འདུལ་བའི་མདོའི་འགྲེལ་པ

Sanskrit title (Tibetan script, as in the text) བི་ན་ཡ་སཱུ་ཏྲ་བྲྀཏྟི

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 165 · folio 112b

བའི་ལྟུང་བར་འགྱུར། རབ་ཏུ་མ་རྫོགས་པ་ལ་ནི་བསྐྲད་པ་བཞིན་ནོ། །དགེ་སློང་གིས་དགེ་སྦྱོང་ལ་གོས་ཤིག་བྱིན་པ་ལས་ཕྲོགས་ན་ཉེས་བྱས་ཏེ་གོས་ན་དགེ་སྦྱོང་ལ་གཏན་སྤང་ངོ་། །དགེ་སློང་གིས་གཙུག་ལག་ཁང་ནས་དགེ་སློང་བསྐྲད་ན་ལྟུང་བར་འགྱུར། དགེ་སྦྱོང་བསྐྲད་ན་

ཉེས་བྱས། དགེ་སྦྱོང་གིས་དགེ་སྦྱོང་བསྐྲད་ན་ཉེས་བྱས། དགེ་སྦྱོང་གིས་དགེ་སློང་ལ་གོས་བྱིན་པ་ལས་ཕྲོགས་ནའང་ཉེས་བྱས། འཕྲོག་པ་རྣམ་གསུམ་མོ། །གཏར་བཟུང་བ་དང་རྩེད་མོ་དང་གཏན་དུ་ཕྲོགས་པ་གསུམ་སྟེ་འོག་ནས་འཆད། བདག་གིས་ཞེས་པ་གསལ་

བའི་འཕྲོག་པ་འདིར་འདུས་སོ། །དགེ་སློང་གིས་དགེ་སློང་ལ་གོས་བྱིན་ཏེ་གཡོག་ཏུ་བྱ་བའམ་ལས་བཅོལ་བའམ་གྲོགས་སུ་བཀྲི་བ་ལས་མ་བཏུབ་སྟེ་གོས་སླར་ཕྲོགས་པ་ལྟ་བུ་ནི་སྤང་བར་འགྱུར། ངས་སེམས་བྱེད་པ་ནི་དེའི་སྤགས་པའོ། །དགེ་སློང་གིས་གོས་བྱིན་པ་ལས་

གཏན་དབྲོག་པ་ནི་མ་ཡིན་གྱི་སྐད་ཅིག་མི་དགའ་བར་བྱ་བའི་ཕྱིར་ཕྲོགས་པ་ནི་ཉེས་བྱས་སོ། །གནོད་པ་དང་། དགེ་སློང་ཞིག་ཡུལ་རྒྱུར་འགྲོ་བ་ལྟ་བུ་ལ་ལམ་ན་མི་རྒོད་དམ་གཅན་གཟན་གྱིས་གནོད་པར་འགྱུར་བ་ཙམ་ལས་མ་བཏང་བ་དང་། དོན་མེད་པར་འཇུག་པ་ལ། དགེ་

སློང་ཡུལ་རྒྱུར་འགྲོ་བ་རྟེན་ངན་པ་དང་འགྲོགས་ཏེ་ཆོས་ལོག་པ་ལ་ལྟ་བ་འམ་དགེ་སློང་གི་ཚུལ་སྟོར་བར་འགྱུར་བ་ཙམ་གྱི་ཚོད་ལས་མ་བཏང་བ་དང་། བགེགས་བྱས་པའི་ཕྱིར་ལྟུང་བ་མེད། བདག་གི་སློབ་མའམ་དགེ་སློང་གྲོགས་པོ་གོང་མ་རྣམས་གཉིས་ལྟ་བུའི་རྐྱེན་ཡོད་པ་ལྟ་

བུ་མི་གཏོང་བའི་ཕྱིར་གོས་ལ་སོགས་པ་ཕྲོགས་ཏེ་གཏར་བཟུང་བ་ནི་ཉེས་མེད་དབྲོག་པའི་སྤང་བའོ། །དབྲོག་པའི་སྤང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།འདི་མན་ཆད་ཞག་དྲུག་གི་སྤང་བ་ལ་འཆད་དེ། བདག་གི་གནས་དང་འདྲ་བའི་གོང་དུ་

འཇིགས་པ་ཡོད་ན་དགོན་པ་པས་ཆོས་གོས་གཅིག་དང་། དགེ་སློང་དགོན་པ་ལ་གནས་པ་མི་རྒོད་ལ་སོགས་པ་ལ་འཇིགས་པའི་རྐྱེན་ཡོད་ན་ཆོས་གོས་གསུམ་གྱི་ནང་ནས་བཟང་པོ་གཅིག་ཁྱིམ་པ་བརྟན་པོའི་ཁྱིམ་དུ་གཞོག་ཏུ་གནང་ངོ་། །བདག་གི་གནས་དང་འདྲ་ཞེས་བྱ་བའི་གྲོང་ན་

Vol. 165 · folio 113a

རྣམ་པ་གཅིག་ཏུ་ན་མི་སྟོར་བའི་ཁྱིམ་པ་བརྟན་པོ་ལ་བྱ། གཅིག་ཏུ་སངས་རྒྱས་ཀྱིས་ཕན་པར་གསུངས་པས་རྐྱེན་བྱུང་ན་ཁྱིམ་པའི་གནས་དང་དགོན་པ་གཉིས་འདྲའོ་ཞེས་གནང་བ་ལ་བྱ། འགྲོ་བ་དེས་དེ་ཁྱིམ་གྱི་ནང་དུ་བཞག་སྟེ་དགོས་པའི་ཕྱིར་ཞག་དྲུག་

ཏུའོ། །དགེ་སློང་དགོན་པ་ལ་འདུག་པས་མི་རྒོད་ཀྱི་རྐྱེན་ཡོད་ན་ཆོས་གོས་གཅིག་ཁྱིམ་པའི་ཁྱིམ་དུ་བཞག་པ་ཞག་དྲུག་གི་བར་དུ་བདག་དང་བྲལ་ཀྱང་ཉེས་མེད་རྐྱེན་མེད་ན་ཞག་བདུན་གྱི་སྐྱ་རེངས་བྱུང་ན་སྤང་བའི་ལྟུང་བར་འགྱུར། རྟག་ཏུ་རྐྱེན་ཡོད་ན་ཚུལ་ནས་བྱུང་བྱུང་གི་བར་དུ་

བྲལ་ཀྱང་ཉེས་མེད། དགེ་སློང་དགོན་པ་ལས་གུད་དུ་དོན་གཉེར་དུ་འགྲོ་སྟེ་ལམ་ན་མི་རྒོད་ཡོད་དེ་ཕྲོགས་ཀྱིས་དོགས་ན་ཆོས་གོས་གཅིག་ཁྱིམ་པའི་ཁྱིམ་དུ་བཞག་སྟེ་ཞག་དྲུག་གི་བར་དུ་འགྲོར་དབང་ངོ་། །ལམ་ན་མི་རྒོད་གཅིག་གིས་ཆོད་དེ་རྐྱེན་བྱུང་ན་ཞག་དྲུག་འདས་ཀྱང་ཉེས་མེད། འདས་

པར་ནི་མི་དབང་ངོ་། །མདོ་ལྟག་མ་ལྟར་ཞག་དྲུག་ཏུ་སོང་བ་ལས་རྐྱེན་མ་བྱུང་ན་ཞག་དྲུག་ལས་འདས་ན་སྤང་བའི་ལྟུང་བར་འགྱུར། ཉེས་མེད་པ་ནི་བར་ཆད་ཀྱི་དབང་གིས་མ་འོངས་ནའོ། །གོང་མ་ལྟར་ཞག་དྲུག་ཏུ་སོང་བ་ལས་བར་ཆད་ཀྱི་རྐྱེན་མི་རྒོད་དམ་ཟམ་པ་ཆད་པའམ་དགྲས་ཆོད་

པ་ལྟ་བུའི་རྐྱེན་བྱུང་ན་ཞག་དྲུག་འདས་ཀྱང་ཉེས་མེད་དོ། །འདི་ལས་ཕྱི་རོལ་དུ་ཞག་དྲུག་ལས་བརྟགས་ཏེ་འདས་ན་ཡན་ལག་མ་ཡིན་ནོ། །དགེ་སློང་ཚུལ་དུ་ཞུགས་པ་ལས་དོན་གཉེར་དུ་འགྲོ་བ་ནི་ཞག་བདུན་པའི་སྔགས་ཀྱིས་བཏབ་སྟེ་སོང་བ་ལས་ཞག་གཅིག་གཉིས་ཀྱིས་དོན་བསྒྲུབ་

པར་གྱུར་ཀྱང་ཞག་བདུན་དུ་གནང་ཞེས་ཟེར་ཞིང་འཕྱན་དུ་མི་གནང་གིས་དོན་གྲུབ་མ་ཐག་ཏུ་སླར་མ་འོངས་ན་ཚུལ་ཞིག་པར་འགྱུར་ན། དགེ་སློང་དགོན་པ་ལ་ནི་ཆོས་གོས་བཞག་སྟེ་ཞག་དྲུག་གི་བར་དུ་དོན་གཉེར་དུ་འགྲོ་བ་ནི་ཞག་གཅིག་གིས་དོན་གྲུབ་ཀྱང་ཞག་དྲུག་ཏུ་མ་འོངས་ཀྱང་ཉེས་

མེད་དོ། །ཚུལ་ནི་ཚེའང་དོན་གྱི་ཕྱིར་འགྲོ་བ་དང་ལམ་ན་འཇིགས་པའི་དབང་དང་ཡན་ལག་འདི་གསུམ་དང་ལྡན་ན་ཞག་དྲུག་ཏུ་ཆོས་གོས་དང་བྲལ་ཀྱང་ཉེས་མེད་དོ། །ཞག་དྲུག་འབྲལ་བའི་སྤང་བའོ། །ཞག་དྲུག་འབྲལ་བའི་སྤང་བ་སྟེ་འདུལ་བའི་དྲིས་པ་ཞེས་བྱ་བའི་ནང་ནས་

Vol. 165 · folio 113b

འབྱུང་བའི་མདོ།། །།རས་ཆེན་གྱི་སྤང་བ་ལ་འཆད་དེ། བདག་ཚུལ་དུ་འཇུག་པའི་ཉིན་མོ་ནས་ཟླ་བ་སྔ་མའི་དང་པོ་ཚུན་ཆད་དབྱར་གྱི་རས་ཆེན་བཙལ་ཚུལ་སྔ་ཕྱིར་གང་དུ་འཇུག་ཀྱང་རུང་སྟེ་ཚུལ་དུ་འཇུག་པའི་ཉིན་མོ་ནས་ཟླ་བ་གཅིག་ཚུན་ཆད་དབྱར་གྱི་རས་ཆེན་བཙལ་ཀྱང་ཉེས་

མེད། བདག་གིས་དབྱར་འདས་ནས་ཟླ་བ་ཕྱེད་ཀྱི་བར་དུ་བཅང་། ཚུལ་སྔ་ཕྱི་གང་དུ་ཞུགས་ཀྱང་རུང་སྟེ་ཚུལ་ནས་བྱུང་ནས་ཞག་བཅོ་ལྔའི་བར་དུ་དབྱར་གྱི་རས་ཆེན་བཅངས་ཀྱང་ཉེས་མེད། དེ་ལས་སྔ་མ་དང་ཕྱི་མའི་དུས་སུ་ན་བྱེད་དོ། །ཚུལ་དུ་འཇུག་པའི་ཉིན་མོ་ནས་ཟླ་བ་གཅིག་

གི་སྔ་རོལ་དུ་དབྱར་གྱི་རས་ཆེན་འཚལ་ཏམ་ཚུལ་ནས་བྱུང་ནས་ཟླ་བ་ཕྱེད་ལས་འདས་པར་བཅངས་ན་སྤང་བའི་ལྟུང་བའོ་ཞེས་བྱི་ཤུ་ཏས་བཤད། ཚུལ་དུ་འཇུག་པའི་ཉིན་མོ་ནས་ཟླ་བ་གཅིག་གི་སྔ་རོལ་དུ་རས་ཆེན་བཙལ་ན་ཉེས་བྱས། ཚུལ་ནས་བྱུང་ནས་ཟླ་བ་ཕྱེད་ལས་འདས་

པར་བཅངས་ན་སྤང་བའི་ལྟུང་བའོ་ཞེས་བྱི་ཛ་ཡ་བར་མས་བཤད། གཞན་དུ་ན་བཅས་པའོ། །དབྱར་གྱི་རས་ཆེན་ཚུལ་ནས་བྱུང་སྟེ་ཟླ་བ་ཕྱེད་ཀྱི་བར་བཅད་དུ་གནང་ངོ་། །དེ་ལས་ཞག་གཅིག་འདས་ན་འང་སྤང་བའི་ལྟུང་བར་འགྱུར། སྔར་བཙལ་ན་ཉེས་པའོ། །ཚུལ་དུ་

ཞུགས་པའི་ཉིན་མོ་ནས་ཟླ་བ་གཅིག་གི་སྔོན་ལོགས་སུ་རས་ཆེན་བཙལ་ན་བཙལ་བའི་ཚེ་ཉེས་བྱས། ཡང་བ་དང་ལྕི་བ་ཐ་དད་དུ་མཁན་པོ་གཉིས་བཤད། གྲུབ་ན་ཐ་མའི་འོ། །མདོ་ལྟག་མ་ལྟར་བཙལ་ཏེ་ལག་ཏུ་ཐོབ་ན་ཉེས་བྱས་ལྕི་བར་འགྱུར་བ་དང་། ལྟུང་བར་འགྱུར་

བ་སོ་སོར་བཤད། འབྲི་བ་ནི་ཟད་ནའོ། །ཟླ་བ་གཅིག་གི་སྔོན་ལོགས་སུ་དབྱར་གྱི་རས་ཆེན་བཙལ་ཏེ་རྙིང་པ་ངན་པ་ཞིག་རྙེད་ན་ཉེས་བྱས་ཡང་བའོ། །ཇི་ལྟར་ཚུལ་དུ་ཞུགས་པ་དེའི་རྗེས་སུ་འགྲོའོ། །དགེ་སློང་ཚུལ་རྣམ་གཉིས་གག་ཏུ་ཞུགས་ཀྱང་རུང་སྟེ་ཆོ་ག་གཞན་ནི་འདྲ་

ཆོས་གོས་འདྲུབ་ཅིང་ཡོན་ཏན་བཅུ་ནི་ཚུལ་སྔ་མར་ཞུགས་པས་འཐོབ་བོ། །དབྱར་གྱི་རས་ཆེན་གྱི་སྤང་བའོ། །དབྱར་གྱི་རས་ཆེན་གྱི་སྤང་བ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།རིང་བའི་སྤང་བ་ལ་འཆད་དེ། དབྱར་གྱི་ཕྱིར་རྙེད་པ་ནི་བྱེད་དོ། །དགེ་

Vol. 165 · folio 114a

སློང་དབྱར་ཚུལ་ན་འདུག་པའི་ཚེ་ཡོན་བདག་ཡོན་ནར་མར་འབུལ་བ་ལས་སྤང་བའི་ལྟུང་བར་འགྱུར་ཏེ་ཇི་ལྟར་འགྱུར་བ་ནི་འོག་ནས་འཆད་དེ། ཚུལ་གྱི་ཚེ་ལས་ཉེས་པར་འགྱུར་རོ། །དབྱར་གྱི་བར་དུ་བདག་གིར་བྱས་པའོ། །དགེ་སློང་དབྱར་ཚུལ་དུ་ཞུགས་པའི་

ཚེ་ཡོན་བདག་གིས་ཡོན་ནར་མར་འབུལ་བ་བླངས་པ་ལས་སྤང་བར་འགྱུར་ཏེ། རིང་བའི་དབང་གིས་ནི་ཐ་མའི་ཞག་བཅུ་ན་རྙེད་པ་མ་གཏོགས་སོ། །དགེ་སློང་དབྱར་ཚུལ་ན་འདུག་པའི་ཚེ་ཡོན་བདག་གིས་ཡོན་ནར་མར་འབུལ་བ་ལེན་དུ་མི་དབང་བ་ལམ་མིང་གིས་སྨོས་པའི་རྐྱེན་

རྣམས་གང་ཡོད་ཀྱང་རུང་སྟེ་བླངས་ཀྱང་ཉེས་མེད་དེ་ནད་པ་བདག་གིས་ཕུལ་བ་དང་ཤི་ལ་ཐུག་པ་ཞིག་རང་གི་ལག་ནས་འབུལ་བ་ཤི་བའི་འོག་ཏུ་གཉེན་གྱིས་ཕུལ་བ་དང་དམག་གམ་ལམ་རིང་པོར་འགྲོ་བས་ཕུལ་ནའོ། །དེ་འགོད་པ་ལས་ཀྱང་ངོ་། །མདོ་སྟེང་མ་ལྟར་ཡོན་ཕུལ་བ་ལས་ཚུལ་

ནས་མ་བྱུང་བར་སོ་སོར་བགོས་ན་སྤང་བའི་ལྟུང་བར་འགྱུར། མ་བགོས་པ་ལས་ཀྱང་ངོ་། །མདོ་ལྟག་མ་ཡང་ལྟག་མ་ལྟར་ཡོན་ཕུལ་བ་ལས་ཚུལ་ནས་བྱུང་བའི་ཉིན་མོ་མ་བགོས་པར་ཕྱི་དེ་ཉིན་སྐྱ་རེངས་བྱུང་ན་སྤང་བར་འགྱུར། མེད་པར་སྦྱིན་བདག་གིས་སྨྲས་པའི་དབང་ནའོ། །མདོ་

ལྟག་མ་ལྟར་ཚུལ་ནས་བྱུང་མ་ཐག་ཏུ་བགོ་བའི་རིགས་པ་ལས་ཡོན་བདག་ཡོན་འབུལ་བ་ན་རེ་ཁོ་བོ་གང་ཞིག་ཏུ་དོན་གཉེར་དུ་འགྲོ་སྟེ་མ་འོངས་ཀྱི་བར་དུ་མ་བགོ་ཤིག་ཅེས་ཟེར་ན་ཡོན་བདག་གི་ཚིག་བཞིན་དུ་མ་བགོས་ཀྱང་ཉེས་མེད། བྱུང་ནས་དེ་མ་ཐག་གི་ནུབ་མོ་རུབ་མ་པ་མ་བསྔོས་

ན་ཡང་ངོ་། །དགེ་འདུན་ཚུལ་ནས་བྱུང་ནས་གོང་མ་ལྟར་ཡོན་ཕུལ་བ་བགོ་བའི་རིགས་པ་ལས་ཡོན་བདག་གི་ཚིག་བཞིན་དུ་བཞག་པ་ལ་རུབ་མ་པ་གཅིག་མ་བསྐོས་པར་བཞག་ན་སྤང་བའི་ལྟུང་བར་འགྱུར། འདི་མི་བསྐོ་བ་མ་ཡིན། ཡོན་བདག་གིས་གོང་མ་ལྟར་ནོར་ཕུལ་བའི་རུབ་མ་པ་

དགེ་འདུན་གྱིས་ཀྱང་མ་བསྐོས་ན་དགེ་འདུན་ཀུན་ཉེས་བྱས། རིང་པའི་སྤང་བའོ། །རིང་པའི་སྤང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།བསྔོས་པའི་སྤང་བ་ལ་འཆད་དེ། དགེ་འདུན་ནམ་གང་ཟག་གཞན་གྱིས་བརྟགས་པའི་གོས་ཤེས་པ་ལས་བདག་

Vol. 165 · folio 114b

གིས་བསྔོས་ཏེ་ཐོབ་ནའོ། །ཡོན་བདག་གཅིག་གིས་དགེ་འདུན་ནམ་གང་ཟག་ལ་གོས་ཤིག་སྦྱིན་པར་བརྟགས་ཏེ་འབུལ་དུ་འོངས་པ་ལ་དགེ་སློང་གཅིག་གིས་བདག་གི་ཡོན་ཏན་བསྔགས་ཏེ་ཁྱེར་ན་སྤང་བའི་ལྟུང་བར་འགྱུར་ཏེ་ཡན་ལག་ལྔ་སྟེ་དགེ་འདུན་ནམ་གང་ཟག་དག་དེ་ལ་སྦྱིན་

པར་བརྟགས་པ་དང་དེ་ལ་སྦྱིན་པར་བདག་གིས་ཤེས་པ་དང་དངོས་པོ་གང་ཡིན་པ་དང་བདག་གིས་བསྔོས་ཏེ་ཐོབ་པ་དང་ཡན་ལག་འདི་ལྔ་དང་ལྡན་པར་བྱས་ན་སྤང་བའི་ལྟུང་བར་འགྱུར་རོ། །བསྔོས་པ་ནི་ཉེས་བྱས་པའོ། །ཡོན་བདག་གིས་དགེ་འདུན་ནམ་གང་ཟག་ལ་སྦྱིན་པར་བསྔོས་

པར་ཤེས་བཞིན་དུ་བདག་གིར་བསྔར་བའི་ཚེ་ཉེས་བྱས་གཞན་ཡང་འདིར་རོ། །ཡོན་བདག་གིས་དགེ་འདུན་ནམ་གང་ཟག་ལ་བསྔོས་པའི་གོས་དགེ་སློང་གཅིག་གིས་དེ་ལ་མ་སྦྱིན་པར་དགེ་འདུན་ནམ་གང་ཟག་འདི་ལ་བྱིན་ཅིག་ཅེས་བསྒོ་བའི་ཚེ་ཉེས་བྱས་ཡང་པ། དེའི་འབྲས་བུ་ཡང་ངོ་། །

མདོ་ལྟག་མ་ལྟར་གཞན་ལ་བྱིན་ཅིག་ཅེས་བསྒོ་བ་དེའི་ལག་ཏུ་གོས་ཐོབ་ན་ཉེས་བྱས་ལྕི་བའོ། །གཞན་ཡང་ངོ་། །ཡོན་བདག་གིས་དགེ་འདུན་ནམ་གང་ཟག་ལ་ཁ་ཟས་ཞིག་འབུལ་བར་བསྔོས་པ་ལས་གཞན་གྱི་དགེ་འདུན་ནམ་གང་ཟག་ལ་བྱིན་ཅེས་བསྒོ་ན་ཉེས་བྱས་མི་མ་ཡིན་གྱི་ཁང་

པ་ཉིད་ལ་བསྔོས་པའི་རྫས་ལ་བྱ། སེམས་ཅན་དུ་མི་བགྲང་བ་ཡང་ངོ་། །ཁང་བུ་གཅིག་གི་རྐྱེན་གཅིག་ཏུ་བཅུག་པ་ལ་བྱ། ཕྲལ་ཞིང་སྤྲད་པས་སོ། །ཡོན་བདག་གིས་ཁང་བུ་བརྩིགས་ཏེ་ཁང་བུ་སོ་སོའི་ནང་དུ་རྐྱེན་མལ་སྟན་ལ་སོགས་པ་བཤམས་ཏེ་བསྔོས་པ་ལས་ཁང་བུ་

གཞན་གྱི་རྐྱེན་དུ་བསྣོར་ན་ཚུས་འབྱིན་ཚེ་ཉེས་བྱས་གཅིག །ཕ་རོལ་ཏུ་བཅུག་པའི་ཚེའང་ཉེས་བྱས་གཅིག་གོ། །ཕྱོགས་གཅིག་གི་ཡང་ངོ་། །ཡོན་བདག་གཅིག་གིས་གཙུག་ལག་ཁང་ངམ་མཆོད་རྟེན་གྱི་ངོས་གཅིག་ལ་ཚོན་གྱིས་བྱུགས་པའམ་བཅོས་པའི་རྒྱུ་ཞིག་ཏུ་རྫས་

བསྔོས་པ་ཕྱོགས་བསྣོར་ན་ཚུས་པོའི་ཚེ་ཉེས་བྱས། ཕ་རོལ་ཏུ་སྤྱོད་པའི་ཚེའང་ཉེས་བྱས་སོ། །ལྟུང་བ་མེད་པ་ནི་བཙལ་ནས་མ་རྙེད་ན་ལྷག་མ་ཟ་བ་ཕྱུགས་ལ་སོགས་པའི་འོ། །དགེ་སློང་ཁ་ཟས་བཟའ་བའི་ཚེ་སྒོ་ན་མི་འམ་ཕྱུགས་ལ་སྦྱིན་པར་བསྔོས་པ་ལས་མ་བཙལ་བར་

Vol. 165 · folio 115a

གཞན་ལ་བྱིན་ན་ཉེས་བྱས་བཙལ་ཏེ་མ་རྙེད་ན་གཞན་ལ་སྦྱིན་པ་ནི་ཉེས་མེད་དོ། །བརྟགས་པ་ནི་བདེ་བར་གཤེགས་པའི་གཟུགས་བརྙན་དག་བསླངས་ནས་བྱིན་པའོ། །སངས་རྒྱས་ཀྱི་སྐུ་གཟུགས་གཅིག་ལ་རྒྱན་མང་དུ་མངའ་བ་ལས། གཙུག་ལག་ཁང་

དེའམ་གཞན་གྱིས་སངས་རྒྱས་ཀྱི་སྐུ་གཟུགས་ལ་ཡ་ཏེ་བྱེད་པའི་ཚེ་བརྒྱན་པ་བརྙར་བྱིན་པ་ལ་ཉེས་མེད། ཉེས་བྱས་པ་ནི་བསྔོས་ནས་མ་བྱིན་པའོ། །གསེར་དངུལ་དང་གོས་ལྟ་བུ་གཞན་སྦྱིན་པར་བསྔོས་པ་ལས་ཕྱིས་མ་བྱིན་ན་ཉེས་བྱས། ཕྱིའི་མཚམས་སུ་སོང་སྟེ་དགེ་འདུན་ཕྱིར་

བསྔོས་པ་ལའོ། །དགེ་འདུན་གྱི་སྤྱིར་དབང་བའི་ནོར་ལྟ་བུ་ལས་དགེ་སློང་བཞི་ཡན་ཆད་ཀྱིས་ཁ་བརྔམ་བྱ་སྟེ་མཚམས་ཀྱི་ཕྱི་རོལ་དུ་ངེད་ཀྱང་དགེ་འདུན་གྱིས་བགོས་ཀྱང་ཉེས་པར་མི་འགྱུར་ཞེས་བགོས་ན་ཉེས་བྱས། སོ་སོར་ལག་ཏུ་ཐོབ་ན་སྤང་བའི་ལྟུང་བར་འགྱུར་ཞེས་བྱི་ཤུ་

ཏས་བཤད། དགེ་སློང་ཤི་བའི་ནོར་རྫས་ཞིག་དགེ་འདུན་དབང་བ་ལས་སྔགས་ཀྱིས་མ་བཏབ་པར་བགོས་ན་ཉེས་བྱས། མཚམས་ཀྱི་ཕྱི་རོལ་ཏུ་སྔགས་ཀྱིས་བཏབ་ནའང་ཉེས་བྱས། ཕྱི་རོལ་དུ་བགོས་པ་རེ་རེ་ཉེས་བྱས་རེ་རེ། དགེ་འདུན་གྱིས་གང་ཟག་མཚམས་ཀྱི་ཕྱི་རོལ་དུ་

བགོར་བཏང་ན་དགེ་འདུན་ཐམས་ཅད་ཉེས་བྱས་ཞེས་བྱི་ཛ་ཡ་བར་མས་བཤད། བྲེལ་བས་འགོད་པ་ཡང་ངོ་། །ཡོན་བདག་གཅིག་གིས་དགེ་འདུན་སྤྱིར་ཡོན་ཕུལ་བ་ལ་དེའི་ནང་ནས་དགེ་སློང་གཉིས་གསུམ་ཞིག་གུད་དུ་དོན་གཉེར་དུ་སོང་སྟེ་དེའི་འོག་ཏུ་བགོས་ན་ཉེས་བྱས་གུད་དུ་སོང་

བའི་དགེ་སློང་ན་རེ་ཅི་བདེར་གོས་ལ་ངའི་སྐལ་བ་བྱིན་ཅེས་བསྒོ་སྟེ་བགོས་པ་ན་ཉེས་མེད། མ་བསྔོས་པ་ཡང་ངོ་། །དགེ་སློང་ཤི་བའི་ནོར་འགོད་པའི་ཚེ་སྔར་སྔགས་ཀྱིས་མ་བཏབ་པར་བགོས་ན་ཉེས་བྱས་ཞེས་བྱི་ཛ་ཡ་བར་མས་བཤད། ཤི་བའི་ནོར་འགོད་པའི་ཚེ་གནས་བརྟན་

དང་ཚེ་ལུ་ཐ་མ་ལ་ནོར་སྣ་རེ་ཞིག་མ་བྱིན་པར་བགོས་ན་ཉེས་བྱས་ཞེས་བྱི་ཤུ་ཏས་བཤད། དགེ་འདུན་ལས་གཅིག་གམ་གཉིས་སམ་གསུམ་འཐོབ་པ་ཐོབ་ནས་བླངས་པའོ། །གཙུག་ལག་ཁང་གཅིག་ཏུ་ཡོན་བདག་གིས་དགེ་འདུན་ལ་ཡོན་ཕུལ་བ་གཙུག་ལག་ཁང་དེ་ན་དགེ་

Vol. 165 · folio 115b

སློང་གཉིས་སམ་གསུམ་ཞིག་འདུག་སྟེ་དགེ་འདུན་དུ་མ་ཚང་ན་ཡོན་དེ་གང་ཟག་དེ་རྣམས་དབང་སྟེ་སྔར་མ་བསྔོས་པར་ནོར་རྫས་དེ་བགོས་ན་ཉེས་བྱས། རྣམ་པ་གཅིག་ཏུ་ན་དགེ་འདུན་ཉི་ཤུ་ཙམ་ཞིག་འདུག་པ་ལས་གཞན་ཡན་མན་དུ་དོན་གཉེར་དུ་སོང་བའི་འོག་ཏུ་ཡོན་བདག་གིས་སྤྱིར་

ཕུལ་བ་གང་ཟག་གཉིས་སམ་གསུམ་འདུག་པས་བགོས་ན་ཉེས་བྱས། དེ་ཕམ་པར་མི་འགྱུར་བ་ནི་ཡོན་བདག་གི་སེམས་ཀྱིས་ཀྱང་བཏང་དགེ་སློང་གྲོགས་ཀྱིས་ཀྱང་མི་ཤེས་པའི་ཕྱིར་རོ། །འདི་ལས་གཞན་ཡང་སྐལ་བ་མི་གཅོད་དོ། །མདོ་ལྟག་མ་ལྟར་དགེ་འདུན་གྱིས་སྤྱིར་ཕུལ་

བས་དགེ་འདུན་ཡན་མན་དུ་སོང་བས་སྐལ་བ་དབང་ངོ་ཞེས་བྱི་ཛ་ཡ་བར་མས་བཤད། ཤི་བའི་ནོར་སྔགས་ཀྱིས་མ་བཏབ་ན་ཕྱོགས་བཅུའི་དགེ་འདུན་དབང་། སྔགས་ཀྱིས་བཏབ་ན་མཚམས་གཅིག་གི་དགེ་འདུན་དབང་སྟེ་མཚམས་གཅིག་གི་དགེ་སློང་ནི་ཡང་སྐལ་བ་མི་གཅོད་དོ་

ཞེས་བྱི་ཤུ་ཏས་བཤད། རྐུ་སེམས་ཀྱིས་ན་བརྐུས་པ་བཞིན་ནོ། །མདོ་ལྟག་མ་ལྟར་དགེ་འདུན་ལ་ཡོན་ཕུལ་བ་གང་ཟག་ལ་འགོད་པའི་ཚེ་དགེ་འདུན་གྲོགས་འོང་བར་དོགས་པའི་ཕྱིར། རྐུ་སེམས་ཀྱིས་བགོས་ན་རིན་ཐང་ལས་ཕམ་པར་འགྱུར། རྐུ་སེམས་ཀྱིས་འགོད་པའི་ཚེ་

ནོར་འོངས་པར་དགེ་སློང་ཕ་རོལ་པོས་མི་ཤེས་ན་སྦོམ་པོ། བྱུང་བྱུང་དུ་དགྲ་འམ་གནོན་པ་སྲོག་ལ་དམན་པའམ་བྱི་ཤུའི་ཚུལ་སྟོར་བ་མ་བྱུང་གི་བར་དུ་གཙུག་ལག་ཁང་མི་དོར། གཙུག་ལག་ཁང་མི་གནས་པར་མི་བྱ། རྒྱལ་པོའམ་མི་རྒོད་ལྟ་བུས་ཆུང་ཟད་གཙེས་པའི་ཕྱིར།

གཙུག་ལག་ཁང་བོར་ཏེ་སོང་ན་ཉེས་བྱས། དེ་ལ་འདོད་པ་དང་བཅས་པ་སྦྱིན་པ་ན་བཅོལ། གཙུག་ལག་ཁང་གཅིག་ན་དགེ་འདུན་མང་ཞིག་ཡོན་བདག་གི་འཚོ་བ་སྦྱར་བ་ལས་ཡོན་བདག་སྤྱུགས་སམ་ལམ་རིང་བོར་སོང་སྟེ་དགེ་འདུན་གྱི་འཚོ་བ་མེད་ན་གང་ཟག་གང་དད་པ་གཅིག་

གམ་གཉིས་ལ་གཙུག་ལག་ཁང་གི་ཡོ་བྱད་གཏད་དེ་གཞག །མ་འོངས་ན་ལོ་བཅུར་གནས། མདོ་ལྟག་མ་ལྟར་གཙུག་ལག་ཁང་སྲུང་བའི་དགེ་སློང་ཡོན་བདག་མ་འོངས་ན་ལོ་བཅུར་གནས་ཤིང་འདུག་ཤིག །སྔར་ནི་བསོད་སྙོམས་བླང་ངོ་། །མདོ་ལྟག་མ་ལྟར་ལོ་བཅུར་

Vol. 165 · folio 116a

གཙུག་ལག་ཁང་དུ་བཞག་པའི་དགེ་སློང་དེ་འཚོ་བ་མེད་ན་ལོ་ལྔར་ནི་བསོད་སྙོམས་བསླང་ངོ་། །དེའི་དུས་ན་སྦྱིན་བདག་མ་བྱུང་ན་གཞན་གཙུག་ལག་ཁང་གི་འཁོར་དང་ལྷན་ཅིག་ཏུའོ། །ལོ་ལྔར་བསྡད་དེ་ཡོན་བདག་མ་འོངས་ནས་འཚོ་བས་མི་སྦྱོར་ན་གཙུག་ལག་

ཁང་གང་དང་ཉེ་བའི་དགེ་འདུན་དང་ཡོན་ཐུན་མོང་དུ་བྱ་སྟེ་ལོ་ལྔའི་བར་དུ་དེ་ལས་འཚོ་བར་བྱའོ། །རྙེད་པ་གཅིག་ལ་གསོ་སྦྱིན་ཐ་དད་པའི་ལས་བྱའོ། །ལོ་བཅུར་གནས་པའི་དགེ་སློང་ལོ་ལྔར་དགེ་འདུན་གཞན་གྱི་གཙུག་ལག་ཁང་དང་འཚོ་བ་ཐུན་མོང་དུ་སྦྱོར་བའི་ཚེ་འཚོ་བ་ནི་

དགེ་འདུན་དང་ཐུན་མོང་དུ་བྱ། མཆོད་པ་དང་གསོ་སྦྱིན་ནི་བདག་གི་གཙུག་ལག་ཁང་དུ་བྱས་ཏེ་རས་ཀྱིས་འཚོ་བ་དང་ཆོས་ཀྱིས་འཚོ་བ་སྟེ་ཆོས་ཀྱིས་འཚོ་བ་ནི་གསོ་སྦྱིན་བྱེད་པའོ། །གཏོང་ན་གཙུག་ལག་ཁང་གི་འཁོར་དུ་དངོས་པོ་རྣམས་ཞོག་ཤིག །མདོ་ལྟག་མ་ལྟར་དགེ་སློང་

ལོ་བཅུར་གནས་ཏེ་ཡོན་བདག་མ་འོངས་ཏེ་གུད་དུ་འགྲོ་ན་གཙུག་ལག་ཁང་དང་ཉེ་བའི་དགེ་འདུན་ལ་སྐུ་གཟུགས་དང་ཡོ་བྱད་ཐམས་ཅད་བརྩིས་ཏེ་གནས་ན་བྱིན་ཅིག །མདོ་ལྟག་མ་ལྟར་གཙུག་ལག་ཁང་བོར་བ་ལས་དགེ་འདུན་སླར་འདུས་ན་ཡོ་བྱད་གཏམས་པའི་རྣམས་དགེ་འདུན་གྱི་

ཡོ་བྱད་ཚང་བར་སླར་བྱིན་ཅིག །གནས་དག་གི་ནོར་གནས་དག་ཏུ་མ་བྱིན་ཅིག །གཙུག་ལག་ཁང་གཅིག་གི་རྐྱེན་ཡུལ་གྲུའམ་ནོར་རྫས་གཙུག་ལག་ཁང་དེའི་རྐྱེན་དུ་བསྔོས་པ་གཙུག་ལག་ཁང་གཞན་གྱི་རྐྱེན་དུ་མི་བསྔོའོ་ཞེས་བྱི་ཛ་ཡ་བར་མ་བཤད། གཙུག་ལག་ཁང་སྟོང་པའི་

རྫས་ཉེ་འཁོར་གྱི་གཙུག་ལག་ཁང་དུ་གཏམས་པ་དགེ་སློང་སླར་འདུས་ན་སྔོན་ཅི་གཏམས་པ་དེ་ཉིད་སླར་སྦྱིན་གྱི་བསྣོར་ཅིང་མི་སྦྱིན་ནོ་ཞེས་བྱི་ཤུ་ཏས་བཤད། དེ་མ་རྙེད་ན་བྱིན་དུ་ཆུགས་ཤིག །ཡོན་བདག་དང་དགེ་འདུན་སླར་འདུས་ཏེ་གཙུག་ལག་ཁང་གི་ཡོ་བྱད་གཏམས་པ་

སླར་མ་བསྐྱལ་ན་ཐོག་མར་གདམས་པའི་དགེ་སློང་གིས་སློང་ལ་སླར་ཕུལ་ཅིག །ཁྱིམ་བདག་གིས་བསྒོས་པ་དེ་ལས་མི་འགལ། ཡོན་བདག་གིས་གཙུག་ལག་ཁང་སོ་སོར་རྐྱེན་ཕུལ་བ་ལས་ནང་མི་བསྣོར་སྟོན་མོས་འདྲེས་པ་ཙམ་ནི་མ་གཏོགས་སོ། །བསྣོར་ན་ཉེས་བྱས། མ་བྱིན་

Vol. 165 · folio 116b

ན་མཐུས་བླང་གཙུག་ལག་ཁང་གཞན་དུ་ནོར་གཏམས་པ་ལྟག་མ་ལྟར་བསླངས་ཏེ་མ་སྟེར་ན་མ་ཐུས་ཕྲོགས་ཏེ་བླངས་ཀྱང་ཉེས་མེད། རྙེད་ན་སྦྱིན་གཙུག་ལག་ཁང་ནང་མལ་སྟན་ནམ་སྣོད་སྤྱད་ལྟ་བུ་གཅིག་ལ་གཅིག་བརྟེན་པ་ལ་བྱིན་ན་ཉེས་མེད། ཉེས་མེད་པ་ནི་མཆོད་རྟེན་དག་

གིར་བསྔོས་པ་མ་གྲུབ་ནས་བསྔོས་པའོ། །བདག་གིས་གདུགས་སམ་འཕན་ལྟ་བུ་མཆོད་རྟེན་འདི་ལ་འབུལ་ལོ་ཞེས་བསྔོས་པ་ལས་རྐྱེན་ཅིག་འབྱུང་སྟེ་ཉེ་འཁོར་གྱི་མཆོད་རྟེན་གཞན་ལ་ཕུལ་ཀྱང་ཉེས་མེད། བྱང་ཆུབ་ཆེན་པོ་དང་ཆོས་ཀྱི་འཁོར་ལོ་དང་ཆོ་འཕྲུལ་ཆེན་པོ་དང་ལྷ་

ལས་བབ་པ་མ་གཏོགས་ཏེ་གཞན་ནོ། །མཆོད་རྟེན་འདི་བཞི་ལ་ཡོན་འབུལ་བར་བསྔོས་པ་ཞིག་ལས་མཆོད་རྟེན་གཞན་ལ་ཕུལ་ན་ཉེས་བྱས། མཆོད་རྟེན་བཞི་ནང་བསྣོར་ཏེ་ཕུལ་བ་ནི་ཉེས་མེད། བསྔོས་པའི་སྤོང་བའོ། །བསྔོས་པའི་སྤོང་བ་སྟེ་འདུལ་བ་རྣམ་པར་འབྱེད་པའི་

ནང་ནས་འབྱུང་བའི་མདོ།། །།འཇོག་པའི་སྤང་བ་ལ་འཆད་དེ། ཞག་བདུན་དུ་བསྔོས་པ་ལས་འདས་ན་དགེ་སློང་ལ་བསྒོ་ཤིག །སྨན་ཞག་བདུན་དུ་བཏགས་ཏེ་བཟའ་བའི་ཚེ་ཞག་རེ་རེ་ལོན་ཞིང་དགེ་སློང་གྲོགས་པོ་ལ་དབང་གཟུགས། མ་བཙུགས་ན་ཉེས་བྱས་ཏེ་ཞག་བདུན་

པའི་སྔགས་ཀྱིས་བཏབ་པས་ཡན་ལག་གཅིག །བཟའ་བའི་ཕྱིར་བཅངས་ནའོ། །སྔགས་བཏབ་སྟེ་བདག་གིས་བཟའ་བའི་ཕྱིར་བཅངས་པ་དང་ཡན་ལག་གཉིས། འདིའོ། །དངོས་པོ་ཁ་ཟས་རྣམ་བཞི་གང་ཡང་རུང་ཡིན་པ་དང་ཡན་ལག་གསུམ། བརྒྱད་ཀྱི་སྐྱ་རེངས་བྱུང་ནའོ། །

ཁ་ཟས་རྣམ་བཞི་དེ་ཞག་བརྒྱད་ཀྱི་སྐྱ་རེངས་བྱུང་བ་དང་ཡན་ལག་བཞི་སྟེ། ཡན་ལག་འདི་བཞི་དང་ལྡན་ན་སྤང་བའི་ལྟུང་བར་འགྱུར། ཞག་འདས་པའི་ཟས་མ་བརྟགས་པ་ཟོས་པ་བཞིན་དུ་འདིར་འདི་དག་ཀྱང་གདགས་སོ། །སྤགས་པའི་ཁ་ཟས་མ་བརྟགས་པ་ཟོས་ན་ལྟུང་བར་

འགྱུར་བ་བཞིན་དུ་སྨན་ཞག་བདུན་པ་ཡང་ཞག་འདས་ན་ཡང་སྤང་བར་འགྱུར། གང་དུ་འདིའི་ཕྱིར་བརྟགས་པ་དེ་ལ་ལྟུང་བ་མེད་དོ། །མར་དང་ཤིང་མར་དང་སྦྲང་རྩི་དང་ཁཎྜ་བརྟགས་པ་ལས། ཞག་བདུན་འདས་ན་སྤང་བའི་ལྟུང་བར་འགྱུར་བ་ལ་སྦྲང་རྩི་དང་ཁཎྜ་ནི་ཞག་འདས་ན་

Vol. 165 · folio 117a

སྤང་ངོ་། །མར་དང་ཤིང་མར་གཉིས་ནི་རྐ་ལག་བསྐུ་བའི་ཕྱིར་བསྔོས་ཏེ་བཞག་ན་སྤང་མི་དགོས་ཏེ་ལྟུང་བ་མཐོལ་བས་ཚངས་སོ། །བརྟགས་པ་ནི་སྣའི་དང་བསྐུ་བ་བསྔོས་པའོ། །ཡོན་བདག་གཅིག་གིས་མར་དང་ཤིང་མར་ཞིག་ཅི་བདེར་སྤྱོད་ཅིག་ཅེས་དགེ་སློང་

ལ་ཡོན་དུ་ཕུལ་བ་ལས་སྣར་བླུགས་པ་དང་རྐང་ལག་བསྐུ་བའི་ཕྱིར་བརྟགས་ཏེ་བཞག་པ་ཞག་འདས་པའམ་ལྷན་ཅིག་འགྲོགས་ཀྱང་ཉེས་མེད་དེ། ཞག་བདུན་གྱི་སྤང་བའོ། །ཞག་བདུན་པའི་སྤང་བའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།

སྤང་བ་རྫོགས་སོ། །འདི་ཡན་ཆད་སུམ་ཅུ་སྤང་བའི་ལྟུང་བ་རྫོགས་སོ།། །།འདི་མན་ཆད་དགུ་བཅུ་ལྟུང་བ་ལ་འཆད་དེ། ཆོས་དང་སངས་རྒྱས་ཀྱི་ཆོས་ལ་བྱ། ཆོས་མ་ཡིན་པར་སངས་རྒྱས་ཀྱི་ཆོས་མ་ཡིན་པ་རྣམས་ལ་བྱ། ཤེས་ཀྱང་དགེ་འདུན་དང་མངོན་སུམ་དུ་ཆོས་མ་

ཡིན་པར་བརྗོད་ན་སྦོམ་པོའི་ཉེས་པའོ། །དགེ་སློང་གིས་ཆོས་ཡིན་པ་དང་ཆོས་མ་ཡིན་པར་ཤེས་བཞིན་དུ་དགེ་འདུན་གྱི་ནང་དུ་མ་ཡིན་པ་ལ་ཡིན་ནོ་ཞེས་སྨྲས་པ་དང་ཡིན་པ་ལ་མ་ཡིན་ཞེས་སྨྲས་ན་དགེ་འདུན་གྱི་ལྷག་མའི་དབྱེན་གྱི་སྦོམ་པོར་འགྱུར། བརྫུན་ལ་རྣམ་པ་ལྔ་སྟེ། ཕས་ཕམ་

པའི་བརྫུན་དང་དགེ་འདུན་གྱི་ལྷག་མའི་བརྫུན་དང་སྦོམ་པོའི་བརྫུན་དང་བཏུང་བའི་བརྫུན་དང་ཉེས་བྱས་ཀྱི་བརྫུན་ཏེ། སྦོམ་པོའི་བརྫུན་ནི་མདོ་འདི་ཉིད་ཡིན་ནོ། །གཞན་ནི་འོག་ནས་འཆད། གསོ་སྦྱིན་གྱི་ཚེ་མི་ཁྱོད་འདི་ན་ཀུན་གཙང་ངམ་ཞེས་ལན་གསུམ་གྱི་བར་དུ་དྲིས་ན་མི་གཙང་དུ་

འདུ་ཤེས་ཀྱང་མི་སྨྲ་བར་འདས་ན་ཉེས་བྱས་པའོ། །གསོ་སྦྱིན་གྱི་ཚེ་སོ་སོར་ཐར་པ་ཀློག་པས་གུད་དུ་ལྟུང་བ་མེད་དམ་ཞེས་ལན་གསུམ་དུ་དྲིས་ན་ལྷག་མ་མན་ཆད་ཉེས་བྱས་ཡན་ཆད་ཀྱི་ལྟུང་བ་ཡོད་བཞིན་དུ་མ་མཐོལ་བར་བཅབས་ཏེ་སོ་སོར་ཐར་པ་བཀླགས་ན་ཉེས་བྱས། འདི་དག་

ཀྱང་མདོ་གོང་མ་གཉིས་ལ་བྱ། ཕས་ཕམ་པའི་ཕས་ཕམ་པའི་བརྫུན་ལ་བྱ། དགེ་འདུན་གྱི་ལྷག་མ་དགེ་འདུན་གྱི་ལྷག་མ་ཤ་བ་དང་སྐུར་བའི་བརྫུན་ལ་བྱ། ལས་གཞན་པ་བརྫུན་གྱི་རྣམས་ནིའོ། །བརྫུན་གོང་མ་བཞི་མ་གཏོགས་པར་གཞན་ཤེས་བཞིན་དུ་བརྫུན་བྱས་སོ་ཅོག་གང་

Vol. 165 · folio 117b

བྱས་ཀྱང་ལྟུང་བར་འགྱུར། སྨྲ་བཞིན་ན་ཡང་འདུ་ཤེས་རྙེད་ན་ལྡང་ངོ་། །བརྫུན་བྱ་བར་བསམས་ཏེ་དངོས་པོ་མ་ཡིན་པ་ལ་ཡིན་པར་ཚིག་མགོ་བརྩམས་པ་ལས་རྐེད་བཅད་དུ་བོར་ཏེ་མ་སྨྲས་ཀྱང་ལྟུང་བར་འགྱུར་ཏེ་དཔེར་ན་ཀུན་འདི་ལ་གསེར་གྱི་ཞེས་བྱ་བ་ལྟ་བུ། མནའ་མི་དོར། དགེ་

སློང་གིས་མནའ་བོར་བ་འབའ་ཞིག་གི་ཚིག་ནི་བདེན་གྱི་གཞན་སྨྲས་པ་ལ་ཡིད་མི་ཆེས་པའི་ཕྱིར་ཉེས་བྱས། བརྫུན་སྨྲ་བའི་ལྟུང་བའོ། །བརྫུན་སྨྲ་བའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།སྐྱོན་དུ་སྨྲ་བའི་ལྟུང་བ་ལ་འཆད་དེ། དགེ་སློང་ངོ་། །དགེ་

སློང་ལ་སོགས་པ་ནི་མ་ཡིན་གྱི་དགེ་སློང་ལ་སྐྱོན་ནས་བོས་ན་ལྟུང་བ་སྟེ་ཡན་ལག་གཅིག །དེ་མ་ཐེག་པའི་ཡང་ངོ་། །འོག་ནས་འབྱུང་བ་ཕྲ་མ་ཡང་དགེ་སློང་ལ་བྱས་པས་ལྟུང་བར་འགྱུར་ཏེ་དགེ་སྦྱོང་དང་སྐྱེ་བོས་སྨྲས་པ་ནི་མི་ལྟུང་ངོ་། །སྐྱོན་ནས་སྐྱོན་ཀྱང་ཡིན་པ་དང་ཡན་ལག་

གཉིས། འབོད་པར་འདོད་པ། སྐྱོན་ནས་ཀྱང་བོས་པ་དང་ཡན་ལག་གསུམ་སྟེ་འདི་གསུམ་དང་ལྡན་པར་དགེ་སློང་ལ་སྨྲས་ཤིང་བོས་ན་ལྟུང་། འཇམ་པའམ། ཚིག་འཇམ་པོས་ཉོན་མོངས་སྐྱོན་འདི་ལྟ་བུ་ཡོད་ཅེས་སྨྲས་ནའང་ལྟུང་། རྩུབ་པོ་གཤེ་བའི་ཚིག་ཏུ་དྲག་པོར་སྐྱོན་ནས་

བོས་ནའང་ལྟུང་། གང་ཅི་ལ་ཡང་དམ་པ་མ་ཡིན་པར་བསམས་ཤིང་སྨྲ་ན། དགེ་སློང་གིས་ཕ་རོལ་ལ་ལུས་ཀྱི་སྐྱོན་ཞར་བའམ་མཛེ་ཅན་ལ་སོགས་པའམ་ཡིད་ཀྱི་སྐྱོན་མེའམ་སྦྲུལ་གདུག་དང་འདྲ་ཞེས་བྱས་པ་དང་རིགས་ཀྱི་སྐྱོན་ཕྱག་དར་བ་ལ་སོགས་པ་འདི་ལྟ་བུ་ཡིན་ནོ་ཞེས་སྨྲས་

ན་ལྟུང་། མིང་མ་ཡིན་པ་དང་མིང་སྐྱོན་དུ་འགྱུར་བ་ལས་བོས་ན་ལྟུང་། མི་དགའ་བ་མ་སྐྱེས་ཀྱང་ངོ་། །དགེ་སློང་གི་དགེ་འདུན་ལ་མདོ་ལྟག་མ་ལྟར་སྐྱོན་ནས་བོས་ན་ཁྲོས་ཀྱང་རུང་ལྟུང་བར་འགྱུར། གཞན་དགེ་སློང་དང་ཁྱིམ་པ་ལ་སྐྱོན་ལྟག་པའི་ལྟར་སྨྲས་ན་ཉེས་བྱས། རྒྱལ་

རིགས་དང་བྲམ་ཟེ་ལ་སོགས་པ་ན་ཉེས་བྱས་པའོ། །དགེ་སློང་ལ་རྒྱལ་རིགས་ལྟ་བུ་རིགས་བཙུན་པ་མ་ཡིན་པ་ལ་གནེང་གཙོང་གི་ཚུལ་དུ་ཡིན་ནོ་ཞེས་སྨྲས་ན་ཉེས་བྱས་ཞེས་བྱི་ཤུ་ཏས་བཤད། ཁྱོད་རྒྱལ་རིགས་ལ་སོགས་པ་བཙུན་པའི་ཚུལ་བོར་ཏེ་ཅིའི་ཕྱིར་ན་ཐར་པར་ཞུགས་ཞེས་

Vol. 165 · folio 118a

སྨྲས་ན་ཉེས་བྱས་ཞེས་བྱི་ཛ་ཡ་བར་མས་བཤད་སྐྱོན་ནས་འབོད་པའོ། །སྐྱོན་ནས་འབོད་པའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།ཕྲ་མའི་ལྟུང་བ་ལ་འཆད་དེ། ཕྲ་མ་འདོད་པས་ཆེ་གེ་མོ་ཞིག་སྨྲའོ་ཞེས་སྨྲ་ནའོ། །ཕ་

རོལ་དགེ་སློང་གཉིས་འཐབ་པ་འམ་དབྱེ་བར་བྱ་བའི་ཕྱིར་ཁྱོད་ལ་འདི་སྐད་ཟེར་རོ་ཞེས་ཟེར་ཞིང་ཕན་ཚུན་དུ་ཚིག་བསྐྱལ་ན་ལྟུང་བར་འགྱུར་ཏེ་དངོས་ཕྲ་མ་ཡིན་པ་དང་ཕ་རོལ་ལ་སྨྲས་པ་དང་ཡན་ལག་གཉིས་དགེ་སྦྱོང་དང་ཁྱིམ་པ་གཉིས་ལ་ཕྲ་མ་བྱས་ན་ཉེས་བྱས། འོན་ཏེ་མིང་

ནས་ན་ཡང་ངོ་། །དགེ་སྦྱོང་དང་ཁྱིམ་པའི་མིང་ནི་མ་ཡིན་གྱི་དགེ་སློང་འདི་ཁྱོད་ལ་འདི་སྐད་ཟེར་རོ་ཞེས་སྨྲས་ན་ལྟུང་བར་འགྱུར་ཏེ་ཡན་ལག་གསུམ། དེ་དགེ་སློང་ནའོ། །ཕ་རོལ་དུ་གནས་པའི་དགེ་སློང་དེ་ཉིད་ཚུལ་ཁྲིམས་མ་ཉམས་པ་ལ་སྨྲས་ཏེ་ཡན་ལག་འདི་བཞི་དང་ལྡན་ན་

ལྟུང་། ཚུལ་དང་མི་ལྡན་པ་ལ་ལྡན་པར་བསམས་ཏེ་སྨྲས་ནའང་ལྟུང་གཞན་ལ་ན་ཉེས་བྱས་པའོ། །ཡན་ལག་འདི་བཞི་དང་མི་ལྡན་པར་སྨྲས་ན་ཉེས་བྱས་ཞེས་བྱི་ཛ་ཡ་བར་མས་བཤད། དགེ་སློང་འདི་འདི་སྐད་ཟེར་རོ་ཞེས་མིང་ནས་མ་ཕྱུང་བར་སྨྲས་ན་ཉེས་བྱས་ཞེས་བྱི་ཤུ་ཏས་

བཤད། ཕྲ་མའོ། །ཕྲ་མའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།སྤྱོས་པ་ལ་འཆད་དེ། འབྷིད། ཤེས་བཞིན་དུ་བྱས་ན་ལྟུང་བར་འགྱུར་ཏེ་ཡན་ལག་གཅིག །དགེ་འདུན་གྱི་ཡང་དག་པར་ཞི་བའོ། །དགེ་སློང་གཉིས་ཤིག་འཐབ་པ་ལས་དགེ་འདུན་

གྱིས་ཞི་བར་བྱས་པ་ལས་དགེ་སློང་གཅིག་གིས་སླར་འཐབ་པའི་རིགས་སོ་ཞེས་འཐབ་ཏུ་བཅུག་པ་ལས་བརྒྱ་རྩ་གཅིག་གང་ཡང་རུང་སྟེ་དགེ་འདུན་གྱིས་ལས་བྱས་ཏེ་ཞི་བ་ལས་ཉེས་པར་འགྱུར་ཏེ་ཡན་ལག་གཉིས། དགེ་སློང་དག་གིས་གླེངས་པའོ། །དགེ་སློང་གཉིས་ཆོས་ཀྱི་ཕྱིར་རྩོད་པ་

ལས་བདག་གིས་གླེངས་པ་ལས་འགྱུར་ཏེ་ཡན་ལག་གསུམ། སྤྱོས་ནའོ། །མདོ་ལྟག་མའི་ལྟག་མ་ལྟར་དགེ་འདུན་གྱིས་ཞི་བར་བྱས་པ་ལས་ཞི་བའི་མི་རིགས་ཀྱིས་ད་རུང་རྩོད་པའི་རིགས་སོ་ཞེས་དགེ་འདུན་གྱི་ལས་སྤྱོས་ཏེ་ཡན་ལག་འདི་བཞི་དང་ལྡན་ན་ལྟུང་བའོ། །འཁོད་པས་དགེ་འདུན་

Vol. 165 · folio 118b

ལས་བྱེད་པའི་ནང་ན་བདག་འདུག་ཏེ་རྒྱུས་ཤེས་པ་དང་། ལས་བྱས་པ་དང་བདག་གིས་གསོལ་བ་དང་ཞུ་བའི་ལས་བྱེད་བྱེད་དེ་རྒྱུས་ཤེས་པ་དང་། དད་པ་བྱིན་པ་ལ་རྩ་བའོ། །བདག་གིས་དད་པ་བྱིན་པ་དང་རྩིས་མགོ་འདི་རྣམས་དང་ལྡན་པར་གང་བྱས་ཀྱང་རུང་སྟེ་ལྟུང་བར་འགྱུར།

ཉེས་བྱས་པ་ནི་འོངས་པ་དང་། དགེ་འདུན་གྱིས་ལས་བྱས་པ་ལ་དགེ་སློང་ཞིག་ཕྱིས་འོངས་ཏེ་ལས་འདི་བྱས་པ་མ་ལེགས་སོ་ཞེས་སྨྲས་ན་ཉེས་བྱས། ལྟ་བ་ལ་བརྗོད་པ་ཡང་ངོ་། །དགེ་སློང་གྲལ་ན་འདུག་པས་དགེ་འདུན་གྱི་ལས་བྱས་པ་ལ་མི་རུང་པ་སྐད་དུ་ཚིག་འཇོང་རྙོལ་དུ་སྨྲས་ནའང་

ཉེས་བྱས། དེ་བཞིན་དུ་གླེང་བར་འདུ་ཤེས་ན་གླེང་བ་དག་ཀྱང་ངོ་། །དགེ་སློང་གཉིས་ཤིག་རྩོད་དེ་ལྟག་ཏུ་དགེ་འདུན་གྱིས་ཞི་བར་བྱས་པ་ལས་ཞི་བར་བྱས་པའི་གླེང་དེ་ནི་མ་བསླང་གི་གླེང་གཞན་ཞིག་གིས་འཐབ་པར་འགྱུར་བའི་གཅུགས་ཤིག་ལས་གླེང་བསླང་སྟེ་རྩོད་དུ་བཅུག་པའང་

ལྟུང་། དགེ་འདུན་གྱིས་ལས་བརྒྱ་རྩ་གཅིག་ལྟ་བུ་གང་ཡང་རུང་བ་ཞི་བའམ་ཆད་པར་བྱས་པ་ལས་དེ་ཉིད་སྤྱོས་ཀྱང་རུང་གཞན་དུ་སྤྱོས་ཏེ་བསྣོར་ཀྱང་རུང་ལྟུང་ངོ་། །ལས་ཀྱི་འབྲས་བུར་གྱུར་པ་ལ་དེ་མ་ཡིན་ཞེས་བརྗོད་ན་ཕྱེད་དོ། །དགེ་འདུན་གྱིས་དགེ་སློང་ལྷག་མར་གྱུར་པ་ཞིག་

ཆད་པར་བྱེད་དུ་བཅུག་པ་ཞག་བཅུ་ཙམ་བྱས་པ་ལ་དགེ་སློང་ཅིག་ན་རེ་ཆད་པ་བྱེད་པ་དེ་ལ་ཁྱོད་ཀྱིས་ཆད་པའི་ལས་བྱས་པ་འདི་མ་ཡིན་གྱིས་གཞན་བྱེད་དུ་བཅུག་གོ་ཞེས་སྤྱོས་པའི་ཚེ་ཉེས་བྱས། ལས་བརྒྱ་རྩ་གཅིག་ཀུན་དེ་དང་འདྲ། སྤྱོས་པའོ། །སྤྱོས་པའི་ལྟུང་བ་སྟེ་འདུལ་བ་རྣམ་པར་

འབྱེད་པའི་ནང་ནས་འབྱུང་བའི་མདོ།། །།བུད་མེད་ལ་ཆོས་འཆད་པའི་ལྟུང་བ་ལ་འཆད་དེ། ཆོས་འཆད་པའོ། །བུད་མེད་བརྡ་ཕྲད་པ་ལ་ཆོས་བཤད་པ་ལས་ལྟུང་བར་འགྱུར་ཏེ་ཡན་ལག་གཅིག །ཚིག་དྲུག་ལས་ལྷག་པར་རོ། །སྒོ་དྲུག་ལས་ལྷག་པར་བཤད་ན་ལྟུང་བར་འགྱུར་

ཏེ་ཡན་ལག་གཉིས། ལྷག་པར་ཤེས་ནའོ། །བདག་གི་ཚིག་ལྔའམ་དྲུག་ལས་ལྷག་པར་སྨྲས་པར་ཤེས་ན་ལྟུང་བར་འགྱུར་ཏེ་ཡན་ལག་གསུམ་དང་ལྡན་ན་ལྟུང་བའོ། །ལྔ་པོ་ཚིག་ལྔ་ལས་བརྩམས་པའོ། །ཕུང་པོ་ལྔ་བཤད་པ་ལས་དྲུག་ཏུ་རྩོམ་པའི་ཚེ་ཉེས་བྱས། དྲུག་ཏུ་

Vol. 165 · folio 119a

སྨྲས་ན་ལྟུང་། སྒོ་དྲུག་མི་རྟག་གོ་ཞེས་བཤད་པ་ལས་ཚིག་བདུན་དུ་རྩོམ་པའི་ཚེ་ཉེས་བྱས་ཚིག་བདུན་དུ་སྨྲས་ན་ལྟུང་བའོ། །མཁས་པས་མ་བྱས་པ་ནི་ལན་ཀུན་དྲིས་པ་དང་། མདོ་ལྟག་མ་ལྟར་ཕུང་པོ་དང་སྐྱེ་མཆེད་བཤད་པ་ལས་བུད་མེད་མཁས་པས་འདི་

ཡན་ལག་ཐབས་ཇི་ལྟ་བུ་ཡིན་ཞེས་དེས་བྱེ་བྲག་ཏུ་དྲིས་པ་ལས་ཡན་ལག་ཞིབ་ཏུ་བཤད་ཀྱང་ཉེས་མེད་ཁ་དོན་དང་བུད་མེད་ཁ་དོན་འབུལ་བ་ལ་ཁ་དོན་མནོད་པ་དང་དབོག་པའི་ཚིག་དྲུག་ལས་ལྷག་པར་སྨྲས་ཀྱང་ཉེས་མེད། ཀུན་དྲི་བ་དང་། སྔོན་ཆད་ཆོས་བཤད་དེ་བུད་མེད་ཀྱིས་བརྗེད་པ་སླར་

འདྲི་ན་ཚིག་དྲུག་ལས་ལྷག་པར་སྨྲས་ཏེ་བསྟན་པའང་ཉེས་མེད། ཉེ་བར་གནས་པ་བྱིན་པ་དང་། དཀོན་མཆོག་གསུམ་ལ་སྐྱབས་སུ་འགྲོ་བ་དང་ཁྲིམས་པའང་ཚིག་དྲུག་ལས་ལྷག་པར་སྨྲས་ཀྱང་ཉེས་མེད། ཀུན་དྲི་བ་དང་བྱིན་པའི་ཆགས་པའོ། །ཡོན་བདག་གི་དགེ་སློང་བཤོས་

གསོལ་བའི་ཚེ་ཚིག་དྲུག་ལས་ལྷག་པར་ཚིགས་བཅད་སྨྲས་ཀྱང་ཉེས་མེད། གནས་སྤངས་ནས་སྔ་མའི་མ་ཡིན་ནོ། །བུད་མེད་ལ་ཆོས་འཆད་པ་ཚིག་བཞིའམ་ལྔ་ཙམ་མན་ཆད་སྨྲས་ཏེ་ས་སྤོས་ཤིང་བཤད་པ་ནི་ཉེས་མེད། ཚིག་གྲངས་ལས་འདས་པར་སྨྲས་ཏེ་ས་སྤོས་པ་ནི་ལྟུང་བར་

འགྱུར། འཆད་པའོ། །འཆད་པའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།ཀློག་པའི་ལྟུང་བ་ལ་འཆད་དེ། རབ་ཏུ་མ་རྫོགས་པ་དང་མཉམ་པའམ། འབྲང་བར་འཐོབ་པར་འགྱུར་བའི་སྟེ། སྨྲས་པ་ཆོས་སམ་ཡི་གེ་ནའོ། །དགེ་སློང་གཉིས་མགྲིན་པ་

བསྒྲིལ་ཞིང་སྨྲས་པ་ནི་མ་གཏོགས་ཏེ་དགེ་སྦྱོང་ངམ་ཁྱིམ་པ་ལྟ་བུ་ཞིག་དང་རྣམ་པ་འདི་རྣམས་གང་དང་ཡང་རུང་སྟེ་ཤ་ལོ་ཀ་གཅིག་ཡན་ཆད་མིད་པ་བསྒྲིལ་ཞིང་སྨྲ་ན་ལྟུང་བར་འགྱུར། མི་འདོད་པར་འགྲུབ་པ་མ་གཏོགས་སོ། །ཁ་ཐོན་ཞུ་བ་ལ་སོགས་པ་དགེ་སློང་གིས་སྨྲས་པའི་རྗེས་

བཞིན་དགེ་སྦྱོང་ངམ་ཁྱིམ་པ་ཞིག་ལྕེ་བདེ་ཞིང་ཚིག་མྱུར་བས་བདག་སྨྲས་པའི་ཚིག་ནོན་ཏེ་བསྒྲིལ་ཞིང་སྨྲས་ཀྱང་ལྷན་ཅིག་སྨྲ་བར་མ་དད་ན་ཉེས་མེད། མཉན་དུ་ཡོད་པ་ན་ཨུ་དའི་ཡི་གེ་ཕལ་མོ་ཆེ་དང་ལྷན་ཅིག་ཏུ་ཀླག་ཅོར་ཆེར་ཟེར་ཞིང་མིད་པ་བསྒྲིལ་པ་ལས་བཅས། ལྷོགས་ཤིག་པ་

Vol. 165 · folio 119b

ཡང་བསྟན་ཏེའོ། །མདོ་ལྟག་མ་ལྟར་དགེ་སྦྱོང་ངམ་ཁྱིམ་པའི་ཚིག་མྱུར་བར་སྨྲ་བ་ལ་ངའི་ཚིག་སྨྲ་བ་མ་ཟིན་པར་མ་སྨྲ་ཤིག་ཅེས་ལན་གཉིས་གསུམ་དུ་བསྟན་ཅིང་བསྒོ་འང་རང་བཞིན་དུ་གྱུར་ཏེ་ཚིག་མྱུར་ནས་མཉམ་དུ་སྨྲས་པའང་ཉེས་མེད། ཁ་དོན་དང་ཁ་དོན་སློས་པའི་སྐབས་སྐབས་

སུ་ཚིག་བསྒྲིལ་ཞིང་སྨྲས་པའང་ཉེས་མེད། སློས་པ་དང་ཁ་དོན་འབུལ་བའི་ཚེ་བརྗེད་དམ་ནོར་ཏེ་བསྟན་པར་སློས་པ་ལ་བསྒྲིལ་ཏེ་སྨྲས་པ་ཉེས་མེད། ཀུན་འདྲི་བའོ། །དགེ་སྦྱོང་གིས་དྲིས་པ་ལ་ལེའུ་དང་དོན་འདི་ལྟ་བུ་ཡིན་ནོ་ཞེས་བསྒོ་བ་ལ་མཉམ་དུ་སློས་ཤིང་སྨྲ་བ་ནི་ཉེས་མེད། ཀློག་

པའོ། །ཀློག་པའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།ཉེས་སྨོས་ལ་འཆད་དེ་བསྐོའོ། །སྡིག་པའི་དགེ་སློང་ཕ་དང་དགེ་སློང་མ་རིགས་སུ་བསྐོའོ། །མཉན་དུ་ཡོད་པ་ན་དགེ་སློང་ཨ་རི་ཤྟ་དང་དགེ་སློང་མ་ས་ར་ལ་གཉིས་ཤུག་ཏུ་འདུས་ནས་རིགས་སུན་པ་སྤྱོད་

པ་ལ་ཡུལ་དེའི་གྲོང་མི་ན་རེ་ཤ་ར་མ་ན་དེའི་སློབ་མ་འདི་ལྟར་རིགས་སུན་ཅིང་མི་ཚངས་པར་སྤྱོད་པ་ལ་ངེད་དང་མི་འདྲ་བ་མེད་ཀྱིས་འདི་དག་ལ་བསྟི་སྟང་དང་བསོད་སྙོམས་ལ་སོགས་པའང་མི་སྦྱིན་ནོ་ཞེས་དམ་བཅས་ཏེ། དགེ་སློང་ཡོན་ཏན་དང་ལྡན་པ་ཁ་ཅིག་སློང་བ་ལའང་བསོད་སྙོམས་

མ་སྟེར་བ་གཏམ་རིམ་པ་ནས་སངས་རྒྱས་ཀྱིས་གསན་ཏེ་དགེ་སློང་གཅིག་གསོལ་བ་དང་ཞུ་བའི་ལས་གཉིས་ཀྱིས་དགེ་སློང་ཕ་དང་དགེ་སློང་མ་འདི་གཉིས་དང་དགེ་འདུན་ཕལ་ཆེར་ཕྱོགས་མི་སྟེ་འདྲའོ་ཞེས་རིགས་སུ་བསྒོ་ཤིག་པར་བསྒོ་བ་ལ་བྱ། ཉོན་ཅིག་ཚེ་དང་ལྡན་པ། བསྐོས་

པའི་དགེ་སློང་གིས་ཁྱིམ་པ་ཕོ་སྨོས་ལ་རིགས་སུན་པའི་མིང་ནས་སྨོས་ཏེ་འོག་མའི་ཚིག་བསྒོ་བ་ལ་བྱ། འགྱུར་བ་ནི་རིགས་སུ་རིགས་སུན་པ་དང་རབ་འབྱུང་གནས་སུ་རབ་འབྱུང་གནས་སུན་པ་འདི་ལྟ་སྟེ་འགྲུབ་པའི་འབྲས་ཀྱི་ཞིང་དུ་སེར་བ་དྲག་པོའི་འཁོར་ལོ་བབ་པ་དེའི་ཕྱིར་འབྲས་

དེ་ཁ་བཏགས་པའི་ཕྱིར་མ་རུང་པར་བྱ་བའི་ཕྱིར་མི་རིགས་པར་ཆུད་གཟན་པ་དང་འགྲུབ་པའི་བུ་རམ་ཤིང་གི་ཞིང་བཙོད་འདྲ་བ་ཞེས་བྱ་བའི་ནད་ཀྱི་རིགས་བྱུང་ནས་དེའི་ཕྱིར་བུ་རམ་ཤིང་དེ་ཉིད་ཁ་གདགས་པའི་ཕྱིར་མ་རུང་བར་བྱ་བའི་ཕྱིར་མི་རིགས་པར་ཆུད་གཟན་པའི་ཕྱིར་ཚེ་དང་ལྡན་པ་

Vol. 165 · folio 120a

ཁྱེད་དགེ་སློང་འདི་དང་དགེ་སློང་མ་འདིས་བསྟན་པ་མ་གཞལ་ཅིག །དགེ་སློང་ཕ་འདི་དང་དགེ་སློང་མ་འདི་དག་ནི་འབྲུ་ཚིག་པ་བཞིན་མི་སྐྱེ་བ་ནི་ཆོས་ཏེ་འདིའི་འདུལ་བའོ། །ལྟོ་ཤིག་བཅོམ་ལྡན་འདས་དང་གནས་བརྟན་གནས་བརྟན་རྣམས་ཀྱིས་དགེ་སློང་ལའོ་ཞེས་

རིགས་སུ་རིགས་ལ་བསྒོ་བ་སྨོས་ཤིག །མི་མོས་ན་ཞུ་བ་བྱོས་ཤིག །དགེ་སློང་བསྐོས་པ་གོང་དུ་བསྐོར་སོང་སོང་བ་ལ་དགེ་སློང་ཨ་རི་ཤྟས་ཁྱོད་སྒོར་འགྲོ་ན་གསད་དོ་ཞེས་བསྡིགས་པ་དང་གྲོང་དུ་འགྲོ་མ་ནུས་ནས་བདག་གིས་རྔོ་མི་ཐོགས་སོ་ཞེས་དད་པ་སླར་ཕུལ་བ་དང་སངས་རྒྱས་ཀྱིས་དགེ་

འདུན་སྟེ་ལྔ་ལ་ཞུ་བ་བྱས་ཏེ་ཁྱེད་རྣམས་ཐམས་ཅད་ཀྱིས་དགེ་སློང་ཨ་རི་ཤྟས་ཕོ་མོ་འདི་གཉིས་དང་གཞན་དང་ཐ་དད་པར་ལྟོས་ཤིག་པར་བསྒོ་བ་ལ་བྱ་འབྷིད་ཤེས་བཞིན་པ་ལ་བྱ། མི་ཤེས་པའི་བསྙེན་པར་མ་རྫོགས་པ་ཉན་ནའོ། །དགེ་སློང་གིས་དགེ་སྦྱོང་དང་ཁྱིམ་པ་གཏམ་མཐོས་ཤིང་

མི་ཤེས་པ་ལས། དགེ་སློང་འདིས་ཕམ་པའམ་དགེ་འདུན་གྱི་ལྷག་མས་བྱས་སོ་ཞེས་བྱས་ན་ལྟུང་བ་སྟེ་དགེ་སྦྱོང་ངམ་ཁྱིམ་པ་དེ་ཕས་ཕམ་པ་བྱུང་བར་མི་ཤེས་པར་སྨྲས་པས་ཡན་ལག་གཅིག་བསྙེན་པར་མ་རྫོགས་པ་དང་ཡན་ལག་གཉིས་མཉན་ཏེ་ཐོས་པ་དང་ཡན་ལག་གསུམ། བསྒོ་

ནའོ། །ཉེས་པ་ཉིད་ཕ་རོལ་ལ་བསྟན་པ་དང་ཡན་ལག་བཞི། ཕས་ཕམ་པ་དང་དགེ་འདུན་གྱི་ལྷག་མའོ། །མདོ་ལྟག་ཏུ་བསྒོ་ཞེས་བྱ་བ་ནི་ཕས་ཕམ་པ་དང་དགེ་འདུན་གྱི་ལྷག་མ་བསྒོ་བ་ལ་བྱ་སྟེ་ཡན་ལག་འདི་ལྔ་དང་ལྡན་ན་ལྟུང་བར་འགྱུར། བསྐོ་བ་མ་བྱས་པའོ། །དགེ་འདུན་གྱིས་

གྲོང་དུ་ཉེས་པ་སྦོམ་པོ་སྨོས་ཤིག་པར་བསྒོས་པ་ནི་མ་གཏོགས་ཏེ་བདག་གིས་ཉེས་པ་སྦོམ་པོ་གཞན་ལ་སྨྲས་ན་ལྟུང་། དགེ་འདུན་ལ་མ་གསོལ་ནའོ། །དགེ་འདུན་སྡེ་ལྔ་ལ་གསོལ་བ་དང་ཞུ་བའི་ལས་ཀྱིས་གྲོང་དུ་བསྒོ་ཤིག་པར་བསྐོས་པ་ནི་ཉེས་མེད། དེ་ལྟར་མ་བསྒོ་བར་སྨྲས་པ་ནི་ལྟུང་

བར་འགྱུར། སྡུག་བསྔལ་སྦྱིན་པར་སྨྲ་བའོ། །ཉེས་སྨོས་ཀྱི་ལྟུང་བ་སྟེ་འདུལ་བ་བདུན་གྱི་གཙུག་ལག་ཁང་ངམ་སངས་རྒྱས་ཀྱི་དྲི་གཙང་ཁང་ངམ་ཙེ་ཏི་ཞིག་བརྩིག་ན་གང་གིས་བརྩིག་ཅིང་ལས་བྱེད་པའི་དགེ་སློང་དེས་ཤིང་གཅོད་ཅིང་རྔ་བའི་ཞལ་ཏ་བྱེད་ཅིང་གཅོད་དུ་གཞུག་པར་

Vol. 165 · folio 120b

གནང་ངོ་། །ཇི་ལྟ་བྱ་བའི་ཐབས་འོག་ནས་འཆད་པ་ཡིན་ནོ། །ཞག་བདུན་བརྒྱད་ཀྱི་སྔོན་ལོགས་སུ་འོག་ཏུ་དཀྱིལ་འཁོར་དང་དྲི་བསུང་དང་མེ་ཏོག་དང་པོག་དང་མེ་མར་དང་གཏོར་མ་བྱིན་ལ་གསུམ་བརྒྱུད་བླངས་ནས་སྦྱིན་པའི་བཤགས་པ་བྱ་སྟེ་གང་ལྷ་ཤིང་འདི་ལ་གནས་པ་དེ་གནས་གཞན་

དུ་ཚོལ་ཅིག་ཤིང་འདི་མཆོད་རྟེན་གྱིའམ་དགེ་འདུན་གྱི་བྱ་བར་འགྱུར་རོ་ཞེས་ཤིག་པའི་ཚིག་གིས་སོ། །ཤིང་གང་ནས་རྔ་བའི་ས་དེར་ཞག་བདུན་ནམ་བརྒྱད་ཀྱི་སྔོན་ལོགས་ནས་ཤིང་དྲུང་དུ་དཀྱིལ་འཁོར་དང་དྲི་བསུང་དང་མེ་ཏོག་དང་མེ་མར་དང་པོག་སྤོས་དང་མཆོད་པ་མེ་མར་དང་

གཏོར་མ་ལ་སོགས་པས་མཆོད་ཅིང་སྦྱིན་ནོ། །དེ་ནས་དཀོན་མཆོག་གསུམ་ལ་བསྟོད་པའི་སྟོཏྟྲ་དང་ཞལ་ནས་གསུངས་པའི་ཚིགས་སུ་བཅད་པ་དང་ཞི་བར་བྱ་བའི་སྨོན་ལམ་དང་གསུམ་བརྒྱུད་མར་བཀླག་གོ། །དེ་ནས་ཤིང་དེ་ལ་གནས་པའི་ལྷ་དེ་ལ་ཤིང་བྱིན་ཅིག་ཅེས་པའི་ཕྱིར་སྦྱིན་

པའི་ཚིགས་སུ་བཅད་པ་ཡང་བྱ་སྟེ་ལྷ་ལ་ཁྱོད་གནས་གུད་དུ་སོང་ཤིག་ཤིང་འདི་ནི་དགེ་འདུན་གྱི་མཆོད་རྟེན་ནམ་གཙུག་ལག་ཁང་གི་ཤིང་དུ་བྱ་དགོས་སོ་ཞེས་བསྒོ་ལ་ཤིང་གཅོད་པའི་ལས་མི་ལ་ཤིང་འདི་རྣམས་ཆོད་ཅིག་ཅེས་མི་བསྒོ་བར་ལྷ་ཁང་གི་ཤིང་དུ་དགོས་པ་ན་འདི་ཡིན་ནོ་ཞེས་རིག་པ་ཙམ་

དུ་བྱ། ཤིང་འཁོར་གཅིག་ནས་མང་དུ་རྔ་ན་མཆོད་པ་སྤྱིར་ཁ་གསུམ་ཙམ་དུ་བྱ་སོ་སོར་ཐོར་བུར་རྔ་ན་མཆོད་པ་དེ་བཞིན་དུ་ཁ་རེ་རེར་བྱ། སྔོན་ཤིང་མཁན་བྱེད་བྱེད་པ་ལས་རབ་ཏུ་བྱུང་བ་ལ་གནང་ཞེས་བྱ་བས་ཤིང་བཅད་པ་དང་ཤིང་ལ་གནས་པའི་ལྷས་དགེ་སློང་གིས་ངའི་གནས་ཕྲོགས་

སོ་ཞེས་སངས་རྒྱས་ལ་གསོལ་ནས་སངས་རྒྱས་ཀྱི་འཕྲུལ་གྱིས་ཤིང་གི་ལྷ་གཞན་ཞིག་བཀུག་སྟེ་ལྷ་འདི་གནས་མ་རྙེད་ཀྱི་བར་དུ་ཁྱོད་དང་ལྷན་ཅིག་ཏུ་འདུག་ཤིག་ཅེས་བསྒོ་སྟེ། དེ་ནས་དགེ་སློང་རྣམས་བསྡུས་ཏེ། ད་ཕྱིན་ཆད་གཙུག་ལག་ཁང་ངམ་མཆོད་རྟེན་གྱི་ཤིང་གཅོད་ན་གོང་མ་

ལྟར་མ་བྱས་པར་མ་གཅོད་ཅིག་ཅེས་བཅས། དེ་སྟེ་འགྱུར་བ་མེ་འབྱུང་ངམ་ཁྲག་ཟག་གམ་ཡན་ལག་འགུལ་ལམ་ལོ་མ་ལྷགས་པ་ལ་སོགས་པ་མཐོང་ན་ཞིང་དང་བཅས་པའི་སྦྱིན་པ་དང་སེར་སྣའི་མི་བསྔགས་པ་དང་བསྔགས་པ་བཅས་པ་བྱ། ཤིང་བཅད་པའི་ཕྱིར་མདོ་ལྟག་མ་ལྟར་ཆོ་

Vol. 165 · folio 121a

ག་བྱ་བའི་འོག་ཏུ་བཅད་པར་བརྩལ་བ་དང་ཤིང་དེ་ལ་མེ་འབྱུང་ངམ་ཁྲག་ཟག་གམ་ཡལ་ག་འགུལ་ལམ་སྒྲ་འབྱུང་བ་ལ་སོགས་པ་མཚན་མ་ཞིག་ཏུ་གྱུར་ན་ཤིང་དེ་ལ་གནས་པའི་ལྷ་གུད་དུ་མ་སོང་བ་ཡིན་གྱིས་ཤིང་འདི་དགེ་འདུན་གྱི་འམ་གཙུག་ལག་ཁང་ངམ་མཆོད་རྟེན་

གྱི་རྒྱུར་ཕུལ་ན་བསོད་ནམས་ཀྱི་ཞིང་ཡིན་ཏེ་ཡོན་ཆེའོ་ཞེས་ཆོས་ཤོད་ཅིག །སྦྱིན་གཏོང་མ་བྱས་ཏེ་སེར་སྣ་བྱས་ན་སྡིག་ཆེ་བའང་བཤད། སྦྱིན་གཏོང་བྱས་ན་བསོད་ནམས་ཆེ་བའི་ཆོས་ཀྱང་བཤད་དེ་ཤིང་བཅད་དམ། མ་ཞི་མི་གཏོང་ན་མི་བཅད། མདོ་ལྟག་མ་ལྟར་ཆོས་བཤད་པ་ལ་

སོགས་པ་བྱས་ཏེ་བཅད་ན་མེ་འབྱུང་བ་ལ་སོགས་པ་འབྱུང་ཞིང་མ་ཞི་ན་ཅི་མི་གཅོད་དོ། །འབྲིང་སེམས་ཅན་གྱི་གྲོང་དང་ས་བོན་རྣམ་ལྔ་མ་རུང་བར་མ་གྱུར་པར་ཀྱང་ཤེས་བཞིན་པ་ལས་ལྟུང་བར་འགྱུར་ཏེ་ཡན་ལག་གཅིག །མ་རུང་བར་མ་གྱུར་ན་ས་བོན་རྣམ་ལྔ་སྟེ་ས་བོན་དང་སྡོང་བུའི་ས་བོན་དང་

ཚིགས་པའི་ས་བོན་དང་མེ་ཏོག་གི་ས་བོན་དང་འབྲས་བུའི་ས་བོན་དང་རྣམ་ལྔ་ལ་གག་ཀྱང་རུང་སྟེ་རུལ་ཞིང་སྣང་བ་མ་ཡིན་པ་དང་མེ་དང་མཚོན་ལ་སོགས་པས་མ་བརྟགས་པ་ལ་མ་རུང་བ་བྱས་ན་ལྟུང་བར་འགྱུར། བརྟགས་པ་མ་བྱས་པའི་ས་བོན་དང་སྐྱེ་བ་ཐ་དད་པ། མ་བརྟགས་པའི་ས་

བོན་དང་རྩི་ཤིང་ཐ་དད་ནས་སྐྱེ་བ་ཞིག་ལས་བཅད་དམ་བཤིག་ན་ལྟུང་བར་འགྱུར་རོ། །རྩ་བྲན་མ་རུང་བར་ན་ཡང་ངོ་། །ཤིང་གི་རྩ་བའི་ཡལ་ག་ཕྲེའུ་དང་ལོ་མའི་ཡལ་ག་ཕྲེའུ་བཅད་ན་ཡང་ལྟུང་བར་འགྱུར་རོ། །ཅི་ལྟ་ཅི་ལྟ་བུར་རྩི་ཤིང་དང་ས་བོན་ཅི་ལྟ་བུའི་ཐབས་ཀྱིས་བཅད་ཅིང་

མ་རུང་བར་བྱས་ན་ལྟུང་བར་འགྱུར། བསྒུལ་བས་ཀྱང་ངོ་། །ཤིང་དྲུང་པ་བསྒུལ་ཅིང་འབྲས་བུ་ལྷགས་ནའང་ལྟུང་བ་རེ་རེ་ཞིང་ལྟུང་བ་རེ་རེའོ། །མནན་པ་རྩྭ་དང་འཇི་བ་དང་ཉལ་ཉིལ་ལ་སོགས་པས་ཀྱང་ངོ་། །ས་བོན་དང་རྩི་ཤིང་ལ་སོགས་པ་མ་རུང་བར་བྱ་བའི་ཕྱིར་རྡོ་ཤིང་གིས་

མནན་ཏས་འཇི་བ་དང་ཉལ་ཉིལ་ལ་སོགས་པས་མནན་ཅིང་མ་རུང་བར་བྱས་ན་ལྟུང་བར་འགྱུར་རོ། །རྣམ་པར་འབྱེད་པའི་ནང་ནས་འབྱུང་བའི་མདོ།། །།བླ་མ་མིའི་ཆོས་ཀྱི་ལྟུང་བ་འཆད་དེ། བདེན་པའོ། །མིའི་བླ་མའི་ཆོས་བདག་དང་ལྡན་དུ་ཟིན་ཀྱང་གཞན་ལ་སྨྲས་ན་ལྟུང་བར་འགྱུར་

Vol. 165 · folio 121b

ཏེ་ཡན་ལག་གཅིག །བདེན་པ་མ་མཐོང་བའི་བསྙེན་པར་མ་རྫོགས་པའོ། །བསྙེན་པར་མ་རྫོགས་པའི་གང་ཟག་ཀྱང་ཡིན་ལ་མིའི་བླ་མའི་ཆོས་མི་ཤེས་ཤིང་མ་མཐོང་བ་ལ་སྨྲས་ཏེ་ཡན་ལག་འདི་བཞི་དང་ལྡན་ན་ལྟུང་བར་འགྱུར་རོ། །ཁྱིམ་པའི་མདུན་དུ་རྫུ་འཕྲུལ་མི་བསྟན། ནོར་

རྫས་ལ་སོགས་པ་ཕྲན་ཚེགས་འདོད་པའི་ཕྱིར་རྫུ་འཕྲུལ་དང་ལྡན་ན་ཡང་ཁྱིམ་པའི་མདུན་དུ་རྫུ་འཕྲུལ་མི་བསྟན། ཁྱིམ་པ་གཅིག་གིས་ལྷུང་བཟེད་ཤིང་མཐོན་པའི་ཁར་བཏགས་ཏེ་མུར་འདུག་དང་སངས་རྒྱས་ཀྱི་ཆོས་ལ་ལྟ་བ་དག་གིས་རྫུ་འཕྲུལ་གྱིས་ལྷུང་བཟེད་ལེན་ནུས་པ་ལྷུང་

བཟེད་ཐལ་བྱུང་སྦྱིན་ནོ་ཞེས་བྱས་པ་དང་མུར་འདུག་གིས་ལེན་མ་ནུས་ཏེ། དགེ་སློང་སླིན་ད་བད་ཙ་ཞེས་བྱ་བས་རྫུ་འཕྲུལ་གྱིས་ལྷུང་བཟེད་བླངས་ཏེ་ཁེ་ནས་ཁེ་འདོད་པ་དང་ཁེའི་ཕྱིར་རྫུ་འཕྲུལ་མི་བྱ་བར་བཅས་ཏེ་བྱས་ན་ཉེས་བྱས། སེམས་ཅན་ཡིད་གཡོ་བ་དང་རྐུན་པོ་ནོར་མི་ཐོབ་པར་བྱ་

བའི་ཕྱིར་རྫུ་འཕྲུལ་བྱས་པ་ཉེས་མེད། དགེ་སློང་མས་སྟོན་པ་ལ་མ་ཡིན། དགེ་སློང་མ་དགྲ་བཅོམ་ཞིང་རྫུ་འཕྲུལ་དང་ལྡན་དུ་ཟིན་ཀྱང་། སངས་རྒྱས་ཀྱི་སྤྱན་སྔར་རྫུ་འཕྲུལ་མི་བྱ། སངས་རྒྱས་ལྷ་ལས་བབས་ཏེ་གཤེགས་པའི་ཚེ་དགེ་སློང་མ་ཨུཏྤ་ལ་བར་སྣང་ལ་རྫུ་འཕྲུལ་གྱིས་

ཕྱག་བྱ་བར་བསམས་ནས་འཁོར་ལོའི་རྒྱལ་པོ་འཁོར་དང་བཅས་པར་སྤྲུལ་པ་དང་འཁོར་ཐམས་ཅད་རྫུ་འཕྲུལ་དེ་སུ་ཞིག་ཡིན་སྙམ་ཐེ་ཚོམ་ཟོས་པ་དང་སངས་རྒྱས་ཀྱི་སྤྱན་སྔར་དགེ་སློང་མ་ཐུགས་ཐུབ་བྱེད་བྱེད་པས་ཉེས་པ་ལས་བཅས། བླ་མ་མིའི་ཆོས་སྨྲ་བའོ། །བླ་མ་མིའི་ཆོས་ཀྱི་ལྟུང་

བ་རྫོགས་སོ།། །།བརྫུན་གྱི་བླ་མའི་ཆོས་སུ་སྨྲ་བའི་ཡན་ལག་ཐམས་ཅད་འདིར་འདུས་ཏེ་འདིར་གཏོགས་སོ།། །།མཛའ་བའི་ལྟུང་བ་ལ་འཆད་དེ། དེ་སྟེ་བསྟན་ན་དོན་གྱི་ཞུ་བ་སྔ་མའི་དོན་དུ་བྱ། དགེ་འདུན་ནོར་ཞིག་འགོད་དམ་གུད་དུ་གཏོང་ན་སྔར་གསོལ་བ་དང་ཞུ་བའི་ལས་བྱས་ལ་

བགོ། །དགེ་འདུན་གྱི་ལས་ཤིག་བྱེད་ནའང་སྔར་གསོལ་བ་དང་ཞུ་བའི་ལས་བྱས་ཏེ་བྱའོ། །གསོལ་བ་དང་ཞུ་བ་སྔར་བྱ་དགོས་པ་ནི་ཕྱིས་མི་ལྡོག་ཅིང་མི་འགྱུར་བར་བརྟན་པར་བྱ་བའི་ཕྱིར་སྔར་བྱའོ། །དད་པ་བྱིན་པའོ། །གོས་བགོ་འམ་ཕར་སྦྱིན་པའམ་སྔར་དད་པ་བྱིན་ལ་ཕྱིས་དགེ་འདུན་

Vol. 165 · folio 122a

དབང་བ་གང་ཟག་ལ་བསྔོས་སོ་ཞེས་ཟེར་ན་ལྟུང་སྟེ་ཡན་ལག་གཅིག །དགེ་སློང་གི་དགེ་འདུན་གྱི་གང་ཟག་ལ་ཟས་མ་བྱིན་པ་རྙེད་ན་ལོག་པར་བསྔོ་བར་དགེ་སློང་གཞན་གྱི་མིང་ནས་མ་ཕྱུང་ཡང་ངོ་། །དགེ་སློང་གི་དགེ་འདུན་གྱི་དཀོར་ཡང་ཡིན་པ་དང་ཁ་ཟས་ཀྱང་མ་

ཡིན་པ་དང་དགེ་འདུན་དབང་བ་མཛའ་བའི་ཕྱིར་གང་ཟག་ལ་བསྔོས་སོ་ཞེས་དགེ་འདུན་ལ་བརྫུན་གྱིས་སྐུར་པ་དང་ཡན་ལག་འདི་བཞི་དང་ལྡན་ན་ལྟུང་བར་འགྱུར་ཏེ། གོས་གང་གིས་ཁྱེར་བའི་གང་ཟག་གི་མིང་ནས་ཕྱུང་ཡང་རུང་མ་ཕྱུང་ཡང་རུང་ལྟུང་བའོ། །མི་བདེན་པའི་དོན།

མཛའ་བའི་ཕྱིར་དགེ་འདུན་གྱི་དབང་བ་གང་ཟག་ལ་བྱིན་ནོ་ཞེས་བརྫུན་དུ་སྐུར་ན་ལྟུང་ངོ་། །སྐུར་བའི་ལྟུང་བའོ། །མཛའ་བའི་ཕྱིར་གོས་བྱིན་ནོ་ཞེས་སྐུར་བའི་ལྟུང་བ་སྟེ་རྫོགས་སོ།། །།བགེགས་ཀྱི་ལྟུང་བ་ལ་འཆད་དེ། འདུལ་བ་དང་ལྡན་པར་སྨྲ་བ་ལ་འཕྱ་ཞིང་རྣམ་པར་སྨྲ་བའོ། །

སོ་སོར་ཐར་པའི་མདོ་འཆད་པ་ལ་ཕས་ཕམ་པ་དང་དགེ་འདུན་གྱི་ལྷག་མ་མ་གཏོགས་པར་ལྟུང་བ་མན་ཆད་ལ་འདི་ལྟ་བུའི་ཚིག་ཆུང་ངུ་རྟག་ཏུ་བསླས་ཅི་དགོས་ཞེས་ཟེར་ན་ལྟུང་སྟེ་བཅོ་ལྔའི་གསོ་སྦྱིན་གྱི་ཚེ་ཡིན་པ་དང་འདུལ་བ་རྣམ་པར་འབྱེད་པ་དང་ཕྲ་མོ་དང་དྲིས་པ་དང་བྱེ་བྲག་ཏུ་གདོན་མི་

ཟ་བ་དང་སྡེ་བཞིའི་ནང་ནས་འབྱུང་བའི་ཚིག་ཡན་པ་དང་འདི་ལྟ་བུའི་ཚིག་ཆུང་ངུ་ཅི་དགོས་ཞེས་ཚིག་ཏུའང་སྨྲས་པ་དང་ཡན་ལག་འདི་གསུམ་དང་ལྡན་ན་ལྟུང་བར་འགྱུར། མདོ་སྡེའི་ན་ཉེས་བྱས་པའོ། །མདོ་སྡེའི་ཚིག་དང་མདོ་སྡེའི་ནང་ནས་འདུལ་བའི་ཚིག་བྱུང་བ་ལ་འདི་ལྟ་བུའི་ཚིག་ཆུང་

ངུ་ཅི་དགོས་ཞེས་སྨྲས་པ་ནི་ཉེས་བྱས་བགེགས་སོ། །བགེགས་ཀྱི་ལྟུང་བ་རྫོགས་ཏེ། དགུ་བཅུའི་ལྟུང་བ་ལས་བཅུ་ཕུང་གཅིག་རྫོགས་སོ།། །།ས་བོན་གྱི་ལྟུང་བ་ལ་འཆད་དེ། དགེ་འདུན་དང་མཆོད་རྟེན་གྱི་ཕྱིར་ན་ལས་སར་པ་པས་ཤིང་ཆོད་ཅིག་དགེ་དོར་བ་ལ་སོགས་པས་ཀྱང་ངོ་། །

ས་བོན་མ་རུང་པར་བྱ་བའི་ཕྱིར་ས་བོན་དང་རྩི་ཤིང་གི་ཐོག་ཏུ་རྡོ་ལ་སོགས་པ་བོར་བ་དང་ས་བོན་ཉིད་གུད་དུ་བོར་ཏེ་མ་རུང་བར་གྱུར་ན་ལྟུང་བར་འགྱུར། རླུང་དང་ཚ་བ་ལ་བཞག་པས་ཀྱང་ངོ་། །ས་བོན་མ་རུང་བར་བྱ་བའི་ཕྱིར་རླུང་དང་ཚ་བ་དང་ཉི་མ་དང་མེ་ལ་སོགས་པར་བཞག་ཅིང་མ་རུང་

Vol. 165 · folio 122b

བར་འགྱུར་ནའང་ལྟུང་བར་འགྱུར། སྐམ་པའི་གནས་སུ་བཞག་པ་ཡང་ངོ་། །ས་བོན་མ་རུང་བར་བྱ་བའི་ཕྱིར་གཤེར་བའི་ས་བོན་སྐམ་པོ་ལ་བཞག་ན་ལྟུང་བར་འགྱུར་རོ། །དེར་འདོན་ནའོ། །ས་བོན་མ་རུང་བར་བྱ་བར་འདོད་པ་ལས་ལྟུང་བར་འགྱུར་ཏེ་ཡན་ལག་གཉིས་བདག་གམ་

གཞན་གྱིས་ཀྱང་ངོ་། །བདག་གིས་ས་བོན་མ་རུང་བར་བྱས་ཀྱང་རུང་གཞན་བྱེད་དུ་བཅུག་ཀྱང་རུང་ལྟུང་བར་འགྱུར་ཏེ་ཡན་ལག་གསུམ། མ་རུང་ན་རྩ་བ་དག་ཏུའོ། །ས་བོན་མ་རུང་བར་མ་གྱུར་པ་ཞིག་ལས་མ་རུང་བར་བྱས་ན་ལྟུང་བར་འགྱུར་ཏེ་དེ་ཡན་ལག་འདི་བཞི་དང་ལྡན་ན་ལྟུང་

བར་འགྱུར་རོ། །མ་རུང་བའི་ཚད་ལས་སོ། །ས་བོན་དང་རྩི་ཤིང་མ་རུང་བར་བྱ་བའི་ཕྱིར་བརྡས་སམ་བསྲེགས་ན་དུ་མ་རུང་བ་བཞིན་དུ་ལྟུང་བ་རེ་རེའོ། །སྡོང་པོ་ཡང་ངོ་། །ཤིང་སྡོང་པོ་གཅིག་རྩ་བར་བཅད་ན་ཡན་ལག་རེ་རེ་ལྟུང་བ་རེ་རེར་མི་འགྱུར་གྱི་རྩ་བ་ནས་བཅད་པས་ལྟུང་བ་

གཅིག་ཏུ་ཟད་དོ། །ཉེས་བྱས་པ་ནི་སྦྱོར་བ་དག་ལའོ། །རྩ་ཤིང་མང་པོ་ཞིག་རལ་གྲིའམ་ཟོར་བ་ཐབས་གཅིག་གིས་བཅད་ཅིང་བརྔས་ནའང་དུ་བཅད་པ་བཞིན་དུ་ཉེས་བྱས་རེ་རེ་དང་ལྟུང་བ་རེ་རེའོ། །དུ་ཆད་པ་བཞིན་དུ་ལྟུང་བ་ནི་རེ་རེར་འགྱུར་ཉེས་བྱས་ནི་སྤྱིར་ཐབས་གཅིག་བྱས་པས་ཉེས་བྱས་

གཅིག་ལས་མེད་པར་བྱི་ཤུ་ཏས་བཤད། འདི་ལས་འདིས་བསྣུན་ན་སོ་སོར་ཐ་དད་དེ་དངོས་པོ་མ་ཡིན་ནོ། །ཤིང་སྡོང་པོ་གཅིག་བཅད་པར་བྱས་ན་སྟ་རེ་ཐབས་རེ་རེ་ལ་ལྟུང་བ་རེ་རེར་མི་འགྱུར་གྱི་ཉེས་བྱས་རེ་རེར་འགྱུར་ཏེ་ཆོད་ཟིན་ན་ལྟུང་བ་གཅིག་ཏུ་ཟད་དོ། །ཕྱུང་ན་མ་ཐར་ཏེ་བསྐྱེད་ཀྱང་

ངོ་། །རྩི་ཤིང་ལ་སོགས་པ་གཞོན་ནུ་ཕྱུང་སྟེ་གུད་དུ་བསྐྱེད་ཀྱང་ལྟུང་བའོ། །ཉ་ལྕིབས་དང་ཆུ་ལྡུམ་ཆུ་ལས་ཕྱུང་ན་དེར་རོ། །ཆུའི་ནང་ན་ཉ་ལྕིབས་འདུག་པ་དང་ཆུ་ལྡུམ་རྩ་བ་མ་ཟུག་པ་ཐང་ལ་བྱུང་ཡང་རུང་ཆུ་གཅིག་ཏུ་སྤོས་ཀྱང་རུང་ལྟུང་བར་འགྱུར་རོ། །ཕྱེད་ནི་འབྲས་བུ་མ་བཅེམ་པར་

མིད་པའོ། །འབྲས་བུ་མ་བཅེམ་པར་རིལ་མེད་དུ་ལྟར་བཏང་ན་ལྟུང་བ་ཕྱེད་དེ་ཉེས་བྱས་སོ། །དེ་སྟེ་འདི་བཅད་ན་དགེའོ་ཞེས་སྨྲའོ། །བསྐོས་ནའོ། །ཤིང་འདི་བཅད་ན་དགེའོ་ཞེས་ཟུར་དུ་སྨྲས་ཏེ་གཅོད་དུ་བཅུག་ཀྱང་རུང་ཤིང་འདི་བཅད་ན་ཁང་ཤིང་དུ་རེ་བཟང་ཞེས་ཁ་འཕྱན་དུ་

Vol. 165 · folio 123a

བསམས་ཤིང་སྨྲས་ནའང་ཉེས་བྱས། རྫུ་འཕྲུལ་གྱིས་ན་མ་བྱས་པའོ། །ཤིང་ཞིག་གཟུགས་བརྙན་དུ་སྤྲུལ་ཏེ་བཅད་ན་ནི་ཉེས་མེད་དོ། །དེ་བཞིན་དུ་ས་བོན་ཐ་དད་པ་ལ་ས་བོན་དུ་འདུ་ཤེས་ནའོ། །ནས་ཞིག་མ་རུང་བར་བྱ་བར་བསམས་ལ་འབྲས་ཞིག་མ་རུང་བར་

བྱས་ནའང་ལྟུང་བར་འགྱུར་རོ། །དེ་བཞིན་དུ་རྩི་ཤིང་དང་ས་བོན་གག་ཀྱང་རུང་གཅིག་ཅིག་མ་རུང་བར་བྱས་པར་བསམས་ལ་གཞན་ཞིག་མ་རུང་བར་བྱས་ནའང་ལྟུང་བར་འགྱུར་རོ། །ཤུན་ཕྲགས་དང་། ཤིང་གི་ཤུན་ཕྲགས་ཤིང་ལས་ནི་འཕགས་ཀྱི་རྩ་བ་ཅུང་ཟད་ཤིང་ལ་ཐོགས་

པ་བཀོགས་པ་དང་། གསོ་བ་དང་། ཤིང་རུལ་པ་ཤིང་མ་མོ་ལ་ཆགས་པའམ་ཤིང་སྤགས་ཤིང་ལ་ཡོག་ཅིང་འདུག་པ་བཀོགས་པ་དང་། ལོ་མ་སྐྱ་བོ་དང་ཤིང་གི་ལོ་མ་སྐྱ་བོར་གྱུར་པ་བཏོགས་པ་དང་། རྒྱས་པའི་མེ་ཏོག་དང་། མེ་ཏོག་རྒྱས་ཟིན་ཏེ་ལྷགས་ལ་ཐུག་པ་བཏོགས་པ་དང་།

སྨིན་པའི་འབྲས་བུ་ནི། ཤིང་ཐོག་སྨིན་ཟིན་ཏེ་བྲུལ་ལ་ཐུག་པ་བཏོགས་པ་དང་། ཕྱེད་ཤི་བ་ཞེས་བཅད་དོ། །མིང་གིས་སྨོས་པ་འདི་རྣམས་བཏོགས་པ་ཕྱེད་ཤི་བ་ཞེས་བྱ་སྟེ་ཉེས་བྱས་སོ། །དེ་དག་གི་རྩ་བར་གྱུར་པ་རང་བཞིན་ལས་མ་གྱུར་ན་མ་ཡིན། མདོ་ལྟག་མའི་ནང་ནས་མིང་

གིས་སྨོས་ཏེ་བཤད་པ་ལྟ་བུ་མ་ཡིན་པར་མེ་ཏོག་དང་འབྲས་བུ་མ་རྒྱས་པ་དང་ལོ་མ་སྐྱ་བོར་མ་གྱུར་པ་དང་ཤིང་ལས་མ་འཕགས་པ་དང་འབྲས་བུ་དང་མེ་ཏོག་གི་རྩ་བ་དང་ཤིང་ཏོག་དང་འབྲས་བུ་ལ་མི་ཉེ་བར་ཤིང་མ་མོ་ལ་ཉེ་བར་སྤྱད་པ་ལ་སོགས་པ་ནི་ལྟུང་བ། ཤིང་ཏོག་ཤིང་གི་

མཚམས་སུ་བཅད་པ་ནི་ཉེས་བྱས། ཕྱེད་ནི་བཏབ་པའི་ས་བོན་གྱི་ཁམ་རྩ་བ་མ་སྐྱེས་པ། ནས་འབྲས་ཀྱི་ས་བོན་བཏབ་ཏེ་མྱུ་གུར་ནི་མ་གྱུར་ས་བོན་ལས་ཀྱང་ཉམས་ཏེ་རྩ་ལྷོགས་ཙམ་དུ་འདུག་པ་ལ་མ་རུང་བར་བྱས་ནའང་ཉེས་བྱས། རྡེའུ་ཤ་དང་ཤ་མོ་དང་ས་བལ་དང་རྫ་མ་དང་གོས་ཀྱི་

རླབས་ཕྱེད་སྐྱེ་བའི་བྱེ་བྲག་གོ། །མིང་གིས་སྨོས་པ་འདི་རྣམས་ལས་གག་ཀྱང་རུང་སྟེ་མ་རུང་བར་བྱས་ན་ཉེས་བྱས། ཁུ་བ་ཚན་མོ་ལ་སོགས་པ་ཕོ་བ་དང་འཆག་པ་དང་ཡལ་ག་ལ་སོགས་པ་དྲངས་པ་དང་དཀྱིལ་འཁོར་དུ་བྱུག་པ་དེའི་སེམས་ཀྱིས་ན་ལྟུང་བ་མེད་དོ། །ཁུ་བ་ལ་སོགས་པ་ཕོ་

Vol. 165 · folio 123b

བ་དང་ཡན་མན་དུ་འགྲོ་བའི་རྡོག་ལམ་དུ་སོང་བ་དང་རྡོ་ཤིང་ལ་སོགས་པ་དྲངས་པའི་འོག་ཏུ་སོང་བ་དང་དཀྱིལ་འཁོར་བྱས་པའི་འོག་ཏུ་ས་བོན་མ་རུང་བ་ལ་སོགས་པ་ས་བོན་མ་རུང་བ་བྱ་བའི་སེམས་ནི་མེད་ཀྱི་ལས་གཞན་བྱེད་པའི་ཞར་ལ་ས་བོན་མ་རུང་བར་གྱུར་པ་ནི་ཉེས་མེད་དོ། །གཅད་

དོ་འཇག་མ་ལ་སོགས་པ་དོག་པར་གྱུར་ཏེ་བཅིངས་པ་ལ་དེ་མ་ཡིན་པས་ཐར་བར་མི་འགྱུར་ནའོ། །དགེ་སློང་དག་གཅིག་མི་རྒོད་ཀྱིས་བཅིངས་ནས་གསད་པར་བྱས་པ་དང་མི་རྒོད་ཀྱི་ནང་ན་དགེ་སློང་གི་ཚུལ་ཤེས་པ་གཅིག་ཡོད་དེ་དགེ་སློང་གསད་པ་མི་རིགས་ཀྱི་རྩྭས་བཅིངས་ཏེ་བཞག་

པ་དང་ཁོའི་ཁྲིམས་ཀྱིས་རྩྭ་གཅད་དུ་མི་རུང་སྟེ་བཅིངས་པ་བཞིན་དུ་འདུག་པའི་རིགས་སོ་ཞེས་ཟེར་ནས་འཇག་མ་ལ་བཅིངས་ཏེ་བཞག་པ་དང་རྒྱལ་པོ་གཅིག་ཅིག་རི་དགས་བཤོར་དུ་སོང་སོང་ནས་མཐོང་བས་རྨོངས་པ་དེ་དགེ་སློང་སྟེ་མི་རྒོད་ཀྱིས་རྩྭ་ལ་བཅིངས་ཏེ་ཁྲིམས་ཀྱིས་རྩྭ་གཅད་དུ་མི་

རུང་བས་སྔོད་མོད་ཅེས་སྨྲས་པ་དང་རྒྱལ་པོ་ཡང་དད་པ་སྐྱེས་ནས་རྒྱལ་པོ་ཉིད་ཀྱི་ལག་གིས་བཀྲོལ་ཏེ་གོས་ལ་སོགས་པས་བརྫངས་ཏེ་བཏང་བ་ལས་བཅས་ཏེ་དེ་ལྟ་བུ་རྩྭས་བཅིངས་ཤིང་སྲོག་ལ་དམན་པ་ཞིག་བྱུང་ན་རྩྭ་བཅད་ཀྱང་ཉེས་མེད་དོ་ཞེས་གནང་ངོ་། །དེ་གཅིག་མ་ཡིན་པ་གཅིག་གིས་

སོ། །མདོ་ལྟག་མ་ལྟར་དགེ་སློང་མང་པོ་ཞིག་བཅིངས་ན་ཟད་པར་གྱིས་རྩྭ་གཅད་ཅིང་ལྟུང་བར་བྱ་བའི་མི་རིགས་ཀྱི་དགེ་སློང་གཅིག་གིས་རྩྭ་ཆོད་དེ་བདག་ཁྲོལ་ལ་གཞན་ཀུན་ཀྱང་བདག་གིས་རྩྭ་མ་ཆད་པར་གྲོལ་ལོ། །ས་བོན་གྱི་ཆོས་མ་ཡིན་པ་ཉེས་པ་མི་བྱེད་དོ། །ས་བོན་དུ་མི་རུང་བ་རྣམས་

ནི་མ་རུང་བར་བྱས་ཀྱང་ལྟུང་བར་མི་འགྱུར་རོ། །མེས་རེག་པ་དང་བཙུགས་པ་མཚོན་དང་སེན་མོ་དང་ནེ་ཙོ་དང་རྙིངས་པ་དང་ཕྱུང་བ་དང་བཀྲུམས་པ་དང་གཤེགས་པ་དང་གཏུབས་པའོ་ཞེས་བརྟགས་པའོ། །ས་བོན་རྣམ་པ་ལྔ་ལ་མིང་གིས་སྨོས་པ་འདི་རྣམས་ཀྱིས་རེག་ཅིང་བརྟགས་པ་ནི་སྤྱད་དུ་རུང་སྟེ་ལྟུང་

བ་དང་ཉེས་པར་མི་འགྱུར་རོ། །ས་བོན་མ་ཡིན་པར་གྱུར་གྱི་བར་དུ་བཏགས་པ་མི་བསྡད། མདོ་གོང་མའི་ནང་ནས་སྨོས་པ་བཞིན་དུ་སྔར་བཏགས་ཟིན་པ་དང་སྣད་ཅིང་རྨ་བྱུང་བ་ལ་སོགས་པ་ས་བོན་དུ་མི་རུང་བ་རྣམས་ཀྱིས་བཏགས་ཟིན་པ་ཡིན་ཏེ་གདོད་བཏགས་མི་དགོས་སོ། །རླངས་པ་མེ་མ་

Vol. 165 · folio 124a

ཡིན་ནོ། །ས་བོན་ལ་སོགས་པ་རླངས་པ་ཚ་བ་ལ་གདུངས་ཤིང་རེག་པ་ཡང་མེས་བརྟགས་པའི་ནང་དུ་ཆུད་དེ་ཕྱིས་བརྟགས་མི་དགོས་སོ། །ཡང་དག་པར་རྟོགས་པ་ན་མེས་འབྲས་བུའི་སྤྱིའི་གཟུགས་སུ་བརྟགས་པ་གཙོ་བོར་བྱས་པའོ། །ནས་དང་ཤིང་ཏོག་ལ་སོགས་པ་

ལྟ་བུ་མང་ཞིག་ཕུང་པོར་འདུག་པ་ལ་བརྟགས་པ་ནི་འབྲུ་རེ་རེ་ནས་བརྟགས་མི་དགོས་ཀྱི་ཕུང་པོའི་སྤྱིར་མེས་རེག་པར་བྱུགས་པས་ཆོག་གོ། །དེའི་ཕྱོགས་གཅིག་ཏུ་ན་འདུས་པའི་མི་འགྱུར་མི་ལྡང་ངོ་། །མདོ་ལྟག་མ་ལྟར་སྤྱིར་ངོས་གཅིག་ཙམ་མེས་རེག་པར་བྱས་པས་མི་ཆོག་གི་ཕྱི་རོལ་གྱི་

ངོས་ཐམས་ཅད་དུ་མེས་རེག་རེག་ཙམ་བྱས་པས་བརྟགས་པར་ཆུད་དོ། །དགེ་སློང་གིས་བྱས་པ་ཡང་བརྟགས་པ་བྱས་པའོ། །ལྟག་ཏུ་ས་བོན་ལ་བརྟགས་པ་རྣམ་པ་ལྔ་བདུན་སྨོས་པ་ལས་མེས་བརྟགས་པ་མ་གཏོགས་པར་གཞན་དགེ་སློང་གིས་བརྟགས་པའང་བརྟགས་པར་ཆུད་དེ་ཟོས་

ཀྱང་ཉེས་མེད་དོ། །རྟོག་རྟོག་པའི་དགེ་སློང་ནི་ཆད་པ་རྩིས་མགོ་བཞིན་དུ་ཡོད་དོ། །དགེ་སློང་གིས་མེས་བརྟགས་པའི་ཟས་ཟོས་པ་ནི་བརྟགས་པར་མི་ཆུད་དེ་ཉེས་བྱས་སོ། །ས་མ་བརྟགས་པར་ཡང་ངོ་། །མཚམས་ཀྱི་ནང་དུ་ཚད་མང་བྱས་པའམ་སྔགས་ཀྱིས་མ་བཏབ་པའི་ཚད་མང་

ས་མ་བརྟགས་པ་ཡིན་ཏེ་དེར་མེས་བརྟགས་པ་མ་གཏོགས་པར་གཞན་བརྟགས་པའང་ཉེས་མེད་དོ། །མེས་བརྟགས་པ་ནི་དགེ་སློང་གི་གནས་སུ་གཡོས་སོས་པ་དང་འདྲའོ། །ཆུ་གྲང་མོས་མ་བཏབ་པར་ཞག་བདུན་པ་དང་ནམ་འཚོའི་བར་དུ་མི་བཟའ། ཞག་བདུན་པའི་སྨན་བུ་རམ་དང་

སྦྲང་རྩི་དང་མར་དང་ཤིང་མར་ལ་སོགས་པ་དང་ཚེ་གཅིག་གི་སྨན་ལ་སོགས་པ་ཡང་བཟའ་བའི་ཚེ་མི་གཞན་ལ་ཆུ་གྲང་མོས་རྟོག་ཏུ་གཞུག་གོ། །མ་བརྟགས་པར་ཟོས་སམ་བདག་གིས་བརྟགས་ན་ཉེས་བྱས། མ་བསླད་པ་ཐུན་གྱི་བར་དུ་མི་བཟའ། རྩབ་མོ་དང་རྒུན་ཆུ་དང་བུ་རམ་ཆུ་ལ་སོགས་པ་

ཕྱི་དྲོ་བཏུང་དུ་རུང་བའི་རྣམས་ཀྱང་ཆུས་བླུགས་ཏེ་མ་བརྟགས་པར་མི་བཏུང་འཐུངས་ན་ཉེས་བྱས། ས་བོན་སྐྱེ་བ་མ་རུང་བའོ། །ས་བོན་གྱི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།འཁྱལ་བའི་ལྟུང་བ་ལ་འཆད་དེ། གང་ཟག་བཅུ་གཉིས་དག་ལ་བྱེད་དེ། དགེ་

Vol. 165 · folio 124b

འདུན་གྱིས་ལས་སུ་བསྐོས་པའི་གང་ཟག་བཅུ་གཉིས་ཀྱི་ལས་གག་ཀྱང་རུང་མ་སྙོམས་ཤིང་བདག་ལ་མནར་ཏོ་ཞེས་བརྫུན་གྱིས་སྐུར་ཅིང་ཕྱར་ཀ་བཏང་བ་ལས་ལྟུང་བར་འགྱུར་ཏེ་ཡན་ལག་གཅིག །མ་བསྐོས་པ་ལ་ཡང་ངོ་། །དགེ་འདུན་གྱིས་གང་ཟག་བཅུ་གཉིས་ཀྱི་ལས་སུ་གསོལ་བ་དང་

ཞུ་བའི་ལས་ཀྱིས་ནི་མ་བསྐོས་ཀྱི་ཁས་བསྐོས་ཤིང་གང་ཟག་བཅུ་གཉིས་ཀྱི་ལས་གང་ཡང་རུང་བྱེད་པ་ལ་འཕྱ་ན་ཡང་ལྟུང་བའོ། །སྤྱོད་པ་འགགས་པ་ཡང་ངོ་། །གང་ཟག་བཅུ་གཉིས་ཀྱི་ལས་གང་ཡང་རུང་བྱེད་བྱེད་པ་ལས་བྱུང་བ་ལ་སྔོན་ལས་བྱེད་པའི་ཚེ་བདག་ལ་མནར་ཅིང་མ་སྙོམས་ཏེ་

མནར་ཏོ་ཞེས་འཕྱ་ན་ཡང་ལྟུང་བའོ། །འཁྱལ་བའམ་བདག་གི་ཕྱིར་དེ་ཐོས་པར་འཕྱར་ཞིང་གཞན་ལ་བསྟན་ནའོ། །འཁྱལ་ཞིང་འཕྱར་བ་ནི་བདག་ལ་མ་སྙོམས་ཤིང་མནར་ཏོ་ཞེས་བྱས་པ་དང་བདག་གིས་སྨྲས་པ་དེ་གང་ཟག་བཅུ་གཉིས་གང་ལ་འཕྱར་བ་དེས་སླར་ཡང་ཐོས་པ་དང་ཁོས་མ་

ཉམས་པ་ལ་བརྫུན་དུའང་སྨྲས་པ་དང་ཡན་ལག་བཞི། རྩ་བའི་ནི་བགྲང་བར་རོ། །ལྟུང་བར་འགྱུར་བའི་ཚད་ནི་དགེ་འདུན་གྱིས་དེ་སྐད་མ་ཟེར་ཅིག་ཅེས་བསྒོ་བ་ལ་མ་བཏང་སྟེ་དགེ་འདུན་གྱིས་ཁྱེད་ཚུལ་ཁྲིམས་དང་མི་ལྡན་ཞིང་ལོག་པར་སྤྱོད་པ་ཡིན་ཏེ་ཚུལ་ཁྲིམས་དང་མི་ལྡན་པའི་ནང་དུ་གཏོགས་

སོ་ཞེས་བསྒོས་ཏེ་མ་བཏང་ན་ལྟུང་བར་འགྱུར་རོ། །ཡན་ལག་འདི་ལྔ་དང་ལྡན་ན་ལྟུང་བའོ། །གཞན་དུ་ན་ཉེས་བྱས་པའོ། །མདོ་ལྟག་མ་ལྟར་དགེ་འདུན་གྱིས་མི་བསྒོ་ཞིང་མ་བགྲངས་ཀྱི་བར་དུ་ཕྱར་ཅིང་སྨྲས་པ་དང་འཕྱར་བར་མ་བསམས་པར་འཕྱར་བའི་ཚིག་ཏུ་ཁ་ནས་བྱུང་བ་ཉེས་བྱས། ཆུང་

ཟད་དུ་དགོངས་པ་ཡང་མི་ནུས་པ་མི་མངག །གང་ཟག་བཅུ་གཉིས་ལ་འཁྱལ་ཞིང་འཕྱར་བའི་མི་དེ་བཅོས་སུ་མི་བཟོད་ཅིང་ཁྲོ་གཏུམ་ཅན་ཞིག་སྟེ་སླར་འཐབ་མོ་རྒལ་ཞིང་འཁོན་དུ་འཛིན་པ་ཙམ་གྱི་ཚོད་ན་དེ་སྐད་མ་སྨྲ་ཤིག་ཅེས་བསྒོ་བ་དང་ཉེས་པའི་ནང་དུ་གཏོགས་པར་བགྲང་བར་མི་བྱ་བར་

བཞག་པ་ལའང་བྱ། འཕྱར་བ་དེ་ལ་མ་སྨྲ་ཤིག་ཅེས་བསྒོར་བཏང་བའི་དགེ་སློང་ཡང་གཉེན་པོ་ཐབས་མཁས་པ་ངོ་ཟློག་ཕོད་པ་ལས་མངག །བདག་གིས་དེ་ཉིད་དང་འཁོན་ན་བདག་གིས་ལས་སུ་མི་བསྒོ། །གང་ཟག་བཅུ་གཉིས་ཀྱིས་ལས་སུ་བསྐོས་པ་གང་ཡང་རུང་སྟེ། དགེ་སློང་གཞན་

Vol. 165 · folio 125a

ལས་ཤིག་བསྐོ་ན་དགེ་སློང་འཁོན་ཡོད་པ་ལ་བདག་གིས་ལས་སུ་མི་བསྐོ། །ལས་སུ་བསྐོ་དགོས་ན་ཡང་དགེ་སློང་འཁོན་མེད་པ་ལས་བསྐོར་གཞུག་གོ། །འཕྱར་བའོ། །འཁྱལ་ཞིང་འཕྱར་བའི་ལྟུང་བ་རྫོགས་སོ།། །།སྨྲ་བའི་ལྟུང་བ་ལ་འཆད་དེ། མི་བགྲང་བ་མ་ཡིན་པ་

ནི། ལྟག་མ་ཕྱར་བ་དང་འདྲ་བར་བསྒོ་བའི་ལན་ལོག་པར་ལྡོན་པ་ཡང་མི་བགྲང་བ་མ་ཡིན་ཏེ་ལོག་པར་སྨྲ་བ་ལ་དེ་སྐད་མ་ཟེར་ཞེས་ལན་གཅིག་བསྒོ། །དེ་ནས་མ་བཏང་ན་ཁྱེད་ཚུལ་ཁྲིམས་དང་མི་ལྡན་པ་འདི་རྣམས་ཀྱི་ནང་དུ་གཏོགས་པར་བགྲང་ཞེས་བྱ་སྟེ་མ་བཏང་ན་ལྟུང་སྟེ་ཡན་ལག་གཅིག །

བསྐུལ་བར་ཞུགས་པའི་བཀའ་དང་མི་སྨྲ་བའི་ལོག་པ་ཅན་དང་སྨྲས་པའི་གང་ཟག་མངོན་སུམ་དུ་འཁྱལ་བ་གཞན་ལ་སྟོན་ཅིང་འཕྱར་བའོ། །དགེ་སློང་གྲོགས་ཀྱིས་ཉེས་པར་བྱེད་ཅིང་ལོག་པར་མ་བྱེད་ཅེས་གཞུང་བཞིན་དུ་བསྒོ་ན་སླར་ལོག་པར་སྨྲ་ཡང་རུང་ཅང་མི་སྨྲ་བར་ཐེན་ཏེ་འདུག་ཀྱང་རུང་ཚུལ་

བཞིན་དུ་བྱད་པ་སྟོན་པ་དགེ་སློང་ལ་མངོན་སུམ་དུ་ལན་ལོག་པར་ལྡོན་ཅིང་སྨྲ་ན་ལྟུང་བའོ། །ཞུ་བས་སོ། །དགེ་འདུན་གྱིས་མ་བྱེད་ཅིག་ཅེས་ལན་གཅིག་སྔར་བསྒོ་བ་དང་ཉེས་པར་གཏོགས་སོ་ཞེས་བགྲང་བ་ནི་གསོལ་བ་དང་ཞུ་བའི་ལས་ཀྱིས་བྱ། དགེ་སློང་གིས་བཀའ་བཟློག་ནའོ། །ཉེས་པར་

སྤྱོད་པ་ལ་དགེ་སློང་ཚུལ་བཞིན་དུ་སྤྱོད་པས་ཚུལ་བཞིན་དུ་བསྒོ་བ་ལ་སླར་ལན་ལོག་པར་སྨྲ་བའམ་ཅང་མི་སྨྲ་བར་ཐེན་ཏེ་འདུག་སྟེ་ངག་མ་མཉན་ཅིང་བཟློག་ན་ལྟུང་སྟེ་ཡན་ལག་གཅིག །དེར་འདོད་པས་སོ། །ལོག་པར་སྤྱོད་པ་ལ་དེ་ལྟར་མ་བྱེད་ཅེས་སྟོན་ཅིང་འོང་བ་ལ་ལན་ལོག་པར་སླར་བཟློག་

པར་འདོད་དེ་སྨྲས་ཤིང་བྱས་པ་ལས་ལྟུང་བར་འགྱུར་ཏེ་ཡན་ལག་གཅིག །གཞན་དུ་སྨྲ་བས་སོ། །བསྒོ་བའི་ལན་བཞིན་དུ་མི་སྨྲ་བའི་ཁ་རོག་ཏུ་འདུག་གམ་ལན་ལོག་པར་སྨྲས་པ་ལ་ཡན་ལག་གཅིག་སྟེ་ཡན་ལག་འདི་བཞི་དང་ལྡན་པར་བྱས་ན་ལྟུང་བར་འགྱུར་ཉེས་བྱས་ནི་ཁ་རོག་ནའོ། །

དྲིས་པ་དང་བསྒོ་བ་ལ་སོགས་པ་ཅི་ཡང་རུང་སྟེ་ལན་ལོག་པར་གླན་པར་བྱ་བའི་ཕྱིར་མི་སྨྲ་བར་འདུག་ན་ཉེས་བྱས། མི་དྲན་ནོ་ཞེས་ཀྱང་ངོ་། །གཏམ་དྲི་བ་ལ་ལན་ལོག་པར་གླན་པར་བྱ་བའི་ཕྱིར་དྲན་པ་མི་དྲན་ནོ་ཞེས་བྱས་ན་ཉེས་བྱས། དེ་སྡུག་བསྔལ་བར་སྨྲས་པ་མ་ཡིན་ནའོ། །གཉེན་

Vol. 165 · folio 125b

བཤེས་ལྟ་བུ་ཤི་ན་དྲང་པོར་སྨྲ་ན་མྱ་ངན་དུ་འགྱུར་བའི་ཕྱིར་མ་སྨྲས་ཤིང་ལན་མ་གླན་ནམ་གཏམ་གཞན་དུ་བཟློག་སྟེ་སྨྲས་ན་ཉེས་མེད་དོ། །དེ་བས་ན་གསད་པ་མཐོང་སྟེ་ཀུན་འདྲི་ན་སྐད་ཅིག་སྲོས་སྐད་ཅིག་ཆུ་འཐུང་སྐད་ཅིག་ངལ་སོས་གནམ་མམ་སེན་མོ་མཐོང་ངོ་ཡང་དག་པར་ན་སེམས་ཅན་

ནམ་གསད་པ་མ་མཐོང་ངོ་ཞེས་སྨྲས་ན་ལྟུང་བ་མེད་དོ། །མི་བསད་པ་ཞིག་བྲོས་ཏེ་སོང་ལ་སྙེགས་པའི་མི་འོངས་ཏེ་འདྲི་ན་མདོ་འདི་ལས་འབྱུང་བ་བཞིན་དུ་རིང་དུ་ཐོགས་པར་བྱ་བའི་ཕྱིར་ཚིག་ལོག་པར་སྨྲས་ཤིང་གྱ་གྱུ་བྱས་ཀྱང་ཉེས་མེད་དོ། །དེ་ལྟར་བྱས་ཀྱང་འདྲི་ན་སེམས་ཅན་ལ་དངོས་པོ་

མེད་པར་བསམས་ཏེ་ཡང་དག་པར་ན་སེམས་ཅན་གསད་པའི་མི་མ་མཐོང་ངོ་ཞེས་ཀྱང་ཉེས་མེད་དེ། གང་དུ་དཔང་པོར་འགྱུར་བ་དེར་གནས་པར་མི་བྱ་ཁ་མཆུ་ལ་སོགས་པ་རྩོད་ཅིང་དཔང་དང་ཆེ་བཞིར་བཅོལ་ཞིང་འཛིན་པར་འགྱུར་བར་མི་འདུག་པར་བྱོལ་ཏེ་འགྲོ། །གནོད་པ་བྱེད་ན་སྒོ་མ་

བཅད་པར་དཔང་དུ་མི་སྦྱིན། མདོ་ལྟག་མ་ལྟར་བྱོལ་ཡང་མ་ཐར་ཏེ་དཔང་དང་ཆེ་བཞིར་བཟུང་ན་ཕྱིས་གནོད་པ་མི་བྱ་བར་དམ་བཅས་ལ་དཔང་བྱ། ཕྱིས་གནོད་པ་མི་བྱ་བར་མི་བཏུབ་ན་ཁ་བཙུམས་ཏེ་འདུག་གོ། །བཀའ་བཟློག་པའོ། །སྨྲ་བའི་ལྟུང་བ་སྟེ་རྫོགས་སོ།། །།ཁྲི་སྟན་གྱི་ལྟུང་བ་

ལ་འཆད་དེ། ཁྲི་དང་ཁྲིའུ་དང་སྔས་དང་ལ་བ་དང་སྔས་ཁབ་དང་གྲུ་བཞི་ཞེས་པ་ནི་མལ་སྟན་ནོ། །དགེ་འདུན་གྱི་ཁྲི་དང་ཁྲིའུ་དང་སྔས་ལ་སོགས་པ་མིང་གིས་སྨོས་པ་འདི་རྣམས་བླ་རེ་མེད་པའི་ནམ་མཁའ་ལ་བོར་བ་ལས་ལྟུང་བར་འགྱུར་ཏེ་མལ་སྟན་དངོས་དང་བླ་རེ་མེད་པ་སྟེ་ཡན་ལག་གཉིས།

འདོམ་བཞི་བཅུ་རྩ་དགུ་དེའི་མཚམས་སོ། །ཁྲི་སྟན་བླ་རེ་མེད་པའི་ནམ་མཁའ་ལ་ལུས་ཏེ་མ་བརྟུལ་བར་སོང་ན་ཁྲི་སྟན་འདུག་པ་ནས་འདོམ་བཞི་བཅུ་རྩ་དགུ་ལས་འདས་པར་སོང་ན་ལྟུང་བར་འགྱུར་ཏེ་ཡན་ལག་གཅིག །བསྐོར་བ་ནི་སྒོ་གང་ནས་སོ། །འདོམ་བཞི་བཅུ་རྩ་དགུར་བཅལ་བ་ནི་

གཙུག་ལག་ཁང་ཕྱི་རས་བསྐོར་ན་གཙུག་ལག་ཁང་གི་ཕྱི་རའི་སྒོ་གང་ནས་བཅལ་ལོ། །ཕྱིར་མེད་ན་སྟན་ག་ལ་འདུག་པའི་གནས་ནས་འདོམ་བཞི་བཅུ་རྩ་དགུ་ལ་བཅལ་ལོ། །དེ་ལས་འདས་པའི་ཕྱིར་བརྗོད་དེ། འགྲོའམ་ནང་དུ་ཡང་ཉལ་ལམ། བསམ་གཏན་དུ་ཞུགས་པ་ལ་སོགས་པས་

Vol. 165 · folio 126a

ལྐོག་ཏུ་གྱུར་པའོ། །བླ་རེ་མེད་པའི་ནམ་མཁའ་ལ་དགེ་འདུན་གྱི་ཁྲི་སྟན་ལུས་ལ་འདོམ་བཞི་བཅུ་རྩ་དགུ་འདས་ཏེ་སོང་ན་བརྗེད་དེ་གུད་དུ་སོང་ཡང་རུང་བསམ་གཏན་བྱེད་དུ་སོང་ཡང་རུང་ཁྱིམ་གྱི་ནང་དུ་ཉལ་དུ་སོང་ཡང་རུང་བསམ་གཏན་བྱེད་དུ་སོང་ཡང་རུང་སྟེ་རྩིས་མགོ་

དང་ལྡན་པར་གྱུར་ན་ལྟུང་བར་འགྱུར་རོ། །ཐ་དད་པ་ལས་སྔར་ན་སྦྱོར་བའོ། །འདོམ་བཞི་བཅུ་རྩ་དགུ་ལས་མ་འདས་པ་དང་ཆར་གྱིས་མ་ཕོག་གམ་རླུང་གིས་མ་བཟློག་གམ་སྲིན་བུས་མ་ཟོས་པར་བླ་གབ་མེད་པ་ལ་ལུས་པ་ནི་ཉེས་བྱས་ཏེ་སྐབས་འདིར་མིང་སྨོས་ཏེ་ཉེས་བྱས་ཉིད་འོག་ནས་

འཆད། འདས་སམ་སྲིན་བུ་དང་རླུང་དང་ཆར་གྱིས་མ་ཕོག་ཀྱང་བླ་རེ་མེད་པ་ལ་ལུས་ན་འདོམ་བཞི་བཅུ་རྩ་དགུ་འདས་ན་ལྟུང་། གྱུར་ན་ཐ་མའོ། །འདོམ་བཞི་བཅུ་རྩ་དགུ་འདས་ཀྱང་ཆར་དང་རླུང་དང་སྲིན་བུ་གང་གིས་ཀྱང་རུང་སྟེ་ཟོས་ཤིང་བཟློག་ན་ལྟུང་བར་འགྱུར་ཏེ་ཡན་ལག་གཅིག །

བརྟུལ་བ་བྱས་སམ་བྱེད་དུ་བཅུག་ན་དེ་མ་ཡིན་ནོ། །དགེ་འདུན་གྱི་ཁྲི་སྟན་བདག་གིས་བརྟུལ་ཏམ་གཞན་ལ་བཅོལ་བ་ནི་ལྟུང་བར་མི་འགྱུར། མ་བརྟུལ་ཏེ་མ་བཅོལ་ན་ལྟུང་བར་འགྱུར་ཏེ་ཡན་ལག་གཅིག་སྟེ། ཡན་ལག་རེ་རེ་ནས་མིང་གིས་སྨོས་པ་ཀུན་དང་ལྡན་ན་ལྟུང་བར་འགྱུར།

དགེ་སློང་ཕ་ལ་མ་བཅོལ་ནའོ། །བརྟུལ་དུ་བཅོལ་བ་ནི་དགེ་སློང་མ་ཡིན་པ་དགེ་སྦྱོང་ངམ་ཁྱིམ་པ་ལ་བཅོལ་བར་མི་ཆུད་དེ་ལྟུང་བར་འགྱུར་གྱི་དགེ་སློང་ལ་བཅོལ་བ་ནི་བཅོལ་བར་ཆུད་དེ། དོག་པ་མ་རྙེད་ན། ཆུའམ་མེའམ། རྐུན་པོ་ལ་སོགས་པ་འཇིགས་པའི་རྐྱེན་བྱུང་སྟེ་མ་བརྟུལ་བར་

སོང་བ་ནི་ཉེས་མེད། འཇིགས་པའི་རྐྱེན་མེད་པ་ལས་ལྟུང་བར་འགྱུར་ཏེ་ཡན་ལག་གཅིག །བྱེད་པ་བཞིན་སྤྱོད་སྤྱོད་པའོ། །དགེ་འདུན་གྱི་ཁྲི་སྟན་ལ་བདག་སྤྱོད་སྤྱོད་དེ་བརྟུལ་ཏེ་འགྲོ་བ་ལས་གྲོགས་ཤིག་འོངས་ན་དེ་ལ་སྤྱོད་ཅིང་འདུག་ཤིག་ཅེས་བསྒོ་སྟེ་འགྲོ་བས་མ་བསྒོ་ན་ཉེས་བྱས་

ཕྱིས་ན་སྤྱོད་པའི་དགེ་སློང་གིས་མ་བརྟུལ་ན་ཡན་ལག་དང་ལྡན་ན་ལྟུང་། དགེ་འདུན་གྱི་ཁྲི་སྟན་ལ་ཁྱིམ་པ་ཞིག་སྤྱོད་ཅིང་འདུག་སྟེ། ཆར་རླུང་དང་སྲིན་བུས་ཟོས་སམ་ནམ་མཁའ་ལ་བོར་བ་ལ་དེ་ལྟར་མ་བྱེད་ཅེས་མ་བསྒོ་འམ། མ་བརྟུལ་ན་ཉེས་བྱས་ཞེས་བྱི་ཤུ་ཏས་བཤད། གཉིས་གཅིག་

Vol. 165 · folio 126b

ཏུ་འཁོད་ན་ཕྱིས་ལངས་པས་བྱའོ། །སྟན་གཅིག་ལ་དགེ་སློང་གཉིས་སྤྱོད་སྤྱོད་པ་ལས་གཅིག་ཕྱི་ན་འདུག་པ་གཅིག་སྔར་འགྲོ་ན་སྔ་མས་བརྟུལ་ཅིག་ཅེས་མ་བསྒོ་ཡང་ཕྱི་མས་མ་བརྟུལ་ན་ལྟུང་བའོ་སྔར་སོང་བ་ལ་ནི་ཉེས་མེད་དོ། །དེ་སྟེ་མཉམ་པས་ན་གསར་བུས་སོ། །སྟན་གཅིག་

ལ་མི་གཉིས་ལྷན་ཅིག་སྤྱོད་སྤྱོད་པ་ལས་ལྷན་ཅིག་འདོང་ན་དགེ་སློང་ཁྲིམས་ན་གང་གཞོན་པས་བརྟུལ་ལ། མ་བརྟུལ་ན་རྒན་པོ་ལ་ཉེས་བྱས་གཞོན་ནུ་ལ་ལྟུང་བའོ། །མཚུངས་པས་ན་ཉེས་བྱས་གཉིས་ཀས་སོ། །མདོ་ལྟག་མ་ལྟར་ལྷན་ཅིག་སྤྱོད་སྤྱོད་པ་གཉིས་ཀ་སྤྱིས་བསྡུའོ། །མ་

བསྡུས་ན་གཉིས་ཀ་ལྟུང་ངོ་། །ངོ་ཚ་མེད་པས་ཕས་ཕམ་པ་བྱུང་བའམ་ཚུལ་ཁྲིམས་ལ་གཡེལ་བ་དང་ཐམ་ཐོམ་སྨྱོན་ཐབས་ཅན་དང་། འཁོན་པ་སྔན་ཆད་འཐབས་ཤིང་འཁོན་ཡོད་པ་དང་། རྒས་པ་རྒན་པོ་མལ་སྟན་བརྟུལ་མི་ནུས་པར་རྒན་པ་དང་། ནད་པ་མལ་སྟན་བརྟུལ་མི་ནུས་པ་དང་། རབ་

ཏུ་མ་རྫོགས་པ་དགེ་སྦྱོང་དང་ཁྱིམ་པ་དང་དེར་ན་མ་བཅོལ་བའོ། །མིང་གིས་སྨོས་པ་འདི་རྣམས་ལ་མལ་སྟན་བརྟུལ་དུ་བཅོལ་ཀྱང་། བཅོལ་བར་མི་ཆུད་དེ་ཡན་ལག་དང་ལྡན་ན་ལྟུང་བའོ། །གཙུག་ལག་ཁང་འདི་མལ་སྟན་ལྟའམ་ལོང་ཤིག །བདག་གུད་དུ་འགྲོ་ན་དགེ་སློང་གྲོགས་ལ་

མལ་སྟན་འདི་ལྟོས་ཤིག་ཅེས་སམ་ལྡེ་མིག་འདི་ན་ཡོད་དེ་ལོང་ཤིག་ཅེས་བསྒོ་སྟེ་འགྲོའོ། །སྒོ་ལྕགས་མ་བཅུག་གོ་ཞེས་བཅོལ། གཙུག་ལག་ཁང་ངམ་སྒོ་མ་བཅད་པར་འགྲོ་ནའང་སྒོ་མ་བཅད་དོ་ཞེས་བསྒོ་སྟེ་འགྲོའོ། །ཐ་དད་པ་གསུམ་སྟེ་རླུང་གིས་བཟློག་པ་དང་ཆར་པས་རིམ་པར་

ཐལ་བ་དང་། སྲིན་བུས་ཟོས་པ་དང་ཆར་པས་གཤེར་བ་དང་རླུང་གིས་བཟློག་པའི་ཚད་ནི་ཆར་པས་སྟེང་ནས་འོག་ཏུ་ཐལ་བ་དང་སྲིན་བུས་བླ་ནས་འོག་ཏུ་ཐལ་བ་དང་རླུང་གིས་ཐ་མ་བཟློག་པ་ཙམ་གྱིས་ལྟུང་བར་འགྱུར་རོ། །མལ་སྟན་མལ་སྟན་ཡང་ཡིན་ལ་དགེ་འདུན་གྱི་དེ་ལ་དགེ་འདུན་གྱི་

མལ་སྟན་ཡང་ཡིན་ལ། བདག་བསྐོས་གཞན་གྱིས་བདག་ལ་གདིང་དུ་བཅུག་གམ། བདག་གིས་གཞག་གམ། བདག་ཉིད་ཀྱིས་བཏིང་ངམ། གཞོག་ཏུ་བཅུག་སྟེ་བདག་གིས་གཞན་གདིང་དུ་བཅུག་སྟེ། བླ་གབ་མེད་དེ་ཞེ་ན་བྱེད་དོ། །བླ་གབ་མེད་པའི་ནམ་མཁའ་ལ་ལུས་ཏེ་མ་

Vol. 165 · folio 127a

བརྟུལ་ན་ལྟུང་བར་འགྱུར་རོ། །རྩ་བ་ནི་མཇུག་ཏུ་ནའོ། །ཡན་ལག་རྣམས་དང་ལྡན་ཞིང་འདོམ་བཞི་བཅུ་རྩ་དགུ་འདས་སམ་ཆར་དག་གིས་གཤེར་བར་གྱུར་ན་ལྟུང་ངོ་། །སྦྱོར་བ་ནི་ཉེས་བྱས་པའོ། །ཡན་ལག་མ་ཚང་ངམ་འདོམ་བཞི་བཅུ་རྩ་དགུ་མ་འདས་པ་

ཙམ་དུ་སོང་བ་ནི་ཉེས་བྱས་སོ། །རེ་རེ་ཤིག་གཞན་གྱིས་ནོན་ནའོ། །དགེ་འདུན་གྱི་མལ་སྟན་ལ་སྤྱོད་སྤྱོད་པ་ལས་གྲོགས་གཅིག་འོངས་ཏེ་ཕྱིན་ན་སྤྱོད་དེ་བདག་སྔར་འགྲོ་ན་ཕྱི་མ་ལ་མལ་སྟན་བརྟུལ་ཅིག་ཅེས་བསྒོ་ལ་འགྲོའོ་མ་བསྒོ་བར་སོང་ན་ཉེས་བྱས། གང་ཟག་གིས་ཀྱང་ངོ་། །

གང་ཟག་གིས་མལ་སྟན་སྤྱོད་སྤྱོད་པ་ལས་མ་བརྟུལ་ཏམ་བརྟུལ་དུ་མ་བཅོལ་བར་སོང་ན་ཉེས་བྱས་སོ། །འོག་མ་བཞི་ཡང་ངོ་། །ཁྲི་སྟན་གྱི་འོག་ན་གདིང་བ་དང་བསྐྲད་པ་དང་ཕྱིས་གནོན་པ་དང་གཟེར་མེད་པ་བཞི་ཡང་དགེ་འདུན་གྱི་གཙུག་ལག་ཁང་དུ་བྱས་ན་ལྟུང་གི་གང་ཟག་གི་

གནས་ལ་བྱས་ན་ཉེས་བྱས། མ་རེག་པ་ནི་མ་ཡིན་ནོ། །དགེ་འདུན་གྱི་ཁྲི་གསེར་དངུལ་དང་རིན་པོ་ཆེ་ལ་སོགས་པས་བྱས་པ་ཞིག་སྐམ་སྲད་ལ་ཕྱུང་ཞིང་འདུག་སྟེ་ཆར་བབ་ན་རེག་ཏུ་མི་རུང་བའི་ཕྱིར་མ་བརྟུལ་ན་ཉེས་མེད་དོ། །རྐུན་པོའི་རྐྱེན་ལྟ་བུ་བྱུང་ན་བརྟུལ་བའི་ཕྱིར་རེག་ཀྱང་བླ་སྟེ་

བརྟུལ་དགོས་སོ། །དེ་སྟེ་བསོད་སྙོམས་ཀྱི་ཕྱིར་བཀྲམ་སྟེ་ཞུགས་ནས་རླུང་དང་ཆར་པ་འོང་ན་གཙུག་ལག་ཁང་ན་གནས་པས་ཆུག་ཤིག །དགེ་འདུན་གྱི་མལ་སྟན་བསོད་སྙོམས་པ་ཞིག་སྤྱོད་ཅིང་གདིང་བ་ལས་མ་བརྟུལ་བར་བདག་བསོད་སྙོམས་ལ་སོང་སྟེ་ཆར་པའམ་རླུང་ལ་

སོགས་པ་བྱུང་ན་དགེ་སློང་སུ་ཕྱི་ན་འདུག་ཅིང་མ་མཐོང་བས་སྡུས་ཤིག་མ་བསྡུས་ན་ཉེས་བྱས་སོ། །ཞུགས་པས་ཀྱང་ནན་ཏན་དུ་ཤོག་ཤིག །སཱུ་ཏྲ་ལྟག་མ་ལྟར་དགེ་སློང་བསོད་སྙོམས་ལ་སོང་བས་ཀྱང་རླུང་དང་ཆར་པ་འོང་བར་མཐོང་ན་མལ་སྟན་བརྟུལ་བའི་ཕྱིར་མྱུར་དུ་འོང་ངོ་། །

མྱུར་དུ་མ་འོངས་ན་སྔོན་གྱི་ལྟུང་བ་དང་ཉེས་བྱས་ཀྱི་སྟེང་དུ་ཡང་ཉེས་བྱས་མཆིས། དེའི་ཕྱིར་མ་ཉེས་པ་དང་འབྲི་བ་མེད་དོ། །བསོད་སྙོམས་པ་མལ་སྟན་མ་བརྟུལ་བར་བསོད་སྙོམས་ལ་སོང་བ་བསོད་སྙོམས་ཀྱི་ཕྱིར་སོང་ཞེས་ཏེ་ཉེས་པ་མེད་པའམ། ལྟུང་བ་འབྲི་བ་མ་ཡིན་གྱི་ཡན་ལག་

Vol. 165 · folio 127b

དང་ལྡན་ན་ལྟུང་བར་འགྱུར་རོ། །དེ་སྟེ་བརྗེད་ནས་ལན་མང་དུ་འདས་སམ་ཕྱིན་ཏེ་དྲན་པ་རྙེད་ན་ཕྱིས་འདི་ལྟར་མི་བྱའོ་ཞེས་སེམས་བསྐྱེད་ཅིང་ཁར་སྨྲོས་ཤིག །དགེ་སློང་མལ་སྟན་སྤྱོད་སྤྱོད་དམ་བཀྲམ་པ་ལས་མ་བརྟུལ་ཏམ་བརྗེད་དེ་གུད་དུ་སོང་ནས་ལམ་རིང་མོ་ཞིག་ཏུ་ཕྱིན་ཏེ་གདོད་དེ་

དྲན་ན་དེ་ལྟར་བརྗེད་པ་ཉེས་སོ་ཞེས་ཡིད་ལ་བསམས་ཤིང་ཁར་ཡང་བརྗོད། ཕྱིན་ཆད་འདི་ལྟར་མི་བྱ་བའི་སེམས་ཀྱང་བསྐྱེད་དོ། །དེ་ལྟར་སེམས་མ་བསྐྱེད་ན་སྔ་མ་ལྟུང་བའི་སྟེང་དུ་ཉེས་བྱས་ཀྱང་ཡོད། ལམ་མི་རིང་བར་དྲན་ན་སླར་ལོག་སྟེ་བརྟུལ་ལོ། །དེ་སྟེ་དགེ་སློང་དང་ལམ་དུ་

ཕྲད་ན་བསྡུ་བར་གསོལ་ཅིག །སཱུ་ཏྲ་ལྟག་མ་ལྟར་དགེ་སློང་གིས་མལ་སྟན་མ་བསྡུས་པར་གུད་དུ་སོང་སྟེ་ལམ་རིང་མོ་ཞིག་ཏུ་ཕྱིན་ཏེ་དྲན་པ་དང་དགེ་སློང་གཞན་ཞིག་དང་ཕྲད་ན་བདག་གིས་གསོལ་བ་བཏབ་སྟེ་མལ་སྟན་མ་བརྟུལ་བར་ལུས་ཀྱི་ཕར་བྱིར་ཕྱིན་པ་དང་བརྟུལ་བར་གསོལ་ལོ་ཞེས་གསོལ་

བ་གདབ། ཁས་བླངས་ནས་དེར་ཕྱིན་ན་བྱ། སཱུ་ཏྲ་ལྟག་མ་ལྟར་གསོལ་བ་བཏབ་པའི་དགེ་སློང་དེས་ཁས་བླངས་ན་ཕྱིན་མ་ཐག་ཏུ་བརྟུལ། ཕྱིན་མ་ཐག་ཏུ་མ་བརྟུལ་ཏེ་ཡན་ལག་དང་ལྡན་པར་གྱུར་ན་ཁས་བླངས་པའི་དགེ་སློང་དེ་ལྟུང་བར་འགྱུར་རོ། །དོགས་པ་མ་རྙེད་དེ་གནས་ནས་འགྲོ་ན་

མལ་སྟན་བརྟུལ། མི་རྒོད་དང་རྐུན་པོ་ལ་སོགས་པ་འཇིགས་པའི་རྐྱེན་མ་བྱུང་བར་གནས་གུད་དུ་འགྲོ་ན་དགེ་འདུན་གྱི་མལ་སྟན་བདག་སྤྱོད་སྤྱོད་ཀྱང་རུང་སྐམ་བསྲད་ལ་བཏིང་ཡང་རུང་བ་བསྡུས་ཤིང་བྲུབས་ལ་འགྲོ། མ་བྲུབས་པར་སོང་ན་ཉེས་བྱས། འདི་ནི་བླ་གབ་མེད་པ་མ་ཡིན་གྱི་

གཙུག་ལག་ཁང་གི་ནང་ན་འདུག་པ་ལ་བྱ། དེ་སྟེ་རྡུལ་གོས་ན་སྤྲུག །དགེ་འདུན་གྱི་མལ་སྟན་ལ་རྡུལ་ལ་སོགས་པ་ཆགས་ན་རུབ་མ་པ་ཡང་རུང་སུ་སྤྱོད་སྤྱོད་པ་ཡང་རུང་སྟེ་སྤྲུག་བརྡབ་སྟེ་བྱི་བདར་བྱ། དེ་ཉིད་ལ་གཏད། སཱུ་ཏྲ་ལྟག་མ་ལྟར་བྱི་བདར་བྱས་པའི་མལ་སྟན་དེ་མལ་སྟན་གྱི་

རུབ་མ་པ་གསར་དུ་བྱེད་པ་སུ་ཡིན་པ་ལ་རྙིང་གུད་དུ་འགྲོ་ན་གཏད་དེ་འགྲོ། དགེ་སློང་དག་ལ་བཅོལ་བར་ཡང་བྱ། མལ་སྟན་གྱི་རུབ་མ་པ་རྙིང་ཡང་རུང་མལ་སྟན་སྤྱོད་སྤྱོད་པའི་དགེ་སློང་སུ་ཡང་རུང་སྟེ་གནས་གཞན་ཞིག་ཏུ་ཐལ་བྱུང་འགྲོ་ལ་མལ་སྟན་གྱི་རུབ་མ་པ་གཞི་འཛིན་མེད་ན་

Vol. 165 · folio 128a

དགེ་སློང་དག་ཀྱང་རུང་བས་སྔས་ཤིག་པར་བཅོལ་ཏེ་འགྲོ་མེད་ན་དགེ་ཚུལ་ལ། སཱུ་ཏྲ་ལྟག་མ་ལྟར་རིང་བར་འགྲོ་ལ་དགེ་སློང་མེད་ན་དགེ་སྦྱོང་ལ་སྡུས་ཤིག་པའམ་ཕུལ་ཅིག་པར་བཅོལ་ཀྱང་ཉེས་པ་མེད་དོ། །དེ་ཡང་ན་ཁྱིམ་པ་དག་ལའོ། །བདག་གྲོགས་

ཀྱི་རྗེས་མི་སླེབས་ཤིང་རིང་བར་འགྲོ་ལ། དགེ་སྦྱོང་ཡང་མེད་ན་ཁྱིམ་པ་དང་དགེ་བསྙེན་ཡིད་བརྟན་པ་ལ་བཅོལ་ཀྱང་ཉེས་མེད་དོ། །ཐམས་ཅད་མེད་ན་ཕྱོགས་བཞིར་བལྟས་ལ་ལྡེ་མིག་སྦོས་ལ་སོང་ཤིག །མལ་སྟན་རྫིའམ་དགེ་སློང་གང་ཡང་རུང་བ་བདག་གུད་དུ་གནས་འཕོས་ཏེ་

འགྲོ་ལ་ཕྱི་ན་མི་གཅིག་ཀྱང་མེད་ན་མལ་སྟན་དང་རྫས་ཀུན་བྲུབས་ཏེ་སྒོ་བཅད་ལ་ལྡེ་མིག་དགེ་སློང་དག་གིས་རྙེད་པ་ཙམ་དུ་སྦས་ལ་དགེ་སློང་དག་འོང་ངམ་མི་འོང་ཕྱོགས་བཞིར་བལྟས་ལ་འགྲོ། དེ་སྟེ་ལམ་གྱི་བར་དུ་དགེ་སློང་མཐོང་ན་ཕྱོགས་དེ་ནའོ་ཞེས་དེ་ལ་སྨྲོས་ཤིག །སཱུ་ཏྲ་ལྟག་

མ་ལྟར་ལྡེ་མིག་སྦས་ཏེ་སོང་བ་ལས་ལམ་དུ་དགེ་སློང་དག་དང་ཕྲད་ན་ལྡེ་མིག་ས་ཚོད་འདིར་སྦས་ཀྱིས་ཚོལ་ལ་སྤྱོད་ཅིག་ཅེས་བསྒོ་སྟེ་འགྲོ། དེ་སྟེ་ཁྱིམ་པར་མགྲོན་དུ་བོས་པ་ལས་སྒོ་བཅད་དེ་དོང་ན་རྩིག་པའམ་ཤིང་དུ་སྟན་སྦོས་ལ་ཞུགས་ཤིག །དགེ་སློང་བསོད་སྙོམས་པ་ཞིག་དགེ་འདུན་

གྱི་ཁྲི་སྟན་ལྐོག་དབེན་པར་ཁྱེར་ཏེ་སྤྱོད་སྤྱོད་པ་ལས་དྲོ་ཁར་ཁྲི་སྟན་སླར་སྐྱེལ་དུ་སོང་བ་ལས་དགེ་འདུན་ཕལ་ཀུན་མགྲོན་དུ་འདོང་སྟེ་སྒོ་བཅད་ཅིང་འདུག་ན་ཁྲི་སྟན་དེ་གཞན་གྱིས་མི་མཐོང་བར་རྩིག་པའམ་ཤིང་དྲུང་དུ་སྦས་ལ་བདག་ཀྱང་དགེ་འདུན་གཞན་གྱི་ཕྱི་བཞིན་མཆོད་སྟོན་ལ་འགྲོའོ། །

དེར་སྟན་བྱིན་ཅིག །གཙུག་ལག་ཁང་གཞན་གྱི་དགེ་འདུན་ཞིག་མཆོད་སྟོན་བྱེད་པའི་ཕྱིར་ཁྲི་སྟན་རྙེད་ན་སྦྱིན། སཱུ་ཏྲ་ལྟག་མ་ལྟར་དགེ་འདུན་གྱི་རྗེས་མ་སླེབས་ཏེ་སྟན་སྦས་ཏེ་ཕྱིས་འོངས་པའི་དགེ་སློང་དེ་ལ་དགེ་འདུན་སྔ་མ་གྲལ་ཞོག་ལ་སྟན་བྱིན་ཅིག་ཅེས་ཀྱང་བཤད་དོ། །བདག་གིས་

ཁྱེར་ཏེ་མ་འོངས་ཤིག །སཱུ་ཏྲ་ལྟག་མ་ལྟར་དགེ་འདུན་གཞན་ཞིག་ལ་ཁྲི་སྟན་བརྙར་སྦྱིན་པ་སླར་བདག་ཉིད་ཀྱིས་མི་བསྐུར་མགྲོན་དུ་འགྲོ་ན་བདག་གིས་སྟན་རང་ཆས་སུ་ཁྱེར་ཏེ་མི་འགྲོ་ཞེས་བྱི་ཤུ་ཏས་བཤད་ཁྱིམ་པ་དང་དགེ་ཚུལ་དེ་དག་གིས་སོ། །གུད་དུ་བརྙར་བྱིན་པའི་སྟན་བདག་ཅག་

Vol. 165 · folio 128b

སླར་ལོག་ན་གཡོག་ཁྱིམ་པའམ་དགེ་སྦྱོང་དག་ལ་བསྐུར་རོ། །མེད་ན་ཁྱིམ་པ་ལ་བསྐྱལ་བའི་ཕྱིར་བཅོལ་ཏེ་འདོང་། དགེ་སྦྱོང་དང་ཁྱིམ་པ་ལ་འཕྲལ་དུ་བསྐུར་དུ་མེད་ན་ཁྱིམ་པ་དག་ལ་བཅོལ་ཏེ་སྐྱོལ་ཅིག་པར་བསྐོས་ཏེ་འདོང་ངོ་། །བདག་གིས་ཁྱེར་ཏེ་འོང་ངོ་ཞེས་ཟེར་ན་བཞག །སཱུ་ཏྲ་

ལྟག་མ་ལྟར་ཁྱིམ་པ་ལ་སྐྱོལ་ཅིག་པར་བཅོལ་ནས་བསྐྱལ་ལོ་ཞེས་ཁས་བླངས་ན་སྟན་བཞག །དེས་མི་སྐྱེལ་ན་གནས་བྱས་པས་བསྐུར། ཁྱིམ་པ་ལ་སྐྱེལ་བར་བཅོལ་ཏེ་མ་བཏུབ་ན་དགེ་སློང་གཞོན་ནུ་རྣམས་ཀྱིས་བསྐུར། མེད་ན་རང་གིས་སོ། །སྐྱེལ་བ་ཁྱིམ་པ་ལ་སོགས་པ་སྐྱེལ་དུ་

མ་བཏུབ་ན་བདག་གིས་བསྐུར། ཐམས་ཅད་ཀྱིས་ན་གཎྜཱི་བརྡུངས་ཏེའོ། །སྟན་བརྙས་པ་དེ་དགེ་སློང་ཀུན་གྱིས་བསྐུར་དགོས་ནའང་གཎྜཱི་བརྡུངས་ལ་བསྡུས་ཏེ་བསྐུར་རམ། ལེན་དུ་འདོང་ངོ་། །ཁྱིམ་པ་ཞིག་གིས་མཆོད་སྟོན་གྱི་ཕྱིར་ཁྲི་སྟན་བརྙས་ན་ཐབས་དེ་བཞིན་གཙུག་ལག་ཁང་དུ་

མགྲོན་བྱས་པ་བདག་གི་ཕྱིར་སྟན་རྙེད་ན་སྦྱིན། ཁྱིམ་པས་དགེ་འདུན་མཆོད་སྟོན་གསོལ་བར་རྒྱུ་ཕུལ་བ་ལས་དེའི་རྗེས་ལ་ཁྱིམ་པ་དེ་ཉིད་ཀྱི་གཉེན་བཤེས་ཟན་སྦྱིན་སྦྱིན་ན་སྟན་བརྙ་ཞེས་ཟེར་ན་དགེ་འདུན་གྱི་རྗེས་མ་སླེབས་ཏེ་སྟན་བྱིན་ཅིག །དེ་དག་བསྲུང་བ་དགེ་སློང་བཞག །སཱུ་ཏྲ་ལྟག་

མ་ལྟར་ཁྱིམ་པའི་གཉེན་བཤེས་ཟན་སྦྱིན་པར་སྟན་བརྙར་ཕྱིན་པ་ལ་དགེ་སྦྱོང་སྤྱན་སྲུང་མ་གཅིག་བཞག །དེ་ཕྱོགས་གཅིག་དུ་འདུག །སྲུང་མ་དེ་ཁྱིམ་པ་དག་ཟན་ཟའི་ནང་དུ་མི་འགྲོ་བར་མིག་རྒྱང་གིས་སྣང་བ་ཙམ་དུ་འདུག་ལ་བགས་ཀྱིས་བསྲུང་། བདག་གིས་ལས་ཀྱང་བྱ་ཞིང་བཙའ།

དགེ་སློང་སྲུང་མར་བསྐོས་པ་དེ་སྟན་སྲུང་བའི་ཟླ་ལ་བདག་གིས་ལས་ཁ་ཐོན་ལ་སོགས་པའང་བྱ། དོང་ལ་གཞུག །ཁྱིམ་པ་ཟན་ཟོས་ཟིན་ཏེ་སྟན་མ་བརྟུལ་བར་དོང་ན་དགེ་སློང་སྲུང་མས་སྟན་རྣམས་བརྟུལ་ཏེ་སྦ། མ་རུང་ན་བཀྲུ། ཁྱིམ་པ་དེ་དག་གི་སྟན་ཤ་ཆང་གིས་རེག་སྟེ་མ་རུང་བར་གྱུར་

པ་དགེ་སློང་དེས་ཕྱི་ཞིང་བཀྲུའོ། །ཆང་གི་སྙིགས་མས་རེག་ན་ཆུས་སོ། །སྟན་ལ་ཆང་ངམ་སྦང་མ་ལྟ་བུས་རེག་ན་ཆུས་བཀྲུའོ། །སྣུམ་གྱིས་ན་སུག་པ་དག་གིས་སོ། །སྟན་ལ་སྣུམ་ལ་སོགས་པས་རེག་ན་སུག་པས་བཀྲུའོ། །མི་གཙང་བས་ན་སའམ་གོ་འདུན་ནམ་ལྕི་སྐམ་ཀྱིས་སོ། །

Vol. 165 · folio 129a

སྐྱུགས་པ་དང་ངན་སྐྱུགས་ལ་སོགས་པས་སྟན་ལ་རེག་ན་ལྕི་སྐམ་དང་སུག་པ་ལ་སོགས་གོ་འདུན་གྱིས་དག་པར་བཀྲུ། མི་འདག་ན་ལན་བུ་དག་གཅོད་ཅིག །ཁྱིའུ་དྲ་བ་དང་ལན་བུའི་གསེབ་ཏུ་ངན་སྐྱུགས་རེག་པ་འདག་ཏུ་མི་བཏུབ་ན་ལན་བུ་དག་གཅོད་ཅིག །ཁྱིམ་པ་

འདུག་པས་མ་བཅུག་ན་གང་གིས་མཐོང་བས་ཆུག་ཤིག །ཁྱིམ་པ་དྲ་མ་གཙུག་ལག་ཁང་དུ་འོངས་པ་ལ་བསྟི་སྟང་དུ་སྟན་བཏིང་བ་ཁྱིམ་པས་སྟན་མ་བརྟུལ་བར་སླར་སོང་ན་དགེ་སློང་གང་གིས་སྟན་མཐོང་བ་གཞུག །ཁྱིམ་པས་སྟན་བརྙས་པའམ་སྲུང་མ་མེད་ན་གང་གིས་མཐོང་བས་

བརྟུལ། དེ་སྟེ་རྒན་པོ་འམ་ན་བས་ན་གཙུག་ལག་ཁང་སྐྱོང་ལའོ། །ཁྱིམ་པ་འདུག་འདུག་པའི་སྟན་མ་བརྟུལ་ཏམ་མ་བསྐྱལ་བ་དགེ་སློང་རྒན་པོ་དང་ནད་པས་མཐོང་སྟེ་སྡུད་མི་ནུས་ན་གཙུག་ལག་ཁང་སྐྱོང་ལ་བོས་ཏེ་སྡུད་དུ་གཞུག །དེ་ལ་སྒོ་ནད་པ་ལ་ཐམས་ཅད་ཀྱིས་བལྟ། དགེ་སློང་

ནད་པ་ལ་དགེ་སློང་ཐམས་ཅད་ཀྱིས་ཉིན་རེ་བཞིན་ལན་རེ་བལྟའོ་མ་བལྟས་ན་ཉེས་བྱས། འདུག་སྟེའོ། །ནད་འདྲི་བའི་ཚེ་འདུག་ལ་འདྲིའོ། །དེ་ལྟར་མ་བྱས་ན་ཉེས་བྱས། དེར་སྟན་ཐོགས་ཏེ་མི་འགྲོ། ནད་འདྲིར་འགྲོ་བའི་ཚེ་བདག་གིས་སྟན་ཁྱེར་ཏེ་མི་འགྲོ་ནད་གཡོག་གིས་དེར་སྟན་གཞག །

ནད་འདྲི་བའི་དགེ་སློང་འོང་བའི་ཕྱིར་ནད་གཡོག་གིས་སྟན་གདིང་། མཁན་པོའམ་སློབ་དཔོན་དགེ་བའི་སྐྱབས་ཀྱི་ཕྱིར་འགྲོ་ན་དེ་སྟེ་གཞན་དུ་དགེ་བའི་སྐྱབས་མི་འཕེལ་ན་ཕྱི་བཞིན་དུ་འགྲོ། །མཁན་པོ་དང་སློབ་དཔོན་གཙུག་ལག་ཁང་ན་དགེ་བ་སྤྱོད་དུ་མི་ལྡོབ་སྟེ་ཤིང་དྲུང་ངམ་ཆུ་འགྲམ་ལ་

སོགས་པར་ཆོས་སློབ་ཅིང་འགྲོ་ན་སློབ་མ་བདག་ཀྱང་ཆོས་སློབ་པའི་ལུང་ནོད་པའི་ཕྱིར་མཁན་པོའི་ཕྱི་བཞིན་དུ་འགྲོའོ། །བདག་གིས་དེའི་སྟན་བསྐུར། མཁན་པོ་དང་སློབ་དཔོན་དབེན་པར་ཆོས་སློབ་དུ་འགྲོ་བའི་སྟན་སློབ་མས་བསྐུར་རོ། །མ་དྲིས་པར་མི་འགྲོ། མཁན་པོ་དང་སློབ་

དཔོན་གྱི་ཕྱི་བཞིན་སློབ་མ་འགྲོ་བ་ཡང་བདག་ཀྱང་ཕྱི་བཞིན་འགྲོའོ་ཞེས་དྲིས་ལ་འགྲོ། བདག་ཉིད་ཀྱིས་ཁྱེར་ཏེ་འོངས། མཁན་པོ་དང་སློབ་དཔོན་དབེན་པར་ཆོས་སློབ་པ་སླར་འོངས་ཏེ་སློབ་མ་དྲུང་ན་མི་འདུག་ན་སྟན་བདག་ཉིད་ཀྱིས་བསྐུར། བླ་གབ་མེད་པ་ལ་ཆོས་ཉན་པ་ལ་རླུང་ངམ་

Vol. 165 · folio 129b

ཆར་གྱིས་ན་མལ་སྟན་དག་གཞུག །གསོ་སྦྱིན་བྱེད་པའམ་ཆོས་འཆད་པ་ལ་སོགས་པ་བླ་གབ་མེད་པ་ལ་འཁོད་འཁོད་པ་ལས་ཆར་པ་འཕྲལ་ལ་བབ་ན་དགེ་སློང་ཀུན་གྱིས་སྟན་བསྡུ་ཞིང་གནས་སུ་བསྐུར་པ་དང་སྦ། རང་གིས་ལྕི་སྟེ་མི་ནུས་ན་རྒན་རབས་དང་གསར་བུར་ལྷན་ཅིག་ཏུ་བརྗེ། སཱུ་

ཏྲ་ལྟག་མ་ལྟར་སྟན་བསྡུ་བ་ལ་རྒན་པ་རྣམས་ཀྱིས་སྟན་ཆེན་པོ་ལྕི་བ་མི་ཐེག་ན་གཞོན་ནུའི་སྟན་ཡང་བ་རྒན་པོ་ལ་བསྐུར་ལ་རྒན་པོའི་སྟན་ལྕི་བ་གཞོན་ནུ་རྣམས་ཀྱིས་བསྐུར། འདྲ་བ་འདྲ་བར་གཞག །མལ་སྟན་གྱི་རྣམས་བྲུབ་པའང་བསྲེས་ལ་མི་གཞག་གི་ཁྲིའུ་ཡང་ལོགས་ཤིག་སྟན་ཡང་

ལོགས་ཤིག་སོ་སོར་བཅེར་རོ། །གཙུག་ལག་ཁང་གཞན་དུ་མལ་སྟན་དང་གོས་བརྙ་ན་བྱིན་ཅིག །གཙུག་ལག་ཁང་གཞན་དུ་མཆོད་སྟོན་བྱས་སམ་དགེ་འདུན་མང་ཞིག་ལྷགས་ཏེ་མལ་སྟན་གྱིས་མི་ཆོག་སྟེ་བརྙ་ན་བརྙར་སྦྱིན་ནོ། །དེ་སྟེ་ཆར་པའམ་རླུང་འབབ་པར་མི་དོགས་ནའོ། །

བརྙར་བྱིན་པ་ཡང་ཆར་པ་དང་རླུང་ལངས་སམ་འབབ་དུ་དོགས་ན་གཤེར་ཅིང་མ་རུང་བའི་ཕྱིར་མི་སྦྱིན། དེ་སྟེ་ལམ་གྱི་བར་དུ་རླུང་ངམ་ཆར་པ་ནི་ཤིང་ངམ་རྩིག་པའི་དྲུང་དུ་སྤུང་པར་བྱ། མལ་སྟན་བརྙས་པ་ལས་སྐྱེལ་ཀྱང་རུང་ལེན་ཀྱང་རུང་ལམ་དུ་ཆར་པ་བབ་ན་ཤིང་དྲུང་ངམ་རྩིག་དྲུང་

དུ་བཅེར་ཏེ་གཞག །གོས་ཀྱི་ནང་ན་ངན་པ་གཅིག་གིས་གཡོགས། སཱུ་ཏྲ་ལྟག་མ་ལྟར་གོས་སྤུངས་ཏེ་བཞག་པའི་སྟེང་དུ་ནང་ན་ངན་པ་གཅིག་གིས་གཡོགས། གཙུག་ལག་ཁང་དུ་ཁྱེར་ཏེ་གོས་དག་བསྐམ། མལ་སྟན་ལམ་དུ་གཤེར་བ་དེ་གཙུག་ལག་ཁང་དུ་ཕྱིན་ནས་བསྐམ། ཚིག་

གམ་ཁྱེར་ན་དགེ་འདུན་གྱི་ཡང་དབྱུང་ངོ་། །དགེ་འདུན་གྱི་མལ་སྟན་ལ་སོགས་པའི་ཁྲོད་དུ་མེའམ་ཆུ་ཞིག་བྱུང་ན་ཀུན་གྱིས་དབྱུང་ཞིང་བསྐྱ། བདག་གི་ལྷུང་བཟེད་དང་ཆོས་གོས་དབྱུང་བ་གྲུབ་པས་སོ། །དགེ་འདུན་གྱི་མལ་སྟན་ཆུའམ་མེ་འབྱུང་བའི་ནང་ན་བདག་གི་ལྷུང་བཟེད་དང་ཆོས་

གོས་ཤིག་ཡོད་ན་བདག་གི་སྔར་དབྱུང་ངོ་། །དགེ་འདུན་ནི་ཕྱུག་གི་གང་ཟག་ནི་ཕོངས་ཤིང་མ་བདོག་པའི་ཕྱིར་རོ། །ཕྱུང་ནས་དགེ་སློང་མི་ནུས་པ་ཅིག་སྲུང་མར་ཞོག་ཤིག །ཆུ་དང་མེའི་ནང་ནས་རྫས་སྔ་མ་ཕྱུང་བའི་དྲུང་དུ་དགེ་སློང་རྒན་པོའམ་ཉམ་རྩལ་ཆུང་ངུ་ཞིག་སྲུང་མར་བཞག་

Vol. 165 · folio 130a

སྟེ་མི་སྟོར་བར་བྱ་བའི་ཕྱིར་རོ། །མི་བཟོད་ན་མ་འཇུག་ཤིག །ཆུ་དང་མེའི་ནང་ནས་དབྱུང་མི་ནུས་ཤིང་སྲོག་ལ་དམའ་བར་གྱུར་ན་དེའི་ནང་དུ་མི་འདུག །མལ་སྟན་གྱི་ལྟུང་བའོ། །ཁྲི་སྟན་གྱི་ལྟུང་བ་སྟེ་རྫོགས་སོ།། །།བཏིང་བ་ལ་འཆད་དེ། གྲོང་བར་དུ་གདིང་

བ་བྱས་ན་ཁྱིམ་པ་ལ་བྱ་ཞིང་དོར། ཁྱིམ་པའི་གྲོང་བར་དུ་རྩྭ་བཏིང་ངམ་ལོ་མ་བཏིང་སྟེ་གནས་གནས་པ་ལས་གུད་དུ་འགྲོ་ན་རྩྭ་འདིར་དོར་རམ་ཇི་ལྟར་བྱ་ཞེས་ཁྱིམ་བདག་ལ་དྲིས་ལ་དོར། དགོན་པར་ན་དཀྲུགས་ཏེའོ། །དགོན་པའམ་ལམ་གྱི་ཞག་ལོན་པའི་སར་རྩྭའམ་ལོ་མ་བཏིང་ན་

འགྲོ་ཀར་སྲིན་བུ་མི་འཇུག་པར་བྱ་བའི་ཕྱིར་དཀྲུགས་ཤིང་ཀློངས་ཏེ་འགྲོ། །མ་དཀྲུགས་ན་ཉེས་བྱས། དེར་སྔས་སམ་འཕོངས་སུ་བྱས་ན་བྱས་པའོ། །སཱུ་ཏྲ་ལྟག་མ་ལྟར་རྩྭ་བཏིང་བ་དཀྲུགས་པ་ནི་བདག་རིང་ན་འཕོངས་སམ་སྔས་གཅིག་དཀྲུགས་པས་དཀྲུགས་པར་ཆུད་དོ། །གོས་

བསྐམ་པའི་ཕྱིར་རྩྭ་བཏིང་བའམ་དོར་བའོ། །གོས་ལ་སོགས་པ་བཀྲུས་པའམ་བསྐམ་པའི་འོག་ཏུ་རྩྭའམ་ལོ་མ་བཏིང་ནའང་ཟིན་ནས་བསྡུས་ཏེ་དོར། སློང་ཞིང་དོར་བར་ཁས་ལེན་ན་སྦྱིན། རྩྭ་བཏིང་བ་བསྡུས་ཏེ་དོར་བ་ལས་སློབ་མ་ལྟ་བུ་ན་རེ་ངས་བསྡུས་ཏེ་དོར་རོ་ཞེས་ཟེར་ན་འདོར་

དུ་གཞུག །རྩྭ་བསླང་ཞེས་ཟེར་ཞིང་ཕྱིས་དོར་རོ་ཞེས་ཟེར་ནའང་སྦྱིན། འཆག་སར་མཆིལ་ལྷམ་འདྲུད་པའི་ཕྱིར་རྩྭ་གདིང་། འཆག་ཅིང་འགྲོ་བའི་ས་རྩུབ་པོ་རྐང་པ་ལ་གནོད་པ་ཡོད་ན་རྩྭ་དང་ལོ་མ་རྐང་པ་ལ་འཇམ་པའི་ཕྱིར་བཏིང་ཡང་ཉེས་མེད་དོ། །དེ་དག་ཀྱང་དོར་རོ། །སཱུ་ཏྲ་ལྟག་

མ་ལྟར་འཆག་སར་རྩྭ་བཏིང་པ་ཡང་བསྡུས་ལ་དོར་རོ། །དགོན་པར་བཏིང་པ་ལས་མ་བརྟུལ་ན་ཉེས་བྱས་སོ། །མདོར་ན་དོར་བ་དག་དོར་ཏེ་བྱར་མི་རུང་བར་མ་གྱུར་པ་དག་གོ། །རྩྭ་བསྡུ་ཞིང་དོར་དགོས་པ་ནི་མ་རུལ་ཅིང་མ་གྲུགས་པ་བསྡུར་རུང་ཞིང་དོར་དུ་ཡོད་པ་ནི་བསྡུ་ཞིང་དོར་རོ། །རུལ་

ཞིང་བསྡུར་མི་རུང་བ་ནི་མ་བསྡུས་ཀྱང་ཉེས་མེད་དོ། །གཞན་དུ་ན་དུས་དུས་སུ་བརྟག །རྩྭ་དང་ལོ་མ་ལ་སོགས་པ་བཏིང་ཞིང་སྤྱོད་པ་མ་རུལ་ཞིང་སྤྱད་དུ་རུང་བ་ནི་སྲིན་བུ་ཞུགས་སམ་མ་ཞུགས་དུས་དུས་སུ་བརྟག་ཅིང་བལྟའོ། །བརྗེ་བའི་ཡང་ངོ་། །སཱུ་ཏྲ་ལྟག་མ་ལྟར་རྩྭ་བཏིང་བ་

Vol. 165 · folio 130b

བརྟགས་ན་སྲིན་བུ་འཇུག་ཏུ་བྱེད་དམ་རྙིངས་ན་སར་པ་དང་བརྗེ། འཇམ་པོ་སྣུམ་པོའི་ས་ན་ཉིན་རེའོ། །ས་ཚན་ཡོད་ཅིང་གཤེར་བ་དང་འཇམ་པོ་དུལ་དུལ་པོར་འཇུག་པ་ནི་སྲིན་བུ་མྱུར་དུ་འཇུག་པའི་ཕྱིར་ཉིན་རེ་ཞིང་ལན་རེ་བལྟའོ། །གཞན་དུ་ན་ཟླ་བ་ཕྱེད་ཅིང་ངོ་། །གསེག་མའམ་བྱེ་མའམ་ས་

མཁྲང་པོ་མྱུར་དུ་སྲིན་བུ་མི་ལྡང་བ་ནི་རྩའམ་ལོ་མ་བཏིང་ན་ཟླ་བ་ཕྱེད་ཅིང་བལྟའོ། །འཆག་ན་ཐག་པས་བཅིངས་པའི་རྩྭའི་བམ་པོ་ཤིང་ལ་འཕྱང་ཞིང་བཞག །དགོན་པའི་འཆག་སར་རྩྭ་བཏིང་ངམ་གདིང་དགོས་ན་མི་འཆག་པའི་ཚེ་རྩྭ་བསྡུས་ཏེ་བཅིངས་ལ་བཏགས་ཏེ་བཞག་རྩྭ་བམ་གྱི་སྟན་

གྲོགས་པོ་དག་འོང་བའི་ཕྱིར་གདིང་དགོས་པས་ཤིང་ལ་བཏགས་ཏེ་བཞག །དེ་ལྟར་ཤིང་ལ་བཏགས་པ་ནི་མི་འདྲུལ་བ་དང་སྲིན་བུ་མི་འཇུག་པའི་ཕྱིར་རོ། །གྱོ་མོར་ལྕི་བ་བཞག །བ་ལང་གི་ལྕི་བ་སྲིན་བུ་མི་འཇུག་པར་བྱ་བའི་ཕྱིར་གྱོ་མོ་དང་ཤིང་ལེབ་དང་རྡོ་ལེབ་ཀྱི་སྟེང་དུ་བཞག་སྔར་འདས་པ་

སོང་ཤིག་ཅེས་པ་ཕན་ཆད་དོ། །རྟག་ཏུ་ཁྲི་སྟན་གྱི་བཤད་པ་མགོ་མན་ཆད་ཁས་བླངས་ནས་དེར་ཕྱིན་ན་བྱ་ཞེས་ཟེར་བ་ཡན་ཆད་ཡན་ལག་བཤད་པ་ཀུན་རྩྭ་བཏིང་ངམ་ལོ་མ་བཏིང་བ་མ་བརྟུལ་བར་སོང་ན་ལྟུང་བར་འགྱུར་བའི་ཡན་ལག་བཤད་པ་དང་འདྲའོ། །མཉམ་པར་སྤྱད་ན་མཚུངས་པར་རོ། །

དགེ་སློང་གཉིས་ཤིག་རྩྭ་བཏིང་བ་ལ་ལྷན་ཅིག་སྤྱོད་སྤྱོད་ན་གཉིས་ཀས་བསྡུས་ཏེ་དོར། དགེ་འདུན་གྱི་མ་ཡིན་ན་བདག་པོ་ལ་ཞུས་ཏེའོ། །དགེ་འདུན་གྱི་གནས་མ་ཡིན་པ་ཁྱིམ་པ་ལ་སོགས་པའི་ཁྱིམ་དུ་རྩྭ་བཏིང་སྟེ་སྤྱོད་སྤྱོད་པ་ལས་དོར་དུ་མི་ཁོམ་པར་གུད་དུ་རིང་བར་འགྲོ་ན་ཁྱིམ་པ་ཉིད་

ལ་རྩྭ་བོར་ཅིག་ཅེས་བཅོལ་ཏེ་དོར་རོ་ཞེས་ཁས་བླངས་ན་མ་བོར་བར་སོང་ཡང་ཉེས་མེད། དགེ་འདུན་གྱི་གཙུག་ལག་ཁང་ནི་རྩ་བཏིང་བའི་ལྟུང་བར་གྱུར་པ་ནི་དགེ་འདུན་གྱི་གཙུག་ལག་ཁང་ཡང་ཡིན། ས་རྡོ་དང་བྱེ་མ་ལ་སོགས་པ་རྩྭ་བཏིང་བའི་གཞི་གསེག་མ་དང་ཁམ་བྲག་དང་བྱེ་མ་ལ་

སོགས་པ་མ་ཡིན་པ། མེད་པར་ཉེས་པར་གྱུར་པར་རུང་བའི་ས་འཇམ་པོའམ་སྣུམ་པ་སྲིན་བུ་ལྡང་བར་འགྱུར་བ་ལ་བདག་གིས་སམ། རྩྭ་དང་ལོ་མ་བདག་གིས་བཏིང་ངམ་བསྐོས་ཏེ་བྱས་པའི་གདིང་བ་ནི་བྱེད་དོ། །གཞན་གདིང་དུ་བཅུག་པ་ལས་མ་བརྟུལ་ན་ལྟུང་བར་འགྱུར་རོ། །གདིང་བའི་

Vol. 165 · folio 131a

ལྟུང་བའོ། །རྩྭ་དང་ལོ་མ་བཏིང་བའི་ལྟུང་བ་རྫོགས་སོ།། །།སྐྲོད་པ་ལ་འཆད་དེ། དགེ་སློང་དང་དགེ་འདུན་གྱི་གཙུག་ལག་ཁང་ལས་བྱེད་དོ། །དགེ་སློང་གི་དགེ་འདུན་གྱི་གཙུག་ལག་ཁང་ན་དགེ་སློང་གནས་གནས་པ་ལས་བསྐྲད་དམ་སྐྲོད་དུ་བཅུག་ན་ཁྲོ་བའི་

སེམས་ཀྱིས་ཁོན་གྱི་ཕྱིར་མ་བྱས་ཀྱང་ལྟུང་བའོ། །དེ་སྟེ་དེ་ན་གནོད་པའམ། ཁང་པ་རྡིབ་ཏུ་འོང་བ་དང་ཆུ་དང་མེ་ལ་སོགས་པ་དབྱུང་བའི་ཕྱིར་གནས་སྤོས་པ་དང་། དགེ་འདུན་འཁྲུག་པ་འབྱུང་སྟེ། དགེ་སློང་གནས་དེ་ནས་མ་ཕྱུང་ན་དགེ་འདུན་ལ་གནོད་པའམ་འཁྲུག་པ་འབྱུང་སྟེ་ཕྱུང་བ་

དང་། མི་ཞིའམ། མ་ཕྱུང་ན་དགེ་འདུན་འཁྲུག་པ་མི་ཞི་བའི་ཕྱིར་ཕྱུང་བ་དང་། བྱེད་པར་འདོད་ན་མ་ཡིན་ནོ། །སྨན་དཔྱད་ལ་སོགས་པ་བྱ་བའི་ཕྱིར་གནས་སྤོས་པ་དང་འདི་རྣམས་ཀྱི་རྐྱེན་མ་ཡིན་པར་དགེ་སློང་བསྐྲད་ན་ལྟུང་བར་འགྱུར་ཏེ་ཡན་ལག་གཅིག །འབྱུང་བའོ། །གཙུག་ལག་ཁང་

ནས་ཀྱང་དགེ་སློང་ཕྱུང་ན་ལྟུང་བར་འགྱུར་ཏེ་ཡན་ལག་གཅིག །གཞན་གྱིས་ཀྱང་ངོ་། །གཞན་ལ་དགེ་སློང་སྐྲོད་དུ་བཅུག་ནའང་ལྟུང་བར་འགྱུར། །ཕ་རོལ་གྱི་ཕྱིར་ཡང་ངོ་། །གཞན་གྱིས་བདག་སྐྲོད་དུ་བཅུག་གམ་བདག་ཉིད་ཀྱིས་བསྐྲད་ཀྱང་རུང་ལྟུང་སྟེ་སཱུ་ཏྲ་འདི་གཉིས་ལ་ཡན་ལག་གཅིག །

གཙུག་ལག་ཁང་ཡིན་པ་དང་ཡན་ལག་འདི་ལྔ་དང་ལྡན་ན་ལྟུང་བར་འགྱུར་རོ། །དགེ་སློང་མ་དང་དགེ་ཚུལ་ཕ་དང་དགེ་ཚུལ་མ་དག་གིས་ནི་ཉེས་བྱས་པའོ། །དགེ་སློབ་མ་དང་། དགེ་སྦྱོང་མ་དང་དགེ་སྦྱོང་ལ་དགེ་སློང་སྐྲོད་དུ་བཅུག་ན་དགེ་སློང་སྐྲོད་དུ་བཅུག་པ་ནི་ལྟུང་བ་དགེ་སྦྱོང་དག་ལ་ནི་

ཉེས་བྱས་སོ། །འདི་དག་ཀྱང་ངོ་། །དགེ་སློབ་མ་དང་དགེ་སྦྱོང་མ་དང་དགེ་སྦྱོང་བསྐྲད་ན་ཉེས་བྱས་སོ། །རྩེད་མོ་ན་ཡང་ངོ་། །སྙིང་ནས་བསྐྲད་པ་ནི་མ་ཡིན་གྱི་རྩེད་མོའི་ཕྱིར་བསྐྲད་པ་ནི་ཉེས་བྱས་སོ། །ཁྱིམ་མི་ན་བསོད་ནམས་མ་ཡིན་པ་མང་ངོ་། །ཁྱིམ་མི་ལ་དགེ་སློང་སྐྲོད་དུ་བཅོལ་ན་དགེ་

སློང་ནི་ལྟུང་བ་ཁྱིམ་པ་ལ་ནི་ལྟུང་བའི་རིམ་པ་མེད་དེ་སྡིག་ཆེའོ། །བསྐྲད་པའོ། །བསྐྲད་པའི་ལྟུང་བ་སྟེ་རྫོགས་སོ།། །།ཕྱིས་གནོན་གྱི་ལྟུང་བ་ལ་འཆད་དེ། འབྷིད། དགེ་འདུན་གྱི་གཙུག་ལག་ཁང་ན་དགེ་སློང་སྔ་ན་འདུག་པར་ཡང་ཤེས་བཞིན་པ་དང་ཡན་ལག་གཅིག །གནས་པ་གཙུག་

Vol. 165 · folio 131b

ལག་ཁང་ན་སྔ་ན་གནས་ཤིང་འདུག་པ་ལས་བསྐྲད་པར་མནན་ན་ལྟུང་བར་འགྱུར་ཏེ་ཡན་ལག་གཅིག །དགེ་སློང་གིས་དགེ་འདུན་གྱི་གཙུག་ལག་ཁང་ནང་གི་གནས་ནའོ། །བདག་གིས་ཕ་རོལ་དགེ་སློང་ཡང་ཡིན་པ་མནན་ཅིང་བསྐྲད་ན་ལྟུང་བར་འགྱུར་ཏེ་ཡན་ལག་གཅིག །དགེ་འདུན་

གྱི་གཙུག་ལག་ཁང་ཡང་ཡིན་པ་ལས་མནན་ན་ལྟུང་བར་འགྱུར་ཏེ་ཡན་ལག་གཅིག །ནན་གྱིས་པ་སྟེ་བསྐྲད་ཅིང་དབྱུང་བའི་ཕྱིར་ནན་གྱིས་མནན་ན་ལྟུང་བར་འགྱུར་ཏེ། ཡན་ལག་གཅིག །ནད་དང་འཇིགས་པའི་དབང་གིས་ནོན་པ་བཏང་སྟེའོ། །ནད་དང་འཇིགས་པའི་རྐྱེན་ལ་སོགས་པ་མེད་པར་

ནན་གྱིས་མནན་ཅིང་བསྐྲད་ན་ལྟུང་སྟེ། ཡན་ལག་གཅིག་སྟེ། ཡན་ལག་འདི་རྣམས་དང་ལྡན་ན་ཕྱིས་གནོན་གྱི་ལྟུང་བར་འགྱུར། དཔེ་འདི་བཞིན་ཏེ་བཟློག་པར་འདོད་པས་དགེ་སློང་ལ་བཟློག་པའོ། །བསྒོ་བ་ལ་ལན་ལོག་པར་སྨྲས་ན་ལྟུང་བར་འགྱུར་བ་བཞིན་དུ་དགེ་སློང་ལ་ལོག་པར་གནོད་

པ་བྱས་ན་ལྟུང་བར་འགྱུར་ཏེ་ཨུ་ད་ཡིས་བདག་གི་སློབ་མ་ལ་ཀླན་ཀ་བཙལ་ནས་ཁྱེད་ཁང་པའི་ནང་ན་འཁོད་པའི་མི་རིགས་ཀྱི་མཁྲིས་པའི་ནད་རྒྱས་ཀྱི་ཕྱི་རོལ་ན་འཁོད་ཅིག་ཅེས་ལྷགས་པ་ལ་བཞག་སྟེ་གནོད་པར་བྱས་པ་དང་བད་ཀན་གྱི་ནད་རྒྱས་ཏེ་ཚ་བ་ལ་འཁོད་ཅིག་ཅེས་གནོད་པ་བྱས་པ་དང་

དགེ་འདུན་རྐུན་པོས་འཇིགས་ཏེ་ཕྱི་རོལ་དུ་ཟར་དུ་མི་རུང་བའི་ཕྱིར་ནང་དུ་གྱོ་མོ་བཞག་སྟེ་བཤང་བ་ལས་གཙུག་ལག་ཁང་བརྩིག་གོ་ཞེས་ཨུ་ད་ཡིས་གྱོ་མོ་དེ་བོར་ཏེ་ཕྱི་རོལ་ཆེ་ཆུང་ནང་དུ་སྟོར་སྟེ་གནོད་པ་བྱས་པ་ལ་སོགས་པ་ལྟ་བུ་དགེ་སློང་ལ་གནོད་པར་བྱེད་པའི་ཕྱིར་ལོག་པའི་ཐབས་ཀྱིས་བྱས་

ན་གག་ཀྱང་རུང་སྟེ་ལྟུང་བའོ། །ནན་གྱིས་མནན་པའོ། །ཕྱིས་གནོན་པའི་ལྟུང་བ་སྟེ་རྫོགས་སོ།། །།གཟེར་མེད་ཀྱི་ལྟུང་བ་ལ་འཆད་དེ། དགེ་འདུན་གྱི་གཙུག་ལག་ཁང་གི་སྟེང་དུ་ན་བྱེད་དོ། །དགེ་འདུན་གྱི་གཙུག་ལག་ཁང་ཡང་ཡིན་པ་ལས་ལྟུང་བར་གྱུར་ཏེ་ཡན་ལག་གཅིག །བླ་

རྫང་ཁང་ཐོག་ཏུ་ཉལ་བ་ལས་ལྟུང་བར་འགྱུར་ཏེ་ཡན་ལག་གཅིག །འོན་ཏེ་གུར་ཁང་ན་མ་ཡིན་ནོ། །ཤིང་མེད་པའི་ས་ཁང་དུ་གུར་འདྲ་བར་ཕུབ་པ་ཁྲིའི་རྩ་བས་མི་རྟོལ་བའི་ཁང་པ་ལ་ཉལ་བ་ནི་ལྟུང་བ་མེད། དེའི་སྟེང་རྣམ་པར་གཡོགས་པ་ན་ཡང་ངོ་། །ཁང་པ་གཞན་གྲལ་བུ་དང་འཇི་བ་

Vol. 165 · folio 132a

ལ་སོགས་པས་གཡོགས་ཤིང་ཁྲི་རྩ་བས་མི་ཕུག་པ་ཡང་ལྟུང་བར་མི་འགྱུར། ཁྲིའི་རྐང་པ་གཟེར་བུ་ཅན་ན་ཡང་ངོ་། །ཁྲིའི་རྐང་པ་གཟེར་བུ་དང་ཁྲིའུ་ལ་སོགས་པས་བཏབ་ཅིང་མི་ལྟུང་བ་ལ་ཁང་ཐོག་ཏུ་ཉལ་བའང་ལྟུང་བར་མི་འགྱུར་རོ། །གན་རྐྱལ་བཏང་སྟེའོ། །ཁྲི་

གཟེར་བུ་མེད་ཀྱང་གན་རྐྱལ་དུ་བཞག་སྟེ་སྟེང་དུ་ཉལ་ཡང་ལྟུང་བར་མི་འགྱུར། རྐང་པའི་སོ་སོར་བཞག་ན་ཡང་ངོ་། །ཁྲིའི་གཟེར་བུ་མེད་ཀྱང་ཁྲིའི་རྐང་པ་བཞིའི་འོག་ཏུ་སོ་ཕག་གམ་ཤིང་ལེབ་ལ་སོགས་པ་བཞག་སྟེ་རྩ་བ་མི་ལྟུང་བ་ལ་ཉལ་བའང་ཉེས་མེད་དོ། །སཱུ་ཏྲ་འདི་རྣམས་ལྟ་

བུ་མ་ཡིན་པ་ལ་ཉལ་བ་ནི་ལྟུང་བར་འགྱུར་ཏེ་ཡན་ལག་གཅིག །མནན་པའོ། །འོག་ན་ཉལ་བ་ལ་གནོད་པར་བྱ་བའི་ཕྱིར། ཁྲི་ལ་དྲག་ཏུ་མནན་པ་ལས་ལྟུང་བར་འགྱུར་ཏེ། ཡན་ལག་གཅིག །འབྷིད་དོ། །དགེ་འདུན་གྱི་གཙུག་ལག་ཁང་ཡིན་པར་ཤེས་ཏེ། འོག་ན་མི་ཡོད་པ་ལས་

ལྟུང་བར་འགྱུར་ཏེ། ཡན་ལག་གཅིག །ཡན་ལག་འདི་རྣམས་དང་ལྡན་ན་གཟེར་མེད་ཀྱི་ལྟུང་བའོ། །རྐང་པ་གཟེར་བུ་ཅན་ལ་འཛེག་པའོ། །གཟེར་མེད་པའི་ལྟུང་བ་སྟེ་རྫོགས་སོ།། །།འདེབས་པའི་ལྟུང་བ་ལ་འཆད་དེ། བདག་སྤྱོད་པའི་ཕྱིར་ས་ལས་གཞན་པའོ། །བདག་གིས་ལུས་ཀྱི་

ཕྱིར་སྤྱོད་པའི་ཆུ་ལས་གཞན་པ་ཆག་ཆག་པ་དང་མཎྜལ་དང་འཇི་བ་བྱེད་པ་ལ་སོགས་པའི་ཆུ་སྲིན་བུ་ཡོད་པར་ཤེས་བཞིན་དུ་སྤྱད་ན་ལྟུང་བར་འགྱུར་ཏེ་སེམས་ཅན་མེད་ལ་ཡོད་པར་བསམས་ཏེ་སྤྱད་ན་ཉེས་བྱས་པའོ། །སེམས་ཅན་ཡོད་པ་ལ་ཡོད་པར་ཤེས་བཞིན་དུ་སྤྱད་ན་ལྟུང་བའོ། །སེམས་ཅན་

ཡོད་ལ་ཡོད་དམ་མེད་ཐེ་ཚོམ་ཟ་བཞིན་དུ་སྤྱད་ན་ལྟུང་བའོ། །སེམས་ཅན་མེད་ལ་མེད་པར་ཤེས་བཞིན་དུ་སྤྱད་ན་ཉེས་མེད་དོ། །སྲོག་ཆགས་དང་བཅས་པའི་དགོས་པའོ། །སེམས་ཅན་དང་བཅས་པར་སྤྱོད་པ་རྫོགས་སོ།། །།རིམ་གཉིས་འདོད་པའི་ལྟུང་བ་ལ་འཆད་དེ། སྒོའི་རེ་བཞི་བྱས་

ཏེ་བསྒྲུབ། དགེ་སློང་གིས་དགེ་འདུན་གྱི་ཕྱིར་གཙུག་ལག་ཁང་བརྩིགས་ཀྱང་རུང་གང་ཟག་གི་ཕྱིར་བརྩིགས་ཀྱང་རུང་སྒོའི་རེ་བཞི་བཅའ་ཞིང་གཞུག །གཏན་པ་ཡང་ངོ་། །སྒོའི་སྤྱིས་དང་གཏན་པ་ལ་སོགས་པའི་གནས་བཅས། སྐར་ཁུང་གདོད། ཁང་པའི་སྐར་ཁུང་ཡང་གདོད། གཙུག་

Vol. 165 · folio 132b

ལག་ཁང་ལས་བྱེད་དོ། །གཙུག་ལག་ཁང་བརྩིགས་པ་ལས་ལྟུང་བར་འགྱུར་ཏེ་ཡན་ལག་གཅིག །སྤྱོད་ལམ་བཞིའི་སྣོད་དང་སྤྱོད་ལམ་བཞི་པོ་ཤོང་བ་མན་ཆད་ནི་ཉེས་མེད་སྤྱོད་ལམ་བཞི་ལས་ལྷག་པར་བརྩིགས་པ་ལས་ལྟུང་བར་འགྱུར་ཏེ་ཡན་ལག་གཅིག །དེ་སྟེ་ཐམས་ཅད་རྡོས་

སམ་སོ་ཕག་གིས་སམ་ཤིང་གིས་ན་མ་ཡིན་ནོ། །རྡོ་འབའ་ཞིག་གིས་སམ་ཤིང་འབའ་ཞིག་གིས་སམ་སོ་ཕག་འབའ་ཞིག་གིས་བརྩིགས་པ་ནི་ཉིན་གཅིག་ལ་ཇི་ཙམ་བརྩིགས་ཀྱང་ལྟུང་བར་མི་འགྱུར་ཏེ་འཇི་བ་དང་ཕ་གུ་གྲངས་ལས་ལྷག་པར་བརྩིགས་ན་ལྟུང་བར་འགྱུར་ཏེ་ཡན་ལག་གཅིག །

ཆར་ཁབ་བམ་གཡོགས་མས་སོ། །ཆར་ཁབ་བམ་གཡོགས་མ་ཡོད་ན་ནི་ཉེས་མེད་དེ། ཆར་ཁབ་མེད་པར་ཕ་གུ་དང་འཇི་བ་ལས་བརྩིགས་ན་ལྟུང་བར་འགྱུར་ཏེ་ཡན་ལག་གཅིག །བྱས་སམ་ཟིན་པར་མཐོང་སྟེ་སྦྱིན་པའི་བདག་པོ་ལ་མ་སྨྲས་ནའོ། །ཁང་པ་རྩིག་པའི་ཡོན་བདག་གུད་དུ་འགྲོ་

སྟེ་ང་སླར་འོངས་པའི་ཁར་ཟིན་པར་བྱོས་ཤིག་ཅེའམ་འགྲོ་ཁར་མཐོང་བར་དགོས་ཀྱིས་རིང་དུ་ཟིན་པར་རྩིག་ཏུ་བཅུག་པ་ནི་ཆུ་ཁུང་དང་སྐུར་ཁུང་ལ་སོགས་པ་མ་བཏོད་པར་རིམ་གསུམ་ལས་འདས་པར་བརྩིགས་པ་ནི་ལྟུང་བར་མི་འགྱུར་ཏེ་རིང་པར་རྩིགས་ཤིག་པར་མ་བསྒོས་པར་རིམ་གསུམ་ལས་

འདས་པར་བརྩིགས་ན་ལྟུང་བར་འགྱུར་ཏེ་ཡན་ལག་གཅིག །ཕ་གུ་རིམ་གསུམ་འཁོར་བ་ལས་འདས་པར་བསྒྲུབས་ནའོ། །ཉིན་གཅིག་ལ་ཕ་གུ་རིམ་གསུམ་ལས་ལྷག་པར་བརྩིགས་ན་ལྟུང་བར་འགྱུར་ཏེ་ཡན་ལག་གཅིག །གཞན་གྱིས་ཀྱང་ངོ་། །གཞན་ཞིག་ལ་བརྩིགས་ཏུ་བཅུག་སྟེ་

རིམ་གསུམ་ལས་ལྷག་པར་བརྩིགས་ན་ལྟུང་བར་འགྱུར་རོ། །དེའི་ཉི་མ་ལའོ། །ཕ་གུ་རིམ་གསུམ་ལས་ལྷག་པར་འདོར་བ་ཡང་ཉི་མ་གཅིག་ལ་གསུམ་ལས་ལྷག་པར་བོར་ན་ལྟུང་བར་འགྱུར་ཏེ་ཡན་ལག་གཅིག །གཞན་དུ་ཡང་འཇིམ་པ་མེད་པར་ནའོ། །སོ་ཕག་མ་ཡིན་པ་ཕ་གུ་ཐ་མལ་

པ་འབའ་ཞིག་འཇི་བ་མེད་པར་བརྩིགས་ནའང་ལྟུང་བར་འགྱུར་ཏེ་རིམ་གསུམ་ལས་འདས་པར་བརྩིགས་པ་ལས་ལྟུང་བར་འགྱུར་རོ། །སྟོར་ཁུང་མ་བཏོད་ན་ཡང་ངོ་། །ཆུ་འགྲོ་བའི་སྟོར་ཁུང་མ་བཏོད་པར་བརྩིགས་པ་ནི་ཉིན་གཅིག་ལ་ཕ་གུ་རིམ་གསུམ་ལས་ལྷག་པར་བརྩིགས་ན་ལྟུང་།

Vol. 165 · folio 133a

སྟོར་ཁུང་བཏོད་ན་ནི་རིམ་བཞིན་དུ་བརྩིགས་ཀྱང་ཉེས་མེད། རྨང་སམ་བརྐོས་པར་བཏིང་ན་ཡང་ངོ་། །རྨང་གི་ས་མ་བརྐོས་པར་རྨང་བཏིང་བ་རིམ་གསུམ་འདས་ན་ལྟུང་སྟེ་རྨང་བརྐོས་ལ་སྟོར་ཁུང་མན་ཆད་རྨང་ལ་ཕ་གུ་རིམ་དུ་བོར་ཡང་ཉེས་མེད། སྒོའི་ཁ་ཁྱེར་སྟེང་མ་

ཡང་ངོ་། །སྒོའི་ཁ་ཁྱེར་མ་བཅུག་པར་ཁ་ཁྱེར་གྱི་ས་ནས་ཕ་གུ་རིམ་གསུམ་ལས་འདས་པར་བརྩིགས་ན་ལྟུང་། ཁ་ཁྱེར་བཅུག་ན་རིམ་དུ་བརྩིགས་ཀྱང་ཉེས་མེད་དོ། །ཉེས་མེད་པ་ནི་སྔ་མའི་ཐོག་མའོ། །ཆུ་ཁུང་མ་བཏོད་དམ་ཁ་ཁྱེར་མ་བཅུག་པར་རིམ་གསུམ་ལས་འདས་ཏེ་རིམ་བཞི་

བོར་ན་ནི་ལྟུང་བ། རིམ་གསུམ་བོར་བ་ཕན་ཆད་བོར་བ་ནི་ཉེས་མེད། རིམ་བཞིན་འདོར་བའི་ཚེ་ཉེས་བྱས་སོ། །བཙུག་ལག་ཁང་གི་ལྟུང་བའོ། །རིམ་གཉིས་འདོར་བའི་ལྟུང་བ་སྟེ་རྫོགས་སོ།། །།མ་བསྐོས་པའི་ལྟུང་བ་ལ་འཆད་དེ། ཕས་ཕམ་མདོ་སྡེ་དང་འདུལ་བ་དང་མ་མོ་ལྟ་བུ་འཛིན་པ་ལོ་

ཉི་ཤུ་ལས་མི་ཉུང་བ་གྲོང་ཁྱེར་གྱི་སྨྲ་བ་དགེ་སློང་མ་དང་ལུས་ཕྲད་པ་བཤགས་པ་བྱས་པ་དགེ་སློང་མ་ལ་སྟོན་པར་བསྐོས་པའོ། །དགེ་སློང་མའི་དགེ་འདུན་ལ་བཅུ་བཞི་དང་བཅོ་ལྔའི་གསོ་སྦྱིན་གྱི་ཚེ་རྟག་ཏུ་ཆོས་འཆད་པར་དགེ་སློང་ལས་བསྐོ་དགོས་ཏེ་དགེ་སློང་བཀོ་བའི་ཕས་ཕམ་པ་མ་བྱུང་བ་

མདོ་སྡེ་དང་འདུལ་བ་དང་མ་མོ་ལྟ་བུ་མཁས་ཤིང་འཛིན་པ་ཁྲིམས་ཚང་ནས་ལོ་ཉི་ཤུ་ལོན་པ་ཡུལ་གྱི་དབུས་ཀྱི་སྐད་དང་ལྡན་ཞིང་དོར་བ་དང་ལྡིང་པ་ལ་སོགས་པ་མེད་པ་དང་དགེ་སློང་མ་དང་སྔོན་ཆད་ལུས་མ་རེག་པ་དང་ལུས་རེག་ཀྱང་བཤགས་པ་བྱས་ཟིན་པ་མིང་གིས་སྨོས་པ་འདི་རྣམས་དང་ལྡན་ན་དགེ་

སློང་མ་ལ་བཅུ་བཞི་འམ་བཅོ་ལྔའི་ཚེ་ལ་ཆོས་འཆད་པར་དགེ་འདུན་གྱིས་བསྐོས་ཀྱང་རུང་ངོ་། །འདི་རྣམས་དང་ལྡན་པའི་དགེ་སློང་དེས་ཆོས་འཆད་ཀྱང་ཉེས་མེད་དོ། །དགེ་འདུན་གྱིས་དགེ་སློང་མ་ལ་ཆོས་བཤད་པར་བསྐོས་ཀྱང་བཅུ་བཞིའམ་བཅོ་ལྔའི་གསོ་སྦྱིན་གྱི་ཚེའི་དུས་སུ་རྟག་ཏུ་འཆད་

ལ་དབང་གི་དུས་སུ་དེ་མ་ཡིན་པར་རྟག་ཏུ་འཆད་དུ་མི་དབང་ངོ་། །གསོ་སྦྱིན་བཅོ་ལྔ་པའི་མཚམས་ཀྱི་ནང་དགེ་སློང་མ་ལ་ཆོས་འཆད་པའི་དགེ་སློང་མས་གང་བསྐོ་བ་ཡང་བཅུ་བཞི་འམ་བཅོ་ལྔའི་གསོ་སྦྱིན་གྱི་ཚེ་དགེ་སློང་མས་གསོལ་བ་བཏབ་ན་མཚམས་ཀྱི་ནང་དུ་དགེ་འདུན་གྱིས་གསོལ་བ་དང་

Vol. 165 · folio 133b

ཞུ་བའི་ལས་ཀྱིས་འཆད་པར་བསྐོའོ། །མཚམས་ཀྱི་ཕྱི་རོལ་ལམ་བཅུ་བཞི་དང་བཅོ་ལྔའི་ཚེ་མ་བསྐོས་ན་བསྐོས་པར་མི་ཆུད་དོ། །མདོ་སྡེ་ལ་སོགས་པ་དང་འཛིན་པ་མེད་ན་སོ་སོར་ཐར་པ་ཐོན་པའོ། །དགེ་སློང་གི་ནང་ན་སཱུ་ཏྲ་ལྟག་མའི་ལྟག་མ་ལྟར་བཤད་པ་དང་ལྡན་པ་མེད་ན་ལོ་ཉི་ཤུ་

ལོན་པ་ཕས་ཕམ་པ་མ་བྱུང་དགེ་སློང་མ་དང་མ་རེག་སྐད་མི་དོར་བ་བཞི་དང་ལྡན་ན་དགེ་སློང་ཕ་དང་དགེ་སློང་མའི་སོ་སོར་ཐར་པ་ཁ་ཏོན་དུའང་ཤེས་ཤིང་འཆང་ནུས་ན་བསྐོར་རུང་ངོ་། །དེ་ཡང་ན་ཕས་ཕམ་པ་བཤད་སཱུ་ཏྲ་ལྟག་མ་ལྟར་ནུས་པ་མེད་ན་ཡང་ལོ་ཉི་ཤུ་ལོན་པ་ཕས་ཕམ་

པ་མེད་སྐད་མི་དོར་དགེ་སློང་མ་དང་རེག་པ་མ་ཡིན་ན་དགེ་སྦྱོང་མའི་ཕས་ཕམ་པ་བརྒྱད་འཆད་ནུས་པ་ཡང་བསྐོར་རུང་ངོ་། །ཆོས་ལྕི་བ་ཡང་ངོ་། །སཱུ་ཏྲ་ལྟག་མ་ལྟར་ཕས་ཕམ་པ་འཆད་ནུས་པའང་མེད་ན་ལོ་ཉི་ཤུ་ལོན་ཞིང་ཕས་ཕམ་པ་མེད་པ་དགེ་སློང་མ་དང་མ་རེག་པ་དང་སྐད་མ་དོར་བའང་

དགེ་སློང་མའི་ལྕི་བ་བརྒྱད་འཆད་ནུས་པའང་བསྐོར་རུང་ངོ་། །ཕྱི་མའི་ནི་ཅི་སྲིང་མོ། །དགེ་སློང་མ་ལ་ཆོས་འཆད་པར་བསྐོ་བ་རྟག་ཏུ་བཤད་པ་དག་དང་ལྡན་པ་མེད་ན་སཱུ་ཏྲ་འདི་ལས་འབྱུང་བ་རྣམས་དང་ལྡན་ན་བསྐོར་རུང་ངོ་། །ཁྱེད་དགེ་སློང་མའི་དགེ་འདུན་འདུས་སམ། དགེ་སློང་མའི་དགེ་

འདུན་ཀུན་འདུས་སམ་ཞེས་ཟེར་ནུས་པ་དང་། ཀུན་གཙང་ངམ། ཁྱེད་ལ་ཕས་ཕམ་པ་དང་དགེ་འདུན་གྱི་ལྷག་མ་ལ་སོགས་པ་མེད་དམ་ཀུན་གཙང་ངམ་ཞེས་སྨྲ་ནུས་པ་དང་མཐུན་ནམ། ཁྱེད་རྣམས་ལས་བརྒྱ་རྩ་གཅིག་ལ་སོགས་པ་གཅིག་ཏུ་སྤྱོད་ཅིང་འདུའམ་ཞེས་ཟེར་ནུས་པ་དང་། ཁ་ན་མ་ཐོ་

བ་མེད་དམ་ཁྱེད་ལ་ཉེས་བྱས་ལ་སོགས་པ་ཁ་ན་མ་ཐོ་བ་མེད་དམ་ཞེས་ཟེར་ནུས་པ་དང་། ཁྱེད་ལ་ལ་ལ་དགེ་འདུན་གྱིས་མ་བསྐོས་པའི་གང་ཟག་མི་འཆད་དམ། ཁྱེད་ལ་དགེ་འདུན་གྱིས་གསོལ་བ་དང་ཞུ་བས་བསྐོས་པ་མ་ཡིན་པའི་དགེ་འདུན་ཆོས་འཆད་དུ་མི་འོང་ངམ་ཞེས་ཟེར་ནུས་པ་དང་། ཁྱེད་

དགེ་འདུན་ལས་གང་ཟག་འཆད་པ་མི་འོང་ངམ། དགེ་འདུན་གྱིས་ཆོས་འཆད་པར་མ་བསྐོས་པའི་དགེ་སློང་མི་འོང་ངམ་ཞེས་ཟེར་ནུས་པ་དང་། ཁྱེད་ལ་འཆད་པ་ནི་དགེ་སློང་སུའང་མི་སྤྲོ་སྟེ། ཁྱེད་ལ་དགེ་འདུན་གྱིས་བསྐོས་པའི་དགེ་སློང་འཆད་དུ་མི་སྤྲོ་སྟེ་མི་བཏུབ་པ་མེད་

Vol. 165 · folio 134a

དམ་ཞེས་འདྲི་ནུས་པ་ལའང་བྱ། ཁྱེད་ནི་མ་རབས་རིགས་དམའ་བ་ཡིན་པས་ན་ཁྱེད་ལ་ཆོས་འཆད་པ་ནི་དགེ་སློང་སུའང་འཆད་དུ་མི་སྤྲོའོ་ཞེས་ཟེར་ནུས་པ་ལའང་བྱ་སྟེ་འདི་རྣམ་གཉིས་ལྟར་སྨྲ་ནུས་པ་དང་། དགེ་འདུན་ལས་ཁྱེད་བཤད་ཅིང་བསྟན་པ་སྟེ། ཁྱེད་དགེ་འདུན་

གྱིས་ཆོས་བཤད་ཅིང་བསྟན་པ་ཡིན་ན་ཁྱེད་ལ་དགེ་འདུན་གྱི་ལས་ཆོས་འཆད་ཅིང་སྟོན་པ་མི་འོང་བའམ་ཞེས་ཟེར་ནུས་པའང་བྱ། དགེ་འདུན་གྱིས་ཁྱེད་ལ་ཆོས་བཤད་པའང་ཐོས་པར་དཀའ་སྟེ་རེས་འགའ་འཆད་པ་ཡིན་གྱིས་ཤེས་པར་སྨྲ་ནུས་པ་དང་། སྲིང་མོ་དག་བག་ཡོད་པར་སྒྲུབས་ཤིག་

ཅེས་སོ། །ཁྱེད་ཀྱིས་མཉན་པ་དང་འཆད་པ་ལ་གཟུངས་སུ་འཛིན་ཅིང་གོ་བ་དང་བཤད་པ་བཞིན་དུ་བག་ཡོད་པར་ནན་ཏན་དུ་སྒྲུབས་ཤིག་ཅེས་བསྒོ་ནུས་པ་དང་མིང་གིས་སྨོས་པའི་ཚིག་འདི་རྣམས་དང་ལྡན་ཞིང་ལོ་ཉི་ཤུ་ཚང་ལ་ཕས་ཕམ་པ་མེད་ཅིང་དགེ་སློང་མ་དང་མ་རེག་ལ་སྐད་མི་དོར་ན་བསྐོར་

རུང་ངོ་། །བླ་མའི་ཆོས་དང་ནུས་པ་མ་གཏོགས་སོ། །དགྲ་བཅོམ་པའི་ཆོས་ཐོབ་ཅིང་དྲུག་མངོན་པར་ཤེས་པ་དང་ལྡན་པ་ནི་དགེ་འདུན་གྱིས་མ་བསྐོས་པར་བཤད་ཀྱང་ཉེས་མེད་དེ་བླ་མའི་ཆོས་དང་མི་ལྡན་པས་དགེ་འདུན་གྱིས་མ་བསྐོས་པར་དགེ་སློང་མ་ལ་འཆད་ན་ལྟུང་བར་གྱུར་ཏེ་ཡན་ལག་གཅིག །

གཅིག་ཀྱང་མེད་པར་དགེ་སློང་མ་ལ་དེ་བསྐོས་པ་དང་མ་བསྐོས་ཀྱང་ངོ་། །རྟག་ཏུ་བཤད་པ་གང་དང་ཡང་མི་ལྡན་པར་དགེ་འདུན་གྱིས་བསྐོས་ཏེ་བཤད་ཀྱང་ལྟུང་། མ་བསྐོས་པར་བཤད་ཀྱང་ལྟུང་བར་འགྱུར་རོ། །སྔོན་བསྐོས་པ་ནི་མ་བསྐོས་པ་མ་ཡིན་ནོ། །བཅུ་བཞི་འམ་བཅོ་ལྔའི་གསོ་སྦྱིན་གྱི་

ཚེ་གསོལ་བ་དང་ཞུ་བའི་ལས་ཀྱིས་དགེ་སློང་མ་ལ་ཆོས་འཆད་པར་བསྐོས་པ་ནི་ཕྱིས་འཆད་པའི་ཚེའང་སྔར་དགེ་འདུན་གྱིས་བསྐོས་ཟིན་པས་ད་བསྐོ་མི་དགོས་སོ། །ཉེས་མེད་པ་ནི་དགེ་འདུན་དུ་མ་ཚང་བ་ལས་རིགས་པ་ལས་གསོལ་ནའོ། །དགེ་འདུན་དུ་མ་ཚང་བ་ཞིག་ལས་དགེ་འདུན་མས་

ཆོས་འཆད་པ་བསྐོར་ཅི་གནང་ཞེས་གསོལ་ན་དགེ་འདུན་དུ་མ་ཚང་བས་གོང་མའི་ཡོན་ཏན་རྣམས་དང་ལྡན་ནམ་བསྐོས་ཀྱང་ཉེས་མེད་དོ། །དེ་ཡང་ངོ་། །དགེ་སློང་ཕའི་དགེ་འདུན་མ་ཚང་བ་ལས་དགེ་འདུན་མས་ཆོས་བཤད་པར་ཅི་གནང་ཞེས་གསོལ་ཀྱང་ཉེས་མེད་དོ། །མ་བསྐོས་པར་

Vol. 165 · folio 134b

འཆད་པའོ། །དགེ་སློང་མའི་དགེ་འདུན་ལ་དགེ་སློང་གིས་མ་བསྐོས་པར་ཆོས་འཆད་པའི་ལྟུང་བ་རྫོགས་སོ།། །།ནུབ་ཀྱི་བར་དུ་འཆད་པའི་ལྟུང་བ་ལ་འཆད་དེ། འབྷིད་ཉི་མ་ནུབ་པར་ཤེས་བཞིན་དུ་འཆད་ན་ལྟུང་བའོ། །ཉི་མ་ནུབ་ནུབ་ཏུའོ། །དགེ་འདུན་གྱིས་དགེ་སློང་མ་ལ་ཆོས་འཆད་པར་

བསྐོས་པའི་དགེ་སློང་ཉི་མ་ནུབ་ཀྱི་བར་དུ་བསྒྲུབ་ནུས་པར་ཤེས་ཏེ་བཤད་ན་ལྟུང་བའོ། །ནུབ་པར་མ་ཤེས་ཏེ་བཤད་ན་ནི་ཉེས་མེད་ནུབ་བམ་མ་ནུབ་ཐེ་ཚོམ་ཟ་ཞིང་བཤད་པ་ནི་ལྟུང་བའོ། །ནུབ་མོ་ཐོག་ཐག་ཏུ་ཆོས་ཉན་ཅིང་དགེ་སློང་མ་ལ་ཆོས་འཆད་པ་ནི་མ་གཏོགས་སོ། །དགེ་སློང་མའི་གཙུག་

ལག་ཁང་དུ་དུས་ཀྱིས་མི་མང་པོ་འདུས་ཤིང་ནུབ་མོ་ཐོག་ཐག་ཏུ་ཆོས་འཆད་ཅིང་ཉན་པ་ནི་ཉི་མ་ནུབ་ཅིང་ཞག་ལོན་ཀྱང་ལྟུང་བར་མི་འགྱུར་རོ། །དེས་ཏེ་དེའི་རྣམ་པའི་ཚེ་གཙུག་ལག་ཁང་སྒོ་ཕྱེ་བའི་མདུན་ན་དབྱར་མོ་ཐང་མ་ཡིན་ནའོ། །སཱུ་ཏྲ་གོང་མ་ལྟར་ནུབ་མོ་ཐོག་ཐག་ཏུ་ཆོས་འཆད་པ་ལྟུང་བ་

མེད་པར་བཤད་པ་འང་དགེ་སློང་ཕའི་གཙུག་ལག་ཁང་དང་ཉེ་ལ་སྒོ་ཐད་ཀར་འདུག་ཅིང་མི་ཕལ་མོ་ཆེ་ཕན་ཚུན་དུ་རྒྱུ་བ་ནི་ལྟུང་བར་མི་འགྱུར་ཏེ་དེ་ལྟ་བུ་མ་ཡིན་པར་ཉི་མ་ནུབ་ནུབ་ཏུ་བཤད་པ་ནི་ལྟུང་བར་འགྱུར་རོ། །ནུབ་ཏུ་འཆད་པའོ། །ནུབ་ཀྱི་བར་དུ་འཆད་པའི་ལྟུང་བ་རྫོགས་སོ།། །།ཟས་ཀྱི་

ཕྱིར་ལྟུང་བ་ལ་འཆད་དེ། མི་འཇིགས་པའི་ཕྱིར་དགེ་སློང་ལ་ཆོས་འདྲི་ན་ཟང་ཟིང་དགེ་སློང་མས་དབུལ་བར་བྱའོ། །དགེ་སློང་མ་ཆོས་འདྲི་བ་ལ་མི་འཇིགས་ཤིང་བག་མི་ཚ་བ་དང་འདྲི་བ་སྤོབས་པར་བྱ་བའི་ཕྱིར་ཆོས་འཆད་པའི་དགེ་སློང་ལ་དགེ་སློང་མས་སྤྱན་གཟིགས་དང་ཡོ་བྱད་ཕྲན་ཚེགས་

དབུལ་ལོ། །དགེ་སློང་ནན་ཏ་ཀ་དགྲ་བཅོམ་པ་རྟག་ཏུ་དགེ་སློང་མ་ལ་ཆོས་འཆད་དེ་དགེ་སློང་མས་ཡོན་ཕྲན་ཚེགས་ཕུལ་ཡང་མི་ལེན་བཙུན་ཞིང་དགྲ་བཅོམ་པ་ཡིན་པས་དགེ་སློང་མ་ཆོས་མ་གོ་བར་སླར་འདྲི་ཡང་འཇིགས་ཤིང་མི་སྤོབས་པ་ལ་མི་འཇིགས་པར་བྱ་ཞིང་འདྲི་བ་སྤོབས་པར་བྱ་བའི་

ཕྱིར་དགེ་སློང་མས་ཀྱང་ཁ་ཟས་དང་ཡོ་བྱད་ཕྲན་ཚེགས་ཕུལ་ཅིག་ཅེས་བཅས། རྒྱ་ཅང་དང་ལན་བུ་དང་ལྕགས་པོད་དང་དྲ་བ་དག་གོ། །དགེ་སློང་མས་དགེ་སློང་ཕ་ཆོས་འཆད་པ་ལ་དབུལ་བ་ནི་མིང་གིས་སྨོས་པ་འདི་རྣམས་ལྟ་བུ་དག་དབུལ་ལོ། །དགེ་སློང་གིས་དེ་ལོངས་ཤིག །དགེ་སློང་མས་

Vol. 165 · folio 135a

སྤྱན་གཟིགས་དང་ཡོ་བྱད་ཕྲན་ཚེགས་དག་དབུལ་ཞིང་འོང་ན་དགེ་སློང་ཕས་ལོངས་ཤིག་ཅི་བླངས་ཀྱང་ཉེས་མེད་དོ། །དགེ་སློང་གིས་ཡང་དག་པ་མ་ཡིན་པར་ཟང་ཟིང་ཆུང་ཟད་ཀྱི་ཕྱིར་དགེ་སློང་མ་ལ་ཆོས་འཆད་དོ་ཞེས་སྨྲ་ནའོ། །དགེ་སློང་གིས་སྤྱན་གཟིགས་དང་ཡོ་བྱད་

ཕྲན་ཚེགས་དགེ་སློང་མ་ལས་བླངས་པ་ལ་སྙིང་རྗེ་བའི་ཕྱིར་ཆོས་བཤད་པ་ནི་མ་ཡིན་གྱི་ཡོ་བྱད་དང་ཁ་ཟས་ཙམ་གྱི་ཕྱིར་ཆོས་འཆད་དོ་ཞེས་སྐུར་པའི་ཕྱིར་སྨྲས་ན་ལྟུང་བའོ། །ཁ་ཟས་དང་ཡོ་བྱད་ཀྱི་ཕྱིར་ཆོས་འཆད་པ་ཡིན་ལ། དེའི་ཕྱིར་ཆོས་འཆད་དོ་ཞེས་བདེན་པར་སྨྲས་པ་ནི་ཉེས་མེད་

དོ། །ཟང་ཟིང་ཆུང་ཟད་ལ་སྨྲ་བའོ། །ཟས་ཀྱི་ཕྱིར་ཆོས་འཆད་དོ་ཞེས་སྨྲ་བའི་ལྟུང་བ་སྟེ་རྫོགས་སོ།། །།གོས་འཚེམ་པའི་ལྟུང་བ་ལ་འཆད་དེ། འབྷིད། གཉེན་མ་ཡིན་པར་ཤེས་བཞིན་དུ་བཙེམས་ན་ལྟུང་བར་འགྱུར་རོ། །གཉེན་མ་ཡིན་པའི་དགེ་སློང་མས། དགེ་སློང་མ་གཉེན་མ་ཡིན་

པར་ཤེས་བཞིན་དུ་དེའི་གོས་བཙེམས་ན་ལྟུང་བར་འགྱུར་རོ། །གཉེན་ཡིན་པ་ལ་མ་ཡིན་པར་བསམས་ནས་བཙེམས་ན་ཉེས་བྱས། གཉེན་མ་ཡིན་པ་ལ་ཐེ་ཚོམ་དུ་བཙེམས་ན་ལྟུང་བ། གཉེན་མ་ཡིན་པར་ཤེས་ཏེ་བཙེམས་ན་ཉེས་བྱས། གོས་བཙེམ་པ། གཉེན་མ་ཡིན་པའི་དགེ་སློང་

མའི་གོས་བདག་གིས་བཙེམས་ཏེ་ཟིན་པར་བྱས་ན་ལྟུང་བའོ། །གོས་བྱེད་པའོ། །གཉེན་མ་ཡིན་པའི་དགེ་སློང་མའི་གོས་བཙེམས་པའི་ལྟུང་བ་རྫོགས་སོ།། །།གོས་བྱིན་པའི་ལྟུང་བ་འཆད་དེ། འབྷིད། གཉེན་མ་ཡིན་པར་ཤེས་བཞིན་ལ་བྱ། བྱིན་པའོ། །གཉེན་མ་ཡིན་པའི་དགེ་

སློང་མར་ཤེས་བཞིན་དུ་དགེ་སློང་གིས་གོས་བྱིན་ན་ལྟུང་བའོ། །གོས་མ་ཡིན་པ་བྱིན་པ། དགེ་སློང་མའི་དགེ་འདུན་མ་ཡིན་པ་གཉེན་མ་ཡིན་པའི་དགེ་སློང་མའི་གང་ཟག་ལ་གོས་བྱིན་ན་ལྟུང་བར་འགྱུར་ཏེ་དགེ་འདུན་མ་ལ་གོས་དང་ཟས་ཕུལ་བ་ནི་ཉེས་མེད་དོ། །དེ་སྟེ་ཕྲོགས་པ་དང་།

དགེ་སློང་མ་གོས་ཕྲོགས་སམ་སྟོར་བའི་རྐྱེན་བྱུང་བ་ལ་གོས་བྱིན་པ་དང་། བཟང་པོར་བཤད་པ་དང་། དགེ་སློང་མས་ཆོས་བཟང་པོ་ལེགས་པར་བཤད་པའི་ཕྱིར་དགེ་སློང་གིས་ཡོན་ཕུལ་བ་དང་། རབ་ཏུ་རྫོགས་པར་བྱེད་པའམ། དགེ་སྦྱོང་མ་ཞིག་རབ་ཏུ་རྫོགས་པར་བྱེད་པའི་ཚེ་གོས་

Vol. 165 · folio 135b

མེད་པ་ལ་གོས་བྱིན་པ་དང་། བརྗེ་བ་མ་ཡིན་ནའོ། །དགེ་སློང་མ་དང་གོས་བཟང་པོ་བརྗེ་བའི་ཕྱིར་བཟང་པོ་བརྗེས་ཏེ་ངན་པ་བྱིན་པ་དང་འདི་རྣམས་མ་གཏོགས་པ་གོས་བྱིན་ན་ལྟུང་བའོ། །གོས་སྦྱིན་པའོ། །གཉེན་མ་ཡིན་པའི་དགེ་སློང་མ་ལ་གོས་སྦྱིན་པའི་ལྟུང་བ་རྫོགས་སོ།། །།གྲོགས་ཀྱི་

ལྟུང་བ་ལ་འཆད་དེ། འགྲོ་བའི་དགོས་པའི་བརྟག་པ་བྱེད་པ་དང་དགེ་ཚུལ་ཕ་དང་དགེ་ཚུལ་མ་རྣམས་སོ། །དགེ་སློང་ཕ་དང་དགེ་སློང་མ་གང་ཞིག་ཏུ་འགྲོ་བར་འགྲོགས་ཏེ་ལམ་དུ་ཞུགས་ནས་ཁ་ཟས་བསྐུར་བ་དང་བརྟག་པ་བྱ་བ་དང་བྱིན་ལེན་བྱ་བའི་ཕྱིར་དགེ་སློང་ཕས་དགེ་སྦྱོང་ཕ་དང་གཡོག་སྐྱེས་

པ་ལ་སོགས་པ་ཁྲིད་དེ་ཁ་ཟས་བསྐུར་ལ་བརྟག་པ་བྱེད་དུ་གཞུག །དགེ་སློང་མས་ཀྱང་དགེ་སྦྱོང་མ་དང་བུད་མེད་ལ་སོགས་པ་ཁྲིད་ལ་ཟས་བསྐུར་ཞིང་བརྟག་པ་ལ་སོགས་པ་བྱེད་དུ་གཞུག །དགེ་སློང་ཕ་དང་དགེ་སློང་མ་དག་ལམ་ཕན་ཚུན་རིགས་པར་རོ། །དགེ་སློང་ཕ་དང་དགེ་སློང་མ་ལམ་དུ་ཞུགས་

པ་ལས་འཇིགས་པའི་རྐྱེན་བྱུང་སྟེ་གྲོགས་ཀྱང་རུང་གཡོག་མེད་པ་གང་ཞིག་ཏུ་འདོང་ན་མི་འགྲོགས་པར་རྒྱང་གྲགས་ཙམ་གྱིས་བཅད་དེ་དགེ་སློང་ཕོའི་རྒྱགས་ནི་མོ་ལ་བསྐུར་རོ་མོའི་རྒྱགས་ནི་ཕོས་བསྐུར་རོ། །དེ་ལྟར་བརྗེས་ཏེ་ཁྱེར་ན་སྤགས་པ་བཏེག་པ་ལ་སོགས་པར་མི་འགྱུར་ཏེ་ཉེས་མེད་དོ། །

ཕན་ཚུན་དུ་བྱིན་ལེན་ཀྱང་ངོ་། །གཡོག་གམ་དགེ་སྦྱོང་མེད་ན་དགེ་སློང་ཕའི་བྱིན་ལེན་དང་དགེ་སློང་མའི་བྱིན་ལེན་གཅིག་ལ་གཅིག་བྱིན་ལེན་དུ་འགྱུར་རོ། །ནད་པ་ཚངས་པ་མཚུངས་པར་སྤྱོད་པ་ལམ་དུ་མི་དོར། དགེ་སློང་ལམ་དུ་འགྲོགས་འགྲོགས་པ་ལས་གྲོགས་ལ་ལ་ཞིག་ནད་ཀྱིས་བཏབ་

ན་སྨན་དཔྱད་དང་གྲོགས་ལ་སོགས་པ་མི་བྱ་བར་མི་དོར་རོ། །དེ་བསྐུར། གྲོགས་ལམ་དུ་ནད་ཀྱིས་བཏབ་པ་དེ་བདག་ཅག་གནས་གང་དུ་འདོང་བར་བསྐུར་རོ། །དེ་བཞིན་དུ་དགེ་སློང་མ་ཡང་ངོ་། །ལམ་དུ་ཞུགས་པ་ལས་དགེ་སློང་མ་ཞིག་ནད་ཀྱིས་བཏབ་ན་ཡང་དགེ་སློང་གྲོགས་ཀྱིས་སྨན་དཔྱད་

དང་ཞལ་ཏ་ལ་སོགས་པ་བྱ་ཞིང་བསྐུར་རོ། །དེར་ཕན་ཚུན་དུ་གྲོགས་བྱ། དགེ་སློང་མ་ཞིག་ལམ་དུ་ནད་ཀྱིས་བཏབ་སྟེ་དགེ་སློང་མ་གྲོགས་མོས་བསྐུར་ཞིང་གྲོགས་བྱས་ཀྱང་མི་ཐེག་ན་དགེ་སློང་ཕས་ཀྱང་གྲོགས་བྱ་ཞིང་བསྐུར་རོ། །དེ་བཞིན་དུ་ཕོ་ན་སྟེ་མི་ནུས་ན་དགེ་སློང་མས་ཀྱང་གྲོགས་བྱ།

Vol. 165 · folio 136a

མགོ་དང་མཇུག་ནས་བཟུང་། སཱུ་ཏྲ་ལྟག་མ་ལྟར་གྲོགས་བྱ་བ་དགེ་སློང་མོ་ན་ན་ཕོས་ནི་མགོ་ནས་བཏེག་གྲོགས་མོས་ནི་མཇུག་ནས་བཏེག་གོ། །དེ་བཞིན་དུ་ཕོ་ན་བའི་གྲོགས་བྱ་ནའང་མོས་ནི་མགོ་ནས་བཏེག་ཕོས་ནི་མཇུག་ནས་བཏེག་གོ། །ཉེས་མེད་པ་ནི་གྲོང་དུ་ཕྱིན་

ནས་སོང་ནའོ། །དགེ་སློང་ནད་ཀྱིས་བཏབ་པ་དེ་ལམ་དུ་གྲོང་ཞིག་ཏུ་བཞག་པ་ནི་ཉེས་མེད་དོ། །ན་བའི་སྨན་དང་ཟས་བསོགས། སཱུ་ཏྲ་ལྟག་མ་ལྟར་ནད་པ་གྲོང་དུ་བཞག་པའི་སྨན་དང་ཟས་ལ་སོགས་པ་ཡང་ཅི་དགོས་པ་བསོགས་ཏེ་བཞག །མཚུངས་པའི་གཟུགས་གཅིག་བཞག །སཱུ་ཏྲ་ལྟག་མ་ལྟར་

ནད་པ་གྲོང་དུ་བཞག་པ་དེ་ལ་ནད་གཡོག་གཅིག་ཀྱང་བཞག་སྟེ་དགེ་སློང་ཕ་ཡིན་ན་ནི་དགེ་སློང་ཕ་ལས་གཅིག་བཞག །མོ་ཡིན་ན་ནི་དགེ་སློང་མ་ལས་གཅིག་བཞག །འཇིགས་པའི་ཕྱིར་ལམ་གྲོགས་སུ་འདུས་པ་ནི་མ་གཏོགས་ཏེ་ལམ་དགོངས་ཐ་མི་དད་ན་དགེ་སློང་མ་གཅིག་ཀྱང་ལམ་དུ་ཁྱེར་

ན་འོ། །མི་རྒོད་དམ་རྐུན་པོའམ་འཇིགས་པའི་རྐྱེན་གཅིག་བྱུང་སྟེ་འཕྲལ་ལ་ལམ་དུ་འགྲོགས་ཏེ་འདུས་པ་ནི་མ་གཏོགས་ལམ་དུ་འགྲོགས་པར་སྔ་ནས་དུས་བྱས་ཏེ་དགེ་སློང་ཕ་དང་དགེ་སློང་མ་ལྷན་ཅིག་དོང་བ་ནི་ལྟུང་བའོ། །རྒྱང་གྲགས་ཤིང་སོ་སོར་རོ། །དགེ་སློང་ཕ་དང་དགེ་སློང་མ་དུས་བྱས་

ཏེ་ལམ་དུ་འགྲོགས་པ་ནི་རྒྱང་གྲགས་རེ་རེ་ཕྱིན་ཅིང་ལྟུང་བ་རེ་རེར་འགྱུར་རོ། །དེ་ཕྱེད་ཅིང་སོ་སོར་ཉེས་བྱས་སོ། །རྒྱང་གྲགས་ཕྱེད་ཅིང་ཉེས་བྱས་རེ་རེར་འགྱུར་རོ། །དགེ་སློང་མ་དང་ལམ་དུ་འགྲོགས་པའི་ལྟུང་བའོ། །དགེ་སློང་མ་དང་ལམ་དུ་འགྲོགས་པའི་ལྟུང་བ་རྫོགས་སོ།། །།གྲུའི་

ལྟུང་བ་ལ་འཆད་དེ། འགྲམ་གཉིས་ཀར་བར་ཆད་དང་བཅས་ཏེ་གྲོས་མ་བྱས་པ་མ་གཏོགས་ཏེ་ཟུང་དུ་གྲུའི་ནང་དུའོ། །དགེ་སློང་ཕ་དང་དགེ་སློང་མ་གཉིས་གྲུའི་ནང་དུ་འགྲོགས་ན་འགྲམ་ཕ་རོལ་ནའང་འཇིགས་ཚུ་རོལ་གྱི་འགྲམ་ནའང་འཇིགས་པའི་རྐྱེན་ཡོད་དེ་ཆུ་འགྲམ་དུ་འགྲོགས་ཏེ་དོང་བ་

འགྲོགས་པར་དུས་མ་བྱས་པ་ནི་མ་གཏོགས་ཏེ་འགྲོགས་པར་དུས་བྱས་ལ་འགྲམ་གཉིས་ཀ་ན་འཇིགས་པའི་རྐྱེན་མེད་བཞིན་དུ་དགེ་སློང་ཕ་དང་དགེ་སློང་མ་གཉིས་གྲུ་གཅིག་གི་ནང་དུ་ཞུགས་ཏེ་དོང་བ་ནི་ལྟུང་བའོ། །ཐད་ཀར་ཕ་རོལ་དུ་རྒལ་བ་ལས་གཞན་པའོ། །ཆུ་ལ་རབ་ཐད་ཀར་

Vol. 165 · folio 136b

བརྒལ་བའི་ཕྱིར་གྲུ་གཅིག་གི་ནང་དུ་འགྲོགས་པ་ནི་ཉེས་མེད། ཡོན་པོ་དང་རབ་ཁ་བཞོ་བོར་འདུག་པ་དང་། ངམ་པ་དང་ཆུ་འགྲམ་ངམ་པས་ཆོད་དེ་ངམ་པ་བསྐོར་བའི་ཕྱིར་འགྱུས་པ་དང་། སློང་སྤང་བའམ། ཆུ་ལ་ཀློང་ཡོད་པའི་ཕྱིར་སྐོར་བ་དང་། རུ་སྐྱ་དང་སྐྱ་བ་ཆག་སྟེ་གྲུ་འབྱམ་པ་དང་། གདོས་

ཆག་གམ་གདོས་ཆག་སྟེ་གྲུ་འབྱམ་པ་དང་། དངོར་འཛིན་གྱི་དབང་གིས་དེའི་ཕྱིར་ཞུགས་པ་ལས་གནས་གཞན་དུ་ནའོ། །མཉན་པ་ཁྱིམ་ལམ་ཉེ་བའི་ཕྱིར་ཐད་ཀར་སྟོང་དུ་མ་བཏུབ་པ་དང་རྐྱེན་འདི་རྣམས་མ་གཏོགས་པར་དགེ་སློང་མ་དང་ཆུ་འགྲམ་དུ་གྲུ་གཅིག་གི་ནང་དུ་འགྲོགས་ན་ལྟུང་བའོ། །

རྩིས་མགོ་ཡན་ལག་དང་བཤད་པ་གཞན་ནི་དགེ་སློང་མ་དང་ལམ་དུ་འགྲོགས་པ་ལྟག་ཏུ་བཤད་པ་དང་འདྲའོ། །དགེ་སློང་མ་དང་ལྷན་ཅིག་ཏུ་ཆུ་རྒལ་བའོ། །དགེ་སློང་མ་དང་གྲུའི་ནང་དུ་འགྲོགས་པའི་ལྟུང་བ་རྫོགས་སོ།། །།དབེན་གྱི་བུད་མེད་དང་འདུག་པ་ལ་འཆད་དེ། བུད་མེད་གཅིག་པུ་ལ་

དབེན་ཞིང་འགྲོ་བ་རྒྱུ་བར་མི་འཇུག་པའི་ཕྱོགས་གཡོགས་པ་དང་བཅས་པ་བར་འདོམ་གང་ན་དེ་དག་བྱེད་དོ། །དགེ་སློང་དང་བུད་མེད་གཉིས་པོ་འགྲོ་བའི་ལམ་ཀ་མ་ཡིན་པ་དབེན་པའི་ཕྱོགས་ར་བས་བསྐོར་བའམ། ས་པ་མོའམ་ཤིང་ཐགས་ཀྱིས་བསྐོར་བའམ་ཤིང་ཁྲོད་དམ་རྩིག་པས་ཆོད་པའམ་ས་

སྲོས་པ་རྣམས་ནི་དབེན་ཞིང་གཡོགས་པ་ཞེས་བྱ་སྟེ། འདི་རྣམས་གང་ཡང་རུང་བར་འདོམ་གང་ཚུན་ཆད་དུ་ས་ལ་འདུག་ན་ལྟུང་བར་འགྱུར་རོ། །འདུག་ནའོ། །སཱུ་ཏྲ་ལྟག་མ་ལྟར་ལྟུང་བར་འགྱུར་བ་ནི་དགེ་སློང་ཕ་དང་བུད་མེད་གཉིས་ཀ་འདུག་པ་ལས་ལྟུང་བར་འགྱུར། འདུག་པ་བཞག་

མ་ཐག་ཏུ་དེའོ། །འདུག་པ་ལས་ལྟུང་བ་ནི་རྐུབ་ས་ལ་འདུག་མ་ཐག་ཏུ་ལྟུང་བར་གྱུར་ཏོ། །གཅིག་པུ་འདུག་པའོ། །དགེ་སློང་ཕ་དང་བུད་མེད་གཉིས་འདུག་པ་ལས་ལྟུང་བར་འགྱུར་བ་རྫོགས་སོ།། །།བུད་མེད་དང་འགྲེང་ན་ལྟུང་བར་འགྱུར་བ་ལ་འཆད་དེ། དགེ་སློང་མའོ། །དགེ་སློང་ཕ་

དང་དགེ་སློང་མ་གཉིས་ས་དབེན་པར་གཉིས་སུ་འགྲེང་ན་ལྟུང་བར་འགྱུར་ཏེ། ཡན་ལག་དང་བཤད་པ་རྟག་ཏུ་བུད་མེད་དང་འདུག་པའི་ལྟུང་བ་དང་འདྲའོ། །འགྲེང་བའོ། །དགེ་སློང་མ་དང་ས་དབེན་པར་འགྲེང་བ་ལས་ལྟུང་བར་འགྱུར་ཏེ་འགྲེང་མ་ཐག་ཏུ་ལྟུང་ངོ་། །གཅིག་པུ་འགྲེང་པའོ། །

Vol. 165 · folio 137a

དགེ་སློང་མ་དང་ས་དབེན་པར་འགྲེང་བའི་ལྟུང་བ་རྫོགས་སོ།། །།བཤམས་པའི་ལྟུང་བ་ལ་འཆད་དོ། འབྷྲིད། སྔར་ཁྱིམ་བདག་གིས་མ་བོས་ལ་དགེ་སློང་མས་བཤམས་པར་ཤེས་བཞིན་དུ་ཟོས་པ་ལས་ལྟུང་ཏེ་ཡན་ལག་གཅིག །དགེ་སློང་མས་བཤམས་པའོ། །

ཁྱིམ་པ་ཞིག་ལ་དགེ་སློང་མས་དགེ་སློང་འདི་ཡོན་ཏན་དང་ལྡན་པ་ཡིན་ཏེ་ཟས་བྱིན་པའི་རིགས་སོ་ཞེས་བཤམས་ཏེ་སྔར་ཁྱིམ་བདག་གིས་སྤྱན་དྲང་བར་མ་བསྒོ་བར་ཟོས་པ་ལས་ལྟུང་སྟེ་ཡན་ལག་གཅིག །མི་བདེན་པའི་ཡོན་ཏན་གྱིས་སོ། །དགེ་སློང་ཡོན་ཏན་དང་ལྡན་པ་ཞིག་ལ་བཤོས་

གསོལ་ཅིག་ཅེས་བྱས་པ་ནི་མི་ལྟུང་གིས་ཡོན་ཏན་མེད་པ་ལས་ཡོན་ཏན་དང་ལྡན་པ་ཡིན་ནོ་ཞེས་བརྫུན་དུ་བསྟོད་པ་ལས་ལྟུང་སྟེ་ཡན་ལག་གཅིག །སྤྱན་དྲངས་པ་མ་བྱས་པའོ། །སྔར་ཁྱིམ་བདག་གིས་སྤྱན་དྲངས་ཤིང་མ་བསྒོ་བར་དགེ་སློང་མས་བཤམས་པའི་ངོར་ཁྱིམ་བདག་གི་ཁྱིམ་དུ་

ཟན་ཟོས་པ་ལས་ལྟུང་སྟེ་ཡན་ལག་གཅིག །བྱས་ཀྱང་ལྷག་པར་རོ། །ཁྱིམ་བདག་གིས་སྔར་སྤྱན་དྲངས་སུ་ཟིན་ཡང་འཕྲལ་ལ་དགེ་སློང་མས་བཤམས་ཏེ་ཡོན་ཏན་དང་ལྡན་པ་འདི་ལ་ཤ་ཁ་ར་ལ་སོགས་པ་ལྷག་པར་གསོལ་ཅིག་ཅེས་བྱ་སྟེ་ཟོས་ན་ལྟུང་སྟེ་ཡན་ལག་གཅིག །བཟའ་

བའོ། །དགེ་སློང་མས་བཤམས་པའང་གོས་ལ་སོགས་པ་ནི་མ་ཡིན་གྱི་ཟས་བཤམས་པ་ལས་ལྟུང་སྟེ་ཡན་ལག་གཅིག །ནན་ཏན་དང་གྲུབ་པས་སོ། །མི་བདེན་པའི་ཡོན་ཏན་ནི་དགྲ་བཅོམ་པའི་རིམ་པ་བརྒྱད་མེད་པར་བརྒྱད་པོའི་ནང་ནས་གང་རུང་བས་བསྟོད་ན་ལྟུང་བར་འགྱུར་རོ། །

དེ་ཐོས་པས་ཀྱང་ངོ་། །སྡེ་སྣོད་གསུམ་ལ་སོགས་པ་དང་མང་དུ་ཐོས་པ་ཡིན་ནོ་ཞེས་བརྫུན་དུ་བསྟོད་ནའང་ལྟུང་བར་འགྱུར་རོ། །ཟོས་ནའོ། །དགེ་སློང་མས་བཤམས་པའི་ཟས་ཟོས་པ་ལས་ལྟུང་བར་འགྱུར་ཏེ་ཡན་ལག་གཅིག །དེ་ནི་མགྲིན་པར་ནའོ། །ཟོས་པའི་ཚད་ནི་ཁ་ནས་སླར་བྱུང་

བའམ་ལུས་དང་རྣ་བ་ལ་སོགས་པ་བསྐུས་ཤིང་བླུགས་པ་ལ་མི་བྱའི་ཟས་མགྲིན་པར་སོང་ནས་ལྟུང་བར་འགྱུར། གཞན་གྱི་ཕྱིར་བ་ལས་ན་འབྲི་བར་བྱེད་དོ། །དགེ་སློང་མས་བཤམས་པའི་ཟས་ཤེས་བཞིན་དུ་བདག་གིས་བླངས་ཏེ་གཞན་ལ་བྱིན་ན་ཉེས་བྱས་སོ། །བྱིན་ཅིག་ཅེས་སྨྲས་ནས་

Vol. 165 · folio 137b

ཟས་ཀྱི་ཕྱིར་ཞུགས་ནའོ། །དགེ་སློང་ཕ་གྲོང་ན་སློང་མོ་བྱེད་པ་ལ་དགེ་སློང་མས་འཕྲལ་ལ་ཁྱིམ་པ་བསྐོས་ཏེ་ཡོན་ཏན་དང་ལྡན་པ་འདི་ལ་གསོལ་ཅིག་ཅེས་བྱས་པ་དེ་བླངས་ན་ཉེས་བྱས། སྤྱོད་པ་བཤམས་པའོ། །དགེ་སློང་མས་བཤམས་པའི་ཟས་ཟོས་པའི་ལྟུང་བ་སྟེ་རྫོགས་སོ། །དགུ་བཅུའི་

ལྟུང་བའི་བཅུ་ཕུང་གཅིག་རྫོགས་སོ།། །།ཡང་ཡང་གི་ལྟུང་བ་ལ་འཆད་དེ། ཟས་ལ་སྤྱན་དྲངས་པ་ལས་གྲོང་བར་དུའང་བདག་གིར་གྱིས་ཤིག །ཁྱིམ་པ་ལ་སོགས་པས་གྲོང་དུ་མཆོད་སྟོན་ལ་སྤྱན་དྲངས་ན་འགྲོ་ཞིང་ཟར་དབང་སྟེ་ཉེས་པར་མི་འགྱུར་རོ། །མ་སོང་ནའང་ཉེས་མེད་དོ། །

དུས་ཤེས་པར་བྱས་ལ་འཇུག་སྟེ་དུས་སྔར་ནི་མ་ཡིན། སཱུ་ཏྲ་ལྟག་མ་ལྟར་གྲོང་བར་དུ་སྤྱན་དྲངས་ན་གདུགས་ཚོད་ཀྱི་ཁར་འདོང་བའི་དུས་རན་པར་བྱ་བའི་དུས་ལས་སྔར་བདག་ཅག་མི་འདོང་ངོ་། །གཎྜཱི་བརྡུངས་ཏེའོ། །གདུགས་ཚོད་ཀྱི་ཁར་མཆོད་སྟོན་ལ་འདོང་བ་ཡང་སྔ་ཕྱིར་མི་འདོང་བའི་

གཎྜཱི་བརྡུངས་ཏེ་བསྡུས་ལ་ཅིག་ཅར་འདུས་ཏེ་ལྷན་ཅིག་འདོང་ངོ་། །བདག་གི་འཁོར་དེར་བྱུལ། གྲོང་བར་དུ་དགེ་འདུན་མཆོད་སྟོན་ལ་འདོང་བ་ལས་མཁན་པོ་དང་སློབ་དཔོན་དང་གནས་བརྟན་དང་མི་མཐུན་པའི་སྡེ་རྣམས་སོ་སོར་འཁོར་ཚུལ་དང་ལྡན་ནམ་མི་ལྡན་པ་བལྟ་ཞིང་བྱུལ་ལ་མི་

མཛེས་པ་ཡོད་ན་མཛེས་པར་བཅོལ། འོངས་པ་ནི་གནས་བརྟན་གྱིས་སོ། །གུད་ནས་གསར་དུ་དགེ་སློང་འོངས་པ་དག་ཅིག་ཡོད་ནའང་གནས་བརྟན་གྱིས་ཡོན་བདག་ལ་ཟན་སྦྱོར་དུ་གཞུག་པའི་ཞལ་ཏ་དང་བདག་གི་འཁོར་གྱི་སློབ་མ་དང་འདྲ་བར་རིམ་གྲོ་དང་ཞལ་ཏ་བྱའོ། །གཏོལ་མེད་པར་

ཟན་གཅད་པར་མི་བྱ། སྨན་དཔྱད་བྱ་བའི་ཕྱིར་ཟན་བཅད་པ་མ་གཏོགས་ཏེ་གདེང་མེད་པ་དང་ཕན་མེད་པར་ཟན་མི་བཅད་བཅད་ན་ཉེས་བྱས། སྐོམ་གྱི་ཕྱིར་གསོལ་ན་འདུག་ཤིག །གྲོང་བར་དུ་མཆོད་སྟོན་ལ་སྤྱན་དྲངས་པ་ལས་ཟན་ཟོས་ཟིན་ན་དོན་མེད་པར་རིང་དུ་མི་འཁོད་དེ་སྦྱིན་བདག་ན་རེ་

ཕྱི་ཕྲེད་རྒུན་ཆབ་ལ་སོགས་པ་གསོལ་ཏེ་གཤེགས་ཞེས་ཟེར་བ་ལས་བསྡད་པ་དང་བཏུང་བ་ལ་ཉེས་མེད། མཉམ་དུ་འམ་ཕྱི་ནས་གོས་ཀྱི་རྙེད་པ་དང་མི་ལྡན་པར་གཉིས་པོའི་སྤྱན་འདྲེན་པ་ཐོབ་ནའོ། །ཡོན་བདག་གཉིས་ཤིག་གིས་མཆོད་སྟོན་ལ་སོ་སོར་ལྷན་ཅིག་ཏུ་སྤྱན་དྲངས་ན་གཉིས་

Vol. 165 · folio 138a

ཀ་ལ་འོང་ངོ་ཞེས་ཁས་བླངས་ན་ཉེས་བྱས། ཉིན་གཅིག་ལ་ལྔ་ཕྱིར་སྤྱན་དྲངས་པ་ལས་གཉིས་ཀ་ལ་ཁས་བླངས་ན་ཉེས་བྱས། སྤྱན་འདྲེན་པ་དེ་གཉིས་ཀ་ན་རེ་གོས་ཤིག་ཡོན་དུ་དབུལ་ལོ་ཞེས་ཟེར་བ་ལས་གཉིས་ཀ་ལ་ཁས་བླངས་ན་ཟོས་ན་ཉེས་པ་མེད། སྤྱན་འདྲེན་པ་སྔ་

མ་ལ་གོས་ཡོད་ལ་སྤྱན་འདྲེན་པ་ཕྱི་མ་ལ་གོས་མེད་པར་ཕྱི་མའི་ཟན་ཟོས་པ་ནི་ལྟུང་བའོ། །སྤྱན་འདྲེན་པ་སྔ་མ་ལ་གོས་མེད་ལ་ཕྱི་མ་ལ་གོས་ཡོད་དེ་ཁས་བླངས་ནས་ཟོས་པ་ནི་ཉེས་མེད་དོ། །བཟའ་བས་སོ། །ཡང་ཡང་བཅའ་བས་ནི་བཟའ་བ་ལས་ལྟུང་བར་མི་འགྱུར་རོ། །བཅའ་བ་ནི་རྩ་

བ་དང་སྡོང་པོ་དང་ཚིགས་པ་དང་མེ་ཏོག་དང་འབྲས་བུ་ལྔའི་ནང་དུ་གཏོགས་པའོ། །བཅའ་བ་འདི་རྣམས་ལས་ལན་གཉིས་ཟོས་ཀྱང་ལྟུང་བ་མེད་དོ། །ལྔའི་ནང་དུ་གཏོགས་པའོ། །བཟའ་བ་ནི་རྣམ་པ་ལྔ་སྟེ་འབྲས་དང་ཁུར་བ་དང་སྲན་མ་དང་ཕྱེ་དང་ཤ་དང་འདི་རྣམས་ལྔའི་ནང་དུ་གཏོགས་

པ་ལས་ལན་གཉིས་སུ་ཟོས་ན་ལྟུང་བར་འགྱུར་རོ། །བཟའ་བ་ལན་གཅིག་བཅའ་བ་ལན་གཅིག་སྔ་ཕྱིར་ལན་གཉིས་ཟོས་ཀྱང་ལྟུང་བར་མི་འགྱུར་རོ། །དེ་སྟེ་གཞན་དུའང་འདི་ནའོ། །བཟའ་བ་རྣམ་ལྔ་ལས་སྔར་ལན་གཅིག་ཟོས་ཟིན་ལ་ཕྱིས་གཞན་ཞིག་གིས་སྤྱན་དྲངས་ཏེ་བཟའ་བ་རྣམ་ལྔ་

ལས་ཟོས་ན་ལྟུང་། ཡོན་བདག་གིས་བཅའ་བ་སྦྱིན་པའི་ཕྱིར་སྤྱན་དྲངས་ལ་བཅའ་བའང་ཟོས་བཟའ་བའང་ཟོས་ན་ཉེས་བྱས་སོ། །བཟའ་བ་ལ་སྤྱན་དྲངས་ཏེ་བཟའ་བ་དང་བཅའ་བ་གཉིས་སྔ་ཕྱིར་ཟོས་པ་ཉེས་མེད་དོ་བར་འགྱུར། མི་ན་ལས་མ་བྱས་ལམ་དུ་མ་ཞུགས་པའོ། །ན་བ་དང་

ལས་བྱས་པ་དང་ལམ་དུ་ཞུགས་པའི་རྐྱེན་མེད་པར་ཟན་ལན་གཉིས་ཟོས་ན་ལྟུང་བར་འགྱུར་རོ། །འདི་རྣམས་ཀྱི་རྐྱེན་བྱུང་སྟེ་ཟོས་པ་ནི་ལྟུང་བ་མེད་དོ། །དགོངས་པས་ནི་ཉེས་བྱས་པའོ། །སྔར་ཟན་ཟོས་ཟིན་པའི་འོག་ཏུ་སྤྱན་འདྲེན་པ་ཅིག་འོངས་པ་དང་མ་ཟོས་པའི་མདུན་དུ་སྔར་སྤྱན་དྲངས་པ་གཅིག་

ལ་ཁས་བླངས་པ་ལས་ཕྱིས་གོས་མེད་པ་ལས་འགྲོ་བར་བསམས་ཤིང་ཁས་བླངས་ན་དེའི་ཚེ་ཉེས་བྱས་ཟོས་ན་ལྟུང་བའོ། །སཱུ་ཏྲ་ལྟག་མ་ལྟར་སྤྱན་དྲངས་ལས་རྣམ་གཉིས་སུ་ཟོས་ན་ལྟུང་བའོ། །གོས་དེ་ཁྲུ་གང་ཁོར་ཡུག་གི་མཐར་གྱུར་ནའོ། །གོས་དང་བཅས་ཏེ་ཟོས་ན་ལན་གཉིས་སུ་

Vol. 165 · folio 138b

ཟོས་ཀྱང་མི་ལྟུང་ངོ་ཞེས་བཤད་པའི་གོས་ཀྱི་ཚད་ནི་ཁྲུ་གང་འཁོར་བ་ཡན་ཆད་ཅིག་སྦྱིན་པའི་ཕྱིར་ཟན་ལན་གཉིས་ཟོས་པ་ནི་ལྟུང་བར་མི་འགྱུར་དེ་ལས་ཆུང་བ་ནི་ལྟུང་བར་འགྱུར་རོ། །ལམ་ནི་དཔག་ཚད་ཕྱེད་དོ། །ལམ་དུ་ཞུགས་ན་ལན་གཉིས་སུ་ཟོས་ཀྱང་ལྟུང་བར་མི་འགྱུར་བ་ནི་དཔག་

ཚད་ཕྱེད་དེ་རྒྱང་གྲགས་བཞིར་འགྲོ་བའམ་ཕྱིན་ན་ཟར་དབང་ངོ་། །གཞན་དུ་ཡང་ངོ་། །སོ་སོར་ཟ་བའི་ལམ་ལ་སོགས་པ་དུས་ཀྱང་དཔག་ཚད་ཕྱེད་དུ་འགྲོ་ན་སོ་སོར་བཟར་དབང་སྟེ་དུས་སུ་ཆུད་དེ། འདི་ལམ་གྲུར་འགྲོ་བ་ཡང་ངོ་། །ལམ་དཔག་ཚད་ཕྱེད་དུ་འགྲོ་བ་དུས་སུ་ཆུད་པ་ནི། རྐང་

པས་འགྲོ་བ་དང་། གྲུར་ཞུགས་པ་གཉིས་ནི་བཟར་དབང་གི་རྟ་དང་ཤིང་རྟ་ལ་སོགས་པ་ལ་ཞོན་པ་ནི་དཔག་ཚད་ཕྱེད་དུ་ཕྱིན་ཀྱང་དུས་སུ་མི་ཆུད་དེ་བཟར་མི་དབང་ངོ་། །ཕྱག་དར་རེ་ལྡེ་ཙམ་མམ་བྱུག་པ་བ་ཀོ་ཙམ་ནི་ལས་སོ། །ལས་བྱས་ན་ཡང་ཡང་དབང་བ་ནི་རེ་ལྡེ་ཙམ་གྱི་ས་ཕྱགས་པ་དང་མཎྜལ་བའི་

ཀོ་བ་ཙམ་མམ་བ་ཉལ་བ་ཙམ་གྱི་ས་ཕྱགས་པ་ནི་དུས་སུ་ཆུད་དེ་ཟར་དབང་ངོ་། །ཕྱག་དར་བྱ་བ་ནི་ཆག་ཆག་སྔར་བཏབ་ལ་ཕྱག་གོ། །མཎྜལ་ནི་བ་ལང་གི་ལྕི་བའམ་འཇིམ་པ་འཇམ་པོས་བྱའོ། །དེ་མཆོད་རྟེན་ནམ་དགེ་འདུན་གྱི་ལའོ། །སཱུ་ཏྲ་ལྟག་མ་ལྟར་ས་ཕྱགས་པ་དང་མཎྜལ་བྱ་བ་ནི་དགེ་

འདུན་གནས་འདུས་པའི་གཙུག་ལག་ཁང་ངམ་སངས་རྒྱས་བཞུགས་པའི་མཆོད་རྟེན་དྲི་གཙང་ཁང་དུ་བྱའོ། །གཞན་དུ་བྱས་པའི་ས་ནི་ལས་སུ་མི་ཆུད་དོ། །ན་བའི་ཚད་མི་ཕོད་ནའོ། །ན་ན་ཡང་ཡང་ཟར་དབང་བའི་ཚད་ནི་ན་སྟེ་ལས་བྱེད་མི་ཕོད་པར་ན་ན་ཡང་ཡང་ཟར་དབང་ངོ་། །ནར་མ་ནི་སྤྱན་

དྲངས་པ་ནི་མ་ཡིན་ནོ། །ཡོན་བདག་གིས་ལོ་དྲུག་གམ་ཚེ་གཅིག་ཏུ་ཟན་སྦྱར་བ་ནི་སྤྱན་དྲངས་པ་ཞེས་མི་བྱ་སྟེ་གཞན་ཞིག་གིས་གུད་དུ་སྤྱན་དྲངས་ཏེ་ཁས་བླངས་པ་ནི་ཉེས་མེད་དོ། །ཡོན་བདག་གིས་ཞལ་ཚུས་དང་གྲོ་གཉིས་ཀར་ནར་མར་སྦྱར་ཏེ་ཟ་ནའང་ལས་བྱ་དགོས་སོ། །མཐོང་བ་ཙམ་ཡང་

ངོ་། །གྲོགས་ཤིག་གཡར་སུས་ཟ་ཞིང་འདུག་པ་ལ་བདག་ཟས་ཟོས་ཟིན་ཏེ་སོང་བ་མཐོང་ནས་བདར་ཏེ་ཟོ་ཞེས་ཟེར་ཏེ་ཟོས་ནའང་རུང་བདག་ཟན་ཟོས་ཟིན་པ་ལས་དགེ་སློང་མ་ལ་སོགས་པའི་གནས་སུ་འོངས་ཏེ་གཡར་སུས་སམ་བཅའ་བ་མི་བཟར་མི་རུང་ཞེས་ཟེར་ཏེ་ཟོས་ནའང་ཉེས་མེད་དོ། །མེད་པར་

Vol. 165 · folio 139a

བསླུ་བ་བྱས་ན་ཡང་ངོ་། །སྔར་རྩེད་མོའང་བརྫུན་དུ་ཟན་ལ་སྤྱན་དྲངས་པ་ལས་ཟན་མེད་པར་གྱུར་ཏེ་ཕྱིས་གཞན་ཞིག་གིས་བོས་ཏེ་ཟོས་ནའང་ཉེས་མེད་དོ། །དེའི་ཕྱིར་དགེ་འདུན་ཡང་ངོ་། །དགེ་སློང་གཅིག་ཅིག་དགོས་ཤིང་། གཅེས་པའི་ཕྱིར་དགེ་འདུན་དུ་

ལངས་པར་སྤྱན་དྲངས་ན་དགེ་སློང་མིང་གིས་དགོས་པ་དེ་དག་གི་གནས་སུའང་གཡར་སུས་ཟོས་ལ་སྤྱན་དྲངས་པར་ཡང་ཟན་ཟོས་ན་ལྟུང་བའོ། །གཞན་ནི་བདག་གིས་གཡར་སུས་དང་ཉི་རིམ་དུ་ཟོས་ཀྱང་ཉེས་མེད་དེ་གཡམ་ལ་སོང་སོང་བ་ལས་གཞན་དུ་སྤྱན་དྲངས་ན་དེར་སོང་ཡང་ཉེས་

མེད་དོ། །འདི་གཞན་ལྔ་པོ་ལ་བྱིན་ཅིག །ཁ་དུ་མ་ཞིག་ཏུ་སྤྱན་དྲངས་ན་ཀུན་དུ་འགྲོ་ཞིང་བཟར་མི་དབང་བའི་ཕྱིར་དགེ་སློང་ཕ་དང་དགེ་སློང་མ་དང་དགེ་སྦྱོང་ཕོ་མོ་དང་དགེ་སློབ་མ་གག་ཀྱང་རུང་བདག་གི་སྐྱིན་པར་བཏང་བ་ནི་ཉེས་མེད་དོ། །དེ་ནི་ཆོས་སོ། །སཱུ་ཏྲ་ལྟག་མ་ལྟར་སྐྱིན་པར་བཏང་བ་

ཡང་ཉེས་མེད་པ་ནི་རབ་ཏུ་རིགས་པའི་ཆོས་ཡིན་པས་ཉེས་མེད་དོ། །གཞན་ཡང་ལོངས་ཤིག །བདག་ཟན་ནར་མར་ཡོན་བདག་གིས་ཟན་སྦྱར་བཞིན་དུ་གཞན་ཞིག་གིས་ཟན་བསྐྱལ་ཏེ་བྱིན་ནམ་རྒྱུ་བསྐྱལ་ཏེ་བྱིན་ན་དགེ་སློང་དང་དགེ་འདུན་ལ་སྦྱིན་པའི་ཕྱིར་བླངས་ཀྱང་ཉེས་མེད་དོ་ཞེས་བི་ཛ་

ཡ་བར་མས་བཤད། སཱུ་ཏྲ་ལྟག་མ་ལྟར་སྐྱིན་པར་བཏང་བའི་དགེ་སློང་རྣམ་ལྔས་ཟན་བླངས་ཤིང་ཟོས་ཀྱང་ཉེས་མེད་དོ་ཞེས་བི་ཤུདྷས་བཤད། མུ་གེའི་ཚེ་ན་ཅི་ཙམ་སྤྱན་འདྲེན་པ་འགྲུབ་པར་བདག་གིར་བྱའོ། །ལོ་ཉེས་པ་དང་མུ་གེ་བྱུང་བའི་ཚེ་ནི་ཁ་དུ་མར་སྤྱན་དྲངས་ཤིང་ཟན་བྱིན་

པའི་ཁས་བླངས་ཤིང་འགྲོའོ། །ཟོས་པ་ཡང་ངོ་། །སཱུ་ཏྲ་ལྟག་མ་ལྟར་ཁ་དུ་མར་སྤྱན་དྲངས་ཤིང་སོང་བ་དེར་ཟན་ལན་དུ་མར་ཟོས་ཀྱང་ཉེས་མེད་དོ། །སྦྱིན་པ་ཡང་ངོ་། །མུ་གེའི་ཚེ་ཁ་མང་པ་ཞིག་ཏུ་སྤྱན་དྲངས་ཏེ་བདག་གིས་མི་ཁྱབ་ན་དགེ་སློང་རྣམ་ལྔ་ལས་ཁ་དུ་མར་སྤྱན་དྲངས་ཤིང་སྐྱིན་

པར་བཀྱེ་བ་དང་བདག་ལ་རྒྱུ་ལྷག་པ་བྱིན་པ་ནི་ཉེས་མེད་དོ། །འབུལ་བ་མི་དད་པར་གྱུར་ན་ཁམ་གཉིས་གསུམ་ཡན་ཆད་ཟོས་ལ་ཁྱིམ་བདག་དགེ་སློང་འདི་ཟས་ཀྱིས་ཕོངས་ཀྱི་རྗེས་སུ་ཡི་རངས་ཤིག་འདི་ལ་སྦྱིན་ནོ་ཞེས་དད་པ་སྐྱེད་ཅིག །མུ་གེའི་ཚེ་ཁ་དུ་མར་སྤྱན་དྲངས་ལ་བདག་གི་ལྟོར་མི་ཤོང་

Vol. 165 · folio 139b

མི་ཁྱབ་སྟེ་གྲོགས་རྣམ་ལྔར་སྐྱིན་པར་ཟར་བཅུག་པ་ལ་སྦྱིན་བདག་མི་དགའ་བར་གྱུར་ན་བདག་གིས་ཁམ་གཉིས་སམ་གསུམ་ཟོས་ལ་དགེ་སློང་འདི་ཟས་ཀྱིས་ཕོངས་པ་ཡིན་ཏེ་འདི་ལ་ཟས་སྦྱིན་པ་ནི་བསོད་ནམས་ཆེ་སྟེ་ཡོན་ཏན་དུ་འགྱུར་གྱིས་མི་དགའ་བར་མ་བྱེད་པར་རྗེས་སུ་ཡི་རངས་

པར་བྱོས་ཤིག་ཅེས་བཤད་ལ་སྦྱིན་བདག་དགའ་བར་བྱ་སྟེ་བདག་གི་སྐྱིན་པར་དགེ་སློང་གཞན་ཟས་ཟར་བཅུག་ལ་བདག་གུད་དུ་འགྲོའོ། །ཡང་ཡང་ཟ་བའོ། །ཡང་ཡང་ཟ་བའི་ལྟུང་བ་རྫོགས་སོ།། །།འབའ་ཞིག་གི་ལྟུང་བ་ལ་འཆད་དེ། འདི་ཆོས་པའི་མ་ཡིན་པ། སངས་

རྒྱས་ཀྱི་ཆོས་མ་ཡིན་པ་མུར་འདུག་གི་ཆོས་བྱེད་པ་འཁོད་པ་ལས་ལྟུང་བར་འགྱུར་ཏེ་ཡན་ལག་གཅིག །ཁྱིམ་པའི་བདག་པོ་དང་བཅས་པ། གནས་ཀྱི་སྦྱིན་བདག་ཁྱིམ་པ་ཡིན་ལ་སྦྱིན་བདག་དང་བཅས་པར་འདུག་པ་ལས་ལྟུང་བར་འགྱུར་ཏེ་ཡན་ལག་གཅིག །མུར་འདུག་

ཐམས་ཅད་ཀྱི་མ་ཡིན་པའི་གནས་སུའོ། །མུར་འདུག་ཐམས་ཅད་ལམ་བསྡོམས་ཀྱི་མུར་འདུག་སྟེ་གཅིག་ལ་བསྔོས་པ་ལས་ལྟུང་བར་འགྱུར། མི་ནའམ། དགེ་སློང་ན་བའི་རྐྱེན་མ་བྱུང་བར་འདུག་པ་ལས་ལྟུང་ཏེ་ཡན་ལག་གཅིག །སྦྱིན་བདག་གིས་སྤྱན་དྲངས་ནའོ། །མུར་

འདུག་གི་གནས་དེར་སྦྱིན་བདག་གིས་སྤྱན་དྲངས་པ་ནི་ལྟུང་བར་མི་འགྱུར་གྱི་སྤྱན་མ་དྲངས་པར་སོང་སྟེ་འདུག་པ་ལས་ལྟུང་སྟེ་ཡན་ལག་གཅིག །ཟོས་ནས་དེར་ཟོས་ན་རྩ་བའོ། །མུར་འདུག་གི་གནས་སུ་ཟན་ལན་གཅིག་ཟོས་པས་ནི་ལྟུང་བར་མི་འགྱུར་གྱི་ཟན་ལན་གཉིས་ཟོས་

ན་ལྟུང་བར་འགྱུར་ཏེ། ཡན་ལག་འདི་དྲུག་དང་ལྡན་ན་ལྟུང་བའོ། །གནས་ནས་ཡང་གནས་ན་ཡང་ཉེས་བྱས་པའོ། །མུར་འདུག་གི་གནས་སུ་ཟན་མ་ཟོས་པར་ཡང་ཞག་གཅིག་འདུག་པ་ནི་ཉེས་མེད་དེ་ཟན་མ་ཟོས་པར་ཞག་གཉིས་འདུག་པ་ནི་ཉེས་བྱས་པའོ། །དེ་ལས་འདས་ན་

ཞག་རེ་ཉེས་བྱས། བདག་པོ་མེད་ན་ཡང་ངོ་། །མུར་འདུག་གི་གནས་དེའི་སྦྱིན་བདག་ཁྱིམ་པ་མེད་པ་ཞིག་ཏུ་ཟན་ལན་གཉིས་ཟོས་པ་ནི་ཉེས་བྱས་ལྕི་བ། ཟན་མ་ཟོས་ན་ཞག་གཉིས་ལོན་པ་ནི་ཉེས་བྱས་ཡང་བའོ། །འདི་རབ་ཏུ་བྱུང་བས་མུར་འདུག་བཞིན་ནོ། །དགེ་སློང་ཞིག་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words