ཆོས་མངོན་པའི་མཛོད་ཀྱི་འགྲེལ་བཤད

Sanskrit title (Tibetan script, as in the text) ཨ་བྷི་དྷརྨ་ཀོ་ཥ་ཊཱི་ཀ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 142 · folio 29a

འཛིན་པའི་ཕྱིར་ཁམས་དག་གོ་ཞེས་བྱ་བ་ནི་རང་གི་མཚན་ཉིད་སྲ་བ་ལ་སོགས་པ་དང་རྒྱུར་བྱས་པའི་གཟུགས་མིག་ལ་སོགས་པ་རྗེས་སུ་འཛིན་པའི་ཕྱིར་ཁམས་དག་ཡིན་ནོ། །ཁམས་བཅོ་བརྒྱད་ནི་རང་དང་སྤྱིའི་མཚན་ཉིད་འཛིན་པའི་ཕྱིར་རམ་དེ་དག་ལ་ལྟོས་

ནས་རིགས་ཀྱི་དོན་ནི་ཁམས་ཀྱི་དོན་ཡིན་ནོ། །ཁམས་དྲུག་བསྟན་པ་ལ་ནི་ཡང་སྲིད་པའི་ས་བོན་གྱི་དོན་ནི་ཁམས་ཀྱི་དོན་ཡིན་ཏེ་སྲིད་པ་རྒྱས་པར་བྱེད་པའི་ཕྱིར་རོ། །འདི་དག་གཟུགས་གཞན་ཐམས་ཅད་ཀྱི་རྟེན་ཉིད་དུ་རགས་པའི་ཕྱིར་ན་ཆེན་པོ་ཉིད་དོ་ཞེས་བྱ་བ་ནི་རྒྱུར་བྱས་པའི་གཟུགས་

ཐམས་ཅད་ཀྱི་རྟེན་ཉིད་དུ་ཆེ་བའི་ཕྱིར་རོ་ཞེས་བྱ་བའི་ཐ་ཚིག་གོ། །དེ་དག་བྱ་བ་ལ་ཤས་ཆེ་བ་དག་ལ་ཞེས་བྱ་བ་ནི་འབྱུང་བ་ཆེན་པོ་དེ་དག་སྲ་བ་ལ་སོགས་པ་འབྲས་བུའི་བྱ་བ་ལ་ཤས་ཆེ་ཞིང་གསལ་བས་འདི་དག་ནི་དེ་དག་བྱ་བ་ལ་ཤས་ཆེ་བ་སྟེ་ས་དང་ཆུ་དང་མེ་དང་རླུང་གི་ཕུང་པོ་དག་ཡིན་

ནོ། །འབྱུང་བ་ཆེན་པོ་དེ་རྣམས་ཆེན་པོར་གནས་ཤིང་ཆེན་པོར་བཀོད་པའི་ཕྱིར་རོ། །འབྱུང་བ་རྒྱས་པར་བྱེད་པས་ན་འབྱུང་བ་དག་ཡིན་ནོ། །འཛིན་པ་ལ་སོགས་ལས་སུ་གྲུབ། །ཅེས་བྱ་བ་ནི་བྱེ་བྲག་ཏུ་སྨྲ་བ་རྣམས་ན་རེ་འཛིན་པ་ལ་སོགས་པ་བསྟན་པ་ལ་ནི་ས་ལ་སོགས་པ་ལ་ལྷག་མ་

རྣམས་རྗེས་སུ་དཔག་པའི་ཕྱིར་ཏེ་སའི་རྫས་རྡོ་ལ་སོགས་པ་ལ་སྡུད་པ་ལ་སོགས་པ་མཐོང་བའི་ཕྱིར་ལྷག་མ་ཆུ་དང་མེ་དང་རླུང་རྣམས་ཡོད་པ་ཉིད་དུ་དཔག་གོ། །ཆུ་ལ་ཡང་གྲུ་འདེགས་པ་དང་དྲོ་བ་ཉིད་དང་གཡོ་བའི་ལས་མཐོང་བའི་ཕྱིར་ས་དང་མེ་དང་ཆུ་རྣམས་ཡོད་པ་ཉིད་དོ། །མེ་ལ་ཡང་བརྟན་པ་

དང་གོང་བུར་འདུག་པ་དང་གཡོ་བ་མཐོང་བའི་ཕྱིར་ས་དང་ཆུ་དང་རླུང་རྣམས་ཡོད་པ་ཉིད་དོ། །རླུང་ལ་ཡང་འདེགས་པ་དང་གྲང་བ་དང་དྲོ་བའི་རེག་པ་མཐོང་བའི་ཕྱིར་ས་དང་ཆུ་དང་མེ་རྣམས་ཡོད་པ་ཉིད་དོ་ཞེས་ཟེར་རོ། །རྒྱས་པར་བྱེད་པ་ནི་འཕེལ་བ་དང་རྒྱས་པར་བྱེད་པར་རིག་པར་བྱ་སྟེ་ཞེས་བྱ་

བ་ལ་འཕེལ་བ་ནི་ལུས་དང་མྱུ་གུ་ལ་སོགས་པ་ཡན་ལག་འབྲེལ་པ་ལྷག་པར་སྐྱེ་བའོ། །རྒྱས་པར་བྱེད་པ་ནི་ལུས་ལ་སོགས་པ་རྒྱུན་ཆགས་པར་ཡུལ་གཞན་དུ་འབྱུང་བའོ། །དྲོ་ཉིད་ཅེས་བྱ་བ་ནི་རང་གི་ངོ་བོ་བསྟན་པ་ལ་ཡང་ངོ་བོའི་རྐྱེན་བསྟན་པ་ཡིན་ཏེ་དྲོ་བ་ཁོ་ན་དྲོ་ཉིད་ཅེས་བྱ་བ་ཡིན་ནོ། །

Vol. 142 · folio 29b

འབྱུང་བའི་རྒྱུན་ཡུལ་གཞན་དུ་བསྐྱེད་པའི་ཕྱིར་གཡོ་བར་བྱེད་དེ་སྒྲོན་མ་གཡོ་བ་བཞིན་དུ་གཡོ་བ་ཡིན་ནོ་ཞེས་བྱ་བ་ནི་སྐད་ཅིག་མ་རྣམས་ལ་ཡུལ་གཞན་དུ་འགྲོ་བ་མེད་དེ་གང་དུ་སྐྱེས་པ་ཉིད་དུ་རྣམ་པར་འཇིག་གོ། །དེའི་ཕྱིར་འདི་སྐད་དུ་སྐད་ཅིག་མ་ཡིན་པའི་ཕྱིར་འབྱུང་བའི་རྒྱུན་ཡུལ་

གཞན་དུ་སྐྱེད་པའི་ངོ་བོ་ཉིད་ནི་གཡོ་བ་ཡིན་ཏེ། སྒྲོན་མ་བཞིན་ནོ་ཞེས་བཤད་དོ། །འབྱུང་བ་རྣམས་ཀྱང་སྐད་ཅིག་མ་ཡིན་ཏེ། གཟུགས་ཡིན་པའི་ཕྱིར་སྒྲོན་མ་ལྟ་བུའོ། །སྒྲོན་མ་ཡང་སྐད་ཅིག་མ་ཡིན་པར་གྲགས་པས་དཔེར་བསྟན་ཏོ། །འདིར་རང་བཞིན་ལས་ཀྱིས་བསལ་བ་

ཡིན་ནོ་ཞེས་བྱ་བ་ནི་གཡོ་བར་བྱེད་པའི་བདག་ཉིད་ཀྱི་ཡང་བ་ཉིད་གང་ཡིན་པ་དེ་ནི་རླུང་གི་ཁམས་ཡིན་ནོ་ཞེས་གཡོ་བར་བྱེད་པའི་ལས་ཀྱིས་ཡང་བ་ཉིད་ཁྱད་པར་དུ་བྱེད་པ་ཡིན་ཏེ། རླུང་གི་ཁམས་ནི་ཡང་ཞིང་གཡོ་བར་བྱེད་པ་ཡིན་ནོ། །ཡང་བ་ཁོ་ན་གང་ཡིན་པ་དེ་ནི་རྒྱུར་བྱས་པའི་

གཟུགས་ཡིན་ནོ། །གསུང་རབ་ལས་སའི་ཁམས་ལ་སོགས་པ་དང་ས་ལ་སོགས་པ་ཡང་གསུངས་ཏེ་དེའི་ཕྱིར། ས་ལ་སོགས་པ་དང་སའི་ཁམས་ལ་སོགས་པ་ལ་བྱེ་བྲག་ཅི་ཡོད་ཅེ་ན་ཞེས་འདྲི་བར་བྱེད་དོ། །འཇིག་རྟེན་གྱི་ནི་ཐ་སྙད་དུ། །ཞེས་བྱ་བ་ནི་འཇིག་རྟེན་གྱི་ཐ་སྙད་དུ་བཏགས་

པའོ། །རླུང་ཚོགས་ཞེས་བྱ་བ་ལ་རླུང་ཚོགས་ནི་རླུང་རྣམས་ཀྱི་ཚོགས་སོ། །འདི་ལྟར་དོན་གྱི་སྡེ་ཚན་དག་ལས་ཞེས་བྱ་བ་ནི་དོན་གྱི་སྡེ་ཚན་གྱི་མདོ་གང་དག་ཕྲན་ཚེགས་ལས་འབྱུང་བ་དེ་དག་ལས་བཤད་པ་ཡིན་ནོ། །གལ་ཏེ་འདོད་པ་ཚོལ་བྱེད་ཅིང་། །ཞེས་བྱ་བ་རྒྱས་པར་འབྱུང་བ་ནི་

གལ་ཏེ་འདོད་པ་ཚོལ་བར་བྱེད་ཅིང་། འདུན་པ་སྐྱེད་པའི་ལུས་ཅན་ཏེ། འདོད་པའི་ཡུལ་དག་མ་འབྱོར་ཅིང་ཕུན་སུམ་ལྡན་པར་མ་གྱུར་ན་དེ་ཟུག་རྔུས་ཟུག་པ་བཞིན་གནོད་པར་འགྱུར་ཏེ། གནོད་པ་བྱེད་པར་འགྱུར་རོ་ཞེས་བྱ་བའི་ཐ་ཚིག་གོ། །གནོད་པར་འགྱུར་ཞེས་བྱ་བའི་

སྒྲ་གནོད་པ་བྱེད་པའི་དོན་ཡིན་པར་ཡོངས་སུ་བཅད་པ་འདིས་ནི་དགེ་སློང་དག་གཟུགས་སུ་ཡོད་ཅིང་གཟུགས་སུ་རུང་བས་ཞེས་བྱ་བའི་མདོ་འདི་ལས་གཟུགས་སུ་རུང་བ་ཞེས་བྱ་བའི་སྒྲ་འབྱུང་བ་ཡང་གནོད་པར་བྱེད་པའི་དོན་ཡིན་པ་ཁོ་ནར་ཡོངས་སུ་བཅད་དོ། །འདོད་པ་ཚོལ་

Vol. 142 · folio 30a

བ་ཟུག་རྔུས་ཟུག་པ་ནི་སྡུག་བསྔལ་མྱོང་བ་ཡིན་པའི་ཕྱིར་གནོད་པ་བྱེད་པར་ཡང་འགྱུར་རོ་ཞེས་བྱ་བར་ཡང་རིགས་ན། གཟུགས་ལ་གོ་ཇི་ལྟར་གནོད་པ་བྱེད་པར་འགྱུར་ཞེ་ན་དེའི་ཕྱིར་ཡོངས་སུ་འགྱུར་བ་སྐྱེད་པའོ་ཞེས་བྱ་བ་སྨོས་ཏེ། རྣམ་པར་འགྱུར་བ་སྐྱེད་

པའོ་ཞེས་བྱ་བའི་ཐ་ཚིག་གོ། །དོན་འདི་དེ་ལྟ་ཡིན་དང་། ཟུག་རྔུས་ཟུག་བཞིན་གནོད་པར་འགྱུར། །ཞེས་འབྱུང་བ་འདིར་ཡང་གལ་ཏེ་དོན་ནི་རྣམ་པར་འགྱུར་བར་བྱེད་དོ་ཞེས་བྱ་བར་བཟུང་ན་དོན་ཤིན་ཏུ་ཡང་རུང་བར་འགྱུར་རོ། །ཐོགས་པའོ་ཞེས་བྱ་བ་ནི་རང་གི་ཡུལ་དུ་གཞན་འབྱུང་

བའམ་གནས་པའོ། །འོ་ན་ནི་རྡུལ་ཕྲ་རབ་ཅེས་བྱ་བ་ནི་རྫས་ཀྱི་རྡུལ་ཕྲ་རབ་ཀྱི་གཟུགས་ནི་གཟུགས་ཡིན་པར་མི་འགྱུར་རོ། །ཅིའི་ཕྱིར་ཞེ་ན། གཟུགས་སུ་མེད་པའི་ཕྱིར་ཏེ་ཆ་ཤས་མེད་པ་ཉིད་ཡིན་ན་གཟུགས་སུ་མེད་པའི་ཕྱིར་རོ་སྙམ་དུ་བསམ་པའོ། །གླན་ཀ་འདི་ནི་རྫས་ཀྱི་རྡུལ་ཕྲ་

རབ་ནི་ཆ་ཤས་མེད་པ་ཡིན་པའི་ཕྱིར་གནོད་པ་བྱེད་པའི་གཟུགས་སུ་རུང་བ་དང་ཐོགས་པ་མེད་པའི་གཟུགས་སུ་རུང་བས་ཀྱང་གཟུགས་སུ་རུང་བར་བྱ་བར་མི་ནུས་སོ་ཞེས་ཕྱོགས་གཉི་ག་ལ་ཡང་ཉེ་བར་བཀོད་པ་ཡིན་ནོ། །རྡུལ་ཕྲ་རབ་ཀྱི་གཟུགས་གཅིག་པུ་ལོགས་ཤིག་ཏུ་གྱུར་པ་ནི་མེད་པ་ཉིད་

དོ་ཞེས་བྱ་བ་ལ་གཅིག་པུ་ཞེས་བྱ་བ་སྨོས་པ་ནི་རྫས་ཀྱི་རྡུལ་ཕྲ་རབ་ཀྱི་གཟུགས་བསྟན་པའི་ཕྱིར་རོ། །ལོགས་ཤིག་ཏུ་གྱུར་པ་ནི་འདུས་པ་ལ་གནས་པ་མ་ཡིན་པ་ཞེས་བྱ་བའི་ཐ་ཚིག་སྟེ་དེ་འདྲ་བ་དེ་ནི་མེད་ཀྱི། འདོད་ན་དབང་པོ་མེད་པ་དང་། །སྒྲ་མེད་ཕྲ་རབ་རྡུལ་རྫས་བརྒྱད། །ཅེས་བྱ་

བ་ལ་སོགས་པ་འབྱུང་བའི་ཕྱིར་རྟག་ཏུ་འདུས་པ་ལ་གནས་པ་ཡིན་ནོ། །འདུས་པ་ལ་གནས་པ་དེ་ལ་ནི་གཟུགས་སུ་རུང་བ་ཉིད་དོ་ཞེས་བྱ་བ་ནི་དོན་གྱིས་ན་འདི་སྐད་དུ་རྫས་ཀྱི་རྡུལ་ཕྲ་རབ་ཀྱི་གཟུགས་འདུས་པ་ལ་གནས་པ་དེ་ལ་ནི་གཟུགས་སུ་རུང་བར་འགྱུར་ཏེ་གནོད་པ་བྱར་ཡོད་ཅིང་

ཐོགས་པར་འགྱུར་རོ་ཞེས་བྱ་བར་ཁས་བླངས་པ་ཡིན་ནོ། །འོ་ན་ནི་འདས་པ་དང་མ་འོངས་པ་ཞེས་བྱ་བ་རྒྱས་པར་འབྱུང་བ་ནི་འདས་པ་དང་མ་འོངས་པ་ནི་ཡུལ་ན་མི་གནས་པའི་ཕྱིར་གཟུགས་སུ་རུང་བ་མ་ཡིན་ཏེ། གནོད་པ་བྱར་ཡང་མེད་ལ་ཐོགས་པ་ཡང་མེད་དོ། །དེ་ཡང་ཞེས་བྱ་བ་རྒྱས་པར་

Vol. 142 · folio 30b

འབྱུང་བ་ལ། དེ་ཡང་གཟུགས་སུ་ཡོད་ཟིན་པ། །ཞེས་བྱ་བ་ནི་འདས་པ་སྟེ་གནོད་པར་བྱེད་པ་དང་ཐོགས་པའི་དོན་གྱིས་སོ། །གཟུགས་སུ་ཡོད་པར་འགྱུར་བ་ཞེས་བྱ་བའི་ནི་མ་འོངས་པ་འབྱུང་བའི་ཆོས་ཅན་ཏེ་དོན་དེ་གཉིས་ཁོ་ནས་སོ། །དེ་དང་རིགས་མཐུན་པ་ཞེས་བྱ་བ་ནི་འབྱུང་

བའི་ཆོས་ཅན་དང་རིགས་མཐུན་པ་མ་འོངས་པ་མི་སྐྱེ་བའི་ཆོས་ཅན་ཡིན་ནོ། །བུད་ཤིང་བཞིན་ནོ་ཞེས་བྱ་བ་ནི་བུས་ཟིན་པ་གང་ཡིན་པ་དང་འབུད་པར་འགྱུར་བ་གང་ཡིན་པ་དང་དེ་དང་རིགས་མཐུན་པ་དེ་ཡང་བུད་ཤིང་ཡིན་ནོ། །དེ་དང་རིགས་མཐུན་པའི་བུད་ཤིང་ནི་བུད་ཤིང་གི་དོན་དུ་བརྟགས་པ་གང་ཞིག་

མེ་དང་མ་ཕྲད་པ་ཁོ་ནར་བར་མ་དོར་འཇིག་པར་འགྱུར་བ་ཡིན་ནོ། །འོ་ན་ནི་རྣམ་པར་རིག་བྱེད་མ་ཡིན་པ་གཟུགས་མ་ཡིན་པར་འགྱུར་རོ། །ཅིའི་ཕྱིར་ཞེ་ན། །ཐོགས་པ་མེད་པའི་ཕྱིར་རོ། །ཐོགས་པ་མེད་པ་ཉིད་ཀྱི་ཕྱིར་དེ་ནི་གནོད་པར་བྱར་ཡང་མེད་ལ་ཐོགས་པར་འགྱུར་བ་ཡང་མེད་དོ། །དེ་

ཡང་རྣམ་པར་རིག་བྱེད་ལ་གཟུགས་སུ་ཡོད་པའི་ཕྱིར་ཞེས་བྱ་བ་རྒྱས་པར་འབྱུང་བ་ནི་རྣམ་པར་རིག་བྱེད་ནི་རྣམ་པར་རིག་བྱེད་མ་ཡིན་པ་ཀུན་ནས་སློང་བར་བྱེད་པ་ཡིན་ནོ། །ཐོགས་པ་དང་བཅས་པ་དེ་ལ་གཟུགས་སུ་ཡོད་པའི་ཕྱིར་རྣམ་པར་རིག་བྱེད་མ་ཡིན་པ་ལ་ཡང་གཟུགས་སུ་ཡོད་

པར་འགྱུར་ཏེ། དཔེར་ན་གྲིབ་མ་ཀུན་ནས་སློང་བར་བྱེད་པའི་ཤིང་ལྗོན་པ་གཡོས་པར་གྲིབ་མ་གཡོ་བ་དེ་དང་འདྲའོ། །འགྱུར་བ་མེད་པའི་ཕྱིར་མ་ཡིན་ཏེ་ཞེས་བྱ་བ་འདིས་ནི་དམ་བཅས་པའི་སྐྱོན་འཛིན་པར་བྱེད་དེ། ཕ་རོལ་པོས་ནི་འདི་སྐད་དུ་རྣམ་པར་རིག་བྱེད་མ་ཡིན་པ་ནི་ཀུན་ནས་བསླང་

བར་བྱ་བ་ཡིན་པའི་ཕྱིར་རང་ཀུན་ནས་སློང་བར་བྱེད་པར་འགྱུར་བའི་རྗེས་སུ་བྱེད་དེ། ཤིང་ལྗོན་པ་དང་གྲིབ་མ་བཞིན་ནོ་ཞེས་དམ་བཅས་སོ། །དམ་བཅས་པ་འདི་ནི་སྔར་ཁས་བླངས་པ་དང་འགལ་བ་ཅན་ཡིན་ཏེ། ཁས་ནི་རྣམ་པར་རིག་བྱེད་གྱུར་ཀྱང་རྣམ་པར་རིག་བྱེད་མ་ཡིན་པ་མི་འགྱུར་བར་བླངས་ཏེ།

འདི་ལྟར་ཐལ་མོ་སྦྱར་བ་བཤིག་སྟེ་ཐལ་མོ་ཁོང་སྟོང་དུ་སྦྱར་བའི་ལུས་ཀྱི་རྣམ་པར་རིག་བྱེད་འགྱུར་རོ་ཞེས་བྱ་བར་ཁས་ལེན་གྱི་རྣམ་པར་རིག་བྱེད་མ་ཡིན་པ་ནི་མ་ཡིན་ནོ། །དེ་ལྟ་བས་ན་སྒྲུབ་པ་འདི་ནི་མི་རུང་ངོ་། །རྣམ་པར་རིག་བྱེད་ལོག་ན་རྣམ་པར་རིག་བྱེད་མ་ཡིན་པ་ཡང་ལྡོག་པར་འགྱུར་ཏེ་

Vol. 142 · folio 31a

ཞེས་བྱ་བ་འདིས་ནི་དམ་བཅས་པ་འདིའི་ཆོས་ཅན་གྱི་ཁྱད་པར་ལས་བཟློག་པ་འཛིན་པར་བྱེད་དེ། གལ་ཏེ་གྲིབ་མ་ཤིང་གི་ཆོས་ཡིན་པར་འདོད་ན་ཤིང་ལོག་ན་གྲིབ་མ་ཡང་ལྡོག་པ་མཐོང་བས་དེ་དང་འདྲའོ། །འདིར་ལ་ལ་དག་འགྱུར་བ་མེད་པའི་ཕྱིར་མ་ཡིན་

ཏེ་ཞེས་བྱ་བ་ནི་ལེགས་པར་སྨྲས་པ་མ་ཡིན་ནོ་ཞེས་སུན་འབྱིན་པར་བྱེད་དོ། །རྣམ་པར་རིག་བྱེད་གྱུར་ན་རྣམ་པར་རིག་བྱེད་མ་ཡིན་པ་ཡང་འགྱུར་བ་ཁོ་ན་སྟེ། རྣམ་པར་རིག་བྱེད་ཆུང་ངུ་དང་འབྲིང་དང་ཆེན་པོ་ཉིད་ཡིན་ན། རྣམ་པར་རིག་བྱེད་མ་ཡིན་པ་ཡང་ཆུང་ངུ་དང་འབྲིང་དང་ཆེན་པོ་ཉིད་དུ་

འགྱུར་རོ་ཞེས་ཟེར་བ་དེ་ནི་རིགས་པ་མ་ཡིན་ནོ། །རྣམ་པར་རིག་བྱེད་མ་ཡིན་པ་སྐྱེ་བ་ཉིད་འདི་ལྟར་ཆུང་ངུ་དང་འབྲིང་དང་ཆེན་པོ་ཉིད་དུ་འགྱུར་གྱི་འགྱུར་བ་ནི་མ་ཡིན་ནོ། །ཆོས་སྐྱེས་པ་ཡང་གཞན་དུ་འབྱུང་བ་ནི་འགྱུར་བ་ཡིན་ལ། དེ་ནི་གཟུགས་སུ་ཡོད་པར་བསམས་པ་ཡིན་ནོ། །གཞན་

དག་ན་རེ་རྟེན་གྱི་འབྱུང་བ་ལ་གཟུགས་སུ་ཡོད་པའི་ཕྱིར་རོ་ཞེས་ཟེར་རོ་ཞེས་བྱ་བ་ནི་སློབ་དཔོན་དབྱིག་གཉེན་སྔ་མའོ། །འབྱུང་བ་སྨོས་པ་ནི་གཞིའི་འབྱུང་བ་བསྟན་པའི་ཕྱིར་རོ། །དེས་ན་གཞན་ལ་ཡང་ཐལ་བར་འགྱུར་བར་བྱ་བའི་ཕྱིར་དེ་ལྟ་ན་འོ་ན་ནི་མིག་གི་རྣམ་པར་ཤེས་པ་ལ་སོགས་པ་

ཡང་ཞེས་བྱ་བ་རྒྱས་པར་སྨོས་སོ། །རྟེན་མིག་ལ་སོགས་པ་གཟུགས་སུ་ཡོད་པའི་ཕྱིར་དེ་དག་གིས་རྣམ་པར་ཤེས་པ་རྣམས་ཀྱང་གཟུགས་ཉིད་དུ་ཐལ་བར་འགྱུར་རོ། །ཉེ་བར་བཀོད་པ་འདི་ནི་མི་མཐུན་པ་ཡིན་ཏེ་ཞེས་བྱ་བ་ནི་སློབ་དཔོན་དབྱིག་གཉེན་སྔ་མའི་ཕྱོགས་པ་འགའ་ཞིག་

ལན་འདེབས་པ་ཡིན་ནོ། །རྣམ་པར་རིག་བྱེད་མ་ཡིན་པ་ཞེས་བྱ་བ་རྒྱས་པར་འབྱུང་བ་ནི་གྲིབ་མ་ཡང་ཤིང་ལྗོན་པ་ལ་འབྱར་བར་བརྟེན་ཏེ་འབྱུང་ལ། འོན་ཀྱང་ནོར་བུ་ལ་དེ་དང་འདྲ་བ་ཡིན་ནོ། །དེ་དག་ནི་དེ་དག་གི་སྐྱེ་བའི་རྒྱུ་མཚན་ཙམ་ཡིན་པ་ཞེས་བྱ་བ་ནི་འབྱར་བ་མེད་དོ་སྙམ་དུ་བསམས་

པ་ཡིན་ནོ། །དེ་ལ་ཅིག་ཤོས་ཀྱིས་འདི་ནི་རེ་ཞིག་བྱེ་བྲག་ཏུ་སྨྲ་བའི་མ་ཡིན་ཏེ་ཞེས་བྱ་བ་རྒྱས་པར་སྨྲས་ཏེ་འདི་ནི་བྱེ་བྲག་ཏུ་སྨྲ་བའི་གཞུང་ལུགས་མ་ཡིན་ནོ། །བྱེ་བྲག་ཏུ་སྨྲ་བའི་གཞུང་ལུགས་ནི་རྫས་ཐ་དད་པའི་ཕྱིར་གྲིབ་མའི་ཁ་དོག་གི་རྡུལ་ཕྲ་རབ་ཀྱང་རང་གི་འབྱུང་བ་བཞི་ཚན་ལ་བརྟེན་

Vol. 142 · folio 31b

ཏེ་འབྱུང་གི་ཤིང་ལྗོན་པ་ལ་ནི་མ་ཡིན་ལ་དེ་བཞིན་དུ་འོད་ཀྱང་རང་གི་འབྱུང་བ་བཞི་ཚན་ལ་བརྟེན་ཏེ་འབྱུང་གི་ནོར་བུ་ལ་ནི་མ་ཡིན་ནོ། །དེ་ལྟར་ན་ནོར་བུ་དང་ཤིང་ལྗོན་པ་དག་བཞིའི་རྒྱུ་མ་ཡིན་པའི་ཕྱིར་འབྱུང་བ་ཆེན་པོ་དང་རྣམ་པར་རིག་བྱེད་མ་ཡིན་པ་ལྟར་གྲིབ་མ་དང་འོད་དག་འབྲེལ་པ་མེད་

པས་དཔེ་དང་དངོས་གཉིས་མི་མཐུན་པ་ཡིན་ནོ། །གྲིབ་མ་དང་འོད་དེ་དག་ལ་བརྟེན་པ་ཉིད་ཡིན་ཡང་ཞེས་བྱ་བ་ནི་ཅི་སྟེ་དེ་དག་གིས་རྗེས་སུ་བྱེད་པའི་ཕྱིར་གྲིབ་མ་ནི་རང་གི་འབྱུང་བ་ལ་བརྟེན་ལ་འབྱུང་བ་དེ་དག་ནི་ཤིང་ལྗོན་པ་ལ་བརྟེན་ནོ། །འོན་ཀྱང་རང་གི་འབྱུང་བ་ལ་བརྟེན་ནས་བྱུང་བ་དེ་དག་ནི་ནོར་

བུ་ལ་བརྟེན་ཏོ་ཞེས་བྱ་བ་བརྒྱུད་པའི་སྒོ་ནས་བརྟེན་པ་ཉིད་དུ་ཁས་ལེན་ཀྱང་འོན་ཀྱང་མི་མཐུན་ཏེ། གྲུབ་པའི་མཐའ་ལས། འདོད་གཏོགས་རྣམ་རིག་མིན་སྐད་ཅིག །ཕྱིན་ཆད་འདས་པའི་འབྱུང་ལས་སྐྱེས། །ཞེས་འབྱུང་བས་རྣམ་པར་རིག་བྱེད་མ་ཡིན་པའི་རྟེན་དག་འགགས་ཀྱང་དེ་མི་

འགག་པར་ཁས་ལེན་པའི་ཕྱིར་རོ། །དེ་ལྟ་བས་ན་འདི་ནི་ལན་དུ་མི་རུང་ངོ་། །གཞན་དག་ནི་འདི་ལ་ཞེས་བྱ་བ་ནི་སློབ་དཔོན་འདི་ཉིད་ཡིན་ཏེ་རྣམ་པར་རིག་བྱེད་མ་ཡིན་པ་ནི་ཤིང་ལྗོན་པ་ལ་གྲིབ་མ་ཉིད་དང་ཞེས་བྱ་བ་རྒྱས་པར་བཤད་པར་གྱུར་པ་གང་ཡིན་པ་དེའི་གཞུང་གཟུགས་པའི་ཕྱིར།

རྟེན་ནི་ཐ་དད་དུ་གྱུར་པ་སྟེ་ཞེས་བྱ་བ་སྨོས་ཏེ་རྣམ་པ་གཉིས་སོ་ཞེས་བྱ་བའི་ཐ་ཚིག་གོ། །ཁ་ཅིག་ནི་གཟུགས་སུ་རུང་བ་སྟེ་མིག་ལ་སོགས་པའོ་ཞེས་བྱ་བ་ནི་ཐོགས་པ་དང་བཅས་པའི་ཕྱིར་རོ། །ལ་ལ་ནི་གཟུགས་སུ་མི་རུང་བ་སྟེ་ཡིད་དོ་ཞེས་བྱ་བ་ནི་བཟློག་པ་ཡིན་པའི་ཕྱིར་རོ། །དེ་ལྟ་

བས་ན་འདྲ་བར་ཐལ་བ་མེད་དེ་ཞེས་བྱ་བ་ནི་རྟེན་གཟུགས་སུ་ཡོད་ཀྱང་མིག་གི་རྣམ་པར་ཤེས་པ་ལ་སོགས་པ་གཟུགས་ཉིད་ཡིན་པར་ཐལ་བར་མི་འགྱུར་བའོ། །གཟུགས་སུ་ཡོད་པས་ན་གཟུགས་སོ་ཞེས་བྱ་བ་ནི་གཞི་གཟུགས་སུ་ཡོད་པས་ན་ཞེས་བྱ་བའི་ཐ་ཚིག་གོ། །འདི་ལྟར་རྣམ་

པར་རིག་བྱེད་ལས་བྱུང་བའི་རྣམ་པར་རིག་བྱེད་མ་ཡིན་པ་ནི་དེ་ལྟར་འབད་འབད་དེ་གཟུགས་ཉིད་ཡིན་པར་གྱུར་ན་ཡང་ཡིན་དུ་ཟད་ན། ཏིང་ངེ་འཛིན་ལས་བྱུང་བ་གོ་ཇི་ལྟར་གཟུགས་ཉིད་ཡིན་ཞེས་རྒོལ་བར་བྱེད་ན། དེ་ལ་ཡང་དེ་དང་རིགས་མཐུན་པའི་ཕྱིར་གཟུགས་ཡིན་ནོ། །དེ་དང་རིགས་མཐུན་

Vol. 142 · folio 32a

པ་ཉིད་ཀྱང་གང་ཞེ་ན། འབྱུང་བ་ཆེན་པོ་རྣམས་རྒྱུར་བྱས་པའོ་སྙམ་དུ་བསམས་པ་སྟེ། དེ་དག་ནི་རྒྱུར་བྱས་པའི་གཟུགས་སྐྱེད་པ་ལ་སོགས་པའི་རྒྱུ་ཡིན་པའི་ཕྱིར་རོ། །དབང་དོན་དེ་དག་ཁོ་ན་ལ། །ཞེས་བྱ་བ་ལ། བཅོམ་ལྡན་འདས་ཀྱི་བསྟན་པ་ནི་འདུལ་བའི་

དབང་གིས་གསུམ་སྟེ། ཕུང་པོ་དང་སྐྱེ་མཆེད་དང་ཁམས་བསྟན་པའོ། །དེ་དག་ལས་ཀྱང་ཆོས་གང་དག་ཕུང་པོ་དག་གི་ནང་དུ་བསྟན་པ་དེ་དག་ཉིད་ཁམས་དང་སྐྱེ་མཆེད་དག་གི་ནང་དུ་ཡང་བསྟན་ཏེ། འདིས་ནི་འདུས་མ་བྱས་འབའ་ཞིག་ལྷག་པར་ཟད་དོ། །ཆོས་མངོན་པ་ཐམས་ཅད་ནི་མདོ་རྣམ་པར་

འཆད་པ་ཡིན་པས་དེའི་ཕྱིར། དབང་དོན་དེ་དག་ཁོ་ན་ལ། །ཞེས་བྱ་བ་འདི་རྒྱས་པར་གསུངས་ཏེ། སློབ་དཔོན་འདི་ནི་ཟོར་ཡང་བ་ལ་མཁས་པ་ཡིན་པས་ཚོར་བའི་ཕུང་པོ་ལ་སོགས་པའི་མཚན་ཉིད་མ་བཤད་པ་ཉིད་དུ། ཟོར་ཡང་བར་གཟུགས་ཀྱི་ཕུང་པོའི་ངོ་བོ་ཉིད་ཀྱི་ཆོས་རྣམས་སྐྱེ་མཆེད་དང་

ཁམས་དག་གི་ནང་དུ་སྟོན་པར་བྱེད་དེ། དབང་པོ་དེ་དག་དང་དོན་དེ་དག་ནི་དབང་དོན་ཏོ། །དེ་དག་ཁོ་ན་ལ་ཞེས་བྱ་བའི་ཁྱད་པར་ནི་དབང་པོ་གཞན་བསལ་བའི་ཕྱིར་དང་། དོན་གཞན་བསལ་བའི་ཕྱིར་རོ། །སྐྱེ་མཆེད་རྣམ་པར་གཞག་པ་ནི་གྲངས་བཞིན་དུ་སྐྱེ་མཆེད་བཅུ་སྟེ་མིག་གི་སྐྱེ་མཆེད་དང་

གཟུགས་ཀྱི་སྐྱ་མཆེད་ནས་ལུས་ཀྱི་སྐྱེ་མཆེད་དང་རེག་བྱའི་སྐྱེ་མཆེད་ཀྱི་བར་ཡིན་ནོ། །ཁམས་རྣམ་པར་གཞག་པ་ནི་དེ་དག་ཉིད་ཁམས་བཅུ་སྟེ་མིག་གི་ཁམས་དང་གཟུགས་ཀྱི་ཁམས་ནས། ལུས་ཀྱི་ཁམས་དང་རེག་བྱའི་ཁམས་ཀྱི་བར་ཡིན་ནོ། །གཟུགས་ཀྱི་ཕུང་པོ་དང་དེའི་སྐྱེ་མཆེད་

དང་ཁམས་རྣམ་པར་གཞག་པ་བཤད་ཟིན་ཏོ་ཞེས་བྱ་བ་རྣམ་པར་རིག་བྱེད་མ་ཡིན་པའི་གཟུགས་འཆད་པར་འགྱུར་བ་ཡིན་པའི་ཕྱིར་གཟུགས་ཀྱི་ཕུང་པོའི་སྐྱེ་མཆེད་དང་ཁམས་རྣམ་པར་གཞག་པ་ཐམས་ཅད་ནི་མ་བཤད་ན། ཅི་སྟེ་བཤད་ཟིན་ཏོ་ཞེས་འདི་སྐད་བརྗོད་ཅེ་ན། བསྟན་པ་འདི་ནི་

ཕལ་ཆེ་བ་བཙན་པར་བྱས་པ་ཡིན་ནོ། །གཟུགས་ཀྱི་ཕུང་པོའི་སྐྱེ་མཆེད་དང་ཁམས་རྣམ་པར་གཞག་པ་ཕལ་ཆེར་བཤད་ཟིན་ཏོ་ཞེས་བྱ་བའི་ཐ་ཚིག་སྟེ། མོན་སྲན་སྡེའུ་ཅུང་ཟད་ཅིག་ཡོད་ཀྱང་མོན་སྲན་གྲེའུའི་ཕུང་པོར་ཐ་སྙད་འདོགས་པ་བཞིན་ནོ། །མྱོང་བ་རྣམ་པ་གསུམ་ཞེས་བྱ་བ་

Vol. 142 · folio 32b

ནི་ཉམས་སུ་མྱོང་བས་ན་མྱོང་བའོ། །གང་གི་ཡིན་ཞེ་ན། སེམས་སམ་གང་ཟག་གི་ཡིན་ནོ། །དེ་ཡང་བདེ་བ་དང་སྡུག་བསྔལ་དང་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་དང་རྣམ་པ་གསུམ་སྟེ། དངོས་པོའི་སེམས་པ་དང་ཡོངས་སུ་གདུང་བ་དང་དེ་གཉིས་ཀ་ལས་མ་གཏོགས་

པའི་རང་གི་ངོ་བོ་མངོན་སུམ་དུ་བྱེད་པའི་ངོ་བོ་ཉིད་ཡིན་ནོ། །ཡང་ན་དེས་ཡུལ་ཉམས་སུ་མྱོང་བར་འགྱུར་བས་མྱོང་བའོ། །ཡང་ན་ཉམས་སུ་མྱོང་བར་བྱེད་པས་མྱོང་བའོ། །གཞན་དག་ན་རེ་སེམས་ལས་བྱུང་བའི་ཁྱད་པར་རེག་པ་ཉམས་སུ་མྱོང་བ་ལུས་དང་སེམས་རྒྱས་པ་དང་འགྲིབ་པ་དང་

དེ་གཉི་ག་ལས་མ་གཏོགས་པའི་གནས་སྐབས་སུ་ཞུགས་པ་ཡིན་ནོ་ཞེས་ཟེར་རོ། །ཉམས་སུ་ཞེས་བྱ་བ་ནི་མཚན་ཉིད་ཡིན་པས་རེག་པའི་རྟགས་ཡིན་ནོ། །རེག་པའི་མཚན་མ་ཉམས་སུ་མྱོང་བ་ཞེས་བྱ་བའི་ཐ་ཚིག་སྟེ། དེ་ནི་ཚོར་བའི་ཕུང་པོ་ཡིན་ནོ། །མཚན་མར་འཛིན་པའི་བདག་ཉིད་

དོ། །ཞེས་བྱ་བ་ལ། མཚན་མ་ནི་དངོས་པོའི་གནས་སྐབས་ཀྱི་ཁྱད་པར་ཏེ་སྔོན་པོ་ལ་སོགས་པ་ཡིན་ནོ། །དེ་འཛིན་པ་ནི་ཡོངས་སུ་གཅོད་པའོ། །དེའི་བདག་ཉིད་ནི་དེའི་ངོ་བོ་ཉིད་དོ། །སྡུག་བསྔལ་ལ་སོགས་པ་ཞེས་བྱ་བའི་སོགས་པ་ཞེས་བྱ་བའི་སྒྲས་ནི་དམར་པོ་ལ་སོགས་པ་

བསྡུ་སྟེ་འདི་ནི་འདུ་ཤེས་ཀྱི་ཕུང་པོ་ཡིན་ནོ། །གལ་ཏེ་འདུ་ཤེས་ཡོངས་སུ་གཅོད་པའི་བདག་ཉིད་ཡིན་ན་གོ་དེ་དང་མཚུངས་པར་ལྡན་ན་མཚན་མ་ལ་འཛིན་པས་རྣམ་པར་ཤེས་པའི་ཚོགས་ལྔ་རྣམ་པར་རྟོག་པ་ཅན་དུ་འགྱུར་རོ་ཞེ་ན་མི་འགྱུར་ཏེ། རྣམ་པར་ཤེས་པ་ལྔ་དང་མཚུངས་པར་ལྡན་

པའི་འདུ་ཤེས་ནི་གསལ་བ་མ་ཡིན་ནོ། །ཡིད་ཀྱི་རྣམ་པར་ཤེས་པའི་ཚོགས་དང་མཚུངས་པར་ལྡན་པ་ནི་གསལ་བ་ཡིན་པས་དེ་ཁོ་ན་རྣམ་པར་རྟོག་པ་དང་བཅས་པ་ཡིན་པར་བཤད་དོ། །འདུ་ཤེས་ཀྱི་ཚོགས་དྲུག་སྟེ་ཚོར་བ་བཞིན་ནོ་ཞེས་བྱ་བ་ནི་ཇི་ལྟར་མིག་གི་འདུས་ཏེ་རེག་པ་ལས་

བྱུང་བའི་ཚོར་བ་ཞེས་བྱ་བ་རྒྱས་པར་བཤད་པའི་དེ་བཞིན་དུ་མིག་གི་འདུས་ཏེ་རེག་པ་ལས་བྱུང་བའི་ཚོར་བའི་འདུ་ཤེས་ཞེས་བྱ་བ་རྒྱས་པར་བརྗོད་པར་བྱའོ། །བཞི་ལས་གཞན་ཡང་ཞེས་བྱ་བ་ནི་ཕུང་པོའི་སྐབས་ཡིན་པའི་ཕྱིར་ཕུང་པོ་བཞི་ལས་སོ། །གཟུགས་ཀྱི་ཕུང་པོ་ལ་

Vol. 142 · folio 33a

སོགས་པ་གསུམ་བཤད་པ་དག་དང་རྣམ་པར་ཤེས་པའི་ཕུང་པོ་ལས་ཏེ་བསྟན་ཟིན་པ་དང་འཆད་པར་འགྱུར་བ་དང་། བཞི་ལས་གཞན་པའི་འདུ་བྱེད་རྣམས་ནི་འདུ་བྱེད་ཀྱི་ཕུང་པོའོ། །བཅོམ་ལྡན་འདས་ཀྱིས་མདོ་ལས། སེམས་པའི་ཚོགས་དྲུག་

གོ་ཞེས་བྱ་བ་གསུངས་ཞེས་བྱ་བ་ནི་འདུ་བྱེད་ཀྱི་ཕུང་པོ་གང་ཞེ་ན། སེམས་པའི་ཚོགས་དྲུག་གོ་ཞེས་གསུངས་པ་ཡིན་ནོ། །མངོན་པར་འདུ་བྱ་བ་ལ་གཙོ་བོ་ཡིན་ནོ་ཞེས་བྱ་བ་ནི་འདི་ལྟ་བུ་དང་འདི་ལྟ་བུར་འགྱུར་བར་བྱའོ་ཞེས་མངོན་པར་འདུ་བྱ་བ་ལ་གཙོ་བོ་ཡིན་ཏེ། ལས་ཀྱི་རྒྱུ་ཅན་གྱི་སྐྱེ་བ་དག་

ཅེས་འབྱུང་བའི་ཕྱིར་རོ། །འདུན་པ་དང་ཐོབ་པ་ལ་སོགས་པ་ནི་སེམས་པའི་རྗེས་སུ་བྱེད་པའི་ཕྱིར་ཏེ། དེའི་རྣམ་པའི་རྒྱུའི་དངོས་པོའི་རྗེས་སུ་བྱེད་པའི་སྒོ་ནས་འདུ་བྱེད་ཀྱི་ཕུང་པོ་ཁོ་ན་ཡིན་པར་རིག་པར་བྱའོ། །དེ་ལྟ་ཡིན་དང་འདུ་བྱེད་པར་ཞུགས་པའི་ཆོས་ཀྱི་ཕུང་པོ་ནི་འདུ་བྱེད་ཀྱི་ཕུང་པོ་ཡིན་ནོ་

ཞེས་བཤད་པར་འགྱུར་རོ། །གཞན་དག་ན་རེ་འདུས་བྱས་མངོན་པར་འདུ་བྱ་བ་ལ་སེམས་པ་གཙོ་བོ་ཡིན་པར་བཤད་པས། དེའི་ཕྱིར་མདོ་ལས་སེམས་པ་སྨོས་ཏེ། ཕུང་པོ་འདི་ཉིད་འདུས་བྱས་ཀྱི་ཆོས་མཚུངས་པར་ལྡན་པ་དང་ལྡན་པ་མ་ཡིན་པ་བསྡུས་པའི་སྒོ་ནས་གཙོ་བོར་གྱུར་པ་ཡིན་པས་

འདུ་བྱེད་ཀྱི་ཕུང་པོར་བཤད་དེ། འདུས་བྱས་ཀྱི་ཕུང་པོ་ཡིན་པའི་ཕྱིར་རོ་ཞེས་ཟེར་རོ། །འདུས་བྱས་མངོན་པར་འདུ་བྱེད་དེ་ཞེས་བྱ་བ་ནི་འབྱུང་བར་འགྱུར་བའི་མིང་གིས་མ་འོངས་པའི་ཕུང་པོ་ལྔ་ལ་འདུས་བྱས་ཞེས་བཤད་པ་ཡིན་ནོ། །དེ་ལྟ་མ་ཡིན་ན་ཞེས་བྱ་བ་རྒྱས་པར་འབྱུང་བ་ནི་གལ་ཏེ་

མདོ་ལས་ཇི་སྐད་འབྱུང་བ་བཞིན་དུ་སེམས་པ་འབའ་ཞིག་འདུ་བྱེད་ཀྱི་ཕུང་པོ་ཡིན་པ་ཁོ་ནར་འདོད་ཀྱི་གཞན་དག་ནི་མ་ཡིན་ན་འདུན་པ་ལ་སོགས་པ་སེམས་ལས་བྱུང་བ་ལྷག་མ་རྣམས་དང་ཐོབ་པ་ལ་སོགས་པ་ལྡན་པ་མ་ཡིན་པ་རྣམས་གཟུགས་ལ་སོགས་པའི་ཕུང་པོ་དག་ཏུ་ཡང་གཟུགས་

སུ་རུང་བ་ལ་སོགས་པ་མེད་པའི་ཕྱིར་མ་འདུས་ལ། འདུ་བྱེད་ཀྱི་ཕུང་པོར་ཡང་དེ་ལྟར་མདོ་ཇི་ལྟ་བ་བཞིན་དུ་བྱ་ན་དེར་བསྡུར་མི་རུང་བའི་ཕྱིར་མ་འདུས་པས། ཕུང་པོར་མ་འདུས་པའི་ཕྱིར་སྡུག་བསྔལ་དང་ཀུན་འབྱུང་བའི་བདེན་པ་ཉིད་དུ་མི་འབྱུང་བས་ཡོངས་སུ་ཤེས་པ་དང་སྤང་བར་ཡང་མི་

Vol. 142 · folio 33b

འགྱུར་ཏེ། ཡོངས་སུ་ཤེས་པ་ནི་སྡུག་བསྔལ་ལོ། །སྤང་བ་ནི་ཀུན་འབྱུང་བའོ། །མངོན་པར་མ་ཤེས་པ་ནི་འཇིག་རྟེན་པའི་ལམ་གྱིས་སོ། །ཡོངས་སུ་མ་ཤེས་པ་ནི་འཇིག་རྟེན་ལས་འདས་པའི་ལམ་གྱིས་སོ། །རྣམ་པ་གཅིག་ཏུ་ན་མངོན་པར་མ་ཤེས་པ་ནི་མཐོང་བའི་ལམ་གྱིས་

སོ། །ཡོངས་སུ་མ་ཤེས་པ་ནི་བསྒོམ་པའི་ལམ་གྱིས་སོ། །དེ་བཞིན་དུ་མ་སྤངས་པར་ཞེས་གསུངས་ཏེ་ཞེས་བྱ་བ་ནི་མདོ་གཞན་ཞིག་ཡིན་ཏེ། ཆོས་གཅིག་ཡོངས་སུ་མ་ཤེས་ཤིང་མ་སྤངས་པར་ཡང་སྡུག་བསྔལ་གྱི་མཐར་བྱེད་པར་ང་མི་སྨྲའོ་ཞེས་བྱ་བའི་ཐ་ཚིག་གོ། །འཇིག་

རྟེན་ལས་འདས་པའི་ལམ་གྱིས་ནམ་མཁའ་དང་སོ་སོར་བརྟགས་པ་མ་ཡིན་པས་འགོག་པ་དག་ཡོངས་སུ་མ་ཤེས་མོད་ཀྱི་འོན་ཀྱང་སྡུག་བསྔལ་གྱི་མཐར་བྱེད་པར་འདོད་པ་མ་ཡིན་ནམ་ཞེ་ན། ཀུན་ནས་ཉོན་མོངས་པའི་དངོས་པོ་ལས་དགོངས་ཏེ་གསུངས་པའི་ཕྱིར་དང་མདོ་སྡེ་པའི་ལྟ་

བ་ལྟར་ན་ཡང་བཏགས་པ་ཡོད་པ་ཡིན་པའི་ཕྱིར་ཉེས་པ་མེད་དེ། དེ་དག་ཀུན་ནས་ཉོན་མོངས་པའི་དངོས་པོ་མ་ཡིན་ན་འདི་གཉིས་ཡོངས་སུ་ཤེས་པར་བྱ་བ་ཉིད་ཀྱིས་ཅི་ཞིག་བྱ། འོ་ན་ནི་འགོག་པ་དང་ལམ་གྱི་བདེན་པ་དག་ཀྱང་ཀུན་ནས་ཉོན་མོངས་པའི་དངོས་པོ་མ་ཡིན་པས་ཡོངས་སུ་

ཤེས་པར་བྱ་བར་མི་འགྱུར་རོ་ཞེ་ན། དེ་གཉིས་ནི་སྡུག་བསྔལ་དང་ཀུན་འབྱུང་བའི་བདེན་པ་དང་འབྲེལ་བ་ཡོད་པའི་ཕྱིར། ཡོངས་སུ་ཤེས་པར་བྱ་བ་ཉིད་དུ་རྣམ་པར་གཞག་སྟེ། འདི་ལྟར་རྣལ་འབྱོར་པ་ནི་འདི་ལྟར་སྡུག་བསྔལ་འདིའི་འགོག་པ་ནི་གང་ཡིན་ཐབས་གང་ཞིག་གིས་ནི་

འགོག་པ་དེ་འཐོབ་པར་འགྱུར་ཞེས་རྣམ་པར་དཔྱོད་པར་བྱེད་པས་འགོག་པ་དང་ལམ་གྱི་བདེན་པ་དག་ཀྱང་ཡོངས་སུ་ཤེས་ཀྱི། ནམ་མཁའ་དང་སོ་སོར་བརྟགས་པ་མ་ཡིན་པས་འགོག་པ་དག་ནི་སྡུག་བསྔལ་དང་འབྲེལ་པ་མེད་པས་དེ་དག་ཡོངས་སུ་མི་ཤེས་སོ། །སྦྱོར་བའི་གནས་

སྐབས་ན་ནི་དེ་དག་ཀྱང་འཇིག་རྟེན་པའི་ལམ་གྱིས་ཆོས་ཐམས་ཅད་བདག་མེད་པའོ་ཞེས་སྤྱིའི་ངོ་བོར་སྒོམ་པར་བྱེད་དོ། །རྣམ་པར་རིག་བྱེད་མ་ཡིན་དང་། །འདུས་མ་བྱས་རྣམས་བཅས་པ་ནི། །ཞེས་བྱ་བ་ནི་རྣམ་པར་རིག་བྱེད་མ་ཡིན་པ་དང་བཅས་ཤིང་ནམ་མཁའ་ལ་སོགས་པ་འདུས་

Vol. 142 · folio 34a

མ་བྱས་རྣམས་དང་བཅས་པའོ། །ཆོས་ཀྱི་སྐྱེ་མཆེད་ཁམས་ཞེས་བྱ། །ཞེས་བྱ་བ་ནི་སྐྱེ་མཆེད་དང་ཁམས་ནི་སྐྱེ་མཆེད་ཁམས་སོ། །འདི་ནི་ཆོས་ཀྱང་ཡིན་ལ་སྐྱེ་མཆེད་དང་ཁམས་ཀྱང་ཡིན་པས་ཆོས་ཀྱི་སྐྱེ་མཆེད་ཁམས་སོ། །འདི་དག་ལ་དེ་སྐད་ཅེས་

བྱ་བ་ཡོད་པས་ན་འདི་དག་ནི་ཆོས་ཀྱི་སྐྱེ་མཆེད་ཁམས་ཞེས་བྱའོ། །གང་དག་ཅེ་ན། ཚོར་བ་དང་འདུ་ཤེས་དང་འདུ་བྱེད་ཀྱི་ཕུང་པོ་དག་སྟེ། སྐྱེ་མཆེད་རྣམ་པར་གཞག་པར་ནི་ཆོས་ཀྱི་སྐྱེ་མཆེད་ཅེས་བྱའོ། །ཁམས་རྣམ་པར་གཞག་པར་ནི་ཆོས་ཀྱི་ཁམས་ཞེས་བྱའོ། །རྫས་བདུན་

ཞེས་བྱ་བ་ནི་རྣམ་པར་རིག་བྱེད་མ་ཡིན་པ་དང་ཚོར་བའི་ཕུང་པོ་དང་འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། ནམ་མཁའ་དང་སོ་སོར་བརྟགས་པས་འགོག་པ་དང་སོ་སོར་བརྟགས་པ་མ་ཡིན་པས་འགོག་པའོ། །རྣམ་ཤེས་སོ་སོར་རྣམ་རིག་པ། །ཞེས་བྱ་བ་ནི་ཕུང་པོའི་སྐབས་

ཡིན་པའི་ཕྱིར་རྣམ་པར་ཤེས་པའི་ཕུང་པོ་ནི་སོ་སོར་རྣམ་པར་རིག་པ་ཡིན་ནོ་ཞེས་བྱ་བའི་ཐ་ཚིག་གོ། །སོ་སོར་ཞེས་བྱ་བ་ནི་ཟློས་པའི་དོན་ཏེ་ཡུལ་དང་ཡུལ་ལ་སོ་སོར་ཞེས་བྱ་བའི་ཐ་ཚིག་གོ། །དམིགས་པ་ནི་དངོས་པོ་ཙམ་འཛིན་པའོ། །ཚོར་བ་ལ་སོགས་པ་སེམས་ལས་བྱུང་བའི་

ཁྱད་པར་རྣམས་ནི་ཁྱད་པར་འཛིན་པའི་ངོ་བོ་དག་ཡིན་ནོ། །རྣམ་པར་ཤེས་པའི་ཚོགས་དྲུག་ཅེས་བྱ་བ་ནི་རྣམ་པར་ཤེས་པའི་ཚོགས་དྲུག་གོ། །རྣམ་པར་ཤེས་པ་དྲུག་དང་ཡིད། །ཅེས་བྱ་བ་ལ་རྣམ་པར་ཤེས་པའི་ཁམས་དྲུག་ནི་གྲངས་བཞིན་ནོ། །མིག་གི་རྣམ་པར་ཤེས་པ་གང་ཡིན་

པ་དེ་ནི་མིག་གི་རྣམ་པར་ཤེས་པའི་ཁམས་ཡིན་ལ། དེ་བཞིན་དུ་ཡིད་ཀྱི་རྣམ་པར་ཤེས་པའི་བར་གང་ཡིན་པ་དེ་ནི་ཡིད་ཀྱི་རྣམ་པར་ཤེས་པའི་ཁམས་ཡིན་ཞིང་དེ་དྲུག་སྤྱིར་ནི་ཡིད་ཀྱི་ཁམས་ཡིན་ནོ་ཞེས་རིག་པར་བྱའོ། །དྲུག་པོ་འདས་མ་ཐག་པ་ཡི། །རྣམ་ཤེས་གང་ཡིན་དེ་ཡིད་དོ། །

ཞེས་བྱ་བ་ལ་དྲུག་པོ་ཞེས་བྱ་བ་ནི་ངེས་པར་བཟུང་བའི་དྲུག་པ་ཡིན་ནོ། །དྲུག་པོ་དག་ནི་ནང་ནས་ཡིན་གྱི། གཞན་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །འདས་མ་ཐག་པ་སྨོས་པ་ནི་རྣམ་པར་ཤེས་པ་གཞན་གྱིས་བར་དུ་ཆོད་པ་བཟློག་པའི་ཕྱིར་རོ། །གང་གི་དེ་མ་ཐག་པ་གང་ཞིག་རྣམ་

Vol. 142 · folio 34b

པར་ཤེས་པ་གཞན་གྱིས་བར་དུ་མ་ཆོད་པ་དེ་ནི་དེའི་རྟེན་ཡིན་གྱི། བར་དུ་ཆོད་པ་ནི་དེའི་རྟེན་མ་ཡིན་ཏེ། འདི་ནི་གཞན་གང་ཞིག་དེས་བར་དུ་མ་ཆོད་པའི་རྟེན་ཡིན་ནོ། །དེ་ཉིད་ཀྱི་ཕྱིར་སེམས་མེད་པའི་གནས་སྐབས་ན་སྙོམས་པར་འཇུག་པའི་སེམས་འདས་ནས་ཡུན་རིང་ཡང་རྣམ་པར་ཤེས་པ་

གཞན་གྱིས་བར་དུ་མ་ཆོད་པའི་ཕྱིར་ལྡང་བའི་སེམས་ཀྱི་རྟེན་ཡིན་ནོ། །འདས་པ་སྨོས་པ་ནི་ད་ལྟར་བྱུང་བ་བསལ་བའི་ཕྱིར་རོ། །ཡིད་ཀྱི་རྣམ་པར་ཤེས་པ་ད་ལྟར་བྱུང་བ་ནི་དེའི་གནས་སྐབས་ལ་རྟེན་ཅན་ཡིན་ནོ། །དེའི་ཕྱིར་དེ་ནི་འདས་པ་ཡིན་པར་འདོད་དེ་དེ་ཉིད་འདི་སྐད་དུ། དྲུག་པའི་

རྟེན་ནི་རབ་བསྒྲུབ་ཕྱིར། །ཞེས་བྱ་བ་ཡིན་ནོ། །རྣམ་ཤེས་སྨོས་པ་ནི་འདས་མ་ཐག་པའི་ཚོར་བ་ལ་སོགས་པ་བཟློག་པའི་ཕྱིར་རོ། །གང་ཡིན་དེ་ཡིད་དོ་ཞེས་བྱ་བ་ནི་རིགས་བསྟན་པའི་ཕྱིར་ཟློས་པ་དང་ལྡན་པ་ཡིན་ནོ། །འགྲེལ་པ་ལས་ནི་རྫས་ཀྱི་དངོས་པོ་བརྗོད་པར་འདོད་པས་རྣམ་པར་

ཤེས་པ་གང་དང་གང་འགགས་མ་ཐག་པ་དེ་ནི་ཡིད་ཀྱི་ཁམས་ཞེས་བྱ་སྟེ་ཞེས་ཟློས་པ་དང་ལྡན་པའི་ཕྱིར་རོ། །དཔེར་ན་བུ་དེ་ཉིད་ཅེས་བྱ་བ་ནི་དཔེར་ན་བུ་དེ་ཉིད་གཞན་གྱི་ཕ་ཞེས་བྱ་བའི་མིང་འཐོབ་ལ་འབྲས་བུ་དེ་ཉིད་གཞན་གྱི་ས་བོན་ཞེས་བྱ་བའི་མིང་འཐོབ་པ་དེ་བཞིན་དུ་འདིར་ཡང་།

མིག་གི་རྣམ་པར་ཤེས་པ་ལ་སོགས་པ་དེ་ཉིད་གཞན་གྱི་རྟེན་ཡིན་པས་ཡིད་ཀྱི་ཁམས་ཞེས་བྱ་བའི་མིང་འཐོབ་པོ། །བཅུ་བདུན་ནམ་བཅུ་གཉིས་སུ་གྱུར་ན་ཞེས་བྱ་བ་ནི་རྣམ་པར་ཤེས་པའི་ཁམས་དྲུག་གང་དག་ཡིན་པ་དེ་དག་ནི་ཡིད་ཀྱི་ཁམས་ཡིན་ལ་ཡིད་ཀྱི་ཁམས་གང་ཡིན་པ་

དེ་ཉིད་རྣམ་པར་ཤེས་པའི་ཁམས་དྲུག་ཡིན་པས་གཅིག་གི་ནང་དུ་གཅིག་འདུས་ཏེ། གལ་ཏེ་རྣམ་པར་ཤེས་པའི་ཁམས་དྲུག་ཡིན་པར་བཟུང་ན་ནི་ཡིད་ཀྱི་ཁམས་དོན་མེད་པས་ཁམས་བཅུ་བདུན་དུ་འགྱུར་རོ། །གལ་ཏེ་ཡིད་ཀྱི་ཁམས་ཡིན་པར་བཟུང་ན་ནི་རྣམ་པར་ཤེས་པའི་

ཁམས་དྲུག་དོན་མེད་པས་ཁམས་བཅུ་གཉིས་སུ་འགྱུར་རོ། །དྲུག་པའི་རྟེན་ནི་རབ་བསྒྲུབ་ཕྱིར། །ཞེས་བྱ་བ་ནི་རྣམ་པར་ཤེས་པ་ལྔའི་རྟེན་ནི་མིག་ལ་སོགས་པ་རང་གི་རྟེན་ཡོད་པའི་ཕྱིར་བསྒྲུབ་པར་མི་བྱའོ། །ཡིད་ཀྱི་རྣམ་པར་ཤེས་པའི་རྟེན་མེད་པས་དེའི་རྟེན་རབ་ཏུ་བསྒྲུབ་པའི་ཕྱིར་

Vol. 142 · folio 35a

ཡིད་ཀྱི་ཁམས་རྣམ་པར་གཞག་གོ། །རྟེན་ལ་སོགས་པ་དྲུག་ཚན་ནི་གཟུགས་ལ་སོགས་པ་ཆོས་ལ་ཐུག་པའི་བར་རོ། །རྟེན་དྲུག་ཚན་ནི་མིག་ལ་སོགས་པ་ཡིད་ལ་ཐུག་པའི་བར་རོ། །བརྟེན་པ་དྲུག་ཚན་ནི་མིག་གི་རྣམ་པར་ཤེས་པ་ལ་སོགས་པ་ནས་ཡིད་

ཀྱི་རྣམ་པར་ཤེས་པ་ལ་ཐུག་པའི་བར་རོ། །དམིགས་པ་དྲུག་ཚན་ནི་གཟུགས་ལ་སོགས་པ་ཆོས་ལ་ཐུག་པའི་བར་རོ། །རྣལ་འབྱོར་སྤྱོད་པའི་ལྟ་བ་ལྟར་ན་ནི་ཡིད་ཀྱི་ཁམས་རྣམ་པར་ཤེས་པ་དྲུག་ལས་མ་གཏོགས་པ་ཡང་ཡོད་དོ། །གོས་དམར་བའི་སྡེ་པ་རྣམས་ཀྱང་ཡིད་ཀྱི་རྣམ་པར་ཤེས་

པའི་རྟེན་སྙིང་གི་དངོས་པོ་ཡིན་པར་བརྗོད་དེ་དེ་ནི་གཟུགས་མེད་པའི་ཁམས་ན་ཡང་ཡོད་དོ་ཞེས་བརྗོད་དོ། །དེ་དག་ནི་གཟུགས་མེད་པའི་ཁམས་དག་ན་ཡང་གཟུགས་ཡོད་པར་འདོད་དེ་གཟུགས་མེད་པ་ཞེས་བྱ་བ་ནི་ཅུང་ཟད་ཡོད་པའི་དོན་ཡིན་ཏེ་ཅུང་ཟད་ཟེར་བ་ལྟ་བུའོ་ཞེས་ཟེར་རོ། །

སེམས་ཐ་མ་ཞེས་བྱ་བ་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དུས་ཀྱིའོ། །ཡིད་མ་ཡིན་པར་འགྱུར་ཏེ་ཞེས་བྱ་བ་ནི་ཡིད་ཀྱི་ཁམས་མ་ཡིན་པར་འགྱུར་ཏེ་ཞེས་བྱ་བའི་ཐ་ཚིག་གོ། །དེ་ནི་མེད་དོ་ཞེས་བྱ་བ་ནི་སྐྱེ་བ་མེད་དོ་ཞེས་བྱ་བའི་ཐ་ཚིག་གོ། །དེ་ཡང་ཡིད་ཀྱི་ངོ་བོར་

ཞེས་བྱ་བ་རྒྱས་པར་འབྱུང་བ་ནི་དེ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། སེམས་ཐ་མ་མེད་དེ་དེ་ཡང་ཡིད་ཀྱི་ངོ་བོར་རྟེན་ཉིད་དུ་གནས་པའི་ཕྱིར་རོ། །རྒྱུ་གཞན་མ་ཚང་བའི་ཕྱིར་ཞེས་བྱ་བ་ནི་ཡང་སྲིད་པའི་ལས་དང་ཉོན་མོངས་པས་མ་ཚང་བའི་ཕྱིར་རོ། །རྣམ་པར་ཤེས་པ་ཕྱི་མ་མི་

སྐྱེ་བར་ཟད་དོ་ཞེས་བྱ་བ་ནི་ཡང་སྲིད་པར་ཉིང་མཚམས་སྦྱོར་བའི་རྣམ་པར་ཤེས་པ་མེད་དོ་སྙམ་དུ་བསམས་པའོ། །འདིར་དཔྱད་པར་བྱ་སྟེ་འདི་སྐད་དུ་རྟེན་དང་བརྟེན་པ་དང་དམིགས་པ་དྲུག་ཚན་རྣམ་པར་གཞག་པས་ཁམས་བཅོ་བརྒྱད་དག་ཏུ་འགྱུར་རོ་ཞེས་བཤད་པ། བརྟེན་པ་དྲུག་

ཚན་རྣམ་པར་གཞག་པ་ནི་མིག་གི་རྣམ་པར་ཤེས་པའི་ཁམས་ནས་ཡིད་ཀྱི་རྣམ་པར་ཤེས་པའི་ཁམས་ཀྱི་བར་ཡིན་ན། བརྟེན་པ་དྲུག་ཚན་འདིའི་རྟེན་དྲུག་ཚན་རྣམ་པར་གཞག་པ་གོ་ཅི་གྲངས་བཞིན་དུ་མིག་གི་རྣམ་པར་ཤེས་པའི་རྟེན་མིག་གི་ཁམས་ཡིན་པ་ནས་ཡིད་ཀྱི་རྣམ་པར་ཤེས་

Vol. 142 · folio 35b

པའི་ཁམས་ཀྱི་རྟེན་ཡིད་ཀྱི་ཁམས་ཡིན་པའི་བར་དུ་ཡིན་ནམ་ཞེ་ན། སྨྲས་པ་དེ་ལྟ་ཡིན་ནོ། །འོ་ན་གང་གི་ཚེ་མིག་དེ་དང་མཚུངས་པ་ཡིན་པ་དེ་གང་གི་རྟེན་ཡིན་གང་གི་ཡང་མ་ཡིན་ནོ། །འོ་ན་ཅི་སྟེ་འདི་སྐད་དུ་མིག་གི་རྣམ་པར་ཤེས་པའི་ཁམས་ཀྱི་རྟེན་ནི་མིག་གི་ཁམས་སོ་ཞེས་བྱ་བ་ལ་

སོགས་པ་བཤད་ཅེ་ན། མིག་གི་རྟེན་ཡིན་པ་ཁོ་ན་འོ། །དེ་དང་མཚུངས་པའི་མིག་གང་ཅུང་ཟད་རྟེན་མ་ཡིན་པ་དེ་ཡང་དེ་དང་རིགས་མཐུན་པའི་ཕྱིར་མིག་གི་ཁམས་ཉིད་དུ་རྣམ་པར་གཞག་པ་ཁོ་ནའོ། །ལུས་ཀྱི་ཁམས་ཀྱི་བར་དུ་ཡང་དེ་བཞིན་དུ་བརྗོད་པར་བྱའོ། །ཡིད་ཀྱི་ཁམས་ཀྱང་

ཡིད་ཀྱི་རྣམ་པར་ཤེས་པའི་ཁམས་ཁོ་ནའི་རྟེན་ཡིན་ཞེ་ན། སྨྲས་པ་མ་ཡིན་ནོ། །དེ་ནི་མིག་གི་རྣམ་པར་ཤེས་པ་ལ་སོགས་པའི་རྟེན་ཡིན་པར་འདོད་དོ། །འདི་ལྟར། ཐ་མའི་རྟེན་འདས་ལྔ་རྣམས་ཀྱི། །དེ་དག་ལྷན་ཅིག་སྐྱེས་པའང་ཡིན། །ཞེས་འབྱུང་ངོ་། །འོ་ན་ཅི་སྟེ་འདི་སྐད་དུ།

དྲུག་པའི་རྟེན་ནི་རབ་བསྒྲུབ་ཕྱིར། །ཁམས་ནི་བཅོ་བརྒྱད་དག་ཏུ་འདོད། །ཅེས་བཤད་ཅེ་ན། དེ་གཞན་དག་གི་རྟེན་ཡིན་ཞེས་ཏེ་དྲུག་པའི་རྟེན་ཡིན་པར་རབ་ཏུ་མི་འགྲུབ་པར་ནི་མི་འགྱུར་ཏེ། འདི་ནི་སྲིད་པའི་སྒོ་ནས་དྲུག་པའི་རྟེན་ཡང་ཡིན་ནོ། །དམིགས་པ་དྲུག་ཚན་ཡང་མིག་གི་རྣམ་པར་

ཤེས་པའི་དམིགས་པ་ནི་གཟུགས་ཀྱི་ཁམས་ཡིན་པ་ནས་ཡིད་ཀྱི་རྣམ་པར་ཤེས་པའི་དམིགས་པས་ནི་ཆོས་ཀྱི་ཁམས་ཡིན་པའི་ཕྱིར་ཡིན་ནོ་ཞེས་བྱ་བ་འདི་དཔྱད་པར་བྱ་སྟེ། ཅི་ལྟར་མིག་གི་རྣམ་པར་ཤེས་པའི་དམིགས་པ་གཟུགས་ཇི་སྙེད་པ་དེ་གཟུགས་ཀྱི་ཁམས་ཡིན་པ་སྟེ་དེ་བཞིན་དུ་

ལུས་ཀྱི་རྣམ་པར་ཤེས་པའི་ཁམས་ཀྱི་བར་གྱི་དམིགས་པ་རེག་བྱ་ཇི་སྙེད་པར་རེག་བྱའི་ཁམས་ཡིན་ལ། དེ་བཞིན་དུ་ཡིད་ཀྱི་རྣམ་པར་ཤེས་པའི་ཁམས་ཀྱི་བར་གྱི་དམིགས་པ་ཇི་སྙེད་པ་དེ་ཐམས་ཅད་ཀྱང་ཆོས་ཀྱི་ཁམས་ཡིན་ནམ་ཞེ་ན། འདི་ལ་གནས་བརྟན་ན་རེ་ཆོས་ཀྱི་ཁམས་

ནི་ཆོས་ཐམས་ཅད་ཀྱི་ངོ་བོ་ཉིད་ཡིན་ནོ་ཞེས་ཟེར་ཏེ་ཁམས་བཅོ་བརྒྱད་ཀྱི་ངོ་བོ་ཉིད་ཡིན་ནོ་ཞེས་བྱ་བའི་ཐ་ཚིག་གོ། །འདིའི་ལྟར་ན་ཇི་ལྟར་ཕྱི་དང་ནང་གི་ཁམས་རྣམ་པར་གཞག་པ་འགྲུབ་པར་འགྱུར། མིག་ལ་སོགས་པ་བཅུ་གཉིས་ནང་གི་ཡིན་པར་འདོད་ལ་དྲུག་ནི་ཕྱིའི་ཡིན་པར་

Vol. 142 · folio 36a

འདོད་ན་གལ་ཏེ་དེ་དག་ཀྱང་ཆོས་ཀྱི་ཁམས་ཀྱི་ནང་དུ་བསྡུ་ན་འཆོལ་བར་འགྱུར་རོ་ཞེ་ན། གནས་བརྟན་ན་རེ་འདི་དག་ནང་དང་ཕྱི་ཉིད་ཡིན་པ་ནི་རྣམ་གྲངས་པ་ཡིན་ཏེ། གང་དག་མིག་གི་རྣམ་པར་ཤེས་པ་ལ་སོགས་པའི་རྟེན་ཡིན་པ་དེ་དག་ནི་མིག་ལ་

སོགས་པ་ཡིན་པས་ནང་གི་ཡིན་ལ་ཡིད་ཀྱི་རྣམ་པར་ཤེས་པའི་དམིགས་པ་ཡིན་པས་ཕྱིའི་ཡིན་ནོ་ཞེས་ཟེར་རོ། །བྱེ་བྲག་ཏུ་སྨྲ་བ་རྣམས་ནི་མདོ་དང་འགལ་བས་དེ་ལྟར་མི་འདོད་དོ། །མདོ་ལས་ནི་འདི་སྐད་དུ་དགེ་སློང་ཆོས་ནི་ཕྱིའི་སྐྱེ་མཆེད་དེ་སྐྱེ་མཆེད་བཅུ་གཅིག་གིས་མ་བསྡུས་པ་

བསྟན་དུ་མེད་པ་ཐོགས་པ་མེད་པ་ཞེས་འབྱུང་སྟེ། དེ་ལྟ་བས་ན། ཆོས་ཀྱི་ཁམས་ནི་རྣམ་པར་རིག་བྱེད་མ་ཡིན་པ་དང་། ཚོར་བ་དང་འདུ་ཤེས་དང་། འདུ་བྱེད་ཀྱི་ཕུང་པོ་དང་། ནམ་མཁའ་དང་། སོ་སོར་བརྟགས་པས་འགོག་པ་དང་། སོ་སོར་བརྟགས་པ་མ་ཡིན་པས་འགོག་པའི་ངོ་བོ་

ཉིད་ཡིན་པའི་ཕྱིར་རྫས་བདུན་པར་འདོད་པར་བྱའོ། །འོ་ན་ནི་ཡིད་ཀྱི་རྣམ་པར་ཤེས་པའི་ཁམས་ཀྱི་དམིགས་པ་བསྟན་པ་ནི་མ་ཚང་བ་ཡིན་ཏེ། མིག་གི་རྣམ་པར་ཤེས་པ་ལ་སོགས་པའི་དམིག་པ་བསྟན་པ་ནི་མ་ཚང་བ་ཡིན་པར་མི་འདོད་དོ་ཞེ་ན། དེ་ནི་དེ་ལྟ་ཡིན་མོད་ཀྱི་འོན་ཀྱང་མིག་

ལ་སོགས་པ་དྲུག་ནི་རྟེན་ཉིད་དུ་བསྟན་པའི་ཕྱིར་དང་། མིག་གི་རྣམ་པར་ཤེས་པ་ལ་སོགས་པ་ནི་བརྟེན་པ་ཉིད་དུ་བསྟན་པའི་ཕྱིར་དང་། གཟུགས་ལ་སོགས་པ་ལྔ་ནི་རྣམ་པར་ཤེས་པའི་ཚོགས་ལྔའི་དམིགས་པར་བསྟན་པའི་ཕྱིར་དེ་དག་ཡིད་ཀྱི་རྣམ་པར་ཤེས་པའི་ཡུལ་

ཡིན་ཡང་ཆོས་ཀྱི་ཁམས་སུ་མ་བཞག་གོ་ཞེས་བརྗོད་དོ། །མདོར་བསྡུ་ན། ཕུང་པོ་དང་ནི་སྐྱེ་མཆེད་དང་། །ཁམས་གཅིག་གིས་ནི་ཐམས་ཅད་བསྡུས། །ཞེས་བྱ་བ་ནི་སྐྱེ་མཆེད་ལ་སོགས་པས་ཀྱང་ཐམས་ཅད་བསྡུས་མོད་ཀྱི་མདོར་བསྡུས་པ་ནི་མ་ཡིན་ནོ། །འོ་ན་ཅི་ཞེ་ན།

རྒྱས་པར་རོ། །འདི་ནི་བསྟན་པ་གསུམ་ལས་བཀར་ཏེ་མདོར་བསྡུ་ན་ཞེས་བཤད་དོ། །གཟུགས་ཀྱི་ཕུང་པོས་ནི་གཟུགས་ཀྱི་ཕུང་པོ་དང་དབང་པོ་དང་དོན་གྱི་ངོ་བོ་ཉིད་ཀྱི་སྐྱེ་མཆེད་དང་ཁམས་བཅུ་དང་ཆོས་ཀྱི་ཁམས་ཀྱི་ཕྱོགས་གཅིག་སྟེ་རྣམ་པར་རིག་བྱེད་མ་ཡིན་པ་བསྡུས་

Vol. 142 · folio 36b

སོ། །ཡིད་ཀྱི་སྐྱེ་མཆེད་ཀྱིས་ནི་རྣམ་པར་རིག་བྱེད་ཕུང་པོ་དང་ཡིད་ཀྱི་སྐྱེ་མཆེད་དེ་ཉིད་དང་རྣམ་པར་ཤེས་པའི་ཁམས་བདུན་བསྡུས་སོ། །ཆོས་ཀྱི་ཁམས་ཀྱིས་ནི་ཚོར་བ་དང་། འདུ་ཤེས་དང་། འདུ་བྱེད་ཀྱི་ཕུང་པོ་དག་དང་ཆོས་ཀྱི་སྐྱེ་མཆེད་དང་ཆོས་ཀྱི་ཁམས་བསྡུ་སྟེ་

འདིར་རྣམ་པར་རིག་བྱེད་མ་ཡིན་པ་ནི་ལན་གཉིས་བསྡུས་སོ། །དཔེར་ན་མིག་གི་དབང་པོ་ནི་ཞེས་བྱ་བ་ལ་མིག་གི་དབང་པོ་ནི་ཚོར་བ་ལ་སོགས་པའི་ཕུང་པོ་དང་རྣ་བ་ལ་སོགས་པའི་སྐྱེ་མཆེད་དང་ཁམས་དང་འགོག་པའི་བདེན་པ་དང་ལམ་གྱི་བདེན་པའི་ངོ་བོ་ཉིད་དང་མི་ལྡན་པ་ཡིན་ནོ། །

དེའི་ཕྱིར་འདི་སྐད་དུ། མིག་གི་དབང་པོ་ནི་གཟུགས་ཀྱི་ཕུང་པོ་དང་མིག་གི་སྐྱེ་མཆེད་དང་ཁམས་དག་དང་སྡུག་བསྔལ་དང་ཀུན་འབྱུང་བའི་བདེན་པ་དག་གིས་བསྡུས་ཏེ་དེ་དག་གི་ངོ་བོ་ཉིད་ཡིན་པའི་ཕྱིར་རོ། །དེ་དག་གི་ངོ་བོ་དང་མི་བདེན་པའི་ཕྱིར་ཕུང་པོ་ལ་སོགས་པ་གཞན་དག་གིས་ནི་མ་

ཡིན་ནོ་ཞེས་བཤད་དོ། །འདིར་ནི་མང་པོས་ཉུང་ངུ་བསྡུས་པ་ཡིན་གྱི་ཉུང་ངུས་མང་པོ་ནི་མ་ཡིན་ནོ། །ཇི་ལྟ་ཞེ་ན། གཟུགས་ཀྱི་ཕུང་པོ་ནི་གཟུགས་ཐམས་ཅད་སྡུད་པར་བྱེད་པ་ཡིན་པའི་ཕྱིར་མང་པོ་ཡིན་ཞིང་མིག་གི་དབང་པོ་ནི་གཟུགས་ཀྱི་ཕུང་པོའི་ཕྱོགས་གཅིག་ཡིན་པའི་ཕྱིར་

ཉུང་ངུ་ཡིན་ལ། གཟུགས་ཀྱི་ཕུང་པོས་མིག་གི་དབང་པོ་བསྡུས་ཀྱི། མིག་གི་དབང་པོས་ནི་གཟུགས་ཀྱི་ཕུང་པོ་མ་ཡིན་ཏེ། མིག་གི་དབང་པོ་ལས་མ་གཏོགས་པའི་གཟུགས་ཀྱང་ཡོད་པའི་ཕྱིར་རོ། །དཔེར་ན་གླང་པོ་ཆེའི་རྗེས་ཀྱིས་བྱའི་རྗེས་བསྡུས་ཀྱི། བྱའི་རྗེས་ཀྱིས་ནི་

གླང་པོ་ཆེའི་རྗེས་མ་བསྡུས་པ་དེ་དང་འདྲའོ། །མཉམ་པས་མཉམ་པ་ཕན་ཚུན་བསྡུས་པ་ནི་དཔེར་ན་མིག་གི་དབང་པོ་མིག་གི་སྐྱེ་མཆེད་ཀྱིས་བསྡུས་པ་དང་མིག་གི་སྐྱེ་མཆེད་ཀྱང་མིག་གི་དབང་པོས་བསྡུས་པ་ལྟ་བུ་སྟེ། འདི་ནི་ཆོས་མངོན་པའི་ལུགས་ཡིན་པར་རིག་པར་བྱའོ། །

དཔེར་ན་བསྡུ་བའི་དངོས་པོ་བཞི་པོ་དག་གིས་འཁོར་རྣམས་ཞེས་བྱ་བ་ལ། བསྡུ་བའི་དངོས་པོ་བཞི་ནི་སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ་ཉིད་དང་། དོན་མཐུན་པ་ཉིད་དོ། །འཁོར་བཞི་ནི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དག་གོ། །

Vol. 142 · folio 37a

དེ་དག་གིས་དེ་དག་བསྡུས་པ་སྟེ། དེ་ནི་རེས་འགའ་བ་ཡིན་ནོ། །རེས་འགའ་ཞིག་འབྱུང་བ་ནི་རེས་འགའ་བ་སྟེ་རེས་འགའ་ཞིག་འདི་དག་ལ་སྦྱིན་པར་བྱེད་ཅིང་སྙན་པར་ཡང་སྨྲ་བར་བྱེད་ཀྱི་བསྡུས་པ་ནི་མ་ཡིན་ནོ། །བརྡར་བཏགས་པ་ནི་ཐ་

སྙད་པ་སྟེ་ངོ་བོ་ཉིད་ཀྱིས་བསྡུས་པ་ནི་དོན་དམ་པ་ཞེས་བཤད་དོ། །མིག་ལ་སོགས་པ་གཉིས་མོད་ཀྱི། །རིགས་དང་སྤྱོད་ཡུལ་རྣམ་པར་ཤེས། །འདྲ་བའི་ཕྱིར་ན་ཁམས་གཅིག་ཉིད། །ཅེས་བྱ་བ་ནི་དོན་གྱིས་ན་འདི་སྐད་དུ་རིགས་ལ་སོགས་པ་ཐ་དད་པའི་ཕྱིར་ཅི་རིགས་

པར་ཁམས་ཐ་དད་པར་རྣམ་པར་གཞག་གི་རྟེན་ཐ་དད་པའི་ཕྱིར་ནི་མ་ཡིན་ནོ་ཞེས་བཤད་པར་འགྱུར་རོ། །དེ་ལ་མིག་གི་ཁམས་ལ་སོགས་པ་ཕན་ཚུན་རིགས་དང་སྤྱོད་ཡུལ་དང་རྣམ་པར་ཤེས་པ་ཐ་དད་པ་ཡིན་ནོ། །གཟུགས་ཀྱི་ཁམས་ལ་སོགས་པ་ནི་རིགས་དང་རྣམ་

པར་ཤེས་པ་ཐ་དད་པ་ཡིན་ནོ། །རྣམ་པར་ཤེས་པའི་ཁམས་རྣམས་ནི་རིགས་དང་སྤྱོད་ཡུལ་ཐ་དད་པ་ཡིན་ནོ། །ཆོས་ཀྱི་ཁམས་ཀྱང་ཡིད་ཀྱི་རྣམ་པར་ཤེས་པའི་ཐུན་མོང་མ་ཡིན་པའི་སྤྱོད་ཡུལ་ཡིན་ནོ། །དེ་བཞིན་དུ་རྣ་བ་དང་སྣ་དག་ལ་ཡང་སྦྱར་བར་བྱའོ་ཞེས་བྱ་བ་ནི་རིགས་

འདྲ་བ་ནི་གཉི་ག་རྣ་བའི་ངོ་བོ་ཉིད་ཡིན་པའི་ཕྱིར་རོ། །སྤྱོད་ཡུལ་འདྲ་བ་ནི་གཉི་གའི་ཡུལ་སྒྲ་ཡིན་པའི་ཕྱིར་རོ། །རྣམ་པར་ཤེས་པ་འདྲ་བ་ནི་གཉི་ག་རྣ་བའི་རྣམ་པར་ཤེས་པ་གཅིག་གི་རྟེན་ཡིན་པའི་ཕྱིར་རོ། །དེ་ལྟ་བས་ན་རྣ་བའི་ཁམས་ནི་གཅིག་ཁོ་ན་ཡིན་ནོ། །དེ་

བཞིན་དུ་སྣ་ལ་ཡང་སྦྱར་བར་བྱའོ། །འོ་ན་འདི་དགོས་པ་གཞན་མེད་པའི་ཕྱིར་གཉིས་མི་འབྱུང་བར་ཐལ་བར་འགྱུར་རོ་ཞེ་ན་དེའི་ཕྱིར་རོ། །མཛེས་བྱའི་ཕྱིར་ན་གཉིས་འབྱུང་ངོ་། །ཞེས་བྱ་བ་སྨོས་སོ། །མིག་དང་རྣ་བའི་རྟེན་གཅིག་དང་སྣའི་བུ་ག་གཅིག་ཏུ་གྱུར་ན་ཤིན་ཏུ་མི་

མཛེས་པར་འགྱུར་རོ་ཞེས་བྱ་བ་ནི་མིག་དང་རྣ་བའི་རྟེན་གཅིག་དང་སྣའི་བུ་ག་གཅིག་ཏུ་གྱུར་ན་ཤིན་ཏུ་མི་སྡུག་པར་འགྱུར་རོ། །རྔ་མོ་དང་བྱི་ལ་དང་འུག་པ་ལ་སོགས་པའི་མིག་ལ་སོགས་པ་གཉིས་འབྱུང་ཡང་རྟེན་མི་མཛེས་པ་མ་ཡིན་ནམ་ཞེ་ན། རིགས་གཞན་ལ་ལྟོས་

Vol. 142 · folio 37b

ན་ནི་དེ་དག་རྟེན་མཛེས་པ་མ་ཡིན་ནོ། །རང་གི་རིགས་ལ་ལྟོས་ནས་ནི་གང་ལ་མིག་ལ་སོགས་པ་གཉིས་ཡོད་པ་དེའི་རྟེན་རང་གི་རིགས་དེའི་ནང་ན་མཛེས་པ་ཡིན་གྱི་གང་ལ་མེད་པ་དེ་ནི་མི་སྡུག་པ་ཡིན་པས་སུན་འབྱིན་པ་དེ་ནི་མི་རུང་ངོ་། །སློབ་དཔོན་འདུས་བཟང་མདོ་འདིའི་

དོན་འགྲེལ་པ་ནི། མཛེས་བྱའི་ཕྱིར་ཞེས་བྱ་བ་ནི་བདག་པོའི་ཕྱིར་ཞེས་བྱ་བའི་ཐ་ཚིག་སྟེ། འཇིག་རྟེན་ན་དབང་པོ་ཕུན་སུམ་ཚོགས་པ་ནི་མཛེས་པའོ་ཞེས་བརྗོད་དོ། །དབང་པོ་གང་དག་རྟེན་མ་ཚང་བ་དེ་དག་ནི་མཐོང་བ་དང་ཐོས་པ་དང་སྣོམ་པ་ཡོངས་སུ་མ་དག་པས་

བདག་པོ་མ་ཡིན་པར་འགྱུར་ཏེ། ཇི་ལྟར་མིག་གཉིས་ཀྱིས་མཐོང་བ་ཡོངས་སུ་དག་པ་དེ་ལྟར་གཅིག་གིས་ནི་མ་ཡིན་ནོ། །དེ་བཞིན་དུ་གཞན་གཉིས་ལ་ཡང་སྦྱར་བར་བྱའོ། །དེ་ལྟར་ན་འདི་དག་གི་དབང་པོ་ཉིད་ཉམས་པར་འགྱུར་བས་དེའི་དོན་ནི་འདི་སྐད་ཅེས་བྱ་

བར་འགྱུར་ཏེ། གསལ་བར་དམིགས་པར་བྱ་བའི་ཕྱིར་རོ་ཞེས་བྱ་བའི་ཐ་ཚིག་གོ། །འདི་ལ་ཡང་འདི་སྐད་དུ་ལས་ཀྱིས་ཡོངས་སུ་གསལ་བར་དམིགས་པའི་རྟེན་དུ་གྱུར་པ་རྒྱ་ཆེན་པོ་གཅིག་ཁོ་ན་ཞིག་སྐྱེད་འདོད་ཅིག །རྟེན་རྣམ་པར་ཆད་པས་ཅི་ཞིག་བྱ་ཞེས་

བརྗོད་པར་ནི་ནུས་སོ།། །།བམ་པོ་བཞི་པ། བྱེ་བྲག་ཏུ་བཤད་པ་ལས་ནི། ཁ་ཅིག་ན་རེ་མཛེས་པར་བྱ་བའི་ཕྱིར་གཉིས་འབྱུང་ངོ་ཞེས་ཟེར་རོ་ཞེས་བྱ་བ་དང་། གཞན་དག་ན་རེ་གསལ་བར་བྱ་བའི་ཕྱིར་རོ་ཞེས་ཟེར་རོ་ཞེས་བྱ་བ་ཕྱོགས་འདི་གཉི་ག་བྲིས་སོ། །

ཞར་ལ་འོངས་པ་རྫོགས་སོ།། །།ལས་ཀྱི་དབང་གིས་དབང་པོ་འབྱུང་བ་མ་ཡིན་ནམ། མཛེས་པར་བྱ་བའི་ཕྱིར་དང་གསལ་བར་བྱ་བའི་ཕྱིར་ཞེས་བྱ་བ་གཞན་ཉིད་བརྗོད་ཅི་དགོས་ཤེ་ན། འདིར་ལས་ཀྱི་དབང་ཁོ་ནས་དབང་པོ་གཉིས་འབྱུང་བར་བཤད་པ་ཡིན་

ནོ། །ཇི་ལྟར་ཞེ་ན་སེམས་ཅན་རྣམས་རྟེན་གྱི་ཡན་ལག་དེ་ལྟར་རྣམ་པར་ཕྱེ་བ་ལས་མཛེས་པའི་མངོན་པའི་ང་རྒྱལ་ཐོག་མ་མེད་པའི་དུས་ནས་གོམས་པ་འབྱུང་སྟེ། དེའི་ཕྱིར་དེ་འདོད་པ་སྔོན་དུ་འགྲོ་བ་དང་གསལ་བར་དམིགས་པའི་འདོད་པ་སྔོན་དུ་འགྲོ་བའི་ལས་ཀྱི་དབང་པོ་དེ་

Vol. 142 · folio 38a

གཉིས་མངོན་པར་གྲུབ་པ་ལས་མཛེས་པར་བྱ་བའི་ཕྱིར་དང་། གསལ་བར་བྱ་བའི་ཕྱིར་འབྱུང་ངོ་ཞེས་བཤད་པ་ཡིན་ནོ། །སྤུངས་དང་སྐྱེ་སྒོ་རིགས་ཀྱི་དོན། །ཕུང་པོ་སྐྱེ་མཆེད་ཁམས་རྣམས་ཡིན། །ཞེས་བྱ་བ་ནི་འདི་དག་ལ་སྤུངས་པ་དང་སྐྱེ་བའི་སྒོ་དང་

རིགས་ཡོད་པས་ན་འདི་དག་ནི། སྤུངས་པ་དང་སྐྱེ་སྒོ་རིགས་ཀྱི་དོན་དག་ཡིན་ནོ། །གང་དག་ཡིན་ཞེ་ན། ཕུང་པོ་དང་སྐྱེ་མཆེད་དང་། ཁམས་ཞེས་བྱ་བ་དག་ཡིན་ནོ། །རྣམ་པ་གཅིག་ཏུ་ན་སྤུངས་པ་དང་སྐྱེ་བའི་སྒོ་དང་རིགས་ཞེས་བྱ་བ་རྣམས་ཀྱི་དོན་དག་ཡིན་ཏེ། གང་དག་ཡིན་ཞེ་ན།

ཕུང་པོ་དང་། སྐྱེ་མཆེད་དང་། ཁམས་དག་ཡིན་ནོ། །མདོ་ལས། འབྱུང་བའི་ཕྱིར་སྤུངས་པའི་དོན་ནི་ཕུང་པོའི་དོན་ཏོ་ཞེས་བྱ་བ་ནི་སྤུངས་པའི་དོན་གང་ཡིན་པ་དེ་ནི་ཕུང་པོའི་དོན་ཏེ་དེ་ནི་མདོ་ལས། གཟུགས་གང་ཡིན་པ་ཅི་ཡང་རུང་། །འདས་པ་འམ། མ་འོངས་པ་འམ། ད་ལྟར་བྱུང་

བའམ་ཞེས་བྱ་བ་རྒྱས་པར་སྟོན་པ་ཡིན་ནོ། །གཅིག་ཏུ་ཞེས་བྱ་བ་ལ། གཅིག་ཏུ་ནི་རྣམ་པ་གཅིག་ཏུའོ། །མི་རྟག་པ་ཉིད་ཀྱིས་འགགས་པའོ་ཞེས་བྱ་བ་ནི་འདུས་བྱས་ཀྱི་མཚན་ཉིད་ཀྱི་མི་རྟག་པ་ཉིད་ཀྱིས་འགགས་པའོ་ཞེས་བྱ་བའི་ཐ་ཚིག་གོ། །མི་རྟག་པ་ཉིད་སྨོས་པ་ནི་འགོག་པ་

གཞན་བསལ་བའི་ཕྱིར། འགོག་པ་ནི་རྣམ་པ་ལྔ་སྟེ་མཚན་ཉིད་ཀྱིས་འགོག་པ་དང་། སྙོམས་པར་ཞུགས་པས་འགོག་པ་དང་། སྐྱེ་བས་འགོག་པ་དང་། སོ་སོར་བརྟགས་པས་འགོག་པ་དང་། སོ་སོར་བརྟགས་པ་མ་ཡིན་པས་འགོག་པའོ། །དེ་ལ་གལ་ཏེ་གཟུགས་འདས་

པ་ནི་འགགས་པའོ་ཞེས་བྱ་བ་དེ་ཙམ་ཞིག་བརྗོད་པར་འགྱུར་ན་ནི་ཁྱད་པར་དུ་མ་བྱས་པའི་ཕྱིར་སྙོམས་པར་འཇུག་པས་འགོག་པ་ལ་སོགས་པ་ལ་ཡང་ཐལ་བར་འགྱུར་རོ། །དེ་དག་ནི་འདས་པའི་དོན་ཉིད་ཡིན་པར་མི་འདོད་དོ། །སྙོམས་པར་འཇུག་པས་འགོག་པ་ནི་སེམས་དང་སེམས་

ལས་བྱུང་བ་མ་འོངས་པ་དག་ཁོ་ནའི་ཡིན་ལ་སྐྱེ་བས་འགོག་པ་ཡང་དེ་དག་ཁོ་ནའི་ཡིན་ནོ། །སོ་སོར་བརྟགས་པས་འགོག་པ་ནི་ཟག་པ་དང་བཅས་པ་ཁོ་ནའི་ཡིན་ནོ། །སོ་སོར་བརྟགས་པ་མ་ཡིན་པས་འགོག་པ་ཡང་མ་འོངས་པ་མི་སྐྱེ་བའི་ཆོས་ཅན་དག་ཁོ་ནའི་ཡིན་ནོ། །དེ་ལྟ་

Vol. 142 · folio 38b

བས་ན་མཚན་ཉིད་ཀྱི་འགོག་པ་སྨོས་པའི་ཕྱིར་མི་རྟག་པ་ཉིད་འདི་སྨོས་སོ། །མ་འོངས་པ་ནི་མ་བྱུང་བའོ་ཞེས་བྱ་བ་ནི་ད་ལྟར་བྱུང་བ་ཉིད་དུ་མ་ཡིན་པའོ། །ད་ལྟར་བྱུང་བ་ནི་བྱུང་ལ་མ་འགགས་པའོ་ཞེས་བྱ་བ་ལ། བྱུང་བ་སྨོས་པ་ནི་མ་འོངས་པ་ལས་ཁྱད་པར་དུ་བྱས་པའི་

ཕྱིར་ལ། མ་འགགས་པ་སྨོས་པ་ནི་འདས་པ་ལས་ཁྱད་པར་དུ་བྱ་བའི་ཕྱིར་ཏེ། མ་འོངས་པ་ནི་མ་འགགས་པ་ཡིན་མོད་ཀྱི་བྱུང་བ་མ་ཡིན་ནོ། །འདས་པ་ཡང་བྱུང་བ་ཡིན་མོད་ཀྱི་མ་འགགས་པ་ནི་མ་ཡིན་ནོ། །ནང་གི་ནི་རང་གི་རྒྱུད་ལ་ཡོད་པའོ་ཞེས་བྱ་བ་ནི་མིག་

ལ་སོགས་པ་དང་གཟུགས་ལ་སོགས་པའོ། །གཞན་གྱི་ཕྱིའོ་ཞེས་བྱ་བ་ནི་དེ་དག་ཉིད་གཞན་གྱི་རྒྱུད་ལ་ཡོད་པ་དང་སེམས་ཅན་དུ་བགྲང་བ་མ་ཡིན་པའོ། །ཡང་ན་སྐྱེ་མཆེད་ཀྱི་སྒོ་ནས་སོ་ཞེས་བྱ་བ་ནི་ནང་གི་ནི་མིག་ལ་སོགས་པ་ལྔ་རང་དང་གཞན་གྱི་རྒྱུད་ལ་ཡོད་པའོ། །གཞན་

གྱི་ཕྱི་སྟེ་གཟུགས་ལ་སོགས་པ་ཡུལ་ལྔ་རང་དང་གཞན་གྱི་རྒྱུད་ལ་ཡོད་པ་དང་སེམས་ཅན་དུ་བགྲང་བ་མ་ཡིན་པ་དང་ཕྱིའི་སྐྱེ་མཆེད་ཀྱི་ངོ་བོ་ཉིད་ཡིན་པའི་ཕྱིར་རྣམ་པར་རིག་བྱེད་མ་ཡིན་པ་ཡང་ཡིན་ནོ། །རགས་པ་ནི་ཐོགས་པ་དང་བཅས་པའོ་ཞེས་བྱ་བ་ནི་རྡུལ་ཕྲ་རབ་བསྩགས་

པའི་ཕྱིར་རོ། །ཕྲ་བ་ནི་ཐོགས་པ་མེད་པའོ་ཞེས་བྱ་བ་ནི་རྣམ་པར་རིག་བྱེད་མ་ཡིན་པའི་གཟུགས་སོ། །ཡང་ན་ལྟོས་པ་པ་ཡིན་ནོ་ཞེས་བྱ་བ་ནི་ཡང་ན་ལྟོས་པས་རགས་པ་དང་ཕྲ་བར་འགྱུར་ཏེ། དཔེར་ན་སྲོ་མ་ལ་ལྟོས་ནས་ཤིག་རགས་པ་ཡིན་ལ་ཤིག་ལ་ལྟོས་ནས་སྲོ་མ་

ཕྲ་བ་ཡིན་པ་ལྟ་བུའོ། །དེ་བས་ན་དེ་ལྟ་ཡིན་དང་ཐོགས་པ་དང་བཅས་པ་ཉིད་ནི་རགས་པ་ཡང་ཡིན་ལ་ཕྲ་བ་ཡང་ཡིན་གྱི། ཐོགས་པ་མེད་པ་ནི་བསྩགས་པ་མ་ཡིན་པའི་ཕྱིར་ཕྲ་བ་ཁོ་ན་ཡིན་ནོ། །ལྟོས་པ་པ་ཡིན་པའི་ཕྱིར་མི་འགྲུབ་པོ་ཞེས་བྱ་བ་ནི་སྲོ་མ་ཕྲ་མོ་དེ་ཉིད་ཉི་ཟེར་

གྱི་རྡུལ་ལ་ལྟོས་ནས་རགས་པ་ཡིན་ལ་རགས་པ་དེ་ཉིད་ཤིག་དང་ནས་ལ་ལྟོས་ནས་ཕྲ་བ་ཡིན་པས་ཕ་རོལ་དང་ཚུ་རོལ་བཞིན་རགས་པ་དང་ཕྲ་བ་རྣམ་པར་མི་གནས་ན་ཇི་ལྟར་ན་རགས་པ་ཡང་ཕྲ་བ་ཡིན་ལ་ཕྲ་བ་ཡང་རགས་པ་ཡིན། མ་ཡིན་ཏེ་ལྟོས་པས་ཐ་དད་པའི་ཕྱིར་

Vol. 142 · folio 39a

རོ་ཞེས་བྱ་བ་ནི་ལྟོས་པས་བྱེ་བྲག་ཡོད་པ་ནི་ལྟོས་པས་ཐ་དད་པ་སྟེ། དེའི་ཕྱིར་མ་གྲུབ་པ་མ་ཡིན་ནོ། །གང་ཁོ་ན་ལ་ལྟོས་ཏེ་རགས་པ་ཡང་ཕྲ་བ་ཡིན་པ་ནི་ནམ་དུ་ཡང་དེ་ལ་ལྟོས་ཏེ་ཕྲ་བ་མ་ཡིན་ཏེ། གཞན་ཡང་དེ་ལ་ལྟོས་ཏེ་ཕྲ་བ་མ་ཡིན་ནོ་ཞེས་

བྱ་བའི་ཐ་ཚིག་གོ། །ཕ་དང་བུ་བཞིན་ཞེས་བྱ་བ་ནི་དཔེར་ན་ལྷ་སྦྱིན་གྱི་བུ་ནི་མཆོད་སྦྱིན་ཡིན་ལ་མཆོད་སྦྱིན་གྱི་བུ་ནི་ཁྱབ་འཇུག་བཤེས་ཡིན་ན། མཆོད་སྦྱིན་དེ་ཁྱབ་འཇུག་བཤེས་ལ་ལྟོས་ཏེ། དེ་ནི་ཕ་ཡིན་ལ་ལྷ་སྦྱིན་ལ་ལྟོས་ཏེ་དེ་ནི་བུ་ཡིན་ནོ། །ལྟོས་པ་པ་ཡིན་པའི་ཕྱིར་

འདི་ཕའི་ངོ་བོར་མི་འགྲུབ་པ་ཡང་མ་ཡིན་ཏེ། ལྟོས་པས་ཐ་དད་པའི་ཕྱིར་རོ། །མཆོད་སྦྱིན་དེ་ནི་ཁྱབ་འཇུག་བཤེས་དེ་ཉིད་ལ་ལྟོས་ཏེ་བུ་ཡང་མ་ཡིན་ལ་ལྷ་སྦྱིན་དེ་ཉིད་ལ་ལྟོས་ཏེ་ཕ་ཡང་མ་ཡིན་པ་དེ་དང་འདྲའོ། །ངན་པ་ནི་ཉོན་མོངས་པ་ཅན་ནོ་ཞེས་བྱ་བ་ནི་དམ་པ་རྣམས་

ཀྱིས་སྨད་པའི་ཕྱིར་རོ། །གྱ་ནོམ་པ་ནི་ཉོན་མོངས་པ་ཅན་མ་ཡིན་པའོ་ཞེས་བྱ་བ་ནི་ཉོན་མོངས་པས་སུན་མ་ཕྱུང་བའི་ཕྱིར་རོ། །རིང་བ་ནི་འདས་པ་དང་མ་འོངས་པའོ་ཞེས་བྱ་བ་ནི་རྒྱུད་ཉམས་པའི་ཕྱིར་དང་དེར་མ་ཕྱིན་པའི་ཕྱིར་རོ། །ཉེ་བ་ནི་ད་ལྟར་བྱུང་བ་ཞེས་བྱ་བ་ནི་རྒྱུད་ཉེ་

བའི་ཕྱིར་རོ། །རྣམ་པར་ཤེས་པའི་བར་དུ་ཡང་དེ་དང་འདྲའོ་ཞེས་བྱ་བ་ནི་ཚོར་བ་གང་ཡིན་པ་ཅི་ཡང་རུང་འདས་པའམ་མ་འོངས་པའམ་ད་ལྟར་བྱུང་བའམ་ནང་གིའམ་ཕྱིའི་འམ་རགས་པའམ་ཕྲ་བའམ། ངན་པའམ། གྱ་ནོམ་པའམ། ཐག་རིང་པོ་ན་ཡོད་པ་གང་ཡིན་པ་

དང་ཉེ་བ་ན་ཡོད་པ་དེ་ཐམས་ཅད་གཅིག་ཏུ་བསྡུས་ཏེ། ཚོར་བའི་ཕུང་པོ་ཞེས་བྱ་བའི་གྲངས་སུ་འགྲོའོ་ཞེས་བྱ་བ་ཡིན་ནོ། །དེ་བཞིན་དུ་རྣམ་པར་ཤེས་པ་ལ་ཡང་དེ་ཐམས་ཅད་གཅིག་ཏུ་བསྡུས་ནས་རྣམ་པར་ཤེས་པའི་ཕུང་པོ་ཞེས་བྱ་བའི་གྲངས་སུ་འགྲོའོ་ཞེས་བྱ་བའི་བར་དུ་

བརྗོད་པར་བྱའོ། །འདི་དག་གིས་འདས་པ་ལ་སོགས་པ་ཉིད་གཟུགས་ཇི་ལྟ་བ་བཞིན་ནོ། །འདི་ནི་ཁྱད་པར་ཡིན་ཏེ། ཚོར་བ་ལ་སོགས་པའི་རགས་པ་ནི་དབང་པོ་ལྔ་ལ་བརྟེན་པའི་ཚོར་བ་ལ་སོགས་པ་བཞི་ཡིན་ཏེ། ལུས་ཅན་མ་ཡིན་པའི་ཕྱིར་རང་ལ་ཡོད་པའི་རགས་པ་

Vol. 142 · folio 39b

ཉིད་ནི་མེད་དོ། །ཕྲ་བ་ནི་ཡིད་ལས་བྱུང་བ་སྟེ། རྟེན་ཀྱང་ལུས་ཅན་མ་ཡིན་པའི་ཕྱིར་རོ། །ཡང་ན་ས་ལས་ཞེས་བྱ་བ་ནི་ཚོར་བ་ལ་སོགས་པ་རགས་པ་དང་ཕྲ་བ་སྟེ། རགས་པ་ནི་འདོད་པ་ན་སྤྱོད་པའི་ཚོར་བའོ། །ཕྲ་བ་ནི་བསམ་གཏན་དང་པོའི་ས་པའོ། །རགས་པ་ནི་བསམ་

གཏན་དང་པོའི་ས་པའོ། །ཕྲ་བ་ནི་བསམ་གཏན་གཉིས་པའི་ས་པའོ་ཞེས་བྱ་བ་ནས། དེ་བཞིན་དུ་རགས་པ་ནི་ཅི་ཡང་མེད་པའི་སྐྱེ་མཆེད་ཀྱི་ས་པ་ཡིན་ནོ། །ཕྲ་བ་ནི་སྲིད་པའི་རྩེ་མོའི་ས་པ་ཞེས་བྱ་བའི་བར་ཡིན་ནོ། །ཚོར་བ་ཇི་ལྟ་བར་རྣམ་པར་ཤེས་པའི་བར་དུ་ཡང་དེ་བཞིན་དུ་

བརྗོད་པར་བྱའོ། །བཙུན་པ་ཞེས་བྱ་བ་ནི་མདོ་སྡེ་པའི་གནས་བརྟན་འགའ་ཞིག་གམ། ཡང་ན་མིང་དེ་ཞེས་བྱ་བ་ཞིག་ཡིན་ནོ། །སྐལ་ལྡན་ཁྱད་པར་ཅན་ན་རེ་དེ་ནི་གནས་བརྟན་ཆོས་སྐྱོབ་ཡིན་ནོ་ཞེས་ཟེར་རོ། །འདི་ལ་བདག་ནི་གལ་ཏེ་དེ་ཆོས་སྐྱོབ་ཡིན་ན་ནི་འདས་པ་དང་མ་

འོངས་པ་ཡོད་པ་ཉིད་དུ་སྨྲ་བ་ཡིན་པས། མདོ་སྡེ་པ་མ་ཡིན་ནོ་ཞེས་སྨྲས་ཏེ། དངོས་སྟོན་པ་མ་ཡིན་ནོ་ཞེས་བྱ་བའི་ཐ་ཚིག་གོ། །འདི་ལྟར་དངོས་པོ་གཞན་ཉིད་དུ་འགྱུར་བར་སྨྲ་བ་ནི་བཙུན་པ་ཆོས་སྐྱོབ་ཡིན་ཏེ། དེ་ན་རེ་ཆོས་དུས་རྣམས་སུ་འཇུག་པ་ན་དངོས་པོ་གཞན་

ཉིད་དུ་འགྱུར་གྱི་རྫས་གཞན་ཉིད་དུ་འགྱུར་བ་ནི་མ་ཡིན་ནོ་ཞེས་ཟེར་རོ་ཞེས་གྲག་གོ་ཞེས་འཆད་པར་འགྱུར་རོ། །བཙུན་པ་འདི་ནི་མདོ་སྡེ་བའི་ལྟ་བ་ལ་འཚེལ་བ་ཡིན་ནོ། །བྱེ་བྲག་ཏུ་བཤད་པའི་ནང་དུ་བཙུན་པ་ན་རེ་ཞེས་བྱ་བ་ལ་སོགས་པ་བྲིས་སོ། །བཙུན་པ་ཆོས་སྐྱོབ་ཀྱང་བྱེ་བྲག་

ཏུ་བཤད་པའི་ནང་དུ་བཙུན་པ་ཆོས་སྐྱོབ་ན་རེ་ཞེས་བྱ་བ་ལ་སོགས་པ་རང་གི་མིང་ཁོ་ན་བྲིས་སོ། །དེས་ན་བཙུན་པ་འདི་ནི་ཆོས་སྐྱོབ་ལས་གཞན་པ་མདོ་སྡེ་པའི་དགེ་སློང་གནས་བརྟན་འགའ་ཞིག་ཡིན་ནོ་ཞེས་བྱ་བར་མངོན་ནོ། །དབང་པོ་ལྔས་གཟུང་བར་བྱའོ་ཞེས་བྱ་བ་ནི་གཟུགས་ལ་

སོགས་པ་ལྔའོ། །གཞན་ནི་ཕྲ་བའོ་ཞེས་བྱ་བ་ནི་མིག་ལ་སོགས་པ་ལྔ་དང་རྣམ་པར་རིག་བྱེད་མ་ཡིན་པའོ། །ཡིད་དུ་འོང་བའོ་ཞེས་བྱ་བ་ནི་ཡིད་ལ་ཁྱབ་པ་ནི་ཡིད་དུ་འོང་བ་སྟེ་ཡིད་དུ་འཐད་པ་ཞེས་བྱ་བའི་ཐ་ཚིག་གོ། །རིང་བ་ནི་ཡུལ་མི་སྣང་བའོ་ཞེས་བྱ་བ་ནི་གཞིའི་ཡུལ་དང་རྟེན་གྱི་

Vol. 142 · folio 40a

གཞིའི་ཡུལ་གྱི་དབང་དུ་བྱས་པའོ། །བལྟ་བར་ནུས་པ་ནི་སྣང་བའོ། །འདི་ལ་ཡུལ་སྣང་བ་ཡོད་པས་ན་ཡུལ་སྣང་བ་ཅན་ཏེ་གཞིའི་ཡུལ་ལམ་རྟེན་གྱི་གཞིའི་ཡུལ་སྣང་བ་ཅན་ནོ། །དཔེར་ན་རྒྱ་ཤུག་གི་རྫ་མ་འམ་མིག་ལ་སོགས་པ་ལྟ་བུ་སྟེ་དེ་ནི་ཉེ་

བ་ཡིན་ནོ། །ཡུལ་མི་སྣང་བ་ཅན་ནི་དེ་ལས་བཟློག་སྟེ་རིང་བ་ཡིན་ནོ། །རིང་བ་ནི་མི་སྣང་བའོ་ཞེས་མ་བཤད་པ་ནི་ལ་ལ་ཉེ་ཡང་ཤིན་ཏུ་ཕྲ་བའི་ཕྱིར་མི་སྣང་བ་དེ་ནི་ཡུལ་སྣང་བ་ཅན་ཡིན་པའི་ཕྱིར་རིང་བར་ཡང་མི་འདོད་པས་སོ། །ཡང་ཅིའི་ཕྱིར་བཙུན་པ་དེ་ལྟར་བཤད་ཅེ་ན། འདས་

པ་ལ་སོགས་པ་ནི་རང་གི་མིང་གིས་བསྟན་པའི་ཕྱིར་ཏེ། དེ་ལྟ་མ་ཡིན་ན་ཟློས་པའི་སྐྱོན་དུ་འགྱུར་རོ། །དེ་དག་གི་རིང་བ་དང་ཉེ་བ་ཉིད་ནི་རྟེན་གྱི་དབང་གིས་སོ་ཞེས་བྱ་བ་ནི་ཚོར་བ་ལ་སོགས་པ་དེ་དག་ནི་ལུས་ཅན་མ་ཡིན་པ་ཉིད་ཀྱིས་ཡུལ་ན་མི་གནས་པའི་ཕྱིར་ཏེ། དེ་ལྟ་བས་ན་འདི་

སྐད་དུ་ཐག་རིང་པོ་ན་ཡོད་པ་ནི་མི་སྣང་བ་ལ་བརྟེན་པའི་ཚོར་བ་ལ་སོགས་པའོ། །ཉེ་བ་ན་ཡོད་པ་ནི་སྣང་བ་ལ་བརྟེན་པ་དག་གོ་ཞེས་བརྗོད་པར་བྱའོ། །རགས་པ་དང་ཕྲ་བ་ཉིད་ནི་སྔ་མ་བཞིན་ནོ་ཞེས་བྱ་བ་ནི་རགས་པ་ནི་དབང་པོ་ལྔ་ལ་བརྟེན་པའོ། །ཕྲ་བ་ནི་ཡིད་ལས་བྱུང་བའོ་

ཞེས་བྱ་བ་ཡིན་ནོ། །སེམས་དང་སེམས་ལས་བྱུང་བ་རྣམས་སྐྱེ་བ་འབྱུང་བ་མཆེད་པར་བྱེད་པས་ན་སྐྱེ་མཆེད་རྣམས་སོ། །གཉིས་ལ་བརྟེན་ཏེ་རྣམ་པར་ཤེས་པ་སྐྱེ་བ་ཐམས་ཅད་སྐྱེ་མཆེད་ཉིད་ཡིན་པར་འགྲུབ་པོ། །རྟེན་ཏམ་རྒྱུད་གཅིག་ལ་ཞེས་བྱ་བ་ལ་རྟེན་ནི་ལུས་ཀྱི་

མཚན་ཉིད་སྤྱིའོ། །རྒྱུད་ནི་སེམས་དང་སེམས་ལས་བྱུང་བ་རྣམས་ཀྱི་རྒྱུན་གྱི་མཚན་ཉིད་དོ། །རང་གི་རིགས་ཀྱི་ཡིན་ཏེ་ཅི་ཞེ་ན། འབྱུང་གནས་དག་ཅེས་བྱ་བར་སྐབས་དང་སྦྱར་རོ། །སྐལ་བ་མཉམ་པའི་རྒྱུ་ཡིན་པའི་ཕྱིར་རོ་ཞེས་བྱ་བ་ནི་མིག་སྔར་སྐྱེས་པ་ནི་ཕྱི་མའི་སྐལ་བ་མཉམ་

པའི་རྒྱུ་ཡིན་པས་འབྱུང་གནས་ནི་ཁམས་ཡིན་ཏེ། གང་ལས་གསེར་ལ་སོགས་པ་འབྱུང་བ་དེ་དག་ནི་དེ་དག་གི་འབྱུང་གནས་ཡིན་ནོ། །འདུས་མ་བྱས་ཁམས་མ་ཡིན་པར་འགྱུར་ཏེ་འདུས་མ་བྱས་ནི་འདུས་མ་བྱས་སམ་གཞན་གྱི་སྐལ་བ་མཉམ་པའི་རྒྱུ་མ་ཡིན་ནོ། །འོ་ན་ནི་

Vol. 142 · folio 40b

སེམས་དང་སེམས་ལས་བྱུང་བ་རྣམས་ཀྱི་ཡིན་ནོ་ཞེས་བྱ་བ་ཅི་ཞེ་ན་འབྱུང་གནས་དག་ཅེས་སྐབས་དང་སྦྱར་རོ། །གཉིས་ལ་བརྟེན་ནས་རྣམ་པར་ཤེས་པ་སྐྱེ་བའི་ཕྱིར་གདོན་མི་ཟ་བར་ཁམས་ཐམས་ཅད་རྣམ་པར་ཤེས་པ་མཚུངས་པར་ལྡན་པ་དང་བཅས་པ་སྐྱེ་བའི་དམིགས་

པ་ཡིན་པ་དང་བདག་པོ་ཡིན་པས་འབྱུང་གནས་དག་ཡིན་ནོ། །སྤུངས་པ་དང་གང་ཟག་བཞིན་ནོ་ཞེས་བྱ་བ་ནི་ཕུང་པོ་ནི་སྤུངས་པའི་སྒྲར་བརྗོད་པར་བྱ་བ་ཡིན་པའི་ཕྱིར་བཏགས་པའི་ཡོད་པ་ཡིན་ཏེ་འབྲུ་སྤུངས་པ་བཞིན་པའམ་གང་ཟག་བཞིན་ནོ། །གང་ཟག་དེ་ནི་

གཟུགས་ལ་སོགས་པ་གདགས་པའི་རྒྱུ་ལ་མ་ལྟོས་པར་གཟུང་དུ་མེད་པའི་ངོ་བོ་ཉིད་ཡིན་པའི་ཕྱིར་བཏགས་པའི་ཡོད་པ་ཡིན་ཏེ་འབྲུ་སྤུངས་པ་བཞིན་ནོ། །བྱ་བའི་ཁུར་ཁྱེར་བའི་དོན་ཞེས་བྱ་བ་ནི་བྱ་བ་ཉིད་ཁུར་ཡིན་པས་བྱ་བའི་ཁུར་ཏེ་འདིས་དེ་ཁྱེར་བས་ན་ཁྱེར་བའོ། །བྱ་བའི་ཁུར་

ཁྱེར་བ་ནི་ལུས་ཀྱི་ཕྱོགས་ཡིན་ཏེ། དེ་ནི་འཇིག་རྟེན་ན་ཕྲག་ཁུར་ཁྱེར་བའོ་ཞེས་བརྗོད་དོ། །མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་ཅེས་བྱ་བ་ལ་སོགས་པ་འབྱུང་བའི་ཕྱིར་འདིས་ཀྱང་བྱ་བའི་ཁུར་ཁྱེར་བ་ཡིན་ནོ། །དེ་ལྟ་བས་ན་ཕྲག་ཁུར་ཁྱེར་བ་དང་འདྲ་བར་ཕུང་པོ་

ཡིན་ནོ་ཞེས་སྒྲ་ཉེ་བར་བཏགས་པ་ཡིན་ནོ། །ཡོངས་སུ་ཆད་པའི་དོན་ནི་མཚམས་ཀྱི་དོན་ཞེས་བྱ་བའི་ཐ་ཚིག་སྟེ། གཟུགས་སུ་ཡོངས་སུ་ཆད་པ་ནས་རྣམ་པར་ཤེས་པར་ཡོངས་སུ་ཆད་པའི་བར་ཡིན་ནོ། །དེ་ནི་མདོ་དང་འགལ་ལོ་ཞེས་བྱ་བ་ནི་བྱ་བའི་ཁུར་ཁྱེར་བའི་

དོན་དང་ཡོངས་སུ་ཆད་པའི་དོན་དེ་གཉི་གའོ། །མདོ་དང་འགལ་བ་ནི་མདོ་ལས་འདས་པའོ། །མདོ་ལས་ཞེས་བྱ་བ་ནི་དེ་རྒྱས་པར་སྟོན་པར་བྱེད་པ་ཡིན་ནོ། །སོ་སོར་ཕུང་པོ་ཉིད་ཅེས་བྱ་བ་རྒྱས་པར་འབྱུང་བ་ཇི་ལྟར་ཞེ་ན། སྨྲས་པ། གཟུགས་འདས་པ་ལ་སོགས་པ་

འདི་ཐམས་ཅད་རེ་རེ་ཞིང་སོ་སོར་གཟུགས་ཀྱི་ཕུང་པོ་ཡིན་ནོ་ཞེས་བྱ་བ་སྨོས་སོ། །འདུས་པས་འདུས་པ་ཅན་གྱི་རྫས་ཞེས་བྱ་བ་བསྟན་པ་ཡིན་ཏེ། དེ་ནི་གཟུགས་འདས་པ་ལ་སོགས་པ་དེ་དག་སྤུངས་པ་ཡིན་ནོ་སྙམ་དུ་བསམས་པ་ཡིན་ནོ། །མདོ་ལས་ཀྱང་། དེ་ཁོ་ན་སྐད་དུ་སའི་

Vol. 142 · folio 41a

ཁམས་གང་ཞེ་ན། སྐྲ་དང་སྤུ་དག་ཅེས་བྱ་བ་རྒྱས་པར་གསུངས་ཏེ། སྐྲ་ལ་སོགས་པའི་རྫས་རེ་རེ་ཡང་སའི་ཁམས་ཡིན་ནོ་ཞེས་བྱ་བར་མངོན་ནོ། །ལན་འདི་ནི་བྱ་བའི་ཁུར་ཁྱེར་བའི་དོན་དང་ཡོངས་སུ་ཆད་པའི་དོན་གྱིས་ཕྱོགས་དག་ལ་ཡང་བརྗོད་

པར་ནུས་སོ། །དེ་ལྟར་ནི་ཤེས་པར་མི་ནུས་ཏེ་ཞེས་བྱ་བ་རྒྱས་པར་འབྱུང་བ་ནི་ཐམས་ཅད་གཅིག་ཏུ་བསྡུས་ནས་ཞེས་འབྱུང་བའི་ཕྱིར་རེ་རེ་ཞིང་གཟུགས་ཀྱི་ཕུང་པོ་ཡིན་ནོ་ཞེས་བྱ་བར་ནི་ཤེས་པར་མི་ནུས་སོ། །གལ་ཏེ་དོན་དེ་ལྟ་ཡིན་པར་གྱུར་ན་ནི་དེ་ཐམས་ཅད་གཟུགས་ཀྱི་ཕུང་

པོ་ཡིན་ནོ་ཞེས་བྱ་བ་ཁོ་ན་ཞིག་བཤད་པར་འགྱུར་རོ། །གཅིག་ཏུ་བསྡུས་ནས་ཞེས་འབྱུང་བ་དོན་མེད་པ་ཡིན་ནོ། །དེ་ལྟ་བས་ན་གཟུགས་ཀྱི་ཕུང་པོ་དག་ནི་སྤུངས་པ་བཞིན་དུ་བཏགས་པའི་ཡོད་པ་ཡིན་ནོ་ཞེས་བྱ་བ་ནི་སློབ་དཔོན་གྱིས་གཞག་པའི་ཕྱོགས་ཡིན་ནོ། །

གཟུགས་ཀྱི་ཕུང་པོ་བསྟན་པ་ལ། རྫས་སུ་ཡོད་པར་རྟོགས་པ་ནི་དེ་འདུས་པ་ཅན་ཡིན་པའི་ཕྱིར་རོ་ཞེས་བྱ་བར་ཁོང་དུ་ཆུད་པར་བྱའོ། །གཟུགས་ཅན་རྣམས་ཀྱང་ཞེས་བྱ་བ་རྒྱས་པར་འབྱུང་བ་ལ། གཟུགས་ཅན་སྨོས་པ་ནི་གཟུགས་ཅན་མ་ཡིན་པ་ལས་ཁྱད་པར་དུ་

བྱ་བའི་ཕྱིར་ཏེ། གཟུགས་ཅན་མ་ཡིན་པ་ཡིད་ཀྱི་སྐྱེ་མཆེད་ནི་འདུས་པ་མ་ཡིན་ཡང་རྒྱུའི་ངོ་བོ་འཛིན་ནོ། །མིག་གི་སྐྱེ་མཆེད་ལ་སོགས་པ་གཟུགས་ཅན་རྣམས་ཀྱང་འདུས་པ་ཁོ་ན་སེམས་དང་སེམས་ལས་བྱུང་བ་སྐྱེ་བའི་སྒོ་ཉིད་དུ་མཆེད་པར་བྱེད་ཀྱི་མ་འདུས་པ་དག་ནི་མ་

ཡིན་པས་འདུས་པའི་མཚན་ཉིད་ཡིན་པའི་ཕྱིར་ཕུང་པོ་བཞིན་དུ་བཏགས་པའི་ཡོད་པར་འགྱུར་ཏེ་རྣམ་པར་ཤེས་པའི་ཚོགས་ལྔ་ནི་བསྩགས་པ་ལ་བརྟེན་པ་དང་དམིགས་པ་ཡིན་པའི་ཕྱིར་རོ། །མ་ཡིན་ཏེ་འདུས་པ་རྣམས་རེ་རེ་ནས་རྒྱུའི་ངོ་བོར་གྱུར་པའི་ཕྱིར་ཞེས་བྱ་བ་དེ་ནི་དེ་ལྟ་མ་

ཡིན་ནོ། །ཅིའི་ཕྱིར་ཞེ་ན། ཚོགས་པ་འདུས་པ་རྣམས་རེ་རེ་ནས་རྒྱུ་ཡིན་པའི་ཕྱིར་རོ། །འདི་ལྟར་མིག་ལ་སོགས་པའི་རྡུལ་ཕྲ་རབ་མང་པོ་ཕན་ཚུན་ལྟོས་པ་འདི་དག་རེ་རེ་ཞིང་རྒྱུའི་ངོ་བོ་ཡིན་གྱི་འདུས་པ་དག་ནི་མ་ཡིན་ནོ། །དཔེར་ན་ཤིང་དྲང་བར་བྱ་བ་ལ་འདྲེན་པར་བྱེད་པ་མང་

Vol. 142 · folio 41b

པོ་དག་རེ་རེ་ནས་ནུས་པ་མེད་ཀྱི་འདུས་པ་ཕན་ཚུན་ལྟོས་པ་རྣམས་ཀྱིས་ནུས་པ་ལྟ་བུའམ། དཔེར་ན་སྐྲ་སོ་སོ་ན་གནས་པ་དག་གིས་རབ་རིབ་ཅན་གྱི་མིག་གི་རྣམ་པར་ཤེས་པ་སྐྱེད་པར་མི་ནུས་ཀྱི་འདུས་པ་དག་གིས་མ་འབྱར་ཀྱང་ནུས་པ་དེ་བཞིན་དུ་མིག་ལ་སོགས་པ་དབང་

པོའི་རྡུལ་ཕྲ་རབ་དག་དང་། གཟུགས་ལ་སོགས་པ་ཡུལ་གྱི་རྡུལ་ཕྲ་རབ་དག་ཀྱང་མིག་ལ་སོགས་པའི་རྣམ་པར་ཤེས་པ་བསྐྱེད་པར་བྱ་བ་ལ་རེ་རེས་ནུས་པ་མེད་ཀྱི་འདུས་པ་དག་གིས་ནི་ནུས་ཏེ། དངོས་པོ་རྣམས་ཀྱིས་ནུས་པ་ནི་དེ་ལྟ་བུ་ཡིན་པར་ཁོང་དུ་ཆུད་པར་བྱའོ། །

ཡུལ་ལྷན་ཅིག་བྱེད་པ་ཡིན་པའི་ཕྱིར་ཞེས་བྱ་བ་ནི་གལ་ཏེ་མང་པོ་རྣམས་སྐྱེ་བའི་སྒོའི་ངོ་བོ་ཡིན་པས་འདུས་པ་སྐྱེ་མཆེད་ཉིད་ཡིན་པར་འགྱུར་གྱི་རྫས་སྐྱེ་མཆེད་ཉིད་མ་ཡིན་ན་ནི་དབང་པོ་དང་ཡུལ་གྱི་རྡུལ་ཕྲ་རབ་འདུས་པ་རྣམས་སྐྱེ་བའི་སྒོའི་ངོ་བོ་ཡིན་པས་དེ་དག་འདུས་པ་སྐྱེ་

མཆེད་ཉིད་ཡིན་པར་འགྱུར་གྱི། སོ་སོར་ནི་སྐྱེ་མཆེད་ཉིད་དུ་མི་འགྱུར་བ་ཞིག་ན། མདོ་ལས་སྐྱེ་མཆེད་བཅུ་གཉིས་ཞེས་འབྱུང་བའི་ཕྱིར་སོ་སོར་སྐྱེ་མཆེད་ཉིད་ཡིན་པར་ཡང་འདོད་དོ། །འདི་ལ་བསྒྲུབ་པ་ཡང་འབྱུང་སྟེ་མིག་གི་སྐྱེ་མཆེད་རྫས་ཀྱི་རྡུལ་ཕྲ་རབ་འདུས་པ་

དག་གང་དག་དང་ལྷན་ཅིག་བྱེད་པ་དེ་དག་དང་ལྷན་ཅིག་འདུས་པའི་བདག་ཉིད་ཀྱི་སྐྱེ་མཆེད་དུ་གྱུར་པ་ནི་མ་ཡིན་ཏེ། མིག་གི་རྣམ་པར་ཤེས་པའི་རྒྱུ་ཡིན་པའི་ཕྱིར་མིག་གི་སྐྱེ་མཆེད་དང་གཟུགས་ཀྱི་སྐྱེ་མཆེད་རྫས་ཀྱི་རྡུལ་ཕྲ་རབ་འདུས་པ་བཞིན་ནོ། །མིག་གི་སྐྱེ་མཆེད་

རྫས་ཀྱི་རྡུལ་ཕྲ་རབ་འདུས་པ་ཇི་ལྟ་བ་དེ་བཞིན་དུ་ལུས་ཀྱི་སྐྱེ་མཆེད་རྡུལ་ཕྲ་རབ་འདུས་པའི་བར་དུ་ཡང་སྦྱར་བར་བྱའོ། །བྱེ་བྲག་ཏུ་བཤད་པ་ལས་ནི་ཞེས་བྱ་བ་འདིས་ཀྱང་ཕུང་པོ་དག་བཏགས་པའི་ཡོད་པའོ་ཞེས་བྱ་བར་སྟོན་ཏོ། །འདི་ནི་ཁྱད་པར་ཡིན་ཏེ། དེ་

དག་ནི་རྫས་སུ་མེད་ཀྱང་དེ་ལ་ཉེ་བར་བཏགས་ནས་རབ་ཏུ་བསྟན་ཏོ་ཞེས་ཁྱད་པར་དུ་བྱ་བའི་ཕྱིར་ནི་ཞེས་བྱ་བའི་སྒྲ་སྨོས་སོ། །ཕུང་པོ་བཏགས་པའི་ཡོད་པར་ལྟ་ན་ནི་ཞེས་བྱ་བ་ནི་ཕུང་པོ་ཞེས་བྱ་བ་བཏགས་པའི་ཡོད་པ་ཡིན་པར་ལྟ་བ་སྟེ། སྤུངས་པ་ཞེས་བྱ་བ་བཏགས་

Vol. 142 · folio 42a

པའི་ཡོད་པ་ཡིན་པར་ལྟ་ན་ཞེས་བྱ་བའི་ཐ་ཚིག་གོ། །རྡུལ་ཕྲ་རབ་ཁམས་གཅིག་དང་ཞེས་བྱ་བ་ནི་མིག་ལ་སོགས་པ་གཟུགས་ཅན་གྱི་ཁམས་བཅུ་པོ་དག་ལས་གང་ཡང་རུང་བ་ཞིག་གི་ཕྱོགས་ཡིན་ནོ། །དེ་བཞིན་དུ་སྐྱེ་མཆེད་དེ་དག་

ཉིད་ལས་གང་ཡང་རུང་བ་ཞིག་དང་། གཟུགས་ཀྱི་ཕུང་པོའི་ཕྱོགས་ཡིན་ནོ། །ཅིའི་ཕྱིར་ཞེ་ན། བཏགས་པ་ཡིན་པར་ལྟ་བ་ལ་ནི་ཕྱོགས་ཅན་ལ་འཇུག་པའི་སྒྲ་ཕྱོགས་ལ་རྣམ་པར་མི་འཇོག་གོ། །འོན་ཏེ་མི་ལྟ་ན་ནི་ཞེས་བྱ་བ་ཅི་ཞེ་ན། ཕུང་པོ་བཏགས་པ་ཡིན་པར་

ཞེས་བྱ་བར་སྐབས་དང་སྦྱར་རོ། །དེ་རྡུལ་ཕྲ་རབ་ཁམས་གཅིག་ཅེས་བྱ་བ་རྒྱས་པར་འབྱུང་བ་ནི་དེ་སྐྱེ་མཆེད་དང་ཁམས་གང་ཡང་རུང་བ་ཞིག་བཤད་པ་གང་ཡིན་པ་དང་གཟུགས་ཀྱི་ཕུང་པོ་གཅིག་ཁོ་ན་ཡིན་ནོ། །ཕྱོགས་ཡིན་ཡང་ཕྱོགས་ཅན་བཞིན་དུ་ཉེ་བར་འདོགས་པ་ཡང་

ཡོད་དོ་ཞེས་བྱ་བ་ནི་རྡུལ་ཕྲ་རབ་ཕྱོགས་ཡིན་ཡང་གཟུགས་ཀྱི་སྐྱེ་མཆེད་དང་ཁམས་གང་ཡང་རུང་བ་ཞིག་བཞིན་དུ་གཟུགས་ཀྱི་ཕུང་པོ་ཉེ་བར་འདོགས་སོ། །དཔེར་ན་རས་ཡུག་གི་ཕྱོགས་གཅིག་ཚིག་པ་ལ་རས་ཡུག་ཚིག་གོ་ཞེས་བྱ་བ་བཞིན་ནོ་ཞེས་བྱ་བ་ནི་ཇི་ལྟར་རས་ཡུག་ཅེས་བྱ་

བའི་སྒྲ་སྤྱི་ལ་འཇུག་པ་ཡིན་ཡང་ཕྱོགས་རེ་རས་ཡུག་གི་ཕྱོགས་གཅིག་ལ་ཡང་ཉེ་བར་འདོགས་པ་དེ་བཞིན་དུ་ཕུང་པོ་ཞེས་བྱ་བའི་སྒྲ་འདས་པ་ལ་སོགས་པའི་གཟུགས་སྤྱི་ལ་འཇུག་པ་ཡང་ཕྱོགས་རྡུལ་ཕྲ་རབ་ལ་ཉེ་བར་འདོགས་སོ། །གཟུགས་ལ་སོགས་པའི་ཕུང་པོ་ཞེས་བྱ་བ་

ཡིན་པའི་ཕྱིར་ཕུང་པོ་དག་ཁོ་ན་བཏགས་པའི་ཡོད་པ་ཡིན་གྱི། སྐྱེ་མཆེད་དང་ཁམས་དག་ནི་མ་ཡིན་ཏེ། གང་གི་ཚེ་གཟུགས་དག་ཁོ་ན་ཕུང་པོ་ཡིན་ནོ་ཞེས་ཚིག་སྡུད་པ་དེའི་ཚེ་རྫས་སུ་ཡོད་པ་ཡིན་ནོ་སྙམ་དུ་བསམས་པ་ཡིན་ནོ། །འདིར་འདི་དཔྱད་པར་བྱ་སྟེ། གལ་ཏེ་

དབང་པོ་རྡུལ་ཕྲ་རབ་རྣམས་དང་ཡུལ་གྱི་རྡུལ་ཕྲ་རབ་རྣམས་རྣམ་པར་ཤེས་པ་བསྐྱེད་པར་བྱ་བ་ལ་ཕན་ཚུན་ལྟོས་པ་དང་བཅས་པ་ཉིད་དུ་འདྲ་ན་འདིར་ཅིའི་ཕྱིར་གཉིས་ཀྱི་འདི་རྣམས་དབང་པོའི་རྡུལ་ཕྲ་རབ་འབའ་ཞིག་བཞིན་དུ་སྐྱེ་མཆེད་གཅིག་ཉིད་དུ་རྣམ་པར་མི་གཞག་ཅེ་ན། འདི་

Vol. 142 · folio 42b

ལྟར་མིག་གི་དབང་པོ་ལ་སོགས་པའི་རྡུལ་ཕྲ་རབ་ཐམས་ཅད་ནི་རང་གི་རྣམ་པར་ཤེས་པ་སྐྱེ་བའི་ཐུན་མོང་གི་རྒྱུ་ཡིན་གྱི་ཡུལ་གྱི་རྡུལ་ཕྲ་རབ་དག་ནི་དེ་ལྟ་མ་ཡིན་ནོ། །འདི་ལྟར་མིག་གི་དབང་པོའི་རྡུལ་ཕྲ་རབ་དག་ནི་ཡུལ་སྔོན་པོའི་རྣམ་པར་ཤེས་པ་སྐྱེ་བའི་རྒྱུ་ཡང་ཡིན་ལ་སེར་པོ་ལ་

སོགས་པའི་རྣམ་པར་ཤེས་པ་སྐྱེ་བ་ཡང་ཡིན་ནོ། །སྔོན་པོའི་རྡུལ་ཕྲ་རབ་དག་ནི་རང་གི་རྣམ་པར་ཤེས་པ་སྐྱེ་བའི་རྒྱུ་ཁོ་ན་ཡིན་གྱི་སེར་པོ་ལ་སོགས་པའི་རྣམ་པར་ཤེས་པ་སྐྱེ་བ་ནི་མ་ཡིན་ནོ། །དེ་བས་ན་མིག་གི་དབང་པོའི་རྡུལ་ཕྲ་རབ་དག་དང་དེའི་ཡུལ་གྱི་རྡུལ་ཕྲ་རབ་རྣམས་

མི་འདྲ་བར་འཇུག་པའི་ཕྱིར་དང་། གནས་སོ་སོ་ན་གནས་པའི་ཕྱིར་མིག་དང་གཟུགས་ཀྱི་རྡུལ་ཕྲ་རབ་རྣམས་སྐྱེ་མཆེད་གཅིག་ཉིད་དུ་རྣམ་པར་གཞག་ཏུ་མི་རུང་སྟེ། དེ་བཞིན་དུ་ལུས་ཀྱི་དབང་པོ་དང་རེག་བྱའི་རྡུལ་ཕྲ་རབ་རྣམས་སྐྱེ་མཆེད་གཅིག་ཉིད་དུ་རྣམ་པར་གཞག་ཏུ་མི་

རུང་བའི་བར་དུ་བརྗོད་པར་བྱའོ། །རྨོངས་དབང་འདོད་རྣམས་གསུམ་གྱི་ཕྱིར། །ཞེས་བྱ་བ་ནི་ཀུན་ཏུ་རྨོངས་པ་དང་ཤེས་རབ་དང་མོས་པ་རྣམ་པ་གསུམ་གྱི་ཕྱིར་ཞེས་བྱ་བའི་ཐ་ཚིག་གོ། །རྨོངས་པ་དང་དབང་པོ་དང་འདོད་པ་དག་རྣམ་པ་གསུམ་སྟེ། དེའི་ཕྱིར་རིལ་པོའི་

བདག་ཏུ་འཛིན་པས་ཞེས་བྱ་བ་ནི། ཁ་ཅིག་ནི་སེམས་ལས་བྱུང་བ་རྣམས་ལ་རིལ་པོར་བཟུང་ནས་དེ་དག་ཉིད་ལ་བདག་ཏུ་འཛིན་ཏེ། རིལ་པོར་བཟུང་ནས་བདག་ཏུ་འཛིན་པ་འཇུག་པའི་ཕྱིར་རོ། །དེ་དག་ལ་ནི་ཕུང་པོ་བསྟན་ཏེ། དེ་ནི་ཚོར་བ་དང་། འདུ་ཤེས་དང་།

འདུ་བྱེད་ཀྱི་བྱེ་བྲག་གི་སེམས་ལས་བྱུང་བ་རྣམ་པ་གསུམ་དུ་བསྟན་ཏེ། འདི་ལ་འདི་ནི་རིལ་པོ་གཅིག་པུ་མ་ཡིན་གྱི་སེམས་ལས་བྱུང་བའི་ཁྱད་པར་ཡིན་ནོ་ཞེས་བདག་ཏུ་འཛིན་པའི་གཉེན་པོར་བྱས་པ་ཡིན་ནོ། །རྣམ་པ་གཅིག་ཏུ་ན་ཁ་ཅིག་བདག་གི་དངོས་པོ་འདི་ནི་

རིལ་པོའི་ངོ་བོ་ཡིན་ལ་བདག་དེ་ཡང་ཚོར་བ་པོ་དང་། འདུ་ཤེས་པ་པོ་དང་སེམས་པ་པོ་ཡིན་ནོ་སྙམ་དུ་ཀུན་ཏུ་རྨོངས་པའོ། །དེ་དག་ལ་ཕུང་པོ་བསྟན་ཏེ། འདི་ནི་བདག་གི་ངོ་བོ་གོང་བུ་མ་ཡིན་གྱི་འདི་ལ་འདི་དག་ནི་སེམས་ལས་བྱུང་བ་རྣམས་ཡིན་ཏེ། ཚོར་

Vol. 142 · folio 43a

བ་དང་། འདུ་ཤེས་དང་། འདུ་བྱེད་དག་འཇུག་པ་ཡིན་ནོ་ཞེས་བདག་ཏུ་འཛིན་པའི་གཉེན་པོར་བྱས་པ་ཡིན་ནོ། །ཁ་ཅིག་ནི་གཟུགས་ཁོ་ན་ལའོ་ཞེས་བྱ་བ་ནི་རིལ་པོར་འཛིན་པས་ཀུན་ཏུ་རྨོངས་སོ་ཞེས་བྱ་བར་སྐབས་དང་སྦྱར་རོ། །དེ་

དག་ལ་ནི་སྐྱེ་མཆེད་བསྟན་ཏེ། དེ་ལ་ནི་གཟུགས་ནི་མིག་ལ་སོགས་པའི་བྱེ་བྲག་གིས་རྣམ་པ་མང་པོར་རྣམ་པར་ཕྱེ་བའི་སེམས་ལས་བྱུང་བ་རྣམས་ནི་ཆོས་ཀྱི་སྐྱེ་མཆེད་གཅིག་ཁོ་ནར་བསྟན་ལ། སེམས་ཀྱང་ཡིད་ཀྱི་སྐྱེ་མཆེད་ཉིད་དུ་བསྟན་ཏོ། །ཁ་ཅིག་ནི་གཟུགས་

དང་སེམས་དག་ལའོ་ཞེས་བྱ་བ་ནི་རིལ་པོར་འཛིན་པས་ཀུན་ཏུ་རྨོངས་སོ་ཞེས་བྱ་བ་ཁོ་ནར་སྐབས་དང་སྦྱར་རོ། །དེ་དག་ལ་ནི་ཁམས་བསྟན་ཏེ། དེ་ལ་ནི་གཟུགས་ཀྱང་མིག་ལ་སོགས་པའི་བྱེ་བྲག་གིས་མང་པོར་རྣམ་པར་ཕྱེ་ལ་སེམས་ཀྱང་མིག་གི་རྣམ་པར་ཤེས་པ་ལ་སོགས་

པའི་ཁམས་ཀྱི་བྱེ་བྲག་གིས་མང་པོར་རྣམ་པར་ཕྱེའི། སེམས་ལས་བྱུང་བ་རྣམས་ནི་མ་ཡིན་ཏེ། ཆོས་ཀྱི་ཁམས་ཉིད་ཁོ་ནར་བསྟན་པའི་ཕྱིར་རོ། །དེས་ནི་གཟུགས་དང་སེམས་ལ་རིལ་པོར་འཛིན་པའི་ཀུན་ཏུ་རྨོངས་པའི་གཉེན་པོར་བྱས་པ་ཡིན་ནོ། །དབང་པོ་དག་ཀྱང་ཞེས་བྱ་བ་རྒྱས་པར་འབྱུང་བ་

ནི་གང་ཟག་ནི་རྣམ་པ་གསུམ་སྟེ། དབང་པོ་རྣོན་པོ་དང་འབྲིང་པོ་དང་རྟུལ་པོའི་ཕྱིར་རོ། །ཡང་ན་གང་ཟག་ནི་རྣམ་པ་གསུམ་སྟེ། མགོ་སྨོས་པས་གོ་བ་དང་། རྣམ་པར་སྤྲོས་ན་གོ་བ་དང་། ཚིག་ལྷུར་ལེན་པའོ། །དེ་ལ་དབང་པོ་རྣོན་པོ་རྣམས་ལ་ནི་ཕུང་པོ་བསྟན་ཏེ། དེ་དག་

ནི་དབང་པོ་རྣོ་བའི་ཕྱིར་ཕུང་པོ་ཕྱེ་བ་ཁོ་ནས་སྐྱེ་མཆེད་དང་ཁམས་དབྱེ་བ་རྟོགས་པར་ནུས་ཏེ་ཇི་སྐད་དུ། དགེ་སློང་གང་ཁྱོད་མ་ཡིན་པ་དེ་ནི་ཁྱོད་ཀྱིས་སྤང་བར་བྱའོ། །གསོལ་བ་བཅོམ་ལྡན་འདས་གློ་བར་ཆུད་དོ་ཞེས་འབྱུང་བ་ལྟ་བུ་དང་། ཇི་སྐད་དུ་དགེ་སློང་

མདོར་བསྡུས་ཏེ་བཤད་པ་འདིའི་དོན་ཇི་ལྟར་ཤེས། བཙུན་པ་གཟུགས་ནི་བདག་མ་ལགས་ཏེ། ཆོས་དེ་ནི་བདག་གིས་སྤང་བར་བགྱིའོ་ཞེས་བྱ་བ་རྒྱས་པར་འབྱུང་བ་ལྟ་བུ་ཡིན་ནོ། །དབང་པོ་འབྲིང་རྣམས་ལ་ནི་སྐྱེ་མཆེད་བསྟན་ཏེ། དེ་དག་ནི་དབང་པོ་

Vol. 142 · folio 43b

འབྲིང་ཡིན་པའི་ཕྱིར་འབྲིང་དུ་བསྟན་པ་ཁོ་ནས་ཡིན་གྱི་ཤིན་ཏུ་རྒྱས་པས་ནི་མ་ཡིན་ཏེ། སྐྱེ་མཆེད་རབ་ཏུ་ཕྱེ་བས་ཁམས་རབ་ཏུ་དབྱེ་བ་རྟོགས་པར་ནུས་ཀྱི་མདོར་བསྡུས་པ་ཕུང་པོ་རབ་ཏུ་ཕྱེ་བས་ནི་མ་ཡིན་ནོ། །དབང་པོ་རྟུལ་པོ་རྣམས་ལ་ནི་ཁམས་བསྟན་ཏེ། དེ་དག་ནི་དབང་པོ་རྟུལ་བའི་

ཕྱིར་རྣམ་པར་མ་ཕྱེ་བ་རང་གི་བློའི་མཐུས་རྟོགས་པར་མི་ནུས་སོ། །འདོད་པ་ཡང་རྣམ་པ་གསུམ་སྟེ་ཞེས་བྱ་བ་ནི་སྔོན་གོམས་པའི་སྦྱོར་བ་ལས་འདོད་པ་རྣམ་པ་གསུམ་ཡིན་ནོ། །རྣམ་པ་གཅིག་ཏུ་ན་ཞི་གནས་སྤྱོད་པ་རྣམས་ནི་མདོར་བསྡུས་པ་འདོད་དོ། །ཞི་གནས་དང་ལྷག་མཐོང་སྤྱོད་པ་

རྣམས་ནི་བར་མ་འདོད་དོ། །ལྷག་མཐོང་སྤྱོད་པ་རྣམས་ནི་རྒྱས་པ་འདོད་དོ། །ཡང་ཅིའི་ཕྱིར་ཞེས་བྱ་བ་རྒྱས་པར་འབྱུང་བ་སེམས་ལས་བྱུང་བ་དག་ལ་རིལ་པོའི་བདག་ཏུ་འཛིན་པས་རྨོངས་པ་རྣམས་ལ་ཕུང་པོ་བསྟན་ཏོ་ཞེས་རྒྱུ་བཤད་ཟིན་པ་མ་ཡིན་ནམ་ཞེ་ན། དེ་དག་ལ་སེམས་

ལས་བྱུང་བ་རྣམས་རྣམ་པར་ཕྱེའོ་ཞེས་བཤད་པ་ནི་བདེན་ན། ཚོར་བ་དང་འདུ་ཤེས་དག་ཁོ་ན་འདུ་བྱེད་ཀྱི་ཕུང་པོ་ལས་ལོགས་ཤིག་ཏུ་ཕུང་པོར་བྱས་ཀྱི། གཞན་དག་ནི་མ་ཡིན་ནོ་ཞེས་བྱ་བ་འདི་ལ་རྒྱུ་ཅི་ཞིག་ཡོད་ཅེ་ན། འདོད་པ་ལ་ལྷག་པར་ཞེན་པ་ཞེས་བྱ་བ་རྒྱས་པར་སྨོས་ཏེ།

འདོད་པ་དག་དང་ལྟ་བ་དག་ལ་མངོན་པར་ཞེན་པ་ཡིན་ནོ། །རྩོད་པའི་རྩ་བ་ལྷག་པར་ཞེན་པ་དེ་གཉིས་ཀྱི་རྒྱུའི་གཙོ་བོ་ནི་གོ་རིམས་བཞིན་དུ་ཚོར་བ་དང་འདུ་ཤེས་དག་སྟེ་ཞེས་བྱ་བ་ནི་གཙོ་བོ་སྨོས་པས་དོན་གྱིས་ན་མ་རིག་པ་ལ་སོགས་པ་ནི་གཙོ་བོའི་རྒྱུ་མ་ཡིན་ནོ་ཞེས་བཤད་པ་ཡིན་ནོ། །ཚོར་བ་རོ་

མྱང་བའི་དབང་གིས་ནི་ཁྱིམ་པ་རྣམས་འདོད་པ་རྣམས་ལ་མངོན་པར་ཞེན་ལ། འདུ་ཤེས་ཕྱིན་ཅི་ལོག་གི་དབང་གིས་ནི་ལྟ་བ་རྣམས་ལའོ། །ཅི་ཞེ་ན། མངོན་པར་ཞེན་ཏོ་ཞེས་བྱ་བར་སྐབས་དང་སྦྱར་ཏེ། ཆོས་མ་ཡིན་པ་ལ་ཆོས་སུ་འདུ་ཤེས་ཤིང་ཆོས་ལ་ཆོས་མ་ཡིན་པར་འདུ་ཤེས་པ་དང་

བདག་མེད་པ་ལ་སོགས་པ་ལ་བདག་ལ་སོགས་པར་འདུ་ཤེས་པ་རྣམས་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ལ་སོགས་པ་ལྟ་བ་དེ་དང་དེ་དག་ལ་མངོན་པར་ཞེན་ཏོ། །དེ་དག་ཀྱང་གང་ཞེ་ན། ཕལ་ཆེར་རབ་ཏུ་བྱུང་བ་ཡིན་ནོ། །ཚོར་བ་ལ་ཞེན་ཅིང་ཞེས་བྱ་བ་རྒྱས་པར་

Vol. 142 · folio 44a

འབྱུང་བ་ནི་ཚོར་བ་ལ་ཞན་ཅིང་ཕྱིན་ཅི་ལོག་བཞིས་ཕྱིན་ཅི་ལོག་ཏུ་གྱུར་པ་ནི་འཁོར་བ་ན་སྐྱེ་བ་བརྒྱུད་པར་བྱེད་དོ། །གོ་རིམས་ཀྱི་རྒྱུ་དེའི་ཕྱིར་ཡང་ཞེས་བྱ་བ་ནི་ཕུང་པོའི་གོ་རིམས་སུ་བླག་པ་ལ། རགས་པ་དང་ནི་ཀུན་ཉོན་མོངས། །སྣོད་སྩོགས་དོན་ཁམས་ཇི་བཞིན་ནོ། །ཞེས་བྱ་བ་

རྒྱུ་བཞི་འཆད་པར་འགྱུར་བ་ཡིན་ནོ། །གཟུགས་ནི་ཐོགས་པ་དང་བཅས་པའི་ཕྱིར་ཐམས་ཅད་པས་རགས་སོ། །གཟུགས་ཅན་མ་ཡིན་པ་རྣམས་ཀྱི་ནང་ན་ཡང་ཚོར་བ་ནི་རྒྱུ་བ་རགས་པའི་ཕྱིར། འདི་ལྟར་ངའི་ལག་པ་ལ་ཚོར་རོ་རྐང་པ་ལ་ཚོར་རོ་ཞེས་ཐ་སྙད་འདོགས་སོ། །འདུ་ཤེས་ནི་

གཉིས་པས་ཆེས་རགས་སོ། །རྣམ་པར་ཤེས་པས་ནི་འདུ་བྱེད་དེ། དེའི་ཕྱིར་གང་ཆེས་རགས་པ་སྔར་བཤད་དོ་ཞེས་བྱ་བ་ནི་རྒྱུ་དང་པོ་ཡིན་ནོ། །ཡང་ཐོག་མ་མེད་པ་ཅན་གྱི་འཁོར་བ་ན་ཕོ་དང་མོ་དག་ཕན་ཚུན་གཟུགས་ལ་མངོན་པར་དགའ་སྟེ། དེ་དག་ཀྱང་ཚོར་བའི་རོ་མྱང་བ་ལ་ཆགས་

པའི་ཕྱིར་རོ། །དེ་ལ་ཆགས་པ་ཡང་འདུ་ཤེས་ཕྱིན་ཅི་ལོག་ཏུ་གྱུར་པའི་ཕྱིར་རོ། །ཕྱིན་ཅི་ལོག་དེ་ཡང་ཀུན་ནས་ཉོན་མོངས་པ་དག་གིས་སོ། །སེམས་ཀྱང་དེ་དག་གིས་ཀུན་ནས་ཉོན་མོངས་པ་ཅན་དུ་བྱས་པས་ཀུན་ནས་ཉོན་མོངས་པའི་གོ་རིམས་ཇི་ལྟ་བ་བཞིན་ནོ་ཞེས་བྱ་བ་ནི་གཉིས་པ་

ཡིན་ནོ། །ཡང་ན་སྣོད་ལ་སོགས་པའི་དོན་གྱིས་ཏེ་གཟུགས་ལ་སོགས་པའི་ཕུང་པོ་ནི་སྣོད་དང་ཟས་དང་ཚོད་མ་དང་བྱན་པོ་དང་ཟ་བ་པོ་ལྟ་བུའོ་ཞེས་བྱ་བ་ནི་གསུམ་པའོ། །ཡང་ན་ཁམས་ཀྱིས་ཏེ་འདོད་པའི་ཡོན་ཏན་གཟུགས་ཀྱིས་རབ་ཏུ་ཕྱེ་བ་ནི་འདོད་པའི་ཁམས་སོ། །ཚོར་བས་རབ་ཏུ་ཕྱེ་བ་ནི་

བསམ་གཏན་རྣམས་སོ། །འདུ་ཤེས་ཀྱིས་རབ་ཏུ་ཕྱེ་བ་ནི་གཟུགས་མེད་པ་གསུམ་མོ། །འདུ་བྱེད་ཙམ་གྱིས་རབ་ཏུ་ཕྱེ་བ་ནི་སྲིད་པའི་རྩེ་མོ་སྟེ། འདི་དག་ནི་རྣམ་པར་ཤེས་པ་གནས་པ་བཞི་ཡིན་ལ་དེ་དག་ལ་རྣམ་པར་ཤེས་པ་གནས་སོ་ཞེས་ཕུང་པོའི་གོ་རིམས་ཞིང་དང་ས་བོན་གྱི་གོ་

རིམས་ལྟ་བུར་བསྟན་པའི་ཕྱིར་རོ་ཞེས་བྱ་བ་ནི་རྒྱུ་བཞི་པ་ཡིན་ནོ། །གང་གི་ཕྱིར་འདི་དག་ཆེས་རགས་པ་དང་ཀུན་ནས་ཉོན་མོངས་པའི་གོ་རིམས་ཀྱི་རྒྱུ་དང་ཟས་དང་ཚོད་མ་ལྟ་བུ་དང་དེ་དག་གིས་ཁམས་གཉིས་རབ་ཏུ་ཕྱེ་བའི་གོ་རིམས་ཀྱི་རྒྱུ་དེ་ཉིད་ཀྱི་ཕྱིར། ཚོར་བ་དང་། འདུ་ཤེས་དག་

Vol. 142 · folio 44b

ལོགས་ཤིག་ཏུ་ཕུང་པོར་བྱས་སོ། །དོན་དུ་མི་རུང་བའི་ཕྱིར་རེ་ཞིག་དེ་དག་ཉིད་ཀྱི་ནང་དུ་བསྡུ་བར་མི་ནུས་སོ་ཞེས་བྱ་བ་ནི་གཟུགས་ཀྱི་ངོ་བོ་ཉིད་དོ་ཞེས་བྱ་བ་ནས་རྣམ་པར་ཤེས་པའི་བར་གྱི་ངོ་བོ་ཉིད་ཡིན་ནོ་ཞེས་བྱ་བར་གཟུགས་ལ་སོགས་པའི་དོན་དུ་མི་རུང་ཞིང་མི་སྲིད་པའི་ཕྱིར་ཕུང་པོ་ལྔ་པོ་དེ་དག་

ཉིད་ཀྱི་ནང་དུ་བསྡུ་བར་ནི་མི་ནུས་ཏེ། དེ་དག་གི་ངོ་བོ་ཉིད་མ་ཡིན་པའི་ཕྱིར་རོ། །ཕུང་པོ་དྲུག་པ་བརྗོད་པར་ཡང་མི་ནུས་སོ། །ཅིའི་ཕྱིར་ཞེ་ན། དོན་དུ་མི་རུང་བའི་ཕྱིར་ཏེ་འདས་པ་ལ་སོགས་པའི་དོན་དུ་མི་རུང་བའི་ཕྱིར་རོ་ཞེས་བྱ་བའི་ཐ་ཚིག་གོ། །འདུས་མ་བྱས་རྣམས་མང་བའི་ཕྱིར་འདུས་མ་

བྱས་ཀྱི་ཕུང་པོ་གཞན་ཞིག་ཏུ་རུང་བ་མ་ཡིན་ནམ་འདས་པ་ལ་སོགས་པའི་དོན་གྱིས་ཅི་ཞིག་བྱ་ཞེ་ན། དེ་ནི་རིགས་པ་མ་ཡིན་ཏེ་འདུས་མ་བྱས་རྣམས་ལ་ཡུལ་དང་ཉེ་བ་མེད་པས་མདོར་བསྡུར་མི་རུང་བའི་ཕྱིར་རོ། །ཡང་ཀུན་ནས་ཉོན་མོངས་པའི་གཞི་ཤེས་པར་བྱ་བའི་ཕྱིར་ཞེས་བྱ་བ་རྒྱས་

པར་འབྱུང་བ་ནི་ཟག་པ་མེད་པའི་ཕྱིར་ཀུན་ནས་ཉོན་མོངས་པའི་གཞི་ཡང་མ་ཡིན་ལ་འདུས་མ་བྱས་ཡིན་པའི་ཕྱིར་རྣམ་པར་བྱང་བའི་གཞི་ཡང་མ་ཡིན་ཏེ། རྣམ་པར་བྱང་བའི་གཞི་ནི་རྣམ་པར་བྱང་བའི་རྒྱུ་ཡིན་པར་བསམས་པའོ། །རྣམ་པ་གཅིག་ཏུ་ན་གཟུགས་ཀྱི་ཕུང་པོ་ཞེས་བཤད་པ་

ནས་རྣམ་པར་ཤེས་པའི་ཕུང་པོ་ཞེས་བྱ་བའི་བར་དུ་བཤད་ནས། གཟུགས་ཀྱི་ཕུང་པོ་ནས་རྣམ་པར་ཤེས་པའི་ཕུང་པོའི་བར་ནི་ཀུན་ནས་ཉོན་མོངས་པའི་གཞི་དང་རྣམ་པར་བྱང་བའི་གཞི་ཡིན་ནོ་ཞེས་བྱ་བར་ཤེས་ཀྱི་འདུས་མ་བྱས་ཀྱི་ཕུང་པོ་ཞེས་བཤད་ན་ནི་ཀུན་ནས་ཉོན་མོངས་པ་དང་རྣམ་

པར་བྱང་བའི་གཞི་ཡིན་ནོ་ཞེས་བྱ་བར་ཡང་མི་ཤེས་པས་འདུས་མ་བྱས་ཀྱི་ཕུང་པོ་ཞེས་བྱ་བ་ནི་མི་སྲིད་དོ། །ཁམས་དང་སྐྱེ་མཆེད་དག་ལ་ཡང་དེ་ལྟར་ཐལ་བར་འགྱུར་རོ་ཞེས་བྱ་བ་ནི་དེ་སྐད་དུ་སྨྲ་བ་དེ་དག་གི་ལྟར་ན་ཇི་ལྟར་བུམ་པ་ཆག་པ་བུམ་པ་མ་ཡིན་པ་དེ་བཞིན་དུ་ཁམས་ཞིག་པ་ཡང་

ཁམས་མ་ཡིན་ལ། སྐྱེ་མཆེད་ཞིག་པ་ཡང་སྐྱེ་མཆེད་མ་ཡིན་པས་ཆོས་ཀྱི་ཁམས་དང་སྐྱེ་མཆེད་དྲུག་ཏུ་འདུས་མ་བྱས་རྣམ་པར་མ་བཞག་པར་འགྱུར་བ་ཞིག་ན། འདི་སྐད་དུ་ཁམས་དང་སྐྱེ་མཆེད་དག་གི་ནང་དུ་ནི་ཆོས་ཐམས་ཅད་བསྡུས་པར་འདོད་དོ་ཞེས་ཀྱང་བཤད་དོ། །ཕུང་པོ་

Vol. 142 · folio 45a

རྣམས་ཀྱི་རྣམ་པ་གཞན་བཤད་ཟིན་ཏོ། །རིམ་ནི་ཞེས་བྱ་བ་འདིར་ནི་ཞེས་བྱ་བའི་སྒྲ་རྣམ་པར་བརྗོད་པ་ལ་ལྟོས་པ་ཉེ་བར་འགོད་དོ་ཞེས་སྟོན་པར་བྱེད་པ་ཡིན་ནོ། །ཐམས་ཅད་པས་རགས་སོ་ཞེས་བྱ་བ་ནི་གཟུགས་ནི་བསྟན་དུ་ཡོད་པ་དང་ཐོགས་པ་དང་བཅས་པ་ལ་

སོགས་པ་དང་ལྡན་པའི་ཕྱིར་ཚོར་བ་ལ་སོགས་པ་ཐམས་ཅད་པས་རགས་པ་ཡིན་ནོ། །ཚོར་བ་ལ་སོགས་པ་གཟུགས་ཅན་མ་ཡིན་པ་རྣམས་ཀྱི་ནང་ན་ཡང་ཞེས་བྱ་བ་ནི་དམིགས་ཀྱིས་བསལ་བ་དྲུག་པ་ཡིན་ནོ། །ཚོར་བ་ནི་རྒྱུ་བ་རགས་པའི་ཕྱིར་རགས་པ་ཡིན་ཏེ། ཀུན་ཏུ་འབྱུང་བ་

རགས་པའི་ཕྱིར་ཞེས་བྱ་བའི་ཐ་ཚིག་གོ། །འདུ་ཤེས་ནི་འདུ་བྱེད་དང་རྣམ་པར་ཤེས་པ་དང་གཉིས་པས་རགས་པ་ཡིན་ཏེ་མཚན་མ་ཡོངས་སུ་གཅོད་པས་ཤེས་པར་སླ་བའི་ཕྱིར་རོ། །རྣམ་པར་ཤེས་པ་བས་ནི་འདུ་བྱེད་རགས་ཏེ་བདེ་བར་འགྱུར་བར་བྱའོ། །སྡུག་བསྔལ་བར་

འགྱུར་བར་མི་བྱའོ་ཞེས་མངོན་པར་འདུ་བྱེད་པའི་མཚན་ཉིད་ཡིན་པའི་ཕྱིར་རོ། །རྣམ་པར་ཤེས་པ་ནི་དམིགས་པ་ཙམ་གྱི་མཚན་ཉིད་ཡིན་པའི་ཕྱིར་ཐམས་ཅད་པས་ཕྲ་བ་ཡིན་ནོ། །གདུལ་བྱ་རྣམས་ལ་ཡང་དོན་ཇི་ལྟར་རགས་པ་བཞིན་བསྟན་པར་བྱ་བར་རིགས་པས་ཕུང་པོའི་གོ་རིམས་

དེ་ལྟ་བུ་ཡིན་ནོ། །ཕོ་དང་མོ་དེ་དག་ཀྱང་ཚོར་བའི་རོ་མྱང་པ་ལ་ཆགས་པའི་ཕྱིར་ཕན་ཚུན་གཟུགས་ལ་མངོན་པར་དགའ་བར་འགྱུར་རོ། །དེ་ལ་ཆགས་པ་ཡང་ཞེས་བྱ་བ་ནི་ཚོར་བ་ལ་ཆགས་པའོ། །འདུ་ཤེས་ཕྱིན་ཅི་ལོག་ཏུ་གྱུར་པའི་ཕྱིར་རོ་ཞེས་བྱ་བ་ནི་རྟག་པ་ལ་སོགས་པ་མཚན་

མར་འཛིན་པའི་ཕྱིར་རོ། །ཚོར་བ་ནི་བདེ་བ་ཡང་འདུ་བྱེད་དང་འགྱུར་བའི་སྡུག་བསྔལ་ཉིད་ཀྱིས་སྡུག་བསྔལ་བ་ཡིན་ནོ། །སྣོད་དང་ཟས་དང་ཞེས་བྱ་བ་རྒྱས་པར་འབྱུང་བ་ནི་གཟུགས་ནི་ཚོར་བའི་རྟེན་ཡིན་པའི་ཕྱིར་སྣོད་ལྟ་བུ་ཡིན་ནོ། །ཚོར་བ་ནི་རོ་མྱང་བར་བྱ་བ་ཡིན་པའི་ཕྱིར་ཟས་ལྟ་བུ་ཡིན་

ནོ། །འདུ་ཤེས་ནི་ཚོར་བ་ལ་དེའི་མཚན་མར་འཛིན་པས་གསལ་བར་བྱེད་པའི་ཕྱིར་ཚོད་མ་ལྟ་བུ་ཡིན་ནོ། །ཡང་ན་འདུ་ཤེས་ཀྱི་དབང་གིས་ཚོར་བ་འདོད་པས་ན་འདུ་ཤེས་ནི་ཚོད་མ་ལྟ་བུ་ཡིན་ནོ། །སེམས་པ་ནི་རྣམ་པར་སྨིན་པའི་ཚོར་བ་མངོན་པར་འདུས་བྱས་ནས་ཉེ་བར་གཏོད་པའི་

Vol. 142 · folio 45b

ཕྱིར་བྱན་པོ་ལྟ་བུ་ཡིན་ནོ། །དེ་ལ་ཕན་འདོགས་པའི་ཕྱིར་རྣམ་པར་ཤེས་པ་ནི་ཟ་བ་པོ་ལྟ་བུ་ཡིན་ཏེ་གོ་རིམས་ནི་སྣོད་ལ་སོགས་པའི་དོན་གྱིས་ཡིན་ནོ། །ཡང་ན་ཁམས་ཀྱིས་ཏེ་ཞེས་བྱ་བ་ནི་འདོད་པའི་ཡོན་ཏན་དག་ཉིད་གཟུགས་དག་ཡིན་ཏེ་དེ་དག་གིས་རབ་ཏུ་ཕྱེ་ཞིང་ཤས་ཆེ་བ་ནི་

འདོད་པའི་ཁམས་སོ། །ཚོར་བས་རབ་ཏུ་ཕྱེ་བ་ནི་བསམ་གཏན་རྣམས་ཏེ་བསམ་གཏན་དང་པོ་ནི་ཡིད་བདེ་བ་དང་བདེ་བའི་དབང་པོས་རབ་ཏུ་ཕྱེ་བ་ཡིན་ནོ། །གཉིས་པ་ནི་ཡིད་བདེ་བའི་དབང་པོས་རབ་ཏུ་ཕྱེ་བ་ཡིན་ནོ། །གསུམ་པ་ནི་བདེ་བའི་དབང་པོས་རབ་ཏུ་ཕྱེ་བ་ཡིན་ནོ། །བསམ་གཏན་

བཞི་པ་ནི་བཏང་སྙོམས་ཀྱི་དབང་པོ་ཡོངས་སུ་དག་པས་རབ་ཏུ་ཕྱེ་བ་ཡིན་ནོ། །འདུ་ཤེས་ཀྱིས་རབ་ཏུ་ཕྱེ་བ་ནི་གཟུགས་མེད་པ་གསུམ་སྟེ་ནམ་མཁའ་མཐའ་ཡས་སྐྱེ་མཆེད་ནི་ནམ་མཁའི་འདུ་ཤེས་ཀྱིས་རབ་ཏུ་ཕྱེ་བ་ཡིན་ནོ། །རྣམ་ཤེས་མཐའ་ཡས་སྐྱེ་མཆེད་ནི་རྣམ་པར་ཤེས་པའི་

འདུ་ཤེས་ཀྱིས་རབ་ཏུ་ཕྱེ་བ་ཡིན་ནོ། །ཅི་ཡང་མེད་པའི་སྐྱེ་མཆེད་ནི་ཅི་ཡང་མེད་པའི་འདུ་ཤེས་ཀྱིས་རབ་ཏུ་ཕྱེ་བ་ཡིན་ནོ། །འདུ་བྱེད་ཙམ་གྱིས་རབ་ཏུ་ཕྱེ་བ་ནི་སྲིད་པའི་རྩེ་མོ་སྟེ་དེ་ན་ནི་སེམས་པས་ཚེ་བསྐལ་པ་བརྒྱད་ཁྲི་འཕེན་པར་བྱེད་དོ། །ཅིའི་ཕྱིར་རྣམ་པར་ཤེས་པ་ཐམས་ཅད་པས་ཕྱིས་

བཤད་ཅེ་ན། དེའི་ཕྱིར་འདི་དག་ནི་རྣམ་པར་ཤེས་པ་གནས་པ་དག་ཡིན་ལ་ཞེས་བྱ་བ་རྒྱས་པར་སྨོས་སོ། །རྣམ་པར་ཤེས་པ་གནས་པ་ནི་བཞི་སྟེ། གཟུགས་སུ་ཉེ་བར་འགྲོ་བའི་རྣམ་པར་ཤེས་པ་གནས་པ་ནི་འདོད་པའི་ཁམས་སོ། །ཚོར་བར་ཉེ་བར་འགྲོ་བ་ནི་བསམ་གཏན་

དག་གོ། །འདུ་ཤེས་སུ་ཉེ་བར་འགྲོ་བ་ནི་གཟུགས་མེད་པ་གསུམ་མོ། །འདུ་བྱེད་དུ་ཉེ་བར་འགྲོ་བ་ནི་སྲིད་པའི་རྩེ་མོའོ། །དེ་དག་ལ་བརྟེན་པའི་ཕྱིར་རྣམ་པར་ཤེས་པ་གནས་པ་བཞི་པོ་དེ་དག་ལ་རྣམ་པར་གནས་པས་ཐམས་ཅད་པས་ཕྱིས་བཤད་དེ་དེ་ལྟར་ན། ཕུང་པོའི་གོ་རིམས་

ཞིང་དང་ས་བོན་གྱི་གོ་རིམས་ལྟ་བུར་བསྟན་པའི་ཕྱིར་བཤད་པ་ཡིན་ནོ། །དེ་ཉིད་ཀྱི་ཕྱིར་ཕུང་པོ་ནི་ལྔ་སྟེ་མི་ཉུང་མི་མང་ངོ་ཞེས་བྱ་བ་ནི་རགས་པ་ལ་སོགས་པའི་རྒྱུས་ན་མི་མང་མི་ཉུང་ངོ་ཞེས་བྱ་བའི་ཐ་ཚིག་གོ། །ལྔའི་ཡུལ་ནི་ད་ལྟར་ཡིན་པའི་ཕྱིར་སྔར་སྨོས་སོ་ཞེས་བྱ་བ་ནི་གང་དག་

Vol. 142 · folio 46a

གི་ཡུལ་ད་ལྟར་ཡིན་པ་དེ་དག་ནི་ཡུལ་གསལ་བ་ཡིན་པས་གཟུང་བར་སླ་བའི་ཕྱིར་སྔར་བཤད་དོ། །ཡུལ་ད་ལྟར་ཡིན་པ་དག་ནི་སྔར་འཇུག་པར་འགྱུར་བ་ད་ལྟར་ན་ཡང་སྔར་བཤད་དོ། །ཡིད་ནི་ཡུལ་མ་ངེས་པ་ཅན་ཡིན་ཏེ་ཞེས་བྱ་བ་ནི་ཡུལ་འཆོལ་བའི་ཕྱིར་རྟོགས་པར་

དཀའ་བ་དང་ཕལ་ཆེར་ཕྱིས་འཇུག་པ་ཡིན་ནོ། །ཇི་ལྟར་ཞེ་ན། ཁ་ཅིག་གི་ཡུལ་ནི་ད་ལྟར་ཡིན་པ་ནས་ཁ་ཅིག་གི་ཡུལ་ནི་དུས་གསུམ་དང་དུས་མ་ཡིན་པའི་བར་ཡིན་ནོ་ཞེས་བྱ་བ་སྨོས་ཏེ། བར་ཞེས་བྱ་བའི་སྒྲ་སྨོས་པས་ནི་ཁ་ཅིག་གི་ཡུལ་ནི་འདས་པ་ཡིན་ལ། ཁ་ཅིག་གི་ཡུལ་ནི་མ་

འོངས་པ་ཡིན་ནོ། །ཁ་ཅིག་གི་ཡུལ་ནི་དུས་གསུམ་ཡིན་པ་ནི་དཔེར་ན་ཆོས་ཐམས་ཅད་ནི་བདག་མེད་པའོ་ཞེས་བྱ་བ་ལྟ་བུ་ཡིན་ནོ། །ཁ་ཅིག་གི་ཡུལ་དུས་མ་ཡིན་པ་ཡིན་པ་ནི་ཡུལ་འདུས་མ་བྱས་ཡིན་ཞེས་བྱ་བའི་ཐ་ཚིག་གོ། །དེ་ལྟར་ན་ཡིད་ནི་ཡུལ་མ་ངེས་པ་ཡིན་ཞིང་དེ་བཞིན་

དུ་དེ་ནི་རྟོགས་པར་བྱ་བར་སླ་བ་ཡང་མ་ཡིན་པས་ཕྱིས་བཤད་དེ་འཇིག་རྟེན་ན་ཡང་རྟོགས་པར་སླ་བ་སྔར་སྟོན་པར་སྣང་ངོ་། །འབྱུང་བ་ལས་གྱུར་དོན་ཕྱིར་བཞི། །ཞེས་བྱ་བ་ནི་མིག་ལ་སོགས་པ་བཞིའི་ཡུལ་རྒྱུར་བྱས་པའི་གཟུགས་ཡིན་ཏེ། དེ་ལྟ་བས་ན་དེ་ནི་ལུས་ལས་སྔར་བཤད་

དོ། །ལུས་ཀྱི་ཡུལ་ནི་མ་ངེས་ཏེ་རེས་འགའ་ནི་འབྱུང་བ་དག་ཡིན་ལ་རེས་འགའ་ནི་འབྱུང་བ་ལས་གྱུར་པ་དག་ཡིན་ནོ་ཞེས་བྱ་བ་ནི་གང་གི་ཚེ་རྣམ་པར་བཅད་ནས་འཛིན་པ་ནའོ། །རེས་འགའ་ནི་གཉི་ག་ཡིན་ཏེ་གལ་ཏེ་རྣམ་པར་མ་བཅད་པར་འཛིན་ནའོ། །ལྷག་མ་ཅི་རིགས་

པར་ཆེས་རྒྱང་རིང་བ་དང་མྱུར་བར་འཇུག་པས་གཞན་པས་སྔར་སྨོས་ཏེ་ཞེས་བྱ་བ་ལ། ལྷག་མ་ནི་མིག་ལ་སོགས་པ་སྟེ། གཞན་པས་ཅི་ཞིག་པར་སྔར་སྨོས་སོ། །ཆེས་རིང་མྱུར་འཇུག་ཕྱིར་ཞེས་བྱ་བ་ནི་གཉིས་པས་གཉིས་དང་གཅིག་པས་གཅིག་དང་། ཡང་གཅིག་པས་གཅིག་

རིང་དུ་འཇུག་པ་དང་ཆེས་རིང་དུ་འཇུག་པ་དང་ཆེས་མྱུར་བར་འཇུག་པའི་ཕྱིར་ཞེས་རྣམ་པར་ཕྱེ་ནས་སྦྱར་བར་བྱའོ་ཞེས་བྱ་བའི་ཐ་ཚིག་གོ། །ཇི་ལྟ་ཞེ་ན། སྨྲས་པ། མིག་དང་རྣ་བ་ནི་ཡུལ་རྒྱང་རིང་བའི་ཕྱིར་སྣ་དང་ལྕེ་གཉིས་པས་དེ་དག་སྔར་སྨོས་སོ། །མིག་དང་རྣ་བ་དེ་གཉིས་ལས་ཀྱང་

Vol. 142 · folio 46b

མིག་ནི་ཆེས་རྒྱང་རིང་བ་ལ་འཇུག་སྟེ་ཆུ་ཀླུང་རྒྱང་རིང་པོ་ནས་མཐོང་ཡང་དེའི་སྒྲ་མི་ཐོས་པས་དེའི་ཕྱིར་དེ་སྔར་སྨོས་སོ་ཞེས་བྱ་བར་སྦྱར་ཏེ་མིག་དེ་རྣ་བ་བས་སྔར་སྨོས་པ་ཡིན་ནོ། །དེ་གཉིས་ལས་ཀྱང་སྣ་ནི་ཆེས་མྱུར་བར་འཇུག་པའི་ཕྱིར་ཞེས་བྱ་བ་ནི་སྣ་དང་ལྕེ་དེ་གཉིས་ལས་ལྕེ་བས་སྣ་སྔར་སྨོས་པ་

ཡིན་ནོ། །ཇི་ལྟ་ཞེ་ན། ཟས་ལྕེ་དང་མ་ཕྲད་པ་གཉིས་ཀྱི་དྲི་འཛིན་པའི་ཕྱིར་རོ་ཞེས་བྱ་བ་སྨོས་སོ། །འདིར་འདི་དཔྱད་པར་བྱ་སྟེ་སྣ་དང་ལྕེ་དག་ཡུལ་ཕྲད་ནས་འཛིན་པ་ཡིན་ན་ཇི་ལྟར་སྣ་དེས་ཟས་ལ་ཡོད་པའི་དྲི་འཛིན་ཅེ་ན། དེས་ཟས་ལ་ཡོད་པར་འཛིན་པར་བྱེད་པ་ནི་མ་ཡིན་གྱི་རླུང་ལ་དྲི་གཞན་

ཞིག་འབྱུང་བ་ཡིན་ནོ། །ཡང་ན་ཟས་ཀྱི་ཡན་ལག་ཕྲ་མོ་དང་ལྷན་ཅིག་འོངས་པའི་དྲི་འཛིན་པར་བྱེད་དེ། དབུགས་མ་བརྔུབས་པར་དྲི་འཛིན་པ་མེད་པའི་ཕྱིར་རོ། །འོ་ན་ནི་ཟས་ལྕེ་དང་མ་ཕྲད་པ་ཉིད་ཀྱི་དྲི་འཛིན་པའི་ཕྱིར་ཞེས་བྱ་བ་ནི་བརྗོད་པར་མི་བྱའོ་ཞེ་ན། ཟས་གོང་བུའི་ངོ་བོ་གང་ཡིན་

པ་དེ་ལྕེ་དང་མ་ཕྲད་པར་ཞེས་བྱ་བར་བསམས་ནས་སྨྲས་པ་ཡིན་པའི་ཕྱིར། ཉེས་པ་མེད་དེ། དེ་ལྟར་ན་སྔ་ནི་ཟས་ཀྱི་ཡན་ལག་དང་ལྷན་ཅིག་འོངས་པའི་དྲི་གང་ཡིན་པ་ཡང་སྣོམ་པར་བྱེད་པས་ཆེས་མྱུར་བར་འཇུག་པ་ཡིན་ནོ། །ལྕེ་ནི་ཟས་ཀྱི་ཡན་ལག་དང་ལྷན་ཅིག་འོངས་པའི་རོ་མྱོང་

བར་མི་བྱེད་ཀྱི་ཟས་གོང་བུ་དང་ལྷན་ཅིག་འོངས་པའི་རོ་ཁོ་ན་མྱོང་བར་བྱེད་པས་དེ་ཆེས་མྱུར་བར་འཇུག་པ་མ་ཡིན་ནོ་ཞེས་བྱ་བ་ཁོང་དུ་ཆུད་པར་བྱའོ། །བྱེ་བྲག་གི་དོན་ཇི་ལྟ་བུ་ཡིན་ཞེ་ན་ཞེས་བྱ་བ་བསྟན་པའི་ཕྱིར་ཅི་ནས་ཀྱང་ཡུལ་དང་ཡུལ་ཅན་ཉིད་དུ་ཞེས་བྱ་བ་རྒྱས་པར་སྨོས་ཏེ། ཅི་ནས་ཀྱང་

གཟུགས་ལ་སོགས་པ་ཡུལ་དང་མིག་གི་དབང་པོ་ལ་སོགས་པ་ལྔ་ཡུལ་ཅན་ཉིད་དུ་རྣམ་པར་གཞག་པའི་སྒོ་ནས་བཅུ་པོ་འདི་དག་རེ་རེ་ནས་སྐྱེ་མཆེད་ཡིན་གྱི། སྤྱིར་གཟུགས་ཀྱི་སྐྱེ་མཆེད་དོ་ཞེས་བྱ་བར་སྐྱེ་མཆེད་ཉིད་གཅིག་ཁོ་ན་ཞིག་ཡིན་པ་ནི་མ་ཡིན་ནོ་ཞེས་ཤེས་པར་བྱ་བ་ཡིན་ནོ། །

དེ་ལྟ་ན་ནི་ཕན་ཚུན་བྱེ་བྲག་ཏུ་མ་བྱས་པར་འགྱུར་རོ། །གལ་ཏེ་བྱེ་བྲག་ཏུ་བྱས་པའི་དོན་དུ་མིག་གི་སྐྱེ་མཆེད་ནས་ལུས་ཀྱི་སྐྱེ་མཆེད་ཀྱི་བར་དང་སྒྲའི་སྐྱེ་མཆེད་ནས་རེག་བྱའི་སྐྱེ་མཆེད་ཀྱི་བར་དགུ་པོ་དག་གི་མིང་གཞན་བརྗོད་ན་ཅིའི་ཕྱིར་གཟུགས་ཀྱི་སྐྱེ་མཆེད་ཀྱི་མིང་ཡང་གཞན་ཞིག་མི་

Vol. 142 · folio 47a

བརྗོད་ཅེ་ན། དེའི་ཕྱིར་མིག་ལ་སོགས་པ་བྱེ་བྲག་ཏུ་བྱས་པ་དག་གིས་གང་མིག་ལ་སོགས་པར་ནི་མིང་མ་བཏགས་ལ་གཟུགས་ནི་ཡིན་པ་དེ་གཟུགས་ཀྱི་སྐྱེ་མཆེད་དུ་ཤེས་པར་འགྱུར་བས་འདིའི་མིང་གཞན་མ་བརྗོད་དོ་ཞེས་བྱ་བ་སྨོས་ཏེ། དཔེར་ན་བ་ལང་མདོ་རིས་

བཏབ་པ་ཐམས་ཅད་ཀྱི་ནང་ན་བ་ལང་མདོ་རིས་མ་བཏབ་པ་གང་ཡིན་པ་དེ་ནི་མདོ་རིས་མེད་པ་ཉིད་མངོན་མཚན་ཡིན་པ་དེ་དང་འདྲའོ། །གཙོ་བོ་ཡིན་པའི་ཕྱིར་ཞེས་བྱ་བ་ནི། གཟུགས་ཀྱི་སྐྱེ་མཆེད་ནི་རྒྱུ་གསུམ་གྱི་གཙོ་བོ་ཡིན་ཏེ། ལག་པ་ལ་སོགས་པའི་འདུས་ཏེ་རེག་པ་དག་གིས་གནོད་པའི་

མཚན་ཉིད་ཀྱི་གཟུགས་སུ་རུང་བའི་ཕྱིར་དང་། འདི་ནི་འདིའི་ཆེ་གེ་མོ་ཞིག་ནའོ་ཞེས་ཡུལ་རྟག་ཏུ་རུང་བའི་ཕྱིར་དང་། འཇིག་རྟེན་ན་ཡང་འདི་ཁོ་ན་གཟུགས་སོ་ཞེས་གྲགས་པའི་ཕྱིར་རོ། །བྱེ་བྲག་གི་དོན་ཉིད་ཀྱིས་གཅིག་ནི་ཆོས་ཀྱི་སྐྱེ་མཆེད་དུ་བཤད་ཅེས་བྱ་བ་ནི་བྱེ་བྲག་གི་དོན་ཅི་ལྟ་ཞེ་ན་ཅི་

ནས་ཀྱང་ཡུལ་དང་། ཡུལ་ཅན་ཉིད་དུ་རྣམ་པར་གཞག་པའི་སྒོ་ནས་བཅུ་གཉིས་པོ་འདི་དག་སོ་སོར་སྐྱེ་མཆེད་ཡིན་གྱི་སྤྱིར་ནི་མ་ཡིན་ནོ་ཞེས་རྟོགས་པར་བྱ་བ་ཡིན་ལ། མིག་ལ་སོགས་པ་བྱེ་བྲག་ཏུ་བྱས་པ་དག་གིས་གང་མིག་ལ་སོགས་པ་ནི་མིང་མ་བཏགས་ལ་ཆོས་ནི་ཡིན་པ་དེ་ཆོས་ཀྱི་སྐྱེ་

མཆེད་དུ་ཤེས་པར་འགྱུར་བས་འདིའི་མིང་གཞན་མ་བརྗོད་དོ། །ཚོར་བ་ལ་སོགས་པ་ཞེས་བྱ་བའི་སྩོགས་པ་ཞེས་བྱ་བའི་སྒྲས་ནི་འདུ་ཤེས་དང་འདུ་བྱེད་དང་རྣམ་པར་རིག་བྱེད་མ་ཡིན་པ་དང་འདུས་མ་བྱས་རྣམས་བསྡུའོ། །རྣམ་པ་ཉི་ཤུ་ཞེས་བྱ་བ་ནི། གཟུགས་རྣམ་གཉིས་དང་རྣམ་

ཉི་ཤུ། །ཞེས་འབྱུང་བའི་ཕྱིར་རོ། །མིག་གསུམ་གྱི་སྤྱོད་ཡུལ་ཡིན་པའི་ཕྱིར་ཞེས་བྱ་བ་ནི་ཤའི་མིག་ནི་བདག་ཅག་ལ་སོགས་པའི་ཡིན་ནོ། །ལྷའི་མིག་ནི་ལྷ་རྣམས་ཀྱི་ཡིན་ནོ། །འཕགས་པའི་ཤེས་རབ་ཀྱི་མིག་ནི་འཕགས་པ་རྣམས་ཀྱི་ཡེ་ཤེས་ཟག་པ་མེད་པ་བདེན་པ་བཞི་ལ་དམིགས་

པ་ཡིན་ནོ། །དེའི་ཕྱིར་གཟུགས་ཁོ་ན་མིག་གསུམ་གྱི་སྤྱོད་ཡུལ་ཡིན་གྱི་མིག་ལ་སོགས་པ་ནི་མ་ཡིན་ཏེ། དེ་ལྟ་བས་ན་དེ་ཁོ་ན་གཟུགས་ཀྱི་སྐྱེ་མཆེད་དུ་བཤད་ཀྱི་གཞན་དག་ནི་མ་ཡིན་ནོ། །གང་དག་གི་ལྟར་ན་སངས་རྒྱས་ཀྱི་གསུང་ཚིག་གི་རང་བཞིན་ཡིན་པ་ཞེས་བྱ་བ་ནི་མདོ་སྡེ་པ་གང་དག་

Vol. 142 · folio 47b

གི་ལྟར་ན་ངག་གི་རྣམ་པར་རིག་བྱེད་ཀྱི་ངོ་བོ་ཉིད་ཡིན་པ་དེ་དག་གི་ལྟར་ན་དེ་དག་ནི་གཟུགས་ཀྱི་ཕུང་པོས་བསྡུས་ཏེ་སྒྲའི་སྐྱེ་མཆེད་ནི་གཟུགས་ཀྱི་ཕུང་པོས་བསྡུས་པའི་ཕྱིར་རོ། །གང་དག་གི་ལྟར་ན་མིང་གི་རང་བཞིན་ཡིན་པ་ཞེས་བྱ་བ་ནི་སྡེ་པ་གཞན་གང་དག་གི་ལྟར་ན་སེམས་དང་ལྡན་

པ་མ་ཡིན་པ་མིང་ཡོད་པ་དེ་དག་གི་ལྟར་ན་ནི་འདུ་བྱེད་ཀྱི་ཕུང་པོས་བསྡུས་ཏེ། །མིང་ནི་འདུ་བྱེད་ཀྱི་ཕུང་པོས་བསྡུས་པའི་ཕྱིར་རོ། །ཆོས་མངོན་པ་པ་རྣམས་ཀྱི་ལྟར་ན་ནི་སངས་རྒྱས་ཀྱི་གསུང་གཉི་གའི་རང་བཞིན་ཡིན་པར་འདོད་དེ། འདི་ལྟར་ཡེ་ཤེས་ལ་འཇུག་པ་ལས་སངས་

རྒྱས་ཀྱི་གསུང་གང་ཞེ་ན། གང་དེ་བཞིན་གཤེགས་པའི་བཀའ་དང་གསུང་དང་བརྗོད་པ་དང་དབྱངས་དང་ངེས་པའི་གསུང་གི་ལམ་དང་གསུང་དབྱངས་དང་གསུང་གི་ཕྲིན་ལས་དང་གསུང་གི་རྣམ་པར་རིག་བྱེད་ཡིན་ནོ། །སངས་རྒྱས་ཀྱི་གསུང་དགེ་བ་ཡིན་པར་བརྗོད་པར་བྱ་བའམ། ལུང་དུ་

མ་བསྟན་པ་ཡིན་པར་བརྗོད་པར་བྱ་ཞེ་ན། དགེ་བ་ཡང་ཡིན་ལ་ལུང་དུ་མ་བསྟན་པ་ཡིན་ནོ། །དགེ་བ་གང་ཞེ་ན། དེ་བཞིན་གཤེགས་པ་དགེ་བའི་ཐུགས་དང་ལྡན་ཞིང་གསུང་བཀའ་སྩོལ་བའི་གསུང་གསུང་གི་རྣམ་པར་རིག་བྱེད་དོ། །ལུང་དུ་མ་བསྟན་པ་གང་ཞེ་ན། དེ་བཞིན་གཤེགས་པ་

ལུང་དུ་མ་བསྟན་པའི་ཐུགས་དང་ལྡན་ཞིང་ཞེས་བྱ་བ་འབྱུང་བ་སྟེ་སྔ་མ་བཞིན་ནོ། །ཡང་དེ་ཉིད་ལས་མཇུག་ཐོགས་སུ་སངས་རྒྱས་ཀྱི་གསུང་ཞེས་བྱ་བ་འདི་ཆོས་གང་ཞིག་ཅེ་ན། གང་མིང་གི་ཚོགས་དང་ཚིག་གི་ཚོགས་དང་ཡི་གེའི་ཚོགས་རྣམས་གོ་རིམས་སུ་བཀོད་པ་དང་། གོ་རིམས་

སུ་བཞག་པ་དང་གོ་རིམས་སུ་ཡང་དག་པར་སྦྱར་བའོ་ཞེས་འབྱུང་སྟེ། ཆོས་མངོན་པ་པ་དེ་དག་གི་ལྟར་ན་ཆོས་ཀྱི་ཕུང་པོ་བརྒྱད་ཁྲི་པོ་དེ་དག་གཟུགས་ཀྱི་ཕུང་པོ་དང་འདུ་བྱེད་ཀྱི་ཕུང་པོས་བསྡུས་པ་ཡིན་ནོ། །མདོ་ལས་ནི་བདག་གིས་བཅོམ་འདས་ལས་མངོན་སུམ་དུ་ཆོས་ཀྱི་ཕུང་པོ་

བརྒྱད་ཁྲི་ལྷན་ཅིག་བཟུང་ངོ་ཞེས་ཀྱང་འབྱུང་ངོ་། །སྡེ་པ་གཞན་གྱིས་མདོ་ལས་ཀྱང་། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཞེས་འབྱུང་ངོ་། །ཁ་ཅིག་བསྟན་བཅོས་ཚད་ཅེས་ཟེར། །ཞེས་བྱ་བ་ནི་བསྟན་བཅོས་ཀྱི་ཚད་ནི་བསྟན་བཅོས་ཚད་དེ་རེ་ཞིག་ཁ་ཅིག་ན་རེ་འདི་ལ་ཚད་བསྟན་

Vol. 142 · folio 48a

བཅོས་ཀྱི་ཚད་ཡོད་པས་ན་ཆོས་ཀྱི་ཕུང་པོ་འདི་ནི་བསྟན་བཅོས་ཀྱི་ཚད་ཙམ་མོ་ཞེས་ཟེར་རོ། །དེ་ནི་ཤ་ལོ་ཀ་དྲུག་སྟོང་ངོ་། །ཞེས་བྱ་བ་ནི་བསྟན་བཅོས་ཀྱི་ཕུང་པོ་ཞེས་པ་དེའི་གཞུང་གི་ཚད་ནི་ཤོ་ལོ་ཀ་དྲུག་སྟོང་ཡོད་དེ། ཆོས་ཀྱི་ཕུང་པོ་བརྒྱད་ཁྲི་པོ་དེ་དག་ནི་ནུབ་སྟེ་

འདི་གཅིག་པུ་ལུས་སོ་ཞེས་ཟེར་རོ། །ཕུང་པོ་ལ་སོགས་གཏམ་རེ་ཡིན། །ཞེས་བྱ་བ་ནི་གཞན་དག་ནི་ཟེར་རོ་ཞེས་བྱ་བར་ཚིག་ཁོང་ནས་དྲང་སྟེ་ཕུང་པོ་ལ་སོགས་པའི་གཏམ་རེ་རེ་ནི་ཆོས་ཀྱི་ཕུང་པོ་ཡིན་ལ་དེ་དག་ཀྱང་ཆོས་ཀྱི་ཕུང་པོ་བརྒྱད་ཁྲིའི་གྲངས་ཡིན་པར་རྣམ་པར་འཆད་པར་བྱེད་དོ། །

རྟེན་ཅིང་འབྲེལ་བར་འབྱུང་བ་ལ་སོགས་པ་ནི་འདི་ལས་འཆད་པར་འགྱུར་རོ། །སྨོན་ནས་ཤེས་པ་དང་ཉོན་མོངས་པ་མེད་པ་ལ་སོགས་པ་ཞེས་བྱ་བའི་སྩོགས་པ་ཞེས་བྱ་བ་སྨོས་པས་ནི་བསྡུ་བའི་དངོས་པོ་དང་ལས་ཀྱི་ལམ་དང་མི་སྡུག་པ་དང་དབུགས་འབྱུང་བ་དང་རྔུབ་པ་དྲན་པ་ལ་སོགས་པ་

བཟུང་ངོ་། །སྤྱོད་པ་རྣམས་ཀྱི་གཉེན་པོར་ནི། །ཆོས་ཀྱི་ཕུང་པོ་མཐུན་པར་གསུངས། །ཞེས་བྱ་བ་ལ་ནི་ཞེས་བྱ་བའི་སྒྲ་ནི་སྔར་བཤད་པའི་ཕྱོགས་བསལ་བའི་ཕྱིར་རམ་ངེས་པར་བཟུང་བའི་དོན་ཡིན་ནོ། །འདོད་ཆགས་དང་ཞེ་སྡང་དང་གཏི་མུག་དང་ང་རྒྱལ་ལ་སོགས་པ་སྤྱོད་པ་ཐ་དད་པས་

ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་ལྟ་བ་དང་ཐེ་ཚོམ་ལ་སོགས་པ་བསྡུས་ཏེ། སེམས་ཅན་ཁ་ཅིག་ནི་འདོད་ཆགས་སྤྱོད་པ་ཡིན་ལ་ཁ་ཅིག་ནི་ཞེ་སྡང་སྤྱོད་པ་ཡིན། ཁ་ཅིག་ནི་གཏི་མུག་སྤྱོད་པ་ཡིན་ཁ་ཅིག་ནི་ང་རྒྱལ་སྤྱོད་པ་ཡིན་ཁ་ཅིག་ལ་ནི་ལྟ་བ་སྤྱོད་པ་ཡིན་ཁ་ཅིག་ནི་ཐེ་

ཚོམ་སྤྱོད་པ་ཡིན། ཁ་ཅིག་ནི་འདོད་ཆགས་དང་ཞེ་སྡང་སྤྱོད་པ་ཡིན་ཁ་ཅིག་ནི་འདོད་ཆགས་དང་ཞེ་སྡང་དང་གཏི་མུག་སྤྱོད་པ་ཡིན། ཁ་ཅིག་ནི་འདོད་ཆགས་ཀྱི་བསམ་པ་ཅན་ཡིན་ལ་ཞེ་སྡང་སྦྱོར་བ་ཡིན། ཁ་ཅིག་ནི་ཞེ་སྡང་གི་བསམ་པ་ཅན་ཡིན་ལ་འདོད་ཆགས་སྦྱོར་བ་ཡིན།

ཁ་ཅིག་ནི་ཞེ་སྡང་སྤངས་ལ་འདོད་ཆགས་པ་ལྟར་འཆོས་པ་ཡིན། ཁ་ཅིག་ནི་འདོད་ཆགས་སྤངས་ལ་ཞེ་སྡང་བ་ལྟར་འཆོས་པ་ཡིན་ཏེ། དེ་དག་གི་གཉེན་པོར་བཅོམ་ལྡན་འདས་ཀྱིས་དེ་དག་གསུངས་པ་ཡིན་ནོ། །ཕུང་པོ་དང་སྐྱེ་མཆེད་དང་ཁམས་གཞན་གང་དག་ཅེས་བྱ་བ་རྒྱས་

Vol. 142 · folio 48b

པར་འབྱུང་བ་ནི་ཕུང་པོ་དང་སྐྱེ་མཆེད་དང་ཁམས་གང་དག་ཡིན་པ་དེ་དག་ཀྱང་བསྟན་བཅོས་འདི་ལས་ཇི་སྐད་དུ་རྣམ་པར་གཞག་པ་བཞིན་དེ་དག་རང་རང་གི་ངོ་བོ་ཉིད་དཔྱད་ནས་ཕུང་པོ་དང་སྐྱེ་མཆེད་དང་ཁམས་འདི་དག་ཉིད་དུ་བསྡུ་བར་བྱ་ཞིང་ནང་དུ་ཆུད་པར་བྱ་སྟེ་ཕུང་པོ་དག་ནི་

ཕུང་པོ་རྣམས་ཀྱི་ནང་དུ་བསྡུ་བར་བྱ་བ་ལ་སྐྱེ་མཆེད་དག་ཀྱང་སྐྱེ་མཆེད་རྣམས་ཀྱི་ནང་དུ་བསྡུའོ། །ཁམས་དག་ཀྱང་ཁམས་རྣམས་ཀྱི་ནང་དུ་བསྡུའོ། །ཚུལ་ཁྲིམས་ཀྱི་ཕུང་པོ་ནི་གཟུགས་ཀྱི་ཕུང་པོས་བསྡུས་སོ་ཞེས་བྱ་བ་ནི་ཚུལ་ཁྲིམས་ཀྱི་ཕུང་པོ་ནི་ལུས་དང་ངག་གིས་སྤོང་བའི་

གཟུགས་ཀྱི་ངོ་བོ་ཉིད་ཡིན་པའི་ཕྱིར་རོ། །ལྷག་མ་ནི་འདུ་བྱེད་ཀྱི་ཕུང་པོས་བསྡུས་སོ་ཞེས་བྱ་བ་ནི་ཏིང་ངེ་འཛིན་ལ་སོགས་པ་ནི་སེམས་ལས་བྱུང་བ་ཡིན་པའི་ཕྱིར་རོ། །འདིར་རྣམ་པར་གྲོལ་བ་ནི་མོས་པ་ཡིན་པར་བསམས་པ་ཡིན་ནོ། །རྣམ་པར་གྲོལ་བའི་ཡེ་ཤེས་མཐོང་བ་ནི་ཤེས་

རབ་ཀྱི་བྱེ་བྲག་ཁོ་ན་ཡིན་ནོ། །བརྒྱད་ནི་མ་ཆགས་པའི་རང་བཞིན་ཡིན་པའི་ཕྱིར་ཆོས་ཀྱི་སྐྱེ་མཆེད་ཀྱིས་བསྡུས་སོ་ཞེས་བྱ་བ་བརྒྱད་གང་ཞེ་ན། ཟད་པར་ས་དང་། ཆུ་དང་། མེ་དང་། རླུང་དང་། སྔོན་པོ་དང་། སེར་པོ་དང་། དམར་པོ་དང་། དཀར་པོའི་སྐྱེ་མཆེད་དག་ཡིན་ནོ། །དེ་དག་

ཡིན་ནོ་བརྒྱད་མ་ཆགས། །ཞེས་སྟོན་པར་འགྱུར་བས་མ་ཆགས་པའི་རང་བཞིན་ཡིན་ལ་མ་ཆགས་པ་ཡང་ཆོས་ཀྱི་སྐྱེ་མཆེད་ཀྱི་ནང་དུ་འདུས་པས་དེ་ནི་དེས་བསྡུས་པ་ཡིན་ནོ། །འཁོར་རྣམས་དང་བཅས་ན་ནི་ཕུང་པོ་ལྔའི་རང་བཞིན་ཡིན་པའི་ཕྱིར་ཡིད་དང་ཆོས་ཀྱི་སྐྱེ་མཆེད་དག་གིས་

བསྡུས་ཏེ་ཚོགས་པ་འདི་ལ་མ་ཆགས་པ་དེའི་འཁོར་རྗེས་སུ་འབྲང་བའི་གཟུགས་ནི་གཟུགས་ཀྱི་ཕུང་པོ་ཡིན་ནོ། །ཚོར་བ་དང་འདུ་ཤེས་ནི་ཚོར་བ་དང་འདུ་ཤེས་ཀྱི་ཕུང་པོ་ཡིན་ནོ། །སེམས་པ་ལ་སོགས་པ་མཚུངས་པར་ལྡན་པ་དག་དང་སྐྱེ་བ་ལ་སོགས་པ་ལྡན་པ་མ་ཡིན་པ་

རྣམས་ནི་འདུ་བྱེད་ཀྱི་ཕུང་པོ་ཡིན་ནོ། །རྣམ་པར་ཤེས་པ་ནི་རྣམ་པར་ཤེས་པའི་ཕུང་པོ་ཡིན་ཏེ། །དེ་ལྟར་ན་དེ་དག་ནི་ཕུང་པོ་ལྔའི་རང་བཞིན་ཡིན་ནོ། །དགུ་པ་དང་བཅུ་པ་ཟད་པར་ནམ་མཁའ་མཐའ་ཡས་སྐྱེ་མཆེད་དང་རྣམ་ཤེས་མཐའ་ཡས་སྐྱེ་མཆེད་དག་ནི་འོག་ནས་འཆད་པར་

Vol. 142 · folio 49a

འགྱུར་རོ། །ཟིལ་གྱིས་གནོན་པའི་སྐྱེ་མཆེད་རྣམས་ཀྱང་དེ་དང་འདྲའོ་ཞེས་བྱ་བ་ནི་དེ་དག་ཀྱང་མ་ཆགས་པའི་རང་བཞིན་ཡིན་པའི་ཕྱིར་ཆོས་ཀྱི་སྐྱེ་མཆེད་ཀྱིས་བསྡུས་སོ། །འཁོར་རྣམས་དང་བཅས་ན་ནི་ཕུང་པོ་ལྔའི་རང་བཞིན་ཡིན་པའི་ཕྱིར་ཡིད་དང་ཆོས་

ཀྱི་སྐྱེ་མཆེད་ཀྱིས་བསྡུས་སོ་ཞེས་སྔ་མ་བཞིན་དུ་རྣམ་པར་བཤད་པར་བྱའོ། །ཟད་པར་ནམ་མཁའ་དང་རྣམ་ཤེས་མཐའ་ཡས་སྐྱེ་མཆེད་དག་དང་ནམ་མཁའ་མཐའ་ཡས་སྐྱེ་མཆེད་ལ་སོགས་པ་བཞི་པོ་སྟེ། ནམ་མཁའ་དང་རྣམ་ཤེས་དང་ཅི་ཡང་མེད་པ་དང་འདུ་ཤེས་མེད་འདུ་

ཤེས་མེད་མིན་སྐྱེ་མཆེད་དག་ནི་ཕུང་པོ་བཞིའི་རང་བཞིན་ཡིན་པའི་ཕྱིར་ཡིད་དང་ཆོས་ཀྱི་སྐྱེ་མཆེད་དག་གིས་བསྡུས་ཏེ། དེ་ན་གཟུགས་ཀྱི་ཕུང་པོ་དག་ནི་མེད་དོ། །རྣམ་པར་གྲོལ་བའི་སྐྱེ་མཆེད་ལྔ་པོ་དག་ཅེས་བྱ་བ་རྒྱས་པར་འབྱུང་བ་ནི་མདོ་ལས་ལྔ་པོ་འདི་དག་ནི་རྣམ་པར་

གྲོལ་བའི་སྐྱེ་མཆེད་ཡིན་ཏེ། ལྔ་གང་ཞེ་ན། འདི་ལས་དགེ་སློང་ལ་སྟོན་པའམ་ཚངས་པ་མཚུངས་པར་སྤྱོད་པ་མཁས་པ་བླ་མ་ལྟ་བུ་གང་ཡང་རུང་བ་ཞིག་ཆོས་སྟོན་པར་བྱེད་ན་ནི་དེ་ལ་སྟོན་པའམ་ཚངས་པ་མཚུངས་པར་སྤྱོད་པ་མཁས་པ་བླ་མ་ལྟ་བུ་གང་ཡང་རུང་བ་ཞིག །ཇི་ལྟ་

ཇི་ལྟར་ཆོས་སྟོན་པར་བྱེད་པ་དེ་ལྟ་དེ་ལྟར་ཆོས་དེ་དག་ལ་དོན་སོ་སོ་ཡང་དག་པར་རིག་པར་ཡང་འགྱུར་ཞིང་ཆོས་སོ་སོ་ཡང་དག་པར་རིག་པར་ཡང་འགྱུར་རོ། །དོན་སོ་སོ་ཡང་དག་པར་རིག་ཅིང་ཆོས་སོ་སོ་ཡང་དག་པར་རིག་པ་དེ་ལ་རབ་ཏུ་དགའ་བ་སྐྱེའོ། །རབ་ཏུ་དགའ་བ་ལ་དགའ་

བ་སྐྱེའོ། །ཡིད་དགའ་བར་གྱུར་ན་ལུས་ཤིན་ཏུ་སྦྱངས་པར་འགྱུར་རོ། །ལུས་ཤིན་ཏུ་སྦྱངས་ན་བདེ་བ་ཉམས་སུ་མྱོང་བར་འགྱུར་རོ། །བདེ་བར་གྱུར་ན་སེམས་མཉམ་པར་འཇོག་པར་འགྱུར་རོ། །སེམས་མཉམ་པར་བཞག་ན་ཡང་དག་པ་ཇི་ལྟ་བ་བཞིན་རབ་ཏུ་ཤེས་ཤིང་ཡང་དག་

པ་ཇི་ལྟ་བ་བཞིན་མཐོང་བར་འགྱུར་རོ། །ཡང་དག་པ་ཇི་ལྟ་བ་བཞིན་རབ་ཏུ་ཤེས་ཤིང་ཡང་དག་པ་ཇི་ལྟ་བ་བཞིན་རབ་ཏུ་མཐོང་ན་ཡིད་འབྱུང་བར་འགྱུར་རོ། །ཡིད་འབྱུང་བར་གྱུར་ན་འདོད་ཆགས་དང་བྲལ་བར་འགྱུར་རོ། །འདོད་ཆགས་དང་བྲལ་ན་རྣམ་པར་གྲོལ་བར་འགྱུར་རོ། །

Vol. 142 · folio 49b

འདི་ནི་རྣམ་པར་གྲོལ་བའི་སྐྱེ་མཆེད་དང་པོ་ཡིན་ནོ། །གང་ལ་གནས་ན་དགེ་སློང་ངམ་དགེ་སློང་མ་དྲན་པ་ཉེ་བར་མི་གནས་པ་ཡང་། ཉེ་བར་གནས་པར་འགྱུར་སེམས་མཉམ་པར་མ་བཞག་པ་ཡང་མཉམ་པར་འཇོག་པར་འགྱུར་ཟག་པ་ཡོངས་སུ་མ་ཟད་པ་དག་ཀྱང་ཡོངས་སུ་ཟད་པར་

འགྱུར། མྱ་ངན་ལས་འདས་པ་གྲུབ་པ་དང་བདེ་བ་བླ་ན་མེད་པ་མ་ཐོབ་པ་ཡང་ཐོབ་པར་འགྱུར་བ་ཡིན་ནོ། །གཞན་ཡང་འདི་ལ་དགེ་སློང་ལ་སྟོན་པའམ་ཚངས་པ་མཚུངས་པར་སྤྱོད་པ་མཁས་པ་བླ་མ་ལྟ་བུ་གང་ཡང་རུང་བ་ཞིག་ཆོས་སྟོན་པར་ཡང་མི་བྱེད་མོད་ཀྱི་འོན་ཀྱང་ཇི་ལྟ་ཇི་ལྟར།

ཇི་ལྟར་ཐོས་པ་དང་ཇི་ལྟར་བསྟན་པ་དང་ཇི་ལྟར་ཀུན་ཆུབ་པར་བྱས་པའི་ཆོས་རྣམས་དབྱངས་ཀྱིས་རྒྱས་པར་ཁ་ཏོན་བྱེད་པ་དེ་ལྟ་དེ་ལྟར་ཆོས་དེ་དག་ལ་དོན་སོ་སོ་ཡང་དག་པར་རིག་པར་ཡང་འགྱུར་ཞིང་ཞེས་བྱ་བ་སྔ་མ་བཞིན་ནོ། །འདི་ནི་རྣམ་པར་གྲོལ་བའི་སྐྱེ་མཆེད་གཉིས་པ་ཡིན་ཏེ་

གང་ལ་གནས་ན་ཞེས་བྱ་བ་སྔ་མ་བཞིན་ནོ། །གཞན་ཡང་འདི་ལ་དགེ་སློང་ལ་སྟོན་པའམ་ཚངས་པ་མཚུངས་པར་སྤྱོད་པ་མཁས་པ་བླ་མ་ལྟ་བུ་གང་ཡང་རུང་བ་ཞིག་ཆོས་སྟོན་པར་མི་བྱེད་ལ་ཇི་ལྟར་ཐོས་པ་དང་ཇི་ལྟར་བསྟན་པ་དང་ཇི་ལྟར་ཀུན་ཆུབ་པར་བྱས་པའི་ཆེས་རྣམས་དབྱངས་

ཀྱིས་རྒྱས་པར་ཁ་ཏོན་ཡང་མི་བྱེད་མོད་ཀྱི། འོན་ཀྱང་ཇི་ལྟར་ཐོས་པ་དང་ཇི་ལྟར་བསྟན་པ་དང་ཇི་ལྟར་ཀུན་ཆུབ་པར་བྱས་པའི་ཆོས་རྣམས་གཞན་དག་ལ་རྒྱས་པར་རབ་ཏུ་སྟོན་པར་བྱེད་དེ། ཇི་ལྟ་ཇི་ལྟར། ཇི་ལྟར་ཐོས་པ་དང་ཇི་ལྟར་བསྟན་པ་དང་ཇི་ལྟར་ཀུན་ཆུབ་པར་བྱས་པའི་ཆོས་

རྣམས་གཞན་དག་ལ་རྒྱས་པར་རབ་ཏུ་སྟོན་པར་བྱེད་པ་དེ་ལྟ་དེ་ལྟར་ཆོས་དེ་དག་ལ་དོན་སོ་སོ་ཡང་དག་པར་རིག་པར་ཡང་འགྱུར་ཞིང་ཞེས་བྱ་བ་སྔ་མ་བཞིན་ནོ། །འདི་ནི་རྣམ་པར་གྲོལ་བའི་སྐྱེ་མཆེད་གསུམ་པ་ཡིན་ཏེ། གང་ལ་གནས་ན་ཞེས་བྱ་བ་སྔ་མ་བཞིན་ནོ། །གཞན་ཡང་འདི་

ལ་དགེ་སློང་ལ་སྟོན་པའམ་ཞེས་བྱ་བ་སྔ་མ་བཞིན་ནོ། །ཁ་ཏོན་ཡང་མི་བྱེད་གཞན་དག་ལ་རྒྱས་པར་རབ་ཏུ་སྟོན་པར་ཡང་མི་བྱེད་སེམས་པར་ཡང་བྱེད་མོད་ཀྱི། འོན་ཀྱང་ཇི་ལྟར་ཐོས་པ་ནས་ཇི་ལྟར་ཀུན་ཆུབ་པར་བྱས་པའི་བར་རྣམས་སེམས་པར་བྱེད། འཇལ་བར་བྱེད། ཉེ་བར་རྟོགས་

Vol. 142 · folio 50a

པར་བྱེད་དེ། ཇི་ལྟ་ཇི་ལྟར། ཇི་ལྟར་ཐོས་པ་ནས་ཇི་ལྟར་ཀུན་ཆུབ་པར་བྱས་པའི་བར་རྣམས་སེམས་པར་བྱེད། འཇལ་བར་བྱེད། ཉེ་བར་རྟོགས་པར་བྱེད་པ་དེ་ལྟ་དེ་ལྟར་ཆོས་དེ་དག་ལ་དོན་སོ་སོ་ཡང་དག་པར་རིག་པར་ཡང་འགྱུར་ཞིང་ཞེས་བྱ་བ་སྔ་མ་བཞིན་

ནོ། །འདི་ནི་རྣམ་པར་གྲོལ་བའི་སྐྱེ་མཆེད་བཞི་པ་ཡིན་ཏེ། གང་ལ་གནས་ན་ཞེས་བྱ་བ་སྔ་མ་བཞིན་ནོ། །གཞན་ཡང་འདི་ལ་དགེ་སློང་ལ་སྟོན་པའམ་ཞེས་བྱ་བ་སྔ་མ་བཞིན་ནོ། །ཁ་དོན་ཡང་མི་བྱེད་གཞན་དག་ལ་རྒྱས་པར་རབ་ཏུ་སྟོན་པར་ཡང་མི་བྱེད་སེམས་པར་ཡང་མི་བྱེད་མོད་ཀྱི་འོན་

ཀྱང་འདིས་ཏིང་ངེ་འཛིན་གྱི་རྒྱུ་མཚན་བཟང་པོ་གང་ཡང་རུང་བ། འདི་ལྟ་སྟེ། རྣམ་པར་བསྔོས་པ་འམ་རྣམ་པར་རྣགས་པ་འམ་རྣམ་པར་བམས་པ་འམ་རྣམ་པར་འབུས་གཞིག་པ་འམ་རྣམ་པར་དམར་བ་འམ་རྣམ་པར་ཟོས་པ་འམ་རྣམ་པར་འཐོར་བ་འམ་རུས་གོང་ངམ་ཀེང་རུས་ཤིག་

ཤིན་ཏུ་རབ་ཏུ་ལེགས་པར་བཟུང་བ་ཡིན་ལེགས་པར་ཡིད་ལ་བྱས་པ་ཡིན་ལེགས་པར་བསྒོམས་པ་ཡིན་ལེགས་པར་བསྟེན་པ་ཡིན་ལེགས་པར་ཁོང་དུ་ཆུད་པར་བྱས་པ་ཡིན་ཏེ། འདིར་ཇི་ལྟ་ཇི་ལྟར་ཏིང་ངེ་འཛིན་གྱི་རྒྱུ་མཚན་བཟང་པོ་གང་ཡང་རུང་བ་ཞེས་བྱ་བ་ནས་ལེགས་པར་ཁོང་

དུ་ཆུད་པར་བྱས་པ་ཡིན་ཞེས་བྱ་བའི་བར་སྔ་མ་བཞིན་ཏེ། དེ་ལྟ་དེ་ལྟར་ཆོས་དེ་དག་ལ་དོན་སོ་སོ་ཡང་དག་པར་རིག་པར་ཡང་འགྱུར་ཞིང་ཞེས་བྱ་བ་སྔ་མ་བཞིན་ནོ། །འདི་ནི་རྣམ་པར་གྲོལ་བའི་སྐྱེ་མཆེད་ལྔ་པ་ཡིན་ཏེ། གང་ལ་གནས་ན་ཞེས་གསུངས་ཏེ་སྔ་མ་བཞིན་ནོ། །རྣམ་

པར་གྲོལ་བ་སྐྱེ་བའི་སྒོ་ནི་ཤེས་རབ་ཀྱི་བྱེ་བྲག་ཡིན་ལ། ཤེས་རབ་ཀྱང་ཆོས་ཀྱི་སྐྱེ་མཆེད་ཀྱིས་བསྡུས་པ་ཡིན་ནོ། །འཁོར་རྣམས་དང་བཅས་ན་ནི་སྒྲ་དང་ཡིད་དང་ཆོས་ཀྱི་སྐྱེ་མཆེད་རྣམས་ཀྱིས་བསྡུས་པ་ནི་སྟོན་པ་དང་ཁ་ཏོན་བྱེད་པ་དང་གཞན་ལ་ཡང་དག་པར་རབ་ཏུ་སྟོན་པ་

དག་ལ་སྒྲ་ཐོས་པའི་ཕྱིར་སྒྲའི་སྐྱེ་མཆེད་ཡོད་ལ་ཡིད་དང་ཆོས་ཀྱི་སྐྱེ་མཆེད་དག་ནི་ཤེས་རབ་ཀྱི་འཁོར་དུ་གྱུར་པ་ཡིན་ཏེ། ཐམས་ཅད་ན་ཡོད་པས་དེ་གསུམ་གྱིས་བསྡུས་པ་ཡིན་ནོ། །སྐྱེ་མཆེད་གཉིས་ལས་ཞེས་བྱ་བ་ནི་མདོ་ལས་སེམས་ཅན་གཟུགས་ཅན་ལ་འདུ་ཤེས་མེད་ཅིང་

Vol. 142 · folio 50b

སོ་སོར་འདུ་ཤེས་མེད་པ་དག་ཀྱང་ཡོད་དེ། འདི་ལྟ་སྟེ། འདུ་ཤེས་མེད་པའི་སེམས་ཅན་རྣམས་ལྟ་བུ་སྟེ་འདི་ནི་སྐྱེ་མཆེད་དང་པོ་ཡིན་ནོ། །སེམས་ཅན་གཟུགས་མེད་པ་ལ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ཏེ་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་

རྫོགས་པར་བྱས་ཏེ་གནས་པ་དག་ཀྱང་ཡོད་དེ། འདི་ལྟ་སྟེ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་འགྲོ་བ་རྣམས་ལྟ་བུ་སྟེ་འདི་ནི་སྐྱེ་མཆེད་གཉིས་པའོ་ཞེས་གསུངས་པ་ཡིན་ཏེ་སྐྱེ་མཆེད་འདི་གཉིས་ལས་འདུ་ཤེས་མེད་པའི་སེམས་ཅན་ནི་སྐྱེ་མཆེད་བཅུས་བསྡུས་ཏེ།

དེ་ན་དྲི་དང་རོའི་སྐྱེ་མཆེད་དག་ཁོ་ན་མེད་པའི་ཕྱིར་རོ། །ཡིད་ཀྱི་སྐྱེ་མཆེད་ནི་དེ་དག་ལ་འཆི་འཕོ་དང་སྐྱེ་བའི་དུས་དག་ན་ཡོད་དོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་འགྲོ་བ་ནི་ཡིད་དང་ཆོས་ཀྱི་སྐྱེ་མཆེད་དག་གིས་ཏེ་བསྡུས་སོ་ཞེས་བྱ་བར་སྐབས་དང་སྦྱར་རོ། །དེ་

དག་ལ་གཟུགས་མེད་པའི་ཕྱིར་རོ། །ཁམས་མང་པོ་པ་ལས་ཁམས་དྲུག་ཅུ་རྩ་གཉིས་བསྟན་པ་ཞེས་བྱ་བ་ནི་མདོ་ལས། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་ཇི་ཙམ་གྱི་མཁས་པ་ཁམས་ལ་མཁས་པ་ལགས།

བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་མཁས་པ་ནི་ཁམས་བཅོ་བརྒྱད་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། ཀུན་དགའ་བོ་མིག་གི་ཁམས་དང་གཟུགས་ཀྱི་ཁམས་དང་མིག་གི་རྣམ་པར་ཤེས་པའི་ཁམས་ཞེས་བྱ་བ་ནས་དེ་བཞིན་དུ་

ཡིད་ཀྱི་ཁམས་དང་ཆོས་ཀྱི་ཁམས་དང་ཡིད་ཀྱི་རྣམ་པར་ཤེས་པའི་ཁམས་ཞེས་བྱ་བའི་བར་ཁམས་བཅོ་བརྒྱད་པོ་འདི་དག་ཡང་དག་པ་ཇི་ལྟ་བ་བཞིན་དུ་ཤེས་ཤིང་མཐོང་ན་ཞེས་བྱ་བ་དང་ཁམས་དྲུག་ཀྱང་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། སའི་ཁམས་

དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་རྣམ་པར་ཤེས་པའི་ཁམས་ཞེས་བྱ་བ་དང་། ཁམས་གཞན་དྲུག་ཀྱང་ཡང་དག་པ་ཇི་ལྟ་བ་བཞིན་དུ་ཤེས་ཤིང་མཐོང་བ་ཡིན་ཏེ། འདོད་པའི་ཁམས་དང་། གནོད་སེམས་ཀྱི་ཁམས་

Vol. 142 · folio 51a

དང་། རྣམ་པར་འཚེ་བའི་ཁམས་དང་། ངེས་པར་འབྱུང་བའི་ཁམས་དང་། གནོད་སེམས་མེད་པའི་ཁམས་དང་། རྣམ་པར་མི་འཚེ་བའི་ཁམས་ཞེས་བྱ་བ་དང་། ཁམས་གཞན་དྲུག་ཀྱང་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། བདེ་

བའི་ཁམས་དང་། སྡུག་བསྔལ་གྱི་ཁམས་དང་། ཡིད་བདེ་བའི་ཁམས་དང་། ཡིད་མི་བདེ་བའི་ཁམས་དང་། བཏང་སྙོམས་ཀྱི་ཁམས་དང་། མ་རིག་པའི་ཁམས་ཞེས་བྱ་བ་དང་། ཁམས་བཞི་ཡང་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། ཚོར་བའི་

ཁམས་དང་། འདུ་ཤེས་ཀྱི་ཁམས་དང་། འདུ་བྱེད་ཀྱི་ཁམས་དང་། རྣམ་པར་ཤེས་པའི་ཁམས་ཞེས་བྱ་བ་དང་། ཁམས་གསུམ་ཡང་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་

མེད་པའི་ཁམས་ཞེས་བྱ་བ་དང་། ཁམས་གཞན་གསུམ་ཡང་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། གཟུགས་ཀྱི་ཁམས་དང་། གཟུགས་མེད་པའི་ཁམས་དང་། འགོག་པའི་ཁམས་ཞེས་བྱ་བ་དང་། ཁམས་གཞན་གསུམ་ཡང་ཡང་

དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། འདས་པའི་ཁམས་དང་། མ་འོངས་པའི་ཁམས་དང་། ད་ལྟར་བྱུང་བའི་ཁམས་ཞེས་བྱ་བ་དང་། ཁམས་གཞན་གསུམ་ཡང་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། ངན་པའི་ཁམས་དང་། བར་མའི་

ཁམས་དང་། གྱ་ནོམ་པའི་ཁམས་ཞེས་བྱ་བ་དང་། ཁམས་གཞན་གསུམ་ཡང་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། དགེ་བའི་ཁམས་དང་། མི་དགེ་བའི་ཁམས་དང་། ལུང་དུ་མ་བསྟན་པའི་ཁམས་ཞེས་བྱ་བ་དང་། ཁམས་གཞན་གསུམ་ཡང་ཡང་

དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། སློབ་པའི་ཁམས་དང་། མི་སློབ་པའི་ཁམས་དང་། སློབ་པ་ཡང་མ་ཡིན་མི་སློབ་པ་ཡང་མ་ཡིན་པའི་ཁམས་ཞེས་བྱ་བ་དང་། ཁམས་གཉིས་ཀྱང་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། ཟག་པ་དང་

Vol. 142 · folio 51b

བཅས་པའི་ཁམས་དང་། ཟག་པ་མེད་པའི་ཁམས་ཞེས་བྱ་བ་དང་། ཁམས་གཞན་གཉིས་ཀྱང་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། འདུས་བྱས་ཀྱི་ཁམས་དང་། འདུས་མ་བྱས་ཀྱི་ཁམས་ཞེས་བྱ་བའི་ཁམས་འདི་གཉིས་ཡང་དག་པ་ཇི་ལྟ་བ་བཞིན་ཤེས་ཤིང་

མཐོང་ན་ཀུན་དགའ་བོ་འདི་ཙམ་གྱིས་ན་མཁས་པ་ཁམས་ལ་མཁམ་པ་ཞེས་གསུངས་པ་ཡིན་ནོ། །སྦྱར་བའི་ཚིག་འདི་དག་ནི་རེ་རེ་ལ་བར་དུ་བརྗོད་པར་བྱ་སྟེ། བདག་གིས་ནི་མངས་སུ་དོགས་པས་མ་བྲིས་སོ་ཞེས་བྱ་བར་རྟོགས་པར་བྱའོ། །ཅི་རིགས་པར་བསྡུ་བར་རིག་

པར་བྱའོ་ཞེས་བྱ་བ་ནི་རེ་ཞིག་ཁམས་བཅོ་བརྒྱད་ནི་དེ་དག་ཉིད་ཡིན་པས་དེ་དག་ནི་འདི་དག་གིས་བསྡུས་པ་ཡིན་ནོ། །དེ་བཞིན་དུ་གང་ལ་སའི་ཁམས་ལ་སོགས་པ་དྲུག་འབྱུང་བ་དེ་དག་ལས་ཀྱང་དང་པོའི་གཞི་ནི་རེག་བྱའི་ཁམས་ཀྱིས་བསྡུས་སོ། །ནམ་མཁའི་ཁམས་ནི་

སྣང་བ་དང་མུན་པའི་ངོ་བོ་ཉིད་ཡིན་པའི་ཕྱིར་གཟུགས་ཀྱི་ཁམས་སུ་འདུས་སོ། །རྣམ་པར་ཤེས་པའི་ཁམས་ནི་སེམས་ཀྱི་ཁམས་བདུན་དུ་འདུས་སོ། །འདོད་པའི་ཁམས་ལ་སོགས་པ་དྲུག་ལས་འདོད་པའི་ཁམས་ནི་འདིར་འདོད་པའི་འདོད་ཆགས་ཡིན་པར་བཞེད་དེ། དེ་ཡང་

སེམས་ལས་བྱུང་བ་ཡིན་ལ་གནོད་སེམས་ཀྱི་ཁམས་ལ་སོགས་པ་ཡང་སེམས་ལས་བྱུང་བ་ཁོ་ན་ཡིན་པས་དེ་དག་ནི་ཆོས་ཀྱི་ཁམས་ཀྱིས་བསྡུས་སོ། །བདེ་བའི་ཁམས་ལ་སོགས་པ་དྲུག་ཀྱང་དེ་ཉིད་དུ་འདུས་སོ། །ཚོར་བའི་ཁམས་ལ་སོགས་པ་བཞི་ལས་གསུམ་ནི་ཆོས་ཀྱི་

ཁམས་སུ་འདུས་སོ། །རྣམ་པར་ཤེས་པའི་ཁམས་ནི་རྣམ་པར་ཤེས་པའི་ཁམས་བདུན་དུ་འདུས་སོ། །འདོད་པའི་ཁམས་ལ་སོགས་པ་གསུམ་ལས་འདོད་པའི་ཁམས་ནི་ཁམས་བཅོ་བརྒྱད་དུ་འདུས་སོ། །གཟུགས་ཀྱི་ཁམས་ནི་དྲི་དང་རོ་དང་སྣ་དང་ལྕེའི་རྣམ་པར་ཤེས་པ་

དག་མ་གཏོགས་པ་ཁམས་བཅུ་བཞིར་འདུས་སོ། །གཟུགས་མེད་པའི་ཁམས་ནི་ཡིད་དང་ཆོས་དང་ཡིད་ཀྱི་རྣམ་པར་ཤེས་པའི་ཁམས་དག་ཏུ་འདུས་སོ། །གཟུགས་ཀྱི་ཁམས་ལ་སོགས་པ་གསུམ་ལས་གཉིས་ཀྱི་བསྡུ་བ་ནི་བཤད་ཟིན་ཏོ། །འགོག་པའི་ཁམས་ནི་ཆོས་ཀྱི་

Vol. 142 · folio 52a

ཁམས་སུ་འདུས་སོ། །འདས་པའི་ཁམས་ལ་སོགས་པ་གསུམ་ནི་སོ་སོར་ཁམས་བཅོ་བརྒྱད་དུ་འདུས་སོ། །ངན་པ་ལ་སོགས་པའི་ཁམས་གསུམ་ནི་འདོད་པའི་ཁམས་ལ་སོགས་པ་ཁོ་ན་ཡིན་པས་འདི་དག་གི་བསྡུ་བ་ནི་བཤད་ཟིན་ཏོ། །དགེ་བའི་ཁམས་

ལ་སོགས་པ་གསུམ་ལས་དགེ་བ་དང་མི་དགེ་བའི་ཁམས་དག་ནི་གཟུགས་དང་སྒྲ་དང་ཆོས་ཀྱི་ཁམས་དག་དང་སེམས་ཀྱི་ཁམས་བདུན་དུ་འདུས་སོ། །ལུང་དུ་མ་བསྟན་པའི་ཁམས་ནི་ཁམས་བཅོ་བརྒྱད་དུ་འདུས་སོ། །སློབ་པ་དང་མི་སློབ་པའི་ཁམས་ལ་སོགས་པ་གསུམ་ལས་དང་

པོ་གཉིས་ནི་ཡིད་དང་ཆོས་དང་ཡིད་ཀྱི་རྣམ་པར་ཤེས་པའི་ཁམས་དག་ཏུ་འདུས་སོ། །གསུམ་པ་ནི་ཁམས་བཅོ་བརྒྱད་དུ་འདུས་སོ། །ཟག་པ་དང་བཅས་པ་ཟག་པ་མེད་པའི་ཁམས་ལས་དང་པོ་ནི་ཁམས་བཅོ་བརྒྱད་དུ་འདུས་སོ། །གཉིས་པ་ནི་ཡིད་དང་ཆོས་དང་ཡིད་ཀྱི་རྣམ་

པར་ཤེས་པའི་ཁམས་དག་ཏུ་འདུས་སོ། །འདུས་བྱས་དང་འདུས་མ་བྱས་ཀྱི་ཁམས་ལས་དང་པོ་ནི་ཁམས་བཅོ་བརྒྱད་དུ་འདུས་སོ། །གཉིས་པ་ནི་ཆོས་ཀྱི་ཁམས་སུ་འདུས་ཏེ་དེ་དག་ནི་ཁམས་དྲུག་ཅུ་རྩ་གཉིས་ཡིན་ནོ། །དེར་གང་དག་ཅེས་བྱ་བ་ནི་ཁམས་མང་པོའི་བར་རོ། །

དེ་དག་ལས་གཉིས་ཀྱི་མཚན་ཉིད་མ་བཤད་ན་ཞེས་བྱ་བ་ནི་སའི་ཁམས་ལ་སོགས་པ་དང་། འདི་དག་གི་ནི་མཚན་ཉིད་ནི། །འཛིན་པ་ལ་སོགས་ལས་སུ་གྲུབ། །སྲ་གཤེར་དྲོ་ཉིད་གཡོ་བ་རྣམས། །ཞེས་བྱ་བ་བཤད་ཟིན་ཏོ། །ནམ་མཁའི་ཁམས་ཀྱི་མཚན་ཉིད་ཀྱང་། །དེ་ལ་

ནམ་མཁའ་མི་སྒྲིབ་པ། །ཞེས་བཤད་ཟིན་ལ། རྣམ་པར་ཤེས་པའི་ཁམས་ཀྱི་མཚན་ཉིད་ཀྱང་། རྣམ་ཤེས་སོ་སོར་རྣམ་རིག་པ། །ཞེས་སྨོས་པའི་ཕྱིར་བཤད་ཟིན་མ་ཡིན་ནམ་ཞེ་ན། རྣམ་པར་ཤེས་པ་ཐམས་ཅད་ཀྱི་མཚན་ཉིད་ནི་བཤད་པ་བདེན་ན། རྣམ་པར་ཤེས་པའི་

ཁམས་གོ་ཅི་འདིར་རྣམ་པར་ཤེས་པ་ཅུང་ཟད་ཅིག་ཁོ་ན་ཡིན་ནོ་ཞེས་བྱ་བར་བསམ་པ་ཡིན་ནམ་འོན་ཏེ་ཐམས་ཅད་ཡིན་ཞེས་བྱ་བར་རྣམ་པར་མ་ཕྱེ་ལ། ནམ་མཁའ་ལ་ཡང་འདུས་མ་བྱས་ཀྱི་མཚན་ཉིད་ཅན་བཤད་ཀྱི་ནམ་མཁའི་ཁམས་ནི་མ་ཡིན་ནོ། །འདི་ནི་གདོན་མི་ཟ་བར་ནམ་

Vol. 142 · folio 52b

མཁའ་ལས་གཞན་ཡིན་ཏེ། མདོ་ལས་དགེ་སློང་སྐྱེས་བུ་འདི་ནི་ཁམས་དྲུག་པ་ཡིན་ནོ་ཞེས་འབྱུང་བའི་ཕྱིར་རོ་སྙམ་པའི་བློ་འདིས། གཉིས་ཀྱི་མཚན་ཉིད་མ་བཤད་ན་ཞེས་བྱ་བ་སྨོས་སོ། །དེ་ཉིད་ཀྱི་ཕྱིར་དེ་ཅི་ནམ་མཁའ་ཉིད་ནམ་མཁའི་ཁམས་ཡིན་ལ་རྣམ་པར་ཤེས་པ་ཐམས་

ཅད་ཀྱང་རྣམ་པར་ཤེས་པའི་ཁམས་ཡིན་པར་རིག་པར་བྱའམ་ཞེས་བྱ་བ་སྨོས་སོ། །ཁ་དང་སྣ་ལ་སོགས་པ་ཞེས་བྱ་བའི་སོགས་པ་ཞེས་བྱ་བའི་སྒྲས་ནི་རྣ་བ་ལ་སོགས་པ་བསྡུའོ། །སྣང་དང་མུན་པ་དག་ཡིན་ལོ། །ཞེས་བྱ་བ་ལ་ལོ་ཞེས་བྱ་བའི་སྒྲས་ནི་ཕ་རོལ་པའི་གཞུང་ལུགས་

རྗོད་པར་བྱེད་པ་ཡིན་ཏེ་རང་གི་གཞུང་ལུགས་ནི་ནམ་མཁའ་ཐོགས་པ་དང་བཅས་པའི་རྫས་མེད་པ་ཙམ་ཡིན་ནོ་ཞེས་བྱ་བར་བསམ་པ་ཡིན་པར་མངོན་ནོ། །མཚན་མོ་དང་ཉིན་མོའི་རང་བཞིན་ཞེས་བྱ་བ་ནི་མཚན་མོ་ཡོད་པའི་མུན་པ་དང་ཉིན་མོའི་འོད་ཀྱི་མཚན་ཉིད་ཀྱི་སྣང་བ་ཡིན་པར་

འདོད་པའི་ཕྱིར་ཏེ། བསྟན་པ་འདི་ནི་ཕལ་ཆེ་བའི་དབང་དུ་བྱས་པ་ཡིན་ནོ། །ཐོགས་པ་ཞེས་བྱ་བ་ནི་ཤིན་ཏུ་གནོད་པར་བྱར་རུང་བའི་ཕྱིར་བརྩེགས་པར་གནས་པའི་གཟུགས་ཏེ། དེ་ནི་དེའི་ཉེ་འཁོར་རོ། །ལོ་ཞེས་བྱ་བ་ནི་བརྩེགས་པ་ལ་གནས་པ་ནི་བརྩེགས་པར་གནས་པ་

སྟེ་ཤིན་ཏུ་གནོད་པར་བྱེད་པའམ་གནོད་པར་བྱ་བ་ཡིན་པས་ན་བརྩེགས་པ་ཡིན་ནོ། །དེ་ནི་དེའི་ཉེ་འཁོར་རོ། །ཞེས་བྱ་བ་ནི་བརྩེགས་པ་རྩིག་པ་ལ་སོགས་པ་དེའི་ཉེ་འཁོར་ཡིན་ཞིང་ཉེ་བར་གནས་པ་ཡིན་ཏེ། དེ་ལ་ལྟོས་ནས་རྣམ་པར་གཞག་ཅེས་བྱ་བའི་ཐ་ཚིག་གོ། །རྣམ་

པར་བཤད་པ་འདི་ལ་ཡང་ལོ་ཞེས་བྱ་བའི་སྒྲ་ནི་བྱེ་བྲག་ཏུ་སྨྲ་བའི་རྣམ་པར་བཤད་པ་ཡིན་པར་རབ་ཏུ་བསྟན་པའི་ཕྱིར་རོ། །རང་གི་གཞུང་ལུགས་ནི་གང་འོག་ནས་འབྱུང་བ་ཡིན་ཏེ། དེས་སྨྲས་པ། འདི་ལ་གཟུགས་གཞན་ཐོགས་པ་མེད་པས་དེ་ལ་གཟུགས་གཞན་མི་ཐོགས་པའི་

ཕྱིར་དེ་ནི་ཐོགས་མེད་ཀྱང་ཡིན་ལ། བརྩེགས་པར་གནས་པའི་གཟུགས་གཞན་གྱི་ཉེ་འཁོར་ཡང་ཡིན་ཏེ། ཕྱོགས་འདི་ལ་ནི་དེ་ནི་ཐོགས་མེད་ཀྱང་ཡིན་ལ་དེ་ནི་ཉེ་འཁོར་ཡང་ཡིན་པས་ཐོགས་མེད་ཉེ་འཁོར་ཡིན་ནོ་ཞེས་བྱ་བར་ཚིག་བསྡུའོ། །ཟག་དང་བཅས་པའི་རྣམ་ཤེས་ནི། །

Vol. 142 · folio 53a

ཞེས་བྱ་བ་ནི་སྐྱེ་བའི་རྒྱུའི་རྣམ་པར་ཤེས་པ་ཡིན་པར་འདོད་པའི་ཕྱིར་རོ། །གལ་ཏེ་ཅིའི་ཕྱིར་སྙམ་ན། དེའི་ཕྱིར་སྨྲས་པ། འདི་ལྟར་ཁམས་དྲུག་པོ་འདི་དག་ནི། སྐྱེ་བའི་རྟེན་ཡིན་པར་འདོད་དེ། དགེ་སློང་སྐྱེས་བུ་འདི་ནི་ཁམས་དྲུག་པ་ཡིན་ནོ་ཞེས་བྱ་

བ་དང་། ཁམས་དྲུག་ལ་བརྟེན་ནས་མའི་མངལ་དུ་བུ་འཇུག་གོ་ཞེས་འབྱུང་བའི་ཕྱིར་རོ། །དེ་དག་ནི་ཉིང་མཚམས་སྦྱོར་བའི་སེམས་ནས་འཆི་བའི་སེམས་ཀྱི་བར་དུ་སྐྱེ་བའི་ཞེས་བྱ་བ་རྒྱས་པར་འབྱུང་བ་ནི་དེ་དག་ནི་སྐྱེ་བ་སྐྱེད་པར་བྱེད་པ་དང་། གསོ་བར་བྱེད་པ་དང་། འཕེལ་

བར་བྱེད་པ་ཡིན་པའི་ཕྱིར་གཞིར་གྱུར་པ་སྟེ། འདི་ལ་སྐྱེད་པར་བྱེད་པ་ནི་རྣམ་པར་ཤེས་པའི་ཁམས་ཡིན་ཏེ། ཉིང་མཚམས་སྦྱོར་བའི་ས་བོན་ཡིན་ནོ། །གསོ་བར་བྱེད་པ་ནི་འབྱུང་བ་དག་ཡིན་ཏེ། དེའི་རྟེན་དུ་གྱུར་པའི་ཕྱིར་རོ། །འཕེལ་བར་བྱེད་པ་ནི་ནམ་མཁའི་ཁམས་

ཡིན་ཏེ། གོ་འབྱེད་པའི་ཕྱིར་རོ། །དེ་ཉིད་ཀྱི་ཕྱིར་འདི་དག་ལ་ཁམས་ཉིད་ཡིན་པར་བརྗོད་དེ། ཉིང་མཚམས་སྦྱོར་བ་འཛིན་པས་ན་ཁམས་དག་ཡིན་ནོ། །ཟག་པ་མེད་པའི་ཆོས་རྣམས་ནི་དེ་ལྟ་མ་ཡིན་ནོ་ཞེས་བྱ་བ་ནི་སྐྱེ་བ་དང་འགལ་བའི་ཕྱིར་སྐྱེ་བའི་རྟེན་མ་ཡིན་ནོ། །

བསྟན་ཡོད་འདིར་ནི་གཟུགས་གཅིག་པུ། །ཞེས་བྱ་བ་འདི་ཅི་ཞིག་ཡིན་ཞེ་ན། ཁྱད་པར་གང་ཞིག་དང་ལྡན་ན་དངོས་པོ་དེ་དེ་ལྟར་བསྟན་པར་ནུས་པའི་ཁྱད་པར་དེ་ནི་བསྟན་པ་ཞེས་བྱའོ། །ཡང་ན་ཚིག་གིས་གཞན་གྱི་མིག་གི་རྣམ་པར་ཤེས་པ་བསྐྱེད་པ་ནི་བསྟན་པ་ཡིན་ལ།

དེ་དང་ལྷན་ཅིག་འཇུག་པ་ནི་བསྟན་ཡོད་དེ་གཟུགས་ཀྱི་ཁམས་གཅིག་པུ་ཡིན་ནོ། །འདིར་ཁམས་བཅོ་བརྒྱད་དག་ལས་གཟུགས་ཀྱི་ཁམས་གཅིག་ཁོ་ནས་བསྟན་དུ་ཡོད་པའོ་ཞེས་དམིགས་ཀྱིས་བསྩལ་བའི་ཕྱིར་རོ། །ལྷག་མ་རྣམས་ནི་བསྟན་དུ་མེད་པའོ་ཞེས་བཤད་

པར་འགྱུར་རོ། །བསྟན་དུ་ཡོད་པ་ཉིད་འདིས་ཀྱང་གཙོ་བོ་ཡིན་པར་བཤད་པ་ཡིན་པར་ཟློས་པའི་ཉེས་པར་ཐལ་བ་མ་ཡིན་ཏེ། དེ་ནི་གྲུབ་པའི་ཕྱིར་རོ། །བསྟན་དུ་ཡོད་པ་ཉིད་ལ་སོགས་པའི་བྱེ་བྲག་འདི་དག་ཀྱང་ཕལ་ཆེར་མདོ་ལས་གསུངས་པ་ཁོ་ན་ཡིན་པས་རབ་ཏུ་བསྟན་ཏེ།

Vol. 142 · folio 53b

འདི་ལྟར་མདོ་ལས། དགེ་སློང་མིག་ནི་ནང་གི་སྐྱེ་མཆེད་ཡིན་ཏེ། འབྱུང་བ་ཆེན་པོ་བཞི་དག་རྒྱུར་བྱས་པ་གཟུགས་དང་བ། གཟུགས་ཅན་བསྟན་དུ་མེད་པ་ཐོགས་པ་དང་བཅས་པའོ་ཞེས་བྱ་བ་ནས། དགེ་སློང་ལུས་ནི་ནང་གི་སྐྱེ་མཆེད་ཡིན་ཏེ་ཞེས་བྱ་བའི་བར་སྔ་མ་བཞིན་ནོ། །དགེ་

སློང་ཡིད་ནི་ནང་གི་སྐྱེ་མཆེད་ཡིན་ཏེ། གཟུགས་ཅན་མ་ཡིན་པ་བསྟན་དུ་མེད་པ་ཐོགས་པ་མེད་པའོ། །དགེ་སློང་གཟུགས་དག་ནི་ཕྱིའི་སྐྱེ་མཆེད་ཡིན་ཏེ། འབྱུང་བ་ཆེན་པོ་བཞི་དག་རྒྱུར་བྱས་པ་གཟུགས་ཅན་བསྟན་དུ་ཡོད་པ་ཐོགས་པ་དང་བཅས་པའོ། །དགེ་སློང་སྒྲ་དག་ནི་

ཕྱིའི་སྐྱེ་མཆེད་ཡིན་ཏེ། འབྱུང་བ་ཆེན་པོ་འདི་དག་རྒྱུར་བྱས་པ་གཟུགས་ཅན་བསྟན་དུ་མེད་ཅིང་ཐོགས་པ་དང་བཅས་པའོ་ཞེས་བྱ་བ་ནས། དགེ་སློང་རེག་བྱ་དག་ནི་ཕྱིའི་སྐྱེ་མཆེད་ཡིན་ཏེ། འབྱུང་བ་ཆེན་པོ་བཞི་དག་དང་། འབྱུང་བ་ཆེན་པོ་བཞི་དག་རྒྱུར་བྱས་པ་གཟུགས་

ཅན་བསྟན་དུ་མེད་པ་ཐོགས་པ་མེད་པ་དང་བཅས་པའོ། །དགེ་སློང་སྐྱེ་མཆེད་རྣམས་ནི་ཕྱིའི་སྐྱེ་མཆེད་ཡིན་ཏེ། སྐྱེ་མཆེད་བཅུ་གཅིག་གིས་མ་བསྡུས་པ་བསྟན་དུ་མེད་པ་ཐོགས་པ་མེད་པའོ་ཞེས་བྱ་བའི་བར་དུ་གསུངས་ཏེ། དེ་དག་ཀྱང་མཛོད་ཀྱི་གནས་དང་པོ་ཡོངས་སུ་

རྫོགས་ཀྱི་བར་དུ་ཁམས་རྣམས་ཀྱི་རབ་ཏུ་དབྱེ་བ་ཁོ་ནར་སྟོན་ཏེ། གཟུགས་དང་རྣམ་པར་ཤེས་པའི་ཁྱད་པར་ཡིན་པའི་ཕྱིར་རོ། །ཐོགས་དང་བཅས་པ་གཟུགས་ཅན་བཅུ། །ཞེས་བྱ་བ་ལ་གཟུགས་ཅན་སྨོས་པ་ནི་གཟུགས་ཅན་མ་ཡིན་པ་བསལ་བའི་ཕྱིར་རོ། །གཟུགས་

ནི་གཟུགས་སུ་རུང་བ་སྟེ་དེ་འདི་དག་ལ་ཡོད་པས་གཟུགས་ཅན་རྣམས་སོ། །བཅུ་ཞེས་བྱ་བ་ནི་མིག་གི་ཁམས་ལ་སོགས་པ་ལྔ་དང་། དེ་དག་གི་ཡུལ་གྱི་ཁམས་ལྔ་ཁོ་ན་ཡིན་ནོ། །ཆོས་ཀྱི་ཁམས་ཇི་ལྟར་བརྩལ་བར་བྱས་པ་ཡིན། དེ་ལ་རྣམ་པར་རིག་བྱེད་མ་ཡིན་པའི་

གཟུགས་ཡོད་པའི་ཕྱིར་དེ་ཡང་གཟུགས་ཅན་ནོ་ཞེས་བརྗོད་པར་ནུས་སོ་ཞེ་ན། གཟུགས་ཅན་ཞེས་ངེས་པར་གཟུང་བའི་ཕྱིར་དེ་བརྩལ་བ་བྱས་པ་ཡིན་ཏེ། ཁམས་གང་དག་གཟུགས་ཅན་གྱི་ངོ་བོ་ཉིད་ཡིན་པ་དེ་དག་ཁོ་ན་གཟུང་བར་བྱ་བ་ཡིན་ན། ཆོས་ཀྱི་ཁམས་ནི་གཟུགས་

Vol. 142 · folio 54a

ཅན་དང་གཟུགས་ཅན་མ་ཡིན་པའི་ངོ་བོ་ཉིད་ཀྱང་ཡིན་ནོ། །རང་གི་ཡུལ་དུ་གཞན་སྐྱེ་བའི་གེགས་བྱེད་པ་སྟེ་ཞེས་བྱ་བ་རྒྱས་པར་འབྱུང་བ་ནི་གང་ན་ཐོགས་པ་དང་བཅས་པའི་དངོས་པོ་གཅིག་ཡོད་པ་དེར་གཟུགས་ཅན་གཉིས་པ་སྐྱེ་བར་མི་འགྱུར་ཏེ།

དཔེར་ན་ལག་པའམ་རྡོ་བ་ལ་ལག་པ་རྡུགས་ཤིང་ཐོགས་པ་སྟེ། ལག་པའི་གནས་སམ་རྡོ་བའི་གནས་སུ་ལག་པ་མི་འབྱུང་བའམ་རྡོ་བ་ཡང་དེ་གཉིས་ལ་སྟེ་རྡོ་བ་ལག་པ་དང་རྡོ་བ་དག་གི་གནས་སུ་མི་འབྱུང་བ་ལྟ་བུ་ཡིན་ནོ། །ཆུ་ལ་ཐོགས་ལ་ཞེས་བྱ་བ་ནི་རང་གི་ཡུལ་ཆུ་ལ་འཇུག་

པ་ཞེས་བྱ་བའི་ཐ་ཚིག་གོ། །མི་ཕལ་ཆེའི་ལྟ་བུའོ་ཞེས་བྱ་བ་ཕལ་ཆེ་བ་སྨོས་པ་ནི་ཉ་བ་ལ་སོགས་པ་བསལ་བའི་ཕྱིར་རོ། །གཉི་གར་མ་ཡིན་པ་ཡང་ཡོད་དེ་ཞེས་བྱ་བ་ནི་ངེས་པར་མངལ་དུ་འཆི་བ་རྣམས་ཀྱི་ལྟ་བུའོ། །རྣམ་པ་དེ་དག་ཅེས་བྱ་བ་ནི་རྣམ་པ་དེ་རྣམས་ཞེས་བྱ་བའི་ཐ་ཚིག་

གོ། །ཕ་བང་ནི་ཁ་རྐུབ་དག་ཡིན་ནོ། །བྱི་ལ་ལ་སོགས་པ་ཞེས་བྱ་བའི་སོགས་པ་སྨོས་པས་ནི་ཆོམ་རྐུན་པའི་མི་ལ་སོགས་པ་དང་། སྟག་ལ་སོགས་པ་བསྡུའོ། །གང་ཞིག་གང་ལ་བྱེད་པ་དེ་ནི་དེའི་ཡུལ་ཡིན་ལ་ཞེས་བྱ་བ་ནི་བྱེད་པ་ནི་རྩལ་ཡིན་ཏེ་མིག་དང་རྣ་བ་ལ་སོགས་པ་

གཟུགས་དང་སྒྲ་ལ་སོགས་པ་ལ་ལྟ་བ་དང་ཉན་པ་ལ་སོགས་པ་ནི་བྱེད་པ་ཡིན་ནོ། །དེ་ཡང་རང་གི་སེམས་དང་སེམས་ལས་བྱུང་བ་དག་ལ་རྟེན་གྱི་ངོ་བོའི་ནུས་པའི་ཁྱད་པར་གྱི་མཚན་ཉིད་ཡིན་པར་རིག་པར་བྱའོ། །གཟུགས་ལ་སོགས་པ་གང་ཞིག་སེམས་དང་སེམས་ལས་བྱུང་

བ་རྣམས་ཀྱིས་ཁར་བ་ལ་བརྟེན་པའི་ཚུལ་དུ་འཛིན་པ་དེ་ནི་དམིགས་པ་ཡིན་ནོ། །དེ་ལྟར་ན་དམིགས་པ་ནི་སེམས་དང་སེམས་ལས་བྱུང་བའི་ཁོ་ནའི་ཡིན་ལ་ཡུལ་ནི་སེམས་དང་སེམས་ལས་བྱུང་བ་འབའ་ཞིག་གིས་མ་ཡིན་གྱི་མིག་ལ་སོགས་པ་ཡང་ཡིན་ནོ། །དེ་ལས་གཞན་དུ་

མི་འཇུག་པའི་ཕྱིར་རོ་ཞེས་བྱ་བ་ནི་འཇིག་རྟེན་ན་གང་ཞིག་ཤིང་ངམ་རྩིག་པ་གང་ལས་གཞན་དུ་མི་འཇུག་པ་དེ་ནི་དེ་ལ་ཐོགས་པ་ཡིན་ནོ། །དེ་བཞིན་མིག་ལ་སོགས་པ་ཡང་ཡུལ་གཞན་དུ་བྱེད་པ་མི་བྱེད་ཀྱི་རང་གི་ཡུལ་ཁོ་ན་ལ་བྱེད་དེ། །དེ་ལྟ་བས་ན་དེ་ལ་ཐོགས་པ་ཡིན་ནོ་ཞེས་

Vol. 142 · folio 54b

བྱའོ། །ཡང་ན་འདི་ལ་གཏོད་པ་ནི་ཐོགས་པ་ཡིན་ཏེ་ཞེས་བྱ་བ་རྒྱས་པར་འབྱུང་བ་ནི་ཡུལ་འདི་ལ་གཏོད་པར་བྱེད་པ་ནི་གཏོད་པའོ། །རང་གི་ཡུལ་ལ་འཇུག་པ་གང་ཡིན་པའོ་ཞེས་བྱ་བ་ནི་བྱེད་ཅེས་བྱ་བའི་ཐ་ཚིག་གོ། །དེ་ལྟ་བས་ན་བཅུ་པོ་དག་ནི་སྒྲིབ་པ་ལ་ཐོགས་པས་ཞེས་

བྱ་བ་རྒྱས་པར་འབྱུང་བ་ནི། ཐོགས་དང་བཅས་པ་གཟུགས་ཅན་བཅུ། །ཞེས་བྱ་བ་འདིར་ཁམས་བཅུ་པོ་དག་ནི་སྒྲིབ་པ་ལ་ཐོགས་པས་ཐོགས་པ་དང་བཅས་པར་འདོད་པ་ཡིན་ནོ། །དེ་ལ་སེམས་དང་སེམས་ལས་བྱུང་བ་དག་ཀྱང་ཡུལ་དང་དམིགས་པ་ལ་ཐོགས་པ་དག་གི་

ཐོགས་པ་དང་བཅས་པ་ཉིད་ཡིན་པས་དྲི་མ་མུ་བཞི་སྟེ་མུ་བཞི་ནི་རྣམ་པ་བཞི་ཞེས་བྱ་བའི་ཐ་ཚིག་གོ། །ཚིག་ཕྱི་མ་དང་སྦྱོར་བ་སྟེ་ཞེས་བྱ་བ་ནི་གལ་ཏེ་དྲི་བའི་ཆ་ཕྱི་མ་བཟུང་ནས་ལན་འདེབས་པར་བྱེད་ན་དེ་ནི་ཚིག་ཕྱི་མ་དང་སྦྱོར་བ་ཡིན་ནོ། །གལ་ཏེ་ཆ་སྔ་མ་བཟུང་ན་ལན་འདེབས་

པར་བྱེད་ན་དེ་ནི་ཚིག་སྔ་མ་དང་སྦྱོར་བ་ཡིན་ནོ། །དེ་དག་ནི་ཡུལ་ལ་ཐོགས་པས་ཀྱང་ཡིན་ནོ་ཞེས་བྱ་བ་ནི་སེམས་དང་སེམས་ལས་བྱུང་བ་རྣམས་ཏེ། དེ་དག་ནི་ཡུལ་ལ་ཐོགས་པ་དང་དམིགས་པ་ལ་ཐོགས་པས་ཐོགས་པ་དང་བཅས་པ་ཡིན་ནོ། །དབང་པོ་ལྔ་ནི་དམིགས་པ་ལ་

ཐོགས་པས་ཐོགས་པ་དང་བཅས་པ་མ་ཡིན་ཏེ། དམིགས་པ་མེད་པའི་ཕྱིར་རོ། །གང་ལ་ཡིད་སྐྱེ་བར་འདོད་པ་ལ་ཞེས་བྱ་བ་རྒྱས་པར་འབྱུང་བ་ནི་རྟེན་ཏམ་དམིགས་པ་གང་ལ་ཡིད་སྐྱེ་བར་འདོད་པ་ལ་བར་ཆད་ཀྱི་སྒྲིབ་པ་གཞན་དག་གིས་ཐོགས་ཤིང་མི་སྐྱེ་བར་བྱེད་ནུས་པ་དེ་ཁོ་

ན་ཐོགས་པ་དང་བཅས་པ་ཡིན་ཏེ། བར་ཆད་ཀྱི་སྒྲིབ་པའི་མཚན་ཉིད་ཀྱི་ཐོགས་པས་ཐོགས་པ་དང་བཅས་པ་ཡིན་པའི་ཕྱིར་རོ། །གཞན་དག་ན་རེ་རང་གི་ཡུལ་དུ་གཞན་སྐྱེ་བའི་གེགས་བྱེད་པའི་མཚན་ཉིད་ཐོགས་པས་ཐོགས་པ་དང་བཅས་པའི་ཕྱིར་རོ་ཞེས་ཟེར་རོ། །དེ་དག་

ཀྱང་གང་ཞེ་ན། དབང་པོ་ལྔ་དང་ཡུལ་ལྔའི་ཁམས་ཀྱི་ངོ་བོ་ཉིད་ཡིན་ནོ། །བཟློག་པ་ནི་ཐོགས་པ་མེད་པར་འདོད་དོ་ཞེས་བྱ་བ་ནི་གང་ཡིད་སྐྱེ་བར་འདོད་པ་ལ་གཞན་དག་གིས་ཐོགས་པར་བྱ་མི་ནུས་པ་སྟེ། དཔེར་ན་ཡིད་ཀྱི་ཁམས་དང་ཆོས་ཀྱི་ཁམས་ལ་ཡིད་ཀྱི་རྣམ་པར་

Vol. 142 · folio 55a

ཤེས་པ་སྐྱེ་བ་ལ་གཞན་དག་གིས་བར་ཆད་ཀྱི་སྒྲིབ་པ་བྱ་བར་མི་ནུས་པ་ལྟ་བུ་ཡིན་ནོ། །དེའི་ཕྱིར་སེམས་ཀྱི་ཁམས་བདུན་དང་ཆོས་ཀྱི་ཁམས་ནི་ཐོགས་པ་མེད་པའི་ངོ་བོ་ཉིད་ཡིན་ནོ་ཞེས་བྱ་བར་གྲུབ་པོ། །ལུང་མ་བསྟན་བརྒྱད་ཅེས་བྱ་བ་ནི་བརྒྱད་ཀྱི་

ལུང་དུ་མ་བསྟན་པ་ཁོ་ནའོ་ཞེས་ངེས་པར་བཟུང་བ་ཡིན་ཏེ། དགེ་བ་དང་མི་དགེ་བའི་ངོ་བོར་ལུང་དུ་མ་བསྟན་པའི་ཕྱིར་ན་ལུང་དུ་མ་བསྟན་པ་དག་ཡིན་ནོ། །གང་དག་དགེ་བ་དང་མི་དགེ་བ་མ་གཏོགས་པ་དེ་དག་ཁོ་ན་ལ་ལུང་དུ་མ་བསྟན་པ་ཡིན་ནོ་ཞེས་བྱ་བར་འདོད་ཀྱི། དགེ་བ་

དང་མི་དགེ་བ་རྣམས་ནི་དགེ་བ་དང་མི་དགེ་བའི་ངོ་བོར་ལུང་དུ་བསྟན་པའི་ཕྱིར་དགེ་བ་ཡང་མི་དགེ་བ་དང་ལུང་དུ་མ་བསྟན་པ་ཉིད་དུ་ལུང་དུ་མ་བསྟན་པ་མ་ཡིན་ལ་མི་དགེ་བ་ཡང་དགེ་བ་དང་ལུང་དུ་མ་བསྟན་པ་ཉིད་དུ་ལུང་དུ་མ་བསྟན་པའི་ཕྱིར་མ་ཡིན་ཏེ། སྒྲ་འཇུག་པ་ནི་བརྡར་

བཏགས་པ་ལ་འཇུག་པ་ཡིན་ནོ། །གཞན་རྣམ་གསུམ་ཞེས་བྱ་བ་ནི་ཁམས་ཞེས་བྱ་བར་སྐབས་དང་སྦྱར་ཏེ། གཞན་དག་ནི་རྣམ་པ་གསུམ་ཁོ་ན་ཡིན་གྱི་རྣམ་པ་གཅིག་ཀྱང་མ་ཡིན་ལ། རྣམ་པ་གཉིས་ཀྱང་མ་ཡིན་ནོ་ཞེས་ངེས་པར་བཟུང་བ་ཡིན་ནོ། །མ་ཆགས་པ་ལ་

སོགས་པ་དང་མཚུངས་པར་ལྡན་པ་དག་ནི་དགེ་བ་ཡིན་ནོ་ཞེས་བྱ་བ་རྒྱས་པར་འབྱུང་བ་ནི་སེམས་ཀྱི་ཁམས་བདུན་མ་ཆགས་པ་དང་། ཞེ་སྡང་མེད་པ་དང་། གཏི་མུག་མེད་པ་དང་། ངོ་ཚ་ཤེས་པ་དང་། ཁྲེལ་ཡོད་པ་དང་། མཚུངས་པར་ལྡན་པ་དག་ནི་དགེ་བ་ཡིན་ནོ། །

ཆགས་པ་དང་། ཞེ་སྡང་དང་། གཏི་མུག་དང་། ངོ་ཚ་མེད་པ་དང་། ཁྲེལ་མེད་པ་དང་། མཚུངས་པར་ལྡན་པ་དག་མི་དགེ་བ་ཡིན་ནོ། །སྨད་པ་ལས་འདས་ཤིང་ངན་སོང་ལས་རྒལ་བས་ན་དགེ་བའོ། །རྣམ་པ་གཅིག་ཏུ་ན་ཤེས་རབ་ནི་རྩྭ་ཀུ་ཤ་དང་འདྲ་བར་རྣོ་བས་

ཀུ་ཤ་ཞེས་བྱ་སྟེ། དེ་ལེན་ཅིང་ཀུན་ཏུ་ལེན་པས་ན་དགེ་བའོ། །གཞན་མ་ཆགས་པ་ལ་སོགས་པ་དང་ཆགས་པ་ལ་སོགས་པ་དང་མཚུངས་པར་མི་ལྡན་པ་དག་ནི་ལུང་དུ་མ་བསྟན་པ་ཡིན་ནོ། །ཆོས་ཀྱི་ཁམས་ནི་ཞེས་བྱ་བ་རྒྱས་པར་འབྱུང་བ་ནི་མ་ཆགས་པ་ལ་སོགས་

Vol. 142 · folio 55b

པའི་ངོ་བོ་ཉིད་ནི་གང་འདི་བཤད་ཟིན་པ་ཡིན་ནོ། །མ་ཆགས་པ་ལ་སོགས་པ་དང་མཚུངས་པར་ལྡན་པ་དག་ནི་ཚོར་བ་ལ་སོགས་པ་ཡིན་ནོ། །མ་ཆགས་པ་ལ་སོགས་པ་ཀུན་ནས་བསླང་བ་ནི་ཐོབ་པ་དང་། སྐྱེ་བ་ལ་སོགས་པ་ལྡན་པ་མ་ཡིན་པ་དང་རྣམ་པར་རིག་བྱེད་མ་ཡིན་པ་

ཡིན་ནོ། །གཞན་ནི་སོ་སོར་བརྟགས་པས་འགོག་པ་ཡིན་ཏེ་ཆོས་ཀྱི་ཁམས་རྣམ་པ་བཞི་ནི་དགེ་བ་ཡིན་ནོ། །ཆགས་པ་ལ་སོགས་པའི་ངོ་བོ་ཉིད་དང་མཚུངས་པར་ལྡན་པ་དང་། ཀུན་ནས་བསླང་བ་ནི་མི་དགེ་བའོ། །གཞན་ནི་ལུང་དུ་མ་བསྟན་པ་ཡིན་ནོ་ཞེས་བྱ་བ་ནི་གང་ཞིག་མ་

ཆགས་པ་ལ་སོགས་པའི་ངོ་བོ་ཉིད་དང་མཚུངས་པར་ལྡན་པ་དང་ཀུན་ནས་བསླང་བ་ཡང་མ་ཡིན་པ་དང་། ནམ་མཁའ་དང་སོ་སོར་བརྟགས་པ་མ་ཡིན་པས་འགོག་པ་དང་ཅི་རིགས་པར་དེ་དག་གིས་ཐོབ་པ་དང་། སྐྱེ་བ་ལ་སོགས་པ་ཡིན་ཏེ་ཆོས་ཀྱི་ཁམས་འདི་ནི་ལུང་དུ་མ་

བསྟན་པ་ཡིན་ནོ། །དེ་ལས་གཞན་པ་དག་ནི་ལུང་དུ་མ་བསྟན་པ་ཡིན་ནོ་ཞེས་བྱ་བ་ནི་དགེ་བ་དང་མི་དགེ་བའི་སེམས་ཀྱིས་ཀུན་ནས་བསླང་བའི་གཟུགས་དང་སྒྲའི་ཁམས་དེ་དག་ལས་གཞན་པ་ལུང་དུ་མ་བསྟན་པའི་སེམས་ཀྱིས་ཀུན་ནས་བསླང་བའི་གཟུགས་དང་སྒྲའི་ཁམས་ལུས་དང་

ངག་གི་རྣམ་པར་རིག་བྱེད་ཀྱིས་བསྡུས་པ་གང་ཡིན་པ་དག་དང་རྣམ་པར་རིག་བྱེད་ཀྱིས་མ་བསྡུས་པ་དག་ནི་ལུང་དུ་མ་བསྟན་པ་ཡིན་ནོ། །འདོད་ཁམས་གཏོགས་པ་ཐམས་ཅད་དོ། །ཞེས་བྱ་བ་ནི་ཁམས་བཅོ་བརྒྱད་ཙམ་གྱིས་བསྡུས་པ་ཡིན་པའི་ཕྱིར་ཐམས་ཅད་འདོད་པའི་ཁམས་སུ་

གཏོགས་པ་ཁོ་ན་ཡིན་ནོ་ཞེས་བྱ་བར་ངེས་པར་བཟུང་གི་རེ་རེས་ཐམས་ཅད་བསྡུས་པ་ནི་མ་ཡིན་ནོ། །དེའི་ཕྱིར། གཟུགས་ཀྱི་ཁམས་ན་བཅུ་བཞིའོ། །ཞེས་བྱ་བ་སྨོས་སོ། །དེ་གཉིས་ནི་ཁམ་གྱི་ཟས་ཡིན་པའི་ཕྱིར་ལ་ཞེས་བྱ་བ་ནི་དྲི་དང་རོ་དེ་གཉིས་ཏེ་དྲི་ཡང་ཁམ་གྱི་ཟས་ཕྲ་མོ་

ཡིན་ནོ། །དེ་ལྟ་ན་ནི་འོ་ན་རེག་བྱའི་ཁམས་ཀྱང་མེད་པར་ཐལ་བར་འགྱུར་ཏེ་ཞེས་བྱ་བ་ནི་ཁམ་གྱི་ཟས་ཡིན་པའི་ཕྱིར་གཟུགས་ཀྱི་ཁམས་འདི་ན་རེག་བྱའི་ཁམས་མེད་པར་ཐལ་བར་འགྱུར་ཏེ། གྲུབ་པའི་མཐའ་ལས། ཁམ་གྱི་ཟས་ནི་འདོད་པ་ན། །སྐྱེ་མཆེད་གསུམ་གྱི་བདག་

Vol. 142 · folio 56a

ཉིད་དོ། །ཞེས་འབྱུང་བའི་ཕྱིར་རོ། །དྲི་དང་རོ་དག་ཀྱང་དེ་ལྟར་ཐལ་བར་འགྱུར་རོ་ཞེས་བྱ་བ་ནི་གང་དག་ཟས་ཀྱི་རང་བཞིན་མ་ཡིན་པ་དེ་དག་དེ་ན་ཡོད་པར་འགྱུར་རོ་ཞེས་བྱ་བའི་ཐ་ཚིག་གོ། །རེག་བྱ་ཡོད་དུ་བཅུག་ཀྱང་ཞེས་བྱ་བ་ཅི་ཞེ་ན།

ལོངས་སྤྱོད་པ་སྟེ། དབང་པོའི་རྟེན་གྱི་དངོས་པོ་དང་གཞིའི་དངོས་པོ་དང་བགོ་བའི་དངོས་པོར་རོ། །གཞན་དག་ན་རེ་ནི་ཞེས་བྱ་བ་ནི་བཙུན་པ་དཔལ་ལེན་ཏོ། །ཤིན་ཏུ་སྦྱངས་པ་དང་ལྷན་ཅིག་པར་གྱུར་པ་ཞེས་བྱ་བ་ནི་ཤིན་ཏུ་སྦྱངས་པ་དང་ལྷན་ཅིག་སྐྱེས་ཏེ། ལུས་ལས་སུ་

རུང་བ་དང་ལྷན་ཅིག་པར་གྱུར་པ་ཞེས་བྱ་བའི་ཐ་ཚིག་གོ། །འདིར་སློབ་དཔོན་གྱི་བཙུན་པ་དཔལ་ལན་གྱི་གཞུང་ལུགས་ཁྱད་དུ་བསད་དེ། བྱེ་བྲག་ཏུ་སྨྲ་བའི་གཞུང་ལུགས་གླགས་དང་བཅས་པར་མཐོང་ནས་རྣམ་པར་གཏན་ལ་དབབ་པ་བརྩམ་པའི་ཕྱིར། དེ་ལྟར་ན་ནི་འོ་ན་ཞེས་བྱ་བ་

རྒྱས་པར་སྨོས་ཏེ། བྱེ་བྲག་ཏུ་སྨྲ་བ་རྣམས་ཀྱིས་ནི་ཤུགས་ཀྱིས་ནི་འདི་སྐད་དུ་གཟུགས་ཀྱི་ཁམས་ན་དྲི་དང་རོ་དག་མེད་དེ། དགོས་པ་མེད་པའི་ཕྱིར་ཕོའི་དབང་པོ་བཞིན་ནོ་ཞེས་བྱ་བར་དམ་བཅས་པར་འགྱུར་རོ། །ཕྱོགས་དེར་སློབ་དཔོན་སུན་འབྱིན་པར་བྱེད་དེ། ཕྱོགས་འདི་ནི་

ཆོས་ཅན་གྱི་ཁྱད་པར་ལས་བཟློགས་པས་སྐྱོན་ཆགས་པའི་མཚན་ཉིད་ཡིན་པའི་ཕྱིར་སྐྱོན་ཅན་ཡིན་ནོ། །གཟུགས་ཀྱི་ཁམས་ཀྱི་དྲི་དང་རོ། །ཞེས་བྱ་བ་རང་འཛིན་པར་བྱེད་པ་ཡོད་པ་ཅན་ནི་ཆོས་ཅན་ཡིན་པར་འདོད་པ་ཡིན་ན། དེ་རང་འཛིན་པར་བྱེད་པ་མེད་པ་ཅན་ཉིད་

དུ་འགྱུར་ཏེ། དཔེར་ན་ཕོ་དང་མོའི་དབང་པོ་དགོས་པ་མེད་པ་ཉིད་ཀྱིས་རང་འཛིན་པར་བྱེད་པ་མེད་པ་ཅན་དག་ཡིན་པ་ལྟར་དྲི་དང་རོ་ཞེས་བྱ་བའི་ཡུལ་ཅན་ཡང་དེ་དང་འདྲ་བར་འགྱུར་རོ། །གང་གིས་ན་ཆོས་ཅན་ལས་བཟློག་པ་འདི་གསལ་བར་འགྱུར་བའི་རྗེས་སུ་དཔག་པ་ཡང་

གསལ་བར་ཡོད་དེ། གཟུགས་ཀྱི་ཁམས་ན་སྣ་དང་ལྕེའི་དབང་པོ་དག་མེད་དེ། དགོས་པ་མེད་པའི་ཕྱིར་ཕོ་དང་མོའི་དབང་པོ་བཞིན་ནོ། །བྱེ་བྲག་ཏུ་སྨྲ་བའི་ཕྱོགས་པ་འགའ་ཞིག་གིས་ལན་གདབ་པའི་ཕྱིར་དགོས་པ་ཡོད་དེ་ཞེས་བྱ་བ་རྒྱས་པར་སྨོས་ཏེ། སྣ་དང་ལྕེའི་དབང་པོ་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words