ཆོས་མངོན་པའི་མཛོད་ཀྱི་འགྲེལ་བཤད

Sanskrit title (Tibetan script, as in the text) ཨ་བྷི་དྷརྨ་ཀོ་ཥ་ཊཱི་ཀ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 142 · folio 1b

༄༅༅། །རྒྱ་གར་སྐད་དུ། ཨ་བྷི་དྷརྨ་ཀོ་ཥ་ཊཱི་ཀ །བོད་སྐད་དུ། ཆོས་མངོན་པའི་མཛོད་ཀྱི་འགྲེལ་བཤད། སངས་རྒྱས་དང་བྱང་ཆུབ་སེམས་དཔའ་ཉན་ཐོས་དང་བཅས་

པ་ཐམས་ཅད་ལ་ཕྱག་འཚལ་ལོ། །སྟོབས་ཆེན་ཡེ་ཤེས་ཏིང་འཛིན་མཆེ་བ་ཅན། །གང་གིས་སྐྱེ་བའི་རང་བཞིན་གཟེབ་དྲལ་ནས། །མྱ་ངན་འདས་ཞི་འབྲོག་དགོན་ཞུགས་གྱུར་པ། །སྟོན་པ་གླང་པོ་དེ་

ལ་མགོས་ཕྱག་འཚལ། །མངོན་པའི་ཆོས་ནི་མདོར་བསྡུས་པ། །ཆོས་མངོན་མཛོད་ཅེས་བྱ་བ་འདི། །དོན་དམ་བསྟན་བཅོས་མཛད་སྒོ་ནས། །སྟོན་པའི་མཛད་པ་འདྲ་མཛད་པ། །བློ་ལྡན་རྣམས་མཆོག་

འཇིག་རྟེན་གྱིས། །སངས་རྒྱས་གཉིས་པ་ལྟར་བརྗོད་གང་། །འགྲོ་བའི་ཡང་དག་གཉེན་གྱུར་པ། །དབྱིག་གཉེན་ཞེས་བྱ་དེས་མཛད་དོ། །བསྟན་བཅོས་རིན་ཆེན་ཆོས་མངོན་པའི། །བྱེ་བྲག་

བཤད་མཚོ་ལས་བཏུས་པའི། །རྣམ་བཤད་དོན་གསལ་ཞེས་བྱའི་མིང་། །དོན་བཞིན་འདི་ནི་བདག་གིས་བྱས། །བཤད་བྱེད་ཡོན་ཏན་བློ་གྲོས་དང་། །དབྱིག་བཤེས་སོགས་པས་ཚིག་དོན་འགྲེལ། །ལེགས་

Vol. 142 · folio 2a

བྱས་གང་ཡིན་དེ་བདག་དང་། །དོན་འདི་ཡིན་ཞེས་དེ་བཞིན་བྲིས། །ཁ་ཅིག་གང་དུ་དེ་དག་གིས། །རྣམ་བཤད་གྲུབ་མཐའ་འགལ་བྱས་ལ། །དེ་དག་ཇི་བཞིན་བརྗོད་ནས་འདིར། །བདག་གིས་གཞན་དུ་རྣམ་བཤད་

བྱས། །གང་དག་ཆོས་མངོན་རྣམ་བཤད་པའམ། །ཆོས་མངོན་མཛོད་ལ་གོམས་བྱས་པ། །དེ་དག་གིས་ནི་རྣམ་བཤད་འདི། །རིགས་སམ་མི་རིགས་རབ་དཔྱོད་ཅིག །གལ་ཏེ་རིགས་པ་ལྟ་ན་བླང་། །དོན་དཀའ་བ་ལ་བདག་འདྲའི་བློ། །འཁྲུལ་

མི་སྲིད་པ་མ་ཡིན་པས། །ཇི་སྟེ་མིན་ན་གཞན་དུ་གྱིས། །གང་ཞིག་ཀུན་ལ་མུན་པ་གཏན་བཅོམ་ཞིང་། །འཁོར་བའི་འདམ་ལས་འགྲོ་བ་དྲངས་མཛད་པ། །དོན་བཞིན་སྟོན་པ་དེ་ལ་ཕྱག་འཚལ་ནས། །ཆོས་མངོན་མཛོད་ཀྱི་བསྟན་བཅོས་

རབ་བཤད་བྱ། །ཞེས་བྱ་བའི་ཚིགས་སུ་བཅད་པ་འདིའི་དོན་རྣམ་པར་དགྲོལ་བའི་ཕྱིར་སློབ་དཔོན་གྱིས། བསྟན་བཅོས་བྱེད་པར་འདོད་པས་རང་གི་སྟོན་པའི་ཆེ་བའི་བདག་ཉིད་ཤེས་པར་བྱ་བའི་ཕྱིར་དེ་ལ་ཡོན་ཏན་བརྗོད་པ་སྔོན་དུ་འགྲོ་བའི་ཕྱག་

འཚལ་བ་རྩོམ་མོ་ཞེས་བྱ་བ་བཤད་དེ། བསྟན་བཅོས་ནི་ཆོས་མངོན་པའི་མཛོད་དོ། །བྱེད་པར་འདོད་པ་ནི་བྱེད་འདོད་པའོ། །རང་གི་སྟོན་པ་ནི་བདག་ཉིད་ཀྱི་སྟོན་པའོ། །བཅོམ་ལྡན་འདས་དེ་ནི་སློབ་དཔོན་བདག་ཉིད་ཀྱི་སྟོན་པ་ཡིན་ཏེ། དེའི་

Vol. 142 · folio 2b

བསྟན་པ་ལ་ཞུགས་པའི་ཕྱིར་རོ། །རྣམ་པ་གཅིག་ཏུ་ན་སྟོན་པ་དེས་ཐུགས་རྗེ་ཆེན་པོའི་གཞན་གྱི་དབང་གིས་འཇིག་རྟེན་ཐམས་ཅད་རང་ཉིད་ཀྱིར་ཡོངས་སུ་བཟུང་ངོ་། །དེ་ལྟ་བས་ན་བཅོམ་ལྡན་འདས་དེ་ནི་རང་ཉིད་ཀྱིར་ཡོངས་སུ་བཟུང་བ་སློབ་དཔོན་གྱི་ཡང་རང་གི་སྟོན་པ་ཡིན་ནོ། །ཆེ་བའི་བདག་ཉིད་

ཤེས་པར་བྱ་བའི་ཕྱིར་ཞེས་བྱ་བ་ལ། ཆེ་བའི་བདག་ཉིད་དེ་རང་དང་གཞན་གྱི་དོན་སྒྲུབ་པ་ཕུན་སུམ་ཚོགས་པ་ཡིན་ནོ། །དེ་ཤེས་པར་བྱ་བའི་ཕྱིར་ཞེས་བྱ་བ་ནི་དེ་ཁོང་དུ་ཆུད་པར་བྱ་བའི་ཕྱིར་རོ། །ཡོན་ཏན་བརྗོད་པ་སྔོན་དུ་འགྲོ་བ་ནི་ཡོན་ཏན་བསྙད་པ་སྔོན་དུ་འགྲོ་བའོ། །དེ་ལ་ཕྱག་འཚལ་བ་རྩོམ་

པ་ནི་དེ་ལ་ཕྱག་འཚལ་བ་བྱེད་དོ་ཞེས་བྱ་བའི་ཐ་ཚིག་གོ། །འདས་པའི་དུས་ཡིན་པའི་ཕྱིར་བརྩམས་སོ་ཞེས་བརྗོད་པར་བྱ་བ་ཡིན་པ་ལས། ད་ལྟར་གྱི་དུས་ཀྱི་ཚིག་སྦྱོར་བ་ནི་ད་དུང་ཕྱག་འཚལ་བ་རྩོམ་པར་དགོངས་པའི་ཕྱིར་རམ། སློབ་མ་བརྒྱུད་པས་ཕྱག་འཚལ་བ་རྩོམ་པ་རྒྱུན་མི་འཆད་པའི་ཕྱིར་རོ། །སྒྲའི་

བསྟན་བཅོས་ལས་ཀྱང་སྒྲ་སྦྱོར་བ་ནི་ཁོ་ན་ལྟ་བུ་སྣང་སྟེ། དེ་ནས་སྒྲ་རྗེས་སུ་སྟོན་པ་ཞེས་བྱ་བ་ལ། དེ་ནས་ཞེས་བྱ་བ་འདི་ནི་སྐབས་ཀྱི་དོན་ཡིན་པར་སྦྱར་རོ་ཞེས་འབྱུང་བ་ལྟ་བུའོ། །གལ་ཏེ་ཡོན་ཏན་བརྗོད་པ་ཙམ་གྱིས་ཆེ་བའི་བདག་ཉིད་ཁོང་དུ་ཆུད་དེ་ཕྱག་འཚལ་བས་ནི་མ་ཡིན་ནོ་ཞེ་ན་མ་ཡིན་ཏེ། དེ་ནི་དེ་བརྗོད་

པར་བྱ་བ་ཡིན་པའི་ཕྱིར་ཏེ། ཕྱག་འཚལ་བས་ནི་ཆེ་བའི་བདག་ཉིད་ལེགས་པར་རྗོད་པར་བྱེད་དོ། །རྣམ་པ་གཅིག་ཏུ་ན་ཡོན་ཏན་བརྗོད་པ་ཁོ་ནས་ཆེ་བའི་བདག་ཉིད་ཤེས་པར་བྱེད་དེ། ཕྱག་འཚལ་བ་རྩོམ་པ་ནི་རང་གི་བསོད་ནམས་སྤེལ་བའི་ཕྱིར་རོ། །རྣམ་པ་གཅིག་ཏུ་ན་དམ་

པ་རྣམས་ཀྱི་སྤྱོད་པའི་རྗེས་སུ་འཇུག་པར་རབ་ཏུ་བསྟན་པའི་ཕྱིར་ཏེ། དམ་པ་རྣམས་ཀྱི་སྤྱོད་པ་ནི་མངོན་པར་འདོད་པའི་ལྷ་ལ་མཆོད་པ་དང་བསྟོད་པ་དང་ཕྱག་བྱས་ནས་བྱ་བ་རྩོམ་པ་ཡིན་ནོ། །དེ་ལ་ཆེ་བའི་བདག་ཉིད་ཤེས་པ་ཅི་དགོས་ཤེ་ན་སྨྲས་པ། དེ་ལ་གུས་པ་བསྐྱེད་པའི་ཕྱིར་རོ། །གུས་པ་བསྐྱེད་

པ་ཡང་གུས་པར་བྱས་ཏེ་དེའི་གསུང་རབ་མཉན་པར་བྱ་བའི་ཕྱིར་རོ། །དེ་ལ་གུས་པར་བྱས་ཏེ་མཉན་པ་ཡང་རིམ་གྱིས་ཐོས་པ་དང་བསམས་པ་དང་བསྒོམས་པ་ལས་བྱུང་བའི་ཤེས་རབ་བསྐྱེད་པའི་ཕྱིར་རོ། །དེ་བསྐྱེད་པ་ཡང་ཉོན་མོངས་པ་སྤངས་པའི་ཕྱིར་ལ། དེ་ཡང་སྡུག་བསྔལ་ཐམས་ཅད་ཉེ་བར་ཞི་བའི་

Vol. 142 · folio 3a

མཚན་ཉིད་མྱ་ངན་ལས་འདས་པ་ཐོབ་པར་བྱ་བའི་ཕྱིར་ཏེ། དགོས་པ་ནི་དེར་ཟད་དོ། །སློབ་དཔོན་གྱིས་ནི་དངོས་སུ་དགོས་པ་ཡིན་པའི་ཕྱིར་ཆེ་བའི་བདག་ཉིད་ཤེས་པ་གཅིག་པུ་དགོས་པར་བཤད་ཀྱི་དེ་ལས་གཞན་པ་དག་ནི་དཔག་པར་ནུས་པས་མ་བཤད་དོ། །གང་ཞིག་ཅེས་བྱ་བ་

ནི་སངས་རྒྱས་བཅོམ་ལྡན་འདས་ཀྱི་དབང་དུ་བྱས་ནས་སྨྲས་པའོ་ཞེས་བྱ་བ་ལ། གང་ཞིག་ཅེས་བྱ་བའི་སྒྲ་ནི་སྤྱིའི་སྒྲ་ཡིན་ཡང་ཁྱད་པར་དུ་བྱས་པའི་ཕྱིར་ཁྱད་པར་ལ་འཇུག་པར་འགྱུར་ཏེ་དཔེར་ན་བྲམ་ཟེ་འདི་རྣམས་ཀྱི་ནང་ན་དཀར་ཤམ་པོ་གོས་དཀར་པོ་གྱོན་པ་གང་ཡིན་པ་དེ་ནི་ལྷ་སྐྱིད་ཡིན་ནོ་ཞེས་བྱ་བ་དེ་ལྟ་བུ་

སྟེ། དེ་བཞིན་དུ་འདིར་ཡང་། གང་ཞིག་ཀུན་ལ་མུན་པ་གཏན་བཅོམ་ཞིང་། །འཁོར་བའི་འདམ་ལས་འགྲོ་བ་དྲངས་མཛད་པ། །དོན་བཞིན་སྟོན་པ་དེ་ལ་ཕྱག་འཚལ་ནས། །ཞེས་བྱ་བའི་གང་ཞིག་ཅེས་བྱ་བའི་སྒྲ་ནི་སངས་རྒྱས་བཅོམ་ལྡན་འདས་ཁོ་ན་དང་སྦྱར་ཏེ། སངས་རྒྱས་ལས་གཞན་ཡོན་

ཏན་གྱི་ཁྱད་པར་དེ་ལྟ་བུ་ཅན་མི་སྲིད་དོ། །དེའི་ཕྱིར་གང་ཞིག་ཅེས་བྱ་བ་ནི་སངས་རྒྱས་བཅོམ་ལྡན་འདས་ཀྱི་དབང་དུ་བྱས་ནས་སྨྲས་པའོ་ཞེས་བཤད་དོ། །སངས་རྒྱས་ཞེས་བྱ་བ་ནི་བློ་རྒྱས་པའི་ཕྱིར་སངས་རྒྱས་ཏེ་དཔེར་ན་པདྨ་ཁ་བྱེ་བ་ཞེས་བྱ་བ་ལྟར་རྣམ་པར་རྒྱས་ཞེས་བྱ་བའི་ཐ་ཚིག་གོ། །རྣམ་པ་གཅིག་ཏུ་ན་མ་

རིག་པའི་གཉིད་གཉིས་དང་བྲལ་བའི་ཕྱིར་སངས་རྒྱས་ཏེ། དཔེར་ན་སྐྱེས་བུ་གཉིད་སད་པ་ཞེས་བྱ་བ་ལྟར་རབ་ཏུ་སད་པ་ཞེས་བྱ་བའི་ཐ་ཚིག་གོ། །བཅོམ་ལྡན་འདས་ཞེས་བྱ་བ་ཚིག་གཉིས་པ་སྨོས་པ་ནི་མ་གུས་པར་དོགས་པ་བཟློག་པའི་ཕྱིར་ཏེ། འཇིག་རྟེན་ན་མངོན་པར་བརྗོད་པ་ཉེ་བའི་ཚིག་

མེད་པ་རྣམས་ནི་མ་གུས་པར་སྣང་སྟེ། ལྷ་སྦྱིན་ཞེས་བྱ་བ་ལྟ་བུའོ། །འདུལ་བ་རྣམ་པར་བཤད་པ་བྱེད་པ་རྣམས་ནི་མུ་བཞི་པར་བྱེད་དེ། སངས་རྒྱས་ཡིན་ལ་བཅོམ་ལྡན་འདས་མ་ཡིན་པ་ཡང་ཡོད་དོ། །རང་སངས་རྒྱས་ནི་རང་བྱུང་ཡིན་པའི་ཕྱིར་སངས་རྒྱས་ཞེས་བརྗོད་པར་མི་ནུས་ལ།

སྦྱིན་པ་ལ་སོགས་པའི་ཚོགས་ཡོངས་སུ་མ་རྫོགས་པའི་ཕྱིར་བཅོམ་ལྡན་འདས་ནི་མ་ཡིན་ཏེ། གང་ཞིག་ཆེ་བའི་བདག་ཉིད་དང་ལྡན་པ་དེ་ནི་བཅོམ་ལྡན་འདས་ཞེས་བྱའོ། །བཅོམ་ལྡན་འདས་ཡིན་ལ་སངས་རྒྱས་མ་ཡིན་པ་ཡང་ཡོད་དེ་དེ་སྲིད་པ་ཐ་མ་པའི་བྱང་ཆུབ་སེམས་དཔའ་ནི་ཡེ་ཤེས་

Vol. 142 · folio 3b

ལ་སོགས་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་ཕྱིར་དང་། མངོན་པར་རྫོགས་པར་སངས་མ་རྒྱས་པའི་ཕྱིར་དང་། གཉི་ག་ཡིན་པ་ཡང་ཡོད་དེ། འདི་ལྟར་སངས་རྒྱས་བཅོམ་ལྡན་འདས་ལྟ་བུའོ། །གཉི་ག་མ་ཡིན་པ་ཡང་ཡོད་དེ་འདི་ལྟ་སྟེ་རྣམ་པ་དེ་དག་མ་གཏོགས་པ་ཡིན་པས་དེའི་ཕྱིར་

སངས་རྒྱས་བཅོམ་ལྡན་འདས་ཞེས་ཁྱད་པར་གཉི་ག་སྨོས་སོ་ཞེས་ཟེར་རོ། །འདིའི་འམ་འདིས་མུན་པ་བཅོམ་པས་མུན་པ་བཅོམ་པའོ་ཞེས་བྱ་བ་ལ་དྲུག་པའི་འབྲུ་མང་པོར་སྦྱར་ན་ནི་ལམ་གྱིས་བཅོམ་པའོ་ཞེས་ལམ་བྱེད་པ་པོ་ཡིན་པར་ཁོང་ནས་དྲང་ངོ་། །གསུམ་པའི་འབྲུ་མང་པོར་སྦྱར་ན་ནི་

ལམ་གྱི་ཞེས་བྱ་བ་བྱེད་པ་ཡིན་པར་ཁོང་ནས་དྲང་ངོ་། །གཞན་དག་རེ་ཞིག་ཚིག་རྣམ་པར་སྦྱར་བ་གཉིས་རབ་ཏུ་བསྟན་པ་ནི། བཅོམ་པ་ནི་གནོད་པ་དང་བྲལ་བ་དག་ཡིན་ནོ་ཞེས་བཅོམ་པའི་དོན་གཉིས་ཡོངས་སུ་བསྡུ་བའི་ཕྱིར་ཏེ། གང་གི་ཚེ་འདིའི་མུན་པ་བཅོམ་པ་ཞེས་ཚིག་རྣམ་པར་སྦྱོར་བ་

དེའི་ཚེ་ནི་བཅོམ་པ་བྲལ་བའི་དོན་ཡིན་པར་གཟུང་སྟེ། འདིའི་མུན་པ་དང་བྲལ་ལོ་ཞེས་བྱ་བའི་ཐ་ཚིག་གོ། །གང་གི་ཚེ་གསུམ་པའི་འབྲུ་མང་པོར་སྦྱར་བ་དེའི་ཚེ་ནི་བཅོམ་པ་གནོད་པའི་དོན་ཡིན་པར་གཟུང་སྟེ། འདིའི་མུན་པ་ལ་གནོད་པ་བྱས་སོ་ཞེས་བྱ་བའི་ཐ་ཚིག་གོ། །དེ་བཞིན་དུ་ཚིག་འོག་མ་

གཉིས་ཀྱང་ཚིག་གཅིག་ཏུ་བྱས་ཏེ་མཇུག་ཏུ། ཐམས་ཅད་ལ་མུན་པ་རྣམ་པ་ཐམས་ཅད་དུ་བཅོམ་པས་ཀུན་ལ་མུན་པ་གཏན་བཅོམ་པའོ་ཞེས་བྱ་བར་སྦྱར་རོ། །ཐམས་ཅད་ལ་ཞེས་བྱ་བ་ནི་སྐྱེ་མཆེད་བཅུ་གཉིས་ཀྱི་མཚན་ཉིད་ཀྱི་ཤེས་བྱ་ལ་སྟེ། མདོ་ལས་བྲམ་ཟེ་ཐམས་ཅད་ཐམས་ཅད་ཅེས་བྱ་བ་ནི་སྐྱེ་

མཆེད་བཅུ་གཉིས་ཇི་སྙེད་པ་ཡིན་ནོ་ཞེས་འབྱུང་བའི་ཕྱིར་རོ། །རྣམ་པ་ཐམས་ཅད་དུ་ཞེས་བྱ་བ་ནི་མུན་པའི་རྣམ་པ་ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པ་དང་བྲལ་བའི་ཕྱིར་རོ། །ཅི་འདིར་མཚན་མོའི་མུན་པ་ལ་མུན་པའི་སྒྲར་བརྗོད་དམ་ཞེ་ན། སྨྲས་པ་མ་ཡིན་ཏེ། མི་ཤེས་པ་ནི་ཡང་དག་པའི་དོན་

མཐོང་བ་ལ་བགེགས་སུ་གྱུར་པའི་ཕྱིར་མུན་པའོ་ཞེས་བྱ་བར་ཁོང་དུ་ཆུད་པར་བྱའོ། །མུན་པ་ཞེས་བྱ་བའི་སྒྲ་ནི་མཚན་མོའི་མུན་པ་ཡིན་པར་གྲགས་ཏེ། བུམ་པ་དང་སྣམ་བུ་ལ་སོགས་པའི་གཟུགས་ཡོད་པ་མཐོང་བའི་བགེགས་སུ་གྱུར་པའི་ཕྱིར་རོ། །སྐྱེ་བོ་ལོང་བ་དང་འདྲ་བར་བྱེད་པས་མུན་པ་ཡིན་ནོ། །མི་

Vol. 142 · folio 4a

ཤེས་པ་ཡང་དེ་དང་ཆོས་མཐུན་པར་ཡང་དག་པའི་དོན་སྡུག་བསྔལ་ལ་སོགས་པའི་བདེན་པ་མཐོང་བའི་བགེགས་སུ་གྱུར་པའི་ཕྱིར་མུན་པ་ཞེས་བྱ་བའི་མིང་ཐོབ་པོ། །དེ་ཡང་ཞེས་བྱ་བ་ནི་མི་ཤེས་པ་དེའོ། །གཉེན་པོ་བརྙེས་ནས་ཞེས་བྱ་བ་ནི་འཕགས་པའི་ལམ་བརྙེས་ནས་ཏེ། མི་མཐུན་

པའི་ཕྱོགས་ནི་ཉོན་མོངས་པ་ཡིན་ལ་མི་མཐུན་པའི་ཕྱོགས་འཇོམས་པར་བྱེད་པའི་ཕྱོགས་ནི་གཉེན་པོ་ཡིན་པའི་ཕྱིར་རོ། །རྣམ་པ་གཅིག་ཏུ་ན་ཡེ་ཤེས་ཟག་པ་མེད་པ་ནི་མི་ཤེས་པའི་གཉེན་པོ་ཡིན་པས་དེ་བརྙེས་ནས། ཤེས་བྱ་ཐམས་ཅད་ལ་ཕྱིས་མི་སྐྱེ་བའི་ཆོས་ཅན་དུ་གྱུར་པའི་ཕྱིར་གཏན་ནས་ཡེ་བཅོམ་པ་ཞེས་

བྱ་བ་ནི་ཀུན་ཏུ་མི་འབྱུང་བར་སྤང་བར་བྱས་སོ་ཞེས་བྱ་བའི་ཐ་ཚིག་གོ། །དེའི་ཕྱིར་འདི་ནི་ཞེས་བྱ་བ་ནི་བཅོམ་ལྡན་འདས་སོ། །རང་སངས་རྒྱས་དང་ཉན་ཐོས་རྣམས་ཀྱང་ཞེས་བྱ་བ་ནི་མཆོད་པའི་ཕྱིར་རང་སངས་རྒྱས་སོ་ཞེས་བྱ་བའི་སྒྲ་གོང་དུ་སྨོས་སོ། །འདོད་མོད་ཀྱི་ཞེས་བྱ་བ་ནི་ཁས་ལེན་མོད་ཀྱིའོ། །གཏན་ནས་ནི་མ་ཡིན་ཏེ་

ཞེས་བྱ་བ་ནི་ཉོན་མོངས་ཅན་མ་ཡིན་པའི་ཀུན་ཏུ་རྨོངས་པ་དང་གཏན་དུ་མ་བྲལ་བའི་ཕྱིར་རོ། །ཉན་ཐོས་དང་རང་སངས་རྒྱས་རྣམས་ཀྱིས་ཀྱང་སངས་རྒྱས་བཞིན་དུ་ཟག་པ་དང་བཅས་པའི་དངོས་པོ་ཐམས་ཅད་སྤངས་པ་མ་ཡིན་ནམ། དེ་ཅི་སྟེ་དེ་དག་ཉོན་མོངས་པ་ཅན་གྱི་ཀུན་ཏུ་རྨོངས་པ་ཁོ་ན་དང་གཏན་དུ་བྲལ་བའོ་ཞེས་བྱ་བ་

ནི་འདི་བརྗོད། འདི་ལྟར་ང་ནི་ཆོས་གཅིག་མངོན་པར་མ་ཤེས་ཤིང་ཡོངས་སུ་མ་ཤེས་པར་སྡུག་བསྔལ་གྱི་མཐར་བྱེད་པར་མི་སྨྲའོ་ཞེས་བྱ་བ་དང་། དེ་བཞིན་དུ་ང་ནི་ཆོས་གཅིག་ཡོངས་སུ་མ་ཤེས་ཤིང་མ་སྤངས་པར་སྡུག་བསྔལ་གྱི་མཐར་བྱེད་པར་མི་སྨྲའོ་ཞེས་གསུངས་སོ། །དེ་ལྟ་བས་ན་ཉན་ཐོས་དང་རང་སངས་རྒྱས་

རྣམས་ཀྱིས་ཀྱང་འདུན་པའི་འདོད་ཆགས་སྤངས་པས་མིག་ལ་སོགས་པ་བཞིན་དུ་ཉོན་མོངས་པ་ཅན་མ་ཡིན་པའི་མི་ཤེས་པ་དེ་སྤངས་པ་ཁོ་ན་ཡིན་ན། དེ་ལྟ་མ་ཡིན་ན་ཉན་ཐོས་དང་རང་སངས་རྒྱས་རྣམས་སྡུག་བསྔལ་གྱི་མཐར་བྱེད་པར་ཡང་མི་འགྱུར་རོ་ཞེ་ན། དེ་ནི་དེ་ལྟ་ཡིན་པ་བདེན་ཏེ། དེ་དག་གིས་ཉོན་

མོངས་པ་ཅན་བཞིན་དུ་ཉོན་མོངས་པ་ཅན་མ་ཡིན་པའི་མི་ཤེས་པ་ཡང་སྤངས་པ་ཁོ་ན་ཡིན་ན། དེ་ནི་སྤངས་ཀྱང་དེ་དག་ལ་མིག་ལ་སོགས་པ་བཞིན་དུ་ཀུན་ཏུ་འབྱུང་གི་སངས་རྒྱས་བཅོམ་ལྡན་འདས་ལ་ནི་སྤངས་ཟིན་ཕན་ཆད་ཀུན་ཏུ་མི་འབྱུང་སྟེ་དེ་ཉིད་ཀྱི་ཕྱིར་ཕྱིས་མི་སྐྱེ་བའི་ཆོས་ཅན་དུ་གྱུར་པའི་ཕྱིར་བཅོམ་པའོ་

Vol. 142 · folio 4b

ཞེས་ཁྱད་པར་དུ་བྱས་སོ། །དེ་ལྟ་མ་ཡིན་ན་ཞེས་བྱ་བ་ཐམས་ཅད་ལ་ཡེ་སྤངས་པའོ་ཞེས་བྱ་བ་ཁོ་ན་ཞིག་བཤད་པར་འགྱུར་རོ། །གང་དག་ཉན་ཐོས་དང་རང་སངས་རྒྱས་རྣམས་ཉོན་མོངས་པ་དང་བྲལ་བའི་ཕྱིར་ཀུན་ནས་ཉོན་མོངས་པ་རྣམ་པར་ལོག་པའོ་ཞེས་རྣམ་པར་འཆད་པ་དེ་དག་གི་ནི། ཇི་སྐད་གསུངས་པ་

དང་སྦྱར་ན་མི་རུང་བས་དོར་རོ། །འདི་ལྟར་དེ་དག་ལ་ཞེས་བྱ་བ་རྒྱས་པར་འབྱུང་བ་ལ་འདི་ལྟར་ཞེས་བྱ་བ་ནི་གང་གི་ཕྱིར་ཞེས་བྱ་བའི་ཐ་ཚིག་གོ། །རྣམ་པ་གཅིག་ཏུ་ན་འདི་ལྟར་ཞེས་བྱ་བ་ནི་ཅི་ལྟར་ཡེ་མ་ཡིན་པ་དེ་ལྟར་རོ། །དེ་དག་ལ་ཞེས་བྱ་བ་ནི་ཉན་ཐོས་དང་རང་སངས་རྒྱས་རྣམས་ལའོ། །སངས་རྒྱས་ཀྱི་

ཆོས་ཞེས་བྱ་བ་ནི་མ་འདྲེས་པ་ལ་སོགས་པའོ། །ཡུལ་དང་དུས་ཤིན་ཏུ་བསྐལ་པ་ཞེས་བྱ་བ་ནི་ཡུལ་ཤིན་ཏུ་བསྐལ་པ་དང་དུས་ཤིན་ཏུ་བསྐལ་པའོ། །རབ་ཏུ་དབྱེ་བ་མཐའ་ཡས་པ་རྣམས་ལ་ཞེས་བྱ་བ་ནི་སངས་རྒྱས་ཀྱི་ཆོས་ཀྱི་ངོ་བོ་ཉིད་མ་ཡིན་པ་གཟུགས་ལ་སོགས་པའི་དོན་རྣམས་ལ་ཡང་ངོ་། །ཉོན་མོངས་

པ་ཅན་མ་ཡིན་པའི་མི་ཤེས་པ་ཡོད་པ་ཉིད་དོ་ཞེས་བྱ་བ་འདི་ནི་ཀུན་ཏུ་འབྱུང་བ་ཁོ་ནའོ་ཞེས་བྱ་བའི་ཐ་ཚིག་གོ། །དེ་ལ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་གང་དག་ཡིན་པ་དེ་དག་ནི་ངོ་བོ་ཉིད་ཀྱིས་ཤིན་ཏུ་ཕྲ་ཞིང་ཟབ་པའི་ཕྱིར་སངས་རྒྱས་ལས་གཞན་པ་རྣམས་ཀྱིས་མི་ཤེས་ཏེ་ཇི་སྐད་དུ། བཅོམ་ལྡན་འདས་ཀྱིས་ཤཱ་

རིའི་བུ་ལ་དེ་བཞིན་གཤེགས་པའི་ཚུལ་ཁྲིམས་ཀྱི་ཕུང་པོ་དང་ཏིང་ངེ་འཛིན་གྱི་ཕུང་པོ་དང་ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཤེས་སམ་ཞེས་དྲིས་པ་དང་། གནས་བརྟན་ཤཱ་རིའི་བུས་བཅོམ་ལྡན་འདས་དེ་ནི་མ་འཚལ་ཏོ་ཞེས་གསོལ་ཏོ་ཞེས་འབྱུང་

བ་ལྟ་བུའོ། །དོན་གཞན་གཟུགས་ཅན་རྡུལ་ཕྲ་རབ་བརྩམས་པ་གང་དག་ཡིན་པ་དེ་དག་ཀྱང་གལ་ཏེ་ཡུལ་ཤིན་ཏུ་བསྐལ་པ་ཡིན་ལ། རྣམ་པར་རིག་བྱེད་མ་ཡིན་པ་དང་གཟུགས་ཅན་མ་ཡིན་པ་གང་ཡིན་པ་དེ་དག་ཀྱང་གལ་ཏེ་རྟེན་ཡུལ་ཤིན་ཏུ་བསྐལ་པ་ཡིན་པའི་ཕྱིར་ཡུལ་ཤིན་ཏུ་བསྐལ་པ་ཞིག་ཡིན་ན་དེ་རྣམས་ཀྱང་ཡུལ་འཇིག་རྟེན་

གྱི་ཁམས་དུ་མས་ཆོད་པའི་ཕྱིར་དེ་དག་གིས་མི་ཤེས་ཏེ། གནས་བརྟན་མཽད་གལ་གྱི་བུས་རང་གི་མ་ཡུལ་དུ་ཤིན་དུ་བསྐལ་པ་འཇིག་རྟེན་གྱི་ཁམས་འོད་ཟེར་ཅན་དུ་སྐྱེས་པའི་ཡུལ་ཡོངས་སུ་མ་ཤེས་སོ་ཞེས་གྲགས་སོ། །དུས་ཤིན་ཏུ་བསྐལ་པ་ནི་འདས་པའམ་མ་འོངས་པ་ཡིན་ཏེ། དེ་རྣམས་ཀྱང་འབྱུང་བ་དང་འཇིག་པ་བསྐལ་

Vol. 142 · folio 5a

པ་གཞན་དུ་མས་ཆོད་པའི་ཕྱིར་དེ་དག་གིས་མི་ཤེས་པ་ཁོ་ན་ཡིན་ཏེ། གནས་བརྟན་ཤཱ་རིའི་བུས་རབ་ཏུ་འབྱུང་བར་འདོད་པའི་མི་ཐར་པའི་ཆ་དང་མཐུན་པའི་དགེ་བའི་རྩ་བ་མ་མཐོང་ནས་བསྐྲད་པ་དང་། བཅོམ་ལྡན་འདས་ཀྱིས་དེའི་ཐར་པའི་ཆ་དང་མཐུན་པ་གཟིགས་ཏེ། ངས་ནི་འདི་ཡི་ཐར་པ་ཡི། །

ས་བོན་ཤིན་ཏུ་ཕྲ་བ་དང་། །ཚོན་དང་རྡོ་ཡི་གསེབ་ན་གསེར། །བག་ལ་ཞ་ལ་ལྟ་བུ་གཟིགས། །ཞེས་གསུངས་ནས་ནི་དེ་ཡང་རབ་ཏུ་ཕྱུང་ངོ་ཞེས་གྲགས་སོ། །རབ་ཏུ་དབྱེ་བ་མཐའ་ཡས་པ་རྣམས་ལ་ཞེས་བྱ་བ་ནི་ཁམས་དང་འགྲོ་བ་དང་སྐྱེ་གནས་དང་སྐྱེ་བ་ལ་སོགས་པའི་བྱེ་བྲག་རྟོགས་

པར་དཀའ་བ་རྣམས་ལ་སྟེ། དེ་རྣམས་ཀྱང་དེ་དག་གིས་མི་ཤེས་པ་ཁོ་ན་ཡིན་ཏེ་འདི་ལྟར། རྨ་བྱའི་མདོངས་ནི་གཅིག་པུ་ཡང་། །རྒྱུ་ཡི་རྣམ་པ་ཐམས་ཅད་ནི། །ཀུན་མཁྱེན་མིན་པའི་ཤེས་བྱ་མིན། །དེ་ཤེས་པ་ནི་ཀུན་མཁྱེན་སྟོབས། །ཞེས་གསུངས་སོ། །དེ་དག་ནི་མི་ཤེས་པའི་རྒྱུ་

བཞི་ཡིན་ཏེ། དེ་དག་ཀྱང་ཁ་ཅིག་ལ་ནི་གཅིག་ཁ་ཅིག་ལ་ནི་གཉིས་ཁ་ཅིག་ལ་ནི་གསུམ་ཁ་ཅིག་ལ་ནི་བཞི་ཞེས་བྱ་བར་ཅི་རིགས་པར་སྦྱར་བར་བྱའོ། །དེ་ལྟར་བདག་ལ་ཕན་པ་སྒྲུབ་པ་ཕུན་སུམ་ཚོགས་པས་ཞེས་བྱ་བ་ལ་སོགས་པ་རྒྱས་པར་འབྱུང་བ་ལ་བདག་ལ་ཕན་པའི་ཕྱིར་བསྒྲུབ་པ་ནི་

བདག་ལ་ཕན་པ་བསྒྲུབ་པའོ། །བདག་ལ་ཕན་པ་སྒྲུབ་པ་ཕུན་སུམ་ཚོགས་པ་ནི་བདག་ལ་ཕན་པ་སྒྲུབ་པ་ཕུན་སུམ་ཚོགས་པ་སྟེ་འབྲས་བུ་གྲུབ་པ་ཞེས་བྱ་བའི་ཐ་ཚིག་གོ། །ཕུན་སུམ་ཚོགས་པ་དེ་ཡང་ཡེ་ཤེས་དང་སྤངས་པ་ཕུན་སུམ་ཚོགས་པ་ཡིན་པར་རིག་པར་བྱ་སྟེ། གཞན་ལ་

ཕན་པ་སྒྲུབ་པ་ཕུན་སུམ་ཚོགས་པ་ཡང་དེ་དང་འདྲ་བ་ཉིད་དུ་བརྗོད་པར་བྱའོ། །གཞན་དག་ན་རེ་བདག་ལ་ཕན་པ་སྒྲུབ་པ་ནི་བདག་ལ་ཕན་པ་སྒྲུབ་པར་བྱེད་པ་སྟེ་བདག་ལ་ཕན་པ་ཉེ་བར་འཛིན་པ་ཞེས་བྱ་བའི་ཐ་ཚིག་གོ། །དེ་ཕུན་སུམ་ཚོགས་པ་ནི་བདག་ལ་ཕན་པ་སྒྲུབ་པ་ཕུན་སུམ་ཚོགས་

པ་སྟེ། གཞན་ལ་ཕན་པ་སྒྲུབ་པ་ཕུན་སུམ་ཚོགས་པ་ཡང་དེ་བཞིན་དུ་བཤད་པར་བྱའོ། །དེ་ཡང་སྡུག་བསྔལ་ཐམས་ཅད་ཉེ་བར་ཞི་བར་མྱ་ངན་ལས་འདས་པ་ཐོབ་པར་བྱེད་པའི་ངོ་བོ་ཉིད་ཡིན་ནོ། །འཁོར་བའི་འདམ་ལས་འགྲོ་བ་དྲངས་མཛད་པ་ཞེས་བྱ་བ་ནི་འཁོར་བ་ན་འཁོར་བའོ། །

Vol. 142 · folio 5b

འོང་ཞིང་འགྲོ་བར་འགྱུར་བ་སྟེ་སྐྱེ་བ་དང་འཆི་བ་བརྒྱུད་པ་ཞེས་བྱ་བའི་ཐ་ཚིག་གོ། །རྣམ་པ་གཅིག་ཏུ་ན་འདིར་སེམས་ཅན་རྣམས་འཁོར་བས་ན་འཁོར་བ་སྟེ་ཁམས་གསུམ་པ་ཡིན་ནོ། །འདམ་དང་ཆོས་མཐུན་པའི་ཕྱིར་འཁོར་བ་ནི་འདམ་དང་འདྲ་བས་འཁོར་བའི་འདམ་མོ། །དེ་ཉིད་

ཀྱི་ཕྱིར་འཁོར་བ་ནི་འགྲོ་བ་ཀུན་ཏུ་ཆགས་པའི་གནས་ཡིན་པའི་ཕྱིར་དང་རྒལ་བར་དཀའ་བའི་ཕྱིར་འདམ་ལྟ་བུ་ཡིན་ཏེ་ཞེས་བཤད་དེ། འདམ་ནི་འཇིག་རྟེན་ན་བྱིང་བའི་བདག་ཉིད་ཡིན་པའི་ཕྱིར་ཀུན་ཏུ་ཆགས་པའི་གནས་ཡིན་ལ་དེ་ཉིད་ཀྱི་ཕྱིར་རམ་གཡོ་བའི་ཕྱིར་རྒལ་བར་དཀའ་བ་ཡིན་ནོ། །

ཡང་ན་གཞན་ལ་བརྟེན་ནས་བརྒལ་དགོས་པའི་ཕྱིར་རྒལ་བར་དཀའ་བ་ཡིན་ནོ། །འཁོར་བ་ཡང་སྲེད་པ་ལ་སོགས་པས་མངོན་པར་བརླན་པའི་ཕྱིར་ཀུན་ཏུ་ཆགས་པའི་གནས་ཡིན་ལ་དེ་ཉིད་ཀྱི་ཕྱིར་རམ་ལྟ་བ་དང་ཐེ་ཙོམ་གྱིས་བསྐྱོད་པའི་ཕྱིར་རྒལ་བར་དཀའ་བ་ཡིན་ནོ། །ཡང་ན་སངས་རྒྱས་ལ་

བརྟེན་ནས་བརྒལ་དགོས་པ་ཉིད་ཀྱི་ཕྱིར་རྒལ་བར་དཀའ་བ་ཡིན་ནོ། །འགྲོ་བ་ནི་སེམས་ཅན་གྱི་འཇིག་རྟེན་ནོ། །དེར་བྱིང་བ་ནི་དེའི་བདག་ཉིད་དུ་ཞུགས་པའམ་ཀུན་འབྱུང་གི་ཡན་ལག་གི་ངོ་བོར་གྱུར་པའི་ཕྱིར་རོ། །སྐྱབས་མེད་པ་ནི་མགོན་མེད་པའོ། །ཐུགས་བརྩེ་བ་དང་ལྡན་པ་ནི་

ཐུགས་རྗེ་དང་ལྡན་པའོ། །བཅོམ་ལྡན་འདས་ཀྱིས་དམ་པའི་ཆོས་སྟོན་པའི་ཕྱག་བརྐྱང་བ་དག་ཅེས་བྱ་བ་ནི་དམ་པའི་ཆོས་སྟོན་པ་ཉིད་ཕྱག་ཡིན་ལ་དེ་དག་བརྐྱང་བ་སྟེ་བསྒྲལ་བར་བྱ་བ་མང་བའི་ཕྱིར་མང་པོའི་ཚིག་སྨོས་སོ། །དེ་དག་གི་སྐལ་བ་ཇི་ལྟ་བ་བཞིན་དུ་དྲངས་སོ་ཞེས་བྱ་བ་ནི་

སྐལ་བ་ཇི་ལྟ་བ་བཞིན་ཞེས་མ་སྨོས་སུ་ཟིན་ཀྱང་འཇིག་རྟེན་ན་དེ་ལྟ་བུ་མཐོང་བའི་ཕྱིར་མངོན་ཏེ། དཔེར་ན་བྲམ་ཟེ་རྣམས་སྟོན་མོ་བྱིན་ཅིག་ཅེས་སྨྲས་ན་འཇིག་རྟེན་ཐམས་ཅད་ཀྱི་བྲམ་ཟེ་རྣམས་ལ་ཟན་སྦྱིན་པར་མི་ནུས་པའི་ཕྱིར། གང་དག་གྲོང་ངམ་གྲོང་ཁྱེར་དེར་ཉེ་བ་ཟན་སྦྱིན་པར་ནུས་པ་

དེ་དག་ཁོ་ན་སྟོན་མོ་བྱིན་ཅིག་ཅེས་བྱ་བར་མངོན་པ་ལྟར་དེ་བཞིན་དུ་འདིར་ཡང་སྐྱེ་བོ་གང་ཞིག་དྲང་བའི་སྐལ་བ་ཅན་དེ་ཁོ་ན་དྲངས་སོ་ཞེས་བྱ་བ་ཡིན་ཏེ་དེའི་ཕྱིར་སྐལ་བ་ཇི་ལྟ་བ་བཞིན་ཞེས་རྣམ་པར་བཤད་དོ། །དོན་བཞིན་སྟོན་པ་ཞེས་བྱ་བ་ནི་སྟོན་པ་དེ་ཡང་རྣམ་པ་གཉིས་ཡིན་ཏེ་དོན་བཞིན་

Vol. 142 · folio 6a

མ་ཡིན་པ་ནི་གང་པོ་ལ་སོགས་པའོ། །དོན་བཞིན་ཡིན་པ་ནི་དེ་བཞིན་གཤེགས་པ་སྟེ་དེའི་ཕྱིར་དོན་ཇི་ལྟ་བ་བཞིན་ཕྱིན་ཅི་མ་ལོག་པར་སྟོན་པས་དོན་བཞིན་སྟོན་པའོ་ཁྱད་པར་དུ་བྱས་སོ། །ཁྱད་པར་འདི་ཡང་གཞན་ལ་ཕན་པ་སྒྲུབ་པའི་ཐབས་བསྟན་

པའི་ཕྱིར་ཏེ་དེ་ཉིད་ཀྱི་ཕྱིར་འདིའི་གཞན་ལ་ཕན་པ་སྒྲུབ་པའི་ཐབས་སྟོན་ཏེ་ཞེས་བྱ་བ་ལ་སོགས་པ་བཤད་དོ། །རྫུ་འཕྲུལ་དང་། དམ་པ་སྦྱིན་པའི་མཐུས་ནི་མ་ཡིན་ནོ་ཞེས་བྱ་བ་ལ་མཐུ་ཞེས་བྱ་བའི་སྒྲ་ནི་རྫུ་འཕྲུལ་གྱི་མཐུ་འམ་དམ་པའི་སྦྱིན་པའི་མཐུས་ཞེས་རེ་རེ་ལ་སྦྱར་བར་བྱ་སྟེ་རྫུ་

འཕྲུལ་གྱི་མཐུ་ནི་དཔེར་ན་ཁྱབ་འཇུག་གཟུགས་སྣ་ཚོགས་སུ་སྟོན་པ་ལྟ་བུའོ། །དམ་པ་སྦྱིན་པའི་མཐུ་ནི་དཔེར་ན་ལྷ་ཆེན་པོ་དམ་པ་སྦྱིན་པར་གྲགས་པ་ལྟ་བུའོ་རྣམ་པ་གཅིག་ཏུ་ན་རྫུ་འཕྲུལ་དང་དམ་པ་སྦྱིན་པ་དང་མཐུ་ཞེས་ཚིག་གསུམ་དུ་ཟླས་དབྱེ་སྟེ་མཐུ་ནི་ནུས་པའི་ཁྱད་

པར་ཡིན་ནོ། །སངས་རྒྱས་རྣམས་ཀྱང་རེས་འགའ་གདུལ་བྱ་རྣམས་ལ་རྫུ་འཕྲུལ་གྱི་ཆོ་འཕྲུལ་ཉེ་བར་སྟོན་པ་མ་ཡིན་ནམ་ཞེ་ན། དེ་ནི་དེ་ལྟ་ཡིན་མོད་ཀྱི་འོན་ཀྱང་དེ་དག་དད་པར་བྱ་བ་ཙམ་དུ་ཟད་ཀྱི་འཁོར་བ་ལས་སྒྲོལ་བ་ནི་རྗེས་སུ་བསྟན་པའི་ཆོ་འཕྲུལ་གྱི་སྒོ་ནས་འདོད་ཆགས་ལ་སོགས་པའི་

གཉེན་པོ་བསྒོམ་པའི་རིམ་གྱིས་ཡིན་ནོ། །དེ་ལ་ཕྱག་འཚལ་ནས་ཞེས་བྱ་བ་ནི་མགོས་བཏུད་ནས་སོ་ཞེས་བྱ་བ་ནི་ཕྱག་ཅེས་བྱ་བའི་སྒྲ་བྱ་བའི་གཞིར་གྱུར་པ་ཡིན་པའི་ཕྱིར་ཕྱག་འཚལ་ནས་ཞེས་བྱ་བའི་སྒྲས་ནི་བཏུད་པའི་དོན་ཡིན་ལ་བཏུད་པ་ཡང་འཇིག་རྟེན་ན་མགོས་བྱ་བར་གྲགས་པས་

མགོས་ཞེས་བཤད་དོ། །ངག་དང་ཡིད་ཀྱིས་ཕྱག་བྱ་བ་ཡང་འདིར་མ་སྨོས་ཀྱང་གྲུབ་པ་ཡིན་ཏེ། ཡོན་ཏན་སྨོས་པ་སྔོན་དུ་འགྲོ་བ་ཡིན་པའི་ཕྱིར་དང་ལུས་དང་ངག་གི་ལས་ཀྱང་ཡིད་ཀྱི་ལས་སྔོན་དུ་འགྲོ་བ་ཡིན་པའི་ཕྱིར་རོ། །ཕྱག་འཚལ་ནས་ཞེས་བྱ་བ་ནི་བྱ་བ་གཞན་ལ་ལྟོས་པ་ཡིན་པའི་

ཕྱིར་ཅི་ཞིག་བྱ་ཞེས་དྲིས་སོ། །བསྟན་བཅོས་རབ་བཤད་བྱ་ཞེས་བྱ་བ་ནི་དོན་གྱི་ཁྱད་པར་མངོན་པར་རྗོད་པར་བྱེད་པའི་མིང་གི་ཚོགས་ནི་བསྟན་བཅོས་སོ། །གལ་ཏེ་སྐད་ཅིག་མ་ཡིན་པའི་ཕྱིར་ཚོགས་པ་མི་འཐད་དོ་ཞེ་ན། དེ་འཛིན་པར་བྱེད་པའི་བློའི་ངོ་བོས་ཚོགས་སུ་བརྟགས་པའི་ཕྱིར་རོ། །

Vol. 142 · folio 6b

བསྟན་བཅོས་གང་ཞེ་ན་ཞེས་བྱ་བ་ནི་མིང་ཅི་ཞེས་བྱ་བ་སྙམ་དུ་བསམས་པའོ། །ཆོས་མངོན་པ་མཛོད་ཅེས་བྱ་བ་འདིའི་ངེས་པའི་ཚིག་འོག་ནས་འཆད་པས་འདི་ནི་རེ་ཞིག་གཞག་གོ། །སྤྱིའི་དོན་རྟོགས་པ་ནི་ཡན་ལག་གི་དོན་རྟོགས་པ་སྔོན་དུ་འགྲོ་བ་ཡིན་པས་རེ་ཞིག་ཆོས་མངོན་པ་

ཞེས་བྱ་བ་འདི་གང་ཞེ་ན་ཞེས་ཡན་ལག་གི་དོན་འདྲིའོ། །ཆོས་མངོན་ཤེས་རབ་དྲི་མེད་རྗེས་འབྲང་བཅས་ཞེས་བྱ་བ་ནི་ཆོས་རབ་ཏུ་རྣམ་པར་འབྱེད་པའི་དུས་ན་ཤེས་རབ་གཙོ་བོ་ཡིན་པས་གཙོ་བོའི་ཚུལ་གྱིས་ཤེས་རབ་སྨོས་སོ། །དྲི་མེད་ཅེས་བྱ་བའི་ཟག་པ་མེད་པའོ་ཞེས་བྱ་བ་ནི་དྲི་མ་

རྣམས་ནི་ཟག་པའི་རྣམ་གྲངས་ཡིན་པའི་ཕྱིར་རོ། །རྗེས་འབྲང་བཅས་ཞེས་བྱ་བ་ནི་འཁོར་དང་བཅས་པའོ་ཞེས་བྱ་བ་ནི་རྒྱལ་པོ་དང་ལྷན་ཅིག་སྤྱོད་ཀྱང་དེ་དང་མཐུན་པར་བྱེད་པའི་ཕྱིར་རྒྱལ་པོའི་རྗེས་སུ་འབྲང་བ་ཞེས་བྱ་བ་དེ་བཞིན་དུ། འདིར་ཡང་དེ་དང་ལྷན་ཅིག་འབྱུང་བའི་ཆོས་

རྣམས་དུས་མཉམ་པར་རྒྱུ་ཡང་རྗེས་སུ་འབྲང་བ་ཁོ་ནས་བརྗོད་དོ། །དེ་དག་ཀྱང་གང་ཞེ་ན་སེམས་དང་སེམས་ལས་བྱུང་བ་དང་ཟག་པ་མེད་པའི་སྡོམ་པ་དང་སྐྱེ་བ་ལ་སོགས་པ་ལྡན་པ་མ་ཡིན་པའི་འདུ་བྱེད་ཅེས་བྱ་བ་དག་ཡིན་ནོ། །སེམས་ལས་བྱུང་བ་དག་པས་སེམས་གཙོ་བོ་མ་ཡིན་ནམ། འདི་

ལྟར་སེམས་ལས་བྱུང་བ་འདི་དག་སེམས་ལ་ཡོད་པ་འམ་སེམས་ལས་འབྱུང་བ་ན་སེམས་ལས་བྱུང་བ་ཞེས་བྱའོ། །དེས་ན་ཤེས་རབ་ཉིད་སེམས་ཀྱི་འཁོར་ཡིན་པར་འོས་ཀྱི་སེམས་ནི་མ་ཡིན་ཏེ་ཤེས་རབ་སེམས་ལས་བྱུང་བ་ཡིན་པའི་ཕྱིར་རོ་ཞེ་ན། དེ་ནི་བདེན་མོད་ཀྱི་འོན་ཀྱང་ཆོས་རབ་ཏུ་

རྣམ་པར་འབྱེད་པའི་དུས་ན་ཤེས་རབ་སེམས་ལས་བྱུང་བ་ཡིན་ཡང་ཚོགས་པ་ཐམས་ཅད་ཀྱི་གཙོ་བོར་འགྱུར་རོ། །ཆོས་འགའ་ཞིག་ལ་ལར་དུས་ཁ་ཅིག་ཏུ་གཙོ་བོར་གྱུར་ཏེ་དཔེར་ན་མངོན་པར་ཡིད་ཆེས་པར་བྱ་བའི་དུས་ན་དད་པ་ཞེས་བྱ་བ་ལ་སོགས་པ་ལྟ་བུའོ། །ཟག་པ་མེད་པའི་

ཕུང་པོ་ལྔ་པོ་ལ་ཞེས་བྱ་བ་ནི་ཚོགས་པ་དེ་ལ་ཟག་པ་མེད་པའི་སྡོམ་པ་ནི་གཟུགས་ཀྱི་ཕུང་པོ་ཡིན་ནོ། །ཚོར་བ་གང་ཡིན་པ་དེ་ནི་ཚོར་བའི་ཕུང་པོ་ཡིན་ནོ། །འདུ་ཤེས་གང་ཡིན་པ་དེ་ནི་འདུ་ཤེས་ཀྱི་ཕུང་པོ་ཡིན་ནོ། །སེམས་ལ་སོགས་དང་སྐྱེ་བ་ལ་སོགས་པ་ནི་འདུ་བྱེད་ཀྱི་ཕུང་པོ་ཡིན་ནོ། །

Vol. 142 · folio 7a

འདི་ལ་རྣམ་པར་ཤེས་པ་ནི་རྣམ་པར་ཤེས་པའི་ཕུང་པོ་ཡིན་ནོ། །རེ་ཞིག་འདི་ནི་ཞེས་བྱ་བ་ལ་རེ་ཞིག་ཅེས་བྱ་བའི་སྒྲ་ནི་རིམ་པ་སྟོན་པའོ། །དོན་དམ་པ་པ་ཞེས་བྱ་བ་ནི་དོན་དམ་པ་ཉིད་ཡིན་པ་འམ་དོན་དམ་པ་ལས་བྱུང་བས་དོན་དམ་པ་པའོ། །རྣམ་པ་

གཅིག་ཏུ་དོན་དམ་པས་རོལ་ཅིང་སྤྱོད་པས་ན་དོན་དམ་པ་པའོ། །བརྡར་བཏགས་པ་ནི་ཐ་སྙད་པའོ། །དེ་ཐོབ་བྱ་ཕྱིར་གང་ཞེས་བྱ་བ་ནི་འདིར་ཡང་ཆོས་མངོན་པ་ནི་ཤེས་རབ་རྗེས་སུ་འབྲང་བ་དང་བཅས་པ་ཡིན་ནོ་ཞེས་བྱ་བར་སྐབས་དང་སྦྱར་ཏེ་མངོན་སུམ་མམ་བརྒྱུད་པའི་སྒོ་ནས་ཤེས་རབ་ཟག་

པ་མེད་པ་དེ་ཐོབ་པར་འགྱུར་བ་ཐོས་པ་ལས་བྱུང་བ་དང་། བསམས་པ་ལས་བྱུང་བ་དང་། བསྒོམས་པ་ལས་བྱུང་བའི་ཤེས་རབ་ཟག་པ་དང་བཅས་པ་གང་ཡིན་པ་དང་། སྐྱེས་ནས་ཐོབ་པ་རྗེས་སུ་འབྲང་བ་དང་བཅས་པ་གང་ཡིན་པ་དེ་ཡང་བརྡར་བརྟགས་པའི་ཆོས་མངོན་པ་ཡིན་ནོ། །དེ་ལ་ཐོས་

པ་ལས་བྱུང་བ་ནི་ཐོས་པའི་སྦྱོར་བ་ལས་སྐྱེས་པའོ། །བསམས་པ་ལས་བྱུང་བ་ནི་བསམས་པའི་སྦྱོར་བ་ལས་སྐྱེས་པའོ། །བསྒོམས་པ་ལས་བྱུང་བ་ནི་བསྒོམས་པའི་སྦྱོར་བ་ལས་སྐྱེས་པའོ། །སྐྱེས་ནས་ཐོབ་པ་ནི་སྐྱེ་བ་ཐོབ་པ་ལས་སྐྱེས་པ་སྟེ། འདི་ལ་སྐྱེས་ནས་ཐོབ་པ་ཡོད་པའི་ཕྱིར་རོ། །

ཐོས་པ་དང་བསམས་པ་ལས་བྱུང་བ་དང་སྐྱེས་ནས་ཐོབ་པ་དང་བསྒོམས་པ་ལས་བྱུང་བ་གཟུགས་མེད་པ་ན་སྤྱོད་པ་ནི་རྗེས་སུ་འབྲང་བའི་གཟུགས་མེད་པའི་ཕྱིར་ཆོས་མངོན་པ་ཕུང་པོ་བཞི་པ་ཡིན་ནོ། །གཟུགས་ན་སྤྱོད་པ་ནི་བསམ་གཏན་གྱི་སྡོམ་པ་ཡོད་པའི་ཕྱིར་ཆོས་མངོན་པ་ཕུང་པོ་ལྔ་པ་

ཡིན་ནོ། །བསྟན་བཅོས་གང་ཞེས་བྱ་བ་ནི་ཆོས་མངོན་པའི་བསྟན་བཅོས་ཡིན་པར་དགོངས་པའོ། །དེ་རྗེས་སུ་འབྲང་བ་དང་བཅས་པ་ཡིན་ནམ་རྗེས་སུ་འབྲང་བ་དང་བཅས་པ་མ་ཡིན་ཞེས་བྱ་བ་ནི་རྣམ་པར་བཤད་པ་མི་མཐུན་ཏེ། ཁ་ཅིག་ན་རེ་སེམས་དང་སེམས་ལས་བྱུང་བའི་ཚོགས་

ཀྱི་ངོ་བོ་མ་ཡིན་པའི་ཕྱིར་རྗེས་སུ་འབྲང་བ་དང་བཅས་པའོ་ཞེས་བྱ་བར་མི་སྦྱར་རོ་ཞེས་ཟེར་རོ། །ཁ་ཅིག་ནི་སྐྱེ་བ་ལ་སོགས་པ་ཡོད་པའི་ཕྱིར་སྦྱོར་ཏེ་ཆོས་མངོན་པ་འདི་ནི་ཕུང་པོ་གཅིག་པའམ། དེ་ལ་སྐྱེ་བ་ལ་སོགས་པ་ཡོད་པས་ཕུང་པོ་གཉིས་པ་ཡིན་ནོ། །གཞན་དག་ན་རེ་བསྟན་བཅོས་

Vol. 142 · folio 7b

ཞེས་བྱ་བ་ནི་ཡེ་ཤེས་ལ་འཇུག་པ་ཡིན་ནོ། །ལུས་སུ་གྱུར་པ་དེ་ལ་ཡན་ལག་དྲུག་ཡོད་དེ་རབ་ཏུ་འབྱེད་པའི་གཞི་དང་། རྣམ་པར་ཤེས་པའི་ཚོགས་དང་། ཆོས་ཀྱི་ཕུང་པོ་དང་བཏགས་པའི་བསྟན་བཅོས་དང་ཁམས་ཀྱི་ཚོགས་དང་ཡང་དག་པར་འགྲོ་བའི་རྣམ་གྲངས་སོ། །དེའི་

ཕྱིར་བསྟན་བཅོས་དེ་ཡང་རྗེས་སུ་འབྲང་བ་དང་བཅས་པ་ཁོ་ན་ཡིན་ཏེ། བརྒྱུད་ནས་དོན་དམ་པའི་ཆོས་མངོན་པར་ཐོབ་པར་བྱེད་པས་བརྡར་བཏགས་པའི་ཆོས་མངོན་པ་ཞེས་བྱའོ། །དེ་ལ་སྐྱེ་གནས་ཐོབ་པའི་ཤེས་རབ་ཀྱིས་ནི་བསྟན་བཅོས་མཉན་པའི་སྒོ་ནས་དེའི་དོན་གྱི་རྗེས་སུ་འབྲང་ངོ་། །

དེ་ལས་ནི་ཐོས་པ་ལས་བྱུང་བའོ་ཐོས་པ་ལས་བྱུང་བ་ལས་ནི་བསམས་པ་ལས་བྱུང་བའོ། །བསམས་པ་ལས་བྱུང་བ་ལས་ནི་བསྒོམས་པ་ལས་བྱུང་བ་ཟག་པ་དང་བཅས་པའོ། །དེ་ལས་ནི་ཟག་པ་མེད་པའི་ཤེས་རབ་སྐྱེ་བར་འགྱུར་ཏེ་རིམ་པ་ནི་དེ་ལྟའོ། །དེ་ལྟ་བས་ན་འདི་ནི་གཟུགས་དེ་ལྟ་བས་

ན་ཞེས་བྱ་བ་ནི་ཚིག་གི་ཕྲད་དོ། །འདི་ནི་ཞེས་བྱ་བ་ནི་རང་གི་མཚན་ཉིད་འཛིན་པ་ཉིད་དུ་ངེས་པར་བཤད་པ་དོན་དམ་པ་པ་དང་བརྡར་བཏགས་པའི་ཆོས་མངོན་པའོ། །དོན་དམ་པའི་ཆོས་ཞེས་བྱ་བ་ནི་ཡེ་ཤེས་དམ་པའི་དོན་ཡིན་པས་དོན་དམ་པའོ། །རྣམ་པ་གཅིག་ཏུ་ན་ཆོས་ཐམས་ཅད་ཀྱི་མཆོག་

ཡིན་པའི་ཕྱིར་དོན་དམ་པ་ཡིན་པས་དོན་དམ་པའོ། །འདི་ནི་དོན་དམ་པ་ཡང་ཡིན་ལ་ཆོས་ཀྱང་ཡིན་པས་དོན་དམ་པའི་ཆོས་སོ། །ཆོས་ཀྱི་མཚན་ཉིད་ཅེས་བྱ་བ་ནི་རང་དང་སྤྱིའི་མཚན་ཉིད་དེ་སའི་ཁམས་ཀྱི་མཚན་ཉིད་ནི་སྲ་བ་དང་མི་རྟག་པ་དང་སྡུག་བསྔལ་བ་ཞེས་བྱའོ། །དེ་ལྟ་བུ་ལ་སོགས་

པ་མངོན་དུ་ཐོབ་པར་བྱ་བ་དང་རྟོགས་པར་བྱ་བ་དང་ཁོང་དུ་ཆུད་པར་བྱ་བར་མངོན་དུ་ཕྱོགས་པའི་ཆོས་ནི་ཆོས་མངོན་པའོ། །ཆོས་མངོན་པ་བཤད་ཟིན་ཏོ་ཞེས་བྱ་བ་ནི་ངོ་བོ་ཉིད་དང་རབ་ཏུ་དབྱེ་བ་དང་ངེས་པའི་ཚིག་གི་སྒོ་ནས་ཏེ་ཡན་ལག་གི་དོན་རྟོགས་ཟིན་ཏོ། །སྤྱིའི་དོན་ད་དུང་མ་རྟོགས་པས་

དེའི་ཕྱིར། བསྟན་བཅོས་འདི་ཇི་ལྟར་ན་ཆོས་མངོན་པའི་མཛོད་ཡིན་ཞེས་སྤྱིའི་དོན་འདྲིའོ། །འདིར་དེ་དོན་དུ་ཞེས་བྱ་བ་ལ་དེ་ཞེས་བྱ་བ་ནི་བཤད་མ་ཐག་པའི་ཕྱིར་ཆོས་མངོན་པ་ཞེས་བྱ་བའི་བསྟན་བཅོས་གཟུང་ངོ་། །དོན་དུ་ཞེས་བྱ་བ་ནི་ཚིག་གི་སྒོ་ནས་མ་ཡིན་པ་སྟེ་དེ་ནི་དོན་གྱི་སྒོ་ནས་ཆུད་ཀྱི་

Vol. 142 · folio 8a

ཐམས་ཅད་ནི་མ་ཡིན་ནོ། །དེའི་ཕྱིར་གཅེས་གཅེས་རྣམས་ཞེས་སྨོས་སོ། །ཆུད་པ་ནི་ནང་དུ་ཆུད་པ་སྟེ། དེ་ལྟ་བས་ན་བདག་ཅག་གི་བསྟན་བཅོས་འདི་ནི་དོན་དེའི་མཛོད་ལྟ་བུ་ཡིན་ཞིང་མཛོད་དང་འདྲ་བ་ཡིན་ནོ། །དོན་འདི་ལ་ནི་ཆོས་མངོན་པའི་མཛོད་ནི་ཆོས་

མངོན་པའི་མཛོད་དོ་ཞེས་བྱ་བར་ཚིག་བསྡུ་སྟེ་རལ་གྱི་གང་དུ་གཞུག་པ་དེ་ནི་དེའི་ཤུབས་ཡིན་པ་ལྟ་བུའོ། །ཡང་ན་ཆོས་མངོན་པའི་གཙུག་ལག་དེ་ལས་བདག་ཅག་གི་བསྟན་བཅོས་འདི་ཕྱུང་བས་ཆོས་མངོན་པ་ཡེ་ཤེས་ལ་འཇུག་པ་ལ་སོགས་པ་དེ་བདག་ཅག་གི་བསྟན་བཅོས་འདིའི་

གནས་ལྟ་བུ་ཡིན་ཏེ། དོན་དུ་ཞེས་བྱ་བར་སྐབས་དང་སྦྱར་རོ། །དེའི་ཕྱིར་ཆོས་མངོན་པ་དེ་ཉིད་འདིའི་མཛོད་ཡིན་ཏེ་དོན་འདི་ལ་ནི་འདི་ལ་ཆོས་མངོན་པའི་མཛོད་ཡོད་པས་ཆོས་མངོན་པའི་མཛོད་ཅེས་བྱ་བར་ཚིག་བསྡུས་ཏེ། རལ་གྲི་ནང་ནས་འབྱིན་པ་དེ་ནི་དེའི་ཤུབས་ཡིན་པ་ལྟ་

བུའོ། །དེ་ལྟར་ན་བསྟན་བཅོས་འདི་ནི་ཆོས་མངོན་པའི་མཛོད་ཡིན་ནོ་ཞེས་བྱ་བ་ནི་སྤྱིའི་དོན་ཡང་ཁོང་དུ་ཆུད་དོ་ཞེས་བྱ་བར་སྟོན་ཏོ། །ཡང་ཅིའི་ཕྱིར་ཆོས་མངོན་པ་བསྟན་ཅེས་བྱ་བ་ནི་ཅི་དགོས་ཞེས་བྱ་བའི་ཐ་ཚིག་སྟེ། དགོས་པ་དང་བཅས་པའི་བསྟན་བཅོས་ནི་བསྡུ་བ་ལེགས་པར་

འགྱུར་གྱི་དགོས་པ་མེད་པ་ནི་མ་ཡིན་ནོ། །འདི་དང་པོ་ཉིད་དུ་སུས་བསྟན་ཅེ་ན་ཞེས་བྱ་བ་ནི་ཆོས་མངོན་པ་འདི་དང་པོ་ཉིད་དུ་སུ་ཞིག་གིས་བཤད་ཅེས་བྱ་བ་ཡིན་ཏེ། ཡིད་ཆེས་པས་བསྟན་པའི་བསྟན་བཅོས་ནི་བསྡུ་བར་འོས་པའི་ངོ་བོར་འགྱུར་རོ་སྙམ་དུ་བསམས་པའོ། །དང་པོ་

ཞེས་ཁྱད་པར་དུ་སྨོས་པ་ནི་བཙུན་པ་ཀཱ་ཏྱཱའི་བུ་ལ་སོགས་པས་ཕྱིས་བསྡུ་སྟེ་བསྟན་པ་ནི། གྲུབ་པས་དང་པོ་ཉིད་དུ་སྟོན་པ་ལ་རྩོད་པའི་ཕྱིར་རོ། །འདི་ལྟར་ཞེས་བྱ་བ་རྒྱས་པར་འབྱུང་བ་ནི་འདི་ལྟར་བསྟན་བཅོས་མཛད་པའི་སློབ་དཔོན་མདོར་བསྡུས་པའི་བསྟན་བཅོས་ཆོས་མངོན་པའི་

མཛོད་འཆད་ཅིང་བྱེད་པར་གུས་ཤིང་འབད་ཅེས་བྱ་བའི་ཐ་ཚིག་གོ། །དེ་ལྟར་དྲི་བ་གཉིས་བྱས་པ་ལས་ཆོས་མངོན་པའི་བསྟན་བཅོས་དགོས་པ་དང་བཅས་པ་ཉིད་དང་ཡིད་ཆེས་པས་བསྟན་པ་ཉིད་དུ་རབ་ཏུ་བསྟན་པའི་ཕྱིར་ཆོས་རྣམས་རབ་ཏུ་རྣམ་འབྱེད་མེད་པར་ཞེས་བྱ་བ་རྒྱས་པར་སྨོས་ཏེ།

Vol. 142 · folio 8b

གང་གི་ཕྱིར་ཆོས་རབ་ཏུ་རྣམ་པར་འབྱེད་པ་གཟུགས་དང་ཚོར་བ་དང་མི་རྟག་པ་དང་སྡུག་བསྔལ་བ་ཞེས་བྱ་བ་ལ་སོགས་པའི་རྣམ་པ་མེད་པར་ཉོན་མོངས་པ་ཉེ་བར་ཞི་བར་བྱ་བའི་ཐབས་མེད་དེ། གཞན་ཞེས་བྱ་བ་ཚིག་ལྷག་མ་ཡིན་ནོ། །དེས་ན་དེ་ཁོ་ན་ཉོན་མོངས་པ་ཉེ་བར་ཞི་བར་བྱ་བའི་ཐབས་

ཡིན་ནོ་ཞེས་བྱ་བར་དོན་གྱིས་གོ་བར་འགྱུར་ཏེ། དཔེར་ན་ཟས་མ་གཏོགས་པར་སྲོག་འཛིན་པའི་ཐབས་མེད་དོ་ཞེས་སྨྲས་ན་ཟས་དེ་ཁོ་ན་སྲོག་འཛིན་པའི་ཐབས་ཡིན་ཞེས་བྱ་བར་དོན་གྱིས་གོ་བར་འགྱུར་བ་ལྟར་འདིར་ཡང་དེ་དང་འདྲའོ། །གལ་ཏེ་ཉོན་མོངས་པ་ཉེ་བར་ཞི་བར་མ་གྱུར་ན་ཅིར་འགྱུར་

ཞེ་ན། དེའི་ཕྱིར་ཉོན་མོངས་པས་ཀྱང་འཇིག་རྟེན་སྲིད་མཚོ་འདིར་འཁྱམས་ཏེ་ཞེས་བྱ་བ་སྨོས་ཏེ་འདིས་ནི་གདོན་མི་ཟ་བར་ཉོན་མོངས་པ་ཉེ་བར་ཞི་བར་བྱ་བ་དགོངས་པ་ཉིད་དུ་སྟོན་ཏོ། །སྲིད་པ་དང་འཁོར་བ་ནི་དོན་གཅིག་གོ། །འབྱིང་བའི་གནས་སུ་ཆོས་མཐུན་པའི་ཕྱིར་སྲིད་པ་ཉིད་མཚོ་ཡིན་

པས་སྲིད་མཚོ་སྟེ་སྲིད་པ་རྒྱ་མཚོ་ལྟ་བུ་འདིར་རོ། །སྲིད་མཚོ་འདིར་ཞེས་བྱ་བ་ལ་འདིར་ཞེས་བྱ་བའི་སྒྲ་ནི་ཉེ་བར་ལེན་པའི་ཕུང་པོ་ལྔའི་མཚན་ཉིད་མངོན་སུམ་དུ་གྱུར་པ་ལས་མ་གཏོགས་པའི་སྲིད་པ་དགག་པའི་ཕྱིར་སྨོས་སོ། །འདིར་འཇིག་རྟེན་འཁྱམས་པ་ནི་དེའི་བདག་ཉིད་དུ་གནས་པའི་

ཕྱིར་རོ། །དེའི་བདག་ཉིད་དུ་གནས་པ་ཡང་གཞིར་སྟོན་པ་སྣང་སྟེ། དཔེར་ན་ཤིང་གཞན་དང་མི་ལྡན་པ་ལས་ཤིང་པ་ལ་ཤ་དག་ལ་ཀུན་དགའི་ར་བ་གནས་སོ་ཞེས་བྱ་བ་ལྟ་བུའོ། །ཉོན་མོངས་པ་རྣམས་ཀྱིས་ཀྱང་འཇིག་རྟེན་འཁོར་བའི་རྒྱ་མཚོ་ཆེན་པོ་འདིར་འཁྱམ་པར་བྱེད་པས་དེའི་

ཕྱིར་ཞེས་བྱ་བ་ནི་རྒྱུ་བསྟན་པ་སྟོན་པར་བྱེད་དོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་ཆོས་མངོན་པ་བསྟན་ཏོ་ཞེས་བྱ་བའི་ཐ་ཚིག་སྟེ། ཉོན་མོངས་པ་ཉེ་བར་ཞི་བར་བྱེད་པའི་ཐབས་ནི་ཆོས་རབ་ཏུ་རྣམ་པར་འབྱེད་པ་ཡིན་གྱི་ཆོས་གཞན་ནི་མ་ཡིན་ནོ་ཞེས་ཆོས་མངོན་པ་སྟོན་པར་བྱེད་པའི་འབྲེལ་

པ་བཤད་པ་ཡིན་ནོ། །དེའི་དོན་དུ་ཞེས་བྱ་བ་ནི་དེ་ཉིད་ཀྱི་ཕྱིར་ཡིན་པས་དེའི་དོན་དུ་སྟེ་དེའི་དོན་ནམ་དེའི་ཆེད་དུ་ཞེས་བྱ་བ་ཡིན་ནོ། །ཆོས་རབ་ཏུ་རྣམ་པར་འབྱེད་པ་དེའི་དོན་དུ་ཞེས་བྱ་བ་ནི་ཆོས་མངོན་པ་བསྟན་པའི་རྒྱུད་ལས་བྱུང་བ་ཆོས་རབ་ཏུ་རྣམ་པར་འབྱེད་པ་སྟེ། སྟོན་པ་སངས་

Vol. 142 · folio 9a

རྒྱས་ཀྱིས་ནི་ཇི་ལྟར་ན་ཆོས་རབ་ཏུ་རྣམ་པར་འབྱེད་པར་འགྱུར་སྙམ་ནས་ཆོས་མངོན་པ་བསྟན་ཏོ། །དེ་ཉིད་ཀྱི་ཕྱིར་ཆོས་མངོན་པའི་བསྟན་པ་མེད་པ་ནི་སློབ་མས་ཆོས་རབ་ཏུ་རྣམ་པར་དབྱེ་བར་མི་ནུས་སོ་ཞེས་བྱ་བ་སྨོས་སོ། །གསུངས་པ་དང་། བཤད་པ་དང་།

བསྟན་པ་ནི་དོན་གཅིག་གོ། །ལོ་ཞེས་བྱ་བ་ལ་ལོ་ཞེས་བྱ་བའི་སྒྲ་ནི་འདི་ནི་ཆོས་མངོན་པ་པ་རྣམས་ཀྱི་གཞུང་ལུགས་ཡིན་གྱི་མདོ་སྡེ་པ་ཁོ་བོ་ཅག་གི་ནི་མ་ཡིན་ནོ་ཞེས་ཕ་རོལ་ཀྱི་འདོད་པ་སྟོན་པར་བྱེད་པ་ཡིན་ནོ། །ཆོས་མངོན་པ་བྱེད་པ་ནི་མང་པོ་ཞིག་ཡོད་པར་གྲགས་ཏེ། འདི་ལྟ་སྟེ་ཡེ་ཤེས་

ལ་འཇུག་པ་ནི་འཕགས་པ་ཀཱ་ཏྱཱའི་བུས་བྱས། རབ་ཏུ་བྱེད་པའི་གཞི་ནི་གནས་བརྟན་དབྱིག་གི་བཤེས་གཉེན་གྱིས་བྱས། རྣམ་པར་ཤེས་པའི་ཚོགས་ནི་བཙུན་པ་ལྷ་སྐྱིད་ཀྱིས་བྱས། ཆོས་ཀྱི་ཕུང་པོ་ནི་འཕགས་པ་ཤཱ་རིའི་བུས་བྱས། བཏགས་པའི་བསྟན་བཅོས་ནི་འཕགས་པ་མཽད་གལ་གྱི་བུས་

བྱས། ཁམས་ཀྱི་ཚོགས་ནི་གང་པོས་བྱས། ཡང་དག་པར་འགྲོ་བའི་རྣམ་གྲངས་ནི་གསུས་པོ་ཆེས་བྱས་པར་གྲགས་སོ། །མདོ་སྡེ་པའི་དོན་གང་ཡིན་ཞེ་ན། གང་དག་མདོ་ཚད་མར་བྱས་ཀྱི་བསྟན་བཅོས་ཚད་མར་མི་བྱེད་པ་དེ་དག་ནི་མདོ་སྡེ་པ་ཡིན་ནོ། །གལ་ཏེ་བསྟན་བཅོས་ཚད་མར་མི་

བྱེད་ན་དེ་དག་ཇི་ལྟར་མདོ་སྡེའི་སྡེ་སྣོད་དང་འདུལ་བའི་སྡེ་སྣོད་དང་། ཆོས་མངོན་པའི་སྡེ་སྣོད་གསུམ་རྣམ་པར་འཇོག །མདོ་ལས་ཀྱང་དགེ་སློང་སྡེ་སྣོད་གསུམ་པ་ཞེས་ཆོས་མངོན་པའི་སྡེ་སྣོད་འབྱུང་ངོ་ཞེ་ན། འདི་ནི་ཉེས་པ་མེད་དེ་དོན་རྣམ་པར་གཏན་ལ་འབེབས་པ་ལ་སོགས་པ་མདོ་སྡེའི་

ཁྱད་པར་གང་དག་ལས་ཆོས་ཀྱི་མཚན་ཉིད་བརྗོད་པ་ཉིད་ཆོས་མངོན་པ་ཞེས་བྱའོ་སྙམ་པའི་དོགས་པ་དེ་བཟློག་པའི་ཕྱིར་དེ་ནི་བཅོམ་ལྡན་འདས་ཀྱིས་སིལ་བུར་བཤད་ལ་ཞེས་བྱ་བ་སྨོས་ཏེ། བྱེ་བྲག་ཏུ་སྨྲ་བ་རྣམས་ན་རེ་དཔེར་ན་གནས་བརྟན་ཆོས་སྐྱོབས་ཀྱིས་ཆེད་དུ་བརྗོད་པའི་སྡེ། ཀྱེ་མ་

འདུ་བྱེད་རྣམས་ནི་མི་རྟག་ཅེས་བྱ་བ་ལ་སོགས་པ་འདུལ་བའི་དབང་གིས་མདོ་སྡེ་དང་དེ་ལས་བཤད་པ་སྡེ་ཚན་དུ་བྱས་ཤིང་གཅིག་ཏུ་འདུག་པར་བྱས་པ་དེ་བཞིན་དུ། བཅོམ་ལྡན་འདས་ཀྱིས་གདུལ་བའི་དབང་དུ་དེ་དང་དེ་ལས་ཆོས་མངོན་པ་ཆོས་ཀྱི་མཚན་ཉིད་སྟོན་པའི་ངོ་བོ་བཤད་པ་ཡང་།

Vol. 142 · folio 9b

གནས་བརྟན་ཀཱ་ཏྱཱའི་བུ་ལ་སོགས་པས་ཡེ་ཤེས་ལ་འཇུག་པ་ལ་སོགས་པར་བསྡུས་ནས་བཞག་གོ་ཞེས་ཟེར་རོ། །བྱེ་བྲག་ཏུ་སྨྲ་བ་ཞེས་བྱ་བ་ནི་བྱེ་བྲག་ཏུ་བཤད་པས་རྩེ་ཞིང་སྤྱོད་པས་ན་བྱེ་བྲག་ཏུ་སྨྲ་བའོ། །ཡང་ན་བྱེ་བྲག་ཏུ་བཤད་པའི་རིག་པས་ན་བྱེ་བྲག་ཏུ་སྨྲ་བའོ། །ཟག་བཅས་ཟག་པ་

མེད་ཆོས་རྣམས། །ཞེས་བྱ་བ་ནི་ཟག་པ་རྣམས་དང་བཅས་པས་ན་ཟག་བཅས་སོ། །འདི་དག་ལ་ཟག་པ་མེད་པས་ན་ཟག་པ་མེད་པ་སྟེ། ཟག་པ་དང་བཅས་པ་རྣམས་ཞེས་བྱ་བ་དང་ཟག་པ་མེད་པ་རྣམས་ཞེས་བྱ་བར་ཚིག་བསྡུའོ། །རང་དང་སྤྱིའི་མཚན་ཉིད་འཛིན་པའི་ཕྱིར་ཆོས་རྣམས་སོ། །

འདི་ནི་ཆོས་ཐམས་ཅད་མདོར་བསྡུས་ཏེ་བསྟན་པའོ་ཞེས་བྱ་བ་ནི་འདི་ལྟ་སྟེ། ཟག་པ་དང་བཅས་པ་དང་ཟག་པ་མེད་པ་འདི་ཙམ་དུ་ཟད་ཀྱི་འདི་ལས་མ་གཏོགས་པའི་ཆོས་མེད་པའོ། །དེའི་ཕྱིར་ཆོས་རྣམས་ཞེས་བྱ་བ་སྨོས་སོ། །མདོར་བསྡུས་ཏེ་བསྟན་ཞེས་བྱ་བ་ནི་མདོར་བསྡུས་ནས་བསྟན་པ་སྟེ། རྒྱས་པར་

བསྟན་པ་ནི་འོག་ནས་བསྟན་བཅོས་ཡོངས་སུ་རྫོགས་ཀྱི་བར་དུ་འབྱུང་བ་ཡིན་ནོ། །འདུས་བྱས་དང་འདུས་མ་བྱས་རྣམས་དང་གཟུགས་ཅན་དང་གཟུགས་ཅན་མ་ཡིན་པ་རྣམས་དང་བསྟན་དུ་ཡོད་པ་དང་བསྟན་དུ་མེད་པ་རྣམས་ཞེས་བྱ་བ་ལ་སོགས་པ་མདོར་བསྡུས་ཏེ་བསྟན་པ་གཞན་དག་ཀྱང་ཡོད་ན།

ཅིའི་ཕྱིར་མདོར་བསྡུས་ཏེ་བསྟན་པ་འདི་ཁོ་ན་བཤད་ཅེ་ན། གང་ཞིག་བཤད་ན་བརྒལ་ཞིང་བརྟག་པར་མི་འགྱུར། ཡང་ན་བསྟན་བཅོས་ནི་དེ་དག་གི་དོན་ཡིན་པའི་ཕྱིར་ཀུན་ནས་ཉོན་མོངས་པ་དང་རྣམ་པར་བྱང་བའི་ཕྱོགས་རབ་ཏུ་བསྟན་པའི་ཕྱིར་ཏེ། ཕྱོགས་དེ་གཉིས་རྟོགས་ན་ཀུན་ནས་ཉོན་མོངས་

པའི་ཕྱོགས་ཡོངས་སུ་བོར་བ་དང་། རྣམ་པར་བྱང་བའི་ཕྱོགས་བརྟེན་པའི་སྒོ་ནས་ངེས་པར་ལེགས་པར་འཐོབ་པར་འགྱུར་རོ། །ལམ་མ་གཏོགས་པའི་འདུས་བྱས་རྣམས། ཟག་བཅས་ཞེས་བྱ་བ་ནི་འདུས་བྱས་དག་ཁོ་ན་སྟེ། གཟུགས་ལ་སོགས་པ་རྒྱུ་དང་རྐྱེན་གྱིས་བསྐྱེད་པ་རྣམས་ནི་

འདུས་བྱས་ཡིན་ནོ། །ཅི་ཐམས་ཅད་དམ་ཞེ་ན་སྨྲས་པ་མ་ཡིན་ཏེ། ལམ་མ་གཏོགས་ཏེ། ལམ་གྱི་བདེན་པ་མ་གཏོགས་པའོ། །ལམ་གྱི་བདེན་པ་ཡང་འདུས་བྱས་ཡིན་པའི་ཕྱིར་ཐལ་བར་འགྱུར་བས་དེ་སྐད་ཅེས་ཁྱད་པར་དུ་བྱས་སོ། །འདི་སྐད་དུ་ལམ་གྱི་བདེན་པ་མ་གཏོགས་པ་འདུས་

Vol. 142 · folio 10a

བྱས་ཐམས་ཅད་ནི་ཟག་པ་དང་བཅས་པའོ་ཞེས་བཤད་པར་འགྱུར་རོ། །ཡང་དེ་དག་ཇི་ལྟར་ན་ཟག་པ་དང་བཅས་པ་ཡིན། གལ་ཏེ་ཟག་པ་དང་མཚུངས་པར་ལྡན་པའི་ཕྱིར་ཡིན་ན་ནི་སེམས་དང་སེམས་ལས་བྱུང་བ་ཉོན་མོངས་པ་ཅན་དག་ཁོ་ན་ཟག་པ་

དང་བཅས་པར་འགྱུར་གྱི་གཞན་ནི་མ་ཡིན་ནོ། །འོན་ཏེ་ཟག་པ་དང་ལྷན་ཅིག་འབྱུང་བའི་ཕྱིར་ཡིན་ན་ནི་རྒྱུད་གཅིག་ལ་ཅི་རིགས་པར་སེམས་ཅན་ཉོན་མོངས་པ་ཀུན་ཏུ་སྤྱོད་པའི་ཉེ་བར་ལེན་པའི་ཕུང་པོ་ལྔ་པོ་དག་ཟག་པ་དང་བཅས་པར་འགྱུར་གྱི་ཉོན་མོངས་པ་ཀུན་ཏུ་མི་སྤྱོད་པའི་ཡང་མ་ཡིན་

ལ་ཕྱིའི་ཆོས་རྣམས་ཀྱང་མ་ཡིན་ནོ། །ཅི་སྟེ་ཟག་པ་རྣམས་ཀྱི་རྟེན་གང་དག་ཡིན་པ་དེ་དག་ཟག་པ་དང་བཅས་པ་ཡིན་ན་ནི་ནང་གི་སྐྱེ་མཆེད་དྲུག་ཁོ་ན་ཟག་པ་དང་བཅས་པར་འགྱུར་རོ། །འོན་ཏེ་ཟག་པ་རྣམས་ཀྱིས་དམིགས་པ་དག་ཟག་པ་དང་བཅས་པ་ཡིན་ན་ནི་འགོག་པ་དང་ལམ་གྱི་བདེན་

པ་ཡང་ཟག་པ་དང་བཅས་པར་འགྱུར་ལ། ས་འོག་མ་ཡང་ས་གོང་མ་ལ་དམིགས་པའི་ཟག་པ་རྣམས་ཀྱིས་ནི་ཟག་པ་དང་བཅས་པར་འགྱུར་རོ་ཞེ་ན། དེའི་ཕྱིར། གང་ཕྱིར་དེ་དག་ལ། ཟག་རྣམས་ཀུན་ཏུ་རྒྱས་པར་འགྱུར། །ཞེས་བྱ་བ་སྨོས་ཏེ། དེའི་ཕྱིར་ཟག་པ་དང་བཅས་པའོ་ཞེས་

དེའི་ཕྱིར་ཞེས་བྱ་བའི་སྒྲ་ཞིག་ལྟག་ནས་སམ་ཁོང་ནས་འབྱུང་ངོ་། །རྒྱས་པར་འགྱུར་ཞེས་བྱ་བ་ནི་རྒྱས་པ་འཐོབ་བོ་ཞེས་བྱ་བའི་ཐ་ཚིག་གམ་གནས་ཐོད་དོ་ཞེས་བྱ་བའི་དོན་ཡིན་ཏེ་འདོད་ཆགས་ལ་སོགས་པ་དེ་དག་རྒྱས་པ་ཐོབ་པའམ་གནས་ཐོད་པའི་སྒོ་ནས་རྒྱུན་ཆགས་པར་འགྱུར་རོ། །གཞན་

དག་ན་རེ་དཔེར་ན་བདག་གི་ཟས་ནི་རྒྱས་པར་འགྱུར་རོ་ཞེས་བྱ་བ་འཕྲོད་ཅིང་མཐུན་པར་འགྱུར་རོ་ཞེས་བྱ་བའི་དོན་ཡིན་པ་དེ་བཞིན་དུ། འདོད་ཆགས་ལ་སོགས་པ་ཡང་ཆོས་དེ་དག་ལས་རྒྱས་པར་འགྱུར་ཞིང་མཐུན་པར་འགྱུར་རོ་ཞེས་བྱ་བའི་ཐ་ཚིག་གོ། །ལས་ལས་འཇིག་རྟེན་སྣ་ཚོགས་

སྐྱེས། །ཞེས་འབྱུང་བའི་ཕྱིར་ཟག་པ་དང་བཅས་པ་རྣམས་ནི་འདོད་ཆགས་ལ་སོགས་པས་བརླན་པའི་ལས་ཀྱིས་བསྒྲུབ་པར་བྱ་བ་ཡིན་ནོ། །རྐྱེན་རྣམས་དང་མཐུན་པར་རྒྱས་པར་འགྱུར་ཞིང་རྒྱས་པར་འཐོབ་པས་ན་ཕྲ་རྒྱས་དག་ཡིན་ནོ། །ཡང་ན་འདི་དག་ལ་རྐྱེན་རྣམས་རྒྱས་པར་འགྱུར་ཞིང་

Vol. 142 · folio 10b

མཐུན་པར་འགྱུར་བས་ན་ཕྲ་རྒྱས་དག་ཡིན་ཏེ། དེ་དག་ཀྱང་དམིགས་པ་དང་མཚུངས་པར་ལྡན་པའི་སྒོ་ནས་རྒྱས་པར་བལྟ་བར་བྱའོ་ཞེས་ཟེར་རོ། །སློབ་དཔོན་ཡོན་ཏན་བློ་གྲོས་ན་རེ་ཆོས་ཐམས་ཅད་ཟག་པ་དག་གིས་དམིགས་པ་པ་ཡིན་ན་ཅིའི་ཕྱིར་ལམ་མ་གཏོགས་པའི་འདུས་

བྱས་དག་ཁོ་ན་ཟག་པ་དང་བཅས་པ་ཞེས་བྱ་བ་ཞེས་ཟེར་བ་གང་ཡིན་པ། ཆོས་ཐམས་ཅད་ཟག་པ་རྣམས་ཀྱིས་དམིགས་པ་ཡིན་ནོ་ཞེས་བྱ་བ་འདི་ནི་ཆོས་མངོན་པ་པ་མ་ཡིན་ཏེ། ནམ་མཁའ་དང་སོ་སོར་བརྟགས་པ་མ་ཡིན་པས་འགོག་པ་དག་ཟག་པའི་དམིགས་པ་མ་ཡིན་པའི་ཕྱིར་རོ། །ཕྲ་

རྒྱས་དྲུག་པོ་ཁོ་ན་ཞིག་ཟག་པ་མེད་པ་ལ་དམིགས་པར་འབྱུང་བ་དེ་དག་ཀྱང་། འགོག་དང་ལམ་མཐོང་སྤང་བྱ་བ། །ལོག་ལྟ་ཐེ་ཚོམ་དེ་དག་དང་། །ལྡན་མང་འབའ་ཞིག་མ་རིག་དང་། །དྲུག་ནི་ཟག་མེད་སྤྱོད་ཡུལ་ཅན། །ཞེས་འབྱུང་བའི་ཕྱིར་འགོག་པ་དང་ལམ་ལ་དམིགས་པ་ཁོ་ན་ཡིན་

ནོ། །དེ་ལྟ་བས་ན་འདི་ནི་ལེགས་པར་བྲིས་པ་མ་ཡིན་པར་བལྟའོ། །འདོད་མོད་ཀྱི་ཞེས་བྱ་བ་ཡིན་མོད་ཀྱི་ཞེས་བྱ་བ་ནི་ཐ་ཚིག་གོ། །རྣམ་པ་གཅིག་ཏུ་ན་འདོད་མོད་ཀྱི་ཞེས་བྱ་བ་ནི་ཁས་ལེན་པའི་དོན་ཡིན་ཏེ་འགོག་པ་དང་ལམ་གྱི་བདེན་པ་ལ་དམིགས་པས་ཀྱང་ཟག་པ་སྐྱེ་བར་ནི་ཁས་

ལེན་པ་ཁོ་ནའོ་ཞེས་བྱ་བའི་ཐ་ཚིག་གོ། །དེ་གཉིས་ལ་ཞེས་བྱ་བ་ནི་འགོག་པ་དང་ལམ་གྱི་བདེན་པ་དག་གོ། །ཕྲ་རྒྱས་བསྟན་པ་ཉིད་དུ་བསྟན་པར་བྱའོ་ཞེས་བྱ་བ་ནི། ཟག་མེད་གོང་མའི་ཡུལ་ཅན་མིན། །བདག་གིར་མ་བྱས་གཉེན་པོའི་ཕྱིར། །ཞེས་བྱ་བ་འདིར་ཏེ་དངོས་པོ་

གང་ཞིག་བདག་ཏུ་ལྟ་བ་དང་སྲེད་པ་དག་གིས་བདག་གིར་བྱས་པ་དེ་ལ་ནི་ཕྲ་རྒྱས་གཞན་དག་ཀྱང་རྒྱས་པར་ནུས་ཏེ་རས་གཤེར་བ་ལ་རྡུལ་འཆགས་པ་ལྟ་བུ་ཡིན་ན། ཟག་པ་མེད་པ་ནི་དེ་ལྟ་མ་ཡིན་ལ་ས་གོང་མ་ཡང་མ་ཡིན་ཏེ་དེའི་ཕྱིར་དེ་དག་ལ་དམིགས་པ་རྣམས་དེ་དག་ལ་རྒྱས་པར་མི་

འགྱུར་རོ། །མྱ་ངན་ལས་འདས་པ་དང་ལམ་དག་ནི་དེ་དག་ལ་དམིགས་པའི་ཉོན་མོངས་པ་རྣམས་ཀྱི་གཉེན་པོ་ཡང་ཡིན་ནོ། །ས་གོང་མ་ཡང་ས་འོག་མ་རྣམས་ཀྱི་གཉེན་པོ་ཡིན་ནོ། །དེའི་ཕྱིར་ཡང་དེ་དག་ལ་གནས་མི་ཐོད་དེ་རྡོ་ལེབ་བསྲེགས་པ་ལ་རྐང་པ་དག་གི་མཐིལ་བཞིན་

Vol. 142 · folio 11a

ནོ། །ཟག་མེད་ལམ་གྱི་བདེན་པ་དང་། །འདུས་མ་བྱས་རྣམས་གསུམ་ཡང་སྟེ། །ཞེས་བྱ་བ་དོན་གྱིས་གོ་བས་གྲུབ་པའི་ཕྱིར་མདོར་བྱ་མི་དགོས་སོ་ཞེས་དེ་སྐད་དུ་རྒོལ་བ་ལ་རེ་ཞིག་སློབ་དཔོན་ཡོན་ཏན་བློ་གྲོས་ན་རེ་འདི་ནི་བརྗོད་པར་བྱ་བ་ཉིད་དོ། །ཅིའི་ཕྱིར་

ཞེ་ན་ལམ་ནི་རྣམ་པ་གཉིས་ཏེ་འཇིག་རྟེན་པ་དང་འཇིག་རྟེན་ལས་འདས་པའོ། །དེ་བས་ན་ཁྱད་པར་དུ་བྱ་བའི་ཕྱིར་ཡང་བརྗོད་དོ། །དེ་ཉིད་ཀྱི་ཕྱིར་འདིར་ལམ་གྱི་བདེན་པ་ཞེས་བྱ་བར་སྨོས་སོ། །གྲགས་པ་ནི་དོན་གྱིས་གོ་བར་འགྱུར་གྱི་མ་གྲགས་པ་ནི་མ་ཡིན་ན་འདུས་མ་བྱས་ཀྱང་མ་གྲགས་

སོ་ཞེས་ཟེར་རོ། །གཞན་དག་ན་རེ་འདི་དོན་གྱིས་གོ་ཡང་ཕུང་པོ་གསུམ་པ་ཡོད་པར་དོགས་པ་བཟློག་པའི་ཕྱིར་ཡང་བརྗོད་དོ། །དཔེར་ན་ཚོར་བ་ཡང་གསུམ་སྟེ། བདེ་བ་དང་སྡུག་བསྔལ་དང་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའོ་ཞེས་བྱ་བ་དེ་བཞིན་དུ་ཆོས་ཀྱང་ཟག་པ་དང་བཅས་པ་

རྣམས་དང་ཟག་པ་མེད་པ་རྣམས་དང་ཟག་པ་དང་བཅས་པ་ཡང་ཡིན་ཟག་པ་མེད་པ་ཡང་ཡིན་པ་རྣམས་སོ་ཞེས་བྱ་བའམ། ཡང་ན་ཟག་པ་དང་བཅས་པ་ཡང་མ་ཡིན་ཟག་པ་མེད་པ་ཡང་མ་ཡིན་པ་རྣམས་སོ་ཞེས་བྱ་བར་སེམས་པར་འགྱུར་ཏེ་དེས་ན་གང་དག་དོན་གྱིས་གོ་བས་བསྩལ་བ་དེ་དག་

ཅི་ཟག་པ་མེད་པ་ཁོ་ན་ཞིག་གམ། འོན་ཏེ་ཟག་པ་དང་བཅས་པ་ཡིན་ཟག་པ་མེད་པ་ཉིད་ཀྱང་ཡིན་པ་ཞིག་གམ། འོན་ཏེ་གཉི་ག་མ་ཡིན་པ་ཞིག་ཅེས་ཐེ་ཚོམ་ཟ་བར་འགྱུར་རོ། །ཟག་པ་དང་བཅས་པ་ཡང་ཡིན་ཟག་པ་མེད་པ་ཉིད་ཀྱང་ཡིན་པར་རྣམ་པར་རྟོག་པའི་གོ་སྐབས་ཀྱང་ཡོད་དེ།

ཇི་ལྟ་ཞེ་ན་རེ་ཞིག་བྱེ་བྲག་ཏུ་སྨྲ་བའི་ལུགས་ལྟར་ན། ཉོན་མོངས་ཕྲ་རྒྱས་བཅས་རྣམ་གཉིས། །ཉོན་མོངས་ཅན་མིན་རྒྱས་འགྱུར་གྱི། །ཞེས་འབྱུང་བའི་ཕྱིར་མིག་ལ་སོགས་པ་དང་། །ཕྱིའི་གཟུགས་ལ་སོགས་པ་ཉོན་མོངས་པ་ཅན་མ་ཡིན་པ་གང་དག་ཡིན་པ་དེ་དག་ནི་རྒྱས་པར་

འགྱུར་བའི་ཟག་པ་དག་ཁོ་ནས་ཟག་པ་དང་བཅས་པ་ཡིན་གྱི་རྒྱས་པར་མི་འགྱུར་བ་དག་གིས་ནི་མ་ཡིན་ནོ། །རྒྱས་པར་མི་འགྱུར་བ་སྤངས་ཟིན་པའི་ཟག་པ་དེ་དག་གིས་ནི་ཟག་པ་དང་བཅས་པ་མ་ཡིན་ནོ། །མ་སྤངས་པ་དག་གིས་ནི་ཐ་ན་གཞན་གྱི་རྒྱུད་ལ་ཡོད་པ་དག་གིས་ཀྱང་ཟག་

Vol. 142 · folio 11b

པ་དང་བཅས་པ་ཁོ་ན་ཡིན་ནོ་ཞེས་ཟེར་རོ། །དཔེས་སྟོན་པའི་ལུགས་ལྟར་ན་ཡང་དགྲ་བཅོམ་པའི་རྒྱུད་ལ་ཡོད་པའི་མིག་ལ་སོགས་པ་དང་ཕྱིའི་གཟུགས་ལ་སོགས་པ་ནི་ཟག་པ་རྣམས་ཀྱི་རྟེན་མ་ཡིན་པའི་ཕྱིར་ཟག་པ་མེད་པ་ཡང་ཡིན་ལ། དེ་དག་ཟག་པ་རྣམས་ཀྱི་གཉེན་པོ་མ་

ཡིན་པའི་ཕྱིར་ཟག་པ་དང་བཅས་པ་ཡང་ཡིན་ནོ་ཞེས་མིག་ལ་སོགས་པ་རྣམ་གྲངས་པའི་ཟག་པ་དང་བཅས་པ་ཡང་ཡིན་ཟག་པ་མེད་པ་ཡང་ཡིན་པ་ཉིད་དུ་རྟོག་པས་ཐེ་ཚོམ་དུ་འགྱུར་རོ། །ཐེ་ཚོམ་དེ་བཟློག་པའི་ཕྱིར། ཟག་མེད་ལམ་གྱི་བདེན་པ་དང་། །འདུས་མ་བྱས་རྣམ་

གསུམ་ཡང་སྟེ། །ཞེས་བྱ་བ་འདི་སྨོས་ཏེ། །འདི་དག་ནི་རྣམ་གྲངས་མེད་པར་ཟག་པ་མེད་པ་ཁོ་ན་ཡིན་གྱི། ཇི་སྐད་བཤད་པ་ལྟ་བུ་ཟག་པ་དང་བཅས་པ་ཡང་མ་ཡིན་ཟག་པ་མེད་པ་ཡང་མ་ཡིན་པ་ནི་མ་ཡིན་པས་ཡང་སྨོས་སོ། །འོན་ཏེ་བྱེ་བྲག་ཏུ་སྨྲ་བ་རྣམས་ཀྱིས་དགྲ་བཅོམ་

པའི་མིག་ལ་སོགས་པ་དེ་དག་ཕྱོགས་གང་གིས་ནང་དུ་བརླན་པར་བྱ་ཅི་ཟག་པ་དང་བཅས་པའི་ཕྱོགས་སུའམ་འོན་ཏེ་ཟག་པ་མེད་པའི་ཕྱོགས་སུ་བསྡུ་ཞེ་ན། ཟག་པ་དང་བཅས་པའི་ཕྱོགས་སུ་བསྡུའོ་ཞེས་ཟེར་རོ། །དེ་དག་ཟག་པ་སྤངས་ཟིན་པ་དག་གིས་ཇི་ལྟར་ཟག་པ་དང་བཅས་པར་

རྣམ་པར་གཞག་ཅེ་ན། གང་དག་ལ་ཟག་པ་རྒྱས་པ་དང་རྒྱས་པར་གྱུར་པ་དང་རྒྱས་པར་འགྱུར་བ་དེ་དག་ནི་ཟག་པ་དང་བཅས་པའོ་ཞེས་བྱའོ། །འཇིག་རྟེན་ན་དུས་གསུམ་པའི་དོན་བརྗོད་པར་འདོད་པས་ཀྱང་ད་ལྟར་གྱི་དུས་ཀྱི་ཚིག་སྦྱོར་བ་སྣང་སྟེ། གང་ཞིག་སྐྱེ་དགུ་རྣམས་དགའ་

བར་བྱེད་པ་དེ་དག་ནི་རྒྱལ་པོའོ་ཞེས་བྱས་ནས་གང་གིས་དགའ་བར་བྱས་པ་དང་དགའ་བར་བྱེད་པ་དང་གང་ཞིག་དགའ་བར་བྱེད་པར་འགྱུར་བ་དེ་དག་རྒྱལ་པོ་ཡིན་ནོ་ཞེས་བྱ་བར་རྟོག་པ་ཉིད་དེ། དེའི་ཕྱིར་དེ་སྐད་དུ་རྣམ་པར་བཤད་དོ། །ཡང་ན་ཟག་པ་སྤངས་ཟིན་པ་དེ་དག་གིས་ཟག་པ་དང་

བཅས་པ་མ་ཡིན་དུ་ཟིན་ཀྱང་ཟག་པ་མ་སྤངས་པ་དཔག་ཏུ་མེད་པ་དག་གིས་ནི་ཐ་ན་གཞན་གྱི་རྒྱུད་ལ་ཡོད་པ་རྣམས་ཀྱིས་ཀྱང་ཟག་པ་དང་བཅས་པ་ཉིད་ཡིན་ནོ། །ཟག་བཅས་ཟག་པ་མེད་ཆོས་རྣམས། །ཞེས་མདོར་བསྡུས་ཏེ་བསྟན་པ་ཁོ་ནས་ཕུང་པོ་གསུམ་པ་ཡོད་པར་ཐལ་བར་མི་འགྱུར་

Vol. 142 · folio 12a

བ་མ་ཡིན་ནམ་ཞེ་ན་མ་ཡིན་ཏེ། །དེ་ལ་ལྷག་མ་གཅིག་ཡོད་པ་སྲིད་པའི་ཕྱིར་རོ། །ཟག་པ་དང་བཅས་པ་རྣམས་དང་ཟག་པ་མེད་པ་རྣམས་དང་ཟག་པ་དང་བཅས་པ་ཡང་ཡིན་ཟག་པ་མེད་པ་ཡང་ཡིན་པ་རྣམས་ནི་ཟག་བཅས་ཟག་པ་མེད་པའོ་ཞེས་ལྷག་མ་

གཅིག་ཡོད་པར་འགྱུར་ཏེ། ངོ་བོ་མི་མཐུན་པ་རྣམས་ལ་ཡང་ལྷག་མ་གཅིག་ཡོད་པར་འདོད་དོ། །གཞན་དག་ན་རེ་འདི་ནི་དོན་གྱིས་གོ་བར་གྲུབ་པ་ཁོ་ན་ཡིན་ཏེ། གསལ་བར་བྱ་བའི་ཕྱིར་སྤྲོས་ཏེ་བརྗོད་དོ་ཞེས་ཟེར་རོ། །འདུས་མ་བྱས་རྣམ་གསུམ་གང་ཞེ་ན་ཞེས་བྱ་བ་ནི་མ་གྲགས་

པའི་ཕྱིར་རོ། །འདྲི་བའོ། །རྣམ་གསུམ་སྨོས་པ་ནི་འདི་ཙམ་ཡིན་པར་ངེས་པར་གཟུང་བ་ཡིན་ནོ། །ཁ་ཅིག་འདུས་མ་བྱས་མྱ་ངན་ལས་འདས་པ་གཅིག་ཁོ་ནར་ཟད་པར་སྨྲ་བར་ཡང་ཡོད་དོ། །འདི་ལྟ་སྟེ། གནས་མའི་བུའི་སྡེ་པ་དག་ལྟ་བུའོ། །བྱེ་བྲག་པ་དག་ནི་འདུས་མ་བྱས་རྡུལ་ཕྲ་རབ་ལ་སོགས་

པ་མང་དུ་བརྗོད་དེ་དེ་དག་གི་གཞུང་ལུགས་དགག་པའི་ཕྱིར་འདི་ཙམ་ཞིག་ཏུ་ངེས་པར་གཟུང་བ་ཡིན་ནོ། །གཉིས་གང་ཞེ་ན་ཞེས་བྱ་བ་ནི་སོ་སོར་བརྟགས་པས་འགོག་པ་དང་སོ་སོར་བརྟགས་པ་མ་ཡིན་པས་འགོག་པ་དག་འདྲི་བ་སྟེ་ནམ་མཁའ་ནི་འཇིག་རྟེན་ན་གྲགས་པའི་ཕྱིར་མ་ཡིན་ནོ། །དེ་ལ་

ནམ་མཁའི་མི་སྒྲིབ་པ་ཞེས་བྱ་བ་ལ་དེ་ལ་ཞེས་བྱ་བ་ནི་དམིགས་ཀྱིས་དབྱེ་བའམ་ཚིག་གི་ཕྲད་དོ། །ངེས་པའི་ཚིག་ཏུ་ན་གོ་འབྱེད་པས་ན་ནམ་མཁའོ། །གཞན་དག་ན་རེ་འདིའི་ནང་ན་དངོས་པོ་རྣམས་ཤིན་ཏུ་སྣང་བས་ནམ་མཁའོ་ཞེས་ཟེར་རོ། །མི་སྒྲིབ་པ་ནི་སྒྲིབ་པ་མེད་པའོ། །བྱེད་པ་པོར་

བསྒྲུབ་པའམ་ལས་སུ་བསྒྲུབ་པ་ཡིན་ཏེ། ཆོས་གང་ཞིག་གཞན་དག་ལ་སྒྲིབ་པར་མི་བྱེད་པའམ་གཞན་དག་གིས་སྒྲིབ་པར་བྱེད་པ་མ་ཡིན་པ་དེ་ནི་ནམ་མཁའ་སྒྲིབ་པ་མེད་པའི་ངོ་བོ་ཉིད་ཡིན་ནོ། །དེ་མངོན་སུམ་གྱི་ཡུལ་མ་ཡིན་པའི་ཕྱིར་ཆོས་གཞན་ལ་མི་སྒྲིབ་པས་རྗེས་སུ་དཔག་གི་

སྒྲིབ་པ་མེད་པ་ཙམ་ནི་མ་ཡིན་ཏེ། དེ་ཉིད་ཀྱི་ཕྱིར། གང་ན་གཟུགས་ཀྱི་གོ་ཡོད་པའོ་ཞེས་རྣམ་པར་བཤད་དོ། །གལ་ཏེ་གང་ཞིག་སྒྲིབ་པར་མི་བྱེད་པའམ་བསྒྲིབ་པར་བྱ་བ་མ་ཡིན་པ་དེ་ནམ་མཁའ་ཡིན་ན་ནི་སེམས་ལ་སོགས་པའི་འདུ་བྱེད་ཐོགས་པ་མེད་པ་དག་ཀྱང་དེ་ཁོ་ན་བཞིན་དུ་

Vol. 142 · folio 12b

ནམ་མཁའ་ཡིན་པར་འགྱུར་རོ་ཞེ་ན། གཞན་དག་ལ་སྒྲིབ་པ་ཡོད་པའི་ཕྱིར་མི་འགྱུར་ཏེ་རྫུ་འཕྲུལ་དང་ལྡན་པ་སེམས་དང་སེམས་ལས་བྱུང་བའི་མཐུས་གཞན་དག་གི་འགྲོ་བའམ་སེམས་ལ་སོགས་པའི་གེགས་བྱེད་དོ། །འོ་ན་སོ་སོར་བརྟགས་པས་འགོག་པ་དང་སོ་སོར་བརྟགས་

པ་མ་ཡིན་པས་འགོག་པ་དག་གགས་བྱེད་པ་མེད་པའི་ཕྱིར་ནམ་མཁའ་ཡིན་པར་འགྱུར་རོ་ཞེ་ན་མ་ཡིན་ཏེ། དེ་དག་ནི་ལྡན་པའི་རྫས་དང་མི་སྐྱེ་བའི་ཆོས་རྣམས་ལྡན་པར་འགྱུར་བ་ངེས་པར་འགོག་པར་འགྱུར་བ་ཉིད་དང་། སྐྱེ་བའི་གེགས་སུ་གྱུར་པ་ཉིད་ཀྱི་སྒྲིབ་པའི་ངོ་བོ་ཡིན་པའི་ཕྱིར་རོ། །རྣམ་

པ་གཅིག་ཏུ་ན་གང་གིས་མཚན་ཉིད་སྒྲིབ་པ་མེད་པ་ཁོ་ན་ཡིན་ཞིང་མཚན་ཉིད་དེ་ནི་ནམ་མཁའ་ཡིན་ན་དེ་གཉིས་ལ་ནི་མཚན་ཉིད་གཞན་ཡང་ཡོད་པས་འགོག་པས་དེ་དག་ནམ་མཁའ་ཡིན་པར་མི་འགྱུར་རོ། །འོ་ན་ནི་ནམ་མཁའ་སྒྲིབ་པ་མེད་ན་ཡོད་པའི་ཕྱིར་དང་། དེ་ཡོད་ན་མེད་པའི་ཕྱིར་ཐམས་

ཅད་ན་ཡོད་པ་མ་ཡིན་པའམ་མི་རྟག་པ་ཞིག་ཏུ་འགྱུར་ཏེ། རྩིག་པ་ལ་སོགས་པ་གཟུགས་གཞན་གྱིས་སྒྲིབ་པ་ཡོད་པས་དེ་ན་ནམ་མཁའི་མཚན་ཉིད་མེད་པའི་ཕྱིར་ནམ་མཁའ་མེད་པར་ཐལ་བར་འགྱུར་ལ། རྩིག་པ་ལ་སོགས་པ་མེད་པ་ན་ཡང་དེ་ཡོད་པར་འགྱུར་བས་མི་རྟག་པར་འགྱུར་རོ་

ཞེ་ན། དེ་ན་ཡང་རྩིག་པ་ལ་སོགས་པའི་གོ་འབྱེད་པའི་ཕྱིར་ནམ་མཁའ་ཡོད་པ་ཉིད་དེ། གལ་ཏེ་དེ་ན་ནམ་མཁའ་མེད་པར་གྱུར་ན་གོ་འབྱེད་པ་མེད་པའི་ཕྱིར་རྩིག་པ་ལ་སོགས་པ་དེ་དག་ཉིད་གནས་པར་མི་འགྱུར་རོ། །དེ་ན་གཟུགས་གཞན་མི་གནས་པ་གང་ཡིན་པ་དེ་ནི་རྩིག་པ་ལ་སོགས་

པས་སྒྲིབ་པའི་ཕྱིར་ཡིན་གྱི་ནམ་མཁའ་མེད་པའི་ཕྱིར་ནི་མ་ཡིན་ཏེ། བཅོམ་ལྡན་འདས་ཀྱིས་ཀྱང་། ཀྱེ་གཽ་ཏ་མ་ས་ཅི་ལ་བརྟེན་ལགས། ཀྱེ་བྲམ་ཟེ་ས་ནི་ཆུ་ལ་བརྟེན་ཏོ། །ཀྱེ་གཽ་ཏ་མ་ཆུ་ཅི་ལ་བརྟེན་ལགས། བྲམ་ཟེ་ཆུ་ནི་རླུང་ལ་བརྟེན་ཏོ། །ཀྱེ་གཽ་ཏ་མ་རླུང་ནི་ཅི་ལ་བརྟེན་ལགས། །

བྲམ་ཟེ་རླུང་ནི་ནམ་མཁའ་ལ་བརྟེན་ཏོ། །ཀྱེ་གཽ་ཏ་མ་ནམ་མཁའ་ཅི་ལ་བརྟེན་ལགས། བྲམ་ཟེ་ཧ་ཅང་ཐལ་ཏེ་བྲམ་ཟེ་ནམ་མཁའ་ནི་རྟེན་མེད་པར་སྣང་བ་མེད་པ་དམིགས་པ་མེད་པའོ་ཞེས་བྱ་བ་རྒྱས་པར་གསུངས་ཏེ། བྱེ་བྲག་ཏུ་སྨྲ་བ་རྣམས་ན་རེ་དེ་ལྟ་བས་ན་ནམ་མཁའ་ཡོད་དོ་ཞེས་

Vol. 142 · folio 13a

ཟེར་རོ། །གང་འབྲལ་བའོ་ཞེས་ཁྱད་པར་དུ་བྱས་པའི་ཕྱིར་མི་རྟག་པ་ཉིད་ཀྱིས་འགོག་པ་དང་སོ་སོར་བརྟགས་པ་མ་ཡིན་པས་འགོག་པ་བསལ་བ་ཡིན་ཏེ། འགོག་པ་དེ་དག་ནི་འབྲལ་བའི་མཚན་ཉིད་ཙམ་མ་ཡིན་ནོ། །མི་ལྡན་པ་ནི་འབྲལ་བ་ཡིན་ཏེ།

ཉོན་མོངས་པ་དང་མི་ལྡན་པའི་མཚན་ཉིད་ཡིན་ནོ། །རྣམ་པ་གཅིག་ཏུ་ན་ལྡན་པར་འགྱུར་བ་ངེས་པར་འགོག་པར་གྱུར་པའི་ཆོས་གང་ཡིན་པ་དེ་ནི་སོ་སོར་བརྟགས་པས་འགོག་པ་ཡིན་ནོ། །སྡུག་བསྔལ་ལ་སོགས་པ་འཕགས་པའི་བདེན་པ་རྣམས་ལ་ཞེས་ཁྱད་པར་དུ་སྨོས་པའི་ཕྱིར་སོ་སོར་

བརྟགས་པ་ནི་ཟག་པ་མེད་པའི་ཤེས་རབ་ཁོ་ན་ཡིན་པར་གཟུང་སྟེ་འཇིག་རྟེན་པའི་ཤེས་རབ་ནི་སྡུག་བསྔལ་གྱི་བདེན་པ་ལ་སོགས་པའི་རྣམ་པ་ཅན་མ་ཡིན་ནོ། །འོ་ན་ཅི་ཞེ་ན་ས་གོང་མ་དང་འོག་མ་ལ་ཞི་བ་ལ་སོགས་པ་དང་རགས་པའི་རྣམ་པ་ཅན་ཡིན་ནོ། །ཤེས་རབ་ཀྱི་བྱེ་བྲག་གོ་ཞེས་བྱ་བ་

ལ་བྱེ་བྲག་སྨོས་པ་ནི་ཉོན་མོངས་པ་སྤོང་བ་བར་ཆད་མེད་པའི་ལམ་གྱི་ཤེས་རབ་ཡིན་པར་བཟུང་བའི་ཕྱིར་རོ། །ཤེས་རབ་ཀྱི་བྱེ་བྲག་དེས་ཐོབ་པར་བྱ་བའི་འགོག་པ་ནི་སོ་སོར་བརྟགས་པས་འགོག་པ་སྟེ། དཔེར་ན་ལོ་མ་ལ་དགའ་བའི་རྒྱལ་པོ་ལ་ལོ་མའི་རྒྱལ་པོ་ཞེས་བྱ་བ་དང་འདྲ་བར་ཚིག་

བར་མ་མི་མངོན་པར་བྱས་པའི་ཕྱིར་རོ། །གལ་ཏེ་སོ་སོར་བརྟགས་པས་འགོག་པ་ཟག་པ་མེད་པའི་ཤེས་རབ་ཁོ་ན་ཡིན་པར་བཟུང་ནས། འཇིག་རྟེན་པའི་ལམ་གྱིས་ཐོབ་པར་བྱ་བའི་འགོག་པ་མ་བསྡུས་པས་མ་ཁྱབ་པའི་མཚན་ཉིད་དུ་འགྱུར་རོ་ཞེ་ན། མ་ཁྱབ་པ་མ་ཡིན་ཏེ་ཟག་པ་

མེད་པའི་ཤེས་རབ་ཀྱིས་ནི་ཟག་པ་དང་བཅས་པའི་དངོས་པོ་ཁམས་གསུམ་པ་ཐམས་ཅད་ཀྱིས་འགོག་པ་ཐོབ་པོ། །འཇིག་རྟེན་པའི་ཤེས་རབ་འབའ་ཞིག་གིས་འཐོབ་པར་འགྱུར་གྱི་ཟག་པ་མེད་པས་མ་ཡིན་པའི་འགོག་པ་གང་ཡིན་པ་དེ་ནི་མེད་ན་འཇིག་རྟེན་པའི་ཤེས་རབ་ཅི་དགོས་ཏེ།

འགོག་པ་འགའ་ཞིག་འཇིག་རྟེན་པའི་ལམ་གྱིས་འཐོབ་པ་གང་མིན་པ་དེ་ནི་དེ་ཉིད་འཇིག་རྟེན་ལས་འདས་པས་འཐོབ་པས། དེ་ལ་འཇིག་རྟེན་ལས་འདས་པ་ཁོ་ན་ཤེས་རབ་ཡིན་གྱི་འཇིག་རྟེན་པ་ནི་མ་ཡིན་ནོ། །བྱེ་བྲག་ཏུ་སྨྲ་བ་རྣམས་ན་རེ་སོ་སོར་བཏགས་པས་འགོག་པ་ནི་བདེན་པ་བཞི་བསྟན་

Vol. 142 · folio 13b

པར་བསྟན་པའི་ཕྱིར་རྫས་སུ་ཡོད་པ་ཡིན་ཏེ། ལམ་གྱི་བདེན་པ་བཞིན་ནོ་ཞེས་ཟེར་རོ། །སོ་སོ་སོ་སོ་ཡིན་ན། ཞེས་བྱ་བ་ནི་ཐ་དད་པ་ཡིན་ཞེས་བྱ་བའི་ཐ་ཚིག་གོ། །ལྡན་པའི་རྫས་རྣམས་ཇི་སྙེད་པ། །ཞེས་བྱ་བ་ནི་ལྡན་པ་ནི་ལྡན་པ་སྟེ་ལྡན་པར་བྱེད་པའི་རྫས་རྣམས་སོ། །རྣམ་པ་གཅིག་

ཏུ་ན་དེ་དག་ལ་ཀུན་ཏུ་སྦྱོར་བས་ན་ལྡན་པ་དག་གོ། །དེ་དག་ནི་ལྡན་པ་ཡང་ཡིན་ལ་རྫས་ཀྱང་ཡིན་པས་ལྡན་པའི་རྫས་ཏེ་ཟག་པ་དང་བཅས་པའི་རྫས་དག་ཅེས་བྱ་བའི་ཐ་ཚིག་གོ། །བཅོམ་ལྡན་འདས་ཀྱིས་ཀྱང་ཟག་པ་དང་བཅས་པའི་རྫས་ནི་འགྱིང་ཕུར་ལྟ་བུའོ། །ཀུན་ཏུ་སྦྱོར་བ་ནི་ཐག་པ་ལྟ་

བུའོ། །གང་ཟག་ནི་གླང་པོ་ལྟ་བུའོ་ཞེས་གསུངས་སོ། །དེ་ལྟ་མ་ཡིན་ཞེས་བྱ་བ་ནི་གལ་ཏེ་གཅིག་ཡིན་ན་ཞེས་བྱ་བའི་ཐ་ཚིག་གོ། །ཉོན་མོངས་པ་ཐམས་ཅད་འགོག་པ་མངོན་སུམ་དུ་བྱེད་པར་ཞེས་བྱ་བ་ནི་ཀུན་འབྱུང་བ་ལ་སོགས་པ་མཐོང་བ་དང་བསྒོམ་པས་སྤང་བར་བྱ་བའི་ཉོན་མོངས་པ་

འགོག་པ་ཐོབ་པར་ཞེས་བྱ་བའི་ཐ་ཚིག་གོ། །ལྷག་མའི་གཉེན་པོ་བསྒོམ་པ་དོན་མེད་པར་འགྱུར་རོ་ཞེས་བྱ་བ་ནི་ཉོན་མོངས་པ་ལྷག་མ་ཀུན་འབྱུང་བ་ལ་སོགས་པ་མཐོང་བ་དང་བསྒོམ་པས་སྤང་བར་བྱ་བའི་བདག་ཉིད་ཀྱི་གཉེན་པོ་ལམ་བསྐྱེད་མི་དགོས་སོ་ཞེས་བྱ་བའི་ཐ་ཚིག་གོ། །

འོ་ན་འགོག་པ་ནི་འདྲ་བ་མ་ཡིན་ནོ་ཞེས་བཤད་པ་ཞེས་བྱ་བ་གང་ལས་བཤད་ཅེ་ན། མདོ་ལས། འཕགས་མ་ཅི་འགོག་པ་འདྲ་བར་ལགས་སམ། ཚེ་དང་ལྡན་པ་ས་ག་འདྲ་བ་མ་ཡིན་ནོ་ཞེས་སྔོན་གྱི་ཁྱོ་ཁྱིམ་བདག་ས་གས་དྲིས་པ་དང་། དགེ་སློང་མ་ཆོས་བྱིན་གྱིས་བཤད་དེ་འགོག་པ་

ནི་འདྲ་བ་མེད་དོ་ཞེས་བྱ་བའི་ཐ་ཚིག་གོ། །ཡང་དག་པར་བརྟགས་ནས་འདིའི་དོན་ཇི་ལྟ་བུ་ཡིན་ཞེས་འདྲི་སྟེ་ཕ་རོལ་པོའི་བསམ་པ་ནི་མང་པོ་ཉིད་གཅིག་ཡིན་ན་ནི་འདྲ་བར་འགྱུར་རོ་སྙམ་པ་ཡིན་ནོ། །འདིའི་འདྲ་བའི་རྒྱུ་གང་ཡང་མ་ཡིན་ཞེས་བྱ་བ་ནི་འདྲ་བའི་རྒྱུ་དང་འདྲ་བ་ཞེས་བྱ་བ་ནི་དོན་

གཅིག་སྟེ། རྒྱུའི་སྒྲ་མི་མངོན་པར་བྱས་པའི་ཕྱིར་རོ། །ཚིག་དག་ལ་ཡང་ཚིག་གི་ཕྱོགས་གཅིག་སྦྱོར་བ་དང་། ངག་དག་ལ་ཡང་ངག་གི་ཕྱོགས་གཅིག་སྦྱོར་བ་སྣང་སྟེ། དཔེར་ན་བདེན་ཁྲོ་ལ་ཁྲོ་བ་ཞེས་བྱ་བ་དང་། ལྷས་བྱིན་ལ་བྱིན་ཞེས་བྱ་བ་དང་། ཟན་ལ་ནང་དུ་ཞུགས་སྐྱོ་

Vol. 142 · folio 14a

མ་ལ་ནང་དུ་ཞུགས་ཞེས་བྱ་བ་ལྟ་བུའོ། །སོ་སོར་བརྟགས་པས་འགོག་པ་ནི་རྟག་པ་ཡིན་ལ་དེ་ལ་འདྲ་བའི་རྒྱུ་ཅི་ཞིག་དགོས་ཏེ་དེ་ལྟ་བས་ན་འདྲ་བའི་རྒྱུ་མེད་པས་ན་འདྲ་བའི་རྒྱུ་མ་ཡིན་ཏེ། འདི་ལ་འདྲ་བའི་རྒྱུ་མེད་པས་འདྲ་བའི་རྒྱུ་མ་ཡིན་པའོ་ཞེས་འབྲུ་མང་

པོ་པར་ཚིག་བསྡུའོ། །འདི་ཡང་གང་གི་འདྲ་བའི་རྒྱུ་ཡང་མ་ཡིན་ནོ་ཞེས་བྱ་བ་ནི་སོ་སོར་བརྟགས་པས་འགོག་པ་འདི་ཡང་ཆོས་གཞན་གང་གི་ཡང་འདྲ་བའི་རྒྱུ་མ་ཡིན་ནོ་ཞེས་བྱ་བ་སྐབས་དང་སྦྱར་རོ། །ཅིའི་ཕྱིར་ཞེ་ན་འདུས་བྱས་ཁོ་ན་འདྲ་བའི་རྒྱུ་ཡིན་པར་འདོད་པའི་ཕྱིར་རོ། །འདི་ལ་འདྲ་

བ་གང་ཡང་མེད་དོ་ཞེས་བྱ་བ་ནི་མ་ཡིན་ནོ་ཞེས་བྱ་བ་ནི་འགོག་པ་ལ་འགོག་པ་འདྲ་བ་གཞན་འགའ་ཡང་མེད་དོ་ཞེས་བྱ་བ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །སྐྱེ་ལ་གཏན་དུ་བགེགས་བྱེད་པ། །འགོག་གཞན་སོ་སོར་བརྟགས་མིན་པས། །ཞེས་བྱ་བ་ནི་མ་འོངས་པའི་ཆོས་རྣམས་སྐྱེ་བ་ལ་གཏན་དུ་

བགེགས་བྱེད་པ་ནི་ཤིན་ཏུ་བགེགས་བྱེད་པ་སྟེ། གཏན་ཏུ་ངེས་པར་འགོག་པའོ། །གཞན་ཞེས་བྱ་བ་ནི་སོ་སོར་བརྟགས་པ་མ་ཡིན་པས་འགོག་པ་སྟེ་དེ་ནི་སོ་སོར་བརྟགས་པས་འགོག་པ་བཤད་མ་ཐག་པ་ལས་གཞན་ཡིན་ནོ། །སོ་སོར་བརྟགས་མིན་པས་ཞེས་བྱ་བ་ལ་མིན་ཞེས་བྱ་བ་ནི་འདི་ནི་མེད་

པར་དགག་པ་སྟེ། སོ་སོར་བརྟགས་པ་མེད་པས་ཐོབ་པར་བྱ་བ་ཞེས་བྱ་བའི་ཐ་ཚིག་གོ། །ཡང་ན་མ་ཡིན་པར་དགག་པ་སྟེ་སོ་སོར་བརྟགས་པ་གཞན་པ་རྐྱེན་མ་ཚང་བ་གང་ཡིན་པ་དེ་ནི་སོ་སོར་བརྟགས་པ་མ་ཡིན་པ་ཡིན་ལ་དེས་ཐོབ་པར་བྱ་བའི་འགོག་པ་ནི་སོ་སོར་བརྟགས་པ་མ་ཡིན་པས་

འགོག་པ་སྟེ། བར་གྱི་ཚིག་མི་མངོན་པར་བྱ་བའི་ཕྱིར་རོ། །འདི་ནི་རིགས་པ་མ་ཡིན་ཏེ་རྐྱེན་མ་ཚང་བ་ནི་མེད་པ་ཡིན་ན་ཇི་ལྟར་མེད་པས་འགོག་པ་དེ་འཐོབ་པར་འགྱུར་ཞེ་ན། ཉེ་བར་བརྟགས་པ་ཡིན་པའི་ཕྱིར། འདི་ནི་ཉེས་པ་མེད་དོ། །རྣམ་པ་གཅིག་ཏུ་ན་སོ་སོར་བརྟགས་པ་མ་ཡིན་

པས་འགོག་པ་ཞེས་བྱ་བ་ནི་སོ་སོར་བརྟགས་པས་འགོག་པ་མ་ཡིན་པ་ནི་སོ་སོར་བརྟགས་པ་མ་ཡིན་པས་འགོག་པ་སྟེ། འདི་སོ་སོར་བརྟགས་པས་འགོག་པ་ལས་གཞན་ཉིད་ཙམ་ཡིན་པར་བརྗོད་ཀྱི། རྐྱེན་མ་ཚང་བ་ལ་བྱེད་པ་ཡོད་པ་ནི་མ་ཡིན་ནོ། །སྐྱེ་ལ་ཞེས་སྨོས་པ་ནི་མི་རྟག་པ་ཉིད་

Vol. 142 · folio 14b

ཀྱི་འགོག་པ་བསལ་བའི་ཕྱིར་ཏེ། མི་རྟག་པ་ཉིད་ཀྱི་འགོག་པ་ནི་ཆོས་གནས་པ་ལ་ཤིན་ཏུ་གེགས་བྱེད་པ་ཡིན་གྱི་ཆོས་སྐྱེ་བ་ལ་ནི་མ་ཡིན་ནོ། །གཏན་དུ་ཞེས་བྱ་བ་སྨོས་པ་ནི་འདུ་ཤེས་མེད་པ་དང་འགོག་པའི་སྙོམས་པར་འཇུག་པ་དང་། འདུ་ཤེས་པ་མེད་པ་བསལ་བའི་ཕྱིར་

ཏེ། དེ་དག་ཀྱང་སེམས་དང་སེམས་ལས་བྱུང་བ་མ་འོངས་པ་རྣམས་སྐྱེ་བ་ལ་གེགས་བྱེད་པ་ནི་ཡིན་མོད་ཀྱི་བགེགས་བྱེད་པའི་དངོས་པོ་དུས་རེ་ཞིག་པ་ཡིན་པས་ཕྱིར་གཏན་དུ་ནི་མ་ཡིན་ནོ། །དཔེར་ན་མིག་དང་ཡིད་གཟུགས་གཅིག་ལ་ཡེངས་པའི་ཞེས་བྱ་བ་ལ་དཔེར་ན་ཞེས་བྱ་བ་ནི་

དཔེར་བརྗོད་པ་སྟེ། གང་ལ་འདིར་གཟུགས་སྔོན་པོ་གཅིག་ལ་མིག་དང་ཡིད་ཡེངས་པ་ཡོད་པ་ནི་མིག་དང་གཟུགས་གཅིག་ལ་ཡེངས་པའོ། །དེའི་གཟུང་བར་བྱ་བའི་གཟུགས་གཞན་ཁ་དོག་གིས་གཟུགས་སྔོན་པོ་ལས་གཞན་པའི་བྱེ་བྲག་དང་སེར་པོ་དང་དམར་པོ་དང་དཀར་

པོ་དག་དང་། དབྱིབས་ཀྱི་གཟུགས་དག་དང་སྒྲ་དང་དྲི་དང་རོ་དང་རེག་བྱ་གང་ཡིན་པ་ཐམས་ཅད་འདས་པར་འགྱུར་ཞིང་ད་ལྟར་བྱུང་བའི་དུས་ལས་འདའ་བར་འགྱུར་ཏེ། འདས་པའི་དུས་སུ་གྱུར་པ་ཞེས་བྱ་བའི་ཐ་ཚིག་གོ། །དེ་དག་ལ་དམིགས་པའི་རྣམ་པར་ཤེས་པའི་ཚོགས་ལྔ་པོ་

དག་ནི་ཡང་སྐྱེ་བར་མི་ནུས་ཏེ་ཞེས་བྱ་བ་ནི་གང་དག་ལ་དམིགས་པའི་བྱེ་བྲག་སྔོན་པོའི་བྱེ་བྲག་ལ་སོགས་པ་བཤད་མ་ཐག་པ་དེ་དག་ཡོད་པ་ནི་དེ་དག་ལ་ནི་དམིགས་པ་སྟེ་གང་དག་ཅེ་ན། རྣམ་པར་ཤེས་པའི་ཚོགས་ལྔའོ། །དེ་དག་སྐྱེ་བར་མི་ནུས་ཏེ་ཞེས་བྱ་བ་འདི་ནི་ངོ་བོ་སྒྲུབ་པ་ཡིན་ནོ། །

དེ་དག་འདས་པའི་ཡུལ་ལ་དམིགས་པའི་མཐུ་མེད་པའི་ཕྱིར་རོ་ཞེས་བྱ་བ་རྒྱས་པར་འབྱུང་བ་ནི་རྣམ་པར་ཤེས་པའི་ཚོགས་ལྔ་པོ་དེ་དག་རང་གི་དམིགས་པ་ཡིན་ཡང་འདས་པའི་ཡུལ་ལ་འཛིན་པར་མི་ནུས་ཏེ། རྣམ་པར་ཤེས་པའི་ཚོགས་ལྔ་པོ་དག་ནི་ད་ལྟར་གྱི་ལ་དམིགས་པའི་ཚོགས་

སོ། །ཇི་སྟེ་ཅིའི་ཕྱིར་སྔོན་པོའི་བྱེ་བྲག་ལ་སོགས་པ་ད་ལྟར་གྱི་ལ་དམིགས་ནས་ད་མི་སྐྱེ་ཞེ་ན། ཆོས་ཐམས་ཅད་ནི་རྒྱུ་དང་འབྲས་བུ་དང་རྟེན་དང་དམིགས་པ་དང་གཞི་ཅན་ལ་དམིགས་པའི་ཕྱིར་དེ་ལྟར་ན་སྐྱེ་བ་ནི་མི་ནུས་ཏེ། རྣམ་པར་ཤེས་པ་གང་གིས་དམིགས་པ་ཡིན་པ་དེ་ཉིད་

Vol. 142 · folio 15a

དེའི་དམིགས་པ་ཡིན་པར་འགྱུར་གྱི་གཞན་ནི་མ་ཡིན་ནོ། །དེ་ལྟ་བས་ན་རྣམ་པར་ཤེས་པའི་ཚོགས་ལྔ་པོ་དེ་དག་དམིགས་པའི་རྐྱེན་མ་ཚང་བའི་ཕྱིར་ཡང་མི་སྐྱེའོ། །དེའི་ཕྱིར། དེ་དག་གི་སོ་སོར་བརྟགས་པ་མ་ཡིན་པས་འགོག་པ་དེ་ནི་ཞེས་བྱ་བ་

རྒྱས་པར་སྨོས་ཏེ་རྣམ་པར་ཤེས་པའི་ཚོགས་ལྔ་པོ་དེ་དག་གིས་དམིགས་པའི་རྐྱེན་མ་ཚང་བའི་ཕྱིར། རྐྱེན་མ་ཚང་བས་འཐོབ་སྟེ་སེམས་དང་སེམས་ལས་བྱུང་བ་སྐྱེ་བ་ན། རྐྱེན་བཞི་པོ་རྒྱུ་དང་མཚུངས་པ་དེ་མ་ཐག་པ་དང་དམིགས་པ་དང་བདག་པོའི་རྐྱེན་དག་ཁོ་ནས་སྐྱེ་བར་འགྱུར་

གྱི་དེ་དག་ལས་གང་ཡང་རུང་བ་ཞིག་མ་ཚང་ན་ཡང་མི་སྐྱེའོ། །གཞན་དག་ན་རེ་མཚུངས་པ་དེ་མ་ཐག་པའི་རྐྱེན་མ་ཚང་བའི་ཕྱིར་ཏེ་དེའི་ཕྱིར། མཚུངས་པ་དེ་མ་ཐག་པའི་རྐྱེན་སེམས་དང་སེམས་ལས་བྱུང་བའི་མཚན་ཉིད་ནི། སྔོན་པོའི་རྣམ་པར་ཤེས་པ་དེ་གཅིག་པུ་ཁོ་ན་སྐྱེའི་

གོ་འབྱེད་ཀྱི་རྣམ་པར་ཤེས་པ་གཉིས་ཅིག་ཅར་དུ་སྐྱེ་མི་སྲིད་པའི་ཕྱིར་སྔོན་པོའི་བྱེ་བྲག་ལ་སོགས་པའི་རྣམ་པར་ཤེས་པ་གཞན་དག་གི་ནི་མ་ཡིན་ནོ་ཞེས་ཟེར་རོ། །འདིར་ནི་དཔེར་བརྗོད་པ་ཙམ་དུ་ཟད་ཀྱི་དེ་བཞིན་དུ་བཟོད་པ་འཐོབ་པ་ལ་སོགས་པའི་ངན་སོང་བའི་ཕུང་པོ་མ་འོངས་པ་རྣམས་ཀྱང་

དེ་དག་སྐྱེ་བ་དང་འགལ་བའི་རྐྱེན་མངོན་སུམ་དུ་གྱུར་ན། རྐྱེན་མ་ཚང་བས་སོ་སོར་བརྟགས་པ་མ་ཡིན་པས་འགོག་པ་ཐོབ་བོ་ཞེས་དཔེར་བརྗོད་པར་བྱའོ། །བཅོམ་ལྡན་འདས་ཀྱིས་ཀྱང་སོ་སོར་བརྟགས་པ་མ་ཡིན་པས་འགོག་པ་ཁོ་ན་ལས་དགོངས་ནས་གང་ཟག་རྒྱུན་དུ་ཞུགས་

པའི་དབང་དུ་མཛད་དེ། འདིའི་སེམས་ཅན་དམྱལ་བ་དང་དུད་འགྲོ་དང་ཡི་དགས་དག་འགགས་སོ་ཞེས་གསུངས་སོ། །དེ་ལྟ་བས་ན་སོ་སོར་བརྟགས་པ་མེད་པར་རྐྱེན་མ་ཚང་བའི་ཕྱིར་མ་འོངས་པའི་ཆོས་དེ་ལྟ་བུ་དག་སྐྱེ་བ་ལ་ངེས་པར་འགོག་པར་གྱུར་པ་དེ་ནི་སོ་སོར་བརྟགས་པ་མ་

ཡིན་པས་འགོག་པ་ཞེས་བྱའོ། །བྱེ་བྲག་ཏུ་སྨྲ་བ་རྣམས་ན་རེ་ཡང་དེ་དང་འདྲ་བའི་རྐྱེན་ཉེ་བར་གྱུར་ན་དེ་སྐྱེ་བར་ཐལ་བར་འགྱུར་བའི་ཕྱིར་རྐྱེན་མ་ཚང་བ་ཙམ་གྱིས་ནི་དེ་གཏན་དུ་མི་སྐྱེ་བར་འཐད་པ་མ་ཡིན་ཏེ། དེའི་ཚེ་དེ་སྐྱེ་བ་ལ་སུ་ཞིག་གེགས་བྱེད་པར་འགྱུར་ཞེས་ཟེར་རོ། །འདིར་མུ་

Vol. 142 · folio 15b

བཞིར་འགྱུར་ཏེ་ཞེས་བྱ་བ་རྒྱས་པར་འབྱུང་བ་ལ་སོ་སོར་བརྟགས་པ་དང་། སོ་སོར་བརྟགས་པ་མ་ཡིན་པས་འགོག་པའི་མཚན་ཉིད་བསྟན་པ་ལ་དྲི་བ་དང་ལན་གདབ་པ་རྣམ་པ་བཞི་ཅིའི་ཕྱིར་བསྟན་ཅེ་ན། བྱེ་བྲག་ཏུ་ཤེས་པར་བྱ་བའི་ཕྱིར་རོ། །འདི་ལྟ་སྟེ། ཟག་པ་དང་བཅས་པ་

འདས་པ་དང་ད་ལྟར་བྱུང་བ་དང་འབྱུང་བའི་ཆོས་ཅན་རྣམས་ཀྱི་ལྟ་བུའོ་ཞེས་བྱ་བ་ནི་ཟག་པ་དང་བཅས་པ་ཡིན་པའི་ཕྱིར་སོ་སོར་བརྟགས་པས་འགོག་པ་ཁོ་ན་འཐོབ་ཀྱི། འདས་པ་དང་ད་ལྟར་བྱུང་བ་རྣམས་ནི་སྐྱེས་ཟིན་པའི་ཕྱིར་ལ་བྱུང་བའི་ཆོས་ཅན་རྣམས་ཀྱང་གདོན་མི་ཟ་བར་འབྱུང་བའི་ཕྱིར་སོ་

སོར་བརྟགས་པ་མ་ཡིན་པས་འགོག་པ་ནི་མི་འཐོབ་སྟེ། སོ་སོར་བརྟགས་པ་མ་ཡིན་པས་འགོག་པའི་མཚན་ཉིད་ནི་སྐྱེ་བ་ལ་གཏན་དུ་བགེགས་བྱེད་པ་ཡིན་པའི་ཕྱིར་རོ། །འདི་ལྟ་སྟེ། ཟག་པ་མེད་པའི་འདུས་བྱས་མི་སྐྱེ་བའི་ཆོས་ཅན་རྣམས་ཀྱི་ལྟ་བུའོ་ཞེས་བྱ་བ་ནི་འདི་དག་སྐྱེ་བའི་ཆོས་

ཅན་ཉིད་ཡིན་ཏེ། དེའི་ཕྱིར་དེ་དག་གི་སོ་སོར་བརྟགས་པ་མ་ཡིན་པས་འགོག་པ་ནི་མི་འཐོབ་སྟེ། སོ་སོར་བརྟགས་པས་འགོག་པའི་མཚན་ཉིད་ནི་སྐྱེ་བ་ལ་གཏན་དུ་གེགས་བྱེད་པ་ཡིན་པའི་ཕྱིར་རོ། །འདི་ལྟ་སྟེ། ཟག་པ་ཟད་པ་མེད་པའི་འདུས་བྱས་མི་སྐྱེ་བའི་ཆོས་ཅན་རྣམས་ཀྱི་ལྟ་

བུའོ་ཞེས་བྱ་བ་ནི་འདི་དག་སྐྱེ་བ་ལ་ཤིན་ཏུ་བགེགས་སུ་གྱུར་པའི་ཕྱིར་མི་སྐྱེ་བའི་ཆོས་ཅན་ཉིད་ཡིན་ཏེ་དེའི་ཕྱིར་དེ་དག་གི་སོ་སོར་བརྟགས་པས་འགོག་པ་འཐོབ་པོ། །དད་པས་རྗེས་སུ་འབྲང་བའི་ལམ་ས་དྲུག་པོ་མི་ལྕོགས་པ་མེད་པ་དང་བསམ་གཏན་ཁྱད་པར་ཅན་དང་བསམ་གཏན་

གྱི་ས་པ་རྣམས་ལས་གང་ཡང་རུང་བ་ཞིག་མངོན་དུ་གྱུར་ན་ལྷག་མ་ལྔའི་སོ་སོར་བརྟགས་པ་མ་ཡིན་པས་འགོག་པ་འཐོབ་བོ། །ཟག་པ་མེད་པ་ཡིན་པའི་ཕྱིར་སོ་སོར་བརྟགས་པས་འགོག་པ་ནི་མ་ཡིན་ཏེ། ཉེས་པ་མེད་པ་ནི་སྤང་བར་འོས་པ་མ་ཡིན་ནོ། །མི་སྐྱེ་བའི་ཆོས་ཅན་

ཞེས་བྱ་བ་སྨོས་པ་ནི་འདས་པ་དང་ད་ལྟར་བྱུང་བ་དང་འབྱུང་བའི་ཆོས་ཅན་བསལ་བའི་ཕྱིར་རོ། །ཟག་པ་མེད་པ་ཞེས་སྨོས་པ་ནི་ཟག་པ་དང་བཅས་པ་བསལ་བའི་ཕྱིར་རོ། །འདུས་བྱས་ཞེས་སྨོས་པ་ནི་འདུས་མ་བྱས་བསལ་བའི་ཕྱིར་རོ། །འདུས་མ་བྱས་ཀྱང་ངོ་བོ་ཉིད་ཀྱི་

Vol. 142 · folio 16a

མི་སྐྱེ་བའི་ཆོས་ཅན་ཡིན་པས། དེའི་ཕྱིར་དེར་ཐལ་དུ་འགྱུར་དུ་འོང་བ་དེ་སྐད་ཅེས་ཁྱད་པར་དུ་བྱས་སོ། །ཁ་ཅིག་ནི་འདི་སྐད་དུ་འདི་ལྟ་སྟེ་ཟག་པ་མེད་པ་ནི་མི་སྐྱེ་བའི་ཆོས་ཅན་རྣམས་ཀྱི་ལྟ་བུའོ་ཞེས་འདོན་ཏེ། དེ་དག་གི་ལྟར་ན་ཇི་ལྟར་འདུས་མ་བྱས་རྣམས་

བསྡུས་པར་ཐལ་བར་མི་འགྱུར་ཞེ་ན་མི་འགྱུར་ཏེ། ཆོས་གང་དག་ལ་སོ་སོར་བརྟགས་པས་འགོག་པའམ་སོ་སོར་བརྟགས་པ་མ་ཡིན་པས་འགོག་པ་སྲིད་པ་དེ་དག་གི་སྐབས་ཡིན་ནོ། །འདུས་མ་བྱས་རྣམས་ལ་ནི་འགོག་པ་དེ་དག་མི་སྲིད་དེ་སོ་སོར་བརྟགས་པ་མ་ཡིན་པས་འགོག་

པ་ནི་སྐྱེ་བ་ལ་གཏན་དུ་བགེགས་བྱེད་པ་ཡིན་ན། འདུས་མ་བྱས་རྣམས་ལ་ཡང་སྐྱེ་བ་མེད་དོ། །གཞན་ཡང་མི་སྐྱེ་བའི་ཆོས་ཅན་རྣམས་ཞེས་བྱ་བ་ནི་མ་ཡིན་པར་དགག་པར་ཚིག་བསྡུ་སྟེ་སྐྱེ་བའི་ཆོས་ཅན་དག་ལས་གཞན་པའི་ཆོས་དེ་དང་འདྲ་བ་གང་ཡིན་པ་དེ་དག་ནི་མི་སྐྱེ་བའི་ཆོས་ཅན་རྣམས་

སོ། །དེ་དང་འདྲ་བ་དག་ཀྱང་གང་ཞེ་ན་འདུས་བྱས་དག་ཁོ་ན་ཡིན་གྱི་འདུས་མ་བྱས་ནི་མ་ཡིན་པས་འདུས་མ་བྱས་པ་རྣམས་ལ་ཐར་བར་མི་འགྱུར་རོ་ཞེས་ཟེར་རོ། །གང་དག་གི་གཉི་ག་འཐོབ་པ་ཡང་ཡོད་དེ་ཞེས་བྱ་བ་ནི་སོ་སོར་བརྟགས་པས་འགོག་པ་དང་། སོ་སོར་བརྟགས་པ་མ་ཡིན་

པས་འགོག་པའོ། །འདི་ལྟ་སྟེ་ཟག་པ་དང་བཅས་པ་ཞེས་བྱ་བ་རྒྱས་པར་འབྱུང་བ་ནི་འདི་དག་ཟག་པ་དང་བཅས་པ་ཡིན་པའི་ཕྱིར་སོ་སོར་བརྟགས་པས་འགོག་པ་ཐོབ་ལ་མི་སྐྱེ་བའི་ཆོས་ཅན་ཡིན་པའི་ཕྱིར་སོ་སོར་བརྟགས་པ་མ་ཡིན་པས་འགོག་པ་ཡང་འཐོབ་བོ། །འདི་དག་ནི་

ནམ་ཡང་རུང་བ་ན་འཐོབ་པར་འདོད་ཀྱི་འདི་དག་གདོན་མི་ཟ་བར་ཅིག་ཅར་འཐོབ་པ་ནི་མ་ཡིན་ནོ། །ཁ་ཅིག་ནི་སྔར་སོ་སོར་བརྟགས་པས་འགོག་པ་འཐོབ་ལ་ཕྱིས་སོ་སོར་བརྟགས་པ་མ་ཡིན་པས་འཐོབ་སྟེ། དཔེར་ན་དགྲ་བཅོམ་པ་གཟུགས་གཅིག་ལ་མིག་དང་ཡིད་ཡེངས་པའི་

དེ་ལས་གཞན་པའི་གཟུགས་ལ་སོགས་པ་ལ་དམིགས་པའི་རྣམ་པར་ཤེས་པའི་ཚོགས་ལྔའི་ལྟ་བུའོ། །ཁ་ཅིག་ནི་སྔར་སོ་སོར་བརྟགས་པ་མ་ཡིན་པས་འགོག་པ་འཐོབ་ལ་ཕྱིས་སོ་སོར་བརྟགས་པས་འགོག་པ་འཐོབ་སྟེ། དཔེར་ན་བཟོད་པ་ཐོབ་པའི་ངན་སོང་གི་འགྲོ་བ་

Vol. 142 · folio 16b

རྣམས་ལྟ་བུའོ། །ཁ་ཅིག་ནི་ཅིག་ཅར་ཏེ་དཔེར་ན་མཐོང་བས་ཐོབ་པའི་ཉོན་མོངས་པ་ཆེན་པོའི་ཡང་ཆེན་པོའི་གཉེན་པོ་སྐྱེས་ན་ཉོན་མོངས་པ་ཆེན་པོ་མ་འོངས་པ་དེ་དག་གིས་སོ་སོར་བརྟགས་པས་འགོག་པ་དང་སོ་སོར་བརྟགས་པ་མ་ཡིན་པས་འགོག་པ་ཅིག་ཅར་འཐོབ་བོ། །དེ་བཞིན་དུ་

གཞན་དག་ལ་ཡང་ཅི་རིགས་པར་སྦྱར་རོ། །འདི་ལྟ་སྟེ་ཟག་པ་མེད་པ་འདས་པ་དང་ད་ལྟར་བྱུང་བ་དང་འབྱུང་བའི་ཆོས་ཅན་རྣམས་ཀྱི་ལྟ་བུའོ་ཞེས་བྱ་བ་ནི་འདས་པ་ལ་སོགས་པ་འདི་དག་སྐྱེ་བ་ལ་བགེགས་བྱ་བར་མི་ནུས་པའི་ཕྱིར་རོ། །སོ་སོར་བརྟགས་པ་མ་ཡིན་པས་འགོག་པ་མི་འཐོབ་བོ། །

འདི་དག་ཟག་པ་མེད་པ་ཡིན་པའི་ཕྱིར་སོ་སོར་བརྟགས་པས་འགོག་པ་ཡང་མི་འཐོབ་བོ། །འདུས་མ་བྱས་རྣམས་ལ་ནི་སྐྱེ་བ་མེད་པའི་ཕྱིར་སོ་སོར་བརྟགས་པ་མ་ཡིན་པས་འགོག་པ་མེད་དེ། སོ་སོར་བརྟགས་པ་མ་ཡིན་པས་འགོག་པ་ནི་སྐྱེ་བ་ལ་གཏན་དུ་བགེགས་བྱེད་པ་ཡིན་ནོ་ཞེས་སྔར་

བཤད་ཟིན་ཏོ། །ཟག་པ་མེད་པ་ཡིན་པའི་ཕྱིར་སོ་སོར་བརྟགས་པས་འགོག་པ་ཡང་མེད་དོ། །དེ་ལྟར་འདུས་མ་བྱས་ནི་བརྗོད་པར་བྱ་བ་ཉུང་བའི་ཕྱིར་དེ་དྲི་བ་དག་ཡོངས་སུ་རྫོགས་པར་བྱས་ཏེ་འདུས་བྱས་རྣམས་བསྟན་པར་འདོད་ནས། ལམ་མ་གཏོགས་པས་འདུས་བྱས་རྣམས།

ཟག་བཅས་ཞེས་གང་སྨྲས་པའི་འདུས་བྱས་དེ་དག་གང་ཞེ་ན་ཞེས་བྱ་བ་གླེང་སློང་བ་བརྗོད་དོ། །འདུས་བྱས་ཆོས་རྣམས་དེ་དག་ཡང་། །ཞེས་བྱ་བ་ལ་ཡང་ཞེས་བྱ་བའི་སྒྲ་ནི་གོང་དུ། ཟག་བཅས་ཟག་པ་མེད་ཅེས་རབ་ཏུ་དབྱེ་བ་བཤད་ཟིན་ཏེ་འདི་ནི་ཡང་རབ་ཏུ་དབྱེ་བ་ཡིན་ནོ་ཞེས་རབ་ཏུ་

དབྱེ་བ་གཞན་རབ་ཏུ་བསྟན་པའི་ཕྱིར་རོ། །འདུས་མ་བྱས་བསྟན་པས་བར་དུ་ཆོད་པའི་ཕྱིར་ཡང་། འདུས་བྱས་ཞེས་བྱ་བ་སྨོས་པ་ནི་འདུས་མ་བྱས་བསལ་བའི་ཕྱིར་རོ། །དེ་དག་ཅེས་བྱ་བའི་སྐབས་སུ་བབ་པ་གོང་མ་དང་སྦྱར་རོ། །སྐབས་སུ་བབ་པ་གོང་མ་ཡང་གང་དག་ཅེ་ན་ཟག་

པ་དང་བཅས་པ་གཏོགས་པ་གང་དག་ཡིན་པ་དང་། མ་གཏོགས་པ་ལམ་གྱི་བདེན་པ་གང་དག་ཡིན་པ་གཉིས་དང་སྦྱར་རོ། །ཇི་ལྟར་ཤེས་ཤེ་ན། གང་དག་ཟག་བཅས་ཉེར་ལེན་པའི། །ཕུང་པོའང་དེ་དག་ཅེས། ཟག་པ་མེད་པ་དག་ལས་ཟག་པ་དང་བཅས་པ་དག་འབྱུང་བའི་ཕྱིར་

Vol. 142 · folio 17a

རོ། །གཟུགས་ལ་སོགས་པ་ཕུང་པོ་ལྔ་ནི་འོག་ནས་འབྱུང་བའི་མཚན་ཉིད་དོ། །འདི་དག་ནི་འདུས་བྱས་ཡིན་པར་བལྟ་སྟེ་འདི་དག་ཀྱང་ཕན་ཚུན་བསྡུས་པ་ཡིན་ནོ། །གཟུགས་ལ་སོགས་པ་ཞེས་སྨོས་པ་ནི་ཚུལ་ཁྲིམས་ལ་སོགས་པའི་ཕུང་པོ་

བསལ་བའི་ཕྱིར་རོ། །ཚུལ་ཁྲིམས་ཀྱི་ཕུང་པོ་དང་ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཞེས་བྱ་བའི་ཕུང་པོ་གཞན་དག་ཀྱང་ཡོད་པས་སོ། །ཕུང་པོ་ཞེས་སྨོས་པ་ནི་གཟུགས་ལ་

སོགས་པའི་ཡུལ་བསལ་བའི་ཕྱིར་རོ། །འདུས་ཤིང་ཕྲད་ནས་ཞེས་བྱ་བ་འདི་དག་ནི་རྣམ་གྲངས་ཡིན་ནོ། །རྣམ་པ་གཅིག་ཏུ་ན་འདུས་ཤིང་ཞེས་བྱ་བ་ནི་ཕྲད་ནས་ཏེ་ཕན་ཚུན་ལྟོས་ནས་ཞེས་བྱ་བའི་ཐ་ཚིག་གོ། །ཕྲད་ནས་ཞེས་བྱ་བ་ནི་ཡང་དག་པར་བསྐྱེད་ནས་ཏེ་ཕྲད་ཅེས་བྱ་བའི་སྒྲའི་དོན་

ནི་དེ་ལྟ་བུར་སྟོན་ཏོ། །རྐྱེན་གཅིག་གིས་བསྐྱེད་པ་ནི་འགའ་ཡང་མེད་དོ་ཞེས་བྱ་བ་ནི་རྐྱེན་ནང་ན་ཉུང་ཡང་རྐྱེན་གཉིས་གདོན་མི་ཟ་བར་ཡོད་དེ། བཞི་ཡིས་སེམས་དང་སེམས་བྱུང་རྣམས། །གསུམ་གྱིས་སྙོམས་པར་འཇུག་པ་གཉིས། །གཞན་ནི་གཉིས་པོ་དག་ལས་སྐྱེ། །ཞེས་

འབྱུང་བའི་ཕྱིར་རོ། །འོ་མ་བཞིན་ནོ་ཞེས་བྱ་བ་ནི་འདུས་བྱས་ཞེས་བྱ་བའི་སྒྲ་མཐར་ཕྱིན་པ་ཡིན་པའི་ཕྱིར་མཐར་ཕྱིན་པའི་སྒྲ་ཉིད་ཀྱིས་དཔེར་སྟོན་པར་བྱེད་དེ། འོ་མ་བཞིན་ཞེས་བྱ་བ་ནི་འོ་མ་ཞེས་བྱ་བ་ནུ་མ་ལས་བྱུང་བའི་འོ་མ་གང་ཡིན་པ་དེ་འོ་མ་ཞེས་བྱ་བར་རིགས་ཀྱི་འབྱིན་པར་འགྱུར་

བ་གང་ཡིན་པ་དང་འབྱིན་པར་མི་འགྱུར་བ་བཞིན་ཉིད་ལ་འདུག་པ་གང་ཡིན་པ་དེ་ནི་འོ་མ་ཞེས་བྱ་བ་ཉིད་དུ་ཡང་མི་འགྱུར་བ་ཞིག་ན་འཇིག་རྟེན་ན་འོ་མ་ཞེས་ཀྱང་བརྗོད་དོ། །དེ་བཞིན་དུ་འདི་ལ་ཡང་དེ་དང་རིགས་མཐུན་ཞིང་རང་གི་མཚན་ཉིད་འདྲ་བའི་ཕྱིར་མ་འོངས་པ་སྐྱེ་བར་འགྱུར་

བའི་ཆོས་ཅན་འདུ་བྱེད་པར་འགྱུར་བ་གང་དག་ཡིན་པ་དང་། སྐྱེ་བར་མི་འགྱུར་བའི་ཆོས་ཅན་འདུ་བྱེད་པར་མི་འགྱུར་བ་གང་དག་ཡིན་པ་དེ་དག་ཀྱང་འདུས་བྱས་ཞེས་བྱའོ། །དེ་དག་ཉིད་དུས་ཞེས་བྱ་བ་རྒྱས་པར་འབྱུང་བ་ནི་ཆོས་མངོན་པ་ཐམས་ཅད་ཀྱི་མདོ་དོན་དང་མདོ་གཏན་

Vol. 142 · folio 17b

ལ་འབེབས་པ་དང་མདོ་རྣམ་པར་འཆད་པ་ཡིན་པས་འདིར་མདོ་ལས་གསུངས་པའི་དུས་ལ་སོགས་པ་ཕུང་པོའི་རྣམ་གྲངས་ཀྱི་ངོ་བོ་དག་བརྗོད་དོ། །སོང་བ་དང་འགྲོ་བ་དང་འགྲོ་བར་འགྱུར་བའི་ཕྱིར་ཞེས་བྱ་བ་ནི་དུས་ཞེས་བྱ་བའི་དོན་འདི་ནི་འཇིག་རྟེན་ན་གྲགས་པའི་ལམ་ལ་

ལྟོས་ཏེ་རྣམ་པར་བཤད་པ་ཡིན་ཏེ། འདི་ལྟར་འཇིག་རྟེན་ལམ་འདི་གྲོང་དུ་སོང་ངོ་ལམ་འདི་འགྲོའོ་ལམ་འདི་འགྲོ་བར་འགྱུར་རོ་ཞེས་བརྗོད་པ་དེ་བཞིན་དུ་འདིར་ཡང་འདས་པ་གང་ཡིན་པ་ནི་སོང་བའི་དུས་ཡིན་ནོ། །ད་ལྟར་གང་ཡིན་པ་ནི་འགྲོ་བ་ཡིན་ནོ། །མ་འོངས་པ་གང་ཡིན་པ་

ནི་འགྲོ་བར་འགྱུར་བ་ཡིན་ནོ། །མི་རྟག་པ་ཉིད་ཀྱིས་ཟ་བའི་ཕྱིར་ཞེས་བྱ་བ་ནི་དུས་རྣམས་སོ་ཞེས་བྱ་བར་སྐབས་དང་སྦྱར་རོ། །མི་རྟག་པ་ཉིད་ཀྱིས་ཟ་ཞིང་འཇོམས་པས་ན་དུས་དག་གོ་ཞེས་བཅོམ་ལྡན་འདས་ཀྱིས་འདུས་བྱས་དག་ཉིད་དུས་ཀྱི་སྒྲར་བསྟན་ཏོ། །འདུས་བྱས་

དེ་དག་ཉིད་བཅོམ་ལྡན་འདས་ཀྱིས་གཏམ་གྱི་གཞིའི་སྒྲར་ཡང་བསྟན་ཏེ། དགེ་སློང་དག་འཕགས་པ་རྣམས་གཏམ་བརྗོད་པ་ན་གང་དག་ལ་བརྟེན་ནས་གཏམ་བརྗོད་པའི་བྱེད་པའི་གཏམ་གྱི་གཞི་ནི་གསུམ་པོ་འདི་དག་ཡིན་ཏེ། བཞི་པ་ཡང་དེ་མེད་ལ་ལྔ་པ་ཡང་མེད་དོ། །གསུམ་

གང་ཞེ་ན། གཏམ་གྱི་གཞི་འདས་པ་དང་མ་འོངས་པ་དང་ད་ལྟར་བྱུང་བའོ་ཞེས་གསུངས་སོ། །གཏམ་ནི་ངག་གོ་ཞེས་བྱ་བ་རྒྱས་པར་འབྱུང་བ་ནི་གཏམ་ནི་ངག་སྟེ་ཡི་གེའི་བདག་ཉིད་ཀྱི་སྒྲའོ་ཞེས་བྱ་བའི་ཐ་ཚིག་གོ། །དེའི་གཞི་ནི་མིང་སྟེ་ཞེས་བྱ་བ་ནི་ཡུལ་ཞེས་བྱ་བའི་ཐ་ཚིག་

གོ། །མིང་གི་བརྗོད་པར་བྱ་བ་ནི་དོན་ཡིན་ཏེ། འདི་ལྟར་ངག་ནི་མིང་ལ་འཇུག་གོ། །མིང་གིས་ནི་དོན་རྗོད་པར་བྱེད་དོ་ཞེས་འབྱུང་ངོ་། །གལ་ཏེ་གཏམ་གྱི་གཞི་མིང་ཁོ་ན་ཡིན་ན་མིང་ནི་འདུས་བྱས་ཀྱི་ཕུང་པོའི་ཕྱོགས་གཅིག་ཁོ་ན་ཡིན་ན་ཇི་ལྟར་འདུས་བྱས་དག་ཉིད་གཏམ་གྱི་

གཞིའི་སྒྲར་བཤད་ཅེ་ན། དེའི་ཕྱིར། དོན་དང་བཅས་པའི་གཞི་སྨོས་པའི་ཕྱིར་ན་འདུས་བྱས་ནི་གཏམ་གྱི་གཞི་ཞེས་བྱའོ་ཞེས་བྱ་བ་སྨོས་སོ། །དེ་ལྟ་མ་ཡིན་ན་ཞེས་བྱ་བ་རྒྱས་པར་འབྱུང་བ་ནི་གལ་ཏེ་དོན་དང་བཅས་པའི་གཞི་མ་བཟུང་ན། རབ་ཏུ་བྱེད་པ་ལས་གཏམ་གྱི་གཞི་རྣམས་ནི་

Vol. 142 · folio 18a

ཁམས་བཅོ་བརྒྱད་ཀྱིས་བསྡུས་སོ་ཞེས་འབྱུང་བའི་གཞུང་དང་འགལ་བར་འགྱུར་རོ་ཞེས་བྱ་བ་ཡིན་ནོ། །ཡང་རིགས་པ་གང་གིས་དོན་དང་བཅས་པའི་གཞི་གཟུང་བར་བྱ་ཞེ་ན། གཏམ་གྱི་ཡུལ་ནི་མངོན་སུམ་དང་བརྒྱུད་པའི་སྒོ་ནས་རྣམ་པ་གཉིས་ཏེ་མངོན་སུམ་གྱི་

ཡུལ་ནི་མིང་ངོ་། །བརྒྱུད་པ་ནི་དོན་ཏོ། །དེ་ནི་རང་གི་ཡུལ་དུ་གྱུར་པ་མིང་གི་ཡུལ་ཡིན་པས། དེའི་ཕྱིར་དེ་ཡང་ཡུལ་ཏུ་རྣམ་པར་གཞག་གོ། །ཅིའི་ཕྱིར་འདུས་མ་བྱས་གཏམ་གྱི་གཞི་ཉིད་དུ་མ་བཤད་ཅེ་ན། དུས་སུ་གཏོགས་པའི་མིང་དང་དུས་སུ་མ་གཏོགས་པའི་དོན་ལྷན་ཅིག་འབྲེལ་པ་མེད་

པའི་ཕྱིར་རོ། །ཡང་ན་གཞི་ཞེས་བྱ་བའི་སྒྲས་ནི་ཡུལ་དང་རྒྱུ་ཞེས་བྱ་བ་དོན་གཉིས་རྗོད་པར་བྱེད་པ་བསྡུས་པའི་ཕྱིར་གང་ཞིག་གཏམ་གྱི་ཡུལ་དང་རྒྱུ་དང་རྐྱེན་ཡིན་པ་དེ་ནི་གཏམ་གྱི་གཞི་ཡིན་ན་འདུས་མ་བྱས་གཏམ་གྱི་རྒྱུ་དང་རྐྱེན་མ་ཡིན་པས་གཏམ་གྱི་གཞི་མ་ཡིན་ནོ། །རྣམ་པ་གཅིག་ཏུ་ན་

འདུས་བྱས་ནི་འདས་པ་ལ་སོགས་པ་ཤིན་ཏུ་མང་བ་ཉིད་ཀྱིས་དེ་བཞིན་གཤེགས་པ་མར་མེ་མཛད་ནི་དེ་ལྟ་དེ་ལྟ་བུར་བྱུང་བར་གྱུར་ཏོ། །དེ་བཞིན་གཤེགས་པ་བྱམས་པ་ནི་འདི་ལྟ་འདི་ལྟ་བུར་འབྱུང་བར་འགྱུར་རོ། །རྒྱལ་པོ་ཀ་བི་ན་ནི་འདི་ལྟ་འདི་ལྟ་བུར་འབྱུང་ངོ་ཞེས་བྱ་བར་རུང་བའི་ཕྱིར་རོ། །དེའི་ཕྱིར་

འདུས་བྱས་དག་ཁོ་ན་གཏམ་གྱི་གཞི་ཉིད་དུ་བཤད་ཀྱིས་འདུས་མ་བྱས་ནི་མ་ཡིན་ནོ། །འདུས་བྱས་ཐམས་ཅད་ནི་མྱ་ངན་ལས་འདས་པའོ་ཞེས་བྱ་བ་ནི་ཕུང་པོ་ལྷག་མ་མ་ལུས་པའི་མྱ་ངན་ལས་འདས་པའོ། །གལ་ཏེ་དེ་ལྟ་ན་ཟག་པ་དང་བཅས་པ་ལ་དེ་ཡོད་པས་ཟག་པ་དང་བཅས་པ་ནི་ངེས་

པར་འབྱུང་བ་དང་བཅས་པ་ཉིད་དུ་རུང་བར་འགྱུར་ན་ལམ་གྱི་བདེན་པ་ལ་གོ་ཇི་ལྟར་ཞེ་ན། ཆོས་ཀྱི་རྣམ་གྲངས་གཟིངས་ལྟ་བུར་ཤེས་པ་རྣམས་ཀྱིས་ཆོས་རྣམས་ཀྱང་སྤང་བར་བྱ་ན་ཆོས་མ་ཡིན་པ་རྣམས་ལྟ་ཅི་སྨོས་ཞེས་འབྱུང་བས་ལམ་གྱི་བདེན་པ་ལ་ཡང་ངེས་པར་འབྱུང་བ་རུང་བ་ཉིད་པས་འདུས་

བྱས་ཐམས་ཅད་ངེས་འབྱུང་བ་དང་བཅས་པ་ཁོ་ན་ཡིན་ནོ། །གཞི་དང་བཅས་པ་ཞེས་བྱ་བ་ནི་འདི་ལ་སྔར་འབྲས་བུ་རྣམས་གནས་ལ་ཕྱིས་འབྱུང་བའི་ཕྱིར། གཞི་ནི་རྒྱུ་ཞེས་བྱ་བའི་ཐ་ཚིག་གོ། །དེ་ཉིད་དག་ལ་ཡོད་པས་གཞི་དང་བཅས་པའོ། །གསུང་རབ་ལས་ནི་གཞི་ཞེས་བྱ་བའི་སྒྲ་ངོ་བོ་ཉིད་

Vol. 142 · folio 18b

དང་དམིགས་པ་དང་ཀུན་ཏུ་སྦྱར་བར་བྱ་བ་དང་རྒྱུ་དང་ཡོངས་སུ་གཟུང་བ་དང་དན་ལྔ་ཡིན་པར་སྣང་སྟེ། རེ་ཞིག་ངོ་བོ་ཉིད་ནི་དེ་གཞི་གང་ཞིག་ཐོབ་པའི་གཞི་དེ་ཉིད་དང་ལྡན་ནོ་ཞེས་བྱ་བ་ངོ་བོ་ཉིད་དེ་དང་ཞེས་བྱ་བར་མངོན་ནོ། །དམིགས་པ་ནི་ཤེས་བྱའི་ཆོས་གང་དག་ཅེ་ན། སྨྲས་པ་ཐམས་ཅད་ཤེས་

པས་གཞི་ཇི་ལྟ་བ་བཞིན་དུ་ཤེས་པར་བྱ་བ་ཡིན་ནོ་ཞེས་བྱ་བ་དམིགས་པ་ཇི་ལྟ་བ་བཞིན་དུ་ཞེས་བྱ་བའི་ཐ་ཚིག་གོ། །ཀུན་ཏུ་སྦྱར་བར་བྱ་བ་ལ་ནི་གཞི་གང་ཞིག་རྗེས་སུ་ཆགས་པའི་ཀུན་ཏུ་སྦྱོར་བ་དང་ཡང་ལྡན་པ་དེ་ཁོང་ཁྲོ་བའི་ཀུན་དུ་སྦྱོར་བ་དང་ཡང་ལྡན་ནོ་ཞེས་བྱ་བ་ལྟ་བུ་ཡིན་ནོ། །རྒྱུ་ནི་གཞི་དང་

བཅས་པའི་ཆོས་གང་དག་ཅེ་ན། འདུས་བྱས་ཀྱི་ཆོས་ཐམས་ཅད་ཅེས་བྱ་བ་ལྟ་བུའོ། །ཡོངས་སུ་གཟུང་བ་ནི་ཞིང་གི་གཞི་དང་ཚོང་དུས་ཀྱི་གཞི་དང་ནོར་གྱི་གཞི་ཡོངས་སུ་གཟུང་བ་སྤངས་ཏེ་དེ་ལས་ཕྱིར་བཟློག་པ་ཡིན་ནོ་ཞེས་བྱ་བ་ལྟ་བུའོ། །འདིར་ནི་གཞི་ཞེས་བྱ་བའི་སྒྲ་རྒྱུ་ཡིན་པར་རིག་

པར་བྱའོ། །རྒྱུའི་ཚིག་ཡིན་ལོ་ཞེས་བྱ་བ་ལ། ལོ་ཞེས་བྱ་བའི་སྒྲ་ནི་ཕ་རོལ་པོའི་གཞུང་ལུགས་སྟོན་པར་བྱེད་པ་སྟེ། འདི་རང་གི་གཞུང་ལུགས་ནི་འདུས་བྱས་རྣམས་ནི་གཞི་དང་བཅས་ཤིང་ངོ་བོ་ཉིད་དང་བཅས་པ་ཡིན་ལ་འདུས་མ་བྱས་རྣམས་ནི་བརྟགས་པའི་ཡོད་པ་ཡིན་པའི་ཕྱིར་

གཞི་མེད་པ་ཡིན་ནོ་ཞེས་བྱ་བར་མངོན་ནོ། །ཡང་འདུས་བྱས་དེ་དག་ཉིད་ཅེས་བྱ་བ་ནི་གོང་དུ་ཟག་པ་དང་བཅས་པར་བཤད་པ་གང་དག་ཡིན་པ་ཞེས་སྟོན་པར་བྱེད་དོ། །གང་དག་ཟག་བཅས་ཉེར་ལེན་པ། །ཕུང་པོའང་དེ་དག་ཅེས་བྱ་བ་འདིར། དེ་དག་གི་ནང་ནས་ཞེས་བྱ་བ་ཞིག་

ཁོང་ནས་དབྱུང་ངོ་། །ཅི་ཞིག་གྲུབ་པར་འགྱུར་ཞེས་བྱ་བ་ནི་དོན་ཡོད་ཀྱི་གོ་བ་གང་ཡིན་པ་དེ་དཔྱོད་པར་བྱེད་པའོ། །ཉེ་བར་ལེན་པའི་ཕུང་པོ་ལ་སོགས་པ་མདོ་དག་ལས་བཤད་པས། དེའི་ཕྱིར་འདིར་དེ་དག་རྣམ་པར་འཆད་པར་བྱེད་པ་སྟེ། འདི་སྐད་དུ་ཆོས་མངོན་པ་ཐམས་ཅད་ནི་

མདོའི་དོན་ཞེས་བྱ་བ་རྒྱས་པར་འབྱུང་བས་སོ། །དེ་དག་ལས་བྱུང་བའི་ཕྱིར་ཉེ་བར་ལེན་པའི་ཕུང་པོ་དག་སྟེ་ཞེས་བྱ་བ་ནི་ཉེ་བར་ལེན་པ་ལས་བྱུང་བའི་ཕུང་པོ་དག་ནི་ཉེ་བར་ལེན་པའི་ཕུང་པོ་དག་སྟེ། བར་གྱི་ཚིག་མི་མངོན་པར་བྱས་པའི་ཕྱིར་དཔེར་ན་རྩྭ་ལས་བྱུང་བའི་མེ་ལ་རྩྭའི་མེ་ཞེས་

Vol. 142 · folio 19a

བྱ་བ་དང་སོག་མ་ལས་བྱུང་བའི་མེ་ལ་སོག་མའི་མེ་ཞེས་བྱ་བ་ལྟ་བུའོ། །གཞན་དག་ནི་བར་གྱི་ཚིག་མི་མངོན་པར་མ་བྱས་པར་ཉེ་བར་ལེན་པ་རྣམས་ཀྱི་ཕུང་པོ་ནི་ཉེ་བར་ལེན་པའི་ཕུང་པོ་དག་གོ་ཞེས་དྲུག་པར་ཚིག་སྡུད་པ་ཁོ་ནས་སྒྲུབ་པར་བྱེད་ཅིང་དཔེ་ཡང་འདི་

སྐད་དུ་དཔེར་ན་རྩྭ་དག་གི་མེ་ནི་རྩྭའི་མེ་ཞེས་བྱ་བ་ལྟ་བུའོ་ཞེས་སྟོན་པར་བྱེད་དོ། །སེམས་ཅན་དུ་བགྲང་བ་གང་དག་ཡིན་པ་དེ་དག་ནི་ཉོན་མོངས་པས་མངོན་པར་བརླན་པའི་ལས་ཀྱི་རྒྱུ་ཅན་ཡིན་པའི་ཕྱིར་ཉེ་བར་ལེན་པའི་ཕུང་པོ་ཡང་ཡིན་པར་རིགས་ན། ཕྱིའི་དངོས་པོ་རྣམས་ཀོ་ཇི་ལྟར་ཉེ་བར་

ལེན་པའི་ཕུང་པོ་ཡིན་ཞེ་ན། དེ་དག་ཀྱང་ཉེ་བར་ལེན་པ་ལས་གྲུབ་པ་ཡིན་ཏེ། གྲུབ་པའི་མཐའ་ལས། ལས་ལས་འཇིག་རྟེན་སྣ་ཚོགས་སྐྱེས། །ཞེས་འབྱུང་བའི་ཕྱིར་རོ། །དེ་དག་ལ་རག་ལུས་པའི་ཕྱིར་རྒྱལ་པོའི་མི་བཞིན་ནོ་ཞེས་བྱ་བ་ནི་དཔེར་ན་རྒྱལ་པོ་ལ་རག་ལས་པའི་མི་ལ་རྒྱལ་པོའི་

མི་ཞེས་བྱ་བ་དེ་བཞིན་དུ་ཉེ་བར་ལེན་པ་རྣམས་ལ་རག་ལས་པའི་ཕུང་པོ་དེ་དག་ནི་ཉེ་བར་ལེན་པའི་ཕུང་པོ་སྟེ་དེ་དག་གི་དབང་གིས་དམིགས་པ་དང་འགྲོ་བ་གཞན་དག་ཏུ་འཇུག་པའི་ཕྱིར་རོ། །ཡང་ན་དེ་དག་ལས་ཉེ་བར་ལེན་པ་རྣམས་འབྱུང་བས་ཞེས་བྱ་བ་འདི་ནི་དོན་ཙམ་བརྗོད་པར་

ཟད་དེ། ཚིག་དག་ནི་འདི་སྐད་དུ་བརྗོད་པར་བྱའོ། །ཉེ་བར་ལེན་པ་རྣམས་ཀུན་ཏུ་འབྱུང་བའི་རྒྱུའི་ཕུང་པོ་དག་ནི་ཉེ་བར་ལེན་པའི་ཕུང་པོ་དག་གོ། །མེ་ཏོག་དང་འབྲས་བུའི་ཤིང་ལྗོན་པ་བཞིན་ནོ། །དཔེར་ན་མེ་ཏོག་དག་གམ་འབྲས་བུ་དག་ཀུན་འབྱུང་བའི་རྒྱུའི་ཤིང་ལྗོན་པ་ནི་མེ་ཏོག་གི་

ཤིང་ལྗོན་པ་དང་འབྲས་བུའི་ཤིང་ལྗོན་པ་ཞེས་བྱ་བ་དེ་དང་འདྲའོ། །དགྲ་བཅོམ་པའི་ཕུང་པོ་དག་ཀྱང་གནོད་པ་བསྐྱེད་པའི་ཕྱིར། གཞན་གྱི་རྒྱུ་ལ་ཡོད་པའི་ཉེ་བར་ལེན་པ་ལ་རག་ལས་པ་ཡང་ཡིན་ལ་དེ་དག་ལས་ཀྱང་གཞན་གྱི་རྒྱུད་ལ་ཡོད་པའི་ཉེ་བར་ལེན་པ་རྣམས་འབྱུང་བས་འདི་དག་ཉེ་

བར་ལེན་པའི་ཕུང་པོ་ཉིད་དུ་འགལ་བ་མེད་དོ། །འཐབ་པ་ནི་ཉོན་མོངས་པ་རྣམས་ཏེ་བདག་དང་གཞན་ལ་གནོད་པའི་ཕྱིར་རོ་ཞེས་བྱ་བ་ནི་གང་དག་བདག་དང་གཞན་དག་ལ་གནོད་པ་བྱེད་པ་དེ་དག་ནི་འཐབ་པ་དག་ཡིན་ཏེ་གཡུལ་འགྱེད་ཅེས་བྱ་བའི་ཐ་ཚིག་གོ། །ཉོན་མོངས་པ་རྣམས་ཀྱང་

Vol. 142 · folio 19b

དེ་ཁོ་ན་དང་འདྲ་བས་འཐབ་པ་དག་ཅེས་བྱའོ། །དེ་དག་གིས་རྒྱས་པར་བྱས་པ་ཉིད་ཀྱི་ཕྱིར་ཞེས་བྱ་བ་ནི་དེ་དག་གིས་རྒྱས་པར་བྱས་ཤིང་ཉེ་བར་བསྟེན་ཏེ་ཞེས་བྱ་བའི་ཐ་ཚིག་གོ། །རྣམ་པ་གཅིག་ཏུ་ན་རྒྱས་པར་བྱས་པ་ནི་ཕྲ་རྒྱས་ཅན་དུ་བྱས་པའོ། །དེའི་ངོ་བོ་ནི་དེ་དག་གིས་རྒྱས་པར་

བྱས་པ་དེ་ཉིད་དེ་དེ་དག་གིས་རྒྱས་པར་བྱས་པ་དེའི་ཕྱིར་རོ། །རྣམ་པ་གཅིག་ཏུ་ན་དེ་དག་ལ་རྒྱས་པར་བྱས་པ་ཉིད་ཡིན་ཏེ། དེའི་ཕྱིར་འཐབ་པ་དང་བཅས་པ་དག་སྟེ་ཟག་པ་དང་བཅས་པ་བཞིན་ནོ། །ཟག་པ་དང་བཅས་པ་ཉིད་ལ་རྣམ་པར་བཤད་པ་གང་ཡིན་པ་དེ་ཉིད་འདི་ལ་ཡང་བརྗོད་

པར་བྱའོ། །འཕགས་པ་རྣམས་དང་མི་འཐུན་པའི་ཕྱིར་སྡུག་བསྔལ་ལོ་ཞེས་བྱ་བ་ནི་འདུ་བྱེད་ཀྱི་སྡུག་བསྔལ་ཉིད་ཀྱིས་དེ་འཕགས་པ་རྣམས་དང་མི་མཐུན་པ་ཡིན་ནོ། །འདི་ལས་སྡུག་བསྔལ་ཀུན་འབྱུང་བས་ན་ཀུན་འབྱུང་བའོ་ཞེས་བྱ་བ་ནི་རྒྱུར་གྱུར་པའི་ཕུང་པོ་རྣམས་ནི་ཀུན་འབྱུང་བ་ཡིན་ལ། འབྲས་

བུར་གྱུར་པའི་ཕུང་པོ་རྣམས་ནི་སྡུག་བསྔལ་ཡིན་ནོ་ཞེས་བྱ་བར་སྟོན་ཏོ། །འཇིག་པས་ན་འཇིག་རྟེན་ནོ་ཞེས་བྱ་བ་ནི་མདོ་ལས་རྟ་དམར་ཅན་ལུས་འདོམ་གང་ཙམ་འདི་ཉིད་ལ་འཇིག་རྟེན་དུ་འདོགས་ཤིང་འཇིག་རྟེན་ཀུན་འབྱུང་བར་ཡང་འདོགས་སོ་ཞེས་ཀྱང་འབྱུང་ལ། བཅོམ་ལྡན་

འདས་ཉིད་ཀྱིས་འཇིག་ཅིང་རབ་ཏུ་འཇིག་པར་འགྱུར་ཏེ་དེ་བས་ན་འཇིག་རྟེན་ཞེས་བྱའོ་ཞེས་ཀྱང་གསུངས་ཏེ། འཇིག་ཅིང་རྣམ་པར་ཉམས་པར་འགྱུར་ཞེས་བྱ་བའི་ཐ་ཚིག་གོ། །འདི་ལ་ལྟ་བ་རྒྱས་པར་འགྱུར་བའི་སྒོ་ནས་གནས་པས་ན་ཞེས་བྱ་བ་ནི་དགེ་སློང་དག་གང་ཁ་ཅིག་བདག་

དང་བདག་གིར་ཡང་དག་པར་རྗེས་སུ་ལྟ་བ་ན་ཡང་དག་པར་རྗེས་སུ་ལྟ་བ་དེ་དག་ནི་ཉེ་བར་ལེན་པའི་ཕུང་པོ་ལྔ་པོ་འདི་ཉིད་ལ་བདག་དང་བདག་གིར་ཡང་དག་པར་རྗེས་སུ་ལྟའོ་ཞེས་འབྱུང་བའི་ཕྱིར་ཉེ་བར་ལེན་པའི་ཕུང་པོ་རྣམས་ནི་ལྟ་བའི་གནས་སོ། །འབྱུང་བས་ནི་སྲིད་པ་སྟེ་ཞེས་བྱ་བ་ནི་ཟག་

པ་དང་བཅས་པའི་ཆོས་རྣམས་ཁོ་ན་སྲིད་པའི་སྒྲར་བཤད་པ་ཡིན་ཏེ། སྲིད་པ་གང་ཞེ་ན་ཉེ་བར་ལེན་པའི་ཕུང་པོ་ལྔའོ་ཞེས་འབྱུང་བའི་ཕྱིར་རོ། །ལམ་གྱི་བདེན་པ་ལ་ཡང་སྡུག་བསྔལ་ལ་སོགས་པའི་སྒྲ་འདི་དག་ཐལ་བར་འགྱུར་ཏེ། ལམ་གྱི་བདེན་པ་ཡང་འདུ་བྱེད་ཀྱི་སྡུག་བསྔལ་དང་

Vol. 142 · folio 20a

ཡང་ལྡན་ནོ། །མཚུངས་པ་དེ་མ་ཐག་པའི་རྐྱེན་ལ་སོགས་པའི་དངོས་པོས་འདི་ལས་ཟག་པ་དང་བཅས་པའི་དངོས་པོ་ཡང་ཀུན་འབྱུང་ངོ་། །འཇིག་པར་ཡང་འགྱུར་རོ། །ལྟ་བ་ཡང་དེ་ལ་དམིགས་སོ། །འབྱུང་བར་ཡང་འགྱུར་ཏེ་དེ་སྐྱེ་བར་འགྱུར་རོ་ཞེས་བྱ་

བའི་ཐ་ཚིག་གོ་ཞེ་ན། འདི་ནི་ཉེས་པ་མེད་དེ། སྒྲ་འཇུག་པ་ནི་གྲགས་པ་ལ་ལྟོས་པ་ཡིན་པས་ན་འཕགས་པ་རྣམས་ཀྱི་ཆོས་གང་དག་འདུ་བྱེད་ཀྱི་སྡུག་བསྔལ་ཉིད་ཀྱིས་འཕགས་པ་རྣམས་དང་མི་མཐུན་ཞིང་སྡུག་བསྔལ་དང་མི་འགལ་བ་དང་དེ་སྐྱེད་པར་བྱེད་པར་གྲགས་པ་དང་ལྟ་བ་

རྒྱས་པ་སྐྱེད་པར་བྱེད་པ་དང་། འཁོར་བ་ཐོག་མ་མེད་པ་ནས་འབྱུང་བ་དེ་དག་ཁོ་ན་ལ་སྡུག་བསྔལ་ལ་སོགས་པ་འདི་དག་བརྡར་བཏགས་ཀྱི་ལམ་གྱི་བདེན་པ་ལ་ནི་མ་ཡིན་ནོ། །དེ་ལྟ་བས་ན་ཟག་པ་དང་བཅས་པའི་ཆོས་རྣམས་ཁོ་ན་སྡུག་བསྔལ་ལ་སོགས་པའི་སྒྲར་བརྗོད་པར་

བྱ་བ་ཡིན་གྱི་ཟག་པ་མེད་པ་དག་ནི་མ་ཡིན་ཏེ། འགྲོ་བས་ན་བ་ལང་ངོ་ཞེས་བྱས་ནས་འགྲོ་བ་པོ་ཐམས་ཅད་ལ་བ་ལང་ཞེས་བྱ་བ་ནི་མ་ཡིན་ནོ། །དེ་ལྟ་བས་ན། སྡུག་བསྔལ་ཀུན་འབྱུང་འཇིག་རྟེན་དང་། །ཞེས་བྱ་བ་ལ་སོགས་པ་ནི་ལེགས་པར་བཤད་པ་ཡིན་ནོ། །གཟུགས་ཞེས་བྱ་

བ་ནི་གཟུགས་ཀྱི་ཕུང་པོའོ། །ལྔ་ཞེས་བྱ་བ་ནི་ཡིད་ཀྱི་དབང་པོ་བསལ་བའི་ཕྱིར་རོ། །དོན་ནི་ཡུལ་ཏེ་རྟོགས་པར་བྱ་ཞིང་ཤེས་པར་བྱ་བ་ཞེས་བྱ་བའི་ཐ་ཚིག་གོ། །ཡང་ལྔ་ཞེས་བྱ་བ་སྨོས་པ་ནི་ཡུལ་ཆོས་བསལ་བའི་ཕྱིར་རོ། །དེ་དག་རྣམས་ཀྱི་རྣམ་ཤེས་རྟེན་ཞེས་བྱ་བ་ལ་དེ་དག་

ཅེས་བྱ་བའི་སྒྲ་ནི་དོན་རྣམས་དང་སྦྱར་རོ། །དོན་དེ་དེ་དག་ལ་འམ་དེ་དག་གི་རྣམ་པར་ཤེས་པ་ནི་དེ་དག་རྣམས་ཀྱི་རྣམ་ཤེས་སོ། །དེ་དག་གི་རྟེན་ནི་དེ་དག་རྣམས་ཀྱི་རྣམ་ཤེས་རྟེན་ཏོ། །གཟུགས་དང་བ་ཞེས་བྱ་བ་ནི་དེ་དག་གཟུགས་ཀྱང་ཡིན་ལ་དང་བ་ཡང་ཡིན་པས་གཟུགས་དང་བའོ། །

ཁྱད་པར་འདིས་ནི་ཡིད་ཀྱི་དབང་པོ་བསལ་བ་ཡིན་ཏེ། ཡིད་ཀྱི་གྲུབ་པའི་མཐའ་ལས། ལྔ་རྣམས་ཀྱི་དེ་དག་ལྷན་ཅིག་སྐྱེས་པ་ཡང་ཞེས་བྱ་བའི་ཕྱིར་དེ་དག་རྣམས་ཀྱི་རྣམ་ཤེས་རྟེན་ནི་ཡིན་མོད་ཀྱི་ཡིད་གཟུགས་ཀྱི་ངོ་བོ་ཉིད་ནི་མ་ཡིན་ཏེ། དེའི་ཕྱིར་བསལ་བ་ཡིན་ནོ། །གཟུགས་ཞེས་སྨོས་པ་

Vol. 142 · folio 20b

ནི་འདིར་དད་པའི་དང་བ་བསལ་བའི་ཕྱིར་རོ། །དེ་དག་རྣམས་ཀྱི་རྣམ་ཤེས་རྟེན་ཞེས་བྱ་བའི་ཁྱད་པར་འདིས་དད་པ་ལ་ཐལ་བར་མི་འགྱུར་ཞེ་ན། མ་ཡིན་ཏེ། འབྲུ་མང་པོ་པར་བརྟགས་ན་དེར་ཐལ་བར་སྲིད་པའི་ཕྱིར་རོ། །གཟུགས་ཞེས་སྨོས་ན་ནི་འབྲུ་མང་པོ་པར་རྟོག་པ་ལྡོག་པར་འགྱུར་

ཏེ། གང་ལ་དེ་དག་གི་རྣམ་པར་ཤེས་པའི་རྟེན་ཡོད་པ་ཉིད་དུ་རྟོག་པར་འགྱུར་བ་དང་བ་གཟུགས་ཀྱི་རང་བཞིན་ནི་མེད་དོ། །དང་བ་ཞེས་སྨོས་པ་ནི་གཟུང་བའི་དངོས་པོ་ལས་མ་གཏོགས་པ་གཟུགས་དང་བའི་ཁྱད་པར་ཤེས་པར་བྱ་བའི་ཕྱིར་རོ། །བྱེ་བྲག་པ་དག་ནི་དབང་པོ་རྣམས་འབྱུང་བར་

འགྱུར་བའི་ཁྱད་པར་ཁོ་ན་ཡིན་ནོ་ཞེས་ཟེར་རོ། །གསུང་རབ་ལས་ནི་དེ་སྐད་དུ་མི་འབྱུང་ངོ་། །འོ་ན་ཅི་ཞེ་ན། དབང་པོ་རྣམས་ནི་གཟུགས་ལ་སོགས་པའི་ཡུལ་ལས་མ་གཏོགས་པ་དང་བ་དབང་པོས་མི་བསོད་པ་རང་གི་རྣམ་པར་ཤེས་པས་རྗེས་སུ་དཔག་པར་བྱ་བ་དག་ཡིན་ཏེ། གང་དག་

གི་རྟེན་མིག་ལ་སོགས་པ་ཡིན་པར་སྣང་བའོ་ཞེས་འབྱུང་ངོ་། །དེ་དག་རྣམས་ཀྱི་རྣམ་ཤེས་རྟེན་ཞེས་བྱ་བའི་ཁྱད་པར་ཡང་ཕན་ཚུན་མཚན་ཉིད་འཆོལ་བ་བཟློག་པའི་ཕྱིར་ཏེ་གལ་ཏེ། མིག་ལ་སོགས་གཟུགས་དང་བ་རྣམས་ཞེས་བྱ་བ་དེ་ཙམ་ཞིག་བརྗོད་ན་ནི་མིག་ཀྱང་རྣ་བ་ལ་སོགས་

པར་ཐལ་བར་འགྱུར་ལ། རྣ་བ་ལ་སོགས་པ་ལ་ཡང་མིག་ཏུ་ཐལ་བར་འགྱུར་བ་ཞིག་ན། གང་གི་ཕྱིར་འདི་སྐད་དུ་གཟུགས་ཀྱི་རྣམ་པར་ཤེས་པའི་རྟེན་གཟུགས་དང་བ་གང་ཡིན་པ་དེ་ནི་མིག་ཡིན་ནོ་ཞེས་ཁྱད་པར་དུ་བྱས་པ་དེའི་ཕྱིར་མཚན་ཉིད་འཆོལ་བར་མི་འགྱུར་ཏེ་རྣ་བའམ་དབང་པོ་གཞན་

ཡང་རུང་གཟུགས་ཀྱི་རྣམ་པར་ཤེས་པའི་རྟེན་ནི་མ་ཡིན་ནོ། །དེ་བཞིན་དུ་རེག་བྱའི་རྣམ་པར་ཤེས་པའི་རྟེན་གཟུགས་དང་བ་གང་ཡིན་པ་ནི་ལུས་ཀྱི་དབང་པོ་ཞེས་བྱ་བའི་བར་དུ་བརྗོད་པར་བྱའོ། །བཅོམ་ལྡན་འདས་ཀྱིས་ཇི་སྐད་དུ་ཞེས་བྱ་བ་ནི་རྣམ་པར་བཤད་པ་འདི་མདོ་སྡེ་དང་མཐུན་

ནོ་སྙམ་དུ་བསམས་པའོ། །ཇི་ལྟ་ཞེ་ན། ནང་གི་ཞེས་བྱ་བ་སྨོས་ཏེ་རྣམ་པར་ཤེས་པའི་རྟེན་ཞེས་བྱ་བའི་ཐ་ཚིག་གོ། །ནང་ཞེས་བྱ་བའི་སྒྲ་ནི་སེམས་ལ་ནང་ཞེས་ཉེ་བར་འདོགས་སོ་ཞེས་འཆད་པར་འགྱུར་རོ། །ནང་གི་དབང་དུ་བྱས་པ་ནི་ནང་གི་དབང་། ནང་གི་ཉིད་ནང་གི་སྟེ་

Vol. 142 · folio 21a

སེམས་ཀྱི་མཚན་ཉིད་ཀྱི་ནང་དུ་བྱ་བ་ལ་རྒྱུ་ཡིན་པས་དོན་འདི་ལྟ་བུ་ལ་ནང་གི་ཞེས་བྱ་བའི་སྒྲར་བརྗོད་དེ། རྣམ་པར་ཤེས་པའི་རྟེན་ཞེས་བྱ་བའི་བར་དུ་བཤད་པར་འགྱུར་རོ། །ཡང་ན་མིག་ལ་སོགས་པ་འདི་དག་ཅེས་བྱ་བ་རྒྱས་པར་འབྱུང་བ་ནི་རྣམ་པ་

གཅིག་ཏུ་ན་དེ་དག་རྣམས་ཀྱི་ཞེས་བྱ་བའི་སྒྲ་དབང་པོ་རྣམས་དང་སྦྱར་ཏེ། མིག་གི་རྣམ་པར་ཤེས་པ་དང་རྣ་བའི་རྣམ་པར་ཤེས་པ་ལ་ཞེས་བྱ་བ་ལ་སོགས་པ་ཡིན་ནོ། །འདི་ནི་གསུང་རབ་ལས་གྲགས་པ་ཡིན་གྱི་གཟུགས་ཀྱི་རྣམ་པར་ཤེས་པ་དང་སྒྲའི་རྣམ་པར་ཤེས་པ་ཞེས་བྱ་བ་ལ་

སོགས་པ་ནི་མ་ཡིན་ནོ། །འཇིག་རྟེན་ན་ནི་རེས་འགའ་དེ་སྐད་ཅེས་ཀྱང་བྱ་སྟེ། དེ་ལྟ་བས་ན་རྣམ་པར་ཤེས་པ་ཅིག་ཤོས་འདི་ལ་བརྟེན་པར་བྱའོ། །དེའི་ཕྱིར་དེ་ལྟར་བཤད་ན་རབ་ཏུ་བྱེད་པ་ལས་ཞེས་བྱ་བ་རྒྱས་པར་གསུངས་སོ། །འདིར་ཇི་ལྟར་མ་གྲུབ་པས་མ་གྲུབ་པ་སྒྲུབ་པར་བྱེད་དེ་མིག་

ཉིད་མ་གྲུབ་པ་ཡིན་ནོ། །དེ་མ་གྲུབ་ན་མིག་གི་རྣམ་པར་ཤེས་པ་ཡང་མ་གྲུབ་པ་ཡིན་ན་ཇི་ལྟར་འདིར་དེས་དེའི་རྟེན་ཉིད་དུ་སྦྱར་ཞེ་ན། རྣམ་པར་ཤེས་པའི་ཁྱད་པར་འདི་དག་ནི་གྲུབ་པ་ཡིན་པ་དེ་ཕན་ཚུན་གྱི་ཁྱད་པར་ཉེ་བར་མཚོན་པའི་ཕྱིར། ཁོ་བོས་མིག་ལ་སོགས་པ་འདི་དག་གིས་དེ་དག་ཁྱད་པར་དུ་

བྱེད་པ་སྟོན་པར་ཟད་དེ། འདི་སྐད་དུ་རྣམ་པར་ཤེས་པའི་ཁྱད་པར་རང་རིག་པ་དང་པོ་གཅིག་པུ་འདིའི་རྟེན་གཟུགས་དང་བ་གང་ཡིན་པ་དེ་ནི་མིག་གི་དབང་པོ་ཡིན་ལ་དེ་བཞིན་དུ་རྣམ་པར་ཤེས་པའི་ཁྱད་པར་རང་རིག་པ་ལྔ་པ་གཅིག་པུའི་རྟེན་གཟུགས་དང་བ་གང་ཡིན་པ་དེ་ནི་ལུས་ཀྱི་དབང་པོ་ཡིན་ནོ་ཞེས་བྱ་བའི་

བར་དུ་བཤད་པར་འགྱུར་ཏེ། མ་གྲུབ་པས་མ་གྲུབ་པ་སྒྲུབ་པ་ནི་མ་ཡིན་ནོ། །གཟུགས་རྣམ་གཉིས་ཞེས་བྱ་བ་ནི་མིག་གི་དོན་ཁ་དོག་དང་དབྱིབས་ཀྱི་བྱེ་བྲག་གིས་རྣམ་པ་གཉིས་ཡིན་ནོ། །འཇིག་རྟེན་ན་གྲགས་པའི་ཕྱིར་དེའི་རང་གི་མཚན་ཉིད་མ་བཤད་པར་ཁ་དོག་ནི་རྣམ་པ་བཞི་སྟེ་སྔོན་

པོ་ལ་སོགས་པའོ་ཞེས་རབ་ཏུ་དབྱེ་བ་ཁོ་ན་བརྗོད་དེ་ཁ་དོག་སྔོན་པོ་དང་སེར་པོ་དང་དམར་པོ་དང་དཀར་པོ་དག་ཡིན་ནོ། །གཞན་དག་ནི་དེའི་བྱེ་བྲག་གོ་ཞེས་བྱ་བ་ལ་གཞན་དག་ཅེས་བྱ་བ་ནི་སྤྲིན་ལ་སོགས་པའོ། །གཞན་དག་ན་རེ་གཞན་དག་ནི་དེའི་བྱེ་བྲག་གོ་ཞེས་བྱ་བ་ནི་སྔོན་པོ་

Vol. 142 · folio 21b

ལ་སོགས་པ་ཁ་དོག་བཞི་ཕྲད་པའི་ཁྱད་པར་ལས་ཁ་དོག་ལྗང་གུ་ལ་སོགས་པ་ཡང་འབྱུང་བས་སྤྲིན་ལ་སོགས་པ་འབའ་ཞིག་ཏུ་ནི་མ་ཟད་དོ་ཞེས་ཟེར་རོ། །དབྱིབས་ཞེས་བྱ་བ་ནི་དབྱིབས་ཀྱི་བྱེ་བྲག་གོ། །ཡང་དེ་དག་ཉིད་ཁོངས་སུ་གཏོགས་པའི་ཚོགས་ཀྱི་བྱེ་བྲག་གིས་རྣམ་

པ་ཉི་ཤུ་ཞེས་བྱ་བ་ཐ་དད་པར་འགྱུར་ཏེ་འདི་ལྟ་སྟེ་རིང་པོ་ལ་སོགས་པ་ཕྱ་ལེ་མ་ཡིན་པ་ལ་ཐུག་པའི་བར་དབྱིབས་རྣམ་པ་བརྒྱད་དང་ལྷག་མ་སྔོན་པོ་ལ་སོགས་པ་ཁ་དོག་རྣམ་པ་བཅུ་གཉིས་ཏེ་རྣམ་པ་ཉི་ཤུ་ཡིན་ནོ། །ནམ་མཁའ་ཁ་དོག་ཅིག་པ་ཞེས་བྱ་བ་ནི་གང་ཐག་རིང་པོ་ནས་

བཻ་ཌཱུརྱའི་རྩིག་པ་ལྟར་སྣང་བའོ། །ལྷམ་པ་ནི་རིལ་རིལ་པོའོ། །ཟླུམ་པོ་ནི་ལེབ་ལེབ་པོའོ། །མཐོན་པོ་ནི་གཟུགས་རགས་པ་ལ་སོགས་པའོ། །དམའ་བ་ནི་གཟུགས་དམའ་བའོ། །གང་ན་གཟུགས་རྣམས་སྣང་བའོ་ཞེས་བྱ་བ་སྨོས་པ་ནི་གྲིབ་མ་དང་མུན་པ་དག་ཐ་དད་དུ་བྱ་བ་

རབ་ཏུ་བསྟན་པའི་ཕྱིར་རོ། །རྣམ་པར་མ་ཕྱེའོ་ཞེས་བྱ་བ་ནི་བྱེ་བྲག་དུ་མ་ཕྱེའོ་ཞེས་བྱ་བའི་ཐ་ཚིག་གོ། །འདིར་འདི་དཔྱད་པར་བྱ་སྟེ་གལ་ཏེ་སྤྲིན་ལ་སོགས་པ་སྔོན་པོ་ལ་སོགས་པ་ཁ་དོག་བཞིའི་བྱེ་བྲག་ཁོ་ན་ཡིན་གྱི་དེ་དག་ལས་མ་གཏོགས་པ་མེད་ན། ཇི་ལྟར་འདི་ལ་ཁ་དོག་ལྗང་གུ་ལ་

སོགས་པ་མ་བཤད་པ་དེ་བཞིན་དུ་སྤྲིན་ལ་སོགས་པ་ཡང་བརྗོད་པར་མི་བྱའོ་ཞེ་ན། འདི་ནི་རྣམ་པར་འཆད་པར་བྱེད་པ་དག་གིས་མ་དཔྱད་དོ། །འདི་སྐད་དུ་བཤད་པར་མི་ནུས་ཏེ་སྤྲིན་ལ་སོགས་པ་དེ་དག་སྔོན་པོ་ལ་སོགས་པའི་བྱེ་བྲག་ཏུ་གྱུར་པ་ཡིན་ཡང་སྒྱུ་མའི་གཟུགས་དང་འདྲ་བའི་ཕྱིར་

ལོགས་ཤིག་ཏུ་བཤད་དོ། །འདི་ལྟར་དེ་དག་ཐག་རིང་པོ་ནས་ནི་རྩིག་པ་ལྟ་བུར་སྣང་ལ་བསྙེན་ན་ནི་མི་སྣང་སྟེ། ལ་ལ་འདི་སྙམ་དུ་ཅུང་ཟད་མེད་དོ་སྙམ་དུ་སེམས་པར་འགྱུར་བ་དང་། ཅི་འདི་ཡོད་པ་ཞིག་གམ་འོན་ཏེ་འཁྲུལ་པ་ཙམ་ཞིག་ཡིན་སྙམ་དུ་ཡིད་གཉིས་ཟ་བར་གྱུར་ན་མི་རུང་

བས། དེ་ལ་ཕྱིན་ཅི་ལོག་པ་དང་། ཐེ་ཚོམ་ཟ་བ་དགག་པའི་ཕྱིར་སྤྲིན་ལ་སོགས་པ་འདི་དག་བཤད་དེ་གཟུགས་ཀྱི་སྐྱེ་མཆེད་ཀྱི་ངོ་བོ་ཉིད་འདི་དག་ཡོད་པ་ཉིད་དོ་ཞེས་བྱ་བ་ཡིན་ནོ། །རིང་པོ་ལ་སོགས་པའི་ཕྱོགས་ཞེས་བྱ་བ་ནི་རིང་པོ་ལ་སོགས་པ་ཕྱ་ལེ་མ་ཡིན་པ་ལ་ཐུག་པའི་

Vol. 142 · folio 22a

ཕྱོགས་ཞེས་བྱ་བའི་ཐ་ཚིག་གོ། །ཕྱོགས་དེ་ཡང་གང་ཞེ་ན། ལུས་ཀྱི་རྣམ་པར་རིག་བྱེད་ཀྱི་ངོ་བོ་ཉིད་དོ་ཞེས་བྱ་བ་སྨོས་ཏེ། ལུས་ཀྱི་རྣམ་པར་རིག་བྱེད་ནི་རེས་འགའ་ནི་ཐུང་ངུ་ཡིན་ལ་རེས་འགའ་ནི་ཕྱ་ལེ་མ་ཡིན་པའི་བར་ཡིན་ནོ། །དེ་ཡང་ཇི་ལྟ་བུ་ཞིག་ཡིན་པར་ཁོང་

དུ་ཆུད་པར་བྱ་ཞེ་ན། དེ་ལ་དམིགས་པའི་སེམས་ཀྱིས་ཀུན་ནས་བསླང་བའི་ལུས་ཀྱི་ལས་གང་ཡིན་པ་དེ་རིང་པོ་ལ་སོགས་པ་ཕྱ་ལེ་མ་ཡིན་པ་ལ་ཐུག་པ་ལུས་ཀྱི་ལས་ཀྱི་ངོ་བོ་ཉིད་མ་ཡིན་པ་ནི་བརྩལ་བར་རྟོགས་པར་བྱའོ། །གཉི་གར་ཡོད་པ་ཡང་ཡོད་དེ་གཟུགས་ཀྱི་སྐྱེ་མཆེད་ལྷག་མའོ་ཞེས་

བྱ་བ་ནི་རིང་པོ་ལ་སོགས་པ་བསལ་བ་གང་ཡིན་པ་དང་། སྤྲིན་དང་དུ་བ་དང་རྡུལ་དང་ཁུག་རྣ་དག་གོ། །སྔོན་པོ་ལ་སོགས་པ་རིང་པོ་ལ་སོགས་པར་ཡོངས་སུ་ཆད་པར་སྣང་ཞེས་བྱ་བ་ནི་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། གྲིབ་མ་དང་མུན་པ་རྣམས་ཀྱི་དབྱིབས་རིང་པོ་ལ་

སོགས་པར་འཛིན་པ་སྟེ། དེ་ལྟ་བས་ན་འདི་དག་ཀྱང་མུ་གསུམ་པའི་ནང་དུ་འདུས་སོ་སྙམ་དུ་བསམས་པའོ། །ཇི་ལྟར་ན་རྫས་གཅིག་ལ་གཉི་གར་ཡོད་ཅེ་ན་ཞེས་བྱ་བ་ནི་ཇི་ལྟར་རྫས་གཅིག་གི་ཁ་དོག་དང་དབྱིབས་ཀྱི་བདག་ཉིད་དུ་འགྱུར་ཞེས་བྱ་བ་ཡིན་ཏེ། གྲུབ་པའི་མཐའ་

ལས་ནི་འདི་སྐད་དུ་དབྱིབས་ཀྱི་གཟུགས་ནི་ཁ་དོག་གི་གཟུགས་ལས་རྫས་གཞན་ཡིན་ནོ་ཞེས་འབྱུང་ངོ་། །དེ་ལ་གཉི་ག་མངོན་པའི་ཕྱིར་ཏེ་ཞེས་བྱ་བ་ནི་དེ་ལ་ཁ་དོག་དང་དབྱིབས་འཛིན་པའི་ཕྱིར་རོ། །ཡོད་པ་འདི་ནི་ཤེས་པའི་དོན་ཡིན་གྱི་ཡོད་པའི་དོན་ནི་མ་ཡིན་ནོ་ཞེས་བྱ་བ་ནི་

བྱེ་བྲག་དུ་སྨྲ་བ་དག་དེ་ལ་ཤེས་པ་རྣམ་པ་གཉི་གར་འཇུག་པ་ཡིན་གྱི་རྫས་གཅིག་ལ་མཚན་ཉིད་གཉི་ག་དང་ལྡན་པ་ནི་མ་ཡིན་ནོ་ཞེས་ལན་འདེབས་པ་ཡིན་ནོ། །འོ་ན་ནི་ལུས་ཀྱི་རྣམ་པར་རིག་བྱེད་ལ་ཡང་ཐལ་བར་འགྱུར་རོ་ཞེས་ཟེར་བ་ནི་སློབ་དཔོན་ཡིན་ཏེ་ལུས་ཀྱི་རྣམ་པར་རིག་

བྱེད་འཛིན་པ་ན་ཁ་དོག་འཛིན་པ་མི་འབྱུང་བ་ནི་མ་ཡིན་ནོ། །བྱེ་བྲག་ཏུ་སྨྲ་བ་རྣམས་ཀྱི་བསམ་པ་ནི་སྔོན་པོ་ལ་སོགས་པ་འམ་སྣང་བ་ལ་སོགས་པ་ཙམ་འཛིན་པ་དེ་ནི་དབྱིབས་ལ་མི་ལྟོས་པར་འབྱུང་ལ་ལུས་ཀྱི་རྣམ་པར་རིག་བྱེད་འཛིན་པ་ནི་ཁ་དོག་ལ་མི་ལྟོས་པར་འབྱུང་གི་གཟུགས་

Vol. 142 · folio 22b

ཀྱི་སྐྱེ་མཆེད་ལྷག་མ་འཛིན་པ་ནི་ཁ་དོག་དང་དབྱིབས་ལ་ལྟོས་ནས་འབྱུང་ངོ་སྙམ་པ་འདི་ཡིན་ནོ། །མདོ་སྡེ་པའི་ཕྱོགས་པའི་སློབ་དཔོན་འདི་ནི་དོན་འདི་མི་ལེན་ཏེ། དབྱིབས་འཛིན་པ་འདི་ནི་མིག་གིས་མ་ཡིན་གྱི་འདི་ནི་ཡིད་ཀྱིས་ཀུན་བརྟགས་པ་ཡིན་ནོ། །ཁ་དོག་མ་བཟུང་བར་དབྱིབས་འཛིན་

པ་མེད་པའི་ཕྱིར་ཁ་དོག་གནས་པ་དག་ཁོ་ན་དབྱིབས་ཡིན་གྱི་དབྱིབས་ཞེས་བྱ་བའི་རྫས་ནི་ཅུང་ཟད་ཀྱང་མེད་དེ། འདི་ནི་ལས་ཀྱི་མཛོད་ཀྱི་གནས་ནས་སྤྱོད་པར་འགྱུར་རོ། །སེམས་ཅན་དང་སེམས་ཅན་མ་ཡིན་པར་སྟོན་པ་ཞེས་བྱ་བ་ནི་ངག་གི་རྣམ་པར་རིག་བྱེད་ཀྱི་སྒྲ་དང་དེ་ལས་མ་གཏོགས་པ་ཞེས་

བྱ་བའི་ཐ་ཚིག་གོ། །ཁ་ཅིག་ནི་སེམས་ཅན་དང་སེམས་ཅན་མ་ཡིན་པར་བགྲང་བ་ཞེས་འདོན་ཏེ་འདིར་ཡང་དོན་ནི་འདི་ཉིད་ཡིན་པར་བསམས་པའོ། །གལ་ཏེ་དོན་སེམས་ཅན་དང་སེམས་ཅན་མ་ཡིན་པའི་རྒྱུད་ལས་བྱུང་བ་ཞེས་བྱ་བ་འདི་ཡིན་པར་འདོད་པར་གྱུར། དེ་ནི་འོག་ནས་འབྲེལ་པས་འདི་

སྐད་དུ། སེམས་ཅན་དུ་སྟོན་པ་ནི་ངག་གི་རྣམ་པར་རིག་བྱེད་ཀྱི་སྒྲའོ། །གཞན་ནི་སེམས་ཅན་དུ་སྟོན་པ་མ་ཡིན་ནོ་ཞེས་འབྱུང་བ་དགོས་པ་མེད་པ་ཉིད་དོ། །དེ་ལྟ་བས་ན་གདོན་པ་ནི་སེམས་ཅན་དང་སེམས་ཅན་མ་ཡིན་པར་སྟོན་པ་ཞེས་བྱ་བར་གསལ་བར་གདོན་པར་བྱའོ། །ཟིན་པའི་འབྱུང་བ་

ཆེན་པོའི་རྒྱུ་ལས་བྱུང་བ་ཞེས་བྱ་བ་ནི་ད་ལྟར་གྱི་འབྱུང་བ་ཆེན་པོ་དབང་པོ་དང་ཐ་མི་དད་པར་འཇུག་པ་དག་ནི་ཟིན་པ་ཡིན་ལ་གཞན་དག་ནི་མ་ཟིན་པ་ཡིན་ནོ། །འདི་ལ་རྒྱུ་ཟིན་པའི་འབྱུང་བ་ཆེན་པོ་དག་ཡོད་པས་ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བའོ། །འདི་ལྟ་སྟེ་ལག་པ་དང་ངག་གི་སྒྲ་ལྟ་

བུའོ་ཞེས་བྱ་བ་ནི་ཕྱིའི་སྤྲུལ་པ་མི་དང་འདྲ་བ་ཡང་ལག་པ་དང་ངག་གི་སྒྲ་འབྱིན་པར་འགྱུར་ཏེ་ཡང་དབང་པོ་དང་ཐ་དད་པར་འབྱུང་བའི་ཕྱིར་མ་ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བའི་ངོ་བོ་ཉིད་ཡིན་པར་ཁོང་དུ་ཆུད་པར་བྱའོ། །དེ་ནི་སྤྲུལ་པ་པོའི་དབང་གིས་མིའི་ཚིག་ཀྱང་སྨྲ་བར་བྱེད་དེ།

གཅིག་པོ་སྨྲ་བར་བྱེད་ན་ནི། །སྤྲུལ་པ་ཐམས་ཅད་སྨྲ་བར་འགྱུར། །གཅིག་པོ་མི་སྨྲར་གྱུར་ན་ནི། །སྤྲུལ་པ་ཐམས་ཅད་མི་སྨྲར་འགྱུར། །ཞེས་འབྱུང་སྟེ་ཕྱིའི་སྤྲུལ་པའི་སྒྲ་དེ་ཡང་མ་ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བ་ཡིན་པས་མི་གཟུང་ངོ་། །འདི་ལྟ་སྟེ་རླུང་དང་ནགས་

Vol. 142 · folio 23a

ཚལ་དང་ཆུའི་སྒྲ་ལྟ་བུའོ་ཞེས་བྱ་བ་ལ། འདི་ལྟ་སྟེ་ཞེས་བྱ་བའི་སྒྲ་ནི་དཔེར་བརྗོད་པ་ཡིན་པའི་ཕྱིར་རོ། །སེམས་ཅན་དུ་སྟོན་པ་ནི་ངག་གི་རྣམ་པར་རིག་བྱེད་ཀྱི་སྒྲའོ། །གཞན་ནི་སེམས་ཅན་དུ་སྟོན་པ་མ་ཡིན་པའོ་ཞེས་བྱ་བ་ནི་སེམས་ཅན་ཡིན་པར་སྟོན་པ་

ནི་སེམས་ཅན་དུ་སྟོན་པ་སྟེ་ངག་གི་རྣམ་པར་རིག་བྱེད་ཀྱི་སྒྲས་ནི་འདི་ནི་སེམས་ཅན་ཡིན་ནོ་ཞེས་བྱ་བར་ཤེས་པར་བྱེད་དོ། །ངག་གི་རྣམ་པར་རིག་བྱེད་ཀྱི་སྒྲ་དེ་ལས་མ་གཏོགས་པའི་སྒྲ་གཞན་ནི་ལག་པའི་སྒྲའི་བར་ཡང་སེམས་ཅན་དུ་སྟོན་པ་མ་ཡིན་པ་ཡིན་ན་སེམས་ཅན་མ་ཡིན་པའི་རྒྱུད་

ལས་སྐྱེས་པ་ལྟ་སྨོས་ཀྱང་ཅི་དགོས་ཞེས་རྣམ་པར་བཤད་པར་འགྱུར་རོ། །དེ་ལྟར་ན་ཟིན་པའི་འབྱུང་བའི་རྒྱུ་ལས་བྱུང་བ་ནི་སེམས་ཅན་དུ་སྟོན་པ་ཡང་ཡིན་ལ་སེམས་ཅན་དུ་སྟོན་པ་མ་ཡིན་པ་ཡང་ཡིན་ནོ། །མ་ཟིན་པའི་འབྱུང་བའི་རྒྱུ་ལས་བྱུང་བ་ཡང་སྤྲུལ་པའི་སྒྲ་ངག་གི་རྣམ་པར་

རིག་བྱེད་ཀྱི་ངོ་བོ་ཉིད་ནི་སེམས་ཅན་དུ་སྟོན་པ་ཡིན་ལ། དེ་ཉིད་ཀྱི་ལག་པའི་སྒྲ་དང་རླུང་དང་ནགས་ཚལ་ལ་སོགས་པའི་སྒྲ་ནི་སེམས་ཅན་དུ་སྟོན་པ་མ་ཡིན་པ་ཡིན་པས་སྒྲ་རྣམ་པ་བཞིའོ། །ཡང་ཡིད་དུ་འོང་བ་དང་ཡིད་དུ་མི་འོང་བའི་བྱེ་བྲག་གིས་རྣམ་པ་བརྒྱད་ཡིན་ནོ། །ཇི་ལྟར་ཁ་

དོག་གི་རྡུལ་ཕྲ་རབ་གཅིག་ལ་ཞེས་བྱ་བ་ནི་སྒྲ་ནི་རྒྱུར་བྱས་པའི་གཟུགས་ཡིན་པའི་ཕྱིར་འབྱུང་བ་བཞིན་མཚན་ཉིད་རྒྱུར་བྱས་པ་མ་ཡིན་ཏེ་ཁ་དོག་གི་རྡུལ་ཕྲ་རབ་བཞིན་ནོ་སྙམ་དུ་བསམས་པའོ། །རོ་ནི་རྣམ་དྲུག་ཅེས་བྱ་བ་ནི་གཞིའི་རིགས་དྲུག་གི་དབང་དུ་བྱས་ནས་དེ་སྐད་བཤད་ཀྱི་རོ་

དྲུག་ཕན་ཚུན་ཕྲད་པའི་ཁྱད་པར་ལས་ནི་རོའི་རྣམ་པ་རབ་ཏུ་མང་པོར་འགྱུར་ཏེ། སྨན་དཔྱད་ཙ་ར་ཀ་ལས། གཅིག་དང་གཉིས་དང་གསུམ་དང་བཞི་དང་ལྔ་དང་དྲུག་ཕྲད་པའི་སྦྱོར་བ་ལས་རོ་དྲུག་ཅུ་རྩ་གསུམ་བསྟན་ཏོ། །དྲི་མཉམ་པ་དང་མི་མཉམ་པའི་ཕྱིར་ཞེས་བྱ་བ་ནི་དྲི་ཤས་ཆེ་བ་མ་ཡིན་པ་

དང་ཤས་ཆེ་བའི་ཕྱིར་རོ་ཞེས་བྱ་བའི་ཐ་ཚིག་སྟེ་ཕྱོགས་འདི་ལ་ནི་དྲི་རྣམ་པ་གཉིས་སུ་འདོད་དོ། །བསྟན་བཅོས་ལས་ནི་དྲི་ཞིམ་པ་དང་དྲི་ང་བ་དང་། དྲི་མཉམ་པའོ་ཞེས་རྣམ་པ་གསུམ་འབྱུང་ངོ་ཞེས་བྱ་བ་ནི་དྲི་མཉམ་པ་ནི་གཞན་གསུམ་པ་ཡིན་ནོ་ཞེས་བྱ་བའི་ཐ་ཚིག་གོ། །གཞན་དག་

Vol. 142 · folio 23b

ན་རེ་དྲི་མཉམ་པ་ཞེས་བྱ་བ་ནི་དེ་དག་ཉིད་ཀྱི་ཕྱོགས་གཅིག་ཡིན་པས་དོན་ནི་དེ་ཁོ་ན་ཡིན་གྱི་སྒྲ་ཙམ་ཞིག་ཐ་དད་པར་ཟད་དོ་ཞེས་ཟེར་རོ། །གྲང་བ་ནི་དྲོ་བ་འདོད་པར་བྱེད་པའོ་ཞེས་བྱ་བ་ནི་སྲིད་པའི་དབང་དུ་བྱས་ནས་འདི་སྐད་དུ་ཆོས་གང་ཞིག་དྲོ་བ་འདོད་པར་བྱེད་པ་དེ་ནི་གྲང་བ་ཞེས་བྱ་

བར་རྒྱུར་བྱས་པའི་གཟུགས་ཡིན་ནོ་ཞེས་བཤད་ཀྱི། སོས་ཀ་དེས་དེ་མི་བྱེད་དུ་ཟིན་ཀྱང་དེ་དང་རིགས་མཐུན་པའི་ཕྱིར་གྲང་བ་ཁོ་ན་ཡིན་པར་ཁོང་དུ་ཆུད་པར་བྱའོ། །རྒྱུ་ལ་འབྲས་བུ་བཏགས་པའི་ཕྱིར་ཏེ་ཞེས་བྱ་བ་ནི་བཀྲེས་པ་ནི་ཟས་འདོད་པ་སྟེ་སེམས་ལས་བྱུང་བའི་ཆོས་ཡིན་

ལ་དེའི་རྒྱུ་ལྟོའི་ནང་ན་ལུས་ཀྱི་དབང་པོས་རེག་པར་བྱ་བ་གང་ཡིན་པ་དེ་ནི་བཀྲེས་པ་ཞེས་བྱ་བ་རྒྱུར་བྱས་པའི་གཟུགས་ཡིན་ནོ། །དཔེར་ན། སངས་རྒྱས་རྣམས་ནི་འབྱུང་བ་བདེ། །ཞེས་བྱ་བ་ལ་སོགས་པ་ནི་སངས་རྒྱས་འབྱུང་བ་མངོན་པར་མཐོ་བ་དང་ངེས་པར་ལེགས་པའི་རྒྱུ་

ཡིན་པའི་ཕྱིར་བདེ་བ་ཞེས་བྱ་བ་ལྟར་འདི་ཡང་དེ་དང་འདྲ་བ་སྟེ་དེ་བཞིན་དུ་སྐོམ་པ་ལ་ཡང་བརྗོད་པར་བྱའོ། །བསྩགས་པ་དག་ལ་ནི་འཇལ་ལོ་ཞེས་བྱ་བ་ནི་ལྕི་བ་ཉིད་ཕྲ་མོ་ཡོད་པའི་ཕྱིར་རོ་སྙམ་དུ་བསམས་པའོ། །འདིར་གཟུགས་ན་སྤྱོད་པའི་གོས་ལ་སོགས་པ་ནི་རྟེན་

དང་བརྟེན་པ་ཡོད་པའི་ཕྱིར་ལྕི་བ་ཉིད་དང་བཅས་པ་ཡིན་ཏེ་དཔེར་ན་རྫ་མ་དང་རྒྱ་ཤུག་ལྟ་བུའོ་ཞེས་རྗེས་སུ་དཔག་པ་ཡིན་ནོ། །ཕན་པར་བྱེད་པ་ནི་ཡོད་དོ་ལོ་ཞེས་བྱ་བ་ལ། ལོ་ཞེས་བྱ་བའི་སྒྲ་ནི་བྱེ་བྲག་ཏུ་སྨྲ་བའི་གཞུང་ལུགས་བསྟན་པའི་ཕྱིར་ཏེ། རང་གི་གཞུང་ལུགས་ནི་དེ་ན་ཏིང་ངེ་

འཛིན་ཁོ་ན་ཕན་པར་བྱེད་པ་ཡིན་པས་དེ་ན་གྲང་བ་བརྟགས་པས་ཅི་ཞིག་བྱ་ཞེས་བྱ་བ་ཡིན་ནོ། །གང་གི་ཚེ་དེའི་རྣམ་པ་བྱེ་བྲག་ཏུ་གཅོད་པར་འགྱུར་བ་ནའོ་ཞེས་བྱ་བ་ནི་གང་གི་ཚེ་སྔོན་པོ་ལ་སོགས་པའི་རྣམ་པའི་མཚན་མ་ལ་གཏོད་པ་ནའོ། །རྣ་བ་ལ་སོགས་པའི་རྣམ་པར་ཤེས་པ་

ཡང་དེ་བཞིན་དུ་རིག་པར་བྱའོ་ཞེས་བྱ་བ་ནི་གང་འདི་སྒྲ་རྣམ་པ་མང་པོ་བཤད་པ་དེ་ལ་རེས་འགའ་ནི་རྫས་གཅིག་གིས་རྣ་བའི་རྣམ་པར་ཤེས་པ་བསྐྱེད་དེ། གང་གི་ཚེ་དེའི་རྣམ་པ་བྱེ་བྲག་ཏུ་གཅོད་པར་འགྱུར་བ་ནའོ། །རེས་འགའ་ནི་མང་པོ་སྟེ་གང་གི་ཚེ་བྱེ་བྲག་ཏུ་མི་གཅོད་པ་ན་སྟེ་དཔེར་

Vol. 142 · folio 24a

ན་རྔའི་སྒྲའི་ཚོགས་དང་སྒྲ་ཆེན་པོ་དང་སྒྲ་གདངས་སྙན་པ་དུ་མའི་ངོ་བོ་ཉན་པ་ལྟ་བུའོ། །དེ་བཞིན་དུ་སྣ་དང་ལྕེའི་རྣམ་པར་ཤེས་པ་དག་ཀྱང་རང་གི་ཡུལ་དང་སྦྱར་བར་བྱའོ། །ཤིན་ཏུ་མང་ན་འབྱུང་བ་ཆེན་པོ་བཞི་དག་ཀྱང་འཇམ་པ་ཉིད་ལ་སོགས་པ་གཅིག་དང་

རེག་བྱ་ལྔས་བསྐྱེད་དོ་ཞེས་བྱ་བ་ཇི་ལྟ་བུ་ཞེ་ན། རེས་འགའ་རྫས་གཅིག་གིས་བསྐྱེད་དེ་གང་གི་ཚེ་དེའི་རྣམ་པ་བྱེ་བྲག་ཏུ་གཅོད་པ་ནའོ། །རེས་འགའ་ནི་གཉིས་ནས་ལྔའི་བར་གྱིས་ཏེ་གང་གི་ཚེ་བྱེ་བྲག་ཏུ་མི་གཅོད་པ་ནའོ། །འཇམ་པ་ཉིད་ལ་སོགས་པ་གཅིག་དང་ཞེས་བྱ་བ་འདི་ལ་

གཏན་ཚིགས་ཅི་ཡོད་ཅེ་ན་རྩུབ་པ་ཉིད་ལ་སོགས་པ་ནི་འབྱུང་བ་བཞི་ཚན་གཞན་ལ་བརྟེན་པའི་ཕྱིར་རོ། །དེ་ལྟར་ན་སྤྱི་ལ་དམིགས་པའི་ཕྱིར་ཞེས་བྱ་བ་རྒྱས་པར་འབྱུང་བ་ནི་ཇི་ལྟར་ཡིད་ཀྱི་རྣམ་པར་ཤེས་པ་མིག་དང་རྣ་བ་དང་སྣ་དང་ལྕེ་དང་ལུས་ཀྱི་རྣམ་པར་ཤེས་པའི་དམིགས་པ་དག་

ཕྱིར་བསྡུས་ཏེ་འཛིན་པར་བྱེད་པས་དེ་སྤྱིའི་མཚན་ཉིད་ཀྱི་ཡུལ་ཅན་དུ་རྣམ་པར་གཞག་པ་དེ་བཞིན་དུ། སྔོན་པོ་དང་སེར་པོ་དང་དམར་པོ་དང་དཀར་པོ་ལ་དམིགས་པའི་མིག་གི་རྣམ་པར་ཤེས་པ་བཞི་པོ་དག་ཀྱང་མིག་གི་རྣམ་པར་ཤེས་པ་གཅིག་གིས་དམིགས་པ་བཞི་པོ་དེ་དག་དང་ཆེས་མང་

པོ་དག་སྤྱིར་བསྡུས་ཏེ་འཛིན་པར་བྱེད་པའི་ཕྱིར་དེའི་སྤྱིའི་མཚན་ཉིད་ཀྱི་ཡུལ་ཅན་དུ་འགྱུར་ཏེ། །འདིའི་དམིགས་པ་གཟུགས་ཀྱི་སྐྱེ་མཆེད་སྤྱིའི་མཚན་ཉིད་ཡིན་པའི་ཕྱིར་རོ། །རྣ་བ་དང་སྣ་དང་ལྕེ་དང་ལུས་ཀྱི་རྣམ་པར་ཤེས་པ་རྣམས་ཀྱང་རང་གི་ཡུལ་དག་དང་སྦྱར་བར་བྱའོ། །

སྐྱེ་མཆེད་ཀྱི་རང་གི་མཚན་ཉིད་ཀྱི་ཞེས་བྱ་བ་ནི་སྐྱེ་མཆེད་རྣམས་ཀྱི་རང་གི་མཚན་ཉིད་ནི་སྐྱེ་མཆེད་ཀྱི་རང་གི་མཚན་ཉིད་དེ་མིག་གི་རྣམ་པར་ཤེས་པས་ཤེས་པར་བྱ་བ་ཉིད་ལ་སོགས་པའམ་གཟུགས་ཀྱི་སྐྱེ་མཆེད་ཉིད་ལ་སོགས་པའོ། །གསུང་རབ་ལས་ནི་རྣམ་པར་ཤེས་པའི་ཚོགས་

ལྔ་པོ་དག་ནི་དེ་དག་གི་རང་གི་མཚན་ཉིད་ཀྱི་ཡུལ་ཅན་དུ་བཞེད་དོ། །རྫས་ཀྱི་རང་གི་མཚན་ཉིད་ཀྱི་ཡུལ་ཅན་དུ་བཞེད་པ་ནི་མ་ཡིན་ནོ་ཞེས་བྱ་བར་སྐབས་དང་སྦྱར་རོ། །སྔོན་པོ་ལ་སོགས་པ་རྫས་རྣམས་ཀྱི་རང་གི་མཚན་ཉིད་ནི་མིག་གི་རྣམ་པར་ཤེས་པ་ལ་སོགས་པ་སྔོན་པོ་ལ་

Vol. 142 · folio 24b

སོགས་པའི་རྣམ་པ་ཅན་གྱིས་རྣམ་པར་ཤེས་པར་བྱ་བ་ཉིད་དམ་སྔོན་པོ་ཉིད་ལ་སོགས་པ་ཡིན་ཏེ་རྣམ་པར་ཤེས་པའི་ཚོགས་ལྔ་པོ་དག་དེ་དག་གི་རང་གི་མཚན་ཉིད་ཀྱི་ཡུལ་ཅན་ཡིན་པར་ནི་མི་འདོད་པས་ཉེས་པ་མེད་དོ། །ཅིག་ཅར་དུ་ཡུལ་དང་ཕྲད་ན་ཞེས་བྱ་བ་ནི་ལུས་དང་ལྕེའི་དབང་

པོ་དག་ཅིག་ཅར་ཡུལ་དང་ཕྲད་པར་གྱུར་ན་རྣམ་པར་ཤེས་པ་གཉིས་ཅིག་ཅར་དུ་འབྱུང་མི་སྲིད་པས་དེའི་ཕྱིར་རྣམ་པར་ཤེས་པ་གང་སྔར་སྐྱེ་ཞེ་ན་ཞེས་འདྲི་བར་བྱེད་དོ། །གང་གི་ཡུལ་ཤས་ཆེ་བའོ་ཞེས་བྱ་བ་ནི་གལ་ཏེ་ལུས་ཀྱི་དབང་པོའི་ཡུལ་ཤས་ཆེ་ན་ལུས་ཀྱི་རྣམ་པར་ཤེས་པ་ལྔར་སྐྱེའོ། །

ཇི་སྟེ་ལྕེའི་དབང་པོའི་ཡུལ་ཤས་ཆེ་ན་ལྕེའི་རྣམ་པར་ཤེས་པ་ལྔར་སྐྱེའོ། །ཡུལ་མཉམ་པ་དང་ཕྲད་ན་ནི་ཞེས་བྱ་བ་ནི་ཡུལ་འདྲ་ན་ཞེས་བྱ་བའི་ཐ་ཚིག་གོ། །ལྕེའི་རྣམ་པར་ཤེས་པ་ལྔར་སྐྱེ་བ་ཅིའི་ཕྱིར་ཞེ་ན། ཟ་བར་འདོད་པས་རྒྱུད་གཏད་པའི་ཕྱིར་ཏེ་ལུས་ཟས་ཟ་བར་འདོད་པའི་གཞོལ་

བའི་ཕྱིར་རོ་ཞེས་བྱ་བའི་ཐ་ཚིག་གོ། །ལྕེའི་རྣམ་པར་ཤེས་པ་ལྔར་སྐྱེའོ་ཞེས་སྨོས་པས་དོན་གྱིས་ན་ལུས་ཀྱི་རྣམ་པར་ཤེས་པ་ནི་ཕྱིས་སྐྱེའོ་ཞེས་བཤད་པར་འགྱུར་རོ། །དེས་ནི་འདིར་དཔྱད་པར་བྱ་སྟེ། ཅི་ལུས་ཀྱི་ཡུལ་གྱི་སྐད་ཅིག་མ་གང་ལྕེའི་ཡུལ་གྱི་སྐད་ཅིག་མ་དང་ལྷན་ཅིག་པར་གྱུར་

པ་འདས་པ་གང་ཡིན་པ་དེ་ལ་ལུས་ཀྱི་རྣམ་པར་ཤེས་པ་སྐྱེའམ། འོན་ཏེ་རྣམ་པར་ཤེས་པའི་ཡུལ་གྱི་སྐད་ཅིག་མ་གཞན་ཞིག་ལ་སྐྱེ་ཞེ་ན། སྨྲས་པ་གཞན་ལའོ། །ཇི་ལྟར་དམིགས་པ་ངེས་པ་ཉམས་པར་མི་འགྱུར་ཞེ་ན། འདི་ནི་ཉེས་པ་མེད་དེ་ཡུལ་དེ་ལས་དམིགས་པའི་རྣམ་པར་ཤེས་

པ་གང་ཡིན་པ་དེ་ནི་སོ་སོར་བརྟགས་པ་མ་ཡིན་པས་འགོག་པ་དེ་དང་འདྲ་བའི་ལུས་ཀྱི་རྣམ་པར་ཤེས་པ་གཞན་ཞིག་ནི་སྐྱེའོ། །དེའི་ཕྱིར་རིགས་མཐུན་པས་གཅིག་པ་ཉིད་དུ་བཏགས་པའི་ཕྱིར་ཕྱིས་སྐྱེའོ་ཞེས་བྱའོ། །རྣམ་པར་རིག་བྱེད་མ་ཡིན་པ་བསྟན་པའི་སྐབས་གཏམ་སྤྲོས་པ་

རྣམ་པ་དུ་མ་ཞིག་གིས་བར་དུ་ཆོད་པས་བརྗེད་པ་བཞིན་ཏེ། དེའི་ཕྱིར་དབང་པོ་ལྔ་དང་དོན་ལྔ་དང་དེ་དག་ཇི་ལྟར་འཛིན་པ་ཡང་བཤད་ཟིན་ཏོ་ཞེས་བྱ་བ་འདི་ཉེ་བར་འགོད་པར་བྱེད་དེ། རེས་འགའ་ནི་རྫས་གཅིག་གིས་མིག་གི་རྣམ་པར་ཤེས་པ་བསྐྱེད་དོ་ཞེས་བྱ་བ་ལ་སོགས་པས་སོ། །

Vol. 142 · folio 25a

དེ་དག་ཇི་ལྟར་འཛིན་པ་ཞེས་བྱ་བ་ནི་ལས་ཀྱི་དྲུག་པ་ཡིན་ནོ། །ད་ནི་རྣམ་པར་རིག་བྱེད་མ་ཡིན་པ་བསྙད་པར་བྱ་བ་དེ་བརྗོད་པར་བྱ་སྟེ་ཞེས་བྱ་བ་ནི། གཟུགས་ནི་དབང་པོ་ལྔ་དང་དོན། །ལྔ་དང་རྣམ་རིག་བྱེད་མིན་ཉིད། །ཅེས་འབྱུང་བ་དེའི་ཕྱིར་རྣམ་པར་རིག་

བྱེད་མ་ཡིན་པ་ཁོ་ན་ལུས་ཏེ། དེའི་མཚན་ཉིད་བསྟན་པའི་སྐབས་ལ་བབ་པས་བརྗོད་པར་བྱའོ། །ཁ་ཅིག་ནི་འགྲེལ་པ་སེམས་གཡེངས་པ་ཞེས་བྱ་བར་འདོན་ཏེ། འདོན་པ་འདི་ལ་ནི་མདོའི་ཚིག་འདི་ལྟར་རྣམ་པར་སྦྱར་བར་བྱའོ། །འདི་ལ་སེམས་གཡེངས་པ་འམ་སེམས་མེད་པ་ཡོད་

པས་ན། གཡེངས་དང་སེམས་མེད་པའོ། །རྣམ་པ་ཅིག་ཏུ་ན་འདི་ལ་སེམས་གཡེངས་པ་དང་སེམས་མེད་པ་ཡོད་པས་གཡེངས་པ་དང་སེམས་མེད་པ་སྟེ་སེམས་ཞེས་བྱ་བའི་སྒྲ་གཅིག་མི་མངོན་པར་བྱས་པ་ཡིན་ནོ། །ཁ་ཅིག་ནི་འདི་སྐད་དུ་གཡེངས་པ་དང་ཞེས་བྱ་བར་འདོན་ཏེ། འདོན་

པ་འདི་ལ་ནི་ཚིག་ཕྱི་མ་གཉིས་འབྲུ་མང་པོ་བར་བྱས་ལ་མཇུག་ཏུ་འདི་སྐད་ཅེས་གཡེངས་པ་དང་སེམས་མེད་པ་ནི་གཡེངས་པ་དང་སེམས་མེད་པའོ་ཞེས་ཚིག་རྣམ་པར་སྦྱར་རོ། །གཡེངས་པ་ནི་གང་ཟག་སྟེ་སེམས་གཡེངས་པ་ཞེས་བྱ་བའི་ཐ་ཚིག་གོ། །སེམས་གཡེངས་པ་ཞེས་བྱ་བ་ནི་དེ་ལས་

གཞན་པའི་སེམས་ཀྱི་ཡང་ཡིན་པའོ་ཞེས་བྱ་བ་ནི་རྣམ་པར་རིག་བྱེད་མ་ཡིན་པའི་སེམས་ལས་གཞན་པའི་སེམས་ཀྱི་ཡིན་པ་ཞེས་བྱ་བའི་ཐ་ཚིག་གོ། །འདི་ལྟ་སྟེ་དགེ་བའི་རྣམ་པར་རིག་བྱེད་མ་ཡིན་པ་ཀུན་ནས་སློང་བར་བྱེད་པའི་སེམས་ནི་དགེ་བ་ཡིན་ལ། དེ་ལས་གཞན་པའི་སེམས་ནི་མི་

དགེ་བའི་སེམས་དང་ལུང་དུ་མ་བསྟན་པའི་སེམས་ཡིན་ཏེ་འདིར་སེམས་གཡེངས་པ་ནི་དེ་ཡིན་པར་བསམས་པ་ཡིན་ནོ། །མི་དགེ་བའི་རྣམ་པར་རིག་བྱེད་མ་ཡིན་པ་ཀུན་ནས་སློང་བར་བྱེད་པའི་སེམས་ནི་མི་དགེ་བ་ཡིན་ལ་དེ་ལས་གཞན་པའི་སེམས་ནི་དགེ་བ་དང་ལུང་དུ་མ་བསྟན་པའི་སེམས་ཡིན་

ལ་འདིར་ཡང་སེམས་གཡེངས་པ་ནི་དེ་ཡིན་པར་རིག་པར་བྱ་སྟེ་དེ་ལས་གཞན་པའི་སེམས་དེའི་ཡང་ཡིན་ནོ། །སེམས་མེད་པའི་ཡང་ཞེས་བྱ་བ་ནི་འདུ་ཤེས་མེད་པ་དང་འགོག་པའི་སྙོམས་པར་ཞུགས་པའི་ཡང་ཡིན་པའོ། །ཡང་ཞེས་བྱ་བའི་སྒྲས་ནི་མ་གཡེངས་པ་སེམས་དང་བཅས་པའི་ཡང་ཡིན་ནོ་

Vol. 142 · folio 25b

ཞེས་བྱ་བར་མངོན་ནོ་ཞེས་བྱ་བ་ནི་གང་ཟག་འདི་དག་ལས་མ་གཏོགས་པ་གསུམ་པའི་ཡང་ཡིན་ནོ་ཞེས་བྱ་བའི་ཐ་ཚིག་གོ། །དགེ་བ་དང་མི་དགེ་ཞེས་བྱ་བ་ནི་དགེ་བ་དང་མི་དགེ་བ་ཁོ་ནའོ་ཞེས་ངེས་པར་བཟུང་བ་སྟེ་ལུང་དུ་མ་བསྟན་པ་མེད་དོ་ཞེས་བྱ་བའི་ཐ་ཚིག་གོ། །འདིས་ནི་མིག་ལ་

སོགས་པ་ཡང་གསལ་བར་རིག་པར་བྱའོ། །རྗེས་འབྲེལ་གང་ཞེས་བྱ་བ་ནི་ཆོས་གང་ཞིག་རྟག་ཏུ་རྒྱུན་དང་ལྡན་པ་ཞེས་བྱ་བའི་ཐ་ཚིག་སྟེ་རྒྱུན་གྱིས་ཉེ་བར་མཚོན་པར་བྱ་བ་ཡིན་པའི་ཕྱིར་རྒྱུན་གྱིས་རྒྱུན་ཅན་སྟོན་པར་བྱེད་དོ། །རྣམ་པ་གཅིག་ཏུ་ན་རྗེས་སུ་འབྲེལ་བར་འགྱུར་བས་རྗེས་འབྲེལ་

ལོ། །རྒྱུན་ཞེས་བྱ་བ་རྣམ་པར་བཤད་པའི་ཚིག་ནི་འབྲུ་མང་པོ་བར་བྱས་པ་ཡིན་ཏེ། འདི་ལ་རྒྱུན་འབྱུང་བའམ་མཆོག་ཡོད་པས་དེ་ཉིད་རྒྱུན་གྱི་ཆོས་སུ་བསྟན་གྱི་དེའི་རྒྱུན་ནི་མ་ཡིན་ནོ། །ཐོབ་པའི་རྒྱུན་ཡང་འདི་ལྟ་བུ་ཡོད་པས་ཞེས་བྱ་བ་ནི་དེའི་ཐོབ་པ་ཡང་གཡེངས་པ་དང་སེམས་མེད་

པ་ལས་ཡང་རྒྱུན་ཆགས་པ་ཡིན་ལ། དགེ་བ་དང་མི་དགེ་བ་ཉིད་ཀྱང་ཡིན་པས་དེ་ལས་ཁྱད་པར་དུ་བྱ་བའི་ཕྱིར། འབྱུང་བ་ཆེ་རྣམས་རྒྱུར་བྱས་པ། །ཞེས་བྱ་བ་སྨོས་ཏེ། འབྱུང་བ་ཆེན་པོ་རྒྱུ་ལས་བྱུང་བ་ཞེས་བྱ་བའི་ཐ་ཚིག་གོ། །དཔེར་ན་བུད་ཤིང་རྒྱུར་བྱས་ནས་མེ་འབྱུང་ངོ་

ཞེས་བྱས་ན་བུད་ཤིང་གི་རྒྱུ་ལས་བྱུང་བའི་མེ་ཞེས་བྱ་བར་གོ་བ་དང་འདྲའོ། །བསྐྱེད་པ་ལ་སོགས་པ་རྒྱུའི་ངོ་བོ་ཡིན་པའི་ཕྱིར་རོ་ཞེས་བྱ་བ་ནི། སྐྱེད་དང་རྟེན་དང་གནས་པ་དང་། །རྟོན་པ་དང་ནི་འཕེལ་བའི་ཕྱིར། །ཞེས་བྱ་བ་ཡིན་ཏེ་སྐྱེད་པའི་རྒྱུ་ནི་དེ་དག་ལས་སྐྱེ་བའི་ཕྱིར་རོ། །རྟེན་

གྱི་རྒྱུ་ནི་སྐྱེས་ཟིན་པ་འབྱུང་བའི་རྗེས་སུ་བྱེད་པའི་ཕྱིར་ཏེ། སློབ་དཔོན་ལ་སོགས་པ་ལ་བརྟེན་པ་ལྟ་བུའོ། །གནས་པའི་རྒྱུ་ནི་གཞིའི་དངོས་པོ་ཡིན་པའི་ཕྱིར་ཏེ་རི་མོའི་རྩིག་པ་ལྟ་བུའོ། །རྟོན་པའི་རྒྱུ་ནི་རྒྱུན་མི་འཆད་པའི་རྒྱུ་ཡིན་པའི་ཕྱིར་རོ། །འཕེལ་བའི་རྒྱུ་ནི་འཕེལ་བའི་རྒྱུ་ཡིན་པའི་ཕྱིར་རོ། །

འབྱུང་བ་ཆེན་པོ་གང་དག་རྒྱུར་བྱས་པ་ཡིན། ཅི་གཞིའི་འབྱུང་བ་ཆེན་པོ་དག་གམ་འོན་ཏེ་རྟེན་གྱི་འབྱུང་བ་ཆེན་པོ་དག་ཡིན་ཞེ་ན། སྨྲས་པ། གཞིའི་འབྱུང་བ་ཆེན་པོ་དག་ཡིན་ནོ། །དེའི་མིང་ཤེས་པར་བྱ་བའི་ཕྱིར་ཏེ་ཞེས་བྱ་བ་ནི་གང་གི་ཕྱིར་གཟུགས་དང་བྱེད་པའི་རང་བཞིན་ཡིན་

Vol. 142 · folio 26a

ཡང་རྣམ་པར་རིག་བྱེད་བཞིན་དུ་གཞན་དག་ལ་རྣམ་པར་རིག་པར་བྱེད་པ་མ་ཡིན་པ། དེའི་ཕྱིར་རྣམ་པར་རིག་བྱེད་མ་ཡིན་པའོ་ཞེས་བྱ་བའི་ཐ་ཚིག་གོ། །ཅིའི་ཕྱིར་གཟུགས་དང་བྱེད་པའི་རང་བཞིན་ཡིན་ཡང་ཞེས་བྱ་བ་ཁྱད་པར་གཉི་ག་སྨོས་ཤེ་ན།

དངོས་པོ་གང་ཞིག་གཟུགས་ཀྱི་རང་བཞིན་ཁོ་ན་ཡིན་ཞིང་བྱེད་པའི་རང་བཞིན་མ་ཡིན་ལ་དེ་ཡང་གཞན་ལ་གོ་བར་མི་བྱེད་པ་ཡང་ཡོད་དེ། དཔེར་ན་མིག་ལ་སོགས་པ་ལྟ་བུའོ། །གང་ཞིག་བྱེད་པའི་རང་བཞིན་ཁོ་ན་ཡིན་ཞིང་གཟུགས་ཀྱི་རང་བཞིན་མ་ཡིན་ལ་དེ་ཡང་གཞན་ལ་གོ་བར་མི་བྱེད་པ་

ཡང་ཡོད་དེ། དཔེར་ན་སེམས་པ་ལྟ་བུའོ། །གང་ཞིག་གཉི་གའི་རང་བཞིན་ཡིན་ལ་དེ་ཡང་གཞན་ལ་གོ་བར་བྱེད་པ་ཡང་ཡོད་དེ། དཔེར་ན་རྣམ་པར་རིག་བྱེད་ལྟ་བུའོ། །རྣམ་པར་རིག་བྱེད་ནི་རང་ཀུན་ནས་སློང་བར་བྱེད་པ་དགེ་བ་དང་མི་དགེ་བའམ། ལུང་དུ་མ་བསྟན་པའམ་ངེས་པའམ་ཁྲོ་

བའམ་གཉི་ག་མ་ཡིན་པ་ཞེས་བྱ་བ་གཞན་ལ་རྣམ་པར་རིག་པར་བྱེད་དེ། དེའི་ཕྱིར་རྣམ་པར་རིག་བྱེད་བཞིན་དུ་ཞེས་བཟློག་པའི་དཔེ་སྦྱོར་བ་ཡིན་ནོ། །མདོར་ན་ཞེས་བྱ་བ་རྒྱས་པར་འབྱུང་བ་ནི་སློབ་དཔོན་གྱིས་སློབ་མ་བདེ་བླག་ཏུ་ཁོང་དུ་ཆུད་པར་བྱ་བའི་ཕྱིར་ཚིག་མདོར་བསྡུས་པས་རྣམ་པར་རིག་

བྱེད་མ་ཡིན་པའི་གཟུགས་དེ་སྟོན་པར་བྱེད་པ་ཡིན་ནོ། །རྣམ་པར་རིག་བྱེད་དང་ཏིང་ངེ་འཛིན་ལས་བྱུང་བའི་གཟུགས་དགེ་བ་དང་མི་དགེ་བ་ནི་རྣམ་པར་རིག་བྱེད་མ་ཡིན་པའོ་ཞེས་བྱ་བ་འདི་ནི་ཅི་རིགས་པར་སྦྱར་བར་བྱའོ། །དགེ་བ་ནི་ལུས་དང་ངག་གི་རྣམ་པར་རིག་བྱེད་ལས་བྱུང་བ་སོ་སོར་ཐར་

པའི་སྡོམ་པས་བསྡུས་པ་དང་སྡོམ་པ་ལ་ཡང་མ་ཡིན་སྡོམ་པ་མ་ཡིན་པ་ཡང་མ་ཡིན་པས་བསྡུས་པ་ཡིན་ནོ། །མི་དགེ་བ་ནི་སྡོམ་པ་མ་ཡིན་པས་བསྡུས་པ་ནི་སྡོམ་པ་ཡང་མ་ཡིན་སྡོམ་པ་མ་ཡིན་པ་ཡང་མ་ཡིན་པས་བསྡུས་པ་ཡིན་ནོ། །ཏིང་ངེ་འཛིན་ལས་བྱུང་བ་ནི་དགེ་བ་ཁོ་ན་ཡིན་ལ་དེ་ཡང་

རྣམ་པ་གཉིས་ཏེ། ཟག་པ་དང་བཅས་པའི་ཏིང་ངེ་འཛིན་ལས་བྱུང་བ་ནི་བསམ་གཏན་གྱི་སྡོམ་པའི་ངོ་བོ་ཉིད་ཡིན་ལ། ཟག་པ་མེད་པའི་ཏིང་ངེ་འཛིན་ལས་བྱུང་བ་ནི་ཟག་པ་མེད་པའི་སྡོམ་པའི་ངོ་བོ་ཉིད་ཡིན་ཏེ་རྒྱུར་བྱས་པའི་གཟུགས་ཀྱི་ངོ་བོ་ཉིད་ཡིན་གྱི་སེམས་དང་སེམས་ལས་བྱུང་བ་ལ་

Vol. 142 · folio 26b

སོགས་པའི་ངོ་བོ་ཉིད་ནི་མ་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །དེ་ལྟ་ན་རྣམ་པར་རིག་བྱེད་ཀྱང་རྣམ་པར་རིག་བྱེད་མ་ཡིན་པར་འགྱུར་བ་མ་ཡིན་ནམ་དེ་ཡང་ཕྱི་མའི་འདྲ་བའི་རྒྱུ་སྔོན་གྱི་རྣམ་པར་རིག་བྱེད་ལས་བྱུང་བ་ཡིན་ནོ་ཞེ་ན། དགེ་བ་དང་མི་དགེ་བ་ཁོ་ནའོ་ཞེས་ངེས་པར་

བཟུང་བའི་ཕྱིར་རྣམ་པར་རིག་བྱེད་ལ་ཐལ་བར་མི་འགྱུར་ཏེ། རྣམ་པར་རིག་བྱེད་ནི་ལུང་དུ་མ་བསྟན་པ་ཡང་ཡིན་ནོ། །དེ་ཉིད་ཀྱི་ཕྱིར་ལྷའི་མིག་དང་རྣ་བ་ཏིང་ངེ་འཛིན་ལས་བྱུང་བ་དང་རྣམ་པར་རིག་བྱེད་ལས་སྐྱེས་པ་རྣམ་པར་སྨིན་པའི་གཟུགས་ཀྱང་རྣམ་པར་རིག་བྱེད་མ་ཡིན་པར་ཐལ་

བར་མི་འགྱུར་རོ། །སློབ་དཔོན་འདུས་བཟང་ནི། འདི་ལ་མ་ཚང་བསྟན་བཅོས་འགལ། །ཉམས་དང་དེ་མིན་དེ་ཉིད་ཐལ། །ཡང་སྒྲ་ལྷག་བརྗོད་ཁྱད་པར་དུ། །བྱ་བ་ཁྱབ་པར་མ་བྱས་སོ། །ཞེས་རྣམ་པར་རིག་བྱེད་མ་ཡིན་པའི་མཚན་ཉིད་ཀྱིས་མདོ་སུན་འབྱིན་པར་བྱེད་དེ་རྗེས་སུ་འབྲེལ་པ་

ནི་རྒྱུན་ཡིན་པར་དེ་ཉིད་ཀྱིས་རྣམ་པར་བཤད་དེ་ཧ་ཅང་ཐལ་བར་འགྱུར་དུ་འོང་བས་སྐད་ཅིག་མ་དང་པོ་ནི་རྒྱུན་མ་ཡིན་ནོ། །དེ་ལྟ་བས་ན་དེ་མཚན་ཉིད་འདིར་བསྡུས་པ་མེད་པས་མ་ཚང་བ་ཡིན་ནོ། །རྒྱུན་ཡང་རྫས་སུ་མེད་པའི་ཕྱིར་རྣམ་པར་རིག་བྱེད་མ་ཡིན་པ་རྫས་སུ་མེད་པར་འགྱུར་བས་བསྟན་

བཅོས་དང་འགལ་བ་ཡིན་ནོ། །མཉམ་པར་གཞག་པའི་ནི་གཡེངས་པ་དང་སེམས་མེད་པའི་རྗེས་སུ་འབྲེལ་བ་མེད་པས་དེ་རྣམ་པར་རིག་བྱེད་མ་ཡིན་པར་ཐལ་བར་འགྱུར་བའི་ཕྱིར་ཉམས་པ་ཡིན་ནོ། །གལ་ཏེ་མ་གཡེངས་པ་དང་སེམས་དང་བཅས་པའི་རྗེས་སུ་འབྲེལ་བའི་ཕྱིར་འདི་ནི་ཉེས་པ་

མེད་དོ་ཞེ་ན། དགེ་བ་དང་མི་དགེ་བའི་རྣམ་པར་རིག་བྱེད་ཀྱང་རྣམ་པར་རིག་བྱེད་མ་ཡིན་པའི་མཚན་ཉིད་དུ་ཐལ་བར་འགྱུར་བས་དེ་མ་ཡིན་པ་དེ་ཉིད་དུ་ཐལ་བར་འགྱུར་རོ། །གོང་མ་ཁོ་ནས་ཆོག་པའི་ཕྱིར་སེམས་མེད་པའི་ཡང་ཞེས་བྱ་བའི་སྒྲ་དོན་མེད་པར་འགྱུར་ཏེ། སེམས་གཡེངས་པའི་

ཡང་ཞེས་བྱ་བ་འདིས་སེམས་དང་བཅས་པའི་གནས་སྐབས་ཐམས་ཅད་བསྡུས་ཟིན་ན་གང་ཡང་ཞེས་བྱ་བའི་སྒྲ་གཉིས་པས་བསྡུ་བར་བྱ་བའི་གནས་སྐབས་གཞན་ཅི་ཞིག་ཡོད། དེ་བས་ན་ཡང་ཞེས་བྱ་བའི་སྒྲ་སྨོས་པ་ལྷག་པ་ཡིན་ནོ། །སེམས་མེད་པའི་དབང་དུ་བྱས་ཏེ་དགེ་བའི་རྣམ་པར་

Vol. 142 · folio 27a

རིག་བྱེད་མ་ཡིན་པ་རྗེས་སུ་འབྲེལ་པ་ཁྱད་པར་དུ་བྱ་དགོས་པ་ལས་རྣམ་པར་བཤད་པ་ལས་ཁྱད་པར་དུ་མ་བྱས་པས་ཁྱད་པར་དུ་བྱ་བ་ཁྱད་པར་དུ་མ་བྱས་པ་ཡིན་ནོ། །ཐོག་མ་མེད་པའི་གཟུགས་སོ་ཞེས་ཁྱད་པར་དུ་བྱ་བ་ཁྱད་པར་དུ་མ་བྱས་པ་གཞན་འདི་

ཡང་ཡོད་དེ། །ཉེས་པ་དག་གི་སྐྱོན་ཆགས་པའི་ཕྱིར་མཚན་ཉིད་འདི་ནི་ལེགས་པར་སྦྱར་བ་མ་ཡིན་ནོ་ཞེ་ན། སྨྲ་བར་བྱ་སྟེ། རེ་ཞིག་རྣམ་པར་རིག་བྱེད་མ་ཡིན་པ་རྒྱུན་ཡིན་པར་བསྟན་པའི་ཕྱིར་སྐད་ཅིག་མ་དང་པོ་རྣམ་པར་རིག་བྱེད་མ་ཡིན་པར་མི་འགྱུར་བས་མ་ཚང་བ་ཡིན་ནོ་ཞེས་སྨྲས་པ་གང་

ཡིན་པ་དེ་ཇེ་ཁྱོད་ཉིད་ལ་དྲི་བར་བྱ་སྟེ་རྒྱུན་ཞེས་བྱ་བ་འདི་ཅི་ཡིན། །སྐད་ཅིག་མ་མང་པོ་ལ་རྒྱུན་ཞེས་བྱའོ། །གལ་ཏེ་དེ་ལྟ་ན་ནི་སྐད་ཅིག་མ་དང་པོ་ལ་སོགས་པ་སྐད་ཅིག་མང་པོ་ལ་རྒྱུན་ཞེས་བྱ་བའི་ཕྱིར་སྐད་ཅིག་མ་དང་པོ་ཡང་རྒྱུན་ཡིན་པར་འགྲུབ་སྟེ། འདི་ལྟར་འབབ་ཆུའི་དངོ་དང་

མཚེའུ་ལས་འབབ་པའི་ཆུ་དག་གི་ཆུའི་ཡན་ལག་དང་པོ་ལ་སོགས་པ་ལ་རྒྱུན་ཞེས་བྱ་བས་མཚན་ཉིད་མ་ཁྱབ་པ་ཉིད་མེད་དོ། །གང་གི་ཚེ་རྗེས་སུ་འབྲེལ་བར་འགྱུར་བས་རྗེས་སུ་འབྲེལ་བའོ་ཞེས་རྫས་ཉིད་ཡིན་པར་སྟོན་པ་དེའི་ཚེ་ན་མ་ཚང་བ་ཉིད་ཀྱི་སྒྲ་ཡང་མེད་དོ། །དེ་ཉིད་ཀྱི་ཕྱིར་

བསྟན་བཅོས་དང་འགལ་བ་ཉིད་ཀྱི་ཉེས་པ་ཡང་ཡོངས་སུ་སྤངས་པ་ཡིན་ནོ། །ཇི་སྟེ་ཡང་འབྲེལ་བ་ཞེས་བྱ་བ་རྒྱུན་ཡིན་པར་བརྗོད་ན་དེ་ལྟ་ན་ཡང་གཟུགས་ཀྱི་སྐབས་ཡིན་པའི་ཕྱིར་ཉེས་པ་མེད་དེ་རྒྱུན་ཆགས་པར་འབྱུང་བའི་ཕྱིར་རྒྱུན་གྱི་སྒྲར་རབ་ཏུ་བསྟན་ཏོ། །མཉམ་པར་གཞག་པའི་རྣམ་

པར་རིག་བྱེད་མ་ཡིན་པ་མ་བསྡུས་པ་ཡང་མ་ཡིན་ཏེ། དེ་ཡང་གཡེངས་པ་དང་སེམས་མེད་པའི་རྒྱུན་གྱིས་རྗེས་སུ་འབྲེལ་བར་མི་འགྱུར་མོད་ཀྱི་མ་གཡེངས་པ་དང་སེམས་དང་བཅས་པའི་རྒྱུད་ཀྱི་རྗེས་སུ་འབྲེལ་བར་ནི་འགྱུར་བ་ཁོ་ན་ཡིན་ལ། རྣམ་པར་རིག་བྱེད་མ་ཡིན་པར་རིགས་མཐུན་

པའི་ཕྱིར་ནི། གཡེངས་པ་དང་སེམས་མེད་པའི་རྗེས་སུ་འབྲེལ་པ་གང་ཡིན་པ་དེ་ཡང་རྣམ་པར་རིག་བྱེད་མ་ཡིན་པ་ཞེས་བྱའོ། །གང་ཡང་འདི་སྐད་དུ་གལ་ཏེ་མ་གཡེངས་པ་དང་སེམས་དང་བཅས་པའི་རྗེས་སུ་འབྲེལ་བའི་ཕྱིར་འདི་ནི་ཉེས་པ་མེད་དོ་ཞེས་ཟེར་ན་ཞེས་སྨྲས་པ། གལ་ཏེ་སེམས་མ་

Vol. 142 · folio 27b

གཡེངས་པ་འབའ་ཞིག་གི་ཡང་རྗེས་སུ་འབྲེལ་བ་དེ་ཡང་རྣམ་པར་རིག་བྱེད་མ་ཡིན་པ་ཡིན་པས་མཉམ་པར་གཞག་པའི་རྣམ་པར་རིག་བྱེད་མ་ཡིན་པ་སྤངས་པ་མ་ཡིན་ནོ་ཞེས་སྨྲ་ན་དགེ་བ་དང་མི་དགེ་བའི་རྣམ་པར་རིག་བྱེད་ཀྱང་དེ་དང་འདྲ་བ་ཉིད་ཡིན་པས་ཁྱོད་ཀྱི་ལྟར་ན་རྣམ་པར་རིག་བྱེད་མ་ཡིན་

པར་འགྱུར་རོ་ཞེས་བྱ་བ་ཡིན་ན། དགེ་བ་དང་མི་དགེ་བ་ཁོ་ནའོ་ཞེས་ངེས་པར་བཟུང་བའི་ཕྱིར་དེ་ཡང་ཉེས་པ་མེད་དེ་རྣམ་པར་རིག་བྱེད་ནི་ལུང་དུ་མ་བསྟན་པ་ཉིད་ཀྱང་ཡིན་པས་རྣམ་པར་རིག་བྱེད་མ་ཡིན་པར་ཐལ་བར་མི་འགྱུར་རོ། །རྣམ་པ་གཅིག་ཏུ་ན་མཆོག་ཏུ་གྱུར་པ་ཡིན་པའི་ཕྱིར་འདི་ཐལ་

བར་མི་འགྱུར་ཏེ། གང་ཞིག་མཆོག་ཏུ་རྗེས་སུ་འབྲེལ་བ་དེ་ཁོ་ན་རྣམ་པར་རིག་བྱེད་མ་ཡིན་པ་ཡིན་ན་རྣམ་པར་རིག་བྱེད་མ་ཡིན་པ་མ་འགགས་ཀྱང་དེ་འགགས་པ་མཐོང་བའི་ཕྱིར་རྣམ་པར་རིག་བྱེད་ནི་རྣམ་པར་རིག་བྱེད་མ་ཡིན་པ་བཞིན་དུ་མཆོག་ཏུ་རྗེས་སུ་འབྲེལ་བར་འགྱུར་བ་མ་ཡིན་ནོ། །གང་

ཡང་ཞེས་བྱ་བའི་སྒྲ་སྨོས་པ་ལྷག་པ་ཡིན་ནོ་ཞེས་སྨྲས་པ་དེ་ཡང་རིགས་པ་མ་ཡིན་པར་སྨྲས་པ་ཡིན་ཏེ། འདི་ལྟར་མདོ་ལས་ནི་ཡང་ཞེས་བྱ་བའི་སྒྲ་གཅིག་ཁོ་ན་འབྱུང་ངོ་། །འབྲེལ་པ་ལས་ནི་དེའི་དོན་གང་ཟག་དེ་གཉི་ག་དང་སྦྱོར་བར་བྱེད་པས་གཉིས་ཀྱང་འབྱུང་སྟེ། སློབ་དཔོན་ཡང་ཞེས་བྱ་

བའི་སྒྲ་མདོ་ལས་འབྱུང་བ་གཅིག་པུ་དེས་གཡེངས་པ་ལས་བཟློག་པ་མ་གཡེངས་པ་དང་སེམས་མེད་པ་ལས་བཟློག་པ་དེ་ཉིད་སེམས་དང་བཅས་པ་རྣམ་པར་རིག་བྱེད་མ་ཡིན་པའི་རྟེན་གང་ཟག་གསུམ་པ་བརྗོད་ཅིང་རང་གི་མིང་བརྗོད་པས་རིགས་མཐུན་པའི་སྒོ་ནས་རྣམ་པར་རིག་བྱེད་མ་ཡིན་

པའི་རྟེན་གང་ཟག་གཡེངས་པ་དང་སེམས་མེད་པ་གཉིས་སྟོན་པར་བྱེད་པ་ན་རྣམ་པར་རིག་བྱེད་མ་ཡིན་པ་རྣམ་པར་རིག་བྱེད་དང་སེམས་དང་སེམས་ལས་བྱུང་བ་དག་ལས་དོན་གཞན་དུ་གྱུར་པ་ཡིན་པར་འཆད་དོ། །གང་ཟག་ནི་རྣམ་པར་རིག་བྱེད་ཀྱི་སེམས་དང་མི་འདྲ་བའི་སེམས་དང་ལྡན་

པ་དང་རྣམ་པར་རིག་བྱེད་ཀྱི་སེམས་དང་འདྲ་བའི་སེམས་དང་ལྡན་པ་དང་། སེམས་མེད་པ་དང་གསུམ་ཁོ་ན་ཡིན་ནོ། །དེ་ལ་རྣམ་པར་རིག་བྱེད་ཀྱི་སེམས་དང་མི་འདྲ་བའི་སེམས་དང་ལྡན་པ་ནི་འདིར་སེམས་གཡེངས་པ་ཡིན་པར་བསམས་པ་སྟེ། དེའི་ལུས་དང་ངག་གི་རྣམ་པར་རིག་

Vol. 142 · folio 28a

བྱེད་དེ་ནི་འགགས་པ་ཡིན་ནོ། །སེམས་མེད་པ་ནི་སེམས་དང་སེམས་ལས་བྱུང་བ་དག་ཀྱང་འགགས་པ་ཡིན་ཏེ་དེ་ལྟ་བས་ན་རྣམ་པར་རིག་བྱེད་མ་ཡིན་པ་འདི་ནི་འདི་ལྟར་དེ་དག་ལ་རྗེས་སུ་འབྲེལ་བར་འགྱུར་བ་ཉིད་ཀྱིས་ཁྱད་པར་དུ་བྱས་པས་རྣམ་པར་རིག་བྱེད་དང་།

སེམས་དང་སེམས་ལས་བྱུང་བའི་ཚོགས་ལས་དོན་གཞན་དུ་གྱུར་པ་ཡིན་ནོ། །དེའི་དོན་འདི་བསྟན་པར་བྱ་བའི་ཕྱིར། གཡེངས་དང་སེམས་མེད་པའི་ཡང་ཞེས་བྱ་བ་སྨོས་ཏེ། སེམས་མ་གཡེངས་པ་ལ་རྣམ་པར་རིག་བྱེད་མ་ཡིན་པ་ཡོད་དོ་ཞེས་བྱ་བ་ནི་ཁྱད་པར་དུ་བྱས་པ་མ་ཡིན་ཏེ། དེ་ལ་རྣམ་

པར་རིག་བྱེད་ཀྱང་ཡོད་དོ། །སེམས་གཡེངས་པ་ལ་ཡང་ཡོད་དོ་ཞེས་བྱ་བ་ནི་ཁྱད་པར་དུ་བྱས་པ་ཡིན་ཏེ། དེ་ལ་རྣམ་པར་རིག་བྱེད་ནི་མེད་ཀྱི་རྣམ་པར་རིག་བྱེད་མ་ཡིན་པ་ནི་རྗེས་སུ་འབྲེལ་བར་འགྱུར་རོ་ཞེས་རྣམ་པར་རིག་བྱེད་ལས་ཁྱད་པར་དུ་བྱས་པ་ཡིན་ནོ། །དེ་བཞིན་དུ་སེམས་དང་བཅས་པ་ལ་རྣམ་

པར་རིག་བྱེད་མ་ཡིན་པ་ཡོད་དོ་ཞེས་བྱ་བ་ནི་ཁྱད་པར་དུ་བྱས་པ་ཡིན་ཏེ། དེ་ལ་ནི་སེམས་དང་སེམས་ལས་བྱུང་བ་དག་ཀྱང་ཡོད་པ་ཉིད་དོ། །སེམས་མེད་པ་ལ་ཡང་ཡོད་དོ་ཞེས་བྱ་བ་ནི་ཁྱད་པར་དུ་བྱས་པ་ཡིན་ཏེ་དེ་ལ་ནི་སེམས་དང་སེམས་ལས་བྱུང་བ་རྣམས་ནི་འགགས་ལ་རྣམ་པར་རིག་བྱེད་མ་ཡིན་པ་ནི་རྗེས་སུ་

འབྲང་བར་འགྱུར་རོ་ཞེས་སེམས་དང་སེམས་ལས་བྱུང་བ་དག་ལས་ཁྱད་པར་དུ་བྱས་པ་ཡིན་ནོ། །དེ་ལྟར་ན་ཡང་ཤེས་བྱའི་སྒྲ་གཅིག་པུས་ཀྱང་ཆོས་གཞན་ལས་ཁྱད་པར་དུ་བྱ་བའི་ཕྱིར་རོ། །གཡེངས་པ་དང་སེམས་མེད་པའི་གསུམ་པར་གྱུར་སེམས་མ་གཡེངས་པ་སྟོན་པར་བྱེད་དོ། །དེ་བས་གསུམ་

པར་གྱུར་པའི་ཕྱིར་སློབ་དཔོན་གྱིས་ཡང་ཞེས་བྱ་བའི་སྒྲས་ནི་མ་གཡེངས་པ་སེམས་དང་བཅས་པ་ཡང་ཡིན་ནོ་ཞེས་བཤད་དོ། །དེ་ལྟ་མ་ཡིན་ན་ཡང་ཞེས་བྱ་བའི་སྒྲས་ནི་སེམས་གཡེངས་པའི་ཡང་ཡིན་ནོ་ཞེས་བྱ་བ་ཁོ་ནའམ་སེམས་མེད་པའི་ཡང་ཡིན་ནོ་ཞེས་བྱ་བ་ཁོ་ན་ཞིག་བརྗོད་པར་འགྱུར་རོ། །

དཔེར་ན་འཇིག་རྟེན་ན་མི་གསུམ་ཞིག་ཡོད་པ་གཅིག་ནི་ནོར་དང་ལྡན་པ་ཞིག་ཡིན་ལ་གཞན་གཉིས་ཀྱང་ནོར་ཙམ་དང་ལྡན་པ་ཡིན་པ་ལས། གཅིག་གཅིག་གིས་དེ་དག་ལ་བརྟགས་ནས་ཁྱབ་འཇུག་བཤེས་ལ་ནི་ནོར་ཡོད་དོ་ཞེས་སྨྲས་པ་དང་། སྨྲ་བ་པོ་གཉིས་པ་ཞིག་གིས་ལྷ་སྦྱིན་དང་མཆོད་སྦྱིན་

Vol. 142 · folio 28b

དག་ལ་ཡང་ནོར་ཡོད་དོ་ཞེས་སྨྲས་པར་གྱུར་ན་ཡང་ཞེས་བྱ་བའི་སྒྲས་ཁྱབ་འཇུག་བཤེས་ལ་ཡང་ཡོད་དོ་ཞེས་བྱ་བའི་སྒྲ་ལྷ་སྦྱིན་དང་མཆོད་སྦྱིན་དག་ལ་ཡོད་པ་གཉིས་ལྟ་བུར་གྱུར་པས་ཁྱབ་འཇུག་བཤེས་དེ་ཉིད་ཉེ་བར་མཚོན་པར་བྱེད་དེ་སྦྱོར་རོ་ཞེས་བྱ་བའི་ཐ་ཚིག་གོ། །དེས་ན་འདི་ལ་ཡང་

ཞེས་བྱ་བའི་སྒྲ་ལྷག་པ་ཉིད་མ་ཡིན་པ་ལྟར་འདིར་ཡང་དེ་དང་འདྲའོ། །གང་ཡང་འདི་སྐད་དུ་སེམས་མེད་པའི་དབང་དུ་བྱས་ཏེ་དགེ་བའི་རྣམ་པར་རིག་བྱེད་མ་ཡིན་པའི་རྗེས་སུ་འབྲེལ་བ་ཁྱད་པར་དུ་བྱ་དགོས་པ་ལས་ཞེས་སྨྲས་པ་དེ་ཡང་གྱི་ན་སྟེ་མཚན་ཉིད་འདི་ནི་རྣམ་པར་རིག་བྱེད་མ་

ཡིན་པའི་རིགས་ཀྱི་དབང་དུ་བྱས་ནས་བཤད་པ་ཡིན་ལ་རྣམ་པར་རིག་བྱེད་མ་ཡིན་པའི་རིགས་དེ་ཡང་སེམས་མེད་པ་ལ་ཡོད་དེ་བརྗོད་པར་འདོད་པ་ནི་དེ་ཙམ་ཞིག་ཏུ་ཟད་ན་ཁྱད་པར་དུ་བྱས་པ་འདིས་གོ་ཅི་ཞིག་བྱ། ཁྱོད་ཀྱི་རྣམ་པར་རིག་བྱེད་མ་ཡིན་པའི་མཚན་ཉིད། བྱས་པ་དང་ཡང་མི་

ལྡན་པའི། །སེམས་ལའང་སེམས་མེད་པ་ལ་གང་། །ལུང་བསྟན་ཐོགས་པ་མེད་པའི་གཟུགས། །དེ་ནི་རྣམ་རིག་བྱེད་མིན་འདོད། །ཅེས་བྱ་བ་ལས་ཀྱང་སེམས་མེད་པའི་དབང་དུ་བྱས་ནས་དགེ་བའི་རྣམ་པར་རིག་བྱེད་མ་ཡིན་པ་ཁྱད་པར་དུ་མ་བྱས་ཏེ། སེམས་མེད་པ་ལ་ནི་རྣམ་པར་རིག་

བྱེད་ལས་བྱུང་བ་དགེ་བའི་རྣམ་པར་རིག་བྱེད་མ་ཡིན་པ་འདི་ཉིད་ཀྱང་སྲིད་དོ་ཞེས་མཛོད་ཀྱི་གནས་བཞི་པ་ནས་སྟོན་པར་འགྱུར་རོ། །གང་ཡང་ཐོགས་པ་མེད་པའོ་ཞེས་ཁྱད་པར་དུ་མ་བྱས་སོ་ཞེས་བྱ་བ་དེ་ཡང་འོག་ནས་བསྟན་པར་བྱ་སྟེ། ཐོགས་དང་བཅས་པ་གཟུགས་ཅན་བཅུ། །ཞེས་བྱ་བ་

འདིར་ཁམས་བཅུ་ཁོ་ན་ཐོགས་པ་དང་བཅས་པ་ཞེས་བྱ་བར་ངེས་པར་བཟུང་བའི་ཕྱིར། རྣམ་པར་རིག་བྱེད་མ་ཡིན་པ་ནི་ཆོས་ཀྱི་ཁམས་ཡིན་པར་འབྱུང་བས་དེ་ནི་ཐོགས་པ་མེད་པའོ་ཞེས་བྱ་བར་འགྲུབ་པར་འགྱུར་རོ། །དེ་ལྟ་བས་ན་ཁོ་བོ་ཅག་གི་རྣམ་པར་རིག་བྱེད་མ་ཡིན་པའི་མཚན་ཉིད་འདི་

དེ་ཁོ་ན་དེ་ལྟར་ཉེས་པ་སྐྱོན་ཆགས་པ་མ་ཡིན་པས་དེ་ཉིད་བཞག་སླའོ། །འབྱུང་བ་དག་ནི་སའི་ཁམས་དང་ཞེས་བྱ་བ་རྒྱས་པར་འབྱུང་བ་ཁམས་སྨོས་པ་ནི་ཁ་དོག་དང་། དབྱིབས་ཀྱི་བདག་ཉིད་ལ་སོགས་པ་བསལ་བའི་ཕྱིར་རོ། །རང་གི་མཚན་ཉིད་དང་རྒྱུར་བྱས་པའི་གཟུགས་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words