་རྣམས་གསང་བ་ནི་སུ་ལ་སྨྲ་བར་བྱ། གང་ལ་ཡིད་བརྟན་པར་བྱ་ཞེས་སྨྲས་པ་དང་། དེ་ནས་བློན་པོ་དག་སེམས་པ་ལ་ཞུགས་སོ། །དེ་དག་ལས་

གཅིག་གིས་ནི་མཛའ་བོ་ལ་སྨྲ་བའི་རིགས་ཞེས་བྱས། ཁ་ཅིག་གིས་ནི་ལྷ་དེ་ཆུང་མ་ལ། ཁ་ཅིག་གིས་ནི་མ་ལ། ཁ་ཅིག་གིས་ནི་སྲིང་མོ་དང་ཕ་ལ། ཁ་ཅིག་གིས་ནི་ཕུ་ནུ་ལའོ་ཞེས་གཞན་དག་གིས་དེ་སྐད་སྨྲས་པ་དང་། རྒྱལ་པོས་སྨན་ཆེན་པོ་གཞན་གྱིས་ནི་ཇི་ལྟར་བསམས་པ་

བཞིན་སྨྲས་ན་ཁྱོད་ཀྱིས་ཅིའི་ཕྱིར་མི་སྨྲ་ཞེས་དྲིས་པ་དང་། དེ་ནས་སྨན་ཆེན་པོས་རྒྱལ་པོ་ལ་ལྷ་བདག་གིས་ནི་འདི་སྙམ་དུ་བསམས་ཏེ། གསང་བ་དེ་ནི་སུ་ལ་ཡང་བགྱི་བར་མི་རིགས་ན་ཆུང་མ་ལྟ་ཅི་སྨོས་ཏེ། དེ་ནི་བདག་གིས་ལྷའི་སྤྱན་སྔར་མངོན་པར་བགྱིའོ་ཞེས་སྨྲས་སོ། །དེ་

ནས་ཕྱི་ཞིག་ན་རྒྱལ་པོའི་རྨ་བྱ་སྟོར་བ་སྨན་ཆེན་པོས་བཙལ་ཏེ་ཕྱོགས་གཞན་ཞིག་ཏུ་སྦས་ནས་དེ་དང་འདྲ་བ་གཞན་ཞིག་བཟུང་སྟེ། ཆུང་མ་ཁྱོད་ཀྱིས་རྒྱལ་པོའི་ཕོ་བྲང་ནས་རྨ་བྱ་སྟོར་བ་ཐོས་སམ་ཞེས་དྲིས་པ་དང་། དེས་ཀྱང་བདག་གིས་ཐོས་སོ་ཞེས་སྨྲས་སོ། །སྨན་ཆེན་

པོས་ཁྱོད་ཀྱིས་སུ་ལ་ཡང་མ་ཟེར་བར་འདི་མྱུར་དུ་ཚོས་ཤིག་དང་བཟའོ་ཞེས་བསྒོའོ། །དེས་རི་བྲགས་ཀྱི་གྲོང་མི་འདིས་རྒྱལ་པོའི་རྨ་བྱ་ཟ་བ་ལྟོས་ཤིག །བདག་གི་ཕ་ནི་འདི་ལ་ཤིན་ཏུ་ཡིད་བརྟན་པར་བྱེད་ན་འདི་ནི་རྒྱལ་པོ་ལ་གནོད་པའི་ལས་བྱེད་དོ་སྙམ་དུ་བསམས་སོ། །ཡང་རེ་ཞིག་

ན་རྒྱལ་པོའི་བཙུན་མོ་འདྲ་བ་བུད་མེད་སྨད་འཚོང་མ་ཞིག་རྒྱན་ཐམས་ཅད་ཀྱིས་བཀླུབས་ཏེ་བདག་གི་བུད་མེད་ཀྱི་ནང་དུ་བཅུག་ནས་ཆུང་མ་ལ་འདི་ནི་རྒྱལ་པོའི་བཙུན་མོ་འདི་ཞེས་བྱ་བ་ཡིན་ཏེ། བདག་འདི་ལ་ཤིན་ཏུ་ཡིད་བརྟན་གྱིས་ཁྱོད་བདག་ལ་སྡུག་ན་སུ་ལ་ཡང་མ་ཟེར་ཅིག་ཅེས་བསྒོ་བ་དང་།

Vol. 11 · folio 70a

དེ་ནས་རྒྱལ་པོའི་བུ་མོ་དེ་འདི་ནི་སྨན་ཆེན་པོ་དང་ལྷན་ཅིག་ཏུ་འདུག་གོ་སྙམ་བསམས་ནས་ཁྲོས་པས་འཁྲུག་པ་སྐྱེས་ཏེ་ཕ་ལ་འཕྱ་ནས་བདག་གི་ཕ་འདི་ལྟ་བུར་དོན་ལ་རྟོག་པ་ཅིའང་མེད་དེ། རི་བྲགས་ཀྱི་གྲོང་མི་རིགས་ངན་པ་ལས་བྱུང་ན་བློན་པོའི་མཆོག་ཏུ་བཅུག་ཅིང་ངན་པ་འདི་

ལ་རྒྱལ་པོའི་དོན་ཐམས་ཅད་གཏད་པ་ག་ལ་རིགས། དེ་ཅི་ནས་སྔོན་གྱི་གནས་རྙིང་པར་གཞག་པ་དེ་ལྟ་བུར་བྱའོ་ཞེས་བསམས་ཏེ་སོང་ནས་ཕ་ལ་ཡབ་ཀྱིས་ངན་པ་དེ་ལྟ་བུ་མ་བརྟགས་པར་བློན་པོའི་མཆོག་ཏུ་བཅུག་ཅིང་ཡིད་བརྟན་པར་བགྱིས་པ་ག་ལ་རིགས། དེས་འདི་ལྟར་རྒྱལ་པོའི་

བཙུན་མོ་ལ་གློ་བ་རིངས་ཏེ་ཡབ་ཀྱི་བཙུན་མོ་འདི་ཞེས་བགྱི་བ་དང་ལྷན་ཅིག་ཏུ་སྤྱོད། རྒྱལ་པོའི་རྨ་བྱ་དེ་ཡང་འདིས་ཟོས། ཡུལ་གཞན་ནས་མི་འོངས་པ་རྣམས་ཀྱང་བསྙེན་ཅིང་ཡོ་བྱད་ཀུན་སྦྱོར་བར་བགྱིད་ན་ཡབ་ནི་རྟག་ཏུ་ཡང་བདག་ལ་སྨན་ཆེན་པོ་འདི་ཐམས་ཅད་པས་སྡུག །འདི་

ལས་ཡིད་དུ་འོང་བ་མེད་དོ་ཞེས་གསུང་ན་དེ་ནི་འདི་ལྟ་བུ་མི་བགྱི་བ་རྣམས་བགྱིད་ཀྱིས་ཇི་ལྟ་བུ་ཡིན་པ་མཁྱེན་པར་གྱིས་ཤིག་ཅེས་སྨྲས་པ་དང་། དེ་ནས་རྒྱལ་པོས་དོན་དེ་དག་བརྟག་པའི་ཕྱིར་གཤེད་མ་མི་རྣམས་ལ་སོད་ཅིག་ཅེས་བཀྲིའོ། །དེ་ནས་རིགས་ངན་པ་དེ་དག་གིས་ཤིང་ཀ་

ར་བཱི་རའི་མེ་ཏོག་གི་ཕྲེང་བ་ནི་མགུལ་དུ་བཏགས། བོང་སྐད་ལྟ་བུའི་རྔ་བརྡུངས། ཚིག་རྩུབ་པོས་སྤྱོས། བསྡིགས། ཚར་བཅད་དེ་མཚོན་ཐོགས་པ་གཤིན་རྗེའི་མི་ལྟ་བུའི་རིགས་ངན་རྣམས་ཀྱིས་དུར་ཁྲོད་དུ་ཁྲིད་མོད་ཀྱི། དེ་གསད་པར་ནི་གང་ཡང་མི་དད་དོ། །གྲོང་ཁྱེར་གྱི་

སྐྱེ་བོ་དང་ལྗོངས་པ་རྣམས་ནི་མིག་ནས་མཆི་མ་ཟག་ཅིང་བདག་གི་བུ་བསད་པ་ལྟར་སྡུག་བསྔལ་ནས་ཉམ་ཐག་པའི་སྒྲ་འབྱིན་ཅིང་ལྷ་དག་ལ་གསོལ་བ་འདེབས་སོ། །ཅི་ཙམ་ཞིག་ན་སྨན་ཆེན་པོས་རྒྱལ་རིགས་དབུལ་པོ་བསྙེན་ཅིང་ལོངས་སྤྱོད་བགོས་ཏེ་བྱིན་པ་དེ་དག་གིས་རྒྱལ་པོའི་མི་རྣམས་ལ་

བདག་ཅག་གིས་འདི་བསད་ཀྱིས་ཁྱེད་ཅག་སླར་ལོག་ཤིག་ཅེས་སོ།། །།འདུལ་བ་ཕྲན་ཚེགས་ཀྱི་གཞི། བམ་པོ་སུམ་བཅུ་རྩ་བཞི་པ། ཅི་ཙམ་ན་དེ་གྲོང་ཁྱེར་ནས་བྱུང་བ་དང་། བྲམ་ཟེ་མོང་རྟུལ་ཞེས་བྱ་བས་གོས་ཀྱི་མཐའ་མ་ནས་འཇུས་ནས་ཁྱོད་ཀྱིས་ནས་བྲེ་གང་སྦྱིན་པར་

Vol. 11 · folio 70b

བྱས་པ་དེ་བྱིན་ལ་སོང་ཤིག་ཅེས་ཟེར་རོ། །སྨན་ཆེན་པོས་གནས་དེར་ཚིགས་སུ་བཅད་དེ་སྨྲས་པ། རྒྱལ་པོ་གྲོགས་སུ་འགྱུར་བ་མེད། །གདོལ་པ་ལ་ནི་བཤེས་པ་མེད། །བུད་མེད་རྣམས་ལ་གསང་མི་བརྗོད། །རྨ་བྱའི་ཤ་ནི་བཟའ་མི་བྱ། །བྲམ་ཟེ་མོང་རྟུལ་པོ་ཡི་ནི། །ནས་བྲེ་གང་

ཡང་འཆགས་མི་བྱ། །དེས་དེ་སྐད་སྨྲ་ཞིང་སོང་བ་དང་། དེ་ནས་གཤེད་མ་མི་རྣམས་ཀྱིས་སྨྲས་པ། སྨན་ཆེན་པོ་དེ་ཅི་ཁྱོད་ཤེས་པ་དང་། རྣམ་པར་ཤེས་པ་ཕུན་སུམ་ཚོགས་པ་ཡིན་ན་བླ་བར་བྱེད་དམ། སྨན་ཆེན་པོས་སྨྲས་པ། ཁོ་བོ་ནི་མི་བླ་སྟེ། འོན་ཀྱང་དེ་ཅི་བླ། དེས་སྨྲས་

པ། ལྷ་བདག་མི་བླ་སྟེ། འོན་ཀྱང་བདག་སྡུག་བསྔལ་གྱིས་ཉམ་ཐག་ནས་དགོས་པ་སྨྲའོ། །དེ་ཅི་ཡིན། དེས་སྨྲས་པ། རྒྱལ་པོ་གྲོགས་སུ་འགྱུར་བ་མེད་ཅེས་བྱ་བ་རྒྱ་ཆེར་རོ། །དེས་ཡང་སྨྲས་པ། ལྷ་གསོལ་བ་འཚལ་ན་རེ་ཞིག་གསན་དུ་གསོལ། བདག་གིས་རྒྱལ་པོ་གྲོགས་

སུ་འགྱུར་བ་མེད་ཅེས་གང་སྨྲས་པ་ནི་སྔོན་ལྷ་གྲོང་ངམ། གྲོང་ཁྱེར་རམ། གྲོང་རྡལ་རྣམས་ཀྱི་དོན་གང་ལ་ཡང་མི་མངའ་བར་གྱུར་ཏེ། ཁྱོད་གང་གི་ཕྱིར་དེ་སྐད་སྨྲ་བ་སྨྲས་པ་དེའི་དོན་ཁྱོད་ཀྱིས་མ་གོ་བར་ཟད་དོ། །དེ་རྣམས་སོང་སྟེ། རྒྱལ་པོ་སྐྱེད་པ་ལ་སྨན་ཆེན་པོ་ཅི་ཞིག་བླ་ན་དེ་བླ་བ་ཟློས་

སུ་སྩལ་བར་གསོལ་ཞེས་སྨྲས་སོ། །དེ་ནས་རྒྱལ་པོས་བོས་ནས་དྲིས་པ། ཞལ་ཟས་དང་། བཏུང་བ་དང་། སླས་གང་དག་ལགས་པ་དེ་ལ་མངའ་བ་ལས་ལྷ་དེང་ས་ལ་དབང་བའི་རྒྱལ་པོ་དང་། རྒྱལ་སྲིད་དང་། དཔུང་དང་། མཛོད་དང་། དམག་ལ་མངའ་མཛད་པར་གྱུར་པ་གང་

ལགས་པ་དེ་ལྟ་བུ་བདག་གིས་བགྱིས་ན་བདག་ལ་ཁྱོད་ཀྱིས་སྔོན་བྱས་པ་གཟོ་བ་ཉིད་མ་དགོངས་པར་ལྷས་དགུམ་དུ་བཏང་བས་དེའི་སླད་དུ་བདག་འདི་སྐད་དུ་རྒྱལ་པོ་གྲོགས་སུ་འགྱུར་བ་མེད་ཅེས་མཆིའོ། །གདོལ་པ་ལ་ནི་བཤེས་པ་མེད་ཅེས་བགྱི་བ་ནི་ལྷ་གདོལ་པ་མལ་དང་གོས་དང་བྲལ་བ་འདི་རྒྱལ་

པོ་སྐྱེད་པས་བདག་ལ་འཚོ་བའི་ཡོ་བྱད་བྱིན་ན་དེས་བདག་འཚོ་བར་བྱའོ་སྙམ་ནས་ལྷའི་དྲུང་དུ་མཆིས་པ་ལས་ལྷས་ཡོངས་སུ་མ་བཟུང་ངོ་། །བདག་གིས་ནི་བཀྲེན་པའོ་སྙམ་པ་དང་། ཡུལ་ནས་འཁྱམས་པའོ་སྙམ་ནས་བགོ་བཤའ་བགྱིས་པ་ལས་འདི་ལྟར་དེང་སང་བདེ་བར་གྱུར་པ་ལགས་ན་དེང་

Vol. 11 · folio 71a

བདག་དགུམ་པའི་སླད་དུ་ཆས་པས་དེའི་སླད་དུ་བདག་འདི་སྐད་དུ་གདོལ་པ་ལ་ནི་བཤེས་པ་མེད་ཅེས་མཆིའོ། །བུད་མེད་རྣམས་ལ་གསང་མི་བརྗོད་ཅེས་བགྱི་བ་ནི་རྒྱལ་པོ་དུས་གཅིག་ན་འཁོར་གྱི་ནང་དུ་བཞུགས་ནས་ཚིག་འདི་སྐད་དུ་ཇི་ལྟར་སུ་ལ་ཡིད་གཅུགས་

པར་བྱ་ཞེས་གསུངས་པ་དང་། དེ་ན་བློན་པོ་རྣམས་ཀྱིས་ཕ་དང་། མ་དང་། སྲིང་མོ་དང་། ནེའུ་ལྡངས་རྣམས་ལའོ་ཞེས་གང་ལ་སྨྲ་བར་བགྱི་བ་དེ་སྨྲས་སོ། །ལྷས་ཀྱང་ཆུང་མ་ལ་བརྗོད་པར་བྱ་སྟེ། འདི་ལྟར་ཆུང་མ་ནི་ལུས་ཀྱི་ཕྱེད་ཡིན་པས་དེའི་ཕྱིར་བརྗོད་པར་བྱའོ་ཞེས་གསུངས་

སོ། །དེ་ནས་བདག་གིས་དོན་འདི་ལྷའི་སྤྱན་སྔར་བབ་པར་བགྱིའོ་སྙམ་ནས་བགམ་པའི་སླད་དུ་རྒྱལ་པོའི་རྨ་བྱ་སྦས་ནས་རྨ་བྱ་གཞན་ཞིག་བླངས་ཏེ་འཚལ་ལོ། །སླས་ལས་ཀྱང་སླས་ཆེ་གེ་མོ་ཞིག་ལས་རྒྱན་བཙལ་ཏེ་སྨད་འཚོང་མ་ཆེ་གེ་མོ་ཞིག་གི་མགུལ་དུ་བཏགས་ནས་ཁྱིམ་དུ་

བཞག་སྟེ་ལྷ་སྨད་འཚོང་མ་དེ་ཡང་གཟིགས་སུ་གསོལ། དེ་ནས་རྒྱལ་པོས་བཀུག་ནས་སླས་དང་། སྨད་འཚོང་མ་ཕྱོགས་གཅིག་ཏུ་གཞག་སྟེ་གཉི་ག་བལྟས་ན། རྟགས་དང་། ཁ་དོག་དང་། ཚུལ་དང་། དབྱིབས་མཚུངས་ཏེ་གཅིག་ལ་ཡང་ཁྱད་པར་དམིགས་པ་

མ་ཡིན་ལ་ཅིག་ཤོས་ལ་ཡང་མ་ཡིན་ནོ། །དེ་ནས་རྒྱལ་པོས་བརྟགས་ནས་བདག་གིས་སྨན་ཆེན་པོ་ནི་ཉེས་པ་མེད་པར་ཁོང་དུ་ཆུད་དོ། །བྲམ་ཟེ་མོང་རྟུལ་པོ་ཡི་ནི། །ནས་བྲེ་གང་ཡང་ཆགས་མི་བྱ། །ཞེས་གང་སྨྲས་པ་ནི་བདག་ལྷས་དགུམ་པར་བཏང་ནས་གཤེད་མ་པ་རྣམས་

ཀྱིས་ཁྲིད་པ་ན་དེས་ནས་བྲེ་གང་བྱིན་ཅིག་ཅེས་ནས་བྲེ་གང་གི་དོན་དུ་གོས་ཀྱི་མཐའ་ནས་བཟུང་བས་དེའི་སླད་དུ་བདག་གིས་དེ་སྐད་སྨྲས་སོ། །དེ་ནས་རྒྱལ་པོ་དོན་དེ་ཐམས་ཅད་མངོན་སུམ་དུ་བསྟན་པས་དགའ་སྟེ་བཀྲོལ་ནས་བཀུར་སྟི་ཆེན་པོས་བཀུར་སྟི་བྱས་སོ། །དེ་ནས་རྒྱལ་པོ་

ལ་ཕྱག་བྱས་ནས་གསོལ་པ། ལྷ་ཁྱོད་ཀྱིས་བུད་མེད་རྣམས་ཀྱི་གསང་གཟིགས་སམ། ཁྱོད་ཀྱི་སྲས་མོ་ནི་བདག་ལ་ཡོང་དགོས་པ་མ་མཆིས་སོ། །འོན་ཀྱང་རིགས་དང་། གཟུགས་དང་། ངང་ཚུལ་དང་། ཤེས་རབ་བདག་དང་འདྲ་བ་དེ་ཁོ་ན་ལྟ་བུའི་མཆིས་འབྲང་ཞིག་བླང་

Vol. 11 · folio 71b

བར་བགྱིའོ། །དེས་རྒྱལ་པོ་ལ་གནང་བ་གསོལ་ནས་བདག་ཉིད་བྲམ་ཟེའི་ཆ་བྱད་དུ་བྱས་ཏེ་ལག་པ་གཡས་པ་བྱ་མ་བུམ་ཐོགས། ལུས་མཆོད་ཕྱིར་ཐོགས་ཀྱིས་མཛེས་པར་བྱས། ལུས་ལ་རི་དགས་ཀྱི་པགས་པ་གོས་སུ་བགོས། གདོང་ལ་བྱུགས་རིས་གསུམ་བྱས་ནས་རི་འོར་ནགས་ཀྱི་

ཚང་ཚིང་ཅན་ག་ལ་བ་དེར་བུ་མོ་བཙལ་བའི་ཕྱིར་ཆས་སོ། །ཇི་ཙམ་ན་ལམ་གྱི་བར་དུ་གྲོང་ཞིག་ཏུ་མུན་སྲོས་པར་གྱུར་ཏོ། །ཐ་གི་ཙམ་ན་བྲམ་ཟེ་ཞིག་གིས་དྲིས་པ་གང་ནས་འོངས། དེས་སྨྲས་པ། ལུས་འཕགས་པའི་ལྗོངས་ནས་སོ། །གང་དུ་འགྲོ་བར་སེམས། ནགས་ཀྱི་ཚང་

ཚིང་ཅན་དུའོ། །ཅི་གང་གི་ཁྱིམ་དུ་བྲང་གདབ་པའི་ངོ་ཤེས་འགའ་ཁྱོད་ལ་ཡོད་དམ། དེས་སྨྲས་པ་མེད་དོ། །དེ་ནས་དེས་ཁྱིམ་དུ་ཁྲིད་དེ་ཚུལ་དང་མཐུན་པའི་འབྱོར་པས་ཕུ་དུད་བྱས་སོ། །དེས་དེའི་ཆུང་མ་ལ་ཡང་འདི་ནི་སྐྱེས་པ་གཞན་ལ་ཆགས་པས་རུང་བ་མ་ཡིན་ནོ་ཞེས་འཕྲིགས་

སོ། །དེ་ཕྱི་དེ་ཉིན་དྲིས་ནས་ཆས་པ་དང་། བྲམ་ཟེས་ཀྱང་སྨྲས་པ། གྲོགས་པོ་བདག་གི་ཁྱིམ་འདི་སྟེ། ཕན་ཚུན་འགྲོ་བའི་ཚེ་ཕྱིན་པ་ན་རང་གི་ཁྱིམ་བཞིན་དུ་སོམས་ཤིག །དེ་བཞིན་བགྱིའོ་ཞེས་སྨྲས་ནས་ཆས་སོ། །ཇི་ཙམ་ན་ལམ་གྱི་བར་ཞིག་ན་ནས་ཀྱི་ཞིང་ཞིག་

ཡོད་པ་དེ་ན་བུ་མོ་གཟུགས་བཟང་ཞིང་བལྟ་ན་སྡུག་པ། རིགས་བཙུན་པ་ཤིན་ཏུ་ཞི་བ་དང་ལྡན་པ་ཞིག་མཐོང་ངོ་། །མཐོང་ནས་ཀྱང་དེའི་ཡིད་དེ་ལ་ཞེན་ཏོ། །དེ་ནས་དྲིས་པ། བཟང་མོ་ཁྱོད་གང་ཞིག་ཡིན། སུའི་ཡིན། ཁྱོད་ཀྱི་མིང་ཅི། དེས་སྨྲས་པ། ས་གའོ། །

ཁྱོད་སུའི་ཡིན། སྨྲས་པ། གང་ཞིག་གྲོང་ཐམས་ཅད་ཀྱི་ཤིང་སྒྲུབ་པར་བྱེད་པའིའོ། །དེ་ནས་སྨན་ཆེན་པོས་བསམས་པ། འདི་བྱད་ནི་བཟང་མོ་ཞིག་ཡིན་ན་ད་རེ་ཞིག་བློ་ཅི་འདྲ་བ་བློ་བགམ་པར་བྱའོ་སྙམ་མོ། །དེ་ནས་དེ་གྲོ་ཞིང་ཞིག་ཏུ་ཞུགས་ཏེ་ལག་པ་བསྒྲེང་ནས་ལག་པ་ཕངས་

པར་བྱ་བའི་ཕྱིར་རྐང་པས་གྲོ་ཕུར་བ་དང་། དེ་ནས་ས་གས་སྨྲས་པ། མཁན་པོ་ཇི་ལྟར་ལག་པ་ཕངས་པ་དེ་བཞིན་དུ་ཁྱོད་རྐང་པ་གཉིས་ཀྱང་ཕངས་པར་གྱིས་ཤིག །དེས་བསམས་པ། བུ་མོ་འདི་ནི་མཛངས་མ་ཞིག་གོ་སྙམ་མོ། །དེ་ནས་ཡང་བྲམ་ཟེས་བགད་ནས་སྨྲས་པ། བུ་མོ་

Vol. 11 · folio 72a

ཁྱོད་ཀྱིས་རྣ་ཆ་གདུབ་ཀོར་གདུ་གུ་ཞིག་སྟེ་ཤིན་ཏུ་ལྷང་ངེའོ། །ས་གས་སྨྲས་པ། མཁན་པོ་རྣ་བ་གཉིས་དགབ་པའི་སླད་དུའོ། །དེ་ནས་སྨན་ཆེན་པོས་སྨྲས་པ། བུ་མོ་བྱད་བཟང་ཞིང་བལྟ་ན་སྡུག་པ་མཛེས་པ་ཡིན་ནོ། །ས་གས་སྨྲས་པ། གྲོང་གི་བདག་པོ་

རྣམས་ཀྱི་བཀའ་དྲིན་གྱིས་སོ། །ཅུང་ཞིག་འདུག་ནས་སྨྲས་པ། ཁྱོད་ཀྱི་ཕ་གར་སོང་། བུ་མོས་སྨྲས་པ། ལམ་གཅིག་གཉིས་སུ་བགྱིད་དུ་མཆིས་ཏེ་ཚེར་མའི་ཡལ་ག་བསྡུས་ནས་ལམ་གཅོད་པར་བགྱིད་དོ། །དེས་ན་སྐྱེ་བོ་དག་ཤུལ་གཉིས་པ་བགྱིད་དོ། །ཁྱོད་ཀྱི་མ་ཡང་གར་

སོང་། ཞིང་ཐོག་ནས་ས་བོན་གྱི་ཕྱིར་མཆིས་སོ། །བུ་མོ་ངའི་ཆུང་མ་བྱའམ། བུ་མོས་སྨྲས་པ། གལ་ཏེ་གྲོང་གི་བདག་པོ་བཏུབ་ནའོ། །དེས་སྨྲས་པ། ནགས་ཀྱི་ཚང་ཚིང་ཅན་དུ་ལམ་གང་ནས་འགྲོ་ན་བདེ་བ་དང་མི་འཁྱོག་པ་དེ་སྟོན་ཅིག །ཡང་སྨྲས་པ། ནགས་ཀྱི་ཚང་

ཚིང་ཅན་གྱི་ལམ། །ཚེར་མ་མེད་ཅིང་ཐིབས་པོ་མེད། །བདེ་ཞིང་མི་འཁྱོག་འཇམ་པ་ནི། །གང་ནས་བདག་འགྲོ་དྲིས་པ་སྟོན། །དེས་དེ་ལ་ལམ་འཁྱོག་པ་ཞིག་བསྟན་ནས། ལམ་གཞན་ནས་མདུན་དུ་རྒྱུགས་ཏེ། རྫིང་བུ་ཞིག་ཏུ་གོས་རྣམས་ཕུད་ནས་མིག་ཡ་གཅིག་བཙུམས་ཏེ་ཅི་ངོ་

ཤེས་སམ། འོན་ཏེ་མ་ཡིན་ཞེས་གློ་གཅིག་གིས་སྙེས་ཏེ་འདུག་གོ། །ཡང་སྨྲས་པ། གང་གིས་ཟ་བགྱིད་དེ་ནས་བཞུད། །གང་གིས་ཟ་བར་མི་བགྱིད་པ། །དེ་ནི་དོར་བར་བགྱིས་ནས་སུ། །ཟན་གྱི་ནགས་སུ་བཞུད་པར་མཛོད། །དེ་ནས་སྨན་ཆེན་པོས་ཇི་སྐད་བསྟན་པའི་ལམ་ནས་

སོང་བ་དང་། ཅི་ཙམ་ན་རྒྱང་རིང་པོ་ནས་དེ་ངོ་ཤེས་ནས་སྨྲས་པ། རས་བལ་ཐགས་སུ་བཏགས་པ་མི་བདོག་པས། །མ་བཀལ་ཐགས་སུ་མ་བཏགས་གྱོན་བྱེད་པ། །མཛེས་ལྡན་གཡོན་པའི་མིག་ཅན་གང་ནས་ནི། །མེ་ཏོག་གྲོང་དུ་འགྲོ་བ་བདག་ལ་སྟོན། །དེ་ནས་བུ་མོས་ཅུང་ཞིག་

བགད་ནས་སྨྲས་པ། འདིར་ནི་གཡོན་པའི་ལམ་འོར་ལ། །གང་ན་ཡོས་ནི་ཡོད་པ་དང་། །པ་ལ་ཤ་ཡི་མེ་ཏོག་རྒྱས། །དེ་ནས་བྲམ་ཟེ་བཞུད་དུ་གསོལ། །དེ་སོང་སོང་སྟེ་ཕྱིན་ནས་སྨྲས་ཏེ་ས་གའི་ཕའི་ཁྱིམ་དུ་སོང་ན་དེའི་ཕ་མ་མི་སྣང་ངོ་། །དེ་ནས་གྲོང་གི་བདག་པོ་རྣམས་ལ་སྨྲས་

Vol. 11 · folio 72b

པ། གལ་ཏེ་ཁྱོད་ཀྱིས་གནང་ན་ས་ག་འདི་བདག་གི་ཆུང་མ་བགྱིད་དོ། །ཚིག་དེ་སྨྲས་མ་ཐག་ཁོ་ནར་གྲོང་གི་བདག་པོ་དེ་ཐམས་ཅད་ཀྱིས་ཚིག་མཐུན་པར་བྲམ་ཟེ་ངན་པ་སློང་མོ་པ་ཁྱོད་གང་ངེད་ཀྱི་ས་ག་ལྷའི་བུ་མོ་འདྲ་བ་སློང་བ་ངོ་མི་ཚའམ། ཡུལ་འདི་ནས་ཡེ་སོང་ཤིག །ཁྱོད་ལ་ཁྱི་མི་སྲུན་

པ་དག་ཟར་བཅུག་ག་རེ་ཞེས་སྤྱོས་སོ། །དེ་སྐྱེ་བོས་བསྐྲད་ནས་དེ་ཁོ་ནའི་དྲུང་དུ་སོང་བ་དང་། ས་གས་རྒྱང་རིང་པོ་ནས་མཐོང་ནས་བྱོན་པ་ལེགས་སོ་ཞེས་སྨྲས་སོ། །དེ་ནས་སྨན་ཆེན་པོས་དེ་རྣམས་ཀྱིས་དེའུ་བརྡེགས་སོ་ཞེས་གྲོང་གི་བདག་པོ་རྣམས་ཀྱི་གཏམ་སྨྲས་པ་དང་། ས་གས་

སྨྲས་པ། ཁྱོད་ཀྱིས་ཇི་ལྟར་རམ་ཐབས་ཅི་ཞིག་གིས་སྨྲས། དེ་ནས་སྨན་ཆེན་པོས་གཏམ་ཇི་ལྟ་བ་བཞིན་དུ་བསྙད་པ་དང་། དེ་ནས་ས་གས་སྨན་ཆེན་པོ་ལ་སྨྲས་པ། བྲམ་ཟེ་ཆེན་པོ་ཁྱོད་ཐ་གི་མི་སྒོམ་མོ། །བུ་མོ་བསླང་བ་ཇི་ལྟར་ཁྱོད་ཀྱིས་མཛད་པ་དེ་ལྟར་བགྱིའམ། བྲམ་ཟེས་སྨྲས་པ།

གཞན་དུ་ཇི་ལྟར་བྱ། བུ་མོས་སྨྲས་པ། རེ་ཞིག་སྔར་ཉེ་བར་བཞུད་དོ། །དེ་ནས་རྗེས་སུ་མཐུན་པར་བགྱིའོ། །རྗེས་སུ་མཐུན་པར་བགྱིས་ནས་མགྲོན་དུ་འབོད་ཅིང་ཟས་སྐོམ་བདའ་བའི་སྟོན་མོས་སྟོན་ཏེ་སླད་ཀྱིས་ཁྱོད་ཀྱི་བགྱི་བ་གང་ལགས་པ་དེ་བགྱི་མོད། དེས་སོང་སྟེ་ཇི་སྐད་བསྟན་པ་བཞིན་

དུ་གྲོང་གི་བདག་པོ་རྣམས་ཁ་ཟས་གྱི་རྣམ་པ་བསོད་པས་སྟོན་ཏོ། །དེ་ནས་ལངས་ཏེ་ས་ག་བསླངས་པ་དང་། དེ་རྣམས་ཀྱིས་དེང་ཁྱོད་ཀྱི་ཡིད་ལ་བསམས་པ་བཞིན་རྫོགས་པར་བྱའོ་ཞེས་ཁས་བླངས་སོ། །དེ་ལྟ་བུའི་དོན་ལ་ཞུགས་པ་ན་ཐ་གི་ཙམ་ན་དེའི་ཕ་མ་འོངས་སོ། །དེ་ནས་སྨན་ཆེན་པོ་

དང་གྲོང་གི་བདག་པོས་ཕ་མ་ལ་གསོལ་བ་བཏབ་པ་དང་སྨྲས་པ། དོན་དེ་བསམས་དགོས་སོ། །དེ་ནས་གྲོང་གི་བདག་པོ་རྣམས་ཀྱིས་སྨྲས་པ། འདི་ལ་ཅི་བསམ་དུ་ཡོད། བྲམ་ཟེ་གཞོན་ནུ་བྱད་བཞིན་བཟང་ཞིང་བལྟ་ན་སྡུག་ལ་བསྟན་བཅོས་མང་པོ་ཤེས་ཤིང་རིག་བྱེད་དང་རིག་བྱེད་ཀྱི་ཡན་

ལག་གི་ཕ་རོལ་དུ་སོན་པ་ཞིག་ཡིན་པས་ཅིར་ཡང་མི་འགྱུར་གྱིས་བྱིན་ཅིག །དེ་ནས་སྨན་ཆེན་པོས་ཀྱང་བྲམ་ཟེ་རྣམས་བོས་ནས་བུ་མོ་བླང་བར་བྱས་སོ། །དེ་ནས་ཉི་མ་གཞན་ཞིག་ལ་གྱོས་པོ་དང་སྒྱུག་མོ་བོས་ནས་བཀུར་སྟི་བྱས་ཏེ་གོས་བསྐོན་ནས་གཉོད་བཅུག་སྟེ་ལུས་འཕགས་སུ་སྐྱེད་པའི་དྲུང་དུ་ཆས་

Vol. 11 · folio 73a

སོ། །དེ་ནས་འགྲོ་བ་ན་དེ་བྲམ་ཟེ་ཞིག་གིས་བཅུ་བཞི་པའི་སྟོན་མོས་སྟོན་ཏེ་ཡོན་དུ་ནས་བྲེ་གང་བྱིན་ནོ། །དེས་ནས་བྲེ་གང་གོས་ཀྱི་མཐའ་མར་ཕུར་ཏེ་གྲོགས་པོའི་ཁྱིམ་དུ་སོང་ནས་སྒོ་བརྡུངས་པ་དང་། བྲམ་ཟེ་མོས་སྨྲས་པ། དེ་སུ་ཞིག །དེས་སྨྲས་པ། ང་ནི་ཁྱོད་ཀྱི་ཁྱིམ་

ཐབ་ཀྱི་གྲོགས་པོ་དེ་ཡིན་ནོ། །དེས་སྨྲས་པ། འདི་ན་དེ་ཡང་མེད་ལ་འགའ་ཡང་མེད་པས་ཁྱིམ་བདག་དེ་མེད་པར་སྐྱེས་པ་གཞན་ཁྱིམ་དུ་འཇུག་ཏུ་མི་རུང་གིས་གཞན་ཞིག་ཏུ་བྲང་ཐོབ་ཤིག །ཅི་ཙམ་ན་སྨན་ཆེན་པོས་བདག་ཅིའི་ཕྱིར་འཇུག་ཏུ་མི་སྟེར་སྙམ་དཔྱད་ན་རེ་ཞིག་ན་སྐྱེས་པ་གཞན་

བཅུག་པར་མཐོང་ངོ་། །དེ་ནས་སྨན་ཆེན་པོས་སྨྲས་པ། འདིས་འཇུག་ཏུ་མ་སྟེར་བ་ནི་རུང་ངོ་། །དེ་དེ་ལྟར་སེམས་པ་དང་། ཐ་གི་ཙམ་ན་བྲམ་ཟེ་དེ་གྲོང་གཞན་ཞིག་ནས་འོངས་ནས་སྒོར་བོས་པ་དང་། དེས་ཁྱོའི་སྒྲ་ཐོས་ནས་དེ་ཇི་ལྟར་བྱ་སྙམ་ནས་མི་དགའ་སྟེ་དེ་སྤྱད་དུ་བཅུག་གོ། །

དེ་ནས་གཉི་ག་ཞུགས་ནས་བདེ་བར་འཁོད་དོ། །ཅི་ཙམ་ན་སྨན་ཆེན་པོས་བྲམ་ཟེ་མོ་ལ་སྨྲས་པ། ནས་འདི་དག་གར་གཞག །བྲམ་ཟེ་མོས་སྨྲས་པ། ས་ལའོ། །བྲམ་ཟེས་སྨྲས་པ། བྱི་བས་ཟོས་པར་འོང་མོད་དེས་མལ་གྱི་འོག་དང་། ཁྱིམ་གྱི་གྲ་ཕན་ཚུན་དུ་བརྟགས་

ན་དེ་མི་སྣང་ངོ་། །ཐ་གི་ཙམ་ན་ཕྱོགས་གཅིག་ན་སྤྱད་ཞིག་སྣང་བ་དང་། དེས་དེ་ནི་འདི་ན་ཡོད་དོ་སྙམ་མོ། །དེ་ནས་སྨན་ཆེན་པོས་སྨྲས་པ། སྤྱད་འདིར་ནས་བླུགས་སོ། །བྲམ་ཟེ་མོས་སྨྲས་པ། འདི་ན་བདག་གི་ནོར་གཅེས་པ་ཡོད་ན་འདིར་ནས་ཇི་ལྟར་བླུགས།

དེ་ནས་ཁྱོས་སྨྲས་པ། བྲམ་ཟེ་མོ་སྐྱོན་ཅན་དེ་སྣོད་གང་ཡང་རུང་བ་ཞིག་ཏུ་བྱོ་ཤིག་དང་། དེ་ནས་དེར་ནས་ལྡུགས་སོ། །སྨན་ཆེན་པོས་ཀྱང་སྨྲས་པ། གཞན་དུ་ནི་ནས་རྣམས་བྱི་བས་མ་རུང་བར་བྱེད་པས་དེའི་ཕྱིར་འདིར་བླུགས་པར་བྱའོ། །དེ་ནས་བྲམ་ཟེ་མོས་ངེས་པར་

རྟོགས་ནས་འཇིགས་ཤིང་སྐྲག་སྟེ་སྨྲས་པ། སྤྱད་འདི་ཡང་གཤེར་ལ་ནས་རྣམས་ཀྱང་མ་རུང་བར་འགྱུར་རོ། །དེ་ནས་སྨན་ཆེན་པོས་བྲམ་ཟེ་མོ་ལ་སྨྲས་པ། ཡང་ཁྱོད་ཀྱིས་སེམས་ཁྲལ་བྱ་མི་དགོས་པར་ཁོ་བོས་ཅི་ནས་ཀྱང་གཤེར་བར་མི་འགྱུར་བ་དང་། ནས་ཀྱང་མ་རུང་བར་

Vol. 11 · folio 73b

མི་འགྱུར་བ་དེ་ལྟར་བྱའོ་ཞེས་དེས་ལངས་ནས་རི་དགས་ཀྱི་པགས་པ་སྔ་ལོག་ཕྱི་ལོག་བྱས། མཆོད་ཕྱིར་ཐོགས་ཉིས་ལྟབ་ཏུ་མགུལ་དུ་ཐོགས་ཏེ་སྤྱད་སྐམ་མོ་ཞེས་སྤྱད་དུ་བ་ལང་གི་ལྕི་བ་དང་ཤིང་དག་བསྐྱ་བར་བརྩམས་པ་དང་། དེ་ནས་བྲམ་ཟེ་མོ་སྡུག་པ་དང་བྲལ་བ་ལས་

སྐྱེས་པའི་སྡུག་བསྔལ་མངོན་དུ་མཐོང་སྟེ། འདི་ད་ནི་མེད་པར་འོང་ངོ་སྙམ་ནས་བྱི་བོ་དེའི་ཁྱིམ་དུ་འདི་ལྟར་གྱུར་གྱིས་མྱུར་དུ་ཤེག་ཤིག་ཅེས་བང་ཆེན་བཏང་ངོ་། །དེ་ནས་དེའི་ཕས་ཐོས་མ་ཐག་ཁོ་ནས་སོང་སྟེ་སྨན་ཆེན་པོ་ལ་སྨྲས་པ། སྤྱད་འདི་རིན་གྱིས་བླང་ངོ་། །དེས་

སྨྲས་པ། བག་རྟོན་ལ་ལོང་ཤིག །ཇི་ལྟར་བྱ། གསེར་གྱི་དོང་ཚེ་ལྔ་བརྒྱ་དག་གིས་ཡིན་གྱི་གཞན་དུ་ནི་མ་ཡིན་ནོ་ཞེས་དེ་སྐད་ཀྱང་ཟེར་ཞིང་སྤྱད་དེའི་ཉེན་ཀོར་དུ་མེ་སྒྲོན་ཡང་སྦོར་བར་བྱེད་པ་དང་། དེའི་ཕས་བསམས་པ། དོན་འདི་ནི་བསྙད་དུ་མི་རུང་ངོ་སྙམ་ནས་ཁྱིམ་སྒོ་ཕྱེ་སྟེ་མི་

སྟོབས་པོ་ཆེས་བཏེག་ནས་རང་གི་ཁྱིམ་དུ་ཁྱེར་རོ། །སྨན་ཆེན་པོས་ཀྱང་ཕྱི་དེ་ཉིན་གསེར་གྱི་དོང་ཚེ་བརྒྱ་ཕྲག་གཅིག་ནི་ཁྱིམ་བདག་དེ་ལ་བྱིན་ཏེ། དེ་ལ་ཁྱོད་ཀྱི་ཆུང་མ་དེ་ནི་འདི་ལྟ་བུ་ཡིན་ནོ་ཞེས་ཁྱིམ་གྱི་གཏམ་དེ་དང་དེ་བས་ན་ཁྱོད་ཀྱིས་བག་གྱིས་ཤིག་ཅེས་སྨྲས་སོ། །གསེར་གྱི་དོང་ཚེ་

ལྷག་མ་བཞི་བརྒྱ་ནི་བྲམ་ཟེ་དེའི་ལག་ཏུ་གཏད་ནས་འདི་རྣམས་ནགས་ཀྱི་ཚང་ཚིང་ཅན་དུ་སོང་ལ་བདག་གིས་བསླངས་པའི་ས་ག་ལ་བྱིན་ཅིག །དེ་དག་ལ་ཁོ་བོ་བྲམ་ཟེ་མ་ཡིན་ཏེ། ཁོ་བོ་ནི་ལུས་འཕགས་པའི་རྒྱལ་པོ་སྐྱེད་པའི་བློན་པོའི་མཆོག་སྨན་ཆེན་པོ་ཞེས་བྱ་བ་ཡིན་ཏེ་ཁོ་བོ་རྟགས་

འདིས་ཚོལ་བའི་ཕྱིར་འོངས་པར་ཟད་དོ། །དེའི་ཕྱིར་བུ་མོ་ཡོངས་སུ་སྐྱོངས་ཤིག་ཅེས་ཀྱང་གྱིས་ཤིག་དེས་གསེར་གྱི་དོང་ཚེ་དེ་རྣམས་བརྫངས་ནས་ཕྲིན་ཡིག་ཀྱང་སྤྲིང་སྟེ་རྒྱལ་པོ་སྐྱེད་པའི་དྲུང་དུ་སོང་ངོ་། །བྲམ་ཟེ་དེས་ཀྱང་ནགས་ཀྱི་ཚང་ཚིང་ཅན་དུ་སོང་སྟེ། ས་ག་ལ་ཕྲིན་

ཡིག་དང་གསེར་གྱི་དོང་ཚེ་སུམ་བརྒྱ་བྱིན་ནོ། །ཅི་ཙམ་ན་ས་གས་བཀླགས་ན། བཞི་པོ་ཡི་ནི་ཆ་དག་ལས། །གལ་ཏེ་ཅ་གཅིག་མ་སྟེར་ན། །ཤིང་གི་སུ་མི་འདོད་བླངས་ནས། །དེར་འདི་ཆུག་ལ་ཆ་དོ་ཤིག །དེས་གསེར་གྱི་དོང་ཚེ་བརྒྱ་ཕྲག་གཅིག་མ་ཐོབ་པར་མཐོང་ནས་དེ་ནས་

Vol. 11 · folio 74a

རིངས་པར་མལ་གྱི་འོག་ཏུ་ཚོལ་བ་དང་། དེས་སྨྲས་པ། དེར་ཅི་ཚོལ། དེས་སྨྲས་པ། ཕོ་བྲང་འཁོར་ནས་རྒྱལ་པོའི་མི་འོངས་ན་གནོད་པ་བྱེད་པ་ཟུང་ཤིག་ཅེས་བྱུང་སྟེ། དེའི་ཕྱིར་སུ་མ་འདོང་ཚོལ་ལོ། །དེས་བླངས་ཏེ་བྲམ་ཟེ་དེ་ལ་སྨྲས་པ། དེར་དེ་ལྟ་

བུ་སུ་ཞིག་ཁྲིད་ཀྱང་ཁོ་མོས་མ་ཤེས་ན་རེ་ཞིག་འདིར་རྐང་པ་ཆུད་དམ་མི་ཆུད་སད་ཀྱིས་ཐང་ཅིག་ཆུག་ཤིག །བྲམ་ཟེས་ཀྱང་བསམ་པ་མནག་པའི་ཕྱིར་རྐང་པ་བཅུག་པ་དང་། དེས་རིངས་པར་གཟེར་བ་བཏབ་པོ། །བྲམ་ཟེས་སྨྲས་པ། ང་ཅིའི་ཕྱིར་གཟུང་། དེས་སྨྲས་པ། དེས་བཞི་

བརྒྱ་བཀུར་ན་ཁྱོད་ཀྱིས་དེ་ལས་བརྒྱ་བསྐུམས་པས་སོ། །དེ་ནས་བྲམ་ཟེ་ཡ་མཚན་སྐྱེས་ཏེ། དེས་བསམས་པ། སྨན་ཆེན་པོ་དང་། འདི་ནི་འདྲེ་དག་ཅིག་སྟེ། འདྲེ་ཆེན་པོ་གཉིས་གནས་གཅིག་ཏུ་འདུས་པར་གྱུར་ཏོ་སྙམ་ནས་དེས་ལྷག་མ་བྱིན་ནོ། །ཐ་གི་ཙམ་ན་ཕ་མ་འོངས་པ་དང་

གསར་དེ་བསྟན་ནས་དེ་ནི་བྲམ་ཟེ་མ་ལགས་ཏེ་དེ་ནི་ལུས་འཕགས་པའི་རྒྱལ་པོ་སྐྱེད་པའི་བློན་པོའི་མཆོག་སྨན་ཆེན་པོ་ཞེས་བགྱི་བ་ལགས་སོ་ཞེས་སྨྲས་པ་ཐོས་ནས་ཕ་མ་དང་བུ་མོ་དེའི་གཉེན་འདུན་གྱི་སྐྱེ་བོ་དག་བདག་ཅག་གིས་ནི་ཆེན་པོ་དང་གཉེན་དུ་བྱས་སོ། །བདག་ཅག་ནི་བསོད་ནམས་

དང་ལྡན་པ་དང་གཙང་བྱེད་ཡིན་ཏེ། ད་ནི་བདག་ཅག་གི་རིགས་སྨན་ཆེན་པོས་གསོལ་བར་བྱས་སོ་ཞེས་ཤིན་ཏུ་དགའ་བ་དང་ལྡན་ནོ། །དེ་ཕྱིན་ཆད་ས་ག་དེ་བསྐུ་མཉེ་དང་། ཁྲུས་དང་། ཟས་སྐོམ་དང་། གོས་དང་། རྒྱན་གྱི་ཁྱད་པར་དག་གིས་ཤིན་ཏུ་བྱི་དོར་བྱ་བར་བརྩམས་པ་

དང་རིང་པོ་མ་ལོན་པར་ཇེ་ཁྱད་པར་གཟུགས་ཤིན་ཏུ་བཟང་བ་དང་ཤིན་ཏུ་མཛེས་པར་གྱུར་ཏོ། །དེ་ནས་སྨན་ཆེན་པོ་གྲོང་ཁྱེར་དུ་སོང་བ་དང་། རྒྱལ་པོས་འོངས་སོ་ཞེས་ཐོས་སོ། །དེ་ནས་རྒྱལ་པོ་དང་བློན་པོ་རྙིང་པ་རྣམས་སྨན་ཆེན་པོ་འོངས་སོ་ཞེས་ཤིན་ཏུ་དགའ་བ་སྐྱེས་སོ། །རྒྱལ་པོ་

སྐྱེད་པས་སྨྲས་པ། ཇི་ལྟར་འོངས། དེས་སྨྲས་པ། བདག་གིས་མཆིས་འབྲང་རྙེད་དོ། །རྒྱལ་པོས་སྨྲས་པ། ཅི་འདྲ་བ་ཞིག །སྨན་ཆེན་པོས་སྨྲས་པ། གཟུགས་བཟང་ཞིང་བལྟ་ན་སྡུག་ལ་མཛེས་པ་དང་། བློ་ཕུན་སུམ་ཚོགས་པ་ཞིག་སྟེ། དེ་ནི་བདག་གི་སྦུ་ལ་འབབ་པ་

Vol. 11 · folio 74b

ལགས་སོ། །དེ་ལྟ་ལགས་ཀྱིས་ཀྱང་ལྷ་ལ་ད་བླང་བར་བགྱི་འམ་ཞེས་ཞུའོ། །དེ་ནས་རྒྱལ་པོས་སྨྲས་པ། ང་མ་གཏོགས་པ་གཞན་སུ་ཞིག་ཁྱོད་ཀྱི་ཐོག་ཏུ་འབབ་སྟེ། དེ་ཅིའི་ཕྱིར་ཞེ་ན། ཁྱོད་ནི་བློན་པོའི་མཆོག་ཡིན་ནོ། །དེ་ལྟ་བས་ན་དེ་ཅི་ནས་ཀྱང་ང་མགུ་བར་འགྱུར་བ་དེ་ལྟ་

བུའི་འབྱོར་པས་བླང་བར་བྱའོ། །ལྷ་དེ་ལྟར་འཚལ་ལོ་ཞེས་སྨྲས་ནས་སྨན་ཆེན་པོ་བློན་པོའི་ཚོགས་ཀྱིས་བསྐོར་ཅིང་བྲམ་ཟེ་དང་། ཁྱིམ་བདག་དང་། སྐྱེ་བོའི་ཚོགས་མགྲོན་དུ་བོས་པ་གཞན་རྣམས་དང་། གླང་པོ་ཆེ་བ་དང་། རྟ་པ་དང་། ཤིང་རྟ་པ་དང་། དཔུང་བུ་ཆུང་

གི་ཚོགས་མང་པོས་བསྐོར་ནས་རི་འོར་ནགས་ཀྱི་ཚང་ཚིང་ཅན་དུ་གྱོས་པོའི་ཁྱིམ་དུ་སོང་ངོ་། །སོང་ནས་བག་མ་བླང་བ་ཆེན་པོ་བྱས་ཏེ་མཐར་གྱིས་ཆུང་མ་ཁྲིད་ནས་གྲོང་ཁྱེར་དུ་འོངས་ཏེ་དེ་ན་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ནས་

བྱང་ཕྱོགས་ནས་ཚོང་པ་ལྔ་བརྒྱ་ཞིག་ཟོང་དུ་རྟ་ཁྱེར་ནས་ལུས་འཕགས་པའི་ལྗོངས་སུ་རྒྱལ་པོ་སྐྱེད་པའི་དྲུང་དུ་ལྷགས་སོ། །གནས་དེ་ན་སྨད་འཚོང་མ་ཚུལ་དང་། འདུལ་བ་དང་། གཟུགས་དང་། རྒྱ་ཆེ་བ་དང་མཐུན་པར་བྱེད་པ་དང་། བགད་པ་དང་། སྒེག་པ་དང་། སྤྲོ་བ་བསྐྱེད་

པ་དང་། གླུ་དང་། གར་དང་། ཟུར་སྟེགས་དང་། བསམ་པ་མཁས་པ་དེ་ལྟ་བུ་ལྔ་བརྒྱ་འཁོད་པས་ཚོང་པ་གང་དག་འོངས་ཤིང་ལྷགས་པ་རྣམས་རྫས་མེད་པར་བྱེད་དོ། །དེ་ནས་དེ་རྣམས་ཀྱིས་བྱང་ཕྱོགས་ནས་ཚོང་པའི་འགྲོན་པ་ཇི་ལྟར་ལྷགས་པ་ཐོས་ནས་དེ་རྣམས་ཀྱིས་

རེ་རེས་ཚོང་པ་རེ་རེ་ལ་རིམ་གྲོ་བྱ་བར་ཁས་བླངས་པས་ཉེ་བར་བཟུང་སྟེ་དེ་དག་རྣམས་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ནས་དེ་རྣམས་ཀྱི་དེད་དཔོན་གང་ཡིན་པ་དེ་ནི་བག་ཡོད་པ་ཅན་ཞིག་པས་དེ་དེ་རྣམས་དང་ལྷན་ཅིག་བག་མེད་པ་

མི་བྱེད་དོ། །སྨད་འཚོང་མ་དེ་རྣམས་ཀྱི་ནང་ན་ཀུན་གྱི་གཙོ་མོ་གང་ཡིན་པ་དེ་ནི་དེད་དཔོན་དེ་འདོད་ན་དེད་དཔོན་ནི་མི་བཏུབ་པོ། །དེ་ནས་དེས་ཚོང་པ་དེ་རྣམས་བསྡུས་ནས་གསོལ་བ་བཏབ་པ་བདག་དང་དེད་དཔོན་མཐུན་པར་མཛོད་ཅིག །དེ་ནས་ཚོང་པ་དེ་རྣམས་དང་སྨད་འཚོང་མ་དེ་

Vol. 11 · folio 75a

རྣམས་ཀྱིས་ཉིན་གཅིག་བཞིན་རྒྱུན་དུ་ཕེའུ་བྱས་ན་བག་མེད་པའི་དབང་དུ་མི་འགྲོའོ། །དེ་ནས་སྨད་འཚོང་མ་དེ་རང་ཉིད་འོངས་ཤིང་དེད་དཔོན་དང་ལྷན་ཅིག་བགད་པ་དང་། ག་ཞ་བྱས་པ་དང་། དེ་ནས་དེད་དཔོན་གྱིས་སྨྲས་པ། ང་ལ་འཁྲུལ་བར་བྱ་

བར་མི་ནུས་ན་ཅིའི་ཕྱིར་ཉོན་མོངས། དེས་སྨྲས་པ། གལ་ཏེ་འཁྲུལ་བར་བགྱི་ན་ཤེས་ལྡན་གྱིས་ཅི་སྩལ། དེས་སྨྲས་པ། རྟའི་མཆོག་ལྔ་སྦྱིན་ནོ། །འོ་ན་འཁྲུལ་བར་མ་བགྱིས་ན་སླད་ཀྱིས་ཀཱར་ཥཱ་པ་ཎ་མ་མཆིས་བཞིན་དུ་རྗེས་སུ་འཇུག་པར་བགྱིའོ། །དེ་ནས་དེ་

ལྟར་སྐུགས་བཙུགས་ནས་འབད་དེ་ཉེ་བར་སྤྱད་པ་ལས་ཀྱང་མ་ནུས་སོ། །ཅི་ཙམ་དུས་གཞན་ཞིག་ན་ཚོང་པ་དེ་རྣམས་ཀྱིས་སྨྲས་པ། དེད་དཔོན་གྲོང་ཁྱེར་གྱི་གཙོ་མོ་སྨད་འཚོང་མ་གཞག་པ་ལས་མ་ཐུག་གིས་འཇིག་རྟེན་གྱི་ཚུལ་གྱིས་ཤིག །དེ་ནས་དེད་དཔོན་གྱིས་དེ་

རྣམས་ལ་སྨྲས་པ། གྲོགས་པོ་དག་མཚན་མོ་རྨི་ལམ་ན་དེ་ལ་ཡོངས་སུ་སྤྱད་དོ། །ཚོང་པ་རྣམས་ཀྱིས་ཀྱང་དེ་ལ་བསྙད་པ་དང་། དེས་དེད་དཔོན་དེ་རྒྱལ་པོའི་མི་རྣམས་འཛིན་དུ་བཅུག་ནས་ཁྱོད་བདག་དང་འདོད་པ་སྤྱད་ཀྱིས་རྟའི་མཆོག་ལྔ་བྱིན་ཅིག །དེད་དཔོན་གྱིས་སྨྲས་པ།

ངན་པ་མོ་བརྫུན་དུ་སྨྲ་བ་ཟེར་རམ་ཞེས་དེ་གཉིས་རྩོད་ཅིང་རྒྱལ་པོའི་ཕོ་བྲང་དུ་དོང་ངོ་། །དེ་ནས་རྒྱལ་པོ་འཁོར་དང་བཅས་པ་ལས་ཤགས་བཀྱེ་བ་ལས་ཉི་མ་ནུབ་ཀྱི་བར་དུ་གཅིག་ཀྱང་མ་ཕམ་ལ། ཅིག་ཤོས་ཀྱང་མ་ཡིན་ནོ། །རྒྱལ་པོ་དང་བློན་པོ་ཐམས་ཅད་ཀྱང་སྐྱོ་བར་

གྱུར་ནས་བཀྲེས་པས་ཉེན་ཏེ་ཕྱིས་དཔྱད་དོ་ཞེས་རང་གི་ཁྱིམ་དུ་དོང་ངོ་། །དེ་ནས་སྨན་ཆེན་པོ་ནུབ་མོ་རང་གི་ཁྱིམ་དུ་སོང་ནས་ས་གས་དྲིས་པ། རྗེའི་སྲས་དེ་རིང་ཅིའི་སླད་དུ་ཐོགས། དེས་ཞལ་ཆེ་གཅད་པར་ཡང་མ་ནུས་པའི་གཏམ་དེ་ཐམས་ཅད་རྒྱ་ཆེར་བསྙད་དོ། །དེ་

ནས་ས་གས་སྨྲས་པ། ཁྱོད་དེ་ལྟར་རྟོག་པ་དང་། སེལ་བ་ཕུན་སུམ་ཚོགས་པ་དེ་ལྟ་བུ་ཐམས་ཅད་ཀྱིས་གཅད་པར་མ་སྤྱོད་ན་ཁྱོད་སྐྱེས་པའི་ཚུལ་དེ་ལྟ་བུ་ལགས་པ་ལྟ། སྨན་ཆེན་པོས་སྨྲས་པ། དེ་ནི་དེ་ལྟ་བུ་ཡིན་ན་ཅི་ཁྱོད་ཀྱིས་གཅད་ནུས་སམ། དེས་སྨྲས་

Vol. 11 · folio 75b

པ། རྔོ་ཐོག་སྟེ། བདག་གི་བློའི་ནུས་པ་ལ་གཟིགས་ཤིག །དེས་སྨྲས་པ། གཤེགས་ལ་རྫིང་བུའི་འགྲམ་དུ་རྟའི་མཆོག་ལྔ་བཞག་སྟེ། དེ་ནས་གནས་དེ་ཉིད་དུ་རྒྱལ་པོ་དང་བློན་པོ་རྣམས་ཀྱང་འདུས་ཏེ་ཤགས་འགྱེད་དུ་སྩལ་ཅིག །གལ་ཏེ་སྨད་འཚོང་མ་གཉིས་དང་།

གཉིས་འདོད་པ་སྤྱད་དོ་ཞེས་མཆི་ན་རྟའི་མཆོག་ལྔ་ཁྱེར་ཅེས་གསུངས་ཤིག །འོན་ཏེ་རྨི་ལམ་ན་འདོད་པ་སྤྱད་དོ་ཞེས་མཆི་ན་དེ་ནས་རྟའི་གཟུགས་བརྙན་ཆུ་ན་མཆིས་པ་དག་སྟོན་ཅིག །གལ་ཏེ་བླང་དུ་མི་རུང་བ་འདི་དག་བདག་ལ་ཅི་དགོས་ཞེས་སྨྲ་ན། དེ་ནས་ཇི་ལྟར་འདི་བླང་དུ་

མི་རུང་བཞིན་དུ་རྨི་ལམ་གྱི་འདོད་པ་སྤྱད་པ་ཡང་དེ་དང་འདྲའོ་ཞེས་གསུངས་ཤིག །དེ་ཐོས་ནས་སྨན་ཆེན་པོ་ཉིད་ཇེ་ཡ་མཚན་དུ་གྱུར་ཏོ། །དེ་ཕྱི་ཉིན་པར་རྒྱལ་པོ་ཡང་འདུས་པ་དང་། བློན་པོ་རྣམས་ཀྱང་ཚོགས་ནས་རྟའི་མཆོག་ལྔ་ཁྲིད་དེ་རྫིང་བུར་ལྷགས་ཏེ། དེར་རྟའི་མཆོག་ལྔ་

བཏགས་ནས་ཤགས་འགྱེད་དུ་བཅུག་གོ། །དེ་ནས་ས་གས་བསྟན་པ་བཞིན་དུ་སྨན་ཆེན་པོས་ཞལ་ཆེ་བཅད་པ་དང་། རྒྱལ་པོ་དང་བློན་པོ་དང་ཁྲམ་གྱི་རུ་རྣམས་ཀྱིས་ཐོས་ནས་ཡ་མཚན་སྐྱེས་སོ། །རྒྱལ་པོས་སྨྲས་པ་ཀྱེ་སྨན་ཆེན་པོ་གང་འདི་ཁར་ཚང་སྨྲས་པ་དང་། ང་དང་། བློན་པོ་

རྣམས་དང་། སྐྱེ་བོ་གཞན་ཡང་ཉོན་མོངས་པར་མི་འགྱུར་བ་ཞིག་ན་ཁྱོད་ཀྱི་ཐབས་སུ་ལས་བྱུང་། དེས་སྨྲས་པ། འདི་ནི་ས་གའི་ཐབས་ལགས་ཏེ། དེས་ཀྱང་ཁར་ཚང་བསྟན་ལགས་སོ། །དེ་ནས་རྒྱལ་པོ་དང་། བློན་པོ་དག་དང་། སྐྱེ་བོའི་ཚོགས་གཞན་རྣམས་ཀྱང་ཡ་མཚན་

སྐྱེས་ཏེ། ཀྱེ་མ་འོ་ཤིང་མཁན་གྱི་བུ་མོ་ས་ག་ནི་ཤིན་ཏུ་མཁས་སོ། །ས་ག་བློ་དང་ལྡན་ནོ་ཞེས་ཡུལ་ཐམས་ཅད་དུ་སྒྲ་གྲགས་པར་གྱུར་ཏོ། །དེ་ནས་བྱང་ཕྱོགས་ཀྱི་ཚོང་པ་ཞིག་གིས་རྒོད་མ་གཉིས་ཤིག་རྒྱལ་པོ་ལ་སྐྱེས་སུ་ཕུལ་ཏེ། ལྷ་རྒོད་མ་འདི་དག་སྨད་ལགས་ན། མ་འམ་བུ་གང་ལགས་

པ་ནི་གཞན་གྱིས་མ་འཚལ་ཏོ། །དེ་ལ་ཡང་རྒྱལ་པོ་འཁོར་དང་བཅས་པ་དེ་དག་སྐྱོ་བར་གྱུར་ནས་དེ་ཁོ་ན་བཞིན་དུ་ཤིང་མཁན་གྱི་བུ་མོ་ས་ག་ལ། སྨན་ཆེན་པོས་སྨྲས་པ་དང་། རྗེའི་སྲས་གང་གི་སྤུ་གཤོར་བ་དེ་ནི་མའོ། །གང་གི་སྤུ་འཇམ་པ་ནི་བུའོ། །ཕྱི་དེ་ཉིན་དེ་བཞིན་དུ་སྨན་ཆེན་པོས་

Vol. 11 · folio 76a

སྨྲས་ནས། ལྷ་ས་གའི་ཐབས་ལགས་སོ་ཞེས་སྨྲས་པ་དང་། དེ་ལ་ཡང་རྒྱལ་པོ་ཡ་མཚན་སྐྱེས་སོ། །དུས་གཞན་ཞིག་ན་སྦྲུལ་ཁས་སྡིགས་པ་ཞིག་གིས་སྦྲུལ་གཉིས་ཁྱེར་ཏེ་འོངས་ནས་དེ་ལ་གཅིག་ནི་ཕོ། ཅིག་ཤོས་ནི་མོ་ལགས་ན་གང་ཕོ་གང་མོ་ལགས་

པ་ནི་མ་འཚལ་ཏོ། །དེ་ནས་རྒྱལ་པོ་དང་། བློན་པོ་དང་། མདུན་ན་འདོན་རྣམས་སྐྱོ་ནས་དེ་ཁོ་ན་བཞིན་དུ་སྨན་ཆེན་པོས་ས་ག་ལ་དྲིས་ཤིང་། གང་ཞིག་ཕོ་འམ་མོ་ཡིན་པར་མ་ཤེས་པ་ཡང་རྒྱས་པར་སྨྲས་པ་དང་། དེ་ནས་ས་གས་ཅུང་ཞིག་བགད་དེ་སྨྲས་པ། གང་དག་དོན་འདི་

ལྟ་བུ་མི་རྟོགས་པ་དེ་ལྟ་བུ་ཁྱོད་ཀྱང་བློན་པོའམ། ཡོང་རྒྱལ་པོ་གོ་བློན་པོ་རྟོག་པ་དང་། སེལ་བ་ཕུན་སུམ་ཚོགས་པ་དེ་ལྟ་བུ་དྲུག་གིས་བརྒྱན་པ་ལྟ་ཞིག་དྲི་ཡིས་ཅི་ཁྱོད་ཀྱིས་ཤེས་སམ། སྨྲས་པ། ཧ་ཅང་མོད་འོད་མའི་རྩེ་མོའམ། སྨིག་མའི་རྩེ་མོ་ལ་རས་བལ་གྱི་འདབ་

མའམ། བལ་གྱིས་དཀྲིས་ཏེ་གཉི་གའི་རྒྱབ་ཏུ་རེག་པར་བགྱིས་པ་དང་། དེ་དག་ལས་གང་རེག་ཏུ་མི་བཟོད་པ་དེ་ནི་ཕོ་ལགས་སོ། །ཕྱི་དེ་ཉིན་དེ་བཞིན་དུ་བྱས་པ་ལས་རྒྱལ་པོ་མགུ་བར་གྱུར་ཏོ། །དེ་ནས་དུས་གཞན་ཞིག་ན་ལྷོ་ཕྱོགས་ནས་ཚོང་པ་དག་ཅིག་ཙན་དན་གྱི་སྡོང་པོ་ཞིག་ཁྱེར་

ཏེ་འོངས་པ་དེའི་མགོ་མཇུག་མ་ཤེས་ཏེ། དེ་ནས་དེ་ཁོ་ན་བཞིན་དུ་ཆུང་མ་ལ་དྲིས་པ་དང་། རྗེའི་སྲས་རྫིང་བུའི་ནང་དུ་བོར་དང་། རྩ་བ་གང་ལགས་པ་དེ་འོག་ཏུ་འབྱིང་ངོ་། །དེ་ཡང་རྒྱལ་པོ་སྐྱེད་པ་དང་། གཞན་ཡང་སྐྱེ་བོའི་ཚོགས་དག་གིས་ཐོས་ནས་ཡ་མཚན་སྐྱེས་སོ། །རྒྱལ་པོ་

སྐྱེད་པའི་བློ་སྐྱེས་པ་ངའི་བློན་པོ་དག་གི་ནང་ན་ནོར་བུ་རིན་པོ་ཆེ་རྟོག་སུ་མཁས་ཤེས་པར་བྱའོ་སྙམ་ནས། དེས་ཁང་པ་རྩེག་མའི་སྟེང་དུ་རྒྱལ་མཚན་གྱི་རྩེ་མོ་ལ་རིན་པོ་ཆེ་བཏགས་སོ། །དེའི་འོག་ན་རྫིང་བུ་ཞིག་ཡོད་དོ། །རྒྱལ་པོས་ཀྱང་སུས་ནོར་བུ་རིན་པོ་ཆེ་འདི་ཤེས་པ་འདི་ལ་སྦྱིན་པར་

དམ་པ་བསྟབས་སོ། །རྫིང་བུ་དེར་ཞུགས་ནས་འོད་དེ་བླང་བ་ལ་ཞུགས་ན་བླང་ཡང་མ་ནུས་སོ། །དེ་ནས་ཤིང་མཁན་གྱི་བུ་མོ་ས་ག་ལ་སྨྲས་པ་དང་། རྗེའི་སྲས་སྟེང་དུ་གཟིགས་ཤིག་དང་། དེ་རྒྱལ་མཚན་གྱི་རྩེ་མོ་ལ་བཏགས་པ་དེའི་མཐུས་གཟུགས་བརྙན་གདའ་མོད་ཀྱི་ནང་དུ་བཞུད་

Vol. 11 · folio 76b

དེ་རྒྱལ་མཚན་གྱི་རྩེ་མོ་ལས་བླང་བར་བགྱིའོ། །དེས་ཕྱི་དེ་ཉིན་དེ་བཞིན་དུ་བྱས་པ་དང་། རྒྱལ་པོས་སྨྲས་པ། འདི་སུའི་ཐབས། དེས་ས་གའི་ཐབས་ལགས་སོ་ཞེས་སྨྲས་པ་དང་། མགུ་ནས་རྣམ་པ་ཐམས་ཅད་དུ་ཤིན་ཏུ་མཁས་སོ་ཞེས་བསྟོད་དོ། །དེ་ནས་ས་ག་ཤིན་ཏུ་གཟུགས་

དང་ལྡན་པར་བློན་པོ་དྲུག་གིས་ཤེས་ཏེ། དེ་བདག་ཅག་གིས་ནོར་བུ་དང་། དངུལ་དང་། དབྱིག་དང་། གསེར་དང་། ཨན་ད་རྙིལ་དང་། པད་མ་རཱ་ག་དང་། རྡོའི་སྙིང་པོ་ལ་སོགས་པས་བྲིད་ལ་ལྷན་ཅིག་ཕྲད་པར་བྱའོ་སྙམ་པ་ལས་མ་ཟུག་གོ། །དེ་དག་རྒྱུན་དུ་སྨྲ་བ་དང་།

དེས་སྨན་ཆེན་པོ་ལ་སྨྲས་པ། ཁྱོད་ཀྱིས་ཡུལ་ཆོས་ཀོ་བུད་མེད་གང་སུ་ཡང་རུང་གཞོན་ཞིང་གཟུགས་བཟང་བ་དེ་གཞན་གྱི་སྐྱེས་པས་སླུ་བ་དེ་ལྟ་བུ་ཞིག་ལྟ། དེས་སྨྲས་པ། འདི་ནི་ཐམས་ཅད་ཀྱི་ཆོས་ཏེ། སྐྱེས་པ་རྣམས་ནི་བུད་མེད་ཐམས་ཅད་ལ་དོན་དུ་གཉེར་མོད་ཀྱི་བུད་མེད་ཉིད་

ཀྱིས་ཤེས་པར་བྱས་ཏེ། གལ་ཏེ་བུད་མེད་མཛངས་ན་དེ་བྱེད་དུ་མི་བཏུབ་པོ། །དེ་ནས་ས་གས་སྨྲས་པ། རྗེའི་སྲས་གལ་ཏེ་དེ་ལྟ་བུ་ལ་ཅོ་དྲི་བའམ། གནོད་པ་ཞིག་བགྱིས་ན་དེ་ལ་ཉེན་དུ་མི་འགྱུར་གྲང་། སྨན་ཆེན་པོས་སྨྲས་པ། བག་རྟོན་ལ་བྱོས་ཤིག །དེ་ནས་དེས་ཁྱེད་ཀྱིས་

ནའོ་ཞེས་སྒྱུ་མཛོད་ཅིག་དང་། དེ་ནས་མཐོ་བཙམ་པར་བགྱིའོ། །དེ་མིན་པར་སྒྱུ་བྱས་ཏེ་འདུག་པ་དང་། དེས་ཀྱང་དེ་དག་གི་ཕོ་ཉ་གང་དག་ཡིན་པ་དེ་དག་ལས་བཟླུགས་པ་འདི་མི་བདེ་མོད་ཀྱི། ཇི་ལྟར་བཀའ་སྩལ་པ་དེ་བཞིན་དུ་རིམ་གྲོ་འཚལ་ལོ་ཞེས་འདི་སྐད་དུ་སོ་སོར་སྤྲིང་ངོ་། །དེས་ཀྱང་

ཤིང་ལས་སྨན་ཆེན་པོའི་གཟུགས་བརྙན་བྱས་ནས་དེ་གོས་ཀྱིས་གཡོགས་ཏེ་མལ་དུ་བསྙལ་ལོ། །དེ་དག་སོ་སོ་ལ་ཡང་སྨྲས་པ། སྨན་ཆེན་པོ་འདི་ནི་ཉམ་ཆུང་སྟེ། ཆེ་གེ་མོ་ཞིག་དང་། ཆེ་གེ་མོ་ཞིག་གི་དུས་སུ་གཞན་གྱིས་མ་འཚལ་བར་སྤྱོན་ཅིག་ཅེས་བྱས་ནས་སྒྲོམ་ཆེན་པོ་

དྲུག་བྱས་ཏེ་རང་གི་ཁང་པ་དྲུག་ཏུ་བཅུག་གོ། །དེ་ནས་དེ་དག་འོངས་པ་དང་སྒྲོམ་དུ་བཅུག་སྟེ་བཅིངས་ནས་ཕྱི་དེ་ཉིན་སྨན་ཆེན་པོ་ཤིའོ་ཞེས་སྒྲ་ཡང་བཏང་ངོ་། །དེ་ནས་རྒྱལ་པོའི་བཙུན་མོའི་འཁོར་དང་བཅས་པ་དང་། གཞན་ཡང་སྐྱེ་བོའི་ཚོགས་དག་གིས་ཐོས་ནས་མྱ་ངན་ཆེན་

Vol. 11 · folio 77a

པོ་དང་ལྡན་ཏེ། བདག་ཅག་སེམས་ཅན་འདི་ལྟ་བུ་དང་བྲལ་བར་གྱུར་ཏོ་ཞེས་རབ་ཏུ་སེམས་ཤིང་མྱ་ངན་གྱི་རྒྱ་མཚོར་ཞུགས་ནས་སྙིང་རྗེ་རྗེ་སྐད་དུ་སྨྲའོ། །ཤིང་མཁན་གྱི་བུ་མོ་ས་ག་དེས་ཀྱང་བློན་པོ་སྒྲོམ་དུ་བཅུག་པ་དེ་དྲུག་ལེགས་པར་བསྡམས་ནས་རྒྱལ་པོ་སྐྱེད་པའི་དྲུང་

དུ་ཁྱེར་ཏེ་ལྷ་སྨན་ཆེན་པོ་ནི་དུས་ལས་འདས་ཏེ། དེའི་ནོར་གང་ལགས་པ་དབྱིག་དང་། གསེར་དང་། དར་དང་། རིན་པོ་ཆེ་ལ་སོགས་པ་དེ་དག་དེ་ཉིད་ཀྱི་རྒྱས་བཏབ་པ་འདི་དག་ལགས་སོ། །དེ་ནས་རྒྱལ་པོས། དེ་ནི་དེ་རིང་ཤི་ནས་དེང་ཉིད་ང་ལ་འདི་ཕུལ་ལོ་ཞེས་ཤིན་ཏུ་མྱ་ངན་གྱིས་གདུངས་

སོ། །དེའི་སྐབས་སུ་སྨན་ཆེན་པོ་ཉིད་གནས་གཞན་ཞིག་ནས་མེ་ཏོག་གིས་བརྒྱན་ཏེ་དགོད་ཅིང་རྒྱལ་པོའི་ཕོ་བྲང་དུ་ཕྱིན་ནས་རྒྱལ་པོ་ལ་ཕྱག་བྱས་ཏེ་སྨྲས་པ། ལྷས་བདག་གདུགས་འགའ་ཡང་བྱམས་པས་མ་བཟུང་སྟེ། དེང་ཉིད་སྡུམ་པ་རྒྱལ་པོས་བཞེས་ལགས་སམ།

རྒྱལ་པོས་སྨྲས་པ། ངས་མ་བླངས་ཏེ། ཁྱོད་ཉིད་ཀྱི་ཁྱིམ་ནས་ཁྱེར་ཏེ་འོངས་སོ། །ཡང་སྨྲས་པ། རྒྱལ་པོ་ཆེན་པོ་སྨན་ཆེན་ནི། །འདི་ནས་འཇིག་རྟེན་ཕ་རོལ་མཆིས། །དེ་ཡི་རིན་ཆེན་འདི་རྣམས་ལགས། །དེ་དག་མི་དབང་བཞེས་སུ་གསོལ། །རྒྱལ་ཆེན་བདག་ནི་

ཡུགས་ས་སྟེ། །ཁྱིམ་ཐབ་དང་ནི་བྲལ་བས་ན། །བདག་ལས་བརྙས་པ་བགྱིས་ནས་ལགས། །བདག་ལས་ནོར་ནི་ཕྲོགས་སུ་མཆི། །དེ་ནས་སྨན་ཆེན་པོས་བློན་པོའི་མཆོག་རྣམས་ཀྱི་བློའི་དཔྱོད་པའི་ལེགས་པ་ཡང་བསྟན་ཏོ། །རྒྱལ་པོ་སྐྱེད་པས་ཀྱང་བལྟས་ན་སྐྲ་དང་ཁ་སྤུ་

བྲེགས། རྐང་ལག་བཞི་བསྐུམས་པའི་བློན་པོ་དྲུག་མཐོང་ནས། བགད་དེ་སྨན་ཆེན་པོ་ལ་སྨྲས་པ། སྨན་ཆེན་པོ་ཐབས་འདི་སུའི་ཡིན་སྨྲོས་ཤིག །དེས་ས་གའིའོ་ཞེས་ཐམས་ཅད་རྒྱས་པར་སྨྲས་སོ། །དེ་ནས་རྒྱལ་པོས་བསམས་པ། ཀྱེ་མ་བུད་མེད་ཀྱི་བློ་གྲོས། ཀྱེ་མ་

བརྟན་པ། ཀྱེ་མ་བློའི་དཔྱོད་པ། དེས་བློན་པོའི་མཆོག་འདི་དག་འདི་ལྟར་ཅོ་དྲིས་སོ་ཞེས་མགུ་ནས་དེ་བཀུར་བ་ཆེར་བྱས་སོ། །ཡུལ་ཐམས་ཅད་དུ་ཡང་ཤིང་མཁན་གྱི་བུ་མོ་ས་ག་ནི་དེ་ལྟར་བློ་དང་ལྡན་ནོ་ཞེས་སྙན་པ་གྲགས་སོ།། །།སྡོམ་ནི། ང་ཡང་སྨན་གྱིས་དེ་བཞིན་ནོ། །ཁྱི་དང་

Vol. 11 · folio 77b

ཕྱུགས་ལ་བཟས་བསོད་སྦྱིན། །དམ་བཅའ་རྡོ་བ་རོལ་མོ་རྣམས། །ཨུ་དུམ་བཱ་ར་སྒྱུར་མོར་འདྲ། །སེ་མོ་དོ་ཡང་སྟོར་བ་སྟེ། །ནེ་ཙོ་གསང་ཡང་བསྙད་པའོ། །བར་མདོ་གཉིས་པའི་ཚིགས་བཅད་དོ། །དེ་ནས་རྒྱལ་པོས་ས་ག་མཁས་ཤིང་མཛངས་པར་ཤེས་ནས་སྨན་ཆེན་པོ་

བསོད་ནམས་དང་ལྡན་པས་ནི་འདི་ལྟ་བུའི་ཆུང་མ་བློ་དང་ལྡན་པ་རྙེད་དོ་སྙམ་མོ། །དེ་ནས་རྒྱལ་པོས་སྨན་ཆེན་པོ་ལ་སྨྲས་པ། གལ་ཏེ་ཁྱོད་དགའ་བར་ལྟ་ན་ང་ལ་ཡང་ཆུང་མ་འདི་ལྟར་བློ་དང་ལྡན་པ་ཞིག་བཙལ་ཏེ་བླངས་ན་ཁྱིམ་གྱི་སྲིད་དང་། གཞན་ཡང་ཕྱི་རོལ་རྒྱལ་པོའི་ཕོ་བྲང་གི་དོན་

འདི་ལ་བདེ་བར་གནས་སོ། །སྨན་ཆེན་པོས་སྨྲས་པ། གང་ནས་བཙལ་བར་བགྱི། གང་གི་ཕྱིར་རྒྱལ་པོ་སྐྱེད་པས་སྨྲས་པ། ལྔ་ལེན་གྱི་རྒྱལ་པོའི་བུ་མོ་སྨན་ལྡན་ཞེས་བྱ་བ་གཟུགས་བཟང་ཞིང་མཛེས་པ། གཞན་ཡང་དྲན་པ་དང་ཤེས་བཞིན་ཅན་འདི་ལྟར་ས་ག་ཅི་འདྲ་བའི་བློ་དང་

ལྡན་པ་ཞིག་ཡོད་ཅེས་ཐོས་པ་དེ་ཆུང་མར་ལོང་ཤིག །དེ་ནས་སྨན་ཆེན་པོས་སྨྲས་པ། ལྷ་འདི་ལ་ཐབས་ཞིག་བགྱི་ན་དེ་ཡང་ལྷའི་མཚམས་ལས་གཞན་པ་དགྲ་ལྟ་བུར་མཆིས་པ་སྟེ། དེ་ལ་སྔར་ཐབས་བཙལ་བར་བགྱིའོ། །དེ་ནས་རྒྱལ་པོ་སྐྱེད་པས་བློན་པོ་མདུན་ན་འདོན་དག་བཏང་

སྟེ། དེ་དག་སློང་བ་ལ་ཞུགས་སོ། །དེ་ནས་ལྔ་ལེན་གྱི་རྒྱལ་པོས་བློན་པོ་རྣམས་བསྡུས་ཏེ། ཇི་ལྟར་བྱ་ཞེས་དྲིས་པ་དང་། དེ་དག་གིས་སྨྲས་པ། རྒྱལ་པོ་སྐྱེད་པ་འདི་སྔན་ཆད་ལྷའི་བཀའ་མི་ཉན་ཏེ་དོན་འདིས་འོ་སྐོལ་གྱི་དབང་དུ་འགྱུར་བ་ནི་དེ་དག་མཆིས་ནས་ཇི་ལྟར་བགྱི་བ་གདོད་

མཛད་ཀྱིས་རེ་ཞིག་སྩོལ་ཅིག་དེས་བྱིན་ནས་ཆེ་གེ་མོ་ཞིག་ན་ཟླ་བ་ཕྱེད་ཀྱི་ཉིན་པར་ཡུད་ཙམ་པ་དག་དང་སྦྱར་ཏེ། བག་མ་ལེན་དུ་ཤོག་ཤིག་ཅེས་བྱས་ནས་ཕྱིར་སོང་སྟེ། རྒྱལ་པོ་སྐྱེད་པ་ལ་བུ་མོ་སྨན་ལྡན་ནི་ཐོབ་པོ་ཞེས་ཤེས་པར་བྱས་སོ། །ཇི་ལྟར་ནམ་བླང་བར་བྱ། དེ་དག་གིས་ཚེས་

གྲངས་ཆེ་གེ་མོ་ཞིག་དང་། ཡུད་ཙམ་པ་དང་སྦྱོར་ལ་ཤོག་ཤིག་ཅེས་མཆིའོ། །དུས་དེའི་འོག་ཏུ་ལྔ་ལེན་གྱི་རྒྱལ་པོས་དེས་བག་མ་གཏང་བའི་དོན་དུ་བརྩམས་པ་ནི་བཟའ་བ་དང་བཏུང་བ་དག་སྟ་གོན་བྱས་ཏེ། བཟའ་བ་དང་བཏུང་བའི་རྣམ་པ་ཐམས་ཅད་དུག་དང་བསྲེ་བ་བྱས་ནས་ལྔ་

Vol. 11 · folio 78a

ལེན་གྱི་རྒྱལ་པོས་བསྡོགས་པ་འདི་ལས་མ་འཕྱི་བར་ཤོག་ཤིག་ཅེས་ཕོ་ཉ་བཏང་ངོ་། །དེ་ནས་དེ་ཐོས་པ་དང་། སྨན་ཆེན་པོས་རྒྱལ་པོ་སྐྱེད་པ་ལ་སྨྲས་པ། ལྷ་རེ་ཞིག་འཕྲལ་དུ་བགྱིར་མི་རུང་སྟེ། དེ་ཅིའི་སླད་དུ་ཞེ་ན། དེ་ནི་གང་གི་ཕྱིར་ལྷའི་མཚམས་ལས་གཞན་

པའི་རྒྱལ་པོ་སྟེ། དེ་དང་རྟག་ཏུ་རྩོད་ཅིང་འདིས་རྒྱུན་དུ་མི་མཐུན་པ་ལྷན་ཅིག་ཏུ་བགྱིས་པས་བརྟག་པར་བགྱིའོ། །རྒྱལ་པོས་སྨྲས་པ། སུ་རྟོག་ཏུ་བཏང་། དེས་སྨྲས་པ། རྒྱལ་པོ་བདེ་བར་བཞུགས་ཤིག །བདག་ལ་ནེ་ཙོ་སྤྱོད་གསལ་ཞེས་བགྱི་བ་མཁས་པ། གསལ་བ།

ཡིད་གཞུངས་པ་དེ་དེར་བཏང་ལ་དེས་ཐམས་ཅད་ལ་གཏམ་བགྱིས་ནས་སླར་མཆི་བར་བགྱིའོ། །དེ་བཞིན་གྱིས་ཤིག །དེ་དེར་སོང་ནས་བསམས་པ། སུ་ལ་བཅར་ཏེ་གང་གིས་ན་ལྷན་ཅིག་འགྲོགས་ཤིང་གཏམ་བྱ། དེས་ཀུན་ཏུ་བལྟས་ན་ཅུང་ཟད་ཀྱང་མ་མཐོང་ངོ་། །འཇིག་རྟེན་གྱི་

ཐ་སྙད་གང་གིས་བྱ་བསམ་མོ། །ཇི་ཙམ་ན་རྒྱལ་པོའི་ཕོ་བྲང་དུ་ཞུགས་ཏེ་དེར་བལྟས་ན་གདུང་གི་བར་ན་རི་སྐེགས་ཞིག་འདུག་པ་མཐོང་སྟེ། དེ་དེར་སོང་ནས་ཀྱང་དེ་གཉིས་ཕན་ཚུན་གཅིག་ལ་གཅིག་དགའ་བས་ཡང་དག་པར་མགུ་བར་བྱས་ནས་གང་ནས་འོངས་ཞེས་དྲིས་སོ། །

ནེ་ཙོས་སྨྲས་པ། བྱང་ཕྱོགས་ཀྱི་རྒྱལ་པོ་ཤི་བི་ཞེས་བྱ་བ་དེ་ནས་ཁོ་བོ་འོངས་སོ། །ཁོ་བོ་སྐྱེད་མོས་ཚལ་སྲུང་སྟེ། དེ་ལ་ཁོ་བོའི་ཆུང་མ་དམ་པ་གཟུགས་བཟང་བ་མཛངས་ཤིང་རྗེས་སུ་མཐུན་པ་ཡིད་དུ་འོང་བ་སྨྲ་བ་རི་སྐེགས་མོ་ཞིག་ཡོད་པ་ལས་རི་སྐགས་དེ་ཡང་གཞན་

དུ་སོང་བ་ལས་ཁྲས་ཁྱེར་ཏེ། དེས་ན་ཁོ་བོ་མྱ་ངན་གྱིས་སེམས་གདུངས་ཤིང་ཕན་ཚུན་འཁྱམ་པ་ལས་ཁྱོད་ཀྱི་དྲུང་དུ་ཕྱིན་ནོ། །བཟང་མོ་ཁྱོད་ཁོ་བོའི་ཆུང་མར་མི་རུང་ངམ། དེས་སྨྲས་པ། ཇི་ལྟར་ན་ནེ་ཙོའི་ཆུང་མ་རི་སྐེགས་ཡིན་ཞེས་མ་ཐོས་མ་མཐོང་སྟེ། དེ་ལྟ་མོད་ཀྱི་ནེ་

ཙོའི་ཆུང་མ་ནི་ནེ་ཙོ་ཉིད་ཡིན་ནོ་ཞེས་ཐོས་སོ། །དེ་ནས་སྤྱོད་གསལ་གྱིས་གཞན་དག་ཕན་ཚུན་འོང་ཞིང་འགྲོ་བའི་རྣམ་གྲངས་ཀྱི་རྣམ་པས་ཉེ་བར་བསྙེན་ཏོ། །ཡང་སྨྲས་པ། བཟང་མོ་བདག་ནི་ཤི་བིའི་རྒྱལ། །སྐྱེད་མོས་སྲུང་བར་གྱུར་པ་སྟེ། །ཁོ་བོའི་ཆུང་མ་རི་སྐེགས་ནི། །འཇམ་

Vol. 11 · folio 78b

པའི་ཚིག་ཏུ་སྨྲར་གྱུར་པ། །བྱས་ནི་ནན་གྱིས་ཁྱེར་བས་ན། །བདག་ནི་དེ་ཡིས་གདུངས་པར་གྱུར། །ཁོ་བོ་འདོད་པས་གདུངས་ནས་ནི། །ཁྱོད་ཀྱི་གན་དུ་འོངས་པ་ཡིན། །རི་སྐེགས་ཀྱིས་སྨྲས་པ། ནེ་ཙོའི་ཆུང་མ་རི་སྐེགས་ནི། །མི་རིགས་པར་ནི་བདག་གིས་བསམས། །ནེ་ཙོའི་

ཆུང་མ་ནེ་ཙོ་བར། །འདི་སྐད་དུ་ནི་མཁས་པས་བསྒྲགས། །དེ་ནས་དེ་བཞིན་དུ་སྨྲས་ཤིང་བསམས་པ་བསྒྲུབས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ནས་ནེ་ཙོ་སྤྱོད་གསལ་གྱིས་རྒྱལ་པོའི་ཕོ་བྲང་ན་བཟའ་བ་མང་པོ་སྦྲང་རྩིའི་

མཆོག་ཅེས་བྱ་བ་དང་། མྱ་ངན་མེད་སྒྱུར་དང་། ཕེའུ་ཏེའུ་དག་དོག་ལེར་འཚེད་པ་དང་། བུ་རམ་ལས་བྱས་པའི་ཁ་ཟས་མང་པོ་མཐོང་ནས་རི་སྐེགས་ལ་སྨྲས་པ། ཅིའི་ཕྱིར་འདི་དག་འཚེད། ཅི་སྟེ་བདག་ཅག་གིས་ཐོབ་བམ། དེ་ནས་རི་སྐེགས་ལ་ཚིགས་སུ་བཅད་དེ་སྨྲས་

པ། དོག་ལེར་མར་སར་མང་པོ་ནི། །འཚེད་པར་བྱེད་པ་འདི་རྣམས་དག །ཁ་ཅིག་བདག་ཅག་གིས་ཐོབ་བམ། །རི་སྐེགས་ཀྱིས་ནི་འཇམ་པོར་སྨྲོས། །རི་སྐེགས་ཀྱིས་སྨྲས་པ། དོག་ལེར་བཅའ་བ་ཁུར་བ་དག །འཚེད་པར་བྱེད་པ་འདི་དག་ཀྱང་། །ནེ་ཙོ་མཁས་པ་

སྤྱོད་གསལ་བ། །འདི་རྣམས་ཁྱོད་ཀྱི་བཟའ་བ་མིན། །འདི་དག་སྐྱེད་པའི་ཆེད་དུ་ནི། །དུག་གིས་ཐམས་ཅད་བསྲེས་པ་ཡིན། །དེ་ནས་སྤྱོད་གསལ་གྱིས་རིག་པ་སྔོན་དུ་བཏང་ནས་རི་སྐེགས་ལ་ཐབས་ཀྱིས་ཡང་སྨྲས་པ། ལྔ་ལེན་རང་གི་བུ་མོ་བ། །སྐྱེད་པ་ལ་ནི་བྱིན་ནོ་ཞེས། །

དེ་ལྟ་བུ་ཡང་སྒྲ་དག་གིས། །ཕྱོགས་ཀུན་དུ་ནི་རྒྱས་གྱུར་ན། །དེ་ལ་སུ་ཡི་ཚིག་བདེན་ཞིང་། །གང་གི་ཚིག་དེ་དེ་བཞིན་ཡིན། །རི་སྐེགས་ཀྱིས་སྨྲས་པ། ནེ་ཙོ་མཁས་པ་སྤྱོད་གསལ་བ། །གཏུམ་པོ་དེས་ནི་མི་བྱིན་ཏེ། །བློ་གྲོས་ངན་པ་ཉིད་དག་གིས། །དེ་ལ་གསད་པ་དག་ཏུ་

བརྩོན། །དེ་དག་ཐོས་ནས་སླར་ལོག་སྟེ་ནེ་ཙོ་སྤྱོད་གསལ་གྱིས་མཐོང་ཞིང་ཐོས་ནས་རྟོགས་ཤིང་ཤེས་པ་ནི་ཚོང་པས་དོན་གྱི་རྙེད་པ་ཐོབ་པ་ཡོངས་སུ་གྲུབ་པ་བཞིན་ནོ། །རི་སྐེགས་ལ་ཤི་བིའི་ཕྱིར་སྨྲས་པ། བདག་གིས་ཆུང་མ་འདྲ་རྙེད་པ། །རི་སྐེགས་འཇམ་པར་སྨྲ་བ་ནི། །ཤི་

Vol. 11 · folio 79a

བིའི་རྒྱལ་པོས་མཁྱེན་བྱའི་ཕྱིར། །བཟང་མོ་བདག་ནི་འགྲོ་བར་བྱ། །རི་སྐེགས་ཀྱིས་སྨྲས་པ། གལ་ཏེ་རྗེ་ཡི་སྲས་གཤེགས་ན། །ཤི་བིའི་རྒྱལ་པོ་མཁྱེན་གསོལ་ནས། །དགུང་བདུན་དག་ལས་གཞན་དུ་ནི། །ཡུན་མི་རིང་བར་མཁྱེན་པར་མཛོད།

བདག་གི་རིགས་དང་རུས་དག་དང་། །ལོངས་སྤྱོད་ཀྱང་ནི་འདི་འདྲ་བར། །ཤི་བིའི་རྒྱལ་པོས་མཁྱེན་པར་མཛོད། །བདག་ཀྱང་སླད་རྗེས་ཁྱེད་མ་དགུམ། །དེ་སོང་ནས་ཕྱིན་པ་དང་། བློན་པོ་སྨན་ཆེན་པོ་ལ་རྒྱ་ཆེར་ཐམས་ཅད་སྨྲས་སོ། །དེ་ནས་སྨན་ཆེན་པོས་རྒྱལ་པོ་སྐྱེད་པ་

ལ་མཁྱེན་པར་བྱས་སོ། །དེ་ནས་ལྔ་ལེན་གྱི་རྒྱལ་པོས་ཀྱང་མི་འོང་བར་རྟོགས་ནས་དཔུང་གི་ཚོགས་ཡན་ལག་བཞི་གོ་བསྐོན་ནས་གླང་པོ་ཆེའི་ཚོགས་དང་། རྟ་པའི་ཚོགས་དང་། ཤིང་རྟའི་ཚོགས་དང་། དཔུང་བུ་ཆུང་གི་ཚོགས་དག་རྒྱལ་པོ་སྐྱེད་པའི་དྲུང་དུ་ཕྱིན་ནས་རྒྱལ་པོ་སྐྱེད་

པའི་ཕོ་བྲང་བསྐོར་བར་བྱས་པ་དང་། དེ་ནས་བློན་པོའི་མཆོག་སྨན་ཆེན་པོས་བསམས་པ་འདིས་ལྷན་ཅིག་ཐབ་མོ་འགྱེད་པར་ཡང་མི་ནུས་ན་ཇི་ལྟར་བྱ་དབྱེན་ཞིག་བྱ་སྙམ་མོ། །དེས་ལྔ་ལེན་གྱི་རྒྱལ་པོའི་བློན་པོ་ལྔ་བརྒྱ་ལ་རྣམ་པ་སྣ་ཚོགས་ཀྱི་སྐྱེས་བསྐུར་ཏེ་དབྱེན་བྱས་སོ། །དབྱེན་

བྱས་ནས་རྒྱལ་པོ་སྐྱེད་པས་ལྔ་ལེན་གྱི་རྒྱལ་པོ་ལ་ཕོ་ཉ་བཏང་སྟེ། ཁོ་བོ་ཁྱོད་ལ་རྒོལ་བ་མི་ནུས་པ་མ་ཡིན་མོད་ཀྱི་ཁོ་བོ་དང་ཁྱོད་གཉེན་ཏེ། ཁྱོད་ཉིད་གྱོས་པོ་ཡིན་པས་མི་རྒལ་ལོ། །འོན་ཀྱང་ཁྱོད་ངའི་ལག་ཏུ་འཚོའམ་གཤིན་པ་ནི་ཤིན་ཏུ་རིག་པར་གྱིས་ཤིག །ངེད་ཀྱིས་ནུས་

པར་གྱུར་ཀྱང་ཁྱོད་ལ་མི་རྒལ་ཏེ། གལ་ཏེ་ཡང་ཁྱོད་ཐེ་ཚོམ་དུ་གྱུར་ན་སྐྱེས་འདི་དང་འདི་དག་ནི་བློན་པོ་ཆེ་གེ་མོ་རྣམས་ལ་བསྐུར་བར་བརྟག་པར་བྱའོ་ཞེས་དེས་སྤྲིང་བ་ལས་སྐྱེས་དང་བཅས་སུ་བཟུང་ངོ་། །དེ་ནས་ལྔ་ལེན་གྱི་རྒྱལ་པོ་དེ་ཉིད་ཀྱི་ནུབ་མོ་ཆས་ནས་རང་གི་ཁྱིམ་དུ་སོང་སྟེ་ཕྱིན་པ་དང་།

བློན་པོ་ལྔ་བརྒྱ་དེ་དག་བསད་དེ། དེ་དག་གི་བུ་རྣམས་ཀྱང་བློན་པོར་བཅུག་པ་བདེན་ནོ་ཞེས་སྨྲས་པ་འདིས་རྒྱལ་པོ་སྐྱེད་པ་དང་ལྷན་ཅིག་པ་དག་དགའ་བ་སྐྱེས་པར་གྱུར་ཏོ། །སྨན་ཆེན་པོས་ཀྱང་དེ་དག་བསད་པར་ཐོས་ནས་བདག་གིས་དེ་ལྟ་བུ་དག་བྱས་སོ་སྙམ་སྟེ་དགའ་བར་གྱུར་ཏོ། །

Vol. 11 · folio 79b

དེ་དག་ཀྱང་བསད་ནས་རྒྱལ་པོ་ལ་སྨན་ཆེན་པོས་གསོལ་པ། འདི་ལྟར་བདག་ཉིད་དངོས་དེར་མཆིས་ལ་ཐོབ་བམ་མི་ཐོབ་བརྟག་པར་བགྱིའོ། །ཞེས་སྨྲས་སོ། །གང་གི་ཕྱིར་དེ་དེར་བདག་ཉིད་ཀྱི་དཔུང་དང་བཅས་ནས་ལྔ་ལེན་གྱི་རྒྱལ་པོའི་ཡུལ་དུ་སོང་བ་དང་། ལྔ་ལེན་གྱི་རྒྱལ་པོས་

གྲོང་ཁྱེར་གྱི་ནང་དུ་ཤོག་ཤིག་ཅེས་སྨྲས་སོ། །དེས་སྨྲས་པ། སྐྱེད་མོས་ཚལ་འདི་ཉིད་དུ་མཆིས་སོ། །ཇི་སྟེ་ཡང་བདག་ངེས་པར་ནང་དུ་མཆི་ན། བློན་པོ་ཆེ་གེ་མོ་ཞིག་གི་ཁྱིམ་དུ་མཆི་བར་འཚལ་ལོ། །དེ་ནས་ལྔ་ལེན་གྱི་རྒྱལ་པོ་བག་ཚ་སྟེ། ཅིའི་ཕྱིར་འདི་འདི་སྐད་དུ་སྨྲ།

རེ་ཞིག་གཞན་ཡང་བདག་དང་བློན་པོ་དག་དབྱེན་བྱེད་དོ་སྙམ་སྟེ། དེ་ལྟར་དགའ་ན་དེ་ཉིད་དུ་འདུག་ཤིག་ཅེས་སྤྲིང་ངོ་། །དེའི་བློན་པོ་རྣམས་ཀྱིས་འདི་ལ་བགྲོས་པ། བདག་ཅག་གི་ཕ་ཆུད་གསན་པར་བྱས་པ་དེ་ཐམས་ཅད་ནི་སྨན་ཆེན་པོ་འདི་ཡིན་པས་བདག་ཅག་གིས་སྔོན་གྱི་ཤ་ཁོན་

རྗེས་སུ་དྲན་པར་བྱས་ཏེ། རྒྱལ་པོ་ལ་དེ་བཞིན་དུ་གལ་གྱིས་བཅུས་ལ་དེ་ལྟར་འདི་ཕྱིར་མི་འགྲོ་བར་བྱའོ་ཞེས་འདུས་ནས་རྒྱལ་པོ་ལ་དེ་དག་གིས་སྨྲས་པ། རྒྱལ་པོ་སྐྱེད་པ་གང་ལ་བློའི་དཔྱོད་ཚུལ་འདི་ལྟ་བུ་དེ་ནི་སྨན་ཆེན་དེའི་ལགས་སོ། །དེ་ལ་རྒྱལ་པོ་སྐྱེད་པ་ནི་ཕ་རོལ་

ལ་གནོད་པ་བགྱིད་མི་ནུས་ཏེ། དེ་ལྟར་ན་དེ་འདི་ཉིད་ན་མཆིས་པའི་ཚེ་བདག་ཅག་གིས་གཞན་ནས་རྒྱལ་པོ་སྐྱེད་པའི་དྲུང་དུ་མཆིའོ། །དེས་སྨྲས་པ། ལེགས་པར་སྨྲས་སོ། །དེ་ནས་དཔུང་གི་ཚོགས་ཡན་ལག་བཞི་པ་གོ་བསྐོན་ཏེ། གླང་པོ་ཆེའི་ཚོགས་དང་། རྟ་པའི་

ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་དག་རྒྱལ་པོའི་ཕོ་བྲང་གང་ན་བ་དེར་སོང་ངོ་། །རྒྱལ་པོ་སྐྱེད་པ་འདིས་ཀྱང་སྟ་གོན་བྱས་སོ། །སྨན་ཆེན་པོས་ཀྱང་ལྔ་ལེན་གྱི་རྒྱལ་པོ་ལམ་ཆེ་གེ་མོ་ཞིག་ནས་རྒྱལ་པོ་སྐྱེད་པའི་ཡུལ་དུ་སོང་བར་ཤེས་སོ། །དེས་ཀྱང་

དེར་ཅུང་ཟད་ཞིག་འདུག་ནས་ཕྱོགས་ཆེ་གེ་མོ་ཞིག་ན་རྒྱལ་པོའི་མཛོད་ཡོད་དེ། མཛོད་དེ་ན་རྒྱལ་པོའི་བུ་མོ་སྨན་ལྡན་མ་ཞེས་བྱ་བ་འདུག་པར་ཤེས་སོ། །དེ་ནས་དེས་ནང་འཁོར་མ་ཞིག་ཁྲིད་དེ་འཁོར་བཞག་ནས་ཇི་ཙམ་ན་རྒྱལ་པོའི་མཛོད་དུ་ཞུགས་ཏེ་མཛོད་ཕྱེ་ནས་བུ་མོ་དང་། འབྱོར་

Vol. 11 · folio 80a

བ་དབྱིག་དང་གསེར་དག་བླངས་ནས་དཔུང་གི་ཚོགས་ཡན་ལག་བཞི་གོ་བསྐོན་ཏེ་ལམ་གཞན་ཞིག་ནས་རྒྱལ་པོ་སྐྱེད་པའི་དྲུང་དུ་སོང་ངོ་། །དེ་ནས་རྒྱལ་པོ་སྐྱེད་པ་དང་། བློན་པོ་དང་། གྲོང་མི་རྣམས་དང་། གཞན་དག་ཀྱང་ལས་ཆེན་པོས་བསྒྲུབས་སོ་ཞེས་རབ་ཏུ་

དགའ་སྟེ་རྗེད་ཅིང་རི་མོར་བྱ་བ་མང་པོ་དག་བྱས་སོ། །ལྔ་ལེན་གྱི་རྒྱལ་པོའི་བློན་པོ་མཆོག་ཀྱང་འོངས་ན་སྨན་ཆེན་པོས་བུ་མོ་དང་མཛོད་ཁྱེར་བ་དང་། རྒྱལ་པོའི་ཕོ་བྲང་དེ་དག་གིས་སྤངས་ཏེ་རང་གི་ཡུལ་དུ་སོང་ངོ་། །རྒྱལ་པོ་སྐྱེད་པས་ཀྱང་གང་གི་ཕྱིར་བཀྲ་ཤིས་ཀྱི་རྣམ་པ་དག་

གིས་བུ་མོ་བག་མར་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ནས་ལྔ་ལེན་གྱི་རྒྱལ་པོས་བུ་མོ་སྨན་ལྡན་ལ་ཕོ་ཉ་ཞིག་བཏང་ནས་འདི་ལྟ་བུ་སུའི་ཐབས་སུས་བརྟགས། སུས་དབྱེན་བྱས་པ་དག་གི་དོན་ཤེས་པར་གྱིས་ལ་རྟོགས་

ལ་སྤྲིངས་ཤིག །དེས་བརྟགས་ནས་ཕོ་ཉ་བཏང་བ་ལ་སྨན་ཆེན་པོ་འདི་ལ་ནེ་ཙོ་སྤྱོད་གསལ་ཞེས་བྱ་བ་མིའི་སྐད་དུ་སྨྲ་བ་དེས་འདི་ལྟར་བརྟགས་སོ། །དེ་ནས་ལྔ་ལེན་གྱི་རྒྱལ་པོས་སྨྲས་པ། ནེ་ཙོ་སྤྱོད་གསལ་ཅི་ནས་ཀྱང་སླར་ཐོང་ཤིག །དེ་ནས་དེས་རབ་ཏུ་འབད་པས་རྙིས་བཟུང་སྟེ་

དེ་ལ་བསྐུར་རོ། །དེ་ནས་རྒྱལ་པོ་ཁྲོ་བས་དཀྲིས་པས་རྣམ་པ་མང་པོར་སྤྱོས་ཏེ་སོད་ཅིག་ཅེས་བསྒོའོ། །དེ་ནས་ནེ་ཙོ་སྤྱོད་གསལ་གྱིས་རྐང་པ་ལ་གཏུགས་ཏེ་རྒྱལ་པོ་ལ་གསོལ་པ། ལྷ་བདག་གི་ཕ་དང་མེས་པོ་ཇི་ལྟར་བཀུམ་པ་དེ་བཞིན་དུ་དགུམ་པར་ཅི་གནང་། གལ་ཏེ་དེ་ལྟ་ན་དེ་

བཞིན་དུ་འདི་གསད་པར་གྱིས་ཤིག་ཅེས་ནས་གནང་ངོ་། །ཇི་ལྟ་བུ་ཉིད་དུ་ཕ་དང་མེས་པོ་བསད་ཅེས་དེས་དེ་ལ་དྲིས་པ་དང་། རས་བལ་གྱིས་མཇུག་མ་དཀྲིས་ཏེ་ཡུངས་མར་གྱིས་བསྐུས་ནས་བསྲེགས་ཏེ་གཏང་བ་དང་། དེ་ནམ་མཁའ་ལ་ཕུར་ཏེ་རྒྱལ་པོའི་ཕོ་བྲང་ཀུན་ནས་འབར་བར་བྱས་ཆུར་

ཞུགས་སོ། །དེ་ནས་རྒྱལ་པོ་སྐྱེད་པའི་དྲུང་དུ་སོང་བ་དང་། སྨན་ཆེན་པོས་ཀྱང་དྲིས་པ་ཁྱོད་ག་ལས་འདིར་ཕྱིན། དེས་ཇི་ལྟར་བྱས་པ་ཐམས་ཅད་ཤེས་པར་བྱས་པ་དང་། དེ་མགུ་བར་གྱུར་ཏོ། །ལྔ་ལེན་གྱི་རྒྱལ་པོ་ཁྲོ་བས་དཀྲིས་པས་ཡང་ཡི་གེ་བསྐུར་བ། དེས་རྣམ་པ་འདི་ལྟ་བུས་

Vol. 11 · folio 80b

གནོད་པ་བྱས་ཏེ་ངེས་པར་སླར་ཐོང་ཤིག །དེས་ཀྱང་བཟུང་སྟེ་བསྐུར་རོ། །ལྔ་ལེན་གྱི་རྒྱལ་པོ་ཁྲོས་པས་སྤུ་རིལ་ཕྱི་ནས་ཤའི་རི་ལུར་བཞག་སྟེ་འགྲོ་ན་སོང་ཤིག་ཅེས་ཕྱི་རོལ་དུ་བོར་བ་དང་། ཁྲས་ཁྱེར་རོ། །དེས་ཀྱང་ཁྲ་ལ་གསོལ་བ་བཏབ་པ། ཁོ་བོ་ཟོས་པ་ནི་ཉིན་གཅིག་གི་ཟས་སུ་ཟད་དེ་ཁོ་བོ་

བཏང་ན་ནི་ཉིན་གཅིག་བཞིན་དུ་ཇི་ལྟ་བུའི་དགོས་པ་དང་བཟའ་བ་མང་པོ་དག་དེ་བཞིན་དུ་སྦྱར་བར་བྱའོ་ཞེས་དེས་ཡིད་ཆེས་པར་མནའ་བོར་ནས་བཏང་སྟེ། སྤྱོད་གསལ་གྱིས་སྨྲས་པ། ཕྱོགས་ཆེ་གེ་མོ་ཞིག་ན་རྒྱལ་པོའི་གཙུག་ལག་ཁང་དེར་ཞོག་ཤིག །དེས་དེ་བཞིན་དུ་བྱས་པ་དང་། དེ་

གཙུག་ལག་ཁོང་དུ་སོང་སྟེ་བུ་ག་ཞིག་ཏུ་ཞུགས་པ་དང་། ཕྱི་དེ་ཉིན་བྲམ་ཟེ་དག་ལྷ་མཆོད་པའི་ཕྱིར་དེར་ལྷགས། ལྷ་དྲི་མ་ཕྱིས་ཏེ། བདུག་པ་དང་། མེ་ཏོག་དང་། ལྷ་བཤོས་དང་། གཏོར་མ་སྦྱིན་པར་བརྩོན་ན། སྤྱོད་གསལ་དེས་ཀྱང་སྨྲས་པ། ཀྱེ་བྲམ་ཟེ་རྒྱལ་པོ་སྡིག་

པ་ཅན་ལྔ་ལེན་གྱི་རྒྱལ་པོ་ལ་ངའི་ཚིག་འདི་བརྗོད་པར་བྱའོ། །ཉེས་པ་འདི་དང་འདི་དག་བྱས་པ་དེ་ནི་ངས་གནོད་པར་བྱས་པ་ཡིན་ནོ། །གལ་ཏེ་ངའི་ཚིག་བཞིན་མ་བྱས་ན་ཕྱིར་ཡང་བྱའོ། །དེ་ལྟར་རེ་ཞིག་ཉིན་རེ་ཞིང་ཤ་རྗེན་དམར་པོ་དང་། ཏིལ་དང་། འབྲས་ཐུག་པོ་ཆེ་བྲེའུ་ཆུང་གང་གི་

ལྷ་བཤོས་བྱས་པ་དང་དེ་ནས་ཕྱིས་བསམ་མོ། །སོང་ནས་དེས་ལྔ་ལེན་གྱི་རྒྱལ་པོ་ལ་ཁོང་དུ་ཆུད་པར་བྱས་སོ། །རྒྱལ་པོས་ཀྱང་དེའི་དོན་ཁོ་ནར་ལྷ་བཤོས་དང་། གཏོར་མ་བྱ་བ་ལ་ཞུགས་ཏེ། ཉིན་གཅིག་བཞིན་དུ་རྒྱལ་པོ་དང་། བློན་པོ་དང་། མདུན་ན་འདོན་དག་ལྷགས་ནས་

ལྷ་ལ་གནང་ངམ་མི་གནང་བཀའ་སྩལ་པར་གསོལ་བ་བཏབ་པ་དང་། དེ་བཞིན་དུ་བྱའོ་ཞེས་སོ། །འདི་ལྟར་དུས་མང་དུ་ལོན་ནས་ནེ་ཙོ་སྤྱོད་གསལ་དེའི་གཤོག་པ་སྐྱེས་ཤིང་འཕུར་ནུས་པར་གྱུར་པ་དང་། ཡང་འགྲོ་བའི་བློ་སྐྱེས་ཏེ། དེ་ལ་ཡང་སྨྲས་པ། འདི་ལྟར་ང་ལ་

གང་ཁྱེད་སྟོབས་ཀྱི་དཔུང་དང་། ལྷ་མོ་དང་། གཞོན་ནུ་དང་། བློན་པོ་དག་དང་ལྷན་ཅིག་མགོ་གཏུན་བཞིན་བྲེགས་ལ་ངའི་དྲུང་དུ་ཤོག་ཤིག་དང་། འདི་ལྟར་བཟོད་ཅིང་གནང་བར་བྱའོ། །དེས་རྒྱལ་པོ་ལ་ཁོང་དུ་ཆུད་པར་བྱས་པ་དང་། རྒྱལ་པོས་ཀྱང་དེ་བཞིན་དུ་བྱས་ཏེ།

Vol. 11 · folio 81a

དེ་ལྟར་ཐམས་ཅད་མགོ་གཏུན་བཞིན་དུ་བྲེགས་ནས་ལྷ་གང་དུ་སོང་སྟེ་རྐང་པ་ལ་གཏུགས་ནས་བཟོད་པ་གསོལ་པ་དང་། དེ་ནས་ནེ་ཙོ་ནམ་མཁའ་ལ་འཕུར་ཏེ་ཚིགས་སུ་བཅད་པ་འདི་སྨྲས་སོ། །བྱེད་པ་ལ་ནི་སླར་བྱས་ཏེ། །ཕྱི་བས་སླར་ནི་ཕྱི་ལ་ལྟོས། །འདིར་ནི་

གཅིག་པུ་ཕྱི་བ་ཡིས། །བཙུན་མོ་ཀུན་དང་ལེགས་པར་ཕྱི། །དེས་འདི་སྐད་དུ་སྨྲས་ཏེ། དེ་ནས་ཡང་སྨན་ཆེན་པོའི་དྲུང་དུ་སོང་བ་དང་། སྤྱོད་གསལ་ཡུན་རིང་ཞིག་ཏུ་མ་མཐོང་ན་གང་ནས་ཕྱིན་ཅེས་དྲིས་སོ། །དེས་འདི་དང་འདི་ལྟ་བུའི་ཐབས་དེ་དག་བདག་གིས་བགྱིས་སོ་ཞེས་རྒྱ་

ཆེར་སྨྲས་སོ། །དེ་ནས་སྨན་ཆེན་པོ་ཡིད་དགའ་ཞིང་མགུ་སྟེ། རྒྱལ་པོ་སྐྱེད་པ་ལ་ནེ་ཙོ་སྤྱོད་གསལ་གྱིས་འདི་ལྟར་བགྱིས་སོ་ཞེས་སྨྲས་པ་དང་། རྒྱལ་པོ་ཡང་མཆོག་ཏུ་དགའ་བ་དང་ལྡན་ནས་སྨྲས་པ། ཨེ་མའོ་འདི་ལྟར་ཁྱོད་མཁས་པ་ཤ་སྟག་དང་ཕྲད་པ་ནི་བསོད་ནམས་དང་ལྡན་ནོ་ཞེས་

སྨྲས་སོ། །དེ་ནས་ཡང་དུས་ཕྱི་ཞིག་ན་རྒྱལ་པོས་བློན་པོ་རྣམས་ལ་གང་རབ་ཏུ་མཁས་པ་ཉམས་སད་དོ་སྙམ་བློ་སྐྱེས་ནས་དེ་དག་བོས་ཏེ་སོ་སོར་ཁྱི་རེ་རེ་བྱིན་ནས་འདི་དག་དུས་འདི་ཙམ་ན་ཐམས་ཅད་མི་སྐད་དུ་སྨྲ་བར་གྱིས་ཤིག་དེ་དག་གིས་དེ་ཁྱིམ་དུ་ཁྲིད་དེ་གསོ་བར་བྱས་པ་ནི་ཤེས་ཀྱི་མི་སྐད་དུ་ཟེར་བ་མི་

ཤེས་སོ། །སྨན་ཆེན་པོས་ཁྱི་དེ་ཁྱིམ་དུ་ཁྲིད་དེ་སོང་ནས་ཁྲི་ལས་མི་རིང་བ་ཞིག་ཏུ་ཕུར་བ་ལ་བཏགས་ཏེ་བཞག་གོ། །ནམ་སྨན་ཆེན་པོའི་ཁ་ཟས་དྲངས་ནས་བཅའ་བ་དང་། བཟའ་བ་དང་། ཁུ་བ་སྣ་ཚོགས་སུ་སྦྱར་བ་ཟ་བར་མཐོང་ཡང་ལེན་མི་ནུས་སོ། །དེ་ནས་ངན་པ་ཅུང་ཟད་ཅིག་

བྱིན་པས་མ་ཤི་མ་སོས་ཙམ་དུ་ཉམ་ཆུང་ལ་རིད་དེ་སྐེམ་པར་གྱུར་ཏོ། །དེ་ནས་རྒྱལ་པོས་ཁྱི་དེ་དག་ལོབས་སམ། མ་ལོབས་བལྟས་ཁྲིད་དེ་ཤོག་ཤིག་པར་བསྒོའོ། །དེ་དག་གིས་ནི་ཐབས་ལ་མི་མཁས་པས་བསླབ་མ་ནུས་སོ། །དེ་ནས་སྨན་ཆེན་པོ་ལ་ཁྱོད་ཀྱི་ཅི་འདྲ་ཁྲིད་དེ་ཤོག་ཅེས་སྨྲས་ནས་

རྒྱལ་པོའི་མདུན་དུ་འོངས་ཏེ་བལྟས་ན་སྐེམ་ཞིང་རིད་དོ། །དེས་འདི་ཅིའི་ཕྱིར་རིད་ཅེས་དྲིས་པ་དང་། སྨན་ཆེན་པོས་ལྷ་བདག་གིས་ཅི་ཟོས་ཅི་འཚལ་བ་དེ་བཞིན་འདི་ལ་སྩལ་ཏོ་ཞེས་སྨྲས་པ་དང་། ཁྱིས་སྨྲས་པ། ལྷ་འདི་ནི་བརྫུན་མཆིས་ཏེ། བདག་ལྟོགས་ཏེ་དེའུ་བཀུམ་མོ། །དེ་ནས་སྨན་ཆེན་

Vol. 11 · folio 81b

པོས་བདག་གིས་འདི་ལྟར་འདི་མིའི་སྐད་དུ་སྨྲ་བར་བགྱིས་སོ་ཞེས་གསོལ་ཏོ། །དེ་ནས་རྒྱལ་པོ་དགྱེས་པར་གྱུར་ཏོ། །དེ་ནས་ཡང་དུས་ཕྱི་ཞིག་ན་ཡང་ཉམ་སྐྱེད་པར་འདོད་ནས་ལུག་འདི་རྣམས་ཁྱེད་ཀྱིས་བཟའ་བཏུང་ཞིམ་པོ་སྩལ་ལ་ཚིལ་མེད་ལ་མཐུ་དང་ལྡན་པར་བྱོས་ཤིག་ཅེས་བསྒོའོ། །དེ་ནས་བློན་

པོ་ལྔ་བརྒྱ་པོ་དེ་དག་ནི་ཐབས་མི་ཤེས་ཏེ། དེ་གསོས་ཏེ་ཚོན་པོར་བྱས་སོ། །སྨན་ཆེན་པོས་ནི་བཟའ་བ་ཞིམ་པོ་མདུན་དུ་བཞག་ནས་ཤིང་ལ་སྤྱང་ཀིའི་གཟུགས་ཅིག་བྱས་ཏེ་ལུག་གི་མདུན་དུ་བཞག་པ་དེས་དེ་མཐོང་བས་ནི་སྐྲག་སྟེ་ཚིལ་ནི་མ་སྐྱེས་མཐུ་དང་ནི་ལྡན་པར་གྱུར་ཏོ། །དེ་དག་ཀུན་བལྟས་

ན་གཞན་དག་ནི་མདོག་དང་ལྡན་ཞིང་ཚིལ་མང་བར་གྱུར་ཏོ། །སྨན་ཆེན་པོའི་ནི་ཚིལ་མེད་ལ་མཐུ་དང་ལྡན་པར་མཐོང་ནས་རྒྱལ་པོ་དགའ་སྟེ་མཛངས་སོ་ཞེས་བསྔགས་སོ། །དེ་ནས་ཡང་དུས་ཕྱི་ཞིག་ན་གང་མཁས་པ་བགམས་ཏེ་བལྟའོ་སྙམ་དུ་བསམས་ནས་བློན་པོ་དེ་དག་གི་བུ་ལྔ་བརྒྱ་པོ་དེ་དག་

སྐྱེད་མོས་ཚལ་དུ་སྔོན་ཟན་བྱས་ཏེ་ཟ་འཐུང་ཞིང་འཁོད་པ་ལས་ངོ་མཚར་དང་ལྡན་པའི་གཏམ་རྩོམ་སྟེ། སུ་གང་གིས་ངོ་མཚར་གྱི་གཏམ་མམ། ཁྱིམ་ན་ཡོད་པ་ཅི་ཐོས་པ་སྨྲོས་ཤིག །དེ་དག་མཛའ་བས་གཅིག་ལ་གཅིག་ངོ་མཚར་གང་ལ་ཅི་ཡོད་པ་དང་། ཁྱིམ་དང་གཞན་གྱི་ཕྱོགས་

ན་མཐོང་བ་རྣམས་སྨྲས་སོ། །དེ་ནས་ཁྱེའུ་དག་གིས་སྨན་ཆེན་པོའི་བུ་ལ་ཁྱོད་ཀྱང་སྨྲོས་ཞེས་བསྐུལ་བ་དང་། སྨན་ཆེན་པོའི་ཁྱིམ་དུ་རྡོ་ཞིག་ཡོད་དེ་དེ་ཀ་རྟེན་ཡིན་པ་ལས་དེ་ཆུའི་སྟེང་དུ་བཞག་ན་ཕན་ཚུན་དུ་འཕྱོ་ཞིང་ཉུག་ཅིང་མཉེ་བ་ལ་སོགས་པའི་ལས་ཀུན་བྱེད་དོ། །དེ་ནས་ཁྱེའུ་དེས་བདག་གི་ཁྱིམ་

ན་ཡོད་པ་དེ་དག་ལ་བསྙད་དེ་ངེད་ཀྱི་ཁྱིམ་ན་ངོ་མཚར་ཡོད་པ་དེ་ལྟ་བུ་ནི་སུ་ལ་ཡང་མེད་དོ། །དེ་དག་གིས་དེའི་རྗེས་ནས་བཟུང་བ་དང་། ངེད་ཀྱི་ཁྱིམ་ན་རྡོ་བ་ཆུའི་སྟེང་ན་འཕྱོ་ཞིང་འགྲོའོ་ཞེས་སྨྲས་པ་དང་། དེ་དག་གིས་བདག་ཅག་གིས་རྡོ་ཆུའི་སྟེང་ནས་འཕྱོ་ཞིང་འགྲོ་བ་དེ་ལྟ་བུ་ནི་མ་མཐོང་མ་ཐོས་སོ། །

དེ་ནས་དེ་དང་དེ་དག་གིས་གསེར་གྱི་དོང་ཚེ་ལྔ་བརྒྱ་ལ་རྒྱལ་བཀྱེའོ། །དེ་ནས་གཞོན་ནུ་དེས་ཇི་ལྟར་གྱུར་ཅིང་དེའི་ཕྱིར་བདག་དང་རྒྱལ་བཀྱེའོ་ཞེས་ཕ་ལ་སྨྲས་པ་དང་། དེས་སྨྲས་པ། བུ་མ་བསྟན་ཅིག །དེ་ནས་དེ་དག་ལྷགས་ནས་མ་བསྟན་པ་དང་། གསེར་གྱི་དོང་ཚེ་ལྔ་བརྒྱ་རྒྱལ་དུ་ཕབ་བོ། །

Vol. 11 · folio 82a

དེ་ནས་སྨན་ཆེན་པོས་སྤྲེའུ་རྣམས་བཟུང་སྟེ། རོལ་མོ་བསླབ་ནས་བུ་ལ་སྨྲས་པ། ད་ནི་སོང་ལ་སྔུན་ཟན་པའི་ནང་དུ་སྔར་གཏམ་གླེངས་ལ་ཁྱོད་ཀྱིས་ངོ་མཚར་སུས་ཅི་མཐོང་ཅི་ཐོས་ཁྱིམ་ལྟ་ན་ཡོད་པ་སྨྲོས་ཤིག་ཅེས་བྱོས་ལ་དེ་ནས་ཁྱོད་ཀྱིས་ང་ནི་རྒྱལ་ཉིས་འགྱུར་དུ་བྱས་ཏེ། བདག་གི་

ཁྱིམ་ན་ནི་རོལ་མོ་མཁན་སྤྲེའུ་ཡོད་དེ་གླུ་ལ་མཁས། གར་ལ་མཁས། རྔ་རྡུང་བ་ལ་མཁས་སོ་ཞེས་བྱོས་ཤིག་ཅེས་བསྒོ་བ་དང་། དེས་ཀྱང་དེ་བཞིན་དུ་གཏམ་གཞན་ལས་བརྗོད་དེ། འདི་ལྟ་བུ་མཐོང་སྟེ་ཡོད་དོ་ཞེས་སྨྲས་པ་དང་། དེ་ནས་དེ་དག་ན་རེ་བདག་ཅག་གིས་སྤྲེའུ་རོལ་མོ་བྱེད་པ་མ་

མཐོང་མ་ཐོས་སོ། །དེས་སྨྲས་པ། དེ་སྟེ་བདག་གིས་བསྟན་ན་ཁྱེད་ཀྱིས་ཅི་སྦྱིན། དེ་དག་གིས་སྨྲས་པ། སྔར་ཡང་ཁྱོད་ལ་གསེར་གྱི་དོང་ཚེ་ལྔ་བརྒྱ་ཕབ་པ་ཡིན། ད་ཡང་དེ་བཞིན་མི་རིགས་མི་ཚུལ་བ་ཟེར་ཏེ། དེ་སྟེ་ཡང་ཁྱོད་ཀྱིས་མ་བསྟན་ན་གསེར་གྱི་དོང་ཚེ་སྟོང་དབབ་བོ། །ཇི་སྟེ་བསྟན་

ན་ངེད་ཀྱིས་སྦྱིན་ནོ། །དེ་ལྟར་དམ་བཅས་ནས་སྤྲེའུ་ཁྲིད་དེ་རྒྱལ་པོའི་ཕོ་བྲང་དུ་འདོང་ངོ་། །དེས་ཀྱང་སྤྲེའུ་རྣམས་རྒྱལ་པོའི་ཕོ་བྲང་དུ་དེད་དེ་རྒྱལ་པོའི་མདུན་དུ་གླུ་དང་། གར་དང་། རྔ་རྡུང་བ་ཀུན་བསྟན་པ་དང་། དེ་ནས་དེ་དག་གིས་དེ་ལ་གསེར་གྱི་དོང་ཚེ་སྟོང་བྱིན་ནོ། །རྒྱལ་པོས་ཀྱང་ངོ་མཚར་དུ་

བཟུང་སྟེ། འདི་ལྟ་བུ་དག་ནི་སྔོན་ཡང་མ་མཐོང་མ་ཐོས་སོ། །དེ་ནས་རྒྱལ་པོ་བློན་པོ་དང་གྲོང་བ་རྣམས་ཀྱིས་ཀྱེ་ཐམས་ཅད་ཡང་དེ་གཅིག་པུ་མཁས་ཤིང་བློ་དང་ལྡན་པ་ལ་ལྟོས་ཤིག །ཀུན་གྱིས་སྨན་ཆེན་པོ་ལ་བཀུར་སྟི་བྱས་སོ། །དེ་ནས་ཡུལ་བེ་དེ་ཧའི་བྲམ་ཟེ་ཞིག་འདུག་པ་དེས་བདག་

དང་རིགས་མཉམ་པ་ལས་ཆུང་མ་བླངས་ཏེ། དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་པ་ལས་ཕྱི་ཞིག་ན་བྲམ་ཟེ་མོ་དེ་སེམས་ཅན་དང་ལྡན་པར་གྱུར་པས་ཟླ་བ་དགུ་འདས་ཏེ་བཙས་ན་བུ་མོ་ཞིག་བྱུང་ན་གཟུགས་ལེགས་ཤིང་བལྟ་ན་བཟང་མོ་ཞིག་གོ། །བྲམ་ཟེ་དེ་ཡང་སྨྲང་དང་སྨྲང་གི་ཡན་ལག་

གི་ཕ་རོལ་ཏུ་ཕྱིན་པ། རིག་པའི་གནས་བཅྭ་བརྒྱད་ཀྱི་ཕ་རོལ་ཏུ་ཕྱིན་པ། བློ་དང་ཤེས་རབ་རྣོ་བ་དེས་འདི་གང་བདག་དང་འདྲ་བར་འགྱུར་བ་བདག་གི་དྲུང་ན་སློབ་ཅིང་འདོན་པར་བྱེད་པ་དེ་ལ་བུ་མོ་འདི་སྦྱིན་ནོ་སྙམ་དུ་བསམས་སོ། །བཙས་པའི་བཙས་སྟོན་རྒྱ་ཆེར་བྱས་ཏེ་འདིའི་མིང་ཅིར་གདགས་

Vol. 11 · folio 82b

ཞེས་བགྲོས་ན། བུ་མོ་འདིའི་མིང་ཨུ་དུམ་བཱ་རི་ཀར་བཏགས་ཏེ། དེ་གསོས་བསྐྱེད་ནས་ཆེན་མོར་གྱུར་ཏོ། །དེ་ནས་བྲམ་ཟེ་གཞན་ཞིག་ལ་བུ་ཁ་དོག་ངན་པ་གཟུགས་མི་སྡུག་པ་མདོག་ངན་པ་མཚན་ངན་པ་བཅྭ་བརྒྱད་དང་ལྡན་པ་ཞིག་བཙས་ཏེ། དེ་སྐྱེས་མ་ཐག་ཏུ་ཕ་མས་ཀྱང་འདི་ལྟ་བུ་མི་

སྡུག་པ་ཡིད་དུ་མི་འོང་བའི་ཕྱིར་མིང་ཡང་གཟུགས་ངན་དུ་བཏགས་སོ། །དེ་གསོས་བསྐྱེད་ནས་ཆེར་སྐྱེས་པ་དང་། ཕས་བུ་ངོ་ཚ་བར་འགྱུར་བ་གཟུགས་ངན་པ་འདི་འདྲ་བ་ལ་བསླབས་ཏེ་ཅི་རུང་སྙམ་ནས་མ་བསླབས་སོ། །དེ་ནས་ཁྱེའུ་གཟུགས་ངན་དེ་ནམ་ཆེར་གྱུར་པ་དེ་ན་བསླབ་པར་

འདོད་ན་ཕས་ནི་མ་བསླབ་ཀྱིས་ཡུལ་གཞན་དུ་འགྲོའོ་སྙམ་དུ་བསམས་ནས། བྲམ་ཟེ་གཞན་ཞིག་གི་དྲུང་དུ་ཕྱིན་ཏེ། བྲམ་ཟེའི་ཁྱེའུ་དེ་ལངས་ནས་བདག་ནི་བྲམ་ཟེ་འདི་ཞེས་བགྱི་བའི་བུ་ལགས་ཏེ་ཁྱོད་ལ་སློབ་པར་འཚལ་བའི་སླད་དུ་ཁྱོད་ཀྱི་དྲུང་དུ་མཆིས་སོ་ཞེས་གསོལ་བ་དང་། དེས་ཀྱང་དེ་

བཞིན་གྱིས་ཤིག་ཅེས་དེ་ལ་སྐབས་ཕྱེའོ། །དེས་རིང་པོ་མ་ལོན་པར་བྲམ་ཟེ་དེས་ཅི་ཤེས་པ་ཐམས་ཅད་གཟུགས་ངན་པ་དེས་ཀྱང་ལོབས་སོ། །དེ་ནས་སློབ་དཔོན་དེས་འདི་སྙམ་དུ་བསམས་སོ། །བདག་གི་དྲུང་ན་སློབ་ཅིང་ཤེས་པ་ཡང་བདག་དང་མཚུངས་པར་གྱུར་པ་དེ་ལ་བུ་མོ་ཨུ་དུམ་བཱ་

རི་ཀ་སྦྱིན་པར་བདག་གིས་དམ་བཅས་ནས། ད་བྲམ་ཟེ་གཟུགས་ངན་འདིས་བདག་གི་དྲུང་ན་བསླབས་ལ་ཤེས་པ་ཡང་བདག་དང་མཚུངས་པར་གྱུར་ན། འདི་གཟུགས་མི་སྡུག་མོད་ཀྱི་བདག་གིས་གཞན་བྱ་མི་ནུས་ཀྱིས་གཉེན་དུ་བྱས་ཏེ་བདག་དང་ཕ་མེས་ལ་འཇིག་རྟེན་དུ་ཡང་མི་རུང་། བྲམ་

ཟེ་གཞན་དག་གིས་ཀྱང་སྨད་པར་འགྱུར་གྱིས་ཅི་ནས་ཡི་དམ་བཅས་པ་བཞིན་དུ་བྱའི་སྙམ་ནས་དེས་བུ་མོ་ཨུ་དུམ་བཱ་རི་ཀ་དེ་རྒྱན་ཐམས་ཅད་ཀྱིས་བཀླུབས་ནས་བྲམ་ཟེའི་ཁྱེའུ་གཟུགས་ངན་པ་ལ་བྱིན་ནས་དེས་དེ་བླངས་ཏེ་དེ་དང་ལྷན་ཅིག་དགའ་བར་སྤྱོད་དུ་མི་སྤོབས་སོ། །དེ་ནས་དེས་བདག་ཉིད་

ཀྱི་ཁྱིམ་དུ་འོངས་པ་དང་། དེ་ན་དགའ་མགུར་བྱའོ་སྙམ་དུ་བསམས་ནས་རང་གི་ཁྱིམ་དུ་ཁྲིད་དོ། །ཨུ་དུམ་བཱ་རི་ཀ་དེ་ཡང་དེ་གཟུགས་ངན་པ་མཐོང་ན་ཡང་ཡིད་དུ་མི་འོང་སྟེ་བདག་ནི་གཟུགས་དང་ལྡན་པ། འདི་ནི་མདོག་མི་སྡུག་པ་རྣམ་པ་བཅྭ་བརྒྱད་དང་ལྡན་པས་ན་ཁྱོ་འདི་ལྟ་བུ་དང་ལྡན་པ་

Vol. 11 · folio 83a

ཞིག་ནི་ངོ་ཚའོ་སྙམ་དུ་བསམས་ཏེ། དེ་ནས་གཟུགས་ངན་དེས་དེ་ཁྲིད་དེ་བདག་ཅག་གི་ཡུལ་དུ་སོང་བ་ལས་ལམ་གྱི་བར་དུ་རྒྱགས་ཆད་དོ། །དེ་རྫིང་གཞན་ཞིག་གི་འགྲམ་དུ་ཕྱིན་ཏེ་གཉི་ག་བཀྲེས་ཤིང་འཁོད་པ་དང་། གྲོགས་གཞན་ཞིག་ཀྱང་ཕྱེ་ཆུའི་ནང་དུ་ཤིང་བུས་དཀྲུགས་ཏེ་

འཐུང་བ་ལ་ཞུགས་པ་དང་། མོ་བྲུ་བས་གཟིར་ཏེ་བསླང་ན། དེ་ལ་གཟུགས་ངན་གྱིས་ཕྱེ་སྤར་གང་བླངས་ཏེ་བདག་ཉིད་འཐུང་ངོ་། །ཨུ་དུམ་བཱ་རི་ཀས་ཇོ་བོ་བདག་ཀྱང་ཤིན་ཏུ་བྲུ་བས་གདུངས་ན། ཁོ་མོའོ་ནི་ལས་ནི་ཆུ་ཞིག་འཐུང་ངོ་ཞེས་སྨྲས་པ་དང་། གཟུགས་ངན་གྱིས་བུད་མེད་ལ་འདི་འདྲ་བའི་

ཆུ་གྲོག་འཐུང་དུ་སྔོན་གྱི་ཆོས་མཁན་དྲང་སྲོང་རྣམས་ཀྱིས་མ་གནང་བས་དེའི་ཕྱིར་མི་སྦྱིན་ནོ་ཞེས་ཟེར་ཏེ་མ་བྱིན་ནོ། །དེ་ནས་ཡང་ཆར་པ་མ་བབ་པའི་ཕྱིར་དགོན་པ་ལ་བྲུ་བས་གཟིར་ཅིང་དོང་བ་ལས་གཉི་གས་ཁྱི་ཤ་ཞིག་རྙེད་ན་གཟུགས་ངན་གྱིས་བསྲེགས་ཏེ་བདག་ཟོས་ནས་ཨུ་དུམ་བཱ་རི་ཀས་

དེ་ཡང་བསླང་ན། འདི་ཡང་བུད་མེད་རྣམས་ལ་དྲང་སྲོང་གིས་མ་གནང་ངོ་ཞེས་ཟེར་ཏེ་མ་སྟེར་རོ། །དེས་བདག་ལྟ་བུ་བྱུར་ངན་མ་བྲུ་བའི་སྡུག་བསྔལ་གྱིས་གཟིར་ཏོ། །ཕ་མ་གཉིས་ཀྱིས་བདག་གི་ཉེས་པ་ཅི་མཐོང་ན་འདི་འདྲ་བ་ལ་བྱིན་ཞེས་བསམས་ཏེ་ཕ་མ་ལ་རྣམ་པ་མང་པོ་སྨྲའོ། །

ཡང་དེ་གཉིས་དོང་བ་ལས་ཤིང་ཨུ་དུམ་བཱ་ར་སྨིན་པ་ཞིག་མཐོང་ནས་གཟུགས་ངན་དེ་ལ་འཛེགས་ཏེ་ཟ་ཞིང་འདུག་པ་དང་། ཨུ་དུམ་བཱ་རི་ཀས་ཁྱོད་གཅིག་པུ་མ་ཟ་བར་ངན་བུ་ལ་ཡང་འོར་ཞེས་སྨྲས་པ་དང་། དེས་སྨིན་པ་ནི་བདག་ཟོས་ཀྱི་མ་སྨིན་པ་མར་བོར་རོ། །དེས་བདག་ལ་མ་སྨིན་པ་མ་

དོར་བར་སྨིན་པ་ལ་ཡང་སྩོལ། དེས་དེ་སྟེ་ཁྱོད་སྨིན་པ་འདོད་ན་བདག་ཉིད་འཛེགས་ཏེ་ཐོགས་ལ་ཟོ་ཤིག་ཅེས་སྨྲས་པ་དང་། བྲུ་བས་གཟིར་བའི་ཕྱིར་ནན་གྱིས་ཨུ་དུམ་བཱ་ར་ལ་འཛེགས་ཏེ་ཟ་ཞིང་འདུག་པ་དང་། གཟུགས་ངན་གྱིས་བསམས་པ། བདག་ལྟ་བུ་བསོད་ནམས་མེད་དེ་ཆུང་མ་

འདི་འདྲ་བ་བདག་ཉིད་ཀྱིས་སོས་པ་ལྟ་ཅི་སྨོས། འདི་ནི་བདག་ལ་ལྟར་ཀྱང་མི་བཏུབ་པོ་སྙམ་ནས་དེ་ཤིང་ལས་བབས་ཏེ་ཤིང་ཨུ་དུམ་བཱ་རའི་དྲུང་ཚེར་མས་བསྐོར་ནས་བོར་ཏེ་སོང་ངོ་། །ཡང་སྨྲས་པ། དེ་གཉིས་སོང་བ་ནགས་ནང་ན། །ཨུ་དུམ་བཱ་ར་སྨིན་པ་མཐོང་། །དེས་ཀྱང་དེ་ལ་

Vol. 11 · folio 83b

འཛེགས་པ་དང་། །ཟ་ཞིང་སྦྱིན་པར་མི་བྱེད་དོ། །སྙན་པར་སྨྲ་བའི་ཚིག་ཅན་མ། །དེ་ལ་བུ་མོས་སྨྲས་པ་ནི། །བདག་ཀྱང་བཀྲེས་པར་གྱུར་པ་ལ། །ཇོ་བོ་སྩོལ་ཅིག་བདག་ལ་ཡང་། །རྩུབ་པའི་ཚིག་ཏུ་སྨྲ་བ་ནི། །དེས་ནི་དེ་ལ་ངན་པ་མོ། །དེ་སྟེ་བཟའ་བར་འདོད་ན་ནི། །ཟོ་ཤིག་བདག་ཉིད་

འཛེགས་ནས་སོ། །དེས་ཀྱང་ནན་གྱིས་བསྒྲིམས་ནས་སུ། །ཤིང་ཆེན་དེ་ལ་འཛེགས་པར་གྱུར། །ཤིང་ལ་འཛེགས་པར་ཤེས་ནས་ནི། །བབས་ཏེ་ཡལ་གས་དྲུང་བསྐོར་སོང་། །དེ་ནས་དེའི་ཚེ་དེའི་དུས་ན་རྒྱལ་པོ་སྐྱེད་པ་རི་དགས་ཤོར་དུ་སོང་སྟེ། དེའི་ཕྱོགས་སུ་ཕྱིན་པ་དང་། དེ་ནས་དེ་ཁྱོ་དང་

བྲལ་བའི་སྡུག་བསྔལ་གྱིས་ཉོན་མོངས་པར་གྱུར། མི་འོང་བ་ཡང་མེད་བོད་དུའང་མེད་པའི་དགོན་པ་ན་ཤིན་ཏུ་སྙིང་རྗེ་ཞིང་བརྩེ་བ་སྐད་དུ་ངུ་ཞིང་འདུག་པ་དང་། དེ་ནས་རྒྱལ་པོ་སྐྱེད་པ་དེའི་ཕྱོགས་སུ་རི་དགས་སྙེགས་པ་ལས་དེས་དེའི་སྒྲ་ཐོས་ནས་འདི་ལྟ་བུར་སྙིང་རྗེ་ཞིང་བརྩེ་བས་སྨྲེ་སྔགས་

འདོན་ཅིང་དགོན་པ་ན་འདུག་པ་འདི་སུ་ཞིག །ཅི་ནས་དེ་བརྟག་གོ་སྙམ་དུ་བསམས་ནས་སྒྲ་དེ་ལོགས་སུ་སོང་སྟེ། ཨུ་དུམ་བཱ་རི་ཀའི་དྲུང་དུ་ཕྱིན་པ་དང་མིག་ཤིན་ཏུ་ལེགས་པ་ནགས་ཀྱི་ལྷ་མོ་ལྟ་བུ་གཟུགས་ལེགས་ཤིང་བལྟ་ན་སྡུག་པ་བཟང་མོ་ཞིག་མཐོང་ནས། ཡང་བཟང་མོ་ལྷ་

མོའམ། གནོད་སྦྱིན་མོའམ། དྲི་ཟ་མོའམ། ལྷའི་སྲས་མོའམ་ཁྱོད་ཅི་ཡིན། དོན་ཅིའི་ཕྱིར་ཕྱོགས་འདིར་འོངས་ཞེས་དྲིས་སོ། །ཡང་སྨྲས་པ། ཤིན་ཏུ་མིག་བཟང་ཡིད་འཕྲོག་མ། །རྒྱན་ཀུན་གྱིས་ནི་བཀླུབས་པ་སྟེ། །ངང་པ་དབྱངས་སྙན་རྐང་གདུབ་ཅན། །སྤྲིན་མངས་ཀྱི་ནི་གློག་དང་འདྲ། །

སྐལ་ཆེན་ལྟེ་བ་སྨིན་བཟང་ན། །ཁྱོད་ནི་ལྷ་འམ་ཀླུ་མོ་འམ། །དྲི་ཟ་མི་འམ་ཅི་ཡིན་པ། །ཁྱོད་ལ་བདག་འདྲི་ལེགས་པར་སྨྲོས། །དེ་ལྟར་བདག་ལ་ཁྱོད་ཀྱིས་ཤེས་པར་བྱོས། །དེ་ནས་རྒྱལ་པོས་དེ་སྐད་དུ་དྲིས་པ་དང་། དེས་འདི་སྐད་དུ་སྨྲས་སོ། །བདག་ནི་ལྷ་མོ་ཀླུ་མ་ལགས། །དྲི་ཟ་མི་འམ་

ཅི་མ་ལགས། །རྒྱལ་ཆེན་བདག་ནི་མི་ལགས་ཏེ། །ཁྱིམ་ཐབ་དང་ནི་བྲལ་བའོ། །དེ་ནས་དེས་ནི་ཤིང་ལས་ཕབ། །དེ་ཉིད་དུ་ནི་ལྷན་ཅིག་ཉལ། །རྒྱལ་པོ་ས་དབང་ཆེན་པོ་པ། །མི་དབང་དེ་ལ་སྡུག་པར་གྱུར། །དེས་དེ་ཤིང་རྟའི་སྟེང་དུ་བསྐྱོན་ནས་གྲོང་ཁྱེར་དུ་ཁྲིད་དེ། དེ་དང་ལྷན་ཅིག་ཏུ་རྩེ་དགའ་ཡོངས་

Vol. 11 · folio 84a

སུ་སྤྱོད་དོ། །བྲམ་ཟེ་དེ་གཅིག་པུ་ལམ་དུ་འགྱོད་ནས་བདག་གིས་དགོན་པར་ཆུང་མ་བོར་ཏེ་འོངས་པ་ནི་མ་ལེགས་པ་ཞིག་བྱས་ཀྱིས་སླར་སོང་ལ་དེ་ཁྲིད་དེ་འོང་ངོ་སྙམ་དུ་བསམས་ནས། དེའི་ཕྱིར་ཨུ་དུམ་བཱ་རི་ཀའི་དྲུང་དུ་ཕྱིན་ན་དེ་མི་སྣང་ནས་གཞན་ཞིག་ལས་རྒྱལ་པོ་སྐྱེད་པས་

ཁྲིད་དེ་བཙུན་མོར་བྱས་སོ་ཞེས་ཐོས་པ་དང་། ཚིག་དེ་ཐོས་ནས་ཡང་ཡིད་ལ་ཤིན་ཏུ་སྡུག་བསྔལ་གྱིས་གཟིར་བར་གྱུར་ཏེ། རྒྱལ་པོའི་སྒོར་ཕྱིན་ན་ནང་དུ་མ་ཆུད་དོ། །བལྟས་ན་རྒྱལ་པོའི་འཁོར་ན་ལས་སར་པར་བྱེད་དེ། དེས་ལས་མི་འདི་དག་དང་ལྷན་ཅིག་རྡོ་བ་ཁྱེར་ཏེ་འགྲོའོ་སྙམ་བསམས་ནས་

དེས་རྡོ་བ་ཁྱེར་ཏེ་རྒྱལ་པོའི་ཕོ་བྲང་དུ་ཞུགས་སོ། །བལྟས་ན་བདག་གི་ཆུང་མ་རྒྱལ་པོ་དང་ལྷན་ཅིག་ཏུ་ཨུག་ཤུད་བརྒྱ་ཞིང་འདུག་གོ། །ཆུང་མ་ནི་འདི་དང་ལྷན་ཅིག་གཏམ་ཐབས་ཇི་ལྟ་བུ་ཞིག་གིས་བྱ་སྙམ་དུ་བསམས་སོ། །དེས་སྨྲས་པ། གཞི་ནི་གསེར་ལ་བྱས་པ་སྟེ། །བརྒྱད་དུ་འཇོག་ཅིང་

དགའ་བར་བྱེད། །བཟང་མོ་བདག་ལ་མི་དགའ་འམ། །ཤིང་མཁན་རྡོ་བ་བླང་བར་བྱས། །གནས་དེར་བདག་གིས་སྨྲས་པ་དང་། །བུད་མེད་ཤ་ཟར་མི་རུང་ཞེས། །དེ་སྐད་སྨྲས་པའི་ཚིག་ཀྱང་དྲན། །འདི་ནི་འདོར་ཞིང་འཇོག་པར་བྱེད། །ཨུ་དུམ་བཱ་རའི་ཤིང་དང་ནི། །ཡིད་འོང་ཁྱོད་ཀྱིས་བདག་

ལ་དྲིས། །ག་གཱའི་དྲུང་དུ་སྐྱེས་པ་སྟེ། །ཤིང་མཁན་གྱིས་ནི་རྡོ་བ་ལོང་། །ཆུ་པྲོག་ཤིང་བུས་དཀྲུགས་པ་སྟེ། །དྲིས་པའི་ལན་ནི་བདག་ལ་སྨྲོས། །བུད་མེད་བཏུང་དུ་མི་རུང་ཞེས། །སྨྲས་པ་ཡིན་ཏེ་འདིར་བཞག་གོ། །མང་ཐོས་སྣ་ཚོགས་སྨྲ་བ་སྟེ། །གསེར་འོད་གྲངས་མེད་སླད་དུ་སྨྲོས། །བཟང་

མོ་བདག་ལ་མི་དགའ་འམ། །སློབ་དཔོན་རྡོ་བ་བླང་བར་གྱིས། །མ་སྨིན་རྣམས་ནི་བདག་ལ་བོར། །སྨིན་པ་དག་ནི་ཁྱོད་ཀྱིས་ཟོས། །ཚིག་རྩུབ་སྨྲས་པ་དེ་ཡང་དྲན། །འདི་ན་ཨུག་ཤུད་འདོར་ཞིང་འདུག །རི་རྩེ་ནས་ནི་བདག་འདོར་ཏེ། །དུག་ཀྱང་བཟའ་འོ་བྲམ་ཟེ་མོ། །ཁྱོད་ཀྱི་མྱ་ངན་ཕྱིར་བདག་

མཆི། །ཤིང་མཁན་གྱིས་ནི་རྡོ་བ་ལོང་། །རི་ཡི་རྩེ་ནས་བདག་འོར་ཅིག །བྲམ་ཟེ་དུག་ཀྱང་ཟ་ལ་རག །འདོད་པའི་ཚེ་ན་མ་འདོད་དོ། །ཨུག་ཤུད་ཀྱིས་ནི་ཁྱིམ་དུ་བྱས། །དེ་ནས་དེ་གཉིས་ཕན་ཚུན་དེ་སྐད་དུ་གཏམ་འཛེར་བ་ལས་རྒྱལ་པོ་དོགས་པ་སྐྱེས་ཏེ། ལྷ་མོ་ཁྱོད་ཅག་གཏམ་ཅི་འཛེར་བ་ནི་ངས་ཁོང་

Vol. 11 · folio 84b

དུ་མ་ཆུད་དེ། ཁྱོད་ཅག་ཅི་ཟེར་བ་བག་ཕོབ་ལ་བདག་གི་ཐོས་པར་སྨྲོས་ཤིག །རྒྱལ་པོ་ནི་བུད་མེད་གྱི་དབང་དུ་འགྲོ་བས་ན་བུད་མེད་ཨུ་དུམ་བཱ་རི་ཀས། ལྷ་ལ་ཇི་ལྟར་གྱུར་པ་ཀུན་ཞིབ་ཏུ་སྨྲས་སོ། །འདི་ནི་བདག་གི་ཁྱོ་ལགས་ཏེ། བདག་གི་ཕ་མས་འདིའི་ཆུང་མར་བྱིན་ནས་འདི་མཁས་པ་བྲམ་ཟེ་ཤེས་པ་དང་།

ཤེས་པའི་ཡན་ལག་ཀུན་ཤེས་པའོ། །དེ་ནས་རྒྱལ་པོས་ལྷ་མོ་ལ་ཇི་ལྟར་བྱ། དེའི་སེམས་ཇི་ལྟར་མགུ་བར་བྱ། ཁྱོད་ཅི་དེ་དང་འགྲོགས་ཏེ་འགྲོ་བར་བྱའམ་ཞེས་སྨྲས་པ་དང་། དེས་ཇི་ལྟར་དེ་བདག་ལ་འདོད་པར་མི་འགྱུར་བ་དང་། དེའི་སྔགས་མ་རུངས་པས་མི་ཚུགས་པ་དང་། བྲམ་ཟེའི་སྔགས་ཀྱི་སྟོབས་

སུ་མི་འགྱུར་བ་དེ་ལྟར་བདག་གིས་བགྱིའོ་ཞེས་སྨྲས་པ་དང་། དེ་ནས་རྒྱལ་པོ་སྐྱེད་པས་ཇི་ལྟར་གྱུར་པ་དེ་སྨན་ཆེན་པོ་ལ་སྨྲས་སོ། །སྨན་ཆེན་པོས་ལྷ་དང་ཇི་ལྟར་འབྲལ་བར་མི་འགྱུར་བ་དེ་ལྟར་བགྱིའོ་ཞེས་སྨྲས་པ་དང་། ཇི་ལྟར་བྱ། སྨན་ཆེན་པོས་བྲམ་ཟེ་འདི་ལྟར་ནུས་པ་ཆུང་ངུ་རྒྱ་མི་ཆེ་ལ་བཙུན་མོ་རྣམས་ཤིན་ཏུ་

གཟི་བརྗིད་དང་ལྡན་པས་དེ་ལ་བདག་གིས་འདི་སྐད་ཅེས་བགྱིའོ། །དེ་བཙུན་མོ་རྣམས་ཀྱི་ནང་ནས་དེ་འདམ་དུ་བཅུག་དང་དེས་ངོ་མི་ཟིན་ཏོ་ཞེས་སྨྲས་ནས། དེ་ནས་སྨན་ཆེན་པོ་དང་རྒྱལ་པོ་ཤེས་པར་བྱས་ནས། བྲམ་ཟེ་དེ་བོས་ཏེ་མཁན་པོ་ཅི་ཚོལ། རྒྱལ་པོའི་ཕོ་བྲང་དུ་ཅིའི་ཕྱིར་འོངས་ཞེས་དྲིས་པ་དང་། དེས་

སྨྲས་པ། བདག་གི་ཆུང་མ་རྒྱལ་པོ་སྐྱེད་པས་འདིར་ཁྲིད་པས་ན་དེ་ཚོལ་དུ་འོངས་སོ། །སྨན་ཆེན་པོས་སྨྲས་པ། ཁྱོད་རང་གི་ཆུང་མ་ངོ་ཤེས་སམ། གཟུགས་ངན་པོས་སྨྲས་པ། ཤེས་སོ། །སྨན་ཆེན་པོས་བཙུན་མོ་ལྔ་བརྒྱ་ཁྱོད་ཀྱི་མདུན་དུ་བཞག་ལ་དེ་རྣམས་ལས་བདག་རང་གི་མ་ཡིན་པ་བཙུན་མོ་གཞན་ཞིག་བཟུང་ན་

མཚོན་གྱིས་ཁྱོད་ཀྱི་ལུས་དུམ་བུར་བྱའོ་ཞེས་བསྒོ་ན། དེ་བཞིན་དུ་བྱའོ་ཞེས་ཟེར་རོ། །དེ་ནས་རྒྱལ་པོ་སྐྱེད་པས་བཙུན་མོ་རྣམས་ལ་རྒྱན་ཐམས་ཅད་ཀྱིས་བཀླུབས་ལ་བདག་གི་དྲུང་དུ་ཤེག་ཤིག །རྒྱན་གྱི་ཁྱད་པར་ཡོད་པར་གྱིས་ཤིག་ཅེས་བསྒོའོ། །དེ་ནས་རྒྱལ་པོ་བཤོས་གསོལ་བའི་ལམ་སྣང་བའི་སར་བརྒྱ་བྱིན་གྱི་

བཙུན་མོ་བཞིན་དུ་དངར་ནས། ཨུ་དུམ་བཱ་རི་ཀ་ལྷ་མོ་བཙུན་མོ་ཐམས་ཅད་ཀྱི་མདུན་དུ་བྱས་པ་ནི་ཇི་ལྟར་ལྷའི་བུ་མོ་རྣམས་ཀྱིས་བསྐོར་བ་བཞིན་རྒྱལ་པོའི་དྲུང་དུ་ལྷགས་པ་དང་། སྨན་ཆེན་པོས་བྲམ་ཟེ་དེ་མདུན་དུ་བཞག་ནས་ཁྱོད་རང་གི་ཆུང་མ་ངོ་ཤེས་ན་འདི་ནས་ཟུང་ཤིག་ཅེས་བསྒོ་བ་དང་། དེ་ནས་བྲམ་ཟེ་དེ་ཨུ་དུམ་བཱ་རི་

Vol. 11 · folio 85a

ཀ་དེ་དང་བཙུན་མོ་གཞན་ཡང་རྒྱན་ཐམས་ཅད་ཀྱིས་བརྒྱན་པ་མཐོང་བ་དང་། སྦྲུལ་སྔགས་གྱིས་བཏབ་པ་བཞིན་དུ་སྤ་གོང་ནས་འདུག་གོ། །ཉི་མ་ཕྱེ་བ་ལ་བལྟར་མི་བཟོད་པ་བཞིན་བྲམ་ཟེ་དེ་དེ་རྣམས་ལ་ལྟ་ཞིང་འདུག་གོ། །དེ་ནས་དེ་དག་ཕྱི་བཞིན་འདྲེ་དང་འདྲ་བའི་བྲན་མོ་ཆུ་ཆུན་མ་བཙུན་མོ་གཞན་ཞིག་གི་

ཕྱི་བཞིན་འགྲོ་བ་མཐོང་བ་དང་དེའི་ལག་ནས་བཟུང་སྟེ། འདི་བདག་གི་ཆུང་མའོ་ཞེས་ཟེར་བ་དང་། སྨན་ཆེན་པོས་དེ་ཡིན་ན་ཁྱེར་ཅིག་ཅེས་སྨྲས་པ་དང་། དེས་བྲན་མོ་ཁྲིད་ནས་སྨྲས་པ། མཆོག་ལ་མཆོག་གི་ཡིད་ཀྱང་ཆགས། །འབྲིང་ལ་འབྲིང་གི་ཡིད་ཀྱང་ཆགས། །སྒུར་མོ་ལ་ཡང་བདག་ཡིད་ཆགས། །བཟང་མོ་

བདག་ནི་འདྲེ་འདྲ་ཁྱོད་ཀྱང་འདྲེའོ། །ལྷ་དག་ཚལ་ན་དགའ་བཞིན་དུ་འདྲེ་མོ་ཚུར་ཤོག །བདག་ཀྱང་འདྲེ་ལྟ་བུ་སྟེ། བདག་ཅག་དགའ་བར་བྱའོ་ཞེས་སྨྲས་ནས་སོང་ངོ་། །དེ་ནས་དུས་ཕྱི་ཞིག་ན་རྒྱལ་པོ་སྐྱེད་པས་བློན་པོའི་མཆོག་སྨན་ཆེན་པོ་ཅི་ཞིག་ཉེས་ཏེ་སྤངས་སོ། །དེ་ན་རྒྱལ་པོ་སྐྱེད་མོས་ཚལ་དུ་བཙུན་མོ་དང་

ལྷན་ཅིག་ཏུ་བྱུང་སྟེ། དེར་བཙུན་མོ་དང་ལྷན་ཅིག་ཉི་མ་ཐུབ་པར་རྩེ་དགའ་ཡོངས་སུ་སྤྱོད་དོ། །དེ་ནས་བཙུན་མོ་མུ་ཏིག་གི་སེ་མོ་དོ་བརྒྱ་སྟོང་རི་བ་བཀྲོལ་ཏེ། ཤིང་ཨ་ཤོ་ཀའི་ཡལ་ག་ལ་གཟར་ཏེ་བཞག་ནས་རྒྱལ་པོ་དང་ལྷན་ཅིག་རྩེ་རྩེ་བ་ལས་མུ་ཏིག་གི་སེ་མོ་དོ་བརྒྱ་སྟོང་རི་བ་དེ་བརྗེད་དོ། །རྒྱལ་པོ་ཡང་བཙུན་

མོ་དང་ལྷན་ཅིག་རྒྱལ་པོའི་ཁབ་ཏུ་དོང་ངོ་། །དེ་ནམ་ཕྱེད་ན་བཙུན་མོ་དེས་མུ་ཏིག་གི་སེ་མོ་དོ་སྐྱེད་མོས་ཚལ་ཉིད་དུ་ལུས་པར་དྲན་ནོ། །མུ་ཏིག་གི་སེ་མོ་དོ་དེ་ཡང་སྤྲ་མོས་ཁྱེར་ཏེ་ཤིང་ཁར་བཞག་གོ། །དེ་ནས་རྒྱལ་པོས་མི་དག་ལ་སྐྱེད་མོས་ཚལ་དུ་མུ་ཏིག་གི་སེ་མོ་དོ་དེ་ལུས་ཀྱིས་མྱུར་དུ་སོང་ལ་ཁྱེར་ཏེ་ཤོག་ཤིག་

ཅེས་བསྒོའོ། །དེ་དག་དེར་དོང་ན་མ་རྙེད་དོ། །རེ་ཞིག་ན་སྤྲང་པོ་ཞིག་དེ་ན་གཞན་གྱིས་ཟོས་པའི་ལྷག་མ་བོར་བ་ཚོལ་དུ་སོང་སོང་བ་ལས་ལྷག་མ་ས་ལ་རྙེད་པ་ཟོས་ཏེ། སྐྱེད་མོས་ཚལ་ནས་བྱུང་སྟེ་འགྲོ་བ་དང་། རྒྱལ་པོའི་མི་དེ་དག་གིས་སྤྲང་པོ་དེ་བཟུང་སྟེ་གཞན་ནི་འདི་ན་སུ་ཡང་མི་སྣང་ན་མུ་ཏིག་གི་སེ་མོ་དོ་དེ་ཕུལ་ཅིག་

ཅེས་བསྒོ་བ་དང་། དེས་སྨྲས་པ། མུ་ཏིག་གི་སེ་མོ་དོ་མ་ཁྱེར་མ་མཐོང་ངོ་བདག་ནི་སྤྲང་པོ་སྟེ། ཟོས་པའི་ལྷག་མ་ཚོལ་བའི་ཕྱིར་འདིའི་ནང་དུ་འོངས་སོ། །དེ་དག་གིས་དེ་ཁུ་ཚུར་དང་དབྱུག་པས་བརྡེགས་ནས་བཙོན་རར་བཅུག་གོ། །དེ་དེ་ན་བཀྲེས་པས་གཟིར་ཏེ་བསམས་པ། བདག་གིས་འདིར་ཐབས་ཤིག་མ་སྦྱར་ན་ནི་

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words