ตัวบทไม่มีชื่อ — ประโยคแรก: གོས་ཀྱི་གཞིའི་བསྡུས་པའི་སྡོམ་ནི

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

เล่ม ๓ · หน้า 50a

གོས་ཀྱི་གཞིའི་བསྡུས་པའི་སྡོམ་ནི། །འཚོ་བྱེད་དང་ནི་གསོ་རས་དང་། །དེ་བཞིན་ཁ་ཚར་རིང་པོ་དང་། །དབྱར་རལ་བར་ནི་རིག་བྱ་དང་། །ཤི་བའི་དུས་དང་ཉེ་དགའ་དང་། །ཐ་མ་དག་ནི་ནད་པ་ཡིན། །བསྡུས་པའི་སྡོམ་ནི། འཚོ་བྱེད་དང་ནི་གསུམ་འདྲལ་དང་། །

เล่ม ๓ · หน้า 50b

དབྱར་གྱི་རས་ཆེན་གདིང་བ་དང་། །གཡན་པ་བདེ་གཤེགས་མོན་དར་དང་། །བལ་དང་ཤ་ན་ཟར་མའི་རས། །སྡོམ་ལ། དུམ་བུ་ས་སྐྱོང་སེང་གེ་དང་། དེ་བཞིན་ཡངས་པར་སོང་བ་དང་། །སེམས་འཕྲོག་དྲང་སྲོང་ས་འཚོ་དང་། །ཨ་མྲ་སྐྱོང་དང་འཇིགས་མེད་དང་། །ཚོང་དཔོན་ཆུང་མ་

རིགས་སྐྱེས་དང་། །སྨན་པ་ཡི་ནི་ལུང་དང་ནི། །རྡོ་འཇོག་དང་ནི་བཟང་བྱེད་དང་། །ཨུ་དུམ་བཱ་ར་གཞལ་བ་དང་། །བསྐྱེད་དང་རྒྱལ་རིགས་སྐྱེད་མོས་ཚལ། །བཅོམ་བརླག་གྱད་དང་བུད་མེད་སྦྲུལ། །ཡ་མུ་ན་དང་དུར་ཁྲོད་དང་། །ཡངས་པ་མིག་དང་སྲིན་གྱི་མེད། །རྒྱལ་པོའི་ཁབ་

བདུན་བཞི་ལྔ་དང་། །འཚོ་བྱེད་སྡེ་ཚན་བསྡུས་པ་ཡིན། །ལུས་འཕགས་ན་རྒྱལ་པོ་འཕགས་སྐྱེས་པོ་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་གང་བ་ན་རྒྱལ་སྲིད་བྱེད་དུ་འཇུག་གོ། །དེའི་བློན་པོ་དུམ་བུ་ལ་སོགས་པ་ལྔ་བརྒྱ་ཡོད་པ་

ལས་བློན་པོའི་མཆོག་དུམ་བུས་ཆོས་དང་མཐུན་པར་རྒྱལ་སྲིད་བྱེད་དུ་འཇུག་སྟེ། ཐ་སྙད་དུ་བྱ་བ་ཡང་རིགས་པས་ལྟ་བར་བྱེད་དོ། །དེས་ན་སྐྱེ་བོའི་ཚོགས་ཐམས་ཅད་དེའི་ངོར་བལྟས་ཤིང་འདུག་གོ། །དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་

བར་བྱེད། དགའ་མགུར་སྤྱོད་པར་བྱེད་དེ་དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་ཏེ། དེའི་བཙས་སྟོན་ཉི་མ་བདུན་གསུམ་ཉི་ཤུ་གཅིག་ཏུ་ཞེས་བྱ་བ་ནས་ས་སྐྱོང་ཞེས་བྱ་བར་བཏགས་སོ་ཞེས་བྱ་བའི་བར་གོང་མ་བཞིན་དུའོ། །དེ་ཡང་

རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་ཏེ་གོང་མ་བཞིན་དུ་རྒྱས་པར་སྦྱར་ཏེ། དེ་ནི་སེང་གེ་ཞེས་བྱ་བར་བཏགས་སོ། །ས་སྐྱོང་དང་སེང་གེ་རིམ་གྱིས་གཞོན་ནུར་གྱུར་ན་ཡང་བློན་པོའི་མཆོག་ཏུ་དུམ་བུ་ནི་ཐོག་མ་ཉིད་ནས་དཔའ་ཞིང་ཕ་རོལ་

གནོན་པ་གནས་ལྔ་ལ་བྱང་བ་ཡིན་ཏེ། དེས་ན་བློན་པོ་རྣམས་ཀྱི་མཆོག་ཏུ་གྱུར་ཏོ། །གང་གི་ཚེ་བུའི་མཐུ་སྐྱེས་པ་དེའི་ཚེ། ལྷག་པར་ཡང་བློན་པོ་ཐམས་ཅད་ཟིལ་གྱིས་མནན་ཏེ་འདུག་གོ། །དེ་ནས་བློན་པོ་དེ་རྣམས་ཟིལ་གྱིས་ནོན་པས་མི་བཟོད་པ་སྐྱེས་ནས་ཕན་ཚུན་དུ་གྲོས་བྱས་ཏེ་རྒྱལ་

เล่ม ๓ · หน้า 51a

པོའི་དྲུང་དུ་དོང་ངོ་། །དེ་ནས་སྐབས་ལ་བབ་པར་རིག་ནས་རྒྱལ་པོ་ལ་སྨྲས་པ། ལྷ་རྒྱལ་པོ་སུ་ལགས། དེས་སྨྲས་པ། ཤེས་ལྡན་དག་གིས་བརྟག་ཏུ་ཅི་ཡོད་རྒྱལ་པོ་ལྷ་ང་ཡིན་མོད། གཞན་སུ་ཞིག་ཡིན། དེ་རྣམས་ཀྱིས་སྨྲས་པ། ལྷ་རྒྱལ་པོ་ནི་དུམ་བུ་ལགས་ཀྱིས་

ལྷ་མ་ལགས་སོ། །གལ་ཏེ་དེ་འཚལ་བར་གྱུར་ན་ལྷ་རྒྱལ་སྲིད་ལས་ཕྱུང་ནས་རང་ཉིད་ཅོད་པན་བཅིངས་ཏེ། རྒྱལ་སྲིད་ཀྱི་དབང་ཕྱུག་ལ་དབང་བགྱིད་པར་འགྱུར་རོ། །རྒྱལ་པོས་བསམས་པ། དེས་འདི་དག་ཐམས་ཅད་ཟིལ་གྱིས་མནན་པས་དེས་ན་དབྱེན་བྱེད་དོ་སྙམ་མོ། །རེ་ཞིག་དུས་གཞན་

ཞིག་ན་རྒྱལ་པོ་བློན་པོའི་ཚོགས་ཀྱིས་ཡོངས་སུ་བསྐོར་ཏེ་འདུག་པ་དང་། བློན་པོའི་མཆོག་དུམ་བུ་རྒོལ་བ་དང་ཕྱིར་རྒོལ་བ་བརྒྱད་སྟོང་གིས་ཡོངས་སུ་བསྐོར་ནས་རྒྱལ་པོའི་ཕོ་བྲང་དུ་ཞུགས་ཏེ། རྒྱལ་པོའི་ཕོ་བྲང་དེ་གང་བར་བྱས་ནས་འདུག་གོ། །གང་གི་ཚེ་རྒྱལ་སྲིད་ཀྱི་བྱ་བ་བྱས་ནས་ཕྱིར་

བྱུང་བ་དེའི་ཚེ་ཡང་རྒྱལ་པོའི་ཕོ་བྲང་དེ་སྟོང་པར་འདུག་གོ། །རྒྱལ་པོས་སྨྲས་པ། ཤེས་ལྡན་དག་སྐྱེ་བོའི་ཚོགས་ཐམས་ཅད་ཕྱིར་བྱུང་བར་གྱུར་ཏམ། བློན་པོ་རྣམས་ཀྱིས་གླགས་རྙེད་ནས་དེ་རྣམས་ཀྱིས་སྨྲས་པ། ལྷ་གང་གི་སླད་དུ་སྙན་དུ་གསོལ་པ་སྤྱན་སྔར་བབ་ལགས་མོད། གལ་

ཏེ་དུམ་བུ་འཚལ་བར་གྱུར་ན་ལྷ་རྒྱལ་སྲིད་ལས་ཕྱུང་ནས་རང་ཉིད་ཅོད་པན་བཅིངས་ཏེ་རྒྱལ་སྲིད་ཀྱི་དབང་ཕྱུག་ལ་དབང་བགྱིད་པར་འགྱུར་རོ། །རྒྱལ་པོ་རྣམས་ཁྭ་ལྟར་ཁུམ་འཕྲིག་ཟ་བ་ཡིན་པས་དེས་བསམས་པ། འདི་རྣམས་ཀྱིས་ཇི་སྐད་སྨྲས་པ་དེ་བཞིན་དུ་གདོན་མི་ཟའོ་སྙམ་ནས་དེ་དེ་ལ་

ཀླན་ཀ་ཚོལ་བར་གྱུར་ཏོ། །འཇིག་རྟེན་ན་མཛའ་བ་དང་། མི་མཛའ་བ་དང་། བར་མ་ཡོད་པས་ཇི་ཙམ་ན་གཞན་དག་གིས་དུམ་བུ་ལ་སྨྲས་པ། ཁྱོད་ལ་རྒྱལ་པོ་ཀླན་ཀ་ཚོལ་ཞིང་འདུག་གིས་ཐབས་ལེགས་པར་སོམས་ཤིག །དེ་རྟོག་པ་སྐྱེས་ཤིང་དེ་དཔྱོད་པ་ལ་ཞུགས་པ་གང་དུ་འགྲོ།

གལ་ཏེ་མཉན་ཡོད་དུ་སོང་ན་ནི་མཉན་ཡོད་དེ་ཡང་རྒྱལ་པོའི་མངའ་རིས་ཡིན་པས་ཉེན་འདི་ཉིད་ཡོད་དོ། །དེ་བཞིན་དུ་བཱ་རཱ་ཎ་སཱི་དང་། རྒྱལ་པོའི་ཁབ་དང་། ཙམ་པ་ཡང་གཅིག་གི་དབང་དུ་གྱུར་པས་ཉེན་འདི་ཉིད་ཡོད་དོ། །ཡངས་པ་ཅན་ནི་ཚོགས་ཀྱི་དབང་ཡིན་ཏེ། བཅུ་དགའ་བ་གང་

เล่ม ๓ · หน้า 51b

ཡིན་པ་དེ་ལ་ནི་ཉི་ཤུ་མི་དགའ་བར་འགྱུར་བ་ཡིན་པས་ཡེ་ཡངས་པ་ཅན་དུ་འགྲོའོ་སྙམ་ནས་དེས་ཡངས་པ་ཅན་གྱི་ལིཙྪ་བཱི་རྣམས་ལ་བདག་ནི་ཁྱེད་ཅག་གི་དཔུང་གི་ཕག་ན་འདུག་པར་འདོད་དོ་ཞེས་ཕོ་ཉ་བཏང་ངོ་། །དེ་རྣམས་ཀྱིས་གུས་པའི་ཚུལ་གྱིས་ལན་སྤྲིང་བ། ཡངས་པ་ཅན་འདིར་

བྱོན་པ་ལེགས་ཀྱིས་སྤྱོན་ཅིག །དེ་ནས་བློན་པོའི་མཆོག་དུམ་བུས་ཉེ་དུ་རྣམས་བོས་ཏེ་སྨྲས་པ། ཤེས་ལྡན་དག་བདག་ནི་ཡངས་པ་ཅན་དུ་ཆས་ཀྱིས་ཁྱེད་ཅག་ལས་གང་དག་འདིར་དགའ་བ་དེ་དག་ནི་འདུག་ཤིག །གང་དག་མི་འདོད་པ་དེ་དག་ནི་སྟ་གོན་གྱིས་ཤིག་དང་འདོང་ངོ་། །

བ་ལང་རྫི་དང་ཕྱུགས་རྫི་རྣམས་ལ་བསྒོ་བ། ཁྱེད་ཅག་གིས་བ་ལང་དང་མ་ཧེ་ཡངས་པ་ཅན་གང་ན་བ་དེར་སྐྱོངས་ཤིག །ཞོ་ཤས་འཚོ་བ་རྣམས་ལ་བསྒོ་བ་ཡངས་པ་ཅན་དུ་འདོང་གིས་གོ་གྱོན་ཅིག །དེ་ནས་སྐྱེ་བོའི་ཚོགས་དེ་ལྟར་སྟ་གོན་བྱེད་དུ་བཅུག་ནས། རྒྱལ་པོའི་དྲུང་དུ་སོང་སྟེ་

རྐང་པ་གཉིས་ལ་གཏུགས་ཏེ་སྨྲས་པ། ལྷ་བགྱི་བ་ཅུང་ཞིག་མཆིས་ཏེ། སྐྱེད་མོས་ཚལ་དུ་མཆི་ན་གཟིགས་སུ་གསོལ། །རྒྱལ་པོས་སྨྲས་པ། དེ་བཞིན་བྱས་སོང་ཤིག །དེས་སྐྱེད་མོས་ཚལ་བྱི་དོར་བྱས་ནས་ནོར་གཅེས་པས་ཤིང་རྟ་བཀང་སྟེ། སྟེང་བཟའ་བ་དང་བཅའ་བས་གཡོགས་

ནས་སོང་ངོ་། །བློན་པོ་རྣམས་ཀྱིས་དུམ་བུ་བྲོས་སོ་ཞེས་ཐོས་ནས། དེ་རྣམས་རིངས་པ་རིངས་པར་རྒྱལ་པོའི་དྲུང་དུ་སོང་ནས་སྨྲས་པ། ལྷ་དུམ་བུ་ནི་བྲོས་སོ། །རྒྱལ་པོས་སྨྲས་པ། དེང་ལ་སླར་ཁུག་ཤིག །དེ་རྣམས་ཀྱིས་དཔུང་གི་ཚོགས་ཡན་ལག་བཞི་པ་གོ་བསྐོན་ནས་བསྙགས་

ཏེ་སྨྲས་པ། དུམ་བུ་ལྷས་བཀའ་སྩལ་གྱིས་སླར་ལོག་ཤིག །དེས་སྨྲས་པ། ཤེས་ལྡན་དག་ཁྱེད་ཅག་གིས་ཡུན་རིང་མོ་ཞིག་ནས་ཀྱེ་མའོ་དུམ་བུ་ཤིའམ་བྲོས་པར་གྱུར་ཀྱང་ཅི་མ་རུང་སྙམ་དུ་བསམས་པ་དེ་ཚེགས་ཆུང་དུས་གྲུབ་ཀྱིས་དེང་ཤིག །ཁོ་བོ་ནི་བྲོས་པ་ཡིན་ནོ། །དེ་རྣམས་ཀྱིས་

རྒྱལ་པོའི་སེམས་བསྲུང་བའི་ཕྱིར་མདའ་དང་མདའ་དག་འདྲེས་པར་བྱས་ནས་ལོག་སྟེ་རྒྱལ་པོ་ལ་སྨྲས་པ། ལྷ་བློན་པོའི་མཆོག་དུམ་བུ་ནི་བྲོས་སོ། །རྒྱལ་པོས་མ་ལེགས་སོ་སྙམ་དུ་བསམས་ནས་ཅང་མི་སྨྲ་བར་འདུག་གོ། །དུམ་བུ་ཡང་རིམ་གྱིས་ཡངས་པ་ཅན་དུ་ཕྱིན་ཏོ། །དེའི་ཚེ་ཡངས་

เล่ม ๓ · หน้า 52a

པ་ཅན་ན་རིས་གསུམ་དུ་གནས་ཏེ། རིས་དང་པོ་ན་ནི་ཁང་པ་རྩེག་མ་བདུན་སྟོང་བ་གམ་གསེར་ལས་བྱས་པའོ། །རིས་བར་མ་ན་ནི་ཁང་པ་རྩེག་མ་ཁྲི་བཞི་སྟོང་བ་གམ་དངུལ་ལས་བྱས་པའོ། །རིས་ཐ་མ་ན་ནི་ཁང་པ་རྩེག་མ་ཉི་ཁྲི་ཆིག་སྟོང་བ་གམ་ཟངས་ལས་བྱས་པ་སྟེ། དེ་

རྣམས་ན་མི་དམ་པ་དང་། བར་མ་དང་། ཕལ་པ་རྣམས་ཅི་རིགས་པར་གནས་སོ། །ཡངས་པ་ཅན་གྱི་ཚོགས་ཀྱིས་ཁྲིམས་སུ་བཅས་ཏེ་བཞག་པ་ནི་རིས་དང་པོར་བུ་མོ་བཙས་པ་གང་ཡིན་པ་དེ་ནི་རིས་དང་པོ་ཉིད་དུ་གཏོང་བར་བྱེད་ཀྱི་བར་མར་མ་ཡིན། ཐ་མར་མ་ཡིན་ནོ། །བར་མའི་གང་

ཡིན་པ་དེ་ནི་རིས་དང་པོ་དང་བར་མ་ལ་གཏོང་བར་བྱེད་དོ། །ཐ་མའི་གང་ཡིན་པ་དེ་ནི་རིས་གསུམ་ཆར་དུ་གཏོང་བར་བྱེད་དོ། །བུད་མེད་རྣམས་ནི་ཡངས་པ་ཅན་མ་གཏོགས་པར་གཞན་དུ་མི་གཏོང་ཞིང་མི་འབྱིན་ཏོ། །བུད་མེད་རིན་པོ་ཆེ་ནི་སུ་ལ་ཡང་མི་གཏོང་བར་ཚོགས་སྤྱིའི་ཡོངས་སུ་ལོངས་

སྤྱད་པ་ཁོ་ནར་བྱེད་དོ། །དུམ་བུ་ནི་སྐྱེས་བུ་དམ་པ་ཡིན་ནོ་ཞེས་ཏེ་རིས་དང་པོར་ཁང་པ་བྱིན་ནས། དེ་ན་གནས་པར་བརྩམས་པ་ལས་གང་གི་ཚེ་ཚོགས་འདུས་པ་དེའི་ཚེ་དེ་བོས་ཀྱང་འདུར་མ་བཏུབ་ནས། དེ་ལ་ཡངས་པ་ཅན་གྱི་ལིཙྪ་བཱི་རྣམས་ཀྱིས་སྨྲས་པ། དུམ་བུ་ཁྱོད་ཅིའི་ཕྱིར་མི་འདུ།

དེས་སྨྲས་པ། འདུ་བ་ཁོ་ན་ལས་བདག་ལ་ཉེས་དམིགས་བྱུང་བས་བདག་མི་འདུའོ། །ཡངས་པ་ཅན་པ་རྣམས་ཀྱིས་སྨྲས་པ། དུམ་བུ་འདུས་ཤིག །འདིར་ཉེས་དམིགས་ཅི་ཞིག་འབྱུང་དེས་འདུ་བར་བརྩམས་ནས་བློ་གྲོས་མ་བྱིན་ནོ། །དེ་རྣམས་ཀྱིས་སྨྲས་པ། དུམ་བུ་བློ་གྲོས་བྱིན་

ཅིག །དེས་སྨྲས་པ། གང་གི་ཕྱིར་བློ་གྲོས་ཁོ་ནས་བདག་ལ་ཉེས་དམིགས་བྱུང་བས་ན་བློ་གྲོས་ནི་མི་སྦྱིན་ནོ། །དེ་རྣམས་ཀྱིས་སྨྲས་པ། བློ་གྲོས་བྱིན་ཅིག་འདིར་ཉེས་དམིགས་ཅི་ཞིག་འབྱུང་། དེ་ཚོགས་དང་ལྷན་ཅིག་འདུས་ནས་བློ་གྲོས་ཀྱང་བྱིན་ནོ། །སྔོན་ཡངས་པ་ཅན་གྱི་ལིཙྪ་བཱི་

རྣམས་གང་སུ་ལ་ཡང་རུང་ཡི་གེ་སྤྲིང་བར་བྱེད་ན་རྩུབ་པོ་དང་བཅས་པར་ཡི་གེ་སྤྲིང་བར་བྱེད་དོ། །གང་གི་ཚེ་དུམ་བུས་བློ་གྲོས་བྱིན་པ་དེའི་ཚེ་འཇམ་པོ་དང་བཅས་པར་ཡི་གེ་སྤྲིང་བར་བྱེད་དོ། །གང་དག་ལ་འཇམ་པོ་དང་བཅས་པར་ཡི་གེ་འོངས་པར་གྱུར་པ་དེ་རྣམས་ཕན་ཚུན་དུ་གྲོས་བྱས་པ།

เล่ม ๓ · หน้า 52b

ཤེས་ལྡན་དག་གང་གིས་ན་ཡངས་པ་ཅན་གྱི་ཚོགས་སྔོན་རྩུབ་པ་དང་བཅས་པར་སྤྲིང་བར་བྱེད་པ་ལས། དེ་འཇམ་པོ་དང་བཅས་པར་གྱུར་པ་ལ་རྒྱུ་ཅི་ཞིག་ཡོད། གཞན་དག་གིས་སྨྲས་པ། ཁྱད་པར་ཡོད་དེ་ལུས་འཕགས་ཀྱི་རྒྱལ་པོའི་བློན་པོའི་མཆོག་དུམ་བུ་དེར་འོངས་ནས།

དེ་དག་དེའི་བློ་གྲོས་བཞིན་བྱེད་དེ། དེས་ན་ད་ལྟར་འཇམ་པོ་དང་བཅས་པར་སྤྲིང་བར་བྱེད་དོ། །དུམ་བུས་ས་སྐྱོང་དང་སེང་གེ་ཁྱིམ་ཕུབ་ནས་སེང་གེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་བུ་མོ་ཞིག་བཙས་ཏེ། དེའི་བཙས་སྟོན་རྒྱ་ཆེར་བྱས་ནས་གོས་

ཅན་ཞེས་བྱ་བར་བཏགས་སོ། །དེ་ལྟས་མཁན་རྣམས་ཀྱིས་མཐོང་ནས་ཁྱེའུ་ཞིག་བཙའ་བར་འགྱུར་ཏེ། དེས་ཕ་སྲོག་དང་ཕྲལ་ནས་རང་ཉིད་ཅོད་པན་བཅིངས་ཏེ་རྒྱལ་སྲིད་བྱེད་པར་འགྱུར་རོ་ཞེས་ལུང་བསྟན་ཏོ། །དེ་ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་

བྱེད་པ་ལས་བུ་མོ་ཞིག་བཙས་ཏེ། དེའི་བཙས་སྟོན་ཡང་རྒྱ་ཆེར་བྱས་ནས་ཉེ་གོས་ཅན་ཞེས་བྱ་བར་བཏགས་སོ། །དེ་ཡང་ལྟས་མཁན་རྣམས་ཀྱིས་མཐོང་ནས་བུ་མཚན་རྫོགས་པ་ཞིག་བཙའ་བར་འགྱུར་རོ་ཞེས་ལུང་བསྟན་ཏོ། །ས་སྐྱོང་གདུག་པ་རྩལ་ཆེ་བ་ཞིག་པས་ཡངས་པ་ཅན་གྱི་ལིཙྪ་

བཱི་རྣམས་ཀྱི་སྐྱེད་མོས་ཚལ་རྣམས་མ་རུང་བར་བྱས་པ་དང་། སྐྱེད་མོས་ཚལ་སྲུང་བ་རྣམས་ཀྱིས་སྨྲས་པ། ཡངས་པ་ཅན་གྱི་ལིཙྪ་བཱི་རྣམས་ནི་གདུག་པ་རྩལ་པོ་ཆེ་ཡིན་གྱིས་དེ་དག་གི་སྐྱེད་མོས་ཚལ་རྣམས་མ་རུང་བར་མ་བྱ་ཤིག་ཅེས་དེས་སླར་བཟློག་ཀྱང་མ་བཏུབ་ནས་སྐྱེད་མོས་ཚལ་སྲུང་བ་རྣམས་

ཀྱིས་དུམ་བུ་ལ་སྨྲས་པ། ཁྱོད་ཀྱི་བུས་ཡངས་པ་ཅན་གྱི་ལིཙྪ་བཱི་རྣམས་ཀྱི་སྐྱེད་མོས་ཚལ་རྣམས་མ་རུང་བར་བྱས་ཏེ། ལིཙྪ་བཱི་འདི་དག་རྣམས་གདུག་པ་རྩལ་པོ་ཆེ་ཡིན་པས་འདི་ལ་གནོད་པ་བྱས་སུ་འོང་གིས་འདི་སླར་ཟློག་ཅིག །དེས་དེ་བཀུག་ནས་སྨྲས་པ། བུ་ཡངས་པ་ཅན་གྱི་ལིཙྪ་

བཱི་རྣམས་ནི་གདུག་པ་རྩལ་པོ་ཆེ་ཡིན་གྱིས་འདི་དག་གི་སྐྱེད་མོས་ཚལ་མ་རུང་བར་མ་བྱ་ཞིག །དེ་དག་གིས་གནོད་པར་བྱས་ས་རེ། དེས་སྨྲས་པ། ཡབ་འདི་དག་ལ་ནི་སྐྱེད་མོས་ཚལ་མཆིས་ན་བདག་ཅག་ལ་ནི་མ་མཆིས་སོ། །དེས་སྨྲས་པ། བུ་སྐྱེད་མོས་ཚལ་གྱི་དོན་དུ་ཚོགས་ལ་

เล่ม ๓ · หน้า 53a

གསོལ་བ་གདབ་བོ། །དེས་ཚོགས་ལ་གསོལ་བ་བཏབ་པ། ཤེས་ལྡན་དག་བདག་གི་བུ་གཉིས་ལ་སྐྱེད་མོས་ཚལ་མ་མཆིས་ཀྱིས་བདག་ལ་སྐྱེད་མོས་ཚལ་ཞིག་ཐུགས་དཔག་མཛད་པའི་རིགས་སོ། །དེ་རྣམས་ཀྱིས་དེ་དག་ལ་སྐྱེད་མོས་ཚལ་རྙིང་པ་ཞིག་བྱིན་པ་ལས། དེ་ན་

ཤིང་སཱ་ལ་ཆེན་པོ་ཞིག་ཡོད་དེ། དེ་ལ་གཅིག་གིས་བཅོམ་ལྡན་འདས་ཀྱི་སྐུའི་གཟུགས་བརྙན་བྱེད་དུ་བཅུག་གོ། །ཅིག་ཤོས་ཀྱིས་ནི་ཞལ་སྲོས་བྱས་སོ། །དེ་བཞིན་དུ་གནས་བརྟན་རྣམས་ཀྱིས་ཀྱང་མདོ་སྡེའི་ནང་དུ་སངས་རྒྱས་བཅོམ་ལྡན་འདས་ཡངས་པ་ཅན་ན་ས་སྐྱོང་དང་སེང་གེའི་ཤིང་སཱ་

ལའི་ཚལ་ན་བཞུགས་སོ་ཞེས་བརྗོད་དོ། །ས་སྐྱོང་གིས་བྱ་བ་མ་ཡིན་པ་སྟོང་ཕྲག་དག་བྱས་པས་ལིཙྪ་བཱི་རྣམས་སྨོད་པར་བྱེད། གཞོགས་འཕྱས་བྱེད། ཁ་ཟེར་བར་བྱེད་དོ། །དེ་ནས་དུམ་བུས་བཀུག་སྟེ་བསྒོ་བ། བུ་ཁྱོད་ཚོགས་འཁྲུག་པར་མ་བྱེད་པར་རི་འོར་ཆེ་གེ་མོ་ཞིག་ཏུ་སོང་ལ་དེར་

རང་གི་ཞིང་ལས་ཀྱི་མཐའ་རྣམས་ལ་ཞལ་ཏ་བྱེད་ཅིང་འདུག་ཤིག །དེ་དེར་སོང་ནས་རང་གི་ཞིང་ལས་ཀྱི་མཐའ་རྣམས་ལ་ཞལ་ཏ་བྱེད་པར་བརྩམས་སོ། །ཇི་ཙམ་དུས་གཞན་ཞིག་ན་ཡངས་པ་ཅན་གྱི་སྡེ་དཔོན་ཤི་ནས་དེ་རྣམས་ཀྱིས་བློན་པོའི་མཆོག་དུམ་བུ་སྡེ་དཔོན་དུ་བཅུག་པ་ལས་

དེས་ཀྱང་དུས་ཐུང་ངུ་ཞིག་ཏུ་ཆོས་དང་མཐུན་པས་སྡེ་དཔོན་བྱས་ནས་ཤིའོ། །ཡངས་པ་ཅན་གྱི་ཚོགས་འདུས་ནས་སུ་ཞིག་སྡེ་དཔོན་དུ་གཞུག་ཅེས་བྱས་པ་དང་། དེ་ནས་ཁ་ཅིག་གིས་སྨྲས་པ། བློན་པོའི་མཆོག་དུམ་བུས་ཚོགས་ཡོངས་སུ་བསྐྱངས་པས་ན་དེ་ཉིད་ཀྱི་བུ་གཞག་གོ། །ཁ་ཅིག་

གིས་སྨྲས་པ། དེའི་བུ་ས་སྐྱོང་ནི་གདུག་པ་རྩལ་པོ་ཆེ་ཞིག་སྟེ། གལ་ཏེ་དེ་སྡེ་དཔོན་དུ་བཅུག་ན་གདོན་མི་ཟ་བར་ཚོགས་ཕྱེ་བར་འགྱུར་རོ། །དེའི་ནུ་བོ་སེང་གེ་གང་ཡིན་པ་དེ་ནི་དེས་པ་འགྲོགས་ན་བདེ་བ་ཚོགས་ཀྱི་སེམས་མགུ་བར་བྱེད་ནུས་པ་ཞིག་པས། གལ་ཏེ་ཚོགས་འདོད་ན་དེ་སྡེ་

དཔོན་དུ་གཞུག་གོ། །ཐམས་ཅད་དགའ་བས་དེ་རྣམས་འདུས་ནས་སེང་གེའི་གན་དུ་སོང་སྟེ། སེང་གེ་ཁྱོད་ལ་སྡེ་དཔོན་སྦྱིན་ནོ། །དེས་སྨྲས་པ། ས་སྐྱོང་ནི་བདག་གི་ཕུ་བོ་ཡིན་པས་དེ་སྡེ་དཔོན་དུ་ཆུག་ཤིག །དེ་རྣམས་ཀྱིས་སྨྲས་པ། སེང་གེ་སྡེ་དཔོན་ཁྱོད་ཀྱི་རིགས་བརྒྱུད་ཀྱིས་རིམ་

เล่ม ๓ · หน้า 53b

པས་འོངས་པ་ཡིན་ནམ་ཅི་ཚོགས་གང་ལ་འདྲང་བ་དེས་སྡེ་དཔོན་བྱ་བར་ཟད་མོད། གལ་ཏེ་ཁྱོད་མི་འདོད་ན་ཁོ་བོ་ཅག་གིས་གཞན་ཞིག་སྡེ་དཔོན་དུ་གཞུག་གོ། །དེས་བསམས་པ། གལ་ཏེ་བདག་གི་ཁྱིམ་ནས་སྡེ་དཔོན་གཞན་དུ་ཤོར་ན་དེ་ནི་མ་འོས་པས་ཡེ་བཀུར་རོ་སྙམ་ནས་དེས་ཁས་

བླངས་པ་དང་། དེ་རྣམས་ཀྱིས་བཀུར་སྟི་ཆེན་པོས་སྡེ་དཔོན་དུ་བཅུག་གོ། །ཡངས་པ་ཅན་པ་རྣམས་སྔོན་གང་ལ་ཡི་གེ་སྤྲིང་བ་དེ་ལ་དུམ་བུ་ལ་སོགས་པ་ཚོགས་ཀྱིས་བཀའ་སྩལ་པ་ཞེས་འདྲི་བར་བྱེད་པ་ལས། གང་གི་ཚེ་སེང་གེ་སྡེ་དཔོན་དུ་གྱུར་པ་དེའི་ཚེ་སེང་གེ་ལ་སོགས་པ་ཚོགས་

ཀྱིས་བཀའ་སྩལ་པ་ཞེས་འདྲི་བར་བྱེད་དོ། །ཇི་ཙམ་དུས་གཞན་ཞིག་ན་རི་འོར་ན་ས་སྐྱོང་རང་གི་ཞིང་བླས་ཀྱི་མཐའ་རྣམས་ལ་ཞལ་ཏ་བྱེད་པའི་རི་འོར་བ་གང་ཡིན་པ་དེར་སྤྲིང་བ་འོངས་པ་དང་། ས་སྐྱོང་གིས་ཕྱེ་སྟེ་བཀླགས་ནས་དེས་སྨྲས་པ། ཤེས་ལྡན་དག་སྔོན་ནི་ཡངས་པ་ཅན་གྱི་

ཚོགས་དུམ་བུ་ལ་སོགས་པའི་ཚོགས་ཀྱིས་བཀའ་སྩལ་པ་ཞེས་འདྲི་ན། ད་ནི་སེང་གེ་ལ་སོགས་པ་ཚོགས་ཀྱིས་བཀའ་སྩལ་པ་ཞེས་འདྲི་ན། ཅི་ཁོ་བོའི་ཕ་ཤིའམ། དེ་རྣམས་ཀྱིས་སྨྲས་པ་ཤིའོ། །དེ་མི་བཟོད་པ་སྐྱེས་ནས་ཡངས་པ་ཅན་དུ་སོང་སྟེ་སྨྲས་པ། ཕུ་བོ་ང་འདུག་

བཞིན་དུ་ཁྱོད་ཀྱིས་སྡེ་དཔོན་བྱ་བ་ཅི་ག་རིགས་སམ། སེང་གེས་ཇི་ལྟར་གྱུར་པ་དེ་ལ་སྨྲས་པ་དང་། དེ་ཡངས་པ་ཅན་གྱི་ལིཙྪ་བཱི་རྣམས་ལ་མི་བཟོད་པ་སྐྱེས་ནས་བསམས་པ། བདག་ལ་ཡངས་པ་ཅན་པ་རྣམས་ཀྱིས་བཀུར་སྟི་མ་ཡིན་པ་བྱས་ཀྱིས་རྒྱལ་པོའི་ཁབ་ཏུ་འགྲོའོ་སྙམ་ནས། དེས་

རྒྱལ་པོ་གཟུགས་ཅན་སྙིང་པོ་ལ་བདག་ལྷའི་བཙན་ཕག་ན་མཆིས་པར་འཚལ་ལོ་ཞེས་ཕོ་ཉ་བཏང་ངོ་། །དེས་དེ་ལ་སྤྲིང་པ་འོང་བ་ལེགས་ཀྱིས་ཤོག་ཤིག་ཅེས་སྤྲིང་ངོ་། །དེ་རྒྱལ་པོའི་ཁབ་ཏུ་འོངས་པ་དང་། དེ་ནས་རྒྱལ་པོ་གཟུགས་ཅན་སྙིང་པོས་བློན་པོའི་མཆོག་ཏུ་བཅུག་གོ། །ཇི་ཙམ་

དུས་གཞན་ཞིག་ན་རྒྱལ་པོ་གཟུགས་ཅན་སྙིང་པོའི་བཙུན་མོ་དམ་པ་ཤི་ནས་དེ་འགྲམ་པ་ལ་ལག་པ་གཏད་དེ་སེམས་ཁོང་དུ་ཆུད་ཅིང་འདུག་པ་དེ་ས་སྐྱོང་གིས་མཐོང་ནས་སྨྲས་པ། ལྷ་ཅིའི་སླད་དུ་ཞལ་ལ་ཕྱག་གཏད་དེ་ཐུགས་མི་དགྱེས་ཤིང་བཞུགས། དེས་སྨྲས་པ། ངའི་བཙུན་མོ་དམ་

เล่ม ๓ · หน้า 54a

པ་ཤི་ན་ཅིའི་ཕྱིར་སེམས་ཁོང་དུ་ཆུད་ཅིང་མི་འདུག །ལྷ་ཐུགས་ངན་མ་མཛད་ཅིག །བདག་གི་ནུ་བོ་ལ་བུ་མོ་གཟུགས་དང་ལང་ཚོ་ཕུན་སུམ་ཚོགས་པ་ལྷ་ཁོ་ན་ལ་འོས་པ་གཉིས་མཆིས་ན། དེ་ལ་གཅིག་ལ་ནི་ཕ་འགུམས་པའི་བུ་ཞིག་བཙའ་བར་འགྱུར། ཅིག་ཤོས་ལ་

ནི་མཚན་ཕུན་སུམ་ཚོགས་པ་ཞིག་བཙའ་བར་འགྱུར་རོ་ཞེས་ལུང་བསྟན་ན་ལྷའི་ཆེད་དུ་དེ་གང་ཁྲིད་དེ་མཆི། བུ་མཚན་ཕུན་སུམ་ཚོགས་པ་བཙའ་བར་འགྱུར་བ་ཞེས་ལུང་བསྟན་པ་གང་ཡིན་པ་དེའོ། །དེ་ནས་ས་སྐྱོང་གིས་སེང་གེ་ལ་སྤྲིང་བ་རྒྱལ་པོ་གཟུགས་ཅན་སྙིང་པོའི་བཙུན་མོ་དམ་པ་ཤི་ནས་

ཁྱོད་ཀྱི་ཉེ་གོས་ཅན་ཚུར་བཀྲི་ཞིག་དང་བཙུན་མོ་དམ་པར་འགྱུར་རོ། །དེས་དེ་ལ་ཡི་གེ་ལན་སྤྲིང་བ། གར་བསྐོར་ཀྱང་ཁྱོད་ཁོ་ན་ལ་བདག་འདྲི་བར་ཟད་དེ། ཁྱོད་ཀྱིས་བྱས་པ་གང་ཡིན་པ་དེ་ནི་ཚད་མའི་མཆོག་ཡིན་པས་ཁྱོད་ཉིད་ཤེས་སོ། །ཇི་ལྟར་ཚོགས་ཀྱིས་ཁྲིམས་སུ་བཅས་པ་ཡངས་

པ་ཅན་ལས་གཞན་དུ་བུ་མོ་མི་གཏོང་ངོ་ཞེས་བཅས་མོད་ཀྱི། འོན་ཀྱང་ཁྱོད་ཉིད་འོངས་ཏེ་སྐྱེད་མོས་ཚལ་དུ་སྡོད་ཅིག་དང་། ཁོ་བོས་དེ་སྐྱེད་མོས་ཚལ་དུ་ཕྱུང་བ་དང་ཁྱོད་ཀྱིས་ཁྲིད་དེ་སོང་ཤིག །དེ་ནས་ས་སྐྱོང་གིས་རྒྱལ་པོ་ལ་མཆི་ཕྱག་བྱས་ནས་ཤིང་རྟར་ཞུགས་ཏེ་ཡངས་པ་ཅན་དུ་སོང་

བ་ལས་རིམ་གྱིས་ཕྱིན་ནས་སྐྱེད་མོས་ཚལ་དུ་བསྡད་དོ། །དེའི་ཚེ་ཡངས་པ་ཅན་གྱི་སྒོ་སྲུང་ཞིག་ཤི་ནས་མི་མ་ཡིན་པ་རྣམས་སུ་སྐྱེས་པ་དེས་ཡངས་པ་ཅན་པ་རྣམས་ལ་བསྟན་པ། བདག་ནི་མི་མ་ཡིན་པ་རྣམས་སུ་སྐྱེས་ཀྱིས་བདག་གི་གནོད་སྦྱིན་གྱི་གནས་བྱོས་ལ་མགུལ་པ་ལ་དྲིལ་དཔྱངས་

ཤིག་དང་གལ་ཏེ་ཡངས་པ་ཅན་རྣམས་ལ་ཕྱིར་རྒོལ་བ་འགའ་ཞིག་འོངས་ན་བདག་གིས་ཇི་ཙམ་དུ་ཟིན་པའམ། འབྲོས་པར་གྱུར་པ་དེ་སྲིད་དུ་དྲིལ་གྱི་སྒྲ་བསྒྲགས་པར་བྱའོ། །དེ་རྣམས་ཀྱིས་གནོད་སྦྱིན་གྱི་གཟུགས་བརྙན་བྱས་ནས་མགུལ་པ་ལ་དྲིལ་བཏགས་ཏེ། གར་དང་། གླུ་

དང་། རོལ་མོའི་སྒྲ་དང་། གཏོར་མ་དང་། མེ་ཏོག་ཕྲེང་གི་ཡོ་བྱད་ཀྱིས་སྒོ་ཁང་དུ་བཞག་གོ། །ས་སྐྱོང་གིས་སེང་གེ་ལ་སྤྲིང་བ། ཁོ་བོ་སྐྱེད་མོས་ཚལ་ན་སྡོད་ཀྱིས་བྱུང་ཤིག །དེས་ཡངས་པ་ཅན་གྱི་ཚོགས་ལ་བརྟགས་ནས་ཁྱིམ་དུ་སོང་སྟེ་ཉེ་གོས་ཅན་ལ་སྨྲས་པ། ཁྱོད་རྒྱལ་

เล่ม ๓ · หน้า 54b

པོ་གཟུགས་ཅན་སྙིང་པོ་ལ་བྱིན་གྱིས་རྒྱན་རྣམས་ཐོགས་ལ་སྐྱེད་མོས་ཚལ་དུ་བྱུང་ཤིག །དེས་རྒྱན་རྣམས་ཐོགས་པར་བརྩམས་པ་དང་། གོས་ཅན་གྱིས་མཐོང་ནས་དེས་སྨྲས་པ། ཅི་ཞིག་གི་ཕྱིར་རྒྱན་ཐོགས། ཁོ་མོ་བག་མར་བཏང་ངོ་། །སུ་ཞིག་ལ། རྒྱལ་པོ་གཟུགས་ཅན་སྙིང་པོ་

ལའོ། །དེས་སྨྲས་པ། ཁོ་མོ་ཕུ་མོ་ཡིན་ན་ཁྱོད་ཅི་སྟེ་བག་མར་གཏང་། གལ་ཏེ་དེ་ལྟ་ན་ཁྱོད་རྒྱན་ཐོགས་ཤིག །དེ་ཡང་སྨྲ་བ་ལས་དྲིལ་གྱི་སྒྲ་བྱུང་ངོ་། །ཡངས་པ་ཅན་གྱི་ཚོགས་རོད་རོད་པོར་གྱུར་ཏེ། བདག་ཅག་གི་མི་མཛའ་བ་ཞིག་ཡངས་པ་ཅན་དུ་ཞུགས་སོ། །སེང་གེ་སྔངས་པས་

ཉེ་གོས་ཅན་ཡིན་ནོ་སྙམ་ནས་གོས་ཅན་ཁྲིད་དེ་མྱུར་བ་མྱུར་བར་ཕྱིར་བྱུང་བ་དང་། ས་སྐྱོང་ཡང་སྔངས་པས་གོས་ཅན་ཤིང་རྟར་བཅུག་སྟེ་སོང་ངོ་། །ཡངས་པ་ཅན་གྱི་ཚོགས་ཀྱིས་ཕྱི་བཞིན་བསྙགས་ནས། དེ་དང་དེ་རྣམས་སུ་ལྷན་ཅིག་འཐབ་པར་བརྩམས་པ་དང་། དེ་གནས་ལྔ་རྣམས་ལ་བྱང་

བ་ཡིན་པས་དེས་ལིཙྪ་བཱི་ལྔ་བརྒྱའི་གནད་དུ་བསྣུན་ནས་དེས་སྨྲས་པ། ཤེས་ལྡན་དག་ངས་ཁྱེད་ཅག་ལས་ལྔ་བརྒྱ་གནད་དུ་བསྣུན་ཟིན་གྱིས་ལྷག་མ་རྣམས་སྲོག་བསྐྱབ་ཀྱིས་སླར་དེང་ཤིག །དེ་རྣམས་ཀྱིས་སྨྲས་པ། ངེད་ཅག་ལས་སེམས་ཅན་གཅིག་ཀྱང་བསད་པ་མེད་དོ། །གོ་ཕུད་ཅིག་

དེ་རྣམས་ཀྱིས་གོ་ཕུད་པ་དང་ལྔ་བརྒྱ་ས་ལ་འགྱེལ་ནས་སྲོག་དང་བྲལ་བར་གྱུར་ཏོ། །དེ་ནས་དེ་རྣམས་ཀྱིས་མི་འདི་ནི་སྲིན་པོ་ཡིན་ནོ་སྙམ་ནས་སྐྲག་སྟེ་བྲོས་སོ། །ཡངས་པ་ཅན་དུ་ལྷགས་ནས་གྲོས་བྱ་བར་བརྩམས་པ། ཤེས་ལྡན་དག་བདག་ཅག་གི་དགྲ་འདི་ལ་གཟུགས་ཅན་སྙིང་པོའི་བུ་

རྣམས་ལན་གློན་དུ་གཞུག་གིས་གླེགས་བུ་ལ་ཡི་གེར་བྲིས་ཏེ་སྒྲོམ་བུར་བཅུག་ནས་རྒྱ་སྐྱེགས་ལ་རྒྱས་བཏབ་ནས་གཞག་གོ་ཞེས་དེ་རྣམས་ཀྱིས་དེ་བཞིན་དུ་བྱས་ནས་བཞག་གོ། །ས་སྐྱོང་ཡང་རིམ་གྱིས་རྒྱལ་པོའི་ཁབ་ཏུ་ཕྱིན་ནས་སྨྲས་པ། ཉེ་གོས་ཅན་བོབས་ཤིག །དེས་སྨྲས་པ། ཁུ་

གུ་བདག་ནི་ཉེ་གོས་ཅན་མ་ལགས་ཏེ། བདག་ནི་གོས་ཅན་ལགས་སོ། །ཁྱོད་ཀྱིས་ཅིའི་ཕྱིར་བདག་ལ་མ་སྨྲས། དེ་ཅང་མི་སྨྲ་བར་འདུག་གོ། །དེ་ནས་དེ་སྡུག་བསྔལ་ཞིང་ཡིད་མི་བདེ་བས་རྒྱལ་པོའི་དྲུང་དུ་སོང་བ་རྒྱལ་པོས་མཐོང་ནས་སྨྲས་པ། ས་སྐྱོང་འོངས་སམ་འོངས་པ་ལེགས་སོ། །

เล่ม ๓ · หน้า 55a

ལྷ་བདག་མཆིས་ལགས་སོ། །ཉེ་གོས་ཅན་ཁྲིད་དེ་འོངས་སམ། ལྷ་ཁྲིད་དེ་མཆིས་ཀྱང་མཆིས་ལ་ཁྲིད་དེ་མ་མཆིས་ཀྱང་མ་མཆིས་སོ། །ཅི་ཞིག་ཟེར། ཉེ་གོས་ཅན་ལགས་སྙམ་ནས་གོས་ཅན་ཁྲིད་དེ་མཆིས་སོ། །བལྟས་ཁྲིད་དེ་ཤོག་ཤིག །དེ་ནང་དུ་ཁྲིད་པ་དང་རྒྱལ་

པོས་ལྷག་པར་གཟུགས་དང་ལང་ཚོ་ཕུན་སུམ་ཚོགས་པ་མཐོང་ནས་བུད་མེད་ཀྱི་ཡུལ་གྱིས་ཕྲོགས་པས་མཐོང་མ་ཐག་ཁོ་ནར་རྒྱལ་པོ་ཆགས་པར་གྱུར་ནས་སྨྲས་པ། ཤེས་ལྡན་དག་བུ་ཕ་གསོད་པ་གང་ཡིན་པ་དེ་ནི་རྒྱལ་སྲིད་ཀྱི་ཕྱིར་ཡིན་པས་གལ་ཏེ་ང་ལ་བུ་ཡོད་པར་གྱུར་ན་དེ་བཙས་མ་ཐག་

ཏུ་ངས་ཅོད་པན་གྱིས་བཅིང་བར་བྱའོ། །དེ་ནས་དེ་དཔལ་གྱི་འབྱོར་པ་ཆེན་པོས་བག་མར་བླངས་ཏེ། ཡུལ་ལུས་འཕགས་ནས་འོངས་པས་ན་ལུས་འཕགས་མ་ཞེས་བྱ་བར་གྲགས་སོ། །དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རེ་ཞིག་དུས་གཞན་

ཞིག་ན་རྒྱལ་པོ་གཟུགས་ཅན་སྙིང་པོ་རི་དགས་ཀྱི་ཕྱིར་བྱུང་བ་ན་བསྟི་གནས་ཤིག་ན་དྲང་སྲོང་མངོན་པར་ཤེས་པ་ལྔ་དང་ལྡན་པ་ཞིག་གནས་སོ། །ཇི་ཙམ་ན་རི་དགས་མདའི་ལོང་ལ་བཏགས་པས་སྐྲག་པ་ཞིག་དྲང་སྲོང་དེའི་བསྟི་གནས་སུ་ཞུགས་ཤིང་བྱུང་བ་རྒྱལ་པོའི་མདས་གནད་དུ་བསྣུན་ཏོ། །དེ་

ནས་དྲང་སྲོང་དེ་ཁྲོས་ནས་སྨྲས་པ། འཐབ་ཀྲོལ་ཅན་གྱི་རྒྱལ་པོ་བདག་གི་བསྟི་གནས་གཅན་གཟན་གདུག་པས་ཀྱང་གཟེམ་པར་བྱ་བར་རི་དགས་སྐྱབས་སུ་འོངས་པ་ཁྱོད་ཀྱིས་གསོད་དམ་ཞེས་དྲང་སྲོང་དེ་རྒྱལ་པོ་ལ་དེ་སྐད་དུ་ཁ་ཟེར་བ་དང་། དཔུང་གི་ཚོགས་འོངས་ནས་སྨྲས་པ། ལྷ་འདི་སུ་ལ་གཡར་མཆི་

རྒྱལ་པོས་སྨྲས་པ། ང་ལ་ཡིན་ན། ཤེས་ལྡན་དག་རྒྱལ་པོ་ལ་ཁ་ཚས་ཟེར་བ་གང་ཡིན་པ་དེ་ལ་ཆད་པ་ཅི་ཡོད། ལྷ་དེའི་ཆད་པ་དགུམ་པ་ལགས་སོ། །གལ་ཏེ་དེ་ལྟ་ན་ངས་དྲང་སྲོང་འདི་ཡོངས་སུ་སྤངས་སོ། །དེ་གསད་པར་བརྩམས་ཏེ་དེ་གསོད་པ་ན་སྨོན་ལམ་ལོག་པར་བཏབ་པ། རྒྱལ་པོ་

འཐབ་ཀྲོལ་ཅན་འདིས་བདག་ཉེས་པ་མེད་ཅིང་གནོད་པ་མི་བྱེད་པ་གསད་པར་བཀྲིས། གང་དུ་སྐྱེས་པ་དེར་འདི་སྲོག་དང་བྲལ་བར་བྱེད་པར་གྱུར་ཅིག །ཡང་བསམས་པ། རྒྱལ་པོ་འདི་དག་ནི་ཤིན་ཏུ་སྦས་པ། ཤིན་ཏུ་བསྲུངས་པ། ཤིན་ཏུ་བཙས་པ་ཡིན་པས་གལ་ཏེ་གཞན་དུ་སྐྱེ་བ་བླངས་

เล่ม ๓ · หน้า 55b

ན་ལན་འགའ་ཡང་སྐབས་རྙེད་པར་མི་འགྱུར་གྱིས། རྣམ་པ་ཐམས་ཅད་དུ་བདག་འདིའི་བཙུན་མོ་དམ་པའི་མངལ་དུ་སྐྱེ་བར་གྱུར་ཅིག་ཅེས་བྱས་སོ། །དེ་སྨོན་ལམ་ལོག་པར་བཏབ་པས་གོས་ཅན་གྱི་མངལ་དུ་སྐྱེས་སོ། །གང་གི་ཚེ་ཉི་མ་ཁོ་ན་ལ་ཉིང་མཚམས་སྦྱོར་བ་བླངས་པ་དེ་ཉིད་ཀྱི་ཉི་མ་ལ་

ཁྲག་གི་ཆར་བབ་བོ། །གོས་ཅན་འདོད་པ་སྐྱེས་པ། ཨེ་མའོ་བདག་གིས་ལྷའི་རྒྱབ་ཀྱི་ཤ་བཅད་ཅིང་བཅད་ཅིང་ཟོས་ཀྱང་ཅི་མ་རུང་སྙམ་མོ། །དེ་ལྟར་གྱུར་པ་རྒྱལ་པོ་ལ་སྨྲས་པ་དང་། རྒྱལ་པོས་ལྟས་མཁན་རྣམས་བཀུག་ནས་སྨྲས་པ་ལས། དེ་རྣམས་ཀྱིས་སྨྲས་པ། ལྷ་འདི་ནི་བཙུན་མོའི་

རུམ་དུ་སེམས་ཅན་ཞིག་ཞུགས་པ་གང་ལགས་པ་དེའི་མཐུ་ལགས་སོ། །རྒྱལ་པོ་སེམས་ཁོང་དུ་ཆུད་ཅིང་འདུག་ནས། འདིའི་འདོད་པ་ཅི་ཞིག་གིས་སེལ་བར་འགྱུར་སྙམ་མོ། །མཁས་པའི་རང་བཞིན་ཅན་གཞན་དག་གིས་སྨྲས་པ། ལྷ་རས་ཀྱི་བར་སྩང་ཤས་བལྟམས་པར་བགྱིས་ཏེ་

གསོལ་ལ་ཉིད་བཙུན་མོ་ལ་སྟོབས་མཛོད་ཅིག །དེ་ནས་རྒྱལ་པོས་རས་ཀྱི་བར་ཤས་གང་བར་བྱས་པ་བགོས་ནས་བདག་ཉིད་གོས་ཅན་ལ་བསྟབས་པ་དང་། དེས་རྒྱབ་ཀྱི་ཤ་ཡིན་ནོ་སྙམ་ནས་ཟོས་སོ། །དེ་ནས་དེའི་འདོད་པ་གང་ཡིན་པ་དེ་དང་བྲལ་བར་གྱུར་ཏོ། །ཡང་དེའི་འདོད་པ་སྐྱེས་པ།

ཀྱེ་མའོ་བདག་གིས་ལྷའི་ཁྲག་ཁོ་ན་འཐུངས་ཀྱང་ཅི་མ་རུང་སྙམ་པ་དེ་ཡང་རྒྱལ་པོ་ལ་སྨྲས་པ་དང་། དེ་ནས་རྒྱལ་པོས་ཡན་ལག་ལྔའི་རྩྭ་གཏར་ནས་ཁྲག་བླུད་པས་དེ་འདོད་པ་དེ་དང་བྲལ་བར་གྱུར་ཏོ། །ཇི་ཙམ་ན་ཟླ་བ་དགུ་ཚང་བ་དང་། ཁྱེའུ་གཟུགས་བཟང་བ། མཛེས་པ་བལྟ་ན་སྡུག་པ་ཞིག་

བཙས་སོ། །བཙས་ཏེ་གང་གི་ཉི་མ་ལ་བཙས་པ་དེ་ཉིད་ཀྱི་ཉི་མ་ལ་ཡང་ཁྲག་གི་ཆར་བབ་བོ། །རྒྱལ་པོས་ཡང་ལྟས་མཁན་རྣམས་བཀུག་ནས་རྨས་པ་དང་། དེ་རྣམས་ཀྱིས་སྨྲས་པ། ལྷ་བསྟན་བཅོས་ལས་ཇི་ལྟར་གདའ་བ་ལྟར་ན་གདོན་མི་འཚལ་བར་ཁྱེའུ་འདིས་ལྷ་སྐུ་ཚེ་དང་ཕྲལ་ནས་རང་ཉིད་ཅོད་

པན་བཅིངས་ཏེ་རྒྱལ་སྲིད་བགྱིད་པར་འགྱུར་རོ། །རྒྱལ་པོས་བསམས་པ། རྣམ་པ་ཐམས་ཅད་དུ་རྒྱལ་སྲིད་ཀྱི་ཆེད་དུ་འདིས་སྲོག་དང་བྲལ་བར་བྱེད་ཀྱིས་འདི་ལ་བདག་ཉིད་ཀྱིས་རྒྱལ་སྲིད་བྱིན་ན་ཅིའི་ཕྱིར་བདག་སྲོག་དང་བྲལ་བར་བྱེད་སྙམ་མོ་དེའི་ཚེ་ཡངས་པ་ཅན་ན་ལིཙྪ་བཱི་མིང་ཆེན་ཞེས་བྱ་བ་

เล่ม ๓ · หน้า 56a

ཞིག་གནས་ཏེ། དེའི་སྐྱེད་མོས་ཚལ་ན་ཨ་མྲའི་ཚལ་ཡོད་པ་ལས་དེར་གློ་བུར་དུ་ཆུ་ཤིང་གི་སྡོང་པོ་ཞིག་སྐྱེས་པ་ཀུན་དགའི་ར་བ་སྲུང་བས་མཐོང་ངོ་། །དེ་མ་ཐག་ཁོ་ནར་མེ་ཏོག་ཆགས་པ་དང་། དེ་ངོ་མཚར་སྐྱེས་ནས་མིང་ཆེན་ལ་སྨྲས་པ་དང་། དེས་ལྟས་མཁན་རྣམས་བཀུག་

ནས་དྲིས་པ་དང་དེ་རྣམས་ཀྱིས་སྨྲས་པ། ལྷ་དེ་སྲུང་དུ་གསོལ་ཅིག་དང་དགུང་བདུན་གྱི་ཉིན་པར་གས་པར་འགྱུར་ཏེ། དེའི་ནང་ནས་བུ་མོ་ཞིག་འབྱུང་བར་འགྱུར་རོ། །ཁྱིམ་བདག་མིང་ཆེན་གྱིས་ཐོས་ནས་ལྷག་པར་ཡང་ངོ་མཚར་སྐྱེས་པར་གྱུར་ཏེ། སྐྱེད་མོས་ཚལ་དེར་ཀུན་ནས་སྲུང་མའི་མི་

རྣམས་བཀོད་ནས་ཉི་མ་བགྲང་བ་ལ་ཞུགས་སོ། །ཇི་ཙམ་ན་ཞག་བདུན་ལོན་པ་དང་སྐྱེད་མོས་ཚལ་དེ་རྡོ་བ་དང་། གསེག་མ་དང་། གྱོ་མོ་རྣམས་བསལ་ནས་ཙན་དན་གྱི་ཆུས་ཆག་ཆག་བཏབ། ཤིན་ཏུ་དྲི་ཞིམ་པོའི་པོག་པོར་དག་བཤམས། དར་གྱི་ཆུན་འཕྱང་མང་པོ་བྲེས། མེ་ཏོག་སིལ་

མས་བཀྲམ། གླུ་དང་རོལ་མོའི་སྒྲ་རྣམ་པ་དུ་མ་དག་དང་། མཛའ་བོ་དང་། གཉེན་བཤེས་ཀྱི་སྐྱེ་བོས་ཡོངས་སུ་བསྐོར་ནས་དཔལ་གྱི་འབྱོར་པ་ཆེན་པོས་ཆུང་མ་དང་ལྷན་ཅིག་བྱུང་ནས་སྐྱེད་མོས་ཚལ་དེ་ན་དེ་རྩེ་བར་བྱེད། དགའ་བར་བྱེད་དགའ་མགུར་སྤྱོད་པར་བྱེད་པ་ལས་ཆུ་ཤིང་གི་སྡོང་པོ་གས་

ནས་བུ་མོ་གཟུགས་བཟང་བ། མཛེས་པ་བལྟ་ན་སྡུག་པ་ཡན་ལག་ཐམས་ཅད་དང་ལྡན་པ་ཞིག་བྱུང་ངོ་། །དེ་ནས་མིང་ཆེན་གྱིས་ཆུང་མ་དམ་པ་ལ་གཏད་པ་དང་། དེས་སྨྲས་པ། ལྷ་འདིའི་མིང་གདགས་སུ་གསོལ། མིང་ཆེན་གྱིས་སྨྲས་པ། བུ་མོ་འདི་ནི་ཨ་མྲའི་ཚལ་ནས་རྙེད་པ་

ཡིན་པས་འདིའི་མིང་ཨ་མྲ་སྐྱོང་མ་ཞེས་བྱའོ། །ཇི་ཙམ་ན་ཁྱིམ་བདག་མིང་ཆེན་སྐྱེད་མོས་ཚལ་ནས་རང་གི་ཁྱིམ་དུ་སོང་སྟེ་བུ་མོ་ཨ་མྲ་སྐྱོང་མ་བསྐྱེད་བསྲིངས་ཏེ་ཞེས་བྱ་བ་ནས་ཆེན་མོར་གྱུར་ཏོ། །ཞེས་བྱ་བའི་བར་གོང་མ་བཞིན་དུའོ། །དེ་སློང་བའི་ཕྱིར་ཡུལ་ཀྲུང་ཀྲུང་པ་རྣམས་དང་། ཤཱཀྱ་

རྣམས་དང་། གཞན་ཡང་ཡུལ་སྣ་ཚོགས་ན་གནས་པའི་རྒྱལ་པོའི་བུ་དང་། བློན་པོའི་བུ་དང་། ཚོང་པ་དང་། ཚོང་དཔོན་དང་། དེད་དཔོན་དུ་མ་དག་འོངས་པ་དང་། ཁྱིམ་བདག་མིང་ཆེན་གྱིས་བསམས་པ་གང་ཁོ་ན་ལ་མ་བྱིན་པ་དེ་དག་ཁོ་ན་སྡང་བར་འགྱུར་ན་འོན་ཀྱང་ཚོགས་ཀྱིས་ཁྲིམས་

เล่ม ๓ · หน้า 56b

སུ་བཅས་པས་རེ་ཞིག་ཚོགས་ལ་བརྟག་གོ་སྙམ་ནས། དེས་ཡངས་པ་ཅན་གྱི་ཚོགས་བསྡུས་ཏེ། ཤེས་ལྡན་བྲམ་ཟེ་དང་ཁྱིམ་བདག་རྣམས་ཉོན་ཅིག །བདག་གིས་སྐྱེད་མོས་ཚལ་ནས་བུ་མོ་ཞིག་རྙེད་པ་དེ་བདག་གིས་བསྣུན་བསྙོད་དེ་བསྐྱེད་ནས། དེ་བདག་གིས་རང་གི་རིགས་རྒྱུད་དང་འཚམ་པར་

འགའ་ཞིག་ལ་ཆུང་མར་བྱིན་ན་ཚོགས་ཀྱིས་ལྟོས་ཤིག །དེ་རྣམས་ཀྱིས་སྨྲས་པ། ཁྱིམ་བདག་སྔོན་ཚོགས་ཁོ་ནས་ཁྲིམས་སུ་བཅས་པ། བུད་མེད་རིན་པོ་ཆེ་ནི་མི་གཏང་སྟེ་ཚོགས་ཀྱིས་སྤྱད་དོ། །ཞེས་བཅས་པ་ཡིན་གྱིས་རེ་ཞིག་བུ་མོ་དེ་ཅི་འདྲ་བ་ཞིག་བལྟས་ཁྲིད་དེ་ཤོག་ཤིག །དེས་དེ་ཚོགས་

ཀྱི་ནང་དུ་ཁྲིད་དེ་འོངས་པ་དང་། གཟུགས་དང་ལང་ཚོ་ཕུན་སུམ་ཚོགས་པ་མཐོང་ནས་ཚོགས་ཐམས་ཅད་ངོ་མཚར་དུ་གྱུར་པའི་མིག་བགྲད་དེ་ཀུན་ཏུ་བརྟགས་པར་བརྩམས་ནས་སྨྲས་པ། ཁྱིམ་བདག་འདི་ནི་བུད་མེད་རིན་པོ་ཆེ་ཡིན་པས་ཚོགས་ཀྱིས་སྤྱད་ཀྱིས་སུ་ལ་ཡང་མི་སྦྱིན་ནོ། །དེ་ནས་ཁྱིམ་བདག་

མིང་ཆེན་ཡིད་མི་བདེ་ཞིང་རང་གི་ཁྱིམ་དུ་སོང་ནས་དེ་འགྲམ་པ་ལ་ལག་པ་གཏད་ནས་སེམས་ཁོང་དུ་ཆུད་ཅིང་འདུག་པ་ཨ་མྲ་སྐྱོང་མས་མཐོང་ནས་དྲིས་པ། ཡབ་ཅིའི་སླད་དུ་ཐུགས་མི་དགྱེས། བུ་མོ་ཁྱོད་བུད་མེད་རིན་པོ་ཆེ་ཡིན་ནོ་ཞེས་ཚོགས་ཀྱིས་སྤྱད་པར་གྱུར་ཏེ། བདག་གི་ཡིད་ལ་རེ་བ་མ་རྫོགས་

སོ། །ཡབ་ཅི་ཁྱོད་གཞན་གྱི་དབང་དུ་གྱུར་ཏམ། བུ་མོ་སྔོན་ཚོགས་ཀྱིས་ཁྲིམས་སུ་བཅས་པ་བུད་མེད་རིན་པོ་ཆེ་ནི་ཚོགས་ཀྱིས་སྤྱད་དོ་ཞེས་བཅས་ལ། ཁྱོད་ཀྱང་བུད་མེད་རིན་པོ་ཆེ་ཡིན་པས་དེའི་ཕྱིར་བདག་ལ་དབང་མེད་དོ། །དེས་སྨྲས་པ། དམ་ཞིག་བཅའ་སྟེ་གལ་ཏེ་བདག་ལ་ཚོགས་

ཀྱི་དམ་པ་ལྔ་ཞིག་སྩལ་ན། བདག་ཚོགས་ཀྱིས་སྤྱད་པར་བགྱི་སྟེ། རིས་དང་པོའི་ཁང་པ་སྩལ་བ་དང་། སྐྱེས་པ་གཅིག་ནང་དུ་ཞུགས་པ་ན་ཅིག་ཤོས་ནང་དུ་མི་འཇུག་པ་དང་། ནང་དུ་འཇུག་པ་གང་ཡིན་པ་དེ་ཡང་ཀཱར་ཥཱ་པ་ཎ་ལྔ་བརྒྱ་འཚལ་ཏེ་མཆི་བ་དང་། གང་གི་ཚེ་ཁྱིམ་ཉུལ་བ་དེའི་ཚེ་བདག་

གི་ཁྱིམ་ཞག་བདུན་ན་བྱུལ་བ་དང་། བདག་གི་ཁྱིམ་དུ་མཆི་བ་རྣམས་ཀྱི་ཕྱིར་འབྱུང་བ་དང་། ནང་དུ་འཇུག་པ་ལ་མི་བརྟག་པའོ། །མིང་ཆེན་གྱིས་ཨ་མྲ་སྐྱོང་མའི་སྤྲིང་བ་བཟླས་པ་དང་། ཚོགས་ཀྱིས་སྨྲས་པ། དེ་བཞིན་དུ་བྱས་ཏེ། རིས་དང་པོའི་ཁང་པ་ཞེས་གང་སྨྲས་པ་ལ་རིས་དང་པོའི་ཁང་

เล่ม ๓ · หน้า 57a

པ་ནི་བུད་མེད་རིན་པོ་ཆེ་འདི་ཁོ་ན་ལ་འོས་སོ། །གཅིག་ནང་དུ་ཞུགས་པ་ན་ཅིག་ཤོས་ནང་དུ་མི་འཇུག་པར་བྱའོ་ཞེས་གང་སྨྲ་བ་དེ་ཡང་བདེན་ཏེ་ཤ་ཁོ་ན་རྣམས་ལས་ནི་འདི་ལྟ་སྟེ། བུད་མེད་ཀྱི་ཤ་ཁོ་ན་ཐ་ཆད་ཡིན་པས་གལ་ཏེ་གཅིག་ནང་དུ་ཞུགས་པ་ན་ཅིག་ཤོས་ཀྱང་ནང་དུ་ཞུགས་ན་

གདོན་མ་ཟོས་པར་གཅིག་ལ་གཅིག་གསོད་པར་འགྱུར་རོ། །ནང་དུ་འཇུག་པ་དེས་ཀཱར་ཥཱ་པ་ཎ་ལྔ་བརྒྱ་ཐོགས་ཏེ་ནང་དུ་འཇུག་པར་བྱའོ་ཞེས་གང་སྨྲས་པ་དེ་ཡང་བདེན་ཏེ། གདོན་མི་ཟ་བར་དེའི་གོས་དང་རྒྱན་དུ་དགོས་སོ། །ཞག་བདུན་ལོན་པ་ན་ཁང་པ་བྱུལ་བར་བྱའོ་ཞེས་གང་སྨྲས་པ་དེ་ཡང་

བདེན་ཏེ། སྔར་རམ་ཕྱིས་བྱས་ཀྱང་རུང་དེ་ལ་འགལ་བ་ཅི་ཞིག་ཡོད། སྐྱེས་པ་རྣམས་ཀྱི་ཕྱིར་འབྱུང་བ་དང་ནང་དུ་འཇུག་པ་ལ་མི་བརྟག་གོ་ཞེས་གང་སྨྲས་པ་དེ་ཡང་བདེན་ཏེ། འདི་སྨད་འཚོང་མ་ཡིན་པས་གལ་ཏེ་མི་རྣམས་ཀྱི་ཕྱིར་འབྱུང་བ་དང་ནང་དུ་འཇུག་པ་བརྟགས་ན་སུ་ཞིག་དེའི་ཁྱིམ་དུ་

འཇུག །དེ་ནས་ཚོགས་ཀྱིས་དེ་ལ་མཆོག་ལྔ་བྱིན་ནས་ཚོགས་ཀྱིས་སྤྱད་པར་གྱུར་ཏོ། །ཡངས་པ་ཅན་གྱི་ལིཙྪ་བཱི་རྣམས་ཀྱིས་དགའ་མགུར་སྤྱད་པའི་ཕྱིར་དེའི་ཁྱིམ་དུ་འཇུག་པར་བརྩམས་པ་ལས། དེ་ན་ཁ་ཅིག་ནི་ཡུལ་ལ་ཆགས་ཆེས་པའི་ཕྱིར་མཐོང་མ་ཐག་ཁོ་ནར་འདོད་ཆགས་དང་བྲལ་

བར་གྱུར་ཏོ། །ཁ་ཅིག་གིས་ནི་རེག་པ་ཁོ་ནས་ཏེ། དེ་ལ་འགས་ཀྱང་སྐྱེས་པའི་བྱ་བ་མ་བྱས་སོ། །དེས་བསམས་པ། འདི་དག་ནི་སྐྱེས་པ་མ་ཡིན་གྱིས་ཐབས་ཤིག་བཤམས་པར་བྱའོ་སྙམ་ནས། དེས་ཡུལ་སྣ་ཚོགས་ན་གནས་པའི་རི་མོ་མཁན་རྣམས་བཀུག་ནས་སྨྲས་པ། ཤེས་ལྡན་དག་

གང་ན་རྒྱལ་པོའམ་བློན་པོའམ་ཕྱུག་པོའམ། ཚོང་དཔོན་ནམ། ཚོང་པའམ། དེད་དཔོན་ཅི་འདྲ་བ་ཞིག་མཐོང་བ་དེ་འདྲ་བ་དག་རྩིག་པ་ལ་བྲིས་ཤིག །དེ་རྣམས་ཀྱིས་ཇི་ལྟར་མཐོང་བ་བཞིན་བྲིས་པ་དང་། དེ་ནས་ཨ་མྲ་སྐྱོང་མ་རྒྱན་སྣ་ཚོགས་ཀྱིས་བརྒྱན་ནས་རི་མོའི་ལས་རྣམས་ལ་སོ་སོར་བརྟགས་

ཏེ་དྲིས་པ། ཤེས་ལྡན་དག་འདི་གང་ཞིག་འདི་ནི་རྒྱལ་པོ་རབ་སྣང་ངོ་། །གཞན་འདི་གང་ཞིག །ཀོ་ས་ལའི་རྒྱལ་པོ་གསལ་རྒྱལ་ལོ། །གཞན་འདི་གང་ཞིག་བད་ས་ལའི་རྒྱལ་པོ་འཆར་བྱེད་དོ། །གཞན་འདི་གང་ཞིག །མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོའོ། །དེས་དེ་

เล่ม ๓ · หน้า 57b

བཞིན་དུ་དྲིས་པ་དང་དེ་རྣམས་ཀྱིས་ཀྱང་ཐམས་ཅད་སྨྲས་སོ། །དེ་ནས་དེས་ཐམས་ཅད་ལ་བརྟགས་པ་དང་གཟུགས་ཅན་སྙིང་པོ་ལ་མིག་ཆགས་ནས་དེས་བསམས་པ། སྐྱེས་བུ་འདི་ལྟར་ཆུ་ཞེང་གབ་པས་ནི་བདག་དང་ལྷན་ཅིག་དགའ་མགུར་སྤྱད་པར་ནུས་སོ་སྙམ་མོ། །ཇི་ཙམ་དུས་གཞན་ཞིག་

ན་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟེང་གི་ཁང་བཟངས་ཀྱི་གཞིར་སོང་ནས་བློན་པོའི་ཚོགས་ཀྱིས་ཡོངས་སུ་བསྐོར་ཏེ་འདུག་ནས་ཚུལ་མ་ཡིན་པའི་གཏམ་སྨྲས་པ། ཤེས་ལྡན་དག་སུས་སྨད་འཚོང་མ་ཇི་ལྟ་བུ་མཐོང་། ས་སྐྱོང་གིས་སྨྲས་པ། ལྷ་རེ་ཞིག་གཞན་ལྟ་ཞོག །ཡངས་པ་

ཅན་ན་སྨད་འཚོང་མ་ཨ་མྲ་སྐྱོང་མ་ཞེས་བགྱི་བ་ཤིན་ཏུ་གཟུགས་དང་ལང་ཚོ་ཕུན་སུམ་ཚོགས་པ་སྒྱུ་རྩལ་དྲུག་བཅུ་རྩ་བཞི་འཚལ་བ་ལྷ་ཁོ་ནས་སྤྱད་དུ་རུང་བ་ཞིག་མཆིས་སོ། །དེས་སྨྲས་པ། ས་སྐྱོང་གལ་ཏེ་དེ་ལྟ་ན་ཡངས་པ་ཅན་དུ་འདོང་། དེ་དང་ལྷན་ཅིག་དགའ་མགུར་སྤྱད་དོ། །དེས་སྨྲས་

པ། ཡངས་པ་ཅན་གྱི་ལིཙྪ་བཱི་རྣམས་ནི་ཡུན་རིང་པོ་ནས་གནོད་པ་བགྱིད་པ་སླར་རྒོལ་བ་དགྲ་བོ་ལགས་པས་ཁྱོད་ལ་གནོད་པ་བགྱིད་དུ་མཆིའོ། །རྒྱལ་པོས་སྨྲས་པ། ཤེས་ལྡན་དག་མི་རྣམས་ནི་སྐྱེས་བུའི་དཔའ་སྙིང་ཅན་ཡིན་པས་འདོང་ངོ་། །དེས་སྨྲས་པ། ལྷ་གལ་ཏེ་དོན་མ་མཆིས་

པ་ལ་གཙིགས་ཆེ་བར་མཛད་ན་གཤེགས་མོད། དེ་ཤིང་རྟར་ཞུགས་ནས་ས་སྐྱོང་དང་ལྷན་ཅིག་ཡངས་པ་ཅན་དུ་ཆས་ཏེ། རིམ་གྱིས་ཡངས་པ་ཅན་དུ་ཕྱིན་ནས་ས་སྐྱོང་ནི་སྐྱེད་མོས་ཚལ་ན་སྡོད་དོ། །རྒྱལ་པོ་ནི་ཨ་མྲ་སྐྱོང་མའི་ཁྱིམ་དུ་ཞུགས་པ་དང་། ཇི་ཙམ་ན་དྲིལ་གྱི་སྒྲ་བྱུང་ངོ་། །ཡངས་

པ་ཅན་གྱི་ལིཙྪ་བཱི་རྣམས་རོད་རོད་པོར་གྱུར་ནས་ཤེས་ལྡན་དག་བདག་ཅག་གི་མི་མཛའ་བ་ཞིག་ནང་དུ་ཞུགས་པས་དྲིལ་འཁྲོལ་ལོ་ཞེས་སྒྲ་གསལ་བ་དང་། སྒྲ་ཆེན་པོ་བྱུང་བ་དང་། རྒྱལ་པོ་གཟུགས་ཅན་སྙིང་པོས་ཨ་མྲ་སྐྱོང་མ་ལ་དྲིས་པ། བཟང་མོ་འདི་ཅི་ཞིག་ཡིན། ལྷ་སྡུམ་པ་ཉུལ་བར་བགྱིད་དོ། །

ཅི་ཞིག་གི་ཕྱིར། ལྷའི་སླད་དུའོ། །ཇི་ལྟར་བྱ། ཅི་འབྲོས་སམ། ལྷ་མི་དགྱེས་པ་མ་མཛད་ཅིག །ལྷ་དགུང་བདུན་ལོན་པ་དང་བདག་གི་སྡུམ་པ་ཉུལ་བར་བགྱིད་པས་རེ་ཞིག་དགུང་བདུན་དུ་རོལ་པས་དགྱེས་པར་མཛོད། དགྱེས་དགུར་མཛོད་ལ་དགུང་བདུན་ལགས་དང་དུས་མཁྱེན་པར་བགྱིའོ། །

เล่ม ๓ · หน้า 58a

དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཇི་ཙམ་ན་ཨ་མྲ་སྐྱོང་མ་སེམས་ཅན་དང་ལྡན་པར་གྱུར་ནས་དེས་རྒྱལ་པོ་གཟུགས་ཅན་སྙིང་པོ་ལ་སྨྲས་པ། ལྷ་བདག་ལ་སེམས་ཅན་ཞུགས་ལགས་སོ། །དེས་དེ་ལ་སེང་རས་ཤིག་དང་སོར་གདུབ་

རྒྱ་བྱིན་ནས་སྨྲས་པ། གལ་ཏེ་བུ་མོ་ཞིག་ཡིན་ན་ཁྱོད་ཉིད་ཀྱི་ཡིན་ནོ། །འོན་ཏེ་ཁྱེའུ་ཡིན་ན་སེང་རས་འདི་སྐོན་ལ་སོར་གདུབ་ཀྱི་རྒྱ་མགུལ་ཏུ་ཐོགས་ཏེ་ངའི་དྲུང་དུ་བཀྲི་ཤིག །དེ་བྱུང་སྟེ་ཤིང་རྟར་ཞུགས་ཏེ་ས་སྐྱོང་དང་ལྷན་ཅིག་ཆས་པ་དང་དྲིལ་བུ་འཁྲོལ་བར་འདུག་གོ། །དེ་རྣམས་ཀྱིས་སྨྲས་པ།

ཤེས་ལྡན་དག་དགྲ་བོ་བྱུང་གིས་རྗེས་བཞིན་དུ་བཙལ་ལོ་ཞེས་ལིཙྪ་བཱི་སྐྱིན་གོར་གྱི་མདའ་རྩིབས་ཅན་ལྔ་བརྒྱས་རྒྱལ་པོ་གཟུགས་ཅན་སྙིང་པོའི་ཕྱི་བཞིན་བསྙགས་པ་དང་ས་སྐྱོང་གིས་མཐོང་ནས་དེས་སྨྲས་པ། ལྷ་ཡངས་པ་ཅན་གྱི་ལིཙྪ་བཱི་རྣམས་མཆི་ན། ལྷ་ཅི་འདི་དག་དང་ལྷན་ཅིག་འཐབ་མོ་བགྱིའམ།

འོན་ཏེ་ཤིང་རྟ་བདའ། དེས་སྨྲས་པ། ང་ནི་དུབ་པས་ཤིང་རྟ་དེད་ཀྱིས་ཁྱོད་ཁོ་ནས་འདི་དག་དང་ལྷན་ཅིག་འཐབ་མོ་ཁྱེས་ཤིག །དེས་དེ་རྣམས་དང་ལྷན་ཅིག་འཐབ་མོ་འགྱེད་པར་བརྩམས་པ་ལས་ཡངས་པ་ཅན་རྣམས་ཀྱིས་ངོ་ཤེས་ནས་དེ་རྣམས་ཀྱིས་སྨྲས་པ། ཤེས་ལྡན་དག་མིའི་སྲིན་པོ་དེ་ཉིད་འདི་

ཡིན་གྱིས་སླར་ལྡོག་གོ། །དེ་རྣམས་སླར་ལོག་ནས་ཡངས་པ་ཅན་དུ་འོངས་ཏེ་འདུས་ནས་ཡང་ཁྲིམས་སུ་བཅས་པ། ཤེས་ལྡན་དག་བདག་ཅག་གི་དགྲ་འདི་ལ་ཡང་གཟུགས་ཅན་སྙིང་པོའི་བུ་རྣམས་ཤ་གློན་དུ་གཞུག་གོ་ཞེས་བཅས་སོ། །ཇི་ཙམ་ན་ཟླ་བ་དགུ་འདས་པ་དང་ཨ་མྲ་སྐྱོང་མ་ལ་ཁྱེའུ་

གཟུགས་བཟང་ལ་མཛེས་པ་བལྟ་ན་སྡུག་པ་ཞིག་བཙས་སོ། །བཙས་ནས་ཞེས་བྱ་བ་ནས་བསྲིངས་བསྐྱེད་དེ་ཆེན་པོར་གྱུར་ཏོ་ཞེས་བྱ་བའི་བར་དུའོ། །དེ་ཡངས་པ་ཅན་པའི་ལིཙྪ་བཱིའི་ཁྱེའུ་རྣམས་དང་ལྷན་ཅིག་རྩེ་བར་བྱེད་པ་ལས། དེ་རྣམས་ཀྱིས་མི་དགའ་བའི་ཚིག་གིས་སྨྲས་པ། བྲན་མོའི་

བུ་ཁྱོད་བརྒྱ་སྟོང་ཕྲག་དུ་མ་ཞིག་ལས་ནི་སྐྱེས་ན་ཕ་སུ་ཡིན། དེ་ངུས་ནས་མའི་དྲུང་དུ་སོང་བ་དང་དེས་སྨྲས་པ། བུ་ཅིའི་ཕྱིར་དུ་ངུ་། དེས་ཐམས་ཅད་རྒྱས་པར་སྨྲས་པ་དང་། དེས་སྨྲས་པ། བུ་གལ་ཏེ་ཡང་འདྲི་བ་དང་ངའི་ཕ་ལྟ་བུ་ནི་ཁྱེད་ཅག་གཅིག་ལ་ཡང་མེད་དོ་ཞེས་སྨྲོས་ཤིག །གལ་ཏེ་

เล่ม ๓ · หน้า 58b

སུ་ཡིན་ཞེས་སྨྲ་དང་། རྒྱལ་པོ་གཟུགས་ཅན་སྙིང་པོ་ཡིན་ནོ་ཞེས་སྨྲོས་ཤིག །ཇི་ཙམ་ན་དེ་དེ་རྣམས་དང་ལྷན་ཅིག་ཡང་རྩེ་བར་བྱེད་པ་ལས་དེ་རྣམས་ཀྱིས་དེ་ལ་དེ་བཞིན་དུ་སྨྲས་པ་དང་། དེས་སྨྲས་པ། ངའི་ཕ་ལྟ་བུ་ནི་ཁྱེད་ཅག་གཅིག་ལ་ཡང་མེད་དོ། །སུ་ཡིན། རྒྱལ་པོ་གཟུགས་ཅན་སྙིང་

པོ་ཡིན་ནོ། །དེ་རྣམས་ཀྱིས་ཤེས་ལྡན་དག་བདག་ཅག་གི་དགྲ་གང་ཡིན་པ་དེ་ནི་འདིའི་ཕ་ཡིན་ནོ་ཞེས་ལྷག་པར་ཡང་བརྡེགས་སོ། །དེས་ངུས་ནས་ཇི་ལྟར་གྱུར་པ་རྣམས་མ་ལ་སྨྲས་པ་དང་། དེས་བསམས་པ། ཡངས་པ་ཅན་གྱི་ལིཙྪ་བཱི་རྣམས་ནི་གདུག་པ་རྩལ་པོ་ཆེ་ཡིན་ཏེ། གལ་ཏེ་

འདི་བསད་པར་འགྱུར་བའི་གནས་དེ་ཡོད་དོ་སྙམ་མོ། །དེ་དེ་ལྟ་བུ་སེམས་ཤིང་འདུག་པ་དང་ཚོང་པ་རབ་ཏུ་མང་པོ་ཟོང་ཐོགས་ནས་རྒྱལ་པོའི་ཁབ་ཏུ་འདོང་བ་དེ་དག་དེས་མཐོང་ནས་སྨྲས་པ། སོར་གདུབ་ཀྱི་རྒྱ་འདིས་སྣོད་རྒྱས་ཐོབ་ལ་དེང་ཤིག་དང་ཤོ་གམ་མི་གཅོད་པར་འགྱུར་རོ། །ཁྱེའུ་འདི་ཡང་

རྒྱལ་པོའི་ཕོ་བྲང་དུ་ཁྲིད་ལ་སོར་གདུབ་ཀྱི་རྒྱ་འདི་འདིའི་མགུལ་དུ་ཐོགས་ཏེ་རྒྱལ་པོའི་ཁབ་ཀྱི་སྒོར་ཞོག་ཅིག །དེ་རྣམས་ཀྱིས་ཀྱང་དེ་བཞིན་དུ་བྱའོ་ཞེས་ཁས་བླངས་སོ། །བུ་ལ་ཡང་མུ་ཏིག་གི་དོ་ཤལ་ཅིག་བྱིན་ནས་སྨྲས་པ། བུ་རྒྱལ་པོ་དགོས་པའི་ཆེད་དུ་འདུས་དང་མུ་ཏིག་གི་དོ་ཤལ་རྐང་

པའི་སྟེང་དུ་ཞོག་ལ་འཛེགས་ཏེ་པང་དུ་འདུག་ཤིག །གལ་ཏེ་འགའ་ཞིག་ཁྱེའུ་འདི་འཇིགས་མི་ཤེས་པ་ཞིག་གོ་ཞེས་སྨྲ་དང་དེ་ལ་ཡང་བུ་ཕས་འཇིགས་པ་འགའ་ཡོད་དམ་ཞེས་སྨྲོས་ཤིག །དེ་ཚོང་པ་རྣམས་དང་ལྷན་ཅིག་ཏུ་རིམ་གྱིས་རྒྱལ་པོའི་ཁབ་ཏུ་ཕྱིན་ནས། དེ་རྣམས་ཀྱིས་ཁྲུས་

བྱས་ཏེ་སོར་གདུབ་ཀྱི་རྒྱ་བཏགས་ནས་རྒྱལ་པོའི་ཕོ་བྲང་གི་སྒོར་བཞག་པ་དང་། དེ་རྒྱལ་པོ་གང་ན་བ་དེར་སོང་སྟེ་ཕྱིན་ནས་མུ་ཏིག་གི་དོ་ཤལ་རྐང་པ་ལ་བཞག་ནས་འཛེགས་ཏེ་པང་དུ་འདུག་གོ། །རྒྱལ་པོས་སྨྲས་པ། ཤེས་ལྡན་དག་ཁྱེའུ་འདི་ནི་འཇིགས་མི་ཤེས་པ་ཞིག་གོ། །དེས་

སྨྲས་པ། ཡབ་བུ་ཕས་འཇིགས་པ་འགའ་མཆིས་ལགས་སམ། དེ་ནས་རྒྱལ་པོས་འཇིགས་པ་མེད་པའི་སྒྲ་ཀུན་ཏུ་སྨྲས་པས་རྒྱལ་བུ་གཞོན་ནུ་འཇིགས་མེད་རྒྱལ་བུ་གཞོན་ནུ་འཇིགས་མེད་ཅེས་བྱ་བར་གྲགས་སོ།། །།འདུལ་བ་གཞི། བམ་པོ་དྲུག་

เล่ม ๓ · หน้า 59a

བཅུ་གཅིག་པ། རྒྱལ་པོ་གཟུགས་ཅན་སྙིང་པོ་གཞན་གྱི་བུད་མེད་ལ་ལྷག་པར་ཆགས་པས་གླང་པོ་ཆེ་ལ་ཞོན་ནས་གྲོང་ཁྱེར་གྱི་སྲང་རྣམས་སུ་སོང་ནས་མིག་ཕན་ཚུན་དུ་ལྟ་ཞིང་འཁྱམ་པར་བྱེད་དོ། །དེའི་ཚེ་རྒྱལ་པོའི་ཁབ་ན་ཚོང་དཔོན་ཕྱུག་པ་ནོར་མང་བ་ལོངས་སྤྱོད་ཆེ་བ་

ཞིག་ཡོད་པ་དེས་རིགས་མཉམ་པ་ལས་ཆུང་མ་བླངས་ནས་ཞེས་བྱ་བ་ནས་དགའ་མགུར་སྤྱོད་པར་བྱེད་དོ་ཞེས་བྱ་བའི་བར་གོང་མ་བཞིན་དུའོ། །དེ་དུས་གཞན་ཞིག་ན་ཆུང་མ་ལ་སྨྲས་པ། བཟང་མོ་ཟོང་ཐོགས་ནས་ཡུལ་གཞན་དུ་འགྲོའོ། །དེས་སྨྲས་པ། རྗེའི་སྲས་དེ་བཞིན་དུ་མཛོད་ཅིག །

དེ་ཟོང་ཐོགས་ཏེ་ཡུལ་གྱི་མཐར་སོང་ངོ་། །དེ་ཡང་ཁ་ཟས་ཞིམ་པོ་དང་གོས་ཀྱིས་ཉོན་མོངས་པས་གདུངས་པར་གྱུར་པ་ལས། རྒྱལ་པོ་གཟུགས་ཅན་སྙིང་པོ་གླང་པོ་ཆེ་ལ་ཞོན་ནས་དེའི་ཁྱིམ་དྲུང་ནས་སོང་བ་དང་། དེས་ཀྱང་སྐར་ཁུང་དུ་འདུག་ནས་རྒྱལ་པོ་ལ་མེ་ཏོག་གི་ཕྲེང་བ་བོར་རོ། །དེ་ནས་རྒྱལ་

པོས་མཐོང་ནས་སྨྲས་པ། མར་ཤོག །དེས་སྨྲས་པ། ལྷ་གཡར་ཚ་ལགས་ཀྱིས་ཁྱོད་ཉིད་ནང་དུ་གཤེགས་ཤིག །དེ་ནས་རྒྱལ་པོ་ནང་དུ་ཞུགས་ནས་དེ་དེ་དང་ལྷན་ཅིག་དགའ་མགུར་སྤྱོད་པར་བྱེད་པ་ལས། དེ་ཡང་དེའི་ཚེ་རུང་ཞིང་ཟླ་མཚན་དང་ལྡན་པས་སེམས་ཅན་ཆགས་པར་གྱུར་ནས་དེས་

རྒྱལ་པོ་ལ་སྨྲས་པ། ལྷ་བདག་ནི་སེམས་ཅན་དང་ལྡན་པར་གྱུར་ཏོ། །དེ་ནས་རྒྱལ་པོས་དེ་ལ་ཡང་སོར་གདུབ་ཀྱི་རྒྱ་དང་སེང་རས་ཁྲ་བོ་བྱིན་ནས་སྨྲས་པ། གལ་ཏེ་རེ་ཞིག་ཁྱེའུར་གྱུར་ན་སེང་རས་འདི་སྐོན་ལ་སོར་གདུབ་ཀྱི་རྒྱ་ཡང་མགུལ་དུ་ཐོགས་ཏེ་ངའི་དྲུང་དུ་བཀྲི་ཤིག །འོན་ཏེ་བུ་མོ་ཡིན་

ན་ནི་ཁྱོད་ཉིད་ཀྱི་ཡིན་ནོ་ཞེས་སྨྲས་ནས་རྒྱལ་པོ་སོང་ངོ་། །ཇི་ཙམ་ན་དེད་དཔོན་དེ་དོན་རྣམས་གྲུབ་སྟེ་རྒྱལ་པོའི་ཁབ་དང་ཉེ་བ་ཞིག་ཏུ་ཕྱིན་ནས། དེས་ཆུང་མ་ལ་བཟང་མོ་དགའ་བ་སྐྱེད་ཅིག །ཁོ་བོ་དོན་གྲུབ་ནས་བདེ་བར་འོངས་ཏེ། ཞག་འདི་ཙམ་ཁོ་ན་ན་ཕྱིན་པར་འོང་ངོ་། །སྤྲིང་བ་དེས་ཐོས་

ནས་བདག་གིས་ནི་བྱ་བ་མ་ཡིན་པ་འདི་ལྟ་བུ་བྱས་ལ། དེ་ཡང་འོང་ན་དེ་ལ་ཇི་ལྟར་བསྒྲུབ་པར་བྱ་སྙམ་དུ་ཕོངས་པར་གྱུར་ནས། དེས་དེ་ལྟར་གྱུར་པ་རྣམས་རྒྱལ་པོ་ལ་རིག་པར་བྱས་པ་དང་། དེ་ནས་རྒྱལ་པོས་སླར་སྤྲིང་བ། བག་མ་ཚ་བར་འདུག་ཤིག་ཅི་ནས་ཀྱང་མྱུར་དུ་མི་འོང་བ་དེ་ལྟར་

เล่ม ๓ · หน้า 59b

ངས་བྱའོ། །རྒྱལ་པོས་དེ་ལ་ཕོ་ཉ་བཏང་བ། དེད་དཔོན་ང་ལ་རིན་པོ་ཆེ་ཆེ་གེ་མོ་དང་ཆེ་གེ་མོ་དག་ཅིག་དགོས་ཀྱིས་དེ་མེད་པར་ཁྱོད་འདིར་མ་འོངས་ཤིག །དེ་རིན་པོ་ཆེ་དེ་རྣམས་ཀྱི་ཕྱིར་ལམ་རིང་པོར་སོང་ངོ་། །དེ་ཡང་ཟླ་བ་དགུ་འདས་ནས་བཙས་པ་དང་ཁྱེའུ་གཟུགས་བཟང་བ་མཛེས་པ། བལྟ་

ན་སྡུག་པ་ཞིག་བཙས་སོ། །མ་བསླབས་ཀྱང་བུད་མེད་ལ་ཤེས་ཉེན་ཡོད་པས་དེས་མར་དང་སྦྲང་རྩིས་དེ་འགྲངས་པར་བསྙོད་ནས་སོར་གདུབ་ཀྱི་རྒྱ་མགུལ་དུ་བཏགས་ཏེ་སེང་རས་ཀྱིས་བཀྲིས་ནས་སྒྲོམ་བུའི་ནང་དུ་བཅུག་སྟེ་བུ་མོ་མངག་གཞུག་མ་ལ་བསྒོ་བ། སོང་ལ་སྒྲོམ་བུ་འདི་ཁྱེར་ཏེ་

རྒྱལ་པོའི་ཕོ་བྲང་གི་སྒོར་ཁྱོད་ཀྱི་དཀྱིལ་འཁོར་བྱོས་ལ་མེ་མར་བུས་ཏེ་ཕྱོགས་གཅིག་ཏུ་ཇི་སྲིད་འགའ་ཞིག་གིས་བླངས་ཀྱི་བར་དུ་སྡོད་ཅིག །དེས་དེ་བཞིན་བྱས་པ་དང་ཇི་ཙམ་ན་རྒྱལ་པོ་སྟེང་གི་ཁང་བཟངས་ཀྱི་གཞིར་སོང་ནས་རྒྱལ་པོ་གཞོན་ནུ་འཇིགས་མེད་དང་ལྷན་ཅིག་འདུག་པ་ལས།

དེས་རྒྱལ་པོའི་ཕོ་བྲང་གི་སྒོ་ན་མར་མེ་མཐོང་ངོ་། །དེ་ནས་ཞོ་ཤས་འཚོ་བ་རྣམས་ལ་བསྒོ་བ། ཤེས་ལྡན་དག་རྒྱལ་པོའི་ཕོ་བྲང་གི་སྒོ་ན་མར་མེ་འབར་བའོ་ནི་ཅི་ཡིན་ལྟོས་ཤིག །དེ་དག་གིས་བལྟས་ནས་སྨྲས་པ། ལྷ་སྒྲོམ་བུ་ཞིག་མཆིས་སོ། །དེས་སྨྲས་པ། ལོང་ཤིག །རྒྱལ་བུ་

གཞོན་ནུ་འཇིགས་མེད་ཀྱིས་སྨྲས་པ། ལྷ་སྒྲོམ་བུ་དེ་ན་ཅི་མཆིས་པ་དེ་བདག་ལ་སྩལ་བར་ཅི་གནང་། རྒྱལ་པོས་དེ་བཞིན་བྱའོ་ཞེས་ཁས་བླངས་སོ། །ཇི་ཙམ་ན་སྒྲོམ་བུ་བླངས་ནས་རྒྱལ་པོ་ལ་ཕུལ་བ་དང་། རྒྱལ་པོས་སྨྲས་པ། ཁ་ཕྱེ་ཤིག །ཁ་ཕྱེ་བ་ལས་ཁྱེའུ་ཞིག་བྱུང་ངོ་། །རྒྱལ་

པོས་སྨྲས་པ། འདི་ཅི་གསོན་ནམ། འོན་ཏེ་ཤི་བ་ཞིག །དེ་རྣམས་ཀྱིས་སྨྲས་པ། ལྷ་གསོན་ལགས་སོ། །དེ་ནས་རྒྱལ་པོས་སོར་གདུབ་ཀྱི་རྒྱ་དང་སེང་རས་ངོ་ཤེས་ནས་རྒྱལ་བུ་གཞོན་ནུ་འཇིགས་མེད་ལ་བྱིན་པ་དང་། དེས་དེ་བསྣུན་བསྙོད་བསྐྱེད་དེ་རྒྱལ་པོས་གསོན་ནམ་ཞེས་ཚིག་

ཏུ་བྱུང་བ་དང་། རྒྱལ་བུ་གཞོན་ནུ་འཇིགས་མེད་ཀྱིས་གསོས་པས། འཚོ་བྱེད་གཞོན་ནུས་གསོལ་ཞེས་བྱ་བར་གྲགས་སོ། །ཇི་ཙམ་དུས་གཞན་ཞིག་ན་འཚོ་བྱེད་གཞོན་ནུས་གསོས་ཆེན་པོར་གྱུར་ཏོ། །དེ་འཇིགས་མེད་དང་ལྷན་ཅིག་བྲེ་མོ་གཏམ་ཟེར་ཞིང་འཁོད་པ། འཇིགས་མེད་

เล่ม ๓ · หน้า 60a

གཞོན་ནུ་མ་སྐྱེས་དགྲ་ནི་མ་བཙས་པ་ཁོ་ན་ནས་རྒྱལ་པོ་ཉིད་དུ་ལུང་བསྟན་གྱིས་བདག་ཅག་གིས་བཟོ་ཅུང་ཟད་བསླབས་ཏེ། དེས་ན་བདག་ཅག་གི་ཕྱི་དུས་ཀྱིས་འཚོ་བར་འགྱུར་རོ། །དེ་གཉིས་ཀྱིས་དེ་ལྟར་གྲོས་བྱས་པ་ལས། ཤིང་རྟ་མཁན་གོས་དཀར་པོ་གོན་པ་མི་གོས་དཀར་པོ་

གོན་པ་རྣམས་ཀྱིས་ཡོངས་སུ་བསྐོར་ནས་རྒྱལ་པོའི་ཕོ་བྲང་དུ་ཞུགས་པ་དང་། དེ་རྒྱལ་བུ་འཇིགས་མེད་གཞོན་ནུས་མཐོང་ནས། དེས་རྒྱལ་པོའི་མི་གཞན་དག་ལ་དྲིས་པ། འདི་སུ་ཞིག་ཡིན། དེ་རྣམས་ཀྱིས་སྨྲས་པ། ཤིང་རྟ་མཁན་ལགས་སོ། །འདིས་ཅི་འཐོབ། འཚོ་བའོ། །དེས་བསམས་

པ། བདག་གིས་ཀྱང་ལྷ་ལ་བརྟགས་ནས་ཤིང་རྟ་མཁན་བསླབ་བོ་སྙམ་ནས། དེ་རྒྱལ་པོའི་དྲུང་དུ་སོང་ནས་སྨྲས་པ། ལྷ་བདག་ཀྱང་ཤིང་རྟ་མཁན་བསླབ་བོ། །རྒྱལ་པོས་སྨྲས་པ། བུ་ཁྱོད་ཅི་འདིས་འཚོ་བར་འགྱུར་རམ། ཡབ་རྒྱལ་པོའི་བུས་ནི་བཟོ་ཐམས་ཅད་ལ་བསླབ་པར་བགྱི་བ་ལགས་

སོ། བུ་གལ་ཏེ་དེ་ལྟ་ན་ཁྱོད་ཤིང་རྟ་མཁན་སློབས་ཤིག །དེས་བསླབ་པར་བརྩམས་སོ། །འཚོ་བྱེད་ཀྱིས་ཀྱང་སྨན་པ་གོས་དཀར་པོ་གོན་པ་མི་གོས་དཀར་པོ་གོན་པ་རྣམས་ཀྱིས་ཡོངས་སུ་བསྐོར་ནས་རྒྱལ་པོའི་ཕོ་བྲང་དུ་ཞུགས་པ་མཐོང་ནས། དེས་གཞན་དག་ལ་དྲིས་པ། འདི་སུ་ཞིག་

ཡིན། དེ་དག་གིས་སྨྲས་པ། སྨན་པ་ལགས་སོ། །འདི་ཅི་ཞིག་བྱེད། དཔྱད་བགྱིད་དོ། །ཅི་ཐོབ། གལ་ཏེ་ནད་པ་ཞིག་སོས་ན་རྔན་པ་ཐོབ་བོ། །འོན་ཏེ་གུམ་ན་མི་འཚོལ་མི་འདྲིའོ། །དེས་བསམས་པ། སྨན་དཔྱད་བསླབ་བོ་སྙམ་ནས། དེ་ཕའི་གན་དུ་སོང་སྟེ་སྨྲས་པ། ལྷ་གནང་བར་

མཛོད་ཅིག །སྨན་དཔྱད་བསླབ་ལགས་སོ། །བུ་ཁྱོད་རྒྱལ་པོའི་སྲས་ཡིན་ནོ། །ཁྱོད་ལ་སྨན་དཔྱད་ཀྱིས་ཅི་བྱ། ལྷ་རྒྱལ་པོའི་བུས་ནི་བཟོ་ཐམས་ཅད་ལ་བསླབ་པར་བགྱི་བ་ལགས་སོ། །བུ་གལ་ཏེ་དེ་ལྟ་ན་སློབས་ཤིག །དེས་སྨན་དཔྱད་བསླབ་པར་བརྩམས་པ་དང་། དེས་སྨན་དཔྱད་

ནི་ལོབས་ན་དེས་ཀླད་པའི་ཐོད་པ་དབྱེ་བའི་དཔྱད་མ་ཤེས་ནས། དེས་རྡོ་འཇོག་ན་སྨན་པའི་རྒྱལ་པོ་རྒྱུན་ཤེས་ཀྱི་བུ་ཞེས་བྱ་བ་ཡོད་དེ། དེས་ཀླད་པའི་ཐོད་པ་འབྱེད་པའི་དཔྱད་ཤེས་སོ་ཞེས་ཐོས་ནས། དེ་རྒྱལ་པོའི་དྲུང་དུ་སོང་སྟེ་སྨྲས་པ། ལྷ་རྡོ་འཇོག་ཏུ་མཆིའོ། །ཅི་ཞིག་གི་ཕྱིར་དེ་ན་

เล่ม ๓ · หน้า 60b

སྨན་པའི་རྒྱལ་པོ་རྒྱུན་ཤེས་ཀྱི་བུ་ཞེས་བགྱི་བ་མཆིས་ཏེ། དེ་ཀླད་པའི་ཐོད་པ་འབྱེད་པའི་དཔྱད་འཚལ་བས་དེ་སློབ་ཏུ་མཆིའོ། །བུ་ཁྱོད་འདིས་མཚོའམ། ལྷ་ཡང་ན་ནི་དཔྱད་མི་བསླབ། ཡང་ན་ནི་ལེགས་པར་བསླབ་པར་བགྱིའོ། །བུ་གལ་ཏེ་དེ་ལྟ་ན་སོང་ཤིག །དེས་རྒྱལ་པོ་པད་མའི་

སྙིང་པོ་ལ་སྤྲིང་བ། བདག་གི་བུ་འདི་སྨན་དཔྱད་སློབ་ཏུ་རྒྱུན་ཤེས་ཀྱི་བུའི་དྲུང་དུ་འོང་གིས། འདིའི་དགོས་པ་ཐམས་ཅད་ཁྱོད་ཀྱིས་སྦྱོར་ཅིག །དེ་རིམ་གྱིས་རྡོ་འཇོག་ཏུ་ཕྱིན་པ་དང་། པད་མའི་སྙིང་པོས་ཀྱང་སྤྲིང་ཡིག་བཀླགས་ཏེ་རྒྱུན་ཤེས་ཀྱི་བུ་ལ་གཏད་ནས་རྒྱལ་པོའི་བུ་འདི་ཁྱོད་ཀྱི་དྲུང་དུ་

ཆེད་དུ་འོངས་ཀྱིས་འདི་ལ་སྨན་དཔྱད་སློབས་ཤིག །རྒྱུན་ཤེས་ཀྱི་བུས་དེ་ལ་སྟོན་པར་བྱེད་པ་ན། དེས་ཉུང་ཟད་བསྟན་པ་དང་འཚོ་བྱེད་ཀྱིས་ཁྱད་པར་དང་བཅས་པ་ལོབས་སོ། །རྒྱུན་ཤེས་ཀྱི་བུའི་ཀུན་ཏུ་སྤྱོད་པ་ནི་གང་གི་ཚེ་ནད་པ་ལ་ལྟར་འགྲོ་བའི་ཚེ་བྲམ་ཟེའི་ཁྱེའུ་ཞིག་ཁྲིད་དེ་འགྲོ་བ་

ཡིན་པས་དེ་དུས་གཞན་ཞིག་ན་འཚོ་བྱེད་ཁྲིད་དེ་སོང་ནས་དེས་ནད་པའི་སྨན་བསྟན་པ་འདི་དང་འདི་དག་ནི་བྱིན་ཅིག་ཅེས་སྨྲས་ནས་བྱུང་ངོ་། །འཚོ་བྱེད་ཀྱིས་བསམས་པ། འདི་ནི་མཁན་པོས་ཉེས་ཏེ། གལ་ཏེ་འདིས་སྨན་འདི་ཟོས་ན་འདི་དེང་ཉིད་འཆི་བར་འགྱུར་ཏེ། མཁན་པོས་བསྟན་པ་

ནི་ལེགས་པ་མ་ཡིན་གྱིས་ཐབས་ཤིག་བྱའོ་སྙམ་ནས་དེ་རྒྱུན་ཤེས་ཀྱི་བུ་དང་ལྷན་ཅིག་ཏུ་བྱུང་ནས་སླར་ནང་དུ་ཞུགས་ཏེ་སྨྲས་པ། མཁན་པོ་འདི་སྐད་ཅེས་གསུང་ངོ་། །ཁོ་བོས་སྨན་བསྟན་པ་གང་ཡིན་པ་དེ་མ་སྦྱིན་པར་འདི་དང་འདི་དག་བྱིན་ཅིག་ཅེས་ཟེར་རོ། །དེས་དེ་བཞིན་དུ་བྱས་པས་སོས་

པར་གྱུར་ཏོ། །ཇི་ཙམ་ཉི་མ་གཞན་ཞིག་ལ་རྒྱུན་ཤེས་ཀྱི་བུ་ཡང་དེའི་དྲུང་དུ་སོང་ནས་དྲིས་པ། ན་བ་ཇི་ལྟ་སོས་པར་གྱུར་ཏོ། །སང་ཡང་དེ་ཉིད་བྱིན་ཅིག །ཅི་སྔ་མ་ལགས་སམ། འོན་ཏེ་སླད་ཀྱིས་བསྟན་པ་ལགས། ཅི་བདག་གིས་སྔར་བསྟན་ཏམ། འོན་ཏེ་ཕྱིས་བསྟན། དེ་

དག་གིས་སྨྲས་པ། འདི་དག་ནི་ཁྱོད་ཀྱིས་མངོན་སུམ་དུ་བསྟན་ཏོ། །འདི་ནི་འཚོ་བྱེད་ལ་ཕྲིན་དུ་སྤྲིང་བ་ཡིན་ནོ། །དེས་བསམས་པ། བདག་གིས་ཉེས་ཀྱིས་འཚོ་བྱེད་ནི་ཤེས་རབ་ཅན་ཡིན་ནོ་སྙམ་བསམས་ནས་སྨྲས་པ། འཚོ་བྱེད་ཀྱིས་བསྟན་པ་གང་ཡིན་པ་དེ་བྱིན་ཅིག །རྒྱུན་

เล่ม ๓ · หน้า 61a

ཤེས་ཀྱི་བུ་འཚོ་བྱེད་ལ་དགའ་བ་སྐྱེས་པས་དེ་གང་དུ་འགྲོ་བར་དེར་འཚོ་བྱེད་འཁྲིད་དོ། །བྲམ་ཟེའི་ཁྱེའུ་གཞན་རྣམས་ཀྱིས་སྨྲས་པ། མཁན་པོ་ཁྱོད་རྒྱལ་པོའི་བུའོ་སྙམ་ནས་འདི་ལ་ནི་སྤྲོ་བས་སྟོན་པར་མཛད་ཀྱི། བདག་ཅག་ལ་ནི་མི་མཛད་དོ། །དེས་སྨྲས་པ། འཚོ་བྱེད་

ནི་ཤེས་རབ་ཅན་ཡིན་པས་ངས་བསྟན་པ་གང་ཡིན་པ་དེ་རང་གིས་རྣམ་པར་འབྱེད་ནུས་ཀྱི་ཁྱེད་ཀྱིས་ནི་དེ་ལྟ་མ་ཡིན་ནོ། །དེ་རྣམས་ཀྱིས་སྨྲས་པ། མཁན་པོས་ཇི་ལྟར་མཁྱེན། གལ་ཏེ་དེ་ལྟ་ན་ངས་ཁྱེད་ཅག་གི་མངོན་སུམ་དུ་བྱའོ། །དེས་བྲམ་ཟེའི་ཁྱེའུ་རྣམས་ལ་ཁྱོད་ཀྱིས་ནི་རྫས་ཆེ་གེ་

མོ་ཞིག་གི་རིན་དྲིས་ཤིག །ཁྱོད་ཀྱིས་ཀྱང་ཆེ་གེ་མོ་ཞིག་གིའོ་ཞེས་ཐམས་ཅད་ཚོང་དུས་སུ་བཏང་ངོ་། །འཚོ་བྱེད་ཀྱང་ཁྱོད་ཀྱིས་ཀྱང་ཆེ་གེ་མོ་ཞིག་གིའོ་ཞེས་བསྒོའོ། །བྲམ་ཟེའི་ཁྱེའུ་རྣམས་ཀྱིས་ཇི་སྐད་བསྟན་པ་ཁོ་ན་བཞིན་བྱས་སོ། །འཚོ་བྱེད་ཀྱིས་ཀྱང་ཇི་སྐད་བསྟན་པ་བཞིན་

བྱས་ནས་བསམས་པ། གལ་ཏེ་མཁན་པོ་རྫས་གཞན་གྱི་རིན་འདྲི་བར་བྱེད་ན་བདག་གིས་ཇི་སྐད་བརྗོད་པར་བྱས། ཐམས་ཅད་དུ་རྫས་ཐམས་ཅད་ཀྱི་རིན་དྲིའོ་སྙམ་མོ། །དེ་དག་ཐམས་ཅད་མཁན་པོའི་དྲུང་དུ་སོང་ནས་ཇི་སྐད་བསྟན་པ་དེ་བཞིན་སྨྲས་སོ། །རྒྱུན་ཤེས་ཀྱི་བུས་མ་བསྟན་

པའི་རྫས་ཀྱི་རིན་དྲི་བར་བརྩམས་ཏེ། བྲམ་ཟེའི་ཁྱེའུ་རྫས་ཆེ་གེ་མོ་ཞིག་གི་རིན་ཇི་ཙམ། དེས་སྨྲས་པ། མ་འཚལ་ཏོ། །གཞན་དག་ལ་དྲིས་པ་དང་། སྨྲས་པ། མ་འཚལ་ལགས་སོ། །འཚོ་བྱེད་ལ་དྲིས་པ་དང་དེས་རྫས་ཐམས་ཅད་ཀྱི་རིན་སྨྲས་སོ། །རྒྱུན་ཤེས་ཀྱི་བུས་སྨྲས་པ།

བྲམ་ཟེའི་ཁྱེའུ་དག་ཁྱེད་ཀྱིས་ཐོས་སམ། ཐོས་ལགས་སོ། །ངས་འཚོ་བྱེད་ནི་ཤེས་རབ་ཅན་ཡིན་ཏེ། ཅུང་ཟད་བསྟན་ན་ཡང་དེ་ལ་རང་གིས་རྣམ་པར་འབྱེད་ནུས་སོ་ཞེས་སྨྲས་པ་ནི་དོན་དེ་ཡིན་ནོ། །གཞན་ཡང་མངོན་སུམ་དུ་བྱའོ་ཞེས་དེ་རྣམས་ལ་སྨྲས་པ། ཐང་ཤིང་ཅན་གྱི་རི་ལ་དེང་

ལ་སྨན་མ་ཡིན་པ་དག་ཁྱེར་ཏེ་ཤོག་ཤིག །དེ་དག་དོང་ནས་དེ་དག་ལས་གང་ཞིག་གིས་གང་སྨན་མ་ཡིན་པར་ཤེས་པ་དེ་དེ་དག་གིས་བླངས་སོ། །འཚོ་བྱེད་ཀྱིས་བསམས་པ། སྨན་མ་ཡིན་པ་ནི་ཅུང་ཟད་ཀྱང་མེད་དོ་སྙམ་ནས། དེས་འདམ་བུ་མདའ་རྒྱུའི་རྩ་བ་དང་། རྡོ་བའི་དུམ་བུ་ཞིག་

เล่ม ๓ · หน้า 61b

བླངས་སོ། །ཇི་ཙམ་ན་འཚོ་བྱེད་ཀྱིས་ལམ་གྱི་ཕྱེད་ན་ཕྱུགས་རྫི་མོ་ཞིག་ཞོའི་བུམ་པ་དང་ཕྲུམ་ཚུད་ཁྱེར་ནས་རྒྱུན་ཤེས་ཀྱི་བུའི་དྲུང་དུ་སོང་བ་ལས་དེ་ཤིན་ཏུ་མིག་ན་བ་དེས་མཐོང་ནས་དེས་དྲིས་པ་གང་དུ་འགྲོ། དེས་སྨྲས་པ། དེས་དེ་ལ་གནས་དེ་ཉིད་ཀྱི་དྲུང་ན་ཡོད་པའི་སྨན་ཞིག་བསྟན་པ་ལས་

དེས་བྱས་པ་དང་མོད་ལ་སོས་པར་གྱུར་ཏོ། །དེ་དགའ་བ་སྐྱེས་ནས་སྨྲས་པ། ཞོའི་བུམ་པ་དང་ཕྲུམ་ཚུད་འདི་ཁྱོད་སྣོམས་ཤིག །དེས་ཕྲུམ་ཚུད་བླངས་ཏེ། ཞོའི་བུམ་པ་ནི་དེ་ཉིད་ལ་བྱིན་ནས་དེ་ཕྲུམ་ཚུད་ཁྱེར་ཏེ་སོང་བ་ལས། ཇི་ཙམ་ན་བྲམ་ཟེའི་ཁྱེའུ་རྣམས་ཀྱིས་ལམ་གྱི་དབུས་ན་གླང་པོ་

ཆེའི་རྗེས་ཞིག་མཐོང་ནས། དེ་རྣམས་ཀྱིས་དེ་ལ་བརྟག་པར་བརྩམས་པ་དང་འཚོ་བྱེད་ཀྱང་འོངས་ནས་དེས་སྨྲས་པ། འདི་ཅི་ཡིན། གླང་པོ་ཆེའི་རྗེས་སོ། །འདི་ནི་གླང་པོ་ཆེའི་རྗེས་མ་ཡིན་གྱི། འདི་ནི་བལ་གླང་མོའི་རྗེས་ཡིན་ཏེ། དེ་ཡང་མིག་གཡས་པ་ཞར་བ་དེ་རིང་ཁོ་ནར་གླང་པོ་ཆེའི་ཕྲུག་

གུ་འབྱུང་བར་འགྱུར་བ་ཞིག་ཡིན་ལ། དེ་ལ་ཞོན་པ་ནི་བུད་མེད་ཡིན་ལ། དེ་ཡང་མིག་གཡས་པ་ཞར་བ་སྦྲུམ་པ་དེ་རིང་ཉིད་དུ་བུ་ཕོ་བཙའ་བར་འགྱུར་བ་ཞིག་ཡིན་ནོ། །ཇི་ཙམ་ན་རྒྱུན་ཤེས་ཀྱི་བུའི་དྲུང་དུ་འོངས་ནས་གང་གིས་གང་ཁྱེར་ཏེ་འོངས་པ་དེས་དེ་བསྟན་ཏོ། །རྒྱུན་ཤེས་ཀྱི་བུས་སྨྲས་པ།

བྲམ་ཟེའི་ཁྱེའུ་དག་འདི་ཐམས་ཅད་ནི་སྨན་ཡིན་ཏེ། རེ་ཞིག་འདི་ནི་ཆེ་གེ་མོ་ཞིག་གིས་ནད་ཆེ་གེ་མོ་ཞིག་ཡིན་ལ་དེ་བཞིན་དུ་གཞན་ཡང་གཞན་དག་ཀྱང་ཡིན་ནོ། །འཚོ་བྱེད་ལ་དྲིས་པ་ཁྱོད་ཀྱིས་ཅི་ཁྱེར་ཏེ་འོངས། དེས་སྨྲས་པ། མཁན་པོ་ཐམས་ཅད་སྨན་ལགས་ཏེ། སྨན་མ་

ལགས་པ་ནི་ཅི་ཡང་མ་མཆིས་སོ། །འོན་ཀྱང་བདག་གིས་འདམ་བུ་མདའ་རྒྱུའི་རྩ་བ་དང་། རྡོའི་དུམ་བུ་དང་། ཕྲུམ་ཚུད་ཅིག་འཚལ་ཏེ་མཆིས་སོ། །འདི་དག་ཅི་དགོས་སྡིག་པས་ཟིན་པ་ལས་འདམ་བུ་མདའ་རྒྱུའི་རྩ་བའི་དུད་པས་བདུག་གོ། །ཕྲུམ་ཚུད་ཀྱིས་ནི་གླན་པར་བགྱིའོ། །རྡོའི་

དུམ་བུས་ནི་སྟོན་ཀའི་དུས་ན་ཞོའི་བུམ་པ་འཆག་པར་འགྱུར་རོ། །རྒྱུན་ཤེས་ཀྱི་བུས་འཛུམ་ཕྱུང་བ་དང་། བྲམ་ཟེའི་ཁྱེའུ་རྣམས་ཀྱིས་བསམས་པ། མཁན་པོ་ནི་འདི་ལ་ཁྲོས་སོ་སྙམ་ནས་དེ་རྣམས་ཀྱིས་སྨྲས་པ། མཁན་པོ་འདི་གཅིག་པུར་བས་སྙམ་མམ། བདག་ཅག་མཆི་བ་ན་ལམ་གྱི་དབུས་

เล่ม ๓ · หน้า 62a

སུ་གླང་པོ་ཆེའི་རྗེས་ཤིག་མཐོང་བ་ན་འདིའི་མཆིད་ནས་འདི་ནི་བལ་གླང་མོའི་རྗེས་ཡིན་ཏེ། དེ་ཡང་མིག་གཡས་པ་ཞར་བ་སྦྲུམ་པ་དེ་རིང་ཁོ་ནར་གླང་པོ་ཆེ་ཕྲུག་གུ་འབྱུང་བར་འགྱུར་བ་ཞིག་ཡིན་ལ། དེ་ལ་ཞོན་པ་ནི་བུད་མེད་ཡིན་ལ་དེ་ཡང་མིག་གཡས་པ་ཞར་བ་སྦྲུམ་པ་དེ་རིང་ཉིད་

དུ་བུ་ཕོ་བཙའ་བར་འགྱུར་རོ་ཞེས་མཆིའོ། །རྒྱུན་ཤེས་ཀྱི་བུས་དྲིས་པ། འཚོ་བྱེད་བདེན་ནམ། མཁན་པོ་མད་དོ། །དེ་གླང་པོ་ཆེའི་རྗེས་སམ། བལ་གླང་མོའི་རྗེས་ཡིན་པ་ཇི་ལྟར་ཤེས། དེས་སྨྲས་པ། མཁན་པོ་བདག་ནི་རྒྱལ་པོའི་རིགས་ལས་ཆེན་པོར་གྱུར་པ་ལགས་ན་ཅི་སྟེ་མ་འཚལ།

གླང་པོ་ཆེའི་རྗེས་ནི་ཟླུམ་མོ། །བལ་གླང་མོའི་རྗེས་ནི་ཆུར་རིང་ངོ་། །མིག་གཡས་པ་ཞར་བར་ཇི་ལྟར་ཤེས། གཡོན་ཕྱོགས་སུ་རན་འཚལ་ཞིང་མཆིས་པ་ལས་སོ། །སྦྲུམ་པར་ཇི་ལྟར་ཤེས། རྐང་པ་གཉིས་གནོན་ཅིང་མཆི་བ་ལས་སོ། །དེང་ཁོ་ནར་འབྲང་བར་འགྱུར་བར་ཇི་ལྟར་ཤེས། གཅིན་

བེའུ་སྣབས་དང་བཅས་པར་འབྱུང་བས་སོ། །གླང་པོ་ཆེའི་ཕྲུག་གུ་ཕོར་འབྲང་བར་འགྱུར་བར་ཇི་ལྟར་ཤེས། རྐང་པ་གཡས་པ་ལྷག་པར་གནོན་ཅིང་མཆི་བས་སོ། །དེ་ལ་བུད་མེད་ཞོན་པར་ཇི་ལྟར་ཤེས། བབས་ནས་རྐང་པའི་བར་དུ་གཅིས་པ་ལས་སོ། །དེ་ཡང་མིག་གཡས་པ་ཞར་བར་ཇི་

ལྟར་ཤེས། གཡོན་ཕྱོགས་སུ་མེ་ཏོག་ཐུ་ཞིང་མཆི་བས་སོ། །དེ་ཡང་སྦྲུམ་པར་ཇི་ལྟར་ཤེས། དེའི་རྐང་པའི་རྟིང་པ་ཕལ་ཆེར་གནོན་ཅིང་མཆིས་པས་སོ། །དེང་ཁོ་ནར་བཙའ་བར་འགྱུར་བར་ཇི་ལྟར་ཤེས། གཅིན་ལྗན་ལྗིན་དང་བཅས་ཏེ་འབྱུང་བ་ལས་སོ། །དེ་ལྟ་ལགས་ཀྱིས་ཀྱང་

གལ་ཏེ་མཁན་པོ་ཐུགས་མི་ཆེས་ན་འགྲོན་པ་གནས་པའི་ཕྱོགས་དེར་བྲམ་ཟེའི་ཁྱེའུ་འགའ་ཞིག་མངག་ཏུ་གསོལ། དེས་བྲམ་ཟེའི་ཁྱེའུ་ཞིག་བཏང་བ་དང་། འཚོ་བྱེད་ཀྱིས་ཇི་སྐད་སྨྲས་པ་དེ་ཐམས་ཅད་དེ་བཞིན་དུ་གྱུར་ཏོ། །རྒྱུན་ཤེས་ཀྱི་བུས་བྲམ་ཟེའི་ཁྱེའུ་རྣམས་ལ་སྨྲས་པ། བྲམ་ཟེའི་

ཁྱེའུ་དག་ཁྱེད་ཀྱིས་ཐོས་སམ། འཚོ་བྱེད་ནི་དེ་འདྲ་བར་ཤེས་རབ་ཅན་ནོ། །འཚོ་བྱེད་ཀྱིས་ཀླད་པའི་ཐོད་པ་འབྱེད་པའི་དཔྱད་མ་གཏོགས་པ་ཐམས་ཅད་བསླབས་སོ། །ཇི་ཙམ་ན་མི་ཞིག་ཀླད་ནད་ཀྱིས་ཐེབས་ནས་རྒྱུན་ཤེས་ཀྱི་བུའི་དྲུང་དུ་སོང་སྟེ་སྨྲས་པ། རྒྱུན་ཤེས་ཀྱི་བུ་བདག་ལ་དཔྱད་

เล่ม ๓ · หน้า 62b

མཛོད་ཅིག །དེས་སྨྲས་པ། ཀྱེ་ནང་རྗེ་རེ་ཞིག་དེ་རིང་དོང་རྐོས་ལ་ལྕི་བ་དག་སྟ་གོན་གྱིས་ཤིག་དང་སང་བདག་གིས་ཁྱོད་ཀྱི་དཔྱད་བྱའོ། །འཚོ་བྱེད་ཀྱིས་ཐོས་ནས་དེ་དེའི་ཕྱི་བཞིན་སོང་སྟེ། ཀྱེ་ནང་རྗེ་བདག་གིས་ཅུང་ཟད་བསླབས་པ་གང་ཡིན་པ་དེ་ཐམས་ཅད་ནི་སེམས་ཅན་ལ་ཕན་པའི་

ཕྱིར་ཡིན་ན། བདག་གིས་ཀླད་པའི་ཐོད་པ་དབྱེ་བ་མ་བསླབས་ཀྱིས། ཁྱོད་ཀྱིས་བདག་དབེན་པར་ཞོག་ཞིག་དང་། ཁྱེད་ཀྱི་ལས་ཇི་ལྟར་བྱེད་པ་བལྟའོ། །དེས་སྨྲས་པ། དེ་བཞིན་དུ་བགྱིའོ། །དེས་དེ་ཕྱོགས་དབེན་པ་ཞིག་ཏུ་བཞག་གོ། །དེ་ནས་རྒྱུན་ཤེས་ཀྱི་བུ་འོངས་ནས་མི་དེ་དོང་དུ་

བཅུག་སྟེ་ཐོད་པ་དབྱེ་བའི་དཔྱད་ཀྱིས་ཐོད་པ་ཕྱེ་ནས་དེ་སྐམ་པས་སྲོག་ཆགས་དེ་བླང་བར་བརྩམས་པ་དང་འཚོ་བྱེད་ཀྱིས་སྨྲས་པ། མཁན་པོ་གཟུ་ལུམས་སུ་མ་བླངས་ཤིག །རིགས་ཀྱི་བུ་འདི་དེང་ཉིད་འགུམ་པར་འགྱུར་རོ། །དེས་སྨྲས་པ། འཚོ་བྱེད་འོངས་སམ། སྨྲས་པ། མཁན་

པོ་བདག་མཆིས་སོ། །ཁོ་བོས་སྲོག་ཆགས་འདི་ཇི་ལྟར་བླང་བར་བྱ། མཁན་པོ་སྐམ་པ་ཚ་བར་མཛོད་དེ་རྒྱབ་ཏུ་རེག་ནས་རྐང་ལག་འཁུམས་པར་གྱུར་པ་དང་དེ་ནས་འོར་ཅིག །དེས་དེ་བཞིན་དུ་བྱས་ནས་སོས་པར་གྱུར་ཏོ། །རྒྱུན་ཤེས་ཀྱི་བུས་སྨྲས་པ། འཚོ་བྱེད་ཁོ་བོ་ཤིན་ཏུ་མགུ་བར་གྱུར་

གྱིས་ཁྱོད་ཁྲུས་བྱོས་ལ་ཤོག་ཤིག་དང་ཀླད་པའི་ཐོད་པ་འབྱེད་པའི་དཔྱད་སྦྱིན་ནོ། །དེས་ཁྲུས་བྱས་ནས། འོངས་པ་དང་དེས་དེ་ལ་ཀླད་པའི་ཐོད་པ་དབྱེ་བའི་དཔྱད་བྱིན་ནས་སྨྲས་པ། འཚོ་བྱེད་བདག་ཅག་ནི་འདིས་འཚོ་བ་ཡིན་གྱིས། ཡུལ་འདིར་ཁྱོད་ཀྱིས་མ་བྱ་ཞིག །མཁན་པོ་དེ་

བཞིན་བགྱིའོ་ཞེས་འཚོ་བྱེད་ཀྱིས་རྒྱུན་ཤེས་ཀྱི་བུ་ལ་ཕྱག་བྱས་ནས་རྒྱལ་པོ་པད་མའི་སྙིང་པོའི་དྲུང་དུ་སོང་སྟེ་ཕྱག་བྱས་ནས། བདག་གིས་སྨན་དཔྱད་བསླབས་ལགས་ཀྱིས་མཆིའོ། །དེའི་ཚེ་རྒྱལ་པོ་པད་མའི་སྙིང་པོ་དང་མི་མཐུན་པ་མཐའ་འཁོབ་པ་སྐྱ་བསེང་ཞེས་བྱ་བ་དག་ཅིག་ཡོད་དེ། དེས་

སྨྲས་པ། འཚོ་བྱེད་བདག་དང་མི་མཐུན་པ་མཐའ་འཁོབ་པ་སྐྱ་བསེང་ཞེས་བྱ་བ་དག་ཅིག་ཡོད་ཀྱིས་འདི་ལྟར་ཁྱོད་ནི་ཤེས་རབ་ཅན་ནུས་པ་ཡིན་པས་རེ་ཞིག་དེ་ཕོབ་ལ་ཕྱིས་སོང་ཤིག་དང་། དེ་ལྟ་ན་བདག་ཅག་གིས་འཇིག་རྟེན་གྱི་ཚུལ་བྱས་པར་འགྱུར་རོ། །དེས་དེ་ལ་ཁས་བླངས་པ་དང་དེ་

เล่ม ๓ · หน้า 63a

ནས་དེས་དཔུང་གི་ཚོགས་ཡན་ལག་བཞི་པ་བསྡུས་ཏེ་བཏང་བ་ལས་དེས་མཐའ་འཁོབ་པ་སྐྱ་བསེང་དེ་རྣམས་ཕབ་ནས་གཏེའུ་བཟུང་དཔྱ་བླངས་ཏེ་སླར་བདེ་བར་འོངས་ནས་ཁྱེར་ཏེ་འོངས་པ་དེ་བཞིན་དུ་རྒྱལ་པོ་ལ་ཕུལ་བ་དང་། དེ་ཤིན་ཏུ་དགའ་ནས་དེ་ཉིད་ལ་རྗེས་སུ་ཡི་རངས་

ནས་དེས་ཀྱང་རྒྱུན་ཤེས་ཀྱི་བུ་ལ་བྱིན་ནོ། །དེ་ནས་འཚོ་བྱེད་རིམ་གྱིས་གྲོང་ཁྱེར་བཟང་བྱེད་དུ་ཕྱིན་ནས་དེ་ཉིད་དུ་དབྱར་གནས་ཏེ། དེ་ནས་དེས་འབྱུང་པོ་ཐམས་ཅད་ཀྱི་སྐད་ཅེས་བྱ་བའི་བསྟན་བཅོས་བསླབས་ནས་གྲོང་ཁྱེར་བཟང་བྱེད་ནས་ཆས་པ་དང་མི་ཞིག་ཤིང་ཁུར་ཁྱེར་ནས་གྲོང་ཁྱེར་

དུ་འཇུག་པ། རུས་པ་དང་པགས་པའི་ལྷག་མ་ལུས་པ། ལུས་ཀུན་ནས་འཛག་པ་འཚོ་བྱེད་ཀྱིས་མཐོང་ནས། དེ་ལ་སྨྲས་པ། ཀྱེ་ནང་རྗེ་ཅི་ཞིག་གིས་གནས་སྐབས་འདི་ལྟ་བུར་གྱུར། དེས་སྨྲས་པ། བདག་གིས་ཀྱང་མི་ཤེས་ན་འོན་ཀྱང་བདག་གིས་ཤིང་ཁུར་འདི་ཁྱེར་

ནས་བདག་ཀྱང་འདི་འདྲ་བའི་གནས་སྐབས་སུ་གྱུར་ཏོ། །དེ་ཤིང་བརྟག་པ་ལ་བྱང་བ་ཡིན་པས་སྨྲས་པ། ཀྱེ་ནང་རྗེ་ཅི་ཤིང་ཁུར་འདི་འཚོང་ངམ། འཚོང་ངོ་། །རིན་ཇི་ཙམ། ཀཱར་ཥཱ་པ་ཎ་ལྔ་བརྒྱའོ། །དེས་དེ་ཉོས་ནས་དེ་ནས་བལྟས་ན་འབྱུང་པོ་ཐམས་ཅད་དད་པར་བྱེད་པ་ཞེས་བྱ་

བའི་ནོར་བུ་མཐོང་ནས་དེའི་མཐུ་ནི་འདི་འདྲ་སྟེ། གང་གི་ཚེ་ནད་པའི་མདུན་དུ་བཞག་པ་དེའི་ཚེ་མར་མེས་ཁྱིམ་ན་ཡོད་པའི་རྫས་བཞིན་དུ་ནད་ཇི་ལྟ་བ་བཞིན་དུ་སྣང་ངོ་། །དེ་རིམ་གྱིས་ཡུལ་ཨུ་དུམ་བཱ་རར་ཕྱིན་པ་དང་། དེ་ན་མི་བྲེས་འཇལ་བ་ཞིག་ཡོད་པ་དེས་བྲེ་བོས་གཞལ་ནས་བྲེ་མགོ་

ལ་སྣུན་པ་འཚོ་བྱེད་ཀྱིས་མཐོང་ནས་སྨྲས་པ། ཀྱེ་ནང་རྗེ་ཅིའི་ཕྱིར་དེ་ལྟར་བྱེད། བདག་གི་ཀླད་པ་ལྷག་པར་གཡའོ། །ཚུར་ཤོག་བལྟའོ་ཞེས་དེས་དེ་བསྙལ་ནས་ཀླད་པ་བལྟས་ཏེ། དེ་ནས་འཚོ་བྱེད་ཀྱིས་འབྱུང་པོ་ཐམས་ཅད་དད་པར་བྱེད་པའི་ནོར་བུ་དེའི་ཀླད་པའི་སྟེང་དུ་གཞག་པ་དང་།

ཇི་ཙམ་ན་སྲིན་གྱི་མེད་ཅིག་སྣང་ངོ་། །དེ་ནས་དེས་སྨྲས་པ། ཀྱེ་ནང་རྗེ་ཁྱོད་ཀྱི་ཀླད་པ་ལ་སྲིན་གྱི་མེད་ཡོད་དོ། །དེས་རྐང་པ་གཉིས་ལ་གཏུགས་ཏེ་སྨྲས་པ། བདག་ལ་དཔྱད་མཛོད་ཅིག །དེས་ཁས་བླངས་སོ། །འཚོ་བྱེད་ཀྱིས་བསམས་པ། མཁན་པོས་ཇི་སྐད་བསྟན་པ་དེ་བཞིན་དུ་

เล่ม ๓ · หน้า 63b

འདིའི་དཔྱད་བྱའོ་སྙམ་ནས། དེས་དེ་ལ་སྨྲས་པ། ཀྱེ་ནང་རྗེ་རེ་ཞིག་དེ་རིང་དོང་རྐོས་ལ་ལྕི་བ་དག་སྟ་གོན་བྱོས་ཤིག་དང་སང་དཔྱད་བྱའོ། །དེས་རྐང་པ་གཉིས་ལ་གཏུགས་ནས་སོང་ངོ་། །འཚོ་བྱེད་ཀྱིས་དེའི་ཕྱི་དེ་ཉིན་འོངས་ནས་དེ་དོང་དུ་བཅུག་སྟེ་ཀླད་པའི་ཐོད་པ་འབྱེད་པའི་དཔྱད་ཀྱིས་

ཀླད་པའི་ཐོད་པ་ཕྱེ་ནས་སྐམ་པ་ཚ་བས་སྲིན་གྱི་མེད་ཀྱི་རྒྱབ་ལ་རེག་པ་བྱས་ཏེ་དེས་རྐང་ལག་འཁུམས་པ་དང་། དེ་ནས་དེས་སྐམ་པས་བླངས་ཏེ་བོར་བས་སོས་པར་གྱུར་ཏོ། །དེས་དེ་ལ་ཀཱར་ཥཱ་པ་ཎ་ལྔ་བརྒྱ་བྱིན་པ་དང་དེས་ཀྱང་རྒྱུན་ཤེས་ཀྱི་བུ་ལ་བསྐུར་རོ། །དེ་ནས་འཚོ་བྱེད་ཡུལ་རོ་ཧི་ཏ་ཀ་

ཞེས་བྱ་བར་ཕྱིན་པ་དང་། ཡུལ་རོ་ཧི་ཏ་ཀ་ན་ཁྱིམ་བདག་ཅིག་ལ་སྐྱེད་མོས་ཚལ་མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགས་པ་ཞིག་ཡོད་དེ། དེ་དེ་ལ་ལྷག་པར་ཆགས་པ་ལས་ཤི་ནས་དེ་ཉིད་དུ་མི་མ་ཡིན་རྣམས་སུ་སྐྱེས་སོ། །དེའི་བུ་ནི་ཁྱིམ་གྱི་དཔོན་པོར་གྱུར་ནས་དེས་སྐྱེད་

མོས་ཚལ་དེར་སྲུང་མའི་མི་བཞག་པ་དང་། དེ་མི་མ་ཡིན་པ་དེས་བསད་དོ། །གཉིས་པ་བཞག་པ་དང་། དེ་ཡང་བསད་ནས་ཁྱིམ་བདག་གི་བུ་དེས་སྐྱེད་མོས་ཚལ་དེ་བོར་རོ། །ཇི་ཙམ་ན་མི་དམུ་ཆུས་གང་བ་སྨན་པ་ཐམས་ཅད་ཀྱིས་སྤངས་པ་ཞིག་སྐྱེད་མོས་ཚལ་དེར་སོང་ནས་ནུབ་

མོ་འབྲང་བཏབ་སྟེ་འདུག་ནས། ཀྱེ་མའོ་བདག་ནི་མི་མ་ཡིན་པས་བསད་ཀྱང་ཅི་མ་རུང་སྙམ་མོ། །དེ་ཉིད་དུ་འཚོ་བྱེད་ཀྱང་ནུབ་མོ་འབྲང་བཏབ་སྟེ་འདུག་གོ། །ཇི་ཙམ་ན་མི་མ་ཡིན་པ་དེས་དམུ་ཆུ་ཅན་དེ་བསྡིགས་པར་བརྩམས་པ་དང་། དམུ་ཆུའི་ནད་དེ་བྱུང་ནས་སྨྲས་པ། འདི་

བདག་གིས་སྔར་བཟུང་ན་ཅིའི་ཕྱིར་འདི་བསྡིགས། ཁྱོད་ལ་ར་སྤུའི་དུད་པས་བདུག་པ་འགའ་ཡང་མེད་པ་ལྟ། དེས་ནི་ཁྱོད་དཔག་ཚད་བཅུ་གཉིས་སུ་འབྲོས་པར་འགྱུར་རོ། །དེས་ཀྱང་སྨྲས་པ། ཁྱོད་ལ་ཡང་ལ་ཕུག་གི་ས་བོན་མར་ཕྱུང་བའི་དར་བ་དང་བཏགས་ཏེ་སྦྱིན་པ་འགའ་ཡང་

མེད་པ་ལྟ། དེས་ནི་ཁྱོད་དུམ་བུ་དུམ་བུར་འཛག་པར་འགྱུར་རོ། །ཐམས་ཅད་འཚོ་བྱེད་ཀྱིས་ཐོས་ནས་དེ་ནང་པར་སྔར་ལངས་ཏེ་ཁྱིམ་བདག་དེའི་དྲུང་དུ་སོང་ནས་དེས་སྨྲས་པ། ཁྱིམ་བདག་སྐྱེད་མོས་ཚལ་མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགས་པ་ཅིའི་ཕྱིར་དོར། ཁྱིམ་

เล่ม ๓ · หน้า 64a

བདག་གིས་དེ་ལ་ཇི་ལྟར་གྱུར་པ་རྣམས་སྨྲས་པ་དང་། དེས་སྨྲས་པ། ཁྱིམ་བདག་ར་སྤུའི་དུད་པས་བདུགས་ཤིག་དང་། མི་མ་ཡིན་པ་དཔག་ཚད་བཅུ་གཉིས་སུ་འབྲོས་པར་འགྱུར་རོ། །ཁྱིམ་བདག་གིས་ར་སྤུའི་དུད་པས་བདུགས་པ་དང་མི་མ་ཡིན་པ་དེ་དཔག་

ཚད་བཅུ་གཉིས་སུ་བྲོས་པར་གྱུར་ཏོ། །ཁྱིམ་བདག་དེས་ཀྱང་འཚོ་བྱེད་ལ་ཀཱར་ཥཱ་པ་ཎ་ལྔ་བརྒྱ་བྱིན་པ་དང་། དེས་དེ་ཡང་རྒྱུན་ཤེས་ཀྱི་བུ་ལ་བསྐུར་རོ། །དེ་ནས་འཚོ་བྱེད་ཀྱིས་དམུ་ཆུ་ཅན་ལ་དྲིས་པ། ནང་རྗེ་ཁྱོད་ཅིའི་ཕྱིར་མི་མ་ཡིན་པས་གནས་བཏབ་པའི་སྐྱེད་མོས་ཚལ་དུ་འདུག །དེས་

དེ་ལ་ཇི་ལྟར་གྱུར་པ་དག་སྨྲས་པ་དང་། འཚོ་བྱེད་ཀྱིས་སྨྲས་པ། ལ་ཕུག་གི་ས་བོན་མར་ཕྱུང་བའི་དར་བ་དང་བཏགས་པ་འཐུང་ཤིག་དང་སོས་པར་འགྱུར་རོ། །དེས་འཐུངས་ནས་སོས་པར་གྱུར་ཏེ། མི་དེས་ཀྱང་འཚོ་བྱེད་ལ་ཀཱར་ཥཱ་པ་ཎ་ལྔ་བརྒྱ་བྱིན་པ་དང་། དེས་ཀྱང་རྒྱུན་ཤེས་ཀྱི་བུ་ལ་

བསྐུར་རོ། །དེ་ནས་འཚོ་བྱེད་རིམ་གྱིས་བཅོམ་བརླག་ཏུ་ཕྱིན་ནས་བཅོམ་བརླག་གི་ཕྱི་རོལ་ན་ཤིང་ཞིག་གི་དྲུང་དུ་ངལ་སོ་ཞིང་འདུག་གོ། །ཇི་ཙམ་ན་གྱད་ཀྱིས་གྱད་གཅིག་བརྡབས་པས་དེའི་ནང་གྲོལ་རྣམས་འཁྲུགས་ནས་དེ་ཤིའོ་ཞེས་ཕྱི་རོལ་ཏུ་ཕྱུང་ངོ་། །ཤིང་དེ་ལ་ཡང་བྱ་རྒོད་མོ་ཕྲུག་གུ་

དང་བཅས་པ་ཞིག་འདུག་པ་ལས་དེ་ལ་ཕྲུག་གུ་དེ་རྣམས་ཀྱིས་སྨྲས་པ། མ་ཤ་བྱིན་ཅིག །དེས་སྨྲས་པ། བུ་ཤ་ག་ལ་ཡོད། དེ་རྣམས་ཀྱིས་སྨྲས་པ། མ་གྱད་ཀྱིས་གྱད་འདི་བརྡབས་ཏེ་ཤི་ནས་ཕྱུང་བ་ཡིན་ནོ། །བུ་འདིར་སྨན་པའི་རྒྱལ་པོ་འཚོ་བྱེད་འོངས་ནས་དེས་འདི་སོས་པར་བྱེད་

པའི་གནས་དེ་ཡོད་དོ། །མ་འདི་ཅི་ཞིག་གིས་སོས་པར་འགྱུར། གལ་ཏེ་དེའི་ནང་གྲོལ་རྣམས་ཕྱེ་མས་རེག་པར་བྱས་ནའོ། །དེ་ཐམས་ཅད་འཚོ་བྱེད་ཀྱིས་ཐོས་སོ། །དེ་ནས་དེ་ལངས་ཏེ་རོའི་དྲུང་དུ་སོང་ནས་དྲིས་པ་ཤེས་ལྡན་དག་འདི་ཅི་ཞིག །དེ་རྣམས་ཀྱིས་སྨྲས་པ། གྱད་ཀྱིས་གྱད་

བརྡབས་པས་ཤི་བ་ཡིན་ནོ། །འཚོ་བྱེད་ཀྱིས་སྨྲས་པ། ཞོག་ཞིག་དང་བལྟའོ། །དེ་རྣམས་ཀྱིས་བཞག་པ་དང་དེ་ནས་འཚོ་བྱེད་ཀྱིས་འབྱུང་པོ་ཐམས་ཅད་དང་བར་བྱེད་པའི་ནོར་བུ་ཀླད་པར་བཞག་ནས་བརྟགས་ན། ཇི་ཙམ་ན་ནང་གྲོལ་རྣམས་འཁྲུགས་པར་བྱས་པ་མཐོང་ནས་དེས་སྨྱུག་

เล่ม ๓ · หน้า 64b

མའི་སྦུབས་སུ་ཕྱེ་མ་བླུགས་ཏེ་ཁས་བུས་པ་དང་ཕྱེ་མས་ནང་གྲོལ་རྣམས་ལ་རེག་ནས་སོས་པར་གྱུར་ཏོ། །དེས་ཀྱང་འཚོ་བྱེད་ལ་ཀཱར་ཥཱ་པ་ཎ་ལྔ་བརྒྱ་བྱིན་པ་དང་། དེས་ཀྱང་དེ་རྒྱུན་ཤེས་ཀྱི་བུ་ལ་བསྐུར་རོ། །བཅོམ་བརླག་ན་ཁྱིམ་བདག་ཅིག་ཡོད་པ་དེའི་ཆུང་མ་གཟུགས་དང་ལང་ཚོ་ཕུན་

སུམ་ཚོགས་པ་ཡིན་པས་དེ་དེ་ལ་ལྷག་པར་ཆགས་ཤིང་འདུག་པ་ལས་ཤི་ནས་དེ་ཉིད་ཀྱི་མོ་མཚན་གྱི་སྲིན་བུར་སྐྱེས་པར་གྱུར་ཏེ། དེ་གང་དང་ལྷན་ཅིག་དགའ་མགུར་སྤྱོད་པ་དེ་ཤི་བར་བྱེད་དོ། །དེ་ནས་དེ་དང་འགའ་ཡང་ལྷན་ཅིག་དགའ་མགུར་སྤྱོད་པར་མི་བྱེད་དོ། །དེས་སྨན་པ་འཚོ་

བྱེད་དེར་འོངས་སོ་ཞེས་ཐོས་ནས་དེ་དེའི་དྲུང་དུ་སོང་སྟེ་སྨྲས་པ། འཚོ་བྱེད་བདག་ལ་བྲོ་ནད་མཆིས་ཀྱིས་དཔྱད་མཛོད་ཅིག །འཚོ་བྱེད་ཀྱིས་དེ་མཐོང་ཞིང་སྨྲ་བའི་ཚིག་ཐོས་ནས་ཆགས་པས་སྨྲས་པ། དམ་ཞིག་བཅའ་སྟེ། གལ་ཏེ་བདག་དང་ལྷན་ཅིག་དགའ་མགུར་སྤྱད་པ་ལྟ་ན་དཔྱད་

བྱའོ། །དེས་སྨྲས་པ། གཡར་ཚ་ལགས་སོ། །དེས་སྨྲས་པ། ཁྱོད་ཀྱིས་དཔྱད་གཞན་ནི་མེད་དོ། །བདག་ལས་ཕངས་པ་གཞན་མེད་པས་དེས་ཁས་བླངས་སོ། །དེ་ནས་དེས་སྒྲེན་མོར་ཕྱུང་སྟེ་བཟོ་བཅོས་བྱས་ནས་མོ་མཚན་གྱི་སྒོར་ཤའི་དུམ་བུ་ཞིག་བཞག་པ་ལས། དེ་ནས་

སྲིན་བུ་དེ་དེ་ལ་ཆགས་པ་དང་དེས་དེ་བླངས་ནས་བོར་ཏེ་སོས་པར་གྱུར་ཏོ། དེ་འདོད་པའི་འདོད་ཆགས་ལ་ལྷག་པར་ཞེན་པས་བརྡ་ཞིག་བྱས་པ་དང་དེས་རྣ་བ་གཉིས་བཀག་སྟེ་སྨྲས་པ། ཁྱོད་ཁོ་བོའི་སྲིང་མོ་དང་འདྲ་སྟེ་ཁྱོད་ཀྱི་དཔྱད་དེ་ཡིན་པས་ཁོ་བོས་དེ་ལྟར་བྱས་པར་ཟད་དོ། །དེས་

ཀྱང་དེ་ལ་ཀཱར་ཥཱ་པ་ཎ་ལྔ་བརྒྱ་བྱིན་པ་དང་། དེས་དེ་ཡང་རྒྱུན་ཤེས་ཀྱི་བུ་ལ་བསྐུར་རོ། །དེ་ནས་འཚོ་བྱེད་རིམ་གྱིས་ཆུ་བོ་ཡ་མུ་ནའི་འགྲམ་དུ་ཕྱིན་པ་དང་། དེས་དེ་ན་མི་རོ་ཞིག་ཡོད་པ་དེའི་བཏིང་བའི་ཕྱོགས་ན་རྒྱུས་པའི་བྲེང་ཡོད་པ་ཉ་རྣམས་ཀྱིས་དྲངས་པ་ལས་དེའི་མིག་འབྱེད་པ་

དང་འཛུམས་པ་མཐོང་ནས། འཚོ་བྱེད་ཀྱིས་དེ་ཐམས་ཅད་བརྟགས་ཏེ། ཇི་ལྟར་རྒྱུས་པ་དང་ལོང་མོ་ལ་སོགས་པའི་ཚིགས་ཀྱི་འབྲེལ་ཐབས་ནི་དེ་ཁོ་ན་ལྟར་འདུག་གོ་སྙམ་ནས། དེ་རིམ་གྱིས་ཡངས་པ་ཅན་དུ་ཕྱིན་པ་དང་། ཇི་ཙམ་ན་གྱད་ཀྱིས་གྱད་གཅིག་ཐལ་མོས་བསྣུན་པས་

เล่ม ๓ · หน้า 65a

མིག་གི་འབྲས་བུ་འཕགས་པ་དང་། འཚོ་བྱེད་དེའི་དྲུང་དུ་སོང་ནས། དེས་རྟིང་བའི་རྒྱུས་པའི་བྲེང་ནས་དྲངས་པ་དང་སླར་ཚུད་པར་གྱུར་ཏོ། །དེས་དེ་ལ་ཀཱར་ཥཱ་པ་ཎ་ལྔ་བརྒྱ་བྱིན་པ་དང་། དེས་འཇིགས་མེད་ཀྱི་མ་ལ་བྱིན་ནོ། །ཡངས་པ་ཅན་ན་མི་ཞིག་ཡོད་པ་དེའི་རྣ་བར་སྲིན་གྱི་

མེད་ཞུགས་ཏེ། དེར་དེ་ལས་ཕྲུག་གུ་བདུན་བརྒྱ་བྱུང་བས་དེ་རྣ་བའི་ནད་ཀྱིས་ཉེན་པར་གྱུར་ནས་འཚོ་བྱེད་ཀྱི་དྲུང་དུ་སོང་སྟེ་སྨྲས་པ། དཔྱད་མཛོད་ཅིག །འཚོ་བྱེད་ཀྱིས་བསམས་པ། སྔར་ནི་བདག་གིས་མཁན་པོས་བསྟན་པས་ལས་བྱས་ཀྱིས་ད་ནི་རང་གི་བློས་ལས་བྱའོ་སྙམ་ནས། དེས་མི་

དེ་ལ་བསྒོ་བ། ཀྱེ་ནང་རྗེ་སོང་ལ་ལོ་མའི་སྤྱིལ་བོ་བྱོས་ཏེ་རས་སྔོན་པོས་གཡོགས་ལ་དེའི་འོག་ཏུ་རྔ་ཞིག་ཞོག་སྟེ་ས་ཡང་དྲོན་པོར་གྱིས་ཤིག །དེས་ཇི་སྐད་བསྟན་པ་བཞིན་དུ་ཐམས་ཅད་བྱས་སོ། །དེ་ནས་འཚོ་བྱེད་ཀྱིས་མི་དེ་ས་ལ་བསྙལ་ནས་ས་དེ་ཆུས་ཆག་ཆག་བཏབ་ནས་དེ་ནས་རྔ་བརྡུངས་པ་དང་སྲིན་

གྱི་མེད་ཀྱིས་དབྱར་གྱི་དུས་ལ་བབ་བོ་སྙམ་ནས་ཕྱིར་བྱུང་ངོ་། །དེ་ནས་འཚོ་བྱེད་ཀྱིས་རྣ་བའི་དྲུང་དུ་ཤའི་དུམ་བུ་ཅིག་བཞག་པ་དང་། དེ་ཡང་སླར་ཞུགས་ཏེ་ཕྲུག་གུ་རྣམས་ཁྲིད་དེ་བྱུང་ནས་ཕྲུག་གུ་རྣམས་དང་ལྷན་ཅིག་ཤའི་དུམ་བུ་ལ་ཆགས་པ་དང་། དེ་ནས་འཚོ་བྱེད་ཀྱིས་དེའི་མོད་ལ་ཤའི་

དུམ་བུ་བོར་བ་དང་མི་དེ་སོས་པར་གྱུར་ཏོ། །དེས་ཀཱར་ཥཱ་པ་ཎ་ལྔ་བརྒྱ་བྱིན་པ་དང་དེས་འཇིགས་མེད་ཀྱི་མ་ལ་བྱིན་ནོ། །དེ་རིམ་གྱིས་རྒྱལ་པོའི་ཁབ་ཏུ་ཕྱིན་པ་དང་། རྒྱལ་པོ་གཟུགས་ཅན་སྙིང་པོས་འཚོ་བྱེད་ཇི་ལྟར་འོངས་པ་ཐོས་ནས། དེས་གཞོན་ནུ་མ་སྐྱེས་དགྲ་ལ་བསྒོ་བ། བུ་ཁྱོད་ཀྱི་ཕུ་

བོ་འོངས་ཀྱིས་བསུར་སོང་ཤིག །དེ་བསུར་སོང་བ་དང་འཚོ་བྱེད་ཀྱིས་གཞོན་ནུ་མ་སྐྱེས་དགྲ་ཇི་ལྟར་བསུར་འོང་བ་ཐོས་ནས་དེས་བསམས་པ། གལ་ཏེ་བདག་གིས་དེས་བསུ་བ་རང་གིར་བྱས་པ་ནི་ནམ་རྒྱལ་པོར་གྱུར་པ་དེའི་ཚེ་བདག་ལ་གནོད་པ་བྱེད་པར་འགྱུར་རོ་སྙམ་ནས། དེ་སླར་ལོག་སྟེ་

སྒོ་གཞན་ཞིག་ནས་ཞུགས་སོ། །དུས་གཞན་ཞིག་ན་འཚོ་བྱེད་སྐྱེ་བོའི་ཚོགས་ཆེན་པོས་ཡོངས་སུ་བསྐོར་ཏེ་སེམས་གཡེང་ཞིང་སོང་བ་དང་། ཇི་ཙམ་ན་བྲམ་ཟེ་ཞིག་མིག་ནད་ཀྱིས་ཐེབས་ནས་འཚོ་བྱེད་ཀྱི་དྲུང་དུ་སོང་སྟེ་བདག་ལ་སྨན་སྟོན་ཅིག །ཚིག་པ་ཟོས་ནས་སྨྲས་པ། ཐལ་བས་ཐོབ་ཅིག །

เล่ม ๓ · หน้า 65b

དེ་དྲང་པོ་ཞིག་པས་ཐལ་བས་བཏབ་པ་དང་སོས་པར་གྱུར་ཏོ། །མིག་ནད་ཀྱིས་ཐེབས་པ་གཞན་ཞིག་ཡོད་པ་དེ་ཡང་འཚོ་བྱེད་ཀྱི་དྲུང་དུ་སོང་བ་དེ་བྲམ་ཟེ་དེས་མཐོང་ནས་དྲིས་པ། ཀྱེ་ནང་རྗེ་གང་དུ་འགྲོ། །དེས་ཇི་ལྟར་གྱུར་པ་སྨྲས་པ་དང་དེས་སྨྲས་པ། ཁྱོད་ལ་འཚོ་བྱེད་ཅི་དགོས། དེས་

ཁོ་བོ་ལ་གང་བསྟན་པ་དེ་བྱོས་ཤིག །དེ་ཡིད་ཆེས་པར་གྱུར་ནས་དེས་ཐལ་བས་བཏབ་པ་དང་ལོང་བར་གྱུར་ཏོ། །དུས་གཞན་ཞིག་ན་རྒྱལ་པོ་གཟུགས་ཅན་སྙིང་པོའི་སྤྱི་བོར་ཕོལ་མིག་བྱུང་ངོ་། །དེས་བློན་པོ་རྣམས་ལ་བསྒོ་བ། ཤེས་ལྡན་དག་སྨན་པ་རྣམས་ཁུག་ཤིག །བློན་པོ་

རྣམས་ཀྱིས་སྨན་པ་རྣམས་བཀུག་པ་དང་། རྒྱལ་པོས་སྨྲས་པ། ཤེས་ལྡན་དག་ངའི་སྤྱི་བོར་ཕོལ་མིག་བྱུང་གིས་དཔྱད་བྱོས་ཤིག །དེ་རྣམས་ཀྱིས་སྨྲས་པ། ལྷ་སྨན་པ་ཆེན་པོ་འཚོ་བྱེད་མཆིས་ན་བདག་ཅག་གིས་བགྱི་བ་ཅི་འཚལ། རྒྱལ་པོས་སྨྲས་པ། ཤེས་ལྡན་དག་འཚོ་

བྱེད་ཁུག་ཤིག །དེ་རྣམས་ཀྱིས་བཀུག་པ་དང་། རྒྱལ་པོས་སྨྲས་པ། འཚོ་བྱེད་དཔྱད་བྱོས་ཤིག །འཚོ་བྱེད་ཀྱིས་སྨྲས་པ། ལྷ་དམ་ཞིག་བཅའ་སྟེ། གལ་ཏེ་ལྷ་ལ་བདག་ཉིད་ཀྱིས་ཁྲུས་བགྱིད་དུ་གནང་ན་བགྱིའོ། །དེ་བཞིན་གྱིས་ཤིག །དེ་ནས་འཚོ་བྱེད་ཀྱིས་སྐྱུ་རུ་རས་

བསྐུས་ཤིང་སྨིན་པར་འགྱུར་བའི་རྫས་དག་བཏབ་ནས་སྨིན་པར་འགྱུར་བའི་རྫས་རྣམས་དང་བསྲེས་པའི་ཆུ་བུམ་པ་ལྔ་བརྒྱ་བླུགས་པ་དང་། གང་གི་ཚེ་སྨིན་པ་དེའི་ཚེ་ན་མ་ཚོར་བར་སྤུ་གྲིས་རེག་པར་བྱས་པ་དང་རྡོལ་ཏོ། །དེ་ནས་འཚོ་བར་འགྱུར་བའི་རྫས་དག་བཏབ་སྟེ་འཚོ་བར་འགྱུར་

བའི་རྫས་རྣམས་དང་བསྲེས་པའི་ཆུ་བུམ་པ་ལྔ་བརྒྱ་བླུགས་པ་དང་། རྨ་དེ་སོས་ཤིང་པགས་པ་དང་འདྲ་བ་དང་སྐྲ་ཡང་མཉམ་པར་གྱུར་ཏོ། །རྒྱལ་པོས་ཁྲུས་བྱས་མ་ཐག་ཏུ་སྨྲས་པ། འཚོ་བྱེད་དཔྱད་བྱོས་ཤིག །དེས་སྨྲས་པ། ལྷ་རེ་ཞིག་བཤོས་གསོལ་ཅིག །རྒྱལ་པོས་

ཟན་ཟོས་ནས་འཚོ་བྱེད་དཔྱད་བྱོས་ཤིག་ལྷ་བགྱིས་ལགས་སོ། །དེ་ཡིད་མ་ཆེས་ནས་ལག་པས་བྱུགས་ན་ཕྱོགས་གང་ན་རྨ་ཡོད་པར་མ་ཤེས་སོ། །མེ་ལོང་བླངས་ཏེ་བལྟས་ན་འོན་ཀྱང་མ་མཐོང་ངོ་། །བཙུན་མོ་ལ་དྲིས་ན་དེས་ཀྱང་ཕྱོགས་གང་ན་རྨ་ཡོད་པར་མ་ཤེས་སོ། །

เล่ม ๓ · หน้า 66a

རྒྱལ་པོ་མཆོག་ཏུ་ངོ་མཚར་སྐྱེས་ནས་བློན་པོ་རྣམས་ལ་སྨྲས་པ། ཤེས་ལྡན་དག་འཚོ་བྱེད་སྨན་པའི་རྒྱལ་པོར་དབང་སྐུར་ཅིག །མི་ལོང་བ་དེས་སྨྲས་པ། ལྷ་ཅི་སྲས་ལ་བྱམས་པས་སམ། འོན་ཏེ་སྨན་མཁས་པས་དབང་བསྐུར་བར་མཛད། རྒྱལ་པོས་སྨྲས་པ།

སྨན་མཁས་པས་སོ། །དེས་སྨྲས་པ། གལ་ཏེ་དེ་ལྟ་ལགས་ན་འདིས་བདག་ནི་སོས་པར་མ་བགྱིས་སོ། །འཚོ་བྱེད་ཀྱིས་སྨྲས་པ། ཀྱེ་ནང་རྗེ་བདག་གིས་ཁྱོད་མཐོང་ཡང་མ་མཐོང་ན་སོས་པར་ལྟ་ག་ལ་བྱས། དེས་སྨྲས་པ། དེ་ནི་མད་ན་འོན་ཀྱང་ཁྱོད་ཀྱིས་གང་ལ་བསྟན་པ་དེས་

བདག་ལ་བསྟན་ཏོ། །ཅི་ཞིག་བསྟན། ཆེ་གེ་མོ་ཞིག་གོ། །འཚོ་བྱེད་ཀྱིས་སྨྲས་པ། དེའི་ཁམས་ཀྱང་གཞན་ལ་ཁྱོད་ཀྱི་ཁམས་ཀྱང་གཞན་ཡིན་གྱིས། ད་འདི་དང་འདི་དག་བྱོས་ཤིག་དང་སོས་པར་འགྱུར་རོ། །དེས་བྱས་ནས་སོས་པར་གྱུར་པ་དང་སྨྲས་པ། ལྷ་འདི་

སྨན་པའི་རྒྱལ་པོར་དབང་བསྐུར་བར་མཛད་དུ་གསོལ། དེ་གླང་པོ་ཆེ་ལ་བསྐྱོན་ནས་དཔལ་གྱི་འབྱོར་པ་ཆེན་པོས་སྨན་པའི་རྒྱལ་པོར་དབང་བསྐུར་ཏོ། །རྒྱལ་པོའི་ཁབ་ན་ཁྱིམ་བདག་ཅིག་ཡོད་པ་སྐྲན་ནད་ཀྱིས་ཐེབས་ནས། སྨན་པ་ཐམས་ཅད་ཀྱིས་སྤངས་པ་དང་། དེས་བསམས་པ།

འཚོ་བྱེད་ཀྱི་དྲུང་དུ་འགྲོའོ། །གལ་ཏེ་དཔྱད་ཅིག་བྱས་ན་ནི་དེ་ལྟ་ན་ལེགས། གལ་ཏེ་མ་བྱས་ན་བདག་ཉིད་འཆི་བར་བྱའོ་སྙམ་ནས། དེ་འཚོ་བྱེད་ཀྱི་དྲུང་དུ་སོང་ནས་འཚོ་བྱེད་བདག་གི་དཔྱད་མཛོད་ཅིག །དེས་སྨྲས་པ། ཀྱེ་ནང་རྗེ་ཁྱོད་ཀྱི་སྨན་འདི་ནི་རྙེད་པར་དཀའོ། །དེས་

བསམས་པ། འཚོ་བྱེད་ཀྱིས་ཀྱང་བདག་སྤངས་ན་འདི་ལ་ཅི་བྱར་ཡོད། དུས་ལ་བབ་ཀྱིས་བདག་ནི་འཆིའོ་སྙམ་ནས་དེ་དུར་ཁྲོད་དུ་སོང་ངོ་། །དེ་ན་རོ་སྲེག་པའི་མེ་འབར་བར་ནེའུ་ལེ་གདུག་པ་ཞིག་དང་སྲོག་ཆགས་གོ་དྷཱ་ཙན་དན་ཞེས་བྱ་བ་འཐབས་ཏེ་ལྷུང་བ་དང་དེ་བཀྲེས་པས་

ཉེན་པས་དེ་གཉིས་ཀ་ཟོས་ཏེ། ལྷས་དུར་ཁྲོད་དུ་ཆར་ཕབ་པའི་འོད་པའི་ཆུ་དེ་ལ་འཐུངས་ནས་དུར་ཁྲོད་དང་ཧ་ཅང་ཡང་མི་རིང་བ་ཞིག་ན་གནག་ལྷས་ཡོད་པ་དེར་སོང་སྟེ། ཀོ་དྲའི་ཆན་དང་མར་ཕྱུང་བའི་ཞོ་འཐུངས་པས་སྐྲན་རྡོལ་ཏེ་ཡར་སློན་མར་འཁྲུས་ནས་སྔོན་ཇི་ལྟ་བ་བཞིན་དུ་

เล่ม ๓ · หน้า 66b

གྱུར་ཏོ། །དུས་གཞན་ཞིག་ན་ལུས་འཕགས་མོའི་མདོམས་ཀྱི་ཕྱོགས་སུ་ཕོལ་མིག་བྱུང་ངོ་། །དེས་རྒྱལ་པོ་ལ་སྨྲས་པ་དང་རྒྱལ་པོས་འཚོ་བྱེད་ལ་བསྒོ་བ། མ་ཡར་མོའི་དཔྱད་བྱོས་ཤིག །དེས་ཁས་བླངས་སོ། །དེ་ནས་ཟན་བྱས་ཏེ་མ་མ་ལ་བྱིན་ནས་ཁྱོད་ཀྱིས་འདིའི་སྟེང་དུ་

འདུག་ཏུ་ཆུག་ཅིག །དེས་དེ་འདུག་ཏུ་བཅུག་པའི་ཟན་འཚོ་བྱེད་ཀྱིས་མཐོང་ནས་བསམས་པ། ཕྱོགས་ཆེ་གེ་མོ་ཞིག་ནའོ་སྙམ་མོ། །དེ་ནས་སྨིན་པར་འགྱུར་བའི་རྫས་དག་བཏབ་སྟེ། སྨིན་པར་ཤེས་ནས་ཟན་གྱི་ནང་དུ་གཙགས་བུ་སྦས་ཏེ་མ་མ་ལ་བསྒོ་བ། ཁྱོད་ཀྱིས་དེ་འདི་ལ་

འདུག་ཏུ་ཆུག་ལ་བཙུན་མོ་འདུག་ནས་སླར་སློང་ཤིག །དེས་དེ་བཞིན་བྱས་པ་ལས་གཙགས་བུས་རེག་མ་ཐག་ཏུ་ཕོལ་མིག་རྡོལ་བར་གྱུར་ཏོ། །དེ་ནས་འཚོ་བར་འགྱུར་བའི་རྫས་དང་བསྲེས་པ་བསྐ་བའི་ཆུས་བཀྲུས་ཏེ་འཚོ་བར་འགྱུར་བའི་རྫས་རྣམས་བཏབ་པས་སོས་པར་གྱུར་

ཏོ། །འཚོ་བྱེད་རྒྱལ་པོའི་དྲུང་དུ་སོང་བ་དང་རྒྱལ་པོས་སྨྲས་པ། འཚོ་བྱེད་ཁྱོད་ཀྱིས་མ་ཡར་མོའི་དཔྱད་བྱས་སམ། ལྷ་བགྱིས་སོ། །ཁྱོད་ཀྱིས་སྒྲེན་མོར་ཕུད་དེ་མ་བལྟས་གྲང་། ལྷམ་བལྟས་སོ། །ཇི་ལྟར་བྱས། དེས་ཇི་ལྟར་གྱུར་པ་རྣམས་སྨྲས་པ་དང་རྒྱལ་པོ་མཆོག་ཏུ་ངོ་

མཚར་སྐྱེས་ནས། དེས་བློན་པོ་རྣམས་ལ་སྨྲས་པ། འཚོ་བྱེད་ལ་ལན་གཉིས་སུ་སྨན་པའི་རྒྱལ་པོར་དབང་སྐུར་ཅིག །མི་སྐྲན་ཅན་ལ་འཚོ་བྱེད་ཀྱིས་སྨན་རྙེད་པར་དཀའོ་ཞེས་སྨྲས་པ་གང་ཡིན་པ་དེས་སྨྲས་པ། ལྷ་ཅི་སྲས་ལ་སྡུག་པས་སམ། འོན་ཏེ་སྨན་མཁས་པས་

དབང་བསྐུར་བར་མཛད། རྒྱལ་པོས་སྨྲས་པ། སྨན་མཁས་པས་སོ། །གལ་ཏེ་དེ་ལྟ་ལགས་ན་འདིས་བདག་ནི་སོས་པར་མ་བགྱིས་སོ། །འཚོ་བྱེད་ཀྱིས་སྨྲས་པ། ཀྱེ་ནང་རྗེ་ངས་ཁྱོད་ལ་དཔྱད་ནི་མ་བྱས་ཀྱི། འོན་ཀྱང་ངས་ཁྱོད་ཀྱི་སྨན་ནི་རྙེད་པར་དཀའོ་ཞེས་སྨྲས་སོ། །

དེས་སྨྲས་པ། བདག་གི་སྨན་ཇི་ལྟ་བུ་དག་ཡིན། འཚོ་བྱེད་ཀྱིས་སྨྲས་པ། གལ་ཏེ་ཟླ་བ་མར་གྱི་ངོ་ཚེས་བཅུ་བཞི་ལ་མི་སེར་སྐྱ་ཞིག་ཤི་ནས་དེ་དུར་ཁྲོད་དུ་སྲེག་པ་ན་ནེའུ་ལེ་གདུག་པ་དང་སྲོག་ཆགས་གོ་དྷཱ་ཙན་དན་འཐབས་ནས་མེར་ལྷུང་བ་དང་དེ་གཉིས་ཁྱོད་ཀྱིས་ཟོས་ལ།

เล่ม ๓ · หน้า 67a

དབང་ཕྱུག་ཆེན་པོའི་ལྷས་དུར་ཁྲོད་དུ་ཆར་ཕབ་པའི་འོད་པའི་ཆུ་དེ་ལ་འཐུངས་ལ། ཀོ་དྲའི་ཆན་ཟོས་ཤིང་མར་ཕྱུང་བའི་ཞོ་འཐུངས་ན་དེ་ལྟ་ན་ཁྱོད་སོས་པར་འགྱུར་ཏེ། བདག་གིས་དེ་ལས་བསམས་ནས་སྨན་རྙེད་པར་དཀའོ་ཞེས་སྨྲས་པ་ཡིན་ནོ། །དེས་སྨྲས་པ། ཤིན་

ཏུ་ལེགས་པར་ཤེས་ཏེ། དེ་བཞིན་དུ་བདག་གིས་ཟོས་སོ། །དེ་ནས་དགའ་བར་གྱུར་ནས་སྨྲས་པ། ལྷ་འདིས་སྨན་པའི་རྒྱལ་པོའི་རྔོ་ཐོག་གི་དབང་བསྐུར་བས་དབང་བསྐུར་དུ་གསོལ། ལན་གཉིས་སུ་ཡང་སྨན་པའི་རྒྱལ་པོར་དབང་བསྐུར་ཏོ། །གང་གི་ཚེ་མི་དགེ་བའི་གྲོགས་པོ་ལྷས་

བྱིན་གྱིས་མ་སྐྱེས་དགྲ་བསླུས་ནས་ཕ་ཆོས་ཀྱི་རྒྱལ་པོ་ཆོས་དང་ལྡན་པ་སྲོག་དང་ཕྲལ་བ་དེའི་ཚེ་དེ་ལ་སྐྲན་གྱི་ནད་ཀྱིས་ཐེབས་པར་གྱུར་ཏོ། །དེས་སྨན་པ་རྣམས་ལ་སྨྲས་པ། ང་ལ་དཔྱད་གྱིས་ཤིག །དེ་རྣམས་ཀྱིས་སྨྲས་པ། ལྷ་ལྷའི་གཅེན་སྨན་པའི་རྒྱལ་པོ་བླ་ན་མེད་པ་འཚོ་བྱེད་འདི་ན་མཆིས་

བཞིན་དུ་བདག་ཅག་གིས་དཔྱད་བགྱིད་རྔོ་ག་ལ་ཐོག །དེས་བློན་པོ་རྣམས་ལ་སྨྲས་པ། ཤེས་ལྡན་དག་འཚོ་བྱེད་ཁུག་ཤིག །དེ་རྣམས་ཀྱིས་བཀུག་པ་དང་། འཚོ་བྱེད་ང་ལ་སྐྲན་ནད་བྱུང་གིས་དཔྱད་བྱོས་ཤིག །ལྷ་བགྱིའོ། །དེས་བསམས་པ། རྒྱུ་གཉིས་ཀྱིས་སྐྲན་རྡོལ་བར་འགྱུར་ཏེ།

ལྷག་པར་དགའ་བའམ། ལྷག་པར་ཁྲོས་པས་ཡིན་ན་སེམས་ཅན་སྡིག་པ་བྱེད་པ་འདི་ལྷག་པར་དགའ་བར་ག་ལ་འགྱུར་གྱིས། རྣམ་པ་ཐམས་ཅད་དུ་ཁྲོས་པར་བྱའོ་སྙམ་དུ་བསམས་ནས་སྨྲས་པ། ལྷ་དམ་ཞིག་བཅའ་སྟེ། གལ་ཏེ་གཞོན་ནུ་འཆར་བྱེད་བཟང་པོའི་ཤ་གསོལ་བལྟ་ན་

དཔྱད་བགྱིའོ། །རྒྱལ་པོས་ཐོས་ནས་ཁྲོས་ཏེ་སྨྲས་པ། ལེགས་སོ་ངས་ནི་ཕ་སྲོག་དང་ཕྲལ། ཁྱོད་ཀྱིས་ཀྱང་འཆར་བྱེད་བཟང་པོ་སྲོག་དང་ཕྲོལ། ང་ཡང་རང་ཉིད་ནད་ཀྱིས་ཤི་ནས་ཁྱོད་ནི་རྒྱལ་པོར་འགྱུར་མོད་དེས་སྨྲས་པ། ལྷ་དཔྱད་ནི་འདི་ལགས་ཏེ། གཞན་གྱིས་སོས་པར་རྔོ་མི་

ཐོག་ལགས་སོ། །བདག་དང་འདྲ་བའི་ཕངས་པ་མེད་པས་དེས་ཁས་བླངས་སོ། །དེ་ནས་འཚོ་བྱེད་ཀྱིས་གཞོན་ནུ་འཆར་བྱེད་བཟང་པོ་རྒྱན་ཐམས་ཅད་ཀྱིས་བརྒྱན་ནས་རྒྱལ་པོ་ལ་ཕུལ་ཏེ། ལྷ་གཞོན་ནུ་འཆར་བྱེད་བཟང་པོ་ལ་ལེགས་པར་གཟིགས་པ་དེ་ལྟར་མཛད་དུ་གསོལ། །ཕྱིས་

เล่ม ๓ · หน้า 67b

གཟིགས་པར་མི་འགྱུར་རོ། །དེ་ནས་དེས་བསྟན་ནས་ཁྱིམ་དུ་ཁྲིད་ནས་བཞག་གོ། །དེ་ནས་འཚོ་བྱེད་ཤའི་དོན་དུ་བསིལ་བའི་ཚལ་གྱི་དུར་ཁྲོད་དུ་སོང་བ་ལས་བསིལ་བའི་ཚལ་གྱི་དུར་ཁྲོད་ནི་ཤི་བའི་རོས་སྟོང་པ་མ་ཡིན་པས་དེ་ནས་རོའི་ཤ་བླངས་ཏེ་ཡོ་བྱད་ཀྱི་ཁྱད་པར་དག་དང་གཡོས་བྱས་ནས་

རྒྱལ་པོའི་དྲོ་ལ་བབ་པའི་དུས་སུ་བསྟབས་སོ། །དེ་ནས་རྒྱལ་པོ་མ་སྐྱེས་དགྲས་ཤ་ཁུའི་ཕོར་བ་བླངས་ནས་ཟ་བར་གཟས་པ་དང་འཚོ་བྱེད་ཀྱིས་ཕྲོགས་ནས་ཀླད་དུ་བསྣུན་ཏེ་སྡིག་པ་བྱེད་པ་ཁྱོད་ཀྱིས་ཕ་ཆོས་དང་ལྡན་པ་ཆོས་ཀྱི་རྒྱལ་པོ་སྲོག་དང་ཕྲལ་ལ་བུའི་ཤ་ཡང་ཟ་བར་བྱེད་དམ། དེས་

རྔམས་ནས་སྨྲས་པ། གལ་ཏེ་དེ་ལྟ་ན་ཅིའི་ཕྱིར་གསད་ཅེས་མི་བཟོད་པ་སྐྱེས་པས་དེའི་སྐྲན་རྡོལ་ནས་ཡར་སློན་མར་འཁྲུས་ཏེ། ཁ་ནས་ཁྲག་དང་བཅས་པར་བྱུང་བ་དེ་མཐོང་ནས་བརྒྱལ་ཏེ་ས་ལ་འགྱེལ་ཏོ། །དེ་ནས་ཆུ་གཏོར་ནས་དབུགས་སླར་བྱུང་བ་དང་ཁྲུས་བྱས་ཏེ་འཕྲོད་པའི་

ཟས་བྱིན་པས་སྔོན་གྱི་ཇི་ལྟ་བ་བཞིན་གྱུར་ཏོ། །དེ་ནས་འཚོ་བྱེད་ཀྱིས་གཞོན་ནུ་འཆར་བྱེད་བཟང་པོ་རྒྱན་ཐམས་ཅད་ཀྱིས་བརྒྱན་ནས་ཁྲིད་དེ་རྒྱལ་པོའི་དྲུང་དུ་སོང་ནས་རྐང་པ་གཉིས་ལ་གཏུགས་ཏེ་སྨྲས་པ། ལྷ་གཞོན་ནུ་འཆར་བྱེད་བཟང་པོ་འདི་ལགས་ཏེ། བདག་སྲོག་ཆགས་

གྲོག་སྦུར་ཡང་སྲོག་དང་འབྲལ་བར་བགྱིད་མི་ཕོད་ན་གཞོན་ནུ་ལྟ་སྨོས་ཀྱང་ཅི་འཚལ། འོན་ཀྱང་ཐབས་འདིས་ལྷ་འཚོ་བར་འགྱུར་བས་བདག་གིས་ཐབས་བཤམས་པར་བགྱིས་པར་བས་སོ། །རྒྱལ་པོ་མཆོག་ཏུ་ངོ་མཚར་སྐྱེས་ནས་དེས་བློན་པོ་རྣམས་ལ་བསྒོ་བ། འཚོ་བྱེད་སྨན་པའི་

རྒྱལ་པོར་དབང་སྐུར་ཅིག །བློན་པོ་རྣམས་ཀྱིས་གླང་པོ་ཆེ་ལ་བསྐྱོན་ནས་དཔལ་གྱི་འབྱོར་པ་ཆེན་པོས་ལན་གསུམ་དུ་ཡང་སྨན་པའི་རྒྱལ་པོར་དབང་བསྐུར་བས་དབང་བསྐུར་ཏོ། །དེ་ནས་འཚོ་བྱེད་དྲེགས་པ་སྐྱེས་ནས་བདག་དང་མཉམ་པའི་སྨན་པ་འགའ་ཡང་ཡོད་པ་མ་ཡིན་ཏེ། བདག་

ནི་ལུས་ཀྱི་དཔྱད་བྱེད་པ་རྣམས་ཀྱི་མཆོག་ཡིན་ལ། བཅོམ་ལྡན་འདས་ནི་སེམས་ཀྱི་དཔྱད་མཛད་པ་རྣམས་ཀྱི་མཆོག་ཡིན་ནོ་སྙམ་མོ། །དེས་དུས་གཞན་ཞིག་ན་བཅོམ་ལྡན་འདས་ཀྱི་སྤྱན་སྔར་སོང་བ་ལས་དེ་དྲེགས་པའི་སྙེམས་པས་བདེན་པ་རྣམས་མ་མཐོང་ངོ་། །བཅོམ་ལྡན་

เล่ม ๓ · หน้า 68a

འདས་ཀྱིས་དགོངས་པ། སྨན་པའི་རྒྱལ་པོ་འཚོ་བྱེད་ཀྱིས་དགེ་བའི་རྩ་བ་བསྐྱེད་ན་ཅིའི་ཕྱིར་བདེན་པ་རྣམས་མ་མཐོང་བར་གྱུར་སྙམ་ན། དྲེགས་པའི་སྙེམས་པ་ལས་གྱུར་པར་གཟིགས་ནས་དེའི་དྲེགས་པ་སྤང་བར་བྱའོ་སྙམ་ནས། དེ་ནས་བཅོམ་ལྡན་འདས་ཀྱིས་སྨན་པའི་

རྒྱལ་པོ་འཚོ་བྱེད་ལ་བཀའ་སྩལ་པ། འཚོ་བྱེད་ཁྱོད་ཀྱིས་རིའི་རྒྱལ་པོ་གངས་ཅན་མཐོང་ངམ། བཙུན་པ་མ་མཐོང་ལགས་སོ། །དེ་བཞིན་གཤེགས་པའི་ན་བཟའ་ཆོས་གོས་ཀྱི་མཐའ་ནས་ཟུང་ཤིག །དེས་བཟུང་བ་དང་དེ་ནས་བཅོམ་ལྡན་འདས་ཀྱིས་སྨན་པའི་རྒྱལ་པོ་འཚོ་བྱེད་ཁྲིད་ནས་

རིའི་རྒྱལ་པོ་གངས་ཅན་གང་ན་བ་དེར་གཤེགས་པ་དང་དེ་ན་སྨན་རྣམ་པ་སྣ་ཚོགས་སྒྲོན་མ་བཞིན་འབར་རོ། །བཅོམ་ལྡན་འདས་ཀྱིས་སྨན་པའི་རྒྱལ་པོ་འཚོ་བྱེད་ལ་འདི་སྐད་ཅེས་བཀའ་སྩལ་ཏོ། །འཚོ་བྱེད་སྨན་ཇི་ཙམ་འདོད་པ་ལོང་ཤིག །བཅོམ་ལྡན་འདས་འཇིགས་ལགས་སོ། །དེ་ནས་

བཅོམ་ལྡན་འདས་ཀྱིས་གནོད་སྦྱིན་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་སོང་ལ་འཚོ་བྱེད་ལ་བསྲུང་བ་བྱོས་ཤིག །དེ་དང་སོང་ནས་སྨན་རྣམ་པ་སྣ་ཚོགས་དག་བླངས་ནས། བཅོམ་ལྡན་འདས་ཀྱིས་བཀའ་སྩལ་པ། འཚོ་བྱེད་སྨན་འདིའི་མིང་ཅི་ཡིན། དེས་གསོལ་པ། བཅོམ་ལྡན་

འདས་ཆེ་གེ་མོ་ལགས་ཏེ། ཆོ་ག་འདིས་ནད་ཆེ་གེ་མོ་ཞིག་ཞི་བར་འགྱུར་རོ། །འདི་ནི་ཆེ་གེ་མོ་ཞིག་ལགས་ཏེ་ནད་ཆེ་གེ་མོ་ཞིག་རབ་ཏུ་ཞི་བར་འགྱུར་རོ། །གཞན་རྣམས་ཀྱི་ནི་མིང་ཡང་མི་ཤེས་སོ། །མ་ཤེས་པ་གང་ཡིན་པ་དེ་དག་བཅོམ་ལྡན་འདས་ཀྱིས་བཀའ་སྩལ་པ། འཚོ་བྱེད་འདི་

ནི་ཆེ་གེ་མོ་སྟེ་ཆོ་ག་ཆེ་གེ་མོས་ནད་ཆེ་གེ་མོ་ཞིག་རབ་ཏུ་ཞི་བར་འགྱུར་རོ། །འདི་ཡང་ཆེ་གེ་མོ་ཞིག་ཅེས་བྱའོ། །འཚོ་བྱེད་ཀྱིས་གསོལ་པ། བཅོམ་ལྡན་འདས་ཀྱིས་སྨན་དཔྱད་ཀྱང་མཁྱེན་པ་ལྟ། དེ་ནས་བཅོམ་ལྡན་འདས་ཀྱིས་སྨན་པའི་རྒྱལ་པོ་འཚོ་བྱེད་ལ་བཀའ་སྩལ་པ། འཚོ་

བྱེད་སྨན་པ་ཟུག་རྔུ་འབྱིན་པ་ཡན་ལག་བཞི་དང་ལྡན་པ་ནི་རྒྱལ་པོ་ལ་འོས་པ། རྒྱལ་པོ་ལ་མཁོ་བ། རྒྱལ་པོའི་ཡན་ལག་གི་གྲངས་སུ་འགྲོའོ།། །།འདུལ་བ་གཞི། བམ་པོ་དྲུག་བཅུ་གཉིས་པ། བཞི་གང་དག་ཅེ་ན། འདི་ལ་སྨན་པ་ཟུག་རྔུ་འབྱིན་པ་ནད་ལ་མཁས་པ་

เล่ม ๓ · หน้า 68b

ཡིན། ནད་ཀུན་ནས་སློང་བ་ལ་མཁས་པ་ཡིན། ནད་བྱུང་བ་སྤོང་བ་ལ་མཁས་པ་ཡིན། སྤངས་པ་ཕྱིས་མི་འབྱུང་བ་ལ་མཁས་པ་ཡིན་ཏེ། ནད་ལ་མཁས་པ་ཇི་ལྟ་བུ་ཞེ་ན། འདི་ལ་སྨན་པ་ཟུག་རྔུ་འབྱིན་པ་ནད་ཤེས་ཤིང་ནད་འདི་ནི་འདི་ལྟ་བུ་དང་འདི་ལྟ་བུ་ཡིན་ནོ་ཞེས་དེ་ལྟར་ནད་ལ་

མཁས་པ་ཡིན་ནོ། །ནད་ཀུན་ནས་སློང་བ་ལ་མཁས་པ་ཇི་ལྟ་བུ་ཞེ་ན། འདི་ལ་སྨན་པ་ཟུག་རྔུ་འབྱིན་པ་ནད་ཤེས་ཤིང་ནད་འདི་ནི་རླུང་གིས་ཀུན་ནས་བསླང་བའམ། མཁྲིས་པས་ཀུན་ནས་བསླང་བའམ། བད་ཀན་གྱིས་ཀུན་ནས་བསླང་བའམ། བདག་ལས་གྱུར་པའམ། གཞན་ལས་

གྱུར་པའམ། འདུས་པ་ལས་གྱུར་པའོ་ཞེས་དེ་ལྟར་ནད་ཀུན་ནས་སློང་བ་ལ་མཁས་པ་ཡིན་ནོ། །ནད་བྱུང་བ་སྤོང་བ་ལ་མཁས་པ་ཇི་ལྟ་བུ་ཞེ་ན། འདི་ལ་སྨན་པ་ཟུག་རྔུ་འབྱིན་པ་ནད་ཤེས་ཤིང་ནད་འདི་ནི་མིག་སྨན་ནམ། སྐུ་མཉེའམ། སྐྱུག་སྨན་ནམ། བཀྲུ་སྨན་ནམ། སྣར་བླུགས་

པའམ། དུ་བས་བདུག་པའམ། ནན་རྩིའི་ལས་ཀྱིས་སྤང་བར་འགྱུར་རོ་ཞེས་དེ་ལྟར་ནད་བྱུང་བ་སྤོང་བ་ལ་མཁས་པ་ཡིན་ནོ། །ནད་སྤངས་པ་ཕྱིས་མི་འབྱུང་བ་ལ་མཁས་པ་ཇི་ལྟ་བུ་ཞེ་ན། འདི་ལ་སྨན་པ་ཟུག་རྔུ་འབྱིན་པ་ནད་ཤེས་ཤིང་ནད་འདི་ནི་འཕྲོད་པའི་ཆོ་ག་འདི་ལྟ་བུ་དང་འདི་ལྟ་བུ་

དག་བྱས་ཏེ་སྤངས་ན་ཕྱིས་མི་འབྱུང་ངོ་ཞེས་དེ་ལྟར་ནད་སྤངས་པ་ཕྱིས་མི་འབྱུང་བ་ལ་མཁས་པ་ཡིན་ཏེ། དེ་ལྟར་ན་སྨན་པ་ཟུག་རྔུ་འབྱིན་པ་ཡན་ལག་བཞི་དང་ལྡན་པ་རྒྱལ་པོ་ལ་འོས་པ་ཡིན། རྒྱལ་པོ་ལ་མཁོ་བ་ཡིན། རྒྱལ་པོའི་ཡན་ལག་གི་གྲངས་སུ་འགྲོ་བ་ཡིན་ནོ། །དེ་བཞིན་

དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡན་ལག་བཞི་དང་ལྡན་པ་ཡང་སྨན་པ་ཟུག་རྔུ་འབྱིན་པ་བླ་ན་མེད་པ་ཞེས་བྱའོ། །འཚོ་བྱེད་བཞི་གང་དག་ཅེ་ན། འདི་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་

འདི་ནི་སྡུག་བསྔལ་འཕགས་པའི་བདེན་པའོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ་ཞེས་ཡང་དག་པ་ཇི་ལྟ་བ་

เล่ม ๓ · หน้า 69a

བཞིན་དུ་རབ་ཏུ་མཁྱེན་ཏོ། །འཚོ་བྱེད་སྨན་པ་ཟུག་རྔུ་འབྱིན་པས་ནི་སྐྱེ་བའི་རྩ་བ་ཅན་གྱི་སྡུག་བསྔལ་རྣམས་སྤང་བའི་སྨན་མི་ཤེས་སོ། །རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་

པའི་རྩ་བ་ཅན་གྱི་སྡུག་བསྔལ་རྣམས་སྤང་བའི་སྨན་མི་ཤེས་སོ། །འཚོ་བྱེད་དེ་བཞིན་གཤེགས་པས་ནི་སྐྱེ་བའི་རྩ་བ་ཅན་གྱི་སྡུག་བསྔལ་རྣམས་སྤང་བའི་སྨན་མཁྱེན་ཏོ། །རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་

བདེ་བ་དང་། འཁྲུག་པའི་རྩ་བ་ཅན་གྱི་སྡུག་བསྔལ་རྣམས་སྤང་བའི་སྨན་མཁྱེན་ཏོ། །དེ་ལྟ་བས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་སྨན་པ་ཟུག་རྔུ་འབྱིན་པ་བླ་ན་མེད་པ་ཞེས་བྱའོ། །ཆོས་ཀྱི་རྣམ་གྲངས་འདི་བཤད་པ་ན་འཚོ་བྱེད་གཞོན་

ནུས་བསྐྱེད་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་འཚོ་བྱེད་གཞོན་ནུས་བསྐྱེད་ཀྱིས་ཆོས་མཐོང་བ་དང་། ཆོས་ཐོབ་པ་དང་། ཆོས་རིག་པ་དང་། ཆོས་ཀྱི་གཏིང་སླེབས་པ་དང་། སོམ་ཉི་ལས་རྒལ་བ་དང་། ཐེ་ཚོམ་ལས་རྒལ་བ་དང་། གཞན་གྱི་

དྲིང་མི་འཇོག་པ་དང་། གཞན་གྱིས་མི་བཀྲི་བ་དང་། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་

ཏོ། །བཙུན་པ་བདག་ནི་འཕགས་སོ། །མངོན་པར་འཕགས་སོ། །བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ན། བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོ་བའི་བར་དུ་སྲོག་དང་བསྡོས་ཏེ་སྐྱབས་སུ་མཆི་བར་

མངོན་པར་དད་ལགས་སོ། །དེ་ནས་སྨན་པའི་རྒྱལ་པོ་འཚོ་བྱེད་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །རིའི་རྒྱལ་པོ་གངས་ཅན་ཁ་བས་ཡོག་སྟེ་རྟག་ཏུ་ལྷགས་པ་ཆེ་བས་བཅོམ་ལྡན་འདས་གྲང་ནད་ཀྱི་སྙུན་

เล่ม ๓ · หน้า 69b

གྱིས་ཐེབས་པ་དང་སྨན་པའི་རྒྱལ་པོ་འཚོ་བྱེད་ཀྱིས་བསམས་པ། དཔེར་ན་འཁོར་ལོས་སྒྱུར་བའི་རྒྱལ་པོ་ལ་བྱ་བ་བཞིན་བདག་ཉིད་ཁོ་ནས་བཅོམ་ལྡན་འདས་ལ་རིམ་གྲོ་བྱའོ་སྙམ་མོ། །དེ་ནས་འཚོ་བྱེད་ཀྱིས་མེ་ཏོག་ཨུཏྤ་ལ་སུམ་བཅུ་རྩ་གཉིས་དང་བཀྲུ་སྨན་གྱི་རྫས་དང་སྦྱར་

ནས། བཅོམ་ལྡན་འདས་ལ་ཕུལ་ཏེ། བཅོམ་ལྡན་འདས་འདི་རྣམས་ཤངས་ཀྱིས་བསྣམ་དུ་གསོལ། བཅོམ་ལྡན་འདས་ཀྱིས་བསྣམས་པ་ལས་ཐང་སུམ་བཅུ་རྩ་གཉིས་ཁོ་ན་འཁྲུས་པར་གྱུར་ཏོ། །དེ་ནས་བཅོམ་ལྡན་འདས་ལ་ཞུས་པ། བཅོམ་ལྡན་འདས་ཅི་ག་ལེགས་

པར་འཁྲུས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འཚོ་བྱེད་སྐྱོན་གང་དག་གཡོས་ལ་མ་འཁྲུས་པ་དེ་དག་ཀྱང་ཡོད། འཁྲུས་ལ་མ་གཡོས་པ་ཡང་ཡོད། འཁྲུས་ལ་གཡོས་པ་ཡང་ཡོད། མ་འཁྲུས་ལ་མ་གཡོས་པ་ཡང་ཡོད་དོ། །འཚོ་བྱེད་ཀྱིས་

གསོལ་པ། བཅོམ་ལྡན་འདས་གལ་ཏེ་དེ་ལྟ་ན་བུ་རམ་དང་ཨ་རུ་ར་གསོལ་ལ་ཁུ་བའི་རིམ་པ་ཡང་མཛོད་ཅིག །བཅོམ་ལྡན་འདས་ཀྱིས་དེ་བཞིན་དུ་མཛད་ནས་སྙུན་གདངས་པར་གྱུར་ཏོ། །འཚོ་བྱེད་ཀྱི་ཀུན་ཏུ་སྤྱོད་པ་ནི་རྒྱལ་པོའམ། བློན་པོ་གང་སུའི་དཔྱད་བྱས་ཀྱང་རུང་སྟེ། དེས་

དེ་ལ་གྲོང་ངམ། གྲོང་མཆོག་སྦྱིན་པར་བྱེད་པ་ཡིན་ནོ། །ཇི་ཙམ་དུས་གཞན་ཞིག་ན་འཚོ་བྱེད་ཀྱིས་ལུས་འཕགས་ཀྱི་རྒྱལ་པོ་ལ་དཔྱད་བྱས་པ་ལས་དེས་དེ་ལ་བརྒྱ་སྟོང་རི་བའི་གོས་བེའུ་རས་ཡུག་པོ་ཆེ་ཞིག་བྱིན་པ་དང་། དེས་དེ་བླངས་ནས་བཅོམ་ལྡན་འདས་གང་ན་དེར་སོང་སྟེ་ཕྱིན་

པ་དང་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་འཚོ་བྱེད་གཞོན་ནུས་བསྐྱེད་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་གི་ཀུན་ཏུ་སྤྱོད་པ་ནི་རྒྱལ་པོའམ། བློན་པོ་གང་སུའི་

དཔྱད་བགྱིས་ཀྱང་རུང་སྟེ། དེས་བདག་ལ་གྲོང་ངམ། གྲོང་མཆོག་སྩོལ་བ་ལགས་པས་བདག་གིས་ལུས་འཕགས་ཀྱི་རྒྱལ་པོ་ལ་དཔྱད་བགྱིས་པ་དང་དེས་བདག་ལ་བརྒྱ་སྟོང་རི་བའི་རས་ཞིག་སྩལ་བ་འདི་བཅོམ་ལྡན་འདས་ལ་བདག་འབུལ་ཞིང་མཆིས་ན། བཅོམ་ལྡན་འདས་ཀྱིས་

เล่ม ๓ · หน้า 70a

ཐུགས་བརྩེ་བ་ཉེ་བར་བཟུང་སྟེ་འདི་བཞེས་སུ་གསོལ། བཅོམ་ལྡན་འདས་ཀྱིས་འཚོ་བྱེད་གཞོན་ནུས་བསྐྱེད་ལས་བརྒྱ་སྟོང་རི་བའི་གོས་བེའུ་རས་ཡུག་པོ་ཆེ་བཞེས་སོ། །དེའི་ཚེ་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་སྣམ་ལོགས་ན་བསིལ་ཡབ་ཐོགས་ཏེ་

བཅོམ་ལྡན་འདས་ལ་གཡོབ་ཅིང་འདུག་གོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་བརྒྱ་སྟོང་རི་བའི་གོས་བེའུ་རས་ཡུག་པོ་ཆེ་ལོང་ལ་ངའི་ཆེད་དུ་གྲིས་དྲོས་ཤིག །དེ་ནས་ཚེ་དང་ལྡན་པ་ཀུན་དགའ་བོས་བླངས་ཏེ་ས་ཕྱོགས་གསལ་ལ་

ཡངས་པར་སོང་ནས་གཞལ་བར་བརྩམས་པ་ལས་ཆོས་གོས་མང་དུ་ལྡང་བར་མཐོང་ངོ་། །དེ་ནས་དེས་བཅོམ་ལྡན་འདས་ཀྱི་ན་བཟའ་ཆོས་གོས་གསུམ་དང་བདག་ཉིད་ཀྱི་བླ་གོས་མཐང་གོས་དང་བཅས་པ་དང་། ཚེ་དང་ལྡན་པ་སྒྲ་ཅན་ཟིན་གྱི་རལ་ཆུང་དཔུང་ཆད་ཅིག་བྱས་སོ། །བཅོམ་

ལྡན་འདས་ཀྱིས་དབྱར་གྱི་གནས་དེར་རས་ལྔ་བརྒྱ་བརྙེས་ཤིང་དགེ་སློང་གི་དགེ་འདུན་གྱིས་ཀྱང་དུ་མ་ཞིག་རྙེད་ན་དགེ་སློང་རྣམས་ཀྱིས་ཇི་ལྟར་བསྒྲུབ་པར་བྱ་བ་མ་ཤེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེའི་

ཕྱིར་རྗེས་སུ་གནང་སྟེ། དགེ་སློང་རྣམས་ཀྱིས་ཁྱིམ་པའི་གོས་གྲིས་དྲས་ཏེ་ཁ་དོག་ངན་པར་བྱས་པ་བཅང་བར་བྱའོ། །རྒྱལ་པོ་གཟུགས་ཅན་སྙིང་པོའི་ཀུན་ཏུ་སྤྱོད་པ་ནི་དགེ་སློང་ངམ་དགེ་སློང་མ་མཐོང་ན་གླང་པོ་ཆེ་ལས་བབས་ནས་རྐང་པ་ལ་ཕྱག་བྱེད་པ་ཡིན་ནོ། །དེ་དུས་གཞན་

ཞིག་ན་གླང་པོ་ཆེ་ལ་ཞོན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། ཕྱོགས་གཅིག་ཏུ་སོང་བ་ལས། ཇི་ཙམ་ན་ལམ་གྱི་དབུས་ནས་འཚོ་བ་པ་ཞིག་མཐོང་ནས་དེ་དེ་ལ་གུས་པ་བསྐྱེད་དེ་གླང་པོ་ཆེ་ལ་བབས་ནས་རྐང་པ་གཉིས་ལ་གཏུགས་སོ། །དེ་ན་མ་དད་

པ་གང་ཡིན་པ་དེ་དག་གིས་བསམས་པ། ལྷ་ནི་དགེ་སློང་འབའ་ཞིག་ལ་མངོན་པར་དད་པ་མ་ཡིན་ནོ། །དད་པ་ཅན་གང་ཡིན་པ་དེ་དག་གིས་བསམས་པ་ནི་གདོན་མི་ཟ་བར་ལྷས་དགེ་སློང་ཡིན་སྙམ་སྟེ། དེ་གུས་པས་གླང་པོ་ཆེ་ལས་བབས་ནས་རྐང་པ་གཉིས་ལ་གཏུགས་སོ་

เล่ม ๓ · หน้า 70b

སྙམ་ནས་དེ་རྣམས་ཡིད་གཉིས་སུ་གྱུར་ཏེ་རྒྱལ་པོ་ལ་སྨྲས་པ། ལྷ་སུ་ལ་ཕྱག་བགྱིས། བཅོམ་ལྡན་འདས་ཀྱི་ཉན་ཐོས་ལའོ། །ལྷ་དེ་ནི་བཅོམ་ལྡན་འདས་ཀྱི་ཉན་ཐོས་མ་ལགས་ཏེ། འཚོ་བ་པ་ལགས་སོ། །དེ་ནས་རྒྱལ་པོ་གཟུགས་ཅན་སྙིང་པོས་འདི་སྙམ་དུ་སེམས་ཏེ། བདག་

གི་དོན་འདི་ཁོ་ན་གསོལ་ལོ་སྙམ་ནས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་

བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་གི་ཀུན་ཏུ་སྤྱོད་པ་ནི་དགེ་སློང་ངམ་དགེ་སློང་མ་མཐོང་ན་གླང་པོ་ཆེ་ལ་བབས་ནས་དེའི་རྐང་པ་ལ་ཕྱག་བགྱིད་པ་ལགས་པས། དེ་རིང་བདག་གུས་པ་སྐྱེས་ནས་གླང་པོ་ཆེ་ལས་བབས་ཏེ་དགེ་སློང་ལགས་སྙམ་ནས་འཚོ་བ་

པའི་རྐང་པ་ལ་གཏུགས་ལགས་ཀྱིས། ཀྱེ་མའོ་བཅོམ་ལྡན་འདས་ཀྱིས་ཐུགས་བརྩེ་བ་ཉེ་བར་བཟུང་སྟེ། འཕགས་པ་རྣམས་ཀྱི་ཆོས་གོས་རྣམས་ལ་མཚན་མ་ཅུང་ཟད་ཅིག་གདབ་ཏུ་གསོལ། བཅོམ་ལྡན་འདས་ཀྱིས་རྒྱལ་པོ་གཟུགས་ཅན་སྙིང་པོ་ལ་ཅང་མི་གསུང་བས་གནང་ངོ་། །དེ་

ནས་རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་སོང་ངོ་། །དེ་ན་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་འཚོ་བ་པ་གང་གིས་བདེན་པ་མཐོང་བ་

ལས་ཕྱག་བདག་གིར་བྱས་པ་ནི་ཉམས་ཏེ་མ་རུང་ངོ་། །དེའི་ཚེ་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་སྣམ་ལོགས་ན་བསིལ་ཡབ་ཐོགས་ཏེ། བཅོམ་ལྡན་འདས་ལ་གཡོབ་ཅིང་འདུག་གོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་

དགའ་བོ་ཁྱོད་ཀྱིས་ལུས་འཕགས་ཀྱི་རི་བོ་མཐོང་ངམ། བཙུན་པ་མ་མཐོང་ལགས་སོ། །དེ་བཞིན་གཤེགས་པའི་ན་བཟའ་ཆོས་གོས་ཀྱི་མཐའ་ནས་ཟུང་ཤིག །དེས་བཟུང་བ་དང་། དེ་ནས་བཅོམ་ལྡན་འདས་ཀྱིས་རྒྱལ་པོའི་ཁབ་ནས་མི་སྣང་བར་མཛད་པས་དེ་ཉིད་ནས་རྫུ་འཕྲུལ་གྱིས་

เล่ม ๓ · หน้า 71a

སྟེང་གི་ནམ་མཁའ་ལས་གཤེགས་ནས་ལུས་འཕགས་ཀྱི་རི་བོ་ལ་བཞུགས་སོ། །དེའི་ཚེ་མ་ག་དྷཱའི་མི་རྣམས་ཀྱི་ཞིང་མཉམ་ཞིང་ཉེ་འཁོར་མཉམ་པ་རྣང་གི་ཁྱད་པར་སྣ་ཚོགས་དག་རྣང་སྒལ་གྱིས་འབྲེལ་ཅིང་མཛེས་པ་དག་གཟིགས་ནས་ཚེ་དང་ལྡན་པ་ཀུན་དགའ་

བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཞིང་མཉམ་ཞིང་ཉེ་འཁོར་མཉམ་ལ་རྣང་གི་ཁྱད་པར་སྣ་ཚོགས་པ་དག་རྣང་སྒལ་གྱིས་འབྲེལ་བར་མཛེས་པ་དེ་དག་མཐོང་ངམ། བཙུན་པ་མཐོང་ལགས་སོ། །ཀུན་དགའ་བོ་དེ་ལྟ་བས་ན་དགེ་སློང་རྣམས་ཀྱིས་འདི་ལྟ་བུར་ཆོས་གོས་

དག་དྲས་ཏེ་དྲུབ་པར་བྱའོ། །གནས་བརྟན་ཀུན་དགའ་བོས་དགེ་སློང་རྣམས་ལ་སྨྲས་པ། ཁྱེད་ཀྱིས་འདི་ལྟ་བུར་ཆོས་གོས་རྣམས་དྲོས་ལ་དྲུབས་ཤིག །དགེ་སློང་རྣམས་ཀྱིས་ཆོས་གོས་དག་དྲས་ཏེ་དྲུབ་པར་བརྩམས་པ་ན་སྣམ་བུ་རྣམས་ཁ་ཕྱོགས་གཅིག་ཏུ་བསྟན་པས་མི་མཛེས་ནས་ཚེ་

དང་ལྡན་པ་ཀུན་དགའ་བོས་བསམས་པ། བཅོམ་ལྡན་འདས་ཀྱིས་བཀའ་མ་སྩལ་མོད་ཀྱི། འདི་ཁོ་ནས་རྐྱེན་བྱས་ནས་གནང་བར་འགྱུར་བའི་གནས་དེ་ཡོད་དོ་སྙམ་ནས་དེས་སྣམ་བུ་རྣམས་ཁ་ཕྱོགས་གཉིས་ཀར་བསྟན་ན་འོན་ཀྱང་མཐའ་སྐོར་མེད་པས་མཛེས་པར་མ་གྱུར་ནས་མཐའ་

སྐོར་བྱས་སོ། །དེ་ནས་བྱས་ཤིང་ཟིན་པ་དང་བཅོམ་ལྡན་འདས་ལ་ཕུལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ལེགས་སོ་ལེགས་སོ། །ངས་གང་གི་ཕྱིར་བཀའ་སྩལ་པ། དེ་ཁྱོད་ཀྱིས་ཤེས་ཏེ། དེ་ལྟ་བས་ན་དགེ་སློང་རྣམས་ཀྱིས་འདི་ལྟ་བུར་ཆོས་གོས་

རྣམས་དྲས་ལ་དྲུབ་པར་བྱའོ། །དགེ་སློང་རྣམས་ཀྱིས་ཆོས་གོས་དྲས་ཤིང་དྲུབས་པ་རེ་རེ་བཅངས་ནས་ལྷག་མ་ནི་མ་དྲས་སོ། །དེ་ནས་བཅོམ་ལྡན་འདས་ཡུལ་མ་ག་དྷཱའི་ལྗོངས་རྒྱུ་ཞིང་གཤེགས་ཏེ། འབྲོག་གནས་སུ་བྱོན་ནས་འབྲོག་གནས་ན་འབྲོག་གནས་ཀྱི་ཚལ་ན་བཞུགས་སོ། །

འབྲོག་གནས་འབབ་ཆུ་དང་ཉེ་བར་གྲང་ཞིང་རླུང་ལྡང་བར་གྱུར་ནས། བཅོམ་ལྡན་འདས་ཀྱིས་ཐུན་དང་པོ་ལ་མཐང་གོས་གསོལ་ཏོ། །ཐུན་པར་པ་ལ་བླ་གོས་གསོལ་ཏོ། །ཐུན་ཐ་མ་ལ་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ང་ལ་སྣམ་སྦྱར་གྱིས་གཡོགས་ཤིག །

เล่ม ๓ · หน้า 71b

དེ་ནས་ཚེ་དང་ལྡན་པ་ཀུན་དགའ་བོས་ལག་པ་གཉིས་བཀྲུས་ནས་སྣམ་སྦྱར་གྱིས་བཅོམ་ལྡན་འདས་ཀྱི་སྟེང་དུ་གཡོགས་ཏེ། བཅོམ་ལྡན་འདས་ཀྱིས་ན་བཟའ་ཆོས་གོས་གསུམ་གྱིས་མཚན་མོ་དེ་འདས་པར་མཛད་དོ། །དེ་ནས་ནམ་ནངས་ནས་དགོངས་པ་འཇིག་རྟེན་ན་ཤིན་ཏུ་སྐྱིད་པ་

བདེ་བ་འདོད་པ་གང་ཡིན་པ་སུ་ཡང་རུང་དེ་རྣམས་ཀྱི་མཆོག་ནི་ང་ཡིན་ཏེ། ང་ཡང་ཆོས་གོས་གསུམ་གྱིས་འཚོ་བར་སྤྱད་ན་ངའི་ཉན་ཐོས་རྣམས་ལྟ་སྨོས་ཀྱང་ཅི་དགོས་སྙམ་དུ་དགོངས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་དགེ་སློང་རྣམས་ཀྱིས་དྲས་པའི་

ཆོས་གོས་གསུམ་བཅང་བར་བྱའོ། །བཅོམ་ལྡན་འདས་ཀྱིས་དྲས་པའི་ཆོས་གོས་གསུམ་བཅང་བར་བྱའོ་ཞེས་བཀའ་སྩལ་ན། དགེ་སློང་ཞིག་ལ་ཆོས་གོས་གསུམ་པ་མེད་ནས་དེས་ཕྱིང་བ་ཞིག་རྙེད་ནས་དེས་དེ་དྲ་བར་བརྩམས་སོ། །བཅོམ་ལྡན་འདས་ཀྱང་ཕྱོགས་དེར་གཤེགས་ནས་

སྨྲས་པ། དགེ་སློང་འདི་ཅི་ཡིན། བཙུན་པ་བཅོམ་ལྡན་འདས་ཀྱིས་དགེ་སློང་རྣམས་ཀྱིས་དྲས་པའི་ཆོས་གོས་གསུམ་བཅང་བར་བྱའོ་ཞེས་བཀའ་སྩལ་ན། བདག་ལ་ཆོས་གོས་གསུམ་པ་མ་མཆིས་ནས་བཙལ་བ་ལས། བདག་གིས་ཕྱིང་བ་འདི་རྙེད་དེ་དྲས་ནས་ཆོས་གོས་བགྱིའོ། །

དགེ་སློང་འདི་ནི་དྲ་བའི་འོས་མ་ཡིན་ནོ། །འོན་ཀྱང་ལྷན་ཐབས་ཀྱིས་གླན་པའི་འོས་ཡིན་པས་ལྷན་ཐབས་ཀྱིས་གླན་ནས་བཅང་བར་བྱའོ་ཞེས་བཀའ་སྩལ་ནས་གཤེགས་ཏེ། དགེ་སློང་གི་དགེ་འདུན་བསྡུས་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་

སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་སློང་ཆེ་གེ་མོ་ཞེས་བྱ་བ་ལ་ཆོས་གོས་མེད་ནས་ཕྱིང་བ་ལ་འདྲ་བར་བྱེད་ཀྱིས། དགེ་སློང་དག་དེ་ལྟ་བས་ན་མི་དྲ་བ་ནི་ལྔ་སྟེ། ཕྱིང་པ་ཐམས་ཅད་དང་། སྣམ་བུ་ཐམས་

ཅད་དང་། བེའུ་རས་ཐམས་ཅད་དང་། སེང་རས་ཐམས་ཅད་དང་། ཀླམ་ཐམས་ཅད་དེ། ལྷན་ཐབས་ཀྱིས་གླན་ནས་བཅང་བར་བྱའོ། །གླེང་གཞི་ནི་མཉན་ཡོད་ནའོ། །ཀོ་ས་ལའི་རྒྱལ་པོ་གསལ་རྒྱལ་གྱི་བློན་པོའི་མཆོག་རི་དགས་འཛིན་ཅེས་བྱ་བ་དེས་རིགས་

เล่ม ๓ · หน้า 72a

མཉམ་པ་ལས་ཆུང་མ་བླངས་ཏེ་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་སོ་ཞེས་བྱ་བ་ནས་དེ་བཞིན་དུ་ཁྱེའུ་བདུན་བཙས་ཏེ། དེ་ལ་དྲུག་གི་

མིང་ནི་ཅི་དགའ་བར་བཏགས་སོ། །ཐ་ཆུངས་གང་ཡིན་པ་དེའི་མིང་ནི་ས་ག་ཞེས་བྱ་བར་བཏགས་སོ། །ཇི་ཙམ་ན་རི་དགས་འཛིན་གྱི་ཆུང་མ་ཤི་ནས། དེས་བུ་དྲུག་གི་ཁྱིམ་ཕུབ་པ་དང་དེ་རྣམས་རང་རང་གི་ཆུང་མ་རྣམས་དང་ལྷན་ཅིག་བྱི་དོར་ལྷུར་ལེན་ཅིང་ཁྱིམ་གྱི་འཚོ་ནམ་མི་སེམས་

པར་འདུག་གོ། །ཁྱིམ་བདག་རི་དགས་འཛིན་འགྲམ་པ་ལ་ལག་པ་གཏད་ནས་སེམས་ཁོང་དུ་ཆུད་ཅིང་འདུག་གོ། །དེའི་གྲོགས་བཤེས་བྲམ་ཟེ་ཞིག་ཡོད་པ་དེ་འོངས་ནས་དེས་དེ་སེམས་ཁོང་དུ་ཆུད་པ་མཐོང་ནས་སྨྲས་པ། ཁྱིམ་བདག་ཅིའི་ཕྱིར་སེམས་ཁོང་དུ་ཆུད། བདག་གི་

བུ་འདི་དག་རང་རང་གི་ཆུང་མ་དང་ལྷན་ཅིག་བྱི་དོར་ལྷུར་ལེན་ཅིང་ཁྱིམ་གྱི་འཚོ་ནམ་མི་སེམས་པར་འདུག་པས་ཁྱིམ་ཞིག་པར་འགྱུར་རོ། །དེས་སྨྲས་པ། ཅིའི་ཕྱིར་ས་ག་ལ་ཁྱིམ་མི་དབུབ་གལ་ཏེ་ན་ཡང་ལྷག་པར་ཕུང་ཀྲོལ་བྱེད་ཀྱང་སུས་ཤེས། གལ་ཏེ་ན་འདི་ལྷག་པར་ལེགས་པར་

བྱེད་ཀྱང་སུས་ཤེས། གལ་ཏེ་ཁྱོད་དད་ན་བུ་མོ་ཞིག་བཙལ་ལོ། །དེ་བཞིན་དུ་གྱིས་ཤིག །དེ་ཚོལ་ཞིང་རིམ་གྱིས་ཡུལ་ཙམ་པར་ཕྱིན་ཏོ། །ཙམ་པ་ན་ཁྱིམ་བདག་སྟོབས་ཀྱི་བཤེས་གཉེན་ཞེས་བྱ་བ་ཡོད་དེ། དེའི་བུ་མོ་ས་ག་མ་ཞེས་བྱ་བ་གཟུགས་བཟང་བ། དར་ལ་བབ་པ།

ཚུལ་དང་དུལ་བ་དང་ལྡན་པ། མཁས་པ། གཡེར་བ་ཞིག་ཡོད་པ་དེ་བུ་མོ་ཡིད་འཕྲོག་མ་གང་འདོད་པ་རྣམས་དང་ལྷན་ཅིག་ཏུ་སྐྱེད་མོས་ཚལ་གྱི་གཞིར་ཆས་པ་དང་བྲམ་ཟེ་དེ་ཡང་ཕྱོགས་དེར་ཕྱིན་ཏེ། དེས་བུ་མོ་རྣམས་མཐོང་ནས་དེས་བསམས་པ། འདི་རྣམས་ཁོ་ན་ལ་རེ་ཞིག་

བརྟག་པར་བྱའོ་སྙམ་ནས་དེ་བརྟག་པ་ལྷུར་ལེན་ཅིང་དལ་བུས་འདབ་ཅིང་དེ་རྣམས་ཀྱི་ཕྱི་བཞིན་དུ་སོང་ངོ་། །བུད་མེད་ནི་ཕལ་ཆེར་ཡང་བའི་རང་བཞིན་ཅན་ཡིན་པས་དེ་རྣམས་ལས་ཁ་ཅིག་ནི་བང་རྒྱུག །ཁ་ཅིག་ནི་མཆོང་བར་བྱེད། ཁ་ཅིག་ནི་འགྲེ། ཁ་ཅིག་ནི་དགོད། ཁ་ཅིག་

เล่ม ๓ · หน้า 72b

ནི་ལུས་སྒྱུར་བར་བྱེད། ཁ་ཅིག་ནི་གླུ་ལེན་པར་བྱེད། འདི་དག་དང་གཞན་ཡང་སྤྱོད་ཚུལ་ངན་པ་དག་བྱེད་དོ། །དུལ་བ་ཕུན་སུམ་ཚོགས་པ་དེ་ནི་གོམ་པ་དལ་གྱིས་དེ་དག་དང་ལྷན་ཅིག་འགྲོའོ། །ཇི་ཙམ་ན་སྐྱེད་མོས་ཚལ་དུ་ཕྱིན་པ་དང་བུ་མོ་དེ་རྣམས་ནི་རྫིང་གི་འགྲམ་དུ་གོས་

རྣམས་བཞག་ནས་མོད་ལ་ཞུགས་ཏེ་རྩེ་བར་བརྩམས་སོ། །དེ་ནི་ཇི་ཙམ་ཇི་ཙམ་ཆུར་ནུབ་པ་དེ་ཙམ་དེ་ཙམ་དུ་གོས་དག་རྗེ་ཞིང་འཇུག་ལ། ཇི་ཙམ་ཇི་ཙམ་ལྡང་བ་དེ་ཙམ་དེ་ཙམ་དུ་གོས་དག་འབེབས་ཤིང་ལྡང་སྟེ། དེ་ལྟ་བུར་སྤྱོད་ལམ་ཞི་བ་ཡིན་ནོ། །དེ་ནས་ཁྲུས་ཀྱི་བརྩོན་པ་

བྱས་ནས་གནས་གཅིག་ཏུ་འདུག་པ་དང་། བུ་མོ་དེ་རྣམས་ནི་ཐོག་མར་རང་ཟས་ཟོས་ནས་དེའི་འོག་ཏུ་འཁོར་གྱི་སྐྱེ་བོ་ལ་སྦྱིན་པར་རྩོམ་མོ། །དེ་ནི་འཁོར་གྱི་སྐྱེ་བོ་ལ་སྔར་བྱིན་ནས་དེའི་འོག་ཏུ་རང་ཟ་བར་རྩོམ་མོ། །དེ་ནས་ཟོས་ཤིང་འཐུངས་ནས་སྐྱེད་མོས་ཚལ་གྱི་བདེ་བ་ཉམས་

སུ་མྱོང་བར་བྱས་ནས་དོང་ངོ་། །ཇི་ཙམ་ན་ལམ་ཀར་ཆུ་རྒལ་བར་བྱེད་པ་ན་བུ་མོ་དེ་རྣམས་ནི་མཆིལ་ལྷམ་ཕུད་ནས་རྒལ་ལོ། །དེ་ནི་མཆིལ་ལྷམ་དང་བཅས་པས་དོང་ངོ་། །ཡང་དོང་སྟེ། དེ་དག་ཀུན་དགའི་ར་བར་ཞུགས་པ་དང་དེས་ནི་གདུགས་ཐོགས་ཏེ་ཨ་མྲའི་ཚལ་ནས་

བྱུང་ངོ་། །གཞན་དག་གིས་གདུགས་རྣམས་བོར་རོ། །དེ་ནས་རླུང་དང་ཆར་པ་བབ་ནས་དེའི་ཚེ་བུ་མོ་རྣམས་ལྷ་ཁང་དུ་ཞུགས་ནས་འདུག་གོ། །དེ་ནི་བླ་གབ་མེད་པ་ནའོ། །བྲམ་ཟེ་དེ་ཡང་དེའི་རྗེས་བཞིན་དུ་སོང་བ་ལས་དེས་དེའི་མཚན་ཉིད་དང་སྤྱོད་ཚུལ་དེ་ལྟ་བུ་མཐོང་ནས། དེ་

ནས་ངོ་མཚར་སྐྱེས་ཏེ་བུ་མོ་དེ་ལ་དྲི་བར་བརྩམས་པ། བུ་མོ་ཁྱོད་སུའི་སྟོབས་ཀྱི་བཤེས་གཉེན་གྱི་བུ་མོའོ། །བུ་མོ་ཁྱོད་ལ་ཅུང་ཟད་ཅིག་དྲིས་མ་ཁྲོ་ཞིག །དེས་འཛུམ་པ་སྔོན་དུ་བཏང་ནས་སྨྲས་པ། ཁུ་གུ་འདི་ལ་ཁྲོར་ཅི་མཆིས་དྲིས་ཤིག །བུ་མོ་འདི་དག་ཐམས་

ཅད་ནི་རྒྱུག་པ་དང་། མཆོང་བ་དང་། འགྲེ་བ་དང་། ལུས་སྒྱུར་བར་བྱེད་པ་དང་། གླུ་ལེན་པར་བྱེད་ཅིང་འདི་དག་དང་གཞན་ཡང་སྤྱོད་ཚུལ་ངན་པ་བྱེད་ཅིང་འགྲོ་ན། ཁྱོད་ནི་ཚུལ་དང་དུལ་བ་ཕུན་སུམ་ཚོགས་པས་དལ་བུས་རྒྱུ་ཞིང་དེ་རྣམས་དང་ལྷན་ཅིག་སྐྱེད་མོས་ཚལ་དུ་

เล่ม ๓ · หน้า 73a

འགྲོ་བར་བྱེད་དོ། །དེས་སྨྲས་པ་བུ་མོ་ཐམས་ཅད་ནི་ཕ་དང་མས་བཙོང་བའི་རྫས་ཡིན་ན། གལ་ཏེ་བདག་གིས་མཆོངས་སམ་འགྲེས་ནས་རྐང་པའམ་ལག་པ་ཆག་པར་གྱུར་ན། བདག་ལ་སུ་ཞིག་སློང་བར་འགྱུར་ཏེ། ངེས་པར་བདག་ཇི་སྲིད་འཚོ་བའི་བར་དུ་ཕ་

དང་མ་ཁོ་ནའི་གསོན་མར་འགྱུར་རོ། །བུ་མོ་ལེགས་ཏེ། དེ་ནི་ཁོང་དུ་ཆུད་དོ། །གཞན་ཡང་འདི་དྲི་སྟེ། བུ་མོ་འདི་དག་ནི་གོས་རྣམས་མཐའ་གཅིག་ཏུ་བཞག་ནས་གོས་གཅིག་ཀྱང་མེད་པར་མོད་ལ་ཞུགས་ནས་རྩེ་བར་རྩོམ་ལ། ཁྱོད་ནི་ཇི་ཙམ་ཇི་ཙམ་དུ་ཆུར་ནུབ་པ་དེ་ཙམ་དེ་

དེ་ཙམ་དེ་ཙམ་དུ་གོས་རྫེ་བར་བྱེད་དོ། །ཁུ་གུ་བུད་མེད་ནི་ངོ་ཚ་ཤེས་པ་དང་ཁྲེལ་ཡོད་པ་དང་ལྡན་པར་བྱ་དགོས་པས་གལ་ཏེ་བདག་གི་གོས་ཕུད་པ་འགའ་ཞིག་གིས་མཐོང་ན། མི་རིགས་པར་འགྱུར་རོ། །བུ་མོ་ཁྱོད་ལ་དེ་ན་སུ་ཞིག་ལྟ། ཁུ་གུ་རེ་ཞིག་ཁྱོད་ཁོ་ནས་ཀྱང་བདག་མཐོང་

བར་འགྱུར་རོ། །བུ་མོ་ལེགས་ཏེ། དེ་ཡང་ཁོང་དུ་ཆུད་དོ། །གཞན་ཡང་འདི་དྲི་སྟེ། བུ་མོ་འདི་དག་ནི་རང་སྔར་ཟོས་ནས་དེའི་འོག་ཏུ་འཁོར་གྱི་སྐྱེ་བོ་ལ་ཟན་སྦྱིན་པར་བྱེད་ལ། ཁྱོད་ནི་འཁོར་གྱི་སྐྱེ་བོ་ལ་སྔར་ཟན་བྱིན་ནས་དེའི་འོག་ཏུ་རང་ཟ་བར་བྱེད་དོ། །ཁུ་གུ་བདག་ཅག་ནི་

བསོད་ནམས་ཀྱི་འབྲས་བུས་འཚོ་བས་བདག་ཅག་ལ་རྟག་ཏུ་དུས་སྟོན་མཆིས་ལ། འདི་དག་ནི་ཚེགས་འབྱུང་བའི་འབྲས་བུས་འཚོ་བ་ལགས། བརྒྱ་ལམ་ན་ལན་འགའ་རྒྱ་ཆེན་པོར་འཐོབ་པའི་ཕྱིར་རོ། །བུ་མོ་ལེགས་ཏེ་དེ་ཡང་ཁོང་དུ་ཆུད་དོ། །གཞན་ཡང་འདི་དྲི་སྟེ། འཇིག་

རྟེན་ཐམས་ཅད་ནི་སྐམ་ལ་མཆིལ་ལྷམ་གྱོན་ལ་ཁྱོད་ནི་ཆུ་ལ་གྱོན་པ་དེ་ཅི། ཁུ་གུ་འཇིག་རྟེན་བླུན་མོད། ཆུ་ཁོ་ན་ལ་མཆིལ་ལྷམ་བགོ་འཚལ་ཏེ། ཅིའི་སླད་དུ་ཞེ་ན། ཐང་ལ་ནི་སྡོང་དུམ་དང་། ཚེར་མ་དང་། རྡོ་བ་དང་། ཟུག་རྡོ་དང་། ཉ་ཕྱིས་ཀྱི་དུམ་བུ་དང་། སྲིན་ཀོག་གི་

དུམ་བུ་རྣམས་མངོན་ལ། ཆུ་ལ་ནི་དེ་དག་མི་མངོན་པས་དེས་ན་ཆུ་ཁོ་ན་ལ་མཆིལ་ལྷམ་བགོ་བར་བགྱིའི་ཐང་ལ་ནི་མ་ལགས་སོ། །བུ་མོ་ལེགས་ཏེ་དེ་ཡང་ཁོང་དུ་ཆུད་དོ། །གཞན་ཡང་འདི་དྲི་སྟེ། བུ་མོ་དེ་དག་ནི་ཉི་མ་ལ་གདུགས་ཐོགས་ན། ཁྱོད་ནི་ཀུན་དགའི་ར་བའི་ཤིང་གི་

เล่ม ๓ · หน้า 73b

གྲིབ་མ་ལ་ཐོགས་པར་བྱེད་ན། འདི་ལ་རིགས་པ་ཅི་ཞིག་ཡོད། ཁུ་གུ་འཇིག་རྟེན་བླུན་མོད་ཀུན་དགའ་ར་བ་ཁོ་ནར་གདུགས་བཅང་འཚལ་ཏེ། དེ་ཅིའི་སླད་དུ་ཞེ་ན། ཀུན་དགའ་ར་བ་ནི་རྟག་ཏུ་སྤྲེའུ་དང་བྱ་རྣམས་ཀྱིས་གང་བས་བྱ་རྣམས་ནི་གཅིན་རྟུག་འཐོར་ཞིང་རུས་པའི་

དུམ་བུ་དག་འཐོར་རོ། །སྤྲེའུ་རྣམས་ཀྱང་བཤང་བ་དང་གཅི་བ་བྱེད་ཅིང་འབྲས་བུའི་ཟ་འཕྲོ་དག་འཐོར་བར་བྱེད་ལ། རང་བཞིན་གྱིས་རྒོད་བག་ཅན་ཡིན་པས་ཕན་ཚུན་ཡལ་ག་གཞན་དུ་འགྲོ་བར་བྱེད་པ་ན་ཤིང་དུམ་དག་ལྷུང་བར་བྱེད་དོ། །བླ་གབ་མ་མཆིས་པ་ལ་ནི་དེ་དག་

མ་མཆིས་སོ། །བརྒྱ་ལ་མཆིས་ན་ཡང་དེ་རེས་འགའ་ཞིག་འབབ་པར་བས་ཏེ། དེས་ན་ཀུན་དགའ་ར་བ་ཁོ་ནར་གདུགས་བཅང་བར་བགྱིའི། བླ་གབ་མ་མཆིས་པར་ནི་མ་ལགས་སོ། །བུ་མོ་ལེགས་ཏེ་དེ་ཡང་ཁོང་དུ་ཆུད་དོ། །གཞན་ཡང་འདི་དྲི་སྟེ་བུ་མོ་འདི་དག་ནི་རླུང་

དང་ཆར་པ་བྱུང་ན་ལྷ་ཁང་དུ་འཇུག་ན་ཁྱོད་ནི་བླ་གབ་མེད་པར་འདུག་གོ། །ཁུ་གུ་བླ་གབ་མ་མཆིས་པ་ཁོ་ནར་གནས་པར་བགྱིའི། ལྷ་ཁང་དུ་འཇུག་པར་ནི་མ་ལགས་སོ། །བུ་མོ་འདི་ལ་རིགས་པ་ཅི་ཡོད། ཁུ་གུ་ལྷ་ཁང་སྟོང་པ་འདི་དག་ནི་རྟག་ཏུ་དྭ་དང་། ནལ་ཕྲུག་དང་།

གཡོན་ཅན་རྣམས་ཀྱིས་མི་སྟོང་ལགས་ཏེ། གལ་ཏེ་བདག་ཞུགས་པའི་ཡན་ལག་དང་ཉིང་ལག་དག་ལ་འགའ་ཞིག་གིས་རེག་ན། དེ་ལྟ་ན་བདག་གི་ཕ་མ་དག་ལ་མི་སྙན་པར་མི་འགྱུར་རམ། ཉིས་ན་བླ་གབ་མེད་པར་སྲོག་དང་ཕྲལ་བ་ནི་བླའི། ལྷ་ཁང་སྟོང་པར་ནི་མི་འཇུག་

གོ། །དེ་ནས་བྲམ་ཟེ་དེ་དེའི་སྤྱོད་ཚུལ་གྱིས་རངས་ཤིང་ཡིད་བདེ་བ་སྐྱེས་ནས་ཁྱིམ་བདག་སྟོབས་ཀྱི་བཤེས་གཉེན་གྱི་ཁྱིམ་དུ་ཞུགས་ཏེ་བུ་མོ་ཐོབ་པར་འདོད་པའི་སྤྲོ་བ་དང་བཅས་པས་བདེ་ལེགས་སུ་གྱུར་ཅིག །བདེ་ལེགས་སུ་གྱུར་ཅིག་ཅེས་སྨྲས་པ་དང་། ཁྱིམ་འཁོར་གྱི་སྐྱེ་

བོས་སྨྲས་པ། བྲམ་ཟེ་རེ་ཞིག་བསླང་བའི་དུས་ནི་མ་ཡིན་ན། ཅི་ཞིག་སློང་། བུ་མོ་སློང་ངོ་། །སུ་ཞིག་གི་ཆེད་དུ། མཉན་ཡོད་ན་བློན་པོའི་མཆོག་རི་དགས་འཛིན་ཅེས་བྱ་བ་དེའི་བུ་ས་ག་ཞེས་བྱ་བའི་འོ། །དེ་རྣམས་ཀྱིས་སྨྲས་པ། དེ་དང་བདག་ཅག་ནི་རིགས་མཉམ་

เล่ม ๓ · หน้า 74a

པ་ཡིན་ན། འོན་ཀྱང་ཡུལ་ཧ་ཅང་ཡང་ཐག་རིང་ཆེས་སོ། །དེས་སྨྲས་པ། རིང་པོ་ཁོ་ན་ལ་བུ་མོ་སྦྱིན་པར་བྱའོ། །ཅིའི་ཕྱིར་ཞེ་ན། ཉེ་ན་རེ་ཞིག་གལ་ཏེ་བདེ་བར་གྱུར་པ་ཐོས་ན་དགའ་བ་སྐྱེད་པར་ཟད། ཉེ་ན་སྡུག་བསྔལ་བར་གྱུར་ན་སྦྱིན་པ་དང་མཆོད་པ་དང་།

བཀུར་སྟི་བྱ་བས་དུབ་པར་འགྱུར་ཞིང་ནོར་འགེད་པར་ཡང་འགྱུར་རོ། །དེ་རྣམས་ཀྱིས་སྨྲས་པ། གལ་ཏེ་དེ་ལྟ་ན་སྦྱིན་ནོ། །དེ་ནས་བྲམ་ཟེ་དེ་བདེ་ལེགས་སུ་གྱུར་ཅིག་ཅེས་སྨྲས་ནས་སོང་སྟེ་རིམ་གྱིས་མཉན་ཡོད་དུ་ཕྱིན་ནས་ལམ་གྱིས་དུབ་པ་བསལ་ཏེ་བློན་པོའི་མཆོག་རི་དགས་འཛིན་

གྱི་དྲུང་དུ་སོང་ནས། དེ་ནས་བུ་མོའི་ཟ་བ་དང་། གནས་པའི་སྤྱོད་ཚུལ་དང་། གཟུགས་བཟང་ཞིང་དར་ལ་བབ་པ་དང་། མཛེས་པ་དང་མཁས་པ་དག་ཇི་ལྟ་བ་བཞིན་དུ་བསྙད་ནས་སྨྲས་པ། བདག་གི་ཉོན་མོངས་པ་ཆེན་པོས་ཡུལ་དང་ཚོང་རྡལ་སྣ་ཚོགས་སུ་བརྒྱུས་པས་སྡུག་བསྔལ་

གྱིས་དེ་རྙེད་ཀྱིས་ད་ནི་སོང་ལ་ལོང་ཤིག །དེ་ནས་བློན་པོའི་མཆོག་རི་དགས་འཛིན་གྱིས་ཉི་མ་དང་ཚེས་གྲངས་དང་། ཡུད་ཙམ་དང་རྒྱུ་སྐར་དག་བསྟུན་ནས་ཙམ་པར་འོངས་ཏེ། དཔལ་གྱི་འབྱོར་པ་ཆེན་པོས་ས་གའི་ཆུང་མ་བླངས་སོ། །དེ་མི་ཡུལ་དུ་འགྲོ་བའི་ཚེ་མས་བསླབས་པ།

བུ་མོ་ཁྱོད་ཀྱིས་ཉི་མ་དང་ཟླ་བ་གཉིས་ལ་རྟག་ཏུ་ཕྱག་བྱ། མེ་ལ་བསྙེན་བཀུར་བྱ། མེ་ལོང་དྲི་མ་ཕྱི་བར་བྱ། གོས་དཀར་པོ་བགོ་བར་བྱ། བླང་བར་བྱའི་སྦྱིན་པར་མི་བྱ། ཚིག་བསྲུང་བར་བྱ། ལངས་ནས་སུ་ལ་ཡང་སྟན་བསྟབ་པར་མི་བྱ། ཞིམ་པོ་བཟའ་བར་བྱ། བདེ་བར་

ཉལ་བར་བྱ། ཐེམ་སྐས་གཟུགས་པར་བྱའོ། །དེ་ནས་རི་དགས་འཛིན་གྱིས་ཐོས་ནས་དེས་བསམས་པ། བུ་མོ་འདི་ལྟ་བ་ལོག་པར་འཛིན་དུ་བཅུག་སྟེ། བདག་གིས་འདི་ལྟ་བ་ལོག་པ་དང་ཕྲལ་ལ་ཡང་དག་པའི་ལྟ་བ་འཛིན་དུ་གཞུག་གོ་སྙམ་དུ་བསམས་ནས་དེ་བླངས་ཏེ་ཆས་

སོ། །དེ་ནས་དེའི་མ་སྡུག་པས་སྙིང་དཀྲུགས་ཤིང་མིག་མཆི་མས་གང་བས་མགུལ་ནས་འཁྱུད་ནས་ངུ་བཞིན་གྱི་ང་རོས་སྨྲས་པ། བུ་མོ་ཁྱོད་མཐོང་བའི་ཐ་མ་ནི་འདི་ཡིན་ནོ། །དེས་དེ་ལ་ཤེས་པར་བྱ་བའི་ཕྱིར་སྨྲས་པ། ཡུམ་རེ་ཞིག་ཁྱོད་འདིར་འཁྲུངས་སམ། འོན་ཏེ་ཉེ་དུའི་

เล่ม ๓ · หน้า 74b

ཁྱིམ་དུ་བུ་མོ་ཉེ་དུའི་ཁྱིམ་དུའོ། །ཁྱོད་ཀྱིས་ཁང་པ་དེ་ཡིན་ནམ། འོན་ཏེ་འདི་ཡིན་འདི་ཡིན་ནོ། །བདག་ཀྱང་འདིར་སྐྱེས་ལ་དེར་བདག་གནས་པར་བསལ་འདུ་བ་མཆིས་ན་གདོན་མི་ཟ་བར་མཐར་འབྲལ་བར་འགྱུར་ན། བཤུམས་སུ་ཅི་མཆིས་ཅང་མ་གསུང་ཤིག །དེ་ནས་རི་

དགས་འཛིན་ནི་ཐང་ལ་སོང་ངོ་། །ས་ག་མ་ནི་ཁྱིམ་ཐབ་དང་། རང་གི་ཁྱིམ་ནས་ཐོབ་པའི་འཁོར་གྱི་སྐྱེ་བོ་དང་ལྷན་ཅིག་ཏུ་གྲུར་དོང་བ་ལས་དེ་ན་རྟ་རྒོད་མ་རྟེའུ་སྨད་བྱུང་ནས་རིང་པོ་མ་ལོན་པ་ཞིག་གྲུར་གཞུག་པར་བྱས་པ་དང་། རྟེའུ་ཐང་ལ་མི་དགའོ་སྙམ་ནས་བསྒྲིམས་ཀྱང་འཇུག་ཏུ་མ་

བཏུབ་པ་དང་ཀུ་ཅོ་བྱུང་བས་ས་ག་མས་ཐོས་ནས་དེས་སྨྲས་པ། ཅིའི་ཕྱིར་ཀུ་ཅོ་འདི་བྱུང་དེ་རྣམས་ཀྱིས་ཇི་ལྟར་གྱུར་པ་རྣམས་སྨྲས་པ་དང་། ས་ག་མས་སྨྲས་པ་རྟེའུ་སྔར་ཆུག་ཅིག་དང་རང་ཉིད་འཇུག་པར་འགྱུར་རོ། །དེ་རྣམས་ཀྱིས་དེ་བཞིན་བྱས་པ་དང་ཞུགས་སོ། །དེ་ནས་རི་དགས་

འཛིན་གྱིས་དེ་རྣམས་ལ་དྲིས་པ། ཅིའི་ཕྱིར་ཁྱེད་ཅག་རིང་ཞིག་ལོན་ནས་འོངས། རྟ་རྒོད་མ་གྲུར་མཆོང་དུ་མ་བཏུབ་ལགས་སོ། །འོ་ན་ཇི་ལྟར་མཆོངས། ཙམ་པ་མོས་ཐབས་བཤམས་པ་ཞིག་བསྟན་ཏེ། རྟེའུ་སྔར་བཅུག་པས་སོ། །ཙམ་པ་མོ་ནི་མཁས་པ་ཡིན་ནོ། །ཇི་ཙམ་ན་

འགྲོན་པ་རྣམས་ལམ་ཀར་ནུབ་མོ་འབྲང་བཏབ་སྟེ་གནས་པ་ལས་རི་དགས་འཛིན་གྱི་མལ་བྱ་སྐྱིབས་ཤིག་ཏུ་བཅས་པ་ས་ག་མས་མཐོང་ནས་དྲིས་པ། འདི་སུའི་མལ། རི་དགས་འཛིན་གྱིའོ། །སྤོས་ཤིག །ཅིའི་ཕྱིར་གལ་ཏེ་གཉིད་ཀྱིས་ལོག་པ་ལ་བྱ་སྐྱིབས་སྟེང་དུ་རྡིབ་ན་གདོན་མི་

ཟ་བར་ནོན་པས་འཆི་བར་འགྱུར་ཏེ། བདག་ལ་གང་ཞིག་བླངས་ན་གྱོས་པོ་ཁྱིམ་དུ་མ་ཕྱིན་པར་ལམ་ཀར་ཤི་བ་འདི་ལྟ་བུའི་བུ་མོ་བག་མར་བླངས་ཞེས་ཇི་སྲིད་འཚོ་བའི་བར་དུ་མི་སྙན་པ་འབྱུང་བར་འགྱུར་རོ། །མལ་དེ་ཡང་སྤོས་པ་ལས་གད་པ་ཞིག་པ་དང་། སྐྱེ་བོའི་ཚོགས་ཆེན་པོས་

ཁྱིམ་བདག་ནོན་ཏོ་ཞེས་ཀུན་བརྒྱུགས་པ་དང་ཁྱིམ་བདག་གིས་སྨྲས་པ། ཤེས་ལྡན་དག་བདག་འདི་ན་འདུག་གིས་མ་སྐྲག་པར་མལ་རྟོགས་ཤིག །མལ་སྤོས་སོ། །སུས། ས་ག་མས་སོ། །ཙམ་པ་མོ་ནི་མཁས་པ་ཡིན་ནོ། །ཡང་སྐྱེད་མོས་ཚལ་རྙིང་པ་ཞིག་ཏུ་ནུབ་མོ་འབྲང་

เล่ม ๓ · หน้า 75a

བཏབ་སྟེ་འཁོད་པ་ལས་རི་དགས་འཛིན་གྱི་མལ་ལྷ་ཁང་སྟོང་པ་ཞིག་ཏུ་བཅས་པ་དང་ས་ག་མས་མཐོང་ནས་དྲིས་པ། འདི་སུའི་མལ། དཔོན་པོའིའོ། །སྤོས་ཤིག །ཅིའི་ཕྱིར་གལ་ཏེ་ལྷ་ཁང་རྡིབ་སྟེ། དེས་ནོན་ན་ཤི་བར་འགྱུར་ཏེ། བདག་ལ་ཞེས་བྱ་བ་ནས་མི་སྙན་

པ་འབྱུང་བར་འགྱུར་རོ་ཞེས་བྱ་བའི་བར་གོང་མ་བཞིན་དུའོ། །མལ་དེ་ཡང་སྤོས་པ་ལས་ལྷ་ཁང་ཞིག་པ་དང་སྐྱེ་བོའི་ཚོགས་ཆེན་པོས་བརྒྱུགས་པ་དང་ཞེས་བྱ་བ་ནས་ཙམ་པ་མོ་ནི་མཁས་པ་ཡིན་ནོ་ཞེས་བྱ་བའི་བར་གོང་མ་བཞིན་དུའོ། །ཇི་ཙམ་ན་རིམ་གྱིས་མཉན་ཡོད་དུ་ཕྱིན་ནས་ལམ་

གྱིས་དུབ་པ་བསལ་ཏེ་མཛའ་བཤེས་དང་། ཉེ་དུ་དང་གཉེན་གྱི་སྐྱེ་བོ་སྤྲས་ནས་ས་ག་མ་རང་གི་རིགས་དང་འཚམ་པའི་ཁྱིམ་གྱི་ལས་དག་བྱེད་དོ། །རི་དགས་འཛིན་གྱི་མནའ་མ་དྲུག་གིས་རེ་མོ་རེ་མོས་ཁྱིམ་མིའི་ཟན་སྦྱོར་བ་ལས་ས་ག་མ་ལ་ཡང་དེ་བཞིན་དུ་བསྒོ་སྟེ། ཁྱོད་ཀྱིས་རེས་

ཀྱང་ཞག་བདུན་པ་ལ་སྦྱོར་ཅིག །དེའི་རེས་ལ་བབ་ཏུ་ཉེ་བ་དང་། གྱོས་པོ་དང་། སྒྱུག་མོ་དང་། ཁྱིམ་བདག་རྣམས་ཀྱི་དྲིའི་ལྷག་མ་གང་ཡིན་པ་དེ་དག་རིལ་བུར་བྱས་ནས་ཉི་མ་རེ་རེ་ཞིང་སྐེམས་སོ། །ཉི་མ་རེ་རེ་ཞིང་ནོད་པའི་ཕྱེ་གང་ཡིན་པ་དེ་ལས་ཀྱང་བྲེ་ཁ་ཕྲི་སྟེ་བཞག་ལ།

ལྷག་མ་མར་དང་བསྲེས་པས་དེ་དང་ཚད་མཉམ་པར་གྱུར་ཏོ། །སང་ལྟ་བུ་རེས་བབ་པ་ན་ཆང་བཏུང་ལ་རག་པར་བྱ་བ་དང་། ཁྱིམ་ཐབ་དང་རང་གི་མེ་ཏོག་གི་ཕྲེང་བ་རྙིང་པ་གང་ཡིན་པ་དེ་དག་བསིལ་བར་བཞག་ནས། ཇི་ཙམ་ན་ནམ་ནངས་པ་དང་། ལས་བྱེད་པ་རྣམས་ལ་སྐྱུར་རྩི་

དང་། དྲི་དང་། མེ་ཏོག་དང་། ཟས་དང་། ཆང་དག་བྱིན་ནོ། །དེ་རྣམས་ཤིན་ཏུ་མགུ་ནས་བདག་ཅག་རིང་ཞིག་ལོན་ནས་ཁྱིམ་བདག་གི་ཆུང་མ་རྙིང་པས་བཞིན་བལྟས་སོ་ཞེས་དེ་རྣམས་ཀྱིས་དེའི་ཉིན་པར་ལས་ཉིས་འགྱུར་དུ་བྱས་སོ། །ཇི་ཙམ་ན་རི་དགས་འཛིན་གྱིས་ཕྱི་དྲོའི་

དུས་སུ་ལས་ཀྱི་མཐའ་ལ་བལྟས་པ་ན་ལས་མང་དུ་ཟིན་པ་མཐོང་ནས་དེས་དྲིས་པ། ཅི་ཁྱེད་ཅག་གིས་གླ་མི་གཞན་དག་ཅིག་བཀུག་གམ། སུས་ཀྱང་མ་བཀུག་གོ། །གང་གིས་ན་ལས་ཉིས་འགྱུར་དུ་བྱས་པ་འདི་ལ་རྒྱུ་ཅི་ཞིག་ཡོད། དེ་རྣམས་ཀྱིས་སྨྲས་པ། དཔོན་པོ་

เล่ม ๓ · หน้า 75b

ཟས་ཅི་འདྲ་བ་དེ་འདྲ་བའི་ལས་བགྱིད་དོ། །དེ་ཇི་ལྟ་བུ་ཡིན། དེ་རྣམས་ཀྱིས་ཇི་ལྟར་གྱུར་པ་རྒྱ་ཆེར་སྨྲས་པ་དང་། རི་དགས་འཛིན་གྱི་བུ་རྣམས་ཀྱིས་རང་རང་གི་ཆུང་མ་ལ་སྨྲས་པ་ལས་དེ་རྣམས་ཀྱིས་སྨྲས་པ། ས་ག་མས་ཇི་ལྟར་བགྱིས་པ་བཞིན་དུ་གལ་ཏེ་བདག་ཅག་

གིས་ཀྱང་ཁྱིམ་ནས་བརྐུས་ལ་གླ་མི་རྣམས་དགའ་བར་བགྱིས་པ་དང་། བདག་ལ་ཡང་ཇོ་བོ་དང་ཁྱེད་གླ་མི་རྣམས་དགའ་བར་འགྱུར་རོ། །དེ་ནས་རི་དགས་འཛིན་གྱིས་ས་ག་མ་ལ་དྲིས་པ། བུ་མོ་ཁྱོད་ཀྱིས་ཁ་ཟས་རྣམས་ཇི་ལྟར་བཤམས། དེས་རྒྱས་པར་སྨྲས་པ་དང་རི་

དགས་འཛིན་མགུ་ནས་དེས་དེ་ཁོ་ན་ཁྱིམ་གྱི་བྱ་བ་རྣམས་བྱེད་དུ་བཅུག་སྟེ། ནང་མི་ཐམས་ཅད་ལ་སྨྲས་པ། ཁྱེད་ཅག་ལས་གང་ཞིག་ས་ག་མས་བྱིན་པས་མགུ་བ་ནི་དེས་གནས་པར་བགྱིས་ལ་དེ་དང་རྗེས་སུ་མཐུན་པར་ཡང་གྱིས་ཤིག །ཇི་ཙམ་ན་དེ་ཁྱིམ་གྱི་དཔོན་མོར་གྱུར་ནས་

སྤྱོད་ཚུལ་དང་། གནས་པ་དང་། དེས་པས་ནང་མི་ཐམས་ཅད་དགའ་བར་གྱུར་ཏོ། །ཇི་ཙམ་དུས་གཞན་ཞིག་ན་ས་ག་མའི་ཁྱིམ་སྟེང་ནས་ངང་པ་རྣམས་ཀྱིས་བྱང་གི་སྒྲ་མི་སྙན་གྱི་གླིང་ནས་མ་རྨོས་མ་བཏབ་པའི་འབྲས་སཱ་ལུ་དག་ཁྱེར་ནས་དོང་བ་ལས་རྒྱལ་པོའི་ཁབ་ན་འདུག་པའི་

ངང་པ་དེས་དེ་དག་མཐོང་ནས་སྐད་ཕྱུང་བ་དང་དེ་རྣམས་ཀྱིས་ཀྱང་སྐྱེ་གནས་མཐུན་པའི་གཅུགས་པས་མནགས་མ་ཐུབ་སྟེ་སྐད་ཕྱུང་བ་དང་རྒྱལ་པོའི་ཁབ་ཀྱི་ཁང་ཐོག་ཏུ་འབྲས་ཀྱི་སྙེ་མ་རྣམས་ལྷུང་བར་གྱུར་ཏོ། །དེ་ནས་རྒྱལ་པོས་བློན་པོ་རྣམས་ལ་རེ་རེ་བྱིན་པ་དང་རི་དགས་འཛིན་

གྱིས་རང་གི་སྐལ་བ་ས་ག་མ་ལ་བྱིན་ནོ། །དེས་ཟ་མ་ཏོག་གི་ནང་དུ་བཅུག་སྟེ་ཞིང་པ་རྣམས་ལ་བསྒོ་བ་དང་། དེ་རྣམས་ཀྱང་ཤིན་ཏུ་མགུ་སྟེ། དེ་རྣམས་ཀྱིས་ཞིང་ཆུང་ངུ་ཞིག་ལེགས་པར་བསྟན་ནས་དུས་ཤེས་པར་བྱས་ཏེ་བཏབ་པ་ལས་ལྷས་དུས་བཞིན་དུ་ཆར་ཕབ་པས་ས་བོན་

དང་མཐུན་པར་ཕུན་སུམ་ཚོགས་པར་སྐྱེས་སོ། །ཕྱི་དེ་ལོ་ལ་ནི་རབ་ཏུ་མང་པོར་སྐྱེས་པར་གྱུར་ཏོ། །ཡང་ཕྱི་དེ་ལོ་ལ་ནི་དེ་བས་ཀྱང་མང་པོར་གྱུར་ཏེ། དེ་བཞིན་དུ་ཇི་ཙམ་ན་བང་བ་ཐམས་ཅད་ངང་པས་ཁྱེར་ཏེ་འོངས་པའི་འབྲས་སཱ་ལུས་གང་བར་གྱུར་ཏོ། །ཇི་ཙམ་ན་ཀོ་

เล่ม ๓ · หน้า 76a

ས་ལའི་རྒྱལ་པོ་གསལ་རྒྱལ་ནད་ཀྱིས་ཐེབས་ནས་དེས་སྨན་པ་རྣམས་བཀུག་སྟེ་དྲིས་པ་དང་། དེ་རྣམས་ཀྱིས་སྨྲས་པ། ལྷ་གལ་ཏེ་ངང་པས་འཚལ་ཏེ་མཆིས་པའི་སཱ་ལུ་བརྙེས་ན་དེ་ལ། འཇམས་བསྒྲལ་ནས་གསོལ་ཅིག་དང་། སོས་པར་འགྱུར་ལགས་སོ། །

རྒྱལ་པོས་བློན་པོ་རྣམས་བཀུག་ནས་སྨྲས་པ། ཤེས་ལྡན་དག་ཁྱེད་ལ་ངང་པས་ཁྱེར་ཏེ་འོངས་པའི་སཱ་ལུའི་སྙེ་མ་བྱིན་པ་དེ་དག་ཁྱེད་ཀྱིས་ཅིར་བྱས། དེ་ནས་ཁ་ཅིག་གིས་སྨྲས་པ། ལྷ་བདག་ཅག་གིས་ནི་ལྷ་ཁང་དུ་ཕུལ་ལོ། །གཞན་དག་གིས་སྨྲས་པ། བདག་ཅག་གིས་མེའི་

ནང་དུ་སྩལ་ཏོ། །གཞན་དག་གིས་སྨྲས་པ། བདག་གིས་སྒོ་ཁང་དུ་བཏགས་སོ། །རི་དགས་འཛིན་གྱིས་སྨྲས་པ། ལྷ་བདག་གིས་ས་ག་མ་ལ་སྩལ་ན་རེ་ཞིག་དེས་ཅིར་བགྱིས་རྨ་བར་འཚལ་ལོ། །དེས་ས་ག་མ་ལ་དྲིས་པ་དང་། དེས་སྨྲས་པ། ཇོ་བོ་ཅི་ངང་པས་འཚལ་ཏེ་མཆིས་

པའི་སཱ་ལུ་འཚལ་བ་ཞིག་མཆིས་སམ། རྒྱལ་པོ་སྙུན་གྱིས་ཐེབས་པ་ལ་སྨན་པ་རྣམས་ཀྱིས་ངང་པས་ཁྱེར་ཏེ་འོངས་པའི་སཱ་ལུ་བསྟན་ཏོ། །དེ་ནས་ས་ག་མས་གསེར་སྣོད་ཀྱི་ནང་དུ་ངང་པས་ཁྱེར་ཏེ་འོངས་པའི་འབྲས་ཀྱིས་བཀང་ནས་རྒྱལ་པོ་ལ་བསྐུར་བ་ལས་རྒྱལ་པོས་ཟོས་ནས་སོས་

པར་གྱུར་ཏོ། །དུས་གཞན་ཞིག་ན་རྒྱལ་པོ་ལ་ལྗོངས་ཀྱི་མི་རྣམས་ཀྱིས་རྟ་རྒོད་མ་སྨད་གཉིས་ཤིག་ཕུལ་བ་ལས་དེ་ལ་མ་ནི་གང་ཡིན། རྟེའུ་ནི་གང་ཡིན་པ་འགས་ཀྱང་མ་ཤེས་ནས་རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་ལེགས་པར་རྟོགས་ལ་ང་ལ་གསོལ་ཅིག །

བློན་པོ་རྣམས་ཀྱིས་ཉིན་ཐོག་ཐག་ཏུ་དཔྱད་ན་དུབ་སྟེ་གཏན་ལ་མ་ཕེབས་སོ། །རི་དགས་འཛིན་ཕྱི་དྲོ་ཁྱིམ་དུ་སོང་བ་དང་ས་ག་མས་རྐང་པ་གཉིས་ལ་གཏུགས་ནས་སྨྲས་པ། ཇོ་བོ་ཇི་སྟེ་དེ་རིང་རིང་ཞིག་ལོན་ནས་གཤེགས། དེས་ཇི་ལྟར་གྱུར་པ་རྣམས་རྒྱས་པར་སྨྲས་པ་དང་ས་ག་

མས་སྨྲས་པ། ཇོ་བོ་འདི་ལ་དཔྱད་དུ་ཅི་ཞིག་མཆིས། དེ་གཉིས་ཆས་མཉམ་པར་སྩལ་དང་བུ་གང་ལགས་པ་དེ་ནི་མྱུར་དུ་འཚལ་ནས་མའི་སྐལ་བ་ལ་འཚལ་ལོ། །མ་གང་ལགས་པ་དེ་ནི་མི་འཚལ་བར་མགོ་སྟེ་ག་གེ་མཆིས་ཏེ། རྟགས་ནི་དེ་ལགས་སོ། །རི་དགས་འཛིན་གྱིས་བློན་པོ་

เล่ม ๓ · หน้า 76b

རྣམས་ལ་སྨྲས་ནས་དེ་རྣམས་ཀྱིས་ཀྱང་ཇི་སྐད་བསྟན་པ་བཞིན་བརྟགས་ནས་དེ་ནས་ནམ་ནངས་པ་དང་རྒྱལ་པོ་ལ་སྨྲས་པ། ལྷ་འདི་ནི་མ་ལགས་སོ། །འདི་ནི་བུ་ལགས་སོ། །རྒྱལ་པོས་སྨྲས་པ། ཁྱེད་ཅག་གིས་ཇི་ལྟར་ཤེས། ལྷ་འདི་ལྟ་བུ་དང་འདི་ལྟ་བུ་ལགས་སོ། །ཁར་རྩང་ཅི་

སྟེ་མ་ཤེས། ལྷ་བདག་ཅག་གིས་འཚལ་བར་རྔོ་ག་ལ་ཐོག །ས་ག་མས་དེ་སྐད་བསྟན་ལགས་མོད། རྒྱལ་པོས་སྨྲས་པ། ཙམ་པ་མོ་ནི་མཁས་པ་ཡིན་ནོ། །མི་ཞིག་ཆུ་འགྲམ་དུ་ལྷམ་བཞག་ནས་ཁྲུས་བྱེད་པ་དང་། མི་གཞན་ཞིག་འོངས་ནས་དེས་ལྷམ་དེས་མགོ་ལ་དཀྲིས་ནས་དེ་ཉིད་

ན་ཁྲུས་བྱ་བར་བརྩམས་སོ། །མི་དེ་ཁྲུས་བྱས་ནས་ལངས་ནས་ལྷམ་དེ་མ་མཐོང་ངོ་། །མི་དེས་སྨྲས་པ། ཀྱེ་ནང་རྗེ་ཅི་ཚོལ་ལྷམ་མོ། །ཁྱོད་ཀྱི་ལྷམ་ག་ལ་ཡོད། གལ་ཏེ་ཁྱོད་ལ་ལྷམ་ཡོད་པར་གྱུར་ན། ཇི་ལྟར་ངས་མགོ་ལ་དཀྲིས་ནས་ཞུགས་པ་དེ་བཞིན་དུ་ཁྱོད་ཀྱིས་ཀྱང་ལྷམ་

གྱིས་མགོ་ལ་དཀྲིས་ནས་ཞུགས་པར་འགྱུར་རོ། །དེས་སྨྲས་པ། འོ་ནི་ཉིད་ཁོ་བོའི་ལྷམ་ཡིན་ནོ། །དེ་གཉིས་ཁྱོད་ཀྱི་ངའི་ཞེས་རྩོད་པར་གྱུར་ནས། དེ་གཉིས་རྒྱལ་པོའི་དྲུང་དུ་སོང་ངོ་། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་ལེགས་པར་རྟོགས་ལ་གང་གི་

ཡིན་པ་དེ་ལ་བྱིན་ཅིག །དེ་རྣམས་ཀྱིས་བརྟག་པར་བརྩམས་ནས་གཅིག་ལ་དྲིས་པ་དང་། དེས་སྨྲས་པ། བདག་གི་ལགས་སོ། །ཅིག་ཤོས་ལ་ཡང་དྲིས་པ་དང་། དེས་སྨྲས་པ། བདག་གི་ལགས་སོ། །ཞེས་ཁྱོད་ཀྱི་དང་ངའི་ཞེས་པ་ལ་ཉི་མ་འདས་ཏེ་བློན་པོ་རྣམས་དུབ་

ནས་དགོངས་ཀ་གཏན་ལ་མ་ཕེབས་པ་བཞིན་དུ་ཁྱིམ་དུ་དོང་ངོ་། །ས་ག་མས་རི་དགས་འཛིན་གྱི་ཞེས་བྱ་བ་ནས་དྲིས་ཏེ་ཞེས་བྱ་བའི་བར་གོང་མ་བཞིན་དུ་སྟེ། དེས་ཇི་ལྟར་གྱུར་པ་རྣམས་སྨྲས་པ་དང་། ས་ག་མས་སྨྲས་པ། ཇོ་བོ་འདི་ལ་དཔྱད་དུ་ཅི་ཞིག་མཆིས། དེ་གཉིས་ལ་

གཅིག་ཀྱང་ཕྱེད་ཁྱེར་ཅིག །ཅིག་ཤོས་ཀྱང་ཕྱེད་ཁྱེར་ཅིག་ཅེས་གསུང་ཤིག་དང་། གང་གི་ལགས་པ་དེའི་མཆིད་ནས་ནི་ཅིའི་ཕྱིར་བདག་གི་ལྷམ་དྲལ་ཞེས་མཆིའོ། །གང་མ་ལགས་པ་དེའི་གློ་བ་ནི་རེ་ཞིག་བདག་གིས་ཕྱེད་ཐོབ་ན་ཡང་དེར་ཟད་འདིར་བདག་ལ་ཅི་ཞིག་འགེད་

เล่ม ๓ · หน้า 77a

སྙམ་སྟེ་དེ་ལྟར་བརྟག་པར་བགྱིའོ། །རི་དགས་འཛིན་སོང་ནས་བློན་པོ་རྣམས་ལ་སྨྲས་ནས་ཞེས་བྱ་བ་ནས་རྒྱལ་པོས་སྨྲས་པ། ཙམ་པ་མོ་ནི་མཁས་པ་ཡིན་ནོ་ཞེས་བྱ་བའི་བར་གོང་མ་བཞིན་དུའོ། །རྒྱལ་པོ་ལ་ཚོང་པ་གྲུ་པས་ཙནྡན་གྱི་སྡོང་དུམ་ཞིག་སྐྱེས་

སུ་ཕུལ་བ་དང་། དེའི་མགོ་གང་ཡིན་མཇུག་གང་ཡིན་པ་མ་ཤེས་ནས་རྒྱལ་པོས་བློན་པོ་རྣམས་ལ་བསྒོ་བ་ཇི་ལྟ་བུ་ཡིན་རྟོགས་ཤིག །དེ་རྣམས་ཀྱིས་ཉིན་ཐོག་ཐག་དཔྱད་ན་མ་ཤེས་ནས་དགོངས་ཀ་ཁྱིམ་དུ་དོང་ངོ་། །ས་ག་མས་ཞེས་བྱ་བ་ནས་རི་དགས་འཛིན་གྱིས་དྲིས་པ་ཞེས་བྱ་

བའི་བར་གོང་མ་བཞིན་དུའོ། །དེས་ཇི་ལྟར་གྱུར་པ་རྣམས་རྒྱ་ཆེར་སྨྲས་པ་དང་། ས་ག་མས་སྨྲས་པ། ཇོ་བོ་འདི་ལ་དཔྱད་དུ་ཅི་མཆིས་ཆབ་ཏུ་འོར་ཅིག་དང་རྩ་བ་གང་ཡིན་པ་དེ་ནི་འབྱིང་བར་འགྱུར་རོ། །ཐོར་ཏོ་གང་ལགས་པ་ནི་སྟེང་དུ་འབྱུང་བར་འགྱུར་རོ། །དེ་ལ་བརྟག་པ་ནི་

དེ་ལགས་སོ། །རི་དགས་འཛིན་གྱིས་བློན་པོ་རྣམས་ལ་སྨྲས་ནས་ཞེས་བྱ་བ་ནས་རྒྱལ་པོས་སྨྲས་པ། ཙམ་པ་མོ་ནི་མཁས་པ་ཡིན་ནོ་ཞེས་བྱ་བའི་བར་གོང་མ་བཞིན་དུའོ། །རི་འོར་ན་ཁྱིམ་བདག་ཅིག་ཡོད་པ་དེས་དེ་དང་རིགས་མཉམ་པ་ལས་ཆུང་མ་བླངས་པ་ལས་དེ་ལ་བུ་ཕོ་

ཡང་མེད། བུ་མོ་ཡང་མེད། དེ་བུ་མངོན་པར་འདོད་པས་ཆུན་མ་ཞིག་བླངས་པ་དང་། དེ་ལ་ཆུང་མ་ཆེན་མོ་ཤོས་རང་བཞིན་གྱིས་ཕྲག་དོག་ཅན་ཞིག་པས་དེའི་མངལ་མ་རུང་བར་བྱ་བའི་སྦྱོར་བ་ཞིག་བྱས་པ་ལས་དེའི་མངལ་ཤིན་ཏུ་རྣམ་པར་དག་པས་སེམས་ཅན་དང་ལྡན་པར་

གྱུར་ནས་ཇི་ཙམ་ན་ཟླ་བ་དགུ་འདས་པ་དང་། ཁྱེའུ་ཞིག་བཙས་སོ། །དེས་བསམས་པ། ཤ་ཁོན་རྣམས་ལ་ནི་འདི་ལྟ་སྟེ། ཆེན་ཆུན་འདི་ཐ་ཆད་ཡིན་པས་གདོན་མི་ཟ་བར་མ་ཡར་མོས་ཐབས་གང་ཡང་རུང་བ་ཞིག་གིས་གསོད་པར་འགྱུར་ན། བདག་གི་ཁྱིམ་ཐབ་

བམ། བདག་གིས་ཅི་བྱར་ཡོད། བདག་གིས་ནམ་དུ་ནི་སྲུང་ཡེ་དེ་ཁོ་ན་ལ་སྦྱིན་པར་བྱའོ་སྙམ་ནས་དེ་དང་ཁྱིམ་ཐབ་ལྷན་ཅིག་གྲོས་བྱས་ཏེ་རུང་ནས་ཆེན་མ་ཤོས་ལ་སྨྲས་པ། ཆེ་ཞེ་བདག་གི་བུ་འདི་ཁྱོད་ལ་བྱིན་གྱིས་གསོས་ཤིག །དེས་བསམས་པ་ཁྱིམ་ནི་གང་ལ་བུ་ཡོད་

เล่ม ๓ · หน้า 77b

པ་དེ་ཁོ་ནའི་ཡིན་པར་ཟད་པས་ཁྱིམ་གྱི་བདག་མོར་གྱུར་པས་གསོའོ་སྙམ་ནས། དེས་དེ་གསོས་པ་ལས་དེའི་ཕ་ཡང་ཤི་བར་གྱུར་ཏོ། །དེ་གཉིས་ཁྱིམ་གྱི་ཕྱིར་རྩོད་པར་གྱུར་ནས་གཅིག་གིས་སྨྲས་པ། འདི་ཁོ་མོའི་བུ་ཡིན་ནོ། །ཅིག་ཤོས་ཀྱིས་སྨྲས་པ། འདི་ནི་ཁོ་མོའི་བུ་

ཡིན་ནོ། །རྒྱལ་པོའི་དྲུང་དུ་སོང་བ་དང་། རྒྱལ་པོས་བློན་པོ་རྣམས་ལ་བསྒོ་བ་ཤེས་ལྡན་དག་དེང་ལ་གང་ཡིན་པ་རྟོགས་ཤིག །དེ་རྣམས་ཀྱིས་དཔྱད་པ་ལས་ཉི་མ་འདས་ཀྱང་གཏན་ལ་མ་ཕེབས་ནས། དགོངས་ཀ་ཁྱིམ་དུ་དོང་བ་དང་། ས་ག་མས་རི་དགས་འཛིན་ལ་དྲིས་ཏེ་ཞེས་

བྱ་བ་ནས་འདི་ལ་དཔྱད་དུ་ཅི་མཆིས་ཞེས་བྱ་བའི་བར་གོང་མ་བཞིན་དུ་སྟེ། དེ་གཉིས་ལ་ཁོ་བོ་ཅག་གིས་གང་གི་བུ་ཡིན་པ་མི་ཤེས་ཀྱིས། ཁྱེད་ཅག་གཉིས་ལས་གང་སྟོབས་ཆེ་བ་དེ་ཁྱེར་ལ་སོང་ཤིག་ཅེས་གསུང་ཤིག་དང་། ལག་པ་གཉིས་ནས་བཟུང་ནས་འདྲེན་པར་བགྱིད་དེ།

དེ་སྡུག་བསྔལ་གྱིས་ངུ་བར་གྱུར་པ་དང་དེའི་མ་གང་ལགས་པ་དེ་ནི་བརྩེ་བ་མཆིས་པས་འདི་གསོན་ན་ནམ་ཞིག་ན་མཐོང་བར་འགྱུར་གྲང་སྙམ་ནས་གཏོང་བར་བགྱིད་དོ། །ཅིག་ཤོས་ནི་བརྩེ་བ་མ་མཆིས་པས་གང་གི་ཚེ་མི་གཏོང་བ་དེའི་ཚེ་དེ་ལ་ལྕག་གིས་གཞུས་ཤིག་དང་ཇི་ལྟར་

གྱུར་པ་སྨྲ་བར་འགྱུར་ཏེ། འདི་ལ་བརྟག་པ་ནི་འདི་ལགས་སོ། །རི་དགས་འཛིན་གྱིས་བློན་པོ་རྣམས་ལ་སྨྲས་པ་དང་ཞེས་བྱ་བ་ནས་རྒྱལ་པོས་སྨྲས་པ། ཙམ་པ་མོ་ནི་མཁས་པ་ཡིན་ནོ་ཞེས་བྱ་བའི་བར་གོང་མ་བཞིན་དུའོ། །དུས་གཞན་ཞིག་ན་རི་དགས་འཛིན་ནད་ཀྱིས་ཐེབས་

ནས་དེ་ལ་སྨན་པས་ཉི་མ་གཅིག་སྨན་བྱིན་པ་ལས་ཐེག་གི་བར་གྱུར་ཏོ། །ཕྱི་དེ་ཉིན་པར་སྨན་མ་ཡིན་པ་བྱིན་པས་ནད་ལ་བབ་པར་གྱུར་ཏོ། །ས་ག་མས་བསམས་པ། ཇོ་བོ་ཇིའི་སླད་དུ་ཉིན་གཅིག་ནི་ཐེག་གི་བར་གྱུར་ལ། ཉིན་གཅིག་ནི་ན་བར་གྱུར་སྙམ་ནས་དེས་སྨན་གང་དག་གིས་

ཐེག་གི་བར་གྱུར་པའི་རྟགས་དེ་དག་བཟུང་ནས། དེ་ནས་དེས་སྨན་པ་རྣམས་སྒོ་ནས་སླར་བཟློག་ནས་རང་ཉིད་ཀྱིས་དཔྱད་པ་ལས་སོས་པར་གྱུར་ཏོ། །རི་དགས་འཛིན་གྱིས་བསམས་པ། གང་གིས་ན་བདག་ཉིན་གཅིག་ནི་ཐེག་གི་ཉིན་གཅིག་ནི་ན་བ་ལས་གང་གི་ཚེ་སྨན་པ་མི་འོང་བ་དེའི་

ที่มาและสัญญาอนุญาต

ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ

สัญญาอนุญาต Public Domain · หลักฐาน

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

  • หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
  • ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด