འདུལ་བ་གཞུང་དམ་པ

Sanskrit title (Tibetan script, as in the text) བི་ན་ཡ་ཨུད་ཏ་ར་གྲན་ཐ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 12 · folio 268b

མཁའ་ལ་གནས་པ་རྣམས་ཀྱི་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ལས་བགྱིད་པ་ནམ་མཁའ་ལ་གནས་པས་ས་ལ་གནས་པ་རྣམས་ཀྱི་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དེ་བཞིན་དུ་མཚམས་ཀྱི་ནང་ན་གནས་པ་དང་། མཚམས་ཀྱི་ཕྱི་རོལ་དུ་

གནས་པ་རྣམས་དང་ལྷན་ཅིག་བཞིར་བྱའོ། །བཙུན་པ་ས་ལ་གནས་པས་ས་ལ་གནས་པ་རྣམས་དང་ལྷན་ཅིག་ལས་བགྱིར་རུང་ངམ། ཨུ་པཱ་ལི་རུང་ངོ་། །འདི་ལྟར་ཡང་དེས་ས་ལ་གནས་པས་གྲངས་བསྐང་ཞིང་ས་ལ་གནས་པ་རྣམས་ལས་དད་པ་བླངས་པར་གྱུར་པའོ། །

ཇི་ལྟར་ས་ལ་གནས་པས་ས་ལ་གནས་པ་དང་ལྷན་ཅིག་པ་དེ་བཞིན་དུ་ས་ལ་གནས་པ་དང་། རྩིག་པ་ལ་གནས་པར་རོ། །ས་ལ་གནས་པ་དང་ཤིང་ལ་གནས་པར་རོ། །རྩིག་པ་ལ་གནས་པ་དང་། རྩིག་པ་ལ་གནས་པར་རོ། །རྩིག་པ་ལ་གནས་པ་དང་ས་ལ་གནས་པར་

རོ། །རྩིག་པ་ལ་གནས་པ་དང་ཤིང་ལ་གནས་པར་རོ། །ཤིང་ལ་གནས་པ་དང་ཤིང་ལ་གནས་པར་རོ། །ཤིང་ལ་གནས་པ་དང་ས་ལ་གནས་པར་རོ། །ཤིང་ལ་གནས་པ་དང་རྩིག་པ་ལ་གནས་པ་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་རུང་སྟེ། ཇི་ལྟར་ཡང་ཤིང་ལ་

གནས་པ་རྣམས་ཀྱིས་གྲངས་སུ་བསྐངས་ཏེ་ས་ལ་གནས་པ་རྣམས་ལས་དད་པ་བླངས་པར་གྱུར་པའོ། །ལས་རྣམ་པ་བཞི་སྟེ། ཆོས་བཞིན་མ་ཡིན་པར་བྱེད་ཅིང་མ་འདུས་པ་དང་། ཆོས་བཞིན་མ་ཡིན་པར་འདུས་པ་དང་། ཆོས་བཞིན་དུ་མ་འདུས་པ་དང་། ཆོས་བཞིན་

དུ་འདུས་པའོ། །ཆོས་བཞིན་མ་ཡིན་པར་བྱེད་ཅིང་མ་འདུས་པ་གང་ཞེ་ན། གསོལ་བ་བྱས་ནས་ལས་མ་བསྒྲགས་ཏེ་མ་འདུས་པར་ཡང་གྱུར་པའོ། །ཆོས་བཞིན་མ་ཡིན་པར་འདུས་པ་གང་ཞེ་ན། གསོལ་བ་བྱས་ནས་ལས་མ་བསྒྲགས་པར་འདུས་པར་ཡང་གྱུར་

པའོ། །ཆོས་བཞིན་དུ་མ་འདུས་པ་གང་ཞེ་ན། གསོལ་བ་བྱས་ལ་ལས་བསྒྲགས་པ་དང་མ་འདུས་པར་ཡང་གྱུར་པའོ། །ཆོས་བཞིན་དུ་འདུས་པ་གང་ཞེ་ན། གསོལ་བ་བྱས་ཤིང་ལས་བསྒྲགས་ལ་འདུས་པར་ཡང་གྱུར་པའོ། །གཞན་ཡང་ལས་རྣམ་པ་བཞི་སྟེ། ཆོས་

Vol. 12 · folio 269a

བཞིན་མ་ཡིན་པར་མཐུན་ལ་མ་འདུས་པ་དང་། ཆོས་བཞིན་མ་ཡིན་པར་མཐུན་ལ་འདུས་པ་དང་། ཆོས་བཞིན་དུ་མཐུན་ལ་མ་འདུས་པ་དང་། ཆོས་བཞིན་དུ་མཐུན་ལ་འདུས་པའོ། །ཆོས་བཞིན་མ་ཡིན་པར་མཐུན་ལ་མ་འདུས་པ་གང་ཞེ་ན། སྔར་ལས་

བསྒྲགས་ལ་ཕྱིས་གསོལ་བ་བྱེད་ཅིང་མ་འདུས་པར་གྱུར་པའོ། །ཆོས་བཞིན་མ་ཡིན་པར་མཐུན་ཞིང་འདུས་པ་གང་ཞེ་ན། སྔར་ལས་བསྒྲགས་ལ་ཕྱིས་གསོལ་བ་བྱེད་ཅིང་འདུས་པར་ཡང་གྱུར་པའོ། །ཆོས་བཞིན་དུ་མཐུན་ལ་མ་འདུས་པ་གང་ཞེ་ན། ལས་དེ་ཉིད་ཀྱིས་

གསོལ་བ་བྱས་ཏེ་ལས་གཞན་བསྒྲགས་ལ་མ་འདུས་པར་གྱུར་པའོ། །ཆོས་བཞིན་དུ་མཐུན་ལ་འདུས་པ་གང་ཞེ་ན། ལས་དེ་ཉིད་ཀྱིས་གསོལ་བ་བྱས་ཤིང་ལས་གཞན་བསྒྲགས་ལ་འདུས་པར་ཡང་གྱུར་པའོ། །བཙུན་པ་མ་འདུས་པའི་ལས་ཞེས་ཀྱང་བགྱི། འདུས་

པའི་ལས་ཞེས་ཀྱང་བགྱི་ན། བཙུན་པ་མ་འདུས་པའི་ལས་གང་ལགས། ཨུ་པཱ་ལི་དགེ་སློང་ཇི་སྙེད་པ་རྣམས་ཀྱིས་མཚམས་སུ་ཡང་ཕྱིན། ལས་ལ་ཡང་བབ་པར་གྱུར། ཐམས་ཅད་མངོན་སུམ་དུ་འདུས་པར་གྱུར། དད་པ་བླང་བའི་རིགས་པ་ཡང་དད་པ་བླངས་པར་གྱུར་ན་དགེ་

སློང་རྣམས་ནི་ཟློག་ཅིང་འཁྱལ་ཏེ། དེ་དག་སླར་ཟློག་ཅིང་འཁྱལ་བཞིན་དུ་ལས་བྱས་ན་དེ་ནི་མ་འདུས་པའི་ལས་ཞེས་བྱའོ། །འདུས་པའི་ལས་གང་ཞེ་ན། དགེ་སློང་ཇི་སྙེད་པ་རྣམས་ཀྱིས་མཚམས་སུ་ཕྱིན་ཅིང་ལས་ལ་བབ་པར་གྱུར། ཐམས་ཅད་ཀྱང་མངོན་སུམ་དུ་འདུས་པར་

གྱུར། དད་པ་བླང་བའི་རིགས་པ་ཡང་དད་པ་བླངས་པར་གྱུར་ན་དགེ་སློང་དག་སླར་མི་ལྡོག་ཅིང་འཁྱལ་བར་མི་བྱེད་དེ། དེ་དག་སླར་མི་ལྡོག་ཅིང་མི་འཁྱལ་བཞིན་དུ་ལས་བྱེད་པས་ན་དེ་ནི་འདུས་པའི་ལས་ཞེས་བྱའོ། །བཙུན་པ་དགེ་འདུན་ཐམས་ཅད་འདུས་ཏེ་འཁོད་ནས་ལས་བགྱིས་

ཀྱང་ལས་དེ་མ་འདུས་པའི་ལས་སུ་འགྱུར་བ་མཆིས་སམ། ཨུ་པཱ་ལི་ཡོད་དེ་འདི་ལྟར་གསོལ་བ་དང་ལས་བྱེད་པ་ན་དགེ་སློང་དག་སླར་ཟློག་ཅིང་འཁྱལ་ཏེ། དེ་དག་སླར་ཟློག་ཅིང་འཁྱལ་བཞིན་ལས་བྱེད་པའོ། །བཙུན་པ་ལས་བགྱིད་པ་ཆད་པ་ཁོར་བ་ཞིག་གིས་ལས་བགྱིས་ན་

Vol. 12 · folio 269b

ལས་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱ་སྟེ། དགེ་འདུན་རྣམས་ནི་འདས་པ་དང་བཅས་པའོ། །བཙུན་པ་ཆད་པ་ཁོར་བ་ཞིག་གིས་དད་པ་བླངས་ནས་ལས་བགྱིས་ན་ལས་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱ་སྟེ། དགེ་སློང་དེ་དག་ནི་

འདས་པ་དང་བཅས་པའོ། །བཙུན་པ་དད་པ་གཅིག་ནས་གཅིག་ཏུ་བླངས་ཏེ་ལས་བགྱིས་ན་ལས་བགྱིས་པ་ཞེས་བྱའམ། ཨུ་པཱ་ལི་བྱས་པ་ཞེས་བྱ་སྟེ། དགེ་འདུན་རྣམས་ནི་འདས་པ་དང་བཅས་པའོ། །བཙུན་པ་མ་འདུས་པར་ལས་བགྱིས་ན་ལས་བགྱིས་པ་ཞེས་བགྱིའམ།

ཨུ་པཱ་ལི་མ་བྱས་པ་ཞེས་བྱ་སྟེ། དགེ་འདུན་ཀྱང་འདས་པ་དང་བཅས་པའོ། །བཙུན་པ་གཅིག་གིས་གཅིག་ལ། གཅིག་གིས་གཉིས་ལ། གཅིག་གིས་གསུམ་ལ། གཅིག་གིས་མང་པོ་ལ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་གཉིས་ཀྱིས་གཅིག་

ལ། གཉིས་ཀྱིས་གཉིས་ལ། གཉིས་ཀྱིས་གསུམ་ལ། གཉིས་ཀྱིས་མང་པོ་ལ་ལས་རྣམས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་གསུམ་གྱིས་གཅིག་ལ། གསུམ་གྱིས་གཉིས་ལ། གསུམ་གྱིས་གསུམ་ལ། གསུམ་གྱིས་མང་པོ་ལ་ལས་བགྱིར་

རུང་ངམ། ཨུ་པཱ་ལི་མི་རུང་ངོ་། །བཙུན་པ་མང་པོས་མང་པོ་ལ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ལས་བགྱིད་པ་གནས་གཅིག་ཏུ་མཆིས་ལ་གནས་བཞིར་ལས་ཐམས་ཅད་བགྱིར་རུང་ངམ། ཨུ་པཱ་ལི་རུང་སྟེ། དེ་འདི་ལྟར་ལས་བྱེད་པའི་དགེ་

སློང་དེས་གནས་བཞི་ཆར་གྱི་མཚམས་ཤིང་ངམ། འདམ་བུའམ། རེ་ལྡེས་མནན་ཏེ་ལས་བྱེད་པའོ། །བཙུན་པ་ལས་བགྱིད་པས་མཚམས་གཅིག་པར་གསོལ་བ་གཅིག་དང་ལས་གཅིག་གིས་གང་ཟག་བཞི་ལ་ལས་བགྱིས་ན་ལས་བགྱིས་པ་ཞེས་བགྱིའམ། ཨུ་པཱ་ལི་

མ་ཡིན་ནོ། །དེ་ཅིའི་ཕྱིར་ཞེ་ན། མཚམས་གཅིག་པར་མང་པོས་མང་པོ་ལ་ལས་བྱར་མི་རུང་ངོ་། །བཙུན་པ་དགེ་སློང་གིས་མཚམས་གཅིག་ལ་མཚུངས་པར་གནས་པའི་དགེ་སློང་རྣམས་ལ་ལས་བགྱིས་ཀྱང་ནོངས་པར་ཡང་མི་འགྱུར་ལ་དགེ་འདུན་མ་འདུས་པར་ཡང་མི་

Vol. 12 · folio 270a

འགྱུར་བ་མཆིས་སམ། ཨུ་པཱ་ལི་ཡོད་དེ། དད་པ་བྱིན་པས་སོ། །བཙུན་པ་ལས་བགྱིད་པའི་དགེ་སློང་གནས་གཅིག་ན་མཆིས་པས་གང་ཟག་བཞི་ལ་ལས་བགྱིས་ན་ལས་དེ་ཡང་བགྱིས་པར་འགྱུར་ལ་དགེ་སློང་དེ་དག་ཀྱང་འདས་པ་དང་བཅས་པར་

ཡང་མི་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་ལས་བྱེད་པའི་དགེ་སློང་དེ་མཚམས་མནན་མཚམས་བཟུང་ནས་མཚམས་སུ་འགྲེང་ངམ་འདུག་ནས་མཚམས་ཀྱི་ནང་དུ་གཉིས་འདུག །མཚམས་ཀྱི་ཕྱི་རོལ་དུ་གཉིས་འདུག་པ་ལ་ལས་བྱེད་པའོ།། །།མདོར་

ན། མངོན་སུམ་གྱུར་དང་སྔ་མ་དག །ལས་རྣམས་གསུམ་དང་ཤི་བ་དང་། མི་སྤྱད་དང་ནི་བདེ་བ་མཚམས། །ཉེས་པ་ལས་ཀྱང་དེ་བཞིན་ནོ། །བཙུན་པ་བཅོམ་ལྡན་འདས་ཀྱིས་ནི་མངོན་སུམ་དུ་གྱུར་པ་ལ་ལས་རྣམས་གྱིས་ཤིག་ཅེས་གསུངས་ན། བཙུན་པ་དགེ་འདུན་

གྱིས་མངོན་སུམ་དུ་མ་གྱུར་པར་ལས་རྣམས་བགྱིས་ཀྱང་ལས་རྣམས་བགྱིས་པར་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་ཡང་དགེ་སློང་མའི་དགེ་འདུན་གྱིས་ཕྱག་མི་བྱ་བའི་སྡོམ་པའམ་ལོངས་སྤྱོད་དང་བྲལ་བའི་སྡོམ་པ་བྱིན་པ་དང་། དགེ་སློང་གི་

དགེ་འདུན་གྱིས་དགེ་སློང་ལ་སྨྱོན་པའི་སྡོམ་པ་བྱིན་པར་གྱུར་པའོ། །བཙུན་པ་སྔར་ལས་བསྒྲགས་ཏེ་ཕྱིས་གསོལ་བ་བགྱིས་ན་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱ་སྟེ། དགེ་སློང་དེ་དག་ནི་འདས་པ་དང་བཅས་པའོ། །བཙུན་པ་བདག་ཉིད་ཀྱིས་

བདག་ཉིད་སྤངས་ན་སྤངས་པ་ཞེས་བགྱིའམ། ཨུ་པཱ་ལི་སྤངས་པ་ཞེས་བྱའོ། །བཙུན་པ་བདག་ཉིད་སྤངས་ཏེ་བདག་ཉིད་ཀྱིས་བདག་ཉིད་ལ་བཟོད་པར་བགྱིས་ན་བཟོད་པ་བགྱིད་པ་ཞེས་བགྱིའམ། ཨུ་པཱ་ལི་བཟོད་པ་བྱས་པ་ཞེས་བྱའོ། །བཙུན་པ་བསྡིགས་པའི་ལས་བགྱིས་པ་

ལ་བསྡིགས་པའི་ལས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་བཞིན་དུ་སྨད་པའི་ལས་བགྱིས་པ་ལ་སྨད་པའི་ལས་བགྱིད་པ་དང་། བསྐྲད་པའི་ལས་བགྱིས་པ་དང་། སླར་བསྡུམ་པའི་ལས་བགྱིས་པ་དང་། མ་མཐོང་བའི་ཕྱིར་སྤངས་པའི་ལས་བགྱིས་

Vol. 12 · folio 270b

པ་དང་། སླར་གྱི་ལས་མ་བགྱིས་པ་དང་། སྡིག་པ་ལ་ལྟ་བ་སླར་མ་བཏང་བའི་ཕྱིར་སྤང་བའི་ལས་བགྱིས་པ་དང་། ཆད་པས་བཅད་པ་ལ་ཆད་པའི་དང་། ཡིད་མགུ་བའི་སྤྱོད་པ་ལ་ཡིད་མགུ་བའི་དང་། དབྱུང་བའི་ཕྱིར་ལས་བགྱིས་པ་ལ་དབྱུང་བའི་ཕྱིར་ལས་བགྱིད་ན་

ལས་བགྱིས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་བསྡིགས་པའི་ལས་བགྱིས་པ་ལ་སྨད་པའི་ལས་བགྱིད། བསྐྲད་པའི་དང་། སླར་བསྡུམ་པའི་དང་། མ་མཐོང་བའི་ཕྱིར་སྤངས་པ་དང་། སླར་གྱི་ལས་མ་བགྱིས་པ་དང་། སྡིག་པ་ལ་ལྟ་བ་སླར་མ་བཏང་

བའི་ཕྱིར་སྤང་བའི་ལས་དང་། ཆད་པས་བཅད་པའི་དང་། ཡིད་མགུ་བའི་དང་། དབྱུང་བའི་ལས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱའོ། །དེ་བཞིན་དུ་ལས་ཐམས་ཅད་ཀྱང་འཁོར་ལོའི་རྒྱུད་བཞིན་དུ་བྱའོ། །བཙུན་པ་བསྡིགས་པའི་

ལས་སུ་འོས་པ་ཞིག་ལ་སྨད་པ་དང་། བསྐྲད་པ་དང་། སླར་བསྡུམ་པའི་ལས་རྣམས་བགྱིས་ན་ལས་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱ་སྟེ། སྨ་དབབ་པའི་ལས་སོ། །བཙུན་པ་བསྡིགས་པའི་ལས་སུ་འོས་པ་ཞིག་ལ་མ་མཐོང་བའི་སླད་དུ་སྤངས་

པ་དང་། སླར་ལས་མ་བགྱིས་པ་དང་། སྡིག་པ་ལ་ལྟ་བ་སླར་མ་བཏང་བའི་སླད་དུ་སྤང་བའི་ལས་བགྱིས་ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱའོ། །དེ་ཅིའི་ཕྱིར་ཞེ་ན། ཨུ་པཱ་ལི་སྨ་དབབ་པའི་ལས་ནི་གཞན་ནོ། །སྤང་བའི་ལས་ནི་གཞན་ནོ། །

བཙུན་པ་བསྡིགས་པའི་ལས་སུ་འོས་པ་ཞིག་ལ་ཆད་པས་བཅད་པ་དང་། ཡིད་མགུ་བ་དང་། དབྱུང་བའི་ལས་བགྱིས་ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱའོ། །དེ་ཅིའི་ཕྱིར་ཞེ་ན། སྨ་དབབ་པའི་ལས་ནི་གཞན་ནོ། །རྣམ་པར་དག་

པའི་ལས་ནི་གཞན་ནོ། །བཙུན་པ་མ་མཐོང་བའི་སླད་དུ་སྤང་བའི་ལས་སུ་འོས་པ་ཞིག་ལ་སླར་ལས་མ་བགྱིས་པ་དང་། སྡིག་པ་ལ་ལྟ་བ་སླར་མ་བཏང་བའི་སླད་དུ་སྤང་བའི་ལས་ཤིག་བགྱིས་ན་ལས་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱའོ། །དེ་

Vol. 12 · folio 271a

ཅིའི་ཕྱིར་ཞེ་ན། དེ་དག་ཐམས་ཅད་ནི་སྤང་བའི་ལས་སོ། །བཙུན་པ་མ་མཐོང་བའི་ཕྱིར་སྤང་བའི་ལས་སུ་འོས་པ་ཞིག་ལ་བསྡིགས་པ་དང་། སྨད་པ་དང་། བསྐྲད་པ་དང་། སླར་བསྡུམ་པའི་ལས་ཤིག་བགྱིས་ན་ལས་བགྱིས་པ་ཞེས་བགྱིའམ།

ཨུ་པཱ་ལི་མ་བྱས་པ་ཞེས་བྱའོ། །དེ་ཅིའི་ཕྱིར་ཞེ་ན། ཨུ་པཱ་ལི་སྤང་བའི་ལས་ནི་གཞན། སྨ་དབབ་པའི་ལས་ནི་གཞན་ནོ། །བཙུན་པ་མ་མཐོང་བའི་སླད་དུ་སྤང་བའི་ལས་སུ་འོས་པ་ཞིག་ལ་ཆད་པས་བཅད་པ་དང་། ཡིད་མགུ་བ་དང་། དབྱུང་བའི་ལས་བགྱིས་

ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱ་སྟེ། དེ་ཅིའི་ཕྱིར་ཞེ་ན། ཨུ་པཱ་ལི་སྤང་བའི་ལས་ནི་གཞན། རྣམ་པར་དག་པའི་ལས་ནི་གཞན་ནོ། །བཙུན་པ་ཆད་པས་གཅད་པར་འོས་པ་ཞིག་ལ་ཡིད་མགུ་བ་དང་། དབྱུང་བའི་ལས་བགྱིས་

ན་ལས་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱའོ། །དེ་ཅིའི་ཕྱིར་ཞེ་ན། ཨུ་པཱ་ལི་འདི་དག་ཐམས་ཅད་ནི་རྣམ་པར་དག་པའི་ལས་སོ། །བཙུན་པ་ཆད་པས་གཅད་པར་འོས་པ་ཞིག་ལ་བསྡིགས་པ་དང་། སྨད་པ་དང་། བསྐྲད་པ་དང་། སླར་བསྡུམ་པའི་

ལས་བགྱིས་ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱའོ། །དེ་ཅིའི་ཕྱིར་ཞེ་ན། ཨུ་པཱ་ལི་རྣམ་པར་དག་པའི་ལས་ནི་གཞན། སྨ་དབབ་པའི་ལས་ནི་གཞན་ནོ། །བཙུན་པ་ཆད་པས་གཅད་པར་འོས་པ་ཞིག་ལ་མ་མཐོང་བའི་ཕྱིར་སྤང་བའི་ལས་

བགྱིས་སམ། སླར་གྱི་ལས་མ་བགྱིས་པ་དང་། སྡིག་པ་ལ་ལྟ་བ་སླར་མ་བཏང་བའི་སླད་དུ་སྤང་བའི་ལས་བགྱིས་ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱའོ། །དེ་ཅིའི་ཕྱིར་ཞེ་ན། ཨུ་པཱ་ལི་རྣམ་པར་དག་པའི་ལས་ནི་གཞན། སྤང་བའི་

ལས་ནི་གཞན་ནོ། །བཙུན་པ་ལས་གཞན་གྱིས་གསོལ་བ་བགྱིས་ལ་ལས་གཞན་གྱིས་བསྒྲགས་ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱ་སྟེ། དགེ་སློང་དེ་དག་ཀྱང་འདས་པ་དང་བཅས་པའོ། །བཙུན་པ་བཅོམ་ལྡན་འདས་ཀྱིས་ནི་གང་ཟག་

Vol. 12 · folio 271b

བྱིས་པ་དང་། གླེན་པ་དང་། མི་གསལ་བ་དང་། མི་མཁས་པ་དང་། ངོ་ཚ་མེད་པ་དང་། ཚིག་མི་བརྟན་པ་དང་། ཡི་དམ་ལས་ཉམས་པ་དང་། སྔོན་ཉེས་པ་བྱུང་བ་དང་། སྔར་འཁྲུགས་པ་དང་། སྨྱོས་པ་དང་རྣམ་པ་བཅུས་འཁྲུགས་ཀྱང་འཁྲུགས་པར་མི་

འགྱུར་རོ་ཞེས་གསུངས་ན། བཙུན་པ་དེ་སྟེ་ཆོས་བཞིན་མ་ལགས་པར་བགྱིད་ཅིང་དེ་དག་ཀྱང་སླར་བཟློག །སླར་དཀྲུགས་ཏེ། དེ་དག་གིས་སླར་བཟློག་སླར་དཀྲུགས་ན་སླར་དཀྲུགས་པ་མི་བརྩན་ནམ། ཨུ་པཱ་ལི་བརྩན་ཏེ། ངས་ཆོས་བཞིན་གྱི་ལས་ལ་

དགོངས་ཏེ་གསུངས་པས་ན། གང་ལ་ཆོས་བཞིན་གྱི་ལས་བྱེད་པ་དེ་ལ་སླར་བཟློག་པ་དང་དཀྲུགས་པ་ནི་མི་བརྩན་ནོ། །བཙུན་པ་གང་ཟག་བཅུ་གཉིས་ཀྱི་ལས་བསྐོ་བའི་ཚེ་དང་བསྙེན་པར་རྫོགས་པར་རིགས་པ་ལ་བསྙེན་པར་རྫོགས་པར་བགྱིད་པའི་ཚེ་དང་། དབྱུང་བར་

རིགས་པ་ལ་བྱིན་པའི་ཚེ་སླར་བཟློག་ཅིང་སླར་དཀྲུགས་ཏེ་བདག་ལ་ལས་མ་བྱེད་ཅིག་ཅེས་མཆི་ན་དེ་དག་གིས་སླར་བཟློག་པ་དང་། སླར་དཀྲུགས་པ་མི་བརྩན་ནམ། ཨུ་པཱ་ལི་བརྩན་ནོ། །ཆད་པའི་ལས་ནི་ངས་དགོངས་ཏེ་གསུངས་སོ། །བཙུན་པ་ལས་བགྱིད་པ་ཞིག་ལས་

བགྱིད་པའི་ཚེ་དུས་ལས་འདས་ན་ལས་བགྱིས་པ་ཞེས་བགྱིའམ། ཨུ་པཱ་ལི་དེ་སྟེ་ལས་མང་དུ་བྱས་ལ་དེ་ཡང་དུས་ལས་འདས་ན་ལས་བྱས་པ་ཞེས་བྱའོ། །བཙུན་པ་ཉེ་བར་ཕྱོགས་པ་དང་ལྷན་ཅིག་ཀུན་དུ་སྤྱད་པར་བགྱིའམ་ཀུན་དུ་མི་སྤྱད་པར་བགྱི། ཨུ་པཱ་ལི་ཉེ་བར་ཕྱོགས་

པ་དང་ལྷན་ཅིག་ཀུན་ཏུ་མི་སྤྱད་པར་བྱའོ། །བཙུན་པ་སྤངས་པ་དེ་གྲོགས་ཞེས་བགྱིའམ། གྲོགས་མ་ལགས་པ་ཞེས་བགྱི། ཨུ་པཱ་ལི་སྤངས་པ་ཐམས་ཅད་ནི་གྲོགས་མ་ཡིན་པ་ཞེས་བྱའོ། །བཙུན་པ་བཅོམ་ལྡན་འདས་ཀྱིས་བསྡིགས་པའི་ལས་བགྱིས་པ་ལ་བཟོད་པ་སྩོལ་

ཅིག་ཅེས་གསུངས་ན། བཙུན་པ་གང་དུ་བཟོད་པ་སྩལ་བར་བགྱི། མཚམས་ཀྱི་ནང་དུའོ། །ཇི་ལྟར་བཟོད་པ་གསོལ་བར་བགྱི། སྤུ་འགྲེང་བ་ཉལ་བཞིན་དུ་དགེ་འདུན་ལ་སྤུ་བསྙལ་ཏེ་འབྱུང་བར་རྩོལ་ཞིང་ཕྱག་འཚལ་བར་སྟོན་མཚམས་ཀྱི་ནང་དུ་འདུག་ནས་བཟོད་པ་གསོལ་ཏེ་

Vol. 12 · folio 272a

ཉེས་པ་མཐོང་བའོ། །བཙུན་པ་སུ་གང་ལ་དགེ་འདུན་གྱི་ནང་དུ་ལན་གསུམ་དུ་བསྒོ་ཡང་སླར་མ་བཏང་བ་དེ་དག་ཐམས་ཅད་ནོངས་པར་འགྱུར་རམ། སུ་གང་ལ་ནོངས་པར་བྱུང་བ་དེ་དག་ཐམས་ཅད་ཀྱང་ལན་གསུམ་དུ་བསྒོ་བར་བགྱིའམ། སུ་གང་ཞིག་དགེ་

འདུན་གྱི་ནང་དུ་ལན་གསུམ་དུ་བསྒོ་ཡང་སླར་མ་བཏང་བ་དེ་དག་ཐམས་ཅད་ལ་ཉེས་པར་འགྱུར་རོ། །བཙུན་པ་ནོངས་པ་བྱུང་ཡང་དེ་དགེ་འདུན་གྱི་ནང་དུ་ལན་གསུམ་དུ་བསྒོ་མི་འཚལ་བར་འགྱུར་བ་མཆིས་སམ། ཨུ་པཱ་ལི་ཡོད་དེ། བསྒོ་བའི་རིགས་པ་ཞིག་བསྒོ་བར་འོས་

པ་མ་གཏོགས་པར་དེ་ལས་ཉེས་པ་གཞན་བྱུང་བའོ། བཙུན་པ་བཅོམ་ལྡན་འདས་ཀྱིས་ནི་ཆོས་གང་དང་ལྡན་པའི་དགེ་སློང་དེ་ལ་སྨ་དབབ་པའི་ལས་དང་སྤང་བའི་ལས་དང་། རྣམ་པར་དག་པའི་ལས་རྣམས་བྱའོ་ཞེས་གསུངས་ན། བཙུན་པ་དེ་སྟེ་དགེ་སློང་མ་ལ་ཡང་

དེ་ལྟ་བུའི་ཆོས་དང་ལྡན་པར་གྱུར་ན་དེ་དག་ལ་ཡང་ལས་དེ་རྣམས་བགྱིའམ། ཨུ་པཱ་ལི་བྱའོ། །བཙུན་པ་དེ་སྟེ་དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ཆོས་དེ་དག་དང་ལྡན་པར་གྱུར་ན། དེ་དག་ལ་ཡང་ལས་དེ་རྣམས་བགྱིའམ། ཨུ་པཱ་ལི་རྣམ་

པར་དག་པའི་ལས་མ་གཏོགས་པར་ལས་གཞན་རྣམས་ནི་བྱའོ།། །།མདོར་ན། སྨྱོན་པ་སེམས་འཁྲུགས་ན་བ་དང་། །འོན་གླེན་གཉིད་ལོག་ར་རོ་བ། །མྱོས་པ་སྙོམས་ཞུགས་འགྲོ་བ་མཚན། །མ་ནིང་དག་ལ་སོགས་པ་དང་། །བསླབ་པ་བྱིན་པ་ཐ་མའོ། །བཙུན་

པ་སྨྱོན་པ་ལ་ལས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་སྨྱོན་པ་ལ་སྡོམ་པ་བྱིན་པ་མ་གཏོགས་པའི་ལས་ལྷག་མ་རྣམས་ནི་དེ་སྟེ་སླར་དགེ་སློང་དུ་འདུ་ཤེས་ཡོད་ཅིང་ལས་འདི་ནི་བདག་ལ་བྱེད་དོ་བར་ཤེས་ན་ལས་བྱས་པ་ཞེས་བྱའོ། །སེམས་འཁྲུགས་པ་དང་། ནད་

ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་རྣམས་ཀྱང་དེ་བཞིན་ནོ། །བཙུན་པ་གཉིད་ལོག་པ་ཞིག་ལ་ལས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་དེ་སྟེ་ལུས་སམ་ངག་གིས་དམིགས་ནས་གསོལ་བ་དང་ལས་བྱ་བའི་ཚེ་གཉིད་ཀྱིས་ལོག་ན་

Vol. 12 · folio 272b

ལས་བྱས་པ་ཞེས་བྱའོ། །དེ་བཞིན་དུ་མྱོས་པ་དང་། ར་རོ་བ་དང་། སྙོམས་པར་ཞུགས་པ་རྣམས་ལ་ཡང་བརྗོད་པར་བྱའོ། །བཙུན་པ་འགྲོ་བ་གཞན་དུ་གནས་པ་ཞིག་ལ་ལས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་ལྷུང་བཟེད་ཁས་དབུབ་པ་མ་གཏོགས་ཏེ་ལས་

ལྷག་མ་རྣམས་ནི་བྱས་པ་ཞེས་བྱའོ། །བཙུན་པ་གང་ལ་ལས་བགྱི་བ་དེའི་མཚན་གྱུར་ན་ལས་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱའོ། །བཙུན་པ་མ་ནིང་ཞིག་ལ་ལས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱའོ། །དེ་བཞིན་

དུ་དགེ་སློང་མ་སུན་ཕྱུང་བ་ནས། སྔར་འཁྲུགས་པའི་བར་དུ་བརྗོད་པར་བྱའོ། །བཙུན་པ་ཟ་མ་ཞིག་ལ་ལས་བགྱིད་ན་ལས་བགྱིད་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱའོ། །བཙུན་པ་དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་པ་

སྩལ་བ་རྣམས་ལ་ལས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ།། །།མདོར་ན། སྨྱོན་པ་དང་ནི་སེམས་འཁྲུགས་དང་། །ན་བ་འོན་པ་གླེན་པ་དང་། །ཁྱིམ་པ་དག་ལ་སོགས་པ་དང་། །བསླབ་པ་

བྱིན་དང་མཚན་དེ་བཞིན། །བཙུན་པ་ལས་བགྱིད་པ་སྨྱོན་པ་ཞིག་གིས་ལས་བགྱིས་ན་ལས་བགྱིས་པ་ཞེས་བགྱིའམ་མ་བགྱིས་པ་ཞེས་བགྱི། ཨུ་པཱ་ལི་དེ་སྟེ་དགེ་སློང་དུ་འདུ་ཤེས་སླར་རྙེད་ཅིང་གསོལ་བ་བྱས་ཏེ་ལས་མ་ཉམས་ན་བྱས་པ་ཞེས་བྱའོ། །སེམས་འཁྲུགས་པ་

དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་རྣམས་ཀྱང་དེ་བཞིན་ནོ། །བཙུན་པ་ལས་བགྱིད་པ་འགྲོ་བ་གཞན་དུ་གནས་པ་ཞིག་གིས་ལས་བགྱིས་ན་ལས་བགྱིས་པ་ཞེས་བགྱིའམ། ཨུ་པཱ་ལི་དེ་བཞིན་ནོ། །དེ་བཞིན་དུ་ལས་བགྱིད་པ་ཁྱིམ་པ་དང་། ཟ་མ་དང་།

མ་ནིང་དང་། ལྷན་ཅིག་མི་གནས་པ་དང་། སོ་སོར་གནས་པ་ནས་སྔར་འཁྲུགས་པའི་བར་དུ་དེ་དག་གིས་ལས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་

Vol. 12 · folio 273a

རྣམས་ཀྱིས་ལས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །བཙུན་པ་ལས་བགྱིད་པས་ལས་བགྱིས་པ་ན་མཚན་འཕོས་ན་ལས་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱའོ། །

ཇི་ལྟར་ལས་བྱེད་པ་དེ་བཞིན་དུ་གྲངས་སུ་བསྐང་བས་ཀྱང་བརྗོད་པར་བྱའོ། །ལས་ཀྱི་དངོས་པོ་སྟེ་དམར་སྐྱའི་དངོས་པོ་རྫོགས་སྷོ།། །།མདོར་ན། ཆད་པ་རྣམ་པ་བདུན་དུ་བྱས། །གནས་གསུམ་དང་ནི་མུ་སྟེགས་ཅན། །བསྒྲགས་པ་དང་ནི་ཉེས་པ་དང་། །མཚན་

དང་སྦྱིན་པ་མ་ཡིན་པའོ། །བཙུན་པ་གང་ཟག་དེ་ཉིད་ཆད་པ་བགྱིད་པ་ལགས་ལ་དེ་ཉིད་ཆད་པ་ཁོར་བ་ཡང་ལགས། དེ་ཡིད་མགུ་བར་སྤྱོད་པ་ལགས་ལ་གང་ཟག་དེ་ཉིད་ཀྱིས་ཡིད་མགུ་བར་སྤྱོད་པ་ཡང་ལགས་པར་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་གང་

ཟག་ཡིད་མགུ་བར་སྤྱད་པ་ལས་དགེ་འདུན་གྱི་ལྷག་མའི་ཉེས་པ་བྱུང་སྟེ། དེ་དགེ་འདུན་ལ་ཡིད་མགུ་བར་བྱ་བ་གསོལ་ཏེ་དགེ་འདུན་གྱིས་དེ་ལ་ཡིད་མགུ་བར་བྱ་བ་བྱིན་ཏེ་དེ་ཡིད་མགུ་བར་བྱ་བ་སྤྱོད་པ་ན་དེ་ཡང་དགེ་འདུན་གྱི་ལྷག་མའི་ཉེས་པ་གཉིས་བྱུང་སྟེ། གཅིག་ནི་ཞག་གཅིག་

ཏུ་བཅབས་པ། གཅིག་ནི་ཞག་གཉིས་སུ་བཅབས་ནས་དེས་ཉེས་པ་དེ་དག་གི་ཕྱིར་དགེ་འདུན་ལས་ཆད་པར་བྱ་བར་གསོལ་བ་དང་། དེ་ལ་དགེ་འདུན་གྱིས་ཀྱང་ཆད་པར་བྱེད་པ་བྱིན་ནོ། །དེས་ཞག་གཅིག་ཏུ་ཆད་པ་བྱས་ཏེ། དེའི་ཉེས་པ་གཅིག་གི་ཆད་པ་ནི་བྱས་སོ། །

གཉིས་པའི་ཆད་པ་ནི་བྱེད། གསུམ་དུ་ནི་ཡིད་མགུ་བར་བྱ་བ་སྤྱོད། བཞི་པ་ནི་ཡིད་མགུ་བར་སྤྱད་པའོ། །བཙུན་པ་ཆད་པ་བགྱིད་པའི་རིགས་པ་ཞིག་ལ་ཡིད་མགུ་བ་བགྱིད་པ་སྩལ་ན་སྩལ་བ་ཞེས་བགྱིའམ། ཨུ་པཱ་ལི་བྱིན་པ་ཞེས་བྱ་སྟེ། དགེ་འདུན་ནི་

འདས་པ་དང་བཅས་པའོ། །བཙུན་པ་ཆད་པ་བགྱིད་པའི་རིགས་པའི་གང་ཟག་གཅིག་ཕྱུང་ན་ཕྱུང་བ་ཞེས་བགྱིའམ། ཨུ་པཱ་ལི་ཕྱུང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །བཙུན་པ་ཡིད་མགུ་བ་བགྱིད་པར་རིགས་པའི་གང་ཟག་ལ་ཆད་པ་

Vol. 12 · folio 273b

བགྱིད་པ་སྩལ་ན་སྩལ་བ་ཞེས་བགྱིའམ། ཨུ་པཱ་ལི་མ་ཡིན་ཏེ། དགེ་འདུན་ལ་ཡང་འདས་པ་དང་བཅས་པའོ། །བཙུན་པ་ཡིད་མགུ་བ་བགྱིད་པར་རིགས་པའི་གང་ཟག་གཅིག་ཕྱུང་ན་ཕྱུང་བ་ཞེས་བགྱིའམ། ཨུ་པཱ་ལི་ཕྱུང་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་

པའོ། །བཙུན་པ་དབྱུང་བར་རིགས་པའི་གང་ཟག་ལ་ཆད་པ་བགྱིད་དུ་སྩལ་ན་སྩལ་བ་ཞེས་བགྱིའམ། ཨུ་པཱ་ལི་མ་ཡིན་ཏེ། དགེ་འདུན་ལ་ཡང་འདས་པ་དང་བཅས་པའོ། །བཙུན་པ་དབྱུང་བར་རིགས་པའི་གང་ཟག་གཅིག་ཡིད་མགུ་བར་བགྱིད་པ་སྩལ་ན་སྩལ་བ་ཞེས་

བགྱིའམ། ཨུ་པཱ་ལི་མ་ཡིན་ཏེ། དགེ་འདུན་ཡང་འདས་པ་དང་བཅས་པའོ། །བཙུན་པ་ལས་བགྱིད་པ་ཕྱོགས་གཅིག་ཏུ་མཆིས་ལ་གནས་བཞིར་ཆད་པ་བགྱིད་པ་དང་། ཡིད་མགུ་བར་བགྱིད་པ་སྩོལ་ཅིང་དབྱུང་བའི་ལས་ཀྱང་བགྱིད་པར་རུང་ངམ། ཨུ་པཱ་ལི་དེ་འདི་ལྟར་ལས་བྱེད་

པའི་དགེ་སློང་དེ་གནས་བཞིའི་མཚམས་སུ་ཤིང་ངམ། དབྱིག་པའམ། རེ་ལྡེས་མནན་ཏེ་ལས་བྱེད་ན་རུང་ངོ་། །བཙུན་པ་ལས་བགྱིད་པའི་གནས་བཞིའི་མཚམས་སུ་ཤིང་ངམ། དབྱིག་པའམ། རེ་ལྡེས་མནན་ཏེ་གསོལ་བ་གཅིག་དང་། ལས་གཅིག་གིས་གང་ཟག་བཞི་ལ་

ཆད་པ་བགྱིད་པ་དང་། ཡིད་མགུ་བར་བགྱིད་པ་དང་། དབྱུང་བའི་ལས་རྣམས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་ཅིའི་ཕྱིར་ཞེ་ན། ཨུ་པཱ་ལི་མཚམས་གཅིག་པ་ལ་མང་པོས་མང་པོ་ལ་ལས་བྱར་མི་རུང་ངོ་། །བཙུན་པ་དགེ་སློང་ཞིག་

གིས་མཚམས་གཅིག་ན་གནས་ཤིང་ལྷན་ཅིག་ཏུ་འཁོད་པའི་དགེ་སློང་དེ་དག་མ་མཆིས་བཞིན་དུ་ཆད་པ་བགྱིད་པ་དང་། ཡིད་མགུ་བར་བགྱིད་པ་དང་། དབྱུང་བའི་ལས་བགྱིད་ཀྱང་ནོངས་པར་མི་འགྱུར་ལ་དེས་དགེ་འདུན་ལ་ཡང་མི་མཐུན་པར་མི་འགྱུར་བ་མཆིས་སམ། ཨུ་

པཱ་ལི་ཡོད་དེ། དད་པ་རྗེས་སུ་ཕུལ་བའོ། །བཙུན་པ་ལས་བགྱིད་པའི་དགེ་སློང་ཕྱོགས་གཅིག་ཏུ་མཆིས་ནས་གང་ཟག་བཞི་ལ་ཆད་པ་བགྱིད་པ་དང་ཡིད་མགུ་བར་བགྱིད་པའི་ལས་བགྱིད་ན་ལས་ཀྱང་བགྱིས་པར་འགྱུར་ལ། དགེ་སློང་དེ་དག་ཀྱང་འདས་པ་དང་བཅས་པར་མི་

Vol. 12 · folio 274a

འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་ལས་བྱེད་པའི་དགེ་སློང་དེས་མཚམས་མནན་མཚམས་བཟུང་སྟེ་མཚམས་སུ་འགྲེང་ངམ་འདུག་ཀྱང་རུང་གཉིས་ནི་མཚམས་ཀྱི་ནང་དུ་བཞག་གཉིས་ནི་མཚམས་ཀྱི་ཕྱི་རོལ་དུ་བཞག་སྟེ་བྱེད་པའོ། །བཙུན་པ་

བཅོམ་ལྡན་འདས་ཀྱིས་ནི་ཆད་པ་བགྱིད་པ་གཉིས་ཐོག་གཅིག་པའི་གནས་སུ་མ་གནས་ཤིག་ཅེས་གསུངས་ན། བཙུན་པ་ཆད་པ་བགྱིད་པ་གཉིས་ཐོག་གཅིག་པའི་གནས་སུ་གནས་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། སྔོན་མུ་སྟེགས་ཅན་དང་

ལྷན་ཅིག་གནས་ནའོ། །བཙུན་པ་ནོངས་པ་གང་ཡང་མ་བྱུང་བ་དེ་ཡང་ཆད་པ་བགྱིད་དུ་མཆིས་སམ། ཨུ་པཱ་ལི་ཡོད་དེ། སྔོན་མུ་སྟེགས་ཅན་ནོ། །བཙུན་པ་དགེ་འདུན་གྱི་ལྷག་མ་མ་བྱུང་བ་ཞིག་ལ་ཆད་པ་བགྱིད་དུ་སྩལ་ཀྱང་ནོངས་པར་མི་འགྱུར་བ་མཆིས་སམ།

ཨུ་པཱ་ལི་ཡོད་དེ། མུ་སྟེགས་ཅན་ལའོ། །བཙུན་པ་དགེ་སློང་ཞིག་གིས་ནོངས་པའི་མིང་དང་རིགས་མ་བསྒྲགས་ན་བཅབས་པ་ཞེས་བགྱིའམ། ཨུ་པཱ་ལི་བཅབས་པ་ཞེས་བྱའོ། །བཙུན་པ་དེ་སྟེ་རིགས་བསྒྲགས་ལ་མིང་མ་བསྒྲགས་ན་བཅབས་པ་ཞེས་བགྱིའམ།

ཨུ་པཱ་ལི་མ་ཡིན་ནོ། །བཙུན་པ་དགེ་འདུན་གྱི་ལྷག་མ་དུ་ལས་འབྱུང་། ཨུ་པཱ་ལི་བཅུ་གསུམ་ལས་སོ། །བཙུན་པ་དགེ་སློང་ཞིག་གིས་དགེ་འདུན་གྱི་ལྷག་མའི་ནོངས་པ་ཞིག་བྱུང་ལ་མ་བཤགས་ཤིང་སླར་མ་བགྱིས་བཞིན་བྱང་བར་འགྱུར་བ་མཆིས་སམ། ཨུ་

པཱ་ལི་ཡོད་དེ། འདི་ལྟར་དགེ་སློང་དེ་ཐུན་མོང་མ་ཡིན་པའི་དགེ་འདུན་གྱི་ལྷག་མ་ཞིག་བྱུང་བར་གྱུར་ལ། དེའི་མཚན་འཕོས་ཏེ་དགེ་སློང་མར་གྱུར་ན། དེ་ལ་དགེ་འདུན་གྱི་ལྷག་མ་ལས་ནི་བྱུང་གི་ཉེས་བྱས་ཀྱི་ལྟུང་བ་ནི་བཤགས་པར་བྱའོ། །བཙུན་པ་དགེ་སློང་

མ་ཞིག་གིས་དགེ་འདུན་གྱི་ལྷག་མའི་ནོངས་པ་ཞིག་བྱུང་ལ་མ་བཤགས་ཤིང་སླར་མ་བགྱིས་བཞིན་བྱང་བར་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་དགེ་སློང་མ་དེ་ཐུན་མོང་མ་ཡིན་པའི་དགེ་འདུན་གྱི་ལྷག་མའི་ཉེས་པ་ཞིག་བྱུང་བར་གྱུར་ལ། དེའི་མཚན་

Vol. 12 · folio 274b

འཕོས་ཏེ་དགེ་སློང་ཕར་གྱུར་ན་དགེ་འདུན་གྱི་ལྷག་མ་ལས་ནི་བྱུང་གི་ཉེས་བྱས་ཀྱི་ལྟུང་བ་ནི་བཤགས་པར་བྱའོ། །བཙུན་པ་དགེ་འདུན་གྱི་ལྷག་མའི་ནོངས་པ་ལས་བྱུང་བཞིན་སླར་ཡང་ནོངས་པ་དེ་བཤགས་པར་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་ཡང་དགེ་སློང་

དེས་ཐུན་མོང་མ་ཡིན་པའི་དགེ་འདུན་གྱི་ལྷག་མའི་ཉེས་པ་བྱུང་བར་གྱུར་པ་དང་དེའི་མཚན་འཕོས་ཏེ་དགེ་སློང་མར་གྱུར་ནས་དགེ་འདུན་གྱི་ལྷག་མ་བྱུང་བ་དང་། དེ་སླར་ཡང་མཚན་འཕོས་ཏེ་དགེ་སློང་དུ་གྱུར་ན་ཉེས་པ་དེ་བཤགས་དགོས་སོ། །བཙུན་པ་དགེ་སློང་ཞིག་ཆད་

པ་སྤྱོད་པ་ལས་དེ་མཚན་འཕོས་ཏེ་དགེ་སློང་མར་གྱུར་ན་ཆད་པ་བྲལ་བ་ཞེས་བགྱིའམ། ཨུ་པཱ་ལི་མ་ཡིན་ཏེ། དགེ་སློང་མ་ལ་ཆད་པ་བྱའོ། །བཙུན་པ་དགེ་སློང་དེ་ཡིད་མགུ་བར་བགྱི་བ་སྤྱོད་པ་ན་མཚན་འཕོས་ཏེ་དགེ་སློང་མར་གྱུར་ན་ཆད་པ་བྲལ་བ་ཞེས་བགྱིའམ། ཨུ་པཱ་

ལི་མ་ཡིན་ཏེ། ཇི་ཙམ་དུ་སྤྱད་པ་དེ་གྲངས་ལ་དགེ་འདུན་སྡེ་གཉིས་ལ་ཟླ་ཕྱེད་དུ་སྐོངས་ཤིག །བཙུན་པ་དགེ་སློང་མ་ཞིག་ཆད་པ་སྤྱོད་པ་ན་མཚན་འཕོས་ཏེ་དགེ་སློང་ཕར་གྱུར་ན་ཆད་པ་བྲལ་བ་ཞེས་བགྱིའམ། ཨུ་པཱ་ལི་མ་ཡིན་ཏེ། དགེ་སློང་ཕ་ལ་ཆད་པ་བྱོས་ཤིག །

བཙུན་པ་དགེ་སློང་མ་ཞིག་ཡིད་མགུ་བར་བགྱི་བ་སྤྱོད་པ་ན་མཚན་འཕོས་ཏེ་དགེ་སློང་ཕར་གྱུར་ན་ཆད་པ་བྲལ་བ་ཞེས་བགྱིའམ། ཨུ་པཱ་ལི་མ་ཡིན་ཏེ། ཞག་དྲུག་ཏུ་གྲོངས་ལ་ཕྱུང་ཤིག །བཙུན་པ་བསླབ་པ་སྩལ་བས་དགེ་སློང་ལ་ཆད་པར་བགྱི་བ་དང་། ཡིད་མགུ་བར་

བགྱི་བ་སྩལ་བར་རུང་ངམ། ཨུ་པཱ་ལི་མི་རུང་ངོ་། །བཙུན་པ་བསླབ་པ་སྩལ་བ་ལ་ཆད་པར་བགྱི་བ་དང་། ཡིད་མགུ་བར་བགྱི་བ་སྩལ་བར་རུང་ངམ། ཨུ་པཱ་ལི་མི་རུང་ངོ་།། །།མདོར་ན། ཉེས་དང་དེ་བཞིན་མཚན་མོ་དང་། །སྐད་རྣམས་དང་ཡང་བཞི་པ་དང་། །

ལུས་དང་དབེན་དང་དེ་བཞིན་སྔགས། །བཞི་པ་གཉིས་དང་སྦྱངས་པའོ། །བཙུན་པ་ནོངས་པ་དང་བཅས་པས་དགེ་སློང་ལ་ཆད་པ་བགྱི་བ་དང་ཡིད་མགུ་བར་བགྱི་བ་སྩལ་བར་རུང་ངམ། ཨུ་པཱ་ལི་མི་རུང་ངོ་། བཙུན་པ་ནོངས་པ་དང་བཅས་པ་ལས་ཆད་པར་

Vol. 12 · folio 275a

བགྱི་བའམ། ཡིད་མགུ་བར་བགྱི་བ་སྤྱད་དུ་རུང་ངམ། ཨུ་པཱ་ལི་མི་རུང་ངོ་། །དེ་བཞིན་དུ་གྲངས་སུ་སྐོང་བ་ཡང་བརྗོད་པར་བྱའོ། །བཙུན་པ་ཆད་པ་བགྱིད་པ་གཞི་གནས་གཅིག་ན་ཆད་པ་བགྱིད་དམ་ཡིད་མགུ་བར་བགྱི་བ་སྤྱོད་དུ་རུང་ངམ། ཨུ་པཱ་ལི་

མི་རུང་སྟེ། མང་པོས་མང་པོ་ལ་ཆད་པར་བྱ་བའམ། ཡིད་མགུ་བར་བྱ་བ་མི་སྤྱོད་དོ། །བཙུན་པ་བཅོམ་ལྡན་འདས་ཀྱིས་ནི་ཆད་པ་བྱེད་པ་གནས་གཞན་དུ་མ་གནས་ཤིག་ཅེས་གསུངས་ན། བཙུན་པ་དེ་སྟེ་གནས་གཞན་དུ་གནས་ན་ཞག་བགྲང་བར་བགྱིའམ། ཨུ་པཱ་ལི་མ་

ཡིན་ནོ། །བཙུན་པ་འཕགས་པ་ཞིག་གིས་འཕགས་པའི་སྐད་དུ་དགེ་སློང་ལ་ནོངས་པ་སྨྲས་པ་དང་། དགེ་སློང་དེས་ཀྱང་འཕགས་པའི་སྐད་མ་འཚལ་ན་སྨྲས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཅབས་པར་འགྱུར་རམ། ཨུ་པཱ་ལི་མི་འགྱུར་རོ། །བཙུན་པ་འཕགས་

པ་ཞིག་གིས་མཐའ་འཁོབ་པའི་སྐད་དུ་དགེ་སློང་ལ་ནོངས་པ་སྨྲས་པ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན་སྨྲས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་མཐའ་འཁོབ་པ་ཞིག་གིས་མཐའ་འཁོབ་པའི་སྐད་དུ་དགེ་སློང་ལ་ནོངས་པ་སྨྲས་པ་དང་།

དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན་སྨྲས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཅབས་པར་འགྱུར་རམ། ཨུ་པཱ་ལི་མི་འགྱུར་རོ། །བཙུན་པ་མཐའ་འཁོབ་པ་ཞིག་གིས་འཕགས་པའི་སྐད་དུ་དགེ་སློང་ལ་ནོངས་པ་སྨྲས་པ་དང་། དགེ་སློང་

དེས་ཀྱང་འཕགས་པའི་སྐད་མ་འཚལ་ན་སྨྲས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཅབས་པར་འགྱུར་རམ། ཨུ་པཱ་ལི་མི་འགྱུར་རོ། །བཙུན་པ་ནོངས་པ་ལུས་ཀྱིས་དམིགས་ཤིང་སྟོན་ན་སྨྲས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དབེན་པ་ལ་མི་

དབེན་པར་འདུ་ཤེས་ནས་སྨྲས་ན་སྨྲས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཅབས་པར་འགྱུར་རམ། ཨུ་པཱ་ལི་མི་འགྱུར་རོ། །བཙུན་པ་དགེ་སློང་ཞིག་གིས་སྨན་ནམ་སྔགས་ཀྱིས་བདག་མི་སྣང་བར་བགྱིས་ཏེ་ནོངས་པ་སྨྲས་ན་སྨྲས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །

Vol. 12 · folio 275b

བཅབས་པར་འགྱུར་རམ། ཨུ་པཱ་ལི་མི་འགྱུར་རོ། །བཙུན་པ་ས་ལ་གནས་པ་དག་གིས་ནམ་མཁའ་ལ་གནས་པ་རྣམས་ལ་ཆད་པ་བགྱིའམ་ཡིད་མགུ་བར་བགྱིད་པའམ། དབྱུང་བའི་ལས་ཀྱང་རུང་བགྱིས་ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་ནམ་

མཁའ་ལ་གནས་པ་དག་གིས་ས་ལ་གནས་པ་རྣམས་ལ་ཆད་པ་བགྱི་བའམ། ཡིད་མགུ་བར་བགྱིའམ། དབྱུང་བའི་ལས་ཀྱང་རུང་བགྱིད་ན་བགྱིས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་ས་ལ་གནས་པ་དག་གིས་ནམ་མཁའ་ལ་གནས་པ་རྣམས་ཀྱི་

གྲངས་སུ་བསྐངས་ཏེ་ཆད་པར་བགྱི་བའམ་ཡིད་མགུ་བར་བགྱི་བའམ། དབྱུང་བའི་ལས་ཀྱང་རུང་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་ནམ་མཁའ་ལ་གནས་པ་དག་གིས་ས་ལ་གནས་པ་རྣམས་ཀྱི་གྲངས་སུ་བསྐངས་ཏེ་ཆད་པ་

བགྱི་བའམ། ཡིད་མགུ་བར་བགྱིད་པའམ། དབྱུང་བའི་ལས་ཀྱང་རུང་བགྱིས་ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་བཞིན་དུ་མཚམས་ཀྱི་ནང་ན་གནས་པ་དང་མཚམས་ཀྱི་ཕྱི་རོལ་ན་གནས་པ་རྣམས་སུ་ལྷན་ཅིག་རྣམ་པ་བཞིར་བྱོས་ཤིག། །།

འདུལ་བ་གཞུང་དམ་པ། བམ་པོ་ཉི་ཤུ་པ། སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགེ་འདུན་གྱི་ལྷག་མའི་ཆོས་བཅུ་གསུམ་པོ་འདི་རྣམས་ལས་ཁུ་བ་ལས་བྱུང་བ་ཞག་གཅིག་བཅབས་པ་ནས། ཚིག་བཀའ་བློ་མི་བདེ་བ་ལས་བྱུང་བ་ཞག་

བཅུ་གསུམ་བཅབས་པའི་བར་དུ་སྟེ། བཙུན་པ་ནོངས་པ་བཅུ་གསུམ་པོ་དེ་དག་དུས་ཐ་དད་པ་མི་འདྲ་བར་བཅབས་པའི་རྣམས་ལ་གསོལ་བ་གཅིག་དང་། ལས་གཅིག་གིས་ཆད་པ་བགྱིད་དུ་སྩལ་བར་རུང་ངམ། ཨུ་པཱ་ལི་རུང་ངོ་། །བཙུན་པ་ཆད་པ་ཁོར་ནས་ཡིད་མགུ་བར་བགྱིད་

དུ་སྩལ་བར་རུང་ངམ། ཨུ་པཱ་ལི་རུང་ངོ་། །ཡིད་མགུ་བར་བགྱི་བ་སྤྱད་ལགས་པ་ལས་དབྱུང་བ་སྩལ་དུ་རུང་ངམ། ཨུ་པཱ་ལི་རུང་ངོ་། །བཙུན་པ་དགེ་འདུན་ལྷག་མ་ནོངས་པ་མང་པོ་མི་འདྲ་བ་ལས་བྱུང་བའི་རྣམས་གསོལ་བ་གཅིག་དང་ལས་གཅིག་གིས་དུས་གཅིག་ཏུ་གཞན་

Vol. 12 · folio 276a

ལ་ཆད་པ་བགྱིད་པ་དང་། གཞན་ལ་ཡིད་མགུ་བར་བགྱི་བ་དང་། གཞན་ལ་དབྱུང་བ་སྩལ་དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་དགེ་འདུན་གྱི་ལྷག་མ་ནོངས་པ་མང་པོ་མི་འདྲ་བ་ལས་བྱུང་བའི་རྣམས་གསོལ་བ་གཅིག་དང་། ལས་གཅིག་གིས་དུས་

གཅིག་ཏུ་གང་ཟག་གཅིག་ལ་ཆད་པ་དང་ཡིད་མགུ་བར་བགྱི་བ་དང་དབྱུང་བ་རྣམས་སྩལ་ཏུ་རུང་ངམ། ཨུ་པཱ་ལི་མི་རུང་ངོ་།། །།མདོར་ན། སྨྱོན་པ་སེམས་འཁྲུགས་ནད་ཀྱིས་གཟིར། །འོན་གླེན་གཉིད་ལོག་ར་རོ་བ། །མྱོས་དང་སྙོམས་ཞུགས་འགྲོ་བ་མཚན། །ཁྱིམ་

པ་དག་ལ་སོགས་པ་དང་། །བསླབ་པ་བྱིན་པ་ཐ་མའོ། །བཙུན་པ་སྨྱོན་པ་ཞིག་གིས་ནོངས་པ་སྨྲས་ན་སྨྲས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཅབས་པར་འགྱུར་རམ། ཨུ་པཱ་ལི་མི་འགྱུར་རོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་

རྣམས་སོ། །བཙུན་པ་སྨྱོན་པ་ཞིག་ལ་ནོངས་པ་སྨྲས་ན་སྨྲས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཅབས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། འོན་པ་དང་། ལྐུགས་པ་

དང་། གཉིད་ལོག་པ་དང་། མྱོས་པ་དང་། ར་རོ་བ་དང་། སྙོམས་པར་ཞུགས་པ་རྣམས་ལ་སྨྲས་ན་སྨྲས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཅབས་པར་འགྱུར་རམ། ཨུ་པཱ་ལི་མི་འགྱུར་རོ། །བཙུན་པ་འགྲོ་བ་གཞན་དུ་གནས་པ་ཞིག་ལ་ནོངས་པ་སྨྲས་ན་སྨྲས་

པ་ཞེས་བགྱིའམ། ཨུ་པཱ་ལི་མ་སྨྲས་པ་ཞེས་བྱའོ། །བཅབས་པར་འགྱུར་རམ། ཨུ་པཱ་ལི་འགྱུར་རོ། །དེ་བཞིན་དུ་མ་ནིང་དང་། དགེ་སློང་མ་སུན་ཕྱུང་བ་ནས། སྔར་འཁྲུགས་པའི་བར་དུ་དེ་དག་ལ་ནོངས་པ་སྨྲས་ན་སྨྲས་པ་ཞེས་བགྱིའམ། ཨུ་པཱ་ལི་སྨྲས་པ་ཞེས་

བྱའོ། །བཅབས་པར་འགྱུར་རམ། ཨུ་པཱ་ལི་མི་འགྱུར་རོ། །བཙུན་པ་དགེ་སློང་གིས་ཟ་མ་ཞིག་ལ་ནོངས་པ་སྨྲས་ན་སྨྲས་པ་ཞེས་བགྱིའམ། ཨུ་པཱ་ལི་སྨྲས་པ་ཞེས་བྱའོ། །བཅབས་པར་འགྱུར་རམ། ཨུ་པཱ་ལི་མི་འགྱུར་རོ། །དེ་བཞིན་དུ་དགེ་འདུན་གྱི་དབྱེན་བགྱིས་པ་

Vol. 12 · folio 276b

དང་། མི་གནས་པ་དང་། སོ་སོར་གནས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ལ་ནོངས་པ་སྨྲས་ན་སྨྲས་པ་ཞེས་བགྱིའམ། ཨུ་པཱ་ལི་སྨྲས་པ་ཞེས་བྱའོ། །བཅབས་པར་འགྱུར་རམ། ཨུ་པཱ་ལི་མི་འགྱུར་རོ། །བཙུན་པ་དགེ་སློང་གིས་ནོངས་པ་སྨྲ་བ་

ན་མཚན་འཕོས་ན་སྨྲས་པ་ཞེས་བགྱིའམ། ཨུ་པཱ་ལི་སྨྲས་པ་ཞེས་བྱའོ། །བཅབས་པར་འགྱུར་རམ། ཨུ་པཱ་ལི་མ་ཡིན་ནོ། །བཙུན་པ་དགེ་སློང་གིས་དགེ་འདུན་གྱི་ལྷག་མའི་ནོངས་པ་ཞིག་བྱུང་ན་ནམ་འཚོའི་བར་དུ་དབྱུང་དུ་མི་རུང་བ་མཆིས་སམ། ཨུ་པཱ་ལི་ཡོད་དེ། འདི་

ལྟར་དགེ་སློང་གིས་ཕས་ཕམ་པ་བཞིའི་ཉེས་པ་ལས་གང་ཡང་རུང་སྟེ། འདས་པ་དེའི་འོག་ཏུ་དགེ་འདུན་གྱི་ལྷག་མའི་ཉེས་པ་ཞིག་བྱུང་བའོ།། །།མདོར་ན། སྨྱོན་པ་སེམས་འཁྲུགས་ན་བ་དང་། །འོན་གླེན་གཉིད་ལོག་ར་རོ་བ། །མྱོས་དང་སྙོམས་ཞུགས་འགྲོ་བ་མཚན། །མ་ནིང་དག་ལ་

སོགས་པ་དང་། །བསླབ་པ་བྱིན་པ་ཐ་མའོ། །བཙུན་པ་སྨྱོན་པ་ཞིག་ལ་ཆད་པ་དང་། ཡིད་མགུ་བར་བགྱི་བ་དང་། དབྱུང་བའི་ལས་རྣམས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་དེ་སྟེ་སླར་དགེ་སློང་དུ་འདུ་ཤེས་པ་དེ་ཉིད་དམ་ལུས་དང་ངག་གིས་ཀྱང་དམིགས་ཤིང་

ལས་འདི་ནི་བདག་ལ་བྱེད་པར་ཤེས་ན་ལས་བྱས་པ་ཞེས་བྱའོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་རྣམས་ལ་ཡང་བརྗོད་པར་བྱའོ། །བཙུན་པ་གཉིད་ལོག་པ་དང་། ར་རོ་བ་ཞིག་ལ་ཆད་པ་དང་། ཡིད་

མགུ་བར་བགྱི་བ་དང་། དབྱུང་བའི་ལས་རྣམས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་དེ་སྟེ་ལུས་སམ་ངག་གིས་དམིགས་པ་ལས་གསོལ་བ་བྱེད་པའི་ཚེ་གཉིད་ཀྱིས་ལོག་ནའང་བྱས་པ་ཞེས་བྱའོ། །དེ་བཞིན་དུ་ར་རོ་བ་དང་། མྱོས་པ་དང་། སྙོམས་པར་ཞུགས་

པ་རྣམས་ལ་ཡང་བརྗོད་པར་བྱའོ། །བཙུན་པ་འགྲོ་བ་གཞན་དུ་གནས་པའི་དགེ་སློང་ཞིག་ལ་ཆད་པ་དང་། ཡིད་མགུ་བར་བགྱི་བ་དང་། དབྱུང་བ་ཡང་རུང་ལས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་བཞིན་དུ་མ་ནིང་དང་། དགེ་སློང་མ་སུན་

Vol. 12 · folio 277a

ཕྱུང་བ་དང་། མི་གནས་པ་དང་། སོ་སོར་གནས་པ་ནས། སྔར་འཁྲུགས་པའི་བར་དུ་བརྗོད་པར་བྱའོ། །བཙུན་པ་དགེ་སློང་གིས་ཟ་མ་ཞིག་ལ་ཆད་པ་དང་། ཡིད་མགུ་བར་བགྱི་བའམ། དབྱུང་བ་ཡང་རུང་ལས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་

ལི་མ་བྱས་པ་ཞེས་བྱའོ། །བཙུན་པ་དགེ་འདུན་གྱི་དབྱེན་བགྱིས་པའི་དགེ་སློང་དང་། ཉེ་བར་ཕྱོགས་པ་དང་། བསླབ་པ་སྩལ་བ་ཞིག་ལ་ཆད་པ་དང་། ཡིད་མགུ་བར་བགྱི་བའམ། དབྱུང་བ་ཡང་རུང་ལས་བགྱིད་ན་ལས་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱ་སྟེ།

དགེ་འདུན་དག་ཀྱང་འདས་པ་དང་བཅས་པའོ། །གང་ཟག་གི་དངོས་པོ་དང་། ཆད་པའི་དངོས་པོ་རྫོགས་སྷོ།། །།མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པ་སེམས་འཁྲུགས་ན་བ་དང་། །འོན་པ་དག་དང་གླེན་པ་

དང་། །མ་ནིང་དག་ལ་སོགས་པ་དང་། །བསླབ་པ་བྱིན་པ་ཐ་མའོ། །བཙུན་པ་དགེ་སློང་ཞིག་གིས་ཕྲིན་གྱིས་གསོ་སྦྱོང་བཀག་ན་བཀག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་

བརྒྱུད་དེ་གསོ་སྦྱོང་བཀག་ན་གསོ་སྦྱོང་བཀག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་དང་། མ་ནིང་དང་། དགེ་སློང་མ་སུན་ཕྱུང་བ་དང་། ཕ་དང་། མ་དང་། དགྲ་བཅོམ་པ་

བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། མི་གནས་པ་དང་། སོ་སོར་གནས་པ་དང་། ཉེ་བར་ཕྱོགས་པ་དང་། སྔོན་ཉེས་པ་བྱུང་བ་དང་། སྔར་འཁྲུགས་པ་

རྣམས་ཀྱང་དེ་བཞིན་ནོ། །བཙུན་པ་བསླབ་པ་སྩལ་བ་ཞིག་གིས་གསོ་སྦྱོང་བཀག་ན་བཀག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་ཟ་མ་ཞིག་གིས་གསོ་སྦྱོང་བཀག་ན་གསོ་སྦྱོང་བཀག་པ་ཞེས་བགྱིའམ། ཨུ་པཱ་ལི་མ་ཡིན་ནོ།། །།མདོར་ན། སྨྱོན་པར་གྱུར་དང་

Vol. 12 · folio 277b

སེམས་འཁྲུགས་དང་། །ནད་ཀྱིས་གཟིར་དང་འོན་གླེན་པ། །གཉིད་ལོག་ར་རོ་མྱོས་པ་དང་། །སྙོམས་པར་ཞུགས་དང་འགྲོ་བ་མཚན། །མ་ནིང་དག་ལ་སོགས་པ་དང་། །བསླབ་པ་བྱིན་པ་ཐ་མའོ། །བཙུན་པ་སྨྱོན་པ་ཞིག་ལ་གསོ་སྦྱོང་བཀག་ན་གསོ་སྦྱོང་བཀག་པ་ཞེས་བགྱིའམ།

ཨུ་པཱ་ལི་མ་ཡིན་ནོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་དང་། གཉིད་ལོག་པ་དང་། ར་རོ་བ་དང་། མྱོས་པ་དང་། སྙོམས་པར་ཞུགས་པ་ལའང་བརྗོད་པར་བྱའོ། །བཙུན་པ་འགྲོ་བ་གཞན་དུ་གནས་

པ་ཞིག་ལ་གསོ་སྦྱོང་བཀག་ན་གསོ་སྦྱོང་བཀག་པ་ཞེས་བགྱིའམ། ཨུ་པཱ་ལི་བཀག་པ་ཞེས་བྱའོ། །བཙུན་པ་དེ་བཞིན་དུ་མ་ནིང་ནས། བསླབ་པ་སྩལ་བ་རྣམས་ཀྱི་བར་དུ་གསོ་སྦྱོང་བཀག་ན་གསོ་སྦྱོང་བཀག་པ་ཞེས་བགྱིའམ། ཨུ་པཱ་ལི་བཀག་པ་ཞེས་བྱའོ། །བཙུན་པ་ཟ་

མ་ཞིག་ལ་གསོ་སྦྱོང་བཀག་ན་གསོ་སྦྱོང་བཀག་པ་ཞེས་བགྱིའམ། ཨུ་པཱ་ལི་བཀག་པ་ཞེས་བྱའོ།། །།མདོར་ན། སྐད་དང་ལུས་དང་དབེན་དང་སྔགས། །མིག་དང་རྣ་བ་དེ་བཞིན་ཏེ། །མཚམས་དང་ས་དང་དེ་བཞིན་གནས། །གསོ་སྦྱོང་ཡིན་ཏེ་ཐ་མའོ། །བཙུན་པ་འཕགས་

པ་ཞིག་གིས་འཕགས་པའི་སྐད་དུ་གསོ་སྦྱོང་བཀག་པ་དང་། དགེ་སློང་དེས་ཀྱང་འཕགས་པའི་སྐད་མ་འཚལ་ན་གསོ་སྦྱོང་བཀག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་བཞིན་དུ་རྣམ་པ་བཞིར་རྒྱས་པར་བྱའོ། །བཙུན་པ་དགེ་སློང་ཞིག་གིས་ལུས་ཀྱི་དམིགས་པས་གསོ་སྦྱོང་

བཀག་ན་གསོ་སྦྱོང་བཀག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དབེན་པ་ལ་མི་དབེན་པར་འདུ་ཤེས་ཏེ་གསོ་སྦྱོང་བཀག་ན་གསོ་སྦྱོང་བཀག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དགེ་སློང་ཞིག་གིས་སྔགས་སམ་སྨན་གྱིས་བདག་མི་སྣང་བར་བགྱིས་ཏེ་

གསོ་སྦྱོང་བཀག་ན་གསོ་སྦྱོང་བཀག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་ལྷའི་མིག་གིས་མཐོང་སྟེ་གསོ་སྦྱོང་བཀག་ན་གསོ་སྦྱོང་བཀག་པ་ཞེས་བགྱིའམ། ཨུ་པཱ་ལི་མ་བཀག་པ་ཞེས་བྱ་སྟེ། དགེ་འདུན་ཡང་འདས་པ་དང་བཅས་པའོ། །བཙུན་པ་ལྷའི་རྣ་

Vol. 12 · folio 278a

བས་ཐོས་ཏེ་གསོ་སྦྱོང་བཀག་ན་གསོ་སྦྱོང་བཀག་པ་ཞེས་བགྱིའམ། ཨུ་པཱ་ལི་མ་ཡིན་ཏེ། དགེ་འདུན་ཡང་འདས་པ་དང་བཅས་པའོ། །བཙུན་པ་མཚམས་ཀྱི་ནང་ན་མཆིས་པས་མཚམས་ཀྱི་སླད་རོལ་ན་མཆིས་པ་རྣམས་ལ་གསོ་སྦྱོང་བཀག་ན་གསོ་སྦྱོང་བཀག་

པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་མཚམས་ཀྱི་སླད་རོལ་ན་མཆིས་པ་ཞིག་གིས་མཚམས་ཀྱི་ནང་ན་མཆིས་པ་རྣམས་ལ་གསོ་སྦྱོང་བཀག་ན་གསོ་སྦྱོང་བཀག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་ས་ལ་གནས་པ་ཞིག་གིས་ནམ་མཁའ་

ལ་གནས་པ་རྣམས་ཀྱི་གསོ་སྦྱོང་བཀག་ན་གསོ་སྦྱོང་བཀག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་ནམ་མཁའ་ལ་གནས་པ་ཞིག་གིས་ས་ལ་གནས་པ་རྣམས་ཀྱི་གསོ་སྦྱོང་བཀག་ན་གསོ་སྦྱོང་བཀག་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དགེ་

སློང་ཞིག་ཕྱོགས་གཅིག་ཏུ་མཆིས་ནས་གནས་བཞིར་གང་ཟག་བཞི་ལ་གསོ་སྦྱོང་བཀག་ན་གསོ་སྦྱོང་བཀག་པར་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་དགེ་སློང་དེས་གནས་བཞིའི་མཚམས་སུ་ཤིང་ངམ། འདམ་བུའམ། རེ་ལྡེས་མཚམས་སུ་མནན་ཏེ་གསོ་སྦྱོང་བཀག་ན་བཀག་

པ་ཞེས་བྱའོ། །བཙུན་པ་དགེ་སློང་ཞིག་གིས་དགེ་སློང་ལ་གསོ་སྦྱོང་བཀག་པ་ཀྱང་བཀག་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། བཀྲ་ཤིས་ཀྱི་གསོ་སྦྱོང་འདོན་པའོ།། །།མདོར་ན། གླེང་པ་དྲན་པར་བྱ་དེ་བཞིན། །སྐབས་འབྱེད་པ་དང་སྨྲ་བར་བྱ། །ལུང་

དབོག་པ་དང་འགོག་པ་དང་། །གསོ་སྦྱོང་དག་དང་སྐབས་དབྱེ་བའོ། །བཙུན་པ་བཅོམ་ལྡན་འདས་ཀྱིས་སྐབས་ཕྱེ་ནས་གླེང་བར་བྱའོ། །དྲན་པར་བྱའོ་ཞེས་གསུངས་ན། བཙུན་པ་སྐབས་ཕྱེ་བ་ལ་གླེངས་ཤིང་དྲན་པར་བགྱིས་ན་ནོངས་པ་དང་བཅས་པར་འགྱུར་བ་མཆིས་སམ།

ཨུ་པཱ་ལི་ཡོད་དེ། སྐབས་ཕྱེ་བ་བཏང་ནས་གླེངས་པ་དང་དྲན་པར་བྱས་པའོ། །བཙུན་པ་ཆོས་བཞིན་དུ་གང་དུ་གླེང་བར་བགྱི། དགེ་འདུན་གྱི་ནང་དུའོ། །བཙུན་པ་ཆོས་བཞིན་དུ་གང་དུ་དྲན་པར་བགྱི། དགེ་འདུན་གྱི་ནང་དུའོ། །བཙུན་པ་ཆོས་བཞིན་དུ་གང་དུ་སྐབས་དབྱེ་བར་

Vol. 12 · folio 278b

བགྱི། དགེ་འདུན་གྱི་ནང་དུའོ། །བཙུན་པ་ཆོས་བཞིན་དུ་གང་དུ་སྨྲ་བར་བགྱི། དགེ་འདུན་གྱི་ནང་དུའོ། །བཙུན་པ་ཆོས་བཞིན་དུ་ལུང་དབོག་པ་གང་དུ་དགག་པར་བགྱི། དགེ་འདུན་གྱི་ནང་དུའོ། །བཙུན་པ་ཆོས་བཞིན་དུ་སྐབས་འབྱེད་པ་གང་དུ་དགག་པར་བགྱི། དགེ་འདུན་གྱི་ནང་དུའོ། །

བཙུན་པ་སྐབས་དབྱེ་བར་གསོལ་བ་གང་དུ་བགྱི། དགེ་འདུན་གྱི་ནང་དུའོ། །བཙུན་པ་གང་དུ་སྐབས་དབྱེ་བར་བགྱི། དགེ་འདུན་གྱི་ནང་དུའོ། །བཙུན་པ་ཆོས་བཞིན་དུ་བགྱི་བའི་རྣམ་པ་གང་དུ་བགྱི། དགེ་འདུན་གྱི་ནང་དུའོ། །བཙུན་པ་ཆོས་བཞིན་དུ་བརྩད་པ་གང་དུ་བགྱི། དགེ་

འདུན་གྱི་ནང་དུའོ། །བཙུན་པ་ཆོས་བཞིན་གྱི་ཡི་དམ་གང་དུ་བགྱི། དགེ་འདུན་གྱི་ནང་དུའོ། །བཙུན་པ་ཆོས་བཞིན་དུ་གསོ་སྦྱོང་དགག་པ་ནི་དུ། ཆོས་བཞིན་མ་ལགས་པ་ནི་དུ། ཆོས་བཞིན་མ་ཡིན་པས་གསོ་སྦྱོང་དགག་པ་ནི་གཅིག་གོ། །ཆོས་བཞིན་པའང་གཅིག་གོ། །

ཆོས་བཞིན་མ་ཡིན་པ་ནི་གཉིས་ཏེ། ཆོས་བཞིན་པའང་གཉིས་སོ། །ཆོས་བཞིན་མ་ཡིན་པ་ནི་གསུམ་སྟེ། ཆོས་བཞིན་པའང་གསུམ་མོ། །ཆོས་བཞིན་མ་ཡིན་པ་ནི་བཞི་སྟེ། ཆོས་བཞིན་པའང་བཞིའོ། །ཆོས་བཞིན་མ་ཡིན་པ་ནི་ལྔ་སྟེ། ཆོས་བཞིན་པའང་ལྔའོ། །

ཆོས་བཞིན་མ་ཡིན་པ་ནི་དྲུག་སྟེ། ཆོས་བཞིན་པའང་དྲུག་གོ། །ཆོས་བཞིན་མ་ཡིན་པ་ནི་བདུན་ཏེ། ཆོས་བཞིན་པའང་བདུན་ནོ། །ཆོས་བཞིན་མ་ཡིན་པ་ནི་བརྒྱད་དེ། ཆོས་བཞིན་ཡིན་པ་ཡང་བརྒྱད་དོ། །ཆོས་བཞིན་མ་ཡིན་པ་ནི་དགུ་སྟེ། ཆོས་བཞིན་པའང་དགུའོ། །ཆོས་

བཞིན་མ་ཡིན་པ་ནི་བཅུ་སྟེ། ཆོས་བཞིན་པའང་བཅུའོ། །ཆོས་བཞིན་མ་ཡིན་པས་གསོ་སྦྱོང་དགག་པ་གཅིག་གང་ཞེ་ན། བྱས་པ་ལ་གཞི་མེད་པས་གསོ་སྦྱོང་འགོག་པ་ནི་ཆོས་བཞིན་མ་ཡིན་པས་གསོ་སྦྱོང་འགོག་པའོ། །བྱས་པ་ལ་གཞི་ཡོད་པས་གསོ་སྦྱོང་འགོག་པ་ནི་ཆོས་

བཞིན་དུ་གསོ་སྦྱོང་འགོག་པའོ། །འདི་ནི་ཆོས་བཞིན་མ་ཡིན་པས་གསོ་སྦྱོང་འགོག་པ་གཅིག་དང་། ཆོས་བཞིན་ཡང་གཅིག་གོ། །ཆོས་བཞིན་མ་ཡིན་པ་གཉིས་དང་། ཆོས་བཞིན་དུ་གསོ་སྦྱོང་འགོག་པ་གཉིས་པོ་གང་ཞེ་ན། ཇི་ལྟར་ཡང་དེ་ནི་དགེ་སློང་གིས་དགེ་སློང་བྱས་པ་ལ་

Vol. 12 · folio 279a

གཞི་མེད་པ་དང་མ་བྱས་པ་ལ་གཞི་མེད་པས་གསོ་སྦྱོང་འགོག་པ་ནི་ཆོས་བཞིན་མ་ཡིན་པས་གསོ་སྦྱོང་འགོག་པའོ། །བྱས་པ་ལ་གཞི་ཡོད་པ་དང་། མ་བྱས་པ་ལ་གཞི་ཡོད་པས་གསོ་སྦྱོང་འགོག་པ་ནི་ཆོས་བཞིན་དུ་གསོ་སྦྱོང་འགོག་པའོ། །ཆོས་བཞིན་མ་ཡིན་པ་

གསུམ་དང་། ཆོས་བཞིན་དུ་གསོ་སྦྱོང་འགོག་པ་གསུམ་གང་ཞེ་ན། ཇི་ལྟར་ཡང་དེ་ནི་དགེ་སློང་གིས་དགེ་སློང་ལ་བྱས་པ་ལ་གཞི་མེད་པ་དང་། མ་བྱས་པ་ལ་གཞི་མེད་པ་དང་། བྱས་པ་དང་མ་བྱས་པ་ལ་གཞི་མེད་པས་གསོ་སྦྱོང་འགོག་པ་ནི་ཆོས་བཞིན་མ་ཡིན་པས་གསོ་སྦྱོང་འགོག་

པའོ། །བྱས་པ་ལ་གཞི་ཡོད་པ་དང་། མ་བྱས་པ་ལ་གཞི་ཡོད་པ་དང་། བྱས་པ་དང་མ་བྱས་པ་ལ་གཞི་ཡོད་པས་གསོ་སྦྱོང་འགོག་པ་ནི་ཆོས་བཞིན་དུ་གསོ་སྦྱོང་འགོག་པའོ། །ཆོས་བཞིན་མ་ཡིན་པ་བཞི་དང་། ཆོས་བཞིན་དུ་གསོ་སྦྱོང་འགོག་པ་བཞི་པོ་གང་ཞེ་ན། ཚུལ་ཁྲིམས་

ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པ་ལ་གཞི་མེད་པ་བཞིས་གསོ་སྦྱོང་འགོག་པ་ནི་ཆོས་བཞིན་མ་ཡིན་པས་གསོ་སྦྱོང་འགོག་པའོ། །ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་

པ་ལ་གཞི་ཡོད་པ་བཞིས་གསོ་སྦྱོང་འགོག་པ་ནི་ཆོས་བཞིན་དུ་གསོ་སྦྱོང་འགོག་པའོ། །ཆོས་བཞིན་མ་ཡིན་པ་ལྔ་དང་། ཆོས་བཞིན་དུ་གསོ་སྦྱོང་འགོག་པ་ལྔ་པོ་གང་ཞེ་ན། ཕས་ཕམ་པ་དང་། དགེ་འདུན་གྱི་ལྷག་མ་དང་། ལྟུང་བ་དང་། སོ་སོར་བཤགས་པ་དང་། ཉེས་

བྱས་རྣམས་ལ་གཞི་མེད་པས་གསོ་སྦྱོང་འགོག་པ་ནི་ཆོས་བཞིན་མ་ཡིན་པས་གསོ་སྦྱོང་འགོག་པའོ། །ཕས་ཕམ་པ་དང་། དགེ་འདུན་གྱི་ལྷག་མ་དང་། ལྟུང་བ་དང་། སོ་སོར་འཆགས་པ་དང་། ཉེས་བྱས་རྣམས་ལ་གཞི་ཡོད་པས། གསོ་སྦྱོང་འགོག་པ་ནི་ཆོས་བཞིན་དུ་གསོ་སྦྱོང་

འགོག་པའོ། །ཆོས་བཞིན་མ་ཡིན་པ་དྲུག་དང་། ཆོས་བཞིན་དུ་གསོ་སྦྱོང་འགོག་པ་དྲུག་པོ་གང་ཞེ་ན། ལྷག་མ་ཡོད་པ་བྱས་པ་ལ་གཞི་མེད་པ་དང་། ལྷག་མ་ཡོད་པ་མ་བྱས་པ་ལ་གཞི་མེད་པ་དང་། ལྷག་མ་ཡོད་པ་བྱས་པ་དང་མ་བྱས་པ་ལ་གཞི་མེད་པ་དང་། ལྷག་མ་མེད་པ་བྱས་

Vol. 12 · folio 279b

པ་ལ་གཞི་མེད་པ་དང་། ལྷག་མ་མེད་པ་མ་བྱས་པ་ལ་གཞི་མེད་པ་དང་། ལྷག་མ་མེད་པ་བྱས་པ་དང་མ་བྱས་པ་ལ་གཞི་མེད་པས་གསོ་སྦྱོང་འགོག་པ་ནི་ཆོས་བཞིན་མ་ཡིན་པས་གསོ་སྦྱོང་འགོག་པའོ། །ཆོས་བཞིན་དུ་གསོ་སྦྱོང་འགོག་པ་དྲུག་པོ་གང་ཞེ་ན། ལྷག་མ་ཡོད་པ་བྱས་པ་ལ་

གཞི་ཡོད་པ་དང་། ལྷག་མ་ཡོད་པ་མ་བྱས་པ་ལ་གཞི་ཡོད་པ་དང་། ལྷག་མ་ཡོད་པ་བྱས་པ་དང་མ་བྱས་པ་ལ་གཞི་ཡོད་པ་དང་། ལྷག་མ་མེད་པ་བྱས་པ་ལ་གཞི་ཡོད་པ་དང་། ལྷག་མ་མེད་པ་མ་བྱས་པ་ལ་གཞི་ཡོད་པ་དང་། ལྷག་མ་མེད་པ་བྱས་པ་དང་མ་བྱས་པ་ལ་གཞི་ཡོད་

པས་གསོ་སྦྱོང་འགོག་པ་ནི་ཆོས་བཞིན་དུ་གསོ་སྦྱོང་འགོག་པའོ། །ཆོས་བཞིན་མ་ཡིན་པ་བདུན་དང་། ཆོས་བཞིན་དུ་གསོ་སྦྱོང་འགོག་པ་བདུན་པོ་གང་ཞེ་ན། ཕས་ཕམ་པ་དང་། དགེ་འདུན་གྱི་ལྷག་མ་དང་། ལྟུང་བ་དང་། སོ་སོར་འཆགས་པ་དང་། ཉེས་བྱས་དང་། ལྟ་བ་

ཉམས་པ་དང་། འཚོ་བ་ཉམས་པ་ལ་གཞི་མེད་པས་གསོ་སྦྱོང་འགོག་པ་ནི་ཆོས་བཞིན་མ་ཡིན་པས་གསོ་སྦྱོང་འགོག་པའོ། །ཕས་ཕམ་པ་དང་། དགེ་འདུན་གྱི་ལྷག་མ་དང་། ལྟུང་བ་དང་། སོ་སོར་འཆགས་པ་དང་། ཉེས་བྱས་དང་། ལྟ་བ་ཉམས་པ་དང་། འཚོ་བ་ཉམས་པ་

ལ་གཞི་ཡོད་པས་གསོ་སྦྱོང་འགོག་པ་ནི་ཆོས་བཞིན་དུ་གསོ་སྦྱོང་འགོག་པའོ། །ཆོས་བཞིན་མ་ཡིན་པ་བརྒྱད་དང་། ཆོས་བཞིན་དུ་གསོ་སྦྱོང་འགོག་པ་བརྒྱད་གང་ཞེ་ན། ཚུལ་ཁྲིམས་ཉམས་པ་དང་། སྤྱོད་པ་ཉམས་པ་དང་། ལྟ་བ་ཉམས་པ་དང་། འཚོ་བ་ཉམས་པར་བྱས་པ་ལ་

གཞི་མེད་པ་དང་། ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པར་མ་བྱས་པ་ལ་གཞི་མེད་པས་གསོ་སྦྱོང་འགོག་པ་ནི་ཆོས་བཞིན་མ་ཡིན་པས་གསོ་སྦྱོང་འགོག་པའོ། །ཚུལ་ཁྲིམས་ཉམས་པ་དང་། སྤྱོད་པ་ཉམས་པ་དང་། ལྟ་བ་

ཉམས་པ་དང་། འཚོ་བ་ཉམས་པར་བྱས་པ་ལ་གཞི་ཡོད་པ་དང་། ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པར་མ་བྱས་པ་ལ་གཞི་ཡོད་པས་གསོ་སྦྱོང་འགོག་པ་ནི་ཆོས་བཞིན་དུ་གསོ་སྦྱོང་འགོག་པའོ། །ཆོས་བཞིན་མ་ཡིན་

Vol. 12 · folio 280a

པ་དགུ་དང་། ཆོས་བཞིན་དུ་གསོ་སྦྱོང་འགོག་པ་དགུ་པོ་གང་ཞེ་ན། ལྷག་མ་དང་བཅས་པ་བྱས་པ་ལ་གཞི་མེད་པ་དང་། ལྷག་མ་དང་བཅས་པ་མ་བྱས་པ་ལ་གཞི་མེད་པ་དང་། ལྷག་མ་དང་བཅས་པ་བྱས་པ་དང་མ་བྱས་པ་ལ་གཞི་མེད་པ་དང་། ལྷག་མ་མེད་པ་

བྱས་པ་ལ་གཞི་མེད་པ་དང་། ལྷག་མ་མེད་པ་མ་བྱས་པ་ལ་གཞི་མེད་པ་དང་། ལྷག་མ་མེད་པ་བྱས་པ་དང་མ་བྱས་པ་ལ་གཞི་མེད་པ་དང་། ལྷག་མ་ཡོད་པ་དང་ལྷག་མ་མེད་པ་བྱས་པ་ལ་གཞི་མེད་པ་དང་། ལྷག་མ་དང་བཅས་པ་དང་ལྷག་མ་མེད་པ་མ་བྱས་པ་ལ་གཞི་མེད་པ་

དང་། ལྷག་མ་དང་བཅས་པ་དང་ལྷག་མ་མེད་པ་བྱས་པ་དང་མ་བྱས་པ་ལ་གཞི་མེད་པས་གསོ་སྦྱོང་འགོག་པ་ནི་ཆོས་བཞིན་མ་ཡིན་པས་གསོ་སྦྱོང་འགོག་པའོ། །ལྷག་མ་དང་བཅས་པ་བྱས་པ་ལ་གཞི་ཡོད་པ་དང་། ལྷག་མ་དང་བཅས་པ་མ་བྱས་པ་ལ་གཞི་ཡོད་པ་དང་། ལྷག་མ་དང་བཅས་པ་

བྱས་པ་དང་མ་བྱས་པ་ལ་གཞི་ཡོད་པ་དང་། ལྷག་མ་མེད་པ་བྱས་པ་ལ་གཞི་ཡོད་པ་དང་། ལྷག་མ་མེད་པ་མ་བྱས་པ་ལ་གཞི་ཡོད་པ་དང་། ལྷག་མ་མེད་པ་བྱས་པ་དང་མ་བྱས་པ་ལ་གཞི་ཡོད་པ་དང་། ལྷག་མ་དང་བཅས་པ་དང་ལྷག་མ་མེད་པ་བྱས་པ་ལ་གཞི་ཡོད་པ་དང་། ལྷག་མ་

དང་བཅས་པ་དང་ལྷག་མ་མེད་པ་མ་བྱས་པ་ལ་གཞི་ཡོད་པ་དང་། ལྷག་མ་དང་བཅས་པ་དང་ལྷག་མ་མེད་པ་བྱས་པ་དང་མ་བྱས་པ་ལ་གཞི་ཡོད་པས་གསོ་སྦྱོང་འགོག་པ་ནི་ཆོས་བཞིན་དུ་གསོ་སྦྱོང་འགོག་པའོ། །ཆོས་བཞིན་མ་ཡིན་པ་བཅུ་དང་། ཆོས་བཞིན་དུ་གསོ་སྦྱོང་འགོག་པ་

བཅུ་གང་ཞེ་ན། ཕས་ཕམ་པ་ཡིན། ཕས་ཕམ་པའི་གཏམ་ལ་ཞུགས་པ་ཡིན། ཚུལ་ཁྲིམས་ཉམས་པ་ཡིན། ལྟ་བ་ཉམས་པ་ཡིན། སྤྱོད་པ་ཉམས་པ་ཡིན། འཚོ་བ་ཉམས་པ་ཡིན། བསླབ་པ་ཕུལ་བ་ཡིན། བསླབ་པ་ཕུལ་བའི་གཏམ་ལ་ཞུགས་པ་ཡིན། དགེ་འདུན་ལ་དཔྱས་

འདོགས་པ་ཡིན། དགེ་འདུན་ལ་དཔྱས་འདོགས་པའི་གཏམ་ལ་ཞུགས་པ་ཡིན་ནོ། །དེ་ལ་ཇི་ལྟར་ན་ཕས་ཕམ་པ་ཡིན་ཞེ་ན། གང་གི་རྣམ་པ་དང་། གང་གི་ཚུལ་དང་། གང་གི་མཚན་མས་དགེ་སློང་ཕས་ཕམ་པའི་ཉེས་པ་བྱུང་བ་དེའི་རྣམ་པ་དང་། དེའི་ཚུལ་དང་། དེའི་མཚན་མས་དགེ་སློང་

Vol. 12 · folio 280b

ཕས་ཕམ་པའི་ཉེས་པ་བྱུང་བར་མཐོང་བ་ཡིན་ནོ། །དེ་དེས་མཐོང་བས་གསོ་སྦྱོང་འགོག་པ་ནི་ཆོས་བཞིན་དུ་གསོ་སྦྱོང་འགོག་པ་ཡིན་ཏེ་དེ་ལྟར་ཕས་ཕམ་པ་ཡིན་ནོ། །ཇི་ལྟར་ན་ཕས་ཕམ་པའི་གཏམ་ལ་ཞུགས་པ་ཡིན་ཞེ་ན། ཇི་ལྟར་ཡང་དེ་ནི་གཙུག་ལག་ཁང་ངམ། གཙུག་ལག་ཁང་གི་ཕྱི་རོལ་ཡང་

རུང་། དགེ་སློང་མང་པོ་འདུས་ཤིང་འཁོད་པར་གྱུར་པའི་རྣམས་ཀྱང་དེ་ལས་བྱུང་བ་དེ་དང་མཐུན་པ་དེའི་རང་བཞིན་གྱི་གཏམ་ལ་ཞུགས་པ་ཡིན་ཏེ། དད་པ་ལས་ཐོས་ཀྱང་རུང་བདག་རང་རྣམ་པ་ལ་དོགས་པ་སྐྱེས་ཀྱང་རུང་སྟེ། དེ་དེས་ཐོས་པ་དང་དོགས་པས་གསོ་སྦྱོང་འགོག་པ་ནི་ཆོས་བཞིན་དུ་གསོ་སྦྱོང་

འགོག་པའོ། །ཇི་ལྟར་ན་ཚུལ་ཁྲིམས་ཉམས་པ་ཡིན་ཞེ་ན། ཕས་ཕམ་པ་བཞི་ལས་གང་ཡང་རུང་ཕས་ཕམ་པ་ཤིན་ཏུ་འདས་པར་གྱུར་པའོ། །ཇི་ལྟར་ན་ལྟ་བ་ཉམས་པ་ཡིན་ཞེ་ན། ལྟ་བ་དྲུག་བཅུ་རྩ་གཉིས་ལས་གང་ཡང་རུང་སྟེ་ལྟ་བར་གྱུར་པ་རབ་ཏུ་ཐོབ་པ་ཡིན་ནོ། །ཇི་ལྟར་ན་སྤྱོད་པ་

ཉམས་པར་གྱུར་པ་ཡིན་ཞེ་ན། མི་སྤྱད་པའི་རྣམས་སྤྱོད་པ་སྟེ། དགེ་སློང་གི་བསླབ་པ་རྣམས་ལ་མི་སློབ་པའོ། །ཇི་ལྟར་ན་འཚོ་བ་ཉམས་པ་ཡིན་ཞེ་ན། འཚོ་བ་ཡོངས་སུ་མ་དག་པ་ཡིན་ནོ། །ཇི་ལྟར་ན་བསླབ་པ་ཕུལ་བ་ཡིན་ཞེ་ན། གང་གི་རྣམ་པ་དང་། གང་གི་ཚུལ་དང་། གང་གི་

མཚན་མས་དགེ་སློང་བསླབ་པ་འབུལ་བ་དེའི་རྣམ་པ་དང་། དེའི་ཚུལ་དང་། དེའི་མཚན་མས་དགེ་སློང་དུ་མཐོང་བ་ཡིན་ཏེ། དེ་དེས་མཐོང་ནས་གསོ་སྦྱོང་འགོག་པ་ནི་ཆོས་བཞིན་དུ་གསོ་སྦྱོང་འགོག་པའོ། །ཇི་ལྟར་ན་བསླབ་པ་ཕུལ་བའི་གཏམ་ལ་ཞུགས་པ་ཡིན་ཞེ་ན། ཇི་ལྟར་ཡང་དེ་ནི་

གཙུག་ལག་ཁང་ངམ། གཙུག་ལག་ཁང་གི་ཕྱི་རོལ་ནའང་རུང་དགེ་སློང་རྣམས་འདུས་ཏེ་འཁོད་པ་དེ་དག་ཀྱང་དེ་ལས་བྱུང་བ་དེ་དང་མཐུན་པ་དེའི་རང་བཞིན་གྱི་གཏམ་ལ་ཞུགས་པ་ཡིན་ཏེ། དད་པ་ལས་ཐོས་ཀྱང་རུང་བདག་ཉིད་རྣམ་པ་ལ་དོགས་པ་སྐྱེས་ཀྱང་རུང་སྟེ། དེ་དེས་ཐོས་པ་དང་དེའི་དོགས་

པས་གསོ་སྦྱོང་འགོག་པ་ནི་ཆོས་བཞིན་དུ་གསོ་སྦྱོང་འགོག་པའོ། །ཇི་ལྟར་ན་དགེ་འདུན་ལ་དཔྱས་འདོགས་པ་ཡིན་ཞེ་ན། གང་གི་རྣམ་པ་དང་། གང་གི་ཚུལ་དང་། གང་གི་མཚན་མས་དགེ་སློང་དགེ་འདུན་ལ་སྨོད་པ་དེ་ལྟ་བུའི་རྣམ་པ་དང་། དེ་ལྟ་བུའི་ཚུལ་དང་། དེ་ལྟ་བུའི་མཚན་མས་དགེ་འདུན་ལ་

Vol. 12 · folio 281a

སྨོད་པའི་དགེ་སློང་དུ་མཐོང་བ་ཡིན་ཏེ། དེ་དེས་མཐོང་ནས་གསོ་སྦྱོང་འགོག་པ་ནི་ཆོས་བཞིན་དུ་གསོ་སྦྱོང་འགོག་པའོ། །ཇི་ལྟར་ན་དགེ་འདུན་ལ་དཔྱས་འདོགས་པའི་གཏམ་ལ་ཞུགས་པ་ཡིན་ཞེ་ན། ཇི་ལྟར་ཡང་དེ་ནི་གཙུག་ལག་ཁང་ངམ། གཙུག་ལག་ཁང་གི་ཕྱི་རོལ་ནའང་རུང་།

དགེ་སློང་རྣམས་འདུས་ཏེ་འཁོད་པ་དེ་དག་ཀྱང་དེ་ལས་བྱུང་བ་དེ་དང་མཐུན་པ་དེའི་རང་བཞིན་གྱི་གཏམ་ལ་ཞུགས་པ་ཡིན་ཏེ། དད་པ་ལས་ཐོས་ཀྱང་རུང་བདག་རང་རྣམ་པ་ལ་དོགས་པ་སྐྱེས་ཀྱང་རུང་སྟེ། དེ་དེས་ཐོས་པ་དང་དེ་ལྟ་བུའི་དོགས་པས་གསོ་སྦྱོང་འགོག་པ་ནི་ཆོས་བཞིན་དུ་གསོ་སྦྱོང་འགོག་

པའོ། །ཆོས་བཞིན་བཅུ་པོ་འདི་དག་བཟློག་པ་ནི་ཆོས་བཞིན་མ་ཡིན་པར་སྦྱར་བར་བྱའོ། །གསོ་སྦྱོང་དགག་པའི་དངོས་པོ་རྫོགས་སྷོ།། །།མདོར་ན། དགེ་ཚུལ་ལོར་མ་ལོན་པ་གཅིག །ཁ་དོག་ངན་དང་གནས་དེ་བཞིན། །མ་བསྐོས་པ་དང་ཕྱག་བྱ་བ། །མངོན་སུམ་རྔུལ་ཟན་མེད་

པའོ། །བཙུན་པ་དགེ་ཚུལ་ཕ་ཉི་ཚེ་དབྱར་ཚུལ་དུ་ཞུགས་ན་དེ་དག་གིས་མལ་སྟན་བགོ་བར་བགྱིའམ། ཨུ་པཱ་ལི་མ་ཡིན་ནོ། །དེ་དག་གིས་མལ་སྟན་བླང་བར་བགྱིའམ། ཨུ་པཱ་ལི་བླང་བར་ནི་བྱའོ། །བཙུན་པ་ལོ་མ་ལོན་པ་དག་ཅིག་ཉི་ཚེ་དབྱར་ཚུལ་དུ་ཞུགས་ན་དེ་དག་གིས་མལ་སྟན་བགོ་བར་

བགྱིའམ། ཨུ་པཱ་ལི་མ་ཡིན་ནོ། །དེ་དག་གིས་མལ་སྟན་བླང་བར་བགྱིའམ། ཨུ་པཱ་ལི་བླང་བར་ནི་བྱའོ། །བཙུན་པ་དགེ་སློང་གཅིག་གམ། གཉིས་སམ། གསུམ་མམ། བཞི་དབྱར་ཚུལ་དུ་ཞུགས་ན་དེ་དག་གིས་མལ་སྟན་བགོ་བར་བགྱིའམ། ཨུ་པཱ་ལི་མ་ཡིན་ནོ། །དེ་དག་གིས་

མལ་སྟན་བླང་བར་བགྱིའམ། ཨུ་པཱ་ལི་བླང་བར་ནི་བྱའོ། །ཨུ་པཱ་ལི་གང་དུ་དགེ་སློང་ལྔའམ། དེ་ལས་ལྷག་པར་གནས་ན་དེ་དག་གིས་གསོལ་བ་བྱས་ལ་མལ་སྟན་བགེད་པ་སྐོས་ཤིག །བསྐོས་པ་དེས་མལ་སྟན་བགོའོ། །བཙུན་པ་མལ་སྟན་དེ་ཉིད་སྤྱད་པས་ནོངས་པར་འགྱུར་བ་དང་། དེ་

ཉིད་སྤྱད་པས་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། གང་ཟག་གི་མལ་སྟན་ཁ་དོག་ངན་པར་མ་བསྒྱུར་བའམ། ཁ་ཚར་རིང་བ་སྤྱད་ན་ཉེས་པ་དང་བཅས་པའོ། །དགེ་འདུན་གྱི་སྤྱད་ན་ཉེས་པ་མེད་དོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་དགེ་འདུན་གྱི་མལ་སྟན་

Vol. 12 · folio 281b

གནས་གཞན་དུ་ཁྱེར་ཞིང་མ་སྤྱོད་ཅིག་ཅེས་གསུངས་ན། བཙུན་པ་དགེ་སློང་ཞིག་གིས་དགེ་འདུན་གྱི་མལ་སྟན་གནས་གཞན་དུ་འཚལ་ཏེ་སྤྱད་ན་ཅིར་འགྱུར། ཉེས་བྱས་སོ། །བར་ཆད་བརྒྱད་ལས་གང་ཡང་རུང་སྟེ། བར་ཆད་གཅིག་བྱུང་བར་གྱུར་པ་དང་། གནས་དེ་ཉིད་དུ་མལ་སྟན་བསྲུང་བར་མི་

ནུས་པ་དང་། གནས་དེར་མི་གནས་པར་སྡོམ་པ་བཅས་པ་ལ་ནི་ཉེས་པ་མེད་དོ། །བཙུན་པ་མ་བསྐོས་པས་མལ་སྟན་བགོ་བར་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དགེ་སློང་ཞིག་གིས་དགེ་འདུན་གྱི་མལ་སྟན་དེ་ཉིད་སྤྱད་ན་ནོངས་པར་འགྱུར་བ་དང་། དེ་ཉིད་སྤྱད་པས་ནོངས་པར་མི་འགྱུར་བ་

མཆིས་སམ། ཨུ་པཱ་ལི་ཡོད་དེ། སྤུ་ཕྱིར་བཟློག་སྟེ་གྱོན་ན་ཉེས་པ་དང་བཅས་པའོ། །བཏིང་ན་ཉེས་པ་མེད་དོ། །རྔུལ་ཟན་མེད་པར་གྱོན་ན་ཉེས་པ་དང་བཅས་པའོ། །རྔུལ་ཟན་དང་བཅས་པར་གྱོན་ན་ཉེས་པ་མེད་དོ། །བཙུན་པ་བཅོམ་ལྡན་འདས་ཀྱིས་ཐམས་ཅད་དུ་ཉེ་བར་ཕྱོགས་པ་དང་གནས་

པར་མི་བྱའོ་ཞེས་གསུངས་ན། བཙུན་པ་ཅི་ཉེ་བར་མ་ཕྱོགས་པས་ཉེ་བར་ཕྱོགས་པ་རྒན་པ་ལའང་ཕྱག་བགྱིའམ། ཨུ་པཱ་ལི་མ་ཡིན་ཏེ། ཉེ་བར་ཕྱོགས་པ་ཐམས་ཅད་ཀྱིས་ཉེ་བར་མ་ཕྱོགས་པ་རྣམས་ལ་ཕྱག་བྱོས་ཤིག །དགེ་སློང་རྣམས་ཀྱི་ཐ་མར་གཞག་གོ། །བཙུན་པ་ཅི་དེ་དག་ལ་མལ་

སྟན་ཀྱང་དགེ་སློང་དེ་དག་གི་ཐ་མར་སྩལ་ཏམ། ཨུ་པཱ་ལི་ཉེ་བར་ཕྱོགས་པ་ལ་རྙེད་པ་དང་མལ་སྟན་བྱིན་པ་མེད་དོ། །བཙུན་པ་མངོན་སུམ་དུ་མ་གྱུར་པ་ལ་མལ་སྟན་སྩལ་བར་བགྱིའམ། ཁ་ཅིག་ལ་བྱིན་ཅིག །ཁ་ཅིག་ལ་མ་སྦྱིན་ཅིག །གང་ལ་སྩལ་བར་བགྱི། སོང་ནས་ཕྱིར་འོང་བ་

ལ་ནི་བྱིན་ཅིག །སུ་ལ་མི་སྩལ། སོང་ནས་ཕྱིར་མི་འོང་བ་ལ་ནི་མ་བྱིན་ཅིག །བཙུན་པ་བཅོམ་ལྡན་འདས་ཀྱིས་དགེ་སློང་གིས་དགེ་འདུན་གྱི་རྫས་རྔུལ་ཟན་མ་མཆིས་པར་མ་སྤྱད་ཅིག་ཅེས་གསུངས་ན། བཙུན་པ་དགེ་སློང་གིས་དགེ་འདུན་གྱི་རྫས་རྔུལ་ཟན་མ་མཆིས་པར་སྤྱད་ཀྱང་ནོངས་པར་

མི་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་ཡང་དེ་ནི་ཁྱིམ་བདག་ཅིག་གིས་གཡོག་པའམ་བགོ་བ་ཞིག་རྔུལ་ཟན་མེད་པར་སྤྱད་པར་དགེ་འདུན་ལ་ཕུལ་བ་ཡིན་ནོ།། །།མདོར་ན། ཀུན་དགའ་བོ་དང་གང་ཟག་དང་། །དེ་ལྟར་ཕྱག་དང་རུང་བ་དང་། །ཐ་མ་དབྱར་དུ་གནས་པ་དང་། །

Vol. 12 · folio 282a

སུམ་ཆ་འབྲི་བ་དེ་བཞིན་ཏེ། །ཁྱིམ་པ་དག་ལ་སོགས་པ་དང་། །བསླབ་པ་བྱིན་པ་ཐ་མའོ། །བཙུན་པ་བཅོམ་ལྡན་འདས་ཀྱིས་ཀུན་དགའ་བོ་ཁྱོད་ཀྱིས་མལ་སྟན་ལྷག་མའི་རྣམས་གོས་ཤིག་ཅེས་གསུངས་ན། ལྷག་པ་གང་ལགས། གང་གཅིག་དང་གཉིས་པོའི་ཕྱོགས་

ལས་ལྷག་པར་གྱུར་པའོ། །བཙུན་པ་བཅོམ་ལྡན་འདས་ཀྱིས་དགེ་སློང་གིས་དགེ་འདུན་གྱི་མལ་སྟན་རྔུལ་ཟན་མ་མཆིས་པར་མ་སྤྱད་ཅིག་ཅེས་གསུངས་ན། བཙུན་པ་དགེ་སློང་གིས་གང་ཟག་གི་མལ་སྟན་སྤྱད་ན་ཅིར་འགྱུར། ཉེས་བྱས་སོ། །བཙུན་པ་བཅོམ་ལྡན་འདས་ཀྱིས་གང་

དགེ་སློང་གློ་བུར་དུ་ལྷགས་པ་དང་། གཞི་བ་རྣམས་ཇི་ལྟར་རྒན་རིམས་བཞིན་ཕྱག་བྱོས་ཤིག་ཅེས་གསུངས་ན། བཙུན་པ་དེ་སྟེ་ཆད་པ་བགྱིད་པའི་དགེ་སློང་རྒན་པ་ལའང་ཕྱག་བགྱིའམ། ཨུ་པཱ་མ་ཡིན་ནོ། །དེ་ཅིའི་ཕྱིར་ཞེ་ན། ཨུ་པཱ་ལི་ཕྱག་བྱ་བའི་མི་རིགས་པ་ཐམས་ཅད་ལ་

ཕྱག་མི་བྱ་སྟེ། ཁོན་ཡོད་པ་ནི་མ་གཏོགས་སོ། །ཨུ་པཱ་ལི་དགེ་འདུན་གྱི་ནང་ན་ཕྱག་བྱ་བའི་མི་རིགས་པའི་གང་ཟག་རྣམས་གང་ཞེ་ན། བསྡིགས་པའི་ལས་བྱས་པ་དང་། སྨད་པའི་ལས་བྱས་པ་དང་། བསྐྲད་པའི་ལས་བྱས་པ་དང་། སླར་སྡུམ་པའི་ལས་བྱས་པ་དང་། མ་མཐོང་

བའི་ཕྱིར་སྤང་བའི་ལས་བྱས་པ་དང་། ལས་སླར་མི་བྱེད་པའི་ཕྱིར་སྤང་བའི་ལས་བྱས་པ་དང་། སྡིག་པ་ལ་ལྟ་བ་སླར་མ་སྤངས་པའི་ཕྱིར་སྤང་བའི་ལས་བྱས་པ་དང་། ཆད་པ་བྱེད་པ་དང་། གཞི་ནས་བསླང་སྟེ། ཆད་པ་བྱེད་པ་དང་། ཆད་པ་ཁོར་བ་དང་། ཡིད་མགུ་བར་བྱ་བ་སྤྱོད་

པ་དང་། གཞི་ནས་བསླང་སྟེ་ཡིད་མགུ་བར་བྱ་བ་སྤྱོད་པ་དང་། ཁྱིམ་པ་དང་། མ་ནིང་དང་། དགེ་སློང་མ་སུན་ཕྱུང་བ་དང་། ཕ་དང་། མ་དང་། དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་

ཅན་དུ་སོང་བ་དང་། རྐུན་གནས་དང་། མི་གནས་པ་དང་། སོ་སོར་གནས་པ་དང་། སྔར་ཉེས་པ་བྱུང་བ་དང་། སྔོན་འཁྲུགས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་དང་། ཤིན་ཏུ་

Vol. 12 · folio 282b

གཞོན་པ་རྣམས་ལ་ཕྱག་མ་བྱེད་ཅིག །བཤང་བ་བྱེད་པ་ལ་ཕྱག་མི་བྱའོ། །བཤང་བ་བྱེད་པས་ཕྱག་མི་བྱའོ། །གཅི་བ་བྱེད་པ་ལ་ཕྱག་མི་བྱའོ། །གཅི་བ་བྱེད་པས་ཕྱག་མི་བྱའོ། །སོ་ཤིང་ཟ་བ་ལ་ཕྱག་མི་བྱའོ། །སོ་ཤིང་ཟ་བས་ཕྱག་མི་བྱའོ། །ཟས་ཟ་བ་ལ་ཕྱག་མི་བྱའོ། །

ཟས་ཟ་བས་ཕྱག་མི་བྱའོ། །འཐུང་བ་ལ་ཕྱག་མི་བྱའོ། །འཐུང་བས་ཕྱག་མི་བྱའོ། །སྒྲེན་མོ་ལ་ཕྱག་མི་བྱའོ། །སྒྲེན་མོས་ཕྱག་མི་བྱའོ། །གོས་གཅིག་པ་ལ་ཕྱག་མི་བྱའོ། །གོས་གཅིག་པས་ཕྱག་མི་བྱའོ། །མི་སྣང་བར་འདུག་པ་ལ་ཕྱག་མི་བྱའོ། །མི་སྣང་བར་འདུག་

པས་ཕྱག་མི་བྱའོ། །མི་བདེ་བར་འདུག་པ་ལ་ཕྱག་མི་བྱའོ། །མི་བདེ་བར་འདུག་པས་ཕྱག་མི་བྱའོ། །ལུང་ནོད་པ་ལ་ཞུགས་པའམ། ཡིད་ལ་བྱེད་པ་ལ་ཞུགས་པའམ། ཆོས་ཉན་པར་ཞུགས་པ་ལ་ཕྱག་མི་བྱའོ། །ལུང་ནོད་པ་དང་། ཡིད་ལ་བྱེད་པ་དང་། ཆོས་ཉན་པར་

ཞུགས་པས་ཕྱག་མི་བྱའོ། །ཡེངས་པ་ལ་ཕྱག་མི་བྱའོ། །ཁྱིམ་གྱི་ནང་དུ་ཞུགས་པ་ལ་མི་བྱ་སྟེ། གང་ཟག་འདི་དག་ནི་ཕྱག་བྱ་བར་མི་རིགས་པའོ། །བཙུན་པ་དགེ་སློང་ཞིག་གིས་དགེ་འདུན་གྱི་ཁྲིའམ་ཁྲིའུ་ལ་མཆིས་སམ་ཉལ་ཀྱང་ནོངས་པ་ལྟུང་བར་མི་འགྱུར་བ་མཆིས་སམ། ཨུ་

པཱ་ལི་ཡོད་དེ། མི་རུང་བ་ལ་འདུག་གམ་ཉལ་བ་སྟེ། གང་དགེ་སློང་རྣམས་སྤྱད་པར་མི་རུང་བའོ། །བཙུན་པ་བཅོམ་ལྡན་འདས་ཀྱིས་གང་ཆད་པ་བགྱིད་པའི་དགེ་སློང་ནི་དགེ་སློང་རྣམས་ཀྱི་ཐ་མར་སྩལ་ཏམ། ཨུ་པཱ་ལི་མ་ཡིན་ཏེ། རིམ་གྱིས་སྦྱིན་ནོ། །བཙུན་པ་བཅོམ་ལྡན་འདས་ཀྱིས་

གང་དབྱར་མེད་པ་དང་། རང་བཞིན་དུ་གནས་པ་རྣམས་ལ་མལ་སྟན་སྔར་བྱིན་ཅིག །དེའི་འོག་ཏུ་སྤངས་པའི་རྣམས་ལའོ་ཞེས་གསུངས་ན། དེ་སྟེ་མལ་སྟན་ལྷག་པར་གྱུར་ན་རང་བཞིན་དུ་གནས་པ་དང་ལྷན་ཅིག་ཏུ་སྩལ་ཏམ། ཨུ་པཱ་ལི་མི་སྦྱིན་ནོ། །བཙུན་པ་དགེ་སློང་ཞིག་གིས་གནས་

བཞི་ནས་མལ་སྟན་བླངས་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། ཇི་ལྟར་ཡང་དེ་ནི་དགེ་སློང་ཞིག་གིས་གནས་བཞིའི་མཚམས་ཤིང་ངམ། འདམ་བུའམ། རེ་ལྡེས་མནན་ཏེ་དབྱར་ཚུལ་དུ་ཞུགས་པ་ཡིན་ནོ། བཙུན་པ་བཅོམ་ལྡན་འདས་ཀྱིས་དགེ་ཚུལ་པ་རྣམས་ལ་

Vol. 12 · folio 283a

ནི་རྙེད་པའི་སུམ་ཆ་བྱིན་ཅིག་གསུངས་ན། བཙུན་པ་ཅི་མལ་སྟན་ཀྱང་སུམ་ཆ་སྩལ་ཏམ། ཨུ་པཱ་ལི་མ་ཡིན་ཏེ། སྐལ་བ་མཉམ་པར་བྱིན་ཅིག །བཙུན་པ་བཅོམ་ལྡན་འདས་ཀྱིས་གང་དགེ་སློང་གསར་བུ་རྣམས་ཀྱིས་རྒན་པོ་རྣམས་ལས་སྔོན་དུ་མལ་སྟན་མ་བླང་ཤིག་

ཅེས་གསུངས་ན། བཙུན་པ་དགེ་སློང་གཞོན་ནུས་རྒན་པ་ལས་སྔར་མལ་སྟན་བླངས་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། གང་གིས་དགེ་འདུན་ལས་གནས་ཀྱི་གནང་བ་ཐོབ་པ་དང་། ཉེ་གཡོག་གི་གནང་བ་ཐོབ་པ་ཡིན། འཇིགས་པའི་ས་ནས་བྲོས་ཏེ་

འོངས་པ་ཡིན་ནོ། །བཙུན་པ་ཁྱིམ་པ་མལ་སྟན་འགོད་པར་བསྐོའམ། ཨུ་པཱ་ལི་མ་ཡིན་ནོ། །དེ་བཞིན་དུ་ཟ་མ་ནས། བསླབ་པ་སྩལ་བའི་བར་དུ་རྒྱས་པར་མལ་སྟན་འགོད་པར་བསྐོའམ། ཨུ་པཱ་ལི་མ་ཡིན་ནོ། །བཙུན་པ་སྨྱོན་པ་མལ་སྟན་འགོད་པར་བསྐོའམ། ཨུ་པཱ་ལི་

མ་ཡིན་ནོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་རྣམས་སོ། །བཙུན་པ་འགྲོ་བ་གཞན་དུ་གནས་པ་དག་མལ་སྟན་འགོད་པར་བསྐོའམ། ཨུ་པཱ་ལི་མ་ཡིན་ནོ། །བཙུན་པ་མ་ནིང་ལ་མལ་སྟན་སྩལ་

ཏམ། ཨུ་པཱ་ལི་མ་ཡིན་ནོ། །དེ་བཞིན་དུ་དགེ་སློང་མ་སུན་ཕྱུང་བ་ནས་སྔར་འཁྲུགས་པའི་བར་དུ་དེ་དག་ལ་མལ་སྟན་སྩལ་ཏམ། ཨུ་པཱ་ལི་མ་ཡིན་ནོ། །བཙུན་པ་དགེ་འདུན་གྱི་དབྱེན་བགྱིས་པ་དང་། བསླབ་པ་སྩལ་བ་ལ་མལ་སྟན་སྩལ་ཏམ། ཨུ་པཱ་ལི་བྱིན་ཅིག །བཙུན་པ་

སྨྱོན་པ་ལ་མལ་སྟན་སྩལ་ཏམ། ཨུ་པཱ་ལི་དེ་སྟེ་སྤྱད་པ་བཞིན་དུ་མི་སྤྱད་ན་མ་སྦྱིན་ཅིག །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་རྣམས་ལའང་བརྗོད་པར་བྱའོ། །བཙུན་པ་མལ་སྟན་འགོད་པར་དགེ་སློང་བསྐོ་བའི་

ཚེ་མཚན་འཕོས་ན་བསྐོས་པ་ཞེས་བགྱིའམ། ཨུ་པཱ་ལི་བསྐོས་པ་ཞེས་བྱའོ། །དེས་མལ་སྟན་བགོ་བར་བགྱིའམ། ཨུ་པཱ་ལི་མ་ཡིན་ནོ། །མལ་སྟན་གྱི་དངོས་པོ་རྫོགས་སྷོ།། །།འདུལ་བ་གཞུང་དམ་པ། བམ་པོ་ཉི་ཤུ་གཅིག་པ། མདོར་ན། གསུམ་དུ་བྱས་པའི་གཟུ་

Vol. 12 · folio 283b

བོ་དང་། །རྣམ་པར་ཞི་བའི་མཚན་དེ་བཞིན། །གསོ་སྦྱོང་དག་གི་མངོན་སུམ་དག །འབྱུང་བ་དག་ཀྱང་དེ་བཞིན་ནོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་གཟུ་བོ་ཆོས་དུ་དང་ལྡན་ན་འདུལ་བ་འཛིན་ཅིང་རྩོད་པ་རྣམས་ཞི་བར་བགྱིད་ནུས་པ་ལགས།

ཨུ་པཱ་ལི་བཅུ་གཅིག་སྟེ། བཅུ་གཅིག་གང་ཞེ་ན། རྩོད་པ་ཤེས། རྩོད་པ་ཅི་ལས་བྱུང་བ་ཤེས། རྩོད་པ་བསྡུ་བ་ཤེས། རྩོད་པ་རྣམ་པར་ཞི་བ་ཤེས། རྩོད་པ་ཤིན་ཏུ་ཞི་བས་ཕྱིས་མི་འབྱུང་བར་ཤེས། འབྱུང་བ་ཤེས། བཅས་པ་ཤེས། རྗེས་སུ་བཅས་པ་ཤེས། དགག་པ་

ཤེས། མངོན་པར་རྗེས་སུ་གནང་བ་ཤེས། ལས་བྱས་པ་དང་མ་བྱས་པ་ཤེས་པ་སྟེ། ཨུ་པཱ་ལི་ཆོས་བཅུ་གཅིག་པོ་འདི་དག་དང་ལྡན་པའི་གཟུ་བོ་ནི་འདུལ་བ་འཛིན་པ་རྩོད་པ་རྣམ་པར་ཞི་བར་བྱེད་ནུས་པ་ཡིན་ནོ། །གཞན་ཡང་ཆོས་བཅུ་གཅིག་སྟེ། བཅུ་གཅིག་པོ་གང་ཞེ་ན། ཉེས་

པ་ཤེས། ཉེས་པ་མེད་པ་ཤེས། ཉེས་པ་ལྕི་བ་ཤེས། ཉེས་པ་ཡང་བ་ཤེས། ཉེས་པ་བྱུང་བ་ཤེས། ཉེས་པ་ལས་འབྱུང་བ་ཤེས། འདོད་པའི་ཕྱིར་མི་འགྲོ་བ། ཞེ་སྡང་དང་། འཇིགས་པ་དང་། གཏི་མུག་གི་ཕྱིར་མི་འགྲོ་བ། ཆད་པའི་ལས་བྱ་བ་དང་མི་བྱ་བ་ཤེས་པ་

སྟེ། ཨུ་པཱ་ལི་བཅུ་གཅིག་པོ་འདི་དག་གིས་རྣམ་པར་ཞི་བར་བྱ་བའི་བར་དུ་རྒྱས་པར་རོ། །གཞན་ཡང་ཆོས་བཅུ་གཅིག་གི་བར་དུ་སྟེ། བཅུ་གཅིག་པོ་གང་ཞེ་ན། མདོ་སྡེ་ལ་མཁས་པ་ཡིན། འདུལ་བ་ལ་མཁས་པ་ཡིན། རྣམ་པར་འབྱེད་པ་ལ་མཁས་པ་ཡིན། ལུང་ལ་

ཞུགས་པ་ཡིན། མདོ་སྡེ་འབྱེད་པ་ཡིན། འཁྲུལ་པ་མི་འཛིན་པ་ཡིན། གསང་བའི་ཚིག་མི་འཛིན་པ་ཡིན། གདོན་མི་ཟ་བར་འཛིན་པ་ཡིན། ཚིག་མང་པོ་མི་འཛིན་པ་ཡིན། དམ་བཅས་པ་འཛིན་པ་ཡིན། ལན་གསུམ་གྱི་བར་དུ་གཞོག་པ་ཡིན་ཏེ། ཨུ་པཱ་ལི་ཆོས་བཅུ་གཅིག་

པོ་འདི་དག་དང་ལྡན་པའི་གཟུ་བོ་ནི་འདུལ་བ་འཛིན་པ་རྩོད་པ་རྣམ་པར་ཞི་བར་བྱེད་ནུས་པ་ཡིན་ནོ། །ཆོས་དུ་དང་ལྡན་པས་རྩོད་པ་ཤིན་ཏུ་ཞི་བ་ལགས། ཨུ་པཱ་ལི་ཉི་ཤུ་རྩ་གཅིག་སྟེ། ཉི་ཤུ་རྩ་གཅིག་པོ་གང་ཞེ་ན། དགེ་འདུན་ལ་བསྒོ་བ་ཡིན། ཆོས་དང་བཅས་པས་རྒྱལ་བའི་བཀའ་དང་

Vol. 12 · folio 284a

མཐུན་པ་ཡིན། ཕྱོགས་དང་ཕ་རོལ་གྱི་ཕྱོགས་ཀྱི་དགེ་སློང་དག་གོ་བར་བྱེད་པ་ཡིན། རྒོལ་བའི་དང་ཕྱིར་རྒོལ་བའི་དགེ་སློང་ལ་ཆོས་དང་མཐུན་པས་རྒོལ་བ་དང་ཕྱིར་རྒོལ་བའི་དགེ་སློང་ལ་འདུལ་བ་མ་ཉམས་པར་བྱེད་པ་ཡིན། མི་གཙང་བའི་གང་ཟག་གི་ཉེས་པ་མ་

བཅབས་པ་ཡིན། བྱུང་བ་ཆུད་མ་གསན་པ་ཡིན། བཅས་པ་ཆུད་མ་གསན་པ་ཡིན། རྗེས་སུ་བཅས་པ་ཆུད་མ་གསན་པ་ཡིན། དགག་པ་ཆུད་མ་གསན་པ་ཡིན། མངོན་པར་རྗེས་སུ་གནང་བ་ཆུད་མ་གསན་པ་ཡིན། ཉེས་པ་ཆུད་མ་གསན་པ་ཡིན། རྒོལ་བའི་དགེ་སློང་གི་

ཡི་དམ་ཤིན་ཏུ་བཟུང་བ་ཡིན། ལན་འདེབས་པའི་ཡི་དམ་ཤིན་ཏུ་བཟུང་བ་ཡིན། མདོ་སྡེའི་ཚིག་ཀྱང་བསྟན་པ་ཡིན། འདུལ་བའང་མཐུན་པ་ཡིན། ཆོས་ཀྱི་མིག་རྗེས་སུ་བཟུང་བ་ཡིན། བསྐོས་ནས་རྣམ་པར་ཞི་བར་བྱེད་པ་ཡིན། ཉེས་པ་སྟོན་པ་ཡིན། ཆད་པའི་

ལས་དམིགས་སུ་བབ་པ་ཡིན། རྣམ་པར་དག་པ་སྟོན་པ་ཡིན། ཆོས་དང་འདུལ་བ་དང་སྟོན་པའི་བསྟན་པས་རྩོད་པ་རྣམ་པར་ཞི་བ་ཡིན་ཏེ། ཨུ་པཱ་ལི་ཆོས་ཉི་ཤུ་རྩ་གཅིག་པོ་འདི་རྣམས་དང་ལྡན་ན་རྩོད་པ་རྣམ་པར་ཞི་བ་ཞེས་བྱའོ། བཙུན་པ་རྒོལ་བའམ་སླར་རྒོལ་བའི་དགེ་སློང་

མཚན་འཕོས་ན་རྩོད་པ་ཞི་བ་ཞེས་བགྱིའམ། ཨུ་པཱ་ལི་ཞི་བ་ཞེས་བྱའོ། །བཙུན་པ་བཅོམ་ལྡན་འདས་ཀྱིས་རྩོད་པ་བྱུང་བ་བྱུང་མ་ཐག་ཏུ་རྩོད་པ་ཞི་བར་བྱེད་པའི་ཆོས་བདུན་གྱིས་རྣམ་པར་ཞི་བར་བྱའོ་ཞེས་གསུངས་ན། བཙུན་པ་རྩོད་པ་རྣམ་པ་བཞི་ལས་གང་ཡང་རུང་སྟེ། རྩོད་

པ་ཞིག་བྱུང་ན་ཞི་བར་བགྱིད་པའི་ཆོས་བདུན་པོ་ལས་གང་ཡང་རུང་བའི་རྩོད་པ་ཞི་བར་བགྱིད་པའི་ཆོས་ཀྱིས་རྣམ་པར་ཞི་བར་མ་བགྱིས་པར་རྣམ་པར་ཞི་བར་འགྱུར་བ་མཆིས་སམ། ཨུ་པཱ་ལི་ཡོད་དེ། དེ་ནི་མཐུན་པའི་གསོ་སྦྱོང་ངོ་། །བཙུན་པ་རྩོད་པ་བཞི་ལས་གང་ཡང་རུང་སྟེ། རྩོད་པ་

ཞིག་བྱུང་ན་རྒོལ་བ་དང་སླར་རྒོལ་བའི་དགེ་སློང་རྣམས་ལས་གང་གི་ཚིག་གཟུང་བར་བགྱི། རྒན་རིམས་ཀྱི་གཟུང་ངོ་། །བཙུན་པ་དེ་སྟེ་གཉི་གའི་ལོ་གྲངས་མཉམ་ན་གང་གི་ཚིག་གཟུང་བར་བགྱི། གང་མང་དུ་ཐོས་པའི་ཡིན་ནོ། །བཙུན་པ་དེ་སྟེ་གཉི་གའང་གཞུང་ལ་མཚུངས་པར་གྱུར་

Vol. 12 · folio 284b

ན་གང་གི་ཚིག་གཟུང་བར་བགྱི། གང་བྱང་བ་ཡིན་ནོ། །དེ་སྟེ་གཉི་ག་བྱང་བར་གྱུར་ན་གང་གི་ཚིག་གཟུང་བར་བགྱི། གང་བྱང་བའི་ཤས་ཆེ་བ་ཡིན་ཏེ། དེའི་ཚིག་གིས་རྩོད་པ་རྣམས་རྣམ་པར་ཞི་བར་བྱའོ། །བཙུན་པ་བཅོམ་ལྡན་འདས་ཀྱིས་གང་ཚུལ་ཤིང་མང་པོས་རྩོད་པ་ཞི་བར་བྱ་

བ་ལས་གང་གི་ཕྱོགས་སུ་ཚུལ་ཤིང་གཅིག་གིས་ཀྱང་ལྷག་པར་གྱུར་ན། དེའི་ཕྱོགས་དེས་རྣམ་པར་ཞི་བར་བྱའོ། །ཞེས་གསུངས་ན། བཙུན་པ་དེ་སྟེ་ཕྱོགས་གཉི་གའི་ཚུལ་ཤིང་མཉམ་པར་གྱུར་ན་གང་གི་དབང་གིས་རྩོད་པ་རྣམ་པར་ཞི་བར་བགྱིད། ཨུ་པཱ་ལི་ཕྱོགས་གང་གིས་དགེ་སློང་དག་ཕལ་

ཆེར་བྱང་བའི་ཤས་ཆེ་བ་ཡིན་ནོ། །བཙུན་པ་གང་དགེ་སློང་རྣམས་རྩོད་པ་དགེ་སློང་རྣམས་ཀྱིས་རྣམ་པར་ཞི་བར་བགྱིད་མ་ནུས་ན། བཙུན་པ་དགེ་སློང་མས་རྣམ་པར་ཞི་བར་བགྱིར་རུང་ངམ། ཨུ་པཱ་ལི་རུང་ངོ་། དེ་བཞིན་དུ་སྡེ་ལྔའི་རྣམས་ཀྱང་ཕན་ཚུན་གཅིག་ལ་གཅིག་སྦྱར་བར་བྱའོ།། །།

མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པ་སེམས་འཁྲུགས་ན་བ་དང་། །འོན་གླེན་ཁྱིམ་པ་དག་ལ་སོགས། །བསླབ་པ་བྱིན་པ་ཐ་མའོ། །བཙུན་པ་ཕྲིན་གྱིས་རྩོད་པ་རྣམ་པར་ཞི་བར་བགྱིས་ན་རྣམ་པར་ཞི་བ་ཞེས་བགྱིའམ།

ཨུ་པཱ་ལི་རྣམ་པར་ཞི་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་བརྒྱུད་དེ་རྣམ་པར་ཞི་བར་བགྱིས་ན་རྣམ་པར་ཞི་བ་ཞེས་བགྱིའམ། ཨུ་པཱ་ལི་རྣམ་པར་ཞི་བ་ཞེས་བྱ་སྟེ། དགེ་

འདུན་ནི་འདས་པ་དང་བཅས་པའོ། །བཙུན་པ་སྨྱོན་པ་ཞིག་གིས་རྩོད་པ་རྣམ་པར་ཞི་བར་བགྱིས་ན་རྩོད་པ་རྣམ་པར་ཞི་བ་ཞེས་བགྱིའམ། ཨུ་པཱ་ལི་རྣམ་པར་ཞི་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་

བ་དང་། གླེན་པ་དང་། ལྐུགས་པ་དང་། འོན་པ་རྣམས་ཀྱིས་རྣམ་པར་ཞི་བར་བགྱིས་ན་རྣམ་པར་ཞི་བ་ཞེས་བགྱིའམ། ཨུ་པཱ་ལི་རྣམ་པར་ཞི་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། བཙུན་པ་ཁྱིམ་པ་ཞིག་གིས་རྩོད་པ་རྣམ་པར་ཞི་བར་བགྱིས་ན་རྣམ་པར་ཞི་བ་ཞེས་

Vol. 12 · folio 285a

བགྱིའམ། ཨུ་པཱ་ལི་རྣམ་པར་ཞི་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །བཙུན་པ་དེ་བཞིན་དུ་མ་ནིང་ནས། བསླབ་པ་སྩལ་བ་རྣམས་ཀྱི་བར་དུ་རྒྱས་པར་དེ་དག་གིས་རྩོད་པ་རྣམ་པར་ཞི་བར་བགྱིས་ན་རྣམ་པར་ཞི་བ་ཞེས་བགྱིའམ། ཨུ་པཱ་ལི་

རྣམ་པར་ཞི་བ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །བཙུན་པ་རྒོལ་བའམ་སླར་རྒོལ་བ་དུས་བགྱིས་ན་རྩོད་པ་རྣམ་པར་ཞི་བ་ཞེས་བགྱིའམ། ཨུ་པཱ་ལི་རྣམ་པར་ཞི་བ་ཞེས་བྱའོ། །དེ་བཞིན་དུ་ཁྱིམ་པ་ལགས་པར་ཁས་བླངས་པ་ནས། བསླབ་པ་སྩལ་བ་

ལགས་པའི་བར་རྒྱས་པར་ཁས་བླངས་ན་རྩོད་པ་རྣམ་པར་ཞི་བ་ཞེས་བགྱིའམ། ཨུ་པཱ་ལི་རྣམ་པར་ཞི་བ་ཞེས་བྱའོ། བཙུན་པ་རྒོལ་བའམ་སླར་རྒོལ་བའི་དགེ་སློང་མཚན་འཕོས་ན་རྩོད་པ་རྣམ་པར་ཞི་བ་ཞེས་བགྱིའམ། ཨུ་པཱ་ལི་རྣམ་པར་ཞི་བ་ཞེས་བྱའོ། །རྩོད་པའི་དངོས་པོ་

རྫོགས་སྷོ།། །།མདོར་ན། བྱེ་འབྱེད་དགེ་འདུན་ཅ་ཅོ་དང་། །ཐ་དད་པ་དང་ཚུལ་བཞིན་དང་། །བསྐལ་པ་ཁ་ན་མ་ཐོ་ལོག །དགེ་འདུན་དབྱེ་དང་མི་མཁས་པའོ། །བཙུན་པ་དགེ་འདུན་བྱེ་བ་ཞེས་ཀྱང་བགྱི། བཙུན་པ་དགེ་འདུན་འདུས་པ་ཞེས་ཀྱང་བགྱི་ན། བཙུན་

པ་དགེ་འདུན་བྱེ་བ་གང་ལགས། ཨུ་པཱ་ལི་གང་དབྱེན་བྱེད་པས་ཆོས་མ་ཡིན་པ་ལ་ཆོས་མ་ཡིན་པར་འདུ་ཤེས། འདུལ་བ་མ་ཡིན་པ་ལ་འདུལ་བ་མ་ཡིན་པར་འདུ་ཤེས་པར་གྱུར་བཞིན་དུ་དེས་འདུ་ཤེས་བཅབས། བཟོད་པ་བཅབས། དད་པ་བཅབས། བློ་གྲོས་དང་།

ལྟ་བ་དང་། རྟོག་པ་རྣམས་བཅབས་ཏེ། འདི་སྐད་དུ་འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པའོ་ཞེས་སྨྲས་ནས། དེས་དགེ་སློང་དག་ལ་བསྒོ། །ཡང་དག་པར་བསྒོ། སློབ། ལེན་དུ་འཇུག །བརྟུལ་ཞུགས་ཀྱི་གཞི་ལྔ་ཡང་རྗེས་སུ་བསྒྲུབས་

ཏེ། འདི་ལྟར་ཚེ་དང་ལྡན་པ་ཁྱེད་ཅག་ལས་གང་དད་ཅིང་བཟོད་དེ་མོས་པ་དེ་དག་གིས་ནི་ཚུལ་ཤིང་ལོང་ཤིག །དེ་དག་གིས་བརྟུལ་ཞུགས་ཀྱི་གནས་ལྔ་བསྒྲགས་ཏེ་གསོལ་བ་བྱས། ཚུལ་ཤིང་བྲིམས་ནས་མང་པོ་ཁྲིད་དེ་འགྲོ་བ་འདི་ནི་དགེ་འདུན་བྱེ་བ་ཞེས་བྱའོ། །དགེ་འདུན་

Vol. 12 · folio 285b

འདུས་པ་གང་ཞེ་ན། དགེ་སློང་མཚམས་ཀྱི་ནང་ན་ཇི་སྙེད་ཅིག་འཁོད་པར་གྱུར་པ་དེ་དག་ལས་བྱེད་པ་ན་དེ་དག་ཐམས་ཅད་འདུས་པར་གྱུར། མངོན་སུམ་དུ་གྱུར། དད་པ་བླང་བར་རིགས་པའི་རྣམས་ལས་དད་པ་བླངས་པར་གྱུར། དགེ་སློང་རྣམས་ཀྱང་འཐབ་པ་མེད། རྩོད་

པ་མེད་ལ། དེ་དག་ཆོས་སུ་འདུ་ཤེས། འདུལ་བར་འདུ་ཤེས་ཤིང་གསོ་སྦྱོང་གི་ལས་བྱེད་པ་འདི་ནི་དགེ་འདུན་འདུས་པ་ཞེས་བྱའོ། །བཙུན་པ་དགེ་འདུན་འབྱེད་པས་བསྟིར་མེད་པའི་ཁ་ན་མ་ཐོ་བ་སྐྱེས་ལ་མཚམས་མེད་པའི་ལས་སུ་འགྱུར་བ་གང་ལགས། ཨུ་པཱ་ལི་ནམ་དབྱེན་

བྱེད་པས་ཆོས་མ་ཡིན་པ་ལ་ཆོས་མ་ཡིན་པར་འདུ་ཤེས་པ་ཡིན། བྱེ་བ་ལའང་ཆོས་མ་ཡིན་པར་འདུ་ཤེས་བཞིན་དུ་དེས་འདུ་ཤེས་བཅབས། བཟོད་པ་བཅབས། དད་པ་དང་། བློ་གྲོས་དང་། ལྟ་བ་དང་། རྟོག་པ་རྣམས་བཅབས་ཏེ། འདི་སྐད་དུ་ཆོས་ནི་འདིའོ། །

འདུལ་བ་ནི་འདིའོ། །སྟོན་པས་བསྟན་པ་ནི་འདིའོ་ཞེས་སྨྲས་ནས་དེས་དགེ་སློང་དག་ལ་བསྒོ། ཡང་དག་པར་བསྒོ། སློབ། ལེན་དུ་འཇུག །བརྟུལ་ཞུགས་ཀྱི་གཞི་ལྔ་རྗེས་སུ་བསྒྲགས་ཏེ། གང་དབྱེན་བྱེད་པ་དེས་བརྟུལ་ཞུགས་ཀྱི་གཞི་ལྔ་རྗེས་སུ་བསྒྲགས་ཏེ། གསོལ་

བ་བྱས་ཚུལ་ཤིང་བྲིམས་ནས་མང་པོ་ཁྲིད་དེ་སོང་བ་འདི་ནི་དགེ་འདུན་འབྱེད་པ་ཡིན་ཏེ་བསྟིར་མེད་པའི་ཁ་ན་མ་ཐོ་བའང་བསྐྱེད། ཡང་དག་པ་བསྒོ་བ་བླངས་ཤིང་ལེན་དུ་འཇུག་པས་མཚམས་མེད་པའི་ལས་སུའང་འགྱུར་རོ། །དགེ་འདུན་འབྱེད་པས་བསྟིར་མེད་པའི་ཁ་ན་མ་ཐོ་བ་ནི་སྐྱེ་

ལ་དེ་མཚམས་མེད་པའི་ལས་སུ་མི་འགྱུར་བ་གང་ཞེ་ན། ཨུ་པཱ་ལི་གང་དབྱེན་བྱེད་པས་ཆོས་མ་ཡིན་པ་ལ་ཆོས་མ་ཡིན་པར་འདུ་ཤེས་པར་གྱུར་ལ་བྱེ་བ་ལ་ནི་ཆོས་སུ་འདུ་ཤེས་པ་དང་། ཆོས་མ་ཡིན་པ་ལ་ཆོས་མ་ཡིན་པར་འདུ་ཤེས་པར་གྱུར་ལ་བྱེ་བ་ལ་ཡང་ཆོས་མ་ཡིན་པར་

འདུ་ཤེས་པ་དང་། ཆོས་མ་ཡིན་པ་ལ་ཆོས་མ་ཡིན་པར་འདུ་ཤེས་པར་གྱུར་ལ་བྱེ་བ་ལ་ཐེ་ཚོམ་ཟ་བ་དང་། ཆོས་མ་ཡིན་པ་ལ་ཆོས་སུ་འདུ་ཤེས་ལ་བྱེ་བ་ལ་ཆོས་མ་ཡིན་པར་འདུ་ཤེས་པ་དང་། ཆོས་མ་ཡིན་པ་ལ་ཆོས་སུ་འདུ་ཤེས་ལ་བྱེ་བ་ལ་ཡང་ཆོས་སུ་འདུ་ཤེས་པ་དང་།

Vol. 12 · folio 286a

ཆོས་མ་ཡིན་པ་ལ་ཆོས་སུ་འདུ་ཤེས་ལ་བྱེ་བ་ལ་ཐེ་ཚོམ་དུ་གྱུར་པ་དང་། ཆོས་ལ་ཆོས་སུ་འདུ་ཤེས་ལ་བྱེ་བ་ལ་ཆོས་མ་ཡིན་པར་འདུ་ཤེས་པ་དང་། ཆོས་ལ་ཆོས་མ་ཡིན་པར་འདུ་ཤེས་ལ་བྱེ་བ་ལ་ཆོས་སུ་འདུ་ཤེས་པ་དང་། ཆོས་ལ་ཆོས་མ་ཡིན་པར་འདུ་ཤེས་ལ་

བྱེ་བ་ལ་ཐེ་ཚོམ་དུ་གྱུར་པ་དང་། ཆོས་ལ་ཆོས་མ་ཡིན་པར་འདུ་ཤེས་ལ་བྱེ་བ་ལའང་ཆོས་མ་ཡིན་པར་འདུ་ཤེས་པ་དང་། ཆོས་ལ་ཆོས་མ་ཡིན་པར་འདུ་ཤེས་ལ་བྱེ་བ་ལ་ཆོས་སུ་འདུ་ཤེས་པ་དང་། ཆོས་ལ་ཆོས་མ་ཡིན་པར་འདུ་ཤེས་ལ་བྱེ་བ་ལ་ཐེ་ཚོམ་དུ་གྱུར་པ་དང་། ཆོས་

དང་ཆོས་མ་ཡིན་པ་ལ་ཐེ་ཚོམ་དུ་གྱུར་ལ་བྱེ་བ་ལ་ཆོས་མ་ཡིན་པར་འདུ་ཤེས་པ་དང་། ཆོས་མ་ཡིན་པ་ལ་ཐེ་ཚོམ་དུ་གྱུར་ལ་བྱེ་བ་ལ་ཆོས་སུ་འདུ་ཤེས་པ་དང་། ཆོས་མ་ཡིན་པ་ལ་ཐེ་ཚོམ་དུ་གྱུར་ལ་བྱེ་བ་ལ་ཡང་ཐེ་ཚོམ་དུ་གྱུར་པ་དང་། ཆོས་ལ་ཐེ་ཚོམ་དུ་གྱུར་ལ་བྱེ་བ་ལ་

ཆོས་མ་ཡིན་པར་འདུ་ཤེས་པ་དང་། ཆོས་ལ་ཐེ་ཚོམ་དུ་གྱུར་ལ་བྱེ་བ་ལ་ཆོས་སུ་འདུ་ཤེས་པ་དང་། ཆོས་ལ་ཐེ་ཚོམ་དུ་གྱུར་ལ་བྱེ་བ་ལའང་ཐེ་ཚོམ་དུ་གྱུར་པ་སྟེ། དེས་འདུ་ཤེས་བཅབས། བཟོད་པ་བཅབས། དད་པ་བཅབས། བློ་གྲོས་དང་། ལྟ་བ་དང་། རྟོག་

པ་རྣམས་བཅབས་ཏེ། འདི་སྐད་དུ་འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པའོ་ཞེས་སྨྲས་ནས། དེས་ཡང་དགེ་སློང་རྣམས་ལ་བསྒོ། ཡང་དག་པར་བསྒོ། སློབ། ལེན་དུ་འཇུག །དགེ་འདུན་དབྱེ་བའི་ཕྱིར་བརྩོན་པ་ནི་དགེ་འདུན་འབྱེད་པར་བྱེད་པ་

སྟེ། བསྟིར་མེད་པའི་ཁ་ན་མ་ཐོ་བ་ནི་སྐྱེ་ལ། དེ་མཚམས་མེད་པའི་ལས་སུ་མི་འགྱུར་བ་ཞེས་བྱའོ། །བཙུན་པ་གང་ལ་ལས་དགེ་འདུན་བྱེ་བ་དེ་དག་ཐམས་ཅད་དགེ་འདུན་ཅ་ཅོར་འགྱུར་ལགས་སམ། དགེ་འདུན་བྱེ་ལ་དགེ་འདུན་ཅ་ཅོ་མེད་པ་ཡང་ཡོད་ལ། དགེ་འདུན་ཅ་ཅོར་གྱུར་

ལ་དགེ་འདུན་མི་འབྱེ་བ་ཡང་ཡོད། དགེ་འདུན་ཀྱང་བྱེ་ལ་དགེ་འདུན་ཅ་ཅོར་ཡང་འགྱུར་བ་ཡོད། དགེ་འདུན་ཡང་མི་འབྱེ་ལ་དགེ་འདུན་ཅ་ཅོར་ཡང་མི་འགྱུར་བ་ཡོད་དེ། དེ་ལ་དགེ་འདུན་བྱེ་ལ་དགེ་འདུན་ཅ་ཅོ་མེད་པ་གང་ཞེ་ན། གང་ཆོས་སུ་འདུ་ཤེས་ལ་དགེ་འདུན་འབྱེད་

Vol. 12 · folio 286b

པའོ། །དགེ་འདུན་ཅ་ཅོར་གྱུར་ལ་དགེ་འདུན་མི་འབྱེ་བ་གང་ཞེ་ན། དབྱེན་དུ་འགྱུར་བའི་དངོས་པོ་བཅུ་བཞི་ལས་གང་ཡང་རུང་སྟེ་དབྱེན་དུ་འགྱུར་བའི་དངོས་པོ་ཞིག་ཤིན་ཏུ་གདོན་མི་ཟ་བར་བཟུང་བར་གྱུར་ལ་དགེ་འདུན་ནི་བྱེ་བར་མ་གྱུར་པའོ། །དགེ་འདུན་ཡང་བྱེ་ལ་དགེ་འདུན་གྱི་ཅ་ཅོར་ཡང་

འགྱུར་ལ་གང་ཞེ་ན། འདི་ལྟར་དགེ་འདུན་དེ་དག་བྱེ་བར་གྱུར་ལ་དབྱེན་དུ་འགྱུར་བའི་དངོས་པོ་བཅུ་བཞི་ལས་གང་ཡང་རུང་སྟེ་དབྱེན་དུ་འགྱུར་བའི་དངོས་པོ་ཞིག་ཤིན་ཏུ་གདོན་མི་ཟ་བར་བཟུང་བར་གྱུར་པའོ། །དགེ་འདུན་ཡང་མི་བྱེ་ལ་དགེ་འདུན་གྱི་ཅ་ཅོར་མི་འགྱུར་བ་གང་ཞེ་ན། རྣམ་

པ་འདི་ལ་བུ་དག་མ་གཏོགས་པའོ། །བཙུན་པ་གང་དགེ་འདུན་བྱེ་བ་དེ་ཐམས་ཅད་དགེ་འདུན་ཐ་དད་པར་གྱུར་པ་ལགས་སམ། དགེ་འདུན་ཐ་དད་པར་གྱུར་ལ་དགེ་འདུན་མི་འབྱེ་བ་ཡང་ཡོད། དགེ་འདུན་བྱེ་ལ་དགེ་འདུན་ཐ་དད་པར་མི་འགྱུར་བ་ཡོད། དགེ་འདུན་བྱེ་ལ་དགེ་འདུན་

ཐ་དད་པར་འགྱུར་བ་ཡང་ཡོད། དགེ་འདུན་མི་འབྱེ་ལ་དགེ་འདུན་ཐ་དད་པར་མི་འགྱུར་བའང་ཡོད་དེ། དགེ་འདུན་ཐ་དད་པར་གྱུར་ལ་དགེ་འདུན་མི་འབྱེ་བ་ནི་དེ་འདི་ལྟར་དགེ་འདུན་རྣམ་གཉིས་སོ་སོ་ན་གཞི་ལ་གནས་པར་གྱུར། རྙེད་པ་ཡང་ཐ་དད་གནས་ཀྱང་ཐ་དད། མཚམས་

ཀྱང་ཐ་དད་པར་གྱུར་ལ་དགེ་འདུན་ནི་མ་བྱེ་བའོ། །དགེ་འདུན་བྱེ་ལ་དགེ་འདུན་ཐ་དད་པར་མི་འགྱུར་བ་ནི་གང་ཆོས་སུ་འདུ་ཤེས་པས་དགེ་འདུན་ཕྱེ་བའོ། །དགེ་འདུན་བྱེ་ལ་དགེ་འདུན་ཐ་དད་པ་ནི་འདི་ལྟར་དགེ་འདུན་བྱེ་བར་གྱུར་ལ་དགེ་འདུན་རྣམ་གཉིས་སོ་སོ་ན་གནས་པར་གྱུར།

རྙེད་པ་ཐ་དད་པ་དང་། གནས་ཐ་དད་པ་དང་། མཚམས་ཐ་དད་པར་གྱུར་པའོ། །དགེ་འདུན་མ་བྱེ་ལ་དགེ་འདུན་ཐ་དད་པར་ཀྱང་མ་གྱུར་པ་ནི་རྣམ་པ་དེ་ལྟ་བུ་དག་མ་གཏོགས་པའོ། །ཇི་ལྟར་དགེ་འདུན་ཐ་དད་པ་ལ་རྣམ་པ་བཞིར་འགྱུར་བ་བཞིན་དུ་དགེ་འདུན་གྱི་ཚུལ་ལ་ཡང་རྣམ་པ་

བཞིར་བརྗོད་པར་བྱའོ། །བཙུན་པ་གང་ལ་ལས་དགེ་འདུན་གྱི་དབྱེན་བགྱིད་པ་དེ་དག་ཐམས་ཅད་བསྐལ་པར་གནས་སམ། དགེ་འདུན་གྱི་དབྱེན་བྱས་ལ་བསྐལ་པར་མི་གནས་པའང་ཡོད། བསྐལ་པར་གནས་ལ་དགེ་འདུན་གྱི་དབྱེན་མ་བྱས་པ་ཡང་ཡོད། དགེ་འདུན་གྱི་

Vol. 12 · folio 287a

དབྱེན་བྱས་ལ་བསྐལ་པར་གནས་པའང་ཡོད། དགེ་འདུན་གྱི་དབྱེན་མ་བྱས་པ་ལ་བསྐལ་པར་མི་གནས་པའང་ཡོད་དོ། །དགེ་འདུན་གྱི་དབྱེན་བྱས་ལ་བསྐལ་པར་མི་གནས་པ་ནི་གང་གིས་ཆོས་སུ་འདུ་ཤེས་པས་དགེ་འདུན་ཕྱེ་བའོ། །བསྐལ་པར་གནས་ལ་དགེ་

འདུན་གྱི་དབྱེན་མ་བྱས་པ་ནི་གླང་པོའི་རྒྱལ་པོ་ཨེ་ར་བ་ན་དང་། གླང་པོའི་རྒྱལ་པོ་ཤིན་ཏུ་བརྟན་པ་དང་། གླང་པོའི་རྒྱལ་པོ་ཡིད་དུ་འོང་བ་དང་། གླང་པོའི་རྒྱལ་པོ་གཤིན་རྗེ་དང་། ཚངས་ལྷ་ཉེ་ཕན་གྱི་ལྷ་རྣམས་སོ། །དགེ་འདུན་ཕྱེ་ལ་བསྐལ་པར་གནས་པ་ནི་ལྷ་སྦྱིན་ནོ། །དགེ་

འདུན་ཀྱང་མ་ཕྱེ་ལ་བསྐལ་པར་ཡང་མི་གནས་པ་ནི་རྣམ་པ་དེ་ལྟ་བུ་དག་མ་གཏོགས་པའོ། །གང་ལ་ལས་དགེ་འདུན་ཕྱེ་ན་དེ་དག་ཐམས་ཅད་བསྐལ་པར་གནས་པའི་ཁ་ན་མ་ཐོ་བ་སྐྱེ་བ་ཡང་རྣམ་པ་བཞིར་བརྗོད་པར་བྱ་སྟེ། དེ་ཡང་དེ་བཞིན་དུ་དབྱེ་བར་བྱའོ། །གང་ལ་ལས་དགེ་

འདུན་འབྱེད་པ་དེ་དག་ཐམས་ཅད་ལོག་པར་ངེས་པ་ལགས་སམ། དགེ་འདུན་འབྱེད་ལ་ལོག་པར་ངེས་པ་མ་ཡིན་པའང་ཡོད། ལོག་པར་ངེས་ལ་དགེ་འདུན་མི་འབྱེད་པའང་ཡོད། དགེ་འདུན་འབྱེད་ལ་ལོག་པར་ངེས་པའང་ཡོད། དགེ་འདུན་འབྱེད་པ་ཡང་མ་ཡིན་ལ་ལོག་

པར་ངེས་པ་མ་ཡིན་པའང་ཡོད་དེ། དགེ་འདུན་འབྱེད་ལ་ལོག་པར་ངེས་པ་མ་ཡིན་པ་ནི་གང་ཆོས་སུ་འདུ་ཤེས་ཤིང་དགེ་འདུན་འབྱེད་པའོ། །ལོག་པར་ངེས་ལ་དགེ་འདུན་འབྱེད་པ་མ་ཡིན་པ་ནི་དེ་མཚམས་མེད་པ་བཞིའོ། །དགེ་འདུན་འབྱེད་ལ་ལོག་པར་ཀྱང་ངེས་པ་ནི་ལྷ་སྦྱིན་ནོ། །

དགེ་འདུན་འབྱེད་པའང་མ་ཡིན་ལ་ལོག་པར་ངེས་པའང་མ་ཡིན་པ་ནི་རྣམ་པ་འདི་ལྟ་བུ་དག་མ་གཏོགས་པའོ། །གང་ལ་ལས་དགེ་འདུན་འབྱེད་པ་དེ་དག་ཐམས་ཅད་མི་མཁས་པ་དང་མ་རིག་པར་གྱུར་པ་ལགས་སམ། དགེ་འདུན་འབྱེད་ལ་མི་མཁས་པ་མ་ཡིན་ཞིང་མ་རིག་པར་གྱུར་

པ་མ་ཡིན་པའང་ཡོད། མི་མཁས་པ་དང་མ་རིག་པ་ཡིན་ལ་དགེ་འདུན་མི་འབྱེད་པའང་ཡོད། དགེ་འདུན་འབྱེད་ལ་མི་མཁས་པ་མ་རིག་པར་གྱུར་པའང་ཡོད། དགེ་འདུན་ཡང་མི་འབྱེད་ལ་མཁས་པའང་ཡིན་མ་རིག་པར་གྱུར་པའང་མ་ཡིན་པའང་ཡོད་དེ། དགེ་འདུན་འབྱེད་ལ་

Vol. 12 · folio 287b

མི་མཁས་པའང་མ་ཡིན་མ་རིག་པར་གྱུར་པ་མ་ཡིན་པ་ནི་གང་ཆོས་སུ་འདུ་ཤེས་པས་དགེ་འདུན་འབྱེད་པའོ། །མི་མཁས་པ་དང་མ་རིག་པར་གྱུར་ལ་དགེ་འདུན་མི་འབྱེད་པ་ནི་སྟོན་པ་དྲུག་གོ། །དགེ་འདུན་འབྱེད་ལ་མི་མཁས་པ་དང་མ་རིག་པ་ནི་ལྷ་སྦྱིན་ནོ། །དགེ་འདུན་ཡང་མི་འབྱེད་

ལ་མི་མཁས་པའང་མ་ཡིན་མ་རིག་པར་གྱུར་པའང་མ་ཡིན་པ་ནི་རྣམ་པ་འདི་དག་མ་གཏོགས་པའོ།། །།མདོར་ན། ཕྱེ་བ་རྣམ་པ་དྲུག་ཏུ་བྱས། །རྒོལ་བ་རྣམ་བཞི་གསོ་སྦྱོང་དང་། །མཚམས་ལ་རྣམ་བཞི་གསུམ་པ་དང་། །བསྐལ་པ་བརྟན་མིན་དེ་བཞིན་ཏེ། །ཁྱིམ་པ་དག་ལ་

སོགས་པ་དང་། །བསླབ་པ་བྱིན་པ་ཐ་མའོ། །བཙུན་པ་ཕྱེ་བ་དང་ལྡན་པ་གང་ལགས། ཁ་ན་མ་ཐོ་བ་གང་ལགས། ཨུ་པཱ་ལི་དགེ་འདུན་ནི་ཕྱེ་བ་དང་ལྡན་པའོ། །འབྱེད་པ་ནི་ཁ་ན་མ་ཐོ་བའོ། །བཙུན་པ་དགེ་འདུན་ཕྱེ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་

འདུན་ཕྱེ་ན་ནོངས་པ་གང་བཤགས་པར་བགྱི། ཉེས་པ་སྦོམ་པོའོ། །བཙུན་པ་འདི་ལྟར་དགེ་སློང་དག་གིས་དགེ་སློང་གི་དགེ་འདུན་འབྱེད་ཀྱི། དགེ་སློང་མས་མ་ལགས། དགེ་སློབ་མས་མ་ལགས། དགེ་ཚུལ་མས་མ་ལགས། དགེ་ཚུལ་ཕས་མ་ལགས་སམ། ཨུ་པཱ་ལི་དེ་བཞིན་

ཏེ། དགེ་སློང་དག་གིས་དགེ་འདུན་འབྱེད་ཀྱི། དགེ་སློང་མས་མ་ཡིན། དགེ་སློབ་མས་མ་ཡིན། དགེ་ཚུལ་མས་མ་ཡིན། དགེ་ཚུལ་ཕས་མ་ཡིན་ནོ། །ཨུ་པཱ་ལི་དེ་བཞིན་དུ་དགེ་སློང་མ་དག་གིས་དགེ་སློང་མའི་དགེ་འདུན་འབྱེད་ཀྱི་དགེ་སློང་གིས་མ་ཡིན། དགེ་སློབ་མས་མ་ཡིན།

དགེ་ཚུལ་མས་མ་ཡིན། དགེ་ཚུལ་ཕས་མ་ཡིན་ཏེ། འོན་ཀྱང་དགེ་འདུན་འབྱེད་པའི་ཕྱིར་ནི་རྩོལ་ལོ། །བཙུན་པ་བཅོམ་ལྡན་འདས་ཀྱིས་རྣམ་པ་གཉིས་ཀྱི་སླད་དུ་དགེ་འདུན་འབྱེ་སྟེ། རྗེས་སུ་བསྒྲགས་པ་དང་། ཚུལ་ཤིང་ལེན་པའོ་ཞེས་གསུངས་ན། བཙུན་པ་གང་རྩེད་མོར་འཚལ་

བའམ། མ་འཚལ་བ་ཞིག་གིས་རྗེས་སུ་བསྒྲགས་ཤིང་ཚུལ་ཤིང་བྲིམས་ན་དགེ་འདུན་ཕྱེ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །འོ་ན་ཅིར་འགྱུར། ཉེས་བྱས་སོ། དགེ་འདུན་འབྱེད་པའི་དགེ་སློང་གིས་དགེ་འདུན་འབྱེད་པ་ན་མཚན་འཕོས་ན་དགེ་འདུན་ཕྱེ་བ་ཞེས་བགྱིའམ། ཨུ་

Vol. 12 · folio 288a

པཱ་ལི་མ་ཡིན་ནོ། །བཙུན་པ་དགེ་སློང་མའི་དགེ་འདུན་བྱེ་ནས་ཕྱོགས་དང་ཕ་རོལ་གྱི་ཕྱོགས་སུ་གནས་ན་དགེ་སློང་མ་ལ་ཟླ་བ་ཕྱེད་ཕྱེད་ཅིང་བསྟན་པའི་ལུང་སྩལ་ཏམ། ཨུ་པཱ་ལི་མ་སྦྱིན་པར་འདི་སྐད་དུ་སྲིང་མོའི་རྣམས་རྗེས་སུ་མཐུན་པར་གྱིས་ཤིག་ཅེས་སྒོ་ཤིག །བཙུན་

པ་དགེ་སློང་གི་དགེ་འདུན་བྱེ་སྟེ་ཕྱོགས་དང་ཕ་རོལ་གྱི་ཕྱོགས་སུ་གནས་ན་དགེ་སློང་མས་ཟླ་བ་ཕྱེད་ཅིང་བསྟན་པའི་ལུང་གསོལ་བར་བགྱིའམ། ཨུ་པཱ་ལི་གསོལ་བར་བྱའོ། གང་ལས་གསོལ། རྗེས་སུ་མ་ཕྱོགས་པ་རྣམས་སོ། བཙུན་པ་དགེ་སློང་གི་དགེ་འདུན་ཕྱེ་སྟེ་ཕྱོགས་དང་ཕ་རོལ་གྱི་

ཕྱོགས་སུ་གནས་ན་དགེ་སློང་མ་ལ་བསྟན་པའི་ལུང་སྩོལ་བར་བགྱིའམ། ཨུ་པཱ་ལི་དགེ་སློང་མ་ཡང་བྱེ་བར་མི་འགྱུར་བའི་ཕྱིར་བས་ན་བྱིན་ཅིག །བཙུན་པ་དགེ་སློང་མའི་དགེ་འདུན་བྱེ་སྟེ་ཕྱོགས་དང་ཕ་རོལ་གྱི་ཕྱོགས་སུ་གནས་པ་ལ་གང་གིས་དགེ་སློང་མ་ལ་ལུང་སྩལ་བར་བགྱི།

རྗེས་སུ་མ་ཕྱོགས་པ་རྣམས་ཀྱིས་སྦྱིན་ནོ། བཙུན་པ་དགེ་སློང་གི་དགེ་འདུན་བྱེ་སྟེ་ཕྱོགས་དང་ཕ་རོལ་གྱི་ཕྱོགས་སུ་གནས་ན་དགེ་སློང་མས་གསོ་སྦྱོང་བགྱིའམ། ཨུ་པཱ་ལི་བྱའོ། །བཙུན་པ་དགེ་སློང་གི་དགེ་འདུན་བྱེ་སྟེ་ཕྱོགས་དང་ཕ་རོལ་གྱི་ཕྱོགས་སུ་གནས་ན་ཉེ་བར་ཕྱོགས་

པའི་དགེ་སློང་རྣམས་ཀྱིས་གསོ་སྦྱོང་བགྱིའམ། ཨུ་པཱ་ལི་མ་ཡིན་ནོ། །དེ་ཅིའི་ཕྱིར་ཞེ་ན། དགེ་འདུན་འདུས་པ་ལས་ནི་གསོ་སྦྱོང་བྱའོ། །བཙུན་པ་ཉེ་བར་ཕྱོགས་པས་ཉེ་བར་མ་ཕྱོགས་པ་རྣམས་ཀྱི་མཚམས་བཀྲོལ་ན་མཚམས་བཀྲོལ་བ་ཞེས་བགྱིའམ། ཨུ་པཱ་ལི་མ་ཡིན་

ནོ། །བཙུན་པ་ཉེ་བར་མ་ཕྱོགས་པ་རྣམས་ཀྱིས་ཉེ་བར་ཕྱོགས་པ་རྣམས་ཀྱི་མཚམས་བཀྲོལ་ན་མཚམས་བཀྲོལ་བ་ཞེས་བགྱིའམ། ཨུ་པཱ་ལི་བཀྲོལ་བ་ཞེས་བྱའོ། །བཙུན་པ་གང་ལ་ལ་ཞིག་ཉེ་བར་ཕྱོགས་པ་དེ་དག་ཐམས་ཅད་སོ་སོར་གནས་པ་ཞེས་བགྱིའམ། རྣམ་པ་

བཞིར་རྒྱས་པར་བརྗོད་དོ། །བཙུན་པ་གང་ལ་ལ་ཞིག་ཉེ་བར་ཕྱོགས་ནས་དེ་དག་ཐམས་ཅད་མི་གནས་པ་ཞེས་བགྱིའམ། རྣམ་པ་བཞིར་རྒྱས་པར་བརྗོད་དོ། །བཙུན་པ་གང་ལ་ལ་སོ་སོར་གནས་ན་དེ་དག་ཐམས་ཅད་མི་གནས་པ་ཞེས་བགྱིའམ། རྣམ་པ་བཞིར་རྒྱས་པར་

Vol. 12 · folio 288b

བརྗོད་དོ། །བཙུན་པ་བཅོམ་ལྡན་འདས་ཀྱིས་ལྕགས་རྣམ་པ་བརྒྱར་གྱེས་པའི་དུམ་བུ་ཡང་བཙལ་བར་བྱའོ་ཞེས་གསུངས་ན། ལྕགས་ཀྱི་དུམ་བུ་ཞེས་བགྱི་བ་གང་ལགས། དད་པ་བཙལ་བར་བྱ་བ་དང་། མོས་པ་བཙལ་བར་བྱ་བ་དང་། འདུམ་པ་བཙལ་བར་བྱ་བ་དང་། དགེ་འདུན་

འདུས་པ་བཙལ་བར་བྱ་སྟེ། དགེ་འདུན་དབྱེ་བའི་ཕྱིར་ནི་བཙལ་བར་མི་བྱའོ། །བཙུན་པ་དགེ་འདུན་བྱེ་སྟེ་ཕྱོགས་དང་ཕ་རོལ་གྱི་ཕྱོགས་སུ་གནས་ན་གཏན་པ་གང་གིས་དབྱུང་བར་བགྱི། ཉེ་བར་མ་ཕྱོགས་པ་རྣམས་ཀྱིས་སོ། །བཙུན་པ་མ་ནིང་ཞིག་གིས་དགེ་འདུན་ཕྱེ་ན་ཕྱེ་བ་ཞེས་

བགྱིའམ། ཨུ་པཱ་ལི་མ་ཡིན་ནོ། །བཙུན་པ་དེ་བཞིན་དུ་དགེ་སློང་མ་སུན་ཕྱུང་བ་ནས། བསླབ་པ་སྩལ་བའི་བར་དུ་རྒྱས་པར་དེ་དག་གིས་དགེ་འདུན་ཕྱེ་ན་དགེ་འདུན་ཕྱེ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་སྨྱོན་པ་ཞིག་གིས་དགེ་འདུན་ཕྱེ་ན་དགེ་འདུན་ཕྱེ་བ་ཞེས་བགྱིའམ།

ཨུ་པཱ་ལི་མ་ཡིན་ནོ། །བཙུན་པ་དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་རྣམས་ཀྱིས་དགེ་འདུན་ཕྱེ་ན་དགེ་འདུན་ཕྱེ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་ཅིའི་ཕྱིར་ཞེ་ན། ཨུ་པཱ་ལི་རང་བཞིན་དུ་གནས་པ་མ་ཡིན་པས་ནི་

དགེ་འདུན་དབྱེ་བར་མི་ནུས་སོ། །ཇི་ལྟར་དགེ་འདུན་འབྱེད་པ་དེ་བཞིན་དུ་གྲངས་སུ་མི་འགྱུར་བར་ཡང་བརྗོད་པར་བྱའོ། །དགེ་འདུན་གྱི་དབྱེན་གྱི་དངོས་པོ་རྫོགས་ཏེ། ཨུ་པཱ་ལིས་དྲིས་པ་རྫོགས་སྷོ།། །།མདོར་ན། བཟང་བྱིན་རྡོ་རྗེ་འདུ་ཤེས་དང་། །བལ་གླང་མོ་དང་རྒོད་མ་

དང་། །བ་དང་རྔ་མོ་རི་དགས་མོ། །བོང་ལུག་ཁྱི་ཕག་མོ་རྣམས་སོ། །སངས་རྒྱས་བཅོམ་ལྡན་འདས་གྲོང་ཁྱེར་ཡངས་པ་ཅན་ན་སྤྲེའུ་རྫིང་འགྲམ་གྱི་ཁང་བུ་བརྩེགས་པ་ན་ཞུགས་སོ། །ཀ་ལན་ད་ཀའི་བུ་བཟང་བྱིན་ལ་བསླབ་པའི་གནས་མ་བཅས་པས་ལས་དང་པོ་པ་ལ་ཉེས་པ་མེད་པ་

ན་བདག་གིས་བསླབ་པ་མ་བཅས་པའི་ཚེ་ལན་མང་ཞིག་ཏུ་མི་ཚངས་པར་སྤྱོད་པ་འཁྲིག་པའི་ཆོས་བྱས་ན་བདག་གི་ལས་དང་པོ་གང་ཡིན་ཞེས་ཐེ་ཚོམ་དུ་གྱུར་ནས་སེམས་ལ་དོགས་པ་དང་འགྱོད་པ་རྣམས་སྐྱེས་ཏེ། དེས་དེ་ལྟ་བུར་གྱུར་པ་དགེ་སློང་རྣམས་ལ་སྨྲས་ནས། དགེ་སློང་རྣམས་ཀྱིས་

Vol. 12 · folio 289a

བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བསླབ་པའི་གནས་མ་བཅས་པ་ན་ཀ་ལན་ད་ཀའི་བུ་བཟང་བྱིན་གྱིས་ཤིན་ཏུ་འདས་པར་གྱུར་པ་ནི་ཐམས་ཅད་ཀྱང་ལས་དང་པོ་པ་ཡིན་ཏེ། ལས་དང་པོ་པ་ལ་ནི་ཉེས་

པ་མེད་དོ། །དགེ་སློང་རྡོ་རྗེའི་བུ་ཞེས་བྱ་བས་བསླབ་པ་མ་ཕུལ། བསླབ་པ་ཉམས་པ་མ་བཤགས་པར་ཁྱིམ་པར་གྱུར་ཏེ། དེས་དེ་ན་མི་ཚངས་པར་སྤྱོད་པ་འཁྲིག་པའི་ཆོས་བྱས་ནས་དེ་འདི་སྙམ་དུ་གྱུར་ཏོ། །རེ་ཞིག་དགེ་སློང་རྣམས་ལ་དྲིས་ལ་དེ་སྟེ་བདག་རབ་ཏུ་འབྱུང་ཞིང་བསྙེན་

པར་རྫོགས་པར་རུང་ན་ནི་རབ་ཏུ་འབྱུང་ངོ་། །དེ་སྟེ་མི་རུང་ན་འདི་ཉིད་ན་འདུག་གོ་སྙམ་བསམས་ནས་དེས་དེ་ལྟར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པའི་བར་དུ་རྒྱས་པར་བྱས་ཏེ། དགེ་སློང་དག་བསླབ་པ་མ་ཕུལ་བསླབ་པ་ཉམས་པ་མ་བཤགས་པར་ཁྱིམ་པའི་

དངོས་པོར་གྱུར་ཏེ་མི་ཚངས་པར་སྤྱོད་པ་འཁྲིག་པའི་ཆོས་ལ་བསྟེན་ན་གང་ཟག་དེ་སླར་ཡང་རབ་ཏུ་འབྱུང་ཞིང་བསྙེན་པར་རྫོགས་པར་མི་རུང་གིས་དེ་བཞིན་དུ་བསླབ་པའི་གནས་བཤད་པར་བྱའོ། །ཡང་དགེ་སློང་གང་བསླབ་པ་མ་ཕུལ་བསླབ་པ་ཉམས་པ་མ་བཤགས་བཞིན་དུ་མི་ཚངས་

པར་སྤྱོད་པ་འཁྲིག་པའི་ཆོས་བྱས་ན་དགེ་སློང་དེ་ཡང་ཕས་ཕམ་པ་ཡིན་གྱིས་ལྷན་ཅིག་མ་གནས་ཤིག །དགེ་སློང་གཅིག་པུ་ཞིག་དགོན་པ་ན་འདུག་སྟེ་དེ་ལས་མི་རིང་བ་ཞིག་ན་བལ་གླང་མོ་ཞིག་ལ་བུ་བྱུང་སྟེ། བལ་གླང་མོ་དེ་ལས་བེའུ་མོ་ཞིག་བྱུང་ངོ་། །དེའི་མ་དེ་ནི་ཟས་ལ་སོང་ནས་དགེ་

སློང་དེས་རྩྭ་བླངས་ཏེ་དེ་ལ་རྩྭ་བྱིན་ཆུ་བླུད་པ་དང་། དེས་དེ་འདུག་པ་ལ་མོ་མཚན་བྱེ་བར་མཐོང་སྟེ། དེས་དེ་མཐོང་ནས་ཆགས་པར་གྱུར་ཏེ་དེར་ལོག་པར་ཞུགས་པ་དང་། དེ་ངོ་ཚ་བའི་ཆོས་སུ་གྱུར་ནས། དེས་བདག་ཕས་ཕམ་པའི་ཉེས་པ་མ་བྱུང་གྲང་སྙམ་བསམས་ནས་ཐེ་ཚོམ་སྐྱེས་ཏེ།

དེས་དེ་ལྟ་བུར་གྱུར་པ་དགེ་སློང་རྣམས་ལ་སྨྲས་པ་ནས་རྒྱས་པར་བརྗོད་དེ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེར་རེག་པར་མ་གྱུར་པས་ཕས་ཕམ་པའི་ཉེས་པ་ནི་མེད་ཀྱི་ཉེས་པ་སྦོམ་པོར་འགྱུར་རོ། །ནམ་བལ་གླང་གི་ཕྲུ་གུ་དེ་ཆེན་པོར་གྱུར་པ་དང་། དེས་དེའི་

Vol. 12 · folio 289b

མོ་མཚན་མཐོང་སྟེ། དེས་དེ་མཐོང་ནས་ཆགས་པ་དང་། དེས་དེར་གཞུག་སྙམ་ནས་མོ་མཚན་གྱི་ཁར་བཙུགས་པ་དང་། དེས་དེ་ལ་ཕྲ་བ་ཅིག་བརྒྱབ་ནས་སྐྲག་པར་གྱུར་ཏེ། བདག་ལ་ཕས་ཕམ་པའི་ལྟུང་བ་མ་བྱུང་གྲང་སྙམ་བསམས་ནས། དེས་དེ་ལྟ་བུར་གྱུར་པ་རྒྱས་

པར་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྐྲག་པ་ལ་ནི་ཆགས་པ་མེད་པས་ཕས་ཕམ་པའི་ཉེས་པ་ནི་མེད་ཀྱི་ཉེས་པ་སྦོམ་པོར་འགྱུར་རོ། །ཇི་ལྟར་བལ་གླང་མོ་བཞིན་དུ་རྒོད་མ་དང་། རྔ་མོ་དང་། རི་དགས་མོ་དང་། བོང་མོ་དང་། ལུག་མོ་

དང་། ཁྱི་མོ་དང་། ཕག་མོ་རྣམས་ཀྱང་དེ་བཞིན་ནོ།། །།མདོར་ན། སྨྱོན་པར་གྱུར་དང་སེམས་འཁྲུགས་དང་། །ནད་ཀྱིས་གཟིར་དང་མི་རྣམས་དང་། །ལམ་མིན་ལམ་དུ་འདུ་ཤེས་དང་། །ལམ་གསུམ་རབ་ཏུ་བསྒྲགས་པའོ། །བཙུན་པ་བཅོམ་ལྡན་འདས་

ཀྱིས་སྨྱོན་པ་ལ་ནོངས་པ་མ་མཆིས་སོ་ཞེས་གསུངས་ན། ཇི་ཙམ་གྱིས་ན་སྨྱོན་པ་ཞེས་བགྱི། རྣམ་པ་ལྔས་སྨྱོན་པར་གྱུར་ཏེ། གཉེན་བཤེས་ཟད་པ་དང་། ལོངས་སྤྱོད་ཟད་པ་དང་། ནོར་ཟད་པ་དང་། ཁམས་མ་མཉམ་པ་དང་། མི་མ་ཡིན་པས་བརླམས་པ་དང་། སྔོན་གྱི་ལས་

ཀྱི་རྣམ་པར་སྨིན་པ་སྟེ། རྣམ་པ་འདི་ལྔས་སྨྱོན་པར་འགྱུར་རོ། །དེ་སྟེ་དགེ་སློང་གི་དངོས་པོར་ཤེས་ན་ནི་དངོས་པོ་ཇི་ལྟ་བ་བཞིན་ནོ། །དེ་སྟེ་དགེ་སློང་གི་དངོས་པོར་མི་ཤེས་ན་སྨྱོན་པ་ལ་ཉེས་པ་མེད་དོ། །བཙུན་པ་བཅོམ་ལྡན་འདས་ཀྱིས་སེམས་འཁྲུགས་པ་ལ་ནོངས་པ་མ་

མཆིས་སོ་ཞེས་གསུངས་ན། ཇི་ཙམ་གྱིས་ན་སེམས་འཁྲུགས་པ་ཞེས་བགྱི། རྣམ་པ་ལྔས་ནི་སེམས་འཁྲུགས་པ་ཞེས་བྱ་སྟེ། མི་མ་ཡིན་པས་དེའི་སེམས་འཁྲུགས་པ་དང་། མི་མ་ཡིན་པས་དེ་ལ་བརླམས་པ་དང་། མི་མ་ཡིན་པས་དེའི་མདངས་ཕྲོགས་པ་དང་། ཁམས་

མ་མཉམ་པ་དང་། སྔོན་གྱི་ལས་ཀྱི་རྣམ་པར་སྨིན་པ་སྟེ། རྣམ་པ་འདི་ལྔས་ནི་སེམས་འཁྲུགས་པ་ཞེས་བྱ་སྟེ་རྒྱས་པར་རོ། །བཙུན་པ་བཅོམ་ལྡན་འདས་ཀྱིས་ནད་ཀྱིས་གཟིར་བ་ལ་ནོངས་པ་མ་མཆིས་སོ། །ཞེས་གསུངས་ན། ཇི་ཙམ་གྱིས་ན་ནད་ཀྱིས་གཟིར་བ་ཞེས་བགྱི། རྣམ་

Vol. 12 · folio 290a

པ་ལྔས་ན་ནད་ཀྱིས་གཟིར་བ་ཞེས་བྱ་སྟེ། དེ་ལ་རླུང་གིས་བསྐྱོད་པ་དང་། མཁྲིས་པ་དང་། བད་ཀན་དང་། འདུས་པ་དང་། དུས་གྱུར་པ་རྣམས་ཏེ། རྣམ་པ་འདི་ལྔ་ནི་ནད་ཀྱིས་གཟིར་བ་ཞེས་བྱའོ། །དགེ་སློང་གིས་ལམ་ལ་ལམ་མ་ཡིན་པར་འདུ་

ཤེས་ནས་མི་ཚངས་པར་སྤྱོད་པ་འཁྲིག་པའི་ཆོས་བྱས་ཏེ། དགེ་སློང་དེ་ལ་བདག་ལ་ཕས་ཕམ་པའི་ཉེས་པ་མ་བྱུང་གྲང་སྙམ་བསམས་ཏེ་ཐེ་ཚོམ་སྐྱེས་ནས་དེས་དེ་ལྟར་གྱུར་པ་རྒྱས་པར་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ལམ་ལ་ལམ་མ་ཡིན་པར་འདུ་ཤེས་

ན་ཕས་ཕམ་པར་འགྱུར་རོ། །ལམ་ལ་ཐེ་ཚོམ་ཟ་བར་འདུ་ཤེས་ནའང་ཕས་ཕམ་པར་འགྱུར་རོ། །ལམ་མ་ཡིན་པ་ལ་ལམ་དུ་འདུ་ཤེས་ན་ཉེས་པ་སྦོམ་པོར་འགྱུར་རོ། །ལམ་མ་ཡིན་པ་ལ་ཐེ་ཚོམ་ཟ་ན་ཉེས་པ་སྦོམ་པོར་འགྱུར་རོ། །ལམ་གསུམ་ལ་བཤང་བའི་ལམ་

དང་། གཅི་བའི་ལམ་དང་། ཁའི་ལམ་མོ། །དགེ་སློང་གིས་གཅི་བའི་ལམ་དུ་དཀྲིས་ཁ་ཤུན་འདས་ན་ཕས་ཕམ་པར་འགྱུར་རོ། །དགེ་སློང་གིས་བཤང་བའི་ལམ་དུ་དཀྲིས་རྐུབ་ཁ་འདས་ན་ཕས་ཕམ་པར་འགྱུར་རོ། །དགེ་སློང་གིས་ཁའི་ལམ་དུ་དཀྲིས་སོ་འདས་ན་ཕས་

ཕམ་པར་འགྱུར་རོ།། །།མདོར་ན། སྤྲེའུ་མོ་སེང་གེ་ཁྲུང་ཁྲུང་མོ། །རྨ་བྱ་ཁྱིམ་བྱའང་དེ་བཞིན་ཏེ། །མཚན་རིང་དང་ནི་རྒྱབ་གཉེན་དང་། །ནན་དི་ཀ་དང་ཁ་གཉིས་སོ། །ཉེས་པ་སྦོམ་པོ་བཞི་སྟེ། སྤྲེའུ་མོ་དང་། མཚན་རིང་ནི་ཇི་ལྟར་རྣམ་པར་འབྱེད་པ་ལས་འབྱུང་བ་

བཞིན་ཏེ། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པར་འགྱུར་རོ། །རྒྱབ་གཉེན་ཀྱང་ཕས་ཕམ་པར་འགྱུར་རོ། །ནན་ད་ཀི་ལ་བསླབ་པ་བྱིན་པ་ཇི་ལྟར་འདུལ་བ་བཞིན་ནོ། །དགེ་སློང་ཞིག་བླ་གབ་མེད་པར་འདུག་ནས་སྒྲེན་མོར་ཁྲུས་བྱེད་དེ། དེའི་ཉེ་གཡོག་ནི་མི་

བཞི་ཞིག་བྱེད་དེ་དེའི་ལུས་ལ་རེག་པས་ཕོ་མཚན་ལས་སུ་རུང་བར་གྱུར་ཏེ་འདོད་ཆགས་ཀུན་དུ་གནས་པ་དང་། དགེ་སློང་གཞན་ཞིག་མདུན་ན་འདུག་པར་གྱུར་པ་དེས་དེའི་ཕོ་མཚན་བདག་གི་ཁར་བཅུག་པ་དང་། དེས་ཀྱང་ལུས་བཏུད་དེ་ཁུ་བ་ཕྱུང་ནས་དགེ་སློང་དེ་ཐེ་ཚོམ་སྐྱེས་ནས་བདག་

Vol. 12 · folio 290b

ལ་ཕས་ཕམ་པའི་ཉེས་པ་མ་བྱུང་གྲང་སྙམ་དུ་བསམས་ཏེ། དེས་དེ་ལྟ་བུར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པའི་བར་དུ་རྒྱས་པར་བྱས་ཏེ། དེ་ལ་ཕས་ཕམ་པའི་ཉེས་པ་ནི་མེད་མོད་ཀྱི། བླ་གབ་མེད་པ་ལ་འགྲེང་ངམ་འདུག་ཀྱང་རུང་གཞན་ལས་བྱེད་པ་བདག་གིར་

མ་བྱེད་ཅིག །དགེ་སློང་ཞིག་འདོད་ཆགས་ཀུན་དུ་གནས་པས་གཟིར་བ་དང་། དེ་ལ་དགེ་སློང་མཛའ་བོ་ཞིག་ཡོད་དེ་དེ་དེའི་དྲུང་དུ་སོང་ནས་དེས་ཚེ་དང་ལྡན་པ་འདོད་ཆགས་ཀྱིས་ཀུན་དུ་ཁེབས་ཤིང་གཟིར་ཏོ་ཞེས་སྨྲས་ན། དེ་ན་རེ་སོང་ལ་མི་ཚངས་པར་སྤྱོད་ཅིག་ཅེས་བསྒོ་བ་དང་།

དེ་ཡང་སོང་ནས་མི་ཚངས་པར་སྤྱོད་པ་བྱས་སོ། །དེ་ལ་བསྒོ་བས་བདག་ལ་ཕས་ཕམ་པའི་ཉེས་པ་མ་བྱུང་གྲང་ཞེས་ཐེ་ཚོམ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་ནི་མེད་ཀྱི་ཉེས་པ་སྦོམ་པོར་འགྱུར་རོ། །སངས་རྒྱས་བཅོམ་ལྡན་

འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་ཉེས་པ་སྦོམ་པོར་ཇི་ལྟ་བ་མཐོལ་བར་བགྱི། ཨུ་པཱ་ལི་ཉེས་པ་སྦོམ་པོ་ནི་འདི་བཞི་སྟེ། ཕས་ཕམ་པ་ལས་བྱུང་བའི་ལྕི་བ་དང་། ཕས་ཕམ་པ་ལས་བྱུང་བ་ཡང་བ་དང་། དགེ་འདུན་གྱི་ལྷག་མ་ལས་བྱུང་བ་

ལྕི་བ་དང་། དགེ་འདུན་གྱི་ལྷག་མ་ལས་བྱུང་བ་ཡང་བ་རྣམས་ཏེ། དེ་ལ་ཨུ་པཱ་ལི་གང་ཕས་ཕམ་པ་ལས་བྱུང་བའི་ཉེས་པ་སྦོམ་པོ་ལྕི་བ་དེ་ནི་མཚམས་ཀྱི་ནང་དུ་དགེ་འདུན་ཐམས་ཅད་ཀྱི་མདུན་དུ་བཤགས་པར་བྱའོ། །གང་ཕས་ཕམ་པ་ལས་བྱུང་བའི་ཡང་བ་དེ་ནི་

མཚམས་ཀྱི་ཕྱི་རོལ་དུ་དགེ་སློང་བཞིའི་མདུན་དུ་བཤགས་པར་བྱའོ། །གང་དགེ་འདུན་གྱི་ལྷག་མ་ལས་བྱུང་བའི་ཉེས་པ་སྦོམ་པོ་ལྕི་བ་ནི་མཚམས་ཀྱི་ཕྱི་རོལ་དུ་དགེ་སློང་བཞིའི་མདུན་དུ་བཤགས་པར་བྱའོ། །དགེ་འདུན་གྱི་ལྷག་མ་ལས་བྱུང་བའི་ཡང་བ་ནི་མཚམས་ཀྱི་ནང་དུ་

དགེ་སློང་གཅིག་གི་མདུན་དུ་བཤགས་པར་བྱའོ།། །།མདོར་ན། གླལ་དང་ལས་སུ་རུང་བར་གྱུར། །མ་དང་དུར་ཁྲོད་པ་དག་དང་། །འོད་བཟང་དང་ནི་བཟང་སྐྱེས་དང་། །ཤིན་ཏུ་བཟང་བ་སྨྱུགས་པ་དང་། །རབ་ཏུ་བཟང་ཞེས་བྱ་བའོ། །དགེ་སློང་གིས་མ་

Vol. 12 · folio 291a

བཀག་པར་གླལ་བ་དང་། འདོད་ཆགས་ཀྱིས་ཀུན་དུ་གཟིར་བའི་དགེ་སློང་ཞིག་དེའི་མདུན་ན་འདུག་པས་ཕོ་མཚན་དེའི་ཁར་བཅུག་ནས་དེས་ལུས་བཏུད་དེ་ཁུ་བ་ཕྱུང་ནས་དགེ་སློང་དེ་བདག་ལ་ཕས་ཕམ་པའི་ཉེས་པ་མ་བྱུང་གྲང་ཞེས་ཐེ་ཚོམ་སྐྱེས་པ་

དང་། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་ནི་མ་བྱུང་མོད་ཀྱི། ད་ཕན་ཆད་དགེ་སློང་གིས་མ་བཀག་པར་གླལ་བར་མ་བྱེད་ཅིག །གླལ་ན་ཉེས་བྱས་སུ་འགྱུར་རོ། །དགེ་སློང་ཞིག་ཕོ་མཚན་སྒྲེང་བཞིན་ལས་སུ་རུང་བར་གྱུར་ནས་

དེས་བདག་གིས་མོ་མཚན་གྱི་ནང་དུ་བཅུག་ཀྱང་ཉེས་པར་མི་འགྱུར་རོ་སྙམ་དུ་བསམས་ཏེ། དེས་བུད་མེད་ཀྱི་མོ་མཚན་དུ་བཅུག་ནས་བདག་ལ་ཕས་ཕམ་པའི་ཉེས་པ་མ་བྱུང་གྲང་ཞེས་ཐེ་ཚོམ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། བཅུག་མ་ཐག་ཏུ་

ཕས་ཕམ་པར་འགྱུར་རོ། །དགེ་སློང་ཞིག་འདོད་ཆགས་ཀྱིས་ཀུན་དུ་ཁེབས་ཤིང་གཟིར་བ་དང་། དེ་མའི་དྲུང་དུ་སོང་ནས་འདི་སྐད་དུ་མ་འདོད་ཆགས་ཀུན་དུ་གནས་པས་གཟིར་ཏོ་ཞེས་སྨྲས་པ་དང་། མ་ན་རེ་བུ་ཁྱོད་ནི་འདི་ཉིད་ནས་བྱུང་བ་ཡིན་གྱིས་དའང་འདི་ཉིད་དུ་ཆུག་

ཤིག་ཅེས་སྨྲས་པ་དང་། དེས་དེ་ཉིད་དུ་གཞུག་སྙམ་སྟེ་རྨ་ཁར་བཙུགས་ན་དེ་ངོ་ཚ་བའི་ཆོས་སུ་གྱུར་ཏེ། དགེ་སློང་དེ་བདག་ལ་ཕས་ཕམ་པའི་ཆོས་སུ་མ་གྱུར་གྲང་ཞེས་ཐེ་ཚོམ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ངོ་ཚ་བ་ནི་ཆགས་པ་མེད་པས་ཕས་ཕམ་

པའི་ཉེས་པ་མེད་མོད་ཀྱི། ཉེས་པ་སྦོམ་པོར་འགྱུར་རོ། །དགེ་སློང་ཞིག་མི་རོ་ལ་བརྟག་པའི་ཕྱིར་དུར་ཁྲོད་དུ་སོང་བ་དང་། དེས་དེ་ན་བུད་མེད་རྒྱན་གྱིས་བརྒྱན་བཞིན་དུ་བོར་བའི་རོ་ཞིག་མཐོང་ངོ་། །དེས་དེ་མཐོང་ནས་ཆགས་པའི་ཆོས་སྐྱེས་ཏེ། དེས་དེའི་ནང་དུ་གཞུག་ཅེས་

རྨ་ཁར་བཙུགས་པ་དང་དེའི་ནང་སྲིན་བུས་གང་ཞིང་འདུག་སྟེ། དགེ་སློང་དེ་བདག་ལ་ཕས་ཕམ་པའི་ཉེས་པ་མ་བྱུང་གྲང་ཞེས་ཐེ་ཚོམ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཉམས་པ་དེ་ལ་རྣམ་པ་གཉིས་ཏེ། ནང་ཉམས་པ་དང་། ཕྱི་ཉམས་པ་སྟེ།

Vol. 12 · folio 291b

ཕས་ཕམ་པའི་ཉེས་པ་ནི་མེད་མོད་ཀྱི་ཉེས་པ་སྦོམ་པོར་འགྱུར་རོ། །འོད་བཟང་མོ་ཞེས་བྱ་བའི་དགེ་བསྙེན་མ་ཞིག་ནུབ་མོ་དུས་བྱས་ནས་དེ་བརྒྱན་བཞིན་དུ་དུར་ཁྲོད་དུ་བོར་བ་དང་། དགེ་སློང་ཞིག་མི་རོ་ལ་བརྟག་པའི་ཕྱིར་དུར་ཁྲོད་དུ་སོང་བ་དེས་དེ་མཐོང་ནས་དེ་ལ་ཆགས་

པའི་ཆོས་སྐྱེས་ཏེ། དེས་དེའི་ནང་དུ་གཞུག་ཅེས་རྨ་ཁར་བཙུགས་པ་དང་དེ་ཡང་ལངས་ཏེ་འདུག་ནས་དགེ་སློང་དེ་འཇིགས་པར་གྱུར་ཏེ། བདག་ལ་ཕས་ཕམ་པའི་ཉེས་པ་མ་བྱུང་གྲང་ཞེས་ཐེ་ཚོམ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་

འཇིགས་པ་ནི་ཆགས་པ་མེད་པས་ཕས་ཕམ་པའི་ཉེས་པ་ནི་མེད་མོད་ཀྱི་ཉེས་པ་སྦོམ་པོར་འགྱུར་རོ། །ཁྱིམ་བདག་བཟང་སྐྱེས་ཞེས་བྱ་བའི་ཆུང་མ་དེའི་གྲོང་དུ་ཉེ་བར་འགྲོ་བ་དང་། དགེ་སློང་ཞིག་ཡོད་པ་དེ་དེར་སོང་ནས་དེ་ལ་འདི་སྐད་དུ་ཁྱིམ་བདག་གི་ཆུང་མ་འདོད་ཆགས་ཀྱིས་

ཁེབས་ཤིང་གཟིར་ཏོ་ཞེས་སྨྲས་པ་དང་། མོས་སྨྲས་པ། འོག་མར་སྨྱུགས་ལ་སྟེང་མར་ཁུ་བ་ཐོང་ཤིག །སྟེང་མར་སྨྱུགས་ལ་འོག་མར་ཁུ་བ་ཐོང་ཤིག་དང་། དེ་ལ་ཁོ་མོས་མི་ཚངས་པར་སྤྱད་པར་མི་ཤེས་སོ་ཞེས་སྨྲས་པ་དང་། དེས་ཀྱང་འདི་སྙམ་དུ་བསམས་ཏེ།

འདི་ནི་བཟང་ངོ་། །འདི་ནི་ལེགས་སོ། །དེ་ལྟ་བུར་ནི་རུང་ངོ་སྙམ་དུ་བསམས་ནས། འོག་མར་སྨྱུགས་ཏེ་སྟེང་མར་ཁུ་བ་བཏང་བ་དང་། དགེ་སློང་དེ་ཐེ་ཚོམ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། བཅུག་མ་ཐག་ཏུ་ཕས་ཕམ་པར་འགྱུར་རོ། །ཤིན་

ཏུ་བཟང་མོའི་གླེང་གཞི་ནི་ཇི་ལྟར་རྣམ་པར་འབྱེད་པ་ལས་འབྱུང་བ་བཞིན་ནོ། །རབ་ཏུ་བཟང་ཞེས་བྱ་བའི་དགེ་སློང་ཞིག་གཅིག་པུ་དགོན་པ་ལ་གནས་ཏེ། དེ་ནས་རྒྱང་མི་རིང་བ་ཞིག་ན་བྲམ་ཟེའི་ཞིང་ཞིག་ཡོད་དེ། བྲམ་ཟེ་དེ་ཞིང་ལ་རྟག་ཏུ་འོང་བ་མཐོང་སྟེ། དེ་མཐོང་

ནས་དད་པ་སྐྱེས་སོ། །དེས་དེ་ཟན་ལ་མགྲོན་དུ་བོས་ནས་དེས་ཀྱང་དེ་ལ་ཁས་བླངས་སོ། །དེས་ནང་པར་སྔར་ཟས་རྣམས་སྦྱར་ཏེ་བུ་མོ་ཆུང་ངུ་སྒྲེན་མོར་སྤྱད་པ་ཞིག་འབོད་དུ་བཏང་བ་དང་། དེས་དེའི་མོ་མཚན་མཐོང་ངོ་། །དེས་མཐོང་ནས་ཆགས་པ་སྐྱེས་ཏེ་བྱས་པ་དང་།

Vol. 12 · folio 292a

དེའི་མོ་མཚན་རལ་ནས་དེ་ཐེ་ཚོམ་སྐྱེས་ཏེ། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་མི་ཚངས་པར་སྤྱད་པས་དགའ་བ་ཚོར་ན་ནི་ཕས་ཕམ་པར་འགྱུར་རོ། །དེ་སྟེ་མ་ཚོར་ན་ནི་ཉེས་པ་སྦོམ་པོར་འགྱུར་རོ།། །།མདོར་ན། ལས་སུ་མི་

རུང་གཉིད་ལོག་ལ། །གནོན་པ་དང་ནི་ར་རོ་དང་། །ནད་ཀྱིས་གཟིར་དང་མི་འདོད་བཞིན། །སྐྱེས་པ་དང་ནི་མ་ནིང་ངོ་། །དགེ་སློང་ཞིག་རང་བཞིན་གྱིས་ཕོ་མཚན་ལས་སུ་མི་རུང་སྟེ། གང་ལས་སུ་རུང་བཞིན་དུ་བཅུག་ན་ཕས་ཕམ་པའི་ཉེས་པར་འགྱུར་གྱི་ལས་སུ་

མི་རུང་བཞིན་དུ་བཅུག་ན་ཉེས་པར་མི་འགྱུར་རོ་སྙམ་ནས། དེས་མ་བསྒྲེང་བཞིན་དུ་བཅུག་པ་དང་ཐེ་ཚོམ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་ནི་མེད་མོད་ཀྱི་ཉེས་པ་སྦོམ་པོར་འགྱུར་རོ། །དགེ་སློང་གིས་བུད་མེད་གཉིད་ལོག་པ་ལ་

བྱས་པ་དང་། དགེ་སློང་དེ་ཐེ་ཚོམ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་ལག་པས་ནི་ལག་པར་རྐང་པས་ནི་རྐང་པར། བརླས་ནི་བརླར། འགྲོང་གིས་ནི་འགྲོང་ལ་འབྱར་ན་ཕས་ཕམ་པར་འགྱུར་རོ། །མ་འབྱོར་ན་ནི་ཉེས་པ་སྦོམ་པོར་འགྱུར་རོ། །

ཇི་ལྟར་གཉིད་ལོག་པ་དེ་བཞིན་དུ་ར་རོ་བ་དང་། ནད་ཀྱིས་གཟིར་བ་དང་། མི་འདོད་བཞིན་པའོ། །ཇི་ལྟར་བུད་མེད་ལ་རྣམ་པ་བཞིར་བརྗོད་པ་སྐྱེས་པ་དང་། མ་ནིང་ལ་ཡང་དེ་བཞིན་ནོ།། །།འདུལ་བ་གཞུང་དམ་པ། བམ་པོ་ཉི་ཤུ་གཉིས་པ།

མདོར་ན། རྣམ་པ་བཞི་དང་ལྔ་པ་དང་། །ལས་རྣམས་ཀུན་དང་གཉིད་ལོག་མ། །ལན་གཅིག་གསུམ་པ་བྱས་པ་དང་། །བུད་མེད་སྐྱེས་པ་མ་ནིང་ངོ་། །དགེ་སློང་ཉལ་བ་ལ་བུད་མེད་ཀྱིས་བྱས་ཏེ་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་

སློང་ཁྱོད་ཀྱིས་ཅི་དགའ་བ་ཚོར་རམ། གསོལ་པ། དགའ་བ་ཚོར་རོ། །བཅོམ་ལྡན་འདས་ཀྱིས་བཀའ་སྩལ་པ། ཤེས་སམ། སྨྲས་པ། འཚལ་བ་ནི་མ་མཆིས་ཏེ། བདག་གཡོས་པ་ཙམ་དུ་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གཉིད་ཀྱིས་

Vol. 12 · folio 292b

ལོག་པ་གཡོས་པ་ཙམ་དུ་གྱུར་པ་ལ་ཕས་ཕམ་པའི་ཉེས་པ་མེད་དེ་ཉེས་པ་སྦོམ་པོར་འགྱུར་རོ། །དགེ་སློང་ཞིག་ཉལ་བ་ན་བུད་མེད་ཀྱིས་བྱས་ཏེ་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཁྱོད་ཀྱིས་ཅི་དགའ་བར་ཚོར་རམ།

གསོལ་བ། དགའ་བར་མ་ཚོར་རོ། །བཅོམ་ལྡན་འདས་ཀྱིས་བཀའ་སྩལ་པ། དགའ་བར་མ་ཚོར་ན་ཉེས་པ་མེད་དོ། །དགེ་སློང་ཉལ་ཞིང་འདུག་པ་ན་བུད་མེད་ཀྱིས་བྱས་ཏེ་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་

ཅི་ཁྱོད་ཀྱིས་ཤེས་སམ། གསོལ་པ། མ་འཚལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཤེས་པ་མེད་ན་ཉེས་པ་མེད་དོ། །དགེ་སློང་ཉལ་བ་ཞིག་འདུག་པ་ལ་བུད་མེད་ཀྱིས་བྱས་ཏེ་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ།

ཅི་དགེ་སློང་ཁྱོད་ཀྱིས་ཤེས་པའམ། དགའ་བ་ཚོར་བ་ཡོད་དམ། གསོལ་པ། འཚལ་བའང་མ་མཆིས་དགའ་བར་ཚོར་བའང་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤེས་པ་མེད་པ་དང་། དགའ་བར་ཚོར་བ་མེད་པ་ལ་ཉེས་པ་མེད་དོ། །

དགེ་སློང་ལ་ཇི་ལྟ་བར་དགེ་སློང་མ་དང་། དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་ལའང་དེ་བཞིན་ནོ། །སྡིག་ཅན་གྱི་དགེ་སྦྱོང་གསུམ་པོས་བུད་མེད་བཟུང་སྟེ་ལམ་ཀུན་དུ་བྱས་ཀྱང་ཉེས་པར་མི་འགྱུར་རོ་ཞེས་སྨྲས་ནས་དེ་དག་གིས་དེའི་ལམ་ཀུན་དུ་བྱས་པ་དང་། དེ་

དག་ཐེ་ཚོམ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། བཅུག་མ་ཐག་ཏུ་ཕས་ཕམ་པར་འགྱུར་རོ། །བུད་མེད་ལ་ཇི་ལྟ་བར་སྐྱེས་པ་དང་། མ་ནིང་ཐམས་ཅད་ལའང་དེ་བཞིན་ནོ།། །།མདོར་ན། བུད་མེད་སྐྱེས་པ་མ་ནིང་དང་། །སུན་ཕྱུང་དགའ་བ་མ་

ཚོར་དང་། །དགོན་པ་གསུམ་དང་རབ་བྱུང་ལྔའོ། །དགེ་སློང་ཞིག་ཉལ་བ་ལ་བུད་མེད་ཀྱིས་བྱས་ཏེ། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ། དགེ་སློང་ཅི་ཁྱོད་ཀྱིས་ཤེས་སམ། གསོལ་པ། མ་འཚལ་ཏོ། །མི་ཤེས་པ་ལ་ཉེས་པ་

Vol. 12 · folio 293a

མེད་དོ། །བུད་མེད་ལ་ཇི་ལྟ་བར་སྐྱེས་པ་དང་། མ་ནིང་ལའང་དེ་བཞིན་ནོ། །དགོན་པའི་དགེ་སློང་སྡིག་ཅན་གྱིས་དགེ་སློབ་མ་བྲིད་ནས་ཁྱོད་ནི་བསྙེན་པར་མ་རྫོགས་པས་མི་ཚངས་པར་སྤྱད་ན་བདག་ཅག་གཉི་ག་ལ་ཉེས་པར་མི་འགྱུར་རོ་ཞེས་སྨྲས་པ་

དང་། དེས་ཀྱང་ཁས་བླངས་སོ། །དེས་ཁས་བླངས་ནས་འགྱོད་པ་སྐྱེས་པ་དང་། དེས་དེ་མ་དད་བཞིན་དུ་བྱས་ནས་དགེ་སློབ་མ་དེ་བདག་ནི་དགེ་སློབ་མ་མ་ཡིན་པར་མ་གྱུར་གྲང་སྙམ་དུ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། བསླབ་པ་ཉམས་

ཀྱིས་སླར་ཡང་བྱིན་ཅིག་ཉེས་བྱས་སུ་འགྱུར་རོ། །དགོན་པའི་སྡིག་ཅན་མས་དགེ་ཚུལ་ཕ་བྲིད་ནས་ཁྱོད་ནི་བསྙེན་པར་མ་རྫོགས་པས་མི་ཚངས་པར་སྤྱད་ཀྱང་བདག་ཅག་གཉིས་ཀ་ལ་ཉེས་པར་མི་འགྱུར་རོ་ཞེས་སྨྲས་ནས་རྒྱས་པར་ཏེ། བཅོམ་ལྡན་འདས་ཀྱིས་བཀའ་སྩལ་པ།

དགེ་ཚུལ་ཕ་ལ་ཉེས་བྱས་སུ་འགྱུར་ཏེ། དགེ་ཚུལ་མ་ལའང་དེ་བཞིན་ནོ། །དགོན་པའི་སྡིག་ཅན་མས་ལོར་མ་ལོན་པ་ལ་ཁྱོད་བསྙེན་པར་རྫོགས་ནས་རིང་པོར་མ་ལོན་གྱིས་མི་ཚངས་པར་སྤྱད་ཀྱང་བདག་ཅག་ལ་ཉེས་པར་མི་འགྱུར་རོ་ཞེས་སྨྲས་ནས། དེས་ཀྱང་དེ་ལ་ཁས་བླངས་

ཏེ། དེས་ཁས་བླངས་ནས་སླར་འགྱོད་པ་སྐྱེས་པ་དང་། དེས་དེ་ལ་མ་དད་བཞིན་དུ་བྱས་ནས་དགེ་སློང་དེ་འདི་སྙམ་དུ་བདག་ལ་ཕས་ཕམ་པའི་ཉེས་པ་མ་བྱུང་གྲང་སྙམ་སྟེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགའ་བར་མ་ཚོར་བ་ལ་ཕས་ཕམ་

པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་ཞིག་གིས་དགེ་སློང་ཞིག་ཉལ་བ་ལ་བྱས་པ་དང་། དགེ་སློང་དེས་ཐོག་མ་དང་། བར་མ་དང་། ཐ་མ་རྣམས་མ་ཤེས་ན་དགེ་སློང་གང་གིས་བྱས་པ་དེ་མ་རུང་བར་བྱོས་ཤིག །རྒྱས་པར་ནི་རྣམ་པར་འབྱེད་

པ་ལས་ཇི་སྐད་འབྱུང་བ་བཞིན་ནོ།། །།མདོར་ན། བཞི་པ་གཟུགས་བརྙན་ཀླུ་མོ་དང་། །གནོད་སྦྱིན་ལྷ་མོ་དྲི་ཟ་མོའོ། །ལྷ་མིན་ཡི་དགས་མི་ཟ་མོ། །ཤ་ཟ་མོ་ཡང་དེ་བཞིན་ནོ། །དགེ་སློང་ཞིག་གིས་ཤིང་གི་གཟུགས་བརྙན་བྱས་པ། གཟུགས་ལེགས་

Vol. 12 · folio 293b

པ། བལྟ་ན་སྡུག་པ། མཛེས་པ་ཞིག་མཐོང་སྟེ། དེ་མཐོང་བ་དང་འདོད་པའི་ཆོས་སྐྱེས་ནས་དེས་དེ་ཉིད་དུ་གཞུག་སྙམ་སྟེ་རྨ་ཁར་བཙུགས་པ་དང་། དེས་ཀྱང་ཕྱེ་ནས་དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་

སྟེ་ཡན་ལག་ཐམས་ཅད་དུ་རེག་པར་བྱས་ནས་ཕས་ཕམ་པར་འགྱུར་རོ། །འོན་ཏེ་མོ་མཚན་སྤྲད་པ་ཙམ་གྱིས་ནི་ཉེས་པ་སྦོམ་པོར་འགྱུར་རོ། །ཇི་ལྟར་ཤིང་ལས་བྱས་པ་དེ་བཞིན་དུ་ས་ལས་བྱས་པ་དང་། རྡོ་ལས་བྱས་པ་དང་། གོས་ལས་བྱས་པ་རྣམས་ཀྱང་དེ་

བཞིན་ནོ། །ཀླུའི་བུ་མོ་ཞིག་དགེ་སློང་གི་དྲུང་དུ་འོངས་ནས་བཙུན་པ་མི་ཚངས་པར་སྤྱད་ཀྱིས་ཚུར་སྤྱོན་ཞེས་སྨྲས་པ་དང་། དེས་ཁས་བླངས་ནས་དེས་དེར་གཞུག་ཅེས་རྨ་ཁར་བཙུགས་པ་དང་། དེ་ཡང་ལུས་རིང་མོར་གྱུར་ནས་དགེ་སློང་དེ་འཇིགས་པར་གྱུར་ནས་འགྱོད་པ་

སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་འཇིགས་པ་ལ་ཆགས་པ་མེད་པས་ན་ཕས་ཕམ་པའི་ཉེས་པ་མེད་དེ་ཉེས་པ་སྦོམ་པོར་འགྱུར་རོ། །དེ་བཞིན་དུ་གནོད་སྦྱིན་གྱི་བུ་མོའི་བར་དུ་རྒྱས་པར་བྱས་ཏེ་དེ་ཡང་མི་སྣང་བར་གྱུར་ནས་དགེ་སློང་དེ་འགྱོད་

པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །ལྷའི་བུ་མོ་དང་། དྲི་ཟའི་བུ་མོ་དང་། ལྷ་མ་ཡིན་གྱི་བུ་མོ་རྣམས་ཀྱང་དེ་བཞིན་དུ་རྒྱས་པར་ཏེ། ཇི་ལྟར་ཀླུའི་བུ་མོ་བཞིན་དུ་ལུས་

ཆེར་གྱུར་ནས། དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་འཇིགས་པ་ལ་ནི་འདོད་ཆགས་མེད་པས་ཕས་ཕམ་པའི་ཉེས་པ་མེད་དེ་ཉེས་པ་སྦོམ་པོར་འགྱུར་རོ། །དེ་བཞིན་དུ་ཡི་དགས་ཀྱི་བུ་མོ་དེའི་མོ་མཚན་ཆེར་

གྱུར་པ་དང་། དེས་དེར་རྐང་པ་བཙུགས་ནས་དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མད་དེ། ཉེས་པ་སྦོམ་པོར་འགྱུར་རོ། །དགེ་སློང་གཅིག་པུ་དགོན་པ་ལ་གནས་པ་དང་། དེར་མི་ཟ་མོ་ཞིག་

Vol. 12 · folio 294a

འོངས་ཏེ། བཙུན་པ་མི་ཚངས་པར་སྤྱད་ཀྱིས་ཚུར་སྤྱོན་ཞེས་སྨྲས་ན་དགེ་སློང་དེ་ཚུལ་ཁྲིམས་དང་ལྡན་པས་སྤྲོ་བ་མ་སྐྱེས་པ་དང་། དེས་སྨྲས་པ། བཙུན་པ་སྤྲོ་བ་སྐྱེད་ཅིག་ཁྱོད་མ་རུང་བར་བྱས་ས་རེ། དེས་དེ་ལ་ཅི་དགའ་བ་བྱོས་ཤིག །སྤྲོ་བ་མི་

བསྐྱེད་དོ་ཞེས་སྨྲས་པ་དང་། མོས་དགེ་སློང་དེ་ཉལ་བ་ལ་ཕྱར་བས་དཀྲིས་ཏེ། རྒྱལ་པོ་བཙུན་མོ་དང་ལྷན་ཅིག་ཏུ་གཟིམས་པའི་མཆན་དུ་བཅུག་པ་དང་། རྒྱལ་པོ་དེས་དགེ་སློང་དེ་མཐོང་ནས་ཁྱོད་འདིར་ཅི་ལ་འོངས། དེས་སྨྲས་པ། བདག་གཅིག་པུ་དགོན་པ་ན་གནས་

པ་དང་དེར་མི་ཟ་མོ་ཞིག་མཆིས་ནས་བདག་ལ་བཙུན་པ་མི་ཚངས་པར་སྤྱད་ཀྱིས་ཚུར་སྤྱོན་ཅེས་མཆི་ནས་བདག་གིས་སྤྲོ་བ་མ་སྐྱེད་པ་དང་། དེས་བཙུན་པ་སྤྲོ་བ་སྐྱེད་ཅིག་ཁྱོད་མ་རུང་བར་བྱས་ས་རེ་ཞེས་མཆི་ནས། དེ་ལ་བདག་གིས་ཅི་དགའ་བར་བྱོས་ཤིག །སྤྲོ་བ་ནི་མི་

སྐྱེད་དོ་ཞེས་དེ་སྐད་སྨྲས་པ་དང་། བདག་ཉལ་བ་ལ་དེས་ཕྱར་བས་དཀྲིས་ཏེ་འདིར་བཞག་གོ། །རྒྱལ་པོས་བཙུན་པ་གང་དུ་འདི་ལྟ་བུར་འཇིགས་པར་འགྱུར་བ་དེ་ལྟ་བུའི་དགོན་པར་ཅིའི་ཕྱིར་གནས་ཞེས་སྨྲས་ནས་དགེ་སློང་བསྐྲད་པ་དང་། དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཕྱིན་ཆད་གང་དུ་འདི་ལྟར་འཇིགས་པར་འགྱུར་བ་དེ་ལྟ་བུའི་དགོན་པར་མ་གནས་ཤིག །དེ་བཞིན་དུ་ཤ་ཟ་མོས་ཀྱང་བྱས་ཏེ། དེས་ཀྱང་ཉལ་བ་ལ་ཕྱར་བས་དཀྲིས་ནས་ཆང་འཚོང་བའི་སྤྱིལ་བུར་

བཅུག་གོ། །ཆང་འཚོང་བ་དེས་སྤྱིལ་བུར་བལྟས་པ་དང་། དགེ་སློང་དེ་མཐོང་ནས་རྒྱས་པར་ནི་ཇི་ལྟར་མི་ཟ་མོས་བྱས་པ་བཞིན་ནོ།། །།མདོར་ན། ཨུཏྤལ་ཁ་དོག་དགའ་བོ་དང་། །ཕྲུག་གུ་གཉིས་དང་ཤ་སྣག་དང་། །ཁྱི་མོ་ཝ་མོ་བྱ་རོག་མོ། །མི་མ་ཡིན་དང་ཆུ་

རྒལ་དང་། །ཉ་དང་སྲམ་དང་ཤིང་ཐུན་མོའོ། །བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དགེ་སློང་མ་ཨུ་པཱ་ལིའི་ཁ་དོག་མ་སྔ་དྲོ་ཤམ་ཐབས་བགོས་ཏེ་མཉན་དུ་ཡོད་པར་བསོད་སྙོམས་ལ་ཞུགས་པ་ནས། རྒྱས་པར་རྐང་པ་བཀྲུས་ཏེ་ནང་དུ་ཡང་དག་པར་འཇོག་ལ་

Vol. 12 · folio 294b

འཇུག་པའི་ཕྱིར་གནས་ཁང་དུ་ཞུགས་པ་དང་། སྒོ་ཕྱེ་སྟེ་འཕྲེས་ནས་ཚ་བའི་དུས་ལ་བབ་པས་གཉིད་ལོག་ཅིང་ཉལ་བ་དང་། གཡོན་ཅན་སྲང་ཕྲན་ནས་རྒྱུ་ཞིང་འདོང་བ་རྣམས་ཀྱིས་མཐོང་སྟེ་དེ་དག་གིས་ཉལ་བ་ལ་བྱས་སོ། །དེ་དག་གིས་བྱས་ནས་དོང་བ་དང་དེ་ཡང་སད་ནས་

དགེ་སློང་མ་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཕྱིན་ཆད་དགེ་སློང་མས་སྒོ་མ་བཅད་པར་མ་འཕྲེས་ཤིག་འཕྲེས་ན་ཉེས་བྱས་སུ་འགྱུར་རོ། །དེ་བཞིན་དུ་སྙོམས་པར་ཞུགས་པ་ལ་བྱས་ན་ཡང་ཉེས་པ་མེད་དེ་ཕྱིན་ཆད་དགེ་སློང་མ་

སྒོ་མ་བཅད་པར་སྙོམས་པར་མ་འཇུག་ཤིག །སྙོམས་པར་ཞུགས་ན་ཉེས་བྱས་སུ་འགྱུར་རོ། །དགེ་སློང་ཞིག་མཉན་དུ་ཡོད་པར་བསོད་སྙོམས་ལ་ཞུགས་པ་དང་། དེ་ཁྱིམ་བདག་གི་ཁྱིམ་དུ་ཞུགས་པ་ཁྱིམ་བདག་དེའི་ཕག་གི་ཕྲུག་གུ་ཞིག་ཕུར་པ་ལ་བཏགས་པས་དེ་

ཕུར་པ་དེ་ལ་འཁོར་ཞིང་འདུག་པ་དང་། དགེ་སློང་དེས་སྙིང་རྗེ་སྐྱེས་ནས་དེ་ཕུར་པ་ལས་བཀྲོལ་ཏེ་བཏང་བ་དང་། ཁྱིམ་བདག་དེས་དགེ་སློང་དེ་མཐོང་ནས་དེས་བརྒྱུགས་ཏེ། དགེ་སློང་དེའི་གོང་བ་ནས་བཟུང་སྟེ། ཁྱོད་ཀྱིས་ཁོ་བོའི་ཕག་གི་ཕྲུག་གུ་བཏང་བས་ན་ཁྱོད་ནི་རྐུ་

བའོ། །ཁྱོད་ནི་གླེན་པའོ། །ཁྱོད་ནི་དགེ་སྦྱོང་སྡིག་ཅན་ནོ་ཞེས་སྨྲས་པ་དང་། དེ་འདི་སྙམ་དུ་བདག་གིས་ཕག་གི་ཕྲུག་གུ་བཏང་བས་ན་བདག་ནི་རྐུ་བ། བདག་ནི་གླེན་པ། བདག་ནི་དགེ་སྦྱོང་སྡིག་ཅན་དུ་གྱུར་གྱིས་བདག་སོང་ལ་མི་ཚངས་པར་སྤྱད་དོ་སྙམ་དུ་བསམས་ནས་དེ་

སོང་སྟེ་མི་ཚངས་པར་སྤྱད་པ་བྱས་པ་དང་། དེས་འདི་སྙམ་དུ་དགེ་སློང་དག་ལ་དྲིས་ལ་དེ་སྟེ་བདག་རབ་ཏུ་ཕྱུང་ནས་བསྙེན་པར་རྫོགས་པ་འཆགས་ན་ནི་བདག་རབ་ཏུ་འབྱུང་ངོ་། །མི་འཆགས་ན་ནི་འདི་ཉིད་དུ་གནས་སོ་སྙམ་དུ་བསམས་ནས། དེས་དེ་ལྟར་གྱུར་པ་དགེ་སློང་རྣམས་

ལ་སྨྲས་པ་དང་། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྔ་མ་ལ་ཉེས་པ་མེད་དེ། ཕྱི་མ་ནི་ཉེས་པར་གྱུར་ཏོ། །དེ་ལྟར་བྱ་གག་གི་ཕྲུག་གུ་ཡང་དེ་བཞིན་ནོ། །ཁྱིམ་བདག་ཅིག་གིས་ཤ་སྣག་གུ་ཞིག་ཁྱེར་ཏེ་

Vol. 12 · folio 295a

སོང་བ་བྱ་འོལ་བས་ཕྲོགས་ཏེ་ཁྱེར་ནས་ཤ་སྣག་གུ་དེ་འོལ་བའི་ཁ་ནས་ཤོར་ཏེ། དགེ་སློང་བསོད་སྙོམས་ལ་སྤྱོད་པ་དེའི་ལྷུང་བཟེད་དུ་ལྷུང་ངོ་། །ཁྱིམ་བདག་དེས་ཤ་སྣག་གུ་དེ་དགེ་སློང་དེའི་ལྷུང་བཟེད་ན་འདུག་པ་མཐོང་བ་དང་། དེས་དགེ་སློང་དེའི་གོང་བ་

ནས་བཟུང་སྟེ། ཁོ་བོའི་ཤ་སྣག་གུ་དེ་འོལ་བས་ཁྱེར་བ་ལ་ཁྱོད་ཀྱི་ལྷུང་བཟེད་ནས་ཟིན་པས་ན་ཁྱོད་ནི་རྐུ་བའོ། །ཁྱོད་ནི་གླེན་པའོ། །ཁྱོད་ནི་དགེ་སྦྱོང་སྡིག་ཅན་ནོ་ཞེས་སྨྲས་པ་དང་། དེ་འདི་སྙམ་དུ་འདིའི་ཤ་སྣག་གུ་དེ་བདག་གི་ལྷུང་བཟེད་ནས་ཟིན་པས་ན་བདག་ནི་རྐུ་བའོ། །བདག་ནི་གླེན་

པའོ། །བདག་ནི་དགེ་སྦྱོང་སྡིག་ཅན་དུ་གྱུར་གྱིས་བདག་སོང་ལ་མི་ཚངས་པར་སྤྱད་པར་བྱའོ་སྙམ་དུ་བསམས་སོ། །རྒྱས་པར་ནི་ཇི་ལྟར་ཕག་གི་ཕྲུག་གུ་བཞིན་ནོ། །དགེ་སློང་ཞིག་གིས་ཁྱི་མོའི་མདུན་དུ་གཅི་བ་བྱས་པ་དང་། དེས་དེའི་ཕོ་མཚན་ཁར་བཅུག་ནས་དེས་ཁུ་བ་ཕྱུང་སྟེ་ལུས་

ཀྱང་བཏུད་ནས་དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཕྱིན་ཆད་དགེ་སློང་གིས་ཁྱི་མོའི་མདུན་དུ་གཅི་བ་མ་བྱེད་ཅིག །ཡང་ན་དེ་སྐྲོད་ཅིག །ཡང་ན་གུད་དུ་སོང་ཤིག །དགེ་སློང་ཞིག་འཆག་པ་ན་ཝ་མོ་ཞིག་སྒྲ་འབྱིན་

ཅིང་ཕྱག་དར་ཁྲོད་ཀྱི་གོས་འདྲལ་ལོ། །དེ་ནས་དེ་འདི་སྙམ་དུ་བདག་གི་ཕྱག་དར་ཁྲོད་ཀྱི་གོས་འདྲལ་བ་དེ་སུ་ཡིན་པ་སོང་སྟེ་བལྟའོ་སྙམ་བསམས་ནས་དེ་ཕྱག་དར་ཁྲོད་ཀྱིས་དཀྲིས་ཏེ་འདུག་པ་དང་། ཝ་མོ་དེ་ཡང་འོངས་ནས་དགེ་སློང་དེ་སྟེང་དུ་ཞོན་པ་དང་། དེས་ཕྱག་དར་ཁྲོད་ཀྱི་གོས་

ཀྱིས་ཝ་དེ་དཀྲིས་ཏེ་བཟུང་ནས་དེ་འདི་སྙམ་དུ་ཝ་འདི་ཕོའམ་མོ་ཡིན་པ་བལྟའོ་ཞེས་བསམས་ནས་དེས་དེའི་མོ་མཚན་མཐོང་ངོ་། །དེས་མཐོང་ནས་འདོད་པའི་ཆོས་སྐྱེས་ཏེ། དེས་དེ་ཉིད་ཀྱི་ནང་དུ་གཞུག་གོ་སྙམ་དུ་བསམས་ནས་རྨ་ཁར་བཙུགས་པ་དང་། མོས་སླར་ལོག་སྟེ་སོས་བཏབ་

ནས་དགེ་སློང་དེ་སྐྲག་པར་གྱུར་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་སྐྲག་པ་ལ་ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་གཅིག་པུ་ནགས་སྟུག་པོ་ན་གནས་པ་དང་། དེ་དེ་ནས་མི་འམ་ཅི་མོས་ཁྲིད་ནས་དེ་བྲག་ཕུག་ཏུ་བཅུག་སྟེ།

Vol. 12 · folio 295b

དེས་ཅི་ནས་ཀྱང་འདུ་ཤེས་གྱུར་པ་དེ་ལྟར་བྱས་སོ། །དེས་དེ་འདུ་ཤེས་བསྒྱུར་ཏེ་སྤྱོད་ཡུལ་གྱི་ཕྱིར་སོང་བ་དང་། དགེ་སློང་དེ་འདུ་ཤེས་ཐོབ་ནས་དེ་གནས་དེ་ནས་ལངས་ཏེ་བྲོས་སོ། །དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེས་

པ་མེད་དེ། ཕྱིན་ཆད་དགེ་སློང་གིས་གང་དུ་འདི་ལྟ་བུར་འཇིགས་པར་འགྱུར་བའི་དགོན་པར་མ་གནས་ཤིག །དགེ་སློང་ཞིག་སྒྲེན་མོར་ཀླུང་རྒལ་བ་ལས་དེའི་ཕོ་མཚན་ཉས་བཟུང་བ་དང་། དེས་ཀྱང་ལུས་བཏུད་དེ་ཁུ་བ་ཕྱུང་ནས་དགེ་སློང་དེ་འགྱོད་པ་སྐྱེས་པ་དང་།

བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཕྱིན་ཆད་འདི་ལྟར་བུར་འཇིགས་པར་འགྱུར་བའི་ཀླུང་གང་ཡིན་པ་ལ་སྒྲེན་མོར་མ་རྒལ་ཅིག །བུད་མེད་ཅིག་སྒྲེན་མོར་ཤིང་ཐགས་ཀྱི་ནང་ན་ཁུ་ལེ་ལྟ་བུས་ཆུ་ཆུ་ཞིང་འདུག་པ་ལ་དགེ་སློང་ཞིག་གིས་ཤིང་ཐགས་ཀྱི་

བསེབ་ནས་དེའི་མོ་མཚན་མཐོང་ངོ་། །དེས་མཐོང་ནས་ཆགས་པ་དང་། དེའི་མོ་མཚན་ལ་དེའི་ཕོ་མཚན་གྱིས་རེག་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །བཅོམ་ལྡན་འདས་མཉན་དུ་ཡོད་པའི་ཛེ་ཏའི་

ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་དག་གིས་བྱ་བ་བྱས་ནས་འཆག་ཅིང་ཉིན་པར་སྤྱོད་པའི་གནས་སུ་སོང་སྟེ། དེས་དེར་སྟན་བཏིང་ནས་སྐྱིལ་མོ་ཀྲུང་བཅས་ཏེ་འདུག་པ་དང་། ཚ་བའི་དུས་ལ་བབ་པས་དེས་དེར་འཕྲེས་ཏེ་ཉལ་བ་དང་གཉིད་

ཀྱིས་ལོག་གོ། །དེ་ཉལ་བ་ན་ཤམ་ཐབས་སྙིལ་ནས་ཕོ་མཚན་ལས་སུ་རུང་བར་གྱུར་ཏེ། བུད་མེད་ཤིང་ཐུན་མ་ཞིག་ཤིང་ཚོལ་ཞིང་གནས་དེར་འོངས་པ་དང་། དགེ་སློང་དེ་མི་སྡུག་པར་ཉལ་བ་མཐོང་ངོ་། །དེས་མཐོང་ནས་ཤིན་ཏུ་ཆགས་ཏེ་དེས་དགེ་སློང་དེ་ལ་ཉལ་པོ་བྱས་སོ། །ཉལ་པོ་བྱས་

ནས་དེ་སོང་བ་དང་། དགེ་སློང་དེ་ཡང་སད་ནས་དེས་འཕགས་པ་བདག་གི་ཁྱིམ་འདི་ཞེས་བགྱི་བ་ན་མཆིས་ཀྱིས་དེ་སྟེ་ཡང་བཞེད་ན་དེར་སྤྱོན་ཅིག་ཅེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཅི་ཁྱོད་ཀྱིས་ཤེས་སམ། གསོལ་པ་མ་

Vol. 12 · folio 296a

འཚལ་ཏོ། །མི་ཤེས་ན་ཉེས་པ་མེད་དེ། བླ་གབ་མེད་པར་གཅིག་པུ་འཕྲེས་ཏེ་མ་འདུག་ཤིག །འདུག་ན་ཉེས་བྱས་སུ་འགྱུར་རོ།། །།མདོར་ན། ས་ཀེ་མ་ཡི་རྩྭ་རྔ་དང་། །ཙམ་པ་ཡ་ཡི་རྒྱུ་ལྔ་དང་། །རྒྱལ་པོའི་ཁབ་ན་སྨན་དཔྱད་དང་། །

བྷ་རུ་ཀད་ཙའི་སྨད་འཚོང་མའོ། །བཅོམ་ལྡན་འདས་ཀེ་ཏའི་ཤིང་པ་ལ་ཤའི་ནགས་ན་བཞུགས་སོ། །དེ་ནས་དགེ་སློང་གཞན་ཞིག་ལ་རྩྭ་རྔ་མ་ཞིག་གིས་རྒྱས་པར་ནི་ཇི་ལྟར་ཤིང་ཐུན་མ་བཞིན་ནོ། །གྲོང་ཁྱེར་ཙམ་པར་ནད་གཡན་པས་བཏབ་པ་དང་རྒྱུ་ལྔ་དང་རྐྱེན་ལྔས་ཕོ་

མཚན་ལས་སུ་རུང་བར་འགྱུར་ཏེ། རྣམ་པར་འབྱེད་པ་ལས་ཇི་སྐད་འབྱུང་བ་བཞིན་ནོ། །བཅོམ་ལྡན་འདས་རྒྱལ་པོའི་ཁབ་ན་བཞུགས་སོ། །དགེ་སློང་ཞིག་ཕོ་མཚན་ནད་ཀྱིས་གཟིར་བ་དང་། འཚོ་བྱེད་ཀྱི་ཕོ་མཚན་ཡང་ནད་ཀྱིས་གཟིར་བར་གྱུར་པ་ན་དེས་བུད་མེད་ཀྱི་ཁར་

བཅུག་པ་དང་དེ་ནས་དེ་ལས་ཐར་ཏོ་ཞེས་དེས་ཐོས་ནས། དེས་འདི་སྙམ་དུ་བཅོམ་ལྡན་འདས་ཀྱིས་ནད་པའི་སྨན་དཔྱད་དུ་གནང་གིས་བུད་མེད་ཀྱི་ཁར་གཞུག་གོ་སྙམ་དུ་བསམས་ཏེ། དེས་བུད་མེད་ཀྱི་ཁར་བཅུག་ནས་ནད་དེ་ལས་ཐར་བ་དང་དགེ་སློང་དེ་འགྱོད་པ་སྐྱེས་ནས། བཅོམ་ལྡན་

འདས་ཀྱིས་བཀའ་སྩལ་པ། བཅུག་མ་ཐག་ཏུ་ཕས་ཕམ་པར་འགྱུར་རོ། །ཡུལ་བྷ་རུ་ཀད་ཙའི་སྨད་འཚོང་ཞིག་གི་ཁྱིམ་དུ་རྐུན་པོ་གཅིག་ཅིག་གནས་ཏེ། དེ་དེ་ནས་བྱུང་ཞིང་མི་དེ་དག་ལ་གནོད་པ་བྱེད་པ་དང་། དེ་དག་གིས་རྒྱལ་པོ་ལ་གསོལ་ནས་རྒྱལ་པོས་སྨད་འཚོང་མ་བོས་ནས་

ཅི་ཁྱོད་ཀྱི་ཁྱིམ་ན་རྐུན་པོ་གནས་སམ་ཞེས་དྲིས་པ་དང་། ལྷ་སུ་ཡང་མ་མཆིས་སོ། །དེ་སྟེ་བཙལ་ཏེ་རྙེད་ན་ནི་ཁྱོད་ཀྱིས་བཅབས་ཏེ་སྦས་པས་ཆད་པས་གཅད་དོ། །མི་དེ་དག་གིས་རྐུན་པོ་དེ་བཟུང་སྟེ་ཁྲིད་ནས་རྒྱལ་པོ་ལ་གསོལ་བ་དང་། རྒྱལ་པོས་བཀའ་སྩལ་པ། ཁྱོད་སོང་ལ་སྨད་

འཚོང་མ་འདི་རྐང་པའི་མཁྲིག་མ་ནས་འབྲིང་པས་ཐོགས་ལ་ལྟག་པར་སྦྲེལ་ཏེ་དུར་ཁྲོད་དུ་འོར་ཅིག །སུ་གང་ཞིག་གིས་འདི་བཏང་ན་དེ་སྟེ་ཆད་པ་འདི་ཉིད་ཀྱིས་བཅད་དོ། །དེ་སྟེ་གསོན་ན་ནི་ཁྱི་རྣམས་ལ་སྦྱིན་ནོ། །དེ་དག་གིས་དེའི་རྐང་པའི་མཁྲིག་མ་ནས་འབྲིང་པས་བཏགས་ནས་ལྟག་

Vol. 12 · folio 296b

པར་སྦྲེལ་ཏེ་དུར་ཁྲོར་དུ་བོར་བ་དང་། དགེ་སློང་ཞིག་དུར་ཁྲོད་ན་མི་རོ་ལ་རྟོག་ཅིང་འདུག་པ་དེས་མཐོང་སྟེ་འདོད་པའི་ཆོས་སྐྱེས་ནས་དེ་ནས་འདི་ལྟར་དེ་ཉིད་དུ་གཞུག་སྙམ་སྟེ་རྨ་ཁར་བཙུགས་པ་དང་། དེ་ལངས་ཏེ་འདུག་ནས། བཙུན་པ་སྔོན་དུ་ཆུ་ཅིག་སྩོལ་ཅིག་ཅེས་སྨྲས་པ་དང་།

དེས་དེ་ལ་ཆུ་བླུད་ནས། དེས་སྨྲས་པ། བཙུན་པ་ཁོ་མོའི་ལུས་དང་མངལ་མི་གཙང་བ་འདི་ཅིར་དགོས། དེས་དེ་ནས་གནངས་ཀྱི་བར་དུ་བཟུང་བ་དང་དེའི་གཉེན་བཤེས་རྣམས་འོང་བ་དགེ་སློང་དེས་རྒྱང་ནས་མཐོང་སྟེ་ངོ་ཚ་བས་ཕྱོགས་གཅིག་ཏུ་སོང་བ་དང་། དེས་གཉེན་བཤེས་

དེ་དག་ལ་སྨྲས་པ། ཁོ་མོ་འདི་ལྟར་ཅུང་ཟད་འཚོ་བ་དེ་ཐམས་ཅད་དགེ་སློང་འདིའི་མཐུ་ཡིན་གྱིས་དེ་བོས་ཤིག་ཅེས་དེས་སྨྲས་པ་དང་། དེ་དག་གིས་བོས་ནས་དེས་སྨྲས་པ། བཙུན་པ་ཁོ་མོ་ཅུང་ཟད་འཚོ་བ་དེ་ཐམས་ཅད་ནི་ཁྱོད་ཀྱི་དྲིན་ཏེ་འདི་དག་ནི་ཁོ་མོའི་གཉེན་བཤེས་ལགས་

ན་འདི་དག་གིས་གསོས་ཏེ་སོས་དང་དེ་སྟེ་ཁོ་མོ་ལ་བགྱི་བ་མཆིས་ན་ཁྱིམ་འདི་ན་མཆིས་ཀྱིས་དེར་སྤྱོན་ཅིག་ཅེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ་ཉེས་པ་སྦོམ་པོར་འགྱུར་རོ།། །།མདོར་

ན། བལ་གླང་ནང་དང་ཁྲོན་པ་དང་། །རེག་དང་གྲུ་ཡང་ནུབ་པ་དང་། །སྐྱེས་པ་དག་དང་སེར་སྐྱ་དང་། །བུད་མེད་བུ་དང་སེར་སྐྱ་དང་། །བཟང་སྐྱེས་ནོར་ཅན་ཕོ་བྲང་སྐྱོང་། །དགེ་སློང་ཕོ་བྲང་འཁོར་སྐྱོང་བལ་གླང་གི་ནང་དུ་སོང་བ་དང་། དེ་གླང་མི་སྲུན་པས་བརྡུངས་ནས་

བུད་མེད་ཀྱི་སྟེང་དུ་འགྱེལ་བ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཤེས་པར་བྱོས་ལ་བལ་གླང་གི་ནང་དུ་སོང་ཤིག །དགེ་སློང་ཞིག་ཁྲོན་པ་ཞིགས་པ་ཞིག་ཏུ་བལྟས་པ་དང་། དེར་ལྷུང་ནས་དེར་སྔར་ཡང་བུད་མེད་ཅིག་

ལྷུང་བ་དེའི་མགུལ་ནས་འཇུས་སོ། །ཁྱིམ་བདག་དག་གིས་ཐག་པ་བླངས་ཏེ་དགེ་སློང་དེ་ཕྱུང་བ་དང་། དེའི་མགུལ་ནས་བུད་མེད་ཅིག་གིས་འཇུས་པར་མཐོང་ནས་དེ་དག་གིས་བུད་མེད་ཁྱོད་ག་ལས་འོངས་ཞེས་སྨྲས་པ་དང་། དགེ་སློང་གིས་འདི་ནི་སྔར་ལྷུང་བ་ཁོ་བོའི་མགུལ་ནས་

Vol. 12 · folio 297a

འཇུས་སོ་ཞེས་སྨྲས་ནས། དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། བག་ཡོད་པར་བྱོས་ལ་ཁྲོན་པར་ལྟོས་ཤིག །དགེ་སློང་ཞིག་བསོད་སྙོམས་སྤྱོད་པ་ལས་སྒོ་ཁང་དོག་པ་ཞིག་ནས་

བྱུང་བ་དང་བུད་མེད་ཅིག་ཀྱང་ནང་དུ་འཇུག་པ་དེའི་མོ་མཚན་གྱིས་དེའི་ཕོ་མཚན་ལ་རེག་པ་དང་། དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། བག་ཡོད་པར་བྱོས་ལ་གྲོང་དུ་བསོད་སྙོམས་སྤྱོད་ཅིག །དགེ་སློང་ཞིག་

གྲུ་ལས་ཀླུང་རྒལ་བ་ན་གྲུ་དེ་ནུབ་པ་དང་། བུད་མེད་ཅིག་ཀྱང་དེ་ན་ཡོད་དེ། དེས་དེའི་མགུལ་ནས་འཇུས་སོ། །དགེ་སློང་རྒལ་བ་དང་དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། བག་ཡོད་པར་བྱོས་ལ་ཀླུང་རྒོལ་ཅིག །སྐྱེས་

པ་སེར་སྐྱ་ཞེས་བྱ་བ་ཞིག་དགེ་སློང་མའི་དྲུང་དུ་སོང་སྟེ་འདི་སྐད་དུ་འཕགས་མ་བདག་རབ་ཏུ་ཕྱུང་ཤིག་ཅེས་སྨྲས་པ་དང་། དེ་དེ་དག་གིས་མ་བརྟགས་པར་རབ་ཏུ་ཕྱུང་སྟེ། དེས་དགེ་སློང་མ་ལ་རེག་པ་དང་། དེ་དག་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ། ཤིན་ཏུ་བརྟགས་ལ་རབ་ཏུ་དབྱུང་བར་བྱོས་ཤིག །སྦོམ་མོ་དགའ་ལྡན་མོ་ཡང་རྒྱས་པར་གཞན་གྱི་བུ་བོར་བ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མས་བུ་དོར་བར་མ་བྱེད་ཅིག །བོར་ན་ཉེས་པ་སྦོམ་པོར་འགྱུར་རོ། སེར་སྐྱ་བཟང་

མོའི་གླེང་གཞི་རྒྱས་པར་བྱས་པ་དང་། བཅོམ་ལྡན་འདས་ཀྱིས་བཀའ་སྩལ་པ། བཟང་མོ་ཇི་ཁྱོད་ཀྱིས་དགའ་བ་ཚོར་རམ། བཙུན་པ་བདག་གིས་དགའ་བ་ལྟ་ག་ལ་ཚོར་གྱི་ཇི་ལྟར་ཐོང་ལྕགས་བསྲེགས་པ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། བུད་མེད་

ཀྱི་མོ་མཚན་གྱི་ཕྱོགས་ནི་ལས་རྣམ་པར་སྨིན་པ་ལས་སྐྱེས་ཏེ། ནན་གྱིས་བྱས་པ་ལ་ཉེས་པ་མེད་དོ། །དགེ་སློང་མ་བཟང་མོ་སྐྱེས་ཞེས་བྱ་བ་དེ་གཡོན་ཅན་རྣམས་ཀྱིས་བཟུང་ནས་ཁ་བཀབ་སྟེ་ནགས་སྟུག་པོར་ཁྲིད་ནས་སུན་ཕྱུང་སྟེ་སླར་བཏང་བ་ལས་དགེ་སློང་མ་དག་གིས་གནས་

Vol. 12 · folio 297b

ནས་བསྐྲད་པ་དང་། དེས་སྨྲས་པ། འཕགས་མ་བདག་གིས་ནི་དགའ་བར་མ་ཚོར་རོ། །ཁྱོད་གཡོན་ཅན་གྱིས་བཟུང་སྟེ་ནགས་སྟུག་པོར་ཁྲིད་ནས་སུན་ཕྱུང་སྟེ་སླར་བཏང་བ་ཡིན་ན་ཅིའི་ཕྱིར་དགའ་བར་མ་ཚོར། དེ་ལྟར་གྱུར་པ་དགེ་སློང་མ་རྣམས་ཀྱིས་དགེ་སློང་

ཕ་རྣམས་ལ་སྨྲས་པ་དང་། དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། ཅི་ཁྱོད་ཀྱིས་དགའ་བར་ཚོར་རམ། བཙུན་པ་བདག་འགྲེས་ལྡོགས་སུག་པ་གཡབས་ན་དགའ་བར་ལྟ་ག་ལ་ཚོར་ཞེས་གསོལ་བ་དང་། བཅོམ་

ལྡན་འདས་ཀྱིས་བཀའ་སྩལ་པ། དགེ་སློང་དག་བུད་མེད་ཀྱི་མོ་མཚན་གྱི་ཕྱོགས་ནི་ལས་རྣམ་པར་སྨིན་པ་ལས་སྐྱེས་ཏེ། འགྲོ་བ་དང་། ལྡོག་པ་དང་། ལག་པ་གཡོབ་པ་ལ་ནི་ནན་གྱིས་བཟུང་བ་ཞེས་བྱ་སྟེ། ནན་གྱིས་བཟུང་བ་ལ་ནི་ཉེས་པ་མེད་དོ། །དགེ་སློང་མ་

ནོར་ཅན་མོ་ཞེས་བྱ་བ་ཞིག་མཉན་དུ་ཡོད་པར་བསོད་སྙོམས་སྤྱོད་པ་ན་གཡོན་ཅན་རྣམས་ཀྱིས་བཟུང་སྟེ་ནགས་སྟུག་པོར་ཁྲིད་ནས་སུན་ཕྱུང་སྟེ་བཏང་བ་དང་། དེ་དགེ་སློང་མ་དག་གིས་གནས་ནས་བསྐྲད་ནས་འཕགས་མ་བདག་གིས་དགའ་བར་མ་ཚོར་རོ་ཞེས་སྨྲས་པ་དང་།

ཁྱོད་གཡོན་ཅན་རྣམས་ཀྱིས་བཅིངས་ཏེ་ནགས་སྟུག་པོར་ཁྲིད་ནས་སུན་ཕྱུང་སྟེ་བཏང་བ་ཡིན་ན་ཅིའི་ཕྱིར་དགའ་བར་མ་ཚོར། དེ་ལྟར་གྱུར་པ་དགེ་སློང་མ་དག་གིས་དགེ་སློང་དག་ལ་སྨྲས་པ་དང་། དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་

བཀའ་སྩལ་པ། ཅི་ཁྱོད་ཀྱིས་དགའ་བར་ཚོར་རམ། བཙུན་པ་བདག་གིས་ངུས་ནས་བོས་བགྲོགས་ཏེ་བདག་ལ་མ་འཛིན་ཅིག་ཅེས་སྨྲས་ན་དགའ་བར་ལྟ་ག་ལ་ཚོར། བཅོམ་ལྡན་འདས་ཀྱིས་བཀའ་སྩལ་པ། བུད་མེད་ཀྱི་མོ་མཚན་གྱི་ཕྱོགས་ནི་ལས་རྣམ་པར་སྨིན་པ་ལས་

སྐྱེས་ཏེ། ངུ་བཞིན་པ་ནི་ནན་གྱིས་བཟུང་བ་ཞེས་བྱ། བོས་བགྲོགས་ནས་བདག་ལ་མ་འཛིན་ཅིག་ཅེས་སྨྲ་བ་ནི་ནན་གྱིས་བཟུང་བ་ཞེས་བྱ་སྟེ། ནན་གྱིས་བཟུང་བ་ལ་ཉེས་པ་མེད་དོ། །དགེ་སློང་མ་ཕོ་བྲང་སྐྱོང་ཞེས་བྱ་བ་ཞིག་མཉན་དུ་ཡོད་པར་བསོད་སྙོམས་སྤྱོད་པ་ན་གཡོན་

Source and licence

Text: Esukhia’s Derge Kangyur e-text (Esukhia/derge-kangyur · commit a582cf47) · public domain

Licence Public Domain · Evidence

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words