འདུལ་བ་ཕྲན་ཚེགས་ཀྱི་གཞི

Sanskrit title (Tibetan script, as in the text) བི་ན་ཡ་ཀྵུ་དྲ་ཀ་བསྟུ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 11 · folio 85b

ལྟོགས་ཏེ་འཆིའོ་སྙམ་ནས། དེས་བཙོན་སྲུང་དག་ལ་བདག་གིས་མུ་ཏིག་གི་སེ་མོ་དོ་དེ་བླངས་པ་བདེན་མོད་ཀྱི་དེ་ཚོང་དཔོན་གྱི་བུ་འདི་ཞེས་བྱ་བ་ལ་བྱིན་ནོ་ཞེས་སྨྲས་པ་དང་། རྒྱལ་པོའི་མི་དེས་ཐོས་ནས་དེ་ཡང་དེར་བཀུག་སྟེ་གཉིས་ཀ་ཤིང་སྒྲོག་ཏུ་བཅུག་པ་དང་། ཚོང་དཔོན་གྱི་བུ་དེའི་ཁྱིམ་ནས་ཁ་ཟས་སྣ་ཚོགས་

འོངས་ཤིང་ཟ་བ་ལ་སྤྲང་པོས་བསླང་བ་དང་། ཚོང་དཔོན་གྱི་བུས་སྤྱོས་ཏེ་སྨྲས་པ། ཁྱོད་ཀྱིས་ང་ལ་ཁ་ཟས་ཀྱིས་གསོ་བར་འཇུག་པའི་ཕྱིར་རྐུར་སྦྱར་གྲང་སྟེ་ཡང་མི་སྦྱིན་ནོ་ཞེས་སྨྲ་ཞིང་ཟའོ། །དེ་ནས་ཚོང་དཔོན་གྱི་བུ་བཤང་བས་མི་བདེ་ནས་དེ་ལ་ལོངས་ཏེ་འདོང་ཞེས་སྨྲས་པ་དང་། དེས་དེ་ནི་ཁྱོད་ཀྱི་ཚིག་བདག་

གིས་མཉན་པ་མ་ཡིན་ཏེ་མི་འགྲོའོ་ཞེས་སྨྲས་པ་དང་། དེས་སྨྲས་པ། ད་ཕན་ཆད་ཇི་ལྟར་བདེ་བར་འགྱུར་བ་དེ་ལྟར་བྱའོ་ཞེས་དེ་ལ་ཚིག་འཇམ་པོ་དང་མནས་ཡིད་ཆེས་པར་བྱས་ཏེ་བཤང་བས་མི་བདེ་བ་ཡང་བཤངས་སོ། །དེ་ནས་ཕྱི་དེ་ཉིན་མོ་ཚོང་དཔོན་གྱི་བུ་དེས་ཁྱིམ་དུ་དེང་ཕན་ཆད་བདག་ཅག་མི་གཉིས་

ཀྱི་ཟན་ཁྱེར་ཏེ་ཤོག་ཅེས་སྤྲིང་ངོ་། །སྤྲང་པོ་དེ་བདེ་བར་གྱུར་པ་དང་། དེས་བསམས་པ། བདག་སྔན་ཆད་ནི་གྲོང་ཁྱེར་ཐམས་ཅད་བསྐོར་ཀྱང་ལྟོ་འགྲངས་པར་མ་རྙེད་ན། ད་འདིར་བཟའ་བ་དང་། བཏུང་བ་ཞིམ་པོ་ཆོག་པར་ཡོད་མོད་ཀྱི་གྲོགས་ནི་འདི་གཅིག་པུས་མི་ཆོག་གིས་སྨད་འཚོང་མ་ཞིག་ཀྱང་དགུག་གོ་སྙམ་

ནས། དེ་སྨད་འཚོང་མ་ཞིག་ལ་འདི་ཡང་ཁྱེར་བ་ལ་གཏོགས་ཀྱིས་ཟུང་ཤིག་ཅེས་བསྒོ་བ་དང་། རྒྱལ་པོའི་མིས་དེ་ཡང་བཙོན་རར་བཅུག་གོ། །དེ་དང་ལྷན་ཅིག་ཏུ་བཟའ་བ་དང་བཏུང་བ་ཞིབ་པོ་ཟོས་ནས་ཡང་སྨྲས་པ། ཇི་ནས་ལོ་བཅུ་གཉིས་ཀྱི་བར་དུ་འདི་ལྟ་བུ་ལས་མ་ཐར་ཡང་བླའོ། །དེ་བཞིན་ཡོངས་

སུ་སྤྱོད་པ་ལས་ཕྱིས་ཡང་འདོད་པ་སྐྱེས་ཏེ་སྨད་འཚོང་མ་འདི་གཅིག་པུས་ཡང་མི་ཆོག་སྟེ། ནམ་འདོད་པ་དང་ལྡན་པར་གྱུར་པ་དེ་ན་དགའ་བ་རྒྱས་པ་མྱོང་བར་འགྱུར་གྱིས་པི་བང་མཁན་གཅིག་ཀྱང་དགུག་གོ་སྙམ་ནས། སྤྲང་པོ་དེས་པི་བང་མཁན་ཅིག་ལ་འདིས་ཀྱང་མུ་ཏིག་གི་སེ་མོ་དོ་ཁྱེར་རོ་ཞེས་སྨྲས་པ་དང་།

དེ་ནས་རྒྱལ་པོའི་མི་དེས་ཡང་སྔ་མ་བཞིན་དུ་དེར་བཅུག་གོ། །དེ་ཚོང་དཔོན་གྱི་བུ་དང་། སྨད་འཚོང་མ་དང་། པི་བང་མཁན་དང་བཙོན་ར་ན་ལྷན་ཅིག་ཏུ་བདེ་བ་སྤྱོད་ཅིང་རྩེ་དགའ་ཡོངས་སུ་སྤྱོད་དོ། །དེ་ནས་དུས་རིང་ཞིག་འདས་པ་དང་དེ་རྣམས་ཀྱིས་སྤྲང་པོ་དེ་ལ་ཅི་ནས་ཀྱང་བདག་ཅག་ཐར་བར་གྱིས་ཤིག །བདག་ཅག་

Vol. 11 · folio 86a

ཐར་ན་ཁྱོད་ལ་ཅིས་ཀྱང་མི་བྲེལ་བར་འགྱུར་བ་དེ་ལྟ་བུར་བྱའོ། །ཞེས་གསོལ་བ་བཏབ་པ་དང་། དེས་ཀྱང་དེ་བཞིན་བྱའོ་ཞེས་ཁས་བླངས་སོ། །དེས་བསམས་པ་གཞན་གྱིས་མ་ཡིན་གྱི་སྨན་ཆེན་པོས་ནུས་སོ་སྙམ་དུ་བློ་བསྐྱེད་ནས་དེ་དག་ལ་ཡང་བདག་ཅག་གི་རྣམས་བཙོན་ར་ནས་ཕྱིན་པར་སྨན་ཆེན་པོ་གཅིག་

པུས་ནུས་ཀྱི་གཞན་ནི་བདག་ཅག་གིས་མ་མཐོང་ཞེས་སྨྲས་ཏེ། དེས་རྒྱལ་པོའི་མི་རྣམས་ལ་སྨན་ཆེན་པོའི་བུ་ཡང་འདིར་གཏོགས་སོ་ཞེས་སྨྲས་པ་དང་། རྒྱལ་པོའི་མིས་དེ་ཡང་དེར་བཀུག་གོ། །དེ་ནས་སྨན་ཆེན་པོས་ཁྱོད་ཀྱི་བུ་བཙོན་རར་བཅུག་གོ་ཞེས་ཐོས་པ་དང་། དེས་བསམས་པ་ཅི་ནས་ཀྱང་འདིའི་ཕྱིར་ད་ནི་རྒྱལ་པོའི་ཕོ་བྲང་

དུ་མི་འགྲོར་མི་རུང་སྟེ། དེར་མ་སོང་ན་བདག་གི་བུ་ཉོན་མོངས་པར་འགྱུར་རོ་སྙམ་ནས་དེ་རྒྱལ་པོའི་ཕོ་བྲང་དུ་སོང་ངོ་། །དེར་འོངས་ནས་རྒྱལ་པོ་ལ་ལྷ་བདག་ལ་བཀའ་འབབ་ཏུ་བས་ན། བདག་གི་བུས་ལྷ་ལ་གློ་བ་རིངས་པ་ཅི་བགྱིས་ན་བཙོན་རར་སྩལ་ཅེས་གསོལ་པ་དང་། རྒྱལ་པོས་མུ་ཏིག་གི་སེ་མོ་དོ་བརྒྱ་སྟོང་རི་བ་སྐྱེད་མོས་

ཚལ་ནས་སྟོར་ན། སྤྲང་པོ་དེ་ལས་དེར་སོང་ངོ་ཞེས་ཟེར་ཏེ་དེའི་ཕྱིར་རོ་ཞེས་སྨྲས་པ་དང་། དེས་ཀྱང་དེ་དག་གི་ཐབས་ཞིབ་ཏུ་ཐོས་ནས། སྨན་ཆེན་པོས་ལྷ་འདི་དག་ནི་གང་གིས་ཀྱང་མ་འཚལ་ཏེ་བདག་གིས་སྨྲས་པ་འདི་དག་གཏང་བར་གསོལ་ཞེས་སྨྲས་པ་དང་། དེ་དག་བཏང་ངོ་། །དེ་ནས་དེ་སྐྱེད་མོས་ཚལ་དུ་སོང་བ་དང་།

དེ་ལ་སྔ་ན་གནས་གང་དུ་བཞུགས། ཤིང་དྲུང་དུ་བཞུགས་སོ་ཞེས་སོ་ཕྱོགས་བསྟན་པ་དང་། དེས་ཤིང་དེ་ལ་བལྟས་ན་ཤིང་དེའི་རྩེ་མོ་ན་སྤྲ་མོ་ཞིག་འདུག་པ་མཐོང་ནས། དེས་བསམས་པ་འདིས་མུ་ཏིག་གི་སེ་མོ་དོ་དེ་ཁྱེར་ཡང་དག་གིས་འདི་ལ་ཐབས་ཞིག་སྦྱར་ཏེ་དགུག་གོ་སྙམ་ནས། དེས་ལྷ་བཙུན་མོ་དང་ལྷན་

ཅིག་ཏུ་འདིར་གཤེགས་ཤིག་ཅེས་གསོལ་པ་དང་རྒྱལ་པོ་ཡང་བཙུན་མོ་དང་སྐྱེད་མོས་ཚལ་དེར་ལྷགས་ཏེ། དེ་ན་འཁོད་པ་དང་། ལྷ་འདིར་བཙུན་མོས་རྒྱན་བཏགས་ན་དེ་ཡང་རྒྱན་འདོགས་སོ་ཞེས་སྨྲས་པ་དང་། སྤྲ་མོ་དེ་ཡང་ཤིང་གི་རྩེ་མོར་འདུག་ནས་མུ་ཏིག་གི་སེ་མོ་དོ་དེ་བཏགས་སོ། །དེ་ནས་སྨན་ཆེན་པོས་བཙུན་

མོ་གར་གྱིས་ཞེས་སྨྲས་པ་དང་། དེས་གར་བྱས་ན་སྤྲ་མོ་དེ་ཡང་ཤིང་གི་རྩེ་མོར་འདུག་ནས་གར་བྱས་པ་དང་། དེའི་མགུལ་ནས་མུ་ཏིག་གི་སེ་མོ་དོ་དེ་མ་ལྷུང་སྟེ་དེ་ཡང་མིས་ཇི་ལྟར་བྱེད་པ་དང་། ཇི་ལྟར་ཆས་པ་དེ་ལ་བལྟས་ནས་དེ་འདྲ་བར་བྱེད་དེ་སྨན་ཆེན་པོས་ལྷ་བཙུན་མོ་འདིས་མགོ་བཏུད་དེ་གར་བགྱིས་ན་

Vol. 11 · folio 86b

རུང་ངོ་ཞེས་སྨྲས་པ་དང་། རྒྱལ་པོས་དེ་བཞིན་གྱིས་ཤིག་ཅེས་བསྒོ་ནས་དེ་མགོ་བཏུད་དེ་གར་བྱེད་པ་ལ་ཞུགས་པ་དང་སྤྲ་མོ་དེས་ཀྱང་མགོ་བཏུད་དེ་གར་བྱས་པ་དང་། དེའི་མགུལ་ནས་མུ་ཏིག་གི་སེ་མོ་དོ་དེ་ལྷུང་ངོ་། །དེ་ནས་རྒྱལ་པོ་དགའ་བས་སྨན་ཆེན་པོའི་མགུལ་

ནས་འཁྱུད་དེ་མགུ་བར་བྱས་ནས་ལོངས་སྤྱོད་ཀྱང་བྱིན་ནོ། །དེ་ནས་བློན་པོ་དྲུག་པོ་དེ་དག་ལྷན་ཅིག་ཏུ་འདུས་ཏེ་སྔོན་གྱི་དུས་དང་དེའི་ཡང་སྔོན་ལོགས་ན་ནི་བདག་ཅག་ལ་རྒྱལ་པོས་རིམ་གྲོར་བྱས། བླ་མར་བྱས། བཙུན་པར་བྱས། མཆོད་པར་བྱས་ན་ད་ནི་རི་བྲགས་ཀྱི་གྲོང་

མི་བློ་རྩིང་བ་ཅན་བཀྲེས་པའི་རིགས་ལས་བྱུང་བ་འདིས་བདག་ཅག་ཐམས་ཅད་གཟི་བརྗིད་ཀྱི་གནས་ནས་ཕྱུང་ན་དེ་ལ་ཇི་ལྟ་བུར་བྱ་ཞེས་བགྲོས་པ་དང་། དེ་ནས་བློན་པོ་གཞན་ཞིག་གིས་ཀྱེ་བདག་ཅག་སྔོན་གཅིག་ལ་གཅིག་སོ་སོར་བྱེ་བས་ན་བདག་ཅག་མཐུ་མེད་པར་བྱས་ཀྱིས་

དེ་ལྟ་བས་ན་ད་ནི་སྐྱེད་མོས་ཚལ་དུ་འདོང་ངོ་། །དེར་དོང་ལ་མནའ་དང་། ཡིད་ཆེས་པ་དང་། གཉེན་དུ་ཡང་བྱའོ། །དེ་ལྟ་བུར་བྱས་ན་རྒྱལ་པོ་སྐྱེད་པ་དང་། སྨན་ཆེན་པོས་བདག་ཅག་ལ་ནི་སྤང་བ་མ་ཡིན་གྱི་སླར་སྟེན་པར་འགྱུར་རོ་ཞེས་སྨྲས་པ་དང་།

དེ་དག་འདུས་ཏེ་སྐྱེད་མོས་ཚལ་དུ་དོང་ངོ་། །འདོང་བ་སྨན་ཆེན་པོས་མཐོང་སྟེ། དེ་ནས་སྨན་ཆེན་པོས་ནམས་ཀྱང་འདི་དག་གཅིག་ཏུ་འདུས་ཏེ་གར་ཡང་མ་དོང་ན། སྔོན་ལྟ་མ་ཡིན་པ་ཞིག་སྦྱར་རོ་སྙམ་བསམས་ནས། དེ་དོགས་པར་གྱུར་ཏེ་ནེ་ཙོ་མ་ཏ་ར་ལ་

ཕྱི་བཞིན་སོང་ལ་འདི་དག་ཅི་དཔྱོད་ཅི་ཟེར་བ་དང་། །ཅི་བྱེད་པ་རྟོགས་ཤིག་ཅེས་བསྒོའོ། །དེ་ནས་བློན་པོ་དྲུག་པོ་དེ་དག་སྐྱེད་མོས་ཚལ་དུ་དོང་ནས་ཕན་ཚུན་གཉེན་དུ་བྱས་ནས་དེ་སྟེ་གཅིག་ལ་གཅིག་མཚང་འདྲུ། གསང་བརྟོལ་ན་ནི་གདོད་བདག་ཅག་

ཡིད་ཆེས་པར་འགྱུར་རོ་ཞེས་སྨྲས་པ་དང་། གཞན་ཞིག་གིས་སྨྲས་པ་དེ་བཞིན་བྱའོ། །དེ་ནས་གཅིག་གིས་སྨྲས་པ། བདག་གིས་ནི་རྒྱལ་པོའི་རྨ་བྱ་ཟོས་སོ། །གཞན་ཞིག་གིས་སྨྲས་པ། བདག་གིས་ནི་རྒྱལ་པོའི་བཙུན་མོ་དང་ལྷན་ཅིག་ཉལ་བར་བྱས་

Vol. 11 · folio 87a

སོ། །གཞན་ཞིག་གིས་སྨྲས་པ། བདག་གིས་ཀྱང་དེ་ལྟ་བུར་བྱའོ་སྙམ་དུ་བསམས་སོ། །འདི་བཞིན་དུ་དྲུག་པོ་དེ་དག་གིས་གཅིག་ལ་གཅིག་གསང་གཏམ་བྱས་ཏེ། སྣོད་གཅིག་ཏུ་ཟོས་པར་གྱུར་ཏོ། །ནེ་ཙོ་མ་ཏ་རས་ཀྱང་དེ་དག་ཐོས་

ནས། སྨན་ཆེན་པོ་ལ་བསླབས་སོ། །དེ་ནས་སྨན་ཆེན་པོས་རྒྱལ་པོ་སྐྱེད་པའི་དྲུང་དུ་སོང་སྟེ་ཕྱིན་ནས་དེ་ཐམས་ཅད་སྨྲས་ཏེ་ལྷའི་བློན་པོ་དག་ནི་རྣམ་པ་འདི་ལྟ་བུའི་ཚུལ་ཁྲིམས་དང་། གཙང་སྦྲ་དང་སྤྱོད་པར་ལྡན་ནོ། །དེ་ནས་རྒྱལ་པོ་སྐྱེད་པས་མངོན་པར་རྟོགས་

ཤིང་དེ་དག་མཐོང་ནས་ཡུལ་མེད་པར་བྱ་སྟེ། ཨེ་མའོ་བདག་གི་བློན་པོ་འདི་དག་ནི་འདི་ལྟ་བུར་མི་རིགས་པ་ཅན་གྱིས་གང་ན་མི་དབང་བ་དེར་དེང་ཤིག་ཅེས་དེ་དག་བསྐྲད་དེ་བཀྱེའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས།

གང་དེའི་ཚེ་དེའི་དུས་ན་སྨན་ཆེན་པོ་ནི་ང་ཉིད་ཡིན་ནོ། །རྒྱལ་པོ་སྐྱེད་པ་དེ་ནི་དགེ་སློང་ཤཱ་རིའི་བུ་འདིའོ། །གང་དེ་ན་བློན་པོ་དྲུག་པོ་དེ་དག་ནི་ད་ལྟར་གྱི་སྟོན་པ་དྲུག་པོ་དེ་དག་སྟེ། དེའི་དུས་ན་ཡང་བློན་པོར་གྱུར་ནས་ཡུལ་མེད་པར་བྱས་སོ། །ད་ཡང་བླ་ན་མེད་པ་

ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས་རྫུ་འཕྲུལ་དང་། ཆོ་འཕྲུལ་གྱིས་ཕམ་པར་བྱས་ཏེ་མཐའ་འཁོབ་ཏུ་བསྐྲད་དོ། །དེ་བས་ན་དགེ་སློང་ཁྱེད་ཀྱིས་དགེ་བའི་བཤེས་གཉེན་ལ་བསྟེན་པར་བརྩོན་པར་བྱའོ། །གང་ལས་ཤེས་

རབ་དང་གཞུང་དང་། །ཡེ་ཤེས་མཆོག་ཏུ་གྱུར་པའོ། །དེ་ལྟ་བུའི་ཡོན་ཏན་དུ་འགྱུར་བ་དེ་ལྟ་བུ་བསྒྲུབ་པར་བྱའོ། །གང་གི་ཚེ་བཅོམ་ལྡན་འདས་ཀྱིས་ཆོ་འཕྲུལ་ཆེན་པོ་བསྟན་ཏེ། མུ་སྟེགས་ཅན་དག་ནི་ཇིས་ཀྱང་སྨ་བབ། ལྷ་དང་མི་ནི་དགའ་བར་མཛད། །སྐྱེ་བོ་

དམ་པ་རྣམས་ནི་མགུ་བར་མཛད་པ་དེའི་དུས་ན་ཡུལ་སོ་སོ་ན་གནས་པའི་བཟོ་བོ་གྲོང་དང་། གྲོང་ཁྱེར་དང་། ཕོ་བྲང་འཁོར་དང་། ཡུལ་དེ་དག་ནས་མཉན་དུ་ཡོད་པར་ལྷགས་ཏེ་རབ་ཏུ་བྱུང་བ་དང་། དེ་དག་གི་བུ་ཕོ་དང་། བུ་མོ་དང་། ཆུང་མ་དང་། གཞན་ཡང་མཛའ་བོ་དང་། གཉེན་དང་།

Vol. 11 · folio 87b

ཕུ་ནུ་དག་ཕན་ཚུན་དུ་ཚོལ་ཞིང་མཉན་དུ་ཡོད་པར་ལྷགས་ཏེ་དེ་དག་མཐོང་ནས་འཕགས་པ་ཁྱེད་ཅག་ནི་འདིར་དོང་སྟེ་རབ་ཏུ་བྱུང་སྟེ་འཁོད་ན་བདག་ཅག་གི་འཚོ་བ་སུས་སྦྱོར་ཞེས་སྨྲས་པ་དང་། དེ་དག་གིས་འདི་ཉིད་དུ་འཁོད་ལ་འདི་ཉིད་དུ་ཁྱོད་སློབས་ཤིག་ཅེས་སྨྲས་པ་དང་། དེ་དག་

གིས་ལགས་ཏེ་དེ་བཞིན་བགྱིའོ་ཞེས་སྨྲས་ནས་དེ་དག་སློབ་པ་ལ་ཞུགས་པ་དང་། ཇི་ཙམ་ན་བྲམ་ཟེ་དང་ཁྱིམ་བདག་དག་ལྷགས་ནས་དེ་དག་གིས་དེ་དག་མཐོང་སྟེ། བཟོ་བོ་འདི་དག་ཐམས་ཅད་རབ་ཏུ་བྱུང་ན་བདག་གི་ལས་སུས་བྱ་ཞེས་འཛེར་ཏོ། །དེ་ལྟ་བུར་གྱུར་པ་དགེ་སློང་དག་གིས་

བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་དགོངས་པ་དེ་དང་འདྲ་བའི་སྣོད་འཆང་ན་ཉེས་པའི་དམིགས་ཡིན་ཏེ། དེ་ལྟ་བས་ན་དེ་དང་འདྲ་བའི་རྒྱུད་ལས་དེ་དང་འདྲ་བའི་ཆ་སྤྱད་མི་འཆང་བར་དགོངས་ནས། དགེ་སློང་རྣམས་ལ་བཀའ་སྩལ་

པ། དགེ་སློང་དག་བྲམ་ཟེ་དེ་དག་དང་ཁྱིམ་བདག་དག་འཕྱ་བ་ནི་གནས་ཡིན་ནོ། །དེ་ལྟ་བས་ན་དགེ་སློང་དག་དེ་དང་འདྲ་བ་ལས་དེ་དང་འདྲ་བའི་རྒྱུད་ཀྱི་ཆ་སྤྱད་མ་འཆང་ཤིག །དགེ་སློང་དག་གིས་དེ་དང་འདྲ་བའི་ཆ་སྤྱད་འཆང་ན་འདས་པ་

དང་བཅས་པར་འགྱུར་རོ། །བཅོམ་ལྡན་འདས་ཀྱིས་དེ་དང་འདྲ་བ་ལས་དེ་དང་འདྲ་བའི་ཆ་སྤྱད་མ་འཆང་ཤིག་ཅེས་གསུངས་པ་དང་། ཅི་ཙམ་ན་སྨན་པ་གཞན་ཞིག་རབ་ཏུ་བྱུང་ནས་ལྗོངས་རྒྱུ་ཞིང་མཉན་དུ་ཡོད་པར་ཕྱིན་པ་དང་། དེ་ལ་དགེ་སློང་

དག་གིས་ཚེ་དང་ལྡན་པ་དགེ་སློང་ནད་པ་འདི་ལ་སྨན་དཔྱད་བྱོས་ཤིག་ཅེས་སྨྲས་པ་དང་། དེས་ཚེ་དང་ལྡན་པ་བཅོམ་ལྡན་འདས་ཀྱིས་མ་གནང་སྟེ། དེ་འདྲ་བ་ལས་དེ་འདྲ་བ་སྤྱད་མ་འཆང་ཤིག་ཅེས་བྱུང་ན་དེ་ལ་སྨན་དཔྱད་ཅིས་བྱ་ཞེས་ཟེར་རོ། །དེ་ལྟར་གྱུར་པ་དགེ་སློང་དག་གིས་བཅོམ་

ལྡན་འདས་ལ་གསོལ་ནས་བཅོམ་ལྡན་འདས་ཀྱིས་དེ་ལྟ་བས་ན་གནང་བ་ནི་སྨན་པ་རབ་ཏུ་བྱུང་ན་གཏར་དཔྱད་ཀྱི་སྤྱད་ཆོངས་ཤིག །སྔོན་ཡི་གེ་པས་ནི་རམ་ཕྱིས་ཆོངས་ཤིག །འདྲེག་མཁན་རབ་ཏུ་བྱུང་ན་ནི་སེན་མོ་གཅད་པ་ཆོངས་ཤིག་ཅེས་བཀའ་སྩལ་ཏོ།། །།

Vol. 11 · folio 88a

འདུལ་བ་ཕྲན་ཚེགས་ཀྱི་གཞི། བམ་པོ་སུམ་བཅུ་རྩ་ལྔ་པ། གླེང་གཞི་མཉན་དུ་ཡོད་པ་ན་སྟེ། ནམ་བཅོམ་ལྡན་འདས་ཀྱིས་རྫུ་འཕྲུལ་ཆེན་པོ་བསྟན་ཏེ། མུ་སྟེགས་ཅན་རྣམས་ནི་སྨ་ཕབ། ལྷ་དང་མི་རྣམས་ནི་དགའ་བར་མཛད། སྐྱེ་བོ་མང་པོ་དག་གི་སེམས་མགུ་བར་མཛད་

པ་དེའི་ཚེ་ན་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པའི་ཤིན་ཏུ་རྙེད་པ་དང་བཀུར་སྟི་རབ་ཏུ་བྱུང་སྟེ། དེ་ནས་བཅོམ་ལྡན་འདས་ཀྱིས་རྙེད་པ་དང་། བཀུར་སྟི་བྱུང་བ་གཅད་པར་དགོངས་ནས་སུམ་བཅུ་རྩ་གསུམ་གྱི་ལྷའི་གནས་སུ་གཤེགས་ཏེ། ལ་བ་རྡོ་དཀར་ལས་ཤིང་པ་རི་ཛཱ་ཏ་ཀ་

དང་། ཀོ་བི་ད་ར་ཀ་དང་། ཤིན་ཏུ་མི་རིང་བ་ཞིག་ཏུ་དབྱར་ཚུལ་དུ་ཞུགས་སོ། །དེ་ནས་བཅོམ་ལྡན་འདས་ཀྱིས་ཡུམ་སྐྱེད་མ་དང་གཞན་ཡང་སུམ་བཅུ་རྩ་གསུམ་གྱི་གནས་ཀྱི་ལྷ་རྣམས་ལ་ཆོས་འཆད་དོ། །དེའི་ཚེ་ན་མཽད་གལ་ཡ་ན་ཆེན་པོ་མཉན་དུ་ཡོད་པའི་ཛེ་ཏའི་ཚལ་མགོན་མེད་

ཟས་སྦྱིན་གྱི་ཀུན་དགའ་ར་བར་དབྱར་ཚུལ་དུ་ཞུགས་སོ། །དེ་ནས་འཁོར་བཞི་ཚེ་དང་ལྡན་པ་མཽད་གལ་ཡ་ན་ཆེན་པོ་གང་ན་བ་དེར་དོང་སྟེ་ཕྱིན་པ་དང་། ཚེ་དང་ལྡན་པ་མཽད་གལ་ཡ་ན་ཆེན་པོའི་རྐང་པ་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་འཁོར་

བཞི་པོ་རྣམས་ལ་ཚེ་དང་ལྡན་པ་མཽད་གལ་ཡ་ན་ཆེན་པོས་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་བསྐུལ། ཡང་དག་པར་གཟེངས་བསྟོད། ཡང་དག་པར་དགའ་བར་བྱས་སོ། །རྣམ་གྲངས་དུ་མའི་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་བསྐུལ།

ཡང་དག་པར་གཟེངས་བསྟོད། ཡང་དག་པར་དགའ་བར་བྱས་ནས་ཅང་མི་ཟེར་བ་དང་། དེ་ནས་འཁོར་བཞི་པོ་རྣམས་སྟན་ལས་ལངས་ནས་བླ་གོས་ཕྲག་པ་ལ་གཟར་ཏེ། ཚེ་དང་ལྡན་པ་མཽད་གལ་ཡ་ན་ཆེན་པོ་གང་ན་བ་དེར་ཐལ་མོ་སྦྱར་ཏེ་ཕྱག་འཚལ་ནས། ཚེ་དང་ལྡན་པ་མཽད་གལ་ཡ་

ན་ཆེན་པོ་ལ་བཙུན་པ་མཽད་གལ་ཡ་ན་ཆེན་པོ་བཅོམ་ལྡན་འདས་ད་ལྟར་གང་དུ་དབྱར་ཚུལ་དུ་ཞུགས་པ་གསན་ཏམ་ཞེས་སྨྲས་པ་དང་། ཀྱེ་བཅོམ་ལྡན་འདས་ནི་སུམ་བཅུ་རྩ་གསུམ་གྱི་གནས་ལ་བ་རྡོ་དཀར་ལས་ཤིང་པ་རི་ཛཱ་ཏ་ཀ་དང་། ཀོ་བི་ད་ར་ཀ་དང་ཤིན་ཏུ་མི་རིང་བ་ཞིག་ཏུ་དབྱར་

Vol. 11 · folio 88b

ཚུལ་དུ་ཞུགས་ཏེ་ཡུམ་སྐྱེད་མ་དང་གཞན་ཡང་སུམ་བཅུ་རྩ་གསུམ་གྱི་ལྷ་རྣམས་ལ་ཆོས་འཆད་པར་བདག་གིས་ཐོས་སོ་ཞེས་སྨྲས་པ་དང་། དེ་ནས་འཁོར་བཞི་པོ་རྣམས་ཀྱིས་ཚེ་དང་ལྡན་པ་མཽད་གལ་ཡ་ན་ཆེན་པོས་བཤད་པ་ལ་མངོན་པར་དགའ་ཞིང་རྗེས་སུ་ཡི་རངས་ནས། ཚེ་དང་ལྡན་པ་མཽད་

གལ་ཡ་ན་ཆེན་པོའི་རྐང་པ་ལ་མགོ་བོས་ཕྱག་འཚལ་ནས་སྟན་ལས་ལངས་ཏེ་དོང་ངོ་། །དེ་ནས་འཁོར་བཞི་པོ་རྣམས་ཟླ་བ་གསུམ་འདས་པ་དང་། ཚེ་དང་ལྡན་པ་མཽད་གལ་ཡ་ན་ཆེན་པོ་གང་ན་བ་དེར་དོང་སྟེ་ཕྱིན་པ་དང་། ཚེ་དང་ལྡན་པ་མཽད་གལ་ཡ་ན་ཆེན་པོའི་རྐང་པ་ལ་མགོ་བོས་ཕྱག་

འཚལ་ཏེ་ཕྱོགས་གཅིག་ཏུ་འཁོད་དེ། ཕྱོགས་གཅིག་ཏུ་འཁོད་ནས་འཁོར་བཞི་པོ་རྣམས་ལ་ཚེ་དང་ལྡན་པ་མཽད་གལ་ཡ་ན་ཆེན་པོས་ཆོས་ཀྱི་གཏམ་ཡང་དག་པར་བསྟན། ཡང་དག་པར་བསྐུལ། ཡང་དག་པར་གཟེང་བསྟོད། ཡང་དག་པར་དགའ་བར་བྱས་སོ། །རྣམ་གྲངས་

དུ་མའི་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་བསྐུལ། ཡང་དག་པར་གཟེངས་བསྟོད། ཡང་དག་པར་དགའ་བར་བྱས་ཏེ་ཅང་མི་ཟེར་བར་འདུག་པ་དང་། དེ་ནས་འཁོར་བཞི་པོ་དག་སྟན་ལས་ལངས་ཏེ་བླ་གོས་ཕྲག་པ་ལ་གཟར་ནས། ཚེ་དང་ལྡན་པ་མཽད་

གལ་ཡ་ན་ཆེན་པོ་ག་ལ་བ་དེར་ཐལ་མོ་སྦྱར་ཏེ་ཕྱག་འཚལ་ནས། ཚེ་དང་ལྡན་པ་མཽད་གལ་ཡ་ན་ཆེན་པོ་ལ་འདི་སྐད་ཅེས་སྨྲས་སོ། །འདི་ལྟར་བཙུན་པ་ཚེ་དང་ལྡན་པ་མཽད་གལ་ཡ་ན་ཆེན་པོས་མཁྱེན་པར་མཛད་དུ་གསོལ། བདག་ཅག་གིས་བཅོམ་ལྡན་འདས་མ་མཐོང་ནས་རིང་ཞིག་

ལོན་ལགས་ཏེ། བཅོམ་ལྡན་འདས་ལ་ལྟ་འཚལ་བས་བདག་ཅག་ཤིན་ཏུ་སྐོམ་སྟེ། བཅོམ་ལྡན་འདས་ལ་བལྟ་བར་འཚལ་གྱིས། དེ་སྟེ་བཙུན་པ་མཽད་གལ་ཡ་ན་ཆེན་པོས་རིགས་ཤིང་ལེགས་ན་ནི་བཙུན་པ་མཽད་གལ་ཡ་ན་ཆེན་པོས་བཅོམ་ལྡན་འདས་གང་ན་བ་དེར་བཞུད་ལ་དྲུང་དུ་

ཕྱིན་པ་དང་། བདག་ཅག་གི་ཚིག་གིས་བཅོམ་ལྡན་འདས་ཀྱི་ཞབས་ལ་ཕྱག་བགྱིས་ཏེ་གནོད་པ་ཆུང་ངམ། གནོད་པར་མ་གྱུར་ཏམ། མྱུར་དུ་བཞེངས་སམ། འཚོའམ། མཐུ་དང་ལྡན་ནམ། བདེའམ། སྙུན་ཆུང་ངམ། བདེ་བར་བཞུགས་སམ། བདེ་བར་གྱུར་ཏམ་ཞེས་ཞུས་ལ་འདི་སྐད་

Vol. 11 · folio 89a

ཅེས་ཀྱང་གསོལ་ཅིག །བཙུན་པ་འཛམ་བུའི་གླིང་གི་འཁོར་བཞི་པོ་དག་བཅོམ་ལྡན་འདས་ལ་བལྟ་བར་འཚལ་ན་བཙུན་པ་སུམ་བཅུ་རྩ་གསུམ་གྱི་ལྷའི་གནས་སུ་འཛེག་ཅིང་བཅོམ་ལྡན་འདས་ཀྱི་དྲུང་དུ་བཅོམ་ལྡན་འདས་ལ་བལྟ་བ་དང་བསྙེན་བཀུར་བའི་ཕྱིར་མཆིར་འཛམ་

བུའི་གླིང་གི་མི་རྣམས་ལ་དེ་འདྲ་བའི་རྫུ་འཕྲུལ་དང་མཐུ་མ་མཆིས་སོ། །གང་སུམ་བཅུ་རྩ་གསུམ་གྱི་གནས་ཀྱི་ལྷ་དེ་རྣམས་ནི་འཛམ་བུའི་གླིང་དུ་བབས་ཏེ། བཅོམ་ལྡན་འདས་ཀྱི་དྲུང་དུ་བཅོམ་ལྡན་འདས་ལ་བལྟ་བ་དང་། བསྙེན་བཀུར་བགྱིད་དུ་མཆི་བར་ནི་སུམ་བཅུ་རྩ་གསུམ་གྱི་ལྷ་ལ་

རྫུ་འཕྲུལ་དང་། མཐུ་མཆིས་ན། བཅོམ་ལྡན་འདས་སུམ་བཅུ་རྩ་གསུམ་གྱི་ལྷའི་གནས་ནས་འཛམ་བུའི་གླིང་དུ་གཤེགས་པར་ཐུགས་རྗེར་དགོངས་ན་ལེགས་སོ་ཞེས་གསུང་ཤིག་ཅེས་སྨྲས་པ་དང་། ཚེ་དང་ལྡན་པ་མཽད་གལ་ཡ་ན་ཆེན་པོས་འཁོར་བཞི་པོ་རྣམས་ལ་ཅང་མི་སྨྲ་བར་

གནང་ངོ་། །དེ་ནས་འཁོར་བཞི་པོ་དག་ཚེ་དང་ལྡན་པ་མཽད་གལ་ཡ་ན་ཆེན་པོས་ཅང་མི་སྨྲ་བས་གནང་བར་རིག་སྟེ། ཚེ་དང་ལྡན་པ་མཽད་གལ་ཡ་ན་ཆེན་པོའི་རྐང་པ་ལ་མགོ་བོས་ཕྱག་འཚལ་ནས་སྟན་ལས་ལངས་ཏེ་དོང་ངོ་། །དེ་ནས་ཚེ་དང་ལྡན་པ་མཽད་གལ་ཡ་ན་ཆེན་པོས་འཁོར་བཞི་པོ་དག་

དོང་ནས་རིང་པོ་མ་ལོན་པར་རིག་པ་དང་དེ་འདྲ་བའི་ཏིང་ངེ་འཛིན་ལ་མཉམ་པར་གཞག་གོ། །ཇི་ལྟར་སེམས་མཉམ་པར་གཞག་པ་ན་འདི་ལྟ་སྟེ། སྟོབས་དང་ལྡན་པའི་སྐྱེས་བུས་དཔུང་པ་བསྐུམ་པ་ལས་བརྐྱང་བའམ། བརྐྱང་བ་ལས་བསྐུམ་པ་ཙམ་དུ་དེ་ལྟར་དེ་བཞིན་ཚེ་དང་ལྡན་པ་མཽད་

གལ་ཡ་ན་ཆེན་པོ་མཉན་དུ་ཡོད་པ་ནས་མི་སྣང་བར་གྱུར་ཏེ། སུམ་བཅུ་རྩ་གསུམ་གྱི་ལྷའི་གནས་ལ་བ་རྡོ་དཀར་ལས་ཤིང་པ་རི་ཛཱ་ཏ་ཀ་དང་། ཀོ་བི་ད་ར་ཀ་དང་། ཤིན་ཏུ་མི་རིང་བ་ཞིག་ཏུ་དེའི་དུས་ན་བཅོམ་ལྡན་འདས་ལྷའི་འཁོར་བརྒྱ་སྟོང་དུ་མའི་མདུན་ན་བཞུགས་ཤིང་ཆོས་འཆད་པ་ཚེ་

དང་ལྡན་པ་མཽད་གལ་ཡ་ན་ཆེན་པོས་མཐོང་ངོ་། །བཅོམ་ལྡན་འདས་ལྷའི་འཁོར་བརྒྱ་སྟོང་དུ་མའི་མདུན་ན་བཞུགས་ཤིང་ཆོས་འཆད་པ་མཐོང་ནས་འཛུམ་པ་བྱས་ཏེ། བཅོམ་ལྡན་འདས་འདི་ན་ཡང་ལྷ་མང་པོ་དང་བཞུགས་པ་ནི་འདི་ལྟ་སྟེ། འཛམ་བུའི་གླིང་གི་འཁོར་བཞི་པོ་

Vol. 11 · folio 89b

བཞིན་ནོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་ཡ་ན་ཆེན་པོའི་བསམ་པ་མཁྱེན་ནས། ཚེ་དང་ལྡན་པ་མཽད་གལ་ཡ་ན་ཆེན་པོ་ལ་འདི་སྐད་ཅེས་བཀའ་སྩལ་ཏོ། །མཽད་གལ་ཡ་ན་ཆེན་པོ་རང་གིས་འདུ་བྱེད་པ་ནི་མ་ཡིན་མོད་ཀྱི། ནམ་གྱི་ཚེ་ངས་འོང་བར་བསམས་པ་དེའི་ཚེ་

ན་ནི་འོང་ངོ་། །ནམ་གྱི་ཚེ་འགྲོ་བར་བསམས་པ་དེའི་ཚེ་ན་འགྲོ་སྟེ། ངའི་སེམས་ལ་སེམས་ཀྱིས་ཤེས་ནས་འོང་བ་དང་འགྲོ་བའོ། །དེ་ནས་ཚེ་དང་ལྡན་པ་མཽད་གལ་ཡ་ན་ཆེན་པོ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་

ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཚེ་དང་ལྡན་པ་མཽད་གལ་ཡ་ན་ཆེན་པོ་ལྷའི་འཁོར་ཐམས་ཅད་དུ་བལྟས་ནས་བཅོམ་ལྡན་འདས་ལ་བཙུན་པ་ལྷའི་འཁོར་འདི་དག་ནི་རྣམ་པ་སྣ་ཚོགས་འདུས་ཤིང་མཆིས་སོ། །དེའི་འཁོར་འདུས་ཤིང་མཆིས་པ་འདི་དག་ནི་གང་སངས་

རྒྱས་ཤེས་ཏེ་དད་པ་དང་ལྡན་པས་ལུས་དང་བྲལ་ནས་འདིར་སྐྱེས་པ་དག་མཆིས་སོ། །དེའི་འཁོར་འདུས་ཤིང་མཆིས་པ་འདི་དག་ནི་གང་ཆོས་དང་། དགེ་འདུན་དང་། འཕགས་པ་བཞེད་པའི་ཚུལ་ཁྲིམས་དང་ལྡན་པས་ལུས་དང་བྲལ་ནས་འདིར་སྐྱེས་སོ་ཞེས་གསོལ་པ་དང་། དེ་ལྟར་དེ་

བཞིན་ཏེ་མཽད་གལ་ཡ་ན་ཆེན་པོ་རྣམ་པ་སྣ་ཚོགས་ཀྱི་ལྷའི་འཁོར་འདི་དག་འདུས་ཤིང་འཁོད་དོ། །ལྷའི་འཁོར་འདི་དག་ལས་གང་སངས་རྒྱས་ལ་ཤེས་ཤིང་དད་པ་དང་ལྡན་པས་ན་ལུས་དང་བྲལ་ནས་འདིར་སྐྱེས་པ་ཡོད་དོ། །ཆོས་དང་། དགེ་འདུན་དང་། འཕགས་པ་བཞེད་པའི་ཚུལ་

ཁྲིམས་དང་ལྡན་པས་ལུས་དང་བྲལ་ནས་འདིར་སྐྱེས་པ་ཡང་ཡོད་དོ། །དེ་ནས་བརྒྱ་བྱིན་ལྷའི་དབང་པོ་བཅོམ་ལྡན་འདས་དང་། ཚེ་དང་ལྡན་པ་མཽད་གལ་ཡ་ན་ཆེན་པོས་བཤད་པའི་རྗེས་སུ་བསྔགས་ནས་ཚེ་དང་ལྡན་པ་མཽད་གལ་ཡ་ན་ཆེན་པོ་ལ་འདི་སྐད་ཅེས་སྨྲས་སོ། །དེ་ལྟར་དེ་བཞིན་

ནོ། །བཙུན་པ་མཽད་གལ་ཡ་ན་ཆེན་པོ་དེ་ལྟར་དེ་བཞིན་ཏེ་རྣམ་པ་སྣ་ཚོགས་ཀྱི་ལྷའི་འཁོར་འདུས་ཤིང་འཁོད་དོ། །ལྷའི་འཁོར་འདི་དག་ལས་གང་སངས་རྒྱས་ཤེས་ཤིང་དད་པ་དང་ལྡན་པས་ལུས་དང་བྲལ་བས་འདིར་སྐྱེས་པ་ཡང་མཆིས་སོ། །ཆོས་དང་། དགེ་འདུན་དང་། འཕགས་

Vol. 11 · folio 90a

པ་བཞེད་པའི་ཚུལ་ཁྲིམས་དང་ལྡན་པས་ལུས་དང་བྲལ་ནས་འདིར་སྐྱེས་པ་ཡང་མཆིས་སོ། །དེ་ནས་ལྷའི་བུ་གཞན་ཞིག་གིས་བཅོམ་ལྡན་འདས་དང་། ཚེ་དང་ལྡན་པ་མཽད་གལ་ཡ་ན་ཆེན་པོ་དང་། བརྒྱ་བྱིན་ལྷའི་དབང་པོས་བཤད་པ་ལ་རྗེས་སུ་བསྔགས་ནས་ཚེ་

དང་ལྡན་པ་མཽད་གལ་ཡ་ན་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་མཽད་གལ་ཡ་ན་ཆེན་པོ་དེ་ལྟར་དེ་བཞིན་ནོ། །དེ་ལྟར་དེ་བཞིན་ཏེ་རྣམ་པ་སྣ་ཚོགས་ཀྱི་ལྷའི་འཁོར་འདུས་ཤིང་འཁོད་དོ། །ལྷའི་འཁོར་འདི་དག་ལས་གང་སངས་རྒྱས་ཤེས་ཤིང་དད་པ་དང་ལྡན་པས་ལུས་དང་

བྲལ་ནས་འདིར་སྐྱེས་པ་ཡང་མཆིས་སོ། །ཆོས་དང་། དགེ་འདུན་དང་། འཕགས་པ་བཞེད་པའི་ཚུལ་ཁྲིམས་དང་ལྡན་པས་ལུས་དང་བྲལ་ནས་འདིར་སྐྱེས་པ་ཡང་མཆིས་སོ། །དེ་ནས་དེའི་ཚེ་ལྷ་གཅིག་ཅིག་སྟན་ལས་ལངས་ཏེ་བླ་གོས་ཕྲག་པ་གཅིག་ལ་བྱས་ནས་བཅོམ་ལྡན་འདས་ག་

ལ་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས། བཅོམ་ལྡན་འདས་ལ་བཙུན་པ་བདག་ནི་སངས་རྒྱས་ལ་ཤེས་ཤིང་དད་པ་དང་ལྡན་པས་ལུས་དང་བྲལ་ཏེ་འདིར་སྐྱེས་སོ་ཞེས་གསོལ་པ་དང་གཞན་ཞིག་གིས་ཀྱང་འདི་སྐད་དུ་སྨྲས་སོ། །བདག་ནི་ཆོས་ལ། བདག་ནི་དགེ་འདུན་ལ།

བདག་ནི་འཕགས་པ་བཞེད་པའི་ཚུལ་ཁྲིམས་དང་ལྡན་པས་ལུས་དང་བྲལ་ནས་འདིར་སྐྱེས་སོ། །དེར་ལྷ་བརྒྱ་སྟོང་དུ་མས་བཅོམ་ལྡན་འདས་ཀྱི་སྤྱན་སྔར་སོ་སོར་རྒྱུན་དུ་ཞུགས་པའི་ལུང་བསྟན་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་ཚེ་དང་ལྡན་པ་མཽད་གལ་ཡ་ན་ཆེན་པོས་ལྷའི་འཁོར་

རྣམས་ལས་དབེན་པར་ཤེས་ནས་སྟན་ལས་ལངས་ཏེ་བླ་གོས་ཕྲག་པ་ལ་གཟར་ནས་བཅོམ་ལྡན་འདས་གང་ན་བ་དེར་སོང་ནས་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འཛམ་བུའི་གླིང་ནས་འཁོར་བཞི་པོ་རྣམས་བཅོམ་ལྡན་འདས་ཀྱི་ཞབས་

ལ་མགོ་བོས་ཕྱག་འཚལ་ནས་གནོད་པ་ཆུང་ངམ། གནོད་པར་མ་གྱུར་ཏམ། མྱུར་དུ་བཞེངས་སམ། འཚོའམ། མཐུ་དང་ལྡན་ནམ། བདེའམ། སྙུན་ཆུང་ངམ། བདེ་བར་བཞུགས་སམ། བདེ་བར་གྱུར་ཏམ་ཞེས་སྙུན་གསོལ་ལོ། །མཽད་གལ་ཡ་ན་ཁྱོད་དང་། འཛམ་

Vol. 11 · folio 90b

བུའི་གླིང་གི་འཁོར་བཞི་པོ་དག་ཀྱང་བདེ་བར་གྱུར་ཅིག །བཙུན་པ་འཛམ་བུའི་གླིང་གི་འཁོར་བཞི་པོ་དག་བཅོམ་ལྡན་འདས་ལ་བལྟ་བར་འཚལ་ཏེ། འདི་སྐད་གསོལ་ལོ། །བཙུན་པ་འཛམ་བུའི་གླིང་གི་མི་རྣམས་སུམ་བཅུ་རྩ་གསུམ་གྱི་ལྷའི་གནས་སུ་འཛེག་ཅིང་བཅོམ་ལྡན་འདས་ཀྱི་དྲུང་དུ་

བཅོམ་ལྡན་འདས་ལ་བལྟ་བ་དང་བསྙེན་བཀུར་བའི་ཕྱིར་མཆི་བར་འགྱུར་བ་དེ་ལྟ་བུའི་རྫུ་འཕྲུལ་དང་མཐུ་འཛམ་བུའི་གླིང་གི་མི་རྣམས་ལ་མ་མཆིས་ཀྱི་བཙུན་པ་སུམ་བཅུ་རྩ་གསུམ་གྱི་ལྷ་དེ་རྣམས་ནི་འཛམ་བུའི་གླིང་དུ་འབབ་ཅིང་། བཅོམ་ལྡན་འདས་ཀྱི་དྲུང་དུ་བཅོམ་ལྡན་འདས་ལ་བལྟ་བ་དང་

བསྙེན་བཀུར་བར་མཆི་བ་དེ་ལྟ་བུའི་རྫུ་འཕྲུལ་དང་མཐུ་སུམ་བཅུ་རྩ་གསུམ་གྱི་ལྷ་རྣམས་ལ་མཆི་ན། བཅོམ་ལྡན་འདས་ཐུགས་རྗེས་དགོངས་ཏེ་སུམ་བཅུ་རྩ་གསུམ་གྱི་ལྷའི་གནས་ནས་འཛམ་བུའི་གླིང་དུ་གཤེགས་ན་ལེགས་སོ་ཞེས་གསོལ་ལོ། །དེ་བས་ན་མཽད་གལ་ཡ་ན་ཁྱོད་འཛམ་བུའི་

གླིང་དུ་སོང་ལ་འཁོར་བཞི་པོ་རྣམས་ལ་བཅོམ་ལྡན་འདས་ནི་དེང་ནས་ཞག་བདུན་ན་སུམ་བཅུ་རྩ་གསུམ་གྱི་ལྷའི་གནས་ནས་འཛམ་བུའི་གླིང་གི་གྲོང་ཁྱེར་སང་ཀཱ་ཤིའི་ཨ་པ་ཛ་རིའི་ནགས་ཤིང་ཨུ་དུམ་བཱ་རའི་དྲུང་དུ་གཤེགས་སོ་ཞེས་བསྒོ་ཤིག །དེ་ནས་ཚེ་དང་ལྡན་པ་མཽད་གལ་ཡ་ན་ཆེན་པོས་

བཅོམ་ལྡན་འདས་ལས་མཉན་ཏེ་ཞབས་ལ་མགོ་བོས་ཕྱག་འཚལ་ནས་དེ་འདྲ་བའི་ཏིང་ངེ་འཛིན་ལ་མཉམ་པར་བཞག་གོ། །ཇི་ལྟར་སེམས་མཉམ་པར་བཞག་པ་ན་འདི་ལྟ་སྟེ། སྟོབས་དང་ལྡན་པའི་སྐྱེས་བུས་དཔུང་པ་བསྐུམ་པ་ལས་བརྐྱང་བའམ། བརྐྱང་བ་ལས་བསྐུམ་པ་བཞིན་ཚེ་དང་ལྡན་

པ་མཽད་གལ་ཡ་ན་ཆེན་པོ་སུམ་བཅུ་རྩ་གསུམ་གྱི་ལྷའི་གནས་ནས་མི་སྣང་བར་གྱུར་ཏེ་འཛམ་བུའི་གླིང་དུ་ཕྱིན་ཏོ། །དེ་ནས་ཚེ་དང་ལྡན་པ་མཽད་གལ་ཡ་ན་ཆེན་པོ་འཛམ་བུའི་གླིང་དུ་འོངས་ནས་འཁོར་བཞི་པོ་དག་ལ་ཀྱེ་བཅོམ་ལྡན་འདས་ནི་དེང་ནས་ཞག་བདུན་ན་སུམ་བཅུ་རྩ་གསུམ་གྱི་ལྷའི་གནས་ནས་

འཛམ་བུའི་གླིང་གི་གྲོང་ཁྱེར་སང་ཀཱ་ཤིའི་ཨ་པ་ཛ་རིའི་ནགས་ཤིང་ཨུ་དུམ་བཱ་རའི་དྲུང་དུ་གཤེགས་སོ་ཞེས་བསྒོའོ། །དེ་ནས་འཁོར་བཞི་པོ་དག་ཞག་བདུན་སོང་བ་ན་དྲི་དང་བྱུག་པ་དག་ཁྱེར་ཏེ་གྲོང་ཁྱེར་སང་ཀཱ་ཤེར་དོང་ངོ་། །དེ་ནས་སང་ཀཱ་ཤེ་ན་གནས་པའི་སྐྱེ་བོ་མང་པོ་དག་གིས་གྲོང་ཁྱེར་སང་

Vol. 11 · folio 91a

ཀཱ་ཤེ་རྡོ་བ་དང་གྱོ་མོ་དང་བོང་བ་དག་མེད་པར་བྱས་ཏེ་ཙན་དན་གྱི་ཆུས་ཆག་ཆག་བཏབ་ནས་བདུག་པ་ཞིམ་པོའི་པོག་པོར་དཔྱངས། རྒྱལ་མཚན་དང་། ལྷའི་འཕན་དག་བསྒྲེང་། དར་གྱི་ལྡ་ལྡི་རྣམས་ནི་བྲེས་ཏེ། མེ་ཏོག་སྣ་ཚོགས་ཀྱིས་གཏོར་བས། ཡིད་དགའ་བར་འགྱུར་བ་

ནི་ལྷའི་དགའ་བའི་ཚལ་དུ་སྐྱེད་མོས་ཚལ་བཞིན་ཏེ། སའི་ཕྱོགས་ཡངས་ཤིང་བླ་གབ་མེད་པར་གདན་བཏིང་ཞིང་བཤམས་སོ། །དེ་ནས་བཅོམ་ལྡན་འདས་ཀྱིས་སུམ་བཅུ་རྩ་གསུམ་གྱི་ལྷ་རྣམས་ལ་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་བསྐུལ། ཡང་དག་པར་གཟེངས་

བསྟོད། ཡང་དག་པར་དགའ་བར་བྱས་ཏེ་སུམ་བཅུ་རྩ་གསུམ་གྱི་ལྷའི་གནས་ནས་སུམ་བཅུ་རྩ་གསུམ་གྱི་ལྷ་རྣམས་དང་ལྷན་ཅིག་ཏུ་མི་སྣང་བར་གྱུར་ཏེ་མཚེ་མར་གཤེགས་སོ། །དེ་ནས་བཅོམ་ལྡན་འདས་ཀྱིས་མཚེ་མའི་ལྷ་རྣམས་ལ་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་

པར་བསྐུལ། ཡང་དག་པར་གཟེངས་བསྟོད། ཡང་དག་པར་དགའ་བར་བྱས་ནས་སུམ་བཅུ་རྩ་གསུམ་གྱི་ལྷ་རྣམས་དང་། མཚེ་མའི་ལྷ་རྣམས་དང་ལྷན་ཅིག་མི་སྣང་བར་གྱུར་ཏེ་དེ་བཞིན་དུ་དགའ་ལྡན་དུ་གཤེགས་སོ། །དེ་བཞིན་དུ་འཕྲུལ་དགའ་དང་། གཞན་འཕྲུལ་དབང་བྱེད་

དང་། ཚངས་རིས་དང་། ཚངས་ལྷ་ཉེ་ཕན་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། མ་ལུས་དགེ་དང་། སྤྲིན་མེད་དང་། བསོད་ནམས་འཕེལ་དང་། འབྲས་བུ་ཆེ་དང་། མི་ཆེ་བ་དང་། མི་དྲོས་དང་། གྱ་ནོམ་སྣང་

དང་། ཤིན་ཏུ་མཐོང་དང་། འོག་མིན་དུ་འདོད་པ་ན་སྤྱོད་པ་དང་། གཟུགས་ཡོད་པ་ན་སྤྱོད་པའི་ལྷ་རྣམས་དང་ཐབས་ཅིག་ཏུ་གཤེགས་སོ། །དེ་ནས་བཅོམ་ལྡན་འདས་འོག་མིན་གནམ་གྱི་ལྷ་རྣམས་ལ་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་བསྐུལ། ཡང་དག་པར་གཟེངས་

བསྟོད། ཡང་དག་པར་དགའ་བར་བྱས་ནས་འོག་མིན་གནས་ནས་མི་སྣང་བར་གྱུར་ཏེ། གྱ་ནོམ་སྣང་གི་ལྷའི་གནས་སུ་གཤེགས་སོ། །ལྷ་རྣམས་ལ་སླད་རིམ་གྱིས་སུམ་བཅུ་རྩ་གསུམ་གྱི་ལྷའི་རིས་ཀྱི་བར་དུ་འདོད་པ་ན་སྤྱོད་པ་དང་། གཟུགས་ཡོད་པ་ན་སྤྱོད་པའི་ལྷ་རྣམས་དང་ཐབས་ཅིག་

Vol. 11 · folio 91b

ཏུ་གཤེགས་སོ། །དེ་ནས་བརྒྱ་བྱིན་ལྷའི་དབང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་འཛམ་བུའི་གླིང་དུ་གཤེགས་སམ། ཀཽ་ཤི་ཀ་འབབ་པོ། །ཅི་རྫུ་འཕྲུལ་གྱིས་འབབ་བམ། འོན་ཏེ་ཞབས་ཀྱིས་གཤེགས། ཀཽ་ཤི་ཀ་རྐང་གིས་སོ། །དེ་ནས་བརྒྱ་བྱིན་

ལྷའི་དབང་པོས་ལྷའི་བུ་ལས་ཐམས་ཅད་དང་ལྡན་པ་ལ་བསྒོ་བ། ལས་ཐམས་ཅད་དང་ལྡན་པ་གསེར་དང་། བཻ་ཌཱུརྱ་དང་། ཤེལ་གྱི་སྐས་གསུམ་སྤྲུལ་ཅེས་སྨྲས་པ་དང་། ཀཽ་ཤི་ཀ་ཁྱེད་མཆོག་ཏུ་བཟང་ངོ་ཞེས་སྨྲས་ནས་ལྷའི་བུ་ལས་ཐམས་ཅད་དང་ལྡན་པས་བརྒྱ་བྱིན་ལྷའི་དབང་པོ་ལས་མཉན་ཏེ་གསེར་

དང་། བཻ་ཌཱུརྱ་དང་། ཤེལ་གྱི་སྐས་གསུམ་སྤྲུལ་ཏོ། །དེ་ནས་བཅོམ་ལྡན་འདས་ནི་བཻ་ཌཱུརྱའི་སྐས་ལ་གཤེགས། ཚངས་པ་འཁོར་གྱི་དབང་པོ་ནི་གཡས་ཕྱོགས་ནས་ནོར་བུའི་རྔ་ཡབ་བརྒྱ་སྟོང་ཐོགས་ཏེ་གཟུགས་ཡོད་པ་ན་སྤྱོད་པའི་ལྷ་དག་དང་ལྷན་ཅིག་ཏུ་གསེར་གྱི་སྐས་ལས་འབབ་བོ། །བརྒྱ་

བྱིན་ལྷའི་དབང་པོས་ནི་བཅོམ་ལྡན་འདས་ཀྱི་གཡོན་ཕྱོགས་ནས་རྩིབས་མ་བརྒྱ་པའི་གདུགས་ཐོགས་ཏེ་འདོད་པ་ན་སྤྱོད་པའི་ལྷ་དག་དང་ལྷན་ཅིག་ཏུ་ཤེལ་གྱི་སྐས་ལས་འབབ་བོ། །དེ་ནས་བཅོམ་ལྡན་འདས་ཀྱིས་འདི་ལྟར་གལ་ཏེ་རྐང་པས་འབབ་ན་ནི་མུ་སྟེགས་ཅན་དག་དགེ་སྦྱོང་གོའུ་ཏ་མས་སུམ་

བཅུ་རྩ་གསུམ་གྱི་ལྷའི་གནས་སུ་རྫུ་འཕྲུལ་གྱིས་སོང་ན་ཡིད་འཕྲོག་པའི་གཟུགས་སུ་མཐོང་བས་དེའི་རྫུ་འཕྲུལ་ཉམས་པར་གྱུར་ཏེ། འཛམ་བུའི་གླིང་དུ་རྐང་པས་བབས་སོ། །ཞེས་ཟེར་རོ། །དེ་སྟེ་རྫུ་འཕྲུལ་གྱིས་བབས་ན་ནི་ཐམས་ཅད་དང་ལྡན་པའི་སྐྱེས་བུའི་བྱེད་པའི་འབྲས་བུ་མེད་པར་འགྱུར་

ན། ཇི་ལྟ་ནས་ད་ཕྱེད་ནི་རྐང་པས་འབབ་བོ། །ཕྱེད་ནི་རྫུ་འཕྲུལ་གྱིས་འབབ་བོ་སྙམ་དུ་དགོངས་སོ། །དེ་ནས་བཅོམ་ལྡན་འདས་བར་བར་ནི་ཞབས་ཀྱིས། བར་བར་ནི་རྫུ་འཕྲུལ་གྱིས་སོ། །དཔག་ཚད་བཅུ་གཉིས་མན་ཆད་མིའི་དྲི་མ་མནམ་སྟེ་ལྷ་རྣམས་སྣོམ་པར་མི་བཟོད་དོ། །དེ་

ནས་བཅོམ་ལྡན་འདས་ཀྱིས་ཙན་དན་གོར་ཤིར་ཥའི་དྲིར་མངོན་དུ་སྤྲུལ་ཏེ་དྲི་དེ་མི་མནམ་པར་བྱས་སོ། །དེ་ནས་བཅོམ་ལྡན་འདས་ཀྱིས་དགོངས་པ། གལ་ཏེ་སྐྱེས་པས་ལྷའི་བུ་མོའམ་བུད་མེད་ཀྱིས་ལྷའི་བུ་མཐོང་ན། འདི་ལྟར་དེ་དག་གང་ཁྲག་དྲོན་པོར་སྐྱུགས་ཏེ་དུས་བྱེད་པར་ནི་གདོན་མི་ཟ་

Vol. 11 · folio 92a

བར་འགྱུར་གྱིས་ཅི་ནས་ངས་ཇི་ལྟར་སྐྱེས་པས་ལྷའི་བུ་མཐོང་ཞིང་བུད་མེད་ཀྱིས་ལྷའི་བུ་མོ་མཐོང་བར་འགྱུར་བ་དེ་ལྟ་བུར་རྫུ་འཕྲུལ་མངོན་དུ་འདུ་བྱ་བ་མངོན་དུ་བྱའོ། །དེ་ནས་བཅོམ་ལྡན་འདས་ཇི་ལྟར་སྐྱེས་པས་ནི་ལྷའི་བུ་མཐོང་ཞིང་བུད་མེད་ཀྱིས་ནི་ལྷའི་བུ་མོ་མཐོང་བར་འགྱུར་

བ་དེ་ལྟ་བུ་རྫུ་འཕྲུལ་འདུས་བྱས་པ་མངོན་དུ་འདུས་བྱས་སོ། །དེའི་དུས་ན་ཚེ་དང་ལྡན་པ་རབ་འབྱོར་ཤིང་གཞན་ཞིག་གི་དྲུང་ན་ཉིན་བར་སྤྱོད་པའི་ཕྱིར་འདུག་སྟེ། ཚེ་དང་ལྡན་པ་རབ་འབྱོར་གྱིས་བཅོམ་ལྡན་འདས་ལོངས་སྤྱོད་མཆོག་དང་སུམ་བཅུ་རྩ་གསུམ་གྱི་ལྷའི་གནས་ནས་འཛམ་བུའི་གླིང་དུ་བབས་

པ་མཐོང་ངོ་། །མཐོང་ནས་འདི་སྙམ་དུ་གྱུར་ཏོ། །ལྷ་འདི་དག་ནི་འདི་བཞིན་དུ་རྫུ་འཕྲུལ་ཆེ་བ་མཐུ་ཆེ་བ་ཡང་བཅོམ་ལྡན་འདས་བོར་ཏེ་རང་གི་གནས་སུ་དོང་ངོ་། །མི་འདི་དག་ཀྱང་ལོ་བརྒྱ་འདས་པ་དང་དུས་བྱེད། བཅོམ་ལྡན་འདས་ཀྱང་ཡོངས་སུ་མྱ་ངན་ལས་འདས་ཏེ་འདི་ལྟ་བུའི་

ལོངས་སྤྱོད་ཆེན་པོ་ཡང་ཐམས་ཅད་ཀྱི་ཐམས་ཅད་དུ་མེད་པར་འགྱུར་རོ། །དེ་ལ་བཅོམ་ལྡན་འདས་ཀྱིས་ལེགས་པར་གསུངས་པ་དེ་ནི་འདུས་བྱས་ཐམས་ཅད་མི་རྟག །མི་བརྟན། ཡིད་བརྟན་དུ་མི་རུང་། འགྱུར་བའི་ཆོས་ཅན་ཏེ་འདུས་བྱས་ཐམས་ཅད་ཀྱིས་ཆོག་གོ། །སྐྱོ་བར་རིགས་སོ། །མི་འདོད་

པའི་རིགས་སོ། །རྣམ་པར་གྲོལ་བར་བྱ་བ་ཤེས་ནས་ཉེ་བར་ལེན་པའི་ཕུང་པོ་ལྔ་ལ་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ཉིད་དུ་ཡིད་ལ་བྱེད་པ་ལ་ཞུགས་ཏེ། དེས་ཉེ་བར་ལེན་པའི་ཕུང་པོ་རྣམས་ལ་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་

མེད་པར་ཡིད་ལ་བྱས་པས་ན་མི་རྟག་པའི་རྣམ་པས་འདི་བཞིན་འཇིག་ཚོགས་སུ་ལྟ་བའི་རིའི་རྩེ་མོ་ཉི་ཤུ་གྱེན་དུ་བྱུང་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་དུ་བྱས་སོ། །དེ་ནས་བདེན་པ་མཐོང་ཞིང་ཤེས་ཏེ་དད་པ་དང་ལྡན་པས་མྱུར་དུ་སྐྱིལ་མོ་ཀྲུང་བཤིག་ནས་པུས་

མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ལ་ཕྱག་བྱས་སོ། །དེ་ནས་དགེ་སློང་མ་ཨུཏྤ་ལའི་ཁ་དོག་མས་འདི་ལྟར་བཅོམ་ལྡན་འདས་སུམ་བཅུ་རྩ་གསུམ་ལྷའི་གནས་ནས་འཛམ་བུའི་གླིང་དུ་བབས་ན་དེ་ལ་ཐབས་ཅི་ཞིག་གིས་བདག་གིས་བཅོམ་ལྡན་འདས་ལ་ཐོག་མར་ཕྱག་བྱ། དེ་སྟེ་

Vol. 11 · folio 92b

འདི་བཞིན་དུ་སོང་ན་ནི་དགེ་སྦྱོང་མ་མགོ་རེག་མའོ་ཞེས་ཟེར་ནས་ཆེ་ཞིང་ཆེ་བའི་ལྷ་དང་མིས་བཅོམ་ལྡན་འདས་བསྐོར་བས་ནང་དུ་འགྲོར་ཡང་མི་སྟེར་གྱིས་ཅི་ནས་བདག་ནི་རྫུ་འཕྲུལ་གྱིས་འགྲོའོ་སྙམ་དུ་བསམས་ཏེ། དེ་འཁོར་ལོས་སྒྱུར་བའི་རྒྱལ་པོའི་ཆ་ལུགས་སུ་བདག་ཉིད་མངོན་དུ་སྤྲུལ་ཏེ་རིན་པོ་

ཆེ་སྣ་བདུན་གྱིས་ཐོག་མར་དྲངས། བློན་པོ་སྟོབས་ཀྱི་མཆོག་ས་ཡ་ཕྲག་བདུན་བཅུ་རྩ་དགུས་ནི་བསྐོར། རྣམ་པ་སྣ་ཚོགས་ཀྱི་རྒྱན་གྱིས་བརྒྱན་པའི་བུ་སྟོང་གིས་ཀྱང་ཟླ་བ་ཁམ་པ་བཞིན་དུ་བསྐོར། མུ་སྟེགས་ཅན་དང་། བྲམ་ཟེ་དང་། ཕོངས་པ་དང་། དམན་པ་དང་། མིའི་མཆོག་སྟོང་

གིས་ནི་རྗེས་སུ་འབྲང་། རྩིབས་མ་བརྒྱ་པའི་གདུགས་སྤྱི་བོར་འཛིན། ཉི་མའི་འོད་ཟེར་སྟོང་ཤར་ཅིང་འཕྲོ་བ་དང་། ཟླ་བ་དང་། སྐར་མ་དང་། གཞལ་མེད་ཁང་མཛེས་པར་བཅས་པ་ཟིལ་གྱིས་གནོན་ཅིང་བཅོམ་ལྡན་འདས་ཀྱི་དྲུང་དུ་སོང་བ་དང་། འཁོར་དེ་དག་གིས་དགེ་སློང་མ་ཨུཏྤ་ལའི་

ཁ་དོག་མ་རྒྱང་མ་ནས་མཐོང་ངོ་། མཐོང་ནས་ཡ་མཚན་དུ་གྱུར་ཏེ་མིག་ཚུགས་ཀྱིས་ལྟ་ཞིང་རྟོག་པ་སྣ་ཚོགས་སུ་གྱུར་ཏོ། །ཁ་ཅིག་ནི་ཀྱེ་རྒྱལ་པོ་འདི་ལྟ་བུ་གང་ནས་འོངས་ཞེས་སྨྲ། ཁ་ཅིག་གིས་ནི་འདི་རྒྱལ་པོའི་སའི་སྟེང་ན་འདི་ལྟ་བུ་དམག་ཕུན་སུམ་ཚོགས་པ་ནི་ག་ལ་ཡོད་ཀྱི་འདི་

ནི་འཁོར་ལོས་སྒྱུར་བའི་རྒྱལ་པོ་འཇིག་རྟེན་གཞན་ནས་བཅོམ་ལྡན་འདས་ལ་བལྟ་བའི་ཕྱིར་འོངས་ཡང་དག་ཅེས་ཟེར་རོ། །དེ་དག་གིས་འཁོར་ལོས་སྒྱུར་བ་དེའི་ལོངས་སྤྱོད་དེ་ལྟ་བུ་མཐོང་ནས་ཨེ་མའོ་བདག་ཅག་ཀྱང་འདི་ལྟ་བུའི་དངོས་པོར་མངོན་པར་སྒྲུབས་ཤིག་ཅེས་ཆགས་པ་སྐྱེས་ཏེ། དེ་དག་

གིས་གོ་ཡང་ཕྱེའོ། །དེའི་དུས་ན་ཚེ་དང་ལྡན་པ་འཆར་ཀ་འཁོར་འདུས་པ་དེའི་ནང་ན་འདུག་སྟེ། དེས་སྨྲས་པ། ཀྱེ་འདི་ནི་འཁོར་ལོས་སྒྱུར་བ་མ་ཡིན་གྱི་འདི་ནི་དགེ་སློང་མ་ཨུཏྤ་ལའི་ཁ་དོག་མ་སྟེ། རྫུ་འཕྲུལ་གྱིས་བཅོམ་ལྡན་འདས་བལྟ་བའི་ཕྱིར་འོངས་སོ། །དེ་དག་གིས་སྨྲས་པ། འཕགས་པ་

འདི་དགེ་སློང་མ་ཨུཏྤ་ལའི་ཁ་དོག་ཡིན་པར་ཁྱོད་ཀྱིས་ཇི་ལྟར་ཤེས་དེ་སྨྲས་པ། ཀྱེ་ཨུཏྤ་ལའི་དྲི་ཤིན་ཏུ་མནམ་པས་ན་འདི་ནི་ཨུཏྤ་ལའི་ཁ་དོག་མ་སྟེ། རྫུ་འཕྲུལ་གྱིས་བཅོམ་ལྡན་འདས་ཀྱི་དྲུང་དུ་འོངས་སོ། །དེ་ནས་དགེ་སློང་མ་ཨུཏྤ་ལའི་ཁ་དོག་མས་རྫུ་འཕྲུལ་མངོན་པར་འདུས་བྱས་པ་

Vol. 11 · folio 93a

སླར་བསྡུས་ནས་བཅོམ་ལྡན་འདས་གང་ན་བ་དེར་ཕྱིན་པ་དང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ། །དེ་ནས་བཅོམ་ལྡན་འདས་ཀྱིས་དགེ་སློང་མ་ཨུཏྤ་ལའི་ཁ་དོག་མ་ལ་འདི་སྐད་ཅེས་བཀའ་སྩལ་ཏོ། །དགེ་སློང་མ་སོང་

ཤིག་ངའི་མདུན་དུ་མ་འདུག་ཤིག །དགེ་སློང་མས་སྟོན་པའི་སྤྱན་སྔར་རྫུ་འཕྲུལ་བྱེད་པ་ནི་མི་རིགས་པའོ། །དེ་ནས་བཅོམ་ལྡན་འདས་ཀྱིས་བསྐྲད་པ་དང་ཕྱོགས་གཅིག་ཏུ་སོང་སྟེ་འདུག་གོ། །བཅོམ་ལྡན་འདས་ཀྱིས་དགོངས་པ། གང་སུ་ཞིག་དགེ་སློང་མ་སྟོན་པའི་སྤྱན་སྔར་རྫུ་འཕྲུལ་བསྟན་

ན་ཉེས་པའི་དམིགས་ཡིན་ཏེ། དེ་ལྟ་བས་ན་དགེ་སློང་མས་སྟོན་པའི་སྤྱན་སྔར་རྫུ་འཕྲུལ་མི་བྱ་བར་དགོངས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་སློང་མས་སྟོན་པའི་སྤྱན་སྔར་རྫུ་འཕྲུལ་སྟོན་པར་མི་རིགས་ཏེ། དེ་ལྟ་བས་ན་དགེ་སློང་མས་སྟོན་པའི་སྤྱན་སྔར་རྫུ་འཕྲུལ་མ་

སྟོན་ཅིག །དགེ་སློང་མས་སྟོན་པའི་སྤྱན་སྔར་སྟོན་ན་འདས་པ་དང་བཅས་པར་འགྱུར་རོ། །དེ་ལ་ཁ་ཅིག་གིས་ནི་དགེ་སློང་མ་ཨུཏྤ་ལའི་ཁ་དོག་མའི་འཁོར་ལོས་སྒྱུར་བའི་ལོངས་སྤྱོད་དུ་མཐོང་ནས་མིར་ཆགས་པ་སྐྱེས་སོ། །ཁ་ཅིག་ནི་ལྷ་རྣམས་ཀྱི་རྫུ་འཕྲུལ་གྱི་ལོངས་སྤྱོད་དུ་མཐོང་ནས་ལྷ་

རྣམས་སུ་ཆགས་པ་སྐྱེས་སོ། །དེ་ནས་བཅོམ་ལྡན་འདས་ཀྱིས་ལྷ་དང་མིར་སྐྱེ་བ་ལས་བཟློག་པའི་ཕྱིར་འཁོར་དེ་དག་ལ་འདི་ལྟ་བུའི་ཆོས་བཤད་དེ་གང་གིས་དེ་ཐོས་པས་ན་ཁ་ཅིག་ནི་རྒྱུན་དུ་ཞུགས་པའི་འབྲས་བུ་མངོན་དུ་བྱས་སོ། །ཁ་ཅིག་གིས་ནི་ཕྱིར་མི་ལྡོག་པའི་འབྲས་བུ། ཁ་ཅིག་

གིས་ནི་ལན་ཅིག་ཕྱིར་འོང་བའི་འབྲས་བུ། ཁ་ཅིག་གིས་ནི་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་དུ་བྱས་སོ། །ཁ་ཅིག་གིས་ནི་ཉན་ཐོས་པའི་བྱང་ཆུབ་ཏུ། ཁ་ཅིག་གིས་ནི་རང་བྱང་ཆུབ་ཏུ། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །

ཁ་ཅིག་གིས་ནི་དྲོད་དུ་གྱུར་པའི་དགེ་བའི་རྩ་བ་རྣམས་བསྐྱེད་དོ། །ཁ་ཅིག་གིས་ནི་སྤྱི་བོ། ཁ་ཅིག་གིས་ནི་བཟོད་པ་ཆུང་ངུ་དང་འབྲིང་པོར་བསྐྱེད་དོ། །འཁོར་དེ་དག་ལས་ཕལ་ཆེར་ནི་སངས་རྒྱས་ལ་གཞོལ། ཆོས་ལ་འབབ། དགེ་འདུན་ལ་རབ་ཏུ་བབ་པར་བཀོད་དོ། །དེ་ནས་བཅོམ་

Vol. 11 · folio 93b

ལྡན་འདས་ཀྱིས་དེ་ལྟ་བུའི་ཕྱིར་ཚིགས་སུ་བཅད་དེ་གསུངས་པ། ས་རྣམས་གཅིག་གིས་ཐོབ་པ་དང་། །ལྷ་རྣམས་སུ་ཡང་འགྲོ་བ་དང་། །ཡང་ན་ཏིང་འཛིན་ཐོབ་པ་བས། །རྒྱུན་དུ་ཞུགས་པའི་འབྲས་བུ་མཆོག །དེ་ནས་བཅོམ་ལྡན་འདས་ཀྱིས་འཁོར་དེ་དག་ལ་ཆོས་ཀྱི་གཏམ་གྱིས་ཡང་

དག་པར་བསྟན། ཡང་དག་པར་བསྐུལ། ཡང་དག་པར་གཟེངས་བསྟོད། ཡང་དག་པར་དགའ་བ་བསྐྱེད་དེ་གདན་ལས་བཞེངས་ཏེ་བཞུད་པ་དང་། དགེ་སློང་དག་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་འཆར་ཀས་

ཨུཏྤ་ལའི་ཁ་དོག་མའི་དྲི་ལས་རྟོགས་པ་ལ་གཟིགས་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་འབའ་ཞིག་མ་ཡིན་གྱི། འདི་ལྟར་འདས་པའི་དུས་ན་ཡང་འཆར་ཀས་དྲི་ལས་རྟོགས་སོ། །དེ་བས་ན་ཉོན་ཅིག་དགེ་སློང་དག་སྔོན་བྱུང་བ་ནི་ཡུལ་

འཁོར་མོ་འཇིག་གི་གྲོང་ཁྱེར་ན་དེད་དཔོན་གཞན་ཞིག་གནས་ཏེ། རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་དོ། །དེ་ལ་རྩེ་དགའ་ཡོངས་སུ་སྤྱོད་པ་ན་ཆུང་མ་སེམས་ཅན་དང་ལྡན་པར་གྱུར་ཏོ། །དེད་དཔོན་དེ་ཡང་རྒྱ་མཚོ་མཆིང་རྣམ་ཆེན་པོར་

ཆས་ནས་དེས་དེ་ལ་བཟང་མོ་བདག་ནི་ཟོང་ཁྱེར་ཏེ་ཡུལ་གཞན་དུ་འགྲོས། ཁྱིམ་གྱི་བྱ་བ་ལ་བག་ཡོད་པར་བྱོས་ཤིག་ཅེས་སྨྲས་པ་དང་། དེས་ཇོ་བོ་དེ་སྟེ་དེ་ལྟར་ན་བདག་ཀྱང་མཆིས་ཁྲིད་ཅིག་ཅེས་ཟེར་རོ། །དེས་བཟང་མོ་ཁྱོད་ལ་དེ་ན་སུ་ཞིག་གཡོག་བྱེད་ཅེས་སྨྲས་པ་དང་། དེ་ངུ་ཞིང་

འདུག་ནས་གཡོག་པོ་དག་གིས་དེད་དཔོན་ཅིའི་ཕྱིར་ན་འདི་ལྟར་དེད་དཔོན་གྱི་བཙུན་མོ་ངུ་ཞེས་སྨྲས་པ་དང་། དེས་འདི་ཡང་བདག་དང་ལྷན་ཅིག་ཏུ་འགྲོ་བར་འདོད་དོ། །དེ་བདག་གིས་མ་ཁྲིད་དེ་དེའི་ཕྱིར་ན་ངུ་ཞིང་འདུག་གོ་ཞེས་སྨྲས་པ་དང་། དེ་དག་གིས་དེད་དཔོན་དེ་སྟེ་དེ་བཞིན་ཅི་ཕྱིར་མི་བཀྲི། དེ་

ན་སུ་ཞིག་འདི་ལ་གཡོག་བྱེད། དེད་དཔོན་དེ་ལྟར་ཉེས་པ་མེད་ཀྱིས་ཁྲིད་ཅིག་དང་བདག་ཅག་གིས་གཡོག་བྱའོ་ཞེས་སྨྲས་པ་དང་། དེས་དེ་ཁྲིད་དེ་རིམ་བཞིན་དོང་བ་ལས་རྒྱ་མཚོ་མཆིང་རྣམ་ཆེན་པོའི་ནང་དུ་ཞུགས་སོ། དེ་དག་རྒྱ་མཚོ་མཆིང་རྣམ་ཆེན་པོར་ཞུགས་པ་དང་། གྲུ་བོ་ཆེ་ཆུ་སྲིན་ཉ་ལྟ་

Vol. 11 · folio 94a

བུས་མི་རིགས་པར་བཟློག་པས་ན་དེ་དེར་དུས་ལས་འདས་སོ། །དེའི་ཆུང་མ་ནི་ཤིང་ལེབ་ཅིག་ལ་འཇུས་ཏེ་རླུང་གིས་རིམ་བཞིན་དུ་ཕུལ་བས་གླིང་ཀཱ་ཤེ་རུར་ཕྱིན་པ་དང་། དེ་ན་བྱའི་རྒྱལ་པོ་གཤོག་བཟངས་གནས་ཏེ། དེས་དེ་ཆུང་མར་བླངས་སོ། །དེས་ཟླ་བ་དགུ་འདས་

པ་དང་བཙས་ན་བུ་ཕོ་ཞིག་བྱུང་སྟེ་གཟུགས་ལེགས་ཤིང་བལྟ་ན་སྡུག་པ་བཟང་པོ་ཞིག་གོ། །དེ་ནས་ཡང་བྱའི་རྒྱལ་པོ་གཤོག་བཟངས་དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་དོ། །དེ་དག་རྩེ་དགའ་ཡོངས་སུ་སྤྱད་པས་བུ་བྱ་གཤོག་བཟངས་ཤིག་བཙས་ཏེ་དེ་ནས་དུས་ཕྱི་ཞིག་ན་བྱའི་རྒྱལ་པོ་

གཤོག་བཟངས་དུས་ལས་འདས་པ་དང་། བྱ་མང་པོ་འདུས་ན་གཤོག་བཟངས་འདས་པའི་སྐྱིན་པར་བུ་རྒྱལ་པོར་བཅུག་གོ། །དེ་ལ་མས་བུ་ཁྱོད་ནི་ཕའི་སྐྱིན་པར་བུ་རྒྱལ་པོར་བཅུག་ན་ཁྱོད་ཀྱིས་ཕུ་བོ་འདི་འཁོར་མོ་འཇིག་གི་མིའི་རྒྱལ་པོར་ཆུག་ཤིག་ཅེས་སྨྲས་པ་དང་། དེས་སྨྲས་

པ། དེ་ལྟར་གཞུག་པར་བགྱིའོ། །དེའི་དུས་ན་འཁོར་མོ་འཇིག་གི་རྒྱལ་པོ་ཚངས་སྦྱིན་ཞེས་བྱ་བ་ཞིག་བྱེད་དེ་དེ་འབྱོར་པ་དང་། རྒྱས་པ་དང་། བདེ་བ་དང་ལོ་ལེགས་པ་དང་མི་ལ་སོགས་པ་སྐྱེ་བོ་མང་པོ་དང་ལྡན་པའི་འཐབ་པ་དང་། རྩོད་པ་དང་། འཁྲུག་པ་དང་། མི་འདུམ་པ་རྣམས་རབ་ཏུ་ཞི་

བ། འཕྲོག་རློམ་དང་ནད་དང་བྲལ་བ། འབྲས་དང་། བུ་རམ་ཤིང་དང་། ཕྱུགས་དང་། མ་ཧེར་ལྡན་པ་ཆོས་ཀྱི་རྒྱལ་པོ་བཞིན་དུ་རྒྱལ་པོ་བྱེད་དོ། །དེ་དོན་བྱེད་པའི་ཕྱིར་འདུས་པ་ལས་བྱའི་རྒྱལ་པོ་གཤོག་བཟངས་ཀྱི་སྤར་མོས་ལག་པ་ནས་བཟུང་སྟེ། རྒྱ་མཚོ་ཆེན་པོར་བོར་ནས་ཕུ་བོ་དེ་རྒྱན་

ཐམས་ཅད་ཀྱིས་བརྒྱན་ཏེ་སེང་གེའི་སྟན་དེ་ལ་བཞག་གོ། །དེ་ནས་བློན་པོ་དག་ལ་ཀྱེ་འདི་ནི་ཁྱོད་ཀྱི་རྒྱལ་པོ་ཡིན་ཏེ། འདི་ལ་གང་གིས་ཉེས་པ་ཅུང་ཟད་ཅིག་བྱས་ན་དེ་ལ་བདག་གིས་འདི་འདྲ་བའི་གནས་སུ་བྱའོ་ཞེས་སྨྲས་པ་དང་། དེ་དག་སྐྲག་སྟེ་དེའི་ཚིག་བཞིན་མཉན་པར་གྱུར་ཏོ། །དེ་དག་

གིས་དེ་སུ་ལ་ཡང་མ་སྨྲས་པས་འཇིག་རྟེན་པ་དག་ནི་དེ་ཉིད་ཚངས་བྱིན་ཡིན་པར་ཤེས་སོ། །དེས་བྱའི་རྒྱལ་པོ་ལ་ནུ་བོ་ཁྱོད་ཀྱིས་བདག་དུས་དུས་སུ་ལྟོས་ཤིག་ཅེས་སྨྲས་པ་དང་། དེས་ཀྱང་ལེགས་ཀྱིས་བལྟའོ་ཞེས་སྨྲས་སོ། །དེ་ནས་དུས་ཕྱི་ཞིག་ན་རྒྱལ་པོ་ཚངས་བྱིན་གྱི་བལ་གླང་མོ་ལ་བེའུ་བྱུང་

Vol. 11 · folio 94b

བར་གྱུར་ཏེ། དེའི་བེའུ་མངལ་གྱི་སྒོར་ཐོགས་ནས་བློན་པོ་དག་གིས་རྒྱལ་པོ་ལ་གསོལ་པ་དང་། དེས་བཙུན་མོའི་འཁོར་དུ་ཁྲིད་ལ་བཙུན་མོ་རྣམས་ཀྱིས་བདེན་པའི་ཚིག་གིས་ཟུག་རྔུ་མེད་པར་བྱོས་ཤིག་ཅེས་སྨྲས་པ་དང་། དེས་དེ་བཙུན་མོའི་འཁོར་དུ་ཁྲིད་པ་དང་། བཙུན་མོ་རྣམས་ཀྱིས་

ཀྱང་བདེན་པའི་ཚིག་གིས་སྨོན་ལམ་བཏབ་ན་དེ་དག་གིས་ཀྱང་དེའི་ཟུག་རྔུ་དང་བྲལ་བར་མ་ནུས་ནས་དེར་སྒྲ་ཆེན་པོ་སྒྲ་དྲག་པོར་བྱུང་བར་གྱུར་ཏེ། རྒྱལ་པོའི་ཕོ་བྲང་ནས་མི་རིང་བ་ཞིག་ན་བ་ལང་རྫི་མོ་ཞིག་གནས་པ་དེས་ཐོས་ནས་དེས་གཞན་ཞིག་ལ་རྒྱལ་པོའི་ཕོ་བྲང་ན་སྒྲ་དྲག་པོ་སྒྲ་ཆེན་པོ་འདི་ཅི་

ཞིག་ཅེས་དྲིས་པ་དང་། དེས་ཇི་ལྟར་གྱུར་པ་སྨྲས་ན་དེས་བདག་གི་བདེན་པའི་ཚིག་གིས་སྨོན་ལམ་བཏབ་སྟེ་དེའི་ཟུག་རྔུ་དབྲལ་བར་བྱའོ་ཞེས་སྨྲས་པ་དང་། དེ་དག་གིས་བློན་པོ་དག་ལ་གསོལ་ཏེ། བློན་པོ་དག་གིས་དེ་བཙུན་མོའི་འཁོར་དུ་ཁྲིད་དེ་དེས་བདེན་པའི་ཚིག་གིས་སྨོན་

ལམ་བཏབ་པོ། །དེས་བདག་ལ་ཁྱོ་གཅིག་པུར་ཟད་དེ་སྐྱེས་པ་གཉིས་པ་མེད་པར་བདེན་ན་བདེན་པའི་ཚིག་འདིས་བ་ལང་མོ་ཟུག་རྔུ་དང་མྱུར་དུ་བྲལ་བར་གྱུར་ཅིག་ཅེས་བདེན་པའི་ཚིག་གིས་སྨོན་ལམ་བཏབ་པ་དང་། དེ་ལས་བེའུ་བྱུང་ན་མཇུག་མ་ལ་ཐོགས་པ་དང་། མོས་བགད་དེ་

འདི་ཙམ་ཡང་བཟོད་པར་མ་ནུས་སོ། །བཙུན་མོ་དག་གིས་དེ་ཅི་ཞིག་ཅེས་དྲིས་པ་དང་། དེས་སྨྲས་པ། བདག་བུ་ཁྱེའུ་ཆུང་ངུ་ཞིག་པང་པར་བླངས་ནས་དེ་གཅིན་གཅིས་པ་དང་། གཅིན་དེ་བདག་གི་མོ་མཚན་དུ་སོང་བ་དེ་བདག་གིས་དགའ་བར་ཚོར་བས་དེའི་ཕྱིར་མཇུག་མ་ཐོགས་

སོ། །དེས་ཇི་ལྟར་གྱུར་པ་དེ་ཡང་སྨྲས་ནས་མཇུག་མ་ཡང་དེ་ནས་བྱུང་ངོ་། །བློན་པོ་དག་གིས་རྒྱལ་པོ་ལ་ལྷ་བལ་གླང་མོ་དེ་ནི་བེའུ་འབྲངས་ལགས་སོ་ཞེས་གསོལ་ནས་དེ་ཟུག་རྔུ་ལས་སུས་ཕྲལ་ཞེས་སྨྲས་པ་དང་། དེ་དག་གིས་ཇི་ལྟར་གྱུར་པ་སྨྲས་ནས། རྒྱལ་པོས་བསམས་པ།

གདོན་མི་ཟ་བར་བདག་གི་བཙུན་མོ་ཐམས་ཅད་ནི་ཚུལ་ཁྲིམས་ངན་པར་གྱུར་པས་ན་བ་ལང་རྫི་མོས་བདེན་པའི་ཚིག་གི་སྨོན་ལམ་བཏབ་པས་ཟུག་རྔུ་ལས་བྲལ་བར་བྱས་སོ་སྙམ་དུ་རིག་ནས། ཀྱེ་བ་ལང་རྫི་མོ་དེ་ལ་དྲིས་བོས་ཤིག་ཅེས་བསྒོ་བ་དང་། དེ་དག་གིས་བོས་ནས་རྒྱལ་པོས་

Vol. 11 · folio 95a

ཁྱོད་ཀྱིས་བལ་གླང་མོ་དེ་བདེན་པའི་ཚིག་གིས་ཟུག་རྔུ་ལས་བྲལ་བར་བྱས་པ་བདེན་ནམ་ཞེས་སྨྲས་པ་དང་། ལྷ་མད་དོ། །རྒྱལ་པོས་གང་འདི་འདྲ་བར་གྱུར་པའི་བུ་མོ་ཡང་འདི་འདྲ་བར་འགྱུར་རོ། །དེ་སྟེ་འདི་ལ་བུ་མོ་ཞིག་ཡོད་ན་དེ་ཆུང་མར་བླང་གིས་སྐད་

ཅིག་འདྲིའོ་སྙམ་བསམས་ནས་ཁྱོད་ལ་བུ་མོ་ཡོད་དམ་ཞེས་སྨྲས་པ་དང་ལྷ་མཆིས་སོ། །མིང་ཅི། ལྷ་མིང་ནི་ཤོ་ཤུམ་པའོ། །མ་མ་སུ་ལ་བྱིན་ནམ་མ་བྱིན། ལྷ་སུ་ལ་ཡང་མ་སྩལ་ཏོ། །མ་མ་དེ་སྟེ་དེ་ལྟར་ན་ང་ལ་ཕུལ་ཅིག་ཆུང་མར་བླང་ངོ་། །ལྷ་གསོལ་ལོ། །དེ་དེས་བྱིན་པ་དང་།

རྒྱལ་པོས་དཔལ་ཆེན་པོའི་ཚོགས་དང་སྦྱར་ཏེ་བག་མར་བླངས་སོ། །རྒྱལ་པོས་དེ་སྟེ་འདི་བཙུན་མོ་དག་གི་འཁོར་འདིར་བཞག་ན་ནི་ཚུལ་ཁྲིམས་ངན་པ་ཅན་དུ་གདོན་མི་ཟ་བར་འགྱུར་རོ་སྙམ་དུ་བསམས་ནས་དེས་བྱའི་རྒྱལ་པོ་གཤོག་བཟངས་ལ་ཇི་ལྟར་གྱུར་པ་སྨྲས་ནས་ཁྱོད་ཀྱིས་འདི་ཉིན་

པར་ནི་ཀ་ཤེ་རུའི་གླིང་དུ་ཁྲིད་ལ་མཚན་མོ་ཁྲིད་དེ་ཤོག་ཤིག་ཅེས་བསྒོའོ། །དེ་ན་རེ་ལེགས་ཀྱིས་དེ་བཞིན་བགྱིའོ་ཞེས་སྨྲས་ཏེ། དེས་བྱ་གཤོག་བཟངས་ལ་བསྐྲིས་ནས། འདི་ལྟར་ཕར་ཁྲིད་ལ་ཚུར་ཁྲིད་དེ་ཤོག་ཤིག །དེས་ཉིན་པར་ནི་ཀ་ཤེ་རུའི་གླིང་དུ་ཁྲིད། མཚན་མོ་ནི་འཁོར་མོ་

འཇིག་ཏུ་ཁྲིད་ཅིང་འོང་ངོ་། །ཀ་ཤེ་རུའི་གླིང་ན་མེ་ཏོག་ཏི་མ་རི་ཞེས་བྱ་བ་དྲི་ཞིམ་པོ་ཞིག་ཡོད་དེ་ཕྲེང་བ་བརྒྱུས་ཏེ་རྒྱལ་པོ་ཚངས་བྱིན་ལ་ཉིན་གཅིག་བཞིན་དུ་བསྐུར་རོ། །འཁོར་མོ་འཇིག་ན་བྲམ་ཟེའི་ཁྱེའུ་གཞན་ཞིག་གནས་ཏེ་དུས་ཕྱི་ཞིག་ན་ཡམ་ཤིང་གི་ཕྱིར་ནགས་སུ་སོང་བ་དང་། དེ་དེར་མི་

འམ་ཅི་མོ་ཞིག་གིས་མཐོང་ནས་དེས་བྲག་ཕུག་ཏུ་བཅུག་སྟེ་བཞག་གོ། །མོ་དེ་དང་ལྷན་ཏུ་རྩེ་དགའ་ཡོངས་སུ་སྤྱོད་དོ། །ནམ་མོ་མེ་ཏོག་དང་འབྲས་བུའི་ཕྱིར་འགྲོ་བ་དེ་ན་བྲག་ཕུག་གི་སྒོ་བྲམ་ཟེའི་ཁྱེའུས་བསྐྱོད་མི་ནུས་པའི་རྡོ་ལེབ་ཆེན་པོས་འགེབས་སོ། །ཇི་ཙམ་ན་དེ་ལ་བྲམ་ཟེའི་ཁྱེའུ་དེའི་བུ་

ཞིག་བཙས་ནས་དེ་གར་འགྲོ་ཡང་མྱུར་དུ་འགྲོ་བས་ན་དེའི་མིང་མྱུར་འགྲོར་བཏགས་སོ། །བྲམ་ཟེའི་ཁྱེའུ་དེས་དེའི་མདུན་ན་རྟག་ཏུ་ཡུལ་འཁོར་མོ་འཇིག་གི་ཡོན་ཏན་བརྗོད་དེ། བུ་འཁོར་མོ་འཇིག་གི་གྲོང་ཁྱེར་ན་ཡོན་ཏན་འདི་དག་དང་འདི་ལྟ་བུ་ཡོད་དོ་ཞེས་བརྗོད་པ་དང་། དེས་ཕ་ཁྱོད་ཡུལ་

Vol. 11 · folio 95b

གང་ཡིན་ཞེས་དྲིས་པ་དང་། དེས་བདག་ནི་ཡུལ་འཁོར་མོ་འཇིག་ན་སྐྱེས་སོ་ཞེས་སྨྲས་སོ། །ཕ་དེ་ལྟར་ལགས་ན་ཅིའི་ཕྱིར་མི་འབྲོས་ཞེས་སྨྲས་པ་དང་། དེས་བུ་ཁྱོད་ཀྱི་མ་ནམ་མེ་ཏོག་དང་འབྲས་བུའི་ཕྱིར་འགྲོ་བ་དེའི་ཚེ་བྲག་ཕུག་གི་སྒོ་འདི་རྡོ་ལེབ་ཆེན་པོས་བཀག་ཅིང་འགྲོ་སྟེ། འདི་ནི་

ངས་བསྐྱོད་པར་མི་ནུས་ན་ཇི་ལྟར་འབྲོས་ཞེས་སྨྲས་པ་དང་། དེས་ཕ་བདག་གིས་དབྱེའོ། །བུ་ལེགས་སོ། །དེས་རྡོ་བ་ལ་གོམས་པར་བྱའོ་ཞེས་ཟེར་ཏེ་ཉི་མ་གཅིག་ནི་རྡོ་བ་ཆུང་ངུ་ཞིག་བཏེག་གོ། །གཉིས་པར་ནི་དེ་བས་ཆེའོ། །གསུམ་པར་ནི་དེ་བས་ཤིན་ཏུ་ཆེ་སྟེ། འདི་བཞིན་དུ་རྡོ་ལེབ་ནམ་

འདེག་ནུས་ཀྱི་བར་དུ་གོམས་པར་བྱེད་དོ། །དེ་ནས་དེས་ཕ་རྡོ་ལེབ་དོར་གྱིས་བྲོས་ཏེ་བཞུད་དོ་ཞེས་སྨྲས་པ་དང་། དེས་བུ་འདི་ལྟར་ཁྱོད་ཀྱི་མ་མེ་ཏོག་དང་འབྲས་བུའི་ཕྱིར་སོང་བའང་སླར་མྱུར་དུ་འོང་གིས་མི་འབྲོས་སོ། །ལམ་དུ་ཕྲད་པ་དང་གདོན་མི་ཟ་བར་ཡུ་བུ་ཅག་དོན་མེད་པར་བྱས་སོ་ཞེས་

སྨྲས་པ་དང་། དེས་ཕ་ཅི་ནས་དེ་མྱུར་དུ་མི་འཁོར་བ་དེ་ལྟར་བདག་གིས་བགྱིའོ་ཞེས་སྨྲས་པ་དང་། བུ་ལེགས་སོ། །དེས་མེ་ཏོག་དང་འབྲས་བུ་ཁྱེར་ཏེ་འོངས་པ་དང་། དེས་དེ་ཁར་བཅུག་ཅིང་བཅུག་ཅིང་བོར་ནས་མས་བུ་ཅིའི་ཕྱིར་ཁར་བཅུག་ཅིང་བཅུག་ཅིང་བོར་ཞེས་དྲིས་པ་དང་། དེས་སྨྲས་པ།

མ་ཁྱོད་ལེ་ལོ་བྱེད་དེ། ཉེན་ཀོར་ན་མེ་ཏོག་དང་འབྲས་བུ་ཁ་བ་སྐྱུར་བ་ཤ་དག་ཁྱེར་ཏེ་འོངས་པས་མི་ཞིམ་སྟེ་ཟ་མི་ནུས་ན་ལགས་ཀྱིས་དོར་མོད། མས་བུ་དེ་སྟེ་དེ་བཞིན་དུ་སང་ནི་རིང་དུ་འགྲོའོ། །ཉེ་བ་ན་ནི་ཞིམ་པོ་མེད་ཀྱིས་སང་རིང་དུ་འགྲོའོ་ཞེས་སྨྲས་པ་དང་། དེས་ལེགས་ཀྱིས་མ་དེ་བཞིན་དུ་གྱིས་

ཤིག་དང་ཞིམ་པོ་ནི་བཟའོ་ཞེས་སྨྲས་སོ། །དེའི་ཕྱི་དེ་ཉིན་རིང་མོ་ཞིག་ཏུ་སོང་ངོ་། །མྱུར་འགྲོས་ཕ་བདག་གིས་རིང་དུ་བཏང་གིས་ད་ནི་འབྲོས་པའི་དུས་ལ་བབ་བོ་ཞེས་སྨྲས་པ་དང་། དེས་སྨྲས་པ། བུ་ལེགས་ཀྱིས་རྡོ་ལེབ་བོར་ཅིག །དེས་རྡོ་ལེབ་བོར་བ་དང་། དེ་མྱུར་འགྲོ་དང་

ལྷན་ཅིག་ཏུ་བྲོས་ཏེ་འཁོར་མོ་འཇིག་ཏུ་ཕྱིན་པ་དང་། དེ་ཡང་མེ་ཏོག་དང་འབྲས་བུ་ཁྱེར་ཏེ་རིང་ཞིག་ལོན་ནས་འོངས་ཏེ་བལྟས་ན་བྲག་ཕུག་སྟོང་པར་གྱུར་པ་དང་། དེ་ངུ་ཞིང་འདུག་ནས་གྲོགས་མོས་མཐོང་སྟེ་ཅིའི་ཕྱིར་ངུ་ཞེས་དྲིས་པ་དང་། དེས་ཕུ་ནུ་མོ་བྲམ་ཟེའི་ཁྱེའུ་དེས་ངའི་བུ་དེ་ཡང་ཁྲིད་དེ་

Vol. 11 · folio 96a

བྲོས་སོ་ཞེས་བསྙད་པ་དང་། དེས་སྨྲས་པ། ཕུ་ནུ་མོ་དེ་མི་ཡིན་ཏེ་མིའི་ནང་ན་དེ་མྱ་ངན་ཅི་ཡོད། དེས་བདག་དང་ལྷན་ཅིག་མི་གནས་པའི་ཕྱིར་ནི་མྱ་ངན་མི་བྱེད་ཀྱི་བདག་གིས་དེ་ལ་འཚོ་བ་ཅུང་ཟད་ཀྱང་མ་བྱིན་ནོ། །ཕུ་ནུ་མོ་ཅི་སྟེར་རམ། བདག་གི་ལག་ཏུ་སྐུར་དང་། དེ་སྟེ་མཐོང་དང་

སྦྱིན་ནོ་ཞེས་སྨྲས་སོ། །དེས་དེའི་ལག་ཏུ་པི་བང་ཅིག་བྱིན་ནས་སྨྲས་པ། ཕུ་ནུ་མོ་དེ་ལ་ཁྱོད་ཀྱིས་པི་བང་འདི་ལོང་ལ་འཚོ་བར་གྱིས་ཤིག །རྒྱུད་ཡ་ཐོག་མ་ལ་མ་རེག་ཤིག །ཉེས་པའི་དམིགས་སུ་གྱུར་ཏ་རེ། དེས་དེ་ཁྱེར་ཏེ་སོང་ངོ་། །བྲམ་ཟེ་དེས་ཁྱེའུ་མྱུར་འགྲོ་དེ་བྲམ་ཟེ་མང་པོ་སློབ་

པ་ལ་ཕུལ་ནས་བྲམ་ཟེའི་ཁྱེའུ་འདི་སློབས་ཤིག་ཅེས་སྨྲས་ནས། དེས་དེ་ཀློག་ཏུ་བཅུག་གོ། །ཁྱེའུ་དེ་དག་གསངས་ཏེ་གང་གི་དུས་ན་མི་ཀློག་པར་གྱུར་པ་དེའི་དུས་ན་ཡམ་ཤིང་ཐུར་འདོང་ངོ་། །ཅི་ཙམ་ན་ཁྱེའུ་དེ་དག་མི་ཀློག་པར་གྱུར་ནས་དེ་དག་ཡམ་ཤིང་ཐུར་དོང་བ་དང་། མྱུར་འགྲོ་དེ་

ཤིན་ཏུ་རིང་བར་སོང་བ་ན་དེའི་མའི་གྲོགས་མོས་མཐོང་སྟེ་བུ་གཏམ་ཅི་གྲག་ཅེས་དྲིས་པ་དང་། དེས་ཇི་འདྲ་བའི་གཏམ་ཞིག་བཀྲེས་སྐོམ་པས་གཟིར་ཏོ་ཞེས་སྨྲས་པ་དང་། དེས་སྨྲས་པ། བུ་ཁྱོད་ཀྱི་མ་དེ་ནི་མྱ་ངན་བྱེད་དེ་ངུ་ཞིང་འདུག་ན་ཅི་དེའི་དྲུང་དུ་མི་འགྲོའམ། མ་འབར་མ་མོ་དེ་དང་ལྷན་

ཅིག་ཏུ་སྨྲ་བར་མི་ནུས་སོ། །བུ་དེ་སྟེ་མི་འགྲོ་ན་ཁྱོད་ཀྱི་འཚོ་བ་ཞིག་སྦྱིན་གྱིས་དེ་སུ་ལ་ཡང་མ་སྦྱིན་ཅིག །དེ་སྩོལ་ཅིག་དང་དེ་སུ་ལ་ཡང་མི་སྦྱིན་པར་བགྱིའོ། །དེས་དེ་ལ་པི་བང་དེ་བྱིན་ཏེ་འདི་ལོང་ལ་འཚོ་བར་གྱིས་ཤིག །ཉེས་པའི་དམིགས་སུ་མི་འགྱུར་བའི་ཕྱིར་རྒྱུད་ལྟག་མ་ལ་མ་

རེག་ཤིག་ཅེས་བསྒོ་བ་དང་། དེས་མ་ལེགས་ཀྱིས་དེ་བཞིན་བགྱིའོ་ཞེས་སྨྲས་ནས་དེས་བླངས་ཏེ་བྲམ་ཟེའི་ཁྱེའུ་དེ་དག་གི་ནང་དུ་སོང་བ་དང་། དེ་དག་གིས་ཁྱེའུ་ཁྱོད་ཅིའི་ཕྱིར་རིང་ཞིག་ཐོགས་ཏེ་འོངས་པི་བང་འདི་ཡང་སུས་བྱིན་ཞེས་དྲིས་པ་དང་། དེས་སྨྲས་པ། ཀྱེ་བདག་གི་མའི་གྲོགས་

མོས་མཐོང་ནས་དེས་བདག་ལ་པི་བང་འདི་བྱིན་ནོ། །དེ་དག་གིས་ཁྱེའུ་ཁྱོད་པི་བང་ལེན་ཤེས་སམ་ཞེས་དྲིས་པ་དང་། དེས་སྨྲས་པ། ཤེས་སོ། །བལྟས་ལོང་ཤིག །དེས་དེ་བླངས་ཏེ་ལེན་ཅིང་གླུ་ལེན་ཏོ། །དེས་རྒྱུད་ལྟག་མ་ལ་མ་རེག་པ་དང་དེ་དག་གིས་སྨྲས་པ། ཁྱེའུ་ཅིའི་ཕྱིར་ན་

Vol. 11 · folio 96b

ཁྱོད་ཀྱིས་རྒྱུད་ལྟག་མ་ལ་མ་རེག་ཅེས་དྲིས་པ་དང་། དེས་ཀྱེ་དེ་སྟེ་འདི་ལ་རེག་ན་ནི་ཉེས་པའི་དམིགས་སུ་འགྱུར་རོ་ཞེས་སྨྲས་པ་དང་། དེ་དག་གིས་བྲམ་ཟེའི་བུས་རེག་པ་ལྟ་ལ་ཉེས་པའི་དམིགས་སུ་འགྱུར་བ་ཅི་ཡོད་ཅེས་སྨྲས་ཏེ། དེ་དག་གིས་རེག་པ་དང་། དེ་དག་ཐམས་ཅད་མཆོང་རྒལ་

ཞིང་གར་བྱེད་དོ། །དེ་དག་གར་བྱས་པས་འཕྱིས་པར་གྱུར་ཏེ་དེ་དག་ནུབ་ཀར་མཁན་པོའི་དྲུང་དུ་འོངས་པ་དང་། དེས་ཁྱེའུ་དག་ཅིའི་ཕྱིར་རིང་ཞིག་ལོན་ཏེ་འོངས་ཞེས་དྲིས་པ་དང་། དེ་དག་གིས་ཇི་ལྟར་གྱུར་པ་ཞིབ་ཏུ་སྨྲས་ནས་དེས་མྱུར་འགྲོ་དེ་ལ་ཁྱོད་པི་བང་ལེན་ཅིང་གླུ་ལེན་ཤེས་སམ་

ཞེས་དྲིས་པ་དང་། འཚལ་ཏོ། །བྲམ་ཟེའི་བུ་དེ་ལྟར་ན་པི་བང་མཉན་གྱིས་ལོང་ཤིག །དེས་དེ་ལེན་ཅིང་གླུ་བླངས་ཏེ་དེས་རྒྱུད་ལྟག་མ་ལ་མ་རེག་པ་དང་། དེས་བྲམ་ཟེའི་བུ་ཅིའི་ཕྱིར་ཁྱོད་ཀྱིས་རྒྱུད་ལྟག་མ་ལ་མ་རེག་ཅེས་དྲིས་པ་དང་། དེས་སྨྲས་པ། མཁན་པོ་དེ་སྟེ་འདི་ལ་རེག་ན་ནི་ཉེས་

པའི་དམིགས་སུ་འགྱུར་རོ། །དེས་བྲམ་ཟེའི་བུ་འདི་ལ་རེག་ན་ཉེས་པའི་དམིགས་སུ་འགྱུར་བ་ཅི་ཡོད། རེག་ཤིག་ཅེས་སྨྲས་པ་དང་། དེས་རེག་པ་དང་། བྲམ་ཟེ་ཆུང་མ་དང་བཅས་ཏེ་མཆོང་རྒལ་ཞིང་གར་བྱེད་དོ། །ཁྱིམ་དེ་ཐམས་ཅད་ཀྱང་མཆོངས་པས་ཞིག་པར་གྱུར་ཏོ། །དེ་ཞིག་

པས་རྫ་མ་དང་སྣོད་ཐམས་ཅད་ཆག་པ་དང་། བྲམ་ཟེ་དེ་ཁྲོས་ནས་དེས་བྲམ་ཟེའི་བུ་དེའི་མགྲིན་པ་ནས་བཟུང་སྟེ་བསྐྲད་དོ། །བསྐྲད་པ་དང་དེ་པི་བང་བླངས་ཏེ་ལེན་པས་འཚོ་བ་སྦྱོར་བ་ལ་ཞུགས་སོ། །ཕྱི་ཞིག་ན་ཚོང་པ་ལྔ་བརྒྱ་ཙམ་ཞིག་རྒྱ་མཚོ་ཆེན་པོར་འདོང་བའི་ཟོང་རྣམས་སྦྱར་ཏེ་རྒྱ་མཚོ་ཆེན་

པོར་ཆས་པ་དང་། དེ་དག་གིས་སྨྲས་པ། ཀྱེ་བདག་ཅག་རྒྱ་མཚོ་ཆེན་པོར་ཞུགས་ན་ཡིད་བསླང་བར་བྱས་རོལ་མོ་མཁན་ཞིག་བཀྲིའོ། །དེ་དག་ལ་གཅིག་གིས་གང་བཀྲི་ཞེས་སྨྲས་པ་དང་། གཞན་ཞིག་གིས་བྲམ་ཟེའི་བུ་མྱུར་འགྲོ་ཞེས་བྱ་བ་བཀྲིའོ་ཞེས་སྨྲས་སོ། །ཁ་ཅིག་གིས་

ལེགས་གྱིས་དེ་བཞིན་བྱའོ་ཞེས་སྨྲས་ནས། དེ་དག་གིས་བྲམ་ཟེའི་བུ་མྱུར་འགྲོ་ཁྲིད་དེ་རྒྱ་མཚོ་ཆེན་པོར་ཞུགས་སོ། །དེ་ནས་རྒྱ་མཚོ་ཆེན་པོའི་ནང་དུ་དོང་བ་དང་། མྱུར་འགྲོ་རོལ་མོ་པི་བང་མཉན་གྱིས་ལོང་ཤིག་ཅེས་སྨྲས་པ་དང་། དེས་པི་བང་ལེན་ཅིང་གླུ་ལེན་པ་ལ་ཞུགས་ན་དེས་པི་

Vol. 11 · folio 97a

བང་དེའི་རྒྱུད་ལྟག་མ་ལ་མ་རེག་ནས་ཚོང་པ་དེ་དག་གིས་མྱུར་འགྲོ་རྒྱུད་ལྟག་མ་འདི་ལ་ཅིའི་ཕྱིར་མི་རེག་ཅེས་སྨྲས་པ་དང་། ཀྱེ་དེ་སྟེ་འདི་ལ་རེག་ན་ནི་ཉེས་པའི་དམིགས་སུ་འགྱུར་རོ། །དེ་དག་གིས་བྲམ་ཟེའི་བུ་ཉེས་པའི་དམིགས་སུ་འགྱུར་བ་ཅི་ཤིག་ཡོད་རེག་ཞིག་ཅེས་སྨྲས་པ་དང་།

དེས་རེག་པ་དང་གྲུ་བོ་ཆེ་འཕར་ཏེ་གྲུ་བུབ་ཅིང་ཞིག་པས་ཚོང་པ་དེ་དག་དུས་ལས་འདས་སོ། །དེ་ནི་སྔོན་གྱི་ལས་ཀྱི་མཐུས་ཤིང་ལེབ་ཅིག་ཟིན་ཏེ་མྱུར་བའི་རླུང་གིས་གླིང་ཀ་ཤེར་ཕུལ་ལོ། །དེ་དེ་ན་སྐྱེད་མོས་ཚལ་གཞན་ཞིག་ན་འདུག་སྟེ་དེ་ནས་མི་གཞན་ནི་མེད་ཀྱི་དེས་ཤོ་ཤུམ་པ་དེ་མཐོང་བ་དང་དེ་དང་དེ་

ལྷན་ཅིག་ཏུ་ཉལ་ལོ། །དེ་ཉིན་པར་ནི་མྱུར་འགྲོ་དང་ཡོངས་སུ་སྤྱོད། མཚན་མོ་ནི་རྒྱལ་པོ་ཚངས་སྦྱིན་དང་སྤྱོད་དོ། །དེས་བཟང་མོ་ཁྱོད་མཚན་མོ་གང་དུ་འགྲོ་ཞེས་སྨྲས་པ་དང་། དེ་དེ་དང་མཛའ་བར་གྱུར་པས་ཐམས་ཅད་སྨྲས་ནས། དེས་སྨྲས་པ། བཟང་མོ་དེ་སྟེ་དེ་བཞིན་བདག་ཀྱང་འཁོར་

མོ་འཇིག་ཏུ་ཁྲིད་ཅིག །དེས་སྨྲས་པ། ཇོ་བོ་ལེགས་ཀྱིས་བཀྲིའོ། །ཁྱོད་ཀྱི་མིང་ཅི་སྨྲོས་ཤིག །དེས་སྨྲས་པ། བཟང་མོ་བདག་གི་མིང་ནི་མྱུར་འགྲོ་ཞེས་བྱའོ། །ཁྱོད་ཀྱི་མིང་ཅི་ཞེས་བྱ་སྨྲོས་ཤིག །ཇོ་བོ་བདག་གི་མིང་ནི་ཤོ་ཤུམ་པ་ཞེས་བགྱིའོ། །དེས་རྡོ་བ་ལས་ཐབས་སུ་སྦྱར་བར་

བརྩམས་ཏེ་ཉིན་གཅིག་ནི་རྡོ་ཆུང་ངུ་ཞིག་བླངས་ཏེ་བྱ་གཤོག་བཟངས་ལ་ཞོན། ཉི་མ་གཉིས་ན་རྡོ་དེ་ཙམ་གཉིས་སོ། །ཉི་མ་གསུམ་ན་རྡོ་དེ་ཙམ་གསུམ་པོ་ནས་དེ་བཞིན་དུ་མིའི་ཚད་དང་མཉམ་པའི་བར་དུ་ཁྱེར་རོ། །དེ་ནས་མྱུར་འགྲོ་དང་ལྷན་ཅིག་ཏུ་བྱ་གཤོག་བཟངས་ལ་ཞོན་ཏེ་དོང་ནས། ཤོ་

ཤུམ་པ་ན་རེ་ཇོ་བོ་མིག་མ་དབྱེ་ཉེས་པ་བྱུང་ཏ་རེ་ཞེས་སྨྲས་པ་དང་། དེས་མིག་བཙུམས་ནས་ནམ་འཁོར་མོ་འཇིག་དང་ཉེ་བར་ཕྱིན་ན་དེས་སྐྱེ་བོ་མང་པོ་དག་གི་སྒྲ་ཅ་ཅོ་ཐོས་པ་དང་། དེས་བསམས་པ། ད་ནི་ཕྱིན་གྱིས་བལྟའོ། །དེས་མིག་ཕྱེ་བ་དང་མིག་བྱུང་སྟེ་ལོང་བར་གྱུར་ཏོ། །ཤོ་ཤུམ་

པས་དེ་སྐྱེད་མོས་ཚལ་དུ་བཞག་སྟེ་རྒྱལ་པོ་ཚངས་སྦྱིན་གྱི་བཙུན་མོ་རྣམས་ཀྱི་ནང་དུ་སོང་ངོ་། །དེ་ནས་དུས་ཕྱི་ཞིག་ན་དཔྱིད་ཀྱི་དུས་ལ་བབ་སྟེ། ཤིང་དག་ནི་ཁ་འབུས། ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། ཤ་རི་ཀ་དང་། ཀོ་ཀི་ལ་དང་། འཚོ་བ་འཚོ་བྱེད་རྣམས་སྒྲ་འབྱིན་

Vol. 11 · folio 97b

པའི་ནགས་སྟུག་པོར་ཚངས་བྱིན་བཙུན་མོས་བསྐོར་ཏེ་ཤོ་ཤུམ་པ་དང་ལྷན་ཅིག་ཏུ་སྐྱེད་མོས་ཚལ་དུ་དོང་བ་དང་། བྲམ་ཟེའི་བུ་མྱུར་འགྲོ་མེ་ཏོག་ཏི་མི་རའི་དྲི་མནམ་ནས་དེས་བསྣམས་ཏེ། དེ་འདྲ་བའི་གླུ་བླང་བར་བསམས་ནས། རླུང་གིས་སུ་ནི་བསྐྱོད་པ་དང་། ཏི་མི་ར་ཡི་དྲི་མནམ་མོ། །གང་ན་

ཤོ་ཤུམ་པ་གནས་པ། ཀ་ཤེ་རུ་ཡི་གླིང་དག་གོ། །དེ་རྒྱལ་པོ་ཚངས་བྱིན་གྱིས་ཐོས་ནས་དེས་བཙུན་མོ་དག་ལ་ཀྱེ་འདི་ན་གླུ་ལེན་པ་སུ་ཡིན་ཚོལ་ཅིག་ཅེས་བསྒོ་བ་དང་། དེ་དག་གིས་ལྷ་མིག་དང་བྲལ་བའི་སྐྱེས་བུ་ཞིག་སྐྱེད་མོས་ཚལ་འདི་ན་གླུ་ལེན་ཅིང་མཆིས་སོ་ཞེས་སྨྲས་སོ། །དེ་རྒྱལ་

པོས་བོས་ཏེ་ཀྱེ་སྐྱེས་བུ་ཁྱོད་ཀྱིས་གླུ་བླངས་སམ་ཞེས་སྨྲས་པ་དང་། ལྷ་བདག་གིས་གླུ་བླངས་སོ། །ཀྱེ་སྐྱེས་བུ་ཡང་ལོང་ཤིག་དང་ཡང་མཉན་ནོ། །དེས་བསམས་པ། གཞན་མ་ཡིན་གྱི་བདག་གིས་བླངས་པ་དེ་སྙན་པ་ལྟ་ཞིག་སྟེ། དེའི་ཕྱིར་རྒྱལ་པོ་ཉན་པར་འདོད་དེ། གལ་ཏེ་ཅུང་

ཟད་ཐོབ་ཀྱང་སྲིད་སྙམ་ནས་དེས་གླུ་བླངས་པ། རླུང་གིས་སུ་ནི་བསྐྱོད་པ་དང་། །ཏི་མི་ར་ཡི་དྲི་མནམ་མོ། །གང་ན་ཤོ་ཤུམ་པ་གནས་པ། །ཀ་ཤེ་རུ་ཡི་གླིང་དག་གོ། །རྒྱལ་པོས་ཀྱེ་སྐྱེས་བུ་ཀ་ཤེ་རུའི་གླིང་འདི་ནས་ཇི་སྲིད་ཅེས་དྲིས་པ་དང་། དེ་ཚིགས་སུ་བཅད་དེ་སྨྲས་པ། འདི་ནས་དེའུ་

དཔག་ཚད་བརྒྱའི། །རྒྱ་མཚོ་ཆེན་པོའི་ཆུ་རྣམས་ཏེ། །དེ་ན་གནས་པ་ཤོ་ཤུམ་པ། །ཀ་ཤེ་རུ་ཡི་གླིང་དག་ནའོ། །དེ་ལ་རྒྱལ་པོ་ཚངས་སྦྱིན་གྱིས་དེའི་ལན་ཚིགས་སུ་བཅད་དེ་སྨྲས་པ། །དེ་སྟེ་བདག་གི་ཡིད་འོང་བ། །ཤོ་ཤུམ་པ་ཞེས་བྱ་བ་དེ། །ཁྱོད་ཀྱིས་ཉེས་པར་མཐོང་ཐོས་ན། །ལུས་ལ་

མཚན་ཡོད་པ་ཡང་སྨྲོས། །དེས་ཀྱང་སླར་ཚིགས་སུ་བཅད་དེ་སྨྲས་པ། སྭ་སྟི་ཀ་ནི་བརླ་ལ་ཡོད། །དེ་ཡི་ནུ་ཀ་འཁྱིལ་པ་སྟེ། །ཏི་མི་ར་ཡི་མེ་ཏོག་རྣམས། །རྒྱུད་པ་ཁྱོད་ཀྱི་ཕྱི་རུའོ། །རྒྱལ་པོས་འདི་ཡང་འདི་ལྟར་ངན་པ་སྤྱོད་པ་གྱུར་པ་ལྟ་སྟེ། འདི་མི་དགོས་ཀྱིས་ལོང་བ་འདི་ལ་སྦྱིན་ནོ་སྙམ་

བསམས་པ་ལས་ཕྱིས་ཡང་ཁྲོས་ཏེ་ཚིགས་སུ་བཅད་དེ་སྨྲས་པ། ཤོ་ཤུམ་པ་ནི་ཁྱོད་སྦྱིན་པ། །རྒྱན་ཀུན་གྱིས་ནི་བཀླུབས་བཞིན་ཏེ། །བོང་བུ་བསྐྱོན་ལ་སྤུགས་ནས་ནི། །གྲོང་ཁྱེར་ནས་ནི་མྱུར་དུ་དེང་། །རྒྱལ་པོ་དེ་ཁྲོས་ནས་བཞོན་པ་བོང་བུ་ལ་ཤོ་ཤུམ་པ་དང་ལོང་བ་ལྷན་ཅིག་ཏུ་བསྐྱོན་ཏེ་

Vol. 11 · folio 98a

ཕྱུང་ངོ་། །དེས་དེ་ཁྲིད་དེ་ཕན་ཚུན་དུ་འཁྱམ་འཁྱམ་ནས། ཉི་མ་ནུབ་པ་དང་རི་བྲགས་ཀྱི་གྲོང་གཞན་ཞིག་ཏུ་ཕྱིན་ཏེ། དེ་ན་ལྷ་ཁང་སྟོང་པ་ཞིག་ཏུ་གནས་སོ། །དེའི་ནུབ་མོ་མི་རྒོད་ལྔ་བརྒྱ་ཙམ་ཞིག་རི་བྲགས་ཀྱི་གྲོང་ཁྱེར་འཇོམས་སུ་ལྷགས་པ་དང་། རི་བྲགས་ཀྱི་གྲོང་ན་

གནས་པའི་སྐྱེ་བོ་མང་པོ་དག་གིས་ཚོར་ནས་དེ་དག་གིས་ཀུན་དུ་བསྒྲགས་ཏེ། རི་བྲགས་ཀྱི་གྲོང་པ་དག་གིས་མི་རྒོད་རྣམས་བཏགས་བཅོམ་མོ། །དེ་ནས་མི་རྒོད་ཀྱི་དཔོན་པོ་དེ་མ་ཟིན་ནས་ལྷའི་ཁང་པ་དེ་ཉིད་དུ་ཞུགས་པ་དང་། རི་བྲགས་ཀྱི་གྲོང་མི་དག་གིས་ལྷའི་ཁང་པ་དེ་ཁོ་ར་ཁོར་

ཡུག་ཏུ་བསྐོར་ནས་མི་རྒོད་དཔོན་པོ་དེས་སྒོ་བཅད་དོ། །རི་བྲགས་ཀྱི་གྲོང་མི་དག་གིས་ཀྱེ་འདི་ན་སུ་ཞིག་གནས་ཞེས་སྨྲས་པ་དང་། བྲམ་ཟེའི་བུ་མྱུར་འགྲོས་སྨྲས་པ། ཀྱེ་བདག་ཅག་ནི་འགྲོན་པོའོ། །དེ་དག་གིས་སྨྲས་པ། མི་རྒོད་འདི་ཕྱིར་བྱུང་ཤིག །གྱིན་ད་ཁྱོད་ཉིད་དོན་མེད་

པར་བྱས་ས་རེ། མི་རྒོད་ཀྱི་སྡེ་དཔོན་དེས་ཤོ་ཤུམ་པ་ལ་ཀྱེ་ལོང་བ་འདིས་ཅི་ཞིག་བྱ་འདི་བསྐྲད་ལ་བདག་ཅག་གཉིས་ཡོངས་སུ་སྤྱད་དོ་ཞེས་སྨྲས་པ་དང་། དེས་ཇོ་བོ་ལེགས་ཀྱིས་དེ་བཞིན་མཛོད་ཅིག་དང་། བདག་ནི་ཁྱོད་ཀྱིའོ་ཞེས་སྨྲས་ནས་དེ་དང་མི་རྒོད་ཀྱི་སྡེ་དཔོན་གྱིས་ལོང་བ་དེ་ར་

བའི་རྩིག་པའི་ཁ་ནས་བོར་བ་དང་། རི་བྲགས་ཀྱི་གྲོང་མི་དེ་དག་གིས་དེའི་མགོ་བཅད་དེ་བོར་རོ། །དེ་ཕྱི་དེ་ཉིན་མི་རྒོད་ཀྱི་སྡེ་དཔོན་གྱིས་ཁྲིད་དེ་དོང་བ་ལས་ཆུ་བོ་ཀ་ར་ད་བར་ཕྱིན་ཏེ་རྒལ་དུ་གྲུ་མེད་ནས་དེས་བཟང་མོ་ཀ་ར་ད་བ་འདི་ནི་ཆུས་གང་བ་ལ་བརྒལ་བར་བྱ་ན། ཁྱོད་རྒྱན་དང་བཅས་ཏེ་

རྒལ་དུ་ནི་མི་ནུས་ཀྱིས། ཁྱེད་རེ་ཞིག་ཁྲུས་བྱེད་ཅིང་འདུག་ཤིག་དང་ངས་རྒྱན་རྣམས་བསྐྱལ་ཏོ། །ཕྱིར་འོངས་ནས་ཕྱིས་ཁྱོད་བསྒྲལ་བར་བྱའོ་ཞེས་སྨྲས་པ་དང་། མོས་ཇོ་བོ་ལེགས་ཀྱིས་དེ་བཞིན་དུ་ཁྲུས་བྱའོ་ཞེས་སྨྲས་ནས། དེས་དེ་ལ་གོས་དང་རྒྱན་ཐམས་ཅད་བྱིན་ཏེ། དེ་ཆུའི་ནང་དུ་

ཞུགས་ཏེ་སྒྲེན་མོར་འདུག་གོ། །དེ་ཡང་ཆུའི་དབུས་སུ་ཕྱིན་པ་དང་དེ་ལ་འདིས་བདག་གི་རྒྱན་དང་གོས་རྣམས་ཕྲོགས་ཏེ་མི་འོང་ངམ་ཞེས་འགྱོད་པ་སྐྱེས་ནས་དེས་ཚིགས་སུ་བཅད་དེ་སྨྲས་པ། ཀ་ར་ད་འདི་ཆུ་ཡིས་གང་། །བཟང་མོས་ཁྱོད་ལ་རྫས་ཀུན་བྱིན། །བདག་གི་དོགས་པ་

Vol. 11 · folio 98b

སྐྱེས་པར་གྱུར། །སྡིག་ཅན་ཁྱོད་ཀྱིས་བདག་མ་སླུ། །དེས་ཀྱང་ཚིགས་སུ་བཅད་དེ་སྨྲས་པ། མི་བཤེས་ཁྱོད་ཀྱིས་བཤེས་རྙིང་བསད། །སྐྱེས་བུ་དེ་ནི་དོན་མེད་དོ། །དེ་བས་ཁྱོད་ལ་ཡིད་བརྟན་དཀའ། །བདག་ཀྱང་ཁྱོད་ཀྱིས་མི་བསད་དམ། །དེས་དེ་ལ་ཕྲོགས་ཏེ་བྲོས་སོ། །དེ་ཡང་

སྒྲེན་མོར་རྩྭ་སྟུག་པོའི་ནང་དུ་ཞུགས་ཏེ་འདུག་པ་དང་། ཅི་ཙམ་ན་ཝ་རྒན་པོ་གཞན་ཞིག་ཤ་ལྟར་ལྟར་པོ་ཞིག་ཁྱེར་ཏེ། ཆུ་བོ་ཀ་ར་ད་བའི་འགྲམ་ནས་སོང་བ་དང་ཉ་ཞིག་ཀྱང་རྒྱགས་ཆེས་པས་ཆུ་ལ་རྒལ་བ་དང་། སྐམ་ས་ལ་ལྷུང་ནས་དེས་ཤ་དེ་བོར་ཏེ་ཉའི་ཕྱིར་བརྒྱུགས་པ་དང་། ཉ་ནི་ཕྱིར་ཆུ་བོ་ཀ་

ར་ད་བར་ཞུགས། ཤ་དེ་ཡང་བྱ་འོལ་བས་ཁྱེར་ནས་དེ་གཉིས་ཀ་ལས་བྲལ་བས་རྣ་བ་ཕབ་སྟེ་འགྱོད་ཅིང་འདུག་པ། ཤོ་ཤུམ་པ་རྩྭ་སྟུག་པོའི་ནང་ན་འདུག་པས་མཐོང་ནས་མོས་ཚིགས་སུ་བཅད་དེ་སྨྲས་པ། ཤ་དུམ་དེ་ནི་འོལ་བས་ཕྲོགས། །ཉ་ནི་ཆུ་བོའི་ནང་དུ་བྲོས། །གཉིས་ཀ་

ལས་སུ་བྲལ་བར་གྱུར། །ཝས་ནི་མྱ་ངན་ཅིར་མི་བྱེད། །དེས་ཕྱོགས་བཞིར་བལྟས་པ་དང་། །སུ་ཡང་མ་མཐོང་སྟེ། དེ་ནས་ཚིགས་སུ་བཅད་དེ་སྨྲས་པ། མི་རྒོད་གར་ཡང་མི་བྱེད་ཅིང་། །གླུ་ལའང་བདག་ནི་མི་དགའ་ན། །རྩྭ་ཡི་ནང་ན་གནས་པ་སུ། །བདག་ལ་འཕྱ་ཞིང་

དགོད་པར་བྱེད། །དེས་ཞང་པོ་བདག་ནི་ཤོ་ཤུམ་པའོ་ཞེས་སྨྲས་པ་དང་། ཝ་དེ་ཁྲོས་ཏེ་དེས་བསམས་པ། སྦྱར་མ་འདི་བདག་ལ་འཕྱ་བར་ཤེས་ནས་ཚིགས་སུ་བཅད་དེ་སྨྲས་པ། ཁྱོ་ནི་ཁྱོད་ཀྱིས་བསད་པ་ཡིན། །བྱི་བོ་དེ་ནི་བྲོས་པས་ན། །གཉི་ག་ལ་ནི་བྲལ་བར་གྱུར། །སྦྱར་མ་མྱ་

ངན་ཅིར་མི་བྱེད། །མོས་སླར་ཚིགས་སུ་བཅད་དེ་སྨྲས་པ། བདག་གི་ཁྱིམ་དུ་སོང་ནས་ནི། །ཁྱོ་མཆོག་ཅིག་ནི་བླང་བར་བྱ། །དེ་ནས་ཁྱོ་ཅིག་རྙེད་པ་དང་། །རིགས་སུན་དབྱུང་བར་མི་བྱའོ། །ཝས་ཚིགས་སུ་བཅད་དེ་སྨྲས་པ། གང་གི་དུས་ན་གང་གཱ་སླར་ལོག་ཅིང་། །ཞོ་ཡི་

ཁ་དོག་ཏུ་ནི་བྱ་རོག་གྱུར། །འབྲས་བུ་བྱུང་བ་དེ་དུས་ན། །ཁྱོད་གདོད་ཚུལ་ཁྲིམས་ལྡན་པར་འགྱུར། །ནམ་ཞིག་བྱ་རོག་འུག་པ་གཉིས། །ཤིང་གཅིག་ལ་ནི་གནས་བཅས་ནས། །ཡིད་དགའ་བ་རུ་གྱུར་པ་ན། །དེ་ཚེ་ཚུལ་ཁྲིམས་ཁྱོད་ལྡན་ནོ། །ནམ་ཞིག་སྦྲུལ་དང་སྲེ་མོ་གཉིས། །

Vol. 11 · folio 99a

ཁུང་བུ་གཅིག་ཏུ་གནས་པ་ན། །དགའ་བར་གྱུར་ཅིང་འཁོད་པ་སྟེ། །དེ་ཚེ་ཚུལ་ཁྲིམས་ཁྱོད་ལྡན་ནོ། །ནམ་ཞིག་རུས་སྦལ་བལ་ལས་ནི། །བགོ་བ་དག་ནི་ལེགས་བྱས་ནས། །དགུན་གྱི་བགོ་བར་གྱུར་པ་ན། །དེ་ནི་ཚུལ་ཁྲིམས་ཁྱོད་ལྡན་ནོ། །ནམ་ཞིག་སྦྲང་བུའི་རྗེ་ངར་

ལས། །སྐས་ཀ་རུ་ནི་ལེགས་བཅས་ཏེ། །མཐོ་རིས་འགྲོ་བའི་སྐས་བཙུགས་ན། །དེ་ཚེ་ཚུལ་ཁྲིམས་ཁྱོད་ལྡན་ནོ། །ནམ་ཞིག་ཀུན་དའི་སྡོང་བུ་ལ། །ཟམ་པ་རབ་ཏུ་ལེགས་བྱས་ནས། །བལ་གླང་དེ་རུ་འགྲོ་བར་གྱུར། །དེ་ཚེ་ཚུལ་ཁྲིམས་ཁྱོད་ལྡན་ནོ། །ནམ་ཞིག་རྒྱ་མཚོའི་དབུས་ནས་

ཀྱང་། །ལེགས་པར་ཡང་ནི་མེ་འབར་ལ། །སྐྱེ་བོ་དག་ནི་དེ་ལ་འཇུག །དེ་ཚེ་ཚུལ་ཁྲིམས་ཁྱོད་ལྡན་ནོ། །ཤོ་ཤུམ་པ་བདག་གིས་བཞད་གད་བྱས་པ་ནི་དེར་ཟད་ན། བདག་གིས་ཁྱོད་སྔོན་གྱི་གནས་སུ་སླར་གཞག་པར་བྱ་ན་ཁྱོད་ཀྱིས་བདག་ལ་ལན་ཅི་ཞིག་བྱ་ཞེས་སྨྲས་པ་དང་། དེས་ཞང་

པོ་དེ་སྟེ་བདག་ཁྱོད་ཀྱིས་སྔོན་གྱི་གནས་སུ་བཞག་ན་ནི་ཁྱོད་ལ་བདག་གིས་ཁྱོད་ཉིན་རེ་ཞིང་ཤ་དུམ་བུ་རེ་རེ་སྦྱིན་ནོ་ཞེས་སྨྲས་པ་དང་། དེས་དེ་བཞིན་གཞག་གིས་ལྟོས་ཤིག །ཁྱོད་ཆུ་ཀླུང་དུ་ཞུགས་ལ་ལྐོག་མ་མན་ཆད་ཆུར་ཆུག་ལ་ཤར་ཕྱོགས་སུ་ལྟོས་ཏེ་འདུག་ཤིག་དང་། བདག་གིས་ལྷ་

ལ་གསོལ་ལོ་ཞེས་ཟེར་ཏེ། དེས་རྒྱལ་པོའི་ཕོ་བྲང་དང་ཉེ་བར་སོང་སྟེ། ལྷ་འདི་ལྟར་ཤོ་ཤུམ་པ་ནི་དགེ་ཞིང་བདེན་ཏེ་དཀའ་ཐུབ་སྤྱོད་པ་བྱེད་ཀྱི་མྱུར་དུ་བོད་པའི་རིགས་སོ་ཞེས་གསོལ་པ་དང་། རྒྱལ་པོ་ཚངས་བྱིན་གྱིས་ཝའི་སྐད་ལ་མཁས་ནས་དེས་བློན་པོ་ལ་ཀྱེ་ཆུ་བོ་ཀ་ར་ན་ད་ན་ཤོ་ཤུམ་པ་དཀའ་

ཐུབ་སྤྱོད་ཅིང་འདུག་གོ་ཞེས་ཐོས་ཀྱིས་དེ་ཚུར་ཁུག་ཤིག་ཅེས་བསྒོའོ། །དེ་དག་གིས་གོས་དང་རྒྱན་བསྐོན་ཏེ་འོངས་པ་དང་། རྒྱལ་པོས་སྔོན་གྱི་གནས་སུ་སླར་བཞག་གོ། །མོས་དེ་ལ་ཉི་མ་རེ་རེ་ཞིང་ཤའི་དུམ་བུ་རེ་རེ་བྱིན་ནོ། །ཇི་སྲིད་ཅིག་གི་དུས་སུ་བྱིན་ཏེ། དེ་ནམ་མ་བྱིན་པ་དང་། ཝ་དེས་

རྒྱལ་པོའི་ཕོ་བྲང་དང་ཉེ་བར་འདུག་ནས་ཤོ་ཤུམ་པ་དེ་སྟེ་ཁྱོད་ཀྱིས་བདག་ལ་ཤའི་དུམ་བུ་བྱིན་ན་ནི་དགེའོ། །མ་བྱིན་ན་ནི་ལེགས་པར་བརྡེགས་ལ་ཇི་ལྟར་སྔོན་གྱི་གནས་སུ་ཕྱིར་ཡང་གཞག་གོ་ཞེས་བསྡིགས་པ་དང་། མོས་ཐོས་ནས་སྐྲག་སྟེ་ཡང་དེ་ལ་ཉི་མ་རེ་རེ་ཞིང་ཤའི་དུམ་བུ་སྦྱིན་པ་ལ་ཞུགས་སོ། །

Vol. 11 · folio 99b

དགེ་སློང་དག་ཇི་སྙམ་དུ་སེམས། གང་ཤོ་ཤུམ་པ་དེ་ནི་འདི་ལྟར་འདི་བཞིན་དེའི་དུས་ན་དགེ་སློང་མ་ཨུཏྤ་ལའི་ཁ་དོག་མའོ། །གང་མྱུར་འགྲོ་དེ་ནི་དེའི་ཚེ་དེའི་དུས་ན་འདི་ལྟར་དགེ་སློང་ཕ་འཆར་ཀའོ། །དེའི་ཚེ་དེའི་དུས་ན་ཡང་འདི་ལྟར་འདིས་དྲི་ལས་ཤེས་ཏེ། ད་ལྟར་ཡང་འདིས་དྲི་ལས་ཤེས་སོ། །

བཅོམ་ལྡན་འདས་ཀྱིས་དེ་སྐད་གསུངས་པ་དང་། དགེ་སློང་ཕ་དག་བཅོམ་ལྡན་འདས་ཀྱིས་བཤད་པ་ལ་ཡི་རངས་ནས་མངོན་པར་དགའོ།། །།འདུལ་བ་ཕྲན་ཚེགས་ཀྱི་གཞི། བམ་པོ་སུམ་བཅུ་རྩ་དྲུག་པ། སངས་རྒྱས་བཅོམ་ལྡན་འདས་མཉན་དུ་ཡོད་པ་ཛེ་ཏའི་ཚལ་མགོན་མེད་

ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། ཆུ་བོ་བལ་གུ་མ་ཏིའི་འགྲམ་ན་དགེ་སློང་དག་འཇིམ་པའི་རིལ་བུ་དང་ཕོ་ལོང་གི་སྦྱོར་བས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་དུ་བྱས་པ་དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དེ་ལྟ་བས་ན་དགེ་སློང་དག་གིས་

འདི་བཞིན་དུ་འཇིམ་པའི་རི་ལུ་དང་ཕོ་ལོང་གི་སྦྱོར་བ་བྱས་ཏེ་བརྩོན་པར་བྱོས་ཤིག །ནན་ཏན་དུ་བྱོས་ཤིག །འབད་པར་བྱོས་ཤིག །ཇི་ལྟར་ཆུ་བོ་བལ་གུ་མ་ཏིའི་འགྲམ་ན་དགེ་སློང་རྣམས་བརྩོན་པར་བྱས། ནན་ཏན་དུ་བྱས། འབད་པར་བྱས་པ་བཞིན་ནོ། །དགེ་སློང་དག་གིས་བརྩོན་འགྲུས་

མ་གཏང་ཤིག །དགེ་སློང་དག་གིས་བརྩོན་འགྲུས་བཏང་ན་འདས་པ་དང་བཅས་པར་འགྱུར་རོ། །སངས་རྒྱས་བཅོམ་ལྡན་འདས་གྲོང་ཀི་ཏ་ཞེས་བྱ་བའི་དྲུང་རི་ཀ་ཏའི་ནགས་སྟུག་པོ་ན་བཞུགས་སོ། །དེའི་ཚེ་རི་ཀ་ཏའི་དགེ་སློང་ཐ་སྐར་སྐྱེས་དང་ནབ་སོ་དང་། དགེ་སློང་དམར་སྐྱ་རྣམས་

གནས་ཏེ། དེ་དག་གིས་འདི་ལྟ་བུ་དང་། འདི་འདྲ་བར་འཐབ་པ་དང་། འཐབ་ཏུ་འཇུག་པ་དང་། ཆེད་དུ་ལྟར་འདོང་ཞིང་འཁོད་པ་དེ་འདི་ལྟ་སྟེ། བལ་གླང་འཐབ་པ་དང་། རྟ་འཐབ་པ་དང་། ཤིང་རྟ་འཐབ་པ་དང་། དཔུང་བུ་ཆུང་འཐབ་པ་དང་། དབྱུག་པས་འཐབ་པ་དང་། ཁུ་ཚུར་

གྱིས་འཐབ་པ་དང་། ཁྱུ་མཆོག་འཐབ་པ་དང་། མ་ཧེ་འཐབ་པ་དང་། ར་ཐུག་འཐབ་པ་དང་། ཐུག་རེ་འཐབ་པ་དང་། ཁྱི་འཐབ་པ་དང་། བྱ་འབར་ཏ་ཀ་འཐབ་པ་དང་། བྱ་ལ་བ་ཀ་འཐབ་པ་དང་། བྱ་གག་འཐབ་པ་དང་། བུད་མེད་སྟོབས་འགྱེད་པ་དང་། སྐྱེས་པ་སྟོབས་འགྱེད་པ་དང་།

Vol. 11 · folio 100a

གཞོན་ནུ་སྟོབས་འགྱེད་པ་དང་། གཞོན་ནུ་མ་རྣམས་སྟོབས་འགྱེད་དུ་འཇུག་པ་དང་། དད་པའི་བྲམ་ཟེ་དང་ཁྱིམ་བདག་དག་འཕྱ་ཞིང་སྨོད་དམ་ངན་དུ་ཟེར་ནས། འདི་ལྟར་དགེ་སློང་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་ཡང་བལ་གླང་འཐབ་པར་བྱེད་བྱེད་

དུ་འཇུག་པའི་དགེ་སྦྱོང་མགོ་རེག་འདི་ལ་ཅི་ཕྱིར་བསོད་སྙོམས་སྦྱིན་པ་དང་། མཆོད་པར་བྱ་སྙམ་དུ་སེམས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དང་ཁྱིམ་བདག་རྣམས་ནི་རིགས་པར་

འཕྱའོ། །དེ་ལྟ་བས་ན་དགེ་སློང་དག་གིས་བལ་གླང་ལ་སོགས་པ་འཐབ་ཏུ་མི་གཞུག །བལྟ་བར་ཡང་མི་བྱའོ། །དགེ་སློང་དག་གིས་བལ་གླང་ལ་སོགས་པ་འཐབ་པར་བྱེད་དམ་བྱེད་དུ་འཇུག་གམ། བལྟས་ན་འདས་པ་དང་བཅས་པར་འགྱུར་རོ།། །།མདོར་ན། བཙའ་ཞུགས་

པ་དང་དགེ་སློང་མས། །ཡོངས་སུ་དྲིས་པ་སྨྲས་པའོ། །ལས་རྣམས་དག་ཀྱང་བྱ་བ་སྟེ། །སླར་བབས་པ་ཡི་དགེ་སློང་མ། །སངས་རྒྱས་བཅོམ་ལྡན་འདས་སེར་སྐྱའི་གནས་ཤིང་ནྱ་གྲོ་དྷའི་ཀུན་དགའ་ར་བ་ན་བཞུགས་ཏེ། དེ་ནས་གཽ་ཏ་མཱི་སྐྱེ་དགུའི་བདག་མོ་ཆེན་མོ་ཤཱཀྱ་མོ་ལྔ་བརྒྱ་དང་ལྷན་

ཅིག་ཏུ་བཅོམ་ལྡན་འདས་གང་ན་བ་དེར་དོང་སྟེ་ཕྱིན་པ་དང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས། གཽ་ཏ་མཱི་སྐྱེ་དགུའི་བདག་མོ་ཆེན་མོ་ལ་བཅོམ་ལྡན་འདས་ཀྱིས་ཆོས་ཀྱི་གཏམ་ཡང་དག་པར་བསྟན།

ཡང་དག་པར་བསྐུལ། ཡང་དག་པར་གཟེངས་བསྟོད། ཡང་དག་པར་དགའ་བར་བྱས་སོ། །རྣམ་གྲངས་དུ་མར་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་བསྐུལ། ཡང་དག་པར་གཟེངས་བསྟོད། ཡང་དག་པར་དགའ་བར་བྱས་ཏེ་ཅང་མི་གསུང་བ་དང་། གཽ་ཏ་

མཱི་སྐྱེ་དགུའི་བདག་མོ་ཆེན་མོ་སྟན་ལས་ལངས་ཏེ་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་དེ་སྟེ་བུད་མེད་ཀྱིས་དགེ་སྦྱོང་གི་འབྲས་བུ་བཞི་འཐོབ་པའི་སྐབས་མཆིས་ན་བུད་མེད་རྣམས་ལེགས་པར་

Vol. 11 · folio 100b

བཤད་པའི་ཆོས་འདུལ་བ་ལ་རབ་ཏུ་བྱུང་སྟེ་བསྙེན་པར་རྫོགས་ནས་དགེ་སློང་མའི་དངོས་པོ་སྤྱོད་ཅིང་བུད་མེད་རྣམས་བཅོམ་ལྡན་འདས་ཀྱི་དྲུང་ན་ཚངས་པར་སྤྱད་པ་སྤྱོད་དུ་གསོལ་ཞེས་གསོལ་པ་དང་། བཅོམ་ལྡན་འདས་ཀྱིས་སྐྱེ་དགུའི་བདག་མོ་ཆེན་མོ་ལ་འདི་སྐད་ཅེས་བཀའ་སྩལ་

ཏོ། །གཽ་ཏ་མཱི་ཁྱོད་འདི་ལྟར་ཁྱིམ་མི་མོའི་གོས་དཀར་པོ་གྱོན་ལ་ནམ་འཚོའི་བར་དུ་དེ་འབའ་ཞིག་པ་ལ་ཡོངས་སུ་རྫོགས་པ། ཡོངས་སུ་དག་པ་ཡོངས་སུ་བྱང་བར་ཚངས་པར་སྤྱད་པ་སྤྱོད་ཅིག་དང་། ཁྱོད་ལ་ཡུན་རིང་པོའི་དོན་དང་། ཕན་པ་དང་། བདེ་བར་འགྱུར་རོ། །གཽ་ཏ་མཱི་སྐྱེ་

དགུའི་བདག་མོ་ཆེན་མོས་ལན་གཉིས་ལན་གསུམ་དུ་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་དེ་སྟེ་བུད་མེད་ཀྱིས་དགེ་སྦྱོང་གི་འབྲས་བུ་བཞི་འཐོབ་པའི་སྐབས་མཆིས་ན་བུད་མེད་རྣམས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་སྟེ་བསྙེན་པར་རྫོགས་ནས་

དགེ་སློང་མའི་དངོས་པོར་སྤྱོད་ཅིང་བུད་མེད་རྣམས་བཅོམ་ལྡན་འདས་ཀྱི་དྲུང་ན་ཚངས་པར་སྤྱད་པ་སྤྱོད་དུ་གསོལ་ཞེས་གསོལ་པ་དང་། བཅོམ་ལྡན་འདས་ཀྱིས་ལན་གཉིས་ལན་གསུམ་དུ་ཡང་གཽ་ཏ་མཱི་སྐྱེ་དགུའི་བདག་མོ་ཆེན་མོ་ལ་གཽ་ཏ་མཱི་ཁྱོད་འདི་ལྟར་ཁྱིམ་མི་མོའི་གོས་དཀར་པོ་གྱོན་ལ་

ནམ་འཚོའི་བར་དུ་དེ་འབའ་ཞིག་པ་ལ་ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བར་ཚངས་པར་སྤྱད་པ་སྤྱོད་ཅིག་དང་། ཁྱོད་ལ་ཡུན་རིང་པོའི་དོན་དང་། ཕན་པ་དང་བདེ་བར་འགྱུར་རོ། །ཞེས་བཀའ་སྩལ་པ་དང་། དེ་ནས་གཽ་ཏ་མཱི་སྐྱེ་དགུའི་བདག་མོ་ཆེན་མོ་

བཅོམ་ལྡན་འདས་ཀྱིས་ལན་གསུམ་དུ་མ་གནང་བ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་དྲུང་ནས་དོང་ངོ་། །དེ་ནས་བཅོམ་ལྡན་འདས་ཀྱིས་སེར་སྐྱའི་གནས་ན་ཇི་སྲིད་དགྱེས་ཀྱི་བར་དུ་བཞུགས་ནས་ལྷུང་བཟེད་དང་ཆོས་གོས་བསྣམས་

ཏེ། ཡུལ་ན་དི་ཀ་གང་ན་བ་དེར་རྒྱུ་ཞིང་གཤེགས་པ་དང་། གཽ་ཏ་མཱི་སྐྱེ་དགུའི་བདག་མོ་ཆེན་མོས་བཅོམ་ལྡན་འདས་སེར་སྐྱའི་གནས་ན་ཇི་སྲིད་དགྱེས་ཀྱི་བར་དུ་བཞུགས་ནས་ལྷུང་བཟེད་དང་ཆོས་གོས་བསྣམས་ཏེ། ཡུལ་ན་དི་ཀ་གང་ན་བ་དེར་རྒྱུ་ཞིང་གཤེགས་པར་ཐོས་སོ། །དེ་ལྟར་

Vol. 11 · folio 101a

ཐོས་པ་དང་ཤཱཀྱ་མོ་ལྔ་བརྒྱ་དང་ལྷན་ཅིག་ཏུ་རང་གིས་མགོ་བྲེགས་ཏེ་ཆོས་གོས་བགོས་སོ། །མགོ་བྲེགས་ཤིང་སྦྱར་མ་གྱོན་ཏེ་བཅོམ་ལྡན་འདས་ཀྱི་དགོངས་མལ་དུ་རྗེས་བཞིན་འབྲང་ཞིང་དོང་ངོ་། །དེ་ནས་བཅོམ་ལྡན་འདས་ཀྱི་ཡུལ་བྲྀ་ཛི་ནས་ལྗོངས་རྒྱུ་ཞིང་ན་དི་ཀར་བྱོན་ཏེ་

ན་དི་ཀའི་གུ་ཇིའི་གནས་ན་བཞུགས་སོ། །དེ་ནས་གཽ་ཏ་མཱི་སྐྱེ་དགུའི་བདག་མོ་ཆེན་མོ་ལུས་ངལ། ལུས་ཆད། ལུས་དུབ་སྟེ། རྡུལ་གྱིས་ལུས་ལ་ཕོག་བཞིན་དུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་

ཏུ་འཁོད་དོ། །ཕྱོགས་གཅིག་ཏུ་འཁོད་ནས་གཽ་ཏ་མཱི་སྐྱེ་དགུའི་བདག་མོ་ཆེན་མོ་ནི་བཅོམ་ལྡན་འདས་ཀྱིས་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་བསྐུལ། ཡང་དག་པར་གཟེངས་བསྟོད། ཡང་དག་པར་དགའ་བར་བྱས་ཏེ། རྣམ་གྲངས་དུ་མར་ཆོས་ཀྱི་གཏམ་ཡང་

དག་པར་བསྟན། ཡང་དག་པར་བསྐུལ། ཡང་དག་པར་གཟེངས་བསྟོད། ཡང་དག་པར་དགའ་བར་བྱས་ཏེ་ཅང་མི་གསུང་བར་བཞུགས་པ་དང་། གཽ་ཏ་མཱི་སྐྱེ་དགུའི་བདག་མོ་ཆེན་མོ་སྟན་ལས་ལངས་ཏེ། བཅོམ་ལྡན་འདས་གང་ན་བ་དེར་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་

འདས་ལ་འདི་སྐད་ཅེས་གསོལ་ཏོ། །བཙུན་པ་དེ་སྟེ་བུད་མེད་ཀྱིས་དགེ་སྦྱོང་གི་འབྲས་བུ་བཞི་འཐོབ་པའི་སྐབས་མཆིས་ན་བུད་མེད་རྣམས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་སྟེ། བསྙེན་པར་རྫོགས་ནས་དགེ་སློང་མའི་དངོས་པོ་སྤྱོད་ཅིང་བུད་མེད་རྣམས་བཅོམ་ལྡན་

འདས་ཀྱི་དྲུང་ན་ཚངས་པར་སྤྱད་པ་སྤྱོད་དུ་གསོལ་ཞེས་གསོལ་པ་དང་། བཅོམ་ལྡན་འདས་ཀྱིས་གཽ་ཏ་མཱི་སྐྱེ་དགུའི་བདག་མོ་ཆེན་མོ་ལ་གཽ་ཏ་མཱི་ཁྱོད་འདི་ལྟར་འདི་བཞིན་དུ་ནམ་འཚོའི་བར་དུ་མགོ་བྲེགས་ཏེ་སྦྱར་མ་གྱོན་ལ་ནམ་འཚོའི་བར་དུ་དེ་འབའ་ཞིག་ཡོངས་སུ་རྫོགས་པ། ཡོངས་

སུ་དག་པ་དང་། ཡོངས་སུ་བྱང་བར་ཚངས་པར་སྤྱད་པ་སྤྱོད་ཅིག་དང་། ཁྱོད་ལ་ཡུན་རིང་པོའི་དོན་དང་། ཕན་པ་དང་། བདེ་བར་འགྱུར་རོ་ཞེས་བཀའ་སྩལ་ཏོ། །གཽ་ཏ་མཱི་སྐྱེ་དགུའི་བདག་མོ་ཆེན་མོས་ལན་གཉིས་ལན་གསུམ་དུ་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །

Vol. 11 · folio 101b

བཙུན་པ་དེ་སྟེ་བུད་མེད་ཀྱིས་དགེ་སྦྱོང་གི་འབྲས་བུ་བཞི་འཐོབ་པའི་སྐབས་མཆིས་ན་བུད་མེད་རྣམས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ནས་དགེ་སློང་མའི་དངོས་པོར་སྤྱོད་ཅིང་། བུད་མེད་རྣམས་བཅོམ་ལྡན་འདས་ཀྱི་དྲུང་ན་ཚངས་པར་སྤྱད་

པ་སྤྱོད་དུ་གསོལ། ཞེས་དེ་སྐད་གསོལ་པ་དང་། བཅོམ་ལྡན་འདས་ཀྱིས་ལན་གཉིས་ལན་གསུམ་དུ་ཡང་གཽ་ཏ་མཱི་སྐྱེ་དགུའི་བདག་མོ་ཆེན་མོ་ལ་གཽ་ཏ་མཱི་ཁྱོད་ཀྱིས་འདི་ལྟར་འདི་བཞིན་དུ་ནམ་འཚོའི་བར་དུ་མགོ་བྲེགས་ཏེ་སྦྱར་མ་གྱོན་ལ་དེ་འབའ་ཞིག་ཡོངས་སུ་རྫོགས་པ་དང་། ཡོངས་སུ་དག་པ་དང་།

ཡོངས་སུ་བྱང་བར་ཚངས་པར་སྤྱད་པ་སྤྱོད་ཅིག་དང་། ཁྱོད་ལ་ཡུན་རིང་པོའི་དོན་དང་ཕན་པ་དང་བདེ་བར་འགྱུར་རོ། །གཽ་ཏ་མཱི་སྐྱེ་དགུའི་བདག་མོ་ཆེན་མོ་ལ་ལན་གཉིས་ལན་གསུམ་དུ་བཅོམ་ལྡན་འདས་ཀྱིས་མ་གནང་བ་དང་ཕྱི་རོལ་གྱི་སྒོ་ཁང་གི་ཕྱོགས་གཅིག་ཏུ་འདུག་སྟེ་ངུ་ཞིང་མཆི་མ་འབྱིན་ཏོ། །

ཚེ་དང་ལྡན་པ་ཀུན་དགའ་བོས་གཽ་ཏ་མཱི་སྐྱེ་དགུའི་བདག་མོ་ཆེན་མོ་ཕྱི་རོལ་གྱི་སྒོ་ཁང་གི་ཕྱོགས་གཅིག་ཏུ་འདུག་ནས་ངུ་ཞིང་མཆི་མ་བྱུང་བ་མཐོང་ངོ་། །དེ་ལྟར་མཐོང་བ་དང་། གཽ་ཏ་མཱི་སྐྱེ་དགུའི་བདག་མོ་ཆེན་མོ་ལ་གཽ་ཏ་མཱི་ཁྱོད་ཅིའི་ཕྱིར་ན་ཕྱི་རོལ་གྱི་སྒོ་ཁང་གི་ཕྱོགས་གཅིག་ཏུ་འདུག་ལ་ངུ་ཞིང་མཆི་མ་

འབྱིན་ཅེས་སྨྲས་པ་དང་། བཙུན་པ་ཀུན་དགའ་བོ་འདི་ལྟར་བུད་མེད་ཀྱིས་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་ནས་བསྙེན་པར་རྫོགས་ཏེ་དགེ་སློང་མའི་དངོས་པོར་མ་གནང་ངོ་། །གཽ་ཏ་མཱི་དེ་ལྟ་ན་སྡོད་ཅིག་དང་ངས་བཅོམ་ལྡན་འདས་ལ་གསོལ་ལོ། །དེ་ནས་ཚེ་དང་ལྡན་པ་

ཀུན་དགའ་བོས་བཅོམ་ལྡན་འདས་གང་ན་བ་དེར་སོང་སྟེ་དྲུང་དུ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་བཙུན་པ་དེ་སྟེ་བུད་མེད་དགེ་སྦྱོང་གི་

འབྲས་བུ་བཞི་འཐོབ་པའི་སྐབས་མཆིས་ན་བུད་མེད་དག་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ནས་དགེ་སློང་མའི་དངོས་པོར་སྤྱོད་ཅིང་། བཅོམ་ལྡན་འདས་ཀྱི་དྲུང་ན་བུད་མེད་རྣམས་ཚངས་པར་སྤྱད་པ་སྤྱོད་དུ་གསོལ་ཞེས་དེ་སྐད་གསོལ་པ་དང་། ཀུན་

Vol. 11 · folio 102a

དགའ་བོ་ཁྱོད་བུད་མེད་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ཏེ་དགེ་སློང་མའི་དངོས་པོར་མ་གསོལ་ཅིག །དེ་ཅིའི་ཕྱིར་ཞེ་ན། ཀུན་དགའ་བོ་ལེགས་པར་བཤད་པའི་ཆོས་འདུལ་བ་ལ་བུད་མེད་རབ་ཏུ་ཕྱུང་ན་ཆོས་འདུལ་བ་དེ་

ཡུན་རིང་དུ་གནས་པར་མི་འགྱུར་རོ། །དེ་འདི་ལྟ་སྟེ་ཀུན་དགའ་བོ་དཔེར་ན་ཁྱིམ་གང་ན་བུད་མེད་མང་ཞིང་སྐྱེས་པ་ཉུང་བ་དེ་ན་རྐུན་པོ་དང་མི་ལ་རྐུ་བ་རྣམས་ཀྱིས་ཆོམས་པར་འགྱུར་ཞིང་རབ་ཏུ་ཆོམས་པར་འགྱུར་རོ། །ཀུན་དགའ་བོ་དེ་བཞིན་དུ་ཆོས་འདུལ་བ་ལ་བུད་མེད་རབ་ཏུ་ཕྱུང་ན་ཆོས་

འདུལ་བ་དེ་ཡུན་རིང་དུ་གནས་པར་མི་འགྱུར་རོ། །འདི་ལྟ་སྟེ། ཀུན་དགའ་བོ་དཔེར་ན། འབྲས་སཱ་ལུ་ཕུན་སུམ་ཚོགས་པའི་ཞིང་ལ་སེར་བའི་འཁོར་ལོ་མི་བཟད་པ་བབས་ན། འབྲས་སཱ་ལུ་དེ་ཉིད་ཉམས་པར་འགྱུར། རྣམ་པར་ཉམས་པར་འགྱུར། ཚུལ་མ་ཡིན་པས་མ་རུང་

བར་འགྱུར་རོ། །ཀུན་དགའ་བོ་དེ་བཞིན་དུ་ཆོས་འདུལ་བ་ལ་བུད་མེད་རབ་ཏུ་བྱུང་ན། ཆོས་འདུལ་བ་འདི་ཡུན་རིང་དུ་མི་གནས་པར་འགྱུར་རོ། །འདི་ལྟ་སྟེ་ཀུན་དགའ་བོ་ཞིང་རྨེད་པའི་ཁྱིམ་བདག་བུ་རམ་ཤིང་ཕུན་སུམ་ཚོགས་པ་ལ་བཙའི་ནད་བྱུང་ན་བུ་རམ་ཤིང་དག་མ་རུང་བར་འགྱུར། ཆུད་

ཟོས་པར་འགྱུར་རོ། །ཀུན་དགའ་བོ་དེ་ལྟར་དེ་བཞིན་དུ་ཆོས་འདུལ་བ་ལ་བུད་མེད་རབ་ཏུ་བྱུང་ན་ཆོས་འདུལ་བ་འདི་ཡུན་རིང་དུ་གནས་པར་མི་འགྱུར་རོ། །འོན་ཀྱང་ཀུན་དགའ་བོ་ངས་བུད་མེད་རྣམས་ལ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་བརྒྱད་བཅས་པ་ལ་བུད་མེད་ཀྱིས་ནམ་

འཚོའི་བར་དུ་བསླབ་པར་བྱའོ། །དེ་འདི་ལྟ་སྟེ་ཀུན་དགའ་བོ་ཁྱིམ་བདག་ཞིང་པས་དབྱར་འདས་ཏེ་སྟོན་ཀྱི་དུས་ན་ཆུ་བོའམ་ཡུར་བ་ཡང་རུང་ཆུ་བཅད་ན་ཆུ་དེ་བགགས་པས་འདའ་བར་མི་འགྱུར་རོ། །ཀུན་དགའ་བོ་དེ་ལྟར་དེ་བཞིན་དུ་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་

བླ་མའི་ཆོས་བརྒྱད་བཅའ་བར་བྱའོ། །དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་གྱིས་ཤིག །བརྒྱད་གང་ཞེ་ན། ཀུན་དགའ་བོ་དགེ་སློང་རྣམས་ལས་བུད་མེད་རྣམས་ཀྱིས་རབ་ཏུ་འབྱུང་བ་དང་བསྙེན་པར་རྫོགས་ནས་དགེ་སློང་མའི་དངོས་པོར་འགྱུར་བ་རབ་ཏུ་རྟོགས་པར་

Vol. 11 · folio 102b

བྱའོ། །ཀུན་དགའ་བོ་ངས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་དང་པོར་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །ཀུན་དགའ་བོ་དགེ་སློང་མ་དག་གིས་དགེ་སློང་ཕ་རྣམས་ལ་ཟླ་བ་ཕྱེད་ཕྱེད་ཅིང་སྟོན་པའི་ལུང་རྗེས་སུ་

བསྟན་པ་བཙལ་བར་བྱའོ། །ཀུན་དགའ་བོ་ངས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་གཉིས་སུ་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །ཀུན་དགའ་བོ་དགེ་སློང་མ་དག་གིས་དགེ་སློང་ཕ་མེད་པའི་གནས་སུ་དབྱར་

ཚུལ་དུ་མི་འཇུག་པར་བྱ་སྟེ། ཀུན་དགའ་བོ་ངས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་གསུམ་དུ་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །ཀུན་དགའ་བོ་དགེ་སློང་མ་དབྱར་ཚུལ་དུ་ཞུགས་པས་དགེ་འདུན་

གཉིས་ཀ་ལ་མཐོང་བ་དང་ཐོས་པ་དང་དོགས་པའི་གནས་གསུམ་དུ་སྐབས་དབྱེ་བར་བྱ་སྟེ། ཀུན་དགའ་བོ་ངས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་བཞིར་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །ཀུན་དགའ་བོ་དགེ་

སློང་མས་དགེ་སློང་ཕ་ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པ་ལ་གླེང་བར་མི་བྱ་དྲན་པར་མི་བྱ་སྟེ། ཀུན་དགའ་བོ་དགེ་སློང་མས་དགེ་སློང་ཕ་ལ་ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་

ཉམས་པ་རྣམས་གླེང་བ་དང་། དྲན་པར་བྱེད་པ་དག་མི་གནང་ངོ་། །དགེ་སློང་དག་གིས་ནི་དགེ་སློང་མ་ལ་ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པ་ལ་གླེང་བ་དང་། དྲན་པར་བྱེད་པ་ལ་དགག་པ་མེད་དེ། ཀུན་དགའ་བོ་ངས་འདི་ནི་བུད་མེད་

རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་ལྔར་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །ཀུན་དགའ་བོ་དགེ་སློང་མས་དགེ་སློང་ཕ་ལ་ཚིག་ངན་པ་མི་སྨྲ། ཁྲོ་བར་མི་བྱ། བསྡིགས་པར་མི་བྱའོ། །ཀུན་དགའ་བོ་དགེ་སློང་མས་དགེ་

Vol. 11 · folio 103a

སློང་ལ་ཚིག་ངན་པ་སྨྲ་བ་དང་། ཁྲོ་བ་དང་། བསྡིགས་པ་རྣམས་མི་གནང་སྟེ། ཀུན་དགའ་བོ་ངས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་དྲུག་པར་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །ཀུན་

དགའ་བོ་བླ་མའི་ཆོས་ཉམས་ན་དགེ་སློང་མས་དགེ་འདུན་གཉི་ག་ལ་ཟླ་བ་ཕྱེད་ཀྱི་བར་དུ་མཉེས་པར་བྱ་བ་སྤྱོད་ཅིག །ཀུན་དགའ་བོ་ངས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་བདུན་དུ་བཅས་ཏེ། དེ་ལ་ཀུན་དགའ་བོ་བུད་མེད་རྣམས་ཀྱིས་ནམ་འཚོའི་

བར་དུ་བསླབ་པར་བྱའོ། །ཀུན་དགའ་བོ་དགེ་སློང་མ་བསྙེན་པར་རྫོགས་ནས་ལོ་བརྒྱ་ལོན་པས་ད་གཟོད་བསྙེན་པར་རྫོགས་པའི་དགེ་སློང་ལ་ཚིག་སྙན་པ་དང་། བསྟོད་པ་དང་ལྡང་བ་དང་། ཐལ་མོ་སྦྱར་བ་དང་། ཕྱག་བྱ་བ་བྱ་སྟེ། ཀུན་དགའ་བོ་ངས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་

མི་འདའ་བར་བྱ་བའི་ཕྱིར་བླ་མའི་ཆོས་བརྒྱད་དུ་བཅས་ཏེ། འདི་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །ཀུན་དགའ་བོ་དེ་སྟེ་གཽ་ཏ་མཱི་སྐྱེ་དགུའི་བདག་མོ་ཆེན་མོས་བླ་མའི་ཆོས་འདི་བརྒྱད་ལ་ཡང་དག་པར་བཟུང་ཞིང་ནན་ཏན་དུ་བྱས་ན་འདི་ཉིད་དེ་ལ་རབ་ཏུ་བྱུང་བའོ། །དེ་ཉིད་བསྙེན་

པར་རྫོགས་པའོ། །དེ་ཉིད་ཉེས་པའི་དངོས་པོ་ཞེས་བཀའ་སྩལ་པ་དང་། དེ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་དྲུང་ནས་སོང་ངོ་། །གཽ་ཏ་

མཱི་སྐྱེ་དགུའི་བདག་མོ་ཆེན་མོ་ག་ལ་བ་དེར་དོང་སྟེ་ཕྱིན་པ་དང་། གཽ་ཏ་མཱི་སྐྱེ་དགུའི་བདག་མོ་ཆེན་མོ་ལ་འདི་སྐད་ཅེས་སྨྲས་སོ། །གཽ་ཏ་མཱི་བུད་མེད་རྣམས་ཀྱིས་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་ནས་བསྙེན་པར་རྫོགས་ཏེ་དགེ་སློང་མའི་དངོས་པོར་ནི་གནང་མོད་ཀྱི་འོན་ཀྱང་གཽ་ཏ་མཱི་

བཅོམ་ལྡན་འདས་ཀྱི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་བརྒྱད་བཅས་ཏེ། འདི་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །ནན་ཏན་དུ་བྱའོ། །བཙུན་པ་ཀུན་དགའ་བོ་བཀའ་སྩལ་པ་དེ་ཉན་ཀྱིས་གསུང་ཤིག །གཽ་ཏ་མཱི་བཅོམ་ལྡན་

Vol. 11 · folio 103b

འདས་ཀྱིས་ནི་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་དགེ་སློང་ལས་བུད་མེད་རྣམས་ཀྱིས་རབ་ཏུ་འབྱུང་བ་དང་བསྙེན་པར་རྫོགས་ཏེ་དགེ་སློང་མའི་དངོས་པོར་རབ་ཏུ་རྟོགས་པར་བྱའོ། །གཽ་ཏ་མཱི་བཅོམ་ལྡན་འདས་ཀྱིས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་

བླ་མའི་ཆོས་བཅས་པ་དང་པོ་སྟེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །གཽ་ཏ་མཱི་བཅོམ་ལྡན་འདས་ཀྱིས་ཡང་བཀའ་སྩལ་པ། ཀུན་དགའ་བོ་དགེ་སློང་རྣམས་ཀྱི་དྲུང་ན་དགེ་སློང་མས་ཟླ་བ་ཕྱེད་ཕྱེད་ཅིང་སྟོན་པའི་ལུང་རྗེས་སུ་བསྟན་པ་བཙལ་བར་བྱའོ། །གཽ་ཏ་མཱི་

བཅོམ་ལྡན་འདས་ཀྱིས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་གཉིས་སུ་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །གཽ་ཏ་མཱི་བཅོམ་ལྡན་འདས་ཀྱིས་ཡང་བཀའ་སྩལ་པ། ཀུན་དགའ་བོ་དགེ་སློང་མས་དགེ་སློང་མེད་པའི་

གནས་སུ་དབྱར་ཚུལ་དུ་མ་འཇུག་ཅིག །གཽ་ཏ་མཱི་བཅོམ་ལྡན་འདས་ཀྱིས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་གསུམ་དུ་བཅས་ཏེ། འདི་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །གཽ་ཏ་མཱི་བཅོམ་ལྡན་འདས་ཀྱིས་ཡང་བཀའ་སྩལ་པ།

ཀུན་དགའ་བོ་དབྱར་ཚུལ་དུ་ཞུགས་པའི་དགེ་སློང་མས་དགེ་འདུན་གཉིས་ཀ་ལ་མཐོང་བ་དང་། ཐོས་པ་དང་། དོགས་པའི་གནས་གསུམ་དུ་སྐབས་དབྱེ་བར་བྱའོ། །གཽ་ཏ་མཱི་བཅོམ་ལྡན་འདས་ཀྱིས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་བཞིར་བཅས་ཏེ།

འདི་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །གཽ་ཏ་མཱི་བཅོམ་ལྡན་འདས་ཀྱིས་ཡང་འདི་སྐད་གསུངས་སོ། །ཀུན་དགའ་བོ་དགེ་སློང་མས་དགེ་སློང་ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པ་ལ་གླེང་བར་མི་བྱ། དྲན་

པར་མི་བྱའོ། །ཀུན་དགའ་བོ་དགེ་སློང་མས་དགེ་སློང་ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པ་ལ་གླེང་བར་བྱ་བ་དང་། དྲན་པར་བྱ་བ་མི་གནང་ངོ་། ཀུན་དགའ་བོ་དགེ་སློང་གིས་ནི་དགེ་སློང་མ་ཚུལ་ཁྲིམས་ཉམས་པ་དང་། ལྟ་བ་ཉམས་

Vol. 11 · folio 104a

པ་དང་། སྤྱོད་པ་ཉམས་པ་དང་། འཚོ་བ་ཉམས་པ་ལ་གླེང་བར་བྱེད། དྲན་པར་བྱེད་པ་ལ་མི་གནང་བ་མེད་དོ། །གཽ་ཏ་མཱི་བཅོམ་ལྡན་འདས་ཀྱིས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་ལྔ་པར་བཅས་ཏེ་འདི་ལ་བུད་མེད་རྣམས་ཀྱིས་ནམ་

འཚོའི་བར་དུ་བསླབ་པར་བྱའོ། །གཽ་ཏ་མཱི་བཅོམ་ལྡན་འདས་ཀྱིས་ཡང་བཀའ་སྩལ་པ། ཀུན་དགའ་བོ་དགེ་སློང་མས་དགེ་སློང་ལ་ཚིག་ངན་པ་སྨྲ་བར་མི་བྱའོ། །ཁྲོ་བར་མི་བྱ། བསྡིགས་པར་མི་བྱའོ། །ཀུན་དགའ་བོ་དགེ་སློང་མས་དགེ་སློང་ལ་ཚིག་ངན་པ་སྨྲ་བ་དང་། ཁྲོ་བ་དང་། བསྡིགས་

པ་རྣམས་མི་གནང་སྟེ། གཽ་ཏ་མཱི་བཅོམ་ལྡན་འདས་ཀྱིས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་དྲུག་པར་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །གཽ་ཏ་མཱི་ཡང་བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་

བོ་བླ་མའི་ཆོས་བྱུང་བའི་དགེ་སློང་མས་དགེ་འདུན་སྡེ་གཉིས་ལ་ཟླ་བ་ཕྱེད་ཕྱེད་ཀྱི་བར་དུ་མཉེས་པར་སྤྱོད་དོ། །གཽ་ཏ་མཱི་བཅོམ་ལྡན་འདས་ཀྱིས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་བདུན་དུ་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་

པར་བྱའོ། །གཽ་ཏ་མཱི་བཅོམ་ལྡན་འདས་ཀྱིས་ཡང་བཀའ་སྩལ་པ། བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་མས་ད་གཟོད་བསྙེན་པར་རྫོགས་པའི་དགེ་སློང་ལ་ཚིག་སྙན་པ་དང་། བསྟོད་པ་དང་ལྡང་བ་དང་། ཐལ་མོ་སྦྱར་བ་དང་། ཕྱག་བྱ་བར་བྱའོ། །གཽ་ཏ་མཱི་བཅོམ་

ལྡན་འདས་ཀྱིས་འདི་ནི་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་བརྒྱད་དུ་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བྱའོ། །བཅོམ་ལྡན་འདས་ཀྱིས་ཡང་བཀའ་སྩལ་པ། ཀུན་དགའ་བོ་དེ་སྟེ་གཽ་ཏ་མཱི་སྐྱེ་དགུའི་བདག་མོ་

ཆེན་མོ་བླ་མའི་ཆོས་འདི་བརྒྱད་ཡང་དག་པར་བཟུང་ཞིང་ནན་ཏན་བྱས་ན་དེ་ལ་འདི་ཉིད་དེའི་རབ་ཏུ་བྱུང་བའོ། །འདི་ནི་བསྙེན་པར་རྫོགས་པའོ། །འདི་ནི་དགེ་སློང་མའི་དངོས་པོ་ཡིན་ནོ་ཞེས་བཀའ་སྩལ་ཏོ། །བཙུན་པ་ཀུན་དགའ་བོ་བཅོམ་ལྡན་འདས་ཀྱིས་བུད་མེད་རྣམས་ཀྱི་ཉེས་པ་དགག་

Vol. 11 · folio 104b

ཅིང་མི་འདའ་བར་བྱ་བའི་ཕྱིར་བླ་མའི་ཆོས་བརྒྱད་འདི་རྣམས་བཅས་ཏེ། དེ་ལ་བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བགྱི་བ་འདི་ནི་བདག་གིས་ངག་དང་། ཡིད་དང་། སྤྱི་བོས་ཀྱང་མནོད་དོ། །བཙུན་པ་ཀུན་དགའ་བོ་དེ་འདི་ལྟ་སྟེ། རྒྱལ་རིགས་ཀྱི་བུ་མོའམ། བྲམ་ཟེའི་བུ་མོའམ།

རྗེའུ་རིགས་ཀྱི་བུ་མོའམ། དམངས་རིགས་ཀྱི་བུ་མོ་ཡང་རུང་རབ་ཏུ་བཀྲུས་པ། རབ་ཏུ་བྱུགས་པ། སྐྲ་དང་སེན་མོ་བྱད་བྱས་པ། གོས་དཀར་པོ་བགོས་པ་ལ་ཁ་ཅིག་གིས་མེ་ཏོག་ཨུཏྤ་ལའི་ཕྲེང་བའམ། ཙམ་པ་ཀའི་ཕྲེང་བ་དང་། བ་རི་ཤི་ཀའི་ཕྲེང་བ་དང་། ཨ་ཏི་མུག་ཏིའི་ཕྲེང་བ་ཡང་།

རུང་བ་བྱིན་ན་དེས་དེ་ལ་ཡིད་དགའ་རངས་ཏེ་ལག་པ་གཉིས་ཀྱིས་བླངས་ནས་ཡན་ལག་གི་མཆོག་མགོ་བོ་ལ་འཇོག་གོ། །བཙུན་པ་ཀུན་དགའ་བོ་དེ་བཞིན་དུ་བཅོམ་ལྡན་འདས་ཀྱིས་བུད་མེད་རྣམས་ཀྱི་ཉེས་པ་དགག་ཅིང་མི་འདའ་བར་བྱ་བའི་ཕྱིར་བླ་མའི་ཆོས་བརྒྱད་པོ་འདི་རྣམས་བཅས་ཏེ། དེ་ལ་

བུད་མེད་རྣམས་ཀྱིས་ནམ་འཚོའི་བར་དུ་བསླབ་པར་བགྱི་བ་འདི་དག་ནི་བདག་གིས་ངག་དང་། ཡིད་དང་། སྤྱི་བོས་ཀྱང་མནོད་དེ། བཅོམ་ལྡན་འདས་ཀྱིས་ནམ་གཽ་ཏ་མཱི་སྐྱེ་དགུའི་བདག་མོ་ཆེན་མོས་བླ་མའི་ཆོས་རྣམས་ཉམས་སུ་བླངས་པས་ན་རབ་ཏུ་བྱུང་ཞིང་བསྙེན་པར་རྫོགས་པའི་དགེ་སློང་

མའི་དངོས་པོར་གནང་བ་དེ་ན་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་བཙུན་པ་བཅོམ་ལྡན་འདས་ཀྱིས་ནི་དེ་སྟེ་གཽ་ཏ་མཱི་སྐྱེ་དགུའི་བདག་མོ་ཆེན་མོས་བླ་མའི་ཆོས་བརྒྱད་ཡང་དག་པར་བཟུང་ནས་ནན་ཏན་བྱས་ན་དེ་ལ་འདི་ཉིད་རབ་ཏུ་བྱུང་བའོ། །འདི་ཉིད་བསྙེན་པར་རྫོགས་པའོ། །

འདི་ཉིད་དགེ་སློང་མའི་དངོས་པོའོ་ཞེས་བཀའ་སྩལ་ན། བཙུན་པ་དེ་ལས་གཞན་པའི་བུད་མེད་རྣམས་ཇི་ལྟར་རབ་ཏུ་བྱུང་ཞིང་བསྙེན་པར་རྫོགས་ནས་དགེ་སློང་མའི་དངོས་པོར་བགྱི་ཞེས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཨུ་པཱ་ལི་བུད་མེད་གཞན་ནི་རིམ་བཞིན་

དུ་རབ་ཏུ་དབྱུང་ཞིང་བསྙེན་པར་རྫོགས་པར་བྱའོ། །བཅོམ་ལྡན་འདས་ཀྱིས་བུད་མེད་གཞན་ནི་རིམ་བཞིན་དུ་རབ་ཏུ་དབྱུང་ཞིང་བསྙེན་པར་རྫོགས་པར་བྱོས་ཤིག་ཅེས་བཀའ་སྩལ་ན་དགེ་སློང་དག་གིས་ཇི་ལྟ་བུ་རིམ་བཞིན་དུ་བྱ་བ་མི་ཤེས་ནས་དེ་ལྟ་བུར་གྱུར་པ་དགེ་སློང་དག་གིས་བཅོམ་ལྡན་

Vol. 11 · folio 105a

འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གཽ་ཏ་མཱི་སྐྱེ་དགུའི་བདག་མོ་ཆེན་མོ་ལ་སོགས་པ་ཤཱཀྱ་མོ་ལྔ་བརྒྱ་རྣམས་ནི་བླ་མའི་ཆོས་རྣམས་ཁས་བླངས་པས་རབ་ཏུ་བྱུང་ཞིང་བསྙེན་པར་རྫོགས་ཏེ་དགེ་སློང་མའི་དངོས་པོར་གྱུར་ཏོ། །བུད་མེད་གཞན་ནི་

རིམ་བཞིན་བྱས་ཏེ་དགེ་སློང་མ་གང་ལ་ཡང་རུང་རབ་ཏུ་འབྱུང་བར་འདོད་པ་ཞིག་གི་དྲུང་དུ་འོངས་ནས་དེས་བར་ཆད་ཀྱི་ཆོས་རྣམས་དྲིས་ལ་གཟུང་བར་བྱའོ། །བཟུང་ནས་སྐྱབས་གསུམ་དང་། དགེ་བསྙེན་མའི་བསླབ་པའི་གཞི་ལྔ་བྱིན་ཅིག །སྐྱབས་གསུམ་གང་ཞེ་ན། སངས་རྒྱས་དང་།

ཆོས་དང་། དགེ་འདུན་ནོ། །བསླབ་པའི་གཞི་ལྔ་གང་ཞེ་ན། སྲོག་གཅོད་པ་རབ་ཏུ་སྤངས་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཆང་དང་འབྲུའི་ཁུ་བ་མྱོས་པར་འགྱུར་བ་བག་མེད་པའི་གནས་རབ་ཏུ་སྤངས་ཤིང་ཆང་དང་འབྲུའི་ཁུ་བ་

མྱོས་པ་བག་མེད་པའི་གནས་ལས་རབ་ཏུ་སྤངས་པ་དེ་ལྟར་འདི་བཞིན་དུ་བདག་མིང་འདི་ཞེས་བགྱི་བ་ཡང་དེང་གི་ཉིན་པར་ནས་ནམ་འཚོའི་བར་དུ་མ་བྱིན་པར་ལེན་པ་དང་། འདོད་པས་ལོག་པར་སྤྱོད་པ་དང་། བརྫུན་དུ་སྨྲ་བ་དང་། ཆང་དང་འབྲུའི་ཁུ་བ་མྱོས་པར་འགྱུར་བ་བག་མེད་པའི་གནས་

རབ་ཏུ་སྤངས་པའོ། །འདི་བཞིན་དུ་ཡང་སྐྱབས་སུ་འགྲོ་བ་དང་། བསླབ་པའི་གཞི་སྦྱིན་པར་བྱའོ། །ཐོག་མར་སྟོན་པ་ལ་ཕྱག་བྱེད་དུ་ཆུག་ཤིག །དེ་ནས་དགེ་སློང་མ་གང་གིས་སྐྱབས་སུ་འགྲོ་བ་དང་བསླབ་པའི་གཞི་སྦྱིན་པ་དེ་ལ་ཕྱག་འཚལ་ཞིང་ཐལ་མོ་སྦྱོར་དུ་ཆུག་ལ། དེ་ནས་དེས་འདི་

སྐད་དུ་སྨྲ་བར་བྱའོ། །འཕགས་མ་དགོངས་ཤིག །བདག་མིང་འདི་ཞེས་བགྱི་བ་ནམ་འཚོའི་བར་དུ་རྐང་པ་གཉིས་ཀྱི་ནང་ན་གཙོ་བོ་སངས་རྒྱས་ལ་སྐྱབས་སུ་འཆིའོ། །འདོད་ཆགས་དང་བྲལ་བའི་ནང་ན་མཆོག་དམ་པའི་ཆོས་ལ་སྐྱབས་སུ་མཆིའོ། །མང་པོའི་ནང་ན་མཆོག་དགེ་འདུན་ལ་

སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་བསྙེན་མར་འཕགས་པས་གཟུང་དུ་གསོལ། དེ་བཞིན་ལན་གཉིས་ལན་གསུམ་དུ་བྱའོ། །དེ་ནས་བསླབ་པའི་གཞི་ལྔ་བྱིན་ཅིག །འཕགས་མ་དགོངས་ཤིག །ཇི་ལྟར་འཕགས་པ་དགྲ་བཅོམ་པ་དེ་དག་གིས་ནམ་འཚོའི་བར་དུ་སྲོག་

Vol. 11 · folio 105b

གཅོད་པ་སྤངས་ཤིང་སྲོག་གཅོད་པ་ལས་རབ་ཏུ་སྤངས་པ་དེ་བཞིན་དུ་བདག་མིང་འདི་ཞེས་བགྱི་བ་ཡང་དེང་གི་ཉིན་པར་ནས་བཟུང་སྟེ། ནམ་འཚོའི་བར་དུ་སྲོག་གཅོད་པ་སྤངས་ཤིང་སྲོག་གཅོད་པ་ལས་རབ་ཏུ་སྤངས་ཏེ་ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པའི་

རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །གཞན་ཡང་ཇི་ལྟར་དགྲ་བཅོམ་པ་དེ་དག་གིས་ནམ་འཚོའི་བར་དུ་མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཆང་དང་། འབྲུའི་ཁུ་བ་མྱོས་པ་བག་མེད་པའི་གནས་སྤངས་ཤིང་རབ་ཏུ་

སྤངས་པ་དེ་བཞིན་དུ་བདག་མིང་འདི་ཞེས་བགྱི་བ་ཡང་དེང་གི་ཉི་གཉིས་ནས་བཟུང་སྟེ། ནམ་འཚོའི་བར་དུ་མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། བག་མེད་པའི་གནས་སྤངས་ཤིང་། ཆང་དང་འབྲུའི་ཁུ་བ་མྱོས་པ་བག་མེད་པའི་གནས་ནས་

སླར་ལོག་སྟེ། བདག་ཡན་ལག་ལྔ་པོ་འདིས་འཕགས་པ་དགྲ་བཅོམ་པ་དེ་དག་གི་བསླབ་པའི་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །སློབ་དཔོན་མས་ཐབས་ཡིན་ནོ། །ཞེས་བརྗོད་པར་བྱའོ། །དགེ་བསྙེན་མས་ལེགས་སོ་ཞེས་བརྗོད་པར་བྱའོ། །དེ་ནས་དགེ་འདུན་གྱི་ནང་

དུ་སྒྲོགས་པའི་དགེ་སློང་མ་སྐོས་ཤིག །གང་བསྐོས་པ་དེས་ཀྱང་དགེ་སློང་མ་དེ་ལ་ཁྱོད་ཀྱིས་འདི་ལ་བར་ཆད་ཀྱི་ཆོས་དྲིས་སམ་ཞེས་དྲིས་ཤིག །མ་དྲིས་པར་བསྒྲག་པར་བྱས་ན་འདས་པ་དང་བཅས་པར་འགྱུར་རོ། །དེ་ནས་དགེ་སློང་མ་དེས་དགེ་འདུན་འདུས་ཤིང་འཁོད་དམ། སོ་སོའི་གནས་

ཁང་དུ་ཡང་རུང་འདི་སྐད་དུ་སྒྲོགས་ཤིག །གསོན་ཅིག་འཕགས་པའི་དགེ་འདུན་མ་རྣམས་མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་བགྱི་བ་ལས་རབ་ཏུ་བྱུང་བར་འཚལ་ཏེ། ཁྱིམ་པ་མོ་གོས་དཀར་པོ་སྐྲ་མ་བྲེགས་པ་ལས་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་

པར་རྫོགས་ཏེ་དགེ་སློང་མའི་དངོས་པོར་གསོལ་ན། མིང་འདི་ཞེས་བགྱི་བ་འདི་སྐྲ་བྲེགས་ཤིང་གོས་ངུར་སྨྲིག་བགོས་ནས་ཡང་དག་པར་དད་པས་ཁྱིམ་ནས་ཁྱིམ་མེད་པར་མཁན་མོ་མིང་འདི་ཞེས་བགྱི་བ་ལས་རབ་ཏུ་འབྱུང་ན། དེ་ཡང་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་མོ་ཉིད་མཆི་ན་ཅི་

Vol. 11 · folio 106a

རབ་ཏུ་བྱུང་ཤིག་གམ། ཐམས་ཅད་ཀྱིས་ཀྱང་དེ་སྟེ་ཡོངས་སུ་དག་ནའོ་ཞེས་སྨྲོས་ཤིག །དེ་སྟེ་འདི་བཞིན་སྨྲ་ན་ནི་ལེགས། འོན་ཏེ་མ་སྨྲས་ན་འདས་པ་དང་བཅས་པར་འགྱུར་རོ། །དེ་ནས་མཁན་མོར་གསོལ་བ་བྱ་སྟེ། སློབ་དཔོན་མ་དགོངས་ཤིག །བདག་མིང་འདི་ཞེས་བགྱི་བ་

སློབ་དཔོན་མ་ལ་མཁན་མོར་གསོལ་ཏེ། སློབ་དཔོན་མ་བདག་གི་མཁན་མོར་གྱུར་ཅིག །སློབ་དཔོན་མ་མཁན་མོ་ལས་རབ་ཏུ་དབྱུང་བར་གསོལ་ལོ། །དེ་བཞིན་དུ་ལན་གཉིས་ལན་གསུམ་དུ་བཟླས། ཚིག་གསུམ་པ་ལ་མཁན་མོ་མཁན་མོ་ལས་ཞེས་བརྗོད་པར་བྱའོ། །མཁན་མོས་ཐབས་ཡིན་ཞེས་

བརྗོད། རབ་ཏུ་བྱུང་མས་ལེགས་སོ་ཞེས་བརྗོད་པར་བྱའོ། །དེ་ནས་མཁན་མོས་འབྲེག་པའི་དགེ་སློང་མ་ལ་སྐྲ་བྲེག་པར་གསོལ་ཅིག །དེས་ཀྱང་ནུ་མོ་སྐྲ་བྲེག་གམ་ཞེས་དྲིས་ཤིག །དེ་སྟེ་བྲེག་གོ་ཞེས་སྨྲ་ན་བྲེག །དེ་སྟེ་མ་ཡིན་ནོ་ཞེས་སྨྲ་ན་འདི་ནས་སོང་ཞེས་སྨྲོས་ཤིག །དགེ་སློང་དག་གིས་

སྐྲ་འབྲེག་པའི་དགེ་སློང་མས་དེ་ལྟར་མངོན་དུ་སྤྱད་པའི་ཆོས་བཅས་ཏེ། སྐྲ་འབྲེག་པའི་དགེ་སློང་མས་འདི་ལྟར་གྲང་བར་གྱུར་ན་ཆུ་དྲོན་པོས་ཁྲུས་བྱའོ། །འོན་ཏེ་ཚ་བར་གྱུར་པའི་ཚེ་ན་ཆུ་གྲང་མོས་ཁྲུས་བྱའོ། །དེ་ནས་སྐད་ཅིག་གཅིག་ལ་ལུས་ཀྱི་ཆུ་བསྐམས་ཏེ་ཤམ་ཐབས་གྱོན་ཅིག །ཤམ་

ཐབས་བསྐོན་པ་ན་མཚན་མ་མེད་པའམ། མཚན་གཉིས་པའམ། གླེ་འདམས་པ་མ་ཡིན་ནམ་ཞེས་མོ་མཚན་བརྟག་པར་བྱའོ། །སྐྲ་འབྲེག་པའི་དགེ་སློང་མས་དེ་ལྟར་མངོན་དུ་སྤྱད་པའི་ཆོས་བཅས་པ་ཡང་དག་པར་བླངས་ཏེ་མི་སྤྱོད་ན་འདས་པ་དང་བཅས་པར་འགྱུར་རོ། །དེ་ནས་རབ་ཏུ་

བྱུང་བ་ཉེ་བར་བསྒྲུབ་པར་བྱ་སྟེ། དང་པོ་སྟོན་པ་ལ་ཕྱག་འཚལ་དུ་བཅུག །དེའི་འོག་ཏུ་མཁན་མོ་ལ་འཚལ་དུ་བཅུག་སྟེ། མདུན་དུ་ཙོག་པུར་འདུག་ཏུ་བཅུག་ལ་ཐལ་མོ་སྦྱོར་དུ་བཅུག་ནས་དེ་ནས་དེས་འདི་སྐད་དུ་སྨྲ་བར་བྱའོ། །མཁན་མོ་དགོངས་ཤིག །བདག་མིང་འདི་ཞེས་བགྱི་བ་

ནམ་འཚོའི་བར་དུ། རྐང་གཉིས་ཀྱི་ནང་ན་གཙོ་བོ་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བའི་ནང་ན་དམ་པའི་ཆོས་ལ་སྐྱབས་སུ་མཆིའོ། །མང་པོའི་ནང་ན་མཆོག་དགེ་འདུན་ལ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་

Vol. 11 · folio 106b

པར་རྫོགས་པའི་སངས་རྒྱས་ཤཱཀྱ་ཐུབ་པ་ཤཱཀྱ་སེང་གེ་ཤཱཀྱའི་རྒྱལ་པོ་གཙོ་བོ་དེ་རབ་ཏུ་བྱུང་བའི་རྗེས་སུ་བདག་རབ་ཏུ་བྱུང་སྟེ་ཁྱིམ་པའི་རྟགས་སྤང་ངོ་། །རབ་ཏུ་བྱུང་བའི་རྟགས་ཡང་དག་པར་ལེན་ཏོ། །དེ་བཞིན་དུ་ལན་གཉིས་ལན་གསུམ་བཟླས། མཁན་མོས་ཐབས་ཡིན་ནོ་ཞེས་བརྗོད་

པར་བྱའོ། །རབ་ཏུ་བྱུང་མས་ལེགས་སོ་ཞེས་བརྗོད་པར་བྱའོ། །དེ་ནས་མཁན་མོས་དགེ་ཚུལ་མའི་བསླབ་པའི་གཞི་འབོགས་པའི་དགེ་སློང་མ་གསོལ་ཅིག །གང་ལ་གསོལ་བ་དེས་སྟོན་པ་ལ་ཕྱག་འཚལ་དུ་ཆུག་ལ་མདུན་དུ་ཙོག་པུར་ཞོག་སྟེ་ཐལ་མོ་སྦྱོར་དུ་ཆུག་ལ་སྐྱབས་སུ་འགྲོ་བ་དང་དགེ་

ཚུལ་མའི་བསླབ་པའི་གཞི་རྣམས་ཕོག་ཤིག །འཕགས་མ་དགོངས་ཤིག །བདག་མིང་འདི་ཞེས་བགྱི་བ་ནམ་འཚོའི་བར་དུ། རྐང་གཉིས་ཀྱི་ནང་ན་གཙོ་བོ་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བའི་ནང་ན་དམ་པའི་ཆོས་ལ་སྐྱབས་སུ་མཆིའོ། །མང་པོའི་ནང་ན་མཆོག་

དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་ཚུལ་མར་འཕགས་མས་གཟུང་དུ་གསོལ། དེ་བཞིན་དུ་ལན་གཉིས་ལན་གསུམ་དུ་བཟླས། ཚིག་གསུམ་པ་ལ་སློབ་དཔོན་མས་ཞེས་བརྗོད་པར་བྱའོ། །སློབ་དཔོན་མས་ཐབས་ཡིན་ནོ་ཞེས་བརྗོད་པར་བྱའོ། །དགེ་ཚུལ་

མས་ལེགས་སོ་ཞེས་བརྗོད་པར་བྱའོ། །དེའི་རྗེས་ལ་དགེ་སློང་མ་ཞིག་གིས་གྲིབ་ཚོད་གཞལ་བར་བྱ་ཞིང་། སྐྱེས་བུ་དང་རྩ་བ་དང་ཉིན་མཚན་གྱི་ཆ་དང་དུས་ཚོད་ཀྱང་བརྗོད་པར་བྱའོ། །དེ་ནས་བསླབ་པའི་གཞི་བཅུ་བྱིན་ཅིག །འཕགས་མ་དགོངས་ཤིག །ཇི་ལྟར་འཕགས་པ་དགྲ་བཅོམ་

པ་དེ་དག་གིས་ནམ་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག་པ་དེ་བཞིན་དུ་བདག་མིང་འདི་ཞེས་བགྱི་བས་ཀྱང་དེང་གི་དུས་འདི་ནས་བཟུང་སྟེ་ནམ་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལྡོག་གོ། །བདག་ཡན་ལག་དང་པོ་འདིས་ཇི་ལྟར་འཕགས་

པ་དགྲ་བཅོམ་པ་དེ་དག་གིས་བསླབ་པའི་རྗེས་སུ་སློབ་པོ། །རྗེས་སུ་སྒྲུབ་པོ། །རྗེས་སུ་བགྱིད་དོ། །གཞན་ཡང་ཇི་ལྟར་འཕགས་པ་དགྲ་བཅོམ་པ་དེ་དག་གིས་ནམ་འཚོའི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། འབྲུའི་ཆང་དང་། འབྲས་བུའི་ཆང་

Vol. 11 · folio 107a

མྱོས་པར་འགྱུར་བ་བག་མེད་པའི་གནས་དང་། གླུ་དང་། གར་དང་། བརྡུང་བ་དང་། ཕྲེང་བ་དང་། དྲི་དང་། བྱུག་པ་དང་། ཁ་དོག་འཆང་བ་རྣམས་དང་། མལ་སྟན་མཐོན་པོ་དང་མལ་སྟན་ཆེན་པོ་དང་། དུས་མ་ཡིན་པར་ཟ་བ་དང་། གསེར་དངུལ་བླང་བ་རྣམས་སྤངས་ཏེ། གསེར་

དངུལ་བླང་བ་ལས་སླར་ལོག་པ་དེ་བཞིན་དུ་བདག་མིང་འདི་ཞེས་བགྱི་བས་ཀྱང་དེང་གི་དུས་འདི་ནས་བཟུང་སྟེ། ནམ་འཚོའི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། འབྲུའི་ཆང་དང་འབྲས་བུའི་ཆང་མྱོས་པར་འགྱུར་བ་བག་མེད་པར་འགྱུར་བའི་གནས་

དང་། གླུ་དང་། གར་དང་། བརྡུང་བ་དང་། ཕྲེང་བ་དང་། དྲི་དང་། བྱུག་པ་དང་། ཁ་དོག་འཆང་བ་རྣམས་དང་། མལ་སྟན་མཐོན་པོ་དང་མལ་སྟན་ཆེན་པོ་དང་། དུས་མ་ཡིན་པར་ཟ་བ་དང་། གསེར་དངུལ་བླང་བ་དག་སྤངས་ནས་གསེར་དངུལ་བླང་བ་ལས་སླར་ལོག་སྟེ། བདག་ཡན་ལག་བཅུ་

པོ་འདིས་ཇི་ལྟར་འཕགས་པ་དགྲ་བཅོམ་པ་དེ་དག་གིས་བསླབ་པའི་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །སློབ་དཔོན་མས་ཐབས་ཡིན་ནོ་ཞེས་བརྗོད་པར་བྱའོ། །དགེ་ཚུལ་མས་ལེགས་སོ་ཞེས་བརྗོད་པར་བྱའོ། །དེ་སྟེ་ཁྱིམ་དུ་གནས་པ་ལོ་བཅུ་ལོན་པའམ། གཞོན་ནུ་

མ་ལོ་བཅྭ་བརྒྱད་ལོན་པ་དེ་ལ་ནི་ལོ་གཉིས་སུ་ཆོས་དྲུག་དང་རྗེས་སུ་འབྲང་བའི་ཆོས་དྲུག་གི་བསླབ་པ་བྱིན་ཅིག །འདི་བཞིན་དུ་སྦྱིན་པར་བྱ་སྟེ། དགེ་སློང་མའི་དགེ་འདུན་འདུས་ཤིང་འཁོད་དོ། །ཉུང་ན་ཡང་དགེ་སློང་མ་བཅུ་གཉིས་འདུས་པའི་འཁོར་ལ་ཕྱག་འཚལ་དུ་ཆུག་ལ་རྒན་པའི་དྲུང་དུ་

ཙོག་པུར་ཞོག་ལ་མཁན་མོར་གསོལ་བར་བྱའོ། །མཁན་མོ་ལ་ཕྱག་འཚལ་དུ་བཅུག་ལ་ཙོག་ཙོག་པོར་འདུག་སྟེ་ཐལ་མོ་སྦྱོར་དུ་བཅུག་ནས་དེ་སྟེ་མཁན་མོ་ཡིན་ན་ནི་འདི་བཞིན་གསོལ་ལོ། །དགོངས་ཤིག་མཁན་མོ་བདག་མིང་འདི་ཞེས་བགྱི་བ་མཁན་མོ་ལ་མཁན་མོར་གསོལ་ན་མཁན་མོ་

བདག་གི་མཁན་མོར་གྱུར་ཅིག །མཁན་མོ་ལས་བསླབ་པའི་སྡོམ་པ་ཡང་དག་པར་བླང་བར་གསོལ་ལོ། །དེ་སྟེ་སློབ་དཔོན་མ་ཡིན་ན་ཡང་འདི་སྐད་དུ་གསོལ་བར་བྱའོ། །སློབ་དཔོན་མ་དགོངས་ཤིག་བདག་མིང་འདི་ཞེས་བགྱི་བ་སློབ་དཔོན་ལས་མཁན་མོར་གསོལ་ཏེ། སློབ་དཔོན་མ་བདག་

Vol. 11 · folio 107b

གི་མཁན་མོར་གྱུར་ཅིག །སློབ་དཔོན་མ་མཁན་མོ་ལས་བསླབ་པའི་སྡོམ་པ་ཡང་དག་པར་བླང་བར་གསོལ་ལོ། །དེ་བཞིན་དུ་ལན་གཉིས་ལན་གསུམ་མོ། །གསུམ་པ་ལ་མཁན་མོ་ཞེས་བརྗོད། མཁན་མོས་ཐབས་ཡིན་ནོ་ཞེས་བརྗོད་པར་བྱའོ། །སློབ་མས་ལེགས་སོ་ཞེས་བརྗོད་པར་བྱའོ། །

དེ་ནས་བསླབ་པའི་སྡོམ་པ་གསོལ་བར་བྱའོ། །གསོན་ཅིག །འཕགས་མའི་དགེ་འདུན་རྣམས་བདག་མིང་འདི་ཞེས་བགྱི་བས་དོན་གྱི་སླད་དུ་མཚན་ནས་སྨོས་ཏེ། མཁན་མོ་འདི་ཞེས་བགྱི་བ་ལས་རབ་ཏུ་རྫོགས་པར་འཚལ་ན། བདག་མིང་འདི་ཞེས་བགྱི་བ་མཁན་མོ་མཚན་འདི་ཞེས་བགྱི་སྟེ། འཕགས་

མའི་དགེ་འདུན་ལས་ལོ་གཉིས་སུ་ཆོས་དྲུག་དང་རྗེས་སུ་འབྲང་བའི་ཆོས་དྲུག་གི་བསླབ་པ་གསོལ་ན། འཕགས་མའི་དགེ་འདུན་མས་བདག་མིང་འདི་ཞེས་བགྱི་བ་ཁྱིམ་ན་གནས་པ་ལོ་བཅུ་ལོན་པའམ་གཞོན་ནུ་མ་ལོ་བཅྭ་བརྒྱད་ལོན་ཏེ། ཆོས་དྲུག་དང་རྗེས་སུ་འབྲང་བའི་ཆོས་དྲུག་གི་བསླབ་པ་

ཐུགས་བརྩེ་བ་ཅན་བརྩེ་བའི་སླད་དུ་སྩལ་དུ་གསོལ་ཏེ། དེ་བཞིན་ལན་གཉིས་ལན་གསུམ་དུ་བྱའོ། །དེའི་འོག་ཏུ་དགེ་སློང་མ་གཅིག་གིས་གསོལ་བ་ཐོབ་ལ་ལས་བྱོས་ཤིག །གསོན་ཅིག །འཕགས་མའི་དགེ་འདུན་མ་རྣམས་མིང་འདི་ཞེས་བགྱི་བ་ཁྱིམ་ན་གནས་པ་ལོ་བཅུ་ལོན་

པའམ། གཞོན་ནུ་མ་ལོ་བཅྭ་བརྒྱད་ལོན་ཏེ་འཕགས་མའི་དགེ་འདུན་མ་ལས་ལོ་གཉིས་སུ་ཆོས་དྲུག་དང་རྗེས་སུ་འབྲང་བའི་ཆོས་དྲུག་གསོལ་ན། དེ་འཕགས་མའི་དགེ་འདུན་གྱིས་དུས་ལ་བབ་ཅིང་བཟོད་ན་འཕགས་མའི་དགེ་འདུན་མ་རྣམས་ཀྱིས་གནང་ལ་འཕགས་མའི་དགེ་འདུན་མ་རྣམས་ཀྱིས་

མིང་འདི་ཞེས་བྱ་བ་ཁྱིམ་ན་གནས་པ་ལོ་བཅུ་ལོན་པའམ། གཞོན་ནུ་མ་ལོ་བཅྭ་བརྒྱད་མ་སྟེ། མཁན་མོ་མིང་འདི་ཞེས་བགྱི་བས། དགེ་སློང་མའི་དགེ་འདུན་ལས་ལོ་གཉིས་སུ་ཆོས་དྲུག་དང་རྗེས་སུ་འབྲང་བའི་ཆོས་དྲུག་གི་བསླབ་པ་སྩོལ་ཅིག །འདི་ནི་གསོལ་བའོ། །ལས་ནི་འདི་

བཞིན་དུ་བྱའོ། །གསོན་ཅིག་འཕགས་མའི་དགེ་འདུན་མ་རྣམས་མིང་འདི་ཞེས་བགྱི་བ་ཁྱིམ་ན་གནས་པ་ལོ་བཅུ་ལོན་པའམ། གཞོན་ནུ་མ་ལོ་བཅྭ་བརྒྱད་མ་སྟེ། མཁན་མོ་མིང་འདི་ཞེས་བགྱི་བས་འཕགས་མའི་དགེ་འདུན་ལས་ལོ་གཉིས་སུ་ཆོས་དྲུག་དང་རྗེས་སུ་འབྲང་བའི་ཆོས་

Vol. 11 · folio 108a

དྲུག་གི་བསླབ་པ་གསོལ་ན། དེའི་སླད་དུ་འཕགས་མའི་དགེ་འདུན་མས་མིང་འདི་ཞེས་བགྱི་བ་ཁྱིམ་ན་གནས་པ་ལོ་བཅུ་ལོན་པའམ། གཞོན་ནུ་མ་ལོ་བཅྭ་བརྒྱད་མ་སྟེ། མཁན་མོ་མིང་འདི་ཞེས་བགྱི་བས་དགེ་སློང་མའི་དགེ་འདུན་ལས་ལོ་གཉིས་སུ་ཆོས་དྲུག་དང་རྗེས་སུ་འབྲང་བའི་

ཆོས་དྲུག་གི་བསླབ་པ་གསོལ་ན། གང་མིང་འདི་ཞེས་བགྱི་བ་ཁྱིམ་ན་གནས་པ་ལོ་བཅུ་ལོན་པའམ། གཞོན་ནུ་མ་ལོ་བཅྭ་བརྒྱད་མ་སྟེ། ཆོས་དྲུག་དང་རྗེས་སུ་འབྲང་བའི་ཆོས་དྲུག་གི་བསླབ་པ་སྩལ་བར་འཕགས་མའི་དགེ་འདུན་རྣམས་གང་བཟོད་པ་ནི་ཅང་མ་གསུང་ཤིག །མི་བཟོད་པ་རྣམས་

ནི་གསུང་ཤིག །མིང་འདི་ཞེས་བགྱི་བ་ཁྱིམ་ན་གནས་པ་ལོ་བཅུ་ལོན་པ་དང་། གཞོན་ནུ་མ་ལོ་བཅྭ་བརྒྱད་མ་སྟེ། ཆོས་དྲུག་དང་རྗེས་སུ་འབྲང་བའི་ཆོས་དྲུག་འཕགས་མའི་དགེ་འདུན་རྣམས་ཀྱིས་སྩལ་ཏེ། འཕགས་མའི་དགེ་འདུན་མ་རྣམས་བཟོད་ཅིང་གནང་སྟེ་ཅང་མི་གསུང་བས་ན་དེ་དེ་

བཞིན་དུ་འཛིན་ཏོ། །དེ་ནས་དེ་ལ་ཆོས་དྲུག་དང་རྗེས་སུ་འབྲང་བའི་ཆོས་དྲུག་ཞིབ་ཏུ་སྟོན་ཅིག །དྲུག་གང་ཞེ་ན། གཅིག་པུ་གྲོང་དུ་མི་འགྲོ་དང་། །ཆུ་བོ་ཕ་རོལ་མི་རྒལ་ལོ། །སྐྱེས་པ་དག་དང་རེག་མི་བྱ། །སྐྱེས་པ་དང་ཡང་གནས་མི་གཅིག །སྨྱན་དུ་འགྱུར་བ་མི་བྱ་སྟེ། །ཁ་ན་མ་ཐོ་མི་

བཅབ་པོ། །འདི་ནི་དེ་བཞིན་གཤེགས་པ་ཡིས། །གསུང་རབ་ཀྱི་ནི་ཆོས་དྲུག་གསུངས། །རྗེས་སུ་འབྲང་བའི་ཆོས་དྲུག་གང་ཞེ་ན། གསེར་ལ་སོགས་པ་མི་བཟུང་སྟེ། །གསང་བའི་སྤུ་ནི་བྲེག་མི་བྱ། །ས་ཡང་བརྐོ་བར་མི་བྱ་ཞིང་། །གླེན་པས་རྩྭ་སྔོན་མི་གཅད་དོ། །བྱིན་ལེན་མ་བྱས་

ཟས་མི་བཟའ། །གཞག་པ་རྣམས་ནི་བཟའ་མི་བྱ། །རྗེས་སུ་འབྲང་བའི་ཆོས་དྲུག་འདི། །བདེ་བར་གཤེགས་པས་མ་གནང་ངོ་། །ནམ་ལོ་གཉིས་སུ་ཆོས་དྲུག་དང་རྗེས་སུ་འབྲང་བའི་ཆོས་དྲུག་གིས་བསླབ་པར་གྱུར་ན། དེ་ནས་ཚངས་པར་སྤྱོད་པ་ལ་རིམ་གྲོར་བྱ་བའི་སྡོམ་པ་སྦྱིན་པར་

བྱའོ། །ཐོག་མར་མཁན་མོས་ཆོས་གོས་ལྔ་དང་། ལྷུང་བཟེད་ཤོམས་ལ་གསང་བ་སྟོན་པ་དང་། ལས་བྱེད་པའི་དགེ་སློང་མ་གསོལ་ཅིག །དེའི་འོག་ཏུ་དགེ་སློང་མའི་དགེ་འདུན་མ་རྣམས་འདུས་ཤིང་འཁོད་པ་དང་། ཉུང་ན་ཡང་དགེ་སློང་མ་བཅུ་གཉིས་འདུས་པའི་འཁོར་ལ་ལན་གསུམ་

Vol. 11 · folio 108b

དུ་ཕྱག་བྱས་ནས་མཁན་མོར་གསོལ་བ་བྱས་ཏེ། དེ་སྟེ་མཁན་མོ་ཡིན་ན་ནི་འདི་བཞིན་གསོལ་ལོ། །དགོངས་ཤིག་མཁན་མོ། བདག་མིང་འདི་ཞེས་བགྱི་བ་མཁན་མོ་ལ་མཁན་མོར་གསོལ་ན། མཁན་མོ་བདག་གི་མཁན་མོར་གྱུར་ཅིག །མཁན་མོ་ལས་བསྙེན་པར་རྫོགས་པར་གསོལ་ལོ། །དེ་སྟེ་

སློབ་དཔོན་མ་ལ་ཡང་འདི་སྐད་དུ་གསོལ་བ་བྱའོ། །སློབ་དཔོན་མ་དགོངས་ཤིག །བདག་མིང་འདི་ཞེས་བགྱི་བ་སློབ་དཔོན་མ་ལས་མཁན་མོར་གསོལ་ཏེ། སློབ་དཔོན་མ་བདག་གི་མཁན་མོར་གྱུར་ཅིག །སློབ་དཔོན་མ་མཁན་མོ་ལས་བསྙེན་པར་རྫོགས་པར་གསོལ་ལོ། །དེ་བཞིན་ལན་གཉིས་

ལན་གསུམ་མོ། །དེ་ནས་ཆོས་གོས་རྣམས་བྱིན་གྱིས་བརླབ་པར་བྱའོ། །མཁན་མོ་དགོངས་ཤིག །བདག་མིང་འདི་ཞེས་བགྱི་བའི་ཆོས་གོས་འདི་སྦྱར་མར་བྱིན་གྱིས་བརླབས་ཏེ་བྱས་པ་རྫོགས་པའི་ཆོས་གོས་ཀུན་དུ་སྤྱད་པའོ། །དེ་བཞིན་ལན་གཉིས་ལན་གསུམ། འདི་བཞིན་དུ་སྟོད་གཡོགས་དང་།

བར་དུ་བགོ་བ་དང་། ཁུ་སུལ་དང་། རྔུལ་གཟན་རྣམས་བྱིན་གྱིས་བརླབ་པོ། །དེ་ནས་ལྷུང་བཟེད་དགེ་སློང་མའི་དགེ་འདུན་མ་ལ་བསྟན་ཏོ། །དགེ་སློང་མ་དག་གིས་ལྷུང་བཟེད་བཟང་ངོ་ཞེས་སྨྲོས་ཤིག །དེ་ནས་ལྷུང་བཟེད་བྱིན་གྱིས་བརླབས་ཏེ། མཁན་མོ་དགོངས་ཤིག །བདག་མིང་འདི་ཞེས་བགྱི་བའི་

ལྷུང་བཟེད་འདི་ནི་དྲང་སྲོང་གི་སྣོད་དེ། བསླང་བའི་སྣོད་དུ་བྱིན་གྱིས་བརླབ་པོ། །བཟའ་བར་ཀུན་དུ་སྤྱད་དོ། །དེ་བཞིན་ལན་གཉིས་ལན་གསུམ་མོ། །དེའི་འོག་ཏུ་ཐོས་པའི་གནས་ནས་སྤངས་ནས་མཐོང་བའི་གནས་སུ་ཐལ་མོ་སྦྱར་ལ་མང་པོ་འདུས་པ་ལོགས་སུ་སྟོན་ལ་ཞོག་ཤིག །དེ་ནས་ལས་བྱེད་པའི་

དགེ་སློང་མས་མིང་འདི་ཞེས་བྱ་བའི་གསང་བ་སྟོན་པར་སུ་ལ་གསོལ་སྨྲོས་ཤིག །གང་བསྐོས་པ་དེས་ཀྱང་མིང་འདི་ཞེས་བགྱི་བའོ་ཞེས་སྨྲོས་ཤིག །དེ་ནས་ལས་བྱེད་པའི་དགེ་སློང་མས་ཐོག་མར་དད་པར་བྱོས་ཤིག །མིང་འདི་ཞེས་བྱ་བ་མཁན་མོ་མིང་འདི་ཞེས་བྱ་བ་སྟེ། མིང་འདི་ཞེས་བྱ་བའི་

གསང་བ་སྟོན་པར་དད་དེ། དེ་སྟེ་དད་ན་དེས་དད་དོ་ཞེས་སྨྲོས་ཤིག །དེ་ནས་ལས་བྱེད་པའི་དགེ་སློང་མས་གསོལ་བ་ཉི་ཚེ་བྱོས་ཤིག །གསོན་ཅིག་འཕགས་པའི་དགེ་འདུན་མ་རྣམས། མཁན་མོ་མིང་འདི་ཞེས་བགྱི་སྟེ། མིང་འདི་ཞེས་བགྱི་བའི་གསང་སྟེ་སྟོན་པར་མིང་འདི་ཞེས་བགྱི་བ་དད་ན། དེ་

Vol. 11 · folio 109a

སྟེ་འཕགས་མའི་དགེ་འདུན་མ་རྣམས་ཀྱི་དུས་ལ་བབ་ཅིང་བཟོད་ན། འཕགས་མའི་དགེ་འདུན་མ་རྣམས་ཀྱིས་གནོང་ཤིག་དང་། འཕགས་མའི་དགེ་འདུན་མ་རྣམས་མཁན་མོ་མིང་འདི་ཞེས་བགྱི་སྟེ། མིང་འདི་ཞེས་བགྱི་བ་ལ་གསང་བ་སྟོན་ཏེ། འདི་ནི་གསོལ་བའོ། །དེ་ནས་

གསང་བ་སྟོན་པའི་དགེ་སློང་མས་མདུན་དུ་ཙོག་པུར་ཞོག་སྟེ་ཐལ་མོ་སྦྱར་དུ་ཆུག་ལ་སྨྲོས་ཤིག །མིང་འདི་ཞེས་བྱ་བ་ཁྱོད་ཉོན་ཅིག །འདི་ནི་ཁྱོད་ཀྱི་བདེན་པའི་དུས། འདི་ནི་ཡང་དག་པའི་དུས་ཏེ། ངས་ཁྱོད་ལ་ཅུང་ཟད་ཅིག་དྲིས་པ་དེ་ཐམས་ཅད་ཁྱོད་ཀྱིས་མ་འཛེམ་པར་བྱུང་བ་ལ་ནི་བྱུང་ཞེས་བྱ།

མ་བྱུང་བ་ལ་ནི་མ་བྱུང་ཞེས་མ་ནོར་བར་སྨྲོས་ཤིག །ཁྱོད་བུད་མེད་དམ། བུད་མེད་དོ། །ཁྱིམ་དུ་གནས་པ་ལོ་བཅུ་གཉིས་པའམ། གཞོན་ནུ་མ་ལོ་ཉི་ཤུ་ཚང་ངམ། ཚང་ངོ་། །ཁྱོད་ཀྱི་ཆོས་གོས་ལྔ་དང་ལྷུང་བཟེད་དུ་ལྡན་ནམ། ལྡན་ནོ། །ཁྱོད་ཀྱི་ཕ་མ་དང་ཁྱིམ་ཐབ་རྣམས་གསོན་ནམ། ཕ་དང་མ་

དང་ཁྱོ་རྣམས་ཀྱིས་གནང་ངམ། བྲན་མོ་མ་ཡིན་ནམ། ཕྲོགས་པ་མ་ཡིན་ནམ། རྙེད་པ་མ་ཡིན་ནམ། བཙོངས་པ་མ་ཡིན་ནམ། རྩོད་པ་མེད་དམ། རྐུས་པ་མ་ཡིན་ནམ། གཞན་གྱི་ཆགས་པ་མེད་དམ། སྤྲུལ་པ་མ་ཡིན་ནམ། དུད་འགྲོ་མ་ཡིན་ནམ། རྒྱལ་པོ་ལ་གཙེས་པ་མ་ཡིན་ནམ།

རྒྱལ་པོ་དང་འཁོན་པ་མ་ཡིན་ནམ། རྒྱལ་པོ་ལ་གནོད་པའི་ལས་བྱེད་པ་མ་ཡིན་ནམ། ཁྱོད་ཀྱིས་རྒྱལ་པོ་ལ་གནོད་པའི་ལས་བྱས་སམ་བྱེད་དུ་བཅུག་པ་མ་ཡིན་ནམ། མི་སྲུན་པ་མ་ཡིན་ནམ། མྱ་ངན་གྱིས་གདུངས་པ་མ་ཡིན་ནམ། སྦྲུམ་མ་མ་ཡིན་ནམ། མཚན་མེད་པ་མ་ཡིན་ནམ། མཚན་

གཉིས་པ་མ་ཡིན་ནམ། གླེ་འདམས་པ་མ་ཡིན་ནམ། རྟག་ཏུ་ཁྲག་འཛག་པ་མ་ཡིན་ནམ། ཁྲག་མེད་པ་མ་ཡིན་ནམ། མཚན་མ་ཙམ་ཡོད་པ་མ་ཡིན་ནམ། དགེ་སློང་བསླུས་པ་མ་ཡིན་ནམ། ཕ་བསད་པ་མ་ཡིན་ནམ། མ་བསད་པ་མ་ཡིན་ནམ། དགྲ་བཅོམ་པ་བསད་པ་མ་ཡིན་ནམ། དེ་བཞིན་

གཤེགས་པའི་སྐུ་ལ་ངན་སེམས་ཀྱིས་ཁྲག་ཕྱུང་བ་མ་ཡིན་ནམ། མུ་སྟེགས་ཅན་མ་ཡིན་ནམ། མུ་སྟེགས་ཅན་དུ་འགྲོ་བ་མ་ཡིན་ནམ། རྐུན་པོའི་རྒྱལ་མཚན་ཅན་མ་ཡིན་ནམ། རྐུན་གནས་པ་མ་ཡིན་ནམ། སོ་སོར་གནས་པ་མ་ཡིན་ནམ། མི་གནས་པ་མ་ཡིན་ནམ། ཅི་ཁྱོད་སྔོན་རབ་ཏུ་

Vol. 11 · folio 109b

བྱུང་བ་མ་ཡིན་ནམ། དེ་སྟེ་རབ་ཏུ་བྱུང་བའོ་ཞེས་སྨྲ་ན། འོ་ན་སླར་སོང་ཤིག་ཅེས་སྨྲོས་ཤིག །དེ་སྟེ་རབ་ཏུ་མ་བྱུང་ཞེས་སྨྲ་ན། ཅི་ཁྱོད་ཀྱིས་ད་ལྟར་རབ་ཏུ་བྱུང་ནས་ཁྱོད་ཀྱིས་ཚངས་པར་སྤྱོད་པ་ཡང་དག་པར་སྤྱད་དམ། ཁྱོད་ཀྱིས་དགེ་སློང་མའི་དགེ་འདུན་ལས་ལོ་གཉིས་སུ་ཆོས་དྲུག་དང་རྗེས་སུ་

འབྲང་བའི་ཆོས་དྲུག་བསླབ་པ་གསོལ་ཏམ། གསོལ་ཏོ། །ཁྱོད་ཀྱིས་ལོ་གཉིས་སུ་ཆོས་དྲུག་དང་རྗེས་སུ་འབྲང་བའི་ཆོས་དྲུག་གི་བསླབ་པ་བསླབས་སམ། བསླབས་སོ། །ཁྱོད་ལ་དགེ་སློང་མའི་དགེ་འདུན་གྱིས་ཚངས་པར་སྤྱད་པ་སྐྱེད་པའི་སྡོམ་པ་ཕོག་གམ། ཕོག་གོ། །ཁྱོད་ལ་དགེ་

སློང་མའི་དགེ་འདུན་གྱིས་སྔར་བྱ་བའི་རྣམས་བྱས་སམ། བགྱིས་སོ། །ཁྱོད་ཀྱིས་དགེ་སློང་མའི་དགེ་འདུན་རྣམས་ཀྱི་སེམས་གུས་པར་བྱས་སམ། གུས་པར་བགྱིས་སོ། །བར་ཆད་ཀྱི་ཆོས་རྣམས་ལས་ཡོངས་སུ་དག་གམ། ཡོངས་སུ་དག་གོ། །ཁྱོད་ལ་གཞན་གྱི་བུ་ལོན་མང་ཡང་

རུང་། །ཉུང་ཡང་རུང་ཆགས་པ་མེད་དམ། ཁྱོད་ཀྱི་མིང་ཅི། ཁྱོད་ཀྱི་མཁན་མོའི་མིང་ཅི། བདག་གི་མིང་ནི་འདི་ཞེས་བགྱི། དོན་གྱི་སླད་དུ་མཚན་ནས་སྨོས་ཏེ་མཁན་མོའི་མིང་ནི་འདི་ཞེས་བགྱིའོ། །ཁྱོད་མིང་འདི་ཞེས་བྱ་བ་ཉོན་ཅིག །བུད་མེད་ཀྱི་ལུས་ལ་གནོད་པར་འགྱུར་བ་ལུས་ཀྱི་

ནད་འདི་འདྲ་བ་ཡོད་དེ། དེ་འདི་ལྟ་སྟེ། མཛེ་དང་། འབྲས་དང་། ཤུ་བ་དང་། ཕོལ་མིག་དང་། ཚད་པ་དང་། ཤ་བཀྲ་ཅན་དང་། རྐོམ་པོ་དང་། ཀློག་པ་དང་། རབ་ཏུ་གཡན་པ་དང་། སྐྱིགས་བུ་དང་། སྐྱུགས་པ་དང་། གཞང་འབྲུམ་དང་། རིམས་དང་། ཟ་ངད་དང་། མྱོས་པ་

དང་། །ཆུ་བགགས་པ་དང་། ངལ་བ་དང་། རྨོང་བུ་དང་། དབུགས་མི་བདེ་བ་དང་། ལུད་པ་དང་། སྐེམ་པ་དང་། བརྗེད་བྱེད་དང་། འཇས་པ་དང་། དཀར་པོའི་ནད་དང་། རྐང་འབམ་དང་། མཚན་པར་རྡོལ་བ་དང་། སྐྲན་དང་། ཁྲག་ནད་དང་། མཁྲིས་པ་དང་། རྐུབ་འབྲུམ་

དང་། །ལྷོག་པ་དང་། ཡན་ལག་ཚ་བ་དང་། རྩིབ་ལོགས་ཚ་བ་དང་། རུས་པ་ཞིགས་པ་དང་། རིམས་དྲག་པོ་དང་། རིམས་ཞག་གཅིག་པ་དང་། ཞག་གཉིས་པ་དང་། ཞག་གསུམ་པ་དང་། ཞག་བཞི་པ་དང་། རིམས་ཉིན་རེ་དང་། འདུས་པའི་རིམས་དང་། རྟག་

Vol. 11 · folio 110a

པའི་རིམས་དང་། རིམས་ལྡང་དུབ་པ་དང་། ཁྱོད་ཀྱི་ལུས་ལ་འདི་ལྟ་བུའི་ལུས་ཀྱི་ནད་དང་། ལུས་ལ་གནོད་པར་འགྱུར་བ། གཞན་དག་མེད་དམ། དེ་སྟེ་ཡོངས་སུ་གཙང་བར་གྱུར་ན། གསང་སྟེ་སྟོན་པས་ཇི་ལྟར་བདག་གིས་ཁྱོད་ལ་དྲིས་པ་དེ་བཞིན་དུ་དགེ་འདུན་གྱི་ནང་དུ་

ཡང་སྨྲོས་ཤིག་ཅེས་བསྒོ་ལ་འདིར་འདུག་སྟེ་མ་བོས་ཀྱི་བར་དུ་མ་འོང་ཤིག །དེ་ནས་གསང་སྟེ་སྟོན་པ་ལམ་གྱི་བར་དུ་འདུག་ལ་འདི་སྐད་སྨྲོས་ཤིག །དགོངས་ཤིག་འཕགས་མ། བདག་གིས་མིང་འདི་ཞེས་བགྱི་བ་ལ་བར་ཆད་ཀྱི་ཆོས་རྣམས་བསྟན་ཅིང་དྲིས་ན། ཡོངས་སུ་དག་གོ་ཞེས་ཉིད་མཆི་ན། ཅི་

མཆི་ཞིག་གམ། དགེ་སློང་མ་ཐམས་ཅད་ཀྱིས་ཀྱང་དེ་སྟེ་ཡོངས་སུ་དག་པར་གྱུར་ན་ཚུར་ཤོག་ཅེས་སྨྲོས་ཤིག །དེ་ལྟར་སྨྲས་ན་ནི་ལེགས། མ་སྨྲས་ན་ནི་འདས་པ་དང་བཅས་པར་འགྱུར་རོ། །དེ་ནས་ལས་བྱེད་པའི་དགེ་སློང་མས་མདུན་དུ་ཞོག་ལ་ཚངས་པར་སྤྱོད་པ་སྐྱེད་པའི་སྡོམ་པ་གསོལ་ཅིག །

གསོན་ཅིག་འཕགས་མའི་དགེ་འདུན་མ་རྣམས། བདག་མིང་འདི་ཞེས་བགྱི་བ་མིང་འདི་ཞེས་བགྱི་བ་ལས་བསྙེན་པར་རྫོགས་པར་འཚལ་ཏེ། དེ་ཡང་བདག་མིང་འདི་ཞེས་བགྱི་བ་འཕགས་མའི་དགེ་འདུན་མ་རྣམས་ལས་ཚངས་པར་སྤྱོད་པ་སྐྱེད་པའི་སྡོམ་པ་གསོལ་ཀྱིས་དོན་གྱི་སླད་དུ་མཚན་ནས་སྨོས་ཏེ་

མཁན་མོ་མིང་འདི་ཞེས་བགྱི་སྟེ། འཕགས་མའི་དགེ་འདུན་གྱིས་བདག་མིང་འདི་ཞེས་བགྱི་བ་ལ་ཚངས་པར་སྤྱོད་པ་སྐྱེད་པའི་སྡོམ་པ་གསོལ་ཅིག །བརྩེ་བ་ཅན་བརྩེ་བའི་ཕྱིར་རོ། །དེ་བཞིན་ལན་གཉིས་ལན་གསུམ་མོ། །དེ་ནས་ལས་བྱེད་པའི་དགེ་སློང་མས་གསོལ་བ་ཐོབ་ལ་ལས་

བྱོས་ཤིག །གསོན་ཅིག་འཕགས་མའི་དགེ་འདུན་མ་རྣམས། མིང་འདི་ཞེས་བྱ་བ་མིང་འདི་ཞེས་བགྱི་བ་ལས་བསྙེན་པར་རྫོགས་པར་འཚལ་ཏེ། མིང་འདི་ཞེས་བགྱི་བ་འདི་མཁན་མོའི་མིང་འདི་ཞེས་བགྱི་བ་སྟེ། འཕགས་མའི་དགེ་འདུན་མ་རྣམས་ལས་ཚངས་པར་སྤྱད་པ་སྐྱེད་པའི་

སྡོམ་པ་གསོལ་ན། དེ་སྟེ་འཕགས་མའི་དགེ་འདུན་མ་རྣམས་ཀྱི་དུས་ལ་བབ་ཅིང་བཟོད་ན་འཕགས་མའི་དགེ་འདུན་མ་རྣམས་ཀྱིས་གནོང་ཤིག །བདག་མིང་འདི་ཞེས་བགྱི་བ་དགེ་འདུན་གྱི་ནང་དུ་བར་ཆད་ཀྱི་ཆོས་འདི་འདྲི་སྟེ། འདི་ནི་གསོལ་བའོ། །མིང་འདི་ཞེས་བྱ་བ་ཁྱོད་ཉོན་ཅིག་འདི་ནི་ཁྱོད་

Vol. 11 · folio 110b

ཀྱི་བདེན་པའི་དུས། འདི་ནི་ཡང་དག་པའི་དུས་ཏེ་ངས་ཁྱོད་ལ་ཅུང་ཟད་ཅིག་དྲིས་པ་དེ་ཐམས་ཅད་ཁྱོད་ཀྱིས་མ་འཛེམ་པར་བྱུང་བ་ལ་ནི་བྱུང་ཞེས་མ་བྱུང་བ་ལ་ནི་མ་བྱུང་ཞེས་མ་ནོར་བར་སྨྲོས་ཤིག །བུད་མེད་དམ། བུད་མེད་དོ་ཞེས་བྱ་བ་ནས། ཁྱོད་ཀྱི་ལུས་ལ་འདི་འདྲ་བའི་ནད་ཀྱིས་གནོད་པ་

དང་གཞན་ཡང་མེད་དམ། དེས་མེད་དོ་ཞེས་སྨྲོས་ཤིག་པའི་བར་དུ་སྦྱར་རོ། །དེ་ནས་གསོལ་བ་བྱོས་ཤིག །གསོན་ཅིག་འཕགས་མའི་དགེ་འདུན་མ་རྣམས། མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་བགྱི་བ་ལས་བསྙེན་པར་རྫོགས་པར་འཚལ་ཏེ། ཁྱིམ་ན་གནས་པ་

ལོ་བཅུ་གཉིས་པའམ། གཞོན་ནུ་མ་ལོ་ཉི་ཤུ་ཚང་ལ་ཆོས་གོས་ལྔ་དང་ལྷུང་བཟེད་དུ་ཡང་ལྡན། བར་ཆད་ཀྱི་ཆོས་རྣམས་ཀྱང་ཡོངས་སུ་གཙང་ངོ་ཞེས་བདག་ཉིད་མཆི་སྟེ། མིང་འདི་ཞེས་བགྱི་བ་འདི་མཁན་མོའི་མིང་འདི་ཞེས་བགྱི་སྟེ། འཕགས་མའི་དགེ་འདུན་མ་རྣམས་ལས་ཚངས་པར་

སྤྱད་པ་སྐྱེད་པའི་སྡོམ་པ་གསོལ་ན། དེ་སྟེ་འཕགས་མའི་དགེ་འདུན་མ་རྣམས་ཀྱི་དུས་ལ་བབ་ཅིང་བཟོད་ན་འཕགས་མའི་དགེ་འདུན་མ་རྣམས་ཀྱིས་གནོང་ལ། འཕགས་མའི་དགེ་འདུན་མ་རྣམས་ཀྱི་མིང་འདི་ཞེས་བགྱི་བ་མཁན་མོའི་མིང་འདི་ཞེས་བགྱི་སྟེ། དེ་ལ་ཚངས་པར་

སྤྱད་པ་སྐྱེད་པའི་སྡོམ་པ་སྩོལ་ཅིག །མཁན་མོའི་མིང་འདི་ཞེས་བགྱི་སྟེ། འདི་ནི་གསོལ་བའོ། །ལས་ཀྱང་འདི་བཞིན་བྱའོ། །གསོན་ཅིག་འཕགས་མའི་དགེ་འདུན་མ་རྣམས་མིང་འདི་ཞེས་བགྱི་བ་འདི་མིང་འདི་ཞེས་བགྱི་བ་ལས་བསྙེན་པར་རྫོགས་པར་འཚལ་ཏེ། ཁྱིམ་

ན་གནས་པ་ལོ་བཅུ་གཉིས་པའམ། གཞོན་ནུ་མ་ལོ་ཉི་ཤུར་ཚང་ལ་ཆོས་གོས་ལྔ་དང་ལྷུང་བཟེད་དུ་ཡང་ལྡན། བར་ཆད་ཀྱི་ཆོས་ཀྱང་གཙང་ངོ་ཞེས་བདག་ཉིད་མཆི་སྟེ། མིང་འདི་ཞེས་བགྱི་བ་འདི་ནི་མཁན་མོ་མིང་འདི་ཞེས་བགྱི་སྟེ། འཕགས་མའི་དགེ་འདུན་མ་རྣམས་ལ་

ཚངས་པར་སྤྱད་པ་སྐྱེད་པའི་སྡོམ་པ་གསོལ་ན། འཕགས་མའི་དགེ་འདུན་མ་རྣམས་ཀྱིས་མིང་འདི་ཞེས་བགྱི་བ་ལ་མཁན་མོ་མིང་འདི་ཞེས་བགྱི་སྟེ། དེ་ལ་ཚངས་པར་སྤྱད་པ་སྐྱེད་པའི་སྡོམ་པ་གསོལ་ན། འཕགས་མའི་དགེ་འདུན་མ་རྣམས་ལས་མིང་འདི་ཞེས་བགྱི་སྟེ། མཁན་མོ་

Vol. 11 · folio 111a

མིང་འདི་ཞེས་བགྱི་སྟེ། དེ་ལ་ཚངས་པར་སྤྱད་པ་སྐྱེད་པའི་སྡོམ་པ་སྩལ་བར་གང་ལ་བཟོད་པ་དེ་དག་ནི་ཅང་མ་གསུང་ཤིག །གང་ལ་མི་བཟོད་པ་དེ་དག་ནི་གསུང་ཤིག །འཕགས་མའི་དགེ་འདུན་མ་རྣམས་ཀྱིས་མིང་འདི་ཞེས་བགྱི་བ་ལ་མཁན་མོ་མིང་འདི་ཞེས་བགྱི་

སྟེ། །དེ་ལ་ཚངས་པར་སྤྱད་པ་སྐྱེད་པའི་སྡོམ་པ་སྩལ་ཏེ། འཕགས་མའི་དགེ་འདུན་མ་རྣམས་ཀྱིས་བཟོད་ཅིང་གནང་བས་ན་ཅང་མི་གསུང་སྟེ། དེ་དེ་བཞིན་དུ་འཛིན་ཏོ། །དེའི་འོག་ཏུ་དགེ་སློང་ཕའི་དགེ་འདུན་ཐམས་ཅད་འདུས་ཤིང་འཁོད་དེ་ཉུང་ན་ཡང་དགེ་སློང་གི་གྲངས་བཅུའི་འཁོར་དང་།

དགེ་སློང་མ་ཐམས་ཅད་འདུས་ཤིང་འཁོད་ལ་ཉུང་ན་ཡང་དགེ་སློང་མ་བཅུ་གཉིས་ཀྱི་འཁོར་དུ་ལས་བྱེད་པའི་དགེ་སློང་ཕའི་མདུན་དུ་རྩྭ་ཆུན་པོའམ། སྟན་ཁོང་ཚངས་ཅན་གྱི་སྟེང་དུ་ཞོག་ལ་ཐལ་མོ་སྦྱར་ཏེ་དགེ་འདུན་གཉིས་ཀ་ལས་བསྙེན་པར་རྫོགས་པར་གསོལ་བར་བྱའོ། །གསོན་ཅིག་

བཙུན་པའི་དགེ་འདུན་སྡེ་གཉིས་རྣམས། བདག་མིང་འདི་ཞེས་བགྱི་བ་དོན་གྱི་སླད་དུ། མཚན་ནས་སྨོས་ཏེ་མཁན་མོའི་མིང་འདི་ཞེས་བགྱི་བ་ལས་བསྙེན་པར་རྫོགས་པར་འཚལ་ཏེ། བདག་མིང་འདི་ཞེས་བགྱི་བ་དགེ་འདུན་སྡེ་གཉི་ག་ལས་བསྙེན་པར་རྫོགས་པར་གསོལ་ན། བཙུན་

པའི་དགེ་འདུན་གཉིས་ཀས་བདག་བསྙེན་པར་རྫོགས་པར་བགྱི་བར་གསོལ། བཙུན་པའི་དགེ་འདུན་གཉིས་ཀས་བདག་དབྱུང་བར་གསོལ། བཙུན་པའི་དགེ་འདུན་གཉི་གས་བདག་རྗེས་སུ་གཟུང་བར་གསོལ། བཙུན་པའི་དགེ་འདུན་གཉི་གས་བདག་ལ་ཐུགས་བརྩེ་བར་གསོལ།

ཐུགས་བརྩེ་བ་ཅན་ཐུགས་བརྩེ་བའི་ཕྱིར་རོ། །འདི་བཞིན་ལན་གཉིས་ལན་གསུམ་དུ་བྱའོ། །དེའི་འོག་ཏུ་ལས་བྱེད་པའི་དགེ་སློང་ཕས་གསོལ་བ་གྱིས་ཤིག །གསོན་ཅིག་བཙུན་པའི་དགེ་འདུན་གཉི་གའི་རྣམས། མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་བགྱི་བ་ལ་

བསྙེན་པར་རྫོགས་པར་འཚལ་ཏེ། མིང་འདི་ཞེས་བགྱི་བ་འདི་མཁན་མོ་མིང་འདི་ཞེས་བགྱི་སྟེ། དགེ་འདུན་གཉི་ག་ལས་བསྙེན་པར་རྫོགས་པར་གསོལ་ན། དེ་སྟེ་དགེ་འདུན་གཉི་གའི་དུས་ལ་བབ་ཅིང་བཟོད་ན་དགེ་འདུན་གཉི་གས་གནོང་ཤིག །བདག་གིས་འདི་ལ་དགེ་

Vol. 11 · folio 111b

འདུན་གཉི་གའི་ནང་དུ་བར་ཆད་ཀྱི་ཆོས་རྣམས་འདྲི་སྟེ། འདི་ནི་གསོལ་བའོ། །མིང་འདི་ཞེས་བྱ་བ་ཁྱོད་ཉོན་ཅིག །འདི་ནི་ཁྱོད་ཀྱི་བདེན་པའི་དུས། འདི་ནི་ཡང་དག་པའི་དུས་ཏེ། ངས་ཁྱོད་ལ་ཅུང་ཟད་ཅིག་དྲིས་པ་དེ་ཐམས་ཅད་ཁྱོད་ཀྱིས་མ་འཛེམ་པར་བྱུང་བ་ལ་ནི་བྱུང་ཞེས་བྱ། མ་

བྱུང་བ་ལ་ནི་མ་བྱུང་ཞེས་མ་ནོར་བར་སྨྲོས་ཤིག །ཁྱོད་བུད་མེད་དམ། བུད་མེད་དོ། །ཁྱིམ་ན་གནས་པ་ལོ་བཅུ་གཉིས་དང་། གཞོན་ནུ་མ་ལོ་ཉི་ཤུ་ཚང་ངམ། ཚང་ངོ་། །ཁྱོད་ཀྱི་ཆོས་གོས་ལྔ་དང་། ལྷུང་བཟེད་དུ་ལྡན་ནམ། ལྡན་ནོ། །ཁྱོད་ཀྱི་ཕ་དང་། མ་དང་། ཁྱིམ་ཐབ་གསོན་

ནམ། །གསོན་ནོ། །ཕ་དང་མ་དང་ཁྱིམ་ཐབ་ཀྱིས་གནང་ངམ། གནང་ངོ་། །བྲན་མོ་མ་ཡིན་ནམ། ཕྲོགས་པ་མ་ཡིན་ནམ། རྙེད་པ་མ་ཡིན་ནམ། བཙོངས་པ་མ་ཡིན་ནམ། ཆགས་པ་མེད་དམ། སྤྲུལ་པ་མ་ཡིན་ནམ། རྒྱལ་པོའི་གཙེས་པ་མ་ཡིན་ནམ། རྒྱལ་པོ་དང་འཁོན་པ་མ་ཡིན་

ནམ། །རྒྱལ་པོ་ལ་གནོད་པའི་ལས་བྱེད་པ་མ་ཡིན་ནམ། ཁྱོད་ཀྱིས་རྒྱལ་པོ་ལ་གནོད་པ་བྱས་པའམ། གནོད་པ་བྱེད་དུ་བཅུག་པ་མ་ཡིན་ནམ། མི་སྲུན་པ་མ་ཡིན་ནམ། མྱ་ངན་གྱིས་གདུངས་པ་མ་ཡིན་ནམ། སྦྲུམ་མ་མ་ཡིན་ནམ། མཚན་མེད་པ་མ་ཡིན་ནམ། མཚན་གཉིས་པ་མ་

ཡིན་ནམ། གླེ་འདམས་པ་མ་ཡིན་ནམ། རྟག་ཏུ་ཁྲག་འཛག་པ་མ་ཡིན་ནམ། ཁྲག་མེད་པ་མ་ཡིན་ནམ། མཚན་མ་ཙམ་ཡོད་པ་མ་ཡིན་ནམ། དགེ་སློང་བསླུས་པ་མ་ཡིན་ནམ། ཕ་བསད་པ་མ་ཡིན་ནམ། མ་བསད་པ་མ་ཡིན་ནམ། དགྲ་བཅོམ་པ་བསད་པ་མ་ཡིན་ནམ། དེ་

བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་ཕྱུང་བ་མ་ཡིན་ནམ། མུ་སྟེགས་ཅན་མ་ཡིན་ནམ། མུ་སྟེགས་ཅན་དུ་འགྲོ་བ་མ་ཡིན་ནམ། རྐུན་པོའི་རྒྱལ་མཚན་ཅན་མ་ཡིན་ནམ། རྐུན་གནས་པ་མ་ཡིན་ནམ། སོ་སོར་གནས་པ་མ་ཡིན་ནམ། མི་གནས་པ་མ་ཡིན་ནམ།

ཅི་ཁྱོད་སྔོན་རབ་ཏུ་བྱུང་ངམ། དེ་སྟེ་རབ་ཏུ་བྱུང་ངོ་ཞེས་སྨྲ་ན། འོ་ན་སོང་ཤིག་ཅེས་སྨྲོས་ཤིག །དེ་སྟེ་རབ་ཏུ་མ་བྱུང་ངོ་ཞེས་ཟེར་ན། ཅི་ཁྱོད་ད་ལྟར་རབ་ཏུ་བྱུང་ངམ། བྱུང་ངོ་། །ཅི་ཁྱོད་ཀྱིས་ཚངས་པར་སྤྱད་པ་ཡང་དག་པར་སྤྱད་དམ། ཅི་ཁྱོད་ཀྱིས་དགེ་སློང་མའི་དགེ་འདུན་

Vol. 11 · folio 112a

གྱིས་ལོ་གཉིས་སུ་ཆོས་དྲུག་དང་། རྗེས་སུ་འབྲང་བའི་ཆོས་དྲུག་བསླབ་པ་བྱིན་ནམ། བྱིན་ནོ། །ཁྱོད་ཀྱིས་ལོ་གཉིས་སུ་ཆོས་དྲུག་དང་རྗེས་སུ་འབྲང་བའི་ཆོས་དྲུག་བསླབ་པ་བསླབས་སམ། བསླབས་སོ། །ཁྱོད་ལ་དགེ་སློང་མའི་དགེ་འདུན་གྱིས་ཚངས་

པར་སྤྱད་པ་སྐྱེད་པའི་སྡོམ་པ་ཕོག་གམ། ཕོག་གོ། །ཁྱོད་ལ་དགེ་སློང་མའི་དགེ་འདུན་གྱིས་སྔར་བྱ་བའི་ལས་རྣམས་བྱས་སམ། བགྱིས་སོ། །ཁྱོད་ཀྱིས་དགེ་སློང་མའི་དགེ་འདུན་རྣམས་ཀྱི་སེམས་གུས་པར་བྱས་སམ། གུས་པར་བགྱིས་སོ། །བར་ཆད་ཀྱི་ཆོས་རྣམས་ལས་ཡོངས་སུ་

དག་གམ། ཡོངས་སུ་དག་གོ། །ཁྱོད་ལ་གཞན་གྱི་བུ་ལོན་མང་ཡང་རུང་། ཉུང་ཡང་རུང་ཆགས་པ་མེད་དམ། ཁྱོད་ཀྱི་མིང་ཅི། ཁྱོད་ཀྱི་མཁན་མོའི་མིང་ཅི། བདག་གི་མིང་ནི་འདི་ཞེས་བགྱི། དོན་གྱི་སླད་དུ་མཚན་ནས་སྨོས་ཏེ་མཁན་མོའི་མིང་ནི་འདི་ཞེས་བགྱིའོ། །མིང་འདི་

ཞེས་བྱ་བ་ཁྱོད་ཉོན་ཅིག །བུད་མེད་ཀྱི་ལུས་ལ་གནོད་པར་འགྱུར་བ་ལུས་ཀྱི་ནད་འདི་འདྲ་བ་ཡོད་དེ། དེ་འདི་ལྟ་སྟེ། མཛེ་དང་། འབྲས་དང་། ཤུ་བ་དང་། ཕོལ་མིག་དང་། ཚད་པ་དང་། ཤ་བཀྲ་ཅན་དང་། རྐོམ་པོ་དང་། གློག་པ་དང་། རབ་ཏུ་གཡའ་བ་དང་། སྐྱུགས་པ་དང་། གཞང་

འབྲུམ་དང་། སྐྱིགས་བུ་དང་། རིམས་དང་། ཟ་ངད་དང་། མྱོས་པ་དང་། ངལ་བ་དང་། མགོ་གཡུང་དང་། ཚད་པ་དང་། ལུད་པ་དང་། དབུགས་མི་བདེ་བ་དང་། སྐེམ་པ་དང་། བརྗེད་བྱེད་དང་། འཇས་པ་དང་། ནད་དཀར་པོ་དང་། རྐང་འབམ་དང་། མཚན་བར་རྡོལ་བ་དང་། སྐྲན་

དང་། །ཁྲག་ནད་དང་། མཁྲིས་པ་དང་། རྐུབ་འབྲུམ་དང་། ལྷོག་པ་དང་། ཡན་ལག་ཚ་བ་དང་། རྩིབ་ལོགས་ཚ་བ་དང་། རུས་པ་ཞིགས་པ་དང་། རིམས་དྲག་པོ་དང་། རིམས་ཞག་གཅིག་པ་དང་། གཉིས་པ་དང་། གསུམ་པ་དང་། བཞི་པ་དང་། རིམས་ཉིན་རེ་བ་དང་། འདུས་པའི་

རིམས་དང་། རིམས་ལྡང་དུབ་པ་དང་། རྟག་པའི་རིམས་དང་། ཁྱོད་ཀྱི་ལུས་ལ་འདི་ལྟ་བུའི་ལུས་ཀྱི་ནད་དང་། ལུས་ལ་གནོད་པར་འགྱུར་བ་དང་། དེ་ལས་གཞན་ཀྱང་མེད་དམ་དེ་ལས་ཁྱོད་ཀྱིས་ཡང་དག་པ་ཇི་བཞིན་པར་སྨྲོས་ཤིག།། །།འདུལ་བ་ཕྲན་ཚེགས་ཀྱི་གཞི། བམ་

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words