ཆོས་མངོན་པའི་མཛོད་ཀྱི་འགྲེལ་བཤད

Sanskrit title (Tibetan script, as in the text) ཨ་བྷི་དྷརྨ་ཀོ་ཥ་ཊཱི་ཀ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 142 · folio 221b

དེ་ཞེས་བྱ་བ་ནི་རིགས་གཞན་ལ་ནི་ཆེས་མང་བ་དང་ཉུང་ངུ་འབྱུང་བ་ཡོད་ཀྱི་རང་གི་རིགས་ལ་མེད་དོ། །སེམས་འགའ་ལ་རྟོག་པ་དང་དཔྱོད་པ་ལ་སོགས་པའི་རིགས་ཐ་དད་པ་ཡིན་པར་འགྱུར་བ་རྣམས་འབྱུང་བ་དང་མི་འབྱུང་བར་ཡང་འགྱུར་གྱི། ནམ་ཡང་ཚོར་བ་ཆེས་མང་བ་ནི་

མ་ཡིན་ཏེ། སེམས་གཅིག་ལ་རེས་འགའ་ནི་ཚོར་བ་གཅིག་གཞན་འགའ་ལ་ནི་གསུམ་མམ་གཉིས་ཞེས་བྱ་བ་ནི་མེད་དོ། །གཟུགས་ནི་རང་གི་རིགས་ལ་ཡང་ཆེས་མང་བ་དང་ཉུང་ངུ་འབྱུང་ངོ་། །ཡང་ཅི་རང་གི་རིགས་ཁོ་ནའི་ཞེས་བྱ་བ་ནི་ཅི་གང་གིས་ན་སེམས་ལས་བྱུང་བ་

ལ་སོགས་པ་ཆེས་མང་བ་དང་ཉུང་ངུ་འབྱུང་བ་ཡོངས་སུ་སྤངས་པར་འགྱུར་བ་ཚོར་བ་ཡང་ཚོར་བ་དུ་མ་བསྐྱེད་པར་མི་ནུས་པའི་ཕྱིར་ཚོར་བ་ཁོ་ནའི་མཚུངས་པ་དེ་མ་ཐག་པའི་རྐྱེན་ཡིན་ལ་འདུ་ཤེས་ལ་སོགས་པ་ཡང་དེ་དང་འདྲ་བ་ཡིན་གྱི་རིགས་གཞན་གྱི་ནི་མ་ཡིན་ཏེ། ཚོར་བ་ནི་

འདུས་ཤེས་ལ་སོགས་པའི་མ་ཡིན་པ་ཞིག་ཡིན་ནམ་ཞེ་ན་ཞེས་བྱ་བ་ཡིན་ནོ། །རྒྱུད་འདྲ་བ་པ་དག་ནི་ཞེས་བྱ་བ་རྒྱས་པར་འབྱུང་བ་ནི་སེམས་ཀྱང་སེམས་གཞན་གྱི་མཚུངས་པ་དེ་མ་ཐག་པའི་རྐྱེན་ཡིན་གྱི། ཚོར་བའི་མ་ཡིན་ལ་ཚོར་བ་གང་ཚོར་བ་གཞན་གྱི་ཡིན་གྱི་སེམས་ཀྱི་མ་ཡིན་

པས་སྐལ་བ་མཉམ་པའི་རྒྱུ་ནི་རྒྱུད་འདྲ་བ་ཡིན་ནོ་ཞེས་བྱ་བའི་ཐ་ཚིག་གོ། །རྒྱུད་འདྲ་བས་རྩེན་པ་འམ་ཐ་སྙད་འདོགས་པ་ན་རྒྱུད་འདྲ་བ་པ་དག་སྟེ། ཆོས་མངོན་པ་པ་ཁ་ཅིག་ཡིན་ནོ། །གལ་ཏེ་རྒྱུད་གཅིག་རྒྱུད་གཞན་གྱི་སྐལ་བ་མཉམ་པའི་རྒྱུ་ཡིན་ན་གང་གི་ཚེ་ཉོན་མོངས་པ་ཅན་མ་ཡིན་

པའི་མཇུག་ཐོགས་སུ་ཉོན་མོངས་པ་ཅན་འབྱུང་བ་དེ་ལ་ཇི་ལྟར་མཚུངས་པ་དེ་མ་ཐག་པའི་རྐྱེན་དུ་རྣམ་པར་བཞག་ཅེ་ན། དེའི་ཕྱིར་གང་གི་ཚེ་ཉོན་མོངས་པ་ཅན་མ་ཡིན་པའི་མཇུག་ཐོགས་སུ་ཞེས་བྱ་བ་རྒྱས་པར་སྨོས་ཏེ། ཉོན་མོངས་པ་ཕྱིས་བྱུང་བ་དེའི་མཚུངས་པ་དེ་མ་ཐག་པའི་

རྐྱེན་ནི་སྔོན་འགགས་པའི་ཉོན་མོངས་པ་སྐད་ཅིག་མ་གཞན་གྱིས་བར་དུ་ཆོད་པ་ཡིན་པར་རྣམ་པར་འཇོག་སྟེ། རིགས་མཐུན་པའི་སེམས་གཞན་གྱིས་བར་དུ་མ་ཆོད་པའི་ཕྱིར་རོ། །ཉོན་མོངས་པ་ཅན་མ་ཡིན་པས་བར་དུ་ཆོད་པ་ནི་བར་དུ་ཆོད་པ་མ་ཡིན་པ་ཁོ་ན་སྟེ། རིགས་མི་

Vol. 142 · folio 222a

མཐུན་པ་ཡིན་པའི་ཕྱིར་རོ། །དཔེར་ན་ལྡང་བའི་སེམས་ཀྱིས་འགོག་པ་ལ་སྙོམས་པར་འཇུག་པའི་སེམས་ལྟ་བུ་སྟེ། སེམས་གཞན་གྱིས་བར་དུ་མ་ཆོད་པའི་ཕྱིར་སྙོམས་པར་འཇུག་པའི་རྫས་ཀྱིས་བར་དུ་ཆོད་ཀྱང་མཚུངས་པ་དེ་མ་ཐག་པའི་རྐྱེན་དུ་རྣམ་

པར་གཞག་པ་དེ་དང་འདྲའོ། །ཁམས་གསུམ་པ་དང་ལྡན་པ་མ་ཡིན་པ་རྣམས་ཅིག་ཅར་མངོན་དུ་འགྱུར་བའི་ཕྱིར་རོ་ཞེས་བྱ་བ་ནི་འཕགས་པ་འདོད་པའི་ཁམས་ཀྱི་འདོད་ཆགས་དང་མ་བྲལ་བའི་འདོད་པ་ན་སྤྱོད་པའི་ཐོབ་པའི་མཇུག་ཐོགས་སུ་ཁམས་གསུམ་པ་དང་ལྡན་པ་མ་

ཡིན་པ་རྣམས་ཀྱི་ཐོབ་པ་དག་འབྱུང་སྟེ། ཁམས་གསུམ་པའི་ཉོན་མོངས་པ་དང་ལྡན་པའི་ཕྱིར་རོ། །དེ་དག་གི་སྐྱེ་བ་ལ་སོགས་པ་ཡང་དེ་དང་འདྲ་བར་འབྱུང་སྟེ། དེ་ལྟར་ན་འཆོལ་བར་མངོན་དུ་འགྱུར་བའི་ཕྱིར་ལྡན་པ་མ་ཡིན་པའི་འདུ་བྱེད་ཐོབ་པ་ལ་སོགས་པ་ཡང་

མཚུངས་པ་དེ་མ་ཐག་པའི་རྐྱེན་མ་ཡིན་ནོ། །ཅིའི་ཕྱིར་མ་འོངས་པ་མཚུངས་པ་དེ་མ་ཐག་པའི་རྐྱེན་དུ་མི་འདོད་ཅེ་ན་ཞེས་བྱ་བ་རྒྱས་པར་འབྱུང་བ་ནི་གོང་དུ། སེམས་དང་སེམས་བྱུང་སྐྱེས་པ་རྣམས། །ཐ་མ་མིན་མཚུངས་དེ་མ་ཐག །ཅེས་བཤད་པས་འདས་པ་དང་ད་ལྟར་

བྱུང་བ་དག་ཁོ་ན་མཚུངས་པ་དེ་མ་ཐག་པའི་རྐྱེན་ཡིན་པར་བཤད་དེ། དེའི་ཕྱིར་དེ་སྐད་དུ་འདྲིའོ། །འཆོལ་བ་ཡིན་པའི་ཕྱིར་ཏེ་ཞེས་བྱ་བ་ནི་མ་འོངས་པའི་དུས་ནི་འཆོལ་བར་འདུག་པའི་ཕྱིར་མཚུངས་པ་དེ་མ་ཐག་པའི་རྐྱེན་ཡིན་པར་མི་འདོད་དོ། །མ་འོངས་པའི་དུས་

འཆོལ་བར་འདུག་པ་ཉིད་ནི་སྔ་ཕྱི་མེད་པའི་ཕྱིར་ཏེ། སྔ་མ་དང་ཕྱི་མ་ཉིད་མེད་པའི་ཕྱིར་རོ། །དུས་སྔ་མ་དང་ཕྱི་མ་དང་ལྡན་པའི་ཕྱིར་ད་ལྟར་གྱི་བས་སྔར་ཞེས་བརྗོད་པར་ནི་ནུས་ན། མ་འོངས་པ་ལ་ནི་སྔ་མ་དང་ཕྱི་མ་ཉིད་མེད་དོ། །དེ་ཉིད་ཀྱི་ཕྱིར་ད་ལྟར་གྱི་ཡང་ད་ལྟར་གྱི་མཚུངས་པ་

དེ་མ་ཐག་པའི་རྐྱེན་དུ་མི་འདོད་དེ། སྔ་མ་དང་ཕྱི་མ་ཉིད་མེད་པའི་ཕྱིར་རོ། །འདས་པ་དང་ད་ལྟར་གྱི་ལས་རྗེས་སུ་དཔག་པའི་ཕྱིར་རོ་ཞེས་བྱ་བ་ནི་འདས་པ་དང་ད་ལྟར་གྱི་ལས་རྗེས་སུ་དཔག་པའི་ཕྱིར་ཏེ། འདས་པ་ལས་རྗེས་སུ་དཔག་པ་ཞེས་བྱ་བ་བསྟན་པའི་ཕྱིར་འདས་པའི་

Vol. 142 · folio 222b

དུས་གཟིགས་ཞེས་བྱ་བ་རྒྱས་པར་སྨོས་སོ། །ད་ལྟར་གྱི་ལས་རྗེས་སུ་དཔག་པ་ཞེས་བྱ་བ་བསྟན་པའི་ཕྱིར་མ་འོངས་ད་ལྟར་བའི་ལས་འདི་ཡང་དེ་ལྟ་བུ་ཡིན་པས་ཞེས་བྱ་བ་རྒྱས་པར་སྨོས་སོ། །ཕྱི་མའི་མཐའ་མི་མཁྱེན་པར་འགྱུར་རོ་ཞེས་བྱ་བ་ནི་འདིའི་ཐམས་ཅད་མཁྱེན་པ་ཉིད་

ཉམས་པར་འགྱུར་རོ་སྙམ་དུ་བསམས་པ་ཡིན་ནོ། །འབྲས་བུའི་རྟགས་སུ་གྱུར་པ་ནི་འབྲས་བུའི་མཚན་མར་གྱུར་པའོ། །མངོན་སུམ་དུ་མཛད་པ་ནི་མ་ཡིན་ནོ་ཞེས་བྱ་བ་ནི་མངོན་སུམ་དུ་གཟིགས་པ་མ་ཡིན་པའོ། །སྔ་མ་དང་ཕྱི་མ་ཉིད་མེད་པས་འཆོལ་བར་འདུག་པའི་ཕྱིར་མ་

འོངས་པ་ནི་མཚུངས་པ་དེ་མ་ཐག་པའི་རྐྱེན་དུ་མི་འདོད་དོ་ཞེས་བཤད་པ་དང་། ཅིའི་ཕྱིར་ཆོས་ཀྱི་མཆོག་གི་མཇུག་ཐོགས་སུ་ཞེས་བྱ་བ་འདི་རྒྱས་པར་སྨོས་སོ། །དེ་ལ་བྱེ་བྲག་ཏུ་སྨྲ་བས་ལན་གདབ་པའི་ཕྱིར་གང་ཞིག་གང་ལ་རག་ལུས་ཏེ་སྐྱེ་བ་ཞེས་བྱ་བ་རྒྱས་པར་སྨྲས་ཏེ།

སྡུག་བསྔལ་ལ་ཆོས་ཤེས་པའི་བཟོད་པའི་ཆོས་གང་ཞིག་འཇིག་རྟེན་པའི་ཆོས་ཀྱི་མཆོག་གང་ལ་རག་ལས་ཏེ་སྐྱེ་བ་དེ་ནི་དེའི་མཇུག་ཐོགས་སུ་སྐྱེའོ། །དཔེར་ན་མཚུངས་པ་དེ་མ་ཐག་པའི་རྐྱེན་མེད་བཞིན་དུ་ས་བོན་ལ་སོགས་པའི་མྱུ་གུ་ལ་སོགས་པ་བཞིན་ཏེ་མྱུ་གུ་ནི་ས་

བོན་ལ་རག་ལས་ཏེ་སྐྱེ་བ་ཡིན་པས་དེའི་མཇུག་ཐོགས་སུ་སྐྱེ་ལ་སྡོང་བུ་ལ་སོགས་པ་ཡང་མྱུ་གུ་ལ་སོགས་པ་ལ་དེ་དང་འདྲའོ། །མཚུངས་པ་དེ་མ་ཐག་པའི་རྐྱེན་མེད་བཞིན་དུ་ཡང་ཞེས་བྱ་བ་ནི་མཚུངས་པ་དེ་མ་ཐག་པའི་རྐྱེན་མེད་པར་ཡང་ངོ་། །ཡང་ཞེས་བྱ་བའི་སྒྲས་

ནི་མཚུངས་པ་དེ་མ་ཐག་པའི་རྐྱེན་ཡོད་ན་ལྟ་ཧ་ཅང་ཡང་སྐྱེ་བར་འགྱུར་སྙམ་དུ་བསམས་པ་ཡིན་ནོ། །དེ་ལྟ་བས་ན་ཚིག་གི་དོན་ནི་གོ་རིམས་ངེས་པར་གནས་པ་ཡང་མེད་ལ་དེ་དང་འདྲ་བར་མཇུག་ཐོགས་སུ་སྐྱེ་བར་ངེས་པར་ཡང་འགྱུར་རོ་ཞེས་བྱ་བ་ཡིན་ནོ། །ཅིའི་ཕྱིར་དགྲ་

བཅོམ་པའི་སེམས་དང་སེམས་ལས་བྱུང་བ་ཐ་མ་རྣམས་ཞེས་བྱ་བའི་འདྲི་བ་འདི་ནི་ཐ་མ་མ་ཡིན་ཞེས་བཤད་པས་བྱུང་བ་ཡིན་ནོ། །སེམས་གཞན་དང་འབྲེལ་པ་མེད་པའི་ཕྱིར་རོ་ཞེས་བྱ་བ་འདི་ལྟར་མཇུག་ཐོགས་སུ་སེམས་གཞན་དང་འབྲེལ་བ་མེད་པས་སོ། །ཡིད་ནི་རྟེན་

Vol. 142 · folio 223a

གྱི་དངོས་པོས་རབ་ཏུ་ཕྱེ་བ་ཡིན་ཞེས་བྱ་བ་ནི་དཔེར་ན་མིག་སྐྱེས་པ་མིག་གི་རྣམ་པར་ཤེས་པའི་རྟེན་གྱི་དངོས་པོར་གནས་པ་གལ་ཏེ་རྒྱུ་གཞན་མ་ཚང་བ་མིག་གི་རྣམ་པར་ཤེས་པ་མི་སྐྱེ་ཡང་དེ་ལ་མིག་གིས་མ་ལན་པ་དེ་བཞིན་དུ་དགྲ་བཅོམ་པའི་སེམས་

ཐ་མ་ཡང་རྐྱེན་གྱི་དངོས་པོར་གནས་ལ་རྒྱུ་གཞན་མ་ཚང་བས་ནི་རྣམ་པར་ཤེས་པ་མི་སྐྱེ་བར་ཟད་དེ་དེས་ལན་པ་ནི་མ་ཡིན་ནོ། །དེ་ནི་བྱེད་པས་རབ་ཏུ་ཕྱེ་བ་མ་ཡིན་ཏེ། སྐྱེད་པར་བྱེད་པའི་སྐྱེས་བུའི་བྱེད་པས་རབ་ཏུ་ཕྱེ་བ་ནི་མ་ཡིན་ནོ་ཞེས་པའི་ཐ་ཚིག་གོ། །གལ་ཏེ་དེ་སྐྱེད་

པར་བྱེད་པས་རབ་ཏུ་ཕྱེ་བ་ཡིན་པར་གྱུར་ན་ནི་དེ་འབྲས་བུ་སྐྱེ་བ་ཁོ་ན་ཡིན་ན་ཡིད་ཡིན་པར་འགྱུར་བ་ཞིག་ན་དེ་ལྟ་ཡང་མ་ཡིན་ཏེ། དེའི་ཕྱིར་དེ་ནི་བསྐྱེད་པར་བྱ་བ་མེད་ཀྱང་ཡིད་ཡིན་པ་ཁོ་ནའོ། །མཚུངས་པ་དེ་མ་ཐག་པའི་རྐྱེན་ནི་བྱེད་པས་རབ་ཏུ་ཕྱེ་བ་ཡིན་ཏེ། བསྐྱེད་པར་བྱ་བ་

ཡོད་པ་ཁོ་ན་ཡིན་ན་མཚུངས་པ་ཡིན་པ་དེ་མ་ཐག་པའི་རྐྱེན་ཡིན་གྱི་མེད་ན་ནི་མ་ཡིན་ནོ། །དེས་ཆོས་གང་འབྲས་བུར་བཟུང་བ་སྟེ། མཚུངས་པ་དེ་མ་ཐག་པའི་རྐྱེན་དེས་ཆོས་གང་ཞིག་འདི་བསྐྱེད་པར་བྱའོ་ཞེས་འབྲས་བུར་གཟུང་བ་དེ་ནི་ཆོས་བློ་དང་མི་ལྡན་པ་ཐམས་ཅད་དམ་

སྲོག་ཆགས་ཆེད་དུ་བསམས་ཤིང་བྱེད་པ་ཐམས་ཅད་ཀྱིས་ཀྱང་ཇི་ལྟར་མི་སྐྱེ་བར་འགྱུར་བ་སྟེ་དེ་མི་སྐྱེ་བར་བྱའོ་ཞེས་དགག་པར་མི་ནུས་སོ། །ཆོས་གང་དག་སེམས་ཀྱི་མཚུངས་པ་དེ་མ་ཐག་པ་ཅན་དེ་དག་ཅེས་བྱ་བ་རྒྱས་པར་འབྱུང་བ་ནི་སེམས་ཀྱི་མཚུངས་པ་དེ་མ་ཐག་པའི་རྐྱེན་

གྱིས་བསྐྱེད་པ་ནི་སེམས་ཀྱི་མཚུངས་པ་དེ་མ་ཐག་པ་ཅན་དག་ཡིན་ཏེ། དེ་དག་ནི་སེམས་དང་མཚུངས་པ་ཡང་ཡིན་ལ་དེ་མ་ཐག་པ་ཡང་ཡིན་པས། སེམས་ཀྱི་མཚུངས་པ་དེ་མ་ཐག་པ་ཅན་ཡིན་ནོ། །རྣམ་པ་གཅིག་ཏུ་ན་འདི་དག་ལ་མཚུངས་པ་དེ་མ་ཐག་པའི་རྐྱེན་སེམས་ཀྱི་

མཚུངས་པ་དེ་མ་ཐག་པ་ཡོད་པས་སེམས་ཀྱི་མཚུངས་པ་དེ་མ་ཐག་པ་ཅན་ཡིན་ཏེ། སེམས་ཀྱི་མཚུངས་པ་དེ་མ་ཐག་པ་ཅན་ནི་སྐད་ཅིག་མ་གཞན་གྱིས་བར་དུ་མ་ཆོད་པ་དག་ཡིན་ནོ། །སེམས་ཀྱི་མཚུངས་པ་དེ་མ་ཐག་པ་ཅན་དེ་དག་ཀྱང་སེམས་དང་སེམས་ལས་བྱུང་བ་རྣམས་དང་སྙོམས་

Vol. 142 · folio 223b

པར་འཇུག་པ་གཉིས་པོ་འདུ་ཤེས་མེད་པ་དང་འགོག་པའི་སྙོམས་པར་འཇུག་པ་དག་ཡིན་གྱི། འདུ་ཤེས་མེད་པ་ནི་ལས་ཀྱི་མཐུས་སྐྱེ་བའི་ཕྱིར་བསྟན་བཅོས་ལས་སེམས་ཀྱི་མཚུངས་པ་དེ་མ་ཐག་པ་ཅན་ཡིན་པར་མི་འབྱུང་ངོ་། །མུ་དང་པོ་ཞེས་བྱ་བ་རྒྱས་པར་འབྱུང་བ་ལ་

སྙོམས་པར་འཇུག་པ་ལས་ལྡང་བའི་སེམས་ནི་སྙོམས་པར་འཇུག་པ་ལ་འཇུག་པའི་སེམས་ཀྱིས་བསྐྱེད་པ་ཡིན་ཏེ། དེའི་ཕྱིར་སེམས་ཀྱི་མཚུངས་པ་དེ་མ་ཐག་པ་ཅན་ཡིན་གྱི་སྙོམས་པར་འཇུག་པའི་སྐད་ཅིག་མས་བར་དུ་ཆོད་པའི་ཕྱིར་སེམས་ཀྱི་དེ་མ་ཐག་པ་ཅན་ནི་མ་ཡིན་ནོ། །སྙོམས་

པར་འཇུག་པའི་སྐད་ཅིག་མ་གཉིས་པ་ལ་སོགས་པ་ནི་སྐད་ཅིག་མ་དང་པོ་མ་གཏོགས་པ་དག་ཅེས་བྱ་བའི་ཐ་ཚིག་གོ། །རྐྱེན་དེས་བསྐྱེད་པའི་ཕྱིར་སེམས་ཀྱི་མཚུངས་པ་དེ་མ་ཐག་པ་ཅན་ཡིན་གྱི་ཅི་རིགས་པར་སྐད་ཅིག་མ་དང་པོ་ལ་སོགས་པས་བར་དུ་ཆོད་པའི་ཕྱིར་

སེམས་ཀྱི་དེ་མ་ཐག་པ་ཅན་ནི་མ་ཡིན་ནོ། །མུ་གཉིས་པ་ནི་སྙོམས་པར་འཇུག་པའི་སྐད་ཅིག་མ་དང་པོའི་སྐྱེ་བ་ལ་སོགས་པ་སྟེ། སྐད་ཅིག་མ་གཞན་གྱིས་བར་དུ་མ་ཆོད་པའི་ཕྱིར་སེམས་ཀྱི་དེ་མ་ཐག་པ་ཅན་ཡིན་གྱི་སེམས་ཀྱི་མཚུངས་པ་དེ་མ་ཐག་པ་ཅན་གྱི་ངོ་བོ་ཉིད་མ་

ཡིན་པའི་ཕྱིར་སེམས་ཀྱི་མཚུངས་པ་དེ་མ་ཐག་པ་ཅན་ནི་མ་ཡིན་ཏེ། སེམས་ཀྱི་མཚུངས་པ་དེ་མ་ཐག་པ་ཅན་ནི་སེམས་དང་སེམས་ལས་བྱུང་བ་རྣམས་དང་སྙོམས་པར་འཇུག་པ་གཉིས་ཁོ་ན་ཡིན་པར་འདོད་དོ། །སེམས་དང་བཅས་པའི་གནས་སྐབས་ཀྱི་སྐྱེ་བ་ལ་སོགས་པ་

ནི་དེ་དག་ཁྱད་པར་དུ་མ་བྱས་པའི་ཕྱིར་སེམས་དང་སེམས་ལས་བྱུང་བ་ཐམས་ཅད་ཀྱི་སྐྱེ་བ་ལ་སོགས་པ་ཡིན་ནོ། །སོགས་པ་ཞེས་བྱ་བ་སྨོས་པས་ནི་སྙོམས་པར་འཇུག་པ་གཉིས་མ་གཏོགས་པ་དང་ལྡན་པ་མ་ཡིན་པ་ཐམས་ཅད་བསྡུ་བ་ཁོ་ན་སྟེ། དེ་དག་ཀྱང་དེ་དང་འདྲ་བ་

ཉིད་དུ་སེམས་ཀྱི་དེ་མ་ཐག་པ་ཅན་ཡིན་གྱི་སེམས་ཀྱི་མཚུངས་པ་དེ་མ་ཐག་པ་ཅན་ནི་མ་ཡིན་ཏེ་སྔ་མ་བཞིན་དུ་བཤད་པར་བྱའོ། །སེམས་དང་བཅས་པའི་གནས་སྐབས་དག་གོ་ཞེས་བྱ་བ་ནི་གང་གི་ཚེ་སེམས་ཀྱི་མཇུག་ཐོགས་སུ་སེམས་འབྱུང་བ་དེའི་ཚེ་སེམས་དང་སེམས་ལས་

Vol. 142 · folio 224a

བྱུང་བ་ཕྱི་མ་རྣམས་སེམས་སྔ་མས་སེམས་ཀྱི་མཚུངས་པ་དེ་མ་ཐག་པ་ཅན་ཡང་ཡིན་ལ། སེམས་ཀྱི་དེ་མ་ཐག་པ་ཅན་ཡང་མ་ཡིན་ནོ། །མུ་བཞི་པ་ནི་སྙོམས་པར་འཇུག་པའི་སྐད་ཅིག་མ་གཉིས་པ་ལ་སོགས་པ་དང་ལྡན་པའི་སེམས་ཀྱི་སྐྱེ་བ་ལ་སོགས་པ་སྟེ།

སེམས་ཀྱི་མཚུངས་པ་དེ་མ་ཐག་པ་ཅན་གྱི་ངོ་བོ་ཉིད་མ་ཡིན་པའི་ཕྱིར་སེམས་ཀྱི་མཚུངས་པ་དེ་མ་ཐག་པ་ཅན་ཡང་མ་ཡིན་ལ། སྙོམས་པར་འཇུག་པའི་སྐད་ཅིག་མ་དང་པོ་ལ་སོགས་པས་བར་དུ་ཆོད་པའི་ཕྱིར་སེམས་ཀྱི་དེ་མ་ཐག་པ་ཅན་ཡང་མ་ཡིན་ནོ། །གསུམ་པ་དང་བཞི་པ་

གང་དག་ཡིན་པ་དེ་དག་ནི་དང་པོ་དང་གཉིས་པ་དག་གོ་ཞེས་བྱ་བ་རྒྱས་པར་འབྱུང་བ་ལ། མུ་དང་པོ་ནི་སྙོམས་པར་འཇུག་པའི་སྐད་ཅིག་མ་དང་པོ་དང་། སེམས་དང་བཅས་པའི་གནས་སྐབས་རྣམས་ཏེ་དེ་དག་ནི་མཚུངས་པ་དེ་མ་ཐག་པའི་རྐྱེན་གྱིས་བསྐྱེད་པའི་ཕྱིར་སེམས་ཀྱི་མཚུངས་

པ་དེ་མ་ཐག་པ་ཅན་ཡིན་གྱི་སྙོམས་པར་འཇུག་པའི་དེ་མ་ཐག་པ་ཅན་ནི་མ་ཡིན་ཏེ། སྙོམས་པར་འཇུག་པའི་སྐད་ཅིག་མ་དང་པོ་ལ་སྙོམས་པར་འཇུག་པའི་སྐད་ཅིག་མ་སྔ་མ་མེད་པས་དེའི་དེ་མ་ཐག་པ་ཅན་གྱི་ངོ་བོ་ཉིད་མ་ཡིན་པའི་ཕྱིར་ལ། སེམས་དང་བཅས་པའི་གནས་སྐབས་ན་ཡང་

སྙོམས་པར་འཇུག་པ་མེད་པའི་ཕྱིར་རོ། །གཉིས་པ་ནི་སྙོམས་པར་འཇུག་པའི་སྐད་ཅིག་མ་གཉིས་པ་ལ་སོགས་པ་དང་ལྡང་བའི་སེམས་ཀྱི་སྐྱེ་བ་ལ་སོགས་པ་སྟེ། ཆོས་འདི་དག་ནི་སྙོམས་པར་འཇུག་པའི་དེ་མ་ཐག་པ་ཅན་ཡིན་གྱི་སེམས་ཀྱི་མཚུངས་པ་དེ་མ་ཐག་པ་ཅན་ནི་མ་ཡིན་ནོ། །

གསུམ་པ་ནི་སེམས་མེད་པའི་སྙོམས་པར་འཇུག་པ་ལས་ལྡང་བའི་སེམས་དང་སྙོམས་པར་འཇུག་པའི་སྐད་ཅིག་མ་གཉིས་པ་ལ་སོགས་པ་སྟེ། འདི་དག་ནི་སེམས་ཀྱི་མཚུངས་པ་དེ་མ་ཐག་པ་ཅན་ཡང་ཡིན་ལ་སྙོམས་པར་འཇུག་པའི་དེ་མ་ཐག་པ་ཅན་ཡང་ཡིན་ནོ། །བཞི་པ་ནི་སྙོམས་པར་

འཇུག་པའི་སྐད་ཅིག་མ་དང་པོ་དང་སེམས་དང་བཅས་པའི་གནས་སྐབས་ཀྱི་སྐྱེ་བ་ལ་སོགས་པ་སྟེ། ཆོས་འདི་དག་ནི་སེམས་ཀྱི་མཚུངས་པ་དེ་མ་ཐག་པ་ཅན་ཡང་མ་ཡིན་ལ་སྙོམས་པར་འཇུག་པའི་དེ་མ་ཐག་པ་ཅན་ཡང་མ་ཡིན་ཏེ། སེམས་ཀྱི་མཚུངས་པ་དེ་མ་ཐག་པ་ཅན་གྱི་ངོ་བོ་

Vol. 142 · folio 224b

ཉིད་མ་ཡིན་པའི་ཕྱིར་དང་། སྙོམས་པར་འཇུག་པའི་སྐད་ཅིག་མ་སྔ་མ་མེད་པའི་ཕྱིར་རོ། །མཚུངས་པར་ལྡན་པ་དང་བཅས་པའི་ཞེས་བྱ་བ་ནི་སེམས་ལས་བྱུང་བ་དང་བཅས་པའི་འོ། །དེ་ལྟ་བུའི་མཚན་ཉིད་ཡིན་པའི་ཕྱིར་ཞེས་བྱ་བ་ནི་དམིགས་པར་བྱ་བའི་མཚན་ཉིད་ཡིན་

པའི་ཕྱིར་རོ། །སྐྱེ་མཆེད་དང་རྫས་དང་སྐད་ཅིག་མ་ངེས་པས་ཞེས་བྱ་བ་ནི་སྐྱེ་མཆེད་དང་རྫས་དང་སྐད་ཅིག་མ་ཡིན་ཏེ་དེ་དག་ངེས་པའོ། །དེས་ན་སེམས་དང་སེམས་ལས་བྱུང་བ་འདི་དག་རང་གིས་དམིགས་པ་ལ་ངེས་པ་ཡིན་ནོ། །དཔེར་ན་རེ་ཞིག་མིག་གི་རྣམ་པར་ཤེས་པ་

མཚུངས་པར་ལྡན་པ་དང་བཅས་པ་ནི་དམིགས་པ་གཟུགས་ཀྱི་སྐྱེ་མཆེད་ལ་ངེས་ཀྱི་སྒྲའི་སྐྱེ་མཆེད་ལ་སོགས་པ་ལ་ནི་མ་ཡིན་ཏེ། སྐྱེ་མཆེད་ངེས་པ་ནི་དེ་ལྟ་བུ་ཡིན་ནོ། །སྐྱེ་མཆེད་དེ་ལ་ཡང་རྫས་ངེས་པས་ནི་གཟུགས་སྔོན་པོ་ལ་མིག་གི་རྣམ་པར་ཤེས་པ་མཚུངས་པར་ལྡན་པ་དང་

བཅས་པ་སྔོན་པོ་འཛིན་པར་བྱེད་པ་ཡིན་པར་ངེས་ཀྱི་སེར་པོ་ལ་སོགས་པ་གཞན་ལ་ནི་མ་ཡིན་ནོ། །དམིགས་པ་གཟུགས་སྔོན་པོ་དེ་ལ་ཡང་གཟུགས་སྔོན་པོའི་སྐད་ཅིག་མ་གང་ཞིག་གང་གི་དམིགས་པ་ཡིན་པ་དེ་ནི་དེ་ཁོ་ནའི་ཡིན་གྱི་གཞན་གྱི་ནི་མ་ཡིན་ཏེ། སྐད་ཅིག་མ་ངེས་

པས་ནི་དེ་ལྟ་བུ་ཡིན་ནོ། །དེ་བཞིན་དུ་སྒྲ་ལ་སོགས་པ་ལ་ཡང་རྣ་བ་ལ་སོགས་པའི་རྣམ་པར་ཤེས་པ་མཚུངས་པར་ལྡན་པ་དང་བཅས་པ་ལ་སོགས་པ་སྦྱར་བར་བྱའོ། །ཅི་རྟེན་ངེས་པས་ཀྱང་ངེས་པ་ཞིག་ཡིན་ནམ་ཞེས་བྱ་བ་ནི་ཅི་སེམས་དང་སེམས་ལས་བྱུང་བ་འདི་དག་མིག་ལ་

སོགས་པའི་རྟེན་ངེས་པས་ཀྱང་ངེས་པ་ཞིག་ཡིན་ན་མ་ཞེས་བྱ་བ་ཡིན་ནོ། །སྨྲས་པ། དེ་བཞིན་དེ་དེ་ལྟ་ཡིན་ནོ་ཞེས་བྱ་བའི་ཐ་ཚིག་གོ། །རྐྱེན་འདི་ནི་ལྷག་པ་ཡིན་པས་བདག་པོའི་རྐྱེན་ཏོ་ཞེས་བྱ་བ་ནི་རྒྱུའི་རྐྱེན་ལ་སོགས་པ་བས་ཏེ། རྒྱུའི་རྐྱེན་ནི་པོ་ཟོས་ནས་རྒྱུ་སྔར་ཟད་ལ་དམིགས་

པའི་རྐྱེན་ཀྱང་ལྷན་ཅིག་འབྱུང་བ་རྣམས་མ་ཡིན་པས་ལྷག་པ་མ་ཡིན་ནོ། །དམིགས་པའི་རྐྱེན་ཡང་ཆོས་ཐམས་ཅད་ཡིད་ལ་ཞེས་བྱ་བ་ནི་ཡིད་ཀྱི་རྣམ་པར་ཤེས་པ་ལ་ལྟོས་ནས་སོ། །ཡང་ན་ལྷག་པའི་རྐྱེན་ཡིན་ཏེ་ཞེས་བྱ་བ་གོང་དུ་ནི་བདག་པོ་ལྷག་པ་ནི་བདག་པོའི་རྐྱེན་ཡིན་ནོ་ཞེས་

Vol. 142 · folio 225a

ཚིག་བསྡུས་པ་ཡིན་ནོ། །ད་ནི་ལྷག་པའི་སྟེ། མང་པོའི་བདག་པོ་སྟེ། དེ་རྐྱེན་ཡིན་པས་བདག་པོའི་རྐྱེན་ནོ་ཞེས་བྱ་བར་ཚིག་བསྡུའོ། །ཇི་ལྟ་ཞེ་ན། ཐམས་ཅད་ཅེས་བྱ་བ་རྒྱས་པར་སྨོས་སོ། །འདུས་བྱས་དང་འདུས་མ་བྱས་ཐམས་ཅད་རང་གི་ངོ་བོ་མ་

གཏོགས་པའི་འདུས་བྱས་དམིགས་པ་དང་བཅས་པ་དང་དམིགས་པ་མེད་པ་ཐམས་ཅད་ཀྱི་རྐྱེན་ཡིན་པས་བདག་པོའི་རྐྱེན་ཡིན་ནོ། །དམིགས་པའི་རྐྱེན་ནི་དམིགས་པ་དང་བཅས་པ་ཁོ་ནའི་ཡིན་གྱི་དམིགས་པ་མེད་པའི་ནི་མ་ཡིན་ནོ། །ཚིག་རྣམ་པར་སྦྱར་བ་དང་པོ་ལ་ནི་རྐྱེན་ལྷག་

པར་བསྟན་པ་ཡིན་ནོ། །གཉིས་པ་ལ་ནི་རྐྱེན་དང་ལྡན་པའོ། །འགག་པ་ལ་བྱ་བ་བྱེད་དོ་ཞེས་བྱ་བ་ནི་འགག་པ་ཁོ་ན་ལ་ཞེས་ངེས་པར་གཟུང་བ་ཡིན་ཏེ། ཕན་ཚུན་འབྲས་བུ་ཡིན་པའི་ཕྱིར་དང་། རྟེན་མཚུངས་པའི་ཕྱིར་ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུད་དག་

དང་གོ་རིམས་བཞིན་ནོ། །གསུམ་པོ་ནི་སྐྱེ་བ་ལའོ་ཞེས་བྱ་བ་ནི་སྐྱེ་བ་ཁོ་ན་ལ་ཞེས་ངེས་པར་གཟུང་བ་ཡིན་ནོ། །དེ་ལས་གཞན་པའི་རྐྱེན་དེ་དག་ལས་བཟློག་པ་ཡིན་ཞེས་བྱ་བ་ནི་ཕྱིས་བཤད་པའི་བྱེད་པའི་དུས་ངེས་པ་ནི་སྔར་བཤད་པའི་མཚུངས་པ་དེ་མ་ཐག་པའི་རྐྱེན་དེ་དང་སྦྱར་ཏེ།

སྐྱེ་བ་ལ་བྱ་བ་བྱེད་དོ་ཞེས་བྱ་བའི་དོན་ཡིན་ལ། སྔར་བཤད་པའི་བྱེད་པའི་དུས་ངེས་པ་ནི་ཕྱིས་བཤད་པའི་དམིགས་པའི་རྐྱེན་དང་སྦྱར་ཏེ། འགག་པ་ལ་བྱ་བ་བྱེད་དོ་ཞེས་བྱ་བའི་དོན་ཏོ། །དེ་ལྟར་ན་དེ་དག་ནི་བཟློག་སྟེ་བྱ་བ་བྱེད་པ་ཡིན་ནོ། །དེའི་ཕྱིར་མཚུངས་པ་དེ་མ་ཐག་པའི་

རྐྱེན་ནི་སྐབས་འབྱེད་པའི་ཕྱིར་སྐྱེ་བ་ལ་བྱ་བ་བྱེད་དོ། །དམིགས་པའི་རྐྱེན་ནི་ད་ལྟར་གྱི་སེམས་དང་སེམས་ལས་བྱུང་བ་རྣམས་ཀྱིས་འཛིན་པའི་ཕྱིར་འགག་པ་ལ་བྱ་བ་བྱེད་དོ་ཞེས་བྱ་བ་སྨོས་ཏེ། དམིགས་པའི་རྐྱེན་ནི་འཛིན་པའི་དོན་གྱི་རྣམ་པར་གཞག་ན་སེམས་དང་སེམས་ལས་བྱུང་བ་

འདས་པ་དང་མ་འོངས་པ་དག་ནི་གཟུང་བར་བྱ་བའི་དོན་འཛིན་པར་བྱེད་པ་ཡང་མ་ཡིན་ནོ། །འདིའི་བྱ་བ་འདི་ཉིད་ཡིན་ནོ་ཞེས་བྱ་བ་ནི་བདག་པོའི་རྐྱེན་འདིའི་བྱ་བ་ནི་གནས་སྐབས་ཐམས་ཅད་དུ་མི་སྒྲིབ་པའི་དངོས་པོར་འདུག་པ་གང་ཡིན་པ་དེ་ཉིད་ཡིན་ནོ་ཞེས་བྱ་བར་གོ་སླ་བས་བདག་པོའི་

Vol. 142 · folio 225b

རྐྱེན་གྱི་བྱེད་པའི་དུས་ངེས་པ་མདོར་མ་བྱས་སོ་སྙམ་དུ་བསམས་པ་ཡིན་ནོ། །རྒྱུ་རྣམ་པ་གཉིས་ཏེ་ཞེས་བྱ་བ་ནི་མཚུངས་པར་ལྡན་པ་དང་། ཀུན་དུ་འགྲོ་བ་དང་རྣམ་པར་སྨིན་པའི་རྒྱུ་རྣམས་མི་སྲིད་པའི་ཕྱིར་རོ། །ས་མཚུངས་པའི་དགེ་བའི་ཆོས་ཞེས་བྱ་བ་ནི་གང་དག་གི་སྟོབས་ཀྱིས་

སྙོམས་པར་འཇུག་པ་དེ་གཉིས་འབྱུང་བ་སྟེ། འགོག་པའི་སྙོམས་པར་འཇུག་པའི་སྐལ་བ་མཉམ་པའི་རྒྱུའི་རྐྱེན་ནི་སྲིད་པའི་རྩེ་མོ་པའི་ཆོས་དགེ་བ་རྣམས་ཡིན་ནོ། །འདུ་ཤེས་མེད་པའི་སྙོམས་པར་འཇུག་པ་ནི་བསམ་གཏན་བཞི་པའི་ས་པ་དག་ཡིན་ནོ། །མཚུངས་པ་དེ་མ་

ཐག་པའི་རྐྱེན་ནི་སྙོམས་པར་འཇུག་པའི་སེམས་མཚུངས་པར་ལྡན་པ་དང་བཅས་པའོ་ཞེས་བྱ་བ་ནི་འགོག་པའི་སྙོམས་པར་འཇུག་པའི་སྐད་ཅིག་མ་ཐམས་ཅད་སེམས་གཞན་གྱིས་བར་དུ་མ་ཆོད་པའི་ཕྱིར་རོ། །སྔ་མ་བཞིན་ནོ་ཞེས་བྱ་བ་ནི་རང་གི་ངོ་བོ་མ་གཏོགས་པ་ཆོས་ཐམས་

ཅད་དོ། །སེམས་ཀྱི་མངོན་པར་འདུ་བྱེད་པ་ལས་སྐྱེ་བའི་ཕྱིར་རོ་ཞེས་བྱ་བ་ནི་སེམས་ཀྱི་རྩོལ་བ་ལས་སྐྱེ་བའི་ཕྱིར་རོ་ཞེས་བྱ་བའི་ཐ་ཚིག་གོ། །སེམས་སྐྱེ་བ་ལ་བགེགས་བྱེད་པའི་ཕྱིར་མཚུངས་པ་དེ་མ་ཐག་པའི་རྐྱེན་ནི་མ་ཡིན་ནོ་ཞེས་བྱ་བ་ནི་མཚུངས་པ་དེ་མ་ཐག་པའི་རྐྱེན་ནི་སེམས་

སྐྱེ་བའི་རྒྱུ་ཡིན་པའི་ཕྱིར་རོ། །གཞན་ནི་གཉིས་པོ་དག་ལས་སྐྱེ། །ཞེས་བྱ་བ་ལ་ནི་ཞེས་བྱ་བའི་སྒྲ་ནི་ངེས་པར་གཟུང་བ་དང་རིམ་པ་གཞན་དུ་སྦྱར་བ་ཡིན་ཏེ། སེམས་དང་སེམས་ལས་བྱུང་བ་དང་སྙོམས་པར་འཇུག་པ་གཉིས་མ་གཏོགས་པ་ཆོས་གཞན་དག་ནི་རྒྱུ་དང་བདག་པོའི་རྐྱེན་

གཉིས་ཁོ་ན་ལས་སྐྱེའོ། །དབང་ཕྱུག་དང་སྐྱེས་བུ་དང་གཙོ་བོ་ལ་སོགས་པ་ཞེས་བྱ་བའི་སྒྲས་ནི་དུས་དང་རང་བཞིན་དང་རྡུལ་ཕྲ་རབ་ལ་སོགས་པ་བསྡུའོ། །དེ་ཉིད་ཀྱིས་ཞེས་བྱ་བ་ལ་ཚིག་གི་དོན་བསྡུས་པ་ནི་གལ་ཏེ་རྒྱུ་གཅིག་པུ་དབང་ཕྱུག་གམ་སྐྱེས་བུ་ནི་མེད་དོ་ཞེས་བྱ་བའི་ཕྱོགས་

འདི་ལ་གཏན་ཚིགས་ཅི་ཡོད་ཅེས་གཏན་ཚིགས་ཚོལ་བར་བྱེད་ན་དབང་ཕྱུག་ལས་མ་གཏོགས་པའི་གཏན་ཚིགས་བྱས་པས་དེ་འགྲུབ་པས་ན་ཁས་བླངས་པར་འགྱུར་རོ། །དེ་ཁས་བླངས་པའི་ཕྱིར་འགྲོ་བ་ཐམས་ཅད་ཀྱི་རྒྱུ་གཅིག་པུ་དབང་ཕྱུག་གམ་སྐྱེས་བུ་ཡིན་ནོ་ཞེས་སྨྲ་བ་འདི་བསྩལ་

Vol. 142 · folio 226a

བ་ཡིན་ཏེ། ཡོངས་སུ་སྤངས་པར་འགྱུར་རོ་ཞེས་བྱ་བ་ཡིན་ནོ། །དབང་ཕྱུག་སོགས་མིན་རིམ་སོགས་ཕྱིར། །ཞེས་བྱ་བ་ནི་དངོས་པོ་རྣམས་ནི་དབང་ཕྱུག་ལ་སོགས་པ་ལ་མི་སྐྱེའོ། །ཅིའི་ཕྱིར་ཞེ་ན། རིམ་སོགས་ཕྱིར་ཏེ་སོགས་པ་ཞེས་བྱ་བ་སྨོས་པས་ནི་ཡུལ་

དང་དུས་ལ་སོགས་པ་བསྡུའོ། །ཡང་ན་རྒྱུ་དུ་མ་ཉིད་དང་ཐུག་པ་མེད་པར་ཐལ་བ་དང་སྐྱེས་བུའི་བྱེད་པ་གཞན་བསྙོན་པར་སྨྲ་བ་རྣམས་བསྡུའོ། །གལ་ཏེ་དབང་ཕྱུག་གམ་གཞན་ཡང་རུང་སྟེ། རྒྱུ་གཅིག་པུ་ཁོ་ན་ཞིག་ཡིན་ན་ཞེས་བྱ་བ་རྒྱས་པར་སྨོས་པ་ནི་གལ་ཏེ་ལྷ་ཆེན་པོའམ་ནོར་

ལྷའམ་སྐྱེས་བུ་ལ་སོགས་པ་གཞན་ཡང་རུང་རྒྱུ་གཅིག་པུ་ཁོ་ན་ཞིག་ཡིན་ན་རྒྱུ་ཡོད་པའི་ཕྱིར་འགྲོ་བ་ཐམས་ཅད་ཅིག་ཅར་དུ་འབྱུང་བར་འགྱུར་ཏེ། རྒྱུ་ཡོད་ན་འབྲས་བུ་མི་འབྱུང་ངོ་ཞེས་བྱ་བ་འདི་ནི་མི་འདོད་དོ། །ནུར་ནུར་པོ་ལ་སོགས་པ་དང་མྱུ་གུ་ལ་སོགས་པའི་དངོས་པོ་རྣམས་ནི་

རིམ་གྱིས་འབྱུང་བར་ཡང་སྣང་སྟེ། དེ་ལྟ་བས་ན་རང་གི་རྒྱུ་བརྒྱུད་པས་མངོན་པར་འགྲུབ་པ་ཡིན་གྱི་དབང་ཕྱུག་ལ་སོགས་པའི་རྒྱུ་ཅན་ནི་མ་ཡིན་ནོ་ཞེས་བྱ་བར་ཤེས་སོ། །འགྲོ་བ་ནི་དབང་ཕྱུག་ལ་སོགས་པའི་རྒྱུ་གཅིག་པུ་ཅན་ཡིན་ནོ་ཞེས་ཁས་འཆེ་བ་དེའི་ཕྱོགས་ནི་རང་གི་རྒྱུས་རིམ་

གྱིས་སྐྱེ་བ་ཉིད་ལ་སོགས་པའི་མཚན་ཉིད་ཀྱི་ཆོས་ཀྱི་ཁྱད་པར་གྱིས་ན་སྐྱོན་དང་བཅས་པ་ཉིད་དུ་མངོན་ནོ། །དེ་ནི་དབང་ཕྱུག་གི་འདོད་པའི་དབང་གིས་ཡིན་ནོ་ཞེས་བྱ་བ་ནི་རིམ་གྱིས་ཁྱད་པར་དེ་ནི་དབང་ཕྱུག་གི་འདོད་པའི་དབང་གིས་ཡིན་ནོ། །ཇི་ལྟར་ཞེ་ན། འདི་ནི་ད་ལྟར་སྐྱེ་བར་གྱུར་

ཅིག་ཅེས་བྱ་བ་ནས་འདི་ནི་ཕྱིས་སྐྱེ་བར་གྱུར་ཅིག་ཅེས་བྱ་བའི་བར་སྨོས་ཏེ། རྒྱུ་དབང་ཕྱུག་ཏུ་སྨྲ་བའི་བསམ་པ་ནི་དེ་ལྟར་ན་དངོས་པོ་རྣམས་རིམ་གྱིས་ཀྱང་འབྱུང་ལ་དབང་ཕྱུག་གི་རྒྱུ་ཅན་ཡང་ཡིན་ནོ་སྙམ་པ་ཡིན་ནོ། །འོ་ན་ནི་འདོད་པ་ཐ་དད་པའི་ཕྱིར་ཞེས་བྱ་བ་རྒྱས་པར་འབྱུང་བ་ནི་

དབང་ཕྱུག་གི་འདོད་པ་ཡང་ཐ་དད་པའི་ཕྱིར་ལ་རྒྱུ་གཅིག་པ་ཉིད་དུ་ཡང་ཁས་བླངས་པའི་ཕྱིར་ཕྱོགས་སྔ་མ་དང་འགལ་བས་ཕྱོགས་ཀྱི་ཆོས་ཀྱི་རང་གི་ངོ་བོ་ལས་བཟློག་པར་གྱུར་པར་འགྱུར་རོ།། །།བམ་པོ་ཉི་ཤུ་གཅིག་པ། འདོད་པ་ཐ་དད་པ་དེ་དང་ཞེས་བྱ་བ་རྒྱས་པར་

Vol. 142 · folio 226b

འབྱུང་བ་ནི་འདོད་པ་ཐ་དད་པ་དེ་ཡང་དེའི་རྒྱུ་སྟེ། འདོད་པ་ཐ་དད་པ་དེའི་རྒྱུ་དབང་ཕྱུག་ལ་ཐ་དད་པ་མེད་པའི་ཕྱིར་ཅིག་ཅར་འབྱུང་བར་འགྱུར་ཏེ་གཅིག་པའི་ཕྱིར་རོ་ཞེས་བྱ་བའི་ཐ་ཚིག་གོ། །དེའི་ཕྱིར་ཅིག་ཅར་འབྱུང་བར་འགྱུར་རོ་ཞེས་པ་ཉེས་པ་གོང་དུ་བཤད་པ་དེ་ཉིད་དུ་འགྱུར་

རོ། །འོན་ཏེ་དབང་ཕྱུག་ནི་དེ་བསྐྱེད་པར་བྱ་བ་ལ་རྒྱུའི་ཁྱད་པར་ཐ་དད་པ་གཞན་ལ་ཡང་ལྟོས་སོ་སྙམ་དུ་སེམས་ན་དེའི་ཕྱིར་འོན་ཏེ་རྒྱུ་གཞན་ལ་ལྟོས་ན་ནི་ཞེས་བྱ་བ་འདི་རྒྱས་པར་སྨོས་ཏེ། རྒྱུ་དབང་ཕྱུག་ཁོ་ན་ཡིན་པར་མ་ཟད་དོ་ཞེས་བྱ་བར་ཁས་བླངས་ན་ཉེས་པ་དེ་ཉིད་དུ་འགྱུར་རོ། །

དེ་དག་ཀྱང་ཞེས་བྱ་བ་རྒྱས་པར་འབྱུང་བ་ནི་རྒྱུའི་བྱེ་བྲག་དེ་དག་ཀྱང་རིམ་གྱིས་སྐྱེ་བར་འདོད་ན་རྒྱུ་གཞན་གྱི་བྱེ་བྲག་རྣམས་ཀྱང་ཡང་རྒྱུ་གཞན་གྱི་བྱེ་བྲག་ལ་ལྟོས་པའི་ཕྱིར་ཐུག་པ་མེད་པར་ཐལ་བར་འགྱུར་ཏེ། དེ་དག་ཀྱང་རྒྱུ་གཞན་གྱི་བྱེ་བྲག་ལ་ལྟོས་ལ་དེ་དག་ཀྱང་རྒྱུ་གཞན་གྱི་བྱེ་བྲག་

ལ་ལྟོས་པས་མཐའ་ཐུག་པ་མེད་པར་ཐལ་བར་འགྱུར་རོ། །ཤཱཀྱའི་སྲས་པོའི་ལུགས་ཁོ་ན་ཞེས་བྱ་བ་ནི་ཤཱཀྱའི་སྲས་པོའི་ལུགས་འཁོར་བ་ཐོག་མ་མེད་པ་ཞེས་བྱ་བ་འདི་ལས་མ་འདས་པར་འགྱུར་རོ། །ཅིག་ཅར་ཡིན་དུ་ཟིན་ཀྱང་ཞེས་བྱ་བ་རྒྱས་པར་འབྱུང་བ་ནི་ཇི་སྟེ་དབང་

ཕྱུག་གི་འདོད་པ་རྣམས་ཅིག་ཅར་ཡིན་ཡང་འགྲོ་བ་ནི་ཅིག་ཅར་མ་ཡིན་ནོ། །ཅིའི་ཕྱིར་ཞེ་ན། འདོད་པ་ཇི་ལྟ་བར་སྐྱེ་བའི་ཕྱིར་ཏེ། འདོད་པ་གང་གིས་འདི་ནི་ད་ལྟར་སྐྱེ་བར་གྱུར་ཅིག་སྙམ་པ་དེ་ནི་འདོད་པ་དེ་ལས་ད་ལྟར་ཁོ་ན་སྐྱེ་ལ། གང་གིས་ཕྱིས་སྐྱེ་བར་གྱུར་ཅིག་སྙམ་པ་དེ་ནི་

དེ་ལས་ཕྱིས་སྐྱེའོ། །འདི་ནི་ཆེས་ཕྱིས་རྣམ་པ་འདི་ལྟ་བུར་གྱུར་ཅིག་སྙམ་པ་དེ་ནི་དེ་ལས་ཆེས་ཕྱིས་དེ་ཁོ་ན་ལྟ་བུར་སྐྱེ་བར་འགྱུར་རོ་སྙམ་དུ་སེམས་ན། དེ་ནི་མ་ཡིན་ཏེ། དེ་དག་ལ་ཕྱིས་ཁྱད་པར་མེད་པའི་ཕྱིར་རོ། །འདོད་པ་དེ་དག་ལ་ཕྱིས་ཁྱད་པར་འགའ་ཡང་མེད་དེ། ཇི་ལྟར་སྔོན་

རྩོམ་པར་མི་བྱེད་པ་དེ་ཁོ་ན་བཞིན་དུ་ཕྱིས་ཀྱང་རྩོམ་པར་མི་འགྱུར་བའམ། ཇི་ལྟར་ཕྱིས་རྩོམ་པར་མི་བྱེད་པ་ལྟ་བུར་སྔོན་ཡང་དེ་དང་འདྲའོ། །རྣམ་པ་གཅིག་ཏུ་ན་སྐྱེད་པར་བྱེད་པ་གཅིག་ཁོ་ནར་ཟད་ཀྱི་གཞན་ནི་མེད་པས་དེ་དག་ལ་ཁྱད་པར་མེད་དོ། །དེའི་ཕྱིར་དབང་ཕྱུག་གི་

Vol. 142 · folio 227a

འདོད་པ་དག་བཞིན་དུ་དངོས་པོ་རྣམས་ཅིག་ཅར་དུ་འབྱུང་བར་འགྱུར་བ་ཉིད་དོ། །འོན་ཏེ་འདོད་པའི་ཁྱད་པར་རྣམ་པ་རྒྱུ་གཞན་ལ་ལྟོས་པ་ཉིད་ཡིན་ན་ནི་ཉེས་པ་སྔ་མ་བཞིན་ནོ། །དེ་ལ་དབང་ཕྱུག་མ་ཡིན་པར་འགྱུར་ཏེ་ཞེས་བྱ་བ་ནི་ཐབས་མེད་པར་དེ་བྱེད་པར་མི་

ནུས་པའི་ཕྱིར་དགའ་བ་དེ་ལ་དབང་ཕྱུག་མ་ཡིན་པར་འགྱུར་ཏེ། དབང་ཕྱུག་གི་དབང་ཕྱུག་ཉིད་ནི་འདིའི་རྒྱུ་གཞན་ལ་མི་ལྟོས་པར་བྱེད་པར་འགྱུར་བ་གང་ཡིན་པ་འདི་ཡིན་ནོ། །གཞན་ལའང་དེ་ཁོ་ན་དང་འདྲའོ་ཞེས་བྱ་བ་ནི་ཇི་ལྟར་དགའ་བ་ལ་དབང་ཕྱུག་མ་ཡིན་པ་དེ་བཞིན་དུ་གཞན་

འཇིག་རྟེན་གསུམ་ཆར་ལ་ཡང་དབང་ཕྱུག་མ་ཡིན་ནོ་ཞེས་བྱ་བར་རྗེས་སུ་དཔག་པའོ། །གལ་ཏེ་ཡང་དབང་ཕྱུག་ཅེས་བྱ་བ་རྒྱས་པར་འབྱུང་བ་ནི་དམྱལ་བ་ལ་སོགས་པར་སྐྱེ་དགུ་ཕྱུང་ན་སྟེ། གལ་ཏེ་སྐྱེ་དགུ་གནོད་པ་མང་པོ་དང་འབྲལ་བ་སྟེ། ནད་ལ་སོགས་པ་གནོད་པ་རྣམ་

པ་མང་པོ་དུ་མ་དག་དང་འབྲེལ་ཞིང་གཙེས་པ་རྣམས་ཕྱུང་ནས་དགའ་བར་འགྱུར་ན་དེ་ལ་ཕྱག་འཚལ་ལོ་ཞེས་བྱ་བའི་ཐ་ཚིག་འདི་ནི་བསྟིང་བ་ཡིན་ནོ། །གང་ཕྱིར་མ་ལུས་སྲེག་པ་དང་། །ཞེས་བྱ་བ་ལ་སོགས་པ་ནི་གང་གི་ཕྱིར་མ་ལུས་པར་སྲེག་པར་བྱེད་པ་དེའི་ཕྱིར་དྲག་པོ་ཞེས་

བྱ་སྟེ། ཐམས་ཅད་ལ་ཡང་དེ་དང་འདྲའོ། །དོན་གཞན་དག་གི་ཞེས་བྱ་བ་ནི་མྱུ་གུ་ལ་སོགས་པ་ལ་ས་བོན་ལ་སོགས་པའི་སྐྱེས་བུའི་བྱེད་པ་མངོན་སུམ་དུ་ནི་སྙོམས་པར་འགྱུར་རོ། །རྒྱུ་རྣམས་ལས་གཞན་གྱི་བྱེད་པ་མི་སྣང་བའི་ཕྱིར་རོ་ཞེས་བྱ་བ་ནི་མིག་དང་གཟུགས་དང་སྣང་བ་

དང་ཡིད་ལ་བྱེད་པ་ལས་མིག་གི་རྣམ་པར་ཤེས་པ་ལ་སོགས་པ་སྐྱེ་བ་དང་། །ས་བོན་དང་། ཞིང་དང་། ཆུ་ལ་སོགས་པ་ལས་མྱུ་གུ་ལ་སོགས་པ་སྐྱེ་བ་ལ་གཞན་གྱི་བྱེད་པ་མི་དམིགས་པའི་ཕྱིར་ཏེ། ཇི་ལྟར་དེ་དག་ཡོད་ན་ཡོད་པའི་ཕྱིར་ལ་དེ་དག་མེད་ན་ཡང་མེད་པའི་ཕྱིར་

མིག་གི་རྣམ་པར་ཤེས་པ་ལ་སོགས་པ་སྐྱེ་བ་མིག་ལ་སོགས་པ་དང་། མྱུ་གུ་ལ་སོགས་པ་སྐྱེ་བ་ལ་ས་བོན་ལ་སོགས་པའི་བྱེད་པ་སྣང་བ་དེ་ལྟ་བུར་མིག་ལ་སོགས་པ་ཡང་ཡོད། ས་བོན་ལ་སོགས་པ་ཡང་ཡོད་ཀྱང་གང་གིས་ན་དེ་ཡང་དེ་དག་སྐྱེ་བ་ལ་བྱེད་པ་ཡིན་པར་རྟོགས་པར་

Vol. 142 · folio 227b

འགྱུར་བ་དབང་ཕྱུག་མེད་ན་མིག་གི་རྣམ་པར་ཤེས་པ་ལ་སོགས་པ་དང་། མྱུ་གུ་ལ་སོགས་པ་མེད་པ་དང་། ཡང་དེ་ཡོད་ན་ཡོད་པའང་མ་མཐོང་ངོ་། །དེའི་ཕྱིར་དེ་བྱེད་པ་མ་མཐོང་བས་རྒྱུ་རྣམས་དང་བཅས་པའི་དབང་ཕྱུག་ལ་རྒྱུར་རྟོག་པར་བྱེད་པ་རྣམས་ནི་གུས་པར་སྨྲ་བ་འབའ་

ཞིག་ཏུ་ཟད་པར་འགྱུར་རོ། །གཞན་ཡང་ལྷན་ཅིག་བྱེད་པའི་རྒྱུ་དང་པོ་རྣམས་ལ་ཡང་ཞེས་བྱ་བ་རྒྱས་པར་འབྱུང་བ་ནི་དབང་ཕྱུག་ནི་ལྷན་ཅིག་བྱེད་པ་དང་པོ་གང་དག་ཡིན་པ་དེ་དག་ལ་དབང་ཕྱུག་དེའི་དབང་ཕྱུག་མེད་པར་འགྱུར་ཏེ། དེ་དག་ནི་འབྲས་བུ་སྐྱེད་པ་ལ་རང་གི་མཐུས་བྱ་བ་

བྱེད་དོ། །ལྷན་ཅིག་བྱེད་པ་དང་པོ་མ་ཡིན་པ་རྣམས་ལ་དབང་ཕྱུག་ཡིན་པས་དང་པོ་ཞེས་བྱ་བ་སྨོས་སོ། །དང་པོ་བྱུང་བ་དབང་ཕྱུག་གི་རྒྱུ་ལས་བྱུང་བ་ཡིན་ཏེ། དེ་ལྟར་ན་སྐྱེས་བུ་བྱེད་པ་མངོན་སུམ་ཡང་བསྙོན་པར་མི་འགྱུར་ལ། རྒྱུ་དག་ལས་གཞན་གྱི་བྱེད་པ་མ་མཐོང་ཡང་འགྲོ་བའི་

རྒྱུ་དབང་ཕྱུག་ཡིན་ནོ་ཞེས་བྱ་བ་ཡང་ཉེས་པ་མེད་དོ་ཞེ་ན། དེ་ཡང་རྒྱུ་གཞན་ལ་མི་ལྟོས་པའི་ཕྱིར་ཏེ། དང་པོ་བྱུང་བ་དེ་ཡང་རྒྱུ་གཞན་ལ་མི་ལྟོས་པའི་ཕྱིར་རྒྱུ་དབང་ཕྱུག་གཅིག་པུ་ཁོ་ནར་ཟད་ཀྱི་གཞན་ནི་མེད་པས་དབང་ཕྱུག་བཞིན་དུ་ཐོག་མ་མེད་པ་ཉིད་དུ་ཐལ་བར་འགྱུར་བ་ཞིག་ན་དེ་ནི་མི་

འདོད་དོ། །དེ་ལྟ་བས་ན་དབང་ཕྱུག་ནི་རྒྱུ་མ་ཡིན་ནོ། །དེ་བཞིན་དུ་གཙོ་བོ་ལ་ཡང་ཅི་རིགས་པར་བརྗོད་པར་བྱའོ་ཞེས་བྱ་བ་ལ་གཙོ་བོ་ནི་སེམས་པ་མེད་པ་ཡིན་ནོ། །དེ་ལྟ་བས་ན་དེ་ལ་འདོད་པ་རྣམ་པར་གཞག་པ་མ་གཏོགས་པ་ལྷག་མ་དགག་པའི་ཚུལ་བརྗོད་པར་བྱ་བ་ཡིན་ཏེ། གལ་

ཏེ་རྒྱུ་གཙོ་བོ་གཅིག་པུ་ཁོ་ན་ཞིག་ཡིན་ན་འགྲོ་བ་ཐམས་ཅད་ཅིག་ཅར་དུ་འབྱུང་བར་འགྱུར་བ་ཞིག་ན། དང་པོ་རྣམས་ནི་རིམ་གྱིས་འབྱུང་བར་ཡང་སྣང་ངོ་། །འོན་ཏེ་རྒྱུ་གཞན་ལ་ལྟོས་ན་ནི་གཙོ་བོ་གཅིག་པུ་ཁོ་ན་རྒྱུ་མ་ཡིན་པར་འགྱུར་རོ། །དེ་དག་ཀྱང་རིམ་གྱིས་སྐྱེ་བ་ལ་རྒྱུ་གཞན་གྱི་བྱེ་

བྲག་ལ་ལྟོས་པའི་ཕྱིར་ཐུག་པ་མེད་པར་ཐལ་བར་འགྱུར་བས་ཞེས་བྱ་བ་རྒྱས་པར་སྦྱར་བར་བྱའོ། །ཡང་འགྲོ་བའི་རྒྱུ་གཅིག་པུ་ཡོངས་སུ་བཟུང་བས་དོན་གཞན་དག་གི་སྐྱེས་བུ་བྱེད་པ་མངོན་སུམ་ནི་བསྙོན་པར་འགྱུར་རོ། །རྒྱུ་རྣམས་དང་བཅས་པའི་གཙོ་བོ་ལ་ཡང་རྒྱུར་རྟོག་པ་

Vol. 142 · folio 228a

རྣམས་ནི་གུས་པར་སྨྲ་བ་འབའ་ཞིག་ཏུ་ཟད་དེ་རྒྱུ་རྣམས་ལས་གཞན་གྱི་བྱེད་པ་མི་སྣང་བའི་ཕྱིར་རོ། །གཙོ་བོ་དེ་ལྷན་ཅིག་བྱེད་པའི་རྒྱུ་དང་པོ་རྣམས་ལ་ཡང་གཙོ་བོ་མ་ཡིན་པར་འགྱུར་རོ། །འོན་ཏེ་དང་པོ་བྱུང་བ་གཙོ་བོའི་རྒྱུ་ལས་བྱུང་བ་ཡིན་ནོ་ཞེ་ན། དང་པོ་འབྱུང་བ་ཆེན་

པོ་ལ་སོགས་པ་འབྱུང་བའི་ངོ་བོ་ཉིད་དེ་ཡང་དང་པོ་མི་དམིགས་པའི་ཕྱིར་གཙོ་བོ་བཞིན་དུ་ཐོག་མ་མེད་པ་ཉིད་དུ་ཐལ་བར་འགྱུར་རོ། །གཙོ་བོ་ནི་རྟག་པ་ཡིན་ལ་ཆེན་པོའི་རྒྱུ་ཡང་གཙོ་བོ་ཡིན་པས་གཙོ་བོ་ནི་སྔ་ལ་ཆེན་པོ་ནི་འཕྱིའོ་ཞེས་བྱ་བར་ཡང་མི་འགྲུབ་པོ། །གཙོ་བོ་སྐྱེད་པར་བྱེད་པའི་ཆོས་

ཅན་ཡིན་པས་རྒྱུ་གཞན་ལ་མི་ལྟོས་པའི་ཕྱིར་དེས་རྟག་ཏུ་འཇུག་པར་ཡང་བྱ་དགོས་སོ། །སྣང་བ་ནི་གསལ་བར་བྱ་བའི་དོན་གསལ་བར་བྱས་ནས་ཡང་གསལ་བར་མི་བྱེད་པ་མ་ཡིན་ཏེ། ངོ་བོ་ཉིད་ནི་དོན་བྱས་པ་ལ་ལྟོས་པ་མེད་དོ། །བློ་མ་སྦྱངས་པ་རྣམས་ནི་དོན་དམ་པའི་བསྟན་བཅོས་དག་གིས་བློ་

མ་སྦྱངས་པ་རྣམས་ཞེས་བྱ་བའི་ཐ་ཚིག་གོ། །དེའི་རྒྱུ་འབྱུང་བ་རྣམ་པ་གཉིས་ཞེས་བྱ་བ་ནི་འབྱུང་བ་སྔར་བྱུང་བ་རྣམས་ནི་རང་གི་རྒྱུ་ཕྱིས་འབྱུང་བ་རྣམས་ཀྱི་སྐལ་བ་མཉམ་པའི་རྒྱུ་ཡིན་ནོ། །ཐ་དད་དུ་མི་འཇུག་པ་རྣམས་ནི་ལྷན་ཅིག་འབྱུང་བའི་རྒྱུ་ཡིན་ནོ། །འབྱུང་བའི་རྗེས་སུ་མཐུན་པར་བྱེད་པའི་ཕྱིར་རོ་

ཞེས་བྱ་བ་ནི་འབྱུང་བ་ལས་གྱུར་པ་ནི་འབྱུང་བ་རྣམས་ཀྱི་རྗེས་སུ་མཐུན་པར་བྱེད་པ་ཡིན་ཏེ། དེ་དག་གྱུར་ན་འགྱུར་བའི་ཕྱིར་རོ། །སློབ་དཔོན་ལ་སོགས་པ་ལ་བརྟེན་པ་བཞིན་ནོ་ཞེས་བྱ་བ་ནི་དཔེར་ན་དགེ་སློང་སློབ་དཔོན་ལ་བརྟེན་པ་བཞིན་ནོ། །སོགས་པ་ཞེས་བྱ་བའི་སྒྲས་ནི་མཁན་པོ་ལ་ཡང་

བརྟེན་པ་ཡིན་ཏེ། དེ་དང་འདྲ་བར་འབྱུང་བ་ལས་གྱུར་པ་ཡང་འབྱུང་བ་རྣམས་ལ་བརྟེན་ཏོ། །དེ་ལྟར་ན་དེ་དག་ནི་ཞེས་བྱ་བ་རྒྱས་པར་འབྱུང་བ་ལ་འབྱུང་བ་དེ་དག་སྐྱེ་བའི་རྒྱུ་ཉིད་དུ་བསྟན་པ་ནི་དེ་དག་ལས་འབྱུང་བ་ལས་གྱུར་པ་སྐྱེ་བའི་ཕྱིར་རོ། །འགྱུར་བའི་རྒྱུ་ཉིད་དུ་ནི་དེའི་རྗེས་སུ་

མཐུན་པར་བྱེད་པའི་ཕྱིར་རོ། །རྟེན་གྱི་རྒྱུ་ཉིད་ནི་རྟེན་དུ་གྱུར་པ་ཡིན་པའི་ཕྱིར་རོ། །གནས་པའི་རྒྱུ་ཉིད་ནི་རྒྱུན་མི་འཆད་པའི་རྒྱུ་ཡིན་པའི་ཕྱིར་རོ། །འཕེལ་བའི་རྒྱུ་ཉིད་ནི་འཕེལ་བར་བྱེད་པའི་རྒྱུ་ཡིན་པའི་ཕྱིར་རོ། །བྱེ་བྲག་མེད་པར་འཇུག་པའི་ཕྱིར་ཞེས་བྱ་བ་ནི་བགེགས་མི་བྱེད་

Vol. 142 · folio 228b

པའི་དངོས་པོར་གནས་པས་གཞན་དག་གི་ཡང་རྒྱུ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །ལུས་དང་ངག་གི་ལས་སེམས་ཀྱི་རྗེས་སུ་འཇུག་པ་ཕན་ཚུན་དུ་ཡིན་གྱི་ཞེས་བྱ་བ་ལུས་ཀྱི་ལས་སེམས་ཀྱི་རྗེས་སུ་འཇུག་པ་ནི་བསམ་གཏན་དང་ཟག་པ་མེད་པའི་སྡོམ་པས་བསྡུས་པ་སྲོག་

གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་སྤོང་བའི་བྱེ་བྲག་གིས་རྣམ་པ་གསུམ་མོ། །ངག་གི་ལས་ཀྱང་བསམ་གཏན་དང་ཟག་པ་མེད་པའི་སྡོམ་པས་བསྡུས་པ་ཁོ་ན་བརྫུན་དུ་སྨྲ་བ་དང་། ཕྲ་མ་དང་། ཚིག་རྩུབ་པོ་དང་། ཚིག་འཁྱལ་པ་སྤོང་བའི་བྱེ་

བྲག་གིས་རྣམ་པ་བཞིའོ། །ལུས་དང་ངག་གི་ལས་རྣམ་པ་བདུན་པོ་དེ་ནི་ཕན་ཚུན་དུ་ལྷན་ཅིག་འབྱུང་བའི་རྒྱུ་ཡིན་ཏེ། རྒྱུར་བྱས་པའི་གཟུགས་སྲོག་གཅོད་པ་སྤོང་བ་ཡང་གཞན་དྲུག་གི་ལྷན་ཅིག་འབྱུང་བའི་རྒྱུ་ཡིན་ལ་དྲུག་པོ་དེ་དག་ཀྱང་དེའི་ལྷན་ཅིག་འབྱུང་བའི་རྒྱུ་ཡིན་ནོ་ཞེས་བྱ་བ་ལྟ་བུར་

ཐམས་ཅད་སྦྱར་བར་བྱའོ། །གཞན་ནི་མ་ཡིན་ནོ་ཞེས་བྱ་བ་ནི་རྒྱུར་བྱས་པའི་གཟུགས་མིག་ལ་སོགས་པ་ཐམས་ཅད་དང་སོ་སོར་ཐར་པའི་སྡོམ་པ་ལ་སོགས་པས་བསྡུས་པའི་བར་ཡང་ཕན་ཚུན་ལྷན་ཅིག་འབྱུང་བའི་རྒྱུ་མ་ཡིན་ཏེ། ཚོགས་པ་ཐ་དད་པའི་ཕྱིར་རོ། །སྐལ་བ་མཉམ་པའི་རྒྱུ་

ཡིན་ནོ་ཞེས་བྱ་བ་ནི་དགེ་བ་ཡང་རང་གི་རྒྱུད་ཀྱི་དགེ་བ་ཡིན་ལ། ཉོན་མོངས་པ་ཅན་ཡང་ཉོན་མོངས་པ་ཅན་གྱི་ཡིན་ནོ་ཞེས་བྱ་བ་ལ་སོགས་པ་ཡིན་ནོ། །ལུས་དང་ངག་གི་ལས་གང་གི་ཞེས་བྱ་བ་ནི་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པའི་ངོ་བོ་ཉིད་མཉམ་པར་བཞག་པ་དང་མཉམ་པར་

མ་བཞག་པའི་སྟེ་ཅི་རིགས་པར་སྦྱར་བར་བྱའོ། །དེ་རྣམས་གཅིག་ཅེས་བྱ་བ་ནི་རྣམ་པར་སྨིན་པའི་རྒྱུ་གཅིག་པུ་ཁོ་ན་ཡིན་ནོ་ཞེས་བྱ་བར་ངེས་པར་གཟུང་བ་ཡིན་ཏེ། བྱེད་རྒྱུའི་རྒྱུ་ནི་དེ་ཁོ་ན་བཞིན་དུ་མི་བགྲང་བའི་ཕྱིར་རོ། །ཚོགས་པ་ཐ་དད་པ་ལ་སོགས་པའི་ཕྱིར་ཡང་ལྷན་ཅིག་འབྱུང་བའི་རྒྱུ་

ལ་སོགས་པར་མི་རུང་བའི་ཕྱིར་རོ། །གཟུགས་ཀྱི་ཁམས་ན་མི་དགེ་བ་མེད་ཀྱི་ཞེས་བྱ་བ་ནི་དེ་འདོད་པ་དག་ལས་དབེན་པ་སྡིག་པ་མི་དགེ་བའི་ཆོས་རྣམས་ལས་དབེན་པ་རྟོག་པ་དང་བཅས་པ་དཔྱོད་པ་དང་བཅས་པ་དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་

Vol. 142 · folio 229a

རྫོགས་པར་བྱས་ཏེ་གནས་སོ་ཞེས་འབྱུང་བའི་ཕྱིར་རོ། །དེ་ལ་གཟུགས་ཀྱི་ཁམས་ན་མི་དགེ་བ་མེད་པས་མི་དགེ་བས་དབེན་པ་ལས་སྐྱེས་པ་དགེ་བ་གང་ཡིན་པ་དེ་ནི་དབེན་པ་ལས་སྐྱེས་པ་ཞེས་བྱའོ། །རྒྱུ་ཇི་ལྟ་བར་འབྲས་བུ་ཡང་དེ་དང་འདྲ་བས་དེར་སྐྱེས་

པ་ལ་ཡང་མི་དགེ་བ་མེད་དོ་ཞེས་བྱ་བར་མངོན་ནོ། །མཇུག་ཐོགས་སུ་ཞེས་འོག་ནས་འཆད་དེ་ཞེས་བྱ་བ་ནི་ཚིག་ལེའུར་བྱས་པའི་མཇུག་ནས་ཏེ་དེ་འདིར་སྦྱར་བར་བྱའོ། །སྙོམས་པར་འཇུག་པའི་ཚེ་དགེ་བ་ཞེས་བྱ་བ་ནི་འདོད་པ་ན་སྤྱོད་པའི་སེམས་དགེ་བ་སྦྱོར་བ་ལས་བྱུང་བའི་མཇུག་

ཐོགས་སུ་བསམ་གཏན་དང་པོའི་སའི་སེམས་ཉེར་བསྡོགས་པའམ། དངོས་གཞི་པ་འབྱུང་ངོ་། །ཉིང་མཚམས་སྦྱོར་བའི་ཚེ་བསྒྲིབས་པའོ་ཞེས་བྱ་བ་ནི་ཉིང་མཚམས་སྦྱོར་བའི་ཚེ་འདོད་པ་ན་སྤྱོད་པའི་སེམས་སྐྱེ་བས་ཐོབ་པ་འཆི་བའི་མཇུག་ཐོགས་སུ་གཟུགས་ན་སྤྱོད་པའི་སེམས་

བསྒྲིབས་ལ་ལུང་དུ་མ་བསྟན་པ་འབྱུང་སྟེ། སྐྱེ་བའི་སྲིད་པ་ཉོན་མོངས་ཅན། །རང་གི་ས་པའི་ཉོན་མོངས་ཀུན། །ཞེས་འབྱུང་བའི་ཕྱིར་རོ། །སྐྱེ་བ་ནི་འདིར་སྲིད་པ་བར་མར་སྐྱེ་བ་ཡིན་པར་བསམས་པ་སྟེ། དེ་ལྟ་བས་ན་སྲིད་པ་བར་མར་ཉིང་མཚམས་སྦྱོར་བ་ཡང་ཉོན་

མོངས་པ་ཅན་ཡིན་པར་རིག་པར་བྱའོ། །རིང་བ་ཉིད་བཞིས་རིང་བ་ཡིན་ཏེ་ཞེས་བྱ་བ་དེ་ལ་རྟེན་རིང་བ་ཉིད་ནི་གཟུགས་ན་སྤྱོད་པའི་རྟེན་གྱིས་འདོད་པ་ན་སྤྱོད་པའི་སྤྲུལ་པའི་སེམས་མངོན་དུ་བྱེད་པ་ཇི་ལྟ་བར་གཟུགས་མེད་པ་ན་སྤྱོད་པའི་རྟེན་གྱིས་འདོད་པ་ན་སྤྱོད་པའི་ཆོས་འགའ་ཡང་

མངོན་དུ་མི་བྱེད་པ་གང་ཡིན་པ་འདི་ཡིན་ཏེ་རིང་བ་ཉིད་འདིས་ན་འདོད་པའི་ཁམས་ནས་གཟུགས་མེད་པའི་ཁམས་དག་རིང་བ་ཡིན་ནོ། །རྣམ་པ་རིང་བ་ཉིད་ནི་གཟུགས་ན་སྤྱོད་པས་རགས་པ་ཞེས་བྱ་བ་ལ་སོགས་པ་རྣམ་པ་དག་ཏུ་ཇི་ལྟ་བར་གཟུགས་མེད་པ་ན་སྤྱོད་པའི་སེམས་ཀྱིས་འདོད་

པའི་ཁམས་རྣམ་པར་མི་བྱེད་པ་གང་ཡིན་པའོ། །དམིགས་པ་རིང་བ་ཉིད་ནི་གཟུགས་ན་སྤྱོད་པས་ཇི་ལྟ་བར་གཟུགས་མེད་པ་ན་སྤྱོད་པའི་སེམས་ཀྱིས་འདོད་པའི་ཁམས་ལ་མི་དམིགས་པ་གང་ཡིན་པའོ། །གཟུགས་མེད་དངོས་གཞིའི་དགེ་བ་ནི། །ཟག་བཅས་འོག་མ་སྤྱོད་

Vol. 142 · folio 229b

ཡུལ་མིན། །ཞེས་འབྱུང་བའི་ཕྱིར་གཟུགས་མེད་པ་ན་སྤྱོད་པའི་སེམས་ཀྱིས་གཟུགས་ཀྱི་ཁམས་ཀྱང་མི་དམིགས་པ་མ་ཡིན་ནམ། ཇི་ལྟར་འདོད་པའི་ཁམས་ཁོ་ན་ནས་གཟུགས་མེད་པའི་ཁམས་དག་རིང་བ་ཡིན་ནོ་ཞེས་བྱ་བ་འདི་བརྗོད་ཅེ་ན། གཟུགས་མེད་པ་ན་

སྤྱོད་པ་དངོས་གཞིའི་སེམས་ཀྱིས་གཟུགས་ཀྱི་ཁམས་ལ་མི་དམིགས་པ་ནི་བདེན་མོད་ཀྱི་འོན་ཀྱང་ནམ་མཁའ་མཐའ་ཡས་སྐྱེ་མཆེད་ཀྱི་ཉེར་བསྡོགས་ཀྱི་སེམས་ཀྱིས་བསམ་གཏན་བཞི་པ་ལ་རགས་པ་ལ་སོགས་པའི་རྣམ་པར་དམིགས་ཏེ། དེའི་ཕྱིར་འདོད་པའི་ཁམས་ནས་

ལྟ་བུར་གཟུགས་ཀྱི་ཁམས་ནས་གཟུགས་མེད་པའི་ཁམས་དག་རིང་བར་རྣམ་པར་མི་གཞག་གོ། །གཉེན་པོ་རིང་བ་ཉིད་ནི་གཟུགས་ཀྱི་ཁམས་ཀྱི་ཇི་ལྟ་བར་གཟུགས་མེད་པའི་ཁམས་དག་འདོད་པའི་ཁམས་ཀྱི་གཉེན་པོ་མ་ཡིན་པ་གང་ཡིན་པ་སྟེ། དེ་ལྟར་ན་རྟེན་དང་། རྣམ་པ་

དང་། དམིགས་པ་དང་། གཉེན་པོ་རིང་བ་ཉིད་དག་གིས་ཀྱང་འདོད་པའི་ཁམས་ནས་གཟུགས་མེད་པའི་ཁམས་དག་རིང་བ་ཡིན་ནོ། །དེ་ལྟ་བས་ན་འདོད་པ་ན་སྤྱོད་པའི་དགེ་བའི་མཇུག་ཐོགས་སུ་གཟུགས་མེད་པ་ན་སྤྱོད་པའི་དགེ་བ་མི་འབྱུང་ངོ་། །སློབ་པ་དང་། མི་སློབ་པའོ་

ཞེས་བྱ་བ་ནི་སྙོམས་པར་འཇུག་པའི་ཚེ་འདོད་པ་ན་སྤྱོད་པའི་དགེ་བ་སྦྱོར་བ་ལས་བྱུང་བའི་མཇུག་ཐོགས་སུ་སློབ་པ་སྔོན་ཐོབ་པ་འབྱུང་སྟེ། མི་སློབ་པ་ཡང་དེ་ཁོ་ན་དང་འདྲའོ། །ཉོན་མོངས་པ་ཅན་གྱི་སྙོམས་པར་འཇུག་པས་གཟིར་བ་ཞེས་བྱ་བ་ནི་རྣལ་འབྱོར་པ་ཉོན་མོངས་པ་ཅན་གྱི་

སྙོམས་པར་འཇུག་པས་གཟིར་བ་ནི་ཉིས་ན་ས་འོག་མའི་དགེ་བ་ཡང་སླའི། གོང་མའི་ཉོན་མོངས་པ་ནི་མ་ཡིན་ནོ་སྙམ་ནས་ས་འོག་མའི་དགེ་བ་ལ་བརྟེན་པའི་ཕྱིར་བསྒྲིབས་ལ་ལུང་དུ་མ་བསྟན་པ་ལས་ཀྱང་དགེ་བའི་སེམས་འབྱུང་ངོ་། །གཟུགས་དང་གཟུགས་མེད་པའི་སེམས་ཐམས་ཅད་

ཀྱི་ཞེས་བྱ་བ་ནི་དགེ་བ་དང་ལུང་དུ་མ་བསྟན་པའི་སེམས་ལ་འཆི་བ་སྲིད་པའི་ཕྱིར་རོ། །དེ་ལས་བཞི་སྟེ་ཞེས་བྱ་བ་ནི་མི་དགེ་བ་ལས་རང་གི་ས་པ་བཞི་ཁོ་ན་སྟེ། མི་དགེ་བ་ནི་ས་གོང་མ་པའི་དགེ་བའི་སྦྱོར་བ་ཉིད་ཡིན་པར་མི་སྲིད་པའི་ཕྱིར་དང་། དེ་མ་སྤངས་པར་ས་གོང་མར་སྐྱེ་བའི་སེམས་མི་

Vol. 142 · folio 230a

འབྱུང་བའི་ཕྱིར་རོ། །སྤྲུལ་པའི་སེམས་ཀྱི་མཇུག་ཐོགས་སུ་དགེ་བ་ཞེས་བྱ་བ་ནི་སྤྲུལ་པ་ལས་ལྡང་བའི་ཚེའོ། །དེའི་མཇུག་ཐོགས་སུ་སེམས་བཅུ་གཅིག་ཁོ་ན་འབྱུང་སྟེ་ཞེས་བྱ་བ་ནི་ཉིང་མཚམས་སྦྱོར་བ་དང་། སྙོམས་པར་འཇུག་པ་དང་། དེ་ལས་ལྡང་

བ་དང་སྤྲུལ་པ་ལ་འཇུག་པའི་ཚེ་དག་ན་སེམས་བཅུ་གཅིག་འབྱུང་བ་སྲིད་དོ། །ཇི་ལྟར་ཞེ་ན་རང་གི་ས་པ་གསུམ་དང་འདོད་པ་ན་སྤྱོད་པ་རྣམས་ཏེ། ལྡང་བའི་ཚེ་དགེ་བ་དང་ཉིང་མཚམས་སྦྱོར་བའི་ཚེ་ཉོན་མོངས་པ་ཅན་གཉིས་དང་། མ་བསྒྲིབས་ལ་ལུང་དུ་མ་བསྟན་པ་སྤྲུལ་པའི་སེམས་

དང་། གཟུགས་མེད་པ་ན་སྤྱོད་པ་ཉིང་མཚམས་སྦྱོར་བའི་ཚེ་བསྒྲིབས་ལ་ལུང་དུ་མ་བསྟན་པ་དང་། སྙོམས་པར་འཇུག་པའི་ཚེ་དགེ་བ་དང་སློབ་པ་དང་མི་སློབ་པ་དག་གོ། །གཟུགས་མེད་པ་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་ནི་གདོན་མི་ཟ་བར་མི་འབྱུང་སྟེ། ཉོན་

མོངས་པ་ཅན་མ་ཡིན་པའི་ཕྱིར་དང་། སྙོམས་པར་འཇུག་པ་ལ་སོགས་པར་མི་རུང་བའི་ཕྱིར་རོ། །དེ་ནི་གཟུགས་ན་སྤྱོད་པ་དང་འདོད་པ་ན་སྤྱོད་པའི་སྤྲུལ་པའི་སེམས་ཇི་ལྟ་བར་སྦྱོར་བས་ཐོབ་པར་བྱ་བ་ཡང་མ་ཡིན་ནོ། །འདོད་པ་ན་སྤྱོད་པའི་ཉོན་མོངས་པ་ཅན་གཉིས་དང་གཟུགས་མེད་

པ་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་མ་གཏོགས་སོ་ཞེས་བྱ་བ་ནི་གཟུགས་ན་སྤྱོད་པའི་དགེ་བ་ནི་འདོད་པ་ན་སྤྱོད་པའི་ཉོན་མོངས་པ་ཅན་གཉིས་ལས་མི་འབྱུང་སྟེ། ཉོན་མོངས་པ་ཅན་གཉིས་པོ་དེ་ནི་དེའི་སྦྱོར་བ་ཡིན་པར་འོས་པ་མ་ཡིན་པའི་ཕྱིར་རོ། །དེ་ཉིད་ཀྱི་ཕྱིར་དང་། དགེ་

བས་ཉིང་མཚམས་སྦྱོར་བ་མེད་པའི་ཕྱིར་དེ་ནི་གཟུགས་མེད་པ་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་ལས་ཀྱང་མི་འབྱུང་ངོ་། །འདོད་པ་ན་སྤྱོད་པའི་ཉོན་མོངས་པ་ཅན་གཉིས་དང་སློབ་པ་དང་མི་སློབ་པ་མ་གཏོགས་སོ་ཞེས་བྱ་བ་ནི་གཟུགས་ན་སྤྱོད་པའི་བསྒྲིབས་ལ་ལུང་དུ་མ་བསྟན་

པ་ནི་འདོད་པ་ན་སྤྱོད་པའི་ཉོན་མོངས་པ་ཅན་གཉིས་ལ་ཡང་མི་འབྱུང་སྟེ། དེ་དག་མ་སྤངས་པར་གཟུགས་ཀྱི་ཁམས་སུ་ཉིང་མཚམས་སྦྱོར་བ་མེད་པས་བསྒྲིབས་ལ་ལུང་དུ་མ་བསྟན་པའི་སེམས་མི་སྲིད་པའི་ཕྱིར་རོ། །སློབ་པ་དང་མི་སློབ་པ་དག་ལས་ཀྱང་མ་ཡིན་ཏེ། དེ་ན་

Vol. 142 · folio 230b

ཡོད་པའི་ཉོན་མོངས་པ་ཅན་གྱིས་ལྡང་བ་མི་སྲིད་པའི་ཕྱིར་རོ། །འདོད་པ་ན་སྤྱོད་པའི་ཞེས་བྱ་བ་ནི་གསུམ་ཞེས་བྱ་བར་སྐབས་དང་སྦྱར་ཏེ། ཉིང་མཚམས་སྦྱོར་བའི་ཚེ། ཉོན་མོངས་ཅན་གཉིས་དང་། ཉོན་མོངས་པ་ཅན་གྱི་ཏིང་ངེ་འཛིན་གྱིས་གཟིར་བ་ལ་དགེ་

བའོ། །འདོད་པ་ན་སྤྱོད་པའི་ཉོན་མོངས་པ་ཅན་དག་དང་གཟུགས་མེད་པ་ན་སྤྱོད་པའི་ཉོན་མོངས་པ་ཅན་ནོ་ཞེས་བྱ་བ་ནི་ཉིང་མཚམས་སྦྱོར་བའི་ཚེའོ། །ས་འོག་མ་པའི་ཉོན་མོངས་པ་ཅན་རྣམས་ཞེས་བྱ་བ་ནི་ཉིང་མཚམས་སྦྱོར་བའི་ཚེའོ། །གཟུགས་མེད་པ་ན་སྤྱོད་པའི་

དགེ་བའི་སེམས་ལས་ནི་སེམས་དགུ་འབྱུང་སྟེ་ཞེས་བྱ་བ་ནི་རང་གི་ས་པ་གསུམ་དང་། དེའི་སྙོམས་པར་འཇུག་པ་ལས་ལྡང་བའི་ཚེ་དང་། ལུགས་དང་མི་མཐུན་པར་སྙོམས་པར་འཇུག་པའི་ཚེ་གཟུགས་ན་སྤྱོད་པའི་དགེ་བ་དང་ཉིང་མཚམས་སྦྱོར་བའི་ཚེ་ས་འོག་མ་པའི་ཉོན་མོངས་

པ་ཅན་རྣམས་དང་སློབ་པ་དང་མི་སློབ་པའོ། །འདོད་པ་ན་སྤྱོད་པའི་དགེ་བ་དང་འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་དག་མ་གཏོགས་སོ་ཞེས་བྱ་བ་ནི་འདོད་པ་ན་སྤྱོད་པའི་དགེ་བས་དེའི་སྙོམས་པར་འཇུག་པ་ལས་ལྡང་མི་སྲིད་དེ་ཤིན་ཏུ་བསྐལ་པའི་ཕྱིར་

རོ། །དེ་ཉིད་ཀྱི་ཕྱིར་དང་མི་གསལ་བའི་ཕྱིར་མ་བསྒྲིབས་ལ་ལུང་དུ་མ་བསྟན་པས་ཀྱང་མ་ཡིན་ནོ། །དེ་ཉིད་ཀྱི་ཕྱིར་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པས་ཀྱང་ལྡང་བ་མ་ཡིན་ནོ། །འདི་རྣམས་ཀྱིས་ཉིང་མཚམས་སྦྱོར་བའམ། མེད་པས་འདི་རྣམས་ནི་དེ་ལས་མི་

འབྱུང་ངོ་། །དེ་དྲུག་གི་ཞེས་བྱ་བ་ནི་མཇུག་ཐོགས་སུ་ཞེས་བྱ་བ་སྐབས་དང་སྦྱར་རོ། །གཟུགས་ན་སྤྱོད་པའི་དགེ་བ་ཞེས་བྱ་བ་ནི་སྙོམས་པར་འཇུག་པའི་ཚེའོ། །སློབ་པ་དང་མི་སློབ་པ་དག་ལས་སོ་ཞེས་བྱ་བ་ནི་ལྡང་བའི་ཚེའོ། །གཟུགས་ན་སྤྱོད་པའི་དགེ་བ་ཞེས་བྱ་བ་ནི་

ཉོན་མོངས་པ་ཅན་གྱི་ཏིང་ངེ་འཛིན་གྱིས་གཟིར་བ་ལའོ། །བསྒྲིབས་པ་དང་ཞེས་བྱ་བ་ལ་སོགས་པ་ནི་ཉིང་མཚམས་སྦྱོར་བའི་ཚེའོ། །འདོད་པ་དང་གཟུགས་ན་སྤྱོད་པའི་ཉོན་མོངས་པ་ཅན་དང་སློབ་པ་དང་མི་སློབ་པ་དག་མ་གཏོགས་སོ་ཞེས་བྱ་བ་ནི་དེས་ས་འོག་མ་པ་ལས་འདོད་

Vol. 142 · folio 231a

ཆགས་དང་མ་བྲལ་བ་དང་ཉིང་མཚམས་སྦྱོར་བ་མེད་པའི་ཕྱིར་ལ་སློབ་པ་དང་མི་སློབ་པ་དག་ལས་ཀྱང་ལྡང་བར་མི་སྲིད་པའི་ཕྱིར་དེ་ནི་དེ་དག་ལས་མི་འབྱུང་ངོ་། །བཞི་པོ་དེ་དག་ཉིད་དང་མི་སློབ་པའོ་ཞེས་བྱ་བ་ནི་ལྡང་བའི་ཚེ་ཁམས་གསུམ་པའི་དགེ་བ་དག་དང་

རྒྱུན་གྱི་ཚེ་སློབ་པ་དང་། རྡོ་རྗེ་ལྟ་བུའི་མཇུག་ཐོགས་སུ་ཟད་པ་ཤེས་པ་ཡིན་པས་མི་སློབ་པ་སྟེ་ལྔའོ། །བཤད་མ་ཐག་པའི་ལྔ་པོ་དེ་དག་ཉིད་ལས་སོ་ཞེས་བྱ་བ་ནི་སྙོམས་པར་འཇུག་པའི་ཚེ་ཁམས་གསུམ་པའི་དགེ་བ་རྣམས་དང་། རྡོ་རྗེ་ལྟ་བུའི་མཇུག་ཐོགས་སུ་འབྱུང་བ་དང་རྒྱུན་གྱི་

ཚེའོ། །དེ་ལས་སེམས་ནི་བཞིའོ་ཞེས་བྱ་བ་ནི་སློབ་པ་མ་གཏོགས་པ་སྟེ། མི་སློབ་པ་ལས་ནི་སློབ་པ་མི་འབྱུང་ངོ་། །ཡོངས་སུ་ཉམས་པའི་ཚེ་ཇི་ལྟར་མི་འབྱུང་ཞེ་ན། ཉོན་མོངས་པ་འབྱུང་བས་བར་དུ་ཆོད་པའི་ཕྱིར་རོ། །སྐྱེས་ནས་ཐོབ་པ་དང་སྦྱོར་བ་ལས་བྱུང་བ་ཞེས་བྱ་བ་ལ་སྐྱེས་ནས་

ཐོབ་པ་ནི་འདོད་པ་དང་གཟུགས་ཀྱི་ཁམས་དག་ཏུ་སྲིད་པ་བར་མར་ཉིང་མཚམས་སྦྱོར་བའི་ཚེ་གང་གིས་ཐོབ་པ་དང་པོ་ཉིད་དུ་སྐྱེ་བའི་ཡིན་ནོ། །གཟུགས་མེད་པའི་ཁམས་སུ་ནི་སྐྱེ་བའི་སྲིད་པའི་ཚེ་གང་གིས་ཐོབ་པ་སྐྱེ་བ་ཡིན་ནོ། །སྦྱོར་བ་ལས་བྱུང་བ་ནི་གང་ཞིག་སྦྱོར་བས་འཐོབ་པ་སྟེ།

ཁམས་གསུམ་དག་ཏུ་ཐོས་པ་དང་བསམས་པ་དང་བསྒོམས་པ་ལས་བྱུང་བ་ཅི་རིགས་པར་སྦྱར་རོ། །རྣམ་པར་སྨིན་པ་ལས་སྐྱེས་པ་དང་། སྤྱོད་ལམ་པ་དང་། བཟོའི་གནས་དང་སྤྲུལ་པའི་སེམས་ཞེས་བྱ་བ་འདི་དག་ནི་རྒྱུ་དང་ལས་ཀྱི་བྱེ་བྲག་གིས་ཐ་དད་པ་ཡིན་ཏེ། རྣམ་པར་སྨིན་

པའི་རྒྱུ་ལས་སྐྱེས་པ་ནི་རྣམ་པར་སྨིན་པ་ལས་སྐྱེས་པའོ། །སྤྱོད་ལམ་ཉལ་བ་དང་འདུག་པ་དང་། འགྲེང་བ་དང་། འགྲོ་བ་དག་ལས་འབྱུང་བ་ནི་སྤྱོད་ལམ་པ་ཡིན་ནོ། །བཟོའི་གནས་དག་ལ་འབྱུང་བ་ནི་བཟོའི་གནས་པ་ཡིན་ནོ། །སྤྲུལ་པའི་ཕྱིར་སེམས་པ་ནི་སྤྲུལ་པའི་སེམས་

སོ། །ཡང་ན་སྤྲུལ་པའམ་སྤྲུལ་པར་བྱ་བ་ལ་འབྱུང་བས་ན་སྤྲུལ་པ་པ་དེ་དེ་ཉིད་ལ་བྱའོ། །ཉི་ཤུར་འགྱུར་རོ་ཞེས་བྱ་བ་ནི་ཇི་ལྟར་ཞེ་ན་དགེ་བ་དྲུག་དང་མ་བསྒྲིབས་ལ་ལུང་དུ་མ་བསྟན་པ་བདུན་དུ་ཕྱེ་ནས་ཞེས་བྱ་བ་སྨོས་ཏེ། ཁམས་གསུམ་དག་ཏུ་སྦྱོར་བ་ལས་བྱུང་བ་དང་། སྐྱེས་ནས་

Vol. 142 · folio 231b

ཐོབ་པའི་ངོ་བོར་དགེ་བ་རྣམ་པ་དྲུག་ཏུ་ཕྱེ་བ་དང་འདོད་པའི་ཁམས་སུ་རྣམ་པར་སྨིན་པ་ལས་སྐྱེས་པ་དང་། སྤྱོད་ལམ་པ་དང་། བཟོའི་གནས་པ་དང་། སྤྲུལ་པའི་བྱེ་བྲག་དང་། གཟུགས་ཀྱི་ཁམས་སུ་རྣམ་པར་སྨིན་པ་ལས་སྐྱེས་པ་དང་། སྤྱོད་ལམ་པ་དང་སྤྲུལ་པའི་བྱེ་བྲག་

གིས་འདོད་པ་དང་། གཟུགས་ཀྱི་ཁམས་གཉིས་ཀྱིས་མ་བསྒྲིབས་ལ་ལུང་དུ་མ་བསྟན་པ་དག་རྣམ་པ་བདུན་དུ་ཕྱེ་ནས་ཏེ། བཅུ་གསུམ་པོ་དེ་དག་དང་ལྷག་མ་མ་ཕྱེ་བ་བདུན་ཁོ་ན་སྟེ། འདི་ལྟ་སྟེ་འདོད་པ་ན་སྤྱོད་པའི་མི་དགེ་བ་དང་། བསྒྲིབས་ལ་ལུང་དུ་མ་བསྟན་པ་དང་།

གཟུགས་ན་སྤྱོད་པའི་བསྒྲིབས་ལ་ལུང་དུ་མ་བསྟན་པ་དང་། གཟུགས་མེད་པ་ན་སྤྱོད་པའི་བསྒྲིབས་ལ་ལུང་དུ་མ་བསྟན་པ་དང་། མ་བསྒྲིབས་ལ་ལུང་དུ་མ་བསྟན་པ་དང་། སློབ་པ་དང་མི་སློབ་པ་སྟེ་དེ་ལྟར་སེམས་ཉི་ཤུར་འགྱུར་རོ། །སྤྱོད་ལམ་ལ་སོགས་པ་མེད་པའི་ཕྱིར་ཞེས་

བྱ་བ་ནི་གཟུགས་མེད་པའི་ཁམས་ན་སྤྱོད་ལམ་པ་དང་། བཟོའི་གནས་དང་སྤྲུལ་པ་མེད་པའི་ཕྱིར་གསུམ་པོ་འདི་དག་མེད་དེ། དམིགས་པར་གྱུར་པའི་གཟུགས་མེད་པའི་ཕྱིར་རོ། །དེ་དག་གི་དམིགས་པ་ནི་གཟུགས་དང་དྲི་དང་རོ་དང་རེག་བྱ་རྣམས་ཡིན་ནོ་ཞེས་བྱ་བ་དེ་ལ་སྤྱོད་ལམ་

པའི་དམིགས་པ་ནི་མལ་ཆ་དང་སྟན་གྱི་གཟུགས་ལ་སོགས་པ་དང་རང་གི་ལུས་ཀྱི་ཡན་ལག་གི་གཟུགས་ལ་སོགས་པ་ཡིན་ནོ། །བཟོའི་གནས་པ་ནི་བཟོའི་གནས་ཀྱི་གཟུགས་ལ་སོགས་པ་ཡིན་ནོ། །སྤྲུལ་པ་པའི་ནི་སྤྲུལ་པའི་གཟུགས་ལ་སོགས་པ་ཡིན་ནོ། །བཟོའི་གནས་

པ་ནི་སྒྲ་ཡང་ཡིན་ནོ་ཞེས་བྱ་བ་ལ། ནི་ཞེས་བྱ་བའི་སྒྲ་ནི་ཁྱད་པར་དུ་བྱ་བ་ཡིན་ནོ། །ཡང་ཞེས་བྱ་བའི་སྒྲས་ནི་གཟུགས་ལ་སོགས་པ་བསྡུའོ། །འདིའི་དམིགས་པ་ནི་སྒྲ་ཡང་ཡིན་ཏེ། ཡིད་ཀྱི་རྣམ་པར་ཤེས་པས་བཟོའི་ལུང་གི་སྒྲ་ལ་དམིགས་ནས་བཟོ་སློབ་པས་སོ། །རྣམ་པར་སྨིན་

པའི་དམིགས་པ་ནི་མ་སྨོས་པའི་ཕྱིར་གཟུགས་ལ་སོགས་པ་ཐམས་ཅད་ཀྱང་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །ཡིད་ཀྱི་རྣམ་པར་ཤེས་པ་དག་ཁོ་ན་དག་ཡིན་ནོ་ཞེས་བྱ་བ་ནི་སྤྱོད་ལམ་པ་ལ་སོགས་པ་གསུམ་ནི་ཡིད་ཀྱི་རྣམ་པར་ཤེས་པ་ཁོ་ན་ཡིན་ཏེ། རྣམ་པར་རྟོག་པའི་མངོན་པར་

Vol. 142 · folio 232a

འདུ་བྱེད་པས་འབྱུང་བའི་ཕྱིར་རོ། །རྣམ་པར་སྨིན་པ་ལས་སྐྱེས་པ་ནི་མ་སྨོས་པའི་ཕྱིར་རྣམ་པར་ཤེས་པ་དྲུག་ཅར་གྱི་ངོ་བོ་ཉིད་ཡིན་ནོ་ཞེས་བསྟན་པར་འགྱུར་རོ། །སྤྱོད་ལམ་པ་དང་བཟོའི་གནས་པ་དག་གི་སྦྱོར་བ་པ་ནི་རྣམ་པར་ཤེས་པའི་ཚོགས་ལྔ་ཡིན་ནོ་ཞེས་བྱ་བ་དེ་

ལ་སྦྱོར་བའི་གནས་སྐབས་ན་ཡོད་པའི་ཕྱིར་སྦྱོར་བ་པ་དག་སྟེ། འདི་ལྟར་དེ་དག་ནི་མཐོང་བ་དང་རེག་པའི་བར་ལས་སྐྱེའོ། །རྣམ་པར་སྨིན་པ་ལས་སྐྱེས་པ་ལ་ནི་སྦྱོར་བ་མེད་དེ། ལས་ཀྱི་མཐུས་རང་གི་ངང་གིས་འབྱུང་བའི་ཕྱིར་རོ། །བཟོའི་གནས་པས་མངོན་པར་བསྒྲུབ་པའི་ཞེས་བྱ་བ་

རྒྱས་པར་འབྱུང་བ་ནི་གཞན་དག་ན་རེ་བཟོའི་གནས་པའི་ཡིད་ཀྱི་རྣམ་པར་ཤེས་པས་མངོན་པར་བསྒྲུབས་ཤིང་བསྐྱེད་པའི་ཡིད་ཀྱི་རྣམ་པར་ཤེས་པ་སྐྱེ་མཆེད་བཅུ་གཉིས་ལ་དམིགས་པ་སྟེ། མིག་གི་སྐྱེ་མཆེད་ལ་དམིགས་པ་ནས་ཆོས་ཀྱི་སྐྱེ་མཆེད་ཀྱི་བར་ལ་དམིགས་པ་ལ་ལུང་དུ་མ་

བསྟན་པ་ཉིད་ཀྱང་ཡོད་དོ་ཞེས་ཟེར་རོ། །དེ་ལྟར་ན་སྤྱོད་ལམ་པ་ལ་སོགས་པའི་ནང་དུ་མ་གཏོགས་པ་གང་ཡིན་པ་མ་བསྒྲིབས་ལ་ལུང་དུ་མ་བསྟན་པ་གཞན་ཡང་ཡོད་དོ་ཞེས་རབ་ཏུ་སྟོན་པར་བྱེད་པ་ཡིན་ཏེ། དེ་ཁོ་ན་ལྟར་ཡིན་པར་ཡང་རྟོགས་པར་བྱའོ། །དེ་ལྟ་མ་ཡིན་ན། གཉིས་

པ་སོགས་ན་ལུས་མིག་དང་། །རྣ་བའི་རྣམ་ཤེས་རྣམ་རིག་སློང་། །གང་ཡིན་དེ་ནི་དང་པོར་རྟོགས། །དེ་ལུང་མ་བསྟན་ཉོན་མོངས་མིན། །ཞེས་བྱ་བ་དང་། དེ་བཞིན་དུ། རང་གི་ས་པས་སྤྲུལ་པར་བྱེད། །འོག་མ་ཡིས་ནི་སྨྲར་འཇུག་གོ། །ཞེས་བྱ་བ་ལ་སོགས་པ་གང་འཆད་

པར་འགྱུར་བ་རྣམ་པར་ཤེས་པ་དེ་དག་བཞི་པོ་འདི་དག་གང་གིས་བསྡུས། རེ་ཞིག་རྣམ་པར་སྨིན་པ་ལས་སྐྱེས་པ་དག་ནི་མ་ཡིན་ཏེ། གོང་མར་སྐྱེས་པ་རྣམས་ཀྱི་རྣམ་པར་སྨིན་པའི་ངོ་བོ་ཉིད་ས་འོག་མ་པ་མ་ཡིན་པའི་ཕྱིར་རོ། །སྤྱོད་ལམ་པ་ལ་སོགས་པ་ཡང་མ་ཡིན་ཏེ། སྤྱོད་ལམ་

པ་ལ་སོགས་པ་མེད་པའི་ཕྱིར་རོ། །མི་ཤེས་པ་ལ་སོགས་པའི་བག་ཆགས་ཅན་གྱི་སེམས་ཡིན་པར་ཡང་མི་གཞུག་གོ། །འདི་ནི་བཙུན་པ་གོ་ཆ་མཐའ་ཡས་ཀྱིས་ཀྱང་རྣམ་པར་བཤད་པའི་བཤད་པ་ལས། བཞི་པོ་དག་ལས་མ་གཏོགས་པར་རྣམ་པར་ཤེས་པ་ལུང་དུ་མ་

Vol. 142 · folio 232b

བསྟན་པ་གཞན་དག་ཀྱང་ཡོད་དོ་ཞེས་བཤད་དེ། བཤད་པ་འདི་ནི་ལྷག་མ་དང་བཅས་པ་ཡིན་པར་ཁོང་དུ་ཆུད་པར་བྱའོ། །མངོན་པར་ཤེས་པའི་འབྲས་བུ་མ་གཏོགས་པ་ཞེས་བྱ་བ་ནི་འདོད་པ་ན་སྤྱོད་པའི་སེམས་ནི་གཟུགས་ན་སྤྱོད་པའི་སྦྱོར་བའི་མཇུག་ཐོགས་ཁོ་ནར་འབྱུང་གི་འདོད་པ་ན་

སྤྱོད་པའི་སྦྱོར་བའི་མཇུག་ཐོགས་སུ་ནི་མ་ཡིན་ནོ། །གཟུགས་ན་སྤྱོད་པའི་སྦྱོར་བ་ལས་བྱུང་བ་དང་། སློབ་པ་དང་། མི་སློབ་པའོ་ཞེས་བྱ་བ་ནི་སྙོམས་པར་འཇུག་པའི་ཚེའིའོ། །རང་གི་དགེ་བ་དང་ཉོན་མོངས་པ་ཅན་དག་ཅེས་བྱ་བ་ནི་རང་གི་དགེ་བ་དག་དང་ཉོན་མོངས་པ་ཅན་དག་སྟེ།

སྦྱོར་བའི་ཚེ་ནི་ཉོན་མོངས་པ་ཅན་མེད་པའི་ཕྱིར་ལ། ཉོན་མོངས་པས་ཡོངས་སུ་སྐྱོ་བ་ལ་ནི་སྦྱོར་བ་ལས་བྱུང་བ་སྐྱེ་བའི་ཕྱིར་རོ། །མ་བསྒྲིབས་ལ་ལུང་དུ་མ་བསྟན་པ་དག་ལས་ནི་མ་ཡིན་ཏེ། སྟོབས་ཆུང་བ་དང་མངོན་པར་འདུ་བྱེད་པ་ཅན་མ་ཡིན་པའི་ཕྱིར་རོ། །གཟུགས་ན་སྤྱོད་

པའི་སྦྱོར་བ་ལས་བྱུང་བ་དང་། ཉོན་མོངས་པ་ཅན་དག་ཅེས་བྱ་བ་ལ་སོགས་པ་དག་ནི་སྦྱོར་བ་ལས་བྱུང་བ་དང་། སློབ་པ་དང་མི་སློབ་པའི་དག་ལས་ནི་ལྡང་བའི་ཚེའོ། །ཉོན་མོངས་པ་ཅན་ལས་ནི་ཉོན་མོངས་པ་ཅན་གྱི་ཏིང་ངེ་འཛིན་གྱིས་གཟིར་བ་ལའོ། །གཟུགས་དང་གཟུགས་

མེད་པ་ན་སྤྱོད་པའི་ཉོན་མོངས་པ་ཅན་དག་ཅེས་བྱ་བ་ནི་ཉིང་མཚམས་སྦྱོར་བའི་ཚེ་སྐྱེས་ནས་ཐོབ་པའི་སེམས་ལ་ནི་འཆི་བ་སྲིད་དོ། །སྔ་མ་བཞིན་དུ་ཞེས་བྱ་བ་ནི་མངོན་པར་ཤེས་པའི་འབྲས་བུ་མ་གཏོགས་པ་ཞེས་བྱ་བའི་ཐ་ཚིག་སྟེ། དེ་ནི་གཟུགས་ན་སྤྱོད་པའི་སྦྱོར་བའི་མཇུག་ཐོགས་

ཁོ་ནར་འབྱུང་བར་བཤད་དོ། །གཟུགས་ན་སྤྱོད་པའི་སྦྱོར་བ་ལས་བྱུང་བ་དང་ཉོན་མོངས་པ་ཅན་དག་ཅེས་བྱ་བ་ནི་སྦྱོར་བ་ལས་བྱུང་བ་དང་ཉོན་མོངས་པ་ཅན་ལས་ཞེས་བྱ་བ་ཡིན་ཏེ། རྒྱས་པར་སྔ་མ་བཞིན་དུ་བཤད་པར་བྱའོ། །མི་དགེ་བ་དང་བསྒྲིབས་ལ་ལུང་དུ་མ་བསྟན་

པའི་མཇུག་ཐོགས་སུ་ཞེས་བྱ་བ་ནི་མི་དགེ་བའི་མཇུག་ཐོགས་དང་བསྒྲིབས་ལ་ལུང་དུ་མ་བསྟན་པའི་མཇུག་ཐོགས་སུ་ཞེས་བརྗོད་པར་བྱ་བ་ཡིན་ཏེ། དེ་དག་ནི་འདྲ་བའི་ཕྱིར་ཅིག་ཅར་དུ་བཤད་དོ། །སྦྱོར་བ་ལས་བྱུང་བ་དང་མངོན་པར་ཤེས་པའི་འབྲས་བུ་ལ་གནས་པ་ལ། འཆི་

Vol. 142 · folio 233a

བ་མེད་པས་དེའི་ཕྱིར་དེ་དག་ལས་ཉོན་མོངས་པ་ཅན་དེ་གཉིས་མི་འབྱུང་ངོ་། །ལྷག་མ་ལ་གནས་པ་ལ་ནི་འཆི་བ་ཡོད་དེ། དེའི་ཕྱིར་ཉིང་མཚམས་སྦྱོར་བའི་ཚེ་དེ་རྣམས་ལས་ཉོན་མོངས་པ་ཅན་དེ་གཉིས་འབྱུང་ངོ་། །སྦྱོར་བ་ལས་བྱུང་བ་མ་གཏོགས་པ་ཞེས་བྱ་བ་

ཡང་དེ་དང་འདྲ་བར་བཤད་པར་བྱའོ། །སྦྱོར་བ་ལས་བྱུང་བ་དང་མངོན་པར་ཤེས་པའི་འབྲས་བུ་དག་མ་གཏོགས་པ་དྲུག་ཅེས་བྱ་བ་ནི་སྟོབས་ཆུང་བ་དང་མངོན་པར་འདུ་བྱེད་པ་ཅན་མ་ཡིན་པའི་ཕྱིར་འདི་དག་གི་མཇུག་ཐོགས་སུ་སྦྱོར་བ་ལས་བྱུང་བ་ཡང་མི་འབྱུང་ལ། གཟུགས་ན་སྤྱོད་

པའི་སྦྱོར་བའི་མཇུག་ཐོགས་སུ་འབྱུང་བའི་ཕྱིར་དེ་དག་ལས་མངོན་པར་ཤེས་པའི་འབྲས་བུ་ཡང་མི་འབྱུང་ངོ་། །གཟུགས་དང་གཟུགས་མེད་པ་ན་སྤྱོད་པའི་ཉོན་མོངས་པ་ཅན་དག་ཅེས་བྱ་བ་ནི་ཉིང་མཚམས་སྦྱོར་བའི་ཚེའོ། །བཟོའི་གནས་པའི་མཇུག་ཐོགས་སུ་ནི་དྲུག་སྟེ་ཞེས་བྱ་

བ་ནི་དེ་ལ་གནས་པ་ལ་སྤྱོད་ལམ་པ་དང་རྣམ་པར་སྨིན་པ་ལས་སྐྱེས་པ་ལྟ་བུར་འཆི་བ་མི་སྲིད་པས་འདི་ལ་གཟུགས་དང་གཟུགས་མེད་པ་ན་སྤྱོད་པའི་ཉོན་མོངས་པ་ཅན་དག་མི་སྲིད་དོ། །མངོན་པར་ཤེས་པའི་འབྲས་བུ་རང་ཉིད་ཅེས་བྱ་བ་ནི་རྒྱུན་གྱི་ཚེའོ། །གཟུགས་ན་སྤྱོད་པའི་སྦྱོར་བ་

ལས་བྱུང་བ་ཞེས་བྱ་བ་ནི་དེ་ལས་ལྡང་བའི་ཚེ་སྟེ། བསམ་གཏན་ལ་མ་ཞུགས་པར་ནི་མངོན་པར་ཤེས་པའི་འབྲས་བུ་ལས་ལྡང་བ་མེད་དོ། །དེ་ཡང་དེ་གཉིས་ཁོ་ན་ལས་སོ་ཞེས་བྱ་བ་ནི་རྒྱུན་གྱི་ཚེ་དང་དེ་ལ་འཇུག་པའི་ཚེ་མངོན་པར་ཤེས་པའི་འབྲས་བུ་དེའོ། །འདོད་པ་སྤྱོད་པའི་དགེ་བ་

དག་ཅེས་བྱ་བ་ནི་ལྡང་བའི་ཚེ་སྟེ་གསལ་བའི་ཕྱིར་སྐྱེས་ནས་ཐོབ་པས་ཀྱང་སྙོམས་པར་འཇུག་པ་ལས་ལྡང་བ་སྲིད་པ་ཡོད་པས་དེའི་ཕྱིར་དགེ་བ་གཉིས་ཀ་ཡང་སྨོས་པ་ཡིན་ནོ། །མངོན་པར་ཤེས་པའི་འབྲས་བུ་ཞེས་བྱ་བ་ནི་འདོད་པ་ན་སྤྱོད་པའི་སྤྲུལ་པའི་སེམས་སོ། །གཟུགས་

མེད་པ་ན་སྤྱོད་པའི་སྦྱོར་བ་ལས་བྱུང་བ་དང་སློབ་པ་དང་མི་སློབ་པ་ནི་སྙོམས་པར་འཇུག་པའི་ཚེའོ། །སྤྱོད་ལམ་པ་དང་རྣམ་པར་སྨིན་པ་ལས་སྐྱེས་པ་དག་མ་གཏོགས་པ་ཞེས་བྱ་བ་ནི་སྟོབས་ཆུང་བ་དང་མངོན་པར་འདུ་བྱེད་པ་ཅན་མ་ཡིན་པའི་ཕྱིར་རོ། །སྦྱོར་བ་ལས་བྱུང་བ་དང་ཉོན་མོངས་པ་

Vol. 142 · folio 233b

ཅན་དག་ཅེས་བྱ་བ་ནི་ལྡང་བ་དང་ཉོན་མོངས་པ་ཅན་གྱི་སྙོམས་པར་འཇུག་པས་གཟིར་བའི་ཚེ་དག་ནའོ། །འདོད་པ་ན་སྤྱོད་པའི་ཉོན་མོངས་པ་ཅན་དག་ཅེས་བྱ་བ་ནི་ཉིང་མཚམས་སྦྱོར་བའི་ཚེའོ། །མངོན་པར་ཤེས་པའི་འབྲས་བུ་མ་གཏོགས་པ་ཞེས་བྱ་བ་ནི་སྤྲུལ་པའི་སེམས་ནི་སྦྱོར་བ་པའི་

མཇུག་ཐོགས་སུ་འབྱུང་བའི་ཕྱིར་རོ། །གཟུགས་མེད་པ་ན་སྤྱོད་པའི་ཉོན་མོངས་པ་ཅན་ཞེས་བྱ་བ་ནི་ཉིང་མཚམས་སྦྱོར་བའི་ཚེའོ། །དགེ་བ་དང་ཉོན་མོངས་པ་ཅན་བཞི་ཞེས་བྱ་བ་ནི་དགེ་བ་དག་དང་ཉོན་མོངས་པ་ཅན་དག་ནི་དགེ་བ་དང་ཉོན་མོངས་པ་ཅན་རྣམས་སོ་ཞེས་བྱ་བར་ཚིག་

བསྡུ་སྟེ། དགེ་བ་དག་ནི་ས་འོག་མ་པའི་དགེ་བ་ལ་བརྟེན་པའི་ཕྱིར་རོ། །མི་དགེ་བ་དག་ནི་ཉིང་མཚམས་སྦྱོར་བའི་ཚེའོ། །འདོད་པ་ན་སྤྱོད་པ་ཞེས་བྱ་བ་རྒྱས་པར་འབྱུང་བ་ནི་དེ་རྣམས་ལས་ཉིང་མཚམས་སྦྱོར་བའི་ཚེའོ། །སྦྱོར་བ་ལས་བྱུང་བ་དང་། བཟོའི་གནས་པ་དང་། མངོན་

པར་ཤེས་པའི་འབྲས་བུ་དག་ལས་གནས་པ་ལ་ནི་འཆི་བ་མེད་པས་དེ་རྣམས་ལས་ནི་མ་ཡིན་ནོ། །འདོད་པ་ན་སྤྱོད་པའི་ཉོན་མོངས་པ་ཅན་དག་ཅེས་བྱ་བ་ནི་ཉིང་མཚམས་སྦྱོར་བའི་ཚེ་སྟེ། གཟུགས་མེད་པ་ན་སྤྱོད་པའི་ཉོན་མོངས་པ་ཅན་ཡང་འདི་ཉིད་ཀྱི་ཚེ་ནའོ། །རང་གི་སྦྱོར་བ་ལས་བྱུང་

བ་ཡང་འདི་ལས་མི་འབྱུང་སྟེ། སྤྱོད་ལམ་པ་ནི་སྟོབས་ཆུང་བ་དང་། མངོན་པར་འདུ་བྱེད་པ་ཅན་མ་ཡིན་པ་ཉིད་ཀྱིས་སྦྱོར་བ་ཡིན་པར་མི་འོས་པའི་ཕྱིར་རོ། །རྣམ་པར་སྨིན་པ་ལས་སྐྱེས་པ་ཡང་དེ་དང་འདྲ་བར་བརྗོད་པར་བྱའོ་ཞེས་བྱ་བ་ནི་སྤྱོད་ལམ་བཤད་པ་ཇི་ལྟ་བར་འདི་

ཡང་དེ་དང་འདྲ་སྟེ། རྣམ་པར་སྨིན་པ་ལས་སྐྱེས་པའི་མཇུག་ཐོགས་སུ་ནི་བདུན་ཏེ་ཞེས་བྱ་བ་ནས་མངོན་པར་ཤེས་པའི་འབྲས་བུ་མ་གཏོགས་པ་ཞེས་བྱ་བའི་བར་ཚིག་གི་དོན་དེ་དག་ཁོ་ན་ཡིན་ནོ། །མངོན་པར་ཤེས་པའི་འབྲས་བུ་མཇུག་ཐོགས་སུ་ནི་གཉིས་ཏེ། རང་གི་སྦྱོར་བ་

ལས་བྱུང་བ་དང་། མངོན་པར་ཤེས་པའི་འབྲས་བུ་དག་ཁོ་ནའོ་ཞེས་བྱ་བ་ནི་ལྡང་བའི་ཚེ་དང་རྒྱུན་གྱི་ཚེའོ། །དེ་ཡང་དེ་དག་ཁོ་ན་ལས་སོ་ཞེས་བྱ་བ་ནི་འཇུག་པའི་ཚེ་དང་རྒྱུན་གྱི་ཚེའོ། །གཟུགས་ན་སྤྱོད་པའི་སྦྱོར་བ་ལས་བྱུང་བ་ཞེས་བྱ་བ་ནི་ལྡང་བའི་ཚེ་ན་སྟེ། སློབ་པ་དང་མི་སློབ་

Vol. 142 · folio 234a

པ་ཡང་དེ་དང་འདྲའོ། །རང་གི་བཞི་ཞེས་བྱ་བ་ལ་དགེ་བ་ནི་འབྱུང་ངོ་ཞེས་བྱ་བར་གསལ་ལོ། །ཉོན་མོངས་པ་ཅན་ནི་རོ་མྱང་བའི་ཚེའོ། །མ་བསྒྲིབས་ལ་ལུང་དུ་མ་བསྟན་པ་ནི་ལྡང་བའི་ཚེའོ། །གཟུགས་ན་སྤྱོད་པའི་སྦྱོར་བ་ལས་བྱུང་བ་ཞེས་བྱ་བ་ནི་

སྙོམས་པར་འཇུག་པའི་ཚེའོ། །རྣམ་པར་སྨིན་པ་ལས་སྐྱེས་པ་མ་གཏོགས་ཞེས་བྱ་བ་ནི་སྟོབས་ཆུང་བ་དང་མངོན་པར་འདུ་བྱེད་པ་མེད་པར་འཇུག་པའི་ཕྱིར་ཞེས་གཏན་ཚིགས་འཆད་པར་འགྱུར་རོ། །སློབ་པ་དང་མི་སློབ་པ་དག་ལས་སོ་ཞེས་བྱ་བ་ནི་སྙོམས་པར་འཇུག་པའི་

ཚེའོ། །ས་འོག་མ་པའི་ཉོན་མོངས་པ་ཅན་དག་གོ་ཞེས་བྱ་བ་ནི་ཉིང་མཚམས་སྦྱོར་བའི་ཚེ་འདོད་པ་དང་། གཟུགས་ན་སྤྱོད་པ་དག་གོ། །གཟུགས་ན་སྤྱོད་པའི་སྦྱོར་བ་ལས་བྱུང་བ་དང་ཉོན་མོངས་པ་ཅན་དག་ཅེས་བྱ་བ་ལ་སྦྱོར་བ་ལས་བྱུང་བའི་ཉོན་མོངས་པ་ཅན་གྱི་ཏིང་ངེ་འཛིན་

གྱིས་གཟིར་བའི་ཕྱིར་རོ། །ཉོན་མོངས་པ་ཅན་ནི་ཉིང་མཚམས་སྦྱོར་བའི་ཚེའོ། །འདོད་པ་ན་སྤྱོད་པའི་ཉོན་མོངས་པ་ཅན་དག་ཀྱང་ཉིང་མཚམས་སྦྱོར་བའི་ཚེའོ། །འདོད་པ་དང་གཟུགས་ན་སྤྱོད་པ་ཞེས་བྱ་བ་རྒྱས་པར་འབྱུང་བ་ནི་སེམས་དེ་རྣམས་ལ་གནས་པ་ལ་འཆི་བ་སྲིད་པའི་ཕྱིར་རོ། །

སྦྱོར་བ་ལས་བྱུང་བ་མ་གཏོགས་པ་ཞེས་བྱ་བ་ནི་རྣམ་པར་སྨིན་པ་ལས་སྐྱེས་པའི་མཇུག་ཐོགས་སུ་སྦྱོར་བ་ལས་བྱུང་བ་མི་འགྱུར་བའི་ཕྱིར་རོ། །འོག་མའི་ཉོན་མོངས་པ་ཅན་གསུམ་མོ་ཞེས་བྱ་བ་ནི་ཉིང་མཚམས་སྦྱོར་བའི་ཚེ་ཁམས་གཉིས་པོ་དག་གོ། །འདོད་པ་ན་སྤྱོད་པའི་སྐྱེ་གནས་

ཐོབ་པ་ཞེས་བྱ་བ་ནི་འདི་ནི་གསལ་བའི་ཕྱིར་སློབ་པ་ལས་ལྡང་བའི་སེམས་ཡིན་པ་སྲིད་དེ་གསལ་བའི་ཕྱིར་ཞེས་གཏན་ཚིགས་འཆད་པར་འགྱུར་རོ། །གཟུགས་དང་གཟུགས་མེད་པ་ན་སྤྱོད་པའི་སྐྱེས་ནས་ཐོབ་པ་དག་ནི་དེ་ལྟར་གསལ་བ་མ་ཡིན་པས་དེ་དག་ནི་མི་འབྱུང་ངོ་། །སློབ་པ་

ནི་རྒྱུན་གྱི་ཚེའོ། །མི་སློབ་པ་ནི་རྡོ་རྗེ་ལྟ་བུའི་མཇུག་ཐོགས་སུའོ། །སློབ་པ་གཅིག་པུ་མ་གཏོགས་པ་ཞེས་བྱ་བ་ནི་མི་སློབ་པ་ལས་སློབ་པ་མི་འབྱུང་སྟེ། དེ་ལྟ་བས་ན་མི་སློབ་པའི་མཇུག་ཐོགས་སུ་ལྔ་ཡིན་གྱི་དྲུག་ནི་མ་ཡིན་ནོ། །སློབ་པ་ལས་ཇི་ལྟ་བ་བཞིན་ཏེ། དེ་དག་ནི་སློབ་པ་བཞིན་དུ་ལྔ་

Vol. 142 · folio 234b

ཡིན་པར་བརྗོད་པར་བྱའོ། །འདིར་སེམས་ཉི་ཤུའི་མཚུངས་པ་དེ་མ་ཐག་པའི་རྐྱེན་མདོར་མ་བྱས་པའི་མདོ་ལྟ་བུའི་བསྡུས་པའི་ཚིགས་སུ་བཅད་པ་དག་ནི། འདོད་དགེ་སྦྱོར་བྱུང་ལས་བཅུ་གཅིག། །དེ་བརྒྱད་ལས་དགེ་གཞན་ལས་ནི། །དགུ་སྟེ་དེ་ནི་བཅུ་གཅིག་ལས། །ཉོན་མོངས་

པ་ཅན་ལས་བདུན་ཏེ། །དེ་དག་སོ་སོར་བཅུ་བཞི་ལས། སྤྱོད་ལམ་རྣམ་སྨིན་སྐྱེས་ལས་བརྒྱད། །དེ་དག་བདུན་ལས་བཟོའི་གནས་ལས། །དྲུག་སྟེ་དེ་ནི་བདུན་ལས་སོ། །སྤྲུལ་པ་ལས་གཉིས་དེ་གཉིས་ལས། །གཟུགས་ན་སྦྱོར་བྱུང་དགེ་བ་ལས། །བཅུ་གཉིས་དེ་ནི་བཅུ་ལས་སོ། །

མ་འབད་བྱུང་དགེ་ལས་བརྒྱད་དེ། །ལྔ་ལས་ཉོན་མོངས་ཅན་ལ་དགུ། །དེ་ནི་བཅུ་གཅིག་ལས་ཡིན་ཏེ། །སྤྱོད་ལམ་རྣམ་སྨིན་སྐྱེས་ལས་བདུན། །གཉིས་པོ་དེ་ནི་ལྔ་ལས་སོ། །མངོན་ཤེས་འབྲས་ལས་སེམས་གཉིས་ཏེ། །དེ་བཞིན་དེ་ནི་གཉིས་ཉིད་ལས། །གཟུགས་

མེད་འབད་བྱུང་དགེ་ལས་བདུན། །དེ་ནི་དྲུག་པོ་ཁོ་ན་ལས། །མ་འབད་བྱུང་བའི་དགེ་ལས་བདུན། །དེ་བཞིན་ལས་གཞན་བརྒྱད་པ་ནི། །ཉོན་མོངས་ཅན་ལས་དེ་བཅུ་ལས། །རྣམ་སྨིན་སྐྱེས་ལས་རྣམ་དྲུག་སྟེ། །བཞི་ལས་སློབ་པ་ལས་དྲུག་གོ། །དེ་ནི་བཞི་པོ་ཁོ་ན་ལས། །

མི་སློབ་པ་ལ་ལྔ་དེ་ཡང་། །ལྔ་པོ་དག་གི་མཇུག་ཐོགས་སུ། །སྤྱོད་ལམ་དང་བཟོ་མངོན་པར་འདུ་བྱ་བ་ལ་ཞུགས་པའི་ཕྱིར་ཞེས་བྱ་བ་ནི་དེ་དག་ལས་སྦྱོར་བ་ལས་བྱུང་བ་མི་འབྱུང་ངོ་ཞེས་བྱ་བར་སྐབས་དང་སྦྱར་རོ། །འདིར་ཅི་རིགས་པར་སྤྱོད་ལམ་པ་དང་བཟོའི་གནས་པའི་མཇུག་ཐོགས་སུ་

སྦྱོར་བ་ལས་བྱུང་བ་མི་འབྱུང་སྟེ། དེ་དག་ནི་གཞན་མངོན་པར་འདུ་བྱ་བ་ལ་ཞུགས་པའི་ཕྱིར་རོ་སྙམ་དུ་བསམས་པ་ཡིན་ནོ། །འདི་ལྟར་སྤྱོད་ལམ་པ་ནི་སྤྱོད་ལམ་མངོན་པར་འདུ་བྱ་བ་ལ་ཞུགས་པ་ཡིན་ཏེ། འགྲོ་བ་ལ་སོགས་པའི་རྣམ་པ་ཅན་ཡིན་པའི་ཕྱིར་རོ། །བཟོའི་གནས་པ་ཡང་

བཟོ་མངོན་པར་འདུ་བྱ་བ་ལ་ཞུགས་པ་ཡིན་ཏེ། འདི་ཁོ་ན་བྱའོ་སྙམ་པ་དེ་ལྟ་བུའི་རྣམ་པ་ཅན་དུ་ཞུགས་པའི་ཕྱིར་རོ། །སྟོབས་ཆུང་བ་དང་མངོན་པར་འདུ་བྱ་བ་མེད་པར་འཇུག་པའི་ཕྱིར་རོ་ཞེས་བྱ་བ་ནི་རྣམ་པར་སྨིན་པ་ལས་སྐྱེས་པའི་མཇུག་ཐོགས་སུ་སྦྱོར་བ་ལས་བྱུང་བ་མི་འབྱུང་བ་

Vol. 142 · folio 235a

ཡིན་ཏེ། རྣམ་པར་སྨིན་པ་ལས་སྐྱེས་པ་དེ་ནི་ལུང་དུ་མ་བསྟན་པའི་ཕྱིར་སྟོབས་ཆུང་བ་ཡང་ཡིན་ལ། སྔོན་གྱི་ལས་ཀྱིས་འཕངས་པའི་ཕྱིར་དང་། འབད་པ་མེད་པར་འབྱུང་བའི་ཕྱིར་མངོན་པར་འདུ་བྱ་བ་མེད་པར་འཇུག་པ་ཡང་ཡིན་ནོ། །རྣམ་པ་གཅིག་ཏུ་ན་སྤྱོད་ལམ་

དང་བཟོ་མངོན་པར་འདུ་བྱ་བ་ལ་ཞུགས་པའི་ཕྱིར་སྤྱོད་ལམ་པ་དང་བཟོའི་གནས་པའི་མཇུག་ཐོགས་སུ་སྦྱོར་བ་ལས་བྱུང་བ་མི་འབྱུང་ངོ་། །སྟོབས་ཆུང་བ་དང་མངོན་པར་འདུ་བྱ་བ་མེད་པར་འཇུག་པའི་ཕྱིར་སྤྱོད་ལམ་པ་དང་བཟོའི་གནས་པ་དང་རྣམ་པར་སྨིན་པ་ལས་སྐྱེས་པའི་

མཇུག་ཐོགས་སུ་སྦྱོར་བ་ལས་བྱུང་བ་མི་འབྱུང་སྟེ། ཐམས་ཅད་ཀྱི་ལུང་དུ་མ་བསྟན་པ་ཉིད་ཀྱིས་སྟོབས་ཆུང་བའི་ཕྱིར་རོ། །མངོན་པར་འདུ་བྱ་བ་མེད་པར་འཇུག་པའི་ཕྱིར་ནི་རྣམ་པར་སྨིན་པས་སྐྱེས་པ་གཅིག་ཁོ་ནའི་མཇུག་ཐོགས་སུ་མི་འབྱུང་བ་ཡིན་ནོ། །ཡང་ན་སྤྱོད་ལམ་

པ་དང་བཟོའི་གནས་པ་དག་ལ་ཡང་སྦྱོར་བ་ལས་བྱུང་བ་མངོན་པར་འདུ་བྱ་བ་མེད་པའི་ཕྱིར་ཏེ། དེ་གཉིས་ནི་གཞན་ལ་བྱེད་པར་ཟད་པ་ཉིད་ཙམ་གྱི་ཕྱིར་མངོན་པ་འདུ་བྱ་བ་ལ་ཞུགས་པ་ཉིད་ཅེས་བཤད་པ་ཡིན་ནོ། །དེས་ན་ཚིག་འདིའི་སྦྱར་བ་ནི་འདི་ཡིན་ཏེ། རྣམ་པར་སྨིན་པ་

ལས་སྐྱེས་པ་དང་། སྤྱོད་ལམ་པ་དང་། བཟོའི་གནས་པ་དེ་དག་ནི་སྤྱོད་ལམ་དང་། བཟོ་མངོན་པར་འདུ་བྱ་བ་ལ་ཞུགས་པའི་ཕྱིར་དང་། སྟོབས་ཆུང་བ་དང་། མངོན་པར་འདུ་བྱ་བ་མེད་པར་འཇུག་པའི་ཕྱིར་སྦྱོར་བ་ལས་བྱུང་བའི་རྗེས་སུ་མཐུན་པ་མ་ཡིན་ཏེ། དེའི་ཕྱིར་དེ་

རྣམས་ཀྱི་མཇུག་ཐོགས་སུ་སྦྱོར་བ་ལས་བྱུང་བ་མི་འབྱུང་ངོ་ཞེས་བྱ་བར་སྦྱར་བ་ཡིན་ནོ། །འབྱུང་བའི་སེམས་ནི་མངོན་པར་འདུ་བྱ་བ་མེད་པར་འཇུག་པས་ཞེས་བྱ་བ་ལ་སྦྱོར་བ་ལས་བྱུང་བའི་སེམས་ཀྱི་རྒྱུན་ལས་གཞན་པའི་སེམས་གང་ཡིན་པ་དེ་ནི་འབྱུང་བའི་སེམས་ཡིན་ལ། དེས་ནི་

རྣལ་འབྱོར་པ་འདི་རྒྱུ་དེ་ལས་འབྱུང་བར་བྱེད་དོ། །དེའི་མཇུག་ཡིན་པའི་ཕྱིར་རོ། །འབྱུང་བའི་སེམས་ནི་མངོན་པར་འདུ་བྱ་བ་མེད་པར་འཇུག་ཅིང་ལྷུན་གྱིས་གྲུབ་པར་འཇུག་པས། འབྱུང་བའི་སེམས་རྣམ་པར་སྨིན་པ་ལས་སྐྱེས་པ་ལ་སོགས་པ་གང་ཡང་རུང་བའི་ངོ་བོ་ཉིད་དེ་ནི་

Vol. 142 · folio 235b

སྦྱོར་བ་ལས་བྱུང་བའི་སེམས་ཀྱི་མཇུག་ཐོགས་སུ་འབྱུང་བར་རིགས་སོ། །དེ་ལྟ་ན་འོ་ན་ནི་ཞེས་བྱ་བ་ནི་གལ་ཏེ་སྦྱོར་བ་ལས་བྱུང་བའི་རྗེས་སུ་མཐུན་པ་མ་ཡིན་པས་རྣམ་པར་སྨིན་པ་ལས་སྐྱེས་པ་ལ་སོགས་པའི་མཇུག་ཐོགས་སུ་སྦྱོར་བ་ལས་བྱུང་བ་མི་འབྱུང་ན། དེ་ལྟ་ན་འོ་ན་ནི་ཉོན་

མོངས་པ་ཅན་དག་ལས་ཀྱང་སྦྱོར་བ་ལས་བྱུང་བ་འབྱུང་བར་མི་འགྱུར་ཏེ་མི་མཐུན་པའི་ཕྱིར་རོ། །ཉོན་མོངས་པ་ཅན་གྱི་ཆོས་ནི་མི་མཐུན་པ་ཡིན་ཏེ། དེ་དང་འགལ་བའི་ཕྱིར་དགེ་བ་དང་མཐུན་པ་མ་ཡིན་ནོ་ཞེས་བྱ་བའི་ཐ་ཚིག་གོ། །འོན་ཀྱང་ཞེས་བྱ་བ་རྒྱས་པར་འབྱུང་བ་ནི་དེ་དང་

མི་མཐུན་མོད་ཀྱིས། འོན་ཀྱང་ཉོན་མོངས་པ་ཀུན་དུ་འབྱུང་བས་ཡོངས་སུ་སྐྱོ་བའི་རྣལ་འབྱོར་པ་ལ་ནི་དེ་ཡོངས་སུ་ཤེས་པ་ལས་ཏེ། ཉོན་མོངས་པ་ཀུན་དུ་འབྱུང་བ་ཡོངས་སུ་ཤེས་པ་ལས་སྦྱོར་བ་ལས་བྱུང་བ་མངོན་དུ་འགྱུར་བར་རིགས་ཏེ། དེ་ཡོངས་སུ་ཤེས་པ་ཉིད་སྦྱོར་བ་ལས་

བྱུང་བའི་སེམས་ཡིན་པས་སོ། །གསལ་བའི་ཕྱིར་ཞེས་བྱ་བ་ནི་འདོད་པ་ན་སྤྱོད་པའི་སྐྱེས་ནས་ཐོབ་པ་ནི་གསལ་བ་ཡིན་པས་དེ་ནི་སློབ་པ་ལ་སོགས་པ་ལས་ལྡང་བའི་སེམས་ཡིན་པ་སྲིད་དོ། །དེ་ཉིད་ཀྱི་ཕྱིར་ཉོན་མོངས་པ་ཅན་གྱི་ཏིང་ངེ་འཛིན་གྱིས་གཟིར་བ་ཡང་དེ་ལ་བརྟེན་པར་

འགྱུར་རོ། །དེ་ནི་མངོན་པར་འདུ་བྱ་བ་མེད་པར་འབྱུང་བའི་ཕྱིར་དེ་ལས་ནི་སློབ་པ་ལ་སོགས་པ་དེ་དག་མི་འབྱུང་ངོ་། །གཟུགས་ན་སྤྱོད་པའི་སྐྱེས་ནས་ཐོབ་པ་ནི་འདོད་པ་ན་སྤྱོད་པ་བཞིན་དུ་གསལ་བ་མ་ཡིན་ཏེ། དེ་ལྟ་བས་ན་ཉོན་མོངས་པ་ཅན་གྱི་ཏིང་ངེ་འཛིན་གྱིས་གཟིར་བ་དེ་ལ་

བརྟེན་པར་མི་འགྱུར་གྱི། སྦྱོར་བ་ལས་བྱུང་བ་ཁོ་ན་རྟེན་པར་བྱེད་དོ། །སེམས་རྣམས་ཕན་ཚུན་གྱི་མཇུག་ཐོགས་སུ་འབྱུང་ལ་དེ་དག་ཀྱང་ཡིད་ལ་བྱེད་པའི་དབང་གིས་འབྱུང་བར་འགྱུར་བས་དེའི་ཕྱིར་ཡིད་ལ་བྱེད་པ་ནི་གསུམ་སྟེ་ཞེས་བྱ་བ་རྒྱས་པར་ཡིད་ལ་བྱེད་པ་ཉེ་བར་འགོད་པ་ཡིན་

ནོ། །རང་གི་མཚན་ཉིད་ཡིད་ལ་བྱེད་པ་ནི་རང་གི་མཚན་ཉིད་ཡིད་ལ་བྱེད་པ་སྟེ། དཔེར་ན་གཟུགས་ནི་གནོད་པར་བྱར་རུང་བའི་མཚན་ཉིད་ཅན་ཡིན་ནོ་སྙམ་པ་དེ་ལྟ་བུ་ལ་སོགས་པའོ། །སོགས་པ་ཞེས་བྱ་བའི་སྒྲས་ནི་ཚོར་བ་ནི་མྱོང་བའི་མཚན་ཉིད་ཅན་ནོ་ཞེས་བྱ་བ་དེ་ལྟ་བུ་ལ་

Vol. 142 · folio 236a

སོགས་པ་བསྡུའོ། །སྤྱིའི་མཚན་ཉིད་ཡིད་ལ་བྱེད་པས་ནི་མི་རྟག་པ་ཉིད་ལ་སོགས་པ་ཡིད་ལ་བྱེད་པ་སྟེ། མི་རྟག་པ་ཉིད་ནས་ངེས་པར་འབྱིན་པར་བྱེད་པའི་བར་རྣམ་པ་བཅུ་དྲུག་དང་ལྡན་པ་ཡིན་ནོ། །མོས་པའི་སྒོ་ནས་ཡིད་ལ་བྱེད་ཀྱི་ཡང་དག་པའི་དོན་གྱི་

སྒོ་ནས་མ་ཡིན་པ་ནི་མོས་པ་ཡིད་ལ་བྱེད་པ་སྟེ་མི་སྡུག་པ་ནས་ཟད་པར་གྱི་སྐྱེ་མཆེད་ལ་སོགས་པའི་བར་དག་ལའོ། །སོགས་པ་ཞེས་བྱ་བའི་སྒྲས་ནི་རྫུ་འཕྲུལ་ལ་སོགས་པ་མངོན་པར་བསྒྲུབས་པ་ལ་ཡང་བ་ཉིད་དུ་མོས་པ་ལ་སོགས་པ་བསྡུ་སྟེ། དཔེར་ན་རྫུ་འཕྲུལ་ཆེ་བ་དང་མཐུ་

ཆེ་བ་ནི་སའི་འདུ་ཤེས་ཆུང་ངུར་ཡང་བྱིན་གྱིས་རློབ་ཅིང་འདུ་ཤེས་ཚད་མེད་པར་ཡང་བྱིན་གྱིས་རློབ་ལ། དེ་འདོད་ནས་གཡོ་བར་ཡང་བྱེད་དོ་ཞེས་བྱ་བ་རྒྱས་པར་འབྱུང་བ་ལྟ་བུ་ཡིན་ནོ། །མི་སྡུག་པ་དང་ལྷན་ཅིག་པ་ཞེས་བྱ་བ་ནི་མི་སྡུག་པ་དང་ལྷན་ཅིག་ཅིང་འབྲེལ་པ་ནི་མི་སྡུག་

པ་དང་ལྷན་ཅིག་པ་སྟེ། འདི་སྐད་དུ་མི་སྡུག་པ་ཡིད་ལ་བྱེད་པའི་མཇུག་ཐོགས་སུ་དྲན་པ་ཡང་དག་བྱང་ཆུབ་ཀྱི་ཡན་ལག་སྒོམ་པར་བྱེད་ཅིང་ཐོབ་པར་བྱེད་དོ་ཞེས་བཤད་པ་ཡིན་ནོ། །དྲན་པ་ཡང་དག་བྱང་ཆུབ་ཀྱི་ཡན་ལག་ནི་འཕགས་པའི་ལམ་ཡིན་པས་མོས་པ་ཡིད་ལ་

བྱེད་པའི་མཇུག་ཐོགས་སུ་འཕགས་པའི་ལམ་འབྱུང་བ་ཡོད་དོ་ཞེས་བསྟན་པའི་ཕྱིར་བཤད་པ་ཡིན་ནོ། །གལ་ཏེ་སྤྱིའི་མཚན་ཉིད་ཡིད་ལ་བྱེད་པའི་མཇུག་ཐོགས་ཁོ་ནར་འཕགས་པའི་ལམ་མངོན་དུ་བྱེད་ཀྱི་མོས་པ་ཡིད་ལ་བྱེད་པའི་མཇུག་ཐོགས་སུ་ནི་མ་ཡིན་ན། མི་སྡུག་

པ་དང་ལྷན་ཅིག་པའི་དྲན་པ་ཡང་དག་བྱང་ཆུབ་ཀྱི་ཡན་ལག་སྒོམ་པར་བྱེད་དོ་ཞེས་བྱ་བ་འདི་ཇི་ལྟར་དྲང་ཞེ་ན། དེ་ཕྱིར་མི་སྡུག་པས་སེམས་བཏུལ་ནས་ཞེས་བྱ་བ་འདི་རྒྱས་པར་སྨོས་ཏེ། སྦྱོར་བའི་གནས་སྐབས་ན་སེམས་ཀྱི་ཇི་སྲིད་ཐ་མར་སྤྱི་ཡིད་ལ་བྱེད་པའི་མཇུག་ཐོགས་

སུ་འཕགས་པའི་ལམ་མངོན་དུ་བྱེད་པར་འགྱུར་བའི་བར་དུ་བཏུལ་ནས་ཏེ། དེའི་ཕྱིར་མདོ་དང་འགལ་བ་མེད་དོ། །འཕགས་པའི་ལམ་གྱི་མཇུག་ཐོགས་སུ་ཡང་ཞེས་བྱ་བ་རྒྱས་པར་འབྱུང་བ་ནི་གཞན་དག་ན་རེ་སྤྱི་ཡིད་ལ་བྱེད་པའི་མཇུག་ཐོགས་སུ་འཕགས་པའི་ལམ་

Vol. 142 · folio 236b

མངོན་དུ་བྱེད་པ་འབའ་ཞིག་ཏུ་མ་ཟད་ཀྱི་འཕགས་པའི་ལམ་གྱི་མཇུག་ཐོགས་སུ་ཡང་སྤྱི་ཡིད་ལ་བྱེད་པ་ཁོ་ན་མངོན་དུ་བྱེད་དོ་ཞེས་ཟེར་རོ། །རེ་ཞིག་མི་ལྕོགས་པ་མེད་པ་ཞེས་བྱ་བ་རྒྱས་པར་འབྱུང་བ་ལ། མི་ལྕོགས་པ་མེད་པ་ལ་སོགས་པ་ཞེས་བྱ་བའི་སྒྲས་ནི་མི་ལྕོགས་པ་

མེད་པ་དང་། བསམ་གཏན་དང་པོ་དང་། བསམ་གཏན་ཁྱད་པར་ཅན་གྱི་ས་གསུམ་ལ་བརྟེན་ནས་ངེས་པ་ལ་འཇུག་ན་ནི་ཉེ་བའི་ཕྱིར་ལམ་དེ་རྣམས་ཀྱི་མཇུག་ཐོགས་སུ་འདོད་པ་ན་སྤྱོད་པའི་སྤྱི་ཡིད་ལ་བྱེད་པ་ཐོས་པ་ལས་བྱུང་བའམ་བསམས་པ་ལས་བྱུང་བ་མངོན་དུ་བྱེད་པར་

འགྱུར་ན། གལ་ཏེ་བསམ་གཏན་གཉིས་པ་ལ་སོགས་པ་ལ་བརྟེན་ནས་ཏེ། བསམ་གཏན་གཉིས་པ་དང་། གསུམ་པ་དང་། བཞི་པ་ལ་བརྟེན་ནས་ངེས་པ་ལ་འཇུག་ན་གོ་ཇི་ལྟར་ཏེ། ཇི་ལྟར་འཕགས་པའི་ལམ་གྱི་མཇུག་ཐོགས་སུ་སྤྱི་ཡིད་ལ་བྱེད་པ་མངོན་དུ་བྱེད་པར་

འགྱུར་ན་འདོད་པ་ན་སྤྱོད་པ་ནི་མི་ནུས་སོ་ཞེས་བྱ་བ་ནི་མངོན་དུ་བྱ་བར་ཞེས་བྱ་བ་ཚིག་ལྷག་མ་ཡིན་ནོ། །ཅིའི་ཕྱིར་ཞེ་ན། བསམ་གཏན་དང་པོས་བར་དུ་ཆོད་པ་ཉིད་ཀྱིས་ཤིན་ཏུ་བསྐལ་པའི་ཕྱིར་རོ། །ཁྱོད་བསམ་གཏན་གཉིས་པ་ལ་སོགས་པའི་ས་པ་ཁོ་ན་མངོན་དུ་བྱེད་

པར་འགྱུར་རོ་ཞེས་སྨྲ་བར་འགྱུར་ན་དེའི་ཕྱིར་ངེས་པར་འབྱེད་པའི་ཆ་དང་མཐུན་པ་མ་གཏོགས་པར་དེ་དག་གི་ས་པ་ཡང་མ་ཐོབ་པོ་ཞེས་བྱ་བར་སྨོས་ཏེ། ངེས་པར་འབྱེད་པའི་ཆ་དང་མཐུན་པ་མ་གཏོགས་པ་བསམ་གཏན་གཉིས་པ་ལ་སོགས་པའི་ས་པའམ། མི་ལྕོགས་པ་མེད་

པ་ལ་སོགས་པའི་ས་པའི་ཟག་པ་མེད་པ་ནི་སྔོན་མ་ཐོབ་པོ། །འཇིག་རྟེན་པའི་ལམ་རྣམ་པ་ཅན་དུ་མ་གཏོགས་པ་ནི་སྔོན་ཐོབ་མོད་ཀྱི་དེ་ནི་འཕགས་པའི་དེ་ལས་ལྡང་བར་བྱེད་པ་ཡིན་པར་མི་འདོད་དོ། །འོ་ན་ནི་ངེས་པར་འབྱེད་པའི་ཆ་དང་མཐུན་པའི་སྤྱི་ཡིད་ལ་བྱེད་པ་མངོན་དུ་བྱེད་པར་

འགྱུར་རོ་ཞེ་ན། དེའི་ཕྱིར་འཕགས་པ་ནི་ཡང་ངེས་པར་འབྱེད་པའི་ཆ་དང་མཐུན་པ་ཞེས་བྱ་བ་རྒྱས་པར་སྨོས་སོ། །གལ་ཏེ་ཅིའི་ཕྱིར་སྙམ་དུ་སེམས་ན། དེའི་ཕྱིར་འབྲས་བུ་ཐོབ་ཟིན་པ་དེའི་སྦྱོར་བ་མངོན་དུ་བྱེད་པ་ནི་རིགས་པ་ཡིན་ནོ་ཞེས་བྱ་བ་རྒྱས་པར་སྨོས་ཏེ། སྦྱོར་བ་ནི་དོན་

Vol. 142 · folio 237a

བྱས་ཟིན་པའི་ཕྱིར་དང་། དམན་པའི་ཕྱིར་ལ། ངེས་པར་འབྱེད་པའི་ཆ་དང་མཐུན་པ་དག་ཀྱང་འཕགས་པའི་ལམ་གྱི་སྦྱོར་བ་ཡིན་ནོ། །དེས་ནི་དེ་དང་འདྲ་བའི་སྤྱིའི་ཡིད་ལ་བྱེད་པ་གཞན་ཡང་ཞེས་བྱ་བ་ནི་བདེན་པ་ལ་དམིགས་པའི་ཕྱིར་ངེས་པར་འབྱེད་

པའི་ཆ་དང་མཐུན་པ་དང་འདྲ་བའི་སྤྱི་ཡིད་ལ་བྱེད་པ་གང་ཞིག་འཐོབ་པར་འགྱུར་བ་སྟེ། ཟག་པ་མེད་པའི་ལམ་སྐྱེ་བའི་ཚེ་ཐོབ་པར་འགྱུར་བ་ཞེས་བྱ་བའི་ཐ་ཚིག་གོ། །ཇི་ལྟར་ཞེ་ན། མྱ་ངན་ལས་འདས་པ་ནི་ཞི་བའོ་སྙམ་པ་ནི་མྱ་ངན་ལས་འདས་པ་ལས་ཐམས་ཅད་ལ་

དམིགས་པའི་ཕྱིར་སྤྱི་ཡིད་ལ་བྱེད་པ་ཡིན་ནོ། །དེ་མངོན་དུ་བྱེད་པར་འགྱུར་རོ་ཞེས་བྱ་བ་ནི་འཕགས་པའི་ལམ་གྱི་མཇུག་ཐོགས་སུ་འདུ་བྱེད་ཐམས་ཅད་ནི་མི་རྟག་པའོ་སྙམ་པའམ་ཆོས་ཐམས་ཅད་ནི་བདག་མེད་པའོ་སྙམ་པའམ་མྱ་ངན་ལས་འདས་པ་ནི་ཞི་བའོ་སྙམ་པ་མངོན་

དུ་བྱེད་པར་འགྱུར་རོ། །དེ་སྐད་དུ་ནི་མི་བརྗོད་དོ། །ཅིའི་ཕྱིར་ཞེ་ན། དེ་དང་འདྲ་བའི་སྤྱི་ཡིད་ལ་བྱེད་པ་འདི་དག་ནི་ངེས་པར་འབྱེད་པའི་ཆ་དང་མཐུན་པ་ལ་རག་ལས་ནས་འཐོབ་པའི་ཕྱིར་ཏེ། འདི་དག་ཟག་པ་མེད་པའི་ལམ་དུ་རག་ལུས་ཏེ་འཐོབ་པ་ནི་མ་ཡིན་ནོ་ཞེས་གྲག་

གོ། །མི་ལྕོགས་པ་མེད་པ་ལ་བརྟེན་ནས་ཞེས་བྱ་བ་རྒྱས་པར་འབྱུང་བ་ལ་དེའི་ས་པ་ཞེས་བྱ་བ་ནི་མི་ལྕོགས་པ་མེད་པའི་ས་པའོ། །དེའི་ས་པའམ་སྲིད་པའི་རྩེ་མོ་པ་ཡིན་ནོ་ཞེས་བྱ་བ་ནི་ཅི་ཡང་མེད་པའི་སྐྱེ་མཆེད་ཀྱི་ས་པའམ་སྲིད་པའི་རྩེ་མོ་པ་སྟེ། གལ་ཏེ་སྲིད་པའི་རྩེ་མོར་

སྐྱེས་པ་ཞིག་ཡིན་ནའོ། །ས་ལྷག་མ་རྣམས་སུ་ནི་ལྡང་བའི་སེམས་རང་གི་ས་པ་ཁོ་ན་ཡིན་གྱི་གཞན་གྱི་ས་པ་ནི་མ་ཡིན་ཏེ། གཞན་གྱི་ས་པ་ནི་སྦྱོར་བས་བསྒྲུབ་པར་བྱ་བ་ཡིན་པའི་ཕྱིར་ལ། རང་གི་ས་པ་ནི་མངོན་པར་འདུ་བྱ་བ་མེད་པར་འབྱུང་བས་སོ། །སྦྱོར་བ་ལ་རག་ལུས་

པའི་ཕྱིར་རོ་ཞེས་བྱ་བ་ཅི་ཞེ་ན། འཕགས་པའི་ལམ་མོ། །ལམ་གྱི་མཇུག་ཐོགས་སུ་ནི་འདོད་པ་ན་སྤྱོད་པའི་སྐྱེས་ནས་ཐོབ་པ་ཡང་མངོན་དུ་འགྱུར་རོ་ཞེས་བྱ་བར་སྐབས་དང་སྦྱར་རོ། །ཁམས་གསུམ་པ་ཡི་ཉོན་མོངས་ཅན། །ཞེས་བྱ་བ་རྒྱས་པར་འབྱུང་བ་ནི་གྲངས་བཞིན་

Vol. 142 · folio 237b

དུ་བསྟན་པ་ཡིན་ཏེ། འདོད་པ་ན་སྤྱོད་པའི་ཉོན་མོངས་པ་ཅན་ལ་ནི་སེམས་དྲུག་རྙེད་དེ་སོ་སོར་རྙེད་དོ་ཞེས་བྱ་བའི་ཐ་ཚིག་གོ། །གཟུགས་ན་སྤྱོད་པ་ལ་ཡང་དྲུག་གོ། །གཟུགས་མེད་པ་ན་སྤྱོད་པ་ལ་ནི་གཉིས་སོ། །དེའི་ཕྱིར་འདོད་པ་ན་སྤྱོད་པའི་ཉོན་མོངས་པ་ཅན་ཞེས་བྱ་བ་

རྒྱས་པར་སྨོས་ཏེ། སེམས་དྲུག་པོ་འདི་དག་དང་མི་ལྡན་པ་ཞེས་བྱ་བ་ནི་སེམས་དྲུག་པོ་འདི་དག་དང་མི་ལྡན་པའི་གང་ཟག་གོ། །ཇི་ལྟ་ཞེ་ན། འདི་ན་དགེ་བའི་རྩ་བའི་ཉིང་མཚམས་སྦྱོར་བ་ནི་ཡང་དག་པའི་ལྟ་བའམ་ཐེ་ཚོམ་གྱིས་ཡིན་ཏེ། དེ་གལ་ཏེ་ཐེ་ཚོམ་གྱིས་

ཉིང་མཚམས་སྦྱོར་བར་བྱེད་ན། དེ་ལ་ཐེ་ཚོམ་དང་མཚུངས་པར་ལྡན་པའི་ཉོན་མོངས་པ་ཅན་གྱི་སེམས་མངོན་དུ་གྱུར་པ་དང་། གང་གི་ཚེ་གཟུགས་ཀྱི་ཁམས་དང་གཟུགས་མེད་པའི་ཁམས་ནས་འདོད་པའི་ཁམས་སུ་སླར་ལྡོག་པ་དེའི་ཚེ་འདིའི་སྲིད་པ་བར་མ་ཉིང་

མཚམས་སྦྱོར་བའི་ཉོན་མོངས་པ་ཅན་གྱི་སེམས་ལ་གདོན་མི་ཟ་བར་དགེ་བ་དེ་རྙེད་པ་ཡིན་ནོ། །མི་དགེ་བ་དང་བསྒྲིབས་ལ་ལུང་དུ་མ་བསྟན་པ་དག་ཅེས་བྱ་བ་རྒྱས་པར་འབྱུང་བ་ནི་སྐབས་ཡིན་པའི་ཕྱིར་དང་། གཟུགས་ན་སྤྱོད་པའི་བསྒྲིབས་ལ་ལུང་དུ་མ་བསྟན་པ་ཡང་ལོགས་

ཤིག་ནས་འབྱུང་བའི་ཕྱིར་འདོད་པ་ན་སྤྱོད་པའི་མི་དགེ་བ་དང་བསྒྲིབས་ལ་ལུང་དུ་མ་བསྟན་པ་དག་ཁོ་ན་ཡིན་ཏེ། མི་དགེ་བ་དང་བསྒྲིབས་ལ་ལུང་དུ་མ་བསྟན་པ་དེ་དག་དང་གཟུགས་ན་སྤྱོད་པའི་ཉོན་མོངས་པ་ཅན་ཏེ། ཅི་ཞེ་ན། རྙེད་ཅེས་བྱ་བར་སྐབས་དང་སྦྱར་རོ། །ཇི་ལྟར་

རྙེད་ཅེ་ན་ཁམས་སུ་སླར་ལྡོག་པ་དང་། ཡོངས་སུ་ཉམས་པ་ལས་ཞེས་བྱ་བ་སྨོས་ཏེ། གང་གི་ཚེ་གཟུགས་ཀྱི་ཁམས་སམ། གཟུགས་མེད་པའི་ཁམས་ནས་འདོད་པའི་ཁམས་སུ་སླར་ལྡོག་པ་དེའི་ཚེ་འདི་སྲིད་པ་བར་མར་ཉིང་མཚམས་སྦྱོར་བ་ཉོན་མོངས་པ་ཅན་གྱི་སེམས་

མི་དགེ་བ་དང་བསྒྲིབས་ལ་ལུང་དུ་མ་བསྟན་པ་དག་ལས་གང་ཡང་རུང་བ་ཞིག་ཏུ་མངོན་དུ་གྱུར་པ་ན་གདོན་མི་ཟ་བར་སྔོན་རྣམ་པར་ཉམས་པའི་ཕྱིར་དེ་དག་དང་མི་ལྡན་པ་ལས་མི་དགེ་བ་དང་བསྒྲིབས་ལ་ལུང་དུ་མ་བསྟན་པ་དེ་དག་རྙེད་པར་འགྱུར་རོ། །ཡོངས་སུ་ཉམས་པ་ལས་

Vol. 142 · folio 238a

གང་གི་ཚེ་འདོད་པའི་འདོད་ཆགས་དང་བྲལ་བ་ལས་ཡོངས་སུ་ཉམས་པ་དེའི་ཚེ་འདི་ལ་ཡོངས་སུ་ཉམས་པའི་སེམས་ཉོན་མོངས་པ་ཅན་མངོན་དུ་གྱུར་ན་དེ་དག་དང་མི་ལྡན་པ་ལས་ཉོན་མོངས་པ་ཅན་དེ་དག་རྙེད་པ་ཡིན་ནོ། །ཁམས་སུ་སླར་ལྡོག་པ་ལས་

གཟུགས་ན་སྤྱོད་པའི་ཉོན་མོངས་པ་ཅན་ནི་གང་གི་ཚེ་གཟུགས་མེད་པའི་ཁམས་ནས་འདོད་པའི་ཁམས་སུ་སླར་ལྡོག་པ་དེའི་ཚེ་འདིའི་སྲིད་པ་བར་མར་ཉིང་མཚམས་སྦྱོར་བའི་ཉོན་མོངས་པ་ཅན་གྱི་སེམས་ལ་གདོན་མི་ཟ་བར་དེ་དང་མི་ལྡན་པ་ལས་གཟུགས་ན་སྤྱོད་པའི་ཉོན་

མོངས་པ་ཅན་སྔོན་ཉམས་པ་རྙེད་པར་འགྱུར་རོ། །ཡོངས་སུ་ཉམས་པ་ལས་ནི་གང་གི་ཚེ་འདོད་པ་ན་སྤྱོད་པའི་སེམས་ཀྱིས་གཟུགས་ཀྱི་འདོད་ཆགས་དང་བྲལ་བ་ལས་ཡོངས་སུ་ཉམས་པ་དེའི་ཚེ་དེ་དང་མི་ལྡན་པ་ལས་གཟུགས་ན་སྤྱོད་པའི་ཉོན་མོངས་པ་ཅན་རྙེད་པར་འགྱུར་

རོ། །ཡོངས་སུ་ཉམས་པ་ལས་གཟུགས་མེད་པ་ན་སྤྱོད་པའི་ཉོན་མོངས་པ་ཅན་ནི་གང་གི་ཚེ་འདོད་པ་ན་སྤྱོད་པའི་སེམས་ཀྱིས་གཟུགས་མེད་པའི་འདོད་ཆགས་དང་བྲལ་བ་ལས་ཡོངས་སུ་ཉམས་པ་དེའི་ཚེ་འདི་དེ་དང་མི་ལྡན་པ་ལས་གཟུགས་མེད་པ་ན་སྤྱོད་པའི་ཉོན་མོངས་པ་ཅན་རྙེད་

པར་འགྱུར་རོ། །སློབ་པ་ཡང་ཡོངས་སུ་ཉམས་པ་ལས་ཞེས་བྱ་བ་སྐབས་དང་སྦྱར་ཏེ། གང་གི་ཚེ་འདོད་པ་ན་སྤྱོད་པའི་སེམས་ཀྱིས་དགྲ་བཅོམ་པ་ཉིད་ལས་ཡོངས་སུ་ཉམས་པ་དེའི་ཚེ་འདི་དེ་དང་མི་ལྡན་པ་ལས་སློབ་པའི་སེམས་རྙེད་པར་འགྱུར་རོ། །དེ་ལྟར་ན་རེ་ཞིག་འདོད་པ་

ན་སྤྱོད་པའི་ཉོན་མོངས་པ་ཅན་གྱི་སེམས་མངོན་དུ་གྱུར་ན་དེ་དག་དང་མི་ལྡན་པ་ལས་སེམས་དྲུག་རྙེད་པར་བཤད་པ་ཡིན་ནོ། །གཟུགས་ན་སྤྱོད་པའི་ཉོན་མོངས་པ་ཅན་གྱི་སེམས་མངོན་དུ་གྱུར་ན་ཡང་དེ་དག་དང་མི་ལྡན་པ་ལས་དྲུག་རྙེད་དོ། །གཟུགས་ན་སྤྱོད་པ་གསུམ་ཞེས་བྱ་བ་

རྒྱས་པར་འབྱུང་བ་ཞེས་བྱ་བ་ནི་གང་གི་ཚེ་གཟུགས་མེད་པའི་ཁམས་ནས་གཟུགས་ཀྱི་ཁམས་སུ་སླར་ལྡོག་པ་དེའི་ཚེ་འདི་གཟུགས་ན་སྤྱོད་པའི་སྲིད་པ་བར་མར་ཉིང་མཚམས་སྦྱོར་བའི་ཉོན་མོངས་པ་ཅན་གྱི་སེམས་ལ་གདོན་མི་ཟ་བར་གཟུགས་ན་སྤྱོད་པ་གསུམ་སྟེ། སྐྱེས་ནས་

Vol. 142 · folio 238b

ཐོབ་པའི་དགེ་བ་དང་ཉོན་མོངས་པ་ཅན་དང་ཐོབ་པ་སྔར་སྐྱེ་བ་ཡོད་པའི་ཕྱིར་མ་བསྒྲིབས་ལ་ལུང་དུ་མ་བསྟན་པ་སྤྲུལ་པའི་སེམས་དང་། འདོད་པ་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་སྤྲུལ་པའི་སེམས་ཁོ་ན་དང་ཡོངས་སུ་ཉམས་པ་ལས་གཟུགས་ན་སྤྱོད་པའི་སེམས་

ཀྱིས་དགྲ་བཅོམ་པ་ཉིད་ལས་ཡོངས་སུ་ཉམས་པ་དེ་དང་མི་ལྡན་པ་ལས་གཟུགས་མེད་པ་ན་སྤྱོད་པའི་ཉོན་མོངས་པ་ཅན་དང་སློབ་པ་རྙེད་དེ། དེ་ལྟར་ན་གཟུགས་ན་སྤྱོད་པའི་ཉོན་མོངས་པ་ཅན་ལ་ཡང་དྲུག་རྙེད་པར་བཤད་པ་ཡིན་ནོ།། །།བམ་པོ་ཉི་ཤུ་གཉིས་

པ། གཟུགས་མེད་པ་ན་སྤྱོད་པའི་ཉོན་མོངས་པ་ཅན་ལ་ནི་དེ་དག་དང་མི་ལྡན་པ་ལས་གཉིས་རྙེད་དེ། ཡོངས་སུ་ཉམས་པ་ལས་གཟུགས་མེད་པ་ན་སྤྱོད་པའི་སེམས་ཀྱིས་དགྲ་བཅོམ་པ་ཉིད་ལས་ཡོངས་སུ་ཉམས་པས་གང་གི་ཕྱོགས་གཅིག་མངོན་དུ་གྱུར་པའི་ཉོན་མོངས་

པ་ཅན་དེ་ཉིད་དང་སློབ་པའོ། །གཟུགས་ན་སྤྱོད་པའི་དགེ་བ་ལ་སེམས་གསུམ་ཞེས་བྱ་བ་ལ། དགེ་བ་ལ་ཞེས་བྱ་བ་ནི་སྤྱིར་བསྟན་པར་ཟད་དེ། གཟུགས་ན་སྤྱོད་པའི་དགེ་བ་འགའ་ལ་ཅི་རིགས་པར་གསུམ་རྙེད་པ་ཡིན་ནོ། །ཇི་ལྟར་ཞེ་ན། རེ་ཞིག་གཟུགས་ན་སྤྱོད་པའི་

དགེ་བའི་སེམས་དང་པོ་མངོན་དུ་གྱུར་ན་དེ་དང་མི་ལྡན་པ་ལས་གཟུགས་ན་སྤྱོད་པའི་དགེ་བ་དེ་ཉིད་རྙེད་ལ། དངོས་གཞིའི་བསམ་གཏན་གྱིས་བསྡུས་པའི་དགེ་བའི་སེམས་མངོན་དུ་གྱུར་ན་དེ་དག་དང་མི་ལྡན་པ་ལས་འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་

དུ་མ་བསྟན་པ་སྤྲུལ་པའི་སེམས་དག་རྙེད་དེ། དེ་ལྟར་ན་གཟུགས་ན་སྤྱོད་པའི་དགེ་བའི་སེམས་མངོན་དུ་གྱུར་ན་གསུམ་རྙེད་དོ་ཞེས་བཤད་དོ། །གསུམ་པོ་ཅིག་ཅར་དུ་རྙེད་དོ་ཞེས་བྱ་བ་སྲིད་པ་ནི་མ་ཡིན་ནོ། །སློབ་པ་ལ་བཞི་ཞེས་བྱ་བ་རྒྱས་པར་འབྱུང་བ་ནི་སློབ་པའི་

སེམས་སྡུག་བསྔལ་ལ་ཆོས་ཤེས་པའི་བཟོད་པའི་སེམས་མངོན་དུ་གྱུར་ན་དེ་དང་མི་ལྡན་པ་ལས་སློབ་པ་སྡུག་བསྔལ་ལ་ཆོས་ཤེས་པའི་བཟོད་པའི་ཚོགས་ཀྱི་ངོ་བོ་ཉིད་དེ་ཉིད་རྙེད་དོ། །འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་དག་དང་

Vol. 142 · folio 239a

གཟུགས་མེད་པ་ན་སྤྱོད་པའི་དགེ་བ་ཡང་རྙེད་དོ། །གང་གི་ཚེ་ཞེ་ན། འཕགས་པའི་ལམ་གྱིས་འདོད་པ་དང་གཟུགས་ཀྱི་ཁམས་ལས་འདོད་ཆགས་དང་བྲལ་བར་བྱེད་པ་ནའོ། །ཇི་ལྟ་ཞེ་ན། གང་གི་ཚེ་འདི་མི་ལྕོགས་པ་མེད་པའི་ས་པའི་

འཕགས་པའི་ལམ་གྱིས་འདོད་པ་ལས་འདོད་ཆགས་དང་བྲལ་བར་བྱེད་པ་དེའི་ཚེ་སློབ་པའི་སེམས་རྣམ་པར་གྲོལ་བའི་ལམ་དགུ་པས་བསྡུས་པ་མངོན་དུ་གྱུར་པ་ན་དེ་དག་དང་མི་ལྡན་པ་ལས་འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་སྤྲུལ་པའི་སེམས་

དག་རྙེད་ལ། གང་གི་ཚེ་ས་དྲུག་པའི་འཕགས་པའི་ལམ་རྣམས་ལས་གང་ཡང་རུང་བ་ཞིག་གིས་གཟུགས་ལས་འདོད་ཆགས་དང་བྲལ་བར་བྱེད་པ་དེའི་ཚེ་སློབ་པའི་སེམས་རྣམ་པ་དང་པོ་མངོན་དུ་གྱུར་པ་ན་དེ་དང་མི་ལྡན་པ་ལ་འདས་པ་དང་མ་འོངས་པ་འཐོབ་པའི་ཚུལ་

གྱིས་གཟུགས་མེད་པ་ན་སྤྱོད་པའི་དགེ་བའི་སེམས་རྙེད་དོ། །འཕགས་པའི་ལམ་ཞེས་སྨོས་པ་ནི་ཟག་པ་དང་བཅས་པའི་སེམས་བརྩལ་བའི་ཕྱིར་ཏེ། རྙེད་པ་འདི་ནི་སློབ་པའི་སེམས་མངོན་དུ་གྱུར་པ་ཡིན་པར་བཤད་དོ། །འདི་ལ་སློབ་དཔོན་ཡོན་ཏན་བློ་གྲོས་ན་རེ། སློབ་པ་ལ་

བཞི། སློབ་པ་དེ་ཉིད་དང་། འཕགས་པའི་ལམ་གྱིས་འདོད་པ་དང་གཟུགས་ཀྱི་ཁམས་ལས་འདོད་ཆགས་དང་བྲལ་བར་བྱེད་པ་ན་འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་དག་དང་གཟུགས་མེད་པའི་དགེ་བའོ་ཞེས་བྱ་བ་ཇི་ལྟ་བུ་ཞེ་ན། དེའི་ཕྱིར་

བཤད་པ། འཕགས་པའི་ལམ་གྱིས་འདོད་པ་དང་གཟུགས་ཀྱི་ཁམས་ལས་འདོད་ཆགས་དང་བྲལ་བར་བྱེད་པ་ན་སྟེ། གང་གི་ཚེ་འདི་མི་ལྕོགས་པ་མེད་པའི་ས་པའི་འཕགས་པའི་ལམ་གྱིས་འདོད་པའི་ཁམས་ལས་འདོད་ཆགས་དང་བྲལ་བར་བྱེད་པ་དེའི་ཚེ་རྣམ་པར་

གྲོལ་བའི་ལམ་དགུ་པ་གང་ཡིན་པ་དེ་ནི་དངོས་གཞིའི་བསམ་གཏན་གྱི་ས་པའི་ལམ་གྱི་སློབ་པ་འཐོབ་པས་སློབ་པ་རྙེད་ཅེས་བྱ་ལ། འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་སྤྲུལ་པའི་སེམས་དག་ཀྱང་དེ་ཁོ་ནའི་ཚེ་རྙེད་དོ། །ས་དྲུག་གི་འཕགས་

Vol. 142 · folio 239b

པའི་ལམ་གྱིས་གཟུགས་ཀྱི་ཁམས་ལས་འདོད་ཆགས་དང་བྲལ་བ་ན་རྣམ་པར་གྲོལ་བའི་ལམ་དགུ་པ་གང་ཡིན་པ་དེ་ནི་གཟུགས་མེད་པ་ན་སྤྱོད་པའི་དགེ་བ་རྙེད་པ་ཡིན་ནོ་ཞེས་ཟེར་ལ། དེའི་སློབ་མ་སློབ་དཔོན་དབྱིག་བཤེས་ཀྱང་དོན་དེ་ཁོ་ན་དག་དེ་དང་ཚིག་དང་ཡི་གེ་དག་ཁོ་

ན་འདྲི་བར་བྱེད་དོ། །བཤད་པ་འདི་ནི་རིགས་པ་མ་ཡིན་ཏེ། དེ་ལྟར་ཚིག་གཅིག་ཏུ་བཤད་ན་དོན་རུང་བ་མ་ཡིན་གྱི་ཚིག་ཐ་དད་པར་ནི་རུང་ངོ་། །སློབ་པ་དེ་ཉིད་ཅེས་བྱ་བ་ནི་ཚིག་གཅིག་ཡིན་ནོ། །འཕགས་པའི་ལམ་ཞེས་བྱ་བ་ནས་འདོད་པ་དང་གཟུགས་ན་སྤྱོད་པའི་མ་

བསྒྲིབས་ལ་ལུང་དུ་མ་བསྟན་པ་དག་ཅེས་བྱ་བའི་བར་ནི་ཚིག་གཞན་ཡིན་ནོ། །འཕགས་པའི་ལམ་གྱིས་འདོད་པ་དང་གཟུགས་ཀྱི་ཁམས་ལས་འདོད་ཆགས་དང་བྲལ་བར་བྱེད་པ་ན་ཞེས་བྱ་བའི་ཁྱད་པར་འདིས་ནི་གོང་དུ་སློབ་པ་དེ་ཉིད་ཅེས་བཤད་པ་དེ་ཁྱད་པར་དུ་བྱ་བ་མ་ཡིན་

ཏེ་ཚིག་ཐ་དད་པའི་ཕྱིར་རོ། །ལྡན་པ་མིན་ལས་རྙེད་ཅེས་བྱ་བ་བྱུང་བའི་ཕྱིར་སེམས་ཀྱིས་རྙེད་པ་འདི་ནི་དེ་དང་མི་ལྡན་པ་ལས་ཡིན་པར་བརྗོད་ན། དེ་ཇི་ལྟར་རྣམ་པར་གྲོལ་བའི་ལམ་དགུ་པ་ལ་སློབ་པའི་སེམས་དང་ལྡན་པའི་གང་ཟག་ལ་སློབ་པའི་སེམས་རྙེད་པར་རྣམ་པར་གཞག །

དངོས་གཞིའི་བསམ་གཏན་གྱི་སློབ་པ་སྔོན་མེད་པ་རྙེད་པར་འགྱུར་རོ་ཞེས་བཤད་པ་མ་ཡིན་ནམ་ཞེ་ན། ཧ་ཅང་ཐལ་བར་འགྱུར་བའི་ཕྱིར་མ་ཡིན་ཏེ། གཟུགས་ན་སྤྱོད་པའི་དགེ་བའི་སེམས་དངོས་གཞིའི་བསམ་གཏན་གྱི་ས་པ་སྔོན་མེད་པའང་རྙེད་པར་འགྱུར་བས་དེ་

ཡང་རྙེད་པར་ཐལ་བར་འགྱུར་རོ། །སློབ་དཔོན་དབྱིག་བཤེས་ན་རེ་སློབ་པའི་སེམས་ལ་གནས་པ་འདོད་པའི་ཁམས་ལས་འདོད་ཆགས་དང་བྲལ་བ་ན་གཟུགས་ན་སྤྱོད་པའི་དགེ་བ་ནི་ངེས་པ་ལ་འཇུག་པའི་དྲོ་བར་གྱུར་པའི་གནས་སྐབས་ཉིད་ན་ཐོབ་ཟིན་པའི་ཕྱིར་མི་བགྲང་

ངོ་ཞེས་ཟེར་རོ། །དེ་ནི་རིགས་པ་མ་ཡིན་ཏེ། སློབ་པའང་མི་བགྲང་བར་འགྱུར་བའི་ཕྱིར་རོ། །སློབ་པའང་མཐོང་བའི་ལམ་གྱི་གནས་སྐབས་དང་པོ་ན་ཐོབ་ཟིན་པས་ཁྱོད་ཀྱིས་དེ་ལྟར་རྣམ་པར་མི་གཞག་པར་བྱ་དགོས་པར་འགྱུར་རོ། །གང་གི་ཕྱིར་སློབ་དཔོན་ཉིད་

Vol. 142 · folio 240a

ཀྱིས་སྤེལ་མའི་ཚིགས་སུ་བཅད་པ་བཤད་པ་ཁོ་ན་ལས། ངེས་འཇུག་དགྲ་བཅོམ་ཉིད་ཀྱི་ཚེ། །སློབ་པ་དང་མི་སློབ་པའོ་ཞེས་བཤད་པ་དེའི་ཕྱིར་ཡང་ཉེས་པར་བཤད་པ་ཡིན་ནོ་ཞེས་བྱ་བར་ངེས་སོ། །ལྷག་མར་བཅས་པས་ལྷག་མ་སྟེ་

ཞེས་བྱ་བ་ནི་སེམས་གང་ལ་རྙེད་པ་མ་བཤད་པ་དེ་ལ་ནི་དེ་ཉིད་རྙེད་དོ་ཞེས་བྱ་བ་ཡིན་ནོ། །ཇི་ལྟ་བུར་ཞེ་ན་རེ་ཞིག་འདོད་པ་ན་སྤྱོད་པའི་དགེ་བའི་སེམས་ལ་སེམས་འདི་རྙེད་ཅིང་རྙེད་དོ་ཞེས་མ་བཤད་པས་དེ་ལ་ནི་དེ་ཁོ་ན་རྙེད་ཀྱི་གཞན་དག་ནི་མ་ཡིན་ཏེ། དཔེར་ན་ཡང་

དག་པའི་ལྟ་བས་དགེ་བའི་རྩ་བའི་ཉིང་མཚམས་སྦྱོར་བར་བྱེད་པའི་ཚེ་འདོད་པ་ན་སྤྱོད་པའི་དགེ་བའི་སེམས་མངོན་དུ་གྱུར་ན། དེ་དང་མི་ལྡན་པ་ལས་དགེ་བའི་སེམས་དེ་ཁོ་ན་རྙེད་ཀྱི་གཞན་ཉོན་མོངས་པ་ཅན་དག་ནི་མ་ཡིན་ཏེ། ཁམས་གསུམ་ཆར་ཡང་སྔར་ཐོབ་ཟིན་

པའི་ཕྱིར་རོ། །འདོད་པ་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་ཡང་མ་ཡིན་ཏེ། རྣམ་པར་སྨིན་པ་ལ་སོགས་པའི་ཐོབ་པ་ནི་ལྷན་ཅིག་སྐྱེ་བ་ཡིན་པའི་ཕྱིར་ལ། སྤྲུལ་པའི་སེམས་ནི་ཐོབ་པ་མེད་པའི་ཕྱིར་རོ། །གཟུགས་དང་གཟུགས་མེད་པ་ན་སྤྱོད་པའི་དགེ་བ་

ལ་སོགས་པ་དང་སློབ་པ་དང་མི་སློབ་པ་དག་ཀྱང་མ་ཡིན་ཏེ་ཐོབ་པ་མེད་པའི་ཕྱིར་རོ། །འདོད་པ་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པའི་སེམས་ལ་ཡང་དེ་རྙེད་པར་བཤད་དེ། དེ་ལ་ཡང་དེ་དང་མི་ལྡན་པ་ལས་དེ་ཁོ་ན་རྙེད་པ་ཡིན་ཏེ། ལུང་བསྟན་མིན་འཐོབ་ལྷན་ཅིག་

སྐྱེ། །ཞེས་བྱ་བ་ཡིན་པའི་ཕྱིར་རོ། །དགེ་བ་ལ་སོགས་པ་གཞན་དག་ནི་མ་ཡིན་ཏེ། སྔར་ཐོབ་ཟིན་པའི་ཕྱིར་དང་། དེ་བཞིན་ཉིད་དུ་ཁ་ཅིག་ཐོབ་པ་མེད་པའི་ཡང་ཕྱིར་རོ། །སྤྲུལ་པའི་སེམས་མངོན་དུ་གྱུར་ན་ནི། འགའ་ཡང་རྙེད་པ་མེད་པས་དེ་ནི་བརྗོད་པར་མི་བྱའོ། །ཉོན་མོངས་པ་

ཅན་ནམ་གཞན་ཡང་རུང་གང་ལ་འགའ་ཡང་ཐོབ་པ་མེད་པ་དེ་ནི་བརྗོད་པར་མི་བྱའོ། །ཁམས་གསུམ་པའི་ཉོན་མོངས་པ་ཅན་ཁོ་ན་ལ་དྲུག་ནས་གཉིས་ཀྱི་བར་རྙེད་ལ། གདོན་མི་ཟ་བ་ནི་མ་ཡིན་ནོ་ཞེས་བྱ་བར་ངེས་པར་གཟུང་ངོ་། །གཟུགས་ན་སྤྱོད་པའི་མ་བསྒྲིབས་ལ་

Vol. 142 · folio 240b

ལུང་དུ་མ་བསྟན་པ་མངོན་དུ་གྱུར་ན་ཡང་། དེ་ཁོ་ན་རྙེད་ཀྱི་གཞན་དག་ནི་མ་ཡིན་ཏེ། སྔ་མ་བཞིན་དུ་བརྗོད་པར་བྱའོ། །དེ་བཞིན་དུ་གཟུགས་མེད་པ་ན་སྤྱོད་པའི་དགེ་བའི་སེམས་རྣམ་པ་དང་པོས་བསྡུས་པ་ནམ་མཁའ་མཐའ་ཡས་སྐྱེ་མཆེད་ཀྱི་ཉེར་བསྡོགས་མངོན་དུ་

གྱུར་ན་ཡང་དེ་དང་མི་ལྡན་པ་ལས་དེ་ཁོ་ན་རྙེད་ཀྱི་གཞན་དག་ནི་མ་ཡིན་ཏེ། ཁ་ཅིག་ནི་སྔར་ཐོབ་ཟིན་པའི་ཕྱིར་ལ། ཁ་ཅིག་ནི་ཐོབ་པ་མེད་པའི་ཕྱིར་རོ། །དེ་བཞིན་དུ་མ་བསྒྲིབས་ལ་ལུང་དུ་མ་བསྟན་པ་དང་མི་སློབ་པ་ལ་ཡང་བརྗོད་པར་བྱའོ། །གཞན་དག་ནི་ཁྱད་པར་

མེད་པར་ཞེས་བྱ་བ་ནི་སྤེལ་མ་བྱེད་པ་དག་གོ། །ཁྱད་པར་མེད་པར་ཞེས་བྱ་བ་ནི་ཁམས་གསུམ་པའི་ཉོན་མོངས་པ་ཅན་ལ་སོགས་པ་སོ་སོར་མ་བྱས་པའི་ཕྱིར་རོ། །དགེ་བའི་སེམས་ལ་བདུན་ཡིན་ཏེ། །ཞེས་བྱ་བ་ནི་མཚན་ཉིད་བཤད་པ་གང་ཡིན་པ་དེ་མ་ཚང་བ་

ཡིན་ཏེ། དགེ་བ་ནི་ཁམས་གསུམ་པ་དང་ཟག་པ་མེད་པ་ཡིན་ལ་དེ་ལ། དགེ་བའི་སེམས་ལ་བདུན་ཡིན་ཏེ། །ཞེས་བརྗོད་པར་བྱའི་དྲུག་ཡིན་ཏེ་ཞེས་བྱ་བ་ནི་མ་ཡིན་ནོ། །ཇི་ལྟ་ཞེ་ན་དེ་བསྟན་པའི་ཕྱིར་འདོད་པ་ན་སྤྱོད་པའི་དགེ་བ་ཞེས་བྱ་བ་རྒྱས་པར་སྨོས་ཏེ། དགེ་

བའི་རྩ་བའི་ཉིང་མཚམས་སྦྱོར་བ་ལས་ཞེས་བྱ་བ་འདི་བཤད་ཟིན་ཏོ། །འདོད་ཆགས་དང་བྲལ་བ་ལས་འདོད་པ་དང་གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་དག་ཅེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་ལམ་གྱིས་འདོད་པའི་

ཁམས་ལས་འདོད་ཆགས་དང་བྲལ་བ་ན་རྣམ་པར་གྲོལ་བའི་ལམ་དགུ་པ་ལ་དེ་དག་དང་མི་ལྡན་པ་ལས་འདོད་པ་དང་གཟུགས་ན་སྤྱོད་པའི་སྤྲུལ་པའི་སེམས་དག་རྙེད་པ་ཡིན་ནོ། །དེ་ན་ཡོད་པའི་ཏིང་ངེ་འཛིན་ཐོབ་པ་ལས་གཟུགས་དང་གཟུགས་མེད་པ་ན་སྤྱོད་པའི་དགེ་

བ་དག་གོ་ཞེས་བྱ་བ་ནི་གང་གི་ཚེ་དང་པོ་ཉིད་དུ་གཟུགས་ན་སྤྱོད་པ་མི་ལྕོགས་པ་མེད་པ་འཐོབ་པ་དེའི་ཚེ་གཟུགས་ན་སྤྱོད་པའི་དགེ་བ་རྙེད་ལ་གང་གི་ཚེ་དང་པོ་ཉིད་དུ་ནམ་མཁའ་མཐའ་ཡས་ཀྱི་ཉེར་བསྡོགས་ཐོབ་པ་དེའི་ཚེ་གཟུགས་མེད་པ་ན་སྤྱོད་པའི་དགེ་བ་རྙེད་དོ། །

Vol. 142 · folio 241a

ངེས་འཇུག་དགྲ་བཅོམ་ཉིད་ཀྱི་ཚེ། །སློབ་པ་དང་མི་སློབ་པའོ་ཞེས་བྱ་བ་ནི་གང་གི་ཚེ་ངེས་པ་ལ་འཇུག་པ་དེའི་ཚེ་ནི་སློབ་པ་སྡུག་བསྔལ་ལ་ཆོས་ཤེས་པའི་བཟོད་པའི་ཚོགས་རྙེད་ལ། གང་གི་ཚེ་དགྲ་བཅོམ་པ་ཉིད་འཐོབ་པ་དེའི་ཚེ་ནི་མི་སློབ་པ་

ཟད་པར་ཤེས་པའི་ཚོགས་རྙེད་དེ། དེ་ལྟར་ན་གནས་སྐབས་འདི་དག་ཏུ་ཇི་སྐད་བཤད་པའི་སེམས་བདུན་པོ་དག་དང་མི་ལྡན་པ་ལས་ལྡན་པ་རྙེད་པར་འགྱུར་རོ། །ལྷག་མ་ནི་རྣམ་པར་བཤད་པ་འདི་ཉིད་ཀྱིས་ཁོང་དུ་ཆུད་པར་བྱའོ་ཞེས་བྱ་བ་ནི་ལྷག་མ་ནི་བདག་གིས་བཤད་

པ་འདི་ཁོ་ན་ལས་རྟོགས་པར་བྱ་བ་ཡིན་ཏེ། ལྷག་མ་ཡང་། ཉོན་མོངས་ཅན་གྱི་སེམས་ལ་ནི། །མཁས་པ་རྣམས་ཀྱིས་དགུ་རྙེད་བརྗོད། །ཅེས་བྱ་བ་དང་། དེ་བཞིན་དུ་གཉིས་པ་ལུང་དུ་མ་བསྟན་ལ་དེ་ཉིད་དོ་ཞེས་བྱ་བ་འདི་ཡིན་ཏེ། ཁམས་གསུམ་པའི་ཉོན་

མོངས་པ་ཅན་ལ་ནི་དེ་དག་དང་མི་ལྡན་པ་ལས་དགུ་རྙེད་དེ། འདོད་པ་ན་སྤྱོད་པ་བཞི་དང་། གཟུགས་ན་སྤྱོད་པ་གསུམ་དང་གཟུགས་མེད་པ་ན་སྤྱོད་པ་བསྒྲིབས་པ་དང་སློབ་པ་ཞེས་བྱ་བ་དགུ་པོ་དག་ཅི་རིགས་པར་རྙེད་དོ། །ཅི་རིགས་པའི་དོན་ནི་འདི་ཡིན་ཏེ། འདོད་

པ་ན་སྤྱོད་པའི་ཉོན་མོངས་པ་ཅན་ལ་དགེ་བའི་སེམས་ཉིང་མཚམས་སྦྱོར་བ་དང་ཁམས་སུ་སླར་ལྡོག་པ་ནས་འདོད་པ་ན་སྤྱོད་པའི་དགེ་བ་རྙེད་དོ། །འདོད་པ་ན་སྤྱོད་པའི་ཉོན་མོངས་པ་ཅན་ཁོ་ན་ལ་ཁམས་སུ་སླར་ལྡོག་པ་དང་། ཡོངས་སུ་ཉམས་པ་ལས་མི་དགེ་བ་དང་།

བསྒྲིབས་ལ་ལུང་དུ་མ་བསྟན་པ་དག་རྙེད་དོ། །གཟུགས་ན་སྤྱོད་པའི་ཉོན་མོངས་པ་ཅན་ལ་ཁམས་སུ་སླར་ལྡོག་པ་ལས་གཟུགས་ན་སྤྱོད་པའི་དགེ་བ་དང་། འདོད་པ་དང་། གཟུགས་ན་སྤྱོད་པའི་མ་བསྒྲིབས་ལ་ལུང་དུ་མ་བསྟན་པ་སྤྲུལ་པའི་སེམས་དག་

རྙེད་དོ། །འདོད་པ་ན་སྤྱོད་པའི་ཉོན་མོངས་པ་ཅན་ནམ་གཟུགས་ན་སྤྱོད་པའང་རུང་བ་ལ་ཁམས་སུ་སླར་ལྡོག་པའམ། ཡོངས་སུ་ཉམས་པ་ལས་གཟུགས་ན་སྤྱོད་པའི་ཉོན་མོངས་པ་ཅན་ཉིད་དོ། །འདོད་པ་ན་སྤྱོད་པའི་ཉོན་མོངས་པ་ཅན་ནམ། གཟུགས་ན་སྤྱོད་

Vol. 142 · folio 241b

པའམ། གཟུགས་མེད་པ་ན་སྤྱོད་པ་ཡང་རུང་བ་ལ་ཡོངས་སུ་ཉམས་པ་ལས་གཟུགས་མེད་པ་ན་སྤྱོད་པའི་ཉོན་མོངས་པ་ཅན་དང་སློབ་པ་དག་རྙེད་དོ། །དེ་ལྟ་བུ་ནི་ཅི་རིགས་པའི་དོན་ཡིན་ནོ། །ལུང་མ་བསྟན་པ་དེ་ཉིད་དོ། །ཞེས་བྱ་བ་ནི་ལྷག་མ་གང་ཡིན་པ་ནི་སྔ་མ་

དང་འདྲ་བ་ཁོ་ན་སྟེ། ཁམས་གསུམ་པའི་ལུང་དུ་མ་བསྟན་པ་རྣམས་ལས་གང་ཡང་རུང་བ་ཞིག་མངོན་དུ་གྱུར་ན་དེ་དང་མི་ལྡན་པ་ལས་ལུང་དུ་མ་བསྟན་པའི་དེ་ཁོ་ན་རྙེད་དེ། གྲུབ་པའི་མཐའ་ལས། ལུང་བསྟན་མི་འཐོབ་ལྷན་ཅིག་སྐྱེས། །ཞེས་འབྱུང་བའི་ཕྱིར་རོ། །

བསྡུས་པའི་ཚིགས་སུ་བཅད་པ་ནི་ཞེས་བྱ་བ་ཐམས་ཅད་འབྱུང་བ་ལས་སྐྱེ་བའི་ཚེ་ནི་ཁམས་སུ་སླར་ལྡོག་པ་ལས་ཞེས་འབྱུང་བའི་ཕྱིར་རོ། །སྙོམས་པར་འཇུག་པ་ལས་ནི་དེ་ན་ཡོད་པ་ཞེས་བྱ་བ་ལ་སོགས་པ་འབྱུང་བའི་ཕྱིར་རོ། །འདོད་ཆགས་དང་བྲལ་བའི་ཚེ་ནི་འདོད་

པའི་འདོད་ཆགས་དང་བྲལ་བའི་ཚེ་ཞེས་འབྱུང་བའི་ཕྱིར་རོ། །ཡོངས་སུ་ཉམས་པའི་ཚེ་ནི་ཡོངས་སུ་ཉམས་པ་ལས་ཞེས་འབྱུང་བའི་ཕྱིར་རོ། །དགེ་བའི་ཉིང་མཚམས་སྦྱོར་བའི་ཚེ་ནི་ཐེ་ཚོམ་དང་ཡང་དག་པའི་ལྟ་བས་དགེ་བའི་རྩ་བའི་ཉིང་མཚམས་སྦྱོར་བ་ལས་

ཞེས་འབྱུང་བའི་ཕྱིར་རོ། །སེམས་རྙེད་ཅེས་བྱ་བ་ནི་སེམས་སོ་སོར་ཐོབ་པའོ། །དེ་ལྡན་པ་མིན་ལས་ཞེས་བྱ་བ་ནི་གང་ཟག་སྟེ། དེ་དག་དང་མི་ལྡན་པ་ལས་ཞེས་འབྱུང་བའི་ཕྱིར་རོ། །ཆོས་མངོན་པའི་མཛོད་ཀྱི་རྒྱ་ཆེར་འགྲེལ་པ་སློབ་དཔོན་རྒྱལ་པོའི་སྲས་

གྲགས་པའི་བཤེས་གཉེན་གྱིས་མཛད་པ་ལས་དབང་པོ་བསྟན་པ་ཞེས་བྱ་བ་སྟེ་མཛོད་ཀྱི་གནས་གཉིས་པའོ།། །།ད་ནི་ཞེས་བྱ་བ་འདི་ནི་མཛོད་ཀྱི་གནས་གཉིས་པ་དང་གསུམ་པའི་འབྲེལ་པ་རབ་ཏུ་བསྟན་པའི་ཕྱིར་སྨོས་པ་ཡིན་ནོ། །འདོད་པ་དང་གཟུགས་དང་

གཟུགས་མེད་པའི་ཁམས་ཀྱི་ངེས་པ་ཉིད་ཀྱིས་སེམས་ལ་སོགས་པ་བསྟན་པ་བྱས་པ་ཞེས་བྱ་བ་ལ་ངེས་པའི་དངོས་པོ་ནི་ངེས་པ་ཉིད་དོ། །ཡང་ན་ངེས་པ་ཉིད་ནི་ངེས་པ་ཁོ་ན་ཡིན་ནོ། །དེས་སེམས་ལ་སོགས་པ་བསྟན་པ་བྱས་པ་ནི། འདོད་ཡིད་དགེ་དང་མི་དགེ་

Vol. 142 · folio 242a

དང་། །བསྒྲིབས་པ་དང་ནི་མ་བསྒྲིབས་པ། །གཟུགས་དང་གཟུགས་མེད་པ་དག་ན། །མི་དགེ་ལས་གཞན་ཞེས་འབྱུང་བའི་ཕྱིར་རོ། །སོགས་པ་ཞེས་བྱ་བའི་སྒྲས་ནི་སེམས་ལས་འབྱུང་བ་ལ་སོགས་པ་བསྡུ་སྟེ། འདོད་པའི་དགེ་བའི་

སེམས་ལ་ནི། རྟོག་དང་དཔྱོད་དང་བཅས་པའི་ཕྱིར། །ཞེས་བྱ་བ་དང་། དེ་ལས་འགྱོད་ཡིད་མི་དགེ་རྣམས། །བསམ་གཏན་དང་པོ་དག་ན་མེད། །རྟོག་པའང་བསམ་གཏན་ཁྱད་པར་ན། །དེ་ཡི་གོང་ན་དཔྱོད་པ་ཡང་། །ཞེས་འབྱུང་བའི་ཕྱིར་རོ། །འདོད་པ་

ལ་སོགས་པའི་ངེས་པ་ཉིད་ཀྱིས་དབང་པོ་རྣམས་བསྟན་པ་བྱས་པ་ནི། དྲི་མེད་མ་གཏོགས་འདོད་པར་གཏོགས། །ཕོ་མོའི་དབང་དང་སྡུག་བསྔལ་དག། །མ་གཏོགས་གཟུགས་གཏོགས་གཟུགས་ཅན་དང་། །བདེ་བའང་མ་གཏོགས་གཟུགས་མེད་གཏོགས། །

ཞེས་འབྱུང་བའི་ཕྱིར་རོ། །འདོད་པ་དང་གཟུགས་དང་གཟུགས་མེད་པའི་ཁམས་དེ་དག་གི་མཚན་ཉིད་ནི་མི་བཤད་པས། དེའི་ཕྱིར་དེ་ལ་འདོད་པ་དང་གཟུགས་དང་གཟུགས་མེད་པའི་ཁམས་དེ་དག་གང་ཡིན་ཞེས་བྱ་བ་འདི་སྨོས་སོ། །དམྱལ་བ་ཡི་དགས་དུད་འགྲོ་

དང་། །ཞེས་བྱ་བ་རྒྱ་ཆེར་འབྱུང་བ་ལ། འགྲོ་བ་བཞི་ཞེས་བྱ་བ་ནི་དམྱལ་བ་དང་ཡི་དགས་དུད་འགྲོ་དང་མིའི་འགྲོ་བ་བཞི་སྟེ། རིལ་གྱིས་འདོད་པའི་ཁམས་སུ་གཏོགས་པ་ཡིན་ནོ། །ལྷའི་འགྲོ་བ་ནི་རིལ་གྱིས་མ་ཡིན་ནོ། །འོ་ན་ཅི་ཞེ་ན། ལྷའི་རིགས་དྲུག་ཡིན་ནོ་

ཞེས་སྟོན་པར་བྱེད་དོ། །དེ་ལ་སེམས་ཅན་རྣམས་འདིར་བསོད་ནམས་མ་ཡིན་པས་ཁྲིད་པར་བྱེད་པས་ན་དམྱལ་བ་རྣམས་སོ། །གཞན་དག་ན་རེ་དགའ་བར་མི་བྱེད་པས་ན་དམྱལ་བ་རྣམས་ཡིན་ནོ་ཞེས་ཟེར་རོ། །སློབ་དཔོན་འདུས་བཟངས་ན་རེ་མི་རྙེད་པའི་དོན་གྱིས་དམྱལ་

བའི་སྒྲ་ནི་སྐྱབས་མི་རྙེད་ཅིང་མེད་པས་ན་དམྱལ་བ་པ་རྣམས་ཡིན་ནོ་ཞེས་ཟེར་རོ། །འདི་ནས་ཤིན་ཏུ་ཕྱིར་མི་ལྡོག་པར་སོང་བས་ན་ཡི་དགས་རྣམས་སོ། །གཞན་དག་ན་རེ་སྐོམ་པ་དང་ལྡན་པའི་ཕྱིར་རོ། །དུད་དེ་འགྲོ་བའི་ཕྱིར་དུད་འགྲོའོ། །ཡིད་ཤས་ཆེ་བའི་ཕྱིར་མི་

Vol. 142 · folio 242b

རྣམས་སོ། །འཇིག་རྟེན་པ་རྣམས་ནི་ཡིད་ཀྱི་བུ་ཡིན་པའི་ཕྱིར་རོ་ཞེས་ཟེར་རོ། །འདི་དག་ལ་ཁྱིམ་ནམ་མཁའ་ཡོད་པས་ན་ལྷའོ། །འདོད་པའི་ཁམས་ནི་འདོད་པས་རབ་ཏུ་ཕྱེ་བའི་ཁམས་ཡིན་ནོ་ཞེས་འཆད་པར་འགྱུར་རོ། །རྒྱལ་པོ་ཆེན་པོ་འཇིག་རྟེན་སྐྱོང་

བ་བཞི་ནི། འཕགས་སྐྱེས་པོ་དང་། མིག་མི་བཟང་དང་། ཡུལ་འཁོར་སྲུང་དང་། རྣམ་ཐོས་ཀྱི་བུའོ། །དེ་དག་ན་ཡོད་པ་ནི་རྒྱལ་ཆེན་བཞི་པ་རྣམས་ཏེ། དེ་དག་གི་ནང་དུ་གཏོགས་པ་ཞེས་བྱ་བའི་ཐ་ཚིག་གོ། །དཔེར་ན་ལྷ་དག་ཏུ་སྐྱེ་བར་འགྱུར་བ་ཞེས་བྱ་བ་

ནི་ལྷའི་ནང་དུ་སྐྱེ་བར་འགྱུར་བ་ཞེས་བྱ་བའི་དོན་ལྟ་བུ་ཡིན་ནོ། །གཞན་དག་ན་རེ་རྒྱལ་པོ་ཆེན་པོ་བཞིའི་གནས་ན་ཡོད་པ་ནི་རྒྱལ་ཆེན་བཞི་པ་རྣམས་ཏེ། བར་གྱི་ཚིག་མི་མངོན་པར་བྱས་པའི་ཕྱིར་བ་ལང་གི་ཤིང་རྟ་ལྟ་བུའོ། །ལེགས་པར་བྱས་པ་ལྷན་ཅིག་

བྱས་པ་རྣམས་ཀྱིས་དེར་སྐྱེ་བས་ན་སུམ་ཅུ་རྩ་གསུམ་པ་རྣམས་སོ། །གཞན་དག་ན་རེ་འཇིག་རྟེན་པ་རྣམས་ན་རེ་གཙོ་བོ་ནོར་ལྷ་བརྒྱད་དང་། ཐ་སྐར་གྱི་བུ་གཞོན་ནུ་གཉིས་དང་། དྲག་པོ་བཅུ་གཅིག་དང་། ཉི་མ་བཅུ་གཉིས་ཞེས་བྱ་བ་དེ་ཙམ་དུ་ཟད་པས་

སུམ་ཅུ་རྩ་གསུམ་པ་རྣམས་སོ་ཞེས་ཟེར་ཏེ། དེ་དང་མཐུན་པར་གསུང་རབ་ལས་ཀྱང་མིང་དེ་བཞིན་དུ་ཐ་སྙད་བཏགས་སོ་ཞེས་ཟེར་རོ། །བསོད་ནམས་ཀྱིས་སོང་བས་ན་འཐབ་བྲལ་བའོ། །ཡང་ན་དེའི་སྡུག་བསྔལ་ཟད་པར་བྱེད་པས་འཐབ་བྲལ་བ་རྣམས་སོ། །དགའ་

ཞིང་ཡིད་དུ་འོང་བས་སོང་བའམ། འདི་དག་ལ་དགའ་བ་ཡོད་པས་ན་དགའ་ལྡན་པ་རྣམས་སོ། །འདི་དག་ལ་རང་རང་གིས་བྱས་པའི་ལོངས་སྤྱོད་རྣམས་སྤྲུལ་པ་ལ་དགའ་བ་ཡོད་པས་ན་འཕྲུལ་དགའ་བ་རྣམས་སོ། །འདི་དག་ལ་གཞན་གྱིས་སྤྲུལ་པའི་ལོངས་

སྤྱོད་དག་ལ་དབང་བསྒྱུར་བའི་ངང་ཚུལ་ཡོད་པས་གཞན་འཕྲུལ་དབང་བྱེད་པ་རྣམས་སོ། །གནས་རྣམས་ཞེས་བྱ་བ་ཚིག་ལྷག་མ་ཞེས་བྱ་བ་ནི་གནས་ཉི་ཤུ་གང་དག་ཡིན་པ་དེ་དག་ནི་འདོད་པའི་ཁམས་ཡིན་ནོ། །གལ་ཏེ་དཔེར་ན་རྟ་ཆུ་འཐུངས་པ་ལ་འཐུངས་

Vol. 142 · folio 243a

པའོ་ཞེས་བྱ་བ་དང་འདྲ་བར་གནས་ཉི་ཤུ་ལ་ཉི་ཤུའོ་ཞེས་བར་གྱི་ཚིག་མི་མངོན་པར་བྱས་ན་ནི་ཤིན་ཏུ་ཡང་རིགས་པ་ཡིན་ནོ། །ཡང་སོས་ནི་གང་དུ་སེམས་ཅན་ཤི་བ་རྣམས་རླུང་དག་གིས་འཚོ་བར་བྱེད་པའོ། །ཐིག་ནག་ནི་གང་དུ་ཐིག་ནག་པོ་

བཏབ་ནས་འཇོག་པར་བྱེད་པའོ། །བསྡུས་འཇོམས་ནི་གང་དུ་ཕྱོགས་གཉིས་ནས་ལུག་ལྟ་བུའི་རི་ལ་སོགས་པ་འོང་སྟེ་སེམས་ཅན་རྣམས་འཇོམས་པར་བྱེད་པའོ། །ངུ་འབོད་ནི་གང་དུ་སེམས་ཅན་བཏགས་པ་རྣམས་ཤིན་ཏུ་སྐྲག་པའི་ང་རོ་འབྱིན་པའོ། །གང་དུ་

ཁྱད་པར་དུ་ཡིན་པ་དེ་ནི་ངུ་འབོད་ཆེན་པོའོ། །ཚ་བ་ནི་གང་དུ་སེམས་ཅན་རྣམས་མེ་ལ་སོགས་པས་གདུང་བར་བྱེད་པའོ། །གང་དུ་ཁྱད་པར་དུ་གདུང་བར་བྱེད་པ་དེ་ནི་རབ་ཏུ་ཚ་བའོ། །མནར་མེད་པ་ནི་གང་དུ་སེམས་ཅན་མེ་འབར་བས་ཤིན་ཏུ་བསྐོར་བ་རྣམས་ལ་བདེ་བའི་

མནའ་བའི་སྐབས་མེད་པའོ། །འཛམ་བུའི་གླིང་ནི་ཤིང་འཛམ་བུས་མཚོན་པའི་གླིང་ངོ་། །ཤར་གྱི་ལུས་འཕགས་ནི་རི་རབ་ཀྱི་ཤར་ཕྱོགས་ན་ཡོད་པའོ། །ནུབ་ཀྱི་བ་ལང་སྤྱོད་ནི་ནུབ་ཕྱོགས་ན་ཡོད་པའོ། །བྱང་གི་སྒྲ་མི་སྙན་ནི་བྱང་ཕྱོགས་ན་ཡོད་པ་སྟེ། གླིང་འདི་

དག་གི་མིང་ནི་འཇིག་རྟེན་ན་དེ་ལྟར་གྲགས་པ་ཡིན་ནོ། །བཤད་མ་ཐག་པའི་ལྷའི་རིགས་དྲུག་དང་དེ་ལྟར་ན་གནས་ཉི་ཤུ་པོ་དེ་དག་ནི་འདོད་པའི་ཁམས་ཡིན་ནོ་ཞེས་བྱ་བ་ནི་དམྱལ་བ་ནི་དམྱལ་བ་བརྒྱད་དང་། གླིང་བཞི་དང་རྒྱལ་ཆེན་བཞིའི་རིས་པ་ལ་སོགས་པ་བཤད་མ་

ཐག་པ་དྲུག་དང་། མ་ཕྱེ་བ་ཡི་དགས་དང་དུད་འགྲོ་ཞེས་བྱ་བ་དང་གནས་ཉི་ཤུ་ནི་འདོད་པའི་ཁམས་ཡིན་ནོ། །རླུང་གི་དཀྱིལ་འཁོར་གྱི་བར་ཞེས་བྱ་བ་ནི་གང་ལ་ཆུའི་དཀྱིལ་འཁོར་འདུག་པའོ། །གཟུགས་ཀྱི་ཁམས་ཞེས་བྱ་བ་ནི་གཟུགས་ཀྱིས་རབ་ཏུ་ཕྱེ་

བའི་ཁམས་ནི་གཟུགས་ཀྱི་ཁམས་ཡིན་ནོ། །དེར་སོ་སོའི། བསམ་གཏན་ས་ནི་གསུམ་པ་ཡིན། །བཞི་པ་ས་ནི་བརྒྱད་པ་ཡིན། །ཞེས་བྱ་བ་དེ་ལ། གཟུགས་ཀྱི་ཁམས་ནི་བསམ་གཏན་ཐམས་ཅད་ཀྱང་ཆུང་ངུ་དང་འབྲིང་དང་ཆེན་པོའི་བྱེ་བྲག་གིས་སོ་སོར་ས་གསུམ་

Vol. 142 · folio 243b

པའི་བྱེ་བྲག་ཉིད་ཡིན་ཏེ། ཚངས་རིས་པ་རྣམས་དང་། ཚངས་པའི་མདུན་ན་འདོན་པ་རྣམས་དང་། ཚངས་ཆེན་པ་རྣམས་ནི་དང་པོ་ཡིན་ནོ། །འོད་ཆུང་པ་རྣམས་དང་། ཚད་མེད་འོད་རྣམས་དང་། འོད་གསལ་བ་རྣམས་ནི་གཉིས་པ་ཡིན་ནོ། །དགེ་ཆུང་རྣམས་དང་།

ཚད་མེད་དགེ་རྣམས་དང་། དགེ་རྒྱས་རྣམས་ནི་གསུམ་པ་ཡིན་ནོ། །སྤྲིན་མེད་རྣམས་དང་། བསོད་ནམས་སྐྱེས་རྣམས་དང་། འབྲས་བུ་ཆེ་བ་རྣམས་ནི་བཞི་པ་ཡིན་ནོ། །ཆེན་པོ་དེ་ཉིད་ཟག་པ་མེད་པའི་བསམ་གཏན་དང་སྤེལ་བའི་སྒོ་ནས་ཆུང་ངུ་དང་འབྲིང་དང་ཆེན་པོ་དང་།

ཤིན་ཏུ་ཆེན་པོ་དང་། ཆེས་ཤིན་ཏུ་ཆེན་པོ་ཐ་དད་པའི་བྱེ་བྲག་གི་གནས་གཞན་ལྔ་སྟེ། མི་ཆེ་བ་རྣམས་དང་། མི་གདུང་བ་རྣམས་དང་། གྱ་ནོམ་སྣང་བ་རྣམས་དང་། ཤིན་ཏུ་མཐོང་རྣམས་དང་། འོག་མིན་རྣམས་སོ། །དེའི་ཕྱིར་བསམ་གཏན་བཞི་པ་ནི་ས་བརྒྱད་པ་

ཞེས་བྱའོ། །དེ་ལ་དགེ་བའི་རྩ་བ་ཆེན་པོ་ལས་སྐྱེས་པའི་ཕྱིར་ཚངས་པའོ། །དེ་ཡང་གང་ཞེ་ན་ཚངས་པ་ཆེན་པོ་ཞེས་བྱ་བ་གང་ཡིན་པ་སྟེ། བསམ་གཏན་ཁྱད་པར་ཅན་ཐོབ་པས་ཐོག་མར་སྐྱེ་ཞིང་ཐ་མར་འཆི་འཕོ་བའི་ཕྱིར་དང་། སྔ་མ་དང་ཁྱད་པར་ཡོད་

པའི་ཕྱིར་ཆེན་པོ་ཡིན་ནོ། །འདི་དག་ལ་དེའི་རིས་ན་གནས་པ་ཡོད་པས་ཚངས་རིས་པ་རྣམས་སོ། །ཚངས་པའི་མདུན་ན་འདོན་པས་ན་ཚངས་པའི་མདུན་ན་འདོན་རྣམས་སོ། །འདི་དག་ལ་ཚེ་དང་ཁ་དོག་ལ་སོགས་པའི་ཁྱད་པར་གྱིས་ཚངས་པ་ཆེན་པོ་ཡོད་པས་

ན་ཚངས་པ་ཆེན་པོ་རྣམས་སོ། །འདི་དག་ལ་འོད་གསལ་གྱི་ས་ལ་ལྟོས་ནས་འོད་ཆུང་ངུ་ཡོད་པས་ན་འོད་ཆུང་རྣམས་སོ། །འདི་དག་ནི་འོད་ཚད་གཟུང་བར་མི་ནུས་པས་ན་ཚད་མེད་འོད་རྣམས་སོ། །གནས་གཞན་ཟད་པར་སྣང་བར་བྱེད་པའི་ཕྱིར་འོད་གསལ་རྣམས་

སོ། །ཡིད་ཀྱི་ས་པའི་བདེ་བ་ལ་ནི་དགེ་བ་ཞེས་བྱ་སྟེ། འདི་དག་ལ་གཞན་གྱི་ས་ལ་ལྟོས་ན་དེ་ཆུང་ངུ་ཡོད་པས་ན་དགེ་ཆུང་རྣམས་སོ། །འདི་དག་ལ་དགེ་བ་ཚད་མེད་པ་ཡོད་པས་ན་ཚད་མེད་དགེ་རྣམས་སོ། །འདི་དག་ལ་དགེ་བ་རྒྱས་པ་ཡོད་པས་ན་དགེ་རྒྱས་

Vol. 142 · folio 244a

རྣམས་ཏེ། གཞན་ན་དེ་ལས་ཤིན་ཏུ་མཆོག་ཏུ་གྱུར་པའི་བདེ་བ་མེད་དོ་སྙམ་དུ་བསམས་པ་ཡིན་ནོ། །འདི་དག་ལ་སྤྲིན་དང་འདྲ་བར་ས་དང་འབྲེལ་པ་མེད་པས་ན་སྤྲིན་མེད་རྣམས་ཏེ། གཞལ་མེད་ཁང་དེ་སེམས་ཅན་དང་། ལྷན་ཅིག་འབྱུང་

ཞིང་འཇིག་པའི་ཕྱིར་ཞེས་འབྱུང་བའི་ཕྱིར་རོ། །གཞན་དག་ན་རེ་འདི་དག་གི་གོང་ན་གཞན་མེད་པའི་སྤྲིན་མེད་རྣམས་ཏེ། གོང་ན་སྤྲིན་ལྟ་བུ་ས་དང་འབྲེལ་པ་མེད་པས་སོ་ཞེས་ཟེར་རོ། །མི་གཡོ་བའི་ལས་ལས་ཡང་དག་པར་འབྱུང་བའི་ཕྱིར་འདི་དག་ལ་བསོད་ནམས་

རྣམས་ལས་སྐྱེས་པ་ཡོད་པས་ན་བསོད་ནམས་སྐྱེས་རྣམས་སོ། །འདི་དག་ལ་འབྲས་བུ་གནས་གཞན་དང་འབྲེལ་པ་སོ་སོའི་སྐྱེ་བོ་པ་ཐམས་ཅད་པས་མཆོག་ཏུ་གྱུར་པ་ཆེན་པོ་ཡོད་པས་ན་འབྲས་བུ་ཆེ་རྣམས་སོ། །སོ་སོའི་སྐྱེ་བོ་རྣམས་དང་མ་འདྲེས་པའི་ཕྱིར་གནས་གཙང་མ་

སྟེ། དེ་འདི་དག་ལ་ཡོད་པས་གནས་གཙང་མ་རྣམས་སོ། །གནས་གཙང་མ་པ་གཞན་དག་པས་མཆོག་ཏུ་མ་གྱུར་པའི་ཕྱིར་རྒྱས་པ་མ་ཡིན་པས་ན་མི་ཆེ་བ་རྣམས་སོ། །ཡང་ན་བདག་ཉིད་ཀྱིས་བདག་གི་གནས་དུས་ཉ་ཉེ་ཞིག་ན་སྤོང་ཞིང་འདོར་བར་མི་བྱེད་པས་ན་མི་ཆེ་བ་རྣམས་

སོ། །ཏིང་ངེ་འཛིན་ཁྱད་པར་ཅན་ཐོབ་པའི་ཕྱིར་འདི་ནི་ཉོན་མོངས་པ་རྣམས་ཀྱིས་གདུང་བར་བྱེད་པ་མེད་པས་ན་མི་གདུང་བ་རྣམས་སོ། །ཡང་ན་བསམ་པ་དགེ་བའི་ཕྱིར་གཞན་དག་ལ་གདུང་བར་མི་བྱེད་པས་ན་མི་གདུང་བ་རྣམས་སོ། །མཐོང་བ་ཡོངས་སུ་དག་པའི་ཕྱིར་ཤིན་

ཏུ་མཐོང་བས་ན་གྱ་ནོམ་སྣང་རྣམས་སོ། །ལྟ་བ་བཟང་བའི་ཕྱིར་ཤིན་ཏུ་མཐོང་རྣམས་སོ། །དེ་ལས་མཆོག་ཏུ་གྱུར་པའི་ས་གཞན་མེད་པའི་ཕྱིར་འདི་དག་འོག་མ་མ་ཡིན་པས་འོག་མིན་རྣམས་ཏེ། གོང་མར་གྱུར་པ་ཡིན་པའི་ཕྱིར་རོ། །འདིས་ནི་གནས་པ་དག་བསྟན་ན། །

ཇི་ལྟར་དེ་ལྟར་ན་གནས་བཅུ་བདུན་པོ་འདི་དག་ཅེས་བྱ་ཞེ་ན། གནས་ནི་གནས་པའི་སྒྲར་བསྟན་པའི་ཕྱིར་ཉེས་པ་མེད་དོ། །དེ་ལྟར་ན་ཉི་འོག་པའི་ལུགས་ཀྱིས་གཟུགས་ཀྱི་ཁམས་ནི་གནས་བཅུ་བདུན་ཡིན་ནོ། །ཁ་ཆེ་བ་རྣམས་ན་རེ་བཅུ་དྲུག་ཡིན་ནོ་ཞེས་ཟེར་རོ་ཞེས་བྱ་བ་ཁ་ཆེ་

Vol. 142 · folio 244b

བ་རྣམས་ན་རེ་གཟུགས་ཀྱི་ཁམས་ནི་བཅུ་དྲུག་ཡིན་ནོ་ཞེས་ཟེར་རོ། །སྤགས་པ་བཞིན་དུ་ཞེས་བྱ་བ་ནི་བང་རིམ་བཞིན་དུ་ཞེས་བྱ་བའི་ཐ་ཚིག་གོ། །གཞན་དག་ན་རེ་འབྲོག་ཕྱོགས་ཀྱི་རྫོང་བཞིན་དུའོ་ཞེས་ཟེར་རོ། །ས་གཞན་ནི་མེད་དོ་ཞེས་བྱ་བ་ནི་ས་གཞན་དང་འབྲེལ་པ་

མེད་པས་སོ། །འདས་པ་དང་མ་འོངས་པ་དང་རྣམ་པར་རིག་བྱེད་མ་ཡིན་པ་དང་། ཆོས་གཟུགས་ཅན་མ་ཡིན་པ་རྣམས་ནི་ཡུལ་ན་མི་གནས་ཞེས་བྱ་བ་ནི་འདས་པ་དང་མ་འོངས་པ་ནི་གཟུགས་ཅན་དག་ཀྱང་ཡུལ་ན་མི་གནས་སོ། །རྣམ་པར་རིག་བྱེད་མ་ཡིན་པ་ནི་གཟུགས་

ཅན་ཡིན་ལ། ད་ལྟར་གྱི་དག་ཀྱང་ཡུལ་ན་མི་གནས་ལ། གཟུགས་ཅན་མ་ཡིན་པ་ཚོར་བ་ལ་སོགས་པ་ཡང་དེ་བཞིན་དུ་ད་ལྟར་གྱི་དག་ཡིན་ཡང་ཡུལ་ན་མི་གནས་ན། འདས་པ་དང་མ་འོངས་པ་རྣམས་ལྟ་སྨོས་ཀྱང་ཅི་དགོས་སོ། །སྐྱེ་བ་ལས་ནི་རྣམ་པ་བཞི། །ཞེས་བྱ་

བ་ནི་ཚེ་རབས་གཞན་དུ་ལས་ཀྱིས་གྲུབ་པའི་ཕུང་པོ་འབྱུང་བ་ནི་སྐྱེ་བ་ཡིན་ཏེ། དེས་ན་གཟུགས་མེད་པའི་ཁམས་རྣམ་པ་བཞི་ཡིན་ནོ། །འདི་ལྟ་སྟེ། ནམ་མཁའ་མཐའ་ཡས་སྐྱེ་མཆེད་དང་། །ཞེས་བྱ་བ་རྒྱས་པར་འབྱུང་བ་ནི་སྙོམས་པར་འཇུག་པར་སྦྱོར་བའི་དུས་ན་ནམ་མཁའ་

མཐའ་ཡས་སོ་སྙམ་དུ་རྣམ་པར་བྱེད་པའི་ཕྱིར་ནམ་མཁའ་མཐའ་ཡས་ཏེ། དེའི་ལམ་དེ་ཉིད་སྐྱེ་མཆེད་ཡིན་ནོ། །དེ་བཞིན་དུ་རྣམ་པར་ཤེས་པ་མཐའ་ཡས་སོ་སྙམ་པ་དང་ཅི་ཡང་མེད་དོ་སྙམ་དུ་དེ་དག་གི་རྣམ་པར་བྱེད་པའི་ཕྱིར། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་

མེད་པའི་སྐྱེ་མཆེད་ཅེས་བྱའོ། །འདུ་ཤེས་ནི་འབྲས་ལྟ་བུའོ། །འདུ་ཤེས་ནི་ཟུག་རྔུ་ལྟ་བུའོ། །འདུ་ཤེས་མེད་པ་ནི་ཀུན་དུ་རྨོངས་པ་སྙམ་ནས། འདུ་ཤེས་གཞན་པ་འབྱུང་བའི་ཕྱིར་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཅེས་བྱའོ། །དེ་དག་ལ་ཡུལ་གྱིས་བྱས་

པའི་བླ་འོག་ནི་མེད་དོ་ཞེས་བྱ་བ་ནི་ཡུལ་ན་མི་གནས་པའི་ཕྱིར་རོ། །ཇི་ལྟར་སེམས་ཅན་གཟུགས་ཅན་རྣམས་ཀྱི་ཞེས་བྱ་བ་ཐེ་ཚོམ་འདི་ཅི་ལས་གྱུར་ཅེ་ན་འདི་ལ་བདག་མེད་ན་འདོད་པ་དང་། གཟུགས་ཀྱི་ཁམས་དག་ན་ནི་སེམས་དང་སེམས་ལས་བྱུང་བ་རྣམས་གཟུགས་

Vol. 142 · folio 245a

ལ་བརྟེན་ནས་འཇུག་པར་བརྟག་གྲང་ན། གཟུགས་མེད་པའི་ཁམས་ན་ནི་གཟུགས་མེད་པས་དེ་ན་སེམས་དང་སེམས་ལས་བྱུང་བ་འཇུག་པར་མི་འགྱུར་རོ་སྙམ་མོ། །ཐེ་ཚོམ་དེ་བཟློག་པའི་ཕྱིར། དེར་ནི་རིས་དང་སྲོག་ལ་ཡང་། །སེམས་

ཀྱི་རྒྱུད་ནི་རྟེན་པ་ཡིན། །ཞེས་བྱ་བ་འདི་སྨོས་ཏེ། ཡང་ཞེས་བྱ་བའི་སྒྲས་ནི་སོ་སོའི་སྐྱེ་བོ་ཉིད་དང་མི་ལྡན་པ་དང་། ཐོབ་པ་དང་། སྐྱེ་བ་ལ་སོགས་པ་བསྡུའོ། །སྟོབས་ཆུང་བའི་ཕྱིར་རོ་ཞེས་བྱ་བ་ཅི་ཞིག་ཅེ་ན་སེམས་ཀྱི་རྒྱུན་ནོ། །སེམས་ཅན་གཟུགས་ཅན་རྣམས་

ཀྱི་སེམས་ཀྱི་རྒྱུན་ནི་གཟུགས་ཀྱི་འདུ་ཤེས་དང་མ་བྲལ་བའི་ཕྱིར་སྟོབས་ཆུང་བ་ཡིན་པས་གཟུགས་མེད་པར་མི་འཇུག་སྟེ། དེའི་ཕྱིར་གཟུགས་ལ་བརྟེན་ནས་འཇུག་གོ། །དེ་ནི་ཅིའི་ཕྱིར་སྟོབས་དང་ལྡན་པ་ཉིད་ཡིན་ཞེས་བྱ་བ་ནི་གཟུགས་མེད་པ་ན་སྤྱོད་པ་དེ་ཅིའི་ཕྱིར་

སྟོབས་དང་ལྡན་པ་ཉིད་ཡིན་ནོ། །དེའི་ཕྱིར་སྙོམས་པར་འཇུག་པའི་ཁྱད་པར་ལས་སྐྱེས་པའི་ཕྱིར་ཞེས་བྱ་བ་རྒྱས་པར་སྨོས་ཏེ། གཟུགས་དང་བྲལ་བའི་འདུ་ཤེས་ཅན་ཞེས་བྱ་བ་ནི་གཟུགས་ཀྱི་འདུ་ཤེས་དང་བྲལ་བ་ཅན་ཞེས་བྱ་བའི་ཐ་ཚིག་གོ། །དེའི་ཕྱིར་དེ་ལ་སྐྱེས་

པ་གཟུགས་མེད་པའི་སེམས་ཀྱི་རྒྱུན་ཀྱང་གཟུགས་ལ་མི་ལྟོས་པར་འཇུག་གོ། །འོ་ན་ནི་སྟོབས་དང་ལྡན་པའི་ཕྱིར་སྙོམས་པར་འཇུག་པའི་ཁྱད་པར་གྱིས་བསྐྱེད་པ་དེ་ཁོ་ནས་འཇུག་པར་འགྱུར་གྱི་རྟེན་གྱིས་ཅི་ཞིག་བྱ་སྙམ་དུ་བསམས་པ་ཡིན་ནོ། །ཇི་ལྟར་སེམས་ཅན་

གཟུགས་ཅན་རྣམས་ཀྱི་ཞེས་བྱ་བ་རྒྱས་པར་འབྱུང་བ་ལ་ཚིག་གི་དོན་ནི་སེམས་ཅན་གཟུགས་ཅན་རྣམས་ཀྱི་རིས་མཐུན་པ་དང་སྲོག་གི་དབང་པོ་དག་གཟུགས་ལ་བརྟེན་པ་དེ་ལྟར་གཟུགས་མེད་པ་རྣམས་ཀྱིས་ཅི་ལ་བརྟེན་ཞེས་བྱ་བ་ཡིན་ནོ། །དེ་གཉིས་ཕན་ཚུན་དུའོ་ཞེས་བྱ་

བ་ནི་རིས་མཐུན་པ་ཡང་སྲོག་གི་དབང་པོ་ལ་བརྟེན་ནས་འཇུག་ལ་སྲོག་གི་དབང་པོ་ཡང་རིས་མཐུན་པ་ལ་བརྟེན་ནས་ཞེས་བྱ་བ་ཡིན་ནོ། །དེ་གཉིས་ཁོ་ན་ཕན་ཚུན་དུ་ཅིའི་ཕྱིར་མི་རྟེན་ཞེས་བྱ་བ་ནི་རྟེན་གཟུགས་ཀྱིས་ཅི་ཞིག་བྱ་སྙམ་དུ་བསམས་པ་ཡིན་ནོ། །ད་ནི་དེ་ན་ཞེས་བྱ་བ་

Vol. 142 · folio 245b

ནི་གཟུགས་མེད་པའི་ཁམས་དེ་ན་ཅིའི་ཕྱིར་རིས་མཐུན་པ་དང་སྲོག་གི་དབང་པོ་དེ་དག་སྟོབས་དང་ལྡན་པ་དེ་ཉིད་ཡིན་ནོ། །དེ་ནི་སེམས་ཀྱི་རྒྱུད་ལ་ཡང་མཚུངས་ཏེ་ཞེས་བྱ་བ་ནི་སེམས་ཀྱི་རྒྱུད་འདི་ཡང་སྙོམས་པར་འཇུག་པའི་ཁྱད་པར་ལས་སྐྱེས་པས་སྟོབས་དང་ལྡན་པ་ཡིན་

པའི་ཕྱིར་གཉིས་ལ་བརྟེན་ནས་འཇུག་པར་མི་འགྱུར་གྱི་བརྟེན་པ་མེད་པ་ཁོ་ནར་འཇུག་པར་འགྱུར་རོ་ཞེས་བྱ་བ་ཡིན་ནོ། །སེམས་དང་སེམས་ལས་བྱུང་བ་དག་ལ་ཡང་ཅི་ཞེ་ན། མཚུངས་ཏེ་ཞེས་བྱ་བར་སྐབས་དང་སྦྱར་རོ། །ཅི་ཞིག་མཚུངས་ཤེ་ན་ཕན་ཚུན་བརྟེན་པ་ཉིད་

དེ། ཇི་ལྟར་རིས་མཐུན་པ་ཡང་སྲོག་གི་དབང་པོ་ལ་བརྟེན་ནས་འཇུག་ལ་སྲོག་གི་དབང་པོ་ཡང་རིས་མཐུན་པ་ལ་བརྟེན་ནས་འཇུག་པ་དེ་བཞིན་དུ་སེམས་ལས་བྱུང་བ་རྣམས་ཀྱང་སེམས་ལ་བརྟེན་ནས་འཇུག་པར་འགྱུར་ལ། སེམས་ཀྱང་སེམས་ལས་བྱུང་བ་རྣམས་

ལ་བརྟེན་ནས་འཇུག་པར་འགྱུར་ན། དེ་དག་ལས་གཞན་པའི་རྟེན་བརྟག་པ་ནི་དགོས་པ་མེད་དོ། །སེམས་ཀྱི་རྒྱུན་གང་གི་ཞེས་བྱ་བ་རྒྱས་པར་འབྱུང་བ་ནི་སེམས་ཀྱི་རྒྱུན་གྱི་འཕེན་པར་བྱེད་པའི་རྒྱུན་ནི་འཕེན་པའི་རྒྱུ་སྟེ། ལས་དང་ཉོན་མོངས་པའི་མཚན་ཉིད་

ཡིན་ནོ། །འདི་ལ་སྲེད་པ་དང་བྲལ་བ་ཡོད་པས་ན་སྲེད་པ་དང་བྲལ་བ་ཅན་ནོ། །སྲེད་པ་དང་མ་བྲལ་བ་ནི་སྲེད་པ་དང་མ་བྲལ་བའོ། །གང་ལ་ཞེ་ན། གཟུགས་ལ་སྟེ་སེམས་ཀྱི་རྒྱུན་དེ་ནི་གཟུགས་དང་ལྷན་ཅིག་འབྱུང་བའི་ཕྱིར་གཟུགས་ལ་བརྟེན་ནས་འཇུག་

གོ། །རྒྱུ་དེ་ལ་རྒྱབ་ཀྱིས་ཕྱོགས་པའི་ཕྱིར་རོ་ཞེས་བྱ་བ་ནི་འཕེན་པའི་རྒྱུ་གཟུགས་ལ་རྒྱབ་ཀྱིས་ཕྱོགས་པའི་ཕྱིར་རོ་ཞེས་བྱ་བའི་ཐ་ཚིག་གོ། །རྡོ་རྗེའི་སོར་གདུབ་ལྟ་བུ་ཞེས་བྱ་བ་ནི་རྡོ་རྗེ་དང་ལྡན་པའི་སོར་གདུབ་སྟེ། སོར་གདུབ་བམ་གདུ་བུ་ལ་རྡོ་རྗེའི་སོར་གདུབ་

ཅེས་བྱ་བ་ལྟ་བུ་དང་། ན་ལེ་ཤམ་གྱི་བཏུང་བ་བཞིན་ཏེ། ན་ལེ་ཤམ་དང་ལྡན་པའི་བཏུང་བ་ལ་བར་གྱི་ཚིག་མི་མངོན་པར་བྱས་པའི་ཕྱིར་ན་ལེ་ཤམ་གྱི་བཏུང་བ་ཞེས་བྱ་བ་དེ་བཞིན་དུ་འདོད་པ་དང་ལྡན་པའི་ཁམས་ནི་འདོད་པའི་ཁམས་སོ་ཞེས་བྱ་བ་ལ་སོགས་པ་ཡིན་

Vol. 142 · folio 246a

ནོ། །ཡང་ན་གཟུགས་སུ་རུང་བ་ཞེས་བྱ་བ་ནི་གནོད་པར་བྱ་བར་རུང་བ་ཞེས་བྱ་བའི་ཐ་ཚིག་སྟེ། དེ་ནི་གཟུགས་དང་ལྡན་པའི་ཕྱིར་ན་གནོད་པར་བྱ་བར་ནུས་སོ། །དེའི་ངོ་བོ་ནི་གཟུགས་མེད་པ་ཡིན་ནོ་ཞེས་བྱ་བ་ནི་གང་གི་ཚེ་མཇུག་ལ་ཁམས་ཞེས་བྱ་

བའི་ཚིག་འདི་ཡོད་པ་དེའི་ཚེ་གཟུགས་མེད་པའི་ཁམས་ཞེས་བྱ་བར་རུང་ངོ་། །གང་གི་ཚེ་མཇུག་ལ་ཚིག་མེད་པར་གཟུགས་མེད་པ་ཞེས་བྱ་བའི་སྒྲ་སྦྱོར་ཏེ། དཔེར་ན་གཟུགས་རྣམས་ལས་འདས་པ་ནི་གཟུགས་མེད་པ་དག་གོ་ཞེས་བྱ་བ་དེའི་ཚེ་ནི་གཟུགས་མེད་པ་

དག་ཉིད་གཟུགས་མེད་པ་རྣམས་སོ་ཞེས་བྱ་བར་གཟུང་བར་བྱའོ། །ཡང་ན་གཟུགས་མེད་པ་ལ་མཁས་པ་དག་ནི་གཟུགས་མེད་པ་རྣམས་སོ་ཞེས་བྱ་བར་བལྟའོ། །ཡང་ན་འདོད་པ་རྣམས་ཀྱི་ཁམས་ནི་ཞེས་བྱ་བ་ནི་ལྡན་པ་ཞེས་བྱ་བའི་སྒྲ་མི་མངོན་པར་བྱས་པ་མེད་པར་ཡང་དྲུག་པར་

ཚིག་བསྡུ་བ་ཁོ་ནས་སྒྲུབ་པར་བྱེད་པ་ཡིན་ནོ། །འདོད་པ་རྣམས་ཀྱི་ཁམས་དེ་གང་ཡིན་ཞེ་ན། གང་ཞིག་འདོད་པ་རྣམས་འཛིན་པའོ་ཞེས་བྱ་བ་སྨོས་སོ། །གཟུགས་དང་གཟུགས་མེད་པའི་ཁམས་དག་ཀྱང་དེ་དང་འདྲ་བར་རིག་པར་བྱའོ་ཞེས་བྱ་བ་ནི་གཟུགས་མེད་པ་རྣམས་

ཀྱི་ཁམས་ནི་གཟུགས་ཀྱི་ཁམས་ཏེ་གང་ཞིག་གཟུགས་རྣམས་འཛིན་པའོ། །གཟུགས་མེད་པའི་ཁམས་ནི་གཟུགས་མེད་པའི་ཁམས་ཏེ་གང་ཞིག་གཟུགས་མེད་པ་འཛིན་པའོ་ཞེས་བྱ་བ་ཡིན་ནོ། །ཁམ་གྱི་ཟས་དང་འཁྲིག་པ་དང་ལྡན་པའི་འདོད་ཆགས་ཞེས་

བྱ་བ་ནི་ཁམ་དུ་བྱེད་པས་ན་ཁམ་མོ། །དེ་ཉིད་ཟས་ཡིན་པས་ན་ཁམ་གྱི་ཟས་སོ། །ཕོ་མོ་ལས་བྱུང་བ་ནི་འཁྲིག་པ་སྟེ། གཉིས་ཀྱིས་གཉིས་སྤྲོད་པ་ལ་སོགས་པའོ། །ཁམ་གྱི་ཟས་དང་འཁྲིག་པ་དག་དང་ལྡན་ཞིང་འབྲེལ་པའམ་སྐྱེད་པ་ལ་ནི་ཁམ་གྱི་ཟས་དང་འཁྲིག་

པ་དང་ལྡན་པའི་འདོད་ཆགས་ཀྱི་འདོད་པ་ཡིན་ཏེ། འདིས་འདོད་པར་བྱེད་པས་ན་འདོད་པ་ཡིན་པའི་ཕྱིར་རོ། །ཇི་ལྟར་དེ་ལྟར་ཤེས་ཤེ་ན། གནས་བརྟན་ཤཱ་རིའི་བུས་བཤད་པའི་ཚིགས་སུ་བཅད་པས་དོན་དེ་བསྟན་པའི་ཕྱིར། འཇིག་རྟེན་དག་ན་སྣ་ཚོགས་གང་

Vol. 142 · folio 246b

དེ་འདོད་པ་མིན་ཞེས་བྱ་བ་རྒྱས་པར་སྨོས་སོ། །ཀུན་དུ་འཚོ་བྱེད་ཀྱིས་ཚིགས་སུ་བཅད་པ་གཞན་གྱིས་དགེ་སློང་འདོད་པའི་རྣམ་པར་རྟོག་པ་དག་ལ་རྣམ་པར་རྟོག་པར་བྱེད་པ་འདོད་པ་ལ་སྤྱོད་པ་ཉིད་ཡིན་ནོ་ཞེས་སྨྲས་པ་གང་ཡིན་པ་དེ་གནས་བརྟན་གྱི་ཁས་བླངས་ཏེ།

འདོད་པ་ལ་སྤྱོད་པ་ནི་རྣམ་པ་གསུམ་སྟེ། ལུས་དང་ངག་དང་ཡིད་ཀྱིས་སོ། །དེ་ལ་འདོད་ཆགས་དང་མ་བྲལ་བ་ཡིད་ཀྱིས་འདོད་པ་ལ་སྤྱོད་པ་ཉིད་ཡིན་ཡང་དགེ་སློང་མ་ཡིན་པར་མི་འགྱུར་གྱི་འདིའི་ཚུལ་ཁྲིམས་ཡོངས་སུ་མ་དག་པར་འགྱུར་བ་འབའ་ཞིག་ཏུ་ཟད་

དོ། །གང་ཞིག་ལུས་དང་ངག་གིས་དེ་བཞིན་གཤེགས་པའི་བསླབ་པའི་གཞི་བཀོད་པའི་མཚམས་ལས་འདས་ཏེ། འདོད་པ་དག་ལ་ཡོངས་སུ་སྤྱོད་པར་བྱེད་པ་དེ་ནི་དགེ་སློང་མ་ཡིན་པར་འགྱུར་ཏེ། དེ་བས་ན་དེས་ཉེས་པ་གཞན་གལ་ཏེ་འཇིག་རྟེན་སྣ་ཚོགས་

གང་དེ་འདོད་ཅེས་བྱ་བ་རྒྱས་པར་སྨོས་ཏེ། གལ་ཏེ་ཁྱེད་ཀྱི་ཕྱོགས་གཟུགས་ལ་སོགས་པ་ཡུལ་སྣ་ཚོགས་དག་འདོད་པ་ཡིན་ནོ་ཞེས་བྱ་བ་ཡིན་ན་ཁྱེད་ཀྱི་སྟོན་པ་ནི་འདོད་ཆགས་དང་བྲལ་བ་ཡིན་ནོ་ཞེས་བྱ་བར་ཁས་བླངས་མོད་ཀྱི་དེས་ན་ཁྱོད་ཀྱི་སྟོན་པ་ཡང་

ལུས་ཀྱི་ཡུལ་དེ་དག་ཉེ་བར་མ་སྤྱད་ཀྱང་གཟུགས་ཡིད་དུ་འོང་བ་རྣམས་མཐོང་བ་ཁོ་ནས་འདོད་པ་ལ་སྤྱོད་པ་ཅན་དུ་ཐལ་བར་འོང་ཞིང་འགྱུར་བ་ཞིག་ན་དེ་ལྟར་ཡང་མི་འདོད་དེ་དེ་ལྟ་བས་ན། སྐྱེས་བུའི་ཀུན་རྟོག་འདོད་ཆགས་འདོད་པ་ཡིན་ནོ་ཞེས་བྱ་བར་གྲུབ་པ་ཡིན་

ནོ། །ཆོས་གང་དག་ཅེས་བྱ་བ་ནི་གང་དག་ཡིན་པ་ཞེས་བྱ་བའི་ཐ་ཚིག་གོ། །སྨྲས་པ་མ་ཡིན་ནོ་ཞེས་བྱ་བ་ནི་འགོག་པར་བྱེད་པ་ཡིན་ནོ། །འདི་ལྟར་ཁམས་གཞན་གྱི་ཆོས་རྣམས་དང་། ཁམས་སུ་མ་གཏོགས་པ་དག་ཀྱང་ཁམས་གཞན་ན་ཀུན་དུ་སྤྱོད་

དེ་འདོད་པའི་ཁམས་ན་ནི་ཁམས་གསུམ་པ་དང་ཟག་པ་མེད་པའི་ཆོས་རྣམས་ཀུན་དུ་སྤྱོད་ལ། གཟུགས་ཀྱི་ཁམས་ན་ཡང་དེ་དང་འདྲ་སྟེ། དེ་ན་འདོད་པ་ན་སྤྱོད་པ་ནི་སྤྲུལ་པའི་སེམས་ཀུན་དུ་སྤྱོད་དོ། །གཟུགས་མེད་པའི་ཁམས་ན་ནི་གཟུགས་མེད་པ་ན་

Vol. 142 · folio 247a

སྤྱོད་པ་རྣམས་དང་ཟག་པ་མེད་པ་དག་སྟེ། དེ་ལྟ་བས་ན་མ་ཡིན་ནོ་ཞེས་འགོག་པར་བྱེད་པ་ཡིན་ནོ། །འོ་ན་ཅི་ཞེ་ན། གང་དག་ལ་འདོད་པ་དང་གཟུགས་དང་གཟུགས་མེད་པའི་འདོད་ཆགས་རྒྱས་པར་འགྱུར་བའོ་ཞེས་བྱ་བ་ནི་གང་དག་ལ་

འདོད་པའི་འདོད་ཆགས་དམིགས་པའམ་མཚུངས་པར་ལྡན་པའི་སྒོ་ནས་ཅི་རིགས་པར་རྒྱས་པར་འགྱུར་བ་དེ་དག་ནི་འདོད་པ་དང་ལྡན་པ་ཡིན་ལ། གང་དག་ལ་གཟུགས་དང་གཟུགས་མེད་པའི་འདོད་ཆགས་དག་རྒྱས་པར་འགྱུར་བ་དེ་དག་ནི་གོ་རིམས་བཞིན་

དུ་གཟུགས་དང་གཟུགས་མེད་པ་དང་ལྡན་པ་ཡིན་ནོ། །ད་ནི་འདི་རྟ་དང་བྲེས་ལྟ་བུ་དེ་ཡིན་ཏེ་ཞེས་བྱ་བ་ནི་རྟ་དང་རྟའི་བྲེས་ནི་རྟ་དང་བྲེས་སོ། །རྟ་དང་བྲེས་དང་འདྲ་བ་ནི་རྟ་དང་བྲེས་ལྟ་བུའོ། །ཡང་ན་འདི་རྟ་དང་བྲེས་ཀྱི་ཡིན་པས་ན་རྟ་དང་བྲེས་ཏེ་རྟ་དང་བྲེས་དང་འདྲ་བ་

ཡིན་ཏེ། འགའ་ཞིག་གིས་རྟའི་བྲེས་འདི་སུའི་ཡིན་ཞེས་དྲིས་ན་དེ་ལ་ཅིག་ཤོས་ཀྱིས་རྟ་འདི་སུའི་ཡིན་པ་དེའི་འོ་ཞེས་སྨྲས་ལ། ཡང་དེས་རྟ་འདི་སུའི་ཡིན་ཞེས་དྲིས་པ་དང་ཡང་ཅིག་ཤོས་དེས་རྟའི་བྲེས་འདི་སུའི་ཡིན་པ་དེའི་འོ་ཞེས་སྨྲས་ན། རྟ་དང་བྲེས་གཉི་

ག་ཡང་མི་ཤེས་ཏེ་ཇི་ལྟར་ཕན་ཚུན་མ་གྲུབ་པས་གཉི་ག་ཡང་ཡོངས་སུ་མི་ཆོད་པ་དེ་བཞིན་དུ་འདིར་ཡང་འདོད་ཆགས་དག་གིས་ཀྱང་ཁམས་རྣམས་སྒྲུབ་པ་མ་ཡིན་ལ་ཁམས་རྣམས་ཀྱིས་ཀྱང་འདོད་ཆགས་དག་མ་ཡིན་པས་འདི་གཉི་ག་ཡང་མི་འགྲུབ་བོ། །

འདོད་པའི་ཁམས་སུ་གནས་བསྟན་པ། །ཞེས་བྱ་བ་ནི། དམྱལ་བ་ཡི་དགས་དུད་འགྲོ་དང་། །མི་རྣམས་དང་ནི་ལྷ་དྲུག་དག །འདོད་པའི་ཁམས་ཡིན་དམྱལ་བ་དང་། །གླིང་དབྱེ་བ་ལས་དེ་ཉི་ཤུ། །ཞེས་བྱ་བ་ཡིན་ཏེ། འདོད་པའི་ཁམས་སུ་གནས་བསྟན་

པ་དེ་དག་ལ་འདོད་ཆགས་དང་མ་བྲལ་བའི་འདོད་ཆགས་གང་ཡིན་པ་དེ་ནི་འདོད་པའི་འདོད་ཆགས་ཡིན་ནོ། །དེ་བཞིན་དུ་གཟུགས་དང་གཟུགས་མེད་པའི་འདོད་ཆགས་ཞེས་བྱ་བ་ནི་གཟུགས་ཀྱི་ཁམས་སུ་གནས་བསྟན་པ་སྟེ། གོང་མའི་གནས་དག་བཅུ་

Vol. 142 · folio 247b

བདུན་ནི། །གཟུགས་ཀྱི་ཁམས་ཡིན་ཞེས་བྱ་བ་དེ་དག་ལ་འདོད་ཆགས་དང་མ་བྲལ་བའི་འདོད་ཆགས་གང་ཡིན་པ་དེ་ནི་གཟུགས་ཀྱི་འདོད་ཆགས་ཡིན་ལ། དེ་བཞིན་དུ་གཟུགས་མེད་པའི་ཁམས་སུ་སྐྱེ་བ་བསྟན་པ་སྟེ། གཟུགས་མེད་ཁམས་ན་གནས་མེད་དོ། །སྐྱེ་བ་

ལས་ནི་རྣམ་པ་བཞི། །ཞེས་བྱ་བ་དེ་དག་ལ་འདོད་ཆགས་དང་མ་བྲལ་བའི་འདོད་ཆགས་གང་ཡིན་པ་དེ་ནི་གཟུགས་མེད་པའི་འདོད་ཆགས་ཡིན་ནོ། །ཅི་རིགས་པར་ཞེས་བྱ་བ་ནི་གནས་བསྟན་པ་ལ་ལྟོས་པ་ཡིན་ནོ། །བསམ་གཏན་དང་གཟུགས་མེད་པ་དག་ལ་འདོད་

ཆགས་པ་ཞེས་བྱ་བ་ནི་སྙོམས་པར་འཇུག་པ་དང་སྐྱེ་བའི་བསམ་གཏན་དག་ལ་འདོད་ཆགས་པ་ནི་གཟུགས་ཀྱི་འདོད་ཆགས་ཡིན་ལ་གཟུགས་མེད་པའི་འདོད་ཆགས་ཀྱང་དེ་དང་འདྲའོ། །སྤྲུལ་པའི་སེམས་ལ་ཇི་ལྟར་འདོད་པའི་འདོད་ཆགས་པ་ཡིན་ཞེས་བྱ་བ་ནི་གང་

གིས་ན་དེ་འདོད་པ་ན་སྤྱོད་པ་ཉིད་ཡིན་པར་འགྱུར་བ་བསམ་གཏན་གྱི་འབྲས་བུ་འདོད་པ་ན་སྤྱོད་པའི་སྤྲུལ་པའི་སེམས་ལ་ཇི་ལྟར་འདོད་པ་ལས་འདོད་ཆགས་དང་བྲལ་བ་རྣམས་ཀྱི་འདོད་པའི་འདོད་ཆགས་ཡིན། གང་གི་ཚེ་འདི་འདོད་པ་ལས་འདོད་ཆགས་དང་མ་བྲལ་བ་དེའི་ཚེ་

ནི་སྤྲུལ་པའི་སེམས་ཀུན་དུ་མི་འབྱུང་ངོ་། །གང་གི་ཚེ་སྤྲུལ་པའི་སེམས་ཀུན་དུ་འབྱུང་བ་དེའི་ཚེ་ནི་དེ་ལས་འདོད་ཆགས་མི་སྐྱེ་ན། ཇི་ལྟར་འདི་འདོད་པའི་འདོད་ཆགས་མེད་པར་འདོད་པ་ན་སྤྱོད་པ་ཉིད་དུ་རྣམ་པར་གཞག་ཅེས་བྱ་བའི་ཐ་ཚིག་གོ། །ཐོས་པ་དང་ཡོངས་སུ་

ཉམས་ནས་དེ་ལ་ཆགས་པའི་ཕྱིར་རོ་ཞེས་བྱ་བ་ནི་གཞན་ལས་ཐོས་ནས་སྤྲུལ་པའི་སེམས་ལ་འདོད་ཆགས་སྐྱེ་ལ། བདག་ཉིད་ཀྱི་སྤྲུལ་པའི་སེམས་ལས་ཡོངས་སུ་ཉམས་ནས་ནི་དེ་ལ་ཆགས་པའི་ཕྱིར་ཏེ། བསམ་གཏན་པ་འདི་ལྟ་བུ་ཞིག་གིས་འདོད་པ་ན་སྤྱོད་པའི་

སྤྲུལ་པའི་སེམས་ཀྱིས་འདོད་པ་ན་སྤྱོད་པའི་སྤྲུལ་པ་སྤྲུལ་པར་བྱེད་དོ་ཞེས་ཐོས་ནས་ནི་དེ་ལ་དམིགས་པའི་འདོད་ཆགས་སྐྱེ་ལ་བདག་ཉིད་ཀྱི་རྗེས་སུ་དྲན་ནས་ཀྱང་དེ་ལ་འདོད་ཆགས་སྐྱེའོ། །ཡང་ན་སྤྲུལ་པའི་དབང་གིས་ཞེས་བྱ་བ་ནི་སྤྲུལ་པ་ཡིད་འཕྲོག་པ་མཐོང་ནས་

Vol. 142 · folio 248a

སྤྲུལ་པ་བྱེད་པའི་ཕྱིར་སེམས་སམ་སྤྲུལ་པ་པོའི་སེམས་ལ་གང་གི་སྤྲུལ་པ་འདི་འདྲ་བ་ཡིན་པའི་སྤྲུལ་པའི་སེམས་ནི་བཟང་ངོ་སྙམ་དུ་འདོད་ཆགས་པ་ཡིན་ནོ། །ཡང་ན་སྤྲུལ་པ་སྤྲུལ་པའི་ཕྱིར་ཞེས་བྱ་བ་ནི་འདོད་པ་ན་སྤྱོད་པའི་སྤྲུལ་པ་སྤྲུལ་

པར་བྱེད་པའི་སེམས་གང་ཡིན་པ་དེ་ནི་འདོད་པ་ན་སྤྱོད་པ་ཡིན་ཏེ། འདོད་པ་ན་སྤྱོད་པའི་ཆོས་ཀྱི་རྒྱུ་ཡིན་པའི་ཕྱིར་བུམ་པའི་རྒྱུའི་སེམས་ལྟ་བུའོ། །གང་འདོད་པ་ན་སྤྱོད་པ་མ་ཡིན་པ་དེ་ནི་འདོད་པ་ན་སྤྱོད་པའི་ཆོས་ཀྱི་རྒྱུ་མ་ཡིན་ཏེ། དཔེར་ན་གཟུགས་ན་སྤྱོད་པའི་

སེམས་ལྟ་བུའོ། །དེ་ལྟ་ཉིད་ཀྱི་ཕྱིར་གཟུགས་ན་སྤྱོད་པས་ནི་དེ་གཉིས་མི་སྤྲུལ་པའི་ཕྱིར་རོ་ཞེས་བྱ་བ་སྨོས་སོ། །ཡང་ཅིའི་ཕྱིར་གཟུགས་ན་སྤྱོད་པའི་སེམས་ཀྱིས་དྲི་དང་རོ་དེ་དག་མི་སྤྲུལ་ཞེ་ན་དྲི་དང་རོ་དེ་དག་ནི་ཁམ་གྱི་ཟས་ཀྱི་ངོ་བོ་ཉིད་ཡིན་པའི་ཕྱིར་ལ། གཟུགས་ཀྱི་

ཁམས་སུ་སྐྱེས་པ་རྣམས་ཀྱང་དེའི་འདོད་ཆགས་དང་བྲལ་བའི་ཕྱིར་རོ། །གཉའ་ཤིང་ཙམ་ཞེས་བྱ་བ་ནི་ཆར་གྱི་རྒྱུན་གཉའ་ཤིང་གི་ཚད་ཙམ་ནི་གཉའ་ཤིང་ཙམ་མོ། །མཚམས་སམ་བར་མེད་དོ་ཞེས་བྱ་བ་ནི་འདབ་ཆགས་པ་ཉིད་དུ་སྟོན་པར་བྱེད་དོ། །སྟེང་དང་འོག་ཅེས་ནི་

མ་གསུངས་སོ་ཞེས་བྱ་བ་ནི་དེའི་ཕྱིར་འཇིག་རྟེན་གྱི་ཁམས་རྣམས་ཐད་ཀ་ཁོ་ནར་གནས་སོ་ཞེས་སྟོན་པར་བྱེད་དོ། །ལྔ་པའི་ཕྱོགས་སོ་ཞེས་བྱ་བ་ནི་ལྷའི་འགྲོ་བ་སྟེ། འདོད་པ་ན་སྤྱོད་པའི་ལྷ་དྲུག་བཤད་པ་ཡིན་ནོ། །ལྷག་མ་རྣམས་ནི་གཟུགས་དང་གཟུགས་མེད་པ་ན་སྤྱོད་

པ་ཡིན་ནོ། །དེ་ལྟ་མ་ཡིན་ན་འགྲོ་བ་འཆོལ་བར་འགྱུར་རོ་ཞེས་བྱ་བ་ནི་འགྲོ་བ་འདྲེས་པའོ། །གལ་ཏེ་དགེ་བ་དང་ཉན་མོངས་པ་ཅན་ཡང་ཡིན་པར་གྱུར་ན། འགྲོ་བ་འཆོལ་བར་འགྱུར་ཏེ། མི་ཡང་དམྱལ་བར་འགྱུར་བའི་ལས་ནས་ལྷར་སྐྱེ་བར་འགྱུར་བའི་བར་གྱི་ལས་བྱེད་

པས་དེའི་ཕྱིར་མིའི་འགྲོ་བ་དམྱལ་བའི་འགྲོ་བ་ཡང་ཡིན་པར་འགྱུར་བ་ནས་ལྷའི་འགྲོ་བའི་བར་དུ་ཡང་ཡིན་པར་འགྱུར་ཏེ། ལས་དེ་རྣམས་འགྲོ་བ་དེར་གཏོགས་པའི་ཕྱིར་རོ། །འདོད་པའི་ཁམས་སུ་སྐྱེས་པས་གོང་མ་པའི་ཉོན་མོངས་པ་རྣམས་དང་ཡང་ལྡན་ལ་འདོད་པ་ན་

Vol. 142 · folio 248b

སྤྱོད་པའི་ཉོན་མོངས་པ་ཅན་འགྲོ་བ་ཐམས་ཅད་པ་དང་ཡང་ལྡན་པས་མི་དེ་ཉིད་དམྱལ་བ་ནས་ལྷའི་བར་དུ་ཡང་ཡིན་པར་འགྱུར་རོ། །སེམས་ཅན་ཞེས་བྱ་བ་ཁོ་ན་ཡིན་ཞེས་བྱ་བ་ནི་ལུས་རྣམས་ལས་དང་མཐུན་པར་དེར་འགྲོ་བའི་ཕྱིར་རོ། །དེ་ཉིད་ཀྱི་ཕྱིར། བསོད་

ནམས་སྡིག་འབྲས་ཉེར་འགྲོ་རྣམས། །ལས་བཞིན་དུ་ནི་འགྲོ་བར་འགྱུར། །ཞེས་གསུངས་སོ། །སྲིད་པ་བར་མའི་རང་བཞིན་དག་ནི་མ་ཡིན་ནོ་ཞེས་བྱ་བ་འདི་བསྒྲུབ་པའི་ཕྱིར་ཁུངས་བཏགས་པ་ལས་ཀྱང་གསུངས་སོ་ཞེས་བྱ་བར་རྒྱས་པར་ཁྱེར་ཏེ་འོང་བར་བྱེད་དོ། །

རྒྱུ་དང་བཅས་པ་དང་འགྲོ་བ་དང་བཅས་པ་ཞེས་བྱ་བ་ལ་རྒྱུ་ནི་ལས་ཀྱི་སྲིད་པའོ། །འགྲོ་བ་ནི་སྲིད་པ་བར་མ་པ་སྟེ། འདིས་འགྲོ་བར་འགྱུར་བའི་ཕྱིར་རོ། །འགྲོ་བ་ནི་བགྲོད་པར་བྱ་བ་ཡིན་པས་ན་འགྲོ་བའོ། །དེའི་རྒྱུ་ལས་དེ་དག་ལོགས་ཤིག་ཏུ་མཛད་པའི་ཕྱིར་རོ་

ཞེས་བྱ་བ་ནི་ལས་ཀྱི་སྲིད་པ་དགེ་བ་དང་མི་དགེ་བ་ནི་འགྲོ་བ་དེ་དག་ལས་ལོགས་ཤིག་ཏུ་མཛད་པའི་ཕྱིར་རོ། །ཁ་ཆེ་བའི་ཡུལ་ན་ཡོད་པ་ཁ་ཆེ་བ་རྣམས་མདོ་འདོན་ཏེ་ཞེས་བྱ་བ་དེ་ནི་མདོ་སིལ་བུ་ཡིན་ཏེ། དེ་དག་ཁོ་ན་འདོན་གྱི་གཞན་རྣམས་ནི་མ་ཡིན་ནོ་ཞེས་བྱ་བར་བསམས་

པ་ཡིན་ནོ། །དམྱལ་བ་པ་ཞེས་བྱ་བ་རྒྱས་པར་འབྱུང་བ་ནི་དམྱལ་བ་པ་དང་མཐུན་པ་དག་ནི་དམྱལ་བ་པའོ། །དེ་དག་གི་ཞེས་བྱ་བ་རྒྱས་པར་འབྱུང་བ་ལ། ལུས་དང་ངག་དང་ཡིད་ཀྱི་དཀྱིལ་འཁོར་ནི་རྒྱུས་ཀུན་ནས་བསླང་བའི་ལས་དག་ཡིན་ནོ། །སྐྱོན་དང་སྙིགས་མ་ནི་ཞེ་

སྡང་དང་འདོད་ཆགས་ཀྱིས་ཀུན་ནས་བསླང་བ་དག་ཡིན་ནོ། །དེའི་ཕྱིར་ཡང་འགྲོ་བ་དག་ནི་མ་བསྒྲིབས་ལ་ལུང་དུ་མ་བསྟན་པ་ཁོ་ན་ཡིན་ནོ་ཞེས་བྱ་བ་ནི་གང་གི་ཕྱིར་རྣམ་པར་སྨིན་པ་གྲུབ་ནས་དམྱལ་བ་ཞེས་བྱ་བའི་གྲངས་སུ་འགྲོའོ་ཞེས་བྱ་བ་ཡིན་ནོ། །འགྲོ་བ་དག་ལ་ཕྲ་

རྒྱས་ཐམས་ཅད་རྒྱས་པར་འགྱུར་རོ་ཞེས་འབྱུང་བའི་གཞུང་ལན་གདབ་པར་བྱ་དགོས་ཏེ། འགལ་བར་ཐལ་བར་འགྱུར་བའི་ཕྱིར་ལན་བརྗོད་པར་བྱ་དགོས་སོ་ཞེས་བྱ་བའི་ཐ་ཚིག་གོ། །གལ་ཏེ་འགྲོ་བ་ཆོས་རྣམ་པ་ལྔའི་ངོ་བོ་ཉིད་ཡིན་པར་གྱུར་ན་དེ་ལྟ་ན་ཕྲ་རྒྱས་ཐམས་

Vol. 142 · folio 249a

ཅད་རྒྱས་པར་འགྱུར་རོ། །ཅི་སྟེ་འགྲོ་བ་དག་མ་བསྒྲིབས་པ་ཁོ་ན་ཡིན་པར་གྱུར་ན་དེ་ལྟ་ན་ནི་བསྒོམ་པས་སྤང་བར་བྱ་བ་རྣམས་དང་། ཀུན་དུ་འགྲོ་བ་རྣམས་ཞེས་བརྗོད་པར་བྱ་དགོས་ཏེ་བསྒོམ་པས་སྤང་བར་བྱ་བ་ནི་འདུས་བྱས་ཀྱི་ཆོས་མ་བསྒྲིབས་ལ་

ལུང་དུ་མ་བསྟན་པ་དག་ཁོ་ན་ཡིན་ལ་དེ་དག་ལ་ཡང་ཕྲ་རྒྱས་བསྒོམ་པས་སྤང་བར་བྱ་བ་རྣམས་དང་། ཀུན་དུ་འགྲོ་བ་རྣམས་དམིགས་པའམ་མཚུངས་པར་ལྡན་པའི་སྒོ་ནས་རྒྱས་པར་འགྱུར་གྱི་གཞན་དག་ནི་མ་ཡིན་ནོ། །དེས་ན་འགྲོ་བ་དག་ནི་མ་བསྒྲིབས་ལ་ལུང་དུ་མ་

བསྟན་པ་ཡིན་ནོ་ཞེས་བྱ་བར་ཤེས་སོ། །འགྲོ་བ་རྣམས་སུ་ཉིང་མཚམས་སྦྱོར་བའི་སེམས་རྣམ་པ་ལྔ་ཡོད་དེ་ཞེས་བྱ་བ་ནི་འགྲོ་བ་རྣམས་སུ་ཉིང་མཚམས་སྦྱོར་བའི་སེམས་ནི་འཇུག་པ་དག་ཡིན་ཏེ། དེ་དག་སྡུག་བསྔལ་མཐོང་བས་སྤང་བར་བྱ་བ་ནས། བསྒོམ་པས་སྤང་བར་

བྱ་བའི་བར་རྣམ་པ་ལྔ་ཡིན་པའི་ཕྱིར་དེ་ལ་ཕྲ་རྒྱས་ཐམས་ཅད་རྒྱས་པར་འགྱུར་རོ་ཞེས་བྱ་བ་རིགས་པ་ཡིན་ནོ། །གྲོང་གི་ཉེན་ཀོར་ཡང་སྨོས་པ་བཞིན་ནོ་ཞེས་བྱ་བ་ནི་གྲོང་གི་གཡས་གཡོན་ཡང་སྨོས་པ་བཞིན་ནོ་ཞེས་བྱ་བའི་ཐ་ཚིག་གོ། །སྙིགས་མ་ལྔ་པོ་དག་ཏུ་ཞེས་བྱ་བ་

སྙིགས་མ་ལྔ་ནི་ཚེའི་སྙིགས་མ་དང་། དུས་ཀྱི་སྙིགས་མ་དང་། ཉོན་མོངས་པའི་སྙིགས་མ་དང་། ལྟ་བའི་སྙིགས་མ་དང་། སེམས་ཅན་གྱི་སྙིགས་མའོ། །དེ་དག་ཏུ་ཉོན་མོངས་པ་དང་ལྟ་བའི་སྙིགས་མ་དག་ཐ་དད་དུ་གསུངས་ཞེས་བྱ་བ་ནི་ཉོན་མོངས་པའི་སྙིགས་མ་དང་ལྟ་

བའི་སྙིགས་མ་སོ་སོར་གསུངས་ཞེས་བྱ་བའི་ཐ་ཚིག་སྟེ། འདི་གཉིས་སོ་སོར་གསུངས་པ་ནི་ཁྱིམ་ན་གནས་པ་དང་རབ་ཏུ་བྱུང་བའི་ཕྱོགས་ཀྱི་དབང་དུ་མཛད་པའི་ཕྱིར་རོ། །འགྲོ་བའི་རྒྱུ་ཤེས་པར་བྱ་བའི་ཕྱིར་ཞེས་བྱ་བ་ནི་འགྲོ་བ་རྣམས་ཀྱི་རྒྱུ་ནི་ལས་ཀྱི་སྲིད་པ་ཡིན་ནོ་ཞེས་བྱ་

བར་རོ། །འདི་ནི་སྲིད་པ་བར་མ་ལ་ཡང་ཐལ་བར་འགྱུར་རོ་ཞེས་བྱ་བ་ནི་དེ་ལྟ་ན་དེ་སྲིད་པ་བར་མ་ཡང་ཡིན་འགྲོ་བ་ཡང་ཡིན་ལ། འགྲོ་བར་འགྲོ་བ་ཤེས་པར་བྱ་བའི་ཕྱིར་འདི་ཐ་དད་དུ་བསྟན་པ་ཡང་ཡིན་ནོ་ཞེས་བྱ་བ་ཡིན་ནོ། །དེར་འགྲོ་བས་ན་ཞེས་བྱ་བ་ནི་ལས་སུ་བསྒྲུབ་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words