འདུལ་བ་གཞུང་དམ་པ

Sanskrit title (Tibetan script, as in the text) བི་ན་ཡ་ཨུད་ཏ་ར་གྲན་ཐ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 12 · folio 239a

པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཙུན་པ་བྱང་གི་སྒྲ་མི་སྙན་གྱི་གང་ཟག་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་

བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ཡང་འདས་པ་དང་བཅས་པའོ། །བཙུན་པ་དོག་ས་ལ་མཆིས་པས་གྲངས་སུ་བསྐངས་ཏེ་ནམ་མཁའ་ལ་མཆིས་པ་བསྙེན་པར་རྫོགས་པར་གནང་ངམ། ཨུ་པཱ་ལི་མི་གནང་ངོ་། །བཙུན་པ་ནམ་མཁའ་

ལ་མཆིས་པས་གྲངས་སུ་བསྐངས་ཏེ་དོག་ས་ལ་མཆིས་པ་བསྙེན་པར་རྫོགས་པར་གནང་ངམ། ཨུ་པཱ་ལི་མི་གནང་ངོ་། །བཙུན་པ་དོག་ས་ལ་མཆིས་པའི་ལས་བགྱིད་པས་ནམ་མཁའ་ལ་མཆིས་པའི་ལས་བགྱིད་པར་གནང་ངམ། ཨུ་པཱ་ལི་མི་གནང་ངོ་། །བཙུན་པ་ནམ་

མཁའ་ལ་མཆིས་པའི་ལས་བགྱིད་པས་དོག་ས་ལ་མཆིས་པའི་ལས་བགྱིད་དུ་གནང་ངམ། ཨུ་པཱ་ལི་མི་གནང་ངོ་། །དེ་བཞིན་དུ་མཚམས་ཀྱི་ནང་ན་འདུག་པ་དང་། མཚམས་ཀྱི་ཕྱི་རོལ་ན་འདུག་པ་ཡང་བཞིར་བྱའོ།། །།འདུལ་བ་གཞུང་དམ་པ། བམ་

པོ་བཅུ་དྲུག་པ། བཙུན་པ་བཅོམ་ལྡན་འདས་ཀྱིས་ལྗོངས་མཐའ་འཁོབ་ཏུ་འདུལ་བ་འཛིན་པ་དང་ལྔས་བསྙེན་པར་རྫོགས་པར་བྱོས་ཤིག་ཅེས་གསུངས་ན། བཙུན་པ་བཅུར་ཡང་མཆིས་ལ། མཆིས་བཞིན་དུ་འདུལ་བ་འཛིན་པ་དང་བཞིས་བསྙེན་པར་རྫོགས་པར་བགྱིས་

ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་བཅོམ་ལྡན་འདས་ཀྱིས་ལྗོངས་ཀྱི་དབུས་སུ་འདུལ་བ་འཛིན་པ་དང་གྲངས་བཅུས་ལྷག་པ་ཡང་རུང་བས་

བསྙེན་པར་རྫོགས་པར་འགྱུར་རོ་ཞེས་གསུངས་ན། བཙུན་པ་གྲངས་ཉི་ཤུའམ་ལྷག་པར་ཀྱང་རུང་སྟེ། མཆིས་བཞིན་པ་ལས་གྲངས་ཉི་ཤུ་ལས་ཉུང་བས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་

Vol. 12 · folio 239b

པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་བཅོམ་ལྡན་འདས་ཀྱིས་རྣམ་པ་ལྔས་ནི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་འདོད་པའི་མིང་ནས་བརྗོད་ནས་ལས་མི་ཉམས་པར་བྱེད་

པའི་བར་དུའོ་ཞེས་གསུངས་ན། བཙུན་པ་ལས་བགྱིད་པས་བསྙེན་པར་རྫོགས་པར་བགྱིད་པ་ན་བསྙེན་པར་རྫོགས་པར་འཚལ་བའི་མིང་ནས་མ་བརྗོད་ལ། མཁན་པོའི་མིང་ནས་བརྗོད། དགེ་འདུན་གྱི་མིང་ནས་བརྗོད། གསོལ་བ་ཡང་བགྱིས། ལས་ཀྱང་མ་ཉམས་

ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བསྙེན་པར་རྫོགས་པར་འཚལ་བའི་མིང་ནས་བརྗོད། དགེ་འདུན་གྱི་མིང་ནས་བརྗོད་ལ། མཁན་པོའི་མིང་ནས་

མ་བརྗོད། གསོལ་བ་ཡང་བགྱིས། ལས་ཀྱང་མ་ཉམས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བསྙེན་པར་རྫོགས་པར་འཚལ་བའི་མིང་ནས་བརྗོད།

མཁན་པོའི་མིང་ནས་བརྗོད་དེ། དགེ་འདུན་གྱི་མིང་ནས་མ་བརྗོད་ལ། གསོལ་བ་ནི་བགྱིས། ལས་ཀྱང་མ་ཉམས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་

པའོ། །བསྙེན་པར་རྫོགས་པར་འཚལ་བའི་མིང་ནས་བརྗོད། མཁན་པོའི་མིང་ནས་བརྗོད། དགེ་འདུན་གྱི་མིང་ནས་ཀྱང་བརྗོད། གསོལ་བ་ནི་མ་བགྱིས་ལ། ལས་ཀྱང་མ་ཉམས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ།

བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བསྙེན་པར་རྫོགས་པར་འཚལ་བའི་མིང་ནས་བརྗོད། མཁན་པོའི་མིང་ནས་བརྗོད། དགེ་འདུན་གྱི་མིང་ནས་བརྗོད། གསོལ་བ་ཡང་བགྱིས་ལ། ལས་ནི་ཉམས་ན་བསྙེན་པར་རྫོགས་པ་ཞེས་

Vol. 12 · folio 240a

བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བཙུན་པ་དགེ་ཚུལ་ཕ་དགེ་སློང་མའི་ལས་ཀྱིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་

ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་དགེ་སློབ་མ་དགེ་སློང་གི་ལས་ཀྱིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་

པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་ལས་བགྱིད་པ་བསྙེན་པར་རྫོགས་པར་བགྱིད་པའི་ཚེ་དུས་ལས་འདས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་དེ་སྟེ་ལས་མང་དུ་བྱས་པར་གྱུར་ན་ནི་བསྙེན་པར་རྫོགས་པ་ཞེས་བྱའོ། །བཙུན་པ་བསྙེན་

པར་རྫོགས་ཀར་ངག་གཅོག་ཅིང་བདག་བསྙེན་པར་རྫོགས་པར་མ་བགྱི་ཤིག་ཅེས་སླར་སྨྲ་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་བསྙེན་པར་

རྫོགས་ཀར་ཁྱིམ་པ་ལགས་པར་འཚལ་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་མཐའ་འཁོབ་པ་འཕགས་པའི་སྐད་དུ་བསྙེན་

པར་རྫོགས་པར་བགྱིས་པ་དང་། མཐའ་འཁོབ་པ་དེས་ཀྱང་འཕགས་པའི་སྐད་མ་འཚལ་ན་བསྙེན་པར་རྫོགས་པ་ཞེས་བགྱིའམ། དེ་སྟེ་གསུང་རབ་འདི་དང་ལྡན་ཞིང་རབ་ཏུ་ལྡན་ལ་ཁས་ལེན་པའི་སེམས་ཡོད་ན་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་

རྣམས་ནི་མི་བྱ་བ་མངོན་པར་སྤྱད་དེ་བསྙེན་པར་རྫོགས་པར་བྱས་པས་འདས་པ་དང་བཅས་པར་འགྱུར་རོ།། །།མདོར་ན། སྨྱོན་པ་སེམས་འཁྲུགས་ན་བ་དང་། །འོན་པ་གླེན་པ་གཉིད་ལོག་དང་། །ར་རོ་བ་དང་མྱོས་པ་དང་། །སྙོམས་པར་ཞུགས་དང་འགྲོ་བ་མཚན། །

Vol. 12 · folio 240b

བཙུན་པ་སྨྱོན་པ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་དེ་སྟེ་བསྙེན་པར་རྫོགས་པའི་འདུ་ཤེས་ཡོད་ལ་ལུས་སམ་ཚིག་གིས་དམིགས་པས་ཁས་བླངས་ན་བསྙེན་པར་རྫོགས་པ་ཞེས་བྱའོ། །ཇི་ལྟར་སྨྱོན་པ་བཞིན་དུ་སེམས་འཁྲུགས་པ་

དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་རྣམས་ཀྱང་རྒྱས་པར་བརྗོད་པར་བྱའོ། །བཙུན་པ་གཉིད་ལོག་པ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་དེ་སྟེ་ལུས་དང་ཚིག་གིས་དམིགས་ལ་གསོལ་བ་

དང་ལས་བྱེད་པའི་ཚེ་གཉིད་ཀྱིས་ལོག་ཀྱང་བསྙེན་པར་རྫོགས་པ་ཞེས་བྱའོ། །ཇི་ལྟར་གཉིད་ཀྱིས་ལོག་པ་དེ་བཞིན་དུ་ར་རོ་བ་དང་། སྙོམས་པར་ཞུགས་པ་རྣམས་ལ་ཡང་བརྗོད་པར་བྱའོ། །བཙུན་པ་འགྲོ་བ་གཞན་དུ་གནས་པ་བསྙེན་པར་རྫོགས་པར་བགྱིས་ན་བསྙེན་པར་

རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་བསྙེན་པར་རྫོགས་ཀར་མཚན་འཕོས་ན་བསྙེན་པར་རྫོགས་པ་ཞེས་བགྱིའམ། བསྙེན་པར་རྫོགས་པ་ཞེས་བྱ་སྟེ།

དགེ་སློང་མའི་ནང་དུ་སྤོས་ཤིག། །།མདོར་ན། སྨྱོན་པར་གྱུར་དང་སེམས་འཁྲུགས་དང་། །ན་བ་འོན་པ་གླེན་པ་དང་། །ཁྱིམ་པ་དག་ལ་སོགས་པ་རྣམས། །བསླབ་པ་བྱིན་དང་དེ་ལྟར་མཚན། །བཙུན་པ་ལས་བགྱིད་པའི་སྨྱོན་པས་བསྙེན་པར་རྫོགས་པར་བགྱིས་ན་

བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་གལ་ཏེ་ལས་བྱེད་པའི་དགེ་སློང་གིས་དགེ་འདུན་གྱི་འདུ་ཤེས་དང་ལྡན་ཞིང་གསོལ་བ་བྱས་ལ་ལས་ཀྱང་མ་ཉམས་ན་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །དེ་བཞིན་

དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། ལྐུགས་པ་དང་། འོན་པ་དང་། དེ་བཞིན་དུ་ར་རོ་བ་རྣམས་ལ་ཡང་བརྗོད་པར་བྱའོ། །བཙུན་པ་ལས་བགྱིད་པ་ཁྱིམ་པས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་

Vol. 12 · folio 241a

མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །དེ་བཞིན་དུ་མ་ནིང་དང་། དགེ་སློང་མ་སུན་ཕྱུང་བ་དང་། ཕ་དང་མ་དང་དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་

དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། མི་གནས་པ་དང་། སོ་སོར་གནས་པ་དང་། སྔར་ཉེས་པ་བྱུང་བ་དང་། སྔར་འཁྲུགས་པས་ལས་བགྱིད་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ།

བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བཙུན་པ་ལས་བགྱིད་པ་ཟ་མས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་

དང་བཅས་པའོ། །བཙུན་པ་ལས་བགྱིད་པ་དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ཀྱིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་

རྫོགས་པར་བྱེད་པ་རྣམས་ནི་འདས་པ་དང་བཅས་པའོ། བཙུན་པ་ལས་བགྱིད་པ་འགྲོ་བ་གཞན་དུ་གནས་པས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་

དང་བཅས་པའོ། །བཙུན་པ་བསྙེན་པར་རྫོགས་པར་བགྱིད་པ་ན་ལས་བགྱིད་པའི་མཚན་འཕོས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ།། །།མདོར་ན།

སྨྱོན་པ་སེམས་འཁྲུགས་ན་བ་དང་། །འོན་པ་གླེན་པ་གཉིད་ལོག་དང་། །ར་རོ་བ་དང་མྱོས་པ་དང་། །སྙོམས་པར་ཞུགས་དང་འགྲོ་བ་མཚན། །ཁྱིམ་པ་དག་ལ་སོགས་པ་རྣམས། །བསླབ་པ་བྱིན་པ་ཐ་མའོ། །བཙུན་པ་མཁན་པོ་སྨྱོན་པས་བསྙེན་པར་རྫོགས་པར་བགྱིས་

Vol. 12 · folio 241b

ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །དེ་བཞིན་དུ་མཁན་པོ་སེམས་འཁྲུགས་པ་དང་། ནད་ཀྱིས་གཟིར་བ་ནས། སྙོམས་པར་ཞུགས་པའི་བར་རྣམས་སོ། །

བཙུན་པ་མཁན་པོ་འགྲོ་བ་གཞན་དུ་གནས་པས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་དགེ་ཚུལ་ཕ་བསྙེན་པར་

རྫོགས་པར་བགྱིད་པ་ན་མཁན་པོའི་མཚན་འཕོས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་མཁན་པོ་ཁྱིམ་པས་བསྙེན་པར་རྫོགས་པར་བགྱིས་ན་

བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །དེ་བཞིན་དུ་མཁན་པོ་ཟ་མ་དང་། མ་ནིང་ནས་རྒྱས་པར་བསླབ་པ་སྩལ་བའི་བར་དུ་དེ་རྣམས་ཀྱིས་བསྙེན་པར་རྫོགས་པར་བགྱིས་ན་

བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །འདུལ་བ་གཞུང་དམ་པ་ལས་བསྙེན་པར་རྫོགས་པའི་དངོས་པོ་རྫོགས་སྷོ།། །།མདོར་ན། ཕྱེད་

དང་གསུམ་དང་བསྐོར་བ་དང་། །བཞི་པ་དང་ནི་མཚམས་དང་མཚན། །ཞིག་དང་སྔ་མ་མཚམས་དང་ཤིང་། །དབྱུང་དང་མི་རུང་ཁྱིམ་པ་དང་། །དབྱུང་བ་ཐ་མ་སྨྲས་པའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་

ཀྱིས་མཚམས་ཆེན་པོ་ཆོད་ཅིག་ཅེས་གསུངས་ན། བཙུན་པ་མཚམས་ཆེན་པོ་ཚད་ཇི་ཙམ། ཨུ་པཱ་ལི་དཔག་ཚད་ཕྱེད་དང་གསུམ་མོ། །དེ་ཚུན་ཆད་ནི་ཐམས་ཅད་ཀྱང་ཆུང་ངུ་སྟེ། དཀྱིལ་འཁོར་གང་དུ་གྲངས་བཞི་བཅུ་བསྐོར་བར་ཤོང་བའོ། །བཙུན་པ་དཔག་ཚད་ཕྱེད་

Vol. 12 · folio 242a

དང་གསུམ་ལས་འདས་པར་མཚམས་བཀུམ་ན་དེ་མཚམས་ཞེས་བགྱིའམ། ཨུ་པཱ་ལི་མ་ཡིན་ཏེ། དཔག་ཚད་ཕྱེད་དང་གསུམ་ནི་མཚམས་སོ། །དེ་ལས་འདས་པ་ནི་མཚམས་མ་ཡིན་ནོ། །དེ་སྟེ་མཚམས་བཅད་ན་ཡང་མ་བཅད་པ་ཞེས་

བྱའོ། །དགེ་སློང་རྣམས་ཀྱང་འདས་པ་དང་བཅས་པ་སྟེ། དེ་བཞིན་དུ་ཐམས་ཅད་ཤེས་པར་བྱའོ། །བཙུན་པ་འོག་གི་མཚམས་གང་ལགས། ཨུ་པཱ་ལི་ཆུ་ཡོད་པའི་བར་དུའོ། །བཙུན་པ་དཔག་ཚད་ཕྱེད་དང་གསུམ་ལས་འདས་པ་ན་ཆབ་མཆིས་ན་དེ་མཚམས་

ཞེས་བགྱིའམ། ཨུ་པཱ་ལི་མ་ཡིན་ཏེ། དཔག་ཚད་ཕྱེད་དང་གསུམ་ནི་མཚམས་སོ། །དེ་མན་ཆད་ནི་མཚམས་མ་ཡིན་ནོ། །བཙུན་པ་སྟེང་གི་ནམ་མཁའ་ལ་མཚམས་གང་ལགས། ཨུ་པཱ་ལི་ཇི་ཙམ་རྩིག་རྒལ་ལམ་ཤིང་གི་རྩེ་མོ་ཡོད་པའོ། །བཙུན་པ་དཔག་ཚད་ཕྱེད་

དང་གསུམ་ལས་འདས་པ་ན་རྩིག་རྒལ་ལམ་ཤིང་གི་རྩེ་མོ་མཆིས་ན་དེ་མཚམས་ཞེས་བགྱིའམ། ཨུ་པཱ་ལི་མ་ཡིན་ཏེ། དཔག་ཚད་ཕྱེད་དང་གསུམ་ནི་མཚམས་ཞེས་བྱའི། དེ་ཡན་ཆད་ནི་མཚམས་མ་ཡིན་ནོ། །བཙུན་པ་རིའི་རྩེ་མོའི་མཚམས་གང་ལགས། ཨུ་པཱ་ལི་ཆུ་མིག་

ཡོད་པའོ། །བཙུན་པ་དཔག་ཚད་ཕྱེད་དང་གསུམ་ལས་འདས་པ་ན་ཆབ་མིག་མཆིས་ན་དེ་མཚམས་ཞེས་བགྱིའམ། ཨུ་པཱ་ལི་མ་ཡིན་ཏེ། དཔག་ཚད་ཕྱེད་དང་གསུམ་ནི་མཚམས་སོ། །དེ་ཡན་ཆད་ནི་མཚམས་མ་ཡིན་ནོ། །བཙུན་པ་མཚམས་ལ་ཡང་མཚམས་ཀྱིས་

བསྐོར་བར་གནང་ངམ། ཨུ་པཱ་ལི་མི་གནང་སྟེ། རྒྱང་གྲགས་ཀྱི་མཚམས་དང་། རྩིག་པའི་མཚམས་དང་། ཆུས་བསྐོར་བའི་དཀྱིལ་འཁོར་ནི་མ་གཏོགས་སོ། །བཙུན་པ་ལས་བགྱིད་པ་འཕགས་པས་འཕགས་པའི་སྐད་དུ་མཚམས་བཀུམ་པ་དང་། དགེ་སློང་དེ་དག་

གིས་འཕགས་པའི་སྐད་མ་འཚལ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མཚམས་བཅད་པ་ཞེས་བྱ་སྟེ། ལས་བྱེད་པ་ནི་འདས་པ་དང་བཅས་པའོ། །བཙུན་པ་འཕགས་པས་མཐའ་འཁོབ་པའི་སྐད་དུ་མཚམས་བཀུམ་པ་དང་། དགེ་སློང་དེ་དག་གིས་

Vol. 12 · folio 242b

མཐའ་འཁོབ་པའི་སྐད་མ་འཚལ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་བཅད་པ་ཞེས་བྱ་སྟེ། ལས་བྱེད་པ་ནི་འདས་པ་དང་བཅས་པའོ། །བཙུན་པ་མཐའ་འཁོབ་པས་མཐའ་འཁོབ་པའི་སྐད་དུ་མཚམས་བཀུམ་པ་དང་། དགེ་སློང་དེ་དག་གིས་མཐའ་འཁོབ་

པའི་སྐད་མ་འཚལ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མཚམས་བཅད་པ་ཞེས་བྱ་སྟེ། ལས་བྱེད་པ་ནི་འདས་པ་དང་བཅས་པའོ། །བཙུན་པ་མཐའ་འཁོབ་པས་འཕགས་པའི་སྐད་དུ་མཚམས་བཀུམ་པ་དང་། དགེ་སློང་དེ་དག་གིས་འཕགས་པའི་སྐད་མ་

འཚལ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མཚམས་བཅད་པ་ཞེས་བྱ་སྟེ། ལས་བྱེད་པ་ནི་འདས་པ་དང་བཅས་པའོ། །བཙུན་པ་སྟེང་གི་ནམ་མཁའ་ལ་མཚམས་དགུམ་པར་རུང་ངམ། ཨུ་པཱ་ལི་མི་རུང་སྟེ། ཨུ་པཱ་ལི་དེ་ཅིའི་ཕྱིར་ཞེ་ན། མཚམས་བསྟན་

དུ་མེད་པའི་ཕྱིར་རོ། །བཙུན་པ་ཉི་མ་དང་ཟླ་བ་དང་སྐར་མས་མཚམས་དགུམ་དུ་རུང་ངམ། ཨུ་པཱ་ལི་མི་རུང་ངོ་། །ཨུ་པཱ་ལི་དེ་ཅིའི་ཕྱིར་ཞེ་ན། དེ་ནི་འདི་ལྟར་ཉི་མ་དང་། ཟླ་བ་དང་། སྐར་མ་ནི་མི་བརྟན་ཞིང་གཡོ་བའི་ཕྱིར་རོ། །བཙུན་པ་ཆུ་རླབས་དང་། ཆུ་རླབས་ཀྱི་རྒྱུད་

དམ། ཀླུང་གི་འགྲམ་དུ་མཚམས་དགུམ་དུ་རུང་ངམ། ཨུ་པཱ་ལི་མི་རུང་ངོ་། །ཨུ་པཱ་ལི་དེ་ཅིའི་ཕྱིར་ཞེ་ན། དེ་ནི་འདི་ལྟར་ཆུ་རླབས་དང་། ཆུ་རླབས་ཀྱི་རྒྱུད་དང་། ཀླུང་གི་འགྲམ་ནི་གཡོ་ཞིང་མི་བརྟན་པའི་ཕྱིར་རོ། །བཙུན་པ་དེ་སྟེ་ཀླུང་གི་འགྲམ་བརྟན་པར་གྱུར་ན་མཚམས་དགུམ་

དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་རྫུ་འཕྲུལ་ལམ་སྒྱུ་མས་མཚམས་དགུམ་དུ་རུང་ངམ། ཨུ་པཱ་ལི་མི་རུང་ངོ་། །ཨུ་པཱ་ལི་དེ་ཅིའི་ཕྱིར་ཞེ་ན། དེ་ནི་འདི་ལྟར་རྫུ་འཕྲུལ་དང་སྒྱུ་མ་ནི་ཐ་སྙད་དུ་མི་འདོགས་པའི་ཕྱིར་རོ། །བཙུན་པ་ཀླུང་ངམ། ཡུར་བ་ལས་མཚམས་བཟླར་

རུང་ངམ། ཨུ་པཱ་ལི་མི་རུང་སྟེ། དེ་ཀླུང་ངམ་ཡུར་ཆུ་རྟག་ཏུ་མི་འབབ་པར་གྱུར་པའོ། །བཙུན་པ་རྟག་ཏུ་འབབ་པའི་ཆུ་གཏིང་ཟབ་པ་ལས་མཚམས་བཟླ་བར་རུང་ངམ། ཨུ་པཱ་ལི་རུང་སྟེ། འདི་ལྟར་ཡང་ཀླུང་དང་ཡུར་ཆུ་དེ་ལས་ཤིང་ངམ་རྩིག་པ་འམ་རེ་ལྡེ་རྣམས་ཀྱིས་བཀབ་པར་གྱུར་

Vol. 12 · folio 243a

པའོ། །བཙུན་པ་དེ་སྟེ་ཤིང་ངམ་རེ་ལྡེ་འཇིག་པའི་ཆོས་སུ་གྱུར་ན་ཞིག་པ་ཞེས་བགྱིའམ། དེ་སྟེ་སྦྱོར་བ་བཏང་ན་ཞིག་པ་ཞེས་བྱའོ། །འོན་ཏེ་སླར་དགབ་པར་སྦྱོར་བ་མ་བཏང་ན་མ་ཞིག་པ་ཞེས་བྱའོ། །བཙུན་པ་ལས་བགྱིད་པ་མཚམས་གཅོད་པ་ན་མཚན་གྱུར་ན་མཚམས་

བཅད་པ་ཞེས་བགྱིའམ། ཨུ་པཱ་ལི་མཚམས་བཅད་པ་ཞེས་བྱའོ། །བཙུན་པ་མཚམས་ཀྱིས་མཚམས་དགྲོལ་དུ་རུང་ངམ། ཨུ་པཱ་ལི་རྒྱང་གྲགས་ཀྱི་མཚམས་དང་། རྩིག་པའི་མཚམས་མ་གཏོགས་པ་གཞན་མི་རུང་ངོ་། །བཙུན་པ་མཚམས་འཇིག་པ་རྣམ་པ་དུ་མཆིས། ཨུ་པཱ་

ལི་ལྔ་སྟེ། མཚམས་མེད་པ་དང་། དགེ་སློང་མེད་པ་དང་། རེ་བ་མེད་པ་དང་། གསོལ་བ་དང་། ལས་དང་ལྔ་ཡིན་ནོ། །བཙུན་པ་སྔོན་གྱི་མཚམས་མ་བཀྲོལ་བར་མཚམས་གཞན་དགུམ་དུ་རུང་ངམ། ཨུ་པཱ་ལི་རྒྱང་གྲགས་ཀྱི་མཚམས་དང་། རྩིག་པའི་མཚམས་དང་།

དཀྱིལ་འཁོར་གྱི་མཚམས་མ་གཏོགས་པར་མི་རུང་ངོ་། །ཨུ་པཱ་ལི་དེ་ཅིའི་ཕྱིར་ཞེ་ན། གསོལ་བ་དང་ལས་ཀྱིས་མཚམས་བཅད་དོ། །གསོལ་བ་དང་ལས་ཀྱིས་མཚམས་དགྲོལ་ལོ། །བཙུན་པ་མཚམས་བཀུམ་པས་མཚམས་དགྲོལ་བའམ། མཚམས་བཀྲོལ་བས་མཚམས་

བཀུམ་པར་འགྱུར་བ་མཆིས་སམ། ཨུ་པཱ་ལི་ཡོད་དེ། ལས་ཀྱིས་མཚམས་བཅད་ན་རྒྱང་གྲགས་དང་། རྩིག་པའི་མཚམས་དགྲོལ་བ་ཞེས་བྱའོ། །ལས་ཀྱིས་མཚམས་བཀྲོལ་ན་རྒྱང་གྲགས་ཀྱི་མཚམས་དང་། རྩིག་པའི་མཚམས་བཅད་པ་ཞེས་བྱའོ། །བཙུན་པ་མཆི་

བའི་རྗེས་སུ་མཆི་བ་གང་ཨུ་པཱ་ལི་མཚམས་སོ། །བཙུན་པ་མཆིས་པའི་རྗེས་སུ་མཆིས་པ་གང་། ཨུ་པཱ་ལི་མཚམས་སོ། །བཙུན་པ་གནས་བཞི་འམ། ལྔ་འམ། དེ་ལས་མང་ཡང་རུང་ཤིང་གཅིག་གིས་མཚམས་དགུམ་པར་རུང་ངམ། ཨུ་པཱ་ལི་རུང་སྟེ། ཇི་ཙམ་དུ་མཚམས་

བསྒྲགས་ཤིང་གཞག་པར་ནུས་པའི་བར་དུའོ། །བཙུན་པ་མཚམས་ནས་མཚམས་སྤོ་བར་རུང་ངམ། ཨུ་པཱ་ལི་མི་རུང་སྟེ། རྒྱང་གྲགས་ཀྱི་མཚམས་དང་། རྩིག་པའི་མཚམས་ནི་མ་གཏོགས་སོ། །བཙུན་པ་སྤོ་མི་འཚལ་བའི་མཚམས་དུ། ཨུ་པཱ་ལི་གཅིག་སྟེ། ལས་ཀྱི་

Vol. 12 · folio 243b

མཚམས་སམ་ཆུ་མིག་གམ་ཁྲོན་པའོ། །བཙུན་པ་རུང་བའི་ས་དང་། མི་རུང་བའི་སའོ་ཞེས་བགྱི་ན། བཙུན་པ་རུང་བའི་ས་གང་ལགས་ཨུ་པཱ་ལི་གནས་གང་ན་མཚམས་ཀྱི་ནང་ན་རུང་བའི་གནས་སུ་བྱིན་གྱིས་བརླབས་པར་གྱུར་པ་འདི་ནི་རུང་བའི་ས་ཞེས་བྱའོ། །བཙུན་པ་མི་རུང་

བའི་ས་གང་ལགས། ཨུ་པཱ་ལི་མཚམས་ཀྱི་ནང་དུ་རུང་བའི་གནས་བྱིན་གྱིས་མ་རླབས་པར་གྱུར་པ་འདི་ནི་མི་རུང་བའི་ས་ཞེས་བྱའོ། །ཨུ་པཱ་ལི་དམ་པའི་ཆོས་ཡོད་པའི་བར་དུ་མི་རུང་བའི་ས་ཡང་ཡོད་དོ། །ཨུ་པཱ་ལི་དམ་པའི་ཆོས་མེད་པར་གྱུར་ན་ཐམས་ཅད་ཀྱང་རུང་བའི་

སའོ། །བཙུན་པ་ཇི་ཙམ་གྱིས་ན་དམ་པའི་ཆོས་མཆིས་པ་ཞེས་བགྱི། ཨུ་པཱ་ལི་གང་གི་ཚེ་ནན་ཏན་བྱེད་པ་རྣམས་ནན་ཏན་བྱེད་ཅིང་ལས་ཀྱང་བྱེད་དེ་ནན་ཏན་དུ་བྱ་བས་ནན་ཏན་བྱེད་ལ་ལས་ཀྱང་བྱེད་པའི་བར་དུ་ནི་དམ་པའི་ཆོས་ཡོད་པ་ཞེས་བྱའོ། །བཙུན་པ་ཇི་ཙམ་གྱིས་ན་

དམ་པའི་ཆོས་མ་མཆིས་པར་གྱུར་པ་ཞེས་བགྱི། ཨུ་པཱ་ལི་གང་གི་ཚེ་ནན་ཏན་བྱེད་པ་རྣམས་ནི་ནན་ཏན་མི་བྱེད་ཅིང་ལས་ཀྱང་མི་བྱེད་དེ་ནན་ཏན་བྱེད་པས་ནན་ཏན་མི་བྱེད་ལ་ལས་ཀྱང་མི་བྱེད་པའི་ཚེ། དམ་པའི་ཆོས་མེད་པར་གྱུར་པ་ཞེས་བྱའོ། །བཙུན་པ་ལས་བགྱིད་པ་ཁྱིམ་

པས་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་བཞིན་དུ་ལས་བྱེད་པ་ཟ་མ་དང་མ་ནིང་དང་། དགེ་སློང་མ་སུན་ཕྱུང་བ་དང་། ཕ་དང་། མ་དང་དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་།

མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། མི་གནས་པ་དང་། སོ་སོར་གནས་པ་དང་། སྔར་འཁྲུགས་པ་རྣམས་ཀྱིས་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་ལས་བགྱིད་པ་དགེ་འདུན་གྱི་དབྱེན་

བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ཀྱིས་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མཚམས་བཅད་པ་ཞེས་ནི་བྱ་ལ། དགེ་འདུན་རྣམས་ནི་འདས་པ་དང་བཅས་པའོ། །བཙུན་པ་ལས་བགྱིད་པ་སྨྱོན་པས་མཚམས་

Vol. 12 · folio 244a

བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་དེ་སྟེ་དགེ་སློང་གི་འདུ་ཤེས་དང་ལྡན་ལ་མཚན་མ་རྣམས་ཀྱང་སྟོན་ནུས་ཤིང་གསོལ་བ་ཡང་བྱས་ཏེ་ལས་མ་ཉམས་ན་མཚམས་བཅད་པ་ཞེས་བྱའོ། །དེ་བཞིན་དུ་ལས་བྱེད་པ་སེམས་འཁྲུགས་པ་དང་། ནད་ཀྱིས་

གཟིར་བ་དང་། གླེན་པ་དང་། འོན་པ་རྣམས་ཀྱང་བརྗོད་པར་བྱའོ། །བཙུན་པ་ལས་བྱེད་པ་འགྲོ་བ་གཞན་དུ་གནས་པས་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་མཚམས་བཀུམ་པ་ན་ལས་བགྱིད་པའི་དགེ་སློང་དུས་ལས་འདས་

ན་མཚམས་བཀུམ་པ་ཞེས་བགྱིའམ། ཨུ་པཱ་ལི་དེ་སྟེ་མཚམས་བསྒྲགས་པར་ཡང་རྟོགས་ལ། ལས་ཀྱང་མང་དུ་བྱས་པར་གྱུར་ན་མཚམས་བཅད་པ་ཞེས་བྱའོ། །ཨུ་པཱ་ལི་དེ་སྟེ་མཚམས་བསྒྲགས་པར་ཡང་མ་རྟོགས་ལ་ལས་ཀྱང་མང་དུ་མ་བྱས་པར་གྱུར་ན་མཚམས་མ་བཅད་

པ་ཞེས་བྱའོ། །དེ་བཞིན་དུ་ཁྱིམ་པ་ཡིན་པར་ཤེས་པ་དང་། མ་ནིང་ཡིན་པ་དང་། དགེ་སློང་མ་སུན་ཕྱུང་བ་དང་། ཕ་དང་མ་དང་། དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ཡིན་པ་དང་། མུ་སྟེགས་ཅན་དང་། མུ་སྟེགས་ཅན་

དུ་སོང་བ་ཡིན་པ་དང་། རྐུན་གནས་དང་། མི་གནས་པ་ཡིན་པ་དང་། སོ་སོར་གནས་པ་ཡིན་པ་དང་། སྔར་ཉེས་པ་བྱུང་བ་ཡིན་པ་དང་། སྔར་འཁྲུགས་པ་ཡིན་པར་ཤེས་པ་ནས། དེ་བཞིན་དུ་འགྲོ་བ་གཞན་དུ་གནས་པ་བདག་ཉིད་ཡིན་པར་ཤེས་པའང་རྒྱས་པར་བརྗོད་པར་

བྱའོ། །བཙུན་པ་མཚམས་འགུམས་པ་ན་དགེ་འདུན་གྱི་དབྱེན་བགྱིས་པར་འཚལ་བ་དང་ཉེ་བར་ཕྱོགས་པ་དང་། བསླབ་པ་སྩལ་བ་ལགས་པར་འཚལ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མཚམས་བཅད་པ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །

བཙུན་པ་ཁྱིམ་པས་གྲངས་སུ་བསྐངས་ཏེ་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་བཞིན་དུ་མ་ནིང་ནས་སྔར་འཁྲུགས་པ་རྣམས་ཀྱི་བར་དུ་དེ་དག་གིས་གྲངས་སུ་བསྐངས་ཏེ་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་

Vol. 12 · folio 244b

མ་ཡིན་ནོ། །བཙུན་པ་དགེ་སློང་ཟ་མས་གྲངས་སུ་བསྐངས་ཏེ་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་བཅད་པ་ཞེས་མི་བྱ་སྟེ། དགེ་འདུན་ཡང་འདས་པ་དང་བཅས་པའོ། །དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་

པ་སྩལ་བ་རྣམས་ཀྱིས་གྲངས་སུ་བསྐངས་ཏེ་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མཚམས་བཅད་པ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ།། །།མདོར་ན། མཚམས་དང་རུང་བའི་གནས་དག་དང་། །ལས་གཅིག་

ཀླུང་ཡང་དེ་བཞིན་ཏེ། །ཞིག་པ་དང་ནི་གླིང་གསུམ་དང་། །གྲོང་དང་གསུམ་པ་དེ་བཞིན་ནོ། །བཙུན་པ་མཚམས་ཀྱི་མཚན་མ་མཆིས་པར་གྱུར་ན་མཚམས་ཞིག་པ་ཞེས་བགྱིའམ། ཨུ་པཱ་ལི་ཞིག་པ་ཞེས་བྱའོ། །བཙུན་པ་མཚམས་ཞིག་ན་རུང་བའི་གནས་ཀྱང་ཞིག་

པ་ཞེས་བགྱིའམ། ཨུ་པཱ་ལི་ཞིག་པ་ཞེས་བྱའོ། །བཙུན་པ་ལས་གཅིག་དང་གསོལ་བ་གཅིག་གིས་ལས་བགྱིད་པ་ཕྱོགས་གཅིག་ཏུ་མཆིས་ཏེ་གནས་བཞིར་མཚམས་དགུམ་པར་རུང་ངམ། ཨུ་པཱ་ལི་རུང་སྟེ། ཇི་ལྟར་ཡང་ལས་བྱེད་པའི་དགེ་སློང་དེས་གནས་བཞིའི་

མཚམས་སུ་ཤིང་ངམ། དབྱིག་པ་འམ། རེ་ལྡེ་ལ་མནན་ཏེ་མཚམས་བཅད་པའོ། །བཙུན་པ་མཚམས་དགུམ་པའི་གནས་སུ་ཀླུང་ངམ་ཡུར་ཆུས་མཚམས་ནོན་ན་མཚམས་ཞིག་པ་ཞེས་བགྱིའམ། ཨུ་པཱ་ལི་དེ་སྟེ་མཚམས་ཀྱི་མཚན་མ་བརྟན་པ་ཡོད་ན་མ་ཞིག་པ་ཞེས་

བྱའོ། །དེ་སྟེ་མཚམས་ཀྱི་མཚན་མ་མེད་པར་གྱུར་ན་ཞིག་པ་ཞེས་བྱའོ། །བཙུན་པ་མཚམས་ཞིག་ན་ཆོས་གོས་དང་མི་འབྲལ་བའི་སྡོམ་པ་ཡང་མ་མཆིས་པ་ཞེས་བགྱིའམ། མཆིས་པ་ཞེས་བགྱི། ཨུ་པཱ་ལི་ཡོད་པ་ཞེས་བྱའོ། །བཙུན་པས་ནི་ལས་ཀྱི་མཚམས་སུ་ཆོས་

གོས་དང་མི་འབྲལ་བའི་སྡོམ་པ་སྐོས་ཤིག་ཅེས་གསུངས་ན། བཙུན་པ་རྒྱང་གྲགས་ཀྱི་མཚམས་དང་། རྩིག་པའི་མཚམས་ལ་ཡང་ཆོས་གོས་དང་མི་འབྲལ་བའི་སྡོམ་པ་བསྐོ་བར་བགྱིའམ། དེ་སྟེ་དགོས་པར་གྱུར་ན་སྐོས་ཤིག །བཙུན་པ་གྲོང་དང་གཙུག་ལག་ཁང་

Vol. 12 · folio 245a

ལྷན་ཅིག་ཏུ་མཆིས་ཏེ་མཚམས་འབྲེལ་བར་གྱུར་ན་དེ་ལ་ཆོས་གོས་དང་མི་འབྲལ་བར་གང་ཚུན་ཆད་བསྐོ་བར་བགྱི། གྲོང་གི་ཉེན་ཀོར་མ་གཏོགས་པའོ། །བཙུན་པ་བཅོམ་ལྡན་འདས་ཀྱིས་ནི་གྲོང་ངམ་གྲོང་གི་ཉེན་ཀོར་མ་གཏོགས་པར་ཆོས་གོས་དང་མི་འབྲལ་བའི་

སྡོམ་པའོ་ཞེས་གསུངས་ན། ཆོས་གོས་དང་མི་འབྲལ་བའི་སྡོམ་པ་བསྐོས་པ་ལས་གྲོང་ཞིག་དེར་བཙུགས་ན་དེ་ཕྱོགས་སུ་ཆོས་གོས་དང་མི་འབྲལ་བའི་སྡོམ་པ་ཞིག་པར་འགྱུར་རམ། ཨུ་པཱ་ལི་ཞིག་པ་ཞེས་བྱའོ། །བཙུན་པ་ཆོས་གོས་དང་མི་འབྲལ་བའི་སྡོམ་པ་བསྐོས་

པ་ལས་གྲོང་གུད་དུ་འཕོས་ན་བཙུན་པ་ཅིའི་ཕྱིར་ཕྱོགས་དེར་ཡང་ཆོས་གོས་དང་མི་འབྲལ་བར་སྡོམ་པར་བསྐོ་བར་བགྱིའམ། ཨུ་པཱ་ལི་མི་དགོས་ཏེ། སྔོན་གྱི་སྡོམ་པ་གསོས་པས་ཆོག་གོ།། །།མདོར་ན། དྲན་པ་བཞི་པ་གསུམ་པ་དང་། །ལྔ་པ་དང་ནི་གཉིས་མཚན་

དང་། །ཉེས་པ་གཉིས་དང་སྐབས་འབྱེད་དང་། །སེམས་པ་འདུག་པ་ལངས་པ་དང་། །ཁྱིམ་པ་དག་ལ་སོགས་པ་དང་། །སྨྱོན་པ་འཆད་དང་མང་པོའོ། །བཙུན་པ་དགེ་འདུན་གྱིས་སྐྱ་རེངས་ཤར་བའི་ཚེ་དེང་ནི་བདག་ཅག་གི་གསོ་སྦྱོང་ངོ་ཞེས་དྲན་པར་གྱུར་ན། དགེ་

སློང་དེ་དག་གིས་གསོ་སྦྱོང་ཇི་ལྟར་བགྱི། དེང་བདག་ཅག་གི་གསོ་སྦྱོང་ངོ་ཞེས་སེམས་ལས་ཚིག་ཏུ་བརྗོད་ཅིང་། འོན་ཏེ་དེ་ན་སོ་སོར་ཐར་པ་ཀློག་ན་བཀླགས་པ་ཞེས་བྱ་སྟེ། དགེ་སློང་དེ་དག་གིས་གསོ་སྦྱོང་ཡང་བྱས་མོད་ཀྱི་འདས་པ་དང་བཅས་པར་འགྱུར་རོ། །བཙུན་

པ་བཅོམ་ལྡན་འདས་ཀྱིས་གསོ་སྦྱོང་གི་ལས་ལ་རྣམ་པ་བཞི་སྟེ། ཆོས་བཞིན་མ་ཡིན་པར་བྱེད་ཅིང་མ་འདུས་པ་དང་། ཆོས་བཞིན་མ་ཡིན་པ་ལ་འདུས་པ་དང་། ཆོས་བཞིན་ལ་མ་འདུས་པ་དང་། ཆོས་བཞིན་ལ་འདུས་པ་རྣམས་སོ་ཞེས་གསུངས་ན། ཆོས་བཞིན་མ་ཡིན་

པར་བྱེད་ཅིང་མ་འདུས་པ་གང་ཞེ་ན། གང་གི་ཚེ་སོ་སོར་ཐར་པ་བཀླག་པར་བྱ་བ་དེའི་ཚེ་མི་ཀློག །གང་གིས་བཀླག་པར་བྱ་བ་དེས་མི་ཀློག །ཇི་ལྟར་བཀླག་པར་བྱ་བ་དེ་ལྟར་མི་ཀློག །ཇི་སྲིད་དུ་བཀླག་པར་བྱ་བ་དེ་སྲིད་དུ་མི་ཀློག་པ་དང་མ་འདུས་པར་གྱུར་པའོ། །ཆོས་བཞིན་

Vol. 12 · folio 245b

མ་ཡིན་པ་ལ་འདུས་པ་གང་ཞེ་ན། གང་གི་ཚེ་ན་སོ་སོར་ཐར་པ་བཀླག་པར་བྱ་བ་དེའི་ཚེ་མི་ཀློག་པ་ནས་རྒྱས་པར་ཇི་སྲིད་དུ་བཀླག་པར་བྱ་བ་དེ་སྲིད་དུ་མི་ཀློག་ཅིང་འདུས་པར་གྱུར་པའོ། །ཆོས་བཞིན་ལ་མ་འདུས་པ་གང་ཞེ་ན། གང་གི་ཚེ་སོ་སོར་ཐར་པ་བཀླག་པར་བྱ་བ་དེའི་ཚེ་

ཀློག །གང་གིས་བཀླག་པར་བྱ་བ་དེས་ཀློག །ཇི་ལྟར་བཀླག་པར་བྱ་བ་དེ་ལྟར་ཀློག །ཇི་ཙམ་དུ་བཀླག་པར་བྱ་བ་དེ་ཙམ་དུ་བཀླགས་པ་དང་མ་འདུས་པར་གྱུར་པའོ། །ཆོས་བཞིན་ལ་འདུས་པ་གང་ཞེ་ན། གང་གི་སོ་སོར་ཐར་པ་བཀླག་པར་བྱ་བ་དེའི་ཚེ་ཀློག་པ་ནས་རྒྱས་

པར་ཇི་སྲིད་དུ་བཀླག་པ་དེ་སྲིད་དུ་ཀློག་ཅིང་འདུས་པར་གྱུར་པའི་བར་དུའོ། །བཙུན་པ་འཕགས་པས་འཕགས་པའི་སྐད་དུ་སོ་སོར་ཐར་པ་བཀླགས་པ་དང་། དགེ་སློང་དེ་དག་གིས་འཕགས་པའི་སྐད་མ་འཚལ་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་

བྱ་སྟེ། སོ་སོར་ཐར་པའི་མདོ་ཀློག་པ་ཡང་འདས་པ་དང་བཅས་པའོ། །མཐའ་འཁོབ་པས་འཕགས་པའི་སྐད་དུ་སོ་སོར་ཐར་པ་བཀླགས་པ་དང་། དགེ་སློང་དེ་དག་གིས་འཕགས་པའི་སྐད་མ་འཚལ་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་

བྱ་སྟེ། སོ་སོར་ཐར་པ་ཀློག་པ་ཡང་འདས་པ་དང་བཅས་པའོ། །འཕགས་པས་མཐའ་འཁོབ་པའི་སྐད་དུ་སོ་སོར་ཐར་པ་བཀླགས་པ་དང་། དགེ་སློང་དེ་དག་གིས་མཐའ་འཁོབ་པའི་སྐད་མ་འཚལ་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་མི་བྱ་སྟེ།

སོ་སོར་ཐར་པའི་མདོ་ཀློག་པ་ཡང་འདས་པ་དང་བཅས་པའོ། །མཐའ་འཁོབ་པས་མཐའ་འཁོབ་པའི་སྐད་དུ་སོ་སོར་ཐར་པའི་མདོ་བཀླགས་པ་དང་། དགེ་སློང་དེ་དག་གིས་མཐའ་འཁོབ་པའི་སྐད་མ་འཚལ་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་མི་བྱ་སྟེ།

སོ་སོར་ཐར་པའི་མདོ་ཀློག་པ་ཡང་འདས་པ་དང་བཅས་པའོ། །བཙུན་པ་ས་ལ་གནས་པའི་གྲངས་ནམ་མཁའ་ལ་གནས་པས་བསྐངས་ཏེ་སོ་སོར་ཐར་པའི་མདོ་ཀློག་པ་བཀླགས་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱ་སྟེ། དགེ་སློང་དེ་དག་ཀྱང་འདས་པ་

Vol. 12 · folio 246a

དང་བཅས་པའོ། །བཙུན་པ་ནམ་མཁའ་ལ་གནས་པའི་གྲངས་ས་ལ་གནས་པས་བསྐངས་ཏེ་སོ་སོར་ཐར་པའི་མདོ་ཀློག་པ་བཀླགས་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱ་སྟེ། དགེ་སློང་དེ་དག་ཀྱང་འདས་པ་དང་བཅས་པའོ། །བཙུན་

པ་ས་ལ་གནས་པ་རྣམས་ལ་ནམ་མཁར་གནས་པས་སོ་སོར་ཐར་པའི་མདོ་ཀློག་ཅིང་གསོ་སྦྱོང་བགྱིས་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱ་སྟེ། དགེ་འདུན་དེ་དག་ཀྱང་འདས་པ་དང་བཅས་པའོ། །བཙུན་པ་ནམ་མཁའ་ལ་གནས་པ་རྣམས་ལ་ས་

ལ་གནས་པས་སོ་སོར་ཐར་པའི་མདོ་ཀློག་ཅིང་གསོ་སྦྱོང་བགྱིས་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱ་སྟེ། དགེ་སློང་དེ་དག་ཀྱང་འདས་པ་དང་བཅས་པའོ། །དེ་བཞིན་དུ་མཚམས་ཀྱི་ནང་ན་འདུག་པ་དང་། མཚམས་ཀྱི་ཕྱི་རོལ་ན་འདུག་པར་ལྷན་ཅིག་

རྒྱས་པར་བཞིར་བྱའོ། །བཙུན་པ་སོ་སོར་ཐར་པ་བཀླག་པ་ལ་རྣམ་པ་དུ་མཆིས། ཨུ་པཱ་ལི་རྣམ་པ་ལྔ་སྟེ། གསོལ་བ་བྱས་ནས་གླེང་གཞི་བཀླགས་ཏེ་ལྷག་མ་རྣམས་ཐོས་པར་ཟད་དོ་ཞེས་བསྒྲགས་པ་འདི་ནི་སོ་སོར་ཐར་པའི་མདོ་བཀླག་པ་དང་པོའོ། །གསོལ་བ་བྱས་ནས་གླེང་གཞི་

བཀླགས་ཏེ་ཕས་ཕམ་པ་བཞི་བཀླགས་ནས་ལྷག་མ་རྣམས་ཐོས་པའོ་ཞེས་བསྒྲགས་པ་འདི་ནི་སོ་སོར་ཐར་པའི་མདོ་ཀློག་པ་གཉིས་པའོ། །གསོལ་བ་བྱས་ཏེ་གླེང་གཞི་བཀླགས་ཏེ་ཕས་ཕམ་པ་བཞི་བཀླགས། དགེ་འདུན་གྱི་ལྷག་མ་བཅུ་གསུམ་བཀླགས་ལ་ལྷག་མ་རྣམས་ཐོས་

པའོ་ཞེས་བསྒྲགས་པ་འདི་ནི་སོ་སོར་ཐར་པའི་མདོ་བཀླག་པ་གསུམ་པའོ། །གསོལ་བ་བྱས་ཏེ་གླེང་གཞི་བཀླགས། ཕས་ཕམ་པ་བཞི་དང་། དགེ་འདུན་གྱི་ལྷག་མ་བཅུ་གསུམ་དང་། མི་མངོན་པ་གཉིས་བཀླགས་ནས་ལྷག་མ་རྣམས་ཐོས་པའོ་ཞེས་བསྒྲགས་པ་འདི་ནི་སོ་སོར་

ཐར་པའི་མདོ་བཀླག་པ་བཞི་པ་སྟེ། རྒྱས་པར་ཀློག་པ་དང་འདི་ལྔའོ། །བཙུན་པ་གསོ་སྦྱོང་གི་ལས་ལ་རྣམ་པ་དུ། ཨུ་པཱ་ལི་ལྔ་སྟེ། བཀླགས་པ་དང་། མི་བཀླག་པར་སེམས་བསྐྱེད་པ་དང་། བྱིན་གྱིས་བརླབས་པ་དང་། ཡོངས་སུ་དག་པ་དང་། སྐབས་འབྱེད་པ་དང་རྣམ་

Vol. 12 · folio 246b

པ་ལྔའོ། །བཙུན་པ་སོ་སོར་ཐར་པའི་མདོ་ཀློག་པས་ཀློག་པའི་ཚེ་མཚན་གྱུར་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱའོ། །བཙུན་པ་དགེ་སློང་ཕྱོགས་གཅིག་ཏུ་མཆིས་པས་གནས་བཞིར་སོ་སོར་ཐར་པའི་མདོ་བཀླགས་ལ་གསོ་སྦྱོང་ཡང་བགྱིས་ན་དགེ་སློང་དེ་

དག་འདས་པ་དང་བཅས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་སོ་སོར་ཐར་པའི་མདོ་ཀློག་པའི་དགེ་སློང་དེ་གནས་པའི་མཚམས་སུ་ཤིང་ངམ། དབྱིག་པའམ། རེ་ལྡེས་མནན་ཏེ་སོ་སོར་ཐར་པའི་མདོ་བཀླགས་པའོ། །བཙུན་པ་གནས་གཅིག་པའི་

མཚམས་ཀྱི་ནང་དུ་གནས་གཅིག་པའི་དགེ་སློང་རྣམས་ཀྱིས་ཕྱོགས་བཞིར་སོ་སོར་གསོ་སྦྱོང་བགྱིས་ན་གསོ་སྦྱོང་ཀྱང་བགྱིས་ལ། དགེ་སློང་དེ་དག་ཀྱང་འདས་པ་དང་བཅས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། གཅིག་གི་གཅིག་དད་པ་བྱིན་པའོ། །བཙུན་པ་སོ་སོར་

ཐར་པའི་མདོ་ཀློག་པའི་དགེ་སློང་ཕྱོགས་གཅིག་ཏུ་མཆིས་པ་མཚམས་ཀྱི་ནང་དང་མཚམས་ཀྱི་སླད་རོལ་ན་གནས་པ་རྣམས་ལ་སོ་སོར་ཐར་པ་བཀླགས་ན་གསོ་སྦྱོང་ཀྱང་བགྱིས་ལ། དགེ་སློང་དེ་དག་ཀྱང་འདས་པ་དང་བཅས་པར་མི་འགྱུར་བ་མཆིས་སམ། །ཨུ་པཱ་ལི་ཡོད་དེ། འདི་

ལྟར་ཡང་སོ་སོར་ཐར་པའི་མདོ་ཀློག་པའི་དགེ་སློང་གིས་མཚམས་ནོན་ཏེ་མནན་ནས་མཚམས་སུ་འགྲེང་ངམ་འདུག་ལ་མཚམས་ཀྱི་ནང་དང་མཚམས་ཀྱི་ཕྱི་རོལ་ན་གནས་པ་རྣམས་ལ་སོ་སོར་ཐར་པ་བཀླགས་པའོ། །བཙུན་པ་དགེ་སློང་གིས་སོ་སོར་ཐར་པའི་མདོ་ཀློག་པ་ལྔ་

ལས་གང་ཡང་རུང་སྟེ། སོ་སོར་ཐར་པའི་མདོ་ཀློག་པ་མ་བཀླགས་ཀྱང་གསོ་སྦྱོང་བགྱིས་པར་འགྱུར་བ་མཆིས་སམ། ཨུ་པཱ་ལི་ཡོད་དེ་སྐབས་འབྱེད་པའི་ཚེ་སྐབས་འབྱེད་པས་སྐབས་ཕྱེ་བའོ། །བཙུན་པ་དགེ་སློང་གིས་ཚིག་ཏུ་མ་སྨྲས་ཀྱང་གསོ་སྦྱོང་བགྱིས་པར་འགྱུར་བ་

མཆིས་སམ། ཨུ་པཱ་ལི་ཡོད་དེ། སེམས་བསྐྱེད་པས་སོ། །བཙུན་པས་འཁོར་རྣམས་མ་ལངས་དགེ་སློང་རྣམས་ནི་མ་དོང་པའོ་ཞེས་གསུངས་ན། བཙུན་པ་ཇི་ཙམ་གྱིས་ན་འཁོར་མ་ལངས་པ་ཞེས་བགྱི། ཨུ་པཱ་ལི་གང་དུ་དགེ་སློང་བཞི་འམ། དེ་ལས་མང་དུ་འདུག་པར་གྱུར་

Vol. 12 · folio 247a

ན་མ་ལངས་པ་ཞེས་བྱའོ། །བཞིར་མ་ཚང་ན་ནི་ལངས་པ་ཞེས་བྱའོ། །བཙུན་པ་དགེ་སློང་གིས་སོ་སོར་ཐར་པའི་མདོ་ཀློག་པ་བཀླགས་པ་དང་སྟན་ལས་ལངས་ཏེ་མཆིས་ནས་དགེ་སློང་མཆིས་བཞིན་དུ་འཚལ་བར་མ་བགྱིས་ཀྱང་ཀུན་དུ་ལྟུང་བར་མི་འགྱུར་བ་མཆིས་སམ།

ཨུ་པཱ་ལི་ཡོད་དེ། བཤང་བ་དང་གཅི་བའི་སར་སོང་སྟེ་དེ་ན་ཡང་ཐོས་པའི་ཉེ་འཁོར་ལས་མ་འདས་པའོ། །ཁྱིམ་པས་སོ་སོར་ཐར་པའི་མདོ་ཀློག་པ་བགྱིས་ཏེ་གསོ་སྦྱོང་བགྱིས་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་གསོ་སྦྱོང་མ་བྱས་པ་ཞེས་བྱ་སྟེ། དགེ་འདུན་ཡང་

འདས་པ་དང་བཅས་པའོ། །དེ་བཞིན་དུ་ཟ་མ་དང་། མ་ནིང་དང་། དགེ་སློང་མ་སུན་ཕྱུང་བ་དང་། མི་གནས་པ་དང་། སོ་སོར་གནས་པ་དང་། འགྲོ་བ་གཞན་དུ་གནས་པ་ནས། སྔར་འཁྲུགས་པའི་བར་དུ་དེ་དག་ནི། ཨུ་པཱ་ལི་གསོ་སྦྱོང་མ་བྱས་པ་ཞེས་བྱ་སྟེ། དགེ་འདུན་

ཡང་འདས་པ་དང་བཅས་པའོ། །བཙུན་པ་དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ཀྱིས་སོ་སོར་ཐར་པའི་མདོ་ཀློག་པ་བགྱིས་ཏེ་གསོ་སྦྱོང་བགྱིས་ན་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱ་སྟེ། དགེ་འདུན་རྣམས་ནི་འདས་པ་

དང་བཅས་པའོ། །བཙུན་པ་སྨྱོན་པས་སོ་སོར་ཐར་པའི་མདོ་ཀློག་པ་བགྱིས་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱ་སྟེ། དགེ་འདུན་རྣམས་ནི་འདས་པ་དང་བཅས་པའོ། །བཙུན་པ་དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། འོན་པས་

སོ་སོར་ཐར་པའི་མདོ་ཀློག་པ་བགྱིས་ཏེ་གསོ་སྦྱོང་བགྱིས་ན་གསོ་སྦྱོང་བགྱིས་པ་ཞེས་བགྱིའམ། གསོ་སྦྱོང་བྱས་པ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །ཇི་ལྟར་སོ་སོར་ཐར་པའི་མདོ་ཀློག་པ་དེ་བཞིན་དུ་མང་པོར་བསྐང་བ་ཡང་རྒྱས་པར་སྦྱར་རོ།། །།མདོར་ན།

མ་ཕུལ་བླངས་པ་དགེ་འདུན་དང་། །བཞི་པ་དང་ནི་གཉིས་པ་མཚན། །ཁོར་བ་དང་ནི་གཅིག་ནས་གཅིག །བྱིན་དང་ལམ་དང་དེ་བཞིན་མང་། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགེ་སློང་གིས་དད་པ་དང་ཡོངས་སུ་དག་པ་བླངས་ཏེ་

Vol. 12 · folio 247b

སྟེང་གི་ནམ་མཁའ་ལས་རེ་བ་མེད་པར་མཆིས་སམ། མཚམས་ཀྱི་སླད་རོལ་དུ་མཆིས་ན་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །བཙུན་པ་དེ་སྟེ་རེ་བ་དང་བཅས་པས་མཆི་ན་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ།

ཨུ་པཱ་ལི་མ་ཡིན་ནོ། །བཙུན་པ་ས་ལ་གནས་པས་ནམ་མཁའ་ལ་གནས་པ་རྣམས་ལ་དད་པ་དང་ཡོངས་སུ་དག་པ་སྩལ་དུ་རུང་ངམ། ཨུ་པཱ་ལི་མི་རུང་ངོ་། །བླང་དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་ནམ་མཁའ་ལ་གནས་པས་ས་ལ་གནས་པ་རྣམས་ལ་དད་པ་དང་ཡོངས་སུ་

དག་པ་སྩལ་བར་རུང་ངམ། ཨུ་པཱ་ལི་མི་རུང་ངོ་། །བླང་བར་རུང་ངམ། ཨུ་པཱ་ལི་མི་རུང་ངོ་། །དེ་བཞིན་དུ་མཚམས་ཀྱི་ནང་དུ་འདུག་པ་དང་མཚམས་ཀྱི་ཕྱི་རོལ་ན་འདུག་པ་རྣམས་ལ་ཡང་བཞིར་བྱའོ། །བཙུན་པ་དགེ་སློང་གིས་དགེ་འདུན་ཐམས་ཅད་འདུས་ཤིང་ཚོགས་པ་ལ་དད་པ་དང་

ཡོངས་སུ་དག་པ་ཕུལ་ན་དེས་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱའོ། །སུས་རྨ་བར་བགྱི། སུས་ཀྱང་མ་ཡིན་ནོ། །བཙུན་པ་དགེ་སློང་འཕགས་པས་འཕགས་པའི་སྐད་དུ་དད་པ་དང་ཡོངས་སུ་དག་པ་ཕུལ་བ་དང་། དགེ་སློང་དེས་ཀྱང་

འཕགས་པའི་སྐད་མ་འཚལ་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །འཕགས་པས་མཐའ་འཁོབ་པའི་སྐད་དུ་དད་པ་དང་ཡོངས་སུ་དག་པ་ཕུལ་བ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན་དད་པ་དང་ཡོངས་སུ་དག་པ་ཕུལ་བ་

ཞེས་བགྱིའམ། ཨུ་པཱ་ལི་མ་ཡིན་ནོ། །མཐའ་འཁོབ་པས་མཐའ་འཁོབ་པའི་སྐད་དུ་དད་པ་དང་ཡོངས་སུ་དག་པ་ཕུལ་བ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །མཐའ་འཁོབ་པས་

འཕགས་པའི་སྐད་དུ་དད་པ་དང་ཡོངས་སུ་དག་པ་ཕུལ་བ་དང་། དགེ་སློང་དེས་ཀྱང་འཕགས་པའི་སྐད་དུ་མ་འཚལ་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དགེ་སློང་གིས་ལུས་ཀྱི་དམིགས་པས་སྐད་མ་བརྗོད་ན་དད་པ་དང་ཡོངས་སུ་དག་པ་

Vol. 12 · folio 248a

ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱའོ། །ཚིག་གིས་སྨྲས་པ་ལུས་ཀྱིས་མ་ལགས་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱའོ། །ལུས་དང་ཚིག་གིས་སྨྲས་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ།

ཨུ་པཱ་ལི་ཕུལ་བ་ཞེས་བྱའོ། །ལུས་ཀྱིས་ཀྱང་མ་ལགས་ཚིག་གིས་ཀྱང་མ་ལགས་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དད་པ་དང་ཡོངས་སུ་དག་པ་སྩལ་བ་ལས་དད་པ་དང་ཡོངས་སུ་དག་པ་ལེན་པའི་དགེ་སློང་མཚན་འཕོས་ན་མ་ཕུལ་བ་

ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་གཅིག་ནས་གཅིག་ཏུ་བརྒྱུད་དེ་དད་པ་དང་ཡོངས་སུ་དག་པ་ཕུལ་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱ་སྟེ། དགེ་སློང་དེ་དག་ནི་འདས་པ་དང་བཅས་པའོ། །བཙུན་པ་ཆད་པ་ཁོར་བས་དད་པ་དང་ཡོངས་སུ་

དག་པ་ཕུལ་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱ་སྟེ། དགེ་སློང་དེ་དག་ནི་འདས་པ་དང་བཅས་པའོ། །བཙུན་པ་དགེ་སློང་གིས་དད་པ་དང་ཡོངས་སུ་དག་པ་ཕུལ་ནས་ཁྱིམ་པར་ཁས་བླངས་ན་དད་པ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་

ཞེས་བྱའོ། །དེ་བཞིན་དུ་མ་ནིང་ལགས་པར་ཁས་བླངས་པ་ནས། སྔར་འཁྲུགས་པ་ལགས་པར་ཁས་བླངས་པའི་བར་དུ་རྒྱས་པར་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །བཙུན་པ་དགེ་སློང་གིས་དད་པ་དང་ཡོངས་སུ་དག་པ་ཕུལ་ནས་ཟ་མ་

ལགས་པར་ཁས་བླངས་ན་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །དེ་སྟེ་དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ལགས་པར་ཁས་བླངས་ན་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ།

ཨུ་པཱ་ལི་མ་ཡིན་ནོ། །བཙུན་པ་དགེ་སློང་གིས་དད་པ་དང་ཡོངས་སུ་དག་པ་བླངས་ནས་ཁྱིམ་པ་ལགས་པར་ཁས་བླངས་ན་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །དེ་བཞིན་དུ་མ་ནིང་ལགས་པར་ཁས་བླངས་པ་ནས། སྔར་འཁྲུགས་པ་

Vol. 12 · folio 248b

ལགས་པར་ཁས་བླངས་པའི་བར་དུ་རྒྱས་པར་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །བཙུན་པ་དགེ་སློང་གིས་དད་པ་དང་ཡོངས་སུ་དག་པ་བླངས་པ་དང་། ཟ་མ་དང་། མི་གནས་པ་དང་། སོ་སོར་གནས་པ་རྣམས་ལགས་པར་ཁས་བླངས་ན་

དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །བཙུན་པ་དགེ་སློང་གིས་དགེ་འདུན་གྱི་དབྱེན་བགྱིས་པ་ལགས་པར་ཁས་བླངས་པའམ། ཉེ་བར་ཕྱོགས་པ་དང་། བསླབ་པ་སྩལ་བ་ལགས་པར་ཁས་བླངས་ན་དད་པ་དང་ཡོངས་སུ་དག་པ་མ་ཕུལ་བ་

ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དགེ་སློང་གིས་དད་པ་དང་ཡོངས་སུ་དག་པ་བླངས་ཏེ་དགེ་འདུན་གྱི་ནང་དུ་མཆིས་ནས་ཁྱིམ་པ་ལགས་པར་ཁས་བླངས་ན་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱའོ། དེ་བཞིན་དུ་མ་ནིང་ནས་སྔར་

འཁྲུགས་པ་ལགས་པར་ཁས་བླངས་པའི་བར་དུ་རྒྱས་པར་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱའོ། །བཙུན་པ་དགེ་སློང་གིས་དད་པ་དང་ཡོངས་སུ་དག་པ་བླངས་ཏེ་དགེ་འདུན་གྱི་ནང་དུ་མཆིས་ནས་ཟ་མ་ལགས་པར་ཁས་བླངས་ན་དད་པ་དང་

ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་བཞིན་དུ་དགེ་འདུན་གྱི་དབྱེན་བགྱིས་པ་དང་། མི་གནས་པ་དང་། སོ་སོར་གནས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ལགས་པར་ཁས་བླངས་ན། བཙུན་པ་དད་པ་དང་ཡོངས་སུ་དག་པ་མ་

ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །གསོ་སྦྱོང་གི་དངོས་པོ་རྫོགས་སོ།། །།འདུལ་བ་གཞུང་དམ་པ། བམ་པོ་བཅུ་བདུན་པ། མདོར་ན། བཞི་པ་རྣམ་པ་བཞི་པ་དང་། །དངོས་པོ་གནས་གཉིས་དེ་བཞིན་ཏེ། །དྲན་པ་འགྲོ་བ་སྤངས་པ་དང་། །འདུག་

པ་དག་དང་ལངས་པ་མཚན། །ཁྱིམ་པ་དག་ལ་སོགས་པ་དང་། །སྨྱོན་པ་དང་ནི་ཆད་པའི་གྲངས། སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་སྐབས་འབྱེད་པའི་ལས་ལ་རྣམ་པ་དུ་མཆིས། ཨུ་པཱ་ལི་བཞི་སྟེ། ཆོས་བཞིན་མ་ཡིན་པས་སྐབས་འབྱེད་

Vol. 12 · folio 249a

ཅིང་མ་འདུས་པ་དང་། ཆོས་བཞིན་མ་ཡིན་པར་འདུས་པ་དང་། ཆོས་བཞིན་དུ་མ་འདུས་པ་དང་ཆོས་བཞིན་དུ་འདུས་པའོ། །ཆོས་བཞིན་མ་ཡིན་པས་སྐབས་འབྱེད་པ་གང་ཞེ་ན། གང་གི་ཚེ་སྐབས་འབྱེད་པར་བྱ་བ་དེའི་ཚེ་ན་སྐབས་འབྱེད་པར་མི་བྱེད་པ་དང་། ཇི་ལྟར་སྐབས་

དབྱེ་བ་དེ་ལྟར་སྐབས་འབྱེད་པ་དེ་མི་བྱེད་པ་དང་། ཇི་ཙམ་དུ་སྐབས་དབྱེ་བར་བྱ་བ་དེ་ཙམ་དུ་སྐབས་འབྱེད་པར་མི་བྱེད་པ་དང་། གང་གིས་སྐབས་དབྱེ་བར་བྱ་བ་དེས་སྐབས་དབྱེ་བར་མི་བྱེད་པ་དང་། མ་འདུས་པར་ཀྱང་གྱུར་པའོ། །ཆོས་མ་ཡིན་པས་འདུས་པ་གང་ཞེ་ན། གང་གི་ཚེ་སྐབས་

དབྱེ་བར་བྱ་བ་དེའི་ཚེ་ན་སྐབས་འབྱེད་པར་མི་བྱེད་པ་ནས། གང་གིས་སྐབས་དབྱེ་བར་བྱ་བ་དེས་སྐབས་འབྱེད་པར་མི་བྱེད་པའི་བར་དུ་རྒྱས་པར་བརྗོད་དེ་འདུས་པར་ཡང་གྱུར་པའོ། །ཆོས་བཞིན་དུ་མ་འདུས་པ་གང་ཞེ་ན། གང་གི་ཚེ་སྐབས་དབྱེ་བར་བྱ་བ་དེའི་ཚེ་ན་སྐབས་འབྱེད་པར་བྱེད་པ་དང་།

ཇི་ལྟར་སྐབས་དབྱེ་བ་དེ་ལྟར་སྐབས་འབྱེད་པར་བྱེད་པ་དང་། ཇི་ཙམ་དུ་སྐབས་དབྱེ་བར་བྱ་བ་དེ་ཙམ་དུ་སྐབས་འབྱེད་པར་བྱེད་པ་དང་། གང་གིས་སྐབས་དབྱེ་བར་བྱ་བ་དེས་སྐབས་འབྱེད་པར་བྱེད་ཅིང་མ་འདུས་པར་ཀྱང་གྱུར་པའོ། །ཆོས་བཞིན་དུ་འདུས་པ་གང་ཞེ་ན། གང་གི་ཚེ་སྐབས་དབྱེ་

བར་བྱ་བ་དེའི་ཚེ་ན་སྐབས་འབྱེད་པར་བྱེད་པ་ནས་གང་གིས་སྐབས་དབྱེ་བར་བྱ་བ་དེས་སྐབས་འབྱེད་པར་བྱེད་པའི་བར་དུ་རྒྱས་པར་བརྗོད་དེ་འདུས་པར་ཀྱང་གྱུར་པའོ། །བཙུན་པ་འཕགས་པས་འཕགས་པའི་སྐད་དུ་སྐབས་ཕྱེ་བ་དང་། དགེ་སློང་དེ་དག་གིས་འཕགས་པའི་སྐད་མ་འཚལ་ན་སྐབས་ཕྱེ་

བ་ཞེས་བགྱིའམ། ཨུ་པཱ་ལི་སྐབས་མ་ཕྱེ་བ་ཞེས་བྱ་སྟེ། དགེ་སློང་དེ་དག་ཀྱང་འདས་པ་དང་བཅས་པའོ། །འཕགས་པས་མཐའ་འཁོབ་པའི་སྐད་དུ་སྐབས་ཕྱེ་བ་དང་། དགེ་སློང་དེ་དག་ཀྱང་མཐའ་འཁོབ་པའི་སྐད་མ་འཚལ་ན་སྐབས་ཕྱེ་བ་ཞེས་བགྱིའམ། ཨུ་པཱ་ལི་སྐབས་མ་ཕྱེ་བ་

ཞེས་བྱ་སྟེ། དགེ་སློང་དེ་དག་ཀྱང་འདས་པ་དང་བཅས་པའོ། །མཐའ་འཁོབ་པས་མཐའ་འཁོབ་པའི་སྐད་དུ་སྐབས་ཕྱེ་བ་དང་། དགེ་སློང་དེ་དག་ཀྱང་མཐའ་འཁོབ་པའི་སྐད་མ་འཚལ་ན་སྐབས་ཕྱེ་བ་ཞེས་བགྱིའམ། ཨུ་པཱ་ལི་སྐབས་མ་ཕྱེ་བ་ཞེས་བྱ་སྟེ། དགེ་སློང་དེ་དག་ཀྱང་འདས་

Vol. 12 · folio 249b

པ་དང་བཅས་པའོ། །མཐའ་འཁོབ་པས་འཕགས་པའི་སྐད་དུ་སྐབས་ཕྱེ་བ་དང་། དགེ་སློང་དེ་དག་ཀྱང་འཕགས་པའི་སྐད་མ་འཚལ་ན་སྐབས་ཕྱེ་བ་ཞེས་བགྱིའམ། ཨུ་པཱ་ལི་སྐབས་མ་ཕྱེ་བ་ཞེས་བྱ་སྟེ། དགེ་སློང་དེ་དག་ཀྱང་འདས་པ་དང་བཅས་པའོ། །བཙུན་པ་ས་ལ་གནས་པའི་གྲངས་

ནམ་མཁའ་ལ་གནས་པས་བསྐངས་ཏེ་སྐབས་ཕྱེ་ན་སྐབས་ཕྱེ་བ་ཞེས་བགྱིའམ། ཨུ་པཱ་ལི་སྐབས་མ་ཕྱེ་བ་ཞེས་བྱ་སྟེ། དགེ་སློང་དེ་དག་ཀྱང་འདས་པ་དང་བཅས་པའོ། །བཙུན་པ་ནམ་མཁའ་ལ་གནས་པའི་གྲངས་ས་ལ་གནས་པས་བསྐངས་ཏེ་སྐབས་ཕྱེ་ན་སྐབས་ཕྱེ་བ་ཞེས་བགྱིའམ།

ཨུ་པཱ་ལི་སྐབས་མ་ཕྱེ་བ་ཞེས་བྱ་སྟེ། དགེ་སློང་དེ་དག་ཀྱང་འདས་པ་དང་བཅས་པའོ། །བཙུན་པ་ས་ལ་གནས་པས་ནམ་མཁའ་ལ་གནས་པ་རྣམས་ལ་སྐབས་ཕྱེ་ན་སྐབས་ཕྱེ་བ་ཞེས་བགྱིའམ། ཨུ་པཱ་ལི་སྐབས་མ་ཕྱེ་བ་ཞེས་བྱ་སྟེ། དགེ་སློང་དེ་དག་ཀྱང་འདས་པ་དང་བཅས་པའོ། །བཙུན་

པ་ནམ་མཁའ་ལ་གནས་པས་ས་ལ་གནས་པ་རྣམས་ལ་སྐབས་ཕྱེ་ན་སྐབས་ཕྱེ་བ་ཞེས་བགྱིའམ། ཨུ་པཱ་ལི་སྐབས་མ་ཕྱེ་བ་ཞེས་བྱ་སྟེ། དགེ་སློང་དེ་དག་ཀྱང་འདས་པ་དང་བཅས་པའོ། །དེ་བཞིན་དུ་མཚམས་ཀྱི་ནང་ན་འཁོད་པ་དང་། མཚམས་ཀྱི་ཕྱི་རོལ་ན་འཁོད་པ་རྣམས་ལྷན་ཅིག་ཏུ་

རྣམ་པ་བཞིར་བྱའོ། །བཙུན་པ་བཅོམ་ལྡན་འདས་ཀྱིས་གང་སྐབས་འབྱེད་པ་དེ་ཉིད་ཀྱི་ཚེ་དངོས་པོ་ནི་ཡོད། གང་ཟག་ནི་མེད་དོ་ཞེས་གསུངས་ན། བཙུན་པ་དངོས་པོ་ནི་གང་ལགས། གང་ཟག་ནི་གང་ལགས། ཉེས་པ་ནི་དངོས་པོའོ། །ཉེས་པ་བྱེད་པ་ནི་གང་ཟག་ཅེས་བྱའོ། །བཙུན་

པ་ཚིག་ཏུ་མ་བརྗོད་ཅིང་སྐབས་ཕྱེ་བར་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་ཡང་དགེ་སློང་དེས་སྤྲིང་ཡིག་གམ་ལག་བརྡས་སྐབས་ཕྱེ་བ་ཞེས་བྱའོ། །བཙུན་པ་དགེ་སློང་ཞིག་ཕྱོགས་གཅིག་ཏུ་འགྲེང་ནས་གནས་བཞིར་སྐབས་འབྱེད་ན་སྐབས་ཕྱེ་བར་འགྱུར་བ་མཆིས་སམ།

ཨུ་པཱ་ལི་ཡོད་དེ། འདི་ལྟར་ཡང་སྐབས་འབྱེད་པའི་དགེ་སློང་དེས་གནས་བཞིའི་མཚམས་སུ་ཤིང་ངམ་རེ་ལྡེས་མནན་ཏེ་སྐབས་འབྱེད་པའོ། །བཙུན་པ་གནས་ཀྱང་གཅིག་མཚམས་ཀྱང་གཅིག་པར་ལྷན་ཅིག་གནས་པའི་དགེ་སློང་དེ་དག་གིས་ཕྱོགས་བཞིར་སྐབས་ཕྱེ་ན་སྐབས་ཕྱེ་བར་ཡང་

Vol. 12 · folio 250a

འགྱུར་ལ་དགེ་འདུན་དེ་དག་ཀྱང་མ་འདུས་པར་འགྱུར་བ་མཆིས་སམ། ཨུ་པཱ་ལི་ཡོད་དེ། གཅིག་ལ་གཅིག་དད་པ་བྱིན་པའོ། །བཙུན་པ་དགེ་འདུན་ཐམས་ཅད་ཀྱིས་སྐྱ་རེངས་ཤར་བ་ན་དྲན་པར་གྱུར་ན་དགེ་སློང་དག་གིས་སྐབས་ཇི་ལྟར་དབྱེ་བར་བགྱི། དེང་ནི་བདག་ཅག་

གིས་སྐབས་དབྱེ་བའོ་ཞེས་ཚིག་ཏུ་བརྗོད་པར་བྱའོ། །ཡང་ན་དེ་ནི་ཚིག་གསུམ་པས་སྐབས་ཕྱེ་ན་ཕྱེ་བ་ཞེས་བྱ་སྟེ། དགེ་སློང་དེ་དག་ནི་འདས་པ་དང་བཅས་པའོ། །བཅོམ་ལྡན་འདས་ཀྱིས་གང་གཉེན་གྱི་དོན་གྱི་སླད་དུ་དབྱར་གྱི་ནང་དུ་སྐབས་ཕྱེ་ཤིག་ཅེས་གསུངས་ན། བཙུན་པ་ཐབས་ཇི་ལྟར་

སྩལ་བར་བགྱི། ཨུ་པཱ་ལི་གང་རིང་དུ་གནས་ལ་སྐབས་འབྱེད་པའི་ཚེ་འོང་མི་ནུས་པའོ། །བཙུན་པ་དགེ་སློང་གིས་གཉེན་གྱི་དོན་གྱི་སླད་དུ་དབྱར་གྱི་ནང་དུ་སྐབས་ཕྱེ་སྟེ་ཞག་བདུན་ནམ། བཞི་བཅུར་ཡང་རུང་བྱིན་གྱིས་བརླབས་ནས་མཆིས་པ་ལས་བཙུན་པ་དེ་སྟེ་སྐབས་འབྱེད་པ་བཅྭ་ལྔ་པའི་སྐབས་དབྱེ་བ་དེ་

ཉིད་ཀྱི་ཚེ་སླར་མཆིས་ན་ཅི་དེས་ཀྱང་སྐབས་དབྱེ་བར་བགྱིའམ། ཨུ་པཱ་ལི་མ་ཡིན་ཏེ། དེ་ལ་ནི་སྐབས་ཕྱེ་བ་དེས་ཆོག་གོ། །བཙུན་པ་དགེ་སློང་ཞིག་སྐབས་འབྱེད་པ་ཚེས་བཅྭ་ལྔ་པ་ཉིད་ཀྱི་ཚེ་སྤངས་ན་དེ་དང་ལྷན་ཅིག་སྐབས་དབྱེ་བར་བགྱིའམ། ཨུ་པཱ་ལི་མ་ཡིན་ནོ། །བཙུན་པ་བཅོམ་ལྡན་འདས་

ཀྱིས་གང་དགེ་སློང་གི་འཁོར་རྣམས་མ་ལངས་མ་དོང་པའོ་ཞེས་གསུངས་ན། བཙུན་པ་ཇི་ཙམ་གྱིས་ན་འཁོར་མ་ལངས་པ་ཞེས་བགྱི་ཨུ་པཱ་ལི་གང་དུ་དགེ་སློང་བཞིའམ། ལྔ་འམ་དེ་ལས་མང་ཡང་རུང་སྟེ་འཁོད་པར་གྱུར་ན་མ་ལངས་པ་ཞེས་བྱའོ། །བཞི་ལས་ཉུང་ནམ་ལངས་པ་ཞེས་བྱའོ། །བཙུན་

པ་སྐབས་དབྱེ་བ་བཅྭ་ལྔ་པ་དེ་ཉིད་ཀྱི་ཚེ་སྟན་ལས་ལངས་ཏེ་སོང་ནས་དགེ་སློང་མཆིས་བཞིན་དུ་འཚལ་བར་མ་བགྱིས་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་དགེ་སློང་བཤང་བ་དང་གཅི་བའི་སར་སོང་ལ་དེ་ཡང་ཐོས་པའི་ཉེ་འཁོར་ལས་མ་འདས་པའོ། །བཙུན་པ་སྐབས་

འབྱེད་པར་བགྱིད་པ་སྐབས་འབྱེད་པའི་ཚེ་མཚན་འཕོས་ཏེ་དགེ་སློང་མར་གྱུར་ནས་སྐབས་ཕྱེ་ན་སྐབས་ཕྱེ་བ་ཞེས་བགྱིའམ། ཨུ་པཱ་ལི་སྐབས་ཕྱེ་བ་ཞེས་བྱའོ། །བཙུན་པ་སྐབས་འབྱེད་པ་ཁྱིམ་པས་ཕྱེ་ན་ཕྱེ་བ་ཞེས་བགྱིའམ། ཨུ་པཱ་ལི་སྐབས་མ་ཕྱེ་བ་ཞེས་བྱ་སྟེ། དགེ་འདུན་ཡང་འདས་པ་

Vol. 12 · folio 250b

དང་བཅས་པའོ། །དེ་བཞིན་དུ་ཟ་མ་དང་། མ་ནིང་དང་། མི་གནས་པ་དང་། འགྲོ་བ་གཞན་དུ་གནས་པ་ནས། རྒྱས་པར་སྔར་འཁྲུགས་པ་རྣམས་ཀྱི་བར་དུ་ཡང་སྐབས་མ་ཕྱེ་བ་ཞེས་བྱ་སྟེ། དགེ་འདུན་དེ་དག་ཀྱང་འདས་པ་དང་བཅས་པའོ། །བཙུན་པ་དགེ་འདུན་གྱི་དབྱེན་བགྱི་བ་

དང་། ཉེ་བར་ཕྱོགས་པ་དང་། བསླབ་པ་སྩལ་བས་སྐབས་ཕྱེ་ན་སྐབས་ཕྱེ་བ་ཞེས་བགྱིའམ། ཨུ་པཱ་ལི་སྐབས་ཕྱེ་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །བཙུན་པ་སྐབས་འབྱེད་པ་སྨྱོན་པས་སྐབས་ཕྱེ་ན་སྐབས་ཕྱེ་བ་ཞེས་བགྱིའམ། ཨུ་པཱ་ལི་སྐབས་ཕྱེ་བ་ཞེས་བྱ་སྟེ།

དགེ་འདུན་ནི་འདས་པ་དང་བཅས་པའོ། །དེ་བཞིན་དུ་སྐབས་འབྱེད་པ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་རྣམས་ཀྱིས་སྐབས་ཕྱེ་ན་སྐབས་ཕྱེ་བ་ཞེས་བགྱི་འམ། ཨུ་པཱ་ལི་སྐབས་ཕྱེ་བ་ཞེས་བྱ་སྟེ། དགེ་འདུན་ཡང་འདས་པ་

དང་བཅས་པའོ། །བཙུན་པ་ཕྲིན་གྱིས་སྐབས་ཕྱེ་ན་སྐབས་ཕྱེ་བ་ཞེས་བགྱིའམ། ཨུ་པཱ་ལི་སྐབས་ཕྱེ་བ་ཞེས་བྱ་སྟེ། དགེ་འདུན་ཡང་འདས་པ་དང་བཅས་པའོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཅིག་ནས་གཅིག་ཏུ་བརྒྱུད་དེ་སྐབས་ཕྱེ་ན་སྐབས་ཕྱེ་བ་ཞེས་བགྱིའམ། ཨུ་

པཱ་ལི་སྐབས་ཕྱེ་བ་ཞེས་བྱ་སྟེ། དགེ་འདུན་ཡང་འདས་པ་དང་བཅས་པའོ། །བཙུན་པ་གཞན་ཟེར་རོ་ཞེས་སྐབས་ཕྱེ་ན་སྐབས་ཕྱེ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་ཁྱིམ་པས་གྲངས་སུ་བསྐངས་ཏེ་སྐབས་ཕྱེ་ན་སྐབས་ཕྱེ་བ་ཞེས་བགྱིའམ། ཨུ་པཱ་ལི་སྐབས་མ་ཕྱེ་བ་ཞེས་བྱ་

སྟེ། དགེ་འདུན་ཡང་འདས་པ་དང་བཅས་པའོ། །དེ་བཞིན་དུ་ཟ་མ་དང་། མ་ནིང་དང་། མི་གནས་པ་དང་། སོ་སོར་གནས་པ་དང་། འགྲོ་བ་གཞན་དུ་གནས་པ་ནས་སྔར་འཁྲུགས་པ་རྣམས་ཀྱི་བར་དུ་སྦྱར་བར་བྱའོ། །བཙུན་པ་དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་

པ་དང་། བསླབ་པ་སྩལ་བ་རྣམས་ཀྱིས་གྲངས་སུ་བསྐངས་ཏེ་སྐབས་ཕྱེ་ན་སྐབས་ཕྱེ་བ་ཞེས་བགྱིའམ། ཨུ་པཱ་ལི་སྐབས་ཕྱེ་བ་ཞེས་བྱ་སྟེ། དགེ་འདུན་ཡང་འདས་པ་དང་བཅས་པའོ། །བཙུན་པ་དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་

Vol. 12 · folio 251a

དང་། འོན་པ་དང་། གཉིད་ལོག་པ་དང་། མྱོས་པ་དང་། ར་རོ་བ་དང་། སྙོམས་པར་ཞུགས་པ་དང་། འགྲོ་བ་གཞན་དུ་གནས་པ་རྣམས་ཀྱིས་གྲངས་སུ་བསྐངས་ཏེ་སྐབས་ཕྱེ་ན་སྐབས་ཕྱེ་བ་ཞེས་བགྱིའམ། ཨུ་པཱ་ལི་སྐབས་མ་ཕྱེ་བ་ཞེས་བྱ་སྟེ། དགེ་འདུན་ནི་

འདས་པ་དང་བཅས་པའོ།། །།མདོར་ན། ཕུལ་དང་བླངས་དང་དགེ་འདུན་དང་། །བཞི་པ་དང་ནི་གཉིས་དང་མཚན། །ཆད་པ་བྲ་བ་གཅིག་ནས་གཅིག །ལམ་དང་མང་པོ་དེ་བཞིན་ནོ། །བཙུན་པ་དགེ་སློང་གིས་དད་པ་དང་སྐབས་ཕྱེ་བ་བླངས་ཏེ་སྟེང་གི་ནམ་མཁའ་ལ་མཚམས་

ཀྱི་སླད་རོལ་དུ་རེ་བ་མ་མཆིས་པར་མཆིས་ན་དད་པ་དང་སྐབས་ཕྱེ་བ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །བཙུན་པ་དེ་སྟེ་རེ་བ་དང་བཅས་ནས་མཆིས་ན་མ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་མོད་ཀྱི་འདས་པ་དང་བཅས་པར་འགྱུར་རོ། བཙུན་པ་ས་ལ་

གནས་པ་རྣམས་ཀྱིས་ནམ་མཁའ་ལ་གནས་པ་རྣམས་ལ་དད་པ་དང་སྐབས་དབྱེ་བ་དབུལ་དུ་རུང་ངམ། ཨུ་པཱ་ལི་མ་ཡིན་ནོ། །བཙུན་པ་བླང་དུ་རུང་ངམ། ཨུ་པཱ་ལི་མ་ཡིན་ནོ། །བཙུན་པ་ནམ་མཁའ་ལ་གནས་པ་རྣམས་ཀྱིས་ས་ལ་གནས་པ་རྣམས་ལ་དད་པ་དང་སྐབས་དབྱེ་བ་

དབུལ་དུ་རུང་ངམ། ཨུ་པཱ་ལི་མ་ཡིན་ནོ། །དེ་བཞིན་དུ་མཚམས་ཀྱི་ནང་ན་འཁོད་པ་རྣམས་དང་། མཚམས་ཀྱི་ཕྱི་རོལ་ན་འཁོད་པ་རྣམས་ཀྱང་རྣམ་པ་བཞིར་བརྗོད་པར་བྱའོ། །བཙུན་པ་དགེ་སློང་གིས་དགེ་འདུན་ཐམས་ཅད་ཚོགས་ཤིང་འཁོད་པ་ལ་དད་པ་དང་སྐབས་དབྱེ་བ་

ཕུལ་ན་དད་པ་དང་སྐབས་དབྱེ་བ་ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱའོ། །སུས་བསྒྲག་པར་བགྱི། སུས་ཀྱང་མ་ཡིན་ནོ། །བཙུན་པ་དགེ་སློང་འཕགས་པས་འཕགས་པའི་སྐད་དུ་དད་པ་དང་སྐབས་དབྱེ་བ་ཕུལ་བ་དང་། དགེ་སློང་དེ་དག་གིས་ཀྱང་འཕགས་པའི་

སྐད་མ་འཚལ་ན་དད་པ་དང་སྐབས་དབྱེ་བ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །འཕགས་པས་མཐའ་འཁོབ་པའི་སྐད་དུ་དད་པ་དང་སྐབས་དབྱེ་བ་ཕུལ་བ་དང་། དགེ་སློང་དེ་དག་གིས་མཐའ་འཁོབ་པའི་སྐད་མ་འཚལ་ན་དད་པ་དང་སྐབས་དབྱེ་བ་ཕུལ་བ་ཞེས་

Vol. 12 · folio 251b

བགྱིའམ། ཨུ་པཱ་ལི་མ་ཡིན་ནོ། །བཙུན་པ་མཐའ་འཁོབ་པས་མཐའ་འཁོབ་པའི་སྐད་དུ་དད་པ་དང་སྐབས་དབྱེ་བ་ཕུལ་བ་དང་། དགེ་སློང་དེ་དག་གིས་མཐའ་འཁོབ་པའི་སྐད་མ་འཚལ་ན་དད་པ་དང་སྐབས་དབྱེ་བ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་མཐའ་

འཁོབ་པས་འཕགས་པའི་སྐད་དུ་དད་པ་དང་སྐབས་དབྱེ་བ་ཕུལ་བ་དང་། དགེ་སློང་དེ་དག་གིས་འཕགས་པའི་སྐད་མ་འཚལ་ན་དད་པ་དང་སྐབས་དབྱེ་བ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དད་པ་དང་སྐབས་འབྱེད་པ་འབུལ་བའི་དགེ་སློང་གིས་ལུས་ཀྱིས་

དམིགས་ཀྱི་ཚིག་གིས་མ་ལགས་ན་དད་པ་དང་སྐབས་དབྱེ་བ་ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱའོ། །དེ་བཞིན་དུ་ཚིག་གིས་སྨྲས་ཀྱི་ལུས་ཀྱིས་མ་ལགས་པ་དང་། ཚིག་དང་ལུས་ཀྱིས་དམིགས་པས་ཀྱང་དད་པ་དང་སྐབས་དབྱེ་བ་ཕུལ་བ་ཞེས་བགྱིའམ། ཨུ་པཱ་ལི་

ཕུལ་བ་ཞེས་བྱའོ། །བཙུན་པ་དེ་སྟེ་ལུས་ཀྱིས་ཀྱང་མ་དམིགས་ཚིག་གིས་མ་སྨྲས་ན་དད་པ་དང་སྐབས་དབྱེ་བ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དད་པ་དང་སྐབས་དབྱེ་བ་འབུལ་བའི་དགེ་སློང་མཚན་གྱུར་ན་དད་པ་དང་སྐབས་དབྱེ་བ་ཕུལ་བ་ཞེས་བགྱིའམ། ཨུ་

པཱ་ལི་མ་ཡིན་ནོ། །བཙུན་པ་ཆད་པ་དང་བྲ་བས་དད་པ་དང་སྐབས་དབྱེ་བ་ཕུལ་ན་དད་པ་དང་སྐབས་དབྱེ་བ་ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱ་སྟེ། དགེ་སློང་དེ་དག་ནི་འདས་པ་དང་བཅས་པའོ། །བཙུན་པ་དད་པ་དང་སྐབས་དབྱེ་བ་གཅིག་ནས་གཅིག་ཏུ་བརྒྱུད་དེ་སྨྲས་ན་དད་པ་

དང་སྐབས་ཕྱེ་བ་ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱ་སྟེ། དགེ་སློང་དེ་དག་ནི་འདས་པ་དང་བཅས་པའོ། །དད་པ་དང་སྐབས་དབྱེ་བ་ཕུལ་ནས་ཁྱིམ་པ་ལགས་པར་ཁས་བླངས་ན་དད་པ་དང་སྐབས་ཕྱེ་བ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །དེ་

བཞིན་དུ་མ་ནིང་ལགས་པར་ཁས་བླངས་པ་ནས་རྒྱས་པར་སྔར་འཁྲུགས་པ་ལགས་པའི་བར་དུ་ཁས་བླངས་ན་དད་པ་དང་སྐབས་ཕྱེ་བ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །བཙུན་པ་དད་པ་དང་སྐབས་འབྱེད་པ་འབུལ་བའི་དགེ་སློང་དད་པ་དང་སྐབས་དབྱེ་བ་འབུལ་བའི་ཚེ་ཟ་མ་

Vol. 12 · folio 252a

ལགས་པར་ཁས་བླངས་ན་དད་པ་དང་སྐབས་དབྱེ་བ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །བཙུན་པ་དེ་སྟེ་དགེ་འདུན་གྱི་དབྱེན་བགྱིས་པ་ལགས་པར་ཁས་བླངས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་ལགས་པར་ཁས་བླངས་ན་དད་པ་དང་

སྐབས་ཕྱེ་བ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དད་པ་དང་སྐབས་དབྱེ་བ་ལེན་པའི་དགེ་སློང་གིས་དད་པ་དང་སྐབས་ཕྱེ་བ་བླངས་ནས་དགེ་འདུན་གྱི་ནང་དུ་མཆིས་ཏེ་ཁྱིམ་པ་ལགས་པར་ཁས་བླངས་ན་དད་པ་དང་སྐབས་ཕྱེ་བ་མ་ཕུལ་བ་ཞེས་བགྱིའམ། ཨུ་པཱ་

ལི་མ་ཕུལ་བ་ཞེས་མི་བྱའོ། །དེ་བཞིན་དུ་མ་ནིང་ལགས་པར་ཁས་བླངས་པ་ནས་རྒྱས་པར་སྔར་འཁྲུགས་པ་ལགས་པའི་བར་དུ་ཁས་བླངས་ན་དད་པ་དང་སྐབས་ཕྱེ་བ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་མི་བྱའོ། །བཙུན་པ་དེ་སྟེ་ཟ་མ་ལགས་པར་ཁས་བླངས་ན་

དད་པ་དང་སྐབས་ཕྱེ་བ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་བཞིན་དུ་དགེ་འདུན་གྱི་དབྱེན་བགྱིས་པ་ནས་བསླབ་པ་སྩལ་བ་ལགས་པའི་བར་དུ་ཁས་བླངས་ན་དད་པ་དང་སྐབས་ཕྱེ་བ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །སྐབས་འབྱེད་པའི་དངོས་པོ་

རྫོགས་སྷོ།། །།མདོར་ན། གྲུ་དང་ནམ་མཁའ་གསུམ་པ་དང་། །སྤྱོད་ཡུལ་ཐེ་ཚོམ་སོང་བ་དང་། །མཚན་དང་གསུམ་པ་གནས་རྣམས་དང་། །དབྱར་གསུམ་པའམ་དེ་བཞིན་ནོ། །བཙུན་པ་དགེ་སློང་གིས་ཕུར་པ་ལ་བཏགས་པའི་གྲུར་དབྱར་ཚུལ་དུ་ཞུགས་ན་ཚུལ་

དུ་ཞུགས་པ་ཞེས་བགྱིའམ། ཨུ་པཱ་ལི་ཚུལ་དུ་ཞུགས་པ་ཞེས་བྱའོ། །བཙུན་པ་དེ་སྟེ་དབྱར་གྱི་ནང་ལོགས་སུ་གྲུ་བཏང་ན་དབྱར་ཞིག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དབྱར་ཚུལ་དུ་ཞུགས་པའི་དགེ་སློང་ཞིག་ཞག་བདུན་དུ་བྱིན་གྱིས་བརླབས་ཏེ་སྟེང་གི་ནམ་མཁའ་

ལས་མཚམས་ཀྱི་སླད་རོལ་དུ་མཆིས་ན་དབྱར་ཞིག་པ་ཞེས་བགྱིའམ། དབྱར་མ་ཞིག་པ་ཞེས་བགྱི། ཨུ་པཱ་ལི་དབྱར་མ་ཞིག་པ་ཞེས་བྱའོ། །བཙུན་པ་དགེ་སློང་གིས་སྟེང་གི་ནམ་མཁའ་ལ་དབྱར་ཚུལ་དུ་ཞུགས་ན་ཚུལ་དུ་ཞུགས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་

Vol. 12 · folio 252b

པ་དགེ་སློང་གིས་སྟེང་གི་ནམ་མཁའ་ལ་གཞལ་མེད་ཁང་དུ་དབྱར་ཚུལ་དུ་ཞུགས་ན་ཚུལ་དུ་ཞུགས་པ་ཞེས་བགྱིའམ། ཨུ་པཱ་ལི་ཚུལ་དུ་ཞུགས་པ་ཞེས་བྱའོ། །བཙུན་པ་དེ་སྟེ་གཞལ་མེད་ཁང་དེ་ནས་གནས་གཞན་དུ་མཆིས་ན་དབྱར་ཞིག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །

བཙུན་པ་བཅོམ་ལྡན་འདས་ཀྱིས་གང་སྤྱོད་ཡུལ་ལ་རྟེན་ཏེ་ཚུལ་དུ་ཞུགས་ཤིག་ཅེས་གསུངས་ན། བཙུན་པ་དགེ་སློང་གི་སྤྱོད་ཡུལ་མ་མཆིས་པར་དབྱར་ཚུལ་དུ་ཞུགས་ན་ཚུལ་དུ་ཞུགས་པ་ཞེས་བགྱིའམ། ཨུ་པཱ་ལི་ཚུལ་དུ་ཞུགས་པ་ཞེས་བྱའོ། །བཙུན་པ་དགེ་སློང་གིས་སྤྱོད་ཡུལ་ལ་

བརྟེན་ཏེ་དབྱར་ཚུལ་དུ་ཞུགས་པར་གྱུར་ན་ཅི་དེས་དེར་ཞག་བདུན་དུ་བྱིན་གྱིས་རླབས་ཏེ་མཆི་བར་བགྱིའམ། ཨུ་པཱ་ལི་མ་ཡིན་ཏེ། དེས་དེ་ཉིད་ལ་བརྟེན་ནས་དབྱར་ཚུལ་དུ་ཞུགས་པའི་ཕྱིར་རོ། །བཙུན་པ་དགེ་སློང་གིས་དབྱར་ཚུལ་དུ་ཞུགས་ཏེ་བདག་ཚུལ་དུ་ཞུགས་སམ་མ་ཞུགས་ཞེས་

ཐེ་ཚོམ་ཟ་ཞིང་དོགས་པར་གྱུར་ན། ཚུལ་དུ་ཞུགས་པ་ཞེས་བགྱིའམ། ཨུ་པཱ་ལི་ཚུལ་དུ་ཞུགས་པ་ཞེས་བྱའོ། །བཙུན་པ་དེ་སྟེ་ཐེ་ཚོམ་དང་དོགས་པ་ལས་ཐེ་ཚོམ་དང་དོགས་པ་བསལ་མ་ནུས་ན་དེས་སླར་ཡང་དབྱར་ཚུལ་དུ་འཇུག་པར་བགྱིའམ། ཨུ་པཱ་ལི་ཚུལ་དུ་འཇུག་པར་

བྱའོ། །བཙུན་པ་དེའི་དབྱར་གྱི་ཚུལ་གང་ལགས། ཨུ་པཱ་ལི་སྔ་མའོ། །བཙུན་པ་དགེ་སློང་གིས་གནས་འདིར་དབྱར་གནས་པར་བྱའོ་སྙམ་དུ་སོང་སྟེ་དེས་དེར་ཕྱིན་པ་དང་སྐྱ་རེངས་ཤར་ནས་དབྱར་ཕྱི་མར་གྱུར་ན་དབྱར་ཚུལ་དུ་ཞུགས་པ་ཞེས་བགྱིའམ། ཨུ་པཱ་ལི་ཚུལ་དུ་ཞུགས་པ་

ཞེས་བྱ་སྟེ། དེས་དེར་ཚུལ་དུ་འཇུག་པར་བསམས་པའི་ཕྱིར་རོ། །བཙུན་པ་དགེ་སློང་གིས་གཙུག་ལག་ཁང་ཞིག་ཏུ་སོང་སྟེ་གནས་འདིར་བདག་ཚུལ་དུ་འཇུག་གོ་ཞེས་བསམས་ནས་དེས་རྐང་པ་ཡ་གཅིག་ནི་མཚམས་ཀྱི་ནང་དུ་བཞག །རྐང་པ་གཅིག་ནི་མཚམས་ཀྱི་ཕྱི་རོལ་དུ་བཞག་

པ་དང་སྐྱ་རེངས་ཤར་ནས་དབྱར་ཕྱི་མར་གྱུར་ན་དབྱར་ཚུལ་དུ་ཞུགས་པ་ཞེས་བགྱིའམ། ཨུ་པཱ་ལི་ཚུལ་དུ་ཞུགས་པ་ཞེས་བྱ་སྟེ། དེས་དེར་ཚུལ་དུ་འཇུག་པར་བསམས་པའི་ཕྱིར་རོ། །བཙུན་པ་དགེ་སློང་གིས་དབྱར་ཚུལ་དུ་ཞུགས་པ་ན་མཚན་གྱུར་ན་ཚུལ་དུ་ཞུགས་པ་ཞེས་

Vol. 12 · folio 253a

བགྱིའམ། ཨུ་པཱ་ལི་ཚུལ་དུ་ཞུགས་པ་ཞེས་བྱའོ། །དེས་གནས་དེར་གནས་པར་བགྱིའམ། ཨུ་པཱ་ལི་མ་ཡིན་ཏེ། དགེ་སློང་མའི་དབྱར་མོ་ཁང་དུ་སོང་ལ་གནས་པར་གྱིས་ཤིག །བཙུན་པ་དགེ་སློང་གིས་གནས་བཞིར་དབྱར་ཚུལ་དུ་ཞུགས་ཀྱང་དབྱར་ཚུལ་

དུ་ཞུགས་པར་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་དགེ་སློང་དེས་གནས་བཞིའི་མཚམས་སུ་ཤིང་ངམ། འོད་མའམ། རེ་ལྡེས་མནན་ཏེ་དབྱར་ཚུལ་དུ་ཞུགས་པའོ། །དེ་གང་དུ་གནས་པར་བགྱི། གང་དགའ་བར་རོ། །བཙུན་པ་དེ་སྟེ་ཤིང་ངམ། འོད་

མའམ། རེ་ལྡེས་ནི་འཇིག་པའི་ཆོས་ཅན་དུ་འགྱུར་ན་དབྱར་ཞིག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །དེས་དབྱར་གང་དུ་གནས་པར་བགྱི། གར་དགའ་བའི་གནས་གཅིག་ཏུའོ། །དེའི་དབྱར་གང་དུ་གཏོགས་སེམས་ཀྱིས་གང་དུ་བསམས་པའོ། །ལྷག་མ་རྣམས་

ནི་བཏང་བ་ཞེས་བྱའོ། །བཙུན་པ་དེ་སྟེ་ཕན་ཆད་ཞག་བདུན་དུ་བྱིན་གྱིས་མ་བརླབས་པར་གནས་དེ་ནས་གཉིས་པོར་མཆིས་ན་དབྱར་ཞིག་པ་ཞེས་བགྱིའམ། ཨུ་པཱ་ལི་དབྱར་ཞིག་པ་ཞེས་བྱའོ། །བཙུན་པ་དགེ་སློང་གིས་གནས་བཞིའམ་དེ་ལས་མང་བའི་གནས་རྣམས་མཚམས་གཅིག་ཏུ་

བགྱིས་ཏེ་དབྱར་ཚུལ་དུ་ཞུགས་ན་གནས་དེ་དག་ཐམས་ཅད་དུ་དབྱར་ཚུལ་དུ་ཞུགས་པ་ཞེས་བགྱིའམ། ཨུ་པཱ་ལི་ཚུལ་དུ་ཞུགས་པ་ཞེས་བྱའོ། །དེས་གང་དུ་གནས་པར་བགྱི། གང་དགའ་བར་རོ། །བཙུན་པ་དགེ་སློང་གིས་གནས་གཅིག་ཏུ་དབྱར་ཚུལ་དུ་ཞུགས་ཏེ་དེ་སླན་ཆད་གནས་

གཉིས་པ་དང་། གསུམ་པ་དང་། བཞི་པར་དབྱར་ཚུལ་དུ་ཞུགས་ན་ཞུགས་པ་ཞེས་བགྱིའམ། ཨུ་པཱ་ལི་ཚུལ་དུ་ཞུགས་པ་ཞེས་བྱའོ། །གནས་གང་དུ། ཕྱི་མར་རོ། །བཙུན་པ་གང་ལ་དབྱར་གྱི་ཚུལ་སྔ་མ་ཡང་མ་མཆིས། ཕྱི་མ་ཡང་མ་མཆིས་ན་དེའི་མིང་ཇི་སྐད་ཅེས་བགྱི།

ཨུ་པཱ་ལི་དབྱར་ཞིག་པ་ཞེས་བྱའོ། །བཙུན་པ་གང་ལ་སྔ་མ་དང་ཕྱི་མའི་དབྱར་གྱི་ཚུལ་མཆིས་ལ་དེས་ཀྱང་ཞག་བདུན་དུ་བྱིན་གྱིས་མ་བརླབས་པར་མཚམས་ཀྱི་སླད་རོལ་དུ་དོན་ཅིག་གི་སླད་དུ་མཆིས་ཏེ་སླར་མཆི་བར་བསམས་ན་དབྱར་ཞིག་པ་ཞེས་བགྱིའམ། ཨུ་པཱ་ལི་དབྱར་ཞིག་པ་

Vol. 12 · folio 253b

ཞེས་བྱའོ། །ཅི་དེས་ཀྱང་སླར་དབྱར་ཚུལ་དུ་འཇུག་པར་བགྱིའམ། ཨུ་པཱ་ལི་མ་ཡིན་ཏེ། དེའི་ཡི་དམ་ལས་འགལ་བས་ན་ཉེས་པ་འཆགས་སུ་ཆུག་ཤིག །བཙུན་པ་ཇི་སྲིད་དུ་དབྱར་ཚུལ་དུ་འཇུག །ཨུ་པཱ་ལི་ཟླ་བ་གསུམ་མོ། །བཙུན་པ་གང་དབྱར་སླད་མར་ཚུལ་དུ་ཞུགས་

པར་གྱུར་པ་དེས་ཇི་ལྟར་ཚུལ་ནས་འབྱུང་བར་བགྱི། ནམ་ཞུགས་པ་ན་ཟླ་བ་གསུམ་དུ་གནས་པའི་གྲངས་ཚང་བའམ། ཡང་ན་རྐྱེན་ཅིག་བྱུང་ན་ཡང་རུང་ངོ་།། །།མདོར་ན། སྐྱ་རེངས་བསམ་པ་སྤང་བ་དང་། །གནས་དང་ཤིང་རྟ་བ་ལང་ཁྱིམ། །ཤིང་དང་གྲོག་པོ་

ཕུག་དེ་བཞིན། །ཞིག་པ་འགྲོ་ཡང་དེ་བཞིན་ཏེ། །སྡེ་ལྔ་དང་ནི་བསམ་པ་དང་། །བདུན་པོ་དང་ནི་མི་གནས་པའོ། །བཙུན་པ་དབྱར་གྱི་ནང་ལོགས་སུ་དགེ་འདུན་འཁྲུགས་ནས་དེར་ཡང་དགེ་སློང་གིས་བསམས་བཞིན་དུ་ཆོས་ཀྱི་ཕྱོགས་དང་། ཆོས་མ་ལགས་པའི་

ཕྱོགས་ལ་གནས་ན་དབྱར་ཞིག་པ་ཞེས་བགྱིའམ། ཨུ་པཱ་ལི་དེ་སྟེ་ལྟ་བ་སྒྲོགས་བཞིན་པ་ལས་སྐྱ་རེངས་ཤར་ན་ནི་དབྱར་ཞིག་པ་ཞེས་བྱའོ། །བཙུན་པ་བཅོམ་ལྡན་འདས་ཀྱིས་ཡང་དགེ་སློང་གི་མདུན་དུ་དབྱར་ཚུལ་དུ་ཞུགས་ཤིག་ཅེས་གསུངས་ན། བཙུན་པ་དགེ་སློང་གིས་

དགེ་སློང་མ་མཆིས་ནས་སེམས་བསྐྱེད་དེ་དབྱར་ཚུལ་དུ་ཞུགས་ན་དབྱར་ཚུལ་དུ་ཞུགས་པ་ཞེས་བགྱིའམ། ཨུ་པཱ་ལི་ཚུལ་དུ་ཞུགས་པ་ཞེས་བྱ་སྟེ། དགེ་སློང་ཡོད་བཞིན་ན་ནི་འདས་པ་དང་བཅས་པའོ། །བཙུན་པ་དགེ་སློང་དབྱར་གྱི་ནང་ལོགས་སུ་སྤངས་པ་དེ་དང་ལྷན་ཅིག་དབྱར་གྱི་

གནས་སུ་གནས་པར་བགྱིའམ། ཨུ་པཱ་ལི་གནས་པར་བྱ་སྟེ། སྐབས་ཕྱེ་ནས་མ་གནས་ཤིག །བཙུན་པ་བཅོམ་ལྡན་འདས་ཀྱིས་ནི་གང་དགེ་སློང་གིས་གནས་འདི་ན་བདག་ལ་དགེ་སློང་མདོ་སྡེ་འཛིན་པ་དང་། མ་ལྟ་བུ་འཛིན་པའི་དགེ་སློང་དེ་ལྟ་བུ་དག་གིས་ཐེ་ཚོམ་མ་སྐྱེས་པ་དག་

ནི་མི་སྐྱེད། སྐྱེས་པ་ནི་སེལ་བར་བྱེད་པ་ཡོད་དམ་མེད་པའི་གནས་རྟོགས་ལ་དབྱར་ཚུལ་དུ་ཞུགས་ཤིག་ཅེས་གསུངས་ན། བཙུན་པ་མདོ་སྡེ་འཛིན་པ་དང་། མ་ལྟ་བུ་འཛིན་པ་མ་མཆིས་པར་དབྱར་ཚུལ་དུ་འཇུག་ཏུ་རུང་ངམ། ཨུ་པཱ་ལི་རུང་ངོ་། །བཙུན་པ་འདུལ་བ་འཛིན་པ་མ་

Vol. 12 · folio 254a

མཆིས་པར་དབྱར་ཚུལ་དུ་འཇུག་ཏུ་རུང་ངམ། ཨུ་པཱ་ལི་མི་རུང་ངོ་། །དེ་སྟེ་བཙུན་པ་འདུལ་བ་འཛིན་པ་མ་མཆིས་ན་སོ་སོར་ཐར་པའི་མདོ་འདོན་པའི་དགེ་སློང་བཙལ་འཚལ་ལམ། སོ་སོར་ཐར་པ་འདོན་པ་མེད་ན་དབྱར་ཚུལ་དུ་འཇུག་ཏུ་མི་གནང་ངོ་། །བཙུན་

པ་ཤིང་རྟ་སྤྱོད་པའི་ཁྱིམ་མམ། བ་ལང་རྫིའི་ཁྱིམ་དུ་གནས་ཏེ་དབྱར་ཚུལ་ཏུ་འཇུག་ཏུ་རུང་ངམ། ཨུ་པཱ་ལི་དེ་སྟེ་དེས་འདི་སྙམ་དུ་དབྱར་གནས་འདི་ནས་གུད་དུ་མི་འདོང་བར་དེས་བསམས་ན་རུང་ངོ་། །བཙུན་པ་དེ་སྟེ་ཚུལ་དུ་ཞུགས་པ་ལས་དོང་ན་དབྱར་ཞིག་པ་ཞེས་བགྱིའམ། ཨུ་པཱ་

ལི་མ་ཡིན་ནོ། །བཙུན་པ་ཤིང་དྲུང་ངམ། རི་ཕྲག་གམ། ཕུག་གམ། སྤྱིལ་བུར་དབྱར་ཚུལ་དུ་འཇུག་ཏུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་དགེ་སློང་གིས་དོན་ཞིག་གི་སླད་དུ་ཞག་བདུན་ནམ། བཞི་བཅུར་བྱིན་གྱིས་བརླབས་ཏེ་མཆིས་པ་ལས་དེ་ཡང་དུས་འདས་

པར་གྱུར་ན་ཞག་བདུན་ནམ། ཞག་བཞི་བཅུར་བྱིན་གྱིས་བརླབས་པ་དེ་ཞིག་ཅེས་བགྱིའམ། ཨུ་པཱ་ལི་མ་ཡིན་ཏེ། དོན་གཞན་གྱིས་ཟད་པར་གྱིས་ཤིག །བཙུན་པ་དགེ་སློང་གིས་ཞག་བདུན་ན་སྐབས་འབྱེད་པར་འགྱུར་རོ་སྙམ་ནས་བྱིན་གྱིས་བརླབས་པར་མཆིས་ན་དབྱར་ཞིག་

པ་ཞེས་བགྱིའམ། ཨུ་པཱ་ལི་དབྱར་ཞིག་པ་ཞེས་བྱའོ། །བཙུན་པ་དེ་སྟེ་ཞག་དྲུག་གམ། ལྔ་འམ། བཞི་འམ། གཅིག་ནས་ཚུལ་ནས་འབྱུང་བར་འགྱུར་རོ་སྙམ་ནས་བྱིན་གྱིས་བརླབས་པར་མཆིས་ན་དབྱར་ཞིག་པ་ཞེས་བགྱིའམ། ཨུ་པཱ་ལི་དབྱར་ཞིག་པ་ཞེས་བྱའོ། །བཙུན་པ་

བཅོམ་ལྡན་འདས་ཀྱིས་ཞག་བདུན་དུ་བྱིན་གྱིས་རློབས་ལ་སོང་ཤིག་ཅེས་གསུངས་ན། བཙུན་པ་གང་གིས་བྱིན་གྱིས་བརླབ་པར་བགྱི། ཨུ་པཱ་ལི་སྡེ་ལྔས་སོ། །གང་དུ་བྱིན་གྱིས་བརླབ་པར་བགྱི། མཚམས་ཀྱི་ནང་དུའོ། །ཇི་ལྟར་བྱིན་གྱིས་བརླབ་པར་བགྱི།

སེམས་བསྐྱེད་ལ་ཚིག་ཏུ་བརྗོད་པར་བྱ་སྟེ་བདག་མིང་འདི་ཞེས་བགྱི་བ་མཚམས་ཀྱི་ནང་གི་གནས་འདིར་དབྱར་སྔ་མ་ཚུལ་དུ་ཞུགས་ཏེ། བདག་མིང་འདི་ཞེས་བགྱི་བ་དོན་འདི་ལྟ་བུའི་ཕྱིར་མཚམས་ཀྱི་སླད་རོལ་དུ་མཆི་བར་བྱིན་གྱིས་བརླབས་ཏེ། བདག་གི་དབྱར་ནི་འདི་ཉིད་དེ་དབྱར་ནི་འདི་ཉིད་

Vol. 12 · folio 254b

དུ་གནས་སོ། །བཙུན་པ་གང་གི་དོན་དུ་བྱིན་གྱིས་བརླབ་པར་བགྱི། ཨུ་པཱ་ལི་སྡེ་བདུན་གྱི་ཕྱིར་རོ། །བཙུན་པ་བཅོམ་ལྡན་འདས་ཀྱིས་ནི་ཞག་བཞི་བཅུའི་སྡོམ་པ་སྩོལ་ཅིག་ཅེས་གསུངས་ན། གང་ལ་སྩལ་བར་བགྱི། ཨུ་པཱ་ལི་སྡེ་ལྔ་ལའོ། །བཙུན་པ་བཅོམ་ལྡན་

འདས་ཀྱིས་ནི་དགེ་འདུན་གྱི་དོན་གྱི་སླད་དུ་ནི་ཞག་བཞི་བཅུའི་སྡོམ་པ་བྱིན་ཅིག་ཅེས་གསུངས་ན། བཙུན་པ་དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་དང་། དགེ་བསྙེན་མ་དང་། དགེ་བསྙེན་ཕ་དང་། གཉེན་གནས་དང་།

འདི་ལས་སླད་རོལ་གྱི་མུ་སྟེགས་ཅན་དགེ་སྦྱོང་གཞན་བྲམ་ཟེ་དང་། སྤྱོད་པ་པ་དང་། ཀུན་དུ་རྒྱུ་བ་རྣམས་ཀྱི་དོན་གྱི་སླད་དུ་ཞག་བཞི་བཅུའི་སྡོམ་པ་སྩལ་བར་བགྱིའམ། ཨུ་པཱ་ལི་མི་རུང་ངོ་། །བཙུན་པ་བཅོམ་ལྡན་འདས་ཀྱིས་ནི་ཞག་བཞི་བཅུར་བསྒོ་བར་བྱའོ་ཞེས་གསུངས་ན། བཙུན་པ་

ཞག་སུམ་བཅུ་རྩ་དགུའམ། ཞག་སུམ་བཅུའམ། ཞག་ཉི་ཤུར་བསྒོ་བར་རུང་ངམ། ཨུ་པཱ་ལི་རུང་ངོ་། །བཙུན་པ་ཞག་བཞི་བཅུའི་སྟེང་དུ་ཡང་ཞག་སུམ་བཅུ་རྩ་དགུའམ། ཞག་སུམ་བཅུའམ། ཞག་ཉི་ཤུའམ། ཞག་བཅུའམ། ཞག་བདུན་དུ་བསྒོ་བར་རུང་ངམ།

ཨུ་པཱ་ལི་མི་རུང་ངོ་། །བཙུན་པ་ཞག་སུམ་བཅུ་རྩ་དགུའི་སྟེང་དུ་ཞག་སུམ་བཅུའམ། ཞག་ཉི་ཤུའམ། ཞག་བཅུའམ། ཞག་བདུན་དུ་བསྒོ་བར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ཞག་བཞི་བཅུའི་སྟེང་དུ་ཞག་བདུན་དུ་བྱིན་གྱིས་བརླབ་ཏུ་རུང་ངམ། ཨུ་པཱ་ལི་

མི་རུང་ངོ་། །ཨུ་པཱ་ལི་དེ་ཅིའི་ཕྱིར་ཞེ་ན་མཚམས་ཀྱི་ནང་དུ་ནི་ཞག་མང་དུ་གནས་པར་བྱའོ། །མཚམས་ཀྱི་ཕྱི་རོལ་དུ་ནི་ཞག་ཉུང་དུ་གནས་པར་བྱའོ། །བཙུན་པ་ཞག་སུམ་བཅུ་རྩ་དགུའི་སྟེང་དུ་ཞག་བདུན་དུ་བྱིན་གྱིས་བརླབ་ཏུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་

ཞག་སུམ་བཅུའམ། ཞག་ཉི་ཤུའམ། ཞག་བདུན་གྱི་སྟེང་དུ་ཞག་བདུན་དུ་བྱིན་གྱིས་བརླབ་ཏུ་རུང་ངམ། ཨུ་པཱ་ལི་རུང་ངོ་། །བཙུན་པ་ཞག་བདུན་གྱི་སྟེང་དུ་ཞག་བཞི་བཅུར་བསྒོ་བར་རུང་ངམ། ཨུ་པཱ་ལི་མི་རུང་ངོ་། །ཨུ་པཱ་ལི་དེ་ཅིའི་ཕྱིར་ཞེ་ན། མཚམས་ཀྱི་ནང་དུ་

Vol. 12 · folio 255a

ནི་ཞག་མང་དུ་གནས་པར་བྱའོ། མཚམས་ཀྱི་ཕྱི་རོལ་དུ་ནི་ཞག་ཉུང་དུ་གནས་པར་བྱའོ། །བཙུན་པ་ཞག་བདུན་གྱི་སྟེང་དུ་ཞག་སུམ་བཅུ་རྩ་དགུར་བསྒོ་བར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ཞག་བདུན་གྱི་སྟེང་དུ་ཞག་སུམ་བཅུའམ། ཞག་ཉི་ཤུའམ།

ཞག་བཅུའམ། ཞག་བདུན་དུ་བསྒོར་རུང་ངམ། ཨུ་པཱ་ལི་རུང་ངོ་། །བཙུན་པ་ཞག་བདུན་གྱི་སྟེང་དུ་ཡང་ཞག་བདུན་དུ་བསྒོར་རུང་ངམ། ཨུ་པཱ་ལི་རུང་ངོ་། །བཙུན་པ་དགེ་སློང་དབྱར་ཚུལ་དུ་ཞུགས་པ་ལས་སློབ་དཔོན་དང་མཁན་པོ་དུས་བགྱིས་ནས་དེས་གནས་བཅའ་བ་མ་

རྙེད་དེ་མཆིས་ན་དབྱར་ཞིག་པ་ཞེས་བགྱིའམ། ཨུ་པཱ་ལི་དབྱར་ཞིག་པ་ཞེས་བྱའོ། །དབྱར་གྱི་དངོས་པོ་རྫོགས་སོ།། །།མདོར་ན། ལྷམ་གཉིས་པགས་པ་རྣམ་གཉིས་དང་། །དོམ་ལྤགས་ཡང་ན་མཇུག་མ་དང་། །མལ་སྟན་མཐོ་དང་མལ་སྟན་ཆེ། །ལྷམ་

ཡུ་ཅན་དང་ཤིང་ལྷམ་མོ། །བཙུན་པ་བཅོམ་ལྡན་འདས་ཀྱིས་ལྷམ་མི་རུང་བ་རྣམ་པ་ལྔ་མ་འཆང་ཤིག་ཅེས་གསུངས་ན། བཙུན་པ་གཞན་ཡང་གཅན་གཟན་མི་སྲུན་པ་དང་། བལ་གླང་ངན་པ་དང་། རྟ་ངན་པ་གཞན་དག་མཆིས་ན་དེ་དག་གི་པགས་པའི་ལྷམ་ཡང་བཅང་བར་

མི་བགྱིའམ། ཨུ་པཱ་ལི་ལྷམ་དེ་དག་ཀྱང་མ་བཅང་ཤིག །བཙུན་པ་བཅོམ་ལྡན་འདས་ཀྱིས་ཁྱིམ་པས་བསྒོས་པའི་ལྷམ་སྨན་མ་བོར་བ་ཆོངས་ཤིག་ཅེས་གསུངས་ན། བཙུན་པ་དགེ་སློང་ཁྱིམ་པས་བོར་བའི་ལྷམ་སྨན་མ་བཅངས་ཀྱང་ནོངས་པ་དང་བཅས་པར་འགྱུར་བ་མཆིས་

སམ། ཨུ་པཱ་ལི་ཡོད་དེ། འདི་ལྟར་ཡང་དགེ་སློང་དེས་ཐམས་ཅད་རི་མོ་ཅན་ནམ། གསེར་གྱིས་བརྒྱན་པའམ། དངུལ་གྱིས་བརྒྱན་པ་བཅངས་པའོ། །བཙུན་པ་དགེ་སློང་གིས་མི་རུང་བ་རྣམ་པ་ལྔ་བཅངས་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་

ལྟར་ཡང་དེས་རི་དགས་ཕྲ་མོའམ། ཀླུས་འཇིགས་པར་གྱུར་ནའོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་པགས་པ་མ་འཆང་ཤིག་པགས་པའི་སྟེང་དུ་མ་འདུག་ཤིག་ཅེས་གསུངས་ན། བཙུན་པ་ཇི་ཙམ་གྱིས་པགས་པའི་སྟེང་དུ་འདུག་པ་ཞེས་བགྱི། ཨུ་པཱ་ལི་ཇི་ཙམ་རྐུབ་

Vol. 12 · folio 255b

ཙོས་བཞག་པར་གྱུར་པའོ། །བཙུན་པ་ཇི་ཙམ་གྱིས་ན་ཉལ་བ་ཞེས་བགྱི། ཨུ་པཱ་ལི་ལུས་ཀྱིས་འཕྲེས་པའོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་པགས་པ་མ་འཆང་ཤིག་ཅེས་གསུངས་ན། བཙུན་པ་དགེ་སློང་གིས་པགས་པ་བཅངས་ཀྱང་ནོངས་པར་མི་འགྱུར་བ་མཆིས་སམ།

ཨུ་པཱ་ལི་ཡོད་དེ། ན་བས་ནི་པགས་པ་ཆོངས་ཤིག །མི་ན་བས་ནི་མ་ཡིན་ནོ། །བཙུན་པ་བཅོམ་ལྡན་འདས་ཀྱིས་དོམ་གྱི་པགས་པ་ཆོངས་ཤིག་ཅེས་གསུངས་ན། བཙུན་པ་ནད་པས་བཅང་བར་བགྱིའམ། འོན་ཏེ་མི་ན་བས་ཀྱང་བཅང་བར་བགྱི། ཨུ་པཱ་ལི་ན་བ་དང་། མི་ན་

བ་གཉིས་ཀས་ཆོངས་ཤིག །བཅོམ་ལྡན་འདས་ཀྱིས་མཇུག་མ་ལྔ་ལས་འཇུས་ཏེ་ཀླུང་རྒོལ་ཅིག་ཅེས་གསུངས་ན། བཙུན་པ་རྐང་པ་བཞི་པ་གཞན་དག་ཀྱང་མཆིས་ན་དེ་དག་གིས་ལས་རྒལ་བར་ཡང་རུང་ངམ། ཨུ་པཱ་ལི་རྒོལ་ཅིག །བཙུན་པ་དེ་སྟེ་ཕོ་མ་མཆིས་ན་མོའི་ལས་རྒལ་བར་

བགྱིའམ། ཨུ་པཱ་ལི་དེ་ནི་བར་ཆད་ཅིག་བྱུང་ན་རྒལ་བར་བྱའོ། །བཙུན་པ་བཅོམ་ལྡན་འདས་ཀྱིས་དགེ་སློང་མལ་སྟན་མཐོན་པོར་མ་འདུག་ཤིག་ཅེས་གསུངས་ན། བཙུན་པ་མལ་སྟན་མཐོན་པོའི་ཚད་ཇི་ཙམ། བདེ་བར་གཤེགས་པའི་སོར་བརྒྱད་ལས་ལྷག་པ་ནི་མལ་སྟན་མཐོན་

པོའོ། །བཙུན་པ་བཅོམ་ལྡན་འདས་ཀྱིས་དགེ་སློང་རྣམས་ལ་མལ་སྟན་མཐོ་ཞིང་ཆེ་བ་ལ་མ་འདུག་ཅེས་གསུངས་ན། བཙུན་པ་དགེ་སློང་མལ་སྟན་མཐོ་ཞིང་ཆེ་བར་མཆིས་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། ལྷའི་ཁྱིམ་དང་། ཀླུའི་ཁྱིམ་དང་། གནོད་

སྦྱིན་གྱི་ཁྱིམ་དང་། རྒྱལ་པོའི་ཁྱིམ་དང་། བློན་པོའི་ཁྱིམ་དེ་དག་ཏུ་སྟན་གཞན་མེད་ནའོ། །བཙུན་པ་དགེ་སློང་གིས་བཞོན་པ་ལ་འཚལ་ན་ནོངས་པ་གསུམ་དུ་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་ཡང་བཞོན་པ་དེ་མོ་ཡིན་པ་དང་། གསེར་གྱིས་བརྒྱན་

པར་གྱུར་པའོ། །བཙུན་པ་བཅོམ་ལྡན་འདས་ཀྱིས་ལྗོངས་ཁ་བ་ཅན་དུ་ལྷམ་ཡུ་བ་ཅན་ཆོངས་ཤིག་ཅེས་གསུངས་ན། བཙུན་པ་དགེ་སློང་གིས་དེ་ལས་གཞན་པའི་ལྗོངས་སུ་ལྷམ་ཡུ་བ་ཅན་བཅངས་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། གང་དུ་ལྷམ་ཡུ་

Vol. 12 · folio 256a

བ་ཅན་མེད་ན་འཚོ་བར་མི་ནུས་པའོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་ཤིང་ལྷམ་མ་འཆང་ཤིག་ཅེས་གསུངས་ན། བཙུན་པ་དགེ་སློང་གིས་ཤིང་ལྷམ་བཅངས་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། ཆུ་ཡོད་པའི་

ཡུལ་ཆུས་གང་བས་ཤིང་ལྷམ་མེད་པར་འགྲོ་མི་ནུས་པ་དེར་རོ། །པགས་པའི་དངོས་པོ་རྫོགས་སོ།། །།མདོར་ན། སྨན་གཉིས་ལན་ཚྭ་རྣམ་པ་གཉིས། །མར་ལ་རྣམ་གཉིས་དེ་བཞིན་ཏེ། །ས་དང་བཙོས་དང་བུ་རམ་དང་། །འབྲུ་མར་ཕན་པ་ཐ་མའོ། །

སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་སྨན་དེ་ཉིད་སྔ་དྲོའི་ལགས་ལ་དེ་ཉིད་སླད་དྲོའི་ཡང་ལགས་དེ་ཉིད་ཞག་བདུན་པའི་ཡང་ལགས། དེ་ཉིད་ནམ་འཚོའི་བར་དུ་བཅང་བ་ལགས་པ་འགྱུར་བ་མཆིས་སམ། ཨུ་པཱ་ལི་ཡོད་དེ། བུ་རམ་

ཤིང་ནི་སྔ་དྲོའིའོ། །ཁུ་བ་ནི་ཕྱི་དྲོའིའོ། །བུ་རམ་ནི་ཞག་བདུན་པའིའོ། །བསྲེགས་པའི་ཐལ་བ་ནི་ནམ་འཚོའི་བར་དུའོ། །ཨུ་པཱ་ལི་ཞོ་ནི་སྔ་དྲོའིའོ། །ཆུ་ནི་ཕྱི་དྲོའིའོ། །མར་ནི་ཞག་བདུན་པའིའོ། །བསྲེགས་པའི་ཐལ་བ་ནི་ནམ་འཚོའི་བར་དུའོ། །ཨུ་པཱ་ལི་

ཤ་ནི་སྔ་དྲོའིའོ། །ཞག་ནི་ཞག་བདུན་པའིའོ། །བསྲེགས་པའི་ཐལ་བ་ནི་ནམ་འཚོའི་བར་དུའོ། །ཨུ་པཱ་ལི་འབྲུ་ནི་སྔ་དྲོའིའོ། །འབྲུ་མར་ནི་ཞག་བདུན་པའིའོ། །བསྲེགས་པའི་ཐལ་བ་ནི་ནམ་འཚོའི་བར་དུའོ། །བཙུན་པ་སྔ་དྲོ་བ་དང་ཕྱི་དྲོ་བ་དང་། ཞག་བདུན་པའི་དང་། ནམ་

འཚོའི་བར་གྱི་སྨན་འདི་དག་རྣམས་ཕན་ཚུན་འདྲེས་ན་འཚལ་དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་བླངས་པ་དང་། བྱིན་ལེན་མ་བགྱིས་པ་དང་། བླངས་པ་ལ་བྱིན་ལེན་བགྱིས་པ་དང་། ནང་དུ་བཞག་པ་དང་། ནང་དུ་བཙོས་པ་དང་། རང་གིས་བཙོས་པའི་རྣམས་འཚལ་

དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་དགེ་སློང་གིས་སྔ་དྲོའི་དང་། སླད་དྲོའི་དང་། ཞག་བདུན་པའི་དང་། ནམ་འཚོའི་བར་གྱི་སྨན་གང་ལགས་པ་དེ་དག་བླངས་པ་དང་། བྱིན་ལེན་མ་བགྱིས་པ་དང་། བླངས་པ་ལ་བྱིན་ལེན་བགྱིས་པ་དང་། ནང་དུ་བཞག་པ་དང་།

Vol. 12 · folio 256b

ནང་དུ་བཙོས་པ་དང་། རང་གིས་བཙོས་པ་དང་། དགེ་སློང་གིས་བཙོས་པའི་རྣམས་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མས་སྔ་དྲོ་བའི་དང་། སླད་དྲོ་བའི་དང་། ཞག་བདུན་པའི་དང་། ནམ་འཚོའི་བར་གྱི་སྨན་གང་ལགས་པ་དེ་དག་བླངས་པ་དང་། བྱིན་

ལེན་མ་བགྱིས་པ་དང་། བླངས་པ་ལ་བྱིན་ལེན་བགྱིས་པ་དང་། ནང་དུ་བཞག་པ་དང་། ནང་དུ་བཙོས་པ་དང་། རང་གིས་བཙོས་པ་དང་། དགེ་སློང་མས་བཙོས་པ་རྣམས་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བླངས་པ་ལ་བྱིན་ལེན་བགྱིས་པ་དང་། ནང་དུ་

བཞག་པ་དང་། ནང་དུ་བཙོས་པ་དང་། རང་གིས་བཙོས་པ་དང་། དགེ་སློང་གིས་བཙོས་པ་འཚལ་བ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མས་བླངས་པ་ལ་བྱིན་ལེན་བགྱི་བ་དང་། ནང་དུ་བཞག་པ་དང་། ནང་དུ་བཙོས་པ་དང་།

རང་གིས་བཙོས་པ་དང་། དགེ་སློང་མས་བཙོས་པ་འཚལ་བ་ན་མཚན་འཕོས་ཏེ་དགེ་སློང་ཕར་གྱུར་ན་ཅིར་འགྱུར། ཉེས་བྱས་སོ། བཙུན་པ་སྔ་དྲོ་བ་གང་ལགས་པ་དང་། སླད་དྲོ་བ་གང་ལགས་པ་དང་། ཞག་བདུན་པ་གང་ལགས་པ་དང་། ནམ་འཚོའི་བར་གྱི་སྨན་རྣམས་

གང་ལགས་པ་ཕན་ཚུན་འདྲེས་ཏེ་མ་ཕྱེད་ན་ནམ་འཚོའི་བར་དུ་བྱིན་གྱིས་བརླབ་ཏུ་རུང་ངམ། ཨུ་པཱ་ལི་མི་རུང་སྟེ། སྔ་དྲོ་བ་དང་། ཕྱི་དྲོ་བ་དང་། ཞག་བདུན་པ་དེ་རྣམས་ཀྱིས་ནམ་འཚོའི་བར་དུ་བྱ་བ་བྱར་མི་རུང་སྟེ། བྱིན་གྱིས་བརླབ་ཏུ་མི་རུང་ངོ་། །དེ་སྟེ་སྔ་དྲོ་བའི་དང་། ཕྱི་དྲོ་བའི་

དང་། ཞག་བདུན་པ་རྣམས་དབྱེ་བར་ནུས་ན་བྱིན་གྱིས་བརླབ་ཏུ་རུང་ངོ་། །བཙུན་པ་མི་རུང་བའི་ཞག་གིས་ལན་ཚྭ་བཙོས་ནས་འཚལ་བར་བགྱིའམ། ཨུ་པཱ་ལི་མི་ན་བས་བཟའ་བར་མི་བྱའོ། །ཤ་ལས་བཙོས་པའམ། མར་ལས་བཙོས་པའམ། འབྲུ་མར་ལས་བཙོས་པ་ཡང་དེ་བཞིན་

ནོ། །བཙུན་པ་མི་རུང་བའི་ལན་ཚྭས་འབྲུ་མར་རམ་མར་བཙོས་པ་འཚལ་དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་མར་རམ་འབྲུ་མར་ཆང་དང་ལྷན་ཅིག་བཙོས་པ་འཚལ་དུ་རུང་ངམ། ཨུ་པཱ་ལི་བཟར་རུང་ངོ་། །བཙུན་པ་མར་རམ་འབྲུ་མར་ཆང་དང་ལྷན་ཅིག་ཏུ་འདྲེས་པར་གྱུར་པ་འཚལ་

Vol. 12 · folio 257a

དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་ཆང་གིས་སྤངས་པའི་སྨན་འཚལ་དུ་རུང་ངམ། ཨུ་པཱ་ལི་ན་བ་ལ་ནི་རུང་གི་མི་ན་བ་ལ་ནི་མ་ཡིན་ནོ། །བཙུན་པ་མི་རུང་བའི་ས་ལ་ཤིང་ཞིག་སྐྱེས་ལ་མི་རུང་བའི་སར་འབྲས་བུ་ཞིག་ལྷུང་ན་འཚལ་དུ་རུང་ངམ། ཨུ་

པཱ་ལི་མི་རུང་ངོ་། །མི་རུང་བའི་ས་ལས་ཤིང་ཞིག་སྐྱེས་ལ་རུང་བའི་སར་འབྲས་བུ་ལྷུང་ན་འཚལ་དུ་རུང་ངམ། ཨུ་པཱ་ལི་མི་རུང་ངོ་། །རུང་བའི་ས་ལ་ཤིང་ཞིག་སྐྱེས་ལ་མི་རུང་བའི་སར་འབྲས་བུ་ལྷུང་ན་འཚལ་དུ་རུང་ངམ། དེ་སྟེ་ཞག་གཅིག་མ་ལོན་པར་གྱུར་ན་ནི་བཟའ་བར་བྱའོ། །

རུང་བའི་ས་ལས་ཤིང་སྐྱེས་ལ་རུང་བའི་སར་འབྲས་བུ་ལྷུང་ན་འཚལ་དུ་རུང་ངམ། ཨུ་པཱ་ལི་བཟར་རུང་ངོ་། །རུང་བའི་ས་ན་ཞུགས་མཆིས་ལ་མི་རུང་བའི་ས་ན་མཆིས་པས་ཞུགས་སམ་ཞུགས་ལྕེའམ། ཞུགས་ལྕེ་ཆད་པས་རུང་བར་བགྱིད་ན་རུང་བར་བགྱིས་པ་ཞེས་བགྱིའམ།

བགྱིས་པ་ཞེས་བརྗོད་དམ། འཚལ་བར་བགྱིའམ། ཨུ་པཱ་ལི་མི་རུང་ངོ་། །རུང་བའི་ས་ན་ཞུགས་མཆིས་ལ་མི་རུང་བའི་ས་ན་མཆིས་པས་ཞུགས་སུ་བཅུག་ན་རུང་ཞེས་བགྱིའམ། བགྱིས་པ་ཞེས་བགྱིའམ། འཚལ་དུ་རུང་ངམ། ཨུ་པཱ་ལི་མ་ཡིན་ནོ། །མི་རུང་

བའི་ས་ན་ཞུགས་མཆིས་ལ་རུང་བའི་ས་ན་མཆིས་པ་ཞུགས་སམ། ཞུགས་ལྕེའམ། ཞུགས་ལྕེ་ཆད་པས་རུང་བར་བགྱིད་ན་རུང་བར་བགྱིས་པ་ཞེས་བགྱིའམ། ཨུ་པཱ་ལི་རུང་བར་བྱས་པ་ཞེས་བྱ་སྟེ། བཟའ་བར་བྱའོ། །མི་རུང་བའི་ས་ན་ཞུགས་མཆིས་ལ་རུང་བའི་

ས་ན་མཆིས་པས་ཞུགས་སུ་སྩལ་ན་རུང་བར་བགྱིས་པ་ཞེས་བགྱིའམ། རུང་བར་བྱས་པ་ཞེས་བྱའོ། །འཚལ་དུ་རུང་ངམ། ཨུ་པཱ་ལི་བཟའ་བར་བྱའོ། །མི་རུང་བའི་ས་ན་སྒྱེད་པོ་གསུམ་མཆིས་ལ་རུང་བའི་ས་ན་ཞུགས་མཆིས་པའི་ཞུགས་ལྕེ་དེས་བསྒྲལ་ན་འཚལ་དུ་

རུང་ངམ། ཨུ་པཱ་ལི་མི་རུང་ངོ་། །མི་རུང་བའི་ས་ན་ཞུགས་མཆིས་ལ་རུང་བའི་ས་ན་སྒྱེད་པོ་གཉིས་མཆིས་པ་དང་། མི་རུང་བའི་ས་ན་སྒྱེད་པོ་གཅིག་མཆིས་པའི་ཞུགས་ལྕེ་དེས་བསྒྲལ་ན་འཚལ་དུ་རུང་ངམ། ཨུ་པཱ་ལི་མི་རུང་ངོ་། །མི་རུང་བའི་ས་ན་སྒྱེད་པོ་གཅིག་མཆིས་

Vol. 12 · folio 257b

ལ་རུང་བའི་ས་ན་ཞུགས་མཆིས་པ་དེའི་ཞུགས་ལྕེས་བསྒྲལ་ན་འཚལ་དུ་རུང་ངམ། ཨུ་པཱ་ལི་མི་རུང་ངོ་། །རུང་བའི་ས་ན་ཞུགས་མཆིས་ལ་རུང་བའི་ས་ན་སྒྱེད་པོ་གཉིས་མཆིས་པ་དང་། མི་རུང་བའི་ས་ན་སྒྱེད་པོ་གཅིག་མཆིས་ལ་ཞུགས་ལྕེ་དེས་བསྒྲལ་ན་འཚལ་དུ་རུང་ངམ།

ཨུ་པཱ་ལི་བཟའ་བར་བྱའོ། །རུང་བའི་ས་ན་སྒྱེད་པོ་གསུམ་མཆིས་ལ་རུང་བའི་ས་ན་ཞུགས་མཆིས་ན་ཞུགས་ལྕེ་དེས་བསྒྲལ་ན་འཚལ་དུ་རུང་ངམ། ཨུ་པཱ་ལི་རུང་ངོ་། །བཙུན་པ་དགེ་སློང་གིས་ས་བོན་གྱི་རིགས་ལྔ་ལས་ཞུགས་སམ་མཚོན་ཏམ་སེན་མོས་རུང་བར་བགྱིད་ན་རུང་བར་

བགྱིས་པ་ཞེས་བགྱིའམ། རུང་བར་བྱས་པ་ཞེས་བྱ་སྟེ། རུང་བར་བྱས་པས་ན་བཟའ་བར་བྱའོ། །མེས་རུང་བར་བྱས་པ་མ་གཏོགས་ཏེ་ལྷག་མ་རྣམས་ནི་བཟའ་བར་བྱའོ། །བཙུན་པ་བཅོམ་ལྡན་འདས་ཀྱིས་བཏུང་བ་རྣམ་པ་བརྒྱད་འཐུང་ཤིག་ཅེས་གསུངས་ན། རྩ་བ་དང་།

སྡོང་བུ་དང་། ལོ་མ་དང་། འབྲས་བུ་དང་། བསྔལ་བར་བསྲེས་པ་འདི་དག་འཚལ་དུ་རུང་ངམ། ཨུ་པཱ་ལི་རུང་ངོ་། །བཙུན་པ་བུ་རམ་ཆབ་དགུང་བདུན་དུ་བྱིན་གྱིས་བརླབ་ཏུ་རུང་ངམ། ཨུ་པཱ་ལི་རུང་ངོ་། །ཇི་སྲིད་དུ་བཏུང་བར་བགྱི། དངོས་པོ་མ་གྱུར་པའི་བར་དུའོ། །བཙུན་པ་

མི་རུང་བའི་སྨན་བུ་རམ་དུ་བསྒྲལ་བ་འཚལ་བར་བགྱིའམ། ཨུ་པཱ་ལི་མ་ཡིན་ནོ། །བཙུན་པ་ནད་པའི་གཡོག་ཇི་ལྟར་བགྱི། སྟོན་པའི་འདུ་ཤེས་པས་སྨན་ཕན་པ་དང་མཐུན་པས་གཡོག་བྱའོ། །བཙུན་པ་ནད་པ་ལ་ཅི་སྩལ་བར་བགྱི། ཨུ་པཱ་ལི་རང་བཞིན་གྱིས་ཁ་ན་མ་ཐོ་བ་མ་

གཏོགས་པར་གང་གིས་ནད་པ་སོས་པར་འགྱུར་བ་དེ་དག་བྱིན་ཅིག། །།མདོར་ན། འུག་པ་འོལ་བ་བྱ་རྒོད་དང་། །བྱ་རོག་ཀང་ཀ་ཆུ་སྐྱར་མོ། །མི་རོ་ཟ་བའི་བྱ་རྣམས་དང་། །སེན་མོ་མཆུ་སྟོབས་གང་ལྡན་པའོ། །བཙུན་པ་འུག་པའི་ཤ་འཚལ་དུ་རུང་ངམ། ཨུ་པཱ་ལི་

མི་རུང་ངོ་། །འོལ་པའི་ཤ་དང་། བྱ་རྒོད་ཀྱི་ཤ་དང་། བྱ་རོག་གི་ཤ་དང་། བྱ་ཀང་ཀའི་ཤ་དང་། ཆུ་སྐྱར་མོའི་ཤ་དང་། གཞན་ཡང་བྱ་མི་རོ་འཚལ་བ་རྣམས་དང་། སེན་མོ་དང་མཆུ་སྟོབས་དང་ལྡན་པའི་ཤ་འཚལ་དུ་རུང་ངམ། ཨུ་པཱ་ལི་མི་རུང་ངོ་།། །།མདོར་ན། སྲོག་

Vol. 12 · folio 258a

ཆགས་ཀན་དུ་ཤ་དང་པད་པ་དང་། །སྲིན་བུ་སྦལ་པའང་དེ་བཞིན་ཏེ། །སྲེ་མོ་སྦྲུལ་དང་གོ་དྷ་དང་། །སྦལ་པ་དཀར་པོ་བོང་བུ་རྔ་མོ་སྲམ། །བཙུན་པ་སྲོག་ཆགས་ཀན་དུ་ཤའི་ཤ་འཚལ་དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་པད་པའི་ཤ་དང་། སྦལ་

པའི་ཤ་དང་། སྲེ་མོའི་ཤ་དང་། སྦྲུལ་གྱི་ཤ་དང་། གོ་དྷའི་ཤ་དང་། སྦལ་པ་དཀར་པོའི་ཤ་དང་། སྲམ་གྱི་ཤ་དང་། བྱ་རོག་གི་ཤ་དང་། གཞན་ཡང་ཆུ་ན་གནས་པ་དང་། སེན་མོ་དང་། མཆེ་བ་སྟོབས་དང་ལྡན་པ་དང་། གཞན་ཡང་མི་རོ་ཟ་བ་དེ་དག་གི་ཤ་

འཚལ་དུ་རུང་ངམ། ཨུ་པཱ་ལི་མི་རུང་ངོ་།། །།མདོར་ན། བལ་གླང་དང་ཡང་ཝ་དང་རྟ། །སྤྲེའུ་དང་མི་ཡང་དེ་བཞིན་ཏེ། །སེང་གེ་སྟག་དང་དོམ་དག་དང་། །སེན་མོ་མཆེ་བ་གང་མཐུ་ལྡན། བཙུན་པ་བལ་གླང་གི་ཤ་འཚལ་དུ་རུང་ངམ། ཨུ་པཱ་ལི་མི་རུང་ངོ་། །བཙུན་

པ་རྟ་དང་ཝའི་ཤ་དང་། སྤྲེའུའི་ཤ་དང་། མིའི་ཤ་དང་། སེང་གེའི་ཤ་དང་། སྟག་གི་ཤ་དང་། དོམ་གྱི་ཤ་དང་། གཞན་ཡང་རྐང་བཞི་པ་སེན་མོ་དང་མཆེ་བ་སྟོབས་དང་ལྡན་པ་དེ་དག་གི་ཤ་འཚལ་དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་གང་གིས་ཤ་འཚལ་དུ་མི་རུང་བ་

དེའི་ཞག་དང་། འོ་མ་འཚལ་དུ་རུང་ངམ། ཨུ་པཱ་ལི་མི་རུང་ངོ་། །ཨུ་པཱ་ལི་དེ་ཅིའི་ཕྱིར་ཞེ་ན། ཨུ་པཱ་ལི་གང་གི་ཤ་མི་རུང་བ་དེའི་ཐམས་ཅད་ཀྱང་མི་རུང་བའོ། །བཙུན་པ་ཤ་རྗེན་འཚལ་དུ་རུང་ངམ། ཨུ་པཱ་ལི་མི་རུང་ངོ་། །བདག་གི་ཕྱིར་བསད་པའི་ཤ་འཚལ་དུ་རུང་ངམ། ཨུ་པཱ་ལི་

མི་རུང་ངོ་། །སྨན་གྱི་དངོས་པོ་རྫོགས་སོ།། །།འདུལ་བ་གཞུང་དམ་པ། བམ་པོ་བཅྭ་བརྒྱད་པ། མདོར་ན། དབྱར་གཉིས་ཕྱེ་བར་གྱུར་པའི་གནས། །རྙེད་དང་དགེ་འདུན་དག་གི་གཉིས། །སྨྱོན་པ་ཆད་པ་གསུམ་པ་དང་། །སྦྱོར་བ་འགྲོན་པ་མང་པོ་དབྱར། །བཙུན་

པ་ཁྱིམ་བདག་ཅིག་གིས་དབྱར་ཚུལ་དུ་ཞུགས་པ་ལ་ཆོས་གོས་འདི་འབུལ་ལོ་ཞེས་མཆི་སྟེ། དབྱར་གནས་པ་རྣམས་ལ་ཆོས་གོས་ཤིག་ཕུལ་ན་དེ་ལ་དབྱར་གྱི་ཟླ་བ་ཐ་མར་ཡང་མ་གྱུར་ལ། གཏན་པ་ཡང་མ་བཏིང་ན་གང་གིས་འཐོབ། ཨུ་པཱ་ལི་དབྱར་གནས་པ་རྣམས་ཀྱིས་སོ། །

Vol. 12 · folio 258b

བཙུན་པ་ཁྱིམ་བདག་ཅིག་གིས་ཆོས་གོས་འདི་ནི་དབྱར་ཚུལ་དུ་ཞུགས་པ་རྣམས་ལ་འབུལ་ལོ་ཞེས་མཆི་སྟེ། དབྱར་ཚུལ་དུ་ཞུགས་པའི་དགེ་འདུན་རྣམས་ལ་ཕུལ་ན་དེར་དབྱར་གྱི་ཟླ་བ་ཡང་ཐ་མར་གྱུར་ལ་གནས་དེར་གཏན་པ་བཏིང་ན་གང་གིས་འཐོབ། དབྱར་གནས་པ་རྣམས་ཀྱིས་

སོ། །བཙུན་པ་ཁྱིམ་བདག་ཅིག་གིས་དགེ་འདུན་ལ་གནས་འདིར་དགེ་སློང་གང་གནས་པ་དེ་དག་ལ་ཆོས་གོས་འདི་འབུལ་ལོ་ཞེས་མཆི་སྟེ། གོས་ཤིག་ཕུལ་ན་གང་གིས་འཐོབ། གང་ལ་བྱིན་པས་སོ། །དེ་བཞིན་དུ་གཉིས་པ་དང་། གསུམ་པ་ནས། བཅུ་པའི་བར་དུ་རྒྱས་

པར་དེ་དག་ལ་ཕུལ་ན་གང་གིས་འཐོབ། གང་ལ་བྱིན་པས་སོ། །བཙུན་པ་ཁྱིམ་བདག་ཅིག་གིས་དགེ་འདུན་ལ་གོས་ཤིག་ཕུལ་ཏེ། གོས་འདི་ནི་གནས་འདིར་སང་ཕོད་གནས་པའི་དགེ་སློང་དེ་དག་ལ་འབུལ་ལོ་ཞེས་མཆི་ན་གང་གིས་འཐོབ། གང་ལ་བྱིན་པས་སོ། །དེ་བཞིན་དུ་

གཉིས་པ་དང་། གསུམ་པ་ནས་ལོ་བཅུའི་བར་དུ་གནས་པ་དེ་དག་ལ་འབུལ་ལོ་ཞེས་མཆི་ན་གང་གིས་འཐོབ། གང་ལ་བྱིན་པས་སོ། །འོན་ཏེ་གནས་དེ་ན་ད་ལྟར་མི་གནས་པར་གྱུར་ན་དགེ་སློང་དེ་དག་གིས་གོས་དེ་དག་བགོ་བར་བགྱིའམ། ཨུ་པཱ་ལི་བགོ་བར་གྱིས་ཤིག །བཙུན་

པ་དབྱར་གྱི་ནང་ལོགས་སུ་དགེ་འདུན་དག་བྱེ་ན་དབྱར་གྱི་རྙེད་པ་དེ་དག་སྩལ་བར་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དབྱར་གྱི་གནས་སུ་རིང་དུ་གནས་པར་གྱུར་པ་ལས་དགེ་འདུན་བྱེ་ན་དབྱར་གྱི་རྙེད་པ་དེ་དག་སྩལ་བར་བགྱིའམ། བྱིན་ཅིག །སུ་ལ་ཕྱོགས་གཉིས་

ག་ལའོ། །བཙུན་པ་དབྱར་གྱི་ནང་ལོགས་སུ་དགེ་སློང་གིས་ལྷུང་བཟེད་དང་ཆོས་གོས་བཙལ་ཏེ་མཆིས་ན་དེའི་དབྱར་གྱི་རྙེད་པ་སྩལ་བར་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དེ་སྟེ་དབྱར་གྱི་གནས་སུ་ཡུན་རིང་དུ་གནས་པར་གྱུར་ན། དེ་ལ་དབྱར་གྱི་རྙེད་པ་སྩལ་ཏམ།

ཨུ་པཱ་ལི་བྱིན་ཅིག །སུ་ལ། གང་ལ་སྩོལ་བའམ་བསྔོས་པར་གྱུར་པ་ལའོ། །བཙུན་པ་དབྱར་གྱི་ནང་ལོགས་སུ་དགེ་སློང་ཞིག་དུས་བགྱིས་ན་དེ་ལ་དབྱར་གྱི་རྙེད་པ་སྩལ་བར་བགྱིའམ། མ་སྦྱིན་ཅིག །དེ་སྟེ་དབྱར་གྱི་གནས་སུ་ཡུན་རིང་དུ་གནས་པར་གྱུར་ཏེ་དུས་ལས་འདས་ན་

Vol. 12 · folio 259a

དབྱར་གྱི་རྙེད་པ་སྩལ་ཏམ། ཨུ་པཱ་ལི་བྱིན་ཅིག །སུ་ལ། གང་ལ་བསྔོས་པར་གྱུར་པ་ལའོ། །འོན་ཏེ་སུ་ལའང་བསྔོས་པར་གྱུར་པ་མ་མཆིས་ན་སུ་ལ་སྩལ། དགེ་འདུན་ལའོ། །བཙུན་པ་དབྱར་གྱི་ནང་ལོགས་སུ་དགེ་སློང་ཞིག་དགེ་ཚུལ་ཕ་ལགས་པར་

ཁས་བླངས་ན། དེ་ལ་དབྱར་གྱི་རྙེད་པ་སྩལ་བར་བགྱིའམ། སྦྱིན་པར་བྱའོ། །དེ་ལ་ཇི་ཙམ་ཞིག་སྩལ། དགེ་ཚུལ་ཕའི་སྐལ་བའོ། །དེ་སྟེ་དབྱར་གྱི་གནས་སུ་ཡུན་རིང་དུ་གནས་པར་གྱུར་ནས་དགེ་ཚུལ་ཕ་ལགས་པར་ཁས་བླངས་ན་ཇི་ཙམ་སྩལ་བར་བགྱི། དགེ་སློང་གི་

སྐལ་བའོ། །བཙུན་པ་དབྱར་གྱི་ནང་ལོགས་སུ་དགེ་སློང་ཞིག་ཁྱིམ་པ་ལགས་པར་ཁས་བླངས་ན། དེ་ལ་དབྱར་གྱི་རྙེད་པ་སྩལ་བར་བགྱིའམ། མི་སྦྱིན་ནོ། །དེ་སྟེ་དབྱར་གྱི་གནས་སུ་ཡུན་རིང་དུ་གནས་པར་གྱུར་ནས་ཁྱིམ་པ་ལགས་པར་ཁས་བླངས་ན། དེ་ལ་དབྱར་གྱི་རྙེད་

པ་སྩལ་བར་བགྱིའམ། བྱིན་ཅིག །སུ་ལ། གང་ལ་བསྔོས་པར་གྱུར་པ་ལའོ། །བཙུན་པ་དབྱར་གྱི་ནང་ལོགས་སུ་དགེ་སློང་ཞིག་མ་ནིང་ལགས་པར་ཁས་བླངས་པ་དང་། དགེ་སློང་མ་སུན་ཕྱུང་བ་དང་། ཕ་དང་། མ་དང་། དགྲ་བཅོམ་པ་བསད་པ་དང་། དགེ་འདུན་གྱི་

དབྱེན་བགྱིས་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། སྔར་ཉེས་པ་བྱུང་བ་དང་། སྔར་འཁྲུགས་པ་རྣམས་ལགས་པར་ཁས་བླངས་ན་དེ་དག་ལ་དབྱར་གྱི་རྙེད་པ་སྩལ་

བར་བགྱིའམ། ཨུ་པཱ་ལི་མི་སྦྱིན་ནོ། །བཙུན་པ་དེ་སྟེ་དབྱར་གྱི་གནས་སུ་ཡུན་རིང་དུ་གནས་པར་གྱུར་ནས་རབ་ཏུ་ཤེས་ན། དེ་ལ་དབྱར་གྱི་རྙེད་པ་སྩལ་བར་བགྱིའམ། ཨུ་པཱ་ལི་སྦྱིན་པར་བྱའོ། །བཙུན་པ་དབྱར་གྱི་ནང་ལོགས་སུ་དགེ་སློང་མ་ལགས་པར་ཁས་བླངས་པ་དང་།

མི་གནས་པ་དང་། སོ་སོར་གནས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ལགས་པར་ཁས་བླངས་ན། དེ་དག་ལ་དབྱར་གྱི་རྙེད་པ་སྩལ་བར་བགྱིའམ། ཨུ་པཱ་ལི་མི་སྦྱིན་ནོ། །བཙུན་པ་དེ་སྟེ་དབྱར་གྱི་གནས་སུ་རིང་དུ་གནས་སམ་དབྱར་རངས་པར་གནས་པ་དེ་

Vol. 12 · folio 259b

དག་ལ་ཁས་བླངས་ན་དེ་དག་ལ་དབྱར་གྱི་རྙེད་པ་སྩལ་བར་བགྱིའམ། ཨུ་པཱ་ལི་སྦྱིན་པར་བྱའོ། །བཙུན་པ་དགེ་སློང་གིས་གནས་བཞི་ནས་ཆོས་གོས་ཀྱི་སྐལ་བ་བདག་གིར་བགྱིས་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་ཡང་དགེ་སློང་དེས་

གནས་བཞི་ཆར་མཚམས་གཅིག་ཏུ་བྱས་ནས་དབྱར་ཚུལ་དུ་ཞུགས་པའོ། །བཙུན་པ་ཇི་ཙམ་གྱིས་ན་ཆོས་གོས་རྙེད་པ་ཞེས་བགྱི། ཨུ་པཱ་ལི་འདི་ལྟ་སྟེ། འདི་ནི་བདག་གི་ཆོས་གོས་སོ་སྙམ་ནས་མིག་གིས་མཐོང་བར་གྱུར་པའམ། ལག་པའམ། ཕྲག་པའམ། པང་

པར་བཞག་པར་གྱུར་པའོ། །བཙུན་པ་དགེ་སློང་གཅིག་པུས་དགེ་འདུན་གྱི་རྙེད་པ་བདག་གིར་བགྱིས་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་ཡང་དགེ་སློང་གཅིག་པུ་གནས་པར་གྱུར་ལ། དེར་ཡང་མི་དག་གིས་དགེ་འདུན་གྱི་ཕྱིར་གོས་

ཕུལ་ནའོ། །བཙུན་པ་དགེ་སློང་གིས་དགེ་འདུན་གྱི་རྙེད་པ་བཏགས་པ་བདག་གིར་བགྱིས་ཀྱང་ནོངས་པ་དང་བཅས་པར་འགྱུར་བ་མཆིས་སམ། ཨུ་པཱ་ལི་ཡོད་དེ། དགེ་འདུན་ལ་བསྔོས་པར་གྱུར་པའོ། །བཙུན་པ་དགེ་སློང་སྨྱོན་པ། ཆོས་གོས་བགེད་པར་བསྐོ་བར་བགྱི་འམ།

ཨུ་པཱ་ལི་མ་ཡིན་ནོ། །སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་འང་དེ་བཞིན་ནོ། །བཙུན་པ་དགེ་སློང་དམུས་ལོང་ཆོས་གོས་བགེད་པར་བསྐོ་བར་བགྱིའམ། ཨུ་པཱ་ལི་མ་ཡིན་ནོ། །བཙུན་པ་སྨྱོན་པའི་ཆོས་

གོས་གང་ནས་བཟུང་སྟེ་བསྔོ་བར་བགྱི། ནམ་རང་གི་སེམས་སོར་ཆུད་པ་ཚུན་ཆད་དོ། །བཙུན་པ་སྨྱོན་པ་ལས་ཆོས་གོས་བླང་བར་བགྱིའམ། མི་བླང་བར་བགྱི། ཁ་ཅིག་ལས་ནི་བླང་བར་བྱ། ཁ་ཅིག་ལས་ནི་མི་བླང་བར་བྱའོ། །གང་ལས་བླང་བར་བྱ། གང་ལ་

ཕའམ། མའམ། སྤུན་ནམ། སྲིང་མོ་གསོན་པ་འམ། རང་གི་ཁྱིམ་ནས་བྱིན་ཡང་རུང་སྟེ། ཡོངས་སུ་གཏོང་བའི་འདུ་ཤེས་ཀྱང་ཡོད་པའོ། །བཙུན་པ་དབྱར་ཞིག་པ་ལས་དབྱར་གྱི་རྙེད་པ་སྩལ་བར་བགྱིའམ། ཁ་ཅིག་ལ་ནི་སྦྱིན། ཁ་ཅིག་ལ་ནི་མི་སྦྱིན་ནོ། །གང་ལ་མི་

Vol. 12 · folio 260a

སྦྱིན་ཞེ་ན། གང་དབྱར་སྔ་མའི་ཚུལ་ཡང་མེད་ལ། ཕྱི་མའི་ཚུལ་ཡང་མེད་པར་ཤེས་པའོ། །གང་ལ་སྦྱིན་པར་བྱ་ཞེ་ན། གང་ལ་དབྱར་སྔ་མའི་ཚུལ་ཡང་ཡོད་ལ། ཕྱི་མའི་ཡང་ཡོད་པར་ཤེས་པའོ། །བཙུན་པ་ནད་གཡོག་གིས་སྦྱོར་བ་བཏང་བར་གྱུར་

ཏེ་གཞན་ལ་ཡང་སྤྲོ་བར་བགྱིས་ལ་ནད་པ་དུས་བགྱིས་ན་ནད་གཡོག་གང་ལ་གོས་སྩལ་བར་བགྱི། ཕྱི་མ་ལའོ། །བཙུན་པ་ནད་གཡོག་མཚམས་ཀྱི་སླད་རོལ་དུ་མཆིས་པ་ལས་ནད་པ་དུས་བགྱིས་ན་ནད་གཡོག་དེ་ལ་གོས་སྩལ་བར་བགྱིའམ། དེ་སྟེ་ནད་པའི་དོན་ཅིག་ལ་སོང་བར་

གྱུར་ན་དེ་ལ་ནད་གཡོག་ལ་གོས་སྦྱིན་པར་བྱའོ། །འོན་ཏེ་གཞན་གྱི་དོན་ཅིག་ལ་སོང་ན་ནི་མི་སྦྱིན་ནོ། །བཙུན་པ་ནད་གཡོག་གནས་གཞན་དུ་དབྱར་ཚུལ་དུ་ཞུགས་པར་གྱུར་ན། དེ་ལ་ནད་གཡོག་ལ་གོས་སྩལ་བར་བགྱིའམ། མི་སྩལ་བར་བགྱི། སྦྱིན་པར་བྱའོ། །བཙུན་

པ་དགེ་ཚུལ་ཕས་ནད་གཡོག་བགྱིས་ན། དེ་ལ་ནད་གཡོག་ལ་གོས་སྩལ་བར་བགྱིའམ། ཨུ་པཱ་ལི་སྦྱིན་པར་བྱའོ། །བཙུན་པ་དགེ་སློང་མས་ནད་གཡོག་བགྱིས་པ་ལས་ནད་པ་དུས་བགྱིས་ན་དེ་ལ་ནད་གཡོག་ལ་གོས་སྩལ་བར་བགྱིའམ། མི་སྦྱིན་ནོ། །དགེ་སློབ་མ་དང་། དགེ་

ཚུལ་མ་རྣམས་ཀྱང་དེ་བཞིན་ནོ། །བཙུན་པ་འགྲོན་པ་མང་པོ་བཅོམ་པའི་གོས་རྙེད་ན་བླང་བར་བགྱིའམ། མི་བླང་བར་བགྱི། ཨུ་པཱ་ལི་དེ་སྟེ་ཚོང་པས་བྱིན་ན་བླང་བར་བྱའོ། །འོན་ཏེ་རྐུན་པོས་བྱིན་ན་དེའི་ཚེ་མི་བླང་ངོ་། །བཙུན་པ་བཅོམ་ལྡན་འདས་ཀྱིས་དགེ་སློང་གིས་དབྱར་གྱི་

ནང་ལོགས་སུ་དབྱར་གྱི་རྙེད་པ་མ་འགོད་ཅིག་ཅེས་གསུངས་ན། བཙུན་པ་ཁྱིམ་བདག་ཅིག་གིས་གནས་མང་ཞིག་ནས་དགེ་སློང་དག་མགྲོན་དུ་བོས་ཏེ་གནས་གཅིག་ཏུ་འཚལ་མ་འཚལ་ནས་དགེ་འདུན་དེ་དག་ལ་མངོན་སུམ་དུ་གོས་ཕུལ་ན་དགེ་སློང་དེ་དག་གིས་གོས་བགོ་བར་བགྱིའམ། ཨུ་

པཱ་ལི་གོས་དེ་དག་ནི་རྐྱེན་འབྱུང་བའི་གོས་པས་བགོ་བར་བྱའོ། །བཙུན་པ་དབྱར་གྱི་ནང་ལོགས་སུ་དགེ་སློང་ཞིག་དུས་བགྱིས་ན་དགེ་སློང་དེ་དག་གིས་གོས་དེ་དག་བགོ་བར་བགྱིའམ། ཤི་བའི་གོས་པས་ན་བགོ་བར་བྱའོ།། །།མདོར་ན། གྲོང་གཉིས་སྤུ་ཅན་ཕྱི་རོལ་མཚམས། །

Vol. 12 · folio 260b

དེ་བཞིན་དུ་ཡང་མཆོད་རྟེན་ནོ། །མཚམས་ལས་བསྔོས་པར་བྱས་པ་དང་། །ཆད་པ་ཐ་མར་གྱུར་པའོ། །བཙུན་པ་གྲོང་གི་ནང་ན་གཙུག་ལག་ཁང་ཞིག་མཆིས་ལ་དེར་དབྱར་ཚུལ་དུ་ཞུགས་པའི་དགེ་འདུན་རྣམས་དོན་ཅིག་གི་སླད་དུ་མཚམས་ཀྱི་སླད་རོལ་དུ་མཆིས་པར་གྱུར་པ་དང་། དེའི་

མཐའ་ན་འཁོད་པའི་དགེ་སློང་དག་གྲོང་ཁྱེར་གྱི་མཚམས་ཀྱི་ནང་ན་མཆིས་པ་ལས་དེར་མི་དག་གིས་དགེ་འདུན་ལ་དབྱར་གྱི་རྙེད་པ་ཞིག་ཕུལ་ན་གང་གིས་འཐོབ། གྲོང་ཁྱེར་གྱི་དགེ་འདུན་གྱིས་སོ། །བཙུན་པ་གྲོང་ཁྱེར་དུ་དགེ་འདུན་ཚུལ་དུ་ཞུགས་ནས་དབྱར་གྱི་ནང་ལོགས་སུ་བྱེ་ན་དབྱར་གྱི་རྙེད་པ་གང་

གིས་འཐོབ། ཨུ་པཱ་ལི་ཆོས་ལ་ཕྱོགས་པས་སོ། །བཙུན་པ་དགེ་སློང་གིས་སྤུ་ཅན་ལས་ཆོས་གོས་གསུམ་དུ་བྱིན་གྱིས་བརླབས་ན་བྱིན་གྱིས་བརླབས་པ་ཞེས་བགྱིའམ། གོས་གཞན་ཡོད་ན་ནི་བྱིན་གྱིས་མ་བརླབ་ཤིག །བྱིན་གྱིས་བརླབས་ན་ནི་འདས་པ་དང་བཅས་པར་འགྱུར་རོ། །བཙུན་

པ་དགེ་སློང་གིས་མཚམས་ཀྱི་སླད་རོལ་དུ་མཆིས་ནས་དགེ་འདུན་གྱི་རྙེད་པ་བདག་ཉིད་ཀྱིས་བདག་གིར་བགྱིས་ན་ཅིར་འགྱུར། ཉེས་བྱས་སོ། །བཙུན་པ་དབྱར་ཚུལ་དུ་ཞུགས་པའི་དགེ་འདུན་དབྱར་གྱི་ནང་ལོགས་སུ་མཆོད་རྟེན་གྱི་རྙེད་པ་བགོས་ཀྱང་ནོངས་པར་མི་འགྱུར་ཞིང་རུང་བར་འགྱུར་བ་

མཆིས་སམ། ཨུ་པཱ་ལི་ཡོད་དེ། ཉན་ཐོས་ཀྱི་མཆོད་རྟེན་ལ་བསྔོས་པར་གྱུར་པ་ནི་ཤི་བའི་ཡོ་བྱད་པས་ན་བགོ་བར་བྱའོ། །བཙུན་པ་བཅོམ་ལྡན་འདས་ཀྱིས་གུམ་པའི་ཡོ་བྱད་མཚམས་ཀྱི་ནང་ན་འཁོད་པས་བགོ་བར་གྱིས་ཤིག་ཅེས་གསུངས་ན། བཙུན་པ་དགེ་སློང་གིས་གུམ་

པའི་ཡོ་བྱད་བྱིན་གྱིས་བརླབས་ཏེ་མཚམས་ཀྱི་སླད་རོལ་དུ་མཆིས་ན་གུམ་པའི་ཡོ་བྱད་ཀྱི་སྐལ་བ་སྩལ་ཏམ། ཨུ་པཱ་ལི་སྦྱིན་ནོ། །དེ་སྟེ་བྱིན་གྱིས་མ་བརླབས་པར་མཆིས་ན་སྩལ་ཏམ། ཨུ་པཱ་ལི་མ་ཡིན་ནོ། །བཙུན་པ་གུམ་པའི་ཡོ་བྱད་དང་གོས་བྱིན་གྱིས་མ་བརླབས་པར་དགེ་

སློང་གཞན་དག་ཅིག་མཆིས་ན་དེ་དག་ལ་གུམ་པའི་ཡོ་བྱད་ཀྱི་སྐལ་བ་སྩལ་བར་བགྱི་འམ། ཨུ་པཱ་ལི་སྦྱིན་པར་བྱའོ། །བཙུན་པ་དེ་སྟེ་བྱིན་གྱིས་བརླབས་ནས་མཆིས་ན་སྩལ་བར་བགྱིའམ། ཨུ་པཱ་ལི་མ་ཡིན་ནོ། །བཙུན་པ་བཅོམ་ལྡན་འདས་ཀྱིས་གུམ་པའི་ཡོ་བྱད་རྣམས་གསོལ་

Vol. 12 · folio 261a

བ་དང་ལས་ཀྱིས་བྱིན་གྱིས་རློབས་ཤིག་ཅེས་གསུངས་ན། བཙུན་པ་གནས་གང་ན་དགེ་སློང་གཅིག་པུ་མཆིས་ན་དེས་ཇི་ལྟར་བྱིན་གྱིས་བརླབ་པར་བགྱི། ཨུ་པཱ་ལི་དགེ་སློང་དེས་སེམས་བསྐྱེད་ནས་ཚིག་ཏུ་སྨྲ་བར་བྱ་སྟེ། བགོ་བ་ལས་རྫས་འདི་ནི་བདག་གིས་འཐོབ་པས་ན་

བདག་གིས་ཆོས་གོས་འདི་བསྡུ་བར་བགྱིའོ། །བདག་གིར་བྱའོ། །འདི་ནི་བྱིན་གྱིས་བརླབ་པར་བྱའོ་ཞེས་བྱིན་གྱིས་བརླབ་པར་བྱའོ། །གནས་གང་ན་དགེ་སློང་གཉིས་སམ་གསུམ་ཡང་རུང་གནས་ན་དེ་དག་ཀྱང་གཅིག་ལ་གཅིག་སྨྲ་བར་བྱའོ། །བཙུན་པ་གོས་མ་དྲས་པ་ལ་བྱིན་གྱིས་

བརླབ་ཏུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་དེ་དང་འདྲ་བའི་རྐྱེན་ཅིག་བྱུང་ན་རུང་ངམ། ཨུ་པཱ་ལི་རུང་ངོ་། །གོས་ཀྱི་དངོས་པོ་རྫོགས་སོ།། །།མདོར་ན། རྙིང་པ་གཉིས་དང་བཞག་པ་དང་། །སར་པ་གཏན་པ་ཞིགས་པ་དང་། །ཟིན་པ་དང་ནི་མ་ཟིན་པ། །དུས་སུ་

རྙེད་དང་མ་བགོས་གཉིས། །མི་རུང་མཚམས་ཀྱི་ཕྱི་རོལ་དང་། །མ་བསྐོས་གང་ཟག་དེ་བཞིན་བཅུ། །བཙུན་པ་གོས་རྙིང་པ་གཏན་པར་བཏིང་ན་བཏིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །གོས་རྙིང་པ་གང་ཞེ་ན། གང་

གིས་སྔར་དགེ་འདུན་གྱིས་གཏན་པ་བཏིང་བར་གྱུར་པའོ། །གོས་རྙིང་པ་བཅངས་པ་གཏན་པར་བཏིང་ན་བཏིང་བ་ཞེས་བགྱི་འམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །གོས་རྙིང་པ་བཅངས་པ་གང་ཞེ་ན། གང་དགེ་སློང་གིས་སྤྱད་པའོ། །

བཙུན་པ་ཉེ་བར་བཞག་པའི་གོས་གཏན་པར་བཏིང་ན་བཏིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །ཉེ་བར་བཞག་པའི་གོས་གང་ཞེ་ན། སྤངས་པའོ། །བཙུན་པ་གོས་སར་པ་གཏན་པར་བཏིང་ན་བཏིང་བ་ཞེས་

བགྱིའམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པར་མི་འགྱུར་རོ། །གོས་སར་པ་གང་ཞེ་ན། དགེ་འདུན་གྱིས་ཐོག་མར་གཏན་པར་བཏིང་བའོ། །བཙུན་པ་གཏན་པའི་གོས་གཏན་པར་བཏིང་ན་བཏིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་བྱ་སྟེ།

Vol. 12 · folio 261b

དགེ་འདུན་ནི་འདས་པ་དང་བཅས་པའོ། །གཏན་པའི་གོས་གང་ཞེ་ན། གོས་གང་དབྱར་ཐ་མའི་ཟླ་བ་ལ་རྙེད་པའོ། །བཙུན་པ་གོས་ཞིགས་པ་ཞིག་གཏན་པར་བཏིང་ན་བཏིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །གོས་

ཞིགས་པ་གང་ཞེ་ན། གོས་རུལ་པའོ། །བཙུན་པ་གོས་མ་ལགས་པ་ཞིག་གཏན་པར་བཏིང་ན་བཏིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །བཙུན་པ་གོས་ལགས་པ་གཏན་པར་བཏིང་ན་བཏིང་བ་ཞེས་བགྱིའམ།

ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ཡང་འདས་པ་དང་བཅས་པར་མི་འགྱུར་རོ། །བཙུན་པ་བཅོམ་ལྡན་འདས་གང་དུས་སུ་རྙེད་པའི་གོས་གཏན་པར་ཐིང་ཤིག་ཅེས་གསུངས་ན། དུས་སུ་རྙེད་པའི་གོས་གཏན་པར་བཏིང་ན་བཏིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་

བྱའོ། །དུས་ཀྱི་གོས་གང་ཞེ་ན། གོས་གང་ཟླ་བ་གསུམ་འདས་ནས་དེ་ཉིད་ཀྱི་ཉ་བྲི་ཞག་གཅིག་ལ་རྙེད་པའོ། །བཙུན་པ་བཅོམ་ལྡན་འདས་ཀྱིས་མ་གྱོན་པའི་གོས་གཏན་པར་བཏིང་ན་བཏིང་བ་ཞེས་བྱའོ་ཞེས་གསུངས་ན། མ་གྱོན་པའི་གོས་གང་ལགས། སར་པ་བཏགས་མ་ཐག་

པའོ། །བཙུན་པ་བཅོམ་ལྡན་འདས་ཀྱིས་མ་གྱོན་པའི་གོས་རུང་བ་གཏན་པར་ཐིང་ཤིག་ཅེས་གསུངས་ན། བཏིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་བྱའོ། །གོས་མ་གྱོན་པ་རུང་བ་གང་ཞེ་ན། ཁ་དོག་ཅན་ནོ། །བཙུན་པ་མི་རུང་བའི་གོས་ཤིག་གཏན་པར་བཏིང་ན་

བཏིང་བ་ཞེས་བགྱི་འམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །མི་རུང་བའི་གོས་གང་ཞེ་ན། རང་གི་རྒྱུད་ཀྱིས་མི་རུང་བའོ། །བཙུན་པ་གོས་སམ་གཏན་པར་བཏིང་བར་མ་བགོས་པས་གཏན་པ་བཏིང་ན་བཏིང་བ་ཞེས་བགྱིའམ། ཨུ་པཱ་

ལི་བཏིང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །བཙུན་པ་མཚམས་ཀྱི་སླད་རོལ་དུ་བསྐོས་པའི་ཆོས་གོས་གཏན་པར་འདིང་ན་བཏིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །བཙུན་པ་གཏན་པ་འདིང་བ་ཆད་

Vol. 12 · folio 262a

པས་བཅད་པས་གཏན་པ་བཏིང་ན་བཏིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །བཙུན་པ་དེ་བཞིན་དུ་གཏན་པ་འདིང་བ་ཆད་པ་ཁོར་བ་དང་། ཡིད་མགུ་བར་སྤྱོད་པ་དང་། ཡིད་མགུ་བར་སྤྱད་པ་ལགས་པ་དང་།

བསླབ་པ་སྩལ་བ་དང་། དབྱར་མ་མཆིས་པ་དང་། ཞིག་པ་དང་། དབྱར་ཕྱི་མར་ཚུལ་དུ་ཞུགས་པ་དང་། དབྱར་གཞན་དུ་གནས་པ་དང་། སྨྱོན་པ་རྣམས་ཀྱིས་གཏན་པ་བཏིང་ན་བཏིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ།། །།

མདོར་ན། ལྔ་པ་གཉིས་དང་སེམས་གཉིས་དང་། །ཤོལ་བོར་གཉིས་དང་དེ་བཞིན་ཏེ། །བུད་མེད་མཚན་དང་གཏན་པ་དང་། །གནས་ལ་རྣམ་པ་དྲུག་ཏུ་བྱ། །བཙུན་པ་བཅོམ་ལྡན་འདས་ཀྱིས་གང་ཟག་ལྔ་གཏན་པ་འདིང་བར་མི་བསྐོ་སྟེ། དེ་ནི་ཆད་པ་བགྱིད་པ་དང་། ཆད་པ་ཁོར་

བ་དང་། ཡིད་མགུ་བར་སྤྱོད་པ་དང་། ཡིད་མགུ་བར་སྤྱད་པ་ལགས་པ་དང་། བསླབ་པ་སྩལ་བ་རྣམས་སོ་ཞེས་གསུངས་ན། བཙུན་པ་ཆད་པ་བགྱིད་པའི་གང་ཟག་ཅིག་གིས་གཏན་པ་བཏིང་ན་བཏིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ནི་འདས་པ་

དང་བཅས་པའོ། །བཙུན་པ་དེ་བཞིན་དུ་ཆད་པ་ཁོར་བ་དང་། ཡིད་མགུ་བར་སྤྱོད་པ་དང་། ཡིད་མགུ་བར་སྤྱད་པ་ལགས་པ་དང་། བསླབ་པ་སྩལ་བ་རྣམས་ཀྱིས་གཏན་པ་བཏིང་ན་གཏན་པ་བཏིང་བ་ཞེས་བགྱི་འམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ནི་འདས་

པ་དང་བཅས་པའོ། །གཞན་ཡང་གང་ཟག་ལྔ་གཏན་པ་གདིང་བར་མི་བསྐོ་སྟེ། དབྱར་མེད་པ་དང་། དབྱར་ཞིག་པ་དང་། དབྱར་ཕྱི་མར་ཚུལ་དུ་ཞུགས་པ་དང་། དབྱར་གཞན་དུ་གནས་པ་དང་། སྤངས་པ་རྣམས་སོ། །བཙུན་པ་བཅོམ་ལྡན་འདས་ཀྱིས་གཞན་ཡང་

གང་ཟག་ལྔ་སྟེ། དབྱར་མེད་པ་དང་། དབྱར་ཞིག་པ་དང་། དབྱར་ཕྱི་མར་ཚུལ་དུ་ཞུགས་པ་དང་། དབྱར་གཞན་དུ་གནས་པ་དང་། སྤངས་པ་རྣམས་ཀྱིས་གཏན་པ་བཏིང་ན་བཏིང་བར་བྱའོ་ཞེས་གསུངས་ན། བཙུན་པ་དེ་སྟེ་དབྱར་མ་མཆིས་པས་གཏན་པ་བཏིང་ན་གཏན་པ་

Vol. 12 · folio 262b

བཏིང་བ་ཞེས་བགྱིའམ། ཨུ་པཱ་ལི་ཁ་ཅིག་ནི་བཏིང་བ་ཞེས་བྱའོ། །ཁ་ཅིག་ནི་མ་བཏིང་བ་ཞེས་བྱའོ། །བཙུན་པ་གང་གིས་བཏིང་བ་ལགས། གང་གིས་མ་བཏིང་བ་ལགས། ཨུ་པཱ་ལི་འདི་ལྟར་དགེ་ཚུལ་པ་དབྱར་ཚུལ་དུ་ཞུགས་པ་ལ་དབྱར་ཕྱི་མའི་གནས་སུ་བསྙེན་པར་རྫོགས་

ཏེ་ཟླ་བ་གསུམ་འདས་པས་གཏན་པ་བཏིང་ན་དེ་ལ་གཏན་པ་བཏིང་བ་ཞེས་བྱའོ། །དེ་ཅིའི་ཕྱིར་ཞེ་ན། ཨུ་པཱ་ལི་ཟླ་བ་གསུམ་འདས་ནས་གཏན་པ་ཞེས་བྱ་སྟེ་དེ་ཡང་ཟླ་བ་གསུམ་དུ་མངོན་ནོ། །ཨུ་པཱ་ལི་གང་ཕྱི་མར་ཞུགས་པ་ལས་རབ་ཏུ་བྱུང་སྟེ་བསྙེན་པར་རྫོགས་ལ་དེ་ཡང་ཟླ་བ་གསུམ་

དུ་གནས་པའི་དགེ་སློང་དང་ལྷན་ཅིག་གཏན་པ་བཏིང་ན་དེ་ནི་གཏན་པ་མ་བཏིང་བ་ཞེས་བྱའོ། །ཨུ་པཱ་ལི་ཟླ་བ་གསུམ་ལོན་ནས་གཏན་པ་བཏིང་བ་ཞེས་བྱ་སྟེ། དེ་ཟླ་བ་གསུམ་མ་ལོན་པར་མངོན་ནོ། །བཙུན་པ་དབྱར་ཞིག་པ་ཞིག་གིས་གཏན་པ་བཏིང་ན་གཏན་པ་བཏིང་བ་ཞེས་བགྱིའམ།

ཨུ་པཱ་ལི་ཁ་ཅིག་ནི་བཏིང་བ་ཞེས་བྱའོ། །ཁ་ཅིག་ནི་མ་བཏིང་བ་ཞེས་བྱའོ། །བཙུན་པ་གང་གིས་བཏིང་བ་ཞེས་བགྱི། གང་གིས་མ་བཏིང་བ་ཞེས་བགྱི། ཨུ་པཱ་ལི་གང་གི་དབྱར་སྔ་མར་ཡང་ཤེས་པ་མེད་ལ་དབྱར་ཕྱི་མའི་ཚུལ་ཀྱང་མེད་པ་སྟེ། དེ་ཟླ་བ་གསུམ་དུ་དགེ་སློང་དང་ལྷན་

ཅིག་གནས་པ་དང་ཅིག་ཆར་གཏན་པ་བཏིང་ན་དེའི་གཏན་པ་མ་བཏིང་བ་ཞེས་བྱའོ། །ཨུ་པཱ་ལི་ཟླ་བ་གསུམ་གནས་ནས་གཏན་པ་ཞེས་བྱ་སྟེ། དེ་ལ་ནི་ཟླ་བ་གསུམ་དུ་ཤེས་པའང་མེད་དོ། །ཨུ་པཱ་ལི་གང་དབྱར་སྔ་མར་གནས་པའམ། ཕྱི་མའང་ཤེས་ལ་དེས་ཞག་བདུན་ནམ།

བཞི་བཅུར་བྱིན་གྱིས་བརླབ་པར་མཚམས་ཀྱི་ཕྱི་རོལ་དུ་སོང་ནས་སྐྱ་རེངས་ཤར་བ་དེ་ཡང་ཟླ་བ་གསུམ་དུ་གནས་པས་གཏན་པ་བཏིང་ན་དེའི་གཏན་པ་བཏིང་བ་ཞེས་བྱའོ། །ཨུ་པཱ་ལི་ཟླ་བ་གསུམ་དུ་གནས་ནས་གཏན་པ་ཞེས་བྱ་སྟེ། དེ་ལ་ཡང་ཟླ་བ་གསུམ་དུ་མངོན་ནོ། །ཡི་དམ་

ལས་འགལ་བས་ཉེས་བྱས་སུ་འགྱུར་རོ། །བཙུན་པ་དབྱར་ཕྱི་མར་ཚུལ་དུ་ཞུགས་པ་ཞིག་གཏན་པ་བཏིང་ན་བཏིང་བ་ཞེས་བགྱིའམ། ཨུ་པཱ་ལི་ཁ་ཅིག་ནི་གཏན་པ་བཏིང་བ་ཞེས་བྱའོ། །ཁ་ཅིག་ནི་མ་བཏིང་བ་ཞེས་བྱའོ། །བཙུན་པ་གང་གི་གཏན་པ་བཏིང་བ་ཞེས་བགྱི། ཨུ་པཱ་ལི་གང་

Vol. 12 · folio 263a

དབྱར་སྔ་མར་ཚུལ་དུ་ཞུགས་པའི་དགེ་སློང་གི་དགེ་འདུན་གཏན་པ་འདིང་བའི་དགེ་སློང་དང་། དབྱར་ཕྱི་མར་ཚུལ་དུ་ཞུགས་པ་དེ་དག་ལྷན་ཅིག་ཏུ་གཏན་པ་འདིང་ན་དེའི་གཏན་པ་བཏིང་བ་ཞེས་བྱའོ། །ཨུ་པཱ་ལི་ཟླ་བ་གསུམ་དུ་གནས་ནས་གཏན་པ་ཞེས་བྱ་སྟེ། དེ་ནི་ཟླ་བ་

གསུམ་དུ་ཤེས་པའང་མེད་དོ། །ཨུ་པཱ་ལི་དགེ་འདུན་ཐམས་ཅད་དབྱར་ཕྱི་མར་ཚུལ་དུ་ཞུགས་ལ་ཟླ་བ་གསུམ་དུ་གནས་ནས་གཏན་པ་འདིང་ན་དེ་དག་གི་གཏན་པ་བཏིང་བ་ཞེས་བྱའོ། །ཨུ་པཱ་ལི་ཟླ་བ་གསུམ་དུ་གནས་ནས་གཏན་པ་ཞེས་བྱ་སྟེ། དེ་དག་ནི་ཟླ་བ་གསུམ་དུ་མངོན་ནོ། །

བཙུན་པ་དབྱར་གཞན་དུ་གནས་པ་ཞིག་གིས་གཏན་པ་བཏིང་ན་གཏན་པ་བཏིང་བ་ཞེས་བགྱིའམ། ཨུ་པཱ་ལི་ཁ་ཅིག་ནི་གཏན་པ་བཏིང་བ་ཞེས་བྱའོ། །ཁ་ཅིག་ནི་མ་བཏིང་བ་ཞེས་བྱའོ། །བཙུན་པ་གང་གི་གཏན་པ་བཏིང་བ་ཞེས་བགྱི། གང་གི་གཏན་པ་མ་བཏིང་བ་ཞེས་བགྱི།

ཨུ་པཱ་ལི་དགེ་སློང་དག་མཚམས་སོ་སོར་བཅད་པའི་གནས་ན་དབྱར་གཞན་དུ་གནས་ལ་གཞན་དུ་སོང་སྟེ་གཏན་པ་བཏིང་ན་དེའི་གཏན་པ་མ་བཏིང་བ་ཞེས་བྱའོ། །ཨུ་པཱ་ལི་གཏན་པ་གང་ཞེ་ན། ཟླ་བ་གསུམ་གནས་ནས་གཏན་པ་བཏིང་བ་དེ་ལ་ནི་ཟླ་བ་གསུམ་དུ་ཤེས་པ་ཡང་མེད་དོ། །ཨུ་

པཱ་ལི་གང་ཟླ་བ་གསུམ་དུ་གནས་པའི་དགེ་སློང་གི་དགེ་འདུན་རྣམས་དབྱར་ཟླ་བ་གསུམ་འདས་པ་དང་། དེ་ཉིད་ཀྱི་ཉ་བྲི་ཞག་གཅིག་ལ་མཚམས་ཆེན་པོ་བཀྲོལ་ཏེ་གནས་བཞིའམ་ལྔའི་མཚམས་གཅིག་ཏུ་བྱས་ནས་གཏན་པ་བཏིང་ན་གནས་དེ་དག་ཐམས་ཅད་དུ་གཏན་པ་བཏིང་བ་ཞེས་བྱའོ། །

དེ་བཞིན་དུ་གནས་ལ་གནས་གཞན་དུ་གཏན་པ་བཏིང་བ་ཞེས་བྱའོ། །བཙུན་པ་སྤངས་པས་གཏན་པ་བཏིང་ན་གཏན་པ་བཏིང་བ་ཞེས་བགྱིའམ། ཨུ་པཱ་ལི་ཁ་ཅིག་ནི་བཏིང་བ་ཞེས་བྱའོ། །ཁ་ཅིག་ནི་མ་བཏིང་བ་ཞེས་བྱའོ། །བཙུན་པ་གང་གིས་གཏན་པ་མ་བཏིང་བ་ཞེས་བགྱི། ཨུ་པཱ་

ལི་དབྱར་ཚུལ་དུ་ཞུགས་པའི་དགེ་སློང་གང་ལ་དགེ་འདུན་འདུས་པ་རྣམས་ཀྱིས་སྤང་བའི་ལས་བྱས་པ་དེ་དག་ཀྱང་བཟོད་པ་མ་གསོལ་བར་དབྱར་གནས་པ་དག་ཀྱང་ལྷན་ཅིག་གཏན་པ་བཏིང་ན་དེའི་གཏན་པ་ནི་མ་བཏིང་བ་ཞེས་བྱའོ། །གང་གི་བཏིང་བ་ཞེས་བགྱི། ཨུ་པཱ་ལི་དགེ་སློང་གང་

Vol. 12 · folio 263b

དབྱར་ཚུལ་དུ་ཞུགས་པ་ལ་དགེ་འདུན་འདུས་པ་རྣམས་ཀྱིས་མཉམ་དུ་མི་སྤྱོད་པའི་སྡོམ་པ་བཅས་པར་གྱུར་ཏམ། བཀར་བའི་ལས་བྱས་པར་གྱུར་ལ། དེས་ཀྱང་བཟོད་པ་གསོལ་ན་དབྱར་གནས་པའི་དགེ་འདུན་རྣམས་དང་ལྷན་ཅིག་ཏུ་གཏན་པ་བཏིང་ན་དེའི་གཏན་པ་བཏིང་བ་ཞེས་བྱའོ། །

བཙུན་པ་བཅོམ་ལྡན་འདས་ཀྱིས་དགེ་སློང་གཏན་པ་འདིང་བས་གཏན་པ་བླངས་ནས་བཀྲུ་བ་དང་། བརྐྱང་བ་དང་། དྲ་བ་དང་། བཙེམ་པ་ཐམས་ཅད་དང་ཁབ་སོ་ཐ་མའི་བར་དུ་ཐོག་མར་འགྲོ་བར་བྱོས་ལ་བདག་གིས་ཆོས་གོས་འདིས་དགེ་འདུན་གྱི་གཏན་པ་གདིང་བར་བྱ་བ་གདིང་ངོ་། །

བདག་གིས་བཏིང་ངོ་ཞེས་སེམས་རྣམ་པ་གསུམ་སྐྱེད་ཅིག །སེམས་རྣམ་པ་གསུམ་བསྐྱེད་ཀྱང་ཆོས་གོས་འདིས་དགེ་འདུན་གྱི་གཏན་པ་གདིང་བར་བྱ། བདག་གིས་བཏིང་ངོ་ཞེས་སེམས་རྣམ་པ་གཉིས་བསྐྱེད་ན་གཏན་པ་བཏིང་བ་ཞེས་བྱའོ། །བཙུན་པ་སེམས་བསྐྱེད་པ་གཅིག་གིས་

གཏན་པ་གདིང་དུ་རུང་ངམ། ཨུ་པཱ་ལི་རུང་སྟེ། འདི་ལྟར་ཡང་གཏན་པ་གདིང་བའི་དགེ་སློང་གིས་གཏན་པ་གདིང་བར་བདག་མིང་འདི་ཞེས་བགྱི་བས་གོས་འདིས་དགེ་འདུན་གྱི་གཏན་པ་གདིང་ངོ་ཞེས་སེམས་བསྐྱེད་ན་གཏན་པ་གདིང་བ་ཞེས་བྱའོ། །བཙུན་པ་ཚུལ་ནས་འབྱུང་

བའི་ཚེ་རྒྱལ་པོས་ཤོལ་བོར་ན་དགེ་སློང་དེ་དག་གིས་གཏན་པ་ཇི་ལྟར་གདིང་བར་བགྱི། ཇི་ལྟར་ཚུལ་ནས་བྱུང་བ་བཞིན་ནོ། །བཙུན་པ་གཏན་པ་དེ་ཉིད་རུང་ལ་དེ་ཉིད་མི་རུང་བར་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་ཡང་དགེ་སློང་དེ་དག་ཁ་ཅིག་ནི་ཤོལ་བོར། ཁ་

ཅིག་ནི་ཤོལ་མ་བོར་བར་ཚུལ་དུ་ཞུགས་ཏེ་དེ་ཉིད་དུ་ཁྱིམ་བདག་གིས་ཤོལ་མ་བོར་བའི་གནས་སུ་ཚུལ་ནས་འབྱུང་བ་དེ་ཉིད་ཀྱི་ཉ་བྲི་ཞག་གཅིག་ལ་དགེ་འདུན་གཉི་ག་ཟན་བྱིན་ཏེ་གཏན་པའི་གོས་ཕུལ་ན་གོས་དེ་ཤོལ་མ་བོར་བ་ལ་ནི་རུང་ངོ་། །ཤོལ་བོར་བ་ལ་ནི་མི་རུང་ངོ་། །བཙུན་པ་གང་

མ་ལྟ་བུའི་ཚིག་བརྒྱད་པོ་འདི་དག་གིས་ནི་གཏན་པ་ལས་འབྱུང་བར་འགྱུར་རོ། །དེ་ལ་ཐུན་མོང་བ་ནི་དུ། ཐུན་མོང་མ་ལགས་པ་ནི་དུ། ཨུ་པཱ་ལི་ཐོག་མ་དང་ཐ་མ་མ་གཏོགས་པར་ལྷག་མ་རྣམས་ནི་ཐུན་མོང་བའོ། །བཙུན་པ་གཏན་པ་འདིང་བའི་དགེ་སློང་གིས་གཏན་པ་འདིང་བའི་

Vol. 12 · folio 264a

ཚེ་མཚན་གྱུར་ན་གཏན་པ་འདིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་བྱ་སྟེ། གཏན་པ་སྦེད་པའི་དགེ་སློང་དད་པར་བྱོས་ཤིག །བཙུན་པ་གཏན་པ་ཞེས་ཀྱང་བགྱི། གཏན་པ་འདིང་བ་ཞེས་ཀྱང་བགྱི། གཏན་པ་འབྱིན་པ་ཞེས་ཀྱང་བགྱི་ན། བཙུན་པ་གཏན་

པ་ནི་གང་། གཏན་པ་འདིང་བ་ནི་གང་། གཏན་པ་འབྱིན་པ་ནི་གང་ལགས། ཨུ་པཱ་ལི་གོས་ནི་གཏན་པའོ། །སེམས་བསྐྱེད་པ་ནི་གཏན་པ་འདིང་བའོ། །མ་ལྟ་བུའི་ཚིག་བརྒྱད་པོ་ནི་གཏན་པ་འབྱིན་པའོ། །བཙུན་པ་དགེ་སློང་རྣམས་ཀྱིས་གནས་བཞིའམ་ལྔ་མཚམས་

ཀྱི་ནང་དུ་བགྱིས་ནས་དབྱར་ཚུལ་དུ་ཞུགས་ཏེ་དེ་དག་ཚུལ་ནས་བྱུང་སྟེ། གཏན་པ་བཏིང་ན་གནས་དེ་དག་ཐམས་ཅད་དུ་གཏན་པ་བཏིང་བ་ཞེས་བགྱིའམ། ཨུ་པཱ་ལི་ཐམས་ཅད་དུ་གཏན་པ་བཏིང་བ་ཞེས་བྱའོ། །བཙུན་པ་དེ་སྟེ་གཏན་པ་བཏིང་ནས་མཚམས་ཆེན་པོ་བཀྲོལ་ཏེ་སོ་

སོར་མཚམས་བཀུམ་ན་གཏན་པ་ཕྱུང་བ་ཞེས་བགྱིའམ། ཨུ་པཱ་ལི་མ་ཡིན་ནོ། །གནས་དེ་དག་ཐམས་ཅད་དུ་གཏན་པ་བཏིང་བ་ཞེས་བགྱིའམ། ཨུ་པཱ་ལི་གཏན་པ་བཏིང་བ་ཞེས་བྱའོ། །དེ་སྟེ་སོ་སོར་མཚམས་བཅད་ནས་གཏན་པ་ཕྱུང་ན་གནས་དེ་དག་ཐམས་ཅད་དུ་གཏན་

པ་ཕྱུང་བ་ཞེས་བགྱིའམ། ཨུ་པཱ་ལི་མ་ཡིན་ཏེ། གང་དག་འབྱིན་པ་དེ་དག་ནི་གཏན་པ་ཕྱུང་བ་ཞེས་བྱའོ། །གང་དག་མི་འབྱིན་པ་དེ་དག་ནི་གཏན་པ་མ་ཕྱུང་བ་ཞེས་བྱའོ། །བཙུན་པ་ཚུལ་ནས་བྱུང་བ་དང་དགེ་སློང་རྣམས་ཀྱིས་གནས་བཞིའམ། ལྔ་མཚམས་གཅིག་ཏུ་བྱས་

ནས་གཏན་པ་བཏིང་ན་གནས་དེ་དག་ཐམས་ཅད་དུ་གཏན་པ་བཏིང་བ་ཞེས་བགྱིའམ། ཨུ་པཱ་ལི་ཐམས་ཅད་དུ་གཏན་པ་བཏིང་བ་ཞེས་བྱའོ། །བཙུན་པ་དེ་སྟེ་གཏན་པ་བཏིང་ནས་མཚམས་ཆེན་པོ་བཀྲོལ་ཏེ་སོ་སོར་མཚམས་བཀུམ་ན་གཏན་པ་མ་བཏིང་བ་ཞེས་བགྱིའམ། ཨུ་པཱ་ལི་

མ་ཡིན་ཏེ། དེ་དག་ཐམས་ཅད་དུ་གཏན་པ་བཏིང་བ་ཞེས་བྱའོ། །བཙུན་པ་དེ་སྟེ་སོ་སོར་མཚམས་བཀུམ་ནས་གཏན་པ་ཕྱུང་ན་གནས་དེ་དག་ཐམས་ཅད་དུ་གཏན་པ་ཕྱུང་བ་ཞེས་བགྱིའམ། ཨུ་པཱ་ལི་མ་ཡིན་ཏེ། གང་འབྱིན་པ་དེ་དག་ནི་གཏན་པ་ཕྱུང་བ་ཞེས་བྱའོ། །གང་མི་འབྱིན་པ་དེ་

Vol. 12 · folio 264b

དག་ནི་གཏན་པ་མ་ཕྱུང་བ་ཞེས་བྱའོ།། །།མདོར་ན། ཟླ་བ་གསུམ་དང་ལྔ་པ་དང་། །གསོ་སྦྱོང་གི་ནི་མཐའ་ལྔ་གསུམ། །སྦྱར་མ་དང་ནི་རས་ཆེན་རྐྱེན། །འབྱིན་པ་གཉིས་དང་འབྱེད་པ་གཉིས། །ཚད་གཉིས་པ་ཡང་དེ་བཞིན་ཏེ། །ཁྱིམ་པ་དག་ལ་སོགས་པ་དག །བསླབ་པ་བྱིན་

པ་ཐ་མའོ། །བཙུན་པ་ཇི་སྲིད་ཅིག་ཏུ་གཏན་པ་གདིང་བར་བགྱི། ཨུ་པཱ་ལི་ཟླ་བ་གསུམ་སྟེ། ཇི་ལྟར་ཟླ་བ་གསུམ་དུ་གནས་པར་ཚུལ་དུ་ཞུགས་པའོ། །བཙུན་པ་ཇི་སྲིད་ཅིག་ཏུ་གཏན་པ་བཅང་བར་བགྱི། ཟླ་བ་ལྔའོ། །བཙུན་པ་གང་དབྱར་ཕྱི་མའི་མཐར་གཏན་པ་བཏིང་བ་ན་དེ་དག་ཀྱང་ཟླ་བ་

ལྔར་གཏན་པ་བཏིང་བར་འགྱུར་རམ། ཨུ་པཱ་ལི་གང་གིས་གཏན་པ་ཇི་ལྟར་བཏིང་བར་འགྱུར་བ་དེ་དག་གི་གྲངས་བཞིན་ཟླ་བ་ལྔར་བཅང་བར་བྱའོ། །བཙུན་པ་གསོ་སྦྱོང་གི་མཐར་གཏན་པ་གདིང་བར་བགྱིའམ། ཨུ་པཱ་ལི་གསོ་སྦྱོང་གི་མཐར་བྱའོ། །བཙུན་པ་གཏན་པ་གསོ་སྦྱོང་གི་

མཐར་དབྱུང་བར་བགྱིའམ། ཨུ་པཱ་ལི་གསོ་སྦྱོང་གི་མཐར་བྱའོ། །བཙུན་པ་དབྱར་མ་རུང་བར་གཞག་པ་ལ་རྒྱུ་དུ། རྐྱེན་དུ། བཅོམ་ལྡན་འདས་ཀྱིས་བཀའ་སྩལ་པ་རྒྱུ་ལྔ་དང་རྐྱེན་ལྔ་སྟེ། ལྔ་པོ་དེ་གང་ཞེ་ན། དགེ་སློང་དང་བཅས་སྒོ་གླེགས་དང་བཅས་པའི་གནས་སུ་

གྱུར་པ་དང་། འཇིགས་པ་དང་བཅས་དོགས་པ་དང་བཅས་པའི་ཡུལ་དང་ཆར་འབབ་པའམ། ཆར་འབབ་པར་དོགས་པར་གྱུར་པ་དང་། དུས་མ་ཡིན་པར་གྲོང་གཞན་དུ་འགྲོ་འདོད་པར་གྱུར་པ་དང་། གནས་ན་གཏན་པ་བཏིང་བར་གྱུར་པ་དང་། གསོལ་བ་དང་ལས་ནི་ཐ་

མའོ། །བཙུན་པ་དབྱར་གྱི་གོས་རས་ཆེན་རུང་བར་གཞག་པ་ལ་རྒྱུ་དུ་རྐྱེན་དུ། ཨུ་པཱ་ལི་གསུམ་སྟེ། ཆར་པ་མི་འབབ་ཅིང་ཆར་པ་འབབ་པར་མི་དོགས་པར་གྱུར་པ་དང་། དུས་མ་ཡིན་པར་གྲོང་གཞན་ནམ་གྲོང་ཁྱེར་གཞན་ནམ། ཀླུང་རྒལ་འདོད་པར་གྱུར་པ་དང་། ཀླུང་

གི་དྲུང་ངམ་ཁྲོན་པའི་དྲུང་ན་མི་གནས་པའོ། །བཙུན་པ་དབྱར་གྱི་གོས་རས་ཆེན་ཇི་སྲིད་དུ་བཅང་བར་བགྱི། ཟླ་བ་ཕྱེད་དང་ལྔའོ། །བཙུན་པ་གཏན་པ་འདིང་བའི་གནས་སུ་རྐྱེན་མེད་པར་འགྱུར་བ་དུ། ཨུ་པཱ་ལི་བཅུ་སྟེ། ཞག་གཅིག་གིས་འབྲལ་བ་མེད་པ་དང་། ཞག་

Vol. 12 · folio 265a

བཅུ་ལས་འདའ་བ་མེད་པ་དང་། ཟླ་བ་གཅིག་ལས་འདའ་བ་མེད་པ་དང་། གོས་མ་བསྡོས་པ་རྣམས་བཅང་བ་དང་། ཆོས་གོས་སྟོད་གཡོགས་དང་མཐང་གོས་གཉིས་པུས་ལྗོངས་སྤྱོད་དུ་འགྲོ་བ་དང་། མང་པོ་ཟ་བ་མེད་པ་དང་། ཡང་ཡང་ཟ་བ་མེད་པ་དང་། སྤྱན་

མ་དྲངས་པར་འགྲོ་བ་དང་། གོས་རྣམས་ཅི་བདེར་ཚོལ་བ་དང་། སྟོན་ཟླ་ཐ་ཆུངས་ནས། དཔྱིད་ཟླ་ར་བའི་བར་དུ་སྟེ། གང་གིས་རྙེད་པ་ཐོབ་པ་དེ་དག་ནི་དབྱར་གནས་པའི་དགེ་འདུན་གྱིས་བགོ་བར་བྱའོ། །བཙུན་པ་ཅི་བསླབ་པའི་གནས་སམ། ཆོས་གོས་བྱིན་གྱིས་བརླབས་པ་དེ་དག་མ་

མཆིས་པར་འགྱུར་རམ། ཨུ་པཱ་ལི་མ་ཡིན་ཏེ། འདི་དག་ནི་ཡོན་ཏན་ནོ། །བཙུན་པ་གསོལ་བ་དང་ལས་མ་བྱས་པས་སྔར་གཏན་པ་དབྱུང་བར་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་ཡང་དགེ་སློང་གཞི་བ་དེ་དག་གིས་དེ་ཉིད་ཀྱི་ཉ་བྲི་ཞག་གཅིག་ལ་གཏན་པ་བཏིང་

བར་གྱུར་པ་དང་། དགེ་སློང་གློ་བུར་བ་མང་ཞིག་ལྷགས་ནས་དེ་དག་ནི་དེའི་ཉིན་མོ་བཅྭ་ལྔར་གྱུར་ཏེ། གསོ་སྦྱོང་བྱེད། སོ་སོར་ཐར་པ་ཀློག་པ་དང་། དེ་སྟེ་དགེ་སློང་གཞི་བ་རྣམས་ཀྱང་དེ་དག་གི་རྗེས་སུ་ཞུགས་ནས་གསོ་སྦྱོང་བྱས་ན་གསོལ་བ་དང་ལས་མ་བྱས་པར་གཏན་པ་ཕྱུང་བ་

ཞེས་བྱའོ། །བཙུན་པ་དགེ་སློང་གཞི་བ་རྣམས་ཀྱིས་གཏན་པ་བཏིང་སྟེ་མཚམས་ཀྱི་སླད་རོལ་དུ་མཆིས་པ་དང་། གློ་བུར་དུ་དགེ་སློང་རྣམས་ལྷགས་ཏེ་གཏན་པ་ཕྱུང་ན་ཕྱུང་བ་ཞེས་བགྱིའམ། ཨུ་པཱ་ལི་མ་ཡིན་ནོ། དེ་ཅིའི་ཕྱིར་ཞེ་ན། ཨུ་པཱ་ལི་གང་གིས་གཏན་པ་བཏིང་བ་དེ་ཉིད་

ཀྱིས་གཏན་པ་ཕྱུང་བ་ཞེས་བྱའོ། །བཙུན་པ་དབྱར་ཚུལ་དུ་ཞུགས་པ་ལས་དགེ་འདུན་བྱེ་ན་གང་གིས་གདིང་། ཆོས་བཞིན་དུ་སྨྲ་བ་རྣམས་ཀྱིས་སོ། །བཙུན་པ་གཏན་པ་བཏིང་བའི་གནས་སུ་དགེ་འདུན་བྱེ་ན་དབྱར་གྱི་རྙེད་པ་སུས་འཐོབ། ཕྱོགས་གཉིས་ཀས་སོ། །བཙུན་པ་དེ་སྟེ་

མངོན་སུམ་དུ་གྱུར་པ་ལས་རྙེད་ན་སུས་འཐོབ། ཆོས་ཀྱི་ཕྱོགས་ཀྱིས་སོ། །བཙུན་པ་ཚད་ལས་ཆུང་བའི་ཆོས་གོས་དུམ་བུར་སྦྱར་ཏེ་གོས་སུ་བཙེམས་ཤིང་། གཏན་པར་བཏིང་ན་གཏན་པ་བཏིང་བ་ཞེས་བགྱིའམ། ཨུ་པཱ་ལི་མ་བཏིང་བ་ཞེས་བྱའོ། །བཙུན་པ་ཚད་ལས་ཆུང་

Vol. 12 · folio 265b

བ་ཞིག་གཏན་པར་བཏིང་ན་གཏན་པ་བཏིང་བ་ཞེས་བགྱིའམ། ཨུ་པཱ་ལི་མ་བཏིང་བ་ཞེས་བྱའོ། །བཙུན་པ་གོས་ཇི་ལྟ་བུས་གཏན་པ་གདིང་བར་བགྱི། ཨུ་པཱ་ལི་མཆུར་ལྔ་ཞེང་དུ་གསུམ་པས་སོ། །བཙུན་པ་གཏན་པ་འདིང་བ་ཁྱིམ་པ་ཞིག་གིས་གཏན་པ་བཏིང་ན་གཏན་པ་བཏིང་

བ་ཞེས་བགྱིའམ། ཨུ་པཱ་ལི་མ་བཏིང་བ་ཞེས་བྱའོ། །དགེ་འདུན་ཡང་འདས་པ་དང་བཅས་པའོ། །དེ་བཞིན་དུ་གཏན་པ་འདིང་བ་མ་ནིང་དང་། མི་གནས་པ་དང་། སོ་སོར་གནས་པ་ནས། སྔར་འཁྲུགས་པའི་བར་དུ་དེ་དག་གིས་གཏན་པ་བཏིང་ན་གཏན་པ་བཏིང་བ་ཞེས་བགྱིའམ། ཨུ་

པཱ་ལི་མ་བཏིང་བ་ཞེས་བྱ་སྟེ། དགེ་འདུན་ཡང་འདས་པ་དང་བཅས་པའོ། །བཙུན་པ་གཏན་པ་འདིང་བ་ཟ་མ་ཞིག་གིས་གཏན་པ་བཏིང་ན་གཏན་པ་བཏིང་བ་ཞེས་བགྱིའམ། ཨུ་པཱ་ལི་མ་བཏིང་བ་ཞེས་བྱ་སྟེ། དགེ་འདུན་ཡང་འདས་པ་དང་བཅས་པའོ། །བཙུན་པ་གཏན་པ་འདིང་བ་

དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ཀྱིས་གཏན་པ་བཏིང་ན་གཏན་པ་བཏིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །བཙུན་པ་གཏན་པ་འདིང་བ་སྨྱོན་པ་ཞིག་གིས་གཏན་པ་

བཏིང་ན་གཏན་པ་བཏིང་བ་ཞེས་བགྱིའམ། ཨུ་པཱ་ལི་མ་བཏིང་བ་ཞེས་བྱའོ། །དེ་སྟེ་དགེ་སློང་གི་འདུ་ཤེས་ཡོད་ལ་བདག་མིང་འདི་ཞེས་བགྱི་བས་དགེ་འདུན་གྱི་གཏན་པ་འདིང་ངོ་། །བདག་གིས་བཏིང་ངོ་ཞེས་སེམས་བསྐྱེད་ན་གཏན་པ་བཏིང་བ་ཞེས་བྱའོ། །དེ་བཞིན་དུ་སེམས་འཁྲུགས་པ་

དང་། ནད་ཀྱིས་གཟིར་བ་རྣམས་སུ་ཤེས་པར་བྱའོ། །བཙུན་པ་གཏན་པ་གདིང་བ་གླེན་པ་དང་། ལྐུགས་པ་དང་། འོན་པ་རྣམས་ཀྱིས་གཏན་པ་བཏིང་ན་གཏན་པ་བཏིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །བཙུན་པ་གཏན་

པ་འདིང་བ་གཞན་དུ་གནས་པས་གཏན་པ་བཏིང་ན་གཏན་པ་བཏིང་བ་ཞེས་བགྱིའམ། ཨུ་པཱ་ལི་བཏིང་བ་ཞེས་བྱ་སྟེ། དགེ་འདུན་ཡང་འདས་པ་དང་བཅས་པའོ། །གཏན་པའི་དངོས་པོ་རྫོགས་སོ།། །།མདོར་ན། གང་དུ་གང་གིས་མཚམས་བཞི་དང་། །བསྒོ་བ་གོས་དང་

Vol. 12 · folio 266a

གསོ་སྦྱོང་བཞི། །གཏན་བཞི་བྱེ་བ་གང་ཟག་གོ། །བཙུན་པ་ཡུལ་ཀཽ་ཤཱམྦཱིར་དགེ་འདུན་གང་གི་ཚེ་བྱེ་བར་གྱུར། ནམ་མཚམས་ཀྱི་ནང་ན་གཅིག་པུ་གནས་པ་ལས་གསོ་སྦྱོང་བྱེད་པ་དང་། དགེ་འདུན་གྱི་བྱ་བ་དང་། དགེ་འདུན་གྱི་དོན་རྣམས་ཐ་དད་པར་བྱས་པ་ནའོ། །

བཙུན་པ་ཡུལ་ཀཽ་ཤཱམྦཱིར་དང་པོར་དགེ་འདུན་གང་གིས་ཕྱེ། ཆོས་མ་ཡིན་པར་སྨྲ་བས་དེ་དག་གིས་ཐོག་མར་མཚམས་ཀྱི་ནང་དུ་གསོ་སྦྱོང་དང་། དགེ་འདུན་གྱི་བྱ་བ་དང་། དགེ་འདུན་གྱི་དོན་རྣམས་ཐ་དད་པར་བྱས་པས་སོ། །བཙུན་པ་ཡུལ་ཀཽ་ཤཱམྦཱི་བས་མཚམས་བཤིག་ན་

མཚམས་ཞིག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དེ་སྟེ་ཡུལ་ཡངས་པ་ཅན་ན་གནས་པས་མཚམས་བཤིག་ན་མཚམས་ཞིག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དགེ་སློང་མའི་དགེ་འདུན་བྱེ་ནས་ཕྱོགས་དང་གཞན་གྱི་ཕྱོགས་སུ་གནས་པ་ལ་

ཟླ་བ་ཕྱེད་ཕྱེད་ཅིང་ལུང་དབོག་པ་དང་བསྟན་པར་བགྱིའམ། འདི་སྐད་དུ་སྲིང་མོ་རྣམས་ཇེ་མཐུན་པར་གྱིས་ཞེས་སྒོ་ཤིག །བཙུན་པ་དགེ་སློང་མའི་དགེ་འདུན་བྱེ་ནས་ཕྱོགས་སུ་གནས་པའི་དགེ་སློང་མ་དག་གིས་ཟླ་བ་ཕྱེད་ཕྱེད་ཅིང་ལུང་དབོག་ཅིང་བསྟན་པ་བཙལ་བར་བགྱིའམ།

བཙལ་བར་བྱའོ། །སུ་ལས་བཙལ། ཆོས་ལ་ཕྱོགས་པ་ལས་སོ། །བཙུན་པ་དགེ་སློང་གི་དགེ་འདུན་བྱེ་ནས་ཕྱོགས་གཉིས་སུ་གནས་པ་དག་གིས་དགེ་སློང་མ་དག་ལ་ལུང་དབོག་ཅིང་བསྟན་པ་སྩལ་བར་བགྱིའམ། དགེ་སློང་མའི་དགེ་འདུན་མི་བྱེ་བའི་ཕྱིར་བྱིན་ཅིག །བཙུན་

པ་ཡུལ་ཀཽ་ཤཱམྦཱིར་ཕྱོགས་གཉིས་ཀ་འདུས་ཤིང་འཁོད་པར་བྱེད་ན་གཟུ་བོས་གང་དུ་དགེ་སློང་མ་ལ་ལུང་དབོག་པར་བགྱི། མཚམས་ཀྱི་ཕྱི་རོལ་དུ་སོང་བའོ། །བཙུན་པ་ཡུལ་ཀཽ་ཤཱམྦཱིར་ཕྱོགས་གཉིས་ཀར་འདུས་ཤིང་འཁོད་པར་གྱུར་ལ། དགེ་སློང་གཟུ་བོ་དག་ཀྱང་མཚམས་ཀྱི་སླད་

རོལ་དུ་མཆིས་པར་གྱུར་པ་དང་། ཁྱིམ་བདག་ཅིག་མཆིས་ནས་དགེ་འདུན་ལ་གོས་ཤིག་ཕུལ་ན་གང་གིས་འཐོབ། ཕྱོགས་གཉིས་ཀས་སོ། །ཡུལ་ཀཽ་ཤཱམྦཱི་ན་གནས་པས་ཡུལ་ཡངས་པ་ཅན་ན་གནས་པ་དག་དང་ལྷན་ཅིག་གསོ་སྦྱོང་བགྱིད་ན་གསོ་སྦྱོང་བགྱིས་པ་ཞེས་བགྱིའམ། ཨུ་

Vol. 12 · folio 266b

པཱ་ལི་མ་ཡིན་ནོ། ཡུལ་ཡངས་པ་ཅན་ན་གནས་པས་ཡུལ་ཀཽ་ཤཱམྦཱིར་གནས་པ་དག་དང་ལྷན་ཅིག་ཏུ་གསོ་སྦྱོང་བགྱིད་ན། གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །གཟུ་བོ་རྣམས་ཡུལ་ཀཽ་ཤཱམྦཱི་ན་གནས་པ་དག་དང་ལྷན་ཅིག་ཏུ་གསོ་སྦྱོང་བགྱིད་ན་གསོ་སྦྱོང་བགྱིས་པ་

ཞེས་བགྱིའམ། ཨུ་པཱ་ལི་མ་ཡིན་ནོ། །གཟུ་བོ་དག་ཡུལ་ཡངས་པ་ཅན་ན་གནས་པ་དང་ལྷན་ཅིག་གསོ་སྦྱོང་བགྱིད་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་སྟེ་བྱེད་ན་གཟུ་བོའི་དངོས་པོ་མེད་དོ། །བཙུན་པ་གཏན་པ་བཏིང་བའི་གནས་སུ་དགེ་འདུན་བྱེ་

ན་གཏན་པ་གང་གིས་གདིང་བར་བགྱི། ཆོས་སུ་སྨྲ་བ་དག་གིས་སོ། བཙུན་པ་གཏན་པ་འདིང་བའི་གནས་སུ་དགེ་འདུན་བྱེ་ན་གཏན་པ་གང་གིས་དབྱུང་བར་བགྱི། ཆོས་སུ་སྨྲ་བ་རྣམས་ཀྱིས་སོ། །བཙུན་པ་གང་ཉེ་བར་ཕྱོགས་པ་དེ་ཐམས་ཅད་སོ་སོར་གནས་པ་ལགས་

སམ། ཉེ་བར་ཕྱོགས་པ་སོ་སོར་གནས་པ་མ་ཡིན་པ་ཡང་ཡོད། སོ་སོར་གནས་ལ་ཉེ་བར་མ་ཕྱོགས་པ་ཡང་ཡོད། ཉེ་བར་ཕྱོགས་ལ་སོ་སོར་གནས་པའང་ཡོད། ཉེ་བར་ཡང་མ་ཕྱོགས་ལ་སོ་སོར་གནས་པ་མ་ཡིན་པ་ཡང་ཡོད་དོ། །ཉེ་བར་ཕྱོགས་ལ་སོ་སོར་གནས་པ་མ་

ཡིན་པ་ནི་གང་དངོས་པོ་ལྔ་ལ་ཉེ་བར་ཕྱོགས་པར་གྱུར་པ་སྟེ། མ་མཐོང་བའི་ཕྱིར་དགེ་འདུན་གྱིས་སྤངས་པར་མ་གྱུར་པ་དང་། སླར་ལས་མ་བྱས་པའི་ཕྱིར་སྤངས་པར་མ་གྱུར་པ་དང་། སྡིག་པ་ལ་ལྟ་བ་མ་བཏང་བའི་ཕྱིར་སྤངས་པར་མ་གྱུར་པའོ། །སོ་སོར་གནས་ལ་ཉེ་བར་མ་

ཕྱོགས་པ་ནི་འདི་ལྟར་དགེ་སློང་དེ་མ་མཐོང་བའི་ཕྱིར་དགེ་འདུན་གྱིས་སྤངས་པར་གྱུར་པ་དང་། སླར་ལས་མ་བྱས་པའི་ཕྱིར་དང་། སྡིག་པ་ལ་ལྟ་བ་མ་བཏང་བའི་ཕྱིར་སྤངས་པར་གྱུར་པ་དང་། དངོས་པོ་ལྔ་ལ་ཡང་ཉེ་བར་ཕྱོགས་པར་མ་གྱུར་པའོ། །ཉེ་བར་ཡང་ཕྱོགས་ལ་སོ་སོར་

ཡང་གནས་པ་ནི་དེ་འདི་ལྟར་དགེ་སློང་དེ་དངོས་པོ་ལྔ་ལ་ཉེ་བར་ཕྱོགས་པར་ཡང་གྱུར་ལ། མ་མཐོང་བའི་ཕྱིར་དགེ་འདུན་གྱིས་ཀྱང་སྤངས་པར་གྱུར་པ་དང་། སླར་ལས་མ་བྱས་པའི་ཕྱིར་དང་། སྡིག་པ་ལ་ལྟ་བ་མ་བཏང་བའི་ཕྱིར་སྤངས་པར་གྱུར་པའོ། །ཉེ་བར་ཕྱོགས་པའང་

Vol. 12 · folio 267a

མ་ཡིན་ལ་སོ་སོར་གནས་པའང་མ་ཡིན་པ་ནི་རྣམ་པ་དེ་ལྟ་བུ་དག་མ་གཏོགས་པའོ། །གང་ཉེ་བར་ཕྱོགས་པ་དེ་ཐམས་ཅད་མི་གནས་པ་ལགས་སམ། ཉེ་བར་ཕྱོགས་ལ་མི་གནས་པ་མ་ཡིན་པ་ཡང་ཡོད་མི་གནས་ལ་ཉེ་བར་མ་ཕྱོགས་པ་ཡང་ཡོད། ཉེ་བར་ཡང་

ཕྱོགས་ལ་མི་གནས་པ་ཡང་ཡོད། ཉེ་བར་ཡང་མ་ཕྱོགས་ལ་མི་གནས་པ་མ་ཡིན་པ་ཡང་ཡོད་དོ། །ཉེ་བར་ཕྱོགས་ལ་མི་གནས་པ་མ་ཡིན་པ་ནི་འདི་ལྟར་དགེ་སློང་དེ་དངོས་པོ་ལྔ་ལ་ཉེ་བར་ཕྱོགས་པར་གྱུར་ལ། ཕས་ཕམ་པ་བཞིའི་ཉེས་པ་གང་ཡང་རུང་བ་བྱུང་བར་མ་

གྱུར་པའོ། །མི་གནས་ལ་ཉེ་བར་ཡང་མ་ཕྱོགས་པ་ནི་དེ་འདི་ལྟར་དགེ་སློང་དེ་ཕས་ཕམ་པ་བཞི་ལས་གང་ཡང་རུང་བའི་ཉེས་པ་བྱུང་བར་གྱུར་ལ། དངོས་པོ་ལྔ་ལ་ནི་ཉེ་བར་མ་ཕྱོགས་པ་ཡིན་ནོ། །ཉེ་བར་ཡང་ཕྱོགས་ལ་མི་གནས་པ་ཡང་ཡིན་པ་ནི་འདི་ལྟར་དགེ་སློང་དེ་དངོས་པོ་

ལྔ་ལ་ཉེ་བར་ཕྱོགས་པར་གྱུར་ཅིང་ཕས་ཕམ་པ་བཞི་ལས་གང་ཡང་རུང་བའི་ཉེས་པ་བྱུང་བ་ཡིན་ནོ། །ཉེ་བར་ཕྱོགས་པ་ཡང་མ་ཡིན་ལ་མི་གནས་པའང་མ་ཡིན་པ་ནི་རྣམ་པ་དེ་ལྟ་བུ་མ་གཏོགས་པའོ། །གང་སོ་སོར་གནས་པ་དེ་ཐམས་ཅད་མི་གནས་པ་ལགས་སམ། སོ་སོར་

གནས་ལ་མི་གནས་པ་མ་ཡིན་པ་ཡང་ཡོད། མི་གནས་ལ་སོ་སོར་གནས་པ་མ་ཡིན་པ་ཡང་ཡོད། སོ་སོར་ཡང་གནས་ལ་མི་གནས་པ་ཡང་ཡོད། མི་གནས་པའང་མ་ཡིན་སོ་སོར་གནས་པ་ཡང་མ་ཡིན་པ་ཡོད་དོ། །སོ་སོར་གནས་ལ་མི་གནས་པ་མ་ཡིན་པ་ནི་འདི་

ལྟར་དགེ་སློང་དེ་མ་མཐོང་བའི་ཕྱིར་སྤངས་པར་གྱུར་ཅིང་སླར་ལས་མ་བྱས་པ་དང་། སྡིག་པ་ལ་ལྟ་བ་མ་བཏང་བའི་ཕྱིར་སྤངས་པར་གྱུར་ལ་ཕས་ཕམ་པ་བཞི་ལས་ཉེས་པ་གང་ཡང་རུང་བ་མ་བྱུང་བ་ཡིན་ནོ། །མི་གནས་ལ་སོ་སོར་གནས་པ་མ་ཡིན་པ་ནི་གང་འདི་ལྟར་དགེ་སློང་དེ་

ཕས་ཕམ་པ་བཞིའི་ཉེས་པ་གང་ཡང་རུང་བ་བྱུང་བར་གྱུར་གྱི་མ་མཐོང་བའི་ཕྱིར་དགེ་འདུན་གྱིས་སྤང་བ་མ་བྱས་པར་གྱུར་ཅིང་སླར་ལས་མ་བྱས་པ་དང་། སྡིག་པ་ལ་ལྟ་བ་མ་བཏང་བའི་ཕྱིར་སྤངས་པར་མ་གྱུར་པའོ། །མི་གནས་ལ་སོ་སོར་ཡང་གནས་པ་ནི་དེ་འདི་ལྟར་དགེ་

Vol. 12 · folio 267b

སློང་དེ་མ་མཐོང་བའི་ཕྱིར་སྤངས་པ་ཡང་ཡིན་ལ། ཕས་ཕམ་པ་བཞིའི་ཉེས་པ་གང་ཡང་རུང་བ་བྱུང་བར་གྱུར་པའོ། །མི་གནས་པའང་མ་ཡིན་སོ་སོར་གནས་པ་ཡང་མ་ཡིན་པ་ནི་རྣམ་པ་དེ་ལྟ་བུ་མ་གཏོགས་པའོ། །བཙུན་པ་དགེ་སློང་ཉིད་ཀྱིས་དགེ་སློང་གི་དགེ་འདུན་འབྱེད་ཀྱི།

དགེ་སློང་མས་མ་ལགས། དགེ་སློབ་མས་མ་ལགས། དགེ་ཚུལ་མས་མ་ལགས། དགེ་ཚུལ་ཕས་མ་ལགས་སམ། ཨུ་པཱ་ལི་དགེ་སློང་ཉིད་ཀྱིས་དགེ་སློང་གི་དགེ་འདུན་འབྱེད་ཀྱི། དགེ་སློང་མས་མ་ཡིན། དགེ་སློབ་མས་མ་ཡིན། དགེ་ཚུལ་མས་མ་ཡིན། དགེ་

ཚུལ་ཕས་མ་ཡིན་མོད་ཀྱི། འོན་ཀྱང་དགེ་སློང་མ་རྣམས་ནི་དགེ་འདུན་དབྱེ་བའི་ཕྱིར་རྩོལ་ལོ། །བཙུན་པ་དགེ་སློང་མ་ཉིད་ཀྱིས་དགེ་སློང་མའི་དགེ་འདུན་འབྱེད་ཀྱི། དགེ་སློང་གིས་མ་ལགས། དགེ་སློབ་མས་མ་ལགས། དགེ་ཚུལ་མས་མ་ལགས། དགེ་ཚུལ་ཕས་

མ་ལགས་སམ། ཨུ་པཱ་ལི་དགེ་སློང་མ་ཉིད་ཀྱིས་དགེ་སློང་མའི་དགེ་འདུན་འབྱེད་ཀྱི། དགེ་སློང་ཕས་མ་ཡིན། དགེ་སློབ་མས་མ་ཡིན། དགེ་ཚུལ་མས་མ་ཡིན། དགེ་ཚུལ་ཕས་མ་ཡིན་མོད་ཀྱི། འོན་ཀྱང་དགེ་སློང་རྣམས་ནི་དགེ་འདུན་དབྱེ་བའི་ཕྱིར་རྩོལ་ལོ། །

བཙུན་པ་དབྱེ་བ་ནི་གང་། ཁ་ན་མ་ཐོ་བ་དང་ལྡན་པ་ནི་གང་ལགས། དབྱེ་བ་ནི་དགེ་འདུན་ནོ། །ཁ་ན་མ་ཐོ་བ་དང་ལྡན་པ་ནི་འབྱེད་པའོ། །བཙུན་པ་དགེ་འདུན་ཕྱེ་ན་ཅིར་འགྱུར། སྦོམ་པོ་སྟེ། གསོལ་བ་དང་ལས་མ་མཉན་ན་དགེ་འདུན་གྱི་ལྷག་མའོ། །བཙུན་པ་ཇི་ཙམ་

གྱིས་ན་དགེ་འདུན་ཕྱེ་བ་ཞེས་བགྱི། ཨུ་པཱ་ལི་གང་གི་ཚེ་ཇི་སྙེད་པའི་དགེ་སློང་རྣམས་མཚམས་སུ་བྱིན། བྱ་བ་ལ་བབ་པར་གྱུར། དེ་དག་ཐམས་ཅད་འདུས་ཤིང་མངོན་སུམ་དུ་གྱུར། དད་པ་བླང་བའི་རིགས་པ་ལས་དད་པ་བླངས་པར་གྱུར། དགེ་སློང་རྣམས་ཀྱིས་མཚམས་

ཀྱི་ནང་ལ་མཚམས་ཀྱི་ནང་ཡིན་པར་འདུ་ཤེས་ཏེ་གསོ་སྦྱོང་དང་ལས་ཐ་དད་དུ་བྱེད་པ་དེ་ལྟ་ན་དགེ་འདུན་བྱེ་བ་ཞེས་བྱའོ། །དགེ་འདུན་ཕྱེ་བས་ནོངས་པ་གང་བཤགས་པར་བགྱི། ཉེས་པ་སྦོམ་པོའོ། །བཙུན་པ་བཅོམ་ལྡན་འདས་ཀྱིས་དེ་ལྟ་བུའི་གང་ཟག་ལ་གླེང་བར་མ་བྱེད་ཅིག །

Vol. 12 · folio 268a

དྲན་པར་མ་བྱེད་ཅིག་ཅེས་གསུངས་ན། དེ་ལྟ་བུའི་གང་ཟག་གང་ལགས། གང་ཟག་གང་མདོ་སྡེ་འཛིན་པ་མ་ལྟ་བུ་འཛིན་པ། བསོད་ནམས་ཆེན་པོ། འཁོར་གཡོག་མང་པོ། གྲགས་པ་དེའོ། །དེ་ལྟ་བུའི་གང་ཟག་ཅིག་སྤངས་ན་ཅིར་འགྱུར། ཉེས་

པ་སྦོམ་པོར་འགྱུར་རོ། །ཡུལ་ཀཽ་ཤཱམྦཱི་ཀའི་དངོས་པོ་རྫོགས་སོ།། །།འདུལ་བ་གཞུང་དམ་པ། བམ་པོ་བཅུ་དགུ་པ། མདོར་ན། སྐད་དང་ནམ་མཁའ་མཚམས་དང་ས། །ཆོས་གཉིས་དང་ནི་མ་འདུས་པ། །ཆད་པ་ཁོར་དང་གཅིག་ནས་གཅིག །མ་

འདུས་གང་ཟག་གནས་དེ་བཞིན། །བཙུན་པ་འཕགས་པ་ཞིག་གིས་འཕགས་པའི་སྐད་དུ་ལས་བགྱིས་པ་དང་། དགེ་སློང་དེ་དག་གིས་ཀྱང་འཕགས་པའི་སྐད་མ་འཚལ་ན་ལས་བགྱིས་པ་ཞེས་བགྱིའམ། ཨུ་པཱ་ལི་ལས་བྱས་པ་ཞེས་བྱ་སྟེ། ལས་བྱེད་པའི་དགེ་སློང་ནི་འདས་

པ་དང་བཅས་པའོ། །བཙུན་པ་འཕགས་པ་ཞིག་གིས་མཐའ་འཁོབ་པའི་སྐད་དུ་ལས་བགྱིས་པ་དང་། དགེ་སློང་དེ་དག་གིས་མཐའ་འཁོབ་པའི་སྐད་མ་འཚལ་ན་ལས་བགྱིས་པ་ཞེས་བགྱིའམ། ཨུ་པཱ་ལི་ལས་བྱས་པ་ཞེས་བྱ་སྟེ། ལས་བྱེད་པ་ནི་འདས་པ་དང་བཅས་

པའོ། །བཙུན་པ་མཐའ་འཁོབ་པ་ཞིག་གིས་མཐའ་འཁོབ་པའི་སྐད་དུ་ལས་བགྱིས་པ་དང་། དགེ་སློང་དེ་དག་གིས་ཀྱང་མཐའ་འཁོབ་པའི་སྐད་མ་འཚལ་ན་ལས་བགྱིས་པ་ཞེས་བགྱིའམ། ཨུ་པཱ་ལི་ལས་བྱས་པ་ཞེས་བྱ་སྟེ། ལས་བྱེད་པ་ནི་འདས་པ་དང་བཅས་

པའོ། །བཙུན་པ་མཐའ་འཁོབ་པ་ཞིག་གིས་འཕགས་པའི་སྐད་དུ་ལས་བགྱིས་པ་དང་། དགེ་སློང་དེ་དག་གིས་འཕགས་པའི་སྐད་མ་འཚལ་ན་ལས་བགྱིས་པ་ཞེས་བགྱིའམ། ཨུ་པཱ་ལི་ལས་བྱས་པ་ཞེས་བྱ་སྟེ། ལས་བྱེད་པ་ནི་འདས་པ་དང་བཅས་པའོ། །བཙུན་པ་ས་ལ་

གནས་པས་ནམ་མཁའ་ལ་གནས་པའི་གྲངས་སུ་བསྐངས་ན་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ནམ་མཁའ་ལ་གནས་པས་ས་ལ་གནས་པའི་གྲངས་སུ་བསྐངས་ན་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ལས་བགྱིས་པས་ལ་གནས་པས་ནམ་

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words