No title in the text — opening words: དཔལ་ཕྱག་ན་རྡོ་རྗེའི་སྦྱིན་སྲེག་མདོར་བསྡུས་པ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 50 · folio 77b

༄༅། །དཔལ་ཕྱག་ན་རྡོ་རྗེའི་སྦྱིན་སྲེག་མདོར་བསྡུས་པ། བཀྲ་ཤིས་པའི་གནས་སུ་མེ་ཐབ་ཟླུམ་པོ་དཀར་པོ་བྱས་ལ། ཙནྡན་ནམ་འོ་མ་ཅན་གྱི་ཤིང་དཀར་པོ་ལ་ཟླུམ་པོར་བརྩིགས་ཏེ། ཡེ་ཤེས་སེམས་དཔའ་སྤྱན་དྲངས་ལ། དང་

ལ་བདུན་རྣམ་དག་བྱ། དེ་ནས་མེ་ཏོག་དཀར་པོས་དུས་གསུམ་དུ་མཆོད་ཅིང་། འབྲས་ཆན་དང་མར་གྱི་སྦྱིན་སྲེག་བྱ། བརྒྱ་རྩ་བརྒྱད་བྱས་ནས་གང་ལ་དམིགས་པ་དེ་ཞི་བར་འགྱུར་རོ། །ཤཱནྟིཾ་ཀུ་རུ་སྭཱ་ཧཱ། དཔལ་འཕེལ་བའི་གནས་སུ་མེ་ཐབ་གྲུ་བཞི་སེར་པོ་བྱས་ལ། ཤིང་

སེར་པོ་གྲུ་བཞི་བརྩིགས་ཏེ། མེ་ཏོག་སེར་པོས་དུས་གསུམ་དུ་མཆོད་ཅིང་། རིན་པོ་ཆེ་ལྔ་དང་འབྲུ་སྣ་ལྔའི་སྦྱིན་སྲེག་བྱས་ན། གང་ལ་དམིགས་པ་དེ་རྒྱས་པར་འགྱུར་རོ། །པུཥྚིཾ་ཀུ་རུ་སྭཱ་ཧཱ། རྒྱས་པ་ལྟ་བུའི་གནས་སུ་ནི། །མེ་ཐབ་ཟླ་གམ་དམར་པོ་བརྩིགས། །སེང་ལྡེང་

དམར་པོའི་ཟླ་གམ་བརྩིགས་ལ། མེ་ཏོག་དམར་པོས་དུས་གསུམ་དུ་མཆོད་ཅིང་། མེ་ཏོག་དང་སྨན་གྱི་སྦྱིན་སྲེག་བྱས་ན། གང་ལ་དམིགས་པ་དེ་ཉིད་དབང་དུ་འགྱུར་རོ། །ཛཿཛཿཧོ། དུར་ཁྲོད་ལ་སོགས་པའི་གནས་སུ་མེ་ཐབ་གྲུ་གསུམ་མཐིང་ནག་བརྩིགས། ཤིང་ནག་པོ་ཚེར་

མ་ཅན་གྲུ་གསུམ་བརྩིགས་ལ། མེ་ཏོག་སྔོན་པོས་དུས་གསུམ་དུ་མཆོད་ཅིང་། དུག་སྣ་ཤ་ཆེན་ཚིལ་ཆེན་ཡུངས་ཀར་སྐེ་ཚེ། བགེགས་ཀྱི་ལིངྒ་ལ་བརྒྱ་རྩ་བརྒྱད་དུ་བསྲེགས་ན། གཟས་པ་པོ་ཚངས་པའི་ཚེ་དང་ལྡན་པ་ཡང་འཆི་བར་འགྱུར་རོ། །མཱ་ར་ཡ་ཧཱུཾ་ཕཊ། གོ་རིམས་དང་པོ་མཎྜལ་

Vol. 50 · folio 78a

བྱ། དེ་ནས་ལྷ་མཆོད། དེ་ནས་སྤྱན་དྲངས། དེ་ནས་བདུན་རྣམ་དག་བྱ། དེ་ནས་མེ་ལྷའི་སྦྱིན་སྲེག་བྱ། དེ་ནས་ཐབ་ཁུང་མི་དམིགས་པར་བྱ། དེ་ནས་མེ་ལྷ་རང་གནས་སུ་གསོལ། སློབ་དཔོན་ལས་ཀྱི་རྡོ་རྗེས་མཛད་པ་རྫོགས་སོ།། །།ཧཱུཾ་བདེ་གཤེགས་

གཙོ་བོ་གཏུམ་པོ་དང་། །ལྷ་རྣམས་ཕྱོགས་སུ་འཁོར་བ་རྣམས། །བདག་དང་སེམས་ཅན་རྒྱུད་སྦྱང་ཕྱིར། །སྐད་ཅིག་ཙམ་གྱིས་གཤེགས་སུ་གསོལ། །ཨོཾ་ཨེ་ཧྱེ་ཧི་བྷ་ག་བཱན། མ་ཧཱ་ཀཱ་རུ་ཎི་ཀ་ཧོ། ས་མ་ཡ་སྟྭཾ་ས་མ་ཡ་ཛཿབཛྲ་ཨཾ་ཀུ་ཤ་ཛཿཞེས་པས་སྤྱན་དྲངས་ལ། ཡི་

གེ་བརྒྱ་པས་སྤྱི་ཁྲུས་དབུལ། ཨོཾ་ས་མ་ཡ་སྟྭཾ། ས་མ་ཡོ་ཧཾ་ཞེས་པས་ཞལ་བསིལ་དབུལ། ཨོཾ་པྲ་པཱ་ར་སཏྐཱ་ར་ཨཱ་དཱི་ཙིད་སྭཱ་ཧཱ། ཞེས་ཞབས་བསིལ་དབུལ། ཨོཾ་ཀ་མ་ལཱ་ཡ་སྭཱ་ཧཱ། ཞེས་པས་མེ་ཏོག་ཕུལ་ལ་གདན་དབུལ། གང་གིས་འཁོར་བའི་ཉེས་པ་ནི། །དྲན་པ་

ཙམ་གྱིས་འཇོམས་མཛད་ཅིང་། །བླ་མེད་བྱང་ཆུབ་ཐོབ་མཛད་པ། །བླ་མའི་ཞབས་ལ་ཕྱག་འཚལ་ལོ། །ལྕང་ལོ་ཅན་གྱི་གནས་མཆོག་དམ་པ་ན། །བཅོམ་ལྡན་རྡོ་རྗེ་གཏུམ་པོ་ནི། །ཡོན་ཏན་ཐམས་ཅད་སྐུ་ལ་རྫོགས། །སྐྱོན་མེད་སྐུ་ལ་ཕྱག་འཚལ་ལོ། །ཆོས་ཉིད་སྟོང་

པའི་ངང་ལས་མ་གཡོས་ཀྱང་། །ཐབས་ལ་མཁས་ཕྱིར་སྣ་ཚོགས་སྐུར་སྟོན་པ། །རྒྱལ་སྲས་ཁྱུང་གི་ཚོགས་ལ་ཕྱག་འཚལ་ལོ། །ཕྱོགས་བཅུར་བཞུགས་པའི་སངས་རྒྱས་ཐམས་ཅད་ལ། །ཡིད་ཀྱིས་ཅི་ནུས་དམིགས་པའི་མཆོད་འབུལ་ན། །ཀུན་དུ་བཟང་པོའི་མཆོད་སྤྲིན་

ཆེན་པོ་ལྟར། །སྐུ་གསུང་ཐུགས་ལ་མཉེས་པའི་མཆོག་གྱུར་ཅིག །བདག་གིས་ཐོག་མ་མེད་པའི་དུས་མཐའ་ནས། །སྡིག་པ་མ་ལུས་བགྱིས་པ་རྣམས། །བཅོམ་ལྡན་ཕྱག་ན་རྡོ་རྗེ་ཡི། །སྤྱན་སྔར་སོ་སོར་སྡིག་བཤགས་སོ། །ཤེས་རབ་སྙིང་རྗེར་ལྡན་པའི་བྱང་ཆུབ་

སེམས། །དུས་གསུམ་རྒྱལ་བས་ཇི་ལྟར་བསྐྱེད་པ་བཞིན། །དེ་ཡི་རྗེས་སུ་བདག་གིས་བསྐྱེད་པར་བགྱི། །བྱང་ཆུབ་སེམས་དེ་ནམ་ཡང་མི་གཏོང་ངོ་། །བླ་མ་རྡོ་རྗེ་འཆང་དང་ནི། །གསང་སྔགས་ཀུན་བདག་རྡོ་རྗེ་འཆང་། །རིགས་འཛིན་པ་ཡི་རྣལ་འབྱོར་རྣམས། །དགེ་

Vol. 50 · folio 78b

བ་མཛད་ལ་རྗེས་ཡི་རང་། །བཅོམ་ལྡན་རྡོ་རྗེ་གཏུམ་པོ་དང་། །འཁོར་དང་བཅས་ལ་ལུས་འབུལ་ན། །བཞེས་ནས་བདག་ལ་རྗེས་མཐུན་པར། །དངོས་གྲུབ་རྣམས་ནི་སྩལ་དུ་གསོལ། །དང་པོ་བྱང་ཆུབ་མཆོག་ཏུ་སེམས་བསྐྱེད་ནས། །ད་ལྟ་དགེ་བ་གང་སྤྱད་པ། །བདག་དང་

སེམས་ཅན་དོན་སླད་དུ། །བྱང་ཆུབ་ཏུ་ནི་བསྔོ་བར་བགྱི། །ཕྱག་རྡོར་བདུན་རྣམ་དག་གོ། །གསེར་མེས་མ་ཚིག་པ། གཡུ་མིག་མ་ཕུག་པ། མུ་ཏིག །རིན་པོ་ཆེ་མདུང་ལེན། གུར་གུམ་གྱིས་བྲིས་པའི་རྟེན་འབྲེལ་གྱི་སྙིང་པོ། རྨ་བྱའི་མདོངས། བྱ་ཁྱུང་གི་སྙིང་པོ་ཁྲོ་གསེར་གྱིས་

བྲིས་པ། གླ་རྩི། ག་པུར། མུ་ཟི། བཙན་དུག །གུ་གུལ། ཙནྡན་གོ་ཤིཪྵ། སྨན་གི་ཝང་། བྱ་རྒོད་ཀྱི་ཚིལ་བུ། སྤྲེའུའི་པགས་པ་ལ་གཏུམ།། ཨྠི

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words