གསང་བ་རྣལ་འབྱོར་ཆེན་པོའི་རྒྱུད་རྡོ་རྗེ་རྩེ་མོ
ชื่อสันสกฤต (อักษรทิเบต ตามตัวบท) བཛྲ་ཤི་ཁར་མ་ཧཱ་གུ་ཧྱ་ཡོ་ག་ཏནྟྲ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๘๔ · หน้า 229b
བ། །རིག་པ་འཛིན་པ་ཐམས་ཅད་ཀྱི། གསང་བ་བསྡུས་པ་གསུམ་པ་ཡིན། །སྔགས་དང་ཕྱག་རྒྱས་མཆོད་པ་དང་། །དེ་བཞིན་རིག་པའི་དངོས་གྲུབ་ཉིད། །བགེགས་རྣམས་བསོད་ནམས་ཉེ་བར་བསྡུ། །གསང་བ་བཞི་པར་འདོད་པ་ཡིན། །གསང་བ་
བཞི་པོ་ཐམས་ཅད་ནི། །རང་བཞིན་རྫུ་འཕྲུལ་ཀུན་བསྡུས་པ། །གསང་བ་མཆོག་གི་རྒྱུད་ཆེན་པོ། །རྒྱུད་དེ་ལས་ནི་རབ་ཏུ་བཤད། །བཟླས་བརྗོད་སྦྱིན་སྲེག་ཆོ་ག་ནི། །དེ་ནི་རྒྱུད་མཆོག་ལས་བཤད་བྱ། །གང་ཕྱིར་རིག་པ་འཛིན་ཀུན་གྱི། །བཟླས་བརྗོད་སྦྱིན་སྲེག་བསྒྲུབ་པར་བྱ། །
བཟླས་བརྗོད་སྦྱོར་བ་མེད་པར་ནི། །རིག་པའི་དངོས་གྲུབ་འབྱུང་མི་འགྱུར། །སྦྱིན་སྲེག་ཙམ་ནི་མེད་པ་རུ། །རིག་པའི་བྱ་བ་བྱེད་མི་འགྱུར། །གང་གིས་རྣལ་འབྱོར་བརྩོན་འགྱུར་བ། །བཟླས་པའི་རིམ་པ་བཤད་བྱ་བ། །རིག་པ་འཛིན་པ་ཐམས་ཅད་ཀྱི། །སྙིང་པོ་འདི་ནི་
གསང་མཆོག་ཡིན། །གསང་བའི་རིགས་འདིར་བཟླས་པ་ནི། །རྣལ་འབྱོར་ཉི་ཤུ་ཡང་དག་བྱུང་། །བཟླས་པ་རྣམ་པ་ཉི་ཤུ་ནི། །གསང་བའི་རྒྱུད་དུ་ཉི་ཤུ་གཅིག །གནས་ངན་ལེན་གྱི་བག་ཆགས་རྟོགས། །རྟོག་པ་བག་ཆགས་ཞེས་བྱ་སྟེ། །བཟླས་པ་ཙམ་
གྱིས་ཐིམ་འགྱུར་ཏེ། །བཟླས་པ་ཙམ་གྱིས་བརྗོད་པར་བྱ། །ཉེས་པ་བྱས་པ་སྤོང་བ་དང་། །དེ་བཞིན་སྲིད་པ་སྦྱོང་བྱེད་ཅིང་། །རྨད་བྱུང་སྣ་ཚོགས་མཐོང་འགྱུར་ཏེ། །དེ་བས་བཟླས་པ་བརྗོད་པར་བྱ། །བྱང་ཆུབ་སྤྱོད་པ་འབྱུང་འགྱུར་ཞིང་། །ཚུལ་མཆོག་མཐོང་
བར་འགྱུར་བ་སྟེ། །དེ་བས་བཟླས་པའི་ཆོ་ག་ནི། །རྣལ་འབྱོར་པས་ནི་ངེས་པར་བྱ། །གསང་བ་ཆེན་པོའི་རྒྱུད་འདི་རུ། །ཧཱུྃ་ནི་དང་པོར་རབ་ཏུ་བསྒྲགས། །གསང་བ་ཐམས་ཅད་ཡང་དག་འབྱུང་། །ཧཱུྃ་གིས་བཟླས་པ་བརྗོད་པར་བྱ། །སངས་རྒྱས་ཀུན་གྱི་གཙོ་བོ་ནི། །
དེ་བཞིན་ཡི་གེ་ཧཱུྃ་རབ་མཆོག །གསང་བ་ཐམས་ཅད་འཁོར་ལོར་བཅས། །རིགས་ལྔ་དག་དང་བཅས་པ་འབྱུང་། །འདིར་ནི་ཡི་གེ་ཧཱུྃ་འབྱུང་བར། །སྔོན་ལ་ཤེས་རབ་ཅན་གྱིས་བརྟག །ལྕེ་སོགས་ཐམས་ཅད་ཁོང་སྟོང་དུ། །ལུས་ཀུན་ལ་ནི་བརྟག་པར་བྱ། །
เล่ม ๘๔ · หน้า 230a
སྦྱོར་བ་བཅུ་ལས་འབྱུང་མི་འགྱུར། །སོ་ལས་རྣམ་པ་ཀུན་དུ་མིན། །ལྕེ་དང་རྩ་བ་ལས་ཀྱང་མིན། །རྐན་ལས་རྣམ་པ་ཀུན་དུ་མིན། །གནས་གང་ལས་ནི་སྦྱོར་བ་འབྱུང་། །སྙིང་ག་ཉིད་ལས་འབྱུང་མི་འགྱུར། །ཁོང་སྟོང་དངོས་པོ་ཐམས་ཅད་ལ། །
སྐྱེ་བ་ཉིད་ནི་སྣང་མི་འགྱུར། །ཡི་གེ་ཧཱུྃ་གི་སྦྱོར་བ་ཡིས། །རང་གི་དབྱིངས་ལ་ཡང་དག་སྦྱར། །དེ་ཉིད་ཉོན་མོངས་ཅན་མི་འགྱུར། །ཀུན་གཞི་ས་བོན་ཐམས་ཅད་པ། །རྐན་དང་ལྐོག་མའི་འབད་པ་དང་། །ལྕེ་ཡི་ཚོགས་ལས་ཡང་དག་འབྱུང་། །ཡི་གེ་ཧཱུྃ་གི་སྒྲ་བྱུང་
བ། །དེ་ནི་མི་རྟོག་ཡང་དག་བྱུང་། །དེ་ལྟར་འབྱུང་བའི་སྦྱར་བ་ལས། །གནས་ཀྱི་ཉོན་མོངས་ཅན་མི་འགྱུར། །ཚིག་དང་བཅས་པའི་ཇི་བཞིན་སྒྲ། །འདུས་བྱས་ཐམས་ཅད་དོར་བར་བྱ། །ཇི་བཞིན་ཧཱུྃ་གི་སྦྱོར་བ་ལས། །ཆོས་རྣམས་ཐམས་ཅད་སྐྱེ་བ་མེད། །
རྣམ་པར་རྟོག་ལས་ཡང་དག་བྱུང་། །དེ་ནི་མི་རྟོག་ཡང་དག་འབྱུང་། །འཁོར་བ་དག་གི་ཐོག་མ་ནི། །ཇི་ལྟར་ཡང་ནི་ཤེས་མི་འགྱུར། །འདིར་ནི་སྐྱེ་བ་མི་སྣང་ཞིང་། །འདུས་བྱས་དག་ནི་འཇིག་པ་མིན། །དེ་བས་ཡི་གེ་ཧཱུྃ་ཙམ་གྱིས། །འདུས་བྱས་སོ་སོར་བརྟག་པར་
བྱ། །དག་ཅིང་མཐར་ཐུག་གནས་ཉིད་ནི། །ཧཱུྃ་གིས་ཀྱང་ནི་སྦྱར་བར་བྱ། །རང་བཞིན་མེད་པའི་སྒྲ་འདི་ནི། །ཡི་གེ་ཧཱུྃ་ལས་ཡང་དག་བྱུང་། །འདི་ལ་དངོས་པོ་ཡོད་མ་ཡིན། །རང་བཞིན་མེད་ཅིང་བདག་མེད་པ། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་
ཉིད་ནི་ཡོད་མ་ཡིན། །བདག་གམ་སེམས་ཅན་གསོ་བ་མེད། །གཟུང་དང་འཛིན་པ་རྣམ་པར་སྤང་། །ཟག་པ་མེད་ཅིང་འདུས་བྱས་མིན། །གནས་ནི་དག་པ་བརྟན་པར་བྱ། །དངོས་གྲུབ་སྦྱོར་བའི་ཡེ་ཤེས་ཀྱིས། །སངས་རྒྱས་བྱང་ཆུབ་ཐོབ་པར་འགྱུར། །དེ་ལྟ་བུ་ཡི་
སྦྱོར་བ་ཡིས། །ཡི་གེ་ཧཱུྃ་ནི་ཡང་དག་འབྱུང་། །ཡེ་ཤེས་དག་པ་ཡང་དག་འབྱུང་། །ཆོས་ཀྱི་དབྱིངས་ཀྱིས་བརྟན་པར་བྱ། །སངས་རྒྱས་རྫུ་འཕྲུལ་ཆེན་པོ་ཡང་། །འདིར་ནི་ཉེ་བར་མི་དམིགས་ཏེ། །གང་ཕྱིར་དུས་གསུམ་གཤེགས་སྙིང་པོ། །སངས་རྒྱས་སྙིང་པོ་
เล่ม ๘๔ · หน้า 230b
ཚོགས་སུ་བཤད། །སངས་རྒྱས་སྲས་བཅས་ཐམས་ཅད་དང་། །རྡོ་རྗེ་ཅན་ནི་རྒྱལ་སྲས་བཅས། །ཧཱུྃ་ཙམ་གྱི་ནི་སྦྱོར་བ་ཡིས། །ཀུན་དུ་ཡང་དག་དགུག་པར་བྱ། །ཡི་གེ་སྦྱོར་བ་གཅིག་གིས་ནི། །སངས་རྒྱས་ཀུན་གྱི་སྙིང་པོ་བརྟན། །གང་ཕྱིར་རྡོ་རྗེ་འཛིན་རྒྱལ་པོ། །
འདི་ནི་རང་གི་སྦྱོར་བས་གནས། །ཆོས་ཀྱི་རྒྱུ་མཐུན་བག་ཆགས་ནི། །བྱང་ཆུབ་སེམས་ནི་མ་རྟོགས་པར། །ཐོག་མ་མེད་ལྡན་འཁོར་བ་ལས། །འབྱུང་བ་ཅུང་ཟད་ཡོད་མ་ཡིན། །ཉན་ཐོས་དང་ནི་རང་རྒྱལ་དང་། །བྱང་ཆུབ་སེམས་དཔའི་རྣམ་འཕྲུལ་ནི། །བྱང་ཆུབ་ཀྱི་ནི་
སེམས་མེད་པར། །འགས་ཀྱང་མྱ་ངན་འདའ་མི་ནུས། །གལ་ཏེ་སངས་རྒྱས་འབྱུང་མེད་ན། །ཉན་ཐོས་དག་ནི་ག་ལས་བྱུང་། །སངས་རྒྱས་འབྱུང་བ་ཡོད་མིན་ན། །རང་རྒྱལ་དེ་ནི་འབྱུང་མི་འགྱུར། །གལ་ཏེ་བྱང་ཆུབ་སེམས་དཔའ་མེད། །སངས་རྒྱས་རྣམས་ནི་གང་
ལས་འབྱུང་། །གལ་ཏེ་བྱང་ཆུབ་སེམས་མེད་ན། །དེ་བས་འཁོར་ལོ་འདི་ཀུན་ནི། །བྱང་ཆུབ་སེམས་ལས་ཡང་དག་བྱུང་། །བྱང་སེམས་གསང་བ་ཆེན་པོ་ནི། །ཡི་གེ་ཧཱུྃ་ལས་ཡང་དག་བྱུང་། །སངས་རྒྱས་ཐམས་ཅད་རབ་འབྱུང་བ། །ཡི་གེ་ཧཱུྃ་གི་སྣང་བར་འགྱུར། །གང་ཕྱིར་
མཚན་ལྡན་གཟུགས་ཅན་ནི། །རྟག་ཏུ་སངས་རྒྱས་རབ་འབྱུང་བ། །ཧཱུྃ་ཡིག་གི་ནི་སྦྱོར་བ་ཧཱུྃ། །དེ་ཉིད་རྡོ་རྗེ་ཡང་དག་བྱུང་། །ཆོས་དབྱིངས་རབ་སྦྱོར་རྡོ་རྗེ་ནི། །དེ་ལས་ཡང་དག་འབྱུང་བར་འགྱུར། །དེ་ལས་རྡོ་རྗེ་རྣལ་འབྱོར་ཆེ། །རྣལ་འབྱོར་དབང་ཕྱུག་བླ་ན་མེད། ཐེ་ཚོམ་མེད་པར་རྣལ་འབྱོར་ཀུན། །
ཡི་གེ་ཧཱུྃ་གི་སྦྱོར་བས་འགྲུབ། །དེ་ལྟ་བུ་ཡི་བཟླས་པ་ཡིས། །ཇི་ལྟར་བཅོམ་ལྡན་འདས་ཀྱིས་ནི། །སྔོན་ནི་བསྔོ་བ་མཛད་པ་ལྟར། །རྣལ་འབྱོར་ལས་བྱས་དགེ་བ་བསྔོ། །བྱང་ཆུབ་སེམས་དཔའི་མཐུ་ཡིས་ནི། །རང་གི་སེམས་ཀྱང་བསྔོ་བར་བྱ། །རྡོ་རྗེ་ཆེན་པོ་མཐར་ཕྱིན་བྱེད། །
བྱང་ཆུབ་སེམས་ཀྱིས་བསྒྲལ་བར་བྱ། །ཆོས་ཀྱི་དབྱིངས་ཀྱི་སྙིང་པོ་ཆེ། །སེམས་ཅན་ཐམས་ཅད་གོས་པ་མེད། །ཐམས་ཅད་དེ་བཞིན་གཤེགས་སྙིང་པོ། །ཉོན་མོངས་འདམ་གྱིས་གོས་པ་མེད། །ཇི་ལྟར་ཟླ་བ་བཞིན་དུ་དག །ཟླ་བ་གང་བའི་འོད་གསལ་བ། །རྟག་ཏུ་
เล่ม ๘๔ · หน้า 231a
ཡང་དག་རྫོགས་པར་གནས། །རབ་ཏུ་དང་བ་འགྲུབ་པར་འགྱུར། །འདི་ནི་དང་པོ་ཆོས་ཡེ་ཤེས། །དེ་བཞིན་གཤེགས་པའི་སྙིང་པོ་ཡིན། །རྟག་ཏུ་དག་པར་གནས་པ་སྟེ། །རང་གི་ཉོན་མོངས་དག་གིས་བསྒྲིབས། །དེ་བས་རང་སེམས་རྣམ་པ་ནི། །ཟླ་བ་གང་
བར་ཤེས་པར་བྱ། །བདག་ནི་འགའ་ཡང་ཡོད་མ་ཡིན། །ཆོས་ཉིད་འདི་ནི་རྒྱལ་བས་ཤེས། །ཡེ་ཤེས་ཟླ་བ་གང་བ་མིན། །གང་ཕྱིར་བདག་ནི་ཡོད་མ་ཡིན། །ཟླ་བ་གང་བ་དང་མཚུངས་རིགས། །གང་ཕྱིར་དག་ཅིང་གོས་པ་མེད། །སངས་རྒྱས་ཡེ་ཤེས་སྐྱོན་མེད་པ། །ཟླ་བའི་སྦྱོར་བས་
བསྒོམ་པར་བྱ། །མཐོང་ནས་ཤེས་རབ་ཅན་གྱིས་བསམ། །འདི་ཡང་གང་གིས་རྟོགས་པར་འགྱུར། །ཡུན་རིང་དུས་སུ་སྡུག་བསྔལ་བའི། །དེ་བཞིན་གཤེགས་པ་བཅོམ་ལྡན་འདས། །ཉོན་མོངས་པ་ཡི་བག་ཆགས་ཀུན། །དེ་བཞིན་སྦྱོང་བར་བྱེད་པར་བསམ། །བྱང་ཆུབ་
སེམས་ནི་སེམས་ཆེན་པོ། །ཉོན་མོངས་ཐམས་ཅད་འཇོམས་བྱེད་པ། །ཆོས་ཀྱི་རྒྱུ་མཐུན་བག་ཆགས་ཀྱི། །གཉེན་པོ་རུ་ནི་བྱུང་བ་ཡི། །དེ་བས་འདི་ཡི་མཐུ་ཡིས་ནི། །སངས་རྒྱས་ཡེ་ཤེས་རྣམ་པར་སྤྱོད། །གནས་ངན་ལེན་ནི་བག་ཆགས་བཅས། །འདོད་པའི་འདམ་གྱིས་
གོས་པ་མེད། །ཉི་མ་ལྟ་བུའི་སེམས་ཆེན་པོ། །ཉོན་མོངས་རྩ་ནི་རབ་སྲེག་བྱེད། །ཟླ་བ་ལྟ་བུའི་སེམས་ཆེན་པོ། །དགེ་བའི་སྨན་ནི་རྣམ་འཕེལ་བྱེད། །སོས་ཀའི་ཚ་བའི་ཟླ་བ་བཞིན། །ཉི་མའི་གདུང་བ་རབ་སྲེག་བྱེད། །ཤར་བར་གྱུར་པས་ཞི་བར་བྱེད། །གདུང་བ་
ཐམས་ཅད་ཞི་བར་བྱེད། །ཉོན་མོངས་གདུང་བས་མ་གདུངས་ཤིང་། །མི་ཤེས་པ་ལ་ཉི་མ་ཉིད། །བྱང་ཆུབ་སེམས་ནི་ཟླ་བ་ཆེ། །ཉོན་མོངས་གདུང་བ་ཞི་བྱེད་པར། །ཀུན་ནས་ཉོན་མོངས་བག་ཆགས་བཅས། །གནས་ངན་ལེན་ནི་འཇོམས་པའི་མཆོག །ཁབ་ལེན་
གྱིས་ནི་ལྕགས་བཞིན་དུ། །ཉོན་མོངས་བག་ཆགས་འདྲེན་བྱེད་པ། །རྡོ་རྗེའི་རང་བཞིན་རྣལ་འབྱོར་པས། །བྱང་ཆུབ་སེམས་དེ་བསྒོམ་བར་བྱ། །ཟླ་བའི་དཀྱིལ་འཁོར་གནས་དེ་རུ། །སླར་ཡང་ཟླ་བ་རྣམ་པར་བསྒོམ། །བྱང་ཆུབ་སེམས་ཀྱི་མཐུ་ཡིས་ནི། །བག་
เล่ม ๘๔ · หน้า 231b
ཆགས་ཐམས་ཅད་སྲེག་བྱེད་པ། །ཡེ་ཤེས་དེ་རུ་འབྱུང་འགྱུར་ཏེ། །གཟུང་བ་དང་ནི་འཛིན་པ་སྤངས། །རྣམ་པར་མི་རྟོག་མཚུངས་མེད་པ། །བདག་མེད་དེ་བཞིན་སྟོང་པ་ཉིད། །མི་ཤེས་རི་བོ་འཇོམས་པར་བྱེད། །རྡོ་རྗེ་དང་མཚུངས་ཁོང་སྟོང་མེད། །རྡོ་རྗེའི་རང་བཞིན་
སྙིང་པོ་ཆེ། །འཇིག་ཚོགས་རི་བོ་བརྟན་པ་ནི། །རྡོ་རྗེ་དེས་ནི་འཇོམས་པར་བྱེད། །དེ་ཕྱིར་རྡོ་རྗེའི་རང་བཞིན་བསྟན། །དེ་བས་རྡོ་རྗེའི་རྣལ་འབྱོར་བས། །ཟླ་བའི་དབུས་སུ་ཟླ་བ་མཚུངས། །ཟླ་བ་གཉིས་དབུས་རྡོ་རྗེ་ཡིས། །རྡོ་རྗེའི་ཡེ་ཤེས་བརྟན་པར་བྱ། །སྟོང་ཉིད་དེ་བཞིན་ཉིད་
དེ་ཉིད། །ཡང་དག་མཐའ་དང་འདུས་མ་བྱས། །སྐྱེ་བ་མེད་ཅིང་འགག་པ་མེད། །ཡི་གེ་ཧཱུྃ་ནི་བསྒོམ་པར་བཤད། །ཆོས་ཀྱི་དབྱིངས་ནི་བརྟན་པ་མཆོག །ནམ་མཁའི་དབྱིངས་དང་མཚུངས་པ་ནི། །ཟླ་བའི་དབུས་སུ་བསྒོམ་པར་བྱ། །ཧཱུྃ་གི་སྦྱོར་བ་དེ་ཡིས་ནི། །རྡོ་རྗེའི་
མཆོག་ནི་བསྒོམ་པར་བྱ། །ལུས་ཀུན་ལ་ནི་སྤྲོ་བྱ་ཞིང་། །སྟོང་པ་ཉིད་དང་མཚུངས་པར་སྤྲོས། །གཟུགས་འདི་ཉིད་ནི་མིང་ཙམ་སྟེ། །དངོས་པོ་འགའ་ཡང་ཡོད་མ་ཡིན། །ཆ་ཤས་ཀྱིས་ནི་རྣམ་དཔྱད་ན། །གཟུགས་ཞེས་བྱ་བ་ཡོད་མ་ཡིན། །དེ་དག་ཕྲ་རབ་རྣམ་བརྟགས་
ཀྱང་། །ཕྲ་རབ་ཞེས་བྱ་ཡོད་མ་ཡིན། །འཇིག་རྟེན་ཀུན་རྫོབ་ཅེས་བྱ་སྟེ། །དམ་པའི་དོན་དུ་ཡོད་མ་ཡིན། །དེ་ལྟ་བུ་ཡི་རང་བཞིན་དུ། །གཟུགས་ཞེས་བྱ་བ་ཡོད་མ་ཡིན། །གཟུགས་དེ་ཡོད་པ་མ་ཡིན་ན། །ཇི་ལྟར་ཡོད་ཅེས་བྱ་བ་ཡིན། །གལ་ཏེ་གཟུགས་དེ་ཡོད་
མིན་ན། །མིང་ཡང་དེ་ལ་ཡོད་མ་ཡིན། །མིང་ནི་གང་ལས་ཡང་དག་བྱུང་། །མིང་ཞེས་བྱ་བ་ཅི་འདྲ་བར། །དངོས་ཞེས་བྱ་བ་དེ་དང་མཚུངས། །མིང་དེས་སོ་སོར་བརྟགས་བྱས་ན། །གནས་གང་ཞིག་ན་རབ་ཏུ་གནས། །དངོས་པོ་གཅིག་ནི་རྣམ་ཕྱེ་ན། །མིང་ནི་མང་པོ་ཡང་
དག་བྱུང་། །རེ་རེ་ཡི་ནི་དབྱེ་བ་ཡིས། །སྔར་གྱི་མིང་ནི་ཉམས་པར་འགྱུར། །དེ་ལ་མིང་ནི་ཡོད་མིན་པ། །མིང་ནི་ཡང་དག་འབྱུང་བ་མེད། །གང་ལ་མིང་ནི་ཡོད་མིན་ན། །ཇི་ལྟར་མིང་དུ་བརྗོད་པར་བྱ། །གང་གིས་མིང་ནི་རབ་གནས་པ། །རྣམ་པ་ཀུན་དུ་དམིགས་མི་འགྱུར། །
เล่ม ๘๔ · หน้า 232a
གཟུགས་ནི་ཉེ་བར་མི་དམིགས་ལ། །དེ་ལ་གཟུགས་ནི་ཇི་ལྟར་ཡོད། །འདི་ནི་ཡང་དག་མི་རྟོག་པ། །བག་ཆགས་དག་གིས་ཀུན་ནས་དཀྲིས། །གང་དུ་བྱིས་པ་རབ་རྨོངས་ཤིང་། །མྱ་ངན་འདས་པ་ཐོབ་མི་འགྱུར། །ཇི་ལྟར་གཟུགས་ནི་རྣམ་བསྒོམ་པ། །དེ་
བཞིན་ཚོར་དང་འདུ་ཤེས་དང་། །སོ་སོ་རུ་ནི་རྣམ་ཕྱེ་ན། །དེ་ལ་སྙིང་པོ་དམིགས་མི་འགྱུར། །གང་ལ་སྙིང་པོ་ཡོད་མིན་པ། །དེ་ལ་དངོས་པོ་ཇི་ལྟར་ཡོད། །གང་ལ་དངོས་པོ་མི་དམིགས་པ། །དམ་པའི་དོན་ནི་ཇི་ལྟར་ཡོད། །གང་ཞིག་བསྟན་པར་མི་དམིགས་པ། །དེ་ནི་ཡོད་
མིན་དངོས་པོར་མེད། །ཆོས་རྣམས་ཐམས་ཅད་མེད་པས་ན། །སྐྱེ་བ་མེད་པར་བརྗོད་པར་བྱ། །གང་ཞིག་མ་སྐྱེས་དེ་ཡོད་མིན། །གང་ཞིག་ཡོད་མིན་ཇི་ལྟར་ཡོད། །མཁས་པས་ཆོས་རྣམས་ཐམས་ཅད་ནི། །འགག་པ་མེད་ཅེས་བྱ་བར་བརྗོད། །སྐྱེ་བ་མེད་ཅིང་འགག་པ་
མེད། །དེ་ནི་གཟོད་ནས་ཞི་བར་འདོད། །དེ་ཕྱིར་རང་བཞིན་མྱ་ངན་འདས། །འདི་ནི་སྟོང་པ་ཉིད་དུ་བརྗོད། །འདི་ནི་ཡང་དག་དེ་ཉིད་ཆེ། །ཡང་དག་མཐའ་རུ་བརྗོད་པར་བྱ། །ཆོས་ཀྱི་དབྱིངས་ནི་སྙིང་པོ་ཆེ། །ཐེག་པ་ཆེན་པོར་བརྗོད་པར་བྱ། །དེ་ནི་སྙིང་པོ་ཁོང་སྟོང་མེད། །རྡོ་རྗེའི་
བསྟན་པ་བླ་ན་མེད། །ལུས་ཀུན་ལ་ནི་སྤྲོ་བྱ་སྟེ། །བདག་གི་ལུས་ནི་འདི་ལྟ་བུ། །རྡོ་རྗེའི་བདག་ཉིད་ཅེས་བྱ་གང་། །ཡི་གེ་ཧཱུྃ་ནི་ཡོངས་སུ་སྤྲོ། །བསྒོམ་པའི་སྦྱོར་བ་འདི་ཡིས་ནི། །སངས་རྒྱས་ཉིད་ནི་འགྲུབ་པར་འགྱུར། །འདི་འདྲའི་ཆོས་ནི་སྐྱེ་བ་མེད། །འདིར་ཡང་འབྱུང་བ་
སྣང་བ་མེད། །ཧཱུཾ་ཞེས་བྱ་བའི་སྦྱོར་བ་ཡིས། །སྐྱེ་བར་ཡང་ནི་སྣང་མི་འགྱུར། །ཆོས་ཉིད་དག་པ་བདེན་པ་གང་། །ཡང་དག་མཐའ་ནི་ཟག་པ་མེད། །ཆོས་དབྱིངས་བརྟན་པ་དམ་པ་ནི། །ཡི་གེ་ཧཱུྃ་དུ་འདིར་རབ་བསྒྲགས། །རྡོ་རྗེ་ཡི་གེ་ཧཱུྃ་དེ་ཉིད། །ཆོས་དབྱིངས་
སྟུག་པོ་བསྟན་པ་ཡིན། །བྱང་ཆུབ་སེམས་གང་དེ་རྡོ་རྗེ། །རྡོ་རྗེ་གང་ཡིན་དེ་ཉིད་ཧཱུྃ། །ཆོས་ཉིད་དག་པ་འདི་ལྟ་བུ། །རྡོ་རྗེ་ཡེ་ཤེས་ཡིད་འོང་བ། །སངས་རྒྱས་ཀུན་གྱི་སྙིང་པོ་ཆེ། །རྡོ་རྗེ་བདག་གི་ལག་ན་གནས། །དེ་བས་རྡོ་རྗེ་ཅན་ཀུན་གྱི། །གསང་བའི་རྣལ་
เล่ม ๘๔ · หน้า 232b
འབྱོར་ཐམས་ཅད་དང་། །ཡི་གེ་ཧཱུྃ་ལ་སྦྱོར་བ་ཡིས། །སྤྲོས་མེད་རྣལ་འབྱོར་བསམ་པར་བྱ། །ཟླ་བའི་དཀྱིལ་འཁོར་དམ་པ་ནི། །སྙིང་གའི་དབུས་སུ་བསྒོམ་པར་བྱ། །ཟླ་བ་དེ་ལ་ཟླ་བ་གཉིས། །དབུས་སུ་ཟླ་བ་རབ་བསྒོམ་བྱ། །ཟླ་བའི་དབུས་སུ་རྡོ་རྗེ་ནི། །མཁས་པ་
ཡིས་ནི་བསྒོམ་པར་བྱ། །རྡོ་རྗེའི་དབུས་སུ་ཡི་གེ་ཧཱུྃ། །སངས་རྒྱས་བྱང་ཆུབ་རབ་བསྒོམ་བྱ། །དེ་ལྟ་བུ་ཡི་སྦྱོར་བ་ཡིས། །ལུས་ཀུན་རབ་ཏུ་བསྒོམ་པར་བྱ། །རྡོ་རྗེ་ཧཱུྃ་མཛད་བཟླས་པ་ཡིས། །རྡོ་རྗེའི་བདག་ཉིད་མྱུར་དུ་ཐོབ། །ཧཱུྃ་རྡོ་རྗེ་ཧཱུྃ་མཛད་བསྒོམ་པ་རྫོགས་སོ།། །།
ཧཱུྃ་གི་སྦྱོར་བ་ཇི་བཞིན་དུ། །ཡི་གེ་ཐམས་ཅད་རྣམ་པར་བསྒོམ། །སེམས་དཔའ་ཆེན་པོའི་སྦྱོར་བ་ཡིས། །ཡི་གེ་བཅུ་དྲུག་དག་པ་ཡིན། །སངས་རྒྱས་ཀུན་གྱི་ཡི་གེ་ཧཱུྃ། །གང་ཕྱིར་སངས་རྒྱས་རིགས་བྱུང་བ། །རྡོ་རྗེ་ཅན་དག་ཀུན་གྱི་ཧཱུྃ། །དྲག་པོ་གཅོད་ཀུན་རབ་ཏུ་བསྒོམ། །
ཨོཾ་ནི་རིན་ཆེན་ཡང་དག་ལྡན། །ཧྲཱི་ནི་པདྨར་ཡང་དག་ལྡན། །ཡི་གེ་ཨ་ནི་སྣ་ཚོགས་བརྗོད། །དེ་ལྟ་བུར་ཡང་བསྒོམ་པར་བྱ། །ཧཱུྃ་ནི་སངས་རྒྱས་རྡོ་རྗེ་དག །ཏྲཱྃ་ནི་རྡོ་རྗེ་སྙིང་པོ་སྟེ། །ཡི་གེ་ཧྲཱིཿ ནི་རྡོ་རྗེ་བསྟན། །སྣ་ཚོགས་རྡོ་རྗེ་ཡི་གེ་ཨ། །ཧཱུྃ་ནི་རྡོ་རྗེ་སེམས་དཔའ་སྟེ། །རྡོ་རྗེ་རྒྱལ་
པོ་ཡི་གེ་ཛ། །ཧོ་ནི་རྡོ་རྗེ་ཆགས་པ་སྟེ། །རྡོ་རྗེ་ལེགས་པ་ཡི་གེ་ས། །ཨོཾ་ནི་རྡོ་རྗེ་རིན་ཆེན་ཏེ། །རྡོ་རྗེ་གཟི་བརྗིད་ཡི་གེ་ཨ། །ཏྲཱྃ་ནི་རྡོ་རྗེ་རྒྱལ་མཚན་ཏེ། །རྡོ་རྗེ་བཞད་པ་ཡི་གེ་ཧ། །ཡི་གེ་ཧྲཱིཿནི་རྡོ་རྗེ་སྤྱན། །རྡོ་རྗེ་རྣོན་པོ་ཡིག་དྷོཾ། །ཨོཾ་ནི་རྡོ་རྗེ་འཁོར་ལོ་སྟེ། །རྡོ་རྗེ་སྨྲ་བ་ཡི་གེ་ས། །
ཡི་གེ་ཀཾ་ནི་རྡོ་རྗེ་ལས། །རྡོ་རྗེ་བསྲུང་བ་ཡི་གེ་ཧྃ། །ཧཱུཾ་ནི་རྡོ་རྗེ་གནོད་སྦྱིན་ཏེ། །རྡོ་རྗེ་ཁུ་ཚུར་ཡི་གེ་པྃ། །གང་དང་གང་ལ་འདོད་པ་ཉིད། །སྙིང་གར་དེ་བཞིན་བསྒོམ་པར་བྱ། །ཡི་གེ་ཧཱུྃ་ནི་རྣལ་འབྱོར་པ། །དེ་ནི་མྱུར་དུ་འགྲུབ་པར་འགྱུར། །ཉི་ཤུ་རྩ་གཅིག་བཟླས་པ་ཡིས། །
གཟུགས་གཅིག་རྣམ་པར་སྤྲོ་བར་བྱ། །ཡི་གེ་ཧཱུྃ་བཟླས་ཙམ་གྱིས་ནི། །སངས་རྒྱས་བྱང་ཆུབ་ཐོབ་པར་འགྱུར། །ཟླ་བའི་དཀྱིལ་འཁོར་དབུས་གནས་པར། །རང་བདག་ཉིད་ནི་བསྒོམ་པར་བྱ། །བདག་ཉིད་རྡོ་རྗེའི་གཟུགས་སུ་སྟེ། །རྡོ་རྗེ་གཅིག་ནི་རྣམ་པར་བསྒོམ། །རྡོ་རྗེའི་
เล่ม ๘๔ · หน้า 233a
དབུས་ཀྱི་ལྟེ་བར་ནི། །དེ་རུ་ཡི་གེ་ཧཱུྃ་བསྒོམ་བྱ། །ཐེག་པ་ཆེན་པོ་མངོན་པར་བསྡུས། །ཇི་བཞིན་མདོ་ཡི་རྗེས་འབྲངས་ནས། །ཇི་བཞིན་རྒྱལ་པོ་སྐྱེས་བུར་བཅས། །ཡི་གེ་ཧཱུྃ་ནི་དང་པོར་བཅས། །དེ་བཞིན་ཡིད་ཀུན་རྣལ་འབྱོར་པས། །སྙིང་ག་རུ་ནི་བསྒོམ་
པར་བྱ། །བདག་ཉིད་རྡོ་རྗེའི་གཟུགས་སུ་སྟེ། །དབུས་སུ་ཡི་གེ་ཧཱུྃ་བསྒོམ་བྱ། །དེ་བཞིན་ཡི་གེ་ཐམས་ཅད་ཀྱང་། །རྣལ་འབྱོར་པས་ནི་སྙིང་གར་བསྒོམ། །ཟླ་བའི་གཟུགས་ལས་ཡང་དག་གནས། །བདག་ཉིད་ཡོངས་སུ་བསྒོམ་བྱ་ཞིང་། །རིགས་ཀྱི་ལྷ་ཡི་སྦྱོར་བ་ཡིས། །རང་
བདག་ཉིད་ནི་བསྒོམ་པར་བྱ། །རྡོ་རྗེ་སེམས་དཔའ་གང་འགའ་ཞིག །གང་དང་གང་ཞིག་མངོན་འདོད་པ། །རིགས་པ་དེ་ནི་སྙིང་གར་བསྒོམ། །ཡི་གེ་ཧཱུྃ་ནི་དང་པོར་སྦྱར། །གང་ཕྱིར་དེ་ལས་རྟོགས་པ་འབྱུང་། །དེ་བཞིན་ཡིད་ཀུན་རྣལ་འབྱོར་པས། །སྙིང་གར་བསྒོམས་པས་བསྒོམ་
པར་བྱ། །ཡང་ན་ནམ་མཁའི་སྦྱོར་བ་ཡིས། །ཡི་གེ་ཧཱུཾ་ནི་དང་པོར་སྦྱར། །ནམ་མཁའི་རང་བཞིན་བསྒོམ་བྱ་ཞིང་། །ཡི་གེ་དག་ནི་ཐམས་ཅད་སྦྱར། །ཡང་ན་ནམ་མཁའི་ཟླ་དབུས་སུ། །གནས་པའི་ཡི་གེ་ཧཱུྃ་བསྒོམ་བྱ། །བདག་ཉིད་རིགས་ཀྱི་ལྷ་མོར་བསམ། །སྐད་ཅིག་
དེ་ལ་རབ་འགྲུབ་འགྱུར། །ཧཱུྃ་ནི་ཇི་སྐད་བསྟན་པ་བཞིན། །སྔགས་ཀུན་རབ་ཏུ་བསྒོམ་པར་བྱ། །རིག་པ་ཀུན་གྱི་གསང་བ་ནི། །རྒྱུད་ཀུན་ཡང་དག་བསྡུས་པ་སྟེ། །བཟླས་པའི་གསང་བ་དེས་སྤངས་པ། །གསང་བ་འདི་ནི་རྣམ་པ་དྲུག །རིག་འཛིན་རྣམས་ཀྱི་སྙིང་པོ་དང་། །རྣལ་
འབྱོར་རྒྱུད་ནི་བསྡུས་པ་དང་། །དོན་ཡོད་ཤིན་ཏུ་རྨད་འབྱུང་བ། །གསང་བ་ལས་ཀྱང་མཆོག་གསང་བཤད། །བཟླས་བརྗོད་ཙམ་གྱི་སྦྱོར་བ་ཡིས། །ལྟ་བའི་རི་བོ་འཇོམས་པར་འགྱུར། །རང་གི་སྙིང་གའི་དབུས་སུ་ནི། །ཟླ་བའི་དཀྱིལ་འཁོར་བསྒོམ་པར་བྱ། །ཟླ་བའི་དཀྱིལ་
འཁོར་དེ་དབུས་སུ། །ཟླ་བ་གཉིས་པ་བསྒོམ་པར་བྱ། །དབུགས་འབྱུང་རྔུབ་པ་གང་ཡིན་པ། །རྡོ་རྗེ་ཡི་གེ་ཧཱུྃ་དུ་བསྒོམ། །མེ་བསྲུབས་པ་ཡི་སྦྱོར་བ་ཡིས། །སྟེང་དང་འོག་ཏུ་རྒྱུ་བར་བྱ། །ཟླ་བའི་དཀྱིལ་འཁོར་ཡང་དག་གནས། །དབུས་སུ་ཡི་གེ་ཧྲཱིཿབསྒོམ་བྱ། །སྟེང་འོག་
เล่ม ๘๔ · หน้า 233b
འགྲོ་བ་བསྒོམ་པར་བྱ། །ཡི་གེ་ཧཱུཾ་ནི་དེ་སྦྱར་ནས། །ཇི་ལྟར་ཤིང་སྐམ་གཙུབ་སྟན་པ། །གཙུབ་ཤིང་ཡང་དག་སྦྱོར་གནས་སུ། །རྩོལ་བ་བྱས་པ་ཙམ་གྱིས་ནི། །སྐད་ཅིག་གིས་ནི་མེ་འབྱུང་བཞིན། །ཡི་གེ་ཨ་ནི་གཙུབ་སྟན་ཏེ། །ཡི་གེ་ཧཱུཾ་ནི་གཙུབ་ཤིང་ཡིན། །རྒྱུ་
བའི་རྣལ་འབྱོར་པ་ཡིས་ནི། །སྐད་ཅིག་གིས་ནི་ཡེ་ཤེས་སྐྱེ། །ཤེས་རབ་ཕ་རོལ་ཕྱིན་ཡེ་ཤེས། །ཡི་གེ་ཧྲཱིཿརུ་འདིར་བརྗོད་བྱ། །བྱང་ཆུབ་སེམས་ནི་ཡི་གེ་ཧཱུྃ། །མེ་ཡི་སྦྱོར་བས་བསྲུབ་པར་བྱ། །བསྲུབ་པའི་སྦྱོར་བ་འདི་ཡིས་ནི། །ཡེ་ཤེས་དམ་པ་སྐྱེ་བར་འགྱུར། །
རྡོ་རྗེ་དེ་ནི་བསྲེག་བྱ་སྟེ། །རྡོ་རྗེ་ཡེ་ཤེས་བླ་ན་མེད། །བྷ་ག་སངས་རྒྱས་ཀུན་ཤེས་རབ། །ལིང་ག་རྡོ་རྗེ་བརྗོད་པར་བྱ། །བྱང་ཆུབ་སེམས་གང་དེ་རྡོ་རྗེ། །བྷ་ག་ལིང་གར་རབ་ཏུ་བསྒྲུབ། །བྷ་གར་ལིང་ག་བཅུག་ནས་ནི། །མདོ་སྡེ་གསང་དབང་ལས་གསུངས་སོ། །བྷ་གའི་སྦྱོར་བ་འདི་ཡིས་ནི། །མཁས་པས་
ལིང་ག་གཞུག་པར་བྱ། །གསང་བ་གཟི་བརྗིད་ཆེན་པོ་འདི། །མི་བསྲུབ་པ་ཡི་སྦྱོར་བ་ཡིས། །འགའ་ཞིག་གིས་ནི་འདི་བསྒྲུབས་ན། །སྐད་ཅིག་གིས་ནི་ཡེ་ཤེས་སྐྱེ། །བཟླས་པ་གསང་བ་རྣམ་པ་བདུན་རྫོགས་སོ།། །།སྦས་པ་གསང་བ་རྒྱུད་ཆེན་པོ། །འདི་ཉིད་རྣལ་
འབྱོར་ཀུན་དུ་བསྡུས། །འདི་ཉིད་ཆེན་པོ་བསྡུས་པ་ནི། །དེ་ནི་གཞན་ཡང་རབ་བཤད་བྱ། །ཟླ་བ་གང་བ་ཡང་དག་གནས། །བདག་ཉིད་རྡོ་རྗེ་བསྒོམ་པར་བྱ། །དེ་ཡི་དབུས་སུ་རྡོ་རྗེ་སྟེ། །རྡོ་རྗེ་རིགས་ཀྱི་བཟླས་པ་བྱ། །ཟླ་བ་གང་བ་ལ་གནས་པར། །བདག་ཉིད་པདྨར་བསྒོམ་
པར་བྱ། །དེ་ཡི་དབུས་སུ་པདྨ་དེ། །པདྨའི་རིགས་ཀུན་བཟླས་པར་བྱ། །ཟླ་བ་གང་བ་ལ་གནས་པར། །བདག་ཉིད་ནོར་བུར་བསྒོམ་པར་བྱ། །དེ་ཡི་དབུས་སུ་རིན་ཆེན་དང་། །རིན་ཆེན་རིགས་ཀྱི་བཟླས་པར་བྱ། །བདག་ཉིད་རྡོ་རྗེ་གཅིག་པུ་ནི། །རྡོ་རྗེ་ནོན་པོར་རབ་ཏུ་བསྒོམ། །
དེ་ཡི་ལས་ཀྱི་རིགས་མཆོག་ལ། །ལས་ཀྱི་རིགས་ཀུན་བཟླས་པར་བྱ། །སངས་རྒྱས་རྗེས་དྲན་ནས་བརྩམས་ཏེ། །སངས་རྒྱས་གཟུགས་སུ་རྣམ་པར་བསྒོམ། །དེ་ཡི་ཐུགས་ཀར་ཞུགས་ནས་ནི། །སངས་རྒྱས་རིགས་ཀུན་བཟླས་པར་བྱ། །རྡོ་རྗེ་སེམས་དཔའི་གཟུགས་ཆེན་པོ། །
เล่ม ๘๔ · หน้า 234a
སེམས་དཔའ་གཅིག་ནི་རྣམ་པར་བསྒོམ། །དེ་ཡི་ཐུགས་ཀར་ཞུགས་ནས་ནི། །རྡོ་རྗེ་རིགས་ཀུན་བཟླས་པར་བྱ། །པདྨའི་སེམས་དཔའ་ཆེན་པོའི་གཟུགས། །འཇིག་རྟེན་དབང་ཕྱུག་རྣམ་པར་བསྒོམ། །དེ་ཡི་ཐུགས་ཀར་ཞུགས་ནས་ནི། །པདྨའི་རིགས་ཀུན་
བཟླས་པར་བྱ། །ནོར་བུ་རིན་ཆེན་སྐལ་བ་ཆེ། །རྡོ་རྗེ་རིན་ཆེན་རྣམ་པར་བསྒོམ། །དེ་ཡི་ཐུགས་ཀར་ཞུགས་ནས་ནི། །རིན་ཆེན་རིགས་ཀུན་བཟླས་པར་བྱ། །སེམས་དཔའ་ཆེན་པོ་རྡོ་རྗེ་ལས། །སེམས་དཔའི་གཟུགས་ནི་རྣམ་པར་བསྒོམ། །དེ་ཡི་ཐུགས་ཀར་ཞུགས་ནས་ནི། །ལས་
ཀྱི་རིགས་ཀུན་བཟླས་པར་བྱ། །བདེན་པ་དམ་ཚིག་མཆོག་གྱུར་པ། །སངས་རྒྱས་ཐམས་ཅད་རབ་གྲོལ་བྱེད། །ཐོས་པ་ཙམ་གྱིས་ཐབས་ཆེན་པོ། །ཡང་ན་སྙིང་གར་རྡོར་རང་བཞིན། །སྣ་ཚོགས་བདག་པོ་བཟླས་བརྗོད་མཚུངས། །ཤེས་རབ་ཅན་གྱིས་གང་བསམས་པ། །ཕུན་
སུམ་ཚོགས་ཀུན་བདེ་བར་ཐོབ། །གསང་བ་ཡང་དག་བཤད་པར་བྱ། །སངས་རྒྱས་གཟུགས་ནི་རྣམ་བསྒོམ་བྱ། །དེ་ཡི་ཐུགས་ཀར་འཇུག་བྱ་ཞིང་། །ཡིད་ཀྱིས་ཐམས་ཅད་བཅུག་ནས་ནི། །དེ་ཡི་སྐུ་ནི་མཚུངས་བར་སྤྲོ། །དེ་ཡི་ཐུགས་ཀའི་དབུས་སུ་ནི། །རྡོ་རྗེའི་རིགས་
ནི་རབ་ཏུ་བཤད། །ཇི་བཞིན་སྔོན་གྱི་རྗེས་འབྲངས་ནས། །དེ་བཞིན་གཤེགས་པ་ཐམས་ཅད་སྤྲོ། །དེ་ལྟ་བུ་ཡི་སྦྱོར་བ་ཡིས། །དེ་བཞིན་གཤེགས་པའི་རིགས་བཟླས་ན། །ཐེ་ཚོམ་མེད་པར་སངས་རྒྱས་ཀུན། །སྐད་ཅིག་དེ་ཉིད་ཀྱིས་འགྲུབ་འགྱུར། །རྡོ་རྗེའི་མདའ་ནི་
ཞི་བ་འདི། །འདི་ལྟ་བུ་ཡི་གཟུགས་བསྒོམ་བྱ། །དེ་ཡི་ཐུགས་ཀར་ཞུགས་ནས་ནི། །རྡོ་རྗེའི་གར་དང་མཚུངས་པར་བསྒོམ། །དེ་ལྟ་བུ་ཡི་སྦྱོར་བ་ཡིས། །རྡོ་རྗེའི་རིགས་ཅན་ཐམས་ཅད་ནི། །ཐེ་ཚོམ་མེད་པར་དངོས་གྲུབ་ཀུན། །ཡེ་ཤེས་བཟླས་པས་འགྲུབ་པར་འགྱུར། །
པདྨའི་སེམས་དཔའ་བསྒོམ་བྱ་ཞིང་། །ཐུགས་ཀར་ཇི་བཞིན་འཇུག་པར་བྱ། །སྣ་ཚོགས་ཐབས་ནི་རབ་བསྒོམས་ན། །པདྨའི་རིགས་ཅན་འགྲུབ་པར་འགྱུར། །རྡོ་རྗེ་རིན་ཆེན་བསྒོམ་བྱ་ཞིང་། །ཐུགས་ཀར་ཇི་བཞིན་འཇུག་པར་བྱ། །རིན་ཆེན་མཛོད་ནི་བཅུག་ནས་སུ། །
เล่ม ๘๔ · หน้า 234b
ཡང་དང་ཡང་དུ་སྤྲོ་བར་བྱ། །དེ་ལྟ་བུ་ཡི་སྦྱོར་བ་ཡིས། །རྡོ་རྗེ་རིན་ཆེན་དགའ་ཆེན་པོ། །ཐེ་ཚོམ་མེད་པར་དངོས་གྲུབ་ཀུན། །བཟླས་པ་ཙམ་གྱིས་འགྲུབ་པར་འགྱུར། །སྟོང་གསུམ་གྱི་ནི་འཇིག་རྟེན་འདིར། །རྡོ་རྗེ་ལས་སུ་རྣམ་པར་བསམ། །དེ་ཡི་ཐུགས་ཀར་ཞུགས་
ནས་ནི། །སྣ་ཚོགས་རྣམ་འཕྲུལ་སྤྲོ་བར་བྱ། །དེ་ལྟ་བུ་ཡི་སྦྱོར་བ་ཡིས། །སྣ་ཚོགས་མཛོད་ནི་རབ་སྤྲོས་ནས། །ཐེ་ཚོམ་མེད་པར་དངོས་གྲུབ་ཀུན། །བཟླས་པ་ཙམ་གྱིས་འགྲུབ་པར་འགྱུར། །ཤིན་ཏུ་གསང་བ་འདི་ལྔ་ནི། །བཟླས་པ་གསང་བ་བླ་ན་མེད། །དེ་ལྟ་བུ་ཡི་སྦྱོར་
བ་ཡིས། །སངས་རྒྱས་བྱང་ཆུབ་ཐོབ་པར་འགྱུར། །བཟླས་པའི་ཆོ་གའི་སྦྱོར་བ་འདི། །རྒྱུད་ཀྱི་སྙིང་པོ་ཀུན་བསྡུས་ཤིང་། །ཉོན་མོངས་ཐམས་ཅད་རབ་འཇོམས་ལ། །རིག་པ་འཛིན་པས་བཟླས་པར་བྱ། །བཟླས་པའི་སྦྱོར་བ་འདི་ཡིས་ནི། །རིག་པའི་བརྟུལ་ཞུགས་ངེས་པར་
བླང་། །གལ་ཏེ་འདི་ནི་དངོས་གྲུབ་འདོད། །རྣལ་འབྱོར་པ་ཡིས་བརྟུལ་ཞུགས་བྱ། །བཟླས་བརྗོད་སྦྱིན་སྲེག་ཆོ་ག་ནི། །རྣལ་འབྱོར་མཆོག་ཏུ་བརྩོན་པར་བྱ། །ཐེག་པ་ཆེན་པོ་མངོན་བསྡུས་པ། །བྱེ་བ་གསུམ་ནི་ཡོངས་སུ་བཟླ། །བྱེ་བ་གསུམ་ནི་བཟླས་བྱས་ནས། །སྒྲུབ་
པ་དག་ནི་བརྩམ་པར་བྱ། །བྱང་ཆུབ་སེམས་ནི་དགའ་ཆེན་པོ། །ཤེས་རབ་ཅན་གྱིས་དཀྱིལ་འཁོར་བྲི། །རྡོ་རྗེ་སེམས་དཔའ་རྒྱལ་པོ་ཆེ། །སེམས་ཅན་གཅིག་གིས་ཡང་དག་བྲི། །གང་ཕྱིར་རྒྱལ་པོ་མཆོག་གསང་དབང་། །རྡོ་རྗེ་མཆོག་ནི་རབ་སྟེར་བྱེད། །རྡོ་རྗེ་དབྱིངས་ཀྱི་
སྦྱོར་བ་ཡིས། །དེ་ནི་སྔོན་དུ་ཡང་དག་བརྩམ། །ཤེས་རབ་ཅན་གྱིས་དཀྱིལ་འཁོར་བྲི། །ཁྲུ་ནི་བཅུ་པར་ཡང་དག་བྲི། །གྲུ་བཞི་པ་ལ་སྒོ་བཞི་པ། །རྟ་བབས་བཞེས་ནི་རྣམ་པར་བརྒྱན། །ཀ་བ་བརྒྱད་དང་ཡང་དག་ལྡན། །དར་གྱི་ཆུན་པོས་རྣམ་པར་བརྒྱན། །ཐིག་བཞི་དང་
ནི་ཡང་དག་ལྡན། །ཁ་ཁྱེར་དག་གིས་ཤིན་ཏུ་སྤྲས། །རིན་ཆེན་དྲ་བས་ཡོངས་སུ་བྲེས། །གསེར་སྐུད་དྲིལ་བུ་གཡེར་ཁས་བརྒྱན། །སྒོ་ཁྱུད་དང་ནི་མཚམས་རྣམས་སུ། །རྡོ་རྗེ་འཆིང་བས་རབ་ཏུ་བཅིང་། །རྡོ་རྗེ་རིན་ཆེན་རབ་ཏུ་བཀོད། །རྡོ་རྗེ་ཐིག་གིས་ཐིག་བཏབ་པ། །
เล่ม ๘๔ · หน้า 235a
དྲི་ཡི་སྦྱོར་བའི་ཆོ་ག་དང་། །ཕུར་བུས་བགེགས་ནི་བསལ་བྱ་ཞིང་། །ཚོན་རྩི་ལྔ་ཡི་སྲད་བུ་ནི། །རྡོ་རྗེ་གསང་བས་བསྲུང་བར་བྱ། །རྡོ་རྗེ་དབྱིངས་ཀྱི་སྦྱོར་བ་ཡིས། །ཕྱི་རོལ་དཀྱིལ་འཁོར་ཐིག་གདབ་བྱ། །ཇི་སྐད་སྔར་བཤད་དེ་ཉིད་ནི། །རྡོ་རྗེ་གསང་བ་ཡོངས་སུ་
བཀོད། །རྡོ་རྗེ་གསང་བ་ཡོངས་བཀོད་ནས། །ཕྱི་རོལ་དཀྱིལ་འཁོར་ཐིག་གདབ་བྱ། །རྡོ་རྗེ་འཁོར་ལོ་རབ་མཛེས་ལ། །འཁོར་ལོའི་དབུས་སུ་རབ་ཏུ་དགོད། །རྡོ་རྗེ་ཆགས་པ་ཡོངས་སུ་དགོད། །ཚོན་རྩི་ལྔ་ནི་རབ་ཏུ་དབྱེ། །ཇི་སྐད་གསང་རྒྱུད་ལས་གསུངས་བཞིན། །དཀར་
པོ་སྣ་ཚོགས་འོད་འབར་བ། །སྔོན་པོ་སེར་པོ་ཤིན་ཏུ་འབར། །བཙོད་སོགས་དང་ནི་རབ་ཏུ་ལྡན། །འོད་ཟེར་དམར་པོ་སྣ་ཚོགས་ལྡན། །སྣ་ཚོགས་ཚོན་རྩིས་བྲི་བར་བྱ། །འོད་ཟེར་དམར་པོ་སྣ་ཚོགས་འབར། །རྡོ་རྗེ་འཁོར་ལོ་ཡོངས་བཀོད་ནས། །ཟླ་བ་གང་བར་རབ་བཀོད་དོ། །
འཁོར་ལོ་ཐམས་ཅད་ཡོངས་སུ་བཟུང་། །ཁ་དོག་ཇི་བཞིན་རིགས་པ་བཞིན། །ཇི་ལྟར་མཛེས་ཤིང་ཤིན་ཏུ་དཀར། །ཇི་བཞིན་ཟླ་བ་ཉ་བ་མཚུངས། །ཟླ་བ་གང་བ་ཡང་དག་བྲི། །ཟླ་བ་གང་བའི་དབུས་སུ་ནི། །རྡོ་རྗེ་སེམས་དཔའ་ཡང་དག་བྲི། །གང་གིས་མཚན་ནི་བཟུང་
བ་ཡིས། །སྐད་ཅིག་གིས་ནི་སྡིག་ལས་གྲོལ། །འཛུམ་པ་དང་བཅས་ཟླ་བའི་མདོག །ཤིན་ཏུ་ཆགས་པ་དགའ་ཆེན་པོ། །མྱུར་དུ་རྡོ་རྗེའི་ཚིག་བརྗོད་དེ། །རྡོ་རྗེ་ཉིད་ཀྱི་སྙིང་པོ་ཡིན། །ཨོཾ་མ་ཧཱ་སུ་ཁ་བཛྲ་སཏྭ་ཧཱུྃ་ཛཿཧཱུྃ་བྃ་ཧོཿ། རྡོ་རྗེའི་གླུ་ནི་བླང་བྱ་ཞིང་། །བྱང་ཆུབ་
སེམས་དཔའི་སྤྱོད་པ་ཆེ། །སངས་རྒྱས་བྱང་ཆུབ་རབ་སྟེར་བྱེད། །འདོད་པའི་ཆགས་པ་ཡང་དག་དྲན། །ཐམས་ཅད་རྗེས་ཆགས་བདེ་བ་ཐུགས་མཆོག་མངའ། །རྡོ་རྗེ་སེམས་དཔའ་རབ་ཏུ་དགའ་བ་མཆོག །ཀྱེ་ཁྱོད་བདེ་ཆེན་བསྟན་པས་འཕེལ་མཛད་པ། །རབ་ཏུ་མྱུར་
དུ་སྒྲུབ་པ་འགྲུབ་པར་མཛོད། །རྡོ་རྗེའི་གླུ་ནི་དེ་ལྟ་བུ། །བླང་ཞིང་འཁོར་ལོ་སྤྱན་དྲང་བྱ། །རྡོ་རྗེ་སེམས་དཔའ་རྒྱལ་པོ་ཆེ། །རྗེས་སུ་ཆགས་ཤིང་རབ་འགྲུབ་འགྱུར། །སེམས་དཔའི་སྐྱིལ་ཀྲུང་ཡང་དག་གནས། །རྡོ་རྗེ་བསྙེམས་ཚུལ་འཆང་བའི་མཆོག །རོལ་པ་དང་
เล่ม ๘๔ · หน้า 235b
བཅས་སྤྱན་གཡོ་བ། །བསྙེམས་ཚུལ་ཆེན་པོ་དགའ་བ་ཆེ། །གཡས་པའི་ཕྱག་གིས་རྡོ་རྗེ་ནི། །ཐུགས་ཀ་རུ་ནི་འཛིན་པའི་མཆོག །གཡོན་པ་དྲིལ་བུ་ཡང་དག་ལྡན། །སླར་ཡང་བསྙེམས་ཚུལ་དང་བཅས་པ། །བྱང་ཆུབ་སེམས་དཔའ་རྡོ་རྗེ་ཆེ། །རྒྱལ་པོ་
ཆེན་པོ་ཐུབ་པ་ཆེ། །སྤྱོད་པ་ཆེན་པོ་ཐེག་པ་ཆེ། །རྡོ་རྗེ་སེམས་དཔའ་བདག་གྲུབ་མཛོད། །རིན་ཆེན་ཆེན་པོ་རྡོ་རྗེ་ཆེ། །རྒྱལ་མཚན་ཆེན་པོ་དྲན་པ་ཆེ། །སངས་རྒྱས་དྲན་པ་རྡོ་རྗེ་ཆེ། །རྡོ་རྗེ་སེམས་དཔའ་བདག་གྲུབ་མཛོད། །འདོད་ཆགས་ཆེན་པོ་བདེ་བ་ཆེ། །
བདེ་བ་ཆེན་པོ་བླ་ན་མེད། །ས་དང་ཕ་རོལ་ཕྱིན་བདེ་བར། །རྡོ་རྗེ་སེམས་དཔའ་བདག་གྲུབ་མཛོད། །ཤེས་རབ་ཆེན་པོ་རྡོ་རྗེ་ཆེ། །རྡོ་རྗེ་ཧཱུྃ་མཛད་ལས་བྱུང་བ། །བྱང་ཆུབ་སེམས་ནི་རྡོ་རྗེ་ཆེ། །རྡོ་རྗེ་སེམས་ནི་རྡོ་རྗེ་ཆེ། །རྡོ་རྗེ་སེམས་དཔའ་བདག་གྲུབ་མཛོད། །རྡོ་རྗེ་ཆེན་པོ་ཆགས་
པ་ཆེ། །རྒྱལ་པོ་ཆེན་པོ་ཐུབ་པ་ཆེ། །དོན་ཡོད་རྒྱལ་པོ་རྡོ་རྗེ་མཆོག །རྡོ་རྗེ་སེམས་དཔའ་བདག་གྲུབ་མཛོད། །ཆོས་ཀྱི་སྲིད་པ་འཁོར་ལོ་ཆེ། །སྨྲ་བའི་ལས་ནི་བླ་ན་མེད། །བསྲུང་ཞིང་བསྲུང་བ་དྲག་པོ་ཆེ། །རྡོ་རྗེ་ཁུ་ཚུར་བདག་གྲུབ་མཛོད། །རྡོ་རྗེ་ཡི་ནི་གླུ་འདི་ཡིས། །དེ་
ཉིད་མཆོག་ཏུ་བསྐུལ་ནས་ནི། །རྡོ་རྗེ་སེམས་དཔའ་རྒྱལ་པོ་ཆེ། །འགྲུབ་འགྱུར་འདི་ལ་ཐེ་ཚོམ་མེད། །འདོད་ཆགས་ཆེན་པོ་དགའ་བ་ཆེ། །རྡོ་རྗེ་སེམས་དཔའ་བསྒོམ་བྱ་ཞིང་། །རྡོ་རྗེ་སེམས་དཔའ་རྒྱལ་པོ་ཆེ། །མཁས་པས་དཀྱིལ་འཁོར་དགོད་པར་བྱ། །དཀྱིལ་འཁོར་
སྔ་མ་དང་མཚུངས་པར། །དཀྱིལ་འཁོར་དུ་ནི་ཡང་དག་བྲི། །དེ་ནས་རྡོ་རྗེ་བལྟས་ནས་ནི། །མཚན་བརྒྱ་རྩ་བརྒྱད་གདོན་པར་བྱ། །ཆོས་ཀྱི་རིག་པ་འཛིན་པ་ནི། །དབབ་དང་གཞུག་པ་ལ་སོགས་པ། །རྡོ་རྗེ་དབྱིངས་ཀྱི་སྦྱོར་བ་ཡིས། །ལས་རྣམས་ཐམས་ཅད་ཡང་དག་བྱ། །
བུམ་པ་ལ་སོགས་ཡོ་བྱད་དང་། །སྤོས་དང་མེ་ཏོག་ལ་སོགས་མཆོག །རྡོ་རྗེ་དབྱིངས་ཀྱི་སྦྱོར་བ་ཡིས། །ལས་རྣམས་ཐམས་ཅད་ཡང་དག་བྱ། །རྡོ་རྗེ་སེམས་དཔའི་རིག་པ་ཡིས། །བུམ་པ་བརྒྱ་རྩ་བརྒྱད་བཟླས་ན། །དེ་ནི་ཞབས་ཀྱི་དྲུང་བཞག་ན། །རྡོ་རྗེ་བདུད་
เล่ม ๘๔ · หน้า 236a
རྩིའི་ཆུ་རུ་འགྱུར། །རྡོ་རྗེ་དབྱིངས་ཀྱི་སྦྱོར་བ་ཡིས། །ཆོ་ག་ཇི་བཞིན་འཇུག་བྱ་ཞིང་། །རྡོ་རྗེ་སེམས་དཔའི་ཕྱག་རྒྱ་ཆེས། །བདག་ཉིད་ལ་ནི་དབང་བསྐུར་བྱ། །ཧཱུྃ་གིས་ཡང་དག་ཞུགས་ནས་ནི། །རྡོ་རྗེ་མཆོད་པས་ཡང་དག་མཆོད། །རྡོ་རྗེ་སེམས་དཔའི་
ཏིང་འཛིན་གྱིས། །ཅི་རིགས་པར་ནི་བསྒྲུབ་པར་བྱ། །ཟླ་བའི་དཀྱིལ་འཁོར་གང་བར་གནས། །ཕྱག་རྒྱ་ཆེན་པོ་ཡོངས་སུ་གཟུང་། །རྡོ་རྗེ་སེམས་དཔའི་ཏིང་འཛིན་གྱིས། །རང་བདག་ཉིད་ནི་བསྒྲུབ་པར་བྱ། །དེ་ནས་གསང་བ་ཕྱག་རྒྱ་ཆེ། །སྐད་ཅིག་རེ་རེ་བསྒྲུབ་པར་
བྱ། །རྡོ་རྗེ་སེམས་དཔའ་རྒྱལ་པོ་ཆེ། །བརྟན་པར་འགྱུར་བར་ཐེ་ཚོམ་མེད། །གསང་བའི་རྣལ་འབྱོར་བསྒྲུབས་ནས་ནི། །ཤིན་ཏུ་བསྟན་པ་བླ་མེད་པ། །རྗེས་ཆགས་སེམས་དཔའ་ཆེན་པོ་ནི། །སྐད་ཅིག་གིས་ནི་བསྒྲུབ་པར་བྱ། །དེ་འདྲའི་མཆོག་ཏུ་གསང་བ་མཐར་
ཕྱིན་པ། །སེམས་དཔའ་རྒྱལ་ཆེན་ཡོངས་སུ་དག་པ་མཆོག །དག་པའི་ཚུལ་འདི་ཅུང་ཟད་མཚུངས་པ་མེད། །རྗེས་ཆགས་འདོད་ཆགས་ཡོངས་སུ་དག་པ་མཆོག །རྡོ་རྗེ་རྒྱལ་མཆོག་ར་བ་དག་དྲི་མ་མེད། །གསང་བ་ལས་བྱུང་འཁོར་ལོ་དམ་པ་འཛིན། །རིག་པའི་
གསང་སྔགས་ཚུལ་འདི་བྱང་ཆུབ་བྱེད། །སྙིང་རྗེ་དང་ལྡན་སྤྱོད་པ་སྤྱོད་བྱེད་པ། །དེ་བཞིན་རབ་འཇིགས་སྡུག་བསྔལ་ཆེན་པོའི་ཕ་རོལ་ཕྱིན་གྱུར་པ། །མཆོག་ཏུ་མཁས་ཤིང་ཕྲ་ལ་རྒྱུད་དང་རྒྱུད་དག་ལས་བྱུང་བ། །དེ་རུ་སྲིད་པ་དག་གི་དྲ་བ་ཆེན་པོ་གཅོད་མཛད་པ། །གསང་
སྔགས་འཁོར་ལོ་ལས་བྱུང་གསང་བ་དེ་འདྲར་བཤད། །གསང་རིགས་མཆོག་ཏུ་བྱུང་བའི་འཁོར་ལོ་སྟེ། །དེ་བཞིན་གཤེགས་པ་ཀུན་གྱི་དགོངས་པ་གཅིག །སྲས་ཀྱི་གཙོ་བོ་དབང་སྒྱུར་རྒྱལ་པོ་སྟེ། །དེ་ཡིས་ཐར་པའི་གྲོང་ཁྱེར་རབ་ཏུ་བཤད། །གསང་བ་རྣལ་འབྱོར་ཆེན་
པོ་དེ་ཁོ་ན་ཉིད་དམ་པ་མཆོག་ཏུ་གསང་བའི་རྟོག་པའི་རྒྱལ་པོ་རྡོ་རྗེ་རྩེ་མོ་ལས། དེ་བཞིན་གཤེགས་པ་ཐམས་ཅད་ཀྱི་མདོ་སྡེ་གསང་བའི་དབང་པོ་དེ་བཞིན་གཤེགས་པའི་རིགས་ཞེས་བྱ་བའི་རྣམ་པར་བཤད་པ་སྟེ་ལེའུ་གཉིས་པ་རྫོགས་སོ།། །།དེ་ནས་རྣལ་འབྱོར་
เล่ม ๘๔ · หน้า 236b
གསང་བ་ཆེ། །སངས་རྒྱས་ཐམས་ཅད་ཀུན་འདུས་པ། །ཆོས་ཀྱི་དབྱིངས་ནི་བརྟན་པའི་མཆོག །ནམ་མཁའ་སྣ་ཚོགས་དངོས་ལྡན་པ། །རི་དབང་རྒྱལ་བོ་ཆེན་པོ་སྟེ། །སངས་རྒྱས་ཀྱི་ནི་སྤྲུལ་པ་སྤྲུལ། །རྡོ་རྗེ་དབང་པོ་ཆེན་པོའི་གནས། །སངས་རྒྱས་ཐམས་ཅད་
ཡང་དག་འདུས། །རྡོ་རྗེ་རྒྱལ་པོ་རྩེ་མོ་སྟེ། །གསང་བའི་རྣལ་འབྱོར་ཡང་དག་བྱུང་། །རྡོ་རྗེ་འཛིན་པ་རྒྱལ་པོ་ཆེ། །ཆོས་དང་ལོངས་སྤྱོད་རྫོགས་པའི་མཚུངས། །རྡོ་རྗེ་ཀུན་གྱིས་རབ་མཛེས་པ། །མཆོག་ཏུ་གྱུར་བའི་གནས་དེ་རུ། །རྡོ་རྗེ་འཛིན་པ་རྒྱལ་པོ་ཆེ། །རྣལ་
འབྱོར་པ་ནི་མི་གསུང་བཞུགས། །སེམས་དཔའི་སྐྱིལ་ཀྲུང་ཡང་དག་བཞུགས། །གཙོ་བོས་ཆོས་ཀུན་དབང་དུ་འགྱུར། །རོལ་བཅས་རྡོ་རྗེ་བསྙེམས་ཚུལ་ལྡན། །རྡོ་རྗེ་སེམས་དཔའ་དགའ་བ་ཆེ། །སངས་རྒྱས་ཀུན་གྱི་གནས་གཅིག་སྟེ། །ཆོས་ཆེན་པོ་ཡི་རྣལ་འབྱོར་མཆོག །
སངས་རྒྱས་ཐམས་ཅད་འདུས་ནས་ནི། །ཐུབ་པའི་དབང་ཕྱུག་ལ་གསོལ་བཏབ། །རྡོ་རྗེ་རྣལ་འབྱོར་རྣལ་འབྱོར་ཆེ། །བྱང་ཆུབ་སེམས་དཔའི་དགའ་ཆེན་པོ། །སེམས་དཔའ་བྱང་སེམས་ལས་བྱུང་བ། །རང་གི་རིགས་འབྱུང་བཤད་དུ་གསོལ། །རྡོ་རྗེ་འཆང་བ་རྒྱལ་པོ་སྟེ། །
རྒྱུད་ཀྱི་སྙིང་པོ་གསང་བ་ཆེ། །གསང་བ་ཆེན་པོ་རིགས་ཀྱི་དབང་། །མདོ་སྡེ་གསང་དབང་རྒྱལ་པོ་སྟེ། །ཐེག་པ་ཆེན་པོ་མངོན་བསྡུས་པ། །ཞི་བས་བྱང་ཆུབ་འགྲུབ་འགྱུར་ཏེ། །ཐམས་ཅད་ཡང་དག་བསྡུས་པ་མིན། །གཏུམ་པོ་ཐམས་ཅད་རབ་འཇོམས་པ། །རང་
རིགས་རྟག་ཏུ་བཤད་དུ་གསོལ། །རྡོ་རྗེ་འཆང་བ་རྒྱལ་པོ་སྟེ། །ཀུན་དུ་མི་གསུང་བཞུགས་པར་གྱུར། །མི་གསུང་གསང་བ་མ་གསུངས་ཏེ། །ཞི་བའི་བདེ་བ་ལ་བཞུགས་གྱུར། །གསང་བ་དེ་བཞིན་གཤེགས་པ་མཆོག །སེམས་དཔའ་ཆེན་པོ་སྙོམས་པར་ཞུགས། །
རྟོག་ཅིང་གཟིགས་པར་མི་མཛད་དེ། །གསང་བའི་རྣལ་འབྱོར་བཞུགས་པར་གྱུར། །སངས་རྒྱས་ཐམས་ཅད་འདུས་ནས་ནི། །ཆོས་ཀྱི་དབྱིངས་ནི་བརྟན་པར་མཛད། །སངས་རྒྱས་གཅིག་བཞིན་ཡང་དག་འགྱུར། །དོན་ཡོད་གྲུབ་པ་བླ་ན་མེད། །སངས་རྒྱས་ཐམས་
เล่ม ๘๔ · หน้า 237a
ཅད་རྣལ་འབྱོར་ཆེ། །གསང་བ་ཀུན་ལས་ཡང་དག་བྱུང་། །རྡོ་རྗེའི་སྦྱོར་བའི་ཏིང་འཛིན་གྱིས། །རྡོ་རྗེ་ཅན་ལ་བསྐུལ་བ་གསུངས། །ཨོྃ་བཛྲ་ས་ཏྭ་ཨུཏ་ཏིཥྛ། རྡོ་རྗེ་བསྐུལ་བ་གསུངས་པ་ན། །ཆོས་དབྱིངས་སངས་རྒྱས་གཅིག་པུ་ཉིད། །གསང་
བའི་རྣལ་འབྱོར་ཏིང་འཛིན་གྱིས། །རྡོ་རྗེ་སེམས་དཔའ་བཞེངས་པར་གྱུར། །ཐུབ་པས་མགོན་རྣམས་ལ་བཏུད་ནས། །ཚིག་ནི་འདི་སྐད་གསུངས་པར་གྱུར། །རྣམ་པ་ཀུན་དུ་ཅི་ཞིག་བགྱི། །བདག་ལ་སངས་རྒྱས་ཀུན་གྱིས་གསུངས། །ཕྱག་ན་རྡོ་རྗེ་བརྟན་པ་ལ། །དེ་ནས་
སངས་རྒྱས་ཀུན་གྱིས་གསུངས། །གསང་བ་རྡོ་རྗེ་རིགས་ཞེས་པ། །རིགས་ཀྱི་དཀྱིལ་འཁོར་བཤད་དུ་གསོལ། །སངས་རྒྱས་ཀུན་གྱི་གསུང་ཐོས་ནས། །རྡོ་རྗེ་དབང་པོའི་གནས་སྣང་བྱེད། །རབ་ཏུ་བཏུད་ནས་ཚིག་གསུངས་པ། །མགོན་པོ་རྣལ་འབྱོར་གཟིགས་སུ་
གསོལ། །བདག་གི་སྣོད་དང་ལྡན་པའི་མཆོག །འདི་ནི་སེམས་ཅན་འགའ་ཡང་མེད། །གང་ཕྱིར་མུ་སྟེགས་ལ་ཆགས་ཤིང་། །སྐྱེ་དགུ་ལྟ་བའི་དྲི་མས་ཁྱབ། །སེམས་ཅན་འདི་དག་གདུལ་བྱ་མིན། །སངས་རྒྱས་ཆོས་ཀྱི་སྣོད་མ་ཡིན། །ལོག་པའི་ལམ་དུ་ཡང་དག་
ཞུགས། །མུན་པ་སྟུག་པོ་ལ་གཞོལ་བ། །ལ་ལ་ལྷ་མི་ལྟ་ལ་ཆགས། །ཁ་ཅིག་བརྟུལ་ཞུགས་ལྟ་བའི་གནས། །ཁ་ཅིག་དཀའ་ཐུབ་གདུངས་པས་འཁྲུལ། །ཉོན་མོངས་པས་ནི་འཁྲུག་པའི་སེམས། །འདོད་པའི་ཡོན་ཏན་ལྔ་ལ་ཆགས། །སྐྱོ་བར་ཡང་ནི་མི་འགྱུར་ཏེ། །
རྡོ་རྗེ་རིགས་ཀྱི་གསང་འདི་ལ། །ནམ་ཡང་སྦྱོར་བར་མི་འགྱུར་རོ། །དེ་དག་འདོད་ཆགས་ཆེ་ལ་ཆགས། །འདོད་པའི་ཆགས་པ་དག་ལས་རྒྱལ། །སངས་རྒྱས་བྱང་ཆུབ་ཆགས་བྲལ་བ། །གསང་བ་འདི་ལ་སྦྱོར་མི་འགྱུར། །ལྟ་བའི་ཆགས་པས་རྒྱལ་བར་འགྱུར། །
འདོད་པའི་ཆགས་པས་ལྟ་བ་ཅན། །སྲིད་པའི་ཞགས་པས་ཤིན་ཏུ་ཆགས། །སངས་རྒྱས་བསྟན་པ་ལ་ཆགས་བྲལ། །ང་རྒྱལ་ལྷག་པའི་ང་རྒྱལ་བཅིང་། །གདུག་ཅིང་དྲག་ལ་ཤིན་ཏུ་ཁྲོ། །སྙིང་རྗེ་མེད་ཅིང་བརྩེ་མེད་འགྱུར། །དེ་ལ་གསང་བ་རུང་མ་ཡིན། །རྨོངས་
เล่ม ๘๔ · หน้า 237b
པ་ཀུན་མཁྱེན་ཡིན་སྙམ་པ། །ཡེ་ཤེས་ཆེན་པོ་ལ་མཁས་པ། །གསང་བ་འདི་ནི་རུང་མ་ཡིན། །འདྲེན་པ་ཇི་ལྟར་བཤད་པར་བགྱི། །གནོད་སྦྱིན་དང་ནི་སྲིན་པོ་ཉིད། །ཤ་ཟ་འབྱུང་པོ་གསང་བ་པ། །ལྷ་ལ་སོགས་པ་གདུག་ཆེན་པོ། །བསྟན་པ་ལ་ནི་འཇུག་མི་འགྱུར། །
ང་ནི་སངས་རྒྱས་རབ་ཏུ་ཞི། །བྱང་ཆུབ་སེམས་ནི་དགའ་ཆེན་པོ། །སེམས་ཅན་འདི་དག་ཤིན་ཏུ་གདུག །བདག་གི་ཚིག་ནི་འགྲུབ་མི་འགྱུར། །ང་ནི་རྒྱལ་ཆེན་ཐེག་ཆེན་ལ། །ནམ་མཁའི་དབྱིངས་བཞིན་རབ་ཏུ་ཡངས། །ཀྱེ་མ་སེམས་ཅན་འདི་དག་དམན། །
བདག་གི་ཚིག་ནི་འགྲུབ་མི་འགྱུར། །ང་ནི་ཐེག་ཆེན་དག་པ་སྟེ། །ཉོན་མོངས་འདམ་གྱིས་གོས་པ་མེད། །ཀྱེ་མའོ་སེམས་ཅན་འདི་ཉོན་མོངས། །བདག་གི་ཚིག་འདི་འགྲུབ་མི་འགྱུར། །ང་ནི་ཤེས་རབ་ཡེ་ཤེས་ཆེ། །ཐེག་པ་ཆེ་ལ་ཤིན་ཏུ་བསྟན། །ཀྱེ་མ་སེམས་
ཅན་ཤེས་རབ་ངན། །བདག་གི་ཚིག་འདི་འགྲུབ་མི་འགྱུར། །བསོད་ནམས་ཆེན་པོ་ཡེ་ཤེས་ཆེ། །ང་ནི་མཆོད་པ་ཆེན་པོའི་ཚོགས། །ཀྱེ་མའོ་སེམས་ཅན་བསོད་ནམས་ཆུང་། །བདག་གི་ཚིག་འདི་འགྲུབ་མི་འགྱུར། །སེམས་ཅན་འདི་དག་ཉེ་བར་འཚེ། །འཇིགས་པ་སྣ་
ཚོགས་ཀུན་དུ་ཁྱབ། །རྣམ་རྟོག་གིས་བསྐྱོད་ཤེས་རབ་ངན། །སངས་རྒྱས་ཆོས་ཀྱི་སྣོད་མ་ཡིན། །སྟོང་གསུམ་གྱི་ནི་འཇིག་རྟེན་འདི། །བདག་པོ་ཆེན་པོ་དབང་ཕྱུག་ཀྱང་། །རྨོངས་པ་ཀུན་སེལ་ཉིད་གྱུར་པ། །སྟོབས་ཆེན་རྫུ་འཕྲུལ་ཆེན་པོ་སྟེ། །དེ་ལ་རྒྱལ་པོ་གྲོགས་བྱེད་ཡོད། །
སྒྱུ་མའི་སྔགས་ནི་ཡོངས་སུ་འཛིན། །དེ་ནི་མི་རྒྱུད་ཅེས་བྱ་སྟེ། །སེམས་ཅན་རྨོངས་བྱེད་ལྷུར་ལེན་པ། །དེ་ནི་རྒྱལ་པོ་ལྷ་ཆེན་པོ། །གཙོ་བོ་རྒྱལ་པོ་ཆེན་པོ་མཚུངས། །དེ་ནི་དབང་ཕྱུག་ཆེ་ཞེས་བྱ། །གདུག་པའི་སེམས་ཅན་འཇོམས་བྱེད་པ། །དེ་ཡི་གཟུགས་ཅན་རྒྱལ་པོ་
ཆེ། །སྐྱེད་བྱེད་བྱེད་པ་པོ་བདག་པོ། །ཚངས་པ་ཆེན་པོ་རྒྱལ་པོ་ཆེ། །ལྟ་བ་སྣ་ཚོགས་རབ་སྟེར་བ། །འདོད་པའི་ཁམས་ཀྱི་རྒྱལ་པོ་ཆེ། །དབང་པོ་ཞེས་བྱ་ཤ་ཅིའི་བདག །བརྩོན་འགྲུས་དབང་ཕྱུག་ཆེན་པོའི་བུ། །གདོང་དྲུག་རྫུ་འཕྲུལ་ཆེན་པོ་ཅན། །དབུང་ཆེན་ཞེས་བྱའི་
เล่ม ๘๔ · หน้า 238a
མིང་ཆེ་སྟེ། །གཞོན་ནུ་མི་ཕམ་འོད་ལྔ་མིང་། །རྒྱལ་པོ་ཆེན་པོ་འདི་ལྔ་ནི། །ཁམས་གསུམ་གྱི་ནི་བདག་པོར་བཤད། །རྒྱལ་པོ་ལྔ་ནི་གཟི་བརྗིད་ཆེ། །ལུས་གསུམ་གྱི་ནི་ངོ་མཚར་ཆེ། །སྐུལ་བྱེད་དབང་ཕྱུག་ཆེན་པོ་ནི། །ཚངས་པ་ཁྱབ་འཇུག་དབང་ཕྱུག་ཆེ། །
དེ་ཡི་ལུས་ཅན་རྒྱལ་པོ་ཆེ། །དབང་ཕྱུག་ཆེན་པོ་ཞེས་གྲགས་པ། །སེམས་ཅན་གདུག་པ་ཤིན་ཏུ་དྲག །སྔགས་བཅས་འཁོར་དང་བཅས་པ་ཡི། །རྒྱལ་པོ་ལྔ་པོ་དེ་དག་ནི། །སེམས་ཅན་དག་ནི་རྣམ་རྨོངས་བྱེད། །ལྟ་བ་ཆེན་པོ་འཛིན་བྱེད་ཅིང་། །བདུད་ཀྱི་དབང་དུ་
གྱུར་པ་སྟེ། །ཉོན་མོངས་ཆེན་པོས་རབ་ཉོན་མོངས། །གཞན་ཡང་ཀུན་ནས་ཉོན་མོངས་བྱེད། །སེམས་ཅན་དག་ནི་འཇོམས་བྱེད་ཅིང་། །བདག་གི་ཚིག་འདི་འགྲུབ་མི་འགྱུར། །དབང་ཕྱུག་ཆེན་པོ་བདག་ཉིད་ཆེ། །བདག་ཉིད་དམ་པའི་ཡིད་ཆེན་པོ། །དེ་ལྟ་བུ་ཡི་རྣམ་རྟོག་
གིས། །སེམས་ཅན་རྣམ་པར་རྨོངས་པར་བྱེད། །ཚངས་པ་འབྱིན་བྱེད་སྐྱེ་དགུའི་བདག །བྱེད་པ་རང་བདག་བྱེད་པ་པོ། །ལྟ་བ་ཆེན་པོ་དེ་ལྟ་བུས། །སེམས་ཅན་དག་ནི་རྣམ་རྨོངས་བྱེད། །ཁྱབ་འཇུག་ཀུན་སོང་ཁྱབ་བྱེད་པ། །ཁྱབ་འཇུག་རང་བཞིན་གྲོང་ཁྱེར་ཀུན། །དེ་ལྟར་ཡང་
དག་མི་འཛིན་པ། །ལྟ་བའི་འཆིང་བ་རབ་སྟེར་བྱེད། །རྒྱ་ཆེར་རྒྱལ་པོ་འདི་རྣམས་ནི། །ལྟ་བར་སྨྲ་ལ་ངེས་པར་སྟོན། །རྨོངས་པ་མཁས་པ་ཡིན་སེམས་ཤིང་། །སེམས་ཅན་འཆིང་བར་བྱེད་པ་ཡིན། །སེམས་ཅན་དེ་རྣམས་གཞན་གྱིས་བསྐུལ། །ལྟ་བར་སྨྲ་བ་ངེས་པར་སྟེན། །
ཁྱབ་འཇུག་ཚངས་པ་ལ་སོགས་པ། །དབང་ཕྱུག་ཆེན་པོ་ཕྱག་བྱེད་དེ། །སངས་རྒྱས་ཡེ་ཤེས་རྣམ་ཀུན་དུ། །བདག་གི་ཚིག་འདི་འགྲུབ་མི་བྱེད། །སེམས་ཅན་འདི་རྣམས་རྨོངས་པར་གྱུར། །དེ་ལ་གསང་བ་རུང་མ་ཡིན། །དེ་ལྟ་བུ་ཡི་རྣམ་པ་ཡིས། །རྡོ་རྗེ་སེམས་དཔའ་དགའ་
ཆེན་པོ། །སངས་རྒྱས་ཀུན་གྱིས་མཁྱེན་ནས་ནི། །རྣལ་འབྱོར་པ་ནི་མི་གསུང་བཞུགས། །མགོན་པོ་ཆེན་པོ་སངས་རྒྱས་ཀུན། །ཐུབ་པ་ཉི་མ་མ་ལུས་པས། །གསུང་གཅིག་གིས་ནི་གསང་བ་ཆེ། །རྡོ་རྗེ་ཡི་ནི་ཚིག་གསུངས་པ། །ཀྱེ་མའོ་སེམས་ཅན་འདི་གདུལ་དཀའ། །
เล่ม ๘๔ · หน้า 238b
གདུག་ཅིང་དྲག་ལ་ཤིན་ཏུ་གཏུམ། །སངས་རྒྱས་ཀུན་གྱིས་མི་འདུལ་བ། །དེ་ཕྱིར་བདག་ཅག་གསོལ་བ་འདེབས། །མགོན་ཁྱོད་ཤེས་རབ་ཆེན་པོ་སྟེ། །ཁྱོད་ནི་ཐབས་ཆེན་བརྗོད་པར་བྱ། །བྱང་ཆུབ་སེམས་ནི་ཐབས་ཆེན་པོ། །ཉོན་མོངས་ཐམས་ཅད་ངེས་པར་འཇོམས། །
གདུག་པ་ཐམས་ཅད་རབ་གདུལ་བ། །མགོན་པོ་ཁྱོད་ལ་གསོལ་བ་འདེབས། །གདུག་པ་འདུལ་བྱེད་རྣམ་འཕྲུལ་པ། །ཐབས་ཆེན་པོ་ནི་རབ་ཏུ་གསུངས། །སངས་རྒྱས་ཀུན་གྱིས་སེམས་ཅན་འདི། །འདུལ་བར་མི་འགྱུར་སྣོད་མིན་ལ། །ཐབས་ཆེན་ཁྲོ་བ་ཆེན་པོ་ནི། །ཐུབ་པ་
ཆེན་པོས་བསྟན་དུ་གསོལ། །སངས་རྒྱས་ཀུན་གྱི་ཚིག་གསན་ནས། །ཕྱག་ན་རྡོ་རྗེ་རྫུ་འཕྲུལ་ཆེ། །ཚིག་དག་གིས་ནི་ཞུས་གྱུར་པ། །སངས་རྒྱས་ཀུན་ལ་འདི་སྐད་གསུངས། །ཨེ་མའོ་གསང་བ་འཁོར་ལོ་ཆེ། །ཐབས་ཆེན་བདག་ཉིད་ཆེན་པོ་སྟེ། །ཆོས་ཀྱི་དབྱིངས་ནི་བསྟན་
པའི་དངོས། །ཐབས་ཀྱི་འཁོར་ལོ་རབ་སྟོན་པ། །ཇི་སྐད་དུ་ནི་བཀའ་སྩལ་པ། །དེ་བཞིན་དུ་ནི་བདག་གིས་བགྱི། །སེམས་ཅན་ཀུན་ལ་ཕན་བྱའི་ཕྱིར། །དྲག་པོ་ཉིད་ནི་བསྟན་པར་བྱ། །དེ་སྐད་གསུངས་ནས་སེམས་དཔའ་ཆེ། །བྱང་ཆུབ་སེམས་དཔའ་བདག་ཉིད་ཆེ། །
མི་གསུང་བཞུགས་ནས་རྣལ་འབྱོར་གྱིས། །དྲག་པོ་ཉིད་ལ་སྙོམས་པར་ཞུགས། །དྲག་པོའི་དཀྱིལ་འཁོར་རྡོ་རྗེ་མཆོག །ཅེས་བྱའི་ཏིང་འཛིན་དེ་ལྟ་བུ། །དྲག་པོ་ཆེན་པོ་སྙོམས་པར་ཞུགས། །དེ་བཞིན་ཐུགས་ཀ་ནས་བྱུང་བ། །དྲག་པོ་འཇིགས་རུང་ཡི་གེ་ཧཱུྃ། །ཁྲོ་བོ་
ཆེན་པོ་བརྗོད་པར་འགྱུར། །རྡོ་རྗེ་ཧཱུྃ་མཛད་ཁྲོ་རྒྱལ་པོ། །མགོན་པོ་ཐུགས་ཀ་ནས་བྱུང་གྱུར། །ས་གཞི་མ་ལུས་གཡོས་གྱུར་ཅིང་། །ས་འདི་དག་ནི་སྒྲ་སྒྲོགས་གྱུར། །སྟོང་གསུམ་མ་ལུས་འདི་དག་ནི། ཧཱུྃ་ཧཱུྃ་ཞེས་བྱ་བརྗོད་པར་གྱུར། །ཚད་མེད་གཞལ་དུ་མེད་པ་ཡི། །
ཁྲོ་བོའི་རྒྱལ་པོ་བྱུང་གྱུར་པས། །ཕྱོགས་རྣམས་ཀུན་དུ་གདུག་ཆེན་དག །སྐད་ཅིག་དེ་ལ་གཏུམ་པར་གྱུར། །སླར་ཡང་གཅིག་ཉིད་གྱུར་ནས་ནི། །གོང་བུར་བྱས་ནས་རབ་བསྡམས་ཏེ། །ཁྲོ་བོའི་རྒྱལ་པོ་སྐུ་ཆེན་པོ། །འཇིགས་སུ་རུང་བ་གཅིག་ཏུ་གྱུར། །དེ་ནི་
เล่ม ๘๔ · หน้า 239a
ཁྲོ་བོའི་རྒྱལ་པོ་ཆེ། །སངས་རྒྱས་ཀུན་གྱི་གྲགས་ཆེན་པོ། །ཁྲོ་རྒྱལ་མདུན་དུ་འདུག་ནས་ནི། །སླར་ཡང་སྙིང་པོ་རབ་ཏུ་བརྗོད། །ཧཱུྃ་ཏྱ་ཧཱུྃ་ཏྱ། འཇིགས་སུ་རུང་བའི་སྤུ་ལངས་བྱེད། །གནོད་སྦྱིན་ཀུན་བདག་གནོད་སྦྱིན་ཏེ། །རྡོ་རྗེ་གནོད་སྦྱིན་རྫུ་འཕྲུལ་
ཆེ། །ཁྲོ་བོ་ཆེན་པོ་བརྗོད་པ་ཡིན། །སྟོང་གསུམ་གྱི་ནི་འཇིག་རྟེན་འདི། །འབར་བའི་ཕྲེང་བའི་འོད་ཀྱིས་ཁྱབ། །རྡོ་རྗེ་མེ་ནི་དྲག་པོ་ཆེ། །མ་ལུས་གསལ་ཞིང་མེ་འབར་གྱུར། །ཕྱི་རོལ་གྱི་ནི་གདུག་པ་ཅན། །མ་ལུས་དཀྱིལ་འཁོར་ལས་བྱུང་བ། །རྡོ་རྗེ་མེ་ནི་རབ་འབར་
བས། །གཡོ་བ་མེད་ཅིང་ཤི་བར་གྱུར། །ལྷ་ཆེན་ལ་སོགས་གདུག་པ་རྣམས། །གང་དག་རིགས་ཀྱི་དཀྱིལ་འཁོར་རྣམས། །རྡོ་རྗེ་གནོད་སྦྱིན་གྱིས་གདུངས་ནས། །གཡོ་བ་མེད་ཅིང་འབར་བར་གྱུར། །དེ་ནི་རྡོ་རྗེ་གནོད་སྦྱིན་ཆེ། །དྲག་པོའི་གཟུགས་ཅན་རབ་འཇིགས་
བྱེད། །ཁྲོ་གཉེར་བསྙེར་བའི་གདོང་ཅན་ཏེ། །དེ་བཞིན་གནག་དང་སྔོ་བར་གྱུར། །མཆེ་བ་གཙིགས་པའི་ཞལ་མངའ་བ། །དབུ་སྐྲ་གྱེན་བརྫེས་ཤིན་ཏུ་སྐྲག །སྤྱན་དམར་སྤྱན་དང་ལྡན་པ་སྟེ། །དེ་བཞིན་རྡོ་རྗེ་བསྟན་པའི་ཞལ། །དྲག་པོ་རྡོ་རྗེ་དྲག་ཚོགས་འཛིན། །
གཅིག་བུ་འབར་བ་རབ་ལྡན་པ། །ཞགས་པ་ལྕགས་ཀྱུ་རྡོ་རྗེ་བདག །སངས་རྒྱས་ཐམས་ཅད་འཇིགས་བྱེད་པ། །ས་རྣམས་མ་ལུས་གཡོ་བར་བྱེད། །ས་འདི་ཡང་ནི་གཡོ་བར་བྱེད། །གནོད་སྦྱིན་ཆེན་པོ་འབྱུང་པོ་སོགས། །གཡོ་བ་མེད་ཅིང་འོག་ཏུ་འགྱེལ། །དེ་ནི་
དྲག་པོ་གནོད་སྦྱིན་ཆེ། །སངས་རྒྱས་ཐམས་ཅད་འཇིགས་པར་བྱེད། །དེ་ཡི་སྤྱན་སྔར་འདུག་ནས་ནི། །ཆེད་དུ་བརྗོད་པ་ཡང་དག་བརྗོད། །ཨེ་མའོ་བྱང་ཆུབ་ཀྱི་ནི་སེམས། །ཀུན་དུ་བཟང་པོ་ཀུན་དགེ་བ། །སེམས་ཅན་འདུལ་བའི་ཐབས་སུ་ནི། །བརྩེ་མེད་ཁྲོ་བོ་ཉིད་དུ་གྱུར། །
སྔར་ནི་རྡོ་རྗེ་སེམས་དཔའ་གང་། །ཞི་བའི་གཟུགས་སུ་རྣམ་གནས་པ། །རྡོ་རྗེ་གནོད་སྦྱིན་འཛིན་གྱུར་ནས། །རྡོ་རྗེ་དྲག་པོ་ཞེས་བྱར་གྲགས། །དེ་ནི་དྲག་པོ་རྡོ་རྗེ་འཛིན། །འཇིགས་རུང་བ་སྤུ་ལངས་པར་བྱེད། །ཡི་གེ་ཧཱུྃ་བཞིའི་ཕྱག་རྒྱ་ཡི། །སྙིང་པོ་གཏུམ་པོ་ཉིད་ཀྱང་
เล่ม ๘๔ · หน้า 239b
གསུངས། །ཨོྃ་སུམྦྷ་ནི་སུམྦྷ་ཧཱུྃ། གྲྀཧྞ་གྲྀཧྞ་ཧཱུྃ། གྲྀཧྞཱ་པ་ཡ། གྲྀཧྞཱ་པ་ཡ་ཧཱུྃ། ཨཱ་ན་ཡ་ཧོ་བྷ་ག་བཱ་ན་བཛྲ་ཧཱུྃ་ཕཊ། ཤིན་ཏུ་གཏུམ་ཞིང་ཆེར་གྲགས་པ། །དེ་བཞིན་ཐུགས་ཀ་ནས་བྱུང་སྟེ། །ཞལ་བཞི་དང་ནི་ཕྱག་བརྒྱད་པ། །བསྐལ་པ་ཡི་ནི་མེ་ལྟར་དྲག །
རྡོ་རྗེ་དུས་ཀྱི་མེ་ལྟར་བྱུང་། །ཉོན་མོངས་ཕྱོགས་ནི་རབ་སེལ་བྱེད། །སྨིན་མ་བསྐྱོད་པས་གཙིགས་པའི་ཞལ། །དེ་བཞིན་རྣམ་པར་འཇིགས་པའི་གདོང་། །འཇིག་རྟེན་གསུམ་སྲེག་དམ་ཚིག་སྟེ། །རྡོ་རྗེ་ཅན་ཀུན་སྲེག་པར་བྱེད། །འབར་ཕྲེང་ཀུན་དུ་འཁྲིགས་པའི་སྒྲ། །
རྡོ་རྗེ་བསྐལ་བའི་མེ་ལྟར་འབར། །རྡོ་རྗེ་ཧཱུྃ་མཛད་ཕྱག་རྒྱ་ནི། །ཕྱག་གཉིས་ཀྱིས་ནི་ཡོངས་སུ་གཟུང་། །རྡོ་རྗེ་བསྡམས་པ་འཛིན་རྒྱལ་པོ། །ལྕགས་ཀྱུ་དང་ནི་ཞགས་པས་བརྒྱན། །རྡོ་རྗེ་ཡི་ནི་ལུ་གུ་རྒྱུད། །ཕྱག་གཉིས་ན་བསྡམས་འཇིགས་རུང་ཞལ། །སངས་རྒྱས་
ཐམས་ཅད་བསྡིགས་བྱེད་པ། །རྡོ་རྗེ་གཏུམ་པོ་ཡང་དག་བྱུང་། །དྲག་པོ་བཀའ་ནི་ནོད་པར་བྱེད། །མྱུར་བ་རུ་ནི་བཀའ་སྩོལ་ཅིག །མིན་ན་སངས་རྒྱས་ཁྱེད་རྣམས་ཀུན། །ཐེ་ཚོམ་མེད་པར་བཟའ་བར་བྱ། །དེ་ནས་སངས་རྒྱས་ཀུན་གྱིས་གསུངས། །ཊཀ་ཀི་ཛཿཧཱུྃ་
ཤིན་ཏུ་དྲག །རིགས་དང་བཅས་པར་ལྷ་ཆེན་པོ། །སྟོབས་ཆེན་པོ་ཡིས་དགུག་པར་གྱིས། །དེ་ནས་རིག་པའི་མཆོག་རྒྱལ་པོ། །བསྙེམས་པའི་ཚུལ་གྱིས་བཞད་བྱེད་ཅིང་། །ཁྲོ་བོ་དྲག་པོ་རྔ་སྒྲ་སྒྲོགས། །རྡོ་རྗེ་ཞགས་པ་བསྐུལ་བར་བྱ། །རྡོ་རྗེ་ཞགས་པ་དྲག་པོ་ཆེ། །
དཔུང་བཅས་གྲོགས་དང་བཅས་པ་དང་། །དེ་བཞིན་རིགས་དང་དཀྱིལ་འཁོར་བཅས། །སོང་ལ་དབང་ཕྱུག་ཆེན་པོ་ཁུག །བཛྲ་པཱ་ཛ་ཧཱུྃ། དབང་ལྡན་རྒྱལ་པོ་ཆེན་པོ་ནི། །སྣ་ཚོགས་རང་གི་འཁོར་ན་གནས། །འཇིགས་བྱེད་མ་དང་ལྷན་ཅིག་ཏུ། །འདོད་པ་ཅན་
ནི་མཆོག་ཏུ་རོལ། །རྡོ་རྗེ་ཞགས་པ་དེར་སོང་སྟེ། །ཁྲོ་བོའི་སྒྲ་ཡིས་བསྡིགས་པར་གྱུར། །དབང་ལྡན་རྒྱལ་པོ་ལ་སྨྲས་པ། །ཁྱོད་ལ་སྟོན་པ་སྤྱན་འདྲེན་མཛད། །སྐྲག་ཅིང་ཁྲོས་ནས་ལྷ་ཆེན་པོས། །འཇིགས་པ་ཡི་ནི་ཚིག་བརྗོད་པ། །ང་ནི་འཇིག་རྟེན་གསུམ་
เล่ม ๘๔ · หน้า 240a
རྒྱལ་པོ། །ང་ལས་སྟོན་པ་གཞན་ཡོད་དམ། །རྡོ་རྗེ་ཞགས་པ་ཁྲོ་བོ་ཆེས། །ཚིག་ནི་ལན་གསུམ་བརྗོད་པར་གྱུར། །རྡོ་རྗེ་ཁྲོ་བོ་རྒྱལ་པོ་ཆེ། །ཁྱོད་ལ་ཤིན་ཏུ་སྤྱན་འདྲེན་མཛད། །ལྷ་ཆེན་དབང་ཕྱུག་ཆེན་པོ་ཡིས། །སླར་ཡང་ལན་གསུམ་སྨྲས་
པ་ནི། །ང་ནི་ཁོ་ན་རྒྱལ་པོ་རང་། །ང་ལ་སྤྱན་འདྲེན་གང་ཞིག་ཡོད། །དེ་ནས་ཞགས་པས་བཀའ་བཞིན་བྱེད། །ཁྲོ་བོ་དྲག་པོ་རབ་འཇིགས་པས། །ཡན་ལག་ཐམས་ཅད་བཅིངས་ནས་ནི། །དབང་ཕྱུག་ཆེན་པོ་བཀུག་པར་གྱུར། །འཇིགས་ཤིང་སྐྲག་ནས་ལྷ་ཆེན་པོ། །
ཤིན་ཏུ་སྨྲེ་སྔགས་འདོན་ཅིང་ངུ་། །སྐྱབས་ནི་གང་ཡང་ཡོད་མ་ཡིན། །འཇིགས་པ་ཆེན་པོ་ཀུན་དུ་བྱུང་། །སྟོབས་དང་དེ་བཞིན་ང་རྒྱལ་གྱིས། །སྟོབས་དང་ཤུགས་ནི་བསྟན་ནས་སུ། །ཞགས་པ་བཅད་ནས་བྲོས་པར་གྱུར། །རང་གི་གནས་སུ་སོང་གྱུར་ནས། །
འཇིག་རྟེན་གསུམ་གྱི་ལྷ་རྣམས་བོས། །ལྷ་དང་ལྷ་མིན་དྲི་ཟར་བཅས། །སྐད་ཅིག་གིས་ནི་འདུས་གྱུར་ནས། །འཁོར་རྣམས་དག་ནི་ངུ་བར་གྱུར། །ཇི་ལྟར་སྔོན་གྱིས་མ་བྱས་པའི། །དེ་ལྟ་བུ་ནི་ཡང་དག་མཐོང་། །སེམས་ཅན་རབ་དྲག་འདི་སུ་ཞིག །རྡོ་རྗེ་ཞགས་
པའི་མདུན་སོང་སྟེ། །རྡོ་རྗེ་རིག་པ་མཆོག་ལ་ཞུས། །དབང་ཕྱུག་ཆེན་པོས་བདག་བཅད་དེ། །དྲག་པོ་ཚངས་པ་རབ་ཏུ་བྲོས། །རྡོ་རྗེ་རིག་པ་མཆོག་རྒྱལ་པོ། །ཁྲོ་བོ་གཏུམ་པོ་ཤིན་ཏུ་དྲག །དེ་ལྟ་བུ་ཡི་ཚིག་གསན་ནས། །ཐམས་ཅད་དུ་ནི་འབར་བར་གྱུར། །
ཁྲོ་བོ་རྡོ་རྗེ་ལུ་གུ་རྒྱུད། །དྲག་པོ་ཡིས་ནི་བཀའ་བསྒོ་བ། །མྱུར་དུ་སོང་ལ་ལྷ་ཆེན་པོ། །རིགས་ཆེན་པོ་དང་བཅས་པ་ཁུག །ཁྲོ་བོའི་རྒྱལ་པོ་ལུ་གུ་རྒྱུད། །གསན་ན་དབང་ཕྱུག་ཆེ་གནས་སོང་། །ཡན་ལག་ཐམས་ཅད་བཅིངས་ནས་སུ། །ལྷ་མོ་དང་བཅས་ཀུན་དུ་
བཀུག །སྐད་ཅིག་འཇིགས་པས་ངུ་བྱེད་ཅིང་། །ལྷ་རྣམས་ཐམས་ཅད་ཤིན་ཏུ་འཇིགས། །འཇིགས་པའི་སྡུག་བསྔལ་སྨྲེ་སྔགས་འདོན། །དེ་རིང་འདྲེན་པ་ལྷ་ཆེན་མིན། །སྟོབས་དང་ཤུགས་ནི་ཐམས་ཅད་ཀྱིས། །རྡོ་རྗེ་ཀུན་དང་འཐབ་པར་གྱུར། །མཐུ་དང་
เล่ม ๘๔ · หน้า 240b
སྟོབས་དང་ཤུགས་ཀྱིས་ནི། །བཅག་ནས་ཐམས་ཅད་བྲོས་པར་གྱུར། །ལྷ་ཆེན་ལ་སོགས་ཐམས་ཅད་ནི། །ཕྱོགས་རྣམས་ཀུན་དུ་བྲོས་པར་གྱུར། །མུན་པ་ཡིས་ནི་ཀུན་དུ་འཁྲུག །ཕྱོགས་རྣམས་ཀུན་དུ་འཇིགས་པར་གྱུར། །ཁྲོ་བོ་ལུ་གུ་རྒྱུད་འོངས་ནས། །རྣམ་པ་
ཀུན་དུ་སྨྲ་བར་བྱེད། །མ་ལུས་ཕྱོགས་རྣམས་ཐམས་ཅད་དུ། །བདག་ཅག་གནས་ནི་བྲོས་པར་གྱུར། །ཁྲོ་བོ་རྡོ་རྗེ་རིག་པ་མཆོག །སླར་ཡང་ཤིན་ཏུ་ཁྲོས་པར་གྱུར། །འབར་བའི་ཕྲེང་བས་རབ་འབར་ཞིང་། །རྡོ་རྗེ་དྲག་པོ་ཉིད་དུ་གྱུར། །དྲག་པོ་ཧ་ཧ་ཞེས་བཞད་དགོད། །
རང་གི་ཡན་ལག་ཟ་བར་བྱེད། །རང་གི་མགོ་ལ་རྡེག་བྱེད་ཅིང་། །རྡོ་རྗེ་གསོར་བ་བསྐོར་བར་འབར། །དེ་ལྟ་བུ་ཡི་ཁྱད་པར་དང་། །བཅས་པས་ཁྲོ་བོ་ཡང་དག་བྱུང་། །སླར་ཡང་རང་གི་བདག་ཉིད་དྲན། །ཁྲོ་བོའི་རྒྱལ་པོ་བརྗོད་པར་གྱུར། །ཨོྃ་སུམྦྷ་ནི་སུམྦྷ་ཧཱུྃ། གྲྀཧྞ་
གྲྀཧྞ་ཧཱུྃ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུྃ། ཨཱ་ན་ཡ་ཧོ་བྷ་ག་བཱན་བཛྲ་ཧཱུྃ་ཕཊ། ཁྲོ་བོའི་རྒྱལ་པོ་བཅས་ནས་ནི། །ཡི་གེ་ཛཿནི་ཡོངས་སུ་བརྗོད། །རྡོ་རྗེ་ལྕགས་ཀྱུར་རབ་ཏུ་བསྔགས། །སྟོབས་དང་ལྡན་པ་ཁྲུག་ལ་ཤོག །ཨོྃ་བཛྲ་ཛྭ་ལ་ཨག་ནི་ས་ཏྲི་ཥ་ཨཾ་ཀུ་ཤ་ཛཿཛཿ།
རྡོ་རྗེ་འབར་བ་ལྕགས་ཀྱུ་ནི། །སོང་ནས་ཕྱོགས་ཀུན་བདག་ཉིད་ཆེ། །སྐད་ཅིག་གིས་ནི་སྟོབས་ཆེན་རྣམས། །ལྷ་རྣམས་ཐམས་ཅད་བཀུག་པར་གྱུར། །རྒྱལ་བོ་དབང་ཕྱུག་ལྔ་དང་ནི། །ལྷ་རྣམས་ཐམས་ཅད་གྲངས་མེད་པར། །རིགས་བཅས་དཔུང་དང་བཅས་པ་ཉིད། །
གཅིག་ཉིད་དུ་ནི་བསྡུས་པར་གྱུར། །རྡོ་རྗེ་ལྕགས་སྒྲོག་རབ་ཏུ་མངགས། །ཆིངས་ཤིག་སྟོབས་ཆེན་དང་ལྡན་པ། །ཚོགས་དང་བཅས་པའི་ལྷ་རྣམས་ཀུན། །བཅིང་བ་ལྔ་ཡིས་བཅིངས་པར་གྱུར། །ནང་གི་འཁོར་དང་བཅས་པའི་ཚོགས། །ལྷ་ཚོགས་གནོད་སྦྱིན་སྲིན་པོ་
དང་། །ལྷ་མིན་རླུང་དང་འབྱུང་པོའི་ཚོགས། །གཞན་ཡང་གདུག་པའི་ཚོགས་རྣམས་ནི། །ཐམས་ཅད་བཅིངས་པར་གྱུར་ནས་ནི། །རྡོ་རྗེ་ཞགས་པ་རབ་ཏུ་མངགས། །རྡོ་རྗེ་ལྕགས་ཀྱུ་དང་བཅས་པར། །སོང་ལ་དཀྱིལ་འཁོར་དག་ཁུག་ཅིག །རྡོ་རྗེ་ཞགས་
เล่ม ๘๔ · หน้า 241a
པས་མངོན་ཆགས་པས། །ཡན་ལག་ཀུན་ལས་ཡོངས་སུ་སྤྲོ། །རྡོ་རྗེའི་རང་བཞིན་ཞགས་པ་སྟེ། །བརྟན་བར་གྱུར་པར་ཐེ་ཚོམ་མེད། །བྱེ་བདག་ནི་གྲངས་མེད་བཅུ། །རྡོ་རྗེ་ལྕགས་ཀྱུ་རབ་ཏུ་བྱུང་། །ལྷ་ལ་སོགས་པའི་རེ་རེ་ཞིང་། །སྤྱི་བོ་ནས་
འགུགས་ཡང་དག་སྦྱོར། །ལྷ་ཆེན་དབང་ཕྱུག་ཆེན་པོ་ཡི། །སྤྱི་བོའི་གཙུག་ཏུ་བཏབ་ནས་ནི། །རྡོ་རྗེ་ལྕགས་ཀྱུ་རྒྱལ་པོ་ཡིས། །དབང་ཕྱུག་ཆེན་པོ་འགུགས་པར་བྱེད། །ལྷ་སོགས་འཁོར་དང་བཅས་པ་ཀུན། །ཕན་ཚུན་དུ་ནི་ངུ་བར་བྱེད། །ཤུགས་རིངས་ཀུན་
དུ་ཕྱུང་ནས་ནི། །ཕན་ཚུན་དུ་ནི་སྨྲ་བར་བྱེད། །ཀྱེ་མའོ་སྡུག་བསྔལ་ཀྱེ་མའོ་ཤི། །ཚོགས་ནི་གང་དུ་ཁྱེར་བར་གྱུར། །རྡོ་རྗེ་འབར་བ་ཆེན་པོ་དེས། །སྐད་ཅིག་དེ་ལ་བསྲེགས་གྱུར་ནས། །རི་རབ་རི་ཡི་རྩེ་མོ་རུ། །ལྷ་ལ་སོགས་པ་ཐམས་ཅད་བཀུག །གནས་དེ་རུ་
ནི་ཐམས་ཅད་དག །ཡོངས་སུ་བསྐོར་ནས་ཀུན་དུ་གནས། །རྡོ་རྗེ་ཁ་ཁྱེར་ཕྱི་རོལ་དུ། །ལྷ་རྣམས་དེ་དག་ཐམས་ཅད་གནས། །རྡོ་རྗེ་ར་བའི་ཕྱི་རོལ་དུ། །ལྷ་ལ་སོགས་པ་ཐམས་ཅད་བཀུག །ཕྱི་རོལ་རྡོ་རྗེ་ར་བ་ནི། །ལྕགས་བསྲེགས་རང་བཞིན་རྡོ་རྗེ་མཚུངས། །
རྡོ་རྗེ་ཅན་གྱི་རྡོར་འབར་མས། །ནང་ནས་ཤིན་ཏུ་གདུངས་པར་གྱུར། །ལྷ་ཚོགས་སེམས་ཅན་དེ་དག་ཀྱང་། །འཇིགས་སུ་རུང་བའི་འོ་དོད་འབོད། །སྟོང་གསུམ་འདི་དག་ཐམས་ཅད་ཀྱང་། །ཧཱུྃ་ཧཱུྃ་སྒྲ་ནི་ཡོངས་སུ་བརྗོད། །འོ་དོད་བོས་ནས་སྨྲ་བར་བྱེད། །ངན་སོང་
དག་ནི་ཅི་ཞིག་བྱེད། །སྔོན་མ་མཐོང་བ་འདི་ཅི་ཞིག །འདིར་ནི་རྡོ་རྗེ་འཛིན་པར་འགྱུར། །རྡོ་རྗེ་འཛིན་པས་རྒྱལ་པོ་དེ། །སླར་ཡང་ཐུགས་རྗེ་ཀུན་དུ་སྐྱེས། །ཐམས་ཅད་བཅིངས་པ་ལས་བཀྲོལ་ཏེ། །རྡོ་རྗེ་མེ་ཡི་ཉེ་བར་མཛེས། །རྡོ་རྗེ་གནོད་སྦྱིན་དྲག་པོ་ཆེ། །རང་གི་
དཀྱིལ་འཁོར་ནས་ཕྱུང་སྟེ། །ལྷ་ལ་སོགས་པ་ཀུན་བོས་ཏེ། །ང་ཡི་ཚིག་འདི་རབ་ཏུ་ཉོན། །དེ་ནས་ལྷ་རྒྱལ་ལ་སོགས་པ། །ཁྱོད་ནི་སུ་ཡིན་སྨྲ་བར་བྱེད། །ངེད་ཀྱིས་ཁྱོད་ནི་སྔར་མ་མཐོང་། །གནས་མཆོག་འདི་ཡང་སྔར་མ་མཐོང་། །རྡོ་རྗེ་གནོད་སྦྱིན་དྲག་པོ་ཆེ། །
เล่ม ๘๔ · หน้า 241b
ཧ་ཧ་ཞེས་དགོད་བཞད་པ་ཡིས། །སྨྲས་པ་རྡོ་རྗེ་གནོད་སྦྱིན་ང་། །ཐམས་ཅད་ཟ་བྱེད་བཟོད་དཀའ་བ། །དེ་ནས་ལྷ་ཆེན་གྱིས་སྨྲས་པ། །རྡོ་རྗེ་གནོད་སྦྱིན་ངས་མི་ཤེས། །ང་ཡིས་ཁྱོད་ནི་སྔར་མ་མཐོང་། །བདག་ཉིད་ཁོ་ན་རང་བྱུང་བ། །རྡོ་རྗེ་དྲག་པོས་རབ་སྨྲས་པ། །
ང་ཡི་བཀའ་ལ་མྱུར་གནས་ཀྱིས། །མིན་ན་རྡོ་རྗེ་འབར་བ་འདིས། །རང་གི་རིགས་ནི་སྲེག་པར་བྱེད། །ལྷ་ཆེན་པོ་ཡིས་ཚིག་སྨྲས་པ། །བསྟན་པ་ལ་ནི་ང་མི་གནས། །འཇིག་རྟེན་གསུམ་གྱི་དབང་ཕྱུག་ང་། །སུ་ཡི་བསྟན་པ་ལ་གནས་པ། །འཁོར་དང་བཅས་པའི་སྟོབས་
གང་ཡིན། །དེ་རིང་ང་ཡིས་བསྟན་པར་བྱ། །ཁྱོད་ལ་སྟོབས་ནི་ཅི་ཡོད་པ། །སྟོབས་ཆེན་ལྡན་པས་བསྟན་པར་གྱིས། །དབང་ཕྱུག་ཆེན་པོ་རྒྱལ་པོ་ཆེ། །འབྱུང་པོའི་ཚོགས་བཅས་ལྷན་ཅིག་ཏུ། །ཚིག་དག་སྨྲས་པར་གྱུར་པ་ནི། །དྲག་པོ་ཉིད་ནི་བསྟན་པར་བྱ། །
སྟོང་གསུམ་གྱི་ནི་འཇིག་རྟེན་འདི། །འོད་ཟེར་འབར་བའི་ཕྲེང་བས་ཁྱབ། །ཧ་ཧ་ཞེས་བྱ་ཤིན་ཏུ་དྲག །དབང་ཕྱུག་ཆེན་པོས་བསྟན་པར་བྱ། །ཨོྃ་ཤཱུ་ལ་ཨ་ཏྲི་ཤཱུ་ལ་མ་ཧཱ་ས་ཧ་སྲ་ཤཱུ་ལ་ཨཱ་ཡུ་དྷེ། རྩེ་གསུམ་མངག་གཞུག་རྒྱལ་པོ་ནི། །སྟོང་ཕྲག་གཅིག་ནི་བྱུང་
བར་འགྱུར། །རྩེ་བཅས་ཀུན་དུ་འབར་བ་ཡིས། །རྡོ་རྗེ་ཅན་དང་ལྷན་ཅིག་འཐབ། །ན་རཱ་ཡ་ནས་སྨྲས་པ། །ཨོྃ་མ་ཧཱ་ས་ཧ་སྲ་ཙཀྲ་ཨཱ་ཡུ་དྷེ། ཁྱབ་འཇུག་གིས་ནི་དེ་དག་སྨྲས། །འཁོར་ལོ་གཅིག་ཏུ་རྣམ་པ་སྟོང་། །ཐམས་ཅད་འོད་ཟེར་འབར་བས་ཁྱབ། །
རྡོ་རྗེ་ཅན་དང་ལྷན་ཅིག་འཐབ། །བརྒྱ་བྱིན་གྱིས་སྨྲས་པ། །ཨོྃ་མ་ཧཱ་ས་ཧ་སྲ་བཛྲ་ཨཱ་ཡུ་དྷེ། རྡོ་རྗེ་སྟོང་ནི་བྱུང་བར་གྱུར། །རྡོ་རྗེ་འབར་བ་ཚ་བས་ཁྱབ། །བརྒྱ་བྱིན་གྱིས་ནི་སྨྲས་པ་ཡིན། །རྡོ་རྗེ་ཅན་དང་ལྷན་ཅིག་འཐབ། །གཞོན་ནུས་སྨྲས་པ། ཨོྃ་མ་ཧཱ་ས་ཧ་སྲ་
ཤ་ཀྵྱཨཱ་ཡུ་དྷེ། གཞོན་ནུས་དེ་སྐད་སྨྲས་ནས་ནི། །མདུང་ནི་རྩེ་གསུམ་སྟོང་བྱུང་གྱུར། །སྒྲ་ནི་དྲག་པོ་སྒྲོགས་བྱེད་ཅིང་། །རྡོ་རྗེ་ཅན་དང་ལྷན་ཅིག་འཐབ། །ཚངས་པས་སྨྲས་པ། ཨོཾ་མ་ཧཱ་ས་ཧ་སྲ་དཎྜ་ཨཱ་ཡུ་དྷེ། ཚངས་པས་དེ་སྐད་སྨྲས་ནས་ནི། །དབྱུག་
เล่ม ๘๔ · หน้า 242a
ཏོ་སྟོང་ནི་བྱུང་གྱུར་ནས། །མཚོན་ཆ་དྲག་པོ་འཇིགས་བྱེད་པས། །རྡོ་རྗེ་ཅན་དང་ལྷན་ཅིག་འཐབ། །གཞན་ཡང་ལྷག་མ་མ་ལུས་པ། །རྣམས་ཀྱིས་ཡང་ནི་མཚོན་ཆ་དག །རེ་རེ་སྟོང་ཕྲག་གཅིག་གྱུར་ནས། །རྡོ་རྗེ་ཅན་དང་ལྷན་ཅིག་འཐབ། །
ཐ་ན་སྤྲུལ་པ་གང་ཡིན་དང་། །ཕྱི་རོལ་གྱི་ནི་དམ་ལྡན་པ། །དེ་རྣམས་ངེས་པར་སྟོང་གྱུར་ནས། །རྡོ་རྗེ་ཅན་དང་ལྷན་ཅིག་འཐབ། །མེ་ཡང་ཀུན་དུ་འབར་གྱུར་ཅིང་། །འཇིགས་པར་བྱེད་པའི་རླུང་ཡང་བྱུང་། །འབྲུག་གི་སྒྲ་དང་གློག་ཆེན་བོས། །ཁྱད་པར་སྲིད་
གསུམ་གནས་པར་གྱུར། །ཧ་ལ་ཧ་ལའི་སྒྲུ་ཆེན་པོ། །ནམ་མཁའ་བར་སྣང་ལ་ནི་གྲག །རྡོ་རྗེ་དྲག་པོ་ཚོགས་ཆེན་པོ། །ལྷ་རྣམས་ཐམས་ཅད་འཐབ་པར་བྱེད། །དེ་ནས་རྒྱལ་པོ་རྡོ་རྗེ་འཛིན། །གཏུམ་པོ་དྲག་པོ་འཇིགས་བྱེད་པས། །ལྷ་ཡི་ལན་གྱི་ཕྱག་རྒྱ་
ནི། །རྡོ་རྗེ་ཡི་ནི་སྙིང་པོ་གསུངས། །ཨོྃ་མ་ཧཱ་ས་ཧ་སྲ་ཧ་ར་བཛྲ་ཙ་ཀྲེ། །ཨོྃ་མ་ཧཱ་བཛྲ་ཤཱུ་ལེ། ཨོྃ་དཱི་བྟ་ཛྭཱལ་ཨག་ནི་བཛྲ། ཨོྃ་བཛྲ་ཤཀྟི། ཨོྃ་མ་ཧཱ་བཛྲ་ནི་དྷི། དེ་ལྟ་བུ་ཡི་རྣམ་པ་རུ། །སྙིང་པོ་དག་ནི་སྟོང་ཕྲག་གཅིག །སྲིད་གསུམ་ཞི་བར་བྱ་བའི་ཕྱིར། །
རྡོ་རྗེ་འཆང་ནི་ཆེན་པོས་ཕྱུང་། །གཏུམ་པོ་འོད་ཟེར་འབར་བས་ཁྱབ། །རྡོ་རྗེ་མེ་དང་ཡང་དག་ལྡན། །དྲག་པོའི་སྙིང་པོ་ལས་བྱུང་གྱུར། །རྡོ་རྗེ་འཆང་ནི་དབུས་ན་བཞུགས། །ལྷ་ཚོགས་ཕྱག་རྒྱ་དེ་དག་ནི། །རྣམ་པར་བཤིག་ཅིང་དུམ་བུར་བྱས། །བཅོམ་
ཞིང་བསྡམས་ཏེ་བསྲེས་ནས་ནི། །ཕྱོགས་རྣམས་ཀུན་དུ་ཐིམ་པར་གྱུར། །རྡོ་རྗེ་མེ་ཡིས་རབ་བསྡམས་པས། །ལྷ་ཡི་རྒྱལ་པོ་འབར་བར་འགྱུར། །འོག་ནས་ས་ནི་རབ་ཏུ་འབར། །སྟེང་ནས་མེ་ནི་ཤིན་ཏུ་གདུངས། །རྡོ་རྗེ་ཁྲོ་བོ་རྒྱལ་པོ་ཆེས། །དབང་ཕྱུག་ཆེན་
པོ་ལ་གསུངས་པ། །ལུས་སྲུལ་པོ་ནི་དྲག་པོ་ཆེ། །ང་ཡི་བཀའ་ནི་རབ་ཏུ་ཉོན། །དུར་ཁྲོད་གནས་ལ་རབ་ཏུ་དགའ། །ལུས་ལ་ཐལ་བ་དག་གིས་བྱུགས། །མི་ཡི་ཤ་ནི་བཟའ་བར་བྱེད། །ང་ཡི་བཀའ་ནི་རབ་ཏུ་ཉོན། །ཁྲག་རློན་གྱིས་ནི་རབ་ཏུ་བསྐུས། །
เล่ม ๘๔ · หน้า 242b
པགས་པ་རློན་པ་གོས་སུ་གྱོན། །ལྷ་རྣམས་ཐམས་ཅད་ཁྱོད་ཀྱི་འཁོར། །ང་ཡི་བཀའ་ནི་རབ་ཏུ་ཉོན། །གདུག་པ་དྲག་ཆེན་མཚན་མོ་རྒྱུ་བ་སློང་མོ་བ། །ཁྲག་ལ་སྤངས་པའི་པགས་ཅན་ལུས་ལ་ཐལ་བས་བྱུགས། །ང་ཡིས་བཀའ་ཉོན་དྲག་པོའི་སེམས་
ལྡན་ལུས་སྲུལ་པོ། །མིན་ན་བསྐལ་པའི་མེ་ཡིས་རྩྭ་བཞིན་ཁྱོད་བསྲེག་བྱ། །རོ་བསྲེགས་ཐལ་བའི་ཕུང་པོ་བཞིན་དུ་ཐལ་བར་འགྱུར། །རིགས་བཅས་དཔུང་ལྡན་དཀྱིལ་འཁོར་དང་བཅས་གནོད་སྦྱིན་དྲག །རྡོ་རྗེ་དྲག་པོ་ཡི་ནི་རབ་གཞོམ་གཞིག་པར་བྱ། །དབང་
ཕྱུག་ཆེན་པོས་སྨྲས་པ། ང་ནི་མ་ལུས་དབང་ཕྱུག་ཆེན་པོའི་འཁོར་ལོས་སྒྱུར། །འཇིག་རྟེན་གསུམ་གྱི་ལྷ་ཚོགས་མ་ལུས་པ་ཡི་འཁོར། །ཤིན་ཏུ་དྲག་ཅིང་རྣམ་གཙིགས་འཇིག་རྟེན་ཁྱོད་ཡིན་ཡང་། །ཁྱོད་ཀྱིས་ང་ཡི་བཀའ་ནི་མཉན་པར་གྱིས། །གདུག་དང་
སངས་རྒྱས་མང་པོའི་འཁོར་ནི་སངས་རྒྱས་ཆོས་ཀྱི་འབྱུང་གནས་ང་ཡིས་སྤྲུལ། །ཞི་ཞིང་དེ་ལ་རྣམ་འདུལ་གསང་བ་དྲི་མེད་ཉོན་མོངས་མེད་པའི་ཕ་རོལ་ཕྱིན། །དེ་འདྲའི་མགོན་པོ་དགའ་བ་དུས་གསུམ་བཞུགས་པ་ཐམས་ཅད་ནས་དབང་བསྐུར། །སླར་ཡང་
ང་ཡི་འབྱུང་པོའི་ཚིག་ཉོན་ཞེས་པའི་ཚིག་ནི་འདི་ལྟ་བུ། །དེ་ནས་རྒྱལ་པོ་རྡོ་རྗེ་འཛིན། །འདུལ་བའི་དོན་ལ་ཤིན་ཏུ་མཁས། །ཁྲོ་བོ་གདུག་པ་གཏུམ་ཆེན་པོ། །རབ་འབར་ཁྲོ་བའི་རྒྱལ་པོ་ནི། །རྡོ་རྗེའི་བྱིན་བརླབས་ཕྱག་རྒྱ་ལས། །བྱ་བ་དེ་འདྲའི་ཏིང་འཛིན་ལ། །
སྙོམས་པར་ཞུགས་ནས་སེམས་དཔའ་ཆེས། །རང་རིགས་ཁྲོ་བོ་ལས་བྱུང་བ། །གདུག་པ་རྣམས་ནི་འདུལ་བའི་ཕྱིར། །ཁྲོ་བོའི་ཆོས་ཀྱི་ཚུལ་བཟུང་ནས། །རྐང་པ་ནས་བརྩམས་སྤྱི་བོའི་བར། །ལུས་ཀུན་ལས་ནི་རྣམ་པར་ཕྱུང་། །ཨོྃ་བཛྲ་ཀྲོ་དྷ་ཨུཥྞི་ཥ་ཧཱུྃ།
རྡོ་རྗེའི་གཙུག་ཏོར་ཁྲོ་བོ་ཆེ། །འབར་བའི་སྤྱི་བོ་ནས་ཕྱུང་ནས། །ས་རྣམས་ཐམས་ཅད་གཡོ་བྱེད་ཅིང་། །ཁྲོ་བོའི་རྒྱལ་པོ་ཐམས་ཅད་འཇོམས། །ཨོྃ་བཛྲ་བྷྲྀ་ཀུ་ཊི་ཀྲོ་དྷ་ཧཱུྃ། ཁྲོ་བོའི་རྒྱལ་པོ་ཁྲོ་གཉེར་ཅན། །མཛོད་སྤུ་ལས་ནི་རབ་ཏུ་བྱུང་། །འཇིགས་བྱེད་དྲག་པོ་
เล่ม ๘๔ · หน้า 243a
ཡང་དག་ལྡན། །ལུས་རྣམས་ཐམས་ཅད་འབར་འགྱུར་བ། །ཨོྃ་ནི་སུམྦྷ་བཛྲ་ཧཱུྃ། རྡོ་རྗེ་རིག་པ་མཆོག་རྒྱལ་པོ། །ཁ་ལས་རབ་ཏུ་བྱུང་བར་གྱུར། །སྤྱི་བོ་ནས་བརྩམས་རྐང་མཐིལ་བར། །རྡོ་རྗེ་འབར་བ་ཡང་དག་ལྡན། །ཊཀྐི་ཧཱུྃ་ཛཿ། ཐུགས་
ཀྱི་ཁྲོ་བོ་རྒྱལ་པོ་ཆེ། །ཐུགས་ཀ་ནས་ནི་རབ་ཏུ་བྱུང་། །འབར་བའི་ཕྲེང་བས་ཁྱབ་པའི་སྐུ། །འཇིགས་སུ་རུང་བ་སྤུ་ལངས་བྱེད། །ཨོྃ་བཛྲ་ཨཾ་ཀུ་ཤ་ཨཱ་ཀརྵ་ཡ་ཧཱུྃ། རྡོ་རྗེ་ལྕགས་ཀྱུ་ཁྲོ་བོ་ཆེ། །ཕྲག་བ་གཡས་ནས་རབ་ཏུ་བྱུང་། །རྡོ་རྗེ་ལྕགས་ཀྱུ་གསོར་བྱེད་
ཅིང་། །རྡོ་རྗེ་འབར་བ་ཡང་དག་ལྡན། །ཨོྃ་བཛྲ་བཱ་ཤ་ཀྲོ་དྷ་ཨཱ་ཀདྜྷྱ་ཧཱུྃ་ཕཊ། རྡོ་རྗེ་ཞགས་པ་ཁྲོ་བོ་ཆེ། །ཕྲག་པ་གཡོན་ནས་རབ་ཏུ་བྱུང་། །རྡོ་རྗེ་འབར་བར་ཡང་དག་ལྡན། །རྡོ་རྗེ་ཞགས་པས་བསྐོར་བར་བྱེད། །ཨོྃ་བཛྲ་ཀཱི་ལི་ཀྲོ་དྷ་ཧཱུྃ་ཕཊ། ཁྲོ་བོའི་རྒྱལ་པོ་
ལྕགས་ཀྱུ་ཐོགས། །ལྟེ་བའི་དབུས་གནས་རབ་ཏུ་ཕྱུང་། །ཀུན་ནས་འབར་བ་ཡང་དག་ལྡན། །བློ་མཆོག་རྡོ་རྗེ་གནོད་སྦྱིན་མཚུངས། །ཨོྃ་བཛྲ་མེ་ཁ་ལཱ་ཀྲོ་དྷ་ཧཱུྃ་ཕཊ། ཁྲོ་བོ་ཆེན་པོ་སྐ་རགས་ནི། །རྐེད་པའི་རྡོ་རྗེ་རབ་ཏུ་ཕྱུང་། །ཀུན་ནས་འབར་བ་ཡང་དག་ལྡན། །
ཕྱག་རྒྱ་དང་ནི་ལྷན་ཅིག་ལྡན། །ཨོྃ་བཛྲ་ཀྲོ་དྷ་བ་ལ་ཧཱུྃ། ཁྲོ་བོའི་རྒྱལ་པོ་ཆེན་པོ་སྟོབས། །དཔུང་བ་གཡས་ནས་རབ་ཏུ་ཕྱུང་། །རྡོ་རྗེ་འབར་བས་འབར་བར་གྱུར། །མེ་ཡིས་ཤིན་ཏུ་ང་རྒྱལ་གྱུར། །ཨོྃ་བཛྲ་བ་ལཱ་ཡ་ཀྲོ་དྷ་ཧཱུྃ། ཁྲོ་བོའི་རྒྱལ་པོ་གདུ་བུ་ནི། །དཔུང་
པ་གཡོན་ལས་ཡང་དག་བྱུང་། །གསང་ཞིང་རྡོ་རྗེ་འབར་བས་ཁྱབ། །རྡོ་རྗེ་ཁྲོ་བོས་རབ་ཏུ་ཁེངས། །ཨོྃ་ས་མ་ཡ་བཛྲ་ཀྲོ་དྷ་ཧཱུྃ་ཧཱུྃ་ཕཊ། དམ་ཚིག་ཁྲོ་བོའི་རྒྱལ་པོ་ནི། །དེ་བཞིན་ཁྲོ་བོའི་གནོད་བྱེད་པ། །ཁུ་ཚུར་གཡས་ནས་རབ་ཏུ་ཕྱུང་། །ཀུན་ནས་འབར་བ་
ཡང་དག་ལྡན། །ཨོྃ་བཛྲ་མུཥྚི་ཀྲོ་དྷ་ཧཱུྃ་ཕཊ། ཁྲོ་བོ་ཁུ་ཚུར་དྲག་པོ་ཆེ། །ཁུ་ཚུར་གཡོན་ལས་རབ་ཏུ་བྱུང་། །རྡོ་རྗེ་འབར་བ་དག་གིས་གསལ། །རྡོ་རྗེ་མེ་ཡིས་རབ་ཏུ་བརྒྱན། །ཨོྃ་བཛྲ་བན་དྷ་ཀྲོ་དྷ་ཧཱུྃ། ས་མ་ཡ་ཧཱུྃ། ཨོྃ་བཛྲ་ཨཉྫ་ལི་བན་དྷ་ཀྲོ་དྷ་ཧཱུྃ། ས་
เล่ม ๘๔ · หน้า 243b
མ་ཡ་ཧཱུྃ། རྡོ་རྗེ་འཆིང་བ་རྒྱལ་པོ་ཆེ། །དེ་བཞིན་རྡོ་རྗེ་སོར་མོ་ཉིད། །ཁྲོ་བོ་ལག་པ་གཡས་གཡོན་གྱི། །སོར་མོ་དག་ལས་ཡང་དག་བྱུང་། །ཨོྃ་བཛྲ་ན་ཁ་ཧཱུྃ། ཨོྃ་བཛྲ་ཀྲོ་དྷ་ཨཾ་ཀུ་ལི་མ་ཧཱ་ཀྲོ་དྷ་ཧཱུྃ། རྡོ་རྗེ་སྡེར་མོ་ཁྲོ་བོ་ཆེ། །དེ་བཞིན་རྡོ་རྗེ་སྡེར་མོའི་གདོང་། །
ཕྱག་ནི་གཡོན་དང་གཡས་པ་ཡི། །སོར་མོ་དག་ལས་རབ་ཏུ་བྱུང་། །ཨོྃ་བཛྲ་ཀུ་མཱ་ར་ཀྲོ་དྷ་ཀ་ཊི་རཱ་ག་ཧཱུྃ། ཨོྃ་བཛྲ་ཀུ་མཱ་ར་ཀྲོ་དྷ་མུརྡྷ་ཌྷ་ཀ་ཧཱུྃ་ཕཊ། ཁྲོ་བོའི་རྒྱལ་པོ་རྐེད་པ་དང་། །དེ་བཞིན་ཁྲོ་བོ་སྤྱི་གཙུག་དག །རྒྱལ་པོ་བརླ་ནི་གཡོན་པ་དང་། །གཡས་པ་དག་
ལས་རབ་ཏུ་བྱུང་། ཨོྃ་ཤྲྀཾ་ཁ་ལི་མ་ཧཱ་ཀྲོ་དྷ་བན་དྷ་ཧཱུྃ་ཕཊ། ཨོྃ་བཛྲ་ཀྲོ་དྷ་ཨཱ་ཤཱ་ནི་བན་དྷ་ཧཱུྃ། གནམ་ལྕགས་རྡོ་རྗེ་ལུ་གུ་རྒྱུད། །ཁྲོ་བོའི་རྒྱལ་པོ་རྫུ་འཕྲུལ་ཆེ། །རྒྱལ་པོ་འབར་བའི་ཕྲེང་བས་ཁྱབ། །པུས་མོའི་ལྷ་ང་དག་ལས་བྱུང་། །ཨོྃ་བཛྲ་བན་དྷ་ཀྲོ་དྷ་ཧ་ན་ཧཱུྃ་ཕཊ།
ཨོྃ་བཛྲ་ཀྲོ་དྷ་ཨཾ་ཀུ་ཤ་ཧཱུྃ་ཕཊ། རྡོ་རྗེ་དབྱུག་པ་ཁྲོ་བོ་ཆེ། །རྡོ་རྗེ་ཡི་ནི་ཡན་ལག་དྲངས། །འབར་བ་དང་བཅས་གནོད་སྦྱིན་གཉིས། །རྗེ་ངར་དག་ལས་རབ་ཏུ་ཕྱུང་། །ཨོྃ་ནཱུ་པུ་ར་ཀྲོ་དྷ་ཧཱུྃ། ཨོྃ་བཛྲ་ཀྲོ་དྷ་མོ་གྷ་བེ་ག་ཨཱ་ན་ཡ་ཧཱུྃ་ཕཊ། དེ་ནས་དཀའ་ཐུབ་ཁྲོ་བོ་ཆེ། །དེ་
བཞིན་རྡོ་རྗེ་དོན་ཡོད་ཉིད། །རྒྱལ་པོ་ཤུགས་ཆེན་གཉིས་པོ་ནི། །གདུ་བུའི་རྐང་ལས་རབ་ཏུ་བྱུང་། །ཨོྃ་བཛྲ་བན་དྷ་ཧ་ལ་ཀྲོ་དྷ་ཧཱུྃ་ཕཊ། ཨོྃ་བཛྲ་པཱ་ཏཱ་ལ་མཱ་ར་ཡ་ཀྲོ་དྷ་ཧཱུྃ་ཕཊ། རྐང་པ་ཁྲོ་བོ་ཤུགས་ཆེན་པོ། །དེ་བཞིན་མཐིལ་གྱི་ཁྲོ་བོ་ཉིད། །འབར་བ་འཕྲོ་བ་ལྷུར་
ལེན་པ། །གཉིས་པོ་ཞབས་ཀྱི་མཐིལ་ལས་བྱུང་། །དེ་དག་ལ་སོགས་རྒྱལ་པོ་ནི། །དཔག་ཏུ་མེད་པར་རབ་ཏུ་བྱུང་། །གང་གཱའི་བྱེ་སྙེད་གྲངས་མེད་པ། །ཕྲ་རབ་རྡུལ་གྱི་ཁམས་དག་ནི། །བ་སྤུའི་གསེབ་ནི་ཐམས་ཅད་དང་། །ལུས་ཀྱི་གསེབ་ནི་ཐམས་ཅད་ནས། །
རྡོ་རྗེ་ཁྲོ་བོ་རྒྱལ་པོ་ཆེ། །རང་གི་སྙིང་པོ་ལས་བྱུང་འགྱུར། །རྡོ་རྗེ་ཁྲོ་བོའི་ཏིང་འཛིན་གྱིས། །ཕྱོགས་རྣམས་ཀུན་དུ་ཡོངས་སྤྲོས་ཏེ། །སླར་ཡང་གཅིག་ཏུ་གྱུར་ནས་ནི། །དཀྱིལ་འཁོར་དུ་ནི་ཡང་དག་ག་གནས། །སངས་རྒྱས་ཀུན་གྱི་སྤྱན་སྔར་འདུས། །ཆེད་དུ་
เล่ม ๘๔ · หน้า 244a
བརྗོད་པ་ཡང་དག་བརྗོད། །ཨེ་མའོ་སངས་རྒྱས་ཐབས་ཆེན་པོ། །ཨེ་མའོ་ཡེ་ཤེས་ཤིན་ཏུ་བཟང་། །སངས་རྒྱས་ཀུན་གྱི་ཏིང་འཛིན་ནི། །ཐེག་པ་ཆེན་པོ་ཞེས་བྱར་བཤད། །ཨེ་མའོ་སངས་རྒྱས་ཐམས་ཅད་ནི། །དཔག་ཏུ་མེད་པ་ཞེས་བྱར་
གྱུར། །རྡོ་རྗེའི་རིགས་ཀྱི་ཁྲོ་བོ་འདི། །ཐམས་ཅད་རྡོ་རྗེའི་རིགས་སུ་བཤད། །སེམས་ཅན་ཀུན་གྱི་དོན་བྱའི་ཕྱིར། །དེ་ཉིད་སངས་རྒྱས་རིགས་ཆེན་པོ། །དེ་ནས་དེ་ཡི་གསང་བའི་མཚན། །ཐམས་ཅད་རྡོ་རྗེའི་རིགས་སུ་བཤད། །ཁྲོ་བོ་ཆེ་ལས་ཡང་དག་བྱུང་། །
རྡོ་རྗེ་ཁྲོ་བོའི་དབང་ཕྱུག་བཤད། །རྡོ་རྗེ་གཙུག་ཏོར་རྡོར་མཛོད་སྤུ། །གནོད་མཛེས་བདག་ཅག་སྟོབས་པོ་ཆེ། །ཐུགས་ཀྱི་ཁྲོ་བོ་རྒྱལ་པོ་ཆེ། །རྒྱལ་པོ་འཁོར་ལོས་སྒྱུར་བ་དང་། །རྡོ་རྗེ་ལྕགས་ཀྱུ་རྡོ་རྗེ་ཞགས། །རྐེད་པའི་ཁྲོ་བོ་སྟོབས་པོ་ཆེ། །སྐ་རགས་སྟོབས་ལྡན་
ཉིད་དང་ནི། །ལག་གདུབ་དེ་བཞིན་དམ་ཚིག་དང་། །རྡོ་རྗེ་ཁུ་ཚུར་རྡོ་རྗེ་བསྡམས། །རྡོ་རྗེ་སོར་མོ་ཤིན་ཏུ་དྲག །རྡོ་རྗེ་སེན་མོ་རྡོ་རྗེ་གདོང་། །དེ་བཞིན་རྐེད་པ་ཁྲོ་རྒྱལ་པོ། །ཁྲོ་བོ་སྤྱི་གཙུག་རྒྱལ་པོ་དང་། །རྫུ་འཕྲུལ་ཆེན་པོ་ལུ་གུ་རྒྱུད། །རྡོ་རྗེ་གནམ་ལྕགས་རྡོ་རྗེ་
དབྱིག །རྡོ་རྗེ་ཁྲོ་བོ་ཡན་ལག་དྲག །རྡོ་རྗེ་རྐང་གདུབ་རྡོར་དོན་ཡོད། །རྡོ་རྗེ་ཞབས་དང་དེ་བཞིན་མཐིལ། །དམ་ཚིག་རྡོ་རྗེ་རྒྱལ་པོ་འདི། །རྡོ་རྗེ་ཡི་ནི་རིགས་སུ་བཤད། །དེ་དག་ལ་སོགས་རྒྱལ་པོ་ནི། །རྒྱལ་པོ་ཆེན་པོ་རྫུ་འཕྲུལ་ཆེ། །བྱང་ཆུབ་སེམས་ལས་ཡང་
དག་བྱུང་། །རྟག་ཏུ་གཞན་ཡང་གྲངས་མེད་པ། །ཁྲོས་པས་རང་གི་ཤ་ཟ་ཞིང་། །འབར་བའི་ཕྲེང་བ་ས་ཁྱབ་པར་གནས། །བསྐལ་པ་ཡི་ནི་མེ་ལྟར་འབར། །རྡོ་རྗེ་ཁྲོ་བོས་དཀྱིལ་འཁོར་ནི། །རྡོ་རྗེའི་རིགས་ནི་བསྐྱེད་ནས་ཀྱང་། །རབ་ཏུ་དྲག་འཛིན་བཀའ་བསྒོས་
པས། །གདུག་པ་རྣམས་ནི་འདུལ་བར་གྱིས། །ང་ཡི་བཀའ་ཡང་མཉན་པར་གྱིས། །རྡོ་རྗེ་ཅན་ཀུན་རང་ཉིད་ཀྱི། །བཀའ་ཐོབ་ནས་ནི་གཟུང་བྱ་སྟེ། །ལྷ་རྣམས་ཀུན་གྱི་གསུང་གཅིག་གིས། །རིག་པ་འདི་ནི་བརྗོད་པར་གྱུར། །ཨོྃ་ནི་སུམྦྷ་བཛྲ་ཧཱུྃ་ཕཊ། རྡོ་རྗེ་
เล่ม ๘๔ · หน้า 244b
ཁྲོ་བོ་སྟོབས་པོ་ཆེ། །གཙུག་ཏོར་ལ་སོགས་ཀུན་གསུངས་པ། །ལྷ་ཆེན་ལ་སོགས་གདུག་པ་རྣམས། །འོག་ཏུ་ཁ་བལྟས་འགྱེལ་བར་གྱུར། །རྡོ་རྗེ་ཁྲོ་བོ་སྟོབས་པོ་ཆེས། །ལྷ་རྣམས་བརྒྱལ་བར་གྱུར་ནས་ནི། །རྡོ་རྗེ་འབར་བ་འབར་ཞེས་པས། །སྙིང་པོ་
དག་ནི་ཡང་དག་བརྗོད། །ཨོྃ་བཛྲ་ཨ་ན་ལ་ད་ཧ་པ་ཙ་མ་ཐ་བྷཉྫ་ར་ཎ་ཧཱུྃ་ཕཊ། ཁྲོ་བོ་ཆེན་པོ་རྡོ་རྗེའི་མེ། །སྐད་ཅིག་དེ་ལས་བྱུང་ནས་ནི། །ལྷ་རྣམས་དེ་དག་བསྲེགས་ནས་ཀྱང་། །དེ་བཞིན་འོག་ཏུ་བསྒྱེལ་བར་གྱུར། །རྡོ་རྗེ་མེས་ནི་རབ་ཏུ་སྲེག །རྡོ་རྗེ་འབར་བས་འབར་
བར་གྱུར། །ཚིག་ཅིང་བཙོས་པར་གྱུར་ནས་ནི། །ལྷ་ལ་སོགས་པ་འོ་དོད་འབོད། །རྡོ་རྗེ་ཁྲོ་ཆེན་དེ་རྣམས་དེ། །དེ་བཞིན་ཁྲོ་ཆེན་ལ་སོགས་པས། །ཐམས་ཅད་གསུང་གཅིག་བྱས་ནས་ནི། །སླར་ཡང་སྙིང་པོ་གསུངས་པར་གྱུར། །ཨོྃ་བཛྲ་ཨཱ་བེ་ཤ་ཨ། རྡོ་རྗེ་དབབ་
པའི་ཁྲོ་བ་ཆེ། །རྡོ་རྗེ་ཅན་གྱི་ཐུགས་ལས་བྱུང་། །ལྷ་རྣམས་ཀུན་གྱི་གནས་སོང་ནས། །དེ་བཞིན་ལྷ་ཆེན་ལ་སོགས་པ། །ལྷ་རྣམས་ཀུན་ལ་ཡང་དག་བབས། །རྡོ་རྗེ་དབབ་པར་རབ་སྡུག་བསྔལ། །བྱས་ནས་རང་གི་ཡན་ལག་དག །གཅིག་ལ་གཅིག་ནི་ཟ་བར་
བྱེད། །རྡོ་རྗེ་ཅན་དང་བཅས་པ་ཀུན། །རྡོ་རྗེ་ཞགས་པ་ཡང་དག་བརྗོད། །ཨོྃ་བཛྲ་ཛྭ་ལ་ཨགྣི་པྲ་དཱི་པྟ་མ་ཧཱ་བཛྲ་ཨཾ་ཀུ་ཤ་ཨཱ་ཀཪྵ་ཡ་ཧཱུྃ། རྡོ་རྗེ་ལྕགས་ཀྱུ་རྒྱལ་སོང་ནས། །སྐད་ཅིག་གིས་ནི་ཡང་དག་འགུགས། །ལྷ་རྣམས་ཐམས་ཅད་བཀུག་ནས་ནི། །སྤྱི་བོ་རུ་
ནི་ལྟུང་བར་བྱེད། །རྡོ་རྗེ་ལྕགས་ཀྱུ་ཡང་དག་འགུགས། །རྡོ་རྗེ་ཞགས་པས་དྲངས་པར་གྱུར། །རྡོ་རྗེ་འབར་བས་རབ་བསྲེགས་ནས། །སྟེང་དུ་རྐང་པ་འོག་ཏུ་མགོ། །ཧ་ཧ་ཞེས་ནི་སྒྲོགས་བྱེད་ཅིང་། །འཇིགས་པའི་སྐད་ཆེན་སྡུག་བསྔལ་གྱུར། །རྡོ་རྗེ་ཅན་ལ་
གསོལ་བ་འདེབས། །སྟོབས་ཆེན་གཞོམ་པར་མ་མཛད་ཅིག །དེ་བཞིན་ལྷ་ལ་སོགས་པ་ཀུན། །དཀྱིལ་འཁོར་དུ་ནི་དགུག་པར་གྱུར། །རྡོ་རྗེ་ཅན་དང་བཅས་ཀུན་གྱིས། །རྡོ་རྗེ་ལྕགས་སྒྲོག་ཡང་དག་བརྗོད། །ཨོྃ་བཛྲ་སྥོ་ཊ་བན་དྷ་ཧཱུཾ་ཕཊ། ལྷ་ཚོགས་གདུག་པ་
เล่ม ๘๔ · หน้า 245a
དེ་དག་ནི། །འཆིང་བ་ལྔ་ཡིས་བཅིངས་པར་གྱུར། །རྡོ་རྗེ་ལྕགས་སྒྲོག་ཁྲོ་བོ་ཆེ། །འཆིང་བ་བརྟན་པ་བཅིངས་པར་གྱུར། །ཁྲོ་བོ་རྡོ་རྗེ་རྒྱལ་པོ་ཆེ། །ཤིན་ཏུ་གཏུམ་པོ་སྟོབས་ཆེན་པོ། །སླར་ཡང་སྙིང་པོ་ཡང་དག་དྲན། །རང་གི་སྙིང་པོ་ཡང་
དག་བརྗོད། །ཧཱུྃ། སྙིང་པོ་དྲག་པོ་བརྗོད་པ་ཡིས། །གདུག་པ་དེ་རྣམས་རབ་ཏུ་འགྱེལ། །གཡོ་མེད་ཤི་བ་བཞིན་དུ་གྱུར། །འཆི་བའི་སྡུག་བསྔལ་ཉེ་བར་འཐོབ། །དེ་ནས་རྒྱལ་པོ་རྣམ་སྣང་མཛད། །ཆོས་ཀུན་དབང་ཕྱུག་དབང་དང་ལྡན། །རྡོ་རྗེ་ཁྲོ་བོ་རྒྱལ་པོ་ཆེ། །
རྡོ་རྗེ་འཆང་ལ་བོས་པར་གྱུར། །སེམས་དཔའ་ཆེན་པོ་མཉན་པར་གྱིས། །འདི་རྣམས་སེམས་ཅན་རབ་འཇིགས་བྱེད། །འཇིག་རྟེན་གསུམ་གྱི་འཁོར་ལོ་འདི། །སྲོག་ནི་གཞོམ་པར་མ་བྱེད་ཅིག །དེ་ནས་རྒྱལ་པོ་རྡོ་རྗེ་འཛིན། །རྡོ་རྗེ་ཀུན་བདག་དབང་ལྡན་པས། །
སངས་རྒྱས་གསུང་ནི་ཐོས་ནས་སུ། །རིག་པ་འདི་ནི་ཡང་དག་བརྗོད། །ཨོྃ་བཛྲ་ཨུཏྟིཥྛ། རྡོ་རྗེ་སློང་བ་རྫུ་འཕྲུལ་ཆེ། །དེ་ནི་བརྗོད་པ་ཙམ་གྱིས་ནི། །ལྷ་ལ་སོགས་པ་ཐམས་ཅད་ནི། །སླར་ཡང་གསོན་པ་ཉིད་དུ་གྱུར། །སྡུག་བསྔལ་ཀུན་དང་རབ་ཏུ་ཕྲལ། །
འཆི་བའི་སྡུག་བསྔལ་ཞི་བར་གྱུར། །རྡོ་རྗེ་སློང་བའི་བྱམས་པ་ཡིས། །སངས་རྒྱས་ཐམས་ཅད་རབ་བསྐུལ་བས། །དེ་ནས་ལྷ་ལ་སོགས་པ་ཀུན། །སངས་རྒྱས་བྱམས་པས་ལངས་པར་གྱུར། །ཐལ་མོ་སྦྱར་ནས་ཚིག་གཅིག་གིས། །བཅོམ་ལྡན་འདས་ལ་ཞུས་
གྱུར་པ། །བཅོམ་ལྡན་ཉེས་པ་གང་གིས་ནི། །བདག་ཅག་འདི་ལྟར་འདུལ་བར་མཛད། །སངས་རྒྱས་ཐུགས་རྗེ་ཅན་ཀུན་གྱིས། །བདག་ཅག་ཡོངས་སུ་བསྐྱབ་ཏུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ཁྱེད་ཅག་ཡོངས་སུ་བསྐྱབ་པ་དང་། །ཕན་
གདགས་པར་ནི་ངས་མི་ནུས། །འདི་ནི་དྲག་པོ་རྡོ་རྗེ་འཛིན། །སངས་རྒྱས་ཀུན་གྱིས་བདག་པོར་བཤད། །དེ་རྣམས་ཀྱིས་གསོལ་བ། ཁྱོད་ཀྱིས་བཅོམ་ལྡན་འདས་ཀྱི་དོན། །ཇི་ལྟར་རུང་ལགས་མི་འཚལ་ལོ། །གང་ཞིག་སངས་རྒྱས་བདག་པོར་གྱུར། །
เล่ม ๘๔ · หน้า 245b
སངས་རྒྱས་འཕགས་པ་ཇི་ལྟ་བུ། །བཅོམ་ལྡན་འདས་ཀྱིས་བཀའ་སྩལ་པ། །སངས་རྒྱས་ཀུན་གྱི་བྱང་ཆུབ་གང་། །དེ་ནས་རྡོ་རྗེ་ཅན་དུ་གྱུར། །བྱང་ཆུབ་སེམས་གང་དེ་རྡོ་རྗེ། །རྡོ་རྗེ་གང་ཡིན་དྲག་པོ་འཛིན། །དེ་རྣམས་ཀྱིས་གསོལ་པ། སངས་རྒྱས་
ཐམས་ཅད་རབ་ཏུ་ཞི། །དེ་ནི་བྱང་ཆུབ་དེ་དང་མཚུངས། །བརྩེ་དང་བྱང་ཆུབ་སེམས་ལས་བྱུང་། །དེ་འདྲའི་དྲག་པོ་ག་ལས་བྱུང་། །བཅོམ་ལྡན་འདས་ཀྱིས་བཀའ་སྩལ་པ། །འདི་ནི་ཐབས་ཀྱིས་འདུལ་བ་སྟེ། །གདུག་པ་ཐམས་ཅད་རབ་འདུལ་བྱེད། །དཔལ་ལྡན་
རྡོ་རྗེ་འཛིན་པ་འདི། །བྱང་ཆུབ་སེམས་ལས་ཡང་དག་བྱུང་། །དེ་ནས་རྒྱལ་པོ་རྡོ་རྗེ་འཛིན། །རྡོ་རྗེ་ཁྲོ་བོ་བདག་ཆེན་པོས། །ལྷ་ཚོགས་ཀུན་ལ་བོས་ནས་ནི། །དབང་ཕྱུག་ཆེན་པོ་ལ་གསུངས་པ། །ང་ཡི་བསྟན་པའི་བཀའ་དག་ནི། །ཀྱཻ་གདུག་པ་དག་མཉན་པར་གྱིས། །
མིན་ན་རྡོ་རྗེ་འབར་བ་ཡིས། །རིགས་དང་བཅས་པ་ང་ཡིས་སྲེག །ཁྱབ་འཇུག་ལ་སོགས་ལྷ་རྣམས་ཀྱིས། །ཚིག་གཅིག་ཏུ་ནི་འདི་སྐད་ཞུས། །གཙོ་བོས་ཇི་ལྟར་བཀའ་སྩལ་པ། །རྒྱལ་པོ་ཆེན་པོ་དེ་བཞིན་བགྱི། །དེ་ནས་ལྷ་ཆེན་གྱིས་སྨྲས་པ། །རྡོ་རྗེ་གནོད་སྦྱིན་ངས་མི་
ཤེས། །ང་ནི་རང་ཉིད་རྒྱལ་པོ་སྟེ། །ང་ཡི་བཀའ་ནི་མཉན་པར་གྱིས། །ལྷ་ཆེན་པོ་ཡི་ཚིག་གསན་ནས། །རྡོ་རྗེ་ཁྲོ་བོ་རབ་འབར་བས། །རྡོ་རྗེ་གནོད་སྦྱིན་འཇོམས་ཞེས་པ། །ཁྲོ་བོའི་རྒྱལ་པོ་ཡང་དག་བརྗོད། །ཨོྃ་བཛྲ་ནི་སུམྦྷ་ཧཱུྃ། ཤིན་ཏུ་གཏུམ་པ་སྟོབས་ཆེན་པོ། །
ཁྲོ་བོ་འདི་ནི་བརྗོད་པ་ཡིས། །དབང་ཕྱུག་ཆེན་པོ་བརྒྱལ་གྱུར་ནས། །དེ་བཞིན་ས་ལ་འགྱེལ་བར་གྱུར། །གཡོ་མེད་འཆི་བའི་དབང་དུ་གྱུར། །ཤིང་འགྱེལ་བཞིན་དུ་གནས་པར་གྱུར། །འགུལ་བ་མེད་ཅིང་གཡོ་བ་མེད། །རྡོ་རྗེ་ཁྲོ་བོས་གདུངས་པར་གྱུར། །བཅོམ་
ལྡན་འདས་ཀྱིས་བཀའ་སྩལ་པ། །རྡོ་རྗེ་ཁྲོ་བོ་ཐམས་ཅད་མཁྱེན། །བདག་ཉིད་ཆེན་པོ་འདི་ཡིས་ནི། །སྲོག་གི་རྒྱུ་ནི་ཟད་པ་དང་། །དེ་ཉིད་ཉམས་པར་ཅི་ཕྱིར་བྱེད། །དེ་ནས་རྒྱལ་པོ་རྡོ་རྗེ་འཛིན། །སངས་རྒྱས་ཐུགས་རྗེས་བསྐུལ་བ་ཡིན། །རྡོ་རྗེ་ཚེ་ཞེས་བྱ་བ་སྟེ། །རྡོ་རྗེའི་
เล่ม ๘๔ · หน้า 246a
རིག་པ་འདི་གསུངས་སོ། །ཨོྃ་བཛྲ་ཨཱ་ཡུཿ། རིག་པ་འདི་ནི་བརྗོད་པ་ཡིས། །དབང་ཕྱུག་ཆེན་པོས་ཡང་དག་ལངས། །རྡོ་རྗེ་ཚེ་ཡིས་གསོན་བྱས་ནས། །བདེ་བ་ཆེན་པོ་ཐོབ་པར་གྱུར། །རྣམ་པར་སྣང་མཛད་ཐུབ་ཆེན་ལ། །ཞབས་དག་ལ་ནི་བཏུད་
ནས་གསོལ། །མགོན་པོ་བཅོམ་ལྡན་སྐྱབས་སུ་གསོལ། །རྡོ་རྗེ་འཛིན་པ་དེ་གདུག་མིན། །ཀུན་མཁྱེན་བཅོམ་ལྡན་བཀའ་སྩལ་པ། །ང་ཡིས་བརྩེ་བར་བྱ་མི་ནུས། །འདི་ནི་གདུག་པ་ཤིན་ཏུ་དྲག །དེ་ཉིད་ལ་ནི་སྐྱབས་སུ་སོང་། །རྡོ་རྗེ་ཁྲོ་བོས་ལྷ་ཆེན་པོ། །ཀུན་དུ་
བོས་ནས་འདི་སྐད་སྨྲས། །ང་ཡིས་བསྟན་པའི་བཀའ་དག་ནི། །གདུག་པ་ཆེན་པོ་མཉན་པར་གྱིས། །རྡོ་རྗེ་གནོད་སྦྱིན་བདག་ཆེན་ལ། །ལྷ་ཆེན་པོ་ཡིས་སླར་སྨྲས་པ། །འཆི་བ་ཆེན་པོ་བཟོད་ནུས་ཀྱི། །ཁྱོད་ཀྱི་བཀའ་ལ་གནས་མི་བྱེད། །རྡོ་རྗེ་ཁྲོ་བོ་དྲག་པོ་ཆེ། །
ཁྲོས་པས་གདུག་པ་འཕེལ་འགྱུར་ན། །ཧཱུྃ་ནི་ཤིན་ཏུ་འཇིགས་བྱེད་པ། །སྙིང་པོ་དྲག་པོ་བརྗོད་པར་གྱུར། །ཧཱུྃ། ཡི་གེ་ཧཱུྃ་ནི་བརྗོད་པ་ཡིས། །དབང་ཕྱུག་ཆེན་པོ་སླར་ཡང་འགྱེལ། །རྡོ་རྗེ་ཁྲོ་བོ་དྲག་པོ་ཆེ། །རྐང་པར་དགུག་པ་ཡང་དག་བརྗོད། །ཨོྃ་པཱ་ཏ་ཨཱ་ཀཪྵ་ཎ་
བཛྲ་ཧཱུྃ། དེ་ནས་རྡོ་རྗེ་དབང་པོ་འདི། །བརྗོད་པས་རྡོ་རྗེ་ཁྲོ་བོ་ཕྱུང་། །ཚིག་ནི་འདི་སྐད་བརྗོད་པར་གྱུར། །བཀའ་སྩལ་བརྗོད་ཅིང་འོད་ཆེན་པོ། །རྡོ་རྗེ་ཁྲོ་བོས་བཀའ་སྩལ་པ། །ཨོྃ་བཱ་ཏ་ཨཱ་ཀཪྵ་ཡ་སརྦ་བཛྲ་དྷ་ར་ཀ་ཙ་ར་ཕཊ་བཛྲ་ཧཱུྃ་ཛཿ། ཁྲོ་བོ་ཆེན་པོས་འདི་གསུངས་
ནས། །དབང་ཕྱུག་ཆེན་པོ་ཨུ་མར་བཅས། །རྐང་པས་འགུགས་པའི་རྡོ་རྗེ་ཡིས། །རྡོ་རྗེ་རྐང་པ་དག་གིས་བཀུག །རྡོ་རྗེ་ཁྲོ་བོས་དེ་དག་བཀུག །སྟེང་དུ་རྐང་པ་འོག་ཏུ་མགོ། །འཇིག་རྟེན་ཐམས་ཅད་དགོད་འགྱུར་ཅིང་། །རྡོ་རྗེ་གདུང་བས་གདུངས་པར་གྱུར། །དེ་
ནས་རྒྱལ་པོ་རྡོ་རྗེ་འཛིན། །དབང་ཕྱུག་ཆེན་པོ་ཨུ་མར་བཅས། །ཞབས་ཀྱིས་མནན་ནས་རྡོ་རྗེ་ཡིས། །དབང་ཕྱུག་ཆེན་པོ་རྡེག་པར་བྱེད། །དེས་ནི་རྐང་པ་གཡོན་པ་ཡིས། །དབང་ཕྱུག་ཆེན་པོ་མནན་བྱས་ནས། །གཡས་པས་ལྷ་མོ་ཨུ་མ་ཡི། །ནུ་མ་དག་གི་བར་དུ་བཙིར། །
เล่ม ๘๔ · หน้า 246b
རྡོ་རྗེ་གསང་སྔགས་འདི་ཡིས་ནི། །དབང་ཕྱུག་ཆེན་པོ་རབ་ཏུ་མནན། །ཨོྃ་བཛྲ་ཨཱ་ཀྲ་མ་ཧོ། སླར་ཡང་དབབ་པའི་རིག་པ་ནི། །རྡོ་རྗེ་ཁྲོ་བོས་ཡང་དག་བརྗོད། །ཨོྃ་བཛྲ་ཨཱ་བེ་ཤ་ཧ་ན་ཧ་ན་ཏྲ་ཊ། དབང་ཕྱུག་ཆེན་པོ་བཅས་གྱུར་པས། །རང་གི་ལག་པས་ལན་སྟོང་དུ། །
རང་གདོང་འཇིགས་སུ་རང་ལ་བརྡེག །སྟོང་ཕྲག་གཅིག་ཏུ་ཡང་དག་གྱུར། །འཇིག་རྟེན་གསུམ་གནས་ཐམས་ཅད་ནི། །འོ་དོད་ཆེན་པོ་འབོད་པར་གྱུར། །བདག་ཅག་གི་ནི་རྒྱལ་པོ་འདི། །དེ་ལྟ་བུ་ཡི་བདག་ཉིད་གྱུར། །དེ་ནས་རྒྱལ་པོ་རྡོ་རྗེ་འཛིན། །བརྩེ་
དང་སྙིང་རྗེ་སྐྱེས་པར་འགྱུར། །སྙིང་རྗེ་སྟེང་དུ་གཞུག་བྱ་སྟེ། །སངས་རྒྱས་བྱམས་པ་ཡང་དག་བརྗོད། །ཨོྃ་བུད་དྷ་མཻ་ཏྲི་རཀྵ། དཔལ་ལྡན་རྡོ་རྗེ་འཛིན་གཙོ་བོས། །དེ་ནས་སྔགས་འདི་གསུངས་པ་ཡིས། །དབང་ཕྱུག་ཆེན་པོའི་སྡུག་བསྔལ་དེ། །སྐད་ཅིག་དེ་
ལ་ཉེ་བར་ཞི། །ཕྱག་ན་རྡོ་རྗེའི་ཞབས་དག་གིས། །རེག་པས་དབང་ཕྱུག་ཆེན་པོས་ནི། །ས་ཆེན་པོ་ནི་ཡང་དག་འཐོབ། །ཏིང་ངེ་འཛིན་དང་གཟུངས་དེ་བཞིན། །ཐ་མལ་བ་ཡི་ལུས་བོར་ནས། །རྡོ་རྗེ་འཛིན་ལ་ཕུལ་བར་གྱུར། །ལྷ་ཆེན་འདི་ནས་ཤི་འཕོས་ནས། །ཤི་
ཞིང་ལུས་ནི་བོར་ནས་སུ། །གང་གཱ་སུམ་ཅུ་རྩ་གཉིས་ཀྱི། །བྱེ་སྙེད་སངས་རྒྱས་ཞིང་དང་མཉམ། །ཐལ་བས་གཡོགས་པའི་གནས་ཞེས་པ། །སངས་རྒྱས་ཞིང་ནི་ཡིད་འོང་བ། །དེ་རུ་སོང་ནས་ལྷ་ཆེན་པོ། །སངས་རྒྱས་འབྱུང་བའང་བསྟན་པར་གྱུར། །ཐལ་བའི་
དབང་ཕྱུག་སྒྲ་དབྱངས་ཅན། །དེ་བཞིན་གཤེགས་པ་དེར་གནས་གྱུར། །དེ་ནས་ཤི་བའི་ལུས་དེ་ཡིས། །ཆེད་དུ་བརྗོད་པ་ཡང་དག་བརྗོད། །སངས་རྒྱས་ཀུན་གྱི་མཐུ་ཡིས་ནི། །ཚིགས་བཅད་གཅིག་ནི་མངོན་པར་བརྗོད། །ཨེ་མའོ་སངས་རྒྱས་ཐམས་ཅད་ཀྱི། །སངས་
རྒྱས་ཡེ་ཤེས་བླ་ན་མེད། །བསད་ནས་སྐད་ཅིག་བདག་གིས་ནི། །མྱ་ངན་འདས་པའི་གནས་དགོད་མཛད། །རྡོ་རྗེ་ཁྲོ་བོ་རྒྱལ་པོ་ཆེས། །དབང་ཕྱུག་ཆེན་པོ་ཡང་དག་ཕྱུང་། །ཁྱབ་འཇུག་ལ་སོགས་ལྷ་རྣམས་ལ། །ཀུན་དུ་བོས་ནས་འདི་གསུངས་པ། །རབ་མཆོག་
เล่ม ๘๔ · หน้า 247a
དཀྱིལ་འཁོར་འདི་རུ་ནི། །གཙོ་བོ་རབ་ཏུ་ཞུགས་པར་གྱིས། །གལ་ཏེ་དེ་བཞིན་མི་བྱེད་ན། །དབང་ཕྱུག་ཆེན་པོ་བཞིན་དུ་བྱ། །དེ་ནས་ལྷ་ཀུན་འཇིགས་གྱུར་ཏེ། །སྐྲག་ནས་ཐམས་ཅད་ཀྱིས་ཞུས་པ། །དེ་བཞིན་དུ་ནི་བགྱིད་པར་འཚལ། །བདག་
ཅག་ཁྱེད་ཀྱི་བྲན་དུ་གྱུར། །རྒྱལ་པོ་ཁྱོད་ཀྱི་དམ་ཚིག་ནི། །ཇི་ལྟར་བསྒྲུབ་པར་མི་བགྱིད་ལགས། །བདག་ཅག་རྣམས་ནི་ཁྱོད་ཀྱི་འཁོར། །བསྐལ་པ་ཆེན་པོ་བཀའ་སྩོལ་ཅིག །རྡོ་རྗེ་ཁྲོ་བོས་བཀའ་སྩལ་པ། །སངས་རྒྱས་ཆོས་དང་དགེ་འདུན་ལ། །སྐྱབས་སུ་
རབ་ཏུ་འགྲོ་བར་གྱིས། །བྱང་སེམས་ཡང་དག་བསྐྱེད་ནས་ནི། །སེམས་ཅན་ཀུན་ལ་ཡང་དག་སྦྱོར། །སྲོག་གཅོད་པ་ན་སྤང་བར་གྱིས། །རྐུ་དང་བརྫུན་དུ་སྨྲ་བ་དང་། །གཞན་གྱི་ཆུང་མ་དེ་བཞིན་དུ། །དེ་ནི་དང་པོར་སྤང་བར་གྱིས། །སེམས་ཅན་གནོད་དང་ལྡན་པ་ནི། །
ཅི་ནས་ཀྱང་ནི་མི་བྱའོ། །བྱང་ཆུབ་སྤྱོད་པ་རབ་སྦྱོར་བ། །དེ་ལ་ལྷོད་མིན་བརྩོན་པར་བྱ། །ང་ཡི་བསྟན་པའི་བཀའ་ཡི་ནི། །འདི་དག་དམ་ཚིག་ཡང་དག་བརྗོད། །ང་ཡི་ཚིག་ནི་མཉན་པར་གྱིས། །མིན་ན་ཁྱོད་ནི་ཀུན་དུ་སྲེག །དེ་ནས་འཇིག་རྟེན་གསུམ་འཁོར་ལོས། །
དེ་ནས་ཚིག་ནི་བླངས་ནས་ཀྱང་། །བྱང་སེམས་ཡང་དག་བསྐྱེད་ནས་ནི། །དཀོན་མཆོག་གསུམ་ལ་སྐྱབས་སུ་སོང་། །རྡོ་རྗེ་ཁྲོ་བོ་རྒྱལ་པོ་ཆེས། །ཀུན་དུ་ཕྱག་རྒྱ་བྱིན་ནས་ཀྱང་། །ཕྱག་རྒྱའི་སྙིང་པོ་འདི་ཡིས་ནི། །རྡོ་རྗེ་ཏི་རིནྟི་རི་ཡི། །དཀྱིལ་འཁོར་དུ་ནི་བཅུག་གྱུར་པས། །
ཨོྃ་བཛྲ་ས་མ་ཡ་གྲྀཧྞ་བུདྡྷ་ས་མ་ཡེ་བཛྲ་སཏྭ་ས་མ་ཡ་མ་ནུ་སྨ་ར། སརྦ་ཏ་ཐཱ་ག་ཏ་ས་མ་ཡ་ཏྲཾ། དྲྀ་ཌྷོ་མེ་བྷ་བ། ཨ་པྲ་ཏི་ཧ་རོ་མེ་བྷ་བ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿ། ཀུ་རུ་ཧ་ཧ་ཧ་ཧ་ཧཱུྃ། དེ་ནས་བརྗོད་པ་ཙམ་གྱིས་ནི། །ཕྱག་རྒྱ་ཀུན་དུ་བབས་པར་གྱུར། །རྡོ་རྗེ་ཏི་རིནྟི་
རི་ཡི། །ཕྱག་རྒྱ་ཀུན་དུ་བསྟན་པར་གྱུར། །དེ་དག་རིམ་བཞིན་བཅུག་ནས་ནི། །རྡོ་རྗེ་རིན་ཆེན་དབང་བསྐུར་གྱུར། །རྡོ་རྗེ་མཚན་མ་ལག་བྱིན་ནས། །རྡོ་རྗེ་མིང་ནི་དབང་བསྐུར་གྱུར། །དེ་ལ་ལྷ་རྣམས་ཐམས་ཅད་ནི། །རྡོ་རྗེ་མིང་གི་དབང་བསྐུར་འགྱུར། །སྔོན་ལ་འཇིག་
เล่ม ๘๔ · หน้า 247b
རྟེན་གསུམ་བདག་པོ། །གོ་རིམས་བཞིན་དུ་དབང་བསྐུར་འགྱུར། །ཁྱབ་འཇུག་ཅེས་བྱར་གནས་པ་ནི། །སྒྱུ་མའི་རྡོ་རྗེ་ཞེས་བྱར་གྲགས། །གཞོན་ནུ་རྡོ་རྗེ་དྲིལ་བུ་སྟེ། །ཚངས་པ་རྡོ་རྗེ་ཐུབ་པ་ཉིད། །དབང་པོ་རྡོ་རྗེ་མཚོན་ཆ་ཉིད། །དེ་དག་རིག་པའི་བདག་
པོར་བཤད། །རྒྱལ་པོ་བཞི་པོ་གཟི་བརྗིད་ཆེ། །རྫུ་འཕྲུལ་ཆེན་པོ་སྟོབས་ཆེན་པོས། །བར་སྣང་ལ་ནི་རྒྱུ་བ་ཉིད། །རྡོ་རྗེའི་མིང་གིས་དབང་བསྐུར་གྱུར། །ཉི་མ་རྡོ་རྗེ་འཁྱིལ་བ་སྟེ། །དེ་བཞིན་ཟླ་བ་རྡོ་རྗེ་འོད། །དབྱིག་ཆེན་རྡོ་རྗེ་དབྱིག་ཏོ་སྟེ། །སེར་སྐྱ་རྡོ་རྗེ་སེར་
སྐྱ་མིན། །དེ་ལ་སོགས་པ་ཁྲོ་རྒྱལ་པོ། །རྡོ་རྗེ་ཁྲོ་བོར་དབང་བསྐུར་གྱུར། །དེ་ནས་མཁའ་སྤྱོད་ལྷ་རྣམས་ནི། །རྡོ་རྗེ་མིང་གིས་དབང་བསྐུར་གྱུར། །མྱོས་ཆེན་རྡོ་རྗེ་མྱོས་པ་སྟེ། །རྡོ་རྗེ་ཕྲེང་བ་སྦྲང་རྩི་བྱེད། །རྣམ་པར་རྒྱལ་དང་རྒྱལ་བྱེད་དང་། །རྡོ་རྗེ་ཤེས་དང་རྒྱལ་བར་
ལྡན། །ཚོགས་ཀྱི་བདག་པོ་རྒྱལ་པོ་དག །ཞེས་བྱ་ལ་སོགས་དབང་བསྐུར་གྱུར། །དེ་ནས་ས་ལ་གནས་པ་རྣམས། །རྡོ་རྗེའི་མིང་གིས་དབང་བསྐུར་གྱུར། །གཏུན་ཤིང་མཛོད་ནི་བསྲུང་བ་སྟེ། །མེ་ནི་དེ་བཞིན་རྡོ་རྗེ་མེ། །རྡོ་རྗེ་རླུང་ནི་རླུང་ཆེན་པོ། །རྡོ་རྗེ་འཇིགས་བྱེད་
ང་ན་རྡོ་རྗེ། །དེ་འདྲ་ལ་སོགས་ཕོ་ཉ་རྣམས། །རྡོ་རྗེ་མཆོག་གིས་དབང་བསྐུར་གྱུར། །དེ་ནས་ས་འོག་གནས་པ་ནི། །རྡོ་རྗེ་ལྕགས་ཀྱུ་རྐང་ཟ་བ། །དེ་བཞིན་གཤིན་རྗེ་རྡོ་རྗེ་ནག །ས་ཡི་གཙུག་ནི་བགེགས་རྡོ་རྗེ། །ཆུ་ལྷ་མགོན་པོ་རྡོ་རྗེ་འཛིན། །དེ་ནས་ལྷ་མོ་ཇི་བཞིན་
དུ། །གོ་རིམས་བཞིན་དུ་དབང་བསྐུར་གྱུར། །རྡོ་རྗེ་མིང་གི་དབང་བསྐུར་གྱིས། །ཡུམ་གྱི་མཆོག་རྣམས་དབང་བསྐུར་གྱུར། །ཁྱབ་འཇུག་མ་ནི་རྡོ་རྗེ་གསེར། །དྲུག་ལྡན་རྡོ་རྗེ་གཞོན་ནུ་མ། །ཚངས་པ་རྡོ་རྗེ་བརྒྱད་ཅུ་མ། །དབང་མོ་རྡོ་རྗེ་ཁུ་ཚུར་མ། །གསོད་བྱེད་རྡོ་རྗེ་
གསོད་ཉིད་མ། །སྣར་མ་རྡོ་རྗེ་འོད་ལྡན་མ། །དེ་ལས་དབྱིག་པ་རྡོར་མཆོག་མ། །འཕྲོག་མ་རྡོ་རྗེ་སྐ་རགས་ཏེ། །གསོད་བྱེད་རྡོ་རྗེ་འཇིགས་མ་སྟེ། །གནམ་ལྕགས་རྡོ་རྗེ་གནམ་ལྕགས་མ། །ནམ་གྲུ་རྡོ་རྗེ་དབང་ལྡན་མ། །གོས་ཅན་རྡོ་རྗེ་གོས་ཅན་མ། །རྡོ་རྗེ་ཕོ་ཉ་
เล่ม ๘๔ · หน้า 248a
ཞི་བ་མ། །རླུང་ལྷ་རྡོ་རྗེ་ཤུགས་ཅན་མ། །ལུས་ངན་མ་ནི་རྡོ་རྗེ་གདེངས། །མེ་ལྷ་དེ་བཞིན་རྡོ་རྗེ་འབར། །ཕག་མོ་རྡོ་རྗེ་གདོང་ཅན་མ། །རྡོ་རྗེ་ནག་མོ་ཙ་མུཎྜི། །ཆུ་ལྷ་རྡོ་རྗེ་ཆུ་སྲིན་མ། །སྣ་ཆད་མ་ནི་སྤྲུལ་མོ་སྟེ། །དེ་འདྲ་ལ་སོགས་གྲངས་མེད་པ། །
ལྷ་མོ་རྣམས་ནི་དབང་བསྐུར་གྱུར། །རང་རང་རིགས་ནི་རྟོགས་ནས་སུ། །ཇི་བཞིན་ལྷ་ཡི་བདག་པོར་བཤད། །དེ་ནས་ཕྱག་རྒྱ་བཅིང་བ་བྱིན། །དེ་བཞིན་དམ་ཚིག་སྙིང་པོའོ། །ལྷ་རྣམས་ཀུན་གྱི་བདག་པོ་ཀུན། །བཀུག་ནས་དེ་བཞིན་དབང་དུ་འགྱུར། །རྡོ་རྗེ་ཕྱག་རྒྱ་གཉིས་
བཅིངས་ནས། །སྡིགས་མཛུབ་དང་ནི་ལྕགས་ཀྱུ་བཅིངས། །འཆིང་བ་དང་ནི་གྲོལ་བྱེད་པར། །དངོས་པོ་བྱ་བའི་དོན་སེམས་དཔའ། །དེ་ཡི་མདུན་དུ་ཁྱེད་རྣམས་ནི། །བྱ་བ་བསྒྲུབ་ཕྱིར་གནས་པར་གྱིས། །ཁྱོད་ཀྱི་སྲོག་ནི་ཉམས་གྱུར་པའི། །དེ་བཞིན་དམ་ཚིག་སྦྱིན་མི་བྱ། །
རྒྱ་ཆེར་ཕྱག་རྒྱ་ཆེན་པོར་ནི། །ཐེག་པ་ཆེན་པོ་མངོན་བསྡུས་པས། །རྡོ་རྗེ་རྣལ་འབྱོར་སྦྱོར་བྱེད་པ། །དེ་ཉིད་ཅེས་བྱ་བསྟན་པ་ཡིན། །དཀྱིལ་འཁོར་མཆོག་རྣམས་དེ་དག་དང་། །དེ་བཞིན་ལྷ་ལ་སོགས་པ་ཀུན། །བཀུག་ཅིང་རབ་ཏུ་བཅུག་པར་གྱུར། །རྡོ་རྗེ་ཅན་གྱིས་དབང་
བྱས་ནས། །རྡོ་རྗེ་ཐམས་ཅད་དབང་བསྐུར་གྱུར། །རྡོ་རྗེ་མིང་གིས་མཚན་པར་བྱས། །ལྷ་ཆེན་པོ་ནི་གཅིག་པུ་ཉིད། །ཞབས་ཀྱིས་འོག་ཏུ་བརྡབས་ནས་བཞག །འཇིག་རྟེན་གདུག་པ་ཆེར་གྱུར་པ། །གདུག་པའི་སྙིང་པོ་ཞེས་བྱར་གྲགས། །གདུག་པའི་དཀྱིལ་
འཁོར་རྒྱལ་པོ་ཡི། །སེམས་ཅན་འོངས་པར་ཐེ་ཚོམ་མེད། །ཐང་ཅིག་ཚེས་གྲངས་རེ་རེ་མ། །གང་དུ་ཟླ་གཅིག་དཀྱིལ་འཁོར་དུ། །སེམས་ཅན་སྟོང་ཕྲག་བརྒྱ་དག་ནི། །སྐད་ཅིག་དེ་ལ་སྡུག་བསྔལ་བྱེད། །ཡིད་ནི་ཉེ་བར་འཇལ་བར་བྱེད། །མདངས་ནི་ཉེ་བར་
འཕྲོག་པའི་ནད། །མི་ཡི་སྐྱེ་བོ་གསོད་པ་དང་། །ཐ་ན་དུག་ཆེན་ཉིད་དང་ནི། །གྲོང་ཁྱེར་དང་ནི་གྲོང་རྡལ་དང་། །གྲོང་དག་འཇོམས་པར་བྱེད་པ་དག །སེམས་ཅན་རྣམས་ནི་གཅོད་བྱེད་དང་། །སྐྱེ་བོ་སྟོང་པ་སྦྱོར་བྱེད་དང་། །དེ་ལྟར་དྲག་ཅིང་འཇིགས་སུ་རུང་། །
เล่ม ๘๔ · หน้า 248b
བརྩེ་བ་མེད་ཅིང་སྡིག་བྱེད་པ། །གསོད་པ་དང་ནི་འཇོམས་པར་བྱེད། །ཤེས་རབ་འཕྲོག་པར་བྱེད་པ་དང་། །དྲག་པོ་སྣ་ཚོགས་གཟུགས་འཛིན་པ། །དུད་འགྲོའི་འགྲོ་བའི་བར་དང་ནི། །སེམས་ཅན་རྣམས་ལ་གནོད་བྱེད་དང་། །མྱུར་དུ་མདངས་ནི་འཕྲོག་པ་དང་། །
ལོ་ཉེས་ཐོག་དང་ཆར་དང་ནི། །ཆར་ནི་མི་འབབ་བྱེད་པ་དང་། །གྲང་དང་དྲོ་བའི་གདུང་བ་ད་ག །སྐད་ཅིག་དེ་ལ་སྐྱེད་པ་དང་། །གདོན་ནི་འབབ་པར་བྱེད་པ་དང་། །ངེས་བཞིན་བདུད་མཆོག་སྐྱེད་པ་དང་། །སེམས་ནི་རྣམ་པར་གཡེང་བྱེད་དང་། །དེ་འདྲའི་གནོད་སྦྱིན་མཐའ་
ཡས་དང་། །དེ་ནས་རྒྱལ་པོ་རྡོ་རྗེ་འཛིན། །དཀོན་མཆོག་གནས་ཀྱི་དབང་ཕྱུག་སྟེ། །སྐྱེ་དགུ་སྣ་ཚོགས་ནད་ཀྱིས་བཏབ། །ཡེ་ཤེས་ཀྱི་ནི་སྤྱན་གྱིས་གཟིགས། །དམ་ཚིག་སྡང་བའི་སེམས་ཅན་དང་། །ཡམས་དང་དེ་བཞིན་ཉེ་བར་འཚེ། །རིམས་དང་གདོན་དང་
དུག་དྲག་པོ། །སྐྱེ་དགུ་འདི་རྣམས་འཇོམས་པར་བྱེད། །སྣ་ཚོགས་སྡུག་བསྔལ་ཀུན་དུ་འཁྲུགས། །འཇིགས་པ་སྣ་ཚོགས་དག་གིས་ཁྱབ། །ཐམས་ཅད་ཉམས་ཤིང་ཟིལ་གྱིས་ནོན། །སྡུག་བསྔལ་དྲག་པོས་སྡུག་བསྔལ་གྱུར། །སླར་ཡང་བདེ་བར་བྱ་བའི་ཕྱིར། །
ནག་པོའི་སྔགས་ནི་ཡོངས་སུ་གཟུང་། །མཁའ་འགྲོ་མ་མོ་རྣལ་འབྱོར་མས། །འགྲོ་བའི་དོན་ནི་ཀུན་དུ་ཁྱབ། །རིམས་དང་གདོན་དང་འབྱུང་པོ་དང་། །མཁའ་འགྲོ་མ་མོ་འབྱུང་པོ་དང་། །གདུག་པ་རྣམས་ཀྱིས་ཀུན་དུ་ཁྱབ། །འཇིག་རྟེན་སྡུག་བསྔལ་སྣོད་འདི་ནི། །གཟིགས་
ནས་རྡོ་རྗེ་འཛིན་རྒྱལ་པོས། །ཐུགས་རྗེ་དག་ནི་བསྐྱེད་པར་གྱུར། །ཀྱེ་མའོ་སེམས་ཅན་འདི་སྡུག་བསྔལ། །དེ་ལ་རྗེས་སུ་བརྩེ་བྱེད་མེད། །ང་ནི་ཁོ་ན་རང་བྱུང་སྟེ། །དེ་བཞིན་སྡུག་བསྔལ་ཐམས་ཅད་འཕྲོག །ང་ལ་ལོག་པར་རྟོག་པ་སྟེ། །སྐྱེ་དགུ་དེ་ལ་བརྩེ་བ་མེད། །དབང་
ཕྱུག་ཆེན་པོ་གང་ཡིན་དང་། །གདུག་པ་ཐམས་ཅད་རབ་འདུལ་བྱེད། །ཡང་དག་བྱང་ཆུབ་རང་བྱུང་འགྱུར། །སྐྱེ་དགུ་མ་ལུས་བསྐྱབ་པར་བྱ། །ཐམས་ཅད་དག་ནི་དགུག་བྱ་ཞིང་། །དེ་བཞིན་དམ་ཚིག་བསྲུང་བར་བྱ། །གནོད་དང་ཕན་པ་བྱས་ནས་ནི། །སྐྱེ་དགུ་འདི་དག་རྣམ་པར་
เล่ม ๘๔ · หน้า 249a
གྲོལ། །དེ་ནས་རྒྱལ་པོ་རྡོ་རྗེ་འཛིན། །དཀྱིལ་འཁོར་སྐྱོབ་དང་ཕན་འདོགས་པ། །ཞེས་བྱ་དེ་འདྲའི་ཏིང་འཛིན་ལ། །སེམས་དཔའ་ཆེན་པོ་སྙོམས་པར་ཞུགས། །མགོན་པོ་ཆེན་པོ་སངས་རྒྱས་ཀུན། །འདི་ལྟར་བཀའ་ནི་ནོད་པར་བྱེད། །དེ་ནས་སངས་རྒྱས་ཐམས་
ཅད་ཀྱི། །དེ་བཞིན་སྙིང་པོ་ཕྱུང་བར་གྱུར། །ཨོཾ་བཛྲི་སུམ་བྷ་ནི་སུམ་བྷ་ཧཱུྃ་ཕཊ། དེ་ནས་རྒྱལ་པོ་རྡོ་རྗེ་འཛིན། །སངས་རྒྱས་བཀའ་ནི་བཟུང་ནས་ཀྱང་། །ཕྱི་རོལ་དཀྱིལ་འཁོར་དགུག་པའི་ཕྱིར། །ལྕགས་ཀྱུའི་སྙིང་པོ་རབ་ཏུ་ཕྱུང་། །ཨོྃ་བཛྲ་ས་མ་ཡ་ཨཱ་ཀཪྵ་ཡ་སརྦ་མཎྡ་ལ་
བཛྲ་དྷ་ར་སཏྭ་མཱ་ཏི་ཀྲ་མ་ཧཱུྃ་ཕཊ། རིག་པ་བརྗོད་པར་གྱུར་པ་ཡིས། །རྡོ་རྗེ་ལྕགས་ཀྱུ་ཤིན་ཏུ་བརྟན། །ལྕགས་ཀྱུ་བདག་ཉིད་ཆེ་མཆོག་ནི། །བརྒྱ་ཕྲག་གྲངས་མེད་བྱུང་བར་གྱུར། །སྟོང་གསུམ་གྱི་ནི་འཇིག་རྟེན་འདི། །རིམ་བཞིན་རབ་ཏུ་ཐིམ་པར་གྱུར། །གང་ཞིག་ཕྱོགས་
རྣམས་བཅུ་པོ་རུ། །གདུག་པའི་དཀྱིལ་འཁོར་མཐོང་བར་གྱུར། །གདུག་པ་དེ་རྣམས་བཀུག་ནས་ཀྱང་། །དེ་བཞིན་གོང་བུ་གཅིག་ཏུ་བྱ། །རྡོ་རྗེ་མེ་ཡིས་ཀུན་དུ་གསུངས། །རི་རབ་རྩེ་མོ་ཕབ་ནས་ནི། །ཚད་མེད་བགྲང་དུ་མེད་པ་རྣམས། །ཕྱི་རོལ་གྱི་ནི་དཀྱིལ་འཁོར་
འོངས། །རྡོ་རྗེ་དབང་པོའི་གནས་ཀུན་དུ། །འཁོར་ཉིད་དུ་ནི་ཡང་དག་གནས། །དེ་ནས་རྡོ་རྗེ་འཛིན་རྒྱལ་པོས། །གདུག་པའི་དཀྱིལ་འཁོར་བོས་ནས་ནི། །ཀྱེ་གདུག་སྐྱེ་དགུ་རྣམས་ལ་ནི། །རྣམ་པར་འཚེ་བ་སྤང་བར་གྱིས། །ཁྱེད་རྣམས་ཀྱིས་ནི་དམ་ཚིག་ལོང་། །སྲོག་
ཆགས་ཐམས་ཅད་གསོད་པ་སྤངས། །མིན་ན་ཁྱེད་རྣམས་གཡས་འབར་བས། །དེ་བཞིན་ང་ཡིས་ཐལ་བར་བྱ། །གདུག་པའི་དམ་ཚིག་དཀྱིལ་འཁོར་གྱིས། །ཚིག་གཅིག་ཏུ་ནི་ཞུས་གྱུར་པ། །མགོན་པོ་བདག་ཅག་ཤ་ཟ་སྟེ། །ཇི་ལྟར་བགྱི་བ་བཀའ་སྩོལ་ཅིག །དེ་ནས་
རྡོ་རྗེ་འཛིན་དྲག་པོས། །མ་བསྡམས་པ་ཡི་ཚིག་གསན་ནས། །རྡོ་རྗེ་ཁྲོ་བོ་རབ་བརྗིད་བཀའ། །སྙིང་པོ་དྲག་པོ་གསུངས་པར་གྱུར། །ཨོྃ་བཛྲ་ཀྲོ་དྷ་ཧ་ན་ད་ཧ་པ་ཙ་བི་དྷཱཾ་ས་ཡ་བི་ཀྲྀ་ཧ་སརྦ་དུཥྚཱན་ས་མ་ཡ་མུ་དྲཱ་མནྜ་ལ་བྷཉྫ་བྷཉྫ། མར་དྷ་མར་དྷ། ཁཱ་ད་ཁཱ་ད། པཱ་ར་མནྟྲ། བཛྲ་
เล่ม ๘๔ · หน้า 249b
ས་མ་ཡ་ཧཱ་ཕཊ། ཁྲོ་བོ་ཆེན་པོས་འདི་བརྗོད་པས། །རབ་དྲག་གདུག་པ་དེ་དག་ནི། །ཚིག་ཅིང་རབ་ཏུ་འགྱེལ་འགྱུར་ཞིང་། །དམ་ཚིག་ཕྱག་རྒྱ་ཉམས་པར་གྱུར། །འོ་དོད་འབོད་ཅིང་ངུ་བར་གྱུར། །གཅིག་ལ་གཅིག་ནི་སྨྲ་བར་བྱེད། །ཇི་སྐད་སྨྲ་བ་བཞིན་བྱས་ཏེ། །འོན་ཀྱང་
བདེན་པར་སྨྲ་མི་བྱ། །རྡོ་རྗེ་སེམས་དཔའ་དྲག་པོ་ཆེ། །རང་བཞིན་གྱིས་ནི་སངས་རྒྱས་བདག །སྟོབས་ཆེན་གསང་བའི་དབང་པོ་ཡིས། །བཅོམ་ལྡན་ཐམས་ཅད་མཁྱེན་པས་གསུངས། །ཨོྃ་ནི་སུམ་བྷ་ཧ་ན་ད་ཧ་པ་ཙ་གྲྀཧྞ་བན་དྷ་ཧཱུཾ་ཕཊ། དེ་ནས་རྒྱལ་པོ་རྡོ་རྗེ་འཛིན། །སངས་
རྒྱས་བཀའ་ལ་རབ་གནས་པས། །རྡོ་རྗེ་ཁྲོ་བོ་རབ་ཟ་བྱེད། །སྙིང་པོ་དྲག་པོ་བརྗོད་པར་གྱུར། །ཨོྃ་མ་ཧཱ་བཛྲ་ཀྲོ་དྷ་པཱ་ད་སརྦ་དུཥྚ་མནྜ་ལ་ཕིནཱ་ཤ་ཡ། །སརྦ་དུཥྚ་སམ་ཡ་ཡན་བི་ཀི་ར་བི་དྷྭཾ་ས་ཡ་སྥོ་ཊ་ཡ། བྷཉྫ་ཡ། བྷཉྫ་ཡ། སརྦ་དུཥྚ་ས་མ་ཡ་མུ་དྲཱཾ་བྷན་དྷ་གྲྀཧྞ། ཧ་ནད་ཧ་པ་ཙ། སརྦ་
དུཥྚ་ས་མ་ཡ་ས་ཏྭ་ས་མ་ཡ་ཧཱུཾ་ཕཊ། དེ་ནས་འདི་ནི་བརྗོད་ཙམ་གྱིས། །རྡོ་རྗེ་ཁྲོ་བོ་བདག་ཉིད་ཆེ། །གཏུམ་པོ་དྲག་པོ་ཤིན་ཏུ་འཇིགས། །རྡོ་རྗེ་ཁྲོ་བོ་རབ་ཏུ་ཕྱུང་། །རིགས་བཅས་དཔུང་དང་བཅས་ལྡན་པ། །དམ་ཚིག་སྡང་བ་བཟུང་ནས་ནི། །ཤིན་ཏུ་འཇིགས་པས་སྐྲག་གྱུར་ཅིང་། །
རྒྱ་མཚོ་ཡང་ནི་རབ་ཏུ་སྒུལ། །ཕྱག་རྒྱ་རབ་འཇིགས་དེ་དག་གིས། །རྣམ་པར་བཅོམ་ཞིང་ཟིལ་གྱིས་མནན། །རྡོ་རྗེ་མེ་ཡིས་བསྲེགས་ནས་ནི། །ཐམས་ཅད་དུ་ནི་ཐལ་བར་བྱས། །བྱང་སེམས་ལས་བྱུང་རྡོ་རྗེ་ཅན། །ཇི་ལྟར་སེམས་ཅན་སྲེག་པར་བྱེད། །འདི་ནི་གཞུག་པའི་
ཚིག་ཡིན་ཏེ། །ཕན་པའི་རིགས་ཅན་རྒྱལ་བདག་སྐྱེས། །འདོད་ཆགས་སྐྱོན་ལ་སོགས་ལྟ་བ། །ཉོན་མོངས་དྲི་མ་གང་ཤེས་ནས། །རྡོ་རྗེ་ཅན་གྱིས་དྲི་མ་འདི། །བཟུང་ནས་ཡེ་ཤེས་མེ་ཡིས་བསྲེགས། །སེམས་ཅན་ཤིན་ཏུ་འཇིགས་ཏེ་སྐྲག །བྱང་ཆུབ་སྤྱོད་པས་བྱང་
ཆུབ་གནས། །མི་བསྐྱོད་པ་ཡི་གནས་སྐྱེས་ཤིང་། །རྡོ་རྗེ་ཅན་ནི་མཆོག་ཏུ་གྱུར། །ཕྱག་ན་རྡོ་རྗེ་སེམས་དཔའ་ཆེ། །རྡོ་རྗེ་ཆེན་པོ་ཕྱག་རྒྱ་འགུགས། །ཞེས་བྱ་དེ་འདྲའི་ཏིང་འཛིན་ལ། །འཇིགས་པ་མེད་པར་སྙོམས་པར་ཞུགས། །མཁའ་འགྲོ་མ་ནི་རྗེས་སྦྱང་ཕྱིར། །
เล่ม ๘๔ · หน้า 250a
རྒྱལ་བ་ལ་ནི་བཀའ་ནོད་གྱུར། །ཕྱག་ན་རྡོ་རྗེ་སྟོབས་ཆེན་ལ། །དེ་ནས་སངས་རྒྱས་ཀུན་གསུངས་པ། །ཨོྃ་ཧ་ན་ཧ་ན་བཛྲ་ཧཱུྃ་ཕཊ། དེ་ནས་རྡོ་རྗེ་འཛིན་དྲག་པོས། །སངས་རྒྱས་ཀུན་གྱི་གསུང་ཐོས་ནས། །འཇིགས་པ་འགུགས་པའི་རྡོ་རྗེ་ནི། །རང་
ཉིད་ཀྱི་ནི་སྔགས་འདི་བརྗོད། །ཨོྃ་བཛྲ་ཨཱ་ཀཪྵ་ཡ་ཤཱི་གྷྲཾ། སརྦ་དུཥྚ་གྲྀཧྞ་བཛྲ་ས་ཏྱེ་ན་ཧཱུྃ་ཛཿ། དེ་ནས་བརྗོད་པ་ཙམ་གྱིས་ནི། །མཁའ་འགྲོ་མ་ནི་མདངས་འཕྲོག་པ། །རྣལ་འབྱོར་སྔགས་དང་ཕྱག་རྒྱར་བཅས། །རི་རབ་ཏུ་ནི་ཀུན་དུ་འདུས། །རྡོ་རྗེ་ལྕགས་ཀྱུས་བཀུག་
ནས་ནི། །འབར་བ་དང་བཅས་འབར་བར་གྱུར། །སྤྱི་བོར་ཐལ་མོ་སྦྱར་ནས་རྩིག །སྨྲས་པ་རྡོ་རྗེ་འཛིན་པས་སྐྱོབས། །སྐལ་ཆེན་རྡོ་རྗེ་ཅན་གྱིས་གསུངས། །ཀྱེ་གདུག་ཚོགས་ཆེན་པོ་མྱུར་བ་རུ། །གསོད་པ་སྤོངས་ལ་བཀའ་ཉན་གྱིས། །དེ་དག་རེ་རེ་ཞིང་སྨྲས་པ། །བདག་
ཅག་འདི་རྣམས་ཤ་ཟ་སྟེ། །གང་ཞིག་རྟག་ཏུ་གསོན་གྱུར་པ། །བདག་ཅག་ལ་ནི་ཐབས་བསྟན་གསོལ། །དེ་ནས་རྒྱལ་པོ་རྡོ་རྗེ་འཆང་། །དེ་ཡིས་ཐབས་ནི་འདི་གསུངས་སོ། །ཟླ་གཅིག་ལོན་ནས་ཤི་བ་གང་། །དེ་ནི་བཟའ་བ་བླང་བར་གྱིས། །བྱང་ཆུབ་སེམས་ལ་ཆགས་
བྲལ་ནས། །གསང་བ་སྨོད་པ་ལྷུར་ལེན་པ། །ཁྱོད་དང་ལྷན་ཅིག་ཡང་དག་སྦྱོར། །དེ་བཟའ་བ་ནི་གནང་བར་གྱིས། །ཕྱག་རྒྱ་ཡི་ནི་སྙིང་པོ་འདི། །རྟག་ཏུ་བཅང་བར་བྱ་བ་སྟེ། །ཕྱི་རོལ་ཐམས་ཅད་སྤངས་ནས་ནི། །སངས་རྒྱས་བསྟན་པ་བསྲུང་བར་གྱིས། །ཨོྃ་བཛྲ་
པྲ་ཏི་གྲྀ་ཧྞ་ཧྲྀ་ད་ཡ་ཨཱ་ཀཪྵ་ཡ། ཙརྱ་ཡཾ་མེ་ས་དྷོ་དྷེ་ན་མི་ནི་ཡ་ཏེ་ཧཱ་ས་རི་དྷ་ཡཾ་ནི་ཥྐ་མ་དུ་ས་མ་ཡ་ཧཱུྃ་ཛཿ། དེ་ནས་རྒྱལ་པོ་རྡོ་རྗེ་འཛིན། །རང་གི་སྔགས་དང་ཕྱག་རྒྱར་ལྡན། །ཁྲོ་བོ་སྤྱི་གཙུག་རྒྱལ་པོ་ནི། །རྣལ་འབྱོར་པ་ནི་དེ་ཡིས་སྤྲོས། །གལ་ཏེ་དམ་ཚིག་ལས་འདས་ན། །
ཁྲ་བོ་བདག་ཉིད་ཆེན་པོ་ཡི། །རྟག་ཏུ་མགོ་བོ་འགས་བྱེད་ཅིང་། །རིགས་དང་བཅས་པ་ངེས་པར་སྲེག །བདུད་རྩི་སྨན་གྱི་རྒྱལ་པོ་ཞེས། །བྱ་བ་དེ་འདྲའི་ཏིང་འཛིན་ལ། །སེམས་དཔའ་ཆེན་པོ་སྙོམས་ཞུགས་ནས། །ནད་ཀྱི་དོན་དུ་ཚོལ་བར་གྱུར། །བཅོམ་ལྡན་འདས་ཀྱིས་
เล่ม ๘๔ · หน้า 250b
བཀའ་སྩལ་པ། །ཨོྃ་བཛྲ་ཧཱུྃ་ཕཊ། དེ་ནས་རྒྱལ་པོ་རྡོ་རྗེ་འཛིན། །སེམས་ཅན་ཐམས་ཅད་འཇིག་བྱེད་པས། །ནད་རྣམས་ཐམས་ཅད་བཀུག་ནས་ནི། །འགུགས་པ་ཡི་ནི་སྙིང་པོ་བརྗོད། །ཨོྃ་བཛྲ་ས་མ་ཡ་ཨཱ་ན་ཡ་སརྦ་དུཥྚ་ཛྭཱ་ར་ཎི་དི་ནཱ་ཤ་ཡ་ཧཱུཾ་ཕཊ། དེ་ནས་
བརྗོད་པ་ཙམ་གྱིས་ཀྱང་། །ནད་དང་གདོན་གྱི་ཚོགས་ཀུན་དང་། །རིམས་སོགས་ཀྱིས་ནི་དེ་ཐོས་ནས། །སྟེང་དུ་རྐང་པ་འོག་ཏུ་མགོ། །འབར་བའི་མེ་དང་ཡང་དག་ལྡན། །ཧ་ཧ་ཞེས་སྒྲོགས་འཇིགས་པར་བྱེད། །བདག་ཅག་རིགས་ནི་མ་གཞོམ་པར། །
ཁྲོ་བོ་ཆེན་པོ་བཀའ་སྩོལ་ཅིག །རྡོ་རྗེ་རྣལ་འབྱོར་ཆེན་པོས་གསུངས། །ང་ཡི་བཀའ་ནི་རབ་ཏུ་ཉོན། །སེམས་ཅན་ཉེ་བར་འཇོམས་པ་སྤོངས། །མདངས་ཀྱང་འཕྲོག་པར་མ་བྱེད་ཅིག །དེ་རྣམས་ཀྱིས་སྨྲས་པ། ཀྱེ་རྒྱལ་པོ་རྡོ་རྗེ་བདག་ཅག་གིས། །སྲོག་གི་སྲུང་བ་
མཛད་དུ་གསོལ། །བདག་ཅག་ཀུན་ནས་གཟི་བརྗིད་ཟ། །ཐབས་ནི་ཅུང་ཟད་བརྩམ་དུ་གསོལ། །རྡོ་རྗེ་སེམས་དཔའ་རྒྱལ་པོ་ཆེ། །དེ་ནས་སྟོབས་ཆེན་གྱིས་སྨྲས་པ། །ང་ཡི་སྔགས་དང་ཕྱག་རྒྱ་དག །གང་ཞིག་བསྲུང་ལ་གནོད་མ་བྱེད། །ཨོྃ་བཛྲ་ཀརྨ་བི་ཤོ་དྷ་ཡ་
སརྦ་ཨཱ་པ་ར་ཎ་ནི་བུད་དྷ་ས་ཏྭེ་སམ་ཡེ་ཧཱུྃ། དེ་ནས་ཕྱག་རྒྱ་ཆེན་པོ་ཀུན། །ཐེག་པ་ཆེན་པོར་མངོན་བསྡུས་པ། །མདོ་སྡེ་གསང་བ་རྒྱལ་པོ་ལས། །ཡོངས་སུ་བཤད་པ་ཐམས་ཅད་ཀུན། །སྔགས་དང་ཕྱག་རྒྱ་གནས་གང་ན། །རྟག་པར་རབ་ཏུ་སྦྱོང་བྱེད་པས། །གནས་
དེ་རུ་ཡང་རྟག་པ་རུ། །ཁྱེད་རྣམས་ཤིན་ཏུ་གནོད་མ་བྱེད། །དེ་སྐད་གསུངས་པས་གདོན་ཀུན་ནི། །ཧི་ཧི་ཞེས་ནི་སྒྲོགས་པར་གྱུར། །སྤྱི་བོའི་རྣལ་འབྱོར་པ་ལ་ནི། །གནོད་པ་བྱེད་པ་ཐམས་ཅད་གཏད། །དེ་ནས་རྒྱལ་པོ་རྡོ་རྗེ་འཛིན། །ཀུན་མཆོག་གནས་ཀྱི་དབང་ཕྱུག་
གིས། །སྡིག་པ་བྲལ་བའི་ཕྱག་རྒྱ་ཆེ། །བློ་གྲོས་ཆེན་པོ་སྙོམས་པར་ཞུགས། །ངན་སོང་བཅིང་བར་བྱ་བའི་ཕྱིར། །མགོན་པོ་དག་ལ་བཀའ་ནོད་བྱེད། །མགོན་ཆེན་སངས་རྒྱས་ཐམས་ཅད་ཀྱིས། །ཀུན་ནས་སྙིང་པོ་བརྗོད་པར་གྱུར། །ཨོྃ་ཀྵེ་པ་ཡ་བཛྲ་སྭཱ་ཧཱ། རྡོ་རྗེ་ཤ་
เล่ม ๘๔ · หน้า 251a
སེམས་དཔའི་ཐབས་ཆེན་པོ། །རྡོ་རྗེ་ལས་ནི་ཡང་དག་བྱུང་། །སེམས་ཅན་རྣམས་ལ་བརྩེ་བྱའི་ཕྱིར། །སྡིག་པ་ཐམས་ཅད་བཀུག་པར་གྱུར། །ཨོྃ་སརྦ་པཱ་པཾ་ཨ་པཱ་ཡ་ན་བི་ཤོ་དྷ་ན་བཛྲ་ས་མ་ཡ་ཧཱུྃ་ཕཊ། དེ་སྐད་བརྗོད་ནས་རྣལ་འབྱོར་ཆེས། །སྐད་ཅིག་
གིས་ནི་ངན་སོང་བཀུག །རི་ཡི་རྒྱལ་པོ་ཉེ་བ་རུ། །ངུ་འབོད་ལ་སོགས་སྣང་བར་གྱུར། །རྡོ་རྗེ་སེམས་དཔའ་རྣལ་འབྱོར་ཆེས། །ངན་སོང་སེམས་ཅན་ལ་སྨྲས་པ། །དཀོན་མཆོག་གསུམ་དང་ང་བསྟན་ལ། །མྱུར་དུ་བསྟན་པ་སྐྱབས་སུ་སོང་། །དེ་དག་ཐམས་ཅད་ཀྱིས་
སྨྲས་པ། །སྟོབས་ཆེན་བདག་ཅག་བསྐྱབ་ཏུ་གསོལ། །གཙོ་བོས་ཇི་སྐད་བཀའ་སྩལ་པ། །དེ་བཞིན་དུ་ནི་བགྱི་བར་འཚལ། །དེ་ནས་རྒྱལ་པོ་རྡོ་རྗེ་འཛིན། །སྡིག་པ་དྲལ་བ་ངེས་འཆིང་བ། །སྡིག་པ་ཐམས་ཅད་རབ་འཇོམས་པ། །མཆོག་ཏུ་གསང་བ་གསུངས་པར་
གྱུར། །ཨོྃ་བཛྲ་པཱ་ཎི་བི་སྥོ་ཊ་ཡ། སརྦ་ཨ་པཱ་ཡ་བྷན་དྷ་ནཱ་ནི་པྲ་མོ་ཀྵ་ཡ་སརྦཱ་པཱ་ཡ་ག་ཏ་བྷྱཿ། སརྦ་སཏྭཾ། སརྦ་ཏ་ཐཱ་ག་ཏ་བཛྲ་སམ་ཡ་ཊྭཱ་ཐ། སེམས་ཅན་ངན་སོང་རྒྱུ་ཅན་རྣམས། །རིག་པ་འདི་ཡིས་དབང་བསྐུར་བས། །ངན་སོང་འཁོར་ལོ་དྲལ་བར་གྱུར། །རྒྱ་མཚོ་རུ་
ནི་རབ་ཏུ་ལྟུང་། །དེ་བཞིན་ངན་སོང་ཤི་འཕོས་ནས། །དེ་ཀུན་རབ་ཏུ་གྲོལ་བར་གྱུར། །སྡུག་བསྔལ་ཀུན་ལས་རབ་ཏུ་གྲོལ། །རྡོ་རྗེ་དབང་པོའི་གནས་ཐོབ་གྱུར། །དེ་བཞིན་ཐུབ་པ་རྣམ་སྣང་གི། །ཞབས་དྲུང་དུ་ནི་སྐྱེས་པར་གྱུར། །རྡོ་རྗེ་སེམས་དཔའི་མཐུ་ཡིས་
ནི། །དེ་བཞིན་མི་ཁོམ་ཟད་པར་གྱུར། །རྡོ་རྗེ་སེམས་དཔའི་མཐུ་ཡིས་ནི། །དེ་ནས་སྐད་ཅིག་དེས་ཞི་ཐོབ། །རྨད་བྱུང་སྣ་ཚོགས་གསང་ཆེན་པོ། །ཆོ་འཕྲུལ་དག་ནི་སྐྱེས་པར་གྱུར། །སྟོང་གསུམ་གྱི་ནི་འཇིག་རྟེན་འདི། །རྡོ་རྗེ་རིན་ཆེན་རང་བཞིན་གནས། །རིན་ཆེན་བདུན་
གྱིས་རབ་ཏུ་སྤྲས། །རྡོ་རྗེ་རིན་ཆེན་གྱིས་རབ་མཛེས། །དེ་ཡི་རིགས་ཀྱི་ནང་སོང་ཀུན། །སྡུག་བསྔལ་ཐམས་ཅད་རྣམ་པར་སྦྱངས། །སེམས་ཅན་བདེ་བ་སྐྱེས་པར་གྱུར། །རྡོ་རྗེ་བདེ་བ་ཡང་དག་ལྡན། །མཆོག་ཆེན་པོ་ཡི་ཞིང་འདི་ནི། །དག་པའི་ཞིང་དུ་རབ་ཏུ་གྲགས། །
เล่ม ๘๔ · หน้า 251b
སེམས་ཅན་དག་པ་ཀུན་དུ་ཁྱབ། །དེ་བཞིན་རྣལ་འབྱོར་རྡོར་རང་བཞིན། །སླར་ཡང་ཤིང་གི་ནགས་ལ་སོགས། །རྨད་བྱུང་ཆེན་པོ་སྣང་བ་མེད། །རིན་ཆེན་སྣ་བདུན་རང་བཞིན་ཀུན། །ནགས་དང་རྩྭ་ལས་སྐྱེས་པར་གྱུར། །མཐོན་དམན་དག་དང་རྣམ་པར་བྲལ། །ལག་
མཐིལ་བཞིན་དུ་མཉམ་པར་སྣང་། །ཀ་ཙ་ལི་ལྟར་རེག་ན་བདེ། །སྟོང་གསུམ་རབ་ཏུ་གནས་པར་གྱུར། །དམྱལ་བ་ལ་སོགས་སྡུག་བསྔལ་ཀུན། །དང་པོར་ངན་སོང་ཉེ་བར་ཞི། །བཀྲེས་སྐོམ་པ་ཡི་སྡུག་བསྔལ་དག །ཀུན་དུ་འགགས་པར་མཉམ་པར་གནས། །རྒྱ་
མཚོ་ཀུན་དུ་ཐིམ་པར་གྱུར། །རི་བོ་གཟུགས་ཀྱང་ཀུན་དུ་ཁྱབ། །གཞན་འཕྲུལ་གྱི་ནི་ལྷ་རྣམས་དང་། །མཚུངས་པ་རུ་ནི་མི་རྣམས་གྱུར། །སླར་ཡང་མུ་ཁྱུད་འཁོར་ལོ་མེད། །རི་རབ་མནྡ་ར་དག་མེད། །ལྷ་ཡི་འཇིག་རྟེན་གནས་ཀྱང་མེད། །རྒྱ་མཚོ་མེད་ཅིང་ལྷ་མིན་མེད། །
ཀླུ་ཡི་གནས་གཞི་དག་ཀྱང་མེད། །མི་ཡི་ཁྱིམ་དང་ཁང་པ་མེད། །གྲོང་ཁྱེར་ལྗོངས་དང་ཡུལ་འཁོར་དང་། །ཕུག་དང་བཅས་པར་རྣམ་པར་བྲལ། །མི་ཡི་གནས་ཀྱང་མེད་པ་ཉིད། །ཆུ་བོ་ཕུག་དང་ལུང་པ་མེད། །མི་དག་གི་ནི་ལུས་ཀྱང་མེད། །སེམས་ཅན་འགའ་ཡང་
འདིར་མི་སྣང་། །ངན་སོང་འཁོར་ལོ་དག་ཀྱང་མེད། །མི་ཁོམ་མེད་ཅིང་སྡུག་བསྔལ་མེད། །བུད་མེད་སྐྱེས་པ་ལ་སོགས་མེད། །རྔ་མོ་གླང་པོ་ལུག་ཀྱང་མེད། །དཔག་བསམ་ཤིང་དང་སྤོས་ཀྱི་ཤིང་། །རིན་ཆེན་སྣ་བདུན་རང་བཞིན་མཛེས། །སྤོས་ཀྱི་ཆུ་ཡི་རྒྱ་མཚོ་དང་། །རིན་
ཆེན་སྣ་ཚོགས་རྣམས་ཀྱིས་མཛེས། །ཤིང་ནི་ཡིད་འོང་ཐམས་ཅད་ལ། །རོལ་མོའི་སྒྲ་ནི་མངོན་པར་ཕྱུང་། །རོལ་མོའི་ཆོས་ཀྱི་སྒྲ་དག་ཀྱང་། །སྟོང་གསུམ་དུ་ནི་ཡོངས་སུ་བྱུང་། །ཇི་ལྟར་རྡོ་རྗེ་དབང་པོ་ཡི། །རི་རབ་རི་ཡི་རྩེ་མོ་ལྟར། །དེ་བཞིན་སྟོང་གསུམ་གྱི་ནི་གནས། །རྣམ་
པ་སྣ་ཚོགས་འོད་འབར་གྱུར། །སྟོང་གསུམ་གྱི་ནི་འཇིག་རྟེན་འདི། །གྲུ་བཞིར་རབ་ཏུ་གནས་པར་གྱུར། །ཀུན་ནས་ཕྱི་རོལ་གནས་རྣམས་ནི། །ཁ་ཁྱེར་དུ་ཡང་སྣང་བར་གྱུར། །སླར་ཡང་ཉི་མ་ཟླ་བ་མེད། །སྐུར་མ་མེད་ཅིང་ལྷ་ཡང་མེད། །རང་གི་ཁང་པའི་ནང་དུ་ཡང་། །
เล่ม ๘๔ · หน้า 252a
ལྷ་རྣམས་ཉིད་ཀྱང་མཐོང་མི་འགྱུར། །སངས་རྒྱས་འོད་ཀྱིས་ཡོངས་སུ་གསལ། །འོད་ཟེར་སྣ་ཚོགས་ཡིད་འཕྲོག་པ། །གང་གིས་ཞིང་ནི་ཡང་དག་སྦྱངས། །རྡོ་རྗེ་རིན་ཆེན་ཡིད་འོང་བ། །རྡོ་རྗེ་དབང་པོའི་གནས་ཉིད་ཀྱང་། །སླར་ཡང་སྣང་བར་
མི་འགྱུར་རོ། །གཞན་དུ་གཞི་ནི་གཅིག་པའི་གནས། །གང་དུ་སངས་རྒྱས་རྣམ་འཕྲུལ་པ། །སྟོང་གསུམ་གྱི་ནི་འཇིག་རྟེན་འདི། །ལྷ་ཡི་པདྨ་ཡོངས་སུ་གསལ། །རིན་ཆེན་སྣ་བདུན་རབ་ཏུ་མཛེས། །དྲི་ཡི་ཚོགས་ནི་ཡིད་འོང་ལྡན། །བསྐལ་པ་ཆེན་པོའི་ཞིང་
གི་དབུས། །དཀྱིལ་འཁོར་ཤིན་ཏུ་སྡུག་སྟེང་དུ། །དཔག་ཚད་སྟོང་ཕྲག་བརྒྱད་ཅུ་ཡི། །རྡོ་རྗེ་སེང་གེའི་ཁྲི་བྱུང་གྱུར། །ཀུན་ནས་ཕྱོགས་རྣམས་ཐམས་ཅད་དུ། །དཔག་ཚད་སྟོང་ཕྲག་དྲུག་ཅུ་ལྡན། །རྡོ་རྗེ་རིན་ཆེན་རང་བཞིན་མཛེས། །སེང་གེའི་ཁྲི་ནི་བཞི་བྱུང་གྱུར། །
རྡོ་རྗེ་བླ་རེ་རྣམ་པར་བྲེས། །དར་གྱི་ཆུན་པོས་རྣམ་པར་འཕྱང་། །དྲིལ་བུའི་དྲ་བ་རྣམ་པར་འཕྱང་། །ཞིང་ནི་ཀུན་ནས་རབ་ཏུ་སྤྲས། །མེ་ཏོག་སྣ་ཚོགས་ཀུན་དུ་བཀྲམ། །སྣ་ཚོགས་སྤྲིན་གྱིས་རབ་ཏུ་གཡོགས། །སྣ་ཚོགས་དྲི་ཡིས་ཀུན་དུ་ཁྱབ། །དཔག་བསམ་ཤིང་གིས་
ཉེ་བར་སྤྲས། །དཔག་བསམ་ཤིང་ནི་ཡིད་འོང་ལྡན། །རྡོ་རྗེའི་རོལ་མོ་མཛེས་པ་དག །སྒྲ་ནི་མངོན་པར་འབྱིན་པར་བྱེད། །འདི་ཉིད་དང་ནི་ལྷན་ཅིག་ཞིང་། །སྒྲིབ་པ་མེད་པའི་རང་བཞིན་དུ། །ཕྱོགས་རྣམས་ཀུན་དུ་སྣང་བར་གྱུར། །སླར་ཡང་འཇིགས་པར་འགྱུར་བ་
མེད། །སྟོང་གསུམ་གྱི་ནི་འཇིག་རྟེན་འདི། །གང་གཱའི་བྱེ་སྙེད་གྲངས་མེད་པ། །ཤིན་ཏུ་ཕྲ་བའི་རྡུལ་སྙེད་ཀྱི། །སངས་རྒྱས་ཐམས་ཅད་ཡོངས་སུ་གསལ། །ཏིལ་གྱི་གང་བུ་གང་བ་བཞིན། །སངས་རྒྱས་ཐམས་ཅད་ཡོངས་སུ་གསལ། །ཕྱོགས་རྣམས་ཀུན་ནས་
མ་ལུས་པར། །སངས་རྒྱས་ཐམས་ཅད་འདིར་གཤེགས་འགྱུར། །དབུས་ཀྱི་སེང་གེའི་གདན་དག་ལ། །ཆོས་དབྱིངས་འཇིགས་པ་མེད་པ་ལ། །རྣམ་པར་སྣང་མཛད་སྟོབས་ཆེན་པོ། །སྟོན་པ་བཅོམ་ལྡན་བཞུགས་པར་གྱུར། །ཤར་དུ་ཡང་ནི་མི་བསྐྱོད་པ། །ལྷོ་རུ་
เล่ม ๘๔ · หน้า 252b
རིན་ཆེན་འབྱུང་ལྡན་ཏེ། །ནུབ་ཏུ་འོད་དཔག་མེད་པ་ཡིན། །བྱང་དུ་དོན་ཡོད་གྲུབ་པ་སྟེ། །མགོན་པོ་ཆེན་པོ་ཕྱོགས་བཞི་རུ། །རྡོ་རྗེ་ཡི་ནི་སྟེང་དུ་བཞུགས། །ཕྱོགས་དང་ཕྱོགས་མཚམས་དག་ཏུ་ནི། །མཉམ་དུ་དམིགས་ནས་རྣམ་པར་གནས། །ཆོས་ཀྱི་དབྱིངས་
ནས་བསྟན་པར་གྱུར། །སངས་རྒྱས་ཐམས་ཅད་བརྟན་པར་བཞུགས། །མངོན་པར་བྱང་ཆུབ་རྣམ་པ་ལྔ། །ཆོས་ཀྱི་དབྱིངས་ནི་བརྟན་པར་མཛད། །སངས་རྒྱས་གྲངས་མེད་ཐམས་ཅད་ནི། །རྡོ་རྗེ་ཅན་ནི་ལྔ་ལ་བཞུགས། །ཕྱོགས་ནི་རེ་རེར་ཁྱབ་གྱུར་པ། །སངས་རྒྱས་
གཅིག་གིས་ཡང་དག་བཞུགས། །མཚམས་དང་སྟེང་དང་འོག་དག་གི། །རྣམ་སྣང་མཛད་ཀྱིས་བརྟན་པར་མཛད། །ཆོས་ཀྱི་དབྱིངས་ནི་བརྟན་གྱུར་པ། །དབུས་ཀྱི་ཕྱོགས་ཀྱི་སངས་རྒྱས་བཞུགས། །དེ་ནས་སངས་རྒྱས་རྣམ་འཕྲུལ་པ། །ཆོས་དང་ལོངས་སྤྱོད་རྫོགས་
སྙིང་པོ། །བྱང་ཆུབ་སེམས་དཔའི་རྣམ་འཕྲུལ་པ། །སངས་རྒྱས་ཐམས་ཅད་རང་ཉིད་ཀྱི། །སེང་གེའི་ཁྲི་ནི་ལྔ་ལ་བཞུགས། །གྲངས་མེད་ཚད་ནི་མེད་པ་ཡི། །སངས་རྒྱས་ཆོས་ཉིད་མ་ལུས་པ། །རི་མོ་གསལ་བ་དང་མཚུངས་པར། །སྟོང་གསུམ་དག་ནི་མ་ལུས་
གྱུར། །བྱང་ཆུབ་སེམས་དཔའི་དགའ་བ་ཆེ། །པདྨའི་སྟེང་དུ་བཞུགས་པར་གྱུར། །དབུས་ཀྱི་འཁོར་ལོ་ཡང་དག་ལྡན། །བྱེ་བ་དག་ནི་གྲངས་མེད་ལྔ། །སངས་རྒྱས་རོལ་པ་དང་ལྡན་པར། །རྡོ་རྗེ་ཅན་ནི་ཐམས་ཅད་བཞུགས། །ཤར་གྱི་ཆ་ལས་ཡང་དག་བཞུགས། །
བྱེ་བ་དག་ནི་གྲངས་མེད་ལྔ། །རྡོ་རྗེ་རྣམ་འཕྲུལ་སྟོན་བྱེད་པ། །འཁོར་ལོ་དང་ལྡན་བཞུགས་པར་གྱུར། །ལྷོ་ཡི་ཕྱོགས་ན་ཐམས་ཅད་གནས། །བྱེ་བ་དག་ནི་གྲངས་མེད་ལྔ། །རིན་ཆེན་རྣམ་འཕྲུལ་ཡང་དག་ལྡན། །འཁོར་ལོ་དང་ལྡན་བཞུགས་པར་གྱུར། །
བྱེ་བ་དག་ནི་གྲངས་མེད་ལྔ། །ནུབ་ཀྱི་ཕྱོགས་ན་ཡང་དག་གནས། །པདྨའི་རྣམ་འཕྲུལ་སྟོན་བྱེད་པ། །འཁོར་ལོ་དང་ལྡན་བཞུགས་པར་གྱུར། །བྱེ་བ་དག་ནི་གྲངས་མེད་ལྔ། །བྱང་གི་ཕྱོགས་ན་རྣམ་པར་གནས། །ལས་ཀྱི་རྣམ་འཕྲུལ་སྟོན་བྱེད་པ། །འཁོར་
เล่ม ๘๔ · หน้า 253a
ལོ་དང་ལྡན་བཞུགས་པར་གྱུར། །གསང་དང་མཆོད་པ་གང་ཡིན་དང་། །ལྷ་མོ་རྡོ་རྗེ་ལྷ་མོ་ནི། །གྲངས་མེད་ཚད་ནི་མེད་པ་དག །བཅུ་གཉིས་ཀྱིས་ནི་དཀྱིལ་འཁོར་གང་། །སྒོ་སྲུང་དག་ནི་གྲངས་མེད་པ། །རྣལ་འབྱོར་མཆོག་དང་ལྡན་པ་
བཞི། །རྒྱལ་པོ་ཤར་དང་ལྷོ་དག་ཏུ། །ནུབ་དང་བྱང་ནི་ཡང་དག་གནས། །ཆོས་ཀྱི་སྐུ་ལས་ཡང་དག་བྱུང་། །ལོངས་སྤྱོད་རྫོགས་པའི་སྐུར་གྱུར་པ། །སེམས་དཔའ་ཆེན་པོ་འདི་དག་ཀུན། །ཆོས་དང་ལོངས་སྤྱོད་རྫོགས་ལས་བྱུང་། །གང་ཞིག་ཕྱོགས་བཅུ་དག་གི་
ཡང་། །བྱང་ཆུབ་སེམས་དཔའི་བདག་ཉིད་ཆེ། །རྣལ་འབྱོར་ཆེན་པོའི་ས་ཐོབ་པ། །དེ་དག་ཀུན་ཀྱང་འདིར་འོངས་པ། །སངས་རྒྱས་ཞིང་ནི་གང་གཱ་ཡི། །བྱེ་མ་དང་མཉམ་ཇི་སྙེད་པ། །ཡོངས་སུ་གང་བར་གྱུར་པའི་ཚོགས། །དེ་དག་ཐམས་ཅད་ཡང་དག་གཤེགས། །
སངས་རྒྱས་ཀུན་གྱི་མཐུ་ཡིས་ནི། །ཞིང་དག་རྒྱ་ནི་ཆེན་པོར་གྱུར། །ཡུལ་རྣམས་ཐམས་ཅད་བྱ་བ་ཡང་། །གནོད་པ་མེད་ཅིང་འཚེ་བའང་མེད། །སྟོང་གསུམ་གྱི་ནི་འཇིག་རྟེན་པའི། །ཇི་ལྟར་སྔོན་ནི་བར་མེད་པའི། །སངས་རྒྱས་བྱང་ཆུབ་སེམས་དཔའ་ཡི། །བར་མེད་
པ་ནི་དེ་བཞིན་གནས། །གང་ནས་སངས་རྒྱས་མི་སྣང་བ། །ཕྱོགས་ནི་རྡུལ་ཙམ་ཡོད་མ་ཡིན། །བྱང་ཆུབ་སེམས་དཔའ་རྣལ་འབྱོར་ཆེ། །གང་དག་ས་ནི་བཞི་བཅུ་དང་། །ཡང་ན་ཆོས་ལས་བྱུང་བ་ཉིད། །སངས་རྒྱས་སྲས་ནི་གྲགས་པ་ཆེ། །རིགས་ལྔ་བྱུང་བ་ལ་སོགས་
པ། །སངས་རྒྱས་རྣམ་འཕྲུལ་སྟོན་པ་དང་། །འདིར་གནས་བྱང་ཆུབ་སེམས་དཔའི་ཚོགས། །མཆོག་རྣམས་ཕྱོགས་དང་ཕྱོགས་མཚམས་མཐོང་། །སངས་རྒྱས་དག་ནི་གྲངས་མེད་ཀུན། །ལྷ་རྣམས་ཡང་དག་གནས་འདི་རུ། །སངས་རྒྱས་ལྔ་ནི་མཐོང་བར་གྱུར། །
སངས་རྒྱས་དགྲ་བཅོམ་མ་གཏོགས་པར། །ཞིང་འདིར་འགའ་ཡང་མཐོང་མ་གྱུར། །རྡོ་རྗེ་རིགས་ཀྱི་འཁོར་ལོ་མིན། །དཀྱིལ་འཁོར་གྱི་ནི་ཚོགས་ཀྱང་མིན། །དབུས་དང་ཕྱོགས་ནི་ཡང་དག་བཞུགས། །སངས་རྒྱས་ལྔ་ན་མཐོང་བར་གྱུར། །དབང་ཕྱུག་ཆེན་པོ་གནོད་
เล่ม ๘๔ · หน้า 253b
བྱེད་པའི། །རྡོ་རྗེ་ཁྲོ་བོ་མཐོང་བར་གྱུར། །སངས་རྒྱས་ལྔ་དང་དེ་བཞིན་དུ། །ཁྲོ་བོ་དྲུག་བདུན་རྣམ་པར་གནས། །ཚངས་སོགས་ལྷ་རྣམས་དེ་དག་ཀྱང་། །ངོ་མཚར་དག་ནི་སྐྱེས་པར་གྱུར། །འཇིགས་ཤིང་སྐྲག་ནས་ལྷ་དེ་དག །གཅིག་ལ་གཅིག་ནི་སྨྲ་བར་
བྱེད། །གཙོ་བོ་ཇི་བཞིན་མཐོང་འགྱུར་ཞིང་། །ཤིན་ཏུ་ངོ་མཚར་ཅི་ཞིག་སྣང་། །སླར་ཡང་ལྷ་ཡི་འཇིག་རྟེན་དག །སྲིད་པ་ནང་དུ་མཐོང་མི་འགྱུར། །འགྲོ་བ་ལྔ་ཡི་སེམས་ཅན་མིན། །རི་རབ་དང་ནི་རྒྱ་མཚོ་མིན། །ཟླ་བ་ཉི་མ་མ་མཐོང་ཞིང་། །རི་དང་ཁང་པ་དག་ཀྱང་
མིན། །ཅི་བདག་ཅག་ནི་རྨོངས་གྱུར་ཏམ། །ཡང་ན་མིག་ནི་ལོང་བར་གྱུར། །ཡང་ན་བདག་ཅག་སེམས་གཡེངས་པ། །སྒྱུ་མའི་རྣམ་འཕྲུལ་འདི་ཅི་ཞིག །བདག་ཅག་གིས་ནི་སྔར་འཇིགས་མཐོང་། །དྲག་ཅིང་བཀུག་ནས་ཐལ་བར་བྱས། །རི་རབ་རི་ཡི་རྩེ་མོ་རུ། །སྡུག་
བསྔལ་ཆེན་པོས་གཟིར་བར་གྱུར། །སླར་ཡང་རི་རབ་ཡོད་མ་ཡིན། །ཁྲོ་བོ་རྫུ་འཕྲུལ་ཆེན་པོ་མེད། །གཞན་དང་ཁྲོ་བོ་ཆེན་པོ་གཅིག །དབང་ཕྱུག་ཆེན་པོ་གནོད་པར་བྱེད། །གནས་ནི་ཆུང་ངུར་གྱུར་པ་ཡང་། །རྒྱ་ཆེན་པོ་རུ་འདི་རུ་སྣང་། །སྟོང་གསུམ་འདི་ཡང་མི་སྣང་
སྟེ། །བདག་ཅག་འཇིག་རྟེན་གཞན་དུ་ཕྱིན། །དེ་ལྟར་བརྗོད་པ་སྣ་ཚོགས་པ། །གཅིག་ལ་གཅིག་ནི་སྨྲ་བར་བྱེད། །མི་སྨྲ་བར་ནི་གནས་གྱུར་ནས། །རྡོ་རྗེ་ཅན་ལ་ལྟ་བར་བྱེད། །གནོད་སྦྱིན་འབྱུང་པོ་ཤ་ཟ་སོགས། །གདུག་པ་ཀུན་དང་གདོན་སོགས་ཀྱིས། །མུན་
པར་ཁྱབ་པ་བཞིན་དུ་ནི། །སྟོང་གསུམ་འདི་ནི་མཐོང་བར་གྱུར། །གཞན་ནི་ཅུང་ཟད་མ་མཐོང་སྟེ། །གཞན་དུ་ཕྱོགས་དག་མུན་པས་ཁྱབ། །རྡོ་རྗེ་ཁྲོ་བོ་འཁྲུལ་གྱུར་ཅིང་། །སྒྱུ་མ་ཡིས་ནི་རྨོངས་གྱུར་ཅིང་། །ཀུན་དུ་རྨོངས་པ་ཉིད་གྱུར་ཅིང་། །གཅིག་ལ་གཅིག་ནི་རྨོངས་
པར་གྱུར། །ཧ་ཧ་ཞེས་བྱའི་སྒྲ་སྒྲོགས་ཤིང་། །བདག་ཅག་འདིར་ནི་གང་དུ་ཕྱིན། །ཚིག་ནི་རབ་ཏུ་རྗོད་བྱེད་ཅིང་། །གཅིག་ལ་གཅིག་ནི་སྨྲ་བར་བྱེད། །འདི་ནི་སུ་ཞིག་བདག་ཅག་གང་། །འདི་ནི་སུ་ཡི་གམ་དུ་ཕྱིན། །བདག་ཅག་རང་གི་གནས་ན་ལྟུང་། །བདག་
เล่ม ๘๔ · หน้า 254a
ཅག་འཇིག་རྟེན་གཞན་དུ་ཕྱིན། །རྡོ་རྗེ་ཁྲོ་བོས་གསད་པར་གྱུར། །འོ་ན་འདི་ནི་ཅི་ཞིག་ཡིན། །ལྷ་ཡི་གནས་ཀྱང་མ་མཐོང་བཞིན། །རྡོ་རྗེ་ཅན་ཡང་མཐོང་མ་གྱུར། །སངས་རྒྱས་དཀྱིལ་འཁོར་འཁོར་ལོ་མིན། །བདག་ཅག་རྣམས་ནི་མུན་པར་གྱུར། །
རང་གི་གནས་ཀྱང་མ་མཐོང་ཞིང་། །རི་རབ་ཉིད་ཀྱང་མཐོང་མ་གྱུར། །མཚོ་དང་རྒྱ་མཚོ་དག་ཀྱང་མིན། །སྐར་མ་ཟླ་བ་ཉི་མ་མིན། །བདག་ཅག་ཐམས་ཅད་གང་ནས་འོངས། །ཡུལ་གང་ཞིག་ཏུ་འགྲོ་བར་བྱ། །འགྲོ་བ་ལྔ་ཡང་ཡོད་མ་ཡིན། །འཇིག་རྟེན་མེད་ཅིང་མ་མོ་མེད། །
མི་དང་མི་མ་ཡིན་པ་དག །རྣམ་པ་ཀུན་དུ་མཐོང་མ་གྱུར། །སྔོན་ནི་ཇི་ལྟར་དེ་བཞིན་ཕྱིས། །རྨད་དུ་བྱུང་བ་ཉིད་མ་གྱུར། །གཞན་དུ་ས་ནི་གཡོས་པར་གྱུར། །རླུང་དག་གིས་ནི་རྣམ་པར་བསྐྱོད། །འབྲུག་གི་སྒྲ་དང་ལོག་ཆེན་པོ། །སྡུག་བསྔལ་ཐམས་ཅད་ཡང་དག་
ལྡན། །བཀྲེས་སྐོམ་ལ་སོགས་སྡུག་བསྔལ་དང་། །བྲལ་མིན་ཀུན་དུ་སྡུག་བསྔལ་གྱུར། །དེར་ནི་ལྷ་ཆེན་རྫུ་འཕྲུལ་དག །ཅུང་ཟད་ཀྱང་ནི་མཐོང་མ་གྱུར། །དམྱལ་བ་ཡི་དགས་དུད་འགྲོ་དག །རྣམ་པར་ཉམས་ཤིང་བཤིག་པར་གྱུར། །སྡིག་པ་དྲལ་བའི་ཕྱག་རྒྱ་ཡིས། །
ངན་སོང་གསུམ་ནི་ཉེ་བར་ཞི། །ལྷ་གང་འདུ་ཤེས་མེད་པ་དང་། །གཟུགས་མེད་པ་ན་སྤྱོད་པར་གནས། །ཕུང་པོ་ལྔ་རུ་རང་བདག་ཉིད། །ངོ་མཚར་དེ་བཞིན་མཐོང་གྱུར་ནས། །རང་ཉིད་ལའང་རྟོག་པར་བྱེད། །གཅིག་ལ་གཅིག་ཀྱང་ལྟ་བར་བྱེད། །དེ་བཞིན་ཐམས་
ཅད་སྐྲག་ཅིང་འཇིགས། །ངོ་མཚར་གྱུར་པ་འདི་ཅི་ཞིག །ཚད་མེད་བསྐལ་པ་ཆེན་པོ་རུ། །བདག་ཅག་དག་པར་གནས་པར་གྱུར། །བདག་མཆོག་ལས་ནི་བདག་ཅག་གྲོལ། །སླར་ཡང་བདག་ཏུ་འཛིན་པར་གྱུར། །སྔོན་གྱི་བག་ཆགས་མངོན་འདོད་ལ། །
སྲིད་གསུམ་གནས་ནས་མཐོང་བར་གྱུར། །སྲིད་པ་གསུམ་ཡང་མཐོང་མ་ཡིན། །དེ་བཞིན་འགྲོ་བ་ལྔ་ཡང་མེད། །གཞན་དུ་ཤིན་ཏུ་དག་པར་གཅིག །ཆོས་དང་ལོངས་སྤྱོད་རྫོགས་པ་སྤྲུལ། །སངས་རྒྱས་ལྔ་ཉིད་མཐོང་བར་གྱུར། །སྲིད་གསུམ་
เล่ม ๘๔ · หน้า 254b
གནས་ནི་གཞན་དག་མིན། །ཚོགས་ལ་ཐམས་ཅད་མཉེས་པར་གྱུར། །གཅིག་ལ་གཅིག་ནི་སྨྲ་བར་བྱེད། །འདི་ནི་སུ་ཞིག་བདག་ཅག་གང་། །བདག་ཅག་འཇིག་རྟེན་གཞན་དུ་ཕྱིན། །སྔོན་ནས་བདག་གིས་འཇིག་རྟེན་འདི། །འགྲོ་བ་ལྔ་བཅས་དེ་
བཞིན་དུ། །རི་རབ་དང་ནི་རྒྱ་མཚོར་བཅས། །ལྷ་རྣམས་དྲུག་ནི་འཁོར་བཅས་མཐོང་། །སྲིད་པ་གསུམ་གྱི་ལྷ་རྣམས་ནི། །གང་ཞིག་འདི་ནི་མཐོང་མ་གྱུར། །གཞལ་ཡས་ཁང་དང་སེམས་ཅན་ནི། །གཙོ་བོ་ཇི་བཞིན་མཐོང་བར་གྱུར། །དེ་འདྲའི་ངོ་མཚར་
སྣ་ཚོགས་པ། །གནས་ཆེན་འདི་རུ་མཐོང་བར་གྱུར། །བྱང་ཆུབ་སེམས་ཀྱི་རྣམ་འཕྲུལ་འདི། །སངས་རྒྱས་ཀུན་གྱིས་རོལ་བ་ཡིན། །གང་ཞིག་སྟོང་གསུམ་འདི་ཡི་ནི། །རང་རྒྱལ་ཐམས་ཅད་མཆོག་གྱུར་པ། །དེ་ཡང་ཀུན་དུ་རྨོངས་གྱུར་ནས། །རྣམ་པར་འཕྲུལ་
པའང་མཐོང་མ་གྱུར། །སངས་རྒྱས་ཉིད་ཀྱང་མཐོང་མ་ཡིན། །རྒྱལ་དང་རྒྱལ་བའི་སྲས་ཀྱང་མིན། །ཆོས་ཀྱི་དབྱིངས་ནི་བརྟན་ཞི་བ། །གནས་ནི་དེ་རུ་མཐོང་མ་གྱུར། །གཞན་དུ་སྟོང་ནི་གསུམ་པོ་འདི། །རྣམ་པ་ཀུན་དུ་མ་མཐོང་ཉིད། །ས་དང་མེ་དང་ཆུ་ཁམས་མིན། །
གསེར་གྱི་དཀྱིལ་འཁོར་དག་ཀྱང་མིན། །འགྲོ་བ་ལྔ་ཡི་སེམས་ཅན་མིན། །ཟླ་བ་ཉི་མ་དག་ཀྱང་མིན། །སྐར་མ་གཟའ་དང་རྒྱུ་སྐར་མིན། །སེམས་ཅན་དག་ཀྱང་ཁམས་གསུམ་མིན། །འདི་དག་ཐམས་ཅད་སྟོང་པར་གྱུར། །གཞན་དུ་ནམ་མཁའ་དཀྱིལ་འཁོར་
མིན། །དེ་དག་ཐམས་ཅད་འཇིགས་སྐྲག་ནས། །མྱ་ངན་འདས་པ་ཉེ་བར་ཐོབ། །གང་ཡང་ཕྱོགས་རྣམས་བཅུ་པོ་ཡི། །ཉན་ཐོས་འཇིགས་པ་མེད་པ་རྣམས། །བྱང་སེམས་ཅན་ནི་ཆེན་པོ་ཡིས། །དེ་དག་ཀུན་ནས་སྐྲག་པར་གྱུར། །རང་རང་གི་ནི་ཞིང་དག་ཏུ། །
སངས་རྒྱས་ཉིད་ཀྱང་མཐོང་མ་གྱུར། །འདུས་པ་ཆེན་པོ་དག་དང་ནི། །ཆོས་རྣམས་སྟོན་པ་དག་ཀྱང་མིན། །ཞིང་དེ་ཡི་ནི་སེམས་ཅན་མིན། །ལྷ་དང་མི་རྣམས་དག་ཀྱང་མིན། །ཁང་པ་མེད་ཅིང་ཞིང་ཡང་མེད། །ས་དང་མེ་དང་རླུང་ཡང་མེད། །རང་གི་
เล่ม ๘๔ · หน้า 255a
ཞིང་ཡང་མ་མཐོང་ཞིང་། །རྡོ་རྗེ་སེམས་དཔའ་འཇིགས་པར་གྱུར། །སྐད་ཅིག་གིས་ནི་མི་དགར་གྱུར། །ཐང་ཅིག་ཏུ་ནི་རྨོངས་པར་གྱུར། །དེ་ལྟ་བུ་ཡི་རྣམ་འཕྲུལ་དུ། །བྱང་ཆུབ་སེམས་ནི་རབ་ཏུ་སྣང་། །སྔོན་གྱི་བསྐལ་བ་ཆེན་པོ་ལ། །འཁོར་ལོ་
རྣམ་པར་འཕྲུལ་པ་བསྟན། །བཅོམ་ལྡན་རྡོ་རྗེའི་རྣལ་འབྱོར་པས། །དེ་ལྟ་བུ་ནི་བྱིན་གྱིས་བརླབས། །སེམས་ཅན་གང་དག་འདི་ན་གནས། །ཉིན་དང་མཚན་མོ་མི་ཤེས་གྱུར། །དེ་ནས་དེ་ཉིད་གསང་བ་ཆེ། །ཆོས་ཀྱི་དབྱིངས་ནི་བརྟན་པའི་ཚོགས། །ཆོས་དང་ལོངས་
སྤྱོད་རྫོགས་སངས་རྒྱས། །དེ་ལྟ་བུ་ཡི་རྣམ་འཕྲུལ་བྱུང་། །སྟོང་གསུམ་ཡོངས་སུ་བསྡུས་པ་ཡི། །ལྷ་ཡི་གནས་ནི་བཀོད་པར་གྱུར། །སངས་རྒྱས་རྣམས་ཀྱི་གནས་གཅིག་པུ། །ཆོས་དང་ལོངས་སྤྱོད་རྫོགས་སྤྲུལ་པ། །ལ་ལར་སྔོན་པོས་རབ་ཏུ་མཛེས། །ས་ཡི་
ཕྱོགས་ནི་རབ་ཏུ་སྤྲས། །རྡོ་རྗེ་སྡོན་པོས་རབ་ཏུ་བརྒྱན། །ལ་ལར་གསེར་གྱི་མདོག་ཏུ་སྣང་། །ཁ་དོག་སེར་པོས་རྣམ་པར་བརྒྱན། །ས་ཡི་ཆ་ཡང་རབ་ཏུ་སྤྲས། །རྡོ་རྗེ་སེར་པོས་རབ་ཏུ་བརྒྱན། །ལ་ལར་ཁ་དོག་དམར་པོ་ནི། །བྱི་རུ་ལྟ་བུས་རབ་ཏུ་མཛེས། །ས་ཡི་
ཆ་ཡང་རབ་ཏུ་སྤྲས། །རྡོ་རྗེ་དམར་པོས་རབ་ཏུ་བརྒྱན། །ལ་ལར་བཙག་གི་མདོག་ཅན་གྱི། །བཻཌཱུརྱ་མཚུངས་རབ་ཏུ་མཛེས། །ས་ཡི་ཆ་ཡང་རྣམ་པར་སྤྲས། །རྡོ་རྗེ་བཙོད་ཀྱིས་རྣམ་པར་མཛེས། །ལ་ལར་ཤེལ་གྱི་མདོག་ཅན་གྱིས། །ཤིན་ཏུ་སྣང་བས་རབ་ཏུ་
མཛེས། །ས་ཡི་ཆ་ཡང་རྣམ་པར་སྤྲས། །རྡོ་རྗེ་ཤེལ་གྱིས་རྣམ་པར་བརྒྱན། །ཤར་དུ་སྔོན་པོ་ཆེན་པོ་སྟེ། །ལྷོར་ནི་སེར་པོ་ཡང་དག་ལྡན། །ནུབ་ཀྱི་ཆ་ནི་དམར་པོ་སྟེ། །བྱང་ནི་བཙོད་དང་ཡང་དག་ལྡན། །དབུས་ཀྱི་ས་ཡི་ཆ་དག་ནི། །ཤེལ་གྱི་མདོག་ཅན་
བླ་ན་མེད། །རྡོ་རྗེ་ཆེན་པོས་ཤིན་ཏུ་དག །ཚོན་རྩི་ལྔ་ཡི་རང་བཞིན་བཤད། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རབ་ཏུ་མཛེས། །ཆ་མཉམ་ལེགས་པར་བགོས་པ་སྟེ། །གོ་རིམས་དང་ནི་ཡང་དག་ལྡན། །ཀུན་ནས་ཕྱི་རོལ་གནས་དག་ན། །རྡོ་
เล่ม ๘๔ · หน้า 255b
རྗེ་ཁ་ཁྱེར་ཡང་དག་ལྡན། །ཀུན་ནས་ཁ་ཁྱེར་དང་ལྡན་ཞིང་། །སྒོ་ཡི་ཁ་ཁྱེར་དག་གིས་སྤྲས། །རི་མོ་རྡོ་རྗེ་སྔོ་རང་བཞིན། །གཞན་ཡང་གསེར་གྱི་མདོག་ཅན་དང་། །ཁ་དོག་དམར་པོ་མཆོག་དང་ནི། །གཞན་ཡང་ཤེལ་ནི་བཟང་པོ་དག །རིན་ཆེན་ཀུན་གྱི་
རང་བཞིན་མཆོག །དཀྱིལ་འཁོར་སྣ་ཚོགས་མཛེས་གྱུར་པ། །སྣ་ཚོགས་གཟུགས་ནི་འཛིན་པའི་མཆོག །རྡོ་རྗེ་ལྷ་མོའི་ཚོགས་ཀྱིས་མཆོད། །དྲ་བ་དྲ་བ་ཕྱེད་པས་སྤྲས། །ཟླ་བ་ཕྱེད་པས་ཉེ་བར་མཛེས། །གཡེར་ཀའི་དྲ་བས་ཀུན་དུ་ཁེབས། །དྲིལ་
བུའི་མཆོག་ནི་ཀུན་དུ་འཕྱང་། །སྣ་ཚོགས་ཤིང་ནི་ཡིད་འོང་ལྡན། །དཔག་བསམ་ཤིང་ནི་ཡིད་འོང་ལྡན། །སྤོས་དང་མེ་ཏོག་དེ་བཞིན་དྲི། །སྣང་བའི་ཤིང་མཆོག་ཡང་དག་ལྡན། །སྣ་ཚོགས་བཀོད་པ་ཉེ་བར་ལྡན། །སྣ་ཚོགས་རྡོ་རྗེ་བདུད་རྩིའི་ཆུ། །མཚོ་མཆོག་
ཆུ་ཡིས་གང་བར་གྱུར། །རྡོ་རྗེ་རྒྱ་མཚོ་རྒྱ་ཆེན་ལྡན། །མེ་ཏོག་སྣ་ཚོགས་ཀུན་དུ་བཀྲམ། །སྣ་ཚོགས་བདུག་པ་དག་གིས་བདུགས། །སྣ་ཚོགས་དྲི་ཡི་ཆུ་ཡིས་གཏོར། །སྣ་ཚོགས་དྲི་ཡིས་ཀུན་དུ་ཁྱབ། །དྲག་པོ་ཆེན་པོ་སྲས་བཅུ་དག །དེ་ནས་ཉམས་དགའ་བ་
དག་བྱུང་། །ཤིང་དང་པད་སོགས་ཐམས་ཅད་ལས། །ཆོས་རྣམས་འབྱུང་བ་ཐོས་པར་གྱུར། །ཕྱོགས་རྣམས་ཀུན་དུ་རྣམ་ཕྱུང་ནས། །དག་པའི་ཞིང་དུ་སྟོང་ཉིད་བཅས། །རྣམ་པར་སྒྲ་ནི་གང་ཞིག་གྲག །ཆོས་ཀྱི་བདེ་བ་འབྱུང་བར་འགྱུར། །ཡྃ། ལྃ། ཤྃ། བཾ།
ཨོཾ་བཛྲ་ས་ཏྭ་ཀྲོ་དྷ་ཡ་ཧཱུྃ་ཕཊ། ཨོྃ་བཛྲ་ཀྲོ་དྷ་ཨཱ་ཀཪྵ་ཡ་ཧཱུྃ་ཕཊ། ཨོྃ་བཛྲ་ཀྲོ་དྷ་རཱ་ག་ཡ་ཧཱུྃ་ཕཊ། ཨོྃ་བཛྲ་དུཥྚི་ཀྲོ་དྷ་ཡ་སཱ་དྷུ་སཱ་དྷུ་ཧཱུྃ་ཕཊ། ཁྲོ་བོ་རྡོ་རྗེ་རིན་ཆེན་མཆོག །འབར་བའི་ཕྲེང་བ་བཀོད་དཀའ་བས། །ཁྲོ་བོ་རྡོ་རྗེ་བླ་ན་མེད། །མཆོག་ཏུ་གསང་བ་གསུངས་པར་
གྱུར། །ཨོྃ་བཛྲ་བྷྲྀ་ཀུ་ཊི་ཀྲོ་དྷ་ཧ་ན་ཧཱུྃ་ཕཊ། ཨོྃ་བཛྲ་སཱུརྱ་མ་ཧཱ་ཛྭ་ལ་མཱ་ལ་ཀྲོ་དྷ་ཛྭཱ་ལ་ཡ་སརྦ་ཧཱུྃ་ཕཊ། ཨོཾ་བཛྲ་ཀེ་ཏུ་མ་ཧཱ་ཀྲོ་དྷ་དྷེ་ན་ཧཱུྃ་ཕཊ། ཨོྃ་ཨཊྚ་ཧཱ་ས་བཛྲ་མཊྚ་ཧཱ་ས་ཀྲོ་དྷ་ཧ་ཧ་ཧ་ཧ་ཧཱུྃ་ཕཊ། ཁྲོ་བོ་ཆེན་པོ་རྡོ་རྗེ་ཆོས། །འབར་བའི་ཕྲེང་བས་ཁྱབ་གྱུར་པས། །
เล่ม ๘๔ · หน้า 256a
ཁྲོ་བོའི་རྒྱལ་པོ་རབ་བཟོད་དཀའ། །མཆོག་ཏུ་འཇིགས་སུ་རུང་བ་སྨྲས། །ཨོྃ་བཛྲ་དྷརྨ་བི་ཤོ་དྷ་ཡ་ཧཱུྃ་ཕཊ། ཨོྃ་ཏིཀྵྞ་ཀྲོ་དྷ་ཙྪིནྡ་ཧཱུྃ་ཕཊ། ཨོྃ་བཛྲ་ཧེ་ཏུ་ཀྲོ་དྷ་པྲ་བེ་ཤ་ཡ་མཎྜ་ལཾ་སརྦ་ཧཱུྃ་ཕཊ། ཨོྃ་བཛྲ་ཀྲོ་དྷ་བྷཱ་ཥ་ཏ་པཱ་ཏ་ཧཱུྃ་ཕཊ། རྡོ་རྗེ་ལས་ནི་རྒྱལ་
པོ་ཆེ། །གསང་བ་ཐམས་ཅད་ཀུན་བསྡུས་པས། །འབར་བ་གསལ་བས་ཁྱབ་པ་བྱུང་། །ཁྲོ་བོ་རྒྱལ་པོས་བརྗོད་པར་གྱུར། །ཨོྃ་བཛྲ་ཀརྨ་ཀྲོ་དྷ་ཧཱུྃ་ཕཊ། ཨོྃ་བཛྲ་ཀ་བ་ཙ་ཀྲོ་དྷ་རཀྵ་རཀྵ་ཧཱུྃ་ཕཊ། ཨོྃ་བཛྲ་ཡཀྵ་ཀྲོ་དྷ་ཁཱ་ད་ཁཱ་ད་ཧཱུྃ་ཕཊ། ཨོྃ་བཛྲ་ཀྲོ་དྷ་མུཥྚི་སཱ་དྷ་ཡ་ས་
མ་ཡ་ཧཱུྃ་ཕཊ། སེམས་དཔའ་འདི་རྣམས་གསང་བ་ཆེ། །ཞི་བའི་གཟུགས་ལས་རྣམ་པར་གྱུར། །རྡོ་རྗེ་ཁྲོ་བོ་དྲག་པོ་ཆེ། །འཁོར་ལོའི་དཀྱིལ་འཁོར་ལ་བཞུགས་གྱུར། །དེ་ནས་རྒྱལ་པོ་རྡོ་རྗེ་འཛིན། །ཁྲོ་བོ་ཆེན་པོ་སྟོབས་པོ་ཆེ། །གསང་བ་འདི་རྣམས་ཡོངས་
སུ་བརྗོད། །མཆོད་པའི་ལྷ་མོས་གསུངས་པར་གྱུར། །ཨོྃ་བཛྲ་ལཱ་སྱེ་རཱ་ག་ཡ་ཧཱུྃ་ཕཊ། ཨོྃ་བཛྲ་མཱ་ལཻ་ཨ་བྷི་ཥིཉྩ་ཡ་ཧཱུྃ་ཕཊ། ཨོྃ་བཛྲ་གཱི་ཏྱེ་གཱ་ཏ་ཡ་ཧཱུྃ་ཕཊ། ཨོྃ་བཛྲ་ནྲྀ་ཏྱེ་བ་ཤི་ཀུ་རུ་ཧཱུྃ་ཕཊ། ཨོྃ་བཛྲ་པུཥྤ་པཱུ་ཛཱ་སྥ་ར་ཎ་ས་མ་ཡེ་ཧཱུྃ་ཕཊ། ཨོྃ་བཛྲ་གན་དྷ་པཱུ་ཛཱ་སྥ་ར་ཎ་ས་
མ་ཡེ་ཧཱུྃཕཊ། ཨོྃ་བཛྲ་དྷཱུ་པ་པཱུ་ཛཱ་སྥ་ར་ཎ་ས་མ་ཡེ་ཧཱུྃ་ཕཊ། ཨོྃ་བཛྲ་ཨཱ་ལོ་ཀཻ་པཱུ་ཛཱ་སྥ་ར་ཎ་ས་མ་ཡེ་ཧཱུྃ་ཕཊ། དེ་ནས་རྒྱལ་པོ་རྡོ་རྗེ་འཛིན། །ཁྲོ་བོ་དྲག་པོ་ཤིན་ཏུ་གདུག །རྡོ་རྗེ་ཁྲོ་བོ་རབ་གཏུམ་པ། །སྒོ་སྲུང་དག་ནི་ཀུན་དུ་བྱུང་། །ཨོྃ་ཨཾ་ཀུ་ཤ་མ་ཧཱ་ཀྲོ་དྷ་ཨཱ་
ཀཪྵ་ཡ་སརྦ་ས་མ་ཡ་ཧཱུྃ་ཛཿ། ཨོྃ་བཛྲ་པཱ་ཤ་མ་ཧཱ་ཀྲོ་དྷ་པྲ་བེ་ཤ་ཡ་སརྦ་ས་མ་ཡ་ཧཱུྃ་ཧཱུྃ། ཨོྃ་བཛྲ་སྥོ་ཊ་མ་ཧཱ་ཀྲོ་དྷ་བན་དྷ་ཡ་སརྦ་ས་མ་ཡ་ཧཱུྃ་བྃ། ཨོྃ་བཛྲ་ཨཱ་བེ་ཤ་མ་ཧཱ་ཀྲོ་དྷ་ཨཱ་བེ་ཤ་ཡ་སརྦ་ས་མ་ཡ་ཧཱུྃ་ཕཊ། ཧོཿ། འཁོར་ལོ་ཡོངས་སུ་ཟླུམ་པོར་ནི། །རྡོ་རྗེ་འཛིན་
པ་ཆེན་པོར་གྱུར། །ཁྲོ་བོ་ཆེན་པོའི་ཚོགས་ཀྱིས་ཁྱབ། །དཀྱིལ་འཁོར་ཆེན་པོ་ཡང་དག་ལྡན། །གནས་ཆེན་པོ་དང་ཡང་དག་ལྡན། །དཀྱིལ་འཁོར་ཆེན་པོར་ཀུན་བསྡུས་པས། །ཤིན་ཏུ་གསང་བ་ཆོས་ཆེན་པོ། །ཆོས་དང་ལོངས་སྤྱོད་རྫོགས་སྤྲུལ་པ། །
เล่ม ๘๔ · หน้า 256b
དེ་ཉིད་སྙིང་པོ་གསང་བ་ཆེ། །ཐར་པ་ཆེན་པོ་གྲོང་ཁྱེར་མཆོག །དཀྱིལ་འཁོར་རྒྱལ་པོ་ཆེན་པོ་སྟེ། །སེམས་ཅན་དོན་ཀུན་ཡང་དག་ལྡན། །ཆོས་ཉིད་རྫོགས་པར་བྱང་ཆུབ་པ། །འདི་འདྲ་ཆོས་དང་ལོངས་སྤྱོད་རྫོགས། །རིགས་ལྔའི་གསང་བ་གང་ཡིན་
པ། །གདོན་མི་ཟ་བར་བྱེད་པ་ཡི། །དེ་བཞིན་གཤེགས་པའི་རིགས་ཞི་བ། །གང་ཕྱིར་དག་པའི་ཚོགས་ཆེན་པོ། །དེ་བཞིན་རྡོ་རྗེའི་རིགས་དྲག་པོ། །གང་ཕྱིར་ལྷ་ཆེན་རབ་འདུལ་བྱེད། །ལྷ་ཆེན་ལ་སོགས་སྤྲུལ་བྱེད་པ། །དེ་བཞིན་པདྨའི་རིགས་མཆོག་སྟེ། །
གང་ཕྱིར་གདུལ་བྱའི་སེམས་ཅན་རྣམས། །སྤྲུལ་པ་སྣ་ཚོགས་ཡང་དག་བྱུང་། །སྤྲུལ་པའི་འཁོར་ལོ་ཞི་བ་སྟེ། །དྲག་པོའི་མཆོད་པ་རབ་བསྐོར་བ། །སྣ་ཚོགས་རིགས་ཅན་འཁོར་ལོ་སྟེ། །རིགས་བཞི་དང་ནི་ཡང་དག་ལྡན། །དེ་བཞིན་གཤེགས་པའི་རིགས་
མཆོག་ནི། །ཤར་གྱི་འཁོར་ལོ་ཡང་དག་བྱུང་། །དེ་ནས་རྡོ་རྗེའི་རིགས་དྲག་པོ། །སེམས་ཅན་དོན་དུ་ཡང་དག་འཇིགས། །རྡོ་རྗེའི་རིགས་མཆོག་ཆེན་པོ་འདི། །དཀྱིལ་འཁོར་ཚོགས་ནི་ཀུན་བསྡུས་པ། །གསང་བའི་དབང་ཕྱུག་རྒྱལ་པོ་ཆེ། །གང་ཕྱིར་
གསང་བའི་བདག་པོར་བཤད། །རྡོ་རྗེ་ཐམས་ཅད་ཀུན་བསྡུས་པ། །རང་གི་རིགས་མཆོག་བཤད་ནས་ནི། །རྡོ་རྗེ་འཛིན་པ་རྒྱལ་པོ་ཆེས། །དཀྱིལ་འཁོར་ཆེན་པོ་ཀུན་དུ་སྤྲུལ། །ལྷ་ལ་སོགས་པ་གདུག་པ་ཀུན། །སྐད་ཅིག་དེ་ལ་ཡང་དག་བཀུག །སླར་ནི་
བཅུག་པར་བྱས་ནས་ཀྱང་། །སྐད་ཅིག་གིས་ནི་དམ་ཚིག་ཕོག །རྡོ་རྗེ་མཚན་མའི་དབང་བསྐུར་བ། །དམ་ཚིག་ལྡན་པ་བྱིན་ནས་ནི། །བཀུག་སྟེ་རབ་ཏུ་བཅུག་ནས་ཀྱང་། །དེ་བཞིན་བཅིངས་ཏེ་དབང་དུ་བྱས། །དམ་ཚིག་ལ་ནི་བརྩོན་བྱས་ཏེ། །དམ་ཚིག་སྡོམ་
པ་དེ་བཞིན་ནོ། །མི་རྣམས་ལ་ནི་ཕན་པའི་ཕྱིར། །དཀྱིལ་འཁོར་མཆོག་ནི་གསུངས་པར་གྱུར། །འཁོར་ལོ་ཆེན་པོ་གྲོང་ཁྱེར་ཆེ། །རྡོ་རྗེ་རིགས་མཆོག་ཆེན་པོ་སྟེ། །ཁམས་གསུམ་རྣམ་རྒྱལ་ཞེས་བྱ་བ། །དེ་ནས་ཡང་དག་བཤད་པར་བྱ། །འཇིག་རྟེན་གསུམ་
เล่ม ๘๔ · หน้า 257a
ཚོགས་ཕམ་བྱས་ནས། །ལྷ་ལ་སོགས་པ་རབ་བཅུག་གྱུར། །དེ་ནས་ཁམས་གསུམ་རྣམ་རྒྱལ་གནས། །འཁོར་ལོ་ཆེན་པོ་གྲོང་ཁྱེར་ཆེ། །གང་མིང་གཟུང་བ་ཙམ་ཉིད་ཀྱིས། །སེམས་ཅན་རབ་ཏུ་བཅོམ་ནས་ནི། །གདོན་ལ་སོགས་པ་འབྲོས་
པར་བྱེད། །རིམས་དང་གདོན་དང་དུག་དག་དང་། །དྲག་པོ་གདུག་པ་དམ་ཚིག་དང་། །མཚན་བཟང་བ་ཡི་མོད་ཉིད་ལ། །སྐྲག་པ་དང་ནི་གཡོ་བར་གྱུར། །སྐུ་ནི་ལོངས་སྤྱོད་རྫོགས་པའི་མཆོག །མི་གང་དག་ནི་གདུལ་བྱ་མིན། །དེ་བས་རྡོ་རྗེ་འཛིན་རྒྱལ་ནི། །དཀྱིལ་
འཁོར་ཆེན་པོ་སྤྲུལ་པར་གྱུར། །རྡོ་རྗེ་སློབ་དཔོན་སྐལ་བ་ཆེ། །ཤིན་ཏུ་བྱང་ཞིང་རབ་ཏུ་མཁས། །དགོངས་པ་ཡི་ནི་ཆོ་ག་ཤེས། །གཞུང་རྣམས་ཐོས་ཤིང་དོན་ལ་མཁས། །རབ་ཏུ་དང་ཞིང་བློ་ལྡན་བརྟན། །རིགས་དང་རིགས་མིན་རབ་ཏུ་ཤེས། །བྱང་ཆུབ་སེམས་
ལ་བརྩོན་པར་གྱུར། །ལྷ་གཞན་དག་ལ་འདོད་ལྡན་མིན། །གསང་བའི་སྙིང་པོ་མཆོག་མཐོང་བ། །སྙིང་རྗེ་བདག་ཉིད་བརྩེར་ལྡན་པ། །དག་ཅིང་དེས་ལ་རྣམ་པར་དུལ། །རང་གི་ངང་གིས་རྣམ་པར་གནས། །ཞེན་ཅིང་ཆགས་ལ་གདུག་པ་མིན། །རྨོངས་པ་མེད་
ཅིང་ལེ་ལོ་མེད། །བརྩེ་ལྡན་ཕན་པའི་བསམ་པ་ཅན། །རྟག་ཏུ་རྣམ་པར་ད་གོད་ལ་དགའ། །གཟུགས་སོགས་འདོད་པའི་ཡོན་ཏན་ལ། །ཆགས་ཤིང་ལྷག་པར་རྒྱལ་གྱུར་ནས། །སྲིད་ལ་སེམས་ནི་སྐྲག་པར་བྱེད། །སྲིད་ལ་མངོན་པར་ཆགས་པ་མེད། །ཐེག་
པ་ཆེན་པོའི་ཚུལ་ལ་བརྩོན། །ཐེག་པ་གཞན་ལ་འདོད་ལྡན་མིན། །སེམས་ཅན་ཀུན་གྱི་དོན་ལ་བརྩོན། །དཀོན་མཆོག་གསུམ་གྱི་མཆོག་བྱུང་བ། །ཉོན་མོངས་ཀུན་དུ་ཆགས་པ་སྤངས། །གཉེན་པོ་དག་ནི་རབ་ཏུ་བསྒོམ། །འདོད་ཆགས་ལ་སོགས་ཉོན་མོངས་
ཆེ། །མི་སྡུག་པ་ལ་སོགས་པ་བསྒོམ། །རིགས་དང་རིགས་མིན་ཆོ་ག་ཤེས། །སྔགས་དང་ཕྱག་རྒྱ་ཤིན་ཏུ་མཁས། །དགུག་དང་གཞུག་དང་བཅིང་བ་དང་། །དབང་དུ་བྱ་དང་གཤེགས་གསོལ་དང་། །ཇི་སྐད་རྡོ་རྗེ་དབྱིངས་བཤད་ཡིན། །སྔོན་དུ་རིག་
เล่ม ๘๔ · หน้า 257b
པའི་བརྟུལ་ཞུགས་བྱ། །ཁ་ན་མ་ཐོ་རྡུལ་ཙམ་ལ། །ཀུན་དུ་འཛེམ་པར་བྱ་བ་ཡིན། །ཚད་དང་ཚོན་རྩི་སྲད་བུ་དང་། །ཡོ་བྱད་ཆོ་ག་ཡང་དག་ལྡན། །བཅིང་དང་ཕུར་བུས་གདབ་པ་ཉིད། །སྔར་བཤད་རྡོ་རྗེ་དབྱིངས་བཞིན་དུ། །བཟའ་བ་དང་ནི་མི་བཟའ་བ། །རྡོ་རྗེ་
སྙེམས་ཚུལ་ཏིང་འཛིན་གྱིས། །རྡོ་རྗེ་དབྱིངས་སོགས་དཀྱིལ་འཁོར་དུ། །སྔར་ནི་ཇི་ལྟར་དེ་བཞིན་བྱ། །དེ་ནས་ཡང་དག་རབ་བཤད་བྱ། །དཀྱིལ་འཁོར་ཆེན་པོ་མཆོག་གྱུར་པ། །རྡོ་རྗེ་དབྱིངས་དང་རབ་ཏུ་མཚུངས། །དངོས་གྲུབ་ཐམས་ཅད་བྱེད་པའི་མཆོག །
གྲུ་བཞི་པ་ལ་སྒོ་བཞི་པ། །རྟ་བབས་བཞེས་ནི་རྣམ་པར་བརྒྱན། །ཐིག་བཞི་དང་ནི་ཡང་དག་ལྡན། །དར་གྱི་ཆུན་པོས་རྣམ་པར་བརྒྱན། །རྒྱ་ཆེར་ཇི་ལྟར་རིགས་པ་རུ། །ཇི་བཞིན་རྡོ་རྗེ་གྲོང་ཁྱེར་ཆེ། །རྡོ་རྗེ་དབྱིངས་དང་རབ་ཏུ་མཚུངས། །རྡོ་རྗེ་འཛིན་པའི་གྲོང་
ཁྱེར་བྲི། །འཁོར་ལོ་ལྔ་དང་ཡང་དག་ལྡན། །ཀ་བ་བརྒྱད་དང་ཡང་དག་ལྡན། །དེ་དབུས་རང་བཞིན་འཁོར་ལོ་ཡི། །དབུས་སུ་སངས་རྒྱས་དགོད་པར་བྱ། །རྣམ་པར་སྣང་མཛད་སྟོན་པ་ཆེ། །རྡོ་རྗེ་སེམས་དཔའ་འོད་པོ་ཆེ། །བྱང་ཆུབ་སེམས་དཔའ་རྒྱལ་པོ་
ཆེ། །སངས་རྒྱས་ལོངས་སྤྱོད་རྫོགས་དཀྱིལ་འཁོར། །སངས་རྒྱས་སྤྱན་སྔར་རྡོ་རྗེ་ནི། །འབར་བའི་དབུས་སུ་དགོད་པར་བྱ། །རྡོ་རྗེ་མེ་ལྟར་འབར་ཉིད་ནི། །ཕྱག་རྒྱ་འཇིག་རྟེན་གསུམ་འཇོམས་པ། །གཡས་སུ་རིན་ཆེན་ཕྱག་རྒྱ་ནི། །འབར་བའི་དབུས་སུ་
དགོད་པར་བྱ། །གཡོན་དུ་པདྨའི་ཕྱག་རྒྱ་བྲི། །རྒྱབ་ཏུ་རྡོ་རྗེ་རྣོན་པོ་ནི། །འབར་བའི་དབུས་སུ་དགོད་པར་བྱ། །ཕྱག་རྒྱ་ཡི་ནི་རྒྱལ་པོ་བཞི། །འབར་བའི་མེ་དང་རབ་ཏུ་ལྡན། །རྣམ་པར་སྣང་མཛད་དཀྱིལ་འཁོར་ཆེ། །ཆོས་དབྱིངས་གྲོང་ཁྱེར་ཆེན་པོ་
ལ། །འཁོར་ལོས་སྒྱུར་བ་བཞི་པོ་ཡི། །ཕྱག་རྒྱ་དག་ཀྱང་དགོད་པར་བྱ། །གང་དང་གང་གི་ཐིག་གྱུར་པ། །དཀྱིལ་འཁོར་ཤེས་རབ་ཅན་ཐིག་གདབ། །རྡོ་རྗེ་ཡི་ནི་སྔགས་འདི་ཡིས། །རྡོ་རྗེའི་ཐིག་ནི་ཡོངས་སུ་གཟུང་། །ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་
เล่ม ๘๔ · หน้า 258a
མ་ཧཱུྃ། དཀྱིལ་འཁོར་ཆེན་པོ་བསྡུས་པ་ཡི། །རྡོ་རྗེ་ཤུགས་ཀྱིས་སོང་ནས་ཀྱང་། །རྡོ་རྗེའི་ཕྱག་རྒྱ་ཡོངས་བསྡུས་པ། །རྒྱལ་པོ་བྲི་ཞིང་དགོད་པར་བྱ། །ཨོྃ་བཛྲ་བེ་གཱ་ཀྲ་མ་ཧཱུྃ། ཚོན་རྩི་ཐམས་ཅད་ཡང་དག་ལྡན། །འབར་བའི་ལྟ་བས་ཐམས་ཅད་
བལྟ། །རྡོ་རྗེ་ཚོན་རྩི་བཀྱེ་བྱ་ཞིང་། །རྡོ་རྗེ་སྔགས་ནི་རབ་ཏུ་བསྐུལ། །ཨོྃ་བཛྲ་ཙི་ཏྲ་ས་མ་ཡ་ཧཱུྃ། ཕྱག་རྒྱ་གང་ཞིག་དགོད་པར་དུ། །སྙིང་པོ་ཐམས་ཅད་དགོད་པར་བྱ། །སྔར་ནི་དགོད་པ་གང་ཡིན་པ། །རྡོ་རྗེ་གཟུགས་ནི་སྐོར་བྱེད་པ། །རྡོ་རྗེ་ཧཱུྃ་མཛད་དཀྱིལ་འཁོར་དུ། །
རྡོ་རྗེ་ཤུགས་ཀྱིས་སོང་ནས་ཀྱང་། །རྡོ་རྗེ་རིག་པ་མཆོག་རྒྱལ་པོ། །མི་བསྐྱོད་ཤིན་ཏུ་མཉམ་བཞག་པ། །ཞལ་བཞི་པ་ལ་ཕྱག་བརྒྱད་པ། །མཆེ་བ་དག་ནི་ཅུང་ཟད་གཙིགས། །ཁྲོ་བོའི་རྒྱལ་པོ་འབར་བས་ཁྱབ། །ཕྱག་ན་ཕྱག་རྒྱ་དང་བཅས་མཚོན། །རྡོ་རྗེ་ཧཱུྃ་
མཛད་ཕྱག་རྒྱ་ནི། །སྟེང་དུ་ཕྱག་གཉིས་ཡང་དག་ལྡན། །དེ་བཞིན་ཁོ་ནར་ཕྱག་གཉིས་དག །ལྕགས་ཀྱུ་འཕྱར་བ་ཡང་དག་ལྡན། །ཕྱག་གཅིག་གིས་ནི་ཞགས་པ་བསྣམས། །གཅིག་གིས་རྡོ་རྗེ་ཡང་དག་བསྣམས། །མདའ་འགེངས་པ་ཡི་ཕྱག་རྒྱ་དང་། །ཕྱག་གཉིས་
དག་ནི་ཤིན་ཏུ་ལྡན། །རྡོ་རྗེ་ཧཱུྃ་མཛད་ཕྱག་རྒྱ་སྟེ། །དབང་ཕྱུག་ཆེན་པོ་ཀུན་དུ་མནན། །གཡས་པས་ལྷ་མོ་ཨུ་མ་ཡི། །ནུ་མའི་བར་དུ་གནོན་པར་བྱེད། །དེ་ཡི་ཕྱོགས་རྣམས་ཐམས་ཅད་དུ། །རྡོ་རྗེ་ཁྲོ་བོ་དགོད་པར་བྱ། །འབར་བའི་ཕྲེང་བས་ཁྱབ་ཅིང་འབར། །ཁྲོ་བོ་འཇིགས་
པར་བྱེད་པ་མཆོག །མདུན་དུ་རྡོ་རྗེ་སེམས་དཔའ་སྟེ། །གཡས་སུ་རྡོ་རྗེ་རྒྱལ་པོ་འོ། །གཡོན་དུ་རྡོ་རྗེ་ཆགས་པ་སྟེ། །རྒྱབ་ཏུ་རྡོ་རྗེ་ལེགས་པའོ། །རྡོ་རྗེ་ཤུགས་ཀྱིས་སོང་ནས་ཀྱང་། །ལྷོ་རུ་ཁྲོ་བོའི་དཀྱིལ་འཁོར་ནི། །ཁྲོ་བོའི་རྒྱལ་པོ་ཁྲོ་གཉེར་ཅན། །ཁྲོ་བོས་ཡོངས་སུ་
བསྐོར་བར་བྲི། །ཐམས་ཅད་འབར་བའི་ཕྲེང་བས་ཁྱབ། །གདོང་ནི་ཁྲོ་བཅས་བཞད་ལྡན་པ། །རྡོ་རྗེ་དབང་ཕྱུག་ཕྱག་རྒྱར་ལྡན། །ཁྲོ་གཉེར་ཅན་ནི་ཡོངས་སུ་བརྗོད། །དེ་ཡི་ཕྱོགས་རྣམས་ཐམས་ཅད་དུ། །རྡོ་རྗེ་ཁྲོ་བོ་བདག་ཉིད་ཆེ། །སྔགས་དང་ཕྱག་རྒྱ་ཡོངས་སུ་བསྡུ། །
เล่ม ๘๔ · หน้า 258b
རང་གི་གནས་སུ་ཡང་དག་བྲི། །མདུན་དུ་རྡོ་རྗེ་རིན་ཆེན་ཏེ། །གཡས་སུ་ཁྲོ་བོ་གཟི་བརྗིད་དོ། །གཡོན་དུ་རྒྱལ་མཚན་དྲག་པོ་སྟེ། །རྒྱབ་ཏུ་ཁྲོ་བོ་བཞད་པའོ། །རྡོ་རྗེ་ཤུགས་ཀྱིས་སོང་ནས་ཀྱང་། །ནུབ་ཀྱི་ཕྱོགས་སུ་དཀྱིལ་འཁོར་ནི། །ཁྲོ་བོ་ཆེན་པོ་
རྡོ་རྗེ་སྟེ། །ཁྲོ་བདག་ཆེན་པོ་རྣམས་ཀྱིས་བསྐོར། །རྡོ་རྗེ་ཆོས་ནི་མདུན་དུ་སྟེ། །རྡོ་རྗེ་རྣོན་པོ་གཡས་སུའོ། །དེ་བཞིན་གཡོན་དུ་རྡོ་རྗེ་རྒྱུ། །རྒྱབ་ཏུ་རྡོ་རྗེ་སྨྲ་བའོ། །རྡོ་རྗེ་ཤུགས་ཀྱིས་སོང་ནས་ཀྱང་། །དཀྱིལ་འཁོར་དག་ནི་མཆོག་བཞི་པ། །རྡོ་རྗེ་དབབ་པ་ལས་
ཆེན་པོ། །ཁྲོ་བོ་ཆེན་པོས་ཡོངས་སུ་བསྐོར། །རྡོ་རྗེ་ལས་ནི་མདུན་དུ་སྟེ། །གཡས་སུ་རྡོ་རྗེ་བསྲུང་བའོ། །གཡོན་དུ་རྡོ་རྗེ་གནོད་སྦྱིན་ཏེ། །རྒྱབ་ཏུ་རྡོ་རྗེ་ཁུ་ཚུར་རོ། །དབུས་ཀྱི་འཁོར་ལོའི་མཚམས་བཞི་རུ། །ལྷ་མོ་བཞི་ནི་ཡང་དག་བྲི། །མཚམས་སུ་ཟླ་བའི་
དཀྱིལ་འཁོར་ལ། །རྡོ་རྗེ་སྒེག་མོ་ལ་སོགས་བྲི། །ཕྱི་རོལ་དཀྱིལ་འཁོར་མཚམས་རྣམས་སུ། །རྡོ་རྗེ་མེ་ཏོག་ལ་སོགས་བྲི། །རྡོ་རྗེ་དབྱིངས་སོགས་དཀྱིལ་འཁོར་དུ། །ཇི་སྐད་སྔར་བཤད་ཆོ་ག་བཞིན། །སྒོ་བཞི་དག་ནི་ཐམས་ཅད་དུ། །སྒོ་སྲུང་རྣམས་ནི་
དགོད་པར་བྱ། །ལྕགས་ཀྱུ་ཞགས་པ་ལྕགས་སྒྲོག་དང་། །དྲིལ་བུ་དབབ་པ་བླ་ན་མེད། །རང་གི་ཕྱག་རྒྱ་སྙིང་གར་བཞག །རང་རང་གི་ནི་སྙིང་པོ་ཡིས། །རྡོ་རྗེ་དྲིལ་བུ་ཡིད་འོང་ལྡན། །རྣམ་པར་སྣང་མཛད་རྣམ་པར་དགོད། །བདག་ཉིད་རྡོ་རྗེ་ཁྲོ་བོ་ནི། །གཙོ་བོ་རྡོ་རྗེ་
རིག་པ་མཆོག །རྡོ་རྗེ་རྒྱལ་པོ་མཆོག་བྱིན་བརླབ། །རང་ཉིད་རྡོ་རྗེ་དཀྱིལ་འཁོར་མཆོག །དེ་ཡིས་དཀྱིལ་འཁོར་དེ་བྲིས་ནས། །རྡོ་རྗེ་ཏི་རིན་ཏི་རི་འཇུག །ཡང་དག་པར་ནི་བརྟག་བྱས་ལ། །ལན་བདུན་དུ་ནི་བསྐོར་བ་བྱ། །ཆད་པ་གང་ཡིན་ཡོངས་སུ་དག །
མཁས་པས་ལྷག་པར་དབྲི་བར་བྱ། །རྡོ་རྗེ་དྲིལ་བུ་རྟོགས་པར་བྱ། །གྲུབ་པར་གྱུར་ཏེ་ཉེས་པ་མེད། །རྡོ་རྗེ་ལྕགས་ཀྱུ་ལ་སོགས་ཀུན། །མཉམ་པར་བཞག་པས་ལས་རྣམས་བྱ། །འཁོར་ལོའི་དབུས་སུ་ཞུགས་ནས་ནི། །མཁས་པས་སྒོ་ནི་དབྱེ་བར་བྱ། །ཡིད་ཀྱིས་རྡོ་རྗེ་རི་
ที่มาและสัญญาอนุญาต
ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด