འདུལ་བའི་མདོའི་འགྲེལ་པ

Sanskrit title (Tibetan script, as in the text) བི་ན་ཡ་སཱུ་ཏྲ་བྲྀཏྟི

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 165 · folio 140a

གིས་ཡོན་བདག་བྱས་ཏེ་མུར་འདུག་གི་ཕྱིར་གནས་བྱས་པའི་སར་ཟན་ལན་གཉིས་ཟོས་ནའང་ཉེས་བྱས་ཟན་མ་ཟོས་པར་ཞག་གཉིས་ལོན་ནའང་ཉེས་བྱས་ཡང་བའོ། །གཉེན་གྱི་ཡང་ངོ་། །གཉེན་ཁྱིམ་པ་ཞིག་གིས་མུར་འདུག་གི་གནས་བྱས་པའི་སར་གནས་

ནའང་སཱུ་ཏྲ་ལྟག་མ་དང་འདྲ་བར་ཉེས་བྱས་སོ། །འབའ་ཞིག་པའི་སྤྱོད་པའོ། །འབའ་ཞིག་པའི་ལྟུང་བ་རྫོགས་སོ།། །།སྦྲུས་པའི་ལྟུང་བ་ལ་འཆད་དེ། སྤྱན་དྲངས་པའོ། །དགེ་སློང་བསོད་སྙོམས་ལ་སོང་སོང་བ་ལས་ཡོན་བདག་དད་པས་ཁ་ཟས་ཅི་བཞེད་པ་བཞེས་ཤིག་ཅེས་

དུས་ཀྱིས་མ་བདར་བ་ལས་ལྟུང་སྟེ་ཡན་ལག་གཅིག་མ་བཅད། དུས་ཀྱིས་ནི་བདར་གྱི་འདི་ཙམ་ཞིག་ཁྱེར་ཅིག་ཅེས་ཐང་མ་བཅད་པ་ལས་བླངས་ན་ལྟུང་བར་འགྱུར་ཏེ་ཡན་ལག་གཅིག །ཅི་བདེ་ཞེས་མ་བྱས་པ། དུས་ཀྱིས་ནི་བདར་ན་ཅི་འདོད་པ་ཁྱེར་ཅིག་ཅེས་མ་བྱས་པ་ལས་ལྟུང་སྟེ་

སཱུ་ཏྲ་ལྟག་མ་དང་གཉིས་ལ་ཡན་ལག་གཅིག་ཏུ་བརྩིའོ། །ཁྱིམ་བདག་གིའོ། །དུས་ཀྱིས་བདར་བ་དེ་ཁྱིམ་བདག་ཀྱང་ཡིན་པ་ལས་ལྟུང་བར་འགྱུར་ཏེ་ཡན་ལག་གཅིག །འབྲས་བཙོས་པ་ཡུལ་དབུས་སུ་གྱུར་འཆད་ཀྱི་སྲ་སྟ་ཕྱེད་དང་ལྔའི་ཚད་ཀྱི་སྲས་སྟ་ཚོད་མ་དང་སྔོར་དུ་བཅས་

གྲོགས་པོ་དང་ལྷན་ཅིག་པ་ནི་སྐལ་བའི་བསོད་སྙོམས་སོ། །ཁྱིམ་བདག་གིས་ཟས་ཁྱེར་ཅིག་ཅེས་དུས་ཀྱིས་བསྟབས་ན་འབྲས་བཙོས་པ་ཚོད་མ་དང་སྔོར་མ་གཏོགས་པར་སྲ་སྟ་ཕྱེད་དང་ལྔ་གྲོགས་གཞན་ལ་ཡང་སྦྱིན་ཞིང་ལྷན་ཅིག་བཟའ་བའི་ཕྱིར་བླངས་ཀྱང་ཉེས་པ་མེད་དོ། །སྲ་སྟ་ཕྱེད་

དང་ལྔ་ལས་ལྷག་པར་བླངས་ན་ལྟུང་བར་འགྱུར་ཏེ་ཡན་ལག་གཅིག །སྲ་སྟ་ཕྱེད་དང་ལྔ་ལས་སྲ་སྟ་དོ་ལ་ནི་ལྷུང་བཟེད་ཆེན་པོ་གང་སྲ་སྟ་ཕྱེད་དང་དོ་ལ་ལྷུང་བཟེད་འབྲིང་པོ་གང་། སྲ་སྟ་གང་ལ་ལྷུང་བཟེད་ཆུང་ངུ་གང་སྟེ་ལྷུང་བཟེད་ཆེ་ཆུང་གསུམ་གྱི་ཚད་དུ་ནི་ལེན་དུ་དབང་གི་དེ་ལས་ལྷག་པའི་

ལྷུང་བཟེད་ཆེན་པོའི་ཚད་དུ་གསུམ་ལེན་དུ་མི་དབང་ངོ་། །ཟོས་ནའོ། །དུས་ཀྱིས་བདར་ཏེ་ལྷག་པར་བླངས་པའི་ཁ་ཟས་དེ་ཟོས་པ་ལས་ལྟུང་སྟེ་ཡན་ལག་གཅིག །བྱུང་སྟེའོ། །དུས་ཀྱིས་བསྟབས་པའི་ཁ་ཟས་དེ་གནས་དེ་ནས་གུད་དུ་ཁྱེར་བ་ལས་ལྷུང་སྟེ་ཡན་ལག་གཅིག །ཡན་ལག་

Vol. 165 · folio 140b

འདི་རྣམས་དང་ལྡན་ན་ལྟུང་ངོ་། །དེར་ཉེས་བྱས་པའོ། །དུས་ཀྱིས་བདར་བ་དེ་ལྷག་པར་བླངས་ནས་ཁྱེར་ཏེ་འགྲོ་བའི་ཚེ་ཉེས་བྱས། ཕ་རོལ་གྱིས་བྱས་ཀྱང་ངོ་། །དུས་ཀྱིས་བདར་བའི་ཁ་ཟས་དེ་གཞན་ལེན་དུ་བཅུག་སྟེ་གནས་གཞན་དུ་འོངས་ནས་ཟོས་ན་ཉེས་བྱས། གཞན་དུ་ན་ཉེས་མེད་

དོ། །དུས་ཀྱིས་བདར་ནས་གཞན་དུ་མ་ཁྱེར་བར་གནས་དེ་ཉིད་དུ་ཟོས་ན་ལྷུང་བཟེད་དུ་ཟོས་ཀྱང་ཉེས་མེད་དོ། །འདུས་མ་བྱས་ན་ཡང་ངོ་། །ཁ་ཟས་མ་གཡོས་པ་རྒྱུར་བྱིན་པ་ནི་ཅི་ཙམ་བླངས་ཀྱང་ཉེས་མེད་དོ། །སྐབས་གཞན་དུ་ཉེས་ཡོད་དེ་གུད་ནས་འཆད་དོ། །དེ་སྟེ་བླངས་པ་མང་ན་

དགེ་སློང་དང་བགོའོ། །སྲ་སྟ་ཕྱེད་དང་ལྔ་མན་ཆད་ཅིག་བླངས་པ་ལས་བདག་གཅིག་པུས་མི་ཟད་དེ་ལྷག་ན་དགེ་སློང་གཞན་དང་བགོ་ཞིང་བཟའོ། །ལྷུང་བཟེད་གཉིས་གསུམ་གང་བ་ལས་ལྷག་པར་ལེན་པའོ། །སྦྲུས་པ་ལྷུང་བཟེད་གཉིས་གསུམ་ལས་ལྷག་པར་བླངས་པའི་ལྟུང་བ་

རྫོགས་སོ།། །།ཟ་བའི་ལྟུང་བ་ལ་འཆད་དེ། ནམ་ཆོག་གི་བར་དུ་བཟའ། ཟན་ཟ་བ་ལ་སྟན་ལས་མི་ལྡང་བར་ལྷན་ཅིག་ཅིག་ཅར་འགྲངས་ཤིང་ཆོག་པར་བཟའ། ཟས་བརྩམས་ནས་མ་ལྡང་ཤིག །ཟན་བཟའ་བའི་ཕྱིར་བླངས་ཏེ་བཟའ་བར་བརྩམས་པ་ལས་ཟན་ཁར་མ་ཟོས་ཀྱི་བར་

དུའང་མི་ལྡང་ལངས་ནའང་ཉེས་བྱས། ཅི་ཙམ་དུ་གང་དེ་དག་གིས་ལན་ཚྭ་ཡན་ཆད་བཟའ་བར་བླངས་ན་དེའི་ཚུལ་ལོ། །ཟན་བཟའ་བར་བརྩམས་ཤིང་བླངས་པ་ནི་བཟའ་བ་དང་བཅའ་བ་ཅིའང་རུང་སྟེ་ལན་ཚྭ་ཙམ་ཡན་ཆད་བཟའ་བའི་ཕྱིར་བླངས་ཤིང་བརྩམས་ཀྱང་མི་ལྡང་ངོ་། །ལངས་ན་

ཉེས་བྱས། ཆུང་ཟད་ཟོས་ཏེ་སླར་འདུག་སྟེ་ཟོས་ན་ལྟུང་བའོ། །གནས་བཏང་ནས་ཟོས་ཟིན་པའོ། །ཟན་ཟ་བའི་འཕྲོ་ལས་ལངས་ཏེ་ཕྱིས་ཟ་བར་བསམས་ཡང་སླར་འདུག་སྟེ་ཟོས་ན་ཡང་ཡང་གི་ལྟུང་བའོ། །འགྲངས་སམ་མི་འདོད་པར་བསམས་ཏེ་ལངས་པ་ལས་ཕྱིས་ཀྱང་ཟོས་ན་ལྷག་མ་

མ་བྱས་པའི་ལྟུང་བའོ། །བཅའ་བ་ཡང་དེ་བཞིན་དུ་ལྟུང་བར་འགྱུར་རོ། །འདུག་པ་ལས་སོ། །ལངས་པ་ནི་འགྲེང་བཞིན་དུ་སོང་བ་ལ་མི་བྱའི་ས་ལ་འདུག་པ་ལས་ལངས་ན་ལྟུང་བར་འགྱུར་རོ། །བཅའ་བ་དང་བཟའ་བ་ལ་སོགས་པའི་ཁ་ཟས་བརྩམས་པ་ལས་སོ། །བཟའ་བ་དང་

Vol. 165 · folio 141a

བཅའ་བ་ལྔ་ལ་སོགས་པ་ཁ་ཟས་ཅི་བཟའ་ཡང་རུང་ལངས་པའི་འོག་ཏུ་ལྷག་མ་མ་བྱས་པར་ཡང་ཟས་སླར་ཟོས་ན་ལྟུང་བར་འགྱུར་རོ། །འདི་ལྟར་ལྟུང་བར་འགྱུར་བ་ནི་ཡང་ལངས་ཤིང་འདུག་ནས་ཟ་བ་གཞན་གྱི་མིག་ཏུ་མི་མཛེས་པའི་ཕྱིར་ལྟུང་ངོ་ཞེས་བཅས། མི་

འདོད་ཅེས་བྱས་པ་ནི་ཉེས་པའི་དམིགས་འོག་ནས་འཆད་རྩ་བ་རྩ་བའི་ནང་དུ་གཏོགས་སོ་ཅོག་དང་། སྡོང་པོ་སྡོང་པོ་དང་ལྡུམ་བུའི་ནང་དུ་གཏོགས་སོ་ཅོག་དང་། མེ་ཏོག་མེ་ཏོག་གི་ནང་དུ་གཏོགས་སོ་ཅོག་དང་། ལོ་མ་ལོ་མའི་ནང་དུ་གཏོགས་སོ་ཅོག་དང་། འབྲས་བུ་འབྲས་བུའི་ནང་དུ་

གཏོགས་སོ་ཅོག་དང་། བཅའ་བ་དང་རྟག་ཏུ་སྨོས་པ་འདི་རྣམས་ནི་བཅའ་བ་ཞེས་བྱ། གཞན་ཐུག་པ་དང་བཟའ་བ་དང་བཅའ་བ་ལས་གཞན་ཐུག་པ་དང་སྐྱོ་མ་དང་། བརྟགས་པ་བཟའ་བ་རྣམ་ལྔ་དང་འོ་མ་དང་ཞོ་དང་མར་ལ་བྱ། མ་བརྟགས་པ་དང་རྟ་དང་བོང་བུའི་ཤ་དང་སྒོག་པ་དང་

དགེ་སློང་གིས་བཙོས་པ་དང་སྤགས་པའི་ཟས་ལ་བྱ། མ་འདྲེས་པའི་བཟའ་བ། ཁ་ཟས་བརྟགས་པ་དང་མ་བརྟགས་པ་མ་འདྲེས་ཀྱང་རུང་འདྲེས་ཀྱང་རུང་བ་ལ་བྱ། བྱིན་ལེན་གྲུབ་པའི་ཕྱོགས་ན་གནས་པ་ལས་བཏང་བར་བྱས་ནའོ། །ཁ་ཟས་མིང་གིས་སྨོས་པ་འདི་རྣམས་ལས་གག་ཀྱང་

རུང་སྟེ་ཁ་ཟས་ཟ་བ་ལས་མི་འདོད་ཅེས་བྱས་སམ། མི་འདོད་པར་བསམས་སམ། ལངས་པ་ལས་ཕྱིས་བཟའ་བ་དང་བཅའ་བ་གག་བྱས་ཀྱང་ཉེས་པར་འགྱུར་ཏེ། བཟའ་བ་ལས་གག་ཀྱང་རུང་སྟེ་མི་འདོད་ཅེས་བྱས་པའི་འོག་ཏུ་བཟའ་བ་གག་ཟོས་ཀྱང་ལྟུང་། བཅའ་བ་ལས་སྣ་གཅིག་

གཅིག་མི་འདོད་ཅེས་བྱས་ན་བཅའ་བ་མི་འདོད་པ་དེ་ཉིད་ཀྱི་འཕྲོ་ལས་སླར་ཟོས་ན་ཉེས་བྱས་ཀྱི་བཅའ་བ་གཞན་དང་བཟའ་བ་ལ་སོགས་པ་ནི་ཉེས་མེད་དོ་ཞེས་ཊཱི་ཀ་ལས་བཤད། འདུལ་བ་འཛིན་པ་ཁ་ཅིག་ན་རེ་གང་མི་འདོད་ཅེས་བྱས་པ་དེ་ཉིད་ཀྱི་འཕྲོ་ལས་ཟོས་པ་ནི་ལྟུང་བ་དང་། ཉེས་པར་

འགྱུར་གྱིས་གཅིག་མི་འདོད་ཅེས་བྱས་པའི་འོག་ཏུ་གཞན་ཟོས་པ་ནི་ཉེས་མེད་དོ་ཞེས་ཀྱང་འཆད། བྱིན་ཅིག་ཅེས་ཀྱང་དེའོ། །ཁ་ཟས་འདི་བྱིན་ཞེས་བླངས་ན་ལྟུང་བའོ། །ཊཱི་ཀ་ལས་ནི་སྣ་གཅིག་བླངས་ན་ཕྱི་ནས་བྲིམས་པ་ཀུན་ཀྱང་ལྟུང་ངོ་། །བཅའ་བ་ནི་གང་བླངས་པ་དེ་ཟོས་ན་ཉེས་བྱས་

Vol. 165 · folio 141b

ཞེས་བཤད། འདུལ་བ་འཛིན་པ་ཁ་ཅིག་ན་རེ་གང་བླངས་པ་དེ་ཟོས་ན་ལྟུང་བ་དང་ཉེས་བྱས་ཀྱིས་བླངས་པ་མ་ཡིན་པ་གཞན་བྲིམས་པ་ནི་ཉེས་མེད་དོ་ཞེས་འཆད། སོང་ཤིག་ཅེས་ཀྱང་ངོ་། །ཟན་འབྲིམ་པ་ལ་མི་འདོད་པར་བསམས་ཀྱང་རུང་མ་བསམས་ཀྱང་རུང་སོང་ཞེས་སྨྲས་ན་མི་

འདོད་ཅེས་བྱ་བར་ཆུད་དེ་ཕྱིས་ཟོས་ན་བཟའ་བ་ནི་ལྟུང་བ་བཅའ་བ་ནི་ཉེས་བྱས་སོ། །ཟོས་སོ་ཞེས་ཀྱང་ངོ་། །འབྲིམ་པ་ལས་ངས་ཟོས་སོ་ཞེས་བྱས་ན་མི་འདོད་པར་བསམས་ཀྱང་རུང་མི་འདོད་པར་སྨྲས་པའི་ནང་དུ་ཆུད་དེ་ཟོས་ན་བཟའ་བ་ནི་ལྟུང་བ་བཅའ་བ་ནི་ཉེས་བྱས་སྐད་ཅིག་ཅེས་པའི་སྒྲ་མ་བརྗོད་

ནའོ། །སཱུ་ཏྲ་ལྟག་མ་གསུམ་ལྟར་མི་འདོད་ཅེས་སྨྲས་པར་མི་ཆུད་པ་ནི་རེ་ཞིག་སྡོད་ཅིག་ཅེས་བྱས་སམ་སྐད་ཅིག་ཇེ་རིམ་ཞེས་སྨྲས་ཏེ་ཟུར་ཡོད་པ་ནི་མི་འདོད་པའི་ཚིག་ཏུ་མི་ཆུད་དེ་ཟོས་ཀྱང་ལྟུང་བར་མི་འགྱུར་རོ། །ཟན་གཅིག་འདོད་དེ་སློང་ན་ཡང་རིམས་ཞེས་བྱས་པ་མི་སློང་བར་མི་ཆུད་ཟོས་

ཀྱང་ཉེས་མེད་དོ། །ཆོག་གོ་ཞེས་ཀྱང་ངོ་། །ཆོག་གོ་ཞེས་བྱས་སམ་འགྲངས་སོ་ཞེས་སྨྲས་པ་ལས་ཟོས་ནའང་བཟའ་བ་ནི་ལྟུང་བ་བཅའ་བ་ནི་ཉེས་བྱས། ཁ་གཟར་གྱེན་དུ་བསྒྲེང་བ་མི་འགྲུབ་ན་ཐུག་འཇམ་མོ། །ཐུག་པ་ནི་བཟའ་བའི་ནང་དུ་མི་གཏོགས་ཤིང་མི་ཆུད་དེ་ལན་གཉིས་སུ་

ལངས་ཤིང་འཐུངས་སམ་མི་འདོད་ཅེས་བྱས་པ་ལས་འཐུངས་ན་ཉེས་བྱས་ཏེ་ཐུག་པའི་ཚད་ནི་ཁ་གཟར་བཅུག་སྟེ་ཐུབ་ན་བཟའ་བའི་ནང་དུ་གཏོགས་སོ། །སྐྱོ་མ་ནི་སོར་མོ་ལྔ་མི་མངོན་ནའོ། །སྐྱོ་མ་ཡང་བཟའ་བའི་ནང་དུ་མི་ཆུད་དེ་ལན་གཉིས་སུ་ལངས་སམ་འཐུངས་སམ་མི་འདོད་ཅེས་བྱ་བ་ལས་

འཐུངས་ན་ཉེས་བྱས་སོ། །སྐྱོ་མར་ཆུད་པའི་ཚད་ནི་སོར་མོའི་རྗེས་སྣང་ན་བཟའ་བའི་ནང་དུ་གཏོགས་སོ། །མི་སྣང་ན་སྐྱོ་མའི་ནང་དུ་གཏོགས་སོ། །བསླུ་བ་ནི་བྱིན་ལེན་མ་ཡིན་ནོ། །མི་ལ་ལ་ཞིག་གིས་རྩེད་མོ་བྱ་བའི་ཕྱིར་ཁ་ནས་བྱིན་པ་ལྟར་བྱེད་པ་ལ་མི་བྱིན་པར་ཤེས་སྟེ་མི་འདོད་ཅེས་བྱས་

པ་ནི་ཕྱིས་ཡང་དག་པར་བྱིན་པས་བླངས་ཏེ་ཟོས་པ་ནི་ཉེས་མེད་དོ། །མཚམས་ཀྱི་ཕྱི་ལོགས་དང་། །ལྷག་མའི་སྔགས་བྱ་བ་ནི་བར་དུ་མིང་གིས་སྨོས་པ་འདི་རྣམས་ཀྱིས་ཆོད་ན་སྔགས་སུ་མི་རུང་སྟེ་ལྷག་མར་མི་ཆུད་པར་དུ་ཆུ་དང་ཡུར་བ་དང་གད་པ་ལ་སོགས་པས་ཆོད་པ་དང་། མི་འགྲུབ་པའི་

Vol. 165 · folio 142a

ཕྱོགས་ནས་གཅིག་ས་ལ་འདུག་ལ་གཅིག་ནམ་མཁའ་ལ་འདུག་པ་དང་ཕ་ཟད་ཚུ་ཟད་དུ་འདུག་པ་རྒྱང་རིང་པོར་འདུག་སྟེ་བྱས་པ་དང་། མདུན་དུ་མི་འདུག་ན་ལྷག་མ་བྱ་བ་མི་དབང་ངོ་། །རྒྱབ་དང་གློར་འདུག་སྟེ་སྔགས་བྱས་པ་ནི་ལྷག་མ་བྱས་པར་མི་ཆུད་དོ། །མདུན་དུ་

དྲང་པོར་འདུག་ལ་མཚམས་ཀྱིས་ཀྱང་མ་ཆོད་ན་སྔགས་བྱའོ། །བྱ་བ་ལག་ན་མི་འདུག་ན་ཡང་ངོ་། །སྔགས་བྱ་བ་ནི་བདག་དང་སྔགས་བྱེད་པ་གཉིས་ཀ་ལག་པ་ཡ་རེ་ས་འོག་ནས་བཏེག་ལ་ལག་པ་ཡ་རེ་ས་སྟེང་ནས་བཀབ་སྟེ་སྔགས་མ་བྱས་ན་མི་འཆགས། མ་བརྟགས་པ་ལ་ནི་མི་བྱའོ། །

ཁ་ཟས་མ་བརྟགས་པ་སྒོག་པ་དང་དགེ་སློང་གིས་བཙོས་པ་དང་སྤགས་པ་ལ་ནི་སྔགས་བཏབ་ཀྱང་མི་འཆགས་སོ། །གདབ་ཀྱང་མི་གདབ་པོ། །དེ་དང་འདྲེས་པ་ཡང་ངོ་། །ཁ་ཟས་བརྟགས་པ་དང་། མ་བརྟགས་པར་འདྲེས་པ་ལ་ཡང་སྔགས་མི་འཆགས་སོ། །གནས་མ་བཏང་བས་བྱ། སྔགས་

གདབ་པའི་དགེ་སློང་ཡང་ཟས་ཟོས་ཟིན་ཏེ་ལངས་པ་ལ་མི་བྱའི་མ་ལངས་པ་ཟན་ཟ་ཞིང་འདུག་པའི་དགེ་སློང་ཅིག་ལ་བྱའོ། །མི་བཟའ་བར་བརྟགས་པས་ཀྱང་བྱས་པ་བཞིན་ནོ། །ལྷག་མ་བྱ་བའི་དགེ་སློང་ཟན་ཟོས་ཟིན་ནས་མི་བཟའ་བར་སེམས་ཐག་ནི་བཅད་ཟིན་གྱི་རྐུབ་ནི་མ་འཕགས་པར་འདུག་པ་

ལ་ལྷག་མ་བྱ་བར་གསོལ་ཏེ་བྱས་ཀྱང་ཉེས་མེད་དོ། །གསོལ་ནས་སོ། །ལྷག་མ་བྱ་བའི་མི་དེས་ཀྱང་ལྷག་མ་བྱར་ཅི་གནང་ཞེས་གསོལ་ན་ལྷག་མ་བྱའི་མི་གསོལ་བར་ཚུལ་གྱིས་ཤིག་ཅེས་མི་བྱའོ། །སོང་ཁྱོད་ཀྱིར་གྱུར་ཏོ་ཞེས་ཚིག་བྱོས་ཤིག །ལྷག་མ་བྱེད་པའི་དགེ་སློང་གིས་སྔགས་

བྱས་ཟིན་ནས་ཟས་འདི་ཁྱོད་ཀྱིར་གྱུར་གྱིས་ཁྱེར་ཅིག་ཅེས་བྱས་ཏེ་བྱིན། ཅི་བདེར་ཟོས་ཤིག་ཅེས་ཀྱང་ཁ་ཅིག་གོ། །ལྷག་མ་བྱེད་པའི་དགེ་སློང་དེས་སྔགས་བྱས་ནས་ཅི་བདེ་ཞེས་བྱས་ཀྱང་རུང་ངོ་ཞེས་འདུལ་བ་འཛིན་པ་ཁ་ཅིག་གིས་བཤད་དེ། སཱུ་ཏྲ་ལྟག་མ་དང་གཉིས་གག་ཀྱང་རུང་ངོ་། །ཁམ་

གཉིས་སམ་གསུམ་ཟོས་ནས་སོ། །ལྷག་མ་བྱ་བ་ནི་ལྷག་མ་བྱེད་པའི་དགེ་སློང་གིས་ཁམ་གཉིས་སམ་གསུམ་ཟོས་ལ་སྔགས་བཏབ་སྟེ་སྦྱིན། བཟློག་པར་བྱས་པ་ལས་མ་ཟ་ཤིག །ལྷག་མ་བྱེད་པའི་དགེ་སློང་མི་བཟའ་བར་ཡི་དམ་བཅས་ཏེ་མ་ལངས་པར་འདུག་པ་ལ་ལྷག་

Vol. 165 · folio 142b

མ་བྱེད་པར་གསོལ་དུ་འོངས་ན་བདག་གི་ཡི་དམ་བཅས་པས་བཟར་མི་རུང་བའི་ཕྱིར་ཟན་ལ་ལག་པས་མནན་ཏེ་སྔགས་ཀྱིས་བཏབ་སྟེ་བྱིན་ཡང་ལྷག་མར་ཆུད་དོ། །གཞན་གྱིས་ལྷག་མ་བྱས་པ་ཡང་ཟོ་ཤིག །དགེ་སློང་ཅིག་གིས་ལྷག་མ་བྱས་ཤིང་སྔགས་བཏབ་ཟིན་པའི་ཟས་ལ་དགེ་

སློང་གཞན་ཟས་ཟོས་ཟིན་པས་ཀྱང་བཟར་རུང་ངོ་། །འབྷྲིད། ཟས་ཟོས་ལ་ལྷག་མ་མ་བྱས་པར་ཤེས་བཞིན་ལས་ལྟུང་སྟེ། ཟིན་ལ་ལྷག་མ་མ་བྱས་ནའོ། །ཟན་ཟོས་ཤིང་ལྷག་མ་མ་བྱས་པ་ལས་ལྟུང་སྟེ་ཡན་ལག་གཅིག །ཟོས་ནའོ། །ལྷག་མ་མ་བྱས་པའི་ཟན་ཟོས་པ་ལས་ལྟུང་བར་གྱུར་

ཏེ་ཡན་ལག་གཅིག །ཁ་ཟས་ཙམ་གྱིས་སོ། །ཁ་ཟས་ཀྱང་ཡིན་པ་ལས་ལྟུང་སྟེ་ཡན་ལག་གཅིག་ཙམ་ཞེས་བྱ་བ་ནི་ཁམ་གཅིག་ཡན་ཆད་ཙམ་ཟོས་པ་ལས་ལྟུང་སྟེ་ཡན་ལག་འདི་རྣམས་དང་ལྡན་ན་ལྷག་མ་མ་བྱས་པའི་ལྟུང་བར་གྱུར་ཏོ། །སྟན་གཅིག་པའི་ཟས་སོ། །ལྷག་མ་མ་བྱས་པའི་

ཟས་ཟོས་པའི་ལྟུང་བ་རྫོགས་སོ།། །།སྟོབས་པའི་ལྟུང་བ་ལ་འཆད་དེ། བསྒོ་བ། དགེ་སློང་ཟན་ཟོས་ཟིན་ཅིང་ལྷག་མ་མ་བྱས་པར་ཤེས་བཞིན་དུ་ཟས་འདི་ལྷག་མ་བྱས་ཟིན་པ་ཡིན་ཏེ་ཁྱོད་ཟོ་ཤིག་ཅེས་བསྒོ་བ་ལས་ལྟུང་སྟེ་ཤེས་བཞིན་དང་ཡན་ལག་གཉིས། དགེ་སློང་ལྷག་མ་མ་བྱས་པའི་

ཟན་བྱིན་པ་དེ་དགེ་སློང་ཡང་ཡིན་པ་དང་ཡན་ལག་འདི་གསུམ་དང་ལྡན་ན་ལྟུང་བར་འགྱུར་རོ། །ཟིན་པ་ལ་བསྒོ། །ཟན་ཟོས་ཟིན་པ་ལ་ལྷག་མ་མ་བྱས་པར་དུས་ཀྱིས་སྟོབས་པའི་ལྟུང་བ་རྫོགས་སོ།། །།མང་པོའི་ལྟུང་བ་ལ་འཆད་དེ། འབྷྲིད། དགེ་འདུན་འདུས་ཤིང་ཟ་བར་ཤེས་བཞིན་དུ་ལོགས་

ཤིག་ཏུ་ཟ་བ་ལས་ལྟུང་སྟེ་ཡན་ལག་གཅིག །སོ་སོར་བསྔོས་པའི་ཟས་ཀྱི་གནས་ལས་གཞན་མཚམས་ཀྱི་ནང་ན་གནས་པའི་དགེ་སློང་དགེ་འདུན་དུ་གྱུར་པར་ལྷན་མི་གཅིག་པར་ཟན་ཟ་ནའོ། །ཡོན་བདག་གིས་དགེ་སློང་དགེ་འདུན་སོ་སོར་ཟ་བར་རྒྱུ་སྦྱར་བ་ནི་མ་གཏོགས་ཏེ་གཞན་ཏེ་མཚམས་

གཅིག་གི་ནང་ན་དགེ་འདུན་ཀུན་གཅིག་ཏུ་འདུས་ཤིང་ཟན་གྱི་རྒྱུ་གཅིག་ཏུ་སྦྱར་ཅིང་ཟ་བ་ལས་བཞི་ཡན་ཆད་དགེ་འདུན་དུ་ལངས་པ་ཞིག་གིས་དགེ་འདུན་གྱི་ཟན་སྐལ་ལས་མི་བཟའ་བར་བྱས་ནས་ཡོན་བདག་གཞན་གྱིས་ཀྱང་གུད་དུ་སྤྱན་མ་དྲངས་པར་བདག་ཉིད་ཀྱིས་རྒྱུ་བཙལ་ཞིང་སྦྱར་ཏེ་མཚམས་

Vol. 165 · folio 143a

ཀྱི་ནང་དུ་ལོགས་ཤིག་ཏུ་ཟན་ཟོས་ན་ལྟུང་ངོ་། །ལྷན་ཅིག་ཏུའོ། །ལོགས་ཤིག་ཏུ་ཟ་བ་དེ་དགེ་འདུན་དུའང་ཚང་བ་དང་ལྷན་ཅིག་ཏུ་འདུས་པ་ལས་ལྟུང་བར་འགྱུར་ཏེ་ཡན་ལག་གཅིག །ལྷན་གཅིག་ཏུ་ཟ་ནའོ། །དགེ་འདུན་དུ་ལངས་པར་ལྷན་ཅིག་ཏུ་འདུས་པ་དེས་ཟན་ཟོས་པ་ལས་

ལྟུང་སྟེ་ཡན་ལག་གཅིག །གསུམ་ལ་སོགས་དང་ངོ་། །ལྷན་ཅིག་ཏུ་ཟ་བ་དེ་རྣམས་གསུམ་མན་ཆད་ནི་གུད་དུ་ཟོས་ཀྱང་ཉེས་བྱས་ཀྱི་གསུམ་ལས་ལྷག་པར་བཞི་ཡན་ཆད་གཅིག་ཏུ་ཚང་ན་ལྟུང་བར་འགྱུར་ཏེ་ཡན་ལག་གཅིག །དགེ་སློང་དང་ངོ་། །བཞིར་ཚང་བ་ཡང་དགེ་སྦྱོང་དང་ཁྱིམ་པ་

མ་ཡིན་གྱི་ཀུན་དགེ་སློང་ཡིན་ན་ལྟུང་སྟེ་ཡན་ལག་གཅིག །གག་གི་ཚུལ་གོས་མེད་པའི་ཟས་གཉིས་པོ་རྙེད་པ་དང་གྲུ་ཡང་མ་བརྒལ་ནའོ། །གོས་དབུལ་བའི་ཕྱིར་ཁ་གཉིས་སུ་སྤྱན་དྲངས་པ་དང་ན་བ་དང་ལས་དང་ལམ་དང་གྲུར་ཞུགས་པ་དང་དུས་འདི་རྣམས་མ་གཏོགས་པར་ཟན་ཟོས་པ་ལས་ལྟུང་

སྟེ་ཡན་ལག་གཅིག་སྟེ། ཡན་ལག་འདི་རྣམས་དང་ལྡན་པར་ལོགས་ཤིག་ཏུ་འདུས་ཏེ་ཟན་ཟོས་ན་ལྟུང་བའོ། །འདུས་པ་ཆེན་པོ་ལས་གཞན་ན་ཡང་ངོ་། །དུས་ཀྱི་མཆོད་སྟོན་ཆེན་པོ་ལྟ་བུ་ཞིག་བྱེད་དེ་མི་ཕལ་མོ་ཆེ་འདུས་ནས་བཀད་ས་གཅིག་ཏུ་མི་ཤོང་སྟེ། ཁང་པ་སོ་སོར་ཆོད་ཅིང་ཟོས་པ་ནི་ཉེས་མེད་དོ། །

གཞན་འདིའི་ཚུལ་མ་ཡིན་པ་རབ་ཏུ་འབྱུང་བའི་ཟན་ལས་སོ། །སངས་རྒྱས་ཀྱི་ཆོས་མ་ཡིན་ལ་ལྟ་བ་མ་ཡིན་པ་མུར་འདུག་གི་རབ་ཏུ་བྱུང་བའི་དགེ་སྦྱོང་གིས་ཟན་བྱིན་ཏེ་ལོགས་ཤིག་ཏུ་ཟོས་པ་ནི་ཉེས་མེད་དོ། །ཟོས་ནའོ། །ལོགས་ཤིག་ཏུ་འདུས་ཤིང་ཟ་བ་ཡང་ཟོས་ཟིན་ན་ལྟུང་བར་གྱུར་ཏེ་ཡན་ལག་

གཅིག་སྟེ་ཡན་ལག་སྔ་མའི་ཐོག་ཏུ་འདིས་བསྣན་ཏོ། །མཚམས་ཀྱི་ནང་གི་དེར་གདོན་མི་ཟ་བར་འོང་པའི་གནས་སུ་འོངས་སམ་མ་དྲིས་པར་ཟོས་ན་འགལ་བ་བྱེད་དོ། །མཚམས་གཅིག་གི་ནང་དགེ་འདུན་ཀུན་འདུས་ཤིང་ཟན་ཟ་བ་ཁ་ཅིག་གྲལ་ལ་མ་ཤོང་སྟེ་ལྐོག་ཏུ་ཟ་བར་གྱུར་ན་ཡང་དགེ་འདུན་གྱི་

སྤྱིས་དགེ་འདུན་ཚང་ངམ་མ་ཚང་ཟན་གག་ཏུ་ཟ་ཞེས་མ་བྱས་ན་ཀུན་ལ་ཉེས་བྱས་ཏེ་དྲི་བ་ནི་གྲལ་ཐོག་མ་ན་འདུག་པས་དྲིའོ། །གང་ཅི་ཡང་ཆུང་ཟད་ཅིག་བྲིམས་ན་ཟས་གཅིག་གོ། །དགེ་འདུན་དུ་ལངས་ཀྱང་རུང་གང་ཟག་ཀྱང་རུང་གུད་དུ་ཟན་ཁ་ཟས་སྣ་འགའ་ཙམ་གྱིས་དགེ་འདུན་གྱི་ནང་དུ་ཕན་ཚུན་དུ་

Vol. 165 · folio 143b

བྲིམས་ན་ལྟུང་བ་དང་ཉེས་བྱས་ལས་བྲིས་ཏེ་ལྟུང་བ་ལས་ནི་ཉེས་བྱས་ཉེས་བྱས་ལས་ནི་ཉེས་བྱས་ཡང་བར་འགྱུར་རོ། །འགྲོ་བ་དང་། ཟན་གྱི་དུས་ལས་སྔར་རིང་པར་འགྲོ་བ་དང་། འོང་བ་དང་། ལམ་རིང་པོ་ཞིག་ནས་འོངས་ཏེ་བཀྲེས་པ་དང་། ནད་པ་དང་ནད་པ་ཟན་ལ་འོང་མི་ཕོད་པ་དང་། ནད་གཡོག་དང་ནད་གཡོག་

ཏུ་བསྐོས་པའི་དགེ་སློང་དང་། དཀོར་པ་ལས་དགེ་འདུན་གྱིས་བསྐོར་བ་དང་། ཐོ་དན་ལྟ་བུ་ལས་ལ་འབྲེལ་པ་དང་། གཞན་ཚང་མང་དང་བསྐོས་སར་ཐམས་ཅད་ཀྱིས་མ་ཟོས་པར་བླངས་ཤིང་མི་བཟའ། མིང་གིས་སྨོས་པ་འདི་རྣམས་ནི་དགེ་འདུན་ལས་སྔར་ཟན་ཟོས་སམ་ལོགས་ཤིག་ཏུ་

ཟོས་པ་ནི་ཉེས་མེད་དོ། །འདི་རྣམས་མ་གཏོགས་པར་དགེ་སློང་གག་ཀྱང་རུང་སྟེ་དགེ་འདུན་ལས་སྔར་ཟོས་སམ་ལོགས་ཤིག་ཏུ་མནོས་ཏེ་ཟོས་ནའང་ཉེས་བྱས་སོ། །སྡེ་ཟན་ནོ། །སྡེར་མང་པོ་འདུས་ཤིང་ལོགས་ཤིག་ཏུ་ཟ་བ་རྫོགས་སོ།། །།དུས་མ་ཡིན་པའི་ལྟུང་བ་ལ་འཆད་དེ། བདག་གི་

ཉི་མ་ཕྱེད་ཕན་ཆད་སྐྱ་རེངས་ཤར་གྱི་བར་དུ་དུས་མ་ཡིན། བདག་ཤར་དང་ལྷོ་དང་ནུབ་དང་བྱང་གི་གླིང་གང་ན་གནས་པའི་གླིང་ཡུལ་དེའི་ཉི་མ་ཕྱེད་ཕན་ཆད་སྐྱ་རེངས་མ་ཤར་གྱི་བར་དུ་དུས་མ་ཡིན་པ་སྟེ་བཟའ་བ་རྣམ་ལྔ་དང་བཅའ་བ་རྣམ་ལྔ་ལ་སོགས་པ་གང་ཟོས་ཀྱང་ལྟུང་བར་འགྱུར་རོ། །སྐྱ་རེངས་

ཤར་ནས་ཉི་མ་ཕྱེད་ཚུན་ཆད་ནི་དུས་ཏེ་ཟོས་ཀྱང་ཉེས་མེད་དོ། །ཤར་ཕྱོགས་ཀྱི་གླིང་དུ་དྲོའི་ཟན་ཟོས་ལ་ལྷོ་ཕྱོགས་སུ་སོང་སྟེ་ཟ་བ་ནི་ཤར་གྱི་ཉི་མ་ཕྱེད་ན་ལྷོའི་ཉི་མ་ཤར་བར་གྱུར་ཏེ་བཟར་རུང་ངོ་། །དེ་བཞིན་དུ་ལྷོ་ནས་ནུབ། ནུབ་ནས་བྱང་བྱང་ནས་ཤར་ཀྱང་ངོ་། །དེར་འབྷྲིད། དུས་མ་ཡིན་ཞིང་དུས་

ལས་འདས་པར་ཤེས་བཞིན་དུ་ཟོས་པ་ལ་ལྟུང་བར་འགྱུར་རོ། །བཟའ་བ་དང་བཅའ་བ་ཟ་བའོ། །དུས་མ་ཡིན་པར་བཟའ་བ་དང་བཅའ་བ་ཟོས་པ་ལ་ལྟུང་བར་འགྱུར་རོ། །དུས་མ་ཡིན་པའི་ཟས་སོ། །དུས་མ་ཡིན་པའི་ཟས་ཟོས་པའི་ལྟུང་བ་སྟེ་རྫོགས་སོ།། །།སྤགས་པའི་ལྟུང་བ་ལ་

འཆད་དེ། ཟན་གྱི་སྔ་རོལ་བྱིན་ལེན་ལ་ཟན་གྱི་ཕྱི་རོལ་ཏམ་དེར་ཐུན་འདས་ན་སྤགས་པའོ། །བཟའ་བ་དང་བཅའ་བ་ལས་དྲོ་ཁ་ཚུན་ཆད་དུ་བཟའ་བར་བསམས་ཏེ་ནང་པར་བྱིན་ལེན་བྱས་པ་ལས་དྲོ་ཁ་ཚུན་ཆད་དུ་ཁྱིམ་པའམ་དགེ་སྦྱོང་ཞིག་གིས་ས་ལས་འཕགས་པར་བཏེག་པ་ནི་ཕྱིན་ཆད་ནམ་ཡང་

Vol. 165 · folio 144a

བཟར་རུང་ངོ་། །ནང་པར་བྱིན་ལེན་བྱས་པའི་ཟན་དེ་དྲོ་ཁར་བཟའ་བར་བྱ་བ་ལས་དྲོ་འདས་པའི་འོག་ཏུ་ཁྱིམ་པ་དང་དགེ་སྦྱོང་གིས་བཏེག་པ་ནི་ཕྱིན་ཆད་བཟར་མི་རུང་སྟེ་ཟོས་ན་ལྟུང་བའོ། །ནང་པར་བྱིན་ལེན་བྱས་པའི་ཟས་དྲོ་ཁར་ཡང་མ་ཟོས་ཁྱིམ་པས་ཀྱང་མ་རེག་པ་དྲོ་

འདས་པ་ནི་སྤགས་པ་སྟེ་བཟར་མི་རུང་སྟེ་ལྟུང་བ་དང་དྲོ་འདས་ན་ལྟུང་བ་བཞིན་དུ་དྲོའི་འོག་ཏུ་བྱིན་ལེན་བྱས་པ་ཕྱི་དྲོ་བཟའ་བར་བསམས་པ་ལས་ཉི་མ་ནུབ་སྟེ་དམར་ཐག་ཆད་པ་ལས་འདས་པ་ཡང་སྤགས་པའོ། །དེར་རོ། །ཁ་ཟས་བདག་གིས་བྱིན་ལེན་བྱས་ལ་དྲོ་དང་ཕྱི་དྲོ་ཐུན་འདས་པར་ཤེས་བཞིན་

དུ་ཟོས་པ་ལས་ལྟུང་བར་འགྱུར་རོ། །བཏེག་པ་མི་མིང་། སྔ་དྲོ་བྱིན་ལེན་བྱས་པ་དྲོ་ཁར་བཟའ་བར་བསམས་ལ་དེ་ཁྱིམ་པ་དང་དགེ་སྦྱོང་གིས་བཏེག་ཅིང་རེག་ན་ཡང་ཕྱི་དྲོ་ཟ་ཡང་རུང་སླར་བྱིན་ལེན་མ་བྱས་པར་ཟ་ན་ཉེས་བྱས་སོ། །མཚམས་ཀྱི་ནང་དུ་བཞག་པ་དང་བཙོས་པ་མ་ཡིན། །དགེ་སློང་གིས་

མ་རེག་ཅིང་བྱིན་ལེན་མ་བྱས་པའི་ཟས་མཚམས་གཅིག་གི་ནང་དུ་ཞག་ལོན་པ་དང་མཚམས་ཀྱི་ནང་དུ་ཁྱིམ་པས་བཙོས་ཤིང་གཡོས་བྱས་པ་ཟོས་པ་ཡང་ཉེས་བྱས་པའོ། །མཚམས་ཀྱི་ནང་དུ་བཙོས་ཀྱང་དགེ་འདུན་གྱིས་གསོལ་བ་དང་ཞུ་བའི་ལས་ཀྱིས་བསྔོས་པ་ནི་ཉེས་མེད་དོ། །གསོལ་བས་

བསྔོ་བ་ཡང་རྣམ་གསུམ་སྟེ་ཐོག་མ་རྨང་གདིང་བ་ན་ཚང་མང་དུ་བསྔོས་པ་དང་ཁང་པ་རྙིང་པ་དགེ་འདུན་ཐམས་ཅད་མཚམས་གཅིག་གི་ཕྱིར་རོལ་དུ་ཞག་གཅིག་གནས་ལ་དེ་ནས་གདོད་ཚང་མང་དུ་བསྔོར་རུང་སྟེ་འདི་གསུམ་གྱི་སྐབས་ལྟ་བུར་གསོལ་བ་བྱས་པ་ནི་བསྔོར་རུང་ངོ་། །དགེ་སློང་གིས་

བཙོས་པ་ཡང་ངོ་། །མཚམས་ཀྱི་ཕྱི་རོལ་དུ་དགེ་སློང་གིས་བཙོས་པ་ཡང་ཉེས་བྱས། རྗེན་པ་ལས་ན་དེ་བཙོས་པའོ། །སཱུ་ཏྲ་ལྟག་མ་གཉིས་ཀྱིས་བཙོས་པ་ནི་བཙོས་ཟིན་པ་ལ་སླར་བསྲོས་པ་ལ་ཉེས་མེད་ཀྱིས་མ་བཅོས་ཤིང་རྗེན་པ་ལས་བཙོས་པ་ཡང་བཙོས་པ་ལས་ཟོས་ན་ཉེས་བྱས། སུམ་ཆ་

བཙོས་ལ་མི་འཇམ་པ་ཚུན་ཆད་དེར་རོ། །བཙོས་པའི་ཚད་དུ་ཆུད་པ་ནི་ནས་དང་འབྲས་དང་སྲན་མ་ལ་སོགས་པ་སྲ་བ་གསུམ་གཉིས་ཚོས་ཤིང་འཇམ་པོ་མུལ་མུལ་མོར་གྱུར་པ་ནི་བཙོས་པའི་ཚད་དུ་ཆུད་དོ། །སུམ་ཆ་ཚོས་ཤིང་འཇམ་པོར་མ་གྱུར་པ་ནི་མ་བཙོས་པའོ། །ཁ་དོག་འགྱུར་ལ་འཇམ་

Vol. 165 · folio 144b

ནའོ། །ཚོད་མ་དང་ག་གོན་ལྟ་བུ་ནི་ཁ་དོག་འགྱུར་ཞིང་འཇམ་པོར་གྱུར་ན་བཙོས་པའོ། །ཁུ་བ་ན་ལྷག་གཉིས་ནའོ། །འོ་མ་ལྟ་བུ་འཚོད་པ་ནི་ལྷག་གཉིས་བཙོས་པས་བཙོས་པར་ཆུད་དོ། །མེས་བརྟགས་པ་བྱས་པའང་མ་བཙོས་པ་མ་ཡིན་ནོ། །བརྟག་པ་རྣམ་བདུན་བྱ་བ་ལ་མེས་བརྟགས་པ་ཡང་

བཙོས་པར་ཆུད་དེ་དགེ་སློང་གིས་མེས་བརྟགས་ན་དགེ་སློང་དེ་ཉིད་ལ་སེམས་བཤིག་པའི་ལྟུང་བ་ཡང་ཡོད་དགེ་སློང་གིས་བརྟགས་པ་དེ་ཟོས་ན་དགེ་སློང་གིས་བཙོས་པ་ཟོས་པའི་ཉེས་བྱས་པར་ཡང་འགྱུར་གཞན་གྱིས་མེས་བརྟགས་པ་ཞིག་བཙོས་ན་ཡང་བཙོས་པའི་ཉེས་བྱས་པར་མི་འགྱུར་རོ། །ཚེས་

བཟུང་བ་ལས་སྤྲུལ་པ་གནས་པའང་གནས་པའོ། །མཚམས་གཅིག་གི་ནང་ན་བཟའ་ཤིང་སྐྱེས་པའི་ཤིང་ཏོག་བླགས་ཏེ་ཟོས་ན་ཡང་མཚམས་གཅིག་གི་ནང་དུ་ཞག་ལོན་པའི་ཁ་ཟས་སུ་ཆུད་དེ་ཉེས་བྱས་སོ། །དེ་བཞིན་དུ་མཚམས་ཀྱི་ནང་དུ་ར་ལུག་དང་བ་བཏགས་པའི་ཞོ་འཐུངས་ནའང་ཉེས་བྱས་སུ་

འགྱུར་རོ། །ཕྱོགས་སུ་སྣོད་གནས་ན་ཡང་དེ་སར་ཚོས་པའོ། །གཙུག་ལག་ཁང་གི་མཚམས་སུ་གཏོགས་པ་དང་མ་གཏོགས་པའི་ཚད་དུ་ལྕགས་སྒྱེད་དམ་སྒྱེད་པུ་ལྟ་བུ་བཙུགས་ཏེ་རྩ་བ་གཉིས་མཚམས་ཀྱི་ཕྱི་རོལ་དུ་ཟུག་ལ་རྩ་བ་གཅིག་མཚམས་ཀྱི་ནང་དུ་ཟུག་པ་ཡང་མཆིས་ཀྱི་ནང་དུ་

བཙོས་པར་ཆུད་དོ། །བཙོས་པ་དེར་གྱུར་པ་མ་ཡིན་ནོ། །མཚམས་ཀྱི་ཕྱི་རོལ་ན་ཟན་འདུག་ལ་མཚམས་ཀྱི་ནང་ན་མི་འདུག་སྟེ་སྐྱ་བ་འམ་གཟར་བུས་དཀྲུགས་ཤིང་འཚེད་པ་ནི་མཚམས་སུ་བཙོས་པར་མི་ཆུད་དོ། །མདག་མ་ཡང་སྣོད་མ་ཡིན་པ་མ་ཡིན་ནོ། །མཚམས་ཀྱི་ནང་དུ་མདག་མ་བླངས་ཏེ་

བསྲེགས་པ་དང་མེ་མཚམས་ཀྱི་ཕྱི་རོལ་དུ་འདུག་ལ་རླུང་གིས་བཏབ་པའི་མེ་ལྕེ་མཚམས་ཀྱི་ནང་དུ་འོངས་པ་ལ་བསྲེགས་པའང་མཚམས་ཀྱི་ནང་དུ་བསྲེགས་པར་ཆུད་དོ། །དེ་ལས་ཕྱུང་ངམ་མ་ཕྱུང་ན་དེར་མ་ཡིན་ནོ། །མཚམས་ཀྱི་ནང་གི་མེ་མདག་མ་ཕྱི་རོལ་དུ་འདྲིལ་བ་ལ་བསྲེགས་པ་དང་། རླུང་

གིས་བཏབ་པའི་མེ་ལྕེ་མཚམས་ཀྱི་ཕྱི་རོལ་དུ་ཕྱུང་བ་ལ་བསྲེགས་པས་ནི་བསྲེགས་པར་མི་ཆུད་དོ། །གནས་བཞིན་དུ་མཚམས་ཀྱང་ངོ་། །གཙུག་ལག་ཁང་གི་ཕྱི་རའི་ཕྱི་རོལ་དུ་འགྲོན་བོར་བའི་ཚུན་ཆད་གཅིག་ཏུ་བཙོས་ན་ཡང་མཚམས་གཅིག་ཏུ་བཙོས་པར་གྱུར་ཏེ་འགྲོན་བོར་བའི་མཚམས་ཇི་

Vol. 165 · folio 145a

ཙམ་དུ་ཚུན་ཆད་མ་ཡིན་པ་ནི་འོག་ནས་འཆད། འདོམ་མོ། །གཙུག་ལག་ཁང་གི་ཕྱི་རའི་ནས་འདོམ་གང་ཚུན་ཆད་ཀྱི་མཚམས་ཀྱི་ནང་དུ་གཏོགས་སོ། །གྱེན་དུ་ནམ་མཁའ་ལ་འགྲུབ་པས་སོ། །མཚམས་ཀྱི་ནང་གི་ནམ་མཁའ་ལ་བཙོས་ཏེ་བར་ཅི་ཡང་མ་ཆོད་

ནའང་མཚམས་ཀྱི་ནང་དུ་བཙོས་པར་ཆུད་དོ། །ནང་གི་ཡང་ངོ་། །ཁང་པ་མཐོན་པོའི་ནང་ཐོག་བོར་བ་ཡང་ནང་གི་ནམ་མཁའ་ལ་བཙོས་ན་མི་གང་ལྷག་སྟེ་བར་ཅི་ཙམ་ཞུགས་ཀྱང་བཙོས་པར་འགྱུར་རོ། །སྟེང་གི་རིམ་པ་ཡང་དེ་བཞིན་ནོ། །ཁང་པ་རྩེག་མ་རིམ་དུ་ཡོད་ཀྱང་རུང་སྟེ་ཡང་ཏོག་ཏུ་བཙོས་

ཀྱང་རུང་འོག་ཁང་ཏུ་བཙོས་ཀྱང་རུང་མཚམས་གཅིག་གི་ནང་དུ་བཙོས་པར་ཆུད་དོ། །གཞན་གྱིས་བསྔོས་པར་གཞན་གྱི་གནས་མ་ཡིན་ནོ། །དགེ་སློང་གི་གནས་ལ་གཞན་ཁ་དྲག་པོ་ཞིག་གིས་དབང་བྱས་ཏེ་དགེ་སློང་ཁང་བུ་མིག་གཅིག་ཏུ་གཞག་ནས་གཞན་དུ་ཁྱིམ་བདག་དེ་འདུག་ན་ཁྱིམ་བདག་

འདུག་པར་བཙོས་པ་དང་ཁྱིམ་པས་བཙོས་པ་ནི་མཚམས་གཅིག་ཏུ་བཙོས་པར་མི་ཆུད་དོ། །ནམ་འཚོའི་བར་དུ་བ་ནི་བཏེག་པ་པ་དང་ནང་དུ་བཙོས་པ་དང་དགེ་སློང་གིས་བཙོས་པ་དེའི་བགགས་པ་ལ་མ་གནས་ཏེ་དུས་སོ། །ཁ་ཟས་དགེ་སློང་བཏེག་པ་དང་མཚམས་ཀྱི་ནང་དུ་བཙོས་པ་དང་། དགེ་

སློང་གིས་བཙོས་པ་བཟར་མི་གནང་ཞེས་བཤད་པ་ལ་ཚེ་གཅིག་ཏུ་བཅང་བ་དང་ཞག་བདུན་པའི་སྨན་ནི་སྔགས་ཀྱིས་བཏབ་ན་བཏེག་པ་དང་བཙོས་པ་ལ་སོགས་པ་སྤྱད་ཅིང་བཟའ་བ་ལ་སོགས་པ་ཉེས་མེད་དོ། །བཙོ་བ་ནི་ན་བའི་ཕྱིར་བཙོས་ན་ནི་ཉེས་མེད་ཀྱི་མི་ན་བར་ནི་དགེ་སློང་གིས་བཙོས་པ་

དང་མཚམས་གཅིག་ཏུ་བཙོས་པ་ནི་མི་གནང་ངོ་། །འབགས་པ་ནི་ཟས་ཀྱི་ཕྱེད་དོ། །ལྷུང་བཟེད་དང་གཞོང་པ་དང་ལག་པ་ལ་སོགས་པ་ལ་ཁ་ཟས་ཆགས་བཞིན་དུ་ཟོས་ན་ཉེས་བྱས་སོ། །ཁའི་དྲི་མ་དང་བཟའ་བཏུང་བ་ཡང་ངོ་། །ཁའི་དྲི་མ་དང་ཁ་ཟས་ཀྱི་ཚིགས་མཁའི་གསེབ་ཏུ་ཆགས་པ་ཡང་མ་

དག་བཞིན་དུ་ཁ་ཟས་ཟོས་ཤིང་འཐུངས་ན་ཉེས་བྱས་ཏེ་ཐུན་འདས་ན་སྤགས་པར་འགྱུར་བའི་ཕྱིར་རོ། །འདིའི་ཕྱི་རོལ་ལྕི་བའམ་སས་ཕྱིས་ཏེ་ཆུས་བཤལ་ལ་བཀྲུའོ། །ཁ་དག་པར་བྱ་བའི་ཕྱིར་ཁའི་ཕྱི་རོལ་ལྕི་བའམ་སས་བསྐུས་ལ་ཆུས་དག་པར་བཤལ་ཞིང་བཀྲུའོ། །ནང་ཆུས་ལན་

Vol. 165 · folio 145b

གཉིས་སམ་གསུམ་གྱིས་ལ་མཁུར་ཆུ་དོར་རོ། །ཁའི་ནང་ནི་ནང་པར་དང་དྲོ་ཟོས་པའི་འོག་ཏུ་སོ་ཤིང་ཟོས་ལ་ལན་གསུམ་ཆུས་དག་པར་བཀྲུའོ། །ཕྱི་དྲོ་སྐོམ་འཐུངས་ནའང་ལན་གསུམ་དུ་ཆུས་དག་པར་བཀྲུའོ། །ལྷུང་བཟེད་ལན་གཉིས་གསུམ་བཟླས་ཏེ་གུས་པར་བཀྲུས་ན་སྒྲ་མ་བྱུང་ཡང་

ངོ་། །ཟན་ཟ་བའི་སྔོན་ལོགས་སུ་ལྷུང་བཟེད་བཀྲུ་བ་ཡང་སྔ་དེ་ཉིན་དག་པར་བཀྲུས་སུ་ཟིན་ཀྱང་ལྕི་བའམ་རྩ་བརྡུངས་པའི་ཁུ་བའམ་ས་འཇམ་པོ་སྤྲ་ཚིལ་འདྲ་བས་ལན་གསུམ་དུ་བཀྲུས་ཏེ་དག་པར་བྱས་ལ་ཀྲིག་ཀྲིག་ཟེར་བའི་སྒྲའམ་བརྡབས་པའི་སྒྲ་དང་ཞེས་ཟེར་བ་ནི་དག་པའི་ཚད་དུ་ཆུད་

དོ། །ལན་གསུམ་དུ་བཟླས་ཏེ་བཀྲུས་ནས་སྒྲ་མི་ཟེར་ཡང་དེས་ཆོག་པར་བརྩིའོ། །ཉེས་མེད་པ་ནི་ལངས་པའོ། །སཱུ་ཏྲ་ལྟག་མ་ལྟར་ལན་གསུམ་དུ་བཟླས་ཏེ་དག་པར་བཀྲུས་པ་ལས་སྣུམ་དང་རྩི་ལ་སོགས་པ་ཁ་ཟས་ཀྱིས་ལངས་པར་ཡང་ཉེས་མེད་དོ། །མི་འབགས་པ་ལ་རེག་པ་ཡང་ངོ་། །

ཁ་ཕྱིས་དང་སྣོད་སྤྱད་ལ་སོགས་པ་ཁ་ཟས་ཆགས་ཤིང་མ་བཀྲུས་པ་ཞིག་ལ་རེག་ན་ཉེས་བྱས་སོ། །བུལ་ཏོག་དང་ལྕི་བ་དང་ས་གང་ཡང་རུང་བས་ལན་གསུམ་དུ་བཀྲུས་ན་སྣུམ་ཡང་ངོ་། །གོས་དང་སྣོད་སྤྱད་དང་ལྷུང་བཟེད་ལ་སོགས་པ་བུལ་ཏོག་དང་ལྕི་བ་དང་ས་ལ་སོགས་པས་ལན་

གསུམ་དུ་དག་པར་བཟླས་ཏེ་བཀྲུས་ན་མ་དག་ཅིང་སྣུམ་ཡང་ཉེས་མེད་དོ། །ལངས་པ་གསལ། ལྷུང་བཟེད་ལན་གསུམ་དུ་དག་པར་བཀྲུས་པ་ལས། ཁ་ཟས་ཚན་པོ་ཞིག་བླུགས་ཏེ་ལྷན་པའི་གསེབ་ནས་རྩིའམ་སྣུམ་ལངས་ཏེ་མངོན་པར་གྱུར་ན་དེ་ཉིད་བསལ་ཏེ་དོར་རོ། །

འབགས་པ་དེའི་ཕྱོགས་སུ་བཀྲུ། ལྷུང་བཟེད་དང་སྣོད་སྤྱད་ལ་སོགས་པ་སྣུམ་མམ་ཟས་ཀྱིས་རེག་ན་གར་རེག་པར་དག་པར་བཀྲུས་ལ་གོས་ནི་གཞན་མི་བཀྲུའོ། །སྣོད་སྤྱད་པ་ནི་གཞན་བཤལ་བས་ཆོག་གོ། །མི་སྣུམ་པའི་ཕྱིར་སྣུམ་པའི་རྫ་མ་ལ་སོགས་པ་རྫིང་བུའི་ཆུ་ཟབ་མོར་གཞུག །

རྫ་མ་ལ་སོགས་སྣོད་སྤྱད་མར་གྱི་སྣོད་བྱེད་བྱེད་དེ་སྣུམ་མི་འདག་ན་རྫིང་བུའི་ནང་དུ་གཞུག །ཉ་དང་རུས་སྦལ་དང་སྦལ་པ་དང་སྦལ་པ་དཀར་པོ་དང་སྲིན་བུ་ཨུ་ལུག་ཀས་མ་བལྡག་ཀྱི་བར་དུ་བཞག །སཱུ་ཏྲ་ལྟག་མ་ལྟར་རྫིང་བུའི་ནང་དུ་གཞུག་པ་ནི་མིང་གིས་སྨོས་པའི་སྲིན་བུ་འདི་རྣམས་ཀྱིས་

Vol. 165 · folio 146a

བལྡགས་ན་སྣུམ་མེད་ཅིང་དག་པར་འགྱུར་ཏེ་ནམ་བལྡགས་ཤིང་དག་གི་བར་དུ་ཞག་གཉིས་གསུམ་དུ་གཞག་གོ། །བསྲེགས་ཏེ་ཡང་སྣུམ་མེད་པར་གྲུབ་ནའོ། །རྫ་མ་སྣུམ་མེད་པར་བྱ་བའི་ཕྱིར་མེས་བསྲེགས་ན་ཡང་སྣུམ་མེད་ཅིང་དག་པར་འགྱུར་རོ། །སྣུམ་མེད་

ནས་ཀྱང་དགེ་སློང་དེ་གོ་འདུན་ནམ་ལྕི་བས་དག་པར་བཀྲུ །སཱུ་ཏྲ་ལྟག་མ་ལྟར་མེའམ་རྫིང་བུར་བཀྲུས་པའི་སྣོད་སྤྱད་དེ་ཕྱི་ནས་ཀྱང་གོ་འདུན་ནམ་ལྕི་བས་ཀྱང་ལན་གཅིག་དག་པར་བཀྲུའོ། །ལན་ཚྭ་དང་བ་ཚ་དང་རྙོག་མ་ཅན་གྱི་ཆུ་ལན་ཚྭ་ལ་སོགས་པ་ཕྱེད་དོ། །ལན་ཚྭ་ཅན་གྱི་ཆུ་དང་

བ་ཚྭ་ཅན་གྱི་ཆུ་དང་རྙོག་མ་ཅན་གྱི་ཆུ་སྔ་དྲོ་བྱིན་ལེན་མ་བྱས་པར་འཐུངས་ན་ཉེས་བྱས་ཕྱི་དྲོ་ནི་བྱིན་ལེན་བྱས་ཏེ་འཐུངས་ཀྱང་ཉེས་བྱས་སོ། །བརྟགས་པ་སྟེ་དུས་མ་ཡིན་པ་དང་ཐམས་ཅད་དུའོ། །ལན་ཚྭ་ཅན་དང་བ་ཚ་ཅན་གྱི་ཆུ་ནི་བཙགས་པའམ་དངས་པར་བྱས་ཏེ་བརྟགས་ན་དུས་མ་ཡིན་པ་དང་བྱིན་

ལེན་མ་བྱས་པར་བཏུད་དུ་རུང་སྟེ་ནད་པ་དང་དགེ་སློང་མིན་པ་ཐམས་ཅད་འཐུང་དུ་དབང་སྟེ་ཉེས་མེད་དོ། །བདག་གིས་དགོས་པར་བྱེད་པ་མི་བྱེད་པ་ལན་ཚྭ་དང་བ་ཚ་མེད་པའོ། །ལན་ཚྭའི་ཆུའི་ཚད་དུ་ཆུད་པ་ནི་ཆུ་དེ་ཉིད་ཀྱི་ནང་དུ་ཚོད་མའམ་ཐུག་པ་བཙོས་ཏེ་ལན་ཚྭ་གུད་ནས་གད་པ་མི་དགོས་ན་ལན་

ཚ་ཅན་གྱི་ཆུར་བརྩིའོ། །བ་ཚྭ་ཅན་གྱི་ཆུ་ནི་གོས་ཀྱི་སྣུམ་ལ་སོགས་པ་བཀྲུས་ན་དག་པར་ནུས་པ་ནི་བ་ཚ་ཅན་གྱི་ཆུར་བརྩི་སྟེ། ཚད་འདིར་མ་ཕྱིན་པ་ཕྱི་དྲོ་དང་སྔ་དྲོ་བྱིན་ལེན་མ་བྱས་པར་འཐུངས་ཀྱང་ཉེས་མེད་དོ། །གཟུགས་བརྙན་སྐྱེས་ན་ཕྱི་མའོ། །ཆུ་རྙོག་མ་ཅན་ནི་བཙགས་སམ་

དངས་ཏེ་ནང་དུ་བཞིན་གྱི་གཟུགས་བརྙན་སྣང་ན་རྙོག་མ་ཅན་མ་ཡིན་པའི་ཚད་དུ་བརྩི་སྟེ་ཕྱི་དྲོ་བཏུང་དུ་རུང་ངོ་། །ཤིང་ཏོག་ཀ་ཏ་ཀའི་འབྲས་བུས་ཆུ་དང་པར་འགྱུར་རོ། །ཆུ་རྙོག་མ་ཅན་གྱི་ནང་དུ་ཤིང་ཏོག་ཀ་ཏ་ཀ་ཞེས་བྱ་བའི་འབྲས་བུ་བཅུག་ན་རྙོག་མ་ཞབས་སུ་རྙིགས་ཏེ་དང་བར་འགྱུར་རོ། །བ་

ལང་གི་ཆུ་དང་བར་བྱ་བའི་ཕྱིར་ཤིང་ལོ་བཅུག་པ་ལྟ་བུ། ཐལ་བའམ་ཟན་བཅངས་པས་ཀྱང་ངོ་། །ཆུ་རྙོག་མ་ཅན་གྱི་ནང་དུ་ཐལ་བ་བཏབ་བམ་ཟན་གྱི་ཆང་པ་བཅུག་ནའང་རྙོག་མ་དང་བར་འགྱུར་རོ། །མི་གྱེས་པའི་ཕྱིར་སྣུམ་མོ། །ཟན་གྱི་ཆང་བ་ཆུར་བཅུག་པ་དེ་མི་གྱེས་པར་བྱ་བའི་ཕྱིར་

Vol. 165 · folio 146b

སྣུམ་གྱི་ཕྱེ་མར་དུ་བྱའོ། །ཆུའི་འབྱུང་གནས་སུ་ཞུགས་ནས་མི་མངོན་ན་ཡོད་པའི་མི་གྲངས་སོ། །རྫིང་བུའམ་ཁྲོན་པའི་ནང་ན་ཁ་ཟས་ཡོད་ལ་ཆུ་ལ་ཁ་ཟས་ཀྱི་བག་ཆགས་ཡོད་པར་མི་མངོན་ན་ཆུ་དངས་པའི་ནང་དུ་བརྩི་སྟེ་ཉེས་མེད་དོ། །རེག་པའི་ཕྱོགས་དེ་ཉི་ཚེ་བསལ། སྣོད་ཀྱི་ནང་གི་སྣུམ་

ལངས་ཏེ་ཁ་ཞག་གིས་ཆོད་དམ་རྫིང་བུའམ་ཁྲོན་པའི་ཆུ་ལ་ཁ་ཟས་དང་ཞག་གི་སྤྲིས་མས་ཡོག་ཅིང་འདུག་ན་ཉི་ཚེ་གུད་དུ་བསལ་ཏེ་བོར་རམ་ཕན་ཚུན་བཤུགས་ཏེ་དངས་པ་ལས་བཅུས་པ་ནི་ཉེས་མེད། བྱ་རོག་གི་མཆུས་རེག་ན་ཐན་ཁོར་ཀྱང་ངོ་། །བདག་གི་ཟས་ལ་བྱ་རོག་གི་མཆུས་རེག་ན་གར་རེག་

པ་ཉི་ཚེ་བཅད་དེ་དོར། བྱིན་ལེན་བྱས་ཟིན་པ་ཞིག་ནའང་གདོད་བྱིན་ལེན་བྱས་ཏེ་བཟའོ། །དེ་དང་ལྡན་པའི་རྒྱུན་གྱིས་རེག་པ་ནི་མ་རེག་པའོ། །ཀུན་དེའི་ནང་ནས་ཆུ་ཏོ་ར་ར་འོང་བ་རྒྱུན་མ་ཆད་པས་ཁ་ཟས་དང་མི་གཙང་བ་ལ་རེག་པ་ནི་ཀུན་དེའི་ནང་ན་འདུག་པ་རེག་པ་མ་ཡིན་ཏེ་མི་གཙང་བ་མེད་པར་མི་བརྩིའོ། །

ནོར་ཏམ་དྲན་པ་ཉམས་ཏེ་ན་མ་ཡིན། རྫས་གཞན་ཞིག་བཟུང་བའི་ཕྱིར་ནོར་ཏམ་བརྗེད་ཀྱང་རུང་སྟེ་ཁ་ཟས་ཡོད་པའི་སྣོད་ལ་བཟུང་ཞིང་རེག་པ་ནི་སྤགས་པར་མི་འགྱུར་ཏེ་ཉེས་མེད་དོ། །དེ་དག་གིས་བསྐྱོང་ནས་གཞག་པ་མ་ཡིན་ནོ། །སཱུ་ཏྲ་ལྟག་མ་ལྟར་ཁ་ཟས་ཀྱི་སྣོད་ལ་ནོར་ཏེ་བཟུང་བ་དེ་བཏེག་ཅིང་

གུད་དུ་སྤོས་ཏེ་གནས་བསྐྱེད་ཀྱང་སྤགས་པ་མ་ཡིན་ཏེ་ཉེས་མེད་དོ། །རབ་ཏུ་ཆུང་ངུའི་གནས་སུ་བསྐྱལ་བའོ། །སཱུ་ཏྲ་ལྟག་མ་ལྟར་ནོར་ཏམ་གནས་བསྣོར་ནས་ཁྱེར་ཁྱེར་བ་ལས་ལམ་དུ་ཚོར་ན་ཐལ་བྱུང་དོར་བ་མ་ཡིན་གྱི་གནས་གང་ཉེ་བ་ཅིག་ཏུ་སྐྱལ་ནའང་སྤགས་པ་མ་ཡིན་ཏེ་ཉེས་མེད་དོ། །ལྷོད་

པས་བཏེག་པའམ་བྱིན་ལེན་བྱས་ཀྱང་མ་ཡིན་ནོ། །དགེ་སློང་ཕས་ཕམ་པ་མ་བྱུང་དུ་ཟིན་ཀྱང་དགེ་འདུན་གྱི་ལྷག་མ་དང་ལྟུང་བ་ལ་སོགས་པ་ལ་ལྷོང་ཅིང་མི་བསྲུང་བས་ནི་བྱིན་ལེན་བྱས་ཀྱང་བཟར་མི་རུང་ངོ་། །བཏེག་པ་དང་བཙོས་པ་ཡང་མ་བརྟགས་པ་མ་ཡིན་ཏེ་བཟར་རུང་ངོ་། །དེས་ཟས་

བྱིན་པ་བླངས་ནའང་བྱིན་ལེན་དུ་ཆུད་དོ། །བྱིན་ལེན་དུ་རིགས་པའི་གཏོགས་པ་མེད་པར་མ་གྱུར་ན་བླངས་པ་མ་ཡིན་ནོ། །ཁ་ཟས་འདྲིམ་ཞིང་འོངས་པ་ལ་བདག་གི་ལག་པས་ཚུས་བསུས་ཏེ་སྔར་བླངས་པ་ནི་བྱིན་ལེན་དུ་མི་ཆུད་དོ། །དགེ་སྦྱོང་དང་ཁྱིམ་པ་ཟས་ཀྱི་སྣོད་ལ་འཛིན་པ་བཞིན་དུ་དགེ་སློང་

Vol. 165 · folio 147a

གིས་རེག་པ་ནི་སྤགས་པར་མི་འགྱུར་རོ། །གཏོགས་པ་དེ་དག་ཐག་བུ་ལ་སོགས་པས་སྦྲེལ་བའོ། །ཟས་དང་ཚོད་མ་ལ་སོགས་པ་ཕྱི་དྲོ་རྟོག་ཅིང་སེལ་ན་ཁྱིམ་པའམ་དགེ་སྦྱོང་གིས་ཐག་བུའི་ཐོག་མ་ནས་བཟུང་ལ་དགེ་སློང་གིས་ཐོག་མ་གཅིག་ལས་བཟུང་སྟེ་ཁ་ཟས་

ཐག་བུ་གཉིས་སོ་སོར་མ་བྲལ་ཞིང་རེག་བཞིན་དུ་བསལ་ཅིང་བརྟགས་པ་ནི་སྤགས་པར་མི་འགྱུར་ཏེ་ཉེས་མེད་དོ། །སྡོམ་པ་མཚུངས་ལྟ་བ་ཐ་མི་དད་ན་སྤགས་པ་དང་བླངས་པ་དང་བྱིན་ལེན་དུ་གཅིག་གོ། །དགེ་སློང་དུ་མཚུངས་ཤིང་སངས་རྒྱས་ཀྱི་ཆོས་ལ་ལྟ་བ་འདྲ་ན་དགེ་སློང་གིས་

སྤགས་ཀྱང་རུང་བཟར་མི་རུང་། བྱིན་ལེན་མ་བྱས་པར་ཐུག་ཐུབ་ཏུ་བྱིན་ཏེ་བླངས་པ་དང་བྱིན་ལེན་དུ་མི་ཆུད་དེ་བཟར་མི་རུང་། གཅིག་གིས་ཟན་ལ་བྱིན་ལེན་བྱས་ན་ཀུན་གྱིས་བཟར་རུང་ངོ་། །དམ་པ་ཡིས་དམ་པ་མ་ཡིན་པའི་འོ། །སཱུ་ཏྲ་ལྟག་མའི་ནང་ནས་བཤད་པ་རྣམ་གསུམ་དགེ་སློང་མས་

བྱས་པ་ནི་དགེ་སློང་མས་ཀྱང་བསྲུངས་ཏེ་སྤགས་པ་དང་བླངས་པའང་བཟར་མི་རུང་བྱིན་ལེན་བྱས་པ་ཡང་གདོད་བྱིན་ལེན་བྱ་མི་དགོས་ཏེ་བཟར་རུང་ངོ་། །འདི་གསུམ་དགེ་སློབ་མས་བྱས་པ་ནི་དགེ་སློང་མས་མི་བསྲུང་ངོ་། །ཁྱིམ་པ་བཞིན་དུ་བུད་མེད་དང་སྐྱེས་པ་ཕན་ཚུན་དུའོ། །སཱུ་ཏྲ་ལྟག་མའི་ནང་

ནས་སྨོས་པའི་རྣམ་གསུམ་ལ་བཏེག་པ་དང་བླངས་པ་དང་བྱིན་ལེན་དགེ་སློང་མས་དགེ་སློང་ཕ་ལ་བྱས་ན་བྱིན་ལེན་དུ་འགྱུར་རོ། །བླང་བ་དང་བཏེག་པ་དང་དགེ་སློང་པས་བཟར་རུང་ངོ་། །དགེ་སློང་ཕས་བྱས་པའམ་དགེ་སློང་མ་ལ་རུང་ངོ་། །དགེ་སྦྱོང་གི་སྦ་བ་ཚུན་ཆད་ལའང་རེག་པའང་དེ་

བཞིན་དུ་ཉེས་བྱས་པའོ། །དགེ་སྦྱོང་གིས་དགེ་སྦྱོང་དང་དགེ་སློང་གི་ཟས་ལ་རེག་པ་ལ་ཉེས་མེད་པ་བཞིན་དུ་དགེ་སློང་གིས་དགེ་སྦྱོང་གི་ཟས་ལ་རེག་པའང་ཉེས་མེད་དོ། །དགེ་སློང་གིས་དགེ་སློང་ཉིད་ཀྱི་ཟས་ལ་རེག་པ་ནི་ཉེས་པར་འགྱུར་རོ། །རེ་བ་ཡོད་པས་བྱིན་པ་ནི་བཏང་བ་ཡིན་ནོ། །ཁྱིམ་པ་ཁ་

ཟས་ལ་ཆགས་བཞིན་དུ་བྱིན་ཏེ་ཆགས་པར་ཤེས་བཞིན་དུ་ཟོས་ན་ལྟུང་བ་སྟེ་བི་ཛ་ཡ་བར་མས་བཤད། བདག་གིས་སྤགས་པའི་ཁ་ཟས་དེ་ལ་ཆགས་བཞིན་དུ་གཞན་ཞིག་བྱིན་ཏེ་སླར་བདག་བྱིན་ཏེ་ཟོས་ན་ལྟུང་བའོ། །མེ་རེ་བར་བཏང་ནས་རེ་བར་གྱུར་ན་ཕྱེད་དོ། །ཁྱིམ་པས་སྔར་ནི་ཆགས་པའི་

Vol. 165 · folio 147b

སེམས་མེད་ལ་ཕྱིས་ཆགས་པའི་སེམས་བྱུང་བའི་ཟན་ཅིག་བྱིན་ཏེ་དེ་ལྟར་ཤེས་བཞིན་དུ་ཟོས་ན་ཉེས་བྱས་ཞེས་བི་ཛ་ཡ་བར་མས་བཤད། བདག་གིས་སྤགས་པར་འགྱུར་བའི་ཁ་ཟས་ཆགས་པའི་སེམས་མེད་པར་གཞན་ཞིག་བྱིན་ལ་ཕྱིས་ཆགས་ཤིང་འདོད་དེ་ཐབས་ཅིག་གིས་སྦྱིན་དུ་བཅུག་ནས་

ཟོས་ན་ཉེས་བྱས། དེ་བས་ན་དེ་ལ་མི་བསླང་ངོ་། །ཁྱིམ་པ་ཟན་ལ་ཆགས་ཏེ་བྱིན་པར་ཤེས་བཞིན་དུ་ཟས་རིམས་ཤིག་ཞེས་བྱ་བ་ལ་སོགས་པས་མི་བསླང་ངོ་ཞེས་བི་ཛ་ཡ་བར་མས་བཤད། སཱུ་ཏྲ་ལྟག་མ་ལྟར་སྤགས་པའི་ཁ་ཟས་གཞན་བྱིན་པ་སླར་ཟོས་ན་ཉེས་པར་འགྱུར་བའི་ཕྱིར་མི་བསླང་

ངོ་། །ཤེས་ནས་མི་བླང་། ཁྱིམ་པ་ཟན་ལ་ཆགས་བཞིན་དུ་བྱིན་པར་ཤེས་པ་ཟོས་ན་ལྟུང་བར་འགྱུར་བའི་ཕྱིར་མི་བླང་ངོ་ཞེས་བི་ཛ་ཡ་བར་མས་བཤད། བདག་གིས་སྤགས་པར་གྱུར་པའི་ཟས་གཞན་བྱིན་པ་སླར་བྱིན་ཏེ་ངོ་ཤེས་ན་མི་བླང་ངོ་། །མ་བརྟགས་པ་མ་ཡིན་པའི་སྐལ་པ་བསྐུར་བར་རེག་

པ་དང་ཁྱེར་བ་གཞུག་པ་དང་དེ་ལྟ་བུའི་རྐྱེན་ཅིག་ནའོ། །ཁ་ཟས་ལ་རེག་ཀྱང་ཉེས་མེད་པ་ནི་དགེ་འདུན་གྱི་ཞིང་ཤས་སུ་བཏང་བའི་སྐལ་བ་བསྐུར་བ་དང་ནས་ཀྱི་སྐལ་བ་ཤས་སུ་བཏང་བའི་མིས་བསྐྱལ་ཏེ་ནང་དུ་འཇུག་པའམ་སྣོད་དུ་ལྡུགས་སུ་མ་བཏུབ་སྟེ་སོང་བ་ནི་ཁྱིམ་པ་དང་དགེ་སྦྱོང་མེ་ལ་རེག་

ཏུ་མི་རུང་བའི་རྐྱེན་བྱུང་ན་བསྐྱབ་དང་གཞུག་པའི་ཕྱིར་རེག་པ་ནི་ཉེས་མེད་དོ། །ཤིང་རྟ་འདྲེན་པའི་སྟན་མ་གཏོགས་ཏེའོ། །ཟས་ཤིག་ཤིང་རྟའི་ནང་དུ་བསྐྱེད་ན་རྐྱེན་ཅིག་གིས་ཤིང་རྟ་ལ་རག་དགོས་ནའང་ཤིང་རྟའི་ཁ་ལོ་སྒྱུར་བ་འདུག་པའི་ས་ལ་མ་རེག་ན་གཞན་ལ་རེག་པ་ནི་ཉེས་མེད་དོ། །གད་པ་

ཡང་ངོ་། །ཤིང་རྟའི་ནང་དུ་ཁ་ཟས་དགང་པའི་ཚེ་རྐྱེན་ཅིག་བྱུང་ན་ཁ་ལོ་བསྒྱུར་བ་འདུག་པའི་ས་ལ་མ་རེག་པར་བདག་གིས་བཀང་ཡང་ཉེས་མེད། སླར་དབྱུང་བའི་ཚེའང་དེ་བཞིན་བྱའོ་ཞེས་བི་ཛ་ཡ་བར་མས་བཤད། ཤིང་རྟ་ན་ཁ་ཟས་འདུག་པའི་ཚེ་གང་པ་ཉིད་དུ་མི་བྱའི་དགེ་སློང་མི་རེག་པར་

འདུག་པའི་ས་ཙམ་བཞག་ལ་ཁ་ཟས་གཞུག་གོ། །ནད་བཞོན་པ་ཡང་ངོ་། །ཁ་ཟས་བཅུག་པའི་ཤིང་རྟའི་ནང་དུ་དགེ་སློང་ནད་པ་ཞིག་འདུག་པ་ན་ཡང་ནད་པ་དེས་ཤིང་རྟའི་ཁ་ལོ་སྒྱུར་བ་འདུག་པའི་ས་ལ་མི་རེག་པར་བྱའོ་ཞེས་བི་ཛ་ཡ་བར་མས་བཤད། ཁ་ཟས་བཅུག་པའི་ཤིང་རྟ་ལ་ནད་པ་

Vol. 165 · folio 148a

ཞིག་བཞག་དགོས་ནའང་ནད་པས་ཁ་ཟས་ལ་མི་རེག་པ་ཙམ་གྱིས་བཞག །གྲུའི་དངོ་ནའོ། །གྲུའི་ནང་དུ་ཁ་ཟས་བཅུག་སྟེ་འགྲོ་ནའང་དངོར་འཛིན་འདུག་པའི་སར་རེག་ནའང་ལྟུང་བ་ཞེས་བི་ཛ་ཡ་བར་མས་བཤད། ནས་དང་ནད་པ་ལྟ་བུ་གྲུའི་ནང་དུ་བསྐྱེད་ནས་སྐམ་པའི་ཕྱིར་

དངོར་བཞག་གོ། །འཛིན་པའི་ཕྱིར་སྟན་ཡང་ངོ་། །ནད་པའི་ནང་ནའང་དངོར་འཛིན་འདུག་པའི་ས་ལ་མ་རེག་པར་འདུག་གོ་ཞེས་བི་ཛ་ཡ་བར་མས་བཤད། ཁ་ཟས་དང་དགེ་སློང་ནད་པ་ལ་སོགས་པ་གྲུར་ཞུགས་ནའང་དངོར་འཛིན་དང་སྐྱ་བ་འདེབས་པའི་ས་བཞག །དགེ་འདུན་གྱི་དང་སྨན་ལྡུད་

པ་གཡོགས་པ་དབོག་པ་དང་གཟར་བུའི་ལས་ཀུན་དང་དབྱུང་བ་ཡང་ངོ་། །དགེ་འདུན་གྱི་ཁ་ཟས་དང་སྨན་འཆེད་ཅིང་གཡོས་བྱེད་པ་ལ་ཁྱིམ་པ་དང་དགེ་སྦྱོང་ལ་སོགས་པ་མེད་ན་ལུད་པ་ལ་དགེ་སློང་གི་གཟར་བུ་དང་སྐྱ་བས་དཀྲུགས་པ་དང་། དབྱུང་ཞིང་དབོག་པའི་ཕྱིར་རེག་པ་ཉེས་པ་མེད་དོ། །

དགེ་སློང་གང་ཟག་གིས་ཁ་ཟས་དང་སྨན་བཙོ་བ་ལ་ལུད་པ་ལ་སོགས་པའི་རྐྱེན་བྱུང་ན་དེ་བཞིན་ཀྱང་རུང་ངོ་། །ཤིང་དབྱུང་མེ་བསད་པ་གོས་ཀྱི་གྲཱ་ལ་སོགས་པས་རླུང་བརླབ་པས་ཀྱང་ཐོག་མར་ནན་ཏན་བྱ། ཁ་ཟས་དང་སྨན་འཚེད་པ་ལུད་པ་ལ་ཐོག་མར་ཤིང་ཕྲི་ཤིང་དབྱུང་མེ་གསད་གོས་ཀྱི་གྲྭས་

རླུང་བརླབ་ཆུས་དགབ་པ་ལ་སོགས་པ་སྡུད་པ་ཞི་བའི་ཐབས་འདི་རྣམས་ཀྱི་ཐབས་ཀྱིས་བྱ་སྟེ་མ་ནུས་ན་གདོད་སཱུ་ཏྲ་ལྟག་མ་ལྟར་བྱ། རྟག་པར་ཆོ་ག་མི་འགྲུབ་ན་ཆུ་བོ་ལས་བསྒྲལ་བའི་ཕྱིར་ཁྱེར་བ་སླེབས་པའི་ཕྱིར་ཡང་ངོ་། །ཆུ་བརྒལ་ཞིང་གྲུར་འཇུག་པ་ལ་ཁ་ཟས་གྲུར་སྐྱེལ་བའི་མི་མེད་དེ་གྲུ་

སྤགས་ཏེ་སོང་དུ་ཉེ་སྟེ་མི་སླེབས་ན་ཁ་ཟས་བདག་གིས་གྲུའི་ནང་དུ་བསྐྱས་པའང་ཉེས་མེད་དོ་ཞེས་བི་ཛ་ཡ་བར་མས་བཤད། དགེ་སློང་གིས་རྒྱགས་ཁུར་ཙ་ཅིག་ལ་བསྐུར་ཏེ་ཆུ་རྒལ་བ་ལས་ཆུ་ཆེ་སྟེ་ཁུར་ཙས་མི་ནུས་ན་ཁུར་ཙ་དང་གཉིས་ཐག་བུས་སྦྲེལ་ལ་བདག་གིས་རྒྱགས་ཁྱེར་ཡང་ཉེས་མེད།

ཐག་བུས་སྦྲེལ་མ་ནུས་ན་ཡང་ཆུ་བརྒལ་གྱི་བར་དུ་བདག་གིས་ཁྱེར་ཡང་ཉེས་མེད། ཆུ་བརྒལ་བ་ལ་ཁུར་ཙ་སྔོན་དུ་སོང་སྟེ་རྒྱགས་ཕྱི་ན་ལུས་ན་ཁུར་ཙ་ནམ་སླེབས་པའི་ཕྱིར་ཁྱེར་ཡང་ཉེས་མེད། གཞན་མེད་ན་བླངས་པའང་རྒྱགས་སུའོ། །སཱུ་ཏྲ་ལྟག་མའི་ལྟག་མ་ལྟར་རྒྱགས་བདག་གིས་ཁྱེར་

Vol. 165 · folio 148b

བའི་རྣམས་གཡོག་གམ་ཁྱིམ་པ་གཞན་ལ་ཡང་བསྐུར་དུ་མེད་ལ་རྒྱགས་གཞན་ཡང་མེད་ན་བདག་གིས་ཁྱེར་ཞིང་བྱེད་ན་ཡང་ཉེས་མེད། ཁུར་ཙ་བ་མེད་ན་སྦྱིན་བདག་ལ་དད་པ་བྱ། ལམ་དུ་ཞུགས་ཏེ་འགྲོ་བ་ལ་རྒྱགས་ཁྱེར་བའི་ཁུར་ཙ་མེད་ན་ལམ་འགྲོགས་པ་ལ་བདག་གི་ཁུར་ཙ་ཡང་མེད་

ཟས་ལ་ཡང་རེག་ཏུ་མི་རུང་ན་ཁྱོད་ཀྱིས་བསྐུར་དུ་ཅི་གནང་ཞེས་གསོལ། མ་གྲུབ་ན་བདག་གིས་བསྐུར། ལྟག་མ་ལྟར་གསོལ་ཏེའང་མ་གནང་བདག་འགྲོ་བའི་དོན་སྡེ་སྣོད་གསུམ་ཐོས་པར་འགྱུར་བ་ལྟ་བུ་ཞིག་སྟེ་མི་འགྲོར་མི་རུང་ན་བདག་གི་རྒྱགས་བདག་ཉིད་ཀྱིས་ཁྱེར་ཡང་ཉེས་མེད་དོ། །

དེ་ཉིད་བྱིན་ལ་བརྗེ་ཞིང་བླང་པར་བསྒྲུབ། བདག་ཉིད་ཁྱེར་བའི་ཟས་དེ་བཟར་མི་རུང་བའི་ཕྱིར་འགྲོན་པོ་གཞན་ལ་ཟས་ཉི་རིམ་གྱིས་ཀྱང་བརྗེས་ཏེ་བཟའ། དེ་མ་གྲུབ་ན་དེ་བཟའ། སཱུ་ཏྲ་ལྟག་མ་ལྟར་ཉི་རིམ་གྱིས་བརྗེས་ཀྱང་མ་གྲུབ་ན་བདག་ཉིད་ཀྱིས་ཁྱེར་བའི་ཟན་བཟའོ། །བྱིན་ལེན་

བྱེད་པ་མེད་ན་བྱིན་ལེན་མ་བྱས་པར་གཞན་གྱིའམ་བདག་གིའོ། །སཱུ་ཏྲ་ལྟག་མ་ལྟར་བདག་ཉིད་ཀྱི་ཟན་ཟ་བ་ལ་བྱིན་ལེན་བྱེད་པའི་མི་མེད་ན་འདུ་ཤེས་བྱང་གི་སྒྲ་མི་སྙན་གྱི་བདག་པོ་མེད་པར་བསམས་ལ་བཟར་རུང་སྟེ་འོག་ནས་འཆད། ཟས་བཅད་པ་བྱས་ཏེའོ། །སཱུ་ཏྲ་ལྟག་མ་ལྟར་བཟར་

རུང་པ་ཡང་ཟས་བརྗེ་བ་དང་བྱིན་ལེན་བྱེད་པའི་མི་མེད་ན་ཞག་གཅིག་གི་བར་དུ་ནི་ཟན་མི་བཟའོ། །ཐོག་མའི་ཉི་མ་སྟག་གི་སྤར་བའོ། །ཕྱི་དེ་ཉིད་ཀྱང་ཟན་བརྗེ་བ་དང་བྱིན་ལེན་བྱེད་པ་མེད་ན་སྟག་གི་སྤར་བ་སྟེ་བདག་གིས་ལག་གི་ཡ་བཙུམས་གང་བཟའོ། །གཉིས་ལ་གཉིས་སོ། །དེའི་ཕྱིར་

དེ་ཉིན་པར་ཀྱང་ཟས་བརྗེ་བ་དང་བྱིན་ལེན་བྱེད་པ་མ་རྙེད་ན་སྟག་གི་སྤར་པ་དོ་བཟའོ། །གསུམ་ལ་ཅི་ཆོག་ཏུའོ། །ཉི་མ་གསུམ་ཕན་ཆད་ནི་ཅི་ཆོག་ཏུ་འགྲངས་འགྲངས་སུ་བཟར་དབང་ངོ་། །འབྲས་བུ་དུས་མ་ཡིན་པར་བརྟག་པ་མ་བྱས་པ་དང་བྱིན་ལེན་མ་བྱས་པར་བླངས་པའང་བཟའོ། །བདག་

གི་ཟས་ཟད་དམ་མེད་དམ་སྦྱིན་བདག་གིས་མ་སྦྱར་ལ་བསླབ་དུ་མ་སྙེད་ན་འབྲས་བུ་ལ་སོགས་པ་མ་བརྟགས་པ་དང་བྱིན་ལེན་མ་བྱས་པ་བཟར་རུང་ངོ་། །ཕྱི་དྲོ་བཟར་ཡང་རུང་ངོ་། །ཟས་མེད་པས་སོ། །སཱུ་ཏྲ་ལྟག་མ་ལྟར་བཟར་རུང་བ་ཡང་ཟས་མེད་ཅིང་ཕོངས་ན་བཟའོ། །བཀྲེས་ཏེ་མི་བཟོད་

Vol. 165 · folio 149a

ནའོ། །སཱུ་ཏྲ་ལྟག་མ་ལྟར་ཕོངས་ཏེ་བཟའ་བ་ཡང་མི་བཀྲེས་ཤིང་བཟོད་ན་མི་བཟའི་བཀྲེས་ཏེ་མི་བཟོད་ན་བཟའོ། །རྩ་བ་ཡང་ངོ་། །བཀྲེས་ཏེ་མི་བཟོད་ན་གྲོ་མ་ལ་སོགས་པའི་རྩ་བ་བརྐོ་མི་དགོས་པར་འདུག་པ་ཡང་བཟར་རུང་ངོ་། །བདག་གིས་ཕྲགས་ཤིང་ཕྱུང་ནས་

བཙོས་ཏེའོ། །སཱུ་ཏྲ་ལྟག་མ་ལྟར་རྩ་བ་བརྐོ་མི་དགོས་པ་དང་ཤིང་ཏོག་བླགས་ཟིན་པ་མ་རྙེད་ན་ཤིང་ཏོག་བླགས་ཤིང་རྩ་བ་བརྐོས་ཏེ་བཟར་ཡང་དབང་ངོ་། །བཙོར་ཡང་དབང་ངོ་། །བྱང་གི་སྒྲ་མི་སྙན་གྱི་གྲགས་པ་ཐམས་ཅད་དུ་བྱིན་ལེན་མ་བྱས་པར་ཟ་བ་ལ་སོགས་པ་རྩམ་པར་འདོད་པ་

ཡིད་ལ་བྱའོ། །སཱུ་ཏྲ་ལྟག་མ་རྣམས་ལྟར་བཟའ་བ་ཡང་བྱང་གི་སྒྲ་མི་སྙན་གྱི་ཁ་ཟས་བདག་པོ་མེད་པ་ཡིན་པར་བསམས་ལ་བྱིན་ལེན་བྱེད་པ་མེད་པའི་ཕྱིར་བ་དང་ཡུལ་ཆོས་ཀྱིས་བཙོག་པའི་ཕྱིར་གཅིག་ལ་གཅིག་རེག་ཏུ་མི་རུང་བས་བདག་ཉིད་ཀྱིས་བླངས་ཏེ་བཟའོ་སྙམ་དུ་བསམས་ལ་བཟའོ། །

སྣོད་ཀྱི་ནང་ནས་ཁ་བླུགས་མི་བྱ། ཆུ་དང་སྐོམ་ལ་སོགས་པ་འཐུངས་པའི་ཚེ་ཁ་བླུགས་མི་བྱ། ཡོད་ན་ལག་པ་བཀྲུས་པའམ་ལོ་མར་རོ། །ཆུའམ་སྐོམ་འཐུངས་དགོས་ཏེ་སྣོད་གཞན་མེད་ན་ལག་པའམ་ལོ་མ་བཀྲུས་ལ་དེའི་ནང་དུ་བཏུང་ངོ་། །མ་གྲུབ་ན་དབེན་པར་རོ། །ཆུ་དཀོན་ཏེ་ལོ་

མའམ་ལག་པ་བཀྲུར་མི་ཆོག་ན་མི་གཞན་གྱིས་མ་མཐོང་བར་དབེན་པར་ཁ་བླུགས་མི་བྱའོ། །ཆུ་དང་བཅས་པ་འདི་ལ་དགབ་པ་མེད་པར་མི་སྤྱད། ཀུན་དེ་དང་ཆུ་སྣོད་ལ་སོགས་པ་ཁ་གབ་ཀྱིས་མ་བཀབ་པར་གཞག་པའམ་སྤྱད་པར་མི་བྱའོ། །དགབ་པ་ནི་རྣམ་པ་གསུམ་སྟེ་ཤིང་གི་དང་རྡོའི་

དང་སའི་འོ། །སཱུ་ཏྲ་ལྟག་མ་ལྟར་སྣོད་ཀྱི་ཁ་དགབ་བྱ་བའི་རྒྱུ་ནི་ས་དང་རྡོ་དང་ཤིང་ལས་བྱའོ། །ལྕགས་དང་ཟངས་དང་ར་གན་དང་ཁར་བ་ལ་སོགས་པ་རང་ཆས་འདུག་པའང་ཉེས་མེད་དོ། །སྣོད་ཀྱི་གཞི་བཅངས་ཏེ་ཤིང་ལའམ་རྡོ་ལའོ། །སྣོད་ཀྱི་གཞི་ཤིང་དང་རྡོ་ལ་སོགས་པ་ལ་བཞག་

ཀྱང་ཉེས་མེད་དོ། །མ་བཞག་ཀྱང་ཉེས་མེད་དོ། །ཉེས་མེད་པ་ནི་སྣོད་ཀྱི་དགོས་པར་ལོ་མ་མ་བྱིན་པར་བླངས་ཀྱང་ངོ་། །སྣོད་སྤྱད་མེད་པའི་ཕྱིར་ཟན་ཟ་བའི་ཕྱིར་གཞིར་རྩི་ཤིང་གི་ལོ་མ་བྱིན་ལེན་མ་བྱས་པར་བླངས་ཏེ་བྱས་ཀྱང་ཉེས་མེད་དོ། །དེ་བཏང་བ་དང་མ་བཏང་བ་བྱེ་བྲག་མེད་དོ། །ཟན་

Vol. 165 · folio 149b

ཟ་བའི་གཞི་ལོ་མས་བྱ་བ་སྔ་ན་ཆད་ཅིང་བྲལ་ཟིན་པ་ལ་ཡང་རུང་རྩ་བ་ལས་མ་ཆད་ཅིང་ཆགས་བཞིན་པའི་ལོ་མའི་སྟེང་དུ་ཟོས་ཀྱང་རུང་ངོ་། །དགོས་པར་གཞན་མེད་ན་མ་བཏང་བ་ལའོ། །སཱུ་ཏྲ་ལྟག་མ་ལྟར་རྩ་བ་ལས་མ་ཆད་པའི་ལོ་མའི་སྟེང་དུ་ཟན་ཟ་བ་ནི་རྩ་བ་དང་སོ་སོར་བྲལ་བའི་ལོ་མ་

མེད་ན་གདོད་བཟའ་སྟེ་ལོ་མ་དེ་ལ་སྣོད་ཅིང་ཆུང་ཟད་རལ་བ་ནི་ཉེས་མེད་དོ། །སྤགས་པ་སྤངས་པའོ། །སྤགས་པའི་ཟས་ཟོས་པའི་ལྟུང་བ་སྟེ་རྫོགས་སོ།། །།ཁ་ནས་མིད་པའི་ལྟུང་བ་ལ་འཆད་དེ། སྦྱིན་བདག་གིས་སེམས་ཀྱིས་བཏང་བ་ལ་གཞན་དང་བྱིན་ལེན་བྱེད་པ་མེད་ན་བླངས་ཏེ་བཟའ།

སྦྱིན་བདག་གིས་སྤྱན་དྲངས་ཤིང་ཁ་ཟས་བྱིན་ཏེ་མངོན་པར་འདུག་ལ་སྦྱིན་བདག་ཆུའམ་མེ་ལ་སོགས་པའི་རྐྱེན་བྱུང་སྟེ་མི་ཁོམ་ནས་ཁ་ཟས་འདྲིམ་པའི་མི་མེད་ལ་གདུགས་ཚོད་ཀྱིས་ཀྱང་མི་ཐུབ་ན་ཁ་ཟས་མངོན་པར་བྱིན་པ་དེ་བྱིན་ལེན་མ་བྱས་པར་བྲིམས་ཏེ་ཟོས་ཀྱང་ཉེས་མེད་དོ། །མངོན་སུམ་

དུ། དགེ་སློང་ཁ་ཟས་བྱིན་པའི་མི་ཐད་ཀར་མངོན་སུམ་དུ་འདུག་ལ་བྱིན་ལེན་བྱ་བ་དང་། མཚམས་ཀྱི་ནང་དུ། བར་དུ་ཆུ་དང་རྩིག་པ་མཐོན་པོས་མ་ཆོད་པ་དང་། མངོན་པར་འགྲུབ་པའི་ཕྱོགས་སུ་འདུག་སྟེ། རྒྱབ་བམ་ཟུར་ནས་མ་ཡིན་གྱི་མདུན་དུ་ཕན་ཚུན་དྲང་པོར་བྱས་ཏེ་ནམ་མཁའ་འམ་

རྩིག་པའམ་ཤིང་གི་ཁ་ལྟ་བུ་ན་གཅིག་འདུག་པ་ལྟ་བུ་མ་ཡིན་པ་དང་། གན་རྐྱལ་གྱི་ལག་པ་ལུས་ཀྱིས་སམ་བདག་གི་ལུས་ཀྱི་ལག་པ་ཁས་སྦུབ་ཏུ་མི་བྱ་བར་བཀན་ཏེ་བླང་བ་དང་། དེ་ལ་གཏོགས་པ་དང་། ལྷུང་བཟེད་དམ་གཞོང་པ་ལ་སོགས་པ་མན་ཅི་སྟེང་དུ་འདུག་པ་ལ་འོག་ནས་ལག་པས་

བཀན་ཏེ་བཟུང་ལ་སྣོད་ཀྱི་ནང་དུ་ཁ་ཟས་བླུགས་པ་ཡང་རུང་། ཐེག་ནུས་པ། འདྲིམ་པའི་མི་ནད་པ་དང་རྒན་པོ་དང་བྱིས་པ་ལྟ་བུ་ཁ་ཟས་མི་ཐེགས་པ་དང་། སྦྱིན་མི་ནུས་པ་མ་ཡིན་པ་དང་། རབ་ཏུ་མ་རྫོགས་པ། དགེ་སློང་ཁྲིམས་རྫོགས་པ་མ་ཡིན་པར་དགེ་སློང་མ་དང་དགེ་སློབ་མ་དང་དགེ་

སྦྱོང་ཕོ་མོ་དང་ཁྱིམ་པ་ཡང་ཡིན་པས་བྲིམས་པ་དང་། མི་མ་ཡིན་པས་ཀྱང་བལ་གླང་དང་རྟ་དང་སྤྲེའུ་ལ་སོགས་པ་ཞིག་གིས་སྦྱིན་པར་བསམས་ཏེ་བྱིན་པ་འང་རུང་། ཡན་ལག་གིས་སམ། འདྲིམ་ཞིང་བྱིན་པའི་ལུས་ཀྱི་ཡན་ལག་ལག་པའམ་སྣའམ་སོས་བཟུང་སྟེ་བྱིན་པ་དང་། དེ་ལ་གཏོགས་

Vol. 165 · folio 150a

པས། འདྲིམ་པའི་ལག་པ་ན་གཟར་བུའམ་སྣོད་སྤྱད་ཀྱིས་བྲིམས་ཀྱང་རུང་ངོ་། །འདོད་ཅིང་བཏང་ལ། འདྲིམ་པའི་མི་དེས་ཀྱང་བདག་ལ་བྱིན་པར་སེམས་ཤིང་བྱིན་པ་དང་། བླངས་ན་བྱིན་ལེན་ནོ། །མིང་གིས་སྨོས་པ་འདི་རྣམ་ལྟར་བྱིན་ལེན་བྱས་པ་འདི་རྣམས་སུ་

ཆུད་དོ། །བཟར་རུང་ངོ་། །སྨོད་པའི་ཡུལ་ན་དཀྱིལ་འཁོར་ལ་ཞོག་ཤིག་ཅེས་བསྟན་པ་ཡང་ངོ་། །ཡུལ་ལ་ལ་ཞིག་ན་ཡུལ་ཆོས་ཀྱིས་གཅིག་ལ་གཅིག་བཙོག་པར་འཛིན་ཅིང་རེག་ཏུ་མི་འདོད་དེ་བྱིན་ལེན་བྱེད་དུ་མི་བཏུབ་པ་ནི་འདྲིམ་པས་མཎྜལ་གྱི་སྟེང་དུ་སྤུངས་ཏེ་བཞག་པ་ལ་བྱིན་ལེན་ལྟག་

མ་ལྟར་བྱས་པར་ཟོས་ཀྱང་ཉེས་མེད་དོ། །ལྷུང་བཟེད་དང་དེའི་གཞི་ཡང་གཅིག་གོ། །ལྷུང་བཟེད་ཀྱི་གཞི་རྩི་ཤིང་གི་ལོ་མའམ་གཞོང་པ་ལྟ་བུས་བྱ་སྟེ། དེའི་འོག་ནས་ལག་པས་བཟུང་ན་ཁ་ཟས་ལྷུང་བཟེད་ཀྱི་ནང་དུ་བླུགས་ཀྱང་རུང་གཞིའི་སྟེང་དུ་བླུགས་ཀྱང་རུང་བྱིན་ལེན་རུང་ངོ་། །

ཡལ་ག་ནི་སྤྲེའུའི་ཡུལ་ཏེ་དེ་ལས་དེ་ནས་མི་འགྲུབ་པ་མ་ཡིན་ནོ། །སྤྲེའུས་ཤིང་ཏོག་ལྟ་བུ་བྱིན་ན་དྲུང་དུ་འོང་དུ་ནི་འཇིགས་ཀྱི་ཤིང་གི་ཁ་ནས་སྦྱིན་པའི་ཕྱིར་བོར་བ་ལ་བདག་གི་སྣོད་དམ་ལག་པ་བཟེད་དེ་བླངས་པའང་བྱིན་ལེན་དུ་ཆུད་དེ་རུང་ངོ་། །འབྲས་བུ་ཁྲི་དང་ཁྲིའུ་དང་ཐུ་བ་དང་

ལྷུང་བཟེད་ཀྱི་གཞིས་བྱིན་ལེན་བཟེད་ན་མི་རིགས་པ་མ་ཡིན་ནོ། །འབྲས་བུ་དང་ཚོད་མ་རྟོག་ཅིང་སེལ་བ་ལྟ་བུ་ལ་ཁྲིའུ་དང་ཁྲི་དང་ཐུ་བ་དང་ལྷུང་བཟེད་ཀྱི་གཞི་ཤིང་གི་ལོ་མའམ་གཞོང་པ་ལྟ་བུའི་འོག་ནས་བཟུང་སྟེ་བྱིན་ལེན་དུ་བྱས་པའང་། བྱིན་ལེན་དུ་ཆུད་དེ་རུང་ངོ་། །གནས་པས་དེ་ལ་བརྟག་

པ་ན་མི་སྨྲ་བས་ནའོ། །གནས་བཅའ་བའི་དགེ་སློང་གཞོན་ནུ་རྣམས་ཀྱིས་ཁ་ཟས་དང་ཚོད་མ་རྟོག་ཅིང་སེལ་བའི་ཚེ་མཆིལ་མའི་ཟེར་མས་མི་རེག་པ་དང་སེམས་མི་འཕྱར་ཅིང་གཅིག་ཏུ་བསྡུ་བའི་ཕྱིར་གཏམ་ལ་སོགས་པ་མི་བྱ་བར་ལས་བྱའོ། །སྙོམས་པར་རིམས་ཤིག་ཅེས་འདྲིམ་པ་ལ་བསྒོ། །

ཁ་ཟས་འདྲིམ་པའི་ཚེ་ཀུན་ལ་ཆེ་ཆུང་མ་ཁྱེར་ཞིང་མཉམ་པར་ཐོབ་པར་བྱ་བའི་ཕྱིར་གྲལ་དཔོན་དང་ཐོ་ངན་གྱིས་འདྲིམ་པ་ལ་སྙོམས་པར་བྲིམས་ཤིག་ཅེས་བསྒོ། །དགེ་སློང་གིས་བྱིན་བླངས་ཏེ་བླིམས་ན་རིགས་སོ། །དགེ་སློང་གིས་ཟན་འདྲིམ་ན་ཡང་དགེ་སློང་འདྲིམ་པ་དེ་ཉིད་ཀྱིས་ཚལ་བཞིན་

Vol. 165 · folio 150b

དུ་བྱིན་ལེན་བྱས་ཏེ་བྲིམས་ན་དགེ་སློང་ཀུན་གྱིས་བྱིན་ལེན་བྱ་མི་དགོས་ཀྱི་དེས་བྱིན་ལེན་བྱས་པས་ཆོག་སྟེ་བྲིམ་དུ་རུང་ངོ་། །མར་དང་ཡུངས་མར་དང་སྦྲང་རྩི་དང་བུ་རམ་རྫ་མར་འདྲིམ་ན་རྩ་དང་འདབ་མ་ལ་སྩོགས་པས་གོས་བཅའ་བའི་ཕྱིར་གླན། མིང་གིས་སྨོས་པ་འདི་རྣམས་ལྟ་བུ་ཞིག་དགེ་

སློང་གིས་བྱིན་ལེན་བྱས་ཏེ་བྲིམ་ན་ཁ་ཟས་ཀྱི་ཟེར་མ་དང་སྣོད་སྤྱད་གོས་ལ་མི་རེག་པར་བྱ་བའི་ཕྱིར་བདག་གི་གོས་ལ་ཕྱར་བའམ་ལོ་མ་ལ་སོགས་པས་གཟན་བྱ་བའམ་སྣོད་ཀྱི་ཞབས་ལ་ལོ་མས་གཟན་བྱ་སྟེ་བྲིམ་མོ། །འདྲིམ་ན་ཐུ་བོ་དང་ཐ་ཆུངས་སོ་སོར་བྱ་སྟེའོ། །ཤིང་ཏོག་ལ་སོགས་པ་

ཞིམ་པ་དང་ཆེ་ཆུང་ཞིག་འདྲེས་པར་འདྲིམ་ན་སྙོམས་པར་བྱ་བའི་ཕྱིར་ཆེ་ཆུང་སོ་སོར་ཕྱེ་ལ་ཆེན་པོས་བཟང་པོ་ལས་ཀྱང་མཉམ་པར་བྲིམ་ཆུང་ངུ་དང་ངན་པ་ལས་ཀྱང་མཉམ་པར་བྲིམ་མོ། །སྐྱུར་རྩི་ཞིམ་པོ་སོ་སོར་བྱས་ཏེ་བྲིམ། སྐྱུར་རྩི་ལྟ་བུ་ལ་ཞིམ་པོ་ཡོད་ན་སོ་སོར་ཕྱེ་སྟེ་ཞིམ་པོ་ལས་ཀྱང་མཉམ་པར་བྲིམ། མི་ཞིམ་པ་ལས་

ཀྱང་མཉམ་པར་བྲིམ། དེ་བཞིན་དུ་ཁ་ཟས་ཞིམ་པ་འདྲིམ་པའི་ཀུན་ལ་བྱའོ། །འདྲིམ་པའི་སློབ་དཔོན་དང་མཁན་པོས་ལོངས་ཤིག །དགེ་འདུན་ལ་ཁ་ཟས་འདྲིམ་པའི་དགེ་སློང་དེའི་ཟན་སྐལ་མཁན་པོའམ་སློབ་དཔོན་གྱིས་བྱིན་ལེན་བྱས་ཏེ་མནོད་དོ། །མི་འཐོབ་པ་ཐོབ་པ་དེ་མ་ཐག་པའི་གནས་སོ། །སཱུ་

ཏྲ་ལྟག་མ་ལྟར་མཁན་པོ་དང་སློབ་དཔོན་མེད་དམ་གྲལ་མཐོན་དམན་ཁྱེར་ཏེ་བླང་དུ་མི་བདེ་ན་འདྲིམ་པའི་གྲལ་གར་བབ་པའི་ལྟག་འོག་ན་དགེ་སློང་སུ་འདུག་པས་བྱིན་ལེན་བྱས་ཏེ་ཟན་མནོད་དོ། །དུ་མའི་ཅི་ཙམ་སྟན་མ་བཏང་བར་ལེན་ནུས་པའོ། །བདག་གི་གྲལ་ལྟག་འོག་ནས་དགེ་སློང་མང་

ཞིག་ཟན་འདྲིམ་དུ་དོང་ངམ་མ་ཚང་སྟེ་ཟན་སྐལ་ནོད་ན་སྟན་ལས་ལྡང་མི་དགོས་ཤིང་ཅི་ཙམ་ནུས་པའི་ཟན་སྐལ་མནོད་དོ། །བདག་གིས་མནོད་པར་ལག་གིས་མི་ཁྱབ་པ་ནི་མ་མནོས་ཀྱང་ཉེས་མེད་དོ། །འདྲིལ་བ་གནས་མ་བཏང་བར་རང་གིས་བླང་ནུས་ན་བྱིན་ལེན་མི་ཞིག་གོ། །ཁ་ཟས་ཤིག་

བྲིམས་ཏེ། བདག་གི་ལག་ཏུ་འོངས་ཏེ་ཤོར་བའམ་སྣོད་ཀྱི་སྟེང་ནས་འདྲིལ་བ་ནི། བདག་སྟན་ལས་འཕགས་མི་དགོས་པར་ལག་གིས་སླེབས་ཚུན་ཆད་དུ་སོང་སྟེ་བླངས་ནས་ཟོས་པ་ནི་བྱིན་ལེན་མི་ཞིག་གོ། །སྟན་ལས་འཕགས་ཏེ་བླངས་པ་ཞིག་ཟོས་ན་ཉེས་བྱས་སོ། །སྦྲང་མ་དང་གྲོག་སྦུར་

Vol. 165 · folio 151a

གྱིས་རེག་ན་ཡང་ངོ་། །བདག་གི་ཁ་ཟས་བྱིན་ལེན་བྱས་ཟིན་པ་ལས་གྲོག་སྦུར་གྱིས་རེག་པའང་བྱིན་ལེན་ཞིག་པར་མི་འགྱུར་རོ། །དགེ་སློང་གིས་མ་བཏང་བར་གཞན་གྱིས་ཀྱང་ངོ་། །བདག་གི་ཁ་ཟས་བྱིན་ལེན་བྱས་ཟིན་ནས་ལག་པས་བཟུང་ཞིང་འདུག་པ་ལ་གཞན་གྱིས་

རེག་ནའང་བྱིན་ལེན་ཞིག་པར་མི་འགྱུར་རོ། །བྱི་བས་ན་ཞིག་པར་བྱེད། བྱིན་ལེན་བྱས་ཟིན་པའི་ཟས་ལ་བདག་གིས་ཀྱང་མ་བཟུང་ལ། སེམས་ཅན་བྱི་བ་ཙམ་ཡན་ཆད་ཀྱིས་རེག་ན་བྱིན་ལེན་ཞིག་གོ། །དེ་ལས་ཟོས་ན་ཉེས་བྱས། བྱིན་བླངས་ནས་བྱིན་བླངས་པའང་རིགས་པ་མ་ཡིན་

ནོ། །བྱིན་ལེན་བྱས་ཟིན་པ་ལས་སྟན་ལས་འཕགས་སམ། གཞན་གྱིས་རེག་གམ། བྱིན་ལེན་བྱས་སམ་མ་བྱས་ཐེ་ཚོམ་ཟ་བ་སླར་གདོད་ཡང་། བྱིན་ལེན་བྱས་ཏེ་ཟོས་པའང་བྱིན་ལེན་བྱེད་དུ་ཆུད་དོ། །འབྷྲིད། ཟས་བྱིན་ལེན་མ་བྱས་པར་ཤེས་བཞིན་དུ་ཟོས་པ་ལས་ལྟུང་བར་འགྱུར་ཏེ་ཡན་

ལག་གཅིག་མ་བླངས་པ་ལས་སོ། །ཟས་བྱིན་ལེན་མ་བྱས་པ་ལས་ལྟུང་བར་འགྱུར་ཏེ་ཡན་ལག་གཅིག་ཆུ་དང་སོ་ཤིང་མ་གཏོགས་པ་ཏེ་བཟའ་བའོ། །ཆུ་དང་སོ་ཤིང་མ་གཏོགས་ཏེ་བཟའ་བ་རྣམ་ལྔ་དང་། བཅའ་བ་རྣམ་ལྔ་ལ་སོགས་པ་ཁ་ཟས་ཅི་ཡང་རུང་ཟས་ལས་ལྟུང་བར་འགྱུར་ཏེ།

ཡན་ལག་གཅིག་ཁར་བཟའ་བའོ། །ལུས་ལ་བྱུག་པ་དང་སྣར་བླུགས་པ་མ་ཡིན་གྱི། ཁར་བཟའ་བ་ལས་ལྟུང་སྟེ། ཡན་ལག་གཅིག་བྱང་གི་སྒྲ་མི་སྙན་གྱི་མ་ཡིན་ནོ། །པའོ། །བྱང་གི་སྒྲ་མི་སྙན་གྱི་ཟས་ནི་བདག་གི་དང་འདྲ་བས་བྱིན་ལན་བྱ་མི་དགོས་ཏེ། བྱང་གི་སྒྲ་མི་སྙན་གྱི་ཟས་ཀྱང་མ་

ཡིན་པ་ལས་ལྟུང་སྟེ་ཡན་ལག་གཅིག །ཡན་ལག་འདི་རྣམས་དང་ལྡན་ན་ལྟུང་བའོ། །ནད་པ་རབ་ཏུ་མ་རྫོགས་པས་བསྙོད་ན་ལོང་ཤིག །ནད་པ་བྱིན་ལེན་བྱེད་མི་ཕོད་པ་ནི་ཁྱིམ་པ་དང་དགེ་སྦྱོང་ལྟ་བུས་ཟན་བསྙོད་དེ། ཟོས་པ་ནི་ཉེས་པར་མི་འགྱུར་གྱིས། ལོང་ཤིག་རབ་ཏུ་རྫོགས་པ་མེད་

ནའོ། །སཱུ་ཏྲ་ལྟག་མ་ལྟར་ཁྱིམ་པ་དང་དགེ་སྦྱོང་གིས་བསྙོད་པ་ཉེས་མེད་པ་ནི་དགེ་སློང་མེད་པ་ན་བླངས་ཏེ་ཟོས་ཀྱང་ཉེས་པ་མེད་དོ། །རབ་ཏུ་མ་རྫོགས་པས་ཀྱང་བསྙོད་ཅིག །ནད་པ་ལ་ཟན་བསྙོད་པ་དགེ་སློང་མེད་ན་དགེ་སྦྱོང་གིས་ཀྱང་སྟོབས་ཤིག་བསྙོད་ཅིག་ཉེས་མེད་དོ། །བྱིན་པ་མ་བླངས་པ་

Vol. 165 · folio 151b

ཟོས་པའི་འོ། །བྱིན་ལེན་མ་བྱས་པར་ཟོས་པའི་ལྟུང་བ་རྫོགས་སོ།། །།བཟང་པོའི་ལྟུང་བ་ལ་འཆད་དེ། འོ་མ་ཞོ་མར་གསར་པ་ཉ་ཤ་ཤ་སྐམ་འདི་དག་ནི་ཟས་བསོད་པའོ། །འོ་མ་དང་ཞོ་དང་མར་སར་པ་དང་། ཉ་ལ་སོགས་པ་ཆུའི་ནང་ན་གནས་པ་བཟར་རུང་ངོ་ཅོག་དང་འདི་རྣམས་ནི་

ཟས་སོ་ཅོག་གི་ནང་དུ་བསོད་ཅིང་བཟའ་བའི་མཆོག་ཡིན་ནོ་ཞེས་གསུངས་སོ། །དེ་ལས་བྱེད་དོ། །སཱུ་ཏྲ་ལྟག་མའི་ནང་ན་སྨོས་པའི་ཁ་ཟས་བཟང་པོ་དེ་རྣམས་ལས་གག་ཀྱང་རུང་། བསླངས་པ་ལས་ལྟུང་སྟེ། ཡན་ལག་གཅིག་གཉེན་མ་ཡིན་པ་དང་། ཁྱིམ་པ་སྦྱིན་བདག་ནའོ། །སྦྱིན་བདག་

གཉེན་མ་ཡིན་ན་ཁྱིམ་པ་ལས་ལྟུང་སྟེ། ཡན་ལག་གཅིག་བདག་གིས་བླངས་ཏེ་ཟོས་ནའོ། །བདག་གིས་བླངས་ཤིང་ཟོས་པ་ལས་ལྟུང་སྟེ། ཡན་ལག་གཅིག་གསོལ་བ་དང་བཅུག་པ་དེ་ནི་ཉེས་བྱས་པའོ། །ཁ་ཟས་བཟང་པོ་ལས་བདག་གིས་བླངས་ཏེ་ཟོས་པ་ནི་ལྟུང་། གཞན་སློང་དུ་བཅུག་སྟེ་

ཟོས་ན་ཉེས་བྱས། སློང་བའི་ཚེ་ནི་གཉིས་ཀའང་ཉེས་བྱས་སུ་འདྲའོ། །མིན་ནའོ། །ཁ་ཟས་བཟང་པོ་ན་བའི་ཕྱིར་བླངས་པ་ནི་མ་གཏོགས་ཀྱི་མི་ན་བར་བླངས་པ་ལས་ལྟུང་སྟེ། ཡན་ལག་གཅིག་ཅི་བདེར་སྤྱན་དྲངས་པ་མ་བྱས་ན། ཡོན་བདག་གིས་ཁྱེད་ཅི་འདོད་པ་ང་ལས་རྟག་པར་ལོང་ཤིག་

ཅེས་ཟེར་བའང་རུང་། ཟན་སློང་བ་ཁྱོད་ཅི་འདོད་ཟེར་ཡང་རུང་སྟེ་བཟང་པོའི་ནང་ནས་མིང་གིས་སྨོས་ཏེ་འདི་འདོད་དོ་ཞེས་བྱས་ཀྱང་མི་ལྟུང་གི་ཅི་འདོད་པ་ལོངས་ཤིག་གམ། ཅི་འདོད་པ་ཞེས་མི་འདྲི་བར་བླངས་པ་ལས་ལྟུང་བར་འགྱུར་ཏེ་ཡན་ལག་འདི་རྣམས་དང་ལྡན་ན་ལྟུང་བར་འགྱུར་རོ། །དེའི་

ཕྱིར་ཐོབ་པའི་ཚེ་ཡང་དེ་སྟེ་གཞན་ངན་པའམ་བཟང་པོའམ་མཉམ་པའམ་རབ་ཏུ་བཟང་པོ་ཡང་བླངས་ནའོ། །ཟན་སློང་བའི་ཚེ་ཁ་ཟས་བསོད་པའི་ནང་ནས་བཟང་པོ་ཞིག་སྣ་གཅིག་ཅིག་བྱིན་པ་ལས་དེ་དང་འདྲ་ཞིང་མཉམ་པ་ཞིག་བྱིན་ཞེས་བླངས་ཏེ་ཐོབ་ན་ལྟུང་། ངན་པ་བྱིན་པ་ལས་བཟང་པོ་

བྱིན་ཞེས་བླངས་ཏེ། བྱིན་ན་ཡང་ལྟུང་། བཟང་པོ་ཞིག་བྱིན་པ་ལ་འདིས་ཀྱང་བཟང་པོ་ཞིག་བྱིན་ཞེས་བྱས་ཏེ། ཐོབ་ན་ལྟུང་། ཁ་ཟས་ངན་པ་ཞིག་བླངས་པ་ལས། བཟང་པོ་བྱིན་ཏེ། བླངས་ཏེ་ཟོས་ན་ལྟུང་། དེ་དག་ལས་ངན་པ་ནི་ཕྱེད་དོ། །ཁ་ཟས་ངན་པ་ཞིག་བླངས་ཏེ་བཟང་པོ་ཞིག་ཐོབ་བམ་བཟང་པོ་

Vol. 165 · folio 152a

ཞིག་བླངས་པ་ལས་ངན་པ་ཞིག་བྱིན་ཏེ་ཟོས་ན་ཉེས་བྱས། ཅི་བདེར་སྤྱན་དྲངས་པ་བཞིན་དུ་སློང་བ་ཁྱེར་ཏེ་འོངས་ན་ཁ་རོག་ཅིང་འདུག་ལ་བཀྱིག་པ་ལས་ཁྱོད་ཅི་སློང་ཞེས་འདྲི་ནའོ། །ཅི་འདོད་ཅེས་ཟེར་ཏེ་འདི་འདོད་ཅེས་བྱས་ཀྱང་ཉེས་མེད་པ་བཞིན་དུ་ཟན་ཁྱེར་ཏེ་འོང་བ་

ལ་དེ་མི་འདོད་ཅེས་བྱས་སམ། མི་འདོད་པའི་ཕྱིར་ལྷུང་བཟེད་ཁ་བཀབ་སྟེ་བསྡད་ཅིང་བཀྱིག་པ་ལས་ཅི་འདོད་ཅེས་ཟེར་བ་ལས་འདི་འདོད་ཅེས་བྱས་ཏེ་དེ་བཞིན་དུ་ཐོབ་པའང་ཉེས་མེད་དོ། །བསོད་པ་བསླངས་པའོ། །ཁ་ཟས་བཟང་པོ་བསླངས་པའི་ལྟུང་བ་རྫོགས་སོ།། །།སྲོག་ཆགས་

དང་བཅས་པའི་ལྟུང་བ་ལ་འཆད་དེ། རང་སྤྱོད་པའི་ཕྱིར་ཞུགས་སམ་འཇུག་ནའོ། །བདག་གི་ལུས་ཀྱི་ཕྱིར་བྱ་བ་ལ་སེམས་ཅན་ཡོད་བཞིན་དུ་བདག་གིས་སྤྱད་དམ། གཞན་སྤྱོད་དུ་བཅུག་པ་ལས་ལྟུང་སྟེ་ཡན་ལག་གཅིག །འབྷྲིད། སེམས་ཅན་ཡོད་པར་ཤེས་བཞིན་དུ་སྤྱད་པ་ལས་

ལྟུང་བར་འགྱུར་ཏེ་ཡན་ལག་གཅིག །སྲོག་ཆགས་ཅན་ནའོ། །སེམས་ཅན་ཀྱང་ཡོད་པ་ལས་ལྟུང་སྟེ་ཡན་ལག་གཅིག །ཆུ་དང་མར་དང་ཉུངས་མར་དང་སྦྲང་རྩི་དང་བུ་རམ་དང་འོ་མ་དང་ཞོ་དང་མར་སར་དང་ཚྭ་དང་རྒུན་གྱི་ཚྭ་དང་ཞོ་ཁུ་དང་རྩབ་མོ་དང་འབྲས་བུ་དང་བཅའ་བ་ལ་སོགས་

པ་དགོས་པ་ལའོ། །མིང་གིས་སྨོས་པ་འདི་རྣམས་གག་ཀྱང་རུང་བདག་གི་ལུས་ཀྱི་ཕྱིར་སྤྱོད་པ་ལས་ལྟུང་བར་འགྱུར་ཏེ་ཡན་ལག་གཅིག །མཐོང་བ་སེམས་ཅན་མཐོང་ཞིང་ལྟར་སྣང་བ་ལས་ལྟུང་སྟེ་ཡན་ལག་གཅིག །ཤི་ནའོ། །སྲོག་ཆགས་ཤི་བ་ལས་ལྟུང་སྟེ་ཡན་ལག་འདི་རྣམས་

དང་ལྡན་ན་ལྟུང་བར་འགྱུར་རོ། །སྲོག་ཆགས་སོ་སོ་སེམས་ཅན་ཡོད་བཞིན་དུ་སྤྱད་དེ་ཤིན་ཏུ་ཤི་བ་བཞིན་དུ་ལྟུང་བར་འགྱུར་རོ། །ལུས་ལ་དགོས་པ་ནི་སྤྱད་པའོ། །བདག་གི་ལུས་ཀྱི་ཡོ་བྱད་དུ་དགོས་ཏེ་སྤྱད་པ་ལ་སེམས་ཅན་ཡོད་ནའང་ལྟུང་བར་འགྱུར་ཏེ་ལུས་ཀྱི་ཕྱིར་གང་གང་དགོས་

པ་ནི་སཱུ་ཏྲ་འོག་མ་ལས་འཆད་པ་བཞིན་ནོ། །འདི་ལྟ་སྟེ་ཁྲུས་དང་སྐོམ་དང་སོ་ཤིང་བཅའ་བ་དང་རྐང་ལག་བཀྲུ་བའོ། །ལུས་ཀྱི་ཕྱིར་དགོས་པ་ནི་ཁྲུས་ཀྱི་ཡོ་བྱད་དང་སྐོམ་དུ་བཏུང་བ་དང་སོ་ཤིང་དང་རྐང་ལག་བཀྲུ་བའི་ཡོ་བྱད་ལ་སེམས་ཅན་ཡོད་བཞིན་དུ་སྤྱད་ན་ཡང་ལྟུང་བར་འགྱུར་རོ། །

Vol. 165 · folio 152b

དགོས་པ་ལ་དགོས་པའི་ཡོ་བྱད་དོ། །ལུས་ལ་དགོས་པའི་ཡོ་བྱད་གོས་དང་སྣོད་སྤྱད་ལ་སོགས་པ་ལས་བཀྲུ་ཞིང་སྤྱད་པར་དགོས་པ་ལ་སེམས་ཅན་ཡོད་ན་ལྟུང་བར་འགྱུར་ཏེ་གང་གང་ཡིན་པ་སཱུ་ཏྲ་འོག་མའི་ནང་ནས་འཆད་པ་ཡིན་ནོ། །བཟའ་བ་དང་། ཟས་ཉིད་དང་། ཟས་བཙོ་བའི་ཡོ་བྱད་ལ་

སེམས་ཅན་ཡོད་པ་དང་། ལྷུང་བཟེད་དང་། ལྷུང་བཟེད་བཀྲུ་བའི་ཡོ་བྱད་ཆུ་དང་ལྕི་བ་ལ་སོགས་པ་ལ་སེམས་ཅན་ཡོད་པ་དང་། གོས་དང་གོས་བཀྲུ་བ་དང་འཚོད་པའི་ཆུ་དང་ཚོན་ལ་སེམས་ཅན་ཡོད་པ་དང་། གནས་དང་ཁང་པའི་སྐྱང་ནུལ་འཇི་བ་དང་ལྕི་བ་ལ་སེམས་ཅན་ཡོད་པ་དང་།

སྭོ་བཀྲུ་བ་དང་། བདག་གི་སྭོ་དང་སྭོ་ལས་གཟུགས་བྱས་པ་བཀྲུ་བ་ལ་སེམས་ཅན་ཡོད་པ་དང་། མེ་ལ་སོགས་པ་ལུས་ཀྱི་ཡོ་བྱད་རྣམས་སོ། །མེ་བུད་པའི་ཡོ་བྱད་ཤིང་ལ་སོགས་པ་ལ་སེམས་ཅན་ཡོད་བཞིན་དུ་སྤྱད་ནའང་ལྟུང་བར་འགྱུར་རོ། །དེ་དག་དང་ས་ལྕི་བ་དང་ཚོན་དང་རྩྭ་དང་ཤིང་ལ་

སོགས་པའོ། །སཱུ་ཏྲ་ལྟག་མའི་ནང་ནས་མིང་གིས་སྨོས་པའི་ཡོ་བྱད་དུ་འགྲོ་བ་ནི། འདི་རྣམས་ལ་སེམས་ཅན་ཡོད་པར་སྤྱད་ནའང་ལྟུང་བར་འགྱུར་རོ། །དེ་དག་ཏུ་དགོས་པ་ནི་འདི་ལྟ་སྟེ་བཀྲུ་བ་དང་བཤལ་བ་དང་བཙོ་བ་དང་གདབ་པ་དང་ཕྱགས་པ་དང་བྱུག་པའོ། །སཱུ་ཏྲ་ལྟག་མའི་

ཡང་ལྟག་མའི་ནང་ནས་མིང་གིས་སྨོས་པའི་ཡོ་བྱད་དུ་དགོས་པ་འདི་རྣམས་ལ་སེམས་ཅན་ཡོད་ཅིང་ཤི་ན་ཡང་ལྟུང་བར་འགྱུར་རོ། །བཅུད་དང་ཆན་ཁུ་དང་ཐུག་པ་དག་བྱེད་པའོ། །ནད་པའི་བཅུད་དང་ཆན་ཁུ་དང་ཐུག་པ་ལ་སོགས་བྱེད་པའི་རྒྱུ་ལས་སེམས་ཅན་ཡོད་ནའང་ལྟུང་བར་འགྱུར་

རོ། །ཆུའི་ལམ་བཅད་དམ་བཏང་བའོ། །ཆུ་བཅད་དེ་ཆུ་བཅད་པའི་ལམ་ན་ཡོད་པའི་སེམས་ཅན་དུ་ཡོད་པ་ཤི་བ་བཞིན་དུ་ལྟུང་བར་འགྱུར་རོ། །ཆུ་གུད་དུ་བཏང་བའི་འདྲོགས་ལ་སྒམ་ལ་འདུག་པའི་སེམས་ཅན་དུ་ཤི་བ་བཞིན་དུ་ལྟུང་བར་འགྱུར་རོ། །ཤིང་དང་གཟིངས་བཅུག་པ་དང་

དྲངས་པ་དང་ཕྱུང་བའོ། །ཆུའི་ནང་དུ་ཤིང་དང་གཟིངས་བཅུག་གམ་ཕྱུང་བ་སེམས་ཅན་ཡོད་ཅིང་ཤི་བར་ཤེས་བཞིན་དུ་བྱས་ནའང་ལྟུང་བར་འགྱུར་རོ། །རིམ་གཅིག་པ་ལས་གཞན་དུ་སྤུ་ཡོད་པ་ལ་སོགས་པས་ཁྲུས་བྱེད་ནའོ། །རྫིང་བུ་དང་མཚེའུའི་ནང་ན་སེམས་ཅན་ཡོད་བཞིན་དུ་

Vol. 165 · folio 153a

ཁྲུས་རས་ཉིས་རིམ་དང་བེའུ་རས་དང་ལྭ་བ་ལྟ་བུ་སྤུ་ཅན་གྱི་ཁྲུས་རས་ཀྱིས་ཁྲུས་མི་བྱ། ཁྲུས་བྱས་ཏེ་སེམས་ཅན་ཤིན་དུ་ཤི་བ་བཞིན་དུ་ལྟུང་བར་འགྱུར་རོ། །དེས་ཀྱང་སེམས་ཅན་ཐམས་ཅད་ལྷག་པའི་ཁམས་ཀྱི་ཆུ་དེ་དག་ཀྱང་སྦྱོར་བའོ། །མཚེའུ་དང་རྫིང་བུ་ལྟ་བུ་སེམས་ཅན་ཕྲ་མོ་

རབ་ཏུ་མང་བར་ཡོད་ན་ཁྲུས་རས་གཅིག་རིམ་གྱིས་ཀྱང་ཁྲུས་མི་བྱ། གཅིག་རིམ་གྱིས་ཁྲུས་བྱས་ཏེ་སེམས་ཅན་ཤི་བར་གྱུར་ན་ཡང་ལྟུང་བ། སྲོག་ཆགས་དང་བཅས་པའི་དགོས་པའོ། །སྲོག་ཆགས་དང་བཅས་པའི་ལྟུང་བ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ་

སྲོག་ཆགས་དང་བཅས་པའི་ཆུ་སྤྱོད་པའི་ལྟུང་བ་ལ་འཆད་དོ། །ཆོངས་ཤིག་ཤིང་སྤྱི་སྤྲོད་ཀྱི་ཚགས་ཆུ་བཙགས་པའི་ཚགས་ཤིང་སྤྱི་སྤྲོད་ལ་བྱས་ཀྱང་ཉེས་མེད། སྦྱིན་པ་ཟག་སྣོད་ཀྱི་སྟེང་ནམ་མཁའ་ལ་གནས་པ་བཙགས་པའི་ཆུ་གཏོར་བའི་སྣོད་ཚགས་སྦྱར་བའི་ཕྱིར་ལྟང་ལྟང་པོ་

གསུམ་ལ་ལྕགས་ཀྱི་གཟེར་བུ་བ་དེ་ལྟར་གསུངས་སོ། །ཤིང་སྤྱི་སྤྲོད་ཀྱི་ཆགས་ནི་ཆུ་སྣོད་འོག་ཏུ་བཞག་ལ་དེའི་སྟེང་ནམ་མཁའ་ལ་ཆུ་ཚགས་དཔྱོངས་ཏེ་ཆུ་ཚགས་ཁ་ལས་སྲད་བུས་བཏགས་ཏེ་སྲད་བུའི་ཐོག་མ་ཤིང་ལྟང་ལྟང་པོ་གསུམ་གྱི་རྐེད་པ་ཙམ་དུ་ཡང་མིག་བྱས་ལ་ཡང་

མིག་ལས་གདགས་ཤིང་ལྟང་ལྟང་པོ་གསུམ་སྤྱི་སྤྲོད་དུ་བྱས་ཏེ་ལྕགས་སྒྱེད་ལྟར་བཙུགས་ལ་ཆུ་བཙག་གོ། །ཆུ་ཚགས་ལ་ཆུ་གནས་པའི་ཕྱིར་གདིང་བ་བྱ། ཆུ་ཚགས་ཀྱི་ཞབས་སུ་ཆུ་འཆགས་ཤིང་སེམས་ཅན་མི་འཆི་བར་བྱ་བའི་ཕྱིར་ནང་དུ་མིག་ཚགས་བླུགས། བྱེ་མའམ་ལྕི་

བས་སོ། །ཆུ་ཚགས་ཀྱི་ནང་དུ་བླུགས་པ་ནི་བྱེ་མའམ་ལྕི་བ་ཕུར་ཏེ་བླུགས། འཛིན་པའི་ལྷུང་བཟེད་ཀྱིས་ཀྱང་ངོ་། །སེམས་ཅན་མི་འཆི་བར་བྱ་བའི་ཕྱིར་ཆུ་ཚགས་ཀྱི་ཞབས་སུ་ཆུ་ཚགས་པར་བྱ་བའི་ཕྱིར་ཆུ་ཆགས་ཀྱི་ཞབས་སྣོད་གཅིག་གི་ནང་དུ་གཞུག་ཏུའང་རུང་ངོ་། །ཁམ་

པའམ་ཟངས་གག་ཀྱང་རུང་བས་སོ། །སྣོད་ནི་ཁམ་ལའམ་ཟངས་གག་ཀྱང་རུང་བས་སོ། །ལས་བྱས་ཏེ་ཆུ་ཚགས་ཀྱི་ཞབས་དེ་ནང་དུ་གཞུག་གོ། །ལྟང་ལྟང་པོ་གསུམ་གྱི་ཡུལ་དེ་བཅིངས། ཆུ་ཚགས་ཀྱི་ཞབས་གཞུག་པའི་སྣོད་དེ་ཡང་ཤིང་སྤྱི་སྤྲོད་གསུམ་གྱི་རྐེད་པ་ལ་བཏགས་ཏེ་

Vol. 165 · folio 153b

ཆུ་ཚགས་ཀྱི་ཞབས་དེའི་ནང་དུ་བཅུག་ལ་འཆང་དུ་གཞུག །བུ་གུ་ལས་བཟུང་། སྣོད་འཕྱང་དུ་གཞུག་པ་དེ་ཁ་ལ་བུ་གུ་ཕུག་སྟེ་བུ་གུ་ལས་གདགས་སོ། །སྔ་མ་ན་སྐུད་པས་སོ། །སྣོད་དེ་ཁམ་པ་ལས་བྱས་ན་བུ་གུ་ལས་གདགས་པ་ཐག་བུ་ལས་བྱ། ཕྱི་མ་ནས་ལྕགས་ཐག་ཕྲ་མོས་

སོ། །སྣོད་དེ་ཟངས་ལ་བྱས་ན་བུ་གུ་ལས་གདགས་པ་ལྕགས་ཐག་ཕྲེའུས་བྱའོ། །དེ་བཅང་། ཁམ་པ་དང་ཟངས་ལས་བྱས་པའི་སྣོད་དེ་བཅངས་ཀྱང་ཉེས་མེད་དེ། ཆུ་མི་སྟེར་ན་ལེབ་ལེབ་པོས་ཡང་ཡང་དུའོ། །ཆུ་ཚགས་ཐགས་བཟང་སྟེ་ཆུ་ཡོང་དུ་མི་བཏུབ་ན་ཤིང་ལེབ་ལེབ་པོས་

ཆུམ་ཐོར་བ་ཙམ་དུ་མི་དྲག་པར་ངོས་ལ་བརྡབ། ཆུ་ཚགས་ལ་བརྡེག །གོང་མ་ལྟར་ཆུ་ཚགས་ཟག་ཏུ་མ་བཏུབ་ན་ཚགས་ཀྱི་ཁ་ལའང་བརྡེག་ཅིང་བསིག །གཅེ་ཚགས་ན་གྲོན་ཆུང་ངོ་། །ཆུ་བཙགས་པའི་ཕྱིར་ཟངས་ཀྱི་ཞབས་བུ་གུ་སེང་སེང་པོར་འདུག་པ་བྱས་ཤིང་བཅངས་ན་ལས་

ཆུང་ཞིང་གྲོན་ཆུང་སྟེ་སླའོ། །དེ་བཅང་ཆུ་བཙགས་པའི་ཚགས་ཟངས་གཅེ་ཚགས་བཅངས་ཀྱང་ཉེས་མེད། ཁམ་པའང་ཟངས་ལས་སོ། །གཅེ་ཚགས་ཞེས་བྱས་པ་ནི་ཁམ་པའམ་ཟངས་གག་ལས་བྱས་ཀྱང་རུང་ངོ་། །དེ་རྫ་མ་འདྲ་བའི་ཞབས་སུ་སྡུ་བུ་ཅན་ནང་དུ་པད་མོ་འདྲ། བུ་གུ་

ཅན་ནོ། །གཅེ་ཚགས་བྱ་བ་ནི་རྫ་མའམ་ཟངས་འདྲ་བར་བྱས་ལ་ཞབས་ཀྱི་ནང་དུ་འབུར་འབུར་པོ་པད་མོའི་སྙིང་པོ་འདྲ་བར་བྱས་ལ་དེའི་འོག་གི་ནང་ཁོང་སྟོང་སྤུ་བུ་ཅན་བྱ་སྟེ་དེ་ལ་སྦུ་བུ་སེང་སེང་པོར་བྱས་ལ་གདོད། རས་མས་དེ་དག་གོ། །འབུར་འབུར་པོར་བུ་གུ་གདོད་པ་དེ་ལ་རས་མས་

གཡོགས་ཏེ་འབུར་འབུར་པོའི་དྲུང་སྲ་མོར་ཐག་བུས་བཅིངས་ལ་སྣོད་དེའི་ནང་དུ་ཆུ་བླུགས་ལ་བཙགས་ན་སེམས་ཅན་མི་ཤོར། ཆུ་ཚགས་ཞོག་ཤིག །ལྟག་ཏུ་ཆུ་ཚགས་རྣམས་གཉིས་སྨོས་པ་མ་གཏོགས་པར་ཆུ་ཚགས་གཞན་བཅངས་ཀྱང་ཉེས་མེད་དེ་འོག་ནས་འཆད། ཚགས་

སམ། ཆུ་ཚགས་ཐ་མལ་པ་དྲུག་པ་དང་ཆོས་ཀྱི་སྣོད་པའམ། ཀུན་དེ་དང་འདྲ་བ་ལ་ཁར་ཡང་བུ་གུ་གདོད་ཞབས་སུ་ཡང་ཆེར་གདོད་དེ་ཞབས་ཀྱི་བུ་གུ་ཆེན་པོར་ཆུ་ཚགས་ཀྱིས་གླན་པ་དང་། གཏང་བའི་ལེབ་ལེབ་པོ། རས་ལེབ་ལེབ་པོ་ཆུའི་ནང་དུ་བཅུག་སྟེ་བཀྲམ་ལ་སླར་བསྡུས་ཏེ་

Vol. 165 · folio 154a

སྣོད་ཀྱི་ནང་དུ་བཙིར་ན་ཡང་སེམས་ཅན་མི་ཆགས་སྟེ་འདི་གསུམ་གང་བཅངས་ཀྱང་རུང་། བརྟགས་པ་ཆུ་ཁྱེར་རམ་འགྲུབ་བམ་སྣོད་དང་སྤྱི་ལུགས་དེ་དག་ཏུའོ། །གུད་དུ་འགྲོ་སྟེ་ཆུ་ཚགས་མེད་ཀྱང་སླ་བ་ནི་ཆུ་བཙགས་ཤིང་བརྟགས་ཟིན་པ་རིལ་བའམ་སྣོད་

དུ་བླུགས་ཏེ་ཁྱེར་བས་ལྕོགས་པ་ཙམ་གྱི་ཚོད་ན་ཉེས་མེད། དེ་དག་མེད་པར་ཡུལ་རྒྱུ་བར་མི་སྤྱད། ཆུ་ཚགས་དང་ཀུན་དེ་མེད་པར་ཡུལ་རྒྱུ་བར་མི་སྤྱད། འཁོན་པ་དང་ལྷན་ཅིག་ཏུ་མ་ཡིན། བདག་ལ་ཆུ་ཚགས་མེད་ལ་འཁོན་ཡོད་པ་ལ་ཆུ་ཚགས་ཡོད་ན་ལྷན་ཅིག་ཏུ་ཡུལ་རྒྱུ་བར་མི་སྤྱད་དེ་

བརྙར་མི་སྟེར་བའི་ཕྱིར་རོ། །འོན་ཏེ་དེ་འདྲ་བའི་རྐྱེན་གཅིག་ན་བཟོད་ནས་སོ། །འཁོན་ཡོད་པ་དང་མི་འགྲོགས་སུ་མི་རུང་བའི་རྐྱེན་གཅིག་ཡོད་ན་བཟོད་པར་གསོལ་ཏེ་ཆུ་ཚགས་ལ་སོགས་པ་བརྙ་བར་སྔ་ནས་དམ་བཅས་ལ་འགྲོའོ། །བྱ་བར་ཡོད་ན་ཡོད་པའོ། །བདག་ལ་ཆུ་ཚགས་ཡོད་

པ་ནི་གུད་ན་ཡོད་པ་ལ་མི་བྱའི་ལག་ན་སྤྱད་དུ་ཡོད་པ་དང་བདག་ཉིད་ཀྱི་ལག་ན་སྤྱད་དུ་མེད་ཀྱང་བརྙས་སམ། ཐུན་མོང་དུ་སྤྱད་དུ་ཡོད་ན་བདག་ལ་ཡོད་པ་དང་འདྲ་སྟེ་ཉེས་མེད། དེ་བས་ན་གཞན་གྱིས་སྦྱིན་པར་ཁས་བླངས་ན་དེ་བཞིན། གུད་དུ་འགྲོ་སྟེ་གྲོགས་ཆུ་ཚགས་ཡོད་པ་ལ་ལམ་

ན་ཐུན་མོང་དུ་སྤྱད་ཅིང་བརྙ་བར་ཐམས་ཏེ་སྦྱིན་པར་ཁས་བླངས་ན་བདག་ལ་ཡོད་པ་དང་འདྲ་སྟེ་ཉེས་མེད། འབྲལ་ཏེ་སྦྱིན་པར་ཁས་མ་བླངས་ན་ཡུལ་རྒྱུར་སྤྱད་ཅིང་མི་བརྟེན། གུད་དུ་འགྲོ་བའི་གྲོགས་ཆུ་ཚགས་ཡོད་པ་དེ་ལམ་ནས་སོ་སོར་བྲལ་ལམ་བརྙར་མི་སྟེར་ན་ཆུ་ཚགས་མེད་པ་

ཡིན་ཏེ་སོང་ན་ཉེས་བྱས་སོ། །མི་འཕངས་པར་བྱེད་ཅིང་རབ་ཏུ་སྤྱོད་པ་ནི་སྤྱོད་པའོ། །གུད་དུ་འགྲོ་སྟེ་ཕ་རོལ་གྱི་གནས་སུ་ཕྱིན་ཚུན་ཆད་ཆུ་སྤྱད་མི་དགོས་པར་འགྲོ་བའི་ལམ་དུ་སོང་བ་ནི་ཆུ་ཚགས་མེད་ཀྱང་ཉེས་མེད་དོ། །རྒྱང་གྲགས་ལྔར་ནི་དེ་བཞིན་ནོ། །རྒྱང་གྲགས་ལྔའི་བར་དུ་ཆུ་

སྤྱད་མི་དགོས་ན་ཡང་ཆུ་ཚགས་མེད་པར་སོང་ཡང་ཉེས་མེད་དོ། །བཞག་སྟེ་གནས་སུ་སོང་བ་ལ་དེར་དེ་མེད་ན་རང་ཉམས་མ་ཡིན་པ་མ་ཡིན་ནོ། །གུད་དུ་འགྲོ་སྟེ་ཕ་རོལ་གྱི་གནས་སུ་ཆུ་ཚགས་རྙེད་པའི་གདེང་མེད་པར་བཞག་སྟེ་སོང་བ་ནི་ཉམས་རངས་དང་ལེ་ལོ་ཡིན་ཏེ་ཉེས་བྱས་སོ། །

Vol. 165 · folio 154b

གནས་དེར་ཆུ་ཚགས་བརྙར་རྙེད་དམ་ཡོན་ཏན་དང་ལྡན་པ་དག་གཅིག་སྟེ་ཆུ་བཙགས་ཤིང་རྟོག་པ་ཞིག་སྟེ་ཆུ་ཚགས་བསྐུར་མི་དགོས་པའི་གདེད་ཡོད་ན་མ་ཁྱེར་ཡང་ཉེས་མེད། གཅིག་ཅིག་གི་དུ་མ་ལ་དེ་བཞིན་དུ་འགྲུབ་སྟེ་དགེ་འདུན་གྱི་བར་དུའོ། །གུད་དུ་འདོང་སྟེ་གཅིག་ལ་ཆུ་

ཚགས་ཡོད་དེ་བརྙར་རྙེད་ཅིང་ཀུན་གྱིས་སྤྱད་དུ་ཡོད་ན་ནི་དགེ་འདུན་ལངས་ཤིང་མི་དུ་ཡོད་ཀྱང་རུང་གཞན་མ་ཁྱེར་ཡང་ཉེས་མེད། རྒྱུན་མགྱོགས་པ་ནི་མི་འཕངས་པར་བྱེད་པ་མ་ཡིན་ནོ། །ཕུ་ཆུ་དྲག་པོར་འབབ་པ་ལ་སྲིན་བུ་མེད་ཅེས་ཏེ་ཆུ་ཚགས་བཞག་པའམ་མེད་པར་བྱ་བ་མ་ཡིན་གྱི་

བསྐུར་དགོས་སོ། །བརྟགས་པ་དེ་དང་འབབ་རྒྱུན་དུ་ལྷན་ཅིག་ཏུ་འགྲོགས་ན་རྒྱང་གྲགས་ཀྱི་བར་དུ་འཇུག་པར་གྱིས་ཤིག །ཆུ་བང་བ་མགྱོགས་བུལ་བདག་དང་མཉམ་ན་གང་དུ་བཅུས་སྟེ་ཆུ་བརྟགས་པ་དེར་རྩི་ཤིང་ངམ་གཅིག་བོར་ཏེ་མཚན་མ་བཙུགས་ལ་རྒྱང་གྲགས་གཅིག་

ཚུན་ཆད་དུ་མཚན་མ་དེའི་འཁོར་དུ་བཅུས་པ་ནི་བརྟགས་མི་དགོས་ཏེ་སྤྱད་དུ་རུང་ངོ་། །ཆུ་དེའི་བར་དུ་འདྲེས་ན་དེ་ཚུན་ཆད་དོ། །སཱུ་ཏྲ་ལྟག་མ་ལྟར་མཚན་མ་བཙུགས་ཏེ་རྒྱང་གྲགས་གཅིག་ཚུན་ཆད་དུ་བརྟགས་མི་དགོས་པ་ཀུན་ནས་ཆུ་གཞན་ཞིག་བྱུང་སྟེ་འདྲེས་ན་རྒྱང་གྲགས་གཅིག་

གི་ཚད་དུ་མི་བྱའི། གང་དུ་འདྲེས་པ་དེ་ཚུན་ཆད་བརྟགས་མི་དགོས་སོ། །འདོམ་གང་གི་འཁོར་བརྟགས་པ་བཞིན་ནོ། །ཁྲོན་པ་དང་མཚེའུ་ལ་གང་ནས་བཅུས་ཏེ་བརྟགས་པའི་འདོམ་གང་ཚུན་ཆོད་བརྟགས་མི་དགོས་སོ། །མིག་གིས་དག་ན་ཆུའང་དག་གོ། །མིག་གིས་བལྟས་ཏེ་

སེམས་ཅན་མ་མཐོང་ཞིང་མི་སྣང་ན་སེམས་ཅན་གཟུགས་ཕྲ་མོ་བལྟར་མི་སྣང་བ་མི་བརྩིའི་ཆུ་དེ་སེམས་ཅན་མེད་ཅིང་དག་པའི་ཚད་དུ་བརྩིའོ། །ཐ་མལ་པས་སོ། །མིག་དག་པ་ནི་འཕྲུལ་གྱི་མིག་ཅན་ལ་མི་བྱའི་ཐ་མལ་པ་ཤའི་མིག་ཅན་ནོ། །དག་པའི་ཚད་དུ་བརྩི་སྟེ་དགྲ་བཅོམ་པ་

དང་འཕྲུལ་ཅན་གྱི་ཆུ་ཡང་ཤའི་མིག་གིས་བརྟགས་པའི་ཚད་དུ་བརྩི་སྟེ་སྤྱད་དོ། །མི་གཡོ་རྡུལ་མེད་པར་བརྟགས། །ཆུ་བལྟབ་ནི་རྡུལ་མེད་ཅིང་མི་གཡོ་བར་འདུག་པ་ལ་བལྟ། རྫ་མ་གང་བ་ཡང་ངོ་། །རྫ་མ་གང་ཞིག་འདུག་པ་ལ་རིལ་གྱིས་བརྟགས་ཀྱང་རུང་སྣོད་ཆུང་ངུས་ལོགས་ཤིག་

Vol. 165 · folio 155a

ཏུ་བཅུས་ཏེ་བརྟགས་ལ་དེ་ནས་སེམས་ཅན་མེད་ན་ཀུན་བརྟགས་པར་ཆུད། འདས་པར་བྱ་བར་གཏོགས་པ་འདིར་སྤྱད་པར་མི་བྱ། ཆུ་བལྟ་བའི་ཚད་ནི་ཤིང་རྟ་བ་ལང་དྲུག་གིས་དྲངས་པ་གཅིག་འཇུག་མལ་གཅིག་ན་བཞག་སྟེ་མགོ་བསྐོར་ལ་

ཐོག་མ་བསྐོར་བའི་སར་སླར་འཁོད་པ་ཙམ་གྱི་ཡུན་གྱི་སྲིད་དུ་བལྟ། སྲོག་ཆགས་འཕྲོ་བ་རྩྭས་བདེ་བར་བསྟན། ཆུའི་ནང་ན་སྲིན་བུ་ཡོད་པ་རྡུལ་དང་ངོ་མི་ཤེས་པའི་ཕྱིར་རྩྭ་མཆོག་གིས་བསྐུལ་ཞིང་བརྟག །གཞན་ལ་ཡང་རྩྭ་མཆོག་གིས་བསྟན། དེ་དག་མྱོས་པའི་ལམ་དུ་མི་དོར། ཆུའི་

ནང་ན་སེམས་ཅན་ཡོད་དེ་སླར་བསྐྱལ་བའི་ཚེ་ཆུ་དྲག་ཏུ་དབོ་བ་ལ་སོགས་པས་སྔངས་པ་དང་སྣད་པ་དང་མྱོས་པར་མི་བྱ་བར་དལ་གྱིས་དོར། གཞན་ལ་ཡང་མ་ཡིན། ཤིག་དང་འཇི་བ་ལ་སོགས་པ་སེམས་ཅན་ཅི་དོར་ཡང་སྔངས་ཤིང་སྣད་པར་མི་བྱ་བར་དལ་གྱིས་དོར། དེ་སྟེ་མེ་མར་

བྱེད་པའི་དེར་སྲོག་ཆགས་ལྟུང་ན་དེ་གཡོགས། མེ་མར་གྱི་ནང་དུ་སེམས་ཅན་མི་འཆི་བར་བྱ་བའི་ཕྱིར་གྱོ་མོ་ལ་སོགས་པ་ལེབ་ལེབ་པོ་དབུས་སུ་བུ་གུ་ཕུག་ལ་དེ་དགབ། སྨྱིག་མའི་ཚལ་བུའི་དྲ་བ་ལ་གོས་དཀར་པོའམ་ལྷང་ཚེར་གྱིས་དཀྲི་བར་དེ་ལྟར་གསུངས་སོ། །མེ་མར་དགབ་པ་སྨྱིག་

མའི་ཚལ་བ་དྲ་བ་འདྲ་བར་བྲེས་ལ་རས་ཕྲན་ནམ་ཤོག་ཤོག་གམ་ལྷང་ཚེར་གྱིས་གཡོགས་པའི་ཁང་བུ་ཕུབ་ཀྱང་རུང་། མིག་བརྒྱ་བ་ཡང་ངོ་། །མེ་མར་གྱི་སྟེང་དུ་གཡོགས་པ་ཁམ་པ་ལ་མིག་མང་དུ་གཙགས་པའི་ཁང་བུ་ཕུབ་ཀྱང་རུང་། ཐོག་མ་ནས་བྱས་པའམ་རྫ་མ་ལ་སོགས་པའི་

གྱོ་མོ་བུ་གུ་ཅན་ནོ། །སཱུ་ཏྲ་ལྟག་མ་ལྟར་ཁམ་པའི་ཁང་བུ་བྱ་བ་ནི་ཐོག་མ་ནས་ཆེད་ཀར་བྱས་པའང་རུང་ཕྱིས་བུ་ལ་འཕྲལ་དུ་བྱས་པའང་རུང་། སྐྲའི་ཞགས་པས་སྦྲུལ་མི་བཅིང་། བདག་གིས་གནས་ན་སྦྲུལ་གདུག་པ་འདུག་ན་རྩྭ་དང་རྩིད་པའི་ཞགས་པས་བཅིངས་ཤིང་མི་དོར།

སེ་གོལ་གྱི་སྒྲ་བྱས་ལ་བཟང་པོའི་བཞིན་མི་སྣང་བའི་ལམ་དུ་འདུག་ཤིག་ཅེས་བྱ། སྦྲུལ་གནས་སམ་ལམ་ཀཾ་ན་འདུག་ན་སེ་གོལ་བརྡབ་སྟེ་བཞིན་བཟང་མི་སྣང་བར་གུད་དུ་སོང་ཞེས་བྱ། མི་འདུག་ན་ར་རྐང་གི་དབྱིག་པས་དལ་གྱིས་བུམ་པའམ་རྫ་མའི་ནང་དུ་བཅུག་ལ་བུ་གུ་བྱས་ཏེ་ཁ་

Vol. 165 · folio 155b

བཅད་ལ་དབྱུང་། སཱུ་ཏྲ་ལྟག་མ་ལྟར་བྱས་ཏེ་མ་བཏུབ་ན་དབྱུག་པའི་མགོ་ཁ་བྲག་ཏུ་འདུག་པས་གཉའ་བར་མ་སྣང་པར་མནན་ལ་རྫ་མའི་ནང་དུ་མི་སུབ་པར་བྱ་བའི་ཕྱིར་རྫ་མའི་ཁ་ཁབ་ལ་བུ་གུ་གཏོད་དེ་སྦྲུལ་ག་ལ་འདུག་པའི་གནས་སུ་བསྐྱལ། མི་འགྲུབ་ན་རྒྱ་ཅང་ངམ་ལྕག་

པོད་དམ་དྲ་བའམ་ཐག་པའི་ཞགས་པར་དས་དཀྲིས་པས་མགྲིན་པར་བཅིང་། དེ་དག་གིས་གཞུག་པར་བསྒོ། །སཱུ་ཏྲ་ལྟག་མ་ལྟར་རྫ་མར་གཞུག་མ་ནུས་ན་མིང་གིས་སྨོས་པ་འདི་རྣམས་ལ་ར་ད་འཇམ་པོས་དཀྲིས་ཏེ་བཏང་སླ་བར་བྱ་བའི་ཕྱིར་འགྲོལ་མིག་ཏུ་མགྲིན་པར་མ་སྣད་པར་

བཏགས་ལ་སྦྲུལ་གྱི་གནས་སུ་བལ་གྱིས་དཀྲི་ཞིང་བཏང་ངོ་། །མིང་གིས་སྨོས་པ་འདི་རྣམས་ཀྱི་མགྲིན་པར་བཅིངས་ལ་རྫ་མའི་ནང་དུ་གཞུག་ཅིང་བསྐྱལ་དུ་ཡང་རུང་ངོ་། །སྤན་སྤུན་ནི་མི་དོར། སྦྲུལ་བསྐྱལ་བ་ཡང་གནས་མ་ཡིན་པ་དང་སྤན་སྤུན་སྦྲུལ་ལ་གནོད་པའི་སར་མི་

གཞག །ཚང་དུ་ཞུགས་ཀྱི་བར་དུ་བསྡད། སྦྲུལ་ཚང་དུ་བསྐྱལ་ནས་ཀྱང་སེམས་ཅན་གཞན་ཞིག་གིས་མི་ཟོས་པར་བྱ་བའི་ཕྱིར་ཚང་དུ་སོང་གི་བར་དུ་བསྡད། ཤིག་ར་དའི་ནང་དུ་གཞུག །ཤིག་ཐང་ལ་བབ་ཅོལ་དུ་མི་དོར་བར་ར་དའི་ནང་དུ་གཞུག །དེའི་གསེབ་ཏུའོ། །ཤིག་

བཅུག་པའི་ར་ད་ཡང་བབ་ཅོལ་དུ་མི་དོར་བར་རྩིག་པའི་གསེབ་ཏུ་གཞུག་སྲིན་བུ་མང་ཀུ་ལ་སྔོན་པོ་ལ་དོར། སྲིན་བུ་མང་ཀུ་ན་མི་ལ་ཟ་བ་ཞིག་ཡོད་དེ་དེ་ཡང་བབ་ཅོལ་དུ་མི་དོར་བར་རྩྭ་སྔོན་པོའི་ནང་དུ་དོར་རོ། །གྲང་མོ་ལ་ཡང་ངོ་། །སྲིན་བུ་མང་ཀུ་ན་ཚ་ཞིང་དྲོ་བའི་གནས་སུ་མི་

གཞག་གི་གྲང་ཞིང་བསིལ་བ་དང་གྲིབ་མར་གཞག་གོ། །བཏང་བའི་བུམ་བུ་སྔ་མ་རྣམས་དབབ་པའི་ཕྱིར་བཅང་། ཆུ་བཙགས་པའི་སྲིན་བུ་སླར་ཆུའི་ནང་དུ་གཏང་བའི་ཕྱིར་བཏང་བའི་སྣོད་བཅངས་ཀྱང་ཉེས་མེད་དོ། །ཁ་ནས་ཀྱང་ཐག་བུས་གདགས་སུ་རུང་། ཞབས་སུ་ཡང་

ཐག་བུས་གདགས་སུ་རུང་བར་བྱས་ལ་ཐུར་དུ་བཏང་བའི་ཚེ་ཁའི་ཐག་བུ་ཐང་པར་བྱས་ལ་སླར་དབྱུང་བའི་ཚེ་ཞབས་ཀྱི་ཐག་བུ་ལ་གཟེང་སྟེ་དྲང་ངོ་། །ཆུ་ཚགས་དེ་ཉིད་ཀྱིས་ཀྱང་དབབ། ཆུ་ཚགས་ཀྱིས་ཀྱང་སླར་སེམས་ཅན་བཏང་དུ་རུང་སྟེ་ཞབས་ནས་ཀྱང་ཐག་བུས་བཏགས་ཁ་ནས་ཀྱང་ཐག་

Vol. 165 · folio 156a

བུས་བཏགས། ས་ལ་བཏང་བའི་ཚེ་ཞབས་ཀྱི་ཐག་བུས་དྲངས་ཏེ་བཏང་ངོ་། །ཚགས་བཤལ་བས་སྲོག་ཆགས་ཆགས་པ་དབོག་པའི་ཐབས། ཆུ་ཚགས་ལ་སྲིན་བུ་ཆགས་པ་བསལ་ཞིང་མེད་པར་བྱ་བའི་ཕྱིར་ཆུའི་ནང་དུ་མི་དྲག་པར་བཤལ་ཞིང་བཀྲུའོ། །དྲི་མ་བཀྲུ།

སྐབས་སྐབས་སུ་ཆུ་ཚགས་ཀྱི་དྲི་མ་ཡང་དག་པར་བཀྲུ། རུལ་བ་མེད་པར་བསྐམ། ཆུ་ཚགས་མི་རུལ་བར་བྱ་བའི་ཕྱིར་བསྐམ། དེ་བཙིར་ན་གཉིས་ཀ་ལ་ཡང་ཕན་ནོ། །ཆུ་ཚགས་བཙིར་ན་དྲི་མ་དག་པ་དང་བསྐམ་པ་ལ་ཕན་ཏེ་གཅུ་ཞིང་ནི་མི་བཙིར། ཁ་ན་མ་ཐོ་བའི་ཡིད་

ཅེས་པ་རྙེད་པར་དགེ་འདུན་ནམ་གང་ཟག་གམ་ཆུ་ཚགས་དང་ཟད་པ་ཡིན་ཅེས་པ་ལ་ཞུགས་ན་ཡང་ངོ་། །ཆུ་བདག་གིས་མ་བརྟགས་པར་སྤྱད་ཀྱང་ཉེས་མེད་པ་ནི་དགེ་འདུན་ནམ་གང་ཟག་གམ་ཚུལ་ཁྲིམས་དང་ལྡན་ཏེ་རྟག་ཏུ་ཆུ་འཚག་ཅིང་རྟོག་པ་དང་གང་ཟག་ཚུལ་ཁྲིམས་དང་ལྡན་པ་

རྟག་ཏུ་ཆུ་འཚག་ཅིང་རྟོག་པ་དང་གསང་ཆུ་སའི་འོག་ནས་འོང་བ་སྔོན་ཆད་སྲིན་བུ་ཡོད་མེད་དེ་མ་བྱུང་སྟེ་སེམས་ཅན་མེད་པར་ཡིད་ཆེས་པ་དང་ཆུ་ཚགས་བཟང་པོ་སྲིན་བུ་ཡོད་མི་འཆོར་ཞིང་སྔོན་ཆད་ཀྱང་སྲིན་བུ་བྱུང་མ་མྱོང་བ་དང་འདི་རྣམས་ནི་རྐྱེན་ཅིག་བྱུང་ནས་མ་བརྟགས་ཤིང་མཚན་མོ་

འཐུངས་ཤིང་སྤྱད་ཀྱང་ཉེས་མེད། ཉི་མ་ཤར་གྱི་བར་དུ་བླངས་པའི་དང་ཁྲོན་པ་བརྟགས་པ་བཞིན་དུ་ཞུགས་ཤིང་། ཆུ་བཅུས་ནས་བརྟགས་ཏེ་སྣོད་ཀྱི་ནང་དུ་བཞག་པ་དང་ཁྲོན་པ་སྲིན་ཡོད་དམ་མེད་བརྟགས་ཏེ་བཞག་པ་ནི་དི་རིང་ཉི་མ་ཤར་ནས་སང་ཉི་མ་ཤར་གྱི་བར་དུ་ཉིན་ཞག་

གཅིག་ཏུ་བརྟག་མི་དགོས་ཏེ་ཕན་ཆད་ནི་བརྟགས་སོ། །རྐང་པ་བཀྲུས་པ་ཕོས་ཏེ་སྟོང་པར་དགང་། བཤང་གཅིའི་སར་རྐང་པ་དང་ཕྱི་རོལ་བཀྲུ་བའི་ཆུ་ཚགས་བྱས་ལ་སྲིན་བུ་མི་འཇུག་པའི་ཕྱིར་སྔ་མ་ཕོ་ཞིང་སྟོང་པར་མི་བཞག་པར་ཕྱི་མ་ཆུ་སར་པས་དགང་། ཞོག་ཤིག་ཆུ་

སྣོད་དང་གཞན་ཡང་ངོ་། །ཆུ་སྣོད་གཞན་དང་སྣོད་སྤྱད་ལ་སོགས་པ་ཡང་ཁ་ཟས་དྲི་མས་འབགས་པ་ལ་སོགས་པ་བཀྲུ་བཤལ་བྱ་སྟེ་བཞག །ཆུ་སྣོད་ནི་ཆུས་དགང་ཞིང་བཞག་རུབ་མ་པ་ལ་དེར་གཏོགས་པ་དགེ་འདུན་གྱི་ན་དེ་ལ་གཏོགས། བཤང་སར་བཞག་པའི་ཆུ་སྣོད་དང་

Vol. 165 · folio 156b

སྣོད་སྤྱད་ལ་སོགས་པ་དགེ་འདུན་གྱི་རུབ་མ་པ་སུ་བྱེད་པའི་ལས་སུ་གཏོགས་ཏེ་རུབ་མ་པས་བསྲུངས་ཤིང་ཞལ་ཏ་བྱ། སྦྱིན་པ་དང་སྡུད་པའང་དེར་མི་གཏོགས་པ་མ་ཡིན་ནོ། །དགེ་འདུན་གྱི་སྣོད་སྤྱད་ལས་པ་བརྙན་པོར་བཏང་བ་དང་མི་དགོས་ཤིང་ལྷག་པ་སྡུད་ཅིང་སྦེད་པ་དང་

བྱན་པོ་ལ་སྣོད་སྤྱད་དཔོག་པ་ཡང་རུབ་མ་པའི་ལས་སུ་བྱའོ། །ཁྱིམ་པ་བརྙ་ན་སྦྱིན། དགེ་འདུན་གྱི་སྣོད་སྤྱད་ལ་ཁྱིམ་པ་བརྙ་ན་སྦྱིན། དེ་ཡོད་ན་སྤྱད་པ་ལས་སོ། །ཁྱིམ་པ་སྣོད་སྤྱད་བརྙར་སྦྱིན་པ་ནི་རྙིང་པ་ལས་སྦྱིན། རྙིང་པ་མེད་ན་སར་པ་ལས་ཀྱང་སྦྱིན། འདིར་སྦྱིན་བདག་གཙུག་

ལག་ཁང་དུ་སྦྱིན་པའམ་སྨྲས་པ་མ་ཡིན་ནོ། །ཁྱིམ་པས་གཙུག་ལག་ཁང་དུ་མཆོད་སྟོན་བྱེད་ཅིང་དེའི་རྗེས་ལ་ཁྱིམ་པའི་གཉེན་བཤེས་ཀྱང་ཅིག་ཅར་གཙུག་ལག་ཁང་དུ་བསྡུས་ཏེ་མགྲོན་བྱེད་པའི་ཕྱིར་སྣོད་སྤྱད་བརྙ་ན་སྦྱིན། དགེ་སློང་ལ་སར་པ་ཐལ་བྱུང་སྦྱིན། དགེ་སློང་རྙིང་

དང་གསར་དུ་ཞུགས་པ་ལ་སྣོད་སྤྱད་དང་ཁ་ཕྱིས་མེད་པ་ཞིག་ཡོད་ན་ཕྱོགས་བཅུའི་དགེ་འདུན་གྱི་དཀོར་ཡང་རུང་སྣོད་སྤྱད་ལས་ཅི་མི་བདོག་པ་ཐལ་བྱུང་སྦྱིན་ནོ། །སྣོད་ཀྱི་ཕྱིར་གནས་བསྐོ་རུབ་མ་པའི་སྣོད་སྤྱད་དང་། དཀོར་ལ་སོགས་པ་འབྲུབ་པའི་མཛོད་ཁང་བསྔོས་ཤིང་སྦྱིན། ཟངས་

དང་ཁམ་པའི་སྣོད་སོ་སོར་གཞུག །མཛོད་དུ་རུབ་མ་པས་སྦ་བརྟུལ་བྱ་བ་ནི་ཟངས་དང་ཁམ་པའི་སྣོད་སྤྱད་སྡེ་སྡེ་སོ་སོར་བཞག །ཆུ་ཞོག་ཤིག །དགེ་འདུན་གྱི་སྤྱིར་བཏུང་བ་དང་སྤྱད་པ་ལ་སོགས་པའི་ཆུ་བཞག །བབ་ཆོལ་དུ་མི་བཞག །ཆུ་དང་ཆུ་སྣོད་ལ་སོགས་པ་བབ་ཆོལ་དུ་མི་

བཞག་ཁང་པ་དེའི་ཕྱིར་བྱ། ཆུ་བབ་ཆོལ་དུ་མི་གཞག་པའི་ཕྱིར་ཆུ་བཞག་པའི་གནས་ཀྱི་ཁང་པ་བྱའོ། །གཙུག་ལག་ཁང་གི་ལྷོ་ནུབ་ཀྱི་ངོས་ཀྱི་ནང་དུའོ། །ཆུ་བཞག་པའི་ཁང་པ་བྱ་བ་ནི་གཙུག་ལག་ཁང་གི་ནང་ལྷོ་ནུབ་ཀྱི་མཚམས་ཀྱི་གྲ་ནས་ཁང་པ་མིག་གཅིག་བསྔོ། སྐར་ཁུང་

གདོད་ཕ་གུ་གདིང་ཆུ་ཁུང་གདོད་སྒོ་བྱ་སྒོ་ལེབ་དང་ཡང་མིག་གཞུག །ཆུ་བཞག་པའི་ཁང་པ་དེ་ཐོག་མ་བརྩིགས་པའི་ཚེ་ནས་སྐར་ཁུང་གདོད། འོག་ཏུ་སོ་ཕག་གདིང་ཆུ་ཁུང་གདོད་སྒོའི་རེ་བཞི་བྱ་སྒོ་ལེབ་གཞུག་སྒོ་ལེབ་ལ་ཡང་མིག་དང་ལག་གཟུངས་བཅའ། ཚགས་བཞག་པའི་ཕྱིར་

Vol. 165 · folio 157a

གདང་ཡང་ངོ་། །ཆུ་བཞག་པའི་ཁང་པའི་ནང་དུ་ཚགས་བསྐམས་ཞིང་བཞག་པའི་གདང་བྱ། ཤིང་ཁྲི་གཞག །ཁང་བུའི་ནང་དུ་ཆུ་སྣོད་ཀྱི་གཞི་ཤིང་ཁྲི་གཞག་ཕག་བུའི་སྟེགས་བུ་ཡང་ངོ་། །ཆུ་བཞག་པའི་གཞི་ཕག་བུ་ལ་སྟེགས་བུར་བྱས་ཀྱང་རུང་ངོ་། །ཤོང་

ཤོང་བོར་རོ། །སྟེགས་བུ་ལ་ཆུ་སྣོད་འཆགས་པར་བྱ་བའི་ཕྱིར་སོ་སོར་ཤོང་བུར་བྱ། སྤྱད་པའི་ཆུ་སྣོད་ཡན་ཆད་དག་པར་བྱ། ཆུས་སྣོད་དང་སྤྱད་པའི་སྣོད་སྤྱད་ལ་སོགས་པ་ཁ་ཟས་དང་དྲི་མས་འབགས་པ་དག་པར་བཀྲུ་ཞིང་བྱི་བདར་བྱ། གཙང་སྦྲར་རོ། །སྤྱད་པའི་སྣོད་སྤྱད་ཀུན་དྲི་མ་

དང་ཁ་ཟས་དང་མི་གཙང་བ་ལ་སོགས་པས་མ་འབགས་པར་གཙང་སྦྲ་བྱ། བཏུང་བའི་ཆུ་ཡང་ངོ་། །བཏུང་བའི་ཆུ་ཡང་རྡུལ་དང་དྲི་མ་དང་། ཁ་ཟས་ཀྱིས་མ་འབགས་པར་གཙང་སྦྲ་བྱ། མ་བརྟགས་པའི་གོས་དང་ལག་པས་མི་བྲིམ། གོས་དང་ལག་པ་ཁ་ཟས་དང་དྲི་མས་འབགས་

ཤིང་མ་བརྟགས་པས་ཁ་ཟས་དང་ཆུ་མི་བྲིམ། དུས་དུས་སུ་ཆུ་སྣོད་ཡང་བཀྲུ། །ཆུ་སྣོད་དང་ཀུན་དེ་ལ་སོགས་པ་དུས་དུས་སུ་ནང་བཀྲུ། ཟབ་ན་རྩྭ་ཨུ་ཤི་རའམ་ཅུ་ཚེའི་སོག་མའམ་ཤིང་ཤུན་ནམ་ར་དས་ཤིང་བུའམ་ཤིང་ཤུན་ནམ་ར་དས་ཤིང་བུ་ལ་བཅིངས་ཏེའོ། །ཀུན་དེ་ལྟ་བུ་ཁ་ཆུང་

ཞིང་མགྲིན་པ་རིང་བ་བཀྲུ་བ་དང་རྫ་མ་ཆེན་པོའི་ལག་གིས་ཕྱིས་མི་སླེབ་པ་ལ་མིང་གིས་སྨོས་པ་འདི་རྣམས་ཤིང་གིས་ཏོར་ཏོ་ལ་བཅིངས་ཏེ་བསྔོགས་ཤིང་བཀྲུའོ། །དེ་དེ་དག་ཏུ་ཁ་ཟས་ཀྱིས་རེག་པ་མི་བསྲུང་བར་མི་བྱ། ཆུ་སྣོད་དང་ཆུ་སྣོད་བཀྲུ་བའི་རྫས་དེ་རྣམས་ལ་ཐོག་མ་ནས་ཁ་ཟས་

ཀྱིས་མ་རེག་པར་བསྲུང་། བསྐམ་པ་ཡང་ངོ་། །སྣོད་སྤྱད་དང་ཆུ་སྣོད་དུས་དུས་སུ་བཀྲུ་ཞིང་བསྐམ་མོ། །དེར་མི་འཕོངས་པའི་ཕྱིར་ལྷན་ཅིག་ཏུ་མ་ཡིན་ནོ། །སྣོད་སྤྱད་སྐེམ་པའི་ཚེ་བྲེལ་བར་མི་འགྱུར་བའི་ཕྱིར་ཁ་ཅིག་སྤྱད་དུ་ཡོད་པར་བྱས་ལ་ཁ་ཅིག་བསྐམ་མོ། །ཆུ་ཡིར་གཏོགས་

པ་ནི་གནས་བྱེད་པ་ལ་གཏོགས་སོ། །ཆུའི་ལས་སུ་བྱ་དགོས་པ་འདི་རྣམས་གནས་བརྟན་དང་མཁན་པོས་མི་བྱའི་སློབ་མ་དང་གནས་འཆའ་བའི་དགེ་སློང་གཞོན་ནུས་བྱའོ། །སྲོག་ཆགས་དང་བཅས་པའི་ཕྲ་མོ་ལ་སོགས་པར་ཆུད་པའོ། །སྲོག་ཆགས་དང་བཅས་པའི་ཆུ་སྤྱོད་པའི་

Vol. 165 · folio 157b

ལྟུང་བ་འདུལ་བ་ཕྲ་མོའི་ནང་ནས་འབྱུང་བའི་མདོ།། །།སྨྱེན་གནས་ཀྱི་ལྟུང་བ་ལ་འཆད་དེ། འབྷྲིད། ཤེས་བཞིན་པ་ལས་ལྟུང་སྟེ་ཡན་ལག་གཅིག །མངོན་སུམ་དུ། ཁྱོ་དང་ཆུང་མ་ལྷན་ཅིག་འཁོད་པའི་གན་དུ་སོང་བ་ལས་ལྟུང་སྟེ་ཡན་ལག་གཅིག །རྩོམ་འདོད་པའོ། །

ཁྱོ་ཤུག་གཉིས་ཉལ་པོ་བྱེད་པར་ཆས་ཤིང་རྩོམ་པ་ལས་ལྟུང་སྟེ་ཡན་ལག་གཅིག །འདུས་པའོ། །ཁྱོ་ཤུག་གཉིས་ཉལ་པོ་བྱེད་པའི་ཕྱིར་འདུས་ཏེ་ལྷན་ཅིག་འཁོད་པ་ལས་ལྟུང་སྟེ་ཡན་ལག་གཅིག །ཕོ་དང་མོའོ། །ལྷན་ཅིག་ཏུ་འདུས་ཏེ་འཁོད་པ་ཕོ་གཉིས་འདུས་ཏེ། འཁོད་

པ་ལ་ནི་མི་ལྟུང་གི་ཕོ་གཅིག་མོ་གཅིག་འཁོད་པ་ལས་ལྟུང་སྟེ་ཡན་ལག་གཅིག །ཁྱིམ་པ་ལའོ། །ཕོ་དང་མོ་ལྷན་ཅིག་འཁོད་པ་དེ་དགེ་སློང་དང་མུར་འདུག་གི་རབ་ཏུ་བྱུང་བ་མ་ཡིན་གྱི་ཁྱིམ་པ་ལས་ལྟུང་སྟེ་ཡན་ལག་གཅིག །གཞན་གྱི་གནས་ན། དགེ་སློང་གི་གནས་

དང་གཙུག་ལག་ཁང་ལ་མི་བྱའི་ཁྱིམ་པའི་གནས་ན་མི་ཚངས་པར་སྤྱད་པ་བལྟས་པ་ལས་ལྟུང་སྟེ་ཡན་ལག་གཅིག །རུང་ཞིང་། རྩིག་པའམ་སབ་མོས་ཆོད་དམ་ཁང་པའི་ནང་ངམ་ས་སྲོས་ཏེ་དབེན་ཞིང་སྤྱད་དུ་རུང་བ་དང་། གཞན་མེད་དེ་སྦྱོར་བ་ནའོ། །ཁྱོ་ཤུག་གཉིས་སུ་འཁོད་

ཅིང་མི་གཞན་མེད་པ་དང་གཞན་ཀྱང་ཡོད་ཀུན་མི་ཚངས་སྤྱོད་པ་དང་འདི་རྣམས་ལ་ཡན་ལག་གཅིག །མངོན་པར་བརྟག་པར་འདུག་ནའོ། །མི་མི་ཚངས་པར་སྤྱོད་པའི་གན་དུ་ཁོང་གིས་ཀྱང་མཐོང་བདག་གིས་ཀྱང་མཐོང་བར་མངོན་པར་སོང་ཞིང་བརྟག་པ་ལྟུང་བར་འགྱུར་ཏེ་

ཡན་ལག་གཅིག་ཡན་ལག་འདི་རྣམས་དང་ལྡན་ན་སྨྱེན་གནས་ཀྱི་ལྟུང་བའོ། །སྨྱེན་གནས་སུ་འདུག་པའོ། །སྨྱེན་གནས་སུ་འདུག་པའི་ལྟུང་བ་རྫོགས་སོ།། །།གབ་པའི་ལྟུང་བ་ལ་འཆད་དེ། དབེན་པར་རྟོག་ཅིང་འདུག་པ། ཁྱོ་ཞིག་མི་ཚངས་པར་སྤྱོད་པ་ལ་འཇབ་

ཅིང་འགྲེངས་ཏེ་ཉན་པ་ན་ལྟུང་སྟེ་ཡན་ལག་གཅིག །གཡོགས་པ་དང་བཅས་པ། རྩིག་པའམ་སབ་མོས་བསྐོར་བའམ་ཁང་པའམ་ས་སྲོས་པའི་ནང་ན་མི་ཚངས་པར་སྤྱོད་པ་ལས་དྲུང་ནས་མ་མཐོང་བར་བལྟ་ཞིང་ཉན་པ་ལས་ལྟུང་སྟེ་ཡན་ལག་གཅིག །འཇིག་པའི་དབང་

Vol. 165 · folio 158a

ཡང་མ་ཡིན། གཅན་གཟན་ནམ་ཆོམ་པོ་ལ་སོགས་པའི་རྐྱེན་བྱུང་སྟེ་མི་ཚངས་པར་སྤྱོད་པའི་གན་དུ་སོང་བ་མ་གཏོགས་ཀྱི་ཆེད་ཀར་ལྟར་སོང་བ་ལས་ལྟུང་སྟེ་ཡན་ལག་གཅིག །ལྟག་མ་སྨྱེན་གནས་ཀྱི་ཡན་ལག་ཀུན་ཀྱང་འདིར་གཏོགས་ཏེ་ཡན་ལག་འདི་

ཀུན་དང་ལྡན་ན་གབ་པའི་ལྟུང་བའོ། །མཐོང་བ་མ་མཐོང་ན་ཉེས་བྱས་པའོ། །ཉལ་པོ་བྱེད་པ་ལ་འཇབ་ཅིང་ལྟ་བ་མིག་གིས་ཀྱང་མ་མཐོང་སྒྲ་ཡང་མ་ཐོས་པར་ཉན་པ་ནི་ཉེས་བྱས་སུ་འགྱུར་རོ། །གནས་གཞན་ནས་རྟོག་ནའོ། །རྒྱང་རིང་པོ་ཞིག་ནས་བཞབས་ཏེ་ལྟ་ཞིང་ཉན་ནའང་

ཉེས་བྱས་སུ་འགྱུར་ཏེ་འོག་ནས་འཆད། ལྟ་བའི་སྤྱོད་ཡུལ་ནི་གནས་ཀྱི་མཐའོ། །མི་ཚངས་པར་སྤྱོད་པ་དང་བར་དུ་རྩིག་པས་ཆོད་དམ་རྩིག་པས་མ་ཆོད་ཀྱང་བར་རྒྱང་རིང་པོ་ན་མི་ཚངས་པར་སྤྱོད་པ་མིག་གིས་མཐོང་བ་དང་སྒྲ་ཐོས་པ་ཙམ་ན་ཉན་ཅིང་བལྟ་ན་ཉེས་བྱས། མཛོད་

ཀྱང་ནང་དུ་ཆུད་དོ། །མཛོད་ཀྱི་ནང་ན་མི་ཚངས་པར་སྤྱོད་པ་ལ་ཉལ་ཁང་ངམ་བཀད་ས་ནས་ཉན་ཅིང་བལྟས་ན་ཡང་ལྟུང་བའོ། །གྲོང་བར་ནི་ཐ་དད་པའོ། །ཁྱིམ་ཁྱེར་གཅིག་གི་ནང་ན་མི་མང་པོ་ཞིག་མི་ཚངས་པར་སྤྱོད་པ་ནོར་དང་ལྟ་བ་བྱེ་བ་ཞིག་ན་མི་ཚངས་པར་དུ་སྤྱོད་པ་བཞིན་དུ་

ལྟུང་བ་རེ་རེར་འགྱུར་རོ། །སྨྱེན་གནས་སུ་འདུག་པའོ། །གབ་པའི་ལྟུང་བ་རྫོགས་སོ།། །།གཅེར་བུའི་ལྟུང་བ་ལ་འཆད་དེ། བུད་མེད་དམ་སྐྱེས་པ་ལས་སོ། །མུར་འདུག་གཅེར་བུ་ཕོ་ཡང་རུང་མོ་ཡང་རུང་ཟན་བྱིན་པ་ལས་ལྟུང་བར་འགྱུར་ཏེ་ཡན་ལག་གཅིག །མ་གཏོགས་

པ་ན་གཉེན་དང་རབ་ཏུ་འབྱུང་བར་འདོད་པ་དང་ནད་པའོ། །བདག་གི་གཉེན་མུར་འདུག་གཅེར་བུར་འདུག་པ་དང་མུར་འདུག་གཅེར་བུ་ལས་ཁོའི་ཆས་བོར་ཏེ་རབ་ཏུ་འབྱུང་བར་འོངས་པ་དང་མུར་འདུག་གཅེར་བུ་ནད་པ་དང་འདི་རྣམས་ལ་ཟས་བྱིན་པ་ནི་མི་ལྟུང་གི་འདི་རྣམས་མ་ཡིན་

པ་ལས་ལྟུང་སྟེ་ཡན་ལག་གཅིག །འདིའི་ཚུལ་དུ་མ་ཡིན་པ་རབ་ཏུ་འབྱུང་བ་གོས་མེད་པ་ལས་སོ། །སངས་རྒྱས་ཀྱི་ཆོས་ལ་རབ་ཏུ་འབྱུང་བ་མ་ཡིན་པ་མུར་འདུག་པའི་ཆོས་ལ་རབ་ཏུ་འབྱུང་བའི་གཅེར་བུ་གོས་མེད་པ་ལ་བྱིན་པ་ལས་ལྟུང་སྟེ་ཡན་ལག་གཅིག །ལུས་སམ་ལུས་

Vol. 165 · folio 158b

ཀྱིར་གཏོགས་པའོ། །བདག་གི་ལུས་ཀྱི་ཡན་ལག་ལག་པས་བྱིན་ཀྱང་རུང་ལུས་ལ་གཏོགས་པ་གཟར་བུའམ་སྣོད་སྤྱད་ཀྱིས་བྱིན་ཀྱང་རུང་བ་ལས་ལྟུང་སྟེ་ཡན་ལག་གཅིག །བཟའ་བ་དང་བཅའ་བ་ལས་སོ། །བཟའ་བ་དང་བཅའ་བ་བྱིན་པ་ལས་ལྟུང་བར་འགྱུར་ཏེ་ཡན་ལག་

གཅིག །བརྟག་པ་ལས་སོ། །དགེ་སློང་གི་ཁ་ཟས་སུ་བརྟག་པ་སྒོག་པའམ་ཆང་ལ་སོགས་པ་མ་ཡིན་པ་བྱིན་པ་ལས་ལྟུང་སྟེ་ཡན་ལག་གཅིག །བདག་དང་དེ་ལ་ཡང་ངོ་། །དགེ་སློང་ཡང་བཟར་རུང་བ་ལས་ལྟུང་སྟེ་མུར་འདུག་ཀྱང་བཟར་རུང་བ་ལས་ལྟུང་སྟེ་ཡན་ལག་

གཅིག །གཅིག་བཟར་རུང་གཅིག་བཟར་མི་རུང་བ་བྱིན་པ་ཡང་ལྟུང་། གཉིས་ཀ་བཟར་མི་རུང་བ་བྱིན་པ་ནི་ཉེས་བྱས་སོ། །སྡིག་པར་བལྟས་པ་བཟློག་པའི་ཕྱིར་བྱིན་པ་མ་གཏོགས། དེར་རིག་གིས་ཆོས་ལས་བཟློག་སྟེ་སངས་རྒྱས་ཀྱི་ཆོས་ལ་དབྱུང་བར་བྱ་བའི་ཕྱིར་ཟན་བྱིན་

པ་ནི་ཉེས་མེད་དོ། །བདག་གིས་བྱིན་ནའོ། །བདག་ཉིད་ཀྱི་ལག་ནས་བྱིན་པ་ལས་ལྟུང་སྟེ་ཡན་ལག་གཅིག །མ་བརྟགས་པ་ནི་ཉེས་བྱས་པའོ། །མུར་འདུག་དང་དགེ་སློང་གཉིས་ཀ་བཟར་མི་རུང་བ་མ་བརྟགས་པའི་ཟས་ཤིག་བྱིན་པ་ནི་ཉེས་བྱས། སྦྱིན་དུ་བཅུག་ན་ཡང་ངོ་། །

གཞན་ཞིག་ལ་བསྐུར་ཏེ་མུར་འདུག་ལ་སྦྱིན་དུ་བཅུག་པའང་ཉེས་བྱས། བགོས་ན་ཡང་ངོ་། །བདག་ཅག་ཟན་ཟ་བའི་དྲུང་ན་མུར་འདུག་ཟན་འདོད་པའི་ཕྱིར་འཁོད་དེ་ཁྲེལ་བལྟས་ཀྱི་ཕྱིར་བདག་གི་ཟན་ལ་བཅད་དེ་བྱིན་ནའང་ཉེས་བྱས། གོས་མེད་པ་ལ་སྦྱིན་པའོ། །གཅེར་

བུ་ལ་ཟས་བྱིན་པའི་ལྟུང་བ་རྫོགས་སོ།། །།གཡུལ་གྱི་ལྟུང་བ་ལ་འཆད་དེ། དམག་འདོད་ཅིང་། དམག་འདོད་པ་ལས་ལྟུང་བར་འགྱུར་ཏེ་ཡན་ལག་གཅིག །གཡུལ་བལྟ་བའི་ཕྱིར་རོ། །དམག་འདོད་པའི་ཕྱིར་གཡུལ་བལྟར་འདོད་དེ་ལྟར་སོང་བ་ལས་ལྟུང་སྟེ་ཡན་

ལག་གཅིག །མ་གཏོགས་པ་ནི་རྒྱལ་པོ་དང་རྒྱལ་མོ་དང་གཞོན་ནུ་དང་བློན་པོ་དང་ཞང་བློན་དང་སྟོབས་ཀྱི་མཆོག་དང་གྲོང་འདབ་དང་སྐྱེ་དགུས་སྨྲས་པ་དང་བར་ཆད་བྱུང་བའི་དབང་གིས་ནའོ། །ལྟུང་བར་མི་འགྱུར་བ་མིང་གིས་སྨོས་པ་འདི་རྣམས་ཀྱིས་མི་འགྲོར་མི་རུང་སྟེ་སང་

Vol. 165 · folio 159a

བ་ནི་ཉེས་མེད་དེ་འདི་རྣམས་ཀྱི་རྐྱེན་མེད་པར་ལྟར་སོང་བ་ལས་ལྟུང་བར་འགྱུར་ཏེ་ཡན་ལག་གཅིག །ཞུགས་པ་ལས་སོ། །གཡུལ་ལྟར་འགྲོ་བའི་ཕྱིར་ཆེད་དུ་སོང་བ་ལས་ལྟུང་སྟེ་ཡན་ལག་གཅིག །མཚམས་ཀྱི་མཐའ་འངས་ཏེ་མཐོང་ནའོ། །བལྟར་

འགྲོ་བའི་ཕྱིར་བདག་གི་གནས་ལས་ཀྱང་འཕགས་གཡུལ་ཡང་མཐོང་བ་ལས་ལྟུང་སྟེ་ཡན་ལག་གཅིག །ཡན་ལག་འདི་རྣམས་དང་ལྡན་ན་གཡུལ་ལྟ་བའི་ལྟུང་བར་འགྱུར། གཡུལ་ལྟ་བའོ། །གཡུལ་ལྟ་བའི་ལྟུང་བ་རྫོགས་སོ།། །།ཞག་གཉིས་ཀྱི་ལྟུང་བ་ལ་

འཆད་དེ། དེ་དག་མེད་པར་དེར་ཉིན་མཚན་གཉིས་རངས་པས་ལྷག་པར་གནས་པའོ། །རྐྱེན་གོང་ནས་སྨོས་པ་རྣམས་ལྟ་བུ་ཞིག་གིས་བཀུག་སྟེ་གཡུལ་གྱི་ཁྲོད་དུ་འོངས་ནས་རྐྱེན་དེ་རྣམས་ཀྱིས་མ་བཏང་བ་ནི་མ་གཏོགས་ཏེ་རྐྱེན་དེ་རྣམས་མ་གཏོགས་ཤིང་མེད་པར་

གཡུལ་ལྟ་བའི་ཕྱིར་ཞག་གཉིས་ལས་རིང་དུ་འདུག་སྟེ་ཞག་གསུམ་གྱི་སྐྱ་རེངས་བྱུང་ན་ལྟུང་བའོ། །དེ་ཕྱིན་ཆད་ཞག་རེ་ལྟུང་བ་རེ་རེར་འགྱུར་རོ། །མཚན་མ་མེད་ན་སྔ་མ་ཡང་ངོ་། །ལྟག་མ་གཡུལ་ལྟ་བའི་ལྟུང་བ་ཡང་རྐྱེན་མིང་གིས་སྨོས་པ་རྣམས་ཀྱིས་མ་བཀུག་པར་

ཞག་ལོན་ན་ལྟུང་བར་འགྱུར་རོ། །གཡུལ་དུ་གནས་པའོ། །ཞག་གཉིས་ཀྱི་ལྟུང་བ་རྫོགས་སོ།། །།ཤོམ་པ་ལ་འཆད་དེ། དམིག་ཡན་ལག་ལ་བྱེད་དོ། །རྟ་དང་མི་དང་བལ་གླང་དང་ཤིང་རྟའི་དམག་རྣམ་བཞི་ལས་ལྟུང་བར་འགྱུར་ཏེ་ཡན་ལག་གཅིག །བར་ཆད་

ཀྱི་དབང་མ་ཡིན་པས་སོང་བའོ། །བདག་ལ་འཇིགས་པའི་རྐྱེན་མ་བྱུང་བ་དང་ལྟག་ནས་རྒྱལ་པོ་ལ་སོགས་པས་བོས་པའི་རྐྱེན་མེད་པར་སོང་བ་ལས་ལྟུང་བར་འགྱུར་ཏེ་ཡན་ལག་གཅིག །འདུས་པའམ་བྲལ་བ་ཡང་ངོ་། །དམག་རྣམས་བཞི་ཀུན་འདུས་པའང་རུང་བཞི་ལས་

གག་ཀྱང་རུང་སྣ་གཅིག་གིས་རྒོལ་བར་ཤོམ་པ་ལ་བལྟས་ནའང་ལྟུང་བར་འགྱུར་རོ། །བཤམས་པ་ལས་སོ། །དམག་རྒོལ་བར་གོ་ཆ་དང་རྒྱན་དང་མཚོན་ཆ་ལ་སོགས་པ་ཐོགས་ཏེ་བཤམས་པའི་ནང་དུ་ཞུགས་པ་ལས་ལྟུང་བར་འགྱུར་ཏེ་ཡན་ལག་གཅིག །རྩ་བས་ན་རྩ་བའོ། །

Vol. 165 · folio 159b

དམག་རྒོལ་བར་བཤམས་ཟིན་ནས་འཐབ་མོ་འགྱེད་པ་ལ་བལྟས་ན་ལྟུང་། སྦྱོར་བ་ནི་ཉེས་བྱས་པའོ། །དམག་ལྟ་བར་འགྲོ་བར་སེམས་ཤིང་སྦྱོར་བ་ནི་ཉེས་བྱས་སོ། །མ་བཤམས་པ་དང་གཉིས་ཀ་ཡང་ཉེས་བྱས་པའོ། །དམག་རྒོལ་དུ་འདོང་བར་དམག་མི་གཞི་ནས་ཆས་

ཏེ་འདོང་བ་ལ་བལྟས་ནའང་ཉེས་བྱས། གཞི་ནས་ནི་འཕགས་ཟིན་གྱི་ཁྲོམ་གྱི་གཞིར་ཚོགས་བྱེད་ཅིང་ཕོག་པ་ལ་བལྟས་ནའང་ཉེས་བྱས་རེག་བཤམས་ལྟ་བའི་ཕྱིར་ཞུགས་མཚམས་ཀྱི་མཐའ་འདས་མཐོང་ན་རྩ་བའོ། །དམག་རྒོལ་ཞིང་འཐབ་པ་ལས་མ་བལྟས་སུ་ཟིན་ཀྱང་

དམག་མི་རྒལ་བར་བཤམས་ཤིང་ཆས་ཏེ་འདོད་པ་ལ་ཕྱུགས་ལ་ཀུ་རེ་བྱེད་ཅིང་ཀླན་ཀ་བཙལ་བའི་ཕྱིར་རེག་པས་ཀྱང་ལྟུང་། གཡུལ་སྤྲད་དེ་འཐབ་པ་ལ་བདག་གི་གནས་ནས་མཐོང་བར་བལྟས་པས་ཀྱང་ལྟུང་ངོ་། །མ་ཞུགས་པར་ན་འབྲི་བའོ། །དམག་མི་འཐབ་ཏུ་འདོང་སྟེ་གོ་

ཆ་དང་མཚོན་ཆ་ལ་སོགས་པ་ཐོགས་ཤིང་མ་བཤམས་པ་ཞིག་མ་བལྟས་ན་ཉེས་བྱས། བལ་གླང་དང་རྟ་དང་བྱ་གག་དང་འུར་པ་དང་ཐི་བ་དང་བུད་མེད་སྐྱེས་པ་འཐབ་པ་ལ་སོགས་པ་མི་བྱ་བ་བྱེད་དུ་མི་གཞུག་མི་བལྟ། མིང་གིས་སྨོས་པ་འདི་རྣམས་བདག་གིས་འཐབ་ཏུ་བཅུག་

སྟེ་བལྟས་ཀྱང་རུང་གཞན་ལ་འཐབ་ཏུ་བཅུག་སྟེ་བལྟས་ཀྱང་རུང་སྟེ་ཉེས་བྱས། །འདི་རྣམས་མ་གཏོགས་པར་གཞན་འཐབ་པ་ལ་བལྟས་ནའང་ཉེས་བྱས། དམག་གི་ཡན་ལག་མྱོང་བའོ། །དམག་ཤོམ་པ་ལ་བལྟས་པའི་ལྟུང་བ་རྫོགས་སོ།། །།འཚོག་པའི་ལྟུང་བ་ལ་འཆད་

དེ། སེམས་འཁྲུགས་པས་སོ། །སེམས་འཁྲུགས་ཤིང་ཁྲོས་ནས་བརྡེགས་པ་ལས་ལྟུང་སྟེ་ཡན་ལག་གཅིག །ལུས་དང་ལུས་ཉིད་ཀྱིས་བརྡེགས་ཀྱང་ལྟུང་། དེ་ལས་བཏང་བ་དང་། ལུས་ཀྱིས་རྡོ་དབྱིག་ལ་སོགས་པ་འཕངས་ཏེ་བཏང་ནའང་ལྟུང་། གཏོགས་པ་ལུས་ལ་

ལག་ཆ་ཐོགས་པས་བརྡེགས་ཀྱང་ལྟུང་། གང་སུ་ལ་ཡང་ཆུང་ངུ་ན་རྐང་པའི་མཐེ་བོས་སམ། ལུས་ཉིད་ཀྱིས་བརྡེགས་པ་ནི་རྐང་པའི་མཐེ་པོའམ། མཛུབ་མོའི་བེམ་ཏོལ་ཙམ་ཡན་ཆད་ཀྱིས་བརྡེག་པ་ཡང་ལྟུང་ངོ་། །ཡུངས་ཀར་རམ། ལུས་ཀྱིས་འཕངས་ཏེ་བཙོག་

Vol. 165 · folio 160a

པ་ནི་ཡུངས་ཀྱི་འབྲུམ་བུ་ཙམ་ཡན་ཆད་ཀྱིས་བརྡེག་པ་ཡང་ལྟུང་ངོ་། །འཇག་མ་དག་གིས་བརྡེགས་པའོ། །ལུས་ལ་གཏོགས་པའི་ལག་ཆས་བརྡེགས་པ་ནི་རྩྭའམ་ཕྱགས་མས་བརྡེགས་པ་ཙམ་གྱིས་ཀྱང་ལྟུང་ངོ་། །འདི་རྣམས་གང་གིས་བརྡེགས་

ཀྱང་རུང་ལྟུང་བར་འགྱུར་ཏེ་ཡན་ལག་གཅིག །དགེ་སློང་ནའོ། །དགེ་སློང་བརྡེགས་པ་ལས་ལྟུང་བར་འགྱུར་ཏེ་ཡན་ལག་གཅིག །ཕ་རོལ་ལའོ། །དགེ་སློང་ཕ་རོལ་པོ་བརྡེགས་པ་པར་འགྱུར་ཏེ་ཡན་ལག་གཅིག །འོག་མ་གསུམ་ཡང་ངོ་། །གཟའ་དང་ཉེས་སྨོས་དང་

བདེ་བའི་ལྟུང་བ་གསུམ་ཡང་ཕ་རོལ་དགེ་སློང་ཡིན་པ་ལས་ལྟུང་བར་འགྱུར་རོ། །རེག་ནའོ། །བརྡེགས་པ་ཕ་རོལ་ལ་ཕོག་ཅིང་རེག་པ་ལས་ལྟུང་བར་འགྱུར་ཏེ་ཡན་ལག་གཅིག་སྟེ་ཡན་ལག་འདི་རྣམས་དང་ལྡན་ན་ལྟུང་བའོ། །བསྣུན་པ་སོ་སོར་རོ། །བརྡེགས་པ་ནི་སོར་མོ་

དང་འབྲུམ་བུ་དང་རྩ་ཉག་མ་རེ་རེ་ལ་ལྟུང་བ་རེ་རེར་འགྱུར་རོ། །ཁུ་ཚུར་གྱིས་བརྡེགས་པ་ནི་ལྟུང་བ་གཅིག །མ་ཕོག་ན་ཉེས་བྱས། བརྡེག་པའི་ཕྱིར་བསྣུན་ཅིང་འཕངས་པ་ལས་མ་ཕོག་པ་ནི་ཉེས་བྱས་ཏེ་འབྲུ་རེ་ཉེས་བྱས་རེ་རེ། གཞན་དུ་བསྣུན་ན་གཞན་དུ་མ་བསྣུན་ཀྱང་ངོ་། །

བདག་འདོད་ཆགས་ལངས་ཏེ་ཕོ་མཚན་བརྡུངས་སམ་བཅད་པ་ནི་ཉེས་བྱས། དགེ་སློང་ཅིག་འདོད་ཆགས་ལངས་ཏེ་ཕོ་མཚན་བརྡུངས་པ་ལས་འདོད་ཆགས་ཀྱི་སེམས་བརྡུངས་ཤིག་ཕོ་མཚན་བརྡུངས་ཀྱང་མི་ཕན་ནོ་ཞེས་སྤྱོས་ནས་ཕྱིན་ཆད་བརྡུངས་ན་ཉེས་བྱས་ཞེས་བཅས། །

ཀ་བ་ལ་བསྣུན་པར་མི་སྦྱིན། ཀ་བ་ལ་ཐལ་མོས་བསྣུན་ན་སོར་མོ་རེ་རེ་ཉེས་བྱས་རེ་རེར་འགྱུར། དྲུག་སྡེས་ཀ་བ་ལ་ཐལ་མོ་བརྡབས་ཏེ་ཀ་བ་འགུལ་བ་ལས་བཅས། རྩིག་པ་དང་ས་དང་ཤིང་དང་གཞན་ལ་ཡང་མ་ཡིན་ནོ། །ཀ་བ་ལ་ཐལ་མོས་བསྣུན་ན་ཉེས་བྱས་སུ་འགྱུར་

བ་བཞིན་དུ་རྡོ་ཤིང་ཅི་ལ་བསྣུན་ཀྱང་ཉེས་བྱས་སུ་འགྱུར་ཏེ་ཁྲོ་སེམས་དང་ཡོངས་པ་དང་རྩེད་མོའི་ཕྱིར་བསྣུན་པ་ནི་ཉེས་བྱས་དགོས་ཤིང་དོན་གྱི་ཕྱིར་བརྡབས་པ་ནི་ཉེས་མེད། བསྣུན་པའོ། །འཚོག་པའི་ལྟུང་བ་རྫོགས་སོ།། །།གཟས་པའི་ལྟུང་བ་ལ་འཆད། བསྣུན་

Vol. 165 · folio 160b

པ་གཟས་པ། བསྣུན་པ་ལྟར་བསྡིགས་པའི་ཕྱིར་བཙོག་པར་གཟས་པ་ནི་ལྟུང་བ་སྟེ་ཡན་ལག་དང་བཤད་པ་ཐམས་ཅད་ལྟག་མ་འཚོག་པའི་ལྟུང་བ་དང་འདྲའོ། །རྫས་སོ་སོར་རོ། །གཟས་ན་སོར་མོ་དང་འབྲུ་དང་རྩ་ཉག་མ་རེ་རེ་ལྟུང་བ་རེ་རེར་འགྱུར་རོ། །གཟས་པའོ། །

གཟས་པའི་ལྟུང་བ་རྫོགས་སོ།། །།ཉེས་སྨོས་ལ་འཆད་དེ། ཕས་ཕམ་པ་དང་དགེ་འདུན་གྱི་ལྷག་མའོ། །ཕས་ཕམ་པ་དང་དགེ་འདུན་གྱི་ལྷག་མ་བཅབས་པ་ལས་ལྟུང་བར་འགྱུར་ཏེ་ཡན་ལག་གཅིག །མ་གཏོགས་པ་ནི་མི་བདེ་བ་དང་དགེ་སྦྱོང་དང་ཚངས་པར་སྤྱོད་པའི་

བར་ཆད་དང་དགེ་འདུན་འཁྲུགས་པར་དོགས་པའི་དབང་དུ་གཏོགས་པའོ། །ལྟུང་བར་མི་འགྱུར་བ་ནི་ཕས་ཕམ་པ་དང་། དགེ་འདུན་གྱི་ལྷག་མ་བྱུང་བ་མཐོལ་ན་བདག་ལ་མི་བདེ་ཞིང་གནོད་པར་འགྱུར་བ་དང་། དགེ་སྦྱོང་དང་དགེ་སློང་གྲོགས་ལ་དགེ་བ་སྤྱོད་པའི་བར་ཆད་དུ་

འགྱུར་ཞིང་མི་བདེ་བ་དང་དགེ་འདུན་འཁྲུགས་པར་འགྱུར་དུ་དོགས་པར་འདི་རྣམས་ཀྱི་རྐྱེན་ལྟ་བུ་ཞིག་གི་ཕྱིར་མ་མཐོལ་ཅིང་བཅབས་པ་ནི་ཉེས་མེད་དེ་རྐྱེན་འདི་རྣམས་མེད་པ་ལས་ལྟུང་སྟེ་ཡན་ལག་གཅིག །སྦས་པའོ། །ཉེས་པ་དེ་ཤེས་བཞིན་དུ་བཅབས་པ་ལས་ལྟུང་བར་འགྱུར་ཏེ་

ཡན་ལག་གཅིག །ཞག་གི་མཐར་ནའོ། །ཞག་གཅིག་གི་སྐྱ་རེངས་བྱུང་བ་ལས་ལྟུང་བར་གྱུར་ཏེ་ཡན་ལག་གཅིག །ཡན་ལག་འདི་རྣམས་དང་ལྡན་ན་ལྟུང་བར་འགྱུར་ཏེ། སྔར་ནི་ཉེས་བྱས་པའོ། །བཅབས་པར་བསམས་ན་སྐྱ་རེངས་མ་བྱུང་གི་བར་དུ་ཉེས་བྱས། ཉེས་པ་

གཞན་ཡང་ངོ་། །ལྟུང་བ་དང་ཉེས་བྱས་ལ་སོགས་པ་གཞན་ལ་ཡོད་ཅིང་བྱུང་བ་ཤེས་ཏེ་བཅབས་ན་ཉེས་བྱས། ཁ་ན་མ་ཐོ་བ་སྦེད་པའོ། །དགེ་སློང་གི་ཉེས་པ་བཅབས་པའི་ལྟུང་བ་རྫོགས་སོ།། །།ལྟུང་བའི་བཅུ་སྟེ་གཅིག་འདས་སོ། །བདེ་བའི་ལྟུང་བ་ལ་འཆད་དེ། ནད་

ཀྱི་གསོས་ཀྱི་ཕྱིར་ནི་མ་གཏོགས་ཏེ། དགེ་སློང་ན་བ་ལ་ཕན་པའི་ཕྱིར་ཟན་བཅད་པ་དང་། སྨན་བྱ་བའི་ཕྱིར་ཟན་མ་བྱིན་པ་ནི་ཉེས་མེད་དོ། །བསམས་ནས་ཁྱིམ་པའི་སྦྱིན་བདག་གི་ཟས་གཅོད་པར་བྱེད་པའོ། །དགེ་སློང་ལ་ཆེད་ཀར་ཟན་གཅད་པར་བསམས་ནས་ཁྱིམ་པའི་

Vol. 165 · folio 161a

གནས་སུ་དགེ་སློང་ལ་ཟན་མ་བྱིན་ཞིང་བཅད་ན་ལྟུང་བའོ། །ནན་ད་དང་ཨུ་པ་ནན་དས་སློབ་མ་དར་མ་ལ་ཟས་བཅད་པ་ལས་བཅས། ཟས་གཅོད་པར་བྱེད་པའོ། །ཟན་གཅོད་པའི་ལྟུང་བ་རྫོགས་སོ།། །།མེའི་ལྟུང་བ་ལ་འཆད་དེ། སེང་གེ་ལ་མི་རེག །

སེང་གེ་ལ་རེག་པར་མི་བྱ། སེང་གེ་ལ་རེག་ན་ཁྲོས་ཏེ་རེག་ཏུ་མི་བཟོད་ཅིང་། གནོད་པར་བྱེད་པ་དེ་བཞིན་དུ་མེ་ལ་རེག་ཏུ་མི་རུང་བའི་དཔེར་སྨོས་སོ། །སྟོན་པ་དང་ཆོས་དང་དགེ་འདུན་དང་ཚངས་པ་མཚུངས་པར་སྤྱོད་པ་མེ་ལ་རེག་ཀྱང་ཉེས་པར་མི་འགྱུར་བ་ནི་སངས་རྒྱས་དང་

ཆོས་དང་དགེ་འདུན་དང་དགེ་སློང་གྲོགས་ཀྱི་ཕྱིར་མཆོད་ཅིང་བསྲོ་བར་བསམས་ཏེ་རེག་པ་དང་བུས་པ་ནི་ཉེས་མེད་དོ། །ཆོས་ཀྱི་བྱ་བའི་ཕྱིར་བྱ་བར་བརྟགས་ཏེ་ལྷུང་བཟེད་བཙོ་བའི་ལས་ལ་དུས་བསྔོ། །ཆོས་ཀྱི་ཕྱིར་བདག་གི་ལུས་ཀྱི་ཡོ་བྱད་དུ་ཆོས་གོས་དང་ལྷུང་བཟེད་

ལ་སོགས་པ་བཙོ་བར་ས་མ་ཡམ་བསྔོས་ཏེ་མེ་ལ་རེག་པ་ནི་ཉེས་མེད་དོ། །རིང་དུ་བསྔོ། །ལྷུང་བཟེད་དང་ཆོས་གོས་བཙོ་བའི་བསམས་པས་ས་མ་ཡམ་གྱི་དུས་བསྔོ་བ་ནི་ཐོག་མ་རེག་པ་ན་ཟིན་གྱི་བར་དུ་གཟུང་ངོ་སྙམ་དུ་བསམ། རྩེད་མོ་མེ་ལ་རྩེ་བའི་ཕྱིར་བཟུང་ནའང་ལྟུང་བར་

འགྱུར་ཏེ་འོག་ནས་འཆད། མགལ་བ་བསྐོར་བ་དང་ཟླ་བ་དང་ཉི་མ་ལྟར་མགལ་བའི་འཁོར་ལོ་ལ་སོགས་པ་བྱེད་དོ། །མིང་གིས་སྨོས་པ་འདི་རྣམས་ཀྱི་གཟུགས་འདྲ་བར་མགལ་བ་ལ་རྩེས་ཤིང་བསྐོར་ན་ལྟུང་བར་འགྱུར། འདི་རྣམས་ཀྱི་གཟུགས་མ་ཡིན་ཡང་མེ་ལ་གཞན་

ཇི་ལྟར་རྩེས་ཀྱང་ལྟུང་བའོ། །མེས་སོ། །མེ་ལ་རེག་པ་ལས་ལྟུང་བར་འགྱུར་ཏེ་ཡན་ལག་གཅིག །ས་མ་ཡམ་མ་བསྔོས་ནའོ། །མེ་ལ་བཟུང་བའི་ཚེ། ས་མ་ཡམ་མ་བསྔོས་པ་ལས་ལྟུང་བར་འགྱུར་ཏེ་ཡན་ལག་གཅིག །རྩེ་བ་དང་དོན་མེད་པའི་ཕྱིར་གཟུང་བ་ནི་ས་མ་ཡམ་བསྔོས་

ཀྱང་མི་ཆུད་དོ། །མི་ན་བའི་དབང་གིས་མ་འདུག་པར་རེག་པའོ། །བདག་མི་ན་བར་མེ་ལ་རེག་པ་ལས་ལྟུང་བར་འགྱུར་ཏེ་ཡན་ལག་གཅིག་བདག་གིས་མ་བསྐོས་ནའོ། །བདག་གིས་བཟུང་ངམ་གཞན་འཛིན་དུ་བཅུག་པ་ལས་ལྟུང་བར་འགྱུར་ཏེ་ཡན་ལག་གཅིག །ཡན་ལག་

Vol. 165 · folio 161b

འདི་རྣམས་དང་ལྡན་པར་བྱས་ན་ལྟུང་བར་འགྱུར་རོ། །སྤར་བ་དང་མེ་ཆེར་བུད་པའི་ཕྱིར་རེག་པ་དང་། གཞིལ་བ་དང་མེ་ཆུང་བར་བྱ་བའི་ཕྱིར་རེག་པ་དང་། ཤིང་ལ་རེག་པ་དང་། མགལ་བ་ལ་རེག་པ་དང་། མ་རེག་པར་བུས་ཀྱང་རུང་། མགལ་བ་མ་ཡིན་པའི་ཤིང་

མེས་མ་རེག་པར་མེར་བཅུག་པ་དང་། འཇུག་པ་དང་ཤིང་མེར་འཇུག་པ་དང་། འབྱིན་པར་བསྐོ་བ། མགལ་བ་ཕྱིར་འབྱིན་པ་དང་། མདག་མ་སྤྱུར་བ་དང་འབྲུ་བའོ། །མདག་མ་སྤྱུར་ཞིང་སྤུངས་པ་དང་། མདག་མ་འབྲུ་བ་དང་། འདི་རྣམས་གག་ཀྱང་རུང་བྱས་ན་ལྟུང་བར་

འགྱུར། མེ་མ་མུར་ནི་ཕྱེད་དོ། །ཐལ་བ་མེ་མ་མུར་ཅན་ལ་རེག་པ་ནི་ཉེས་བྱས་སོ། །འབར་བ་ཡང་ངོ་། །མེ་ལྕེ་ལ་རེག་པ་ཡང་ཉེས་བྱས། དེར་ཤིང་གིས་བཅུག་སྟེ་ཕྱུང་ན་མེ་གཞན་དུ་ཆུད་དོ། །མེ་ལྕེ་དང་མེ་མར་མུར་ཅན་ལ་ཤིང་བཅུག་སྟེ་མེར་མཆེད་པ་ལ་རེག་ན་ནི་ལྟུང་

བའོ་ཞེས་ཊཱི་ཀ་ལས་བཤད། མཁན་པོ་ཁ་ཅིག་ན་རེ་ཉེས་བྱས་ཞེས་བཤད། སྐྲ་དང་སྤུ་དང་རུས་པ་དང་སེན་མོ་དང་མཆིལ་མ་དང་སྣབས་དང་སྐྱུགས་པ་དང་ཚད་པ་དང་བལ་སྲན་དང་རྒྱ་སྲན་དང་ཤིང་མར་དང་། ཡུངས་མར་དང་སྦྲང་རྩི་དང་མར་རྣམས་ནི་ཤིང་ཕྱེད་བཞིན་ནོ། །

མང་གིས་སྨོས་པ་འདི་རྣམས་མེར་བསྲེགས་པ་ནི་ཉེས་བྱས་སོ། །གཞན་ལ་བྱེད་ཅིང་གཞན་བསྔོས་པ་བསྔོས་པ་ཕྱེད་དོ། །སངས་རྒྱས་གྲོགས་ཀྱི་ཕྱིར་བསྔོས་ཏེ་བུས་པ་ལས་གཞན་གྱི་ཕྱིར་སྤྱད་དམ་གྲོགས་ལྟ་བུའི་ཕྱིར་བུད་པ་ལ་ས་མ་ཡམ་གྱི་འདུ་ཤེས་གཞན་གྱི་ཕྱིར་བསྔོས་པ་

ནི་ཉེས་བྱས། མེའི་ཁྲིམས་སོ། །མེ་ལ་རེག་པའི་ལྟུང་བ་རྫོགས་སོ།། །།དད་པའི་ལྟུང་བ་ལ་འཆད་དེ། དགེ་སློང་གི་ཕྱིར་ལས་འདས་པ་དད་པ་བྱིན་ཏེ་སླར་ལེན་པའི་ཕྱིར་ངག་གིས་སོ། །དགེ་སློང་གི་དགེ་འདུན་གྱི་ལས་ཅི་བྱེད་ཀྱང་རུང་སྔར་དད་པ་ཕུལ་ལ་ཕྱིས་དད་པ་མི་འབུལ་ལོ་

ཞེས་སྨྲས་ཤིང་བཟློག་པ་ནི་ལྟུང་བའོ། །དད་པ་སླར་ལན་པའོ། །དད་པའི་ལྟུང་བ་རྫོགས་སོ།། །།རབ་ཏུ་མ་རྫོགས་པའི་ལྟུང་བ་ལ་འཆད་དེ། །ཉི་མ་དང་ཟླ་བ་མ་ཡིན་པའི་སྣང་བ་ཅན་གྱི་གནས་ཀྱི་ཕྱོགས་སུ་མི་ཉལ། ཉི་མ་དང་ཟླ་བའི་འོད་ལ་ཉལ་བ་ནི་ཉེས་མེད་དེ་མེ་དང་མེ་མར་

Vol. 165 · folio 162a

དང་རིན་པོ་ཆེ་དང་སྨན་གྱི་འོད་ལ་ཉལ་ན་ཉེས་བྱས། མ་གཏོགས་པ་ནི་ནད་པ་དང་ནད་པའི་གཡོག་གི་དབང་གིས་ནའོ། །ལྟུང་བར་མི་འགྱུར་བ་ནི་དགེ་སློང་ནད་པ་མེ་མར་གྱིས་བཙའ་དགོས་པ་དེ་དང་དེའི་ནད་གཡོག་མི་མར་གྱིས་བཙའ་དགོས་པ་དེ་དང་།

འོད་ལ་ཉལ་བ་ནི་ཉེས་མེད་དོ། །འདིར་འགའ་འགའ་ལྟུང་བའོ་ཞེས་སོ། །མེ་མར་གྱི་འོད་ལ་ཉལ་བ་འདུལ་བ་འཛིན་པ་ཁ་ཅིག་ན་རེ་ལྟུང་བའོ་ཞེས་ཀྱང་འཆད་དེ་ལྟུང་བ་དགུ་བཅུ་རྩ་གཅིག་ཏུ་མི་འབྱུང་བས་ལྟུང་བ་མ་ཡིན་གྱི་ཉེས་བྱས་སོ། །ཉལ་བ་མ་ཡིན་ན་ནི་ཕྱེད་དོ། །མེ་མར་

གྱི་འོད་དང་དགེ་སྦྱོང་དང་ལྷན་ཅིག་ཁྱིམ་གཅིག་གི་ནང་ན་ཙོག་པུར་ཐུམ་ཕྲས་སུ་ཉལ་བ་ནི་ལྟུང་བ་དང་ཉེས་བྱས་ཀྱི་ཕྱེད་དུ་འགྱུར་རོ། །སོ་སོར་ཉིན་མོ་ལ་ཡང་ངོ་། །ཉིན་པར་མེ་མར་གྱི་འོད་ལ་ཉལ་བ་དང་མཚན་མོ་འདྲ་སྟེ་ཉེས་བྱས་སོ། །མང་དུ་གཡོགས་པའི་བསྐོར་བ་པའི་ཁྱིམ་

གྱི་མཐའོ། །ཁྱིམ་གཅིག་ཏུ་ཉལ་ན་ལྟུང་བའི་ཁྱིམ་ནི་ཐོག་ཀྱང་གསུམ་གཉིས་པོར་རྩིག་པའང་སུམ་གཉིས་བསྐོར་བའི་ནང་དུ་དགེ་སྦྱོང་དང་ཉལ་ན་ལྟུང་བར་འགྱུར། དེར་ཆུད་པ་བཞིན་པ་ནི་གཏོགས་པའི་སྒོའི་ངོས་ཀྱི་མཚམས་ཀྱང་ཁྱིམ་དུ་གྱུར་པ་ནའོ། །ཁང་པ་གཅིག་གི་

ནང་ན་ཉལ་བ་དང་འདྲ་བར་ཁང་བུ་གཅིག་ཕུག་ན་འདུག་ལ་སྒོ་ན་ཁང་པའམ་ཁྱམས་ཐོག་ཕོར་བ་ཞིག་ཡོད་ན་ཁང་བུ་ཕུག་མའི་ཕ་རོལ་ཚུ་རོལ་གྱི་རྩིག་པ་ཁ་དྲང་དུ་བཅད་ན་ཕུག་པ་ཙམ་གྱི་ས་ཁྱོན་ཚད་ཀྱི་ནང་ཙམ་དུ་བྱས་པའི་ཕྱི་རོལ་གྱི་ཁང་པར་དགེ་སྦྱོང་ཉལ་ན་ཕུག་མར་དགེ་

སློང་ཉལ་ཡང་ལྟུང་བར་འགྱུར། རིབ་མ་ལྟག་མ་ཡང་སྒོ་དེའི་ནང་དུ་ཆུད་དོ། །ཁང་བུ་ཡང་ཐོག་ཅན་དུ་འདུག་ན་སྒོ་འོག་ཁང་གི་ནང་དུ་བྱུང་ལ་གཅིག་ཏུ་དགེ་སྦྱོང་ཉལ་ལ་གཅིག་ཏུ་དགེ་སློང་ཉལ་བ་ནི་ལྟུང་བར་འགྱུར། རིམ་པ་མང་པོ་གཅིག་གི་ནང་དུ་གཅིག་སྒོ་ཕྱུང་བ་ནི་

མི་བརྩིའོ། །མཚམས་དང་བཅས་པའི་གནས་ཙམ་ཕན་ཆད་གནས་ན་དེར་སོ་སོར་འགྱུར་རོ། །ར་མོ་ཆེས་བསྐོར་བའི་ནང་ན་ཉལ་ན་འདོམ་གང་ཕན་ཆད་དུ་དགེ་སྦྱོང་བསྙལ་པ་ནི་ཉེས་བྱས་ཁང་མོ་ཆེ་ཞིག་ནས་བདག་ཉལ་བ་ནས་བདག་གི་གནས་ཁང་གཅིག་ཙམ་གྱི་སས་

Vol. 165 · folio 162b

བར་དུ་བཅད་དེ་དེ་ཕན་ཆད་དགེ་སྦྱོང་བསྙལ་བ་ནི་ཉེས་མེད། ཕྱེད་པ་ནི་ཤིང་གི་རྩ་བ་དང་རྩིག་པའི་སེར་ག་དང་ལྡུམ་རྩ་རྣམས་སོ། །དགེ་སྦྱོང་དང་ལྷན་ཅིག་ཏུ་ཤིང་གི་ལོ་མ་འདབ་ཆགས་སུ་འདྲེས་ཤིང་སྟེང་ཁེབས་པར་འདུག་པའི་འོག་ཏུ་ཉལ་ལམ་ཁང་པའི་རྩིག་པ་གློ་རྡོལ་དུ་

སེང་སོང་པོར་འདུག་སྟེ་ཕན་ཚུན་མི་རྒྱུར་རུང་བ་དང་གད་པའི་སེར་ག་སེང་སོང་པོར་འདུག་པའི་ནང་དུ་ཉལ་ལམ་རྒུན་འབྲུའི་ཤིང་ལྟ་བུ་སྟེང་འཛིངས་པ་དང་ལྡུམ་ཕོང་ཕུང་གི་ཁྲོད་དུ་ཉལ་བ་ནི་ཉེས་བྱས། སྟུག་པོ་དང་བཅས་པར་བུད་མེད་དང་ལྷན་ཅིག་ཉལ་ནའོ། །ནགས་སམ་རྩྭའམ་

ལྡམ་ལྡུམ་ཁྲོད་དུ་བུད་མེད་དང་ཉེ་བར་ཉལ་ན་ཉེས་བྱས་སུ་འགྱུར་ཏེ་ཅི་ཙམ་ཚུན་ཆད་པ་ནི་འོག་ནས་འཆད། དེའི་ལམ་ནི་བྱ་གག་འཕུར་ནས་བབ་པ་ནང་དུ་འགྱུར་རོ། །མདོ་ལྟག་མ་ལྟར་ཉེས་བྱས་སུ་འགྱུར་བའི་ཚེད་ནི་བྱ་གག་འཕུར་ཏེ་བབ་པའི་ལམ་ཚུན་ཆད་གཅིག་ཏུ་

ཉལ་ན་ཉེས་བྱས་ཁང་མོ་ཞིག་དུ་ཉལ་ནའང་བྱ་གག་འཕུར་བའི་ལམ་ཚུན་ཆད་ལྟུང་བའོ། །ཐམས་ཅད་ཀྱི་བར་དུ་རྒྱུར་ཡོད་པ་ཁྱིམ་གཞན་མེད་པར་གཡོགས་ན་གཅིག་གོ། །ཁང་པ་ཕྱི་རྒྱ་གཅིག་ལ་ནང་མིག་སོ་སོར་འདུག་སྟེ་དབུས་ཀྱི་ཁྱམས་དོག་པ་ཞིག་ན་སྒོ་མེད་དམ་

སྒོ་མ་བཅད་པར་ཁང་བུ་ནང་དུ་དགེ་སྦྱོང་ཉལ་ལ་དབུས་སུ་དགེ་སློང་ཉལ་ན་ལྟུང་བའོ། །སོ་སོ་ནི་བདག་གི་སྐལ་བར་གཏོགས་པའི་སྒོ་བཅིང་པས་བཅིངས་ན་མཚམས་ཀྱང་ངོ་། །ཁང་པའི་ཕྱི་རྒྱག་ཅིག་ལ་ནང་ཐ་དད་པར་འདུག་ན་གཅིག་ཏུ་དགེ་སློང་ཉལ་ཏེ་སྒོ་དམ་དུ་བཅད་

ན་གཞན་དུ་དགེ་སྦྱོང་ཉལ་ཀྱང་མི་ལྟུང་། དེ་བཞིན་དུ་དགེ་སློང་གིས་ལྟུང་བ་ལ་བསྲུང་ནའོ། །བུད་མེད་ཀྱང་དགེ་སློང་གཅིག་གིས་རེས་ཀྱིས་བསྲུངས་ལ་གཅིག་ཉལ་ཀྱང་ལྟུང་བར་མི་འགྱུར་རོ། །བདག་པོས་བསྲུངས་པའི་བུད་མེད་ན་ཡང་ངོ་། །བུད་མེད་ཁྱིམ་ཐབ་དང་བཅས་

པར་འདུག་པ་ནི་ཁྱིམ་གཅིག་ན་ཉལ་ཀྱང་ཞག་གཅིག་གིས་ལྟུང་བར་མི་འགྱུར་ཏེ་ཞག་གཉིས་ལས་འདས་ན་ནི་རབ་ཏུ་མ་རྫོགས་པ་དང་ཉལ་བ་ནི་ལྟུང་བར་བརྩི། རིམ་བླ་མར་ན་སྐས་ཕྱུང་ནའོ། །བདག་ཡང་ཐོག་ཏུ་ཉལ་ན་བུད་མེད་དམ་དགེ་སྦྱོང་འོག་ཁང་དུ་བསྙལ་ལ་སྐས་

Vol. 165 · folio 163a

སྟེང་དུ་དྲངས་ཏེ་ཉལ་ཀྱང་ཉེས་མེད་དོ། །འབྲི་བ་ནི་ཁྱིམ་མ་ཡིན་གཞན་དུ་གྱུར་ནའོ། །ཁང་པ་ཐོག་ཕྱེད་བོར་བ་དང་ཕྱེད་བསྐོར་བ་དང་ཁང་བུའི་སྒོའི་ཕྱི་རོལ་ཐོག་མེད་པ་ལ་འདོམ་གང་ཚུན་ཆད་ཐང་ངམ་དབྱེ་ལ་འདོམ་གང་ཚུན་ཆད་དུ་དགེ་སྦྱོང་ཉལ་

ན་ཉེས་བྱས། རབ་ཏུ་མ་རྫོགས་པ་དང་ལྷན་ཅིག་ཏུ་གྲོང་ན་ནུབ་གསུམ་དུ་ཉལ་བའོ། །རབ་ཏུ་མ་རྫོགས་པ་དང་ཁྱིམ་གཅིག་ལ་ནུབ་གཉིས་ལས་འདས་པར་ནུབ་གསུམ་དུ་ཉལ་ན་ལྟུང་བའོ། །འཐས་ནའོ། །ནུབ་གསུམ་གྱི་མཐའ་སྐྱ་རེངས་བྱུང་ན་ལྟུང་བར་འགྱུར་རོ། །

ཕན་ཆད་ནི་ཉེས་བྱས་པའོ། །ཞག་གཉིས་ནས་གསུམ་གྱི་སྐྱ་རེངས་མ་བྱུང་གི་བར་དུ་དགེ་སྦྱོང་དང་ཉལ་ན་ཉེས་བྱས། ཉེས་མེད་པ་ནི་ལམ་ནི་ངལ་ཏེ་མྱོས་པའོ། །ལམ་རིང་པོ་ནས་འོངས་ཏེ་ཆད་པ་ནི་ཞག་གསུམ་གྱི་སྐྱ་རེངས་མ་བྱུང་ཚུན་ཆད་ལྡང་བར་བསམས་ཏེ་ལངས་པ་ནི་

ཉེས་མེད་དེ། དེ་ལྟ་བུའི་མཐར་ཡང་ངོ་། །སཱུ་ཏྲ་ལྟག་མ་ལྟར་ཆད་པའི་དགེ་སློང་སྐྱ་རེངས་མ་བྱུང་ཚུན་ཆད་ལྡང་བར་བྱས་པ་ལས་ཐལ་བྱུང་གཉིད་ལོག་སྟེ་སྐྱ་རེངས་བྱུང་ཡང་ཉེས་མེད་དོ། །མ་བརྟགས་པའི་དགེ་སློང་གིས་བྱ་བ་དེ་སྒྲུབ་པ་དང་ནད་གཡོག་ལྷན་ཅིག་ཏུ་ཡང་ངོ་། །དགེ་སློང་ནད་

པ་ལ་སོགས་པ་རྟོག་ཅིང་བྱིན་ལེན་བྱ་བའི་ཕྱིར་དགེ་སྦྱོང་བཞག་སྟེ་གཞན་དུ་བསྙལ་ན་གནས་མེད་དམ་ནད་པ་ལ་མི་བདེ་ན་དྲུང་དུ་བསྙལ་ན་ཡང་ནད་པ་ལ་ཡང་ལྟུང་བར་མི་འགྱུར་ནད་གཡོག་དགེ་སློང་ལ་ཡང་ལྟུང་བར་མི་འགྱུར་རོ། །དགེ་སྦྱོང་དང་ཡང་ངོ་། །གཞན་ཡང་དགེ་

སྦྱོང་དང་ལྷན་ཅིག་ཉལ་ན་ཡང་ལྟུང་བར་མི་འགྱུར་བ་ཡོད་དེ་འོག་ནས་འཆད་དོ། །དེ་ཡོད་པས་སོ། །དགེ་སློང་སློབ་པའམ་ཉེ་གནས་དགེ་སྦྱོང་ཡོད་པ་ནི་དགེ་སྦྱོང་དེ་དང་ལྷན་ཅིག་ཉལ་ཡང་ལྟུང་བར་མི་འགྱུར་ཏེ་འོག་ནས་འཆད་དོ། །གནས་དེ་ན་སྡིག་པའི་དགེ་སློང་འདུག་

ནའོ། །བདག་ཅག་གི་གནས་ན་དགེ་སྦྱོང་ཁ་འདྲེན་ཅིང་འཕྲོག་པ་དང་དགེ་སྦྱོང་གི་རྐུབ་ཏུ་མི་ཚངས་པར་སྤྱོད་པའི་དགེ་སློང་སྡིག་པ་སྤྱོད་པ་ཡོད་ན་བདག་གི་སློབ་མ་དགེ་སྦྱོང་དང་ནུབ་གཉིས་ལས་ལྷག་པར་ཉལ་ཀྱང་ཉེས་མེད། བསྐྲད་པར་ནན་ཏན་བྱས་སམ་བྱེད་པའོ། །

Vol. 165 · folio 163b

བདག་ཅག་གི་འཁོར་ན་སྡིག་པ་བྱས་པའི་དགེ་སྦྱོང་ཡོད་ན་བདག་ཅག་གིས་ཀྱང་བསྐྲད། བདག་གི་མ་ནུས་ན་རྒྱལ་པོའམ་ཞང་བློན་ལ་བྱས་ཏེ་འང་བསྐྲད་ཚུལ་ཕྱི་མའི་དུས་ན་ཐོག་མའི་ཟླ་བ་གཉིས་ཀྱི་ཚེ་ནའོ། །སྡིག་པ་བྱེད་པའི་དགེ་སློང་སྐྲོད་མ་ནུས་ན་ཚུལ་ཕྱི་མར་ཞུགས་ཀྱང་

ཟླ་བ་གཉིས་ལོན་ནས་ཚུལ་དྲལ་ཏེ་བདག་གི་དགེ་སྦྱོང་སྔོན་དུ་བཅུག་ལ་བཀྲིའོ། །དེ་ལས་ལྷག་པར་མི་གནས། ཚུལ་ཕྱི་མར་ཞུགས་ནས་ཟླ་བ་གཉིས་ལོན་ན་དེ་ལས་རིང་དུ་མི་བསྡད་པར་མདོ་ལྟག་མ་ལྟར་འགྲོ། མ་སོང་ན་ལྟུང་བར་འགྱུར་རོ། །སྔ་མའི་ཚུལ་ནི་མི་དགོས། སྡིག་

པའི་དགེ་སློང་ཡོད་ན་ཚུལ་སྔ་མར་མི་བསྲུང་མི་འཇུག་པར་བདག་གི་དགེ་སྦྱོང་ཁྲིད་ལ་འགྲོ། ཕན་ཆད་པ་འང་མི་བསྲུང་། ཚུལ་སྔ་མར་ཞུགས་ཀྱང་སྡིག་པའི་དགེ་སློང་ཡོད་ན་ཟླ་བ་གཉིས་ཀྱི་བར་དུ་བསྲུངས་ཤིང་བསྡད་མི་དགོས་ཀྱི་ཚུལ་ཕྱི་མ་ཡོད་པས་སྔ་མ་དྲལ་ཏེ་དགེ་

སྦྱོང་ཁྲིད་ལ་སོང་ཤིག །དེ་ལྟ་ན་མི་གནས་པའི་དགེ་སློང་མི་གཞག །བདག་ཅག་གི་འཁོར་ན་སྡིག་པའི་དགེ་སློང་ཡོད་ན་གཞན་གྱི་དགེ་སྦྱོང་ཉེ་གནས་སུའང་མི་གཞག །དགེ་སྦྱོང་གསར་དུ་རབ་ཏུ་འབྱུང་བ་ཞིག་ཡོད་ནའང་རབ་ཏུ་མི་དབྱུང་ངོ་། །གཉིད་ལྟུང་སྟེ་མྱོས་

ན་ལམ་དུ་དགེ་སྦྱོང་མཐུན་དུ་བྱས་ཏེ་འགྲོའོ། །དགེ་སྦྱོང་ཁྲིད་དེ་སོང་བ་ལས་དགེ་སྦྱོང་ཆད་ཅིང་གཉིད་ཀྱིས་མྱོས་ན་དགེ་སྦྱོང་ཕྱི་བཞིན་འབྲང་དུ་མི་གཞུག་གི་སྔོན་དུ་བཅུག་ལ་བཀྲིའོ། །དེ་སྟེ་བཀྲེས་ན་དེའི་ཚེ་ཚུལ་དུས་པས་སྔར་ཟས་སྦྱིན། དགེ་སྦྱོང་བཀྲེས་ཤིང་འགྲོ་མི་

ཕོད་ན་གདུགས་ཚོད་ལ་མ་བབ་པར་ཟན་སྦྱིན་ནོ། །བཀྲེས་ཏེ་མི་བཟོད་ཅིང་ཟས་སློང་ན་ཕྱི་དྲོ་བྱིན་ཀྱང་ཉེས་མེད་དོ། །དེ་སྟེ་ཡང་དུས་ལ་ཡང་ངོ་། །མདོ་ལྟག་མ་ལྟར་སྔར་ཟན་བྱིན་ཀྱང་གདུགས་ཚོད་ཀྱི་ཚེའང་ཟས་སྦྱིན་ནོ། །རབ་ཏུ་མ་རྫོགས་པ་དང་ལྷན་ཅིག་ཉལ་བའོ། །

རབ་ཏུ་མ་རྫོགས་པ་དང་ལྷན་ཅིག་ཉལ་བའི་ལྟུང་བ་རྫོགས་སོ།། །།ཆོས་ལ་འཆད་དེ། འདི་ལྟར་བདག་གིས་བཅོམ་ལྡན་འདས་ཀྱིས་ཆོས་བཤད་པ་ཤེས་ཏེ་ཅི་ལྟར་གང་བར་དུ་གཅོད་པའི་ཆོས། བཅོམ་ལྡན་འདས་ཀྱིས་གསུངས་པ་དེ་བསྙེན་ཀྱང་བར་དུ་གཅོད་པར་མི་

Vol. 165 · folio 164a

འགྱུར་རོ་ཞེས་པ་ལ་སོགས་པ་དགེ་སློང་ཞིག་འདི་སྐད་ཅེས་སྨྲས་ཏེ་འདི་ལྟར་བདག་གིས་བཅོམ་ལྡན་འདས་ཀྱིས་ཆོས་བཤད་པ་ནི་ཤེས་ཏེ་ཅི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་གསུངས་པ་ནི་དེ་སྤྱད་ཀྱང་བར་དུ་གཅོད་པར་མི་འགྱུར་རོ་

ཞེས་ཟེར་བའི་དགེ་སློང་དེ་ལ་དགེ་སློང་དག་གིས་འདི་སྐད་ཅེས་བསྒོ་ཤིག །ཚེ་དང་ལྡན་པ་ཁྱོད་འདི་སྐད་མ་ཟེར་ཅིག །བཅོམ་ལྡན་འདས་ཀྱིས་ཆོས་བཤད་པ་ནི་ཤེས་ཏེ། དེ་ཅི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་དེ་སྤྱད་ཀྱང་བར་དུ་

གཅོད་པར་མི་འགྱུར་རོ་ཞེས་སོ། །བཅོམ་ལྡན་འདས་ལ་སྐུར་པ་མ་འདེབས་ཤིག །བཅོམ་ལྡན་འདས་ལ་སྐུར་པས་དགེ་བར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུང་སྟེ་དུ་མའི་གཞུང་ལས་ཀྱང་བར་དུ་གཅོད་པའི་ཆོས་ཀྱི་ནི་བར་གཅོད་དོ་ཞེས་གསུངས་

ཏེ་དེ་སྤྱད་པས་བར་དུ་གཅོད་པར་འགྱུར་གྱིས་འདི་ལྟ་བུའི་སྡིག་པ་ལ་ལྟ་བ་ཐོང་ཤིག་ཅེས་བསྒོ་སྟེ་མ་མཉན་ན་ལྟུང་བར་འགྱུར་རོ། །ལན་གསུམ་བསྒོ་བའི་ཐབས་དང་བཤད་པ་ནི་དགེ་འདུན་གྱི་ལྷག་མ་བཅུ་གསུམ་ལ་འཇུག་གི་བཞི་བཤད་པ་དང་འདྲའོ། །ཚིག་ཙམ་ནས་

མི་གཏོང་བའོ། །མདོ་ལྟག་མ་ལྟར་བར་དུ་གཅོད་པར་མི་འགྱུར་རོ་ཞེས་ཟེར་བ་ལས་དེ་སྐད་མ་ཟེར་བར་ཐོང་ཤིག་ཅེས་ལན་གསུམ་དུ་བསྒོ་བར་གསོལ་བ་དང་ཞུ་བའི་ལས་བྱས་ཏེ་མ་བཏང་ན་ལྟུང་བར་འགྱུར། འདི་སྨད་པའི་ཕྱིར་དེ་ལ་ཞུ་བ་བྱ། མདོ་ལྟག་མ་ལྟར་ལན་

གསུམ་དུ་བསྒོ་སྟེ་མ་ཉན་པའི་དགེ་སློང་དེ་ཆོས་ལ་འགལ་ཞིས་ཉེས་པ་མི་གཏོང་བའི་ཕྱིར་དགེ་འདུན་སྨད་པའི་ལས་བྱས་ཏེ་བསྐྲད་དོ། །ལྟ་བར་ཞུགས་པ་མི་གཏོང་བའོ། །བཅོམ་ལྡན་འདས་ཀྱིས་གསུངས་པའི་ཆོས་ལ་བར་དུ་གཅོད་པར་མི་འགྱུར་རོ་ཞེས་ཟེར་བའི་ལྟུང་

བ་རྫོགས་སོ།། །།སྨྲ་བའི་ལྟུང་བ་ལ་འཆད་དེ། འབྷྲིད། ལྟག་ཏུ་བཤད་པ་ལྟར་དགེ་སློང་བསྐྲད་པ་ཤེས་བཞིན་དུ་འགྲོགས་པ་ལས་ལྟུང་བར་འགྱུར། དེ་སྐད་ཟེར་སྤངས་པ་སླར་མ་བྱས་པའི་དགེ་སློང་ལས་སོ། །སངས་རྒྱས་ཀྱིས་བར་དུ་གཅོད་པའི་ཆོས་གསུངས་པ་

Vol. 165 · folio 164b

ལས་བར་དུ་གཅོད་པར་མི་འགྱུར་རོ་ཞེས་ཟེར་བ་ལ་ལན་གསུམ་བསྒོ་སྟེ། མ་མཉན་ཅིང་སླར་མ་བཤགས་པའི་དགེ་སློང་དང་བཅར་ཞིང་འགྲོགས་པ་ལས་ལྟུང་བར་འགྱུར་རོ། །བསྟན་པ་བྱིན་པ་ཡང་ངོ་། །དགེ་སློང་བསྐྲད་པ་ཀློག་པ་དང་ཁ་དོན་འབུལ་བ་ལ་བསྟན་ཅིང་བསླབས་

ནའང་ལྟུང་བར་འགྱུར་རོ། །ཀུན་འདྲིལ་བ་དང་། ཆོས་དང་ལས་བྱེད་པ་ལ་སོགས་པ་བསྐྲད་པའི་དགེ་སློང་འདྲི་ཞིང་འོང་བ་ལ་བསྟན་ནའང་ལྟུང་བའོ། །གནས་བཅའ་བ་དང་། བསྐྲད་པའི་དགེ་སློང་དེ་བདག་ལ་གནས་འཆར་བཅུག་ནའང་ལྟུང་བའོ། །བསྟན་པ་དང་འཆད་

པ་ཡང་ངོ་། །ཆོས་དང་བསམ་གཏན་ལ་སོགས་པ་བསྟན་ཅིང་བཤད་ནའང་ལྟུང་བའོ། །ལྟ་བ་འཆགས་པ་བསྐྲད་པའི་དགེ་སློང་དེ་ལ་ཁྱོད་ཉེས་པ་མེད་དེ་དགེ་འདུན་གྱིས་བསྐྲད་པ་མི་རིགས་ན་ཞེས་སྨྲས་ནའང་ལྟུང་། ཟང་ཟིང་སྤྱོད་པའོ། །བསྐྲད་པའི་དགེ་སློང་དེ་བཅར་

ཞིང་ཟས་དང་གོས་ལ་སོགས་པ་བྱིན་པའང་ལྟུང་བར་འགྱུར། གཡོག་བདག་གིར་བྱས་པ། བསྐྲད་པའི་དགེ་སློང་དེ་བདག་གི་གཡོག་ཏུ་ལས་དག་བྱེད་དུ་བཅུག་ནའང་ལྟུང་བའོ། །ཁྱིམ་དུ་ལྷན་ཅིག་ཉལ་བ། བསྐྲད་པའི་དགེ་སློང་དེ་དང་ཁྱིམ་གཅིག་གི་ནང་ན་ལྷན་

ཅིག་ཉལ་ནའང་ལྟུང་བའོ། །འཐས་སོ། །ཁྱིམ་གཅིག་གི་ནང་ན་ཉལ་ཏེ་སྐྱ་རེངས་འབྱུང་ན་འང་ལྟུང་ངོ་། །ནུབ་མོའོ། །སྐྱ་རེངས་འབྱུང་བའི་ནི་ཞག་གཅིག་ལོན་པའི་ནུབ་མོ་འདས་པའི་སྐྱ་རེངས་འབྱུང་ན་ལྟུང་བའོ། །གཞན་ཡང་འདུ་བའོ། །བསྐྲད་པའི་དགེ་སློང་

དེ་དང་ལྷན་ཅིག་འགྲོགས་ཀྱང་རུང་གཏམ་བྱས་ཀྱང་རུང་སྟེ་ཅི་སྤྱད་ཀྱང་ལྟུང་བར་འགྱུར་རོ། །མ་གཏོགས་པ་ནི་ནད་པ་དང་ལྟ་བ་དབྱེ་བ་བྱ་བའི་ཕྱིར་རོ། །ལྟུང་བར་མི་འགྱུར་བ་ནི་བསྐྲད་པའི་དགེ་སློང་ནད་ཀྱིས་བཏབ་སྟེ་གསོ་བ་དང་བར་དུ་གཅོད་པར་མི་འགྱུར་རོ་ཞེས་

ཟེར་ཞིང་ལོག་པ་བལྟས་པ་དང་བྲལ་ཞིང་འཆགས་སུ་གཞུག་པའི་ཕྱིར་བསྙེན་ཅིང་བཅར་བ་ནི་ཉེས་མེད་དོ། །སྤངས་པ་དང་འཇུག་པའོ། །དགེ་སློང་བར་དུ་གཅོད་པར་མི་འགྱུར་རོ་ཞེས་ཟེར་བའི་ཕྱིར་བསྐྲད་པ་དང་འགྲོགས་པའི་ལྟུང་བ་རྫོགས་སོ།། །།དགེ་སྦྱོང་གི་ལྟུང་བ་

Vol. 165 · folio 165a

ལ་འཆད་དེ། ཚིག་དེ་བརྩམས་ནས་མི་གཏོང་བའི་དགེ་སྦྱོང་མ་རུང་པར་བྱ། དགེ་སྦྱོང་ཞིག་འདི་སྐད་ཟེར་ཏེ་བཅོམ་ལྡན་འདས་ཀྱིས་འདོད་པ་ནི་བར་དུ་གཅོད་དོ་ཞེས་གསུངས་པ་བར་དུ་གཅོད་པར་མི་འགྱུར་རོ་ཞེས་ཟེར་བ་ལ་བར་དུ་གཅོད་པར་འགྱུར་

གྱིས་དེ་སྐད་མ་ཟེར་ཅིག་ཅེས་དགེ་འདུན་གྱིས་བསྒོ་སྟེ་མ་མཉན་ཅིང་མ་བཏང་ན་དགེ་སྦྱོང་དེ་བསྐྲད་དོ། །ཨུ་པ་ནན་དའི་སློབ་མ་དགེ་སྦྱོང་དང་དགེ་སྦྱོང་གཞན་དུ་རྩེ་ཞིང་སྡིག་པ་སྤྱད་པ་དགྲ་བཅོམ་པ་དང་བསྐུར་པ་ལས་བཅས། སྔར་ཞུ་བ་བཞིའི་ལས་ཀྱིས་ཁྱོད་ཅེས་ནས་ཕྱིས་

མ་རུང་བར་ཁྱོད་དོ་ཞེས་རིམ་གྱིས་ཞུ་བ་བྱེད་དེ་ཐོང་ཤིག་འདི་ལྟ་བུའི་གཟུགས་སྡིག་པ་ལ་ལྟ་བར་གྱུར་པ་ལས་དང་པོ་གླག་པ་བྱ་སྟེ་གཉིས་སོ་ཞེས་སོ་སོར་དེའི་མཐར་དགེ་སློང་གིས་བསྒོ། མདོ་ལྟག་མ་ལྟར་དགེ་སྦྱོང་བསྐྲད་པ་ནི་དགེ་འདུན་གསོལ་བ་དང་ཞུ་བའི་ལས་བྱེད་

པ་མཐོང་བར་མི་དགུག་གི་ཕོ་ཉར་དགེ་སློང་ཅིག་བཏང་སྟེ་བར་དུ་གཅོད་པར་མི་འགྱུར་རོ་ཞེས་སྨྲ་བ་དེ་ཐོང་ཤིག་མ་བཏང་ན་ཁྱོད་དགེ་འདུན་གྱིས་སྐྲོད་པར་བྱེད་དེ་གསོལ་བ་དང་ཞུ་བའི་ལས་ལན་གཅིག་བྱས་ཟིན་ཏོ་ཞེས་བསྒོ། དེ་བཞིན་དུ་མ་བཏང་ན་བསྐྲད་པའི་ལས་གསོལ་

བ་དང་ཞུ་བའི་ལས་གཉིས་བྱས་ཟིན་གྱིས་ཐོང་ཤིག་ཅེས་བསྒོ། ལན་གཉིས་བསྒོ་སྟེའང་མ་གཏང་ན་ལན་གསུམ་གྱི་བར་དུ་བསྒོ་སྟེ་མ་བཏང་ན་དགེ་སྦྱོང་དེ་བསྐྲད་དོ། །ལོག་ན་ལྷག་པ་མི་བྱ། མདོ་ལྟག་མ་ལྟར་ལན་ཅིག་ལན་གཉིས་ལན་གསུམ་ཚུན་ཆད་དུ་བསྒོ་སྟེ་བཏང་

ན་བསྒོ་བ་ཕྱི་མ་ཡང་བྱ་མི་དགོས་བསྐྲད་པ་ཡང་མི་བྱའོ། །མ་རུང་བའི་ཕྱིར་དགེ་སྦྱོང་ལའོ། །ལྟག་ཏུ་བཤད་པ་ལྟར་ལན་གསུམ་དུ་བསྒོ་སྟེ་མ་བཏང་ནས་བསྐྲད་པའི་དགེ་སྦྱོང་དེ་དང་བཅར་ཞིང་འགྲོགས་པ་ལས་ལྟུང་བར་འགྱུར་རོ། །ལྟུང་བར་འགྱུར་བ་ནི་ལྟག་ཏུ་དགེ་སློང་

བསྐྲད་པ་དང་འགྲོགས་ན་ལྟུང་བར་འགྱུར་བར་བཤད་པའི་ཚིག་ཀུན་འདིའི་ཡན་ལག་ཏུ་གཏོགས་ཏེ་དེ་དང་འདྲའོ། །མ་རུང་བར་བྱ་བའི་བསྡུས་པའོ། །དགེ་སྦྱོང་བསྐྲད་པ་དང་འགྲོགས་པའི་ལྟུང་བ་རྫོགས་སོ།། །།ཁ་དོག་བསྒྱུར་བའི་ལྟུང་བ་ལ་འཆད་དེ། སྔོན་པོ་དང་།

Vol. 165 · folio 165b

རམས་ཀྱིས་བཙོས་པ་དང་། བཙག་དང་ས་དམར་གྱིས་བཙོས་པ་ཡང་རུང་འདམ་ལ་བཙོས་པ་ཡང་རུང་། ཤུན་པས་ཤིང་དང་ལྡུམ་གྱི་རྩ་བ་དང་ཤིང་ཤུན་དང་མེ་ཏོག་དང་ལོ་མས་བཙོས་པ། བདག་གིས་གོས་མ་བཙོས་པ་ལས་སོ། །འདི་རྣམས་ཀྱིས་ཁ་དོག་བསྒྱུར་

ཅིང་བཙོས་པ་ནི་གྱོན་ཅིང་འཆང་དུ་དབང་གིས་ཁ་དོག་མ་བསྒྱུར་བ་གྱོན་ཅིང་འཆང་ན་ལྟུང་བའོ། །མཐར་ནི་ལྷུང་བཟེད་ཀྱི་ཁ་གཡོགས་པ་དང་གཏུར་བུ་དང་རྐང་པའི་གོས་དང་ལུས་བཅིང་པ་དང་བགོ་བ་ལ་སོགས་པ་ཀུན་སྤྱོད་པའོ། །གོས་གསར་དུ་བྱས་ཤིང་སར་པ་

ཞིག་གསར་དུ་རྙེད་ཀྱང་རུང་རྙིང་བ་ཞིག་ཉོས་སམ་བྱིན་ཏེ་གསར་དུ་རྙེད་ཀྱང་རུང་ཆུང་ངུ་ན་ལྷུང་བཟེད་ཀྱི་ཁ་བཅད་པ་དང་སྐ་རགས་ཡན་ཆད་མིང་གིས་སྨོས་པ་འདི་རྣམས་གང་ཡང་རུང་སྟེ་འཆང་ངམ་གྱོན་ན་ལྟུང་བའོ། །སྡེ་གཞན་གྱིས་ལས་ནའང་བརྟག་མི་དགོས། དགེ་

སློང་ཕ་དང་དགེ་སློང་མ་དང་དགེ་སློབ་མ་དགེ་སྦྱོང་ཕོ་མོ་དང་ལྔ་གང་གིས་བཙོས་ཀྱང་རུང་ཁ་དོག་བསྒྱུར་ཟིན་པ་མི་གདོད་བཙོ་མི་དགོས་ཏེ་གཅིག་ལ་གཅིག་བརྟགས་པའོ། །ཁྱིམ་པས་ཕྲོགས་ན་ཡང་མ་ཡིན། དགེ་སློང་གིས་གོས་ཁ་དོག་བསྒྱུར་ཟིན་པ་ལས་རྐུན་

པོས་ཁྱེར་རམ་ཁྱིམ་པ་ཞིག་གིས་ཁྱེར་བ་ལས་སླར་འོངས་ཏེ་ཁ་དོག་མ་ཡལ་ན་བཙོ་མི་དགོས་ཏེ་བརྟགས་པའོ། །ཚོན་ཆེན་པོ་ཅན་བགོ་བར་མི་བྱ། གོས་ཚོན་ཆེན་པོས་བཙོས་པ་ནི་གང་གྱོན་ཀྱང་རུང་སྟེ་ཉེས་བྱས་རེ་རེར་འགྱུར་རོ། །ཚོན་ཆེན་པོ་ནི་མཚལ་དང་ལི་ཀྲུ་

དང་བཙོད་དང་རྒྱ་སྐྱེགས་དང་གུར་གུམ་དང་ལེ་བརྒན་རྩི་དང་ཐིང་ཤིང་དང་རྨ་ཤིང་དང་བརྒྱད་དོ། །ཁྱིམ་པའི་ཡང་མ་ཡིན་ཁྱིམ་པའི་གོས་འདྲ་བ་གྱོན་པ་ནི་ཅི་ལྟ་བུ་གྱོན་ཀྱང་ཉེས་བྱས། སྤྱད་པའི་ནི་གཙུག་ལག་ཁང་གི་ནང་ན་ངུར་སྨྲིག་གིས་གཡོགས་ནའོ། །ཁྱིམ་པའི་

གོས་གྱོན་ཀྱང་ཉེས་མེད་པ་ནི་མི་གཞན་གྱིས་མ་མཐོང་བར་གཙུག་ལག་ཁང་དུ་ནི་ཀ་ཤས་མི་སྣང་བར་གཡོགས་ཏེ་གྱོན་པ་ནི་ཉེས་མེད། ལམ་དུ་བརྙས་ཏེ་བགོ་བ་ནི་སྤྱིའི་འོ། །ལམ་དུ་ཞུགས་པ་ལས་དགེ་སློང་ལ་ལ་ཞིག་གིས་གོས་བརྙན་པོ་རྙེད་ན་གཅིག་པོ་གོ་ཚེར་མི་བགོ་

Vol. 165 · folio 166a

བར་ཀུན་གྱིས་སྤྱིར་སྤྱད་དོ། །གྲོགས་ནི་དགེ་སློང་དང་དགེ་སྦྱོང་གཅིག་ན་རྒན་པོ་ནས་གག་ཏུ་གྲུབ་པའི་སྟེང་དུ་སྦྱིན། ཀུན་གྱིས་སྤྱིར་བརྙས་པའི་གོས་སྤྱད་པ་ནི་དགེ་སློང་རྒན་རིམས་ནས་ཅི་ཐོབ་ཐོབ་ཏུ་གཡོགས་ཤིང་བསྐོན་ཏེ་དགེ་སྦྱོང་ཡན་ཆད་ཀུན་ཐོབ་

ན་ལེགས་ཀུན་མི་ཐོབ་ན་མཇུག་མ་ནས་དུ་མ་ཐོབ་པ་ན་ཁ་རྗེ་ཆེ་ཆུང་དུ་ཟད་དེ་ཉེས་མེད་དོ། །མ་ཆད་ན་གྱོན་ཏེ་འཆག་ཏུ་མི་འགྲོ། སྟེང་གོས་སྤྱིར་བརྙར་བྱིན་པ་ལས་བདག་གཅིག་པུ་གྱོན་ཏེ་འཆག་ཏུ་མི་འགྲོ། སྟེང་དུ་བཅགས་པ་ནི་སྤྱན་དྲངས་ནས་བསོད་ནམས་འདོད་

པས་སར་པ་ཁ་ཚར་མ་བཅད་པ་མི་རྟག་པ་ཡིད་ལ་བཟུང་པས་བཅོམ་སྟེའོ། །ཡོན་བདག་དད་པས་བསོད་ནམས་འདོད་པའི་ཕྱིར་སྟན་དང་ཡོ་བྱད་ལ་སོགས་པ་ནོར་རྫས་བཟང་པོ་དང་ཁ་ཚར་མ་བཅད་པ་ལ་སོགས་པས་བརྒྱན་ཅིང་བཏིང་སྟེ་སྤྱན་དྲངས་ནས་ནོར་རྫས་དེ་རྣམས་ལ་

མི་རྟག་ཅིང་འཇིག་པ་ཡིན་ཏེ་མི་རྟག་པའི་རྫས་དེ་ལ་སྤྱད་པས་བསོད་ནམས་རྟག་པར་འགྱུར་བར་ཡིད་ལ་བསམས་ཏེ་སྤྱད་པ་ནི་ཉེས་མེད་དོ། །གོས་མ་བཙོས་པའི་སྦྱོར་བའོ། །གོས་ཁ་དོག་མ་བསྒྱུར་བ་གྱོན་པའི་ལྟུང་བ་རྫོགས་སོ།། །།རིན་པོ་ཆེའི་ལྟུང་བ་ལ་འཆད་དེ། རེག་

པ་དང་རེག་ཏུ་བཅུག་ན་བདག་གི་མ་ཡིན་པའི་རིན་པོ་ཆེ་ཡང་བྱེད་དོ། །བདག་གི་མ་ཡིན་པ་ནོར་བུ་རིན་པོ་ཆེ་རྣམས་དང་གསེར་དངུལ་ལས་བྱེད་དུ་བྱས་པ་ལ་སོགས་པ་ལ་བདག་གིས་བཟུང་ངམ་གཞན་འཛིན་དུ་བཅུག་ནའང་ལྟུང་ངོ་། །དེར་གཏོགས་པ་ཡང་ངོ་། །རིན་པོ་ཆེར་

གཏོགས་པ་བཟུང་ན་ལྟུང་བར་འགྱུར་ཏེ་རིན་པོ་ཆེར་གཏོགས་པ་གང་གང་ཡིན་པ་ནི་འོག་ནས་འཆད་པའི་སཱུ་ཏྲ་རྣམས་ཡིན་ནོ། །དེ་དག་ནི་མཚོན་ཆ་སྟེ་གཡུལ་དུ་སྤྱོད་པ་དང་རོལ་མོའི་ཡོ་བྱད་ཀྱིས་སྤྱད་ཀྱང་ངོ་། །རིན་པོ་ཆེར་གཏོགས་པ་ནི་མཚོན་ཆ་གཡུལ་དུ་འཐབ་མོ་བྱེད་

པའི་སྤྱད་དང་རོལ་མོའི་ལག་ཆ་ལ་སོགས་པ་ལ་བྱ་སྟེ་གང་ལ་རེག་ཀྱང་རུང་ལྟུང་བར་འགྱུར། དགོས་པའི་ཕྱིར་དགོས་པར་གྲུབ་ན་རྩ་བའོ། །སཱུ་ཏྲ་ལྟག་མའི་ནང་ནས་འབྱུང་བའི་མཚོན་ཆ་དང་རོལ་མོའི་ཆ་སྤྱད་ནི་མ་ཆད་ཅིང་མ་བྲལ་ཏེ་སོ་སོ་ལས་སུ་སྤྱད་དུ་རུང་བ་ལ་

Vol. 165 · folio 166b

བཟུང་ན་ལྟུང་བའོ། །མ་གྲུབ་ན་ཉེས་བྱས་པ། མཚོན་ཆ་དང་རོལ་མོའི་ཆ་སྤྱད་ཆག་གམ་གྲུགས་ཏེ་སྤྱད་དུ་མི་རུང་པ་ལ་རེག་ན་ཉེས་བྱས། མ་གཏོགས་པ་ནི་བདག་གི་བྱ་བར་མ་ཞུགས་པ་ནོར་ཆུད་མི་གཟན་པའི་སེམས་ཀྱིས་གཙུག་ལག་ཁང་དང་དེའི་མཚམས་སུ་གཏོགས་

པ་ནའོ། །རིན་པོ་ཆེ་དང་རིན་པོ་ཆེ་ལ་གཏོགས་པ་བཟུང་ཡང་ཉེས་པ་མེད་པ་ནི་གཙུག་ལག་ཁང་གི་ཕྱིར་ཚུན་ཆད་ཀྱི་ནང་ངམ་ར་བའི་ཕྱི་རོལ་གཙུག་ལག་ཁང་གི་མཚམས་སུ་གཏོགས་པ་ཚུན་ཆད་གཅིག་ན་གཞན་གྱི་ནོར་འཁྱམ་པ་ཞིག་འདུག་ན་ནོར་བདག་སུའི་ཡིན་ན་

སླར་སྦྱིན་པའི་ཕྱིར་མི་སྟོར་བར་བྱ་བར་བསམས་ཏེ་བདག་གིས་བླངས་སམ་གཞན་ལེན་དུ་བཅུག་ཀྱང་ཉེས་མེད། དེ་ལ་མི་གཡེལ་བར་རོ། །མདོ་ལྟག་མ་ལྟར་རྫས་བླངས་པ་དེ་ནོར་བདག་སླར་སྦྱིན་པའི་ཕྱིར་མ་སྟོར་བར་ནན་ཏན་ཏུ་བསྲུང་། ཞག་བདུན་ནམ་བརྒྱད་དུ་

དེའི་མཚམས་སུའོ། །སླར་སྦྱིན་པའི་ཕྱིར་བླངས་པའི་ནོར་དེ་ནོར་བདག་ལེན་དུ་མ་འོངས་སམ་ཁུངས་མ་ཕྱིན་ན་བདག་ཉིད་ཀྱི་ལག་ཏུ་ཞག་བདུན་ནམ་བརྒྱད་དུ་ཆོངས་ཤིག །འགྲོ་ན་ཉལ་ཉིལ་ལམ་ལོ་མ་བསྡུས་པས་གཡོགས། རྙེད་པའི་གཞི་དེ་ཉིད་དུ་སྦར་རུང་བ་

ཞིག་གམ་བླངས་པ་ལས་བདག་གུད་དུ་འགྲོ་ན་སའམ་སྦུར་མ་ལ་སོགས་པས་གཡོགས་ཏེ་གཞན་གྱིས་མི་རྙེད་པར་སྦས་ལ་འགྲོ། རྟགས་ལ་མ་ཕབ་ན་ངའི་ཞེས་ཟེར་ཡང་མི་སྦྱིན། ནོར་རྙེད་པ་དེ་ལ་ནོར་བདག་ང་ཡིན་ཞེས་ཟེར་ཞིང་ལེན་པ་ཞིག་འོངས་ན་ནོར་མི་

བསྟན་པར་སྤུ་རྟགས་དྲིས་ཏེ་མཐུན་ན་སྦྱིན་སྤུ་རྟགས་དང་མི་མཐུན་ན་མི་སྦྱིན། མ་འོངས་ཏེ་འདས་ན་དགེ་འདུན་གྱི་མཛོད་དུ་གཞུག །ནོར་རྙེད་པ་དེ་ཞག་བརྒྱད་ཀྱི་བར་དུ་བསྡད་དེ་ནོར་བདག་མ་འོངས་ཤིང་ཁུངས་མ་ཕྱིན་ན་བདག་གི་ལག་ན་མི་བཅང་བར་དགེ་འདུན་གྱི་

མཛོད་དུ་གཞུག་གོ། །ཟླ་བ་དྲུག་གི་མཐའི་བར་དུ་བཅད། སཱུ་ཏྲ་ལྟག་མ་ལྟར་དགེ་འདུན་གྱི་མཛོད་དུ་བཞག་པ་ལས་ནོར་བདག་མ་འོངས་ན་ཟླ་བ་དྲུག་གི་བར་དུ་མཛོད་དུ་བཞག་སྟེ་བཅང་། འདས་ཏེ་མ་འོངས་ན་སངས་རྒྱས་སམ་དགེ་འདུན་གྱིས་གང་དུ་རྙེད་པ་

Vol. 165 · folio 167a

དེར་སྦྱར། ཟླ་བ་དྲུག་གི་བར་དུ་དགེ་འདུན་གྱི་མཛོད་དུ་བཞག་ཀྱང་ནོར་བདག་མ་འོངས་ན་སངས་རྒྱས་ཀྱི་མཆོད་རྟེན་དང་ཉེ་བ་ཞིག་ན་འདུག་པ་ལས་རྙེད་ན་ནི་སངས་རྒྱས་ཀྱི་དཀོར་དུ་བྱའོ། །དགེ་འདུན་དང་ཉེ་བ་ཞིག་ནས་རྙེད་དེ་བླངས་ན་དགེ་འདུན་

གྱི་དཀོར་དུ་བྱའོ། །མི་མཁོ་ན་བཙོང་ལ་མཁོ་ཞིང་བརྟན་པར་རོ། །དགེ་འདུན་ནམ་སངས་རྒྱས་ལ་ཕུལ་བའི་ནོར་དེ་སྤྱད་དུ་མི་མཁོ་ན་ཕྱིས་ནོར་བདག་ལེན་དུ་འོངས་ན་གཏན་སྟོར་བར་མི་བྱ་བའི་ཕྱིར་ཟངས་ལྟ་བུ་བརྟན་པར་འདུག་པའི་རྫས་སུ་བཙོང་། དེ་སྟེ་བདག་པོ་

འོངས་ན་གནང་བ་བསླང་མི་འདོད་ན་སྦྱིན། །སཱུ་ཏྲ་ལྟག་མ་ལྟར་བཙོངས་པ་ལས་ནོར་བདག་འོངས་ནས་ཁྱོད་ཀྱི་བསོད་ནམས་སུ་རུང་བའི་ཕྱིར་དཀོན་མཆོག་ལ་ཕུལ་ཏེ་སྤུ་བསྒྱུར་བ་འདི་ཡིན་གྱིས་དད་པ་བསྐྱེད་ཅིག་ཅེས་དད་པ་བསྐྱེད་དུ་མི་བཏུབ་ཏུ་འདོད་ཅེས་ཟེར་ན་སླར་སྦྱིན།

དེ་སྟེ་སྐྱེད་སློང་ན་འདི་ཉིད་ཀྱང་མང་བར་མི་སེམས་སམ་ཇི་སྲིད་དུ་བདག་ཅག་གིས་བསྲུངས་ཞེས་སྨྲོས་ཤིག །སཱུ་ཏྲ་ལྟག་མ་ལྟར་ནོར་སྤུ་བསྒྱུར་བ་སླར་བྱིན་པ་ལས་ནོར་གྱི་སྐྱེད་དང་སྤྱད་པའི་གླ་ལ་སོགས་པ་འདོད་ཅེས་ཟེར་ན་འདི་སྲིད་དུ་ངས་བསྲུངས་ཏེ་ནོར་དངོས་མ་སྟོར་བར་

བྱིན་པ་འདི་ཉིད་ཆེ་ཞིང་མང་བར་མི་སེམས་སམ་ཞེས་ཤགས་གདབ། ནོར་བུ་ལ་སོགས་པ་བདར་ཕུག་ན་མཁོ་བའོ། །ནོར་བུ་བྱི་བདར་བྱས་ཤིང་ཕུག་པ་ལ་རེག་པ་ནི་ལྟུང་བ་མ་བདར་མ་ཕུག་པ་ལ་རེག་པ་ནི་ཉེས་བྱས་མགུལ་འཁོར་དང་གདུ་བུ་དང་དཔུང་རྒྱན་དང་ཕྲེང་བ་དང་

ཕྲེང་ཕྱེད་པ་དང་གཞུག་པར་ནའོ། །གསེར་དངུལ་དང་ནོར་བུའི་མགུལ་འཁོར་དང་གདུ་བུ་དང་དཔུང་རྒྱན་དང་ཕྲེང་བ་དང་དོ་ཤལ་ལ་སོགས་པ་སྤྱད་ཅིང་གཞུག་ཏུ་རུང་བ་ལ་བཟུང་བ་ནི་ལྟུང་བ། ཆག་ཅིང་ཆད་ཏེ་སྤྱད་དུ་མི་རུང་བ་ལ་བཟུང་བ་ནི་ཉེས་བྱས། རོལ་མོ་བྱིན་

ན་དང་བེ་ནུ་དང་བལ་ལ་རི་དང་མ་ཧ་ཏི་དང་མུ་གྷོ་ཥ་རྣམས་རྒྱུད་དང་བཅས་པ་དག་གོ། །རོལ་མོ་སྤྱད་པ་མིང་གིས་སྨོས་པ་འདི་རྣམས་ནི་བྱི་བང་ཤ་དགས་ཏེ་རྒྱུད་དང་བཅས་པ་ལ་བཟུང་ན་ལྟུང་བའོ། །རྒྱུད་དང་སོ་སོར་བྲལ་བ་ནི་ཉེས་བྱས། ཟེར་བ་གླིང་བུ་དང་། དུང་དང་བུད་

Vol. 165 · folio 167b

དུང་དང་། རྔ་དང་རྔ་བོ་ཆེ་སྟེ་གཟིངས་དང་། བི་དྷྲི་དང་རྔ་བེ་རི་དང་། པ་ཊ་ཧ་དང་རྔ་ཆུང་ངུ་ལག་པ་གཉིས་ཀྱིས་བརྡབ་པ་དང་། མུ་ར་བ་རྣམས་སོ། །རྫ་མ་དང་ལས་བྱས་པའི་རྔ་དང་འདི་རྣམས་ལ་རེག་ནའང་ལྟུང་ངོ་། །གཞུ་རྒྱུད་དང་བཅས་ནའོ། །གཞུ་རྒྱུད་དང་བཅས་པ་ལ་རེག་ནའང་ལྟུང་བར་

འགྱུར་རོ། །དེ་བཞིན་དུ་རལ་གྲི་དང་ཟོར་རལ་དང་སོ་གཅིག་པ་དང་མདུང་དང་ལག་མདུང་དང་ཨེ་ཏ་དག་གོ། །མིང་གིས་སྨོས་པ་འདི་རྣམས་སྤྱད་དུ་རུང་བ་ལ་རེག་ནའང་ལྟུང་། སྤྱད་དུ་མི་རུང་ན་ཉེས་བྱས། མདའ་དང་ལྕགས་མདའ་དང་སྟག་མདའ་མདེའུ་དང་བཅས་

པའོ། །མདའི་མིང་གིས་སྨོས་པ་འདི་རྣམས་སྤྱད་དུ་རུང་ཞིང་མདེའུ་དང་བཅས་པ་ལ་རེག་ནའང་ལྟུང་བའོ། །རིང་བསྲེལ་དང་བཅས་པའི་སྐུ་གཟུགས་ལ་ཡང་ངོ་། །ཤ་རི་རམ་ནང་ན་ཡོད་པའི་སྐུ་གཟུགས་ལ་རེག་ནའང་ལྟུང་བ། ཉེས་མེད་པ་ནི་དེར་སྟོན་པའི་འདུ་

ཤེས་གཞན་ནོ། །ཤ་རི་རམ་ཡོད་པའི་གཟུགས་ཁྱིམ་པའམ་དགེ་སྦྱོང་མེད་ན་སྟོན་པ་ཡིན་པར་བསམས་ཤིང་མཆོད་པར་གཟུང་བ་ནི་ཉེས་མེད་དོ། །ནོར་བུ་དང་ཟན་དང་སོག་མའི་ཕྲེང་བ་དང་ཆུ་སྦྲང་དང་མ་ཏིལ་གྱི་སྦལ་སྐད་དང་བལ་གཞུ་དང་མདེའུ་གཞུ་ནི་ཕྱེད་དོ། །མིང་གིས་

སྨོས་པ་འདི་རྣམས་ལ་རེག་ཅིང་བྱས་ནའང་ཉེས་བྱས་སོ། །གསེར་གྱི་ཐུ་ལུམ་མོ་མཁོ་བའོ། །གསེར་དང་དངུལ་གྱི་གར་བུ་དང་སྦྲམ་དང་གསེར་ཕྱེ་དང་དགོག་ལ་སོགས་པ་བྱད་དུ་མ་བྱས་པ་ལ་རེག་པ་ནི་ཉེས་བྱས། སྔངས་ན་གཟུང་ངམ་བདག་གི་ལ་མི་གནོད་ན་དགེ་

འདུན་གྱིའམ་མཆོད་རྟེན་གྱི་གསེར་དངུལ་སྦོས་ཏེ་སོང་ཤིག་འཇིགས་པའི་རྐྱེན་ཅིག་བྱུང་སྟེ་དཀོན་མཆོག་གསུམ་གྱི་དཀོར་གསེར་དངུལ་ལམ་རིན་པོ་ཆེ་ལ་སོགས་པ་བཀྲམ་པའམ་མ་བྲུབས་པ་ལ་བདག་གིས་བྲུབ་ཅིང་གཞུག་ནུས་པ་ཙམ་གྱིས་ཆོད་ན་བྲུབས་ཏེ་

སྡུས་ལ་སོང་ཤིག་རེག་ཀྱང་ཉེས་མེད་དོ། །དད་པའམ་དགེ་སྦྱོང་གིས་སོ། །ལྟག་མ་ལྟར་བྲུབ་པ་དགེ་སྦྱོང་དང་ཁྱིམ་པ་ཡོད་ན་བདག་གིས་མ་རེག་པར་ཁྱིམ་པ་དང་དགེ་སྦྱོང་བྱེད་དུ་གཞུག །མེད་ན་བདག་གིས་སོ། །དཀོན་མཆོག་གི་དཀོར་བྲུབ་པ་ཁྱིམ་པ་དང་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words