དབང་ཆོས་རྟེན་འབྲེལ་འགྲོ་ལྡོག

Sanskrit title (Tibetan script, as in the text) དྷརྨ་ཨ་བྷི་ཥི་ཀ་མ་ར་ག་ས་ཧི

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 28 · folio 117b

༄༅༅། །རྒྱ་གར་སྐད་དུ། དྷརྨ་ཨ་བྷི་ཥི་ཀ་མ་ར་ག་ས་ཧི། བོད་སྐད་དུ། དབང་ཆོས་རྟེན་འབྲེལ་འགྲོ་ལྡོག །དཔལ་རྡོ་རྗེ་མཁའ་འགྲོ་མ་རྣམས་ལ་ཕྱག་འཚལ་ལོ། །བླ་མ་མཁའ་འགྲོ་རྡོ་རྗེ་འཆང་དབྱེར་

མེད། །གར་བསྒོམ་གནད་ཀྱི་ཡུལ་དེར་འདུད། །བླ་མེད་རྒྱུད་རྣམས་བཅུད་བསྡུས་པའི། །དབང་ཆོས་རིམ་པ་བཤད་པར་བྱ། །དབང་བཞིའི་གདམས་པ་ཟབ་མོ་ཡིས། །རང་གཞན་ལྷན་ཅིག་སྐྱེས་པ་དེས། །གཞན་རྣམས་དབང་དུ་སྡུད་པ་ཡི། །སྲོག་སྔགས་ཟབ་མོ་

འདི་ཉིད་ལ། །དབང་བཞིའི་གདམས་པ་མེད་པ་ཡིས། །རྣམ་རྟོག་དབང་དུ་རྣམ་རྟོག་སོང་། །རང་ཉིད་གཞན་གྱི་དབང་དུ་འགྲོ། །རང་སྲོག་གཅོད་པའི་སྟྭ་རེ་ཡིན། །དབང་པོ་གཅིག་དང་ཚེ་གཅིག་ལ། །གང་ཟག་བཞི་དང་རིགས་ཅན་བཞིན། །མཆོག་དབང་བཞི་

Vol. 28 · folio 118a

ཡིས་ཐེ་ཚོམ་མེད། །དུག་གསུམ་ལམ་དང་རྣམ་རྟོག་ལམ། །མཆོག་ཐུན་དངོས་གྲུབ་གང་བསྒྲུབ་པ། །བསྙེན་སོགས་བཞི་དང་བཅུ་གནད་གཅེས། །རང་རྐྱེན་དག་ལས་གཞན་རྐྱེན་འབྱུང་། །ལྟས་གཅིག་རྟགས་བཞིན་ཤེས་བྱས་ལ། །བསྒྲུབ་དང་

ལྡོག་གཞག་གདམས་ངག་གཅེས། །བླ་མ་སངས་རྒྱས་དབྱེར་མེད་མཆོག །གར་བསྒོམ་རིགས་ལྔའི་སྐོར་ལྡོག་སོགས། །མཆོག་ཐུན་གཉིས་ཀྱི་བྱེ་བྲག་གིས། །ཏིང་འཛིན་ལྔ་ལྡན་གདམས་པ་བཅས། །གཞན་ཡང་ཏིང་འཛིན་དུ་མ་ལས། །འཇུག་པར་བྱེད་པ་མ་

ཤེས་ན། །མཆོག་དང་ཐུན་མོང་དེ་ལ་མེད། །དེ་བས་གདན་གྱི་གདམས་པ་གཅེས། །ལུས་ངག་ཡིད་གསུམ་རྟེན་འབྲེལ་ཀྱང་། །ཡེ་ཤེས་གཅིག་གིས་འགྲོ་ལྡོག་ངེས། །དད་གུས་བདག་གཞན་འགྲོ་ལྡོག་ངེས། །གཅིག་ལ་གཅིག་བརྟེན་མཚུངས་ལྡན་འགྲུབ། །ཕྲིན་

ལས་བཞི་དང་བསྡུ་བ་བཞི། །རིགས་ལྔ་ཡེ་ཤེས་ལྔ་ལ་སོགས། །སྟན་ཐོག་གཅིག་ཏུ་བསྒོམ་པ་གཅེས། །བཞི་པ་ཕྱག་རྒྱ་ཆེན་པོ་གཅེས། །ཁྱད་པར་ཏིང་འཛིན་ལྔ་ལྡན་གཅེས། །མི་འགྱུར་བླ་མ་གདམས་པ་གཅེས། །འཁྲུལ་འཁོར་ཉེས་ནད་དགྲ་གདོན་འབྱུང་། །ཞི་དང་

དངོས་གྲུབ་འབྱུང་བ་ལ། །ལུས་རྩ་ངག་རླུང་སེམས་ཐིག་ལེ། །དབྱེར་མེད་ལྷན་ཅིག་སྐྱེས་པ་ཡི། །དབང་བཞི་དག་ལས་སྐྱེས་པའི་བུ། །གེགས་སེལ་བོགས་འདོན་ངག་ཏུ་འགྱུར། །ཕྱག་རྒྱ་ཉེར་གནས་ཕྱི་འཁོར་སོགས། །ལུས་ངག་ཡིད་གསུམ་འདྲ་མཐུན་དང་། །ཁ་དོག་

དབྱིབས་སོགས་རྒྱུད་སྡེ་བཞིན། །གང་ལ་གང་ཤིས་རྟེན་འབྲེལ་གནད། །རྣལ་འབྱོར་བློ་སེམས་མཐུན་པས་འགྲུབ། །ཅི་བསམ་འགྲུབ་པས་བློ་རེ་བདེ། །རང་ལུས་གཞན་ལུས་གདམས་པ་གཅིག །རང་སེམས་གཙོ་བོར་གྱུར་པ་ལས། །རྣལ་འབྱོར་ཕོ་རང་བྱ་མི་དགོས། །

བླ་མེད་ཐེག་པ་ཆེན་པོ་ཡིན། །བདེ་ཤས་ཆེ་བའི་རིགས་ཀྱིས་ནི། །རིགས་ལྡན་ཤེས་དང་སྒྱུ་རྩལ་ཤེས། །འཁྲུལ་འཁོར་གནད་དང་ཡོན་ཏན་སོགས། །ཐ་མལ་སྤངས་པ་གནད་དུ་གཅེས། །བླ་མེད་སྣོད་རུང་སྣོད་བྱས་ནས། །ཉོན་མོངས་རང་དབང་ལམ་དང་འདྲེས། །

Vol. 28 · folio 118b

སྲིད་སེལ་རིགས་རྒྱུད་སྤེལ་ཞེས་བྱ། །བཞི་ལྡན་གདན་དང་མཐུན་པས་བསྒྱུར། །མཐོན་དམན་སྐྱོན་ཡོན་བཟང་ངན་སོགས། །འདུན་པའི་སེམས་ཀྱིས་བསྒྱུར་བར་བྱ། །སྤྲོས་བཅས་སྤྲོས་མེད་ཤིན་ཏུ་སྤྲོས་མེད་དང་། །ཕྱོགས་ལས་རྣལ་འབྱོར་དོན་གྱི་སྤྱོད་པ་བྱ། །ཕྱི་ནང་གསང་

བ་དེ་ཉིད་རིག་མ་ཡིན། །བསྟེན་ཐབས་དུས་ཚོད་གནས་སྐབས་འདོད་ཡོན་དང་། །ཁྱད་པར་རོ་དྲུག་རིག་མ་གནད་ཀྱིས་བཅད། །འབྲས་བུ་བཞི་དང་དབྱེར་མེད་ཕྱག་རྒྱའི་གནད། །ལ་ལ་ཉོན་མོངས་འབུར་འཇོམས་བྱེད། །ལ་ལ་ཉོན་མོངས་འགྱོད་རྗེས་གཅོད། །ཉོན་མོངས་

ཆེ་བ་བདེ་བ་ཆེ། །དེ་ཕྱིར་སྟོང་པའི་རྒྱས་འདེབས་གནད། །གཞན་དོན་སློབ་པའི་ཟུང་འཇུག་ཡིན། །བྱ་བྱེད་བྲལ་སོགས་ལྷུན་གྲུབ་ཡིན། །དམ་ཚིག་བཞི་དང་སྡོམ་པ་བཞི། །དམ་བཅའ་བཞི་བཅས་མཆོག་དབང་བསྐུར། །ཕྱོགས་བཅུའི་དཔའ་བོ་རྣལ་འབྱོར་མ། །

འདུས་ན་ཛཱ་ལནྜ་རར་ཐིམ། །པདྨ་བཞི་ལ་ཐིག་ལེ་བཞི། །བདེ་བ་བཅུ་དྲུག་སྐྱེ་བར་འགྱུར། །རང་སྣང་ཡེ་ཤེས་གཟུགས་ཅན་གྱིས། །པདྨ་ལྟེ་བའི་དབུས་ན་གནས། །ནོར་བུའི་རྩེ་མོར་གནས་པའི་ཚེ། །མར་མེ་ལྟ་བུར་མྱ་ངན་འདས། །ཕྱག་རྒྱ་བཞི་དང་སྐུ་བཞིར་བསྟན། །

སངས་རྒྱས་རྣམས་ནི་ཆོས་སྐུ་ཡིན། །གསང་སྔགས་ཚུལ་ཆེན་ཐེག་པ་འདིར། །བླ་མ་བཟང་པོས་བཟུང་བ་རྣམས། །ཟླ་བ་དྲུག་ལ་སོགས་པས་ནི། །འགྲུབ་པས་སུ་ཞིག་འདིར་མི་འཇུག །རྟེན་འབྲེལ་རྡོ་རྗེའི་ཚིག་དྲུག་འདི། །མ་བྱུང་འབྱུང་བར་མི་འགྱུར་རོ། །ཚིག་

དོན་འབྲེལ་པའི་རྟེན་འབྲེལ་འདི། །ཐབས་ཤེས་གཉིས་སུ་འབྲེལ་བྱས་ནས། །མཆོག་ཐུན་གཉིས་སུ་འགྲུབ་འགྱུར་ཞིང་། །མཁའ་འགྲོའི་དམོད་བཞིན་ད་ལྟར་དེ་འགྲུབ་ཤོག །དཔལ་ནཱ་རོ་པས་མཛད་པའི་དབང་ཆོས་ཀྱི་གདམས་ངག་རྫོགས་སོ།། །།

རྒྱ་གར་གྱི་བླ་མ་ཏེ་ཕུ་པ་དང་། བོད་ཀྱི་ལོ་ཙཱ་བ་རྨ་བན་ཆོས་འབར་གྱིས་བསྒྱུར་བའོ།།

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words