འཕགས་པ་ཐར་པ་ཆེན་པོ་ཕྱོགས་སུ་རྒྱས་པ་འགྱོད་ཚངས་ཀྱིས་སྡིག་སྦྱངས་ཏེ་སངས་རྒྱས་སུ་གྲུབ་པར་རྣམ་པར་བཀོད་པ་ཞེས་བྱ་བ་ཐེག་པ་ཆེན་པོའི་མདོ

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

เล่ม ๖๗ · หน้า 210a

༄༅༅། །བོད་སྐད་དུ། འཕགས་པ་ཐར་པ་ཆེན་པོ་ཕྱོགས་སུ་རྒྱས་པ་འགྱོད་ཚངས་ཀྱིས་སྡིག་སྦྱངས་ཏེ་སངས་རྒྱས་སུ་གྲུབ་པར་རྣམ་པར་བཀོད་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་

པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན། དགེ་སློང་གི་དགེ་འདུན་ཆེན་པོ་བརྒྱད་ཁྲི་དང་། བྱང་ཆུབ་སེམས་དཔའི་དགེ་འདུན་སུམ་ཁྲི་དྲུག་སྟོང་དང་ཐབས་ཅིག་ཏུ་བཞུགས་ཏེ། དེ་དག་ཀུན་ཀྱང་སྐྱེ་བ་གཅིག་གིས་ཐོགས་པ། སྒྲིབ་པ་ཐམས་ཅད་དང་

ཡོངས་སུ་བྲལ་བ། གཟི་བརྗིད་དང་དཔལ་གྱི་དབང་ཕྱུག་དང་ལྡན་པ། དེ་བཞིན་གཤེགས་པ་ལ་གསང་བའི་དོན་ཐབས་ཀྱིས་བསྐུལ་བ། སངས་རྒྱས་ཀྱི་ཞིང་ཡོངས་སུ་དག་པར་བྱེད་པ། སངས་རྒྱས་ཀྱི་བྱ་བ་ལྷུན་གྱིས་གྲུབ་པ། སངས་རྒྱས་རྣམས་ཀྱི་བྱིན་གྱི་རླབས་ཀྱིས་རྣམ་པར་བཀོད་པ།

ཆོས་ཀྱི་སྡེ་སྣོད་སྲུང་ཞིང་སྐྱོབ་པའི་ཕྱིར་ཐེག་པ་ཆེན་པོའི་མདོ་གཟུངས་སུ་འཛིན་ཅིང་སེང་གེའི་སྒྲས་ཕྱོགས་བཅུར་ཆོས་ཀྱི་འབྲུག་སྒྲ་ཆེན་པོ་སྒྲོགས་པ། དེ་དག་གི་ཡོན་ཏན་གྱི་གོ་འཕང་ནི་རི་རབ་དང་འདྲ་ལ། ཤེས་རབ་ཟབ་ཅིང་རྒྱ་ཆེ་བ་ནི་རྒྱ་མཚོ་དང་འདྲ་སྟེ། བདུད་ཀྱི་སྡེ་དཔུང་དང་བཅས་པར་བཏུལ་བ།

མུ་སྟེགས་ཐམས་ཅད་སྡུད་ཅིང་སེམས་རྣམ་པར་བྱང་བ་ལ་འཇོག་པ། མཐུ་སྟོབས་དང་ལྡན་པས་རྣམ་པར་གྲོལ་བ་ལ་ཐོགས་པ་མེད་པ། མཉམ་པ་ཉིད་ལ་བདེ་བར་གནས་པ། དྲན་པ་དང་ཏིང་ངེ་འཛིན་ཀུན་ཏུ་བཟུང་བ། བསྟན་པ་ལ་མོས་ཤིང་བློ་གྲོས་དང་ལྡན་པ། བསྡུ་བའི་དངོས་པོ་བཞི་དང་།

ཕ་རོལ་ཏུ་ཕྱིན་པ་དྲུག་དང་། ཐབས་ལ་མཁས་པ་དཔག་ཏུ་མེད་པས་ཆོས་ཐམས་ཅད་ཀྱི་དོན་དང་མི་ལྡན་པ་མེད་པ། སྐྱེ་བོ་རྣམས་ཀྱི་ཡིད་བཞིན་དུ་ཕྱིར་མི་ལྡོག་པའི་འཁོར་ལོ་བསྐོར་བ། ཡོད་པ་དང་མེད་པ་ཤེས་པའི་ཤེས་རབ་དང་ལྡན་པས་ཆོས་ཀྱི་རྣམ་གྲངས་ལ་མཁས་པ། མངོན་པར་ཤེས་པའི་ཏིང་ངེ་འཛིན་

ལ་བཞུགས་ཏེ་སྤྱན་ལྔས་སེམས་ཅན་རྣམས་ཀྱི་དབང་པོ་རྟོགས་པ། གཟི་བརྗིད་དང་དཔལ་དཔག་ཏུ་མེད་པ་སྐྱེ་བོ་མང་པོ་རྣམས་བསམ་གཏན་དང་ཤེས་རབ་ཀྱིས་སེམས་སུ་སྦྱངས་ཏེ་མཚན་དང་དཔེ་བྱད་བཟང་པོས་བརྒྱན་ཅིང་མཆོག་དང་ལྡན་པར་བྱེད་པ། སེམས་ནམ་མཁའ་དང་འདྲ་བ། འཇིག་རྟེན་གྱི་

เล่ม ๖๗ · หน้า 210b

གཟུགས་དང་ཁ་དོག་ཡོངས་སུ་བཏང་སྟེ། ཆོས་རྣམས་ཀྱི་ཆོས་ཉིད་ལ་མཁས་པ། རང་གི་རིག་པ་དང་ལྡན་པའི་ཤེས་རབ་ཀྱིས་སེམས་ཅན་གང་ནས་གང་དུ་འཁོར་བར་ཤེས་པ། ཏིང་ངེ་འཛིན་ཐམས་ཅད་དང་ལྡན་པས་མཉམ་པ་མེད་པ་ལ་བསྙེན་པ། དགེ་བའི་རྩ་བ་ཡུན་རིང་པོ་ནས་བསྐྱེད་པས་སངས་

རྒྱས་ཀྱི་དབང་ཕྱུག་ཐོབ་པ། ཡེ་ཤེས་དང་། སྟོབས་བཅུ་དང་། མི་འཇིགས་པ་བཞི་དང་། མ་འདྲེས་པ་བཅྭ་བརྒྱད་དང་ལྡན་པ། བཟང་འགྲོའི་སྒོ་ནི་ཕྱེ། ངན་འགྲོ་རྣམས་ཀྱི་སྒོ་ནི་བཀག་སྟེ། སེམས་ཅན་ཀུན་ལ་བུ་གཅིག་པ་དང་འདྲ་བར་སྙོམས་པར་བསྟན་པའི་ཕྱིར་ལམ་རྒྱུད་ལྔར་སྐྱེ་ཞིང་ལུས་

སྟོན་པར་བྱེད་པ། སེམས་ཅན་རྣམས་ཉོན་མོངས་པ་ལས་བསྒྲལ་བའི་ཕྱིར་སྨན་པའི་རྒྱལ་པོ་ལྟར་རྫུ་ཞིང་འཁོར་བ་ལ་གནས་ཏེ། ནད་གསོ་བའི་ཆོ་ག་ལ་མཁས་པས་ནད་ཀྱི་རྐྱེན་བཞིན་དུ་སྨན་བྱིན་ནས་འཁོར་བ་ལས་ཡོངས་སུ་ཐར་བར་བྱེད་པ། གང་གིས་ཐོས་ཀྱང་མ་གྲོལ་བ་མེད་པ་དེ་ལྟ་བུའི་ཡོན་ཏན་

ཚད་མེད་པ་དང་ལྡན་པ། སྔོན་འདས་པའི་སངས་རྒྱས་གྲངས་མེད་པ་ལ་མཆོད་པ་མྱོང་བ། སངས་རྒྱས་ཀྱི་ངོ་བོ་ཉིད་ཤིན་ཏུ་རིག་པ། དེ་བཞིན་གཤེགས་པ་ཡུན་དུ་གནས་པར་ཤེས་པ། རྟག་པར་ཡང་སེམས་ཅན་ལ་སངས་རྒྱས་ཀྱི་ངོ་བོ་ཉིད་ཡོད་པར་བཤད་པ་ཤ་སྟག་ལ་འདི་ལྟ་སྟེ། བྱང་ཆུབ་

སེམས་དཔའ་སེམས་དཔའ་ཆེན་པོ་འཇམ་དཔལ་དང་། བྱང་ཆུབ་སེམས་དཔའ་འོད་མི་གཡོ་དང་། བྱང་ཆུབ་སེམས་དཔའ་ཀླུ་ཤིང་ལྗོན་པ་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་མཐུ་ཆེན་ཐོབ་དང་། བྱང་ཆུབ་སེམས་དཔའ་སྨན་གྱི་རྒྱལ་པོ་དང་།

བྱང་ཆུབ་སེམས་དཔའ་སྨན་གྱི་བླ་དང་། བྱང་ཆུབ་སེམས་དཔའ་ཀུན་ཏུ་བཟང་པོ་དང་། བྱང་ཆུབ་སེམས་དཔའ་ཆོས་ཀྱི་དབང་ཕྱུག་རྒྱལ་པོ་དང་། བྱང་ཆུབ་སེམས་དཔའ་སེང་གེའི་སྒྲ་དང་། བྱང་ཆུབ་སེམས་དཔའ་གཟུངས་འཛིན་དང་། བྱང་ཆུབ་སེམས་དཔའ་རིན་ཆེན་མཛོད་དང་། བྱང་ཆུབ་

སེམས་དཔའ་རྟག་འགྲུས་དང་། བྱང་ཆུབ་སེམས་དཔའ་རྒྱུན་མི་གཏོང་དང་། བྱང་ཆུབ་སེམས་དཔའ་མཚན་ཉིད་ལ་དད་པ་དང་། བྱང་ཆུབ་སེམས་དཔའ་ཐུབ་མེད་དང་། བྱང་ཆུབ་སེམས་དཔའ་བྱམས་པ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་སུམ་ཁྲི་དྲུག་སྟོང་དང་། མཐུ་

เล่ม ๖๗ · หน้า 211a

སྟོབས་དང་ལྡན་པའི་ལྷ་བྱེ་བ་ཁྲག་ཁྲིག་ཕྲག་བརྒྱད་ཅུ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་དང་། ལྷ་དང་། ཀླུ་དང་། གནོད་སྦྱིན་དང་། མི་དང་མི་མ་ཡིན་པ་ལ་སོགས་པ་དང་། ཚངས་པ་དང་། བརྒྱ་བྱིན་ལ་སོགས་ཏེ་གྲངས་མེད་དཔག་ཏུ་མེད་པའི་

ལྷ་དང་ལྷན་ཅིག་ཏུ་ནམ་མཁའ་ལ་འཁོད་དེ། ལྷའི་རིན་པོ་ཆེའི་མེ་ཏོག་གི་ཆར་ཕབ་ནས་རོལ་མོ་སིལ་སྙན་ཡང་གྲངས་མེད་དཔག་ཏུ་མེད་པ་སྒྲ་རང་འབྱིན་པ་བྱས་ཏེ། ལྷ་ཚངས་པས་སམ་བྷ་རའི་སྤོས་ཀྱི་བདུག་པ་དྲི་ཞིམ་པོས་བདུགས་ཏེ། དེ་བཞིན་གཤེགས་པ་ལ་མཆོད་པའི་སྤྲིན་ཕུང་ཕྱོགས་

བཅུའི་འཇིག་རྟེན་གྲངས་མེད་པའི་ཁམས་ཀུན་ཏུ་ཁྱབ་པར་གྱུར་ཏེ། ཕྱོགས་བཅུའི་སངས་རྒྱས་ཐམས་ཅད་དང་། ཕྱོགས་བཅུའི་ཆོས་ཐམས་ཅད་དང་། ཕྱོགས་བཅུའི་བྱང་ཆུབ་སེམས་དཔའི་དགེ་འདུན་ཐམས་ཅད་ལ་ཀུན་ཏུ་མཆོད་ཡོན་གསོལ་བར་གྱུར་ཏོ། །དེ་ལྟར་ལྷ་རྣམས་ཀྱིས་

མཆོད་པ་ཕུལ་བ་ཡང་ཐེག་པ་ཆེན་པོ་བླ་ན་མེད་པའི་ལམ་ཚོལ་བའི་ཕྱིར་རོ། །དེ་ནས་དེའི་ཚེ་དེའི་དུས་ན་བཅོམ་ལྡན་འདས་འཁོར་ཆེན་པོ་གྲངས་མེད་དཔག་ཏུ་མེད་པས་བསྐོར་བ་དེ་དག་དང་ཐབས་ཅིག་ཏུ་ཤིང་སཱ་ལ་ཆེན་པོ་ག་ལ་བ་དེ་ལོགས་སུ་གཤེགས་ནས་དཔྱིད་ཟླ་འབྲིང་པོའི་ཚེས་བཅྭ་ལྔ་ལ་

མྱ་ངན་ལས་འདའ་བའི་ཁར། དེ་བཞིན་གཤེགས་པའི་བྱིན་གྱི་རླབས་ཀྱིས་བྱམས་པ་ཆེན་པོས་སེམས་ཅན་ཐམས་ཅད་སྡུད་ཅིང་སྐྱོབ་པར་དགོངས་ཏེ། གསུང་དབྱངས་ཆེན་པོ་ཕྱུང་ནས་སྒྲ་དེས་ཕྱོགས་བཅུ་ཀུན་ཏུ་ཁྱབ་པར་སོ་སོའི་སྐད་བཞིན་དུ་སེམས་ཅན་ཐམས་ཅད་ལ་བཀའ་སྩལ་པ། དེང་ནི་དེ་

བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སེམས་ཅན་ལ་ཐུགས་བརྩེ་བར་དགོངས་སོ། །སེམས་ཅན་ལ་སྲུང་ཞིང་སྐྱོབ་པར་དགོངས་སོ། །སེམས་ཅན་སྡུད་ཅིང་གཞེས་པར་དགོངས་སོ། །སེམས་ཅན་ལ་སྙོམས་པར་གཟིགས་པ་ནི་དཔེར་ན་བུ་གཅིག་

ལ་ལྟ་བ་དང་འདྲ་བར་རྟེན་མེད་པ་ལ་རྟེན་བྱའོ། །སངས་རྒྱས་ཀྱི་བདག་ཉིད་མ་མཐོང་བ་ནི་མཐོང་བར་བྱའོ། །ཉོན་མོངས་པ་དང་མ་བྲལ་བ་ནི་བྲལ་བར་བྱའོ། །བདེ་བ་མེད་པ་ནི་བདེ་བར་བྱའོ། །མ་གྲོལ་བ་ནི་རྣམ་པར་གྲོལ་བར་བྱའོ། །ལོངས་སྤྱོད་མེད་པ་ནི་ལོངས་སྤྱོད་དང་ལྡན་པར་བྱའོ། །

เล่ม ๖๗ · หน้า 211b

ཐེ་ཙོམ་དང་མ་བྲལ་བ་ནི་ཐེ་ཙོམ་དང་བྲལ་བར་བྱའོ། །འགྱོད་ཚངས་མ་བྱས་པ་ནི་འགྱོད་པ་ཚངས་པར་བྱའོ། །མྱ་ངན་ལས་མ་འདས་པ་ནི་མྱ་ངན་ལས་བཟླ་བར་བྱའོ་ཞེས་བཀའ་སྩལ་པ་དང་། དེའི་ཚེ་དེའི་དུས་ན་ལམ་གྱི་གཡས་གཡོན་དུ་ས་གཞི་མཉམ་པ་ཐང་བཟང་པོ་ཡོངས་སུ་དག་པ། བཀྲ་ཤིས་ཀྱི་ས་

ཆུ་ཞེང་དུ་མཉམ་པར་དཔག་ཚད་སྟོང་ཕྲག་བཅུ་བཅུ་ཡོད་པ་དེ། བཅོམ་ལྡན་འདས་ཀྱིས་གཟིགས་ནས་མོད་ལ་དེར་གཞེས་ཏེ། དགེ་སློང་རྣམས་ལ་འདི་སྐད་ཅེས་བཀའ་སྩལ་ཏོ། །གནས་འདི་ནི་ཆོས་བཤད་པའི་སར་འོས་སོ་ཞེས་བཀའ་སྩལ་པ་དང་། དགེ་སློང་ཀུན་དགའ་བོས་བཅོམ་ལྡན་

འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ནི་སྔོན་རྟག་ཏུ་རི་དང་། ཚལ་དང་། ཆབ་གཙང་མ་འབབ་པ་དང་། བཟའ་ཤིང་གི་ར་བ་དང་། མེ་ཏོག་དག་མཆིས་པ་ལ་དགྱེས་ན་དེང་འདིར་ནི་ཆབ་འབབ་པ་ཡང་མ་མཆིས། ཤིང་དང་ཚལ་ཡང་མ་མཆིས། གྲོང་

ཁྱིམ་དང་། བཟའ་ཤིང་གི་ར་བ་དང་། མི་ཕལ་ཡང་མ་མཆིས་པར་བཅོམ་ལྡན་འདས་འདིར་ཅི་ལ་དགྱེས་ཏེ་བཞུགས་ཤིང་ཆོས་བཤད་ཅེས་གསུངས། ཕལ་ཤུལ་རིང་པོ་ནས་མཆི་བ། བཀྲེས་སྐོམ་པའི་སྡུག་བསྔལ་གྱིས་གདུངས་པའི་སེམས་ཅན་རྣམས་སྲོག་ཀྱང་མི་འཚོ་སྟེ། ཟས་མཆིས་

ན་ནི་སྲོག་མཆིས། སྲོག་མཆིས་ན་ནི་ལུས་མཆིས། ལུས་མཆིས་ན་ནི་ཆོས་ལམ་ཡང་མཆིས་སོ། །ཟས་མ་མཆིས་ན་སྲོག་མ་མཆིས། སྲོག་མ་མཆིས་ན་ལུས་མ་མཆིས། ལུས་མ་མཆིས་ན་ཆོས་ལམ་ཡང་མ་མཆིས་པ་ལགས་ནད་འདིའི་ནང་དུ་འདི་ལྟ་བུའི་ཡིད་ལ་བབ་པ་གང་

ཡང་མ་མཆིས་པར་བཅོམ་ལྡན་འདས་ཅིའི་སླད་དུ་འདིར་ཆོས་བཤད་ཅེས་གསུངས། དེ་ནས་ཤེས་རབ་ཆེན་པོ་ཤ་ར་དྭ་ཏིའི་བུས་སངས་རྒྱས་ཀྱི་བྱིན་གྱི་རླབས་ཀྱིས་ཀུན་དགའ་བོ་ལ་སྨྲས་པ། སྔར་ཆོས་ཀྱི་ཕྱིར་ཞུ་བའི་རིགས་ཀྱི་གཞན་ནི་བསམ་མི་དགོས་སོ། །དེ་བཞིན་གཤེགས་པ་ནི་སྟོབས་

བཅུ་དང་། མི་འཇིགས་པ་བཞིར་མ་ཟད་ཀྱི་དེ་བཞིན་གཤེགས་པ་ལ་སྟོབས་དཔག་ཏུ་མེད་པ་དང་། ཅིས་ཀྱང་མི་བསྙེངས་པ་ཐམས་ཅད་མཁྱེན་པའི་ཡེ་ཤེས་དཔག་ཏུ་མེད་པ་དང་། གཟི་བརྗིད་དང་། རྫུ་འཕྲུལ་དཔག་ཏུ་མེད་པ་མངའ་སྟེ། གང་རྟེན་མེད་པ་དེའི་ནི་རྟེན་དུ་མཛད། སངས་རྒྱས་ཀྱི་ངོ་བོ་

เล่ม ๖๗ · หน้า 212a

ཉིད་མ་མཐོང་བ་ནི་མཐོང་བར་མཛད། ཉོན་མོངས་པ་དང་མ་བྲལ་བ་ནི་ཉོན་མོངས་པ་དང་བྲལ་བར་མཛད། བདེ་བ་མེད་པ་ནི་བདེ་བ་ལ་རེག་པར་མཛད། མ་གྲོལ་བ་ནི་རྣམ་པར་གྲོལ་བར་མཛད། ལོངས་སྤྱོད་དང་མི་ལྡན་པ་ནི་ལོངས་སྤྱོད་དང་ལྡན་པར་མཛད། མྱ་ངན་ལས་མ་འདས་པ་ནི་

ཡོངས་སུ་མྱ་ངན་ལས་བཟླ་བར་མཛད་དེ། དེ་བཞིན་གཤེགས་པ་ལ་འདི་ལྟ་བུ་ལ་སོགས་པའི་རྫུ་འཕྲུལ་དཔག་ཏུ་མེད་པ་དང་ལྡན་ན་དེ་བཞིན་གཤེགས་པ་ལ་རང་འབྱུང་མེད་པའི་མྱ་ངན་བྱ་ཅི་དགོས། བདག་དྲན་པ་སྔོན་དྲ་མ་ཆེན་པོ་དྲི་མ་མེད་པར་གྲགས་པས་ཕལ་མང་པོ་ལ་ཆོས་བསྟན་པ་ན་འཇིག་རྟེན་གྱི་

ཁམས་གཞན་ནས་འོངས་པའི་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་དང་། མཐུ་སྟོབས་དང་ལྡན་པའི་ལྷ་དང་། ཀླུ་ལ་སོགས་པའི་ཕལ་མང་པོ་ཁང་པའི་ནང་དུ་འདུས་ཏེ་འཁོད་པའི་ཚེ་ན་ཟས་དག་མི་སྣང་ནས། བདག་གིས་དེའི་ཚེ་ན་ཕལ་མང་པོ་འདི་རྣམས་ཀྱི་ཟས་ཇི་ལྟར་འབྱོར་

སྙམ་བསམས་པ་ལས་དྲི་མ་མེད་པར་གྲགས་པས་བདག་ལ་སྨྲས་པ། ཉན་ཐོས་ཤེས་རབ་དམན་པ་ཡང་དག་པའི་ཆོས་བསམ་པའི་རིགས་ཀྱི་ཐོག་མ་ནས་ཟས་དང་། གོས་དང་། ཁྲི་སྟན་ལ་སོགས་པ་སྒྱུ་མའི་རྫས་ལ་ཅིའི་ཕྱིར་རྣམ་པར་རྟོག་ཅེས་དྲ་མ་ཆེན་པོ་དྲི་མ་མེད་པར་གྲགས་པས་དེ་

སྐད་སྨྲས་པའི་ཚེ་ལྷ་དང་། མི་རྣམས་ནི་ཆོས་ལམ་ཐོབ་བདག་ནི་སྐྱེངས་ཏེ་ཁྱོད་ད་ལྟར་སྨྲས་པ་ཡང་དེ་དང་འདྲའོ། །དེ་ནས་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དགའ་བོ་བློ་གྲོས་ཀྱི་མཆོག་ཤ་ར་དྭ་ཏིའི་བུས་སྨྲས་པ་བདེན་ཏེ། ཐེག་པ་ཆེན་པོ་བསམ་པའི་རིགས་ཀྱི་ལུས་བདེ་བའི་

ཕྱིར་བསམ་པ་ནི་མ་ཡིན་ནོ། །དེ་སྐད་ཅེས་བཀའ་སྩལ་མ་ཐག་ཏུ་ཏིང་ངེ་འཛིན་ཏུ་ཞུགས་ནས་བྱིན་གྱི་རླབས་ཀྱི་མོད་ལས་དེར་གསེར་གྱི་མེ་ཏོག་གཅིག་འབུས་ནས་བྱུང་སྟེ། དེའི་འཕང་དུ་དཔག་ཚད་ཁྲི་ཕྲག་བཞི་བཅུ་ཡོད་ལ། དེས་སྟོང་ཁམས་ཀུན་ཀྱང་ཆུབ་པར་གཡོགས་ནས་བཻ་དཱུརྱའི་དྲ་བས་ཀྱང་

གསེར་གྱི་མེ་ཏོག་ཁྱབ་པར་གཡོགས་ཏེ། མེ་ཏོག་དེའི་འོག་ཏུ་རིན་པོ་ཆེའི་ཁྲུས་ཀྱི་རྫིང་བུ་ཡོན་ཏན་བརྒྱད་དང་ལྡན་པའི་ཆུ་གཙང་མས་ཡོངས་སུ་གང་བ། དེའི་ངོས་བཞིར་མེ་ཏོག་སྣ་ཚོགས་རྣམ་པ་མང་པོ་ལ་འདི་ལྟ་སྟེ། མེ་ཏོག་ཨུད་པ་ལ་དང་། ཀུ་མུ་ད་དང་། པད་མ་དང་། པུན་ད་རཱི་ཀ་ལ་སོགས་པ་རྣམ་པ་

เล่ม ๖๗ · หน้า 212b

མང་པོ་དཔག་ཏུ་མེད་པས་རིན་པོ་ཆེའི་རྫིང་རྣམ་པར་བརྒྱན་པ་བྱུང་ནས། གང་ལ་ལ་ཞིག་གིས་གསེར་གྱི་མེ་ཏོག་དང་། རིན་པོ་ཆེའི་རྫིང་བུ་མཐོང་བ་ཙམ་གྱིས་ཆོས་ཀྱི་མིག་རྣམ་པར་དག་པ་ཐོབ་ན་ནང་དུ་ཞུགས་ཏེ་ཁྲུས་བྱས་པ་ལྟ་ཅི་སྨོས། གལ་ཏེ་ཞུགས་ཏེ་ཁྲུས་བྱས་པ་ནི་རྣམ་པར་དག་པ་དང་། མི་སྐྱེ་བའི་ཆོས་

ལ་བཟོད་པ་ཐོབ་བོ། །གསེར་གྱི་མེ་ཏོག་དེའི་འོག་ཏུ་སེང་གེའི་ཁྲི་རིན་པོ་ཆེ་ལས་བྱས་པ། འཕང་དུ་དཔག་ཚད་བརྒྱ་པ་བྱུང་སྟེ། དེ་ནས་བཅོམ་ལྡན་འདས་ཀྱིས་རིན་པོ་ཆེའི་ཁྲི་དེ་ལ་བཞུགས་ནས་སྐུའི་བ་སྤུའི་བུ་ག་དང་། ཡན་ལག་ཀུན་ནས་འོད་ཟེར་ཆེན་པོ་བཏང་སྟེ། དེ་བཞིན་གཤེགས་པའི་འོད་ཟེར་ཡང་

གསེར་གྱི་མེ་ཏོག་གི་ཁ་དོག་དང་འཐུན་པར་ཕྱོགས་བཞིར་བྱུང་བས་ཕྱོགས་བཅུར་སངས་རྒྱས་ཀྱི་ཞིང་ཐམས་ཅད་དུ་ཁྱབ་པར་སྣང་བར་བྱས་པའི་གནས་ཐམས་ཅད་དུ་རི་ལུང་དང་། ཡུལ་ས་ཀུན་ཀྱང་མཉམ་པར་གྱུར་ནས་ཐམས་ཅད་གསེར་གྱི་ཁ་དོག་ཏུ་གྱུར་ཏེ། སྨེ་བཙོགས་པ་ཡང་མེད་ལ་སེམས་ཅན་དམྱལ་

བ་ཡང་ཞི་ནས་ཡི་དྭགས་ཀྱང་རྣམ་པར་གྲོལ་ཏེ། ལོག་སྤྱོད་དང་དམ་པའི་ཆོས་ལ་སྨོད་པ་ནི་མ་གཏོགས་སོ། །དེ་བཞིན་གཤེགས་པའི་བྱིན་གྱི་རླབས་ཀྱིས་འཇིག་རྟེན་གྱི་ཁམས་གཞན་དང་། དབུས་ཀྱི་ཁམས་འདི་དང་འདྲ་བར་གྱུར་ནས་ཐ་དད་པ་མེད་དོ། །ཕྱོགས་བཅུའི་སངས་རྒྱས་ཀྱིས་ཀྱང་འོད་ཟེར་དེ་གཟིགས་

ནས་སོ་སོ་ནས་ཚིག་འཐུན་པར་བཅོམ་ལྡན་འདས་ཤཱཀྱ་ཐུབ་པ་ལ་ལེགས་སོ་ཞེས་པས་བསྟོད་ནས་ལེགས་སོ་ལེགས་སོ། །བཅོམ་ལྡན་འདས་བྱམས་པ་ཆེན་པོས་འོད་ཟེར་བཏང་བ་འདི་ནི་སྔོན་གྱི་འོད་ཟེར་དང་མི་འདྲ་སྟེ། སྔོན་ཆད་ཀྱི་འོད་ནི་ཤར་ཕྱོགས་སུ་སྔར་ཤར་ན། དེང་གི་འོད་ནི་ཕྱོགས་བཞི་ནས་

དུས་གཅིག་ཏུ་ཕྱོགས་བཅུར་ཁྱབ་པར་ཤར་བ་ལས་བལྟས་ན་འོད་དེས་ནི་སྡུག་བསྔལ་བའི་སེམས་ཅན་ཐམས་ཅད་ཁམས་གསུམ་ནས་བཏོན་ཏེ། མྱ་ངན་ལས་བཟླ་བར་མངོན་ནོ་ཞེས་གསུངས་སོ། །དེ་ནས་ཕྱོགས་བཅུའི་སངས་རྒྱས་རྣམས་ཀྱིས་སོ་སོའི་འཁོར་གྱི་བྱང་ཆུབ་སེམས་དཔའ་སེམས་དཔའ་

ཆེན་པོ་རྣམས་ལ་བཀའ་སྩལ་པ། རིགས་ཀྱི་བུ་དག་འདི་ལྟ་སྟེ། འཇིག་རྟེན་གྱི་ཁམས་མི་མཇེད་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་འོད་ཟེར་ཆེན་པོ་གཏོང་བ་ནི་གདོན་མི་ཟ་བར་དམ་པའི་ཆོས་བསྟན་ཅིང་སེམས་ཅན་རྣམས་སྡུག་བསྔལ་བ་ལས་བསྒྲལ་

เล่ม ๖๗ · หน้า 213a

གྱི་ཆ་ན། ཁྱེད་རྣམས་འཇིག་རྟེན་གྱི་ཁམས་དེར་སོང་ལ། སངས་རྒྱས་དེ་ལ་མཆོད་པ་ཕུལ་ནས་ཐེ་ཙོམ་རྣམས་ཞུ་ཞིང་ཆོས་ཀྱི་རྣམ་གྲངས་ཉན་ཅིང་གསོལ་བའི་རིགས་སོ། །འཇིག་རྟེན་གྱི་ཁམས་དེའི་སེམས་ཅན་ཡོངས་ཀྱིས་ངན་ཅིང་ཁྲོ་ལ་རྫུན་སྒྱུ་ཅན་ཏེ། ཐེག་པ་གཅིག་ལ་མ་དད་པས་

དེ་བཞིན་གཤེགས་པ་ཤཱཀྱ་ཐུབ་པས་བྱམས་པ་ཆེན་པོས་ཐབས་སྣ་ཚོགས་ཀྱིས་ཐེག་པ་གསུམ་དུ་ཕྱེ་སྟེ། སྲིད་པ་གསུམ་ལས་རྣམ་པར་གྲོལ་བར་བྱེད་དོ། །ཐེག་པ་གསུམ་དུ་བསྟན་གྱིས་ཀྱང་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་དག་པ་

ཡོངས་སུ་དཀར་བ་སྟེ། སངས་རྒྱས་བཅོམ་ལྡན་འདས་དེ་ནི་བསྐལ་པ་ཁྲི་ཕྲག་བརྒྱ་སྟོང་དུ་ཡང་མཐོང་བར་མི་འགྱུར། ཆོས་ཀྱི་རྣམ་གྲངས་བཤད་དོ་ཅོག་ཀྱང་ཐོས་པར་མི་འགྱུར། འཁོར་དེ་དག་ཀྱང་ཚོགས་འདུས་པར་མི་འགྱུར། བཅོམ་ལྡན་འདས་ཤཱཀྱ་ཐུབ་པའི་གདན་ཁྲི་དང་། གསེར་གྱི་

མེ་ཏོག་ཁྱད་པར་ཅན་ལ་བཞུགས་པ་ཡང་མཐོང་བར་མི་འགྱུར་རོ། །དེ་བས་ན་ཁྱེད་རྣམས་འཇིག་རྟེན་དེར་སོང་ལ། སངས་རྒྱས་དེ་མཐོང་ཞིང་ཐེ་ཙོམ་དག་ཞུ་ན་ཁྱེད་རྣམས་ཀྱང་བསོད་ནམས་ཐོབ་ལ། སྐྱེ་བོ་ཀུན་ལ་ཕན་པ་དང་། བདེ་བར་ཡང་འགྱུར་རོ། །དེ་སྐད་ཅེས་བཀའ་སྩལ་མ་ཐག་ཏུ་ཕྱོགས་

བཅུའི་སངས་རྒྱས་ཀྱི་ཞིང་རེ་རེ་ནས་བྱང་ཆུབ་སེམས་དཔའ་བྱེ་བ་ཕྲག་བཅུ་བཅུ་རང་རང་གི་གནས་ནས་ལངས་ཏེ། སོ་སོའི་སངས་རྒྱས་ལ་ཕྱག་འཚལ་ནས། ཐབས་ཅིག་ཏུ་དོང་སྟེ། བྱང་ཆུབ་སེམས་དཔའ་རེ་རེ་ཡང་རོལ་མོ་རྣམ་པ་བརྒྱ་སྟོང་ཐོགས་ཏེ། མེ་ཏོག་རིན་པོ་ཆེ་མཆོག་ཏུ་བཟང་པོའི་ཆར་

ཕབ་ནས་བཅོམ་ལྡན་འདས་ཤཱཀྱ་ཐུབ་པ་ག་ལ་བ་དེར་ཕྱིན་ཏེ། བཅོམ་ལྡན་འདས་ལ་ཕྱག་འཚལ་ནས་ལན་བདུན་བསྐོར་བ་བྱས་ནས་ཕྱོགས་གཅིག་ཏུ་འདུག་གོ། །དེ་ནས་སོ་སོ་ནས་ཚིག་གཅིག་དང་། ངག་གཅིག་དང་། སྒྲ་གཅིག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །

བཅོམ་ལྡན་འདས་བདག་ཅག་གསོལ་ཞིང་ཞུ་བ་ཞིག་མཆིས་ན་སྐྱེ་བོ་རྣམས་ལ་སྨན་པ་དང་བདེ་བའི་སླད་དུ་བཅོམ་ལྡན་འདས་ཀྱིས་སྐབས་དབྱེ་ཞིང་བཤད་པར་སྨོན་ཏོ། །དེ་ནས་བཅོམ་ལྡན་འདས་ཀྱིས་ཕས་བྱིན་པའི་བྱང་ཆུབ་སེམས་དཔའ་རྣམས་ལ་བཀའ་སྩལ་པ། རིགས་ཀྱི་བུ་དག་ཐེ་ཙོམ་

เล่ม ๖๗ · หน้า 213b

ཡོད་ན་དེ་ཀུན་དྲིས་ཤིག་དང་། ངས་ཁྱེད་རྣམས་ལ་བྱེ་བྲག་ཕྱེད་པར་བཤད་དོ། །དེ་ནས་བྱང་ཆུབ་སེམས་དཔའ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གི་དེ་བཞིན་གཤེགས་པ་ནི་ཐེག་པ་གཅིག་ལས་མི་བཤད་ན། འདིར་

བཅོམ་ལྡན་འདས་ཀྱིས་ཅིའི་སླད་དུ་ཐེག་པ་གསུམ་དུ་བཤད་ཅེས་གསོལ་པ་དང་། དེ་ནས་བཅོམ་ལྡན་འདས་ཀྱིས་ཐོགས་པ་མེད་པའི་ཡེ་ཤེས་ཀྱིས་བྱང་ཆུབ་སེམས་དཔའ་རྣམས་ལ་བཀའ་སྩལ་པ། རིགས་ཀྱི་བུ་ཁྱེད་རྣམས་སེམས་ཅན་ལ་ཕན་པ་དང་བདེ་བའི་ཕྱིར་དོན་འདི་ལྟ་བུ་འདྲི་བ་ལེགས་ཀྱིས་

ཉོན་ཅིག་རིགས་ཀྱི་བུ་རྣམས་དཔེར་ན་མི་གཅིག་ལ་མིང་གསུམ་ཡོད་པ་ལྟ་བུ་སྟེ། ཆུང་ངུའི་ཚེ་ན་ནི་བྱིས་པ་ཞེས་བྱ། ལོ་ཉི་ཤུ་ཡན་ཆད་ལ་ནི་སྐྱེས་བུ་ཞེས་བྱ། ལོ་བརྒྱད་ཅུ་ཡན་ཆད་འདས་པ་ནི་རྒན་པོ་ཞེས་བྱའོ། །ངའི་ཐེག་པ་གསུམ་ཡང་དེ་དང་འདྲ་སྟེ། སེམས་རྒྱ་ཆུང་ངུ་ཉན་ཐོས་ལ་ནི་ཐེག་

པ་ཆུང་ངུར་བསྟན། སེམས་རྒྱ་འབྲིང་པོ་རང་སངས་རྒྱས་ལ་ནི་ཐེག་པ་འབྲིང་པོ་བསྟན། བྱང་ཆུབ་སེམས་དཔའ་སེམས་དཔའ་ཆེན་པོ་ལམ་ཆེན་པོ་ལ་ཞུགས་པ་ལ་ནི་ཐེག་པ་ཆེན་པོ་བསྟན་ཏོ། །རིགས་ཀྱི་བུ་ཁྱེད་རྣམས་ཡང་ཉོན་ཅིག །མདོར་མཐའ་གཉིས་མེད་པ་དང་ཕྱོགས་གཅིག་ཏུ་འཐུན་ཏེ།

ཤེས་པའི་སྒོ་ཐ་དད་ཀྱང་མཐའ་གཅིག་ཏུ་འདུའོ། །མདོ་ནི་ཐེག་པ་གཅིག་སྟེ། ཐབས་སྤྱད་པས་གསུམ་དུ་བགོས་ཀྱིས་ཀྱང་། ཉན་ཐོས་དང་། རང་སངས་རྒྱས་ཀྱི་ཐེག་པ་ཡང་ཐེག་པ་ཆེན་པོའི་ནང་དུ་འདུ་ལ། ཐེག་པ་ཆེན་པོ་ནི་སངས་རྒྱས་ཀྱི་ཐེག་པའོ། །དེ་བས་ན་ཐེག་པ་གསུམ་ཡང་

ཐེག་པ་གཅིག་གོ་ཞེས་ཆོས་འདི་བསྟན་པའི་ཚེ་བྱང་ཆུབ་སེམས་དཔའ་སྟོང་ཕྲག་བཅུ་མི་སྐྱེ་བའི་ཆོས་ལ་བཟོད་པ་ཐོབ་བོ། །དགེ་སློང་བརྒྱད་བརྒྱས་ནི་དགྲ་བཅོམ་པའི་འབྲས་བུ་ཐོབ། ལྷ་ཉི་ཁྲིས་ནི་ཆོས་ཀྱི་མིག་རྣམ་པར་དག་པ་ཐོབ། མི་ལས་ཁྲི་ཕྲག་བརྒྱ་སྟོང་ནི་མོད་ལ་བླ་ན་མེད་པ་ཡང་

དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་ཕྱོགས་བཅུ་ནས་ཕྱིན་པའི་བྱང་ཆུབ་སེམས་དཔའ་རྣམས་ཀྱིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་དེ་བཞིན་གཤེགས་པའི་

เล่ม ๖๗ · หน้า 214a

མཐུ་དང་། བྱིན་གྱི་རླབས་ཀྱིས་ཁམས་འདིར་ཕྱིན་ཅིང་བཅོམ་ལྡན་འདས་ཀྱི་ཞལ་མཐོང་བའི་སྟེང་དུ་ཐེག་པ་ཆེན་པོའི་ཆོས་ཀྱང་ཐོས་ན་ཆོས་ཀྱི་རྣམ་གྲངས་འདི་བདག་ཅག་གིས་བླངས་ཏེ་གཟུངས་སུ་འཛིན་པར་གནང་བར་མཛད་དུ་གསོལ། དེ་བཞིན་གཤེགས་པ་མྱ་ངན་ལས་འདས་པའི་སླད་ན་

འཇིག་རྟེན་གྱི་ཁམས་འདི་དང་། འཇིག་རྟེན་གྱི་ཁམས་གཞན་དུ་རི་དང་། ནགས་དང་། ཚལ་དང་། ཤིང་དྲུང་དང་། རིག་པ་འཛིན་པའི་གནས་དང་། གྲོང་དང་གྲོང་ཁྱེར་དང་། གྲོང་རྡལ་དང་། ལྗོངས་དང་། དགོན་པ་དང་། དུར་ཁྲོད་དང་། མཆོད་རྟེན་དང་། གཙུག་ལག་ཁང་དང་། དགེ་འདུན་གྱི་གནས་

ཁང་དང་། ཆོས་སྟོན་པའི་ས་མང་པོ་འདུ་བ་དང་། ཁྱིམ་པའི་གནས་སོ་སོའི་ཁྱིམ་ཁྱིམ་དུ་རྒྱ་ཆེར་སྤེལ་ཞིང་རྒྱུན་མི་འཆད་པར་བགྱིའོ། །དེ་ཅིའི་སླད་དུ་ཞེ་ན། ཆོས་ཀྱི་རྣམ་གྲངས་འདི་ཡུན་རིང་དུ་གནས་ནང་ན་འགྲོ་ཀུན་བཀག་པར་འགྱུར་རོ། །སྔོན་དེ་བཞིན་གཤེགས་པས་བསྟན་པས་སེམས་

ཅན་དམྱལ་བའི་སྒོ་བཅད་ཅེས་ཐོས་ཏེ། གང་གིས་མདོ་སྡེ་འདི་ལས་ཚིག་གཅིག་བཏོན་ན་ལྷ་རྣམས་ཀྱང་རབ་ཏུ་དགའ་བ་དང་ཚིམ་པ་སྐྱེས་ཏེ། རྟག་ཏུ་བསྙེན་བཀུར་བགྱིད་ཅིང་རང་བཞིན་གྱིས་དགེ་བ་སྤྱོད་དོ། །གང་ལ་ལས་ཐར་པ་ཆེན་པོ་ཕྱོགས་སུ་རྒྱས་པའི་མདོ་འདི་ཐོས་ཏེ། དགའ་བ་སྐྱེས་ནས་དད་

པ་དང་གུས་པའི་སེམས་ཀྱིས་ཡི་གེར་འབྲིའམ། ཡི་གེར་འདྲིར་འཇུག་གམ། ཀློག་གམ། ཁ་ཏོན་ཏུ་བྱས་སམ། བླངས་སམ། འཆང་ངམ། ཕྱག་འཚལ་ཞིང་ཆོས་ཀྱི་རྣམ་གྲངས་འདིའི་ནང་གི་སངས་རྒྱས་ཀྱི་མཚན་གཅིག་གམ། བྱང་ཆུབ་སེམས་དཔའི་མིང་གཅིག་བརྗོད་ན་གང་ཟག་དེ་ནི་ཚེ་འདི་

ཉིད་ལ་བདེ་བ་ཐོབ་སྟེ། སྡིག་པ་རྣམས་མི་མཐོང་ཞིང་ཚེ་ཟད་དེ་འཆི་འཕོས་ན་ཡང་བྱང་ཆུབ་སེམས་དཔའ་བདག་ཅག་རྣམས་ཀྱིས་སྔོན་དུ་ལམ་དྲངས་ཏེ། བདག་ཅག་གི་འཇིག་རྟེན་གྱི་ཁམས་རྣམ་པར་དག་པར་གནས་གཅིག་ཏུ་སྐྱེ་བར་བགྱིའོ། །དེ་ཅིའི་སླད་དུ་ཞེ་ན། མདོ་སྡེ་འདི་བླངས་པ་དང་།

གཟུངས་སུ་འཛིན་པའི་སླད་དུའོ། །མདོ་སྡེ་འདི་བླངས་ཏེ། གཟུངས་སུ་འཛིན་པ་ནི་སངས་རྒྱས་ཀྱི་སྐུ་འཛིན་པའོ། །སངས་རྒྱས་ཀྱི་སྐུ་འཛིན་པ་ནི་བྱང་ཆུབ་སེམས་དཔའ་ལགས་པར་མངོན་ཏེ། དེ་བས་ན་དེ་དག་ནི་བདག་ཅག་དང་བསླབ་པ་གཅིག་གོ། །རྒྱུ་དང་རྐྱེན་དེས་ན་མདོ་སྡེ་འདི་གཟུངས་སུ་འཛིན་པ་

เล่ม ๖๗ · หน้า 214b

རྣམས་གནས་གཅིག་ཏུ་སྐྱེ་ཞིང་མི་འབྲལ་བར་སྨོན་ཏོ། །དེ་ནས་ཚངས་པ་ཆེན་པོ་དང་། སུམ་ཅུ་རྩ་གསུམ་གྱི་ལྷ་རྣམས་དང་། འཇིག་རྟེན་སྐྱོང་བ་རྒྱལ་པོ་ཆེན་པོ་བཞི་དང་། གསང་བ་པའི་བདག་པོ་ལག་ན་རྡོ་རྗེ་དང་། གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་ལ་སོགས་པ་དང་། ཀླུའི་རྒྱལ་

པོ་དགའ་བོ་དང་། ཉེ་དགའ་བོ་དང་། ལྷ་མ་ཡིན་དང་། ནམ་མཁའ་ལྡིང་དང་། དབྱངས་ཅན་དང་། འཕྲོག་མ་མོ་དང་། རིའི་ལྷ་དང་། ཤིང་གི་ལྷ་དང་། ཀླུང་གི་ལྷ་དང་། མཚོའི་ལྷ་དང་། སའི་ལྷ་དང་། ཆུའི་ལྷ་དང་། མེའི་ལྷ་དང་། རླུང་གི་ལྷ་ལ་སོགས་པ་གྲངས་མེད་དཔག་ཏུ་མེད་པ་

དག་རང་རང་གི་སྟན་ལས་ལངས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཅིང་གུས་པས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་བཅོམ་ལྡན་འདས་ཀྱིས་བསྟན་པའི་མདོ་སྡེ་ཐར་པ་ཆེན་པོ་ཕྱོགས་སུ་རྒྱས་པ་འདི་ལ་རྟག་ཏུ་

བསྲུང་ཞིང་འཛིན་པར་བགྱིའོ། །མདོ་སྡེ་འདི་གང་དུ་གནས་པ་དེར་བདག་ཅག་གིས་རྟག་ཏུ་མདུན་དུ་བདར་ཏེ་ཡོངས་སུ་དག་པར་བགྱིའོ། །མདོ་སྡེ་འདི་མཆོད་རྟེན་དུའམ་གནས་ཁང་དུའམ། ཁྱིམ་པའི་ཁྱིམ་དུའམ། དགོན་པ་ན་གནས་ཀྱང་རུང་སྟེ། གལ་ཏེ་གང་ཟག་འགའ་ཞིག་གིས་སུག་

པ་མི་གཙང་བས་མདོ་སྡེ་འདི་བཟུང་ངམ། མ་གུས་པར་བཀླགས་སམ། ཁ་ཏོན་དུ་བགྱིས་ན་བདག་ཅག་གིས་གང་ཟག་དེ་འགྲོ་སྡོད་འདུག་ཉལ་སྤྱོད་ལམ་རྣམ་བཞིར་ལུས་དང་སེམས་མི་བདེ་བར་བགྱིའོ། །དེ་གང་དུ་གནས་པ་དེར་འཇིགས་ཤིང་སྐྲག་པ་དང་། གློ་བུར་དུ་གནོད་པ་འབྱུང་བར་བགྱིའོ། །

ཚེ་འདི་ལ་མི་བདེ་བ་སྣ་ཚོགས་དང་། ཚེ་འཕོས་ན་ཡང་སེམས་ཅན་དམྱལ་བར་ལྟུང་བར་བགྱིའོ། །གང་ལ་ལ་ཞིག་གིས་མདོ་སྡེ་འདི་ལ་གུས་པར་བགྱིས་ཏེ། སུག་པ་གཙང་མས་བླངས་ཤིང་འཆང་ངམ། ཁྲུས་བགྱིས་ཏེ་བདུག་སྤོས་ཀྱིས་བདུག་ཅིང་བཀླགས་སམ། ཁ་ཏོན་དུ་བགྱིས་སམ། འཆང་ངམ་

འཛིན་ཏམ། ཡི་གེར་འདྲིའམ། ཡི་གེར་འདྲིར་འཇུག་གམ། རྗེས་སུ་དྲན་ནམ་སྡིག་པའི་ཆོས་རྣམས་མ་སྤྱད་ན་བདག་ཅག་གིས་མདོ་སྡེ་འདི་བསྲུང་བའི་སླད་དུ་གང་ཟག་དེའི་རིམ་གྲོ་བགྱིའོ། །བསྲུང་བར་བགྱིའོ། །གང་ཟག་དེ་ཉལ་ན་ཡང་དེའི་མདུན་དུ་མཆིས་ཏེ། ལྟས་ངན་པ་རྣམས་མི་འབྱུང་བར་བགྱིའོ། །ཡང་

เล่ม ๖๗ · หน้า 215a

གཅིག་ཏུ་ན་དགྲ་མ་རུངས་པ་དང་། གདོན་མ་རུངས་པ་རྣམས་ཀྱི་གནོད་པས་མི་ཚུགས་པར་བགྱིའོ། །དེ་གང་དུ་གནས་པའི་ཁང་ཁྱིམ་ཡང་བསྲུང་བར་བགྱིའོ། །དེ་སྟེ་འགྲོན་དུ་མཆི་ན་བདག་ཅག་རྣམས་ཀྱིས་རྟག་ཏུ་ཕྱིན་འབྲང་ཞིང་ཅི་འཚལ་བ་སྦྱར་བར་བགྱིའོ། །ཕྱོགས་བཞིར་གང་

དུ་མཆི་ན་ཡང་བགེགས་མ་མཆིས་པར་རྒྱུན་ཏུ་དགེ་བའི་ཆོས་མཐོང་ཞིང་ཚེ་འཕོས་ན་ཡང་ལྷར་སྐྱེ་བར་བགྱིའོ། །རྒྱུ་དེ་དང་རྐྱེན་དེས་ནི་སངས་རྒྱས་མཐོང་ཞིང་ཐེག་པ་ཆེན་པོ་མི་སྟོང་བར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། ལྷ་དང་།

ལྷ་མ་ཡིན་གྱི་བདག་པོ་ལ་སོགས་པ་ལ་བཀའ་སྩལ་པ། དེ་དེ་བཞིན་ནོ། །དེ་དེ་བཞིན་ཏེ། ཁྱེད་རྣམས་ཀྱིས་བཤད་པ་བཞིན་ཏེ། མདོ་སྡེ་འདི་ཐོས་པར་ཡང་མི་འགྱུར་ན་མཐོང་བར་ལྟ་ག་ལ་འགྱུར། གལ་ཏེ་མདོ་སྡེ་འདི་བླངས་ཏེ་བཟུང་ངམ། འཆང་ངམ། ཀློག་གམ། ཁ་ཏོན་དུ་བྱེད་པར་

འདོད་ན་ཁྲུས་དག་པར་བྱས་ལ་གོས་གཙང་མ་བགོས་ཏེ། ཁང་པ་དབེན་པ་གཙང་མའི་ནང་དུ་བ་དན་དང་། རྒྱལ་མཚན་དང་། གདུགས་ཀྱིས་བརྒྱན་ནས་བདུག་པ་སྣ་ཚོགས་དང་། ཙན་དན་དང་། ཕྱེ་མ་དང་། བྱུག་པས་མཆོད་ཅིང་ཕྱག་འཚལ་ནས་དེ་ལྟར་ཉིན་མཚན་དུས་དྲུག་ཏུ་ཐོག་མར་མགོ་

བཙུགས་ནས་ཉིན་ཞག་བདུན་གྱི་བར་དུ་ཉིན་རེ་རེ་ཞིང་མདོ་སྡེ་འདི་བཀླགས་ཏེ། སེམས་མི་གཡེང་བ་དང་། དྲན་པ་མི་གཡེང་བ་དང་། རྟོག་པ་མི་གཡེང་བ་དང་། བསམ་པ་མི་གཡེང་བ་དང་། གཟུངས་སུ་འཛིན་པ་མི་གཡེང་བ་དང་། སྤྱོད་པ་མི་གཡེང་བ་དང་། བསྟན་ཅིང་བསླབ་པ་མི་གཡེང་བར་ཉིན་

མཚན་དུས་དྲུག་ཏུ་མདོ་སྡེ་འདིའི་ནང་ནས་འབྱུང་བའི་སངས་རྒྱས་དང་། བྱང་ཆུབ་སེམས་དཔའ་དང་། མདོ་སྡེ་བཅུ་གཉིས་རྣམས་ལ་ཕྱག་འཚལ་ཞིང་ཀློག་པའམ། ཁ་ཏོན་ཏུ་འདོན་ཅིང་མོས་པ་དང་གུས་པར་བྱེད་ནུས་ན་མདོ་སྡེ་འདིའི་ནང་ནས་འབྱུང་བ་བཞིན་དུ་སྡིག་ལྕི་བ་ཀུན་འབྱང་བར་འགྱུར་གྱིས། དེ་

ལ་ཐེ་ཙོམ་མམ་ཡིད་གཉིས་སུ་མ་བྱེད་ཅིག །དེ་ཅིའི་ཕྱིར་ཞེ་ན། ཐར་པ་ཆེན་པོ་ཕྱོགས་སུ་རྒྱས་པའི་མདོ་སྡེ་འདི་ནི་ཕྱོགས་བཅུའི་སངས་རྒྱས་ཀྱི་སྤྱད་པ་སྤྱོད་པའོ། །འདི་ནི་བསྲུང་ཞིང་སྐྱོབ་པ་སྟེ། སངས་རྒྱས་ཐམས་ཅད་ཀྱི་ཡུམ་མོ། །འདི་ནི་མདོ་སྡེ་ཀུན་གྱི་རྒྱལ་པོའོ། །འདི་ནི་དོན་དམ་པའི་སྙིང་པོ་

เล่ม ๖๗ · หน้า 215b

འོ། །འདི་ནི་བྱང་ཆུབ་སེམས་དཔའ་རྣམས་ཀྱི་ལམ་མོ། །ཐར་པ་ཆེན་པོ་ཕྱོགས་སུ་རྒྱས་པའི་མདོ་སྡེ་ཟབ་མོ་འདི་ནི་འཇིག་རྟེན་ན་ཆེན་པོ་དྲུག་དང་འདྲ་སྟེ། བསམ་གྱིས་མི་ཁྱབ་བོ། །དྲུག་པོ་གང་ཞེ་ན། ས་ཆེན་པོ་དང་། ཆུ་ཆེན་པོ་དང་། མེ་ཆེན་པོ་དང་། རླུང་ཆེན་པོ་དང་། ཉི་མ་ཆེན་པོ་དང་། ནམ་

མཁའ་ཆེན་པོའོ། །མདོ་སྡེ་འདི་ནི་ས་ཆེན་པོ་དང་འདྲ་སྟེ། གཙང་སྨེ་དང་། བཟང་ངན་ཐམས་ཅད་ཐེག་པར་བྱེད་དོ། །མདོ་སྡེ་འདི་ནི་ཆུ་ཆེན་པོ་དང་འདྲ་སྟེ། སྨེ་བཙོག་ཐམས་ཅད་འཁྲུ་བར་བྱེད་དོ། །མདོ་སྡེ་འདི་ནི་མེ་ཆེན་པོ་དང་འདྲ་སྟེ། ཉོན་མོངས་པ་དང་། བཙོག་པ་དང་། ལྗན་ལྗིན་

ཐམས་ཅད་ཚིག་པར་བྱེད་དོ། །མདོ་སྡེ་འདི་ནི་རླུང་ཆེན་པོ་དང་འདྲ་སྟེ། སྨེ་བཙོག་ཐམས་ཅད་བུས་པར་བྱེད་དོ། །མདོ་སྡེ་འདི་ནི་ཉི་མ་ཆེན་པོ་དང་འདྲ་སྟེ། མུན་ནག་ཡོད་དོ་ཅོག་སྣང་བར་བྱེད་དོ། །མདོ་སྡེ་འདི་ནི་ནམ་མཁའ་དང་འདྲ་སྟེ། བཟང་ངན་ཡོད་དོ་ཅོག་ཐམས་ཅད་ཤོང་བར་བྱེད་དོ། །དེ་ལྟ་བུའི་

ཐེག་པ་ཆེན་པོའི་མདོ་སྡེ་ཐར་པ་ཆེན་པོ་ཕྱོགས་སུ་རྒྱས་པ་འདི་རྒྱ་ཆེ་བ་ནི་དཔེ་ཟླ་མེད་དེ། ཡར་བྱང་ཆུབ་སེམས་དཔའ་དང་། བར་དུ་ཉན་ཐོས་དང་། མར་འཇིག་ཚོགས་ཀྱི་གཟུགས་ཅན་ནོ་ཅོག་མི་ཤོང་བ་མེད་དོ། །དེ་བས་ན་ཁྱེད་རྣམས་ཀྱིས་མདོ་སྡེ་འདི་གཟུངས་སུ་བཟུང་སྟེ། ཆོངས་ཤིག །ཀུན་ཏུ་སྤེལ་བར་

གྱིས་ཤིག །དད་ཅིང་གུས་པར་བྱོས་ཤིག་དང་། ཁྱེད་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་ཀྱི་ཡེ་ཤེས་ཁོང་དུ་ཆུད་པ་དང་། སངས་རྒྱས་ཀྱི་བདག་ཉིད་མངོན་དུ་མཐོང་བར་བྱའོ། །ཁྱེད་ལྷ་རྣམས་ཀྱང་མདོ་སྡེ་འདི་བླངས་ཏེ། འཆང་ན་རྒྱུན་དུ་ང་ཡང་མཐོང་ལ། མ་བྱོན་པའི་སངས་རྒྱས་

ཐམས་ཅད་མཐོང་བ་དང་། ཆོས་ཀྱི་འཁོར་ལོ་བསྐོར་བ་དང་། དཀྱིལ་འཁོར་ཆེན་པོ་ལ་ཞུགས་པར་བྱའོ་ཞེས་བཀའ་སྩལ་པ་དང་། དེ་ནས་འཁོར་མང་པོའི་ནང་ནས་བྱང་ཆུབ་སེམས་དཔའ་མཚན་ཉིད་དད་ཅེས་བྱ་བ་དེ་འཁོར་འདུས་པའི་ནང་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བགོས་

ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་གསོལ་ཞིང་ཞུ་བ་ཞིག་མཆིས་ན་དཔག་ཏུ་མ་མཆིས་པའི་སྐྱེ་བོ་ལ་སྨན་པ་དང་། བདེ་བའི་སླད་དུ་བཅོམ་ལྡན་འདས་ཀྱིས་སྐབས་དབྱེ་ཞིང་བཤད་པར་སྨོན་ཏོ། །

เล่ม ๖๗ · หน้า 216a

དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་མཚན་ཉིད་དད་ལ་བཀའ་སྩལ་པ། ཤིན་ཏུ་ལེགས་སོ་ལེགས་སོ། །རིགས་ཀྱི་བུ་དྲི་བ་ཡོད་ན་ཅི་འདོད་པ་བཞིན་དྲིས་ཤིག་དང་། ངས་ཁྱོད་ལ་བྱེ་བྲག་ཕྱེད་པར་བཤད་དོ། །ཁྱོད་ཀྱིས་དྲིས་པ་དེ་ཡང་སེམས་ཅན་དཔག་ཏུ་མེད་

པ་ལ་ཕན་པ་དང་བདེ་བར་འགྱུར་རོ། །དེ་ནས་བྱང་ཆུབ་སེམས་དཔའ་མཚན་ཉིད་དད་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་དྲན་པ་སྔོན་ཡུན་རིང་པོ་འདས་པ་ན། དེ་བཞིན་གཤེགས་པ་མཚན་རིན་ཆེན་གཙུག་ཕུད་ཅེས་བགྱི་བ་དེའི་མཚན་ལན་ཅིག་ཐོས་ན་ལྷར་སྐྱེ་བ་ཐོབ་བོ་ཞེས་

ཐོས་ཏེ། དེ་ལས་ཡུན་མི་རིང་བ་ཞིག་ན་རྒྱལ་པོ་ལྷའི་དབང་ཕྱུག་འོད་ཀྱི་ཡུལ་ཁམས་ན་དགོན་པའི་ནང་ཞིག་ལ་རྫིང་ཆེན་པོ་ཞིག་མཆིས་པའི་ཆབ་སྐམས་ནས་དེ་ན་ཉ་ཆེན་པོ་སྟོང་ཕྲག་བཅུ་ཞིག་མཆིས་པ་གདུགས་ཀྱིས་གདུངས་ཏེ་འགུམ་དུ་ཉེ་བ་ལས། དྲ་མ་ཆུ་འབེབས་ཞེས་བགྱི་བས་ཉ་དེ་དག་མཐོང་

ནས་སེམས་ཅན་ལ་ཤིན་ཏུ་བྱམས་པ་དང་། སྙིང་རྗེ་སྐྱེས་ཏེ། ཆབ་དང་ཁ་ཟས་སྩལ་ཀྱང་དགུང་འགའ་ཙམ་ཞིག་ནི་གསོན་གྲང་ན། ཚེ་རིང་པོར་མི་ཐོགས་པར་འཚལ་བས་བཅོམ་ལྡན་འདས་རིན་ཆེན་གཙུག་ཕུད་ཀྱི་མཚན་ལན་གསུམ་བརྗོད་པ་ཉ་དེ་དག་གིས་ཐོས་མ་ཐག་ཏུ་དུས་ལས་འདས་ཏེ།

སུམ་ཅུ་རྩ་གསུམ་གྱི་ལྷར་སྐྱེས་སོ་ཞེས་གདའ་ན་དེང་བཅོམ་ལྡན་འདས་འཁོར་འདི་དག་དང་། དུས་སླད་མའི་སེམས་ཅན་རྣམས་ཀྱི་སླད་དུ་སངས་རྒྱས་རྣམས་ཀྱི་མཚན་བསྟན་ཅིང་བཅོམ་ལྡན་འདས་ཤཱཀྱ་ཐུབ་པའི་མཚན་ཐོས་ན་ཚད་མ་མཆིས་དཔག་ཏུ་མ་མཆིས་པའི་སྐྱེ་བོ་ལ་སྨན་པ་དང་བདེ་བ་དང་།

དཔག་ཏུ་མ་མཆིས་པའི་བསོད་ནམས་དང་། རྟག་ཏུ་ལོངས་སྤྱོད་ཕུན་སུམ་ཚོགས་པ་དང་། སངས་རྒྱས་ཀྱི་བདག་ཉིད་ཀྱང་མངོན་སུམ་དུ་རྟོགས་པར་འགྱུར་བའི་སླད་དུ་བཤད་དུ་གསོལ། སྡོམ་པའི་རྩ་བ་ཉམས་པ་དང་། ཉོན་མོངས་པས་འཁྲུལ་པའི་སེམས་ཅན་རྣམས་ཡོངས་སུ་གྲོལ་བར་འགྱུར་བའི་སླད་

དུ་བཤད་པར་སྨོན་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མཚན་ཉིད་དད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་གལ་ཏེ་ངས་ཕྱོགས་བཅུའི་སངས་རྒྱས་ཀྱི་མཚན་རྒྱ་ཆེར་བཤད་ན་བསྐལ་པ་བརྒྱ་སྟོང་ཁྲིའི་བར་དུ་བཤད་ཀྱང་མི་རྫོགས་ཏེ། འདི་ལྟར་ཆུ་ཐམས་ཅད་

เล่ม ๖๗ · หน้า 216b

ཀྱི་ཐིགས་པ་ནི་བགྲང་ཞིང་ཤེས་པར་རུང་གི་སངས་རྒྱས་ཐམས་ཅད་ཀྱི་མཚན་ནི་གྲངས་སུ་ཤེས་པ་མེད་དོ། །རི་རབ་ཐམས་ཅད་ནི་སྲང་གྲངས་སུ་བགྲང་དུ་རུང་གི་སངས་རྒྱས་ཐམས་ཅད་ཀྱི་མཚན་ནི་གྲངས་སུ་ཤེས་པ་མེད་དོ། །ནམ་མཁའི་མཚམས་དང་མཐའ་ཐུག་པར་ཤེས་པར་རུང་གི་སངས་རྒྱས་ཐམས་ཅད་ཀྱི་

མཚན་ནི་གྲངས་སུ་ཤེས་པ་མེད་དོ། །ངས་ཁྱོད་ལ་དུས་གསུམ་གྱི་སངས་རྒྱས་རྣམས་ཀྱི་མཚན་མདོ་ཙམ་ཞིག་བསྟན་གྱིས་གང་གིས་རྣ་བར་ལན་གཅིག་ཐོས་ན་གང་ཟག་དེ་ཚེ་འཕོས་མ་ཐག་ཏུ་ལྷའི་གནས་སུ་སྐྱེ་བར་འགྱུར་རོ། །ཐོས་ནས་ཀྱང་མོས་པ་དང་གུས་པར་བྱས་ཏེ། ཡི་གེར་བྲིས་ལ་མཚན་ནས་བརྗོད་ཅིང་ཕྱག་

འཚལ་ན་བསྐལ་པ་གྲངས་མེད་པ་ནས་འཁོར་བའི་སྡིག་པ་ཀུན་འབྱང་བར་འགྱུར། བསོད་ནམས་དཔག་ཏུ་མེད་པ་འཐོབ་པར་འགྱུར་རོ། །གང་ཟག་དེ་དུས་ཟད་ན་ཡང་ཕྱོགས་བཅུའི་འཇིག་རྟེན་གྱི་ཁམས་གང་ནས་གང་དུ་དད་པ་དེ་དང་དེར་སྐྱེ་བར་འགྱུར། ང་ཡང་མཐོང་ལ་དུས་མ་འོངས་པ་ན་བསྐལ་པ་བཟང་པོའི་

སངས་རྒྱས་རྣམས་ཀྱང་མཐོང་བར་འགྱུར་རོ། །དེ་ནས་བཅོམ་ལྡན་འདས་ཀྱིས་ཡང་འཁོར་མང་པོ་རྣམས་ལ་བཀའ་སྩལ་པ། ཁྱེད་རྣམས་ཚུལ་བཞིན་དུ་གོས་ཚགས་བཅོས་ལ། ལུས་མི་གཡེང་བ་དང་། སེམས་མི་གཡེང་བ་དང་། དྲན་པ་མི་གཡེང་བ་དང་། རྟོག་པ་མི་གཡེང་བར་བྱོས་ལ་ཆོས་ཐོས་པར་

འདོད་ན་སེམས་རྩེ་གཅིག་ཏུ་བསྡུས་ཤིག །བཅོམ་ལྡན་འདས་མར་མེ་རི་རབ་རྒྱལ་པོ་ལ་ཕྱག་འཚལ་ལོ། །བཅོམ་ལྡན་འདས་རིན་ཆེན་རྒྱལ་པོ་ལ་ཕྱག་འཚལ་ལོ། །བཅོམ་ལྡན་འདས་རིན་ཆེན་གཙུག་ཕུད་ལ་ཕྱག་འཚལ་ལོ། །བཅོམ་ལྡན་འདས་ཚེ་དཔག་མེད་ལ་ཕྱག་འཚལ་ལོ། །བཅོམ་ལྡན་འདས་

རྣམ་པར་གཟིགས་ལ་ཕྱག་འཚལ་ལོ། །བཅོམ་ལྡན་འདས་རིན་ཆེན་མང་ལ་ཕྱག་འཚལ་ལོ། །བཅོམ་ལྡན་འདས་ཤཱཀྱ་ཐུབ་པ་ལ་ཕྱག་འཚལ་ལོ། །བཅོམ་ལྡན་འདས་ཆོས་ཐམས་ཅད་སྡུད་ཅིང་འཛིན་པ་ལ་ཕྱག་འཚལ་ལོ། །བརྗོད་དཔག་འདས་ལ་ཕྱག་འཚལ་ལོ། །དཔེ་ཟླ་མེད་ལ་ཕྱག་འཚལ་ལོ། །མུ་མེད་ཆོས་

ལ་ཕྱག་འཚལ་ལོ། །བསམ་ཁྱབ་དཀའ་ལ་ཕྱག་འཚལ་ལོ། །སྟོབས་ལ་གནས་པའི་སྟོབས་ཀྱི་སྟོབས་ལ་ཕྱག་འཚལ་ལོ། །འཇིག་པ་མེད་པའི་སྟོབས་བཅུ་ལ་ཕྱག་འཚལ་ལོ། །འཇིག་རྟེན་གསུམ་གྱི་གཙོ་ལ་ཕྱག་འཚལ་ལོ། །ཐམས་ཅད་འདྲེན་པའི་སྟོན་པ་ཆེན་པོ་ལ་ཕྱག་འཚལ་ལོ། །འཆིང་བ་ཀུན་

เล่ม ๖๗ · หน้า 217a

གཅོད་ལ་ཕྱག་འཚལ་ལོ། །ཕ་རོལ་མཐར་ཕྱིན་ལ་ཕྱག་འཚལ་ལོ། །འཇིག་རྟེན་ཀུན་ལས་འདས་ཟིན་པ་ལ་ཕྱག་འཚལ་ལོ། །འཁོར་བའི་རྒྱུད་དང་ཡོངས་སུ་བྲལ་བ་ལ་ཕྱག་འཚལ་ལོ། །ཏིང་ངེ་འཛིན་རྣམ་པར་གྲོལ་བ་ལ་ཕྱག་འཚལ་ལོ། །ནམ་མཁའ་ལྟར་དམིགས་

སུ་མེད་པ་ལ་ཕྱག་འཚལ་ལོ། །མང་པོའི་ནང་ན་ཆོས་ཀྱི་རྒྱལ་པོ་ལ་ཕྱག་འཚལ་ལོ། །བདུད་བཞིའི་ཚོགས་འཇོམས་པ་ལ་ཕྱག་འཚལ་ལོ། །བུ་གཅིག་པའི་ཕ་ལྟར་བྱམས་པ་ཆེན་པོ་ལ་ཕྱག་འཚལ་ལོ། །ཚེ་རབས་འཆི་འཕོས་གར་འབྱུང་གར་སྐྱེས་ཀྱང་སངས་རྒྱས་ཀྱི་ཞལ་རྟག་ཏུ་མཐོང་ཞིང་སངས་

རྒྱས་ཀྱི་བདག་ཉིད་མངོན་པར་རྟོགས་ལ་མྱ་ངན་ལས་འདས་པ་ཆེན་པོར་ཕྱིན་པར་གྱུར་ཅིག །དེ་ཅིའི་ཕྱིར་ཞེ་ན། འཇིག་ཚོགས་ཅན་ཀུན་ལ་སངས་རྒྱས་ཀྱི་བདག་ཉིད་ཡོད་པའི་ཕྱིར་རོ། །ཀྱེ་འཁོར་མང་པོ་རྣམས་སོར་མོ་བཅུའི་ཐལ་མོ་སྦྱོར་ལ་ཡང་དག་པར་མཉན་ཅིང་སེམས་ཐག་པ་ནས་མཆོད་པ་ཕུལ་

ཅིག །ངས་ནི་ཕྱོགས་བཅུ་དུས་གསུམ་གྱི། །སངས་རྒྱས་མཚན་རྣམས་བཤད་ཀྱིས་ཉོན། །སྡིག་པ་མཚམས་མེད་ལྔ་པོ་ཡང་། །རྣམ་གྲོལ་མཚན་ཉིད་བསྐྱེད་པར་བྱ། །དགེ་རྩ་མེད་པའི་གང་ཟག་ལ། །ངས་ནི་དགྲོལ་ཞིང་བཤད་ཀྱིས་ཀྱང་། །དེས་ཀྱང་ཆུད་པར་མི་ནུས་ཏེ། །ས་བོན་ཚིག་

རྣམས་རང་བཞིན་དོང་། །གྲུང་བརྟན་འབའ་ཞིག་གནས་པར་འགྱུར། །ཐེག་པ་ཆུང་ངུ་བསལ་ནས་སུ། །ཐེག་ཆེན་ཉི་ཚེ་ཡོད་པར་འགྱུར། །ཐེག་པ་གཉིས་པོ་བསལ་ནས་སུ། ཐེག་པ་གཅིག་པུ་ཡོད་པར་འགྱུར། །དགེ་རྩ་མེད་པའི་གང་ཟག་གིས། །སྒྲ་འདི་ཐོས་པར་མི་འགྱུར་ཏེ། །སངས་རྒྱས་

གྲངས་མེད་མཆོད་མྱོང་བས། །གདོད་དེས་སངས་རྒྱས་མཚན་ཐོས་སོ། །ལེན་ཅིང་འཛིན་པར་བྱེད་པ་ནི། །ཕྱོགས་ཙམ་རྣམ་པར་གྲོལ་བ་སྟེ། །རྣམ་དག་ས་ལ་བདེ་བར་གནས། །ད་ཡང་ང་ཡི་ཆོས་འདི་ལ། །སངས་རྒྱས་སྤྱད་པ་ཀུན་སྤྱད་དེ། །སངས་རྒྱས་མཚན་ལ་ཕྱག་འཚལ་ཞིང་། །མདོ་འདི་

བླང་ཞིང་ཀློག་འཆང་ན། །བདུད་ཀྱི་ལས་དང་བྲལ་བར་འགྱུར། །རྩ་བ་བཞི་དང་མཚམས་མེད་དང་། །ལོག་སྤྱོད་རྣམས་ཀྱི་སྡིག་ཀྱང་འབྱང་། །མ་འོངས་དུས་ན་གང་ཟག་དེ། །འཕགས་པའི་ལམ་ཡང་ངེས་པར་འགྲུབ། །གང་ཞིག་དད་པ་མ་སྐྱེས་ན། །ངན་སོང་གསུམ་དུ་ལྟུང་ཡང་དག །དད་སྐྱེས་

เล่ม ๖๗ · หน้า 217b

བརྩོན་འགྲུས་ཕྱག་འཚལ་ན། །ཚད་མེད་སངས་རྒྱས་མཐོང་བར་འགྱུར། །དེ་བས་རྩེ་གཅིག་ཕྱག་འཚལ་ཞིང་། །སྡིག་པ་དཔག་མེད་བྱང་བར་སྨོན། །དེ་ཕྱིར་གུས་པར་ཕྱག་འཚལ་ལོ། །དེ་ནས་འཁོར་མང་པོ་རྣམས་ཐལ་མོ་སྦྱར་ཏེ། ཡང་དག་པར་མཉན་ནས་ལུས་དང་སེམས་རྩེ་གཅིག་ཏུ་བསྡུས་

ཏེ། གཡེལ་ཞིང་འགྱུར་བ་མེད་པར་ཡན་ལག་ལྔ་ས་ལ་གཏུགས་ཏེ་སེམས་ཐག་པ་ནས་མཉན་ཏོ། །དེ་ནས་བཅོམ་ལྡན་འདས་ཀྱིས་སངས་རྒྱས་ཀྱི་མཚན་ནས་བརྗོད་ཅིང་བསྒྲགས་པ་ལས། འདས་པའི་སངས་རྒྱས་དཔག་ཏུ་མེད་པ་ལ་ཕྱག་འཚལ་ལོ། །སངས་རྒྱས་ཉི་ཟླ་མར་མེ་གསལ་ཉི་ཁྲི་ལ་ཕྱག་

འཚལ་ལོ། །སངས་རྒྱས་མར་མེ་མཛད་སུམ་ཁྲི་ལ་ཕྱག་འཚལ་ལོ། །སངས་རྒྱས་ཐོགས་མེད་ཡེ་ཤེས་མཆོག་ལ་ཕྱག་འཚལ་ལོ། །སངས་རྒྱས་རྒྱལ་བུ་བཅུ་དྲུག་ལ་ཕྱག་འཚལ་ལོ། །སངས་རྒྱས་ནམ་མཁའི་རྒྱལ་པོ་ལ་ཕྱག་འཚལ་ལོ། །སངས་རྒྱས་རིན་ཆེན་མང་ལ་ཕྱག་འཚལ་ལོ། །

སངས་རྒྱས་སྤྲིན་དབང་མར་མེ་རྒྱལ་པོ་ལ་ཕྱག་འཚལ་ལོ། །སངས་རྒྱས་བྱིན་སྒྲ་རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་དཔག་མེད་ལ་ཕྱག་འཚལ་ལོ། །སངས་རྒྱས་དགེ་བར་བསམས་ལ་ཕྱག་འཚལ་ལོ། །སངས་རྒྱས་སྐུ་སྤྲུལ་ལ་ཕྱག་འཚལ་ལོ། །སངས་རྒྱས་ཉི་ཟླ་གསལ་གྱི་དཔལ་ལ་ཕྱག་

འཚལ་ལོ། །སངས་རྒྱས་པད་མ་དག་པ་རྒྱུ་སྐར་རྒྱལ་པོ་ཡེ་ཤེས་ལ་ཕྱག་འཚལ་ལོ། །སངས་རྒྱས་རྣམ་དག་བརྒྱན་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཀླུ་བཙུན་རྒྱལ་པོ་ལ་ཕྱག་འཚལ་ལོ། །སངས་རྒྱས་སྤྲིན་འབྲུག་སྒྲ་རྒྱལ་པོ་ལ་ཕྱག་འཚལ་ལོ། །སངས་རྒྱས་སྤྲིན་འབྲུག་སྒྲ་རྒྱུ་སྐར་རྒྱལ་པོ་ཡེ་

ཤེས་པ་དམ་ལ་ཕྱག་འཚལ་ལོ། །སངས་རྒྱས་རིན་ཆེན་རྒྱལ་པོ་ལ་ཕྱག་འཚལ་ལོ། །སངས་རྒྱས་ཤིང་སཱ་ལ་རྒྱལ་པོ་ལ་ཕྱག་འཚལ་ལོ། །སངས་རྒྱས་རིན་ཆེན་བླ་མ་དཔལ་གཟི་བརྗིད་རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་སྣང་རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་མི་

གཡོ་འབུམ་ཕྲག་བརྒྱ་ལ་ཕྱག་འཚལ་ལོ། །སངས་རྒྱས་འོད་རྒྱང་རིང་ལ་ཕྱག་འཚལ་ལོ། །སངས་རྒྱས་ཟླ་འོད་ལ་ཕྱག་འཚལ་ལོ། །སངས་རྒྱས་སྤོས་ཙན་དན་ལ་ཕྱག་འཚལ་ལོ། །སངས་རྒྱས་རི་ལེགས་རྒྱལ་པོ་ལ་ཕྱག་འཚལ་ལོ། །སངས་རྒྱས་རི་རབ་ལྷའི་ཐོར་ཚུགས་ཅན་ལ་ཕྱག་

เล่ม ๖๗ · หน้า 218a

འཚལ་ལོ། །སངས་རྒྱས་འོད་སྙོམས་རི་རབ་ལ་ཕྱག་འཚལ་ལོ། །སངས་རྒྱས་ཟླ་གཟུགས་ལ་ཕྱག་འཚལ་ལོ། །སངས་རྒྱས་ཡང་དག་པའི་དྲན་པ་ལ་ཕྱག་འཚལ་ལོ། །སངས་རྒྱས་དྲི་མ་བྲལ་ལ་ཕྱག་འཚལ་ལོ། །སངས་རྒྱས་ཆགས་མེད་ལ་ཕྱག་འཚལ་ལོ། །

སངས་རྒྱས་ཀླུའི་ལྷ་ལ་ཕྱག་འཚལ་ལོ། །སངས་རྒྱས་ས་མི་གཡོ་ལ་ཕྱག་འཚལ་ལོ། །སངས་རྒྱས་མེ་ཏོག་མཆོག་ལ་ཕྱག་འཚལ་ལོ། །སངས་རྒྱས་བཻ་དཱུརྱའི་མེ་ཏོག་མཆོག་ལ་ཕྱག་འཚལ་ལོ། །སངས་རྒྱས་བཻ་དཱུརྱ་དང་གསེར་གྱི་ཁ་དོག་ལ་ཕྱག་འཚལ་ལོ། །སངས་རྒྱས་གསེར་

མཛོད་ལ་ཕྱག་འཚལ་ལོ། །སངས་རྒྱས་སའི་གདུང་ལ་ཕྱག་འཚལ་ལོ། །སངས་རྒྱས་ཟླ་བའི་གཟུགས་བརྙན་ལ་ཕྱག་འཚལ་ལོ། །སངས་རྒྱས་ཉི་མའི་དབྱངས་ལ་ཕྱག་འཚལ་ལོ། །སངས་རྒྱས་པད་མ་རྣམ་གྲོལ་ལ་ཕྱག་འཚལ་ལོ། །སངས་རྒྱས་འོད་ཟེར་རྣམ་པར་བརྒྱན་ལ་ཕྱག་འཚལ་

ལོ། །སངས་རྒྱས་བློ་རྒྱ་མཚོ་མངོན་པར་ཤེས་པ་ལ་ཕྱག་འཚལ་ལོ། །སངས་རྒྱས་ཆུ་འོད་ལ་ཕྱག་འཚལ་ལོ། །སངས་རྒྱས་དབྱངས་ཆེན་པོ་ལ་ཕྱག་འཚལ་ལོ། །སངས་རྒྱས་དྲི་མ་སྒྱུ་མ་དང་བྲལ་བ་ལ་ཕྱག་འཚལ་ལོ། །སངས་རྒྱས་ཡིད་སྐྱོ་སྤངས་ལ་ཕྱག་འཚལ་ལོ། །སངས་རྒྱས་

རིན་པོ་ཆེ་འབར་བ་ལ་ཕྱག་འཚལ་ལོ། །སངས་རྒྱས་གཙུག་དམ་པ་ལ་ཕྱག་འཚལ་ལོ། །སངས་རྒྱས་དཔའ་བར་འཛུགས་ཕྱག་འཚལ་ལོ། །སངས་རྒྱས་ཤེས་རབ་ཡོན་ཏན་འཛིན་ལ་ཕྱག་འཚལ་ལོ། །སངས་རྒྱས་ཉི་ཟླའི་འོད་སྒྲིབ་ལ་ཕྱག་འཚལ་ལོ། །སངས་རྒྱས་ཉི་ཟླ་བཻ་དཱུརྱའི་

འོད་ལ་ཕྱག་འཚལ་ལོ། །སངས་རྒྱས་བླ་མེད་བཻ་དཱུརྱའི་འོད་ལ་ཕྱག་འཚལ་ལོ། །སངས་རྒྱས་རབ་མཆོག་གཙོ་ལ་ཕྱག་འཚལ་ལོ། །སངས་རྒྱས་བྱང་ཆུབ་མེ་ཏོག་ལ་ཕྱག་འཚལ་ལོ། །སངས་རྒྱས་ཟླ་གསལ་ལ་ཕྱག་འཚལ་ལོ། །སངས་རྒྱས་ཉི་འོད་ལ་ཕྱག་འཚལ་ལོ། །སངས་རྒྱས་

མེ་ཏོག་མདོག་གི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཆུ་ཟླའི་འོད་ལ་ཕྱག་འཚལ་ལོ། །སངས་རྒྱས་ཚོམ་མུན་སེལ་ལ་ཕྱག་འཚལ་ལོ། །སངས་རྒྱས་སྡུག་བསྔལ་བསྒྲལ་ལ་ཕྱག་འཚལ་ལོ། །སངས་རྒྱས་མོས་པ་དང་བ་ལ་ཕྱག་འཚལ་ལོ། །སངས་རྒྱས་སྔོན་ལེགས་ལ་ཕྱག་འཚལ་

เล่ม ๖๗ · หน้า 218b

ལོ། །སངས་རྒྱས་རྫུ་འཕྲུལ་གཟི་བརྗིད་ལ་ཕྱག་འཚལ་ལོ། །སངས་རྒྱས་ཆོས་ཀྱི་ཤེས་རབ་ལ་ཕྱག་འཚལ་ལོ། །སངས་རྒྱས་བཞད་སྒྲ་ལ་ཕྱག་འཚལ་ལོ། །སངས་རྒྱས་སེང་གེ་སྒྲ་ལ་ཕྱག་འཚལ་ལོ། །སངས་རྒྱས་ཀླུའི་སྒྲ་ལ་ཕྱག་འཚལ་ལོ། །སངས་རྒྱས་འཇིག་རྟེན་གནས་ལ་

ཕྱག་འཚལ་ལོ། །སངས་རྒྱས་དབང་ཕྱུག་ལ་ཕྱག་འཚལ་ལོ། །སངས་རྒྱས་ཚེ་དཔག་མེད་ལ་ཕྱག་འཚལ་ལོ། །སངས་རྒྱས་འོད་དཔག་མེད་ལ་ཕྱག་འཚལ་ལོ། །སངས་རྒྱས་འོད་མཐའ་ཡས་ལ་ཕྱག་འཚལ་ལོ། །སངས་རྒྱས་འོད་ཐོགས་མེད་ལ་ཕྱག་འཚལ་ལོ། །སངས་རྒྱས་འོད་ཟླ་

མེད་ལ་ཕྱག་འཚལ་ལོ། །སངས་རྒྱས་འོད་འབར་རྒྱལ་པོ་ལ་ཕྱག་འཚལ་ལོ། །སངས་རྒྱས་འབར་བའི་འོད་ལ་ཕྱག་འཚལ་ལོ། །སངས་རྒྱས་འབར་བའི་རྩ་བ་ལ་ཕྱག་འཚལ་ལོ། །སངས་རྒྱས་རྣམ་དག་འོད་ལ་ཕྱག་འཚལ་ལོ། །སངས་རྒྱས་རབ་ཏུ་དགའ་བའི་འོད་ལ་ཕྱག་འཚལ་ལོ། །སངས་རྒྱས་

ཤེས་རབ་འོད་ལ་ཕྱག་འཚལ་ལོ། །སངས་རྒྱས་འོད་རྒྱུན་མི་འཆད་ལ་ཕྱག་འཚལ་ལོ། །སངས་རྒྱས་འོད་བསམ་དཀའ་ལ་ཕྱག་འཚལ་ལོ། །སངས་རྒྱས་འོད་བརྗོད་མེད་ལ་ཕྱག་འཚལ་ལོ། །སངས་རྒྱས་ཉི་ཟླའི་འོད་འཕགས་ལ་ཕྱག་འཚལ་ལོ། །སངས་རྒྱས་མཚན་བཟངས་གསེར་བཙོ་

མའི་མདོག་ལ་ཕྱག་འཚལ་ལོ། །སངས་རྒྱས་རིང་དུ་བརྟག་པ་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་མཛོད་ལ་ཕྱག་འཚལ་ལོ། །སངས་རྒྱས་དབྱངས་དཔག་མེད་ལ་ཕྱག་འཚལ་ལོ། །སངས་རྒྱས་ཟིལ་དངར་གྱི་རོ་ལ་ཕྱག་འཚལ་ལོ། །སངས་རྒྱས་ཀླུའི་རྒྱལ་བ་ལ་ཕྱག་

འཚལ་ལོ། །སངས་རྒྱས་རྒྱལ་བའི་སྟོབས་ལ་ཕྱག་འཚལ་ལོ། །སངས་རྒྱས་སེང་གེའི་དབྱངས་ལ་ཕྱག་འཚལ་ལོ། །སངས་རྒྱས་དྲི་མ་དང་བྲལ་བའི་འོད་ལ་ཕྱག་འཚལ་ལོ། །སངས་རྒྱས་དཔལ་མཆོག་ལ་ཕྱག་འཚལ་ལོ། །སངས་རྒྱས་འཇམ་དཔལ་རི་ལ་ཕྱག་འཚལ་ལོ། །སངས་རྒྱས་རྡོ་རྗེ་

རྒྱལ་པོ་ལ་ཕྱག་འཚལ་ལོ། །སངས་རྒྱས་མེ་ཏོག་བླ་མེད་ལ་ཕྱག་འཚལ་ལོ། །སངས་རྒྱས་འཇིགས་མེད་སྟོབས་ཀྱི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཀླུ་རྗེ་དབང་ཕྱུག་ལ་ཕྱག་འཚལ་ལོ། །སངས་རྒྱས་སེང་གེའི་གཟི་བརྗིད་རྒྱལ་པོ་ལ་ཕྱག་འཚལ་ལོ། །སངས་རྒྱས་དབང་ཕྱུག་

เล่ม ๖๗ · หน้า 219a

རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་ཁྱབ་ལ་ཕྱག་འཚལ་ལོ། །སངས་རྒྱས་ཀུན་ཏུ་སྣང་ལ་ཕྱག་འཚལ་ལོ། །སངས་རྒྱས་ཀུན་ཏུ་གཙང་ལ་ཕྱག་འཚལ་ལོ། །སངས་རྒྱས་སྤོས་ཏ་མ་ར་བ་ར་ཙན་དན་ལ་ཕྱག་འཚལ་ལོ། །སངས་རྒྱས་སྤོས་ཙན་དན་

འོད་ལ་ཕྱག་འཚལ་ལོ། །སངས་རྒྱས་ནོར་བུའི་རྒྱལ་མཚན་ལ་ཕྱག་འཚལ་ལོ། །སངས་རྒྱས་དཀོན་མཆོག་བརྩེགས་རབ་ཏུ་དགའ་བའི་སྙིང་པོ་ལ་ཕྱག་འཚལ་ལོ། །སངས་རྒྱས་བརྩོན་འགྲུས་ཆེན་པོ་བླ་ན་མེད་པ་ལ་ཕྱག་འཚལ་ལོ། །སངས་རྒྱས་ནོར་བུའི་རྒྱལ་མཚན་མར་མེའི་འོད་ལ་

ཕྱག་འཚལ་ལོ། །སངས་རྒྱས་ཤེས་རབ་སྒྲོན་མ་སྣང་ལ་ཕྱག་འཚལ་ལོ། །སངས་རྒྱས་རྒྱ་མཚོའི་དཔལ་འོད་སྣང་ལ་ཕྱག་འཚལ་ལོ། །སངས་རྒྱས་རྡོ་རྗེ་སྲ་བརྟན་ལ་ཕྱག་འཚལ་ལོ། །སངས་རྒྱས་གསེར་འོད་ཀུན་ཏུ་དགྲ་མ་ལ་ཕྱག་འཚལ་ལོ། །སངས་རྒྱས་བརྩོན་འགྲུས་ཆེ་བཙན་ལ་ཕྱག་

འཚལ་ལོ། །སངས་རྒྱས་དཔའ་བརྟུལ་ལ་ཕྱག་འཚལ་ལོ། །སངས་རྒྱས་ཐུགས་རྗེའི་འོད་ལ་ཕྱག་འཚལ་ལོ། །སངས་རྒྱས་ཐུགས་རྗེ་སྟོབས་ཀྱི་རྒྱལ་པོ་ལ་ཕྱག་འཚལ་ལོ། །སངས་རྒྱས་བྱམས་པའི་སྙིང་པོའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཙན་དན་གྱི་ཕུག་རྣམ་པར་

བཀོད་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་བཟང་ལེགས་གཙོ་ལ་ཕྱག་འཚལ་ལོ། །སངས་རྒྱས་ལེགས་པར་སད་ལ་ཕྱག་འཚལ་ལོ། །སངས་རྒྱས་རྣམ་པར་བཀོད་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་གསེར་གྱི་རི་བོ་རིན་པོ་ཆེའི་གདུགས་ལ་ཕྱག་འཚལ་ལོ། །

སངས་རྒྱས་གསེར་གྱི་མེ་ཏོག་འབར་བའི་འོད་ཀྱི་མཚན་མ་ལ་ཕྱག་འཚལ་ལོ། །སངས་རྒྱས་སྒྲོན་ཆེན་འོད་སྣང་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་བླ་རེ་སྟོང་པ་ཉིད་དུ་བརྟགས་པའི་སྟོབས་ཀྱི་དབང་ཕྱུག་རྒྱལ་པོ་ལ་ཕྱག་འཚལ་ལོ། །སངས་རྒྱས་གསེར་གྱི་མེ་ཏོག་གི་འོད་ལ་ཕྱག་

འཚལ་ལོ། །སངས་རྒྱས་ནམ་མཁའི་རིན་ཆེན་མེ་ཏོག་གི་འོད་ལ་ཕྱག་འཚལ་ལོ། །སངས་རྒྱས་བཻ་དཱུརྱ་རྣམ་པར་བཀོད་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་སྐུ་ཀུན་ཏུ་མངོན་པར་སྟོན་པའི་འོད་ལ་ཕྱག་འཚལ་ལོ། །སངས་རྒྱས་ཡེ་ཤེས་འོད་མི་འགྱུར་ལ་ཕྱག་འཚལ་ལོ། །

เล่ม ๖๗ · หน้า 219b

སངས་རྒྱས་བདུད་ཀྱི་རྒྱལ་པོ་རྣམས་ཚར་གཅོད་ལ་ཕྱག་འཚལ་ལོ། །སངས་རྒྱས་འོད་སྣང་སྟོང་ལ་ཕྱག་འཚལ་ལོ། །སངས་རྒྱས་བྱམས་པའི་ཤེས་རབ་རྒྱལ་བ་ལ་ཕྱག་འཚལ་ལོ། །སངས་རྒྱས་བྱམས་པའི་འོད་གསལ་ལ་ཕྱག་འཚལ་ལོ། །སངས་རྒྱས་འཇིག་རྟེན་དག་པའི་འོད་

ལ་ཕྱག་འཚལ་ལོ། །སངས་རྒྱས་དགེ་དབེན་ཟླ་བའི་དབྱངས་ལ་ཕྱག་འཚལ་ལོ། །སངས་རྒྱས་མཆོག་བཙུན་ཡེ་ཤེས་རྒྱལ་པོ་ལ་ཕྱག་འཚལ་ལོ། །སངས་རྒྱས་གདུགས་རིན་པོ་ཆེའི་རྒྱལ་པོར་གནས་པ་ལ་ཕྱག་འཚལ་ལོ། །སངས་རྒྱས་ཀླུའི་རིགས་བླ་ན་མེད་པ་ཡེ་ཤེས་གཙོ་བོའི་

རྒྱལ་པོ་ལ་ཕྱག་འཚལ་ལོ། །སངས་རྒྱས་ཉི་ཟླའི་འོད་ལ་ཕྱག་འཚལ་ལོ། །སངས་རྒྱས་ཉི་ཟླ་ནོར་བུའི་འོད་ལ་ཕྱག་འཚལ་ལོ། །སངས་རྒྱས་ཡེ་ཤེས་ཀྱི་བ་དན་མཆོག་ཏུ་བརྒྱན་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་དྲི་མེད་མཛོད་ཀྱི་རྒྱལ་པོ་ལ་ཕྱག་འཚལ་ལོ། །སངས་རྒྱས་

འོད་སྣང་མཚན་མ་ལ་ཕྱག་འཚལ་ལོ། །སངས་རྒྱས་གསེར་འབར་བའི་འོད་སྣང་ལ་ཕྱག་འཚལ་ལོ། །སངས་རྒྱས་གསེར་འོད་སྣང་བའི་མཛོད་ལ་ཕྱག་འཚལ་ལོ། །སངས་རྒྱས་སེང་གེའི་སྒྲའི་སྟོབས་ཀྱི་དབང་ཕྱུག་རྒྱལ་པོ་ལ་ཕྱག་འཚལ་ལོ། །སངས་རྒྱས་མཆོག་དབྱངས་དམ་

པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་བ་དན་འོད་རྟག་ལ་ཕྱག་འཚལ་ལོ། །སངས་རྒྱས་འཇིག་རྟེན་རྣམ་པར་རྟོག་པའི་མར་མེའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཤེས་རབ་ཀྱི་ན་བཟའི་རྒྱལ་པོ་ཐོབ་པ་ལ་ཕྱག་འཚལ་ལོ། །སངས་རྒྱས་ཆོས་ཀྱི་མཚན་ཉིད་དམ་པའི་

རྒྱལ་པོ་ལ་ཕྱག་འཚལ་ལོ། །སངས་རྒྱས་རི་རབ་འོད་ལ་ཕྱག་འཚལ་ལོ། །སངས་རྒྱས་མེ་ཏོག་སུ་མ་ནའི་འོད་ལ་ཕྱག་འཚལ་ལོ། །སངས་རྒྱས་མེ་ཏོག་ཨུད་པ་ལའི་འོད་ལ་ཕྱག་འཚལ་ལོ། །སངས་རྒྱས་སྟོབས་བཙན་དམ་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཤེས་རབ་ཀྱི་སྟོབས་

ཀྱི་རྒྱལ་པོ་ལ་ཕྱག་འཚལ་ལོ། །སངས་རྒྱས་རབ་ཏུ་དགའ་འཁྲུག་མེད་འོད་ལ་ཕྱག་འཚལ་ལོ། །སངས་རྒྱས་སྒྲ་དབྱངས་དཔག་མེད་རྒྱལ་པོ་ལ་ཕྱག་འཚལ་ལོ། །སངས་རྒྱས་བློ་གྲོས་འོད་ལ་ཕྱག་འཚལ་ལོ། །སངས་རྒྱས་གསེར་གྱི་རྒྱ་མཚོའི་འོད་ལ་ཕྱག་འཚལ་ལོ། །སངས་རྒྱས་

เล่ม ๖๗ · หน้า 220a

ཤེས་རབ་ཀྱི་རི་དང་རྒྱ་མཚོའི་དབང་ཕྱུག་རྒྱལ་པོ་ལ་ཕྱག་འཚལ་ལོ། །སངས་རྒྱས་ཐར་པ་ཆེན་པོའི་འོད་ལ་ཕྱག་འཚལ་ལོ། །སངས་རྒྱས་ཆོས་ཐམས་ཅད་རྟག་ཏུ་གང་བའི་རྒྱལ་པོ་ལ་ཕྱག་འཚལ་ལོ། །སངས་རྒྱས་བླུན་མི་སྟོན་ལ་ཕྱག་འཚལ་ལོ། །འདས་པའི་སངས་རྒྱས་

སྤྲུལ་པའི་སྐུ་ཐམས་ཅད་ལ་ཕྱག་འཚལ་ལོ། །འདས་པའི་སངས་རྒྱས་གཅིག །སངས་རྒྱས་བཅུ། སངས་རྒྱས་བརྒྱ། སངས་རྒྱས་སྟོང་། སངས་རྒྱས་ཁྲི་ལ་ཕྱག་འཚལ་ན་བསྐལ་པ་གྲངས་མེད་དཔག་ཏུ་མེད་པའི་འཁོར་བ་ནས་སྡིག་བགྱིས་པའི་མི་བཟད་པ་ཐམས་ཅད་འབྱང་བར་

འགྱུར་རོ། །སངས་རྒྱས་འབུམ་ཕྲག་གཅིག །འབུམ་ཕྲག་བཅུ། འབུམ་ཕྲག་བརྒྱ། འབུམ་ཕྲག་སྟོང་། འབུམ་ཕྲག་ཁྲི། བྱེ་བ་ཁྲག་ཁྲིག་གང་གཱའི་བྱེ་མ་སྙེད་གྲངས་མེད་དཔག་ཏུ་མེད་པའི་སངས་རྒྱས་ལ་གུས་པར་ཕྱག་འཚལ་ལོ། །གལ་ཏེ་གང་ཟག་ལ་ལས་འདས་པའི་སངས་རྒྱས་

གྲངས་མེད་དཔག་ཏུ་མེད་པའི་མཚན་ཐོས་ན་དེ་བསྐལ་པ་ཁྲི་ཕྲག་བརྒྱད་ཅུའི་བར་དུ་སེམས་ཅན་དམྱལ་བའི་སྡུག་བསྔལ་དུ་མི་ལྟུང་སྟེ། དེ་བས་ན་གུས་པར་ཕྱག་འཚལ་ལོ། །གང་གིས་སངས་རྒྱས་འདས་པའི་མཚན། །དེ་ལ་གུས་པར་ཕྱག་འཚལ་ན། །སེམས་ཉིད་ཐོབ་ཅིང་སྡིག་ཀྱང་

འབྱང་། །མི་དགེ་བཅུ་དང་མཚམས་མེད་ལྔ། །ཕྱིན་ཆད་མི་བྱེད་སྡོམ་པར་ནུས། །དམ་པའི་ཆོས་ནི་རྟག་ཏུ་ཐོས། །ཐེག་ཆེན་ཚུལ་ཁྲིམས་ལྡན་པ་སྟེ། །དེ་ཕྱིར་དེ་ལྟར་ཕྱག་ཀྱང་འཚལ། །རྣམ་པ་གཉིས་ཤིག་མ་གཏོགས་ཏེ། །ཐེག་ཆེན་ཆོས་ལ་དམོད་པ་དང་། །

ལོག་སྤྱོད་ཕྱོགས་སུ་ལྟ་བའོ། །གང་ཞིག་སེམས་ཉིད་རྣམ་དག་ན། །ལོག་སྤྱོད་ཅེས་སུ་མི་བྱ་སྟེ། །སངས་རྒྱས་དཔག་མེད་རྟག་ཏུ་མཐོང་། །སྡིག་པའི་རྩ་བ་བཞི་པོ་དང་། །མཚམས་མེད་ལྔར་བཅས་གང་བྱས་པ། །རྣམ་དག་སེམས་ཀྱིས་འགྱོད་ནུས་ན། །དེ་ནི་ཚུལ་བཞིན་གནས་པ་

ཡིན། །དེ་ཡང་གུས་པར་ཕྱག་འཚལ་ཕྱིར། །མི་དགེ་བཅུ་ཡི་ལས་འབྱང་ཞིང་། །ཐེག་ཆེན་ཚུལ་ཁྲིམས་ཐོབ་པས་ན། །དེ་བས་གུས་པར་ཕྱག་འཚལ་ལོ། །འདས་པའི་སངས་རྒྱས་རྣམས་ཀྱི་མཚན་དེ་དག་བཤད་པའི་ཚེ་བྱང་ཆུབ་སེམས་དཔའ་སྟོང་ཕྲག་བཅུ་མི་སྐྱེ་བའི་ཆོས་ལ་

เล่ม ๖๗ · หน้า 220b

བཟོད་པ་ཐོབ་བོ། །ཉན་ཐོས་བརྒྱད་བརྒྱས་ནི་ཐེག་པ་ཆེན་པོའི་སེམས་ཤེས་ཙམ་སྐྱེས་སོ། །དགེ་སློང་ལྔ་སྟོང་ནི་དགྲ་བཅོམ་པར་གྲུབ་བོ། །ལྷ་དང་མི་ཁྲི་ཕྲག་བཅུ་ཞིག་ཆོས་ཀྱི་མིག་རྣམ་པར་དག་པ་ཐོབ་བོ། །ད་ལྟར་བཞུགས་པའི་སངས་རྒྱས་གྲངས་མེད་དཔག་ཏུ་མེད་པ་ལ་ཕྱག་འཚལ་ལོ། །

སངས་རྒྱས་གསལ་རྒྱལ་འབུམ་ཕྲག་བཅུ་ལ་ཕྱག་འཚལ་ལོ། །སངས་རྒྱས་གསེར་བཙོ་མའི་ཕྱེ་དྲི་མ་བྲལ་ལ་ཕྱག་འཚལ་ལོ། །སངས་རྒྱས་སྣང་བ་དཔག་མེད་ལ་ཕྱག་འཚལ་ལོ། །སངས་རྒྱས་ཉི་མའི་དཀྱིལ་འཁོར་འོད་སྣང་རྒྱལ་པོ་ལ་ཕྱག་འཚལ་ལོ། །སངས་རྒྱས་སྤོས་བརྩེགས་ལ་ཕྱག་

འཚལ་ལོ། །སངས་རྒྱས་སེང་གེ་འབུམ་གཟུགས་ལ་ཕྱག་འཚལ་ལོ། །སངས་རྒྱས་སེང་གེ་རྣམ་པར་རོལ་པ་ལ་ཕྱག་འཚལ་ལོ། །སངས་རྒྱས་ཡོན་ཏན་ཀུན་ཏུ་འོད་ཀྱི་རིའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཡོན་ཏན་བདེ་གནས་རིན་པོ་ཆེའི་རྒྱལ་པོ་ལ་ཕྱག་འཚལ་ལོ། །

སངས་རྒྱས་རིན་པོ་ཆེའི་མེ་ཏོག་རྣམ་པར་བརྒྱན་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་དཀའ་ཐུབ་ལ་ཕྱག་འཚལ་ལོ། །སངས་རྒྱས་རི་རབ་མཚན་མ་ལ་ཕྱག་འཚལ་ལོ། །སངས་རྒྱས་རི་རབ་རྒྱལ་པོ་ཐོབ་ལ་ཕྱག་འཚལ་ལོ། །སངས་རྒྱས་རིན་ཆེན་དཔལ་ལ་ཕྱག་འཚལ་ལོ། །སངས་

རྒྱས་རིན་ཆེན་ཟླ་བ་ལ་ཕྱག་འཚལ་ལོ། །སངས་རྒྱས་རིན་ཆེན་འབར་བ་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་རྒྱན་ལ་ཕྱག་འཚལ་ལོ། །སངས་རྒྱས་དཀའ་ཐུབ་སེང་གེའི་ང་རོ་ལ་ཕྱག་འཚལ་ལོ། །སངས་རྒྱས་འོད་ཆེན་རྒྱལ་པོ་ལ་ཕྱག་འཚལ་ལོ། །སངས་རྒྱས་མི་འགྱུར་ལ་

ཕྱག་འཚལ་ལོ། །སངས་རྒྱས་སྨན་གྱི་རྒྱལ་པོ་ལ་ཕྱག་འཚལ་ལོ། །སངས་རྒྱས་རྣམ་པར་བརྒྱན་ལ་ཕྱག་འཚལ་ལོ། །སངས་རྒྱས་ལྡིང་ཁང་ཕྱིན་ལ་ཕྱག་འཚལ་ལོ། །སངས་རྒྱས་ཟླ་བའི་གདུགས་ལ་ཕྱག་འཚལ་ལོ། །སངས་རྒྱས་འོད་ཁྱབ་ལ་ཕྱག་འཚལ་ལོ། །སངས་རྒྱས་རིན་

ཆེན་རྒྱལ་པོ་ལ་ཕྱག་འཚལ་ལོ། །སངས་རྒྱས་རྣམ་པར་གཟིགས་ལ་ཕྱག་འཚལ་ལོ། །སངས་རྒྱས་གཙུག་ཏོར་ཅན་ལ་ཕྱག་འཚལ་ལོ། །སངས་རྒྱས་ཐམས་ཅད་སྐྱོབ་ལ་ཕྱག་འཚལ་ལོ། །སངས་རྒྱས་ལོག་པར་དད་སེལ་ལ་ཕྱག་འཚལ་ལོ། །སངས་རྒྱས་གསེར་ཐུབ་ལ་ཕྱག་

เล่ม ๖๗ · หน้า 221a

འཚལ་ལོ། །སངས་རྒྱས་འོད་སྲུང་ལ་ཕྱག་འཚལ་ལོ། །སངས་རྒྱས་འབྲུག་སྒྲའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ཆོས་ཀྱི་སྙིང་པོ་ལ་ཕྱག་འཚལ་ལོ། །སངས་རྒྱས་ཙན་དན་མེ་ཏོག་ལ་ཕྱག་འཚལ་ལོ། །སངས་རྒྱས་ཙན་དན་འདབ་མ་ལ་ཕྱག་འཚལ་ལོ། །སངས་

རྒྱས་ཡིད་མཆོག་ལ་ཕྱག་འཚལ་ལོ། །སངས་རྒྱས་ཐུབ་ཟླ་མེད་ལ་ཕྱག་འཚལ་ལོ། །སངས་རྒྱས་ཟིལ་མངར་རྔ་ལ་ཕྱག་འཚལ་ལོ། །སངས་རྒྱས་རྣམ་པར་གཟིགས་ལ་ཕྱག་འཚལ་ལོ། །སངས་རྒྱས་ཉི་ཟླའི་འོད་སྣང་ལ་ཕྱག་འཚལ་ལོ། །སངས་རྒྱས་ཐུབ་མེད་འོད་ལ་ཕྱག་འཚལ་ལོ། །

སངས་རྒྱས་རྣམ་པར་བརྒྱན་དང་ལྡན་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་ཟེར་ཀུན་ཏུ་ཁྱབ་པའི་ཡོན་ཏན་གྱི་རྒྱལ་པོ་ལ་ཕྱག་འཚལ་ལོ། །སངས་རྒྱས་བདུད་བཞི་འཇོམས་པའི་སེང་གེའི་སྒྲའི་རྒྱལ་པོ་ལ་ཕྱག་འཚལ་ལོ། །སངས་རྒྱས་རྡོ་རྗེ་འཇིགས་མེད་ལ་ཕྱག་འཚལ་ལོ། །

སངས་རྒྱས་བཻ་དཱུརྱའི་འོད་ལ་ཕྱག་འཚལ་ལོ། །སངས་རྒྱས་རི་རབ་རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་ཟེར་གཙང་མའི་རྒྱལ་པོ་ལ་ཕྱག་འཚལ་ལོ། །སངས་རྒྱས་དགེ་དཔལ་ལ་ཕྱག་འཚལ་ལོ། །སངས་རྒྱས་འོད་ཟེར་དཔག་མེད་ལ་ཕྱག་འཚལ་ལོ། །སངས་རྒྱས་

གཟུངས་རྣམ་པར་རོལ་པ་ལ་ཕྱག་འཚལ་ལོ། །སངས་རྒྱས་དཔའ་བར་འགྲོ་བའི་ཏིང་ངེ་འཛིན་གྱི་སྟོབས་ཀྱི་རྒྱལ་པོ་ལ་ཕྱག་འཚལ་ལོ། །སངས་རྒྱས་དགེ་མཐོང་ཏིང་ངེ་འཛིན་གྱི་དབང་ཕྱུག་རྒྱལ་པོ་ལ་ཕྱག་འཚལ་ལོ། །སངས་རྒྱས་ཡོན་ཏན་བླ་མེད་ལ་ཕྱག་འཚལ་ལོ། །སངས་རྒྱས་རྫུ་འཕྲུལ་

དབང་ཕྱུག་ལ་ཕྱག་འཚལ་ལོ། །སངས་རྒྱས་མཚན་མའི་གཟུགས་མེད་ལ་ཕྱག་འཚལ་ལོ། །སངས་རྒྱས་གཟུགས་འཐོར་ལ་ཕྱག་འཚལ་ལོ། །སངས་རྒྱས་དྲི་མཚན་མེད་ལ་ཕྱག་འཚལ་ལོ། །སངས་རྒྱས་བྲོ་མཚན་མེད་ལ་ཕྱག་འཚལ་ལོ། །སངས་རྒྱས་རེག་མཚན་མེད་ལ་

ཕྱག་འཚལ་ལོ། །སངས་རྒྱས་ཏིང་ངེ་འཛིན་གྱི་དབང་ཕྱུག་ལ་ཕྱག་འཚལ་ལོ། །སངས་རྒྱས་ཤེས་རབ་ཏིང་ངེ་འཛིན་གྱི་དབང་ཕྱུག་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་གཟུགས་ཀྱི་དབང་ཕྱུག་ལ་ཕྱག་འཚལ་ལོ། །སངས་རྒྱས་ཀུན་ཏུ་སྡུད་ལ་ཕྱག་འཚལ་ལོ། །སངས་རྒྱས་དྲིན་དཔལ་ཀུན་ཏུ་

เล่ม ๖๗ · หน้า 221b

འོད་ལ་ཕྱག་འཚལ་ལོ། །སངས་རྒྱས་གཙུག་ཏོར་ཅན་ལ་ཕྱག་འཚལ་ལོ། །སངས་རྒྱས་ཐམས་ཅད་སྐྱོབ་ལ་ཕྱག་འཚལ་ལོ། །སངས་རྒྱས་ལོག་པར་དད་སེལ་ལ་ཕྱག་འཚལ་ལོ། །སངས་རྒྱས་གསེར་ཐུབ་ལ་ཕྱག་འཚལ་ལོ། །སངས་རྒྱས་འོད་སྲུང་ལ་ཕྱག་འཚལ་ལོ། །

སངས་རྒྱས་ཡིད་སྒྲ་སྙན་སྲེད་ལ་ཕྱག་འཚལ་ལོ། །སངས་རྒྱས་རབ་ཏུ་དགའ་བ་ལ་ཕྱག་འཚལ་ལོ། །སངས་རྒྱས་མི་འཁྲུགས་པ་ལ་ཕྱག་འཚལ་ལོ། །སངས་རྒྱས་རི་རབ་མཚན་མ་ལ་ཕྱག་འཚལ་ལོ། །སངས་རྒྱས་སེང་གེ་དབྱངས་ལ་ཕྱག་འཚལ་ལོ། །སངས་རྒྱས་སེང་གེའི་མཚན་མ་

ལ་ཕྱག་འཚལ་ལོ། །སངས་རྒྱས་སྤྲིན་དབང་ཕྱུག་ལ་ཕྱག་འཚལ་ལོ། །སངས་རྒྱས་རྟག་ཏུ་ཞི་ལ་ཕྱག་འཚལ་ལོ། །སངས་རྒྱས་དབང་པོའི་མཚན་མ་ལ་ཕྱག་འཚལ་ལོ། །སངས་རྒྱས་སྣང་བ་མཐའ་ཡས་ལ་ཕྱག་འཚལ་ལོ། །སངས་རྒྱས་ཚངས་པའི་མཚན་མ་ལ་ཕྱག་འཚལ་ལོ། །

སངས་རྒྱས་འཇིག་རྟེན་གྱི་སྡུག་བསྔལ་ཐམས་ཅད་ལས་འདས་པ་ལ་ཕྱག་འཚལ་ལོ། །སངས་རྒྱས་ཏ་མ་ར་བར་ཙན་དན་གྱི་སྤོས་ལ་ཕྱག་འཚལ་ལོ། །སངས་རྒྱས་རི་རབ་ཀྱི་གཟུགས་ལ་ཕྱག་འཚལ་ལོ། །སངས་རྒྱས་སྤྲིན་དབང་ཕྱུག་རྒྱལ་པོ་ལ་ཕྱག་འཚལ་ལོ། །སངས་རྒྱས་འཇིག་རྟེན་

གྱི་འཇིགས་པ་ཐམས་ཅད་བཅོམ་པ་ལ་ཕྱག་འཚལ་ལོ། །སངས་རྒྱས་སྤྲུལ་པའི་སྐུ་ཤཱཀྱ་ཐུབ་པ་འབུམ་ཕྲག་བརྒྱ་ལ་ཕྱག་འཚལ་ལོ། །ད་ལྟར་བཞུགས་པའི་སངས་རྒྱས་གཅིག །སངས་རྒྱས་བཅུ། སངས་རྒྱས་བརྒྱ། སངས་རྒྱས་སྟོང་། སངས་རྒྱས་ཁྲི་ལ་གུས་པར་ཕྱག་འཚལ་ན་

བསྐལ་པ་གྲངས་མེད་པ་ནས་འཁོར་བའི་སྡིག་ལྕི་བ་ཐམས་ཅད་འབྱང་བར་འགྱུར་རོ། །སངས་རྒྱས་འབུམ་ཕྲག་གཅིག །འབུམ་ཕྲག་བཅུ། འབུམ་ཕྲག་བརྒྱ། འབུམ་ཕྲག་སྟོང་། འབུམ་ཕྲག་ཁྲི། བྱེ་བ་ཁྲག་ཁྲིག་གང་གཱའི་ཀླུང་གི་བྱེ་མ་སྙེད་གྲངས་མེད་དཔག་ཏུ་མེད་པའི་སངས་རྒྱས་ལ་

ཕྱག་འཚལ་ལོ། །གང་ལ་ལས་ད་ལྟར་བཞུགས་པའི་སངས་རྒྱས་གྲངས་མེད་དཔག་ཏུ་མེད་པའི་མཚན་ཐོས་ན་དེ་ནི་བསྐལ་པ་ཁྲི་ཕྲག་དྲུག་ཅུའི་བར་དུ་སེམས་ཅན་དམྱལ་བར་མི་ལྟུང་སྟེ། དེ་བས་གུས་པར་ཕྱག་འཚལ་ལོ། །ད་ལྟར་ཕྱོགས་བཅུར་བཞུགས་པ་ཡི། །སངས་རྒྱས་རྣམས་ལ་ཕྱག་

เล่ม ๖๗ · หน้า 222a

འཚལ་ན། །ལས་ངན་ཀུན་ལས་རྣམ་པར་གྲོལ། །མཚམས་མེད་ལྔ་པོའི་སྡིག་ཀྱང་འབྱང་། །རྣམ་དག་ས་ལ་རྟག་ཏུ་གནས། །ཤཱཀྱའི་ཆོས་ལའང་བདེ་གནས་ཤིང་། །མཐའ་རུ་ངན་སོང་གསུམ་དང་བྲལ། །སངས་རྒྱས་བྱམས་པའང་མཐོང་བ་དང་། །སངས་རྒྱས་སྟོང་ཡང་

མཐོང་བར་འགྱུར། །དེ་བས་ད་ལྟར་ཕྱག་ཀྱང་འཚལ། །ཕྱོགས་བཅུའི་སངས་རྒྱས་ཡང་མཐོང་སྟེ། །རྣམ་དག་ཞིང་དུ་རྟག་པར་སྐྱེ། །དམ་པའི་ཆོས་ཀྱང་ཐོས་གྱུར་ཅིང་། །སངས་རྒྱས་རྟག་པའང་མངོན་པར་རྟོགས། །ད་ལྟར་བཞུགས་པའི་སངས་རྒྱས་རྣམས་ཀྱི་མཚན་བཤད་པའི་ཚེ་ཆུ་བོ་

གང་གཱ་གཉིས་ཀྱི་བྱེ་མ་སྙེད་ཀྱི་བྱང་ཆུབ་སེམས་དཔའ་གཟུངས་ཀྱི་སྒོར་ཆུད་པར་གྱུར་ཏོ། །ལྷ་དང་མི་འབུམ་ཕྲག་བཞི་བཅུ་རྩ་གཉིས་ནི་བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །བསྐལ་པ་བཟང་པོའི་སངས་རྒྱས་མ་བྱོན་པ་དཔག་ཏུ་མེད་པ་ལ་ཕྱག་འཚལ་ལོ། །སངས་རྒྱས་བྱམས་པ་

ལ་ཕྱག་འཚལ་ལོ། །སངས་རྒྱས་རྣམ་དག་སྐུ་ལ་ཕྱག་འཚལ་ལོ། །སངས་རྒྱས་མེ་ཏོག་འོད་ལ་ཕྱག་འཚལ་ལོ། །སངས་རྒྱས་མེ་ཏོག་རྫོགས་ལ་ཕྱག་འཚལ་ལོ། །སངས་རྒྱས་འོད་སྣང་ལ་ཕྱག་འཚལ་ལོ། །སངས་རྒྱས་མིང་དང་མཚན་མ་ལ་ཕྱག་འཚལ་ལོ། །སངས་རྒྱས་

འཛམ་བུ་ན་དའི་གསེར་འོད་ལ་ཕྱག་འཚལ་ལོ། །སངས་རྒྱས་ཆོས་སྣང་ལ་ཕྱག་འཚལ་ལོ། །སངས་རྒྱས་རིན་ཆེན་སྣང་ལ་ཕྱག་འཚལ་ལོ། །སངས་རྒྱས་ཁྱབ་སྣང་ལ་ཕྱག་འཚལ་ལོ། །སངས་རྒྱས་ཀུན་ཏུ་མཚན་མ་ལ་ཕྱག་འཚལ་ལོ། །སངས་རྒྱས་ཀུན་ཏུ་འོད་ལ་ཕྱག་འཚལ་ལོ། །

སངས་རྒྱས་ཤེས་རབ་རི་དང་རྒྱ་མཚོ་ལ་ཕྱག་འཚལ་ལོ། །སངས་རྒྱས་རྫུ་འཕྲུལ་གྱི་དབང་ཕྱུག་གི་རྒྱལ་པོ་ལ་ཕྱག་འཚལ་ལོ། །སངས་རྒྱས་རིན་པོ་ཆེ་རྣམ་པར་བཀོད་པ་ལ་ཕྱག་འཚལ་ལོ། །སངས་རྒྱས་སྐྱེས་བུ་དམ་པ་ལ་ཕྱག་འཚལ་ལོ། །སངས་རྒྱས་དབང་ཕྱུག་ཐོབ་པའི་

རྒྱལ་པོ་འབུམ་ཕྲག་བརྒྱ་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་མཚན་ཉིད་ལ་ཕྱག་འཚལ་ལོ། །སངས་རྒྱས་མཐོང་དགའ་ལ་ཕྱག་འཚལ་ལོ། །སངས་རྒྱས་འོད་ཀྱི་མཚན་མས་རྣམ་པར་བརྒྱན་པའི་རྒྱལ་པོ་ཉི་ཁྲི་ལ་ཕྱག་འཚལ་ལོ། །སངས་རྒྱས་མཚན་འཐུན་པ་ཀུན་ཏུ་

เล่ม ๖๗ · หน้า 222b

དཔལ་སུམ་ཁྲི་ལ་ཕྱག་འཚལ་ལོ། །སངས་རྒྱས་འབྲུག་སྒྲའི་རྒྱལ་པོ་ལ་ཕྱག་འཚལ་ལོ། །སངས་རྒྱས་འོད་མི་འགྱུར་བཞི་ཁྲི་བརྒྱད་སྟོང་ལ་ཕྱག་འཚལ་ལོ། །སངས་རྒྱས་ཟླ་བ་རིན་པོ་ཆེའི་རྒྱལ་པོ་ལ་ཕྱག་འཚལ་ལོ། །སངས་རྒྱས་དྲི་མ་དང་བྲལ་བའི་འོད་ལ་ཕྱག་འཚལ་ལོ། །སངས་

རྒྱས་གཟུགས་དམ་པ་ལ་ཕྱག་འཚལ་ལོ། །སངས་རྒྱས་གཟུགས་དམ་པའི་འོད་ཟེར་ལ་ཕྱག་འཚལ་ལོ། །སངས་རྒྱས་བགེགས་ཀྱི་ཚོགས་ཐམས་ཅད་བཅོམ་པ་ལ་ཕྱག་འཚལ་ལོ། །སངས་རྒྱས་དྲིའི་ཚོགས་ལ་ཕྱག་འཚལ་ལོ། །སངས་རྒྱས་སྒྲའི་ཚོགས་ལ་ཕྱག་འཚལ་ལོ། །

སངས་རྒྱས་འོད་ཟེར་རྣམ་པར་བཀོད་པ་སྟོང་ཕྲག་བརྒྱད་ཅུ་ལ་ཕྱག་འཚལ་ལོ། །སངས་རྒྱས་འོད་ཟེར་རྣམ་པར་བཀོད་པ་འབུམ་ཕྲག་བརྒྱད་ཅུ་ལ་ཕྱག་འཚལ་ལོ། །སངས་རྒྱས་རིན་པོ་ཆེའི་མེ་ཏོག་རྣམ་པར་བརྒྱན་པ་ལ་ཕྱག་འཚལ་ལོ། །སངས་རྒྱས་ཡོན་ཏན་མཆོག་གི་རྒྱལ་པོ་ལ་ཕྱག་

འཚལ་ལོ། །སངས་རྒྱས་གསེར་བཙོ་མའི་འོད་སྣང་ལ་ཕྱག་འཚལ་ལོ། །སངས་རྒྱས་ལུང་བསྟན་པ་པདྨའི་འོད་ལྔ་བརྒྱ་ལ་ཕྱག་འཚལ་ལོ། །སངས་རྒྱས་མི་འཇིགས་སྲེད་མེད་ཀྱི་བུ་ལ་ཕྱག་འཚལ་ལོ། །སངས་རྒྱས་མེ་ཏོག་བཟང་པོས་རྣམ་པར་བརྒྱན་པ་ལ་ཕྱག་འཚལ་ལོ། །

སངས་རྒྱས་རྡོ་རྗེ་ཏིང་ངེ་འཛིན་གྱི་དབང་ཕྱུག་ལ་ཕྱག་འཚལ་ལོ། །མ་བྱོན་པའི་སངས་རྒྱས་གཅིག །སངས་རྒྱས་བཅུ། སངས་རྒྱས་བརྒྱ། སངས་རྒྱས་སྟོང་། སངས་རྒྱས་ཁྲི་ལ་ཕྱག་འཚལ་ན། བསྐལ་པ་གྲངས་མེད་དཔག་ཏུ་མེད་པའི་འཁོར་བ་ནས་སྡིག་ལྕི་བ་རྣམས་

འབྱང་བར་འགྱུར་རོ། །སངས་རྒྱས་འབུམ་ཕྲག་གཅིག །འབུམ་ཕྲག་བཅུ། འབུམ་ཕྲག་བརྒྱ། འབུམ་ཕྲག་སྟོང་། འབུམ་ཕྲག་ཁྲི་བྱེ་བ་ཁྲག་ཁྲིག་གང་གཱའི་བྱེ་མ་སྙེད་དཔག་ཏུ་མེད། གྲངས་མེད་པའི་སངས་རྒྱས་ཀྱི་མཚན་གང་ཟག་གང་ལ་ལས་ཐོས་པར་གྱུར་ན་བསྐལ་པ་ཁྲི་ཕྲག་བཞི་བཅུའི་བར་

དུ་སེམས་ཅན་དམྱལ་བར་མི་ལྟུང་སྟེ། དེ་བས་ད་ལྟར་ཕྱག་འཚལ་ལོ། །གང་ཞིག་སངས་རྒྱས་མ་བྱོན་རྣམས། །དེ་ལ་གུས་པར་ཕྱག་འཚལ་ན། །ལོག་སྤྱོད་རྣམས་ནི་མ་གཏོགས་ཏེ། །སྒྲིབ་པ་གསུམ་དང་མཚམས་མེད་ལྔ། །སྡིག་པ་དེ་རྣམས་འབྱང་བར་འགྱུར། །སངས་རྒྱས་

เล่ม ๖๗ · หน้า 223a

ཆོས་ལ་བདེ་གནས་ཤིང་། །དཔག་མེད་སངས་རྒྱས་མཐོང་བར་འགྱུར། །དམ་པའི་ཆོས་ཀྱང་རྟག་ཏུ་ཐོས། །དེ་བས་ད་ལྟར་གུས་ཕྱག་འཚལ། །གང་ཞིག་ཕྱོགས་བཅུ་དུས་གསུམ་གྱི། །སངས་རྒྱས་རྣམས་ལ་ཕྱག་འཚལ་ན། །ཁ་ན་མ་ཐོ་འདས་པ་དང་། །

མ་འོངས་པ་དང་ད་ལྟར་གྱི། །ལས་ངན་བཅུ་པོ་བྱས་པ་ཡང་། །ད་ལྟར་མངོན་དུ་བྱང་བར་འགྱུར། །ཕྱི་མའི་དུས་ལ་སངས་རྒྱས་ཀྱི། །ངོ་བོ་ཉིད་ཀྱང་མཐོང་བར་འགྱུར། །དེ་བས་དེ་ལ་མོས་པར་བྱོས། །ཁ་ཏོན་འདྲི་ཀློག་ཕྱག་འཚལ་ན། །ཚེ་རབས་གར་བྱུང་གར་སྐྱེས་ཀྱང་། །

ལྟ་བ་ལོག་པར་མི་སྐྱེའོ། །རྣམ་པར་གྲོལ་པ་རྒྱུན་ཏུ་ཐོབ། །མཐའ་འཁོབ་ས་རུ་ཡོང་མི་སྐྱེ། །ངན་པའི་ཡུལ་དུའང་མི་སྐྱེ་ཞིང་། །རྒྱལ་པོ་མ་རུངས་མཐོང་མི་འགྱུར། །བསྐལ་པ་འབུམ་ཕྲག་བཞི་ཁྲིའི་བར། །སེམས་ཅན་དམྱལ་བར་མི་སྐྱེའོ། །དེ་བས་གུས་པར་ཕྱག་འཚལ་

ན། །མི་དགེ་བཅུ་ཡི་ལས་འབྱང་ཞིང་། །གཟུངས་ཆེན་རབ་ཏུ་ཐོབ་པར་འགྱུར། །བཅོམ་ལྡན་འདས་ཀྱིས་སངས་རྒྱས་མ་བྱོན་པ་རྣམས་ཀྱི་མཚན་བསྒྲགས་པའི་ཚེ་བྱང་ཆུབ་སེམས་དཔའ་ལྔ་ཁྲིས་ཕྱིར་མི་ལྡོག་པའི་སར་གནས་སོ། །དགེ་སློང་མ་བདུན་བརྒྱས་ནི་དགྲ་བཅོམ་མར་

གྲུབ་བོ། །ལྷ་དང་མི་འབུམ་ཕྲག་དྲུག་ཅུ་རྩ་གཉིས་ཀྱིས་ནི་ཆོས་ཀྱི་མིག་རྣམ་པར་དག་པ་ཐོབ་བོ། །གཟུངས་ཆེན་པོ་དང་། མདོ་སྡེ་བཅུ་གཉིས་ལ་ཕྱག་འཚལ་ལོ། །མདོའི་སྡེ་ལ་ཕྱག་འཚལ་ལོ། །ལུང་དུ་བསྟན་པའི་སྡེ་ལ་ཕྱག་འཚལ་ལོ། །ཚིགས་སུ་བཅད་པའི་སྡེ་ལ་ཕྱག་འཚལ་ལོ། །

དབྱངས་ཀྱིས་བསྙད་པའི་སྡེ་ལ་ཕྱག་འཚལ་ལོ། །ཆེད་དུ་བརྗོད་པའི་སྡེ་ལ་ཕྱག་འཚལ་ལོ། །གླིང་གཞིའི་སྡེ་ལ་ཕྱག་འཚལ་ལོ། །རྟོགས་པ་བརྗོད་པའི་སྡེ་ལ་ཕྱག་འཚལ་ལོ། །འདས་པ་བརྗོད་པའི་སྡེ་ལ་ཕྱག་འཚལ་ལོ། །སྐྱེས་པ་རབས་ཀྱི་སྡེ་ལ་ཕྱག་འཚལ་ལོ། །

ཤིན་ཏུ་རྒྱས་པའི་སྡེ་ལ་ཕྱག་འཚལ་ལོ། །རྨད་དུ་བྱུང་བའི་སྡེ་ལ་ཕྱག་འཚལ་ལོ། །གཏན་ལ་ཕབ་པར་བསྟན་པའི་སྡེ་ལ་ཕྱག་འཚལ་ལོ། །ཐེག་པ་ཆེན་པོའི་སྡེ་སྣོད་ཐམས་ཅད་ལ་ཕྱག་འཚལ་ལོ། །གང་གིས་མདོ་སྡེ་བཅུ་གཉིས་དང་། ཕ་རོལ་ཏུ་ཕྱིན་པ་རྣམས་ཀྱི་མཚན་ཐོས་ན་

เล่ม ๖๗ · หน้า 223b

བསྟོད་པ་བྱས་སམ། ཕྱག་འཚལ་ལམ། བརྗོད་དམ། མོས་པ་བསྐྱེད་དམ། བླངས་སམ། འཆང་བར་བྱེད་ན་གང་ཟག་དེ་བསྐལ་པ་ཁྲི་ཕྲག་ཉི་ཤུའི་བར་དུ་སེམས་ཅན་དམྱལ་བར་མི་ལྟུང་སྟེ། ཚེ་སྔ་ཕྱི་དྲན་པའི་ཡེ་ཤེས་དང་ལྡན་པར་འགྱུར་རོ། །དེའི་ཕྱིར་གུས་པས་ཕྱག་འཚོལ་ཅིག །

བཅོམ་ལྡན་འདས་ཀྱིས་མདོ་སྡེ་བཅུ་གཉིས་ཀྱི་མཚན་བཤད་པའི་ཚེ་བྱང་ཆུབ་སེམས་དཔའ་བརྒྱད་ཁྲི་ལྔ་སྟོང་གིས་རྡོ་རྗེའི་ཏིང་ངེ་འཛིན་ཐོབ་བོ། །ཉན་ཐོས་འབུམ་ཕྲག་བཅུས་ཐེག་པ་ཆེན་པོའི་སེམས་བསྐྱེད་དོ། །དགེ་སློང་དང་། དགེ་སློང་མ་སྟོང་ཕྲག་བཅུས་དགྲ་བཅོམ་པའི་འབྲས་བུ་ཐོབ་བོ། །

ལྷ་དང་མི་དཔག་ཏུ་མེད་པ་ཞིག་གིས་ཆོས་ཀྱི་མིག་རྣམ་པར་དག་པ་ཐོབ་བོ། །ཕྱོགས་བཅུའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤྱན་རས་གཟིགས་

དབང་ཕྱུག་ལ་ཕྱག་འཚལ་ལོ། །བྱང་ཆུབ་སེམས་དཔའ་མཐུ་ཆེན་ཐོབ་ལ་ཕྱག་འཚལ་ལོ། །བྱང་ཆུབ་སེམས་དཔའ་བརྩོན་འགྲུས་རྟག་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱུན་མི་གཏོང་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་ལག་ལ་ཕྱག་འཚལ་ལོ། །བྱང་

ཆུབ་སེམས་དཔའ་སྨན་གྱི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་དཔའ་བརྩོན་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་ཟླ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་གང་ལ་ཕྱག་འཚལ་ལོ། །བྱང་

ཆུབ་སེམས་དཔའ་སྟོབས་པོ་ཆེ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྟོབས་དཔག་ཏུ་མེད་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁམས་གསུམ་འཕགས་ལ་ཕྱག་འཚལ་ལོ། །བྱང་ཆུབ་སེམས་དཔའ་བཟང་སྐྱོང་ལ་ཕྱག་འཚལ་ལོ། །བྱང་ཆུབ་སེམས་དཔའ་བྱམས་

པ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་བརྩེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་འདྲེན་མཁན་ལ་ཕྱག་འཚལ་ལོ། །བྱང་ཆུབ་སེམས་དཔའ་དཔལ་གྱི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་འཆད་མོས་ལ་ཕྱག་འཚལ་ལོ། །བྱང་ཆུབ་

เล่ม ๖๗ · หน้า 224a

སེམས་དཔའ་ཀླུའི་སྡོང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཙན་དན་རིན་པོ་ཆེའི་མེ་ཏོག་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤྱོད་པ་བླ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤྱོད་པ་མཐའ་ཡས་ལ་ཕྱག་འཚལ་ལོ། །བྱང་ཆུབ་སེམས་དཔའ་

སྤྱོད་པ་རྣམ་པར་བཀོད་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤྱོད་པ་རྣམ་དག་ལ་ཕྱག་འཚལ་ལོ། །བྱང་ཆུབ་སེམས་དཔའ་གཟུངས་འཛིན་ལ་ཕྱག་འཚལ་ལོ། །བྱང་ཆུབ་སེམས་དཔའ་རྡོ་རྗེ་སྲེད་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་རྟག་པར་གུས་ལ་ཕྱག་འཚལ་

ལོ། །བྱང་ཆུབ་སེམས་དཔའ་སྔོན་གྱི་རྒྱལ་པོའི་མེ་ཏོག་ལ་ཕྱག་འཚལ་ལོ། །བྱང་ཆུབ་སེམས་དཔའ་མཐོང་ན་དགའ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་དབྱངས་དམ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་བརྩོན་འགྲུས་ཡོན་ཏན་གྱི་སྟོབས་ལ་ཕྱག་འཚལ་ལོ། །བྱང་ཆུབ་

སེམས་དཔའ་བློ་གྲོས་མི་ཟད་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྙིང་པོ་རྣམ་དག་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤྱན་རྣམ་དག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་འཇམ་དཔལ་ལ་ཕྱག་

འཚལ་ལོ། །བྱང་ཆུབ་སེམས་དཔའ་བྱམས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་བསམ་ལེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་སྟོང་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་རྫུ་འཕྲུལ་མེ་ཏོག་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་

གསལ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་འོད་གསལ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་བླ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཡེ་ཤེས་རྒྱལ་མཚན་ལ་ཕྱག་འཚལ་ལོ། །བྱང་ཆུབ་སེམས་དཔའ་དབང་པོ་ཞི་བ་ལ་ཕྱག་འཚལ་ལོ། །བྱང་ཆུབ་

སེམས་དཔའ་ཤེས་རབ་སྨོན་ལམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤོས་ཀྱི་གཟུགས་བརྙན་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་གསལ་ལ་ཕྱག་འཚལ་ལོ། །བྱང་ཆུབ་སེམས་དཔའ་དབུང་གནས་ལ་ཕྱག་འཚལ་ལོ། །བྱང་ཆུབ་སེམས་དཔའ་འགོག་སྤྱོད་ལ་ཕྱག་འཚལ་ལོ། །བྱང་

เล่ม ๖๗ · หน้า 224b

ཆུབ་སེམས་དཔའ་རྣམ་གྲོལ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་ཀྱི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་མཉམ་པར་རྟོག་ལ་ཕྱག་འཚལ་ལོ། །བྱང་ཆུབ་སེམས་དཔའ་མཉམ་མི་རྟོག་ལ་ཕྱག་འཚལ་ལོ། །བྱང་ཆུབ་སེམས་དཔའ་མཉམ་མི་མཉམ་རྟོག་ལ་ཕྱག་འཚལ་

ལོ། །བྱང་ཆུབ་སེམས་དཔའ་ཏིང་ངེ་འཛིན་གྱི་དབང་ཕྱུག་གི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་ཀྱི་དབང་ཕྱུག་གི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་ཀྱི་མཚན་ཉིད་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་ཀྱི་མཚན་མ་ལ་ཕྱག་འཚལ་

ལོ། །བྱང་ཆུབ་སེམས་དཔའ་འོད་ཀྱིས་བརྒྱན་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱན་ཆེན་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་དཀོན་མཆོག་བརྩེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་བློ་བརྩེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་ལག་

ལ་ཕྱག་འཚལ་ལོ། །བྱང་ཆུབ་སེམས་དཔའ་ལག་ན་རིན་པོ་ཆེའི་ཕྱག་རྒྱ་ལ་ཕྱག་འཚལ་ལོ། །བྱང་ཆུབ་སེམས་དཔའ་ལག་རྒྱུན་ཏུ་བཏེག་ལ་ཕྱག་འཚལ་ལོ། །བྱང་ཆུབ་སེམས་དཔའ་ལག་རྒྱུན་ཏུ་ཕབ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྟག་ཏུ་བརྩེ་བ་ཅན་ལ་ཕྱག་འཚལ་

ལོ། །བྱང་ཆུབ་སེམས་དཔའ་དགའ་བའི་དབང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་དགའ་བའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་བློའི་དབྱངས་ལ་ཕྱག་འཚལ་ལོ། །བྱང་ཆུབ་སེམས་དཔའ་ནམ་མཁའི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་

རིན་ཆེན་སྒྲོན་མ་འཛིན་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་དཔའ་བོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་བལྟ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་བདེན་པའི་དྲ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་དྲ་བ་སྣང་ལ་ཕྱག་འཚལ་ལོ། །

བྱང་ཆུབ་སེམས་དཔའ་སྐྱོན་མེད་རྟོག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་བརྩེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་གཙུག་ཕུད་ལ་ཕྱག་འཚལ་ལོ། །བྱང་ཆུབ་སེམས་དཔའ་ལྷའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་བདུད་རྣམ་

เล่ม ๖๗ · หน้า 225a

པར་འཇོམས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་གློག་གི་དཔལ་ལ་ཕྱག་འཚལ་ལོ། །བྱང་ཆུབ་སེམས་དཔའ་དབང་ཕྱུག་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཡོན་ཏན་གྱི་མཚན་གྱིས་རྣམ་པར་བརྒྱན་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་

སེང་གེ་སྒྲ་ལ་ཕྱག་འཚལ་ལོ། །བྱང་ཆུབ་སེམས་དཔའ་འབྲུག་སྒྲ་ལ་ཕྱག་འཚལ་ལོ། །བྱང་ཆུབ་སེམས་དཔའ་བཏང་བཟུང་རི་བསྒུལ་བའི་སྒྲ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤོས་ཀྱི་གླང་པོ་ཆེ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤོས་ཀྱི་གླང་པོ་ཆེ་དཀར་པོ་ལ་ཕྱག་

འཚལ་ལོ། །བྱང་ཆུབ་སེམས་དཔའ་དམ་པ་སྐྱེས་ལ་ཕྱག་འཚལ་ལོ། །བྱང་ཆུབ་སེམས་དཔའ་མེ་ཏོག་རྒྱན་ལ་ཕྱག་འཚལ་ལོ། །བྱང་ཆུབ་སེམས་དཔའ་ཚངས་པའི་དྲ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་དབྱུག་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་

སྒྲ་ཐུབ་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཞིང་གི་རྒྱན་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་གྱི་གཙུག་པུད་ལ་ཕྱག་འཚལ་ལོ། །བྱང་ཆུབ་སེམས་དཔའ་ནོར་བུའི་གཙུག་ཕུད་ལ་ཕྱག་འཚལ་ལོ། །བྱང་ཆུབ་སེམས་དཔའ་གཞོན་ནུ་བརྒྱན་པའི་འོད་ལ་ཕྱག་འཚལ་ལོ། །

བྱང་ཆུབ་སེམས་དཔའ་འཇིག་རྟེན་འཛིན་ལ་ཕྱག་འཚལ་ལོ། །བྱང་ཆུབ་སེམས་དཔའ་སྣང་ཤར་ལ་ཕྱག་འཚལ་ལོ། །བྱང་ཆུབ་སེམས་དཔའ་དཀའ་རྒྱལ་ལ་ཕྱག་འཚལ་ལོ། །བྱང་ཆུབ་སེམས་དཔའ་དགེ་བའི་ཡོན་ཏན་ལ་ཕྱག་འཚལ་ལོ། །བྱང་ཆུབ་སེམས་དཔའ་མེ་ཏོག་གི་འོད་ལ་ཕྱག་

འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་ཙན་དན་གྱི་མེ་ཏོག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་གསང་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་ཀྱི་དབང་ཕྱུག་ལ་ཕྱག་འཚལ་ལོ། །བྱང་ཆུབ་སེམས་དཔའ་དཔལ་གྱི་གཙོ་ལ་ཕྱག་འཚལ་ལོ། །བྱང་ཆུབ་

སེམས་དཔའ་མིག་མི་འཛུམས་ལ་ཕྱག་འཚལ་ལོ། །བྱང་ཆུབ་སེམས་དཔའ་དཔལ་གྱི་གཙུག་ཏོར་ལ་ཕྱག་འཚལ་ལོ། །བྱང་ཆུབ་སེམས་དཔའ་སྔོན་གྱི་དགེ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་དགེ་བའི་རྩ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་དཔུང་མཆོག་ལ་ཕྱག་

เล่ม ๖๗ · หน้า 225b

འཚལ་ལོ། །བྱང་ཆུབ་སེམས་དཔའ་སྐྱེས་བུ་དམ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེང་གེ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེང་གེའི་དབྱངས་ལ་ཕྱག་འཚལ་ལོ། །བྱང་ཆུབ་སེམས་དཔའ་གཙང་ཤེས་ལ་ཕྱག་འཚལ་ལོ། །བྱང་ཆུབ་སེམས་དཔའ་ལེགས་ལྡན་སྲེད་

མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་དགེ་ཡིད་ལ་ཕྱག་འཚལ་ལོ། །བྱང་ཆུབ་སེམས་དཔའ་མངོན་སུམ་མཐོང་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་ཏུ་སྲུང་ལ་ཕྱག་འཚལ་ལོ། །བྱང་ཆུབ་སེམས་དཔའ་གློག་གི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་

མཐོང་ན་དགའ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྣང་བའི་མཚན་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་དམ་པའི་ཡིད་ལ་ཕྱག་འཚལ་ལོ། །བྱང་ཆུབ་སེམས་དཔའ་བློ་གྲོས་མི་ཟད་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་ཟབ་མོ་ལ་ཕྱག་འཚལ་ལོ། །

བྱང་ཆུབ་སེམས་དཔའ་ཞི་བའི་མཚན་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཐོགས་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་དགེ་བའི་བླ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་བསོད་ནམས་ཀྱི་ཞིང་ལ་ཕྱག་འཚལ་ལོ། །བྱང་ཆུབ་སེམས་དཔའ་པདྨའི་རྒྱན་ལ་

ཕྱག་འཚལ་ལོ། །བྱང་ཆུབ་སེམས་དཔའ་ཡོན་ཏན་གྱི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་བའི་བླ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་ལག་ན་རིན་པོ་ཆེའི་ཕྱག་རྒྱ་ལ་ཕྱག་འཚལ་ལོ། །བྱང་ཆུབ་སེམས་དཔའ་ནོར་བུའི་གཙུག་ཏོར་གྱི་རྒྱལ་པོ་ལ་ཕྱག་འཚལ་

ལོ། །བྱང་ཆུབ་སེམས་དཔའ་བདེན་མོས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་མཐོང་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱལ་པོ་ཐོབ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱལ་པོ་ཟབ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱལ་པོ་མེ་

ཏོག་ལ་ཕྱག་འཚལ་ལོ། །བྱང་ཆུབ་སེམས་དཔའ་གཟུགས་དམ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་འདྲི་མཁས་ལ་ཕྱག་འཚལ་ལོ། །བྱང་ཆུབ་སེམས་དཔའ་ལན་ལྡོན་མཁས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་མཚན་ཉིད་མངོན་དུ་རྟོགས་ལ་ཕྱག་འཚལ་ལོ། །

เล่ม ๖๗ · หน้า 226a

བྱང་ཆུབ་སེམས་དཔའ་ངེས་པའི་མཚན་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་ངེས་པར་བརྩེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་དགའ་བས་སྐྱེད་ལ་ཕྱག་འཚལ་ལོ། །བྱང་ཆུབ་སེམས་དཔའ་བདེ་བར་གནས་ལ་ཕྱག་འཚལ་ལོ། །བྱང་ཆུབ་སེམས་

དཔའ་བདུད་སྐྲག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་སྦྱིན་ལ་ཕྱག་འཚལ་ལོ། །བྱང་ཆུབ་སེམས་དཔའ་སྐྱབས་མཛད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་གོ་འཕང་འཕགས་ལ་ཕྱག་འཚལ་ལོ། །བྱང་ཆུབ་སེམས་དཔའ་སྦྱིན་པ་དཔའ་ལ་ཕྱག་འཚལ་ལོ། །

བྱང་ཆུབ་སེམས་དཔའ་ཡེ་ཤེས་དམིགས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་སྨོན་ལམ་ལ་ཕྱག་འཚལ་ལོ། །བྱང་ཆུབ་སེམས་དཔའ་བསྡུ་བ་རྣམ་བཞི་ལ་ཕྱག་འཚལ་ལོ། །བྱང་ཆུབ་སེམས་དཔའ་དབྱངས་སྟོན་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱ་མཚོ་མཆོག་ལ་

ཕྱག་འཚལ་ལོ། །བྱང་ཆུབ་སེམས་དཔའ་ཆོས་དགའ་ལ་ཕྱག་འཚལ་ལོ། །བྱང་ཆུབ་སེམས་དཔའ་བྱང་ཆུབ་ཀྱི་ལམ་ལ་ཕྱག་འཚལ་ལོ། །བྱང་ཆུབ་སེམས་དཔའ་མདོ་འཛིན་ལ་ཕྱག་འཚལ་ལོ། །བྱང་ཆུབ་སེམས་དཔའ་བྱམས་པའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་

དབང་ཕྱུག་ཆེན་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཚངས་པའི་དབྱངས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁ་དོག་དམ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཙན་དན་ཚལ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེང་གེའི་དབྱངས་ལ་ཕྱག་

འཚལ་ལོ། །བྱང་ཆུབ་སེམས་དཔའ་སྒྲ་མཆོག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཁ་དོག་དམ་པའི་གཟུགས་ལ་ཕྱག་འཚལ་ལོ། །བྱང་ཆུབ་སེམས་དཔའ་རྣམ་པ་སྣ་ཚོགས་བརྒྱན་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤཱཀྱའི་རྒྱལ་མཚན་ལ་ཕྱག་འཚལ་ལོ། །

བྱང་ཆུབ་སེམས་དཔའ་སྤྱི་བོ་སྐྱེས་ལ་ཕྱག་འཚལ་ལོ། །བྱང་ཆུབ་སེམས་དཔའ་སྣང་བའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་ཆེན་ལ་ཕྱག་འཚལ་ལོ། །བྱང་ཆུབ་སེམས་དཔའ་འཇིགས་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གསང་བ་བརྩེགས་ལ་ཕྱག་

เล่ม ๖๗ · หน้า 226b

འཚལ་ལོ། །བྱང་ཆུབ་སེམས་དཔའ་མེ་ཏོག་འཚེར་ལ་ཕྱག་འཚལ་ལོ། །བྱང་ཆུབ་སེམས་དཔའ་གཙོ་མཆོག་ལ་ཕྱག་འཚལ་ལོ། །བྱང་ཆུབ་སེམས་དཔའ་ལུས་ཀུན་ཏུ་མངོན་པར་སྟོན་ལ་ཕྱག་འཚལ་ལོ། །བྱང་ཆུབ་སེམས་དཔའ་མངོན་པར་ཤེས་ལ་ཕྱག་འཚལ་ལོ། །བྱང་

ཆུབ་སེམས་དཔའ་རྒྱ་མཚོ་དཔལ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྐུ་མཐའ་ཡས་ལ་ཕྱག་འཚལ་ལོ། །བྱང་ཆུབ་སེམས་དཔའ་སྨན་གྱི་རྒྱལ་པོའི་དབང་ཕྱུག་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་སྲུང་ལ་ཕྱག་འཚལ་ལོ། །བྱང་ཆུབ་སེམས་དཔའ་དྲི་མེད་

མཛོད་ཀྱི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཐམས་ཅད་སྐྱོབ་ལ་ཕྱག་འཚལ་ལོ། །བྱང་ཆུབ་སེམས་དཔའ་མཐོ་བཙུན་དཔལ་གྱི་རྗེ་ལ་ཕྱག་འཚལ་ལོ། །བྱང་ཆུབ་སེམས་དཔའ་བཻ་དཱུརྱའི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་འཇིགས་མེད་ལ་ཕྱག་འཚལ་

ལོ། །བྱང་ཆུབ་སེམས་དཔའ་རྒྱ་མཚོའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེང་གེའི་སྒྲ་ལ་ཕྱག་འཚལ་ལོ། །བྱང་ཆུབ་སེམས་དཔའ་མཚན་ཉིད་དད་ལ་ཕྱག་འཚལ་ལོ། །བྱང་ཆུབ་སེམས་དཔའ་ས་འཛིན་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་

རྒྱན་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་ཟེར་ལ་ཕྱག་འཚལ་ལོ། །བྱང་ཆུབ་སེམས་དཔའ་སྤོབས་པ་ཆེན་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་བྱམས་པའི་སྟོབས་ལ་ཕྱག་འཚལ་ལོ། །བྱང་ཆུབ་སེམས་དཔའ་སྙིང་རྗེ་ཆེན་པོ་ལ་ཕྱག་འཚལ་ལོ། །

བྱང་ཆུབ་སེམས་དཔའ་རྟེན་པའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྟེན་པའི་སྟོབས་ལ་ཕྱག་འཚལ་ལོ། །བྱང་ཆུབ་སེམས་དཔའ་རྟེན་པའི་དཔལ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་ཏུ་ཕན་གདགས་ལ་ཕྱག་འཚལ་ལོ། །བྱང་ཆུབ་

སེམས་དཔའ་ཀུན་ཏུ་བཟུང་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་མི་འགྱུར་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་ཏུ་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཡང་དག་པའི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ལོག་པར་

เล่ม ๖๗ · หน้า 227a

དད་སེལ་ལ་ཕྱག་འཚལ་ལོ། །བྱང་ཆུབ་སེམས་དཔའ་ལྷའི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་ཆུབ་ལ་ཕྱག་འཚལ་ལོ། །བྱང་ཆུབ་སེམས་དཔའ་སྟོན་པའི་མཁན་པོ་ལ་ཕྱག་འཚལ་

ལོ། །བྱང་ཆུབ་སེམས་དཔའ་བཟོད་པ་ཆེན་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་མེ་ཏོག་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་མེ་ཏོག་བརྩེགས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་

རྒྱ་མཚོ་ལ་ཕྱག་འཚལ་ལོ། །བྱང་ཆུབ་སེམས་དཔའ་བློ་བརྟན་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤཱཀྱའི་རིགས་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་གྱི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་གྱི་སྙིང་པོ་ལ་ཕྱག་འཚལ་ལོ། །བྱང་ཆུབ་

སེམས་དཔའ་རྟག་ཏུ་སྙིང་རྗེ་ཅན་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་བླ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་ནོར་གྱི་དབྱིག་ལ་ཕྱག་འཚལ་ལོ། །བྱང་ཆུབ་སེམས་དཔའ་རིའི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་རི་ལ་ཕྱག་འཚལ་ལོ། །བྱང་

ཆུབ་སེམས་དཔའ་སྣང་བ་ཆེན་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་འཛིན་ལ་ཕྱག་འཚལ་ལོ། །བྱང་ཆུབ་སེམས་དཔའ་རི་ངར་ཅན་ལ་ཕྱག་འཚལ་ལོ། །བྱང་ཆུབ་སེམས་དཔའ་རིའི་རྩེ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིའི་རྒྱལ་མཚན་ལ་ཕྱག་འཚལ་ལོ། །བྱང་

ཆུབ་སེམས་དཔའ་རིའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་བདུད་འདུལ་ལ་ཕྱག་འཚལ་ལོ། །བྱང་ཆུབ་སེམས་དཔའ་འབྲུག་སྒྲ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆར་པའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་འབྲུག་གི་རྒྱལ་པོ་ལ་ཕྱག་འཚལ་

ལོ། །བྱང་ཆུབ་སེམས་དཔའ་འཁོར་ལོ་རིན་པོ་ཆེ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་འཚེར་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་གཙོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་མཛོད་ལ་ཕྱག་འཚལ་ལོ། །བྱང་ཆུབ་སེམས་དཔའ་

เล่ม ๖๗ · หน้า 227b

རིན་ཆེན་སྣང་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་མི་འགྱུར་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་ཕྱག་རྒྱ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་དཀྱིལ་འཁོར་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་རྒྱན་ལ་ཕྱག་འཚལ་ལོ། །

བྱང་ཆུབ་སེམས་དཔའ་རིན་ཆེན་ཆུ་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་འབར་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་སྟོན་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་ཆེན་བྱེད་ལ་ཕྱག་འཚལ་ལོ། །

བྱང་ཆུབ་སེམས་དཔའ་ཆོས་མོས་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱལ་པོ་རྣམ་དག་ལ་ཕྱག་འཚལ་ལོ། །བྱང་ཆུབ་སེམས་དཔའ་གཙུག་ཏོར་གྱི་མཚན་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རིན་པོ་ཆེའི་

ཐོར་ཚུགས་ལ་ཕྱག་འཚལ་ལོ། །བྱང་ཆུབ་སེམས་དཔའ་འོད་སྟོང་ལ་ཕྱག་འཚལ་ལོ། །བྱང་ཆུབ་སེམས་དཔའ་ཡང་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་བློ་རིག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་བ་རྟོགས་ལ་ཕྱག་འཚལ་ལོ། །བྱང་ཆུབ་སེམས་དཔའ་

ཟླ་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་ཀྱི་འཁོར་ལོ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྣམ་དག་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་སྦྱིན་བརྟག་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་ཏུ་དཔལ་ལ་ཕྱག་འཚལ་ལོ། །བྱང་ཆུབ་

སེམས་དཔའ་སྣང་ཁྱབ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱལ་མཚན་དམ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་མཉེན་པའི་དབྱངས་ལ་ཕྱག་འཚལ་ལོ། །བྱང་ཆུབ་སེམས་དཔའ་དཔལ་འབར་ལ་ཕྱག་འཚལ་ལོ། །བྱང་ཆུབ་སེམས་དཔའ་མཚན་མའི་འོད་ལ་ཕྱག་

འཚལ་ལོ། །བྱང་ཆུབ་སེམས་དཔའ་རྒྱ་མཚོའི་ཟླ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱ་མཚོའི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་བ་དམ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤེས་རབ་གཙང་མ་ལ་ཕྱག་འཚལ་ལོ། །བྱང་ཆུབ་སེམས་

เล่ม ๖๗ · หน้า 228a

དཔའ་འོད་འཕགས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཟླ་བའི་དཔལ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཉི་མའི་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རྡོ་རྗེ་ལ་ཕྱག་འཚལ་ལོ། །བྱང་ཆུབ་སེམས་དཔའ་འབར་བའི་རྒྱལ་མཚན་ལ་ཕྱག་

འཚལ་ལོ། །བྱང་ཆུབ་སེམས་དཔའ་དཔལ་བཙུན་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱ་མཚོ་གསལ་ལ་ཕྱག་འཚལ་ལོ། །བྱང་ཆུབ་སེམས་དཔའ་རྒྱ་མཚོ་རྒྱ་ཆེ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཡུལ་རྣམ་པར་རྟོག་ལ་ཕྱག་འཚལ་ལོ། །བྱང་ཆུབ་

སེམས་དཔའ་ཤེས་རབ་གསལ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཡོན་ཏན་ལ་ཕྱག་འཚལ་ལོ། །བྱང་ཆུབ་སེམས་དཔའ་སྣང་ཐར་ལ་ཕྱག་འཚལ་ལོ། །བྱང་ཆུབ་སེམས་དཔའ་གསང་བ་སྟོན་ལ་ཕྱག་འཚལ་ལོ། །བྱང་ཆུབ་སེམས་དཔའ་རབ་ཏུ་སྦྱིན་ལ་ཕྱག་འཚལ་

ལོ། །བྱང་ཆུབ་སེམས་དཔའ་གཟུགས་སྟོབས་ལ་ཕྱག་འཚལ་ལོ། །བྱང་ཆུབ་སེམས་དཔའ་རབ་ཏུ་འདུལ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་ལུས་སྦེད་ལ་ཕྱག་འཚལ་ལོ། །བྱང་ཆུབ་སེམས་དཔའ་གཅིག་དང་། བཅུ་དང་། བརྒྱ་དང་། སྟོང་དང་། ཁྲི་ལ་

ཕྱག་འཚལ་ལོ། །བྱང་ཆུབ་སེམས་དཔའ་ཁྲི་ཕྲག་བརྒྱ། ཁྲི་ཕྲག་ཉིས་བརྒྱ། ཁྲི་ཕྲག་སུམ་བརྒྱ། ཁྲི་ཕྲག་བཞི་བརྒྱ། ཁྲི་ཕྲག་ལྔ་བརྒྱ། ཁྲི་ཕྲག་དྲུག་བརྒྱ། ཁྲི་ཕྲག་བདུན་བརྒྱ། ཁྲི་ཕྲག་བརྒྱད་བརྒྱ། ཁྲི་ཕྲག་དགུ་བརྒྱ། ཁྲི་ཕྲག་སྟོང་རྣམས་ལ་ཕྱག་

འཚལ་ན་བསྐལ་པ་དཔག་ཏུ་མེད་པ་ཚུན་ཆད་ཀྱི་འཁོར་བའི་སྡིག་ལྕི་བ་འབྱང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་འབུམ་ཕྲག་གཅིག །འབུམ་ཕྲག་བཅུ། འབུམ་ཕྲག་བརྒྱ། འབུམ་ཕྲག་སྟོང་། འབུམ་ཕྲག་ཁྲི། འབུམ་ཕྲག་ཁྲི་ཕྲག་ཁྲི་ལ་ཕྱག་འཚལ་ན་

བསྐལ་པ་དཔག་ཏུ་མེད་པ་ཚུན་ཆད་ཀྱི་འཁོར་བའི་སྡིག་པ་མི་ཟད་པ་ཐམས་ཅད་འབྱང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་གཱ་གཅིག་གི་བྱེ་མ་སྙེད་ལ་ཕྱག་འཚལ་ལོ། །གང་གཱ་གཉིས་ཀྱི་བྱེ་མ་སྙེད་ལ་ཕྱག་འཚལ་ལོ། །གང་གཱ་གསུམ་གྱི་བྱེ་མ་སྙེད་ལ་ཕྱག་འཚལ་ལོ། །གང་གཱ་

เล่ม ๖๗ · หน้า 228b

བཞིའི་བྱེ་མ་སྙེད་ལ་ཕྱག་འཚལ་ལོ། །གང་གཱ་ལྔའི་བྱེ་མ་སྙེད་ལ་ཕྱག་འཚལ་ལོ། །གང་གཱ་དྲུག་གི་བྱེ་མ་སྙེད་ལ་ཕྱག་འཚལ་ལོ། །གང་གཱ་བདུན་གྱི་བྱེ་མ་སྙེད་ལ་ཕྱག་འཚལ་ལོ། །གང་གཱ་བརྒྱད་ཀྱི་བྱེ་མ་སྙེད་ལ་ཕྱག་འཚལ་ལོ། །གང་གཱ་དགུའི་བྱེ་མ་སྙེད་ལ་ཕྱག་འཚལ་ལོ། །གང་གཱ་

བཅུའི་བྱེ་མ་སྙེད་ལ་ཕྱག་འཚལ་ལོ། །གང་གཱ་བརྒྱའི་བྱེ་མ་སྙེད་ལ་ཕྱག་འཚལ་ལོ། །གང་གཱ་སྟོང་གི་བྱེ་མ་སྙེད་ལ་ཕྱག་འཚལ་ལོ། །གང་གཱ་ཁྲིའི་བྱེ་མ་སྙེད་ལ་ཕྱག་འཚལ་ལོ། །གང་གཱ་བྱེ་བ་ཁྲག་ཁྲིག་ཕྲག་བརྒྱ་སྟོང་དུ་མའི་བྱེ་མ་སྙེད་ལ་ཕྱག་འཚལ་ལོ། །དེ་རྣམས་ལ་ཕྱག་འཚལ་ན་བསྐལ་པ་

གྲངས་མེད་དཔག་ཏུ་མེད་པ་ཚུན་ཆད་ཀྱི་འཁོར་བའི་སྡིག་ལྕི་བ་ཐམས་ཅད་ཡོངས་སུ་འབྱང་བར་འགྱུར་རོ། །གང་ལ་ལ་ཞིག་གིས་བྱང་ཆུབ་སེམས་དཔའ་སེམས་དཔའ་ཆེན་པོའི་མཚན་འདི་དག་ཐོས་ན་བསྐལ་པ་སྟོང་ཕྲག་བཞི་བཅུའི་བར་དུ་སེམས་ཅན་དམྱལ་བའི་སྡུག་བསྔལ་དུ་མི་ལྟུང་ཞིང་སྲིད་པ་

གསུམ་གྱི་ཁམས་སུ་མི་གཏོགས་ཏེ། རྟག་ཏུ་རྣམ་པར་གྲོལ་བའི་ཁམས་སུ་གཏོགས་པར་འགྱུར་རོ། །མཐའ་འཁོབ་ཏུ་མི་སྐྱེ། ཡུལ་ངན་པར་མི་སྐྱེ། ལུས་ངན་པ་མི་ལེན། ལོག་པར་མི་ལྟ། །རིགས་ངན་དུ་མི་སྐྱེ། མུ་སྟེགས་ཅན་དུ་མི་སྐྱེ། དབང་པོ་ཡན་ལག་

ཚང་བར་འགྱུར། དམ་པའི་ཆོས་རྟག་ཏུ་ཐོས་པར་འགྱུར། སྡོམ་པའི་ཚུལ་ཁྲིམས་མ་མནོས་ཀྱང་ཁྲིམས་དང་རྟག་ཏུ་ལྡན་པར་འགྱུར། ཐེག་པ་ཆེན་པོ་སྤྱོད་ལམ་མཛེས་པ་དང་། སངས་རྒྱས་ཀྱི་བདག་ཉིད་ཀྱང་མཐོང་བར་འགྱུར། དེ་བས་གུས་པར་ཕྱག་འཚལ་ཏེ། སངས་

རྒྱས་ཀྱི་ཆོས་ལ་བདེན་པར་གནས་ཤིང་ཕྱི་མའི་ཚེ་སངས་རྒྱས་གྲུབ་པ་ཐོབ་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་མཚན་བཤད་པའི་ཚེ་རིགས་ཀྱི་བུ་དང་རིགས་ཀྱི་བུ་མོ་དད་པ་ཅན་འབུམ་ཕྲག་བརྒྱད་ཅུ་རྩ་བརྒྱད་ཀྱིས་ནི་ཕྱིར་མི་འོང་བའི་འབྲས་བུ་ཐོབ་བོ། །

ལྷ་འབུམ་ཕྲག་དགུ་བཅུ་རྩ་བཞིས་ནི་ལན་ཅིག་ཕྱིར་འོང་བའི་འབྲས་བུ་ཐོབ་བོ། །དགེ་སློང་སེམས་སྟོར་བ་འབུམ་ཕྲག་བདུན་ཅུ་རྩ་བརྒྱད་ཀྱིས་ནི་སེམས་ཀྱི་བདག་ཉིད་སླར་རྙེད་དེ་དགྲ་བཅོམ་པའི་འབྲས་བུ་ཐོབ་བོ། །བྱང་ཆུབ་སེམས་དཔའ་འབུམ་ཕྲག་བཅུས་ནི་གཟུངས་ཆེན་པོ་ཐོབ་སྟེ། མ་འོངས་

เล่ม ๖๗ · หน้า 229a

པའི་དུས་ན་མངོན་པར་འཚང་རྒྱའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མཚན་ཉིད་དད་ལ་བཀའ་སྩལ་པ། རིགས་ཀྱི་བུ་འདས་པའི་སངས་རྒྱས་བཅོམ་ལྡན་འདས་རིན་ཆེན་གཙུག་ཕུད་ཅེས་བྱ་བ་དེའི་མཚན་སེམས་ཅན་སྡུག་བསྔལ་

གྱིས་གཟིར་བ་ཅན་རྣམས་ཀྱིས་ལན་ཅིག་ཐོས་ན་འཆི་འཕོས་པའི་ཚེ་ལྷར་སྐྱེའོ་ཞེས་ཁྱོད་ཉིད་ཀྱིས་བཤད་པ་དང་། དེ་ཡང་ང་ལ་སངས་རྒྱས་ཐམས་ཅད་ཀྱི་མཚན་བཤད་པར་གསོལ་ཞིང་སེམས་ཅན་ཀུན་སྡུག་བསྔལ་དང་བྲལ་ཞིང་འཇིག་རྟེན་ལས་བཟླ་བར་འདོད་པ་དེའི་ཕྱིར་ངས་ཀྱང་ཁྱོད་དང་སྐྱེ་བོ་

ཀུན་ལ་དཀོན་མཆོག་གསུམ་གྱི་མཚན་རྫོགས་པར་བཤད་ཀྱིས་ཀྱང་། དོན་དམ་པར་ན་དཀོན་མཆོག་གཅིག་ལ་བཀྲི་བའི་དབང་གིས་གསུམ་དུ་བཤད་པ་གང་ལ་ལས་དེའི་མཚན་ཐོས་ནས་སེམས་ཐག་པ་ནས་དྲན་པར་བྱས་ཏེ། འཆི་ཀར་དགེ་བའི་བཤེས་གཉེན་འགའ་ཞིག་གིས་དཀོན་མཆོག་

གསུམ་གྱི་མཚན་ལན་གསུམ་དུ། ན་མོ་བུད་དྷཱ་ཡ། ན་མོ་དྷ་རྨཱ་ཡ། ནམཿསཾ་གྷཱ་ཡ་ཞེས་དེ་སྐད་དུ་ཆེད་དུ་བརྗོད་དུ་བཅུག་ན་མི་འདི་འཆི་འཕོས་ནས་ངན་སོང་གསུམ་དུ་མི་འགྲོ་སྟེ། ཕྱོགས་བཅུའི་འཇིག་རྟེན་གྱི་ཁམས་གང་ནས་གང་དུ་དད་པ་དེ་དང་དེར་སྐྱེ་བར་འགྱུར་རོ། །སངས་རྒྱས་ཐམས་

ཅད་ལ་མཐར་གྱིས་རིམ་གྲོ་བྱེད་པར་འགྱུར། བྱང་ཆུབ་སེམས་དཔའ་ཐམས་ཅད་མཐོང་བར་འགྱུར། འཇམ་དཔལ་དང་ཀུན་ཏུ་བཟང་པོས་ཐེག་པ་ཆེན་པོའི་ཆོས་ཐར་པ་ཆེན་པོ་ཕྱོགས་སུ་རྒྱས་པ་བཤད་པའང་ཐོས་པར་འགྱུར། ཐོས་ནས་ཀྱང་དེ་མ་ཐག་ཏུ་སྐྱེ་བ་མེད་པའི་ཆོས་ལ་བཟོད་པ་

ཐོབ་པར་འགྱུར་རོ། །རིགས་ཀྱི་བུ་གང་ཟག་དེ་ཡང་བསྐལ་པ་གྲངས་མེད་པ་ནས་དགེ་བའི་རྩ་བ་ཤིན་ཏུ་བསྩགས་པས་གདོད་དཀོན་མཆོག་གསུམ་གྱི་མཚན་ཐོས་པ་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་མཚན་ཉིད་དད་ཀྱིས་འདི་སྐད་ཅེས་གསོལ་ཏོ། །

བཅོམ་ལྡན་འདས་ཇི་ལྟར་ན་དཀོན་མཆོག་གསུམ་ཞེས་བགྱི། དངོས་པོ་གཅིག་གམ། དངོས་པོ་གཉིས་སམ། དངོས་པོ་གསུམ་དུ་བགྱི། ཅི་སྟེ་དངོས་པོ་གཅིག་ན་ནི་སྐྱབས་གཅིག་ཏུ་སོང་བས། དངོས་པོ་གསུམ་ལགས་ན་ནི་སྐྱབས་གསུམ་དུ་གྱུར་པས་སྐྱབས་གསུམ་

เล่ม ๖๗ · หน้า 229b

དུ་གྱུར་ན་ནི་སངས་རྒྱས་དང་ཆོས་ཀྱང་དབྱིངས་ཐ་དད་པར་འགྱུར་ཏེ། དགེ་འདུན་ཡང་དེ་བཞིན་ནོ། །གལ་ཏེ་སྐྱབས་གསུམ་ཞིག་ལགས་ན་ནི་སྐྱེ་བོ་རྣམས་རྣམ་པ་གསུམ་དུ་མཐོང་བས་བསྐལ་པ་གསུམ་གྱི་བར་དུ་ཆོས་སྤྱོད་ཀྱང་ཐེག་པ་གཅིག་ཏུ་བརྡ་མི་འཇལ་བར་མཆི་ན། བཅོམ་ལྡན་

འདས་སེམས་ཅན་རྣམས་ལ་སྨན་པ་དང་བདེ་བའི་སླད་དུ་བདག་ལ་བཤད་དུ་གསོལ། བདག་འདི་ཐོས་ནས་ཀྱང་སྐྱེ་བོ་ཀུན་ལ་བྱེ་བྲག་ཕྱེད་པར་བཤད་པར་འཚལ་ལོ། །བཅོམ་ལྡན་འདས་མྱ་ངན་ལས་འདས་པའི་སླད་ན་གང་ལ་ལས་མཚན་ཐོས་ན། བླ་ན་མེད་པའི་བྱང་ཆུབ་ཀྱི་གནས་ཐོབ་པར་ཡང་

འགྱུར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་མཚན་ཉིད་དད་ལ་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ལེགས་སོ་ལེགས་སོ། །དོན་ཆེན་པོ་འདི་ལྟ་བུ་ང་ལ་ཞུ་བར་ནུས་པ་ནི་ཤིན་ཏུའང་ལེགས་སོ་ལེགས་སོ། །རིགས་ཀྱི་བུ་ཁྱོད་འདི་ལྟ་བུའི་དོན་ཆེན་པོ་

འདྲི་བ་ཡང་ས་དང་པོ་དང་། ས་གཉིས་པ་དང་། ས་གསུམ་པ་དང་། ས་བཞི་པ་དང་། ས་ལྔ་པ་དང་། ས་དྲུག་པ་དང་། ས་བདུན་པ་དང་། ས་བརྒྱད་པ་ལ་གནས་པ་མ་ཡིན་ཏེ། ས་བཅུ་ཆོས་ཀྱི་སྤྲིན་ལ་གནས་པའི་སྐྱེས་བུ་ཆེན་པོ་ནི་དེ་བཞིན་གཤེགས་པ་ལ་དོན་ཆེན་པོ་འདི་ལྟ་བུ་འདྲི་བ་ཡིན་ནོ། །ཁྱོད་ལེགས་པར་ཉོན་ཅིག །ངས་བྱེ་བྲག་

ཕྱེད་པར་བཤད་ད། །རིགས་ཀྱི་བུ་སྐྱེ་བོ་ཐམས་ཅད་ནི་ཐོག་མ་མེད་པ་ནས་མ་རིག་པས་བསྒྲིབས་ཏེ། ཁམས་གསུམ་གྱི་བཙོན་ར་ན་འཁོར་ཞིང་སྡུག་བསྔལ་སྣ་ཚོགས་ཀྱིས་གཟིར་ཏེ། ལམ་རྒྱུད་དྲུག་ཏུ་ཕན་ཚུན་རྣམ་པར་རྒྱུ་བ་ལ་སྐྱབས་དང་རྟེན་པའི་གནས་མེད་ནས་ལྷ་མ་སྲིན་ལ་ཕྱོགས་

ཏེ་སྐྱབས་ཚོལ་བ། མུ་སྟེགས་རྣམས་རང་གི་རྐང་ལག་བཅིངས་ཤིང་སྲོག་བཏང་སྟེ། སྐྱབས་ཚོལ་ན་ཡང་སྡུག་བསྔལ་ལས་ཐར་པ་མེད་དོ། །མེ་དང་མཚོའི་ནང་དུ་མཆོངས་ཏེ་སྲོག་བཏང་ཡང་འཁོར་བ་ལས་ཐར་པའི་དུས་མེད་དེ། དེའི་ཕྱིར་མགོན་པོ་ཆེན་པོ་དེ་བཞིན་གཤེགས་པས་

བྱམས་པའི་ཏིང་ངེ་འཛིན་གྱིས་སྐྱེ་བོ་རྒྱུན་ཏུ་འཁྲུལ་པ་རྣམས་ལ་ཐུགས་བརྩེ་བར་དགོངས་ཏེ། དཀོན་མཆོག་གསུམ་གྱི་མཚན་བསྟན་ཅིང་ཡང་དག་པའི་རྟེན་གནས་སུ་བྱ་བའི་ཕྱིར། བསླབ་པ་དང་པོ་པ་ཉན་ཐོས་དང་རང་བྱང་ཆུབ་པ་རྣམས་ལ་ཐེམ་སྐས་དང་འདྲ་བར་དཀོན་མཆོག་གསུམ་

เล่ม ๖๗ · หน้า 230a

ཡང་དངོས་པོ་ཐ་དད་པར་བཤད་དོ། །དེའི་འོག་ཏུ་རྒྱུན་རིང་དུ་ཚངས་པར་སྤྱོད་པའི་སྐྱེས་བུ་དམ་པ་ལ་ཡང་དག་པ་མཐར་ཕྱིན་པའི་དཀོན་མཆོག་གསུམ་དངོས་པོ་གཅིག་པར་ཡང་བཤད་དེ། སངས་རྒྱས་དཀོན་མཆོག་གཅིག་གི་ནང་ན་ཆོས་དང་དགེ་འདུན་གྱི་དཀོན་མཆོག་ཀྱང་ཡོད་པར་

བཤད་དོ། །རིགས་ཀྱི་བུ་ཅིའི་ཕྱིར་དཀོན་མཆོག་ཅེས་བྱ་ཞེ་ན། དཔེར་ན་འཇིག་རྟེན་གྱི་རིན་པོ་ཆེ་སྣ་བདུན་པོས་ཕོངས་པ་རྣམས་ལ་འཚོ་བ་བསྟངས་པ་དང་འདྲ་བར་དཀོན་མཆོག་གསུམ་ཡང་འཇིག་རྟེན་ན་སྐྱེ་བོ་རྣམས་ཀྱི་ཆོས་ཀྱི་སྐུ་བསྐྱེད་པ་དང་། ཡེ་ཤེས་སྤེལ་བར་བྱེད་པས་དཀོན་མཆོག་ཅེས་བྱའོ། །དཀོན་

མཆོག་གསུམ་དངོས་པོ་ཐ་དད་པ་ནི་སངས་རྒྱས་རྒྱལ་པོའི་ཁབ་ཏུ་སྐུ་སྤྲུལ་ཅིང་བྱང་ཆུབ་སེམས་དཔའ་ཡིན་པ་སྐད་དུ་སེམས་ཅན་བསྒྲལ་བའི་ཕྱིར་བརྟུལ་ཞུགས་དང་དཀའ་ཐུབ་སྤྱད་དེ། བྱང་ཆུབ་ཀྱི་ཤིང་དྲུང་དུ་མངོན་པར་བྱང་ཆུབ་ནས་བདག་དང་གཞན་གྱི་དོན་མཛད་ཅེས་བྱ་བ་ནི་སངས་རྒྱས་ཞེས་བྱའོ། །

སངས་རྒྱས་ནི་མ་རིག་པའི་གཉིད་ལས་སད་པའོ། །དགེ་འདུན་ཞེས་བྱ་བ་ནི་མཆོད་པའི་གནས་སོ། །སྟོན་པ་ལས་སློབ་མས་དོན་རྙེད་པའི་ཕྱིར་དགེ་འདུན་ཞེས་བྱའོ། །དགེ་འདུན་ལ་རྣམ་པ་གཉིས་ཏེ། འཐུན་པ་དང་། འདུས་མ་བྱས་པའོ། །འདུས་མ་བྱས་པ་ཐོབ་པ་ནི་ཡང་དག་པའི་

སྟོང་པ་ཉིད་ཀྱིས་ཤེས་རབ་ཀྱི་མཚན་ཉིད་སྟོང་པ་ཉིད་གྲོལ་བ་ནི་འདུས་མ་བྱས་པའོ། །འཁྲུལ་པ་བར་མི་ཆད་པར་འབྱུང་བའི་ཟག་པ་ཟད་པ་ཡང་འདུས་མ་བྱས་ཞེས་བྱའོ། །ཟག་པ་ཐམས་ཅད་འགགས་ནས་འཕགས་པ་རྣམས་དང་གནས་གཅིག་ཏུ་འཐུན་ཏེ། རྩོད་པ་མེད་པ་ནི་འཐུན་པ་སྟེ།

དོན་དེ་གཉིས་དང་ལྡན་པ་ནི་དགེ་འདུན་ཞེས་བྱའོ། །རིགས་ཀྱི་བུ་ཆོས་ནི་དགེ་སྡིག་གི་ཆོས་ཐམས་ཅད་དང་། འདུས་བྱས་དང་། འདུས་མ་བྱས་རྣམས་སོ། །སྡིག་པའི་ཆོས་ནི་སྤང་བར་བྱ། དགེ་བའི་ཆོས་ནི་འཕེལ་བར་བྱའོ། །དེ་ཡང་སེམས་ཀྱིས་དམིགས་སོ་ཅོག་ཆོས་ཀྱི་དཀོན་

མཆོག་ཅེས་བྱའོ། །དེའི་ཕྱིར་སངས་རྒྱས་དང་། དགེ་འདུན་གཉིས་དངོས་པོ་ཡང་མི་གཅིག་ལ། ངོ་བོ་ཉིད་ཀྱང་ཐ་དད་དོ། །ཆོས་ནི་དགེ་འདུན་དང་སངས་རྒྱས་སུ་དབྱིངས་འཐུན་ཏེ་སོ་སོར་དབྱེ་བར་དཀའོ། །ཇི་ལྟར་སོ་སོར་དབྱེ་བར་དཀའ་ཞེ་ན། །གལ་ཏེ་སངས་རྒྱས་དང་དགེ་

เล่ม ๖๗ · หน้า 230b

འདུན་གཉིས་ཀྱི་མཚན་བླ་དགས་སུ་བཏགས་ཏེ། རྣམ་པར་དཔྱོད་པ་བས་རྣམ་པར་གྲོལ་བའི་ཕུང་པོ་ཐོབ་པ་དང་། དགེ་བའི་ཡོན་ཏན་ཐམས་ཅད་ཆོས་ཀྱི་དཀོན་མཆོག་གོ་ཞེས་བྱ་བར་དོན་དེ་ལྟ་བུ་ཡང་མ་ཡིན་ཏེ། དེ་ཅིའི་ཕྱིར་ཞེ་ན། དགེ་བའི་ཡོན་ཏན་དང་བསོད་ནམས་ཀྱི་དབང་གིས་མི་

ལུས་ཐོབ་པ་ཡིན་ནོ། །ཆོས་དང་བྲལ་ན་མི་མེད་ལ། མི་ལས་གུད་ན་ཡང་ཆོས་ཀྱི་དཀོན་མཆོག་ཅེས་བྱ་བ་ག་ལ་ཡོད། །དེང་འདིར་གླེང་བ་ནི་མི་དང་ཆོས་སུ་གཅིག་ཏུ་འཐུན་ལ་ཐ་དད་པ་ཡང་ཡོད་དེ། ཆོས་ཀྱི་དབང་གིས་མིར་གྲུབ། མིའི་དབང་དུ་ཆོས་འགྲོ་བས་དེའི་ཕྱིར་རྣམ་པར་གྲོལ་བའི་

ཕུང་པོ་དང་། སྟོབས་བཅུ་དང་། མི་འཇིགས་པ་བཞི་དང་། མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་། ཕ་རོལ་ཏུ་ཕྱིན་པ་ལ་སོགས་ཏེ། ཏིང་ངེ་འཛིན་གྲངས་མེད་པ་ཡང་སངས་རྒྱས་དཀོན་མཆོག་ཏུ་བཤད་དོ། །ཉན་ཐོས་ཀྱི་རྣམ་པར་གྲོལ་བའི་ཕུང་པོ་ནི་དགེ་འདུན་

དཀོན་མཆོག་ཏུ་བཤད་དོ། །ཡོན་ཏན་འདི་རྣམས་འདུས་བྱས་དང་འདུས་མ་བྱས་པའི་ཆོས་ཀྱི་རྣམ་གྲངས་དང་། གཏན་ཚིགས་སུ་དམིགས་པའི་སྦྱོར་བ་ནི་ཆོས་ཀྱི་དཀོན་མཆོག་ཅེས་བྱའོ། །ཡེ་ནི་དབྱིངས་གཅིག་སྟེ། དོན་གཉིས་སུ་བཤད་ཀྱིས་ཀྱང་ཆོས་ཀྱི་དབྱིངས་ལ་སངས་རྒྱས་དང་དགེ་

འདུན་ཐ་དད་པ་ཡང་ཡོད་དེ། དེ་ཡང་ཆོས་ཀྱི་དཀོན་མཆོག་ཏུ་བསྡུའོ། །དེ་ལྟར་རྣམ་པ་གསུམ་དུ་བཤད་ནས། སེམས་ཅན་གྱི་སྐྱབས་དང་རྟེན་དུ་བྱ་ན། ཁམས་གསུམ་ན་འཁོར་བའི་འཇིགས་པ་ལས་ཐར་བར་འགྱུར་རོ། །སྤྱོད་པ་ཐམས་ཅད་ཀྱི་སྡུག་བསྔལ་སྦོམ་པོ་ལས་ཐར་གྱིས་ཀྱང་

སྡུག་བསྔལ་ཕྲ་མོ་མ་ཟད་དེ། དེའི་ཕྱིར་ཡང་དག་པ་མཐར་ཕྱིན་པའི་དཀོན་མཆོག་གསུམ་བཤད་པར་བྱའོ། །སྔོན་བཤད་པ་ལ་སངས་རྒྱས་ལ་སྡུག་བསྔལ་མངའོ། །ཆོས་ནི་མི་རྟག་གོ། །དགེ་འདུན་ཡང་མི་རྟག་སྟེ། སྡུག་བསྔལ་ཡིན་པས་ཡང་དག་པའི་རྟེན་གནས་མ་ཡིན་ཞེས་ཟེར་ན་

དེང་འདིར་བཤད་པ་ནི་རྟག་ཏུ་གནས་པ་སྟེ། རྣལ་འབྱོར་སྤྱོད་པ་པ་རྣམས་ཀྱིས་ཆོས་ཉིད་སྟོང་པ་ཉིད་དུ་མངོན་པར་ཆུད་ཅིང་། ཕྱིན་ཅི་ལོག་བརྒྱད་དང་བྲལ་བ། སྐྱེ་འགག་མེད་པ་ཡང་དག་པའི་རྟེན་གནས་སུ་གྱུར་པ་དེ་ནི་སངས་རྒྱས་དཀོན་མཆོག་ཅེས་བྱའོ། །རྟག་པའི་ཆོས་རྙེད་དོ་ཅོག་དམིགས་

เล่ม ๖๗ · หน้า 231a

པའི་མཐར་ཕྱིན་པར་སྤྱད་པ་ནི་ཡང་དག་པའི་ཆོས་དཀོན་མཆོག་ཅེས་བྱའོ། །སྤྱོད་པ་པ་རྣམས་ཀྱིས་ཡང་དག་པའི་ཆོས་ཀྱི་ཆོས་ཉིད་ཁོང་དུ་ཆུད་ཅིང་རྟག་ཏུ་འདུས་མ་བྱས་པའི་གནས་སུ་གྲུབ་པ་ནི་དགེ་འདུན་ཞེས་བྱའོ། །ཡང་ཕྱིན་ཅི་ལོག་བརྒྱད་གཏན་དུ་བྲལ་བས་འཕགས་པ་དང་སྐྱེ་བོ་

ཐམས་ཅད་འཐུན་ཞིང་ནམ་དུ་ཡང་རྩོད་པ་མེད་པ་ནི་དགེ་འདུན་དཀོན་མཆོག་ཅེས་བྱའོ། །སྔོན་དཀོན་མཆོག་གསུམ་མི་དང་ཆོས་སུ་ཐ་དད་པར་བཤད། དེང་འདིར་ནི་སངས་རྒྱས་དངོས་པོ་གཅིག་ལ་ཆོས་དང་དགེ་འདུན་ཡང་དེར་བྱུང་བས་དོན་དེའི་ཕྱིར་ངས་ཁྱོད་ལ་དངོས་པོ་གཅིག་པའི་དཀོན་མཆོག་

གསུམ་བཤད་དེ། སྐྱེ་བོ་ཀུན་ཐེག་པ་གཅིག་ཏུ་ཕྱོགས་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་མཚན་ཉིད་དད་ཀྱིས་འདི་སྐད་ཅེས་གསོལ་ཏོ། །སངས་རྒྱས་བཅོམ་ལྡན་འདས་གང་ལ་རྣམ་པར་རྟོག་སྟེ་ཐེག་པ་ཆེན་པོ་བསྒྲུབ་པར་བགྱི། བཅོམ་ལྡན་འདས་ཀྱིས་

བཀའ་སྩལ་པ། རིགས་ཀྱི་བུ་ཁམས་གསུམ་མི་རྟག་པར་བསམས་ཏེ་ཐེག་པ་ཆེན་པོར་བསྒྲུབ་བོ། །བྱང་ཆུབ་སེམས་དཔའ་མཚན་ཉིད་དད་ཀྱིས་གསོལ་པ། ཇི་ལྟར་ན་མི་རྟག་པ་ལ་རྣམ་པར་རྟོག་པར་བགྱི། བཀའ་སྩལ་པ། མི་རྟག་པ་ལ་རྣམ་པར་རྟོག་པར་བྱ་ན་ཉོན་མོངས་པ་རྣམ་པར་སྤངས་ཏེ་ཡང་

དག་པའི་དྲན་པ་མངོན་དུ་བཞག་ལ་བྱམས་པ་དང་སྙིང་རྗེ་ཐོག་མར་འགྲོ་བར་བྱ་སྟེ། སྐྱེ་བོ་རྣམས་ལ་ཆོས་བཤད་ཅིང་བསྒྲལ་ན་ཡང་ལན་མི་རེ་བ་ནི་བྱང་ཆུབ་སེམས་དཔའ་ཞེས་བྱའོ། །དེ་ལྟར་སེམས་ཅན་ཡོངས་སུ་མི་གཏོང་བར་ཐེག་པ་ཆེན་པོ་བསྒྲུབ་པར་བྱའོ། །རིགས་ཀྱི་བུ་དཔེར་ན་གྲོང་ཁྱེར་ཆེན་པོ་

གཅིག་འཁོར་རྒྱ་དཔག་ཚད་གཅིག་ལ། སྒོ་མང་པོ་ཞིག་ཡོད་པ་དེར་འགྲོར་ནི་ལམ་ན་གཡང་ས་དང་། མུན་ནག་པ་དང་། ཤིན་ཏུ་འཇིགས་པའི་ས་ཆེར་ཡོད་ཀྱིས་ཀྱང་། གྲོང་ཁྱེར་དེར་ཕྱིན་ན་ཤིན་ཏུ་བདེ་སྐྱིད་པར་འགྱུར་བས་སྐྱེས་བུ་མི་གཅིག་ལ་བུ་གཅིག་པུ་ཞིག་ཡོད་པ་ཤིན་ཏུ་ཡང་སྡུག་མོད་

ཀྱི། གྲོང་ཁྱེར་དེ་ན་བདེ་སྐྱིད་པའི་ལོངས་སྤྱོད་དཔག་ཏུ་མེད་པ་ཡོད་དོ་ཞེས་ཐོས་པས་བུ་སྡུག་པ་དེར་བོར་ནས། གྲོང་ཁྱེར་དེར་འགྲོ་འདོད་པའི་ཕྱིར་ཐབས་སྣ་ཚོགས་ཀྱིས་ལམ་འཇིགས་ས་བསྒྲལ་ནས་གྲོང་ཁྱེར་དེའི་སྒོར་ཕྱིན་པ་དང་། རྐང་པ་ཡ་གཅིག་ནང་དུ་བཅུག་སྟེ། རྐང་པ་ཡ་གཅིག་མ་བཏེག་

เล่ม ๖๗ · หน้า 231b

པའི་བར་དུ་བུ་དེ་དྲན་ནས་འདི་ལྟར་བསམས་སོ། །བདག་ལ་བུ་གཅིག་པུ་ཡོད་པ་བདག་ཆས་པའི་ཁར་ཅི་སྟེ་མ་ཁྲིད། ད་སུ་ཞིག་སླད་ན་གསོ་ཞིག་གུ་ཞེས་བསམས་ནས་གྲོང་ཁྱེར་དེ་བཏང་སྟེ་སླར་བུའི་ཐད་དུ་ཆས་སོ། །རིགས་ཀྱི་བུ་བྱང་ཆུབ་སེམས་དཔའི་བྱམས་པ་དང་སྙིང་རྗེ་ཡང་དེ་དང་འདྲ་སྟེ།

བྱམས་ཤིང་སྙིང་བརྩེ་བའི་ཕྱིར་མངོན་པར་ཤེས་པ་ལྔ་སྒོམ་པར་བྱེད་དོ། །བསྒོམས་ཏེ་ཟག་པ་ཟད་ན་ཡང་མི་ཤེས་གྲུབ་པ་མི་ལེན་ཏེ། དེ་ཅིའི་ཕྱིར་ཞེ་ན། སེམས་ཅན་ལ་སྙིང་བརྩེ་བའི་ཕྱིར་ཟག་པ་ཟད་པ་དང་། མངོན་པར་ཤེས་པ་སྤོང་སྟེ། སོ་སོའི་སྐྱེ་བོའི་སར་བགྲོད་པར་བྱེད་དོ། །རིགས་ཀྱི་

བུ་དཔེར་གྲོང་ཁྱེར་བདེ་སྐྱིད་པ་ཞེས་བྱ་བ་ནི་རྣམ་པར་ཐར་པ་ཆེན་པོ་ལ་བྱའོ། །དཔེར་སྒོ་མང་པོ་ཞེས་བྱ་བ་ནི་ཏིང་ངེ་འཛིན་གྱི་སྒོ་བརྒྱད་ཁྲི་བཞི་སྟོང་ལ་བྱའོ། །དཔེར་ལམ་འཇིགས་ས་ཆེན་པོ་ཞེས་བྱ་བ་ནི་བདུད་དང་བགེགས་ལྟ་བུ་ལ་བྱའོ། །དཔེར་གྲོང་ཁྱེར་གྱི་སྒོར་ཕྱིན་ཞེས་བྱ་བ་ནི་མངོན་

པར་ཤེས་པ་ལྔ་ཐོབ་པ་ལ་བྱའོ། །དཔེར་རྐང་པ་ཡ་གཅིག་བཏེག་སྟེ་ཐེམ་པའི་ནང་དུ་འཇུག་པ་ནི་ཡེ་ཤེས་ལ་བྱའོ། །དཔེར་རྐང་པ་ཡ་གཅིག་མ་བཏེག་པ་ནི་བྱང་ཆུབ་སེམས་དཔའ་གཞན་རྣམ་པར་མ་གྲོལ་བ་ལ་བྱའོ། །དཔེར་བུ་གཅིག་པུ་ལུས་ཞེས་སྨྲ་བ་ནི་ལམ་རྒྱུད་ལྔའི་སེམས་ཅན་ལ་

བྱའོ། །དཔེར་བུ་ལ་དྲན་པ་ནི་སྙིང་རྗེ་ཆེན་པོ་ལ་བྱའོ། །དཔེར་བུའི་ཐད་དུ་ལྡོག་པ་ནི་སེམས་ཅན་འདུལ་ཞིང་རྣམ་པར་གྲོལ་བ་ཐོབ་པར་བྱེད་པ་ལ་བྱའོ། །དཔེར་ལན་དང་འགྲུབ་པ་མི་ལེན་པ་ནི་ཐབས་མཁས་པ་ལ་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱམས་པ་

ཆེན་པོ་དང་སྙིང་རྗེ་ཆེན་པོས་བསྡུས་ཏེ། མི་གཏོང་བ་ནི་བསམ་གྱིས་མི་ཁྱབ་བོ། །རིགས་ཀྱི་བུ་ཡང་འདི་ལྟ་སྟེ། བྱང་ཆུབ་སེམས་དཔའ་སྐྱེས་བུ་དམ་པ་དང་པོ་སེམས་བསྐྱེད་པ་ནས་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་སེམས་ཅན་ལ་རྟག་ཏུ་དགེ་བ་བཅུ་དཔོག་པར་བྱའོ། །བཅུ་པོ་གང་

ཞེ་ན། སྲོག་མི་གཅོད་པ་དང་། མ་བྱིན་པར་མི་ལེན་པ་དང་། འདོད་པས་ལོག་པར་མི་གཡེམ་པ་དང་། བརྫུན་དུ་མི་སྨྲ་བ་དང་། ཕྲ་མ་དང་དབྱེན་མི་བྱེད་པ་དང་། ངག་རྩུབ་པོ་མི་སྨྲ་བ་དང་། དོན་མེད་པའི་གཏམ་ཚིག་ཀྱལ་པ་མི་སྨྲ་བ་དང་། བརྣབ་སེམས་མི་བྱེད་པ་

เล่ม ๖๗ · หน้า 232a

དང་། གནོད་སེམས་མི་བྱེད་པ་དང་། ལོག་པར་མི་ལྟ་བ་སྟེ། བྱང་ཆུབ་སེམས་དཔའ་དེ་བཞིན་དུ་བྱམས་པ་དང་། སྙིང་རྗེ་ཕུན་སུམ་ཚོགས་པར་སྤྱད་ན་བྱམས་པས་ནི་དགེ་བ་སྟོན་ཅིང་བདེ་བ་ལ་འགོད་པར་བྱེད། སྙིང་རྗེས་ནི་སྡུག་བསྔལ་ལས་ཐར་བ་དང་། དམྱལ་བ་

ལས་སྒྲོལ་བར་བྱེད་དོ། །སྐྱེ་བོ་རྣམས་མྱ་ངན་ལས་འདའ་བར་བསྒྲུབ་འདོད་པའི་སྒོ་མ་ཤེས་པ་མཐོང་ན་བྱང་ཆུབ་སེམས་དཔས་སྐྱེ་བོ་དེ་དག་ལ་སྙིང་རྗེ་བའི་སེམས་བསྒོམ་པར་བྱའོ། །སྙིང་རྗེ་བའི་དབང་གིས་སེམས་ཅན་ཐམས་ཅད་ལ་མྱ་ངན་ལས་འདའ་བའི་སྒོ་འབྱེད་པས་བདེ་བའི་གནས་མངོན་

པར་སྟོན་ཏེ། ཐེག་པ་ཆེན་པོའི་འབྲས་བུ་ཐོབ་པར་བྱེད་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་སྤྱད་པ་སྤྱོད་པ་ཞེས་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་མཚན་ཉིད་དད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཡང་དག་པའི་དྲན་པ་ཞེས་བགྱི་བ་གང་། བཀའ་

སྩལ་པ། མི་སྐྱེ་མི་འགག་པའི་ཆོས་སྤྱད་པའོ། །གསོལ་པ། བཅོམ་ལྡན་འདས་ཆོས་མི་སྐྱེ་བ་ནི་གང་། མི་འགག་པ་ནི་གང་། བཀའ་སྩལ་པ། རིགས་ཀྱི་བུ་སྡིག་པའི་ཆོས་ནི་མི་སྐྱེ་བར་བྱ། དགེ་བའི་ཆོས་ནི་མི་འགག་པར་བྱའོ། །དེ་ལྟ་བུའི་སྤྱོད་པ་ཁམས་གསུམ་དུ་སྤྱད་པ་ནི་འདོད་པ་རྣམ་པ་ལྔའི་བག་ཆགས་ཀྱི་

དྲི་མས་གོས་པར་མི་འགྱུར་རོ། །རིགས་ཀྱི་བུ་ཁམས་གསུམ་ན་བགྲོད་ཅིང་སེམས་ཅན་བསྒྲལ་བར་འདོད་ན་ཆོས་རྣམ་པ་བཅུ་པོ་འདིས་ཁམས་གསུམ་དུ་བགྲོད་པར་བྱ་སྟེ། ཀུན་རྫོབ་ཀྱི་ཚིག་དང་། ཡི་གེའི་རྗེས་སུ་ཁམས་གསུམ་ཡོད་པར་བཤད་མོད་ཀྱི། བླ་ན་མེད་པའི་བྱང་ཆུབ་ནི་དུས་གསུམ་དུ་མི་གནས་

ལ་མཐར་ཕྱིན་པའི་བྱང་ཆུབ་རྣམ་གྲངས་སུ་མི་ལྟུང་ན་དུས་གསུམ་དང་ཁམས་གསུམ་ལྟ་ཅི་སྨོས། ཆོས་བཅུ་པོ་གང་ཞེ་ན། སྟོད་པ་དང་སྨད་པ་ལ་སེམས་སྐྱེད་བྲི་མེད་པ་དང་། སྙན་པ་དང་མི་སྙན་པར་ཐོས་པ་ལ་སེམས་རྣམ་པར་མི་རྟོག་པ་དང་། ཤེས་རབ་ཅན་དང་། གཏི་མུག་ཅན་ལ་འདྲ་བར་སྙིང་རྗེ་

བསྐྱེད་པ་དང་། སེམས་ཅན་བླ་འོག་གང་ཡང་རུང་སྟེ། སྙོམས་པར་ལྟ་བ་དང་། མཆོད་པ་གུས་མ་གུས་ལ་སེམས་རྣམ་པ་གཉིས་སུ་མི་འབྱེད་པ་དང་། གཞན་གྱི་ཉེས་སྐྱོན་ལ་འཕྱས་མི་འདོགས་པ་དང་། ཐེག་པ་རྣམ་པ་སྣ་ཚོགས་སུ་མཐོང་ན་ཡང་ཐེག་པ་གཅིག་ཏུ་ལྟ་བ་དང་། ངན་སོང་གསུམ་གྱི་

เล่ม ๖๗ · หน้า 232b

སྒྲ་ཐོས་ན་ཡང་འཇིགས་པ་དང་སྐྲག་པའི་སེམས་མི་སྐྱེད་པ་དང་། བྱང་ཆུབ་སེམས་དཔའ་རྣམས་ལ་དེ་བཞིན་གཤེགས་པ་དང་འདྲ་བར་བལྟ་བ་དང་། བསྐལ་པ་སྙིགས་མ་ཅན་གྱི་དུས་སུ་སངས་རྒྱས་འབྱུང་བ་ལ་ངོ་མཚར་རྨད་དུ་བྱུང་བའི་འདུ་ཤེས་བསྐྱེད་པ་དང་བཅུ་སྟེ། ཆོས་བཅུ་པོ་དེ་དག་དང་

ལྡན་ན་བྱང་ཆུབ་སེམས་དཔའི་ཉོན་མོངས་པའི་བག་ཆགས་ཀྱིས་ཉོན་མོངས་པར་མི་འགྱུར་རོ། །བྱང་ཆུབ་སེམས་དཔའ་སྐྱེས་བུ་དམ་པ་ཁམས་གསུམ་ན་བགྲོད་པའི་ཚེ་སྙིང་རྗེ་ཆེན་པོས་གཞི་བྱས་ན་མནོལ་བའི་ཞིང་དེར་འོད་འདྲེས་ཀྱང་རྡུལ་མི་གཅིག་སྟེ། དེ་བས་ན་བསམ་གྱིས་ཁྱབ་དཀའ་ཞེས་བྱའོ། །

གང་ཞིག་འཇིག་རྟེན་རྣམ་དག་ན། །བསྐལ་པ་གཅིག་གི་བར་དག་ཏུ། །ཚུལ་ཁྲིམས་དམ་དུ་བསྲུང་བ་ནི། །སྐྱེས་བུ་དེ་ནི་སྐད་ཅིག་ཙམ། །བྱམས་པ་སྤྱད་པས་དམ་པ་མཆོག །གང་ཞིག་འཇིག་རྟེན་འདི་རུ་ནི། །ལུས་དང་ངག་ཡིད་སྡིག་སྤྱད་དེ། །ངན་སོང་

གསུམ་དུ་ལྟུང་ངེས་དག །བྱམས་སེམས་དེ་ཡིས་འཕྲལ་དུ་འབྱང་། །བྱང་ཆུབ་སེམས་དཔའ་འགའ་ཞིག་གིས། །འཇིག་རྟེན་ངན་པར་སྐྱེས་ན་ཡང་། །འཇིགས་དང་དོགས་པ་མ་སྐྱེད་ཅིག །ངན་སོང་ལྟུང་བའི་སྡིག་ཡོད་ཀྱང་། །མགོ་བོ་ན་བ་ཙམ་གྱིས་འབྱང་། །

གང་ཞིག་འཆིང་བ་གཅོད་འདོད་དམ། །ཉོན་མོངས་སྒྲིབ་པ་སྤང་འདོད་པ། །འཇིག་རྟེན་ངན་འདིར་སྐྱེས་ན་ཡང་། །དམ་ཆོས་བསྲུང་བས་ཤེས་རབ་འཕེལ། །རྣམ་དག་ཞིང་དུ་བསྐལ་པ་འབུམ། །ཚུལ་ཁྲིམས་རྣམ་དག་སྤྱད་པ་བས། །དེང་ནས་སང་གི་བར་དག་ཏུ། །

འཇིག་རྟེན་འདི་ན་གནས་ཀྱང་སླ། །དེ་ཅིའི་ཕྱིར་ཞེ་ན། ངས་ནི་མི་འཁྲུགས་འཇིག་རྟེན་དང་། །བདེ་བ་ཅན་གྱི་འཇིག་རྟེན་གཉིས། །ཤིན་ཏུ་རྣམ་དག་མཐོང་བ་ན། །སྡུག་བསྔལ་བྱ་བའི་མིང་ཡང་མེད། །ཁམས་དེར་བསོད་ནམས་བྱ་བ་ནི། །དཀའ་བ་སྙམ་དུ་མི་མཛད་དོ། །

གང་ཞིག་འཇིག་རྟེན་འདི་དག་ཏུ། །རང་གིས་མི་བཟོད་བཟོད་བྱ་སྟེ། །ཕ་རོལ་པོ་ཡང་བཟོད་བཅུག་ན། །དེ་ནི་བསོད་ནམས་དམ་པ་མཆོག །དེ་ཕྱིར་བྱང་ཆུབ་སེམས་དཔའ་རྣམས། །འཇིག་རྟེན་ངན་འདིར་བགྲོད་པའི་ཚེ། །ཉོན་མོངས་མྱ་ངན་མ་བྱེད་པར། །སེམས་ཅན་

เล่ม ๖๗ · หน้า 233a

ཐམས་ཅད་འདྲེན་བྱ་སྟེ། །བརྩོན་འགྲུས་བརྟན་པའི་སེམས་བསྐྱེད་ན། །བླ་མེད་བྱང་ཆུབ་མྱུར་དུ་ཐོབ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་ཀྱིས་དེང་འདིར་བྱང་

ཆུབ་སེམས་དཔའ་བྱང་ཆུབ་ཀྱི་རྒྱུ་དང་རྐྱེན་ཞིག་ཞུ་ཞིང་མཆིས་ན། དེ་བཞིན་གཤེགས་པས་སྐབས་དབྱེ་བར་གནང་ན་སྤོབས་པ་བསྐྱེད་དེ་ཞུ་བར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ལེགས་སོ། །རིགས་ཀྱི་བུ་ཁྱོད་སྔོན་སངས་རྒྱས་བརྒྱ་སྟོང་དུ་མ་ལ་དགེ་བའི་རྩ་བ་

རྣམས་བསྐྱེད་པ། བྱང་ཆུབ་སེམས་དཔའི་ཐབས་སྤྱད་པ་ལ་མཁས་པ། བྱང་ཆུབ་སེམས་དཔའ་ཐམས་ཅད་ཀྱི་ཕྱིར་བྱང་ཆུབ་སྤྱོད་པའི་བརྩོན་འགྲུས་བརྟན་པ་འདྲི་བ་ལེགས་ཀྱིས་འདོད་པ་བཞིན་དྲིས་ཤིག །ངས་ཁྱོད་ལ་བྱེ་ཕྲག་ཕྱེད་པར་བཤད་དོ། །བཅོམ་ལྡན་འདས་ཀྱིས་སྐབས་དབྱེ་

བར་གནང་ནས་བཅོམ་ལྡན་འདས་ལ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔས་ཅི་བགྱིས་ན་བརྟུལ་ཞུགས་དང་དཀའ་ཐུབ་ཀྱི་སེམས་ལ་གདུང་བ་མ་མཆིས་པར་འགྱུར། བྱང་ཆུབ་སེམས་དཔས་ཅི་བགྱིས་ན་ངེས་པའི་ཚིག་ལ་འགྱོད་པ་མ་

མཆིས་པར་འགྱུར། བྱང་ཆུབ་སེམས་དཔས་ཅི་བགྱིས་ན་དགེ་བའི་རྩ་བ་འཕེལ་བར་འགྱུར། བྱང་ཆུབ་སེམས་དཔས་ཅི་བགྱིས་ན་འཇིགས་པ་མ་མཆིས་ཤིང་ཚུལ་མི་གཡོ་བར་འགྱུར། བྱང་ཆུབ་སེམས་དཔས་ཅི་བགྱིས་ན་དམ་པའི་ཆོས་ཡོངས་སུ་འགྲུབ་པར་འགྱུར། བྱང་ཆུབ་སེམས་

དཔས་ཅི་བགྱིས་ན་ས་གཅིག་ནས་ས་བཅུའི་བར་དུ་ལེགས་པར་འཚལ་བར་འགྱུར། བྱང་ཆུབ་སེམས་དཔས་ཅི་བགྱིས་ན། ཐབས་ལ་ཤིན་ཏུ་མཁས་པར་འགྱུར། བྱང་ཆུབ་སེམས་དཔས་ཅི་བགྱིས་ན་སེམས་ཅན་གྱི་སྟོན་པ་བགྱིད་པར་འགྱུར། བྱང་ཆུབ་སེམས་དཔས་ཅི་བགྱིས་ན་ཚེ་ཚེ་རབས་རབས་སུ་

བྱང་ཆུབ་ཀྱི་སེམས་ཆུད་མི་གཟོན་པར་འགྱུར། བྱང་ཆུབ་སེམས་དཔས་ཅི་བགྱིས་ན་སེམས་སྤྱོད་པ་རྣམས་གཅིག་ལས་རྣམ་པ་སྣ་ཚོགས་སུ་སྤྱོད་པ་མ་མཆིས་པར་འགྱུར། བྱང་ཆུབ་སེམས་དཔས་ཅི་བགྱིས་ན་ཆོས་རིན་པོ་ཆེས་ལེགས་པར་སྒྲུབ་པར་འགྱུར། བྱང་ཆུབ་སེམས་དཔས་ཅི་བགྱིས་ན་ཚུལ་ཁྲིམས་

เล่ม ๖๗ · หน้า 233b

དང་འདུལ་བ་ལས་བཅས་པའི་ཁ་ན་མ་ཐོ་བ་ལས་འབྱུང་བར་འགྱུར། བྱང་ཆུབ་སེམས་དཔས་ཅི་བགྱིས་ན་ཉོན་མོངས་པ་རྣམས་འགག་པར་འགྱུར། བྱང་ཆུབ་སེམས་དཔས་ཅི་བགྱིས་ན་ཚོགས་མང་པོ་ཀུན་དང་འཐུན་པར་འགྱུར། བྱང་ཆུབ་སེམས་དཔས་ཅི་བགྱིས་ན་ཆོས་ཀྱི་སྦྱིན་པའི་སྒོ་ལེགས་པར་

འབྱེད་པར་འགྱུར། བྱང་ཆུབ་སེམས་དཔས་ཅི་བགྱིས་ན་སྔོན་གྱི་དབང་གི་མཐུས་དགེ་བའི་རྩ་བ་མི་སྟོར་བར་འགྱུར། བྱང་ཆུབ་སེམས་དཔས་ཅི་བགྱིས་ན་གཞན་གྱིས་བསྟན་པ་ལ་རག་མི་ལུས་པར་རང་བཞིན་གྱིས་ཕ་རོལ་ཏུ་ཕྱིན་པ་དྲུག་སྤྱད་པར་འགྱུར། བྱང་ཆུབ་སེམས་དཔས་ཅི་བགྱིས་ན་བསམ་གཏན་

དང་ཏིང་ངེ་འཛིན་བཏང་སྟེ། འདོད་པའི་ཁམས་སུ་སྐྱེ་བར་འགྱུར། བྱང་ཆུབ་སེམས་དཔས་ཅི་བགྱིས་ན་སངས་རྒྱས་ཀྱི་ཆོས་ལས་ཕྱིར་མི་ལྡོག་པར་འགྱུར། བྱང་ཆུབ་སེམས་དཔས་ཅི་བགྱིས་ན་དགེ་བའི་རྩ་བ་འཕེལ་བ་དང་། ཁམས་གསུམ་དུ་བགྲོད་ཅིང་སེམས་ཅན་ལ་སྟོན་པ་བགྱིད་དེ། སངས་

རྒྱས་ཀྱི་ངོ་བོ་ཉིད་བར་མི་འཆད་པར་འགྱུར་རོ་ཞེས་བགྱིས་པ་དང་། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ནམ་མཁའི་སྙིང་པོ་ལ་ལེགས་སོ་ཞེས་བྱ་བ་བྱིན་ཏེ། ཁྱོད་དེ་བཞིན་གཤེགས་པ་ལ་བྱང་ཆུབ་སེམས་དཔའི་བྱ་བ་རྣམས་ཞུ་ནུས་པ་ཡང་ཤིན་ཏུ་ལེགས་སོ་ལེགས་སོ། །ཁྱོད་ལེགས་

པར་ཉོན་ལ་དྲན་པ་མངོན་དུ་ཞོག་ཤིག །གསོལ་པ། བཅོམ་ལྡན་འདས་བཀའ་བཞིན་དུ་ཐོས་པར་སྨོན་ཏེ། མཉན་ཅིང་མནོས་པར་འཚལ་ལོ་ཞེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ནམ་མཁའི་སྙིང་པོ་ལ་བཀའ་སྩལ་པ། རིགས་ཀྱི་བུ་བྱང་ཆུབ་སེམས་

དཔའ་ཆོས་བཞི་དང་ལྡན་ན་བརྟུལ་ཞུགས་དང་དཀའ་ཐུབ་ཀྱིས་སེམས་མི་གདུང་བར་འགྱུར་རོ། །ཆོས་བཞི་གང་ཞེ་ན། སེམས་ཅན་ཐམས་ཅད་ལ་སྙིང་རྗེ་ཆེར་བསྐྱེད་པ་དང་། བརྩོན་འགྲུས་བསྐྱེད་ཅིང་ལེ་ལོ་མི་བྱེད་པ་དང་། སྐྱེ་ཤིའི་འཁོར་བ་རྨི་ལམ་ཙམ་དང་འདྲ་བར་ཤེས་པ་དང་། ཡང་

དག་པའི་ཡིད་ཀྱིས་སངས་རྒྱས་ཀྱི་ཡེ་ཤེས་བསམ་པ་དང་བཞི་སྟེ། བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་དཀའ་ཐུབ་དང་བརྟུལ་ཞུགས་ཀྱིས་སེམས་གདུང་བ་མེད་པར་འགྱུར་རོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ངེས་པའི་ཚིག་ལ་བར་མ་དོར་འགྱོད་པར་མི་

เล่ม ๖๗ · หน้า 234a

འགྱུར་རོ། །བཞི་གང་ཞེ་ན། ངེས་པའི་ཚིག་ཆོས་ལ་བདག་མེད་པར་མངོན་པར་ཆུད་ཅེས་བརྗོད་པ་དང་། ངེས་པའི་ཚིག་སྐྱེ་གནས་སོ་ཅོག་ལ་དད་པའི་འདུ་ཤེས་བསྐྱེད་པ་མི་རིགས་ཞེས་བརྗོད་པ་དང་། ངེས་པའི་ཚིག་གིས་ཐེག་པ་ཆེན་པོ་ལ་རྒྱུན་དུ་བསྔགས་པ་བརྗོད་པ་དང་། ངེས་

པའི་ཚིག་གིས་ལས་དགེ་སྡིག་གི་འབྲས་བུ་མི་རླག་ཅེས་བརྗོད་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་དགེ་བའི་རྩ་བ་རྣམ་པར་འཕེལ་བར་འགྱུར་རོ། །བཞི་གང་ཞེ་ན། ཚུལ་ཁྲིམས་བསྲུང་བ་དང་། མང་དུ་ཐོས་པ་དང་། སྦྱིན་པ་བྱིན་པ་དང་། རབ་ཏུ་བྱུང་བ་དང་བཞི་

འོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་འཇིགས་པ་མེད་ཅིང་ཚུལ་ལས་མི་གཡོ་བར་འགྱུར་རོ། །བཞི་གང་ཞེ་ན། ཁེ་སྟོར་བ་དང་མི་སྙན་པར་གྲགས་པ་དང་། སྨད་ཅིང་སྨ་དབབ་པ་དང་། སྡུག་བསྔལ་གྱིས་ནོན་ཀྱང་མི་གཡོ་བ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་

དང་ལྡན་ན་ཆོས་དཀར་པོ་ཡོངས་སུ་འགྲུབ་པར་འགྱུར་རོ། །བཞི་གང་ཞེ་ན། ཕ་རོལ་པོ་ལ་ལས་དགེ་སྡིག་ཡིད་ཆེས་པར་སྟོན་པ་དང་། སྦྱིན་པ་ལ་ལན་མི་རེ་བ་དང་། དམ་པའི་ཆོས་བསྲུང་ཞིང་སྐྱོང་བ་དང་། ཤེས་རབ་ཆེན་པོས་བྱང་ཆུབ་སེམས་དཔའ་ཐམས་ཅད་ལ་སྟོན་པར་བྱེད་པ་དང་བཞིའོ། །རིགས་

ཀྱི་བུ་བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན། ས་གཅིག་ནས་ས་བཅུའི་བར་དུ་ལེགས་པར་ཤེས་པར་འགྱུར་རོ། །ཆོས་བཞི་གང་ཞེ་ན། དགེ་བའི་རྩ་བ་ཡུན་དུ་བསྐྱེད་པ་དང་། ཉེས་སྐྱོན་ཐམས་ཅད་སེལ་བ་དང་། ཐབས་ལ་ཤིན་ཏུ་མཁས་པ་དང་། དགེ་བའི་བརྩོན་འགྲུས་ཅི་སྤྱད་པ་བྱང་

ཆུབ་ཏུ་བསྔོ་བ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ཐབས་ལ་ཤིན་ཏུ་མཁས་པར་འགྱུར་རོ། །བཞི་གང་ཞེ་ན། སེམས་ཅན་གྱི་ཡིད་དང་འཐུན་པར་བྱེད་པ་དང་། གཞན་གྱི་བསོད་ནམས་དང་ཡོན་ཏན་ལ་རྗེས་སུ་ཡི་རང་བའི་སེམས་སྐྱེད་པ་དང་། སྡིག་ཡོད་ན་

འགྱོད་ཚངས་བྱེད་པ་དང་། དེ་བཞིན་གཤེགས་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་སེམས་ཅན་གྱི་སྟོན་པ་བྱེད་པར་འགྱུར་རོ། །བཞི་གང་ཞེ་ན། རྟག་ཏུ་སེམས་ཅན་ལ་ཕན་པ་དང་བདེ་བ་སྒྲུབ་

เล่ม ๖๗ · หน้า 234b

པར་བྱེད་པ་དང་། རང་གི་དགའ་བ་ཡོངས་སུ་འདོར་བ་དང་། མཉེན་དེས་བྱས་ཏེ་བཟོད་པ་བསྒོམ་པ་དང་ལེ་ལོ་སྤོང་བ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ཚེ་ཚེ་རབས་རབས་སུ་བྱང་ཆུབ་ཀྱི་སེམས་ཆུད་མི་ཟོས་པར་འགྱུར་རོ། །བཞི་གང་ཞེ་ན། ཕྱོགས་བཅུའི་སངས་རྒྱས་

ཐམས་ཅད་རྟག་ཏུ་དྲན་པར་བྱེད་པ་དང་། བསོད་ནམས་བྱས་སོ་ཅོག་སེམས་ཅན་གྱི་ཕྱིར་བླ་ན་མེད་པའི་བྱང་ཆུབ་ཏུ་བསྔོ་བ་དང་། དགེ་བའི་བཤེས་གཉེན་ལ་སྟེན་པ་དང་། ཐེག་པ་ཆེན་པོ་ཡོངས་སུ་སྒྲོག་པར་བྱེད་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་སེམས་སྤྱོད་པ་

རྣམ་པ་གཅིག་ལས་རྣམ་པ་སྣ་ཚོགས་སུ་མི་སྤྱོད་པར་འགྱུར་རོ། །བཞི་གང་ཞེ་ན། ཉན་ཐོས་ཀྱི་སེམས་སྤང་བ་དང་། རང་སངས་རྒྱས་ཀྱི་སེམས་སྤང་བ་དང་། ཆོས་སྒྲུབ་པས་སྐྱོ་མི་ངས་པ་དང་། ཆོས་ཅི་ཐོས་པ་གཞན་ལ་སྟོན་པར་བྱེད་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་

དང་ལྡན་ན་ཆོས་རིན་པོ་ཆེ་ལེགས་པར་བསྒྲུབ་པར་འགྱུར་རོ། །བཞི་གང་ཞེ་ན། ཐེག་པ་ཆེན་པོ་ཆོས་དཀོན་པའི་ཕྱིར་རིན་པོ་ཆེ་དང་འདྲ་བར་འདུ་ཤེས་བསྐྱེད་པ་དང་ཐེག་པ་ཆེན་པོའི་ཆོས་སེམས་ཀྱི་ནད་ཐམས་ཅད་སེལ་བའི་ཕྱིར་སྨན་དང་འདྲ་བར་ལྟ་བ་དང་། ཐེག་པ་ཆེན་པོའི་ཆོས་ནམ་ཡང་མི་རླག་པའི་ཕྱིར་

ནོར་གྱི་དབྱིག་དང་འདྲ་བར་ལྟ་བ་དང་། ཐེག་པ་ཆེན་པོའི་ཆོས་མྱ་ངན་ལས་འདའ་བར་བྱེད་པའི་ཕྱིར་སྡུག་བསྔལ་འགོག་པར་ལྟ་བ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ཚུལ་ཁྲིམས་ཉམས་པ་དང་། ཉོན་མོངས་པའི་ཁ་ན་མ་ཐོ་བ་ལས་འབྱུང་བར་འགྱུར་རོ། །བཞི་གང་ཞེ་ན།

ཆོས་རྣམས་འོང་བ་མེད་པའི་ཕྱིར་ཆོས་ལ་མི་སྐྱེ་བའི་བཟོད་པ་ཐོབ་པ་དང་། ཆོས་རྣམས་སོང་བ་མེད་པའི་ཕྱིར་ཆོས་ལ་མི་འགོག་པའི་བཟོད་པ་ཐོབ་པ་དང་། ཆོས་རྣམས་རྒྱུ་དང་རྐྱེན་ལས་སྐྱེ་བར་ཤེས་པའི་ཕྱིར་ཆོས་ལ་རྟེན་ཅིང་འབྲེལ་བར་འབྱུང་བའི་བཟོད་པ་ཐོབ་པ་དང་། ཐ་དད་པའི་སེམས་

རྒྱུད་མེད་པའི་ཕྱིར་མི་གནས་པའི་བཟོད་པ་ཐོབ་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ཉོན་མོངས་པ་རྣམས་འགག་པར་འགྱུར་རོ། །བཞི་གང་ཞེ་ན། ཡང་དག་པའི་དྲན་པ་མངོན་དུ་གཞག་པ་དང་། དབང་པོ་རྣམས་བསྡམ་པ་དང་། དགེ་བའི་ཆོས་ཀྱི་

เล่ม ๖๗ · หน้า 235a

སྟོབས་བསྐྱེད་ནུས་པ་དང་། དབེན་པའི་གནས་སུ་དད་ཅིང་འདུ་འཛི་སྤང་བར་བྱ་བ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་ཚོགས་མང་པོ་ཀུན་དང་འཐུན་པར་འགྱུར་རོ། །བཞི་གང་ཞེ་ན། བདག་ཆོས་སྒྲུབ་ན་ཡང་ཁྱད་པར་ཐོབ་པར་མི་སྒྲུབ་པ་དང་།

ལེ་ལོ་མེད་པར་རྟག་ཏུ་བཀུར་སྟི་དང་གུས་པའི་སེམས་སྐྱེད་པ་དང་། ཆོས་ཀྱི་ཕན་པ་འབའ་ཞིག་ཚོལ་གྱི་བདག་མི་སྤྱོམ་པ་དང་། གཞན་ལ་དགེ་བའི་ཆོས་བསྟན་ཀྱང་རྙེད་པ་དང་། བཀུར་སྟི་དང་། གྲགས་པ་མི་ཚོལ་བ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་

ཆོས་ཀྱི་སྦྱིན་པའི་སྒོ་ལེགས་པར་འབྱེད་པར་འགྱུར་རོ། །བཞི་གང་ཞེ་ན། དམ་པའི་ཆོས་ཡོངས་སུ་བསྲུང་ཞིང་སྐྱོང་བ་དང་། རང་གི་ཤེས་རབ་ལ་ཕན་པར་བྱེད་ཅིང་གཞན་ལ་སྟོན་པར་བྱེད་པ་དང་། རྟག་ཏུ་ཡ་རབས་ཀྱི་ཆོས་སྤྱོད་པ་དང་། རྣམ་པར་དག་པ་དང་། མ་དག་པའི་ཆོས་ལ་མི་རྟོག་པ་

དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་སྔོན་གྱི་དབང་གི་མཐུས་དགེ་བའི་རྩ་བ་མི་རླག་པར་འགྱུར་རོ། །བཞི་གང་ཞེ་ན། ཕ་རོལ་པོའི་ཉེས་སྐྱོན་ལ་དབང་མི་བཟའ་བ་དང་། ཞེ་སྡང་ཅན་ལ་རྟག་ཏུ་བྱམས་སེམས་བསྒོམ་པ་དང་། རྟག་ཏུ་ཆོས་ཐམས་ཅད་རྟེན་འབྲེལ་དུ་

བཤད་པ་དང་། བླ་ན་མེད་པའི་བྱང་ཆུབ་རྟག་ཏུ་དྲན་པར་བྱ་བ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་གཞན་གྱིས་བསྟན་པ་ལ་རག་མ་ལུས་པར་རང་བཞིན་གྱིས་ཕ་རོལ་ཏུ་ཕྱིན་པ་དྲུག་སྤྱོད་པར་འགྱུར་རོ། །བཞི་གང་ཞེ་ན། རྟག་ཏུ་ཆོས་ཀྱི་སྦྱིན་པ་གཞན་ལ་སྦྱིན་པ་དང་།

གཞན་གྱི་ཁ་ན་མ་ཐོ་བ་མི་བརྗོད་པ་དང་། ཆོས་ཀྱིས་བསྡུས་ཏེ་སེམས་ཅན་གྱི་སྟོན་པ་ལ་མཁས་པ་དང་། ཆོས་ཟབ་མོ་ཆུབ་པར་ཤེས་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་བསམ་གཏན་དང་ཏིང་ངེ་འཛིན་བཏང་སྟེ་འདོད་པའི་ཁམས་སུ་མངོན་དུ་སྐྱེ་བར་འགྱུར་རོ། །

བཞི་གང་ཞེ་ན། སེམས་མཉེན་དེས་སུ་བྱ་བ་དང་། དགེ་བའི་རྩ་བའི་མཐུ་རྙེད་པར་བྱ་བ་དང་། སེམས་ཅན་ཐམས་ཅད་མི་གཏོང་བ་དང་། ཤེས་རབ་དང་ཐབས་མཁས་པའི་མཐུ་སྟོབས་རྒྱུན་དུ་སྒོམ་ནུས་པ་དང་བཞིའོ། །བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན། སངས་རྒྱས་ཀྱི་ཆོས་

เล่ม ๖๗ · หน้า 235b

ལས་ཕྱིར་མི་ལྡོག་པར་འགྱུར་རོ། །བཞི་གང་ཞེ་ན། སྐྱེ་ཤིའི་འཁོར་བ་གྲངས་མེད་པར་མྱོང་ན་ཡང་སྐྱོ་བའི་སེམས་མི་བསྐྱེད་པ་དང་། རྟག་ཏུ་སངས་རྒྱས་ཚད་མེད་པ་ལ་མཆོད་པ་བྱ་བ་དང་། བྱམས་སེམས་ཚད་མེད་པ་བསྒོམ་པར་བྱ་བ་དང་། སངས་རྒྱས་ཀྱི་ཡེ་ཤེས་ཚད་མེད་པ་ལ་མོས་

པ་བསྐྱེད་པ་དང་བཞིའོ། །རིགས་ཀྱི་བུ་བྱང་ཆུབ་སེམས་དཔའ་ཡང་ཆོས་བཞི་དང་ལྡན་ན་སངས་རྒྱས་ཀྱི་བདག་ཉིད་རྒྱུན་མི་འཆད་པར་འགྱུར་རོ། །བཞི་གང་ཞེ་ན། སེམས་ཅན་ཐམས་ཅད་ཀྱི་ཕྱིར་སྨོན་ལམ་མི་གཏོང་བ་དང་། སྦྱིན་པའི་སྤྱོད་ལམ་ལ་དད་པ་དང་། བརྩོན་འགྲུས་ཆེན་པོ་ལ་འདུན་

པ་དང་། སངས་རྒྱས་ཀྱི་ཆོས་ལ་སེམས་ཟབ་མོས་རྒྱུན་དུ་སྤྱོད་པ་དང་བཞི་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས་ཁམས་གསུམ་དུ་བགྲོད་ཅིང་སྤྱོད་པ་རྣམ་པ་བཞི་པོའི་རྣམ་གྲངས་སྤྱད་དེ། སེམས་ཅན་ལ་ཕན་པ་དང་བདེ་བར་བྱས་ཤིང་འཇིག་རྟེན་ལས་བཟླ་བར་བསྒོམས་ན་སངས་རྒྱས་

ཀྱི་བདག་ཉིད་རྒྱུན་མི་འཆད་པར་འགྱུར་རོ། །དེའི་ཚེ་ཐེག་པ་ཆེན་པོའི་ཆོས་རྣམ་པ་བཞི་བཞིར་བཤད་པའི་ཚེ་ན་ལྷ་བཞི་ཁྲིས་ནི་བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །མི་ལས་ཉི་ཁྲི་ལྔ་སྟོང་ནི་ཆོས་ལ་མི་སྐྱེ་བའི་བཟོད་པ་ཐོབ་བོ། །བྱང་ཆུབ་སེམས་དཔའ་བཞི་ཁྲི་བརྒྱད་སྟོང་ནི་ཆོས་ཀྱི་

ཁམས་ཀྱི་བཟོད་པའི་ཕ་རོལ་ཏུ་ཕྱིན་པ་ཐོབ་སྟེ་སངས་རྒྱས་ཀྱི་ཡེ་ཤེས་ལ་མངོན་པར་ཆུད་དོ། །དེའི་ཚེ་དེའི་དུས་ན་ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་མདོ་སྡེ་འདི་ལེགས་པར་

ཟུང་ཤིག །ཆོངས་ཤིག་ཅེས་བཀའ་སྩལ་ནས་བྱང་ཆུབ་སེམས་དཔའ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་མདོ་སྡེ་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། མདོ་སྡེ་འདིའི་མིང་ནི་ཐར་པ་ཆེན་པོ་ཕྱོགས་སུ་

རྒྱས་པ་བདུད་ཀྱི་ཡུལ་འཇོམས་པ། མུ་སྟེགས་ཀྱི་དཔུང་དང་བཅས་པར་གཞིག་པ། ཉོན་མོངས་པ་ཐམས་ཅད་སེལ་བ། ལོག་པར་ལྟ་བ་དང་། འདོད་པ་རྣམ་པ་ལྔའི་འཆིང་བ་འགྲོལ་བ། ཁམས་གསུམ་གྱི་བཙོན་ར་འདྲལ་བ། འཁོར་བ་ལས་ཐར་ཅིང་མྱ་ངན་ལས་འདའ་བའི་ཕྱོགས་སུ་

เล่ม ๖๗ · หน้า 236a

སྒྲོལ་བ། ས་བོན་དམ་པའི་རྒྱུ་སྐམས་པ་རླན་པར་བྱེད་པ། རྒྱུ་རྐྱེན་ཆེན་པོ་ཕ་རོལ་ཏུ་ཕྱིན་པ་དྲུག་གི་ཆོས་ཀྱི་ཆར་འབེབས་པ། སེམས་ཅན་ཐེག་པ་གསུམ་གྱི་མྱུ་གུ་དང་མེ་ཏོག་རྒྱས་ཤིང་འཕེལ་བར་བྱེད་པ། བྱང་ཆུབ་ཀྱི་འབྲས་བུ་མཆོག་ཐེག་པ་གཅིག་ཏུ་འགྲུབ་པར་བྱེད་པ་ཞེས་

བྱ་བར་ཟུང་ཤིག །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་སྔོན་འདས་པའི་སངས་རྒྱས་གྲངས་མ་མཆིས་པའི་སྤྱན་སྔ་དང་། འདུས་པ་གྲངས་མ་མཆིས་པ་དང་། ཚོགས་དཔག་ཏུ་མ་མཆིས་པའི་ནང་

དུ་ཆོས་རྣམ་པ་སྣ་ཚོགས་དང་། དོན་རྣམ་པ་སྣ་ཚོགས་དང་། མཚན་མ་རྣམ་པ་སྣ་ཚོགས་དང་། ཐེག་པ་རྣམ་པ་སྣ་ཚོགས་ཀྱང་ཐོས་ན་ངོ་མཚར་རྨད་དུ་བྱུང་བའི་ཆོས་དེ་ལྟ་བུ་དང་། ངོ་མཚར་རྨད་དུ་བྱུང་བའི་དོན་དེ་ལྟ་བུ་དང་། ངོ་མཚར་རྨད་དུ་བྱུང་བའི་མཚན་མ་དེ་ལྟ་བུ་དང་། ངོ་མཚར་རྨད་

དུ་བྱུང་བའི་ཐེག་པ་ཆེན་པོ་དེ་ལྟ་བུ་ནི་ཐོས་མ་མྱོང་སྟེ། དེང་ཐོས་པ་འདི་ད་བདག་གིས་རྒྱུན་མི་འཆད་པར་བགྱིའོ། །བཅོམ་ལྡན་འདས་དེ་བཞིན་གཤེགས་པ་ནི་རྟག་ལ་ཆོས་དང་དགེ་འདུན་ནི་འགག་པར་མི་འགྱུར་ཏེ། ཁམས་གསུམ་གྱི་སེམས་ཅན་རང་སྐྱེ་ཞིང་རང་འགག་པར་གྱུར་

ནས་དེ་བཞིན་གཤེགས་པ་མ་མཐོང་བ་དང་། ཆོས་དང་དགེ་འདུན་མ་མཐོང་བས་མྱ་ངན་ལས་འདས་ཏེ་འགག་པར་འགྱུར་རོ་ཞེས་བརྗོད་དོ། །བདག་ཅག་དེ་བཞིན་གཤེགས་པའི་བྱིན་གྱི་རླབས་ཀྱིས་ཁམས་གསུམ་དུ་བགྲོད་ཅིང་སོ་སོའི་སྐྱེ་བོའི་རྗེས་སུ་སྙེགས་ཏེ། མྱ་ངན་ལས་འདའོ་

ཞེས་བླ་དགས་སུ་བརྗོད་པ་ལགས་སོ། །བཅོམ་ལྡན་འདས་དེ་བཞིན་གཤེགས་པ་མྱ་ངན་ལས་འདས་པའི་སླད་ན། བདག་ཅག་རྣམས་ཀྱིས་ཐེག་པ་བརྒྱད་ཁྲིས་སངས་རྒྱས་ཀྱི་ཡེ་ཤེས་སུ་ཆུད་པར་སྐྱེས་བུ་ཆེན་པོའི་ཆོས་ཀྱི་སྐུ་ཐོབ་པར་བགྱིའོ། །ཆོས་ཀྱི་ཁམས་སུ་གཏོགས་པའི་སེམས་

ཅན་རྣམས་ལ་མདོ་སྡེ་འདི་སྤེལ་བར་བགྱིའོ། །གཟུང་ཞིང་འཆང་བ་དང་། ཀློག་པ་དང་། ཁ་ཏོན་དུ་འདོན་པར་བགྱིའོ། །ཇི་ལྟར་བཤད་པ་བཞིན་བསྒོམ་སྟེ། དུས་གཅིག་ཏུ་སངས་རྒྱས་སུ་འགྲུབ་པར་བགྱིའོ། །མི་གཏོང་བར་བགྱིའོ། །བཅོམ་ལྡན་འདས་རིགས་ཀྱི་བུ་

เล่ม ๖๗ · หน้า 236b

དང་། རིགས་ཀྱི་བུ་མོ་གང་ལ་ལས་བཅོམ་ལྡན་འདས་མྱ་ངན་ལས་འདས་པའི་སླད་ན་སྙིགས་མ་ཅན་གྱི་དུས་སུ་མདོ་སྡེ་འདི་གཟུངས་སུ་བཟུང་ཞིང་ཀློག་གམ། ཁ་ཏོན་དུ་བགྱིད་དམ། གླེགས་བམ་དུ་ཡི་གེར་འདྲིའམ། ཡི་གེར་འདྲིར་འཇུག་ན་བསོད་ནམས་ཇི་ཙམ་ཞིག་ཐོབ་པར་འགྱུར། བཅོམ་ལྡན་

འདས་ཀྱིས་བཀའ་སྩལ་པ། རིགས་ཀྱི་བུ་གང་ལ་ལས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནོར་བུ་རིན་པོ་ཆེས་ཡོངས་སུ་བཀང་སྟེ་སྦྱིན་པ་བྱིན་པ་བས་མདོ་སྡེ་འདིའི་མིང་ཙམ་ཐོས་པས་བསོད་ནམས་དཔག་ཏུ་མེད་པར་ཆེའོ། །གང་ལ་ལས་འཇིག་རྟེན་གྱི་ཁམས་སྟོང་ཕྲག་

བཅུ་ནོར་བུ་རིན་པོ་ཆེས་ཡོངས་སུ་བཀང་སྟེ་སྦྱིན་པ་བྱིན་པ་བས་མདོ་སྡེ་འདི་གླེགས་བམ་དུ་བྱས་ཏེ་འཆང་བ་ཙམ་གྱིས་བསོད་ནམས་དཔག་ཏུ་མེད་པར་ཆེའོ། །གང་ལ་ལས་ཕྱོགས་བཅུའི་འཇིག་རྟེན་གྱི་ཁམས་སུ་ནོར་བུ་རིན་པོ་ཆེས་ཡོངས་སུ་བཀང་སྟེ་སྦྱིན་པ་བྱིན་པ་བས་ཐེག་པ་ཆེན་པོ་ཕྱོགས་

སུ་རྒྱས་པའི་མདོ་སྡེ་འདིའི་ནང་ན་ཡི་གེ་འབྲུ་གཅིག་གམ། ཚིགས་བཅད་གཅིག་གམ། ཤུ་ལོག་གཅིག་འདྲིའམ། འདྲིར་འཇུག་ན་དེ་བས་ཀྱང་བསོད་ནམས་དཔག་ཏུ་མེད་པར་ཆེའོ། །འཇིག་རྟེན་གྲངས་མེད་པའི་ཁམས་སུ་རིན་པོ་ཆེས་ཡོངས་སུ་བཀང་སྟེ་སྦྱིན་པ་བྱིན་པ་བས་ཀྱང་སེམས་ཐག་པ་

ནས་མདོ་སྡེ་འདི་ཤུ་ལོག་གཅིག་ཀློག་གམ། ཁ་ཏོན་དུ་བྱས་ན་བསོད་ནམས་དེ་བས་ཀྱང་དཔག་ཏུ་མེད་པར་ཆེའོ། །སྟོང་ཁམས་ཡོངས་སུ་གང་བའི་སེམས་ཅན་གྱི་སྲོག་གི་སྐྱབས་བྱིན་པ་བས་ཀྱང་། གང་གིས་སེམས་ཐག་པ་ནས་མདོ་སྡེ་འདིའི་དོན་ཚིག་གཅིག་ཤེས་ཏེ། གཞན་ལ་

ཚིག་གཅིག་གམ། ཤུ་ལོག་གཅིག་གི་དོན་བསྟན་ན་བསོད་ནམས་དེ་བས་ཀྱང་དཔག་ཏུ་མེད་པར་ཆེའོ། །དེ་ཅིའི་ཕྱིར་ཞེ་ན། ཟང་ཟིང་གི་སྦྱིན་པ་ནི་ཉན་ཐོས་ཀྱི་སྦྱིན་པ་ཡིན་ཏེ། ཚེ་དང་ལོངས་སྤྱོད་བསྐྱེད་པར་ཟད་ཀྱི་འཁོར་བ་ལས་མི་ཐར་རོ། །ཐེག་པ་ཆེན་པོ་ཆོས་ཀྱི་སྦྱིན་པ་ནི་སེམས་ཅན་

རྣམས་ཀྱི་བྱང་ཆུབ་ཀྱི་རྩ་བ་བསྐྱེད་པ་དང་། ཐེག་པ་གསུམ་གྱི་ཡེ་ཤེས་ཀྱི་སྲོག་སྡུད་པར་བྱེད་པའོ། །རིགས་ཀྱི་བུ་མདོ་སྡེ་འདི་ཀློག་པ་དང་འཆང་བ་ནི་སྔོན་སྡིག་ཅན་མ་རུངས་པ་ཡིན་ན་ཡང་ད་དགེ་བ་དང་ལྡན་པའོ། །སྔོན་སྡུག་བསྔལ་ཅན་ཡིན་ན་ཡང་ད་ལོངས་སྤྱོད་དང་ལྡན་པའོ། །སྔོན་འཆིང་

เล่ม ๖๗ · หน้า 237a

བ་ཅན་ཡིན་ན་ཡང་དགྲོལ་ཐར་པ་དང་ལྡན་པའོ། །སྔོན་མ་རྒལ་བ་ཡིན་ན་ཡང་ད་རྒལ་བ་ཅན་ནོ། །སྔོན་བླུན་པ་ཞིག་ཡིན་ན་ཡང་ད་ནི་སློབ་དཔོན་དུ་ཆུད་པའོ། །སྔོན་ཟག་པ་དང་བཅས་པ་ཞིག་ཡིན་ན་ཡང་ད་ནི་ཟག་པ་མེད་པའོ། །སྔོན་སོ་སོའི་སྐྱེ་བོའི་སྤྱོད་པ་ཅན་ཞིག་ཡིན་ན་ཡང་ད་ནི་

འཕགས་པའི་སྤྱོད་པ་དང་ལྡན་པའོ། །སྔོན་ཆོས་ལམ་དང་འགལ་བ་ཞིག་ཡིན་ན་ཡང་ད་ནི་འཕགས་པའི་ལམ་ལ་ཆུད་པའོ། །ལུས་སྐྱེ་བོའི་ལུས་ཅན་ཡིན་ན་ཡང་མདོ་སྡེ་འདི་ཀློག་པ་དང་འཆང་བའི་ཕྱིར་བློ་ནི་འཕགས་པའི་ཡེ་ཤེས་དང་འདྲ་བའོ། །སྔོན་ཉོན་མོངས་པ་ཅན་ཞིག་ཡིན་ན་ཡང་ད་མདོ་སྡེ་

འདི་ཀློག་པ་དང་འཆང་བའི་ཕྱིར་སངས་རྒྱས་བཅོམ་ལྡན་འདས་དང་འདྲ་བར་མྱ་ངན་ལས་འདའ་བ་ཅན་ནོ་ཞེས་བཀའ་སྩལ་པ་དང་། བྱང་ཆུབ་སེམས་དཔའ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་བཤད་པ་ལྟར་ན། སྔོན་སོ་སོའི་སྐྱེ་བོ་

ལགས་ཀྱང་ད་ནི་འཕགས་པའི་སྤྱོད་པ་དང་ལྡན་ནོ་ཞེས་བགྱི་བ་དང་། སྔོན་ཉོན་མོངས་པ་ཅན་ལགས་ན་ཡང་ད་ནི་མདོ་སྡེ་འདི་ཀློག་པ་དང་། འཆང་བས་སངས་རྒྱས་བཅོམ་ལྡན་འདས་དང་འདྲ་བར་མྱ་ངན་ལས་འདའ་བ་ཅན་ནོ། །ཞེས་བྱུང་ན་ཚུལ་ཁྲིམས་ཞིག་པ་དང་། མཚམས་མ་མཆིས་

པར་སྤྱད་པ་དང་། དམ་པའི་ཆོས་ལ་སྐུར་པ་བཏབ་པ་ཡང་ཅི་མདོ་སྡེ་འདི་ཀློག་པ་ཙམ་གྱིས་ཉོན་མོངས་པ་སྤོང་སྟེ། མྱ་ངན་ལས་འདའ་བ་དང་འཐུན་པ་ཞིག་ལགས་སམ། དོན་དེ་རིག་པར་དཀའ་ཞིང་མཆིས་ན། བཅོམ་ལྡན་འདས་བྱེ་བྲག་ཕྱེད་པར་བསྟན་དུ་གསོལ་ཞེས་བགྱིས་

པ་དང་། བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱིས་ལེགས་པར་ཞུས་པས་ངས་ཀྱང་ལེགས་པར་བཤད་པར་བྱའོ། །རིགས་ཀྱི་བུ་སེམས་ཅན་ཐམས་ཅད་སངས་རྒྱས་མ་མཐོང་བའི་ཕྱིར་ལོག་པར་ལྟ་བ་དང་། ཚུལ་ཁྲིམས་

ཉམས་པ་དང་། དམ་པའི་ཆོས་ལ་སྐུར་པ་བཏབ་པ་ཡིན་ནོ། །སངས་རྒྱས་འཇིག་རྟེན་དུ་བཞུགས་པ་ན་ཚུལ་ཁྲིམས་ཉམས་པ་དང་། དམ་པའི་ཆོས་ལ་སྐུར་པ་བཏབ་པ་ཡོང་མེད་དོ། །དེ་ཇི་ལྟ་ཞེ་ན། དཔེར་ན་དྲ་མ་མི་གཅིག་ལ་བུ་གཅིག་པུ་ཞིག་ཡོད་པ་དེ་ཤིན་ཏུའང་ཕངས་ཤིང་སྡུག་

เล่ม ๖๗ · หน้า 237b

ན་ཕ་ཡོད་པའི་ཚེ་ན་ནི་ཉིན་མཚན་དུ་བསྟན་ཅིང་བསླབས་པས་བྱས་སོ་ཅོག་ལ་འགལ་བ་མེད། བུ་ཡང་ཕ་ལ་སྲི་ཞུ་ཆེ་སྟེ། ཕའི་ངག་ཉན་ཅིང་ཉེས་པ་ཡོང་མ་བྱུང་ངོ་། །རེ་ཤིག་དུས་གཅིག་ན་ཕ་ལམ་རིང་པོར་འདྲོན་དུ་སོང་བ་ལས་རིང་དུ་ལོན་ཏེ་སླར་མ་འཁོར་བའི་བར་དུ་བུ་དེ་ཕའི་བསྟན་ངག་

བརྗེད་ནས་ཉེས་པ་ཡང་མང་དུ་བྱུང་ངོ་། །ཕ་རིང་དུ་ལོན་ཏེ་སླར་མ་འཁོར་བའི་ཕྱིར་ཕ་ཤི་བ་སྐད་དུ་བརྗོད་དེ་ངུད་མོ་དག་བྱེད་ཅིང་ཁད་ཀྱིས་འཆལ་དུ་བྱེད་དོ། །མྱ་ངན་གྱིས་ནོན་ཏེ་སེམས་སྟོར་ནས་ཕས་བསྟན་པ་ཡང་བརྗེད་དེ་ཆོས་ལ་སྐུར་པ་དང་འདྲ་བར་འགལ་བ་ཤ་སྟག་བྱེད་དོ། །ཕ་དེ་ཡུན་རིང་མོ་ཞིག་

ལོན་ནས་དུས་གཅིག་ན་སླར་ཁྱིམ་དུ་ལོག་པའི་ཚེ་བུ་ཡང་ཤིན་ཏུ་དགའ་བ་དང་ཚིམ་པ་སྐྱེས་ནས་སྔོན་ཕའི་བསྟན་ངག་ཀྱང་དྲན་ཏེ་གཟུངས་སུ་བཟུང་ནས་ཉེས་པ་ཡང་མ་བྱུང་ངོ་། །ཕ་མཐོང་བའི་ཕྱིར་ཕ་མ་ཤི་བར་ཡང་ཡིད་ཆེས་ནས་ལོག་པར་ལྟུང་བ་ཅན་ཞེས་ཀྱང་མི་བྱའོ། །ཕའི་བཀའ་བཞིན་དུ་མི་འགལ་

བར་སྤྱད་པས་སྐུར་པ་ཅན་ཞེས་ཀྱང་མི་བྱ་སྟེ། རིགས་ཀྱི་བུ་དྲ་མ་ཞེས་བྱ་བ་ནི་དེ་བཞིན་གཤེགས་པའོ། །བུ་གཅིག་པུ་ཞེས་བྱ་བ་ནི་སེམས་ཅན་ཐམས་ཅད་དོ། །ཕས་བསྟན་ཅིང་བསླབས་ཞེས་བྱ་བ་ནི་ཚུལ་ཁྲིམས་སོ། །ལམ་རིང་པོར་སོང་ཞེས་བྱ་བ་ནི་དེ་བཞིན་གཤེགས་པ་ཁམས་གཞན་དུ་ཆོས་ཀྱི་

འཁོར་ལོ་བསྐོར་བར་གཤེགས་པའོ། །ཕ་མ་མཐོང་ཞེས་བྱ་བ་ནི་ཚེ་འདས་སོ་ཞེས་བརྗོད་པའོ། །མྱ་ངན་གྱིས་ནོན་པ་ནི་སྒྲིབ་པས་བསྒྲིབས་པའོ། །གཟུངས་སུ་མི་འཛིན་པ་ནི་ཚུལ་ཁྲིམས་ཞིག་པའོ། །ཤི་བ་སྐད་བརྗོད་པའི་ཕྱིར་སྡིག་སྤྱོད་པའོ། །དོན་འཁྲུལ་པའི་ཕྱིར་སྐུར་པ་བཏབ་པའོ། །

དེ་བཞིན་གཤེགས་པས་ཁམས་གཞན་ནས་སླར་གཤེགས་ཏེ། སེམས་ཅན་གྱིས་མཐོང་བ་ནི་སངས་རྒྱས་མྱ་ངན་ལས་མི་འདའ་བར་ཡིད་ཆེས་པའོ། །སངས་རྒྱས་ཀྱིས་ཆོས་བསྟན་ནས་སེམས་ཀྱི་རང་བཞིན་སླར་རྙེད་པས་ཚུལ་ཁྲིམས་མི་ཉམས་པའོ། །མྱ་ངན་ལས་མི་འདའ་བར་ཡིད་

ཆེས་པ་ནི་ལྟུང་བ་མེད་པའོ། །བསྟན་པ་དང་མི་འགལ་བར་སྤྱོད་ཅིང་དོན་ཤེས་པ་ནི་ཆོས་ལ་མི་སྐུར་པ་ཡིན་ནོ། །རིགས་ཀྱི་བུ་མདོ་སྡེ་འདི་ཀློག་པ་དང་འཆང་བ་ནི་འཁོར་བ་གྲངས་མེད་པའི་ཉོན་མོངས་པའི་སྡིག་ལྕི་བ་ཀུན་འབྱང་བར་འགྱུར་རོ། །གང་མདོ་སྡེ་འདི་ཐོས་པ་ནི་སངས་རྒྱས་ཀྱི་མཚན་ཐོས་པའོ། །

ที่มาและสัญญาอนุญาต

ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ

สัญญาอนุญาต Public Domain · หลักฐาน

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

  • หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
  • ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด