ཆོས་མངོན་པའི་མཛོད་ཀྱི་འགྲེལ་བཤད

Sanskrit title (Tibetan script, as in the text) ཨ་བྷི་དྷརྨ་ཀོ་ཥ་ཊཱི་ཀ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 142 · folio 193a

གང་གི་ཚེ་དད་པས་རྗེས་སུ་འབྲང་བ་ལ་སོགས་པའི་དབང་པོ་འཕོ་བར་བྱེད་ཅིང་ཆོས་ཀྱི་རྗེས་སུ་འབྲང་བའི་ལམ་ལ་སོགས་པ་མངོན་དུ་བྱེད་པ་ན་དད་པས་རྗེས་སུ་འབྲང་བའི་ལམ་བྱུང་བ་ཆོས་ཀྱི་རྗེས་སུ་འབྲང་བའི་ལམ་མ་བྱུང་བ་དང་། མཐོང་བས་

ཐོབ་པའི་ལམ་གྱི་རྒྱུ་ཡིན་ནོ་ཞེས་ཟེར་ཏེ། དེ་ནི་དད་པས་རྗེས་སུ་འབྲང་བའི་དབང་པོ་རྣམས་འཕོ་བ་མེད་པས་རིགས་པ་མ་ཡིན་གྱི། དད་པས་མོས་པ་ལ་སོགས་པ་ནི་འཕོ་བར་འགྱུར་རོ། །སྦྱོར་བ་ལས་བྱུང་བ་ཞེས་བྱ་བ་ལས་སྦྱོར་བས་གྲུབ་པ་ནི་སྦྱོར་བ་ལས་བྱུང་བ་དག་སྟེ།

སྦྱོར་བ་ལས་བྱུང་བ་དག་པ་ནི། སྐྱེས་ནས་ཐོབ་པ་ཅན་བསལ་བའི་ཕྱིར་རོ། །འདོད་པ་ན་སྤྱོད་པའི་ཐོས་པ་ལས་བྱུང་བ་རྣམས་ཞེས་བྱ་བ་ནི་སངས་རྒྱས་ཀྱི་བཀའ་ཐོས་པ་ལས་ངེས་པར་བྱུང་བ་གང་དག་ཡིན་པ་དེ་དག་ནི་ཐོས་པ་ལས་བྱུང་བའོ། །བསམས་པ་ལས་བྱུང་བ་

རྣམས་ནི་བསམས་པ་ལས་བྱུང་བ་རྣམས་ཀྱི་ཡིན་ཏེ་ཞེས་བྱ་བ་ནི་བསམས་པ་ལས་བྱུང་བ་རྣམས་ཁོ་ནའི་ཡིན་གྱི། མཉམ་དང་ཁྱད་པར་ཅན་གྱི་ཡིན། །སྦྱོར་བྱུང་དེ་གཉིས་ཁོ་ནའི་ཡིན། །ཞེས་འབྱུང་བའི་ཕྱིར་ཐོས་པ་ལས་བྱུང་བ་རྣམས་ཀྱི་ནི་མ་ཡིན་ནོ། །བསྒོམས་

པ་ལས་བྱུང་བ་ནི་མེད་པའི་ཕྱིར་རོ་ཞེས་བྱ་བ་ནི་འདོད་པའི་ཁམས་མཉམ་པར་གཞག་པ་མ་ཡིན་པའི་ཕྱིར་བསྒོམས་པ་ལས་བྱུང་བ་དག་མེད་དོ། །བསམས་པ་ལས་བྱུང་བ་ནི་མེད་པའི་ཕྱིར་རོ་ཞེས་བྱ་བ་ལ། བསམས་པ་ལས་བྱུང་བ་མེད་པའི་གཏན་ཚིགས་ནི་གང་གི་ཚེ་

དེ་དག་སེམས་པར་རྩོལ་བ་དེ་ཁོ་ནའི་ཚེ་དེ་དག་གི་ཏིང་ངེ་འཛིན་ཉིད་ཉེ་བར་གནས་པར་འགྱུར་རོ་ཞེས་བྱ་བ་ཡིན་ནོ། །དེ་དག་ཀྱང་ཞེས་བྱ་བ་ནི་ཐོས་པ་ལས་བྱུང་བ་ལ་སོགས་པའོ། །ཆུང་ངུའི་ཆུང་ངུ་དག་ནི་ཐམས་ཅད་ཀྱི་ཡིན་ལ་ཞེས་བྱ་བ་ནི་ཆུང་ངུའི་ཆུང་ངུ་དག་ནི་

མཉམ་པ་ཆུང་ངུའི་ཆུང་ངུ་གཞན་དག་དང་ཁྱད་པར་ཅན་ཆུང་ངུའི་འབྲིང་པོ་ལ་སོགས་པ་གཞན་བརྒྱད་ཀྱི་ཡང་ཡིན་པས་ཐམས་ཅད་ཀྱི་སྐལ་བ་མཉམ་པའི་རྒྱུ་ཡིན་ནོ། །ཆུང་ངུའི་འབྲིང་པོ་དག་ནི་བརྒྱད་ཀྱི་ཡིན་ཏེ་ཞེས་བྱ་བ་ནི་རྣམ་པ་ཆུང་ངུའི་ཆུང་ངུ་དོར་ཏེ་དེ་ནི་དམན་པའི་ཕྱིར་

Vol. 142 · folio 193b

རོ། །ལུགས་ནི་དེ་ལྟའོ་ཞེས་བྱ་བ་ནི་འདི་ལྟ་སྟེ་ཆུང་ངུའི་ཆེན་པོ་ནི་བདུན་གྱི་ཡིན་ལ། འབྲིང་པོའི་ཆུང་ངུ་ནི་དྲུག་གི་ཡིན་པ་ནས། ཆེན་པོའི་ཆེན་པོ་ནི་ངོ་བོ་གཅིག་པ་ཆེན་པོའི་ཆེན་པོ་གཞན་དག་གི་སྐལ་བ་མཉམ་པའི་རྒྱུའི་བར་དུ་ཡིན་པ་སྟེ། དེ་དང་དེ་དག་ནི་དམན་པ་ཡིན་

པའི་ཕྱིར་སྔ་མ་སྔ་མ་རྣམས་ནི་དོར་བར་བྱའོ། །སྐྱེས་ནས་ཐོབ་པ་ཅན་གྱི་དགེ་བའི་ཆོས་རྣམས་ཞེས་བྱ་བ་ལ་སྐྱེ་བས་ཐོབ་པ་ནི་སྐྱེས་ནས་ཐོབ་པའོ། །དེ་འདི་དག་ལ་ཡོད་པས་སྐྱེས་ནས་ཐོབ་པ་ཅན་དག་གོ། །རྣམ་པ་དགུ་པོ་ཐམས་ཅད་ཕན་ཚུན་དུ་སྐལ་བ་མཉམ་པའི་

རྒྱུ་ཡིན་ཏེ་ཞེས་བྱ་བ་ནི་ཆུང་ངུའི་ཆུང་ངུ་རྣམས་ནས་ཆེན་པོའི་ཆེན་པོ་རྣམས་ཁོ་ནའི་བར་གྱི་སྐལ་བ་མཉམ་པའི་རྒྱུ་ཡིན་ལ་ཆེན་པོའི་ཆེན་པོ་ནི་ཆུང་ངུའི་ཆུང་ངུ་རྣམས་ནས་ཆེན་པོའི་ཆེན་པོ་རྣམས་ཀྱི་བར་གྱི་སྐལ་བ་མཉམ་པའི་རྒྱུ་ཡིན་ནོ། །མངོན་པར་འདུ་བྱེད་པ་ལས་བྱུང་བ་

མ་ཡིན་པའི་ཕྱིར་མཉམ་པ་དང་ཁྱད་པར་ཅན་དག་ཁོ་ནའི་ནི་མ་ཡིན་ཏེ། སྐལ་བ་མཉམ་པའི་རྒྱུ་མངོན་པར་འདུ་བྱེད་པའི་ལས་བྱུང་བའི་འབྲས་བུ་ནི་དམན་པ་ཡིན་པར་མི་འདོད་ཀྱི་མངོན་པར་འདུ་བྱེད་པ་མེད་པ་ལས་བྱུང་བའི་ནི་མ་ཡིན་ནོ། །ཉོན་མོངས་པ་ཅན་རྣམས་ཀྱང་དེ་དང་

འདྲའོ་ཞེས་བྱ་བ་ནི་བརྩལ་བ་ལས་བྱུང་བ་མ་ཡིན་པའི་ཕྱིར་རྣམ་པ་དགུ་པོ་ཐམས་ཅད་ཕན་ཚུན་དུ་སྐལ་བ་མཉམ་པའི་རྒྱུ་ཡིན་པས་སྔར་བྱུང་བ་ཐམས་ཅད་ཀྱང་རང་གི་ས་པ་ཕྱིས་འབྱུང་བ་ཐམས་ཅད་ཀྱི་སྐལ་བ་མཉམ་པའི་རྒྱུ་ཡིན་ཏེ། འདི་ལ་མཉམ་པ་དང་ཁྱད་པར་ཅན་ཉིད་ལ་

ལྟོས་པ་ནི་མེད་དོ། །དེ་དག་ནི་གོ་རིམས་བཞིན་དུ་བཞི་དང་གསུམ་དང་གཉིས་དང་གཅིག་དག་གི་སྐལ་བ་མཉམ་པའི་རྒྱུ་ཡིན་ནོ་ཞེས་བྱ་བ་ལ་རྣམ་པར་སྨིན་པ་ལས་སྐྱེས་པ་ནི་རྣམ་པར་སྨིན་པ་ལས་སྐྱེས་པ་ལ་སོགས་པ་བཞིའི་སྐལ་བ་མཉམ་པའི་རྒྱུ་ཡིན་ནོ། །སྤྱོད་ལམ་པ་དག་ནི་སྤྲུལ་པ་

ནི་སྤྱོད་ལམ་པ་ལ་སོགས་པ་གསུམ་ཁོ་ནའི་ཡིན་གྱི་རྣམ་པར་སྨིན་པ་ལས་སྐྱེས་པ་རྣམས་ཀྱི་ནི་མ་ཡིན་ཏེ། དེ་དག་ནི་མངོན་པར་འདུ་བྱེད་པ་ལས་བྱུང་བ་མ་ཡིན་པ་ཉིད་ཀྱིས་དམན་པའི་ཕྱིར་རོ། །བཟོའི་གནས་པ་དག་ནི་གཉིས་ཀྱི་ཡིན་ནོ། །སྤྲུལ་པ་དག་ནི་སྤྲུལ་པ་རྣམས་

Vol. 142 · folio 194a

ཁོ་ནའི་ཡིན་གྱི་གོང་མ་རྣམས་ཀྱི་ནི་མ་ཡིན་ཏེ། སྔ་མ་སྔ་མ་དག་ནི་ཆོས་མངོན་པར་འདུ་བྱེད་པ་མེད་པ་ལས་བྱུང་བ་ཡིན་པའི་ཕྱིར་རོ། །སྤྲུལ་པའི་སེམས་བསམ་གཏན་བཞིའི་འབྲས་བུ་འདོད་པ་ན་སྤྱོད་པ་ཡང་ཡིན་ཏེ་ཞེས་བྱ་བ་ནི་བསམ་གཏན་བཞི་པོ་

དག་གི་འབྲས་བུ་སྟེ། སྤྲུལ་པའི་སེམས་འདོད་པ་ན་སྤྱོད་པ་ནི་བསམ་གཏན་དང་པོ་དང་གཉིས་པ་དང་གསུམ་པ་དང་བཞི་པའི་འབྲས་བུ་ཡིན་པས་རྣམ་པ་བཞིའོ། །དེ་ཡང་གོ་རིམས་བཞིན་དུ་བཞི་དང་གསུམ་དང་གཉིས་དང་གཅིག་དག་གི་སྐལ་བ་མཉམ་པའི་རྒྱུ་ཡིན་ནོ་ཞེས་བྱ་

བར་སྦྱར་ཏེ། བསམ་གཏན་དང་པོའི་འབྲས་བུ་ནི་བསམ་གཏན་དང་པོ་དང་གཉིས་པ་དང་གསུམ་པ་དང་བཞི་པའི་འབྲས་བུའི་སྟེ། བཞིའི་སྐལ་བ་མཉམ་པའི་རྒྱུ་ཡིན་ནོ། །བསམ་གཏན་གཉིས་པའི་འབྲས་བུ་ནི་བསམ་གཏན་གཉིས་པ་དང་གསུམ་པ་དང་བཞི་པའི་འབྲས་བུའི་སྟེ།

གསུམ་གྱི་སྐལ་བ་མཉམ་པའི་རྒྱུ་ཡིན་ནོ། །བསམ་གཏན་གསུམ་པའི་འབྲས་བུ་ནི་བསམ་གཏན་གསུམ་པ་དང་བཞི་པའི་འབྲས་བུའི་སྟེ་གཉིས་ཀྱི་ཡིན་ནོ། །བསམ་གཏན་བཞི་པའི་འབྲས་བུ་ནི་བསམ་གཏན་བཞི་པའི་འབྲས་བུ་གཞན་ཁོ་ནའི་སྟེ། གཅིག་གི་སྐལ་བ་མཉམ་པའི་རྒྱུ་

ཡིན་ནོ། །འདིར་གང་གིས་དེ་ལྟར་ངེས་པའི་རིགས་པ་ཅི་ཞིག་ཡོད་ཅེ་ན། རིགས་པ་དེ་བསྟན་པར་འདོད་ནས་བསམ་གཏན་གོང་མའི་འབྲས་བུ་ནི་བསམ་གཏན་འོག་མའི་འབྲས་བུའི་མ་ཡིན་ནོ་ཞེས་བྱ་བ་རྒྱས་པར་སྨོས་ཏེ། སྤྲུལ་པའི་སེམས་འདོད་པ་ན་སྤྱོད་པ་བསམ་གཏན་བཞི་

པའི་འབྲས་བུ་ནི་སྤྲུལ་པའི་སེམས་འདོད་པ་ན་སྤྱོད་པ་བསམ་གཏན་དང་པོའི་འབྲས་བུ་ནས་སྤྲུལ་པའི་སེམས་འདོད་པ་ན་སྤྱོད་པ་བསམ་གཏན་གསུམ་པའི་འབྲས་བུའི་བར་གྱི་སྐལ་བ་མཉམ་པའི་རྒྱུ་མ་ཡིན་ནོ། །ཅིའི་ཕྱིར་ཞེ་ན། སྨྲས་པ། སྐལ་བ་མཉམ་པའི་རྒྱུ་མངོན་པར་

འདུ་བྱེད་པ་ཅན་ཏེ། འབད་པ་ཆེན་པོས་བསྒྲུབ་པར་བྱ་བའི་འབྲས་བུ་ནི་དེ་ལྟར་འབད་པ་ཆེན་པོས་བསྒྲུབ་པར་བྱ་བ་མ་ཡིན་པ་དམན་པ་མ་ཡིན་ཏེ། འབད་པའི་ཁྱད་པར་ཇི་ལྟ་བུས་བསམ་གཏན་དང་པོ་ནས་བསམ་གཏན་གསུམ་པའི་བར་སྒྲུབ་པར་བྱེད་པ་དེ་ལྟ་བུ་ཁོ་ནས་སྒྲུབ་པར་

Vol. 142 · folio 194b

བྱེད་པ་ནི་མ་ཡིན་ནོ། །འོ་ན་ཅི་ཞེ་ན། འབད་པའི་ཁྱད་པར་ཆེས་མཆོག་ཏུ་གྱུར་པས་སྒྲུབ་པར་བྱེད་དོ། །དེ་ལྟ་བས་ན་འབྲས་བུ་ཡང་འབད་པའི་ཁྱད་པར་མཆོག་ཏུ་གྱུར་པས་སྒྲུབ་པར་བྱེད་དོ་ཞེས་བྱ་བར་ཁོང་དུ་ཆུད་པར་བྱའོ། །བསམ་གཏན་འོག་མའི་འབྲས་བུ་ནི་བསམ་

གཏན་གོང་མའི་འབྲས་བུའི་སྐལ་བ་མཉམ་པའི་རྒྱུ་ཡིན་གྱི་བསམ་གཏན་གོང་མའི་འབྲས་བུ་ནི་བསམ་གཏན་འོག་མའི་འབྲས་བུའི་མ་ཡིན་ནོ། །བསམ་གཏན་བཞི་པའི་འབྲས་བུ་སྦྱར་བ་ཇི་ལྟ་བར་བསམ་གཏན་གསུམ་པ་དང་གཉིས་པའི་འབྲས་བུ་ཡང་དེ་བཞིན་དུ་སྦྱར་

བར་བྱའོ། །དེ་ཉིད་ཀྱི་ཕྱིར་གསུངས་སོ་ཞེས་བྱ་བ་ནི་གང་གི་ཕྱིར་སྐལ་བ་མཉམ་པའི་རྒྱུ་མངོན་པར་འདུ་བྱེད་པ་ཅན་གྱི་འབྲས་བུ་དམན་པ་མ་ཡིན་པ་དེའི་ཕྱིར་གསུངས་སོ་ཞེས་བྱ་བའི་ཐ་ཚིག་གོ། །ཅི་ཞིག་གསུངས་ཤེ་ན། ཟག་པ་མེད་པ་སྐྱེས་པ་ཟག་པ་མེད་པ་མ་སྐྱེས་

པའི་རྒྱུ་མ་ཡིན་པ་ཡོད་དམ་ཞེས་བྱ་བ་རྒྱས་པར་སྨོས་ཏེ། ཟག་པ་མེད་པ་སྡུག་བསྔལ་ལ་ཆོས་ཤེས་པ་སྐྱེས་པ་ནི་ཟག་པ་མེད་པ་སྡུག་བསྔལ་ལ་ཆོས་ཤེས་པའི་བཟོད་པ་མི་སྐྱེ་བའི་ཆོས་ཅན་རྣམས་ཀྱི་རྒྱུ་མ་ཡིན་པ་ལྟ་བུ་སྟེ། སྡུག་བསྔལ་ལ་ཆོས་ཤེས་པ་ནི་མངོན་པར་

འདུ་བྱེད་པ་ཅན་ཉིད་ཀྱིས་སྡུག་བསྔལ་ལ་ཆོས་ཤེས་པའི་བཟོད་པ་དག་པས་ཁྱད་པར་དུ་འཕགས་པའི་ཕྱིར་རོ། །འདི་ལྟར་ཉོན་མོངས་པའི་བྲལ་བའི་ཐོབ་པ་དང་ལྷན་ཅིག་ལ་སྐྱེ་བ་གང་ཡིན་པ་དེ་ནི་ཁྱད་པར་དུ་འཕགས་པ་ཡིན་ནོ། །ཁྱད་པར་ཅན་ཐམས་ཅད་ཀྱང་དམན་པའི་

རྒྱུ་མ་ཡིན་པ་ལྟ་བུ་སྟེ། དཔེར་ན་དགྲ་བཅོམ་པ་ཉིད་ལས་ཡོངས་སུ་ཉམས་པའི་མི་སློབ་པའི་ལམ་སྐྱེས་པ་ནི་ལན་ཅིག་ཕྱིར་འོང་བ་དང་ཕྱིར་མི་འོང་བའི་ལམ་ཕྱིས་སྐྱེ་བ་དག་གི་སྐལ་བ་མཉམ་པའི་རྒྱུ་མ་ཡིན་པ་ལྟ་བུའོ། །རྒྱུད་གཅིག་ལ་ངེས་པའི་ཟག་པ་མེད་པའི་ཆོས་སྔོན་

ཐོབ་པ་ཞེས་བྱ་བ་རྒྱས་པར་འབྱུང་བ་ནི་རྒྱུད་གཅིག་ཏུ་གཏོགས་པའི་སྡུག་བསྔལ་ལ་ཆོས་ཤེས་པའི་བཟོད་པ་མ་འོངས་པ་སྐད་ཅིག་མ་དང་པོ་ཁོ་ན་ལ་ཐོབ་པ་དེ་དག་ནི་མ་སྐྱེས་པ་ལ་ཆོས་ཤེས་པ་སྐད་ཅིག་མ་གཉིས་པ་ལ་སྐྱེས་པའི་རྒྱུ་མ་ཡིན་ཏེ། འདི་ལྟར་འབྲས་བུ་སྔ་བ་ནི་

Vol. 142 · folio 195a

མེད་དོ། །འདི་ལ་ནི་སྡུག་བསྔལ་ལ་ཆོས་ཤེས་པའི་བཟོད་པ་དག་པས་སྡུག་བསྔལ་ལ་ཆོས་ཤེས་པ་ཆེས་སྔ་སྟེ། དེ་ནི་སྐྱེས་ཟིན་པའི་ཕྱིར་ལ་དེ་དག་ནི་མ་སྐྱེས་པའི་ཕྱིར་རོ། །ཡང་ན་འདི་ལྟར་སྐལ་བ་མཉམ་པའི་རྒྱུ་མ་འོངས་པ་མེད་པའི་ཡང་ཕྱིར་

རོ། །སྡུག་བསྔལ་ལ་ཆོས་ཤེས་པའི་བཟོད་པ་མ་འོངས་པ་དཔག་ཏུ་མེད་པ་ཞིག་ཐོབ་པ་ཁོ་ན་ཡིན་གྱི་སྐྱེས་པ་ནི་མ་ཡིན་ནོ། །ཟག་པ་མེད་པའི་ཆོས་སྔར་སྐྱེས་པ་ཞེས་བྱ་བ་རྒྱས་པར་འབྱུང་བ་ནི་གང་དུ་མ་སྐྱེས་པ་ནི་སྐལ་བ་མཉམ་པའི་རྒྱུ་མ་ཡིན་ནོ་ཞེས་ཐོབ་པ་ཙམ་གྱི་ཆོས་ཤིག་

དྲིས་པར་ཟད་གྱི་ཆོས་སྐྱེས་པ་ནི་མ་ཡིན་ནོ། །ད་ནི་ཅི་སྐྱེས་པ་ཡང་སྐལ་བ་མཉམ་པའི་རྒྱུ་མ་ཡིན་པ་ཡོད་དམ་ཞེས་ཁྱད་པར་གྱི་ངོ་བོར་འབྲི་བ་ཡིན་ནོ། །ཆེན་པོ་ཆུང་ངུའི་ལྟ་བུ་སྟེ་ཞེས་བྱ་བ་ནི་ཁྱད་པར་ཅན་དམན་པའི་ལྟ་བ་ཞེས་བྱ་བའི་ཐ་ཚིག་གོ། །འདི་ལྟ་སྟེ་འབྲས་བུ་གོང་མ་

ལས་ཡོངས་སུ་ཉམས་པ་སྟེ་དགྲ་བཅོམ་པ་ཉིད་ཀྱི་འབྲས་བུ་ལས་ཡོངས་སུ་ཉམས་པའམ། ཕྱིར་མི་འོང་བའི་འབྲས་བུ་ལས་ཡོངས་སུ་ཉམས་པ་འབྲས་བུ་འོག་མ་མངོན་དུ་བྱེད་པའི་ཚེ་སྟེ་ཕྱིར་མི་འོང་བའི་འབྲས་བུ་མངོན་དུ་བྱེད་པའམ་ལན་ཅིག་ཕྱིར་འོང་བའི་འབྲས་བུ་

མངོན་དུ་བྱེད་པའི་ཚེ་དགྲ་བཅོམ་པ་ཉིད་གྱི་ལམ་ཆེན་པོའི་ཆེན་པོ་སྔར་སྐྱེས་པ་གང་ཡིན་པ་དེ་ནི་ཕྱིར་མི་འོང་བའི་འབྲས་བུའམ་ལན་ཅིག་ཕྱིར་འོང་བའི་འབྲས་བུ་ཕྱིས་སྐྱེས་པའི་སྐལ་བ་མཉམ་པའི་རྒྱུ་མ་ཡིན་ཏེ། དམན་པའི་ཕྱིར་རོ། །དེ་བཞིན་དུ་ཕྱིར་མི་འོང་བའི་འབྲས་བུ་

ལས་ཡོངས་སུ་ཉམས་པའི་ཕྱིར་མི་འོང་བའི་འབྲས་བུའི་ལམ་སྔར་སྐྱེས་པ་གང་ཡིན་པ་དེ་ནི་ལན་ཅིག་ཕྱིར་མི་འོང་བའི་འབྲས་བུ་ཕྱིས་སྐྱེས་པའི་སྐལ་བ་མཉམ་པའི་རྒྱུ་མ་ཡིན་ཏེ། དེ་དམན་པའི་ཕྱིར་རོ། །སྡུག་བསྔལ་ལ་ཆོས་ཤེས་པའི་བཟོད་པ་ཐོབ་པ་ཞེས་བྱ་བ་རྒྱས་པར་འབྱུང་

བ་ནི་སྡུག་བསྔལ་ལ་ཆོས་ཤེས་པའི་ཐོབ་པ་སྔར་སྐྱེས་པ་གང་ཡིན་པ་དེ་ནི་སྐད་ཅིག་མ་ཕྱི་མ་དང་ལྷན་ཅིག་སྐྱེས་པ་སྟེ་སྐད་ཅིག་མ་ཕྱི་མ་སྡུག་བསྔལ་ལ་ཆོས་སུ་ཤེས་པའི་བཟོད་པའི་མཚན་ཉིད་ལ་སོགས་པ་ལམ་ལ་རྗེས་སུ་ཤེས་པའི་བཟོད་པའི་བར་དག་དང་ལྷན་ཅིག་སྐྱེས་པ་སྡུག་

Vol. 142 · folio 195b

བསྔལ་ལ་ཆོས་ཤེས་པའི་བཟོད་པའི་ཐོབ་པ་རྣམས་ཀྱི་སྐལ་བ་མཉམ་པའི་རྒྱུ་མ་ཡིན་ནོ། །ཅིའི་ཕྱིར་ཞེ་ན། དེ་དག་ནི་དམན་པའི་ཕྱིར་ལ་དེ་ནི་ཁྱད་པར་ཅན་ཡིན་པའི་ཕྱིར་རོ། །ཡང་ཇི་ལྟར་ན་དེ་དག་ནི་དམན་པ་ཉིད་ཡིན་ལ་དེ་ནི་ཁྱད་པར་ཅན་ཉིད་ཡིན་ཞེ་ན། སྡུག་

བསྔལ་ལ་ཆོས་ཤེས་པའི་བཟོད་པ་བས་ནི་སྡུག་བསྔལ་ལ་ཆོས་ཤེས་པ་ཁྱད་པར་ཅན་ཡིན་ཏེ། དེས་གཞོམ་པར་བྱ་བའི་ཉོན་མོངས་པའི་ཐོབ་པ་ལས་རྣམ་པར་གྲོལ་བའི་ཕྱིར་དང་། རྒྱུས་ཤིན་ཏུ་རྒྱས་པར་བྱས་པའི་ཕྱིར་རོ། །དེ་ལྟ་བས་ན་སྡུག་བསྔལ་ལ་ཆོས་ཤེས་པའི་

བཟོད་པའི་ཐོབ་པ་རྒྱུས་ཤིན་ཏུ་རྒྱས་པར་བྱས་པ་དག་པས་ཀྱང་སྡུག་བསྔལ་ལ་ཆོས་ཤེས་པའི་ཐོབ་པ་ཁྱད་པར་ཅན་ཡིན་ནོ། །དེ་དག་ནི་དམན་པ་ཡིན་ཏེ་དེའི་ཐོབ་པ་ཡིན་པའི་ཕྱིར་རོ། །གཞན་ཡང་རྒྱུ་གཉིས་པོ་དེ་ཉིད་ཀྱི་ཕྱིར་སྡུག་བསྔལ་ལ་ཆོས་ཤེས་པའི་ཐོབ་པ་ནི་སྡུག་

བསྔལ་ལ་ཆོས་ཤེས་པའི་བཟོད་པའི་ཐོབ་པ་སྐད་ཅིག་མ་དང་པོ་ལ་སྐྱེས་པ་བས་ཁྱད་པར་ཅན་ཡིན་ལ་སྡུག་བསྔལ་ལ་ཆོས་ཤེས་པའི་བཟོད་པའི་ཐོབ་པ་དེ་ནི་དམན་པ་ཡིན་ནོ། །དེའི་ཕྱིར་དེ་སྔོན་དུ་འགྲོ་བ་སྐད་ཅིག་མ་ཕྱི་མ་དང་ལྷན་ཅིག་སྐྱེས་པ་སྡུག་བསྔལ་ལ་ཆོས་ཤེས་

པའི་བཟོད་པའི་ཐོབ་པ་གཞན་དག་ཀྱང་རྒྱུས་ཤིན་ཏུ་རྒྱས་པར་བྱས་པ་ཡིན་ཡང་དམན་པ་ཁོ་ན་ཡིན་ནོ། །དེ་ལྟ་བས་ན་དེ་དག་གི་སྐལ་བ་མཉམ་པའི་རྒྱུ་མ་ཡིན་ནོ། །མཚུངས་ལྡན་རྒྱུ་ནི་སེམས་དག་དང་། །སེམས་བྱུང་ཞེས་བྱ་བ་ལ། ནི་ཞེས་བྱ་བའི་སྒྲ་ནི་ངེས་པར་

གཟུང་བའམ། མཚུངས་པར་ལྡན་པའི་རྒྱུ་ནི་སེམས་དང་སེམས་ལས་བྱུང་བ་དག་ཁོ་ན་ཡིན་ནོ་ཞེས་རིམ་པ་གཞན་དུ་སྦྱར་བ་ཡིན་ནོ། །དེ་ལྟ་ན་ནི་ཞེས་བྱ་བ་རྒྱས་པར་འབྱུང་བ་ནི་གལ་ཏེ་མཚུངས་པར་ལྡན་པའི་རྒྱུ་ནི་སེམས་དང་སེམས་ལས་བྱུང་བ་ཁོ་ན་ཡིན་ནོ། །ཞེས་

དེ་ཙམ་ཞིག་བརྗོད་ན་ནི་དུས་ཐ་དད་པ་ལས་སྐྱེས་པ་རྣམས་ཀྱང་དུས་ཐ་དད་པ་ལས་སྐྱེས་པ་དག་དང་ལྷན་ཅིག་མཚུངས་པར་ལྡན་པའི་རྒྱུར་ཐལ་བར་འགྱུར་ལ། རྒྱུད་ཐ་དད་པ་ལས་སྐྱེས་པ་རྣམས་ཀྱང་རྒྱུད་ཐ་དད་པ་ལས་སྐྱེས་པ་དག་དང་ལྷན་ཅིག་མཚུངས་པར་ལྡན་

Vol. 142 · folio 196a

པའི་རྒྱུར་ཐལ་བར་འགྱུར་ཏེ། དུས་དང་རྒྱུད་ཀྱིས་ཐ་དད་པ་དེ་དག་སེམས་དང་སེམས་ལས་བྱུང་བ་མ་ཡིན་ནོ། །འོ་ན་ནི་རྣམ་པ་དང་དམིགས་པ་གཅིག་པ་དག་ཡིན་ནོ་ཞེས་བྱ་བ་ནི་གལ་ཏེ་སེམས་དང་སེམས་ལས་བྱུང་བ་དག་རྣམ་པ་གཅིག་པ་སྟེ།

སྔོན་པོ་ལ་སོགས་པའི་རྣམ་པ་གཅིག་པ་ཅན་དང་དམིགས་པ་གཅིག་པ་སྟེ། སྔོན་པོ་ལ་སོགས་པའི་དམིགས་པ་གཅིག་པ་ཡིན་ན། དེ་ལྟ་ན་དེ་དག་ན་མཚུངས་པར་ལྡན་པའི་རྒྱུ་ཡིན་གྱི་གཞན་དུ་ནི་མ་ཡིན་ནོ། །དེ་ལྟར་ན་དུས་ཐ་དད་པ་ལས་སྐྱེས་པ་ཉིད་དང་རྒྱུད་ཐ་དད་པ་ལས་

སྐྱེས་པ་ཉིད་བཟློག་པར་འགྱུར་རོ་སྙམ་དུ་བསམས་པ་ཡིན་ནོ། །དེ་ལྟ་ན་ཡང་དེ་ཉིད་དུ་ཐལ་བར་འགྱུར་རོ་ཞེས་བྱ་བ་ནི་དུས་དང་རྒྱུད་ཐ་དད་པ་ལས་སྐྱེས་པ་རྣམས་ཕན་ཚུན་མཚུངས་པར་ལྡན་པའི་རྒྱུ་ཉིད་དུ་ཐལ་བར་འགྱུར་རོ་ཞེས་བྱ་བའི་ཐ་ཚིག་སྟེ། སེམས་དང་སེམས་ལས་བྱུང་བ་

དུས་དང་རྒྱུད་ཐ་དད་པ་ལས་སྐྱེས་པ་རྣམས་ལ་ཡང་རྣམ་པ་དང་དམིགས་པ་གཅིག་པ་ཉིད་ནི་སྲིད་དོ། །རྒྱུད་ཐ་དད་པ་ལས་སྐྱེས་པ་རྣམས་ལ་ཡང་ཐལ་བར་འགྱུར་ཏེ་ཞེས་བྱ་བ་ནི་དུས་ཐ་དད་པ་ལས་སྐྱེས་པ་ཉིད་གཅིག་པུ་བསྩལ་བར་ཟད་ཀྱི། མང་པོ་ཟླ་བ་ཚེས་པ་ལ་སོགས་

པ་ལ་ལྟ་བ་དག་ནི་སེམས་དང་སེམས་ལས་བྱུང་བ་རྣམ་པ་དང་དམིགས་པ་གཅིག་པ་རྣམས་འབྱུང་ངོ་། །རྟེན་མཚུངས་པ་ཅན་རྣམས་སོ་ཞེས་བྱ་བ་ནི་འདི་དག་ལ་རྟེན་མཚུངས་ཤིང་ཐ་མི་དད་པ་ཡོད་པས་ན་རྟེན་མཚུངས་པ་དག་སྟེ། མཚུངས་པ་ཞེས་བྱ་བའི་སྒྲ་འདྲ་བའི་དོན་ཡིན་

པར་བཟུང་ན་ནི་རིགས་འདྲ་བའི་ཕྱིར་དེ་ཉིད་དུ་ཐལ་བར་འགྱུར་རོ། །ཕན་ཚུན་འབྲས་བུའི་དོན་གྱིས་ན་ཞེས་བྱ་བ་ནི་ཇི་ལྟར་ན་འགྲོན་པ་རྣམས་ཕན་ཚུན་གྱི་སྟོབས་ཀྱིས་ལྷན་ཅིག་ལམ་དུ་འགྲོ་བ་དེ་བཞིན་དུ་སེམས་ཀྱང་སེམས་ལས་བྱུང་བའི་འབྲས་བུ་ཡིན་ལ། སེམས་ལས་བྱུང་བ་ཡང་

སེམས་ཀྱི་ཡིན་པས་ན་ཕན་ཚུན་དུ་འབྲས་བུ་ཡིན་པའི་ཕྱིར་དོན་འདིས་ལྷན་ཅིག་འབྱུང་བའི་རྒྱུ་ཡིན་ནོ། །མཚུངས་པ་ལྔས་ཞེས་བྱ་བ་རྒྱས་པར་འབྱུང་བ་ནི་མཚུངས་པ་ལྔ་པོ་རྟེན་དང་དམིགས་པ་དང་རྣམ་པ་དང་དུས་དང་རྫས་མཚུངས་པ་དག་གིས་ཞེས་བྱ་བའི་ཐ་ཚིག་གོ། །

Vol. 142 · folio 196b

མཚུངས་པར་ལྡན་པའི་དོན་གྱིས་ན་ཞེས་བྱ་བ་ནི་མཚུངས་པར་འཇུག་པའི་དོན་གྱིས་ན་མཚུངས་པར་ལྡན་པའི་རྒྱུ་ཡིན་ཏེ། ཇི་ལྟར་ཕན་ཚུན་སྟོབས་ཀྱིས་ལམ་དུ་འགྲོ་བའི་འགྲོན་པ་དེ་དག་ཉིད་ཟས་དང་སྐོམ་དང་ཁྲུས་དང་མལ་ཆ་དང་སྟན་ལ་སོགས་པ་ཡོངས་སུ་སྤྱད་པའི་བྱ་བ་ལ་

འདྲ་བར་སྦྱོར་བ་དེ་བཞིན་དུ་འདི་དག་ཀྱང་ཕན་ཚུན་མཚུངས་པར་ལྡན་པ་ཉིད་ཡིན་ནོ། །དེ་ཉིད་ཀྱི་ཕྱིར་གཅིག་མེད་ན་ཡང་ཐམས་ཅད་མཚུངས་པར་ལྡན་པས་ཞེས་བྱ་བ་སྨོས་སོ། །ཀུན་འགྲོ་ལྔ་ཞེས་བྱ་བ་ནི་དེ་དག་ཀུན་དུ་འགྲོ་བ་ཡང་ཡིན་ལ་སྔ་མ་ཡང་ཡིན་པས་ཀུན་འགྲོ་སྔ་མ་

ཡིན་ཏེ། ཀུན་དུ་འགྲོ་བ་སྔར་སྐྱེས་པ་རྣམས་ཞེས་བྱ་བའི་ཐ་ཚིག་གོ། །རང་གི་ས་པའི་ཀུན་དུ་འགྲོ་བའི་ཆོས་སྔར་སྐྱེས་པ་རྣམས་ཞེས་བྱ་བ་ནི་ཕྲ་རྒྱས་ཀུན་དུ་འགྲོ་བ་འདས་པ་དང་ད་ལྟར་བྱུང་བ་རྣམས་ཏེ། ཉོན་མོངས་པ་ཅན་ཉོན་མོངས་པའི་ངོ་བོ་ཉིད་དང་མཚུངས་པར་ལྡན་པ་

དང་ཀུན་ནས་བསླང་བ་ཕྱི་མ་འདས་པ་དང་ད་ལྟར་བྱུང་བ་ཕྱི་མ་རྣམས་དང་མ་འོངས་པ་རྣམས་ཀྱི་ཀུན་དུ་འགྲོ་བའི་རྒྱུ་ཡིན་ནོ། །བཤད་པར་བྱའོ་ཞེས་བྱ་བ་ནི་མཛོད་ཀྱི་གནས་ལྔ་པ་ལས། སྡུག་བསྔལ་རྒྱུ་མཐོང་སྤང་བྱ་བ། །ལྟ་དང་དེ་བཞིན་ཐེ་ཚོམ་དང་། །གང་དེ་ལྷན་ཅིག་མ་

འདྲེས་པའི། །མ་རིག་གང་ཡིན་ཀུན་དུ་འགྲོ། །ཞེས་བྱ་བ་འདིར་བསྟན་པར་བྱ་བ་ཡིན། ཉོན་མོངས་པ་ཅན་གྱི་ཆོས་ཀྱི་ཐུན་མོང་གི་རྒྱུ་ཉིད་ཡིན་པས་ན་ཞེས་བྱ་བ་རྒྱས་པར་འབྱུང་བ་ནི་གང་གི་ཕྱིར་འདི་ནི་ཉོན་མོངས་པ་ཅན་དག་ཁོ་ནའི་རིགས་ལྔ་ཆར་གྱི་ཡང་ཀུན་དུ་འགྲོ་

བའི་རྒྱུ་ཡིན་ལ་སྐལ་བ་མཉམ་པའི་རྒྱུ་ནི་ཉོན་མོངས་པ་ཅན་རྣམས་ཀྱི་ཡང་ཡིན་ཉོན་མོངས་པ་ཅན་མ་ཡིན་པ་རྣམས་ཀྱི་ཡང་ཡིན་པ་དེའི་ཕྱིར་ལོགས་ཤིག་ཏུ་རྣམ་པར་གཞག་གོ། །འདི་ཇི་ལྟར་ཉོན་མོངས་པ་ཅན་གྱི་ཆོས་ཀྱི་ཐུན་མོང་གི་རྒྱུ་ཉིད་ཡིན་ཞེས་བྱ་བ་བསྟན་པའི་ཕྱིར་

རིས་གཞན་དག་གི་ཡང་རྒྱུ་ཡིན་པའི་ཕྱིར་ཏེ་ཞེས་བྱ་བ་སྨོས་ཏེ། དེ་དག་གི་མཐུས་ནི་ཞེས་བྱ་བ་ནི་ཀུན་དུ་འགྲོ་བ་དེ་དག་གི་མཐུས་རིས་གཞན་པའི་ཉོན་མོངས་པ་འདོད་ཆགས་ལ་སོགས་པ་སྐྱེ་བར་འགྱུར་རོ། །དེ་དག་ཀྱང་གང་ཞེ་ན། ཀུན་དུ་འགྲོ་བའི་རྒྱུ་སྡུག་བསྔལ་

Vol. 142 · folio 197a

མཐོང་བས་སྤང་བར་བྱ་བའི་རིས་གཞན་ནི་ཀུན་འབྱུང་བ་དང་འགོག་པ་དང་ལམ་མཐོང་བ་དང་བསྒོམ་པས་སྤང་བར་བྱ་བ་དག་ཡིན་ནོ། །ཀུན་དུ་འགྲོ་བས་ཀུན་འབྱུང་མཐོང་བས་སྤང་བར་བྱ་བའི་རིས་གཞན་ནི་སྡུག་བསྔལ་དང་འགོག་པ་དང་ལམ་མཐོང་བ་

དང་བསྒོམ་པས་སྤང་བར་བྱ་བ་དག་ཡིན་ནོ། །ཉོན་མོངས་པའི་རིས་ཐམས་ཅད་དུ་འགྲོ་ཞིང་དམིགས་པའམ་ཉོན་མོངས་པའི་རིས་ཐམས་ཅད་ཀྱི་རྒྱུའི་དངོས་པོར་འགྱུར་བས་ན་ཀུན་དུ་འགྲོ་བ་དག་ཡིན་ནོ། །དེ་ཉིད་ཀྱི་ཕྱིར་ཉོན་མོངས་པ་ཐམས་ཅད་ནི་འཇིག་ཚོགས་ལ་ལྟ་བའི་རྩ་

བ་ཅན་ཡིན་ནོ། །འཇིག་ཚོགས་ལ་ལྟ་བ་ལས་རབ་ཏུ་སྐྱེ་བ་དང་། འཇིག་ཚོགས་ལ་ལྟ་བ་ལས་ཀུན་འབྱུང་བ་ཡིན་ནོ་ཞེས་གསུངས་ཏེ། བདག་ཏུ་འཛིན་པའི་སྒོ་ནས་འདོད་ཆགས་དང་ང་རྒྱལ་དང་ཁོང་ཁྲོ་བ་ལ་སོགས་པ་ཀུན་འབྱུང་བའི་ཕྱིར་རོ། །ཇི་འཕགས་པའི་གང་

ཟག་གི་ཉོན་མོངས་པ་ཅན་གྱི་ཆོས་རྣམས་ཀྱང་ཞེས་བྱ་བ་ནི་འཕགས་པའི་གང་ཟག་གི་ཀུན་དུ་འགྲོ་བ་རྣམས་ནི་མཐོང་བས་སྤང་བར་བྱ་བ་ཡིན་པའི་ཕྱིར་ཐམས་ཅད་སྤངས་པ་ཁོ་ན་ཡིན་ལ་འདོད་ཆགས་ལ་སོགས་པ་ནི་སློབ་པ་རྣམས་ཀུན་དུ་སྤྱོད་དེ། དེ་དག་གི་འདོད་ཆགས་ལ་

སོགས་པ་དེ་དག་ནི་ཀུན་དུ་འགྲོ་བའི་རྒྱུ་ཅན་མ་ཡིན་ནོ་སྙམ་དུ་སེམས་ཤིང་དེ་སྐད་དུ་འདྲི་བ་ཡིན་ནོ། །ཉོན་མོངས་པ་ཅན་གྱི་ཆོས་རྣམས་ཞེས་བྱ་བ་ནི་བྱེ་བྲག་ཏུ་མ་ཕྱེ་བའི་ཕྱིར་སོ་སོའི་སྐྱེ་བོ་དང་འཕགས་པའི་རྒྱུད་ལས་སྐྱེས་པ་རྣམས་ཞེས་བྱ་བར་ཤེས་སོ། །མཐོང་བས་

སྤང་བར་བྱ་བའི་ཆོས་རྣམས་ཀྱི་རྣམ་པར་སྨིན་པ་གང་ཡིན་པའོ་ཞེས་བྱ་བ་འདི་ནི་དོན་ཡོངས་སུ་རྫོགས་པར་བྱ་བའི་ཕྱིར་སྨོས་པ་ཡིན་གྱི་འདི་དཔེར་བརྗོད་པ་ནི་མ་ཡིན་ནོ། །ལུང་དུ་མ་བསྟན་པའི་ཆོས་འདུས་བྱས་རྣམས་ཞེས་བྱ་བ་ནི་བསྒྲིབས་ལ་ལུང་དུ་མ་བསྟན་པ་དང་མ་

བསྒྲིབས་ལ་ལུང་དུ་མ་བསྟན་པ་རྣམས་བཟུང་སྟེ་བསྒྲིབས་ལ་ལུང་དུ་མ་བསྟན་པ་དག་ནི་འདོད་པའི་ཁམས་ཀྱི་འཇིག་ཚོགས་ལ་ལྟ་བ་དང་མཐར་འཛིན་པར་ལྟ་བ་དང་དེ་དག་དང་མཚུངས་པར་ལྡན་པ་དང་། ཀུན་ནས་བསླང་བའི་ཆོས་རྣམས་དང་གཟུགས་དང་གཟུགས་

Vol. 142 · folio 197b

མེད་པ་ན་སྤྱོད་པའི་ཉོན་མོངས་པ་ཅན་གྱི་ཆོས་རྣམས་སོ། །འདུས་བྱས་སྨོས་པ་ནི་ནམ་མཁའ་དང་སོ་སོར་བརྟགས་པ་མ་ཡིན་པས་འགོག་པ་བསྩལ་བའི་ཕྱིར་ཏེ། ཡང་དག་ལུང་མ་བསྟན་བསྟན་དག །ཅེས་འབྱུང་བས་དེ་གཉིས་ལུང་དུ་མ་བསྟན་པ་ཡིན་པའི་ཕྱིར་རོ། །

དེ་ལ་འདོད་པ་ན་སྤྱོད་པའི་ཉོན་མོངས་པ་ཅན་གྱི་ཆོས་རྣམས་ནི་ཅི་རིགས་པར་འཇིག་ཚོགས་ལ་ལྟ་བ་ལ་སོགས་པ་དེ་དག་ཉིད་སྐལ་བ་མཉམ་པ་དང་ཀུན་དུ་འགྲོ་བ་དང་ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུར་གྱུར་པ་དག་གིས་ལུང་དུ་མ་བསྟན་པའི་རྒྱུ་ཅན་ཡིན་གྱི།

གཞན་དག་གིས་ནི་མ་ཡིན་ནོ། །ས་གོང་མ་པ་རྣམས་ནི་གཞན་དག་གིས་ཀྱང་ཡིན་ནོ་ཞེས་བྱ་བ་དེར་ནི་གོ་སླའོ། །མ་བསྒྲིབས་ལ་ལུང་དུ་མ་བསྟན་པ་རྣམས་ནི་སྐལ་བ་མཉམ་པའི་རྒྱུས་བསྒྲིབས་ལ་ལུང་དུ་མ་བསྟན་པའི་རྒྱུ་ཅན་ཡིན་ནོ། །མི་དགེ་བ་རྣམས་ནི་འདོད་པ་ན་སྤྱོད་པའི་

འདོད་ཆགས་ལ་སོགས་པ་ཡིན་ནོ། །དེ་དག་ཀྱང་ཀུན་དུ་འགྲོ་བའི་རྒྱུས་འཇིག་ཚོགས་ལ་ལྟ་བ་ལ་སོགས་པའི་རྒྱུ་ཅན་ཡིན་ཏེ་འདིར་དཔེར་བརྗོད་པ་ནི་འདི་ཡིན་ནོ། །མི་དགེ་བ་རྣམས་སོ་ཞེས་ཁྱད་པར་དུ་མ་བྱས་པར་འབྱུང་བའི་ཕྱིར་མཐོང་བས་སྤང་བར་བྱ་བ་དང་། བསྒོམ་པས་སྤང་

བར་བྱ་བ་རྣམས་འབྱུང་སྟེ། འདི་ནི་འདིར་ཁུངས་གཉིས་པ་ཡིན་ནོ། །དེ་དག་ལས་གཞན་པ་སྡུག་བསྔལ་གྱི་བདེན་པ་ཉོན་མོངས་པ་ཅན་གང་ཡིན་པའོ་ཞེས་བྱ་བ་ནི་ཁུངས་གསུམ་པ་ཡིན་ཏེ། དེ་དག་ལས་གཞན་པ་སྡུག་བསྔལ་གྱི་བདེན་པ་ཉོན་མོངས་པ་ཅན་ནི་བྱེ་བྲག་ཏུ་མ་ཕྱེ་བའི་

ཕྱིར་མཐོང་བས་སྤང་བར་བྱ་བ་དང་བསྒོམ་པས་སྤང་བར་བྱ་བ་རྣམས་གཟུང་སྟེ། སོ་སོའི་སྐྱེ་བོ་རྣམས་ཀྱི་བཞིན་དུ་འཕགས་པ་རྣམས་ཀྱི་བསྒོམ་པས་སྤང་བར་བྱ་བ་ཡང་ཀུན་དུ་འགྲོ་བའི་འཇིག་ཚོགས་ལ་ལྟ་བའི་རྒྱུ་ཅན་ཡིན་གྱི་འཇིག་ཚོགས་ལ་ལྟ་བའི་རྒྱུ་ནི་མ་ཡིན་ནོ་ཞེས་དེ་ནི་

བཤད་ཟིན་ཏོ། །འོ་ན་བཏགས་པའི་བཤད་པ་ནི་ཞེས་བྱ་བ་ནི་གལ་ཏེ་མི་དགེ་བ་ལུང་དུ་མ་བསྟན་པའི་རྒྱུ་ཅན་དག་ཀྱང་ཡིན་གྱི་མི་དགེ་བའི་རྒྱུ་ཅན་འབའ་ཞིག་ནི་མ་ཡིན་ན། བཏགས་པའི་བཤད་པ་ཡོད་དེ། འཕགས་པའི་གང་ཟག་འདོད་པའི་འདོད་ཆགས་དང་བྲལ་བ་ལས་

Vol. 142 · folio 198a

ཡོངས་སུ་ཉམས་པ་དེ་ལས་དང་པོར་ཉོན་མོངས་པ་ཅན་གྱི་སེམས་པ་མངོན་དུ་བྱེད་པ་གང་ཡིན་པའོ་ཞེས་བྱ་བ་ཇི་ལྟར་དྲང་། བཏགས་པའི་བཤད་པའི་དོན་ནི་འདོད་པའི་འདོད་ཆགས་དང་བྲལ་བ་ལས་ཡོངས་སུ་ཉམས་པའི་ཚེ་ནི་འཕགས་པའི་གང་ཟག་གི་སེམས་

པ་ལྷན་ཅིག་འབྱུང་བའི་རྒྱུ་དང་མཚུངས་པར་ལྡན་པའི་རྒྱུས་མི་དགེ་བའི་རྒྱུ་ཅན་ཁོ་ན་ཡིན་གྱི་ལུང་དུ་མ་བསྟན་པའི་རྒྱུ་ཅན་ནི་མ་ཡིན་ཏེ་འཇིག་ཚོགས་དང་མཐར་འཛིན་པར་ལྟ་བ་དག་སྤངས་པའི་ཕྱིར་རོ་ཞེས་བྱ་བ་ཡིན་པར་འགྱུར་རོ་སྙམ་པའི་བསམ་པ་འདིས་རྒོལ་བར་བྱེད་དོ། །བྱེ་

བྲག་ཏུ་སྨྲ་བས་དེ་ནི་རྒྱུ་མ་སྤངས་པ་ལ་དགོངས་ནས་གསུངས་པ་ཡིན་གྱི་ཞེས་བྱ་བ་སྨོས་ཏེ་བཏགས་པའི་བཤད་པ་འདི་ནི་ལྷན་ཅིག་འབྱུང་བའི་རྒྱུ་དང་མཚུངས་པར་ལྡན་པའི་རྒྱུ་ལས་དགོངས་ཤིང་ཐུགས་ལ་དགོངས་ནས་གསུངས་པ་ཡིན་ཏེ། སེམས་པ་དེའི་རྒྱུ་མཐོང་བས་སྤང་བར་བྱ་

བ་འཇིག་ཚོགས་ལ་ལྟ་བ་ལ་སོགས་པ་ནི་མཐོང་བའི་ལམ་གྱིས་སྤངས་ཟིན་པའི་ཕྱིར་བཏགས་པའི་བཤད་པ་ལས་མ་གསུངས་སོ། །མི་དགེ་བ་རྣམས་དང་དགེ་བའི་ཆོས་ཟག་པ་དང་བཅས་པ་རྣམས་ཞེས་བྱ་བ་ནི་མི་དགེ་བ་རྣམས་ནི་ཟག་པ་དང་བཅས་པ་ཁོ་ན་ཡིན་པས་བྱེ་བྲག་ཏུ་

མ་བྱས་སོ། །དགེ་བ་དག་ནི་རྣམ་པ་གཉིས་ཏེ། ཟག་པ་དང་བཅས་པ་དག་ཀྱང་ཡིན་ཟག་པ་མེད་པ་དག་ཀྱང་ཡིན་པས་དེའི་ཕྱིར་དགེ་བ་ཟག་པ་དང་བཅས་པ་གང་དག་ཡིན་པ་དེ་དག་རྣམ་པར་སྨིན་པའི་རྒྱུ་ཡིན་གྱི་ཟག་པ་མེད་པ་དག་ནི་མ་ཡིན་ནོ་ཞེས་བྱེ་བྲག་ཏུ་བྱེད་དོ། །

རྣམ་པར་སྨིན་པའི་ཆོས་ཅན་ཡིན་པའི་ཕྱིར་རོ་ཞེས་བྱ་བ་ནི་རྣམ་པར་སྨིན་པའི་རང་བཞིན་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །སྟོབས་ཆུང་བའི་ཕྱིར་ཏེ་ས་བོན་རུལ་པ་བཞིན་ནོ་ཞེས་བྱ་བ་རྒྱས་པར་འབྱུང་བ་ནི་ཇི་ལྟར་ས་བོན་རུལ་པ་དག་སྟོབས་ཆུང་བའི་ཕྱིར་མངོན་པར་བརླན་

ཀྱང་མྱུ་གུ་སྐྱེ་བའི་རྒྱུར་མི་འགྱུར་བ་དེ་བཞིན་དུ་ལུང་དུ་མ་བསྟན་པའི་ཆོས་རྣམས་སྲེད་པར་མངོན་པར་བརླན་ཀྱང་རྣམ་པར་སྨིན་པ་སྐྱེ་བའི་རྒྱུར་མི་འགྱུར་ཏེ་སྟོབས་ཆུང་བའི་ཕྱིར་རོ། །ཟག་པ་མེད་པ་རྣམས་ནི་སྟོབས་དང་ལྡན་ཡང་སྲེད་པས་མངོན་པར་མ་བརླན་པའི་ཕྱིར་རྣམ་པར་སྨིན་

Vol. 142 · folio 198b

པ་འགྲུབ་པར་མི་བྱེད་དོ། །དཔེར་ན་ས་བོན་གྲུང་པོ་སྐམ་པོ་རྣམས་ཆུ་དག་གིས་མ་བརླན་པའི་ཕྱིར་མྱུ་གུ་འགྲུབ་པར་མི་བྱེད་པ་དེ་དང་འདྲའོ། །སྔ་མ་དག་ནི་རང་གི་མཐུ་མེད་པ་ཡིན་ནོ། །གཞན་དག་ནི་ལྷན་ཅིག་བྱེད་པའི་རྒྱུ་གཞན་མེད་པ་ཡིན་ནོ། །གང་དང་ལྡན་པ་ཞེས་བྱ་བ་ནི་

ཁམས་གང་དང་ལྡན་པ་སྟེ། ལྡན་པ་མ་ཡིན་པ་འདོད་པ་ལ་སོགས་པ་དང་ལྡན་པ་མ་ཡིན་པ་ཟག་པ་མེད་པ་རྣམས་གང་དང་ལྡན་པའི་རྣམ་པར་སྨིན་པ་ཞིག་མངོན་པར་འགྲུབ་པར་བྱེད་པར་འགྱུར། རྣམ་པར་སྨིན་པ་ནི་ལྡན་པ་ཡིན་པར་འགྱུར་གྱི་མི་ལྡན་པ་ནི་མ་ཡིན་ཏེ།

འདོད་པའི་ཁམས་ལ་སོགས་པ་དང་ལྡན་པའི་ཆོས་ཀྱི་ངོ་བོ་ཉིད་ཡིན་པའི་ཕྱིར་རོ། །ལྷག་མ་རྣམས་ནི་ཞེས་བྱ་བ་རྒྱས་པར་འབྱུང་བ་ནི་ལྷག་མ་མི་དགེ་བ་རྣམས་དང་དགེ་བ་ཟག་པ་དང་བཅས་པ་རྣམས་ནི་རྣམ་པ་གཉི་ག་ཡིན་ཞིང་རྣམ་པ་གཉིས་ཡིན་པའི་ཕྱིར་ཏེ། སྟོབས་དང་

ལྡན་པ་དང་མངོན་པར་བརླན་པའི་རྣམ་པ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །དེ་དག་ནི་རྣམ་པར་སྨིན་པ་འགྲུབ་པར་བྱེད་དེ། དཔེར་ན་ས་བོན་གྲུང་པོ་མངོན་པར་བརླན་པ་རྣམས་ཀྱིས་མྱུ་གུ་མངོན་པར་འགྲུབ་པར་བྱེད་པ་དང་འདྲའོ། །རྣམ་པར་སྨིན་པའི་རྒྱུ་ཞིག་ཅེས་

བྱ་བ་རྒྱས་པར་འབྱུང་བ་ནི་གལ་ཏེ་རྣམ་པར་སྨིན་པ་ཞེས་བྱ་བ་རྣམ་པར་སྨིན་པས་ན་རྣམ་པར་སྨིན་པའོ་ཞེས་བྱ་བར་ངོ་བོར་བསྒྲུབ་ན་ནི་རྣམ་པར་སྨིན་པའི་རྒྱུ་ཞེས་དྲུག་པར་བསྡུ་བ་ཡིན་ནོ། །འོན་ཏེ་བདག་ཉིད་རྣམ་པར་སྨིན་པར་འགྱུར་བས་ཞེས་ལས་སུ་སྒྲུབ་ན་ནི་དེ་ལ་རྣམ་པར་

སྨིན་པ་ཉིད་རྒྱུ་ཡིན་པས་རྣམ་པར་སྨིན་པའི་རྒྱུའོ་ཞེས་ལས་ཀྱི་གཞིར་བྱ་བ་ཡིན་ནོ། །དེས་ན་ཅིར་འགྱུར་ཞེས་བྱ་བ་ནི་དེས་ན་ཉེས་པ་ཅིར་འགྱུར་ཞེས་བྱ་བ་ཡིན་ནོ། །གལ་ཏེ་རྣམ་པར་སྨིན་པའི་རྒྱུ་ཞེས་བྱ་བར་ངོ་བོ་སྒྲུབ་པར་བཟུང་ན་ནི་མིག་རྣམ་པར་སྨིན་པ་ལས་སྐྱེས་པ་ཡིན་ནོ་

ཞེས་བྱ་བར་དེར་མི་འགྱུར་ཏེ། མིག་ནི་རྣམ་པར་སྨིན་པ་ལས་སྐྱེས་པ་མ་ཡིན་ནོ། །འོ་ན་ཅི་ཞེ་ན། རྣམ་པར་སྨིན་པའི་རྒྱུ་ལས་ལས་ཞེས་བྱ་བའི་ཐ་ཚིག་སྟེ། རྣམ་པར་སྨིན་པ་ནི་རྒྱུ་མ་ཡིན་ནོ། །འོན་ཏེ་རྣམ་པར་སྨིན་པ་ཉིད་རྒྱུ་ཡིན་པས་ཞེས་ལས་སུ་སྒྲུབ་པར་གཟུང་ན་ནི། ལས་ཀྱང་རྣམ་

Vol. 142 · folio 199a

པར་སྨིན་པར་འགྱུར་བས་རྣམ་པར་སྨིན་པ་ཡིན་པའི་ཕྱིར་མིག་རྣམ་པར་སྨིན་པ་ལས་སྐྱེས་པ་ཡིན་ནོ་ཞེས་བྱ་བ་འདི་ནི་འགྲུབ་མོད་ཀྱི། འོན་ཀྱང་ལས་ཀྱི་རྣམ་པར་སྨིན་པ་ཞེས་བྱ་བ་དེར་ནི་མི་འགྱུར་ཏེ། རྣམ་པར་སྨིན་པ་ནི་ལས་ཁོ་ན་ལ་བྱའི། རྣམ་

པར་སྨིན་པ་ནི་མ་ཡིན་ལ། ལས་ཀྱི་རྣམ་པར་སྨིན་པ་ཞེས་བྱ་བ་འདིར་ནི་ངོ་བོ་སྒྲུབ་པའི་དོན་དུ་བཞེད་ཀྱི་ལས་སུ་སྒྲུབ་པ་ནི་མ་ཡིན་ནོ། །དེ་ལྟ་བས་ན་ལས་ཀྱི་རྣམ་པར་སྨིན་པ་ཞེས་བྱ་བ་དེར་མི་འགྱུར་རོ། །གཉིས་ཀ་ལྟར་ཡང་རུང་ངོ་ཞེས་སྔར་བཤད་ཟིན་ཏོ་ཞེས་བྱ་བ་ནི།

རྣམ་པར་སྨིན་པ་ལས་སྐྱེས་པ་དང་། རྒྱས་ལས་བྱུང་བ་ནང་གི་ལྔ། །ཞེས་བྱ་བ་དེར་བཤད་ཟིན་ཏེ། དེར་རྣམ་པར་སྨིན་པའི་རྒྱུ་ལས་སྐྱེས་པ་ནི་རྣམ་པར་སྨིན་པ་ལས་སྐྱེས་པ་སྟེ། བར་གྱི་ཚིག་མི་མངོན་པར་བྱས་པའི་ཕྱིར་བ་ལང་གི་ཤིང་རྟ་ཞེས་བྱ་བ་ལྟ་བུའོ་ཞེས་བྱ་བ་

ནི་ངོ་བོ་བསྒྲུབ་པར་གཟུང་བ་ཡིན་ནོ། །ཡང་ན་འབྲས་བུའི་དུས་སུ་ཕྱིན་པའི་ལས་ནི་རྣམ་པར་སྨིན་པ་ཞེས་བྱ་སྟེ། རྣམ་པར་སྨིན་པར་འགྱུར་བའི་ཕྱིར་རོ། །དེ་ལས་སྐྱེས་པ་ནི་རྣམ་པར་སྨིན་པ་ལས་སྐྱེས་པ་རྣམས་སོ་ཞེས་བྱ་བ་ནི་ལས་སུ་སྒྲུབ་པར་གཟུང་བ་ཡིན་ནོ། །འབྲས་

བུ་ནི་རྣམ་པར་སྨིན་པ་ཁོ་ན་ཡིན་པས་རྣམ་པར་སྨིན་པའོ་ཞེས་བྱ་བ་ནི་འབྲས་བུ་ཡིན་པར་བརྗོད་པར་འདོད་ན་ནི་ངོ་བོ་སྒྲུབ་པ་ཁོ་ནར་ཡོངས་སུ་གཟུང་ཞེས་བྱ་བའི་ཐ་ཚིག་གོ། །དེ་ལྟ་བས་ན་མིག་ནི་རྣམ་པར་སྨིན་པ་ལས་སྐྱེས་པ་ཡིན་ནོ་ཞེས་བྱ་བ་ཡང་བར་གྱི་ཚིག་མི་མངོན་པར་

བྱས་ཏེ། ངོ་བོ་སྒྲུབ་པར་སྨིན་པའི་སྒོ་ནས་ཀྱང་གྲུབ་ལ་ལས་ཀྱི་རྣམ་པར་སྨིན་པ་ཞེས་བྱ་བ་ཡང་ངོ་བོ་སྒྲུབ་པ་སྨོས་པའི་སྒོ་ནས་འགྲུབ་པར་འགྱུར་ཏེ། སྒྲས་རྟོགས་པ་ནི་བརྗོད་པར་འདོད་པ་སྔོན་དུ་འགྲོ་བ་ཡིན་པའི་ཕྱིར་རོ། །མི་འདྲ་བར་སྨིན་པ་ནི་རྣམ་པར་སྨིན་པའོ་

ཞེས་བྱ་བ་ནི་རྒྱུ་དང་མི་འདྲ་བའི་འབྲས་བུ་ཞེས་བྱ་བའི་ཐ་ཚིག་གོ། །རྒྱུ་ནི་ལུང་དུ་བསྟན་པ་ཁོ་ན་ཡིན་ལ་འབྲས་བུ་ནི་ལུང་དུ་མ་བསྟན་པ་ཁོ་ན་ཡིན་ཏེ། ལྷན་ཅིག་འབྱུང་བའི་རྒྱུ་ལ་སོགས་པའི་སྨིན་པ་ནི་འདྲ་བ་ཁོ་ན་ཡིན་པས་ཁྱད་པར་དུ་བྱས་པ་ཡིན་ནོ། །བསྟན་

Vol. 142 · folio 199b

བཅོས་ཆོས་མངོན་པ་ལས་འདི་སྐད་དུ་རྣམ་པར་འཆད་པས་དེའི་ཕྱིར་འདི་སྐད་དུ། རྣམ་པར་སྨིན་པའི་རྒྱུ་ཕུང་པོ་གཅིག་ལ་ཞེས་བྱ་བ་རྒྱས་པར་འགོད་པར་བྱེད་དེ། འདི་ལ་ཐོབ་པ་དག་ནི་ཤིང་ལྗོན་པའི་ཕྱི་ཤུན་བཞིན་དུ་སེམས་པ་ལ་སོགས་པ་ལས་ཐ་དད་པར་གནས་པས་

དེ་དག་གི་འབྲས་བུ་ཡང་ཡོངས་སུ་རྫོགས་པར་བྱེད་པ་ཡིན་པའི་ཚུལ་དུ་ལོགས་ཤིག་ཏུ་བརྗོད་དོ། །འདི་ལ་ཕུང་པོ་གཅིག་ཡོད་པས་ན་རྣམ་པར་སྨིན་པའི་རྒྱུ་ཕུང་པོ་གཅིག་པ་སྟེ། ཕུང་པོ་གང་ལ་ཐོབ་པ་དག་ཡོད་པ་དེ་ཉིད་དེ་ལ་དེ་དག་གིས་སྐྱེ་བ་ལ་སོགས་པ་ཡང་ཡོད་པས་

ཕུང་པོ་གཅིག་པ་ཡིན་ནོ། །ཐོབ་པ་དག་གི་འབྲས་བུ་གང་ཡིན་པ་དེ་ཉིད་དེ་དག་གི་སྐྱེ་བ་ལ་སོགས་པའི་ཡང་ཡིན་པས་འབྲས་བུ་ཐུན་མོང་བའི་ཕྱིར་འབྲས་བུ་གཅིག་པ་ཅན་ཡིན་ནོ། །རྣམ་པར་སྨིན་པའི་རྒྱུ་ཕུང་པོ་གཉིས་ལ་འབྲས་བུ་གཅིག་པ་ཅན་ནི་ལུས་དང་ངག་གི་ལས་

དང་དེ་དག་གི་སྐྱེ་བ་ལ་སོགས་པ་སྟེ་ལུས་དང་ངག་གི་ལས་དག་ནི་གཟུགས་ཀྱི་ཕུང་པོར་བསྡུས་པའི་ཕྱིར་ལ། དེ་དག་གི་སྐྱེ་བ་ལ་སོགས་པ་ནི་འདུ་བྱེད་ཀྱི་ཕུང་པོར་བསྡུས་པའི་ཕྱིར་ཕུང་པོ་གཉིས་ཡིན་ནོ། །དེ་དག་གི་འབྲས་བུ་ཐ་མི་དད་པའི་ཕྱིར་འབྲས་བུ་གཅིག་པ་ཅན་ཡང་

ཡིན་ནོ། །ཕུང་པོ་བཞི་ལ་འབྲས་བུ་གཅིག་པ་ཅན་ནི་སེམས་དང་སེམས་ལས་བྱུང་བ་དགེ་བ་དང་མི་དགེ་བ་སྐྱེ་བ་ལ་སོགས་པ་དང་བཅས་པ་དག་སྟེ་སེམས་དང་སེམས་ལས་བྱུང་བ་དེ་དག་ནི་ཅི་རིགས་པར་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་ཕུང་པོས་བསྡུས་

པའི་ཕྱིར་ལ་སྐྱེ་བ་ལ་སོགས་པ་ནི་འདུ་བྱེད་ཀྱི་ཕུང་པོས་བསྡུས་པའི་ཕྱིར་རྣམ་པར་སྨིན་པའི་རྒྱུ་ཕུང་པོ་བཞི་ཡིན་ནོ། །འབྲས་བུ་ཐུན་མོང་བའི་ཕྱིར་འབྲས་བུ་གཅིག་པ་ཅན་ཡིན་ཏེ། སེམས་ཀྱི་འབྲས་བུ་ཡང་གཞན་ལ་སེམས་ལས་བྱུང་བ་རྣམས་ཀྱི་ཡང་གཞན་པ་ནི་མ་ཡིན་

ནོ། །འདོད་པའི་ཁམས་ན་མཉམ་པར་གཞག་པ་མེད་པའི་ཕྱིར་རྣམ་པར་སྨིན་པའི་རྒྱུ་ཕུང་པོ་ལྔ་ལ་འབྲས་བུ་གཅིག་པ་ནི་མེད་དོ། །འདི་ན་གཟུགས་ཀྱི་ཕུང་པོས་སྡུག་བསྔལ་ལུས་དང་ངག་གི་ལས་ནི་སེམས་དང་སེམས་ལས་བྱུང་བ་དག་དང་འབྲས་བུ་གཅིག་པར་

Vol. 142 · folio 200a

མི་འགྱུར་ཏེ། ཚོགས་པ་ཐ་དད་པའི་ཕྱིར་རོ། །ཕུང་པོ་གསུམ་པ་ཅན་ནི་ཁམས་གསུམ་ཆར་ན་ཡང་མེད་དེ། སེམས་དང་སེམས་ལས་བྱུང་བ་རྣམས་ནི་གདོན་མི་ཟ་བར་འབྲས་བུ་གཅིག་པའི་ཕྱིར་དང་། ཅི་རིགས་པར་ཕུང་པོ་བཞིའི་ངོ་བོ་ཉིད་

ཡིན་པའི་ཡང་ཕྱིར་རོ། །གཟུགས་ཀྱི་ཁམས་ན་རྣམ་པར་སྨིན་པའི་རྒྱུ་ཕུང་པོ་གཅིག་ལ་ཞེས་བྱ་བ་རྒྱས་པར་འབྱུང་བ་ནི་ཐོབ་པ་སྐྱེ་བ་ལ་སོགས་པ་དང་བཅས་པ་ནི་འདུ་བྱེད་ཀྱི་ཕུང་པོས་བསྡུས་པའི་ཕྱིར་ཕུང་པོ་གཅིག་ཡིན་ནོ། །དེ་བཞིན་དུ་འབྲས་བུ་ཐུན་མོང་པའི་

ཕྱིར་འབྲས་བུ་གཅིག་པ་ཅན་ཡང་ཡིན་ནོ། །འདུ་ཤེས་མེད་པའི་སྙོམས་པར་འཇུག་པ་སྐྱེ་བ་ལ་སོགས་པ་དང་བཅས་པ་ཡང་དེ་དང་འདྲ་བ་ཁོ་ནར་བརྗོད་པར་བྱའོ། །རྣམ་པར་རིག་བྱེད་ནི་གཟུགས་ཀྱིས་བསྡུས་པའི་ཕྱིར་ལ་སྐྱེ་བ་ལ་སོགས་པ་ནི་འདུ་བྱེད་ཀྱི་ཕུང་པོའི་ངོ་བོ་ཉིད་

ཡིན་པའི་ཕྱིར་ཕུང་པོ་གཉིས་པ་ཡིན་ནོ། །འབྲས་བུ་གཅིག་པ་ཅན་ནི་སྔ་མ་བཞིན་ནོ། །དགེ་བའི་སེམས་མཉམ་པར་མ་བཞག་པ་ལ་ནི་རྗེས་སུ་འཇུག་པའི་གཟུགས་མེད་པས་གཟུགས་ཀྱི་ཕུང་པོ་མ་གཏོགས་པ་ཚོར་བ་ལ་སོགས་པའི་ཕུང་པོས་བསྡུས་པའི་ཕྱིར་ཕུང་པོ་བཞི་

པ་ཡིན་ནོ། །ཕུང་པོ་ལྔ་པ་ནི་སེམས་མཉམ་པར་བཞག་པ་ན་སྟེ། རྗེས་སུ་འཇུག་པའི་གཟུགས་ནི་སེམས་ལ་སོགས་པ་དང་གཅིག་ཏུ་འབྱུང་བའི་ཕྱིར་རོ། །གཟུགས་མེད་པའི་ཁམས་ན་ཞེས་བྱ་བ་རྒྱས་པར་འབྱུང་བ་ནི་དེ་ན་གཟུགས་ཐམས་ཅད་མེད་པ་ཉིད་པས་རྣམ་པར་

སྨིན་པའི་རྒྱུ་ཕུང་པོ་གཅིག་པ་དང་ཕུང་པོ་བཞི་པ་ཡིན་ཏེ། དེ་ལ་ཐོབ་པ་སྐྱེ་བ་ལ་སོགས་པ་དང་བཅས་པ་ནི་ཕུང་པོ་གཅིག་ཡིན་ཏེ། སྔ་མ་བཞིན་ནོ། །འགོག་པའི་སྙོམས་པར་འཇུག་པ་སྐྱེ་བ་ལ་སོགས་པ་དང་བཅས་པ་ཡང་རྣམ་པར་སྨིན་པའི་རྒྱུ་ཕུང་པོ་གཅིག་པ་ཡིན་

ནོ། །འབྲས་བུ་གཅིག་པ་ཅན་ཡིན་ནོ་ཞེས་བྱ་བ་ནི་གོ་བར་སླའོ། །ལས་ཀྱང་ཡོད་དེ་ཞེས་བྱ་བ་རྒྱས་པར་འབྱུང་བ་ནི་གང་གི་རྣམ་པར་སྨིན་པ་ནི་སྲོག་གི་དབང་པོ་ཡིན་པ་ལས་དེའི་རྣམ་པར་སྨིན་པ་ནི་གདོན་མི་ཟ་བར་སྲོག་གི་དབང་པོ་དེ་དང་དེའི་སྐྱེ་བ་ལ་སོགས་པ་ལྡན་པ་མ་ཡིན་པ་

Vol. 142 · folio 200b

རྣམས་ཡིན་ལ། དེ་ཐམས་ཅད་ཀྱང་ཆོས་ཀྱི་སྐྱེ་མཆེད་ཀྱིས་བསྡུས་པའི་ཕྱིར་རྣམ་པར་སྨིན་པ་སྐྱེ་མཆེད་གཅིག་རྣམ་པར་སྨིན་པར་འགྱུར་རོ། །གང་གི་ཡིད་ཀྱི་སྐྱེ་མཆེད་ཡིན་པ་དེའི་ནི་གཉིས་ཏེ། ཡིད་དང་ཆོས་ཀྱི་སྐྱེ་མཆེད་དག་གོ་ཞེས་བྱ་བ་ནི་ཡིད་ཀྱི་སྐྱེ་མཆེད་དེའི་

ཚོགས་པ་ལ་ནི་གདོན་མི་ཟ་བར་ཚོར་བ་ལ་སོགས་པ་དང་སྐྱེ་བ་ལ་སོགས་པ་ལྷན་ཅིག་འབྱུང་བ་རྣམ་པར་སྨིན་པའི་ངོ་བོར་འགྱུར་ལ། ཚོར་བ་ལ་སོགས་པ་དང་སྐྱེ་བ་ལ་སོགས་པ་ཡང་ཆོས་ཀྱི་སྐྱེ་མཆེད་ཀྱིས་བསྡུས་པའི་ཕྱིར་རྣམ་པར་སྨིན་པ་ཡིད་དང་ཆོས་ཀྱི་སྐྱེ་མཆེད་དང་དེ་

གཉིས་རྣམ་པར་སྨིན་པར་འགྱུར་རོ། །གང་གི་རེག་བྱའི་སྐྱེ་མཆེད་ཡིན་པ་ཡང་དེ་དང་འདྲའོ་ཞེས་བྱ་བ་ནི་རེག་བྱའི་སྐྱེ་མཆེད་དེ་ལ་གདོན་མི་ཟ་བར་སྐྱེ་བ་ལ་སོགས་པ་ཡང་ཡོད་པའི་ཕྱིར་ཆོས་ཀྱི་སྐྱེ་མཆེད་ཀྱང་རྣམ་པར་སྨིན་པར་འགྱུར་གྱི་རེག་བྱའི་སྐྱེ་མཆེད་འབའ་ཞིག་པ་ནི་

མ་ཡིན་པས་དེའི་སྐྱེ་མཆེད་གཉིས་རྣམ་པར་སྨིན་པར་འགྱུར་རོ། །གང་གི་ལུས་ཀྱི་སྐྱེ་མཆེད་ཡིན་པ་དེའི་ནི་གསུམ་སྟེ་ལུས་ཀྱི་སྐྱེ་མཆེད་དེ་ཉིད་དང་དེ་ནི་གདོན་མི་ཟ་བར་འབྱུང་བ་བཞི་ཚན་ལ་བརྟེན་པའི་ཕྱིར་དེའི་རྟེན་རེག་བྱའི་སྐྱེ་མཆེད་འབྱུང་བ་བཞི་ཚན་དང་དེའི་སྐྱེ་བ་ལ་

སོགས་པ་ཡང་ཡོད་པས་དེ་ལ་གསུམ་པ་ཆོས་ཀྱི་སྐྱེ་མཆེད་ཀྱང་རྣམ་པར་སྨིན་པར་འགྱུར་རོ། །དེ་དང་འདྲའོ་ཞེས་བྱ་བ་རྒྱས་པར་འབྱུང་བ་ནི་གང་གི་རྣམ་པར་སྨིན་པ་གཟུགས་དང་དྲི་དང་རོའི་སྐྱེ་མཆེད་རྣམས་ལས་གང་ཡང་རུང་བ་ཞིག་ཡིན་པ་དེའི་རྣམ་པར་སྨིན་པ་ཡང་དེ་བཞིན་

དུ་སྐྱེ་མཆེད་གསུམ་པོ་ཡིན་ཏེ། གཟུགས་ལ་སོགས་པ་གང་ཡང་རུང་བའི་སྐྱེ་མཆེད་དེ་ཉིད་དང་དེའི་རྟེན་འབྱུང་བའི་ངོ་བོ་ཉིད་རེག་བྱའི་སྐྱེ་མཆེད་དང་དེའི་སྐྱེ་བ་ལ་སོགས་པའི་ངོ་བོ་ཉིད་ཆོས་ཀྱི་སྐྱེ་མཆེད་དོ། །གང་གི་མིག་གི་སྐྱེ་མཆེད་ཡིན་པ་དེ་ནི་བཞི་སྟེ། མིག་དེ་ཉིད་དང་

མིག་ཀྱང་གདོན་མི་ཟ་བར་ལུས་ལ་རག་ལུས་ཏེ། འབྱུང་བའི་ཕྱིར་ལུས་ཀྱི་སྐྱེ་མཆེད་དང་སྔ་མ་བཞིན་དུ་རེག་བྱ་དང་ཆོས་ཀྱི་སྐྱེ་མཆེད་དག་གོ། །གང་གི་རྣ་བ་དང་སྣ་དང་ལྕེའི་སྐྱེ་མཆེད་དག་ཡིན་པ་ཡང་དེ་དང་འདྲའོ་ཞེས་བྱ་བ་རྒྱས་པར་འབྱུང་བ་ནི་གང་གི་རྣམ་པར་སྨིན་པ་རྣ་བ་

Vol. 142 · folio 201a

ལ་སོགས་པ་གང་ཡང་རུང་བ་ཞིག་ཡིན་པ་དེའི་རྣམ་པར་སྨིན་པ་ཡང་དེ་དང་འདྲ་བར་སྐྱེ་མཆེད་བཞི་ཡིན་ཏེ། རྣ་བ་ལ་སོགས་པ་གང་ཡང་རུང་བའི་སྐྱེ་མཆེད་དེ་ཉིད་དང་སྔ་མ་བཞིན་དུ་ལུས་དང་རེག་བྱ་དང་ཆོས་ཀྱི་སྐྱེ་མཆེད་དག་གོ། །ལས་དེ་ཡང་ཡོད་

དེ་ཞེས་བྱ་བ་རྒྱས་པར་འབྱུང་བ་ནི་སྐྱེ་མཆེད་ལྔ་ནས་བཅུ་གཅིག་གི་བར་ཞེས་ཅི་རིགས་པར་སྦྱར་རོ། །རྣམ་པར་སྨིན་པ་སྐྱེ་མཆེད་བཅུ་གཉིས་པ་ནི་མེད་དེ། སྒྲའི་སྐྱེ་མཆེད་རྣམ་པར་སྨིན་པའི་ངོ་བོ་ཉིད་མེད་པའི་ཕྱིར་རོ། །འདི་ལ་སློབ་དཔོན་དབྱིག་བཤེས་ན་རེ་གང་གི་རྣམ་པར་

སྨིན་པ་ཆོས་ཀྱི་སྐྱེ་མཆེད་གཅིག་ཁོ་ན་སྨིན་པར་འགྱུར་བའི་ལས་ཀྱང་ཡོད་དེ་ཞེས་བྱ་བ་མི་འཐད་དོ། །ཅིའི་ཕྱིར་ཞེ་ན། སྲོག་གི་དབང་པོ་ནི་འཕེན་པར་བྱེད་པའི་ལས་ཀྱི་འབྲས་བུ་ཡིན་པའི་ཕྱིར་རོ། །རེ་ཞིག་གལ་ཏེ་འདོད་པའི་ཁམས་ན་ལས་ཀྱི་རྣམ་པར་སྨིན་

པར་འགྱུར་ན་གདོན་མི་ཟ་བར་སྐྱེ་མཆེད་དྲུག་མ་དོད་པ་ནུར་ནུར་པོ་ལ་སོགས་པའི་གནས་སྐབས་ན་ནི་ལུས་དང་སྲོག་གི་དབང་པོ་དག་ཡོད་དོ། །སྐྱེ་མཆེད་དྲུག་དོད་ནས་ནི་མིག་ལ་སོགས་པ་དྲུག་དང་ཡིད་ཀྱི་སྐྱེ་མཆེད་བདུན་ཡོད་པར་འགྱུར་རོ། །གཟུགས་ཀྱི་ཁམས་

ན་ཡང་བདུན་ནོ། །གཟུགས་མེད་པའི་ཁམས་ན་ཡང་ཡིད་དང་ཆོས་ཀྱི་སྐྱེ་མཆེད་དག་གདོན་མི་ཟ་བར་ཡོད་པར་འགྱུར་ཏེ། སྲོག་གི་དབང་པོ་ནི་སྐྱེ་བ་ཐམས་ཅད་འཕེན་པར་བྱེད་པའི་འབྲས་བུ་ཡིན་པའི་ཕྱིར་རོ། །ཡང་ན་འདིར་ཁམས་གང་ལས་བསམས་ཞེས་

སྨྲས་སོ། །གཟུགས་མེད་པའི་ཁམས་ཡིན་ནོ། །དེ་ན་ཡང་སྲོག་གི་དབང་པོ་ནི་འཕེན་པར་བྱེད་པའི་ལས་ཀྱི་འབྲས་བུ་ཡིན་པའི་ཕྱིར་གདོན་མི་ཟ་བར་ཡིད་ཀྱི་སྐྱེ་མཆེད་ཀྱང་ཡོད་པར་འགྱུར་ལ་རྣམ་པར་སྨིན་པ་ནི་ཚོར་བས་རབ་ཏུ་ཕྱེ་བའི་ཕྱིར་རྣམ་པར་སྨིན་པ་སྲོག་གི་

དབང་པོ་ཁོ་ན་རྣམ་པར་སྨིན་པར་འགྱུར་བ་ཡང་མ་ཡིན་པས་དེ་ནི་ཚོར་བ་ལ་སོགས་པ་ཡང་ཡོད་པར་འགྱུར་རོ་ཞེ་ན།། །།བམ་པོ་བཅུ་དགུ་པ། འདིར་སྨྲས་པ། འདི་ནི་སྐད་ཅིག་མ་སྐྱེ་བ་ལས་བསམས་ནས་བཤད་པ་ཡིན་ཏེ། སྐད་ཅིག་མ་གང་ལ་གཟུགས་

Vol. 142 · folio 201b

མེད་པར་སྐྱེས་པའི་སེམས་རྣམ་པར་སྨིན་པ་ལས་སྐྱེས་པ་ཀུན་དུ་མི་འབྱུང་བའི་སྐད་ཅིག་མ་དེ་ལ་རྣམ་པར་སྨིན་པ་སྲོག་གི་དབང་པོ་ཁོ་ན་འབྱུང་བའི་ཕྱིར་དང་། ཡིད་ཀྱི་སྐྱེ་མཆེད་ནི་ཀུན་དུ་མི་འབྱུང་བའི་ཕྱིར་རྣམ་པར་སྨིན་པར་སྲོག་གི་དབང་པོ་ཁོ་ན་རྣམ་པར་སྨིན་པར་

འགྱུར་ན་ཅིའི་ཕྱིར་དེ་ཀུན་དུ་འབྱུང་བའི་ཚེ་གཞན་ཡིད་ཀྱི་སྐྱེ་མཆེད་ཀྱང་ཡོད་པས་དེའི་རྣམ་པར་སྨིན་པ་ཡིད་དང་ཆོས་ཀྱི་སྐྱེ་མཆེད་གཉིས་ཡིན་ཞེས་རྣམ་པར་འཆད་པར་བྱེད། འདི་དཔྱད་པར་བྱ་སྟེ། སྲོག་གི་དབང་པོ་ནི་འཕེན་པར་བྱེད་པའི་ལས་ཀྱི་རྣམ་པར་སྨིན་པ་

ཡིན་ནོ་ཞེས་བྱ་བ་འདི་ནི་ཡིན་ན་སྲོག་གི་དབང་པོ་རྣམ་པར་སྨིན་པའི་ཚེ་ཡིད་ཀྱི་སྐྱེ་མཆེད་ལ་སོགས་པ་ཡང་རྣམ་པར་སྨིན་པར་འགྱུར་གྱི། སྐྱེ་མཆེད་གཞན་རྣམ་པར་སྨིན་པ་ཡིན་པ་ནི་མི་འགོག་གོ། །འདིར་ནི་རྣམ་པར་སྨིན་པའི་རྒྱུ་བསམ་པ་ཡིན་ཏེ་གང་གི་ཆོས་ཀྱི་སྐྱེ་མཆེད་

གཅིག་ཁོ་ན་རྣམ་པར་སྨིན་པར་འགྱུར་གྱི་སྐྱེ་མཆེད་གཞན་ནི་མ་ཡིན་པའི་ལས་དེ་ཡང་ཡོད་དེ་ཞེས་བྱ་བ་འདི་ཙམ་ཞིག་བརྗོད་པར་འདོད་པར་ཟད་དོ། །སྲོག་གི་དབང་པོ་འཕེན་པར་བྱེད་པའི་ལས་ཉིད་ལ་ཡིད་ཀྱི་སྐྱེ་མཆེད་ལ་སོགས་པ་ཡང་རྣམ་པར་སྨིན་པར་འགྱུར་གྱི་སྐྱེ་

མཆེད་གཅིག་ཁོ་ན་ནི་མ་ཡིན་ནོ་ཞེ་ན། འདི་ལ་སྨྲ་བར་བྱ་སྟེ། དེ་ལ་ཡིད་ལ་སོགས་པ་གཞན་དག་ཡོད་པ་ཡང་ལས་དེ་ཁོ་ནའི་རྣམ་པར་སྨིན་པ་ཡིན་གྱི་ལས་གཞན་གྱི་ནི་མ་ཡིན་ནོ་ཞེས་བྱ་བའི་ངེས་པ་འདི་ཅིས་བྱས། རིས་མཐུན་པ་ཡང་ལས་གཅིག་གི་རྣམ་པར་སྨིན་

པ་ཡིན་ལ། སྲོག་གི་དབང་པོ་ཡང་གཞན་གྱི་ཡིན། ཡིད་ཀྱི་སྐྱེ་མཆེད་ལ་སོགས་པ་ཡང་གཞན་ཁོ་ནའི་ཡིན་ནོ་ཞེས་བྱ་བའི་སྲིད་པ་གང་ཡིན་པ་ནི་ཡོད་དོ། །གལ་ཏེ་ཁྱོད་ཇི་ལྟར་གང་གིས་མིག་གི་སྐྱེ་མཆེད་ཡིན་པ་དེ་ནི་མིག་དང་ལུས་དང་རེག་བྱ་དང་ཆོས་ཀྱི་སྐྱེ་མཆེད་

རྣམས་སོ་ཞེས་བྱ་བའི་སྐབས་སུ་གང་གི་རྣམ་པར་སྨིན་པ་མིག་གི་སྐྱེ་མཆེད་ཡིན་པ་དེའི་ནི་གདོན་མི་ཟ་བ་ཡིན་པའི་ཕྱིར་ལུས་ཀྱི་སྐྱེ་མཆེད་ཀྱང་ཡིན་པ་དེ་བཞིན་དུ་ཡིད་ཀྱི་སྐྱེ་མཆེད་ལ་སོགས་པ་ཡང་ལས་དེ་ཁོ་ནའི་རྣམ་པར་སྨིན་པ་ཡིན་ནོ་ཞེས་བྱ་བར་འགྱུར་ན།

Vol. 142 · folio 202a

དེ་ནི་མ་ཡིན་ཏེ། འགའ་ཞིག་ནི་འགའ་ཞིག་ཁོ་ན་ལ་རག་ལས་ཏེ་འབྱུང་བའི་ཕྱིར་ཏེ། མིག་གི་དབང་པོ་ནི་ལུས་ཀྱི་དབང་པོ་མེད་པར་འབྱུང་བ་མེད་ཀྱི་སྲོག་གི་དབང་པོ་ནི་རྣམ་པར་སྨིན་པའི་ཡིད་མེད་ཀྱང་འབྱུང་བ་ཡོད་པས་འདི་ནི་མི་

མཚུངས་སོ། །སློབ་དཔོན་འདུས་བཟང་ན་རེ་གང་གི་རྣམ་པར་སྨིན་པ་ཆོས་ཀྱི་སྐྱེ་མཆེད་ཁོ་ན་རྣམ་པར་སྨིན་པར་འགྱུར་བའི་ལས་ཀྱང་ཡོད་དེ། གང་གི་སྲོག་གི་དབང་པོ་ཡིན་པའོ། །གང་གི་མིག་གི་སྐྱེ་མཆེད་ཡིན་པ་དེའི་ནི་ལྔ་སྟེ། མིག་དང་ལུས་དང་

གཟུགས་དང་རེག་བྱ་དང་ཆོས་ཀྱི་སྐྱེ་མཆེད་རྣམས་སོ། །ལྕེའི་སྐྱེ་མཆེད་ཀྱི་བར་དུ་ཡང་དེ་དང་འདྲའོ། །གང་གི་ལུས་ཀྱི་སྐྱེ་མཆེད་ཡིན་པ་དེའི་ནི་བཞི་སྟེ། ལུས་དང་གཟུགས་དང་རེག་བྱ་དང་ཆོས་ཀྱི་སྐྱེ་མཆེད་རྣམས་སོ་ཞེས་ཟེར་ཏེ། གཟུགས་མེད་ན་མི་འབྱུང་བ་

ཡིན་པའི་ཕྱིར་གཟུགས་ཀྱི་སྐྱེ་མཆེད་ཀྱང་མིག་སྒྲུབ་པར་བྱེད་པའི་ལས་དེ་ཉིད་ཀྱི་རྣམ་པར་སྨིན་པ་ཡིན་ནོ་ཞེས་གཞུང་ལུགས་གཞན་ཞིག་འདོད་པར་བྱེད་དོ། །སློབ་དཔོན་འདི་ནི་གཟུགས་ཀྱི་སྐྱེ་མཆེད་ལས་དེ་ཁོ་ནའི་རྣམ་པར་སྨིན་པ་ཡིན་པར་ངེས་པ་མེད་དོ་ཞེས་བྱ་

བ་ཕྱོགས་གཞན་གང་གི་ལུས་ཀྱི་སྐྱེ་མཆེད་ཡིན་པ་དེའི་ནི་གསུམ་མོ། །གང་གི་མིག་གི་སྐྱེ་མཆེད་ཡིན་པ་དེའི་ནི་བཞིའོ་ཞེས་བྱ་བའི་རྗེས་སུ་འབྲང་སྟེ། སྲོག་གི་དབང་པོ་དང་རིས་མཐུན་པ་ལ་སོགས་པ་ཕན་ཚུན་མེད་ན་མི་འབྱུང་བ་རྣམས་གདོན་མི་ཟ་བར་ལས་གཅིག་

ཁོ་ནའི་རྣམ་པར་སྨིན་པ་ཡིན་པ་ནི་མ་ཡིན་ནོ་སྙམ་དུ་བསམས་པ་ཡིན་ནོ། །རྣམ་པར་བཤད་པ་བྱེད་པ་རྣམས་ཀྱིས་ཕྱོགས་དེ་གཉིས་བྲིས་པ་ལ་དེ་དག་གང་ཞིག་གང་ལ་དད་པ་དེ་དེས་ཡོངས་སུ་བཟུང་བར་ཟད་དེ། ཞར་ལ་འོངས་པས་ཆོག་གོ། །ཡང་ཇི་ལྟར་ན་ལས་ཁ་

ཅིག་གི་རྣམ་པར་སྨིན་པ་ནི་སྐྱེ་མཆེད་གཅིག་རྣམ་པར་སྨིན་པར་གྱུར་པ་ནས་ཁ་ཅིག་གི་ནི་བཅུ་གཅིག་གི་བར་ཡིན་ཞེ་ན། དེའི་ཕྱིར་ལས་ཀྱི་འབྲས་བུ་སྣ་ཚོགས་དང་སྣ་ཚོགས་མ་ཡིན་པའི་ཕྱིར་ཞེས་བྱ་བ་རྒྱས་པར་སྨོས་སོ། །པདྨ་དང་བལ་པོ་སེའུ་དང་ཤིང་ནྱ་གྲོ་དྷ་ལ་

Vol. 142 · folio 202b

སོགས་པ་དག་གི་ས་བོན་ཏེ་པདྨ་ལ་སོགས་པའི་ས་བོན་ནི་འབྲས་བུ་རྩ་བ་དང་མྱུ་གུ་དང་སྡོང་བུ་དང་འདབ་མ་དང་ཟེ་བ་དང་ཟེ་འབྲུ་དང་སྙིང་པོ་སྣ་ཚོགས་པ་ཡིན་ལ། ཤིང་ནྱ་གྲོ་དྷ་ལ་སོགས་པ་ཡང་ཡལ་གའི་མདོ་དང་ཡལ་ག་དང་འདབ་མ་དང་མགོ་ལྕོག་དང་མྱུ་གུ་དང་མེ་

ཏོག་དང་འབྲས་བུ་དུ་མ་ཕུན་སུམ་ཚོགས་པ་སྤྲིན་ལྟ་བུར་སྣང་ངོ་། །ཁ་ཅིག་ནི་འབྲས་བུ་སྣ་ཚོགས་པ་མ་ཡིན་ཏེ། འདི་ལྟ་སྟེ་ནས་དང་གྲོ་ལ་སོགས་པའི་ས་བོན་དག་ལྟ་བུའོ། །འབྲས་བུ་ངོ་བོ་གཅིག་པའི་ཕྱིར་ཏེ་འདི་ནི་ས་བོན་གྱི་ཆོས་ཉིད་ཡིན་ནོ། །ལས་དུས་གཅིག་

པའི་སྟེ་འདས་པའི་རྣམ་པར་སྨིན་པ་དུས་གསུམ་པ་སྟེ་འདས་པ་དང་མ་འོངས་པ་དང་ད་ལྟར་བྱུང་བ་རྣམ་པར་སྨིན་པར་ནི་འགྱུར་གྱི་ལས་དུས་གཉིས་པ་ཡང་སྟེ་འདས་པ་དང་ད་ལྟར་བྱུང་བའི་ཡང་དུས་གཅིག་པ་སྟེ་མ་འོངས་པ་ནི་མ་ཡིན་ནོ། །བཟློག་པ་ནི་མ་ཡིན་ནོ་ཞེས་

བྱ་བ་ནི་ལས་སྐད་ཅིག་མ་མང་པོའི་སྐད་ཅིག་མ་གཅིག་པ་སྟེ། རྒྱུ་བས་འབྲས་བུ་ཧ་ཅང་ཉུང་བར་འགྱུར་དུ་འོང་བའི་ཕྱིར་རོ་ཞེས་བྱ་བར་སྦྱར་རོ། །རྣམ་པར་སྨིན་པ་ནི་ལས་དང་ལྷན་ཅིག་ཏུ་རྣམ་པར་སྨིན་པ་ཡང་མ་ཡིན་ཏེ། ལྷན་ཅིག་སྐྱེས་པ་ནི་ལྷན་ཅིག་འབྱུང་བ་

དང་མཚུངས་པར་ལྡན་པའི་རྒྱུ་དག་བྱ་བ་བྱེད་པའི་ཕྱིར་ལ་རྣམ་པར་སྨིན་པའི་རྒྱུ་ནི་མི་འདྲ་བར་སྨིན་པ་ལ་ལྟོས་པའི་ཕྱིར་རོ། །རྣམ་པར་སྨིན་པ་མཇུག་ཐོགས་སུ་རྣམ་པར་སྨིན་པ་ཡང་མ་ཡིན་ནོ། །ཅིའི་ཕྱིར་ཞེ་ན། མཇུག་ཐོགས་ཀྱི་སྐད་ཅིག་མ་ནི་མཚུངས་

པ་དེ་མ་ཐག་པའི་རྐྱེན་གྱིས་དྲངས་པའི་ཕྱིར་ཏེ། འདི་ལྟར་མཇུག་ཐོགས་ཀྱི་སྐད་ཅིག་མ་ནི་མཚུངས་པ་དེ་མ་ཐག་པའི་རྐྱེན་གྱི་སྟོབས་ཀྱིས་དྲངས་པ་ཡིན་གྱི་མཚུངས་པ་དེ་མ་ཐག་པའི་རྐྱེན་འདི་རྣམ་པར་སྨིན་པའི་རྒྱུ་ཡིན་ཡང་། རྣམ་པར་སྨིན་པའི་

རྒྱུའི་སྟོབས་ཀྱིས་དྲངས་པ་ནི་མ་ཡིན་ནོ། །འདི་ནི་དེ་ལྟ་བུ་ཁོ་ན་ཡིན་ཏེ། འདི་ལྟར་མཚུངས་པ་དེ་མ་ཐག་པའི་རྐྱེན་རྣམ་པར་སྨིན་པའི་རྒྱུ་ལས་མཇུག་ཐོགས་ཀྱི་སྐད་ཅིག་མ་རེས་འགའ་ནི་དགེ་བ་རེས་འགའ་ནི་མི་དགེ་བ་རེས་འགའ་ནི་ལུང་དུ་མ་བསྟན་

Vol. 142 · folio 203a

པར་འབྱུང་ངོ་། །དེ་ལྟ་མ་ཡིན་ནོ་ལུང་དུ་མ་བསྟན་པ་ཁོ་ནར་འགྱུར་རོ། །རྣམ་པ་གཅིག་ཏུ་མཇུག་ཐོགས་ཀྱི་སྐད་ཅིག་མ་རྣམ་པར་སྨིན་པའི་ངོ་བོ་ཉིད་མ་ཡིན་པ་མཚུངས་པ་དེ་མ་ཐག་པའི་རྐྱེན་གྱིས་དྲངས་པའི་ཕྱིར་རོ། །རྣམ་པར་སྨིན་པའི་ངོ་བོ་ཉིད་

ནི་མ་ཡིན་ཏེ། མཚུངས་པ་དེ་མ་ཐག་པའི་རྐྱེན་གྱིས་མ་དྲངས་པའི་ཕྱིར་རོ་སྙམ་དུ་བསམས་པ་ཡིན་ནོ། །རྣམ་པར་སྨིན་པའི་རྒྱུ་ལས་འབྲས་བུ་སྨིན་པ་ནི་རྒྱུན་ལ་ལྟོས་པ་ཡིན་ནོ་ཞེས་བྱ་བ་ནི་སེམས་དང་སེམས་ལས་བྱུང་བའི་རྒྱུན་ཡོད་ན་རྣམ་པར་སྨིན་པའི་རྒྱུ་འདས་པས་

རྣམ་པར་སྨིན་པའི་འབྲས་བུ་འབྱིན་པར་འགྱུར་ཏེ། འདི་ནི་ཆོས་ཉིད་ཡིན་ནོ་སྙམ་དུ་བསམས་པའོ། །འདི་དག་གི་དུས་ངེས་པ་དོན་གྱིས་ནི་བཤད་མོད་ཀྱི་ཞེས་བྱ་བ་ནི་དོན་གྱིས་བཤད་ཀྱི་རང་གི་སྒྲས་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །བརྗོད་པ་ནི་རྣམ་པ་གཉིས་

ཏེ། རང་གི་སྒྲས་བསྟན་པ་དང་། དོན་གྱིས་བཤད་པའོ། །ཇི་ལྟ་ཞེ་ན། སྐལ་མཉམ་རྒྱུ་ནི་འདྲ་བའོ། །རང་རིས་ས་པའོ་སྔར་སྐྱེས་རྣམས། །ཞེས་བྱ་བ་དང་། དེ་བཞིན་དུ། ཀུན་འགྲོ་ཞེས་བྱ་ཉོན་མོངས་ཅན། །རྣམས་ཀྱི་རང་སར་ཀུན་འགྲོ་ལྔ། །ཞེས་འབྱུང་

བའི་ཕྱིར་སྐལ་བ་མཉམ་པ་དང་ཀུན་དུ་འགྲོ་བའི་རྒྱུ་དག་ནི་འདས་པ་དང་ད་ལྟར་བྱུང་བ་དག་ཁོ་ན་ཡོད་ཀྱི་མ་འོངས་པ་དག་ནི་མེད་དོ། །ལྷན་ཅིག་འབྱུང་བ་དང་མཚུངས་པར་ལྡན་པ་དང་རྣམ་པར་སྨིན་པའི་རྒྱུ་དག་ནི་ཁྱད་པར་མ་སྨོས་པ་ཉིད་ཀྱི་ཕྱིར་དོན་གྱིས་ན་དུས་གསུམ་པ་

ཡིན་ནོ་ཞེས་བཤད་པ་ཡིན་ནོ། །སྐལ་བ་མཉམ་པ་དང་ཀུན་དུ་འགྲོ་བའི་རྒྱུ་དག་ཁོ་ན་སྔར་སྐྱེས་པ་ཡིན་ལ། སྔར་སྐྱེས་པ་ཁོ་ན་ཡང་དེ་དག་ཡིན་ནོ་ཞེས་ངེས་པར་གཟུང་བའི་ཕྱིར་དང་། ཕན་ཚུན་དུ་འབྲས་བུ་ཉིད་ཡིན་པར་འབྱུང་བའི་ཕྱིར་དང་། སེམས་ལ་སོགས་པ་དང་།

མི་དགེ་བ་ལ་སོགས་པའི་ངོ་བོ་ཉིད་ཡིན་པའི་ཕྱིར་འདི་རྣམས་དུས་སུ་མ་གཏོགས་པ་ཉིད་བཟློག་པ་ཡིན་ནོ། །མདོར་བྱ་སྟེ་ཞེས་བྱ་བ་ནི་བསྡུས་ཏེ། མདོར་བྱ་བའམ་མདོར་མ་བྱས་པ་མདོར་བྱ་བ་ཡིན་ནོ། །འདིར་གཏན་ཚིགས་ནི་བཤད་ཟིན་ཏོ་ཞེས་བྱ་བ་ཇི་ལྟར་བཤད་ཅེ་ན།

Vol. 142 · folio 203b

སྐལ་བ་མཉམ་པའི་རྒྱུ་ནི་རྒྱུ་མཐུན་པའི་འབྲས་བུས་འབྲས་བུ་དང་བཅས་པ་ཡིན་ན། དེ་ཡང་མ་འོངས་པ་ལ་རིགས་པ་མ་ཡིན་ཏེ། སྔ་ཕྱི་མེད་པའི་ཕྱིར་རོ་ཞེས་བྱ་བ་དེ་ལྟ་བུ་ལ་སོགས་པ་ཡིན་ཏེ། སྐལ་བ་མཉམ་པའི་རྒྱུའི་གཏན་ཚིགས་བཤད་པ་གང་ཡིན་པ་དེ་ནི་ཀུན་དུ་

འགྲོ་བའི་རྒྱུའི་གཏན་ཚིགས་བཤད་པའི་ངོ་བོ་ཡིན་པར་ཡང་རིག་པར་བྱའོ། །ཀུན་དུ་འགྲོ་བའི་རྒྱུ་ནི་སྐལ་བ་མཉམ་པའི་རྒྱུ་དང་འདྲ་སྟེ། སྐལ་བ་མཉམ་པའི་རྒྱུ་ནི་ཉོན་མོངས་པ་ཅན་རྣམས་ཀྱི་རྒྱུ་ཉོན་མོངས་པ་ཅན་ཡིན་ནོ། །ཀུན་དུ་འགྲོ་བའི་རྒྱུ་ཡང་ཉོན་མོངས་པ་

ཅན་རྣམས་ཀྱི་རྒྱུ་ཉོན་མོངས་པ་ཅན་ཁོ་ན་ཡིན་ལ། འདི་ནི་ཉོན་མོངས་པ་ཅན་གྱི་ཆོས་སྤྱིའི་རྒྱུ་ཡིན་པ་ཉིད་ཀྱིས་སྐལ་བ་མཉམ་པའི་རྒྱུ་ལས་ལོགས་ཤིག་ཏུ་རྣམ་པར་བཞག་གོ་ཞེས་དེ་ནི་བཤད་ཟིན་ཏོ། །འདི་ནི་སྐལ་བ་མཉམ་པའི་རྒྱུ་ཁོ་ན་བཞིན་དུ་མ་འོངས་པ་ཡང་མེད་ལ་

རྒྱུ་མཐུན་པའི་འབྲས་བུས་འབྲས་བུ་དང་བཅས་པ་ཡང་ཡིན་པས་འདིའི་ཚུལ་ནི་དེ་ཁོ་ན་དང་འདྲའོ། །གསུམ་པོ་དག་ནི་དུས་གསུམ་པ་ཞེས་བྱ་བ་ནི་དུས་གསུམ་པ་ཁོ་ན་གསུམ་ཡིན་ལ། གསུམ་ཁོ་ན་ཡང་དུས་གསུམ་པ་ཡིན་ནོ་ཞེས་ངེས་པར་གཟུང་བའི་ཕྱིར་བྱེད་རྒྱུའི་རྒྱུ་

ནི་དེ་ལྟ་མ་ཡིན་པར་འགྱུར་རོ། །ཇི་ལྟར་དེ་ལྟ་མ་ཡིན་ཞེ་ན། བྱེད་རྒྱུའི་རྒྱུ་ནི་དུས་ངེས་པ་མ་བསྟན་པས་དུས་ཐམས་ཅད་པ་དང་དུས་དང་བྲལ་བར་ཡང་རིག་པར་བྱའོ་ཞེས་བྱ་བ་སྨོས་ཏེ། རང་ལས་གཞན་པ་རང་གི་ངོ་བོ་མ་གཏོགས་པ་ཆོས་ཐམས་ཅད་ནི་བྱེད་རྒྱུའི་རྒྱུ་ཡིན་ནོ། །

དེའི་ཕྱིར་ན་དེ་ལྟར་འགྱུར་གྱི་གཞན་དུ་ནི་མ་ཡིན་ནོ། །རྒྱུ་དང་འབྲས་བུ་ཞེས་བྱ་བ་འདི་གཉིས་ནི་ཕན་ཚུན་ལྟོས་པ་ཡིན་པས་དེའི་རྒྱུ་དེ་དག་གང་གི་ཡིན་པའི་འབྲས་བུ་དེ་གང་ཞེ་ན་ཞེས་འདྲིའོ། །འདུས་བྱས་བྲལ་བཅས་འབྲས་བུ་ཡིན། །ཞེས་བྱ་བ་ནི་ནམ་མཁའ་དང་

སོ་སོར་བརྟགས་པ་མ་ཡིན་པས་འགོག་པ་མ་གཏོགས་པ་ཆོས་ཐམས་ཅད་འབྲས་བུ་ཡིན་ནོ་ཞེས་བཤད་པར་འགྱུར་རོ། །དེ་ལྟ་ན་འོ་ན་ནི་ཞེས་བྱ་བ་རྒྱས་པར་འབྱུང་བ་ནི་འདུས་མ་བྱས་འབྲས་བུ་ཡིན་པའི་ཕྱིར་ཏེ། འདུས་མ་བྱས་འབྲས་བུ་ཡིན་པས་ན་འདིའི་

Vol. 142 · folio 204a

བདག་ཉིད་ལས་གཞན་པ་འདུས་མ་བྱས་དེ་གང་གི་འབྲས་བུ་ཡིན་པའི་རྒྱུ་གཞན་ཞིག་ཀྱང་ཡོད་པར་འགྱུར་ལ་འདུས་མ་བྱས་རྒྱུ་ཡིན་པའི་ཕྱིར་འདིའི་བདག་ཉིད་ལས་གཞན་པ་འདུས་མ་བྱས་དེ་གང་གི་རྒྱུ་ཡིན་པའི་འབྲས་བུ་གཞན་ཞིག་ཀྱང་ཡོད་

པར་འགྱུར་རོ་ཞེ་ན། འདུས་མ་བྱས་ལ་རྒྱུ་དང་འབྲས་བུ་དེ་དག་མེད་དེ། བྲལ་བའི་འབྲས་བུ་ནི་འདུས་མ་བྱས་སོ་སོར་བརྟགས་པས་འགོག་པའི་མཚན་ཉིད་ཡིན་ནོ། །དེ་ལ་ནི་རྒྱུ་གཞན་མེད་དེ། བསྐྱེད་པར་བྱ་བ་མ་ཡིན་པའི་ཕྱིར་རོ། །རྒྱུ་ནི་ཡིན་ཏེ། འདུས་

བྱས་སྐྱེ་བ་ལ་བགེགས་མི་བྱེད་པའི་ངོ་བོར་གནས་པའི་ཕྱིར་རོ། །དེ་ལ་འབྲས་བུ་རྣམ་པར་གཞག་པ་ཡང་མེད་དེ། འབྲས་བུ་འཛིན་པ་དང་དམིགས་པའི་མཐུ་མེད་པའི་ཕྱིར་རོ། །དེ་ཉིད་ཀྱི་ཕྱིར་རྒྱུ་རྣམ་པ་དྲུག་མི་སྲིད་པའི་ཕྱིར་དང་ཞེས་བྱ་བ་རྒྱས་པར་སྨོས་སོ། །

འདི་ལ་ལྷན་ཅིག་འབྱུང་བའི་རྒྱུ་དང་མཚུངས་པར་ལྡན་པའི་རྒྱུ་ནི་མི་སྲིད་དོ། །དེ་དང་ཆོས་འགའ་ཡང་ལྷན་ཅིག་མི་འབྱུང་བའི་ཕྱིར་དང་། མཚུངས་པར་མི་ལྡན་པའི་ཕྱིར་རོ། །འདི་ལ་སྐལ་བ་མཉམ་པའི་རྒྱུ་ཡང་འགའ་ཡང་མེད་དེ། འདུས་བྱས་དང་མི་འདྲ་བའི་ཕྱིར་

དང་ས་མཚུངས་པ་ཉིད་དུ་མི་རུང་བའི་ཕྱིར་རོ། །དེ་ཉིད་ཀྱི་ཕྱིར་དང་། དེ་ཉོན་མོངས་པ་ཅན་མ་ཡིན་པའི་ཕྱིར་ཀུན་དུ་འགྲོ་བའི་རྒྱུ་ཡང་མེད་དེ། རྣམ་པར་སྨིན་པའི་ངོ་བོ་ཉིད་མ་ཡིན་པའི་ཕྱིར་འདི་ལ་རྣམ་པར་སྨིན་པའི་རྒྱུ་ཡང་མེད་དེ། རྣམ་པར་སྨིན་པའི་ཆོས་ནི་སེམས་ཅན་

དུ་བགྲང་བ་དང་ཁམས་སུ་གཏོགས་པ་ཡིན་ནོ། །བསྐྱེད་པར་བྱ་བ་མ་ཡིན་པ་ཁོ་ནའི་ཕྱིར་ཡང་དེ་ལ་རྒྱུ་འདི་དག་མེད་དོ། །བསྐྱེད་པར་བྱ་བ་མ་ཡིན་པ་ཉིད་ཀྱི་ཕྱིར་འདི་ལ་བྱེད་རྒྱུའི་རྒྱུ་ཡང་མེད་དེ། དེ་ཉིད་ཀྱི་ཕྱིར། ཅིའི་ཕྱིར་ལམ་འབྲལ་བའི་བྱེད་རྒྱུའི་རྒྱུར་མི་འདོད་ཅེ་ན།

འདི་ལྟར་དེ་ནི་སྐྱེ་བ་ལ་བགེགས་མི་བྱེད་པའི་ངོ་བོར་རྣམ་པར་གཞག་པ་ཡིན་ན་འདུས་མ་བྱས་ནི་སྐྱེ་བ་དང་ལྡན་པ་མ་ཡིན་ནོ་ཞེས་བྱ་བ་སྨོས་སོ། །དུས་སུ་མ་གཏོགས་པའི་ཕྱིར་ཡང་འདི་ལ་རྒྱུ་དག་མེད་དེ། རྒྱུ་ནི་དུས་སུ་གཏོགས་པའི་ཆོས་ཀྱི་ཡིན་པར་རྣམ་པར་གཞག་

Vol. 142 · folio 204b

གོ། །དེ་ལྟར་ན་རྒྱུ་རྣམ་པ་དྲུག་མི་སྲིད་པའི་ཕྱིར་འདུས་མ་བྱས་ལ་རྒྱུ་མེད་དོ། །འབྲས་བུ་རྣམ་པ་ལྔ་མི་སྲིད་པའི་ཕྱིར་འདུས་མ་བྱས་ལ་འབྲས་བུ་ཡང་མེད་དོ། །ཅིའི་ཕྱིར་ཞེ་ན། རེ་ཞིག་སྤྱིར་དུས་ལས་རྣམ་པར་གྲོལ་བ་ལ་འབྲས་བུ་འཛིན་པ་དང་། སྨིན་པའི་མཐུ་མེད་

པའི་ཕྱིར་ཏེ། འདི་སྐད་དུ། ལྔ་པོ་ད་ལྟར་འབྲས་བུ་དག །འཛིན་ཏེ་གཉིས་ནི་འབྱིན་པར་བྱེད། །ཅེས་བྱ་བ་དེ་ལྟ་བུ་ལ་སོགས་པ་འབྱུང་བ་ཡིན་ནོ། །གཞན་ཡང་རེ་ཞིག་བདག་པོའི་འབྲས་བུ་ནི་མེད་དེ་དེ་ནི། སྔོན་འབྱུང་མ་ཡིན་འདུས་བྱས་ནི། །འདུས་བྱས་ཁོ་ནའི་

བདག་པོའི་འབྲས། །ཞེས་འབྱུང་བས་ལྷན་ཅིག་སྐྱེས་པ་དང་ཕྱིས་བྱུང་བ་ཡིན་ན། དེ་ཡང་སྐྱེ་བ་དང་ལྡན་པ་མ་ཡིན་པས་འདི་ལ་འབྲས་བུ་ལྷན་ཅིག་སྐྱེས་པ་དང་ཕྱིས་སྐྱེས་པ་མེད་དོ། །སྐྱེ་བ་དང་ལྡན་པ་མ་ཡིན་པ་ཉིད་ཀྱི་ཕྱིར་རྒྱུ་མཐུན་པའི་འབྲས་བུ་ཡང་མེད་དོ། །

རྒྱུ་མཐུན་པའི་འབྲས་བུ་ནི་སྐྱེ་བ་དང་ལྡན་པ་དང་འདྲ་བའི་ཆོས་སྐྱེ་བ་དང་ལྡན་པ་ཡིན་ནོ། །དེ་ཉིད་ཀྱི་ཕྱིར་དང་། སྐྱེས་བུའི་བྱེད་པ་མེད་པའི་ཕྱིར་འདུས་མ་བྱས་ལ་སྐྱེས་བུ་བྱེད་པའི་འབྲས་བུ་ཡང་མེད་དེ། །གང་གི་མཐུས་གང་ཞིག་སྐྱེ་བའམ་འཐོབ་པ་དེ་ནི་དེའི་སྐྱེས་

བུའི་བྱེད་པའི་འབྲས་བུ་ཡིན་ནོ། །དེ་ཉིད་ཀྱི་ཕྱིར་ན་བྲལ་བའི་འབྲས་བུ་ཡང་མེད་དེ། བྲལ་བ་ནི་ལམ་གྱི་སྟོབས་ཁོ་ནས་འཐོབ་ན་ལམ་དེ་ཡང་འདུས་བྱས་ཡིན་ནོ། །རྣམ་པར་སྨིན་པའི་རྒྱུ་དང་ཆོས་མི་མཐུན་པའི་ཕྱིར་རྣམ་པར་སྨིན་པའི་འབྲས་བུ་ཡང་མེད་དེ། །རྣམ་

པར་སྨིན་པའི་འབྲས་བུ་རྒྱུ་ནི་ཟག་པ་དང་བཅས་པ་ཡིན་ན། འདུས་མ་བྱས་ནི་ཟག་པ་དང་བཅས་པ་ཡང་མ་ཡིན་ནོ། །རྣམ་པ་གཅིག་ཏུ་ན་རྒྱུ་རྣམ་པ་ལྔ་དང་ཆོས་མི་མཐུན་པའི་ཕྱིར་འབྲས་བུ་རྣམ་པ་ལྔ་མི་སྲིད་པས་འདུས་མ་བྱས་ལ་འབྲས་བུ་མི་སྲིད་དོ། །

གལ་ཏེ་ལམ་འབྲལ་བའི་བྱེད་རྒྱུའི་རྒྱུ་ཡིན་པར་མི་འདོད་ན། ད་ནི་དེ་གང་གི་འབྲས་བུ་ཡིན་ཏེ། འབྲས་བུ་ནི་རྒྱུ་དང་ལྡན་པར་འགྱུར་དགོས་སོ། །ཡང་ན་ཇི་ལྟར་དེ་རྣམ་པ་གང་གིས་ན་འབྲས་བུ་ཡིན་ཞེ་ན། སྨྲས་པ། རེ་ཞིག་དེ་གང་གི་འབྲས་བུ་ཡིན་ཞེས་གང་སྨྲས་པ་དེ་

Vol. 142 · folio 205a

ནི་ལམ་གྱི་ཡིན་ནོ། །དེ་ཇི་ལྟར་འབྲས་བུ་ཡིན་ཞེས་གང་སྨྲས་པ་ནི་དེའི་སྟོབས་ཀྱིས་འཐོབ་པའི་ཕྱིར་འབྲས་བུ་ཡིན་ཏེ་ལམ་གྱི་སྟོབས་ཀྱིས་འཐོབ་པའི་ཕྱིར་རོ་ཞེས་བྱ་བའི་ཐ་ཚིག་གོ། །ཡང་ན་ཚིག་འདི་ལྟར་སྦྱར་ཏེ། དེ་གང་གི་འབྲས་བུ་ཡིན་ཞེ་ན་

ལམ་གྱི་འབྲས་བུ་ཡིན་ནོ། །དེ་ཇི་ལྟར་ན་འབྲས་བུ་ཡིན་ཞེ་ན། དེའི་སྟོབས་ཀྱིས་འཐོབ་པའི་ཕྱིར་རོ་ཞེས་བྱའོ། །འོ་ན་ནི་ལམ་དེ་ཐོབ་པ་དེ་ཁོ་ན་ལ་ནུས་པའི་ཕྱིར་ཐོབ་པ་ཁོ་ན་ལམ་གྱི་འབྲས་བུ་ཡིན་གྱི་བྲལ་བ་ནི་མ་ཡིན་ནོ། །ཅི་ཞེ་ན། ལམ་གྱི་འབྲས་བུ་ཞེས་བྱ་བར་

སྐབས་དང་སྦྱར་རོ། །དེ་ལ་ནུས་པ་མེད་པའི་ཕྱིར་ཞེས་བྱ་བ་ཡིན་ཏེ། །ལམ་ནི་བྲལ་བ་ལ་ནུས་པ་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ། །དེ་ལྟ་བས་ན་རེ་ཞིག་ལམ་ནི་ཇི་ལྟར་ཡང་འདིའི་རྒྱུ་མ་ཡིན་ཏེ། ལམ་ནི་འདིའི་རྒྱུར་རྒྱུ་དྲུག་པོ་དག་ལས་གང་ཡང་མ་ཡིན་ནོ། །

བྲལ་བ་ནི་འདིའི་འབྲས་བུ་ཡིན་ཏེ། ཐོབ་པར་བྱ་བའི་འབྲས་བུ་ཡིན་གྱི་བསྐྱེད་པར་བྱ་བ་ནི་མ་ཡིན་ནོ་སྙམ་དུ་བསམས་པའོ། །ཁ་ཅིག་ནི་བྱེད་པ་པོ་དང་། ཤེས་པར་བྱེད་པ་དང་། གསལ་བར་བྱེད་པ་དང་། འཇིག་པར་བྱེད་པ་དང་། འཐོབ་པར་བྱེད་པ་ཞེས་བྱ་བའི་

རྒྱུ་རྣམ་པ་ལྔར་འདོད་དེ། བྱེད་པ་པོའི་རྒྱུ་ནི་མྱུ་གུའི་ས་བོན་ལྟ་བུའོ། །ཤེས་པར་བྱེད་པ་ནི་མེའི་དུ་བ་ལྟ་བུའོ། །གསལ་བར་བྱེད་པ་ནི་བུམ་པའི་མར་མེ་ལྟ་བུའོ། །འཇིག་པར་བྱེད་པ་ནི་བུམ་པའི་ཐོ་བ་ལྟ་བུའོ། །ཐོབ་པར་བྱེད་པ་ནི་ཡུལ་གཞན་དུ་ཕྱིན་པར་

བྱ་བའི་ཤིང་རྟ་ལྟ་བུའོ་ཞེས་ཟེར་རོ། །དེ་ལྟར་ན་ལམ་ནི་འདི་ཐོབ་པར་བྱེད་པ་ཡིན་གྱི་སྐྱེད་པར་བྱེད་པའི་རྒྱུ་ནི་མ་ཡིན་ལ་བྲལ་བའི་འབྲས་བུ་ཡང་ཐོབ་པར་བྱ་བ་ཡིན་གྱི་བསྐྱེད་པར་བྱ་བ་ནི་མ་ཡིན་ནོ་ཞེས་བསྟན་པར་འགྱུར་རོ། །ཡང་བདག་པོའི་འབྲས་བུ་ཡང་

མེད་ན་གོ་ཞེས་བྱ་བ་རྒྱས་པར་འབྱུང་བ་ནི་གལ་ཏེ་འདུས་མ་བྱས་ལ་འབྲས་བུ་ཞིག་ཡོད་པར་གྱུར་ན་དེ་ནི་བྱེད་རྒྱུའི་རྒྱུ་ཉིད་དུ་རྣམ་པར་གཞག་པའི་ཕྱིར་བདག་པོའི་འབྲས་བུ་ཡིན་པར་འགྱུར་གྲང་ན། འདུས་མ་བྱས་ལ་དེ་དག་མེད། །ཅེས་འབྱུང་བའི་ཕྱིར་འདི་ལ་དེ་ཡང་

Vol. 142 · folio 205b

བཟློག་སྟེ་བཀག་པ་དང་རྒོལ་བར་བྱེད་པ། ཡང་ན་བདག་པོའི་འབྲས་བུ་ཡང་མེད་ན་གོ་ཇི་ལྟར་ན་འདུས་མ་བྱས་བྱེད་རྒྱུའི་རྒྱུ་ཡིན་ཞེས་འདྲི་བར་བྱེད་དོ། །སྐྱེ་བ་ལ་མི་སྒྲིབ་པའི་དངོས་པོས་བྱེད་རྒྱུའི་རྒྱུ་ཡིན་ཏེ་སྐྱེ་བ་ལ་མི་སྒྲིབ་པའི་དངོས་པོ་ཞེས་སྨོས་པའི་ཕྱིར་འདུས་

མ་བྱས་འདི་ནི་འདུས་བྱས་ཁོ་ནའི་བྱེད་རྒྱུའི་རྒྱུར་རྣམ་པར་གཞག་གི་འདུས་མ་བྱས་ཀྱི་ནི་མ་ཡིན་ནོ་ཞེས་བསྟན་པ་ཡིན་ནོ། །ཅིའི་ཕྱིར་འདུས་བྱས་བཞིན་དུ་འདིའི་འབྲས་བུ་རྣམ་པར་མི་གཞག་ཅེ་ན། དེའི་ཕྱིར། དུས་ལས་གྲོལ་བ་ལ་འབྲས་བུ་འཛིན་པ་དང་སྨིན་པའི་

མཐུ་མེད་པའི་ཕྱིར་རོ་ཞེས་བྱ་བ་སྨོས་ཏེ། དུས་ཀྱིས་བསྡུས་པའི་ཆོས་ཁོ་ན་ལ་འབྲས་བུ་འཛིན་པ་དང་སྨིན་པའི་མཐུ་ཡོད་ཀྱི་གཞན་ལ་ནི་མེད་དེ། ལྔ་པོ་ད་ལྟར་འབྲས་བུ་དག །འཛིན་ཏེ་གཉིས་ནི་འབྱིན་པར་བྱེད། །ཅེས་འཆད་པར་འགྱུར་རོ། །རྣམ་གྲངས་ཀྱིས་

གསུངས་སོ་ཞེས་བྱ་བ་ནི་སྒྲ་གཞན་གྱིས་བཤད་ཀྱི། རང་གི་སྒྲས་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །དེ་དག་ཀྱང་མི་རྟག་པ་ཡིན་ན་ཞེས་བྱ་བ་ནི་དེ་དག་ཀྱང་མི་རྟག་པ་ཁོ་ནའོ་ཞེས་ངེས་པར་གཟུང་བའི་ཕྱིར་རྟག་པ་ནི་རྒྱུ་མ་ཡིན་ནོ། །དམིགས་པའི་རྐྱེན་དུ་

ཡང་མི་འགྱུར་རོ་ཞེས་བྱ་བ་ནི་རྒྱུ་གང་དག་ཡིན་པ་དང་རྐྱེན་གང་དག་ཡིན་པ་ཞེས་འབྱུང་བའི་ཕྱིར་ཇི་ལྟར་དེ་ལས་རྒྱུ་དག་མི་རྟག་པར་བཤད་པ་དེ་བཞིན་དུ་རྐྱེན་དག་ཀྱང་མི་རྟག་པ་ཁོ་ནར་བཤད་པ་ཡིན་ནོ། །དེ་ལྟ་བས་ན་འདུས་མ་བྱས་དམིགས་པའི་རྐྱེན་དུ་ཡང་མི་འགྱུར་རོ། །

སྐྱེད་པའི་ཞེས་བཀར་བའི་ཕྱིར་ཞེས་བྱ་བ་ནི་གཟུགས་སྐྱེད་པའི་རྒྱུ་གང་དག་ཡིན་པ་དང་། རྐྱེན་གང་དག་ཡིན་པ་དེ་དག་ཀྱང་མི་རྟག་པ་ཡིན་གྱི། སྐྱེད་པར་མི་བྱེད་པའི་གང་དག་ཡིན་པ་ནི་མ་ཡིན་ནོ། །རྐྱེན་ནི་རྣམ་པ་གཉིས་ཏེ། སྐྱེད་པར་བྱེད་པ་དག་དང་སྐྱེད་པར་

བྱེད་པ་མ་ཡིན་པ་དག་ཡིན་ལ། དམིགས་པའི་རྐྱེན་ནི་སྐྱེད་པར་བྱེད་པ་མ་ཡིན་པ་དག་སྟེ། །དམིགས་པ་ཙམ་ཡིན་པའི་ཕྱིར་རོ། །དམིགས་པའི་རྐྱེན་ནི་ད་ལྟར་གྱི་སེམས་དང་སེམས་ལས་བྱུང་བ་རྣམས་ཀྱིས་འཛིན་པའི་ཕྱིར་ཆོས་འགག་པ་

Vol. 142 · folio 206a

ལ་བྱ་བ་བྱེད་དོ། །གཉིས་པོ་དག་ནི་འགག་པ་ལ་བྱ་བ་བྱེད་ཅེས་འབྱུང་བའི་ཕྱིར་རོ། །རྒྱུ་རྣམས་ཀྱང་ཞེས་བྱ་བ་རྒྱས་པར་འབྱུང་བ་ནི་རྒྱུ་ཡང་སྐྱེད་པར་བྱེད་པ་དང་། སྐྱེད་པར་བྱེད་པ་མ་ཡིན་པ་ཡིན་ཏེ།

དེ་ལྟ་བས་ན་འདུས་མ་བྱས་སྐྱེད་པར་བྱེད་པ་མ་ཡིན་པ་ཡང་མི་སྒྲིབ་པའི་དངོས་པོ་ཙམ་གྱིས་བྱེད་པའི་རྒྱུ་ཉིད་དུ་མི་དགག་པ་མ་ཡིན་ནམ། མདོ་ལས་དམིགས་པའི་རྐྱེན་ཡིན་པར་གསུངས་ཀྱི་ཞེས་བྱ་བ་ནི་རྐྱེན་ནི་བཞི་སྟེ་ཞེས་བྱ་བའི་མདོ་འདི་ལས་སོ། །བཀག་

པ་ནི་མེད་དོ་ཞེས་བྱ་བ་ནི་ཆོས་ཉིད་དང་མི་འགལ་བའི་ཕྱིར་ཉེས་པ་མེད་དོ་སྙམ་དུ་བསམས་པ་ཡིན་ནོ། །མདོ་རྣམས་ཀྱང་ཕལ་ཆེར་ནུབ་ན་ཞེས་བྱ་བ་ནི་ཡང་དག་པར་བསྡུས་པའི་བཞི་པོ་ཉམས་པའི་ཕྱིར་རོ། །འདི་ལ་སློབ་དཔོན་ནི་ཆོས་ཉིད་དང་འགལ་བ་མེད་

པས་འབད་པ་མེད་དེ། འོན་ཀྱང་འདུས་མ་བྱས་ཉིད་ཡོད་པ་ཞིག་ཡིན་ནམ། འོན་ཏེ་མེད་ཅེས་དཔྱོད་པར་ནི་བྱེད་དོ། །འདུས་མ་བྱས་ཐམས་ཅད་ཀྱང་ཞེས་བྱ་བ་ནི་སོ་སོར་བརྟགས་པས་འགོག་པ་འབའ་ཞིག་ཏུ་མ་ཟད་དོ། །གཟུགས་དང་ཚོར་བ་ལ་

སོགས་པ་བཞིན་དུ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་སྒྲ་དང་འདུ་ཤེས་དང་མིག་ལ་སོགས་པ་བསྡུས་ཏེ། མདོ་སྡེ་པ་རྣམས་ན་རེ་ཇི་ལྟར་གཟུགས་ལས་ཚོར་བ་ཡང་དངོས་པོ་གཞན་ཡིན་པ་དང་ཚོར་བ་ལས་ཀྱང་འདུ་ཤེས་དངོས་པོ་གཞན་ཡིན་པ་ནས་

འདུ་བྱེད་རྣམས་ཀྱི་བར་ལས་རྣམ་པར་ཤེས་པ་དངོས་པོ་གཞན་ཡིན་པ་དེ་བཞིན་ཉིད་དུ་འདུས་མ་བྱས་ནི་གཟུགས་ལ་སོགས་པ་ལྔ་ལས་དངོས་པོ་གཞན་དུ་ཡོད་པ་མ་ཡིན་ནོ། །དེའི་ཕྱིར་འདུས་མ་བྱས་ནི་རྫས་སུ་མེད་དོ་ཞེས་ཟེར་རོ། །རེག་བྱ་མེད་པ་ཙམ་

ཞེས་བྱ་བ་ནི་ཐོགས་པ་དང་བཅས་པའི་རྫས་མེད་པ་ཞེས་བྱ་བའི་ཐ་ཚིག་གོ། །མ་རྙེད་ན་ཞེས་བྱ་བ་ནི་མ་རྙེད་པ་ནའོ། །ཕྲ་རྒྱས་དང་སྐྱེ་བ་སྐྱེས་པ་འགགས་ནས་སོ་སོར་བརྟགས་པའི་སྟོབས་ཏེ། ཤེས་རབ་ཀྱི་སྟོབས་ཀྱིས་ཕྲ་རྒྱས་དང་སྐྱེ་བ་གཞན་མི་སྐྱེ་བ་ནི་སོ་

Vol. 142 · folio 206b

སོར་བརྟགས་པས་འགོག་པ་ཡིན། དེ་ལྟར་ན་ཕྲ་རྒྱས་འགོག་པ་ནི་ཀུན་འབྱུང་བའི་བདེན་པ་འགོག་པ་ཡིན་ནོ། །སྐྱེ་བ་འགོག་པ་ནི་སྡུག་བསྔལ་གྱི་བདེན་པ་འགོག་པ་ཡིན་ནོ་ཞེས་བཤད་པར་འགྱུར་རོ། །ཕུང་པོ་ལྷག་མ་དང་བཅས་པ་དང་། ཕུང་

པོའི་ལྷག་མ་མེད་པའི་མྱ་ངན་ལས་འདས་པ་རྣམ་པར་གཞག་པའི་ཕྱིར་ཡང་གཉི་ག་སྨོས་པ་ཡིན་ནོ། །མདོ་སྡེ་པའི་ལུགས་ཀྱི་ཕྲ་རྒྱས་ནི་གང་དག་ཡིན། དེ་དག་ཀྱང་སྐྱེ་བ་ནི་སོ་སོར་བརྟགས་པའི་སྟོབས་ཀྱིས་ཇི་ལྟར་འགོག་ཅེ་ན། ཕྲ་རྒྱས་ནི་ཕྲ་རྒྱས་དགུ་

བཅུ་རྩ་བརྒྱད་ཀྱི་བག་ཆགས་ཡིན་ཏེ། སྐད་ཅིག་མ་དང་པོ་ལ་ནི་ཕྲ་རྒྱས་གང་གི་གཉེན་པོ་སོ་སོར་བརྟགས་པའི་ལམ་གང་ཡིན་པ་དེ་དང་ཕྲ་རྒྱས་དེ་ལྷན་ཅིག་ཏུ་སྐྱེའོ། །སྐད་ཅིག་མ་གཉིས་པ་ལ་སོགས་པ་ལ་ནི་དེའི་སྟོབས་ཀྱིས་དེ་འགོག་གོ། །དེའི་

སྟོབས་ཁོ་ནས་ཡང་སྲིད་པའི་སྐྱེ་བ་ཉིང་མཚམས་སྦྱོར་བར་མི་བྱེད་པའི་འགོག་པ་ཡང་ཡིན་ནོ། །དཔེར་ན་བར་མ་དོར་འཆི་བའི་རིས་མཐུན་པ་ལྷག་མ་ལྟ་བུའོ་ཞེས་བྱ་བ་རྒྱས་པར་འབྱུང་བ་ལ། རིས་མཐུན་པའི་མི་ལ་སོགས་པའི་མཚན་ཉིད་དམ། ཕུང་པོ་

ལྔའི་མཚན་ཉིད་ཀྱི་བདག་གི་ངོ་བོ་ཡིན་ནོ། །དེའི་ལྷག་མ་ནི་དེའི་མཚན་ཉིད་ཁོ་ནར་སྐྱེ་བ་སྟེ། བར་མ་དོར་འཆི་བའི་རིས་མཐུན་པ་ལྷག་མ་དེ་ཡོངས་སུ་མ་རྫོགས་པ་ཁོ་ནར་རྐྱེན་མ་ཚང་བས་མི་སྐྱེ་བ་གང་ཡིན་པ་དེ་ནི་སོ་སོར་བརྟགས་པ་མ་ཡིན་པས་འགོག་

པ་ཡིན་ནོ། །རྐྱེན་མ་ཚང་བ་ནི་ཡོ་བྱད་ལ་སོགས་པའི་རྐྱེན་མ་ཚོགས་པས་ཕུང་པོའི་ཐ་མ་འཆི་བ་ཞེས་བྱ་བ་རྣམས་རིས་མཐུན་པ་མཚམས་སྦྱོར་བར་མི་ནུས་པ་གང་ཡིན་པའོ། །དེའི་ཕྱིར་དེ་ནི་སོ་སོར་བརྟགས་པས་འགོག་པ་ཡིན་ནོ་ཞེས་བྱ་བ་ནི་ཕུང་པོའི་ལྷག་

མ་དང་བཅས་པའི་མྱ་ངན་ལས་འདས་པའི་དབྱིངས་ཡིན་ནོ། །སྡུག་བསྔལ་མི་སྐྱེ་བ་ཞེས་བྱ་བ་ནི་ཕུང་པོའི་ལྷག་མ་མེད་པ་ཡིན་ནོ། །སོ་སོར་བརྟགས་པ་མ་ཡིན་པས་འགོག་པར་བཤད་པ་གང་ཡིན་པ་སྡུག་བསྔལ་མི་སྐྱེ་བ་དེ་ཡང་སྐྱེ་བའི་རྒྱུ་ཕྲ་རྒྱས་

Vol. 142 · folio 207a

མ་ཚང་བ་ནི་སོ་སོར་བརྟགས་པས་བྱས་པའི་ཕྱིར་སོ་སོར་བརྟགས་པ་མེད་པར་མི་འགྲུབ་སྟེ། དེའི་ཕྱིར་དེ་ནི་སོ་སོར་བརྟགས་པས་འགོག་པ་ཁོ་ན་ཡིན་ནོ། །རང་གི་ངང་གིས་འགག་པའི་ཕྱིར་རོ་ཞེས་བྱ་བ་ནི་བདག་ཉིད་ཀྱིས་འགག་

པའི་ཕྱིར་གྱི་ཤེས་རབ་ཀྱི་མཐུས་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །མ་ཞིག་ན་དེ་མེད་པའི་ཕྱིར་རོ་ཞེས་བྱ་བ་ནི་ཕྲ་རྒྱས་དེ་མ་ཞིག་ན་སོ་སོར་བརྟགས་པ་མ་ཡིན་པས་འགོག་པ་དེ་མེད་པའི་ཕྱིར་རོ། །སྐྱེ་བ་ལ་གགས་མ་བྱས་པ་ཅན་ཞེས་བྱ་བ་ནི་འདི་དག་

ལ་སྐྱེ་བ་ལ་གགས་མ་བྱས་པ་ཡོད་པས་སྐྱེ་བ་ལ་གགས་མ་བྱས་པ་ཅན་དག་སྟེ། དེ་དག་སྐྱེ་བ་ལ་གགས་བྱེད་པའི་དངོས་པོ་གང་ཡིན་པ་དེ་ནི་འདི་ལ་སོ་སོར་བརྟགས་པའི་མཐུ་ཡིན་ནོ། །གལ་ཏེ་མི་སྐྱེ་བ་ཁོ་ན་ཞེས་བྱ་བ་རྒྱས་པར་འབྱུང་བ་ནི་སྤངས་པ་

ནི་མྱ་ངན་ལས་འདས་པ་ཡིན་པར་འདོད་དོ། །གལ་ཏེ་མི་སྐྱེ་བ་ལ་མྱ་ངན་ལས་འདས་པ་ཞེས་བྱ་བར་གྱུར་ན་མི་སྐྱེ་བ་ནི་མ་འོངས་པ་ཁོ་ན་ཡིན་གྱི་འདས་པ་དང་ད་ལྟར་བྱུང་བ་ནི་སྐྱེས་ཟིན་པའི་ཕྱིར་མི་སྐྱེ་བ་མེད་ན་ཇི་ལྟར་མདོ་ལས། འདས་པ་དང་མ་འོངས་པ་དང་

ད་ལྟར་བྱུང་བའི་སྡུག་བསྔལ་སྤང་བར་འགྱུར་རོ་ཞེས་བཤད། མདོའི་ཚིག་དེ་ནི་ཇི་ལྟར་དྲང་། གང་གི་ལྟར་ན་མྱ་ངན་ལས་འདས་པ་རྫས་གཞན་ཡིན་པ་དེའི་ལྟར་ན་ནི་དེ་དག་ཀུན་དུ་བསྟེན་པ་ལ་སོགས་པས་འདས་པ་དང་ད་ལྟར་བྱུང་བ་དག་གི་མྱ་ངན་ལས་

འདས་པ་ཡང་འཐོབ་པར་འགྱུར་བས་མདོའི་ཚིག་འདི་ལེགས་པར་དྲངས་པ་ཡིན་ནོ། །དེ་ལ་དམིགས་པའི་ཉོན་མོངས་པ་སྤངས་པས་ཞེས་བྱ་བ་ནི་སྡུག་བསྔལ་ལ་དམིགས་པའི་ཉོན་མོངས་པ་སྤངས་པས་ཞེས་བྱ་བའི་ཐ་ཚིག་གོ། །གཟུགས་ལ་འདུན་པ་དང་

འདོད་ཆགས་གང་ཡིན་པ་ཞེས་བྱ་བ་ལ་འདུན་པ་ནི་མ་འོངས་པ་ལ་དོན་དུ་གཉེར་བའོ། །འདོད་ཆགས་ནི་ཐོབ་པའི་དོན་ལ་ལྷག་པར་ཞེན་པའོ། །རྒྱས་པར་རྣམ་པར་ཤེས་པའི་བར་དུ་གསུངས་ཏེ་ཞེས་བྱ་བ་ནི་ཚོར་བ་དང་འདུ་ཤེས་དང་འདུ་བྱེད་དག་དང་རྣམ་པར་

Vol. 142 · folio 207b

ཤེས་པ་ལ་འདུན་པ་དང་འདོད་ཆགས་གང་ཡིན་པ་དེ་སྤོངས་ཤིག །འདུན་པ་དང་འདོད་ཆགས་སྤངས་ན་ཁྱེད་ཀྱིས་རྣམ་པར་ཤེས་པ་དེ་ལྟ་བུ་དེ་ཡང་སྤངས་པར་འགྱུར་རོ་ཞེས་བྱ་བ་ཡིན་ནོ། །དེ་ལྟར་ན་དུས་གསུམ་པའི་སྡུག་བསྔལ་ཡང་ཞེས་བྱ་བ་ནི་འདུན་པ་དང་

འདོད་ཆགས་སྤངས་པ་ཁོ་ན་གཟུགས་ལ་སོགས་པ་སྡུག་བསྔལ་སྤངས་པ་ཡིན་ལ། །འདུན་པ་དང་འདོད་ཆགས་མ་འོངས་པ་དེ་ཡང་མི་སྐྱེ་བར་འགྱུར་ཏེ། དེའི་ཕྱིར་དུས་གསུམ་པའི་སྡུག་བསྔལ་ཡང་སྤང་བར་རུང་ངོ་ཞེས་སྟོན་པར་བྱེད་དོ། །དེར་ཡང་ཚུལ་ནི་

འདི་ཁོ་ན་ཡིན་ནོ་ཞེས་བྱ་བ་ནི་གལ་ཏེ་འདས་པ་དང་མ་འོངས་པ་དང་ད་ལྟར་བྱུང་བའི་ཉོན་མོངས་པ་སྤང་བར་འགྱུར་རོ་ཞེས་འབྱུང་བ་དེར་ཡང་ཚུལ་ནི་ཉོན་མོངས་པ་འདོད་ཆགས་སམ་ཞེ་སྡང་ལ་འདུན་པ་དང་འདོད་ཆགས་གང་ཡིན་པ་དེ་སྤོངས་ཤིག་ཅེས་བྱ་བ་རྒྱས་པར་སྦྱར་

བ་འདི་ཁོ་ན་ཡིན་ཏེ། དེ་ལ་དམིགས་པའི་ཉོན་མོངས་པ་སྤངས་པས་ཀྱང་ཉོན་མོངས་པ་སྤངས་པ་ཡིན་གྱི། རང་གི་ངོ་བོས་ནི་མ་ཡིན་པ་ཉིད་པས་དུས་གསུམ་པའི་ཉོན་མོངས་པ་ཡང་སྤངས་པར་རུང་ངོ་ཞེས་བྱ་བའི་ཐ་ཚིག་གོ། །ཡང་ན་དགོངས་པ་ནི་ཞེས་བྱ་

བ་རྒྱས་པར་འབྱུང་བ་ལ། ཚེ་རབས་སྔ་མ་པ་ནི་ཚེ་རབས་སྔ་མ་ལ་ཡོད་པ་ཡིན་ནོ། །ཚེ་འདི་པ་ནི་ཚེ་འདི་ལ་ཡོད་པ་ཡིན་ཏེ། དེ་ལྟར་ན་ཉོན་མོངས་པ་སྐད་ཅིག་མ་གཅིག་པ་བསྩལ་པ་ཡིན་ནོ། །འདི་ཇི་ལྟར་རྟོགས་པར་བྱ་ཞེ་ན། ཚེ་རབས་སྔ་མ་དང་ཚེ་འདི་

པའི་ཉོན་མོངས་པ་ཐམས་ཅད་སྦྱར་གྱི་སྐད་ཅིག་མ་གཅིག་ནི་མ་ཡིན་ནོ། །དེའི་ཕྱིར་དཔེར་ན་སྲེད་པ་རྣམ་པར་སྤྱད་པ་དག་ལ་ཞེས་བྱ་བ་རྒྱས་པར་སྨོས་ཏེ། གཞན་དག་ལ་ཡང་དེ་ལྟ་བུ་མཐོང་བས་དེ་ལྟ་བུ་ཡིན་པར་ཁོང་དུ་ཆུད་པར་བྱའོ། །འདས་པའི་དུས་ཀྱི་

སྐད་ཅིག་མ་གཅིག་ལ་སྲེད་པ་རྣམ་པར་སྤྱད་པ་བཅོ་བརྒྱད་ཇི་ལྟར་རུང་སྟེ། དེའི་ཕྱིར་འདས་པའི་ཚེ་རབས་ཀྱི་དབང་དུ་མཛད་ནས་གསུངས་པ་ཡིན་ནོ། །སྲེད་པར་རྣམ་པར་སྤྱད་པ་བཅོ་བརྒྱད་ནི་དགེ་སློང་དག་བདག་གོ་སྙམ་དུ་འཛིན་པ་ཡོད་ན། བདག་ནི་འདི་

Vol. 142 · folio 208a

ལྟ་བུ་ཞིག་ཡིན་ནོ་སྙམ་དུ་སེམས་པར་འགྱུར་ཞིང་བདག་ནི་དེ་འདི་ལྟ་ཞིག་ཡིན་ནོ་སྙམ་པ་དང་། བདག་ནི་ཡོད་པ་ཡིན་ནོ་སྙམ་པ་དང་། བདག་ནི་མེད་པ་ཡིན་ནོ་སྙམ་པ་དང་། བདག་ནི་གཞན་དུ་ཡིན་ནོ་སྙམ་དུ་སེམས་པར་ཡང་འགྱུར་རོ། །

འདི་འབྱུང་བར་འགྱུར་རོ་སྙམ་དུ་སེམས་པར་འགྱུར་ཞིང་འདི་འབྱུང་བར་མི་འགྱུར་རོ་སྙམ་པ་དང་། འདི་ལྟ་བུར་འབྱུང་བར་འགྱུར་རོ་སྙམ་པ་དང་། དེ་ལྟ་བུར་འབྱུང་བར་འགྱུར་རོ་སྙམ་པ་དང་། གཞན་དུ་འབྱུང་བར་འགྱུར་རོ་སྙམ་དུ་སེམས་པར་ཡང་

འགྱུར་རོ། །འདི་འབྱུང་བར་འགྱུར་སྙམ་དུ་སེམས་པར་འགྱུར་ཞིང་། འདི་ལྟ་བུར་འབྱུང་བར་འགྱུར་རམ་སྙམ་པ་དང་། དེ་ལྟ་བུར་འབྱུང་བར་འགྱུར་རམ་སྙམ་པ་དང་། གཞན་དུ་འབྱུང་བར་འགྱུར་རམ་སྙམ་དུ་སེམས་པར་ཡང་འགྱུར་རོ། །འདི་འབྱུང་

བར་འགྱུར་རམ་མི་འགྱུར་ཞིག་གུ་སྙམ་དུ་སེམས་པར་འགྱུར་ཞིང་དེ་ལྟར་འབྱུང་བར་འགྱུར་རམ་མི་འགྱུར་ཞིག་གུ་སྙམ་པ་དང་། འདི་ལྟ་བུར་འབྱུང་བར་འགྱུར་རམ་མི་འགྱུར་ཞིག་གུ་སྙམ་པ་དང་། གཞན་དུ་འབྱུང་བར་འགྱུར་རམ་མི་འགྱུར་ཞིག་གུ་སྙམ་

དུ་སེམས་པར་ཡང་འགྱུར་རོ་ཞེས་བྱ་བ་ཡིན་ཏེ། ད་ལྟར་བྱུང་བའི་བར་དུ་ཡང་དེ་དང་འདྲའོ། །དེ་བཞིན་དུ་འདིར་ཡང་ཚེ་རབས་སྔ་མ་པ་དང་ཚེ་རབས་འདི་པའི་ཉོན་མོངས་པའི་རྒྱུན་མཐའ་དག་སྦྱར་གྱི་སྐད་ཅིག་མ་གཅིག་ནི་མ་ཡིན་ནོ། །དེ་ལྟར་རབ་ཏུ་བསྒྲུབས་

ནས་འདོད་པ་བསྟན་པར་བྱ་བའི་ཕྱིར་ཉོན་མོངས་པ་གཉིས་པོ་དེས་ཞེས་བྱ་བ་རྒྱས་པར་སྨོས་ཏེ། ཚེ་རབས་སྔ་མ་པ་དང་ཚེ་འདི་པ་ཞེས་བྱ་བའི་ཉོན་མོངས་པ་གཉིས་ཀྱིས་ད་ལྟར་བྱུང་བའི་རྒྱུ་དང་འདི་ལ་མ་འོངས་པ་བསྐྱེད་པའི་ཕྱིར་ས་བོན་གྱི་དངོས་པོ་སྟེ་བག་

ཆགས་ཀྱི་མཚན་ཉིད་ཀྱི་ནུས་པ་བཞག་ལ། ས་བོན་གྱི་དངོས་པོ་དེ་སྤངས་པས་ཉོན་མོངས་པ་གཉིས་པོ་དེ་ཡང་སྤངས་པ་ཡིན་ཏེ། དཔེར་ན་རྣམ་པར་སྨིན་པ་ཟད་པས་རྣམ་པར་སྨིན་པ་ཉེ་བར་སྤྱད་ནས་ལས་ཟད་པར་འགྱུར་བ་ཉེ་བར་འདོགས་པ་དེ་དང་འདྲའོ། །

Vol. 142 · folio 208b

འོ་ན་མ་འོངས་པ་སྤངས་པ་ཇི་ལྟར་རྣམ་པར་གཞག །དེས་གང་ཞིག་སྤངས་པས་དེ་སྤང་བར་འགྱུར་བ་རྒྱུན་ལ་ས་བོན་གྱི་དངོས་པོ་བཞག་པ་ནི་མེད་དོ་ཞེ་ན། དེའི་ཕྱིར་མ་འོངས་པའི་སྡུག་བསྔལ་ལམ་ཉོན་མོངས་པ་ནི་ས་བོན་མེད་པའི་ཕྱིར་གཏན་དུ་མི་སྐྱེ་བ་སྤངས་

པ་ཡིན་ནོ་ཞེས་བྱ་བ་སྨོས་ཏེ། ས་བོན་མེད་པ་ཡང་སོ་སོར་བརྟགས་པའི་སྟོབས་ཀྱིས་འགྱུར་རོ། །འདས་པ་འགགས་ཟིན་པ་དང་ད་ལྟར་བྱུང་བ་འགགས་པ་ལ་མངོན་དུ་ཕྱོགས་པ་ལ་ནི་འབད་པ་སྟེ། གཉེན་པོ་བསྐྱེད་པའི་འབད་པ་དོན་དང་བཅས་པ་སྟེ། དགོས་

པ་དང་བཅས་པར་མི་འགྱུར་རོ་ཞེས་བྱ་བའི་ཐ་ཚིག་གོ། །དེ་དག་གི་མཆོག་ནི་འདོད་ཆགས་དང་བྲལ་བ་ཞེས་བྱ་བ་ལ་འདོད་ཆགས་དང་བྲལ་བ་ནི་འདོད་ཆགས་ཟད་པ་སྟེ། སོ་སོར་བརྟགས་པས་འགོག་པ་ཞེས་བྱ་བའི་ཐ་ཚིག་གོ། །ཇི་ལྟར་ན་མེད་པ་

རྣམས་ཀྱི་མཆོག་མེད་པ་ཡིན་པར་འོས་ཞེས་བྱ་བ་ནི་ཇི་ལྟར་ན་ནམ་མཁའ་ལ་སོགས་པ་འདུས་མ་བྱས་མེད་པ་རྣམས་ཀྱི་མཆོག་འདོད་ཆགས་དང་བྲལ་བ་འདུས་མ་བྱས་མེད་པ་ཡིན་པར་འོས་ཞེས་བྱ་བ་ཡིན་ནོ། །འདིའི་ལན་གདབ་པའི་ཕྱིར་མེད་པ་ཡང་ཁ་ཅིག་

ཅེས་བྱ་བ་རྒྱས་པར་སྨོས་སོ། །གཉིས་པའི་ཞེས་བྱ་བ་ནི་གཉིས་པའི་ཀུན་འབྱུང་བའི་བདེན་པའི་འོག་ཏུ་རང་གི་ཤེས་རབ་ཀྱིས་མཐོང་བ་དང་གཞན་དག་ལ་བསྟན་པའི་སྒོ་ནས་བསྟན་པ་སྟེ་གསུམ་དུ་ཁ་སྐོང་བ་ནི་གསུམ་པ་ཡིན་ནོ། །ཅིར་འགྱུར་ཞེས་བྱ་བ་ནི་

ཉེས་པ་ཅིར་འགྱུར་ཞེས་བྱ་བའི་ཐ་ཚིག་གོ། །ཅི་ཞིག་ཏུ་ཡང་འགྱུར་ཞེས་བྱ་བ་ནི་ཡོན་ཏན་ཅི་ཞིག་ཏུ་འགྱུར་ཞེས་བྱ་བའི་དོན་ཏོ། །ཅི་ཞིག་ཏུ་ཡང་འགྱུར་ཞེས་ཡོན་ཏན་ཡོངས་སུ་དྲིས་པ་དང་། བྱེ་བྲག་ཏུ་སྨྲ་བའི་ཕྱོགས་བསྐྱབ་པར་འགྱུར་རོ་ཞེས་བྱ་བ་སྨོས་སོ། །

ཅིར་འགྱུར་ཞེས་བྱ་བ་ཉེས་པ་ཅིར་འགྱུར་ཞེས་སྨྲས་པ་གང་ཡིན་པ་དེ་ལ་ཡང་དག་པ་མ་ཡིན་པ་ཀུན་དུ་བརྟགས་པར་འགྱུར་རོ་ཞེས་བྱ་བ་སྨྲས་ཏེ། ཉེས་པར་འགྱུར་རོ་ཞེས་བྱ་བའི་ཐ་ཚིག་གོ། །གཟུགས་དང་ཚོར་བ་ལ་སོགས་པ་བཞིན་དུ་ཞེས་བྱ་བ་ནི་མངོན་

Vol. 142 · folio 209a

སུམ་གྱི་སྒོ་ནས་སོ། །མིག་ལ་སོགས་པ་བཞིན་དུ་ཞེས་བྱ་བ་ནི་ལས་ཀྱི་སྒོ་ནས་སོ། །རྗེས་སུ་དཔག་པའི་སྒོ་ནས་ཞེས་བྱ་བའི་ཐ་ཚིག་གོ། །འདི་ནི་ལན་དུ་མ་ཞིག་བཤད་ཟིན་ཏོ། །དངོས་པོ་ཞེས་བྱ་བ་ནི་འདོད་ཆགས་ལ་སོགས་པའི་

དངོས་པོའོ། །རྒྱུ་དང་འབྲས་བུ་ལ་སོགས་པའི་དངོས་པོ་མི་སྲིད་པའི་ཕྱིར་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་བདག་དང་བདག་པོ་དང་ཡན་ལག་དང་ཡན་ལག་ཅན་གྱི་འབྲེལ་པ་ལ་སོགས་པ་བསྡུས་ཏེ། དངོས་པོ་འགགས་པ་ནི་རྒྱུ་དང་འབྲས་བུ་དང་ཡན་ལག་

དང་ཡན་ལག་ཅན་ཞེས་བྱ་བ་དེ་ལྟ་བུ་ལ་སོགས་པ་མ་ཡིན་ནོ། །འོ་ན་དེ་ཐོབ་པར་ངེས་པའི་རྒྱུ་གང་ཞིག་ཡིན་ཞེས་བྱ་བ་རྒྱས་པར་འབྱུང་བ་ནི་འགོག་པ་འདི་ཁོ་ནའི་ཐོབ་པ་ཡིན་གྱི། གཞན་གྱི་ནི་མ་ཡིན་ནོ་ཞེས་འགོག་པ་དེ་ཐོབ་པར་ངེས་པ་གང་ཡིན་པ་སྟེ་ངེས་པར་ཐོབ་པ་

དེའི་རྒྱུ་གང་ཞིག་ཡིན། འགོག་པ་ནི་ཐོབ་པ་དང་ལྷན་ཅིག་འབྲེལ་པ་ཅི་ཡང་མེད་དེ། རྒྱུ་དང་འབྲས་བུ་ལ་སོགས་པའི་འབྲེལ་པ་མི་སྲིད་པའི་ཕྱིར་རོ། །མཐོང་བའི་ཆོས་ལ་མྱ་ངན་ལས་འདས་པ་ཐོབ་པ་ཞེས་བྱ་བ་ནི་ཕུང་པོའི་ལྷག་མ་དང་བཅས་པའི་མྱ་ངན་

ལས་འདས་པ་ལ་གནས་པ་ཞེས་བྱ་བའི་ཐ་ཚིག་སྟེ། གལ་ཏེ་འདིའི་དངོས་པོ་མེད་པ་ཡིན་ན་ཇི་ལྟར་ཐོབ་པར་རུང་། གཉེན་པོ་ཐོབ་པས་ཞེས་བྱ་བ་རྒྱས་པར་འབྱུང་བ་ནི་འཕགས་པའི་ལམ་ཐོབ་པས་ཉོན་མོངས་པ་དང་ཡང་སྲིད་པའི་སྐྱེ་བ་དང་ཤིན་ཏུ་འགལ་བའི་

རྟེན་ཐོབ་པའི་ཕྱིར་མྱ་ངན་ལས་འདས་པ་ཐོབ་པ་ཞེས་བྱའོ། །དངོས་པོ་མེད་པ་ཙམ་ཉིད་དུ། །ཞེས་བྱ་བ་ལ་ཙམ་ཞེས་བྱ་བའི་སྒྲ་ནི་རྫས་གཞན་ཉིད་ཡིན་པ་བཟློག་པ་ཡིན་པའི་ཕྱིར་རོ། །འདི་སྐད་དུ་སྡུག་བསྔལ་འདི་ཞེས་བྱ་བ་རྒྱས་པར་འབྱུང་བ་ལ། སྤངས་

པ་ཞེས་བྱ་བ་ནས་འབྱུང་བ་མེད་པ་ཞེས་བྱ་བའི་བར་འདི་དག་ནི་རྣམ་གྲངས་ཀྱི་སྒྲ་ཡིན་ནོ། །འབྱུང་བ་མེད་པ་ཞེས་བྱ་བ་འདི་ནི་གསལ་བས་དཔེར་བརྗོད་པར་བཤད་པ་ཡིན་ཏེ། འདིར་འབྱུང་བར་མི་འགྱུར་བས་དེའི་ཕྱིར་འབྱུང་བ་མེད་པའོ་ཞེས་བྱ་བ་ནི་གཞིར་

Vol. 142 · folio 209b

བསྒྲུབ་པ་ཡིན་ནོ་ཞེས་སྟོན་པར་བྱེད་ཀྱི་མི་འབྱུང་བས་ན་འབྱུང་བ་མེད་པའོ་ཞེས་བྱ་བར་ངོ་བོ་སྒྲུབ་པ་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །གང་ཁོ་ནས་དེ་འཐོབ་པར་ཡོངས་སུ་རྟོག་པ་ཞེས་བྱ་བ་ནི་ལམ་གང་གིས་སྤངས་པ་འཐོབ་པར་ཡོངས་སུ་རྟོག་པའི་ལམ་དེ་ཡོད་དམ་

ཐོབ་ན་སྡུག་བསྔལ་མི་འབྱུང་བར་འདོད་པར་གྱིས་ཤིག །གཞན་མྱ་ངན་ལས་འདས་པ་ཡོངས་སུ་བརྟགས་པས་ཅི་ཞིག་བྱ་བ་ཡིན་ནོ། །དེའི་སེམས་ཀྱི་རྣམ་པར་ཐར་ཞེས་བྱ་བ་ནི་བཅོམ་ལྡན་འདས་ཀྱི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་ཚེའི་ཡིན་ནོ། །

དངོས་པོ་ཇི་ལྟ་བ་བཞིན་ནི་དམིགས་པ་ཇི་ལྟ་བ་བཞིན་ནོ། །ལྡན་པའི་དངོས་པོ་ནི་གང་ལ་ཉོན་མོངས་པ་དང་ལྡན་པར་འགྱུར་བའོ། །དངོས་པོ་དང་བཅས་པའི་ཆོས་རྣམས་ཞེས་བྱ་བ་ནི་རྒྱུ་དང་བཅས་པ་རྣམས་སོ། །ཡོངས་སུ་གཟུང་བའི་དངོས་པོ་ནི་ཡོངས་སུ་གཟུང་བར་

བྱ་བ་ཡིན་པས་ན་ཡོངས་སུ་གཟུང་བའོ། །ཐ་མར་བསྟན་པའི་ཕྱིར་ཞེས་བྱ་བ་ནི་ཚིག་ལེའུར་བྱས་པའི་མཇུག་ནས་རྣམ་པར་སྨིན་པའི་རྒྱུ་འབྱུང་སྟེ། དེའི་འབྲས་བུ་ནི་རྣམ་པར་སྨིན་པ་ཁོ་ན་ཡིན་ནོ། །བྱེད་རྒྱུའི་རྒྱུ་ནི་ཚིགས་སུ་བཅད་པའི་དང་པོ་ནས་འབྱུང་བའི་ཕྱིར་དང་པོ་

ཡིན་ཏེ། དེའི་འབྲས་བུ་ནི་བདག་སྐྱེས་ཡིན་ནོ། །བདག་ནི་བདག་པོ་ཡིན་ནོ། །དེ་ལས་སྐྱེས་པ་ནི་བདག་སྐྱེས་ཏེ་བདག་པོའི་འབྲས་བུ་ཞེས་བྱ་བའི་ཐ་ཚིག་གོ། །ཁ་ཅིག་ནི། བདག་པོའི་འབྲས་བུ་དང་པོའི་ཡིན་ཞེས་བྱ་བར་འདོན་ཏེ། འབྲས་བུ་འདི་བདག་པོའི་ཡིན་

པས་ན་བདག་པོའི་འོ། །འོ་ན་ནི་དབང་བྱེད་པ་ཞེས་བྱ་བར་འགྱུར་རོ། །འོན་ཏེ་དམིགས་ཀྱིས་བསྩལ་བའི་ཡུལ་ལ་ཡང་སྤྱིར་བསྟན་པར་སྦྱར་རོ་ཞེས་བྱ་བར་འགྱུར་ན་ནི་དེ་ལྟ་བུའི་ངོ་བོར་ཡང་འགྱུར་རོ། །དེ་ཉིད་དབང་བྱེད་པ་ཡིན་ནོ་ཞེས་བྱ་བ་ནི་མི་སྒྲིབ་པའི་དངོས་པོ་ཙམ་དུ་

གནས་པ་གང་ཡིན་པའོ། །སྐྱེད་པའི་དངོས་པོ་ཡང་ཡོད་ཅེས་བྱ་བ་ནི་གཙོ་བོའི་དངོས་པོ་ཡང་སྟེ་སྐྱེད་པར་བྱེད་པའི་དངོས་པོ་ཡང་ཞེས་བྱ་བའི་ཐ་ཚིག་གོ། །དེ་ལྟ་བས་ན་འདིས་ནི་བྱེད་རྒྱུའི་རྒྱུ་བྱེད་པ་པོ་དང་བཏང་སྙོམས་སུ་འཇུག་པ་རྣམ་པ་གཉི་ག་ལ་ཡང་བདག་པོའི་འབྲས་བུ་

Vol. 142 · folio 210a

ཡོད་དོ་ཞེས་བསྟན་པར་འགྱུར་རོ། །འདུས་མ་བྱས་ནི་མ་གཏོགས་ཏེ་འདི་ལྟར། སྔོན་བྱུང་མ་ཡིན་འདུས་བྱས་ནི། །འདུས་བྱས་ཁོ་ནའི་བདག་པོའི་འབྲས། །ཞེས་འཆད་པར་འགྱུར་རོ། །སྐྱེ་མཆེད་བཅུ་ཞེས་བྱ་བ་ནི་མིག་དང་གཟུགས་ཀྱི་སྐྱེ་

མཆེད་དག་ནས། ལུས་དང་རེག་བྱའི་སྐྱེ་མཆེད་དག་གི་བར་ཡིན་ཏེ། མིག་དང་གཟུགས་རྣམས་ལ་བརྟེན་ཏེ་མིག་གི་རྣམ་པར་ཤེས་པ་སྐྱེའོ་ཞེས་བྱ་བ་ནས་ལུས་དང་རེག་བྱ་རྣམས་ལ་བརྟེན་ཏེ་ལུས་ཀྱི་རྣམ་པར་ཤེས་པ་སྐྱེའོ་ཞེས་བྱ་བའི་བར་འབྱུང་བའི་ཕྱིར་རོ། །འདི་

ཡང་བྱེད་རྒྱུའི་རྒྱུ་ཁོ་ན་ཡིན་ཏེ། མིག་ལ་སོགས་པའི་སྐྱེ་མཆེད་རྣམས་ནི་མིག་གི་རྣམ་པར་ཤེས་པ་ལ་སོགས་པའི་ལྷན་ཅིག་འབྱུང་བའི་རྒྱུ་ལ་སོགས་པ་རྒྱུ་ལྔ་པོ་དག་ཡིན་པར་ནི་མི་སྲིད་དོ། །ཡིད་ཀྱི་སྐྱེ་མཆེད་ནི་ཡིད་ཀྱི་རྣམ་པར་ཤེས་པའི་སྐལ་བ་མཉམ་པའི་རྒྱུ་ལ་

སོགས་པ་ཡིན་པར་སྲིད་ལ་ཆོས་ཀྱི་སྐྱེ་མཆེད་ཀྱང་ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་ལ་སོགས་པ་ཡིན་པར་སྲིད་པས་བྱེད་རྒྱུའི་རྒྱུ་ཁོ་ན་ཡིན་ནོ་ཞེས་ངེས་པར་མ་བཟུང་ངོ་། །དེ་ལྟ་བས་ན་སྐྱེ་མཆེད་བཅུ་ཞེས་བཤད་ཀྱི། སྐྱེ་མཆེད་བཅུ་གཉིས་ཞེས་ནི་མ་

བཤད་དོ། །སྣོད་ཀྱི་འཇིག་རྟེན་ལ་ལས་རྣམས་ལྟ་བུའོ་ཞེས་བྱ་བ་ཅི་ཞེ་ན། བྱེད་རྒྱུའི་རྒྱུ་ལ་བསྐྱེད་པའི་དངོས་པོ་ཡང་ཡོད་ཅེས་བྱ་བར་སྐབས་དང་སྦྱར་རོ། །སྣོད་ཀྱི་འཇིག་རྟེན་ནི་ལས་དགེ་བ་དང་མི་དགེ་བས་བསྐྱེད་པ་ལུང་དུ་མ་བསྟན་པ་ཡིན་ཡང་རྣམ་པར་སྨིན་པ་ཡིན་

པར་མི་འདོད་དེ། རྣམ་པར་སྨིན་པ་ནི་སེམས་ཅན་ཞེས་བྱ་བ་ཡིན་པར་མཚན་ཉིད་ལས་འབྱུང་བའི་ཕྱིར་རོ། །དེ་ལྟ་བས་ན་བདག་པོའི་འབྲས་བུ་འདི་ནི་བྱེད་རྒྱུའི་རྒྱུ་ཡིན་ནོ། །མིག་འབའ་ཞིག་ལ་ཡོད་པ་མ་ཡིན་གྱི། རྣ་བ་ལ་སོགས་པ་ཡང་ཡོད་དོ། །ཅི་ཞེ་ན།

མིག་གི་རྣམ་པར་ཤེས་པ་བསྐྱེད་པ་ལ་བརྒྱུད་པས་དབང་བྱེད་པ་སྟེ་མིག་ལྟ་བུར་མངོན་སུམ་དུ་མ་ཡིན་ནོ། །ཇི་ལྟར་ཤེས་ཤེ་ན་སྨྲས་པ། ཐོས་ནས་ལྟ་བར་འདོད་པར་འབྱུང་བའི་ཕྱིར་ཏེ། ལྟ་བར་འདོད་པ་རྣམས་ལ་མིག་གི་རྣམ་པར་ཤེས་པ་སྐྱེའོ་སྙམ་དུ་བསམས་པ་ཡིན་

Vol. 142 · folio 210b

ནོ། །དེ་ལྟ་བུ་ལ་སོགས་པར་སྦྱར་བར་བྱའོ་ཞེས་བྱ་བ་ནི་བསྣམས་ནས་ལྟ་བར་འདོད་ན་འབྱུང་བའི་ཕྱིར་རོ་ཞེས་བྱ་བ་དེ་ལྟ་བུ་ལ་སོགས་པ་སྦྱར་བར་བྱ་བ་ཡིན་ནོ། །རྒྱུ་མཐུན་སྐལ་མཉམ་ཀུན་འགྲོ་བའི། །ཞེས་བྱ་བ་ནི་འབྲས་བུ་ཞེས་བྱ་བར་སྦྱར་རོ། །རྒྱུ་མཐུན་པའི་

འབྲས་བུ་ནི་སྐལ་བ་མཉམ་པ་དང་ཀུན་དུ་འགྲོ་བའི་རྒྱུ་དག་ཁོ་ནའི་ཡིན་ནོ་ཞེས་བྱ་བར་ངེས་པར་གསུངས་ཏེ། དེ་གཉིས་ཀྱི་མཇུག་ཐོགས་སུ་འབྱུང་བ་ནི་སྐྱེས་བུ་བྱེད་པའི་འབྲས་བུ་ཡང་ཡིན་ནོ། །སྐྱེས་བུ་པ་ནི་གཉིས་ཀྱིས་ཡིན་ཞེས་བྱ་བ་ནི་སྐྱེས་བུ་བྱེད་པའི་འབྲས་བུ་ཁོ་

ན་ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་དག་གི་ཡིན་ནོ་ཞེས་བྱ་བར་ངེས་པར་གཟུང་ངོ་། །སྐྱེས་བུའི་འབྲས་བུ་ནི་སྐྱེས་བུ་པའོ། །སྐྱེས་བུ་བྱེད་པའི་འབྲས་བུ་ཞེས་བྱ་བའི་ཐ་ཚིག་སྟེ། སྐྱེས་བུ་བྱེད་པ་ནི་སྐྱེས་བུའི་དངོས་པོ་དང་ཐ་མི་དད་པའི་ཕྱིར་རོ། །སྐྱེས་

བུའི་དངོས་པོ་དང་ཐ་མི་དད་པའི་ཕྱིར་སྐྱེས་བུའི་ལས་ཉིད་སྐྱེས་བུ་བྱེད་པ་ཡིན་ལ། སྐྱེས་བུ་ལས་གཞན་པ་ནི་མ་ཡིན་ཏེ། སངས་རྒྱས་པ་དག་ནི་ལས་དང་ལྡན་པ་དག་ལས། ལས་གཞན་ཡིན་པར་མི་འདོད་དོ། །དེ་ལྟ་བས་ན་སྐྱེས་བུ་བྱེད་པའི་འབྲས་བུ་གང་ཡིན་པ་དེ་ནི་

སྐྱེས་བུ་ཁོ་ནའི་ཡིན་པས་སྐྱེས་བུ་པ་ཞེས་བཤད་དོ། །ཆོས་གང་གི་བྱེད་པ་གང་ཡིན་པ་ཞེས་བྱ་བ་ནི་ཆོས་གང་གི་ལས་ཏེ་བྱ་བ་གང་ཡིན་པ་དེ་ནི་དེའི་སྐྱེས་བུ་བྱེད་པ་ཡིན་ནོ་ཞེས་བྱ་བའི་ཐ་ཚིག་གོ། །ནང་གི་བྱེད་པའི་སྐྱེས་བུ་མེད་པའི་ཕྱིར་སྐྱེས་བུ་ཞེས་བྱ་བ་ནི་ཆོས་ཙམ་དུ་ཟད་

པས་དེའི་ཕྱིར་ཆོས་བྱེད་པ་ཞེས་བྱ་བར་འགྱུར་གྱི་སྐྱེས་བུ་བྱེད་པ་ཞེས་བྱ་བར་ནི་མི་འགྱུར་བ་མ་ཡིན་ནམ་ཞེ་ན། དེའི་ཕྱིར་སྐྱེས་བུའི་བྱེད་པ་ལྟ་བུ་ནི་སྐྱེས་བུ་བྱེད་པ་སྟེ་ཞེས་བྱ་བ་སྨོས་ཏེ། འཇིག་རྟེན་ན་བརྟགས་པའི་སྐྱེས་བུའི་སྐྱེས་བུ་བྱེད་པ་ཇི་ལྟ་བར་ཆོས་ཀྱི་ཡང་དེ་དང་འདྲ་བས་སྐྱེས་བུའི་བྱེད་

པ་ལྟ་བུར་སྐྱེས་བུ་བྱེད་པ་ཡིན་ནོ། །དཔེ་བསྟན་པའི་ཕྱིར་སྨན་བྱ་རོག་རྐང་ཞེས་བྱ་བ་ལ་སོགས་པ་སྨོས་ཏེ། སྨན་བྱ་རོག་གི་རྐང་པ་ལྟ་བུ་ལ་བྱ་རོག་རྐང་ཞེས་བྱ་བ་དང་། མི་གང་ཞིག་གླང་པོ་ཆེ་མྱོས་པ་ལྟ་བུའམ་དཔའ་བོར་མཐོང་བ་དེ་ལ་གླང་པོ་ཆེ་མྱོས་པ་ཞེས་བྱ་བ་བཞིན་ནོ། །ཅི་གཞན་

Vol. 142 · folio 211a

དག་ལ་ཡང་ཞེས་བྱ་བ་ནི་རྒྱུ་དག་ལའོ། །རྣམ་པར་སྨིན་པའི་རྒྱུ་མ་གཏོགས་པ་གཞན་དག་ལ་ཡང་ཡོད་དེ་ཞེས་བྱ་བ་ནི་སྐལ་བ་མཉམ་པ་དང་ཀུན་དུ་འགྲོ་བ་དང་བྱེད་རྒྱུའི་རྒྱུ་དག་ལའོ། །ཅིའི་ཕྱིར་ཞེ་ན། འདི་ལྟར་སྐྱེས་བུ་བྱེད་པའི་འབྲས་བུ་

ནི་ལྷན་ཅིག་འབྱུང་བའམ་དེ་མ་ཐག་ཏུ་འབྱུང་བ་ཡིན་ཞེས་བྱ་བ་སྨོས་ཏེ། ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་དག་གི་འབྲས་བུ་ལྷན་ཅིག་འབྱུང་བར་བཤད་ལ། དེ་ཡང་སྐྱེས་བུ་བྱེད་པའི་འབྲས་བུ་ཁོ་ན་ཡིན་ཏེ། འབྲས་བུ་གཞན་ལྷན་ཅིག་འབྱུང་བ་ནི་མེད་

དོ། །སྐལ་བ་མཉམ་པ་དང་ཀུན་དུ་འགྲོ་བའི་རྒྱུ་དག་གི་ནི་དེ་མ་ཐག་ཏུ་འབྱུང་བ་ཁོ་ན་སྐྱེས་བུ་བྱེད་པའི་འབྲས་བུ་ཡིན་ནོ། །བྱེད་རྒྱུའི་རྒྱུ་ནི་གཉི་ག་ཡིན་ནོ། །ཡང་ཅི་སྐྱེས་བུ་བྱེད་པའི་འབྲས་བུ་རྒྱུ་མཐུན་པའི་འབྲས་བུ་དང་བདག་པོའི་འབྲས་བུ་ལས་གཞན་པ་ཞིག་ཡིན་ནམ་

ཞེ་ན། སྨྲས་པ་མ་ཡིན་ཏེ། འབྲས་བུ་དེ་ཁོ་ན་དེ་དང་དེའི་མིང་འཐོབ་པོ། །འདི་ལྟར་དེ་ནི་རྒྱུ་དང་འདྲ་བར་འབྱུང་བའི་ཕྱིར་རྒྱུ་མཐུན་པའི་འབྲས་བུ་ཡང་ཡིན་ནོ། །དེའི་སྟོབས་ཀྱིས་འབྱུང་བའི་ཕྱིར་སྐྱེས་བུ་བྱེད་པའི་འབྲས་བུ་ཡང་ཡིན་ནོ། །བགེགས་མི་བྱེད་པའི་དངོས་པོར་

གནས་པས་འབྱུང་བའི་ཕྱིར་བདག་པོའི་འབྲས་བུ་ཡང་ཡིན་ནོ། །རྣམ་པར་སྨིན་པ་ནི་དེ་ལྟ་མ་ཡིན་ནོ་ཞེས་བྱ་བ་ཅི་ཞེ་ན། ལྷན་ཅིག་འབྱུང་བའམ་དེ་མ་ཐག་ཏུ་བྱུང་བ་ཞེས་བྱ་བར་སྐབས་དང་སྦྱར་རོ། །རྣམ་སྨིན་ལུང་དུ་མ་བསྟན་ཆོས། །ཞེས་བྱ་བ་རྒྱས་པར་འབྱུང་

བ་ནི་ལུང་དུ་མ་བསྟན་པ་ཁོ་ན་དང་སེམས་ཅན་ཞེས་བྱ་བ་ཁོ་ན་དང་། ལུང་དུ་བསྟན་པ་ལས་བྱུང་བ་ཁོ་ནའོ་ཞེས་བྱ་བར་ངེས་པར་གཟུང་སྟེ། ལུང་དུ་མ་བསྟན་ཞེས་བྱ་བ་ནི་མ་བསྒྲིབས་ལ་ལུང་དུ་མ་བསྟན་པ་ཡིན་པར་བརྗོད་པར་འདོད་པ་ཡིན་ནོ། །གང་ལ་སེམས་ཅན་

ཞེས་བརྗོད་པ་ཡོད་པ་དེ་ནི། སེམས་ཅན་བརྗོད་པ་སྟེ་སེམས་ཅན་གྱི་རྒྱུན་ལས་སྐྱེས་པ་ཞེས་བྱ་བའི་ཐ་ཚིག་གོ། །ལུང་དུ་མ་བསྟན་པ་ལས་ཕྱིས་བྱུང་བ་ནི་ལུང་བསྟན་ཕྱིས་བྱུང་བ་སྟེ། རྒྱས་པ་ལས་བྱུང་བ་དང་རྒྱུ་མཐུན་པ་དག་ནི་ལུང་དུ་བསྟན་པ་ལས་བྱུང་བ་མ་ཡིན་

Vol. 142 · folio 211b

ནོ། །བསམ་གཏན་གྱི་ཁྱད་པར་ལ་སྙོམས་པར་ཞུགས་པའི་དབང་པོའི་འབྱུང་བ་ཆེན་པོ་རྒྱས་པར་འབྱུང་བ་དེ་ཡང་ལུང་དུ་བསྟན་པ་ལས་བྱུང་བས་དེ་རྣམ་པར་སྨིན་པ་ཡིན་པར་འགྱུར་ལ། སྤྲུལ་པའི་སེམས་ཀྱང་ཏིང་ངེ་འཛིན་གྱི་སེམས་ལས་བྱུང་བའི་ཕྱིར་དེ་དང་

འདྲ་བ་ཁོ་ནར་འགྱུར་བ་ཡིན་ནམ་ཞེ་ན། དེ་ནི་ཉེས་པ་མེད་དེ་ལུང་བསྟན་ཕྱིས་བྱུང་ཞེས་བྱ་བ་ལ་ཕྱིས་ཞེས་བྱ་བའི་སྒྲ་ནི་དུས་ཕྱི་མའི་དོན་ཡིན་པས་ལུང་དུ་བསྟན་པ་དགེ་བ་དང་མི་དགེ་བ་ལས་དུས་ཕྱིས་ཁོ་ན་འབྱུང་གི་ཅིག་ཅར་ཡང་མ་ཡིན་ལ་དེ་མ་ཐག་ཏུ་ཡང་མ་ཡིན་

པ་གང་ཡིན་པ་དེ་ལ་རྣམ་པར་སྨིན་པ་ཞེས་བྱའོ། །ཏིང་ངེ་འཛིན་ལས་སྐྱེས་པའི་རྒྱས་པ་ནི་ཏིང་ངེ་འཛིན་དང་ལྷན་ཅིག་ཏུ་ཡང་འབྱུང་ལ་དེ་མ་ཐག་ཏུ་ཡང་འབྱུང་ངོ་། །སྤྲུལ་པའི་སེམས་ནི་དེ་མ་ཐག་པ་ཁོ་ནར་འབྱུང་ངོ་། །རྣམ་པར་སྨིན་པ་ནི་ས་མཚུངས་པ་ཁོ་ན་ཡིན་པར་

འདོད་ལ། དེ་གཉིས་ནི་ས་ཐ་དད་པ་ཡང་ཡིན་པས་རྣམ་པར་སྨིན་པ་ཡིན་པར་ཐལ་བ་མེད་དོ། །རྒྱུ་མཐུན་རྒྱུ་དང་འདྲ་བའོ། །ཞེས་བྱ་བ་ནི་དགེ་བ་དང་ཉོན་མོངས་པ་ཅན་དང་། མ་བསྒྲིབས་ལ་ལུང་དུ་མ་བསྟན་པ་དང་འདྲ་བའི་དབང་དུ་བྱས་པ་ཡིན་ནོ། །གལ་ཏེ་དེ་ལྟ་ན་དགེ་

བར་འདྲ་བའི་ཕྱིར་ཟག་པ་མེད་པ་ཡང་རྒྱུ་དགེ་བ་ཟག་པ་དང་བཅས་པའི་རྒྱུ་མཐུན་པའི་འབྲས་བུར་འགྱུར་རོ་ཞེ་ན་མ་ཡིན་ཏེ། རིས་མི་མཐུན་པའི་ཕྱིར་རོ། །སྐལ་བ་མཉམ་པའི་རྒྱུ་ནི་རིས་མཐུན་པ་ཡིན་པར་འདོད་ཀྱི་ཐམས་ཅད་ནི་མ་ཡིན་ནོ། །དེ་ནི་ས་དང་པོ་ཉོན་མོངས་པ་

ཅན་ལས་འདྲ་བ་ཡིན་གྱི་ཞེས་བྱ་བ་ནི་ཀུན་དུ་འགྲོ་བའི་རྒྱུ་ནི་ས་དང་ཉོན་མོངས་པ་ཅན་ལས་འདྲ་བ་ཡིན་པའོ། །གང་དང་ལྷན་ཅིག་ཅེ་ན། འབྲས་བུ་དང་ངོ་། །ཇི་ལྟ་ཞེ་ན། རེ་ཞིག་ས་ལས་ནི་ཀུན་དུ་འགྲོ་བའི་རྒྱུ་ཡང་འདོད་པ་ན་སྤྱོད་པ་ནས་སྲིད་པའི་རྩེ་མོའི་བར་ཡིན་ལ།

དེའི་འབྲས་བུ་ཡང་འདོད་པ་ན་སྤྱོད་པ་ནས་སྲིད་པའི་རྩེ་མོ་པའི་བར་ཡིན་ནོ། །ཉོན་མོངས་པ་ཅན་ལས་ནི་ཀུན་དུ་འགྲོ་བའི་རྒྱུ་ཡང་ཉོན་མོངས་པ་ཅན་ཡིན་ལ། དེའི་འབྲས་བུ་ཡང་ཉོན་མོངས་པ་ཅན་ཡིན་ནོ། །སྐལ་བ་མཉམ་པའི་རྒྱུ་ཇི་ལྟ་བར་རྣམ་པ་ལས་ཀྱང་དེ་དང་འདྲ་བ་ནི་མ་

Vol. 142 · folio 212a

ཡིན་ནོ། །གང་ཞིག་རྣམ་པ་ལས་ཀྱང་འདྲ་བ་ཞེས་བྱ་བ་ནི་ཀུན་དུ་འགྲོ་བའི་རྒྱུ་གང་ཞིག་རང་གི་འབྲས་བུ་དེ་རྣམ་པ་ལས་ཀྱང་འདྲ་བའི་ཀུན་དུ་འགྲོ་བའི་རྒྱུ་དེ་ནི་སྐལ་བ་མཉམ་པའི་རྒྱུ་ཡིན་ཞེས་བྱ་བར་ཁས་ལེན་པ་ཉིད་དོ། །ས་དང་ཉོན་མོངས་པ་ཅན་ཉིད་དུ་

འདྲ་བའི་ཕྱིར་ཀུན་དུ་འགྲོ་བའི་རྒྱུ་ཡིན་ལ། དེ་རྣམ་པའི་སྒོ་ནས་ཀྱང་འདྲ་བའི་ཕྱིར་སྐལ་བ་མཉམ་པའི་རྒྱུ་ཡང་ཡིན་ནོ། །དེ་ཉིད་ཀྱི་ཕྱིར་གཉི་གའི་ངོ་བོ་ཉིད་ཡིན་པ་ཉིད་ཀྱིས་མུ་གསུམ་པ་སྲིད་པའི་ཕྱིར་མུ་བཞིར་བྱའོ། །མུ་དང་པོ་ནི་སྐལ་བ་མཉམ་པའི་རྒྱུ་ཀུན་དུ་འགྲོ་བ་མ་ཡིན་

པའོ་ཞེས་བྱ་བ་ནི་སྐལ་བ་མཉམ་པའི་རྒྱུ་འདོད་ཆགས་ལ་སོགས་པ་སྟེ། དེ་ནི་རང་གི་རིས་ཀྱི་ཉོན་མོངས་པའི་སྐལ་བ་མཉམ་པའི་རྒྱུ་ཁོ་ན་ཡིན་གྱི་ཀུན་དུ་འགྲོ་བའི་ངོ་བོ་ཉིད་མ་ཡིན་པའི་ཕྱིར་ཀུན་དུ་འགྲོ་བའི་རྒྱུ་ནི་མ་ཡིན་ནོ། །གཉིས་པ་ནི་རིས་གཞན་པའི་ཀུན་དུ་འགྲོ་བའི་རྒྱུའོ་

ཞེས་བྱ་བ་ནི་ཀུན་དུ་འགྲོ་བའི་རྒྱུ་འཇིག་ཚོགས་ལ་ལྟ་བ་ལ་སོགས་པ་ཡིན་ཏེ། དེ་ནི་ཀུན་དུ་འགྲོ་བའི་ངོ་བོ་ཉིད་ཡིན་པའི་ཕྱིར་དང་། རིས་གཞན་གྱི་ཉོན་མོངས་པ་ཅན་གྱི་རྒྱུ་ཡིན་པའི་ཕྱིར་ཀུན་དུ་འགྲོ་བའི་རྒྱུ་ཁོ་ན་ཡིན་གྱི་རིས་གཞན་གྱི་ཉོན་མོངས་པ་ཅན་གྱི་སྐལ་བ་མཉམ་པའི་རྒྱུ་

ཉིད་ཡིན་པ་མེད་པའི་ཕྱིར་སྐལ་བ་མཉམ་པའི་རྒྱུ་ནི་མ་ཡིན་ནོ། །གསུམ་པ་ནི་རིས་གཅིག་པའི་ཀུན་དུ་འགྲོ་བའི་རྒྱུའོ་ཞེས་བྱ་བ་ནི་ཀུན་དུ་འགྲོ་བའི་རྒྱུ་འཇིག་ཚོགས་ལ་ལྟ་བ་ལ་སོགས་པ་ཡིན་ཏེ། དེ་ནི་རིས་གཅིག་པའི་ཉོན་མོངས་པ་ཅན་དང་འདྲ་བའི་ཕྱིར་རིས་གཅིག་པའི་ཉོན་

མོངས་པའི་སྐལ་བ་མཉམ་པའི་རྒྱུ་ཡིན་ལ། དེ་ནི་རིས་གཅིག་པའི་ཉོན་མོངས་པ་ཅན་གྱི་རྒྱུ་ཉིད་ཡིན་པའི་ཚུལ་གྱིས་དེའི་ཀུན་དུ་འགྲོ་བའི་རྒྱུ་ཡིན་པའི་ཕྱིར་དང་། ཀུན་དུ་འགྲོ་བའི་རྒྱུ་ཉིད་དང་ལྡན་པའི་ཕྱིར་ཀུན་དུ་འགྲོ་བའི་རྒྱུ་ཡང་ཡིན་ནོ། །བཞི་པ་ནི་རྣམ་པ་དེ་དག་མ་

གཏོགས་པའོ་ཞེས་བྱ་བ་ནི་མུ་གསུམ་བཤད་པའི་ཆོས་ཀྱི་རྣམ་པ་དག་མ་གཏོགས་པ་ཞེས་བྱ་བའི་ཐ་ཚིག་གོ། །འདི་ལྟ་སྟེ་ཉོན་མོངས་པ་ཅན་གྱི་ཆོས་དག་ནི་དགེ་བ་རྣམས་ཀྱི་སྐལ་བ་མཉམ་པའི་རྒྱུ་མ་ཡིན་ཏེ། མི་འདྲ་བའི་ཕྱིར་རོ། །དེ་ཉིད་ཀྱི་ཕྱིར་དང་དགེ་བ་རྣམས་ནི་ཉོན་

Vol. 142 · folio 212b

མོངས་པ་ཅན་མ་ཡིན་པའི་ཕྱིར་ཀུན་དུ་འགྲོ་བའི་རྒྱུ་ཡང་མ་ཡིན་ཏེ། དེ་བཞིན་དུ་དགེ་བ་རྣམས་ཉོན་མོངས་པ་ཅན་དག་གི་མ་ཡིན་པ་ཡང་སྦྱར་བར་བྱའོ། །ཉོན་མོངས་པ་ཅན་དག་ཀྱང་ཉོན་མོངས་ཅན་རྣམས་ཀྱི་སྐལ་བ་མཉམ་པའི་རྒྱུ་ཡང་མ་ཡིན་ལ། ཀུན་དུ་འགྲོ་བའི་རྒྱུ་ཡང་

མ་ཡིན་ཏེ། འདི་ལྟ་སྟེ། འདོད་ཆགས་ལ་སོགས་པ་ནི་རིས་གཞན་པ་ཡིན་པའི་ཕྱིར་རིས་གཞན་པའི་ཉོན་མོངས་པ་ཅན་རྣམས་ཀྱི་སྐལ་བ་མཉམ་པའི་རྒྱུ་ཡང་མ་ཡིན་ལ། འདོད་ཆགས་ལ་སོགས་པ་ཀུན་དུ་འགྲོ་བ་མ་ཡིན་པའི་ཕྱིར་ཀུན་དུ་འགྲོ་བའི་རྒྱུ་ཡང་མ་ཡིན་ནོ། །

ཀུན་དུ་འགྲོ་བའི་ཆོས་དག་ཀྱང་རིས་གཅིག་པའི་ཉོན་མོངས་པ་ཅན་རྣམས་ཀྱི་ཡང་སྐལ་བ་མཉམ་པའི་རྒྱུ་ཡང་མ་ཡིན་ལ། ཐམས་ཅད་དུ་འགྲོ་བའི་རྒྱུ་ཡང་མ་ཡིན་ཏེ། གལ་ཏེ་དེ་དག་མ་འོངས་པ་ཡིན་ན་ཞེས་བྱ་བར་སྦྱར་རོ། །བྲལ་བའི་བློ་ཡིས་ཟད་པའོ། །ཞེས་བྱ་བ་

ནི་བློས་ཐོབ་པར་བྱ་བའི་འགོག་པ་ནི་བྲལ་བའི་འབྲས་བུ་ཡིན་ནོ་ཞེས་བྱ་བའི་ཐ་ཚིག་གོ། །དེས་ན་ཞེས་བྱ་བ་ནི་རྒྱུ་དེས་ན་སྟེ། གང་གི་ཕྱིར་ཟད་པ་ནི་འགོག་པ་ཡིན་ལ་བློ་དེ་ནི་ཤེས་རབ་ཡིན་པའི་རྒྱུ་དེས་ནི་སོ་སོར་བརྟགས་པས་འགོག་པ་ནི་བྲལ་བའི་འབྲས་བུ་ཡིན་ནོ་ཞེས་བཤད་

པར་འགྱུར་རོ་ཞེས་སྟོན་ཏེ། གང་གི་སྟོབས་ཀྱིས་གང་སྐྱེ་བ། །ཞེས་བྱ་བ་རྒྱས་པར་འབྱུང་བ་ནི་གང་གི་སྟོབས་ནི། གང་གིས་སྟོབས་སོ་ཞེས་དྲུག་པར་ཚིག་བསྡུས་ཏེ། གང་གི་སྟོབས་ཀྱིས་འདུས་བྱས་གང་སྐྱེ་བའི་འབྲས་བུ་དེ་ནི་དེའི་སྐྱེས་བུ་བྱེད་པ་ལས་སྐྱེས་པ་

ཡིན་ནོ། །སྐྱེས་བུ་བྱེད་པ་ལས་སྐྱེས་པ་ནི་སྐྱེས་བུ་བྱེད་པ་ལས་སྐྱེས་པ་སྟེ། སྐྱེས་བུ་བྱེད་པའི་འབྲས་བུ་ཞེས་བྱ་བའི་ཐ་ཚིག་གོ། །དཔེར་བརྗོད་པ་སྟོན་པར་བྱེད་དེ། དཔེར་ན་ས་འོག་མ་པ་འདོད་པ་ན་སྤྱོད་པ་དེའི་སྦྱོར་བའི་སེམས་ཀྱི་འབྲས་བུ་ས་གོང་མ་པ་བསམ་གཏན་

དང་པོའི་ས་པ་འམ་བསམ་གཏན་གཉིས་པའི་ས་པའི་ཏིང་ངེ་འཛིན་ལྟ་བུ་སྟེ་སྐྱེས་བུ་བྱེད་པ་ལས་སྐྱེས་པ་ཞེས་བྱ་བར་སྐབས་དང་སྦྱར་རོ། །ཟག་པ་དང་བཅས་པའི་ཟག་པ་མེད་པ་དང་བསམ་གཏན་གྱི་སེམས་སེམས་ཀྱི་སྤྲུལ་པའི་སེམས་ཀྱང་འབྲས་བུ་དེ་ཁོ་ན་

Vol. 142 · folio 213a

ཡིན་ནོ། སོགས་པ་ཞེས་བྱ་བའི་སྒྲས་ནི་གཞན་ཡང་དཔེར་ན་འདོད་པ་ན་སྤྱོད་པའི་འཆི་བའི་སེམས་ལས་གཟུགས་ན་སྤྱོད་པའི་སྲིད་པ་བར་མའི་སྐད་ཅིག་མ་དང་པོ་ལྟ་བུའོ་ཞེས་བྱ་བ་དེ་ལྟ་བུ་ལ་སོགས་པ་བསྡུའོ། །རིས་མི་མཐུན་པ་དཔེར་བརྗོད་

པ་ནི་རྒྱུ་མཐུན་པའི་འབྲས་བུ་བསྩལ་བའི་ཕྱིར་ཏེ། ས་ཐ་དད་པ་ནི་རྒྱུ་དང་འདྲ་བ་མ་ཡིན་པས་ས་གོང་མ་པའི་ཏིང་ངེ་འཛིན་ཀྱང་ས་འོག་མ་པའི་སྦྱོར་བའི་སེམས་ཀྱི་རྒྱུ་མཐུན་པའི་འབྲས་བུ་མ་ཡིན་ལ། ཟག་པ་མེད་པ་ཡང་ཟག་པ་དང་བཅས་པའི་མ་ཡིན་ནོ་ཞེས་བརྗོད་པར་

བྱའོ། །རྒྱུ་མཐུན་པའི་འབྲས་བུ་ཐམས་ཅད་སྐྱེས་བུ་བྱེད་པའི་འབྲས་བུ་ཡིན་པ་ནི་མ་ཡིན་ཏེ། གང་ཞིག་གང་གི་སྟོབས་ཀྱིས་སྐྱེ་ཞིང་འདྲ་བ་དང་ས་མཚུངས་པ་དང་དེ་མ་ཐག་པ་ཡིན་པ་དེ་ནི་དེའི་སྐྱེས་བུ་བྱེད་པའི་འབྲས་བུ་ཡང་ཡིན་ལ། རྒྱུ་མཐུན་པའི་འབྲས་བུ་ཡང་ཡིན་

ནོ། །འདི་ལ་མུ་བཞི་པར་ཡང་འགྱུར་ཏེ། སྐྱེས་བུ་བྱེད་པའི་འབྲས་བུ་ཁོ་ན་ཡིན་ལ་རྒྱུ་མཐུན་པའི་འབྲས་བུ་མ་ཡིན་པ་ཡང་ཡོད་དེ། ཇི་སྐད་བཤད་པ་ལྟ་བུའོ། །རྒྱུ་མཐུན་པའི་འབྲས་བུ་ཁོ་ན་ཡིན་ལ། སྐྱེས་བུ་བྱེད་པའི་འབྲས་བུ་མ་ཡིན་པ་ཡང་ཡོད་དེ། སྐལ་

བ་མཉམ་པ་དང་ཀུན་དུ་འགྲོ་བའི་རྒྱུ་དག་གི་འབྲས་བུ་བར་དུ་ཆོད་པ་ལྟ་བུའོ། །གཉི་ག་ཡིན་པ་ཡང་ཡོད་དེ། སྐལ་བ་མཉམ་པ་དང་ཀུན་དུ་འགྲོ་བའི་རྒྱུ་དག་གི་འབྲས་བུ་དེ་མ་ཐག་ཏུ་འབྱུང་བ་ལྟ་བུའོ། །གཉི་ག་མ་ཡིན་པ་ཡང་ཡོད་དེ། དཔེར་ན་རྣམ་པར་སྨིན་པའི་

རྒྱུའི་འབྲས་བུ་རྣམ་པར་སྨིན་པ་ལྟ་བུའོ། །སོ་སོར་བརྟགས་པས་འགོག་པ་ཡང་སྐྱེས་བུ་བྱེད་པའི་འབྲས་བུ་ཡིན་པར་ནི་འདོད་མོད་ཀྱི། རྟག་པའི་ཕྱིར་འདི་རྒྱུའི་སྟོབས་ཀྱིས་སྐྱེ་བ་ནི་མ་ཡིན་ཏེ། དེའི་ཕྱིར་ཚིག་ལེའུར་བྱས་པ་ལས་མ་བཤད་དོ། །དེ་ཉེ་བར་སྦྱར་

བའི་ཕྱིར་སོ་སོར་བརྟགས་པས་འགོག་པ་ནི་གང་གི་སྟོབས་ཀྱིས་འཐོབ་པ་ཞེས་བརྗོད་པར་བྱའོ་ཞེས་བྱ་བ་སྨོས་སྟེ། །སོ་སོར་བརྟགས་པས་འགོག་པ་ནི་སོ་སོར་བརྟགས་པའི་སྟོབས་ཀྱིས་འཐོབ་སྟེ། དེ་ལྟ་བས་ན་སོ་སོར་བརྟགས་པའི་འགོག་པ་སྐྱེས་བུ་བྱེད་པའི་

Vol. 142 · folio 213b

འབྲས་བུ་ཡིན་ནོ། །སྔོན་བྱུང་བ་མ་ཡིན་ཞེས་བྱ་བ་རྒྱས་པར་འབྱུང་བ་ལ། སྔོན་བྱུང་མ་ཡིན་པ་ནི་སྔར་བྱུང་བ་ལས་གཞན་པའོ། །དེ་གང་ཞེ་ན་ལྷན་ཅིག་འབྱུང་བ་དང་ཕྱིས་འབྱུང་བ་སྟེ། འབྲས་བུ་སྔ་ལ་རྒྱུ་འཕྱི་བ་ནི་མེད་དོ། །འདུས་བྱས་ཀྱི་ཆོས་ཁོ་ན་བདག་

པོའི་འབྲས་བུ་ཡིན་གྱི། འདུས་མ་བྱས་ནི་མ་ཡིན་ནོ། །འདུས་བྱས་ཁོ་ནའི་ཡིན་གྱི་འདུས་མ་བྱས་ཀྱི་ནི་མ་ཡིན་ཏེ། འབྲས་བུ་འཛིན་པ་དང་སྨིན་པའི་མཐུ་མེད་པའི་ཕྱིར་རོ། །ཐམས་ཅད་ཀྱི་ཞེས་བྱ་བ་ནི་སྐྱེད་པར་བྱེད་པ་དང་བགེགས་མི་བྱེད་པའི་དངོས་པོར་གནས་

པའི་ཡང་ངོ་། །སྐྱེས་བུ་བྱེད་པའི་འབྲས་བུ་ནི་བྱེད་པ་པོའི་ཡིན་ནོ་ཞེས་བྱ་བ་ནི། གང་གི་སྟོབས་ཀྱིས་གང་སྐྱེ་བའི། །འབྲས་དེ་སྐྱེས་བུ་བྱེད་ལས་སྐྱེ། །ཞེས་འབྱུང་བའི་ཕྱིར་རོ། །བདག་པོའི་འབྲས་བུ་ནི་བྱེད་པ་པོ་མ་ཡིན་པའི་ཡང་ཡིན་ཏེ་ཞེས་བྱ་བ་ནི། སྔོན་བྱུང་མ་

ཡིན་འདུས་བྱས་ནི། །འདུས་བྱས་ཁོ་ནའི་བདག་པོའི་འབྲས། །ཞེས་འབྱུང་བའི་ཕྱིར་རོ། །གཞན་དག་གི་ནི་བདག་པོའི་འབྲས་བུ་ཁོ་ན་ཡིན་ནོ་ཞེས་བྱ་བ་ནི་བཟོ་དེ་བཟོ་བོ་མ་ཡིན་པ་བགེགས་མི་བྱེད་པའི་དངོས་པོར་གནས་པ་རྣམས་ཀྱི་ནི་བདག་པོའི་འབྲས་བུ་ཁོ་

ན་ཡིན་གྱི་སྐྱེས་བུ་བྱེད་པའི་འབྲས་བུ་ནི་མ་ཡིན་ནོ། །དེ་ལྟར་ན་མུ་བཞི་པར་འགྱུར་ཏེ་སྐྱེས་བུ་བྱེད་པའི་འབྲས་བུ་ཁོ་ན་ཡིན་ལ་བདག་པོའི་འབྲས་བུ་མ་ཡིན་པ་ཡང་ཡོད་དེ། དཔེར་ན་བྲལ་བའི་འབྲས་བུ་ལྟ་བུའོ། །བདག་པོའི་འབྲས་བུ་ཁོ་ན་ཡིན་ལ། སྐྱེས་

བུ་བྱེད་པའི་འབྲས་བུ་མ་ཡིན་པ་ཡང་ཡོད་དེ། རྒྱུ་ཡལ་བར་འདུག་པའི་འབྲས་བུ་དང་འབྲས་བུ་བར་དུ་ཆོད་པ་ལྟ་བུའོ། །གཉི་ག་ཡིན་པ་ཡང་ཡོད་དོ། རྒྱུ་བྱེད་པ་པོའི་ལྷན་ཅིག་འབྱུང་བ་དང་དེ་མ་ཐག་ཏུ་བྱུང་བ་ལྟ་བུའོ། །གཉི་ག་མ་ཡིན་པ་ཡང་ཡོད་དེ།

དཔེར་ན་ནམ་མཁའ་དང་སོ་སོར་བརྟགས་པ་མ་ཡིན་པས་འགོག་པ་ལྟ་བུའོ། །ལྔ་པོ་ད་ལྟར་འབྲས་བུ་འཛིན། །ཞེས་བྱ་བ་ནི་ད་ལྟར་གྱི་དག་ཁོ་ན་འབྲས་བུ་འཛིན་ཏོ་ཞེས་བྱ་བར་ངེས་པར་བཟུང་བ་ཡིན་ནོ། །འཛིན་ཞེས་བྱ་བ་ནི་འཕེན་པར་བྱེད་པ་སྟེ། ས་བོན་གྱི་

Vol. 142 · folio 214a

དངོས་པོར་ཉེ་བར་གནས་པ་ཞེས་བྱ་བའི་ཐ་ཚིག་གོ། །བྱེད་རྒྱུའི་རྒྱུ་ཡང་དེ་དང་འདྲ་མོད་ཀྱི་ཞེས་བྱ་བ་ནི་ད་ལྟར་གྱི་ཁོ་ན་འབྲས་བུ་འཛིན་གྱི་འདས་པ་ཡང་མ་ཡིན་ལ། མ་འོངས་པ་ཡང་མ་ཡིན་མོད་ཀྱི། དེ་ནི་འབྲས་བུ་དང་བཅས་པར་མ་

ངེས་པས་མ་བརྗོད་དོ། །འདི་ལྟར་འདུས་མ་བྱས་ཀྱང་བྱེད་རྒྱུའི་རྒྱུ་ཡིན་པར་འདོད་མོད་ཀྱི་འདི་ལ་འབྲས་བུ་ནི་མེད་ལ། མ་འོངས་པ་ཡང་བྱེད་རྒྱུའི་རྒྱུ་ཡིན་མོད་ཀྱི་སྔར་བྱུང་བའི་ཆོས་ཀྱི་འབྲས་བུ་དང་བཅས་པ་ནི་མ་ཡིན་ནོ། །གཉིས་པ་ནི་འབྱིན་པར་བྱེད་ཅེས་བྱ་བ་ནི་

ད་ལྟར་གྱི་དག་ཅེས་བྱ་བར་སྐབས་དང་སྦྱར་ཏེ། ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུ་དག་ནི་ད་ལྟར་ཁོ་ན་འབྲས་བུ་འབྱིན་པར་བྱེད་དོ། །རེ་ཞིག་གང་འདས་པ་དག་ནི་རིགས་ན་ཞེས་བྱ་བ་ནི་འདི་གཉིས་ནི། རྒྱུ་མཐུན་སྐལ་མཉམ་ཀུན་འགྲོ་བའི། །ཞེས་

འབྱུང་བའི་ཕྱིར་རྒྱུ་མཐུན་པའི་འབྲས་བུས་འབྲས་བུ་དང་བཅས་པ་དག་ཏུ་བཤད་ན། ད་ལྟར་གྱི་དག་གོ་རྒྱུ་མཐུན་པའི་འབྲས་བུ་ཇི་ལྟར་འབྱིན་ཏེ་ད་ལྟར་གྱི་གནས་སྐབས་ན་ནི་དེ་གཉིས་ཀྱི་རྒྱུ་མཐུན་པའི་འབྲས་བུ་མི་སྣང་ངོ་ཞེ་ན། སྨྲས་པ། མཇུག་ཐོགས་སུ་བསྒྲུབ་པའི་ཕྱིར་

ཏེ། ཅི་ཞེ་ན། འབྲས་བུ་འབྱིན་པ་ཞེས་བྱ་བར་སྐབས་དང་སྦྱར་རོ། །དེ་དག་ཀྱང་འདས་པ་ཡིན་ཞེས་བྱ་བ་ནི་རྒྱུ་དང་འབྲས་བུ་དག་འགྲོགས་པ་མེད་པའི་ཕྱིར་རོ། །ཡང་དེ་ཉིད་མི་འབྱིན་ཏོ་ཞེས་བྱ་བ་ནི་ད་ལྟར་གྱི་གནས་སྐབས་ཁོ་ནར་ཕྱུང་ཟིན་པའི་ཕྱིར་ཡང་འབྲས་བུ་དེ་

ཉིད་འབྱིན་པར་ནི་མི་བྱེད་དོ་ཞེས་བྱ་བའི་ཐ་ཚིག་གོ། །ད་ལྟར་ཉིད་དུ་ཁྱེར་ཏེ་འོངས་ཟིན་པ་ནི་ཡང་བསྐུར་བར་མི་ནུས་སོ། །གང་གི་ཚེ་དེ་གཉིས་འདས་པས་འབྲས་བུ་འབྱིན་པར་བྱེད་པ་ན་ཡང་དེ་ཁོ་ནའི་ཚེ་རང་གི་འབྲས་བུ་དེ་འབྱིན་པར་བྱེད་དེ་སྐྱེ་བའི་གནས་སྐབས་ཁོ་ནར་

འབྲས་བུ་སྒྲུབ་པར་བྱེད་ཀྱི། གཞན་དུ་ནི་མ་ཡིན་ལ། འབྲས་བུ་དེ་ནི་བསྒྲིབས་པ་འབའ་ཞིག་ཏུ་ཟད་དོ་ཞེས་བྱ་བར་ཁོང་དུ་ཆུད་པར་བྱའོ། །དགེ་བའི་རྩ་བ་ཀུན་དུ་གཅོད་པས་ཐམས་ཅད་ཀྱི་ཐ་མར་འདོར་བའི་ཐོབ་པ་གང་དག་ཡིན་པའོ་ཞེས་བྱ་བ་འདི་ལ། དགེ་

Vol. 142 · folio 214b

བའི་རྩ་བ་རྣམས་ནི་རིམ་གྱིས་ཀུན་དུ་འཆད་དོ། །ཇི་ལྟ་ཞེ་ན། ལོག་པར་ལྟ་བ་ནི་ཆུང་ངུའི་ཆུང་ངུ་ནས་ཆེན་པོའི་ཆེན་པོའི་བར་རྣམ་པ་དགུ་ཡིན་ལ། དགེ་བའི་རྩ་བ་དག་ཀྱང་རྣམ་པ་དགུ་ཡིན་ནོ།། །།བམ་པོ་ཉི་ཤུ་པ། དེ་ལ་བསྒོམ་པས་སྤང་བར་བྱ་

བའི་ཉོན་མོངས་པ་བཞིན་དུ་བཟློག་སྟེ། ལོག་པར་ལྟ་བ་ཆུང་ངུའི་ཆུང་ངུས་ནི་དགེ་བའི་རྩ་བ་ཆེན་པོའི་ཆེན་པོ་རྣམས་ཀུན་དུ་འཆད་པར་འགྱུར་བ་ནས་ལོག་པར་ལྟ་བ་ཆེན་པོའི་ཆེན་པོ་ནས་དགེ་བའི་རྩ་བ་ཆུང་ངུའི་ཆུང་ངུ་རྣམས་ཀུན་དུ་འཆད་པའི་བར་དུ་འགྱུར་རོ། །

དེ་ལ་ཐ་མའི་གནས་སྐབས་ན་དགེ་བའི་རྩ་བ་ཆུང་ངུའི་ཆུང་ངུ་རྣམས་ནི་ཀུན་དུ་མི་འབྱུང་གི་དེ་དག་གི་ཐོབ་པ་ཆུང་ངུའི་ཆུང་ངུ་དག་ནི་ཀུན་དུ་འབྱུང་ངོ་། །དེའི་ཚེ་ཐམས་ཅད་ཀྱི་ཐ་མ་དེ་དག་འདོར་བ་ནི་ཐོབ་པ་དེ་དག་གི་ཐོབ་པ་འགག་པ་ཞེས་བྱ་བའི་ཐ་ཚིག་གོ། །དགེ་

བའི་སྐལ་བ་མཉམ་པའི་རྒྱུ་ཐ་མའི་གནས་སྐབས་ཀྱི་ཐོབ་པ་དེ་དག་ནི་འབྲས་བུ་འཛིན་པར་བྱེད་ཅིང་འབྲས་བུ་ཡོངས་སུ་འཛིན་པར་བྱེད་ཀྱི་བསྐྱེད་པར་བྱ་བའི་དགེ་བའི་རྩ་བ་སྐད་ཅིག་མ་གཞན་མེད་པའི་ཕྱིར་རང་གི་རྒྱུ་མཐུན་པའི་འབྲས་བུ་འབྱིན་པར་ནི་མི་བྱེད་དོ། །

མུ་གཉིས་པ་ནི་འབྱིན་པར་བྱེད་ལ་འཛིན་པར་མི་བྱེད་པ་ཞེས་བྱ་བ་ཡིན་ཏེ། དགེ་བའི་རྩ་བ་དག་གི་ཉིང་མཚམས་སྦྱོར་བས་ཐམས་ཅད་ཀྱི་དང་པོར་འཐོབ་པ་གང་དག་ཡིན་པ་ནི་ཐམས་ཅད་ཀྱི་སྔོན་དུ་འཐོབ་པ་གང་དག་ཡིན་པའོ། །དགེ་བའི་རྩ་བ་སྐལ་པ་མཉམ་

པའི་རྒྱུ་དེ་དག་ནི་འབྲས་བུ་འབྱིན་པར་བྱེད་ཅིང་རང་དང་རྒྱུ་མཐུན་པའི་འཐོབ་པ་སྐྱེད་པར་བྱེད་ཀྱི། སྔར་ཉིད་བཟུང་ཟིན་པའི་ཕྱིར་འཛིན་པར་ནི་མི་བྱེད་དོ། །མུ་གཉིས་པ་བསྟན་པ་འདི་ནི་སྐྱོན་དང་བཅས་པ་ཡིན་ཏེ། དགེ་བའི་རྩ་བའི་ཉིང་མཚམས་སྦྱོར་བའི་ཚེ་ནི་

དགེ་བའི་རྩ་བ་རྣམ་པ་དགུ་ཆར་གྱི་ཡང་འཐོབ་པ་འདས་པ་དང་མ་འོངས་པ་དང་ད་ལྟར་བྱུང་བ་དག་མཉམ་དུ་འཐོབ་པར་འགྱུར་ལ། དེ་དག་ལས་དགེ་བའི་སྐལ་བ་མཉམ་པའི་རྒྱུ་འདས་པའི་ཐོབ་པ་གང་དག་ཡིན་པ་དེ་ནི་འབྲས་བུ་འབྱིན་པར་བྱེད་ཀྱི་བཟུང་ཟིན་པའི་

Vol. 142 · folio 215a

ཕྱིར་འཛིན་པར་ནི་མི་བྱེད་དོ་ཞེས་བྱ་བ་འདི་རིགས་ན། དགེ་བའི་སྐལ་བ་མཉམ་པའི་རྒྱུད་ལྟར་གྱི་ཐོབ་པ་དེ་དང་འདྲ་བ་ཁོ་ནར་ཐོབ་པ་གང་དག་ཡིན་པ་དེ་དག་ཇི་ལྟར་འབྲས་བུ་འབྱིན་པར་བྱེད་པ་ཁོ་ན་ཡིན་གྱི་འཛིན་པར་བྱེད་པ་ནི་མ་ཡིན་ནོ་ཞེས་བྱ་

བར་དམིགས་ཀྱིས་བསལ་བར་འགྱུར་ཏེ། དེ་ནི་འཛིན་པར་བྱེད་པ་ཡང་ཡིན་ལ་འབྱིན་པར་བྱེད་པ་ཡང་ཡིན་ནོ། །དེ་ལྟར་ན་ཁྱད་པར་དུ་མ་བྱས་པའི་མུ་གཉིས་པ་བསྟན་པ་འདི་ནི་སྐྱོན་དང་བཅས་པ་ཡིན་ནོ། །དེ་ལྟ་བས་ན་སློབ་དཔོན་གྱིས་འདི་སྐད་དུ་དེ་དག་ཉིད་

ཀྱིས་ཉིང་མཚམས་སྦྱོར་བར་བྱེད་པའི་ཞེས་བརྗོད་པར་བྱ་བ་ནི་ཡིན་ནོ་ཞེས་བྱ་བ་སྨོས་ཏེ། དགེ་བའི་སྐལ་བ་མཉམ་པའི་རྒྱུ་ཐོབ་པ་དེ་དག་ནི་རང་དང་རྒྱུ་མཐུན་པའི་འབྲས་བུ་འབྱིན་པའི་ཕྱིར་འབྲས་བུ་འབྱིན་པར་བྱེད་པ་ཁོ་ན་ཡིན་གྱི། སྔར་བཟུང་ཟིན་པའི་

ཕྱིར་འཛིན་པར་བྱེད་པ་ནི་མ་ཡིན་ནོ། །མུ་གསུམ་པ་ནི་འབྲས་བུ་འཛིན་པར་བྱེད་པ་ཡང་ཡིན་ལ་འབྱིན་པར་བྱེད་པ་ཡང་ཡིན་པ་སྟེ། དགེ་བའི་རྩ་བ་ཀུན་དུ་མ་འཆད་པའི་གནས་སྐབས་ལྷག་མ་རྣམས་སུའོ་ཞེས་བྱ་བ་ནི་གནས་སྐབས་གང་དུ་དགེ་བའི་རྩ་

བ་རྣམས་ཀུན་དུ་གཅོད་པས་ཐོབ་པ་གང་དག་ཐམས་ཅད་ཀྱི་ཐ་མར་འདོར་བ་དང་། གནས་སྐབས་གང་དུ་དགེ་བའི་རྩ་བ་རྣམས་ཀྱི་ཉིང་མཚམས་སྦྱོར་བས་ཐོབ་པ་གང་དག་ཐམས་ཅད་ཀྱི་དང་པོར་འཐོབ་པའི་གནས་སྐབས་གཉིས་མ་གཏོགས་པའོ། །དཔེར་ན་

བདག་ཅག་ལ་སོགས་པའི་དགེ་བའི་ཐོབ་པ་དག་ལྟ་བུ་སྟེ། འབྲས་བུ་འཛིན་པར་ཡང་བྱེད་ལ་འབྱིན་པར་བྱེད་པ་ཡང་ཡིན་ནོ། །སྐལ་བ་མི་མཉམ་པའི་སྐད་ཅིག་མ་གཞན་གྱིས་བར་དུ་མ་ཆོད་པ་ཞེས་བརྗོད་པར་བྱ་དགོས་སོ་ཞེ་ན། བརྗོད་པར་བྱ་མི་དགོས་ཏེ།

ཐོབ་པའི་མཚན་ཉིད་ཀྱི་སྐལ་བ་མཉམ་པའི་རྒྱུ་ལ་ནི་སྐལ་བ་མི་མཉམ་པའི་སྐད་ཅིག་མ་གཞན་གྱིས་བར་དུ་ཆོད་ཀྱང་འབྲས་བུ་འཛིན་པ་དང་འབྱིན་པ་ཡང་སྲིད་པའི་ཕྱིར་རོ། །བཞི་པ་ནི་རྣམ་པ་དེ་དག་མ་གཏོགས་པ་སྟེ། དཔེར་ན་ས་གོང་མ་ལས་ཡོངས་སུ་

Vol. 142 · folio 215b

ཉམས་པའི་དགེ་བའི་སྐལ་བ་མཉམ་པའི་རྒྱུ་ས་གོང་མ་པའི་དགེ་བའི་རྩ་བ་རྣམས་ཀྱི་ཐོབ་པ་གང་དག་ཡིན་པ་དེ་དག་ནི་སྔོན་བཟུང་ཟིན་པའི་ཕྱིར་འབྲས་བུ་འཛིན་པར་ཡང་མི་བྱེད་ལ། ས་དེ་ལས་ཡོངས་སུ་ཉམས་པ་ལ་ས་དེ་པའི་དགེ་བའི་ཆོས་རྣམས་ཀྱི་ཐོབ་

པ་མེད་པའི་ཕྱིར་འབྱིན་པར་བྱེད་པ་ཡང་མ་ཡིན་ཏེ། དེ་བཞིན་དུ་དགེ་བའི་རྩ་བ་ཀུན་དུ་ཆད་པའི་གནས་སྐབས་ལ་ཡང་བརྗོད་པར་བྱའོ། །འདི་ལ་སློབ་དཔོན་འདུས་བཟངས་ན་རེ་འདི་སྐད་དུ་དེ་དག་ཉིད་ཀྱིས་ཉིང་མཚམས་སྦྱོར་བར་བྱེད་པའི་ཞེས་བརྗོད་པར་བྱ་བ་ནི་

ཡིན་ནོ་ཞེས་གང་སྨྲས་པ་དེ་ནི་རུང་བ་མ་ཡིན་ནོ། །ཅིའི་ཕྱིར་ཞེ་ན། ཉིང་མཚམས་སྦྱོར་བར་བྱེད་པས་ཐམས་ཅད་ཀྱི་དང་པོར་ཐོབ་པ་གང་དག་ཡིན་པ་དེ་དག་ནི་ཐམས་ཅད་ཀྱི་ཐ་མར་བོར་བ་གང་དག་ཡིན་པ་དེ་དག་ཁོ་ནའི་རྒྱུ་མཐུན་པའི་འབྲས་བུ་ཡིན་པར་མ་ཟད་ཀྱི་དེ་ནི་དེའི་ཐོབ་

པའི་རྒྱུ་སྔོན་རོལ་དུ་འགགས་པའི་ཡང་རྒྱུ་མཐུན་པ་ཡིན་ནོ། །དེའི་ཕྱིར་འདི་ནི་ཅི་ནས་ཀྱང་འབྲས་བུ་ཡིན་པར་སྨོས་པས་ཟད་པར་དེའི་སྐལ་བ་མཉམ་པའི་རྒྱུར་བསྡུས་པ་ཉིད་དུ་འགྱུར་སྙམ་ནས་དེ་ཁོ་ནའི་ཕྱིར་བརྗོད་པ་ཡིན་ནོ། །དེ་ལྟ་བས་ན་ཇི་ལྟར་བཀོད་པ་ཉིད་ལེགས་

པ་ཡིན་ནོ་ཞེས་ཟེར་རོ། །དེ་ལྟར་གཉི་ག་ལ་ཡང་ཚིག་གི་སྐྱོན་བརྗོད་ན། ཚིག་གང་ཞིག་བཟང་ཞེ་ན། འདིར་ནི་ཆོས་མངོན་པ་ལས་བྱུང་བ་ཁོ་ན་བཟང་ངོ་ཞེས་བྱ་བར་བལྟའོ། །དགེ་བའི་ཉིང་མཚམས་སྦྱོར་བའི་ཆོས་ཐོབ་པ་ད་ལྟར་གྱི་ཐོབ་པ་དག་འབྲས་བུ་འབྱིན་

པར་ཡང་བྱེད་ལ་འཛིན་པར་ཡང་བྱེད་ཀྱི། འབྱིན་པར་བྱེད་པ་ཁོ་ན་ཡིན་ལ་འཛིན་པར་བྱེད་པ་མ་ཡིན་པ་ནི་མ་ཡིན་པས་ཁྱད་པར་དུ་མ་བྱས་པའི་ཕྱིར་ཉེས་སོ་ཞེས་བཤད་པ་མ་ཡིན་ནམ་ཞེ་ན། དེ་ནི་ཉེས་པ་མེད་དེ། དགེ་བའི་རྩ་བ་དག་གི་ཉིང་མཚམས་སྦྱོར་བས་

ཞེས་བྱ་བ་འདི་ནི་དགེ་བའི་རྩ་བ་ཐོབ་པ་སྐྱེ་བར་ཆས་པའི་གནས་སྐབས་ཁོ་ནར་བརྗོད་པ་ཡིན་གྱི་ད་ལྟར་གྱི་གནས་སྐབས་སུ་ནི་མ་ཡིན་ནོ། །དེ་ན་ནི་ད་ལྟར་གྱི་དགེ་བའི་རྩ་བའི་ཐོབ་པ་དག་འགའ་ཡང་མེད་ན་ཇི་ལྟར་དེ་དག་འབྲས་བུ་འཛིན་པར་བྱེད་པ་ཡང་ཡིན་ལ་འབྱིན་

Vol. 142 · folio 216a

པར་བྱེད་པ་ཡང་ཡིན་ཞེས་བརྗོད་པར་ནུས། རང་གི་རྒྱུད་ལ་དགེ་བའི་རྩ་བའི་ཐོབ་པ་སྐལ་བ་མཉམ་པའི་རྒྱུར་གྱུར་པ་འདས་པ་དག་ནི་ཐམས་ཅད་ཀྱང་དེའི་ཚེ་དེ་མ་ཐག་ཏུ་སྒྲུབ་པའི་ཚུལ་གྱིས་རང་དང་རྒྱུ་མཐུན་པའི་འབྲས་བུ་འབྱིན་པར་བྱེད་པ་ཁོ་ན་

ཡིན་གྱི་སྔོན་བཟུང་ཟིན་པའི་ཕྱིར་འཛིན་པར་བྱེད་པ་ནི་མ་ཡིན་ནོ། །དེ་ལྟ་བས་ན་རིགས་པ་འདིས་ཆོས་མངོན་པ་ལས་འབྱུང་བ་ཁོ་ན་གཞུང་གཟུགས་པར་བྱའོ། །དེ་ལྟར་ཚིག་བྱེ་ཕྲག་ཏུ་མ་ཕྱེ་ན་དགེ་བའི་ཐོབ་པ་མ་འོངས་པ་རྣམས་མུ་གཉིས་པ་ཉིད་དུ་བརྗོད་པར་ཐལ་

པར་འགྱུར་ཏེ། དེ་དག་ཀྱང་དེའི་ཚེ་འདས་པའི་ཐོབ་པ་བཞིན་དུ་འཐོབ་པར་འགྱུར་བ་མ་ཡིན་ནམ་ཞེ་ན། དེ་ནི་ཉེས་པ་མེད་དེ་མ་འོངས་པ་རྣམས་ལ་སྐལ་བ་མཉམ་པའི་རྒྱུ་ཉིད་མེད་པའི་ཕྱིར་ལ་འདིར་ནི་སྐལ་བ་མཉམ་པའི་རྒྱུའི་དབང་དུ་བྱས་པ་ཡིན་པའི་ཕྱིར་རོ། །

དེ་ལྟར་ན་ཡང་ཐམས་ཅད་ཀྱི་དང་པོར་འཐོབ་པ་གང་དག་ཡིན་པ་སྟེ་ཞེས་ཐོབ་པ་དག་ཉི་ཚེ་བརྗོད་པར་མི་བྱའི་འདི་སྐད་དུ་གང་དག་ཐམས་ཅད་ཀྱི་དང་པོར་འཐོབ་པ་སྟེ་ཞེས་བརྗོད་པར་བྱ་བ་ཡིན་ནོ། །དགེ་བའི་ཆོས་གང་དག་ཅེས་བྱ་བའི་ཐ་ཚིག་སྟེ། དགེ་བའི་ཉིང་

མཚམས་སྦྱོར་བ་ནས་སེམས་དང་སེམས་ལས་བྱུང་བ་རྣམས་ཀྱང་དང་པོ་ཉིད་དུ་ཐོབ་པར་འགྱུར་གྱི། དེའི་ཐོབ་པ་དག་འབའ་ཞིག་ནི་མ་ཡིན་ནོ་ཞེ་ན། དེ་ནི་ཡིན་མོད་ཀྱི་འོན་ཀྱང་དགེ་བའི་ཉིང་མཚམས་སྦྱོར་བ་ན་ཐོབ་པ་རྣམས་ཁོ་ན་གདོན་མི་ཟ་བའི་ཕྱིར་དེ་སྐད་བརྗོད་

པ་ཡིན་ཏེ། དགེ་བའི་ཐོབ་པ་དག་ནི་ཡང་དག་པའི་ལྟ་བའམ་ཐེ་ཚོམ་གྱིས་ཀྱང་རུང་དགེ་བའི་ཉིང་མཚམས་སྦྱོར་བ་ན་གདོན་མི་ཟ་བར་སྐྱེ་བར་འགྱུར་གྱི་སེམས་དང་སེམས་ལས་བྱུང་བ་རྣམས་ནི་ཐེ་ཚོམ་གྱིས་དགེ་བའི་ཉིང་མཚམས་སྦྱོར་བ་ན་རེ་ཞིག་འབྱུང་བར་

མི་འགྱུར་བས་ཐོབ་པ་དག་ཁོ་ན་བརྗོད་པ་ཡིན་ནོ་ཞེས་རྗོད་པར་བྱེད་དོ། །མི་དགེ་བ་ཞེས་བྱ་བ་རྒྱས་པར་འབྱུང་བ་ནི་མི་དགེ་བའི་སྐལ་བ་མཉམ་པའི་རྒྱུ་ཡང་མི་དགེ་བའི་སྐལ་བ་མཉམ་པའི་རྒྱུ་འབྲས་བུ་འཛིན་པར་བྱེད་ལ་འབྱིན་པར་བྱེད་པ་མ་ཡིན་པ་ཡང་ཡོད་

Vol. 142 · folio 216b

དོ་ཞེས་བྱ་བ་རྒྱས་པར་མུ་བཞི་པར་སྦྱར་ཏེ། མུ་དང་པོ་ནི་འདོད་པའི་འདོད་ཆགས་དང་བྲལ་བ་ཐོབ་པ་དང་ལྡན་པས་ཐམས་ཅད་ཀྱི་ཐ་མར་འདོར་བའི་ཐོབ་པ་གང་དག་ཡིན་པ་སྟེ། མི་དགེ་བའི་སྐལ་བ་མཉམ་པའི་རྒྱུ་དེ་དག་ནི་འབྲས་བུ་འཛིན་པར་བྱེད་པ་ཡིན་གྱི་འབྱིན་

པར་བྱེད་པ་ནི་མ་ཡིན་ནོ། །ཇི་ལྟ་ཞེ་ན། འདི་ལ་ཉོན་མོངས་པ་ཡང་རྣམ་པ་དགུ་ཡོད་པ་ལ་ལམ་ཡང་རྣམ་པ་དགུ་ཡོད་དོ། །དེ་ལ་ལམ་ཆུང་ངུའི་ཆུང་ངུས་ནི་ཉོན་མོངས་པའི་རྣམ་པ་ཆེན་པོའི་ཆེན་པོ་སྤོང་བར་འགྱུར་བ་ནས་ཆེན་པོའི་ཆེན་པོས་ནི་ཆུང་ངུའི་ཆུང་ངུའི་བར་དུ་

སྤོང་བར་འགྱུར་ཞིང་དེ་རྣམས་ཀྱི་ཐོབ་པ་དག་ཀྱང་དེ་དང་འདྲ་བ་ཁོ་ནར་སྤོང་བར་འགྱུར་རོ། །དེས་ན་འདོད་པའི་འདོད་ཆགས་དང་བྲལ་བ་ཐོབ་པ་དང་ལྡན་པ་ཐམས་ཅད་ཀྱི་ཐ་མར་འདོར་བ་མི་དགེ་བ་ཆུང་ངུའི་ཆུང་ངུའི་ཐོབ་པ་གང་དག་ཡིན་པ་མི་དགེ་བའི་སྐལ་བ་མཉམ་

པའི་རྒྱུ་དེ་དག་ནི་འབྲས་བུ་འཛིན་པར་བྱེད་པ་དག་ཡིན་གྱི། མི་དགེ་བའི་ཐོབ་པའི་སྐད་ཅིག་མ་གཞན་མེད་པའི་ཕྱིར་འབྱིན་པར་བྱེད་པ་ནི་མ་ཡིན་ནོ། །གཉིས་པ་ནི་འདོད་པའི་འདོད་ཆགས་དང་བྲལ་བ་ལས་ཡོངས་སུ་ཉམས་པ་ཐམས་ཅད་ཀྱི་དང་པོར་མི་དགེ་བ་རྣམས་

ཀྱི་ཐོབ་པ་འཐོབ་པ་གང་དག་ཡིན་པ་སྟེ་མི་དགེ་བའི་སྐལ་བ་མཉམ་པའི་རྒྱུ་དེ་དག་ནི་འབྲས་བུ་འབྱིན་པར་བྱེད་པ་ཡིན་གྱི་འཛིན་པར་བྱེད་པ་ནི་མ་ཡིན་ཏེ། སྔ་མ་བཞིན་དུ་བརྗོད་པར་བྱའོ། །འདིར་སློབ་དཔོན་འདི་སྐད་དུ་དེ་དག་ཉིད་ཀྱིས་ཡོངས་སུ་ཉམས་

པའི་ཞེས་བརྗོད་པར་བྱ་བ་ཡིན་ནོ་ཞེས་འཆད་པར་བྱེད་དེ། འདོད་པའི་འདོད་ཆགས་དང་བྲལ་བ་ཐོབ་པ་དང་ལྡན་པས་ཐམས་ཅད་ཀྱི་ཐ་མར་འདོད་པས་གང་དག་ཡིན་པ་དེ་དག་ཁོ་ནས་ཞེས་བྱ་བ་ཡིན་ནོ། །དེ་དག་ནི་བཟུང་ཟིན་པའི་ཕྱིར་འཛིན་པར་བྱེད་པ་ནི་

མ་ཡིན་གྱི་འབྱིན་པར་བྱེད་པ་ཉིད་ཡིན་པ་འབའ་ཞིག་ཏུ་ཟད་དོ། །ཚིག་སྔ་མ་ལ་ནི་མུ་གཉིས་པ་མི་སྲིད་དེ་ཇི་སྐད་སྔར་བཤད་པ་ཡིན་ནོ། །འདི་ལ་སློབ་དཔོན་འདུས་བཟངས་ན་རེ་དེ་ནི་རུང་བ་མ་ཡིན་ནོ་ཞེས་དེ་ཁོ་ན་བཞིན་དུ་ཕྱིར་རྒོལ་བར་བྱེད་དེ་ཐམས་ཅད་ནི་གོང་མ་

Vol. 142 · folio 217a

དང་འདྲ་བར་སྦྱར་བར་བྱའོ། །གསུམ་པ་ནི་འདོད་པའི་འདོད་ཆགས་དང་མ་བྲལ་བའི་གནས་སྐབས་ལྷག་མ་རྣམས་སུའོ་ཞེས་བྱ་བ་ནི་གནས་སྐབས་དང་པོ་དང་གཉིས་པ་ཇི་སྐད་བཤད་པའི་གནས་སྐབས་གཉིས་པོ་དེ་དག་ཁོ་ན་མ་གཏོགས་

པའི་གནས་སྐབས་རྣམས་སུའོ། །དཔེར་ན་བདག་ཅག་གི་མི་དགེ་བ་རྣམས་ཀྱི་ཐོབ་པ་དག་ལྟ་བུ་སྟེ། མི་དགེ་བའི་སྐལ་བ་མཉམ་པའི་རྒྱུ་དེ་དག་ནི་འབྲས་བུ་འཛིན་པར་བྱེད་པ་ཡང་ཡིན་ལ་འབྱིན་པར་བྱེད་པ་ཡང་ཡིན་ནོ། །བཞི་པ་ནི་ཇི་སྐད་བཤད་པའི་རྣམ་པ་

དེ་དག་མ་གཏོགས་པ་སྟེ། དཔེར་ན་འདོད་པའི་འདོད་ཆགས་དང་བྲལ་བ་ཡོངས་སུ་མི་ཉམས་པའི་ཆོས་ཅན་གྱི་མི་དགེ་བ་རྣམས་ཀྱི་ཐོབ་པ་གང་ཡིན་པ་ལྟ་བུ་སྟེ། མི་དགེ་བའི་སྐལ་བ་མཉམ་པའི་རྒྱུ་དེ་ནི་སྔོན་བཟུང་ཟིན་པའི་ཕྱིར་འབྲས་བུ་འཛིན་པར་བྱེད་པ་

ཡང་མ་ཡིན་ལ་དེ་ལ་དེའི་ཐོབ་པ་མེད་པའི་ཕྱིར་འབྱིན་པར་བྱེད་པ་ཡང་མ་ཡིན་ནོ། །བསྒྲིབས་ལ་ལུང་དུ་མ་བསྟན་པའི་ཡང་དེ་བཞིན་དུ་ཞེས་བྱ་བ་རྒྱས་པར་འབྱུང་བ་ནི་ལུང་དུ་མ་བསྟན་པ་ཡང་དེ་བཞིན་དུ་བསྒྲིབས་ལ་ལུང་དུ་མ་བསྟན་པའི་སྐལ་བ་མཉམ་པའི་རྒྱུ་འབྲས་

བུ་འཛིན་པར་བྱེད་ལ་འབྱིན་པར་བྱེད་པ་མ་ཡིན་པ་ཡང་ཡོད་དེ་ཞེས་བྱ་བ་རྒྱས་པར་མུ་བཞི་པར་བྱ་བ་ཡིན་ཏེ་དགྲ་བཅོམ་པ་ཉིད་ཐོབ་པ་དང་དགྲ་བཅོམ་པ་ཉིད་ལས་ཡོངས་སུ་ཉམས་པ་ལས་ཅི་རིགས་པར་སྦྱར་བར་བྱའོ། །མུ་དང་པོ་ནི་དགྲ་བཅོམ་པ་ཉིད་ཐོབ་པ་

དང་ལྡན་པས་ཐམས་ཅད་ཀྱི་ཐ་མར་འདོར་བའི་ཐོབ་པ་གང་དག་ཡིན་པ་སྟེ། བསྒྲིབས་ལ་ལུང་དུ་མ་བསྟན་པའི་སྐལ་བ་མཉམ་པའི་རྒྱུ་དེ་ནི་འབྲས་བུ་འཛིན་པར་བྱེད་པ་ཡིན་གྱི་ཉོན་མོངས་པ་ཅན་གྱི་སྐད་ཅིག་མ་གཞན་མེད་པའི་ཕྱིར་འབྱིན་པར་བྱེད་པ་ནི་མ་ཡིན་

ནོ། །གཉིས་པ་ནི་དགྲ་བཅོམ་པ་ཉིད་ལས་ཡོངས་སུ་ཉམས་པ་ཐམས་ཅད་ཀྱི་དང་པོར་འཐོབ་པ་གང་ཡིན་པའོ། །འདི་སྐད་དུ་དེ་དག་ཉིད་ཀྱིས་ཡོངས་སུ་ཉམས་པའི་ཞེས་བརྗོད་པར་བྱ་བ་ནི་ཡིན་ནོ། །དེ་ལྟ་ན་འབྲས་བུ་འབྱིན་པ་གཅིག་པུ་ཁོ་ན་ཡིན་པར་

Vol. 142 · folio 217b

བསྟན་པར་འགྱུར་རོ། །ཚིག་སྔ་མ་ལ་གཞུང་གཟུགས་པ་ཡང་རིམ་པ་དེ་ཉིད་ཀྱིས་བརྗོད་པར་བྱའོ། །གསུམ་པ་ནི་སྲིད་པའི་རྩེ་མོ་ལས་འདོད་ཆགས་དང་མ་བྲལ་བའི་གནས་སྐབས་ལྷག་མ་དག་ཏུའོ། །བཞི་པ་ནི་རྣམ་པ་དེ་དག་མ་གཏོགས་པ་སྟེ།

དཔེར་ན་དགྲ་བཅོམ་པ་ཉིད་ཐོབ་པའི་བསྒྲིབས་ལ་ལུང་དུ་མ་བསྟན་པའི་ཐོབ་པ་གང་དག་ཡིན་པ་སྟེ། བསྒྲིབས་ལ་ལུང་དུ་མ་བསྟན་པའི་སྐལ་བ་མཉམ་པའི་རྒྱུ་དེ་ནི་ཅི་རིགས་པར་བཟུང་ཟིན་པའི་ཕྱིར་འབྲས་བུ་འཛིན་པར་བྱེད་པ་ཡང་མ་ཡིན་ལ་སྤངས་ཟིན་པའི་

ཕྱིར་འབྱིན་པར་བྱེད་པ་ཡང་མ་ཡིན་ནོ། །མ་བསྒྲིབས་ལ་ལུང་དུ་མ་བསྟན་པ་ནི་ཚིག་ཕྱི་མ་དང་སྦྱོར་བ་སྟེ་ཞེས་བྱ་བ་ལ། ཚིག་ཕྱི་མ་དང་སྦྱོར་བའི་མཚན་ཉིད་ནི་བཤད་ཟིན་པས་ཡང་མི་བཤད་དོ། །མ་བསྒྲིབས་ལ་ལུང་དུ་མ་བསྟན་པའི་སྐལ་བ་མཉམ་

པའི་རྒྱུ་གང་ཞིག་འབྲས་བུ་འཛིན་པར་བྱེད་པ་འབྱིན་པར་བྱེད་པ་ཡང་ཡིན་ནམ་ཞེ་ན། སྨྲས་པ། རེ་ཞིག་འབྱིན་པ་གང་ཡིན་པ་དེ་ནི་འཛིན་པ་ཡང་ཡིན་ཏེ། མ་བསྒྲིབས་ལ་ལུང་དུ་མ་བསྟན་པ་ནི་ཡོངས་སུ་མྱ་ངན་ལས་འདས་ཀྱི་བར་དུ་ཉེ་བ་ཡིན་པའི་ཕྱིར་

རོ། །འཛིན་ལ་མི་འབྱིན་པ་ཡང་ཡོད་དེ། དགྲ་བཅོམ་པའི་ཕུང་པོ་ཐ་མ་རྣམས་ཏེ་ཕུང་པོ་ཐམས་ཅད་ངེས་པར་སྤངས་པས་མ་བསྒྲིབས་ལ་ལུང་དུ་མ་བསྟན་པའི་རྒྱུ་མཐུན་པ་མེད་པའི་ཕྱིར་རོ། །དམིགས་པ་དང་བཅས་པའི་ངེས་པས་ནི་སྐད་ཅིག་རེ་རེ་

ལ་སྟེ་ཞེས་བྱ་བ་ནི་སྔར་ནི་ཅི་རིགས་པར་དམིགས་པ་མེད་པ་རྣམས་ཀྱི་ངེས་པར་བཤད་པ་ཡིན་ནོ། །དམིགས་པ་དང་བཅས་པའི་ངེས་པས་ནི་སེམས་དང་སེམས་ལས་བྱུང་བ་རྣམས་ཁོ་ནའི་སྐལ་བ་མཉམ་པའི་རྒྱུ་ཉིད་བཤད་དོ། །སྐད་ཅིག་རེ་རེ་ལ་སྟེ་ཞེས་

བྱ་བ་ནི་སྐད་ཅིག་མ་གཞན་ལ་ལྟོས་ནས་ཡིན་གྱི་ཡོངས་སུ་གཏུགས་ཏེ་ཆད་པའི་སྒོ་ནས་ནི་མ་ཡིན་ནོ། །དགེ་བའི་སེམས་ཀྱི་མཇུག་ཐོགས་སུ། །ཞེས་བྱ་བ་རྒྱས་པར་འབྱུང་བ་ནི་གང་གི་ཚེ་དགེ་བའི་སེམས་ཀྱི་མཇུག་ཐོགས་སུ་ཉོན་མོངས་པ་ཅན་ནམ་ལུང་དུ་མ་བསྟན་པའི་

Vol. 142 · folio 218a

སེམས་མངོན་དུ་བྱེད་པ་དེའི་ཚེ་དགེ་བའི་སེམས་དེ་གང་ལས་དེའི་རྒྱུད་དུ་གཏོགས་པའི་འབྲས་བུ་དགེ་བ་མ་འོངས་པ་བར་དུ་ཆོད་པར་འབྱུང་བར་འགྱུར་བའམ་མི་སྐྱེ་བའི་ཆོས་ཅན་གྱི་འབྲས་བུ་འཛིན་པར་བྱེད་པ་ཡིན་ནོ། །འབྱིན་པར་བྱེད་པ་ནི་

མ་ཡིན་ཏེ། འདི་ལྟར་དེའི་མཇུག་ཐོགས་སུ་དགེ་བ་འབྱུང་བ་མེད་ལ་སྐལ་བ་མཉམ་པའི་རྒྱུ་ནི་འབྲས་བུ་འདྲ་བས་འབྲས་བུ་དང་བཅས་པར་འདོད་དོ། །གཉིས་པ་ནི་བཟློག་པའོ་ཞེས་བྱ་བ་ནི་གང་གི་ཚེ་ཉོན་མོངས་པ་ཅན་དང་བསྒྲིབས་ལ་ལུང་དུ་མ་བསྟན་པའི་སེམས་

ཀྱི་མཇུག་ཐོགས་སུ་དགེ་བའི་སེམས་མངོན་དུ་བྱེད་པ་དེའི་ཚེ་དགེ་བའི་སེམས་དེ་སྔོན་དགེ་བའི་སེམས་གང་གིས་འབྲས་བུ་ཉིད་དུ་བཟུང་བ་དེའི་འབྱིན་པར་བྱེད་པ་ཡིན་གྱི་སྔོན་བཟུང་ཟིན་པའི་ཕྱིར་དེ་འཛིན་པར་བྱེད་པ་ནི་མ་ཡིན་ནོ། །གསུམ་པ་ནི་དགེ་བའི་སེམས་

ཀྱི་མཇུག་ཐོགས་སུ་དགེ་བ་ཁོ་ནའོ་ཞེས་བྱ་བ་ནི་མངོན་དུ་བྱེད་པའོ་ཞེས་བྱ་བར་སྐབས་དང་སྦྱར་ཏེ། དགེ་བའི་སེམས་སྔ་མ་དེ་ནི་དགེ་བའི་སེམས་གཉིས་པ་འབྲས་བུ་ཉིད་དུ་འཛིན་པར་བྱེད་པ་ཡང་ཡིན་ལ། དེ་མ་ཐག་ཏུ་སྒྲུབ་པའི་ཕྱིར་འབྱིན་པར་བྱེད་པ་ཡང་

ཡིན་ནོ། །བཞི་པ་ནི་རྣམ་པ་དེ་དག་མ་གཏོགས་པའོ་ཞེས་བྱ་བ་ནི་གང་གི་ཚེ་ཉོན་མོངས་པ་ཅན་དང་ལུང་དུ་མ་བསྟན་པའི་སེམས་ཀྱི་མཇུག་ཐོགས་སུ་ཉོན་མོངས་པ་ཅན་དང་ལུང་དུ་མ་བསྟན་པའི་སེམས་མངོན་དུ་བྱེད་པ་དེའི་ཚེ་དགེ་བའི་སྐལ་བ་མཉམ་པའི་རྒྱུ་

དམིགས་པ་དང་བཅས་པ་འདི་བཟུང་ཟིན་པའི་ཕྱིར་འབྲས་བུ་འཛིན་པར་བྱེད་པ་ཡང་མ་ཡིན་ལ། ཉོན་མོངས་པ་ཅན་དང་ལུང་དུ་མ་བསྟན་པའི་སེམས་མངོན་དུ་བྱེད་པའི་ཕྱིར་འབྱིན་པར་བྱེད་པ་ཡང་མ་ཡིན་ནོ། །མི་དགེ་བ་ལ་སོགས་པ་ལ་ཡང་དེ་བཞིན་དུ་

སྦྱར་བར་བྱའོ་ཞེས་བྱ་བ་ནི་མི་དགེ་བའི་སྐལ་བ་མཉམ་པའི་རྒྱུ་དམིགས་པ་དང་བཅས་པ་འབྲས་བུ་འཛིན་པར་བྱེད་ལ་འབྱིན་པར་མི་བྱེད་པ་ཡང་ཡོད་དེ་ཞེས་བྱ་བ་མུ་བཞིའོ། །མུ་དང་པོ་ནི་མི་དགེ་བའི་མཇུག་ཐོགས་སུ་དགེ་བའམ་ལུང་དུ་མ་བསྟན་པའི་སེམས་

Vol. 142 · folio 218b

མངོན་དུ་མི་བྱེད་པའོ། །གཉིས་པ་ནི་བཟློག་པའོ། །གསུམ་པ་ནི་མི་དགེ་བའི་སེམས་ཀྱི་མཇུག་ཐོགས་སུ་མི་དགེ་བ་ཁོ་ནའོ། །བཞི་པ་ནི་རྣམ་པ་དེ་དག་མ་གཏོགས་པའོ། །སོགས་པ་ཞེས་བྱ་བའི་སྒྲས་ནི་བསྒྲིབས་ལ་ལུང་དུ་མ་བསྟན་པ་དང་། མ་བསྒྲིབས་

ལ་ལུང་དུ་མ་བསྟན་པའི་སྐལ་བ་མཉམ་པའི་རྒྱུ་སྦྱར་བར་བྱ་བ་ཡིན་ཏེ། རེ་ཞིག་བསྒྲིབས་པའི་མུ་དང་པོ་ནི་བསྒྲིབས་ལ་ལུང་དུ་མ་བསྟན་པའི་སེམས་ཀྱི་མཇུག་ཐོགས་སུ་དགེ་བའམ་མ་བསྒྲིབས་ལ་ལུང་དུ་མ་བསྟན་པའི་སེམས་མངོན་དུ་བྱེད་པའོ། །གཉིས་པ་ནི་

བཟློག་པའོ། །གསུམ་པ་ནི་བསྒྲིབས་ལ་ལུང་དུ་མ་བསྟན་པའི་མཇུག་ཐོགས་སུ་བསྒྲིབས་ལ་ལུང་དུ་མ་བསྟན་པ་ཁོ་ན་ཡིན་ནོ། །བཞི་པ་ནི་རྣམ་པ་དེ་དག་མ་གཏོགས་པའོ། །མ་བསྒྲིབས་ལ་ལུང་དུ་མ་བསྟན་པའི་མུ་དང་པོ་ནི་མ་བསྒྲིབས་ལ་ལུང་དུ་མ་

བསྟན་པའི་མཇུག་ཐོགས་སུ་དགེ་བའམ་ཉོན་མོངས་པ་ཅན་གྱི་སེམས་མངོན་དུ་བྱེད་པའོ། །གཉིས་པ་ནི་བཟློག་པའོ། །གསུམ་པ་ནི་མ་བསྒྲིབས་ལ་ལུང་དུ་མ་བསྟན་པའི་མཇུག་ཐོགས་སུ་མ་བསྒྲིབས་ལ་ལུང་དུ་མ་བསྟན་པ་ཁོ་ན་ཡིན་ནོ། །བཞི་པ་ནི་རྣམ་པ་

དེ་དག་མ་གཏོགས་པའོ། །དེའི་ས་བོན་གྱི་དངོས་པོར་ཉེ་བར་འགྲོ་བའི་ཕྱིར་རོ་ཞེས་བྱ་བ་ནི་འབྲས་བུ་དེའི་ས་བོན་གྱི་དངོས་པོར་ཉེ་བར་འགྲོ་བའི་ཕྱིར་རོ་ཞེས་བྱ་བའི་ཐ་ཚིག་གོ། །འདི་ནི་མདོ་སྡེ་པའི་ལུགས་ཡིན་ཏེ། གླེགས་བམ་ཁ་ཅིག་ལས་ནི་འདི་སྐད་དུ་འབྱུང་བ་

མེད་དོ། །འདི་ལྟ་སྟེ། རླུང་གི་དཀྱིལ་འཁོར་གྱི་ཆུའི་དཀྱིལ་འཁོར་ལྟ་བུ་ཞེས་བྱ་བ་ནི་འབྲས་བུ་དེའི་འདི་ལྟ་སྟེ་ཞེས་བྱ་བ་ནི་དཔེར་རབ་ཏུ་བསྟན་པ་ཡིན་ཏེ། རླུང་གི་དཀྱིལ་འཁོར་གྱི་རྟེན་གྱི་འབྲས་བུ་ནི་ཆུའི་དཀྱིལ་འཁོར་ཡིན་ནོ། །བར་དུའོ་ཞེས་བྱ་བའི་སྒྲས་

ནི་ཆུའི་དཀྱིལ་འཁོར་གྱི་གསེར་གྱི་ས་གཞི་དང་། གསེར་གྱི་ས་གཞིའི་རྩྭ་དང་འབྲུ་དང་སྨན་ལ་སོགས་པ་སྟེ། རྟེན་གྱི་འབྲས་བུ་ཡིན་ནོ་ཞེས་བྱ་བར་སྐབས་དང་སྦྱར་རོ། །མི་སྡུག་པའི་ནི་དྲན་པ་ཉེ་བར་གཞག་པ་རྣམས་ནས་བཟུང་སྟེ། མི་སྐྱེ་བ་ཤེས་པའི་བར་

Vol. 142 · folio 219a

ལྟ་བུ་སྟེ། དེ་བཞིན་དུ་སྦྱོར་བ་གཞན་དབུགས་རྔུབ་པ་དང་འབྱུང་བ་དྲན་པ་ལ་སོགས་པའི་འབྲས་བུ་ཡང་སྦྱར་བར་བྱའོ། །ཚོགས་པའི་འབྲས་བུ་ནི་ཚོགས་པའི་འབྲས་བུའོ། །མིག་ལ་སོགས་པ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་མིག་

དང་གཟུགས་དང་སྣང་བ་དང་ཡིད་ལ་བྱེད་པ་རྣམས་བསྡུས་ཏེ། དེ་བཞིན་དུ་བསྒོམས་པའི་འབྲས་བུ་ནི་བསྒོམས་པའི་འབྲས་བུའོ་ཞེས་བྱ་བར་ཚིག་བསྡུའོ། །འདི་ཐམས་ཅད་ནི་ཞེས་བྱ་བ་རྒྱས་པར་འབྱུང་བ་ནི་འབྲས་བུ་རྣམ་པ་བཞི་པོ་འདི་ནི། སྐྱེས་བུ་བྱེད་པ་དང་།

བདག་པོའི་འབྲས་བུ་དག་གི་ཁོངས་སུ་འདུས་པ་ཡིན་ཏེ། རྟེན་གྱི་འབྲས་བུ་ནི་བདག་པོའི་འབྲས་བུའི་ནང་དུ་འདུས་སོ། །སྦྱོར་བའི་འབྲས་བུ་ལ་སོགས་པ་ནི་སྐྱེས་བུ་བྱེད་པ་དང་བདག་པོའི་འབྲས་བུ་དག་གི་ནང་དུ་འདུས་སོ། །ཆོས་ཉོན་མོངས་པ་ཅན་རྣམས་དང་ཞེས་

བྱ་བ་རྒྱས་པར་འབྱུང་བ་ལ་ཉོན་མོངས་པ་ཅན་ནི་ཉོན་མོངས་པ་དེ་དང་མཚུངས་པར་ལྡན་པ་དང་། དེས་ཀུན་ནས་བསླང་བ་དག་ཡིན་ནོ། །རྣམ་པར་སྨིན་པ་ལས་སྐྱེས་པ་ནི་རྣམ་པར་སྨིན་པའི་རྒྱུ་ལས་སྐྱེས་པ་དག་ཡིན་ནོ། །ཟག་པ་མེད་པའི་དང་པོ་ནི་སྡུག་བསྔལ་

ལ་ཆོས་ཤེས་པའི་བཟོད་པ་དང་དེ་དང་ལྷན་ཅིག་འབྱུང་བ་དག་ཡིན་ནོ། །དེ་དག་གི་ལྷག་མ་རྣམས་ཞེས་བྱ་བ་ནི་ཉོན་མོངས་པ་ཅན་ལ་སོགས་པ་གསུམ་པོ་དག་གི་སྟེ། རྣམ་པར་སྨིན་པ་ལས་མ་གཏོགས་པའི་ལུང་དུ་མ་བསྟན་པ་སྤྱོད་ལམ་པ་དང་བཟོའི་གནས་པ་

དང་སྤྲུལ་པ་དག་གོ། །ཟག་པ་མེད་པའི་སྐད་ཅིག་མ་དང་པོ་མ་གཏོགས་པའི་དགེ་བ་རྣམས་སོ་ཞེས་བྱ་བ་ལ། དགེ་བ་ཞེས་བྱ་བ་སྨོས་པས་ནི་ཟག་པ་དང་བཅས་པ་དང་ཟག་པ་མེད་པ་དག་གཟུང་སྟེ། དེ་ལ་ལྷག་མ་ནི་སྡུག་བསྔལ་ལ་ཆོས་ཤེས་པའི་ཚོགས་

ལ་སོགས་པ་སློབ་པ་དང་མི་སློབ་པའི་ལམ་ཐམས་ཅད་དང་། འཇིག་རྟེན་པའི་དགེ་བ་རྣམས་ཁོ་ན་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །ལྷག་མ་ཡང་འདིར་ཕུང་པོ་གསུམ་པར་བྱ་སྟེ། དེས་ན་ཆོས་རྣམ་པ་བཞི་པོ་དེ་དག་ནི། ཉོན་མོངས་ཅན་དང་རྣམ་

Vol. 142 · folio 219b

སྨིན་སྐྱེས། །ལྷག་དང་དང་པོ་འཕགས་རིམ་བཞིན། །རྣམ་སྨིན་ཀུན་འགྲོ་དེ་གཉིས་དང་། །སྐལ་མཉམ་མ་གཏོགས་ལྷག་ལས་སྐྱེས། །ཞེས་བྱ་བ་སྨོས་ཏེ། རྣམ་སྨིན་ཞེས་བྱ་བ་ནི་རྣམ་པར་སྨིན་པའི་རྒྱུའོ། །ཆོས་ཉོན་མོངས་པ་ཅན་རྣམས་ནི་རྣམ་པར་སྨིན་

པའི་རྒྱུ་མ་གཏོགས་པ་ལྷག་མ་ལྔ་པོ་བྱེད་རྒྱུ་དང་ལྷན་ཅིག་འབྱུང་བ་དང་སྐལ་བ་མཉམ་པ་དང་མཚུངས་པར་ལྡན་པ་དང་ཀུན་དུ་འགྲོ་བ་དག་ལས་ཅི་རིགས་པར་སྐྱེ་སྟེ། རང་གི་ངོ་བོ་མ་གཏོགས་པ་ཆོས་ཐམས་ཅད་ཀྱི་མཚན་ཉིད་ཀྱི་བྱེད་རྒྱུའི་རྒྱུ་དང་། རང་གི་ཚོགས་

ཀྱི་སེམས་ལ་སོགས་པའི་མཚན་ཉིད་ཀྱི་ལྷན་ཅིག་འབྱུང་བའི་རྒྱུ་དང་། རང་གི་རྒྱུད་ཀྱི་ཉོན་མོངས་པ་ཅན་སྔར་བྱུང་བའི་མཚན་ཉིད་ཀྱི་སྐལ་བ་མཉམ་པའི་རྒྱུ་དང་། འདི་ལྟར་དེ་དག་སེམས་དང་སེམས་ལས་བྱུང་བའི་ངོ་བོ་ཉིད་ཡིན་པས་རང་གི་ཚོགས་ཀྱི་སེམས་

དང་སེམས་ལས་བྱུང་བའི་མཚན་ཉིད་ཀྱི་མཚུངས་པར་ལྡན་པའི་རྒྱུ་དང་། འཇིག་ཚོགས་ལ་ལྟ་བ་ལ་སོགས་པ་སྔར་བྱུང་བའི་མཚན་ཉིད་ཀྱི་ཀུན་དུ་འགྲོ་བའི་རྒྱུ་ལས་སྐྱེ་བར་འགྱུར་རོ། །རྣམ་པར་སྨིན་པའི་རྒྱུ་ལས་ནི་མ་ཡིན་ཏེ། རྣམ་པར་སྨིན་པའི་རྒྱུ་ནི་རྣམ་

པར་སྨིན་པའི་འབྲས་བུས་འབྲས་བུ་དང་བཅས་པ་ཡིན་ན། ཆོས་ཉོན་མོངས་པ་ཅན་རྣམས་ནི་རྣམ་པར་སྨིན་པའི་ངོ་བོ་ཉིད་མ་ཡིན་པས་དེ་དག་དེ་ལས་མི་སྐྱེའོ། །རྣམ་པར་སྨིན་པ་ལས་སྐྱེས་པ་རྣམས་ནི་ཀུན་དུ་འགྲོ་བའི་རྒྱུ་མ་གཏོགས་པ་རྒྱུ་དག་ལྷག་མ་ལྔ་པོ་

ཁོ་ན་ལས་སྐྱེའོ། །རྣམ་པར་སྨིན་པ་རྣམས་ཉོན་མོངས་པ་ཅན་མ་ཡིན་པའི་ཕྱིར་ཀུན་དུ་འགྲོ་བའི་རྒྱུ་ལས་ནི་མ་ཡིན་ཏེ། ཀུན་དུ་འགྲོ་བའི་རྒྱུའི་མཚན་ཉིད་ནི། ཀུན་འགྲོ་ཞེས་བྱ་ཉོན་མོངས་ཅན། །རྣམས་ཀྱི་ཞེས་བྱ་བ་བཞིན་ནོ། །རྣམ་པར་སྨིན་པ་ལས་སྐྱེས་པ་

དག་ལོག་པར་ལྟ་བ་ལ་སོགས་པ་ཀུན་དུ་འགྲོ་བ་ལས་སྐྱེ་བར་འགྱུར་མོད་ཀྱི་ཀུན་དུ་འགྲོ་བའི་རྒྱུ་ཡིན་པའི་ཕྱིར་དེ་ལས་སྐྱེ་བ་ནི་མ་ཡིན་ནོ། །འོ་ན་ཅི་ཞེ་ན། རྣམ་པར་སྨིན་པའི་རྒྱུ་ཡིན་ནོ། །ཆོས་ལྷག་མ་རྣམས་ནི་ཞེས་བྱ་བ་རྒྱས་པར་འབྱུང་བ་ནི་ལྷག་མ་རྣམས་

Vol. 142 · folio 220a

ལ་རྣམ་པར་སྨིན་པའི་ངོ་བོ་ཉིད་མེད་པའི་ཕྱིར་རྣམ་པར་སྨིན་པའི་རྒྱུ་ཡང་མེད་ལ་ཉོན་མོངས་པ་ཅན་གྱི་ངོ་བོ་ཉིད་མ་ཡིན་པའི་ཕྱིར་ཀུན་དུ་འགྲོ་བའི་རྒྱུ་ཡང་མེད་དོ། །དེའི་ཕྱིར་རྣམ་པར་སྨིན་པ་དང་ཀུན་དུ་འགྲོ་བའི་རྒྱུ་དེ་དག་མ་གཏོགས་པ་ལྷག་མ་

བཞི་ལས་སྐྱེ་སྟེ། སྔ་མ་བཞིན་དུ་བཤད་པར་བྱའོ། །ཟག་པ་མེད་པའི་དང་པོ་རྣམས་ནི་རྣམ་པར་སྨིན་པ་དང་ཀུན་དུ་འགྲོ་བའི་རྒྱུ་སྟེ། དང་ཞེས་བྱ་བའི་སྒྲས་དྲངས་པ་དེ་དག་དང་སྐལ་བ་མཉམ་པའི་རྒྱུ་མ་གཏོགས་པ་ལྷག་མ་བྱེད་རྒྱུ་དང་ལྷན་ཅིག་འབྱུང་བ་དང་མཚུངས་

པར་ལྡན་པའི་རྒྱུ་དག་ལས་ཅི་རིགས་པར་སྐྱེའོ། །ཟག་པ་མེད་པ་རྣམས་ལ་རྣམ་པར་སྨིན་པའི་ངོ་བོ་ཉིད་མེད་པའི་ཕྱིར་རྣམ་པར་སྨིན་པའི་རྒྱུ་མེད་དོ། །ཉོན་མོངས་པ་ཅན་མ་ཡིན་པའི་ཕྱིར་ཀུན་དུ་འགྲོ་བའི་རྒྱུ་ཡང་མེད་དོ། །ལམ་ནི་སྔོན་མ་བསྐྱེད་པའི་ཕྱིར་སྐལ་བ་མཉམ་

པའི་རྒྱུ་ཡང་མེད་དོ། །ཟག་པ་དང་བཅས་པ་ཆོས་ཀྱི་མཆོག་ནི་ཟག་པ་མེད་པའི་ཚོགས་ཀྱི་སྐལ་བ་མཉམ་པའི་རྒྱུ་ཡིན་པར་རུང་བ་མ་ཡིན་ནོ། །དེ་ལྟ་བས་ན་དེ་དག་ལས་མི་སྐྱེའོ། །སེམས་དང་སེམས་ལས་བྱུང་བ་ཡིན། །ཞེས་བྱ་བ་ལ། སེམས་དང་སེམས་ལས་བྱུང་

བ་ཞེས་བྱ་བ་སྨོས་པ་ནི་མཚུངས་པར་ལྡན་པའི་རྒྱུ་ཡོད་པར་བསྟན་པའི་ཕྱིར་རོ། །ཟག་པ་མེད་པའི་སེམས་དང་ལྡན་པ་མ་ཡིན་པ་ཐོབ་པ་ལ་སོགས་པ་དང་སྡོམ་པ་གཟུགས་ཅན་གྱི་ངོ་བོ་ཉིད་ཀྱང་ཟག་པ་མེད་པ་དག་ཏུ་རིག་པར་བྱ་སྟེ། སེམས་དང་སེམས་ལས་བྱུང་བ་དག་

ལས་གཞན་པ་སེམས་དང་ལྡན་པ་མ་ཡིན་པ་དང་། གཟུགས་ཅན་ཉོན་མོངས་པ་ཅན་ལ་སོགས་པ་ཉོན་མོངས་པ་ཅན་དང་། རྣམ་པར་སྨིན་པ་ལས་སྐྱེས་པ་དང་། ཟག་པ་མེད་པའི་དང་པོ་དེ་དག་ཀྱང་སེམས་དང་སེམས་ལས་བྱུང་བ་རྣམས་ཇི་ལྟ་བ་དེ་ཁོ་ན་བཞིན་དུ་

སྐྱེའོ། །མཚུངས་པར་ལྡན་པའི་རྒྱུ་གཅིག་པུ་མ་གཏོགས་པ་འབའ་ཞིག་ཏུ་ཟད་དོ། །དེ་དག་མཚུངས་པར་ལྡན་པའི་ངོ་བོ་ཉིད་མ་ཡིན་པའི་ཕྱིར་མཚུངས་པར་ལྡན་པའི་རྒྱུ་ལས་ནི་སྐྱེ་བར་མི་འགྱུར་རོ། །ཇི་ལྟ་ཞེ་ན། སེམས་དང་ལྡན་པ་མ་ཡིན་པ་དང་། གཟུགས་

Vol. 142 · folio 220b

ཅན་ཉོན་མོངས་པ་ཅན་རྣམས་ནི་རྣམ་པར་སྨིན་པ་དང་མཚུངས་པར་ལྡན་པའི་རྒྱུ་དག་མ་གཏོགས་པ་རྒྱུ་ལྷག་མ་བཞི་ལས་སྐྱེའོ། །རྣམ་པར་སྨིན་པ་ལས་སྐྱེས་པ་ཡང་ཀུན་དུ་འགྲོ་བ་དང་མཚུངས་པར་ལྡན་པའི་རྒྱུ་དག་མ་གཏོགས་པར་ལྷག་མ་བཞི་ཁོ་ན་ལས་སྐྱེའོ། །ལྷག་

མ་རྣམས་ནི་རྣམ་པར་སྨིན་པ་དང་ཀུན་དུ་འགྲོ་བ་དང་མཚུངས་པར་ལྡན་པའི་རྒྱུ་རྣམས་མ་གཏོགས་པ་ལྷག་མ་གསུམ་ལས་སོ། །ཟག་པ་མེད་པའི་དང་པོ་ནི་རྣམ་པར་སྨིན་པ་དང་ཀུན་དུ་འགྲོ་བའི་རྒྱུ་དག་དང་སྐལ་བ་མཉམ་པའི་རྒྱུ་དང་མཚུངས་པར་ལྡན་པའི་རྒྱུ་མ་གཏོགས་པ་

ལྷག་མ་རྒྱུ་གཉིས་ལས་སྐྱེའོ། །རྒྱུ་གཅིག་ལས་བྱུང་བའི་ཆོས་ནི་མེད་དོ་ཞེས་བྱ་བ་ནི་རྒྱུ་དང་ལྷན་ཅིག་འབྱུང་བའི་རྒྱུ་དག་གདོན་མི་ཟ་བར་མེད་ན་མི་འབྱུང་བ་ཡིན་པའི་ཕྱིར་རོ། །སྐྱེ་བ་བསྐྱེད་བྱ་སྐྱེད་བྱེད་པ། །རྒྱུ་དང་རྐྱེན་དག་མེད་པར་མིན། །ཞེས་བཤད་པས་དེའི་ཕྱིར་རྒྱུ་རྒྱས་པར་བཤད་པའི་

འོག་ཏུ་རྐྱེན་རྣམས་གང་ཞེ་ན་ཞེས་འདྲི་བར་བྱེད་དོ། །རྐྱེན་དུ་འདྲ་བ་ནི་རྐྱེན་ཉིད་དོ་ཞེས་བྱ་བ་ནི་རྐྱེན་གྱི་རྣམ་པ་ཞེས་བྱ་བའི་ཐ་ཚིག་སྟེ་བ་ལང་ཉིད་ལྟ་བུ་ཡིན་ནོ། །སེམས་དང་སེམས་བྱུང་ཞེས་བྱ་བ་རྒྱས་པར་འབྱུང་བ་ནི་སེམས་དང་སེམས་ལས་བྱུང་བ་རྣམས་ཁོ་ན་མཚུངས་པ་དེ་མ་ཐག་

པ་ཡིན་ནོ་ཞེས་བྱ་བར་ངེས་པར་གཟུང་བ་ཡིན་ནོ། །སྐྱེས་ཞེས་སྨོས་པ་ནི་མ་འོངས་པ་བརྩལ་བའི་ཕྱིར་རོ། །ཐ་མ་པ་ཡིན་ཞེས་སྨོས་པ་ནི་ཕྱི་མ་དང་བཅས་པ་རྣམས་མཚུངས་པ་དེ་མ་ཐག་པ་ཡིན་པའི་ཕྱིར་རོ། །རྐྱེན་འདི་མཚུངས་པ་ཡང་ཡིན་ལ་དེ་མ་ཐག་པ་ཡང་ཡིན་པས་མཚུངས་

པ་དེ་མ་ཐག་པའི་རྐྱེན་ཏོ་ཞེས་བྱ་བ་ནི་མཚུངས་པ་ཞེས་བྱ་བའི་སྒྲ་ནི་འདྲ་བའི་དོན་ཡིན་ནོ། །འདོད་པ་ན་སྤྱོད་པའི་གཟུགས་ཀྱི་ཞེས་བྱ་བ་ནི་རྣམ་པར་རིག་བྱེད་མ་ཡིན་པའོ། །རེས་འགའ་ནི་འདོད་པ་ན་སྤྱོད་པའི་རྣམ་པར་རིག་བྱེད་མ་ཡིན་པའི་གཟུགས་དང་གཟུགས་ན་སྤྱོད་པའི་

རྣམ་པར་རིག་བྱེད་མ་ཡིན་པའི་གཟུགས་འབྱུང་སྟེ། ཟག་པ་དང་བཅས་པའི་བསམ་གཏན་མངོན་དུ་གྱུར་པ་ནའོ་རེས་འགའ་ནི་འདོད་པ་ན་སྤྱོད་པ་དང་ཟག་པ་མེད་པ་འབྱུང་སྟེ། ཟག་པ་མེད་པའི་བསམ་གཏན་མངོན་དུ་གྱུར་པ་ནའོ། །འདོད་པ་ན་སྤྱོད་པའི་སེམས་

Vol. 142 · folio 221a

ཀྱི་མཇུག་ཐོགས་སུ་འདོད་པ་ན་སྤྱོད་པ་དང་། གཟུགས་ན་སྤྱོད་པ་དང་། ཟག་པ་མེད་པའི་སེམས་ཅིག་ཅར་ནི་ནམ་ཡང་མི་འབྱུང་བས་གཟུགས་སྔོན་དུ་འགྱུར་བ་འཆོལ་བ་ཡིན་ནོ། །གཉིས་པ་འབྱུང་བའི་ཕྱིར་རོ་ཞེས་བྱ་བ་ནི་རྒྱས་པ་ལས་འབྱུང་བ་གཉིས་པ་

འབྱུང་བའི་ཕྱིར་ཏེ། གང་གི་ཚེ་ཟས་ཟོས་ནས་ཉལ་བ་འམ་བསམ་གཏན་ལ་སྙོམས་པར་འཇུག་པ་དེའི་ཚེ་ཟས་ལས་སྐྱེས་པའི་རྒྱས་པ་ལས་བྱུང་བ་དང་། གཉིད་ལས་སྐྱེས་པ་འམ། ཏིང་ངེ་འཛིན་ལས་སྐྱེས་པའི་རྒྱས་པ་ལས་བྱུང་བ་འབྱུང་ངོ་། །བཙུན་པ་ནི་མདོ་སྡེ་པའི་གནས་

བརྟན་ཞིག་ཡིན་ནོ། །ཆོས་མང་བ་དང་ཉུང་ངུ་འབྱུང་བའི་ཕྱིར་ཏེ་ཞེས་བྱ་བ་ཅི་ཞེ་ན། གཟུགས་ནི་མཚུངས་པ་དེ་མ་ཐག་པའི་རྐྱེན་མ་ཡིན་ཞེས་བྱ་བར་སྐབས་དང་སྦྱར་རོ། །དགེ་བ་དང་མི་དགེ་བ་དང་ལུང་དུ་མ་བསྟན་པའི་སེམས་དག་དང་ཞེས་བྱ་བ་ནི། འདོད་པའི་དགེ་བའི་སེམས་ལ་

ནི། །རྟོག་དང་དཔྱོད་དང་བཅས་པའི་ཕྱིར། །སེམས་ལས་བྱུང་བ་ཉི་ཤུ་གཉིས། །ལ་ལ་དག་ཏུ་འགྱོད་པས་བསྣན། །མི་དགེ་བ་ནི་མ་འདྲེས་དང་། །ལྟ་དང་ལྡན་ནའང་ཉི་ཤུ་འབྱུང་། །ཉོན་མོངས་བཞི་དང་ཁྲོ་སོགས་དང་། །འགྱོད་པ་དང་ནི་ཉི་ཤུ་གཅིག །བསྒྲིབས་ལ་

བཅོ་བརྒྱད་ལུང་མ་བསྟན། །གཞན་ལ་བཅུ་གཉིས་དག་ཏུ་འདོད། །ཅེས་བྱ་བའི་རིམ་པ་འདིས་རེས་འགའ་ནི་སེམས་ལས་བྱུང་བ་མང་པོ་ཉི་ཤུ་རྩ་གསུམ་ལས་སེམས་ལས་བྱུང་བ་ཉུང་ངུ་ཉི་ཤུ་རྩ་གཅིག་གམ་བཅོ་བརྒྱད་དམ་བཅུ་གཉིས་འབྱུང་ལ་རེས་འགའ་ནི་ཉུང་ངུ་ལས་

མང་པོ་འབྱུང་སྟེ་བཟློག་པ་ཡིན་ནོ། །རྟོག་པ་དང་དཔྱོད་པ་དང་བཅས་པ་ལ་སོགས་པའི་ཏིང་ངེ་འཛིན་གསུམ་ལ་ཞེས་བྱ་བ་ནི། རྟོག་པ་དང་དཔྱོད་པ་དང་བཅས་པ་ལ་སོགས་པའི་ཏིང་ངེ་འཛིན་ཀྱང་ཡོད་ལ། རྟོག་པ་མེད་ལ་དཔྱོད་པ་ཙམ་ཡང་ཡོད། རྟོག་པ་ཡང་མེད་དཔྱོད་

པ་ཡང་མེད་པ་ཡང་ཡོད་པས་ཏིང་ངེ་འཛིན་འདི་གསུམ་ལ་སེམས་ལས་བྱུང་བ་ཆེས་མང་བ་དང་ཉུང་ངུ་འབྱུང་སྟེ། དེའི་ཕྱིར་སེམས་དང་སེམས་ལས་བྱུང་བ་དག་ཀྱང་མཚུངས་པ་དེ་མ་ཐག་པའི་རྐྱེན་མ་ཡིན་པར་འགྱུར་ཞེ་ན། རིགས་གཞན་ལ་ནི་ཡོད་ཀྱི་རང་གི་རིགས་ལ་ནི་མེད་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words