ཆོས་མངོན་པའི་མཛོད་ཀྱི་འགྲེལ་བཤད

Sanskrit title (Tibetan script, as in the text) ཨ་བྷི་དྷརྨ་ཀོ་ཥ་ཊཱི་ཀ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 142 · folio 83b

ལ་སོགས་པ་ཅི་རིགས་པར་ས་ཐམས་ཅད་པ་ཡིན་ཞེས་བྱ་བ་ནི་ཡིད་དང་ཆོས་དང་ཡིད་ཀྱི་རྣམ་པར་ཤེས་པ་རྣམས་ནི་འདོད་པ་ན་སྤྱོད་པ་ནས་སྲིད་པའི་རྩེ་མོའི་བར་ས་ཐམས་ཅད་པ་ཡིན་ཏེ། འདི་ལྟ་སྟེ་འདོད་པའི་ཁམས་སུ་སྐྱེས་པ་ཞིག་གལ་ཏེ་འདོད་པ་ན་སྤྱོད་པའི་ཡིད་ཀྱི་མཇུག་ཐོགས་

སུ་འདོད་པ་ན་སྤྱོད་པའི་ཆོས་ལ་དམིགས་པའི་ཡིད་ཀྱི་རྣམ་པར་ཤེས་པ་འདོད་པ་ན་སྤྱོད་པ་ཁོ་ན་ཞིག་བསྐྱེད་ན་ཐམས་ཅད་འདོད་པ་ན་སྤྱོད་པ་ཡིན་ནོ། །གལ་ཏེ་སྐྱེ་བའི་ཚེའམ་སྙོམས་པར་འཇུག་པའི་ཚེ་བསམ་གཏན་དང་པོའི་ས་པ་ནས་སྲིད་པའི་རྩེ་མོའི་ས་པའི་བར་ལས་ཅི་རིགས་པར་

དེ་ཁོ་ན་བཞིན་དུ་འདོད་པ་ན་སྤྱོད་པའི་ཡིད་ཀྱི་རྣམ་པར་ཤེས་པ་སྐྱེད་པར་བྱེད་ན་ཡིད་ནི་དེ་དག་པ་ཡིན་ནོ། །ལྷག་མ་རྣམས་ནི་འདོད་པ་ན་སྤྱོད་པ་ཡིན་ནོ། །ཇི་སྟེ་དེ་ཉིད་ན་དེའི་རྣམ་པར་ཤེས་པ་སྐྱེད་པར་བྱེད་ན་ནི་དམིགས་པ་བསམ་གཏན་དང་པོའི་ས་པ་ནས་སྲིད་པའི་རྩེ་མོ་ས་པའི་བར་གྱི་ཆོས་

རྣམས་ཡིན་པས་ཆོས་ནི་དེ་དག་པ་ཡིན་ནོ། །ལྷག་མ་རྣམས་ནི་སྔ་མ་བཞིན་ནོ། །དེ་བཞིན་དུ་བསམ་གཏན་དང་པོར་སྐྱེས་པ་ནས་སྲིད་པའི་རྩེ་མོར་སྐྱེས་པའི་བར་དུ་ཅི་རིགས་པར་བརྗོད་པར་བྱའོ། །ཞར་ལ་འོངས་པའི་སྐབས་རྫོགས་སོ་ཞེས་བྱ་བ་ནི། མིག་དང་ནི། རྣམ་ཤེས་ཁམས་དག་སོ་སོ་དང་། །

ལྷན་ཅིག་ཏུ་ཡང་འཐོབ་པ་ཡོད། །ཅེས་བྱ་བ་འདིའི་སྐབས་དང་སྦྱར་བའམ། ཡང་ལུས་གང་ལ་གནས་ཏེ་མིག་གིས་གཟུགས་རྣམས་ལྟ་བ་ན་ཞེས་བྱ་བ་དེ་ལྟ་བུ་ལ་སོགས་པ་ནི་ཞར་ལ་འོངས་པའི་སྐབས་ཡིན་ཏེ། ལྟ་བ་དང་འབྲེལ་པའི་སྒོ་ནས་འོངས་པའི་ཕྱིར་རོ། །གཉིས་ཀྱིས་རྣམ་

ཤེས་ཕྱི་ཡི་ལྔ། །ཞེས་བྱ་བ་ལ་ལྔ་སྨོས་པ་ནི་ཆོས་ཀྱི་ཁམས་བཟློག་པའི་ཕྱིར་རོ། །ཕྱིའི་སྨོས་པ་ནི་མིག་ལ་སོགས་པ་གསལ་བའི་ཕྱིར་ཏེ། ཕྱིའི་ལྔ་ཁོ་ན་གཉིས་ཀྱིས་རྣམ་པར་ཤེས་པར་བྱ་བ་ཡིན་ནོ་ཞེས་ངེས་པར་བཟུང་བའི་ཕྱིར་ཁམས་གཞན་བཅུ་གསུམ་ནི་རྣམ་པར་ཤེས་པའི་

ཚོགས་ལྔའི་ཡུལ་མ་ཡིན་པའི་ཕྱིར་རྣམ་པར་ཤེས་པ་གཅིག་གིས་རྣམ་པར་ཤེས་པར་བྱ་བ་ཡིན་ནོ་ཞེས་བྱ་བར་གྲུབ་པོ། །འདུས་མ་བྱས་ཆོས་རྟག་པའོ། །ཞེས་བྱ་བ་ནི་འདུས་མ་བྱས་ཁོ་ན་རྟག་པ་ཡིན་ཏེ། དུས་རྣམས་སུ་འཕོ་བ་མེད་པའི་ཕྱིར་རྟག་པ་དག་ཡིན་ནོ། །ཆོས་ཀྱི་

Vol. 142 · folio 84a

ཕྱེད་དང་གང་དག་ནི། །བཅུ་གཉིས་ནང་གི་བཤད་དབང་པོ། །ཞེས་བྱ་བ་ནི་ཁམས་དག་ཅེས་བྱ་བར་སྐབས་དང་སྦྱར་རོ། །དབང་པོ་ཉི་ཤུ་རྩ་གཉིས་གསུངས། །ཞེས་བྱ་བ་ནི་བྲམ་ཟེ་རང་བཞིན་ཉན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། །

བཅོམ་ལྡན་འདས་དང་ཐབས་ཅིག་མངོན་སུམ་དུ་ཡང་དག་པར་མགུ་བ་དང་ཀུན་ཏུ་དགའ་བར་འགྱུར་བའི་གཏམ་རྣམ་པ་སྣ་ཚོགས་བྱས་ནས་ཕྱོགས་གཅིག་ཏུ་འདུག་གོ། །འདུག་ནས་ཀྱང་བཅོམ་ལྡན་འདས་ལ་བྲམ་ཟེ་རང་བཞིན་ཉན་གྱིས་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་དབང་

པོ་རྣམས་དབང་པོ་རྣམས་ཞེས་བགྱི་ན། ཀྱེ་གཽ་ཏ་མ་དབང་པོ་རྣམས་ནི་དུ་ཞིག་མཆིས། ཇི་སྙེད་ཅིག་གིས་ནི་དབང་པོ་རྣམས་བསྡུས་པ་ལགས། བྲམ་ཟེ་དབང་པོ་ནི་ཉི་ཤུ་རྩ་གཉིས་པོ་འདི་དག་ཡིན་ཏེ། ཉི་ཤུ་རྩ་གཉིས་གང་ཞེ་ན། མིག་གི་དབང་པོ་དང་། རྣ་བའི་དབང་པོ་དང་། སྣའི་

དབང་པོ་དང་། ལྕེའི་དབང་པོ་དང་། ལུས་ཀྱི་དབང་པོ་དང་། ཡིད་ཀྱི་དབང་པོ་དང་། མོའི་དབང་པོ་དང་། ཕོའི་དབང་པོ་དང་། སྲོག་གི་དབང་པོ་དང་། བདེ་བའི་དབང་པོ་དང་། སྡུག་བསྔལ་གྱི་དབང་པོ་དང་། ཡིད་བདེ་བའི་དབང་པོ་དང་། ཡིད་མི་བདེ་བའི་དབང་པོ་

དང་། བཏང་སྙོམས་ཀྱི་དབང་པོ་དང་། དད་པའི་དབང་པོ་དང་། བརྩོན་འགྲུས་ཀྱི་དབང་པོ་དང་། དྲན་པའི་དབང་པོ་དང་། ཏིང་ངེ་འཛིན་གྱི་དབང་པོ་དང་། ཤེས་རབ་ཀྱི་དབང་པོ་དང་། མི་ཤེས་པ་ཀུན་ཤེས་པར་བྱེད་པའི་དབང་པོ་དང་། ཀུན་ཤེས་པའི་དབང་པོ་དང་། ཀུན་

ཤེས་པ་དང་ལྡན་པའི་དབང་པོའོ། །བྲམ་ཟེ་འདི་དག་ནི་དབང་པོ་ཉི་ཤུ་རྩ་གཉིས་ཡིན་ཏེ། འདི་ཙམ་གྱིས་དབང་པོ་རྣམས་བསྡུས་པའི་ཕྱིར་རོ། །དེ་ནས་བྲམ་ཟེ་རང་བཞིན་ཉན་བཅོམ་ལྡན་འདས་ཀྱིས་བཤད་པ་ལ་མངོན་པར་དགའ་ནས་རྗེས་སུ་ཡི་རངས་ཏེ། བཅོམ་ལྡན་འདས་

ཀྱི་ཐད་ནས་སོང་ངོ་ཞེས་བྱ་བ་ཡིན་ནོ། །ཆོས་ཀྱི་ཕྱེད་ཅེས་བྱ་བ་ནི། ཆོས་ཀྱི་ཁམས་ཀྱི་ཕྱོགས་གཅིག་ཅེས་བྱ་བའི་ཐ་ཚིག་གོ། །ཆོས་མངོན་པ་པ་རྣམས་ནི་སྐྱེ་མཆེད་དྲུག་རྣམ་པར་གཞག་པ་ལ་མ་གུས་པས་ཞེས་བྱ་བ་ནི་མིག་གི་སྐྱེ་མཆེད་ནས། ལུས་ཀྱི་སྐྱེ་མཆེད་དང་

Vol. 142 · folio 84b

ཡིད་ཀྱི་སྐྱེ་མཆེད་ཅེས་བྱ་བའི་བར་སྐྱེ་མཆེད་དྲུག་རྣམ་པར་གཞག་པ་རིགས་པའི་ངོ་བོ་ལ་མ་གུས་པས། ཡིད་ཀྱི་དབང་པོ་སྲོག་གི་དབང་པོའི་མཇུག་ཐོགས་སུ་འདོན་ཏེ་དམིགས་པ་དང་བཅས་པའི་ཕྱིར་རོ། །ཚོར་བའི་དབང་པོ་ལ་སོགས་པ་དམིགས་པ་དང་བཅས་པ་རྣམས་ནི་

དེའི་མཇུག་ཐོགས་སུ་འདོན་ཏེ། སྲོག་གི་དབང་པོ་ལ་སོགས་པ་དབང་པོ་བཅུ་གཅིག་ཅེས་བྱ་བ་ནི་སྲོག་གི་དབང་པོ་དང་། ཚོར་བའི་དབང་པོ་ལྔ་དང་། དད་པ་ལ་སོགས་པའི་དབང་པོ་ལྔའོ། །གསུམ་པོ་དག་གི་ཆའོ་ཞེས་བྱ་བ་ནི་ཀུན་ཤེས་པར་བྱེད་པའི་དབང་པོ་ལ་སོགས་

པ་རྫས་དགུའི་བདག་ཉིད་དག་ལས་ཡིད་ཀྱི་དབང་པོ་མ་གཏོགས་པ་གཞན་བརྒྱད་ནི་ཆོས་ཀྱི་ཁམས་ཀྱི་ཕྱོགས་གཅིག་གོ། །མིག་ལ་སོགས་པ་རང་གི་མིང་གིས་སྨོས་པ་ཞེས་བྱ་བ་ནི་མིག་ལ་སོགས་པའི་ཁམས་ལྔ་ནི་དབང་པོ་ལྔ་སྟེ། མིག་གི་དབང་པོ་ནས་ལུས་ཀྱི་

དབང་པོའི་བར་ཡིན་ནོ། །མོ་དང་ཕོའི་དབང་པོ་དག་ནི་ལུས་ཀྱི་ཕྱོགས་གཅིག་ཁོ་ན་ཡིན་པས་མིག་ལ་སོགས་པའི་ཁམས་ལྔ་ནི་དབང་པོ་བདུན་ཡིན་ནོ། །སེམས་ཀྱི་ཁམས་བདུན་ནི་ཡིད་ཀྱི་དབང་པོ་ཡིན་ནོ། །དེ་ལྟར་ན་ནང་གི་ཁམས་བཅུ་གཉིས་ནི་དབང་པོ་བརྒྱད་ཡིན་

ནོ། །ནང་གི་ཁམས་བཅུ་གཉིས་ཁོ་ན་དང་ཆོས་ཀྱི་ཕྱེད་ཁོ་ན་དབང་པོ་ཡིན་ནོ་ཞེས་བྱ་བར་ངེས་པར་བཟུང་བའི་ཕྱིར་གཟུགས་ལ་སོགས་པའི་ཁམས་ལྔ་དང་ཆོས་ཀྱི་ཁམས་ཀྱི་ཕྱོགས་དེ་ལས་གཞན་པ་ནི་དབང་པོ་མ་ཡིན་ནོ་ཞེས་བྱ་བར་གྲུབ་པོ། །ཆོས་མངོན་པའི་

མཛོད་ཀྱི་རྣམ་པར་བཤད་པ་དོན་གསལ་བ་ཞེས་བྱ་བ་སློབ་དཔོན་རྒྱལ་པོའི་སྲས་གྲགས་པའི་བཤེས་གཉེན་གྱིས་མཛད་པ་ལས་ཁམས་བསྟན་པ་ཞེས་བྱ་བ་སྟེ་མཛོད་ཀྱི་གནས་དང་པོའོ།། །།དབང་པོ་རྣམས་བཤད་པ་ལ་ཞེས་བྱ་བ་ནི་མཛོད་ཀྱི་གནས་དང་པོ་དང་གཉིས་

པ་འབྲེལ་པ་ཡོད་པ་ཉིད་དུ་བསྟན་པའི་ཕྱིར་དབང་པོ་རྣམས་བཤད་པ་ལ་ཞེས་སྨོས་པ་ཡིན་ཏེ། གང་གི་ཕྱིར་མཛོད་ཀྱི་གནས་ཀྱི་མཇུག་ནས། ཆོས་ཀྱི་ཕྱེད་དང་གང་དག་ནི། །བཅུ་གཉིས་ནང་གིར་བཤད་དབང་པོ། །ཞེས་བཤད་པ་དེའི་ཕྱིར་འདི་སྨོས་སོ་ཞེས་བྱ་བར་སྦྱར་རོ། །

Vol. 142 · folio 85a

བརྡ་སྤྲོད་པ་པ་རྣམས་ཀྱི་དབང་པོ་ཞེས་བྱ་བའི་སྒྲའི་དོན་བྱེ་བྲག་ཏུ་བཤད་པ་གཞན་དུ་བྱས་ཏེ། དེའི་ཕྱིར་དབང་པོའི་དོན་ཅི་ཞེ་ན་ཞེས་འདྲི་བར་བྱེད་དོ། །དབང་ནི་དབང་ཕྱུག་དམ་པའོ་ཞེས་འབྱུང་སྟེ་སྐད་ཀྱི་བྱིངས་དེ་ནི་དབང་བྱེད་པས་ན་དབང་པོ་རྣམས་སོ་

ཞེས་བྱ་བའི་ངོ་བོ་ཡིན་པར་བལྟ་བར་བྱའོ། །དབང་པོ་མང་བའི་ཕྱིར་དབང་བྱེད་པས་ན་དབང་པོ་རྣམས་སོ་ཞེས་མང་པོའི་ཚིག་གིས་བསྟན་པར་བྱས་པ་ཡིན་ནོ། །དེ་ལྟ་བས་ན་དབང་བྱེད་པ་ཞེས་བྱ་བའི་སྒྲ་འདི་ནི་དབང་པོ་ཞེས་བྱ་བར་བྱས་པ་ཡིན་ནོ། །དེས་ན་ངེས་པའི་ཚིག་གི་ཚུལ་

གྱིས་ན་དབང་པོ་ཞེས་བྱ་བར་འགྱུར་ཏེ། དཔེར་ན་གླང་པོ་ཞེས་བྱ་བ་ལྟ་བུའོ། །བརྡ་སྤྲོད་པ་པ་རྣམས་ཀྱིས་ནི་འདི་ལ་ཚང་ཚིང་ཡོད་པས་ན་གླང་པོ་ཆེ་ཞེས་བྱའོ་ཞེས་གླང་པོ་ཆེ་ཞེས་བྱ་བའི་སྒྲས་ལྡན་པའི་དོན་དུ་རྣམ་པར་འཆད་པར་བྱེད་དོ། །ངེས་པའི་ཚིག་དག་ཏུ་ནི་དེ་ལ་མ་གུས་

པས་ཚང་ཚིང་ན་རྒྱུ་བའི་ཕྱིར་གླང་པོ་ཆེ་ཡིན་ནོ་ཞེས་ངེས་པའི་ཚིག་གི་ཚུལ་གྱིས་སྒྲུབ་པར་བྱེད་དེ། འདིར་ཡང་དེ་དང་འདྲ་བར་བལྟ་བར་བྱའོ། །གལ་ཏེ་བརྡ་སྤྲོད་པའི་ཚུལ་ཏུ་དབང་པོའི་རྟགས་ནི་དབང་པོའོ་ཞེས་བྱ་བར་བྱེ་བྲག་ཏུ་བཤད་པ་ནི་དབང་བྱེད་པའི་དོན་ནི་དབང་པོའི་དོན་ཏོ་

ཞེས་བྱ་བར་ཉམས་པར་འགྱུར་བ་ཞིག་ན་དབང་བྱེད་པའི་དོན་ཡིན་པར་ཡང་འདོད་དོ། །དེ་ལྟ་བས་ན་དབང་པོ་ཞེས་བྱ་བའི་སྒྲའི་དོན་བྱེ་བྲག་ཏུ་བཤད་པ་འདི་ལྟ་བུར་འདོད་པར་བྱའོ། །མཐོང་བ་དང་ཐོས་ནས་ཡང་བ་ཡོངས་སུ་སྤོང་བའི་ཕྱིར་ཞེས་བྱ་བ་ནི་ངམ་གྲོག་ལ་སོགས་

པ་མཐོང་བ་དང་སྟག་ལ་སོགས་པའི་སྒྲ་ཐོས་ནས་ཡང་བ་ཡོངས་སུ་སྤོང་བའི་ཕྱིར་རོ། །མཚུངས་པར་ལྡན་པ་དང་བཅས་པ་དག་ཅེས་བྱ་བ་ནི་སེམས་ལས་བྱུང་བ་དང་བཅས་པ་དག་གོ། །གཟུགས་ལྟ་བ་དང་སྒྲ་མཉན་པ་དག་གི་ཞེས་བྱ་བ་ནི་མིག་གིས་མཐོང་ངོ་། །རྣ་བས་

ཐོས་སོ་ཞེས་བྱ་བ་ལ་སོགས་པ་ནི་བྱེ་བྲག་ཏུ་སྨྲ་བ་རྣམས་ཀྱི་གྲུབ་པའི་མཐའ་ཡིན་ནོ། །དེ་ལ་ནི་མིག་དང་རྣ་བ་དག་ནི་མཐོང་བ་དང་མཉན་པ་གཏོད་པར་བྱེད་པའི་ཁྱད་པར་གྱི་མཚན་ཉིད་ཅན་དག་གི་ཐུན་མོང་མ་ཡིན་པའི་རྒྱུ་ཉིད་ལ་དབང་བྱེད་པ་ཡིན་ནོ། །སྔ་མ་བཞིན་དུ་ལུས་

Vol. 142 · folio 85b

མཛེས་པར་བྱ་བ་ལ་ཞེས་བྱ་བ་ནི་སྣ་ལ་སོགས་པ་མེད་པའི་སེམས་ཅན་རྣམས་ནི་མི་མཛེས་པའི་ངོ་བོ་ཡིན་པའི་ཕྱིར་རོ། །ལུས་མི་མཛེས་པའི་ཕྱིར་ཞེས་བྱ་བའི་ཐ་ཚིག་གོ། །དེ་དག་གིས་ཁམ་གྱི་ཟས་ལ་ཡོངས་སུ་ལོངས་སྤྱོད་པའི་ཕྱིར་ཞེས་བྱ་བ་ནི་སྣ་ལ་སོགས་པ་དེ་དག་

གིས་དེ་ལ་ཡོངས་སུ་ལོངས་སྤྱོད་པའི་ཕྱིར་རོ། །དྲི་ཇི་ལྟར་ཁམ་གྱི་ཟས་ཉིད་ཡིན་ཞེ་ན་སྣས་དྲིའི་ཟས་རྣམ་པར་བཅད་ནས་ཁམ་དུ་བྱེད་པའི་ཕྱིར་རོ། །རེག་བྱ་ཇི་ལྟར་ཁམ་གྱི་ཟས་ཉིད་ཡིན་ཞེ་ན། ལུས་ཀྱི་ཁྲུས་དང་བསྐུ་བ་ལ་སོགས་པས་རེག་བྱའི་ཟས་སྤུའི་བུ་གའི་ཁར་རྣམ་

པར་བཅད་ནས་ཁམ་དུ་བྱེད་པའི་ཕྱིར་རོ། །བཞི་རྣམ་གཉིས་ལའོ་ཞེས་བྱ་བ་ལ། ལོ་ཞེས་བྱ་བ་ནི་ཕ་རོལ་པོའི་གཞུང་ལུགས་བསྟན་པ་ཡིན་ཏེ་རང་གི་གཞུང་ལུགས་ནི་འོག་ནས་འབྱུང་བ་ཡིན་ནོ། །གཉིས་ལ་ཞེས་བྱ་བ་ནི་རེ་རེ་ལ་སྦྱར་བར་བྱའོ། །སེམས་ཅན་གྱི་བྱེ་བྲག་

ནི་མོའོ་ཕོའོ་ཞེས་བྱ་བ་ལ་མོ་ཞེས་བྱ་བ་ནི་རིས་མཐུན་པ་ཅིག་ཡིན་ལ་ཕོ་ཞེས་བྱ་བ་ནི་གཞན་ཡིན་ཏེ། དེ་གཉིས་ཀྱི་བྱེ་བྲག་ཡིན་ནོ། །སེམས་ཅན་གྱི་ཁྱད་པར་ཞེས་བྱ་བ་ནི་ནུ་མ་ལ་སོགས་པ་དབྱིབས་དང་རོ་དང་སྤྱོད་པ་གཞན་པ་ཉིད་དེ་ཁྱད་པར་ཡོད་པ་ཞེས་བྱ་བའི་ཐ་ཚིག་

གོ། །གཞན་དག་ན་རེ་ནི་ཀུན་ནས་ཉོན་མོངས་པ་དང་རྣམ་པར་བྱང་བ་དག་ལ་ཞེས་བྱ་བ་ནི་སྔོན་གྱི་སློབ་དཔོན་ཡིན་ཏེ། གཟུགས་ན་སྤྱོད་པ་རྣམས་ལ་ཕོའི་དབང་པོ་མེད་ཀྱང་ཁྱད་པར་དུ་གྲུབ་པའི་ཕྱིར་སེམས་ཅན་གྱི་བྱེ་བྲག་དང་ཁྱད་པར་དག་ལ་དབང་བྱེད་པ་ནི་མ་ཡིན་ཏེ།

སེམས་ཅན་གྱི་བྱེ་བྲག་ནི་ཁྱད་པར་གྱིས་བྱས་པ་ཡིན་ནོ་སྙམ་དུ་བསམས་པ་ཡིན་ནོ། །དེ་དག་དང་མི་ལྡན་པ་དང་ཉམས་པ་ཞེས་བྱ་བ་དེ་དག་ནི་མི་ལྡན་པ་ཡང་ཡིན་ལ། ཉམས་པ་ཡང་ཡིན་པས་མི་ལྡན་པ་དང་ཉམས་པའོ། །མོ་དང་ཕོའི་དབང་པོ་དེ་དག་དང་མི་ལྡན་པ་

དང་ཉམས་པ་རྣམས་ནི་དེ་དག་དང་མི་ལྡན་པ་དང་ཉམས་པའོ། །གང་དག་ཡིན་ཞེ་ན། ཟ་མ་དང་མ་ནིང་དང་མཚན་གཉིས་པ་རྣམས་ཡིན་ནོ། །དེ་དག་དང་མི་ལྡན་པ་ནི་ཟ་མ་རྣམས་ཡིན་ཏེ། དེ་དག་ལ་མོ་དང་ཕོའི་དབང་པོ་མེད་པའི་ཕྱིར་རོ། །ཟ་མ་དང་མ་ནིང་དག་

Vol. 142 · folio 86a

ལ་ཁྱད་པར་ཅི་ཡོད་ཅེ་ན། ཟ་མ་ནི་རང་བཞིན་གྱིས་མོ་དང་ཕོའི་དབང་པོ་མེད་པ་དག་ཡིན་ནོ། །མ་ནིང་ནི་གནོད་པས་དབང་པོ་ཉམས་པ་དག་ཡིན་ནོ། །འདུལ་བ་ལས་ནི་རང་བཞིན་གྱིས་མ་ནིང་དང་ཕྲག་དོག་ཅན་དང་འཁྱུད་པའི་མ་ནིང་དང་མ་ནིང་ཟླ་ཕྱེད་པ་དང་

བཅས་པའི་མ་ནིང་ཞེས་བྱ་བ་མ་ནིང་ཁོ་ན་ལྔ་འབྱུང་སྟེ། དེ་ལས་རང་བཞིན་གྱིས་མ་ནིང་འབྱུང་བ་ནི་འདིར་ཟ་མ་ཡིན་པར་འདོད་དེ། གང་ཞིག་རང་བཞིན་གྱིས་མཚན་མ་མེད་པ་དེ་ནི་རང་བཞིན་གྱིས་མ་ནིང་ཡིན་ལ། ལྷག་མ་ནི་འདིར་མ་ནིང་དག་ཡིན་པར་འདོད་དེ། རེ་ཞིག་བཅད་

པའི་མ་ནིང་ནི་དབང་པོ་བཅད་པ་ཡིན་པའི་ཕྱིར་དབང་པོ་མ་ཚང་བ་ཡིན་ནོ་ཞེས་བྱ་བར་གསལ་བ་ཉིད་དོ། །མ་ནིང་ཟླ་ཕྱེད་པ་ལ་སོགས་པ་ནི་དབང་པོ་ལས་སུ་མི་རུང་བ་ཉིད་ཀྱིས་དེ་དག་ཉམས་པ་ཁོ་ན་ཡིན་ནོ། །དབང་པོ་ལས་སུ་རུང་བ་ཉིད་ཀྱི་དུས་ན་ཡང་དེ་དག་ཉམས་པ་

ཡིན་ནོ་ཞེས་བྱ་བར་རྣམ་པར་གཞག་པ་ཁོ་ན་སྟེ། དེའི་དབང་པོ་ལས་སུ་རུང་བ་ཉིད་ནི་ཕོའི་དགའ་བའི་ཁྱད་པར་སྐྱེད་པར་བྱེད་པ་མ་ཡིན་པའི་ཕྱིར་དང་། བུ་སྐྱེད་པར་བྱེད་པ་མ་ཡིན་པའི་ཕྱིར་རོ། །འདིར་ཟ་མ་དང་མ་ནིང་ཞེས་བྱ་བ་སོ་སོར་འབྱུང་བ་ནི་དབང་པོ་ཡོད་པའི་

ཕྱིར་སྙམ་དུ་སེམས་པ་བཟློག་པའི་ཕྱིར་རོ། །དེ་ལྟ་མ་ཡིན་ན་འདུལ་བ་བཞིན་དུ་ཆོས་མངོན་པ་འདི་ལས་ཀྱང་མ་ནིང་ཞེས་བྱ་བ་ཁོ་ན་བཏོན་པར་འགྱུར་རོ། །མཚན་གཉིས་པ་རྣམས་ནི་དེ་དག་ཉམས་པ་ཡིན་ཏེ། གནས་ཉམས་པས་ཉམས་པའི་ཕྱིར་དང་བདེ་བ་ཆུང་ངུའི་རྒྱུ་ཉིད་

ཀྱིས་ཉམས་པའི་ཕྱིར་རོ། །གཞན་དག་ན་རེ་ནི་དེ་དག་དང་མི་ལྡན་པ་རྣམས་ནི་ཟ་མ་ཡིན་ལ་དེ་དག་ཉམས་པ་རྣམས་ནི་མ་ནིང་ཡིན་ཏེ། གནོད་པས་ཉམས་པའི་ཕྱིར་རོ། །མཚན་གཉིས་པ་རྣམས་ཀྱང་དེ་དག་ཉམས་པ་ཡིན་ཏེ་གནས་ཉམས་པས་ཉམས་པའི་ཕྱིར་དང་། བདེ་བ་ཆུང་

ངུའི་རྒྱུ་ཉིད་ཀྱིས་ཉམས་པའི་ཕྱིར་རོ་ཞེས་ཟེར་རོ། །དེ་དག་ལ་ནི་སྡོམ་པ་ལ་སོགས་པ་མེད་དོ། །ཟ་མ་མ་ནིང་སྒྲ་མི་སྙན། །མཚན་གཉིས་མ་གཏོགས་མི་རྣམས་ལ། །སྡོམ་མིན་ཞེས་བྱ་བ་དང་། ཟ་མ་སོགས་ལ་མི་འདོད་དོ། །ཕན་དང་ངོ་མཚར་ཆུང་བའི་ཕྱིར། །ཞེས་བྱ་བ་དང་།

Vol. 142 · folio 86b

སྐྱེས་པ་བུད་མེད་ཀྱི་འཆད་དོ་ཞེས་འབྱུང་བའི་ཕྱིར་རོ། །ཕོ་དང་མོ་རྣམས་ལ་ནི་དེ་དག་ཡོད་དེ། དེའི་ཕྱིར་མོ་དང་ཕོའི་དབང་པོ་དག་ནི་ཀུན་ནས་ཉོན་མོངས་པ་ལ་དབང་བྱེད་པ་ཡིན་ནོ། །སྡོམ་པ་དང་འབྲས་བུ་འཐོབ་པ་དང་འདོད་ཆགས་དང་བྲལ་བ་རྣམས་ཞེས་བྱ་བ་ནི་སྡོམ་པ་

ནི་རྣམ་པ་གསུམ་སྟེ། སོ་སོ་ཐར་པའི་སྡོམ་པ་དང་། བསམ་གཏན་གྱི་སྡོམ་པ་དང་། ཟག་པ་མེད་པའི་སྡོམ་པའོ། །དེ་དག་ལ་ནི་སྡོམ་པ་གཅིག་ཀྱང་མེད་ན་ཐམས་ཅད་ལྟ་སྨོས་ཀྱང་ཅི་དགོས་ཏེ། སྡོམ་པའང་དེ་བཞིན་ལ་ཞེས་འབྱུང་བའི་ཕྱིར་རོ། །དེ་ཉིད་ཀྱི་ཕྱིར་དེ་

དག་ལ་རྒྱུན་ཏུ་ཞུགས་པ་ལ་སོགས་པ་འབྲས་བུ་འཐོབ་པ་དང་འདོད་པ་ལ་སོགས་པའི་འདོད་ཆགས་བྲལ་བ་ཡང་མི་སྲིད་དོ། །མོ་དང་ཕོ་རྣམས་ལ་ནི་སྲིད་པས། དེའི་ཕྱིར་ཕོ་དང་མོའི་དབང་པོ་རྣམ་པར་བྱང་བ་ལ་ཡང་དབང་བྱེད་པ་ཡིན་ནོ། །རིས་མཐུན་པར་མཚམས་སྦྱོར་

བ་དང་ཡང་དག་པར་འཛིན་པ་དག་ལ་ཞེས་བྱ་བ་ནི་སྲོག་གི་དབང་པོ་ནི་རིས་མཐུན་པར་སྐྱེ་བ་ལ་སྟེ། དེ་ནི་རིས་མཐུན་པར་མཚམས་སྦྱོར་བ་ལ་དབང་བྱེད་པར་རྣམ་པར་གཞག་གོ། །རིས་མཐུན་པ་ཡང་དག་པར་འཛིན་པ་ལ་ཡང་དབང་བྱེད་པ་ཡིན་ཏེ། སྲོག་གི་དབང་པོའི་

དབང་གིས་དེའི་འོག་ཏུ་གནས་པའི་ཕྱིར་རོ། །ཡིད་ཀྱི་དབང་པོ་ནི་ཡང་སྲིད་པར་མཚམས་སྦྱོར་བ་ཞེས་བྱ་བ་ནི་ཉོན་མོངས་པ་ཅན་གྱིས་ཡང་སྲིད་པར་མཚམས་སྦྱོར་བའི་ཕྱིར་རོ། །འདི་སྲོག་གི་དབང་པོ་ལས་ཁྱད་པར་ཅི་ཡོད་ཅེ་ན། སྲོག་གི་དབང་པོ་ནི་སྲིད་པ་བར་མ་ཁོ་ནར་མཚམས་སྦྱོར་བ་

ཡིན་ལ། ཡིད་ཀྱི་དབང་པོ་ནི་སྐྱེ་བའི་སྲིད་པར་ཡང་ཡིན་ནོ། །སྲོག་གི་དབང་པོ་ནི་དུས་མཉམ་དུ་རིས་མཐུན་པ་དང་དེར་མཚམས་སྦྱོར་བར་བྱེད་ཀྱི་ཡིད་ཀྱི་དབང་པོ་ནི་དུས་ཐ་དད་པ་ཡིན་ཡང་། ཡང་སྲིད་པར་མཚམས་སྦྱོར་བར་བྱེད་དོ། །དབང་གི་ངོ་བོ་དང་མཐུན་པར་བྱེད་པ་ཞེས་བྱ་བ་ནི་འཇིག་རྟེན་ནམ་

ཆོས་ནི་སེམས་ཀྱི་དབང་གི་ངོ་བོ་དང་མཐུན་པར་བྱེད་པ་ཡིན་ནོ། །ཇི་སྐད་དུ་འཇིག་རྟེན་འདི་ནི་སེམས་ཀྱིས་ཁྲིད་དོ་ཞེས་བྱ་བ་རྒྱས་པར་གསུངས་པ་ལྟ་བུའོ་ཞེས་བྱ་བ་ནི་ཚིགས་སུ་བཅད་པ་ལས་ཀྱང་། འཇིག་རྟེན་སེམས་ཀྱིས་ཁྲིད་པ་སྟེ། །སེམས་ཀྱིས་ཡོངས་སུ་དྲངས་པ་ཡིན། །སེམས་ཀྱི་

Vol. 142 · folio 87a

ཆོས་ནི་གཅིག་པུ་ཡི། །དབང་གི་རྗེས་སུ་ཆོས་ཀུན་འགྲོ། །ཞེས་གསུངས་པ་ཡིན་ནོ། །དེ་དག་ལ་འདོད་ཆགས་ལ་སོགས་པ་རྒྱས་པར་འགྱུར་བ་ཉིད་ཀྱི་ཕྱིར་ཞེས་བྱ་བ་ནི་འདི་དག་ལ་དམིགས་པ་འམ་མཚུངས་པར་ལྡན་པའི་སྒོ་ནས་བདེ་བ་ལ་སོགས་པ་

དེ་དག་ལ་རྒྱས་པར་འགྱུར་བའི་ངང་ཚུལ་ཡོད་པས་ན་འདོད་ཆགས་ལ་སོགས་པ་འདི་དག་ནི་དེ་དག་ལ་རྒྱས་པར་འགྱུར་བ་ཡིན་ནོ། །དེའི་ངོ་བོ་ནི་དེ་དག་ལ་རྒྱས་པར་འགྱུར་བ་ཉིད་དོ། །དེའི་ཕྱིར་ཏེ། ཇི་སྐད་དུ་བདེ་བའི་ཚོར་བ་ལ་ནི་འདོད་ཆགས་རྒྱས་པར་འགྱུར་ལ། སྡུག་བསྔལ་

ལ་ནི་ཞེ་སྡང་། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་ལ་ནི་གཏི་མུག་གོ་ཞེས་གསུངས་པ་ལྟ་བུའོ། །དེ་དག་གིས་རྣམ་པར་བྱང་བར་བྱེད་དོ་ཞེས་བྱ་བ་ནི་དེ་དག་གིས་རྣམ་པར་དག་པར་འགྱུར་ཞེས་བྱ་བའི་ཐ་ཚིག་གོ། །དེ་ལྟར་ན་དད་པ་ལ་སོགས་པ་འདི་དག་ནི་ཉོན་མོངས་པ་

རྣམ་པར་དག་པར་བྱ་བ་ལ་དབང་བྱེད་དོ་ཞེས་བཤད་པ་ཡིན་ནོ། །གཞན་དག་ན་རེ་བདེ་བ་ལ་སོགས་པ་རྣམས་ནི་རྣམ་པར་བྱང་བ་ལ་ཡང་དབང་བྱེད་དེ་ཞེས་བྱ་བ་ལ། ཡང་ཞེས་བྱ་བའི་སྒྲའི་དོན་ནི་བདེ་བ་ལ་སོགས་པ་ནི་ཀུན་ནས་ཉོན་མོངས་པ་འབའ་ཞིག་ལ་དབང་བྱེད་པ་མ་ཡིན་ནོ། །

འོ་ན་ཅི་ཞེ་ན། རྣམ་པར་བྱང་བ་ལ་ཡང་ཡིན་ནོ་ཞེས་བྱ་བ་ཡིན་ནོ། །ཆོས་མངོན་པ་པ་ཁོ་ན་ཁ་ཅིག་དེ་སྐད་ཅེས་ཟེར་ཏེ། དེ་དག་རྣམ་པར་བྱང་བ་ལ་དབང་བྱེད་པ་ཡོད་དེ་ཞེས་བྱ་བའི་ལུང་འདི་ལྟར་བདེ་བར་གྱུར་པའི་སེམས་མཉམ་པར་འཇོག་པར་འགྱུར་རོ་ཞེས་གསུངས་པ་ཡང་ཁྱེར་ཏེ་

འོང་བར་བྱེད་དོ། །སྡུག་བསྔལ་གྱི་རྒྱུ་ཅན་གྱི་དད་པ་ནི་འདི་ལ་རྒྱུ་སྡུག་བསྔལ་ཡོད་པས་ན། དད་པ་འདི་ནི་སྡུག་བསྔལ་གྱི་རྒྱུ་ཅན་ཡིན་ནོ། །སྡུག་བསྔལ་གྱི་རྒྱུ་ལས་བྱུང་བ་ཞེས་བྱ་བའི་ཐ་ཚིག་གོ། །སྡུག་བསྔལ་ཡོད་ན་འགའ་ཞིག་ཆོས་སམ་དཀོན་མཆོག་གསུམ་ལ་དད་པ་སྐྱེ་

བའམ་རབ་ཏུ་འབྱུང་བ་མངོན་པར་འདོད་པར་འགྱུར་རོ། །ཡིད་བདེ་བ་ལ་སོགས་པ་ངེས་པར་འབྱུང་བ་ལ་བརྟེན་པ་དྲུག་ཅེས་བྱ་བ་ནི་ཡིད་བདེ་བ་ངེས་པར་འབྱུང་བ་ལ་བརྟེན་པ་དྲུག་དག་དང་ཡིད་མི་བདེ་བ་ངེས་པར་འབྱུང་བ་ལ་བརྟེན་པ་དྲུག་དག་དང་། བཏང་སྙོམས་ངེས་པར་འབྱུང་

Vol. 142 · folio 87b

བ་ལ་བརྟེན་པ་དྲུག་དག་སྟེ། ངེས་པར་འབྱུང་བ་ནི་ཟག་པ་དང་བཅས་པ་དང་ཟག་པ་མེད་པའི་ལམ་ཡིན་ནོ། །གཞན་དག་ན་རེ་ཁམས་སམ་འཁོར་བ་ལ་ངེས་པར་འབྱུང་ཞིང་འདོད་ཆགས་དང་བྲལ་བ་ཡིན་ནོ་ཞེས་ཟེར་རོ། །མདོ་ལས་ཇི་སྐད་དུ་མིག་གི་རྣམ་པར་ཤེས་པར་བྱ་

བའི་གཟུགས་རྣམས་ལ་བརྟེན་ཏེ། ཡིད་བདེ་བ་ངེས་པར་འབྱུང་བ་ལ་བརྟེན་པ་སྐྱེའོ་ཞེས་གསུངས་པ་ལྟ་བུ་སྟེ། ངེས་པར་འབྱུང་བ་ལ་དམིགས་པ་འམ། ངེས་པར་འབྱུང་བ་དང་མཐུན་པ་ཞེས་བྱ་བའི་ཐ་ཚིག་གོ། །དེ་བཞིན་དུ་ཡིད་དང་ཆོས་རྣམས་ལ་བརྟེན་ཏེ་ཡིད་བདེ་བ་

ངེས་པར་འབྱུང་བ་ལ་བརྟེན་པ་སྐྱེའོ་ཞེས་བྱ་བའི་བར་དང་། དེ་བཞིན་དུ་མིག་གི་རྣམ་པར་ཤེས་པར་བྱ་བའི་གཟུགས་རྣམས་ལ་བརྟེན་ཏེ་ཡིད་མི་བདེ་བ་སྐྱེའོ་ཞེས་བྱ་བའོ། །དེ་བཞིན་དུ་ཡིད་དང་ཞེས་བྱ་བའི་བར་དང་། དེ་བཞིན་དུ་མིག་གི་རྣམ་པར་ཤེས་པར་བྱ་བའི་གཟུགས་

རྣམས་ལ་བརྟེན་ཏེ་བཏང་སྙོམས་ངེས་པར་འབྱུང་བ་ལ་བརྟེན་པ་སྐྱེའོ་ཞེས་བྱ་བ་དང་དེ་བཞིན་དུ་ཡིད་དང་ཞེས་བྱ་བའི་བར་གསུངས་པ་ལྟ་བུ་ཡིན་ཏེ། ལ་ལ་ནི་ངེས་པར་འབྱུང་བ་ཐོབ་པར་འགྱུར་རོ་སྙམ་དུ་ཡིད་བདེ་བ་ཡིན་ནོ། །ལ་ལ་ནི་བདག་གིས་ངེས་པར་འབྱུང་བའི་ཕྱིར་

འབད་པ་མ་བྱས་སོ་སྙམ་དུ་ཡིད་མི་བདེ་བ་ཡིན་ནོ། །ལ་ལ་ནི་གཟུགས་ལ་སོགས་པ་དེ་དག་ལ་སོ་སོར་བརྟགས་ནས་བཏང་སྙོམས་སུ་བྱེད་པ་ཡིན་ནོ། །གཞན་དག་ན་རེ་ནི་ཞེས་བྱ་བ་ནི་མདོ་སྡེ་པ་དག་ཡིན་ནོ། །རྣམ་པར་ཤེས་ནས་ཡང་བ་ཡོངས་སུ་སྤོང་བའི་ཕྱིར་ཞེས་བྱ་བ་ནི་

རྣམ་པར་ཤེས་པས་ཡང་བ་ཡོངས་སུ་སྤོང་བར་བྱེད་ཀྱི་མིག་དང་རྣ་བས་ནི་མ་ཡིན་ནོ་སྙམ་དུ་བསམས་པ་ཡིན་ནོ། །རྣམ་པར་ཤེས་པ་ལས་གཞན་པ་གཟུགས་མཐོང་བ་འམ་སྒྲ་ཐོས་པ་ཡང་མེད་ཅེས་བྱ་བ་ནི་གཟུགས་མཐོང་བ་དང་སྒྲ་ཐོས་པ་ནི་དཔྱད་ན་འཛིན་པ་ལས་ལོགས་ཤིག་

ན་ཡོད་པར་མི་དམིགས་ལ། འཛིན་པ་ཡང་རྣམ་པར་ཤེས་པ་ཁོ་ན་ཡིན་གྱི་གཞན་ནི་མ་ཡིན་ནོ། །དེ་ལྟ་བས་ན་མིག་དང་རྣ་བའི་རྣམ་པར་ཤེས་པ་མཚུངས་པར་ལྡན་པ་དང་བཅས་པ་དག་སྐྱེད་པ་ལ་དབང་བྱེད་པར་བཤད་པ་གང་ཡིན་པ་དེ་ཉིད་དེ་ཡིན་གྱི་འདི་དག་གཞན་ལ་དབང་བྱེད་པ་

Vol. 142 · folio 88a

ནི་མ་ཡིན་ནོ་སྙམ་དུ་བསམས་པ་ཡིན་ནོ། །ཡིད་ནི་དོན་ཐམས་ཅད་ལ་དམིགས་པར་བྱ་བ་ལ་ཞེས་བྱ་བ་སྨོས་པ་ནི་རང་གི་དོན་ལ་དམིགས་པར་དབང་བྱེད་ཕྱིར་ཞེས་བྱ་བ་ཁོ་ནས་གྲུབ་པ་ལས་ཡིད་ནི་དོན་ཐམས་ཅད་ལ་དམིགས་པར་བྱ་བ་ལ་ཞེས་འབྱུང་

བའི་ས་པ་ནི་ཆོས་ཐམས་ཅད་ཆོས་ཀྱི་ཁམས་ཀྱི་ངོ་བོ་ཉིད་མ་ཡིན་པའི་ཕྱིར་ཏེ་འདི་ནི་གོང་དུ་རྣམ་པར་བཤད་ཟིན་ཏོ། །འདི་ལ་དོན་རྣམས་ཀྱང་དབང་བྱེད་མ་ཡིན་ནམ་ཞེས་བྱ་བ་ནི་གཉིས་ལ་བརྟེན་ནས་རྣམ་པར་ཤེས་པ་སྐྱེའོ་ཞེས་འབྱུང་བའི་ཕྱིར་རོ། །ལྷག་པར་དབང་བྱེད་

པ་ཉིད་ནི་དབང་བྱེད་པ་ཉིད་ཡིན་ལ་ཞེས་བྱ་བ་ནི་ལྷག་པར་དབང་བྱེད་པ་ནི་དབང་བྱེད་པ་ཡིན་ནོ། །དེའི་ངོ་བོ་ནི་ལྷག་པར་དབང་བྱེད་པ་ཉིད་དོ། །གཟུགས་ཐམས་ཅད་ལ་དམིགས་པར་བྱ་བ་ལ་ཐུན་མོང་གི་རྒྱུ་ཡིན་པའི་ཕྱིར་རོ་ཞེས་བྱ་བ་ནི་མིག་གི་ངོ་བོ་གཅིག་པུ་ནི་སྔོན་པོ་དང་སེར་པོ་

ལ་སོགས་པའི་གཟུགས་ཐམས་ཅད་དམིགས་པར་བྱ་བ་ལ་རྒྱུ་ཡིན་པའི་ཕྱིར་རོ། །གཟུགས་ཀྱི་ངོ་བོ་གཅིག་པུ་ནི་སྔོན་པོ་དང་སེར་པོ་ལ་སོགས་པའི་གཟུགས་ཐམས་ཅད་དམིགས་པར་བྱ་བ་ལ་རྒྱུ་ཉིད་མ་ཡིན་ཏེ། གཟུགས་སྔོན་པོ་ནི་གཟུགས་སེར་པོ་དམིགས་པར་བྱ་བ་ལ་རྒྱུ་

མ་ཡིན་ནོ། །དམིགས་པ་དེ་གསལ་བ་ཉིད་ལ་སོགས་པའི་རྗེས་སུ་བྱེད་པའི་ཕྱིར་རོ་ཞེས་བྱ་བ་ནི་འདི་ལྟར་དམིགས་པ་ནི་མིག་ལ་སོགས་པ་གསལ་བ་དང་མི་གསལ་བ་ཉིད་ཀྱི་རྗེས་སུ་བྱེད་དེ། །འདི་ལྟ་སྟེ་མིག་གསལ་ན་ནི་དེའི་དམིགས་པ་གསལ་ལ། མིག་མི་གསལ་ན་ནི་མི་

གསལ་བ་ཡིན་ནོ། །སོགས་པ་ཞེས་བྱ་བའི་སྒྲས་ནི་མི་དགེ་བ་དང་དགེ་བ་དང་ཚོར་བ་དང་བཅས་པ་དང་ཚོར་བ་མེད་པའི་རྗེས་སུ་བྱེད་པ་སྟེ། ཡིད་མི་དགེ་ན་ནི་དམིགས་པ་མི་དགེ་བ་ཡིན་ལ། དགེ་ན་ནི་དགེ་བ་ཡིན། ཚོར་བ་དང་བཅས་ན་ནི་ཚོར་བ་དང་བཅས་པ་ཡིན། ཚོར་བ་

མེད་ན་ནི་ཚོར་བ་མེད་པ་ཡིན་ནོ་ཞེས་བྱ་བ་ཡིན་ནོ། །དམིགས་པ་གཟུགས་ཀྱིས་གསལ་བ་དང་མི་གསལ་བ་ཉིད་ལ་སོགས་པའི་རྗེས་སུ་བྱེད་པ་ནི་མ་ཡིན་ཏེ། དེའི་ཕྱིར། དེ་ལས་བཟློག་པ་ཡིན་པའི་ཕྱིར་རོ་ཞེས་བྱ་བ་སྨོས་སོ། །དེ་ལྟ་བས་ན་མིག་ལ་སོགས་པ་ལྷག་པར་དབང་

Vol. 142 · folio 88b

བྱེད་པ་ཡིན་གྱི། གཟུགས་ལ་སོགས་པ་ནི་མ་ཡིན་ནོ། །ལུས་ལས་མོ་དང་ཕོའི་དབང་དག་ཅེས་བྱ་བ་འདི་ལ་སྒྲུབ་པ་ནི་མོ་དང་ཕོའི་དབང་པོ་ནི་ལུས་ཀྱི་དབང་པོའི་ངོ་བོ་ཉིད་ཡིན་ཏེ། རེག་བྱའི་རྣམ་པར་ཤེས་པ་སྐྱེད་པར་བྱེད་པ་ཡིན་པའི་ཕྱིར་མོ་དང་ཕོའི་དབང་པོའི་ངོ་བོ་

ཉིད་མ་ཡིན་པའི་ལུས་ཀྱི་དབང་པོ་བཞིན་ནོ། །ཆོས་མི་མཐུན་པ་ནི་མིག་གི་དབང་པོ་ལྟ་བུའོ། །མོའི་དབང་པོ་ནི་རང་བཞིན་ང་རོ་དང་གཡོ་བ་དང་བསམ་པ་དག་ཅེས་བྱ་བ་ལ། མོའི་བསམ་པ་ནི་མོ་ནི་ཕོ་ལ་སེམས་པ་ཡིན་ནོ། །ཕོ་ནི་བཟློག་པ་ཡིན་ཏེ་དེ་ལྟ་ཡིན་དང་མོ་

དང་ཕོའི་དབང་པོ་དག་ནི་སེམས་ཅན་གྱི་ཁྱད་པར་ཁོ་ན་ལ་དབང་བྱེད་པ་ཡིན་ནོ། །སྲོག་གི་དབང་པོ་ནི་རིས་མཐུན་པར་གནས་པར་བྱ་བ་ལ་དབང་བྱེད་པ་ཡིན་གྱི་བྱེ་བྲག་ཏུ་སྨྲ་བའི་ལྟ་བུར་རིས་མཐུན་པའི་བར་མཚམས་སྦྱོར་བ་ལ་དབང་བྱེད་པ་ནི་མ་ཡིན་ཏེ། དེ་ལ་ནི་ཡིད་ཁོ་ན་དབང་

བྱེད་པའི་ཕྱིར་རོ། །ཚོར་བ་རྣམས་ནི་ཀུན་ནས་ཉོན་མོངས་པར་བྱ་བ་ལ་དབང་བྱེད་དེ་ཞེས་བྱ་བ་འདི་ལ་ནི་བྱེ་བྲག་ཏུ་སྨྲ་བ་རྣམས་དང་གཞུང་ལུགས་གཅིག་གོ། །འདི་ལྟར་དེ་དག་གིས་ཞེས་བྱ་བ་རྒྱས་པར་འབྱུང་བ་ལ། ཉོན་མོངས་པ་རྣམས་ཀྱང་རྣམ་པར་གནོན་པ་ནི་འཇིག་རྟེན་

པའི་ལམ་གྱི་རྣམ་པ་དག་གིས་སོ། །ལམ་ཡང་འདྲེན་པར་བྱེད་པ་ནི་ངེས་པར་འབྱེད་པའི་ཆ་དང་མཐུན་པ་ལ་སོགས་པའི་རྣམ་པ་དག་གིས་སོ། །དེ་ལྟར་ན་དད་པ་ལ་སོགས་པ་ནི་རེ་རེ་ཞིང་རྣམ་པར་བྱང་བའི་ཚོགས་ལ་དབང་བྱེད་དོ་ཞེས་བཤད་པ་ཡིན་ནོ། །སེམས་རྣམ་པར་

མ་གྲོལ་བ་ལ་ཡོངས་སུ་མྱ་ངན་ལས་འདའ་བ་མེད་ཅེས་བྱ་བ་ནི་ཀུན་ཤེས་པ་དང་ལྡན་པའི་དབང་པོ་ནི་ཟད་པ་ཤེས་པ་ལ་སོགས་པ་ཟག་པ་མེད་པའི་དབང་པོ་ཡིན་ནོ། །དེ་ཉིད་ཀྱང་ཉོན་མོངས་པ་ལས་རྣམ་པར་གྲོལ་བའི་ཕྱིར་དང་རྒྱུད་རྣམ་པར་གྲོལ་བའི་ཕྱིར་རྣམ་པར་གྲོལ་བ་ཡིན་ལ། དེ་ཐོབ་

པ་ནི་ཕུང་པོའི་ལྷག་མ་མེད་པའི་མྱ་ངན་ལས་འདའ་བར་འགྱུར་རོ། །དེ་ལྟ་བས་ན་ཀུན་ཤེས་པ་དང་ལྡན་པའི་དབང་པོ་ནི་ཕུང་པོའི་ལྷག་མ་མེད་པའི་མྱ་ངན་ལས་འདའ་བ་ལ་དབང་བྱེད་པར་རྣམ་པར་གཞག་གོ། །མཐོང་བའི་ཆོས་ལ་བདེ་བར་གནས་པར་བྱ་བའི་ཕྱིར་ཞེས་བྱ་བ་

Vol. 142 · folio 89a

རྒྱས་པར་འབྱུང་བ་ནི་ཆོས་མཐོང་བ་ནི་མཐོང་བའི་ཆོས་ཏེ་མཐོང་བའི་ཚེ་ཞེས་བྱ་བའི་ཐ་ཚིག་གོ། །གནས་པ་བདེ་བ་ནི་བདེ་བར་གནས་པའོ། །མཐོང་བའི་ཆོས་ལ་བདེ་བར་གནས་པ་ནི་མཐོང་བའི་ཆོས་ལ་བདེ་བར་གནས་པའོ། །རྣམ་པར་གྲོལ་

བས་དགའ་བ་དང་བདེ་བ་སོ་སོར་ཡང་དག་པར་མྱོང་བའི་ཕྱིར་རོ་ཞེས་བྱ་བ་ལ། རྣམ་པར་གྲོལ་བ་ནི་ཉོན་མོངས་པ་སྤངས་པའོ། །དགའ་བ་ནི་ཡིད་བདེ་བའོ། །བདེ་བ་ནི་ཤིན་ཏུ་སྦྱངས་པའི་བདེ་བའོ། །རྣམ་པར་གྲོལ་བས་དགའ་བ་དང་བདེ་བ་སོ་སོར་ཡང་དག་པར་མྱོང་བ་ནི་རྣམ་

པར་གྲོལ་བས་དགའ་བ་དང་བདེ་བ་སོ་སོར་ཡང་དག་པར་མྱོང་བ་སྟེ། དེའི་ཕྱིར་རོ། །འདི་སྐད་དུ་རྣམ་པར་གྲོལ་བས་དགའ་བ་དང་བདེ་བ་ཡང་དག་པར་མྱོང་བ་ཉིད་མཐོང་བའི་ཆོས་ལ་བདེ་བར་གནས་པ་ཡིན་ནོ་ཞེས་བཤད་པ་ཡིན་ནོ། །ངག་དང་ལག་པ་དང་རྐང་པ་དང་རྐུབ་དང་

མདོམས་རྣམས་ཀྱང་དབང་པོ་ཉིད་དུ་ཁ་བསྐང་བར་བྱའོ་ཞེས་བྱ་བ་ནི་མིག་གི་དབང་པོ་ལ་སོགས་པ་མ་གཏོགས་པ་ངག་གི་དབང་པོ་ལ་སོགས་པར་རྟོག་པར་བྱེད་པ་ཡིན་ཏེ། ངག་གི་དབང་པོ་ནི་གང་གིས་ན་ཚིག་སྨྲ་བར་བྱེད་པ་ཡིན་ནོ། །ལག་པའི་དབང་པོ་ནི་གང་གིས་ན་རྫས་ཅུང་

ཟད་ལེན་པར་བྱེད་པ་ཡིན་ནོ། །རྐང་པའི་དབང་པོ་ནི་གང་གིས་ན་འགྲོ་བར་བྱེད་པ་ཡིན་ཏེ། འཆག་པར་བྱེད་པ་ཞེས་བྱ་བའི་ཐ་ཚིག་གོ། །རྐུབ་ཀྱི་དབང་པོ་ནི་གང་གིས་ན་རྟུག་པ་རྟུག་པར་བྱེད་པ་ཡིན་ནོ། །མདོམས་ཀྱི་དབང་པོ་ནི་ལུས་ཀྱི་དབང་པོ་ཕྱོགས་གཅིག་ལས་མ་གཏོགས་པ་

གང་གིས་ན་ཀུན་ཏུ་དགའ་བའི་ཁྱད་པར་འཐོབ་པ་ཡིན་ནོ། །མ་རིག་པ་ལ་སོགས་པ་ནི་བཅོམ་ལྡན་འདས་ཀྱིས་དོན་གང་གིས་དབང་པོ་ཉི་ཤུ་རྩ་གཉིས་སུ་གསུངས་པ་དེ་མ་རིག་པ་ལ་སོགས་པ་དང་འབྲེལ་པ་མེད་པའི་ཕྱིར་དབང་པོ་ཉིད་དུ་ཁ་བསྐང་བར་མི་བྱའོ། །དོན་དེ་ཡང་གང་ཞེ་ན།

སེམས་ཀྱི་རྟེན་དང་དེའི་བྱེ་བྲག་ཅེས་བྱ་བ་རྒྱས་པར་སྨོས་ཏེ། སེམས་ཀྱི་རྟེན་དང་། རྟེན་དེའི་བྱེ་བྲག་དང་། གནས་པ་དང་། ཀུན་ནས་ཉོན་མོངས་པ་དང་། རྣམ་པར་བྱང་བའི་ཚོགས་དང་། རྣམ་པར་བྱང་བ་ཞེས་བྱ་བ་ཡིན་ནོ། །སྐྱེ་མཆེད་དྲུག་པོ་དེ་དག་ནི་སེམས་ཅན་གྱི་རྫས་ཀྱི་གཞི་

Vol. 142 · folio 89b

ཡིན་ནོ་ཞེས་བྱ་བ་ནི་དེ་ལས་གཞན་པ་རྣམས་དེ་དག་ལ་བརྟེན་པའི་ཕྱིར་རོ། །འདི་ལྟར་དབང་པོ་དྲུག་གི་དབང་གིས་རྟེན་དང་། ཡུལ་གྱི་རྣམ་པར་ཤེས་པ་དྲུག་འབྱུང་བ་ཡིན་ནོ། །འདི་དག་ཀྱང་སེམས་ཅན་གྱི་རྫས་ཡིན་པར་ནི་འདོད་མོད་ཀྱི་གཞི་ནི་མ་ཡིན་ཏེ། དེ་ལ་སོགས་པའི་དབང་གིས་སྐྱེ་

མཆེད་དྲུག་བྱུང་བ་ནི་མ་ཡིན་ནོ། །ལྔས་ནི་རྣམ་པར་བྱང་བའི་ཚོགས་སོགས་པར་བྱེད་དོ་ཞེས་བྱ་བ་ནི་དད་པ་ལ་སོགས་པས་སོ། །གསུམ་གྱིས་ནི་རྣམ་པར་བྱང་བར་བྱེད་དེ་ཞེས་བྱ་བ་ནི་མི་ཤེས་པ་ཀུན་ཤེས་པར་བྱེད་པའི་དབང་པོ་ལ་སོགས་པས་སོ། །རྟོག་པ་གཞན། འཇུག་པའི་རྟེན་དང་མི་སྐྱེ་

དང་། །ཞེས་བྱ་བ་རྒྱས་པར་འབྱུང་བ་ནི་འཇུག་པའི་ཕྱོགས་དང་ལྡོག་པའི་ཕྱོགས་ཀྱི་དབང་དུ་བྱས་ནས་བཤད་པ་ཡིན་ཏེ། འཇུག་པ་སྟེ་འཁོར་བའི་རྟེན་དང་། སྐྱེ་བ་དང་གནས་པ་དང་ཉེ་བར་སྤྱོད་པ་དང་ལྡོག་པ་སྟེ། མྱ་ངན་ལས་འདས་པའི་རྟེན་དང་། སྐྱེ་བ་དང་། གནས་པ་དང་། ཉེ་བར་

སྤྱོད་པ་ཡིན་ནོ། །འདི་ཙམ་གྱིས་ན་སྐྱེས་བུའི་དོན་ཡོངས་སུ་རྫོགས་པ་དེ་ལས་གཞན་པའི་དབང་པོ་གདགས་པ་ནི་དོན་མེད་པ་ཡིན་ནོ། །ཁྱེད་ཀྱི་དེའི་སྒྲ་ལ་སོགས་པ་དམིགས་པ་ནི་དང་པོ་ཡིན་ནོ། །ཡོན་ཏན་དང་སྐྱེས་བུའི་ཁྱད་པར་དམིགས་པ་ནི་མཐའ་ཡིན་ནོ་ཞེས་སྐྱེས་བུའི་དོན་ཡོངས་

སུ་རྫོགས་པ་འདོན་ཏོ། །དེ་ལ་སྐྱེ་མཆེད་དྲུག་པོ་སེམས་ཅན་གྱི་རྫས་ཀྱི་གཞིར་གྱུར་པས་ནི་འཁོར་བས་ན་འཇུག་པའི་རྟེན་ཡིན་ནོ། །སྐྱེ་བ་ནི་ཕོ་དང་མོའི་དབང་པོ་དག་ཡིན་ནོ་ཞེས་བྱ་བ་ནི་འདི་ནི་སྐྱེ་བར་འགྱུར་བས་ན་སྐྱེ་བའོ། །ཅིའི་ཕྱིར་ཞེ་ན། དེ་ལས་སྐྱེས་པའི་ཕྱིར་རོ་ཞེས་བྱ་བ་སྨོས་སོ། །

གང་ཞིག་ཅེ་ན། སྐྱེ་མཆེད་དྲུག་སྟེ། ཡིད་དང་ལུས་ཀྱི་དབང་པོ་དག་ནི་དེ་དག་ལས་མངོན་སུམ་དུ་སྐྱེ་བའི་ཕྱིར་ལ། མིག་ལ་སོགས་པ་བཞི་ནི་རིམ་གྱིས་སྐྱེ་བའི་ཕྱིར་རོ། །གནས་པ་ནི་སྲོག་གི་དབང་པོ་ཡིན་ཏེ། སྐྱེ་མཆེད་དྲུག་གནས་པར་བྱེད་པའི་ཕྱིར་རོ། །ཚོར་བ་རྣམས་ཀྱིས་ནི་ཉེ་

བར་སྤྱོད་པར་བྱེད་དེ་བདེ་བ་ལ་སོགས་པས་སོ། །ལྡོག་པའི་རྟེན་ནི་དད་པ་ལ་སོགས་པ་ཡིན་ནོ་ཞེས་བྱ་བ་ནི་དད་པ་ལ་སོགས་པ་ནི་གཞིར་གྱུར་པ་ཡིན་པའི་ཕྱིར་རོ། །སྐྱེ་བ་ནི་ཀུན་ཤེས་པར་བྱེད་པའི་དབང་པོ་ཡིན་ནོ་ཞེས་བྱ་བ་ནི་དང་པོར་སྐྱེས་པ་སྟེ། ཐོག་མ་ཉིད་དུ་ཟག་པ་མེད་པ་སྐྱེ་བ་ཡིན་

Vol. 142 · folio 90a

པའི་ཕྱིར་རོ། །གནས་པ་ནི་ཀུན་ཤེས་པའི་དབང་པོ་ཡིན་ཏེ་རྒྱུན་ཆགས་པར་བྱེད་པ་ཡིན་པའི་ཕྱིར་རོ། །ཀུན་ཤེས་པ་དང་ལྡན་པའི་དབང་པོས་ནི་ཉེ་བར་སྤྱོད་པར་བྱེད་དོ་ཞེས་བྱ་བ་ནི་དེས་ན་སེམས་རྣམ་པར་གྲོལ་བས་དགའ་བ་དང་བདེ་བ་སོ་སོར་ཡང་དག་པར་མྱོང་

བའི་ཕྱིར་རོ། །དེའི་ཕྱིར་དབང་པོ་ནི་དེ་སྙེད་ཅིག་ཡིན་ཞེས་བྱ་བ་ནི་མ་རིག་པ་ལ་སོགས་པ་ནི་དབང་པོ་ཉིད་ཡིན་པར་མི་འདོད་དོ་ཞེས་བྱ་བའི་ཐ་ཚིག་གོ། །དེ་ཉིད་ཀྱི་ཕྱིར་དེ་དག་གི་གོ་རིམས་ཀྱང་དེ་ཡིན་ནོ་ཞེས་བྱ་བ་ནི་མིག་གི་དབང་པོ་ནས་ཀུན་ཤེས་པ་དང་ལྡན་པའི་དབང་པོ་ཞེས་བྱ་བའི་བར་

ཡིན་ཏེ། འཇུག་པ་དང་ལྡོག་པའི་རྟེན་ལ་སོགས་པར་གྱུར་པའི་ཕྱིར་རོ། །ངག་ནི་ཚིག་སྨྲ་བར་བྱ་བ་ལ་དབང་པོ་ཉིད་མ་ཡིན་ཏེ་སློབ་པའི་ཁྱད་པར་ལ་ལྟོས་པའི་ཕྱིར་རོ་ཞེས་བྱ་བ་ནི་བུས་པ་སྐྱེས་མ་ཐག་པ་བསླབ་པ་མེད་པ་ཁོ་ནར་མིག་གིས་གཟུགས་མཐོང་ལ་ཚིག་ནི་དེ་ལྟར་སྨྲ་བར་མི་བྱེད་དོ། །

དེ་ལྟ་བས་ན་དབང་པོའི་ལས་ལས་འདས་པའི་ཕྱིར་ངག་དབང་པོ་ཉིད་ཡིན་པར་འོས་པ་མ་ཡིན་གྱི། ཚིག་ཏུ་སྨྲ་བ་དེ་ནི་ལྕེའི་དབང་པོའི་རྟེན་ཁོ་ནའི་ལས་ཡིན་ནོ། །ལག་པ་དང་རྐང་པ་ཡང་ལེན་པ་དང་འགྲོ་བ་ལས་གཞན་མ་ཡིན་པའི་ཕྱིར་ཏེ་ཞེས་བྱ་བ་ནི་ལག་པ་ཉིད་གཞན་དུ་བྱུང་བ་ལ་ལེན་པ་ཞེས་

བྱ་ལ། རྐང་པ་ཉིད་གཞན་དུ་བྱུང་བ་ལ་འགྲོ་བ་ཞེས་བྱ་སྟེ། ལས་མེད་པའི་ཕྱིར་དང་། རང་གི་བདག་ཉིད་ལ་བྱེད་པ་ཡང་འགལ་བའི་ཕྱིར་ལག་པ་དང་རྐང་པ་ནི་དབང་པོ་ཉིད་མ་ཡིན་ནོ། །སྦྲུལ་ལ་སོགས་པ་ལ་ཞེས་བྱ་བ་ནི་སྦྲུལ་ལ་སོགས་པ་ལ་རྐང་པ་དང་ལག་པ་མེད་མོད་ཀྱི། འོན་ཀྱང་དེ་དག་

ལེན་པ་དང་འགྲོ་བར་འགྱུར་བས་ལག་པ་དང་རྐང་པ་ནི་དབང་པོ་ཉིད་མ་ཡིན་ནོ། །གལ་ཏེ་དེ་དག་ལ་ཡང་ཕྲ་མོ་ཡོད་དོ་ཞེ་ན། བསྒྲུབ་པར་བྱ་བ་ཡིན་པའི་ཕྱིར་མ་ཡིན་ཏེ་འདི་གཉིས་ཀྱང་དབང་པོ་ཉིད་མ་ཡིན་ནོ། །རྟུག་པར་བྱ་བ་ལ་ཞེས་བྱ་བ་ནི་མི་གཙང་བ་རྟུག་པར་བྱ་བ་ལའོ། །བུ་གའི་ནམ་

མཁའ་ལ་གནས་པའི་རྫས་ལྕི་བ་ནས་གང་ཅི་ཡང་རུང་སྟེ། རྐུབ་ཀྱི་གནས་ལས་གཞན་ན་ཡང་། ལྟུང་བའི་ཕྱིར་རྫས་ལྕི་བ་ནི་ལྕི་བ་ཉིད་ཁོ་ནའི་ཕྱིར་རང་ལྟུང་གི་དབང་པོས་བྱས་པ་ནི་མ་ཡིན་ནོ། །དེ་རླུང་གིས་ཀྱང་བྲོ་བར་བྱེད་པའི་ཕྱིར་རོ་ཞེས་བྱ་བ་ནི་མི་གཙང་བའི་རྫས་ལྕི་བ་དེ་རླུང་གིས་བྲོ་བར་བྱེད་

Vol. 142 · folio 90b

པའི་ཕྱིར་དེ་ནི་རླུང་ཁོ་ནའི་ལས་ཡིན་གྱི། རྐུབ་ཀྱི་དབང་པོ་ནི་མ་ཡིན་ཏེ། དེ་ནི་མི་དམིགས་པའི་ཕྱིར་རོ། །མདོམས་ཀྱང་ཀུན་དུ་དགའ་བར་བྱ་བ་ལ་དབང་པོ་ཉིད་མ་ཡིན་ཏེ་ཞེས་བྱ་བ་ལ། ཚིག་གི་དོན་གྱི་ཀུན་ཏུ་དགའ་བར་བྱ་བ་ལ་ལུས་ཀྱི་དབང་པོའི་ཕྱོགས་གཅིག་པོ་མོ་དང་ཕོའི་དབང་པོ་

ལས་མ་གཏོགས་པའི་མདོམས་སུ་བཏགས་པ་དབང་པོ་ཉིད་མ་ཡིན་ཏེ་ཉོན་མོངས་པ་ཅན་གྱི་བདེ་བ་དེ་ནི་ལུས་ཀྱི་དབང་པོའི་ཕྱོགས་གཅིག་གི་མོ་དང་ཕོའི་དབང་པོས་བྱས་པ་ཡིན་ནོ་ཞེས་བྱ་བ་ཡིན་ཏེ། ལྐོག་མ་དང་སོ་དང་མིག་གི་ལམ་དང་ཚིགས་རྣམས་ཀྱང་ཞེས་བྱ་བ་རྒྱས་པར་འབྱུང་བ་ནི།

གལ་ཏེ་ཇི་སྐད་དུ་བཤད་པའི་རྒྱུས་དབང་པོ་དག་ནི་དེ་སྙེད་ཁོ་ན་ཡིན་ནོ་ཞེས་བྱ་བར་མི་འདོད་ན་ལྐོག་མ་ཡང་མིད་པ་དང་སོ་ཡང་བཅའ་བ་དང་མིག་གི་ལམ་ཡང་འབྱེད་པ་དང་འཛུམས་པ་དང་། ཚིགས་ཀྱང་རུས་པའི་ཚིགས་བསྐུམ་པ་དང་བརྐྱང་བའི་བྱ་བ་དག་ལ་དབང་པོ་ཉིད་ཡིན་པར་

ཐལ་བར་འགྱུར་རོ། །རྒྱུར་གྱུར་པ་ཐམས་ཅད་ཅེས་བྱ་བ་རྒྱས་པར་འབྱུང་བ་ནི་གལ་ཏེ་གང་ཞིག་གང་ལ་རྩལ་ཡོད་པ་དེ་དེ་ལ་དབང་པོ་ཉིད་ཡིན་པར་འདོད་ཀྱི་གོང་དུ་བཤད་པའི་རྒྱུ་ངེས་པ་དེ་ནི་མི་འདོད་ན་ས་བོན་ལ་སོགས་པ་རྒྱུར་གྱུར་པ་ཐམས་ཅད་རང་གི་བྱ་བ་སྟེ་རང་གི་འབྲས་བུ་མྱུ་གུ་ལ་

སོགས་པའི་མཚན་ཉིད་ཀྱི་བྱ་བ་ལ་དབང་པོ་ཉིད་ཡིན་པར་ཐལ་བར་འགྱུར་རོ་ཞེས་བྱ་བར་སྐབས་དང་སྦྱར་རོ། །དེ་ལྟ་བས་ན་ངག་ལ་སོགས་པ་ནི་དབང་པོ་ཉིད་ཡིན་པར་རིགས་པ་མ་ཡིན་ནོ། །དེ་ལ་མིག་ལ་སོགས་པ་ཞེས་བྱ་བ་རྒྱས་པར་འབྱུང་བ་ལ་དེ་ལ་ཞེས་བྱ་བ་ནི་ཚིག་གི་ཕྲད་ཡིན་

ནོ། །བསྟན་ཟིན་ཏོ་ཞེས་བྱ་བ་ནི། དེ་དག་རྣམས་ཀྱི་རྣམ་ཤེས་རྟེན། །མིག་ལ་སོགས་གཟུགས་དང་བ་རྣམས། །ཞེས་བྱ་བ་དང་། ལུས་ལས་མོ་དང་ཕོའི་དབང་དག །ཅེས་བྱ་བ་ཡིན་ནོ། །སྲོག་གི་དབང་པོ་ཞེས་བྱ་བ་ནི། །སྲོག་ནི་ཚེ་ཡིན་དྲོད་དང་ནི། །རྣམ་ཤེས་རྟེན་གང་ཡིན་པའོ། །

ཞེས་བྱ་བ་འདིར་རོ། །དད་པ་ལ་སོགས་པ་རྣམས་ནི་སེམས་ལས་བྱུང་བ་དག་གི་ནང་ནས་ཞེས་བྱ་བ་ནི། དད་དང་བག་ཡོད་ཤིན་ཏུ་སྦྱངས། །ཞེས་བྱ་བའི་ཕྱོགས་འདིར་རོ། །ཚོར་བ་ལ་སོགས་པ་ཡང་། ཚོར་བ་མྱོང་བ་ཞེས་བྱ་བ། ཚོར་དང་སེམས་པ་འདུ་ཤེས་དང་། །ཞེས་བྱ་བ་འབྱུང་

Vol. 142 · folio 91a

བའི་ཕྱིར་བསྟན་ཟིན་པ་ཡང་ཡིན་ལ། སེམས་ལས་བྱུང་བ་དག་གི་ནང་ནས་འཆད་པར་འགྱུར་བ་ཡང་མ་ཡིན་ནམ་ཞེ་ན། ཚོར་བའི་སྤྱིའི་ངོ་བོ་བཤད་ཟིན་པ་དང་འཆད་པར་འགྱུར་བ་བདེན་མོད་ཀྱི་ཁྱད་པར་རྣམ་པར་དབྱེ་བའི་ངོ་བོ་ནི་འདི་ནས་འཆད་པར་འདོད་པས།

བདེ་བ་ལ་སོགས་པ་བཤད་པར་བྱ་སྟེ་ཞེས་བྱ་བ་སྨོས་སོ། །འོ་ན་ཀུན་ཤེས་པར་བྱེད་པའི་དབང་པོ་ལ་སོགས་པ་ནི་བཤད་མི་དགོས་ཏེ། འདི་ལྟར་ཡིད་ཀྱི་མཚན་ཉིད་ནི་བཤད་ཟིན་ཏོ། །དད་པ་ལ་སོགས་པ་ནི་སེམས་ལས་བྱུང་བ་དག་གི་ནང་ནས་འཆད་པར་འགྱུར་རོ། །བདེ་བ་དང་ཡིད་བདེ་བ་

དང་བཏང་སྙོམས་རྣམས་ནི་འདི་ནི་འཆད་དོ་ཞེ་ན། འདི་དག་ཀྱང་བཤད་དགོས་པ་ཁོ་ནའོ། །འདི་ལྟར་འདི་དག་ནི་རྫས་དགུའི་ངོ་བོ་ཉིད་ཡིན་པར་བསྟན་དགོས་སོ། །གནས་སྐབས་འདི་ན་ནི་རྫས་དགུ་པོ་འདི་དག་མི་ཤེས་པ་ཀུན་ཤེས་པར་བྱེད་པའི་དབང་པོ་ཞེས་བྱ་བར་འགྱུར་ལ། གནས་

སྐབས་འདི་ན་ནི་ཀུན་ཤེས་པའི་དབང་པོ་ཞེས་བྱ་བར་འགྱུར། གནས་སྐབས་འདི་ན་ནི་ཀུན་ཤེས་པ་དང་ལྡན་པའི་དབང་པོ་ཞེས་བྱ་བར་འགྱུར་རོ་ཞེས་བྱ་བར་འདི་དག་གི་གནས་སྐབས་ཀྱི་ཁྱད་པར་ཏེ་བསྟན་དགོས་སོ། །དེའི་ཕྱིར་བདེ་བ་ལ་སོགས་པ་དང་ཀུན་ཤེས་པར་བྱེད་པའི་དབང་པོ་ལ་

སོགས་པ་བཤད་པར་བྱ་སྟེ་ཞེས་བྱ་བ་ནི་ལེགས་པར་སྨྲས་པ་ཡིན་ནོ། །ལུས་ཚོར་སིམ་པ་མ་ཡིན་གང་། །ཞེས་བྱ་བ་ལ་ལུས་ཚོར་ཞེས་བྱ་བ་ནི་ཡིད་ཀྱིས་བཟློག་པའི་ཕྱིར་རོ། །སིམ་པ་མ་ཡིན་ཞེས་བྱ་བ་ནི་སིམ་པ་བཟློག་པའི་ཕྱིར་རོ། །དེ་ལ་ལུས་དག་ནི་མིག་ལ་སོགས་པ་ལྔ་ཡིན་ཏེ་རྡུལ་ཕྲ་རབ་

ལ་སོགས་པའི་བདག་ཉིད་ཡིན་པའི་ཕྱིར་རོ། །ལུས་དེ་ལ་ཡོད་པའམ་རྟེན་ལུས་དང་ལྷན་ཅིག་སྤྱོད་པས་ན་ལུས་ཀྱི་ཡིན་ཏེ་དབང་པོ་ལྔ་ལ་བརྟེན་པའི་ཚོར་བ་གནོད་པར་བྱེད་པ་གང་ཡིན་པ་དེ་ནི་སྡུག་བསྔལ་གྱི་དབང་པོ་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །སིམ་པ་ནི་བདེ་བའོ་ཞེས་

བྱ་བ་ནི་འདིར་ལུས་ཀྱི་ཞེས་བྱ་བ་དང་དབང་པོ་ཞེས་བྱ་བར་སྦྱར་བར་བྱ་སྟེ། སིམ་པ་ཞེས་བྱ་བ་སྨོས་པ་ནི་སིམ་པ་མ་ཡིན་པ་བཟློག་པའི་ཕྱིར་རོ། །འདི་སྐད་དུ་དབང་པོ་ལྔ་ལ་བརྟེན་པའི་ཚོར་བ་སིམ་པ་ཕན་འདོགས་པར་བྱེད་པ་དེ་ནི་བདེ་བའི་དབང་པོ་ཡིན་ནོ་ཞེས་བཤད་པ་ཡིན་ནོ། །བསམ་གཏན་

Vol. 142 · folio 91b

གསུམ་པ་ན། སེམས་ཀྱི་དེ་ནི་བདེ་དབང་པོ། །ཞེས་བྱ་བ་ནི་བསམ་གཏན་གསུམ་པ་ན་ནི་སེམས་ཀྱི་ཚོར་བ་སིམ་པ་ཡང་བདེ་བའི་དབང་པོ་ཡིན་ནོ་ཞེས་བྱ་བར་རྣམ་པར་གཞག་གོ། །ཅིའི་ཕྱིར་དེ་ནི་སེམས་ཀྱི་སིམ་པ་ཁོ་ན་ཡིན་པར་གཟུང་གི་ལུས་ཀྱི་ནི་མ་ཡིན་ཞེ་ན། འདིར་དེ་ནི་རྣམ་པར་

ཤེས་པའི་ཚོགས་ལྔ་མེད་པའི་ཕྱིར་ལུས་ཀྱི་ཚོར་བ་ནི་མེད་དོ་ཞེས་བྱ་བ་སྨོས་སོ། །ཅིའི་ཕྱིར་བསམ་གཏན་གསུམ་པ་ན་དེ་ཡིད་བདེ་བའི་དབང་པོ་མ་ཡིན་ཞེ་ན། དེའི་ཕྱིར་བསམ་གཏན་གསུམ་པ་ན་ནི་དགའ་བའི་འདོད་ཆགས་དང་བྲལ་བའི་ཕྱིར་དེ་བདེ་བའི་དབང་པོ་ཁོ་ན་ཡིན་ཞེས་བྱ་

བ་སྨོས་ཏེ། འདི་ལྟར་མདོ་ལས་དགའ་བའི་འདོད་ཆགས་དང་བྲལ་བ་རྣམས་བཏང་སྙོམས་སུ་གནས་སོ་ཞེས་བྱ་བ་ནས་རྒྱས་པར་དྲན་པ་དང་ལྡན་ཞིང་བདེ་བར་གནས་སོ་ཞེས་བྱ་བ་དང་། བསམ་གཏན་གསུམ་པ་རྫོགས་པར་བྱས་ཏེ་གནས་སོ་ཞེས་བྱ་བའི་བར་གསུངས་སོ། །གལ་ཏེ་

དགའ་བ་ནི་ཡིད་བདེ་བ་ལས་གཞན་ཡིན་ནོ་སྙམ་ན་དེའི་ཕྱིར་དགའ་བ་ནི་ཡིད་བདེ་བ་ཡིན་ནོ་ཞེས་བྱ་བ་སྨོས་སོ། །སེམས་ཀྱི་སིམ་པ་མ་ཡིན་པ། །ཡད་མི་བདེ་བའོ་ཞེས་བྱ་བ་ནི་སེམས་ཀྱི་ཚོར་བ་གནོད་པར་བྱེད་པ་ནི་ཡིད་མི་བདེ་བ་ཡིན་ནོ། །བཏང་སྙོམས་ནི་བར་མའོ་ཞེས་བྱ་བ་ནི་

བཏང་སྙོམས་ཀྱི་དབང་པོ་ནི་ཚོར་བ་བར་མ་གང་ཡིན་པ་སྟེ། སིམ་པ་ཡང་མ་ཡིན་སིམ་པ་མ་ཡིན་པ་ཡང་མ་ཡིན་ནོ་ཞེས་བྱ་བའི་ཐ་ཚིག་གོ། །གཉི་གའི་ཞེས་བྱ་བ་ནི་འདི་ལ་ཡན་ལག་གཉི་ག་ཡོད་པས་ན་གཉི་གའི་སྟེ་ལུས་ཀྱི་དང་སེམས་ཀྱི་ཞེས་བྱ་བའི་ཐ་ཚིག་གོ། །མི་རྟོག་ཕྱིར་ཞེས་བྱ་བ་ནི་མངོན་པར་

སྤྱོད་པའི་རྣམ་པར་རྟོག་པ་མེད་པའི་ཕྱིར་ཞེས་བྱ་བའི་ཐ་ཚིག་གོ། །ཕལ་ཆེར་ཞེས་བྱ་བ་སྨོས་པ་ནི་ཏིང་ངེ་འཛིན་ལས་སྐྱེས་པ་དང་རྣམ་པར་སྨིན་པ་ལས་སྐྱེས་པའི་དགའ་བ་དང་བདེ་བ་ཡོངས་སུ་སྤང་བའི་ཕྱིར་རོ། །ལུས་ཀྱི་ནི་མ་ཡིན་ནོ་ཞེས་བྱ་བ་ནི་ལུས་ཀྱི་བདེ་བ་དང་སྡུག་བསྔལ་ནི་རྣམ་

པར་རྟོག་པས་སྐྱེ་བ་མ་ཡིན་ནོ། །ཅིའི་ཕྱིར་ཞེ་ན། ཡུལ་གྱི་དབང་གིས་ནི་དགྲ་བཅོམ་པ་རྣམས་ལ་ཡང་སྐྱེ་བས་ཞེས་བྱ་བ་སྨོས་ཏེ། ཡུལ་གྱི་དབང་ཁོ་ནས་དགྲ་བཅོམ་པ་སྡུག་པ་དང་མི་སྡུག་པ་རྣམ་པར་རྟོག་པ་སྤངས་པ་རྣམས་ལ་ཡང་ལུས་ཀྱི་བདེ་བ་དང་སྡུག་བསྔལ་བསྐྱེད་པས་སོ། །

Vol. 142 · folio 92a

དེའི་ཕྱིར་དེ་དག །དབང་པོ་ཉིད་དུ་ཐ་དད་ཀྱི། །ཞེས་བྱ་བ་ནི་ལུས་དང་སེམས་ཀྱི་བདེ་བ་དག་དང་སྡུག་བསྔལ་དེ་དག་དབང་པོ་ཉིད་དུ་ཐ་དད་དེ་སོ་སོར་བདེ་བའི་དབང་པོ་དང་ཡིད་བདེ་བའི་དབང་པོ་དང་སྡུག་བསྔལ་གྱི་དབང་པོ་དང་ཡིད་མི་བདེ་བའི་དབང་པོ་ཞེས་

བྱ་བ་ཡིན་གྱི། བཏང་སྙོམས་ནི་ལུས་ཀྱིའམ་སེམས་ཀྱིའམ་རྣམ་པར་སྨིན་པ་ལས་སྐྱེས་པ་འམ་རྒྱུ་མཐུན་པ་ལས་བྱུང་བ་ཡང་རུང་སྟེ། རྣམ་པར་མི་རྟོག་པ་ཁོ་ནར་མངོན་པར་རྟོགས་པ་མེད་པ་ཁོ་ནར་རང་གི་ངང་གིས་མངོན་པར་འདུ་བྱེད་པ་མེད་པར་སྐྱེ་བས་དེ་ལྟ་བས་ན་དབང་པོ་ཉིད་དུ་ཐ་

དད་པ་མེད་པར་བཏང་སྙོམས་ཀྱི་དབང་པོ་ཞེས་དབང་པོ་གཅིག་ཏུ་བྱས་སོ།། །།བམ་པོ་དགུ་པ། ལུས་ཀྱི་བདེ་བ་ཡང་གཞན་དུ་ཞེས་བྱ་བ་རྒྱས་པར་འབྱུང་བ་ནི་ལུས་ཀྱི་བདེ་བ་ཡང་ཉམས་སུ་མྱོང་བའི་ངོ་བོའི་ཁྱད་པར་གཞན་གྱིས་རྗེས་སུ་འཛིན་ལ་སེམས་ཀྱི་ཡང་གཞན་

གྱིས་ཏེ་ལུས་ཀྱི་ནི་བརྟེན་པ་ཡིན་ལ། སེམས་ཀྱི་ནི་མི་བརྟེན་པ་ཡིན་ནོ། །དེ་བཞིན་དུ་ལུས་ཀྱི་སྡུག་བསྔལ་ཡང་ཉམས་སུ་མྱོང་བའི་ངོ་བོའི་ཁྱད་པར་གཞན་གྱི་ས་ཡིན་ལ། སེམས་ཀྱི་ཡང་གཞན་གྱི་ཡིན་ནོ། །བཏང་སྙོམས་ལ་བྱེ་བྲག་མེད་དེ་ཞེས་བྱ་བ་ནི་རང་གི་ངོ་བོ་དང་ཁྱད་

པར་གྱི་མཚན་ཉིད་ཀྱི་བྱེ་བྲག་མེད་དོ། །དེ་བས་ན་བཏང་སྙོམས་ཀྱི་ཕྱིར་ཏེ་བཏང་སྙོམས་སུ་བྱ་བའི་ཕྱིར་བྱེ་བྲག་མེད་པས་རང་གི་ངོ་བོ་དང་ཁྱད་པར་མེད་པས་ཐ་དད་པ་མེད་དོ། །མཐོང་བསྒོམ་མི་སློབ་ལམ་ལ་དགུ། །ཞེས་བྱ་བ་ནི་མཐོང་བ་ཞེས་བྱ་བ་ནི་མཐོང་བ་ཡིན་ནོ། །མཐོང་བ་དང་བསྒོམ་

པ་དང་མི་སློབ་པའི་ལམ་ནི་མཐོང་བསྒོམ་མི་སློབ་ལམ་ཡིན་ནོ། །ལམ་གསུམ་པོ་དེ་ཉིད་ལ་ཡིད་དང་། བདེ་བ་དང་། ཡིད་བདེ་བ་དང་། བཏང་སྙོམས་དང་། དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ཅེས་བྱ་བའི་རྫས་དགུ་པོ་གང་དག་ཡིན་པ་དེ་དག་ནི་མཐོང་

བའི་ལམ་ལ་ནི་མི་ཤེས་པ་ཀུན་ཤེས་པར་བྱེད་པའི་དབང་པོ་ཞེས་བྱའོ། །བསྒོམ་པའི་ལམ་ལ་ནི་ཀུན་ཤེས་པའི་དབང་པོ་ཞེས་བྱའོ། །མི་སློབ་པའི་ལམ་ལ་ནི་ཀུན་ཤེས་པ་དང་ལྡན་པའི་དབང་པོ་ཞེས་བྱའོ་ཞེས་བྱ་བ་རྣམ་པར་བཞག་སྟེ། རྫས་དེ་དག་ནི་ཕན་ཚུན་ལྟོས་ནས་མིང་དེ་དང་དེ་འཐོབ་

Vol. 142 · folio 92b

བོ། དགུ་ཞེས་བྱ་བ་ནི་ཚོགས་པ་གཞན་ལ་ལྟོས་ནས་དེ་སྐད་ཅེས་བཤད་པ་ཡིན་གྱི་ཚོགས་པ་གཅིག་ལ་རྫས་དགུ་ཡོད་པ་མ་ཡིན་ཏེ། བདེ་བ་དང་ཡིད་བདེ་བ་དང་། བཏང་སྙོམས་ཀྱི་དབང་པོ་རྣམས་ལས་གང་ཡང་རུང་བ་ཁོ་ན་ཞིག་ཡོད་པའི་ཕྱིར་རོ། །གལ་ཏེ་ལམ་དེ་མི་ལྕོགས་པ་མེད་པ་དང་།

བསམ་གཏན་ཁྱད་པར་ཅན་དང་། བསམ་གཏན་བཞི་པ་དང་། ནམ་མཁའ་དང་། རྣམ་ཤེས་དང་། ཅི་ཡང་མེད་པའི་སྐྱེ་མཆེད་ཀྱི་ས་པ་ཞིག་ཡིན་ན་ནི་དེ་ལ་བཏང་སྙོམས་ཀྱི་དབང་པོ་ཁོ་ན་ཡོད་ཀྱི་བདེ་བ་དང་། ཡིད་བདེ་བའི་དབང་པོ་དག་ནི་མེད་དོ། །གལ་ཏེ་བསམ་གཏན་དང་པོ་དང་། གཉིས་

པའི་ས་པ་ཞིག་ཡིན་ན་ནི་དེ་ལ་ཡིད་བདེ་བའི་དབང་པོ་ཁོ་ན་ཡོད་དོ། །གལ་ཏེ་བསམ་གཏན་གསུམ་པའི་ས་པ་ཞིག་ཡིན་ན་ནི་དེ་ལ་བདེ་བའི་དབང་པོ་ཁོ་ན་ཡོད་ཀྱི་གཞན་ནི་མེད་དོ། །མི་ཤེས་པ་ཀུན་ཤེས་པར་བྱ་བ་ཞུགས་པ་ཡིན་ནོ་ཞེས་བྱ་བ་ནི་བདེན་པ་བཞི་མི་ཤེས་པ་ཀུན་ཤེས་པར་བྱ་ཞིང་ཀུན་

རྟོགས་པར་བྱ་བར་ཞུགས་པ་སྟེ། ཀུན་ཤེས་པར་བྱའོ་སྙམ་དུ་བསམས་པའོ། །དེའི་དབང་པོ་ནི་མི་ཤེས་པ་ཀུན་ཤེས་པར་བྱེད་པའི་དབང་པོ་ཡིན་ནོ། །བསྒོམ་པའི་ལམ་ནི་སྔོན་མ་མཐོང་བ་ཀུན་ཤེས་པར་བྱ་བ་ནི་མེད་ཀྱི་ཕྲ་རྒྱས་ལྷག་མ་སྤངས་པའི་ཕྱིར་ཏེ། བསྒོམ་པས་སྤང་བར་

བྱ་བའི་ཉོན་མོངས་པ་སྤང་བར་བྱ་བའི་ཕྱིར་བདེན་པ་བཞི་པོ་དེ་ཉིད་ཀུན་ཤེས་པར་བྱེད་དོ། །གང་ཟག་ཀུན་ཤེས་པ་དེའི་དབང་པོ་ཡིན་པའམ་ཀུན་ཤེས་པ་ཉིད་དབང་པོ་ཡིན་པས་ན་ཀུན་ཤེས་པའི་དབང་པོའོ། །མི་སློབ་པའི་ལམ་ལ་ནི་ཀུན་ཤེས་སོ་སྙམ་དུ་རྟོག་པ་ནི་ཀུན་ཤེས་པ་སྟེ་ཞེས་བྱ་

བ་ནི་དོན་བརྗོད་པ་ཙམ་དུ་ཟད་དེ་སྒྲའི་ཚིག་རྣམ་པར་སྦྱར་བ་ནི་འདི་ལྟར་བྱའོ། །ཀུན་ཤེས་པ་ཞེས་བྱ་བ་ནི་ཀུན་རྟོགས་པ་ཡིན་ནོ། །དེ་འདི་ལ་ཡོད་པས་སམ་འདི་ཀུན་ཤེས་པ་སྲུང་བའི་ངང་ཚུལ་ཡིན་པས་ན་ཀུན་ཤེས་པ་དང་ལྡན་པ་ཡིན་ནོ། །དེ་ལྟ་བུའི་དབང་པོ་ནི་ཞེས་བྱ་བ་

ནི་ཀུན་ཤེས་པ་དང་ལྡན་པ་ནི་དེ་ལྟ་བུའི་དབང་པོ་ནི་ཞེས་བྱ་བའི་ཐ་ཚིག་གོ། །གསུམ་ནི་དྲི་མ་མེད་ཅེས་བྱ་བ་ནི་གསུམ་ནི་དྲི་མ་མེད་པ་ཁོ་ན་ཡིན་ནོ་ཞེས་བྱ་བར་ངེས་པར་གཟུང་བ་ཡིན་ནོ། །ཟག་པ་དང་བཅས་པ་དང་ཟག་པ་མེད་པའི་རྣམ་པའི་བྱེ་བྲག་འདི་ཁམས་བསྟན་པ་

Vol. 142 · folio 93a

ལས། ཟག་མེད་ལམ་གྱི་བདེན་པ་དང་། །ཞེས་བྱ་བ་དང་། དེ་གསུམ་ཟག་བཅས་ཟག་པ་མེད། །ལྷག་མ་རྣམས་ནི་ཟག་བཅས་སོ། །ཞེས་འབྱུང་བའི་ཕྱིར་བཤད་ཟིན་མ་ཡིན་ནམ་ཞེ་ན། རྣམ་པའི་བྱེ་བྲག་དེ་ལྟ་བུ་ལ་སོགས་པ་འདི་ནི་བཤད་པ་

བདེན་མོད་ཀྱི་དེ་ནི་སྤྱིའི་ངོ་བོར་བཤད་ཀྱི་བྱེ་བྲག་གི་ངོ་བོར་ནི་མ་ཡིན་ཏེ། དེ་བས་ན་སློབ་མས་བདེ་བླག་ཏུ་རྟོགས་པར་བྱ་བའི་ཕྱིར་རྣམ་པའི་བྱེ་བྲག་དེ་ལྟ་བུ་ལ་སོགས་པ་འདི་ནི་ཚིག་རེ་རེའི་ངོ་བོ་ནས་བརྗོད་དོ་ཞེས་བྱ་བར་ཡང་བརྗོད་དོ་ཞེས་བྱ་བར་ཁོང་དུ་ཆུད་པར་བྱའོ། །དགུ་རྣམ་གཉིས་

ཞེས་བྱ་བ་དོར་བྱ་མི་དགོས་ཏེ། གཅིག་ཏུ་ཟག་པ་དང་བཅས་པ་དང་ཟག་པ་མེད་པའི་ངེས་པར་གཟུང་བ་ཁོ་ནས་དགུ་རྣམ་གཉིས་ཞེས་བྱ་བ་འགྲུབ་པར་འགྱུར་རོ། །གལ་ཏེ་འདི་དག་གཅིག་ཏུ་ཟག་པ་མེད་པ་ཁོ་ནར་གྱུར་པ་ཡིན་ན་ནི་གཅིག་ཏུ་ཟག་པ་མེད་པ་ཀུན་ཤེས་པར་བྱེད་པའི་

དབང་པོ་ལ་སོགས་པའི་ནང་དུ་སྟོན་པར་འགྱུར་རོ། །འོན་ཏེ་གཅིག་ཏུ་ཟག་པ་དང་བཅས་པ་ཡིན་པར་གྱུར་ན་ནི་གཅིག་ཏུ་ཟག་པ་དང་བཅས་པ་གཟུགས་ཅན་གྱི་དབང་པོ་དང་སྲོག་དང་སྡུག་བསྔལ་དང་ཡིད་མི་བདེ་བའི་ནང་དུ་སྟོན་པར་འགྱུར་བ་ཞིག་ན། དེ་ལྟ་ཡང་མ་ཡིན་པས་

དེའི་ཕྱིར་དགུ་རྣམས་གཉིས་ཞེས་བྱ་བ་གྲུབ་པ་ཡིན་ནོ་ཞེ་ན། དེ་ནི་དེ་ལྟ་ཡིན་མོད་ཀྱི་གཞུང་ལུགས་གཞན་བཟློག་པའི་ཕྱིར་ཡང་། དགུ་རྣམ་གཉིས་ཞེས་བྱ་བ་འདི་བརྗོད་དེ། དགུ་ནི་རྣམ་གཉིས་ཁོ་ན་ཡིན་གྱི་ཇི་ལྟར་ཁ་ཅིག་བརྗོད་ཅིང་དེ་གྲུབ་པར་བྱ་བའི་ཕྱིར་ལུང་ཡང་ཁྱེར་ཏེ་འོང་བ་

ལྟ་བུར་ཟག་པ་མེད་པ་དག་ནི་མ་ཡིན་ནོ། །གང་ལ་དབང་པོ་ལྔ་པོ་འདི་དག་ཅེས་བྱ་བ་རྒྱས་པར་འབྱུང་བ་ལ། ཐམས་ཅད་དུ་ཐམས་ཅད་མེད་པ་ཞེས་བྱ་བ་ནི་ཆུང་ངུ་དང་འབྲིང་དང་ཆེན་པོའི་བྱེ་བྲག་གི་རྣམ་པ་ཐམས་ཅད་དུའོ། །ཐམས་ཅད་ཅེས་བྱ་བ་ནི་ལྔ་ཆར་མེད་པ་ཞེས་བྱ་བའི་ཐ་ཚིག་གོ། །

སོ་སོའི་སྐྱེ་བོའི་ཕྱོགས་ལ་གནས་པར་ང་སྨྲའོ་ཞེས་འབྱུང་བའི་ཕྱིར་དོན་གྱིས་ན་འདི་སྐད་དུ་གང་ལ་འདི་དག་ཡོད་པ་དེ་ནི་འཕགས་པ་ཡིན་ནོ་ཞེས་བཤད་པ་ཡིན་ནོ། །སློབ་དཔོན་གྱིས་དེ་དག་ཟག་པ་མེད་པ་ཉིད་ཡིན་པར་བྱ་བའི་སྐབས་སུ་དེ་ནི་ཁུངས་སུ་མི་རུང་སྟེ་ཞེས་བྱ་བ་སྨོས་སོ། །འདི་ལྟ་

Vol. 142 · folio 93b

སྟེ་འཕགས་པའི་གང་ཟག་རྣམ་པར་གཞག་པར་མཛད་ནས། གང་ལ་དབང་པོ་འདི་དག་ཅེས་གསུངས་པའི་ཕྱིར་རོ་ཞེས་བྱ་བ་ཇི་ལྟ་བུ་ཞེ་ན། དགེ་སློང་དག་དབང་པོ་ནི་ལྔ་པོ་འདི་དག་ཡིན་ནོ། །ལྔ་གང་ཞེ་ན། དད་པའི་དབང་པོ་ནས་ཤེས་རབ་ཀྱི་དབང་པོའི་བར་ཡིན་ཏེ། དབང་པོ་ལྔ་པོ་

འདི་དག་རྣོ་བ་དང་ཡོངས་སུ་རྫོགས་པས་དགྲ་བཅོམ་པ་ཡིན་ནོ། །དེ་བས་ཆེས་ཞན་པ་དང་ཆེས་རྟུལ་བས་ཕྱིར་མི་འོང་བ་ཡིན་ནོ། །དེ་བས་ཆེས་ཞན་པ་དང་ཆེས་རྟུལ་བས་ལན་ཅིག་ཕྱིར་འོང་བ་ཡིན་ནོ། །དེ་བས་ཆེས་ཞན་པ་དང་ཆེས་རྟུལ་བས་རྒྱུན་དུ་ཞུགས་པ་ཡིན་ནོ། །དེ་བས་ཆེས་

ཞན་པ་དང་ཆེས་རྟུལ་བས་ཆོས་ཀྱི་རྗེས་སུ་འབྲང་བ་ཡིན་ནོ། །དེ་བས་ཆེས་ཞན་པ་དང་ཆེས་རྟུལ་བས་དད་པས་རྗེས་སུ་འབྲང་བ་ཡིན་ནོ། །དགེ་སློང་དག་དེ་ལྟར་ན་དབང་པོ་རྣམས་ཀྱི་ཕ་རོལ་ཏུ་ཕྱིན་པ་ལ་བརྟེན་ཅིང་སྟོབས་རྣམས་ཀྱི་ཕ་རོལ་ཏུ་ཕྱིན་པ་ལ་བརྟེན་ནས་གང་ཟག་གི་ཕ་རོལ་ཏུ་ཕྱིན་པ་

དག་མངོན་ནོ། །གང་ལ་དབང་པོ་ལྔ་པོ་འདི་དག་ཐམས་ཅད་དུ་ཐམས་ཅད་མེད་པ་དེ་ནི་ཕྱི་རོལ་སོ་སོའི་སྐྱེ་བོའི་ཕྱོགས་ལ་གནས་པར་ང་སྨྲའོ་ཞེས་བྱ་བ་ཡིན་ནོ། །བཅོམ་ལྡན་འདས་ཀྱིས་དེ་ལྟར་འཕགས་པའི་གང་ཟག་རྣམ་པར་གཞག་པ་མཛད་ནས་གང་ལ་དབང་པོ་འདི་དག་ཅེས་གསུངས་པ་

ཡིན་ཏེ། །ཕྱི་རོལ་སོ་སོའི་སྐྱེ་བོའི་ཕྱོགས་ལ་གནས་པ་དད་པ་ལ་སོགས་པ་ཟག་པ་དང་བཅས་པ་དང་ལྡན་པ་ལ་ནི་འགལ་བ་མེད་དོ། །ཡང་ན་སོ་སོའི་སྐྱེ་བོ་རྣམ་པ་གཉིས་ཏེ་ཞེས་བྱ་བ་ནི་ནང་པ་དང་ཕྱི་རོལ་པའོ། །དགེ་བའི་རྩ་བ་ཀུན་ཏུ་མ་ཆད་པ་ནི་ནང་པ་ཡིན་ཏེ། སངས་རྒྱས་པས་བསྡུས་པའི་ཕྱིར་

རོ། །དགེ་བའི་རྩ་བ་ཀུན་ཏུ་ཆད་པ་ནི་ཕྱི་པ་ཡིན་ཏེ། དེ་ལས་བཟློག་པ་ཡིན་པའི་ཕྱིར་རོ། །དེ་ཉིད་ཀྱི་ཕྱིར་ཕྱི་རོལ་ཞེས་ཁྱད་པར་དུ་བྱས་པ་ཡིན་ནོ། །དེ་ལྟ་མ་ཡིན་ན་སོ་སོའི་སྐྱེ་བོའི་ཕྱོགས་ལ་གནས་པར་ང་སྨྲའོ་ཞེས་བྱ་བ་ཁོ་ན་ཞིག་བཤད་པར་འགྱུར་རོ། །མདོ་ལས་ཀྱང་ཞེས་

བྱ་བ་ནི། ཡང་བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པ་ཞིག་ན་འདི་སྙམ་དུ་དགོངས་ཏེ། བདག་གིས་ཆོས་ཟབ་མོ་ཟབ་པར་སྣང་ལ་བལྟ་བར་དཀའ་བ་རྟོགས་པར་དཀའ་བ་བརྟག་པར་བྱ་བ་མ་ཡིན་པ་རྟོག་གེའི་སྤྱོད་ཡུལ་མ་ཡིན་པ་ཆ་ཕྲ་བ་

Vol. 142 · folio 94a

མཁས་ཤིང་མཛངས་ལ་ཤེས་པས་རིག་པར་བྱ་བ་རྟོགས་པ་དེ་བདག་གིས་གཞན་དག་ལ་བསྟན་ཏེ། གཞན་དག་གིས་དེ་མ་ཤེས་པར་གྱུར་ན་དེས་ནི་བདག་ལ་གནོད་པར་ཡང་འགྱུར་ཞིང་ཚེགས་སུ་ཡང་འགྱུར་ལ་སེམས་ལ་ཉམ་ང་བར་ཡང་འགྱུར་

བས། མ་ལ་བདག་གཅིག་པུ་མཐོང་བའི་ཆོས་ལ་བདེ་བར་གནས་པར་བྱ་བའི་ཕྱིར་དགོན་པ་ལ་གཞོལ་བར་རྣལ་འབྱོར་དང་ལྡན་པར་གནས་པར་བྱ་བ་གོར་མ་ཆག་སྙམ་མོ། །དེ་ནས་ཚངས་པ་མི་མཇེད་ཀྱི་བདག་པོ་འདི་སྙམ་དུ་སེམས་ཏེ། ད་ལྟར་འཇིག་རྟེན་གྱི་ཁམས་འདིར་དེ་

བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྱུང་བ་ནི་བརྒྱ་ལམ་ན་རེས་འགའ་ཞིག་འབྱུང་བར་ཟད་དེ། དཔེར་ན་ཨུ་དུམ་བཱ་རའི་མེ་ཏོག་དང་འདྲ་ན། བཅོམ་ལྡན་འདས་དེ་ཡང་ཐུགས་ལས་ཆུང་ངུར་བཞུགས་པར་དགོངས་ཀྱི་ཆོས་བསྟན་པར་མི་དགོངས་

པས། ཀྱེ་མ་འཇིག་རྟེན་འདི་ནི་མ་རུང་ངོ་། །ཀྱེ་མ་འཇིག་རྟེན་འདི་ནི་རབ་ཏུ་མ་རུང་ངོ་། །མ་ལ་བདག་གིས་བཅོམ་ལྡན་འདས་ལ་གསོལ་བ་གདབ་གོར་མ་ཆག་གོ་སྙམ་མོ། །དེ་ནས་ཚངས་པ་མི་མཇེད་ཀྱི་བདག་པོ་དཔེར་ན་སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་

བརྐྱང་བའམ་བརྐྱང་བ་ལས་བསྐུམས་པ་ཙམ་དུ་ཚངས་པའི་འཇིག་རྟེན་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་ནས་དེའི་ཚེ་ཚངས་པས་ཚིགས་སུ་བཅད་དེ་གསོལ་པ། མ་ག་དྷཱ་ཡི་ཡུལ་འདིར་སྔོན་ཆད་ཆོས། །མ་དག་དྲི་མ་རྗེས་སུ་འབྲེལ་

པ་འབྱུང་། །བདུད་རྩི་སྒོ་མོ་དབྱེ་བར་མཛོད་ཅིག་ཆོས། །རྡུལ་བྲལ་ཉོན་མོངས་མེད་པ་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཚངས་པ་ང་ཡིས་ཐ་བ་ཀུན། །བཅོམ་ནས་ཚེགས་ཆེན་གྱིས་རྟོགས་པའི། །

ཆོས་འདི་སྲིད་པའི་འདོད་ཆགས་ཀྱིས། །བཀྲིས་པས་བདེ་བླག་རྟོགས་མ་ཡིན། །རྒྱུན་ཕྱོགས་ལས་ནི་བཟློག་པའི་ལམ། །ཟབ་ལ་ཤིན་ཏུ་བལྟ་དཀའ་སྟེ། །འདོད་ཆགས་ཀྱིས་ཆགས་མུན་པ་ཡི། །ཕུང་པོས་བསྒྲིབས་པས་མི་མཐོང་ངོ་། །ཚངས་པས་གསོལ་པ། བཅོམ་

Vol. 142 · folio 94b

ལྡན་འདས་སེམས་ཅན་འཇིག་རྟེན་དུ་སྐྱེས་ཤིང་འཇིག་རྟེན་དུ་རྒས་པ་རྣམས་ལ་དབང་པོ་རྣོན་པོ་དག་ཀྱང་མཆིས་དབང་པོ་འབྲིང་པོ་དག་ཀྱང་མཆིས་དབང་པོ་རྟུལ་པོ་དག་ཀྱང་མཆིས་སོ་ཞེས་གསུངས་པ་ཡིན་ནོ། །ཆོས་ཀྱི་འཁོར་ལོ་མ་བསྐོར་བ་ཁོ་ནའི་ཚེ་ཞེས་བྱ་བ་རྒྱས་པར་འབྱུང་བ་ནི།

དད་པ་ལ་སོགས་པའི་དབང་པོ་གང་དག་གིས་དེ་དག་སྐལ་བ་དང་ལྡན་པར་བཤད་པ་ཡིན་ཏེ། གང་གི་ཕྱིར་ཆོས་ཀྱི་འཁོར་ལོ་མ་བསྐོར་བའི་ཚེ་དབང་པོ་རྣོན་པོ་དག་ཀྱང་ཡོད་དོ་ཞེས་བྱ་བ་ལ་སོགས་པ་གསུངས་པ་དེའི་ཕྱིར་དད་པ་ལ་སོགས་པ་ཟག་པ་དང་བཅས་པ་དག་ཡོད་པ་ཉིད་དོ། །འཇིག་

རྟེན་ལྷ་དང་བཅས་པ་ཞེས་བྱ་བ་རྒྱས་པར་འབྱུང་བ་ནི་དེ་སྲིད་དུ་ང་འཇིག་རྟེན་ལྷ་དང་བཅས་པ་བདུད་དང་བཅས་པ་ཚངས་པ་དང་བཅས་པ་དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པ་ལྷ་དང་མིར་བཅས་པ་འདི་ལས་གྲོལ་བ་དང་། ངེས་པར་བྱུང་བ་དང་། མི་ལྡན་པ་དང་བྲལ་བ་དང་ཕྱིན་ཅི་ལོག་དང་

བྲལ་བའི་སེམས་ཀྱིས་མང་དུ་གནས་པར་མི་འགྱུར་རོ་ཞེས་བྱ་བ་རྒྱས་པར་གསུངས་པ་ཡིན་ནོ། །ཟག་པ་མེད་པ་རྣམས་ལ་ནི་ཡོངས་སུ་བརྟགས་པའི་རྣམ་པ་འདི་མེད་དོ་ཞེས་བྱ་བ་ནི་ཟག་པ་མེད་པ་རྣམས་ལ་ནི་རོ་མྱང་བ་དང་ཉེས་དམིགས་དང་ངེས་པར་འབྱུང་བ་རུང་བ་མ་ཡིན་ནོ། །དགྲ་བཅོམ་

པ་ཞེས་བྱ་བ་ནི་ཕྱིར་མི་འོང་བ་ནི་མ་ཡིན་ཏེ། རྒྱུད་ཉོན་མོངས་པ་ལས་རྣམ་པར་མ་གྲོལ་བའི་ཕྱིར་རོ། །རྫུ་འཕྲུལ་དང་ལྡན་པ་ཞེས་བྱ་བ་ནི་མངོན་པར་ཤེས་པ་ཐོབ་པའོ། །སེམས་ལ་དབང་ཐོབ་པ་ཞེས་བྱ་བ་ནི་དུས་དང་མི་སྦྱོར་བར་རྣམ་པར་གྲོལ་བའོ། །འཚོ་བའི་ཡོ་བྱད་ཅེས་བྱ་བ་ནི་

འཚོ་བར་བྱེད་པའི་ཡོ་བྱད་དེ་དེ་དང་མཐུན་པའི་ཕྱིར་རོ། །ཕུལ་ནས་དེ་བསམས་ཏེ་ཞེས་བྱ་བ་ནི་ཚེ་དེ་བསམས་ནས་ཏེ་སེམས་ལ་བྱས་ནས་ཞེས་བྱ་བའི་ཐ་ཚིག་གོ། །ཇི་ལྟར་ཞེ་ན། བདག་གི་ལོངས་སྤྱོད་ཀྱི་རྣམ་པར་སྨིན་པ་གང་ཡིན་པ་དེའི་ཚེའི་རྣམ་པར་སྨིན་པར་གྱུར་ཅིག་སྙམ་པ་ཡིན་ནོ། །རབ་ཀྱི་མཐའ་པ་

ཞེས་བྱ་བ་འདིའི་མཚན་ཉིད་ནི་འཕེལ་བའི་རབ་ཏུ་ཕྱེ་བ་ཡིན་ཞེས་འཆད་པར་འགྱུར་བ་ཡིན་ནོ། །སེམས་སྐྱེད་པར་བྱེད་ཅིང་ཚིག་ཏུ་ཡང་སྨྲ་བར་བྱེད་དེ་ཞེས་བྱ་བ་ནི་སེམས་དང་ཚིག་དག་ཀྱང་དེ་གྲུབ་པར་བྱ་བའི་ཕྱིར་སྐྱེད་ཅིང་སྨྲ་བར་བྱེད་དེ་རྒྱུ་གཅིག་གིས་བསྒྲུབ་པར་བྱ་བའི་འབྲས་བུ་ནི་མེད་དོ། །དེ་ལྟ་

Vol. 142 · folio 95a

བས་ན་འདི་ནི་སྲོག་གི་དབང་པོ་རྣམ་པར་སྨིན་པ་ཁོ་ན་ཡིན་ནོ་ཞེས་སྟོན་པར་བྱེད་དོ། །ལོངས་སྤྱོད་ཀྱི་རྣམ་པར་སྨིན་པའི་ལས་གང་ཡིན་པ་དེའི་ཚེའི་རྣམ་པར་སྨིན་པ་འབྱིན་པར་འགྱུར་བས་བསམ་གཏན་བསྒོམ་པའི་སྟོབས་ཀྱིས་དེ་འདྲེན་པར་བྱེད་པ་ཡིན་ནོ། །རྣམ་

པར་སྨིན་པའི་ལྷག་མ་རྣམ་པར་སྨིན་པར་བྱེད་ཅེས་བྱ་བ་ནི་ཚེ་རབས་གཞན་གྱི་ལས་དུས་མ་ཡིན་པར་འཆི་བས་འབྲས་བུ་ཡོངས་སུ་མ་རྫོགས་པའི་རྣམ་པར་སྨིན་པའི་ལྷག་མ་བསྒོམ་པའི་སྟོབས་ཀྱིས་དྲངས་ནས་སོ་སོར་མྱོང་བར་བྱེད་དོ། །དེ་དག་གི་དེ་ལྟ་བུ་ཞེས་བྱ་བ་ནི་རྣལ་འབྱོར་པ་དེ་དག་

གིའོ། །སྔོན་གྱི་ལས་ལས་གྲུབ་པ་དབང་པོའི་འབྱུང་བ་ཆེན་པོ་རྣམས་ཀྱི་གནས་པའི་དུས་འཕེན་པ་ཞེས་བྱ་བ་ནི་སྔོན་གྱི་ཚེ་རབས་ཀྱི་ལས་ནི་སྔོན་གྱི་ལས་སོ། །དེ་ལས་སྐྱེས་པ་ནི་སྔོན་གྱི་ལས་ལས་སྐྱེས་པའོ། །དབང་པོའི་འབྱུང་བ་ཆེན་པོ་རྣམས་ཀྱི་གནས་པ་ནི་རྒྱུན་ཏོ། །གནས་པའི་དུས་ནི་གནས་

པའི་དུས་སོ། །དེ་འཕེན་པ་ནི་ཀུན་ཏུ་འཕེན་པ་སྟེ། གནས་པའི་དུས་འཕེན་པ་ཡིན་ནོ། །དེ་སྲིད་དུ་འཁོར་བའི་སྐད་ཅིག་མ་རྒྱུན་ཆགས་པར་ནུས་པ་ནི་འཕེན་པ་ཡིན་ཏེ། དེས་གནས་པའི་དུས་འདི་ཀུན་ཏུ་འཕེན་པར་བྱེད་དོ། །རྣལ་འབྱོར་པ་རྣམས་ནི་སྔོན་གྱི་ལས་ལས་སྐྱེས་པ་དབང་པོའི་འབྱུང་

བ་ཆེན་པོ་རྣམས་ཀྱི་གནས་པའི་དུས་འཕེན་པ་ནི་ཟློག་པར་བྱེད་ལ། སྔོན་མེད་པའི་ཏིང་ངེ་འཛིན་ལས་སྐྱེས་པ་གློ་བུར་བ་ནི་འཕེན་པར་བྱེད་དོ། །དྲི་བ་ལས་དྲི་བ་གཞན་འབྱུང་སྟེ་ཞེས་བྱ་བ་ནི། འོ་ན་དགེ་སློང་དགྲ་བཅོམ་པའི་ཚེའི་འདུ་བྱེད་དག་འཇོག་པར་བྱེད་པའི་སྲོག་གི་དབང་པོ་གང་ཡིན་པ་དེ་

གང་གི་རྣམ་པར་སྨིན་པ་ཡིན་ཞེས་བྱ་བའི་དྲི་བ་འདི་ལས་ཅིའི་ཕྱིར་ཚེའི་འདུ་བྱེད་དག་བྱིན་གྱིས་རློབ་པར་བྱེད་ཅེས་པ་དྲི་བ་གཞན་ཡིན་ནོ། །གཞན་ལ་ཕན་པའི་དོན་ཏམ་བསྟན་པ་གནས་པར་བྱ་བའི་དོན་དུ་སྟེ་ཞེས་བྱ་བ་ནི་སངས་རྒྱས་བཅོམ་ལྡན་འདས་རྣམས་ནི་གཞན་ལ་ཕན་པའི་དོན་དང་

བསྟན་པ་གནས་པར་བྱ་བའི་དོན་མཛད་པ་ཁོ་ན་ཡིན་ནོ། །ལུས་ནད་ལ་སོགས་པར་གྱུར་པ་ཞེས་བྱ་བ་ནི་སྡུག་བསྔལ་གསུམ་དང་ལྡན་པའི་ཕྱིར་ནད་དང་འབྲས་དང་ཟུག་རྔུ་ལ་སོགས་པ་ལྟ་བུ་ཡིན་ནོ། །གང་དུའམ་གང་ཞིག་གི་ཞེས་བྱ་བ་ལ་གང་དུ་ཞེས་བྱ་བའི་དྲི་བ་འདིའི་ལན་ནི་མིའི་ནང་ཁོ་

Vol. 142 · folio 95b

ན་དག་ཏུ་སྟེ། གླིང་གསུམ་པོ་དག་ཏུ་ཞེས་བྱ་བ་ཡིན་ནོ། །གང་ཞིག་གི་ཞེས་བྱ་བའི་ལན་ནི་དགྲ་བཅོམ་པ་ཕོ་མོ་རབ་ཀྱི་མཐའི་བསམ་གཏན་ཐོབ་པ་དུས་དང་མི་སྦྱོར་བར་རྣམ་པར་གྲོལ་བའི་སྟེ་ཞེས་བྱ་བ་ཡིན་ནོ། །དེ་ནི་ཞེས་བྱ་བ་རྒྱས་པར་འབྱུང་བ་ལ། ཏིང་ངེ་འཛིན་ལ་ཡང་དབང་བ་ནི་རབ་ཀྱི་

མཐའི་བསམ་གཏན་ཐོབ་ན་དབང་པོ་རྣོ་བའི་ཕྱིར་རོ། །ཉོན་མོངས་པ་དག་གིས་ཀྱང་རྒྱུད་ཉེ་བར་མ་བསྟན་པ་ནི་ཉོན་མོངས་པ་མ་ལུས་པར་སྤངས་པའི་ཕྱིར་རོ། །མཐོང་བས་ཐོབ་པ་ནི་ཏིང་ངེ་འཛིན་ལ་དབང་བ་ཉིད་ཡོད་མོད་ཀྱི་དེའི་རྒྱུད་ཉོན་མོངས་པ་དག་གིས་ཉེ་བར་མ་བསྟན་པ་ནི་མ་ཡིན་ནོ། །དུས་ཀྱི་རྣམ་

པར་གྲོལ་བ་ནི་རྒྱུད་ཉོན་མོངས་པ་དག་གིས་མ་བསྟན་པ་ཡིན་མོད་ཀྱི་ཏིང་ངེ་འཛིན་ལ་དབང་བ་ཉིད་མ་ཡིན་ནོ། །དུས་དང་མི་སྦྱོར་བར་རྣམ་པར་གྲོལ་བ་ལ་ནི་གཉི་ག་ཡོད་དོ། །མང་པོའི་ཚིག་ནི་ཞེས་བྱ་བ་ནི་ཚེའི་འདུ་བྱེད་དག་ཅེས་སྨོས་པ་གང་ཡིན་པ་དེ་ནི་མང་པོའི་ཚིག་ཡིན་ནོ། །དེ་ལྟ་བས་ན་ཚེ་

དང་སྲོག་གི་འདུ་བྱེད་ཀྱི་སྐད་ཅིག་མ་མང་པོ་རྣམས་ལ་ཞེས་བྱ་བ་སྨོས་ཏེ། ཚེའི་འདུ་བྱེད་རྒྱུད་ལ་ཡོད་པ་མང་པོ་རྣམས་ལ་འདོར་ཞིང་བྱིན་གྱིས་རློབ་པའི་ཕྱིར་ཏེ་རྒྱུན་གྱིས་དོན་མངོན་པར་བསྒྲུབ་པའི་ཕྱིར་དང་སྐད་ཅིག་མ་གཅིག་ནི་གནོད་པར་མི་བྱེད་པའི་ཕྱིར་གཅིག་ལ་འདོར་བའམ་བྱིན་གྱིས་རློབ་

པ་ནི་དགོས་པ་མེད་དོ། །དུས་གཞན་གྱི་བར་དུ་འཇུག་པ་ཚེའི་རྫས་གཅིག་པུ་ནི་མེད་དོ་ཞེས་བྱ་བ་ནི་དུས་གཞན་གྱི་བར་དུ་འདུག་པའི་ངང་ཚུལ་ཅན་ནི་དུས་གཞན་གྱི་བར་དུ་འདུག་པའོ། །སྐད་ཅིག་མ་མ་ཡིན་པ་སྟེ་ཁ་ཅིག་ན་རེ་ཚེའི་རྫས་དེ་ལྟ་བུ་དེ་མེད་དོ་ཞེས་བསྟན་པའི་ཕྱིར་རོ་ཞེས་ཟེར་རོ། །

འདུ་བྱེད་མང་པོ་རྣམས་ལ་ཞེས་བྱ་བ་འདི་ནི་མདོ་སྡེ་བ་རྣམས་ཀྱི་ཕྱོགས་ཡིན་ཏེ། སྐད་ཅིག་མ་གཅིག་ཁོ་ན་ལ་གང་དག་ལ་ཚེ་ཞེས་གདགས་པའི་འདུ་བྱེད་དེ་དག་མང་པོ་ཞིག་ཡོད་ཀྱི་ཚེ་ཞེས་བྱ་བའི་རྫས་གཅིག་པུ་ཞིག་ཡོད་པ་ནི་མ་ཡིན་ནོ། །འདུ་བྱེད་དེ་དག་ཀྱང་ཕུང་པོ་ལྔའི་ངོ་བོ་ཉིད་དམ་ཕུང་

པོ་བཞིའི་ངོ་བོ་ཉིད་ཡིན་པར་བལྟ་བར་བྱའོ། །དེ་ལྟ་མ་ཡིན་ན་འདུ་བྱེད་སྨོས་པ་མཛད་པར་མི་འགྱུར་གྱི། འདི་སྐད་དུ་བཅོམ་ལྡན་འདས་ཀྱིས་སྲོག་དག་བྱིན་གྱིས་བརླབས་ནས་ཚེ་དག་བཏང་ངོ་ཞེས་བརྗོད་པར་འགྱུར་རོ། །འཆི་བ་ལ་མངའ་བ་ཉིད་དུ་བསྟན་པའི་ཕྱིར་ཞེས་བྱ་བ་ནི་འཆི་བ་

Vol. 142 · folio 96a

ལ་དབང་བ་ཉིད་མངའོ་ཞེས་པར་རོ། །ཟླ་བ་གསུམ་ཁོ་ན་བྱིན་གྱིས་བརླབས་ཏེ་ཕྱིན་ཆད་ནི་འདུལ་བའི་དོན་མེད་པའི་ཕྱིར་མ་ཡིན་ནོ་ཞེས་བྱ་བ་ནི་ཟླ་བ་གསུམ་བསྡུས་པ་སྟེ་ཟླ་བ་གསུམ་ཉིད་ཟླ་བ་གསུམ་མོ། །ཟླ་བ་གསུམ་ཕྱིན་ཆད་ནི་འདུལ་བའི་དོན་མེད་

པའི་ཕྱིར་མ་ཡིན་ཏེ། སངས་རྒྱས་ཀྱི་མཛད་པའི་མཇུག་ནི་ཤིན་ཏུ་བཟང་ལྡན་ཡིན་པའི་ཕྱིར་རོ། །བསྐལ་པ་ལས་ལྷག་པ་ཞེས་བྱ་བ་ལ། བསྐལ་པ་ནི་བསྐལ་པ་གཅིག་རངས་པ་ཡིན་ནོ། །བསྐལ་པ་བས་ལྷག་པ་ནི་བསྐལ་པ་བས་ལྷག་པ་ཡིན་ཏེ། བསྐལ་པ་བས་ཐལ་བ་ཞེས་

བྱ་བའི་ཐ་ཚིག་གོ། །དེ་ཡང་བསྒྲུབ་པའི་ཕྱིར་རོ་ཞེས་བྱ་བ་ནི་དམ་བཅས་པ་བསྒྲུབ་པའི་ཕྱིར་ཏེ། དེ་ལྟ་མ་ཡིན་ན་ཚིག་ཙམ་དུ་འགྱུར་རོ། །ཕུང་པོ་དང་འཆི་བདག་གི་བདུད་དག་ལས་ཞེས་བྱ་བ་ནི་བྱེ་བྲག་ཏུ་སྨྲ་བ་རྣམས་ན་རེ་བདུད་ནི་བཞི་སྟེ་ལྷའི་བུའི་བདུད་དང་། ཉོན་མོངས་པའི་བདུད་

དང་། ཕུང་པོའི་བདུད་དང་། འཆི་བདག་གི་བདུད་དོ། །དེ་ལ་ཐུན་དང་པོ་ལ་ལྷའི་བུའི་བདུད་ལས་རྒྱལ་ལོ། །ཐུན་གཉིས་པ་ལ་ལྷའི་སྤྱན་གྱིས་འཇིག་རྟེན་ལ་གཟིགས་ནས་ཐུན་གསུམ་པ་ལ་ཉོན་མོངས་པའི་བདུད་ལས་རྒྱལ་ལོ། །ཡུལ་ཡངས་པ་ཅན་དུ་སྲོག་གི་འདུ་བྱེད་དག་བྱིན་གྱིས་

བརླབས་ནས་ཚེའི་འདུ་བྱེད་དག་བོར་ཏེ། ཕུང་པོའི་བདུད་ལས་རྒྱལ་བར་བྱ་བའི་ཕྱིར་ཕུང་པོ་དག་བཏང་ངོ་། །དེ་དག་བཏང་ནས་ནོངས་པར་འགྱུར་ཏེ། དེ་བས་ན་འཆི་བདག་གི་བདུད་ལས་རྒྱལ་བར་བྱ་བའི་ཕྱིར་བྱིན་གྱིས་བརླབས་སོ་ཞེས་ཟེར་རོ། །ཞར་ལ་འོངས་པ་རྫོགས་སོ་ཞེས་བྱ་བ་

ནི་དྲི་བ་ལས་དྲི་བ་གཞན་འབྱུང་བ་གང་ཡིན་པའོ། །བཅུ་གཉིས་གཉིས་ཞེས་བྱ་བ་ནི་བཅུ་གཉིས་ཁོ་ན་རྣམ་པ་གཉིས་ཁོ་ནའོ་ཞེས་བྱ་བར་ངེས་པར་གཟུང་ངོ་། །དད་པ་ལ་སོགས་པ་ཀུན་ཤེས་པའི་དབང་པོ་དང་ལྡན་པ་ལ་ཐུག་པའི་བར་བརྒྱད་དང་ཡིད་མི་བདེ་བ་མ་གཏོགས་པ་གཅིག་ཏུ་རྣམ་པར་

སྨིན་པ་སྲོག་གི་དབང་པོ་ལས་གཞན་པ་དབང་པོ་བཅུ་གཉིས་ནི་རྣམ་པར་སྨིན་པ་ཡང་ཡིན་ལ་རྣམ་པར་སྨིན་པ་མ་ཡིན་པ་ཡང་ཡིན་ཏེ། དེ་ལ་མིག་ལ་སོགས་པ་ཕོའི་དབང་པོ་ལ་ཐུག་པའི་བར་བདུན་གཉིད་ལོག་པ་པས་མངོན་པར་བསྒྲུབས་པ་རྒྱས་པ་ལས་བྱུང་བ་རྣམས་ནི་རྣམ་པར་སྨིན་

Vol. 142 · folio 96b

པ་མ་ཡིན་ནོ། །ཡིད་དང་སྡུག་བསྔལ་དང་བདེ་བ་ཞེས་བྱ་བ་རྒྱས་པར་འབྱུང་བ་ནི་ཡིད་ལ་སོགས་པ་དགེ་བ་དང་ཉོན་མོངས་པ་ཅན་གང་དག་ཡིན་པ་དེ་དག་ཀྱང་རྣམ་པར་སྨིན་པ་མ་ཡིན་ལ་ལུང་དུ་མ་བསྟན་པ་སྤྱོད་ལམ་པ་དང་བཟོའི་གནས་པ་དང་སྤྲུལ་པ་པའི་ངོ་བོ་ཉིད་གང་དག་ཡིན་པ་དེ་

དག་ཀྱང་ཅི་རིགས་པར་རྣམ་པར་སྨིན་པ་མ་ཡིན་ནོ། །ཅི་རིགས་པར་ཞེས་བྱ་བའི་ཁྱད་པར་སྨོས་པ་ནི་སྤྱོད་ལམ་པ་ལ་སོགས་པ་ཡིད་ཀྱི་ཉིད་ཡིན་པས་སྡུག་བསྔལ་གྱི་དབང་པོ་མི་སྲིད་པའི་ཕྱིར་ལ། བདེ་བ་དང་ཡིད་བདེ་བ་དག་ཀྱང་ཁ་ཅིག་ཏུ་མི་སྲིད་པའི་ཕྱིར་རོ། །དེ་ལ་འདོད་པའི་

ཁམས་ན་ནི་སྤྱོད་ལམ་པའི་ཡིད་ཀྱི་དབང་པོ་དང་དེ་དང་མཚུངས་པར་ལྡན་པ་ཡིད་བདེ་བ་དང་བཏང་སྙོམས་ཀྱི་དབང་པོ་དག་རྣམ་པར་སྨིན་པ་མ་ཡིན་ནོ། །གཟུགས་ཀྱི་ཁམས་ན་ནི་སྤྱོད་ལམ་པ་དང་དེ་དང་མཚུངས་པར་ལྡན་པའི་ཚོར་བའི་དབང་པོ་ནི་རྣམ་པར་སྨིན་པ་མ་ཡིན་ཏེ་ས་ཇི་

ལྟ་བ་བཞིན་ནོ། །སྤྲུལ་པ་པ་ནི་ས་ལྔ་པ་ཡིན་ཏེ། དེ་ལ་ནི་བཏང་སྙོམས་ཀྱི་དབང་པོ་ཁོ་ན་རྣམ་པར་སྨིན་པ་མ་ཡིན་ནོ། །བཙུན་པ་གོ་ཆ་མཐའ་ཡས་ན་རེ་ནི་སྤྱོད་ལམ་པ་དང་བཟོའི་གནས་པ་དང་སྤྲུལ་པ་པ་རྣམས་ནི་རྟག་ཏུ་བཏང་སྙོམས་ཀྱི་དབང་པོ་དང་མཚུངས་པར་ལྡན་པ་

དག་ཡིན་ནོ་ཞེས་ཟེར་རོ། །ལྷག་མ་རྣམས་ནི་རྣམ་པར་སྨིན་པ་ཡིན་ནོ་ཞེས་བྱ་བ་ནི་དགེ་བ་དང་ཉོན་མོངས་པ་ཅན་དང་སྤྱོད་ལམ་པ་དང་སྤྲུལ་པ་པའི་ངོ་བོ་ཉིད་ཀྱི་དབང་པོ་ལ་སོགས་པ་ལས་གཞན་པའི་ཡིད་ཀྱི་དབང་པོ་ལ་སོགས་པ་རྣམ་པར་སྨིན་པ་ལས་སྐྱེས་པ་དག་ནི་རྣམ་པར་སྨིན་པ་

ཡིན་ནོ། །ལྷག་མ་རྣམས་ནི་རྣམ་པར་སྨིན་པ་མ་ཡིན་པ་ཞེས་བྱ་བར་གྲུབ་པོ་ཞེས་བྱ་བ་ནི་སྲོག་གི་དབང་པོ་དང་མིག་ལ་སོགས་པ་བཅུ་གཉིས་མ་གཏོགས་པ་སྟེ། དེ་དག་ངེས་པར་བཟུང་བ་ཁོ་ནས་ལྷག་མ་རྣམས་ནི་རྣམ་པར་སྨིན་པ་མ་ཡིན་ནོ་ཞེས་བྱ་བར་གྲུབ་པ་ཡིན་ནོ། །དེ་དག་

ཀྱང་གང་ཞེ་ན། ཡིད་མི་བདེ་བ་ནི་དགེ་བ་དང་མི་དགེ་བ་ཡིན་པའི་ཕྱིར་རྣམ་པར་སྨིན་པ་མ་ཡིན་ཏེ་འདི་ལྟར། དེ་གཅིག་ནི། རྣམ་པར་སྨིན་བཅས་ཞེས་འཆད་པར་འགྱུར་རོ། །དད་ལ་སོགས། དགེ་བརྒྱད། ཅེས་འབྱུང་བས་རྣམ་པར་སྨིན་པ་མ་ཡིན་ཏེ་རྣམ་པར་སྨིན་པའི་མཚན་

Vol. 142 · folio 97a

ཉིད། རྣམ་སྨིན་ལུང་དུ་མ་བསྟན་ཆོས། །སེམས་ཅན་ཞེས་བྱ་ཞེས་བྱ་བ་མེད་པའི་ཕྱིར་རོ། །གལ་ཏེ་ཡིད་མི་བདེ་བ་རྣམ་པར་སྨིན་པ་མ་ཡིན་ནོ་ཞེ་ན། ལུང་འདི་དང་འགལ་ལོ་ཞེས་བསྟན་པའི་ཕྱིར་ལས་ནི་གསུམ་སྟེ་ཞེས་བྱ་བ་ལ་སོགས་པ་སྨོས་སོ། །

མཚུངས་པར་ལྡན་པ་མྱོང་བར་འགྱུར་བའི་དབང་དུ་མཛད་ནས་ཞེས་བྱ་བ་མྱོང་བར་འགྱུར་བ་ནི་ཚོར་བ་སྟེ། འདི་ལ་ཡིད་མི་བདེ་བ་མྱོང་བར་འགྱུར་བ་ཡོད་པས་ན་ཡིད་མི་བདེ་བ་མྱོང་བར་འགྱུར་བའི་ལས་སོ། །འོ་ན་ནི་ཡིད་བདེ་བ་དང་བཏང་སྙོམས་མྱོང་བར་འགྱུར་བའི་ལས་དག་ཀྱང་ཞེས་

བྱ་བ། ཕ་རོལ་པོའི་བསམ་པ་ནི་མཚུངས་པར་ལྡན་པ་ཙམ་ཡིན་པར་སྨྲས་པའི་ཕྱིར་ཡིད་མི་བདེ་བ་བཞིན་དུ་ཡིད་བདེ་བ་དང་བཏང་སྙོམས་དག་ཀྱང་རྣམ་པར་སྨིན་པ་མ་ཡིན་པར་འགྱུར་བ་སྙམ་པ་ཡིན་ནོ། །མཚུངས་པར་ལྡན་པ་ཡིན་ཡང་ཉེས་པ་མེད་ལ་རྣམ་པར་སྨིན་པ་ཡིན་ཡང་ཉེས་པ་མེད་

དོ་ཞེས་བྱ་བ་འདི་ལ་ཡིད་བདེ་བ་མྱོང་བར་འགྱུར་བ་ཡོད་པས་ཡིད་བདེ་བ་མྱོང་བར་འགྱུར་བའི་ལས་ཡིན་ནོ་ཞེས་བྱས་ན་ཡང་ཉེས་པ་མེད་ལ། འདི་ལ་ཡིད་བདེ་བ་རྣམ་པར་སྨིན་པ་ཉིད་དུ་མྱོང་བར་འགྱུར་བ་ཡོད་པས་ན་ཡིད་བདེ་བ་མྱོང་བར་འགྱུར་བའི་ལས་སོ་ཞེས་བྱས་ན་ཡང་ཉེས་པ་མེད་པའོ། །གོ་

སྐབས་མེད་པས་ན་དེ་ནི་དེ་ལྟར་ཤེས་སོ་ཞེས་བྱ་བ་ནི་གལ་ཏེ་ཡིད་མི་བདེ་བ་རྣམ་པར་སྨིན་པ་མ་ཡིན་ནོ་ཞེས་བྱ་བར་རིགས་པས་ཡོངས་སུ་དཔྱད་ན་སྟེ། དེ་བས་ན་གོ་སྐབས་མེད་པས་འདི་སྐད་དུ་མཚུངས་པར་ལྡན་པ་མྱོང་བར་འགྱུར་བའི་དབང་དུ་མཛད་ནས་ཞེས་རྣམ་པར་འཆད་པར་བྱེད་པ་ཡིན་ནོ། །

དེའི་ཕྱིར་ཡིད་མི་བདེ་བ་རྣམ་པར་སྨིན་པ་མ་ཡིན་ནོ་ཞེས་བྱ་བ་འདི་ལ་རིགས་པ་ཅི་ཞིག་ཡོད་ཅེས་བྱ་བ་སྨོས་སོ། །ཡང་ན་ལ་ལར་ནི་མཚུངས་པར་ལྡན་པ་མྱོང་བར་འགྱུར་བ་ཉིད་ཡིན་ནོ། །ལ་ལར་ནི་རྣམ་པར་སྨིན་པ་མྱོང་བར་འགྱུར་བ་ཉིད་དོ་ཞེས་བྱ་བའི་གོ་སྐབས་མེད་པས་ན་དེ་ནི་དེ་ལྟར་ཤེས་

སོ། །གལ་ཏེ་ཁྱོད་འོ་ན་ནི་ཐམས་ཅད་དུ་མཚུངས་པར་ལྡན་པ་མྱོང་བར་འགྱུར་བ་ཉིད་ཡིན་ནོ་ཞེས་སྨྲ་ན། བསམ་པ་འདས་མ་ཐག་པ་འདི་ལ་བརྟགས་ནས་ཡིད་མི་བདེ་བ་རྣམ་པར་སྨིན་པ་མ་ཡིན་ནོ་ཞེས་བྱ་བ་འདི་ལ་རིགས་པ་ཅི་ཞིག་ཡོད་ཅེ་ན་ཞེས་བྱ་བ་སྨོས་སོ། །ཡིད་མི་བདེ་བ་ནི་ཞེས་བྱ་བ་ནི་

Vol. 142 · folio 97b

མི་འདོད་པ་སེམས་པར་བྱེད་པ་ལ་སོགས་པ་ཀུན་ཏུ་རྟོག་པའི་ཁྱད་པར་དག་གིས་སྐྱེད་པར་བྱེད་ཅིང་རྣམ་པར་ཞི་བར་བྱེད་པ་ཡིན་ནོ། །ཡིད་བདེ་བ་ཡང་དེ་དང་འདྲ་བས་ཞེས་བྱ་བ་ནི་འདོད་པ་སེམས་པ་ལ་སོགས་པ་ཀུན་ཏུ་རྟོག་པའི་ཁྱད་པར་དག་གིས་སྐྱེད་པར་བྱེད་ཅིང་རྣམ་པར་ཞི་བར་བྱེད་པ་

ཡིན་ནོ། །འོ་ན་འདོད་ཆགས་དང་བྲལ་བ་རྣམས་ལ་ཞེས་བྱ་བ་ནི་འདི་ལྟར་འདོད་ཆགས་དང་བྲལ་བ་རྣམས་ལ་ཡིད་མི་བདེ་བ་ལྡོག་སྟེ། འདོད་ཆགས་དང་བྲལ་བ་རྣམས་ལ་རྣམ་པར་སྨིན་པར་གྱུར་པ་མིག་ལ་སོགས་པ་ནི་མི་ལྡོག་གི་ཡིད་མི་བདེ་བ་ནི་ལྡོག་སྟེ། བསྟན་བཅོས་ལས་ཡིད་

མི་བདེ་བ་དང་འདོད་ཆགས་དང་བྲལ་ཞིང་མི་ལྡན་པ་ཡིན་ནོ་ཞེས་འབྱུང་བའི་ཕྱིར་རོ། །མདོ་ལས་ཀྱང་འདོད་ཆགས་དང་མ་བྲལ་བ་ལ་ནི་ཟུག་རྔུའི་ཚོར་བ་གཉིས་བཤད་དེ། ལུས་ཀྱི་སྡུག་བསྔལ་དང་སེམས་ཀྱི་ཡིད་མི་བདེ་བ་ཡང་སོ་སོར་མྱོང་བར་འགྱུར་རོ་ཞེས་བྱ་བ་དང་། འདོད་ཆགས་

དང་བྲལ་བ་ལ་ནི་ཟུག་རྔུ་གཅིག་སྟེ། ལུས་ཀྱི་སྡུག་བསྔལ་ཁོ་ན་སོ་སོར་མྱོང་བར་འགྱུར་རོ་ཞེས་འབྱུང་བའི་ཕྱིར་གསུངས་པ་ཡིན་ནོ། །དེ་དག་གིས་ཡིད་བདེ་བ་ལུང་དུ་མ་བསྟན་པ་ཞེས་བྱ་བ་རྒྱས་པར་འབྱུང་བ་ནི་འདོད་ཆགས་དང་བྲལ་བ་རྣམས་ཀྱི་ཡིད་བདེ་བ་ལུང་དུ་མ་བསྟན་པ་རྣམ་

པར་སྨིན་པ་ཡང་ཅི་འདྲ་བ་ཞིག་ཡོད་པར་འགྱུར། དེ་དག་གི་ཡིད་བདེ་བ་ནི་སྙོམས་པར་འཇུག་པས་བསྡུས་པས་འབྱུང་ལ་དེ་ཡང་དགེ་བ་ཡིན་པའི་ཕྱིར་རྣམ་པར་སྨིན་པ་མ་ཡིན་ཏེ། དེའི་ཕྱིར་དེ་དག་གི་ཡིད་བདེ་བ་རྣམ་པར་སྨིན་པ་ཅི་འདྲ་བ་ཞིག་ཡིན་པ་བརྗོད་པར་བྱ་དགོས་སོ། །ཅི་འདྲ་བ་

ཡང་རུང་སྟེ་ཞེས་བྱ་བ་ནི་ཡོངས་སུ་མི་ཆོད་ཀྱང་དེ་ནི་ཡོད་པ་ཁོ་ནའོ་ཞེས་སྟོན་པར་བྱེད་པ་ཡིན་ཏེ་དེ་ལ་རྣམ་པར་སྨིན་པའི་གོ་སྐབས་ཡོད་དུ་ཟིན་ཀྱང་ཡིད་མི་བདེ་བ་ནི་སྙོམས་པར་འཇུག་པའི་གནས་སྐབས་ན་ཡང་རུང་སྟེ། རྣམ་པ་ཐམས་ཅད་དུ་མི་འབྱུང་བས་དེའི་ཕྱིར་རྣམ་པར་སྨིན་པ་མ་ཡིན་ནོ་

ཞེས་བྱ་བར་གྲུབ་པ་ཡིན་ནོ། །ཡིད་ཀྱི་དབང་པོ་ནི་གཉི་གའི་རྣམ་པར་སྨིན་པ་ཡིན་ནོ་ཞེས་བྱ་བ་ནི་བདེ་འགྲོ་དང་ངན་འགྲོ་གཉི་གར་དགེ་བ་དང་མི་དགེ་བ་གཉི་གའི་རྣམ་པར་སྨིན་པ་ཡིན་ནོ་ཞེས་བྱ་བར་སྐབས་དང་སྦྱར་རོ། །བརྒྱད་པ་སྲོག་གི་དབང་པོ་རྣམས་བདེ་འགྲོ་ན་ནི་དགེ་བའི་རྣམ་

Vol. 142 · folio 98a

པར་སྨིན་པ་ཡིན་ལ་ཞེས་བྱ་བ་འདི་ནི་སྤྱིར་བསྟན་པ་ཡིན་ནོ། །དེ་ལ་ཇི་ལྟར་མཚན་གཉིས་པ་སྡུག་པ་མ་ཡིན་པར་འདོད་པ་དགེ་བའི་རྣམ་པར་སྨིན་པ་ཡིན་ཞེ་ན། བདེ་འགྲོ་ན་མི་དགེ་བས་མཚན་གཉིས་པོ་དེའི་གནས་རྙེད་པ་ཡིན་གྱི་ཞེས་བྱ་བ་སྨོས་ཏེ།

འདིའི་གནས་ཉམས་པ་ཡིན་ཏེ། དེའི་ཕྱིར་འདི་མི་དགེ་བས་རྙེད་པ་ཡིན་ཏེ་ལྡན་པ་མ་ཡིན་པའི་ཆོས་ཡིན་གྱི་མཚན་གཉིས་ནི་དགེ་བ་ཁོ་ནའི་རྣམ་པར་སྨིན་པ་ཡིན་ནོ་སྙམ་དུ་བསམས་པ་ཡིན་ནོ། །དེ་གཅིག་ནི། རྣམ་པར་སྨིན་བཅས་ཞེས་བྱ་བ་ནི་དེ་གཅིག་ནི་རྣམ་པར་སྨིན་པ་དང་

བཅས་པ་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ། །དེའི་ཕྱིར་ནི་ཞེས་བྱ་བའི་སྒྲ་ནི་ཁོ་ན་ཡིན་ཞེས་བྱ་བའི་དོན་དང་རིམ་པ་གཞན་དུ་སྦྱར་བ་ཞེས་བྱ་བ་སྨོས་ཏེ། གནས་གཞན་དུ་སྦྱར་ཞེས་བྱ་བའི་ཐ་ཚིག་གོ། །དེ་གཅིག་རྣམ་པར་སྨིན་བཅས་ནི། །ཞེས་བྱས་ནས་ནི་རིམ་པ་གཞན་དུ་སྦྱར་བར་མི་

འགྱུར་ཏེ་ཚིགས་སུ་བཅད་པ་བསྡེབས་པ་དང་མཐུན་པར་དེ་སྐད་ཅེས་བཤད་པ་ཡིན་ནོ། །དེ་ནི་ལུང་དུ་མ་བསྟན་པ་ཡང་མེད་ལ་ཞེས་བྱ་བ་ནི་རྣམ་པར་སྨིན་པ་དང་བཅས་པ་ཁོ་ན་ཡིན་ནོ་ཞེས་ངེས་པར་གཟུང་བར་བྱ་བའི་རིགས་པ་སྟོན་པར་བྱེད་པ་ཡིན་ཏེ། རྣམ་པར་སྨིན་པ་མེད་པའི་དངོས་པོ་ནི་

གཉིས་སུ་འདོད་དེ། ལུང་དུ་མ་བསྟན་པ་དང་། ཟག་པ་མེད་པའོ། །དེ་ནི་རྣམ་པར་རྟོག་པའི་ཁྱད་པར་གྱིས་བསྐྱེད་པར་བྱ་བ་ཡིན་པའི་ཕྱིར་ལུང་དུ་མ་བསྟན་པ་ཡང་མ་ཡིན་ལ། མཉམ་པར་གཞག་པ་མ་ཡིན་པའི་ཕྱིར་ཟག་པ་མེད་པ་ཡང་མ་ཡིན་ནོ། །ལུང་དུ་མ་བསྟན་པ་ནི་ས་བོན་རུལ་

པ་བཞིན་དུ་རྣམ་པར་སྨིན་པ་འབྱིན་པར་མི་ནུས་པ་མ་ཡིན་ནོ། །ཟག་པ་མེད་པ་ནི་སྲིད་པས་མངོན་པར་མ་བརླན་པའི་ཕྱིར་རྣམ་པར་སྨིན་པ་འབྱིན་པར་མི་ནུས་ཏེ། ས་བོན་མ་བརླན་པ་བཞིན་ནོ། །ཤུགས་ཀྱིས་ན་དེ་ནི་མི་དགེ་བ་འམ་དགེ་བ་ཟག་པ་དང་བཅས་པ་ཡིན་པར་འགྱུར་ཏེ། དེའི་ཕྱིར་ཡིད་

མི་བདེ་བ་ནི་རྣམ་པར་སྨིན་པ་དང་བཅས་པ་ཁོ་ན་ཡིན་གྱི་རྣམ་པར་སྨིན་པ་མེད་པ་ནི་མེད་དོ། །བཅུ་རྣམ་གཉིས་ཞེས་བྱ་བ་ནི་བཅུ་ཁོ་ན་རྣམ་པ་གཉིས་ཡིན་ལ་རྣམ་གཉིས་ཁོ་ན་བཅུ་ཡིན་ནོ་ཞེས་ངེས་པར་གཟུང་བ་ཡིན་ནོ། །རྣམ་གཉིས་ཞེས་བྱ་བ་ནི་རྣམ་པར་སྨིན་པ་དང་བཅས་པ་དང་རྣམ་པར་

Vol. 142 · folio 98b

སྨིན་པ་མེད་པ་དག་ཡིན་ནོ། །ཡིད་དང་ཚོར་གཞན་དད་ལ་སོགས། །ཞེས་བྱ་བ་ལ། ཚོར་ཞེས་བྱ་བ་ནི་ཚོར་བ་ཡིན་ནོ། །གཞན་ཞེས་བྱ་བ་སྨོས་པས་ནི་ཡིད་མི་བདེ་བ་མ་གཏོགས་པ་གཟུང་སྟེ། ཡིད་མི་བདེ་བ་ནི་བཤད་ཟིན་པའི་ཕྱིར་རོ། །དད་ལ་སོགས་པ་ཞེས་བྱ་བ་ནི་དད་པ་

དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་དག་བཟུང་ངོ་ཞེས་བྱ་བར་སྐབས་དང་སྦྱར་རོ། །གཞན་ནི་རྣམ་པར་སྨིན་པ་མེད་པ་བཞིན་ནོ་ཞེས་བྱ་བ་ནི་ཡིད་མི་བདེ་བ་ལ་སོགས་པ་ཇི་སྐད་བཤད་པ་དམིགས་ཀྱིས་བསྩལ་བའི་ཕྱིར་སྲོག་དང་གཟུགས་ཅན་

གྱི་དབང་པོ་བདུན་དང་ཀུན་ཤེས་པར་བྱེད་པའི་དབང་པོ་ལ་སོགས་པ་གསུམ་ནི་གོ་རིམས་བཞིན་དུ་ལུང་དུ་མ་བསྟན་པའི་ཕྱིར་དང་། ཟག་པ་མེད་པ་ཡིན་པའི་ཕྱིར་རྣམ་པར་སྨིན་པ་མེད་པ་དག་ཡིན་ནོ་ཞེས་བྱ་བར་གྲུབ་པོ། །དགེ་བ་བརྒྱད་ཅེས་བྱ་བ་ནི་བརྒྱད་ནི་དགེ་བ་ཁོ་ནའོ་ཞེས་བྱ་

བར་ངེས་པར་གཟུང་བ་ཡིན་ནོ། །ཡིད་མི་བདེ་བ་དང་། རྣམ་གཉིས་ཞེས་བྱ་བ་ནི་རྣམ་གཉིས་ཁོ་ན་ཡིད་མི་བདེ་བ་ཡིན་ལ་ཡིད་མི་བདེ་བ་ཁོ་ན་རྣམ་གཉིས་ཡིན་ནོ་ཞེས་བྱ་བར་ངེས་པར་གཟུང་བ་ཡིན་ཏེ། རྣམ་གཉིས་ཞེས་བྱ་བ་ནི་དགེ་བ་དང་མི་དགེ་བའོ། །དགེ་བ་ཡང་ཡིན་ལ་ལུང་

དུ་མ་བསྟན་པ་ཡང་ཡིན་པ་དང་མི་དགེ་བ་ཡང་ཡིན་ལ་ལུང་དུ་མ་བསྟན་པ་ཡིན་ཞེས་བྱ་བ་རྣམ་གཉིས་གཞན་ཡང་ཡོད་ན་དེ་ཇི་ལྟར་འདི་སྐད་དུ་དགེ་བ་ཡང་ཡིན་མི་དགེ་བ་ཡང་ཡིན་ནོ་ཞེས་བྱ་བར་ངེས་པར་གཟུང་ཞེ་ན། རྣམ་པར་བཤད་པའི་སྒོ་ནས་བྱེ་བྲག་རྟོགས་པ་ཡིན་ནོ། །རྣམ་པ་

གཅིག་ཏུ་ན་ཡིད་མི་བདེ་བ་རྣམ་པར་སྨིན་པ་དང་བཅས་པ་ཁོ་ན་ཡིན་ནོ་ཞེས་ངེས་པར་གཟུང་སྟེ། དེ་ལྟ་བ་ན་འདི་ཁོ་ན་རྣམ་པ་གཉིས་ཡིན་པར་འགྱུར་རོ། །ཚོར་གཞན་ནི་ཡིད་མི་བདེ་བ་མ་གཏོགས་པའི་ཚོར་བ་བཞི་སྟེ། དེ་ནི་བཤད་ཟིན་པའི་ཕྱིར་རོ། །རྣམ་གསུམ་ཞེས་བྱ་བ་ནི་

དགེ་བ་དང་མི་དགེ་བ་དང་ལུང་དུ་མ་བསྟན་པ་དག་ཡིན་ནོ། །རྣམ་གསུམ་ནི་རྣམ་པ་གསུམ་སྟེ། མ་ཆགས་པ་ལ་སོགས་པ་དང་མཚུངས་པར་ལྡན་པ་དག་ནི་དགེ་བ་ཡིན་ནོ། །ཆགས་པ་ལ་སོགས་པ་དང་མཚུངས་པར་ལྡན་པ་དག་ནི་མི་དགེ་བ་ཡིན་ནོ། །དེ་ལས་གཞན་པ་དག་ནི་

Vol. 142 · folio 99a

ལུང་དུ་མ་བསྟན་པ་ཡིན་ནོ། །གཞན་ནི་རྣམ་པ་གཅིག་ཅེས་བྱ་བ་ནི་བརྒྱད་པ་སྲོག་གི་དབང་པོ་དང་གཞན་ནི་རྣམ་པ་གཅིག་ཁོ་ནའོ་ཞེས་བྱ་བར་ངེས་པར་གཟུང་བར་བྱ་བ་ཡིན་ཏེ། ལུང་དུ་མ་བསྟན་པ་ཁོ་ནའོ་ཞེས་བྱ་བའི་ཐ་ཚིག་གོ། །འདིའི་དོན་དུ་འདི་ཡང་སྨོས་ཏེ།

དེ་ལྟ་མ་ཡིན་ན་དེ་མི་དགེ་བ་ཁོ་ན་ཡིན་པ་འམ་དགེ་བ་དང་ལུང་དུ་མ་བསྟན་པ་ཁོ་ན་ཡིན་པར་ཡང་དོགས་པར་འགྱུར་རོ། །དེ་ལྟ་བས་ན་མངོན་པར་འདོད་པའི་རྣམ་པ་གཅིག་པུ་ཉིད་རབ་ཏུ་གྲུབ་པར་བྱ་བའི་ཕྱིར་ཡང་བརྗོད་དེ། འདི་ལ་རྣམ་པ་གཅིག་ཉིད་གང་ཞིག་སྲིད་པ་དེ་ཡིན་ནོ། །

སྲིད་པ་ཡང་གང་ཡིན་ཞེ་ན། ལུང་དུ་མ་བསྟན་པ་ཡིན་ནོ། །དྲི་མེད་མ་གཏོགས་འདོད་པར་གཏོགས། །ཞེས་བྱ་བ་ནི་དྲི་མ་མེད་པ་ཁོ་ན་མ་གཏོགས་པ་འདོད་པར་གཏོགས་པ་ཡིན་ནོ། །དེ་ནི་དེ་ལྡན་པ་མ་ཡིན་པ་ཁོ་ནའོ་ཞེས་བྱ་བ་ནི་ཁམས་གསུམ་མ་གཏོགས་པ་ཁོ་ནའོ་ཞེས་བྱ་

བའི་ཐ་ཚིག་གོ། །ཕོ་མོའི་དབང་དང་སྡུག་བསྔལ་དག །མ་གཏོགས་གཟུགས་གཏོགས་ཞེས་བྱ་བ་རྒྱས་པར་འབྱུང་བ་ནི་ཕོ་དང་མོ་ནི་ཕོ་མོའོ། །དེ་དག་གི་དབང་པོ་ནི་ཕོ་མོའི་དབང་པོ་དག་ཡིན་ནོ། །སྡུག་བསྔལ་དག་ཅེས་བྱ་བ་ནི་སྡུག་བསྔལ་གྱི་ཚོར་བའི་ངོ་བོ་ཉིད་དག་ཡིན་ཏེ། སྡུག་

བསྔལ་དང་ཡིད་མི་བདེ་བ་ཞེས་བྱ་བའི་ཐ་ཚིག་གོ། །ཕོ་དང་མོའི་དབང་པོ་དེ་དག་དང་སྡུག་བསྔལ་དང་ཡིད་མི་བདེ་བ་དག་དང་འདིར་སྦྱར་བ་དྲི་མ་མེད་པ་མ་གཏོགས་པ་དབང་པོ་ལྷག་མ་རྣམས་ནི་གཟུགས་སུ་གཏོགས་པ་ཡིན་ནོ། །ག་ལས་འབྱུང་ཞེས་དྲིས་པ་དང་མདོ་བསྟན་

པའི་ཕྱིར་གནས་མ་ཡིན་ཞིང་གོ་སྐབས་མེད་དེ་ཞེས་བྱ་བ་ནི་རྒྱས་པར་སྨོས་ཏེ། མདོ་འདི་ལས་སོ་སྙམ་དུ་བསམས་པའོ། །ཕོའི་ངོ་བོ་གཞན་འདོད་པའི་ཁམས་ན་ཕོ་རྣམས་ལ་ཡོད་པ་གང་ཡིན་པ་ནི་ཡོད་དོ་ཞེས་བྱ་བ་ནི་ནུ་མ་ལ་སོགས་པ་དབྱིབས་དང་ང་རོ་དང་སྤྱོད་པ་གཞན་པ་ཉིད་དོ། །

སྡུག་བསྔལ་གྱི་དབང་པོ་མེད་དོ་ཞེས་བྱ་བ་ནི་ལུས་དང་བའི་ཕྱིར་བསྣུན་པ་ལས་བྱུང་བ་དེ་མེད་ལ་མི་དགེ་བ་མེད་པའི་ཕྱིར་རྣམ་པར་སྨིན་པ་ལས་སྐྱེས་པ་ཡང་མེད་དོ། །ཞི་གནས་ཀྱིས་བརླན་པའི་ཕྱིར་ཡིད་མི་བདེ་བའི་དབང་པོ་མེད་དོ་ཞེས་བྱ་བ་ནི་གང་གི་ཕྱིར་ཞི་གནས་ཀྱི་ཏིང་ངེ་འཛིན་

Vol. 142 · folio 99b

གྱིས་ཁོང་ཁྲོ་བ་དང་བྲལ་བས་རྒྱུད་ལ་རྩུབ་བག་མེད་པ་དེའི་ཕྱིར་ཡིད་མི་བདེ་བ་མེད་དོ། །ཀུན་ནས་མནར་སེམས་ཀྱི་གཞི་མེད་པའི་ཕྱིར་ཞེས་བྱ་བ་ལ། ཀུན་ནས་མནར་སེམས་ནི་འཁྲུག་པའོ། །དེའི་གཞི་ནི་ཡུལ་ཡིན་པས་ཀུན་ནས་མནར་སེམས་ཀྱི་གཞིའོ། །ཀུན་ནས་མནར་སེམས་

ཀྱི་གཞི་ནི་དགུ་སྟེ། བདག་ལ་གནོད་པ་བྱས་སོ་བྱེད་དོ་བྱེད་པར་འགྱུར་རོ་ཞེས་བྱ་བ་ཀུན་ནས་མནར་སེམས་ཀྱི་གཞི་གསུམ་དང་། བདག་གི་མཛའ་བོ་ལ་གནོད་པ་བྱས་སོ་བྱེད་དོ་བྱེད་པར་འགྱུར་རོ་ཞེས་བྱ་བ་ཀུན་ནས་མནར་སེམས་ཀྱི་གཞི་གཞན་གསུམ་དང་། བདག་གི་དགྲ་བོ་ལ་

ཕན་པ་བྱས་སོ་བྱེད་དོ་བྱེད་པར་འགྱུར་རོ་ཞེས་བྱ་བ་ཀུན་ནས་མནར་སེམས་ཀྱི་གཞི་གཞན་གསུམ་མོ། །ཀུན་ནས་མནར་སེམས་ཀྱི་གཞི་དགུ་པོ་འདི་དག་མེད་པའི་ཕྱིར་ཡུལ་གྱིས་བྱས་པའི་ཡིད་མི་བདེ་བ་ཡང་མེད་ཀྱི་རྒྱུས་བྱས་པ་མེད་པ་འབའ་ཞིག་ནི་མ་ཡིན་ནོ་ཞེས་སྟོན་པར་བྱེད་དོ། །

རང་གི་རྒྱུད་ལ་ཡོད་པའི་ཁོང་ཁྲོ་བ་བྱས་པ་གང་ཡིན་པ་དེ་ནི་རྒྱུས་བྱས་པ་ཡིན་ལ། ཀུན་ནས་མནར་སེམས་ཀྱི་གཞི་དགུས་བྱས་པ་གང་ཡིན་པ་དེ་ནི་རྐྱེན་གྱིས་བྱས་པ་ཡིན་ནོ། །གཟུགས་ཅན་དང་བདེ་བ་ཡང་ཞེས་བྱ་བའི་ཡང་ཞེས་བྱ་བའི་སྒྲས་ནི་གོང་དུ་བཤད་པ་སྦྱར་བར་བྱ་བ་

ཡིན་ཏེ། དེའི་ཕྱིར་ཕོ་དང་མོའི་དབང་པོ་དག་དང་བདེ་བ་དག་དང་དྲི་མ་མེད་པ་ཡང་མ་གཏོགས་སོ་ཞེས་བྱ་བར་སྦྱར་རོ་ཞེས་བྱ་བ་སྨོས་སོ། །གཟུགས་ཅན་གྱི་དབང་པོ་ནི་མིག་ལ་སོགས་པའོ། །བདེ་བ་དག་ཅེས་བྱ་བ་ནི་བདེ་བའི་ཚོར་བའི་ངོ་བོ་ཉིད་དག་སྟེ། བདེ་བ་དང་། ཡིད་བདེ་

བའི་དབང་པོ་དག་གོ། །ཚོར་བ་གསུམ་ནི་བདེ་བ་དང་ཡིད་བདེ་བ་དང་། བཏང་སྙོམས་དག་ཡིན་ཏེ། བདེ་བའི་དབང་པོ་བསམ་གཏན་གསུམ་པའི་ས་པ། མཐོང་བས་སྤང་བར་བྱ་བའི་ཕྲ་རྒྱས་དང་མཚུངས་པར་ལྡན་པ་གང་ཡིན་པ་དེ་ནི་མཐོང་བས་སྤང་བར་བྱ་བ་ཡིན་ནོ། །དེ་ཉིད་

ན་དེ་ལས་གཞན་པའི་ཟག་པ་དང་བཅས་པ་དང་རྣམ་པར་ཤེས་པའི་ཚོགས་ལྔ་པ་འདོད་པ་ན་སྤྱོད་པ་དང་རྣམ་པར་ཤེས་པའི་ཚོགས་གསུམ་པ་བསམ་གཏན་དང་པོའི་ས་པ་ནི་བསྒོམ་པས་སྤང་བར་བྱ་བ་ཡིན་ནོ། །བདེ་བའི་དབང་པོའི་ཟག་པ་མེད་པ་ནི་སྤང་བར་བྱ་བ་མ་ཡིན་

Vol. 142 · folio 100a

པ་ཡིན་ནོ། །ཡིད་བདེ་བ་ཡང་མཐོང་བས་སྤང་བར་བྱ་བ་དང་མཚུངས་པར་ལྡན་པ་ནི་མཐོང་བས་སྤང་བར་བྱ་བ་ཡིན་ནོ། །དེ་ལས་གཞན་པ་ཟག་པ་དང་བཅས་པ་ནི་བསྒོམ་པས་སྤང་བར་བྱ་བ་ཡིན་ནོ། །ཟག་པ་མེད་པ་ནི་སྤང་བར་བྱ་བ་མ་ཡིན་ནོ། །

བཏང་སྙོམས་ནི་ཐམས་ཅད་ན་ཡོད་པ་ཉིད་པས་རྟོགས་པར་སླའོ། །གཉིས་ཀྱིས་སྤང་བ་ཡིད་མི་བདེ་ཞེས་བྱ་བ་ནི་ཡིད་བདེ་བ་མ་ཡིན་པ་དང་ལྡན་པས་ཡིད་བདེ་བ་མ་ཡིན་པའོ། །དེའི་ངོ་བོ་ནི་ཡིད་བདེ་བ་མ་ཡིན་པ་ཉིད་དེ། ཡིད་མི་བདེ་བ་ཞེས་བྱ་བའི་ཐ་ཚིག་སྟེ། མཐོང་བས་སྤང་

བར་བྱ་བ་དང་ལྡན་པ་ནི་མཐོང་བས་སྤང་བར་བྱ་བ་ཡིན་ནོ། །དེ་ལས་གཞན་པ་ནི་བསྒོམ་པས་སྤང་བར་བྱ་བ་ཡིན་ནོ་མཉམ་པར་གཞག་པ་མ་ཡིན་པའི་ཕྱིར་སྤང་བར་བྱ་བ་མ་ཡིན་པ་ནི་མེད་དོ། །འདོད་པར་དང་པོར་རྣམ་སྨིན་གཉིས། །རྙེད་དེ་ཞེས་བྱ་བ་ནི་འདོད་པའི་ཁམས་ནི་འདོད་

པ་གཙོ་བོ་ཡིན་པའི་ཕྱིར་འདོད་པ་རྣམས་ཞེས་བསྟན་ཞེས་འཆད་པར་འགྱུར་རོ། །འདོད་པའི་ཁམས་ན་སེམས་ཅན་སྒོ་ང་ལས་སྐྱེ་བ་དང་། མངལ་ནས་སྐྱེ་བ་དང་དྲོད་གཤེར་ལས་སྐྱེ་བ་རྣམས་ཀྱིས་དང་པོ་ཁོ་ནར་རྣམ་པར་སྨིན་པའི་བདག་ཉིད་ཀྱི་དབང་པོ་གཉིས་རྙེད་པར་འགྱུར་

ཏེ། ལུས་ཀྱི་དབང་པོ་དང་སྲོག་གི་དབང་པོའོ། །ཅིའི་ཕྱིར་ཞེ་ན། སྐྱེ་བའི་སྲིད་པ་ཉོན་མོངས་ཅན། །རང་གི་ས་པའི་ཉོན་མོངས་ཀུན། །ཞེས་འབྱུང་བའི་ཕྱིར་ཡིད་དང་བཏང་སྙོམས་ཀྱི་དབང་པོ་དག་ནི་ཉིང་མཚམས་སྦྱོར་བའི་ཚེ་གདོན་མི་ཟ་བར་ཉོན་མོངས་པ་ཅན་ཡིན་པའི་ཕྱིར་ལ།

མིག་ལ་སོགས་པ་ཡང་གནས་སྐབས་དེ་ན་མེད་པའི་ཕྱིར་རོ། །རྫུས་ཏེ་སྐྱེས་པས་མིན་ཞེས་བྱ་བ་ནི་དམིགས་ཀྱིས་བསལ་བ་སྟེ། བྱེ་བྲག་ཏུ་མ་ཕྱེ་བའི་ཕྱིར་རྫུས་ཏེ་སྐྱེ་བ་རྣམས་ཀྱིས་ཀྱང་དེ་དང་འདྲ་བར་གཉིས་ཁོ་ན་ཞིག་འཐོབ་པར་འགྱུར་རོ་ཞེས་བྱ་བར་ཐལ་བར་འགྱུར་

བས། དེ་ལྟ་བས་ན་འདི་བཀག་པ་ཡིན་ནོ། །ཅི་རྫུས་ཏེ་སྐྱེ་བ་རྣམས་ཀྱིས་དེ་གཉིས་མ་རྙེད་པ་ཁོ་ན་ཞིག་ཡིན་ནམ་ཞེ་ན། རྙེད་པར་འགྱུར་མོད་ཀྱི་གཉིས་ཁོ་ན་ནི་མ་ཡིན་ཏེ། དེའི་ཕྱིར་དེ་ཡིས་དྲུག་གམ་ཞེས་བྱ་བ་ལ་སོགས་པ་རྒྱས་པར་སྨོས་སོ། །གལ་ཏེ་མཚན་མེད་པ་ཞིག་

Vol. 142 · folio 100b

ཡིན་ན་སྟེ་ཞེས་བྱ་བ་ནི་གལ་ཏེ་ཕོ་དང་མོའི་དབང་པོ་མེད་པ་ཞིག་ཡིན་ནོ། །འདི་ལྟར་བསྐལ་པ་དང་པོ་པ་རྣམས་ལྟ་བུའོ་ཞེས་བྱ་བ་ནི་དུས་ཀྱི་དང་པོ་བྱུང་བ་རྣམས་ཏེ། སྔ་བྱུང་སེམས་ཅན་གཟུག་ཅན་བཞིན། །ཞེས་འབྱུང་བའི་ཕྱིར་རོ། །དྲུག་གང་ཞེ་ན། མིག་ལ་སོགས་པ་ལྔ་

དང་དྲུག་པ་སྲོག་གི་དབང་པོའོ། །སྩོགས་པ་ཞེས་བྱ་བའི་སྒྲས་ནི་དམྱལ་བ་ལ་སོགས་པ་གཟུང་སྟེ། སྲིད་པ་བར་མ་དང་སྐྱེ་བའི་སྲིད་པར་ཉིང་མཚམས་སྦྱོར་བའི་གནས་སྐབས་ན་དེ་དག་དང་པོར་འཐོབ་བོ། ཡང་ཅི་རྫུས་ཏེ་སྐྱེ་བ་དག་ལ་ཡང་མཚན་གཉིས་པ་ཡོད་དམ་

ཞེ་ན་ཞེས་བྱ་བ་ལ། ཀླན་ཀ་བའི་བསམ་པ་ནི་མཚན་གཉིས་འབྱུང་བ་ནི་དམན་པ་ཡིན་ལ་རྫུས་ཏེ་སྐྱེ་བའི་སྐྱེ་གནས་ནི་ཁྱད་པར་ཅན་ཡིན་ན་འདི་གཉིས་ཇི་ལྟར་ལྡན་སྙམ་དུ་བསམས་པ་ཡིན་ནོ། །གཟུགས་གཙོ་བོ་ཡིན་པའི་ཕྱིར་གཟུགས་རྣམས་ཞེས་བསྟན་ཏེ་ཞེས་བྱ་བ་ལ།

གཟུགས་གཙོ་བོ་ཡིན་པའི་ཕྱིར་ཞེས་བྱ་བ་ནི་གཟུགས་རྣམས་དང་བའི་ཕྱིར་ཏེ། འོད་གསལ་བའི་ཕྱིར་ཞེས་བྱ་བའི་ཐ་ཚིག་གོ། །རྣམ་པ་གཅིག་ཏུ་གཟུགས་ཀྱི་ཁམས་ནི་འདོད་པའི་ཡོན་ཏན་གཙོ་བོ་མ་ཡིན་ནོ། །འོ་ན་ཅི་ཞེ་ན། གཟུགས་ཙམ་གཙོ་བོ་ཡིན་ཏེ། གཟུགས་

མེད་པ་བཞིན་དུ་གཟུགས་མེད་པ་གཙོ་བོ་ཡང་མ་ཡིན་ནོ། །མདོ་ལས་ཀྱང་ཞེས་བྱ་བ་ནི་མདོ་ལས་ཀྱང་འདི་ལྟ་བུ་སྣང་བས་འདི་བདག་གིས་བྱས་པ་ཁོ་ན་ནི་མ་ཡིན་ནོ་ཞེས་བྱ་བར་སྟོན་པ་ཡིན་ནོ། །གང་དག་གཟུགས་རྣམས་ལས་འདས་ནས་གཟུགས་མེད་པའི་རྣམ་པར་ཐར་པ་ཞི་

བ་དེ་དག་ཀྱང་མི་རྟག་པ་མི་བརྟན་པ་ཡིད་བརྟན་དུ་མི་རུང་བ་རྣམ་པར་འགྱུར་བའི་ཆོས་ཅན་ཡིན་ནོ་ཞེས་བྱ་བ་རྒྱས་པར་གསུངས་པ་ཡིན་ནོ། །རྫུས་ཏེ་སྐྱེ་བ་མཚན་མེད་པ་དག་གིས་རྙེད་པ་གང་ཡིན་པའོ་ཞེས་བྱ་བ་ནི་བསྐལ་པ་དང་པོ་པ་དག་གིས་སོ། །སྙོམས་པར་འཇུག་པ་

རིང་བའི་ཕྱིར་ཞེས་བྱ་བ་ནི་གང་གི་ཕྱིར་སྔར་གཟུགས་ཀྱི་སྙོམས་པར་འཇུག་པ་ཡིན་ལ་ཕྱིས་གཟུགས་མེད་པའི་སྙོམས་པར་འཇུག་པ་ཡིན་པ་དེའི་ཕྱིར་གཟུགས་ཀྱི་ཁམས་པས་གཟུགས་མེད་པའི་ཁམས་གོང་མ་ཡིན་ནོ། །སྐྱེ་བའི་མཆོག་ཡིན་པའི་ཕྱིར་ཞེས་བྱ་བ་ནི་གང་གི་ཕྱིར་སྐྱེ་

Vol. 142 · folio 101a

བའི་སྒོ་ནས་གཟུགས་ཀྱི་ཁམས་པས་གཟུགས་མེད་པའི་ཁམས་མཆོག་ཡིན་ཏེ། དེ་ན་བསྐལ་པ་སྟོང་ཕྲག་དུ་མར་རབ་ཏུ་ཞི་བའི་རྣམ་པར་སྨིན་པར་འགྱུར་བ་དེའི་ཕྱིར་ཡང་འདི་གོང་མ་ཡིན་གྱི་སྐྱེ་བའི་ཡུལ་གྱི་སྒོ་ནས་ནི་མ་ཡིན་ཏེ། གཟུགས་

མེད་ཁམས་ན་གནས་མེད་དོ། །ཞེས་འབྱུང་བའི་ཕྱིར་རོ། །གཟུགས་མེད་དག་ཏུ་འཆི་བ་ནི་ཞེས་བྱ་བ་ནི་འཆི་བར་འགྱུར་བ་ན་སྟེ་གཟུགས་མེད་པའི་ཁམས་ན་ནི་དབང་པོ་འདི་གསུམ་ཁོ་ན་འགག་པར་འགྱུར་རོ། །འདི་ནི་དམིགས་ཀྱིས་བསལ་བ་དང་བཅས་པ་ཡིན་པར་རིག་

པར་བྱ་སྟེ། དགེ་ལ་ཐམས་ཅད་དག་ཏུ་ལྔ། །ཞེས་འབྱུང་བའི་ཕྱིར་རོ། །གཟུགས་ན་བརྒྱད་ཅེས་བྱ་བ་ནི་གཟུགས་ཀྱི་ཁམས་ནི་དེ་དག་ཉིད་མིག་ལ་སོགས་པ་ལྔ་དང་བཅས་ཏེ་བརྒྱད་ཁོ་ན་ཅིག་ཅར་འགག་པར་འགྱུར་ཏེ། དབང་པོ་ཚང་བར་འཆི་བའི་ཕྱིར་རོ། །དེ་ཉིད་ཀྱི་ཕྱིར་

རྫུས་ཏེ་སྐྱེ་བ་ཐམས་ཅད་ནི་དབང་པོ་རྣམས་ཚང་བར་སྐྱེ་ཞིང་འཆིའོ་ཞེས་བྱ་བ་སྨོས་སོ། །འདོད་པར་བཅུ་འམ་དགུ་འམ་བརྒྱད། །ཅེས་བྱ་བ་ནི་མཚན་གཉིས་པ་ཞིག་ཡིན་ལ་གལ་ཏེ་དབང་པོ་ཚང་ན་བཅུ་འགག་པར་འགྱུར་རོ། །མཚན་གཅིག་པ་ཞིག་ཡིན་ན་ནི་དགུའོ། །མཚན་

མེད་པ་ཞིག་ཡིན་ན་ནི་བརྒྱད་དེ། གལ་ཏེ་དབང་པོ་མ་ཚང་བ་ལོང་བའམ་འོན་པ་ཞིག་ཡིན་ན་ནི་དེའི་ཚེ་དབང་པོ་དབྲི་བར་བྱའོ། །འདོད་པའི་ཁམས་ཀྱི་འདི་ཐམས་ཅད་ཀྱང་དམིགས་ཀྱིས་བསལ་བ་དང་བཅས་པ་ཁོ་ན་ཡིན་པར་རིག་པར་བྱའོ། །དམིགས་ཀྱིས་བསལ་བ་དེ་བསྟན་

པའི་ཕྱིར། རིམ་གྱིས་འཆི་བ་དག་ལ་བཞི། །ཞེས་བྱ་བ་སྨོས་སོ། །དེ་རྣམས་ལ་ནི་སོ་སོར་འགག་པ་མེད་དོ་ཞེས་བྱ་བ་འདི་དག་ནི་འདོད་པའི་ཁམས་ན་ཕན་ཚུན་བྲལ་ཏེ་འགག་པ་མེད་དོ་སྙམ་དུ་བསམ་པ་ཡིན་ནོ། །དགེ་ལ་ཀུན་ཏུ་ལྔ་ཡང་ཡིན། །ཞེས་བྱ་བ་འདི་ནི། གཟུགས་མེད་

དག་ཏུ་འཆི་བ་ནི། །ཡིད་དང་སྲོག་དང་བཏང་སྙོམས་ཉིད། །ཅེས་བྱ་བ་དེ་ལྟ་བུ་ལ་སོགས་པ་འཆི་བའི་ཚུལ་གོང་དུ་བཤད་པ་ཐམས་ཅད་ཀྱི་དམིགས་ཀྱིས་བསལ་བ་ཡིན་ནོ། །འཆི་བའི་སེམས་ནི་རྣམ་པ་གསུམ་སྲིད་དེ་ཉོན་མོངས་པ་ཅན་དང་ལུང་དུ་མ་བསྟན་པ་དང་དགེ་བའོ། །

Vol. 142 · folio 101b

དེ་ལ་ཉོན་མོངས་པ་ཅན་དང་ལུང་དུ་མ་བསྟན་པའི་འཆི་བའི་ཚུལ་ནི་སྤྱིར་བསྟན་པའི་ཚུལ་གྱིས་བཤད་ཟིན་ཏོ། །དགེ་བའི་སེམས་ཀྱིས་འཆི་བ་ལ་ནི་དད་པ་ལ་སོགས་པ་ལྔ་བསྣན་པར་བྱ་སྟེ། དད་པ་ལ་སོགས་པ་འདི་དག་ནི་དགེ་བའི་སེམས་ལ་གདོན་མི་ཟ་བར་ཡོད་དོ། །དེས་ན་

གང་དུ་གསུམ་བཤད་པ་དེར་ནི་བརྒྱད་དོ། །གང་དུ་བརྒྱད་ཡིན་པ་དེར་ནི་བཅུ་གསུམ་མོ། །གང་དུ་བཅུ་ཡིན་པ་དེར་ནི་བཅོ་ལྔའོ། །གང་དུ་དགུ་ཡིན་པ་དེར་ནི་བཅུ་བཞིའོ། །ཡང་གང་དུ་བརྒྱད་ཡིན་པ་དེར་ནི་བཅུ་གསུམ་མོ། །གང་དུ་བཞི་ཡིན་པ་དེར་ནི་དགུའོ་ཞེས་བྱ་བ་

རྒྱས་པར་བརྩི་བར་བྱའོ། །གཟུགས་དང་གཟུགས་མེད་པ་ཁམས་དག་ན་ནི་རིམ་གྱིས་འཆི་བ་མེད་དོ། །དབང་པོའི་སྐབས་སུ་དབང་པོའི་ཆོས་ཐམས་ཅད་དཔྱད་པར་བྱ་སྟེ་ཞེས་བྱ་བ་ནི་ཁ་ཅིག་ན་རེ་དབང་པོའི་སྐབས་སུ་བྱ་བ་ནི་དབང་པོའི་ཆོས་ཏེ་དབང་པོའི་གནས་སྐབས་ཀྱི་ཁྱད་

པར་རམ་བྱེད་པའི་ཁྱད་པར་ཐམས་ཅད་དཔྱད་པར་བྱ་སྟེ་ཞེས་ཟེར་རོ། །གཞན་དག་ན་རེ་དབང་པོའི་སྐབས་ཏེ་དབང་པོའི་ཕུང་པོ་ལས་དབང་པོའི་ཆོས་གནས་སྐབས་ཀྱི་ཁྱད་པར་རམ་བྱེད་པའི་ཁྱད་པར་ཐམས་ཅད་དཔྱད་དེ་བསྟན་བཅོས་འདི་ཡང་བསྡུས་པ་ཡིན་པའི་ཕྱིར་རོ་སྙམ་དུ་

བསམས་པ་ཡིན་ནོ་ཞེས་ཟེར་རོ། །འབྲས་བུ་ཐ་མ་གཉིས་དགུས་ཐོབ། །ཅེས་བྱ་བ་ནི་དབང་པོ་དགུ་དག་གིས་འཐོབ་པ་ནི་དགུས་འཐོབ་པའོ། །གང་ཞིག་ཅེ་ན། འབྲས་བུ་ཐ་མ་གཉིས་སོ། །ཐ་མ་ན་འདུག་པ་ནི་ཐ་མ་དག་གོ། །འབྲས་བུ་ཐ་མ་ནི་འབྲས་བུ་ཐ་མ་དག་སྟེ་དེ་

གཉིས་སོ། །ཡང་ཐ་མ་དག་ཀྱང་གང་ཡིན་ཞེ་ན་རྒྱུན་དུ་ཞུགས་པ་དང་དགྲ་བཅོམ་པ་ཉིད་ཀྱི་འབྲས་བུའོ་ཞེས་བྱ་བ་ནི་ཇི་ལྟར་དབྱུག་པ་ལ་ཐ་མ་གཉིས་ཡོད་པ་དེ་བཞིན་དུ་སྦྲེངས་ཏེ་འདུག་པ་རྣམས་ལས་རྒྱུན་དུ་ཞུགས་པའི་འབྲས་བུ་དང་དགྲ་བཅོམ་པ་ཉིད་ཀྱི་འབྲས་བུ་ནི་ཐ་

མ་ཡིན་ནོ། །ལན་ཅིག་ཕྱིར་འོང་བའི་འབྲས་བུ་དང་ཕྱིར་མི་འོང་བའི་འབྲས་བུ་ནི་བར་མ་དག་ཡིན་ནོ། །འབྲས་བུ་ཐ་མ་དེ་གཉིས་ནི་དབང་པོ་དགུ་ཁོ་ནས་འཐོབ་སྟེ། དགུ་པོ་གང་དག་གིས་ཤེ་ན། དད་པ་ལ་སོགས་པ་དང་། ཀུན་ཤེས་པ་དང་ལྡན་པའི་དབང་པོ་མ་

Vol. 142 · folio 102a

གཏོགས་པ་དག་དང་། ཡིད་དང་བཏང་སྙོམས་ཀྱི་དབང་པོ་དང་དགུས་འཐོབ་སྟེ་ཞེས་བྱ་བ་སྨོས་སོ། །དེ་ལ་མངོན་པར་རྟོགས་པའི་རིམ་པ་ནི་འདི་ལྟ་བུ་ཡིན་ཏེ་སྡུག་བསྔལ་ལ་ཆོས་ཤེས་པའི་བཟོད་པ་དང་། སྡུག་བསྔལ་ལ་ཆོས་ཤེས་པ་དང་། སྡུག་

བསྔལ་ལ་རྗེས་སུ་ཤེས་པའི་བཟོད་པ་དང་། སྡུག་བསྔལ་ལ་རྗེས་སུ་ཤེས་པ་དང་། ཀུན་འབྱུང་བ་ལ་ཆོས་ཤེས་པའི་བཟོད་པ་དང་། ཀུན་འབྱུང་བ་ལ་ཆོས་ཤེས་པ་དང་། ཀུན་འབྱུང་བ་ལ་རྗེས་སུ་ཤེས་པའི་བཟོད་པ་དང་། ཀུན་འབྱུང་བ་ལ་རྗེས་སུ་ཤེས་པ་དང་། འགོག་པ་

ལ་ཆོས་ཤེས་པའི་བཟོད་པ་དང་། འགོག་པ་ལ་ཆོས་ཤེས་པ་དང་། འགོག་པ་ལ་རྗེས་སུ་ཤེས་པའི་བཟོད་པ་དང་། འགོག་པ་ལ་རྗེས་སུ་ཤེས་པ་དང་། ལམ་ལ་ཆོས་ཤེས་པའི་བཟོད་པ་དང་། ལམ་ལ་ཆོས་ཤེས་པ་དང་། ལམ་ལ་རྗེས་སུ་ཤེས་པའི་བཟོད་པ་

དང་། ལམ་ལ་རྗེས་སུ་ཤེས་པ་ཞེས་བྱ་བ་སྐད་ཅིག་མ་བཅུ་དྲུག་ནི་མངོན་པར་རྟོགས་པ་ཞེས་བྱའོ། །དེ་ལ་དེ་ལས་སྐད་ཅིག་བཅྭ་ལྔ་ནི། །མ་མཐོང་མཐོང་ཕྱིར་མཐོང་བའི་ལམ། །ཞེས་འབྱུང་བའི་ཕྱིར་སྡུག་བསྔལ་ལ་ཆོས་ཤེས་པའི་བཟོད་པ་ནས་ལམ་ལ་རྗེས་སུ་ཤེས་པའི་བཟོད་

པའི་བར་སྐད་ཅིག་མ་བཅོ་ལྔ་ནི་མཐོང་བའི་ལམ་ཡིན་ཏེ། དེ་ནི་ཀུན་ཤེས་པར་བྱེད་པའི་དབང་པོ་ཞེས་བྱའོ། །སྐད་ཅིག་མ་བཅུ་དྲུག་པ་ལམ་ལ་རྗེས་སུ་ཤེས་པ་དེ་ནི་བསྒོམ་པའི་ལམ་ཡིན་ལ། དེ་ནས་བཟུང་སྟེ། རྡོ་རྗེ་ལྟ་བུའི་ཏིང་ངེ་འཛིན་གྱི་བར་གྱི་ཟག་པ་མེད་པའི་ལམ་དེ་ཐམས་

ཅད་ཀྱང་བསྒོམ་པའི་ལམ་ཡིན་ཏེ། དེ་ནི་ཀུན་ཤེས་པའི་དབང་པོ་ཞེས་བྱའོ། །དེ་ལ་རྒྱུན་དུ་ཞུགས་པའི་འབྲས་བུ་ནི་ལམ་ལ་རྗེས་སུ་ཤེས་པའི་བཟོད་པའི་གནས་སྐབས་ན་འཐོབ་བོ། །དེ་ན་ནི་དད་པ་ལ་སོགས་པའི་དབང་པོ་ལྔ་གདོན་མི་ཟ་བར་ཡོད་དེ་གནས་སྐབས་དེ་ནི་དགེ་བ་

ཡིན་པའི་ཕྱིར་རོ། །ལམ་ལ་རྗེས་སུ་ཤེས་པའི་བཟོད་པ་ཀུན་ཤེས་པར་བྱེད་པའི་དབང་པོའི་ངོ་བོ་ཉིད་འདི་ནི་ད་ལྟར་གྱི་ཡིན་ནོ། །ཡིད་ཀྱི་དབང་པོ་ཡང་དེ་དང་མཚུངས་པར་ལྡན་པ་ཡིན་ནོ། །མི་ལྕོགས་པ་མེད་པ་ལ་བརྟེན་པ་ཡིན་པའི་ཕྱིར་བཏང་སྙོམས་ཀྱི་དབང་པོ་ཡང་

Vol. 142 · folio 102b

གདོན་མི་ཟ་བར་ཡོད་དོ། །མི་ལྕོགས་པ་མེད་པ་ནི་བཏང་སྙོམས་ཀྱི་དབང་པོ་དང་མཚུངས་པར་ལྡན་པའི་ཕྱིར་རོ། །གནས་སྐབས་དེ་ན་ལམ་ལ་རྗེས་སུ་ཤེས་པ་ཀུན་ཤེས་པའི་དབང་པོའི་ངོ་བོ་ཉིད་ནི་སྐྱེ་བ་ལ་མངོན་དུ་ཕྱོགས་པར་འདུག་པ་ཡིན་ནོ། །དེའི་ཕྱིར་འབྲས་བུ་དེ་ནི་དད་པ་ལ་སོགས་

པ་ལྔ་དང་ཀུན་ཤེས་པར་བྱེད་པའི་དབང་པོ་དང་ཀུན་ཤེས་པའི་དབང་པོ་དང་ཡིད་དང་བཏང་སྙོམས་ཀྱི་དབང་པོ་དག་སྟེ། དགུས་འཐོབ་པར་འགྱུར་རོ། །གཉི་གས་ཀྱང་དེ་འཐོབ་སྟེ་ཞེས་བྱ་བ་ནི་དེ་ནི་བར་ཆད་མེད་པའི་ལམ་ཀུན་ཤེས་པར་བྱེད་པའི་དབང་པོའི་ངོ་བོ་ཉིད་དང་རྣམ་པར་གྲོལ་བའི་

ལམ་ཀུན་ཤེས་པའི་དབང་པོའི་ངོ་བོ་ཉིད་ཀྱིས་འཐོབ་བོ། །གོ་རིམས་བཞིན་དུ་འབྲལ་བའི་ཐོབ་པ་འདྲེན་པར་བྱེད་པ་དང་རྟེན་ཡིན་པའི་ཕྱིར་ཞེས་བྱ་བ་ནི་བར་ཆད་མེད་པའི་ལམ་ནི་བྲལ་བའི་ཐོབ་པ་དེ་འདྲེན་པར་བྱེད་པ་ཡིན་པའི་ཕྱིར་ཏེ། སྐྱེ་བར་བྱེད་པ་ཡིན་པའི་ཕྱིར་དང་། རྣམ་པར་གྲོལ་བའི་

ལམ་ནི་དེའི་རྟེན་ཡིན་པའི་ཕྱིར་ཏེ་གཞི་ཡིན་པའི་ཕྱིར་ཞེས་བྱ་བའི་ཐ་ཚིག་གོ། །།བམ་པོ་བཅུ་པ། གཉིས་ཀྱིས་ཆོམ་རྐུན་ཕྱིར་ཕྱུང་བ་དང་སྒོ་བཅད་པ་དང་འདྲ་སྟེ། ཇི་ལྟར་མི་གཉིས་ལས་གཅིག་གིས་ནི་ཆོམ་རྐུན་ཕྱིར་འབྱིན་པར་བྱེད་ཅིང་གཉིས་པས་དེ་ལ་སྒོ་གཅོད་པར་བྱེད་

པ་དེ་བཞིན་དུ། བར་ཆད་མེད་པའི་ལམ་གྱིས་ནི་བྲལ་བའི་ཐོབ་པ་འདྲེན་པར་བྱེད་དེ། ཉོན་མོངས་པའི་ཐོབ་པ་བླངས་ཏེ་འགག་པའི་ཕྱིར་རོ། །རྣམ་པར་གྲོལ་བའི་ལམ་གྱིས་ནི་རྟེན་བྱེད་དེ་བྲལ་བའི་ཐོབ་པ་དང་ལྷན་ཅིག་སྐྱེས་པའི་ཕྱིར་རོ། །དགྲ་བཅོམ་པ་ཉིད་ནི་དད་པ་ལ་སོགས་པ་དང་།

ཀུན་ཤེས་པར་བྱེད་པའི་དབང་པོ་མ་གཏོགས་པ་དག་དང་ཞེས་བྱ་བ་ནི་དགྲ་བཅོམ་པ་ཉིད་ཀྱི་འབྲས་བུ་ནི་རྡོ་རྗེ་ལྟ་བུའི་ཏིང་ངེ་འཛིན་གྱི་གནས་སྐབས་ན་ཐོབ་སྟེ། དད་པ་ལ་སོགས་པ་དང་ཡིད་ནི་སྔ་མ་བཞིན་ནོ། །གནས་སྐབས་དེ་ན་བར་ཆད་མེད་པའི་ལམ་རྡོ་རྗེ་ལྟ་བུའི་ཏིང་ངེ་འཛིན་གྱི་ཚོགས་

ཀུན་ཤེས་པའི་དབང་པོ་ངོ་བོ་ཉིད་ནི་ད་ལྟར་གྱི་ཡིན་ནོ། །བདེ་བ་དང་ཡིད་བདེ་བ་དང་བཏང་སྙོམས་ཀྱི་དབང་པོ་རྣམས་ལས་གང་ཡང་རུང་བ་ཞིག་ཅེས་བྱ་བ་ནི་གལ་ཏེ་བསམ་གཏན་གསུམ་པ་ལ་བརྟེན་ནས་དགྲ་བཅོམ་པ་ཉིད་འཐོབ་ན་ནི་དེ་ན་བདེ་བའི་དབང་པོ་ད་ལྟར་གྱི་ཡིན་ནོ། །

Vol. 142 · folio 103a

འོན་ཏེ་བསམ་གཏན་དང་པོའམ་གཉིས་པ་ལ་བརྟེན་ནས་འཐོབ་ན་ནི་དེ་ན་ཡིད་བདེ་བའི་དབང་པོ་ཡིན་ནོ། །ཇི་སྟེ་མི་ལྕོགས་པ་མེད་པ་དང་བསམ་གཏན་ཁྱད་པར་ཅན་དང་བསམ་གཏན་བཞི་པ་དང་རྣམ་ཤེས་དང་ནམ་མཁའ་དང་ཅི་ཡང་མེད་པའི་སྐྱེ་མཆེད་རྣམས་

ལས་གང་ཡང་རུང་བ་ཞིག་ལ་བརྟེན་ནས་འཐོབ་ན་ནི་དེ་ན་བཏང་སྙོམས་ཀྱི་དབང་པོ་ད་ལྟར་གྱི་ཡིན་ནོ། །གནས་སྐབས་འདི་ན་རྣམ་པར་གྲོལ་བའི་ལམ་ཟད་པ་ཤེས་པའི་ཚོགས་ཀུན་ཤེས་པ་དང་ལྡན་པའི་དབང་པོའི་ངོ་བོ་ཉིད་ནི་སྐྱེ་བ་ལ་མངོན་དུ་ཕྱོགས་པ་ཡིན་ནོ། །དེའི་ཕྱིར་འབྲས་བུ་

དེ་ནི་དད་པ་ལ་སོགས་པ་ལྔ་དང་ཀུན་ཤེས་པའི་དབང་པོ་དང་ཀུན་ཤེས་པ་དང་ལྡན་པའི་དབང་པོ་དང་། ཡིད་ཀྱི་དབང་པོ་དང་བདེ་བ་དང་ཡིད་བདེ་བ་དང་བཏང་སྙོམས་ཀྱི་དབང་པོ་རྣམས་ལས་གང་ཡང་རུང་བ་ཞིག་སྟེ། དགུས་འཐོབ་པར་འགྱུར་རོ། །དེ་ནི་བར་ཆད་མེད་པའི་ལམ་དང་རྣམ་པར་གྲོལ་བའི་

ལམ་དག་གིས་འཐོབ་ཅེས་བྱ་བ་ནི། སྔ་མ་བཞིན་དུ་བཤད་པར་བྱའོ། །གཉིས་ནི་བདུན་དང་བརྒྱད་དང་དགུས་ཞེས་བྱ་བ་ནི་འབྲས་བུ་ཞེས་བྱ་བ་ཚིག་ལྷག་མ་ཡིན་ནོ། །རེ་རེ་ཞིང་ཞེས་བྱ་བ་རྒྱས་པར་འབྱུང་བ་ནི་ལན་ཅིག་ཕྱིར་འོང་བའི་འབྲས་བུ་ཡང་བདུན་ནམ་བརྒྱད་དམ་དགུ་དག་གིས་

འཐོབ་ལ་ཕྱིར་མི་འོང་བའི་འབྲས་བུ་ཡང་དེ་དང་འདྲའོ། །དེ་བསྟན་པའི་ཕྱིར། རེ་ཞིག་གལ་ཏེ་ལན་ཅིག་ཕྱིར་འོང་བའི་འབྲས་བུ་མཐར་གྱིས་འཐོབ་ལ་དེ་ལ་ཡང་འཇིག་རྟེན་པའི་ལམ་གྱིས་འཐོབ་ན་ནི་ཞེས་བྱ་བ་སྨོས་ཏེ། འཇིག་རྟེན་པའི་ལམ་ནི། ཞི་སོགས་རགས་སོགས་རྣམ་པ་ཅན། །

གོང་དང་འོག་མ་སྤྱོད་ཡུལ་ཅན། །ཞེས་འབྱུང་བའི་ཕྱིར་ཞི་བ་ལ་སོགས་པ་དང་རགས་པ་ལ་སོགས་པའི་རྣམ་པ་ཅན་ཡིན་ཏེ། དེས་ན་འདི་ན་རྣལ་འབྱོར་པ་ས་གོང་མ་ལ་ནི་ཞི་བ་དང་གྱ་ནོམ་པ་དང་ངེས་པར་འབྱུང་བར་ལྟ་ལ་འོག་མ་ནི་རགས་པ་དང་སྡུག་བསྔལ་བ་དང་རྩིག་པ་སྟུག་པོ་ལྟ་

བུར་ལྟའོ། །དེ་ཡང་རྣམ་པ་བཞིར་བརྗོད་དེ། སྦྱོར་བའི་ལམ་དང་བར་ཆད་མེད་པའི་ལམ་དང་རྣམ་པར་གྲོལ་བའི་ལམ་དང་ཁྱད་པར་ཅན་གྱི་ལམ་མོ། །དེ་ལ་སྦྱོར་བའི་ལམ་ནི་གང་ལ་བར་ཆད་མེད་པའི་ལམ་སྐྱེ་བ་སྟེ། དེ་ཡང་གང་གིས་ན་ཉོན་མོངས་པ་རྣམས་སྤོང་བར་བྱེད་པ་ཡིན་ནོ། །རྣམ་

Vol. 142 · folio 103b

པར་གྲོལ་བའི་ལམ་ཡང་བར་ཆད་མེད་པའི་ལམ་གྱི་མཇུག་ཐོགས་སུ་སྐྱེ་བ་སྟེ། ཉོན་མོངས་པ་སྤངས་པའི་ཐོབ་པའི་རྟེན་བྱེད་པ་ཡིན་ནོ། །ཁྱད་པར་ཅན་གྱི་ལམ་ནི་དེ་ཡན་ཆད་ཀྱི་ལམ་ཁྱད་པར་ཅན་ཡིན་ཏེ། ལམ་དེས་ནི་ཉོན་མོངས་པའི་རྣམ་པ་ཆེན་པོའི་ཆེན་པོ་དང་ཆེན་པོའི་

འབྲིང་པོ་དང་ཆེན་པོའི་ཆུང་ངུ་དང་། འབྲིང་པོའི་ཆེན་པོ་དང་འབྲིང་པོ་དང་འབྲིང་པོའི་ཆུང་ངུ་དང་། ཆུང་ངུའི་ཆེན་པོ་དང་ཆུང་ངུའི་འབྲིང་པོ་དང་ཆུང་ངུའི་ཆུང་ངུ་ཞེས་བྱ་བ་དགུ་སྤང་བར་བྱ་བ་ཡིན་ནོ། །དེ་ལ་གལ་ཏེ་སོ་སོའི་སྐྱེ་བོ་ཞིག་སྤོང་བར་བྱེད་ན་ནི་དེས་མཐོང་བ་དང་བསྒོམ་པས་སྤང་

བར་བྱ་བའི་ཉོན་མོངས་པ་རྣམས་བསྲེས་ཏེ་ཆུང་ངུ་དང་ཆེན་པོ་ལ་སོགས་པའི་བྱེ་བྲག་གི་རྣམ་པར་དགུར་བྱས་ནས་སྤོང་སྟེ། བར་ཆད་མེད་པ་དང་རྣམ་པར་གྲོལ་བའི་ལམ་ཆུང་ངུའི་ཆུང་ངུ་དག་གིས་ནི་ཉོན་མོངས་པའི་རྣམ་པ་ཆེན་པོའི་ཆེན་པོ་སྤོང་ལ། དེ་བཞིན་དུ་བར་ཆད་མེད་པ་དང་རྣམ་པར་

གྲོལ་བའི་ལམ་ཆེན་པོའི་ཆེན་པོ་དག་གིས་ནི་ཉོན་མོངས་པའི་རྣམ་པ་ཆུང་ངུའི་ཆུང་ངུའི་བར་དུ་སྤོང་ངོ་། །འཕགས་པ་ནི་བསྒོམ་པས་སྤང་བར་བྱ་བའི་ཉོན་མོངས་པ་དག་ཁོ་ན་དེ་བཞིན་དུ་རྣམ་པ་དགུར་བྱས་ནས་སྤོང་སྟེ། མཐོང་བས་སྤང་བར་བྱ་བ་རྣམས་ནི་མཐོང་བའི་ལམ་གྱིས་སྔར་སྤངས་

ཟིན་པའི་ཕྱིར་རོ། །འཇིག་རྟེན་ལས་འདས་པའི་བསྒོམ་པའི་ལམ་ནི་མི་རྟོག་པ་ལ་སོགས་པའི་རྣམ་པའི་བྱེ་བྲག་གིས་རྣམ་པ་བཅུ་དྲུག་ཡིན་ལ། དེ་ཡང་དེ་བཞིན་དུ་སྦྱོར་བའི་ལམ་ལ་སོགས་པར་ཁྱད་པར་གྱིས་བཞིར་དབྱེའོ། །འདིར་ཡང་བར་ཆད་མེད་པ་དང་རྣམ་པར་གྲོལ་བའི་ལམ་ཆུང་

ངུའི་ཆུང་ངུ་དག་གིས་ནི་ཉོན་མོངས་པའི་རྣམ་པ་ཆེན་པོའི་ཆེན་པོ་སྤོང་ལ། དེ་བཞིན་དུ་བར་ཆད་མེད་པ་དང་རྣམ་པར་གྲོལ་བའི་ལམ་ཆེན་པོའི་ཆེན་པོས་ནི་ཉོན་མོངས་པའི་རྣམ་པ་ཆུང་ངུའི་ཆུང་ངུ་སྤོང་སྟེ། འདི་ནི་འཇིག་རྟེན་པ་དང་འཇིག་རྟེན་ལས་འདས་པའི་ལམ་དག་གི་ཕྱོགས་ཙམ་

ཞིག་བསྟན་པ་ཡིན་ནོ། །དེ་ལ་ལན་ཅིག་ཕྱིར་འོང་བའི་འབྲས་བུ་མཐར་གྱིས་འཐོབ་པ་འམ། ཕལ་ཆེར་ལ་འདོད་ཆགས་དང་བྲལ་བས་འཐོབ་ཀྱང་རུང་སྟེ། དེ་ལ་མཐར་གྱིས་པ་ནི་གང་རྒྱུན་ཏུ་ཞུགས་པའི་འབྲས་བུ་ཐོབ་ནས་རིམ་གྱིས་ལན་ཅིག་ཕྱིར་འོང་བའི་འབྲས་བུ་ཐོབ་པ་

Vol. 142 · folio 104a

ཡིན་ནོ། །འདི་ཡང་གང་ཞིག་ཅེ་ན། གང་ཞིག་འཆིང་བ་མཐའ་དག་དང་ལྡན་པ་ཞིག་གམ། གལ་ཏེ་རྣམ་པ་གཅིག་ལ་སོགས་པ་སྤངས་ལ་རྣམ་པ་དྲུག་པ་མ་སྤངས་པར་ངེས་པ་ལ་འཇུག་པ་ཡིན་ཏེ། དེ་ནི་སེམས་ཀྱི་སྐད་ཅིག་མ་བཅུ་དྲུག་པ་ལ་

རྒྱུན་དུ་ཞུགས་པ་ཡིན་ནོ། །དེ་ཞི་གནས་སྤྱད་པ་ཡིན་པའི་ཕྱིར་བསྒོམ་པས་སྤང་བར་བྱ་བའི་ཕྱིར་རྣམ་པ་གཅིག་གམ་དྲུག་པ་ཁོ་ནའི་བར་སྤང་བར་བྱ་བའི་དོན་དུ་འཇིག་རྟེན་པའི་ལམ་ཡང་སྐྱེད་པར་བྱེད་ན་ནི་དེ་རྣམ་པ་དྲུག་སྤངས་ན་ལན་ཅིག་ཕྱིར་འོང་བའི་འབྲས་བུ་འཐོབ་ལ། འབྲས་

བུ་དེ་ནི་དད་པ་ལ་སོགས་པ་ལྔ་དང་ཡིད་ཀྱི་དབང་པོ་ལྔ་དང་མི་ལྕོགས་པ་མེད་པ་ལ་བརྟེན་པ་ཡིན་པའི་ཕྱིར་བདུན་པ་བཏང་སྙོམས་ཀྱི་དབང་པོ་དང་དབང་པོ་བདུན་དག་གིས་འཐོབ་བོ། །འོན་ཏེ་འཇིག་རྟེན་ལས་འདས་པའི་ལམ་གྱིས་འཐོབ་ན་ནི་དེ་དག་ཁོ་ན་དང་བརྒྱད་པ་ཀུན་ཤེས་པའི་དབང་པོ་དང་།

དབང་པོ་བརྒྱད་དག་གིས་འཐོབ་སྟེ། དད་པ་ལ་སོགས་པའི་དབང་པོ་དེ་དག་ཁོ་ན་ཟག་པ་མེད་པ་ཡིན་པའི་ཕྱིར་ཀུན་ཤེས་པའི་དབང་པོ་ཞེས་བྱ་བའི་མིང་འཐོབ་བོ། །ཅི་སྟེ་ཕལ་ཆེར་ལ་འདོད་ཆགས་དང་བྲལ་བ་ཞིག་གིས་འཐོབ་ན་ནི་ཞེས་བྱ་བ་ནི་གང་ཞིག་སོ་སོའི་སྐྱེ་བོའི་གནས་སྐབས་ལ་

འཇིག་རྟེན་པའི་ལམ་གྱིས་རྣམ་པ་དྲུག་པ་སྤངས་པར་གྱུར་པ་རྣམ་པ་ཕལ་ཆེར་ལས་འདོད་ཆགས་དང་བྲལ་བའི་ཕྱིར་ཕལ་ཆེར་ལ་འདོད་ཆགས་དང་བྲལ་བ་ཞེས་བྱ་སྟེ། གལ་ཏེ་དེས་ལན་ཅིག་ཕྱིར་འོང་བའི་འབྲས་བུ་འཐོབ་པ་ནའོ། །ཇི་ལྟར་འཐོབ་ཅེ་ན། གོང་དུ་བཤད་པའི་མངོན་

པར་རྟོགས་པའི་རིམ་གྱིས་ལམ་ལ་ཆོས་ཤེས་པའི་བཟོད་པའི་གནས་སྐབས་ན་འཐོབ་བོ། །དགུས་འཐོབ་སྟེ་གང་དག་ཁོ་ནས་རྒྱུན་དུ་ཞུགས་པའི་འབྲས་བུ་འཐོབ་པ་ཡིན་ནོ་ཞེས་བྱ་བ་ནི་དད་པ་ལ་སོགས་པ་དང་ཀུན་ཤེས་པ་དང་ལྡན་པའི་དབང་པོ་མ་གཏོགས་པ་དག་དང་ཡིད་དང་བཏང་

སྙོམས་ཀྱི་དབང་པོ་དག་དང་ཞེས་བྱ་བ་སྔ་མ་བཞིན་དུ་བཤད་པར་བྱ་སྟེ། འདི་ནི་རྒྱུན་དུ་ཞུགས་པའི་འབྲས་བུ་མ་ཐོབ་པ་ཁོ་ནར་སྐད་ཅིག་མ་བཅུ་དྲུག་པ་ཁོ་ན་ལ་ལན་ཅིག་ཕྱིར་འོང་བ་ཡིན་པར་འགྱུར་རོ། །གལ་ཏེ་ཕྱིར་མི་འོང་བའི་འབྲས་བུ་མཐར་གྱིས་འཐོབ་ལ་ཞེས་བྱ་བ་ལ། འདིར་

Vol. 142 · folio 104b

མཐར་གྱིས་པ་ནི་གང་ཞིག་རྒྱུན་ཏུ་ཞུགས་པའི་འབྲས་བུ་དང་ལན་ཅིག་ཕྱིར་འོང་བའི་འབྲས་བུ་ཐོབ་ནས་འབྲས་བུ་འཐོབ་པ་འམ་གང་ཞིག་ཕལ་ཆེར་ལ་འདོད་ཆགས་དང་བྲལ་བར་གྱུར་པས་རྒྱུན་དུ་ཞུགས་པའི་འབྲས་བུ་མ་ཐོབ་པ་ཁོ་ནར་ལན་ཅིག་ཕྱིར་འོང་བའི་འབྲས་བུ་ཉིད་ཐོབ་ནས་ཕྱིར་མི་འོང་

བའི་འབྲས་བུ་ཐོབ་པ་ཡིན་ནོ། །དེ་ཡང་གལ་ཏེ་འཇིག་རྟེན་པའི་ལམ་གྱིས་འཐོབ་ན་ནི་དེ་དབང་པོ་བདུན་གྱིས་འཐོབ་སྟེ་ལན་ཅིག་ཕྱིར་འོང་བའི་འབྲས་བུ་མཐར་གྱིས་པ་ཇི་ལྟ་བ་བཞིན་ནོ་སྙམ་དུ་བསམས་པ་ཡིན་ནོ། །དད་པ་ལ་སོགས་པ་དང་ཡིད་དང་བཏང་སྙོམས་ཀྱི་དབང་པོ་དག་གིས་འཐོབ་

བོ་ཞེས་བྱ་བའི་ཐ་ཚིག་གོ། །འོན་ཏེ་འཇིག་རྟེན་ལས་འདས་པའི་ལམ་གྱིས་འཐོབ་ན་ནི་དེ་བརྒྱད་ཀྱིས་འཐོབ་སྟེ་དེ་དང་འདྲའོ་ཞེས་བྱ་བ་ནི་ལན་ཅིག་ཕྱིར་འོང་བའི་འབྲས་བུ་ཇི་ལྟ་བ་ཁོ་ན་བཞིན་ནོ། །བརྒྱད་ཀྱིས་འཐོབ་ཅེས་བྱ་བ་ནི་ཐ་ཚིག་གོ། །བརྒྱད་པ་ནི་ཀུན་ཤེས་པའི་དབང་པོ་ཡིན་ནོ། །

ཇི་སྟེ་འདོད་ཆགས་དང་བྲལ་བ་ཞིག་གིས་ཐོབ་ན་ནི་ཞེས་བྱ་བ་ནི་གང་ཞིག་འཇིག་རྟེན་པའི་ལམ་གྱིས་རྣམ་པ་དགུ་པ་སྤངས་ཏེ། འདོད་པའི་ཁམས་ཙམ་ལས་འདོད་ཆགས་དང་བྲལ་བའམ་བསམ་གཏན་དང་པོ་ནས་ཅི་ཡང་མེད་པའི་བར་ལས་ཀྱང་འདོད་ཆགས་དང་བྲལ་བ་ཞིག་ཕྱིར་མི་

འོང་བའི་འབྲས་བུ་འཐོབ་ན་ནི་དེ་དགུས་འཐོབ་བོ། །རྒྱུན་དུ་ཞུགས་པའི་འབྲས་བུ་ཇི་ལྟ་བ་བཞིན་པ་ནི་རྒྱུན་དུ་ཞུགས་པའི་འབྲས་བུ་ཡང་མཐོང་བའི་ལམ་གྱིས་འཐོབ་ལ་འདི་ཡང་མཐོང་བའི་ལམ་ཁོ་ནས་འཐོབ་པས་འདྲ་བ་ཡིན་ནོ། །འདི་ནི་ཁྱད་པར་ཡིན་གྱི། རྟེན་གྱི་བྱེ་བྲག་

ལས་བདེ་བ་དང་ཡིད་བདེ་བ་དང་བཏང་སྙོམས་ཀྱི་དབང་པོ་རྣམས་ལས་གང་ཡང་རུང་བ་ཞིག་ཡིན་ནོ་ཞེས་བྱ་བ་ནི་གལ་ཏེ་བསམ་གཏན་གསུམ་པ་ལ་བརྟེན་ནས་ངེས་པ་ལ་འཇུག་ན་ནི་དེ་ལ་བདེ་བའི་དབང་པོ་ཡིན་ནོ། །འོན་ཏེ་བསམ་གཏན་དང་པོ་དང་གཉིས་པ་ལ་བརྟེན་ནས་འཇུག་

ན་ནི་དེ་ན་ཡིད་བདེ་བའི་དབང་པོ་ཡིན་ནོ། །ཅི་སྟེ་མི་ལྕོགས་པ་མེད་པ་དང་བསམ་གཏན་ཁྱད་པར་ཅན་དང་། བསམ་གཏན་བཞི་པ་རྣམས་ལས་གང་ཡང་རུང་བ་ཞིག་ལ་བརྟེན་ནས་འཇུག་པ་ན་ནི་དེ་ན་བཏང་སྙོམས་ཀྱི་དབང་པོ་ཡིན་ནོ། །གང་གི་ཚེ་འདི་མཐར་གྱིས་པ་ཞིག་ཡིན་ལ་

Vol. 142 · folio 105a

ཞེས་བྱ་བ་ནི་གང་གི་ཚེ་འདི་མཐར་གྱིས་པ་སྟེ་སྔོན་འབྲས་བུ་ཐོབ་པ་དབང་པོ་རྣོན་པོ་ཞིག་ཡིན་ལ་དེ་རྣམ་པར་གྲོལ་བའི་ལམ་དགུ་པ་ལས་འཇིག་རྟེན་པའི་ལམ་གྱིས་དངོས་གཞིའི་བསམ་གཏན་ལ་འཇུག་པ་དེའི་ཚེ་ཡང་དབང་པོ་བརྒྱད་ཀྱིས་ཕྱིར་མི་འོང་བའི་འབྲས་

བུ་འཐོབ་སྟེ། དེ་ལ་རྣམ་པར་གྲོལ་བའི་ལམ་ནི་བསམ་གཏན་གྱི་དངོས་གཞིས་བསྡུས་པ་ཡིན་ལ་དེ་ན་ནི་ཡིད་བདེ་བའི་དབང་པོ་ཡིན་ནོ། །བར་ཆད་མེད་པའི་ལམ་ནི་མི་ལྕོགས་པ་མེད་པས་བསྡུས་པ་ཁོ་ན་ཡིན་ཏེ། གལ་ཏེ་འཇུག་ན་དེ་ན་ཡང་བཏང་སྙོམས་ཀྱི་དབང་པོ་ཁོ་ན་ཡིན་གྱི་

གཞན་དུ་ནི་མ་ཡིན་ནོ། །དེ་ན་དད་པ་ལ་སོགས་པ་ལྔ་དང་ཡིད་དང་བཏང་སྙོམས་དང་ཡིད་བདེ་བའི་དབང་པོ་དག་དང་བརྒྱད་ཀྱིས་འཐོབ་བོ། །དེ་ནི་གཉི་གས་ཀྱང་འཐོབ་བོ་ཞེས་བྱ་བ་ནི་བར་ཆད་མེད་པ་དང་རྣམ་པར་གྲོལ་བའི་ལམ་དག་གིས་སོ། །ཆོམ་རྐུན་ཕྱིར་འབྱིན་པ་དང་སྒོ་གཅོད་པ་

བཞིན་ཏེ་འདི་ནི་བཤད་ཟིན་ཏོ། །འོན་ཏེ་འཇིག་རྟེན་ལས་འདས་པའི་ལམ་གྱིས་འཇུག་ན་ནི་ཞེས་བྱ་བ་ནི་མཐར་གྱིས་པ་དབང་པོ་རྣོན་པོ་དེ་ཉིད་ཡིན་པར་རིག་པར་བྱ་སྟེ། སྐབས་ལ་བབ་པ་ཡིན་པའི་ཕྱིར་རོ། །དེ་དབང་པོ་དགུས་འཐོབ་པ་ནི་བཤད་མ་ཐག་པའི་དབང་པོ་དེ་དག་ཁོ་ན་དང་

དགུ་པ་ཀུན་ཤེས་པའི་དབང་པོས་ཏེ། དབང་པོ་དེ་དག་ཉིད་ཟག་པ་མེད་པའི་ཕྱིར་ཀུན་ཤེས་པའི་དབང་པོ་ཞེས་བྱ་བའི་མིང་འཐོབ་བོ། །འདིར་འདི་བརྗོད་པར་བྱ་སྟེ། ཅིའི་ཕྱིར་མཐར་གྱིས་པ་ཁོ་ན་བཤད་ཀྱི། འདོད་ཆགས་དང་བྲལ་བ་སྔོན་དུ་འགྲོ་བ་ནི་མ་ཡིན་ཞེ་ན། འདོད་ཆགས་

དང་བྲལ་བ་སྔོན་དུ་འགྲོ་བ་ནི་མི་ལྕོགས་པ་མེད་པ་ལ་བརྟེན་ཏེ་མཐོང་བའི་ལམ་བསྐྱེད་པས་སེམས་ཀྱི་སྐད་ཅིག་མ་བཅུ་དྲུག་པ་ལ་བསམ་གཏན་དང་པོའི་དངོས་གཞི་ལ་འཇུག་པ་མ་ཡིན་ཏེ། ཐོབ་ཟིན་པ་དེ་ལ་མ་གྲུབ་པའི་ཕྱིར་རོ། །མཐར་གྱིས་པ་ནི་དངོས་གཞིའི་བསམ་གཏན་དོན་དུ་

གཉེར་བ་ཡིན་ཏེ། དེ་སྔོན་མ་ཐོབ་པའི་ཕྱིར་རོ། །དེ་ལྟ་བས་ན་འདི་དངོས་གཞི་ཁོ་ན་ལ་འཇུག་པ་གང་ཡིན་པ་ནི་སྲིད་པ་ཡོད་དོ། །འདོད་ཆགས་དང་བྲལ་བ་སྔོན་དུ་འགྲོ་བ་ནི་བདེན་པ་བཞི་མཐོང་བ་ལ་གུས་པ་བྱས་པ་ཡིན་གྱི་བསམ་གཏན་ལ་ནི་མ་ཡིན་པས་སེམས་ཀྱི་སྐད་ཅིག་མ་བཅུ་

Vol. 142 · folio 105b

དྲུག་པ་དེ་ལ་དངོས་གཞིའི་བསམ་གཏན་ལ་མི་འཇུག་གོ་སྙམ་དུ་བསམ་པ་ཡིན་ནོ། །འབྲས་བུ་ཐ་མ་གཉིས་དགུས་འཐོབ། །ཅེས་བཤད་པ་དེ་འགལ་བར་བསྟན་པའི་ཕྱིར། འོ་ན་ཆོས་མངོན་པ་ལས་ཞེས་བྱ་བ་སྨོས་ཏེ། ཡེ་ཤེས་ལ་འཇུག་པ་ལས་དབང་པོ་དུ་དག་གཅིག་གིས་དགྲ་

བཅོམ་པ་ཉིད་འཐོབ་ཅེ་ན། བཅུ་གཅིག་གིས་འཐོབ་པོ་ཞེས་བཤད་པ་གང་ཡིན་པ་དེ་ཇི་ལྟར་མི་འགལ་སྙམ་དུ་བསམས་པ་ཡིན་ནོ། །འགའ་ཞིག་སྲིད་ཕྱིར་ཞེས་བྱ་བ་ནི་གང་ཟག་གཅིག་འགའ་ཞིག་ལ་སྲིད་ཀྱི་ཐམས་ཅད་ལ་སྲིད་པ་ནི་མ་ཡིན་པ་སྟེ། དབང་པོ་རྟུལ་པོ་འགའ་ཞིག་ཡོངས་སུ་

ཉམས་ཤིང་ཡོངས་སུ་ཉམས་ནས་རྟེན་གྱི་བྱེ་བྲག་གིས་བདེ་བ་དང་ཡིད་བདེ་བ་དང་བཏང་སྙོམས་ཀྱི་དབང་པོ་རྣམ་གྲངས་པ་དག་གིས་དགྲ་བཅོམ་པ་ཉིད་ཐོབ་པར་འགྱུར་བས་དེའི་ཕྱིར་འདི་སྐད་དུ་བཅུ་གཅིག་གིས་ཞེས་བཤད་ཀྱི་སེམས་དང་སེམས་ལས་བྱུང་བ་རྣམས་ནི་རྫས་རེ་རེ་ཞིག་སྐྱེ་

བའི་ཕྱིར་བདེ་བ་དང་ཡིད་བདེ་བ་དང་བཏང་སྙོམས་ཀྱི་དབང་པོ་རྣམས་དུས་གཅིག་ཏུ་ཕྲད་པ་སྲིད་པ་ནི་མེད་དོ་ཞེས་བྱ་བའི་ཐ་ཚིག་གོ། །གང་ཟག་དབང་པོ་རྟུལ་པོ་གང་ཞིག་མི་ལྕོགས་པ་མེད་པའམ་གཞན་གྱི་བཏང་སྙོམས་ཀྱི་དབང་པོ་ལ་བརྟེན་ནས་དགྲ་བཅོམ་པ་ཉིད་འཐོབ་

པར་བྱེད་ན་དེའི་ནི་དེའི་བཏང་སྙོམས་ཀྱི་དབང་པོས་འཐོབ་པ་ཡིན་ནོ། །དེ་ལས་ཀྱང་ཡོངས་སུ་ཉམས་པར་གྱུར་ཏེ་དེའི་འོག་ཏུ་ཡང་བསམ་གཏན་དང་པོ་དང་གཉིས་པ་ལ་བརྟེན་ནས་དགྲ་བཅོམ་པ་ཉིད་འཐོབ་པར་བྱེད་ན་དེའི་དེ་ནི་ཡིད་བདེ་བའི་དབང་པོས་འཐོབ་པ་ཡིན་ནོ། །ཡང་

དེ་ལས་ཀྱང་ཡོངས་སུ་ཉམས་པར་གྱུར་ཏེ་དེའི་འོག་ཏུ་ཡང་དེ་བསམ་གཏན་གསུམ་པ་ལ་བརྟེན་ནས་དགྲ་བཅོམ་པ་ཉིད་འཐོབ་པར་བྱེད་ན་ནི་དེ་ནི་བདེ་བའི་དབང་པོས་འཐོབ་པ་ཡིན་ནོ། །འབྲས་བུ་འཐོབ་པ་དེ་ལ་དད་ལ་སོགས་པ་ལྔ་དང་ཡིད་དང་ཀུན་ཤེས་པ་དང་ཀུན་ཤེས་པར་ལྡན་

པའི་དབང་པོ་རྣམས་དང་བདེ་བ་དང་ཡིད་བདེ་བ་དང་བཏང་སྙོམས་ཀྱི་དབང་པོ་ལས་གང་ཡང་རུང་བ་ཞིག་སྟེ། དབང་པོ་དགུ་ནི་རེ་རེ་ལ་བྱ་བ་བྱེད་པ་ཡིན་ལ། དེ་ཡང་དང་ཡང་འཐོབ་པའི་ཕྱིར་བཅུ་གཅིག་གིས་ཞེས་བཤད་པ་ཡིན་ནོ། །འདི་ཕྱིར་མི་འོང་བ་ལ་ཡང་ཇི་ལྟར་ཐལ་བར་

Vol. 142 · folio 106a

མི་འགྱུར་ཞེ་ན་ཞེས་བྱ་བ་ནི་ཅིའི་ཕྱིར་བསྟན་བཅོས་དེ་ལས་དགྲ་བཅོམ་པ་ཉིད་ཀྱི་འབྲས་བུ་ཁོ་ན་བཅུ་གཅིག་གིས་འཐོབ་པ་ཞེས་བཤད་ཀྱི་ཕྱིར་མི་འོང་བའི་འབྲས་བུ་ཡང་ཞེས་ནི་མ་བཤད་ཅེ་ན། འདི་ནི་ཡོངས་སུ་ཉམས་ཕན་ཆད་ནམ་ཡང་བདེ་བའི་དབང་པོས་

འཐོབ་པ་མེད་དོ་ཞེས་བྱ་བ་ནི་ཕྱིར་མི་འོང་བ་འདི་བསམ་གཏན་གསུམ་པ་ཡན་ཆད་ཀྱི་ས་ཐོབ་པོ་ཞེས་པ་ལས། ས་གོང་མ་ཉིད་ལས་ཡོངས་སུ་ཉམས་པར་གྱུར་ན་འདི་ནི་ཕྱིར་མི་འོང་བའི་འབྲས་བུ་ལས་ཡོངས་སུ་ཉམས་པ་ཞེས་མི་བྱ་སྟེ། བསམ་གཏན་གཉིས་པའི་བར་ཡང་དེ་དང་

འདྲའོ། །གང་གི་ཚེ་དང་པོ་ལས་ཡོངས་སུ་ཉམས་པར་གྱུར་པ་དེའི་ཚེ་ནི་ཕྱིར་མི་འོང་བའི་འབྲས་བུ་ལས་ཡོངས་སུ་ཉམས་པ་ཞེས་བྱ་སྟེ། ཕྱིར་མི་འོང་བའི་འབྲས་བུ་ནི་ཐ་མའི་ཆ་དང་མཐུན་པ་ལྔ་སྤངས་པའི་སྒོ་ནས་རྣམ་པར་གཞག་གོ། །གང་གི་ཚེ་དེ་འདོད་པའི་འདོད་ཆགས་དང་བྲལ་བ་

ལས་ཡོངས་སུ་ཉམས་པ་དེའི་ཚེ་ནི་བསམ་གཏན་གསུམ་པ་མེད་ན་དེ་ཇི་ལྟར་ཕྱིར་མི་འོང་བའི་འབྲས་བུ་བདེ་བའི་དབང་པོས་འཐོབ་པར་འགྱུར། དེའི་ཕྱིར་འདི་ནི་ཡོངས་སུ་ཉམས་ཕན་ཆད་ནམ་ཡང་བདེ་བའི་དབང་པོས་འཐོབ་པ་མེད་དོ་ཞེས་བཤད་པ་ཡིན་ནོ། །འདི་ཡིད་བདེ་

བའི་དབང་པོས་འཐོབ་པར་འགྱུར་རམ་ཅི་ན་གང་གི་ཕྱིར་བདེ་བའི་དབང་པོ་ཁོ་ན་འགོག་ཅེ་ན། གལ་ཏེ་རྣམ་པར་གྲོལ་བའི་ལམ་དགུ་པ་ལ་དངོས་གཞིའི་བསམ་གཏན་ལ་འཇུག་པར་བྱེད་ན་འཐོབ་པར་འགྱུར་རོ། །དེ་ནི་མེད་དེ། གང་ཞིག་ཡོངས་སུ་ཉམས་པར་འགྱུར་བ་དེ་ནི་དབང་

པོ་རྟུལ་པོ་ཡིན་ལ་དབང་པོ་རྟུལ་པོ་གང་ཡིན་པ་དེ་ཡང་རྣམ་པར་གྲོལ་བའི་ལམ་དགུ་པ་ལ་དངོས་གཞི་ལ་འཇུག་པར་མི་ནུས་སོ། །དབང་པོ་རྣོན་པོས་ནི་ནུས་ཏེ། དབང་པོ་སྤོ་བ་ནི་དཀའ་བའི་ཕྱིར་རོ་ཞེ་ན། དེ་ནི་བདེན་ན་འོན་ཀྱང་གལ་ཏེ་དབང་པོ་རྟུལ་པོ་མཐར་གྱིས་འཐོབ་པ་འདི་

ཕྱིར་མི་འོང་བའི་འབྲས་བུ་ཐོབ་སྟེ། དེ་ལས་ཀྱང་ཡོངས་སུ་ཉམས་པར་གྱུར་ནས་དབང་པོ་འཕོ་བར་བྱེད་ལ་དབང་པོ་འཕོས་ནས་ཀྱང་དབང་པོ་རྣོན་པོར་གྱུར་ཏེ་སྔར་བཤད་པའི་རིམ་པ་ཁོ་ནས་ཕྱིར་མི་འོང་བའི་འབྲས་བུ་འཐོབ་བོ། །གལ་ཏེ་རྣམ་པར་གྲོལ་བའི་ལམ་དགུ་པ་ལ་དངོས་

Vol. 142 · folio 106b

གཞི་ལ་འཇུག་པར་བྱེད་ན། དེ་ཕྱིར་མི་འོང་བའི་འབྲས་བུ་དེ་དགུའམ་བརྒྱད་ཀྱིས་འཐོབ་པར་འགྱུར་ཏེ། འཇིག་རྟེན་པའི་ལམ་གྱིས་འཇུག་ན་ནི་དད་པ་ལ་སོགས་པ་ལྔ་དང་ཡིད་ཀྱི་དབང་པོ་དང་བར་ཆད་མེད་པའི་ལམ་གྱིས་བསྡུས་པ་བཏང་སྙོམས་ཀྱི་དབང་པོ་དང་རྣམ་པར་གྲོལ་

བའི་ལམ་དངོས་གཞིའི་བསམ་གཏན་གྱིས་བསྡུས་པ་ཡིད་བདེ་བའི་དབང་པོས་འཐོབ་པ་པོ། ཇི་སྟེ་འཇིག་རྟེན་ལས་འདས་པས་འཇུག་པར་བྱེད་ན་ནི་དགུ་པ་ཀུན་ཤེས་པའི་དབང་པོ་ཡིན་པར་ཁོང་དུ་ཆུད་པར་བྱའོ། །དེ་ལྟ་བས་ན་འདི་ནི་ཡོངས་སུ་ཉམས་ཕན་ཆད་ནམ་ཡང་བདེ་

བའི་དབང་པོས་འཐོབ་པ་མེད་དོ་ཞེས་བྱ་བ་ནི་ལེགས་པར་སྨྲས་པ་ཡིན་ནོ། །འོ་ན་ནི་འདོད་ཆགས་དང་བྲལ་བ་སྔོན་དུ་འགྲོ་བས་དེ་བཅུ་གཅིག་གིས་འཐོབ་པར་འགྱུར་རོ། །ཇི་ལྟ་ཞེ་ན། གང་ཟག་དབང་པོ་རྟུལ་པོ་བསམ་གཏན་གསུམ་པ་ཐོབ་པ་བསམ་གཏན་གསུམ་པ་ལ་བརྟེན་

ནས་ངེས་པ་ལ་འཇུག་པར་བྱེད་ན་སེམས་ཀྱི་སྐད་ཅིག་མ་བཅུ་དྲུག་པ་ལ་ཕྱིར་མི་ལྡོག་པར་འགྱུར་ཏེ། དེས་འབྲས་བུ་དེ་བདེ་བའི་དབང་པོ་དང་དད་པ་ལ་སོགས་པ་ལྔ་དང་ཡིད་དང་ཀུན་ཤེས་པ་དང་ཀུན་ཤེས་པར་བྱེད་པའི་དབང་པོ་དག་གིས་འཐོབ་བོ། །དེ་ཕྱིར་མི་འོང་བའི་འབྲས་བུ་དེ་

ལས་ཡོངས་སུ་ཉམས་པ་དང་དབང་པོ་སྦྱངས་ནས་དབང་པོ་རྣོན་པོའི་བདག་ཉིད་དུ་བྱས་ཏེ་མི་ལྕོགས་པ་མེད་པ་ཁོ་ན་ལ་བརྟེན་ནས་ཕྱིར་མི་འོང་བའི་འབྲས་བུ་འཐོབ་པ་རྣམ་པར་གྲོལ་བའི་ལམ་དགུ་པ་ལ་དངོས་གཞི་ལ་འཇུག་པར་བྱེད་ན། དེའི་འབྲས་བུ་དེ་སྔ་མ་བཞིན་དུ་བཏང་སྙོམས་ཀྱི་

དབང་པོ་དང་ཡིད་བདེ་བའི་དབང་པོ་དང་དད་པ་ལ་སོགས་པ་ལྔ་དང་བརྒྱད་པ་ཡིད་ཀྱི་དབང་པོ་དང་དགུ་པ་ཀུན་ཤེས་པའི་དབང་པོས་ཀྱང་འཐོབ་པོ། །དེ་ལྟར་ན་གང་ཟག་དེས་ནི་དུས་གཉིས་དག་ཏུ་ཕྱིར་མི་འོང་བའི་འབྲས་བུ་དེ་དབང་པོ་བཅུ་གཅིག་གིས་འཐོབ་པར་འགྱུར་རོ་ཞེ་ན། དེའི་

ཕྱིར་དེ་དག་དགག་པའི་དོན་དུ་འདོད་ཆགས་དང་བྲལ་བ་ཉིད་སྔོན་དུ་འགྲོ་བ་ལ་ནི་ཡོངས་སུ་ཉམས་པར་འགྱུར་བ་མེད་དེ། དེའི་འདོད་ཆགས་དང་བྲལ་བ་ནི་ལམ་གཉིས་ཀྱིས་འཐོབ་པའི་ཕྱིར་རོ་ཞེས་བྱ་བ་འདི་སྨོས་ཏེ། འདོད་པའི་འདོད་ཆགས་དང་བྲལ་བ་ནི་གང་ལ་བརྟེན་ཏེ་ངེས་པ་

Vol. 142 · folio 107a

ལ་ཞུགས་ཀྱང་རུང་ཡོངས་སུ་ཉམས་པར་མི་འགྱུར་རོ། །དེ་ལྟ་བས་ན་དེའི་འདོད་ཆགས་དང་བྲལ་བ་སྟེ་འདོད་པའི་འདོད་ཆགས་དང་བྲལ་བ་ནི་ལམ་གཉིས་ཀྱིས་ཏེ་འཇིག་རྟེན་པ་དང་འཇིག་རྟེན་ལས་འདས་པས་འཐོབ་པའི་ཕྱིར་རོ། །འདི་ལ་འབྲས་བུ་ནི་རྣམ་པ་གཉིས་ཏེ། འབྲས་

བུ་འདུས་བྱས་འདུས་མ་བྱས། །ཞེས་འབྱུང་བའི་ཕྱིར་རོ། །དེ་ལ་ཕྱིར་མི་འོང་བའི་འབྲས་བུ་བྲལ་བའི་མཚན་ཉིད་འདུས་མ་བྱས་གང་ཡིན་པ་དེ་ནི་སྔར་འཇིག་རྟེན་པའི་ལམ་གྱིས་འཐོབ་ལ་ངེས་པ་ལ་འཇུག་པ་ན་ཡང་དེ་ཡང་འཇིག་རྟེན་ལས་འདས་པའི་ལམ་གྱིས་འཐོབ་སྟེ། དེའི་འཐོབ་

པ་དེ་ནི་འཇིག་རྟེན་པ་དང་འཇིག་རྟེན་ལས་འདས་པ་དང་རྣམ་པ་གཉིས་ཡིན་ནོ། །དེ་ལྟ་བས་ན་དེའི་འདོད་ཆགས་དང་བྲལ་བ་ནི་བརྟན་པ་ཡིན་ནོ། །དེ་བས་ན་འདི་ལས་ཡོངས་སུ་ཉམས་པར་མི་འགྱུར་རོ། །འབྲས་ལས་ཉམས་འགྱུར་དང་པོ་ལས་མ་ཡིན། །ཞེས་འབྱུང་བའི་ཕྱིར་

དང་། མཐོང་བས་སྤང་བར་བྱ་བ་རྣམས་ནི་གཞི་མེད་པ་ཡིན་པའི་ཕྱིར། རྒྱུ་གཞན་འདི་ཡང་ཡོད་པ་མ་ཡིན་ནམ། ཅིའི་ཕྱིར་དེ་འདིར་མ་བཤད་ཅེ་ན། འདི་ཡང་བརྗོད་པར་བྱ་བ་ཡིན་མོད་ཀྱི་འོན་ཀྱང་གཞན་དག་འདི་སྐད་དུ་མཐོང་བས་སྤང་བར་བྱ་བའི་ཉོན་མོངས་པའི་འདོད་

ཆགས་དང་བྲལ་བ་ལས་ཡོངས་སུ་ཉམས་པར་མ་གྱུར་ཀྱང་ཅིའི་ཕྱིར་ཡོངས་སུ་ཉམས་པ་ནི་བསྒོམ་པས་སྤང་བར་བྱ་བའི་ཉོན་མོངས་པ་ཙམ་གྱིས་འདོད་ཆགས་དང་བྲལ་བ་ལས་ཡོངས་སུ་ཉམས་པར་གོ་མི་འགྱུར་ཞེས་སྨྲ་བར་འགྱུར་རོ། །ཐ་མའི་ཆ་དང་མཐུན་པ་ལྔ་སྤངས་པས་

ཕྱིར་མི་འོང་བའི་འབྲས་བུར་འགྱུར་ཏེ། དེ་ལ་འཇིག་ཚོགས་ལ་ལྟ་བ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་། ཐེ་ཚོམ་ནི་མཐོང་བས་སྤང་བར་བྱ་བ་ཡིན་ནོ། །འདོད་པའི་འདུན་པ་དང་གནོད་སེམས་ནི་བསྒོམ་པས་སྤང་བར་བྱ་བ་དག་ཡིན་ནོ། །དེ་དག་

ཀྱང་འདོད་ཆགས་དང་བྲལ་བ་སྔོན་དུ་འགྲོ་བས་དེས་མངོན་པར་རྟོགས་པའི་མཐའ་སེམས་ཀྱི་སྐད་ཅིག་མ་བཅུ་དྲུག་པ་དེ་ན་དེའི་མཐུས་ཟག་པ་མེད་པའི་རིགས་རྣམས་ཐོབ་པའི་ཕྱིར་འཇིག་རྟེན་པའི་ལམ་གྱིས་སྤངས་པའི་ཐོབ་པ་ཡང་ཟག་པ་མེད་པའི་ཐོབ་པར་འགྱུར་ཏེ། གནས་

Vol. 142 · folio 107b

སྐབས་དེ་ན་ཕྱིར་མི་འོང་བའི་འབྲས་བུ་འདུས་བྱས་ཟག་པ་མེད་པ་རྣམ་པར་གྲོལ་བའི་ལམ་དགུ་པའི་ངོ་བོ་ཉིད་དང་། འདུས་མ་བྱས་འདོད་པའི་འདུན་པ་ལ་སོགས་པ་སྤངས་པ་འཐོབ་པར་འགྱུར་རོ། །དེ་ལྟ་བས་ན་འཕགས་པས་དེའི་འདོད་ཆགས་དང་བྲལ་བ་ལམ་གཉིས་ཀྱིས་འཐོབ་

པའི་ཕྱིར་རྒྱུ་འདི་ཁོ་ན་བཤད་དེ། འདོད་པའི་འདུན་པ་ལ་སོགས་པ་སྤངས་པ་ལམ་གཉིས་ཀྱིས་འཐོབ་པའི་ཕྱིར་རོ་ཞེས་བྱ་བའི་ཐ་ཚིག་གོ། །བཏང་སྙོམས་དང་ནི་སྲོག་དང་ནི། །ཡིད་དང་ལྡན་ལ་ངེས་གསུམ་ལྡན། །ཞེས་བྱ་བ་ནི་བཏང་སྙོམས་སམ་སྲོག་གམ་ཡིད་དང་ལྡན་ཞིང་མ་བྲལ་

བ་ནི་གདོན་མི་ཟ་བར་གསུམ་དང་ལྡན་ཏེ། བཏང་སྙོམས་དང་སྲོག་དང་ཡིད་ཀྱི་ངོ་བོ་ཉིད་དེ་དག་ཁོ་ན་དང་ལྡན་པ་ཡིན་ནོ། །འདི་དག་ནི་ཕན་ཚུན་མེད་ན་མི་ལྡན་པ་ཡིན་ཞེས་བྱ་བ་ནི་གང་ཞིག་གཅིག་དང་ལྡན་པ་དེ་གཞན་གཉིས་དང་ཡང་ལྡན་པ་ཡིན་ནོ། །དེའི་ཕྱིར་འདི་དག་ལྡན་པར་རྣམ་པར་འཇོག་

པར་བྱེད་ཀྱི་མིག་ལ་སོགས་པ་ནི་མི་བྱེད་དོ། །དེ་ལྟ་བས་ན་མིག་དང་རྣ་བ་དང་སྣ་དང་ལྕེའི་དབང་པོ་དག་དང་ནི་ཞེས་བྱ་བ་སྨོས་ཏེ། གཟུགས་མེད་པའི་ཁམས་སུ་སྐྱེས་པ་ནི་མིག་དང་རྣ་བ་དང་སྣ་དང་ལྕེའི་དབང་པོ་དག་དང་མི་ལྡན་ནོ། །འདིར་ལུས་ཀྱི་དབང་པོ་མ་སྨོས་པ་ནི་འདོད་པའི་ཁམས་

ན་ནི་གང་གིས་མ་ཐོབ་པ་དང་རྣམ་པར་ཉམས་པ་ཞེས་བྱ་བ་བསྡུ་བའི་དོན་མིག་ལ་སོགས་པ་ཁོ་ན་ལ་སྲིད་ཀྱི་ལུས་ལ་ནི་མ་ཡིན་པའི་ཕྱིར་རོ། །དེ་ལྟ་མ་ཡིན་ན་གཟུགས་མེད་པར་སྐྱེས་པ་ནི་གཟུགས་ཅན་གྱི་དབང་པོ་དག་དང་མི་ལྡན་ནོ་ཞེས་བྱ་བ་ཁོ་ན་ཞིག་བརྗོད་པར་འགྱུར་རོ། །མ་ཐོབ་པ་

དང་རྣམ་པར་ཉམས་པ་དག །ཅེས་བྱ་བ་ལ། མ་ཐོབ་པ་ནི་ནུར་ནུར་པོ་ལ་སོགས་པའི་གནས་སྐབས་ནའོ། །རྣམ་པར་ཉམས་པ་དག་ནི་ལོང་བ་ཉིད་ལ་སོགས་པའི་གནས་སྐབས་དང་རིམ་གྱིས་འཆི་བ་ཐོབ་པ་རྣམ་པར་ཉམས་པའི་ཕྱིར་རོ། །སོ་སོའི་སྐྱེ་བོ་མི་ལྡན་ནོ་ཞེས་ཁྱད་པར་དུ་བྱས་

པ་ནི་འཕགས་པ་ནི་གདོན་མི་ཟ་བར་ལྡན་པའི་ཕྱིར་རོ། །དེའི་ཟག་པ་མེད་པའི་བདེ་བ་ནི་ས་འཕོས་པས་གཏོང་བ་མེད་དོ། །ཡིད་མི་བདེ་བ་དང་འདོད་པའི་འདོད་ཆགས་དང་བྲལ་བ་དང་ནི་མི་ལྡན་ནོ་ཞེས་བྱ་བ་ནི་འདི་ན་གནས་པའམ། ཁམས་གཞན་ན་གནས་པའམ་སོ་སོའི་སྐྱེ་བོའམ་

Vol. 142 · folio 108a

འཕགས་པ་ཡང་རུང་མི་ལྡན་པ་ཡིན་ནོ། །སོ་སོའི་སྐྱེ་བོ་དང་འབྲས་བུ་ལ་གནས་པ་དག་ཅེས་བྱ་བ་ནི་འབྲས་བུ་ལ་གནས་པ་རྒྱུན་དུ་ཞུགས་པ་ལ་སོགས་པ་ནི་མངོན་པར་རྟོགས་པའི་རྗེས་ལ་རྣམ་པར་ཉམས་པའི་ཕྱིར་ཀུན་ཤེས་པར་བྱེད་པའི་དབང་པོ་དེ་

དང་མི་ལྡན་ནོ། །ཀུན་ཤེས་པའི་དབང་པོ་མཐོང་བའི་ལམ་ལ་གནས་པ་དག་ནི་མ་ཐོབ་པའི་ཕྱིར་མི་ལྡན་ལ་མི་སློབ་པའི་ལམ་ལ་གནས་པ་དག་ནི་འབྲས་བུ་ཐོབ་པ་ན་རྣམ་པར་ཉམས་པའི་ཕྱིར་མི་ལྡན་ནོ། །མ་བཀག་པའི་གནས་སྐབས་དག་ཏུ་ནི་ཇི་སྐད་བཤད་པ་དང་ཞེས་བྱ་བ་ནི་དེ་

ལས་གཞན་པའི་གནས་སྐབས་དག་ཏུ་ནི་དབང་པོ་གང་དང་གང་བཤད་པའི་དབང་པོ་དེ་དང་དེ་ལྡན་པར་རིག་པར་བྱ་སྟེ། དེ་ལ་འདོད་པའི་ཁམས་ན་ནི་མ་ཐོབ་པ་དང་རྣམ་པར་ཉམས་པའི་གནས་སྐབས་མ་གཏོགས་པ་མིག་ལ་སོགས་པ་ལྕེ་ལ་ཐུག་པའི་བར་དག་དང་ལྡན་ནོ། །ལུས་ཀྱི་

དབང་པོ་དང་ནི་འདོད་པ་དང་གཟུགས་ཀྱི་ཁམས་སུ་སྐྱེས་པ་ལྡན་ནོ་ཞེས་བྱ་བ་ལ་སོགས་པ་ཡིན་ནོ། །བདེ་ལུས་ལྡན་པ་བཞི་དག་དང་། །ཞེས་བྱ་བ་ནི་ལྡན་ལ་ཞེས་བྱ་བ་དང་ངེས་པར་ལྡན་ཞེས་བྱ་བར་སྦྱར་ཏེ་གྲངས་ཀྱི་གོ་རིམས་བརྗོད་པར་འདོད་པས་དེའི་འོག་ཏུ་བདེ་བ་ལ་སོགས་པ་སྨོས་པ་

ཡིན་ནོ། །བདེ་བའི་དབང་པོ་དང་ལྡན་པ་ཞེས་བྱ་བ་ནི་བསམ་གཏན་བཞི་པ་དང་གཟུགས་མེད་པའི་ཁམས་སུ་སྐྱེས་པའི་སོ་སོའི་སྐྱེ་བོ་ལས་མ་གཏོགས་པ་ཐམས་ཅད་ནི་བདེ་བའི་དབང་པོ་དང་ལྡན་ལ། དེ་བཞིན་དག་དང་ནི་གདོན་མི་ཟ་བར་ལྡན་པ་མ་ཡིན་ཏེ། མིག་ལ་སོགས་པ་ལྕེའི་

དབང་པོ་ལ་ཐུག་པའི་བར་དག་དང་ནི་གཟུགས་མེད་པའི་ཁམས་དང་། འདོད་པའི་ཁམས་ན་ཡང་མ་ཐོབ་པ་དང་། རྣམ་པར་ཉམས་པའི་གནས་སྐབས་ན་མི་ལྡན་ནོ། །ལུས་ཀྱི་དབང་པོ་དང་ནི་གཟུགས་མེད་པའི་ཁམས་ན་ནི་མི་ལྡན་ནོ། །ཕོ་དང་མོའི་དབང་པོ་དང་ནི་གཟུགས་ཀྱི་ཁམས་

དང་གཟུགས་མེད་པའི་ཁམས་དང་འདོད་པའི་ཁམས་ན་མ་ཐོབ་པ་དང་རྣམ་པར་ཉམས་པའི་གནས་སྐབས་ན་ཡང་མི་ལྡན་ནོ། །སྡུག་བསྔལ་གྱི་དབང་པོ་དང་ནི་གཟུགས་དང་གཟུགས་མེད་པའི་ཁམས་དག་ན་མི་ལྡན་ནོ། །ཡིད་བདེ་བའི་དབང་པོ་དང་ནི་སོ་སོའི་སྐྱེ་བོའི་བསམ་གཏན་

Vol. 142 · folio 108b

གསུམ་པར་སྐྱེས་པ་དང་མི་ལྡན་ནོ། །ཡིད་མི་བདེ་བའི་དབང་པོ་དང་ནི་འདོད་པའི་འདོད་ཆགས་དང་བྲལ་བའི་གནས་སྐབས་ན་མི་ལྡན་ནོ། །དད་པ་ལ་སོགས་པ་ལྔ་དང་ནི་དགེ་བའི་རྩ་བ་ཀུན་དུ་ཆད་པའི་གནས་སྐབས་ན་མི་ལྡན་ནོ། །ཀུན་ཤེས་པར་བྱེད་པའི་དབང་པོ་དང་ནི་སོ་སོའི་སྐྱེ་བོ་དང་

འབྲས་བུ་ལ་གནས་པའི་གནས་སྐབས་ན་མི་ལྡན་ནོ། །ཀུན་ཤེས་པའི་དབང་པོ་དང་ནི་སོ་སོའི་སྐྱེ་བོ་དང་མཐོང་བའི་ལམ་དང་མི་སློབ་པའི་གནས་སྐབས་ན་མི་ལྡན་ནོ། །ཀུན་ཤེས་པ་དང་ལྡན་པའི་དབང་པོ་དང་ནི་སོ་སོའི་སྐྱེ་བོ་དང་སློབ་པའི་གནས་སྐབས་ན་མི་ལྡན་ནོ། །གང་ཞིག་ལུས་ཀྱི་དབང་

པོ་དང་ལྡན་པ་དེ་ཡང་བཞི་དང་ལྡན་ནོ་ཞེས་བྱ་བ་ནི་འདོད་པ་དང་གཟུགས་ཀྱི་ཁམས་སུ་སྐྱེས་པ་ནི་ལུས་ཀྱི་དབང་པོ་དང་ལྡན་པ། དེ་གཞན་དག་དང་ནི་གདོན་མི་ཟ་བར་ལྡན་པ་མ་ཡིན་ཏེ། མིག་ལ་སོགས་པ་དག་དང་ནི་འདོད་པའི་ཁམས་ན་མ་ཐོབ་པ་དང་རྣམ་པར་ཉམས་པའི་གནས་སྐབས་ན་མི་

ལྡན་ནོ། །ཕོ་དང་མོའི་དབང་པོ་དག་དང་ནི་གནས་སྐབས་དེ་དང་གཟུགས་ཀྱི་ཁམས་ན་མི་ལྡན་ནོ། །སྡུག་བསྔལ་དང་ནི་དེ་ཉིད་ན་མི་ལྡན་ནོ། །བདེ་བ་དང་ནི་སོ་སོའི་སྐྱེ་བོ་བསམ་གཏན་བཞི་པར་སྐྱེས་པ་དང་མི་ལྡན་ནོ། །ཡིད་བདེ་བ་དང་ནི་སོ་སོའི་སྐྱེ་བོ་བསམ་གཏན་གསུམ་པ་དང་བཞི་

པར་སྐྱེས་པ་མི་ལྡན་ནོ། །ཡིད་མི་བདེ་བ་དང་དད་པ་ལ་སོགས་པ་གཞན་དག་དང་མི་ལྡན་པ་ནི་སྔ་མ་བཞིན་དུ་བརྗོད་པར་བྱའོ། །མིག་སོགས་ལྡན་ལ་ལྔ་དང་ལྡན། །ཞེས་བྱ་བ་ནི་མིག་དང་རྣ་བ་དང་སྣ་དང་ལྕེ་དང་ལྡན་པ་ལ་ཞེས་བྱ་བའི་ཐ་ཚིག་གོ། །དེ་དང་ཞེས་བྱ་བ་ནི་མིག་དེ་དང་སྟེ་མིག་

ཡོད་ན་ལུས་ཀྱི་དབང་པོ་གདོན་མི་ཟ་བར་ཡོད་ཀྱི། རྣ་བ་ལ་སོགས་པ་ནི་མ་ཡིན་ཏེ། འདོད་པའི་ཁམས་ན་མ་ཐོབ་པ་དང་རྣམ་པར་ཉམས་པ་སྲིད་པའི་ཕྱིར་རོ། །ཕོ་དང་མོའི་དབང་པོ་ལ་སོགས་པ་འཁྲུལ་པ་ནི་སྔ་མ་བཞིན་དུ་བརྗོད་པར་བྱའོ། །རྣ་བ་དང་སྣ་དང་ལྕེའི་དབང་པོ་དག་དང་

ལྡན་པ་ཡང་དེ་དང་འདྲ་བར་རིག་པར་བྱའོ་ཞེས་བྱ་བ་ནི་གང་ཞིག་རྣ་བའི་དབང་པོ་དང་ལྡན་པ་དེ་ནི་གདོན་མི་ཟ་བར་བཏང་སྙོམས་དང་སྲོག་དང་ཡིད་དང་ལུས་ཀྱི་དབང་པོ་དག་དང་དེ་དང་དབང་པོ་ལྔ་དང་ལྡན་ཏེ་ཞེས་བྱ་བ་དེ་ལྟ་བུར་ཐམས་ཅད་སྦྱར་བར་བྱའོ། །ཡིད་བདེ་ལྡན་ཡང་ཞེས་པ་ཅི་ཞེ་ན།

Vol. 142 · folio 109a

གདོན་མི་ཟ་བར་ལྔ་དང་ལྡན་ནོ་ཞེས་བྱ་བར་སྐབས་དང་སྦྱར་རོ། །ཅིའི་ཕྱིར་ཡིད་བདེ་བ་མིག་ལ་སོགས་པ་ཁོ་ནའི་ནང་དུ་མི་བསྡུ་ཞེ་ན། གནས་གཞན་ནས་འབྱུང་བའི་ཕྱིར་རོ། །འདི་ལྟར་སོགས་པ་ཞེས་བྱ་བའི་སྒྲས་བསྡུས་ན་ནི་འཆོལ་བར་འགྱུར་རོ། །བསམ་

གཏན་གཉིས་པར་སྐྱེས་པ་བསམ་གཏན་གསུམ་པར་མ་ཐོབ་པ་བདེ་བའི་དབང་པོ་གང་དང་ལྡན་པ་ཡིན་ཞེ་ན་ཞེས་བྱ་བ་ནི་བདེ་བའི་དབང་པོ་འདོད་པའི་ཁམས་ན་ནི་རྣམ་པར་ཤེས་པའི་ཚོགས་ལྔ་པ་ཡོད་ལ་བསམ་གཏན་དང་པོ་ན་ནི་རྣམ་པར་ཤེས་པའི་ཚོགས་གསུམ་པ་ཡོད། བསམ་

གཏན་གསུམ་པ་ན་ནི་ཡིད་ཀྱི་ཡོད་དོ། །དེའི་ཕྱིར་བསམ་གཏན་གཉིས་པར་སྐྱེས་པ་བདེ་བའི་དབང་པོ་འོག་མ་དང་ཡང་མི་ལྡན་ནོ། །དེ་ནི་ས་འཕོས་པས་བཏང་བའི་ཕྱིར་རོ། །བསམ་གཏན་གསུམ་པའི་ས་པ་དང་ཡང་མི་ལྡན་ཏེ། དེ་ནི་མ་ཐོབ་པའི་ཕྱིར་རོ་སྙམ་དུ་བསམས་ནས་རྒོལ་

བར་བྱེད་པ་ཡིན་ནོ། །བདེ་བའི་དབང་པོ་གང་དང་ལྡན་ཞེ་ན། བསམ་གཏན་གསུམ་པའི་ཉོན་མོངས་པ་ཅན་དང་ལྡན་ནོ་ཞེས་བྱ་བ་སྨོས་ཏེ། གྲུབ་པའི་མཐའ་ནི་སེམས་ཅན་འོག་མར་སྐྱེས་པ་ཐམས་ཅད་ནི་ས་གོང་མ་པའི་ཉོན་མོངས་པ་ཅན་མ་སྤངས་པ་དང་ལྡན་ནོ་ཞེས་བྱ་བ་ཡིན་ནོ། །དབང་

པོ་ལྷག་མ་འཁྲུལ་པ་ནི་སྔ་མ་བཞིན་དུ་བརྗོད་པར་བྱའོ། །སྡུག་བསྔལ་ལྡན་བདུན་དང་ཞེས་བྱ་བ་ནི་འདི་ནི་འདོད་པའི་ཁམས་སུ་སྐྱེས་པ་ཡིན་ཏེ། དེ་ལྟ་བས་ན་གདོན་མི་ཟ་བར་ལུས་ཀྱི་དབང་པོ་དང་ལྡན་ནོ། །ཚོར་བའི་དབང་པོ་བཞི་དང་ཞེས་བྱ་བ་ནི་ཡིད་མི་བདེ་བ་མ་གཏོགས་པ་དག་དང་

ངོ་། །ཡིད་དང་སྲོག་གི་དབང་པོ་དག་ཀྱང་ཡོད་པས་གདོན་མི་ཟ་བར་དབང་པོ་བདུན་དང་ལྡན་པ་ཡིན་ནོ། །དབང་པོ་ལྷག་མ་འཁྲུལ་པ་ནི་སྔ་མ་བཞིན་དུ་བརྗོད་པར་བྱའོ། །མོའི་དབང་སོགས་ལྡན་བརྒྱད་དང་། །ཞེས་བྱ་བ་ནི་མོ་དང་ཕོ་དང་ཡིད་མི་བདེ་བ་དང་དད་པ་དང་བརྩོན་འགྲུས་དང་དྲན་པ་

དང་ཏིང་ངེ་འཛིན་དང་ཤེས་རབ་དང་ལྡན་པ་ཞེས་བྱ་བའི་ཐ་ཚིག་གོ། །སྲོག་དང་ཡིད་དང་བདེ་བ་དང་སྡུག་བསྔལ་དང་ཡིད་བདེ་བ་དང་བཏང་སྙོམས་ཀྱི་དབང་པོ་རྣམས་ནི་བཤད་ཟིན་པའི་ཕྱིར་ལ། ཀུན་ཤེས་པ་དང་ལྡན་པའི་དབང་པོ་ལ་སོགས་པ་གསུམ་ནི་འཆད་པར་འགྱུར་བའི་ཕྱིར་

Vol. 142 · folio 109b

དབང་པོ་བརྒྱད་པོ་འདི་དག་ཁོ་ན་གཟུང་བ་ཡིན་ནོ། །གང་ཞིག་མོའི་དབང་པོ་དང་ལྡན་པ་དེ་ནི་ཞེས་བྱ་བ་ནི་མོའི་དབང་པོ་དང་ལྡན་པ་ནི་འདོད་པའི་ཁམས་སུ་སྐྱེས་པ་ཡིན་པས་དེའི་ཕྱིར་དེ་ནི་གདོན་མི་ཟ་བར་དབང་པོ་བརྒྱད་དང་འདི་དག་ཁོ་ན་བཟུང་བ་ཡིན་ནོ། །བདུན་པོ་དེ་དག་དང་ལྡན་ཞེ་ན།

བདུན་པོ་དེ་དག་དང་མོའི་དབང་པོ་དང་ཞེས་བྱ་བ་སྨོས་ཏེ། ལུས་དང་སྲོག་དང་ཡིད་དག་དང་ཚོར་བའི་དབང་པོ་བཞི་སྟེ་བདུན་དང་བརྒྱད་པ་མོའི་དབང་པོ་དང་ལྡན་ནོ། །མིག་ལ་སོགས་པ་ནི་ཉམས་པ་ལ་སོགས་པ་ཇི་སྐད་བཤད་པ་སྲིད་པའི་ཕྱིར་རྒྱུ་དེ་དག་གིས་ན་ལྷག་མ་དག་ནི་ངེས་པ་མེད་

དོ། །ཕོའི་དབང་པོ་དང་ལྡན་པ་ཡང་མོའི་དབང་པོ་དང་ལྡན་པ་བཞིན་བརྗོད་པར་བྱའོ། །ཡིད་མི་བདེ་བ་དང་ལྡན་པ་ཡང་འདོད་པར་སྐྱེས་ཤིང་འདོད་པའི་འདོད་ཆགས་དང་བྲལ་བ་ཡིན་པས་དེ་དང་འདྲ་བར་བདུན་པོ་དེ་དག་ཡིད་མི་བདེ་བ་དང་ལྡན་པ་ཡིན་ནོ། །དད་པ་དང་ལྡན་པ་ཡང་ཁམས་

གསུམ་པའི་སེམས་ཅན་ཡིན་པས་དད་པ་ལ་སོགས་པ་མེད་ན་མི་འབྱུང་བ་ལྔ་པོ་དེ་དག་དང་། བཏང་སྙོམས་དང་སྲོག་དང་ཡིད་དག་དང་ལྡན་ནོ། །ལྷག་མ་དག་དང་ནི་མ་ངེས་ཏེ་སྔ་མ་བཞིན་ནོ། །དད་པ་དང་ལྡན་པ་ཇི་ལྟ་བར་ཤེས་རབ་དང་ལྡན་པའི་བར་དུ་ཡང་དེ་དང་འདྲའོ། །ཀུན་ཤེས་པ་ལ་དབང་བྱེད་

པས་ན་ཀུན་ཤེས་པ་དང་ལྡན་པའི་དབང་པོའོ་ཞེས་བྱ་བ་ནི་ཀུན་ཤེས་པ་ཁོ་ན་ལ་དབང་བྱེད་པ་ནི་ཀུན་ཤེས་པ་དང་ལྡན་པའི་དབང་པོ་སྟེ། མ་ལུས་པར་ཤེས་པའི་དབང་པོ་ཞེས་བྱ་བའི་ཐ་ཚིག་གོ། །ཀུན་ཤེས་པའི་དབང་པོ་ཡང་ཀུན་ཤེས་པ་ལ་དབང་བྱེད་པ་ནི་ཡིན་མོད་ཀྱི་མ་ལུས་པར་ནི་མ་

ཡིན་ཏེ། སྤང་བར་བྱ་བ་ལྷག་མ་དང་བཅས་པའི་ཕྱིར་རོ། །ཡང་ན་ཚིག་གི་ཕྱོགས་གཅིག་སྨོས་ནས་ཀུན་ཤེས་པ་དང་ལྡན་པའི་གང་ཟག་ལ་ཀུན་ཤེས་པ་དང་ལྡན་པ་ཞེས་བརྗོད་དོ། །དེའི་དབང་པོ་ནི་ཀུན་ཤེས་པ་དང་ལྡན་པའི་དབང་པོ་ཞེས་བྱའོ། །གང་ཞིག་ཀུན་ཤེས་པའི་དབང་པོ་དང་

ལྡན་པ་དེ་ནི་གདོན་མི་ཟ་བར་བཅུ་གཅིག་དང་ལྡན་ནོ་ཞེས་བྱ་བ་ནི་ཀུན་ཤེས་པའི་དབང་པོ་དང་ལྡན་པ་ནི་སློབ་པ་འབྲས་བུ་ལ་གནས་པ་ཡིན་ཏེ། ཁམས་གསུམ་ཆར་ན་ཡང་ཡོད་དོ། །བསམ་གཏན་བཞི་པ་དང་གཟུགས་མེད་པར་སྐྱེས་པ་དེ་ཇི་ལྟར་བདེ་བ་དང་ཡིད་བདེ་བའི་དབང་པོ་དག་དང་ལྡན་

Vol. 142 · folio 110a

ཞེ་ན། ཇི་ལྟར་འཕགས་པ་ནི་འདོད་པ་ལས་འདོད་ཆགས་དང་བྲལ་བ་ན་གདོན་མི་ཟ་བར་ཡིད་བདེ་བའི་དབང་པོ་འཐོབ་ལ། བསམ་གཏན་གཉིས་པ་ལས་འདོད་ཆགས་དང་བྲལ་བ་ན་ཡང་བདེ་བའི་དབང་པོ་འཐོབ་པོ། །དེ་དག་ནི་ས་འཕོས་ཀྱང་གཏོང་བར་མི་འགྱུར་

ཏེ། འདི་ལྟར། ས་འཕོས་ཉམས་པ་དག་གིས་ནི། །བསམ་གཏན་གཏོགས་པའི་དགེ་བ་གཏོང་། །དེ་བཞིན་གཟུགས་མེད་གཏོགས་འཕགས་ནི། །འབྲས་ཐོབ་སྦྱངས་དང་ཉམས་རྣམས་ཀྱིས། །ཞེས་འཆད་པར་འགྱུར་རོ། །འབྲས་བུ་ཐོབ་པ་དང་དབང་པོ་སྦྱོང་བ་ན་ཡང་ཞུགས་

པའི་ལམ་དང་དབང་པོ་རྟུལ་པོའི་ལམ་གྱིས་བསྡུས་པ་དེ་དག་གཏོང་མོད་ཀྱི་འོན་ཀྱང་འབྲས་བུ་དང་དབང་པོ་རྣོན་པོས་བསྡུས་པ་གཞན་དག་ནི་འཐོབ་པར་འགྱུར་རོ། །དེ་ལྟ་བས་ན་བསམ་གཏན་བཞི་པ་དང་གཟུགས་མེད་པར་སྐྱེས་པའི་འཕགས་པ་ནི་བདེ་བ་དང་ཡིད་བདེ་བའི་དབང་པོས་འཕོས་

པ་ཡང་ཡོངས་སུ་མ་བཏང་བ་དེ་དག་དང་ལྡན་པ་ཁོ་ན་ཡིན་ནོ། །ལྷག་མ་དག་དང་ནི་སྔ་མ་བཞིན་དུ་མ་ངེས་པ་ཡིན་ནོ། །ཀུན་ཤེས་བྱེད་པའི་དབང་ལྡན་ལ། །བཅུ་གསུམ་དག་དང་ལྡན་པ་ཡིན། །ཞེས་བྱ་བ་རྒྱས་པར་འབྱུང་བ་ནི་ཀུན་ཤེས་པར་བྱེད་པའི་དབང་པོ་དང་ལྡན་པ་ནི་འདོད་པའི་

ཁམས་ཁོ་ནར་ཀུན་ཤེས་པར་བྱེད་པའི་དབང་པོ་སྐྱེད་པའི་ཕྱིར་འདོད་པ་ན་སྤྱོད་པའི་སེམས་ཅན་ཡིན་ཏེ། མི་སྐྱོ་ལུང་ལས་འདིར་རྩོམ་ཞིང་། །དེ་མཐར་ཕྱིན་ཞེས་འབྱུང་ཕྱིར་རོ། །ཞེས་འབྱུང་བའི་ཕྱིར་རོ། །དེ་ལྟ་བས་ན་གདོན་མི་ཟ་བར་འདི་ལ་ལུས་ཀྱི་དབང་པོ་ཡང་ཡོད་ལ། ཡིད་མི་བདེ་བ་མ་

གཏོགས་པ་ཚོར་བ་བཞི་ཡང་ཡོད་དེ། དེས་ནི་འདོད་ཆགས་དང་བྲལ་བའི་གནས་སྐབས་ན་འཁྲུལ་པའི་ཕྱིར་རོ། །དེ་ལ་གདོན་མི་ཟ་བར་ཞེས་བྱ་བར་སྦྱར་ཏེ། དབང་པོ་བཅུ་གསུམ་དང་གདོན་མི་ཟ་བར་ཁོ་ནར་ལྡན་ནོ་ཞེས་བྱ་བར་ངེས་པར་གཟུང་བ་ཡིན་གྱི། བཅུ་གསུམ་ཁོ་ན་དང་ཞེས་བྱ་བ་ནི་

མ་ཡིན་ནོ། །ལྷག་མ་དག་དང་ནི་མ་ངེས་ཏེ། ལོང་བ་ལ་སོགས་པ་ལ་ཡང་མཐོང་བའི་ལམ་སྲིད་པའི་ཕྱིར་རོ། །མོ་དང་ཕོའི་དབང་པོ་དག་མ་ཚང་ན་ཡང་ཇི་ལྟར་མཐོང་བའི་ལམ་སྐྱེ་བར་འགྱུར་ཏེ། མོ་དང་ཕོའི་དབང་པོ་དང་མི་ལྡན་པ་དང་ཉམས་པ་རྣམས་ལ་སྡོམ་པ་དང་འབྲས་བུ་འཐོབ་པ་

Vol. 142 · folio 110b

དང་འདོད་ཆགས་དང་བྲལ་བ་མེད་དོ་ཞེ་ན། རེ་ཞིག་ཁ་ཅིག་ན་རེ་སྡོམ་པ་ཐོབ་པ་རྣམས་ཀྱི་འབྲས་བུ་འཐོབ་པར་འགྱུར་ལ། མཚན་གཉིས་འབྱུང་བས་སོ་སོར་ཐར་པའི་སྡོམ་པ་གཏོང་བར་འགྱུར་གྱི་དེ་དག་ཉམས་པས་ནི་མ་ཡིན་ནོ། །ཡང་ན་ངེས་པར་འབྱེད་པའི་ཆ་དང་མཐུན་པ་ལ་

གོམས་པ་ལ་རིམ་གྱིས་འཆི་བས་མོ་དང་ཕོའི་དབང་པོ་འགགས་ཀྱང་མཐོང་བའི་ལམ་སྐྱེ་བར་འགྱུར་རོ་ཞེས་ཟེར་རོ། །གཞན་དག་ན་རེ་འདིར་ནི་གང་ཟག་སྤྱིའི་དབང་དུ་བྱས་པ་ཡིན་གྱི་གཅིག་ཁོ་ན་ལ་གདོན་མི་ཟ་བར་དབང་པོ་དང་ལྡན་པ་དང་འཁྲུལ་པ་བརྗོད་པ་ནི་མ་ཡིན་ནོ་ཞེས་ཟེར་རོ། །

ཇི་ལྟར་ཞེ་ན། བཏང་སྙོམས་དང་ནི་སྲོག་དང་ནི། །ཡིད་དང་ལྡན་ལ་ངེས་གསུམ་ལྡན། །ཞེས་བྱ་བ་འདོད་པའི་ཁམས་སུ་སྐྱེས་པ་ཡང་རུང་སྲིད་པའི་རྩེ་མོའི་བར་དུ་སྐྱེས་པ་ཡང་རུང་སྟེ། བཏང་སྙོམས་དང་ལྡན་པའི་གང་ཟག་ཇི་སྙེད་པ་དེ་ཐམས་ཅད་གདོན་མི་ཟ་བར་གསུམ་དང་ལྡན་པ་ཡིན་ནོ། །

མིག་ལ་སོགས་པ་འཁྲུལ་པ་ནི་ཐམས་ཅད་དུ་ཅི་རིགས་པར་སྦྱར་ཏེ། ལ་ལ་ནི་གཟུགས་ཅན་གྱི་དབང་པོ་དག་དང་མི་ལྡན་པ་ཉིད་ཡིན་ཏེ། གཟུགས་མེད་པའི་ཁམས་སུ་སྐྱེས་པ་གང་ཡིན་པའོ་ཞེས་བྱ་བ་ནས་རྒྱས་པར་ལ་ལ་ནི་དད་པ་ལ་སོགས་པ་དང་མི་ལྡན་ཏེ་དགེ་བའི་རྩ་བ་ཀུན་དུ་ཆད་པ་

གང་ཡིན་པའོ་ཞེས་བྱ་བའི་བར་ཡིན་ཏེ། གཟུགས་མེད་པའི་ཁམས་སུ་སྐྱེས་པ་དེ་ཉིད་ནི་མ་ཡིན་ནོ། །ཡང་འདིར་ཀུན་ཤེས་པར་བྱེད་པའི་དབང་པོ་དང་ལྡན་པ་ཇི་སྙེད་པ་དེ་ཐམས་ཅད་ནི་གདོན་མི་ཟ་བར་ཇི་སྐད་བཤད་པའི་དབང་པོ་བཅུ་གསུམ་ལྡན་པ་ཡིན་ནོ། །འགའ་ཞིག་ལ་འཁྲུལ་པ་ནི་

ཅི་རིགས་པར་ཁོ་ནར་སྦྱར་བར་བྱ་སྟེ། འདི་ལྟར་ལ་ལ་ནི་མིག་གི་དབང་པོ་དང་མི་ལྡན་ཏེ། ལོང་བ་གང་ཡིན་པའོ། །ལ་ལ་ནི་རྣ་བའི་དབང་པོ་དང་མི་ལྡན་ཏེ་འོན་པ་གང་ཡིན་པའོ་ཞེས་བྱ་བ་ནས་དེ་བཞིན་དུ་ལ་ལ་ནི་མོའི་དབང་པོ་དང་མི་ལྡན་ཏེ་ཕོ་གང་ཡིན་པའོ། །ལ་ལ་ནི་ཕོའི་དབང་པོ་དང་

མི་ལྡན་ཏེ་མོ་གང་ཡིན་པའོ། །ལ་ལ་ནི་ཡིད་མི་བདེ་བ་དང་མི་ལྡན་ཏེ་འདོད་ཆགས་དང་བྲལ་བ་གང་ཡིན་པའོ་ཞེས་བྱ་བ་དེ་ལྟ་བུ་ཁོ་ན་ཁོང་དུ་ཆུད་པར་བྱའོ། །དགེ་མེད་ནང་ན་ཉུང་ལྡན་པ། །ལུས་ཚོར་སྲོག་ཡིད་བརྒྱད་དང་ལྡན། །ཞེས་བྱ་བ་ནི་གང་ཟག་གཅིག་འགའ་ཞིག་ནང་ན་ཉུང་བ་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words