No title in the text — opening words: འཕྲུལ་གྱི་མེ་ལོང་དགུ་སྐོར་ཞེས་བྱ་བའི་རྩ་འགྲེལ་བཞུགས

No translation — Tibetan only: there is no translation we are licensed to publish (84000’s translations are no-derivatives, non-commercial)

Vol. 211 · folio 363b

༄། །འཕྲུལ་གྱི་མེ་ལོང་དགུ་སྐོར་ཞེས་བྱ་བའི་རྩ་འགྲེལ་བཞུགས། །༄༅༅། །ཀུན་མཁྱེན་ཉིད་ལ་ཕྱག་འཚལ་ལོ། །རྣལ་འབྱོར་ལྟ་བའི་སྤྱི་འགྲེལ་བརྡེག །ལོག་རྟོག་བྱང་ཆུབ་ཡུལ་སྣང་བའི། །ཆོས་ཀུན་

སེམས་སུ་གཅིག་མི་གཅིག །ལྷུན་གྱིས་གྲུབ་པ་གང་ལ་བགྱི། །དེ་ཉིད་སྣང་བ་ཡོད་དམ་མེད། །ཡེ་ནས་སངས་རྒྱས་ཡིན་ནམ་མིན། །ཁམས་གསུམ་སེམས་ཅན་ཇི་ལྟར་འཁྲུལ། །འཁྲུལ་ཉིད་ནི་དོན་ཅི་

ལགས། །རྣལ་འབྱོར་བྱེ་བའི་ངོ་བོ་གང་། །དེ་དག་དོགས་པའི་ཐེ་ཚོམ་གང་། །དེ་རྣམས་ཁྱད་པར་ཇི་ལྟར་ཆེ། །འཕྲུལ་གྱི་མེ་ལོང་དགུ་སྐོར་སྐྱེབཞིན། །གསལ་བྱེད་འཕྲུལ་ཚིག་དགུ་ཡིས་སྟོན། །སྒྱུ་མ་རྣམ་གཉིས་

སྤྱོད་དུ་ཡུལ་ནི། །སེམས་ཀྱི་ཆོས་ཉིད་ངང་དུ་གཅིག །དེ་ཡི་དེ་ཉིད་ཇི་ལྟ་བ། །མཁའ་དང་གཞའ་སྣང་ཇི་བཞིན་དུ། །ལོག་རྟོག་སེམས་རྒྱུད་ཐ་དད་ཀྱང་། །རིགས་རྒྱུད་མེད་ཕྱིར་དབྱེ་བ་དཀའ། །སེམས་

ཉིད་ནོར་བུ་རིན་པོ་ཆེ། །ཇི་ལྟར་དམིགས་ཤིང་སེམས་པར་སྣང་། །འགྲོ་ལ་སེམས་རྒྱུད་གཉིས་སུ་འཆར། །དེ་ནི་དངོས་མེད་ཀུན་གྱི་གཞི། །ལོག་རྟོག་མུན་པའི་ཡུལ་སྣང་ཀུན། །སེམས་ཕྱིར་མཐའ་ལ་

རྩོད་པ་མེད། །གང་ལ་ཡོད་མེད་མེད་པ་ལྟེ། །རྟོག་པའི་སྨྲ་བསམ་ཡུལ་ལས་འདས། །དེ་ནི་དེ་ཕྱིར་རྒྱལ་འགྲོ་ཞེས། །རིས་སུ་བཅད་པ་མེད་པ་ལ། །གཙང་དང་མི་གཙང་དངོས་གཅིག་བཞིན། །ཕྱོགས་སུ་

བལྟས་ན་ནོར་བའི་བློ། །ཇི་སྙེད་འཇིག་རྟེན་འཁྲུལ་པའི་སེམས། །མེ་ལོང་གཡའ་དང་མཁའ་སྤྲིན་བཞིན། །རིག་དང་མ་རིག་གཉིས་མེད་པས། །ཕྱོགས་གཅིག་རྐྱེན་གྱི་དུས་སུ་འཁྲུལ། །འཇིག་རྟེན་བརྟན་

Vol. 211 · folio 364a

གཡོ་ལ་སོགས་པ། །སྣང་བ་ཉིད་ན་རང་བཞིན་མེད། །རང་བྱུང་ཕྱི་ནང་མེད་སྣང་ཕྱིར། །དེ་དུས་རང་བཞིན་ཉམས་པ་མེད། །འཇུག་པའི་རྣམ་ཤེས་དེ་ལྟ་བུས། །ཤེས་རབ་ཐུན་མོང་

སྤྱན་ཡིན་ནོ། །རང་བྱུང་ཡེ་ཤེས་ཚོགས་ཀུན་བདག །ཤེས་རབ་ཅན་གྱི་མཆོག་ཡིན་ནོ། །རྡོ་རྗེ་ཡིད་ནི་དབང་མཆོག་ཕྱིར། །ལྟ་བ་མེད་ཕྱིར་རང་སྤྱི་ཆོས། །དབྱེར་མེད་ཕྱོགས་ལྟའི་འདོད་བྲལ་བ། །མ་ནོར་

རང་གི་མཚན་ཉིད་རྟོགས། །གསུམ་གཉིས་གཅིག་གིས་སྤངས། །དང་པོ་དངོས་དང་གསལ་བ་དང་། །སྔ་མ་སངས་རྒྱས་སེམས་ཅན་དག །སོ་སོ་སེམས་རྒྱུད་ཐ་དད་པ། །གཅིག་ན་བདུན་ལ་སྔ་རྟོགས་སྐྱེ། །

དེ་བཞིན་སེམས་རྒྱུད་བརྒྱད་ལ་ཟ། །ཐ་དད་ཞེ་ན་བདུན་གྱིས་འགལ། །དེ་བས་དགག་དང་སྒྲུབ་མེད་པས། །གཅིག་དང་དུ་མ་མེད་པའོ། །གསུམ་པའི་སྔ་མ་རྟོག་སྐྱོན་དགུ། །ཕྱི་མ་མེད་པའི་ཐེ་ཚོམ་དག །

སྐྱོན་གྱི་དངོས་པོ་བཅུ་གཉིས་ཤེས། །མི་མཁས་མཁས་པའི་བསམ་པ་ནི། །མི་མཁས་ཤིན་ཏུ་མི་མཁས་པ། །ཤིན་ཏུ་མི་མཁས་མཐར་ལྟ་བའི། །མི་མཁས་ཡོད་མེད་རྩོད་བྱེད་ཅིང། །དགག་དང་སྒྲུབ་པ་

གང་བྱེད་པ། །དེ་དེ་དེ་ལ་ཆགས་སྡང་སྐྱེ། །མཁས་དང་ཤིན་ཏུ་མཁས་པ་ནི། །མཁས་པ་ཕལ་པ་དགག་སྒྲུབ་ཅན། །སྒྲུབ་པའི་དོན་ལ་བརྟེན་པར་བྱེད། །བྱིས་པའི་གཟུང་འཛིན་དབང་གྱུར་པའི། །

མ་ནོར་ལམ་དང་བྲལ་བ་ཡིན། །ཤིན་ཏུ་མཁས་པ་ཐམས་ཅད་ལ། །སེམས་ཕྱིར་དགག་དང་སྒྲུབ་པ་མེད། །དེ་དང་རང་རིག་རང་སྣང་ཕྱིར། །དགག་སྒྲུབ་བྲལ་ལ་ཡིད་མི་རྟོན། །དེ་ཕྱིར་སོ་སོ་དགག་སྒྲུབ་ཅན།

Vol. 211 · folio 364b

སྒྲུབ་པའི་ཕྱོགས་ལ་ཞེན་པའི་ཕྱིར། །དེ་དེ་མེད་པ་ག་ལ་མཐོང་། །དེ་བས་རང་གི་བརྟགས་མཐོང་ཡིན། །དེ་དེ་སྐས་གདང་ཇི་ལྟ་བ། །ཁྱད་པར་གྲངས་དང་དོར་བ་མེད། །ཆ་ཡོད་དུག་ལ་མི་འཐུང་བཞིན། །ལོག་

ལྟ་གཉིས་སུ་ག་ལ་འགྱུར། །གཉིས་པོ་དེ་ལྟར་དེ་ཉིད་ལ། །གྲུབ་པའི་ཐ་སྙད་ཇི་ལྟར་མཚོན། །མ་གྲུབ་གྲུབ་ན་ངེས་ཚིག་མེད། །དེ་མ་གྲུབ་ན་དེ་བཞིན་ནོ། །དེ་བས་སྲིད་དང་མི་སྲིད་ཀུན། །ལྷུན་གྲུབ་ཕྱོགས་སུ་

གྲུབ་པ་མེད། །བཞི་པའི་སྔ་མ་སྐྱོན་དྲུག་གཉིས། །དེ་བཞིན་ཕྱི་མ་རྗེས་སུ་མཐུན། །གཉིས་མེད་ཞེ་ན་དུས་གསུམ་ལ། །འབྱུང་ཞེས་བྱ་བའང་གཉིས་མེད་དང་། །སྨན་ཉིད་ཕན་གནོད་བདག་གནས་ལྟར། །

ངོ་བོ་ཐ་དད་འགྱུར་བ་མེད། །ཕྱོགས་ལས་ལོགས་པའི་ཐ་དད་མེད། །ལྔ་པ་འཁྲུལ་གཞི་ཡོད་མེད་པའི། །སྐྱོན་ནི་གསུམ་པ་ཇི་བཞིན་གྲངས། །མིག་ཡོར་གསུམ་ལ་དངོས་མེད་འདྲའི། །ཆོས་ཡོད་བཞིན་

པས་རང་སེམས་ལ། །དེ་དངོས་མེད་ཀྱང་རྒྱུ་རྐྱེན་དྲུག །རང་བཞིན་ལྷུན་གྲུབ་དཔག་བསམ་བཞིན། །སོ་སོར་སྣང་བ་དུས་གསུམ་དུ། །རྒྱུན་དུ་འཁྲུལ་ལ་ལྷུན་གྲུབ་པས། །འགྲོ་འོང་འབྱུང་འཇུག་མེད་སྣང་བཞིན། །

གཞི་ཡོད་མེད་དང་དབྱེར་མེད་མཚུངས། །དྲུག་པ་དེ་ལྟར་དེ་བདེན་ན། །དེ་ལ་སྐྱོན་དུ་བྱ་བ་བདུན། །ཐམས་ཅད་འཆིང་འགྲོལ་དབྱེར་མེད་ལ། །གཉིས་མཐོང་འཁྲུལ་བར་བལྟ་བ་འཁྲུལ། །དེ་བས་བླང་དང་དོར་བ་མེད། །བདེ་

སྡུག་གནས་སུ་རིས་མ་བལྟ། །བདུན་པ་རང་རིག་ཅན་ཡིན་ན། །དེ་ལ་སྐྱོན་བཅུ་འབྱུང་བར་འགྱུར། །དེ་བཞིན་ཉིད་ཀྱི་ཡེ་ཤེས་འདི། །མི་ལྔའི་བདག་པོ་ཀུན་གྱི་སེམས། །རང་སྤྱི་ཇི་སྙེད་ཇི་ལྟ་བ། །རང་ཡུལ་མེད་

Vol. 211 · folio 365a

པར་ངེས་གསལ་བ། །ནམ་མཁའ་སྤྲིན་མཐོངས་འོད་བཞིན་དུ། །རབ་རིབ་གང་དག་ཤེས་རབ་སྣང་། །བརྒྱད་པ་ངེས་མཐོང་སྒྲིབ་པའི་གྲངས། །བརྒྱད་པ་བསྙད་པ་ཡན་ལག་བཅས། །ཕྱག་རྒྱ་

བཞི་ཡི་གཞིར་གྱུར་པ། །ངེས་པར་ངོས་ཟིན་བྱ་བར་བསྙད། །མ་རིག་པ་ཉིད་ཡེ་ཤེས་གསལ། །ཐེ་ཚོམ་ཉིད་ཀྱང་ངེས་པའི་སྤྱན། །ལོག་རྟོག་ཉིད་ཀྱང་མ་ནོར་ལམ། །དེ་ལ་མི་མཐུན་ཤེས་དང་བྲལ། །དགུ་པ་འདས་དང་

འཇིག་རྟེན་པའི། །ཐེག་པའི་ལྟ་བ་གྲལ་དགོངས། །སྐས་གདང་ལྟ་བུར་བསྟན་པ་དག །ཀུན་ཀྱང་བདག་དང་བྲལ་བའི་ཕྱིར། །འཇིག་རྟེན་ཤེས་འཕགས་ཅི་སྨོས་ཏེ། །དེ་དག་ཉིད་ནི་དགག་དང་སྒྲུབ། །རིམ་པ་ཡོད་

མེད་ཁྱད་པར་དང་། །ལྟོས་པས་ཕྱེ་བའི་ཁྱད་པར་ནི། །བདག་སྤོང་བདག་མེད་སྒྲུབ་པ་དང་། །གཟུགས་སྤོང་ཕྱི་སྟེང་སྒྲུབ་པ་དང་། །དོན་འགོག་སེམས་ཙམ་སྒྲུབ་པ་དང་། །མཐའ་སྤོང་མཐའ་བྲལ་སྒྲུབ་པ་དང་། །

དྲི་སྤོང་དག་པ་སྒྲུབ་པ་དང་། །མཚན་འགོག་མཚན་མེད་སྒྲུབ་པ་དང་། །བླང་དོར་འགོག་མེད་སྒྲུབ་པ་དང་། །རྩོལ་སྤོང་རྩོལ་བྲལ་སྒྲུབ་པ་དང་། །དེ་དག་ཀུན་ཀྱང་ཡོད་མེད་ཕྱིར། །དགག་སྒྲུབ་རང་གིས་མི་བྱེད་

པའོ། །རིམ་པར་ཕྱེ་བའི་ཁྱད་པར་སྟོན། །མཐོང་བ་དག་དང་མ་དག་པའི། །རིམ་པས་དོན་གཅིག་ཁྱད་པར་སྣང་། །མཐོང་བ་དགེ་བའི་ཀུན་མཐོང་འདི། །སྣ་ཚོགས་ཐེག་པའི་ལྟ་བ་དང་། །ཇི་སྙེད་བསྡོམ་པའི་

བྱ་བ་རྣམས། །སྦྱང་བར་བྱ་བ་མ་ཡིན་ཡང་། །མ་འདྲེས་ཡོངས་སུ་རྫོགས་པར་གསལ། །ཀུན་ཤེས་བཞིན་འདྲ་རབ་རིབ་དྲི་མ་ཉིད། །བསྟན་པའི་མེ་ལོང་མཐོང་གོམས་རང་དག་སར། །འགྱུར་བས་མ་འོངས་དོན་ཅན་

Vol. 211 · folio 365b

ཆེད་བགྱིས་པའི། །དགེ་རྩས་བདག་དང་མཐའ་ཡས་འགྲོ་བར་བསྔོ། །འཕྲུལ་གྱི་མེ་ལོང་དགུ་སྐོར་རྫོགས་སོ།། །།

Source and licence

Text: Esukhia’s Derge Tengyur e-text (Esukhia/derge-tengyur · commit 17465313) · public domain

Licence Public Domain · Evidence

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

No translation — Tibetan only: there is no translation we are licensed to publish (84000’s translations are no-derivatives, non-commercial)

  • Shown: the woodblock reading — Esukhia’s editorial marks ({original,normalised} · (error?,suggestion) · […] · #) are all kept in the data
  • The Tibetan text is not in the collection search yet — the available tokenizer drops Tibetan vowel signs and would match the wrong words