ཆོས་མངོན་པའི་མཛོད་ཀྱི་འགྲེལ་བཤད

Sanskrit title (Tibetan script, as in the text) ཨ་བྷི་དྷརྨ་ཀོ་ཥ་ཊཱི་ཀ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 142 · folio 56b

དེ་དག་མེད་པར་ནི་རྟེན་མཛེས་པ་ཉིད་དང་། ངག་གི་རྣམ་པར་རིག་བྱེད་དུ་ཡང་མི་འགྱུར་ཏེ་མཐོང་བས་གནོད་པ་འདིས་ནི་ཐལ་བར་འགྱུར་བ་ཟློག་པར་བྱེད་དེ། འདིར་རྗེས་སུ་དཔག་པ་ལ་མཐོང་བས་གནོད་པར་འགྱུར་རོ། །དེ་ཡང་གང་ཡིན་ཞེ་ན། གཟུགས་ཀྱི་ཁམས་ན་

སྣ་དང་ལྕེའི་དབང་པོ་དག་ཡོད་དེ། དགོས་པ་དང་བཅས་པའི་ཕྱིར་མིག་གི་དབང་པོ་བཞིན་ནོ། །སློབ་དཔོན་གྱིས། གལ་ཏེ་དགོས་པ་དེར་ཟད་ན། །ཞེས་བྱ་བ་རྒྱས་པར་སྨོས་ཏེ། རྟེན་ཁོ་ནས་ལུས་མཛེས་པ་དང་ཚིག་སྨྲ་བར་འགྱུར་གྱི་དབང་པོས་ནི་མ་ཡིན་པས་དགོས་

པ་དང་བཅས་པ་ཉིད་ཀྱི་གཏན་ཚིགས་མ་གྲུབ་པ་ཉིད་དུ་སྟོན་པར་བྱེད་དོ། །བྱེ་བྲག་ཏུ་སྨྲ་བའི་ཕྱོགས་པ་ཞིག་གིས་དབང་པོ་མེད་པའི་རྟེན་མི་སྲིད་དེ་ཞེས་བྱ་བ་རྒྱས་པར་སྨོས་ཏེ། གཟུགས་ཀྱི་ཁམས་ན་དབང་པོ་མེད་པའི་སྣ་དང་ལྕེའི་དབང་པོའི་རྟེན་མི་སྲིད་དེ། རྟེན་ཡིན་པའི་

ཕྱིར་ཕོའི་དབང་པོའི་རྟེན་བཞིན་ནོ། །འདིས་ནི་དགོས་པ་དང་བཅས་པ་ཉིད་དུ་གྲུབ་པ་ཉིད་དུ་འཇོག་པར་བྱེད་དོ། །སློབ་དཔོན་གྱིས་དེ་ནི་དགོས་པ་མེད་པའི་ཕྱིར་མི་སྲིད་པར་རིགས་ཀྱི་ཞེས་བྱ་བ་རྒྱས་པར་སྨོས་ཏེ། ཕོའི་དབང་པོའི་རྟེན་དེ་ནི་དགོས་པ་མེད་པའི་ཕྱིར་མི་སྲིད་པར་རིགས་

ཀྱི་སྣ་དང་ལྕེའི་དབང་པོའི་རྟེན་ནི་ལུས་མཛེས་པར་བྱ་བ་དང་མངོན་པར་བརྗོད་པར་དགོས་པའི་ཕྱིར་དགོས་པ་དང་བཅས་པ་ཡིན་ཏེ། དེའི་ཕྱིར་འདི་དག་ནི་དབང་པོ་མེད་པར་ཡང་སྲིད་པར་རིགས་སོ། །འདིར་སྒྲུབ་པ་ཡང་བརྗོད་པར་བྱ་སྟེ། གཟུགས་ཀྱི་ཁམས་ན་དབང་པོ་མེད་པའི་

སྣ་དང་ལྕེའི་དབང་པོའི་རྟེན་སྲིད་དེ། དགོས་པ་དང་བཅས་པའི་ཕྱིར་མིག་གི་དབང་པོའི་རྟེན་བཞིན་ནོ། །འདིས་ནི་དགོས་པ་དང་བཅས་པ་ཉིད་མ་གྲུབ་པ་དེ་ཉིད་རྣམ་པར་འཇོག་པར་བྱེད་དོ། །དེ་ལྟར་འདིར་བྱེ་བྲག་ཏུ་སྨྲ་བའི་ཕྱོགས་པ་དགོས་པ་དང་བཅས་པ་ཉིད་དུ་སྨྲ་བ་འགའ་ཞིག་

བཀག་པ་དང་། བྱེ་བྲག་ཏུ་སྨྲ་བ་རྣམས་ཀྱིས་དེ་ལྟ་ན་ནི་འོ་ན་སྣ་དང་ལྕེའི་དབང་པོ་དག་ཀྱང་མེད་པར་ཐལ་བར་འགྱུར་ཏེ། དགོས་པ་མེད་པའི་ཕྱིར་རོ་ཞེས་བྱ་བ་ནི་སུན་འབྱིན་པ་ལྟར་སྣང་བ་ཉིད་དུ་བསྟན་པའི་ཕྱིར་དགོས་པ་མེད་པར་ཡང་ཞེས་བྱ་བ་རྒྱས་པར་སྨྲས་ཏེ། དཔེར་ན་མངལ་

Vol. 142 · folio 57a

དུ་ངེས་པར་འཆི་བ་རྣམས་ཀྱི་དབང་པོ་དགོས་པ་མེད་པར་མངོན་པར་འགྲུབ་པ་ལྟ་བུ་སྟེ། དེ་དག་གིས་ནི་གཟུགས་མཐོང་བ་ལ་སོགས་པར་མི་འགྱུར་རོ། །དེ་བཞིན་དུ་གཟུགས་ཀྱི་ཁམས་ན་དགོས་པ་མེད་ཀྱང་སྣ་དང་ལྕེའི་དབང་པོ་མངོན་པར་འགྲུབ་

པར་འགྱུར་རོ། །འདིས་ནི་གཟུགས་ཀྱི་ཁམས་ན་སྣ་དང་ལྕེའི་དབང་པོ་དག་མེད་དེ། དགོས་པ་མེད་པའི་ཕྱིར་ཕོའི་དབང་པོ་བཞིན་ནོ་ཞེས་བྱ་བའི་དགོས་པ་མེད་པ་ཉིད་མ་ངེས་པ་ཡིན་པར་རབ་ཏུ་སྟོན་ཏོ། །སློབ་དཔོན་གྱི་དགོས་པ་མེད་པ་ནི་ཡིན་མོད་ཀྱི་ཞེས་བྱ་བ་རྒྱས་པར་སྨོས་

ཏེ། དགོས་པ་མེད་པར་དབང་པོ་གྲུབ་པ་ནི་ཡིན་མོད་ཀྱི་འདུས་བྱས་རྣམས་ནི་རྒྱུ་དང་བཅས་པ་ཡིན་པའི་ཕྱིར་རྒྱུ་མེད་པ་ཅན་ནི་མ་ཡིན་ནོ། །གང་ཡང་ཡུལ་ལས་སྲེད་པ་དང་བྲལ་བ་དེ་ནི་གདོན་མི་ཟ་བར་དབང་པོ་ལས་ཀྱང་སྲེད་པ་དང་བྲལ་བ་ཡིན་ཏེ་ཞེས་བྱ་བ་འདིས་ནི་རྒྱུ་མེད་པར་རབ་

ཏུ་སྟོན་པར་བྱེད་དོ། །དེའི་ཕྱིར་སྒྲུབ་པ་ནི་འདི་སྐད་དུ་བརྗོད་པར་བྱའོ། །གཟུགས་ཀྱི་ཁམས་ན་སྣ་དང་ལྕེའི་དབང་པོ་དག་མེད་དེ། རྒྱུ་མེད་པའི་ཕྱིར་རྒྱུ་མེད་པའི་མྱུ་གུ་བཞིན་ནམ་ཕོའི་དབང་པོ་ལྟ་བུའོ། །ཡང་ན་ཕོའི་དབང་པོ་ཡང་ཅི་སྟེ་འགྲུབ་པར་མི་འགྱུར་ཞེས་བྱ་བ་ནི་སློབ་

དཔོན་ཉིད་རྣམ་པར་རྟོག་པ་སློང་བར་བྱེད་པ་ཡིན་ནོ། །བསམ་པ་གང་ཡིན་ཞེ་ན། གལ་ཏེ་དགོས་པ་མེད་པ་དང་རྒྱུ་མེད་པར་ཡང་སྣ་དང་ལྕེའི་དབང་པོ་དག་འབྱུང་ན་ནི་ཕོའི་དབང་པོ་ཡང་ཅི་སྟེ་འགྲུབ་པར་མི་འགྱུར་སྙམ་པ་ཡིན་ནོ། །བྱེ་བྲག་ཏུ་སྨྲ་བ་རྣམས་ཀྱི་ཕྱོགས་ནི་གཟུགས་

ཀྱི་ཁམས་ཀྱི་སེམས་ཅན་གྱི་རྒྱུད་ནི་སྣ་དང་ལྕེའི་དབང་པོ་དང་བཅས་པ་ཡིན་ཏེ། གཟུགས་ཅན་ཡིན་པའི་ཕྱིར་འདོད་པ་ན་སྤྱོད་པའི་སེམས་ཅན་གྱི་རྒྱུད་བཞིན་ནོ་ཞེས་བྱ་བ་འདི་ཡིན་ནོ། །སློབ་དཔོན་ནི་ཕོའི་དབང་པོ་ཡང་ཅི་སྟེ་གྲུབ་པར་མི་འགྱུར་ཞེས་ཟེར་ཏེ་འདིས་ནི་ཕྱོགས་ཏེ་

ཆོས་ཅན་གྱི་ཁྱད་པར་ལས་བཟློག་པ་ཡིན་པར་སྟོན་པར་བྱེད་དེ། གཟུགས་ཀྱི་ཁམས་ཀྱི་སེམས་ཅན་གྱི་རྒྱུད་ཕོའི་དབང་པོ་མེད་པ་ཅན་ནི་ཆོས་ཅན་ཡིན་ལ། དེ་ལས་བཟློག་པ་ནི་ཕོའི་དབང་པོ་ཡོད་པ་ཅན་ཉིད་ཡིན་ནོ། །བྱེ་བྲག་ཏུ་སྨྲ་བ་རྣམས་ཀྱིས་ལན་གདབ་པའི་ཕྱིར་

Vol. 142 · folio 57b

མི་མཛེས་པ་བྱེད་པའི་ཕྱིར་རོ་ཞེས་བྱ་བ་སྨྲས་སོ། །ཇི་ལྟར་ཞེ་ན། གཟུགས་ཀྱི་ཁམས་ན་ནི་ཕོའི་དབང་པོ་མེད་དེ། མི་མཛེས་པར་བྱེད་པའི་ཕྱིར་ཞར་བ་དང་ཞ་བོ་བཞིན་ནོ། །རྗེས་སུ་དཔག་པ་དེ་ལ་གནོད་དང་། ཁོ་བོ་ཅག་གི་དམ་བཅས་པ་འདི་བཟློག་པ་མ་ཡིན་

ཏེ། རིགས་པ་ཅན་གྱི་གྲུབ་པའི་མཐའ་ལས་ཀྱང་། གལ་ཏེ་མཐོང་བས་མི་གནོད་ན། །ཞེས་བྱ་བའི་ཕྱིར་རོ་སྙམ་དུ་བསམས་པ་ཡིན་ནོ། །སློབ་དཔོན་གྱིས་མདོམས་ཀྱི་སྦ་བ་སྦུབས་སུ་ནུབ་པ་རྣམས་ཀྱི་ཅིའི་ཕྱིར་མི་མཛེས་པར་འགྱུར་ཞེས་བྱ་བ་སྨོས་ཏེ། མདོམས་སུ་སྦ་བ་ནི་

མདོམས་ཀྱི་སྦ་བའོ། །མདོམས་ནི་གང་གིས་ནི་ཕོའི་དབང་པོ་དཀྲིས་པ་ཡིན་ནོ། །སྦ་བ་ནི་ཕོའི་དབང་པོའོ། །སྦུབས་ནི་གང་དུ་མདོམས་ཀྱི་སྦ་བ་དེ་གནས་པའོ། །གང་དག་ལ་མདོམས་ཀྱི་སྦ་བ་སྦུབས་སུ་ནུབ་པ་དེ་ཡོད་པ་དེ་དག་ནི་མདོམས་ཀྱི་སྦ་བ་སྦུབས་སུ་ནུབ་པ་རྣམས་

ཏེ་དེ་དག་གི་ཅི་སྟེ་མི་མཛེས་པར་འགྱུར་མཛེས་པ་ཁོ་ནའོ་ཞེས་བྱ་བའི་ཐ་ཚིག་གོ། །འདིས་ནི་མི་མཛེས་པར་བྱེད་པ་ཉིད་མ་གྲུབ་པར་སྟོན་པར་བྱེད་དོ། །དགོས་པའི་དབང་གིས་འབྱུང་བ་ཡང་མ་ཡིན་ནོ་ཞེས་བྱ་བ་རྒྱས་པར་འབྱུང་བ་ནི། །བྱེ་བྲག་ཏུ་སྨྲ་བ་མི་མཛེས་པར་བྱེད་

པའི་ཕྱིར་རོ་ཞེས་སྨྲ་བ་རྣམས་ཀྱིས་ནི་དོན་གྱི་ཤུགས་ཀྱིས་ན་འདི་སྐད་དུ་ཕོའི་དབང་པོ་ནི་དགོས་པའི་དབང་གིས་བསྐྱེད་པར་བྱ་བ་ཡིན་ནོ་ཞེས་དམ་བཅས་པ་ཡིན་ནོ། །དེ་ཡང་རྗེས་སུ་དཔགས་པས་ཕྱོགས་སུ་མི་རུང་བར་འགྱུར་ཏེ། ཆོས་ཅན་གྱི་ངོ་བོ་ཉིད་ལས་བཟློག་པས་སྐྱོན་

དང་བཅས་པའི་ཕྱིར་རོ། །ཇི་ལྟ་ཞེ་ན། སྨྲས་པ། ཕོའི་དབང་པོ་ནི་དགོས་པའི་དབང་གིས་བསྐྱེད་པར་བྱ་བ་ཡིན་ལ། རང་གི་རྒྱུས་བསྐྱེད་པར་བྱ་བ་ཡིན་པའི་ཕྱིར། ཞར་བ་དང་ཞ་བོ་བཞིན་ནོ། །བྱེ་བྲག་ཏུ་སྨྲ་བ་རྣམས་ཀྱིས་འོ་ན་ནི་མདོ་ལས་དབང་པོ་མ་ཚང་བ་མ་ཡིན་

ཞིང་མེད་པ་མ་ཡིན་ནོ་ཞེས་འབྱུང་བ་དང་འགལ་ལོ་ཞེས་བྱ་བ་རྒྱས་པར་སྨྲས་ཏེ། གཟུགས་ཀྱི་ཁམས་ཀྱི་སེམས་ཅན་གྱི་རྒྱུད་ནི་སྣ་དང་ལྕེའི་དབང་པོ་མེད་པ་ཅན་ཡིན་ནོ་ཞེས་བྱ་བ་གང་ཡིན་པ་འདི་ནི་ཕྱོགས་ཡིན་ནོ། །ཕྱོགས་དེ་ནི་ཕྱོགས་སྔ་མ་དང་འགལ་བའི་ཕྱིར་སྐྱོན་

Vol. 142 · folio 58a

དང་བཅས་པ་ཡིན་ཏེ། འདི་ལྟར་བཅོམ་ལྡན་འདས་ཀྱིས་ནི་གཟུགས་ན་སྤྱོད་པའི་སེམས་ཅན་རྣམས་དབང་པོ་མ་ཚང་བ་མེད་ཅིང་མེད་པ་མ་ཡིན་ནོ་ཞེས་གསུངས་སོ། །དབང་པོ་མ་ཚང་བ་མེད་པ་ནི་ཞར་བ་དང་ཞ་བོ་ལ་སོགས་པ་ཉིད་མེད་པའི་ཕྱིར་

རོ། །མེད་པ་མ་ཡིན་པ་ནི་མིག་ལ་སོགས་པ་མེད་པ་མ་ཡིན་ནོ། །སློབ་དཔོན་གྱིས་དེ་ནི་དབང་པོ་གང་དག་སྲིད་པ་ཞེས་བྱ་བ་རྒྱས་པར་སྨོས་སོ། །མདོའི་དོན་གཟུགས་ཀྱི་ཁམས་དེ་ན་སྣ་དང་ལྕེའི་དབང་པོ་མ་གཏོགས་པའི་མིག་ལ་སོགས་པ་གང་དག་སྲིད་པ་དེ་དག་

གིས་དབང་པོ་མེད་པ་མ་ཡིན་ནོ། །ཞེས་བྱ་བར་བཟུང་བའི་ཕྱིར་འགལ་བ་མེད་དོ། །འདི་སྐད་དུ་བརྗོད་དོ་ཞེས་བྱ་བ་ནི་བྱེ་བྲག་ཏུ་སྨ་བ་རྣམས་སོ། །ཡོད་པ་ཉིད་ཀྱི་ཞེས་བྱ་བ་རྒྱས་པར་འབྱུང་བ་ནི་གཟུགས་ཀྱི་ཁམས་དེ་ན་སྣ་དང་ལྕེའི་དབང་པོ་དག་ནི་ཡོད་པ་ཉིད་ཀྱི་དྲི་དང་རོ་དག་ནི་

མ་ཡིན་ནོ། །སེམས་ཅན་རྣམས་ནི་ལུས་ཀྱི་སྒོ་སྟེ་རང་གི་རྒྱུད་ཀྱི་སྒོ་ནས་མིག་ལ་སོགས་པའི་སྐྱེ་མཆེད་དྲུག་ལ་སྲེད་པ་ཀུན་ཏུ་སྦྱོར་ཅིང་འབྱུང་ལ། ལས་ཀྱང་དེས་མངོན་པར་བརླན་པ་ཡིན་པས་གཟུགས་ཀྱི་ཁམས་ཀྱི་སྣ་དང་ལྕེའི་དབང་པོ་དག་ནི་རྒྱུ་དང་བཅས་པ་ཡིན་ནོ། །དེ་བས་ན་

རྒྱུ་དང་བཅས་པའི་ཕྱིར་གཟུགས་ཀྱི་ཁམས་ན་འདི་དག་ཡོད་པ་ཁོ་ན་སྟེ་རྒྱུ་དང་བཅས་པའི་མྱུ་གུ་ལ་སོགས་པ་བཞིན་ནོ། །འདིས་ནི་གཟུགས་ཀྱི་ཁམས་ན་སྣ་དང་ལྕེའི་དབང་པོ་དག་མེད་དེ། རྒྱུ་མེད་པའི་ཕྱིར་རོ་ཞེས་སྒྲུབ་པ་སྨྲས་པ་གང་ཡིན་པ་དེ་མ་གྲུབ་པོ་ཞེས་བྱ་བར་སྟོན་པར་

བྱེད་དོ། །ཕོའི་དབང་པོ་ནི་འཁྲིག་པའི་སྒོ་ནས་ཏེ། ཅི་ཞེ་ན་སྲེད་པ་ཀུན་ཏུ་སྤྱོད་ཅེས་བྱ་བར་སྐབས་དང་སྦྱར་རོ། །གཟུགས་ན་སྤྱོད་པའི་སེམས་ཅན་རྣམས་ནི་འཁྲིག་པའི་འདོད་ཆགས་དང་བྲལ་བ་ཡིན་ཏེ། དེ་ལྟ་བས་ན་དེ་ལ་སྲིད་པ་སྔོན་དུ་འགྲོ་བའི་ལས་མེད་དོ། །དེ་ལྟ་བས་

ན་རྒྱུ་མེད་པའི་ཕྱིར་དེ་ན་ཕོའི་དབང་པོ་མེད་དེ། རྒྱུ་མེད་པའི་མྱུ་གུ་ལ་སོགས་པ་ལྟ་བུ་ཡིན་པས་གཟུགས་ཀྱི་ཁམས་ན་ཁམས་བཅུ་བཞིའོ་ཞེས་བྱ་བ་གྲུབ་པ་ཡིན་ནོ། །གཟུགས་མེད་གཏོགས་པ་ཞེས་བྱ་བ་རྒྱས་པར་འབྱུང་བ་ནི། ཡིད་དང་ནི། ཆོས་དང་ཡིད་ཀྱི་རྣམ་ཤེས་ཁམས། །

Vol. 142 · folio 58b

དག་ཁོ་ན་གཟུགས་མེད་པའི་ཁམས་སུ་གཏོགས་པ་ཡིན་ནོ་ཞེས་བྱ་བར་ངེས་པར་བཟུང་བའི་ཕྱིར་ཁམས་གཞན་དག་ནི་མེད་དོ་ཞེས་བཤད་པ་ཡིན་ནོ། །གང་གི་ཕྱིར་གཟུགས་ཀྱི་འདོད་ཆགས་དང་བྲལ་བ་རྣམས་དེར་སྐྱེ་བ་དེའི་ཕྱིར་དེ་ན་གཟུགས་ཅན་གྱི་རང་བཞིན་གྱི་ཁམས་བཅུ་པོ་

མིག་ལ་སོགས་པ་ལྔ་དང་གཟུགས་ལ་སོགས་པ་ལྔ་ཡང་མེད་དོ། །དེ་དག་ལ་བརྟེན་པ་དང་དམིགས་པ་རྣམ་པར་ཤེས་པའི་ཁམས་ལྔ་ཡང་མེད་དོ་ཞེས་བྱ་བ་ནི་གང་དག་ལ་གོ་རིམས་བཞིན་དུ་རྟེན་དང་དམིགས་པ་མིག་ལ་སོགས་པ་དང་གཟུགས་ལ་སོགས་པ་དེ་དག་ཡོད་པ་དེ་

དག་ནི་དེ་དག་ལ་བརྟེན་པ་དང་དམིགས་པ་ཡིན་ནོ། །དེ་ན་དམིགས་པ་ལ་སོགས་པ་རྟེན་རྣམས་དང་གཟུགས་ལ་སོགས་པ་དམིགས་པ་རྣམས་མེད་པའི་ཕྱིར་མིག་གི་རྣམ་པར་ཤེས་པ་ལ་སོགས་པའི་ཁམས་དེ་དག་ཀྱང་མེད་དོ། །དེ་གསུམ་ཟག་བཅས་ཟག་པ་མེད། །ཅེས་བྱ་བ་

ནི་འདི་གསུམ་ཁོ་ན་ཟག་པ་དང་བཅས་པ་དང་ཟག་པ་མེད་པ་ཡིན་ནོ་ཞེས་ངེས་པར་བཟུང་བ་ཡིན་ནོ། །ལྷག་མ་རྣམས་ནི་ཟག་བཅས་སོ། །ཞེས་བྱ་བ་འདི་ཅིའི་ཕྱིར་བརྗོད། འདི་གསུམ་ཁོ་ན་ཟག་པ་དང་བཅས་པ་དང་ཟག་པ་མེད་པ་ཡིན་ནོ་ཞེས་ངེས་པར་བཟུང་བས་

ལྷག་མ་རྣམས་ནི་ཟག་པ་དང་བཅས་པ་ཡིན་ནོ་ཞེས་བྱ་བར་གྲུབ་པ་མ་ཡིན་ནམ་ཞེ་ན་མ་གྲུབ་བོ། །ཇི་ལྟ་ཞེ་ན་ལྷག་མ་རྣམས་ཟག་པ་དང་བཅས་པ་ཁོ་ན་ཞིག་ཡིན་ནམ་ཟག་པ་མེད་པ་ཁོ་ན་ཞིག་ཡིན་སྙམ་དུ་ཐེ་ཚོམ་ཟ་བར་འགྱུར་རོ། །དེ་དག་བཟློག་པའི་ཕྱིར། ལྷག་མ་རྣམས་

ནི་ཟག་བཅས་སོ། །ཞེས་བྱ་བ་འདི་བརྗོད་དོ། །རྟོག་དང་དཔྱོད་དང་བཅས་པ་ནི། །རྣམ་པར་ཤེས་པའི་ཁམས་ལྔ་ཡིན། །ཞེས་བྱ་བ་ལ་ནི་ཞེས་བྱ་བའི་སྒྲ་ནི་རྟོག་པ་དང་དཔྱོད་པ་དང་བཅས་པ་ཁོ་ནའོ་ཞེས་ངེས་པར་བཟུང་བ་ཡིན་ནོ། །ཐ་མ་གསུམ་ནི་རྣམ་གསུམ་མོ། །ཞེས་

བྱ་བ་ནི་ཐ་མ་དག་ཁོ་ན་རྣམ་པ་གསུམ་མོ་ཞེས་ངེས་པར་བཟུང་བ་ཡིན་ནོ། །རྟོག་པ་དང་དཔྱོད་པ་དག་ལས་གཞན་ཞེས་བྱ་བ་ནི་རྟོག་པ་དང་དཔྱོད་པ་དག་ནི་ཆོས་ཀྱི་ཁམས་མཚུངས་པ་དང་ལྡན་པའི་ངོ་བོ་ཡིན་ཏེ། དེ་གཉིས་འདིར་བསྡུས་པར་ཐལ་བར་འགྱུར་བས་ཡོངས་སུ་སྤང་

Vol. 142 · folio 59a

བར་བྱའོ། །རྟོག་པ་ནི་རྣམ་པ་གཞན་གཉིས་པའི་ནང་དུ་འདུ་བར་འགྱུར་རོ། །དཔྱོད་པ་ཡང་བསམ་གཏན་ཁྱད་པར་ཅན་ལས་སྐྱེས་པ་ནི་རྣམ་པ་གསུམ་པའི་ནང་དུ་འདུའོ། །དེ་ལས་གཞན་པ་ནི་རྣམ་པ་གསུམ་ཆར་གྱི་ནང་དུ་ཡང་མི་འདུའོ་ཞེས་

འཆད་པར་འགྱུར་རོ། །ཡིད་ཀྱི་ཁམས་ལ་སོགས་པ་ཆོས་ཀྱི་ཁམས་མཚུངས་པར་ལྡན་པ་ལ་ཐུག་པའི་བར་འདི་དག་འདོད་པའི་ཁམས་དང་བསམ་གཏན་དང་པོའི་དངོས་གཞི་ཉེར་བསྡོགས་དང་བཅས་པ་ན་ནི་རྟོག་པ་དང་བཅས་དཔྱོད་པ་དང་བཅས་པ་དག་ཡིན་ཏེ་རྟོག་པ་

དང་དཔྱོད་པ་དང་མཚུངས་པར་ལྡན་པའི་ཕྱིར་རོ། །དེ་ཉིད་ཀྱི་ཕྱིར་བསམ་གཏན་ཁྱད་པར་ཅན་ན་ནི་རྟོག་པ་མེད་པའི་ཕྱིར་རྟོག་པ་མེད་པ་ཡིན་ལ་དཔྱོད་པ་དང་མཚུངས་པར་ལྡན་པའི་ཕྱིར་དཔྱོད་པ་ཙམ་ཡིན་ནོ། །དེ་ཉིད་ཀྱི་ཕྱིར་གཉིས་པ་ནས་བཟུང་སྟེ། སྲིད་པའི་རྩེ་མོའི་བར་གྱི་ནི་

རྟོག་པ་ཡང་མེད་ལ་དཔྱོད་པ་ཡང་མེད་པ་ཡིན་ནོ། །ཆོས་ཀྱི་ཁམས་མཚུངས་པར་ལྡན་པ་མ་ཡིན་པ་ཐམས་ཅད་དང་ཞེས་བྱ་བ་ནི་ཅི་རིགས་པར་ཁམས་གསུམ་པའི་གཟུགས་དང་སེམས་དང་ལྡན་པ་མ་ཡིན་པ་དང་འདུས་མ་བྱས་རྣམས་སོ། །བསམ་གཏན་ཁྱད་པར་ཅན་གྱི་དཔྱོད་

པ་ནི། རྟོག་པ་མེད་པའི་ཕྱིར་རྟོག་པ་ཡང་མེད་ལ། དཔྱོད་པ་གཉིས་པ་མེད་པའི་ཕྱིར་དཔྱོད་པ་ཡང་མེད་པ་ཡིན་ནོ། །དཔྱོད་པ་རྣམ་པ་གསུམ་པོ་འདི་དག་གི་ནང་དུ་མི་འདུ་ན་ཞེས་བྱ་བ་ནི་འདོད་པའི་ཁམས་དང་བསམ་གཏན་དང་པོའི་ས་པའི་དཔྱོད་པ་ནི་རེ་ཞིག་རྣམ་པ་

དང་པོ་རྟོག་པ་དང་བཅས་དཔྱོད་པ་དང་བཅས་པ་ཞེས་བྱ་བའི་ནང་དུ་ནི་མི་འདུ་སྟེ། དེ་ནི་རྟོག་པ་དང་བཅས་པ་ཡིན་མོད་ཀྱི་དཔྱོད་པ་དང་བཅས་པ་ནི་མ་ཡིན་ཏེ། དཔྱོད་པ་དང་མཚུངས་པར་མི་ལྡན་པའི་ཕྱིར་རོ། །གཉིས་པ་རྟོག་པ་མེད་ཅིང་དཔྱོད་པ་ཙམ་ཞེས་བྱ་བའི་ནང་དུ་

ཡང་མི་འདུ་སྟེ་རྟོག་པ་དང་མཚུངས་པར་ལྡན་པའི་ཕྱིར་དང་དཔྱོད་པ་གཉིས་པ་མེད་པའི་ཕྱིར་རོ། །གསུམ་པ་རྟོག་པ་ཡང་མེད་དཔྱོད་པ་ཡང་མེད་ཅེས་བྱ་བའི་ནང་དུ་ཡང་མི་འདུ་སྟེ། དེ་ནི་དཔྱོད་པ་གཉིས་པ་མེད་པའི་ཕྱིར། དཔྱོད་པ་མེད་པ་ཡིན་མོད་ཀྱི་རྟོག་པ་མེད་པ་ནི་མ་ཡིན་

Vol. 142 · folio 59b

ཏེ། རྟོག་པ་དང་མཚུངས་པར་ལྡན་པའི་ཕྱིར་རོ། །དེ་ཅི་སྐད་དུ་བརྗོད་པར་བྱ་ཞེ་ན། དེའི་ཕྱིར་དཔྱོད་པ་མེད་ཅིང་རྟོག་པ་ཙམ་ཡིན་ནོ་ཞེས་བྱ་བ་སྨོས་ཏེ། དཔྱོད་པ་གཉིས་པ་མེད་པའི་ཕྱིར་དཔྱོད་པ་མེད་པའོ། །རྟོག་པ་དང་མཚུངས་པར་ལྡན་པའི་ཕྱིར་རྟོག་པ་ཙམ་མོ། །དེ་ཉིད་

ཀྱི་ཕྱིར་ཞེས་བྱ་བ་ནི་གང་གི་ཕྱིར་རྟོག་པ་དང་དཔྱོད་པ་དང་བཅས་པའི་ས་ན་དཔྱོད་པ་མེད་ཅིང་རྟོག་པ་ཙམ་ཞེས་བྱ་བ་དཔྱོད་པ་དེ་ལྟ་བུ་ནི་རྣམ་པ་བཞི་པ་ཡིན་ནོ། །ལྷག་མ་རྣམས་ནི་གཉི་ག་སྤངས་ཞེས་བྱ་བ་ནི་ལྷག་མ་ནི་མ་བཤད་པ་གཟུགས་ཅན་གྱི་ཁམས་བཅུ་ཡིན་ནོ། །དེ་དག་

རྟོག་པ་མེད་ཅིང་དཔྱོད་པ་ཙམ་ཞིག་གམ་རྟོག་པ་ཡང་མེད་དཔྱོད་པ་ཡང་མེད་པ་ཞིག་ཡིན་སྙམ་དུ་ཐེ་ཚོམ་ཟ་བས་ལྷག་མ་རྣམས་ནི་གཉི་ག་སྤངས་པ་ཁོ་ནའོ་ཞེས་ངེས་པར་འཛིན་པར་བྱེད་པ་ཡིན་ཏེ། རྟོག་པ་ཡང་མེད་དཔྱོད་པ་ཡང་མེད་པ་ཁོ་ནའོ་ཞེས་བྱ་བའི་ཐ་ཚིག་གོ། །ཇི་ལྟར་ན་

རྣམ་པར་རྟོག་པ་མེད་པ་དག་ཅེས་བྱ་ཞེ་ན་ཞེས་བྱ་བ་ནི་མིག་གི་རྣམ་པར་ཤེས་པ་དང་ལྡན་པས་སྔོན་པོ་ཤེས་ཀྱི། སྔོན་པོའོ་སྙམ་དུ་མ་ཡིན་ནོ་ཞེས་འབྱུང་བའི་ཕྱིར་རོ། །རྣམ་པར་རྟོག་པ་ནི་རྣམ་པ་གསུམ་མོ་ཞེས་གྲག་གོ་ཞེས་བྱ་བ་ལ། གྲག་ཅེས་བྱ་བའི་སྒྲ་ནི་གཞན་གྱི་གཞུང་

ལུགས་རྗོད་པར་བྱེད་པ་ཡིན་ནོ། །རང་གི་བསམས་པ་ནི་སེམས་པ་དང་ཤེས་རབ་ཀྱི་ཁྱད་པར་ཡིན་པས་ངོ་བོ་ཉིད་ཀྱི་རྣམ་པར་རྟོག་པ་ཆོས་གཞན་ནི་མེད་དོ་སྙམ་པ་ཡིན་ཏེ། འདི་ལྟར་འདིས་ཕུང་པོ་ལྔ་པ་ལས་རྟོག་པ་གང་ཞེ་ན། ཀུན་ཏུ་ཚོལ་བ་ཡིད་ཀྱི་བརྗོད་པ་དེ་སེམས་པ་

དང་ཤེས་རབ་ཀྱི་ཁྱད་པར་གང་སེམས་རྩིང་བའོ། །དཔྱོད་པ་གང་ཞེ་ན། སོ་སོར་རྟོག་པ་ཡིད་ཀྱི་བརྗོད་པ་སྟེ་སེམས་པ་དང་ཤེས་རབ་ཀྱི་ཁྱད་པར་དེ་བཞིན་དུ་གང་སེམས་ཞིབ་པའོ་ཞེས་བཤད་དེ། གཏན་ལ་མི་འབེབས་པའི་གནས་སྐབས་ན་ནི་སེམས་པའོ། །གཏན་ལ་

འབེབས་པའི་གནས་སྐབས་ན་ནི་ཤེས་རབ་བོ་ཞེས་རྣམ་པར་གཞག་གོ།། །།བམ་པོ་དྲུག་པ། དེ་བས་ན་དེ་དག་ལ་ངོ་བོ་ཉིད་ཀྱི་རྟོག་པ་ཡོད་ཀྱི་ཞེས་བྱ་བ་ལ་དེ་བས་ན་ཞེས་བྱ་བ་ནི་ཚིག་གི་ཕྲད་དམ་དེ་ལྟ་བས་ན་ཞེས་བྱ་བའི་དོན་ཡིན་ནོ། །ངོ་བོ་ཉིད་ཁོ་

Vol. 142 · folio 60a

ནས་རྣམ་པར་རྟོག་པ་རྩིང་བའི་མཚན་ཉིད་ཡིན་པའི་ཕྱིར་ངོ་བོ་ཉིད་ཀྱི་རྣམ་པར་རྟོག་པ་ནི་རྟོག་པ་ཡིན་ནོ། །དེ་རྣམ་པར་ཤེས་པའི་ཚོགས་ལྔ་པོ་འདི་རྣམས་ལ་མཚུངས་པར་ལྡན་པའི་སྒོ་ནས་ཡོད་དེ་དེ་ལྟ་བས་ན་རྣམ་པར་རྟོག་པ་དང་བཅས་པ་དག་ཅེས་

བྱ་བའོ། །གཞན་དག་ནི་མ་ཡིན་ཏེ་ཞེས་བྱ་བ་ནི་འདི་དག་ལ་ངེས་པར་རྟོག་པ་དང་རྗེས་སུ་དྲན་པའི་རྣམ་པར་རྟོག་པ་དག་མེད་དེ། དེ་ལྟ་བས་ན་རྣམ་པར་རྟོག་པ་མེད་པ་དག་ཅེས་བྱའོ། །དཔེར་ན་རྟ་རྐང་གཅིག་པ་ལ་རྐང་མེད་ཅེས་བྱ་བ་བཞིན་ནོ་ཞེས་བྱ་བ་ལ། རྐང་པ་

གསུམ་བཅད་ནས་རྐང་པ་གཅིག་ཡོད་ཀྱང་རྐང་མེད་ཅེས་བྱ་བ་དེ་བཞིན་དུ་རྣམ་པར་རྟོག་པ་གཅིག་ཡོད་པ་ལ་ཡང་རྣམ་པར་རྟོག་པ་མེད་པ་ཞེས་བྱའོ། །དེ་ནི་ངེས་པར་རྟོག་པའི་རྣམ་པར་རྟོག་པའོ་ཞེས་བྱ་བ་ནི་ཡིད་ཀྱི་ཤེས་རབ་མཉམ་པར་གཞག་པ་མ་ཡིན་པ་ཐོས་པ་དང་

བསམས་པ་ལས་བྱུང་བ་དང་སྐྱེས་ནས་ཐོབ་པའོ། །དེ་ནི་ཡིད་ལ་ཡོད་པས་ན་ཡིད་ཀྱིའོ། །གཡེང་ཞེས་བྱ་བ་ནི་སྣ་ཚོགས་པ་སྟེ་དམིགས་པ་སྣ་ཚོགས་པ་ཞེས་བྱ་བའི་ཐ་ཚིག་གོ། །ཡང་ན་ཟབ་པ་དང་བྲལ་བ་སྟེ་ཡང་དང་ཡང་དུ་དམིགས་པ་ལ་བརྟེན་པའི་ཕྱིར་གཡེང་བའོ། །ཅིའི་

ཕྱིར་ངེས་པར་རྟོག་པའི་རྣམ་པར་རྟོག་པ་ཞེས་བྱ་ཞེ་ན། དམིགས་པ་དེ་དང་དེ་ལ་མིང་དུ་ལྟོས་ནས་འཇུག་པའི་ཕྱིར་དང་གཟུགས་དང་ཚོར་བ་དང་མི་རྟག་པ་དང་སྡུག་བསྔལ་བ་ཞེས་བྱ་བ་ལ་སོགས་པར་ངེས་པར་རྟོག་པའི་ཕྱིར་རོ། །མཉམ་པར་གཞག་པ་ནི་བསྒོམས་པ་ལས་བྱུང་བ་

སྟེ་མིང་ལ་མི་ལྟོས་པར་དམིགས་པ་ལ་འཇུག་པས་འདི་ནི་ངེས་པར་རྟོག་པའི་རྣམ་པར་རྟོག་པ་ཞེས་མི་བྱའོ། །ཡིད་ཀྱི་དྲན་པ་ཉིད་མཉམ་པར་གཞག་པ་དང་མཉམ་པར་གཞག་པ་མ་ཡིན་པ་ཐམས་ཅད་ཅེས་བྱ་བ་ནི་མཉམ་པར་གཞག་པ་དང་མཉམ་པར་གཞག་པ་མ་ཡིན་

པའོ། །དེ་ནི་མཚན་ཉིད་དྲན་པ་གང་ཞེ་ན། སེམས་ཀྱིས་མངོན་པར་བརྗོད་པའོ་ཞེས་འབྱུང་བའི་ཕྱིར་མིང་ལ་མི་ལྟོས་པར་དམིགས་པའི་དོན་ཉམས་སུ་མྱོང་བ་ཙམ་ལ་འཇུག་པ་ཡིན་ནོ་ཞེས་གྲག་གོ། །རྣམ་པར་ཤེས་པའི་ཚོགས་ལྔ་དང་མཚུངས་པར་ལྡན་པ་ནི་ཉམས་སུ་མྱོང་བ་

Vol. 142 · folio 60b

དོན་མངོན་པར་བརྗོད་པ་ལ་འཇུག་པ་མ་ཡིན་པའི་ཕྱིར་རྗེས་སུ་དྲན་པའི་རྣམ་པར་རྟོག་པ་ཡིན་པར་མི་འདོད་དོ། །དམིགས་བཅས་སེམས་ཀྱི་ཁམས་བདུན་ནོ། །ཞེས་བྱ་བ་ནི་བདུན་ཁོ་ན་དམིགས་པ་དང་བཅས་པ་ཡིན་ལ་དམིགས་པ་དང་བཅས་པ་ཁོ་ན་བདུན་ཡིན་ནོ་ཞེས་གཉི་

གར་ངེས་པར་བཟུང་བ་ཡིན་ནོ། །ཆོས་ཀྱི་ཕྱེད་ཀྱང་དམིགས་པ་དང་བཅས་པ་ཡིན་ཏེ་ཞེས་བྱ་བ་འདི་ནི་བཤད་ཟིན་པ་ལས་མ་གཏོགས་པར་བརྗོད་པ་ཡིན་ཏེ། འདིར་ཡང་ཆོས་ཀྱི་ཕྱེད་ཁོ་ན་དམིགས་པ་དང་བཅས་པ་ཡིན་ལ་དམིགས་པ་དང་བཅས་པ་ཁོ་ན་ཡང་ཆོས་ཀྱི་ཕྱེད་

ཡིན་ནོ་ཞེས་གཉི་གར་ངེས་པར་གཟུང་བ་ཡིན་ནོ། །གང་གི་ཕྱིར་བདུན་ཁོ་ན་དམིགས་པ་དང་བཅས་པ་དང་ཆོས་ཀྱི་ཕྱེད་ཁོ་ན་དམིགས་པ་དང་བཅས་པའོ་ཞེས་བྱ་བར་ངེས་པར་བཟུང་བ་ཡོད་པ་དེའི་ཕྱིར། ལྷག་མ་གཟུགས་ཅན་གྱི་ཁམས་བཅུ་པོ་དག་དང་ཆོས་ཀྱི་ཁམས་ཀྱི་

ཕྱོགས་ལྡན་པ་མ་ཡིན་པ་ནི་དམིགས་པ་མེད་པ་ཞེས་བྱ་བར་གྲུབ་པོ་ཞེས་བྱ་བར་བཤད་པ་ཡིན་ནོ། །འདི་ལྟར་ངེས་པར་མ་བཟུང་ན་ནི་དོན་འདི་གྲུབ་པར་མི་འགྱུར་རོ། །མ་ཟིན་དགུ་ཞེས་བྱ་བ་ནི་དགུ་ནི་མ་ཟིན་པ་ཁོ་ནའོ་ཞེས་ངེས་པར་བཟུང་བ་ཡིན་ནོ། །བརྒྱད་པའི་ཕྱེད་དང་

བཅས་ཏེ་ཞེས་བྱ་བ་ནི་ལྷན་ཅིག་ཅེས་བྱ་བའི་ཐ་ཚིག་གོ། །བརྒྱད་པོ་དེ་དག་རྣམས་ཞེས་བྱ་བ་ནི་སེམས་ཀྱི་ཁམས་བདུན་པོ་དེ་དག་དང་གང་གི་ཕྱེད་དམིགས་པ་དང་བཅས་པར་བཤད་པའི་ཆོས་ཀྱི་ཁམས་སོ། །བརྒྱད་སྨོས་པ་ནི་ཆོས་ཀྱི་ཁམས་ཀྱི་ཕྱེད་བསྡུས་པར་ཤེས་པར་

འགྱུར་ན་མི་རུང་བས་ཆོས་ཀྱི་ཁམས་མཐའ་དག་བསྡུ་བའི་དོན་ཡིན་ཏེ། བརྒྱད་པོ་དེ་དག་དང་གཞན་སྒྲ་དང་དགུ་ནི་མ་ཟིན་པ་ཡིན་ནོ་ཞེས་བཤད་པ་ཡིན་ནོ། །དགུ་པོ་གཞན་ནི་རྣམ་པ་གཉིས་ཞེས་བྱ་བ་ལ་དགུ་ནི་མིག་ལ་སོགས་པ་ལྔ་དང་སྒྲ་མ་གཏོགས་པ་གཟུགས་ལ་སོགས་

པ་བཞིའོ། །དེ་དག་ནི་རྣམ་པ་གཉིས་ཁོ་ན་སྟེ། ཟིན་པ་དང་མ་ཟིན་པ་ཁོ་ན་ཡིན་ཞེས་བྱ་བའི་ཐ་ཚིག་གིས་ཟིན་པ་ཁོ་ན་ནི་མ་ཡིན་ནོ་ཞེས་བྱ་བ་འདིའི་དོན་དུ། དགུ་པོ་གཞན་ནི་རྣམ་པ་གཉིས། །ཞེས་ཀྱང་མདོར་བྱས་སོ། །ཕན་པ་དང་གནོད་པ་དག་གིས་ཕན་ཚུན་མཐུན་པར་

Vol. 142 · folio 61a

བྱེད་པའི་ཕྱིར་ཞེས་བྱ་བ་ནི་མིག་གི་ཁམས་ལ་སོགས་པ་ལ་ཕན་པ་དང་གནོད་པ་མིག་སྨན་དང་ལག་པས་བསྣུན་པ་ལ་སོགས་པའི་མཚན་ཉིད་དག་གིས་ཀྱང་སེམས་དང་སེམས་ལས་བྱུང་བ་རྣམས་ལ་ཕན་པ་དང་གནོད་པ་དག་ཏུ་འགྱུར་ལ་སེམས་

དང་སེམས་ལས་བྱུང་བ་རྣམས་ལ་ཕན་པ་དང་གནོད་པ་ཡིད་བདེ་བ་དང་ཡིད་མི་བདེ་བའི་མཚན་ཉིད་དག་གིས་ཀྱང་མིག་གི་ཁམས་ལ་སོགས་པ་ལ་ཕན་པ་དང་གནོད་པ་དག་ཏུ་འགྱུར་རོ། །དེའི་ཕྱིར་སེམས་དང་སེམས་ལས་བྱུང་བ་རྣམས་ཀྱིས་རྟེན་གྱི་དངོས་པོས་ཉེ་བར་

བཟུང་བ་ཞེས་བྱ་བ་སྟེ། བདག་གིར་བྱས་ཞེས་བྱ་བའི་ཐ་ཚིག་གོ། །འཇིག་རྟེན་ན་སེམས་པ་དང་བཅས་པ་ཞེས་བརྗོད་པ་གང་ཡིན་པའོ་ཞེས་བྱ་བ་ནི་སྲོག་དང་བཅས་པ་ཞེས་བྱ་བའི་ཐ་ཚིག་གོ། །རེག་བྱ་རྣམ་པ་གཉིས་ཡིན་ཏེ། །ཞེས་བྱ་བ་ནི་རེག་བྱ་ཁོ་ན་རྣམ་པ་གཉིས་

ཡིན་ལ་རྣམ་པ་གཉིས་ཁོ་ན་རེག་བྱ་ཡིན་ནོ་ཞེས་གཉི་གར་ངེས་པར་བཟུང་བ་ཡིན་ནོ། །ལྷག་མ་གཟུགས་ཅན་དགུ་པོ་ནི། །འབྱུང་གྱུར་ཅེས་བྱ་བ་འདིར་ཡང་གཉི་གར་ངེས་པར་བཟུང་བ་ཡིན་ནོ། །ཆོས་ཁམས་ཕྱོགས་གཅིག་ཀྱང་། འབྱུང་བ་ལས་གྱུར་པ་ཡིན་ཞེས་བྱ་བ་

འདིར་ཡང་གཉི་གར་ངེས་པར་བཟུང་བ་ཡིན་ནོ། །གང་གི་ཕྱིར་འདི་དག་གཉི་གར་ངེས་པར་བཟུང་བ་དེའི་ཕྱིར། ལྷག་མ་སེམས་ཀྱི་ཁམས་བདུན་དང་རྣམ་པར་རིག་བྱེད་མ་ཡིན་པ་མ་གཏོགས་པ་ཆོས་ཀྱི་ཁམས་ནི་གཉི་ག་མ་ཡིན་པའོ་ཞེས་བྱ་བར་གྲུབ་པ་ཡིན་ནོ། །

འབྱུང་བ་རྣམ་པ་བཞི་ཉིད་དང་སྲ་བ་ལ་སོགས་པའི་མཚན་ཉིད་དུ་ངེས་པར་བཟུང་བའི་ཕྱིར་ཞེས་བྱ་བ་ནི་བཞི་ཉིད་དུ་ངེས་པར་བཟུང་བའི་ཕྱིར་རེག་བྱའི་ཁམས་ལ་ས་དང་ཆུ་དང་མེ་དང་རླུང་གི་ཁམས་དང་འབྱུང་བ་བཞི་ཡོད་པ་ཡིན་ནོ། །དེ་ལ་འཇམ་པ་ཉིད་ལ་སོགས་པ་དང་

མིག་ལ་སོགས་པ་ནི་འབྱུང་བ་དག་མ་ཡིན་ནོ། །སྲ་བ་ལ་སོགས་པའི་མཚན་ཉིད་དུ་ངེས་པར་བཟུང་བའི་ཕྱིར་ས་དང་ཆུ་དང་མེ་དང་རླུང་གི་ཁམས་དག་གི་ནང་དུ་མིག་ལ་སོགས་པ་ཆོས་གཞན་འདུ་བར་མི་འགྱུར་རོ། །ཇི་ལྟ་ཞེ་ན། འབྱུང་བ་ཆེན་པོ་བཞི་ནི་སའི་ཁམས་

Vol. 142 · folio 61b

དང་ཆུའི་ཁམས་དང་མེའི་ཁམས་དང་རླུང་གི་ཁམས་སོ། །སའི་ཁམས་གང་ཞེ་ན། སྲ་བ་ཉིད་དོ་ཞེས་བྱ་བ་རྒྱས་པར་འབྱུང་བ་ཡིན་ནོ། །དེ་དག་ཀྱང་རེག་བྱ་ཡིན་པའི་ཕྱིར་ཞེས་བྱ་བ་ནི་སྲ་བ་ལ་སོགས་པ་དེ་དག་རེག་བྱ་ཡིན་པའི་ཕྱིར་རོ། །འདི་ལྟར་དེ་དག་ནི་རེག་བྱ་

ཡིན་ལ་ཁ་དོག་ལ་སོགས་པ་ནི་བལྟ་བྱ་དང་མཉན་བྱ་དང་བསྣམ་བྱ་དང་མྱང་བྱ་ཡིན་ནོ། །དེ་དག་རེག་བྱ་ཡིན་པར་ཇི་ལྟར་ཤེས་ཤེ་ན། དེའི་ཕྱིར་སྨྲས་པ། མིག་ལ་སོགས་པས་ཀྱང་སྲ་བ་ལ་སོགས་པ་མི་འཛིན་ཏོ། །འོ་ན་ཅི་ཞེ་ན། ལུས་ཀྱི་དབང་པོ་ཁོ་ནས་ཏེ། དེའི་

ཕྱིར་དེ་དག་ནི་རེག་བྱ་ཡིན་ནོ་ཞེས་བྱ་བར་ཤེས་སོ། །གལ་ཏེ་ཁ་དོག་ལ་སོགས་པ་དེ་དག་ཀྱང་རེག་བྱ་ཡིན་ནོ་སྙམ་དུ་སེམས་ན། དེའི་ཕྱིར་ལུས་ཀྱི་དབང་པོས་ཀྱང་ཁ་དོག་ལ་སོགས་པ་མ་ཡིན་ནོ་ཞེས་བྱ་བ་སྨོས་ཏེ། ཅི་ཞེ་ན་འཛིན་པ་ཞེས་བྱ་བར་སྐབས་དང་སྦྱར་རོ། །

མདོ་ལས་ཀྱང་ཞེས་བྱ་བ་རྒྱས་པར་འབྱུང་བ་ནི་མདོ་གཞན་ལས་ཀྱང་རྒྱས་པར་བསྟན་པ་ཡིན་ནོ། །ཇི་ལྟར་ཞེ་ན། དགེ་སློང་རེག་བྱ་རྣམས་ནི་ཕྱིའི་སྐྱེ་མཆེད་ཡིན་ཏེ་འབྱུང་བ་ཆེན་པོ་བཞི་དག་དང་འབྱུང་བ་ཆེན་པོ་བཞི་དག་རྒྱུར་བྱས་པ་གཟུགས་ཅན་བསྟན་དུ་མེད་པ་ཐོགས་

པ་དང་བཅས་པའོ་ཞེས་བྱ་བའི་བར་འདི་རྒྱས་པར་གསུངས་ཏེ། ལྷག་མ་མིག་ལ་སོགས་པའི་སྐྱེ་མཆེད་ནི་འབྱུང་བ་དག་མ་ཡིན་ཞེས་གསལ་བར་ཀུན་ཏུ་བསྟན་པ་ཡིན་ནོ། །འོ་ན་མདོ་ལས་གང་ཞེས་བྱ་བ་རྒྱས་པར་འབྱུང་བ་ལ། མིག་གི་ཤའི་གོང་བུ་ལ་སྲ་བ་དང་མཁྲང་

བར་གྱུར་པ་གང་ཡིན་པ་ཞེས་བྱ་བ་ནི་མཁྲང་བའི་རྣམ་པ་ཞེས་བྱ་བའི་ཐ་ཚིག་སྟེ། མིག་གི་དབང་པོ་ནི་སྲ་བའི་ངོ་བོ་ཉིད་ཡིན་ནོ་སྙམ་དུ་བསམས་ནས་རྒོལ་བར་བྱེད་པ་ཡིན་ནོ། །དེ་དང་ཐ་མི་དད་པར་འདུག་པའི་ཤའི་གོང་བུ་ལ་དེ་སྐད་དུ་བསྟན་པར་ཟད་དོ་ཞེས་བྱ་བ་ནི་མིག་

གི་དབང་པོ་དང་ཐ་མི་དད་པར་འདུག་པའི་རྟེན་ལ་དེ་སྐད་ཅེས་བརྗོད་པ་ཡིན་ནོ། །མིག་གི་རྟེན་ལ་ཡང་མིག་ཉེ་བར་འདོགས་པར་འགྱུར་རོ། །དེ་ཉིད་ཀྱི་ཕྱིར་ཤའི་གོང་བུ་ཞེས་སྨོས་ཀྱི་དེ་ལྟ་མ་ཡིན་ཏེ། གལ་ཏེ་དབང་པོ་ཁོ་ན་ཡིན་པར་བཞེད་ན་མིག་ལ་ཞེས་བྱ་བ་ཁོ་ན་ཞིག་

Vol. 142 · folio 62a

བཤད་པར་འགྱུར་རོ། །མི་འདི་ནི་ཁམས་དྲུག་པ་ཡིན་ཞེས་བྱ་བ་རྒྱས་པར་འབྱུང་བ་ནི་མངལ་དུ་འཇུག་པའི་སྒོ་ལས་སམ་ནུར་ནུར་པོ་ལ་སོགས་པའི་གནས་སྐབས་ནའོ། །འབྱུང་བ་ཙམ་ཡིན་པར་བསྟན་པའི་ཕྱིར་འབྱུང་བ་ལས་གྱུར་པ་མེད་དོ་ཞེས་བྱ་བའི་ཀླན་ཀའི་

དོགས་པ་བསྡུ་བར། སེམས་ཅན་གྱི་རྫས་ཀྱི་གཞི་བསྟན་པའི་ཕྱིར་ཞེས་བྱ་བ་སྨོས་ཏེ། སེམས་ཅན་གྱི་རྫས་ཀྱི་གཞི་ཡང་དག་པར་བསྟན་པའི་ཕྱིར་རོ། །ས་ལ་སོགས་པ་བཞི་ནི་སེམས་ཅན་གྱི་གཞི་ཡིན་ཏེ། དེ་རྣམས་ལ་སོགས་པ་རེག་པའི་སྐྱེ་མཆེད་ལྔ་པོ་དག་འབྱུང་བའི་ཕྱིར་རོ། །ཡིད་ཀྱི་

ཁམས་ཀྱང་སེམས་ཀྱི་གཞི་ཡིན་ཏེ། དེ་ལས་ཡིད་ཀྱི་རིག་པའི་སྐྱེ་མཆེད་འབྱུང་བའི་ཕྱིར་རོ། །རྣམ་པ་གཅིག་ཏུ་ན་སའི་ཁམས་ལ་སོགས་པ་བཞི་ནི་རྒྱུར་བྱས་པའི་གཟུགས་ཀྱི་རྟེན་ཡིན་པའི་ཕྱིར་ལ། རྣམ་པར་ཤེས་པའི་ཁམས་ཀྱང་སེམས་ལས་བྱུང་བ་རྣམས་ཀྱི་རྟེན་ཡིན་པའི་ཕྱིར་ཏེ། དེ་ཉིད་ཀྱི་

ཕྱིར་སེམས་ཅན་གྱི་གཞི་ཡིན་ནོ། །ཇི་ལྟར་ཤེས་ཤེ་ན། ཡང་རེག་པའི་སྐྱེ་མཆེད་དྲུག་ཅེས་གསུངས་པའི་ཕྱིར་ཏེ་མདོ་དེ་ཉིད་ལས་ཕྱིས་རེག་པའི་སྐྱེ་མཆེད་ནི་དྲུག་སྟེ། མིག་གི་རེག་པའི་སྐྱེ་མཆེད་ནས་ཡིད་ཀྱི་རེག་པའི་སྐྱེ་མཆེད་ཀྱི་བར་རོ་ཞེས་བྱ་བ་གསུངས་སོ། །དེའི་ཕྱིར་དགེ་སློང་མི་འདི་ནི་ཁམས་དྲུག་

པ་ཡིན་ནོ་ཞེས་གསུངས་པ་ནི་སེམས་ཅན་གྱི་རྫས་ཀྱི་གཞི་ཡང་དག་པར་བསྟན་པའི་ཕྱིར་ཡིན་གྱི་འབྱུང་བ་ཙམ་དུ་གནས་པའི་ཕྱིར་ནི་མ་ཡིན་ནོ་ཞེས་བྱ་བར་ཤེས་སོ། །ཇི་ལྟར་རྣམ་པར་ཤེས་པའི་ཁམས་ལས་ཐ་དད་པ་མ་ཡིན་ཡང་། ཡང་ཡིད་ཀྱི་སྐྱེ་མཆེད་སྨོས་པ་དེ་བཞིན་དུ་མིག་ལ་སོགས་པ་ཡང་

ཁམས་བཞི་ལས་ཐ་དད་པ་མ་ཡིན་བཞིན་དུ་ཡང་བརྗོད་པར་གྱུར་པ་ཞིག་མ་ཡིན་ནམ། དེའི་ཕྱིར་ཡང་རེག་པའི་སྐྱེ་མཆེད་སྨོས་པས་འབྱུང་བ་ལས་གྱུར་པ་ལོགས་ཤིག་ན་ཡོད་པ་ཉིད་དུ་མ་གྲུབ་པོ་ཞེ་ན། དེ་ནི་དེ་ལྟ་མ་ཡིན་ཏེ། གལ་ཏེ་སའི་ཁམས་ལ་སོགས་པ་ཁོ་ན་རེག་པའི་སྐྱེ་མཆེད་དག་ཡིན་པར་

གྱུར་ན་དེ་དག་ཉིད་ཀྱི་རེག་པའི་སྐྱེ་མཆེད་ཅེས་བྱ་བ་ཁོ་ན་བཤད་པར་འགྱུར་བ་ཞིག་ན་དེ་ལྟ་ནི་མ་ཡིན་ནོ། །འོ་ན་ཅི་ཞེ་ན། མིག་གི་རེག་པའི་སྐྱེ་མཆེད་ནས་ཡིད་ཀྱི་རེག་པའི་སྐྱེ་མཆེད་ཀྱི་བར་རོ་ཞེས་གསུངས་ཏེ། དེའི་ཕྱིར་སའི་ཁམས་ལ་སོགས་པ་མ་གཏོགས་པ་མིག་ལ་སོགས་པ་ཡོད་དོ་ཞེས་བྱ་

Vol. 142 · folio 62b

བར་ཤེས་སོ། །རྣམ་པར་ཤེས་པའི་ཁམས་ནི་མིག་ལ་སོགས་པའི་རེག་པའི་སྐྱེ་མཆེད་སྨོས་པའི་ཞར་ལ་ཡང་བརྗོད་པར་ཟད་དོ། །རེག་པའི་སྐྱེ་མཆེད་ཅེས་བྱ་བའི་དོན་གང་ཡིན་ཞེ་ན། སེམས་ལས་བྱུང་བ་རག་པའི་རྟེན། །ཞེས་བྱ་བའི་ཐ་ཚིག་གོ། །སེམས་ལས་བྱུང་བ་རྣམས་མེད་པར་ཐལ་བར་འགྱུར་

བའི་ཕྱིར་རོ་ཞེས་བྱ་བ་ནི་གལ་ཏེ་དགེ་སློང་མི་འདི་ནི་ཁམས་དྲུག་པ་ཡིན་ནོ་ཞེས་གསུངས་པ་སྒྲ་ཇི་བཞིན་ཁོ་ནར་རྫས་རྣམས་བཟུང་གི་དེ་ལ་བརྟེན་པའི་རྫས་གཞན་དག་མ་ཡིན་ན་དེས་ན་འདིར་རྣམ་པར་ཤེས་པའི་ཁམས་ཙམ་སྨོས་པའི་ཕྱིར་དེ་ལ་བརྟེན་པ་སེམས་ལས་བྱུང་བ་རྣམས་མ་བསྡུས་པར་ཐལ་

བར་འགྱུར་རོ་ཞེས་བྱ་བར་འདིར་འགྱུར་རོ། །གལ་ཏེ་འདོད་པའི་ཕྱིར་ཉེས་པ་མེད་དོ་ཞེ་ན། མ་ཡིན་ཏེ། ཕྱོགས་འདི་ནི་ཉེས་པ་དང་བཅས་པའི་ཕྱིར་རོ། །སེམས་ལས་བྱུང་བ་རྣམས་ནི་སེམས་ཀྱི་ཁྱད་པར་ཁོ་ན་ཡིན་ནོ་ཞེས་བྱ་བའི་ཕྱོགས་འདི་ནི་རང་གི་གྲུབ་པའི་མཐའ་དང་འགལ་བའི་ཕྱིར་ཉེས་པ་དང་

བཅས་པ་ཡིན་ནོ། །དེའི་ཕྱིར་སེམས་ཉིད་སེམས་ལས་བྱུང་བ་རྣམས་ཡིན་ནོ་ཞེས་ཁས་བླང་བར་ཡང་རིགས་པ་མ་ཡིན་ཏེ་ཞེས་བྱ་བ་སྨོས་སོ། །ཅིའི་ཕྱིར་ཞེ་ན། མདོ་ལས་འདུ་ཤེས་དང་སེམས་པའི་ཆོས་འདི་ནི་སེམས་ལས་བྱུང་བ་སེམས་ལ་བརྟེན་པའོ་ཞེས་འབྱུང་བའི་ཕྱིར་རོ། །འདིར་བསྒྲུབ་པ་

ཡང་འབྱུང་སྟེ། འདུ་ཤེས་དང་ཚོར་བ་དག་ནི་སེམས་ལས་དོན་གཞན་དུ་གྱུར་པ་ཡིན་ཏེ། ཕུང་པོ་བསྟན་པ་ལོགས་ཤིག་ཏུ་བསྟན་པའི་ཕྱིར་གཟུགས་ཀྱི་ཕུང་པོ་བཞིན་ནོ། །རྣམ་པ་གཅིག་ཏུ་ན་འདུ་ཤེས་དང་ཚོར་བ་དག་ནི་རང་གི་རྟེན་ལས་དོན་གཞན་དུ་གྱུར་པ་ཡིན་ཏེ། དེ་ལ་བརྟེན་པའི་ཕྱིར་རོ། །གང་

ཞིག་རང་གི་རྟེན་ལ་བརྟེན་པ་དེ་ནི་རང་གི་རྟེན་ལས་དོན་གཞན་དུ་གྱུར་པ་ཡིན་ཏེ། དཔེར་ན་རྩིག་པ་ལ་བརྟེན་པའི་རི་མོ་ལྟ་བུའོ། །སེམས་འདོད་ཆགས་དང་བཅས་པ་ལ་སོགས་པ་འབྱུང་བའི་ཕྱིར་རོ་ཞེས་བྱ་བ་ནི་སེམས་འདོད་ཆགས་དང་བཅས་པས་འདོད་ཆགས་དང་བཅས་པའོ་ཞེས་བྱ་བར་ཡང་དག་

པ་ཇི་ལྟ་བ་བཞིན་རབ་ཏུ་ཤེས་སོ། །སེམས་འདོད་ཆགས་དང་བྲལ་བ་ལ་འདོད་ཆགས་དང་བྲལ་བའོ་ཞེས་བྱ་བར་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །སེམས་ཞེ་སྡང་དང་བཅས་པ་ལ་ཞེ་སྡང་དང་བཅས་པའོ་ཞེས་བྱ་བར་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ་ཞེས་བྱ་བ་རྒྱས་

Vol. 142 · folio 63a

པར་འབྱུང་བ་ཡིན་ནོ། །འདིར་སྒྲུབ་པ་ནི་སེམས་འདོད་ཆགས་དང་བཅས་པའོ་ཞེས་བྱ་བ་སེམས་འདོད་ཆགས་དག་ཕན་ཚུན་དོན་གཞན་པ་ཉིད་ཡིན་ནོ། །ལྷན་ཅིག་ལྡན་པར་བསྟན་པས་བསྟན་པའི་ཕྱིར་ནག་པ་བུ་དང་བཅས་པ་ཞེས་བྱ་བ་བཞིན་ནོ། །གཟུགས་ཅན་བཅུ་ནི་

བསགས་པའོ། །ཞེས་བྱ་བ་ནི་བཅུ་ཁོ་ན་རྡུལ་ཕྲ་རབ་བསགས་པའི་ངོ་བོ་ཡིན་ནོ་ཞེས་བྱ་བའི་ཐ་ཚིག་གོ། །ངེས་པར་བཟུང་བ་འདིས་ན་ཁམས་གཞན་དག་ནི་བསགས་པ་མ་ཡིན་ནོ་ཞེས་བྱ་བར་འགྲུབ་པོ། །ཕྱི་རོལ་གྱི་ནི་ཁམས་བཞི་ཡིན། །ཞེས་བྱ་བ་ནི་སྒྲ་མ་གཏོགས་པ་གཟུགས་ལ་སོགས་

པའོ། །དགྲ་སྟ་དང་ཤིང་ཞེས་བྱ་བ་ལ་སོགས་པའོ་ཞེས་བྱ་བ་ནི་དགྲ་སྟ་ཞེས་བྱ་བ་ལ་སོགས་པ་ནི་གཅོད་པར་བྱེད་པ་ཡིན་ལ་ཤིང་ཞེས་བྱ་བ་ལ་སོགས་པ་ནི་གཅད་པར་བྱ་བ་ཡིན་ཏེ། སྲིད་པའི་ཕྱིར་དེ་སྐད་ཅེས་བཤད་ཀྱི་རེས་འགའ་ནི་དགྲ་སྟ་ཞེས་བྱ་བ་ལ་སོགས་པ་ཡང་གཅད་པར་བྱ་བ་ཡིན་ནོ། །འབྲེལ་

བ་འབྱུང་བ་ཅན་ཞེས་བྱ་བ་རྒྱས་པར་འབྱུང་བ་ནི་འདི་ལ་འབྲེལ་པར་འབྱུང་བ་ནི་རྣམ་པར་མ་བྱེ་བར་འབྱུང་བའི་ངང་ཚུལ་ཡོད་པས་ན་འདུས་པའི་རྒྱུན་འབྲེལ་བར་འབྱུང་བ་ཅན་ཡིན་ཏེ། གཟུགས་ལ་སོགས་པ་འདུས་པའི་རྒྱུན་ཞེས་བྱ་བའི་ཐ་ཚིག་གོ། །དེ་རྣམ་པར་འབྱེད་པ་སྐྱེད་པ་གང་ཡིན་པ་ནི་རྣམ་པར་

འབྱེད་པ་སྐྱེད་པར་བྱེད་པ་ཡིན་ཏེ། དེ་ནི་གཅོད་པ་ཡིན་ནོ། །དངོས་པོ་སྐད་ཅིག་མ་རྣམས་དགྲ་སྟ་ལ་སོགས་པ་མེད་ཀྱང་འཆད་པར་འགྱུར་བ་ཁོ་ན་ཡིན་མོད་ཀྱི་རྒྱུན་འགག་པ་ནི་དགྲ་སྟ་ལ་སོགས་པ་ཡིན་པས་དགྲ་སྟ་ལ་སོགས་པས་གཅོད་པར་བྱེད་པ་ཡིན་ནོ་ཞེས་བཤད་དེ། རྒྱུ་ཚོགས་པའི་ཁྱད་པར་གྱི་དབང་

གིས་འབྲས་བུའི་ཁྱད་པར་འབྱུང་བ་ཡིན་ནོ། །དེ་ལ་ཁམས་བཞི་པོ་ཁོ་ན་གཅོད་པར་བྱེད་པ་དང་གཅད་པར་བྱ་བ་ཡིན་ནོ་ཞེས་ངེས་པར་བཟུང་སྟེ། དེ་ལྟར་ངེས་པར་བཟུང་བས་ཁམས་གཞན་དག་ནི་གཉི་ག་མ་ཡིན་པའོ་ཞེས་བྱ་བ་གྲུབ་བོ། །དེ་ཉིད་ཀྱི་ཕྱིར་ལུས་ཀྱི་དབང་པོ་ལ་སོགས་པ་ནི་གཅད་པར་བྱ་

བ་མ་ཡིན་ཏེ་ཞེས་བྱ་བ་རྒྱས་པར་སྨོས་ཏེ། འདིར་ནི་མིག་གི་དབང་པོ་ལ་སོགས་པ་ལ་ཞེས་བརྗོད་པར་བྱ་བ་ཡིན་པ་ལས། ཅིའི་ཕྱིར་ལུས་ཀྱི་དབང་པོ་ལ་སོགས་པ་ཞེས་སྨོས་ཤེ་ན། འདི་ལྟར་གལ་ཏེ་འཆད་པར་འགྱུར་ན་ལུས་ཀྱི་དབང་པོ་ལ་བཅད་པ་ཡོངས་སུ་གསལ་བར་འགྱུར་བས། དེའི་ཕྱིར་

Vol. 142 · folio 63b

ལུས་ཀྱི་དབང་པོ་ལ་སོགས་པའི་དབང་པོ་དག་བརྗོད་དོ། །ཡན་ལག་མ་ལུས་པར་བཅད་ཅིང་ཡན་ལག་དང་ཉིང་ལག་བཅད་ན་དེ་དག་ལ་གཉིས་སུ་བྱར་མེད་པའི་ཕྱིར་ཏེ་ལུས་ཀྱི་དབང་པོ་ལ་སོགས་པ་དེ་དག་གཉིས་སུ་བྱར་མེད་པའི་ཕྱིར་རོ། །དེ་དག་ལ་གཉིས་སུ་བྱར་མེད་དོ་ཞེས་བྱ་བ་ཇི་ལྟར་

ཤེས་ཤེ་ན། དེའི་ཕྱིར་ཡང་སྨྲས་པ། དབང་པོ་རྣམས་ལ་ནི་གཉིས་སུ་འགྱུར་བ་མེད་དེ་བཅད་པའི་ཡན་ལག་ལུས་དང་བྲལ་བ་ལ་དབང་པོ་མེད་པའི་ཕྱིར་རོ། །ཡན་ལག་བཅད་པ་ལུས་དང་བྲལ་བ་གང་ཡིན་པ་དེ་ལ་དབང་པོ་མེད་དོ་ཞེས་བྱ་བ་འདི་ཡང་ཇི་ལྟར་ཤེས་ཤེ་ན། འདི་ལྟར་དེ་དག་དང་རེག་བྱ་

ལ་སོགས་པ་ལ་བརྟེན་ནས་ལུས་ལ་སོགས་པའི་རྣམ་པར་ཤེས་པ་མི་སྐྱེའོ། །འོ་ན་ཇི་ལྟར་སྣའི་རྩེ་མོ་བཅད་དེ་ཡང་སྦྱར་བས་ལུས་ཀྱི་རྣམ་པར་ཤེས་པ་བསྐྱེད་ཅེ་ན། སྣའི་དྲུང་བ་དང་འབྲེལ་བས་ཡང་ལུས་ཀྱི་དབང་པོ་སྐྱེ་བའི་ཕྱིར་ཉེས་པ་མེད་དོ། །གལ་ཏེ་དེ་ལ་ལུས་ཀྱི་དབང་པོ་མེད་ན་ཇི་ལྟར་འདི་

ན་རྨིགས་བུ་ལ་སོགས་པའི་མཇུག་མ་བཅད་པ་དག་འགུལ་ཞེ་ན། དེ་ནི་རླུང་གི་ཁམས་ཀྱི་འགྱུར་བ་ཡིན་གྱི་ལུས་ཀྱི་དབང་པོའི་ལས་ནི་མ་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །གཅོད་པར་བྱེད་པ་ཡང་མ་ཡིན་ཏེ། ནོར་བུའི་འོད་བཞིན་དུ་དང་བའི་ཕྱིར་རོ་ཞེས་བྱ་བ་ནི་དཔེར་ན་ནོར་བུའི་འོད་དང་

བའི་ཕྱིར་གཅོད་པར་བྱེད་པ་མ་ཡིན་པ་ལྟར་དབང་པོ་རྣམས་ཀྱང་དེ་དང་འདྲའོ། །དེ་བཞིན་བསྲེག་བྱ་འཇལ་བྱེད་པའོ། །ཞེས་བྱ་བའི་དེ་བཞིན་ཞེས་བྱ་བའི་སྒྲས་ནི་ཕྱིའི་ཁམས་བཞི་པོ་དེ་དག་ཉིད་དེ་དང་འདྲ་བའི་དོན་དུ་རབ་ཏུ་སྟོན་པར་བྱེད་པ་ཡིན་ནོ། །ཤིང་ལ་སོགས་པ་མེས་བྱས་པའི་འགྱུར་བ་ནི་སྲེག་པ་

ཡིན་ལ་དེ་ཡང་དབང་པོ་དག་ལ་མེད་དེ། ནོར་བུའི་འོད་བཞིན་དུ་དང་བའི་ཕྱིར་རོ། །དེ་དག་ནི་ཤིང་ལ་སོགས་པ་ལྟ་བུའམ་པགས་པ་ལ་སོགས་པ་ལྟ་བུར་འགྱུར་བ་མེད་དོ། །འོ་ན་ཅི་ཞེ་ན། དེ་དང་འབྲེལ་བ་ལས་རྒྱུན་ཆད་པར་འགྱུར་རོ། །ཁམས་བཞི་པོ་དེ་དག་ཉིད་སྲང་ལ་སོགས་པར་གྱུར་པ་ནི་

འཇལ་བར་བྱེད་པ་ཡིན་གྱི་དབང་པོ་རྣམས་ནི་མ་ཡིན་ཏེ། དེ་བཞིན་དུ་གསལ་བའི་ཕྱིར་རོ། །ཁམས་ལུས་ཅན་མ་ཡིན་པ་རྣམས་ནི་ལུས་མེད་པ་ཉིད་ཀྱི་ཕྱིར་བཅད་པ་ལ་སོགས་པ་མི་སྲིད་པས་དེ་དག་གི་བཅད་པ་ལ་སོགས་པ་བསམ་པར་མི་བྱའོ། །སྒྲ་ཡང་མ་ཡིན་ཏེ་ཆད་པ་ཡིན་པའི་ཕྱིར་རོ་ཞེས་

Vol. 142 · folio 64a

བྱ་བ་ཅི་ཞེ་ན། གཅོད་པར་བྱེད་པ་དང་གཅོད་པར་བྱ་བའམ་བསྲེག་པར་བྱ་བ་འམ་འཇལ་བར་བྱེད་པ་སྟེ། རྒྱུན་ཆགས་པར་མི་འདུག་པའི་ཕྱིར་རོ། །སྲེག་དང་གཞལ་ལ་མི་མཐུན་སྨྲ། །ཞེས་བྱ་བ་ནི་སྒྲ་ཡང་མ་ཡིན་ཏེ། ཆད་པ་ཡིན་པའི་ཕྱིར་རོ་ཞེས་བྱ་བ་འདི་འོག་

མ་ལ་ཡང་སྦྱར་བར་བྱའོ། །ཁ་ཅིག་ནི་བསམ་པ་ནི་ཁམས་བཞི་པོ་དེ་དག་ཉིད་སྲེག་པར་བྱེད་པ་ཡང་ཡིན་ལ་འཇལ་བར་བྱེད་པ་ཡང་ཡིན་ཏེ། སྲེག་པར་བྱེད་པ་ནི་མེ་དང་རྩི་དྲག་པོ་ལ་སོགས་པ་ཡིན་ལ་དེ་ལ་ཡང་ཁམས་བཞི་པོ་སྤྱིར་ཐལ་བ་ལ་སོགས་པ་འགྱུར་བའི་རྒྱུ་ཡིན་པའི་ཕྱིར་རོ། །གཞལ་

བར་བྱ་བ་ནི་ལན་ཚྭ་ལ་སོགས་པ་ཡིན་ལ། དེ་ལ་ཡང་སྤྱིར་སྲང་མདའི་མགོ་དམའ་བར་བྱེད་པའི་རྒྱུ་ཡིན་ནོ་སྙམ་པ་ཡིན་ནོ། །མེའི་ཁམས་ཁོ་ན་སྲེག་པར་བྱེད་པ་ཡིན་ལ་ལྕི་བ་ཉིད་ཁོ་ན་གཞལ་བར་བྱ་བ་ཡིན་ནོ་ཞེས་བྱ་བ་ནི་མེའི་ཁམས་མེ་འབར་བ་ལ་སོགས་པའི་རྣམ་པ་བྱ་བ་ལ་ཤས་ཆེ་བ་ཁོ་ན་སྲེག་

པར་བྱེད་པ་ཡིན་ཏེ། སའི་ཁམས་ལ་སོགས་པ་ནི་རང་གི་བྱ་བ་ལ་ཤས་ཆེ་བ་ཉིད་ཡིན་ཡང་སྲེག་པར་བྱེད་པ་ཉིད་མ་ཡིན་པ་མཐོང་བའི་ཕྱིར་རོ། །རྒྱུར་བྱས་པའི་གཟུགས་ལྕི་བ་ཉིད་བྱ་བ་ལ་ཤས་ཆེ་བ་ཁོ་ན་གཞལ་བར་བྱ་བ་ཡིན་ཏེ། སྣང་བ་ལ་སོགས་པ་རྫས་ཡང་བ་ལ་གཟུགས་ལ་སོགས་པ་བྱ་བ་

ལ་ཤས་ཆེ་བ་ཉིད་ཡིན་ཡང་གཞལ་བར་བྱ་བ་ཉིད་མ་ཡིན་པར་མཐོང་བའི་ཕྱིར་རོ། །ནང་གི་ལྔ་ཞེས་བྱ་བ་ལ་ནང་གི་ཞེས་བྱ་བ་སྨོས་པ་ནི་གཟུགས་ལ་སོགས་པ་བཟློག་པའི་ཕྱིར་རོ། །ལྔ་སྨོས་པ་ནི་ཡིད་ཀྱི་བཟློག་པའི་ཕྱིར་རོ། །ནང་གི་ལྔ་ནི་རྣམ་པར་སྨིན་པ་ལས་སྐྱེས་པ་དང་རྒྱས་པ་ལས་བྱུང་བ་

ཁོ་ན་ཡིན་གྱི་རྒྱུ་མཐུན་པ་ལས་བྱུང་བ་ནི་མ་ཡིན་ནོ་ཞེས་བྱ་བར་ངེས་པར་བཟུང་ངོ་། །དེ་ཅིའི་ཕྱིར་ཞེ་ན། དེ་དག་ལས་མ་གཏོགས་པ་རྒྱུ་མཐུན་པ་མེད་པའི་ཕྱིར་རོ། །རྒྱུ་མཐུན་པ་ནི་རྒྱུ་དང་འདྲ་བ་ཡིན་པའི་ཕྱིར་རྣམ་པར་སྨིན་པ་ལས་སྐྱེས་པ་དང་རྒྱས་པ་ལས་བྱུང་བ་དག་ཀྱང་རྒྱུ་མཐུན་པ་ལས་བྱུང་

བ་ནི་ཡིན་མོད་ཀྱི་དེ་དག་རྣམ་པར་སྨིན་པ་ལས་སྐྱེས་པ་དང་རྒྱས་པ་ལས་བྱུང་བ་ཉིད་ཁོ་ནས་བསྡུས་པའི་ཕྱིར་རྒྱུ་མཐུན་པ་ལས་བྱུང་བའོ་ཞེས་བྱ་བར་མི་བཟུང་བའི་ཕྱིར་ནི་གང་དག་རང་གི་རྒྱུ་དང་འདྲ་བ་ཡང་ཡིན་ལ་རྣམ་པར་སྨིན་པ་ལས་སྐྱེས་པ་དང་རྒྱས་པ་ལས་བྱུང་བ་ཡང་མ་ཡིན་པ་དེ་དག་རྒྱུ་མཐུན་

Vol. 142 · folio 64b

པ་ལས་བྱུང་བ་ཡིན་པར་འདོད་དོ། །མིག་ལ་སོགས་པ་ནི་དེ་ལྟ་བུ་མ་ཡིན་ནོ། །འོ་ན་ཅི་ཞེ་ན། རྣམ་པར་སྨིན་པ་ལས་སྐྱེས་པ་དང་རྒྱས་པ་ལས་བྱུང་བ་དག་ཡིན་ཏེ། དེའི་ཕྱིར་དེ་དག་ལས་མ་གཏོགས་པ་རྒྱུ་མཐུན་པ་མེད་པའི་ཕྱིར་ཞེས་བྱ་བ་འདི་སྨོས་སོ། །ཡང་དེ་དག་ལ་རྒྱུ་མཐུན་པ་ལས་བྱུང་བ་མེད་

དོ་ཞེས་བྱ་བ་ཇི་ལྟར་ཤེས་ཤེ་ན། ཤི་བ་ལ་རྗེས་སུ་འཇུག་པ་མེད་པའི་ཕྱིར་རོ། །མིག་གི་ཁམས་ལ་སོགས་པ་ནི་གཟུགས་ལ་སོགས་པ་བཞིན་དུ་ཤི་བ་ལ་རྗེས་སུ་འཇུག་པ་མེད་དོ། །རྣམ་པར་སྨིན་པའི་རྒྱུ་ལས་སྐྱེས་པ་ནི་ཞེས་བྱ་བ་ནི་འབྲས་བུ་རྣམ་པར་སྨིན་པའི་རྒྱུ་ནི་རྣམ་པར་སྨིན་པའི་རྒྱུའོ། །

རྣམ་པར་སྨིན་པའི་རྒྱུ་ལས་སྐྱེས་པ་ནི་རྣམ་པར་སྨིན་པ་ལས་སྐྱེས་པ་སྟེ། བར་གྱི་ཚིག་མི་མངོན་པར་བྱས་པའི་ཕྱིར་བ་གླང་གི་ཤིང་རྟ་ཞེས་བྱ་བ་བཞིན་ནོ་ཞེས་བྱ་བ་ནི་རྒྱུ་ཞེས་བྱ་བའི་སྒྲ་མི་མངོན་པར་བྱས་པའི་ཕྱིར་བ་ལང་གི་ཤིང་རྟ་ཞེས་བྱ་བ་བཞིན་ཏེ། དཔེར་ན་བ་ལང་དག་དང་ལྡན་པའི་ཤིང་རྟ་ལ་བ་

ལང་གི་ཤིང་རྟ་ཞེས་བྱ་བ་ལྟ་བུའོ། །ཡང་ན་འབྲས་བུའི་དུས་སུ་ཕྱིན་པའི་ལས་ནི་ཞེས་བྱ་བ་ནི་མཇུག་ཐོགས་སུ་འབྲས་བུ་རྣམ་པར་སྨིན་པ་སྐྱེ་བའི་སྐད་ཅིག་མ་ལ་གནས་པ་ཞེས་བྱ་བའི་ཐ་ཚིག་གོ། །ཡང་ན་རྒྱུ་ལ་འབྲས་བུ་བཏགས་པ་ཡིན་ཏེ་ཞེས་བྱ་བ་རྒྱས་པར་འབྱུང་བ་ནི་ལས་ཀྱི་མཚན་ཉིད་ཀྱི་

རྒྱུ་རྣམ་པར་སྨིན་པའི་ངོ་བོ་ཉིད་མ་ཡིན་པ་ཡང་རྣམ་པར་སྨིན་པ་ཞེས་བྱ་སྟེ། དེ་སྐྱེད་པར་བྱེད་པ་ཡིན་པའི་ཕྱིར་རོ། །དཔེར་ན་འབྲས་བུ་ལ་རྒྱུ་བཏགས་པ་ཞེས་བྱ་བ་རྒྱས་པར་འབྱུང་བ་ནི་མིག་ལ་སོགས་པ་རེག་པའི་སྐྱེ་མཆེད་དྲུག་པོ་འདི་དག་ནི་སྔོན་གྱི་ལས་ཡིན་ཞེས་བྱ་བ་ལྟ་བུ་ཡིན་ཏེ། སྔོན་

གྱི་སྐྱེ་བ་ལ་ཡོད་པས་ནི་སྔོན་གྱི་ཉིད་སྔོན་གྱི་ལས་ཡིན་ནོ། །རེག་པའི་སྐྱེ་མཆེད་དེ་དག་ནི་སྔོན་གྱི་ལས་ཀྱི་ངོ་བོ་ཉིད་མ་ཡིན་ཡང་དེ་ལས་སྐྱེས་པའི་ཕྱིར་སྔོན་གྱི་ལས་ཡིན་ནོ་ཞེས་བྱ་བ་དེ་བཞིན་དུ་འདིར་ཡང་བཟློག་སྟེ་ཉེ་བར་བཏགས་པ་ཡིན་པར་བལྟའོ། །ཟས་དང་ལེགས་པར་བྱ་བ་དང་གཉིད་

ལོག་པ་དང་ཏིང་ངེ་འཛིན་གྱི་ཁྱད་པར་དག་གིས་རྒྱས་པར་བྱས་པ་རྣམས་ནི་རྒྱས་པ་ལས་བྱུང་བ་དག་གོ་ཞེས་བྱ་བ་ལ་ཁྱད་པར་གྱི་སྒྲ་ནི་རེ་རེ་ལ་སྦྱར་བར་བྱའོ། །དེ་ལ་ཟས་དང་གཉིད་ལོག་པ་དག་ནི་འཇིག་རྟེན་ན་གྲགས་པར་ཟད་དོ། །ལེགས་པར་བྱ་བ་ནི་ལུས་བསྐུ་བ་དང་། སྨན་མར་བཏང་

Vol. 142 · folio 65a

བ་ལ་སོགས་པའི་ངོ་བོ་ཉིད་དོ། །ཏིང་ངེ་འཛིན་ནི་སེམས་རྩེ་གཅིག་པ་ཉིད་ཀྱི་མཚན་ཉིད་དོ། །ཉེ་བར་བསགས་པ་ནི་རྒྱས་པའོ། །བསགས་པ་ལ་ཡོད་པ་ནི་རྒྱས་པ་ལས་བྱུང་བ་སྟེ་དམག་ལ་ཡོད་པ་བཞིན་ནོ། །ཡང་ན་བསགས་པ་ཉིད་རྒྱས་པ་ལས་བྱུང་བ་སྟེ་

འདུལ་བ་ལས་བྱུང་བ་བཞིན་ནོ། །གཞན་དག་ན་རེ་ཚངས་པར་སྤྱོད་པས་ཀྱང་ཞེས་བྱ་བ་ནི་ཚངས་པར་སྤྱོད་པ་དབང་པོ་ཉེ་བར་ཞི་བ་རྣམས་ཀྱིས་ལུས་རྒྱས་པར་མཐོང་བའི་ཕྱིར་རོ། །དེས་ནི་མི་གནོད་པ་ཙམ་དུ་ཟད་ཀྱི་ཞེས་བྱ་བ་ནི་མི་ཚངས་པར་སྤྱོད་པས་ནི་ལུས་ཉམ་ཆུང་བར་འགྱུར་བ་ཚངས་

པར་སྤྱོད་པས་ནི་ལུས་ཉམ་ཆུང་བར་མི་འགྱུར་རོ། །དེ་ལྟ་བས་ན་སྨྲས་པ་ཚངས་པར་སྤྱོད་པ་དེས་ནི་མི་གནོད་པ་ཙམ་དུ་ཟད་ཀྱི་རྒྱས་པ་མ་ཡིན་ནོ། །རྒྱས་པ་ནི་ཟས་ལ་སོགས་པས་ཡིན་པ་ཉིད་དོ། །འོ་ན་ཅིའི་ཕྱིར། རབ་ཏུ་བྱུང་བ་ཚངས་པར་སྤྱོད་པ་ཁ་ཅིག་གིས་ལུས་ཉམ་ཆུང་བར་འགྱུར་ཞེ་ན།

དེ་ནི་འདོད་པའི་ཡོངས་སུ་གདུང་བ་ལ་སོགས་པ་དང་ལྡན་པ་ལས་འགྱུར་བར་ཟད་དོ། །ཕྱིར་བཞིན་དུ་ཀུན་དུ་སྲུང་ངོ་ཞེས་བྱ་བ་ནི་རྒྱས་པའི་རྒྱུད་ནི་རྣམ་པར་སྨིན་པའི་རྒྱུད་ལ་བསྐོར་ཏེ་གནས་པས་ཀུན་ཏུ་བསྲུང་བ་ཡིན་ནོ། །སྒྲ་ནི་རྒྱས་པ་ལས་བྱུང་བ་ཞེས་བྱ་བ་ནི་ལུས་ཉམ་ཆུང་བ་མ་ཡིན་པའི་སྒྲ་གསང་

མཐོ་བ་མཐོང་བའི་ཕྱིར་རོ། །འདོད་དགུར་འབྱུང་བའི་ཕྱིར་རོ་ཞེས་བྱ་བ་ནི་བདག་གིས་སྒྲ་བསྒྲགས་པར་བྱའོ་ཞེས་བྱ་བར་འདོད་ན་ནི་འབྱུང་ལ་མི་འདོད་ན་ནི་མི་འབྱུང་ངོ་། །རྣམ་པར་སྨིན་པ་ལས་སྐྱེས་པའི་ཆོས་ནི་མི་འདོད་བཞིན་དུ་ཡང་འབྱུང་སྟེ། དེ་ལྟ་བས་ན་སྒྲ་ནི་རྣམ་པར་སྨིན་པ་ལས་སྐྱེས་པ་མ་ཡིན་ནོ། །

འདི་ལ་སྒྲུབ་པ་ཡང་བརྗོད་པར་བྱ་སྟེ། སྒྲ་ནི་རྣམ་པར་སྨིན་པ་ལས་སྐྱེས་པ་མ་ཡིན་ཏེ། འདོད་དགུར་འབྱུང་བའི་ཕྱིར་སེམས་ལས་བྱུང་བ་ཚུལ་བཞིན་ཡིད་ལ་བྱེད་པ་བཞིན་ནོ། །གང་ཞིག་རྣམ་པར་སྨིན་པ་ལས་སྐྱེས་པ་དེ་ནི་འདོད་དགུར་འབྱུང་བ་མ་ཡིན་ཏེ། དཔེར་ན་མིག་གི་དབང་པོ་ལྟ་བུའོ། །འོ་ན་གང་

བསྟན་བཅོས་ལས་ཞེས་བྱ་བ་རྒྱས་པར་འབྱུང་བ་འདིས་ནི་དམ་བཅས་པ་རང་གི་གྲུབ་པའི་མཐའ་དང་འགལ་བ་ཉིད་འཛིན་པར་བྱེད་པ་ཡིན་ནོ། །ཁ་ཅིག་ན་རེ་བརྒྱུད་པ་འདི་ནི་གསུམ་པ་ཡིན་ཏེ་ཞེས་བྱ་བ་རྒྱས་པར་འབྱུང་བ་ནི་མགྲིན་པར་ཚིག་རྩུབ་པོ་སྤོང་བའི་ལས་ཀྱི་ལམ་གྱི་རྣམ་པར་སྨིན་པའི་ངོ་བོ་

Vol. 142 · folio 65b

ཉིད་ཀྱི་འབྱུང་བ་དག་འགྲུབ་ལ་དེ་དག་ལས་སྒྲ་འབྱུང་བ་ཡིན་ནོ། །ཕྱོགས་གཉིས་པ་ལ་ཡང་ལས་དག་ལས་ནི་རྣམ་པར་སྨིན་པ་ལས་སྐྱེས་པའི་འབྱུང་བ་རྣམས་འགྲུབ། དེ་ལས་ནི་ཟས་ཀྱིས་རྒྱས་པའམ་ཏིང་ངེ་འཛིན་གྱིས་རྒྱས་པའི་སྒོ་ནས་རྒྱས་པ་ལས་བྱུང་བ་རྣམས་འགྲུབ། དེ་དག་ལས་ནི་

རྒྱུ་མཐུན་པ་ལས་བྱུང་བ་སྔོན་གྱི་འབྱུང་བ་ལས་མ་གཏོགས་པ་གསར་དུ་བྱུང་བ་རྣམས་འགྲུབ། དེ་དག་ལས་ནི་སྒྲ་འགྲུབ་པོ་ཞེས་བྱ་བ་ཡིན་ཏེ། དེའི་ཕྱིར་སྒྲ་ནི་རྣམ་པར་སྨིན་པ་ལས་སྐྱེས་པ་ཡིན་ནོ། །ཚིག་ཀྱལ་པ་སྤངས་པས་ཚངས་པའི་དབྱངས་ཉིད་འགྲུབ་པོ་ཞེས་བྱ་བ་ནི་བརྒྱུད་དེ་འགྲུབ་པ་

ལས་དགོངས་ཏེ་གསུངས་པ་ཡིན་ཏེ། འདིས་ནི་དམ་བཅས་པ་དེའི་རང་གི་གྲུབ་པའི་མཐའ་དང་འགལ་བ་ཉིད་ཡོངས་སུ་སྤོང་བར་བྱེད་དོ། །གལ་ཏེ་སྒྲ་བཞིན་དུ་རིགས་པ་དང་འགལ་བར་འགྱུར་ན་ཞེས་བྱ་བ་ནི་སྒྲ་ནི་འདོད་དགུར་འབྱུང་བས་རྣམ་པར་སྨིན་པའི་རིགས་པ་དང་འགལ་བའི་

ཕྱིར་རྣམ་པར་སྨིན་པ་ལས་སྐྱེས་པ་མ་ཡིན་པར་བཤད་དོ། །གལ་ཏེ་ལུས་ཀྱི་ཚོར་བ་དེ་ཡང་དེ་དང་འདྲ་བར་འདོད་དགུར་འབྱུང་བ་ནི་རྣམ་པར་སྨིན་པ་ལས་སྐྱེས་པ་མ་ཡིན་པར་འགྱུར་བ་ཞིག་ན་དེ་ནི་འདོད་དགུར་འབྱུང་བ་མ་ཡིན་ཏེ། མིག་ལ་སོགས་པ་བཞིན་ནོ། །དེ་ལྟ་བས་ན་རྣམ་པར་སྨིན་

པ་ལས་སྐྱེས་པ་ཞེས་བྱ་བ་རུང་ངོ་སྙམ་དུ་བསམས་པ་ཡིན་ནོ། །དེ་ཡང་ཅི་འདྲ་བ་ཞིག་ཡིན་ཞེ་ན། གང་བདེ་བ་དང་སྡུག་བསྔལ་གྱི་རྐྱེན་ཉེ་བར་གཏོད་པ་མེད་པར་འབྱུང་བ་ཡིན་ནོ། །སྐལ་བ་མཉམ་པ་དང་ཀུན་ཏུ་འགྲོ་བའི་རྒྱུས་བསྐྱེད་པ་རྣམས་ནི་རྒྱུ་མཐུན་པ་ལས་བྱུང་བ་དག་གོ་ཞེས་བྱ་བ་ནི་སྐལ་བ་

མཉམ་པ་དང་ཀུན་ཏུ་འགྲོ་བའི་རྒྱུ་དག་ཁོ་ནས་བསྐྱེད་པ་ཡིན་གྱི་རྣམ་པར་སྨིན་པའི་རྒྱུས་ནི་མ་ཡིན་ཞེས་ངེས་པར་བཟུང་བ་ཡིན་ནོ། །རྣམ་པར་སྨིན་པའི་རྒྱུས་བསྐྱེད་པ་རྣམས་ནི་རྣམ་པར་སྨིན་པ་ལས་སྐྱེས་པ་དག་གོ་ཞེས་བྱ་བ་ནི་རྣམ་པར་སྨིན་པའི་རྒྱུས་བསྐྱེད་པ་ཁོ་ན་ཡིན་གྱི་རྣམ་པར་སྨིན་པའི་རྒྱུ་ཁོ་ནས་

སྐྱེད་པ་ནི་མ་ཡིན་ནོ་ཞེས་བྱ་བར་ངེས་པར་བཟུང་བ་ཡིན་ཏེ། རྣམ་པར་སྨིན་པ་ལས་སྐྱེས་པ་ནི་སྐལ་བ་མཉམ་པའི་རྒྱུས་ཀྱང་བསྐྱེད་པ་ཡིན་ནོ། །འདིར་ཡང་ཐོགས་པ་མེད་པ་བརྒྱད་ནི་རྒྱུ་མཐུན་པ་ལས་བྱུང་བ་དང་། རྣམ་པར་སྨིན་པ་ལས་སྐྱེས་པ་ཁོ་ན་ཡིན་ནོ་ཞེས་བྱ་བར་ངེས་པར་བཟུང་ངོ་། །དེ་དག་

Vol. 142 · folio 66a

བསགས་པ་མེད་པའི་ཕྱིར་རྒྱས་པ་ལས་བྱུང་བ་ནི་མ་ཡིན་ཏེ། རྡུལ་ཕྲ་རབ་བསགས་པའི་ངོ་བོ་ཉིད་མ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །གཞན་རྣམ་གསུམ་ཞེས་བྱ་བ་ནི་གཞན་དག་ཁོ་ན་རྣམ་པ་གསུམ་ཡིན་ནོ་ཞེས་བྱ་བ་ངེས་པར་བཟུང་ངོ་། །དེ་ལ། རྣམ་

སྨིན་ལུང་དུ་མ་བསྟན་ཆོས། །སེམས་ཅན་ཞེས་བྱ། ཞེས་འབྱུང་བའི་ཕྱིར་རྣམ་པར་སྨིན་པ་ལས་སྐྱེས་པ་ནི་དབང་པོ་དང་ཐ་མི་དད་པར་འདུག་པ་དག་ཁོ་ན་ཡིན་ནོ། །རྒྱུ་མཐུན་པ་ལས་བྱུང་བ་དང་རྒྱས་པ་ལས་བྱུང་བ་ནི་དབང་པོ་ཐ་དད་པར་འདུག་པ་དག་ཀྱང་ཡིན་ནོ། །ཡང་དབང་པོ་དང་ཐ་

དད་པར་འགྱུར་བ་དག་ལ་ཡང་རྒྱུ་མཐུན་པ་ལས་བྱུང་བ་ཡོད་དོ་ཞེས་བྱ་བར་ཇི་ལྟར་ཤེས་ཤེ་ན། ཤི་བ་ལ་ཡང་དེ་རྗེས་སུ་འཇུག་པ་མཐོང་བའི་ཕྱིར་ཏེ། སེམས་ཅན་དུ་བགྲང་བ་མ་ཡིན་པ་རྣམ་པར་སྨིན་པ་ལས་སྐྱེས་པ་ཡིན་པར་ནི་མི་འདོད་དོ། །རྫས་དང་ལྡན་པ་གཅིག་ཅིག་ཁོ་ན་རྫས་དང་

ལྡན་པ་ཡིན་ནོ་ཞེས་བྱ་བར་ངེས་པར་བཟུང་བ་ཡིན་ནོ། །བརྟན་པའི་ཕྱིར་རྫས་སོ་ཞེས་བྱ་བ་ནི་མི་འཇིག་པའི་ཕྱིར་རོ། །སྐད་ཅིག་མ་གཅིག་རྒྱུ་མཐུན་པ་ལས་བྱུང་བ་མ་ཡིན་པར་འགྱུར་ཏེ་ཞེས་བྱ་བ་ནི་སྐད་ཅིག་མ་གཅིག་སྐལ་བ་མི་མཉམ་པས་བསྐྱེད་པ་ཡིན་ནོ། །སྐད་ཅིག་མ་སྔ་མ་ཟག་པ་

མེད་པའི་ངོ་བོ་ཉིད་མ་ཡིན་པའི་ཕྱིར་སྐད་ཅིག་ཡིན་གྱི་དོན་འདི་སྐད་ཅིག་མ་གཞན་དུ་རྣམ་པར་འཇིག་པ་ཞེས་བྱ་བ་ཡིན་པར་ནི་མི་འདོད་དོ། །དེ་ལྟ་མ་ཡིན་ན་ཁམས་ཐ་མ་དག་ཁོ་ན་སྐད་ཅིག་མ་ཡིན་ནོ་ཞེས་ངེས་པར་བཟུང་བའི་ཕྱིར་དེ་ལས་གཞན་པའི་ཁམས་རྣམས་ནི་སྐད་ཅིག་མ་མ་ཡིན་པ་ཉིད་

དུ་ཐལ་བར་འགྱུར་རོ། །ཡང་ཇི་ལྟར་སྡུག་བསྔལ་ལ་ཆོས་ཤེས་པའི་བཟོད་པའི་ཚོགས་ལ་ཡིད་ཀྱི་ཁམས་དང་ཡིད་ཀྱི་རྣམ་པར་ཤེས་པའི་ཁམས་ཅིག་ཅར་དུ་འབྱུང་བ་རྣམ་པར་ཤེས་པ་གཉིས་འཕྲད་པར་མི་འདོད་དོ་ཞེ་ན། དེ་གཉིས་ཅིག་ཅར་འབྱུང་ངོ་ཞེས་ནི་མི་ཟེར་རོ། །འོ་ན་ཅི་ཞེ་ན།

འདིར་རྣམ་པར་ཤེས་པ་ལ་ཁམས་གཉིས་ཉིད་དུ་རྣམ་པར་གཞག་ཏེ་མིང་གཉིས་སུ་བརྗོད་དོ་ཞེས་བྱ་བའི་ཐ་ཚིག་གོ། །དེའི་ཕྱིར་སྡུག་བསྔལ་ལ་ཆོས་ཤེས་པའི་བཟོད་པ་དང་མཚུངས་པར་ལྡན་པའི་སེམས་ནི་ཡིད་ཀྱི་ཁམས་དང་ཡིད་ཀྱི་རྣམ་པར་ཤེས་པའི་ཁམས་ཡིན་ནོ་ཞེས་བྱ་བར་སྨོས་

Vol. 142 · folio 66b

སོ། །ལྷག་མ་དེ་དང་ལྷན་ཅིག་འབྱུང་བ་རྣམས་ནི་ཆོས་ཀྱི་ཁམས་སོ་ཞེས་བྱ་བ་ནི་བཟོད་པའི་ཚོགས་དེ་ལ་སེམས་ལས་གཞན་པའི་ཆོས་ལྷག་མ་དེ་དང་ལྷན་ཅིག་འབྱུང་བ་རྣམས་ཏེ། འདི་ལྟ་སྟེ་ཟག་པ་མེད་པའི་སྡོམ་པ་དང་ཚོར་བ་དང་འདུ་ཤེས་དང་སེམས་པ་ལ་སོགས་པ་མཚུངས་པར་ལྡན་

པ་རྣམས་དང་དེ་དག་གི་ཐོབ་པ་དང་སྐྱེ་བ་ལ་སོགས་པ་ནི་ཆོས་ཀྱི་ཁམས་ཡིན་ནོ། །ལྡན་པ་ཐོབ་པ་ཞེས་བྱ་བ་ནི་སྔར་མ་ཐོབ་པའི་ཐོབ་པ་འཐོབ་པ་ཞེས་བྱ་བའི་ཐ་ཚིག་གོ། །མིག་གི་རྣམ་པར་ཤེས་པ་དང་ཡང་ཡིན་ནམ་ཞེས་བྱ་བ་ཅི་ཞེ་ན། ལྡན་པ་ཐོབ་པ་ཞེས་བྱ་བའི་སྐབས་དང་སྦྱར་རོ། །སོ་སོ་

ཐོབ་ཅེས་བྱ་བ་འདིས་ནི་མུ་དང་པོ་དང་གཉིས་པ་དག་བསྟན་ཏོ། །ལྷན་ཅིག་ཏུ་ཡང་ཞེས་བྱ་བ་འདིས་ནི་མུ་གསུམ་པ་བསྟན་ཏོ། །བཞི་པ་ནི་བཤད་པ་ལས་མ་གཏོགས་པ་ཡིན་ནོ་ཞེས་བྱ་བར་རྟོགས་པར་སླ་བའི་ཕྱིར་མ་བསྟན་ཏོ། །ཡང་ན་ཡང་ཞེས་བྱ་བའི་སྒྲ་སོ་སོ་ཡང་མ་ཡིན་ལྷན་ཅིག་ཀྱང་མ་ཡིན་

པ་ཡང་ཡོད་དོ་ཞེས་འདི་ཡང་བཤད་པ་ཡིན་ནོ། །འདོད་པའི་ཁམས་ན་རིམ་གྱིས་མིག་གི་དབང་པོ་ཐོབ་པ་ཞེས་བྱ་བ་ནི་འདོད་པའི་ཁམས་ན་གནས་པའི་གང་ཟག་རིམ་གྱིས་ཏེ་ནུར་ནུར་པོ་ལ་སོགས་པའི་རིམ་གྱིས་སམ་འཆི་བའི་རིམ་གྱིས་མིག་གི་དབང་པོ་འཐོབ་པོ། །གང་དང་ལྡན་པ་ཡིན་ཅི་

འདོད་པའི་ཁམས་ཁོ་ན་ཡིན་ནམ་ཞེ་ན་སྨྲས་པ། མ་ཡིན་ཏེ། ཁྱད་པར་མེད་པར་ཏེ་འདོད་པ་དང་ལྡན་པའང་རུང་གཟུགས་དང་ལྡན་པའང་རུང་འཐོབ་པ་ནའོ། །ནུར་ནུར་པོ་ལ་སོགས་པའི་གནས་སྐབས་སམ་དེ་བཞིན་དུ་རིམ་གྱིས་འཆི་བ་དང་མིག་མེད་པ་འཆི་བ་ན་མིག་གི་ཁམས་དང་མི་ལྡན་པ་ཡིན་གྱི།

ནུར་ནུར་པོ་ལ་སོགས་པའི་གནས་སྐབས་སམ་དེ་བཞིན་དུ་འཆི་བའི་གནས་སྐབས་ན་དེ་མེད་པའི་ཕྱིར་སྐྱེ་མཆེད་དྲུག་འབྱུང་བའི་གནས་སྐབས་སམ་སྲིད་པ་བར་མའི་གནས་སྐབས་དེའི་ཚེ་དེ་དང་ལྡན་པ་འཐོབ་པོ། །མིག་གི་རྣམ་པར་ཤེས་པའི་ཁམས་དང་མི་ལྡན་པ་ལྡན་པ་འཐོབ་པ་ནི་མ་ཡིན་

ཏེ། འདི་ལྟར་འདི་ནི་སྔར་སྲིད་པ་བར་མར་ཉིང་མཚམས་སྦྱོར་བའི་ཚེ་ན་དགེ་བ་དང་ཉོན་མོངས་པ་དང་འདས་པ་དང་མ་འོངས་པ་དེ་དང་ལྡན་པ་ཁོ་ན་ཡིན་ནོ། །འདི་ནི་གནས་སྐབས་ཁྱད་པར་ཅན་གྱི་དབང་དུ་བྱ་བ་ཡིན་གྱི་ཐོབ་པ་དང་ལྡན་པ་ཐོབ་པའི་གནས་སྐབས་ནི་མ་ཡིན་ནོ། །མིག་གི་རྣམ་པར་ཤེས་པའི་

Vol. 142 · folio 67a

ཁམས་དང་ཡིན་ལ་ཞེས་བྱ་བ་རྒྱས་པར་འབྱུང་བ་ནི་བསམ་གཏན་གཉིས་པ་ལ་སོགས་པར་སྐྱེས་པ་དེ་ལ་དེ་ན་མིག་གི་རྣམ་པར་ཤེས་པ་མེད་པའི་ཕྱིར་དེ་དང་སྔོན་མི་ལྡན་པ་ལས་བསམ་གཏན་དང་པོའི་ས་པའི་མིག་གི་རྣམ་པར་ཤེས་པ་མ་བསྒྲིབས་ལ་ལུང་དུ་མ་

བསྟན་པའི་ངོ་བོ་ཉིད་མངོན་དུ་བྱེད་པ་དེའི་ཚེ་ན་མིག་གི་རྣམ་པར་ཤེས་པའི་ཁམས་དང་མི་ལྡན་པ་ལྡན་པ་འཐོབ་བོ། །མིག་གི་ཁམས་དང་ནི་མི་ལྡན་པ་ལྡན་པ་འཐོབ་པ་མ་ཡིན་ཏེ། ཐོབ་ཟིན་པ་དང་འདྲ་བར་ལྡན་པའི་ཕྱིར་རོ། །དེ་དག་ནས་ཤི་འཕོས་ནས་འོག་མར་སྐྱེ་བ་ནའོ་ཞེས་བྱ་བ་ནི།

བསམ་གཏན་གཉིས་པ་ལ་སོགས་པ་ནས་ཤི་འཕོས་ནས་འོག་མ་བསམ་གཏན་དང་པོ་དང་འདོད་པའི་ཁམས་སུ་སྐྱེ་བ་སྲིད་པ་བར་མར་ཉིང་མཚམས་སྦྱོར་བ་ན་མིག་གི་རྣམ་པར་ཤེས་པའི་ཁམས་དགེ་བ་དང་ཉོན་མོངས་པ་ཅན་འདས་པ་དང་མ་འོངས་པ་དང་མི་ལྡན་པ་ལྡན་པ་འཐོབ་པོ། །

མིག་གི་ཁམས་དང་ནི་མ་ཡིན་ནོ། །ཐོབ་ཟིན་པ་བཞིན་དུ་ལྡན་པའི་ཕྱིར་རོ། །གཉི་ག་དང་ལྡན་པ་ཐོབ་པ་ཡང་ཡོད་དེ་ཞེས་བྱ་བ་ནི་གཟུགས་མེད་པ་ནས་ཤི་འཕོས་པ་ན་སྔོན་མིག་གི་རྣམ་པར་ཤེས་པའི་ཁམས་དག་དང་མི་ལྡན་པ་ལས་སྲིད་པ་བར་མ་ཉིང་མཚམས་སྦྱོར་བའི་གནས་སྐབས་

ཁོ་ན་མིག་གི་ཁམས་སྐྱེ་བ་ལ་མངོན་དུ་ཕྱོགས་པ་དང་། མིག་གི་རྣམ་པར་ཤེས་པའི་ཁམས་དགེ་བ་དང་ཉོན་མོངས་པ་ཅན་འདས་པ་དང་མ་འོངས་པ་དང་ལྡན་པ་འཐོབ་སྟེ་སྲིད་པ་བར་མ་པ་རྣམས་ནི་དབང་པོ་མ་ཚང་བ་མ་ཡིན་ནོ། །གཉི་ག་དང་མ་ཡིན་པ་ཡོད་དེ་རྣམ་པ་དེ་དག་ལས་མ་གཏོགས་

པའོ་ཞེས་བྱ་བ་ནི་མུ་གསུམ་བཤད་པའི་ཆོས་རྣམ་པ་གསུམ་མ་གཏོགས་པར་ཞེས་བྱ་བའི་ཐ་ཚིག་སྟེ། གཟུགས་མེད་པའི་ཁམས་ནས་ཤི་འཕོས་ནས་དེ་ཉིད་དུ་སྐྱེ་བ་ནི་གཉི་ག་དང་མི་ལྡན་པ་ལྡན་པ་མི་འཐོབ་བོ། །དེ་ན་ནི་མི་ལྡན་པ་ཉིད་ཡོད་ཀྱི་ལྡན་པ་ཐོབ་པ་ནི་མེད་དོ། །བསམ་གཏན་གཉིས་

པ་ལ་སོགས་པར་སྐྱེས་པ་མིག་གི་རྣམ་པར་ཤེས་པ་མངོན་དུ་མི་བྱེད་པ་ཡང་གཉི་ག་དང་མི་ལྡན་པ་ལྡན་པ་མི་འཐོབ་བོ། །ཇི་ལྟ་ཞེ་ན་མིག་གི་ཁམས་དང་ནི་ལྡན་པ་འཐོབ་མོད་ཀྱི་མིག་གི་ཁམས་དང་མི་ལྡན་པ་ནི་མ་ཡིན་ནོ། །མིག་གི་རྣམ་པར་ཤེས་པའི་ཁམས་དང་ནི་མི་ལྡན་མོད་ཀྱི་ལྡན་པ་

Vol. 142 · folio 67b

འཐོབ་པ་ནི་མ་ཡིན་ཏེ། དེ་མངོན་དུ་མི་བྱེད་པའི་ཕྱིར་རོ། །འདོད་པའི་ཁམས་ནི་གནས་པ་མིག་དང་ལྡན་པ་ཅིག་ཅར་ཤི་བས་ནི་སྲིད་པ་བར་མར་ཉིང་མཚམས་སྦྱོར་བ་ཆ་གཉི་ག་དང་མི་ལྡན་པ་ལས་ལྡན་པ་མི་འཐོབ་སྟེ་དེ་དག་དང་ལྡན་པའི་ཕྱིར་རོ། །གང་མིག་གི་ཁམས་དང་ལྡན་པ་དེ་མིག་གི་

རྣམ་པར་ཤེས་པའི་ཁམས་དང་ཡང་ཡིན་ནམ་ཞེ་ན་ཞེས་བྱ་བ་ནི། སོ་སོ་དང་། །ལྷན་ཅིག་ཏུའང་འཐོབ་པ་ཡོད་ཅེས་བྱ་བའི་མདོ་འདི་ཉིད་ཀྱིས་མུ་བཞི་པ་འདི་ཡང་བསྒྲེ་བར་བྱེད་པ་ཡིན་ནོ། །འཐོབ་པ་ནི་རྙེད་པ་ཡིན་ནོ། །རེས་འགའ་ནི་བརྗོད་པར་འདོད་པའི་སྒོ་ནས་ཐོབ་པ་ཙམ་ལ་ཡང་བྱ་སྟེ་མུ་

བཞི་པའི་དང་པོ་ལ་ནི་རྙེད་པ་ཡིན་ནོ། །གཉིས་པ་ལ་ནི་ཐོབ་པ་ཙམ་ཡིན་ནོ། །མུ་དང་པོ་ནི་ཞེས་བྱ་བ་རྒྱས་པར་འབྱུང་བ་ནི་བསམ་གཏན་གཉིས་པ་ལ་སོགས་པར་སྐྱེས་པ་ནི་དབང་པོ་རྣམས་མ་ཚང་བ་མ་ཡིན་པས་མིག་གི་དབང་པོ་དང་ནི་གདོན་མི་ཟ་བར་ལྡན་ལ། མིག་གི་རྣམ་པར་ཤེས་པའི་ཁམས་

དང་ནི་མི་ལྡན་ཏེ། དེ་ན་མེད་པའི་ཕྱིར་དང་བསམ་གཏན་དང་པོའི་ས་པའི་མིག་གི་རྣམ་པར་ཤེས་པ་ནི་མངོན་དུ་མི་བྱེད་པའི་ཕྱིར་རོ། །འདོད་པའི་ཁམས་ན་མིག་མ་ཐོབ་པ་དང་ཉམས་པའོ་ཞེས་བྱ་བ་ནི་འདི་ལ་མིག་མ་ཐོབ་པ་འམ་ཉམས་པ་ཡོད་པས་མིག་མ་ཐོབ་པ་དང་ཉམས་པའོ། །མིག་མ་ཐོབ་པ་

ནི་ནུར་ནུར་པོ་ལ་སོགས་པའི་གནས་སྐབས་ནའོ། །མིག་ཉམས་པ་ནི་མིག་མེད་པར་གྱུར་པ་སྟེ་དེ་ནི་འདོད་པའི་ཁམས་ན་སྲིད་པ་བར་མར་ཉིང་མཚམས་སྦྱོར་བ་ན་ཐོབ་པའི་མིག་གི་རྣམ་པར་ཤེས་པ་དགེ་བ་དང་ཉོན་མོངས་པ་ཅན་དང་ལྡན་གྱི་མིག་གི་ཁམས་དང་ནི་མ་ཡིན་ཏེ། དེ་ནི་མེད་པའི་ཕྱིར་རོ། །

མིག་ཐོབ་པ་དང་མ་ཉམས་པ་ཞེས་བྱ་བ་ནི་འདི་ལ་མིག་ཐོབ་པ་དང་མ་ཉམས་པ་ཡོད་པས་ན་མིག་ཐོབ་པ་དང་མ་ཉམས་པ་སྟེ། དེ་ནི་འདོད་པའི་ཁམས་ན་མིག་གི་ཁམས་དང་མིག་གི་རྣམ་པར་ཤེས་པའི་ཁམས་སོ། །དེ་བཞིན་དུ་སྔར་ཐོབ་པ་དང་། དེའི་ཚེ་ལུང་དུ་མ་བསྟན་པ་

དང་ཡང་ལྡན་པ་ཡིན་ནོ། །བསམ་གཏན་དང་པོར་སྐྱེས་པ་ཡང་དེ་གཉིས་དང་ལྡན་པ་ཡིན་ཏེ། དེ་ལ་རང་གི་ས་པ་ཡང་གདོན་མི་ཟ་བར་ཡོད་པའི་ཕྱིར་ལ་གཞན་གྱིས་པའི་མིག་ཀྱང་སྲིད་པའི་ཕྱིར་རོ། །བསམ་གཏན་གཉིས་པ་ལ་སོགས་པར་སྐྱེས་པ་ལྟ་བའོ་ཞེས་བྱ་བ་ནི་བསམ་

Vol. 142 · folio 68a

གཏན་དང་པོའི་ས་པའི་མིག་གི་རྣམ་པར་ཤེས་པ་མངོན་དུ་བྱེད་པ་ན་ཞེས་བྱ་བའི་ཐ་ཚིག་སྟེ་དེ་ཡང་གདོན་མི་ཟ་བར་འདི་གཉིས་དང་ལྡན་ནོ། །བཞི་པ་ནི་རྣམ་པ་དེ་དག་མ་གཏོགས་པའོ་ཞེས་བྱ་བ་ནི་གཟུགས་མེད་པའི་ཁམས་སུ་སྐྱེད་པའོ། །ཅི་རིགས་པར་

བརྟག་པར་བྱའོ་ཞེས་བྱ་བ་ན་གང་མིག་གི་ཁམས་དང་མི་ལྡན་པ་ལྡན་པ་འཐོབ་པ་དེ་གཟུགས་ཀྱི་ཁམས་དང་ཡང་ཡིན་ནམ་གང་གཟུགས་ཀྱི་ཁམས་དང་ཡང་ཡིན་པ་དེ་མིག་གི་ཁམས་དང་ཡང་ཡིན་ནམ་ཞེ་ན། མིག་གི་ཁམས་དང་གཟུགས་ཀྱི་ཁམས་དག་སོ་སོ་དང་ལྷན་ཅིག་ཏུ་ཡང་འཐོབ་

པ་ཡོད། རེ་ཞིག་སོ་སོ་ནི་མིག་གི་ཁམས་དང་ཡིན་ལ་གཟུགས་ཀྱི་ཁམས་དང་མ་ཡིན་པ་ཡང་ཡོད་དེ། རིམ་གྱིས་མིག་གི་དབང་པོ་ཐོབ་པ་ནའོ། །གཟུགས་ཀྱི་ཁམས་དང་ཡིན་ལ་མིག་གི་ཁམས་དང་མ་ཡིན་པ་ཡང་ཡོད་དེ་ཞེས་བྱ་བའི་མུ་འདི་ནི་མེད་དོ། །ལྷན་ཅིག་ཏུ་ཡང་ནི་གཉི་ག་དང་

མི་ལྡན་པ་ལྡན་པ་ཐོབ་པ་ཡང་ཡོད་དེ། གཟུགས་མེད་པའི་ཁམས་ནས་ཤི་འཕོས་ནས་འདོད་པའི་ཁམས་དང་གཟགས་ཀྱི་ཁམས་སུ་སྐྱེ་བ་ནའོ། །གཉི་ག་དང་མ་ཡིན་པ་ཡང་ཡོད་དེ། རྣམ་པ་དེ་དག་མ་གཏོགས་པའོ། །གང་མིག་གི་ཁམས་དང་ལྡན་པ་དེ་གཟུགས་ཀྱི་ཁམས་དང་ཡང་ཡིན་ནམ་ཞེ་ན།

ཚིག་སྔ་མ་དང་སྦྱོར་བ་སྟེ་རེ་ཞིག་གང་མིག་གི་ཁམས་དང་ལྡན་པ་དེ་ནི་གཟུགས་ཀྱི་ཁམས་དང་ཡང་ཡིན་ནོ། །གཟུགས་ཀྱི་ཁམས་དང་ཡིན་ལ་མིག་གི་ཁམས་དང་མ་ཡིན་པ་ཡང་ཡོད་ལ། ནུར་ནུར་པོ་ལ་སོགས་པའི་གནས་སྐབས་ན་མིག་མ་ཐོབ་པ་དང་མིག་ཐོབ་པ་ཉམས་པའོ། །གང་

མིག་གི་རྣམ་པར་ཤེས་པའི་ཁམས་དང་མི་ལྡན་པ་ལྡན་པ་འཐོབ་པ་དེ་གཟུགས་ཀྱི་ཁམས་དང་ཡང་ཡིན་ནམ། གང་གཟུགས་ཀྱི་ཁམས་དང་ཡིན་པ་དེ་རྣམ་པར་ཤེས་པའི་ཁམས་དང་ཡང་ཡིན་ནམ་ཞེ་ན། དེ་བཞིན་དུ་དེ་གཉིས་ནི་སོ་སོ་དང་། ལྷན་ཅིག་ཏུ་ཡང་ཐོབ་པ་ཡང་ཡོད་དོ། །རེ་ཞིག་

སོ་སོ་ནི་མིག་གི་རྣམ་པར་ཤེས་པའི་ཁམས་དང་ཡིན་ལ་གཟུགས་ཀྱི་ཁམས་དང་མ་ཡིན་པ་ཡང་ཡོད་དེ། བསམ་གཏན་གཉིས་པ་ལ་སོགས་པར་སྐྱེས་པ་མིག་གི་རྣམ་པར་ཤེས་པ་མངོན་དུ་བྱེད་པ་ནའོ། །གཟུགས་ཀྱི་ཁམས་དང་ཡིན་ལ་མིག་གི་རྣམ་པར་ཤེས་པའི་ཁམས་དང་མ་ཡིན་པ་

Vol. 142 · folio 68b

ཡང་ཡོད་དེ། གཟུགས་མེད་པའི་ཁམས་ནས་ཤི་འཕོས་ནས་བསམ་གཏན་གཉིས་པ་ལ་སོགས་པར་སྐྱེ་བ་ནའོ། །ལྷན་ཅིག་ཏུ་ཡང་ནི་གཉི་ག་དང་མི་ལྡན་པ་ལྡན་པ་འཐོབ་པ་ཡང་ཡོད་དེ། གཟུགས་མེད་པའི་ཁམས་ནས་ཤི་འཕོས་ནས་འདོད་པའི་ཁམས་དང་ཚངས་པའི་འཇིག་རྟེན་

དུ་སྐྱེ་བ་ནའོ། །གཉི་ག་དང་མ་ཡིན་པ་ནི་རྣམ་པ་དེ་དག་མ་གཏོགས་པའོ། །གང་མིག་གི་རྣམ་པར་ཤེས་པའི་ཁམས་དང་ལྡན་པ་དེ་གཟུགས་ཀྱི་ཁམས་དང་ཡང་མ་ཡིན་ནམ། གང་གཟུགས་ཀྱི་ཁམས་དང་ཡིན་པ་དེ་མིག་གི་རྣམ་པར་ཤེས་པའི་ཁམས་དང་ཡང་ཡིན་ནམ་ཞེ་ན། ཚིག་ཕྱི་མ་

དང་སྦྱོར་བ་སྟེ་རེ་ཞིག་གང་མིག་གི་རྣམ་པར་ཤེས་པའི་ཁམས་དང་ལྡན་པ་དེ་ནི་གཟུགས་ཀྱི་ཁམས་དང་ཡང་ཡིན་ནོ། །གཟུགས་དང་ཡིན་ལ་མིག་གི་རྣམ་པར་ཤེས་པ་དང་མ་ཡིན་པ་ཡང་ཡོད་དེ། བསམ་གཏན་གཉིས་པ་ལ་སོགས་པར་སྐྱེས་པ་མིག་གི་རྣམ་པར་ཤེས་པ་མངོན་དུ་མི་བྱེད་པ་ནའོ། །

མིག་དང་རྣམ་པར་ཤེས་པ་དང་གཟུགས་རྣམས་ཀྱི་འཐོབ་པ་དང་ལྡན་པ་བསམ་པ་ཇི་ལྟ་བ་དེ་བཞིན་དུ་རྣ་བ་དང་། རྣམ་ཤེས་ཁམས་དག་སོ་སོ་དང་། །ལྷན་ཅིག་ཏུ་ཡང་འཐོབ་པ་ཡོད། །ཅེས་བྱ་བ་ལ་སོགས་པ་རྣ་བ་དང་རྣམ་པར་ཤེས་པ་དང་སྒྲའི་ཁམས་རྣམས་ཀྱི་འཐོབ་པ་དང་ལྡན་པ་ཡང་

བསམ་པར་བྱའོ། །ནང་གི་བཅུ་གཉིས་ཞེས་བྱ་བ་ནི་གཉི་གར་ངེས་པར་བཟུང་བ་ཡིན་ཏེ་ངེས་པར་བཟུང་བ་ཁོ་ནས་གཟུགས་ལ་སོགས་པ་གཞན་ནི་ཕྱིའི་ཡིན་ན་ཞེས་བྱ་བར་གྲུབ་པོ། །བདག་གི་དབང་དུ་བྱས་པ་ནི་གང་གིའོ། །ཡང་ན་བདག་གི་ཆེད་དུ་བྱས་པ་ནི་ནང་གིའོ། །ཡང་ན་ནང་གི་ཉིད་

དམ་མངལ་ཡོད་པས་ན་ནང་གིའོ། །ངར་འཛིན་པའི་རྟེན་ཡིན་པའི་ཕྱིར་ཞེས་བྱ་བ་ནི་བདག་ཏུ་སྨྲ་བ་རྣམས་ནི་ངར་འཛིན་པའི་རྟེན་ནི་བདག་ཡིན་ནོ་ཞེས་རྟོགས་པར་བྱེད་དེ་ངར་འཛིན་པའི་རྟེན་ནི་སེམས་ཡིན་པས་བདག་ཅེས་ཉེ་བར་འདོགས་སོ། །ཇི་ལྟ་ཞེ་ན། སྨྲས་པ་ཚིགས་སུ་བཅད་པ་ལས།

མཁས་པས་བདག་ཉིད་ཤིན་ཏུ་ནི། །དུལ་བས་མཐོ་རིས་ཐོབ་པར་འགྱུར། །ཞེས་གསུངས་སོ། །ཡང་སེམས་བདག་ཅེས་བྱ་བའི་སྒྲར་བརྗོད་དོ་ཞེས་བྱ་བ་ཡང་ཇི་ལྟར་ཤེས་ཤེ་ན་དེའི་ཕྱིར་བཅོམ་ལྡན་འདས་ཀྱིས་གཞན་ལས་ཞེས་བྱ་བ་ལ་སོགས་པ་སྨོས་ཏེ། ཚིགས་སུ་བཅད་པ་གཞན་

Vol. 142 · folio 69a

ལས། སེམས་དུལ་བ་ནི་ལེགས་པ་སྟེ། །སེམས་དུལ་བས་ནི་བདེ་བ་འདྲེན། །ཞེས་གསུངས་སོ། །དེས་ན་དོན་ནི་ཆོས་གང་དག་ནང་སེམས་སུ་བྱ་བ་འམ་ནང་སེམས་ཀྱི་དབང་དུ་བྱས་ནས་རྟེན་གྱི་ངོ་བོར་ཉེ་བར་གྱུར་པར་འདུག་པ་དེ་དག་ནི་ནང་གི་ཡིན་ལ་གང་

དག་ཡུལ་གྱི་ངོ་བོར་འདུག་པ་དེ་དག་ནི་ཕྱིའི་ཡིན་ནོ་ཞེས་བྱ་བ་འདི་ཡིན་ནོ། །ཉེ་བར་གྱུར་པ་ཡང་ཅི་ཞིག་ཡིན་ཞེ་ན། གང་གི་ཕྱིར་རྣམ་པར་ཤེས་པ་དེ་གྱུར་པའི་རྗེས་སུ་བྱེད་པ་ཡིན་ནོ། །མིག་ལ་སོགས་པ་ཁོ་ན་ལ་རྣམ་པར་ཤེས་པ་ཡོད་པར་མངོན་གྱི་གཟུགས་ལ་སོགས་པ་ལ་ནི་མ་ཡིན་ཏེ།

འདི་ལྟར་སེམས་ནི་དབང་པོ་དང་འབྲེལ་པའི་ལུས་ཀྱི་ཕྱོགས་ན་ཡོད་པར་ཡོངས་སུ་གཅོད་པའི་ཡུལ་གྱི་ཕྱོགས་ན་ནི་མ་ཡིན་ནོ། །དེ་ལྟ་ན་འོ་ན་ནི་རྣམ་པར་ཤེས་པའི་ཁམས་དྲུག་པོ་དག་ཅེས་བྱ་བ་རྒྱས་པར་འབྱུང་བ་ནི། རེ་ཞིག་འདིར་རྣམ་པར་ཤེས་པའི་ཁམས་ལྔ་པོ་དག་ནི་ཡུལ་དང་དབང་པོ་

དང་དུས་མཉམ་པའི་ཕྱིར་ད་ལྟར་གྱི་ཁོ་ན་ཡིན་པར་བཟུང་སྟེ་རྣམ་པར་ཤེས་པའི་ཚོགས་ལྔ་ནི་ད་ལྟར་གྱི་ཡུལ་ཅན་ཡིན་ལ། འདིར་ཡིད་ཀྱི་རྣམ་པར་ཤེས་པའི་ཁམས་ཀྱང་ད་ལྟར་གྱི་ཁོ་ན་ཡིན་པར་རྣམ་པར་གཞག་གོ། །གང་གི་ཕྱིར་རྟེན་ཡིད་ཀྱི་ཁམས་ཀྱང་འདས་མ་ཐག་པ་ལས་རྣམ་པར་

འཇོག་སྟེ། ཡིད་ཀྱི་ཁམས་དང་ཡིད་ཀྱི་རྣམ་པར་ཤེས་པའི་ཁམས་དག་ནི་དུས་ཀྱི་བྱེ་བྲག་ཁོ་ནའི་སྒོ་ནས་ཐ་དད་པར་རྣམ་པར་གཞག་པ་ཡིན་པ་དེའི་ཕྱིར་དེ་དག་ནི་ནང་གི་ཡིན་པར་མི་འགྱུར་ཏེ་དེ་དག་ཡིད་ཀྱི་ཁམས་ཉིད་དུ་མ་གྱུར་ཅིང་འདས་པ་ཉིད་དུ་མ་གྱུར་པ་ནི་སེམས་ཀྱི་རྟེན་དུ་མི་འགྱུར་རོ། །

གང་གི་ཚེ་ཡིན་པ་དེའི་ཚེ་ཡང་དེ་དག་ཉིད་དེ་དག་ཡིན་ཏེ་མཚན་ཉིད་ལས་མི་འདའོ་ཞེས་བྱ་བའི་ཚིག་འདིས་ཅི་ཞིག་བསྒྲུབས་ཤེ་ན། འདིས་ནི་འབྱུང་བར་འགྱུར་བའི་རྟེན་གྱི་ངོ་བོས་ནང་གི་ཉིད་ཡིན་པའི་ཕྱིར་ད་ལྟར་གྱི་འདི་དག་ཀྱང་རྟེན་གྱི་ངོ་བོ་ཡིན་པར་འགྱུར་རོ་ཞེས་བྱ་བ་འདི་བསྒྲུབས་པ་

ཡིན་ནོ། །གལ་ཏེ་ཡང་རྣམ་པར་ཤེས་པ་མ་འོངས་པ་དང་ད་ལྟར་བྱུང་བ་ཞེས་བྱ་བ་རྒྱས་པར་འབྱུང་བ་ནི་འདས་པའི་དུས་ན་ཡིད་ཀྱི་ཁམས་ཀྱི་མཚན་ཉིད་ཡོད་པ་གང་ཡིན་པ་དེ་མ་འོངས་པ་དང་ད་ལྟར་བྱུང་བའི་དུས་དག་ན་ཡང་ཡོད་པ་ཁོ་ནའོ་སྙམ་དུ་བསམས་པ་ཡིན་ནོ། །མཚན་

Vol. 142 · folio 69b

ཉིད་ནི་དུས་རྣམས་སུ་འཁྲུལ་པ་མེད་དོ་ཞེས་བྱ་བ་ནི་ངོ་བོ་ཉིད་ཡོངས་སུ་འདོར་བ་མེད་དོ་ཞེས་བྱ་བའི་ཐ་ཚིག་གོ། །ཆོས་ཞེས་བྱ་བ་ནི་བརྟེན་པ་དང་བཅས་ཞེས་བྱ་བ་ནི་ཆོས་ཞེས་བྱ་བ་ནི་རྟེན་པ་དང་བཅས་པ་ཁོ་ན་ཡིན་ནོ་ཞེས་ངེས་པར་འཛིན་པར་བྱེད་པ་ཡིན་ནོ། །གང་ཞིག་རྣམ་

པར་ཤེས་པ་གང་གི་ཡུལ་དུ་ངེས་ལ་ཞེས་བྱ་བ་ནི་འདི་ལྟ་སྟེ་གཟུགས་ནི་མིག་གི་རྣམ་པར་ཤེས་པའི་ཡུལ་དུ་ངེས་པ་ནས་ཆོས་རྣམས་ནི་ཡིད་ཀྱི་རྣམ་པར་ཤེས་པ་ཡུལ་གྱི་བར་དུ་ངེས་ལ་གལ་ཏེ་དེ་ལ་མིག་གི་རྣམ་པར་ཤེས་པ་སྐྱེས་པ་འམ་སྐྱེ་པའི་ཆོས་ཅན་ཡིན་པ་ཡིན་པ་ནས་གལ་ཏེ་དེ་ལ་

ཡིད་ཀྱི་རྣམ་པར་ཤེས་པའི་བར་དུ་སྐྱེས་པ་འམ་སྐྱེ་བའི་ཆོས་ཅན་གྱི་ཡུལ་དེ་ནི་རྟེན་པ་དང་བཅས་པ་ཞེས་བྱའོ། །དེའི་དམིགས་པ་ཡང་རང་གི་ངོ་བོ་དང་ལྷན་ཅིག་འབྱུང་བ་མ་གཏོགས་པའོ་ཞེས་བྱ་བ་ནི་རང་གི་ངོ་བོ་དང་ལྷན་ཅིག་འབྱུང་བ་རྣམས་མ་གཏོགས་པ་སྟེ་རང་གི་ངོ་བོ་དང་

ལྷན་ཅིག་འབྱུང་བ་མ་གཏོགས་པ་ཆོས་ཐམས་ཅད་ནི་རྣམ་པར་ཤེས་པ་དེའི་དམིགས་པའི་ངོ་བོ་ཉིད་ཡིན་ནོ། །རང་གི་བདག་ཉིད་ལ་བྱེད་པ་ནི་འགལ་བའི་ཕྱིར་ཏེ་སོར་མོའི་རྩེ་མོ་དེ་ཉིད་ལ་སོར་མོའི་རྩེ་མོ་དེ་ཉིད་ཀྱིས་རེག་པར་འགྱུར་བ་ཡང་མེད་ལ། རལ་གྲིའི་སོ་སོ་དེ་ཉིད་ཀྱིས་གཅོད་པར་འགྱུར་བ་

ཡང་མེད་དོ། །ཤིན་ཏུ་ཉེ་བའི་ཕྱིར་དེ་དང་ལྷན་ཅིག་འབྱུང་བ་མཚུངས་པར་ལྡན་པའམ་མཚུངས་པར་ལྡན་པ་མ་ཡིན་པ་དག་ཀྱང་མ་ཡིན་ཏེ། མིག་ལ་ཡོད་པའི་མིག་རྩི་ནི་དེས་མི་འཛིན་ཏོ། །སེམས་ཀྱི་སྐད་ཅིག་མ་དེ་ཡང་སེམས་ཀྱི་སྐད་ཅིག་མ་གཞན་གྱི་དམིགས་པ་ཡིན་ཞེས་བྱ་

བ་ནི་སྐད་ཅིག་མ་སྔ་མ་ལ་རང་གི་ངོ་བོ་དང་ལྷན་ཅིག་འབྱུང་བའི་ཆོས་གང་དག་དམིགས་པར་མ་གྱུར་པ་དེ་དག་ཀྱང་དམིགས་པར་གྱུར་པས་སྐད་ཅིག་མ་གཉིས་ཀྱི་དམིགས་པར་ནི་ཆོས་ཐམས་ཅད་འགྱུར་རོ། །དེ་ལྟ་བས་ན་ཆོས་ཀྱི་ཁམས་ནི་རྟག་ཏུ་རྟེན་པ་དང་བཅས་པ་ཡིན་ཏེ་ཆོས་ཀྱི་

ཁམས་ནི་ཡིད་ཀྱི་ཁོ་ན་ཡིན་པར་ངེས་སོ། །ལྷག་མ་ནི། དེ་དང་མཚུངས་པ་དག་ཀྱང་ཡིན། །ཀྱང་ཞེས་བྱ་བའི་སྒྲ་ནི་རྟེན་པ་དང་བཅས་པ་དག་ཀྱང་ཡིན་པའོ་ཞེས་བྱ་བ་ནི་ལྷག་མ་དག་ཁོ་ན་རྟེན་པ་དང་བཅས་པ་དང་མཚུངས་པ་ཡིན་ནོ་ཞེས་ངེས་པར་འཛིན་པར་བྱེད་པ་ཡིན་ནོ། །ཆོས་ཀྱི་

Vol. 142 · folio 70a

ཁམས་ཁོ་ན་རྟེན་པ་དང་བཅས་པའོ་ཞེས་ངེས་པར་བཟུང་བའི་ཕྱིར་ལྷག་མ་རྣམས་རྟེན་པ་དང་བཅས་པ་ནི་མ་ཡིན་པས་རྟེན་པ་དང་བཅས་པ་དང་དེ་དང་མཚུངས་པ་དག་ཏུ་འགྲུབ་པར་འགྱུར་བ་མ་ཡིན་ནམ་ཞེ་ན། འགྲུབ་པར་མི་འགྱུར་ཏེ་རྟེན་པ་དང་བཅས་

པ་དག་ཁོ་ན་ནི་མ་ཡིན་ནོ་ཞེས་བྱ་བར་འགྱུར་མོད་ཀྱི་དེ་དང་མཚུངས་པ་ཁོ་ན་ཡིན་ནོ་ཞེས་བྱ་བར་འགྱུར་བས་དེ་བཟློག་པའི་ཕྱིར་ལྷག་མ་ནི། དེ་དང་མཚུངས་པ་དག་ཀྱང་ཡིན། །ཞེས་བྱ་བ་འདི་བརྩམས་ཏེ་རྟེན་པ་དང་བཅས་པ་དག་ཁོ་ན་ཡང་མ་ཡིན་ལ་དེ་དང་མཚུངས་པ་དག་ཁོ་ན་ཡང་

མ་ཡིན་ནོ། །གང་ཞིག་རང་གི་ལས་མི་བྱེད། །ཅེས་བྱ་བ་ནི་དེ་དང་མཚུངས་པ་དག་ཡིན་ནོ་ཞེས་བྱ་བར་སྦྱར་ཏེ་དེ་དང་མཚུངས་པ་དག་ཅེས་བྱ་བའི་མཇུག་ཐོགས་སུ་བཤད་པ་ཡིན་པའི་ཕྱིར་རོ། །གང་ཞིག་རང་གི་ལས་བྱེད་པ་ནི་རྟེན་པ་དང་བཅས་པའོ་ཞེས་བཤད་པར་འགྱུར་རོ་

ཞེས་བྱ་བ་ནི་རང་གི་ལས་མི་བྱེད་པ་དེ་ཁོ་ན་དེ་དང་མཚུངས་པ་ཡིན་ལ་དེ་དང་མཚུངས་པ་ཁོ་ན་རང་གི་ལས་མི་བྱེད་པ་ཡིན་ནོ་ཞེས་ངེས་པར་བཟུང་བ་དང་། དོན་གྱི་ཤུགས་ཀྱིས་ན་རང་གི་ལས་བྱེད་པ་ནི་རྟེན་པ་དང་བཅས་པ་ཡིན་ནོ་ཞེས་བྱ་བ་ཡིན་ནོ། །གཟུགས་རྣམས་མཐོང་བ་ཞེས་བྱ་བ་

ནི་མཐོང་བར་འགྱུར་ཞེས་བརྗོད་པར་བྱ་བ་མ་ཡིན་ནོ། །དེ་ལྟ་ན་དེ་རིང་འདས་པ་དང་ཁར་རྩང་འདས་པ་དང་ཡང་ཡོངས་སུ་བསྡུས་པར་འགྱུར་གྱི་དེ་ལྟ་མ་ཡིན་ནམ་ཁྱབ་པའི་མཚན་ཉིད་དུ་འགྱུར་རོ། །ཡང་ན་ཇི་སྐད་ཁོ་ནར་འབྱུང་བ་དེ་ནི་མཚོན་པ་ཙམ་དུ་ཟད་པར་བལྟ་བར་བྱ་སྟེ་དེ་རིང་

འདས་པ་ཡང་བརྗོད་པར་བྱའོ། །དེ་བཞིན་དུ་ཡིད་ཀྱི་བར་ལ་ཡང་རང་གི་ཡུལ་ལ་བྱེད་པས་བརྗོད་པར་བྱའོ་ཞེས་བྱ་བ་ནི་རང་གི་ཡུལ་ལ་རྩལ་གྱིས་བརྗོད་པར་བྱའོ། །ཇི་ལྟ་ཞེ་ན། རྣ་བ་གང་གིས་སྒྲ་རྣམས་ཐོས་པ་འམ་ཉན་པར་འགྱུར་བའི་རྣ་བ་དེ་ནི་རྟེན་པ་དང་བཅས་པའོ་ཞེས་བྱའོ་

ཞེས་བྱ་བ་སྟེ་ཐམས་ཅད་ལ་སྐྱར་བར་བྱའོ།། །།བམ་པོ་བདུན་པ། རྣམ་པར་ཤེས་པ་དང་ལྡན་པ་དང་ལྡན་པ་མ་ཡིན་པ་ཞེས་བྱ་བ་ནི་རྣམ་པར་ཤེས་པ་དང་འབྲེལ་བ་དང་འབྲེལ་བ་མ་ཡིན་པ་ཞེས་བྱ་བའི་ཐ་ཚིག་གོ། །གཅིག་གི་མིག་རྟེན་པ་དང་བཅས་པ་དེ་ནི་

Vol. 142 · folio 70b

ཐམས་ཅད་ཀྱི་རྟེན་པ་དང་བཅས་པ་ཡིན་ནོ་ཞེས་བྱ་བའི་དོན་ཏོ། །དེ་དང་མཚུངས་པ་རྣམས་ཀྱང་དེ་བཞིན་ཏེ་ཞེས་བྱ་བ་ནི་གཅིག་གི་མིག་དེ་དང་མཚུངས་པ་གང་ཡིན་པ་དེ་ནི་ཐམས་ཅད་ཀྱི་དེ་དང་མཚུངས་པ་ཡིན་ནོ་ཞེས་བྱ་བའི་ཐ་ཚིག་གོ། །ཕྲད་ནས་འཛིན་པའི་ཕྱིར་ཞེས་བྱ་བ་ནི་དྲི་ལ་སོགས་

པ་གང་དག་ལྷས་བྱིན་གྱི་ལྕེའི་དབང་པོ་ལ་སོགས་པ་དང་ཕྲད་ནས་འཛིན་པ་དེ་དག་མཆོད་སྦྱིན་གྱིས་མི་འཛིན་ཏེ་རང་གི་སྣའི་དབང་པོ་ལ་སོགས་པ་གནས་པའི་ཕྱིར་རོ། །དེ་བས་ན་ཐུན་མོང་མ་ཡིན་པའི་ཕྱིར་རོ། །འདི་དག་ནི་མིག་ལ་སོགས་པ་བཞིན་དུ་བསྒྲེ་བའི་རིགས་ཏེ་གཅིག་གི་དྲི་རྟེན་པ་

དང་བཅས་པ་གང་ཡིན་པ་དེ་ནི་ཐམས་ཅད་ཀྱི་ཡིན་ལ་དེ་དང་མཚུངས་པ་ཡང་དེ་བཞིན་ནོ་ཞེས་བརྗོད་པར་བྱའི། གཟུགས་ཇི་ལྟར་དྲི་ལ་སོགས་པ་ཡང་དེ་དང་འདྲའོ་ཞེས་ནི་བརྗོད་པར་མི་བྱའོ། །གཅིག་གི་སྣ་ལ་སོགས་པའི་རྣམ་པར་ཤེས་པ་སྐྱེད་པར་འགྱུར་བའི་དྲི་ལ་སོགས་པ་གང་དག་ཡིན་

པ་དེ་དག་ཉིད་གཞན་དག་གིས་ཡང་ཡིན་པ་སྲིད་པ་དེ་ནི་ཡོད་ཀྱི་ཞེས་བྱ་བ་ནི་གལ་ཏེ་དེ་དག་ལྷས་བྱིན་གྱི་སྣའི་དབང་པོ་ལ་སོགས་པ་དང་ཕྲད་པར་གྱུར་ན་ནི་ལྷས་བྱིན་གྱི་རྣམ་པར་ཤེས་པ་སྐྱེད་པར་འགྱུར་ལ། ཇི་སྟེ་མཆོད་སྦྱིན་གྱི་སྣའི་དབང་པོ་ལ་སོགས་པ་དང་ཕྲད་ན་ནི་མཆོད་སྦྱིན་གྱི་རྣམ་

པར་ཤེས་པ་སྐྱེད་པར་འགྱུར་རོ་ཞེས་བྱ་བའི་ཐ་ཚིག་གོ། །ཡང་ན་གཞན་དག་གི་ཡང་ཡིན་ཞེས་བྱ་བ་ནི་དེ་ལ་ཡོད་པའི་སྲིན་བུ་ཕྲ་མོ་ལ་སོགས་པའི་རྣམ་པར་ཤེས་པ་ཡང་སྐྱེད་པར་འགྱུར་གྱི་དྲི་ལ་སོགས་པ་དེ་དག་གང་གིས་སྣའི་དབང་པོ་ལ་སོགས་པ་དང་ཕྲད་པའི་ལྷས་བྱིན་དེ་ཁོ་ནའི་

རྣམ་པར་ཤེས་པ་སྐྱེད་པར་འགྱུར་བ་ནི་མ་ཡིན་ནོ། །དབང་པོ་དང་ཡུལ་དང་རྣམ་པར་ཤེས་པ་རྣམས་ཕན་ཚུན་རྟེན་པ་ཞེས་བྱ་བ་ནི་ཕན་ཚུན་རྟེན་དང་ཡུལ་དང་བརྟེན་པའི་ངོ་བོར་མངོན་དུ་འཇུག་པ་སྟེ། འདི་ལྟར་དབང་པོའི་ཁམས་དག་ནི་ཅི་རིགས་པར་རྣམ་པར་ཤེས་པའི་ཁམས་དག་གི་ནི་རྟེན་

གྱི་ནི་ངོ་བོར་བརྟེན་ཏེ་རྟེན་པར་བྱེད་དོ་ཞེས་བྱ་བའི་ཐ་ཚིག་གོ། །ཡུལ་རྣམས་ཀྱི་ནི་ཡུལ་ཅན་གྱི་ངོ་བོར་རོ། །དེ་བཞིན་དུ་ཡུལ་གྱི་ཁམས་དག་ཀྱང་རང་གི་དབང་པོའི་ཁམས་རྣམས་ཀྱི་ནི་ཡུལ་གྱི་ངོ་བོར་རྟེན་ཏོ། །རྣམ་པར་ཤེས་པའི་ཁམས་རྣམས་ཀྱི་ནི་ཡུལ་དང་དམིགས་པའི་ངོ་བོར་རྟེན་ཏེ། དེ་བཞིན་དུ་

Vol. 142 · folio 71a

རྣམ་པར་ཤེས་པའི་ཁམས་དག་ཀྱང་རང་རང་གི་དབང་པོའི་ཁམས་རྣམས་ཀྱི་རྟེན་ཅན་གྱི་ངོ་བོར་རྟེན་ཏོ། །ཡུལ་གྱི་ཁམས་རྣམས་ཀྱི་ནི་ཡུལ་ཅན་དང་དམིགས་པ་ཅན་གྱི་ངོ་བོར་རྟེན་ཏོ། །དེ་བས་ན་ཕན་ཚུན་རྟེན་པ་ནི་བརྟེན་པ་ཡིན་ནོ། །བྱེད་པ་རྟེན་པ་ནི་བརྟེན་པའོ་ཞེས་བྱ་བ་ལ། བྱེད་

པ་ནི་མིག་ལ་སོགས་པའི་བྱེད་པ་ནི་བལྟ་བ་ལ་སོགས་པ་ཡིན་ནོ། །རྣམ་པར་ཤེས་པའི་ཁམས་རྣམས་ཀྱི་ནི་རྣམ་པར་ཤེས་པར་བྱེད་པ་ཉིད་དོ། །ཡུལ་གྱི་ཁམས་རྣམས་ཀྱི་ནི་དེ་དག་གི་ཡུལ་ལམ་དམིགས་པའི་ངོ་བོ་ཡིན་ནོ། །བྱེད་པ་དེ་ལ་རྟེན་པ་ནི་བརྟེན་པ་ཡིན་ཏེ་དེ་འདི་དག་ལ་ཡོད་པས་ན་ཞེས་བྱ་

བའི་ཐ་ཚིག་གོ། །འདི་ནི་རབ་ཏུ་བསྟན་པ་ཙམ་ཁོ་ནར་ཟད་ཀྱི་ཚིག་རྣམ་པར་སྦྱར་བ་ནི་འདི་ལྟར་བྱའོ། །རྟེན་པ་དང་ལྷན་ཅིག་འདུག་པས་རྟེན་པ་དང་བཅས་པས་སམ་འདི་དག་ལ་རྟེན་པ་འདྲ་བ་ཡོད་པས་འདི་དག་ནི་རྟེན་པ་མཚུངས་པ་དག་ཡིན་ནོ། །འབྲས་བུ་རེག་པ་མཚུངས་པའི་ཕྱིར་ཞེས་བྱ་བ་ཅི་

ཞེ་ན། །རྟེན་པ་དང་མཚུངས་པ་ཞེས་བྱ་བར་སྐབས་དང་སྦྱར་རོ། །བརྟེན་པར་བྱ་བ་ཡིན་པས་ན་རྟེན་པ་སྟེ་ཚིག་རྣམ་པར་སྦྱར་བ་ནི་སྔ་མ་བཞིན་ནོ། །དབང་པོ་དང་ཡུལ་དང་རྣམ་པར་ཤེས་པ་འདི་རྣམས་ཀྱི་འབྲས་བུ་སེམས་ལས་བྱུང་བ་རེག་པ་དྲན་པ་ཡིན་ཏེ། མིག་དང་གཟུགས་རྣམས་ལ་བརྟེན་ནས་

མིག་གི་རྣམ་པར་ཤེས་པ་སྐྱེའོ། །གསུམ་འདུས་པ་ལས་རེག་པའོ་ཞེས་བྱ་བ་ལ་སོགས་པ་འབྱུང་བའི་ཕྱིར་རོ། །གང་དག་རྟེན་པ་དང་བཅས་པ་མ་ཡིན་པ་ཞེས་བྱ་བ་རྒྱས་པར་འབྱུང་བ་ནི་མིག་ལ་སོགས་པ་རྟེན་པ་དང་བཅས་པ་མ་ཡིན་པ་གང་དག་ཡིན་པ་དེ་དག་ནི་རྟེན་པ་དང་བཅས་པའི་མཚན་

ཉིད་དུ་བཤད་པ་དེ་དག་དང་མཚུངས་ཤིང་འདྲ་བས་ན་དེ་དང་མཚུངས་པ་ཡིན་ཏེ་འདིར་མཚུངས་པ་ཞེས་བྱ་བའི་སྒྲ་ནི་འདྲ་བའི་དོན་ཡིན་ནོ། །མཐོང་བས་སྤང་བར་བྱ་བ་ཞེས་བྱ་བ་ལ་མཐོང་བ་ནི་དང་པོ་ཉིད་དུ་བདེན་པ་མཐོང་བ་ཡིན་ཏེ། ཟག་པ་མེད་པའི་སེམས་ཀྱི་སྐད་ཅིག་མ་བཅོ་ལྔས་བསྡུས་པ་

ཡིན་ནོ། །བསྒོམ་པ་ནི་དེ་ཉིད་ལ་ཡང་དང་ཡང་དུ་ལྟ་བ་ཡིན་ནོ། །ཡང་ན་བསྒོམ་པ་ནི་འཇིག་རྟེན་པའི་མཉམ་པར་གཞག་པའི་ཤེས་པ་ཡིན་ནོ། །བཅུ་ནི་བསྒོམ་པས་སྤང་བྱ་ཡིན། །ལྔ་ཡང་ཡིན་ཏེ་ཞེས་བྱ་བ་ནི་གཟུགས་ཅན་གྱི་ཁམས་བཅུ་དང་དེ་དག་གི་རྣམ་པར་ཤེས་པའི་ཁམས་ལྔ་

Vol. 142 · folio 71b

ཡིན་ནོ། །དེ་དག་ཁོ་ན་ཡིན་ནོ་ཞེས་བྱ་བ་འདི་ཇི་ལྟར་ཤེས་ཤེ་ན། ཐ་མའི་གསུམ་རྣམ་གསུམ་ཞེས་འབྱུང་བའི་ཕྱིར་ཐ་མའི་གསུམ་ལས་གཞན་པ་ནི་ཁམས་བཅོ་ལྔ་ཡིན་ནོ་ཞེས་བྱ་བ་ཡིན་ཏེ་དེ་དག་ནི་བསྒོམ་པས་སྤང་བར་བྱ་བ་ཁོ་ན་ཡིན་ནོ་ཞེས་བྱ་བར་ངེས་པར་བཟུང་ངོ་། །རྣམ་པ་

གསུམ་སྟ་ཞེས་བྱ་བ་ནི་མཐོང་བས་སྤང་བར་བྱ་བ་དང་བསྒོམ་པས་སྤང་བར་བྱ་བ་དང་། སྤང་བར་བྱ་བ་མ་ཡིན་པ་དག་ཡིན་ནོ་ཞེས་བྱ་བའི་ཐ་ཚིག་སྟེ། དེ་དག་ཁོ་ན་རྣམ་པ་གསུམ་ཡིན་ནོ། །ཕྲ་རྒྱས་བརྒྱད་ཅུ་རྩ་བརྒྱད་དང་དེ་དག་དང་ལྷན་ཅིག་འབྱུང་བ་ཞེས་བྱ་བ་ལ་ཕྲ་རྒྱས་ནི་འཇིག་ཚོགས་ལ་

ལྟ་བ་ལ་སོགས་པ་ཡིན་ནོ། །དེ་དག་དང་ལྷན་ཅིག་འབྱུང་བ་ནི་རྣམ་པར་ཤེས་པ་དང་ཚོར་བ་ལ་སོགས་པ་མཚུངས་པར་ལྡན་པ་རྣམས་དང་མཚུངས་པར་ལྡན་པ་མ་ཡིན་པ་དེ་དག་གི་མཚན་ཉིད་དང་རྗེས་ཀྱི་མཚན་ཉིད་དག་ཡིན་ནོ། །དེ་དག་གི་ཐོབ་པ་རྗེས་སུ་འབྲང་བ་དང་བཅས་པ་རྣམས་ཞེས་བྱ་བ་

ལ། དེ་དག་ཅེས་བྱ་བའི་སྒྲ་ནི་ཕྲ་རྒྱས་ལ་སོགས་པ་དང་སྦྱར་ཏེ། ཕྲ་རྒྱས་དེ་དག་དང་། དེ་དག་དང་ལྷན་ཅིག་འབྱུང་བ་རྣམས་ཀྱིས་ཐོབ་པ་དག་ཡིན་ནོ། །ཐོབ་པ་དག་དང་ཕྲ་རྒྱས་དང་ལྷན་ཅིག་འབྱུང་བ་ཡིན་མོད་ཀྱི་ཐམས་ཅད་ནི་མ་ཡིན་ཏེ། །ཐོབ་པ་ཁ་ཅིག་ནི་ཕྲ་རྒྱས་ལ་སོགས་པ་དང་ལྷན་ཅིག་

འབྱུང་བ་ཡིན་ཏེ་ལྷན་ཅིག་སྐྱེས་པ་གང་དག་ཡིན་པའོ། །ཁ་ཅིག་ནི་དེ་དག་པས་སྔ་མ་དང་འཕྱི་བར་འགྱུར་ཏེ། དེའི་ཕྱིར་ཐོབ་པ་ལོགས་ཤིག་ཏུ་སྨོས་སོ། །རྗེས་སུ་འབྲང་བ་དང་བཅས་པ་རྣམས་ཞེས་བྱ་བ་སྨོས་པས་ནི་རྗེས་ཀྱི་ཐོབ་པ་དག་དང་དེ་དག་གི་མཚན་ཉིད་དག་བསྡུའོ། །ཟག་པ་དང་

བཅས་པ་ལྷག་མ་རྣམས་ནི་བསྒོམ་པས་སྤང་བར་བྱ་བ་དག་ཡིན་ནོ་ཞེས་བྱ་བ་ནི་ཁམས་ཐ་མ་གསུམ་པོ་དེ་དག་ཉིད་མཐོང་བས་སྤང་བར་བྱ་བ་རྣམས་ལས་གཞན་པ་ཟག་པ་དང་བཅས་པ་ལྷག་མ་གང་དག་ཡིན་པ་དེ་དག་ནི་བསྒོམ་པས་སྤང་བར་བྱ་བ་ཡིན་ནོ། །དེ་དག་ཀྱང་གང་ཞེ་ན། ཕྲ་རྒྱས་

བཅུ་དང་དེ་དག་དང་ལྷན་ཅིག་འབྱུང་བ་རྣམས་དང་དེ་དག་གིས་ཐོབ་པ་རྗེས་སུ་འབྲང་བ་དང་བཅས་པ་རྣམས་ཏེ་དགེ་བ་ཟག་པ་དང་བཅས་པ་རྣམས་དང་འདུ་བྱེད་མ་བསྒྲིབས་ལ་ལུང་དུ་མ་བསྟན་པ་རྣམས་དང་རྣམ་པར་རིག་བྱེད་མ་ཡིན་པའི་གཟུགས་ཟག་པ་དང་བཅས་པ་རྗེས་སུ་འབྲང་

Vol. 142 · folio 72a

བ་དང་བཅས་པ་ཡིན་ནོ། །ཟག་པ་མེད་པ་རྣམས་ནི་སྤང་བར་བྱ་བ་མ་ཡིན་པ་དག་གོ་ཞེས་བྱ་བ་ནི་ལམ་གྱི་བདེན་པ་དང་འདུས་མ་བྱས་ཀྱི་ངོ་བོ་ཉིད་ཡིན་ནོ། །སྤང་བར་བྱ་བ་གཞན་ཡང་ཡོད་པ་མ་ཡིན་ནམ་ཞེས་བྱ་བ་རྒྱས་པར་འབྱུང་བ་ནི་སོ་སོའི་སྐྱེ་བོ་ཉིད་

ཀྱང་མ་བསྒྲིབས་ལ་ལུང་དུ་མ་བསྟན་པའི་འདུ་བྱེད་ཀྱི་ངོ་བོ་ཉིད་ཡིན་པའི་ཕྱིར་བསྒོམ་པས་སྤང་བར་བྱ་བའི་ནང་དུ་གཏོགས་ལ་ངན་སོང་བར་འགྱུར་བའི་ལུས་དང་ངག་གི་ལས་ཀྱང་གཟུགས་ཀྱི་ངོ་བོ་ཉིད་ཡིན་པའི་ཕྱིར་བསྒོམ་པས་སྤང་བར་བྱ་བ་ཡིན་པར་བཤད་པས། དེའི་ཕྱིར་གནས་

མའི་བུའི་སྡེ་པ་དག །འཕགས་པའི་ལམ་དང་འགལ་བའི་ཕྱིར། །ཞེས་རྒོལ་བར་བྱེད་དེ། སོ་སོའི་སྐྱེ་བོ་ཉིད་ཀྱང་འཕགས་པའི་ལམ་སྐྱེས་པ་ན་མེད་ལ་ངན་སོང་བར་ངེས་པའི་ལས་ཡོད་ན་ཡང་འཕགས་པའི་ལམ་མི་སྐྱེའོ། །འཕགས་པའི་ལམ་སྐྱེས་ན་ནི་ངན་སོང་བའི་ལས་ཀྱང་

མི་འབྱུང་སྟེ། དེ་ལྟ་བས་ན་གཉི་ག་འཇིག་ཚོགས་ལ་ལྟ་བ་ལ་སོགས་པ་བཞིན་དུ་མཐོང་བས་སྤང་བར་བྱ་བ་ཡིན་ནོ་ཞེས་རྗོད་པར་བྱེད་དེ། དེ་དགག་པའི་ཕྱིར་འདི་བཤད་ཟིན་ཀྱང་བདེ་བླག་ཏུ་རྟོགས་པར་བྱ་བའི་ཕྱིར་མདོར་བསྡུས་ནས་ཡང་། ཉོན་མོངས་ཅན་མིན་མཐོང་སྤང་མིན། །

གཟུགས་མིན་དྲུག་པ་མིན་སྐྱེས་མིན། །ཞེས་བྱ་བ་བརྗོད་དེ། མཐོང་བ་ནི་མཐོང་བ་ཡིན་ནོ། །ཉོན་མོངས་ཅན་མིན་པ་ནི་མ་བསྒྲིབས་ལ་ལུང་དུ་མ་བསྟན་པ་དང་དགེ་བ་ཟག་པ་དང་བཅས་པ་ཡིན་ཏེ་མཐོང་བས་སྤང་བར་བྱ་བ་མ་ཡིན་ནོ། །གཟུགས་ནི་ཉོན་མོངས་ཅན་ཡིན་ཡང་མཐོང་བས་

སྤང་བར་བྱ་བ་མ་ཡིན་ནོ། །དྲུག་པ་མིན་སྐྱེས་ནི་རྣམ་པར་ཤེས་པའི་ཚོགས་ལྔ་ལས་སྐྱེས་པ་ཡིན་ཏེ། དེ་ནི་གཟུགས་མ་ཡིན་ཞིང་ཉོན་མོངས་པ་ཅན་ཡིན་ཡང་མཐོང་བས་སྤང་བར་བྱ་བ་མ་ཡིན་ནོ། །འདི་ལས་གཞན་ཇི་སྐད་བཤད་པ་ལྟ་བུ་ནི་མཐོང་བས་སྤང་བར་བྱ་བ་མ་ཡིན་ནོ། །སོ་

སོའི་སྐྱེ་བོ་ཉིད་ནི་ཉོན་མོངས་པ་ཅན་མ་ཡིན་པའི་ལུང་དུ་མ་བསྟན་པ་ཡིན་ཏེ་དགེ་བའི་རྩ་བ་ཀུན་ཏུ་ཆད་པ་དང་འདོད་ཆགས་དང་བྲལ་བ་རྣམས་ཀྱང་དེ་དང་ལྡན་པའི་ཕྱིར་རོ་ཞེས་བྱ་བ་ནི་དགེ་བའི་རྩ་བ་ཀུན་ཏུ་ཆད་པ་རྣམས་ནི་ཆོས་དགེ་བ་དག་དང་མི་ལྡན་པར་འདོད་ལ་སོ་སོའི་སྐྱེ་བོ་ཉིད་དང་མི་ལྡན་

Vol. 142 · folio 72b

ཏེ། འདི་ལྟར་དེ་དག་ནི་སོ་སོའི་སྐྱེ་བོ་ཡིན་པར་འདོད་དོ། །དེ་ལྟ་བས་ན་དེ་དག་ནི་སོ་སོའི་སྐྱེ་བོ་ཉིད་ནི་དགེ་བ་ཡང་མ་ཡིན་ནོ། །དེ་ནི་འདོད་ཆགས་དང་བྲལ་བ་རྣམས་ཀྱང་དེ་དང་ལྡན་པའི་ཕྱིར་ཉོན་མོངས་པ་ཅན་ཡང་མ་ཡིན་ཏེ། ཉོན་མོངས་པ་ཅན་གྱི་དངོས་པོ་ནི་ངོ་བོ་ཉིད་ཀྱིས་སྤོང་བར་འདོད་དེ། ཐོབ་པ་བཅད་

པར་སྤོང་བ་ཞེས་བྱ་བའི་ཐ་ཚིག་གོ། །གལ་ཏེ་སོ་སོའི་སྐྱེ་བོ་ཉིད་དེ་ཉོན་མོངས་པ་ཅན་ཞིག་ཡིན་པར་གྱུར་ན་འཇིག་རྟེན་པའི་འདོད་ཆགས་དང་བྲལ་བ་རྣམས་ལ་དེའི་ཐོབ་པ་ཆད་པས་དེ་དང་མི་ལྡན་པ་ཞིག་ན། དེ་དག་དེ་དང་ལྡན་པར་ཡང་འདོད་དེ། །འདི་ལྟར་འཇིག་རྟེན་པའི་འདོད་ཆགས་དང་བྲལ་བ་དེ་

དག་ནི་སོ་སོ་སྐྱེ་བོ་ཁོ་ན་ཡིན་པར་འདོད་དོ། །ཉོན་མོངས་པ་ཅན་མ་ཡིན་པའི་ལུང་དུ་མ་བསྟན་པ་ཉིད་ཅིག་ཡིན་ན་ནི་ཉེས་པ་མེད་དོ། །ཉོན་མོངས་པ་ཅན་མ་ཡིན་པ་ནི་འདུན་པའི་འདོད་ཆགས་སྤོང་བར་འདོད་དེ། དེ་ལ་དམིགས་པའི་ཉོན་མོངས་པའི་ཐོབ་པ་གཅོད་ཅེས་བྱ་བའི་ཐ་ཚིག་གོ། །དེའི་བདག་

ཉིད་ཀྱི་ཐོབ་པ་གཅོད་པར་ནི་མི་འདོད་དོ། །འདི་ལྟར་བཅོམ་ལྡན་འདས་ཀྱིས་དགེ་སློང་དག་གཟུགས་ལ་འདུན་པའི་འདོད་ཆགས་གང་ཡིན་པ་དེ་སྤོངས་ཤིག་འདུན་པའི་འདོད་ཆགས་སྤངས་ནས་དེ་ལྟ་ན་ཁྱེད་ཀྱིས་གཟུགས་སྤངས་པ་ཡིན་ནོ་ཞེས་བྱ་བ་རྒྱས་པར་གསུངས་སོ། །དེ་ལྟ་བས་ན། དེ་དག་

གི་སོ་སོའི་སྐྱེ་བོ་ཉིད་ཉོན་མོངས་པ་ཅན་མ་ཡིན་པའི་ལུང་དུ་མ་བསྟན་པ་སྤངས་ཀྱང་མིག་ལ་སོགས་པ་བཞིན་དུ་ཀུན་ཏུ་འབྱུང་སྟེ། དེའི་ཕྱིར་དེ་དང་ལྡན་པ་ཡིན་ནོ། །ཡང་ཅིའི་ཕྱིར་སོ་སོའི་སྐྱེ་བོ་ཉིད་ནི་ཉོན་མོངས་པ་ཅན་མ་ཡིན་པའི་ལུང་དུ་མ་བསྟན་པ་ཡིན་པའི་ཕྱིར་མཐོང་བས་སྤང་བར་བྱ་བ་མ་ཡིན་ལ་

ལུས་དང་ངག་གི་ལས་ནི་གཟུགས་ཡིན་པའི་ཕྱིར་མཐོང་བས་སྤང་བར་བྱ་བ་མ་ཡིན་ཞེ་ན། བདེན་པ་དག་ལ་ལོག་པར་མི་རྟོག་པའི་ཕྱིར་ཞེས་བྱ་བ་སྨོས་ཏེ། སོ་སོའི་སྐྱེ་བོ་ཉིད་ནི་ཉོན་མོངས་པས་སྐྱོན་ཅན་དུ་གྱུར་པ་མ་ཡིན་པའི་ཕྱིར་དང་དམིགས་པར་བྱེད་པ་མ་ཡིན་པའི་ཕྱིར་སྡུག་བསྔལ་ལ་

སོགས་པའི་བདེན་པ་དག་ལ་ལོག་པར་མི་རྟོག་སྟེ། ཕྱིན་ཅི་ལོག་གི་ངོ་བོར་མི་འཇུག་གོ་ཞེས་བྱ་བའི་ཐ་ཚིག་གོ། །ལུས་དང་ངག་གི་ལས་ཀྱང་དམིགས་པར་བྱེད་པ་མ་ཡིན་པ་ཉིད་ཀྱིས་ལོག་པར་མི་རྟོག་སྟེ། དེ་ལྟ་བས་ན་གཉི་ག་མཐོང་བས་སྤང་བར་བྱ་བ་མ་ཡིན་ནོ། །བདེན་པ་དག་ལ་ལོག་

Vol. 142 · folio 73a

པར་མི་རྟག་པའི་ཕྱིར་ཞེས་བྱ་བའི་གཏན་ཚིགས་འདི་ནི་དྲུག་པ་མ་ཡིན་པ་ལས་སྐྱེས་པ་ལ་ཡང་བསྒྲེ་བར་བྱའོ། །སྡུག་བསྔལ་ལ་ཆོས་ཤེས་པའི་བཟོད་པ་ན་སོ་སོའི་སྐྱེ་བོ་ཉིད་དུ་ཡང་ཐལ་བར་འགྱུར་བའི་ཡང་ཕྱིར་རོ་ཞེས་བྱ་བའི་རྒྱུ་བསྡུ་བ་འདི་ནི་སོ་སོ་

སྐྱེ་བོ་ཉིད་ཁོ་ན་མཐོང་བས་སྤང་བར་བྱ་བ་ཉིད་ཡིན་པ་བཟློག་པའི་ཕྱིར་བརྗོད་པ་ཡིན་ཏེ། ལུས་དང་ངག་གི་ལས་དང་ནི་འབྲེལ་པ་མེད་པའི་ཕྱིར་རོ། །སྡུག་བསྔལ་ལ་ཆོས་ཤེས་པའི་བཟོད་པ་ན་སོ་སོའི་སྐྱེ་བོ་ཉིད་ཀྱི་ཐོབ་པ་འཆད་ཀྱི། འགགས་པར་འགྱུར་བའི་ལམ་གྱིས་ནི། །དེའི་

སྒྲིབ་པ་རབ་ཏུ་སྤོང་། །ཞེས་འབྱུང་བའི་ཕྱིར་ཆད་ཟིན་པ་ནི་མ་ཡིན་ཏེ། དེས་སྤང་བར་བྱ་བའི་ཉོན་མོངས་པའི་ཐོབ་པ་བཞིན་ནོ། །སྡུག་བསྔལ་ལ་ཆོས་ཤེས་པས་ན་ནི་དེའི་ཐོབ་པ་ཆད་པ་ཡིན་ནོ། །དེས་ན་སྡུག་བསྔལ་ལ་ཆོས་ཤེས་པའི་བཟོད་པའི་གནས་སྐབས་ན་དེའི་ཐོབ་པ་

ཡོད་པའི་ཕྱིར་གང་ཟག་དེ་སོ་སོའི་སྐྱེ་བོ་ཉིད་ཡིན་པར་འགྱུར་བ་ཞིག་ན། འདི་ནི་དེའི་གནས་སྐབས་ན་འཕགས་པའི་ལམ་ཐོབ་པའི་ཕྱིར་སོ་སོའི་སྐྱེ་བོ་ཡིན་ནོ་ཞེས་བྱ་བར་རྣམ་པར་གཞག་པར་ཡང་མི་ནུས་སོ། །འདི་ལྟར་སོ་སོ་སྐྱེ་བོ་ཉིད་ཀྱི་མཚན་ཉིད་ནི། སོ་སོའི་སྐྱེ་བོ་ཉིད་གང་ཞེ་ན།

འཕགས་པའི་ཆོས་རྣམས་མ་ཐོབ་པའོ་ཞེས་བྱ་བ་ཡིན་ལ་མ་ཐོབ་པ་དེ་ཡང་འཕགས་པའི་ཆོས་རྣམས་ཐོབ་ནས་ལྡོག་སྟེ། དེ་ལྟ་བས་ན་འདི་ནི་འཕགས་པ་ཁོ་ན་ཡིན་ནོ། །རེ་ཞིག་བྱེ་བྲག་ཏུ་སྨྲ་བ་ཁྱེད་རྣམས་ལ་འདི་དྲི་བར་བྱ་སྟེ། ཅི་སོ་སོའི་སྐྱེ་བོ་ཉིད་དེ་བསྒོམ་པའི་ལམ་ཐོབ་པ་ཁོ་ནས་

སྤོང་བར་འགྱུར་རམ། སྨྲས་པ་མ་ཡིན་ཏེ། སོ་སོའི་སྐྱེ་བོ་ཉིད་དེ་ནི་འདོད་པ་ན་སྤྱོད་པ་ནས་སྲིད་པའི་རྩེ་མོ་པའི་བར་ས་དགུ་པ་ཡིན་ལ་དེ་ཡང་ཉོན་མོངས་པ་ཅན་མ་ཡིན་པ་ཡིན་ནོ། །དེས་ན་སོ་སོའི་ཉོན་མོངས་པའི་རྣམ་པ་དགུ་པ་སྤོང་བའི་ཕྱིར་གནས་སྐབས་ན་སྤོང་བར་འགྱུར་ཏེ་ཟག་པ་དང་

བཅས་པ་ཉོན་མོངས་པ་ཅན་མ་ཡིན་པ་ཐམས་ཅད་ནི་རྣམ་པར་གྲོལ་བའི་ལམ་དགུ་པ་ཁོ་ན་ལ་སྤོང་བར་འགྱུར་རོ། །གལ་ཏེ་དེ་ལྟ་ན་འདོད་ཆགས་དང་མ་བྲལ་བའི་གནས་སྐབས་ན་འཕགས་པ་སོ་སོའི་སྐྱེ་བོ་ཡིན་པར་འགྱུར་རོ་ཞེ་ན་མ་ཡིན་ཏེ། སོ་སོའི་སྐྱེ་བོ་ཉིད་རྣམ་པར་

Vol. 142 · folio 73b

ཉམས་པའི་ཕྱིར་རོ། །སྡུག་བསྔལ་ལ་ཆོས་ཤེས་པའི་བཟོད་པ་ཕན་ཆད་དེ་རྣམ་པར་ཉམས་པ་ཁོ་ན་ཡིན་གྱི། སྤང་བ་ནི་མ་ཡིན་ནོ། །རྣམ་པར་ཉམས་པ་དང་སྤང་བ་དག་ལ་ཁྱད་པར་ཅི་ཡོད་ཅེ་ན། རྣམ་པར་ཉམས་པ་ནི་ཐོབ་པ་ཆད་པ་ཡིན་པར་རྣམ་པར་གཞག་གོ། །སྤངས་པ་ནི་

གཉེན་པོ་ཐོབ་པ་ཡིན་པར་རྣམ་པར་གཞག་གོ། །དེ་ལྟ་བས་ན་ཐོབ་པ་ཆད་པས་སོ་སོའི་སྐྱེ་བོ་ཉིད་དེ་དང་མི་ལྡན་པའི་ཕྱིར་དེའི་གནས་སྐབས་ན་འཕགས་པ་ཁོ་ན་ཡིན་གྱི་སོ་སོའི་སྐྱེ་བོ་ནི་མ་ཡིན་པས་ཉེས་པ་མེད་དོ། །མིག་དང་ཆོས་ཀྱི་ཁམས་ཕྱོགས་ནི། །ལྟ་བ་ཡིན་ཏེ་ཞེས་བྱ་བ་ནི་མིག་ཁོ་ན་

དང་ཆོས་ཀྱི་ཁམས་ཀྱི་ཕྱོགས་ཁོ་ན་ལྟ་བ་ཡིན་ནོ་ཞེས་བྱ་བར་ངེས་པར་འཛིན་པ་ཡིན་ན། །འཇིག་ཚོགས་ལ་ལྟ་བ་ལ་སོགས་པ་ཞེས་བྱ་བ་ནི་འཇིག་ཚོགས་ལ་ལྟ་བ་དང་མཐར་འཛིན་པར་ལྟ་བ་དང་ལོག་པར་ལྟ་བ་དང་ལྟ་བ་མཆོག་ཏུ་འཛིན་པ་དང་ཚུལ་ཁྲིམས་དང་། བརྟུལ་ཞུགས་མཆོག་ཏུ་འཛིན་

པའོ། །སློབ་པའི་ཟག་པ་མེད་པའོ། །ཞེས་བྱ་བ་ནི་ཤེས་རབ་ཅེས་བྱ་བ་སྐབས་དང་སྦྱར་རོ། །མི་སློབ་པའི་ནི་མི་སློབ་པའི་འོ་ཞེས་བྱ་བ་ནི་མི་སློབ་པའི་ཟག་པ་མེད་པའི་ཤེས་རབ་ནི་མི་སློབ་པ་ཡིན་ནོ། །ཟད་པ་དང་མི་སྐྱེ་བ་ཤེས་པ་མ་གཏོགས་པ་ཞེས་བརྗོད་པར་བྱ་སྟེ། ཟད་དང་མི་སྐྱེ་བློ་

ལྟ་མིན། །ཞེས་འཆད་པར་འགྱུར་རོ། །སྤྲིན་བཅས་པ་དང་སྤྲིན་མེད་པ། །ཞེས་བྱ་བ་རྒྱས་པར་འཇིག་རྟེན་པ་ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པ་དང་སློབ་པ་དང་མི་སློབ་པའི་ལྟ་བ་དག་གིས་ཆོས་ལ་ལྟའོ་ཞེས་བྱ་བའི་བར་དུ་འབྱུང་བ་ནི་འཇིག་རྟེན་ལ་ཡོད་པས་ན་འཇིག་

རྟེན་པའོ། །ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པ་ནི་ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པའོ། །འདི་ནི་ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པ་ཡང་ཡིན་ལ་འཇིག་རྟེན་པ་ཡང་ཡིན་པས། འཇིག་རྟེན་པ་ཉོན་མོངས་པ་ཅན་དང་ཉོན་མོངས་པ་

ཅན་མ་ཡིན་པའོ། །འཇིག་རྟེན་པ་ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པ་དང་སློབ་པ་དང་མི་སློབ་པ་ནི་འཇིག་རྟེན་པ་ཉོན་མོངས་པ་ཅན་དང་ཉོན་མོངས་པ་ཅན་མ་ཡིན་པ་དང་སློབ་པ་དང་མི་སློབ་པ་མ་ཡིན་ཏེ་དེ་དག་གི་ཆོས་ལ་ལྟའོ། །ཇི་ལྟ་བུ་ཞིག་ཡིན་ཞེ་ན། ཇི་ལྟར་

Vol. 142 · folio 74a

སྤྲིན་དང་བཅས་པའི་མཚན་མོ་གཟུགས་ལ་ལྟ་བ་དེ་བཞིན་དུ་འཇིག་ཚོགས་ལ་ལྟ་བ་ལ་སོགས་པ་འཇིག་རྟེན་པའི་ལྟ་བ་ཉོན་མོངས་པ་ཅན་གྱིས་ཆོས་ལ་ལྟ་བ་ཡིན་ཏེ། ཤིན་ཏུ་མི་གསལ་ཞེས་བྱ་བའི་ཐ་ཚིག་གོ། །ཇི་ལྟར་སྤྲིན་མེད་པའི་མཚན་མོ་དེ་

ཉིད་གཟུགས་ལ་ལྟ་བ་བཞིན་དུ་འཇིག་རྟེན་པའི་ལྟ་བ་ཉོན་མོངས་པ་ཅན་མ་ཡིན་པས་ཆོས་ལ་ལྟ་བ་ཡིན་ཏེ། མི་གསལ་ཞེས་བྱ་བའི་ཐ་ཚིག་གོ། །ཇི་ལྟར་སྤྲིན་དང་བཅས་པའི་ཉིན་མོ་གཟུགས་ལ་ལྟ་བ་དེ་བཞིན་དུ་སློབ་པའི་ལྟ་བས་ཆོས་ལ་ལྟ་བ་ཡིན་ཏེ། མི་གསལ་བ་ཡིན་གྱི་ཤིན་

ཏུ་ནི་མ་ཡིན་ནོ། །ཇི་ལྟར་སྤྲིན་མེད་པའི་ཉིན་མོ་གཟུགས་ལ་ལྟ་བ་དེ་བཞིན་དུ་མི་སློབ་པའི་ལྟ་བས་ཆོས་ལ་ལྟ་བ་ཡིན་ཏེ། ཤིན་ཏུ་རབ་ཏུ་གསལ་ཞེས་བྱ་བའི་ཐ་ཚིག་གོ། །ངེས་རྟོག་མེད་པའི་ཞེས་བྱ་བ་ནི་རྟོག་པ་མེད་པའི་ཕྱིར་ཏེ། རྟོག་པ་ནི་ཡུལ་ལ་ངེས་པར་དཔྱོད་པ་སྔོན་དུ་འགྲོ་བའི་

ངེས་པར་འདྲེན་པ་ཡིན་ནོ། །དེ་ཉིད་ཀྱི་ཕྱིར་ཤེས་རབ་ཉོན་མོངས་པ་ཅན་ནམ་ཞེས་བྱ་བ་རྒྱས་པར་འབྱུང་བ་ནི་རྟོག་པ་མེད་པ་དེ་ཉིད་ཀྱི་ཕྱིར་ཡིད་ཀྱི་ཤེས་རབ་འདོད་ཆགས་ལ་སོགས་པ་དང་མཚུངས་པར་ལྡན་པ་ཉོན་མོངས་པ་ཅན་ནམ་ཉོན་མོངས་པ་ཅན་མ་ཡིན་པ་ཟད་པ་དང་མི་སྐྱེ་བ་ཤེས་པ་

དང་བསྒྲིབས་ལ་ལུང་དུ་མ་བསྟན་པ་གཞན་ཡང་ལྟ་བ་མ་ཡིན་ནོ། །གཟུགས་ལ་ལྟ་བའི་དོན་གྱིས་ཏེ། །ཞེས་བྱ་བ་ནི་མིག་གི་རྟོག་པར་བྱེད་པ་ཉིད་ཀྱི་ལྟ་བ་མ་ཡིན་ནོ། །འོ་ན་ཅི་ཞེ་ན། གཟུགས་ལ་ལྟ་བའི་དོན་གྱིས་ཏེ་ཤེས་རབ་ནི་རྟོག་པར་བྱེད་པ་ཉིད་ཀྱིས་ཡིན་ནོ་ཞེས་བཤད་པར་འགྱུར་

རོ། །རྣམ་པར་ཤེས་པ་གཞན་དང་ལྡན་པས་ཀྱང་ཞེས་བྱ་བ་ནི་རྣམ་པར་ཤེས་པ་གཞན་མངོན་དུ་གྱུར་པའི་གང་ཟག་གིས་ཏེ་རྣམ་པར་ཤེས་པ་གཞན་ལ་ཆགས་པས་ཞེས་བྱ་བའི་ཐ་ཚིག་གོ། །མཐོང་བར་འགྱུར་རོ་ཞེས་བྱ་བ་ནི་མིག་གི་དབང་པོ་དང་ཡུལ་ལ་སོགས་པ་ཉེ་བའི་ཕྱིར་རོ། །

གང་གི་ཕྱོགས་མིག་གི་རྣམ་པར་ཤེས་པས་མཐོང་ངོ་ཞེས་བྱ་བ་དེའི་ལྟར་ན་ནི་དེའི་རྣམ་པར་ཤེས་པ་མེད་པས་ཉེས་པ་མེད་དོ། །རྣམ་པར་ཤེས་པ་དེ་ཁོ་ནས་མཐོང་བར་འགྱུར་རོ་ཞེས་བྱ་བ་ནི་དེ་ཡོད་ན་མཐོང་བ་ཡོད་པའི་ཕྱིར་དང་དེ་མེད་ན་མེད་པའི་ཕྱིར་རོ། །གང་ཕྱིར་བར་དུ་ཆོད་པ་ཡི། །

Vol. 142 · folio 74b

གཟུགས་ནི་མཐོང་བ་མིན་ཕྱིར་ལོ། །ཞེས་བྱ་བ་ལ། ལོ་ཞེས་བྱ་བའི་སྒྲ་ནི་ཕ་རོལ་པོའི་གཞུང་ལུགས་སྟོན་པར་བྱེད་པ་ཡིན་ནོ། །དེ་ནི་ཐོགས་པ་མེད་པའི་ཕྱིར། །ཞེས་བྱ་བ་ནི་རྣམ་པར་ཤེས་པ་ནི་ལུས་ཅན་མ་ཡིན་པས་རྩིག་པ་ལ་སོགས་པ་ལས་ཀྱང་འདས་ཏེ་མཐོང་བར་འགྱུར་རོ། །

རྣམ་པར་ཤེས་པར་སྨྲ་བས། བསྒྲིབས་པ་ལ་ནི་རྣམ་པར་ཤེས་པ་མི་སྐྱེ་བ་ཉིད་དེ་ཞེས་བྱ་བ་སྨྲས་ཏེ། ཡུལ་སྣང་བར་མ་གྱུར་པའི་ཕྱིར་རོ་སྙམ་དུ་བསམས་པ་ཡིན་ནོ། །ཅི་སྟེ་མི་སྐྱེ་ཞེས་བྱ་བ་ནི་ཐོགས་པ་མེད་པ་ཡིན་པའི་ཕྱིར་རྩིག་པ་ལ་སོགས་པ་ལས་ཀྱང་འདས་ཏེ། རྩིག་པ་ལ་སོགས་པས་

བསྒྲིབས་པའི་ཡུལ་ལ་རྣམ་པར་ཤེས་པ་སྐྱེ་བར་འགྱུར་རོ་སྙམ་དུ་བསམས་པ་ཡིན་ནོ། །གང་གི་ལྟར་ན་ཞེས་བྱ་བ་ནི་བྱེ་བྲག་ཏུ་སྨྲ་བ་ཁོ་བོ་གང་གི་ཕྱོགས་མིག་གིས་མཐོང་ངོ་ཞེས་བྱ་བ་ཡིན་པ་དེའི་ལྟར་ན་ནི་ཁོ་བོ་མིག་ཐོགས་པ་དང་བཅས་པའི་ཕྱིར་རྩིག་པ་ལ་སོགས་པས་བསྒྲིབས་པ་

ལ་འཇུག་པ་མེད་དེ་མིག་ལྟ་བར་འཇུག་པ་མེད་དོ། །འོ་ན་ནི་བྱེ་བྲག་ཏུ་སྨྲ་བའི་ལྟར་ན་ཡང་བསྒྲིབས་པ་ལ་ཡང་རྣམ་པར་ཤེས་པ་སྐྱེ་བར་འགྱུར་རོ་ཞེས་བྱ་བའི་ཀླན་ཀ་ཁོང་ནས་དབྱུང་བའི་དོགས་པ་བསུ་བར་བྱེ་བྲག་ཏུ་སྨྲ་བ་དེ་ཉིད་ཀྱིས་ཡང་རྣམ་པར་ཤེས་པ་ཡང་རྟེན་དང་ལྷན་ཅིག་ཏུ་

ཞེས་བྱ་བ་སྨྲས་ཏེ། ཇི་ལྟར་མིག་བསྒྲིབས་པ་ལ་འཇུག་པ་མེད་པར་རུང་བ་ལྟར་རྣམ་པར་ཤེས་པ་ཡང་རྟེན་དང་ལྷན་ཅིག་ཡུལ་གཅིག་ལ་འཇུག་པའི་ཕྱིར་མི་སྐྱེ་བར་རུང་སྟེ་རྣམ་པར་ཤེས་པ་འཇུག་པ་མེད་དོ། །མིག་གི་ཡུལ་བསྒྲིབས་པའི་དོན་གང་ཡིན་པར་གྱུར་པ་དེ་ཉིད་རྣམ་པར་ཤེས་

པའི་ཡང་ཡིན་པས་རྣམ་པར་ཤེས་པ་ཡང་མི་སྐྱེ་བར་རུང་གི་རྣམ་པར་ཤེས་པར་སྨྲ་བ་ཁྱེད་ཀྱི་ལྟར་ན་ནི་རྣམ་པར་ཤེས་པ་ཐོགས་པ་མེད་པ་ཡིན་པས་བསྒྲིབས་པ་ལ་ཡང་རྣམ་པར་ཤེས་པ་སྐྱེ་བར་འགྱུར་བ་ཞིག་ན་སྐྱེ་བར་ཡང་མི་འགྱུར་ཏེ། དེ་ལྟ་བས་ན་མིག་གིས་མཐོང་གི་རྣམ་པར་ཤེས་པས་ནི་མ་

ཡིན་ནོ་ཞེས་བྱ་བར་གྲུབ་པོ། །དེ་ལྟར་རྣམ་པར་ཤེས་པར་སྨྲ་བ་བཀག་པ་དང་སློབ་དཔོན་གྱིས་དེའི་ཕྱོགས་བཟུང་ནས་མིག་ཀྱང་ལུས་ཀྱི་དབང་པོ་བཞིན་དུ་ཡུལ་དང་ཕྲད་པ་ཞིག་ཡིན་ནམ་ཅི་ལྷག་ཅེ་ན་ཞེས་བྱ་བ་རྒྱས་པར་སྨོས་ཏེ། ཇི་ལྟར་ལུས་ཀྱི་དབང་པོ་ཡུལ་དང་ཕྲད་པ་རྩིག་པ་ལ་སོགས་པ་ལ་

Vol. 142 · folio 75a

ཐོགས་པས་དེ་ཕན་ཆད་དུ་འཇུག་པར་མི་འགྱུར་བའི་ཕྱིར་རྩིག་པ་ལ་སོགས་པས་བསྒྲིབས་པའི་ཡུལ་མི་འཛིན་པ་དེ་བཞིན་དུ་མིག་ཀྱང་ཡུལ་དང་ཕྲད་ཅིང་རྩིག་པ་ལ་སོགས་པའི་ཐོགས་པས་ཐོགས་པར་གྱུར་ལ་དེ་ཕན་ཆད་དུ་འགྲོ་བར་མི་འགྱུར་བས་རྩིག་པ་ལ་

སོགས་པས་བསྒྲིབས་པའི་ཡུལ་མི་འཛིན་པ་ཞིག་ཡིན་ནམ་ཅི། དེ་ནི་རུང་བ་མ་ཡིན་ཏེ། དེ་ལྟ་བས་ན། ཐོགས་པ་དང་བཅས་པའི་ཕྱིར་མིག་གིས་བསྒྲིབས་པ་མི་མཐོང་ངོ་ཞེས་བརྗོད་པར་མི་བྱའོ། །མཆིང་བུ་དང་ལྷང་ཚེར་དང་ཤེལ་དང་ཆུ་དག་གིས་བར་དུ་ཆོད་པ་ཡང་ཇི་ལྟར་མཐོང་བར་

འགྱུར་ཏེ་ཞེས་བྱ་བ་ནི་མཆིང་བུ་དང་ལྷང་ཚེར་དང་ཤེལ་དང་ཆུས་བར་དུ་ཆོད་ཅིང་བསྒྲིབས་པའི་གཟུགས་ཀྱང་ཇི་ལྟར་མཐོང་སྟེ། ཐོགས་པ་དང་བཅས་པ་ཡིན་པའི་ཕྱིར་རྩིག་པ་ལ་སོགས་པས་ཆོད་པ་བཞིན་མཆིང་བུ་ལ་སོགས་པས་ཆོད་པ་ཡང་མིག་གིས་མཐོང་བར་མི་འགྱུར་བ་ཞིག་ན། དེ་ནི་གྲུབ་

པའི་མཐའ་ལས་མཐོང་བར་འགྱུར་རོ་ཞེས་འབྱུང་ངོ་། །གང་དུ་སྣང་བ་ལ་གེགས་མེད་ན་ཞེས་བྱ་བ་ནི་སྣང་བ་ཡོད་ན་ཡུལ་སྣང་བར་གྱུར་པ་ཡིན་པས་རྣམ་པར་ཤེས་པ་སྐྱེ་བ་སྲིད་དེ་རྣམ་པར་ཤེས་པའི་རྒྱུ་ནི་འདི་སྐད་དུ་མིག་གི་དབང་པོ་མ་ཉམས་པ་ཡིན་ཡུལ་སྣང་བར་གྱུར་པ་ཡིན་ཏེ་དེ་ལས་སྐྱེས་

པའི་ཡིད་ལ་བྱེད་པ་ཉེ་བར་གནས་པ་ཡིན་ནོ་ཞེས་འབྱུང་ངོ་། །དེའི་ཕྱིར་མཆིང་བུ་ལ་སོགས་པས་བསྒྲིབས་པའི་གཟུགས་དེ་མེད་ལ་མིག་གི་རྣམ་པར་ཤེས་པ་སྐྱེ་བ་ཉིད་ལ་གང་ལ་མཆིང་བུ་ལ་སོགས་པའི་ངོ་བོ་ཉིད་མ་ཡིན་པ་རྩིག་པ་ལ་སོགས་པ་ཐིབས་པོ་ཅན་དག་གིས་གེགས་ཡོད་

པའི་བསྒྲིབས་པ་དེ་ལ་ནི་མི་སྐྱེའོ། །ཅི་ཞེ་ན། མིག་གི་རྣམ་པར་ཤེས་པའོ། །མ་སྐྱེས་པའི་ཕྱིར་བསྒྲིབས་པ་མི་མཐོང་སྟེ་ཁྱེད་ཀྱིས་ཅི་སྟེ་མི་སྐྱེ་ཞེས་རྒྱུ་དྲིས་པ་གང་ཡིན་པ་དེའི་རྒྱུ་ནི་འདི་ཡིན་པར་སྨྲའོ། །འོ་ན་གང་མདོ་ལས་མིག་གིས་ཞེས་བྱ་བ་རྒྱས་པར་འབྱུང་བ་ནི་མིག་གིས་

གཟུགས་རྣམས་མཐོང་ནས་མཚན་མར་འཛིན་པར་མི་འགྱུར་ཞིང་མངོན་རྟགས་སུ་འཛིན་པར་མི་འགྱུར་ཞེས་བྱ་བ་རྒྱས་པར་གསུངས་པ་ཡིན་ནོ། །གང་གི་ཕྱིར་མིག་གིས་མཐོང་བ་དེའི་ཕྱིར་གང་ཟག་གི་མིག་གིས་མཐོང་ངོ་སྙམ་དུ་བསམས་པ་ཡིན་ནོ། །སློབ་དཔོན་གྱིས་དེར་ནི་

Vol. 142 · folio 75b

དགོངས་པ་ནི་དེ་ལ་བརྟེན་ཏེ་ཞེས་བྱ་བ་འདི་ཡིན་ཏེ་ཞེས་བྱ་བ་སྨོས་སོ། །དེར་ནི་དགོངས་པ་ནི་མིག་ལ་བརྟེན་ཏེ་ཞེས་བྱ་བ་འདི་ཡིན་ཏེ། མིག་ལ་བརྟེན་ཏེ་རྣམ་པར་ཤེས་པས་མཐོང་ནས་ཞེས་བྱ་བའི་ཐ་ཚིག་གོ། །ཇི་ལྟར་ཤེས་ཤེ་ན། དཔེར་ན་ཡིད་ཀྱི་ཆོས་རྣམས་རྣམ་པར་ཤེས་པར་བྱས་

ནས་ཞེས་བྱ་བ་སྨོས་སོ། །ཡིད་ལ་བརྟེན་ཏེ་ཡིད་ཀྱི་རྣམ་པར་ཤེས་པས་ཤེས་པར་བྱས་ནས་ཤེས་པར་བྱ་བ་ཡིན་གྱི་འདས་མ་ཐག་པའི་ཡིད་ཀྱིས་ནི་ཆོས་རྣམས་རྣམ་པར་མི་ཤེས་པ་ནི་ད་ལྟར་གྱི་གནས་སྐབས་ན་བྱ་བ་བྱེད་པ་ཡིན་ནོ། །ཡང་ན་བརྟེན་པའི་ལས་རྟེན་ལ་ཉེ་བར་བཏགས་པ་ཡིན་ཏེ་

ཞེས་བྱ་བ་ནི་བརྟེན་པ་རྣམ་པར་ཤེས་པའི་ལས་མཐོང་བ་རྟེན་མིག་ལ་ཉེ་བར་བཏགས་པ་ཡིན་ཏེ། རྣམ་པར་ཤེས་པས་མཐོང་བ་ལ་མིག་གིས་མཐོང་ངོ་ཞེས་ཉེ་བར་བཏགས་པ་ཡིན་ནོ། །དཔེར་ན་ཁྲིའུ་དག་འབོད་དོ་ཞེས་བྱ་བ་ལྟ་བུའོ་ཞེས་བྱ་བ་ནི། དཔེར་ན་ཁྲིའུ་ལ་འདུག་པའི་མི་དག་འབོད་པ་

ལ་ཁྲིའུ་དག་འབོད་དོ་ཞེས་ཉེ་བར་འདོགས་པ་དེ་དང་འདྲའོ། །ཇི་ལྟར་མདོ་ལས་མིག་གི་རྣམ་པར་ཤེས་པར་བྱ་བའི་ཞེས་བྱ་བ་རྒྱས་པར་འབྱུང་བ་ནི་བྱེ་བྲག་ཏུ་སྨྲ་བ་རྣམས་ཀྱིས་ཕྱོགས་ཀྱང་མིག་གིས་ནི་རྣམ་པར་མི་ཤེས་སོ། །འོ་ན་ཅི་ཞེ་ན། རྣམ་པར་ཤེས་པས་རྣམ་པར་ཤེས་སོ་ཞེས་བྱ་བ་

འདི་ཡིན་ནོ། །འོན་ཀྱང་མིག་གི་རྣམ་པར་ཤེས་པར་བྱ་བའི་གཟུགས་སྡུག་པ་རྣམས་ཞེས་གསུངས་ཏེ། དེར་ནི་གདོན་མི་ཟ་བར་བརྟེན་པའི་ལས་རྟེན་ལ་བརྗོད་པ་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །གཟུགས་རྣམས་མཐོང་བར་བྱ་བ་ལ་སྒོ་ཡིན་ནོ་ཞེས་ཀྱང་གསུངས་ཏེ་ཞེས་བྱ་

བ་ནི་སྒོ་དང་འདྲ་བས་ན་སྒོ་ཡིན་ཏེ་རྒྱུ་དང་རྟེན་ཡིན་ནོ་ཞེས་བྱ་བར་བསམས་པ་ཡིན་ནོ། །ལུང་འདིས་ནི་མིག་གི་སྒོ་ནས་རྣམ་པར་ཤེས་པས་མཐོང་ངོ་ཞེས་དེ་ལ་བརྟེན་ཏོ་ཞེས་བཤད་པའི་དོན་གང་ཡིན་པ་དེ་ཉིད་གཞུང་འཛུགས་པར་བྱེད་པ་ཡིན་ནོ། །དེར་ནི་ལྟ་བ་ལ་སྒོ་ཞེས་བྱ་བར་ཟད་དོ་ཞེས་

བྱ་བ་ནི་བྲམ་ཟེ་མིག་ནི་འདི་ལྟ་སྟེ། གཟུགས་རྣམས་མཐོང་བར་བྱ་བ་ལ་སྒོ་ཡིན་ནོ་ཞེས་ཀྱང་གསུངས་ཏེ་ཞེས་བྱ་བ་འདིར་རོ། །མིག་ནི་གཟུགས་རྣམས་མཐོང་བར་བྱ་བ་ལ་ལྟ་བ་ཡིན་ནོ་ཞེས་བྱ་བ་འདི་ནི་མི་རུང་ངོ་ཞེས་བྱ་བ་འདི་ནི་འདིར་ཚིག་ཏུ་མི་རུང་བས་མི་རུང་ངོ་ཞེས་བྱ་བར་

Vol. 142 · folio 76a

བསམས་པའོ། །གལ་ཏེ་འདིས་ལྟ་བས་ན་མཐོང་བའོ་ཞེས་བྱེད་པ་ཡིན་པ་འམ་ལྟ་བར་བྱེད་པས་ན་བྱེད་པ་པོ་ཡིན་པ་འམ་ལྟ་བའི་ཕྱིར་ཞེས་ངོ་བོ་སྒྲུབ་པ་ཡིན་ཡང་མཐོང་བ་ནི་ལྟ་བ་ཡིན་པས་མཐོང་བ་དེའི་ཕྱིར་ཞེས་བྱ་བ་འདི་ཇི་ལྟར་རུང་། འདི་ལྟར་

མིག་ལས་མ་གཏོགས་པའི་མཐོང་བ་ནི་མེད་དོ། །གལ་ཏེ་ལྟ་བར་བྱེད་པ་ཡིན་ནོ་སྙམ་ན་རྣམ་པར་ཤེས་པ་ལས་མ་གཏོགས་པ་མེད་དེ། རྣམ་པར་ཤེས་པ་ཁོ་ན་ལྟ་བར་བྱེད་པ་ཡིན་གྱི་འདི་ལས་གཞན་ཡོད་པར་ནི་མ་མཐོང་ངོ་། །གལ་ཏེ་དོན་མིག་ནི་གཟུགས་རྣམས་བལྟ་བར་བྱ་ཞིང་རྣམ་པར་ཤེས་

པར་བྱ་བ་ལ་སྒོ་དང་ཁུང་ཡིན་ནོ་ཞེས་བྱ་བར་བཟུང་ན་དེ་ནི་རུང་ངོ་། །དཔེར་ན་ཤེས་རབ་འགའ་ཞིག་ལ་མཐོང་བ་ཞེས་ཀྱང་བྱ། རབ་ཏུ་ཤེས་པ་ཞེས་ཀྱང་བྱ་ཞེས་བྱ་བའི་ཉེ་བར་བཀོད་པ་འདིས་ནི་མཐོང་བ་དང་རྣམ་པར་ཤེས་པ་དག་དོན་གྱི་ངོ་བོ་གཞན་མ་ཡིན་ནོ་ཞེས་སྟོན་པར་བྱེད་དོ། །གང་

ཞིག་དེ་སྐད་དུ་བརྗོད་པའི་བྱེ་བྲག་དེ་ཡང་གང་ཞེ་ན། ལྟ་བའི་བདག་ཉིད་དུ་བཤད་པ་གང་ཡིན་པ་སྟེ། དེ་ལས་གཞན་འཕགས་བློ་གཉི་ག །ཞེས་འབྱུང་བའི་ཕྱིར་དང་མདོ་ལས་ཀྱང་དེ་ལྟར་ཤེས་ཤིང་དེ་ལྟར་མཐོང་བ་དེ་ཞེས་འབྱུང་བའི་ཕྱིར་རོ། །རྣམ་པར་ཤེས་པ་འགའ་ཞིག་

ཅེས་སྨོས་པའི་ཕྱིར་རྣམ་པར་ཤེས་པ་ཐམས་ཅད་ཀྱིས་མཐོང་བ་ནི་མ་ཡིན་ནོ་ཞེས་ཀྱང་བཤད་པར་འགྱུར་ཏེ། མིག་གི་རྣམ་པར་ཤེས་པས་མཐོང་ངོ་ཞེས་བྱ་བའི་རྣ་བ་ལ་སོགས་པའི་རྣམ་པར་ཤེས་པ་ནི་མ་ཡིན་ནོ། །ལྟ་བར་བྱ་བ་གཞན་གང་ཞིག་ཡིན་ཞེས་བྱ་བ་ནི་གང་ལ་དམིགས་

པར་བྱེད་པ་ཉིད་ཡོད་པས་དེ་ནི་མཐོང་བར་རུང་ངོ་སྙམ་དུ་བསམས་པ་ཡིན་ནོ། །དེ་ནི་ཀླན་ཀར་མི་རུང་སྟེ། །ཞེས་བྱ་བ་རྒྱས་པར་འབྱུང་བ་ནི་གལ་ཏེ་རྣམ་པར་ཤེས་པས་རྣམ་པར་ཤེས་ན་ཡང་རྣམ་པར་ཤེས་པ་བྱེད་པ་པོར་གྱུར་པའི་ཕྱིར་རྣམ་པར་ཤེས་པའི་བྱ་བ་གཞན་གང་ཞིག་ཡོད་ཅེས་

བྱ་བ་བརྗོད་དགོས་པས་མཚུངས་པར་ཀླན་ཀར་འགྱུར་རོ། །དེ་ལ་བྱེད་པ་པོ་དང་བྱ་བའི་བྱེ་བྲག་ཀྱང་མེད་ཅེས་བྱ་བ་ནི་བྱེད་པ་པོ་རྣམ་པར་ཤེས་པ་དང་བྱ་བ་རྣམ་པར་ཤེས་པའི་མཚན་ཉིད་དག་ལ་བྱེ་བྲག་གཞན་ཉིད་མེད་མོད་ཀྱི་རྣམ་པར་ཤེས་པས་རྣམ་པར་ཤེས་སོ་ཞེས་བྱེད་པ་པོ་

Vol. 142 · folio 76b

དང་བྱ་བ་འབྲེལ་བར་ཐ་སྙད་འདོགས་པ་ཡང་ཡོད་པའོ། །དེ་བཞིན་དུ་འདིར་ཡང་མིག་གིས་ལྟའོ་ཞེས་བྱ་བར་འགྱུར་བས་དེ་ནི་ཀླན་ཀར་མི་རུང་ངོ་། །གཞན་དག་ན་རེ་མཐོང་བ་ནི་མིག་གི་རྣམ་པར་ཤེས་པ་ཡིན་ནོ་ཞེས་ཟེར་ཏེ་དེའི་རྟེན་དུ་གྱུར་པའི་ཕྱིར་མཐོང་ངོ་ཞེས་བྱ་སྟེ་དཔེར་ན་དྲིལ་སྒྲོགས་

པའི་རྟེན་དུ་གྱུར་པའི་ཕྱིར་དྲིལ་སྒྲོགས་སོ་ཞེས་བྱ་བ་བཞིན་ནོ་ཞེས་ཟེར་རོ། །རྣམ་པར་ཤེས་པའི་རྟེན་དུ་གྱུར་པའི་ཕྱིར་ཞེས་བྱ་བ་ནི་མིག་གི་རྣམ་པར་ཤེས་པའི་རྟེན་དུ་གྱུར་པའི་ཕྱིར་ཞེས་བྱ་བའི་ཐ་ཚིག་གོ། །འཇིག་རྟེན་ན་རྣམ་པར་ཤེས་པ་དེ་ནི་མཐོང་བའོ་ཞེས་གྲགས་ཏེ་ཞེས་བྱ་བ་ནི་

འཇིག་རྟེན་ན་མཐོང་བའོ་ཞེས་གྲགས་ཀྱི་རྣམ་པར་ཤེས་པའོ་ཞེས་བྱ་བ་ནི་མ་གྲགས་སོ། །ཇི་ལྟར་ཤེས་ཤེ་ན། དེའི་ཕྱིར་འདི་ལྟར་དེ་སྐྱེས་ན་གཟུགས་མཐོང་ངོ་ཞེས་འཛེར་གྱི་རྣམ་པར་ཤེས་སོ་ཞེས་ནི་མི་ཟེར་རོ་ཞེས་བྱ་བ་སྨོས་སོ། །བྱེ་བྲག་ཏུ་བཤད་པ་ལས་ཀྱང་ཞེས་བྱ་བ་ནི་དོན་དེ་ཉིད་

མངོན་པར་བརྗོད་དོ་སྙམ་དུ་བསམས་པ་ཡིན་ཏེ། མིག་དང་ཕྲད་པ་ནི་མིག་ལམ་དུ་སྣང་བར་གྱུར་པའོ། །རྣམ་པར་ཤེས་པ་ནི་ཡོད་པ་ཙམ་གྱིས་ཞེས་བྱ་བ་ནི་རྟེན་གྱི་ངོ་བོའི་ཚུལ་གྱིས་ནི་མ་ཡིན་ནོ་ཞེས་སྟོན་པར་བྱེད་དོ། །དཔེར་ན་ཉི་མས་ཉིན་པར་བྱེད་དོ་ཞེས་བྱ་བ་བཞིན་ནོ་ཞེས་བྱ་བ་ནི་

དཔེར་ན་ཉི་མ་ཡོད་པ་ཙམ་གྱིས་ཉིན་པར་བྱེད་དོ་ཞེས་བྱ་བའོ། །དེ་བཞིན་དུ་རྣམ་པར་ཤེས་པས་རྣམ་པར་ཤེས་པ་ཡིན་ནོ། །ཅིའི་ཕྱིར་ཞེ་ན། །འཇིག་རྟེན་ན་དེ་ལྟར་གྲགས་པའི་ཕྱིར་རོ། །དེ་ནི་བྱེད་པ་མེད་པ་དང་ཞེས་བྱ་བ་རྒྱས་པར་འབྱུང་བ་ལ་བྱེད་པ་མེད་པ་ཞེས་བྱ་བ་ནི་འདུས་པ་ལས་དོན་

གཞན་དུ་གྱུར་པའི་བྱེད་པ་པོ་དང་བྱ་བ་འགོག་པར་བྱེད་པ་ཡིན་ནོ། །ཆོས་ཙམ་ཞེས་བྱ་བ་ནི་རང་གི་རྒྱུད་ཀྱི་བྱེད་པ་པོ་འགོག་པར་བྱེད་པ་ཡིན་ནོ། །རྒྱུ་དང་འདྲས་བུ་ཙམ་ཞེས་བྱ་བ་ནི་བྱེད་པ་པོ་མེད་ཀྱང་རྒྱུ་དང་འབྲས་བུ་དག་བྱ་བ་དང་བྱེད་པར་འབྲེལ་པར་སྟོན་པར་བྱེད་པ་ཡིན་ནོ། །དེ་ལ་འདུན་པའི་སྒོ་

ནས་མིག་གིས་མཐོང་ངོ་། །རྣམ་པར་ཤེས་པས་རྣམ་པར་ཤེས་སོ་ཞེས་ཉེ་བར་འདོགས་པར་བྱེད་ཅེས་བྱ་བ་ནི་དངོས་པོ་གང་ཞིག་ཐ་སྙད་གདགས་པའི་ཡན་ལག་ཡིན་པ་དེས་འདིར་ཐ་སྙད་ཡང་དག་པར་གྲུབ་པར་བྱ་བའི་ཕྱིར་ཡོད་པ་མ་ཡིན་ཡང་ཡོད་པའི་ངོ་བོར་ཀུན་བརྟགས་ནས་མིག་གིས་མཐོང་ངོ་། །

Vol. 142 · folio 77a

རྣམ་པར་ཤེས་པས་རྣམ་པར་ཤེས་སོ་ཞེས་བྱ་བ་དེ་ལྟ་བུ་ལ་སོགས་པ་བྱེད་པ་པོ་དང་བྱ་བ་ལ་སོགས་པ་རྣམ་པར་འཇོག་པར་བྱེད་དོ། །འདི་ལ་མངོན་པར་ཞེན་པར་མི་བྱའོ་ཞེས་བྱ་བ་ནི་ངོ་བོ་ཉིད་ནི་དངོས་པོ་ལ་ལྟོས་ནས་གཞན་ཡིན་ནོ་ཞེས་བྱ་བ་ལ་སོགས་པར་རོ། །

ལྗོངས་ཀྱི་མིའི་ངེས་པའི་ཚིག་ལ་མངོན་པར་ཞེན་པར་མི་བྱའོ་ཞེས་བྱ་བ་ནི་ལྗོངས་ཀྱི་མིའི་ནང་ན་ངེས་ཤིང་གཏན་ལ་བབ་པར་བརྗོད་པ་ནི་ལྗོངས་ཀྱི་མིའི་ངེས་པའི་ཚིག་སྟེ། དེ་དག་ལ་འདི་ངེས་པའི་ཚིག་འདི་ཡིན་པས་དེའི་ཕྱིར་ཞེས་མངོན་པར་ཞེན་པར་མི་བྱ་བ་འམ་ངེས་པའི་ཚིག་ཐམས་ཅད་དོན་དང་

ལྡན་པ་ཁོ་ན་ཞེས་བརྟགས་པར་མི་བྱའོ། །འཇིག་རྟེན་གྱི་མིང་ལ་མངོན་པར་བརྒྱུག་པར་མི་བྱའོ་ཞེས་བྱ་བ་ནི་འཇིག་རྟེན་གྱི་མིང་བདག་དང་སྲོག་ཅེས་བྱ་བ་དེ་ལྟ་བུ་ལ་སོགས་པ་སྒྲོ་བཏགས་པར་མི་བྱ་སྟེ། ཡང་དག་པ་མ་ཡིན་པ་ལ་སྒྲོ་བཏགས་ནས་ལུས་ལ་སོགས་པ་མ་གཏོགས་པའི་བདག་ཡོད་དོ་

ཞེས་བྱ་བར་རྟོག་པར་མི་བྱའོ་ཞེས་བྱ་བའི་ཐ་ཚིག་གོ། །ཡང་ན་འཇིག་རྟེན་གྱི་མིང་ལ་མངོན་པར་བརྒྱུག་པར་མི་བྱའོ་ཞེས་བྱ་བ་འདི་འདའ་བར་མི་བྱ་བ་སྟེ། དོན་དམ་པའི་ཕྱིར་མིང་ཡང་མེད་དོ་ཞེས་རྣམ་པར་བརྟག་པར་མི་བྱའོ་ཞེས་བྱ་བའི་ཐ་ཚིག་གོ། །འདའ་བ་དང་བརྒལ་བ་ཞེས་བྱ་བ་ནི་དོན་གཅིག་གོ། །

གཉི་ག་དག་གིས་ཀྱང་ཞེས་བྱ་བ་ལས་ཀྱང་ཞེས་བྱ་བའི་སྒྲས་ནི་གཅིག་གིས་ཀྱང་མཐོང་བ་ཡིན་ནོ། །ངེས་པ་མེད་དེ་ཞེས་བྱ་བ་ནི་གཉི་ག་ཕྱེ་ན་མཐོང་བ་བཞིན་དུ་གསལ་ལོ་ཞེས་བཤད་པ་ཡིན་ནོ། །གང་ཡང་རུང་བ་ཞིག་གཞན་དུ་གྱུར་ན་ནི་མ་ཡིན་ནོ་ཞེས་བྱ་བ་ནི་མིག་ཕྱེ་བ་དང་ཕྱེད་ཕྱེ་བ་དག་ལས་གང་

ཡང་རུང་བ་ཞིག་གཞན་དུ་གྱུར་པ་ནའོ། །གཉིས་ལས་གང་ཡང་རུང་བ་ཞིག་གཞན་དུ་གྱུར་ན་སྟེ། གལ་ཏེ་ཕྱེ་བ་གང་ཡིན་པ་དེ་ཕྱེད་ཕྱེ་བའམ་ཐམས་ཅད་བཙུམས་པར་བྱས་པ་འམ། ཕྱེད་ཕྱེ་བ་གང་ཡིན་པ་དེ་གལ་ཏེ་ཐམས་ཅད་བཙུམས་པ་འམ་ཐམས་ཅད་ཕྱེ་བ་བྱས་ན་དེའི་ཚེ་ཟླ་བ་གཉིས་སུ་

མཐོང་བར་མི་འགྱུར་རོ། །དེའི་ཕྱིར་འདིར་མིག་གཉི་ག་ཡང་རྣམ་པར་ཤེས་པ་བསྐྱེད་པར་བྱ་བ་ལ་ཞོ་ཤ་ཡོད་དོ་ཞེས་བྱ་བར་ཤེས་སོ། །རྣམ་པར་ཤེས་པ་ནི་གཟུགས་བཞིན་དུ་ཡུལ་ན་མི་གནས་པའི་ཕྱིར་ཞེས་བྱ་བ་ནི་བཟློག་པའི་དཔེ་ཡིན་ཏེ། ཇི་ལྟར་གཟུགས་ཡུལ་ན་གནས་པའི་ཕྱིར་རྟེན་

Vol. 142 · folio 77b

རྣམ་པར་ཆད་པས་རྣམ་པར་ཆད་པར་འགྱུར་བ་ལྟར་རྣམ་པར་ཤེས་པ་ནི་དེ་ལྟ་མ་ཡིན་ནོ། །རྣམ་པར་ཤེས་པ་ནི་ཡུལ་ན་གནས་པ་མ་ཡིན་ནོ། །འོ་ན་ཅི་ཞེ་ན། ལུས་ཅན་མ་ཡིན་པའི་ཕྱིར་ཡུལ་ན་མི་གནས་པ་ཡིན་ནོ། །ཡུལ་ན་མི་གནས་པའི་ཕྱིར་ན་རྟེན་རྣམ་པར་ཆད་པས་རྣམ་པར་ཆད་པར་མི་

འགྱུར་རོ། །འདི་ལྟར་གཟུགས་རྒྱང་རིང་པོ་ནས་མཐོང་ཞེས་བྱ་བ་ནི་གང་ན་གཟུགས་སྣང་བ་དེ་ན་དེ་འཛིན་པར་བྱེད་པའི་མིག་གི་དབང་པོ་མེད་དེ། དེ་ཚད་མས་མི་དམིགས་པའི་ཕྱིར་དེ་ན་ལྷས་བྱིན་ལ་སོགས་པ་མེད་པ་བཞིན་ནོ། །མིག་ལ་ཇི་ལྟ་བ་དེ་བཞིན་དུ་རྣ་བ་ལ་ཡང་བརྗོད་པར་བྱའོ། །ཅིག་

ཤོས་ཀྱིས་སྨྲས་པ། མིག་དང་རྣ་བ་ནི་རང་གི་ཡུལ་གྱི་ཕྱོགས་དང་ཕྲད་པ་ཡིན་ཏེ། དབང་པོ་ཡིན་པའི་ཕྱིར་སྣའི་དབང་པོ་ལ་སོགས་པ་ལྟ་བུའོ། །རྗེས་སུ་དཔག་པ་འདིས་ནི་གཏན་ཚིགས་དེ་ནི་ཚད་མས་མི་དམིགས་པ་ཉིད་མ་གྲུབ་པར་སྟོན་པར་བྱེད་དོ། །སློབ་དཔོན་གྱིས་ཡུལ་དང་ཕྲད་པ་ཉིད་གཅིག་ཡིན་

ན་ནི་ཞེས་བྱ་བ་རྒྱས་པར་སྨོས་ཏེ། གལ་ཏེ་མིག་དང་རྣ་བ་ཡུལ་དང་ཕྲད་པ་ཡིན་པར་བརྟགས་ན་ནི་མིའི་ནང་ན་འདི་ན་བསམ་གཏན་པ་རྣམས་ལ་ལྷའི་མིག་དང་རྣ་བ་སྐྱེ་བར་མི་འགྱུར་རོ། །གལ་ཏེ་མིག་དང་རྣ་བས་ཅི་རིགས་པར་ཡུལ་ཤིན་ཏུ་བསྐལ་པར་ཡོད་པ་དག་རྩིག་པ་ལ་སོགས་པས་ཆོད་པའི་གཟུགས་

དང་སྒྲ་འཛིན་པར་བྱེད་ན་དེ་ལྟ་ན་འདི་ལྷའི་ཉིད་ཡིན་པར་སྲིད་པར་འགྱུར་བ་ཞིག་ན་དེ་ཡང་ཡུལ་དང་ཕྲད་པ་ཉིད་ཅིག་ཡིན་ན་མི་འགྱུར་ཏེ། སྣ་ལ་སོགས་པ་བཞིན་ནོ། །དཔེར་ན་སྣ་དང་ལྕེ་དག་ཡུལ་དང་ཕྲད་པའི་ཕྱིར་བསམ་གཏན་པ་རྣམས་ལ་ལྷའི་དག་སྐྱེ་བར་མི་འགྱུར་བ་དེ་དང་འདྲའོ། །འདིས་ནི་ཕྱོགས་རང་གི་

ཡུལ་གྱི་ཕྱོགས་དང་ཕྲད་པ་ཉིད་ཆོས་ཅན་གྱི་ཁྱད་པར་ལས་བཟློག་པའི་སྐྱོན་དང་བཅས་པ་ཉིད་དུ་སྟོན་པར་བྱེད་དེ། མིག་དང་རྣ་བ་ལྷའི་མིག་དག་ཡིན་པར་སྲིད་པ་ནི་ཆོས་ཅན་ཡིན་ནོ། །ལྷའི་ཉིད་ཀྱི་ངོ་བོ་ཡིན་པར་མི་སྲིད་པ་ནི་ཁྱད་པར་ལས་བཟློག་པ་སྟེ། དེར་འགྱུར་བས་ན་ཉེས་པ་ཡིན་ནོ། །སྐྱོན་

འདིས་ན་རྗེས་སུ་དཔག་པར་མི་རུང་བའི་ཕྱིར་དེ་ཚད་མས་མི་དམིགས་པ་ཉིད་དུ་རྣམ་པར་འཇོག་པར་བྱེད་དོ། །དེ་ལྟ་བས་ན་མིག་དང་རྣ་བ་ནི་ཡུལ་དང་མ་ཕྲད་པ་ཡིན་ནོ། །གལ་ཏེ་ཡུལ་དང་མ་ཕྲད་པ་ཡིན་ན་ཞེས་བྱ་བ་རྒྱས་པར་འབྱུང་བ་ནི་ཉེ་བ་དང་ཤིན་ཏུ་རིང་བ་ན་ཡོད་པ་དང་བར་དུ་ཆོད་པའང་རུང་དེ་དང་མ་

Vol. 142 · folio 78a

ཕྲད་པར་འདྲ་བས་དེ་མཐོང་བར་ཐལ་བར་བྱེད་པ་ཡིན་ནོ། །ཕ་རོལ་པོའི་འདི་ཅི་སྒྲུབ་པ་ཞིག་ཡིན་ནམ་འོན་ཏེ་སུན་འབྱིན་པ་ཞིག །གལ་ཏེ་རེ་ཞིག་འདི་སྐད་དུ་མིག་དང་རྣ་བས་ནི་ཤིན་ཏུ་རིང་བ་དང་བར་དུ་ཆོད་པ་འཛིན་པར་འགྱུར་ཏེ། ཡུལ་དང་མ་ཕྲད་པ་ཡིན་པའི་ཕྱིར་

ཡུལ་ཉེ་བ་ལྟ་བུའོ་ཞེས་སྒྲུབ་པ་ཡིན་ན་ནི་དེ་ནི་བསྒྲུབ་པར་མི་རུང་སྟེ། །བདག་ཉིད་ལ་གཏན་ཚིགས་མ་ངེས་པའི་ཕྱིར་དང་། སྔར་ཁས་བླངས་པ་དང་འགལ་བའི་ཕྱིར་རོ། །འོན་ཏེ་མིག་དང་རྣ་བའི་མཚན་ཉིད་ཀྱི་ཆོས་ཅན་མ་ཕྲད་པ་ཐམས་ཅད་འཛིན་པར་བྱེད་པ་ཉིད་དུ་ཐལ་བར་འགྱུར་བར་སུན་

འབྱིན་པ་ཡིན་ན་ནི་དེ་ནི་སུན་འབྱིན་པར་མི་རུང་སྟེ། རྗེས་སུ་དཔག་པས་གནོད་པའི་ཕྱིར་རོ། །ཇི་ལྟ་ཞེ་ན། རེ་ཞིག་ཁབ་ལོང་གིས་ཀྱང་ལྕགས་མ་ཕྲད་པ་ཐམས་ཅད་ཅི་སྟེ་མི་འདྲེན་ཞེས་བྱ་བ་སྨོས་སོ། །དྲིལ་བའི་སྒོ་ནས་ཁབ་ལོང་དཔེར་ཉེ་བར་བཀོད་དེ་མིག་དང་རྣ་བ་མ་ཕྲད་པར་འཛིན་པར་

བྱེད་པ་མ་ཡིན་པ་ཉིད་དུ་སྒྲུབ་པར་བྱེད་དོ། །མིག་དང་རྣ་བ་ནི་མ་ཕྲད་པ་ཐམས་ཅད་འཛིན་པར་བྱེད་པ་མ་ཡིན་ཏེ་མ་ཕྲད་པ་ཐམས་ཅད་འཛིན་པའི་མཐུ་མེད་པའི་ཕྱིར་ཁབ་ལོང་བཞིན་ནོ། །ཁབ་ལོང་ནི་ལྕགས་མ་ཕྲད་པ་འཛིན་པར་བྱེད་དེ་འདྲེན་པར་བྱེད་ཅེས་བྱ་བའི་ཐ་ཚིག་ཡིན་ཡང་མ་ཕྲད་པ་ཐམས་

ཅད་འཛིན་པར་བྱེད་པ་ནི་མ་ཡིན་པ་ལྟར་མིག་དང་རྣ་བ་ཡང་དེ་དང་འདྲའོ། །ཡུལ་དང་ཕྲད་པ་ཉིད་ཅིག་ཡིན་ཡང་ཅིའི་ཕྱིར་མིག་སྨན་ནམ་ཐུར་མ་ཕྲད་པ་ཐམས་ཅད་མི་མཐོང་སྟེ་དེ་ནི་མཚུངས་སོ་ཞེས་བྱ་བ་ནི་ཡུལ་ཤིན་ཏུ་རིང་བ་དང་བར་དུ་ཆོད་པ་ནི་མིག་དང་རྣ་བས་མི་འཛིན་ཏེ། གཟུང་བར་མི་རུང་བའི་ཕྱིར་མིག་

སྨན་དང་ཐུར་མ་ཕྲད་པ་ལྟ་བུའོ། །ཡང་ན་མིག་དང་རྣ་བ་ནི་རང་གི་གཟུང་བར་བྱ་བ་ཐམས་ཅད་འཛིན་པར་བྱེད་པ་མ་ཡིན་ཏེ། དབང་པོའི་ངོ་བོ་ཉིད་ཡིན་པའི་ཕྱིར་རྣ་བའི་དབང་པོ་ལ་སོགས་པ་ལྟ་བུའོ། །སྣ་ལ་སོགས་པ་ཡུལ་དང་ཕྲད་པ་ཡིན་ཡང་ལྷན་ཅིག་འབྱུང་བའི་དྲི་ལ་སོགས་པ་མི་འཛིན་པའི་ཕྱིར་ཐམས་ཅད་

ནི་མ་ཡིན་ཏེ། དབང་པོ་རྣམས་ཀྱིས་ནུས་པ་འདི་འདྲ་བས་སྣ་ལ་སོགས་པ་དང་ལྷན་ཅིག་འབྱུང་བའི་དྲི་དང་རོ་དང་རེག་བྱ་དག་མི་འཛིན་ཏོ། །ཡིད་ནི་གཟུགས་ཅན་མ་ཡིན་པའི་ཕྱིར་ཞེས་བྱ་བ་ནི་ཕྲད་པ་ཉིད་ནི་ལུས་ཅན་རྣམས་ཁོ་ནའི་ཡིན་པར་རྣམ་པར་གཞག་གི། ལུས་ཅན་མ་ཡིན་པ་རྣམས་ནི་མ་ཡིན་པས་ཡུལ་

Vol. 142 · folio 78b

དང་ཕྲད་པ་ཡིན་ཞེས་བྱ་བ་ནི་དཔྱད་པར་མི་བྱའོ། །གསུམ་གཞན་དུ་ཞེས་བྱ་བ་ནི་གསུམ་ནི་ཕྲད་པ་ཁོ་ན་ཡིན་ནོ་ཞེས་བྱ་བར་ངེས་པར་གཟུང་བར་འདོད་པའི་ཕྱིར་བརྩམས་པ་ཡིན་ནོ། །དེ་ལྟ་མ་ཡིན་ན་ཡུལ་དང་ཕྲད་པ་དང་མ་ཕྲད་པ་ཡང་ཡིན་ནོ་ཞེས་བྱ་བར་ཡང་སྲིད་པར་འགྱུར་རོ། །དབུགས་

མ་རྔུབས་པར་ནི་མི་འཛིན་པའི་ཕྱིར་རོ་ཞེས་བྱ་བ་ནི་སྣར་དབུགས་རྔུབས་པ་དང་ལྷན་ཅིག་འབྱུང་བ་ཕྲ་མོ་བཞི་འོངས་པ་གང་ཡིན་པ་དེའི་དྲི་སྣས་སྣོམ་པར་བྱེད་དོ། །གཞན་དག་ན་རེ་རླུང་ལས་དྲི་གཞན་འབྱུང་ངོ་ཞེས་ཟེར་རོ། །འདྲེས་པར་འགྱུར་བ་ནི་ཡུལ་གཅིག་པར་འགྱུར་བའོ། །འོན་ཏེ་

ཕྱོགས་གཅིག་གིས་ཡིན་ན་ནི་ཞེས་བྱ་བ་ཅི་ཞེ་ན། རེག་པར་འགྱུར་ན་ནི་ཞེས་བྱ་བར་སྦྱར་རོ། །འོ་ན་ཇི་ལྟར་སྒྲ་མངོན་པར་འགྲུབ་པར་འགྱུར་ཞེས་བྱ་བ་ནི་གལ་ཏེ་མི་རེག་ན་བསྣུན་དུ་མེད་པས་སྒྲ་མངོན་པར་འགྲུབ་པར་མི་འགྱུར་རོ་སྙམ་དུ་བསམས་པ་ཡིན་ནོ། །དེ་ཉིད་ཀྱི་ཕྱིར་ཏེ་ཞེས་ཟེར་བ་ནི་ཁ་

ཅེ་པ་རྣམས་ཡིན་ཏེ་གལ་ཏེ་རེག་པར་གྱུར་ན་ལག་པས་ལག་པ་ལ་བསྣུན་ན་བྱིང་བར་འགྱུར་ཏེ་རྒྱ་སྐྱེགས་ལ་རྒྱ་སྐྱེགས་གཞན་བཞིན་ནོ། །ཇི་ལྟར་བསགས་པ་ལ་བརྒྱབ་ན་ཞིག་པར་མི་འགྱུར་ཞེས་བྱ་བ་ནི་རྡུལ་ཕྲ་རབ་ཕན་ཚུན་མ་རེག་པའི་ཚོགས་ལ་ལག་པ་ལ་སོགས་པས་བརྒྱབ་ན་ཇི་ལྟར་

ཞིག་པར་མི་འགྱུར་ཞེས་བྱ་བ་ཡིན་ནོ། །དེ་དག་གི་དབུས་ན་ཆུང་ཟད་ཀྱང་མེད་པ་གང་ཡིན་པ་དེ་ཁོ་ན་འདབ་ཆགས་པ་ཉིད་ཡིན་ནོ་ཞེས་བྱ་བ་ནི་ནང་ན་སྣང་བ་ལ་སོགས་པ་མེད་པས་འདི་དག་འདབ་ཆགས་པ་ཉིད་དུ་རྣམ་པར་གཞག་སྟེ། དེ་ཁོ་ན་ནི་ཕྲད་པ་ཉིད་ཡིན་གྱི་གཞན་དུ་ནི་མ་ཡིན་ནོ། །ཡང་

ཞེས་བྱ་བ་ནི་གཞན་ཡང་ཞེས་བྱ་བའི་ཐ་ཚིག་སྟེ། འདུས་པ་རྣམས་ནི་ཆ་ཤས་དང་བཅས་པ་ཡིན་པའི་ཕྱིར་རེག་པར་འགྱུར་བས་གལ་ཏེ་བདག་ཉིད་ཐམས་ཅད་ཀྱིས་རེག་པར་གྱུར་ན་ནི་རྫས་རྣམས་འདྲེས་པར་འགྱུར་རོ། །གལ་ཏེ་ཕྱོགས་གཅིག་གིས་ན་ནི་ཆ་ཤས་དང་བཅས་པར་ཐལ་བར་འགྱུར་

ཞེས་ཉེས་པ་སྨྲས་པ་གང་ཡིན་པའི་ཉེས་པ་མེད་དོ། །རྒྱུའི་ཕྱིར་ཞེས་བྱ་བ་ནི་གང་གི་རྒྱུ་ཅི་འདྲ་བ་དེ་ནི་རེག་པའམ་མ་རེག་པ་དེའི་རྒྱུའི་ཕྱིར་ཞེས་བྱ་བ་བཤད་པ་ཡིན་ནོ། །རེས་འགའ་ནི་ཞེས་བྱ་བ་རྒྱས་པར་འབྱུང་བ་ལ་རེག་པའི་རྒྱུ་ཅན་ཞེས་བྱ་བ་ནི་འདི་ལ་ཕན་ཚུན་རེག་པའི་རྒྱུ་ཡོད་པས་ན་རེག་པའི་རྒྱུ་ཅན་

Vol. 142 · folio 79a

གྱིས་མ་རེག་པ་ཡིན་ནོ། །གང་གི་ཚེ་རྣམ་པར་ཞིག་པ་ནའོ་ཞེས་བྱ་བ་ནི་དཔེར་ན་བོང་བ་སྐམ་པོ་ཕྱེ་མར་བྱས་པ་ལྟ་བུའོ། །གང་གི་ཚེ་བསགས་པར་གྱུར་པ་ནའོ་ཞེས་བྱ་བ་ནི་དཔེར་ན་ཁ་བ་ལྟ་བུ་སྟེ་དེ་ནི་སྔོན་ཕྲ་ལ་ཕྱིས་ཆེན་པོར་འགྱུར་རོ། །གང་གི་ཚེ་བསགས་པ་དང་ལྡན་པ་

བསགས་པ་ནའོ་ཞེས་བྱ་བ་ནི་དཔེར་ན་འཇིམ་པའི་གོང་བུ་གཉིས་ཕྲད་པ་ལྟ་བུའོ། །སྐད་ཅིག་མ་ཕྱི་མར་གནས་པར་འགྱུར་རོ་ཞེས་བྱ་བ་ནི་སྐྱེས་ནས་རེག་པ་དང་ལྡན་པའི་ཕྱིར་རོ། །བཙུན་པ་ན་རེ་ནི་རེག་པ་ནི་མེད་ཀྱི་འདབ་ཆགས་པ་ལ་རེག་གོ་སྙམ་དུ་འདུ་ཤེས་པར་ཟད་དོ་ཞེས་ཟེར་ཏེ་བཙུན་པའི་ལུགས་

འདོད་པར་བྱའོ་ཞེས་བྱ་བ་བྱེ་བྲག་ཏུ་སྨྲ་བའི་གཞུང་ལུགས་ཅིའི་ཕྱིར་འདོད་པར་མི་བྱ། བྱེ་བྲག་ཏུ་སྨྲ་བ་རྣམས་ཀྱིས་ཀྱང་འདི་སྐད་དུ་དེ་དག་གི་དབུས་ན་ཅུང་ཟད་ཀྱང་མེད་པ་གང་ཡིན་པ་དེ་ཁོ་ན་འདབ་ཆགས་པ་ཉིད་ཡིན་ནོ་ཞེས་སྨྲས་པ་མ་ཡིན་ནམ་ཞེ་ན། དེ་སྐད་ཅེས་ནི་སྨྲས་མོད་ཀྱི་ཚིག་དེ་ནི་གླགས་དང་

བཅས་པ་ཡིན་ནོ། །བྱེ་བྲག་ཏུ་སྨྲ་བ་དབུས་ན་ཅུང་ཟད་ཀྱང་མེད་པ་གང་ཡིན་པ་ཞེས་སྨྲ་བ་རྣམས་ནི་དབུས་ན་སྣང་བ་ལ་སོགས་པ་ཡོད་པར་མི་འདོད་ཀྱི་རྡུལ་ཕྲ་རབ་གཞན་འཇུག་པའི་གོ་སྐབས་མེད་པར་ནི་མི་སྨྲའོ། །གཞན་དུ་རྡུལ་ཕྲ་རབ་བར་དང་བཅས་པ་རྣམས་ཀྱི་བར་དག་ཏུ་འགྲོ་བ་ལས་སུ་འགོག་ན་

ཞེས་བྱ་བ་ནི་འགྲོ་བ་དང་ལྡན་པ་ཞེས་བྱ་བ་ཚིག་ལྷག་མ་ཡིན་ནོ། །ཉེས་པ་གཞན་འདི་ཡང་ཡོད་དེ། །ཇི་ལྟར་བྱེ་བྲག་ཏུ་སྨྲ་བ་རྣམས་རྟོག་པར་བྱེད་པ་ལྟར་རྡུལ་ཕྲ་རབ་རྣམས་ལས་བསགས་པ་དག་གཞན་པ་ཡང་མ་ཡིན་པས་དེ་དག་ཁོ་ན་བསགས་པ་ལ་རེག་པ་ཡིན་ཏེ། དཔེར་ན་གཟུགས་སུ་རུང་བ་

ལྟ་བུའོ་ཞེས་བྱ་བ་ནི་འདུས་པ་ཁོ་ན་ཡིན་གྱི་གཅིག་པུ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །གལ་ཏེ་རྡུལ་ཕྲ་རབ་ལ་ཕྱོགས་ཆ་ཐ་དད་པར་ཞེས་བྱ་བ་རྒྱས་པར་འབྱུང་བ་ནི་སློབ་དཔོན་རྡུལ་ཕྲ་རབ་ཡོངས་སུ་མ་གྲུབ་པར་འཆད་པར་འདོད་ནས་དཔྱོད་པར་བྱེད་པ་ཡིན་ཏེ། གལ་ཏེ་རྡུལ་ཕྲ་རབ་གཅིག་ལ་ཤར་

ཕྱོགས་ལ་སོགས་ཏེ་ཕྱོགས་ཀྱི་ཆ་ཐ་དད་པར་རྟོག་ན་ནི་ཕན་ཚུན་རེག་གམ་མ་རེག་ཀྱང་རུང་སྟེ། ཆ་ཤས་དང་བཅས་པ་ཉིད་དུ་ཐལ་བར་འགྱུར་རོ། །གལ་ཏེ་མ་ཡིན་ན་ནི་ཞེས་བྱ་བ་ཅི་ཞེ་ན། ཕྱོགས་ཆ་ཐ་དད་པར་ཞེས་བྱ་བར་སྦྱར་རོ། །རེག་ཀྱང་ཐལ་བར་མི་འགྱུར་རོ་ཞེས་བྱ་བ་ཅིར་ཞེ་ན། ཆ་ཤས་

Vol. 142 · folio 79b

དང་བཅས་པ་ཉིད་དུའོ། །འདིར་སྒྲུབ་པ་ནི་རྡུལ་ཕྲ་རབ་ནི་ཆ་ཤས་མེད་པ་མ་ཡིན་ཏེ། ཕྱོགས་ཆ་ཐ་དད་པ་དང་ལྡན་པའི་ཕྱིར་མོན་སྲན་གྲེའུའི་ཕུང་པོ་བཞིན་ནོ། །བྱེ་བྲག་ཏུ་སྨྲ་བ་རྣམས་ནི་ཕྱོགས་ཆ་ཐ་དད་པ་དང་ལྡན་པ་ཉིད་འདི་མི་འདོད་དེ། ཕྱོགས་ཆ་ཐ་དད་པ་ནི་བསགས་པའི་གཟུགས་དག་

ཁོ་ནའི་ཡིན་པར་རྟོག་གོ། །འདི་སྐད་དུ་ཡུལ་ཐ་མི་དད་པ་ཉིད་དུ་གྱུར་ན་མི་རུང་བས་ཐོགས་པ་དང་བཅས་པ་རྣམས་ཀྱི་ཡུལ་ཐ་དད་པ་ཉིད་དང་བར་དང་བཅས་པ་ཉིད་དག་ཡིན་ཡང་དེ་དག་འདབ་ཆགས་པར་གནས་པའི་ཕྱིར་ཐོགས་པ་དང་བཅས་པ་ཉིད་ཀྱིས་འགྲོ་བའི་གགས་བྱེད་དོ་ཞེས་བྱ་བ་གང་ཡིན་པ་

འདི་ནི་ཆོས་ཉིད་ཡིན་ནོ་ཞེས་ཀྱང་བརྗོད་དོ། །མགལ་མེའི་འཁོར་ལོ་ལ་སོགས་པ་བཞིན་དུ་མྱུར་དུ་འཇུག་པས་རི་ལ་སོགས་པ་འཛིན་ཏམ་ཞེས་བྱ་བ་ནི་བདག་ཉིད་ཀྱི་ཚད་དང་མཉམ་པ་ཁོ་ནའི་དོན་འཛིན་པར་འདོད་ན་ཇི་ལྟར་རི་ཆེན་པོ་དག་ཅིག་ཅར་འཛིན་པ་ལྟ་བུར་སྣང་གི་རིམ་གྱིས་ནི་མ་ཡིན་ནོ་སྙམ་

པའི་དོགས་པ་བསུ་བར་དེ་ལྟར་འཛིན་པའི་རིགས་པ་མྱུར་དུ་འཇུག་པས་ཞེས་བྱ་བ་ལ་སོགས་པས་རྗོད་པར་བྱེད་དེ་དཔེར་ན་འགལ་མེའི་འཁོར་ལོ་ལ་སོགས་པ་འཛིན་པ་རིམ་གྱིས་ཡིན་ཡང་ཅིག་ཅར་ལྟ་བུར་མངོན་པའོ། །དེ་བཞིན་དུ་རི་དང་ཆུ་བོའི་སྒྲ་ལ་སོགས་པ་འཛིན་པ་ཡང་མྱུར་དུ་འཇུག་པ་ཡིན་ནོ། །

འོན་ཏེ་མཉམ་པ་དང་མི་མཉམ་པ་ཞིག་ལ་ཞེས་བྱ་བ་ནི་རྒུན་འབྲུམ་ལ་སོགས་པ་ལ་ལྟ་ན་ནི་མཉམ་པ་ཡིན་ལ་སྐྲའི་རྩེ་མོ་དང་རི་ལ་སོགས་པ་ལ་ལྟ་ན་ནི་མི་མཉམ་པ་ཡིན་ནོ་སྙམ་དུ་བསམས་པ་ཡིན་ནོ། །མིག་ཕྱེ་བ་ཙམ་གྱིས་ཞེས་བྱ་བ་ནི་རིམ་གྱིས་མཐོང་བ་མ་ཡིན་པའི་ལུགས་ཀྱིས་སོ། །དེ་བཞིན་དུ་རྣ་

བས་ཞེས་བྱ་བ་རྒྱས་པར་འབྱུང་བ་ནི་རེས་འགའ་ནི་ཆུང་སྟེ། གང་གི་ཚེ་སྦྲང་བུའི་སྒྲ་ཐོས་པ་ནའོ། །རེས་འགའ་ནི་མཉམ་སྟེ། གང་གི་ཚེ་འགའ་ཞིག་གིས་སྒྲ་རྣ་བའི་རྡུལ་ཕྲ་རབ་དང་ཚད་མཉམ་པ་ཐོས་པ་ནའོ། །རེས་འགའ་ནི་ཆེ་སྟེ། གང་གི་ཚེ་འབྲུག་གི་སྒྲ་ཐོས་པ་ནའོ་ཞེས་བྱ་བ་ཡིན་ནོ། །

གོ་སྙོད་ཀྱི་མེ་ཏོག་བཞིན་དུ་གནས་ཏེ་ཞེས་བྱ་བ་ནི་གོ་སྙོད་ནག་པོའི་མེ་ཏོག་བཞིན་དུ་གནས་སོ་ཞེས་བྱ་བའི་ཐ་ཚིག་གོ། །རྣ་བའི་འབྲུག་གི་ནང་ན་གནས་སོ་ཞེས་བྱ་བ་ནི་རྣ་བའི་ནང་ན་གྲོ་བའི་ཁ་དོག་གི་རྣམ་པ་ལྟ་བུ་ཡོད་པ་གང་ཡིན་པ་དེ་ནི་གྲོ་བ་དང་འདྲ་བས་འབྲུག་ཡིན་ཏེ་རྣ་བའི་དབང་པོའི་རྡུལ་ཕྲ་

Vol. 142 · folio 80a

རབ་དག་ནི་དེའི་ནང་ན་གནས་སོ། །མཚུལ་པའི་ནང་ན་ཞེས་བྱ་བ་ལ་མཚུལ་པ་ནི་སྣའི་རྒྱུད་དོ། །ཕྲེང་བ་བཞིན་དུ་གནས་སོ་ཞེས་བྱ་བ་ནི་ཕྲེང་བ་མ་འགྲུས་པར་ཀོར་ཀོར་པོར་གནས་པ་ཡིན་ནོ། །སྐྲའི་རྩེ་མོའི་ཁྱོན་ཙམ་ཞིག་ལྕེའི་དབང་པོའི་རྡུལ་ཕྲ་རབ་དག་གིས་མ་ཁེབས་

སོ་ཞེས་གྲག་གོ་ཞེས་བྱ་བ་ལ། གྲག་ཅེས་བྱ་བའི་སྒྲ་ནི་ལུང་ཡིན་པར་བསྟན་པའི་ཕྱིར་རོ། །མ་ཁེབས་པ་ནི་མ་ཁྱབ་པའོ། །ཐམས་ཅད་ཀྱིས་རྣམ་པར་ཤེས་པ་སྐྱེད་ན་ནི་ལུས་ཞིགས་པར་འགྱུར་རོ་ལོ་ཞེས་བྱ་བ་ལ། ལོ་ཞེས་བྱ་བའི་སྒྲས་ནི་ལས་ཀྱི་མཐུ་ཁོ་ནས་འཇིག་པར་མི་འགྱུར་བ་ཡིན་

ནོ་ཞེས་མ་དད་པ་སྟོན་པར་བྱེད་པ་ཡིན་ནོ། །རྟེན་དང་དམིགས་པ་ནི་བསགས་པ་ཡིན་པའི་ཕྱིར་རོ་ཞེས་བྱ་བ་ནི་རྟེན་བསགས་པ་ཡིན་པའི་ཕྱིར་དང་དམིགས་པ་བསགས་པ་ཡིན་པའི་ཕྱིར་རོ། །ཐ་མའི་རྟེན་འདས་ཞེས་བྱ་བ་ནི་འདས་པ་ཁོ་ནའོ་ཞེས་བྱ་བར་ངེས་པར་བཟུང་བ་ཡིན་ནོ། །དེ་ཉིད་ཀྱི་ཕྱིར་

ཞེས་བྱ་བ་ནི་གང་གི་ཕྱིར་རྣམ་པར་ཤེས་པའི་ཚོགས་ལྔ་པོ་དག་དབང་པོ་གཉིས་ཀྱི་རྟེན་ཅན་ཡིན་ཏེ། མིག་གི་དབང་པོ་ལ་སོགས་པའི་རྟེན་ཅན་དང་ཡིད་ཀྱི་དབང་པོའི་རྟེན་ཅན་དག་ཡིན་པ་དེའི་ཕྱིར་མུ་བཞི་པ་འབྱུང་སྟེ། མུ་དང་པོ་ནི་མིག་ཡིན་ནོ་ཞེས་བྱ་བ་ནི་མིག་གི་རྣམ་པར་ཤེས་པའི་རྟེན་གྱི་དངོས་

པོར་ཡིན་གྱི། མིག་སེམས་དང་སེམས་ལས་བྱུང་བའི་ངོ་བོ་ཉིད་མ་ཡིན་པས་མཚུངས་པ་དེ་མ་ཐག་པའི་རྐྱེན་གྱི་དངོས་པོར་ནི་མ་ཡིན་ཏེ། མཚུངས་པ་དེ་མ་ཐག་པའི་རྐྱེན་གྱི་མཚན་ཉིད་ནི། སེམས་དང་སེམས་བྱུང་སྐྱེས་པ་རྣམས། །ཐ་མ་མིན་མཚུངས་དེ་མ་ཐག །ཅེས་བྱ་བ་ཡིན་ནོ། །མུ་

གཉིས་པ་ནི་ཆོས་ཀྱི་ཁམས་སེམས་ལས་བྱུང་བ་འདས་མ་ཐག་པ་ཡིན་ནོ་ཞེས་བྱ་བ་ནི་དེ་ནི་མཚུངས་པ་དེ་མ་ཐག་པའི་དངོས་པོར་ཡིན་གྱི་རྟེན་གྱི་དངོས་པོར་ནི་མ་ཡིན་ཏེ། རྣམ་པར་ཤེས་པའི་རྟེན་ནི་མིག་ལ་སོགས་པ་ཡིད་ལ་ཐུག་པའི་བར་དྲུག་ཁོ་ན་ཡིན་པར་འདོད་ཀྱི་གཞན་དག་ནི་མ་ཡིན་ནོ། །

གསུམ་པ་ནི་འདས་མ་ཐག་པའི་ཡིད་ཡིན་ནོ་ཞེས་བྱ་བ་ནི་གཉི་གའི་མཚན་ཉིད་དང་ལྡན་པའི་ཕྱིར་རོ། །བཞི་པ་ནི་བཤད་པ་ལས་མ་གཏོགས་པའི་ཆོས་རྣམས་ཡིན་ཏེ་ཞེས་བྱ་བ་ནི་མུ་གསུམ་ལས་མ་གཏོགས་པ་ལྡན་པ་མ་ཡིན་པ་དང་འདུས་མ་བྱས་ལ་སོགས་པ་ཡིན་ནོ། །དེ་བཞིན་དུ་

Vol. 142 · folio 80b

ལུས་ཀྱི་རྣམ་པར་ཤེས་པའི་བར་དུ་ཡང་རང་གི་དབང་པོ་བརྗོད་པར་བྱའོ་ཞེས་བྱ་བ་ནི་གང་རྣ་བའི་རྣམ་པར་ཤེས་པའི་རྟེན་གྱི་དངོས་པོར་ཡིན་པ་དེ་དེའི་མཚུངས་པ་དེ་མ་ཐག་པའི་རྐྱེན་གྱི་དངོས་པོར་ཡང་ཡིན་ནམ་ཞེ་ན། མུ་བཞི་སྟེ་མུ་དང་པོ་ནི་རྣ་བ་ཡིན་ནོ། །གཉིས་པ་ནི་ཆོས་ཀྱི་ཁམས་སེམས་

ལས་བྱུང་བ་འདས་མ་ཐག་པ་ཡིན་ནོ། །གསུམ་པ་ནི་འདས་མ་ཐག་པའི་ཡིད་ཡིན་ནོ། །མུ་བཞི་པ་ནི་བཤད་པ་ལས་མ་གཏོགས་པའི་ཆོས་རྣམས་ཡིན་ཏེ། དེ་བཞིན་དུ་གཞན་ལ་ཡང་བརྗོད་པར་བྱའོ། །ཡིད་ཀྱི་རྣམ་པར་ཤེས་པ་ནི་ཚིག་སྔ་མ་དང་སྦྱོར་བ་སྟེ་ཞེས་བྱ་བ་ནི་གང་ཡིད་ཀྱི་

རྣམ་པར་ཤེས་པའི་རྟེན་གྱི་དངོས་པོར་ཡིན་པ་དེ་ནི་དེའི་མཚུངས་པ་དེ་མ་ཐག་པའི་རྐྱེན་གྱི་དངོས་པོར་ཡང་ཡིན་ནོ་ཞེས་ཚིག་སྔ་མ་དང་སྦྱོར་བ་ཡིན་ནོ། །རེ་ཞིག་གང་རྟེན་གྱི་དངོས་པོར་ཡིན་པ་དེ་ནི་མཚུངས་པ་དེ་མ་ཐག་པའི་རྐྱེན་གྱི་དངོས་པོར་ཡང་ཡིན་ནོ་ཞེས་བྱ་བ་ནི་རེ་ཞིག་མཚུངས་

པ་དེ་མ་ཐག་པའི་རྐྱེན་འདི་ནི་གདོན་མི་ཟ་བར་ཡིད་ཡིན་ནོ། །མཚུངས་པ་དེ་མ་ཐག་པའི་རྐྱེན་གྱི་དངོས་པོར་ཡིན་ལ་རྟེན་གྱི་དངོས་པོར་མ་ཡིན་པ་ཡང་ཡོད་དོ། །ཆོས་ཀྱི་ཁམས་སེམས་ལས་བྱུང་བ་འདས་མ་ཐག་པའོ་ཞེས་བྱ་བ་ནི་མིག་ལ་སོགས་པ་རྟེན་དྲུག་གི་ངོ་བོ་མ་ཡིན་པའི་ཕྱིར་

རོ། །དེ་དག་གྱུར་པས་འགྱུར་ཉིད་ཕྱིར། །ཞེས་བྱ་བ་རྒྱས་པར་འབྱུང་བ་ནི་མིག་ལ་སོགས་པ་དེ་དག་གྱུར་པས་འགྱུར་བ་ནི། དེ་དག་གྱུར་པས་འགྱུར་བ་སྟེ་དེ་དག་གྱུར་པས་འགྱུར་བ་ནི་དེ་དག་གྱུར་པས་འགྱུར་བའོ། །འདི་དག་ལ་དེ་ཡོད་པས་རྣམ་པར་ཤེས་པ་རྣམས་ནི་དེ་དག་གྱུར་པས་

འགྱུར་བ་ཡིན་ནོ། །དེའི་ངོ་བོ་ནི་དེ་དག་གྱུར་པས་འགྱུར་བ་ཉིད་ཡིན་ནོ། །དེའི་ཕྱིར་འདི་དག་གི་རྟེན་མིག་ལ་སོགས་པ་ཁོ་ན་ཡིན་ནོ་ཞེས་བྱ་བར་ངེས་པར་བཟུང་ངོ་། །ཕན་པ་དང་གནོད་པ་དང་གསལ་བ་དང་མི་གསལ་བ་ཉིད་ཀྱི་རྗེས་སུ་བྱེད་པའི་ཕྱིར་ཞེས་བྱ་བ་ནི་མིག་ལ་སོགས་པ་ལ་མིག་

སྨན་ལ་སོགས་པས་ཕན་བཏགས་ཤིང་རྡུལ་ལ་སོགས་པས་གནོད་པ་བྱས་ན་གོ་རིམས་བཞིན་དུ་མིག་གི་རྣམ་པར་ཤེས་པ་ལ་སོགས་པ་བདེ་བ་དང་བཅས་པ་སྐྱེད་པའི་ཕྱིར་དང་། སྡུག་བསྔལ་དང་བཅས་པ་སྐྱེད་པའི་ཕྱིར་རྗེས་སུ་བྱེད་པ་ཡིན་ནོ། །དེ་དག་གསལ་བ་དང་མི་གསལ་བ་ཉིད་

Vol. 142 · folio 81a

སྐྱེད་པའི་ཕྱིར་གསལ་བ་དང་མི་གསལ་བ་ཉིད་ཀྱི་རྗེས་སུ་ཡང་བྱེད་དོ། །དེའི་ཕྱིར་མིག་ལ་སོགས་པ་གྱུར་པས་རྣམ་པར་ཤེས་པ་འགྱུར་བ་ཡིན་ནོ་ཞེས་བྱ་བར་ཤེས་སོ། །གཟུགས་གསལ་ན་རྣམ་པར་ཤེས་པ་གསལ་བ་སྐྱེ་བ་སྣང་ལ། མི་གསལ་ན་མི་

གསལ་བ་ཡང་མ་ཡིན་ནམ་ཞེ་ན། གཟུགས་གསལ་བ་དང་མི་གསལ་བ་ཉིད་ཡིན་ན་མིག་གི་རྣམ་པར་ཤེས་པ་རྗེས་སུ་བྱེད་མོད་ཀྱི་མིག་དང་གཟུགས་དག་གྱུར་པའི་གནས་སྐབས་ན་ནི་མིག་གི་གནས་སྐབས་ཉིད་ན་མིག་གི་རྣམ་པར་ཤེས་པ་རྗེས་སུ་བྱེད་པའི་གཟུགས་ཀྱི་གནས་སྐབས་སུ་ནི་

མ་ཡིན་ནོ། །འདི་ལྟར་མིག་ལ་ནི་ཕན་བཏགས་ལ་གཟུགས་ནི་ཉེ་བར་བཅོམ་ན་དེའི་འདོད་ཆགས་དང་བྲལ་བ་བར་མར་གནས་སྐབས་ལ་མིག་གི་རྣམ་པར་ཤེས་པ་འགྱུར་བ་མེད་པར་སྐྱེའི་སྡུག་བསྔལ་དང་བཅས་པར་སྐྱེ་བ་ནི་མ་ཡིན་ནོ། །གཟུགས་ལ་ནི་ཕན་བཏགས་ལ་མིག་ནི་

ཡོངས་སུ་མ་སྤངས་ལ་མིག་སེར་གྱི་ནད་དམ་རབ་རིབ་ཀྱི་གནོད་པས་ཉམས་ན་སེར་པོར་མཐོང་བར་འཁྲུལ་པའམ། སྐྲ་ཤད་ལ་སོགས་པ་མཐོང་བར་འབྱུང་བར་འགྱུར་རོ། །དེ་བཞིན་དུ་གཟུགས་ནི་གསལ་ལ་མིག་ནི་རྡུལ་གྱིས་མི་གསལ་བར་གྱུར་ན་ཡང་མིག་གི་རྣམ་པར་ཤེས་པ་མི་

གསལ་བར་སྐྱེའོ། །དེ་བཞིན་དུ་གཟུགས་མི་གསལ་ལ་གལ་ཏེ་མི་གསལ་བར་གྱུར་ན་ཡང་མིག་གི་རྣམ་པར་ཤེས་པ་གསལ་བར་སྐྱེའོ།། །།བམ་པོ་བརྒྱད་པ། འདི་ལྟར་བྱ་རྒོད་ཀྱི་མིག་ནི་རང་བཞིན་གྱིས་གསལ་བས་རོའི་གཟུགས་མི་གསལ་ཡང་དཔག་ཚད་

དུ་མས་བར་དུ་ཆོད་པ་ལ་ཡང་མིག་གི་རྣམ་པར་ཤེས་པ་སྐྱེ་བར་འགྱུར་རོ། །དེ་བཞིན་དུ་རྣ་བ་ལ་སོགས་པ་ལ་ཡང་སྦྱར་བར་བྱའོ། །དེའི་ཕྱིར་ཐུན་མོང་མ་ཡིན་ཕྱིར། །ཞེས་བྱ་བ་ནི་རྟེན་དུ་གྱུར་པ་དེའི་ཕྱིར་དང་ཐུན་མོང་མ་ཡིན་པའི་ཕྱིར་རོ། །རྟེན་གྱི་དངོས་པོ་ནི་བཤད་ཟིན་པས་དེའི་

ཕྱིར་གུས་པར་མི་བྱེད་ཀྱི་ཐུན་མོང་མ་ཡིན་པ་ཉིད་ཁོ་ན་བཤད་པའི་ཕྱིར་ཇི་ལྟར་ན་ཐུན་མོང་མ་ཡིན་པ་ཉིད་ཡིན་ཞེས་བྱ་བ་ལ་སོགས་པ་སྨོས་སོ། །གཞན་གྱི་མིག་གི་རྣམ་པར་ཤེས་པ་ཡང་ཞེས་བྱ་བ་ནི་གཞན་གྱི་རྒྱུད་ལ་ཡོད་པའི་རྣམ་པར་ཤེས་པ་ཡང་ཞེས་བྱ་བའི་ཐ་ཚིག་གོ། །དེ་དག་

Vol. 142 · folio 81b

ཁོ་ནས་རྣམ་པར་ཤེས་པ་བསྟན་ཞེས་བྱ་བ་ནི་མིག་ལ་སོགས་པས་མིག་གི་རྣམ་པར་ཤེས་པ་ནས་ཡིད་ཀྱི་རྣམ་པར་ཤེས་པའི་བར་དུ་བསྟན་གྱི། གཟུགས་ལ་སོགས་པས་གཟུགས་ཀྱི་རྣམ་པར་ཤེས་པ་ནས་ཆོས་ཀྱི་རྣམ་པར་ཤེས་པའི་བར་དུ་ནི་མ་ཡིན་ནོ། །དཔེར་ན་རྔ་བོ་ཆེའི་སྒྲ་དང་ནས་ཀྱི་

མྱུ་གུ་བཞིན་ནོ་ཞེས་བྱ་བ་ནི་དཔེར་ན་ཐུན་མོང་མ་ཡིན་པའི་ཕྱིར་འཇིག་རྟེན་ན་རྔ་བོ་ཆེའི་སྒྲ་དང་ནས་ཀྱི་མྱུ་གུ་ཞེས་རྔ་བོ་ཆེ་དང་ནས་དེ་དག་གི་སྒོ་ནས་སྟོན་གྱི། དབྱིག་པའི་སྒྲ་དང་ཞིང་གི་མྱུ་གུ་ཞེས་བྱ་བ་ནི་མ་ཡིན་པ་ལྟ་བུའོ། །དབྱུག་པ་ཡང་རྔ་པ་ཊ་ཧ་ལ་སོགས་པའི་སྒྲའི་རྒྱུར་འགྱུར་ལ། ཞིང་

ཡང་འབྲས་སཱ་ལུ་དང་གྲོ་ལ་སོགས་པའི་མྱུ་གུའི་རྒྱུར་འགྱུར་མོད་ཀྱི་ཐུན་མོང་ཡིན་པའི་ཕྱིར་དེ་དག་གི་སྒོ་ནས་སྟོན་པར་མི་བྱེད་ཀྱི། ཐུན་མོང་མ་ཡིན་པའི་ཕྱིར་རྔ་བོ་ཆེ་དང་ནས་དག་གི་སྒོ་ནས་སྟོན་པ་ལྟར། འདིར་ཡང་དེ་དང་འདྲ་བར་བལྟ་བར་བྱའོ། །གཞན་ཡང་གཉི་ག་སེམས་ཅན་དུ་

བགྲང་བ་ཡིན་པའི་ཕྱིར་མིག་གི་རྣམ་པར་ཤེས་པ་ཡིན་ཏེ། གཟུགས་ནི་སེམས་ཅན་དུ་བགྲང་བ་མ་ཡིན་པ་ཡང་ཡིན་ནོ། །མིག་གི་རྣམ་པར་ཤེས་པ་ནི་མིག་གི་རྣམ་པར་ཤེས་པ་སྟེ། དེ་ནི་རྒྱུ་ཡིན་པའི་ཕྱིར་རོ། །མིག་གི་རྣམ་པར་ཤེས་པ་ནི་མིག་གི་རྣམ་པར་ཤེས་པ་སྟེ། རྣམ་པར་ཤེས་པ་བདེ་

བ་དང་། སྡུག་བསྔལ་གྱི་ཚོར་བ་དང་མཚུངས་པར་ལྡན་པའི་མིག་ཕན་པ་དང་གནོད་པར་ཞུགས་པའི་ཕྱིར་རོ། །མིག་ནས་རྣམ་པར་ཤེས་པ་ནི་མིག་གི་རྣམ་པར་ཤེས་པ་སྟེ། ཐུན་མོང་མ་ཡིན་པ་ཉིད་དུ་དེའི་སྒོ་ནས་འཇུག་པའི་ཕྱིར་རོ། །མིག་གི་རྣམ་པར་ཤེས་པ་ནི་མིག་གི་རྣམ་པར་ཤེས་པ་

ཡིན་ཏེ། སེམས་ཅན་དུ་བགྲང་བ་ཉིད་བདག་པོར་གྱུར་པའི་ཕྱིར་རོ། །མིག་ལ་རྣམ་པར་ཤེས་པ་ནི་མིག་གི་རྣམ་པར་ཤེས་པ་སྟེ། དེ་དང་མཚུངས་པར་ལྡན་པའི་ཚོར་བ་བདེ་བ་དང་སྡུག་བསྔལ་བ་ནི་མིག་ཁོ་ན་ལ་ཡོངས་སུ་གཅད་པར་བྱ་བ་ཡིན་པའི་ཕྱིར་རོ། །དེ་བཞིན་དུ་རྣ་བ་ལ་སོགས་

པ་ལ་ཡང་སྦྱར་བར་བྱ་སྟེ། དེ་ལྟར་ན་མིག་ལ་སོགས་པ་ཁོ་ནའི་སྒོ་ནས་རྣམ་པར་ཤེས་པ་བསྟན་པར་རུང་གི་གཟུགས་ལ་སོགས་པའི་སྒོ་ནས་ནི་མ་ཡིན་ནོ། །བསམ་གཏན་གསུམ་པ་དང་། བཞི་པའི་ས་པའི་མིག་གིས་དེ་དག་གི་ས་པ་དང་ས་འོག་མའི་གཟུགས་རྣམས་ལ་ལྟ་བའི་ཡང་

Vol. 142 · folio 82a

དེ་བཞིན་དུ་སྦྱར་བར་བྱའོ་ཞེས་བྱ་བ་ནི་འདོད་པའི་ཁམས་སུ་སྐྱེས་པ་དེ་ཁོ་ནའི་སྦྱར་བར་བྱ་བ་ཡིན་ནོ། །བསམ་གཏན་གསུམ་པ་ལ་སོགས་པའི་མིག་གིས་ལྟ་བའི་ཡང་དེ་བཞིན་དུ་སྦྱར་བར་བྱའོ་ཞེས་བྱ་བ་ནི་བསམ་གཏན་དང་པོར་སྐྱེས་པ་དེ་ཁོ་ནའི་བསམ་གཏན་

གསུམ་པ་དང་བཞི་པའི་མིག་གིས་ལྟ་བའི་སྦྱར་བར་བྱ་བ་ཡིན་ནོ། །ལུས་ལ་འོག་མའི་མིག་མ་ཡིན། །ཞེས་བྱ་བ་ནི་ས་འོག་མ་པ་ཞེས་བྱ་བའི་ཐ་ཚིག་སྟེ། རང་གི་ས་པ་དང་། ས་འོག་མ་ནི་ཁས་བླངས་པ་ཡིན་ནོ། །ལུས་དང་མིག་དང་གཟུགས་རྣམས་ནི་འདོད་པ་ན་སྤྱོད་པ་ནས་

བསམ་གཏན་བཞི་པའི་ས་པའི་བར་ས་ལྔ་པ་དག་ཡིན་ནོ་ཞེས་བྱ་བ་ལ་ལུས་ནི་ཁོག་པ་སྟེ། ལུས་ལ་སོགས་པ་འདི་དག་ནི་གཟུགས་མེད་པའི་ཁམས་ན་མེད་པའི་ཕྱིར་འདོད་པ་ན་སྤྱོད་པ་དང་བསམ་གཏན་དང་པོའི་ས་པ་ནས་བསམ་གཏན་བཞི་པའི་ས་པའི་བར་དག་ཡིན་ནོ། །མིག་གི་རྣམ་པར་

ཤེས་པ་ནི་འདོད་པ་ན་སྤྱོད་པ་དང་བསམ་གཏན་དང་པོའི་ས་པ་དང་ས་གཉིས་པ་ཡིན་ནོ་ཞེས་བྱ་བ་ནི་འདོད་པ་ན་སྤྱོད་པ་དང་བསམ་གཏན་དང་པོའི་ས་པ་དག་ཡིན་ཏེ། དེ་དག་ན་རྟོག་པ་དང་དཔྱོད་པ་དག་ཡོད་པའི་ཕྱིར་ལ་མིག་གི་རྣམ་པར་ཤེས་པ་ཡང་གདོན་མི་ཟ་བར་རྟོག་པ་དང་དཔྱོད་པ་དང་བཅས་

པའི་ཕྱིར་རོ། །མིག་གི་གོང་མའི་གཟུགས་མ་ཡིན་ཞེས་བྱ་བ་ནི་མིག་གི་ཡུལ་ནི་གོང་མའི་གཟུགས་མ་ཡིན་ཏེ། ས་གོང་མ་པའི་གཟུགས་ནི་ཕྲ་བའི་ཕྱིར་རོ། །རང་གི་ས་པ་དང་ས་འོག་མ་པ་ནི་ཁས་བླངས་པ་ཡིན་ནོ། །རྣམ་པར་ཤེས་པའང་ཅི་ཞེ་ན་གོང་མ་ནི་མིག་གི་མ་ཡིན་ནོ་ཞེས་བྱ་བར་

སྐབས་དང་སྦྱར་ཏེ། ས་འོག་མ་པ་འདོད་པ་ན་སྤྱོད་པའི་མིག་གི། མིག་གི་རྣམ་པར་ཤེས་པ་བསམ་གཏན་དང་པོའི་ས་པ་ནི་མ་ཡིན་གྱི་རང་གི་ས་པ་དང་། ས་འོག་མ་པ་ནི་ཁས་བླངས་པ་ཡིན་ནོ། །འདོད་པ་ན་སྤྱོད་པའི་མིག་གི། མིག་གི་རྣམ་པར་ཤེས་པ་ནི་རང་གི་ས་པ་འདོད་པ་ན་སྤྱོད་པ་ཁོ་ན་ཡིན་

ལ། བསམ་གཏན་དང་པོའི་ས་པའི་མིག་གི། མིག་གི་རྣམ་པར་ཤེས་པ་ཡང་བསམ་གཏན་དང་པོའི་ས་པ་ཁོ་ན་ཡིན་གྱི། འདིའི་མིག་གི་རྣམ་པར་ཤེས་པ་འདོད་པ་ན་སྤྱོད་པ་ནི་མ་ཡིན་ནོ། །ས་འོག་མ་པ་ནི་ཁས་བླངས་པ་ཡིན་ནོ་ཞེས་བཤད་པ་མ་ཡིན་ནམ་ཞེ་ན། དེ་སྐད་ཅེས་བཤད་

Vol. 142 · folio 82b

པ་བདེན་མོད་ཀྱི། འོན་ཀྱང་རང་གི་མེད་ན་ས་འོག་མ་པ་ཡིན་པར་འདོད་ཀྱི་ཡོད་ན་ནི་མ་ཡིན་ནོ། །བསམ་གཏན་གཉིས་པ་དང་གསུམ་པ་དང་བཞི་པའི་མིག་ནི་རང་གི་མེད་པས་མིག་གི་རྣམ་པར་ཤེས་པ་བསམ་གཏན་དང་པོའི་ས་པ་ཁོ་ན་ཡིན་གྱི། འདོད་པ་ན་སྤྱོད་པ་མ་ཡིན་ཏེ། ཤིན་ཏུ་དམན་

པའི་ཕྱིར་རོ། །ས་འོག་མ་པ་ནི་ཁས་བླངས་པ་ཡིན་ནོ་ཞེས་བྱ་བ་ནི་སྲིད་པའི་ཕྱིར་དེ་སྐད་དུ་བཤད་པར་ཟད་དོ། །འདིའི་ཞེས་བྱ་བ་བཤད་མ་ཐག་པའི་མིག་གི་རྣམ་པར་ཤེས་པའི་ཞེས་བྱ་བ་ནི་རྣམ་པར་ཤེས་པའི་རིགས་ཀྱི་ཡུལ་ནི་དེ་ལྟར་ཐམས་ཅད་ཡིན་ནོ། །ཅི་རིགས་པར་ནི་སྦྱར་

བར་བྱ་སྟེ། འདོད་པ་ན་སྤྱོད་པའི་མིག་གི་རྣམ་པར་ཤེས་པའི་ནི་རང་གི་ས་པའི་གཟུགས་ཁོ་ན་ཡིན་ནོ། །བསམ་གཏན་དང་པོའི་ས་པའི་མིག་གི་རྣམ་པར་ཤེས་པ་བསམ་གཏན་དང་པོའི་ས་པའི་མིག་གི་རྟེན་ཅན་གྱི་ཡུལ་ནི་རང་གི་ས་པ་དང་ས་འོག་མ་ཡིན་ནོ། །བསམ་གཏན་བཞི་

པའི་ས་པའི་མིག་གི་རྟེན་ཅན་གྱི་ཡུལ་ནི་བསམ་གཏན་བཞི་པའི་ས་པ་དང་དེའི་འོག་མའི་ས་པ་ཐམས་ཅད་ཡིན་ནོ། །དེ་བཞིན་དུ་བསམ་གཏན་གཉིས་པའི་ས་པའི་བར་གྱིས་མིག་གི་རྟེན་ཅན་གྱི་ཡུལ་ནི་གཉིས་པའི་ས་པ་དང་དེའི་འོག་མའི་ས་པ་ཡིན་ནོ། །དེ་ལྟར་ན་རྣམ་པར་ཤེས་པའི་

རིགས་ཀྱི་ཡུལ་ནི་ས་གོང་མ་དང་འོག་མ་དང་རང་གི་ས་པ་ཐམས་ཅད་ཡིན་ནོ། །ལུས་ཀྱི་ཡང་གཟུགས་དང་རྣམ་པར་ཤེས་པ་དག་ཐམས་ཅད་དུ་ཡིན་ནོ་ཞེས་བྱ་བ་ནི་འདོད་པ་ན་སྤྱོད་པའི་ལུས་ཁོག་པའི་ནི་གཟུགས་དང་རྣམ་པར་ཤེས་པ་རང་གི་ས་པ་དང་ས་གོང་མ་དག་ཡིན་ནོ། །བསམ་

གཏན་དང་པོའི་ས་པའི་ལུས་ཀྱི་རྣམ་པར་ཤེས་པ་ནི་བསམ་གཏན་དང་པོའི་ས་པ་ཁོ་ན་ཡིན་ལ། གཟུགས་ནི་རང་དང་འོག་མ་དང་གོང་མའི་ས་པ་ཡིན་ཏེ། རང་གི་རྟེན་གྱི་མིག་ཇི་ལྟ་བ་བཞིན་ནོ། །བསམ་གཏན་གཉིས་པ་ལ་སོགས་པའི་ས་པའི་ལུས་ཀྱི་ནི་རྣམ་པར་ཤེས་པ་ནི་ས་འོག་མ་པ་

ཁོ་ན་ཡིན་ཏེ། བསམ་གཏན་དང་པོའི་ས་པ་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ། །གཟུགས་ནི་བསམ་གཏན་གཉིས་པ་དང་གསུམ་པའི་ས་པའི་ལུས་ཀྱི་ནི་གཟུགས་ནི་རང་དང་གོང་མ་དང་འོག་མའི་ས་པ་ཡིན་ཏེ། རང་གི་རྟེན་གྱི་མིག་ཇི་ལྟ་བ་བཞིན་ནོ། །བསམ་གཏན་བཞི་པའི་ལུས་

Vol. 142 · folio 83a

ཀྱི་ནི་གཟུགས་ནི་དེ་ཡན་ཆད་ན་གཟུགས་མེད་པའི་ཕྱིར་རང་དང་ས་འོག་མ་པ་ཡིན་ཏེ། རང་གི་རྟེན་གྱི་མིག་ཇི་ལྟ་བ་བཞིན་ནོ། །རྣ་བའང་དེ་བཞིན་དུ་ཞེས་བྱ་བ་ནི་མིག་ཇི་སྐད་དུ་བཤད་པ་དེ་བཞིན་དུ་རྣ་བའང་བཤད་པར་བྱ་བ་ཡིན་ནོ། །ཇི་ལྟར་ཞེ་ན། ཡང་ལུས་

གང་ལ་གནས་ཏེ་རྣ་བས་སྒྲ་རྣམས་ཉན་པ་ན་ཅི་ལུས་དང་རྣ་བ་དང་སྒྲ་དང་རྣམ་པར་ཤེས་པ་དེ་རྣམས་ས་གཅིག་པ་ཁོ་ན་ཞིག་ཡིན་ནམ། འོན་ཏེ་གཞན་གྱི་ས་པ་ཡང་ཡིན་ཞེ་ན། སྨྲས་པ། ཐམས་ཅད་ལ་བྱེ་བྲག་ཡོད་དེ། འདོད་པའི་ཁམས་སུ་སྐྱེ་བ་རང་གི་རྣ་བས་རང་གི་སྒྲ་རྣམས་ལ་ཉན་པ་

ན་ཐམས་ཅད་རང་གི་ས་པ་ཡིན་ནོ་ཞེས་བྱ་བའི་ཕྱོགས་འདིས་འདི་ནི་ངེས་པ་ཡིན་ཏེ་ཞེས་བྱ་བའི་བར་བརྗོད་པར་བྱ་བའོ། །ལུས་ལ་འོག་མའི་རྣ་བ་མིན། །རྣ་བའི་གོང་མའི་སྒྲ་མ་ཡིན། །རྣམ་པར་ཤེས་པ་འང་སྒྲ་ནི་འདིའི། །ལུས་ཀྱིའང་གཉི་ག་ཐམས་ཅད་དུ། །ཞེས་བྱ་བ་རྒྱས་

པར་སྦྱར་བར་བྱའོ་ཞེས་བྱ་བ་ཇི་ལྟར་ཞེ་ན་ལུས་ལ་འོག་མའི་རྣ་བ་ཡིན། ལུས་དང་རྣ་བ་དང་སྒྲ་རྣམས་ནི་འདོད་པ་ན་སྤྱོད་པ་ནས་བསམ་གཏན་བཞི་པའི་བར་ས་ལྔ་པ་ཡིན་ནོ། །རྣམ་པར་ཤེས་པ་ནི་འདོད་པ་ན་སྤྱོད་པ་དང་། བསམ་གཏན་དང་པོའི་ས་པ་དང་ས་གཉིས་པ་ཡིན་ནོ། །

དེ་ལས་གོང་མ་པའི་ལུས་ཡིན་པ་ས་དེ་པ་འམ་ས་གོང་མ་པའི་རྣ་བ་ཡིན་གྱི། ས་འོག་མ་པ་ནི་མ་ཡིན་ནོ། །འདིའི་རྣ་བའི་ཡུལ་ནི་དེའི་ས་པ་འམ་ས་འོག་མ་པའི་སྒྲ་ཡིན་གྱི། རྣ་བའི་གོང་མའི་སྒྲ་མ་ཡིན། ས་གོང་མ་པའི་སྒྲ་ས་འོག་མ་པའི་རྣ་བས་ཐོས་པར་ནི་ནམ་ཡང་མི་ནུས་སོ། །

རྣམ་པར་ཤེས་པ་འམ་གོང་མ་ནི་རྣ་བའི་མ་ཡིན་ཏེ་སྒྲ་བཞིན་ནོ། །སྒྲ་ནི་འདིའི་ལུས་ཀྱི་འང་གཉི་ག་ཐམས་ཅད་དུ་འདིའི་ཞེས་བྱ་བ་བཤད་མ་ཐག་པའི་རྣ་བའི་རྣམ་པར་ཤེས་པའི་ཡུལ་ནི་གོང་མ་དང་འོག་མ་དང་རང་གི་ས་པའི་སྒྲ་ཐམས་ཅད་པ་ཡིན་ནོ། །ལུས་ཀྱི་ཡང་སྒྲ་དང་རྣམ་

པར་ཤེས་པ་དག་ཐམས་ཅད་དུ་ཡིན་ནོ། །ཡིད་མ་ངེས་ཏེ་ཞེས་བྱ་བ་ནི་ཇི་ལྟར་ལུས་ལ་འོག་མའི་མིག་དང་རྣ་བ་མ་ཡིན་ཞེས་བྱ་བ་དེ་ལྟ་བུ་ལ་སོགས་པས་མིག་དང་རྣ་བ་ངེས་པ་དེ་ལྟར་ཡིད་ནི་མ་ངེས་སོ། །དེ་ཉིད་ཀྱི་ཕྱིར་ས་ལྔ་པའི་ལུས་ལ་ཡང་སྙོམས་པར་འཇུག་པ་དང་སྐྱེ་བའི་ཚེ་ཡིད་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words