ཚད་མ་རྣམ་འགྲེལ་གྱི་རྒྱན་གྱི་འགྲེལ་བཤད

Sanskrit title (Tibetan script, as in the text) པྲ་མཱ་ཎ་བརྟི་ཀཱ་ལངྐ་ར་ཊཱི་ཀཱ

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 180 · folio 270b

ལས་ནི་མ་ཡིན་ལ་རིག་བྱ་ཐ་དད་པ་མ་ཡིན་ནོ། །ཁྱད་པར་ནི་གཞན་ཁྱད་པར་དུ་བྱེད་པ་ཡིན་ནོ། །དེའི་ཕྱིར་ཕྱི་རོལ་ཞེས་འཛིན་པ་ལས་ཐ་དད་པར་འཛིན་པ་ཡིན་ནོ་ཞེས་བྱ་བའི་དོན་ཏོ། །མེད་པར་ཞེས་བྱ་བ་ནི། རིག་པ་ཞེས་བྱ་བའི་བྱེད་པ་འདི་དང་སྦྱར་བར་བྱའོ། །ལྟོས་པ་ཡོད་མིན་ན་ཞེས་བྱ་བ་ནི། དེའི་ངོ་བོའི་ལྟོས་

པའོ།། །དོན་དམ་དུ་སྟེ། མངོན་སུམ་དུ་སྣང་བས་སོ། །ཀུན་རྫོབ་ནི་རྟག་པ་ཅན་གྱི་མངོན་པའི་ང་རྒྱལ་གྱིས་རྣམ་པར་དཔྱོད་པ་སྟེ་རྣམ་པར་རྟོག་པའི་བྱེད་པ་ཁོ་ན་རང་གི་རྣམ་པ་ལ་ཕྱི་རོལ་བ་ཉིད་དུ་འཛིན་པ་ཡིན་གྱི་འདི་ལ་གཟུང་བ་ནི་མེད་དོ། །ཡོད་ཀྱང་རང་གི་མཚན་ཉིད་ལས་ཁྱད་བར་མེད་པར་ཐལ་བར་འགྱུར་ཏེ།

བརྗོད་བྱ་མ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །ཁུ་ཁྲག་གི་ལུས་ནི་ནུར་ནུར་པོ་ལ་སོགས་པ་ཡིན་གྱི་མྱོས་པའི་ནུས་པ་བཞིན་དུ་ནུས་པ་ནི་ནུས་པ་མ་ཡིན་ནོ། །རྣམ་ཤེས་ལུས་ལ་བརྟེན་པའི་ཕྱིར་ཤེས་པའི་ནུས་པས་རྟེན་ལུས་གཡོ་བ་ཡིན་གྱི། དེ་མེད་ན་ཤི་བའི་ལུས་ནི་མ་ཡིན་ནོ་ཞེས་བྱ་བ་ནི་མི་

རིགས་སོ། །རེག་པའི་རྣམ་ཤེས་ཁྱད་པར་ཅན་ནི་འབད་པ་སྟེ་ནང་གི་རེག་བྱའི་རྣམ་པའི་རྣམ་ཤེས་ཉིད་ཡིན་ལ་དེ་ཡང་ཀ་བ་ལ་སོགས་པ་ལ་མེད་དོ་ཞེས་བའི་དོན་ཏོ། །ཤེས་པ་ནི་བདེ་བ་ལ་སོགས་པ་དང་སྡུག་བསྔལ་ལ་སོགས་པ་ཙམ་རིག་བྱ་ཡིན་པའི་ཕྱིར་ཁྱེད་ཀྱི་ལ་ཡང་སྐྱོན་མཚུངས་པ་མ་ཡིན་

ནམ་འདོད་ཆགས་དང་བྲལ་བ་ཡང་གཞན་གྱི་འདོད་ཆགས་རིག་པས་འདོད་ཆགས་ཅན་དུ་འགྱུར་རོ་སྙམ་དུ་སེམས་པ་ནི། ཁྱེད་ལ་ཡང་ཞེས་བྱ་བའོ། །ཕྱི་རོལ་ཉིད་ཤེས་པའི་བདག་ཉིད་ཡིན་པར་ནི་ཁོ་བོ་ཅག་འདོད་པ་མ་ཡིན་གྱི་འོ་ན་ཅི་ཞེ་ན། ཕྱི་རོལ་ལ་སོགས་པའི་ཚོགས་པ་ལས་དེ་དང་འདྲ་

བའི་ཤེས་པ་སྐྱེ་བ་ཡིན་ནོ། །དེའི་ཕྱིར་དེ་ཉིད་ཡིན་པར་མི་འགྱུར་ལ་བདག་ཉིད་ཐམས་ཅད་ཀྱིས་འདྲ་བ་ཡང་མ་ཡིན་ཏེ། ཕྱི་རོལ་དང་ཅིག་ཤོས་ལ་སོགས་པ་བཞིན་དུ་ཁྱད་པར་ཡོད་པ་ཡིན་ནོ་ཞེས་བསྟན་པ་ནི། དེའི་རྣམ་པ་ཅན་གྱིས་ཞེས་བྱ་བའོ། །འོན་ཏེ་ཡན་ལག་ཅན་ཉིད་ཤེས་པ་ལས་ཐ་མི་

དད་པའི་ཕྱིར་དམིགས་པ་ཉིད་ཀྱི་རྟེན་ཡིན་གྱི་རྡུལ་ཕྲ་རབ་དག་ནི་ཞེས་བྱ་བའོ། །ཤེས་པའི་དམིགས་པའི་འབྲས་བུ་ལས་ཐ་དད་པས་དེ་རྟོགས་བྱ་མ་ཡིན་པའི་ཕྱིར་དང་རྟོགས་པ་གཞན་མེད་པའི་ཕྱིར་དེའི་ཕྱེད་དེ་རྣམས་རྡུལ་ཕྲ་རབ་རྣམས་མེད་པ་ཉིད་དུ་འགྱུར་བར་བསྟན་པ་ནི་མེད་པ་ཉིད་ཅེས་བྱ་བའོ། །མི་ཤེས་

Vol. 180 · folio 271a

པའི་བདག་ཉིད་ཡིན་པའི་ཕྱིར་ཤེས་པའི་བདག་ཉིད་ཀྱི་ལུས་ནི་གཞན་དུ་མི་འཐད་པས་ཀྱང་བརྟག་བྱ་མ་ཡིན་པར་རྟོགས་པར་འདོད་པས་དེ་བསྟན་པ་ནི། ཕྲ་རབ་རྡུལ་རྣམས་ལུས་ཀྱི་ནི། །ཞེས་བྱ་བ་སྟེ། ལུས་ཀྱི་དེའི་རིགས་སུ་རྟོགས་པ་ཡིན་ན། རྡུལ་ཕྲ་རབ་རེ་རེ་ནས་རིག་པར་བྱེད་པར་འགྱུར་

བ་ཡིན་ཏེ། རྣམ་ཤེས་ཀྱི་བདག་ཉིད་ཡིན་པའི་ཕྱིར་རོ། །དེ་ལྟ་བུའི་ལུས་ཀྱི་དེ་འདྲ་བའི་རིགས་སུ་ཅིའི་ཕྱིར་རྟོག་པ་ཡིན་ཞེས་བསྟན་པ་ནི། ཕྲ་རབ་རྡུལ་རྣམས་ཀྱི་ངོ་བོ་ཉིད་དུ་ཞེས་བྱ་བ་སྟེ། ཕྱེད་སྔ་མས་ནི་རྣམ་ཤེས་ཀྱི་བདག་ཉིད་ཀྱི་རྡུལ་ཕྲ་རབ་ཀྱིས་བྱས་པའི་ཕྱིར་ཞེས་རྡུལ་ཕྲ་རབ་རྣམས་

རྟོགས་བྱ་ཉིད་དུ་བརྗོད་ལ་ཕྱི་མས་ནི་བྱེད་པ་པོ་རྣམས་སོ། །དེའི་ཕྱིར་དེ་ལྟར་རྡུལ་ཕྲ་རབ་བཀག་པས་ཡན་ལག་མ་ལུས་པ་བཀག་ནས་དེའི་ཕྱིར་ཞེས་བྱ་བ་སྨོས་སོ། །གཡོ་བ་དང་མི་གཡོ་བའི་སྐྱོན་ཁོ་ནས་སུན་འབྱིན་པ་ཡིན་ན་བསྒྲིབས་པ་དང་མ་བསྒྲིབས་པ་ལ་སོགས་པས་ཅི་དགོས་སྙམ་དུ་

སེམས་པ་ལ། ཡན་ལག་ཅན་གྱི་རང་བཞིན་གྱི་རྫས་ཞེས་བྱ་བ་སྨོས་སོ། །ཕྲད་པ་ལ་སོགས་པའི་རྒྱུ་ཡིན་པའི་འདུ་བའི་རྒྱུར་འགྱུར་རོ་ཞེས་བྱ་བའི་དོན་ཏོ། །བྱ་བ་ཅན་ཞེས་བྱ་བ་ནི་ཡན་ལག་ཅན་བསྒྲིབས་པ་ན་ཞེས་བྱ་བའོ། །ཡོན་ཏན་ཅན་ཞེས་བྱ་བ་ནི་གཅིག་ཚོན་གྱིས་བསྒྱུར་ན་ཞེས་

བྱ་བས་སུན་ཕྱུང་བར་བསྟན་བ་ནི། ཚོན་གྱིས་བསྒྱུར་བ་ལ་ཡང་ཞེས་བྱ་བའོ། །ཡང་ན་གལ་ཏེ་སེམས་ཀྱི་ཉེ་བར་ལེན་པ་ལུས་ཡིན་ན་ཤི་བ་ལ་ཡང་འགྱུར་ཏེ་ཉེ་བར་ལེན་པ་ཡོད་པའི་ཕྱིར་རོ་ཞེས་བྱ་བར་རིགས་ལ་ཉེ་བར་ལེན་པ་ཡན་ལག་ཅན་ནི་ཉེས་པ་མི་མཉམ་བ་ལ་སོགས་པས་ལྡོག་པ་

ཡིན་པའི་ཕྱིར་ཞེས་བྱ་བ་ནི་མི་རིགས་ཏེ་འཚོ་བའི་གནས་སྐབས་ན་ཡང་ཚེར་མས་ཕུག་པ་ལ་སོགས་པས་ལུས་ཀྱི་ཡན་ལག་ཅན་ལྡོག་པས་འཆི་བར་ཐལ་བར་འགྱུར་བའི་ཕྱིར་རོ། །སྣང་བར་མངོན་པར་འདོད་པའི་ཡན་ལག་ཅན་ཁྱབ་བྱེད་ནི་ཉེ་བར་དམིགས་པ་ཡོད་པ་ནི་མ་ཡིན་ལ་དེའི་

ཡོད་པར་ཐ་སྙད་བྱེད་པ་ཡང་ཉེ་བར་དམིགས་པར་བྱེད་པ་མ་ཡིན་གྱི་འདི་ཡོད་དོ་ཞེས་བྱ་བ་བཀག་པ་ཡིན་ནོ། །གཅིག་ཏུ་འཛིན་པར་ཡུལ་རགས་པ་རྣམས་མ་ཡིན་ནམ། ཇི་ལྟར་ཉེ་བར་དམིགས་པ་སྣང་བ་ཡིན། འཕེན་སེལ་མེད་པ་ནི་སྟེང་འོག་ལ་སོགས་པའི་ཆ་ཐ་དད་ཀྱང་གཅིག་ཏུ་སྣང་

Vol. 180 · folio 271b

བ་ཡིན་གྱི་དུ་མར་ནི་མ་ཡིན་ཏེ། རྒྱ་ཁྱོན་ཆེ་བར་དམིགས་པའི་རྒྱུ་མཚན་ནི་ཆེ་བ་ཉིད་ཡིན་པའི་ཕྱིར་རོ། །ཇི་ལྟར་ནགས་ཀྱི་ཕྲེང་བ་རྒྱུ་མཚན་མ་ཡིན་པ་ནི་སོ་སོ་བར་མི་འཛིན་བ་མ་ཡིན་ནམ་དེ་བཞིན་རྡུལ་ཕྲ་རབ་ཀྱི་རྒྱུ་མཚན་ལས་སྣ་ཚོགས་པ་ཉིད་དུ་མཚོན་པའི་ཐ་དད་པ་རྣམས་ཁོ་ན་གཅིག་ཏུ་འཛིན་པའི་

ཡུལ་ཡིན་པར་མི་རིགས་ཏེ། སྣ་ཚོགས་པ་ཉིད་དུ་འཛིན་པའི་ཕྱིར་རོ། །ནགས་ལ་སོགས་པ་ལ་ནི་ཉེ་བ་ན་གནས་པས་དེ་འཛིན་པར་ཡིན་ནོ་སྙམ་དུ་སེམས་པ་ལ་ཡན་ལག་ཅན་འཛིན་པ་ཡིན་པ་ལ་གནོད་པ་ཅན་བསྟན་པ་ནི། ལག་སོགས་གཡོ་ན་ཞེས་བྱ་བ་སྟེ། གང་ལ་དམིགས་པས་སྣ་ཚོགས་པ་ཉིད་དུ་ཉེ་བར་

མཚོན་པ་དེ་ལ་དམིགས་པས་ཐ་མི་དད་པར་ཤེས་པ་ཡིན་ལ་དེའི་དམིགས་པ་ཡང་ཡན་ལག་རྣམས་ཁོ་ན་ཡིན་གྱི་གཞན་མ་ཡིན་པའི་ཕྱིར་ལག་པ་ལ་སོགས་པ་ཐ་དད་པ་གཡོ་བ་ཡིན་ན་ཐམས་ཅད་གཡོ་བར་འགྱུར་ཏེ་དེ་དང་ཐ་མི་དད་པའི་ཕྱིར་རོ། །ཁྱབ་བྱ་ལས་ཐ་མི་དད་པས་ཁས་བླངས་པ་ཡིན་པས་

ཁྱབ་བྱེད་དུ་ཁས་ལེན་པ་ཡིན་ནོ། །གཡོ་བཞིན་པ་ལས་ཐ་མི་དད་པ་གཡོ་བ་ཁོ་ནར་སྣང་བར་འགྱུར་བ་དེ་ལྟར་མི་སྣང་ན་ཐ་དད་པ་ཡིན་པའི་ཕྱིར་ཁྱབ་པར་བྱེད་པ་མེད་དོ། །ཕྱོགས་གཅིག་འཛིན་པས་ཀྱང་ཡན་ལག་ཅན་འཛིན་པ་ཁོ་ན་ཡིན་པར་དགོངས་པ་ཡིན་པར་ཉེ་བར་མཚོན་པར་བྱེད་པ་

གཡོ་བ་དང་ཅིག་ཤོས་མཐོང་བས་དམིགས་པ་ནི་དེ་བཞིན་དུ་ཐ་མི་དད་པ་ལ་ཡང་གཅིག་ཏུ་མ་དམིགས་ན་ཐམས་ཅད་མ་དམིགས་པར་འགྱུར་རོ། །ཉེ་བར་དམིགས་པ་ཡང་ཡིན་ན་ཐ་དད་པའི་ཕྱིར་ཁྱབ་པར་བྱེད་པ་མེད་པར་བསྟན་པ་ནི་གཅིག་ཅེས་བྱ་བ་ནི་གཡོ་བའོ། །སྔ་མ་དང་ཕྱི་མའི་ངོ་བོས་གཅིག་པ་

ཡིན་པའི་ཕྱིར་སོ་སོར་སྣང་བ་ཐ་དད་པར་ཉེ་བར་མཚོན་པར་བྱེད་པ་རང་གི་འདོད་པས་བསྟན་པ་ནི། ཚོན་གྱིས་ཞེས་བྱ་བ་སྟེ་ཚོན་གྱིས་བསྒྱུར་བ་གཅིག་སྣང་བ་ན་དེ་དང་ཐ་མི་དད་པ་ཡང་མ་ཡིན་པ་བཞིན་དུ་སྣང་བར་འགྱུར་ཏེ། ཐ་མི་དད་པ་ཁྱབ་བྱ་ཡིན་ན་ནི་དེར་སྣང་བ་ཡོད་ན་ནི་སྣང་བའི་ཁྱབ་བྱེད་དུ་འགྱུར་རོ། །

དེ་མེད་ན་ཡང་ཁྱབ་བྱ་དང་ཐ་དད་པ་མེད་པར་འགྱུར་རོ། །འོན་ཏེ་ཡན་ལག་རྣམས་ཉིད་གཡོ་བ་ལ་སོགས་པ་དང་ལྡན་པ་ཡིན་གྱི་ཡན་ལག་ཅན་ནི་མ་ཡིན་ན་གཞན་དམིགས་པ་མ་ཡིན་ལ་སྣ་ཚོགས་པ་ཉིད་དུ་དམིགས་པའི་མཚན་ཉིད་ཀྱི་ཡུལ་ལ་ཐ་དད་པ་མེད་པར་ཤེས་པ་མ་ཡིན་ནོ། །

Vol. 180 · folio 272a

གཡོ་བ་དང་བསྒྲིབས་པ་ལ་སོགས་པ་ནི་ཁྱབ་བྱ་ལ་འཇུག་པའི་ཕྱིར་དེ་དང་ལྡན་པ་ཉིད་དུ་ཅིག་ཤོས་ཐ་དད་པ་ལས་མ་ཡིན་པ་མ་ཡིན་ནམ། བདག་དང་ནམ་མཁའ་ལ་སོགས་པ་བཞིན་དུ་བློ་དང་སྒྲ་ལ་སོགས་པ་ཞེས་བྱ་བར་ནི་མི་རིགས་ཏེ། གཅིག་ཉིད་ཡིན་ན་མ་ཁྱབ་པར་མི་རིགས་པའི་ཕྱིར་

དང་ངོ་བོ་གཞན་མེད་པའི་ཕྱིར་དེའི་ཕྱིར་སོ་སོར་སྣང་བ་ཕན་ཚུན་རྗེས་སུ་འཇུག་པ་མ་ཡིན་པས་རྒྱ་ཆེ་བ་ནི་ཐ་དད་པ་ཉིད་ཅེས་བྱ་བའི་དོན་ཏོ། །སོ་སོར་སྣང་བ་ཐ་དད་པའི་རིགས་པ་འདི་ཁོ་ན་ལས་ཚོགས་པ་གཅིག་པ་སྟེ་ཕྲད་པ་ནི་ཚོགས་པ་ཅན་མ་རྟོགས་པ་གསལ་བ་ཡིན་པར་བསྟན་པ་ནི། གཅིག་ཡོད་མིན་ཞེས་བྱ་

བའོ། རྡུལ་ཕྲ་རབ་རེ་རེ་རིག་པར་ཐལ་བར་འགྱུར་བ་ནི། རེ་རེ་ནུས་པ་ཉིད་ཡིན་ན། ཅིག་ཅར་མང་པོ་འབྱུང་བར་འགྱུར། །ཞེས་འཆད་པར་འགྱུར་བ་མ་ཡིན་ནམ། ཇི་ལྟར་སྔ་མ་བཞིན་ཞེས་རྗོད་པར་བྱེད་ཅེ་ན། སྐྱོན་མེད་དེ། དེའི་ཕྱིར་ཐམས་ཅད་ས་བོན་དངོས་ཤེས་པར་བསྟན་པའི་ཕྱིར་རོ། །རྡུལ་ཕྲ་རབ་

རྣམས་རེ་རེ་ནས་དམིགས་པ་མ་ཡིན་ཏེ། ཆེས་ཕྲ་བའི་ཕྱིར་རོ་འདུས་པ་ལ་ཡང་དེ་རྣམས་ཉིད་འདི་དག་ཡིན་པའི་ཕྱིར་ཕུལ་དུ་བྱུང་བ་མེད་པས་དམིགས་པ་མེད་པ་ཉིད་ཡིན་ལ་རྟེན་ཉིད་ནི་དེའི་ཉེ་བར་ལེན་པ་ཉིད་ཡིན་ནོ་སྙམ་དུ་སེམས་པ་ནི། ཁྱད་པར་མེད་པའི་ཕྱིར་ཞེས་བྱ་བ་སྟེ། དམིགས་བྱ་མ་ཡིན་པ་ཤ་ཟ་

ལ་སོགས་པ་རྣམས་འདུས་ནས་ཡང་དམིགས་བྱར་མི་རུང་ཞེས་བྱ་བའི་དོན་ཏོ། །ཁྱད་པར་ཅན་རྣམས་ཞེས་བཤད་པ་ནི་རིགས་པའི་གནས་སྐབས་ན་ཡང་ཞེས་བྱ་བའོ། །དབང་ཡུལ་ཞེས་བྱ་བའི་བཤད་པ་ནི། དམིགས་པ་ཡིན་པའི་ཕྱིར་རོ་ཞེས་བྱ་བའོ། །ཁྱད་པར་མེད་པའི་ཕྱིར་མི་དམིགས་པ་ཉིད་མ་

ཡིན་ནོ་ཞེས་བྱ་བས་ཕ་རོལ་པོས་སྨྲས་པ་བཀག་པ་ཡིན་ནོ། །འདུས་བའི་གནས་སྐབས་ན་ནི་རྡུལ་ཕྲ་རབ་ཀྱི་ཡུལ་མ་ཡིན་ཏེ། སྣམ་བུ་ལ་སྣལ་མའི་ཐ་སྙད་བཞིན་དུའོ་ཞེས་བྱ་བ་ལྟ་བུའོ་ཞེས་སླར་སེལ་བ་བསྟན་པ་ནི། དེ་ཉིད་ཀྱི་ཕྱིར་ཞེས་བྱ་བ་སྟེ། རྡུལ་ཕྲ་རབ་ཀྱི་ཐ་སྙད་ཀྱི་ཡུལ་ཉིད་ནི་འདི་ཁོ་ན་ཡིན་

ཏེ་གཞན་མེད་པའི་ཕྱིར་རོ། །ཐ་སྙད་གཞན་མེད་ན་དེ་ཉིད་ཁོ་ན་འདོར་བ་ཡང་མ་ཡིན་ནོ། །དེའི་ཕྱིར་ཉེ་བར་དམིགས་པ་ལ་གེགས་མི་བྱེད་པ་ཉིད་འོ་ན་རྡུལ་ཕྲ་རབ་ཡིན་ཞེས་བྱ་བའི་དོན་ཏོ། །ཡང་ན་སེམས་ཀྱི་ཉེ་བར་ལེན་པ་འབྱུང་བ་ཡིན་ན་ཕྱི་རོལ་གྱི་འབྱུང་བ་རྣམས་ལ་ཡང་ཐལ་བར་འགྱུར་ཏེ་ཐལ་ཆེས་

Vol. 180 · folio 272b

པའི་ཕྱིར་རོ་ཞེས་བྱ་བ་ལ་སོགས་པ་འགྱུར་བ་ཡིན་པར་བསྟན་པ་ནི་སྔ་མ་བཞིན་ཞེས་བྱ་བའོ། །འོན་ཏེ་ལུས་ཀྱི་རྣམ་པའི་ཁྱད་པར་མེད་པའི་ཕྱིར་ཕྱི་རོལ་ལ་སེམས་པ་ཅན་མེད་དེ་ཁྱད་པར་མེད་པ་ལས་ཀྱང་རྡུལ་ཕྲ་རབ་ཉིད་ཡིན་ནོ། །དེའི་ཕྱིར་ཡང་རྟོགས་པ་མ་ཡིན་ཏེ། སེམས་རྟེན་པ་འཛིན་པར་བྱེད་པ་

ཉིད་ཀྱིས་ཡིན་ནོ་སྙམ་དུ་སེམས་པ་ནི། ཁྱད་པར་མེད་པའི་ཕྱིར་ཞེས་བྱ་བའོ། །ལུས་ཀྱི་རྣམ་པ་ནི་ཤི་བའི་ལུས་ལ་ཡང་ཡོད་པའི་ཕྱིར་སེམས་སུ་ཐལ་བར་འགྱུར་བར་བསྟན་པ་ནི། ཤི་བའི་ལུས་ལ་ཡང་ལུས་ཀྱི་རྣམ་པའི་ཁྱད་པར་མེད་པར་མ་གྲུབ་པའི་ཕྱིར་གང་ལ་དེའི་ཁྱད་པར་མེད་པ་ཁོ་ནས་རྡུལ་

ཕྲ་རབ་ཉིད་ཡིན་ལ་དེའི་ཕྱིར་སེམས་ཀྱི་དམིགས་པ་ཁོ་ན་ཉིད་ཀྱིས་བརྟེན་པ་ཉིད་ཅེས་བྱ་བ་ནི་མ་ཡིན་ནོ་ཞེས་བྱ་བ་དེ་ལ། ཁྱད་པར་ཅན་རྣམས་ཞེས་བྱ་བ་སྨོས་ཏེ། ཕུལ་དུ་བྱུང་བ་ཅན་རྣམས་མེད་ཀྱང་ཕྱི་རོལ་གྱི་འདུས་པ་རྣམས་དབང་ཡུལ་ཉིད་དེ་དབང་པོའི་གཟུང་བ་ཉིད་དམིགས་བྱ་ཉིད་ཡིན་ནོ།

དེའི་ཕྱིར་ཤེས་པའི་དམིགས་པ་ཉིད་དུ་རྡུལ་ཕྲ་རབ་ཉིད་མ་ཡིན་ནོ་ཞེས་བྱ་བའི་དོན་ཏོ། །དབང་པོའི་གཟུང་བ་ཉིད་རྡུལ་ཕྲ་རབ་རྣམས་སོ་སོ་ལ་མེད་ཀྱང་འདུས་པ་ཉིད་ལ་སྒྲ་ལ་སོགས་པ་བཞིན་དུ་ཡོད་པ་མ་ཡིན་ནམ་སྙམ་དུ་ཐོགས་པ་ནི་མ་ཡིན་ཏེ། ཆེན་པོའི་འབྲས་བུ་མ་ཡིན་པའི་ཕྱིར་རོ། །ཆེན་པོ་གཅིག་

ནི་དེ་ལྟར་འགྱུར་བ་མ་ཡིན་ཏེ། གསེང་མེད་པའི་ཕྱིར་རོ་སྙམ་དུ་སེམས་པ་ནི། གལ་ཏེ་རྡུལ་ཕྲ་རབ་ཙམ་ཡིན་ན་ཞེས་བྱ་བའོ། །སྣང་བ་ཉིད་ལས་ཐ་དད་པ་ཕུལ་དུ་ཕྱུང་བ་གཞན་ལ་སྒྲིབ་པ་ལ་སོགས་པ་རྒྱུ་མ་ཡིན་པར་བསྟན་པ་ནི། འདིས་ནི་སྒྲིབ་བྱེད་ཅེས་བྱ་བའོ། །སྣང་བ་ཉིད་ཕུལ་དུ་བྱུང་བ་ཁོ་ནས་

ཐོགས་པ་ལ་སོགས་པའི་འབྲས་བུ་འབྱུང་བ་གཞན་མེད་ཀྱང་མཐོང་བ་ཡིན་པར་བསྟན་པ་ནི། དངུལ་ཆུ་གསེར་སོགས་ཞེས་བྱ་བ་སྟེ། དངུལ་ཆུ་གསེར་ལ་ཞུགས་པ་ནི་རྡུལ་ཕྲ་རབ་ཀྱི་བར་དུ་ཐ་དད་པ་མ་ཡིན་པའི་ཡན་ལག་ཅན་ཡིན་ལ་གསེར་ཡང་རྫས་སུ་མ་བརྩམས་པ་ཡིན་ཏེ། རིགས་མཐུན་པ་མ་ཡིན་པའི་ཕྱིར་ཐོགས་པ་དང་

བཅས་པའི་དམིགས་བྱར་མཐོང་བ་མ་ཡིན་ཏེ། དེ་ལ་ཕུལ་དུ་བྱུང་བ་ཡོད་པའི་ཕྱིར་རོ། །དེ་བཞིན་དུ་རྡོ་བསྲེགས་པ་ཡང་ཡིན་ནོ། །དེ་འདིས་ནི་རྡོ་དང་འབར་བའི་རྫས་ཉིད་མ་ཞིག་པ་ཐོགས་པ་དང་བཅས་པ་འདྲེས་པ་ཡིན་ཞེས་བྱ་བ་གསལ་བ་ཡིན་ནོ། །ཡན་ལག་སོ་སོ་བ་ཡིན་ནོ་ཡན་ལག་རེ་རེ་འདྲེས་པ་མ་ཡིན་ཏེ་

Vol. 180 · folio 273a

ཁབ་ལ་སོགས་པས་བཞིན་དུ་ཡན་ལག་རྣམས་དྲུབ་པ་མ་ཡིན་པའི་ཕྱིར་ཐོགས་པ་མེད་པར་བརྗོད་དུ་གལ་ཏེ་རྡུལ་ཕྲ་རབ་ཙམ་སོ་སོར་ནི་དབང་པོ་ལས་འདས་པ་ཡིན་ན་འདུས་པ་ཇི་ལྟར་དབང་ཡུལ་ཡིན་ཞེ་ན། དབང་སོགས་སོ་སོར་ཞེས་བྱ་བ་སྟེ། དབང་པོ་ལས་འདས་པའི་

དབང་པོ་ཡང་དམིགས་བྱའི་ཤེས་པ་སྐྱེད་པར་བྱེད་པ་མཐོང་བ་ཡིན་ཞེས་བྱ་བའི་དོན་ཏོ། །འོན་ཏེ་དབང་པོ་ལ་སོགས་པ་སོ་སོར་ནུས་པ་མེད་ཀྱི། དངོས་པོ་གཞན་ཕྲད་པ་ཡོད་ན་ནུས་པར་འགྱུར་རོ་ཞེ་ན། འདིར་ཐལ་མཚུངས་ཞེས་བྱ་བ་སྟེ། ཕུལ་དུ་བྱུང་བ་མ་སྐྱེས་ན་ཕྲད་པ་ཉིད་དུ་མི་བྱེད་ལ་གཞན་ནི་དེ་རྒྱུ་མ་

ཡིན་ཏེ། དེས་བྱས་པ་ཉིད་ཡིན་ན་འདིའི་ཞེས་བྱ་བའི་འབྲེལ་པ་མེད་པའི་ཕྱིར་རོ། །དེ་དང་འདུ་བ་ལས་ཡིན་ནོ་ཞེ་ན། དེ་ཉིད་འདི་རྒྱུ་ཉིད་ཡིན་བའི་ཕྱིར་རྟོགས་པ་བཞིན་དུ་དེ་ཡང་མི་འགྱུར་རོ་ཞེས་བྱ་བའི་དོན་ཏོ། །གསེར་དང་དངུལ་ཆུ་ལ་སོགས་པ་ཕན་ཚུན་ཐ་དད་པས་རྡུལ་ཕྲ་རབ་རྣམས་ནི་འབྲས་བུ་

རྩོམ་པ་མ་ཡིན་པའི་ཕྱིར་དབང་པོ་ལས་འདས་པ་མ་ཡིན་ནམ་མངོན་སུམ་པ་ནི་དོན་གཞན་ཕྲད་པ་ཡིན་ལ་དེས་ཁས་མི་ལེན་ན་རིག་པ་མེད་པར་ཐལ་བར་འགྱུར་རོ་སྙམ་དུ་སེམས་པ་ནི། ཕྲད་པ་སྣང་བ་ཞེས་བྱ་བ་སྟེ། མཐོང་བའི་ཡུལ་ཕྲད་པ་མེད་ན་གང་ཡང་མེད་པའི་ཕྱིར་དེ་རྣམས་ལ་དེའི་ནུས་པ་རྗེས་སུ་དཔོག་པ་

ཡིན་ཏེ་དབང་པོའི་ཡུལ་ཉིད་ཀྱི་ནུས་པ་ཞེས་བྱ་བའི་དོན་ཏོ། །དབང་པོའི་ཡུལ་ཉིད་ཀྱི་ནུས་པ་མེད་ན་ཕྲད་པ་མེད་ལ་རླུང་དང་ནགས་ཕྲད་པ་བཞིན་པ་དེ་རྣམས་མངོན་སུམ་དུ་འགྱུར་བ་ཡིན་པར་བསྟན་པ་ནི། ག་ལ་རྟོགས་ཞེས་བྱ་བ་སྟེ། མི་སྣང་བ་ཉིད་ནི་དོན་གཞན་ཕྲད་པ་ཉིད་ལ་གཏན་ཚིགས་མ་ཡིན་ནོ། །འོན་

ཀྱང་དེ་རྣམས་ཀྱི་དེ་ལ་ནུས་པ་བསྐྱེད་པ་ལ་ཞེས་བྱ་བའི་དོན་ཏོ། །དངུལ་ཆུ་དང་གསེར་ལ་སོགས་པའི་ངོ་བོ་སྣང་བ་གཟུགས་དང་རོ་ལ་སོགས་པར་སྣང་བ་ཕྲད་པ་དང་འགལ་བར་བསྟན་པ་ནི། རོ་གཟུགས་ལ་སོགས་ཕྲད་པ་འགའ། །ཞེས་བྱ་བ་སྟེ། གཟུགས་ལ་སོགས་པ་དང་ལྡན་པར་སྣང་བ་ནི། ཡོངས་

སུ་བརྟགས་བའི་ཕྲད་པ་དང་འགལ་བ་ཡིན་ཏེ། དྲོ་བ་དང་གྲང་བ་ལྟ་བུའོ་ཞེས་བྱ་བའི་དོན་ཏོ། །འོན་ཏེ་རྟེན་ལ་ཡོད་པ་དེའི་བརྟེན་པ་ཕྲད་པ་ལ་ཉེ་བར་བརྟགས་པ་ཡིན་ཏེ། ཁྲི་ལ་འདུག་པ་ལ་ཁྲིའི་སྒྲ་ལྟ་བུའོ་ཞེས་ཟེར་བ་ན། ཉེ་བར་བཏགས་པ་ལས་ཞེས་བྱ་བའོ། །ཁྲི་དང་དེ་ལ་འདུག་པ་ཁོ་ན་བཞིན་དུ་རྡུལ་

Vol. 180 · folio 273b

ཕྲ་རབ་དང་དེའི་ཕྲད་པ་དག་སོ་སོར་སྣང་བ་ཐ་དད་པར་འགྱུར་ལ་དེ་རྣམས་རྟག་ཏུ་མ་དམིགས་པ་ཡིན་ན་གཟུགས་བཞིན་དུ་དམིགས་བྱ་ཡིན་པར་ཉེ་བར་བཏགས་པ་མ་ཡིན་ནོ། །ཉ་ཕྱིས་ལ་དངུལ་བཞིན་དུ་ལྷག་པར་སྒྲོ་འདོགས་པ་ཡང་འདིས་བསལ་བ་ཡིན་ནོ། །དཀར་པོ་ལ་སེར་པོའི་ཤེས་པའི་རིགས་

པ་ཡང་ཐ་དད་པར་མཐོང་བ་མེད་ན་མི་རིགས་སོ་ཞེས་བྱ་བའི་དོན་བསྟན་པ་ནི། བློ་ཐ་དད་པར་ཞེས་བྱ་བ་སྟེ། གཟུགས་བཞིན་དུ་གཅིག་ནི་བསགས་པ་ཡིན་པའི་ཕྱིར་རྡུལ་ཕྲ་རབ་འདུས་པ་ཙམ་ཕུལ་དུ་བྱུང་བ་སྐྱེས་པའི་དབང་པོའི་ཡུལ་ཡིན་ཞེས་བྱ་བའི་དོན་ཏོ། །གཟུགས་ལ་སོགས་པ་དང་ལྡན་པ་

སྣང་བ་མིན་པའི་ཕྱིར་ཕྲད་པ་ནི། སྣང་བ་འབའ་ཞིག་མ་ཡིན་ཏེ། དེ་ལས་གཞན་པ་ཕྲེང་བ་ལ་སོགས་པའི་ཚད་ཀྱི་ཡོན་ཏན་གཞན་མཐོང་བའི་ཕྱིར་ཞེས་བྱ་བ་ལ། ཕྲེང་རིང་ཞེས་བྱ་བ་སྨོས་ཏེ། ངེས་པ་ཅན་གྱི་ཕྱོགས་དང་ཡུལ་རྣམས་ལ་དངོས་པོ་རྣམས་མ་ཕྲད་པ་ཡིན་ཡང་ཕྲེང་ཞེས་བྱ་བ་ནི་གྲངས་མང་

པོ་ཉིད་ཡིན་ཡང་ཚད་དང་ལྡན་པ་མ་ཡིན་ལ་ཉེ་བར་བཏགས་པ་ཡང་མ་ཡིན་ཏེ། ཇི་སྐད་བསྟན་པའི་རིགས་པ་ལས་སོ། །དེ་འདི་ཕྲད་པ་ལ་སོགས་པ་ཁས་བླངས་ནས་གཟུགས་ལ་སོགས་པའི་ཡོན་ཏན་དང་འབྲེལ་པ་མེད་པས་དེ་དང་ལྡན་པའི་ཤེས་བྱ་གཞན་མིན་པར་ཡིན་ལག་ཅན་སྤངས་

པ་བརྗོད་ནས་ད་ནི་གཟུགས་དང་རོ་ལ་སོགས་པའི་ངེས་པར་སྣང་བས་གཞན་གྱི་སྣང་བ་མེད་པ་ནི་མེད་པའི་ཐ་སྙད་དུ་བརྗོད་པ་ཡིན་ནོ། །གྲངས་དང་ཕྲད་དང་ཞེས་བྱ་བ་སྟེ། ཐག་ཉེ་བའི་དངོས་པོ་གཉིས་དང་དེའི་བརྡ་ལས་བྱུང་བའི་སྒྲ་ཡང་སྣང་བ་ཡིན་གྱི་ཕྲད་པ་གཞན་ནམ་དེའི་སྒྲ་ཡང་མ་ཡིན་ནོ། །

དབང་པོའི་ཡུལ་ཉིད་ཀྱི་ནུས་པ་ལས་ནུས་པ་གཞན་ནི་སྒྲིབ་པ་ལ་སོགས་པའི་འབྲས་བུ་ཡིན་ནོ་ཞེས་བྱ་བ་ཕ་རོལ་པོའི་གཞུང་སྤོང་བར་བྱེད་པར་བསྟན་པ་ནི། རྡུལ་ཕྲ་རབ་རྣམས་ཞེས་བྱ་བ་སྟེ། ཡན་ལག་ཅན་གྱི་ནུས་པ་གཞན་དང་འབྲེལ་པ་ནི་དེ་ཉིད་མེད་པ་སྟེ། ཡན་ལག་ཅན་གྱི་ནུས་པ་གཞན་མེད་

ནའོ། གསེར་དང་བཅས་ཕྱིར་ཞེས་བྱ་བ་སྟེ། ཕན་ཚུན་འདྲེས་པ་ཡིན་ན་གོང་བུ་རྡུལ་ཕྲ་རབ་ཙམ་ཐལ་བར་འགྱུར་བའི་ཕྱིར་རྡུལ་ཕྲ་རབ་རྣམས་མ་འདྲེས་པ་ཡིན་པར་ཁས་བླངས་པས་རླུང་ལ་སོགས་པའི་སྒྲིབ་པར་བྱེད་པའི་སྣམ་བུ་ལ་སོགས་སྐར་ཁུང་ལྟ་བུར་འགྱུར་རོ། །གེགས་མེད་པ་ནི་

Vol. 180 · folio 274a

ཕན་ཚུན་ནང་དུ་སྟེ་ཁུང་དུ་རླུང་ལ་སོགས་པ་འཇུག་པ་གང་དག་གིས་དེ་རྣམས་དེ་ལྟ་བུར་རོ། །གང་དག་གིས་ཡན་ལག་ཅན་སྐྱེད་པར་བྱེད་པ་ཡང་ཕུལ་དུ་བྱུང་བ་སྐྱེ་བར་མི་བྱེད་ན་མི་སྲིད་པར་བསྟན་པ་ནི། རེག་པ་མེད་པར་ཞེས་བྱ་བ་སྟེ། གང་གི་ཚེ་ཡང་ཕན་ཚུན་མ་རེག་

པ་ཁོ་ན་མ་མཐོང་བ་ལས་ཉེ་བར་གནས་པའི་རྡུལ་ཕྲ་རབ་རྣམས་དོན་གཞན་བཞིན་དུ་སྒྲིབ་པ་ལ་སོགས་པར་བྱེད་པ་ཡིན་ལ་དེའི་ཚེ་ཡང་སོ་སོ་ཡིན་པ་ནི་ཚང་བའི་ཕུབ་མ་གཏོར་བ་བཞིན་དུ་མི་འགྱུར་བ་ཁོ་ནར་བསྟན་པ་ནི། རྡུལ་ཕྲན་རྣམས་ནི་འདྲེས་མིན་ཡང་། །ཞེས་བྱ་བ་སྟེ། མཐོང་བ་འདི་ཡང་ཐག་རིང་

བའི་རྒྱུ་མཚན་གྱི་སོ་སོ་བ་ཉིད་མི་འཛིན་གྱི་བར་མཚམས་མེད་པར་སྣང་བར་བསྟན་པ་ནི། ཇི་ལྟ་བར་མཚམས་དང་བཅས་པ། །ཞེས་བྱ་བ་སྟེ། རབ་རིབ་ཅན་གྱིས་སྐྲ་ཉག་རེ་རེ་མི་འཛིན་ཡང་འདུས་པ་མི་འཛིན་པ་ནི་མ་ཡིན་ནོ། །དེ་བཞིན་དུ་རྡུལ་ཕྲ་རབ་ཀྱང་མི་སྣང་བ་ཁོ་ན་སྣང་བར་འགྱུར་ཞེས་རྒོལ་བས་

གནོད་པ་ཡང་མ་ཡིན་ལ་དབང་པོ་རྣམས་ཡུལ་མ་ཡིན་པ་ལ་འཇུག་པའི་སྐྱོན་ཡང་མེད་དོ། །རབ་རིབ་ཅན་ལ་ནི་སྐྲ་རྣམས་དབང་པོའི་ཡུལ་ཉིད་དུ་དགོས་པ་ཅན་མ་ཡིན་ནོ། །རྡུལ་ཕྲ་རབ་རྣམས་ཀྱང་རྣལ་འབྱོར་པའི་དབང་པོའི་ཡུལ་ཡིན་ཞེས་ཚིག་ཡོད་པའི་ཕྱིར་རོ། །དེའི་ཕྱིར་གང་གིས་འདུས་པ་འཛིན་

པ་དེས་གཅིག་འཛིན་པ་མ་ཡིན་ཞེས་བྱ་བའི་དགོས་པ་ཅན་མ་ཡིན་ནོ། །རྡུལ་ཕྲ་རབ་ཀྱི་ཚོགས་ལ་བརྟེན་ནས་ཡན་ལག་ཅན་ལ་འདུས་པའི་མཚན་ཉིད་དུ་སྒྲུབ་པ་ནི། དེ་ལ་གནོད་པའི་རྒྱུ་མཚན་མ་ཡིན་ཞེ་ན། བྱ་བ་དང་འགལ་བའི་ཕྱིར་སུན་འདོན་པ་མ་ཡིན་པ་མ་ཡིན་ནམ། རག་ལས་པ་གཞན་དུ་

མི་འཐད་པས་རྟོགས་བཞིན་པ་ནི་དེ་ཉིད་ལ་གནོད་པར་བྱེད་པ་མ་ཡིན་ནོ། །དེ་མེད་ན་རང་ཉིད་མེད་པའི་ཕྱིར་རོ། །རིགས་པ་བརྒྱ་བྱིན་ཆེ་བ་ཡིན་གྱི་གཅིག་ནི་རྒྱ་ཆེ་བ་མ་ཡིན་པ་མ་ཡིན་ནམ། ཡུལ་སྣ་ཚོགས་པ་ལ་ཕན་ཚུན་རྗེས་སུ་མཐུན་པ་ནི་གཅིག་མ་ཡིན་ནོ། །དེ་ལྟར་འགའ་ཡང་རྟོག་པར་བྱེད་པ་

ཡང་མ་ཡིན་ཏེ། སོ་སོར་སྣང་བ་ཉིད་དེ་ལྟ་བུའི་རྣམ་པ་ཡིན་པའི་ཕྱིར་རོ། །དེས་ན་འཇིག་པ་ནི་བློ་ལ་བརྟེན་པའི་ཕྱིར་མི་རིགས་ཏེ། རྡུལ་ཕྲ་རབ་རྣམས་ཁོ་ན་སྣང་བའི་ཕྱིར། མི་སྣང་ན་དེ་ལ་འདུ་བ་ཅན་གྱི་རྫས་སྣང་བ་ཡིན་པར་ཅི་ལས་ཡིན། ཡན་ལག་འཛིན་པ་མ་ཡིན་ཏེ། མི་གསལ་བའི་སྣང་བ་

Vol. 180 · folio 274b

ལ་ཡང་ཆུ་སྐྱར་དུ་འཛིན་པ་ལ་རྒྱ་ཆེ་བ་དམིགས་པས་ཡན་ལག་རྣམས་འཛིན་པའི་ཕྱིར་རོ། །དེས་ན་མཐའི་སྣང་བ་ལ་ཡང་ཡན་ལག་སྣང་བ་ཉིད་ཡིན་པའི་ཕྱིར་རྡུལ་ཕྲ་རབ་རྣམས་ཇི་ལྟར་དབང་པོ་ལས་འདས་པ་ཡིན། འོན་ཏེ་སྣང་བས་བཞིན་དུ་དེ་ཡན་ལག་རྣམས་ཀྱང་སྣང་བ་ཁོ་ནའི་ཕྱིར་དབྱེ་བ་ཡིན་ནོ། །

དེ་ལྟ་མ་ཡིན་ཏེ། དེ་ལ་ཡང་ཡན་ལག་ཡོད་ན་སྣང་བ་ཉིད་དུ་ཐལ་བར་འགྱུར་རོ། །མི་སྣང་བ་ཉིད་ཡིན་ཡང་དབྱེ་བ་ཉིད་མ་གཏོགས་པའི་ཕྱིར་དེ་ཁོ་ན་རྡུལ་ཕྲ་རབ་རྣམས་ཀྱང་དབང་པོའི་ཡུལ་ཉིད་ཡིན་པར་མ་ཉམས་པ་ཡིན་ནོ། །གསེང་མེད་པའི་ཤེས་པ་བཞིན་དུ་གསེང་མེད་པའི་འབྲས་བུ་བསྒྲིབས་

པ་ལ་སོགས་པའི་འབྲས་བུ་འདི་ཉིད་ཀྱི་ཡིན་པར་བསྟན་པ་ནི། དེ་བཞིན་དུ་འབྲས་བུ་གཞན་ཡང་ཞེས་བྱ་བ་སྨོས་ཏེ། རྡུལ་ཕྲ་རབ་རྣམས་ཀྱང་ཕྲ་བ་ཉིད་ཀྱིས་དབྱེ་བ་མ་ངེས་པས་དེ་ལྟར་སྣང་བ་ནི་ཐམས་ཅད་ཡུལ་གཅིག་ལ་འདྲེས་ན་གོང་བུ་རྡུལ་ཕྲ་རབ་ཙམ་དུ་ཐལ་བར་འགྱུར་བ་དང་། རྡུལ་ཕྲ་རབ་ཆ་

ཤས་ཅན་དུ་ཐལ་བར་འགྱུར་བར་རྟོགས་པ་ཡིན་པར་བསྟན་པ་ནི། འདི་ལ་ཡང་ཞེས་བྱ་བ་སྟེ། བུ་ག་ཅན་རྣམས་ཀྱི་རྒྱུ་མཚན་ཅན་གྱི་དབང་གིས་བུ་ག་མེད་པར་མཐོང་བ་མ་ཡིན་གྱི་སྒྲིབ་པ་ལ་སོགས་པ་འབྲས་བུ་ཡང་མཐོང་བ་ཡིན་པར་བསྟན་པ་ནི། དཔེར་ན་ཞེས་བྱ་བ་སྟེ་ཡན་ལག་ཅན་མེད་ཀྱང་གཉི་

གས་དངུལ་ཆུ་དང་གསེར་ལ་སོགས་པ་སྒྲིབ་པ་ལ་སོགས་པ་བྱེད་པར་མཐོང་བར་བསྟན་པ་ནི། ཡང་ན་ཞེས་བྱ་བའོ། །གལ་ཏེ་མ་མཐོང་བའི་དབང་གིས་རྡུལ་ཕྲ་རབ་འདུས་པ་ནི་མ་འབྱར་བ་ཡིན་ཡང་སོ་སོ་བ་མ་ཡིན་ན། ཕུབ་མ་ཕྱེ་མ་ཆང་པ་ལ་སོགས་པས་འཕངས་པ་ཡང་དེ་ཉིད་དུ་འགྱུར་རོ། །

འདི་ལ་བརྗོད་པ་ནི། རྟོགས་པ་ལ་སོགས་པ་ཞེས་བྱ་བ་སྟེ། མ་མཐོང་བས་སྦྱར་བའི་རྡུལ་ཕྲ་རབ་རྣམས་ཇི་ལྟར་མཐོང་བ་ཁོ་ནར་རིགས་པ་ཡིན་ནོ་ཞེས་བྱ་བའི་དོན་ཏོ། །གཏོར་བ་དང་ཅིག་ཤོས་ལ་སོགས་པའི་འབྲས་བུ་སྣ་ཚོགས་པ་ཅན་ཉིད་ཁོ་ན་རྟོགས་པ་ཡིན་པར་བསྟན་པ་ནི། འདི་ལྟར་གཟུགས་ལ་

སོགས་པ་ཞེས་བྱ་བའོ། །འོན་ཏེ་རྟེན་དང་ཕྲད་པ་ལས་དབང་པོ་ཕྲད་པར་རྟོགས་པ་ནི་མ་ཡིན་ནོ། །འོན་ཀྱང་ཕྲད་པ་ཁོ་ན་ལས་ཡིན་ནོ། །འདི་ལ་བརྗོད་པ་ནི་འོ་ན་རྟེན་མཐོང་བ་མེད་པར་ཞེས་བྱ་བའོ། །རྫས་དང་དབང་པོ་དང་དངུལ་ཆུ་དང་གསེར་དག་གི་ཕྲད་པ་ནི་ཕྲད་པ་མ་ཡིན་ཏེ། གང་གི་ཕྱིར་རྫས་དང་ཡོན་

Vol. 180 · folio 275a

ཏན་དག་ལ་འདིར་རྟོག་པ་ནི་མ་ཡིན་ནོ། །དེ་ལྟ་ཡིན་ན་ཁས་བླངས་པ་ཡིན་པར་བསྟན་པ་ནི། དེའི་ཚེ་ཞེས་བྱ་བ་སྟེ། རྒྱུ་མ་ཡིན་པ་ནི་འདུ་བ་ཅན་གྱི་རྒྱུ་མ་ཡིན་པའོ། །དབང་པོ་དང་ལྡན་པའི་རྡུལ་ཕྲ་རབ་རྣམས་ལ་འདུ་བ་ལས་ཕྲད་པ་འཛིན་པ་ཡིན་ན། དེའི་ཁྱད་པར་དང་ལྡན་པའི་རྡུལ་

ཕྲ་རབ་རྣམས་སྣང་བའམ་འབྲས་བུ་གཞན་བྱེད་པར་འགྱུར་བའི་ཕྱིར་ཡན་ལག་ནི་རྟོགས་པའི་ཡུལ་མ་ཡིན་པར་བསྟན་པ་ནི། དེ་ལྟ་ན་ནི་འོ་ན་ཞེས་བྱ་བའོ། །ལྡན་པའི་འདུ་བ་འཛིན་པར་བྱེད་པ་ཉིད་ཡིན་ན། ཕྲ་བའི་ཡན་ལག་གི་ཕྲད་པ་ཡང་འཛིན་པར་འགྱུར་བ་ཡིན་པར་བསྟན་པ་ནི། ཕྲད་པ་ཐམས་

ཅད་ཅེས་བྱ་བའོ། །ཐག་རིང་བ་ལ་ཡང་རགས་པ་མཐོང་བའི་རྗེས་སུ་དཔོག་པ་ནི་དབང་པོ་དང་ཕྲད་པ་ཡིན་པར་བསྟན་པ་ནི། མ་ཡིན་ཏེ་རགས་པ་རྣམས་ཀྱང་ཞེས་བྱ་བའོ། །རྒྱུ་མཚན་གྱི་རྒྱུ་ཉིད་ཁས་བླངས་པ་དང་འགལ་བ་སེལ་བར་བྱེད་པ་ནི། འོན་ཏེ་ཕྲད་པ་ཞེས་བྱ་བ་སྟེ། དབང་པོ་དང་ཕྲད་པ་

ལ་དངུལ་ཆུ་དང་གསེར་ཕྲད་པའི་རྒྱུ་མཚན་ཡིན་པ་དེ་ཅི་ལས་ཡིན་པ་བསམས་ན། གཞན་མེད་པས་དེ་ཁོ་ན་ཡིན་པའི་ཕྱིར་དེ་ཉིད་སྐྱོན་ཡིན་པར་བསྟན་པ་མ་ཡིན་ཏེ། འདུ་བ་ནི་འདི་ལའོ་ཞེས་བྱ་བའོ། །གལ་ཏེ་འབྲས་བུ་རྫས་ཡོད་པ་ཡིན་ན། དེ་དང་དབང་པོའི་དངོས་སུ་འབྲེལ་པ་ཡིན་པས་བརྒྱུད་

པའི་ལྡན་པ་འདུ་བར་རྟོགས་པ་ལ་དོན་མེད་དོ། །དེ་ལྟ་ཡིན་ན་དེ་བཞིན་རྡུལ་ཕྲ་རབ་ཕྲད་པ་ཡོད་ན་ཡན་ལག་ཅན་དུ་བརྟག་པ་དེས་ཅི་ཞིག་བྱ། དེ་རྣམས་ཁོ་ན་ཕྲད་པའི་ཁྱད་པར་དང་ལྡན་པའི་མངོན་སུམ་པ་རྣམས་སུ་འགྱུར་རོ་ཞེས་ཟེར་བ་ནི། འོན་ཏེ་འབྲས་བུའི་རྫས་ཞེས་བྱ་བ་སྟེ། བཟློག་པ་ལ་ཡང་

ཞེས་བྱ་བ་ནི་རྡུལ་ཕྲ་རབ་རྣམས་མེད་ན་ཡང་ཡན་ལག་ཅན་དུ་རྟོག་པ་ཡིན་ཏེ། རྣམ་པར་དབྱེ་བའི་རྒྱུ་མེད་ཅེས་བྱ་བའི་དོན་ཏོ། །གང་ཡང་ཡན་ལག་ཅན་ཡོད་པ་ཡིན་ན་རྡུལ་ཕྲ་རབ་དང་ཕྲད་པ་དབང་བོ་ལ་མི་སྲིད་དོ་ཞེས་བྱ་བ་དེ་མི་རིགས་ཏེ། ཡན་ལག་ཅན་དང་ཕྲད་པ་ལ་ཡང་དེ་རྣམས་དང་ཡུལ་ཐ་

མི་དད་པ་ཉིད་ཀྱིས་དེ་ཡོད་པའི་ཕྱིར་རོ་ཞེས་བསྟན་པ་ནི། ཡན་ལག་ཅན་དང་ཕྲད་པ་ནི། །ཞེས་བྱ་བ་སྟེ། ཡན་ལག་ཅན་དང་ཕྲད་པར་སྨྲ་བས་ཀྱང་རྡུལ་ཕྲ་རབ་དང་ཕྲད་པར་དགག་པར་བྱེད་པ་མ་ཡིན་ནོ། །དེའི་ཕྱིར་ལྡན་པའི་དུས་ཁོ་ན་འཛིན་པར་རྒྱུ་མ་ཡིན་ནོ། །དྲུག་པོ་འབྱར་བ་ཡིན་པའི་ཕྱིར་ཡན་

Vol. 180 · folio 275b

ལག་ཅན་བཞིན་དུ་རྡུལ་ཕྲ་རབ་དང་ཕྲད་པས་ཀྱང་དབང་པོ་དང་ཕྲད་པ་ཡིན་དུ་ཆུག་ཀྱང་མཐོང་བ་ལ་མི་འཐད་པ་ལུང་ལས་སམ་གཞན་ལས་ཀྱང་མ་ཡིན་པར་བསྟན་པ་ནི། ཡང་ན་རྟོགས་པའི་ཞེས་བྱ་བ་སྟེ། ཕྲད་པ་ལས་ཡང་དབང་པོའི་ཕྲད་པས་རོ་དང་གཟུགས་ལ་སོགས་པ་རྣམས་ཀྱང་དེའི་ལྡན་

པའི་འདུ་པ་ལས་དམིགས་བྱར་འགྱུར་རོ། །དེ་མ་མཐོང་ན་དེ་རྣམས་ལ་དབང་པོ་དང་ཕྲད་པ་མེད་པའི་ཕྱིར་དེ་རྣམས་ལྡན་པའི་འདུ་བ་ལས་འཛིན་པར་མི་འགྱུར་རོ། །དེ་བསྟན་པ་ནི་གཞན་ཡང་ཞེས་བྱ་བའོ། །བློ་ཐ་དད་པར་ཞེས་བྱ་བ་ནི་དེ་ཡོད་པ་དང་མེད་པ་དག་གིས་སོ་སོར་སྣང་བ་ཐ་དད་པའོ། །

གཞན་གྱི་ནི་དེ་ལས་གཞན་པ་ལ་ཉེ་བར་བཏགས་པ་ཡང་དེ་ཁོ་ན་བཞིན་དུ་འགྱུར་གྱི་གཞན་དུ་ནི་མ་ཡིན་ནོ། །གཞན་དུ་ཡང་སྣང་བར་བསྟན་པ་ནི། གཟུགས་སམ་རོ་གང་ཡིན་པ་དེ་ཉིད་ཅེས་བྱའོ། །གལ་ཏེ་ཤིན་ཏུ་འདྲེས་པ་ནི་སྣ་ཚོགས་པར་མཚོན་པ་ཉིད་ལ་གཞན་དུ་རྟོགས་པ་གང་ཡིན་

ན་རྡུལ་ཕྲ་རབ་རྣམས་ཁོ་ན་ཕྲ་བ་ཡིན་པའི་ཕྱིར་དེ་ལྟར་འགྱུར་རོ་ཞེས་བསྟན་པ་ནི། དེ་ལྟ་ན་ནི་འོ་ན་ཞེས་བྱ་བ་སྟེ། རྡུལ་ཕྲ་རབ་རྣམས་དངར་བའི་ཁྱད་པར་ལས་ཕྲེང་བ་ལ་སོགས་ལ་དེ་ལྟར་རྟོགས་པའི་རྒྱུ་ཉིད་མཐོང་བ་ཡང་ཡིན་ཏེ་གཞན་མེད་པའི་ཕྱིར་རོ་ཞེས་བསྟན་པ་ནི། གལ་ཏེ་རྡུལ་ཕྲ་རབ་ཅེས་

བྱ་བའོ། །དངར་བ་ཞེས་བྱ་བ་འདིའི་བཤད་པ་ནི། དངར་བའི་ཁྱད་པར་ཙམ་ཉིད་ཀྱི། །ཞེས་བྱ་བའོ། །དེའི་ན་དེ་ལྟའི་ཞེས་བྱ་བའི་བཤད་པ་ནི། དེ་བཞིན་དུ་ཞེས་བྱ་བ་ལ་སོགས་པའོ། །རྩོད་པ་ནི་རབ་ཏུ་རྩོད་པའོ། །གཞི་ནི་གང་གི་ཡན་ལག་ཅན་གྱི་ཡུལ་དུ་མངོན་པར་འདོད་པ་དངར་བ་ཙམ་ཉིད་ལ་

རབ་ཏུ་རྩོད་པ་ཙམ་དུ་རྟོགས་པ་ཉིད་ཀྱིས་མངོན་སུམ་ལ་སོགས་པ་རྩ་བ་མེད་པ་ཉིད་གཏན་ཚིགས་སུ་བརྗོད་པ་ཡིན་ལ་དེའི་ཕྱིར་དེ་བཞིན་དུ་ཕྲད་པར་ཁས་བླངས་པས་དེ་དང་དེར་བསྟན་ནས་ད་ནི་ཕྲད་པ་ཉིད་དེ་ལ་རུང་བར་མངོན་པར་འདོད་པ་དང་ཐ་དད་པས་མ་དམིགས་པར་བསྟན་པ་ནི། གང་ཡང་བརྗོད་པ་ཞེས་

བྱ་བ་ནི་ཕྲད་ལས་ཤེས་ན་འདིར་ཐལ་མཚུངས་ཞེས་བྱ་བ་དེར་རོ། །ཕྲད་པ་ཅན་འབའ་ཞིག་ནི་ཉེ་བ་ཉིད་ཀྱིས་ཕྲད་པ་ཅན་གྱི་ཤེས་པའི་ཡུལ་ཁོ་ན་ཡིན་ནོ། །གནོད་པ་མེད་པའི་རྣམ་རྟོག་གི་བློ་ནི་ཐ་དད་པའི་ཡུལ་ཅན་ཡིན་ལ་དེའི་ཕྱིར་མངོན་སུམ་ཡང་ཐ་དད་པར་འཛིན་པ་ཡིན་ནོ། །གང་གི་ཕྱིར་དེ་ནི་གཞན་

Vol. 180 · folio 276a

དུ་མཐོང་བ་ལས་སྐྱེས་པ་མ་ཡིན་ལ་དེས་མ་སྐྱེས་པ་ནི་དེ་ལྟ་ཡིན་ཡང་འདི་ཡང་དེ་ལྟར་འགྱུར་བ་ནི་མ་ཡིན་ནོ་སྙམ་དུ་སེམས་པ་ལ་དངོས་པོའི་གནས་སྐབས་ཀྱི་ཁྱད་པར་མཐོང་བ་ལས་སྐྱེས་པའི་ཕྱིར་དེ་དངོས་པོའི་དབྱེ་བའི་ཕན་བྱེད་མ་མ་ཡིན་ནོ་ཞེས་བྱ་བའི་དོན་འདི་སྒྲ་ཞེས་དངོས་

པོ་ཞེས་བྱ་བ་འདིའི་རྟོགས་བྱ་བསྟན་པ་ནི། ལྡན་པ་ཡིན་ནོ་ཞེས་བློས་བཟུང་བ་ཞེས་བྱ་བའོ། །གནས་སྐབས་ཀྱི་ཁྱད་པར་བསྟན་པ་ནི། དེར་ནི་ཉེ་བར་སྐྱེ་བར་གྱུར་པ་ཞེས་བྱ་བའོ། །གནས་སྐབས་དེ་མ་གཏོགས་པར་དེ་བྱུང་ན་དེ་དང་ལྡན་པ་བཞིན་དུ་སོ་སོར་སྣང་བར་འགྱུར་བར་བསྟན་པ་ནི།

ཇི་ལྟར་དོན་དེ་མདུན་གནས་པ། །ཞེས་བྱ་བའོ། །གནས་སྐབས་ཀྱི་ཁྱད་པར་ཡང་དེ་མ་གཏོགས་པར་མེད་པར་བསྟན་པ་ནི། རྗེས་འགྲོའི་ལྡོག་པ་དག་ལས་ནི། །ཞེས་བྱ་བའོ། །རྗེས་སུ་འགྲོ་བ་དང་ལྡོག་པ་ཉིད་བསྟན་པ་ནི། འབའ་ཞིག་པ་ཞེས་བྱ་བའོ། །འབྱོར་པ་ལས་མ་འབྱོར་པ་

གཞན་ཉིད་ཡིན་པར་མངོན་སུམ་གྱིས་རྟོགས་པ་མ་ཡིན་ནམ། དེ་ཡང་གནས་སྐབས་ཡིན་ལ་དེ་མངོན་སུམ་པ་ཡིན་པ་ཁོ་ནར་བསྟན་པ་ནི། མངོན་སུམ་གྱིས་ཞེས་བྱ་བ་སྟེ། དངོས་པོ་གཞན་ཁོ་ན་མངོན་སུམ་གྱིས་རྟོགས་པ་ཡིན་གྱི། གནས་སྐབས་གཞན་ནི་མ་ཡིན་ནོ་ཞེ་ན། དངོས་པོ་

ཉིད་གནས་སྐབས་གཞན་དང་ཕྲད་པ་ཡང་ཡིན་པར་བརྗོད་པ་ཡིན་ནོ། །དེ་ཉིད་ཀྱི་ཕྱིར་ཞེས་བྱ་བ་ནི། གཅིག་ཉིད་དང་ཕྲད་པ་ལ་སོགས་པ་ཅན་ཕྱི་རོལ་གྱི་བསྡུས་པ་ལས་ལྡོག་པའི་ནུས་པ་ཅན་ཉེ་བ་དང་བསྐྱེད་པ་ཡང་བོར་ནས་གཞན་ནི་མ་ཡིན་ནོ། །དེ་ཡང་རང་དབང་དུ་རྣམ་རྟོག་གི་ཤེས་པས་

འཛིན་པ་མ་ཡིན་ཏེ། འོ་ན་ཅི་ཞེ་ན། རྣམ་པར་རྟོག་པའི་དོན་ཡིན་ནོ། །ཇི་ལྟར་ཡིན་ཞེ་ན། རྣམ་རྟོག་གིས་ཏེ་ཐ་དད་པས་སོ། །དངོས་པོ་ཐ་དད་པ་ནི་མེད་པ་ཉེ་བ་ལས་ལྡོག་པ་ནི་དངོས་པོའི་རྗེས་སུ་འབྲང་བས་ཞེས་བྱ་བ་ནི་རྣམ་པ་འདིས་སོ། །རྣམ་རྟོག་གི་དོན་ལ་ཡང་དེ་ལྟར་ཡིན་ནོ། །བག་

ཆགས་ལས་དངོས་པོ་ཐ་དད་པའི་རྗེས་སུ་འབྲང་བའི་ཕྱིར་ཐ་དད་པར་རྣམ་པར་བརྟག་པའི་དོན་ལ་རྣམ་རྟོག་གི་ཤེས་པ་ཡིན་གྱི་ཕྱི་རོལ་གྱི་དབྱེ་བ་རྣམ་པར་འཇོག་པར་བྱེད་པ་ནི་མ་ཡིན་ལ་གཟུགས་གཅིག་དང་རོ་གཅིག་ཅེས་བྱ་བ་ལྟ་བུ་དང་། རྫ་མ་ཆག་གོ་ཞེས་མྱ་ངན་བྱེད་པ་དང་། མ་སྐྱེས་པའི་

Vol. 180 · folio 276b

བུ་རྣམས་རྒན་པོར་གྱུར་པ་བཞིན་དུ་ཡང་མཐོང་བ་ཡིན་ནོ་ཞེས་བསྟན་པ་ནི། ཡོན་ཏན་ལ་སོགས་པའམ་ཞེས་བྱ་བའོ། །དངོས་པོ་ལ་མེད་ཀྱང་རྣམ་རྟོག་གི་ཐ་དད་པར་མཐོང་བར་བྱེད་པར་བསྟན་པ་ནི། སྒྲ་དང་ཤེས་པ་ཞེས་བྱ་བ་ནས་གནས་པར་འགྱུར་བ་མ་ཡིན་ནོ་ཞེས་བྱ་བའི་བར་དུའོ། །

གལ་ཏེ་བག་ཆགས་ཀྱི་དབང་གིས་དེ་ལྟ་བུའི་རྣམ་པར་རྟོག་པ་དོན་གྱི་ཡུལ་ལ་མ་ཡིན་ན་འོན་ཏེ་དེ་ལྟ་ན། ཇི་ལྟར་དོན་མཆོག་ཏུ་འཛིན་པ་ཡིན། བྲལ་བ་དང་མ་བྲལ་བ་ལ་ཡང་དེ་ཉིད་དེ་ལ་མེད་ཀྱང་དེ་ཁོ་ན་བྲལ་བ་དེ་ལ་ཡོད་ཀྱང་མེད་པ་ཡིན་ལ་ཞེས་རྗེས་སུ་འགྲོ་བ་དང་ལྡོག་པས་བཟུང་བ་

ཡིན་ལ་ཐ་དད་པའི་ཤེས་པ་དེ་ལྟ་བུའི་བག་ཆགས་ལས་བྱུང་བ་ནི་དེ་ལྟར་གྱུར་པ་མ་ཡིན་པའི་དོན་དེ་ཉིད་དེ་ལྟ་བུ་བྱེད་པ་ཡིན་པར་བསྟན་པ་ནི། དེ་ལ་རྗེས་སུ་འགྲོ་བ་དང་ལྡོག་པས་ཞེས་བྱ་བའོ། །རྣམ་པར་རྟོག་པ་ནི་དེ་ལྟ་བུར་གྱུར་པ་མ་ཡིན་པའི་དངོས་པོ་ཁོ་ན་དེ་ལྟ་བུར་མངོན་པར་འདོད་པ་ཡིན་

པར་བསྟན་པ་ནི། བརྟགས་པ་ཉིད་ཅེས་བྱ་བའོ། །རྣམ་པར་བརྟགས་པ་ཉིད་ནི་དོན་མ་ཡིན་ལ་སྐད་ཅིག་མ་དང་སྐད་ཅིག་མ་མ་ཡིན་པ་ཉིད་ལ་སོགས་པའི་ཐ་དད་པར་འཛིན་པའི་དབྱེ་བས་དངོས་པོ་ཡོད་ན་ཡུལ་གྱི་རྣམ་པར་དབྱེ་བས་འཇུག་པ་དང་ལྡོག་པ་དག་ཏུ་མི་འགྱུར་བར་བསྟན་པ་ནི། རྣམ་པར་རྟོག་པའི་

དོན་ཐ་དད་པ་ནི་ཞེས་བྱ་བ་སྟེ། རྗེས་སུ་འགྲོ་བ་དང་ལྡོག་པ་དག་གི་བག་ཆགས་གང་ཡིན་པ་དེ་ལས་རྣམ་པར་རྟོག་པ་ཡིན་ལ་དེའི་ཡུལ་ཡང་སྒྲ་ཡིན་ནོ། །གལ་ཏེ་ལྡོག་པ་ཡང་དངོས་པོ་ལས་གཞན་པ་ཡིན་ན་དེ་ལ་དམིགས་པའི་རྣམ་པར་རྟོག་པ་ཡང་ཐ་དད་པ་ཁོ་ནས་དམིགས་པར་འགྱུར་ཞེས་བྱ་བ་

འདི་ལ་ལྡོག་པ་ཡང་ལོག་པ་ལས་ཞེས་བྱ་བ་སྨོས་ཏེ། དེ་ཉིད་ནི་གསེང་གི་དབྱེ་བ་བསྡུས་པ་མ་ཡིན་པ་དང་། མི་ལྡན་པ་ལས་ལྡོག་པ་ནི་བསྡུས་པ་དང་ཅིག་ཤོས་ཀྱང་དེ་ཉིད་ཡིན་པའི་ཕྱིར་མི་ལྡན་པ་ལས་ཐ་དད་པ་ལས་རྣམ་རྟོག་གི་ཡུལ་ཡིན་ནོ། །དེ་བཞིན་དུ་མི་ལྡན་པ་དང་ཅིག་ཤོས་ལ་ཡང་

སྦྱར་བར་བྱའོ་ཞེས་མཇུག་སྡུད་པར་བྱེད་པ་ནི། དེ་ལས་ཀྱང་ཞེས་བྱ་བའོ། །གཟུགས་གཅིག་རོ་གཅིག་ཅེས་བསྡུས་པ་ལས་བཟློག་པ་ནི་རྫས་ཀྱི་ཐུན་མོང་བ་ཉིད་དམིགས་ནས་དེའི་ཡོན་ཏན་གྲངས་སུ་ཉེ་བར་བཏགས་པ་མ་ཡིན་ནམ། དེ་བཞིན་དུ་རྫ་མ་ཆག་པ་རྗེས་སུ་དྲན་པས་བཟུང་བ་ཡིན་ན།

Vol. 180 · folio 277a

མྱ་ངན་ནི་ལས་ཡིན་པས་ཉེ་བར་བཏགས་པ་ཡིན་ནོ། །ངེས་པར་བརྟགས་པས་བཟུང་བའི་བུལ་ནི་རྒས་པ་བྱེད་པ་པོ་ཉིད་ཡིན་ནོ། །དེ་བསྟན་པ་ནི། གལ་ཏེ་འདིར་ནི་བཏགས་འདོད་ན། །ཞེས་བྱ་བའོ། །དེ་ལྟ་ཡིན་ན་བསྡུས་པ་ལས་ལྡོག་པ་ལས་གཅིག་ཉིད་ཡིན་ན་ནི།

གཞན་མ་དམིགས་པའི་ཕྱིར་ཡིན་ལ་གཉི་ག་ནི་མ་ཡིན་ནོ། །དེ་ལྟ་ཡིན་ན། བསྡུས་པ་ལས་ལྡོག་པ་ཡིན་པས་གཅིག་པ་ཉིད་དུ་ངེས་པར་འགྱུར་ཏེ། འདི་ནི་དེ་ཙམ་ཡིན་པའི་ཕྱིར་གསུམ་ཉིད་དམ་གཅིག་ཉིད་དག་ཏུ་ཐེ་ཚོམ་ཟ་བར་མི་འགྱུར་རོ། །དེ་ལྟ་མ་ཡིན་ཏེ། བསྡུས་པ་ལྡོག་པ་ཙམ་

གཅིག་ཉིད་ཡིན་ལ་དེའི་ཁྱད་པར་ལྡོག་པ་ནི་མ་ཡིན་ནོ། །གཉིས་པ་མ་ཡིན་ཞེས་བྱ་བ་འདི་ཡང་ཁྱད་པར་ལྡོག་པ་ཡིན་པ་ནི། གསུམ་ཉིད་ལ་སོགས་པའི་བསྡུས་པ་གཞན་དང་ཐུན་མོང་བ་ཡིན་ནོ། །དེའི་ཕྱིར་ཐེ་ཚོམ་ནི་ཡོན་ཏན་ནམ་གཞན་ཡང་རུང་བ་ལྡོག་པར་བྱེད་པ་མ་ཡིན་པར་བསྟན་

པ་ནི། དེ་འདོད་པ་ཞེས་བྱ་བ་སྟེ། ཞིག་པ་དང་མ་སྐྱེས་པ་དག་བཞིན་དུ་ངེས་པར་རྟོག་པ་དང་རྗེས་སུ་དྲན་པ་དག་གིས་བཟུང་བའི་དངོས་པོ་ཐམས་ཅད་ལ་སྒྲ་དང་ཤེས་པ་ནི་ཆོས་ཅན་ཡོད་ཀྱང་བསྡུས་པ་ལྡོག་པ་ལ་སོགས་པ་རྒྱུ་མཚན་ཡིན་ཏེ། གཟུགས་ལ་སོགས་པ་བཞིན་དུ་རྫས་ལ་ཡང་

གཅིག་ཉིད་དུ་འཛིན་པར་བྱེད་ཅེས་བྱ་བའི་དོན་ཏོ། །རྒྱུ་མཚན་གང་གིས་ཞེས་བྱ་བ་ནི་ཞིག་པ་དང་མ་སྐྱེས་པའི་བུམ་པ་དང་བུ་ལ་སོགས་པ་རྣམས་ལ་ངེས་པར་རྟོག་པ་དང་རྗེས་སུ་དྲན་པས་བཟུང་ཐུ་བ་ཉིད་ནི་ཉེ་བར་གདགས་པའི་རྒྱུ་མཚན་ཡིན་ནོ། །ཉེ་བར་བཏགས་པ་སྟེ་དེ་ཉིད་ཡིན་པར་སྒྲོ་གདགས་པ་

ནི། སྒྲ་དང་ཤེས་པའི་རྒྱུ་མཚན་གང་གིས་ཤེས་པ་དེ་ལས་གཞན་སྒྲོ་འདོགས་པ་ནི་མ་ཡིན་ཏེ། དེ་དང་འདྲ་བ་ཉིད་འབའ་ཞིག་ལས་དེ་ཉིད་ལས་སྒྲོ་འདོགས་པ་ཡིན་ལ་དེ་ཤེས་པའི་ངོ་བོ་དང་དེའི་རྗེས་སུ་འབྲང་བར་བྱེད་པ་ཡང་དེའི་སྒྲ་ཡིན་ནོ། །དེ་བཞིན་དུ་གཟུགས་ལ་སོགས་པ་རྣམས་ལ་ཡང་བསྡུས་

པ་ལས་བཟློག་པའི་རྒྱུ་མཚན་ལས་གཅིག་ཉིད་དུ་སྒྲོ་འདོགས་པ་དང་དེའི་སྒྲ་ཡིན་ནོ། །དེ་ཉིད་དུ་སྒྲོ་འདོགས་པ་དང་དེའི་ཤེས་པ་དག་ལ་ཐ་དད་པ་མེད་ཀྱང་ཐ་དད་པར་བརྗོད་པར་སྦྱར་བར་བྱའོ། །དེ་ཉིད་ཅེས་བྱ་བ་ནི་དེ་རྒྱུ་མཚན་ཉིད་དུ་ཉེ་བར་བཏགས་པ་དེ་དག་གི་རྒྱུ་ཡིན་ཞེས་བཤད་པ་ནི། གལ་ཏེ་

Vol. 180 · folio 277b

ཞིག་པ་དང་མ་སྐྱེས་པ་དག་ལ་ཞེས་བྱ་བའོ། །གཞན་དག་ནི་གང་གི་སྒྲར་བསྟན་པའི་རྒྱུ་མཚན་ཁོ་ན་དེ་ཉིད་ཡིན་ཞེས་མཆོག་ཏུ་འཛིན་པར་བྱེད་དེ་རྒྱུ་ནི་རྟགས་སུ་བཟུང་ནས་དེ་རྗེས་སུ་དཔག་པའི་ཡུལ་ཡིན་ནོ་ཞེས་བྱ་བ་བཞིན་དུ་ཕོ་རྟགས་ཉིད་ཡིན་ལ་རྒྱུ་ནི་རྒྱུ་མཚན་ཁོ་ན་ཡིན་ནོ། །ཞིག་པ་ལ་སོགས་

པ་རྣམས་ལ་དེའི་སྒྲ་དང་ཤེས་པ་དག་ཏུ་ཉེ་བར་བཏགས་པ་ཡིན་ལ་གང་ཞིག་དེ་ལ་དེའི་རྒྱུ་མཚན་ཡིན་པ་དེ་ཁོ་ན་ཐམས་ཅད་ལ་འགྱུར་ལ་མ་མཐོང་བའི་རྒྱུ་མཚན་གཞན་བཏགས་པས་ཅི་ཞིག་བྱ་ཞེས་བྱ་བའི་དོན་ཡིན་པར་འཆད་དོ། །བཏགས་པ་ནི་དེའི་ཤེས་པ་དག་ལ་ཐ་དད་པ་མེད་ཀྱང་རྒྱུ་དང་དེ་དང་ལྡན་

པ་ཉིད་དུ་བརྗོད་པ་ཡིན་ནོ་བྱ་བ་དང་དེ་དང་ལྡན་པ་དག་གི་ཐ་དད་པར་ཡོངས་སུ་བཏགས་པས་ཡིན་པར་བསྟན་པ་ནི། ཐོག་མ་མེད་པའི་རྟོག་པ་སྟེ་ཐོག་མ་མེད་པའི་བག་ཆགས་གང་ཡིན་པ་དེ་ལ་སྒྲོ་བཏགས་པ་ནི་བྱེད་པ་ཡིན་ནོ། །གཞན་ལས་མཐོང་བ་རྒྱུ་མཚན་གང་གིས་ཀྱང་གཞན་དུ་ཤེས་བཞིན་

པའི་སྒྲོ་འདོགས་པ་ནི་ཉེ་བར་གཏགས་པ་ཡིན་པར་ཐ་སྙད་འདོགས་པ་ཡིན་ནོ། གལ་ཏེ་དེ་འདི་ལ་བཞིན་དུ་གཞན་ལ་ཡང་མི་འགྱུར་ན་དེའི་ཤེས་པ་ཉིད་དུ་ཡང་མི་འགྱུར་བར་བསྟན་པ་ནི། གལ་ཏེ་ཀུན་ལ་ཉེར་བཏགས་མིན། །ཞེས་བྱ་བ་སྟེ། ཀུན་ལ་ནི་གཙོ་བོ་དང་ཕལ་པ་ལ་ཡང་ངོ་། །རྒྱུ་

མཚན་གང་ལས་ཕལ་བར་མངོན་པར་འདོད་པ་དེའི་ཤེས་པ་དེ་ཁོ་ན་ལས་གཙོ་བོར་མངོན་པར་འདོད་པ་ལ་ཡང་དེར་འགྱུར་ཏེ། རྒྱུ་མཚན་གཞན་ལ་མཐོང་བའི་ཕྱིར་རོ། །མཐོང་ན་ཡང་རྨོ་བར་འདོད་པའི་མི་ལ་བ་ལང་ཞེས་བྱ་བ་ལ་སོགས་པ་ཁོ་ན་ཕལ་པ་དང་ཅིག་ཤོས་ཡིན་པར་བསྟན་པ་ནི། ཐ་དད་པར་

ནི་བ་ལང་གི་ལྐོག་ཤལ་ལ་ཡིན་ལ་རྨོ་བྱེད་ཀྱི་མི་ལ་སོགས་པ་ནི་གཙོ་བོའི་ཐ་དད་ཁྱད་པར་ཡིན་ནོ། །གལ་ཏེ་ག་ལས་ནི་མ་ཡིན་པ་སྟེ། གཙོ་བོ་ཐམས་ཅད་ཐ་དད་པའི་ཁྱད་པར་མ་ཡིན་ཏེ། ཁ་ཅིག་ཡིན་ནོ་ཞེས་བྱ་བའི་དོན་ཏོ། །ཐ་དད་པའི་ཁྱད་པར་ཉིད་མེད་ན་གཙོ་བོ་དང་ཅིག་ཤོས་ཀྱི་དབྱེ་བ་ཇི་ལྟར་

ཡིན་ཇི་ལྟར་ཡང་མ་ཡིན་ཏེ། གང་གི་ཕྱིར་ཐ་མི་དད་པའི་རྒྱུ་མཚན་ལས་ཐ་སྙད་དག་ལ་དེ་ལྟར་དབྱེ་བར་བྱེད་པ་ནི་མ་ཡིན་ནོ། །བསྡུས་པ་ལས་རྟོག་པ་ཙམ་ལ་ཐ་སྙད་འདོགས་པ་ནི་གཟུགས་ལ་སོགས་པའམ་དེ་དང་ལྡན་པ་ལ་ཡང་མཚུངས་པ་མ་ཡིན་ནམ་ཞེ་ན། དེའི་སྒྲ་དག་ལ་བུམ་པ་དང་རྩིག་པའི་སྒྲ་

Vol. 180 · folio 278a

དག་བཞིན་དུ་ཐ་མི་དད་པའི་དོན་ཉིད་ཀྱི་ཡོན་ཏན་དང་ཡོན་ཏན་ཅན་གྱི་སྒྲ་ཉིད་དུ་མི་འགྱུར་རོ་ཞེས་བསྟན་པ་ནི། ཐ་དད་པ་མེད་པ་ཞེས་བྱ་བས་སོ། །ཁྱེད་ཀྱིས་གཅིག་པ་ཉིད་ཀྱི་གྲངས་རྗོད་པར་བྱེད་པའི་གཅིག་གི་སྒྲའི་རྫས་ལ་དེ་མེད་ཀྱང་གཟུགས་ལ་སོགས་པ་ལ་ཡིན་ཡང་

གཟུགས་ལ་སོགས་པའི་སྒྲའི་རྣམ་གྲངས་ནི་མ་ཡིན་ཏེ། རྒྱུ་མཚན་གང་ལས་ཀྱང་ཇི་ལྟ་བ་བཞིན་དུ་ཁོའི་ཡང་གཟུགས་པོ་དང་བུམ་པ་ལ་སོགས་པའི་སྒྲ་རྣམས་མཚུངས་པའི་དོན་ལ་མ་ཡིན་ཏེ། རྒྱུ་མཚན་ཐ་དད་པའི་ཕྱིར་ཞེས་བསྟན་པ་ནི། དོན་གཞན་རྒྱུ་མཚན་ཅན་མིན་ཡང་། །ཞེས་བྱ་

བའོ། །གཟུགས་ལ་སོགས་པ་ལ་ཡང་རྫས་བཞིན་དུ་གྲངས་གཅིག་པ་ཉིད་ནི་ཁྱེད་ཀྱི་ཡང་ཡོན་ཏན་དང་ལྡན་པ་ཉིད་ཀྱི་རྫས་ལས་ཐ་མི་དད་པའི་དོན་ཉིད་དུ་ཐལ་བར་འགྱུར་བར་བསྟན་པ་ནི། གལ་ཏེ་དེར་ཡང་དོན་གཞན་ན། །ཞེས་བྱ་བའོ། །གཟུགས་ལ་སོགས་པ་དང་བུམ་པ་ལ་སོགས་པའི་སྒྲ་

དག་གི་རྒྱུ་མཚན་གང་ཡིན་གང་གིས་ཐ་དད་མ་ཡིན་པའི་རྒྱུ་མཚན་དུ་བསྟན་པ་ནི། ལྡོག་པའི་དབྱེ་བས་ཐ་དད་པ་ཡིན་ཏེ་ཞེས་བྱ་བ་སྟེ། གཟུགས་ལ་སོགས་པའི་སྒྲ་ནི་ཁྱད་པར་གྱི་ནུས་པའི་ཡུལ་ཡིན་ལ་བུམ་པའི་སྒྲ་ནི་སྤྱིའི་ནུས་པའི་ཡུལ་ལ་ཡིན་ནོ་ཞེས་བྱ་བའི་དོན་ཏོ། །དེ་མ་ཡིན་པ་ལས་ལྡོག་པ་

ཁོ་ནའི་ངོ་བོ་ནི་ནུས་པ་ཡིན་ཏེ་ལས་མ་ཡིན་པ་ལ་སོགས་པ་བཞིན་དུ་གཞན་མ་ཡིན་པར་བསྟན་པ་ནི། ལས་རྫས་མིན་པ་ཞེས་བྱ་བ་སྟེ། གཙོ་བའི་རྒྱུ་མཚན་ཞེས་བྱ་བ་ནི་དེར་སྒྲོ་འདོགས་པའི་ངོ་བོ་ཡིན་པའི་ཕྱིར་ཏེ། དེ་མེད་ན་གང་ལ་སྒྲོ་འདོགས་པ་ཡིན་དེས་ན་ཉེ་བར་བཏགས་པ་མ་ཡིན་ཞེས་བྱ་བའི་དོན་

ཏོ། །མཐོང་བ་མེད་ན་ཇི་ལྟར་སྒྲོ་འདོགས་པར་བྱེད་པ་ཡིན་ཞེས་བྱ་བར་ནི་མི་རིགས་ཏེ། མཐོང་བ་མེད་ཀྱང་དབང་ཕྱུག་རྟག་པ་ལ་སོགས་པ་བཞིན་དུ་རྟོག་པ་ཙམ་གྱིས་དམིགས་པ་ལ་སྒྲོ་འདོགས་པ་སྲིད་པའི་ཕྱིར་རོ་ཞེས་བསྟན་པ་ནི། རྟོག་པས་བྱས་པའི་ཁྱད་པར་ཐ་དད་པ་ཞེས་བྱ་བ་སྟེ། ཐ་དད་པའི་

ཁྱད་པར་ཉིད་གཙོ་བོ་ཡིན་ནོ་ཞེས་རིམ་པ་གཞན་དུ་ངེས་པར་བཟུང་བའི་དོན་དུ་བརྗོད་ནས་གནས་ཇི་ལྟ་བཞིན་བསྟན་པ་ནི། གཞན་ཡང་གལ་ཏེ་ཞེས་བྱ་བའོ། །ཐ་དད་པའི་ཁྱད་པར་གཙོ་བོ་ཡིན་ནོ་ཞེས་བྱ་བ་ཉིད་ཅི་ལས་གཅིག་ཏུ་ངེས་པ་ཁོ་ན་ཡིན་ཏེ་མ་ཡིན་པ་ཉིད་དོ། །འོན་ཀྱང་ཐ་མི་དད་པའི་ཁྱད་པར་

Vol. 180 · folio 278b

གཙོ་བོ་མ་ཡིན་ཞེས་བྱ་བ་འདི་ཡང་མཐའ་ཡོད་པའི་ཕྱིར་སྔ་མ་སྔ་མར་ཉེ་བར་བཏགས་པ་ཞེས་ཕྱི་མ་ཕྱི་མ་ལས་གཙོ་བོ་ཡིན་ཞེས་བྱ་བའི་དོན་ཏོ། །ཡོན་ཏན་ལ་སོགས་པ་ལའམ་ཞེས་བྱ་བ་འདིས་མེད་པའི་ཁྱད་པར་དང་ལྡན་པ་ཞིག་པ་ལའམ་སྐྱེས་ལ་ཞེས་བྱ་བས་མེད་པའི་ཁྱད་པར་ཅན་བརྗོད་པ་

ཡིན་པར་བསྟན་པ་ནི། ཞིག་པ་དང་མ་སྐྱེས་པ་ལ་ནི་ཞེས་བྱ་བའོ། །གལ་ཏེ་མེད་པའི་ཁྱད་པར་ལ་ཡང་གཙོ་བོ་ཡིན་ཡང་ཁྱད་པར་དང་ཁྱད་པར་ཅན་གྱི་སྒྲ་དག་རྣམ་གྲངས་ཉིད་དུ་འགྱུར་ཏེ། ཁྱད་པར་ཅན་ཙམ་ཡོད་པའི་ཕྱིར་ཞེས་བྱ་བའི་དོན་དང་ཐ་དད་པ་མེད་པ་ཐ་དད་དོན་ཞེས་བྱ་བ་འདི་འཆད་པར་

བསྟན་པ་ནི་གལ་ཏེ་ཁྱད་པར་ཞེས་བྱ་བའོ། །གལ་ཏེ་སྒྲ་དག་གི་འཇུག་པའི་རྒྱུ་མཚན་ཐ་དད་པ་ཡིན་ན་འདི་དག་ལ་གནས་པ་དག་ལ་བ་ལང་དང་རྟ་ཞེས་བྱ་བ་བཞིན་དུ་གཞི་མཐུན་པར་མི་འགྱུར་ཞེས་ཟེར་བ་ནི་ཐ་དད་པར་འགྱུར་བའི་ཕྱིར་ཐ་སྙད་པ་ཡིན་ལ་འཇུག་པའི་རྒྱུ་མཚན་ཐ་དད་པ་སྒྲ་གང་གི་ཡིན་པ་དེ་དེ་ལྟར་

འགྱུར་རོ། །དེའི་ངོ་བོ་ནི་དེ་ཙམ་མོ། །སྣང་བ་ནི་སྣང་བར་བྱེད་པ་ཉིད་ཡིན་པའོ། །གཞི་མཐུན་པ་ཉིད་ནི་སྒྲ་ལས་བྱུང་བ་ཡིན་ཡང་དོན་ལ་བྱུང་བར་འགྱུར་བ་མ་ཡིན་ནོ། །སྔོན་པོའི་སྒྲ་ནི་ཡོན་ཏན་ཙམ་ལ་འཇུག་པ་ཡིན་གྱི་ཡོན་ཏན་ཅན་ལ་འཇུག་པ་ནི་མ་ཡིན་གྱི། ཨུཏྤ་ལའི་སྒྲ་ཡང་རིག་པ་ཙམ་ལ་འཇུག་པ་ཡིན་གྱི་དེ་དང་ལྡན་པ་ལ་ནི་མ་ཡིན་ནོ་

ཞེ་ན། འོན་ཏེ་ཡོན་ཏན་གྱིས་མཚོན་པའི་ཡོན་ཏན་ལ་འཇུག་པ་ཡིན་ན་ནི། དེ་ལྟ་ན་ཡོན་ཏན་ཅན་ཏེ་སྤྱི་ཉིད་དུ་མཚོན་པ་མ་ཡིན་ཏེ། གཞི་མཐུན་པ་མེད་པར་ཐལ་བར་འགྱུར་བའི་ཕྱིར་རོ། །ཁྱད་པར་ལས་ཡིན་ནོ་ཞེ་ན། དེའི་ཕྱིར་བརྗོད་པ་གཅིག་ཉིད་དང་ནི་ཞེས་བྱ་བ་སྟེ། འབྲེལ་པ་ན་ཞེས་བྱ་བ་ནི་རྒྱུ་མཚན་གྱི་

བདུན་པ་སྟེ་རྒྱུ་མཚན་དང་བྱེད་པ་དང་རྒྱུ་རྣམས་ལ་ཐམས་ཅད་ལ་མང་པོར་མཐོང་བ་ཡིན་ཞེས་བྱ་བའི་ཚིག་ལས་སོ། །འདུ་བའི་འབྲེལ་པ་ནི་དེ་ལྟར་མཚོན་པའི་རྒྱུ་མཚན་ཡིན་པའི་ཕྱིར་གཅིག་ཉིད་ཀྱིས་ཐམས་ཅད་མཚོན་པ་ནི་དོན་གྱི་སྒོ་ཁོ་ན་ལས་ཡིན་ནོ། །དེའི་ཕྱིར་དཔྱོད་པ་ཁོ་ནས་དེ་ཡང་དཔྱད་པ་ཡིན་པར་བསྟན་པ་

ནི། དོན་རྣམས་གཞི་མཐུན་པ་ཉིད་ཀྱང་ཞེས་བྱ་བའོ། །ཡོན་ཏན་ནི་ཡོན་ཏན་ཅན་གྱི་ཁྱད་པར་མཚོན་པར་བྱེད་པ་ཡང་རང་ཡོངས་སུ་གཅོད་པས་མཚོན་པར་བྱེད་པ་ཡིན་གྱི་གཞན་མཚོན་པར་བྱེད་པ་ནི་མ་ཡིན་ཏེ། དེའི་ཕྱིར་གཉིས་པའི་སྦྱོར་བ་ཡིན་ནོ་སྙམ་དུ་སེམས་པ་ནི་འབྲེལ་པ་ཡོད་པ་ཡིན་ན་ཡང་ཞེས་བྱ་བ་སྟེ།

Vol. 180 · folio 279a

གང་ལས་ཞེས་བྱ་བ་འདིའི་ལན་ནི། འདུ་བའི་སྟོབས་ཀྱིས་ནི་ཞེས་བྱ་བ་སྟེ། གཞན་མི་སྲིད་པའི་ཕྱིར་རོ། །ཇི་ལྟར་ཞེས་བྱ་བ་འདི་ལ་ནི་ཐ་མི་དད་པར་ཞེས་བྱ་བའོ། །འདུ་བ་ལ་ནི་ཕྲད་པ་བཞིན་དུ་དོན་དམིགས་པ་མ་ཡིན་ཏེ། །སོ་སོ་བར་གྲུབ་པར་ཐལ་བར་འགྱུར་བའི་ཕྱིར་རོ། །དེའི་ཕྱིར་

ཡོན་ཏན་དང་ཡོན་ཏན་ཅན་ཡང་ཐ་མི་དད་པར་དམིགས་པ་ཡིན་ན་དེ་དག་ལ་འདུས་པ་དག་གི་ཡོན་ཏན་དང་རིགས་དག་ལ་དེ་ལྟར་དམིགས་པ་ཡིན་པའི་ཕྱིར་གཅིག་གི་སྒྲ་དོན་མེད་པ་ཁོ་ན་ཡིན་པར་བསྟན་པ་ནི། གཅིག་ཉིད་ལས་ནི་ཞེས་བྱ་བའོ། །འོན་ཏེ་སྔོན་པོ་དང་ཨུཏྤ་ལའི་སྒྲ་དག་ལ་ཕན་ཚུན་ཡོངས་སུ་

གཅོད་པའི་ཆོས་ཅན་ལ་ཁྱབ་པ་ནི་མ་ཡིན་ཏེ། རང་གི་བརྗོད་བྱ་ཡོངས་སུ་གཅོད་པ་ཙམ་ལ་མཐར་ཐུག་པ་ཡིན་ནོ་སྙམ་དུ་སེམས་པ་ནི། འོན་ཏེ་སྔོ་སོགས་ཞེས་བྱ་བའོ། །ཨུཏྤ་ལ་ཉིད་འདུ་བ་ཅན་གྱི་ཆོས་ཅན་སྔོན་པོའི་སྒྲ་ལས་རྟོགས་པ་ཡིན་ན། ཇི་ལྟར་དབྱེ་བ་འདི་ཡིན་ཞེས་ཟེར་བ་ལ་འདུ་བ་ཅན་

ཏེ། ཆོས་ཅན་ནི་ཨུཏྤ་ལ་ཉིད་ཀྱིས་སོ། །རྟོགས་པ་ནི་སྔོན་པོའི་སྒྲ་ལས་སོ། །དེའི་མངོན་སུམ་གྱིས་སྔོན་པོའི་ཆོས་རྟོགས་པ་ན་དེའི་འདུ་བ་ཅན་ཨུཏྤ་ལ་ཉིད་ཀྱང་རྟོགས་བྱ་ཉིད་དུ་མཐོང་བར་བསྟན་པ་ནི། ཇི་ལྟར་སྔོན་པོ་མངོན་སུམ་གྱིས་ཞེས་བྱ་བའོ། །ཁྱད་པར་གྱི་མཐར་ཐུག་པ་ཡིན་ན་ཡང་སྒྲ་

ངག་གི་གཞི་མཐུན་པ་ཉིད་དུ་མི་འགྱུར་བ་ཡིན་ནོ་ཞེས་བྱ་བ་ནི། སྒྲས་ནི་ངེས་པ་ཉིད་ཀྱི་དོན། །ཞེས་བྱ་བའོ། །བླངས་པའི་སྔོན་པོ་ཉིད་ཆོས་ཅན་ལས་གཞན་ཡོད་པ་མ་ཡིན་ཏེ། མངོན་སུམ་གྱིས་མ་དམིགས་པའི་ཕྱིར་རོ་ཞེས་བསྟན་པ་ནི། ཨིནྡྲ་ནཱི་ལ་ཨུཏྤ་ལ་སོགས་ཞེས་བྱ་བའོ། །དེའི་ཕྱིར་ཆ་

ཙམ་གསལ་བ་མ་ཡིན་ནོ་ཞེས་བྱ་བ་གསལ་བ་ཡིན་ཏེ་མེ་བཞིན་པའི་ཆ་ཉིད་ལེན་པ་ཡིན་ན་སྒྲ་དོན་དང་རེག་པར་མི་འགྱུར་རོ་ཞེས་བྱ་བའི་དོན་ཏོ། །སྔོན་པོའི་སྒྲ་ལས་ཨུཏྤ་ལར་ཡང་ཉེ་བར་འཇོག་པར་བྱེད་པ་ན་ཨུཏྤ་ལའི་སྒྲ་བཞིན་ཡོད་ན་ཨུཏྤ་ལ་མ་ཡིན་པ་ལས་ལྡོག་པ་མ་ཡིན་ནམ། དེ་བཞིན་དུ་ཨུཏྤ་ལའི་

སྒྲ་ལ་ཡང་སྔོན་པོའི་སྒྲ་ཡོད་ན། སྔོན་པོ་མ་ཡིན་པ་ལས་ལྡོག་པ་ཡིན་པའི་ཕྱིར་གཉི་གའི་ནུས་པ་ཡིན་ནོ་སྙམ་དུ་སེམས་པ་ལ། གལ་ཏེ་སྔོ་ཉིད་ཅེས་བྱ་བ་སྟེ། གལ་ཏེ་སྔོན་པོའི་སྒྲ་ཨུཏྤ་ལ་ཙམ་གྱིས་ནུས་པ་ཅན་བཞིན་ནོ། །སྔོན་པོའི་སྒྲ་དོན་མེད་པར་འགྱུར་ལ། འོན་ཏེ་དེ་དང་དེ་མ་ཡིན་པ་ལ་ནུས་པ་ཅན་

Vol. 180 · folio 279b

ཡིན་ན་ཇི་ལྟར་ཨུཏྤ་ལའི་སྒྲ་ཉེ་བ་ན་ལྡོག་པར་འགྱུར། འོན་ཏེ་དེ་ཉེ་བ་དང་མ་འབྲེལ་བ་ཡང་སྐྱེས་བུས་དེ་ལྟར་རྣམ་པར་གཞག་པར་བྱ་བ་ཡིན་ནོ། །དེ་ལྟ་ཡིན་ན་སྐྱེས་བུའི་བློ་ལས་བྱུང་བའི་ཁྱད་པར་ལ་སོགས་པ་ཉིད་ཡིན་གྱི་སྒྲ་ལས་བྱུང་བ་ནི་མ་ཡིན་ནོ། །འོན་ཏེ་སྒྲ་ཡང་བློ་དེའི་རྗེས་སུ་འཇུག་པ་

ཡིན་ན་དེ་ལྟ་ཡིན་ན་བློ་སྒྲུབ་པ་ནི་འདི་བརྗོད་བྱ་ཡིན་པའི་ཕྱིར་ཕྱི་རོལ་གྱི་དོན་ཉིད་ནི་མ་ཡིན་ནོ། །འོན་ཏེ་ཁྱད་པར་ལ་ཡང་སྒྲ་ཉིད་ནུས་པ་ཅན་ཡིན་ན་ཐམས་ཅད་ལ་དེ་བཞིན་དུ་འགྱུར་རོ། །འོན་ཏེ་གཞན་ལ་ཡང་ནུས་ན་འདི་ལ་ཡང་དེ་བཞིན་དུ་འགྱུར་ཏེ། ནུས་པ་དེ་དང་མ་བྲལ་བའི་ཕྱིར་རོ། །གནས་སྐབས་

ལ་སོགས་པ་ཡང་འདིས་བཤད་པ་ཡིན་ནོ། །གང་གི་ཕྱིར་སྐྱེས་བུ་ནི་གནས་སྐབས་པས་དེ་ལ་མེད་པའི་ཁྱད་པར་ཡང་རྟོགས་པ་ཡང་ཡིན་ནོ་ཞེས་བྱ་བའི་དོན་ཏོ། །གང་གི་ལ་ཡང་སྔོན་པོ་མ་ཡིན་པ་ལོག་པས་སྔོན་པོའི་སྒྲས་རྟོགས་པར་བྱ་བ་དེ་ཉིད་ཨུཏྤ་ལའི་སྒྲ་ཡང་ཨུཏྤ་ལ་མ་ཡིན་པ་ལས་སོ་ལྡོག་

པ་ཕན་ཚུན་ཁྱད་པར་མེད་པས་གཞི་མཐུན་པ་མེད་པ་ཡིན་ཏེ། ཁྱད་པར་དང་ཅིག་ཤོས་ཡོད་པ་དང་མེད་པར་ཐལ་བར་འགྱུར་རོ་སྙམ་དུ་སེམས་པ་ལ་དེའི་ཕྱིར་རང་གི་བག་ཆགས་ཀྱི་དབང་གིས་སྐྱེས་པའི་བློ་ཉིད་ཅེས་བྱ་བ་སྟེ། བག་ཆགས་ལས་བྱུང་བའི་རྟོག་པ་སྔོན་པོ་ཉིད་དང་ཅིག་ཤོས་ཐ་དད་པར་བྱེད་ཅིང་

སླར་ཡང་ཐ་མི་དད་པར་བྱེད་པ་དེའི་ཕྱིར་གཞི་མཐུན་པ་ཉིད་དམ་ཅིག་ཤོས་སུ་འགྱུར་གྱི་དངོས་པོ་ཐ་མི་དད་པ་ལས་ནི་མ་ཡིན་ནོ། །རྫས་ལྷུང་ན་དེའི་གཟུགས་ལ་སོགས་པ་ལྷུང་བ་ཡིན་གྱི་གཞན་མ་ལྟུང་བར་མཐོང་བ་ལ་གཞན་དུ་རྫས་དང་ལྡན་པར་སྣང་བ་ནི་མ་ཡིན་ལ་གཞན་ལྕི་བ་ཉིད་ནི་གཞན་གྱི་ལྟུང་བའི་རྒྱུ་

མཚན་མ་ཡིན་ཏེ། ཐལ་ཆེས་པའི་ཕྱིར་རོ། །དེའི་ཕྱིར་ལྕི་བ་ཉིད་ཀྱི་ཕྱིར་ལྟུང་བ་ཡིན་པས་གཟུགས་ལ་སོགས་པ་བྱེད་པ་དང་ལྡན་པར་བསྟན་པ་ནི། ལྕི་བ་ཉིད་ཡོད་པས་ན་ཞེས་བྱ་བའོ། །གལ་ཏེ་ལྕི་བ་ཉིད་བཞིན་དུ་གཟུགས་ལ་སོགས་པ་ལྟུང་བ་ལས་ལྕི་བ་ཉིད་ཀྱི་ཀྱང་དེ་ལྟར་འགྱུར་ན་དེ་ལྟར་ན་

ཐུག་པ་མེད་པ་ཡིན་ནོ། །རང་གི་ངོ་བོ་ནི་དེ་ལྟར་ལྟུང་བ་ཞེས་མ་ཡིན་ལ་དེའི་བར་གྱིས་གཞན་དེ་ལྟ་བུར་གྱུར་པ་མ་ཡིན་ཡང་ལྟུང་བར་བྱེད་པ་ནི་མ་ཡིན་ནོ། །དེ་ལ་རང་ཉིད་དེ་ལྟར་གྱུར་པ་ཡང་མ་ཡིན་པའི་ཕྱིར་ཆེར་དཔྱོད་པ་ཡིན་ནོ། །ཡོན་ཏན་ལྟུང་བ་ཡིན་ཞེས་འདིས་མཐོང་བ་ཡིན་པར་བསྟན་པ་ནི་

Vol. 180 · folio 280a

བཏུང་བ་ལ་སོགས་པ་ཞེས་བྱ་བའོ། །གལ་ཏེ་བག་ཆགས་ལས་བྱུང་བའི་རྟོག་པ་ནི། ཐ་དད་པ་དང་ཐ་མི་དད་པར་ཡང་བྱེད་ན། ཇི་ལྟར་དངོས་པོའི་ངོ་བོ་གཞན་དུ་འགྱུར་དེའི་དབང་དུ་བྱས་པ་ཡིན་ན། དེ་ཉིད་རྣམ་གྲངས་ཉིད་ཡིན་ནོ་སྙམ་དུ་སེམས་པ་ལ། དངོས་པོ་ཐ་

མི་དད་ཀྱང་ལྡོག་པའི་བྱ་བའི་དབང་གིས་རྟོག་པ་བག་ཆགས་བྱུང་བ་ཡིན་པར་བསྟན་པ་ནི། དེའི་ཕྱིར་ལྡོག་པའི་ཁྱད་པར་གྱིས་ཞེས་བྱ་བ་སྟེ། ཐ་དད་པ་ཞེས་བྱ་བ་སྟེ། ཕོ་རྟགས་ཡིན་ཏེ། སྒྲ་དང་ཤེས་པའི་བསམས་པས་ཡིན་པར་བསྟན་པ་ནི། སྒྲ་དང་རྟོགས་པ་ཐ་དད་པ་ཡིན་ཏེ་ཞེས་བྱ་བའོ། །

གལ་ཏེ་ལྡོག་པའི་ཡུལ་ལ་རྟོག་པ་ཡིན་ན་བ་ལང་གི་བ་ལང་ཉིད་ཅེས་བྱ་བ་བཞིན་དུ། བ་ཡང་ཐུ་ཡུ་ཞེས་བྱ་བར་ཡང་འགྱུར་གྱི་གཞི་མཐུན་པར་ནི་མི་འགྱུར་རོ་སྙམ་དུ་སེམས་པ་ནི། འོ་ན་ཅི་ལྟར་ཞེས་བྱ་བའོ། །དེ་ལ་རེ་ཞིག་བ་ལང་གི་བ་ལང་ཉིད་ཅེས་བྱ་བ་ལ་སོགས་པ་དངོས་པོ་བརྗོད་པ་ཉིད་ཀྱི་

རྟ་དང་རྟ་ལ་སོགས་པ་རྣམས་ཀྱིས་ཐ་དད་བཞིན་དུ་སྟེ། ཡན་འགར་བཞིན་དུ་མཚོན་པ་ཡིན་ནོ། །གང་དེ་ལ་ཆོས་གཞན་རྣམས་ཀྱིས་ཏེ་དཀར་པོ་ཉིད་ལ་སོགས་པ་རྣམས་ཀྱིའོ། །ཁྱད་པར་བྱེད་པ་ནི་རྣམ་པར་གཅོད་པར་བྱེད་པ་ཉིད་དོ། །དེའི་ཕྱིར་དེ་ལས་གཞི་མཐུན་པ་མ་ཡིན་ནོ། །འདི་ལྟ་བུའི་

སྦྱོར་བ་འདི་ནི་ཐ་སྙད་པའི་མ་ཡིན་པ་མ་ཡིན་ནམ་དོན་བྱེད་པར་མི་སྟོན་པའི་ཕྱིར་རོ། །དེ་རྣམས་དོན་མེད་པ་ཅན་ལ་ཐ་སྙད་དུ་བྱེད་པ་ནི་མ་ཡིན་ཏེ་ཐ་སྙད་དུ་བྱེད་པའི་ཕྱིར་རོ། །རྟོག་པ་དང་ལྡན་པའི་ཕྱིར་རོ་ཞེས་བསྟན་པ་ནི། ཐོས་པ་དེ་ཙམ་ཞེས་བྱ་བ་སྟེ། ཐ་སྙད་འདི་ཡང་དོན་གྱི་མཐར་ཐུག་པ་ཁོ་ན་ཡིན་

གྱི། ཇི་ལྟར་ཐུ་ཡུ་ལ་འཇུག་པའི་བ་ལང་གི་བརྡ་ནི་ཁྲ་མོ་ལ་བ་ལང་ཉིད་ཀྱི་ཐ་སྙད་མི་བྱེད་ཀྱང་། བ་ལང་གི་སྒྲའི་ཡུལ་ཡོད་པ་ཡིན་ལ་དེ་འདི་ལ་ཡང་དེས་ཐ་སྙད་ལ་འདིའི་གོ་སྐབས་ཡོད་པ་ཡིན་ནོ་ཞེས་བྱ་བའི་དོན་ཏོ། །འཕངས་པ་མེད་པ་ནི་ཁོངས་སུ་གཏོགས་པ་མ་ཡིན་པ་སྟེ། གཞན་ཀུན་ནི་ཆོས་

གཞན་ཏེ་དཀར་པོ་ལ་སོགས་པ་གང་གིས་དེ་དེ་ལྟར་ཡིན་པའོ། །མངོན་སུམ་གྱིས་བཟུང་བའི་དངོས་པོར་ཐ་མི་དད་པ་ཡིན་ཡང་རྟོག་པས་བསླང་བའི་བསམ་པ་ཁོ་ནས་ཐ་དད་པ་ཡིན་ཏེ། འདི་ལ་དཔེ་ནི། སོར་མོའི་ལྡན་པ་ཞེས་བྱ་བའོ། །གཞི་མཐུན་པའི་ཡུལ་ཉེ་བར་བསྟན་པ་ནི། སོར་མོ་ལྡན་གྱུར་

Vol. 180 · folio 280b

ཞེས་བྱ་བ་སྟེ། མི་ལྡན་པ་ལས་ལོག་པ་ཙམ་ཡུལ་ཉིད་ཡིན་པའི་ཕྱིར་རོ། །དེ་དང་མཐུན་པ་ཡང་ཆོས་གཞན་དང་མ་བྲལ་བ་ཡིན་པར་བརྗོད་པའི་ཕྱིར་དེ་ལས་གཞན་པ་རྗོད་པར་བྱེད་པ་དེ་ལྟ་བུ་རྣམས་ཀྱིས་གཞི་མཐུན་པ་འཐོབ་པ་ཡིན་ལ་ཆོས་ཅན་བརྗོད་པར་གྲགས་པ་ཡིན་ནོ། །དེས་ཐམས་

ཅད་ཁོངས་སུ་གཏོགས་པར་བརྗོད་ན་ཆོས་གཞན་དང་བརྗོད་པ་རྣམས་ཀྱིས་རྣམ་གྲངས་སུ་འགྱུར་བ་མ་ཡིན་ནམ་ཞེས་ཟེར་བ་ལ་དོན་གཅིག་བརྗོད་ཀྱང་ཞེས་བྱ་བ་སྨོས་ཏེ། ཐ་དད་པ་དང་ཐ་མི་དད་པ་དག་ལ། བརྗོད་བྱ་གཅིག་ཁོ་ན་ཡིན་ལ་བྲལ་བ་དང་མ་བྲལ་བ་དག་ཁོ་ན་ཡིན་ནོ། །གལ་ཏེ་འདི་

ཁོ་ན་ཅི་ལས་ཤེ་ན། དེ་ལྟར་ཏེ་རྣམ་པ་དེ་ཉིད་ཀྱིས་བྱས་པ་ནི་རྒན་པོ་རྣམས་ཀྱིས་སོ། །བརྡ་ནི་རྣམ་པར་གཞག་པ་སྟེ། གང་གི་ཡིན་པ་དེ་དེ་བཞིན་ཏེ་གང་གི་ཕྱིར་ཡིན་པ་དེའི་ཕྱིར་འདི་ཁྱད་པར་ཡིན་ནོ་ཞེས་བྱ་བའི་དོན་ཏོ། །འགྲེལ་པ་མཛད་པ་ནི་ལྡོག་པའི་ཡུལ་ལ་ཆོས་དང་ཆོས་ཅན་བརྗོད་པའི་སྒྲ་དག་གི་ཐ་

དད་པ་དང་ཐ་མི་དད་པ་ཡང་རྟོག་པས་སྤྲུལ་པ་ཡིན་པར་བསྟན་ནས་ལྡོག་པའི་ཐ་དད་མེད་ཀྱང་རྟོག་པས་བྱས་པའི་ཐ་དད་པའི་འཇིག་རྟེན་གྱི་བརྡ་ལ་བརྟེན་ནས་གོ་བར་བྱའོ་ཞེས་བྱ་བའི་དོན་དོན་གཅིག་བརྗོད་པའི་ཞེས་བྱ་བས་བཤད་པ་ཡིན་ནོ། །དེ་བཞིན་དུ་བ་ལང་གི་ཞེས་བྱ་བ་ལ་སོགས་

པས་ཐ་དད་བཞིན་དུ་ཞེས་བྱ་བ་ལ་སོགས་པ་ལྡོག་པའི་ཐ་དད་ཡོད་པ་ཅན་གྱི་ཡུལ་ཞེས་བྱ་བ་ནི་རྣམ་པར་དབྱེ་བའོ། །དེ་བཞིན་དུ་ཞེས་བྱ་བས་ཀྱང་བརྟགས་པའི་ཐ་དད་པས་ཞེས་འཛིན་པ་ཡིན་ནོ། །རིལ་ཞེས་བྱ་བ་ནི་ཆོས་བསྡུས་པ་དང་ཆོས་གཞན་ཡང་བརྗོད་པ་ཡིན་ནོ། །འཛིན་པ་གཞན་

ཞེས་བྱ་བས་ནི་ཇི་ལྟ་བའི་རྣམ་གྲངས་གསལ་བ་ཡིན་ནོ། །ཐ་དད་པ་ནི་ཞེས་བྱ་བས་ནི་དངོས་སུ་བའི་ཐ་དད་གསལ་བ་ཡིན་ནོ། །གང་གི་ཚེ་བ་ལང་གི་རྣམ་པ་ཞེས་བྱ་བ་ལ་སོགས་པས་ནི་ཐ་དད་པར་མངོན་པར་བརྗོད་པ་ནི་མ་ཡིན་ལ་དགོངས་པ་ཅན་ཉིད་དུ་བསྟན་པས་ཐོས་པ་དེ་ཙམ་ཞེས་བྱ་བའི་

ཚིགས་བཅད་བཤད་པ་ཡིན་ནོ། །དེའི་བདག་ཉིད་ཀྱི་འབྲེལ་པ་ཉིད་ཅེས་བྱ་བ་ནི་མངོན་སུམ་གྱིས་དེ་ཉིད་མཐོང་བའི་ཕྱིར་རོ། །འབའ་ཞིག་ཅེས་བྱ་བ་ནི་ཡུལ་ཐག་རིང་པོ་ལ་བ་ལང་དང་རྟའི་བྱེ་བྲག་ལ་རྣམ་པར་དཔྱོད་པ་མེད་པའི་ཕྱིར་རོ། །བ་ལང་དཀར་པོ་ཞེས་བྱ་བས་ཐ་དད་པའི་ཐ་སྙད་ཀྱི་ཡུལ་

Vol. 180 · folio 281a

བསྟན་པ་ནི། སོར་མོ་ལྡན་གྱུར་པ་ཞེས་བྱ་བའོ། །གང་གི་ཚེ་ཞེས་བྱ་བ་ལ་སོགས་པས་ཚིགས་སུ་བཅད་པའི་ཕྱེད་བཤད་པ་ཡིན་ནོ། །མཁས་པ་ཞེས་བྱ་བ་ལ་སོགས་པས་ནི་ཇི་སྐད་བསྟན་པ་སྡུད་པར་བྱེད་པ་ཡིན་ནོ། །འདི་རྣམས་ཚིགས་སུ་བཅད་པ་དང་པོས་ནི་གང་

གི་ཚེ་བ་ལང་གི་རྣམ་པ་ཞེས་བསྟན་པའི་དྲི་བ་བསྡུས་པ་ཡིན་ནོ། །གཉིས་པས་ནི་དེའི་ཚེ་བ་ལང་གིའོ་ཞེས་སྔར་མཐོང་བ་ལས་ཞེས་བྱ་བ་བསྡུས་པ་ཡིན་ནོ། །གང་གི་ཚེ་གལ་ཏེ་མཐོང་བ་དམན་པ་ཞེས་བྱ་བ་བསྟན་པ་ནི། གལ་ཏེ་ཚད་མའི་འཇུག་པ་ལ་ཞེས་བྱ་བ་འདིས་བསྡུས་པ་ཡིན་ནོ། །དེའི་

ཚེ་ནི་ལན་དུ་ཞེས་བསྟན་པ་ནི་དེའི་ཚེ་དངོས་རིག་པ་དེ་ཞེས་བྱ་བ་འདིས་བསྡུས་པ་ཡིན་ནོ། །གཞན་དུ་ན་ཐ་དད་པ་དང་ཐ་མི་དད་པའི་ཐ་སྙད་མི་རིགས་པར་བསྟན་པ་ནི། ཚུལ་ལུགས་གཞན་གྱི་གོ་སྐབས་ནི། །ཞེས་བྱ་བའོ། །ཅི་ལས་ཡིན་ཞེ་ན། མངོན་སུམ་ཉིད་དམ་ཞེས་བྱ་བ་སྟེ། ཆོས་ཅན་གྱི་

ཐ་དད་པའམ་ཐ་མི་དད་པ་ཡང་རུང་མངོན་སུམ་གྱིས་འཛིན་པ་མ་ཡིན་ནོ་ཞེས་བྱ་བའི་དོན་ཏོ། །ངེས་པར་བཟུང་བ་ཡང་ཆོས་དང་ཆོས་ཅན་དག་ལ་མངོན་སུམ་མེད་ན་མ་ཡིན་པ་མ་ཡིན་ནམ་ཇི་ལྟར་ཐོག་མ་མེད་པའི་བག་ཆགས་རྩ་བ་ཡིན་ཞེས་ཟེར་བ་ལ། གང་ཚེ་རྗེས་འགྲོ་ལྡོག་པ་དག། །ཅེས་བྱ་བའོ། །

ཐ་སྙད་དེ་ནི་དེ་ལྟ་ཉིད། །ཅེས་བྱ་བ་ནི་ཐོག་མ་མེད་པའི་བག་ཆགས་ཀྱི་རྒྱུ་མཚན་ལས་ངེས་པར་བཟུང་བ་ཡིན་ནོ། །གང་གི་ཕྱིར་སྒྲ་དང་ཤེས་པ་ནི་ཐོག་མ་མེད་པའི་བག་ཆགས་ལས་བྱུང་བའི་རྣམ་པར་རྟོག་པའི་དོན་གྱི་ཡུལ་ཡིན་པ་དེའི་ཕྱིར་དེ་ལས་ཡན་ལག་ཅན་ལ་སོགས་པ་མི་འགྲུབ་པོ་ཞེས་བྱ་

བ་ཉེ་བར་བསྡུ་བ་ནི། དེའི་ཕྱིར་ཡན་ལག་ཉིད་ཅེས་བྱ་བའོ། །གལ་ཏེ་ཆོས་ཅན་གྱི་སྒྲ་ལྡོག་པའི་དངོས་པོའི་ཡུལ་ལ་ཆོས་གཞན་མ་སྤངས་བའི་ཕྱིར་དེའི་བརྗོད་པ་རྣམས་ཀྱིས་གཞི་མཐུན་པ་ཡིན་པ་གཟུགས་ནི་བུམ་པའོ་ཞེས་བྱ་བར་ཡང་འགྱུར་རོ། །གཟུགས་ལ་སོགས་པའི་སྒྲའི་བརྗོད་

བྱ་ལས་གཞན་ལ་ཡན་ལག་ཅན་དང་འདུས་པ་ལ་སོགས་པ་དེའི་ཡུལ་མ་ཡིན་ན་གང་གིས་འདི་སྐྱོན་མ་ཡིན་སྙམ་དུ་སེམས་པ་ནི། གལ་ཏེ་ཡན་ལག་ཅན་ནི་ཞེས་བྱ་བའོ། །གལ་ཏེ་ཡང་གཟུགས་ལ་སོགས་པ་ཐ་དད་པ་ཅུང་ཟད་ཀྱང་མེད་པ་ལ་གཟུགས་ལ་སོགས་པ་རྣམས་མཐུན་པའི་

Vol. 180 · folio 281b

འབྲས་བུ་དེ་ལ་མི་བྱེད་པར་རྣམ་པར་གཅོད་པའི་ངོ་བོའི་ནུས་པ་ནི་བུམ་སྒྲ་བརྗོད་པ་ནི་གཟུགས་ལ་སོགས་པའི་ནུས་པས་བླངས་པ་མ་ཡིན་ལ་དཀར་པོ་ལ་སོགས་པའི་ནུས་པ་ནི་བླངས་པ་ཡིན་ནོ། །བླངས་པ་དང་མ་བླངས་པ་དེ་དག་ནི་གཞི་མཐུན་པ་ཉིད་དང་མི་མཐུན་པ་ཉིད་ལ་ཡང་

འདུས་པའི་སྒྲ་ཉིད་དང་གཞན་ལ་ནི་རིགས་ཀྱི་སྒྲ་ཉིད་ཡིན་པར་བསྟན་པ་ནི་གཟུགས་ལ་སོགས་ཞེས་བྱ་བ་སྟེ། གཟུགས་ལ་སོགས་པ་རྣམས་ཀྱི་ནུས་པ་ཐ་དད་པ་ནི་ཁྱད་པར་ཏེ་ངེས་པའི་འབྲས་བུ་ལ་ཐུན་མོང་མ་ཡིན་པའི་འབྲས་བུ་ཡིན་ལ་དེ་རྣམས་འཕེན་པ་མ་ཡིན་པ་སྟེ། བླངས་པས་

འཇུག་པ་ཞེས་བྱ་བ་ནི་སྒྲའི་ནུས་པ་ཡིན་པར་འཇིག་རྟེན་གྱི་ཐ་སྙད་ཀྱི་རྗེས་སུ་འགྲོ་བར་བརྗོད་པ་ཡིན་ན། དེའི་ཕྱིར་འདི་ལྟ་བུར་ནུས་པའི་ཁྱད་པར་ཏེ་ངེས་པའི་མི་འཕེན་པར་བསྟན་པས་ནུས་པའི་སྤྱིའི་ཡུལ་བསྟན་པ་ཡིན་ནོ། །དེ་ལྟ་ཡིན་ན་ནུས་པའི་སྤྱི་ཉིད་ཀྱི་དངོས་པོ་ཉིད་བརྗོད་བྱ་ཡིན་པའི་ཕྱིར་

ཡན་ལག་ཅན་ལ་སོགས་པ་ཇི་ལྟར་སྤངས་པ་ཡིན་ཞེས་ཟེར་བ་ལ། དེ་མཚུངས་ཞེས་བྱ་བ་སྨོས་ཏེ། །དེས་ཏེ་གཟུགས་ལ་སོགས་པ་རྣམས་དེ་མཚུངས་པ་ཡང་ཡིན་ལ། འབྲས་བུ་ཡང་ཡིན་པ་ནི་ཆུ་འཛིན་པ་ལ་སོགས་པའི་འབྲས་བུའོ། །དེའི་རྒྱུ་མ་ཡིན་པ་ནི་བྱེད་པ་མ་ཡིན་པ་སྟེ། སྣམ་བུ་ལ་

སོགས་པའི་གཟུགས་ལ་དེ་རྣམ་པར་གཅོད་པའི་ངོ་བོ་སྟེ། བྱེད་པ་པོ་ལ་ཡོད་པའི་བྱ་བ་ཡིན་པར་ཁས་བླངས་པའི་ཕྱིར་རོ། །གང་གི་ཕྱིར་ནུས་པ་ནི་ནུས་པ་མ་ཡིན་པ་ལས་ལོག་པའི་ངོ་བོ་ཡིན་གྱི་གཞན་ནི་མ་ཡིན་ནོ། །གལ་ཏེ་གཟུགས་ལ་སོགས་པའི་ནུས་པའི་སྤྱི་བུམ་པའི་སྒྲས་བརྗོད་

པ་ཡིན་ན། དེ་ཉིད་འདུས་པའི་སྒྲ་ཁོ་ན་ཡིན་གྱི་རིགས་ཀྱི་སྒྲར་མི་འགྱུར་ཞེས་ཟེར་བ་ལ། དེས་ན་འདིའི་ཞེས་བྱ་བ་སྨོས་ཏེ། བུམ་པའི་སྒྲ་ཁོ་ན་ནུས་པའི་སྤྱི་ལ་ལྟོས་ནས་འདུས་པ་ཡིན་ཏེ། ཁྱད་པར་གྱི་ནུས་པ་ལ་མི་འཕེན་པའི་ཕྱིར་རོ། །དེ་འཕེན་པ་ལས་ནི་དཀར་པོ་བཞིན་དུ་རིགས་ཀྱི་སྒྲ་

ཡིན་ནོ། །ནུས་པའི་ཁྱད་པར་མི་འཕེན་པ་ཁོ་ནས་ནུས་པའི་སྤྱི་ལས་དེ་དེའི་ཞེས་བྱ་བར་ཐ་དད་པར་རྣམ་པར་དབྱེ་བ་བསྟན་པ་ནི། བུམ་པ་ཡི་ནི་གཟུགས་སོགས་ཞེས་བྱ་བ་སྟེ། ཙན་དན་གྱི་དྲི་ཞེས་ཐ་སྙད་འདོགས་པ་ནི་ཡོན་ཏན་དང་ཡོན་ཏན་ཅན་ཐ་དད་པར་བྱེད་པ་མ་ཡིན་ཏེ། གཞན་དུ་ཡང་ཡོད་

Vol. 180 · folio 282a

པའི་ཕྱིར་རོ། །ནུས་པའི་སྤྱིས་ཁྱད་པར་ཅན་དུ་གྱུར་པ་རྣམས་ནི་དེ་ལས་གཞན་པས་ཁྱད་པར་ཅན་དུ་བྱས་པའི་གཟུགས་ལ་སོགས་པ་རྣམས་ལས་གཞན་པ་འཇུག་པའི་ཡུལ་དུ་འགྱུར་བར་བསྟན་པ་ནི། དེ་སྤྱི་ཡན་ལག་ཏུ་བྱས་པ་གང་དག་གི་ཡིན་པ་དེ་དག་གི་ཡིན་གྱི་

གཟུགས་ལ་སོགས་པ་ཙམ་གྱིས་ནི་མ་ཡིན་ཏེ། བུམ་པ་ལ་ངེས་པའི་དོན་བྱེད་ནུས་པའི་སྤྱིའི་ཡན་ལག་དབྱེ་བ་ཡིན་པའི་ཕྱིར། སྣ་ཚོགས་པ་ཉིད་ཀྱིས་ངོ་བོ་ལ་ཉེ་བར་གནོད་པ་ཡིན་ཞེས་བྱ་བའི་དོན་ཏོ། །དེ་དེ་ལྟར་བུམ་པ་ལ་སོགས་པའི་མིང་གི་ཚིག་ནི་ཐོག་མ་མེད་པའི་བག་ཆགས་ལས་བྱུང་

བའི་རྣམ་རྟོག་གིས་སྤྲུལ་པའི་དོན་གྱི་དབྱེ་བ་ལ་གནས་པའི་དོན་དང་འཇིག་རྟེན་གྱི་ལུགས་ལ་ཡང་བརྟེན་ནས་རྣམ་གྲངས་མ་ཡིན་པ་ལ་སོགས་པར་བསྟན་ནས། ད་ནི་ཉེ་བར་བསྒྱུར་བ་དང་། ཚིག་ཕྲད་དང་ཨཱ་ཁྱ་ཏ་ལ་སོགས་པ་རྣམས་ཀྱང་བརྟགས་པའི་དོན་གྱི་དབྱེ་བས་གཞི་མཐུན་པ་ཉིད་དང་

ཅིག་ཤོས་ལ་སོགས་པ་འཇིག་རྟེན་གྱི་རྣམ་གཞག་ལ་བརྟེན་ནས་ཡང་བཤད་པར་བྱའོ་ཞེས་བསྟན་པ་ནི། ཕྱོགས་འདིས་གཞན་ལ་ཡང་བརྗོད་པར་བྱ་ཞེས་བྱ་བ་སྟེ། འདིས་ཏེ་བརྟགས་པའི་དངོས་པོའི་དབྱེ་བ་དང་འཇིག་རྟེན་གྱི་རྣམ་གཞག་དང་། སྒྲའི་ནུས་པའི་ངོ་བོས་འདི་ཁོ་ནས་སེལ་བ་

རྣམས་ཁྱད་པར་མེད་པ་ཉིད་ཀྱིས་རང་ལ་ཡོད་པའི་དབྱེ་བ་མེད་པའི་ཕྱིར་སྒྲ་མ་ལུས་པའི་རྣམ་གྲངས་ཉིད་གསལ་བ་ཡིན་ཏེ། བརྟགས་པ་རྣམས་ཀྱི་དབྱེ་བ་མ་རྟོགས་པའི་ཕྱིར་རོ། །རིགས་ཀྱི་སྒྲ་ནི་ཞེས་བྱ་བ་ནི་འདི་ཞེས་བྱ་བ་ལ་ལྟོས་པ་ཡིན་ལ་ཚོགས་པའི་སྒྲ་འདི་ཉིད་ཅེས་བྱ་བ་ནི་རིགས་ཀྱི་སྒྲར་

འགྱུར་ཏེ། ནུས་པ་དེའི་སྤྱི་ནི་གསལ་བྱ་སོ་སོ་ལ་ངེས་པ་གང་གི་ཚེ་རྗོད་པར་བྱེད། ཆོས་གཞན་མ་སྤངས་པས་ཞེས་བྱ་བ་འདི་ལ་བསམས་པའོ། །ཚོགས་པའི་སྒྲ་ནི་འདི་ལ་དཔེ་ནི། དཔེར་ན་ནགས་ཞེས་བྱ་བའོ། །རིགས་ཀྱི་སྒྲ་ཞེས་བྱ་བ་འདི་ལ། དཔེ་ནི། དཔེར་ན་ཤིང་ཞེས་བྱ་བའོ། །ནུས་

པའི་སྤྱིའི་རྗོད་བྱེད་ཀྱང་ནུས་པའི་ཁྱད་པར་གྱི་རྗོད་བྱེད་རྣམས་ཀྱི་རེས་འགའ་ཞིག་མཐུན་པ་ནི་ཤིང་དང་ནགས་ཞེས་བྱ་བ་བཞིན་དུ། འཇིག་རྟེན་ལ་སྦྱོར་བ་ཁོ་ན་མ་ཡིན་སྙམ་དུ་སེམས་པ་ནི། འོན་ཏེ་ཇི་ལྟར་ཞེས་བྱ་བའོ། །ཤིང་དང་ནགས་ཞེས་བྱ་བ་ནི་འཇིག་རྟེན་གྱི་རྣམ་གཞག་ལས་དེ་ལྟར་ཡོད་པ་

Vol. 180 · folio 282b

ལས་འགྱུར་བ་ཡིན་གྱི་གཟུགས་བུམ་པ་ཞེས་བྱ་བ་ནི་མ་ཡིན་ཏེ། དེ་མེད་པའི་ཕྱིར་རོ་ཞེས་བསྟན་པ་ནི། གལ་ཏེ་བསྟན་བཅོས་ཞེས་བྱ་བ་སྟེ། བསྟན་བཅོས་གཞན་ནི། རྐང་མིག་ལ་སོགས་པའི་རིག་པའི་རྗེས་སུ་འབྲང་བའོ། །འཇིག་རྟེན་རྣམ་གཞག་གི་རྗེས་སུ་འཇུག་པ་ཡིན་

ན། གཟུགས་ལ་སོགས་པ་རྣམས་བུམ་པར་འགྱུར་བར་བསྟན་པ་ཁོ་ན་ནི་དངོས་པོ་ཡང་དག་པར་ཞེས་བྱ་བ་སྟེ། དེ་མཚུངས་པ་ནི་འབྲས་བུ་ཡི། །རྒྱུ་མིན་པ་ནི་རྣམ་དཔྱོད་པ། །ཞེས་བྱ་བ་འདི་ལ་དབྱིབས་ཀྱི་ཁྱད་པར་དུ་མངོན་པར་འདོད་པ་བཞིན་ནོ་གཞན་དུ་ན་སྤྱིའི་འབྲས་བུ་ལ་ནུས་པ་མེད་

པར་ཐལ་བར་འགྱུར་ཞེས་བསྟན་པ་ནི། དབྱིབས་ཀྱི་ཁྱད་པར་གང་ལས་ཞེས་བྱ་བའོ། །དབྱིབས་དང་ལྡན་པ་ལས་ཐ་དད་པ་དེའི་དབྱིབས་ནི་མ་ཡིན་ནོ། །དེ་རྣམས་དེ་ལྟར་འབྱུང་བ་འབའ་ཞིག་ནི་དེ་ལྟ་བུའི་ཐ་སྙད་ཀྱི་ཡུལ་ཡིན་པའི་ཕྱིར་གཟུགས་ལ་སོགས་པ་རྣམས་བུམ་པ་བཞིན་དུ་རིགས་

པ་ཤེས་པ་པོ་ལ་གཟུགས་དང་བུམ་པ་ཞེས་བྱ་བར་ནི་མི་འགྱུར་རོ། །ཕྱོགས་གཅིག་ལ་བསྡུས་པའི་ཚིག་མེད་པའི་ཕྱིར་རོ་ཞེས་བྱ་བ་ནི་གཟུགས་ལ་བུམ་པ་ཞེས་བྱའོ། །གལ་ཏེ་ཕན་ཚུན་ཁྱབ་པ་མེད་པའི་ཕྱིར་གཟུགས་ནི་བུམ་པ་ཞེས་བྱ་བར་གཞི་མཐུན་པ་མ་ཡིན་ན་དེ་བཞིན་དུ་འདིར་ཡང་

ཤིང་ནི་ཤིང་ཤ་པ་ཞེས་བྱ་བར་མི་འགྱུར་རོ། །ཤིང་ཤ་པས་ཤིང་ལ་ཁྱབ་པ་ནི་མ་ཡིན་ཏེ། སེང་ལྡེང་ལ་ཡང་ཡོད་པའི་ཕྱིར་རོ་སྙམ་དུ་སེམས་པ་ནི། གལ་ཏེ་ཤིང་དང་ཞེས་བྱ་བའོ། །དེ་ཡང་ཡོད་པ་ཁོ་ནས་ཡོད་པ་ལ་ཁྱབ་པ་ནི་མ་ཡིན་ནོ། །འོན་ཀྱང་རྟོགས་པ་འཕེན་པ་ནི་མ་ཡིན་ལ། དེ་མི་

འཕེན་པ་ཁྱབ་བྱ་ཡིན་པར་བསྟན་པ་ནི། ཤིང་བློ་ཞེས་བྱ་བའོ། །འདིར་ཡང་ཞེས་བྱ་བ་ནི་ཁྱད་པར་ཅན་གྱི་ནུས་པ་དང་ལྡན་པ་ཡང་འཕངས་པ་ཡིན་ཞེས་བྱ་བ་འདི་ལ་ཡང་ངོ་། །གནའི་ཐ་སྙད་ནི་འཇིག་རྟེན་གྱི་ཐ་སྙད་དོ། །རྒྱུ་མཚན་དེ་ལས་ཀྱང་སྒྲའི་ནུས་པ་ཡིན་གྱིས་རང་བཞིན་གྱི་ནི་མ་ཡིན་ཏེ།

བརྡ་མ་བཟུང་ན་མི་རྟོགས་པའི་ཕྱིར་རོ། །འདི་ཤིང་རྟོག་པ་ནས་ཞེས་བྱ་བས་སྒྲ་ལས་རྟོགས་པ་ནི་མ་ཡིན་ཏེ། དོན་མངོན་སུམ་པ་ཡིན་པའི་ཕྱིར་འདི་ཞེས་བྱ་བར་རབ་ཏུ་གྲུབ་པར་རྗེས་སུ་བརྗོད་ནས་ཤིང་རྟོག་པ་ནས་ཞེས་པ་སའི་སྒྲ་བརྗོད་པར་བྱ་བ་ཉིད་དུ་གྲུབ་པར་བྱེད་པ་ཡིན་ནོ། །དེའི་ཕྱིར་སྒྲ་མ་བཟུང་

Vol. 180 · folio 283a

བ་ལས་གཉི་ག་ལས་བྱུང་བའི་ཤེས་པ་ཡོད་པ་ཡིན་ཏེ་བརྡ་ཅན་མ་ཡིན་པ་ཉིད་དུ་ཐལ་བར་འགྱུར་བའི་ཕྱིར་རོ། །གལ་ཏེ་བ་ལང་དག་ནི་ཉི་ཤུའོ་ཞེས་བྱ་བ་ལ་སོགས་པའི་འདྲི་བ་ཡང་གྲངས་ལ་ཇི་ལྟ་བ་བཞིན་དུ་ཉེ་བར་བསྒྱུར་བ་དང་ཚིག་ཕྲད་དང་ཨཱ་ཁྱ་ཏ་དག་ལ་ཡང་

མཚུངས་པ་བཅུ་འདུས་པ་སྟེ། བཅུ་ཕྲག་གཉིས་ཀྱི་ངོ་བོ་གཞན་ཁོ་ན་ཡིན་པར་བསྟན་པ་ནི། བསྟན་པའི་ནུས་པ་ཞེས་བྱ་བ་སྟེ། རབ་ཏུ་གནས་པ་དང་མངོན་པར་འགྲོ་བ་ཞེས་བྱ་བ་ནི་ཉེ་བར་བསྒྱུར་བའོ། །ཡོད་པའམ་མེད་པ་ཞེས་བྱ་བ་ནི་ཚིག་ཕྲད་དོ། །འཚེད་པར་བྱེད་ཅེས་བྱ་བ་ནི། ཨཱ་

ཁྱ་ཏ་རྣམས་ཀྱི་བྱ་བ་བྱེད་པ་པོའི་གནས་སྐབས་ཀྱི་ཚིག་ལས་དོན་གྱི་བྱེ་བྲག་གསལ་བ་ཡིན་ནོ། །དེ་བཞིན་དུ་དོན་གྱི་དབྱེ་བའི་རྗེས་སུ་འབྲང་བའི་རྣམ་རྟོག་གི་གོ་བྱའི་དོན་གྱི་བྱེ་བྲག་ལ་ཐ་སྙད་དུ་བྱེད་པ་ནི་སྒྲ་ལས་ཆུང་བ་ཡིན་གྱི། སྒྲུབ་པ་སྨྲ་བ་ནི་མ་ཡིན་ཏེ། སྒྲུབ་པ་སྨྲ་བ་པོ་རྣམས་ཀྱིས་ཀྱང་མ་

བོར་བའི་ཕྱིར་རོ། །ཡན་ལག་ཅན་ནམ་སྤྱི་ལ་ཡང་ཡན་ལག་གི་དབྱིབས་ཀྱི་ཁྱད་པར་དེ་ལས་གཞན་པ་ལས་ལོག་པ་མ་རྟོགས་པས་རྟོགས་པར་མི་ནུས་ཏེ་རྗེས་སུ་འཇུག་པ་ཙམ་ཡིན་པའི་ཕྱིར་རོ། །བག་ཆགས་ཇི་ལྟ་བ་བཞིན་དང་བརྡ་ཇི་ལྟ་བ་བཞིན་དུ་རྟོག་པ་དོན་གྱི་དབྱེ་བ་རྗེས་སུ་སྒྲུབ་པ་བཞིན་

བ་ནི་ཡུལ་དེ་ཁོ་ན་ལ་རིགས་ཀྱི་དམིགས་བཞིན་པ་མ་ཡིན་པ་ཡན་ལག་ཅན་དང་སྤྱི་ལ་སོགས་པའི་ཡུལ་ལ་ནི་མ་ཡིན་ནོ། །དེ་ལྟར་སྤྱིའི་དོན་གྱི་དབྱེ་བ་ཡུལ་ལ་བརྟེན་ནས་སྒྲའི་ཐ་སྙད་རྣམ་པར་དབྱེ་བ་བྱས་ནས། ད་ནི་དེར་གཏོད་པ་མ་བྱས་པས་ཐོག་མ་མེད་པའི་བག་ཆགས་ཙམ་གྱི་རྣམ་རྟོག་གིས་

བརྟགས་པའི་དོན་གྱི་དབྱེ་བ་ལ་བརྟེན་ནས་རྣམ་གྲངས་མ་ཡིན་པ་ཉིད་དུ་བརྗོད་པ་ནི། ཡང་ན་ཐོག་མ་མེད་པའི་ཞེས་བྱ་བའོ། །ཕྱི་རོལ་གྱི་དོན་ལ་ཡང་དེ་ལྟ་བུའི་བག་ཆགས་ཡོད་པའི་ཕྱིར་བརྟག་པར་བྱ་བ་དང་གཅིག་ཏུ་བྱས་ནས་ཐ་སྙད་དུ་བྱེད་པ་ནི་སྒྲུབ་པའི་ཡུལ་ཁོ་ན་ལ་ཡིན་དུ་ཟིན་ཀྱང་དེ་བཞིན་དུ་སྤྱི་

དང་ཡན་ལག་ཅན་ལ་སོགས་པར་འགྱུར་བའི་སྐྱོན་མེད་པར་བསྟན་པ་ནི། གལ་ཏེ་སྒྲ་དོན་དེ་ལྟ་བུ་ཡིན་ཡང་ཞེས་བྱ་བ་སྟེ། དེ་ལ་སྟེ་སྒྲུབ་པའི་ངོ་བོའི་བརྗོད་བྱ་ལ་རྩོད་བྱེད་ནི་སྒྲུབ་བྱེད་རྟོགས་པར་བྱེད་པ་ཡིན་ཏེ། དེས་ཀྱང་གཞན་གྱི་འདོད་པ་ཅུང་ཟད་ཀྱང་མི་འགྲུབ་པོ་ཞེས་བྱ་བའི་དོན་ཏོ། །དེ་ལྟར་བརྗོད་

Vol. 180 · folio 283b

བྱའི་རྣམ་པར་དབྱེ་བ་ནི་རྟོག་པ་ཙམ་གྱི་རྒྱུ་མཚན་ལས་ཡིན་པར་བསྟན་ནས་བརྗོད་ཀྱི་རྣམ་པར་དབྱེ་བ་ཡང་ལེགས་པའམ་མ་ལེགས་པའི་ངོ་བོ་བག་ཆགས་ཙམ་ལས་བྱུང་བ་ཡིན་ཏེ། རྣམ་པར་རྟོག་པའི་རྒྱུ་མཚན་ཅན་ཁོ་ན་ཡིན་ནོ། །འདི་ལྟར་དོན་གྱི་རྣམ་པར་དབྱེ་བ་ཉིད་ནི་ལེགས་པ་ཉིད་ཀྱི་

རྒྱུ་མཚན་མ་ཡིན་ཏེ། མི་ལེགས་པར་འདོད་པ་ལ་ཡང་ཡོད་པའི་ཕྱིར་རོ་ཞེས་བསྟན་པ་ནི། ཐ་མལ་པའི་སྒྲ་ཞེས་བྱ་བའོ། །འདུ་བྱེད་དང་ལྡན་པས་འདུས་བྱས་པ་ཉིད་ནི་ཐ་མལ་པ་ལ་ཡང་ཡོད་པ་འདི་ཡང་མི་རིགས་པར་བསྟན་པ་ནི། མཚན་ཉིད་ཀྱིས་ནི་འདོད་པ་ནི་མངོན་པར་འདོད་པའོ། །འོན་ཏེ་

ལེགས་པ་ཉིད་དང་ཅིག་ཤོས་ཉིད་འདུས་བྱས་དང་ཅིག་ཤོས་ཉིད་ཡིན་ན་དེ་ཡང་རབ་ཏུ་གྲགས་པ་མེད་ན་རྟོགས་པ་མ་ཡིན་ནོ། །རྟོགས་པ་མ་ཡིན་པར་བསྟན་པ་ནི། ལེགས་པར་སྦྱར་དང་ལེགས་མིན་ཞེས་བྱ་བ་སྟེ། ཆོས་དང་ཅིག་ཤོས་ཀྱི་རྒྱུ་མཚན་ལས་ནི་ལེགས་པ་དང་མི་ལེགས་པ་ཉིད་ཀྱི་ངོ་བོ་

ལེགས་པར་སྦྱར་བ་དང་ཅིག་ཤོས་ཉིད་ཚད་མ་གོ་བར་བྱ་བ་མ་ཡིན་ནོ་ཞེས་བྱ་བའི་དོན་ཏོ། །ཚད་མའི་རྗེས་སུ་འཇུག་པ་མེད་ན་གྲགས་པ་ནི་མེད་པར་སྨྲ་བའི་ཚིག་བཞིན་དུ་ཕྱིན་ཅི་ལོག་ཏུ་གོ་བར་བསྟན་པ་ནི། རྣམ་པར་གཞག་པ་ཙམ་དུ་ཟད་ཅེས་བྱ་བའོ། །ཡན་ལག་དྲུག་པའི་རིག་བྱེད་རྒྱུ་མེད་པར་

འདོན་པར་བྱེད་པ་ཡིན་ནོ་ཞེས་བྱ་བའི་ལུང་ནི་བྱཱ་ཀ་ར་ནའི་རྩ་བ་ཡིན་ནོ། །ལུང་ཡང་ཚད་མ་ཁོ་ན་ཡིན་སྙམ་དུ་སེམས་པ་ལ། མ་མཐོང་བའི་དོན་བརྗོད་ནི་ཞེས་བྱ་བ་སྟེ། ལུང་ནི་བག་ཆགས་ལས་བྱུང་བའི་རྣམ་པར་རྟོག་པ་ཙམ་གྱིས་མཐོང་བའི་དོན་གྱི་ཡུལ་ལ་ཡིན་གྱི་དངོས་པོ་ལ་བརྟེན་པ་ནི་

མ་ཡིན་ནོ། །དེ་ལ་བརྟེན་པ་ཡིན་ན་ནི་དེ་སྒྲུབ་པ་ཡིན་ནོ། །མ་མཐོང་བའི་དོན་ལ་མ་ཡིན་དུ་ཟིན་ཀྱང་འབྲས་བུར་རྟོགས་པ་ན་ཆོས་ཀྱི་འབྲས་བུར་འགྱུར་རོ་ཞེས་བྱ་བའི་དོན་ཏོ། །དེ་ལ་ཡིད་ཆེས་ཡོད་མིན་ཏེ། ཞེས་བྱ་བ་ནི། མངོན་སུམ་ལ་སོགས་པའི་ཚད་མ་མེད་པའོ། །དེ་བཞིན་དུ་ཐ་མི་

དད་པའི་ཡན་ལག་ཅན་དང་སྤྱི་ལ་སོགས་པ་རྣམས་ཤེས་པའི་རྒྱུ་ནི་མངོན་སུམ་ལ་སོགས་པས་སམ་ཐ་སྙད་ལས་ཀྱང་རྟོགས་བྱ་མ་ཡིན་ནོ་ཞེས་བསྟན་པ་ཡིན་ནོ། །སོ་སོར་སྣང་བའི་དབྱེ་བས་ཐ་དད་པར་ནི་འགྱུར་ན་རྒྱ་ཆེན་པོར་དམིགས་པས་ཕན་ཚུན་རྗེས་སུ་མི་འགྲོ་བར་འགྱུར་བའི་ཕྱིར་རོ་སྙམ་དུ་སེམས་

Vol. 180 · folio 284a

པ་ནི། གལ་ཏེ་ལུས་ཀྱི་ཞེས་བྱ་བ་སྟེ། གལ་ཏེ་ཞེས་བྱ་བ་ནི་ཁས་བླངས་པ་ཞེས་བྱ་བའི་དོན་འདི་ལའམ་དེ་བཞིན་གྱི་དོན་ལ་ཡིན་ཏེ། ཡན་ལག་ཅན་ལ་སོགས་པ་མེད་པར་བྱས་པ་ཡིན་ནོ། །དེ་ལ་ཞེས་བྱ་བ་ནི་ཁས་བླངས་པ་ལ་ཕྱོགས་གཉི་ག་ལ་ཡང་གོ་རིམས་

བཞིན་དུ་སྐྱོན་བསྟན་པ་ནི། མ་ལུས་རྒྱུ་ཉིད་ཅེས་བྱ་བ་སྟེ། རྒྱུ་མ་ལུས་ཅན་ནི་ཡན་ལག་གཅིག་མ་ཚང་ན་རྒྱུ་མེད་པའི་ཕྱིར་མི་འབྱུང་ངོ་། །དེ་མེད་ཀྱང་འབྱུང་བ་ཡིན་ན་ནི་རྒྱུ་དེ་ཉིད་དང་འགལ་བའི་ཕྱིར་རྒྱུ་གཞན་ཉིད་ཁྱབ་བྱེད་དུ་རྟོགས་པར་བྱེད་པས་འགལ་བ་ཁྱབ་པར་འགྱུར་རོ། །རེ་རེའི་རྒྱུ་ཉིད་

ཡིན་ན་ཡང་ཁྱབ་བྱེད་མང་པོ་འབྱུང་བ་ཡིན་ལ་དེ་དང་འགལ་བ་གཅིག་ཉིད་ནི་ཁྱབ་པར་བྱེད་པ་འགལ་བར་འགྱུར་བར་བསྟན་པ་ནི། རེ་རེ་ནུས་པ་ཉིད་ཡིན་ན། །ཞེས་བྱ་བའོ། །ལུས་ཀྱི་ཡན་ལག་གི་བསྐྱེད་བྱའི་ཡང་ཤེས་པ་ནི་དབུགས་འབྱུང་བ་ལ་སོགས་པ་རྒྱུ་གཅིག་གིས་ངེས་པར་གྱུར་

པ་ནི་གཅིག་ཁོ་ནར་འགྱུར་བ་མ་ཡིན་ནམ་དེའི་ཕྱིར་རྒྱུ་རེ་རེ་ཉིད་ལ་མང་པོ་ཉིད་སྐྱོན་མ་ཡིན་ནོ་སྙམ་དུ་སེམས་པ་ལ། དུ་མ་ཉིད་དུ་ཞེས་བྱ་བ་སྨོས་སོ། །དབུགས་དབྱུང་བ་ལ་སོགས་པ་ལ་ཡང་དུ་མ་ཉིད་ཀྱི་ཕྱིར་དུ་མ་ཉིད་ཀྱི་སྐྱོན་སྤངས་པ་མ་ཡིན་ནོ་ཞེས་བྱ་བའི་དོན་ཏོ། །ཕྱོགས་དང་པོ་འཆད་པ་

ནི། འབྲས་བུ་གང་ལ་ཞེས་བྱ་བའོ། །གཉིས་པ་འཆད་པ་ནི། འོན་ཏེ་ཡན་ལག་རྣམས་ཞེས་བྱ་བའོ། །དབུགས་འབྱུང་རྔུབ་དག་གི་དུ་མ་ཉིད་དུ་ཁས་ལེན་པ་ལ་སྐྱོན་བརྗོད་ནས་གཅིག་པ་ཉིད་ཁས་ལེན་པ་ལ་ཡང་ཕྱོགས་གཉིས་པའི་སྐྱོན་གཞན་ལ་ཐལ་འགྱུར་ཡིན་པ་བསྟན་པ་ནི།

གཅིག་ཉིད་ཡིན་ན་ཡང་ཞེས་བྱ་བ་སྟེ། ནུས་པའི་རྒྱུ་ནི་རང་གི་འབྲས་བུ་ལ་ལྟོས་པ་དང་བཅས་པ་ཡིན་ལ་དེས་ན་ཁྱབ་པ་ཡིན་ཏེ་དེའི་ཁྱབ་བྱེད་འབྲས་བུ་ཉེ་བར་བྱེད་པ་ཡིན་ནོ། །དེ་ཡོད་ཀྱང་མེད་ན་ནི་ཁྱབ་བྱེད་མ་ཡིན་པའི་ཕྱིར་དེའི་ཕྱིར་ཤིང་ཉིད་ལ་ཤིང་ཤ་པ་ཉིད་བཞིན་དུ་རྟག་ཏུ་ཉེ་བ་ཡིན་ནོ་ཞེས་

བྱ་བས་དང་པོའི་འབྲས་བུའི་དུས་སུ་གཉིས་པ་ལ་སོགས་པའི་བྱེད་པ་པོ་ཉེ་བ་ཡིན་པར་མཚོན་པ་ཡིན་ནོ། །རྟག་ཏུ་ཉེ་བ་དེ་དེའི་ཚེ་མི་ཉེ་བར་གྱུར་པ་ནི་མ་ཡིན་ནོ། །འོན་ཏེ་རྒྱུའི་ཆོས་ཡིན་པའི་ཕྱིར་རམ་གཞན་ལས་ཀྱང་རུང་འབྲས་བུ་དེའི་དུས་སུ་འབྲས་བུ་གཞན་བྱེད་པ་མ་ཡིན་ལ་དེ་ལྟ་བུ་

Vol. 180 · folio 284b

ཡིན་ན་དུས་གཞན་ལ་ཡང་དེ་ཉིད་ཁྱབ་པར་མི་འགྱུར་བའི་ཕྱིར་མི་འབྱུང་བ་ཡིན་ནོ་སྙམ་དུ་སེམས་པ་ལ་གལ་ཏེ་དུ་མའི་རྒྱུ་མིན་ན་ཞེས་བྱ་བའོ། །དབུགས་འབྱུང་རྔུབ་ལ་སོགས་པའི་སྒྲས་ནི་ལུས་གཟུང་ངོ་། །ནུས་པའི་རྒྱུ་ནི་རང་ཡོད་པས་འབྲས་བུ་ཡོད་པར་གོ་བར་བྱེད་པ་ཡིན་ཏེ། དེས་

ཁྱབ་པའི་ཕྱིར་རོ་ཞེས་བསྟན་པ་ནི། རྒྱུ་ཉེ་ཡང་ངོ་ཞེས་བྱ་བའོ། །བདེན་ཏེ་འབྲས་བུ་སྐྱེད་པར་བྱེད་པའི་རང་བཞིན་ནི་ལྷན་ཅིག་བྱེད་པ་ལ་ལྟོས་པ་ཡིན་གྱི་འབའ་ཞིག་ནི་མ་ཡིན་ལ་དེས་ཀྱང་འདིའི་བདག་ཉིད་དུ་གྱུར་པའམ་གཞན་ཡང་ཕུལ་དུ་བྱུང་བར་བྱེད་པ་ནི་མ་ཡིན་ནོ། །འོ་ན་ཅི་ཞེ་ན།

འབྲས་བུ་ཡིན་ནོ་སྙམ་དུ་སེམས་པ་ནི། གཞན་དང་གཞན་ཞེས་བྱ་བའོ། །གཞན་ལ་ལྟོས་པའི་བྱེད་པ་རང་བཞིན་ཡིན་པའི་ཕྱིར། ཨ་རུ་ར་ལ་ལྟོས་ནས་ལྷ་འཁྲུ་བར་བྱེད་པ་ཡིན་པ་བཞིན་དུ་རིགས་པ་ཤེས་པ་རྣམས་ཀྱིས་མཉན་པར་བྱ་བ་མ་ཡིན་ནོ། །འབྲས་བུའི་རང་བཞིན་ལྟོས་པ་ཁོ་ན་ལས་

ཡིན་ཏེ། གཞན་ནི་དེའི་འབྲས་བུ་ཉིད་དུ་མ་རྟོགས་པའི་ཕྱིར་རོ། །སད་པར་བྱེད་པ་རྣམས་ཀྱང་དབུགས་ལ་སོགས་པ་ཁོ་ན་བཞིན་དུ་སེམས་ཀྱི་རྒྱུ་ཉིད་མ་ཡིན་ཏེ། དེ་མེད་ཀྱང་འབྱུང་བའི་ཕྱིར་རོ་ཞེས་བསྟན་པ་ནི། སད་པར་བྱེད་པའི་རྐྱེན་ཀྱང་ཞེས་བྱ་བའོ། །དེ་ལྟ་ཡིན་ན་དེའི་ངེས་པ་གང་

ན་ཡོད་ཅེ་ན། སྔོན་གྱི་འདུ་བྱེད་པ་ཞེས་བྱ་བ་སྨོས་སོ། །འདུ་བྱེད་པ་འབྲས་བུ་ལ་མི་འཁྲུལ་པར་རྟོགས་པ་ཡིན་ན། དབུགས་ལ་སོགས་པའི་ནུས་པ་ནི་མ་ཡིན་ནོ་ཞེས་བསྟན་པ་ནི། དེས་ན་གལ་ཏེ་ཞེས་བྱ་བའོ། །དབུགས་འབྱུང་བ་ལ་སོགས་པ་གཅིག་ཉིད་ཅེས་བྱ་བ་འདི་ངེས་པ་ཉིད་ཅེས་བྱ་

བ་འདི་དང་སྦྱར་བར་བྱའོ། །དབུགས་འབྱུང་བ་ལ་སོགས་པ་གཅིག་ཉིད་དུ་ངེས་པར་བྱེད་པར་གཞན་འདོད་པར་ཁས་བླངས་ནས་དེ་མི་རིགས་པར་བསྟན་པ་ཡིན་ནོ། །ད་ནི་རྟོགས་པ་དང་འགལ་བར་བརྗོད་པ་ཡིན་པར་བསྟན་པ་ནི། གཅིག་ཉིད་དུ་འཐད་པ་ནི་མ་ཡིན་ཏེ་ཞེས་བྱ་བ་སྟེ། དབུགས་

འབྱུང་བ་གཅིག་གི་དུས་སུ་ཡང་དོན་དུ་མི་ཤེས་པ་ཅིག་ཅར་སྐྱེས་པར་མཐོང་བའི་ཕྱིར་དབུགས་འབྱུང་བ་དེ་ལས་ངེས་པར་འབྱུང་བ་ནི་མ་ཡིན་ཏེ། དེ་ལྟ་མོད་ཀྱི་གང་དུ་ཡང་འགྲོ་བ་ན་བགྲོད་བྱ་དྲན་པ་ཁོ་ནའི་ཚེ་མདུན་ན་གནས་པའི་ཤིང་མཐོང་བ་དང་དེའི་མེ་ཏོག་གི་དྲི་བསྣམས་པ་དང་། སོ་རྩི་ལ་

Vol. 180 · folio 285a

སོགས་པའི་རོ་མྱོང་བར་བྱེད་པ་དང་མཁྲང་བ་ལ་རེག་པའི་རླུང་ལ་སོགས་པས་རེག་པར་ཡང་བྱེད་པ་ལ་སོགས་པ་རྣམས་ལ་རིམ་གྱིས་རྟོགས་པ་མ་ཡིན་ལ་ཅིག་ཅར་རྟོགས་ཀྱང་མ་འཁྲུལ་པ་ཡིན་ཏེ། གནོད་པ་ཅན་མེད་པའི་ཕྱིར་རོ། །རེས་འགའ་རིམ་གྱིས་རྟོགས་པས་རྟོགས་

པ་ལ་ངེས་པར་བྱེད་པ་ཅིག་ཅར་བར་མངོན་པར་རློམ་པའི་འཁྲུལ་པ་ནི་མ་ཡིན་ཏེ། དེ་ཁོ་ནའི་འགོར་བ་དང་ཅིག་ཤོས་དག་གི་རིམ་གྱིས་དང་ཅིག་ཤོས་སུ་ཡང་ལེགས་པ་ཡིན་པའི་ཕྱིར་རོ། །དབུགས་འབྱུང་བ་གཅིག་གི་དུས་གཅིག་ཉིད་ཀྱི་བློ་སྐྱེ་བཞིན་པ་ནི་དོན་དུ་མ་འཛིན་པའི་བདག་

ཉིད་ཅན་མ་ཡིན་ནམ། དུ་མ་ཉིད་ནི་མ་ཡིན་ནོ་སྙམ་དུ་སེམས་པ་ལ། དུ་མ་བློ་གཅིག་གིས་ཤེས་ན། །ཞེས་སྨོས་སོ། །རྣམ་པ་མེད་པ་ཉིད་ཀྱིས་ཉེ་བ་དང་ལྐོག་ཏུ་གྱུར་པ་མེད་པའི་ཕྱིར་དེ་དག་ཙམ་འཛིན་པ་བཞིན་དུ་དོན་མ་ལུས་པར་འཛིན་པར་འགྱུར་རོ། །སྐྱེད་པར་བྱེད་པ་ཉིད་དམ་ཉེ་བ་ནི་

ངེས་པའི་རྒྱུ་མ་ཡིན་ནོ་ཞེ་ན།། །འགལ་བ་མེད་ཕྱིར་ཞེས་བྱ་བ་སྨོས་སོ། །སྐྱེས་པར་བྱེད་པ་ནི་ཤེས་པའི་བདག་ཉིད་ཐོབ་པར་བྱེད་པ་དང་བྱ་བ་ངེས་པས་ཀྱང་ཉེ་བའམ་དབང་པོ་ཡང་རུང་ཡུལ་འཛིན་པ་ལ་ངེས་པར་བྱེད་པ་ཡིན་ཏེ། ངེས་པ་མེད་པར་འཛིན་པ་ནི། གཅིག་ཡིན་ཞེས་ཁས་བླངས་

པའི་ཕྱིར་རོ། །འཛིན་པར་འདོད་པ་ཡང་ངེས་པར་བྱེད་པ་མ་ཡིན་ཏེ། ཐ་དད་པའི་ཕྱིར་དང་སྐྱེད་བྱེད་མ་ཡིན་པའི་ཕྱིར་དང་ངོ་། །དེ་ཤེས་པའི་ཁོངས་སུ་གཏོགས་པ་ཡང་མ་ཡིན་ནོ། །དེའི་ཕྱིར་འགལ་བ་མེད་ཕྱིར་ཏེ། མི་མཐུན་པ་མ་ཡིན་པའི་ཕྱིར་རྣམ་ཤེས་ཐམས་ཅད་འབྱུང་འགྱུར་

རོ། གང་གི་ཚེ་རྗེས་སུ་མཐུན་པ་མ་ཡིན་པའི་བློ་ཡང་དུས་གཅིག་གི་ཚེ་བྱུང་བ་ནི་ཐམས་ཅད་འཛིན་པར་བྱེད་པ་མ་ཡིན་ལ་དེའི་རིམ་གྱིས་ཀྱང་ཡུལ་དེ་དང་དེ་འཛིན་པ་མ་ཡིན་ཏེ། མི་མཐུན་པ་མ་ཡིན་པ་ཉིད་ཀྱི་ཁྱད་པར་དང་མཚན་ཉིད་མི་མཐུན་པ་མེད་པའི་ཕྱིར་རོ། །མི་མཐུན་པ་མ་ཡིན་

པ་ཉིད་ཙམ་རྒྱུ་མཚན་ཅན་ཁྱབ་བྱེད་ཡིན་ན་དེ་ཡོད་ན་ངེས་པར་འགྱུར་ལ་མི་འགྱུར་ན་ནི་དེའི་ཚེ་རྒྱུ་མཚན་ཅན་མ་ཡིན་གྱི་གཞན་གྱི་རྒྱུ་མཚན་ཅན་དུ་འགྱུར་བའི་ཕྱིར་འགལ་བ་ཁྱབ་པ་ཡིན་ནོ། །དེའི་ཕྱིར་གཅིག་ལ་ཡང་མི་འགྱུར་རོ། །རིམ་གྱིས་ཀྱང་ཞེས་བྱ་བ་ནི་རེ་རེས་ཀྱང་ཞེས་བྱ་བའི་

Vol. 180 · folio 285b

དོན་ཏོ། །དབུགས་གཅིག་ཀྱང་ངེས་པ་མེད་པ་ཁོ་ནར་འགྱུར་ན་ངེས་པ་དང་འགལ་བ་ཁྱབ་པ་ཡིན་ནོ་ཞེས་བསྟན་པ་ཡིན་ཡང་དབུགས་དེ་ལས་རྟོགས་པ་ཡིན་ན་དེ་ལས་ཤེས་ཡང་བརྗོད་པ་དོན་གཞན་དུ་འགྱུར་བར་བསྟན་པ་ནི། འཛིན་པ་དེ་ཉིད་ཅེས་བྱ་བ་སྟེ། འདི་ཡང་རྣམ་ཤེས་

ནུས་པ་ངེས་པའི་ཕྱིར་ཞེས་བྱ་བ་འདིས་རྣམ་པར་དཔྱད་པ་ཁོ་ན་ཡིན་པར་བསམ་པར་བྱའོ། །དུ་མ་བློ་གཅིག་གིས་ཤེས་ན། །ཞེས་བྱ་བ་འདི་ཡང་གནས་སྐབས་པའི་ཚད་མ་ལ་མི་ལྟོས་པ་མེ་ལོང་དྲི་མ་མེད་པ་ལྟ་བུའི་བློ་གཅིག་པུ་རྟག་པའི་སེམས་ཀྱི་ངོ་བོར་གཞན་གྱིས་ཁས་བླངས་

པ་ལ་བརྟེན་ནས་བཤད་པ་ནི། འོན་ཏེ་ཡིད་ཀྱི་རྣམ་པར་ཤེས་པ་ཞེས་བྱ་བའོ། །འདིས་ནི་རྒྱལ་དཔོག་པའི་གཞུང་བསལ་བ་ཡིན་གྱི། རྒྱང་འཕེན་པའི་བསལ་བ་ནི་མ་ཡིན་ཏེ། དེ་ནི་བློ་རྟག་པར་ཁས་ལེན་པ་མ་ཡིན་ཏེ། འཇིག་རྟེན་ཕ་རོལ་མེད་པར་འདོད་པའི་ཕྱིར་རོ། །དེའི་གཞུང་

ལས་དབུགས་གཅིག་པོ་ལས་སྐྱེས་པའི་བློ་གཅིག་ཁོ་ན་རིམ་གྱིས་དོན་དུ་མ་ཤེས་པ་ཡིན་ཞེས་བྱ་བ་ཁོ་ནར་བཤད་པར་བྱ་བ་ཡིན་ནོ། །གལ་ཏེ་རྣམ་པར་ཤེས་པ་ཞེས་བྱ་བ་མེད་པ་ཉིད་ཐོབ་ནས་ཏེ། ཐོབ་པར་བྱས་ནས་སོ། །ཉེ་བའི་རིམ་པ་ཁྱད་པར་ཅན་མེད་པའི་ཕྱིར་ཞེས་བྱ་བ་ནི་རྟག་པའི་བློ་ལ་

དོན་གྱི་ཁྱད་པར་བསྐྱེད་བྱ་དང་ཅིག་ཤོས་མེད་པས་དོན་ཉེ་བ་དང་ཉེ་བ་མ་ཡིན་པ་དག་ལ་ཁྱད་པར་མེད་པའི་ཕྱིར་རོ་ཞེས་བྱ་བའོ། །ཉེ་བའི་དོན་འཛིན་པ་ལ་རྒྱུ་རྣམ་ཤེས་ཀྱི་བདག་ཉིད་དུ་གནས་པ་ནི་ཉེ་བ་མ་ཡིན་པའི་ཡང་མཚུངས་སོ། །མཚུངས་པའི་ཕྱིར་འགལ་བའི་དོན་མ་ཡིན་པར་བསྟན་པ་ནི།

མེ་ལོང་རྣམ་པར་གནས་པའི་ཞེས་བྱ་བ་ནི་ཉེ་བ་འཛིན་པའི་རྒྱུ་མཚན་ཉེ་བ་མ་ཡིན་པ་ལ་ཡང་མཚུངས་སོ་ཞེས་བྱ་བའི་དོན་ཏོ། །རྒྱུ་མཚན་ལ་ཁྱད་པར་མེད་ཀྱང་གལ་ཏེ་ཉེ་བ་མེད་པ་མི་འཛིན་ན་ཉེ་བ་ལ་ཡང་དེར་མི་འགྱུར་བར་བསྟན་པ་ནི། འོན་ཏེ་དེའི་ཚེ་ནུས་པ་མེད་ན་ཞེས་བྱ་བའོ། །བློ་རྟག་

པའི་ཕྱོགས་ཞར་ལ་བྱུང་བ་ཡོངས་སུ་རྫོགས་པར་བྱས་ནས་དབུགས་འབྱུང་བ་ངེས་པ་ཅན་གྱི་ཕྱོགས་ཉིད་རྗེས་སུ་འབྲེལ་པ་ཡིན་པར་བསྟན་པ་ནི། འོན་ཏེ་འདི་སྙམ་དུ་སེམས་ཞེས་བྱ་བ་སྟེ། དེ་ལ་ཡང་ཞེས་པ་ནི་དབུགས་ངེས་པར་བྱེད་པའི་ཕྱོགས་ལ་ཡང་ངོ་། །དབུགས་ལ་སོགས་པ་གཅིག་

Vol. 180 · folio 286a

ཉིད་ཡིན་ཡང་རྟག་པའི་ཕྱིར་འབྲས་བུ་ཕྱི་མ་བྱེད་པའི་ངོ་བོ་སྔ་ན་མེད་པའི་ཕྱིར་དེའི་ཚེ་དེ་ཁོ་ན་དེ་ཡང་འབྱུང་བར་འགྱུར་རོ། །ཤེས་པ་གསལ་བ་མང་པོའི་ཡིན་པར་ནི་མི་རིགས་ཏེ། དབུགས་གཅིག་པ་ཉིད་ཡིན་པའི་ཕྱིར་རོ། །སྐད་ཅིག་མའི་དབུགས་མང་པོ་

ཞེས་བྱ་བའོ། །དུས་གཅིག་པ་རྣམས་ཀྱང་ཡོད་པའི་ཕྱིར་དེ་ཁོ་ན་གསལ་བ་མང་པོའི་ཡིན་ནོ་ཞེ་ན་ཡང་ཞེས་བྱ་བ་ལ་ཟེར་བ་ནི། རང་རིག་མིན་པའི་དུས་ཅན་གྱི་སྟེ་རིམ་གྱིས་འབྱུང་བ་ཞེས་བྱ་བའོ། །དེ་འདྲ་བའི་ཞེས་བྱ་བ་ནི་རིམ་གྱིས་འབྱུང་བ་རྣམས་ཀྱི་སྟེ་སེམས་རེ་རེའི་སྐྱེད་བྱེད་ཁོ་ན་

དབུགས་རེ་རེའི་སྐྱེད་བྱེད་ཡིན་ནོ་ཞེས་བྱ་བའི་དོན་ཏོ། །དེ་ལྟ་ཡིན་ཡང་དབུགས་དེ་རྣམས་ཉིད་རིམ་པ་དང་ལྡན་པར་མི་འགྲུབ་སྟེ་རྒྱུ་མེད་པའི་ཕྱིར་རོ། །ལུས་ནི་མ་ཡིན་ཏེ། དུ་མ་ཉིད་ཡིན་པས་རྣམ་ཤེས་བཞིན་དུ་དེ་ལ་ཡང་ཐལ་བར་འགྱུར་རོ། །གོ་རིམས་ལྡན་པའི་རྒྱུ་མེད་ཕྱིར། །ཞེས་

བྱ་བའོ། །ད་ལྟར་བ་བཞིན་དུ་སྔ་མ་སྔ་མའི་རང་གི་རིགས་རྒྱུ་ཉིད་ཡིན་ཡང་སྐྱེ་བའི་དང་པོ་ལ་འབྱུང་བར་མི་འགྱུར་ཏེ། འཇིག་རྟེན་ཕ་རོལ་ཁས་མི་ལེན་པས་རང་གི་རིགས་ཀྱི་སྔ་མ་མེད་པའི་ཕྱིར་རོ་ཞེས་བསྟན་པ་ནི། རང་རིགས་སྔ་མ་རྒྱུ་ཉིད་ནི། །ཞེས་བྱ་བའོ། །སྐྱེ་བའི་དང་པོའི་དབུགས་

ནི་རེས་འགའ་བ་མ་ཡིན་པའི་ཕྱིར་འབྲས་བུ་ཡིན་གྱི་རྒྱུ་ཅི་ཡིན་པར་རྟོགས་པར་བྱེད་པ་མ་ཡིན་ནམ་སྙམ་དུ་སེམས་པ་ལ། དེས་དེ་དབུགས་དེ་འདྲ་བ་ཞེས་བྱ་བ་རང་གི་རིགས་ཡོད་པ་མ་ཡིན་ཏེ། འཇིག་རྟེན་ཕ་རོལ་ཁས་མི་ལེན་པའི་ཕྱིར་རོ། །རིགས་ཐ་དད་པ་ཡང་རྒྱུ་མ་ཡིན་ཏེ། འཚོ་

བའི་གནས་སྐབས་ན་མ་མཐོང་བའི་ཕྱིར་རོ། །དེའི་བསྐྱེད་བྱ་གཞན་གྱི་ཚེ་གཞན་གྱི་བསྐྱེད་བྱ་ནི་མ་ཡིན་ཏེ། འབྲས་བུ་ཉིད་མ་ཡིན་པར་ཐལ་བར་འགྱུར་བའི་ཕྱིར་རོ། །གཞན་གྱི་བསྐྱེད་བྱ་བ་ཉིད་དུ་ཁས་ལེན་པ་ཡིན་ན་དེ་ཡང་གཞན་གྱི་ལུས་ཡིན་ཏེ་གཞན་མ་མཐོང་བའི་ཕྱིར་རོ། །དེ་ཡང་

དུ་མ་ཡིན་པའི་ཕྱིར་དབུགས་ཀྱང་དུ་མ་ཡིན་ནོ། །དེའི་ཕྱིར་དེའི་འབྲས་བུ་ཡང་དུས་གཅིག་ལ་དུ་མར་འགྱུར་རོ། །དེའི་ཕྱིར་དེ་ཁོ་ན་མ་ངེས་པ་ཉིད་ཡིན་པར་བསྟན་པ་ནི། དུ་མ་ཉིད་ཡོད་ཀྱང་ཞེས་བྱ་བའོ། །རྒྱུ་དུ་མ་ཉིད་མ་ཡིན་གྱི་སོ་སོ་སྣང་བ་ལས་ཀྱང་ཐ་དད་པ་ཡུལ་ཅན་ཕྱིར་ཞེས་བྱ་བ་ནི།

Vol. 180 · folio 286b

རྒྱ་ཆེ་བར་དམིགས་པའི་ཕྱིར་རོ། །ཁས་བླངས་པ་དང་འགལ་བ་ཡིན་པར་བསྟན་པ་ནི། ཁྱེད་ལ་ནི་ཞེས་བྱའོ། །ཕའི་དབུགས་སྔོན་དུ་འགྲོ་བ་ཅན་ཡིན་ཡང་རང་གི་རིགས་སྔ་མ་དང་ལྡན་པ་ཉིད་ཀྱི་རང་གི་གོམས་པའི་འབྲས་བུ་ལ་དབྱེ་བ་མེད་པའི་ཕྱིར་གཅིག་གི་ངོ་བོའི་དབུགས་སུ་འགྱུར་

ཞེས་བསྟན་པ་ནི། དེ་ལྟ་བུའི་བདག་ཉིད་དུ་གྱུར་པ་ཞེས་བྱ་བ་སྟེ། ཐལ་བ་སྔ་མའི་ཞེས་བྱ་བ་ནི་རང་གི་གོམས་པའི་འབྲས་བུའི་དབྱེ་བྱེད་མེད་པའི་ཕྱིར་གཅིག་གི་ངོ་བོར་འགྱུར་ཏེ། ཕ་དང་མའི་དབུགས་རྒྱུ་ཉིད་ཡིན་པར་ཁས་བླངས་ཀྱང་ངོ་། །བརྡར་རྟོགས་པར་བྱེད་པ་ན་ཡང་བ་ལང་མཐོང་

བ་ལས་ཞེས་བྱ་བའི་རིགས་པས་རྣམ་ཤེས་དུ་མ་སྐྱེ་བར་འདོད་པ་ཁོ་ན་ཡིན་ནོ་སྙམ་དུ་སེམས་པ་ལ། རིགས་མཐུན་པའི་ཞེས་བྱ་བ་སྟེ། གལ་ཏེ་རིགས་ཐ་དད་པ་ཅིག་ཅར་སྐྱེ་བ་ཡང་མཚུངས་པར་ནི་མ་ཡིན་ཏེ། མ་མཐོང་བའི་ཕྱིར་རོ། །གལ་ཏེ་ཡང་དབུགས་ཀྱི་སྐད་ཅིག་མ་མང་པོ་

རྣམས་ཅིག་ཅར་སྐྱེ་བ་ཡིན་ན་དེ་རྣམས་ཁོ་ན་ཤེས་པ་རེ་རེ་སྐྱེད་པར་བྱེད་པ་ཡིན་ཏེ་ཐ་དད་པའི་ཕྱིར་རིགས་ཐ་དད་པ་སྐྱེད་པར་བྱེད་པ་ཡིན་གྱི་རིགས་མཚུངས་པའི་སྐྱེད་བྱེད་ནི་མ་ཡིན་ནོ་སྙམ་དུ་སེམས་པ་ལ། སྐད་ཅིག་ཐ་དད་པ་ཉིད་ཀྱིས་ཞེས་བྱ་བའོ། །དབུགས་ལུས་བཞིན་དུ་དུ་མ་ཉིད་

ཡིན་ན། རེ་རེ་རྒྱུ་ཉིད་ཡིན་པས་ཅིག་ཅར་མང་པོ་འབྱུང་བར་འགྱུར་བའི་སྐྱོན་ལ་དེའི་ཕྱིར་བློ་ནི་ཅིག་ཅར་སྐྱེ་བ་ཞེས་བྱ་བ་འདིས་བསྟན་ནས། ལུས་རྒྱུ་ཉིད་ཡིན་ན་ནི། ཡན་ལག་གཅིག་དང་བྲལ་ནའང་མིན། །ཞེས་བྱ་བ་བཟླས་ནས་བརྗོད་པས་བསྟན་པ་ནི། གལ་ཏེ་དུ་མའང་གཅིག་དུས་ཅན། །

ཞེས་བྱ་བའོ། །འོན་ཏེ་གང་དང་གང་དབུགས་ཀྱི་ཉེ་བའི་ཡན་ལག་ཡིན་པ་དེ་དང་དེ་ཤེས་པའི་རྒྱུར་འགྱུར་རོ་སྙམ་དུ་སེམས་པ་ནི། ཇི་སྟེ་ཇི་ལྟར་ཡོད་རྒྱུ་ཡིན། །ཞེས་བྱ་བ་སྟེ། ཇི་ལྟར་ཡོད་པ་ནི་ཇི་ལྟར་སྲིད་པ་ཡིན་ལ། དབུགས་ནི་ཕུལ་དུ་བྱུང་བའི་ཡན་ལག་དང་འགྲིབ་པའི་ཡན་

ལག་ཀྱང་རྒྱུ་ཡིན་ནོ་ཞེས་བྱ་བའི་དོན་ཏོ། །ལན་ནི། ཤེས་པ་ལ་ཡང་ཁྱད་པར་ཡོད་འགྱུར་ཏེ་ཕུལ་དུ་བྱུང་བ་དང་འགྲོ་བ་ཉིད་དོ། །རྒྱུ་རྣམ་པར་འགྱུར་བ་ཡིན་ཡང་དེའི་འབྲས་བུ་རྣམ་པར་འགྱུར་བ་མ་ཡིན་པར་བསྟན་པ་ནི། དེ་དེའི་འབྲས་བུ་མིན་ཞེས་བྱ་བ་སྟེ། ཐ་དད་པར་ཁྱད་པར་མེད་

Vol. 180 · folio 287a

པས་ཐ་དད་མིན་ཏེ། ཁྱད་པར་དུ་མི་འགྱུར་བ་སྟེ། དེའི་ཁྱད་པར་གྱི་ཁྱད་པར་ཅན་ཉིད་ཡིན་ན་དེའི་འབྲས་བུ་ཉིད་རྟོགས་པ་ཡིན་ཞེས་བྱ་བའི་དོན་ཏོ། །ཚོགས་པ་དང་མ་ཚོགས་པ་དག་ཟད་པ་དབུགས་ཞན་པར་རྒྱུ་བ་ལ་སོགས་པ་རྣམས་ལ་སྟེ། ཉུང་བ་ཉིད་ལ་མ་

ཚང་བ་ཉིད་ནི་མེད་པའོ། །དེ་ལྟ་བུའི་དེ་ནི་གཉི་ག་ལ་ཡང་ཚོགས་པ་མེད་པ་ཁོ་ན་མ་ཡིན་པར་བསྟན་པ་ནི་དེ་མེད་པར་འབྱུང་བ་ཞེས་བྱ་བའོ། །ཇི་ལྟར་ཡོད་རྒྱུ་ཞེས་བྱ་བའི་བཤད་པ་ནི་ཇི་ལྟར་གནས་པ་ཞེས་བྱ་བའོ། །གལ་ཏེ་ཇི་ལྟར་ཡོད་པའི་རྒྱུ་ཡིན་ན་ཉེ་བ་ན་གནས་པ་མ་ཡིན་པ་ཡང་

རྒྱུར་འགྱུར་རོ་ཞེས་བསྟན་པ་ནི། དེ་ལྟ་ན་འོ་ན་ཞེས་བྱ་བའོ། །དེ་ལྟར་ནི་མ་ཡིན་ཏེ་ཞེས་བྱ་བ་ནི་ཡུལ་ལ་སོགས་པས་གསལ་བ་ནི། རྒྱུ་ཡིན་པ་མི་སྲིད་དེ་རྗེས་སུ་འགྲོ་བ་དང་ལྡོག་པ་མེད་དོ་ཞེས་བྱ་བའི་དོན་ཏོ། །དེའི་ཕྱིར་རྒྱུའི་ཁྱད་པར་གྱིས་ཁྱད་པར་ཅན་འབྲས་བུ་ཡིན་པར་བསྟན་

པ་ནི་དེའི་ཕྱིར་ཚོགས་པ་ལས་ཞེས་བྱ་བའོ། །གཞན་དུ་གྱུར་པ་ལས་ཞེས་བྱ་ནི་མི་ཉེ་བ་ལས་སོ། །གང་ཞིག་གང་གི་རྣམ་པར་འགྱུར་བར་བྱེད་པ་ནི། ཡོད་ན་འབྱུང་བ་ཡིན་པར་ཤེས་པ་ཡིན་ནོ་ཞེས་བསྟན་པ་ནི། མ་ཡིན་ཏེ། དེ་འགྱུར་ན་འགྱུར་བ་ཉིད་ལས་ཞེས་བྱ་བའོ། །དེ་འགྱུར་ན་འགྱུར་བ་ཉིད་མེད་ན་ཡང་དེའི་ཆོས་ཀྱི་ངོ་བོ་ནི་

དེ་མེད་ན་མེད་པའི་ཕྱིར་ཅི་ལས་དེའི་འབྲས་བུར་མ་གྱུར་སྙམ་དུ་སེམས་པ་ལ་དེ་ཡོད་ན་ནི་ཡོད་ཙམ་གྱིས་ཞེས་བྱ་བ་སྨོས་ཏེ། དེའི་འགྱུར་བ་དག་རྒྱུ་དང་ལྡན་པ་དག་མ་ཡིན་ན། དེའི་ཆོས་ཅན་དག་གི་ཡང་དེ་ལྟ་བུ་ཉིད་ཁོ་ནར་རྟོགས་པར་འགྱུར་ཏེ་རྒྱུ་མེད་པའི་ཤེས་པ་ཡིན་པར་ཁྱད་པར་མེད་པའི་

ཕྱིར་རོ་ཞེས་བྱ་བའི་དོན་ཏོ། །ཡོངས་སུ་གྱུར་པའི་ཁྱད་པར་ལ་ལྟོས་པའི་ལུས་ནི་སེམས་ཀྱི་རྒྱུ་ཡིན་ལ་ཡོངས་སུ་གྱུར་པ་གཅིག་པའི་ཕྱིར་སྐྱེད་པར་བྱེད་པ་ཡིན་ཏེ། ཤི་བ་ལ་དེ་མེད་པའི་ཕྱིར་སྐྱེད་བྱེད་མ་ཡིན་ནོ་སྙམ་དུ་སེམས་པ་ལ། འདིས་ནི་ཡོངས་སུ་གྱུར་པ་ཞེས་བྱ་བའོ། །

དབུགས་བཞིན་དུ་ཡོངས་སུ་གྱུར་པ་ཡང་འཇིག་རྟེན་ཕ་རོལ་མེད་ན་དང་པོ་ཡང་མི་འགྱུར་བ་ཁོ་ན་ཡིན་ཏེ། རྒྱུ་མེད་པའི་ཕྱིར་རོ་ཞེས་བསྟན་པ་ནི། ཡོངས་སུ་གྱུར་པའི་རིམ་པ་དེའང་ཞེས་བྱ་བ་སྟེ། དེ་བཞིན་དུ་དེའི་ཁྱད་པར་མེད་པ་ཡང་རྣམ་ཤེས་ཀྱི་ཁྱད་པར་གྱི་རྒྱུར་མི་འགྱུར་ཏེ། ལུས་

Vol. 180 · folio 287b

ལ་ཁྱད་པར་མེད་པའི་ཕྱིར་རོ་ཁྱད་པར་ཡིན་ན་ཡང་ལུས་ཙམ་ལས་མི་འབྱུང་བའི་ཕྱིར་སླར་ཡང་ཁྱད་པར་རྟོགས་པ་ཡིན་ན་ཐུག་པ་མེད་པར་འགྱུར་བར་བསྟན་པ་ནི། ལུས་ཁྱད་མེད་ཕྱིར་དེ་ཡི་ཡང་། །ཞེས་བྱ་བའོ། །ཡོངས་སུ་གྱུར་པའི་ཁྱད་པར་མེད་ན་རྣམ་ཤེས་ཀྱི་ཁྱད་པར་འདོད་པ་

མ་ཡིན་ཏེ། དེ་རྒྱུ་མེད་པ་ཉིད་ཡིན་ན། རྣམ་ཤེས་ཀྱང་རྒྱུ་མེད་པ་ཅན་ཉིད་དུ་ཐལ་བར་འགྱུར་བའི་ཕྱིར་རོ། །དེ་བཞིན་དུ་ཡོངས་སུ་གྱུར་པའི་ཁྱད་པར་ཡང་ལུས་ཀྱི་ཁྱད་པར་མེད་ན་མི་འབྱུང་བར་བསྟན་པ་ནི། ཇི་ལྟར་ཡོངས་སུ་གྱུར་པའི་ཁྱད་པར་མེད་ཀྱང་ཞེས་བྱ་བ་ལ་སོགས་པའི་

ཡོངས་སུ་གྱུར་པ་ལ་ཁྱད་པར་ཡིན་ན་ནི། རྩུབ་པ་དང་ཅིག་ཤོས་ཉིད་དུ་མཐོང་བ་ཡིན་ལ་དེ་བཞིན་དུ་ལུས་ལ་ཁྱད་པར་མེད་ཀྱང་དེའི་ཡོངས་སུ་གྱུར་པར་འགྱུར་བ་མ་ཡིན་ནམ་སྙམ་དུ་སེམས་པ་ནི། གལ་ཏེ་འོ་མ་ལ་སོགས་པའི་ཞེས་བྱ་བའོ། །འོ་མ་གཉིས་དུས་མཚུངས་པར་

གཞག་པ་ཁ་བས་དྲོ་བར་མཚུངས་པ་ནི་ཡོངས་སུ་གྱུར་པར་མཚུངས་པར་འགྱུར་བ་ཡིན་གྱི་ལུས་གཉིས་དུས་མཚུངས་པར་གནས་པ་ལ་སོགས་པ་ཡིན་ཡང་རྣམ་ཤེས་ཡོངས་སུ་གྱུར་པ་མཚུངས་པར་འགྱུར་བ་མ་ཡིན་ཏེ། མཚན་ཉིད་མི་མཐུན་པ་གཞན་དང་གཞན་པའི་རྣམ་ཤེས་མཐོང་བའི་

ཕྱིར་རོ། །དེའི་མི་མཉམ་པའི་དཔེ་ཡིན་པར་བསྟན་པ་ནི། འོ་མ་མཚུངས་པ་ཞེས་བྱ་བ་ལ་སོགས་པ་ནས་མཚུངས་པ་ཉིད་དོ་ཞེས་བྱ་བའི་བར་གྱི་ངག་གཅིག་ཡིན་ནོ། །ལུས་ཉིད་ནི་ཞེས་བྱ་བ་ནི་ཡོངས་སུ་གྱུར་པའི་ཞེས་བལྟ་བར་བྱའོ། །གལ་ཏེ་ལུས་རྣམ་ཤེས་ཡོངས་སུ་གྱུར་པའི་

རྒྱུ་མ་ཡིན་ན་གཞན་གང་ཡིན་ཞེས་ཟེར་བ་ལ། ལུས་མཚུངས་པ་དང་མི་མཚུངས་པ་དག་ལ་རྗེས་སུ་མཐུན་པ་གོམས་པའི་བག་ཆགས་ནི་རྒྱུ་མཚན་ཡིན་ཞེས་བྱ་བར་སྦྱར་རོ། །དེའི་ཕྱིར་ཇི་ལྟར་སྲིད་པའི་རྒྱུ་ལ་དེའི་ཁྱད་པར་ཡིན་ན་འབྲས་བུའི་ཁྱད་པར་ཁོ་ན་ཡིན་པར་ཉེ་བར་བསྡུ་བ་ནི་དེའི་ཚོགས་

པའི་འབྲས་བུ་ཉིད་ཅེས་བྱ་བ་སྟེ། ཇི་ལྟར་ཡོད་པའི་འབྲས་བུ་ཉིད་ལ་སྟེ། ཕུལ་དུ་བྱུང་བ་དང་འགྲིབ་པ་ཉིད་ལ་ཡོད་པའོ། །དེ་ལྟ་མ་ཡིན་ན་ཞེས་བྱ་བ་ནི་རེ་རེའི་ནུས་པ་ཉིད་ཡིན་ནའང་ངོ་། །དུ་མ་ཉིད་དོ་ཞེས་བྱ་བ་ནི་ཅིག་ཅར་མང་པོ་འབྱུང་བར་འགྱུར་བའོ། །དེ་ལྟ་ན་རྒྱུ་མཚན་གང་ལས་

Vol. 180 · folio 288a

རྣམ་ཤེས་རིམ་གྱིས་འབྱུང་བར་འགྱུར་སྙམ་དུ་སེམས་པ་ནི། གང་གི་ཞེས་བྱ་བའོ། །རྒྱུ་རྣམ་ཤེས་ནི་གཅིག་ཡིན་ལ། དེ་ལ་བསྡུས་པ་དང་རེ་རེའི་རྣམ་པར་རྟོག་པ་མེད་པའི་ཕྱིར་དེའི་ཕྱོགས་ལ་འབྱུང་བའི་སྐྱོན་མ་ཡིན་ནོ། །གཅིག་པོ་དེ་ཡང་གཅིག་གི་རྒྱུ་

ཡིན་ལ་དུས་གཞན་ལ་འབྱུང་བའི་རྣམ་ཤེས་ནི་དེའི་བསྐྱེད་བྱ་མ་ཡིན་ནོ། །གང་གི་ཕྱིར་དེ་ཡོད་པ་ལས་སྐད་ཅིག་མ་དང་པོ་ཁོ་ན་ལ་འབྱུང་བ་ཡིན་སྐད་ཅིག་མ་གཅིག་ལ་ཡོད་པ་གཅིག་པོ་ཁོ་ན་དུ་མ་ལ་ནུས་པ་ཅན་ནི་མ་ཡིན་ཏེ། རྗེས་སུ་འགྲོ་བ་དང་ལྡོག་པ་དག་གིས་མ་རྟོགས་པའི་ཕྱིར་རོ། །

རྒྱུ་གཅིག་པའི་འབྲས་བུ་ནི་རྒྱུ་ཡོད་པར་གདོན་མི་ཟ་བ་མ་ཡིན་ནམ་དེའི་ཕྱིར་སྔ་ན་མེད་པའི་ཕྱིར་རྟག་ཏུ་བར་འགྱུར་རོ། །འདི་ཅི་མིག་གཉིས་བཙུམས་ནས་རྒོལ་བ་ཡིན་ནམ་གང་གི་ཕྱིར་འབྲས་བུའི་ཤེས་པ་མ་སྐྱེས་པ་ནུས་པ་ཅན་གཞན་ལས་སྐྱེ་བ་ཡིན་ལ་དེའི་གནས་སྐབས་སུ་འདིའི་འབྲས་བུ་ཡང་

མ་ཡིན་ཏེ། རྒྱུ་མེད་པའི་ཕྱིར་རོ། །དེའི་ཕྱིར་ཇི་ལྟར་སྔ་ན་མེད་པ་མ་ཡིན་དེ་སྐྱེས་ན་དེ་ལས་སྐྱེ་བ་ཡིན་པའི་ཕྱིར་ཇི་ལྟར་རྟག་ཏུ་བར་འགྱུར་ཞེས་བསྟན་པ་ནི། རྣམ་ཤེས་ནུས་པ་ངེས་པའི་ཕྱིར། །ཞེས་བྱ་བ་སྟེ། སྐད་ཅིག་མའི་རྣམ་ཤེས་གཅིག་ནི་ཤེས་པ་གཅིག་སྐྱེད་པ་ཁོ་ན་ལ་ནུས་པ་ཅན་དུ་

རྗེས་སུ་འགྲོ་བ་དང་ལྡོག་པ་དག་རྟོགས་པ་ཡིན་ཏེ། གཞན་གྱི་སྐྱེད་བྱེད་མ་ཡིན་ནོ་ཞེས་བྱ་བར་ངེས་པའོ། །འགྲེལ་པ་མཛད་པ་ནི་མེ་ལ་སོགས་པ་བཞིན་དུ་འབྲས་བུ་གཞན་དུ་མི་འཐད་པར་རྟོགས་པའི་ནུས་པས་རྗེས་སུ་མཐུན་པའི་བག་ཆགས་ཀྱི་རྣམ་ཤེས་མཐོང་བ་ཁོ་ན་ཡིན་པར་བསྟན་

པ་ནི། ནུས་པ་ངེས་པའི་ཞེས་བྱ་བའོ། །ནུས་པའི་མཚན་ཉིད་གཉིས་པ་བསྟན་པ་ནི། ཆགས་པའི་ཁྱད་པར་ཞེས་བྱ་བ་སྟེ། དེ་ཡང་ཤེས་པ་གཞན་འབྱུང་བ་ལ་གནོད་པ་ཁོ་ནར་མཐོང་བ་ཡིན་ནོ། །བག་ཆགས་དང་རྗེས་སུ་མཐུན་པ་ཞེས་བྱ་བ་བཤད་པ་ནི། བག་ཆགས་བརྟན་པ་

ཞེས་བྱ་བའོ། །འབའ་ཞིག་གམ་ཞེས་བྱ་བ་ནི། གཉིད་ལོག་པ་ལ་སོགས་པས་སེམས་རྒྱུན་ཆད་པ་ཡིན་ནོ། །དེའི་ཚེ་རྣམ་རྟོག་ཁོ་ན་སད་པ་ཡིན་གྱི་གཞན་ནི་མ་ཡིན་ནོ། །ཆགས་པའི་ཁྱད་པར་རམ་གནས་པའི་ངེས་པ་ཞེས་བྱ་བ་འདིའི་ཡུལ་བསྟན་པ་ནི། སྔོན་པོར་མཐོང་བའི་མཚུངས་

Vol. 180 · folio 288b

པ་དེ་མ་ཐག་པའི་རྐྱེན་ནི། སྔོན་པོའི་རྣམ་པར་རྟོག་པ་འབྱུང་བ་ལ་རྗེས་སུ་མཐུན་པའི་བག་ཆགས་སད་པ་ནི་དེ་ལ་ཆགས་པས་དེ་ལས་འབྱུང་བ་ཡིན་ནོ། །འབའ་ཞིག་གམ་ཞེས་བྱ་བ་འདི་ལ་ཉམས་སུ་མྱོང་བར་འཛིན་པ་ནི། འདི་ལྟར་ཞེས་བྱ་བའོ། །མཚུངས་པ་དེ་མ་ཐག་པའི་

རྐྱེན་ནམ་རྗེས་སུ་མཐུན་པ་སད་པ་ཞེས་བྱ་བ་འདི་ལ་སྤྱོད་པ་ནི་མཚུངས་པ་དེ་མ་ཐག་རྐྱེན་ལས་ཞེས་བྱ་བ་སྟེ། ཉེ་བ་ཉིད་དུ་ཞེས་བྱ་བ་ནི། སྔོན་པོ་མཐོང་བ་ནི་སྔོན་པོ་ནི་རྣམ་རྟོག་དང་ཉེ་བ་ཞེས་བྱ་བས་ཆགས་པའི་ཁྱད་པར་བསྟན་པ་ཡིན་ནོ། བར་དུ་གཅོད་པ་ནི་བར་ཆད་ལ་སོགས་འདི་

ཉིད་འཆད་པ་ནི། རྣམ་པར་ཤེས་པ་ལ་བར་དུ་གཅོད་པའི་བག་ཆགས་གང་དག་ཡིན་པ་དེ་དག་གི་རྣམ་པར་རྟོག་པའོ། །གཞན་གྱི་ཤེས་བྱ་གནས་སྐབས་ཡིན་པའི་ཕྱིར་རྣམ་རྟོག་ལས་སོ། །ཅི་ལས་ཤེས་ཤེ་ན། ཆགས་པའི་ཡུལ་ཡིན་པས་དེས་བར་དུ་ཆོད་པའི་ཕྱིར་དེ་རྣམས་སྐྱེ་བ་མིན་

ཞེས་པར་སྦྱར་རོ། །དེའི་ཕྱིར་དེ་ལྟར་ཆགས་པའི་ཁྱད་པར་གྱི་ངེས་པ་ལས་གཅིག་གམ་དེ་མེད་ན་དུ་མ་ཡང་སེམས་གཅིག་ལས་ཀྱང་སེམས་སྐྱེ་བར་འགྱུར་བ་ཡིན་གྱི་ནུས་པ་ཉིད་ཀྱི་ངོ་བོའི་ནུས་པ་ལ་ནི་མ་ཡིན་ནོ་ཞེས་བྱ་བ་ཉེ་བར་བསྡུ་བ་ནི། དེ་བས་ན་རྣམ་པར་ཤེས་པ་ལས་ཞེས་བྱ་བའོ། །

ཤེས་པ་གཅིག་ལན་ཅིག་སྐྱེ་བཞིན་པ་ནི། རྒྱུ་གཅིག་པར་གོ་བར་བྱེད་ན་དུ་མའི་ངོ་བོའི་ལུས་ལ་མཚན་ཉིད་མི་མཐུན་པའི་གོ་བར་བྱེད་པ་ཡིན་ཞེས་བྱ་བ་དེ་དག་ཙམ་ལ་ཚད་མ་འཇུག་པ་མ་ཡིན་ནམ་དེ་རྣམ་པར་ཤེས་པ་ཞེས་བྱ་བ་ཅི་ལས་ཡིན། ཡོད་ཀྱང་ཡོད་པ་ཁོ་ན་ཡིན་ཏེ་ཅིག་ཅར་ཤེས་པ་མི་

སྐྱེ་བ་ནི་ཡིད་ཀྱི་རྟགས་ཡིན་གྱི་ནང་གི་ཆོས་བདེ་བ་ལ་སོགས་པ་རྣམས་ལ་ནི་རྒྱུ་མེད་པར་སྐྱེས་པ་སྐྱེ་བ་མ་ཡིན་ནོ་སྙམ་དུ་སེམས་པ་ལ། དོན་གཞན་ཆགས་པས་ནུས་པ་མེད། །ཅེས་བྱ་བ་སྟེ། སྔ་མའི་ཤེས་པ་ཁོ་ན་ཤེས་པ་གཅིག་གི་དུས་ན་ཤེས་པ་གཞན་མི་འབྱུང་བར་ནུས་པར་རྟོགས་པ་

ཡིན་གྱི་ཡིད་ཀྱི་ནི་མ་ཡིན་ཞེས་བྱ་བའི་དོན་ཏོ། །ཤེས་པ་གཅིག་དུས་གཅིག་གི་ཚེ་འབྱུང་བ་ངེས་པ་ཅན་དེ་མ་ཐག་པ་གཅིག་གི་ངོ་བོའི་རྣམ་ཤེས་གོ་བར་བྱེད་པ་མ་ཡིན་ནམ་དེ་ཡང་རང་གི་རྒྱུ་དེ་ལྟ་བུ་ཡིན་ལ་དེ་ཡང་དེ་ལྟ་བུའི་ཡིན་ལ་དེ་ཡང་དེ་ལྟ་བུའི་ཡིན་པ་ནི་ཇི་སྲིད་དང་པོའི་རྣམ་ཤེས་ནི་ལུས་གཅིག་ལས་སམ་དུ་མ་

Vol. 180 · folio 289a

ལས་ཀྱང་རུང་ཚོགས་པའི་ངོ་བོ་ལས་སྐྱེ་བ་དེ་སྐྱེ་བ་དེ་སྲིད་དུ་གོ་བ་ཡིན་གྱི་དུས་གཞན་ན་འབྱུང་བ་ནི་མ་ཡིན་ཏེ། དེ་ལ་ལྟོས་ནས་དེ་སྐྱེད་བྱེད་མ་ཡིན་པའི་ཕྱིར་དང་དང་པོ་ཤེས་པ་སྐྱེ་བ་ཁོ་ན་ལ་ནུས་པ་ཡིན་པའི་ཕྱིར་རོ། །དེའི་ཕྱིར་ཤེས་པ་ཐམས་ཅད་དེ་ཁོ་ན་བཞིན་

འགྱུར་ཏེ། ནུས་པའི་ཁྱད་པར་མེད་པའི་ཕྱིར་རོ་ཞེས་བྱ་བར་ཐལ་བར་འགྱུར་རོ་སྙམ་དུ་སེམས་པ་ནི། གལ་ཏེ་ལུས་ཉིད་ལས་ཞེས་བྱ་བ་སྟེ་ཡང་གི་སྒྲས་ནི་ཤེས་པ་གཅིག་སྐྱེ་བ་ཡང་ངོ་། །གལ་ཏེ་ཤེས་པ་དུ་མ་ཡིན་ན་ཇི་ལྟར་ཤེས་པ་གཅིག་ཡིན་རྒྱུ་དུ་མ་ཉིད་ལ་འབྲས་བུ་མང་པོ་མཐོང་བའི་

ཕྱིར་རོ་སྙམ་དུ་སེམས་ན། ཡང་དེ་ལ་ཟེར་བ་ནི། དཔེར་ན་དབང་པོའི་རྣམ་པར་ཤེས་པ་དུ་མ་ཞེས་བྱ་བ་སྟེ། དེ་ཟེར་བ་ནི། གལ་ཏེ་ལུས་ལས་ཞེས་བྱ་བའོ། །ལན་ཅིག་ཅེས་བྱ་བ་ནི། དུས་གཞན་ན་མི་སྐྱེ་བ་ཞེས་བྱ་བ་ནི་དོན་ཏོ། །འདི་ཡང་རང་ཡིན་ལ་རིགས་ཀྱང་ཡིན་ལ་ཞེས་བྱ་བའི་ཤེས་པའི་

ནུས་པ་ཞེས་བྱ་བའི་དོན་ཏོ། །དང་པོ་སྐྱེད་བྱེད་ཀྱི་ལུས་དུས་ཕྱིས་ངོ་ཤེས་པ་ལས་རྗེས་སུ་འཇུག་པར་མཐོང་བའི་ཕྱིར་རོ། །ཇི་ལྟར་སྐྱེད་བྱེད་མ་ཡིན་པའམ་དེའི་ཚེ་ཁོ་ན་དེའི་བསྐྱེད་བྱ་མེད་པ་ཇི་ལྟར་ཡིན་ཏེ་བསྟན་པ་ནི། དེས་ན་ལུས་ཀྱི་ནུས་པ་ནི། དེས་ན་ལུས་ཀྱི་ནུས་པ་ནི། །ཞེས་བྱ་བ་སྟེ། ལུས་ཀྱང་སྐྱེད་བྱེད་ཡིན་ལ་རྣམ་

ཤེས་ཀྱང་ཡིན་ཞེས་བྱ་བ་རྣམ་པར་འགྲེལ་བ་ནི། གལ་ཏེ་ལུས་ལས་ཞེས་བྱ་བ་སྟེ། གང་གི་ཚེ་ཡང་དང་ཡང་དུ་སྐྱེད་པར་བྱེད་པ་དེའི་ཚེ་ཁྱད་པར་མེད་པའི་ཕྱིར་དང་པོའི་ཚེ་ཁོ་ན་སྐྱེད་པར་བྱེད་པ་ཁོ་ན་ཞེས་བྱ་བའི་དོན་ཏོ། །འོན་ཏེ་ཡང་དང་ཡང་དུ་སྐྱེད་པར་བྱེད་པ་ཡིན་ཏེ། བསྐྱེད་བྱའི་ཤེས་པས་ཉེ་

བར་གནོད་པའི་ཕྱིར་རོ་སྙམ་དུ་སེམས་པ་ནི། འོན་ཏེ་རྣམ་པར་ཤེས་པ་དེས་ཞེས་བྱ་བ་སྟེ། ཤེས་པ་གཅིག་ཁོ་ན་ལས་ནུས་པའི་ཕྱིར་དང་དུས་གཞན་གྱི་བསྐྱེད་བྱ་མེད་པའི་ཕྱིར་ཁྱད་པར་མེད་པར་ཤེས་པ་དུ་མ་ཅིག་ཅར་སྐྱེད་པ་མ་ཡིན་ནོ་ཞེས་བྱ་བའི་དོན་ཏོ། །ལན་ནི་དོན་འདི་ཞེས་བྱ་བ་སྟེ།

འབྲས་བུའི་རྒྱུའི་ནུས་པ་ལ་ཉེ་བར་གནོད་པའི་འོ། །གང་ཡུལ་དུ་བྱས་པ་ཡིན་ཞེ་ན། རྣམ་ཤེས་ཉིད་ལས་ཞེས་བྱ་བའོ། །ཚད་མ་གཉི་ག་ལས་གྲུབ་པའི་རྣམ་ཤེས་ནི་རྣམ་ཤེས་ཉིད་ལས་སོ། །དཔེར་ན་འཚོ་བའི་གནས་སྐབས་ན་རྣམ་ཤེས་ཉིད་ལས་རྣམ་ཤེས་ཡིན་པ་ནི་དེའི་འདུ་བྱེད་ཀྱི་

Vol. 180 · folio 289b

རྗེས་སུ་བྱེད་པའི་ཕྱིར་ཡིན་ལ། དེ་བཞིན་དུ་དང་པོའི་གནས་སྐབས་ལ་ཡང་ཡིན་གྱི་ལུས་ལས་ནི་མ་ཡིན་ཏེ་འགལ་བའི་འབྲས་བུ་ཡིན་ནོ་ཞེས་བསྟན་པའི་ཕྱིར་རྣམ་པར་ཤེས་པ་དང་བྲལ་བའི་ལུས་ཉིད་ལས་ཞེས་བྱ་བ་སྟེ། རྣམ་པར་ཤེས་པ་དུ་མ་སྐྱེ་ཞིང་ཞེས་བྱ་བ་ནི། གཅིག་

གམ་དུ་མ་ལ་ཡང་མ་གུས་པའི་བསམ་པས་སོ། །ཤེས་པ་དུ་མ་གཞན་དང་གཞན་སྐྱེད་པར་བྱེད་པ་ནི་ནུས་པ་ལ་ཁྱད་པར་མེད་པའི་ཕྱིར་དུས་གཅིག་ལས་ཤེས་པ་དུ་མ་སྐྱེད་པར་བྱེད་པ་ཡིན་པར་དགོངས་པའོ། །འབྲས་བུ་རྒྱུ་རྣམས་ཀྱི་ནུས་པ་ལ་ཉེ་བར་གནོད་པ་མ་བྱས་ཀྱང་གཅིག་

གིས་བྱས་པ་ལ་གཞན་ཡལ་བར་འདུག་པར་མཐོང་བ་ཡིན་ནོ་སྙམ་དུ་སེམས་པ་ལ་རྒྱུ་རྣམས་རྟོག་པ་དང་ལྡན་པ་ནི་འགའ་ཡང་མེད་དོ་ཞེས་བྱ་བ་སྟེ། གང་གི་གང་ལས་ཞེས་བྱ་བ་ནི་རྒྱུའི་ལྔ་པ་ཡིན་ནོ། །གལ་ཏེ་ཡང་འབྲས་བུས་ཉེ་བར་གནོད་པ་ནི་གཞན་ལ་མི་སྣང་ཡང་འདི་ཉིད་ལ་ཅིས་

མི་སྲིད་པ་ཡིན་སྙམ་དུ་སེམས་པ་ནི། འོན་ཏེ་བརྒྱ་ལ་ཞེས་བྱ་བ་ནི། ལན་ནི་ལུས་ལས་ཞེས་བྱ་བ་སྟེ། ལུས་ནི་ཤེས་པ་ལས་སྐྱེད་བྱེད་ཉིད་དུ་ངེས་བ་ཡིན་ན་ཕྱི་མའི་དུས་སུ་སྐྱེད་པར་མི་བྱེད་པས་ཉེ་བར་གནོད་པ་སྲིད་པར་འགྱུར་རོ། །རྣམ་ཤེས་དུ་མ་ཞེས་བྱ་བ་ནི་སྐྱེད་བྱེད་ཉིད་ཙམ་དུ་དགོངས་

པས་སོ། །དུ་མ་འཛིན་པ་ནི་གཙོ་བོ་མི་བྱེད་པས་སོ། །དོགས་པར་འགྱུར་བ་ལ། ལ་ལར་ཞེས་བྱ་བ་ནི་དུས་ཕྱིས་ཤེས་པ་ཉིད་ལ་ཤེས་པ་ཡིན་ནོ། །རྒྱུ་མཚན་ནི་ལུས་སྐྱེད་པར་བྱེད་པའི་ནུས་པ་ཅན་དུ་ངེས་པའོ། །ལུས་བཞིན་དུ་རྣམ་ཤེས་ཀྱི་ཡང་ཅི་ལས་དེ་ངེས་པ་ཡིན་ཞེས་པ་ལ། དེའི་

ཕྱོགས་སུ་ལྷུང་བའི་ཞེས་བྱ་བ་སྨོས་ཏེ། གོམས་པའི་འདུ་བྱེད་པའི་ཁྱད་པར་གྱིས་ངེས་པར་རྣམ་ཤེས་ཀྱི་སྐྱེད་བྱེད་ཡིན་ལ་གཅིག་སྐྱེད་པར་བྱེད་པ་འདི་ཡིན་པར་ཉམས་སུ་མྱོང་བ་ཡིན་ནོ་ཞེས་བྱ་བའི་དོན་ཏོ། །དབང་པོ་དུ་མའི་བསྐྱེད་བྱ་ཤེས་པ་དུ་མ་ཡིན་པར་མཐོང་བ་མ་ཡིན་ནམ། དེ་བཞིན་

དུ་ལུས་ཀྱི་བསྐྱེད་བྱར་ཡང་འགྱུར་སྙམ་དུ་སེམས་པ་ནི། བརྗོད་བྱ་མ་ཡིན་ནམ་ཞེས་བྱ་བའོ། །དབང་པོ་ཡང་སྔ་མའི་རྣམ་ཤེས་དང་བྲལ་ན་རྣམ་ཤེས་ཀྱི་རྒྱུ་མ་ཡིན་ཏེ་རྣམ་ཤེས་ཀྱི་འདུ་བྱེད་པ་མེད་ན་མེད་པའི་ཕྱིར་རོ། །དེ་ནི་གཅིག་གམ་དུ་འམ་ཡང་རུང་ནུས་པ་ཡོད་པ་དང་མེད་པ་དག་གིས་

Vol. 180 · folio 290a

རྣམ་ཤེས་སྐྱེད་པར་བྱེད་པ་ཡིན་པར་བརྗོད་པ་ནི། བདེན་ཏེ་ཞེས་བྱ་བ་ལ་སོགས་པའོ། །དེ་དེ་ལྟར་རྣམ་ཤེས་ཀྱི་ངེས་པར་རྣམ་ཤེས་གཞན་གྱི་འདུ་བྱེད་པའི་རྗེས་སུ་བྱེད་ན། འཇིག་རྟེན་ཕ་རོལ་མེད་ན་མི་སྲིད་པ་ཡིན་པར་བསྟན་པ་ནི། གཞན་ལ་ཞེས་བྱ་བའོ། །

ལུས་རྒྱུ་ཉིད་ཡིན་ན་གསལ་བ་མང་པོ་ཁོ་ན་ཡིན་ཏེ། དེའི་རྟག་ཏུ་ཉེ་བ་ཡིན་ནོ་ཞེས་བསྟན་པ་ནི། དེས་ན་ལུས་དེ་ཞེས་བྱ་བའོ། །ནུར་ནུར་པོའི་ངོ་བོའི་ལུས་ཤེས་པའི་སྐྱེད་བྱེད་མ་ཡིན་ནམ། གཞན་ནི་དེ་དང་མཚན་ཉིད་མི་མཐུན་པ་ནི་དེའི་སྐྱེད་བྱེད་མ་ཡིན་ནོ། །དེའི་ཕྱིར་ནུས་པ་དང་ལྡན་

པའི་ལུས་ནི་ལྡོག་པ་ཅི་ལས་ཡིན་ཞེས་བྱ་བ་མི་རིགས་པ་ཡིན་སྙམ་དུ་སེམས་པ་ནི། འོན་ཏེ་ལུས་དེའི་ཞེས་བྱ་བའོ། །ནུར་ནུར་པོ་དང་། མཚན་ཉིད་མི་མཐུན་པ་སྐྱེད་བྱེད་མ་ཡིན་ན། དེ་དང་ལྷན་ཅིག་མ་བྲལ་བའི་རྣམ་ཤེས་སུ་མི་འགྱུར་བར་བསྟན་པ་ནི། གལ་ཏེ་དང་པོའི་ལུས་ཉིད་

ཀྱི་ཞེས་བྱ་བ་ལ་སོགས་པ་སྟེ། ལན་ཅིག་ཉེ་བར་ལེན་པ་ཉིད་དུ་འབྲས་བུའི་ཁྱད་པར་ལ་ངེས་ན་དེ་ཉིད་ལ་ལྷན་ཅིག་བྱེད་པ་ཉིད་ནི་དེ་དང་འགལ་བ་ཉིད་དུ་མི་འགྱུར་བར་བསྟན་པ་ནི། གལ་ཏེ་ལུས་ཞེས་བྱ་བའོ། །བ་ལང་གི་ལྕི་བ་དང་ཨུཏྤ་ལའི་རྩ་བའི་དབྱེ་བ་བཞིན་དུ་ལུས་དང་རྣམ་ཤེས་ལས་

བྱུང་བའི་རྣམ་ཤེས་ཀྱི་དབྱེ་བ་ཡིན་ནོ་སྙམ་དུ་སེམས་པ་ལ། རྣམ་ཤེས་དག་གི་དབྱེ་བ་ནི་གོམས་པའི་བསྐྱེད་བྱའི་ཁྱད་པར་ཉིད་དུ་བྱེ་བྲག་མེད་པའི་ཕྱིར་རོ་ཞེས་བསྟན་པ་ནི། གསལ་བ་ལ་སོགས་པ་ཞེས་བྱ་བའོ། །སེམས་ལ་ལུས་ནི་ཉེ་བར་ལེན་པ་ཉིད་མ་ཡིན་ན་སེམས་ཀྱི་འདུ་བྱེད་པའི་རྗེས་སུ་

འཇུག་པར་ངེས་པས་ལྷན་ཅིག་བྱེད་པ་ཉིད་མེད་པ་ལ་ཡང་རྒྱུ་མཚན་མཚུངས་པ་ཡིན་ནོ་ཞེས་ཟེར་བ་ནི། ཁྱེད་ཀྱི་ལྟར་ན་ཡང་ངོ་ཞེས་བྱ་བའོ། །རྟེན་མིན་ཕྱིར་ནི་ཉེ་བར་ལེན་པ་མ་ཡིན་པའི་ཕྱིར་རོ། །ལྷན་ཅིག་བྱེད་པ་མ་ཡིན་པའི་ཕྱིར་ལུས་ལ་བརྟེན་པ་མ་ཡིན་པའི་སེམས་ནི་ལུས་མེད་ཀྱང་རྣམ་པར་

གནས་པར་འགྱུར་རོ་ཞེས་བྱ་བའི་ཕྱོགས་ལ་ཁས་ལེན་པ་ཡིན་པར་བསྟན་པ་ནི། སེམས་ཀྱི་རྒྱུ་ནི་གནས་པའི་རྒྱུ་སྟེ། གནས་པ་ནི་རྒྱུན་མ་ཆད་པ་ཡིན་པ་དེའི་རྒྱུ་ནི་ལས་ཀྱི་མིང་ཅན་ཏེ་དེ་ནི་ལུས་ཀྱི་རྒྱུ་ཡིན་ནོ། །དེའི་ལུས་ཀྱི་རྒྱུ་ནི་སྐྱེ་མཆེད་ལྔའོ། །དེའི་འཇུག་པ་ཐོབ་པ་ནི་ལུས་གཞན་

Vol. 180 · folio 290b

བསྐྱེད་པའི་བྱ་བའོ། །དེའི་དོན་དུ་ཡན་ལག་ཉིད་དེ་རྒྱུ་མཚན་དུ་གང་གི་ཚེ་མི་འགྱུར་ན་སྟེ་ལུས་ལ་སྲེད་པ་དང་བཅས་པའོ། །དེའི་ཚེ་རྒོལ་བ་ཁས་བླངས་པ་ཡིན་ནོ་ཞེས་གནས་སྐབས་ལ་ལྟོས་ནས་ལྷག་མའི་དོན་ཡིན་ནོ། །དེའི་རྒྱུ་འཇུག་པ་ན་ཐོབ་དོན་དུ་ཞེས་བསྟན་པ་དེའི་རྒྱུ་གང་ཡིན་པ་ཞེས་

བྱ་བ་དེ་ལ་བསྟན་པ་ནི། ཚེ་འདི་ཉིད་སྐྱེ་མཆེད་ལྔའི་སྲིད་པ་འདི་ལས་གཞན་པའི་ལུས་སྐྱེ་བ་གཞན་ལ་འབྱུང་བར་འགྱུར་བ་ནི་ལུས་གཞན་ཡིན་ལ་དེའི་བསྐྱེད་པའི་ལུས་ལ་རྒྱུ་ཡིན་ནོ། །ཡང་ན་ཡན་ལག་ཅན་ཉིད་དུ་མི་འགྱུར་བའི་ཕྱོགས་ལ་འབའ་ཞིག་གནས་པར་དམ་བཅས་ནས་ཕྱོགས་གཞན་

ལ་དེ་མེད་པར་བསྟན་པ་ནི། དེ་ཉིད་ཀྱི་ཕྱིར་གང་གི་ཚེ་ཡང་ཞེས་བྱ་བ་སྟེ། ཡང་གི་སྒྲ་ནི་ཁྱད་པར་གྱི་ཚིག་གོ། །འདི་ལ་ཡང་བག་ཆགས་ལ་གནས་པའི་ལམ་གྱི་ངོ་བོ་ནི། དེ་དང་ལྷན་ཅིག་བརྗོད་པ་ཅན་དུ་བྱེད་པ་ཡིན་ནོ། །ནུར་ནུར་པོ་ནི་སྲིད་པ་གཞན་ལ་འབྱུང་བའོ། །སོགས་པའི་སྒྲས་ནི་ཚེ་འདི་པའི་

སྐྱེ་མཆེད་ལྔ་བསྟན་པ་ཡིན་ཏེ། འབྱུང་རྔུབ་དབང་པོ་བློ་དག་ནི། །ལུས་ཉིད་འབའ་ཞིག་ལས་སྐྱེས་མིན། །ཞེས་གསུངས་པའི་ཕྱིར་རོ། །མངོན་པར་ཕྱོགས་པའི་བྱ་བའི་དངོས་པོ་བསྟན་ནས་དེར་གཏོད་པ་བསྟན་པ་ནི། དེ་ཐོབ་པ་ནི་ལུས་ཀྱི་རྒྱུ་འབའ་ཞིག་ལ་ཞེས་བྱ་བའོ། །དགག་བྱ་བསྟན་

ནས། དགག་པ་བསྟན་པ་ནི། དེ་ཡན་ལག་དུ་མི་འགྱུར་ན་ཞེས་བྱ་བའོ། །འབའ་ཞིག་གནས་པའི་སེམས་བག་ཆགས་ལ་གནས་པའི་སྐྱེ་མཆེད་ལྔའི་དབང་གིས་དུས་ཕྱིས་ལུས་དང་བཅས་པར་འབྱུང་བར་བསྟན་པ་ནི། ལུས་གཞན་སྐྱེ་བ་ལ་ནི་ཞེས་བྱ་བའོ། །སེམས་ཀྱི་ངོ་བོའི་ལས་ཀྱང་སྐྱེ་བ་ཕྱི་

མའི་ལུས་མ་མཐོང་ན་ཇི་ལྟར་རྒྱུ་ཡིན་པར་རྟོགས་སྙམ་དུ་སེམས་པ་ནི། དེའི་ཡན་ལག་གི་ཞེས་བྱ་བའོ། །འདི་ནི་ལས་ཀྱིའོ། །ཡན་ལག་དངོས་པོ་ནི་སྐྱེ་མཆེད་ལྔ་པོ་རྒྱུ་ཉིད་དོ། །དེ་དག་དགག་པ་ལ་མི་དམིགས་པ་ནི་འབྲས་བུ་མི་དམིགས་པའོ། །དེས་འབྱེད་མིན་པ་ནི་ཁྱད་པར་མེད་པ་ཉིད་ཀྱིས་མ་

ངེས་པ་ཡིན་པའི་ཕྱིར་རོ། །ཚེ་འདི་པའི་སྐྱེ་མཆེད་ལྔ་ནི་སྐྱེ་བ་ཕྱི་མ་འབྲས་བུའི་ལུས་ལ་བཟློག་པས་ཁྱབ་པས་འགལ་བ་ཡིན་ཞེས་བྱ་བར་ཡང་འགྱུར་བའི་ཕྱིར་མི་དམིགས་པ་ཉིད་རྟོགས་བྱ་ཡིན་པའི་ཕྱིར་མི་མཐུན་པའི་ཕྱོགས་ལས་བཟློག་པ་ལ་ཐེ་ཚོམ་ཟ་བ་ཉིད་ཀྱིས་འགལ་བར་མ་རྟོགས་པས་མ་

Vol. 180 · folio 291a

ངེས་པ་ཁོ་ན་ཡིན་པར་བསྟན་པ་ནི། དེ་ཡི་ཡན་ལག་དངོས་པོ་དང་། །ཞེས་བྱ་བའོ། །གལ་ཏེ་ཡང་སྐྱེ་མཆེད་ལྔ་མངོན་སུམ་པ་ཡིན་ཡང་དེའི་འབྲས་བུ་སྐྱེ་བ་ཕྱི་མའི་ལུས་དབང་པོ་ལས་འདས་པ་ཡིན་པའི་ཕྱིར་དེའི་རྒྱུ་ཉིད་དབང་པོ་ལས་འདས་པ་ཁོ་ན་ཡིན་ནོ། །དེ་ལྟ་ཡིན་

ཡང་ཁས་བླངས་པ་ཡིན་པར་བསྟན་པ་ནི། གལ་ཏེ་ཡང་ཞེས་བྱ་བ་སྟེ། དེ་ལྟར་མེད་དོ་ཞེས་བྱ་བ་ནི་མ་དམིགས་པའི་ཁྱད་པར་ཏེ་ནུས་པའི་ངོ་བོའི་ལས་ཀྱང་དབང་པོ་ལས་འདས་པ་ཡིན་པའི་ཕྱིར་ཞེས་བྱ་བའི་དོན་ཏོ། །ཁྱབ་པ་སྔོན་དུ་འགྲོ་བ་ཅན་ཞེས་བྱ་བ་ནི། དབང་པོ་མཚམས་སྦྱོར་བ་ལས་

བཟློག་པས་ཁྱབ་སྟེ། འགལ་བས་ཁྱབ་པ་ཞེས་བྱ་བའི་དོན་ཏོ་ཞེས་བཤད་པ་ཞེས་བྱ་བ་ནི། འབྲས་བུའི་འདོད་པས་སྔགས་རྣམས་ནི། །བྱས་དང་སྐྱེས་བུས་བྱས་བརྗོད་བྱ། །བློ་དབང་སྨྲ་དང་སྐྱེས་བུ་ཉིད། །ལ་སོགས་སྒྲུབ་བྱེད་གང་བརྗོད་པ། །ཚད་ལྟར་སྣང་ཡིན་ལྷག་ལྡན་པས། །ཇི་

བཞིན་དོན་རྟོགས་ཡོད་མ་ཡིན། །ཞེས་གསུངས་པའོ། །དེ་དང་མཚམས་སྦྱོར་བ་ཞེས་བྱ་བ་ནི། འདི་བའི་ལུས་སུ་གྱུར་པའི་དབང་པོ་དང་མཚམས་སྦྱོར་བའོ། །དེ་ཡང་ནི། འཇིག་རྟེན་ཕ་རོལ་དུ་འབྱུང་བའི་མཚམས་སྦྱོར་བའོ། །དེའི་ཚེ་ནི་དེའི་དུས་སུ་འདི་པ་ཡིན་པའི་ཕྱིར་རོ། །ཁུ་ཁྲག་

གཞན་གྱིས་བསྐྱེད་པའི་དབང་པོ་ཞེས་བྱ་བ་ནི། ལས་ཀྱི་མཚམས་སྦྱོར་བར་བྱེད་པ་ལ་ལྟོས་ནས་མི་དམིགས་པ་ཙམ་ནི་མི་སྣང་བ་མི་དམིགས་པའོ། །མི་དམིགས་པར་ཞེས་བྱ་བ་ནི། གཞན་གྱིས་ཏེ་སྣང་བ་མི་དམིགས་པས་རྟོགས་པ་མ་ཡིན་ནོ་ཞེས་བྱ་བར་སྦྱར་རོ། །ཇི་ལྟར་བསྒྲུབ་

བྱའི་ཐུན་མོང་བའི་ཡུལ་ནི། ཁྱད་པར་མ་ཡིན་པ་དེ་བཞིན་དུ་རྒྱུའི་ཁྱད་པར་ལས་བྱུང་བ་ཉིད་ཀྱང་། རྩ་བའི་མེད་བཞིན་དུ་ཁྱད་པར་མ་ཡིན་པ་ཁོ་ནར་བསྟན་པ་ནི། ཁུ་ཁྲག་གཞན་ཉིད་ཀྱིས་ཞེས་བྱ་བའོ། །དཔེ་དང་དོན་གྱིས་ཡུལ་གྱི་ཁྱད་པར་གྱི་དཔེ་བརྗོད་པ་ནི་བུམ་པ་དང་སྒྲའི་ཞེས་བྱ་

བྱའོ། །ཡུལ་དང་རྒྱུའི་ཁྱད་པར་ལ་སོགས་པ་རྣམས་ནི། ཁྱད་པར་བྱེད་པ་ཉིད་ལ་གཏན་ཚིགས་ཉིད་ཡིན་ཏེ། དབང་པོ་གཞན་དང་མཚམས་སྦྱོར་བ་ལ་གེགས་མེད་པའི་ཕྱིར་རོ་ཞེས་བསྟན་པ་ནི། དབང་པོ་སྔ་མ་ཞེས་བྱ་བ་སྟེ། རང་རིགས་ལ་ནི་རང་གི་རྒྱུད་ལས་བྱུང་བ་རྣམས་ལ་སྟེ། རྒྱུད་

Vol. 180 · folio 291b

གཞན་གྱི་དབང་པོ་ལ་མཚམས་སྦྱོར་བ་མ་ཡིན་ན་རང་གི་རྒྱུད་ལ་མཚམས་ཀྱི་སྦྱོར་བ་མ་ཡིན་ནོ། །གང་གི་ཕྱིར་མེ་ནི་མེ་གཞན་གྱི་བསྐྱེད་བྱའི་དུ་བ་སྐྱེད་པར་མི་བྱེད་པ་མ་ཡིན་ནོ། །འཇིག་རྟེན་ཕ་རོལ་དུ་བྱུང་བའི་དབང་པོ་ནི་འཇིག་རྟེན་ཕ་རོལ་གཞན་ལས་འབྱུང་བའི་རང་གི་རྒྱུད་ཀྱི་

སྐྱེད་བྱེད་དུ་མ་ཡིན་ནོ་ཞེ་ན། འགྱུར་བ་མཐོང་བའི་ཕྱིར་ཞེས་བྱ་བ་སྨོས་ཏེ། གོམས་པའི་བསྐྱེད་བྱའི་དབང་པོ་རྣམས་ཀྱི་འགྱུར་བ་སྟེ། གཡེར་བག་ཅན་ལ་སོགས་པའི་ཁྱད་པར་དུ་སྐྱེ་བ་དང་པོ་ལ་མཐོང་བའི་ཕྱིར་གཞན་ལས་ཏེ་སྐྱེ་བ་སྔ་མ་ལས་གཞན་ཏེ་སྐྱེ་བ་ཕྱི་མ་གཞན་གྱི་དབང་པོ་

རྣམས་འགྲུབ་པ་ཉིད་ཅེས་བྱ་བ་གནས་སྐབས་ཡིན་པའི་ཕྱིར་འཚོ་བའི་གནས་སྐབས་སུ་འབྲེལ་པ་འཛིན་པ་ལས་སྐྱེ་བའི་དང་པོ་ལ་རྗེས་སུ་དཔོག་པ་ཡིན་ནོ་ཞེས་བྱ་བའི་དོན་ཏོ། །གསལ་བའི་ཁྱད་པར་ལས་འབྲེལ་པ་འཛིན་པ་ན་དེ་དང་འདྲ་བ་ལ་ཡང་འཛིན་པ་ཡིན་གྱི། གཞན་དུ་ན་འབྲས་

བུ་མཐོང་བ་ཉིད་ལ་རྒྱུར་རྟོགས་པར་བྱ་བ་ཡིན་པའི་ཕྱིར་འབྲས་བུ་མི་མཐོང་བ་ནི་ཉེ་བར་ལེན་པར་མི་བྱེད་དོ། །དེ་ལྟ་ཡིན་ན་ཐ་སྙད་ཆད་པར་འགྱུར་བ་ཡིན་པར་བསྟན་པ་ནི། གསལ་བའི་ཁྱད་པར་ཞེས་བྱ་བའོ། །དེ་ལྟར་ན་གཡོ་བ་ཞེས་བྱ་བ་ལ་སོགས་པ་ནས་སྐྱེས་པ་ནི་དེ་ལྟ་བུར་གྱུར་པའི་

བར་གྱིས་འབྲེལ་པ་འཛིན་པ་ཡིན་པར་བསྟན་པ་ཡིན་ནོ། །དེ་ལྟ་བུར་གྱུར་པ་མཐོང་བ་ལས་ཞེས་བྱ་བ་ནི་རྗེས་སུ་དཔག་པའོ། །འོན་ཏེ་དབང་པོ་ནི་ཞེས་བྱ་བ་ནི་དབང་པོ་གཞན་དང་མཚམས་སྦྱོར་བ་ཉིད་ཀྱིས་གཟུང་བ་ཡིན་ནོ་ཞེས་ཟེར་བ་ལ། གལ་ཏེ་དེ་ལྟ་ན་ཞེས་བྱ་བ་སྟེ། གལ་ཏེ་ཡང་དབང་པོ་

ཆོས་ཅན་ཅིག་ཡིན་ཡང་དེའི་ཁྱད་པར་གཡོ་བ་ལ་སོགས་པ་རྣམས་ཏེ། གོམས་པའི་བསྐྱེད་བྱ་ནི། སྐད་ཅིག་རེ་རེ་ཞིང་ཐ་དད་པ་ཁོ་ན་ཡིན་པར་བསྟན་པ་ནི། གཡོ་བ་ལ་སོགས་པ་གོམས་པ་སྔོན་དུ་འགྲོ་བ་ཅན་ཞེས་བྱ་བ་སྟེ། དེས་ན་དབུགས་ཀྱི་གནས་སྐབས་སུ་ཞེས་བྱ་བ་ནི་གཡོ་བ་ལ་སོགས་

པའི་མཚན་ཉིད་ཀྱི་རང་བཞིན་དུ་གྱུར་པ་ལས་ཏེ། རང་བཞིན་མ་ཡིན་ན་སྐྱེ་བ་གཞན་དང་གཞན་གྱི་དབང་པོ་རྣམས་མི་འགྲུབ་པོ་ཞེས་བྱ་བའི་དོན་ཏོ། །སྐྱེ་བ་གཞན་དང་གཞན་ཡང་སྐད་ཅིག་རེ་རེ་ཞིང་གཞན་དང་གཞན་ཉིད་དུ་འགྲེལ་པ་མཛད་པ་བཞེད་པ་ཡིན་ནོ། །ས་ལ་སོགས་པ་བཞིན་ཞེས་

Vol. 180 · folio 292a

བྱ་བ་ནི་ས་ལ་སོགས་པའི་རང་བཞིན་དུ་གྱུར་པའི་ཁམ་ཕོར་ལ་སོགས་པའི་འགྱུར་བ་ཐ་དད་པ་ཡིན་པ་ནི། ས་ལ་སོགས་པ་ཉིད་ཐ་དད་པ་ཡིན་གྱི་ཤེས་པ་ནི་མ་ཡིན་ནོ། །གལ་ཏེ་ལུས་ལས་ལན་ཅིག་བློ། །སྐྱེ་ཞིང་ཕྱིས་ནི་རང་རིག་ལས་ངེས་པ་ན་ཞེས་རྒོལ་བ་

དང་། ལུས་ཀྱི་ནུས་པ་ནི་ཅིའི་ཕྱིར་ན་ལྡོག་པ་ཡིན་ཞེས་བྱ་བ་ལ་དེའི་ངོ་བོར་ཁྱད་པར་མེད་པ་ལས་སྐྱེད་བྱེད་ཡིན་ན་ཅིག་ཅར་དུ་མའི་སྐྱེད་བྱེད་ཉིད་དུ་ཐལ་བར་འགྱུར་བར་ཡང་ངོ་། །དབང་པོ་ལ་ཡང་ལྷག་པར་བསྟན་པ་ནི། གལ་ཏེ་ལུས་ལས་དེ་སྐྱེ་ན། །ཞེས་བྱ་བའོ། །དེ་ཉིད་རྣམ་པར་འགྲེལ་

པ་ནི། །འོན་ཀྱང་དང་པོ་ཞེས་བྱ་བའོ། །ལན་ལྷག་པར་བསྟན་པ་ནི། སྔ་མ་བཞིན་དུ་ཐལ་བར་འགྱུར། །ཞེས་བྱ་བ་དེར་རྣམ་པར་འཆད་པ་སྟེ། གལ་ཏེ་ལུས་ལས་ཞེས་བྱ་བའོ། །ཡང་ན་ལུས་ལས་དབང་པོ་སྐྱེ་བར་ཁས་ལེན་པ་ཡིན་ན་གནས་སྐབས་ལ་སོགས་པ་ཐལ་ཆེས་པ་ཡིན་

པར་སྐྱེ་བ་ཡོངས་སུ་འཛིན་པ་ལ་ཐལ་ཆེས་པའི་ཕྱིར་ཞེས་གསུངས་པ་ལྷག་པར་བསྟན་པ་ནི། སྔ་མ་བཞིན་དུ་ཐལ་བར་འགྱུར། །ཞེས་བྱ་བའོ། །སྔ་མ་དེ་ཉིད་གཙོ་བོ་ཡིན་ཏེ་རྩིག་པ་དང་བུམ་པ་ལ་སོགས་པ་དང་། ཤི་བའི་ལུས་ལ་ཡང་སེམས་མེད་པའི་ཕྱིར་དབང་པོ་མེད་ན་དེའི་རྒྱུ་དེ་ཉིད་ཡིན་

ཏེ། འབྲས་བུ་དེ་ལ་ངེས་པའི་ཕྱིར་རོ་ཞེས་བྱ་བའི་དོགས་པ་སྔོན་དུ་སོང་བས་བསྟན་པ་ནི། སེམས་ལས་ཀྱང་ཞེས་བྱ་བ་སྟེ། ཀྱང་གི་སྒྲས་སེམས་ཀྱི་ཞེས་བྱ་བ་བསྡུས་པ་ཡིན་པར་བསྟན་པ་ནི། སེམས་ཀྱི་ཡང་ཞེས་བྱ་བའོ། །གང་གི་ཕྱིར་གོམས་པའི་བསྐྱེད་བྱའི་རྣམ་པ་མཐོང་བ་ལས་དབང་

པོ་རྣམས་སྐྱེ་བའི་དང་པོ་ལ་སྐྱེ་བ་སྔ་མའི་དབང་པོའི་སེམས་རྒྱུའི་ཁྱད་པར་དུ་གྲུབ་པ་ཡིན་གྱི་འབྲས་བུའི་ཁྱད་པར་ནི་དེ་མེད་ན་གྲུབ་པ་མ་ཡིན་ལ། དེ་ལས་གཞན་པ་ལུས་ལ་སོགས་པ་ཡང་རྒྱུ་མ་ཡིན་ནོ། །དེའི་ཕྱིར་རྒྱུ་མ་ཚང་བ་ལས་ཤི་བ་སྐྱེ་བ་གཞན་དུ་མཚམས་སྦྱོར་བ་མ་ཡིན་པ་མི་རིགས་པར་

བསྟན་པ་ནི། དེས་ནི་རྒྱུ་དང་བྲལ་བའི་ཕྱིར། །ཞེས་བྱ་བ་སྟེ་མེད་པའི་ཕྱིར་རོ། །ཀུན་ཞེས་བྱ་བ་ནི་དགྲ་བཅོམ་པ་འབའ་ཞིག་ཁོ་ན་མ་ཡིན་ཏེ། སོ་སོའི་སྐྱེ་བོ་རྣམས་ཀྱི་ཡང་ཞེས་བྱ་བར་དགོངས་བས་དགག་པའི་དག་གཅིག་ཡིན་པའམ། སོ་སོའི་སྐྱེ་བོ་རྣམས་སུ་མ་ཟད་ཀྱི་དགྲ་བཅོམ་པ་

Vol. 180 · folio 292b

རྣམས་ཀྱི་ཡང་ཡིན་ནོ། །གང་གི་ཕྱིར་ཉོན་མོངས་པ་མེད་པའི་སེམས་སམ་དབང་པོ་ཡང་རུང་དེའི་ཡང་རྒྱུན་དུ་བྱེད་པ་བཀག་པ་ནི་མ་ཡིན་ནོ། །འོན་ཏེ་དབང་པོའི་སེམས་ཀྱང་མཚམས་སྦྱོར་བར་བྱེད་པ་མ་མཐོང་བའི་ཕྱིར་བཟློག་པས་ཁྱབ་པ་ཡིན་ན་མ་མཐོང་བ་ལ་ཁྱད་པར་མེད་པ་ཉིད་ཀྱིས་མ་ངེས་

པའི་ཕྱིར་མི་རིགས་པ་ཡིན་པར་བསྟན་པ་ནི། དེའི་ཕྱིར་འདི་འདྲ་ཞེས་བྱ་བའོ། །འཆི་བ་སེམས་ཉིད་ཡིན་པའི་ཕྱིར། །ཞེས་བྱ་བ་ཉེ་བར་མཚོན་པ་ནི་དབང་པོ་ཉིད་ལ་སོགས་པར་རོ། །ནང་གི་རིག་པའི་ཁྱད་པར་གྱིས་ནི་ལུས་ཀྱི་ཞེས་བྱ་བ་དང་སྦྱར་བར་བྱའོ། །ཇི་ལྟར་ལུས་ཐ་དད་པ་ལ་

འཇུག་པ་ཉིད་ལུས་ཐ་དད་པ་ལ་དམིགས་པ་ཉིད་ཡིན་པ་དེ་བཞིན་དུ་ལུས་གཞན་ལ་མཚམས་སྦྱོར་བ་ཅན་ཉིད་ཀྱང་ལུས་གཞན་ལ་དམིགས་པ་ནི་སེམས་གཞན་སྐྱེད་པར་བྱེད་པ་ཉིད་ཡིན་ནོ། །དེའི་ཕྱིར་ཡང་མ་ངེས་པའི་གཏན་ཚིགས་སུ་འགྱུར་བར་བསྟན་པ་ནི། དེས་ན་མ་ངེས་པ་ཡིན་ནོ་ཞེས་བྱ་

བའོ། །རབ་ཏུ་གྲུབ་པ་མ་ཡིན་པའི་ཁྱད་པར་ཡང་གཏན་ཚིགས་ཡིན་པར་བསྟན་པ་ནི། ལུས་གཞན་པ་ཉིད་ཀྱང་མ་ཡིན་ཏེ། དེའི་ཕྱིར་ལུས་ནི་ཡིད་ཀྱི་རྣམ་ཤེས་ཀྱི་རྒྱུན་ལ་ཕན་བྱེད་པའི་ཕྱིར་རྟེན་ཡིན་གྱི་སྐྱེད་པར་བྱེད་པའི་ཕྱིར་ནི་མ་ཡིན་ནོ། །དེ་ཡི་ཤེས་པས་ཕན་འདོགས་ཕྱིར། །ཡིད་ནི་ལུས་

ལ་བརྟེན་པར་བཤད། །འགའ་ཞིག་ཚེ་ན་སེམས་རྒྱུན་གྱི། །ཕན་འདོགས་བྱེད་པའང་ཡིན་བླ་སྟེ། །ཞེས་གསུངས་པ་ཡིན་པའི་ཕྱིར་ཞེས་བསྟན་པ་ནི། དེའི་ཕྱིར་ཡིད་ཀྱི་རྒྱུན་ལ་ཞེས་བྱ་བའོ། །འབྲུའི་རྒྱུན་བཞིན་ཞེས་བྱ་བ་ནི་ས་བོན་ལས་སྐྱེད་པ་ནི་ཆུ་ལ་སོགས་པས་ཕན་བྱེད་པ་ཡིན་ནོ། །དེ་

ལྟ་བུ་དེ་ཡང་སེམས་སྐྱེ་བ་བརྒྱུད་པར་རྒྱུན་མི་འཆད་པར་རྗེས་སུ་འཇུག་པ་ཡིན་ལ། སྙིང་རྗེ་ལ་སོགས་པ་དེའི་ཆོས་རྣམས་ཕུལ་དུ་བྱུང་བར་འགྱུར་བ་ཡིན་ནོ། །དེའི་ཕྱིར། སྒྲུབ་བྱེད་སྙིང་རྗེ་གོམས་ལས་དེ། །ཞེས་བྱ་བ་འདིའི་གཉེན་པོ་འདི་གྲུབ་པ་ཡིན་པར་བསྟན་པ་ནི། དེས་ན་སེམས་ཀྱི་

རྒྱུན་ཐོག་མ་མེད་པ་ཞེས་བྱ་བའོ། །དེའི་ཕྱིར་གང་གི་འདུ་བྱེད་ཉིད་ངེས་པ་ཡིན་པ་ནི་རྗེས་སུ་འཇུག་པ་ཞེས་བྱ་བ་ལ་སོགས་པས་སེམས་ནི་སེམས་ལས་ཡིན་ཏེ། སྐྱེ་བ་དང་པོ་ལ་ལུས་ལ་སོགས་པ་འགྱུར་བ་མ་ཡིན་ཡང་དེ་འགྱུར་ན་འགྱུར་བའི་ཕྱིར་རོ། །སེམས་ནི་ལུས་འཛིན་པའི་བདག་ཉིད་

Vol. 180 · folio 293a

ཡིན་ལ་འབད་པ་མེད་པའི་རྒྱུན་ཉིད་ཀྱིས་བརྟན་པ་ཡིན་ཡང་སྙིང་ལ་དེའི་ཆོས་རྣམས་གོམས་པ་ལས་འབྱུང་བ་ཉིད་ཀྱིས་འབད་པ་ལ་ལྟོས་པ་ཡིན་པའི་ཕྱིར་གདོན་མི་ཟ་བར་བྱུང་བའམ་ཕུལ་དུ་བྱུང་བ་ཡང་མ་ཡིན་ཏེ། མཆོངས་པ་ལ་སོགས་པ་ལྟ་བུ་ཡིན་པར་བསྟན་པ་ནི།

གལ་ཏེ་གོམས་པ་ཡོད་མེད་ཅེས་བྱ་བ་སྟེ། རབ་ཀྱི་ནི་ཡུལ་མ་ཡིན་པ་དང་ལྡན་པའོ། །མཐར་ཕྱིན་པ་ནི་མཐར་ཐུག་པ་གང་ཡིན་པ་དེར་ཅུང་ཟད་ཙམ་ནི་དཔག་ཏུ་ཡོད་པ་ཕུལ་དུ་བྱུང་བ་མ་ཡིན་ནོ། །ཁྱད་པར་ནི་ཕུལ་དུ་བྱུང་བར་སྣང་བའོ། །ཁྱད་པར་འགྱུར་ན་ཡང་ཞེས་བྱ་བ་ནི་ཕུལ་དུ་བྱུང་བར་འགྱུར་ན་

ཡང་ངོ་། །རང་བཞིན་ནི་དུས་ཇི་ཙམ་པ་ཉིད་དང་ཁྱད་པར་ཇི་ཙམ་པ་ཉིད་ཀྱང་ངོ་། །དེ་ལས་འདའ་མིན་ནི་འབད་པ་མེད་པའི་རྒྱུན་ཉིད་དང་ཚད་མེད་པའི་ཕུལ་དུ་བྱུང་བ་ཉིད་ཀྱང་ངོ་། །ཤིན་ཏུ་གོམས་པའི་མཆོངས་པ་ཡང་དཔག་ཚད་དམ་དཔག་ཚད་ཕྱེད་དུ་མི་འགྱུར་རོ། །ཆུ་ཁྱད་པར་ཅན་དུ་བསྐོལ་བ་ཡིན་

ཡང་འབར་བའི་མཐར་ཐུག་པར་མི་འགྱུར་ཏེ། རྟེན་ཆུ་ཉིད་མེད་པའི་ཕྱིར་རོ། །གོམས་པ་ནི་རང་བཞིན་ལ་ཁྱད་པར་གྱི་རྒྱུ་མ་ཡིན་ཏེ། དེ་མེད་ན་རྒྱུ་ནི་དེའི་རྒྱུ་མ་ཡིན་པར་ཐལ་བར་འགྱུར་བའི་ཕྱིར་ཏེ་ཤིན་ཏུ་ཕུལ་དུ་བྱུང་བ་ཉིད་དང་ཕུལ་དུ་བྱུང་བའི་རྒྱུ་ཉིད་འགལ་བའི་ཕྱིར་རོ། །མཆོངས་པ་ཕུལ་དུ་བྱུང་བ་

ཙམ་དང་ལྡན་པ་ནི་ཤིན་ཏུ་ཕུལ་དུ་བྱུང་བ་ཡིན་ཡང་མཆོངས་པའི་བདག་ཉིད་ལས་ལྡོག་པ་མ་ཡིན་ན་གང་གིས་འགལ་བར་འགྱུར་ཕུལ་དུ་བྱུང་བར་ལན་ཅིག་སྒྲོ་བཏགས་པས་ཀྱང་རང་བཞིན་ལས་ལྡོག་པ་མ་ཡིན་ཏེ། མཆོངས་པ་དང་སྙིང་རྗེ་བ་ལ་སོགས་པ་དང་ཁྱད་པར་ཅི་ཡོད་སྙམ་དུ་སེམས་པ་ལ། བྱས་ཏེ་གལ་ཏེ་

ཞེས་བྱ་བ་སྟེ། གོམས་པས་བྱས་པའི་ཁྱད་པར་རོ། །རང་ཡོད་པ་ལ་འབད་རྩོལ་གཞན་ལ་ལྟོས་པ་ནི་མཆོངས་བ་འཕེལ་བ་མ་ཡིན་ཏེ། ཕུལ་དུ་བྱུང་བ་གཞན་ལ་རྟེན་མེད་པའི་ཕྱིར། ཁྱད་པར་དག་ནི་མེད་འཕེལ་ཞིང་། །ཞེས་བྱ་བའོ། །ཡང་འབད་པ་ལ་སོགས་པ་ཡིན་ཡང་ཆུ་ཤིན་ཏུ་ཆེར་བསྐོལ་

བ་ལ་སོགས་པའི་དབྱེ་བས་འཕེལ་བ་ཁོ་ན་ཡིན་ནོ་སྙམ་དུ་སེམས་པ་ལ་ཁྱད་པར་དང་རྟེན་དངོས་སུ་འགལ་བ་མ་ཡིན་ཡང་ཁྱད་པར་བྱེད་པ་དང་འགལ་བའི་ཕྱིར་འགལ་བའི་འབྲས་བུ་ཉིད་ཀྱིས་འདི་རང་བཞིན་ཡིན་པར་བསྟན་པ་ནི། རང་བཞིན་དེ་འདྲ་མ་ཡིན་ཏེ། །ཞེས་བྱ་བའོ། །སླར་ཡང་འབད་པ་ལ་བརྟེན་པ་

Vol. 180 · folio 293b

དང་རྟེན་མི་བརྟེན་པ་ཉིད་དག་ལ་གོ་རིམས་བཞིན་དུ་མི་འཕེལ་བ་དང་། རང་བཞིན་མ་ཡིན་པའི་སྐྱོན་ཡིན་ནོ། །ཅི་ལས་ཡིན་སྙམ་དུ་སེམས་པ་ལ་དང་པོ་ལ་གཏན་ཚིགས་བསྟན་པ་ནི། དེ་ལ་ཞེས་བྱ་བ་ལ། དེ་ལ་ནི་སྔ་མའི་རྒྱུས་རྫོགས་པའི་ཁྱད་པར་ལ་ཕན་འདོགས་པའི་ནུས་པ་ཡོངས་སུ་རྫོགས་

པ་གང་དག་གི་ཡིན་པ་དེ་དག་གིའོ། །ཕྱོགས་གཉིས་པ་ལ་ཡང་རྟག་ཏུ་ཞེས་བྱ་བ་ལ་སོགས་པ་ནས་ཁྱད་པར་འཕེལ་ཡང་ཞེས་བྱ་བའི་བར་ཏེ། རྟེན་གནས་མ་ཡིན་པ་ནི། རྟེན་གནས་པ་མེད་པས་རང་བཞིན་མ་ཡིན་པའི་ཕྱིར། ཁྱད་པར་དག་ནི་མི་འཕེལ་ཞིང་། འཕེལ་ཡང་ཕུལ་དུ་བྱུང་བ་མ་ཡིན་ཞེས་བྱ་བར་

སྦྱར་རོ། །ཕུལ་དུ་བྱུང་བའི་འཕེལ་བ་མ་ཡིན་པ་ནི། སླར་ཡང་འབད་པ་ལ་ལྟོས་པ་དང་། རྟེན་བརྟན་པ་ཉིད་མེད་ན་མི་འབྱུང་བའི་ཕྱིར་དེས་ཁྱབ་པ་ནི་དེ་ལས་བཟློག་པ་ལ་མི་འགྱུར་རོ་ཞེས་བཟློག་པ་བསྟན་པ་ནི། གང་ཚེ་བྱས་འགྱུར་བ་ཞེས་བྱ་བ་སྟེ། རྟེན་མི་བརྟན་པ་ཉིད་ལོག་ན་རང་བཞིན་མ་ཡིན་པ་ཉིད་

ལྡོག་པ་ཡིན་ནོ་ཞེས་བྱ་བའི་དོན་ཏོ། །འགྲེལ་པར་ཡང་དེ་ལྟ་བུའི་དོན་གོ་བར་བྱའོ། །ཁྱད་པར་ནི་ཕུལ་དུ་བྱུང་བ་སྟེ་དེ་ཙམ་དུ་བྱུང་བར་རྣམ་པར་གནས་པ་ཕུལ་དུ་བྱུང་བ་ཉིད་ཁྱད་པར་དེ་ལ་འབྱུང་བ་འཕེལ་བར་ཅི་སྟེ་མི་འགྱུར། དེ་བསྟན་པ་ནི། ཁྱད་པར་ཡིན་ནོ་ཅོག་ཅེས་བྱ་བའོ། །རང་གི་རྒྱུན་དུ་གྱུར་པ་ཙམ་

གྱིས་ནི་ཁྱད་པར་ནི་རང་གི་ངོ་བོ་ཙམ་དུ་གྱུར་པ་དེ་ལྟར་རྣམ་པར་གཞག་པ་ཕུལ་དུ་བྱུང་བ་མ་ཡིན་ནོ། །འོན་ཀྱང་ཞེས་བྱ་བས་ཁྱད་པར་བསྟན་པ་ནི། མཆོངས་པའི་ཡུལ་སྔ་མ་ཉིད་ལ་སླར་ཡང་འབད་རྩོལ་ལ་ལྟོས་པ་ཡང་ཆུ་བསྐོལ་བ་འཕེལ་པ་ཡང་མི་བརྟན་པ་ཉིད་ཀྱིས་ཕུལ་དུ་བྱུང་བར་འཕེལ་བ་མ་ཡིན་

པར་བསྟན་པ་ནི། འདི་དང་མེ་དང་འབྲེལ་པ་མེད་ཀྱང་ཡོད་པ་ནི་མ་ཡིན་ནོ་ཞེས་བྱ་བའི་དེ་མ་ཐག་ཏུ་རྟེན་ཡང་མ་ཡིན་ཞེས་བྱ་བར་བལྟ་བར་བྱའོ། །གང་གི་ཕྱིར་ཡོད་པ་ལས་འཕེལ་བ་མཐར་ཐུག་པར་མི་འགྱུར་བ་ནི་ཕུལ་དུ་བྱུང་བར་མི་འཕེལ་བའོ། །ཁྱབ་པ་ཞེས་བྱ་བ་ནི་དེ་ཉིད་ལ་ཡོད་པའི་ཕྱིར་རོ། །དེ་

མེད་པའི་ཕྱིར་ནི་ཁྱབ་པར་བྱེད་པ་མེད་པའི་ཕྱིར་རོ། །དེ་ལས་བཟློག་པ་སྲིད་པའི་ཕྱིར། །ཞེས་བྱ་བ་ནི་ཁྱབ་པར་བྱེད་པ་འགལ་བ་ཡིན་ནོ། །འདིས་ནི་གང་ཚེ་བྱས་གྱུར་པ། །ཞེས་བྱ་བ་བཤད་པ་ཡིན་ནོ། །རྟེན་མི་བརྟན་པ་ཉིད་གྱུར་ན། །རང་བཞིན་དེ་འདྲ་འང་མ་ཡིན་ཏེ། །ཞེས་བྱ་བ་འབའ་ཞིག་

Vol. 180 · folio 294a

མ་ཡིན་ཏེ། འོན་ཀྱང་སླར་ཡང་འབད་རྩོལ་ལ་ལྟོས་པ་ལ་ཡང་སྦྱར་བར་ནུས་པ་ཡིན་ནོ་ཞེས་བསྟན་པ་ནི། ཡང་རྩོལ་བ་ལ་ལྟོས་པ་གང་ཡིན་པ་ཞེས་བྱ་བའོ། །ཁྱད་པར་བྱེད་པ་དང་བཅས་པ་ཞེས་བྱ་བ་ནི་ཁྱབ་པར་བྱེད་པ་མེད་པའམ་ཁྱབ་པར་བྱེད་པ་དང་འགལ་བའོ། །

གང་ཞིག་ཡང་རྩོལ་བ་ཞེས་བྱ་བ་ལ་སོགས་པ་ཡང་འབད་རྩོལ་ལ་ལྟོས་པ་ལ་ཡང་ཕུལ་དུ་བྱུང་བར་འཕེལ་བ་ནི། རྟེན་དང་འགལ་བའི་འབྲས་བུ་ཡིན་པའི་ཕྱིར། རང་བཞིན་མེད་པ་ཡིན་ནོ་ཞེས་དགོངས་པ་ཡིན་ཏེ། རང་བཞིན་མེད་པ་ཉིད་ཅེས་བྱ་བ་ནི་རྟེན་མི་བརྟན་པ་ཉིད་ཀྱི་ཕྱིར་རོ། །རྒྱུ་ཉེ་

བ་ལ་ལྟོས་བ་ཞེས་བྱ་བ་ནི་འབྲས་བུ་འབྱུང་བའི་འཕེལ་བ་དང་ལྡན་པའི་རྟེན་ལ་དགོངས་ནས་འགལ་བའི་འབྲས་བུ་ཡིན་པའི་ཕྱིར་རོ། །རང་གི་ངང་གིས་འཇུག་པ་ཞེས་བྱ་བ་ནི། འགལ་བ་མེད་པའི་འབྲས་བུ་ཡིན་ནོ། །མཆོངས་པ་དང་ཆུ་བསྐོལ་བ་བཞིན་ཞེས་བྱ་བ་འདི་ལ། ཆུ་བསྐོལ་བ་ནི་དཔེ་

ཡིན་ཏེ་མཆོངས་བ་ལ་ནི་སྦྱོར་བར་ནུས་པ་ཡིན་ནོ་ཞེས་དགོངས་པས་སོ། །གང་ཚེ་བྱས་གྱུར་པ་ཞེས་བྱ་བ་དེ་འཆད་པ་ཡིན། བརྩེ་བ་ལ་སོགས་པའི་ཡིད་ཀྱི་ཡོན་ཏན་ཞེས་བྱ་བ་སྟེ། འདི་ལ་དཔེ་ནི་ཤིང་དག་དང་དངུལ་ཆུ་ཞེས་བྱ་བ་སྟེ། དེ་རྣམ་པར་འགྲེལ་པ་ནི། ཕྱི་རོལ་གྱི་ཡོན་ཏན་འགའ་ཞིག་

ཅེས་བྱ་བའོ། །ཡང་འབད་རྩོལ་ལ་མི་ལྟོས་པ་ཁོ་ནའི་ཕྱིར་གོམས་པ་ལས་བྱུང་བའི་སྙིང་རྗེ་ལ་སོགས་པ་ཡང་། གོམས་པ་ཡང་རང་གི་ངང་གིས་ཏེ། རང་གི་རྒྱུ་མཚན་གྱིས་ཡིན་པར་ཉེ་བར་བསྡུ་བ་ནི། སེམས་ལ་ཞེས་བྱ་བ་སྟེ། བདེ་སོགས་ཞེས་བྱ་བས་ཆོས་ཅན་རྣམས་ཆོས་ཀྱི་ཁྱད་པར་དང་ལྡན་

པར་བསྟན་པ་ཡིན་ནོ། །དེ་བཞིན་དུ་འབད་རྩོལ་གཞན་གྱིས་བསྐྱེད་བྱའི་ཁྱད་པར་གཞན་ནི་རང་གི་ངང་གིས་འཇུག་པའི་བརྗོད་བྱ་ཡིན་པར་བསྟན་པ་ནི། ཡང་ནས་ཡང་དུ་ཞེས་བྱ་བ་སྟེ། དེ་གོམས་པས་ནི་དེའི་རྗེས་སུ་འཇུག་པ་སྟེ། བྱས་པའི་ཁྱད་པར་ནི་ཕུལ་དུ་བྱུང་བ་གང་དག་ཡིན་པ་དེ་དག་ཡིན་

ནོ། དེ་རྗེས་སུ་འཇུག་པའི་ཁྱད་པར་ཡིན་ཡང་། མཆོངས་པ་ལ་སོགས་པ་རྣམ་པར་ལྡོག་པ་ཁོ་ན་ཡིན་ནམ་དེ་ལས་བསྟན་པ་ནི། དེའི་ཚེ་སྙིང་རྗེ་ལ་སོགས་པའི་ཁྱད་པར་བྱས་ཟིན་པར་བརྗོད་པ་ནི། གང་གི་ཚེ་ཡང་འབད་རྩོལ་ལ་མི་ལྟོས་པ་མཆོངས་པ་ལ་སོགས་པའི་ཁྱད་པར་དང་མཚན་ཉིད་མི་

Vol. 180 · folio 294b

མཐུན་པའི་ཁྱད་པར་བསྟན་པ་ཡིན་གྱི། ཁྱད་པར་ཙམ་ནི་མ་ཡིན་ནོ་ཞེས་བྱ་བའི་དོན་ཏོ། །ཁྱད་པར་འདི་ལ་ལྟོས་པ་ཡིན་ན་འདིར་འགྱུར་རོ་ཞེས་བསྟན་པ་ནི། རྩོལ་བ་གཞན་ཞེས་བྱ་བའོ། །གལ་ཏེ་ཁྱད་པར་འདི་ཉིད་གོམས་པའི་བསྐྱེད་བྱ་ལ་ཁྱད་པར་མེད་ན། འདི་ཇི་ལྟར་ཡིན། རྒྱུ་ལ་

ཁྱད་པར་མེད་ན་འབྲས་བུ་ལ་ཁྱད་པར་མེད་དོ་སྙམ་དུ་སེམས་པ་ནི། གལ་ཏེ་མཆོངས་པ་ཡང་ཞེས་བྱ་བ་སྟེ། གོམས་པའི་བསྐྱེད་བྱའི་ཁྱད་པར་ཡིན་ཡང་། ཁྱད་པར་དག་ལ་ཡང་འབད་རྩོལ་ལ་ལྟོས་པ་དང་མི་ལྟོས་པ་ཆོས་ཅན་ལ་གནས་པ་ཉིད་ཀྱིས་ཁྱད་པར་ཆེ་བ་ཡིན་པར་བསྟན་པ་ནི། འདི་ལ་བཤད་

ཟིན་ཏོ་ཞེས་བྱ་བ་སྟེ། ཡང་འབད་རྩོལ་ལ་ལྟོས་པའི་ཁྱད་པར་ནི་འཕེལ་བ་ཡིན་ཡང་ཆུ་བསྐོལ་བ་བཞིན་དུ་ཤིན་ཏུ་འཕེལ་བ་མ་ཡིན་ཏེ། རྟེན་དང་འགལ་བའི་འབྲས་བུ་ཉིད་ཀྱིས་རང་ཉིད་ཁོ་ན་མེད་པའི་ཕྱིར་རོ་ཞེས་བསྟན་པ་ཉེ་བར་བསྡུ་བ་ནི། དེའི་ཕྱིར་ཞེས་བྱ་བ་སྟེ། རྟེན་བརྟན་པའི་ཕྱིར་འཕེལ་བའི་

ཁྱད་པར་ནི་རྟེན་དང་འགལ་བའི་འབྲས་བུ་མ་ཡིན་ནོ། །དེའི་ཕྱིར་ཤིན་ཏུ་འཕེལ་བ་ཁོ་ན་ཡིན་ཏེ། ཁྱད་པར་གྱི་རྒྱུ་དང་རྟེན་མ་འགལ་བའི་ཕྱིར་དང་། ཁྱད་པར་ལ་ཡང་འབད་རྩོལ་ལ་ལྟོས་པ་མེད་པའི་ཕྱིར་རོ། །ད་ནི་སྙིང་རྗེ་ལ་སོགས་པའི་ཆོས་ཁོ་ན་ཕུལ་དུ་བྱུང་བའི་མིང་ཅན་ནི་གོམས་པའི་བསྐྱེད་

བྱ་ཡིན་གྱི་ཆོས་ཅན་ནི་མ་ཡིན་ཏེ། རང་གི་རྒྱུད་ལས་བྱུང་བའི་ཕྱིར་དང་དེ་ཁོ་ན་ཉིད་བཞིན་དུ་ཕུལ་དུ་བྱུང་བའི་གནས་སྐབས་མཐོང་བའི་ཕྱིར་རོ། །མཆོངས་པ་ལ་སོགས་པའི་ཆོས་ཅན་ཡང་འབད་རྩོལ་མེད་ན་མི་སྲིད་པར་བསྟན་པ་ནི་གང་ཕྱིར་ཞེས་བྱ་བ་སྟེ། རིགས་མཐུན་པའི་སྔར་གྱི་ས་བོན་ལས་བྱུང་

བ་ཉིད་ཀྱི་འབད་རྩོལ་ཉིད་ཀྱིས་བསྐྱེད་བྱ་ཉིད་སེལ་བར་བྱེད་པས་ཡུལ་གྱི་ཕན་འདོགས་པ་ལ་སོགས་པ་ལ་ལྟོས་པའི་ཡིན་ནོ། །དེའི་ཕྱིར་ཆོས་ལ་མི་དམིགས་པ་ལ་སོགས་པ་ཉིད་ཀྱིས་སྙིང་རྗེ་ལ་སོགས་པ་རབ་ཏུ་འཇུག་པ་བརྗོད་པ་ཡིན་པར་བསྟན་པ་ནི། ཡུལ་ཉེ་བ་ཞེས་བྱ་བ་ལ་སོགས་པའོ། །དེ་ལ་

དམིགས་པ་ཉིད་ནི་ད་དུང་ཡང་སྣང་བ་ཉིད་ཁོ་ན་ཡིན་པར་བསྟན་པ་ནི། དྲན་པ་དང་ཐོས་སོགས་ཀྱིས་ཀྱང་ཞེས་བྱ་བ་སྟེ། དྲན་པ་ལ་སོགས་པའི་མི་དམིགས་པ་ནི། དངོས་པོར་མི་སྣང་ཕྱིར་རྣམ་རྟོག་ཅེས་བསྟན་པ་ཡིན་ནོ། །ཡུལ་ལ་སོགས་པ་ལ་ལྟོས་པ་མེད་པ་འབའ་ཞིག་ནི་མ་ཡིན་ཏེ། མི་མཐུན་པའི་

Vol. 180 · folio 295a

ཕྱོགས་ཀྱིས་ཀྱང་བཟློག་བྱ་མ་ཡིན་པར་བསྟན་པ་ནི། དེའི་ཞིང་དུ་བྱས་པ་དག་ཅེས་བྱ་བའོ། །རྒྱས་པ་ལས་གཞན་པ་ནི། རྒྱས་པ་ལ་མ་ཡིན་པ་སྟེ་གཞན་པའོ། །དེ་ཁོ་ན་གཞན་པ་ཉིད་ཡིན་ཏེ། མི་མཐུན་པའི་ཕྱོགས་ཀྱིས་མི་གསལ་བར་བྱས་པའི་ཕྱིར་དང་། གོམས་

པའི་ཡུལ་ལ་སོགས་པ་ལ་མི་ལྟོས་པའི་ཕྱིར་ཞན་པ་ཉིད་མ་ཡིན་ནོ། །འདི་ལྟར་སེམས་ཅན་དང་ཆོས་དང་མི་དམིགས་པའི་སྙིང་རྗེ་རྣམས་ནི་སོ་སོའི་སྐྱེ་བོ་དང་། འཕགས་པ་དང་བྱང་ཆུབ་སེམས་དཔའ་རྣམས་ཀྱི་ཡིན་པར་འགྲུབ་ཅེས་བྱ་བའི་དོན་ཏོ། །མཆོངས་པ་ཡང་རང་གི་ས་བོན་ལས་བྱུང་བ་

ཉིད་མ་ཡིན་ནམ། གོམས་པ་ནི་ཕུལ་དུ་བྱུང་བ་ཁོ་ན་ལ་སྙིང་རྗེ་ལ་སོགས་པ་བཞིན་དུ་བྱེད་པ་ཡིན་པའི་ཕྱིར་རོ་སྙམ་དུ་སེམས་པ་ནི། ཇི་སྟེ་ཞེས་བྱ་བ་ལ་སོགས་པའོ། །མཆོངས་པ་ནི་མཆོངས་པས་བྱུང་བ་ནི་ཡིན་ཏེ་སྟོབས་དང་འབད་རྩོལ་ལས་བྱུང་བ་ཡིན་ནོ་ཞེས་བྱ་བར་བསྟན་པ་ནི། དེ་ལྟར་མཆོང་

ཉིད་ལས་མཆོངས་མིན། །ཞེས་བྱ་བའོ། །སྟོབས་ལས་སམ་འབད་རྩོལ་ལས་བྱུང་བ་ནི་གོམས་པས་ཤིན་ཏུ་ཕུལ་དུ་བྱུང་བར་འགྱུར་བ་མ་ཡིན་ནམ་སྙམ་དུ་སེམས་པ་ནི། དེ་རྒྱུ་ཞེས་བྱ་བ་སྟེ་གནས་པའི་ནུས་ཉིད་ཡིན་པའི་ཕྱིར་གནས་པའི་འབྲས་བུ་ཉིད་ཡིན་གྱི། གོམས་པའམ་གཞན་ཡང་རུང་

དེའི་རང་བཞིན་གྱིས་མཆོང་བ་ནི་མ་ཡིན་ནོ། །གོམས་པ་ནི་སྟོབས་ཀྱི་རང་བཞིན་ཁོ་ན་ལ་བརྟེན་པ་ཡིན་པར་བསྟན་པ་ནི། རང་གིས་མཆོངས་པ་གོམས་པར་ཞེས་བྱ་བའོ། །གོམས་པ་ཡོད་པའི་མཆོངས་པ་གང་ཡིན་པ་ནི། སྔ་རོལ་ན་དེ་སྟོབས་ཡོད་ཀྱང་མེད་པ་མ་ཡིན་ནམ་སྙམ་དུ་སེམས་པ་ནི་

ཇི་སྟེ་ཡང་ཞེས་བྱ་བ་ལ་སོགས་པའོ། །སྔར་གྱི་སྟོབས་བད་ཀན་ལ་སོགས་པས་ལུས་ལྕི་བ་ལ་སོགས་པས་ཉེ་བར་གནོད་པ་ཡིན་ལ་གོམས་པས་ནི་ཉེ་བར་གནོད་པ་མེད་པར་བྱེད་པ་བསྟན་པ་ནི། དེ་ནི་དང་པོ་ཞེས་བྱ་བའོ། །གལ་ཏེ་སྟོབས་རང་གི་ས་བོན་ཙམ་ལས་བྱུང་བར་འབད་རྩོལ་མེད་པར་ཕུལ་

དུ་བྱུང་བའི་སྙིང་རྗེར་འགྱུར་རོ། །གང་གི་ཕྱིར་འབྲས་བུ་མི་དམིགས་པ་ནི། རྒྱུའི་ཚོགས་པ་མེད་པར་གོ་བར་བྱེད་པ་ཡིན་ནོ་སྙམ་དུ་སེམས་པ་ནི། གལ་ཏེ་བརྩེ་བ་ལ་སོགས་པ་ཞེས་བྱ་བའོ། །དེའི་ཚེ་དེའི་བདག་ཉིད་དུ་ཡང་ཞེས་ཡང་གི་སྒྲ་རིམ་ལས་བཟློག་པ་ཡིན་ཏེ། གང་གི་ཚེ་ཞེ་ན། རྟེན་བརྟན་པ་ཡང་

Vol. 180 · folio 295b

ཡིན་ན་ཡིན་གྱི་གཞན་གྱི་ཚེ་ནི་མ་ཡིན་པའོ། །མི་མཐུན་པའི་ཕྱོགས་སུ་བྱེད་པ་ལ་གོམས་པ་ལས་རྟོགས་པ་ཡིན་གྱི་རང་གི་ངོ་བོ་ལས་ནི་མ་ཡིན་ཞེས་ཅི་ལས་རྟོགས་པ་ཡིན་ཞེས། འདི་ལྟར་གོམས་པ་ཞེས་བྱ་བ་ལ་སོགས་པ་སྨོས་སོ། །གསལ་བ་ནི་བྱ་བ་ལ་ཕུལ་དུ་བྱུང་བ་གོམས་པ་གང་ཡིན་

པ་དེ་སྔ་མ་སྔ་མ་ནི་ཕྱི་མ་ཕྱི་མའི་སྙིང་རྗེ་ལ་སོགས་པའི་རྩ་བ་ཡིན་ཏེ་སྔ་མའི་རང་གི་རིགས་ཀྱི་ས་བོན་ཉིད་མེད་ན། གོམས་པ་ཉིད་དུ་མི་འགྱུར་རོ་ཞེས་བྱ་བའི་དོན་ཏོ། །སྔ་མའི་རང་གི་རིགས་ལས་བྱུང་བ་ཡིན་ན་གོམས་པར་འགྱུར་བར་བསྟན་པ་ནི། བརྩེ་བ་ལ་སོགས་པ་ཞེས་བྱ་བ་ལ་སོགས་པའོ། །དེ་

ཡང་གང་ལ་འགྱུར་ཞེ་ན། གསལ་བ་ཞེས་བྱ་བའོ། །སྐྱེ་བ་ལ་ནི་མ་ཡིན་ནོ། །དེའི་ཕྱིར་འདི་ལྟར་རང་གི་ས་བོན་ལས་བྱུང་བའི་གོམས་པ་ཕུལ་དུ་བྱུང་བ་ཡིན་པའི་ཕྱིར། སྙིང་རྗེ་ནི་སེམས་ཀྱི་རང་བཞིན་ཁོ་ན་ཡིན་པར་བསྟན་པ་ནི། དེས་ན་ཞེས་བྱ་བ་སྟེ། རང་གི་དོན་ཞེས་བྱ་བས་གེགས་བྱེད་པ་

མེད་པ་ལ་མཆོག་ཏུ་འཛིན་པ་ཡིན་ནོ། །རང་གི་ས་བོན་ལས་བྱུང་བ་ཉིད་ཅེས་བྱ་བས་གོམས་པས་ཕུལ་དུ་བྱུང་བ་ཉིད་དུ་བསྟན་པ་ཡིན་ནོ། །འདི་ཉིད་ནི་ཚད་མ་ཀུན་ལས་བཏུས་པ་ལ་སོགས་པ་ལ་འགྲོ་བ་ལ་ཕན་པར་བཞེད་པ་ཉིད་ཀྱི་བསམ་པས་དགོངས་པ་ཕུན་སུམ་ཚོགས་པ་ཡིན་པར་བསྟན་

ཏོ། །ཤིན་ཏུ་གོམས་པ་ནི་བསམ་པ་ཇི་ལྟ་བ་བཞིན་དུ་སྦྱོར་བར་བསྟན་པ་ནི། དེ་ལྟར་ན་ཞེས་བྱ་བའོ། །ཐུགས་རྗེ་ཕུལ་བྱུང་ཞེས་བྱ་བ་ལ་སོགས་པ་ནི་བརྩེ་བ་དང་ལྡན་པ་ཞེས་བྱ་བ་འདི་བཤད་པའོ། །སྡུག་བསྔལ་གཞོམ་པའི་ཕྱིར་ཞེས་བྱ་བ་ནི་རང་དང་གཞན་གྱི་སྡུག་བསྔལ་གཞོམ་པར་བྱ་

བའི་དོན་དུའོ། །གཞན་གྱི་སྡུག་བསྔལ་གཞོམ་པ་སྔོན་དུ་བྱེད་པ་ཁོ་ན་སྙིང་རྗེ་དང་ལྡན་པའི་རྗེས་སུ་མཐུན་པ་མ་ཡིན་ནམ། རང་གི་སྡུག་བསྔལ་གཞོམ་པ་མངོན་དུ་བྱེད་པ་ནི། དེ་ལྟ་བུའི་བསམ་པ་མེད་པའི་ཕྱིར་རོ། །རང་གི་སྡུག་བསྔལ་གཞོམ་པ་མངོན་དུ་བྱེད་པ་ཡང་། གཞན་གྱི་སྡུག་བསྔལ་

གཞོམ་པ་མངོན་དུ་བྱེད་པའི་ཐབས་ཡིན་པའི་ཕྱིར་གདོན་མི་ཟ་བར་དགོངས་པ་ཡིན་ཏེ། དེ་མེད་ན་དེ་ཉིད་མེད་པའི་ཕྱིར་རོ་ཞེས་བསྟན་པ་ནི། ལྐོག་ཏུ་གྱུར་པ་ཞེས་བྱ་བ་སྟེ། ཐབས་དང་དེའི་རྒྱུ་མངོན་དུ་བྱེད་པ་པོས་དེ་བཤད་པ་ནི་ཤིན་ཏུ་བླ་བར་མཐོ་རིས་དང་བྱང་གྲོལ་ཞེས་བྱ་བའོ། །མཐོ་རིས་ཀྱི་

Vol. 180 · folio 296a

ལམ་མངོན་དུ་མ་བྱས་པ་ནི། ཆད་པར་ནུས་པ་མ་ཡིན་ཏེ། རྗེས་སུ་དཔག་པའི་ཡུལ་ཡིན་པའི་ཕྱིར་རོ་ཞེས་བསྟན་པ་ནི། དེ་ལ་ནི་དེས་ཞེས་བྱ་བའོ། །རྗེས་སུ་དཔག་པས་ཡོངས་སུ་ངེས་པའི་དེ་ཁོ་ན་ཉིད་ཡོད་པ་ལ་སོགས་པས་སྐད་ཅིག་མ་ཉིད་ལ་སོགས་པར་ངེས་

པ་ཡིན་ན། རང་གི་དོན་ནི་རྗེས་སུ་དཔག་པའོ། །འདོད་པ་ནི་བྱེད་པ་སྟེ་དེའི་དུས་ན་མེད་པ་ནི་སྟོན་པ་མེད་པའོ། །ཇི་ཙམ་དུ་ཞེ་ན། ཐམས་ཅད་ཀྱི་ཚེ་ནི་མ་ཡིན་ཞེས་བྱ་བར་སྦྱར་རོ། །གཞན་གྱི་དོན་གྱི་རྗེས་སུ་དཔག་པའི་ངོ་བོ་སྟོན་པ་ནི། རང་གི་སྔོན་དུ་འགྲོ་བ་ཅན་ཡིན་ན། དེའི་ཚེ་གདུལ་བྱ་

ཉེ་བ་ཡང་ཡོད་པ་མ་ཡིན་ཏེ། རང་ཉིད་མ་ངེས་པའི་ཕྱིར་རོ། །ལྐོག་ཏུ་མ་གྱུར་པའི་ཐབས་ལས་བྱུང་བ་དང་། དེའི་རྒྱུའི་སྐྱོན་ནི་འདི་མ་ཡིན་ཏེ། ངེས་པར་འབྱེད་པའི་ཆ་ལས་བརྩམས་ནས་ཁྱད་པར་ཐམས་ཅད་མངོན་སུམ་ཡིན་པའི་ཕྱིར་རོ། །རྗེས་སུ་དཔག་པས་ཁྱད་པར་ཐམས་ཅད་ངེས་བ་ཡང་

མ་ཡིན་ཏེ། མངོན་སུམ་ཉིད་དུ་ཐལ་བར་འགྱུར་བའི་ཕྱིར་རོ། །ཐབས་བྱུང་དེ་རྒྱུ་ལྐོག་ཏུ་གྱུར་པ་ལ་སྐྱོན་གཞན་བསྟན་པ་ནི། དམྱལ་བ་ལ་སོགས་པར་སྐྱེས་པ་ན་མེད་པའི་ཕྱིར་རོ། །འབྲས་བུ་མངོན་དུ་བྱེད་པ་ནི་དམྱལ་བ་ལ་སོགས་པར་འགྲོ་བ་མེད་པའི་ཕྱིར་དུས་ཐམས་ཅད་དུ་སྟོན་པར་བྱེད་པར་

འགྱུར་གྱི། གཞན་དུ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་བཞིན་དུ་སྡུག་བསྔལ་གཞོམ་པ་མངོན་དུ་བྱེད་པས་འཁྲུགས་པ་མ་ཡིན་པ་ཉིད་མེད་ན་དྲན་པ་གོམས་པའི་ཡིད་ཀྱི་གསལ་བ་ཉིད་དང་བྲལ་བའི་ཕྱིར་སྔོན་གྱི་གནས་རྗེས་སུ་དྲན་པའི་ཤེས་པ་མེད་པ་ཡིན་ན་སོ་སོར་ངེས་པའི་ལས་ཀྱི་འབྲས་བུ་སྟོན་

པ་མ་ཡིན་ལ་འབྲས་བུ་དང་རྒྱུའི་རང་གི་ངོ་བོའི་ཁྱད་པར་མ་ངེས་པས་རྣམ་པ་ཐམས་ཅད་པའི་དངོས་པོ་ཐམས་ཅད་མངོན་དུ་བྱེད་པ་མི་སྲིད་པའི་ཕྱིར་འོད་ཟེར་ཅན་གྱི་འཇིག་རྟེན་གྱི་ཁམས་ལ་སོགས་པའི་སྲུང་གཏམ་སྟོན་པར་མི་འགྱུར་རོ། །བསྟན་པ་ནི་འཇིག་རྟེན་གྱི་ཁམས་ཞེས་བྱ་བའོ། །དེ་བས་ན་

ཐམས་ཅད་ཅེས་བྱ་བ་ནི་གཞན་གྱི་སྡུག་བསྔལ་གཞོམ་པ་བཞིན་དུ་རང་གི་སྡུག་བསྔལ་གཞོམ་པ་ཡང་ཞེས་བྱ་བའོ། །དེ་ལ་ཞེས་བྱ་བ་ནི། སྡུག་བསྔལ་གཞོམ་པ་དང་དེའི་རྒྱུ་མངོན་དུ་བྱེད་པ་དག་གོ། །རྒྱུ་ནི་ཐབས་ཡིན་ཏེ་དེ་བཞིན་དུ་སྡུག་བསྔལ་གཞོམ་པའི་ཕྱིར་ཞེས་བྱ་བ་ནི་སྡུག་བསྔལ་

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words