འཕགས་པ་ལག་ན་རྡོ་རྗེ་དབང་བསྐུར་བའི་རྒྱུད་ཆེན་པོ
ชื่อสันสกฤต (อักษรทิเบต ตามตัวบท) ཨཱརྱ་བཛྲ་པཱ་ཎི་ཨ་བྷི་ཥེ་ཀ་མ་ཧཱ་ཏནྟྲ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๘๗ · หน้า 112b
ལག་པ་གཉིས་ཀ་སྦྱར་ལ་མཐེ་བོ་གཉིས་བསྣོལ་ཏེ་མཛུབ་མོ་གཉིས་ཀྱང་བསྣོལ་བ་ནི་ཁོར་ཡུག་ཆེན་པོའི་ཕྱག་རྒྱའོ། །རྣལ་འབྱོར་གྱི་སྟན་ལ་འདུག་ནས་བློ་དང་ལྡན་པས་ལག་པ་གཉིས་ལྷུང་བཟེད་འཛིན་པའི་ཚུལ་དུ་ལྟེ་བའི་ཐད་ཀར་གཞག་པ་ནི་ལྷུང་བཟེད་ཀྱི་ཕྱག་རྒྱའོ། །དེ་བཞིན་དུ་ལག་པ་
གཡས་པ་བསྟོད་དེ་མི་འཇིགས་པ་སྦྱིན་པའི་ཚུལ་དུ་བྱས་པ་ནི་མི་འཇིགས་པ་སྦྱིན་པའི་ཕྱག་རྒྱའོ། །དེ་བཞིན་དུ་ལག་པ་གཡས་པ་བཀན་ཏེ་དམ་པ་སྦྱིན་པའི་ཚུལ་དུ་གཞག་པ་ནི་དམ་པ་སྦྱིན་པའི་ཕྱག་རྒྱའོ། །ལག་པ་གཡས་པ་ཁུ་ཚུར་བཅངས་ལ་མཛུབ་མོ་བརྐྱང་སྟེ་དཔྲལ་བར་ཁྲོ་གཉེར་
བཅངས་ལ་གཞག་པའི་ཕྱག་རྒྱ་འདི་ནི་བདུད་སྐྲག་པའི་ཕྱག་རྒྱའོ། །དེ་བཞིན་དུ་ལག་པ་གཡས་པ་ཁུ་ཚུར་བཅངས་ལ་གུང་མོ་དང་སྲིན་ལག་བསྒྲེང་སྟེ་མཐེ་བོ་དེའི་དྲུང་དུ་གཞག་པ་ནི་སྤྱན་གྱི་ཕྱག་རྒྱའོ། །དེ་བཞིན་དུ་ལག་པ་གཉིས་སྦྱར་ཏེ་ཕན་ཚུན་བསྣོལ་ལ་སོར་མོ་རྣམས་ཁུ་ཚུར་བཅངས་ཏེ་
མཛུབ་མོ་གཉིས་བསྒྲེང་ལ་བཀུག་སྟེ་དཀྱིལ་འཁོར་གྱི་ཚུལ་དུ་སྦྱར་བ་འདི་ནི་ཞགས་པའི་ཕྱག་རྒྱའོ། །དེ་བཞིན་དུ་ལག་པ་གཉིས་སྦྱར་ལ་ཁུ་ཚུར་བཅངས་ཏེ་མཛུབ་མོ་བསྒྲེང་ལ་ཚིགས་དང་པོ་བཀུག་སྟེ། ལྷག་མ་རྣམས་བསྣོལ་བའི་ཚུལ་དུ་གཞག་པ་ནི་ལྕགས་ཀྱུའི་ཕྱག་རྒྱའོ། །
ལྕགས་ཀྱུའི་ཕྱག་རྒྱ་དེ་ལས་གུང་མོ་གཉིས་བཀུག་སྟེ་དེ་ཉིད་ལ་བཅངས་པ་ནི་དེ་བཞིན་གཤེགས་པའི་སྙིང་པོའི་ཕྱག་རྒྱའོ། །ཕྱག་རྒྱ་དེ་ཉིད་ལས་སྲིན་ལག་བརྐྱང་ལ་ལྷག་མ་དེ་བཞིན་དུ་གཞག་པ་ནི་དེ་བཞིན་གཤེགས་པའི་ལྟེ་བའི་ཕྱག་རྒྱའོ། །ཕྱག་རྒྱ་དེ་ཉིད་ལས་མཐེའུ་ཆུང་བརྐྱང་སྟེ་
ལྷག་མ་དེ་བཞིན་གཞག་པ་ནི་རྐེད་པའི་ཕྱག་རྒྱའོ། །དེ་བཞིན་དུ་ལག་པ་གཉིས་སྙིམ་པར་སྦྱར་ལ་མཛུབ་མོ་གཉིས་བཀུག་སྟེ་ནང་དུ་བཅུག་ལ་སྲིན་ལག་གཉིས་དང་མཐེའུ་ཆུང་གཉིས་དང་མཐེ་བོ་གཉིས་ཡིད་ཙམ་བཀུག་སྟེ་གུང་མོ་གཉིས་གཤིབས་པ་འདི་ནི་སྦུབས་ཀྱི་ཕྱག་རྒྱའོ། །ཕྱག་རྒྱ་
འདི་ཉིད་ལས་སྲིན་ལག་གཉིས་གྱེན་དུ་བསྒྲེང་བ་ནི་རྡོ་རྗེ་མཚམས་ཆེན་པོ་བཅད་པའི་ཕྱག་རྒྱའོ། །དེ་ཉིད་ལས་གུང་མོ་གཉིས་བཀུག་ལ་མཐེ་བོ་བརྐྱང་བ་ནི་བསྲུང་བ་ཆེན་པོའི་ཕྱག་རྒྱའོ། །དེ་བཞིན་དུ་མཛུབ་མོ་གཉིས་བརྐྱང་སྟེ་མཐེ་བོ་གཉིས་ནང་དུ་བཅུག་པ་ནི་རྡོ་རྗེ་ཀུན་དུ་འབར་བའི་
เล่ม ๘๗ · หน้า 113a
ཕྱག་རྒྱའོ། །དེ་བཞིན་དུ་ལག་པ་གཉིས་ཁུ་ཚུར་བཅངས་ལ་སོར་མོ་ཐམས་ཅད་བརྐྱང་སྟེ་མཛུབ་མོ་གཉིས་ངོས་ནས་འཁྱུད་པ་ནི་རྡོ་རྗེ་གོ་ཆའི་ཕྱག་རྒྱའོ། །ཕྱག་རྒྱ་དེ་ཉིད་ལས་སྲིན་ལག་གཉིས་དང་མཐེ་བོ་གཉིས་སྦྱར་བ་ནི་རྡོ་རྗེ་ལྕེའི་ཕྱག་རྒྱའོ། །ཕྱག་རྒྱ་དེ་ཉིད་ལས་མཛུབ་
མོ་གཉིས་དང་སྲིན་ལག་གཉིས་བཀུག་སྟེ་ནང་དུ་སྦྱར་ལ་མཐེ་བོ་གཉིས་བསྟོད་དེ་ཡིད་ཙམ་བཀུག་ལ་གུང་མོ་ལོགས་སུ་ཕྱོགས་པར་གཞག་སྟེ། སྲིན་ལག་གཉིས་སྔ་མ་བཞིན་དུ་གཞག་པ་ནི་རྡོ་རྗེ་ཞལ་གྱི་ཕྱག་རྒྱའོ། །ཕྱག་རྒྱ་དེ་ཉིད་ལས་མཛུབ་མོ་གཉིས་ནང་དུ་བཅུག་ལ་བཀུག་སྟེ་བསྟོད་དེ་
གཞག་པ་ནི་རྡོ་རྗེ་མཆེ་བའི་ཕྱག་རྒྱའོ། །ཕྱག་རྒྱ་དེ་ཉིད་ལས་མཛུབ་མོ་གཉིས་བཀྱེད་དེ་ཚིགས་དང་པོ་བཀུག་པ་ནི་རྡོ་རྗེ་སོ་སོ་ཡང་དག་པར་རིག་པའི་ཕྱག་རྒྱའོ། །དེ་བཞིན་དུ་ལག་པ་གཉིས་སྙིམ་པའི་ཚུལ་དུ་སྦྱར་ལ་མཐེ་བོ་གཉིས་དང་མཐེའུ་ཆུང་གཉིས་ནང་དུ་བཅུག་སྟེ་སྦྱར་བ་ནི་སྟོབས་བཅུ་
འཛིན་པའི་རྡོ་རྗེའི་ཕྱག་རྒྱའོ། །དེ་ཉིད་ལས་མཐེ་བོ་གཉིས་རྩེ་མོ་བཀུག་སྟེ་སྦྱར་བ་ནི་དྲན་པ་ཉེ་བར་གཞག་པ་རྡོ་རྗེའི་ཕྱག་རྒྱའོ། །ཕྱག་རྒྱ་དེ་ཉིད་ལས་མཐེ་བོ་གཉིས་ཀྱི་སྟེང་དུ་སྲིན་ལག་གཉིས་གཞག་པ་ནི་རྡོ་རྗེ་ཡེ་ཤེས་ཐམས་ཅད་རྟོགས་པར་བྱེད་པའི་ཕྱག་རྒྱའོ། །ཕྱག་རྒྱ་དེ་ཉིད་ལས་
མཛུབ་མོ་གཉིས་ཀྱི་དྲུང་དུ་བཀུག་སྟེ་གཞག་པ་ནི་བྱམས་པའི་ཕྱག་རྒྱའོ། །དེ་བཞིན་དུ་ལག་པ་གཉིས་སྙིམ་པར་སྦྱར་ལ་གུང་མོ་གཉིས་ཀྱིས་སྲིན་ལག་གཉིས་འཁྱུད་ལ་མཐེ་བོ་གཉིས་ཀྱི་སྟེང་དུ་མཛུབ་མོ་གཉིས་གཞག་སྟེ་ལྷག་མ་སྔ་མ་བཞིན་གཞག་པ་ནི་དམ་པ་སྦྱིན་པའི་རྡོ་རྗེའི་ཕྱག་
རྒྱའོ། །ལག་པ་གཡོན་པ་ཁུ་ཚུར་བཅངས་ལ་མཛུབ་མོ་བཀུག་སྟེ་སྲིན་ལག་དེའི་དྲུང་དུ་བཅར་བ་ནི་ཕྱག་བརྙན་མ་ཐམས་ཅད་ཀྱི་རྡོ་རྗེ་ལྕགས་ཀྱུའི་ཕྱག་རྒྱའོ། །ཕྱག་རྒྱ་དེ་ཉིད་ལས་སོར་མོ་ཐམས་ཅད་ཡིད་ཙམ་བཀུག་ལ་གུང་མོ་བསྒྲེང་བ་ནི་ཨུཏྤ་ལའི་རྡོ་རྗེའི་ཕྱག་རྒྱའོ། །དེ་བཞིན་དུ་ལག་
པ་གཡས་པ་ཁུ་ཚུར་བཅངས་ལ་མཛུབ་མོ་དང་གུང་མོ་བསྒྲེང་སྟེ་ཡིད་ཙམ་སྒུ་བོར་བྱས་པ་ནི་རྡོ་རྗེ་རལ་གྲི་སོ་གཅིག་པ་ཡུ་བ་ཅན་གྱི་ཕྱག་རྒྱའོ། །དེ་བཞིན་དུ་ལག་པ་གཉིས་སྙིམ་པར་སྦྱར་ལ་མཛུབ་མོ་གཉིས་ཚིགས་དང་པོ་བཀུག་པ་ནི་ནམ་མཁའ་ལྟར་དྲི་མ་མེད་པའི་ཕྱག་རྒྱའོ། །ཕྱག་རྒྱ་འདི་
เล่ม ๘๗ · หน้า 113b
ཉིད་ལས་མཐེ་བོ་གཉིས་བསྣོལ་བ་ནི་དེ་བཞིན་གཤེགས་པའི་ཞབས་ལས་བྱུང་བའི་ཕྱག་རྒྱའོ། །དེ་ཉིད་ནང་དུ་བཅུག་པ་ནི་གོས་བཀྲ་གྱོན་པའི་ཕྱག་རྒྱའོ། །དེ་བཞིན་དུ་མཛུབ་མོ་གཉིས་ནང་དུ་བཅུག་པ་ནི་ཆོས་ཐམས་ཅད་མཉམ་པ་ཉིད་ལ་འཇུག་ཅིང་གནས་པའི་ཕྱག་རྒྱའོ། །ཕྱག་རྒྱ་འདི་ཉིད་ལས་
གུང་མོ་གཉིས་བསྣོལ་བའི་ཚུལ་དུ་གཞག་པ་ནི་སྤྲོས་པ་མེད་པར་གནས་པའི་ཕྱག་རྒྱའོ། །དེ་བཞིན་དུ་ལག་པ་གཉིས་སྦྱར་ལ་མཐེ་བོ་གཉིས་དང་མཐེའུ་ཆུང་གཉིས་སྦྱར་བ་ནི་དེ་བཞིན་གཤེགས་པའི་གོ་ཆ་ལས་བྱུང་བའི་ཕྱག་རྒྱའོ། །ཕྱག་རྒྱ་འདི་ཉིད་ལས་གུང་མོ་དང་སྲིན་ལག་བསྐྱེད་པ་ནི་སྒྲ་ཆེར་
སྒྲོགས་ཀྱི་ཕྱག་རྒྱའོ། །དེ་བཞིན་དུ་ལག་པ་གཉིས་སྦྱར་ལ་སོར་མོ་རྣམས་བསྣོལ་ཞིང་ཟླ་བའི་ཚུལ་དུ་བྱས་ལ་བསྡམས་ཏེ་མཐེ་བོ་གཉིས་ངོས་ལ་བཞར་བ་ནི་ནམ་མཁའ་ལྟར་དྲི་མ་མེད་པའི་ཕྱག་རྒྱའོ། །ཕྱག་རྒྱ་འདི་ཉིད་ལས་མཐེའུ་ཆུང་གཉིས་ཕྱུང་སྟེ་མཐེ་བོ་གཉིས་དང་རྩེ་སྤྲད་པ་ནི་སྟོབས་
བཅུ་ལས་ངེས་པར་འབྱུང་པའི་ཕྱག་རྒྱའོ། །ཕྱག་རྒྱ་འདི་ཉིད་ལས་སྲིན་ལག་གཉིས་ཕྱུང་སྟེ་མཐེའུ་ཆུང་གཉིས་སྔ་མ་བཞིན་གཞག་པ་ནི་ནམ་མཁའ་མཐའ་ཡས་པ་རྣམ་པར་གནོན་པའི་ཕྱག་རྒྱའོ། །དམ་པ་སྦྱིན་པའི་རྡོ་རྗེའི་ཕྱག་རྒྱ་ལས་མཐེ་བོ་གཉིས་ལག་མཐིལ་དུ་གཞག་པ་ནི་ལྟད་མོ་ཅན་གྱི་
ཕྱག་རྒྱའོ། །མཐེ་བོ་ཕྱུང་སྟེ་མཛུབ་མོའི་དྲུང་དུ་བཅར་བ་ནི་སྤྱོད་པའི་བློ་གྲོས་ཀྱི་ཕྱག་རྒྱའོ། །ཕྱག་རྒྱ་འདི་ཉིད་ལས་གུང་མོ་དང་མཐེ་བོ་སྦྱར་བ་ནི་བློ་བརྟན་གྱི་རིན་པོ་ཆེའི་ཕྱག་རྒྱའོ། །ཕྱག་རྒྱ་འདི་ཉིད་ལས་མཛུབ་མོ་གཉིས་བརྐྱང་བ་ནི་དཀོན་མཆོག་འབྱུང་གནས་ཀྱི་ཕྱག་རྒྱའོ། །ཕྱག་རྒྱ་འདི་
ཉིད་ལས་མཐེ་བོ་དང་སྲིན་ལག་རྩེ་མོ་སྤྲད་ལ་གུང་མོ་བརྐྱང་བ་ནི་ལག་ན་ཕྱག་རྒྱ་རིན་པོ་ཆེའི་ཕྱག་རྒྱའོ། །ཕྱག་རྒྱ་འདི་ཉིད་ལས་མཐེ་བོ་དང་མཐེའུ་ཆུང་སྦྱར་ལ་མཛུབ་མོ་བཀུག་པ་ནི་རྟག་ཏུ་བརྩོན་པར་གནས་ཀྱི་ཕྱག་རྒྱའོ། །དེ་བཞིན་དུ་ལག་པ་གཉིས་སྦྱར་ཏེ་སྲིན་ལག་གཉིས་ནང་དུ་བཅུག་ལ་
མཛུབ་མོ་གཉིས་ཀྱིས་གུང་མོ་གཉིས་ཀྱི་རྩེ་མོ་མནན་ཏེ་མཐེ་བོ་གཉིས་ངོས་ལ་སྦྱར་བ་ནི་བཅོམ་ལྡན་འདས་འཁོར་ལོས་སྒྱུར་བའི་རྒྱལ་པོ་ཆེན་པོའི་འཁོར་ལོའི་ཕྱག་རྒྱའོ། །ཕྱག་རྒྱ་འདི་ཉིད་ལས་མཐེ་བོ་གཉིས་ནང་དུ་བཅུག་པ་ནི་ཆེར་བཞད་ཀྱི་ཕྱག་རྒྱའོ། །ཕྱག་རྒྱ་འདི་ཉིད་ལས་མཛུབ་
เล่ม ๘๗ · หน้า 114a
མོ་བརྐྱང་བ་ནི་བཅོམ་ལྡན་འདས་འདི་ཉིད་ཀྱི་འོད་ཟེར་འབར་བ་ཆེན་པོའི་ཕྱག་རྒྱའོ། །མཛུབ་མོ་གཉིས་ཀྱིས་གུང་མོ་གཉིས་ལ་གོ་ཆའི་ཚུལ་དུ་འཁྱུད་པ་ནི་བཅོམ་ལྡན་འདས་ཀྱི་གོ་ཆའི་ཕྱག་རྒྱའོ། །མཛུབ་མོ་གཡས་པ་བཀུག་པ་ནི་བཅོམ་ལྡན་འདས་འདི་ཉིད་ཀྱི་སྙན་གྱི་ཕྱག་
རྒྱའོ། །མཛུབ་མོ་གཡས་པ་བཀུག་ལ་གཡོན་པ་བརྐྱང་བ་ནི་འདི་ཉིད་ཀྱི་སྨིན་མའི་ཕྱག་རྒྱའོ། །མཛུབ་མོ་གཉིས་བཀུག་པ་ནི་འདི་ཉིད་ཀྱི་ཤངས་ཀྱི་ཕྱག་རྒྱའོ། །དེ་བཞིན་དུ་མཛུབ་མོ་གཉིས་ཀྱིས་གུང་མོ་གཉིས་དང་སྲིན་ལག་གཉིས་ལ་གོ་ཆའི་ཚུལ་དུ་འཁྱུད་ལ་ཡིད་ཙམ་བཀུག་སྟེ་མཐེ་
བོ་གཉིས་དེའི་དྲུང་དུ་བཅར་བ་ནི་བཅོམ་ལྡན་འདས་འཁོར་ལོས་སྒྱུར་བའི་རྒྱལ་པོ་ཆེན་པོ་གཙུག་ཏོར་གྱི་ཕྱག་རྒྱའོ། །དེ་ཉིད་ལས་ཁ་སྦུབས་ཏེ་སྨིན་མཚམས་སུ་གཞག་པ་ནི་བཅོམ་ལྡན་འདས་ཀྱི་མཛོད་སྤུའི་ཕྱག་རྒྱའོ། །དེ་བཞིན་དུ་མཛུབ་མོ་བརྐྱང་ལ་མཐེ་བོ་བསྟོད་དེ་བཀུག་པ་ནི་བཅོམ་ལྡན་
འདས་ཀྱི་ཞལ་གྱི་ཕྱག་རྒྱའོ། །ཕྱག་རྒྱ་འདི་ཉིད་ལས་མཐེ་བོ་གཉིས་ནང་དུ་བཅུག་ལ་སླར་བསྒྲེང་བ་ནི་མཆེ་བའི་ཕྱག་རྒྱའོ། །ཕྱག་རྒྱ་དེ་ཉིད་ལས་སྲིན་ལག་གཉིས་ནང་དུ་བཅུག་སྟེ་ཕྱིར་བསྒྲེང་བ་ནི་ལྗགས་ཀྱི་ཕྱག་རྒྱའོ། །འདི་ཉིད་ལས་མཛུབ་མོ་གཉིས་གདུབ་ཀོར་གྱི་ཚུལ་དུ་ངོས་
ལ་སྦྱར་བ་ནི་མཁུར་བའི་ཕྱག་རྒྱའོ། །འདི་ཉིད་ལས་མཛུབ་མོ་གཉིས་ནང་དུ་བཅུག་སྟེ་གུང་མོ་གཉིས་ཀྱི་དྲུང་དུ་སྦྱར་བ་ནི་ཀོསྐོའི་ཕྱག་རྒྱའོ། །གཙུག་ཏོར་གྱི་ཕྱག་རྒྱ་ལས་མཐེའུ་ཆུང་གཉིས་བསྐྱེད་དེ་སྙིང་གར་གཞག་པ་ནི་དཔལ་བེའུའི་ཕྱག་རྒྱའོ། །དེ་བཞིན་དུ་ལག་པ་
གཉིས་སྙིམ་པར་སྦྱར་བའི་ཚུལ་དུ་སྦྱར་ཏེ་མཛུབ་མོ་གཉིས་གདུབ་ཀོར་གྱི་ཚུལ་དུ་གུང་མོ་གཉིས་ཀྱི་ངོས་ལ་སྦྱར་བ་ནི་བཅོམ་ལྡན་འདས་ཀྱི་སྤྱན་གྱི་ཕྱག་རྒྱའོ། །ཕྱག་རྒྱ་འདི་ཉིད་ལས་གུང་མོ་གཉིས་ནང་དུ་བཅུག་པ་ནི་ལྟེ་བའི་ཕྱག་རྒྱའོ། །སྲིན་ལག་གཉིས་ཀྱང་ནང་དུ་བཅུག་པ་ནི་བཅོམ་
ལྡན་འདས་ཀྱི་གསུང་གི་ཕྱག་རྒྱ་ཆེན་པོའོ། །དེ་བཞིན་དུ་ལག་པ་གཉིས་སྙིམ་པར་སྦྱར་ཏེ་མཐེའུ་ཆུང་གཉིས་ཀྱི་ནང་དུ་མཛུབ་མོ་གཉིས་ཀ་བཀུག་ལ་རྡོ་རྗེའི་ཚུལ་དུ་གཞག་པ་ནི་བཅོམ་ལྡན་འདས་ཀྱི་རྡོ་རྗེ་ལས་བྱུང་བའི་ཕྱག་རྒྱའོ། །ཕྱག་རྒྱ་དེ་ཉིད་ལས་མཐེའུ་ཆུང་གཉིས་སྔ་མ་བཞིན་
เล่ม ๘๗ · หน้า 114b
དུ་གཞག་པ་ལ་མཛུབ་མོ་གཉིས་རྡོ་རྗེའི་ཚུལ་དུ་ངོས་ལ་གཞག་པ་ནི་རྡོ་རྗེ་ཡན་ལག་ལས་བྱུང་བའི་ཕྱག་རྒྱའོ། །རྡོ་རྗེ་ཡན་ལག་ལས་བྱུང་བའི་ཕྱག་རྒྱ་འདི་ཉིད་ལས་མཐེ་བོ་གཉིས་གུང་མོ་གཉིས་ཀྱི་དྲུང་དུ་བཅར་ལ་ལྷག་མ་སྔ་མ་བཞིན་དུ་གཞག་པ་ནི་རྡོ་རྗེ་ལྟར་མཁྲེགས་པའི་ཕྱག་རྒྱའོ། །དེ་བཞིན་
དུ་ལག་པ་གཉིས་བསྣོལ་བའི་ཚུལ་གྱིས་གཡོན་པ་ཁ་སྦུབས་ལ་གཡས་པ་བཀན་ཏེ། མཐེ་བོ་དང་མཐེའུ་ཆུང་གཉིས་རྩེ་མོ་སྤྲད་ལ་སོར་མོ་ལྷག་མ་རྣམས་མདུང་རྩེ་གསུམ་པའི་ཚུལ་དུ་གཞག་པ་ནི་གཉིས་ཀའི་རྡོ་རྗེའི་ཕྱག་རྒྱའོ། །ཕྱག་རྒྱ་འདི་ཉིད་ལས་མཐེའུ་ཆུང་དང་མཐེ་བོ་རྡོ་རྗེ་
བཅིངས་པའི་ཚུལ་དུ་བཅིང་བ་ནི་རྡོ་རྗེ་གདུ་བུའི་ཕྱག་རྒྱ་སྟེ་མཚམས་བཅད་པའི་ཕྱག་རྒྱའོ། །ཕྱག་རྒྱ་འདི་ཉིད་ལས་མཛུབ་མོ་གཡས་གཡོན་གཉིས་ཀ་བསྐུམ་པ་ནི་ས་བཅིང་བའི་རྡོ་རྗེའི་ཕྱག་རྒྱའོ། །ཕྱག་རྒྱ་འདི་ཉིད་ལས་མཛུབ་མོ་སྔ་མ་བཞིན་དུ་བརྐྱང་བ་ལ་ལག་པ་གཡས་
གཡོན་གཉིས་ཀའི་གུང་མོ་བཀུག་པ་ནི་རྡོ་རྗེ་ཕྲེང་བའི་ཕྱག་རྒྱའོ། །རྡོ་རྗེ་ཕྲེང་བའི་ཕྱག་རྒྱ་ལས་གུང་མོ་བརྐྱང་ལ་སྲིན་ལག་གཡས་པ་བཀུག་པ་ནི་ལུས་ཀུན་དུ་འཛིན་པའི་རྡོ་རྗེའི་ཕྱག་རྒྱའོ། །ལུས་ཀུན་དུ་འཛིན་པའི་རྡོ་རྗེའི་ཕྱག་རྒྱ་དེ་ལས་སྲིན་ལག་བརྐྱང་སྟེ་མཛུབ་མོའི་ཚིགས་དང་པོ་
བཀུག་པ་ནི་ནམ་མཁའ་རྣམ་པར་འཇོམས་པའི་རྡོ་རྗེའི་ཕྱག་རྒྱའོ། །དེ་བཞིན་དུ་ལག་པ་གཡོན་པའི་མཛུབ་མོ་ཡང་ལག་མཐིལ་དུ་ཕུར་བུའི་ཚུལ་དུ་གཞག་པ་ནི་ཕུར་བུ་རྡོ་རྗེའི་ཕྱག་རྒྱའོ། །ཕུར་བུ་རྡོ་རྗེའི་ཕྱག་རྒྱ་ལས་སོར་མོ་ཐམས་ཅད་བསྐུམ་པ་ནི་རྡོ་རྗེ་བཀྲ་ཤིས་ཀྱི་ཕྱག་རྒྱའོ། །རྡོ་རྗེ་བཀྲ་
ཤིས་ཀྱི་ཕྱག་རྒྱ་ལས་སོར་མོ་ཐམས་ཅད་བསྒྲེང་སྟེ་གཞག་པ་ནི་རྡོ་རྗེ་བླ་རེའི་ཕྱག་རྒྱའོ། །དེ་ཉིད་ལས་སོར་མོའི་བར་ཕྲལ་ཏེ་གཞག་པ་ནི་རྡོ་རྗེ་མདུང་རྩེ་གསུམ་པའི་ཕྱག་རྒྱའོ། །དེ་ཉིད་ལས་གཏུན་ཤིང་གི་ཚུལ་དུ་གཅིག་ཏུ་བསྡུས་པ་ནི་རྡོ་རྗེ་གཏུན་ཤིང་གི་ཕྱག་རྒྱའོ། །རྡོ་རྗེ་གཏུན་བུའི་
ཕྱག་རྒྱ་ལས་ལག་པ་གཡས་པའི་གུང་མོ་དང་སྲིན་ལག་གཉིས་བཀུག་ལ་མཛུབ་མོ་བེ་ཅོན་གྱི་ཚུལ་དུ་བསྒྲེང་བ་ནི་རྡོ་རྗེ་བེ་ཅོན་གྱི་ཕྱག་རྒྱའོ། །གུང་མོ་ཡང་དེ་ཉིད་ལ་སྦྱར་ཏེ་བརྐྱང་བ་ནི་རྡོ་རྗེ་རལ་གྲིའི་ཕྱག་རྒྱའོ། །རྡོ་རྗེ་རལ་གྲིའི་ཕྱག་རྒྱ་ལས་ཚིགས་དང་པོ་བཀུག་པ་ནི་འཁོར་ལོ་རྡོ་རྗེའི་
เล่ม ๘๗ · หน้า 115a
ཕྱག་རྒྱའོ། །འཁོར་ལོ་རྡོ་རྗེའི་ཕྱག་རྒྱ་ལས་གུང་མོའི་རྒྱབ་ཏུ་མཛུབ་མོ་གཉིས་བཀུག་སྟེ་སྦྱར་བ་ནི་རྡོ་རྗེ་ལྕགས་མདའི་ཕྱག་རྒྱའོ། །རྡོ་རྗེ་ལྕགས་མདའི་ཕྱག་རྒྱ་ལས་སྲིན་ལག་ཡང་དེ་ཉིད་ལ་སྦྱར་བ་ནི་རྡོ་རྗེ་རྩེ་གཅིག་པའི་ཕྱག་རྒྱའོ། །རྡོ་རྗེ་རྩེ་གཅིག་པའི་ཕྱག་རྒྱ་ལས་གུང་
མོ་བསྒྲེང་སྟེ་བརྐྱང་ལ་དེ་དག་ལས་གཅིག་ཞགས་པའི་ཚུལ་དུ་བཀུག་པ་ནི་རྡོ་རྗེ་ཞགས་པའི་ཕྱག་རྒྱའོ། །དེ་བཞིན་དུ་ལག་པ་གཡོན་པའི་སོར་མོ་གསུམ་གཅིག་ཏུ་བསྡུས་པ་ནི་རྡོ་རྗེ་རུས་སྦལ་གྱི་ཕྱག་རྒྱའོ། །རྡོ་རྗེ་རུས་སྦལ་གྱི་ཕྱག་རྒྱ་ལས་མཛུབ་མོ་བསྒྲེང་བ་ནི་ལྷ་མ་ཡིན་གྱི་འཁྲུལ་
འཁོར་ཐམས་ཅད་འཇོམས་པར་བྱེད་པའི་རྡོ་རྗེའི་ཕྱག་རྒྱའོ། །ཕྱག་རྒྱ་འདི་ཉིད་ལས་སོར་མོ་གཉིས་བརྐྱང་སྟེ་མཛུབ་མོ་བསྐུམ་པ་ནི་སྟང་སྟབས་འགུགས་པ་རྡོ་རྗེའི་ཕྱག་རྒྱའོ། །དེ་བཞིན་དུ་ལག་པ་གཉིས་སྙིམ་པར་སྦྱར་ཏེ་གུང་མོ་གཉིས་སྲིན་ལག་གཉིས་ལ་འཁྱུད་དེ་མཐེ་བོ་གཉིས་དང་
མཛུབ་མོ་གཉིས་ངོས་ལ་སྦྱར་བ་ནི་རྡོ་རྗེ་གནས་ཀྱི་ཕྱག་རྒྱའོ། །ཕྱག་རྒྱ་དེ་ཉིད་ལས། མཐེའུ་ཆུང་གཉིས་ཀ་བརྐྱང་ནས་སུ། །མཐེ་བོ་གཉིས་ནི་བསྒྲེང་བྱས་ལ། །འདི་ནི་གཏུན་ཤིང་རྐེད་ཉག་སྟེ། །ཀུན་དུ་ཐོགས་པ་མེད་པར་འདོད། །ཕྱག་རྒྱ་འདི་ཉིད་ལས་མཛུབ་མོ་གཉིས་དེའི་དྲུང་
དུ་བཀུག་པ་ནི་རྡོ་རྗེ་ཡན་ལག་བརྒྱན་པའི་ཕྱག་རྒྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་ཡང་རྡོ་རྗེ་དོན་ཡོད་པའི་དཀྱིལ་འཁོར་ཡང་དག་པར་བསྒྲུབ་པར་བྱ་བའི་ཕྱིར། བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་གསང་སྔགས་ཀྱི་སྒོ་སྤྱོད་པ་རྡོ་རྗེས་བྱིན་གྱིས་
བརླབས་པ་རྣམས་ཀྱི་དངོས་གྲུབ་བསྒྲུབ་པའི་ཐབས་ས་སླ་བ། སངས་རྒྱས་ཐམས་ཅད་ཀྱི་སྤྱོད་པ་ཤེས་པ། མངོན་པར་རྫོགས་པར་བྱང་ཆུབ་པ་རྣམ་པར་རྟོག་པ་མེད་པའི་ཕྱག་རྒྱ་གསང་ཆེན་ཡན་ལག་དང་ཡན་ལག་ལས་བྱུང་བ། རྡོ་རྗེ་སེམས་དཔས་བྱིན་གྱིས་བརླབས་པ་རྣམས་དང་།
སྔོན་གྱི་རྒྱལ་བ་ལ་བྱ་བ་བྱས་པ་རྣམས་དང་། ཐེག་པ་ཆེན་པོ་རྟོགས་པར་ཁོང་དུ་ཆུད་པ་རྣམས་དང་། རྡོ་རྗེ་འཆང་གིས་བྱིན་གྱིས་བརླབས་པ་རྣམས་ཀྱིས་མཉན་པའམ། གཟུང་བ་རྣམས་ཀྱིས་མ་གཏོགས་པར་ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་ཤེས་པར་མི་ནུས་ན།
เล่ม ๘๗ · หน้า 115b
གཞན་འཇིག་རྟེན་པ་མུ་སྟེགས་བྱེད་རྣམས་ཀྱིས་ཤེས་པའམ་རྣམ་པར་ཤེས་པ་ལྟ་ཅི་སྨོས་པ་བཤད་པར་བརྩམས་སོ། །དེ་ནས་རྡོ་རྗེ་འཆང་གིས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་བྱམས་པ་ཆེན་པོ་དང་། སྙིང་རྗེ་ཆེན་པོའི་མིག་གཉིས་ཀྱིས་རྣམ་པར་བལྟས་ཏེ་རྡོ་རྗེ་དོན་ཡོད་པའི་
དཀྱིལ་འཁོར་གྱི་བྱིན་གྱི་རླབས་ཀྱིས་བྱིན་གྱིས་བརླབས་ནས་སྨྲས་པ། རིགས་ཀྱི་བུ་དག་དེ་བཞིན་གཤེགས་པའི་ཟུར་ཙམ་གྱིས་གོ་བའི་ཡེ་ཤེས་ལས་བྱུང་བའི་ཕྱག་རྒྱའི་དཀྱིལ་འཁོར་རབ་འབྱམ་ཞེས་བྱས་པའི་ཆོས་ཀྱི་སྒོ་སེམས་ཅན་གྱི་ཁམས་མཐའ་ཡས་པ་སྒྲོལ་བར་བྱེད་པ་ཡོད་དོ་ཞེས་སྨྲས་
ནས། །དེའི་ཚེ་སྨིན་མཚམས་ཀྱི་བར་ནས་འགྲོ་བ་ཐམས་ཅད་ཡོངས་སུ་སྐྱོབ་པ་ཞེས་བྱ་བའི་འོད་ཟེར་འཁོར་བརྒྱ་ཕྲག་དུ་མ་དང་ལྡན་པར་བྱུང་ངོ་། །དེ་བྱུང་ནས་ནམ་མཁའི་ཁམས་ཀྱིས་ཀླས་པའི་འཇིག་རྟེན་གྱི་ཁམས་རྒྱ་མཚོ་ཐམས་ཅད་དུ་སེམས་ཅན་ཐམས་ཅད་ཀྱི་བསམ་པ་འདུན་པར་
བྱས་ནས། དཀོན་མཆོག་གསུམ་གྱི་རྡོ་རྗེའི་བྱིན་གྱི་རླབས་ཀྱིས་སེམས་ཅན་གྱི་ཁམས་བྱིན་གྱིས་བརླབས་ཏེ། སླར་ཡང་བྱང་ཆུབ་སེམས་དཔའ་ལག་ན་རྡོ་རྗེ་ལ་བསྐོར་བ་བྱས་ནས་མཛོད་སྤུ་ཉིད་དུ་ཞུགས་སོ། །དེ་ནས་ཐམས་ཅད་དང་ལྡན་པའི་འཁོར་དེས་མགྲིན་གཅིག་ཏུ་ཚིག་སྨྲས་པ། སེམས་
དཔའ་ཆེན་པོ་འདི་ནི་དུས་སོ། །འདི་ནི་ཚོད་དོ། །དེས་ན་བདག་ཅག་གིས་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་རྣམས་ལ་དངོས་གྲུབ་སྩལ་བར་བགྱིའོ། །བསྲུང་བ་དང་གཟི་བརྗིད་ཕུན་སུམ་ཚོགས་པ་ལ་སོགས་པ་སྩལ་བར་བགྱིའོ། །དེ་ནས་རྡོ་རྗེ་འཆང་
གིས་གསང་ཆེན་དང་བཅས་པའི་ཡན་ལག་གི་ཕྱག་རྒྱ་སྨྲས་པ། མཁས་པས་དམ་ཚིག་ཅེས་བྱ་བའི། །ཕྱག་རྒྱ་ཐོག་མར་བཅིངས་ནས་སུ། །སངས་རྒྱས་སྙིང་པོ་དྲན་བྱས་ལ། །ལག་པ་གཡས་པ་བསྒུལ་བར་བྱ། །ཨོཾ་རྫོགས་པའི་སངས་རྒྱས་རྣམས་ཀྱི་ཡེ་ཤེས་ཀྱི་ཕྱག་རྒྱ་ནི་མི་ཤེས་
པའི་གྲོང་ཁྱེར་འཇིག་པར་བྱེད་པ་སྟེ། རྡོ་རྗེ་ཡེ་ཤེས་རྣམ་པར་དགོད་པའི་ཕྱག་རྒྱ་ཞེས་བྱའོ། །ལག་པ་གཡས་པ་བཏེག་ནས་སུ། །སྟེང་གི་ཕྱོགས་སུ་ཡོངས་བསྐྱོད་ན། །སྡང་བ་རྣམས་ནི་བསྐྲད་པར་འགྱུར། །སྐྱོད་བྱེད་རྣམས་ཀྱང་གཡོ་བར་འགྱུར། །བཙུམས་ཀྱི་ཚུལ་དུ་བྱས་ནས་སུ། །
เล่ม ๘๗ · หน้า 116a
ལག་པ་གཡས་པ་བཏེག་བྱས་ལ། །རྣལ་འབྱོར་པས་ནི་མཚོག་མར་གཞག །ཁ་ཞེས་བྱ་བ་འབར་ཕྲེང་ཅན། །ཐིག་ལེ་དང་ནི་བཅས་པར་ཡང་། །སྤྱི་བོའི་སྟེང་དུ་གནས་པར་བྱ། །མེ་ལྕེ་ཕྲེང་ལྡན་ཀུན་དུ་འབར། །ཕྱོགས་བཅུ་ཀུན་དུ་ལྷམ་མེ་བ། །གཙུག་ཏོར་ཕྱག་རྒྱ་
ཕྱག་རྒྱ་ཆེ། །གཙུག་ཏོར་སྟེང་ན་གནས་པ་ཡིན། །སྔགས་ལ། བཛྲ་ཧོ་ཁྃ་སྭཱ་ཧཱ། ལག་པ་དེ་ཉིད་མཛུབ་བསྒྲེང་སྟེ། །བཏེག་པ་སྨིན་མ་གཉིས་ཀར་ཡང་། །སྔགས་པས་ཧ་ཞེས་བྱ་བ་ནི། །སྐྱེད་གཉིས་དང་ནི་ལྡན་པར་གཞག །སྔགས་ལ། བཛྲ་ཧོ་ཏུ་མ་སྭཱ་ཧཱ། རྡོ་རྗེ་སྨིན་མའི་ཕྱག་
རྒྱའོ། །གུང་མོ་བསྒྲེང་བའི་ཚུལ་གྱིས་སུ། །ལག་པ་དེ་ཉིད་བཏེག་ནས་སུ། །ཧ་ཞེས་བྱ་བ་མིག་གཉིས་སུ། །སྐྱེད་གཉིས་དང་ནི་ལྡན་པར་གཞག །སྔགས་ལ། བཛྲ་ཧོ་ཧྲཱིཿསྭཱ་ཧཱ། རྡོ་རྗེ་མིག་གི་ཕྱག་རྒྱའོ། །ལག་པ་དེ་ཉིད་བཏེག་ནས་སུ། །ཧ་ཞེས་བྱ་བ་སྟོབས་ལྡན་པར། །
མཐེའུ་ཆུང་བསྒྲེང་བའི་ཚུལ་གྱིས་སུ། །རྡོ་རྗེ་སྣ་ལ་གཞག་པར་བྱ། །སྔགས་ལ། བཛྲ་ཧོ་ཧ་སྭཱ་ཧཱ། རྡོ་རྗེ་སྣའི་ཕྱག་རྒྱའོ། །མཐེའུ་ཆུང་བསྒྲེང་བའི་ཚུལ་གྱིས་སུ། །ལག་པ་དེ་ཉིད་བཏེག་ནས་སུ། །སྔགས་པས་རྣ་བ་གཉི་གར་ཡང་། །ཧེ་ཞེས་བྱ་བ་གཞག་པར་བྱ། །སྔགས་ལ།
བཛྲ་ཧ་ཧོ་སྭཱ་ཧཱ། རྡོ་རྗེ་རྣ་བའི་ཕྱག་རྒྱའོ། །མཐེ་བོ་བསྒྲེང་སྟེ་ལག་དེ་ཉིད། །བཏེག་ནས་མཁུར་ཚོས་གཉིས་ཀར་ཡང་། །ཧ་ཞེས་བྱ་བ་སྐྱེད་གཉིས་ཅན། །བརྟུལ་ཞུགས་ཅན་གྱིས་གཞག་པར་བྱ། །སྔགས་ལ། བཛྲ་ཧོ་ཧོ་སྭཱ་ཧཱ། རྡོ་རྗེ་མཁུར་བའི་ཕྱག་རྒྱའོ། །སྔགས་པས་གུང་མོ་
མཐེབ་སྦྱར་ཏེ། །ལག་པ་དེ་ཉིད་བཏེག་ནས་སུ། །ཧ་ཞེས་བྱ་བ་སྐྱེད་གཉིས་ཅན། །མཆུ་གཉིས་སུ་ནི་གཞག་པར་བྱ། །སྔགས་ལ། བཛྲ་ཧོ་ཧཱུྃ་སྭཱ་ཧཱ། རྡོ་རྗེ་མཆུའི་ཕྱག་རྒྱའོ། །སྔགས་ཤེས་པས་ནི་མཐེབ་བསྒྲེང་སྟེ། །ལག་པ་དེ་ཉིད་བཏེག་ནས་སུ། །ཧ་ཞེས་བྱ་བ་ཐིག་ལེ་ཅན། །
ལྕེ་ཡི་གནས་སུ་གཞག་བར་བྱ། །སྔགས་ལ། བཛྲ་ཧོ་ཧྃ་སྭཱ་ཧཱ། རྡོ་རྗེ་ལྕེའི་ཕྱག་རྒྱའོ། །ལག་པ་གཡོན་པ་བཏེག་ནས་སུ། །སྔགས་པས་ནུ་མ་ཇིང་གཉིས་ཀར་ཡང་། །ར་ཞེས་བྱ་བ་གཞག་བྱ་སྟེ། །སྐྱེད་གཉིས་དང་ནི་ལྡན་པའོ། །སྔགས་ལ། བཛྲ་ཧ་ཧོར་སྭཱ་ཧཱ། རྡོ་རྗེ་
เล่ม ๘๗ · หน้า 116b
ནུ་མཇིང་གི་ཕྱག་རྒྱའོ། །ལག་པ་གཡོན་པ་དེ་ཉིད་ནི། །མགུལ་པའི་གནས་སུ་གཞག་པར་བྱ། །ར་ཞེས་བྱ་བ་སྐྱེད་གཉིས་ཅན། །མཛུབ་མོ་རྩེ་མོས་གཞག་པར་བྱ། །སྔགས་ལ། བཛྲ་ཧོ་ཧྲི་སྭཱ་ཧཱ། དཔལ་བེའུ་རྡོ་རྗེའི་ཕྱག་རྒྱའོ། །ལག་པ་དེ་ཉིད་བཏེག་ནས་སུ། །མཁས་
པས་མཆན་ཁུང་ཕྱོགས་སུ་གཞག །ར་ཞེས་བྱ་བའི་ཐིག་ལེ་ཅན། །དེར་ནི་ལེགས་པར་གཞག་པར་བྱ། །བཛྲ་ཧོ་ར་མ་སྭཱ་ཧཱ། རྡོ་རྗེ་མཆན་ཁུང་ཕྱག་རྒྱའོ། །ལག་པ་དེ་ཉིད་བཏེག་ནས་སུ། །སོར་མོ་སྲིན་ལག་ཚུལ་གྱིས་ནི། །ར་གཉིས་རྩེག་དང་བཅས་པར་ཡང་། །ལག་
པ་གཉི་གར་གཞག་པར་བྱ། །བཛྲ་ཧོ་རཱ་རཱ་སྭཱ་ཧཱ། རྡོ་རྗེ་དགེ་བའི་ཕྱག་རྒྱའོ། །ལག་པ་དེ་ཉིད་བཏེག་ནས་སུ། །སྔགས་པས་སྙིང་གི་སྟེང་དུ་ནི། །ར་ཞེས་བྱ་བ་རྣ་རུ་ཅན། །ཇི་ལྟ་བཞིན་དུ་གཞག་པར་བྱ། །བཛྲ་ཧོ་རོ་སྭཱ་ཧཱ། རྡོ་རྗེ་སྙིང་གི་ཕྱག་རྒྱའོ། །ལག་གཡས་དམ་པ་སྦྱིན་བྱས་
ལ། །མཁས་པས་སོར་མོ་མཛུབ་མོ་ཡིས། །སྙིང་ག་ནས་ནི་སོར་གཉིས་སུ། །སྐྱེད་གཉིས་ལྡན་པའི་བ་གཞག་གོ། །བཛྲ་ཧོ་བྷ་སྭཱ་ཧཱ། རྡོ་རྗེ་ཡན་ལག་གི་ཕྱག་རྒྱའོ། །ལག་པ་དེ་ཉིད་སྨད་ནས་སུ། །གུང་མོ་པ་ཞེས་བྱ་བ་གཉིས། །སྐྱེད་གཉིས་དང་ནི་ལྡན་པར་ཡང་། །རྩིབ་
ལོགས་གཡོན་པར་གཞག་པར་བྱ། བཛྲ་ཧོ་བྷི་བི་སྭཱ་ཧཱ། རྡོ་རྗེ་རྩིབ་ལོགས་ཀྱི་ཕྱག་རྒྱའོ། །ལག་པ་དེ་ཉིད་བཏེག་ནས་སུ། །མཁས་པས་རྩིབ་ལོགས་གཡས་པར་ནི། །བ་ཞེས་བྱ་བའི་ཐིག་ལེ་ཅན། །མཐེའུ་ཆུང་སོར་མོ་གཞག་པར་བྱ། །སྔགས་ལ། བཛྲ་ཧོ་
པྃ་སྭཱ་ཧཱ། རྩིབ་ལོགས་གཡས་པའི་རྡོ་རྗེའི་ཕྱག་རྒྱའོ། །ལག་པ་དེ་ཉིད་བཏེག་ནས་སུ། །མཐེ་བོ་དང་ནི་གུང་མོ་གཉིས། །བ་ཞེས་བྱ་བའི་ཐིག་ལེར་བཅས། །རྣ་རུ་རྟགས་ཅན་ལྟེ་བར་གཞག །སྔགས་ལ། བཛྲ་ཧོ་བཾ་སྭཱ་ཧཱ། རྡོ་རྗེ་ལྟེ་བའི་ཕྱག་རྒྱའོ། །ལག་པ་དེ་
ཉིད་བཏེག་ནས་སུ། །ལྟེ་བའི་འོག་གི་སོར་གཉིས་སུ། །བ་ཞེས་བྱ་བའི་ཐིག་ལེ་ཅན། །གཉིས་ཤིག་མཛུབ་མོའི་རྩེ་མོར་གཞག །སྔགས་ལ། བཛྲ་ཧོ་བྃ་བྃ་སྭཱ་ཧཱ། རྡོ་རྗེ་ཟླ་བ་སྡུག་གི་ཕྱག་རྒྱའོ། །ལག་པ་དེ་ཉིད་བཏེག་ནས་སུ། །རྐེད་པའི་ཕྱོགས་སུ་བློ་ལྡན་
เล่ม ๘๗ · หน้า 117a
གྱིས། །སོར་མོ་གུང་མོའི་ཚུལ་གྱིས་སུ། །སྐྱེད་གཉིས་ལྡན་པའི་བ་གཞག་གོ། །སྔགས་ལ། བཛྲ་ཧོ་བྷཽ་སྭཱ་ཧཱ། རྡོ་རྗེ་རྐེད་པའི་ཕྱག་རྒྱའོ། །ལག་པ་གཡོན་པ་ཁ་སྦུབས་ལ། །གཡས་པ་དེའི་སྟེང་དུ་བཀན་ཏེ། །ལག་པ་གཉིས་བསྣོལ་མར་སྦྱར་ལ། །མཐེ་བོ་
མཐེ་ཆུང་ཕན་ཚུན་དུ། །རྡོ་རྗེ་བཅིངས་པའི་ཚུལ་བྱས་ཏེ། །མཛུབ་མོ་བསྒྲེང་ལ་གཡོན་རོལ་ནས་སོར་མོ་ཐམས་ཅད་ཀྱིས་གོ་བགོ་བའི་ཚུལ་དུ་བསྐོར་རོ། །རྡོ་རྗེ་གོ་བགོ་བའི་ཕྱག་རྒྱ་སྟེ། སྔགས་ལ། བཛྲ་ཧྃ་ཧ་སྭཱ་ཧཱ། མཐེ་བོ་གཉིས་ནི་ཕྱེ་ནས་སུ། །གཡས་ལོགས་སུ་ནི་ཡོངས་སུ་འཕང་། །
ཚངས་ལ་སོགས་པའི་ལྷ་སྐྲོད་ན། །སྡང་སེམས་རྣམས་ལྟ་སྨོས་ཅི་དགོས། །རྡོ་རྗེ་འཁོར་ལོའི་ཕྱག་རྒྱ་ཞེས། །རྒྱལ་བ་དམ་པ་རྣམས་ཀྱིས་གསུངས། །འདི་གཞག་བྱ་བའི་ཚུལ་གྱིས་སུ། །རྒྱལ་བ་དམ་པར་འགྱུར་བ་ཡིན། །སྔགས་ལ། བཛྲ་ཧོ་བྃ་བ་སྭཱ་ཧཱ། མཛུབ་མོ་ནང་
དུ་བཀུག་ནས་སུ། །ལྷག་མ་སྔ་མ་བཞིན་དུ་གཞག །གུང་མོ་གྱེན་དུ་བསྒྲེང་བྱས་ལ། །འོག་གི་ས་ལ་གཞག་པར་བྱ། །སྔགས་ལ། བཛྲ་ཧོ་ཧཾ་སྭཱ་ཧཱ། རྡོ་རྗེ་ཡན་ལག་གི་ཕྱག་རྒྱའོ། །འདི་དག་ཐམས་ཅད་ཤེས་ནས་སུ། །རྡོ་རྗེའི་ལུས་སུ་སྲ་བར་འགྱུར། །བལྟས་པས་བགེགས་
ཀྱང་ཞིར་འགྱུར་ན། །ཕ་རོལ་གནོད་པ་སྨོས་ཅི་དགོས། །བལྟས་པས་ནད་རྣམས་ཐམས་ཅད་དང་། །སྡང་བ་ཐམས་ཅད་འཇིགས་པར་བྱེད། །ཕྱག་རྒྱར་བཅས་ཏེ་སྔགས་བརྗོད་ན། །ལྷ་ལ་སོགས་པ་དབང་དུ་འགྱུར། །དེ་ནས་སློབ་མ་བརྟག་བྱ་སྟེ། །ཆོ་ག་མཐོང་བའི་ལས་ཀྱིས་
ནི། །ཡན་ལག་ཐམས་ཅད་མཚན་ལྡན་ཞིང་། །ཡན་ལག་རྫོགས་ལ་མཐུན་པ་བདམ། །མཐོང་བ་ཉམས་དང་ཟུར་ལྟ་དང་། །མ་རུངས་པ་དང་མིའུ་ཐུང་སྤངས། །བྱེ་བྲག་ཏུ་ནི་ལྟ་བ་བརྟག །ལྟ་བ་དོན་ཀུན་སྒྲུབ་པར་བྱེད། །དྲག་དང་འཇམ་དང་བར་མ་དང་། །ལྟ་བ་རྣམ་པ་གསུམ་
དུ་གསུངས། །བསྐྲད་དང་བསད་དང་དེ་བཞིན་དུ། །བསྐམ་དང་ཕུང་བར་བྱ་བ་དང་། །མ་རུངས་བ་དག་དབང་བྱ་དང་། །ཚར་གཅོད་པ་ནི་དྲག་པོར་བསྟན། །འཇམ་པོར་ལྟ་བ་འཇམ་པོར་བྱེད། །སེམས་ཅན་ཐམས་ཅད་དབང་དུ་བྱེད། །བསྒྲུབ་པ་རྒྱ་ཆེར་སེམས་ལྡན་ཞིང་། །འཇམ་པོར་ལྟ་
เล่ม ๘๗ · หน้า 117b
བ་སྙན་པར་སྨྲ། །སྙིང་རྗེ་དང་ནི་ཐབས་ལྡན་ཞིང་། །བྱང་ཆུབ་སེམས་དང་འཇིགས་མེད་པ། །བདུད་ཀྱི་དཔུང་ནི་སྟོབས་པོ་ཆེ། །མ་ཐུལ་ཐམས་ཅད་འདུལ་བྱེད་ན། །བགེགས་དང་ལོག་འདྲེན་ཐམས་ཅད་དང་། །སྡང་བ་ཀུན་ལྟ་སྨོས་ཅི་དགོས། །དེ་ལྟ་བས་ན་རྣམ་ཀུན་དུ། །
འཇམ་པོར་བལྟ་བ་བརྟག་པར་བྱ། །མཛའ་དང་དགྲ་ལ་སེམས་སྙོམས་ཤིང་། །ལས་སུ་བྱ་བ་རྣམ་སྤངས་ལ། །སྔགས་པས་བར་མར་གནས་པ་ནི། །གལ་ཏེ་ཐབས་ལ་མཁས་ཤིག་ན། །ཡིད་ལ་བསམས་པར་གྱུར་པ་ཡིས། །དགོས་པ་ཐམས་ཅད་བྱེད་པར་འགྱུར། །དེ་ལྟ་
བས་ན་རྣམ་ཀུན་དུ། །ལྟ་བ་འདི་ནི་རྣམ་པར་སྦྱར། །གང་ཞིག་ལྟ་བ་ཡོངས་དག་ཅིང་། །དེ་བཞིན་ཡིད་ཀྱང་རྣམ་དག་པ། །དེ་ལ་རྡོ་རྗེ་ཡེ་ཤེས་ཕྱིར། །བརྟུལ་ཞུགས་ཅན་གྱིས་མཆོག་ཏུ་བསྟན། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ལག་ན་རྡོ་རྗེ་ལ་
འདི་སྐད་ཅེས་སྨྲས་སོ། །རིགས་ཀྱི་བུ་ཇི་ལྟར་ཁྱོད་ཀྱིས་བཤད་པའི་དོན་བདག་གིས་ཤེས་པ་ལྟར་ན། བདག་འདི་སྙམ་དུ་བྱང་ཆུབ་སེམས་དཔའ་ཡིད་རྣམ་པར་སྦྱང་བར་བྱའོ་སྙམ་བྱེད་དོ། །དེ་སྐད་ཅེས་སྨྲས་པ་དང་། ལག་ན་རྡོ་རྗེས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་
སྨྲས་སོ། །འཇམ་དཔལ་ལེགས་སོ་ལེགས་སོ། །ཡིད་རྣམ་པར་དག་པར་བྱ་བའི་ཕྱིར་ཚིག་འདི་ཁྱོད་ཀྱིས་ལེགས་པར་སྨྲས་སོ། །འཇམ་དཔལ་དེའི་ཕྱིར་ཉོན་ཅིག་དང་། གང་དང་ལྡན་ན་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་རྣམས་
གསང་སྔགས་རྣམས་ལ་གསང་བའི་དངོས་གྲུབ་ཐོབ་པར་གྱུར་པའི་ཡིད་རྣམ་པར་དག་པ་ཞེས་བྱ་བ་ཆོས་ཀྱི་སྒོ་ཁོ་བོས་ཁྱོད་ལ་བཤད་པར་བྱའོ། །འཇམ་དཔལ་དེ་ལ་རིགས་ཀྱི་བུའམ། རིགས་ཀྱི་བུ་མོ་དཀྱིལ་འཁོར་མཐོང་བ། བྱང་ཆུབ་ཏུ་སེམས་བསྐྱེད་པ། ཡིད་སྙིང་རྗེ་དང་
ལྡན་པ། ཐབས་ལ་མཁས་པ། གསང་སྔགས་ཀྱི་སྒོ་ཡི་གེའི་ཚུལ་བསྟན་པ་ལ་མཁས་པས་འདི་སྙམ་དུ་ངག་མ་གཏོགས་པར་ཡིད་མེད། ཡིད་མ་གཏོགས་པར་ངག་མེད། ཡིད་མ་གཏོགས་པར་ལྷའི་གཟུགས་མེད་དེ། ཡིད་ཉིད་ངག་ཡིན་ལ་ངག་ཉིད་ཡིད་ཡིན་
เล่ม ๘๗ · หน้า 118a
ཞིང་ལྷའི་གཟུགས་ཉིད་ཀྱང་ཡིད་ཡིན་ལ། ངག་ཉིད་ཀྱང་ལྷའི་གཟུགས་ཡིན་ནོ་སྙམ་དུ་བསམ་པར་བྱའོ། །དེ་ལྟར་ཐ་དད་དུ་བྱ་བ་མེད་པར་མོས་ན། སྔགས་པས་ཡིད་རྣམ་པར་དག་པ་ཐོབ་བོ། །ཡིད་རྣམ་པར་དག་པ་དང་ལྡན་པ་དེ་གང་གི་ཚེ། རྣམ་པ་ཐམས་ཅད་དུ་རྟག་
པར་བདག་གི་ལུས་དང་ལྷའི་གཟུགས་སུ། བདག་གི་ངག་དང་ལྷའི་ངག་ཏུ། བདག་གི་ཡིད་དང་ལྷའི་ཡིད་དུ་མཚུངས་པར་མཐོང་བ་དེའི་ཚེ་མཉམ་པར་གཞག་པ་ཡིན་ནོ། །གང་ཚེ་ཀུན་དུ་ཐམས་ཅད་དུ། །སྔགས་པ་མཉམ་པར་གཞག་གྱུར་ན། །དེའི་ཚེ་ལུས་ལ་སོགས་པ་ཡི། །མཉམ་ཉིད་
གནས་ལ་ཞུགས་པར་འགྱུར། །མཉམ་ཉིད་གནས་ལ་གནས་པ་ཡི། །ཡན་ལག་བསྐྱོད་པ་ཇི་སྙེད་དང་། །ཚིག་ཏུ་བརྗོད་པ་ཇི་སྙེད་པ། །དེ་སྙེད་གསང་སྔགས་ཕྱག་རྒྱ་ཡིན། །སྔགས་པ་ཀུན་དུ་དགྲ་མེད་ཅིང་། །རྟག་ཏུ་མི་གཡོ་བདེ་བར་གནས། །དབང་ཕྱུག་ཀུན་གྱི་གོ་འཕང་ཐོབ། །
འདོད་པ་འབྱོར་བའི་གནས་ལ་གནས། །དེ་བསིལ་ཡོངས་སུ་གདུང་བ་མེད། །བཟོད་དང་ལྡན་པའི་ཚུལ་ཁྲིམས་བསྡམས། །དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས། བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཇི་ཙམ་དུ་ཡིད་རྣམ་པར་དག་
པའི་སྒོའི་ཆོས་ཀྱི་རྣམ་གྲངས་འདི་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་རྣམས་ལ་ཕན་པར་གྱུར་པ་ནི་ངོ་མཚར་ཏོ། །རིགས་ཀྱི་བུ་འདི་ལྟ་སྟེ་དཔེར་ན་ས་ཆེན་པོ་ནི་རྐང་གཉིས་པ་དང་། རྐང་བཞི་པ་རྣམས་ལ་ཕན་པར་གྱུར་པ་ཡིན་ནོ། །རིགས་ཀྱི་བུ་དེ་
བཞིན་དུ་ཆོས་ཀྱི་སྒོ་འདི་ཡང་། བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་རྣམས་ལ་ཕན་པར་གྱུར་པ་ཡིན་ནོ། །རིགས་ཀྱི་བུ་གང་དག་ཆོས་ཀྱི་སྒོ་འདི་ལ་མངོན་པར་བརྩོན་པའི་བྱང་ཆུབ་སེམས་དཔའ་དེ་དག་ནི་གསང་སྔགས་ཀྱི་དངོས་གྲུབ་བསྒྲུབ་པའི་
གནས་ལ་སྐལ་བ་ཡོད་པ་ཡིན་ནོ། །ལག་ན་རྡོ་རྗེས་སྨྲས་པ། ཞི་བའི་བློ་གྲོས་དེ་དེ་བཞིན་ཏེ། ཇི་སྐད་སྨྲས་པ་དེ་བཞིན་ནོ། །དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པ་སྟེ། དེ་དག་ནི་རྡོ་རྗེ་དཀྱིལ་འཁོར་ཆེན་པོ་ལ་འཇུག་པ་དང་། མཉན་པ་དང་། ཡང་དག་
เล่ม ๘๗ · หน้า 118b
པར་འཛིན་པའི་སྐལ་བ་ཡོད་པ་དག་གོ། །དེ་ནས་ཐམས་ཅད་དང་ལྡན་པའི་འཁོར་དེས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་རིགས་ཀྱི་བུ་གང་དག་ཡིད་རྣམ་པར་དག་པའི་སྒོའི་ཆོས་ཀྱི་རྣམ་གྲངས་འདི་ལ་མངོན་པར་བརྩོན་པ་དེ་དག་ནི་ཕྱག་བགྱི་བ་ལགས་
ཏེ། བདག་ཅག་ཐམས་ཅད་གཡོག་དང་བཅས་འཁོར་དང་བཅས་པར་འདུས་ནས་གོས་དང་ཟས་རྣམས་ཀྱིས་དེ་དག་ལ་བསྟི་སྟང་དུ་བགྱི། བླ་མར་བགྱི། རི་མོར་བགྱི། མཆོད་པར་བགྱིའོ། །གྲོང་ན་གནས་ཀྱང་རུང་། དགོན་པར་གནས་ཀྱང་རུང་སྟེ་གནོད་པ་ཐམས་ཅད་ཀྱང་བཟློག་པར་
བགྱིའོ། །ཕན་པ་རྣམས་ཉེ་བར་བསྒྲུབ་པར་བགྱིའོ། །རིགས་ཀྱི་བུའམ་རིགས་ཀྱི་བུ་མོ་རྟག་ཏུ་རྒྱུན་མི་འཆད་པར་མངོན་པར་བརྩོན་པ་དེ་དག་གི་རེ་བ་ཐམས་ཅད་ཇི་ཙམ་དུ་ཡོངས་སུ་རྫོགས་པར་མ་བགྱིས་པ་དེ་སྲིད་དུ་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་
པར་སངས་རྒྱས་པར་མི་བགྱིའོ། །དེ་ནས་བྱང་ཆུབ་སེམས་དཔའ་ལག་ན་རྡོ་རྗེས་ཐམས་ཅད་དང་ལྡན་པའི་འཁོར་དེ་ལ་འདི་སྐད་ཅེས་སྨྲས་སོ། །ལེགས་སོ་ལེགས་སོ། །གྲོགས་པོ་དག་འདི་ལྟ་སྟེ། གང་གི་ལག་ན་ཡིད་རྣམ་པར་དག་པའི་སྒོ་གནས་པ་དེ་ནི་དེ་བཞིན་གཤེགས་པ་
རྣམས་ཀྱི་བྱང་ཆུབ་བོ། །འདི་ལྟ་སྟེ་གསང་སྔགས་ཀྱི་སྒོ་སྤྱོད་པ་མངོན་པར་རྫོགས་པར་བྱང་ཆུབ་པ་འཛིན་པ་ལ་བསྟི་སྟང་དུ་བྱ་རི་མོར་བྱ་སྟེ་འདི་ཉིད་བྱ་བའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་དེའི་ཚེ། བྱང་ཆུབ་སེམས་དཔའི་སྤྱད་པ་གསང་སྔགས་
ཀྱི་སྒོ་སྤྱོད་པ་རྣམས་བསྲུང་བའི་ཕྱིར། རྣམ་པར་དག་པ་མཐའ་ཡས་པའི་གནས་ཀྱི་གསང་སྔགས་ཀྱི་ཚིག་རྣམས་སྨྲས་པ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་བྷ་ཡ་བྷི་ཁ་ཏེ་བྷྱཿ། སརྦ་ཐཱ་ཧཱུྃ་ཙ་པ་ལི་ནི་ཀ །ཀེ་ཀ་རཀྵ་རཀྵ་དཱ་ཀེ་བྷྱ་དཪྨ། ཥ་ཏཱྃ་གི་ཙཎྜོ་ལི་
ཥ་པ་དོ་ལི་ཏིརཏྣ་ཧ་མ་བ་ཡི་ནི་མ་ནི་སམ་མ་མ་ཧཱ་ཡ་ན་སི་སྭཱ་ཧཱ། ཆོས་སྨྲ་བ་གང་ལ་ལ་ཞིག་གིས་ཉིན་ལན་གསུམ་མཚན་ལན་གསུམ་དྲན་པར་བྱས་ན། དེ་ལ་འཇིགས་པ་དང་གནོད་པ་ཐམས་ཅད་མི་འབྱུང་ངོ་། །དེ་བཞིན་དུ་ལག་པ་གཉིས་སྦྱར་ཏེ་གུང་མོ་གཉིས་བཀུག་ལ་ནང་དུ་བཅུག་
เล่ม ๘๗ · หน้า 119a
པ་ནི་བྱང་ཆུབ་ཀྱི་སྙིང་པོ་གནོན་པའི་རྡོ་རྗེའི་ཕྱག་རྒྱའོ། །ཕྱག་རྒྱ་འདི་ཉིད་ལས་སྲིན་ལག་གཉིས་ཀྱི་ཚིགས་དང་པོ་བཀུག་པ་ནི་བདུད་ཡང་དག་པར་བསྐུལ་བའི་རྡོ་རྗེའི་ཕྱག་རྒྱའོ། །ཕྱག་རྒྱ་འདི་ཉིད་ལས་གུང་མོ་གཉིས་སླར་ཕྱུང་སྟེ། སྔ་མ་བཞིན་དུ་གཞག་པ་ནི་བདུད་ཀྱི་
དཔུང་སྐྲག་པར་བྱེད་པའི་ཕྱག་རྒྱའོ། །ཕྱག་རྒྱ་དེ་ཉིད་ལས་སྲིན་ལག་གཉིས་གཤིབས་ཏེ་མཐེ་བོ་གཉིས་བཀུག་ལ་ནང་དུ་བཅུག་པ་ནི་བདུད་ཀྱི་སྡེ་རྣམ་པར་འཇོམས་པའི་ཕྱག་རྒྱའོ། །ཕྱག་རྒྱ་དེ་ཉིད་ལས་མཐེ་བོ་གཉིས་ཕྱུང་ལ་མཛུབ་མོ་གཉིས་བཀུག་ལ་ནང་དུ་བཅུག་པ་ནི་བདུད་འདུལ་བའི་ཕྱག་
རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧེ་ཧེ་སྭཱ་ཧཱ། ཕྱག་རྒྱ་འདི་ཉིད་ལས་མཐེ་བོ་གཡོན་པས་མཐེ་བོ་གཡས་པ་མནན་པ་ནི་གདོན་ཐམས་ཅད་ཚར་གཅོད་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧི་སྭཱ་ཧཱ།
ཕྱག་རྒྱ་འདི་ཉིད་ལས་མཛུབ་མོ་གཡས་པས་མཐེ་བོ་གཡོན་པ་མནན་པ་ནི་སྲིན་པོ་ཐམས་ཅད་ཚར་གཅོད་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཏེ་ཧེ་རེ་ཊེ་སྭཱ་ཧཱ། ཕྱག་རྒྱ་འདི་ཉིད་ལས་ལག་པ་གཡོན་པའི་སྲིན་ལག་གིས་ལག་པ་གཡས་པའི་
མཐིལ་དུ་བྲུད་པ་ནི་མཁའ་འགྲོ་མ་ཐམས་ཅད་ཀྱི་སྙིང་རྣམ་པར་འཇོམས་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧེ་རངྒི་ཎི་ཧེ་ཧེ་སྭཱ་ཧཱ། ཕྱག་རྒྱ་འདི་ཉིད་ལས་སྙིམ་པའི་ཚུལ་དུ་བྱས་པ་ནི་མཛུབ་མོ་གཉིས་དང་མཐེ་བོ་གཉིས་དུང་གི་ཚུལ་དུ་བྱས་པ་ནི་
རྡོ་རྗེ་དུང་གི་ཕྱག་རྒྱ་སྟེ་ཀླུ་ཐམས་ཅད་ཀྱི་སྙིང་རྣམ་པར་འཇོམས་པའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཛཾ་གི་རི་ཕུཏྟ་རེ་རེ་སྭཱ་ཧཱ། དེ་བཞིན་དུ་ལག་པ་གཉིས་སྦྱར་ལ་གུང་མོ་གཉིས་བསྣོལ་བ་ནི། གནོད་སྦྱིན་ཐམས་ཅད་ཚར་གཅོད་པའི་ཕྱག་རྒྱའོ། །སྔགས་
ལ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཛིཾ་གི་རི་ཎི་ཧཱུྃ་ན་དེ་ཀེ་སྭཱ་ཧཱ། ཕྱག་རྒྱ་འདི་ཉིད་ལས་མཐེའུ་ཆུང་གཉིས་ནང་དུ་བཅུག་ལ་གུང་མོ་གཉིས་སྔ་མ་བཞིན་དུ་གཞག་པ་ནི་དྲི་ཟ་ཚར་གཅོད་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ ། སརྦ་མུ་ཁེ་བྷྱཿ། སརྦ་ཐཱ་
เล่ม ๘๗ · หน้า 119b
ཧེ་རི་གེ་བྷྱཿསྭཱ་ཧཱ། ཕྱག་རྒྱ་འདི་ཉིད་ལས་མཛུབ་མོ་གཉིས་འཁྱུད་པའི་ཚུལ་དུ་བྱས་པ་ནི་ལྷ་མ་ཡིན་ངེས་པར་འཇོམས་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧཱུྃ་ཧཱུྃ་ཕཊ་ཕཊ། ཕྱག་རྒྱ་འདི་ཉིད་ལས་མཐེ་བོ་གཉིས་འཁྱུད་ལ་བསྒྲེང་སྟེ། སོར་མོ་ལྷག་
མ་རྣམས་བརྐྱང་བ་ནི་ནམ་མཁའ་ལྡིང་ཐམས་ཅད་བྲན་བཞིན་ལས་ཅི་ཡང་བྱེད་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧ་རི་པིངྒོ་ལི་མུ་ཁི་སྭཱ་ཧཱ། དེ་བཞིན་དུ་ལག་པ་གཉིས་སྦྱར་ལ་ལག་པ་གཡོན་པ་བཀན་ཏེ་གཡས་པ་ཁ་སྦུབས་ལ་སྲིན་ལག་གིས་ལག་པ་
གཡོན་པ་མཐིལ་དུ་རེག་པར་བྱས་པ་ནི་མི་འམ་ཅི་ཚར་གཅོད་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཛ་ཡ་ཛ་ཡ་ནི་སྭཱ་ཧཱ། ཕྱག་རྒྱ་འདི་ཉིད་ལས་མཛུབ་མོས་ལག་པ་དེ་ཉིད་ཀྱི་མཐིལ་དུ་རེག་པར་བྱས་པ་ནི་ལྟོ་འཕྱེ་ཆེན་པོ་ཚར་གཅོད་པའི་ཕྱག་རྒྱའོ། །
སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ག་ར་ལི་ནི་ཧཱུྃ་ཀ་རི་ཎི་སྭཱ་ཧཱ། དེ་བཞིན་དུ་ལག་པ་གཉིས་སྦྱར་ལ་ལག་པ་གཉིས་བསྣོལ་བ་ནི་སྡང་བ་ཐམས་ཅད་དགག་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧེ་ཙཎྜི་
ཧེ་རི་བི་ཀེ་སྭཱ་ཧཱ། ལག་པ་དེ་ཉིད་སོར་མོ་རྣམས་གཅིག་གིས་གཅིག་འཁྱུད་ལ་ལག་པ་གཉིས་སྔ་མ་བཞིན་དུ་གཞག་པ་ནི་སྲིན་པོ་ཐམས་ཅད་ཀྱི་སྙིང་ཚིག་པར་བྱེད་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཀེང་ཀ་རི་ཎི་ཛྷྃ་ཀ་རི་ཎི་ཀེ་སྭཱ་ཧཱ། ཕྱག་
རྒྱ་འདི་ཉིད་ལས་མཐེ་བོ་གཉིས་ཡིད་ཙམ་བཀུག་པ་འདི་ནི་སྲིན་པོ་ཐམས་ཅད་ཀྱི་སྙིང་རྨོངས་པར་བྱེད་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཀར་ན་ཛི་ཏེ་བི་ཁ་ལ་མུ་ཀི་སྭཱ་ཧཱ། ཕྱག་རྒྱ་འདི་ཉིད་ལས་མཛུབ་མོ་གཉིས་ཕྱེ་སྟེ་མཐེ་བོ་སྔ་མ་བཞིན་
གཞག་པ་ནི་ཤ་ཟ་འདུལ་བའི་ཕྱག་རྒྱ་སྟེ་རྒྱལ་བ་མཆོག་རྣམས་ཀྱིས་རྟག་ཏུ་གསུངས་སོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་མི་ཙི་སྭཱ་ཧཱ། ཕྱག་རྒྱ་འདི་ཉིད་ལས་གུང་མོ་གཉིས་ཕྱེ་ལ་མཛུབ་མོ་གཉིས་སྔ་མ་བཞིན་གཞག་པ་ནི་ཤ་ཟ་མོ་ཐམས་
เล่ม ๘๗ · หน้า 120a
ཅད་ཀྱི་སྙིང་རྨོངས་པར་བྱེད་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་པི་ཤཱ་ཙི་ནི་སྭཱ་ཧཱ། ཕྱག་རྒྱ་འདི་ཉིད་ལས་སྲིན་ལག་གཉིས་ཀྱང་ཕྱེ་སྟེ། གུང་མོ་གཉིས་སྔ་མ་བཞིན་གཞག་པ་ནི་འབྱུང་པོ་ཐམས་ཅད་དབང་དུ་བྱ་བའི་ཕྱག་རྒྱའོ། །
སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་གུྃ་གུྃ་སྭཱ་ཧཱ། ཕྱག་རྒྱ་འདི་ཉིད་ལས་མཐེའུ་ཆུང་གཉིས་ཀྱང་ཕྱེ་ལ་སྲིན་ལག་གཉིས་སྔ་མ་བཞིན་གཞག་པ་ནི་འབྱུང་པོ་ཐམས་ཅད་དགུག་པའི་ཕྱག་རྒྱའོ། །སྔགས་ལ། ནམཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་གུ་མི་གུ་
མི་ཧི་ལི་གེ་སྭཱ་ཧཱ། ཕྱག་རྒྱ་འདི་ཉིད་ལས་མཐེ་བོ་གཡོན་པ་བརྐྱང་ལ་ལྷག་མ་སྔ་མ་བཞིན་གཞག་པ་ནི་གྲིབ་གནོན་ཐམས་ཅད་སྐྲག་པར་བྱེད་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཚཱ་ཡཱ་ལི་སྭཱ་ཧཱ། དེ་བཞིན་དུ་མཐེ་བོ་གཡོན་པ་བརྐྱང་ལ་ལག་
པ་གཡས་པ་སྔ་མ་བཞིན་དུ་གཞག་པ་ནི་གྲིབ་གནོན་ཐམས་ཅད་འཇིགས་པར་བྱེད་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཛོ་ལ་ནི་ཛ་ཏི་ཀེ་སྭཱ་ཧཱ། ཕྱག་རྒྱ་འདི་ཉིད་ལས་མཛུབ་མོ་གཉིས་ཕྱེ་སྟེ་བསྣོལ་བའི་ཚུལ་དུ་བཀུག་ལ་མཐེ་བོ་གཉིས་ཀྱི་སྟེང་
དུ་གཞག་པ་ནི་བརྗེད་བྱེད་ཐམས་ཅད་གཞིག་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ལྃ་བོད་ར་ཎཱི་བྷྲི་བྷྲི་ཤི་ནི་སྭཱ་ཧཱ། ཕྱག་རྒྱ་འདི་ཉིད་ལས་སོར་མོ་ཐམས་ཅད་ཕྱེ་སྟེ་བསྒྲེང་བ་ནི་བརྗེད་བྱེད་མ་ཐམས་ཅད་སྐྲག་པར་བྱེད་པའི་ཕྱག་རྒྱའོ། །སྔགས་ལ།
ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་བེ་རཏྣི་ཨུ་ལྐ་མུ་གི་ཙི་ཕུ་རི་རེ་སྭཱ་ཧཱ། དེ་བཞིན་དུ་སོར་མོ་ཐམས་ཅད་བཀུག་སྟེ་ནང་དུ་བཅུག་ལ། མཐེ་བོ་གཉིས་བསྒྲེང་སྟེ་དེ་ལྟར་བྱས་པ་འདི་ནི་བྱད་རྣམས་ཀྱི་སྙིང་སྐམ་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་
མུ་ཁེ་བྷྱཿ། སརྦ་ཐཱ་ཁི་ཁི་རི་ཧྲྀ་ད་ཡ་བི་དཱ་ར་ཎི་སྭཱ་ཧཱ། ཕྱག་རྒྱ་འདི་ཉིད་ལས་མཐེ་བོ་གཉིས་བཀུག་སྟེ་ནང་དུ་བཅུག་ལ་མཛུབ་མོ་གཉིས་བསྒྲེང་བ་འདི་ནི་བྱད་ཐམས་ཅད་ཀྱི་སྙིང་ཀུན་དུ་སྦྱར་བའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་བིས་རི་ཎི་སྭཱ་ཧཱ། དེ་
เล่ม ๘๗ · หน้า 120b
ནས་ཡང་ལག་ན་རྡོ་རྗེ་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའི་སྟོབས་བཅུའི་སྟོབས་དང་ལྡན་པ། རྡོ་རྗེ་ཡེ་ཤེས་ལས་མངོན་པར་འབྱུང་བ་རྣམས་ཀྱི་དོན་དུ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་ལས་བྱུང་བའི་ཕྱག་རྒྱ་གསང་བ་རབ་འབྱམ་བསྟན་
པའི་སྒོ་སྨྲས་པ། ཐོག་མར་སངས་རྒྱས་ཐམས་ཅད་ལ་ཕྱག་བྱས་ཏེ། བྱང་ཆུབ་ཀྱི་སེམས་མངོན་དུ་བྱས་ལ། །བྱམས་པ་ཆེན་པོ་དང་སྙིང་རྗེ་ཆེན་པོའི་མིག་གིས་སེམས་ཅན་གྱི་ཁམས་ཁྱབ་པར་བྱས་ཏེ། སྤོས་ཀྱིས་ལག་པ་བསྐུས་ལ་ཁ་ཤར་ཕྱོགས་སམ། བྱང་ཕྱོགས་སུ་བལྟས་ཏེ་
ཕྱག་རྒྱ་ལེགས་པར་བཅིང་བར་བྱའོ། །ལག་པ་གཉིས་སྙིམ་པར་སྦྱར་ལ་བསྟོད་དེ་གཞག་པ་ནི་དེ་བཞིན་གཤེགས་པ་རིན་པོ་ཆེ་ཏོག་གི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཏྲི་རཏྣ་ནིཪྫཱ་ཏ་ཧཱུྃ་ཧཱུྃ་སྭཱ་ཧཱ། ཕྱག་རྒྱ་འདི་ཉིད་ལས་མཐེ་བོང་གཉིས་
བཀུག་སྟེ་ངོས་ལ་བཅར་བ་ནི་དེ་བཞིན་གཤེགས་པ་མེ་ཏོག་ཀུན་དུ་རྒྱས་པའི་དབང་པོའི་རྒྱལ་པོའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཛྙཱ་ན་སམྦྷ་བ་སྭཱ་ཧཱ། ཕྱག་རྒྱ་འདི་ཉིད་ལས་མཛུབ་མོ་གཉིས་རྡོ་རྗེའི་ཚུལ་དུ་བཀུག་སྟེ་གུང་མོའི་ངོས་ཀྱི་ཐད་
ཀར་གཞག་པ་ནི་བཅོམ་ལྡན་འདས་འོད་དཔག་མེད་ཀྱི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཨ་མི་ཏོདྦྷ་བེ། ཛྙཱ་ན་པ་རི་ཎི་སྭཱ་ཧཱ། ཕྱག་རྒྱ་འདི་ཉིད་ལས་མཛུབ་མོ་གཉིས་བཀུག་སྟེ་འདི་ཉིད་ཀྱི་རྩེ་མོ་གུང་མོ་ལ་རེག་པར་བྱས་པ་ནི་མི་འཁྲུགས་
པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་བྷི་ག་ད་ཛྭཱ་ཛྙཱ་ན་སྃ་བྷ་བ་སྭཱ་ཧཱ། ལག་པ་གཉིས་ཁུ་ཚུར་བཅངས་ལ། མཛུབ་མོ་གཉིས་ཀྱིས་མཐེ་བོ་གཉིས་ལ་འཁྱུད་པ་ནི་བཅོམ་ལྡན་འདས་རྣམ་པར་གཟིགས་ཀྱི་ཕྱག་རྒྱའོ། །སྔགས་
ལ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཀ་ན་བི་ཙུ་ཏི་ཏ་ཛྙཱ་ནོ་ད་ཡ་སྭཱ་ཧཱ། ཕྱག་རྒྱ་འདི་ཉིད་ལས་གུང་མོ་གཉིས་གཤིབས་ཏེ་བསྒྲེང་བ་ནི་བཅོམ་ལྡན་འདས་དེ་བཞིན་གཤེགས་པ་གཙུག་ཏོར་ཅན་གྱི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏི་བྷྱཿ། སརྦ་མུ་ཁེ་
เล่ม ๘๗ · หน้า 121a
བྷྱཿ། སརྦ་ཐཱ་ཛྙཱ་ན་ཤི་ཁི་སཾ་བྷ་བ་སྭཱ་ཧཱ། དེ་བཞིན་དུ་སྔ་མ་ལྟར་ཁུ་ཚུར་བཅངས་ལ་སྲིན་ལག་གཉིས་གཤིབས་ཏེ་བསྒྲེང་བ་ནི་བཅོམ་ལྡན་འདས་ཐམས་ཅད་སྐྱོབ་ཀྱི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་བི་ཤུདྡྷ་ག་ཏ་ཛྙཱ་ན་བི་དེ་སྭཱ་ཧཱ།
སྔ་མ་བཞིན་དུ་དེ་ལྟར་ཁུ་ཚུར་བཅངས་ལ་མཐེའུ་ཆུང་གཉིས་གཤིབས་ཏེ་བསྒྲེང་བ་ནི་བཅོམ་ལྡན་འདས་ལོག་པར་དད་སེལ་གྱི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཛི་མ་སྭཱ་ཧཱ། དེ་བཞིན་དུ་ཁུ་ཚུར་བཅངས་ལ་མཐེ་བོ་གཉིས་དང་མཛུབ་མོ་
གཉིས་ནང་དུ་བཀུག་པ་ནི་བཅོམ་ལྡན་འདས་འཁོར་ལོས་སྒྱུར་བ་ཆེན་པོའི་དབུའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཁ་ཏྲ་མི་སྭཱ་ཧཱ། ཕྱག་རྒྱ་འདི་ཉིད་ལས་གུང་མོ་གཉིས་ཕྱུང་སྟེ་གཤིབས་ལ་བསྒྲེང་བ་ནི། བཅོམ་ལྡན་འདས་འཁོར་ལོས་སྒྱུར་
བ་ཆེན་པོའི་གཙུག་ཏོར་གྱི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཛཱཾ། ཕྱག་རྒྱ་འདི་ཉིད་ལས་མཛུབ་མོ་གཉིས་ཕྱུང་སྟེ་ཚིགས་དང་པོ་བཀུག་པ་དེ་ཉིད་ལ་སྦྱར་བ་ནི་སྤྱན་གྱི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ།
སརྦ་ཐཱ་དྲི། ཕྱག་རྒྱ་འདི་ཉིད་ལས་མཐེ་བོ་གཉིས་ཡིད་ཙམ་བཀུག་ལ་མཛུབ་མོ་གཉིས་ལ་ཕྱོགས་པར་བྱས་ཏེ། ལྷག་མ་སྔ་མ་བཞིན་གཞག་པ་ནི་བཅོམ་ལྡན་འདས་ཀྱི་འཁོར་ལོའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཨྃ། སྔ་མ་
བཞིན་དུ་ལག་པ་གཉིས་ཁུ་ཚུར་བཅངས་ལ་མཛུབ་མོ་གཉིས་ཕྱིར་བཀྱེད་དེ་བརྐྱང་ལ་ཚིགས་དང་པོ་བཀུག་ཅིང་མཐེ་བོ་གཉིས་ཕྱིར་བཀྱེད་དེ་བརྐྱང་བ་ནི་བཅོམ་ལྡན་འདས་དཔལ་བེའུའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཤྲཱིཿ། ཕྱག་རྒྱ་
འདི་ཉིད་ལས་གུང་མོ་གཉིས་བཀྱེད་དེ་བརྐྱང་ལ་མཐེ་བོ་གཉིས་ནང་དུ་བཅུག་པ་ནི་བཅོམ་ལྡན་འདས་ཀྱི་ལྟེ་བའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧྲིཾ། སྔ་མ་བཞིན་དུ་ལག་པ་གཉི་ག་ཁུ་ཚུར་བཅངས་ལ། མཐེའུ་ཆུང་གཉིས་
เล่ม ๘๗ · หน้า 121b
ཕྱུང་སྟེ་བཀྱེད་པ་འདི་ནི་བཅོམ་ལྡན་འདས་ཀྱི་ཞབས་ཀྱི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧྲྃ། འདི་དག་ནི་བཅོམ་ལྡན་འདས་འཁོར་ལོས་སྒྱུར་བ་ཆེན་པོའི་ཕྱག་རྒྱ་སྟེ་དགོས་པའི་དོན་ཐམས་ཅད་སྒྲུབ་བོ། །གང་ཞིག་ནང་གི་དག་པ་ཡིས། །
ཕྱག་རྒྱ་འདི་དག་འཛིན་བྱེད་པ། །སྔགས་པ་འདི་ནི་སྡིག་བྲལ་བར། །འགྱུར་ཏེ་འདི་ལ་ཐེ་ཙོམ་མེད། །རྡོ་རྗེ་འཆང་རྣམས་ཐམས་ཅད་དང་། །བྱང་ཆུབ་སེམས་དཔའ་རྣམས་དང་ནི། །རྫུ་འཕྲུལ་ཆེ་བའི་ལྷ་ཀུན་ཡང་། །བློ་དང་ལྡན་པ་དེ་ལ་བསྲུང་། །དེ་ལྟ་བས་ན་རྣམ་ཀུན་དུ། །བདག་
ཉིད་ཆེ་ལ་གུས་པར་བྱ། །རིག་སྔགས་རྟག་ཏུ་བཟླས་བྱས་ན། །དེ་ལ་དངོས་གྲུབ་མི་དཀའོ། །རྒྱལ་བ་རྣམས་ཀྱིས་གསུངས་པའི་སྔགས། །ཚེ་འདི་ལ་ནི་གྲུབ་པར་འགྱུར། །འཇིག་རྟེན་སྔགས་རྣམས་གང་ཡིན་པ། །དེ་དག་དེ་ཡི་དབང་འགྱུར་ཏེ། །བསྒོ་བ་ཅི་ཞིག་གྱིས་ཤིག་
ཅེས། །དེ་ཡི་གཡས་གཡོན་འཁོར་བར་འགྱུར། །མི་མིན་ལྷ་ཡི་སྨན་རྣམས་ཀྱང་། །དེ་ཡི་དབང་དུ་གྱུར་ཅིང་འཁོད། །སྔགས་པས་སྔགས་ཀྱི་ཚུལ་གནས་ནས། །གང་ཚེ་ལུས་ནི་འདོར་འགྱུར་ན། །དབང་སྒྱུར་གྱི་ནི་གནས་མཆོག་ཏུ། །དེ་ཚེ་དེ་ནི་སྐྱེ་བར་འགྱུར། །གང་
ན་དབང་ལྡན་བཅོམ་ལྡན་འདས། །རྣམ་པར་སྣང་མཛད་ཆེ་བཞུགས་པར། །རྒྱལ་བའི་སྲས་པོ་འདོད་པ་བཞིན། །སྐྱེ་བདག་ནི་འཛིན་པར་འགྱུར། །ཇི་སྲིད་བྱང་ཆུབ་གྱུར་གྱི་བར། །དེ་ཡི་སྤྱོད་པ་ཉམས་མི་འགྱུར། །རྡོ་རྗེ་འཆང་རྣམས་ཐམས་ཅད་ཀྱིས། །ཐམས་
ཅད་དུ་ནི་བྱིན་གྱིས་བརླབས། །དེ་བཞིན་དུ་ལག་པ་གཉི་ག་སྦྱར་ལ་སྲིན་ལག་གཉིས་ནང་དུ་བཅུག་སྟེ། མཛུབ་མོ་གཉིས་ཚིགས་དང་པོ་བཀུག་ལ་གུང་མོ་གཉིས་གཤིབས་པ་ལ་ནས་གང་གིས་མ་རེག་པ་ཙམ་དུ་གཞག་ཅིང་། མཐེ་བོ་གཉིས་དེའི་དྲུང་དུ་གཞག་པ་ནི་རྡོ་རྗེ་དྲག་པོ་
ཆེན་པོའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཙཎྜ་མ་ཧཱ་རོ་ཥ་ཎ་ཧཱུཾ། ཕྱག་རྒྱ་དེ་ཉིད་ལས་མཛུབ་མོ་གཡས་པས་གུང་མོ་བསྒྲེང་བ་ལ་འཁྱུད་པ་འདི་ནི་རྡོ་རྗེ་དྲག་པོ་ཆེན་པོའི་མགོའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་
เล่ม ๘๗ · หน้า 122a
ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་མྃ། མཛུབ་མོ་གཡོན་པས་གུང་མོ་བསྒྲེང་བ་ལ་འཁྱུད་པས་མཛུབ་མོ་གཡས་པ་ཕྱེ་སྟེ། སྔ་མ་བཞིན་དུ་ཚིགས་དང་པོ་བཀུག་སྟེ་གཞག་པ་ནི་རྡོ་རྗེ་དྲག་པོ་ཆེན་པོའི་གཙུག་ཏོར་གྱི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་
མུ་ཁེ་བྷྱཿ། སརྦ་ཐཱ་ཛཱི། དེ་བཞིན་དུ་མཛུབ་མོ་གཉིས་ཀྱིས་གུང་མོ་བསྒྲེང་བ་ལ་འཁྱུད་པ་ནི་རྡོ་རྗེ་དྲག་པོ་ཆེན་པོའི་གོ་ཆའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཨཱ། དེ་བཞིན་དུ་མཛུབ་མོ་གཉིས་ཕྱེ་ལ་གློག་འགྱུ་བའི་ཐབས་སུ་བརྐྱང་བ་ནི་
རྡོ་རྗེ་དྲག་པོའི་རྡོ་རྗེ་མེ་ལྕེ་འབར་བ་ཆེན་པོའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཀྴྃ། ཕྱག་རྒྱ་འདི་ཉིད་ལས་མཛུབ་མོ་གཡས་པ་བཀུག་སྟེ་མཐེ་བོའི་དྲུང་དུ་གཞག་པ་ནི་རྡོ་རྗེ་དྲག་པོ་ཆེན་པོའི་དཔྲལ་བའི་ཕྱག་རྒྱའོ། །སྔགས་ལ། ན་མཿསརྦ་ཏ་
ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ནི་ལྃ་བ་ཏི་ཀ་ཏི་སྭཱ་ཧཱ། དེ་བཞིན་དུ་མཛུབ་མོ་གཡོན་པའི་མཐེ་བོའི་དྲུང་དུ་གཞག་ལ་གུང་མོ་བསྒྲེང་བའི་ཚིགས་དང་པོ་བཀུག་སྟེ་ཡིད་ཙམ་སྨད་པ་ནི་རྡོ་རྗེ་དྲག་པོ་ཆེན་པོའི་ནུ་མ་ཇིང་གི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་
ཁེ་བྷྱཿ། སརྦ་ཐཱ་ཧ་ས་ཧ་ས། དྷ་ཀ་དྷ་ཀ །ཙ་ར་ཙ་ར། ཧྃ་པྲ་ཙཎྜ་པཛྲ་སྭཱ་ཧཱ། དེ་བཞིན་དུ་ནུ་མཇིང་གི་ཕྱག་རྒྱ་ལས་མཛུབ་མོ་གཉིས་བཀུག་སྟེ་བཀྱེད་ལ་བརྐྱང་ཞིང་མཐེའུ་ཆུང་གཉིས་ནང་དུ་བཅུག་པ་ནི་རྡོ་རྗེ་དྲག་པོ་ཆེན་པོའི་དཔལ་བེའུའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་
ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་པི་ཕུ་ལ་བཛྲ་ཙཎྜ་སྭཱ་ཧཱ། ཕྱག་རྒྱ་འདི་ཉིད་ལས་མཐེའུ་ཆུང་ཕྱུང་སྟེ་སྔ་མ་བཞིན་དུ་གཞག་པ་ནི་རྡོ་རྗེ་དྲག་པོ་ཆེན་པོའི་རྐང་པའི་ཕྱག་རྒྱའོ། །སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་བི་ཙི་ཏྲ་ག་ཏི་སྭཱ་ཧཱ། དེ་ལྟར་ཕྱག་རྒྱ་རབ་
འབྱམ་འདི་དག་ནི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་རྣམ་པ་སྣ་ཚོགས་སུ་གནས་པ། འཇིག་རྟེན་གྱི་ཁམས་དུ་མར་སེམས་ཅན་གྱི་ཁམས་དུ་མ་རྣམ་པར་སྦྱོར་བར་བྱེད་པ། དུས་གསུམ་ལ་ནི་སྟོབས་ཐོགས་པ་མེད་པ། ཆོས་ཀྱི་དབྱིངས་རྟོགས་པ་ལས་བྱུང་བ།
เล่ม ๘๗ · หน้า 122b
དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པའི་འགྲོ་བ་གཅོད་པར་བྱེད་པ། དེ་བཞིན་གཤེགས་པའི་
རྟོགས་པ་ཐོབ་པར་བྱེད་པ། དེ་བཞིན་གཤེགས་པའི་སྐུ་དང་གསུང་དང་ཐུགས་ཀྱི་བཀོད་པ་བསྟན་པའི་རྣམ་པར་གནས་པར་བྱེད་པ། བསམ་པ་ཇི་ལྟ་བ་བཞིན་དུ་ཡོངས་སུ་རྫོགས་པར་བྱེད་པ། རྡོ་རྗེ་དོན་ཡོད་པའི་དཀྱིལ་འཁོར་བཀོད་པ་སྒྲུབ་པར་བྱེད་པ། བྱང་ཆུབ་སེམས་དཔའི་སྤྱོད་
པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་རྣམས་དང་། ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱི་མིག་ཏུ་གྱུར་པ་ཤ་སྟག་གོ། །ལག་ན་རྡོ་རྗེ་དབང་བསྐུར་བའི་དཀྱིལ་འཁོར་ཆེན་པོ་བཀོད་པ་དེ་བཞིན་གཤེགས་པའི་སྔོན་གྱི་སྤྱོད་པའི་རྒྱུ་མཐུན་པ་བསྟན་པ་དང་ཆོ་
འཕྲུལ་རྣམ་པར་འཕྲུལ་པའི་གནས་ལས་ཕྱག་རྒྱ་རབ་འབྱམ་ཇི་སྙེད་པའོ།། །།འཕགས་པ་ལག་ན་རྡོ་རྗེ་དབང་བསྐུར་བ། བམ་པོ་བཅུ་པ། དེ་ནས་ཡང་ལག་ན་རྡོ་རྗེས་བདུད་ཐམས་ཅད་ཕམ་པར་བྱེད་པ། བཀོད་པ་རྣམ་པར་སྤྲུལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་སོ། །བྱང་ཆུབ་སེམས་དཔའ་ལག་ན་རྡོ་རྗེ་སྙོམས་པར་ཞུགས་མ་ཐག་ཏུ། དེ་ནས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་ཕྱག་གཡས་པ་བརྐྱང་སྟེ། ལག་ན་རྡོ་རྗེའི་མགོ་ལ་བྱུགས་ནས་ལེགས་སོ་ཞེས་བྱ་བ་བྱིན་ཏེ། སེམས་ཅན་ཀུན་ལ་ཕན་བྱེད་པ། །དཔའ་
བོ་ཆེན་པོ་ལེགས་སོ་ལེགས། །གསང་སྔགས་སྤྱོད་ལས་བྱུང་བ་ཡི། །རྡོ་རྗེ་སྟང་སྟབས་ཆེད་ཀྱི་ཕྱིར། །སྡང་བའི་སེམས་ཅན་འཇིགས་བྱེད་པ། །ཏིང་འཛིན་འདི་ལ་སྙོམས་པར་ཞུགས། །རྡོ་རྗེ་སྟང་སྟབས་ཆོ་གའི་རིམ། །སེམས་ཅན་ཆེན་པོ་ཁྱོད་ཀྱིས་སྟོན། །རྡོ་རྗེ་
འབྱུང་བའི་རྐང་སྟབས་ནི། །སྔགས་རྒྱལ་རྣམས་ཀྱི་སྤྱི་ཡིན་ཏེ། །འདུག་པ་དང་ནི་འགྲོ་བ་དང་། །ལྡང་དང་རྣམ་པར་གཏོར་བ་དང་། །དགུག་པ་དང་ནི་བརྐྱང་བ་དང་། །རྐང་པས་བཅིང་དང་བསྐུམ་པ་དང་། །སྤོ་བ་དང་ནི་གཞག་པ་དང་། །ཁུ་ཚུར་བཅངས་པས་གཟུང་བ་དང་། །
เล่ม ๘๗ · หน้า 123a
གཟིར་དང་རྡོ་རྗེས་གཞོམ་པ་དང་། །རྡོ་རྗེའི་ཕྱག་རྒྱས་ཕུར་བཏབ་དང་། །སེང་གེ་ལྟ་བུར་མཆོང་བ་དང་། །ཧཱུཾ་ཞེས་བྱ་བས་བསྡིགས་པ་དང་། །སྙན་ལས་ལངས་ནས་མཆུ་གནོན་དང་། །ཁྲོ་གཉེར་དཔྲལ་བར་བལྟ་བ་དང་། །སྨིན་མ་བསྐྱོད་པར་བྱ་བ་དང་། །དེ་
བཞིན་མིག་གཉིས་བགྲད་པ་དང་། །རྐང་སྟབས་རྣམ་པར་དབྱེ་བ་དང་། །ལག་གཉིས་སྦྱར་བར་བྱ་བ་དང་། །དེ་བཞིན་ལག་པ་བསྐྱོད་པ་དང་། །རྐང་པ་གཉིས་ཀྱིས་མཆོང་བ་དང་། །ལུས་ནི་བསྙེམས་དང་བཅས་པར་ཡང་། །བྱེ་བྲག་ཏུ་ནི་སྟོན་པ་དང་། །བཅད་དང་གཏུབ་དང་
བགད་པ་དང་། །བཟའ་དང་རྣམ་པར་བགད་པ་དང་། །ཀུན་དུ་སྒྲ་དང་རྣམ་སྒྲ་དང་། །དྲག་ཏུ་བྱེད་དང་བཅིང་བ་དང་། །སྡང་བ་ཐམས་ཅད་ཚར་བཅད་དང་། །རེངས་པར་བྱ་དང་རྨོངས་བྱ་དང་། །གྱེན་དུ་མཆོང་དང་བསྣུན་པ་དང་། །མཛེས་པའི་སྟབས་དང་གཙུབ་པ་དང་། །བསྒྲུབ་
པའི་དང་པོར་སྔར་སྤྱད་དང་། །དེ་བཞིན་ལྷ་ལ་བསྙེན་བྱ་དང་། །སྔགས་པ་ཡིས་ནི་དཀྱིལ་འཁོར་དང་། །དངོས་གྲུབ་ཅི་འདྲ་ཡིན་པ་དང་། །སེམས་ཅན་ཁམས་ལ་རྣམ་ཀུན་དུ། །བསྲུང་དང་སྦ་བ་བྱ་བ་དང་། །དཔའ་བོ་འདི་དག་ཐམས་ཅད་དང་། །གཞན་ཡང་ཡིད་ལ་ཅི་འདོད་དང་། །
སྡང་སེམས་ལྡན་པ་དེ་དག་ལ། །དེ་བཞིན་ཕྱིར་གསོ་བྱ་བ་དང་། །འདི་དག་ཐམས་ཅད་རྒྱ་ཆེར་ནི། །སེམས་ཅན་ཐར་བར་འདོད་པས་སྨྲོས། །དེ་ནས་དེ་བཞིན་གཤེགས་པ་དེ་དག་གིས་རྐང་སྟབས་ཀྱི་ཐབས་ཀྱིས་རྣམ་པར་རྒྱལ་བར་བྱ་བའི་ཕྱིར་གསང་སྔགས་འདི་ལྟ་བུ་གསུངས་སོ། །ནམཿ
སརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། ཙཎྜ་བཛྲ་པྲ་ཛྭ་ལི་ཏ་མཱུ་རྟི་སྭཱ་ཧཱ། དེ་ནས་ལག་ན་རྡོ་རྗེས་གསང་སྔགས་འདི་ཐོས་ནས་དགའ་ཞིང་མགུ་ལ། རབ་ཏུ་དགའ་བའི་ཡིད་ཀྱིས་ཐམས་ཅད་དང་ལྡན་པའི་འཁོར་ལ་རྣམ་པར་བལྟས་ནས་སྨྲས་པ། ཀྱེ་
གྲོགས་པོ་དག་ཉོན་ཅིག །སེམས་ཅན་གང་ལ་ལ་དག་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་དོང་བ་རྣམས་དང་། བྱང་ཆུབ་སེམས་དཔའ་གང་དག་གསང་སྔགས་ཀྱི་སྤྱད་པ་སྤྱོད་ཅིང་། གསང་སྔགས་ཀྱི་ཚུལ་ལ་བརྩོན་པ་དེ་དག་ལ་ཅི་ནས་ཀྱང་སྟོན་པའི་བསྟན་པ་ཡུན་རིང་དུ་
เล่ม ๘๗ · หน้า 123b
གནས་པར་བྱ་བའི་ཕྱིར། དེང་ཕྱིན་ཅད་བསྲུང་བར་གྱིས་ཤིག །བསྟི་སྟང་དུ་གྱིས་ཤིག །རི་མོར་གྱིས་ཤིག །མཆོད་པ་གྱིས་ཤིག །དེ་ནས་ཐམས་ཅད་དང་ལྡན་པའི་འཁོར་དེས་མགྲིན་གཅིག་ཏུ་ཚིག་སྨྲས་པ། ཆོས་ཀྱི་རྗེས་བཀའ་སྩལ་པ་བཞིན་འཚལ་ལོ་ཞེས་བརྗོད་ནས་ཅང་མི་སྨྲ་
བར་འཁོད་དོ། །དེ་ནས་ལག་ན་རྡོ་རྗེས་ཡང་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་སྨྲས་པ། རིགས་ཀྱི་བུ་དག་གང་ལ་ལ་ཞིག་མ་འོངས་པའི་དུས་ན་དེ་བཞིན་གཤེགས་པའི་སྔོན་གྱི་སྤྱོད་པའི་དཀྱིལ་འཁོར་ལ་བསྲུང་བ་བསྒྲུབ་པར་བརྩོན་པ། བྱང་ཆུབ་སེམས་དཔའི་སྤྱོད་
པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་རྣམས་ཀྱི་དམ་ཚིག་ལས་འགལ་བར་བྱེད་ན། རིག་པའི་རྒྱལ་པོ་དྲག་པོས་རྡོ་རྗེ་འབར་བ་རབ་ཏུ་འབར་བ་ཀུན་དུ་མཆེད་ཅིང་རབ་ཏུ་འབར་བས་དེའི་མགོ་ཚལ་པ་བདུན་དུ་འགེམས་སོ། །དེ་ནས་བྱང་ཆུབ་སེམས་དཔའ་སེམས་དཔའ་
ཆེན་པོ་ལག་ན་རྡོ་རྗེས་བྱང་ཆུབ་སེམས་དཔའ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ། །ཞི་བའི་བློ་གྲོས་སྟང་སྟབས་ཀྱི་མཚན་ཉིད་སྔོན་གྱི་སངས་རྒྱས་རྣམས་ཀྱིས་གསུངས་པ་བཤད་ཀྱིས་ཉོན་ཅིག །མཐུན་པའི་རྐང་སྟབས་བྱས་ནས་སུ། །དེ་བཞིན་གཤེགས་ལ་ཕྱག་
བྱས་ནས། །སྔགས་པས་ཤར་ཕྱོགས་ཁ་བལྟས་ཏེ། །འགྲེང་ལ་ཐལ་མོ་མཚོག་མར་གཞག །གསང་སྔགས་ལྟ་བུར་འཇོ་མཆོག་གིས། །རྡོ་རྗེ་སྟངས་ཚུལ་གར་བྱེད་ཅིང་། །མཚོག་ནས་ཐལ་མོ་ཕབ་ནས་སུ། །སྙིང་གར་གཞག་པའི་ཚུལ་གྱིས་ནི། །ཕྱོགས་རྣམས་
ཀུན་དུ་བསྐོར་བར་བྱ། །རྡོ་རྗེ་ཁུ་ཚུར་བཅངས་ནས་སུ། །ལག་པ་གཡས་པ་བཏེག་བྱས་ལ། །གཡོན་པ་རྐེད་པའི་རྒྱབ་ཏུ་གཞག །རྐང་པ་གཡས་པ་བཏེག་ནས་སུ། །གཡས་པ་བསྐུམ་པར་ལེགས་པར་སྦྱར། །གཡོན་པ་མཚོག་མར་བསྟོད་ནས་སུ། །སྡང་བ་
ཀུན་ལ་བསྡིགས་པར་བྱ། །རྐང་པ་གཡས་པ་བརྐྱང་བྱ་ཞིང་། །གཉི་ག་རྡོ་རྗེ་ཁུ་ཚུར་བཅངས། །ཁྲོས་བཅས་ཧཱུཾ་ཞེས་བྱ་བས་བསྒྱིངས། །རྡོ་རྗེ་བསྣུན་པས་བསྣུན་པར་བྱ། །རྡོ་རྗེ་གར་གྱིས་བསྒྱུར་ནས་སུ། །རྐང་པ་གཡོན་པ་བསྐུམ་བྱས་ལ། །དེ་ལྟར་ཕྱོགས་བཞི་རྣམས་
เล่ม ๘๗ · หน้า 124a
སུ་ཡང་། །རྡོ་རྗེའི་གནོན་འགྲོས་གནོན་པར་བྱ། །རྡོ་རྗེ་ཐལ་མོ་སྦྱར་ནས་སུ། །རྐེད་པའི་གནས་སུ་གཞག་པར་བྱ། །རྟིང་སྤྲད་གནས་ལ་གནས་ནས་སུ། །མིག་ནི་ཐུར་དུ་བལྟ་བར་བྱ། །རྡོ་རྗེ་ཕུར་བུས་བཏབ་ནས་ནི། །ས་འོག་རྣམ་བདུན་གཡོ་བར་འགྱུར། །འབྲུག་
སྒྲ་དལ་འདྲའི་ཧཱུཾ་ལྡན་ཞིང་། །རབ་འབར་རྡོ་རྗེ་འཆང་འདྲ་བར། །རྡོ་རྗེ་གྱེན་དུ་འགྱེད་པར་བྱ། །རྒྱབ་ཏུ་ཐལ་མོ་སྦྱར་བར་བྱ། །དེ་ནས་རྡོ་རྗེ་གར་བྱ་ཞིང་། །ལྟེ་བའི་གནས་སུ་གཞག་པར་བྱ། །འདི་འདྲའི་གནས་ལ་གནས་ནས་སུ། །མྱུར་འགྲོ་ལ་ཤིན་ཏུ་བསླབས་པས་བཞག །སངས་
རྒྱས་བྱང་ཆུབ་སེམས་དཔའ་དང་། །ཁྲོ་བོ་ཕྱག་བརྙན་བྲན་མོ་ཡི། །མཚོན་ཆའི་ཕྱག་རྒྱ་ཇི་སྙེད་པ། །རྡོ་རྗེ་བེ་ཅོན་དབྱུག་ཐོ་དང་། །མདུང་ཐུང་མདའ་ཆེན་འཁོར་ལོ་དང་། །རྡོ་རྗེ་རྩེ་གཅིག་གཏུན་ཤིང་སོགས། །ཕོ་ཉ་ཕོ་སྨོས་གང་ཡིན་དང་། །བགེགས་ལ་སོགས་པ་རྣམ་པར་ཟློག །
ཕྱག་རྒྱའི་ཚོགས་གཞན་གང་གསུངས་པ། །བགེགས་རྣམས་གཞིག་པར་བྱ་བའི་ཕྱིར། །དཀྱིལ་འཁོར་འདི་ནི་བསྟན་རྣམས་ཀྱིས། །སྤྱི་ཡི་ཆོ་ག་རྒྱས་པར་ནི། །བསླབས་པའི་སྔགས་པས་ལྷར་བཅས་དང་། །ལྷ་མིན་གསང་བ་ཀུན་དུ་གཞོམ། །དཀྱིལ་འཁོར་ལ་ནི་བགེགས་
བྱའི་ཕྱིར། །ཚངས་པའི་སྡོང་བུར་ཐུག་པ་ནས། །ས་སྟེང་གནས་པའི་ལྷ་ཡི་བར། །གཅིག་ཏུ་འདུས་ནས་ལྷགས་གྱུར་ཀྱང་། །སྟང་སྟབས་ཆོ་ག་ཤེས་པ་ཡི། །སྔགས་པས་ཧཱུཾ་ཞེས་བྱ་བ་ཡིས། །ཐམས་ཅད་རྣམ་པར་གཏོར་འགྱུར་ཏེ། །ཤིང་བལ་འདབ་མ་རླུང་གཏོར་བཞིན། །
རྡོ་རྗེ་འབར་བའི་མེར་གྱུར་ནས། །བསྐལ་པའི་མེ་འདྲར་ལངས་ནས་སུ། །རྡོ་རྗེ་རྐང་པ་ལྡན་པར་ནི། །རྡོ་རྗེ་ཕྱག་རྒྱས་ཀུན་དུ་གཞོམ། །རྡོ་རྗེས་གནོན་དང་ལྡན་པར་ནི། །རྡོ་རྗེའི་ཕྱག་རྒྱས་བཅོམ་ནས་སུ། །སྔགས་པས་ས་གསུམ་ཕུང་བྱེད་ན། །བགེགས་དང་ལོག་འདྲེན་སྨོས་ཅི་དགོས། །ཆེན་
པོའི་རྡོ་རྗེ་ཕྱག་རྒྱ་ཡི། །སྟང་སྟབས་འདི་ནི་སྤྱི་ཡིན་ཏེ། །བསྒྲུབ་མིན་དོན་ཀྱང་སྒྲུབ་བྱེད་ན། །ཆོ་ག་ཞིབ་ལས་བྱུང་ཅི་སྨོས། །རྡོ་རྗེ་འབྱུང་བ་དམ་པ་ནི། །ཐོག་མར་བཅིང་བ་བྱས་ནས་སུ། །དེ་ནས་རྡོ་རྗེ་མཆོག་རིག་ལས། །འབྱུང་བ་གཞན་ཡང་བཅིང་བར་བྱ། །འདི་ལས་གསང་
เล่ม ๘๗ · หน้า 124b
སྔགས་རྣམས་དང་ནི། །སྟང་སྟབས་རྣམ་པ་ཐམས་ཅད་འབྱུང་། །དེ་ལྟ་བས་ན་རྣམ་ཀུན་དུ། །སྔགས་པས་བསྒྲིམས་ཏེ་བསླབ་པར་བྱ། །དམ་ཚིག་ཆེན་པོ་རྡོ་རྗེ་འབྱུང་བའི་རྩ་བའི་སྟང་སྟབས་སོ། །རྡོ་རྗེ་འབྱུང་བར་འདུག་ནས་སུ། །སེང་གེ་བཞིན་དུ་ཕ་རོལ་གནོན། །རྡོ་རྗེ་ཕྱག་རྒྱས་
ཀུན་དུ་གཞོམ། །རྡོ་རྗེ་རྐང་པ་བརྐྱང་བར་བྱ། །ཧཱུྃ་ཞེས་བྱ་བའི་སྒྲ་སྒྲོགས་ཤིང་། །རྡོ་རྗེའི་ཕྱག་རྒྱས་བཅོམ་ནས་སུ། །ས་རྣམས་ཀུན་ཀྱང་གཡོ་འགྱུར་ན། །གསང་དང་ཀླུ་རྣམས་སྨོས་ཅི་དགོས། །སེང་གེའི་ཚུལ་དུ་མཆོངས་ནས་ནི། །བགེགས་གང་སེང་གེའི་གཟུགས་འདྲ་དང་། །
གླང་ཆེན་ཤིང་རྟ་སྤྲེའུ་དང་རྟ། །གཞན་ཡང་གང་དག་རྐང་བཞི་པ། །དེ་ནས་རྣམ་པར་འབྲོས་པའམ། །འཆི་བར་འགྱུར་ཏེ་ཐེ་ཙོམ་མེད། །ཚངས་པས་བྱས་པའི་བགེགས་རྣམས་ཀྱང་། །སྐད་ཅིག་དེ་ལ་མྱུར་དུ་འཇིག །སེང་གེ་ལྟར་ཕ་རོལ་གནོན་པའི་སྟང་སྟབས་སོ། །
རྡོ་རྗེ་འབྱུང་བར་ཡང་འདུག་སྟེ། །རྐང་པ་བསྣོལ་བའི་ཚུལ་གྱིས་སུ། །རྡོ་རྗེ་ཁུ་ཚུར་གཉི་ག་ནི། །རྐེད་པའི་གནས་སུ་གཞག་པར་བྱ། །ཧཱུཾ་བརྗོད་མགུལ་པ་བསལ་བའི་སྒྲས། །རྡོ་རྗེ་གར་གྱིས་གར་བྱ་ཞིང་། །རྐང་པ་གཡོན་པ་བཏེག་ནས་ནི། །དེ་ཡི་རྩེ་མོ་སར་བཙུགས་ལ། །
རྐང་པ་གཡོན་པ་བཏེག་ནས་ནི། །ལག་པ་རྡོ་རྗེ་གསོར་བཅས་པར། །ལག་གཡོན་སྙིང་གར་བཞག་ནས་ནི། །སྔགས་པས་འཁོར་ལོ་བཞིན་དུ་བསྐོར། །རྡོ་རྗེ་འབར་བའི་མེར་བསྒྱུར་ནས། །རྡོ་རྗེའི་ཉི་མའི་མིག་ལྡན་པར། །རྡོ་རྗེ་མགུལ་པ་བསལ་བའི་སྒྲས། །ཕྱོགས་ཀུན་
ཡོངས་སུ་རྫོགས་པར་བྱ། །བགེགས་ཀྱི་གནས་སུ་དམིགས་ནས་ནི། །མྱུར་དུ་རྡོ་རྗེ་གོམ་སྟབས་ཀྱིས། །རྐང་གཡས་བརྐྱང་བའི་གནས་ན་ནི། །རྡོ་རྗེ་ཕྱག་རྒྱས་ཀུན་དུ་གཞོམ། །དེ་བཞིན་ཕྱོགས་དང་མཚམས་རྣམས་ཀྱང་། །ཀུན་དུ་ཡང་དག་གཞོམ་པར་བྱ། །བདུད་
སྡེ་མི་བཟད་ཆེན་པོ་དང་། །ཕྱོགས་རྣམས་ཀུན་ནས་བྱུང་བ་ཀུན། །གཡས་བརྐྱང་གོམ་པའི་སྟབས་སྦྱར་ཏེ། །རྡོ་རྗེའི་ཕྱག་རྒྱས་ཀུན་དུ་གཞོམ། །ས་གསུམ་ཐམས་ཅད་གཡོ་འགྱུར་ན། །བགེགས་དང་ལོག་འདྲེན་སྨོས་ཅི་དགོས། །རྡོ་རྗེ་ཕྱག་རྒྱ་བལྟས་ནས་ནི། །
เล่ม ๘๗ · หน้า 125a
བགེགས་དང་ལོག་འདྲེན་ཐམས་ཅད་དང་། །མི་བཟད་གཟུགས་ཅན་སྲིན་པོ་རྣམས། །ཕྱོགས་རྣམས་ཀུན་དུ་འབྲོས་པར་འགྱུར། །རྡོ་རྗེ་གཡས་པ་བརྐྱང་བའོ། །རྡོ་རྗེ་འབྱུང་བར་འདུག་ནས་སུ། །མཚོག་མར་རྡོ་རྗེ་ཐལ་སྦྱར་ཏོ། །རྡོ་རྗེར་བཅས་པའི་ལག་
བསྐོར་ཞིང་། །སྤྲིན་ལྟར་ཡོངས་སུ་ཁྱབ་པར་བྱ། །རྡོ་རྗེ་གར་གྱིས་གར་བྱ་ཞིང་། །མཆུ་ནི་སོ་ཡིས་གནན་པར་བྱ། །ཁུ་ཚུར་གཡོན་པ་བཏེག་པར་བྱ། །གཡས་པ་སྙིང་གར་གཞག་པར་བྱ། །རྐང་པ་གཡོན་པ་བཏེག་ནས་སུ། །གཡས་རོལ་དུ་ནི་གཅུ་བར་བྱ། །འབྲུག་སྒྲ་
དལ་འདྲའི་ཧཱུཾ་བརྗོད་པ། །གཡོན་པ་བརྐྱང་བའི་རྐང་གནོན་ཏེ། །རྡོ་རྗེ་རྐང་པས་བསྣུན་པར་བྱ། །གཡས་པས་ལ་གཟུག་པར་བྱ། །རྡོ་རྗེ་རྐང་པ་ས་འོག་ཏུ། །བསྣུན་ན་ཐམས་ཅད་གཡོ་བར་བྱེད། །ས་ཡི་འོག་ན་གནས་པའི་ཀླུ། །གསང་དང་ལྷ་མིན་སྲིན་པོར་བཅས། །ཐམས་
ཅད་གཡོས་པ་འདི་ཅི་ཞེས། །ཡ་མཚན་འཛིན་པའི་སེམས་གྱུར་ནས། །ཡ་མཚན་འཛིན་པའི་སྙིང་གིས་སུ། །འདི་དག་ཐམས་ཅད་ཅིར་འགྱུར་ཀྱེ། །བསྐལ་པ་ཟད་པར་མ་གྱུར་གྲང་། །དེ་སྐད་ཕན་ཚུན་འདྲི་བར་བྱེད། །གནས་དེ་ནས་ནི་ཡང་བསྐྱོད་ནས། །རྡོ་རྗེ་འབར་བའི་མིག་
ལྡན་པར། །རྡོ་རྗེའི་ཕྱག་རྒྱས་ཧཱུཾ་བརྗོད་དེ། །རྡོ་རྗེ་རྐང་པས་བསྣུན་པར་བྱ། །ཀླུ་དང་གསང་བ་ཐམས་ཅད་དང་། །གཞན་ཡང་གང་དག་སར་གནས་པ། །གང་ན་སྔགས་འཆང་འདུག་པ་ཡི། །གནས་དེར་ཐམས་ཅད་ལྷགས་ནས་སུ། །ལུང་ནི་ཡོངས་སུ་ནོད་བྱེད་ཅིང་། །རྡོ་
རྗེ་འབར་བས་རབ་ཉེན་པས། །ཇོ་བོ་ཅི་ཞིག་ཚོལ་ཅིག་པ། །བཀའ་ལུང་མྱུར་དུ་བདག་ཅག་སྩོལ། །བཅུད་ཀྱིས་ལེན་ཏམ་དངུལ་ཆུ་འམ། །འོན་ཏེ་མིག་བསྐུའི་སྨན་རྫས་སམ། །གནོད་སྦྱིན་ཕོ་སྨོས་འབངས་སུ་འམ། །འོན་ཏེ་རྒྱལ་སྲིད་བཞེད་གྱུར་ཏམ། །འོན་ཏེ་དཔལ་གྱི་
སྒོ་བཞེད་དམ། །འོན་ཏེ་ཡུལ་ས་གཞན་བཞེད་ན། །རྡོ་རྗེ་འབར་བས་གཟིར་གྱུར་པས། །བཞེད་པ་ཐམས་ཅད་བསྐང་བར་བགྱི། །སྔགས་པས་འགའ་ཞིག་བླངས་ནས་སུ། །དེ་དག་ལ་ནི་བྱམས་པར་བྱ། །རྡོ་རྗེ་གར་ནི་ལེགས་བྱ་ཞིང་། །ཕྱག་རྒྱ་དེ་ནི་བསྡུ་བར་བྱ། །
เล่ม ๘๗ · หน้า 125b
ཆོ་ག་མཐོང་བའི་ལས་ཀྱིས་སུ། །རྡོ་རྗེ་གནས་སུ་གཞག་པར་བྱ། །གཞན་དུ་ན་ནི་གསང་བ་དང་། །སྲིན་པོ་ཐམས་ཅད་གནོད་བྱེད་དེ། །གླགས་ལྟ་ཀླན་ཀ་ཚོལ་བྱེད་པ། །གཟིར་བ་དེ་དག་གནོད་པར་བྱེད། །གླགས་སུ་གྱུར་པ་རྟོགས་ནས་སུ། །སྔགས་པ་ལ་ནི་གནོད་པར་བྱེད། །དེ་
ལྟ་བས་ན་རྣམ་ཀུན་དུ། །བློ་དང་ལྡན་པའི་སྒྲུབ་པ་པོས། །རྡོ་རྗེའི་གནས་ནི་རིག་བྱས་ལ། །སྟང་སྟབས་བྱ་བ་སྦྱར་བར་བྱ། །གཡོན་བརྐྱང་རྐང་པའི་སྟང་སྟབས་སོ། །རྡོ་རྗེའི་འབྱུང་བར་འདུག་ནས་སུ། །དཔྲལ་བར་ཐལ་མོ་སྦྱར་བར་བྱ། །རྡོ་རྗེ་གར་ནི་བྱས་ནས་སུ། །ཐལ་མོ་སྙིང་
གར་གཞག་པར་བྱ། །ཚངས་པའི་རྐང་སྟབས་བྱས་ནས་སུ། །པདྨའི་ཐལ་མོ་རྒྱས་པར་བྱ། །གཉི་ག་ཁུ་ཚུར་བཅངས་ནས་སུ། །གཡས་པ་གྱེན་དུ་བརྐྱང་བར་བྱ། །གཡོན་པ་སྙིང་གར་བཞག་ནས་སུ། །ཧཱུཾ་དང་ཕཊ་བཅས་ཁྲོས་བསྒྱིངས་ཤིང་། །སོས་ནི་མཆུ་ཡང་མནན་བྱས་
ནས། །རྡོ་རྗེ་ཉི་མའི་མིག་ལྡན་ཞིང་། །བཞིན་ནི་ཁྲོ་གཉེར་རིམ་འཆས་པས། །གར་བྱེད་པ་ཡི་ཚུལ་གྱིས་ནི། །རྐང་པ་གཡས་པ་དགུག་པར་བྱ། །གཡོན་པ་ཡང་ནི་དེ་བཞིན་དགུག །རྡོ་རྗེ་གསོར་བའི་ཕྱག་རྒྱ་ཡིས། །ལག་པ་གྱེན་དུ་བསྒྲེང་བར་བྱ། །གྱེན་དུ་བལྟས་ན་དྲག་ཏུ་ནི། །
རྡོ་རྗེ་ཕྱག་རྒྱས་བསྣུན་པར་བྱ། །རྡོ་རྗེ་ཕྱག་རྒྱས་བསྣུན་པས་ནི། །ཚངས་པ་བཅས་དང་བརྒྱ་བྱིན་བཅས། །གནས་དང་བཅས་པ་ཐམས་ཅད་འགུལ། །ཕན་ཚུན་གཅིག་ལ་གཅིག་ལྟ་ཞིང་། །གྲོགས་དག་བསྐལ་པ་འཁྲུགས་གྱུར་ཏམ། །འོན་ཏེ་སེམས་ཅན་ཆེ་བྱུང་ངམ། །འོན་ཏེ་
སངས་རྒྱས་བྱུང་གྱུར་ཏམ། །ཅི་ཞེས་ཐམས་ཅད་ཕན་ཚུན་སྨྲ། །མྱོས་ཆེས་གྱུར་ནས་ཕན་ཚུན་དང་། །ཕྱོགས་བཅུ་དག་ཏུ་ལྟ་བར་བྱེད། །རྡོ་རྗེ་འབར་བས་གཟིར་བས་ན། །གནས་དེ་ནས་ནི་དོང་ནས་སུ། །རྡོ་རྗེའི་ལྡན་པ་ཅི་བཞེད་པ། །གསུངས་ཞེས་ལུང་ནི་ནོད་པར་བྱེད། །བདག་
ཅག་ནོངས་པ་མ་མཆིས་ཤིང་། །བཀའ་དང་འགལ་བར་བགྱིད་མ་ལགས། །རྡོ་རྗེ་འབར་བས་གཟིར་གྱུར་ནས། །བཀའ་ལུང་མྱུར་དུ་བདག་ལ་སྩོལ། །རྡོ་རྗེ་ཅན་གྱིས་རྡོ་རྗེ་ལ། །མིག་མི་འཛུམས་པར་རྟག་ཏུ་བལྟ། །ལྷ་ཕལ་གཞན་རྣམས་དེ་དག་ཀྱང་། །རྡོ་རྗེ་འབར་
เล่ม ๘๗ · หน้า 126a
བས་བརྒྱ་ལ་གྱུར་ནས། །རྡོ་རྗེའི་དམ་པ་ལྡན་པ་ལ། །ཐུགས་ལ་ཅི་དགོངས་བླང་མཛོད་དང་། །གལ་ཏེ་རྒྱལ་སྲིད་བཞེད་གྱུར་ཏམ། །དེ་བཞིན་མི་དང་ལྷ་བཞེད་དམ། །ལྷ་ཡི་བུ་མོ་བསྙེམས་པ་དང་། །ལྷ་ཡི་བདེ་བ་ཡིད་མཐུན་བཞེད། །ཐུགས་ལ་གང་བཞེད་དེ་དག་
རྣམས། །དེ་དག་དབུལ་བར་བགྱིད་པར་འགྱུར། །དེ་ནས་ལྷ་མང་རྫུ་འཕྲུལ་ཆེ། །དེ་དག་ཡིད་ནི་རབ་དགའ་ནས། །རྡོ་རྗེ་འབར་བས་གཟིར་བ་དག །སྒྲུབ་པ་པོ་ལ་མྱུར་དུ་དབུལ། །དེ་ནས་བྱམས་པའི་སེམས་ཀྱིས་ནི། །སྔགས་པས་བལྟས་ནས་གཏང་བར་བྱ། །གཞན་དུ་ན་ནི་གཟིར་དེ་དག །
གླགས་རྙེད་གནོད་པ་བྱེད་པར་འགྱུར། །རྡོ་རྗེ་འབྱུང་བར་ཡང་འདུག་སྟེ། །རྡོ་རྗེ་གར་ནི་རབ་ཏུ་བྱ། །མཚོག་མར་ཐལ་མོ་སྦྱར་ནས་སུ། །ཕྱོགས་རྣམས་ཀུན་དུ་རྒྱས་པར་བྱ། །རྐང་པ་སྤོ་བའི་ཚུལ་གྱིས་སུ། །གཡས་པ་བཏེག་ཅིང་དེ་བཞིན་གཡོན། །རྡོ་རྗེ་ཁུ་ཚུར་ཚུལ་གྱིས་ནི། །གཡས་
པ་གྱེན་དུ་བསྒྲེང་བར་བྱ། །གཡོན་པ་སྙིང་གར་བཞག་ནས་སུ། །སྨིན་མ་དགུག་ཅིང་བསྒུལ་བསྐྱོད་དེ། །མིག་གིས་བགེགས་ལ་བལྟས་བྱས་ན། །ཧཱུཾ་དང་བཅས་པས་རང་བསྐུལ་ན། །གལ་ཏེ་ཚངས་པ་ཉིད་གྱུར་ཏམ། །གལ་ཏེ་ཁྱབ་འཇུག་ཉིད་གྱུར་ཏམ། །དྲག་པོ་བརྒྱ་བྱིན་
ཉིད་གྱུར་ཡང་། །བལྟས་པས་མྱུར་དུ་འཇིགས་པར་འགྱུར། །ཅི་སྟེ་ཁྱབ་འཇུག་དྲག་པོ་རྣམས། །བདག་གི་དབང་དུ་གྱུར་འདོད་པས། །ཀུན་དུ་བསྐྱོད་པའི་ཚུལ་གྱིས་སུ། །རྡོ་རྗེ་ཉི་མའི་མིག་ཅན་གྱིས། །རྐང་པ་ཐབས་སྦྱར་ཚུལ་གྱིས་སུ། །རྡོ་རྗེ་ཕྱག་རྒྱས་བསྣུན་པར་བྱ། །རྡོ་
རྗེ་ཕྱག་རྒྱས་བསྣུན་པས་ན། །ས་རྣམས་ཐམས་ཅད་རབ་ཏུ་གཡོ། །དེ་ནས་བརྒྱ་བྱིན་ལྷ་རྣམས་དང་། །ལྷ་མིན་སྲིན་པོ་གསང་བ་པ། །སྟན་ལས་ཉམས་པར་བདག་ཉིད་ཀྱིས། །མ་ཤེས་ཤིག་ནི་བརྒྱལ་བར་འགྱུར། །དེ་ནས་ཁྱབ་འཇུག་དྲག་པོ་རྣམས། །ཡིད་ནི་བློང་ཞེས་
གྱུར་ནས་སུ། །རྡོ་རྗེ་རྣལ་འབྱོར་ཆེར་ལྡན་པ། །ག་ལ་བ་དེར་ཐལ་སྦྱར་དོང་། །བདག་ཅག་ནོངས་པ་མ་མཆིས་པར། །སྔགས་ཀྱིས་བདག་ཅག་ཤིན་ཏུ་གཟིར། །གཟིར་བའི་ལྷ་རྣམས་དེ་དག་ཀུན། །སྟན་ལས་སེམས་ནི་ཉམས་པར་འགྱུར། །ཅི་ལྟར་ཅི་བགྱི་བཀའ་སྩོལ་
เล่ม ๘๗ · หน้า 126b
ཅེས། །ལུང་ལ་གུས་པས་ལྟ་ཞིང་འཁོད། །ཀུན་ལ་བྱམས་པ་བྱས་ནས་སུ། །སྙིང་ལ་བསམ་པ་གཅིག་བླངས་ན། །དེ་ཡི་མོད་ལ་དེ་དག་རྣམས། །དགའ་ཞིང་མགུ་ནས་སྦྱིན་པར་བྱེད། །སྔགས་པ་མཉམ་པར་བཞག་ནས་སུ། །དེ་དག་ཕྱག་རྒྱའི་རྒྱལ་པོ་བཏང་། །རྐང་པ་སྤོ་
བའི་ཚུལ་གྱིས་སུ། །རྡོ་རྗེའི་གནས་སུ་གཞག་པར་བྱ། །རྡོ་རྗེ་འཛིན་པ་ཐམས་ཅད་ཀྱི། །རྡོ་རྗེའི་གནས་ནི་རྐེད་ནས་གཅོད། །རྡོ་རྗེ་འབྱུང་བར་འདུག་ནས་སུ། །དབང་པོ་ཆེན་པོའི་གནས་སུ་བརྟན། །མཚོག་མར་ཐལ་མོ་སྦྱར་བྱས་ལ། །ཕྱོགས་རྣམས་ཀུན་དུ་རྒྱས་པར་བྱ། །
རྐང་པ་སྤོ་བའི་ཚུལ་གྱིས་སུ། །རྡོ་རྗེ་ཁུ་ཚུར་བཅངས་བྱས་ལ། །གར་བྱེད་པ་ཡི་ལག་པ་ཡིས། །བགེགས་ཀྱི་གཟུགས་རྣམས་བསྡིགས་པར་བྱ། །དེ་བཞིན་གཡས་དང་གཡོན་གྱིས་ཀྱང་། །གནས་ནས་སོང་གི་བར་དུ་བྱ། །ཅི་སྟེ་བགེགས་ཆེན་རབ་སྡང་བ། །བསྡིགས་ནས་འགྲོ་བར་
མི་བྱེད་ན། །རྡོ་རྗེ་གོམ་པ་མྱུར་བོར་ལ། །གྱེན་དུ་ལག་པ་ཀུན་དུ་བསྐྱོད། །ལག་གཉིས་ས་ལ་བརྡབས་ནས་སུ། །འབྲུག་སྒྲ་དལ་འདྲའི་ཧཱུཾ་བརྗོད་ལ། །གསང་སྔགས་བློ་ལྡན་རྐང་བསྐུམས་ཏེ། །རྣམ་པ་ཀུན་དུ་ལུས་བསྐོར་རོ། །དེ་ནས་སྡང་བའི་ཚུལ་གྱིས་སུ། །རྡོ་རྗེའི་ལག་པ་
གཡས་བརྐྱང་ལ། །རྡོ་རྗེ་ལྕགས་ཀྱུའི་ཕྱག་རྒྱ་ཡིས། །བགེགས་རྣམས་ཐམས་ཅད་དགུག་པར་བྱ། །གཡས་དང་གཡོན་གྱི་ཚུལ་གྱིས་ནི། །རེ་རེ་ཚངས་པའི་བྱེད་བྱས་ལ། །འབྲུག་སྒྲ་དལ་འདྲའི་ཧཱུཾ་རྣམས་དང་། །ཕཊ་རྣམས་ཀྱིས་ནི་རབ་བསྐུལ་ཏེ། །རྡོ་རྗེ་གཟིར་བའི་ཕྱག་རྒྱ་
ཡིས། །བགེགས་རྣམས་ཐམས་ཅད་གཟིར་བར་བྱ། །བདེ་གཤེགས་གོ་འཕང་མ་གཏོགས་པར། །རྡོ་རྗེ་ཅན་དང་འཁོར་ལོ་ཅན། །སངས་རྒྱས་སྲས་པོ་གང་གཞན་གྱི། །དེ་ཡི་ལུས་ལ་མི་སེམས་ན། །ལྷ་དང་དྲི་ཟ་གསང་བ་དང་། །གཞན་ཡང་གང་དག་ཀླུ་རྣམས་དང་། །ཤིང་
བལ་འདབ་མ་རླུང་གཏོར་བཞིན། །ཧཱུཾ་བརྗོད་འཇིགས་འགྱུར་སྨོས་ཅི་དགོས། །ལྷ་མིན་སྲིན་པོ་མ་རུངས་པ། །ཡི་དགས་གྲུལ་བུམ་མངག་གཞུག་དང་། །བདུད་དང་བདུད་ཀྱི་ཕོ་ཉ་རྣམས། །འདི་ལྟར་གྱུར་པ་ཅི་ཞིག་སྨོས། །བྱམས་པའི་སེམས་ལ་མཉམ་བཞག་ཅིང་། །སྙིང་རྗེ་
เล่ม ๘๗ · หน้า 127a
ལ་ཡང་མཉམ་བཞག་ནས། །བྱང་ཆུབ་སེམས་དྲན་སྔགས་པ་ཡིས། །ཕྱག་རྒྱ་བསྡུ་བ་བརྩམ་པར་བྱ། །ཉེས་པ་ཅུང་ཟད་ཙམ་གྱི་ཕྱིར། །བགེགས་རྣམས་ལ་ནི་གནོད་མི་བྱ། །ཤིན་ཏུ་སྡང་བར་རིག་ནས་སུ། །གལ་ཏེ་བགེགས་ལ་གནོད་བྱ་ན། །ཤིན་ཏུ་
སྡང་བ་དྲག་རྣམས་ལ། །འཇམ་དེས་ཉིད་དུ་མི་བྱའོ། །གལ་ཏེ་འཇམ་དེས་ཉིད་བྱས་ན། །དེ་ཡི་མོད་ལ་གནོད་པ་བྱེད། །ཐོག་མར་འཇམ་པོར་སྦྱར་པར་བྱ། །ལན་གཉིས་ཚེ་ན་དབྱེ་བར་བརྩོན། །གསུམ་ཚེ་མཆོད་ཡོན་ཐོགས་ནས་སུ། །མེ་ཏོག་སྙིམ་པར་གནས་བྱས་ལ། །དེ་ནས་
བགེགས་ལ་མཆོད་པར་བྱ། །འབྱུང་པོ་ཀུན་ཕན་གཏོར་བྱིན་ན། །འདི་སྐད་ཀྱི་ནི་ཚིག་བརྗོད་དེ། །བདག་གིས་དེ་རིང་ཁྱོད་མཆོད་ཀྱིས། །སོང་ཤིག་བགེགས་ཆེན་འགྲོ་བར་གྱིས། །ཕྱིན་ཆད་དེ་ལྟར་མ་བྱེད་ཅིག །ཁྱོད་ཀྱི་སྟོབས་དང་རྩལ་མཐོང་སྟེ། །ཁྱོད་ནི་བགེགས་ཀྱང་བྱེད་པར་
ནུས། །ཁྱོད་ནི་ལྷ་ཡི་སྤྲུལ་པ་སྟེ། །ཁྱོད་ནི་བགེགས་བྱེད་མི་ནུས་མིན། །སྔོན་ཅད་མཆོད་པ་མ་ཐོབ་པ། །དེ་རིང་བདག་གིས་མཆོད་བྱས་ན། །ཁྱོད་ཀྱིས་ད་ནི་མཆོད་ཁྱེར་ལ། །བགེགས་ཀྱི་དབང་པོ་སོང་ཞེས་བརྗོད། །གལ་ཏེ་འདུག་ཀྱང་བགེགས་མིན་ན། །དེ་ནི་སྤྱོད་པ་བཟང་པོ་
ཡིན། །སྔགས་པས་མཆོད་བྱས་འོས་ཀྱང་ནི། །ཅི་སྟེ་བགེགས་ནི་ཡང་བྱེད་ན། །ཕྱོགས་བཅུ་སངས་རྒྱས་དབང་གྱུར་པས། །མི་མཆོག་རྣམས་ཀྱིས་མཁྱེན་པར་གསོལ། །བགེགས་ལ་ཆད་པས་གཅད་སླད་དུ། །སྦྱོར་བ་བགྱིས་ཀྱང་ནོངས་མ་མཆིས། །སངས་རྒྱས་
རྣམས་དང་སངས་རྒྱས་སྲས། །བྱང་ཆུབ་སེམས་དཔའ་པ་རྣམས་ཀྱིས། །བཀའ་དང་བདག་འགལ་མི་བགྱིད་བརྗོད། །ལྷ་དང་ལྷ་མིན་གསང་རྣམས་དང་། །ཕྱོགས་བཅུ་ཀུན་གྱི་དྲི་ཟ་དང་། །གཟའ་དང་མི་འམ་ཅི་གང་དག །མགོན་པོ་མགོན་པོ་ཆེ་རྣམས་ལ། །བགེགས་
ཀྱིས་གཙེས་པ་བསྒྲག་པར་བྱ། །གལ་ཏེ་ཆུང་ཞིག་བསྐྱབ་ཅེ་ན། །མྱུར་དུ་ཡོངས་སུ་སྐྱོབས་ཤིག་ཅེས། །བསྒྲགས་པ་གང་དག་མཉན་བྱས་ནས། །བགེགས་བྱེད་ཞི་བར་གྱུར་ན་ནི། །དེ་ནས་ཕྱོགས་རྣམས་ཐམས་ཅད་ཀྱི། །ལྷ་རྣམས་ལ་ནི་མཆོད་པར་བྱ། །གལ་ཏེ་དེ་ལྟར་
เล่ม ๘๗ · หน้า 127b
མི་འདུག་ན། །མེ་ཏོག་ཐལ་མོ་མཆོད་ཡོན་གྱིས། །སངས་རྒྱས་ལ་སོགས་རབ་བསྐུལ་ལ། །དེ་ལ་ཆད་པས་གཅད་པར་བྱ། །དྲག་པོ་ཤིན་ཏུ་སྡང་སེམས་ཅན། །བཀའ་ལུང་ལས་ནི་འགལ་བྱེད་ཅིང་། །སྲོག་ཀྱང་ཤིན་ཏུ་འཕྲོག་བྱེད་ལ། །སངས་རྒྱས་རྣམས་ཀྱང་མི་གཡོལ་བ། །
དེ་ལ་ཕན་པར་ཤེས་ནས་སུ། །བསྐལ་པ་བྱེ་བ་དུ་མར་ནི། །སེམས་དམྱལ་རྣམས་སུ་སྐྱེ་བ་ཡི། །སྡུག་བསྔལ་མང་པོ་འདིར་འགྱུར་ཞེས། །ཇི་ལྟར་སྨན་པས་སེམས་ཅན་གྱི། །ནད་རྣམས་གསོ་བར་བྱེད་པ་བཞིན། །གཟིར་བས་བདག་ལ་ཉེས་པ་མེད། །མཁས་པས་རྣམ་པར་སྤངས་མ་
ཡིན། །དེ་ལྟར་སེམས་ནི་མཉམ་བཞག་ཅིང་། །སྙིང་རྗེ་ཡིད་དང་ལྡན་པ་ཡིས། །བྱང་ཆུབ་སེམས་ནི་བརྟན་བྱས་ཏེ། །དེ་ལ་ཆད་པས་བཅད་པ་བརྩམ། །ཇི་ལྟར་སྨན་པ་མཁས་པ་ཡིས། །ཉེས་ཏེ་ཡལ་བར་མི་འདོར་བཞིན། །ཐབས་དང་ཤེས་རབ་མཁས་པ་ཡང་། །མི་
བྱེད་མཁས་ནའང་ཉེས་དང་བཅས། །ཇི་ལྟར་སྨན་པ་མི་མཁས་པ། །ཐབས་དང་ཤེས་རབ་བྲལ་བ་ཡིས། །ནད་པ་ཡལ་བར་འདོར་བྱེད་ཅིང་། །གསོ་བའི་ཆོ་ག་མི་བྱེད་པ། །དེ་བཞིན་ཤེས་དང་བྲལ་བ་ཡིས། །གལ་ཏེ་གསོ་བར་བརྩོན་ན་ཡང་། །ཐབས་དང་ཤེས་རབ་བྲལ་བ་
ལ། །སངས་རྒྱས་རྣམས་ནི་བསྔགས་མི་མཛད། །ནད་པ་ནད་པ་རྣམས་ལ་ནི། །སྨན་པ་ཇི་ལྟར་སྨན་བྱིན་ན། །ཚ་དང་ཁ་དང་བསྐ་བ་ཡང་། །འཇིག་རྟེན་སྨོད་པར་མི་བྱེད་པ། །དེ་བཞིན་འདུལ་བའི་བྱེ་བྲག་གིས། །ཅི་རིགས་པ་ནི་གསོ་བར་བྱ། །སྡང་བའི་སེམས་ཅན་
རྣམས་ལ་ནི། །འཕྱས་ཏེ་སངས་རྒྱས་རྣམས་མི་སྨོད། །འདས་པའི་དུས་ན་སྔོན་བྱུང་བ། །ཤིན་ཏུ་རྨད་བྱུང་རྒྱལ་བ་བྱུང་། །དེ་བཞིན་གཤེགས་པའི་གསུང་རབ་ལས། །འགྲོ་བའི་ཆོས་ནི་འདི་འདྲ་སྟེ། །ཤིན་ཏུ་སྡང་སེམས་དྲག་པོ་ཡི། །སེམས་ཅན་ཐམས་ཅད་དེ་ཚེ་
བྱུང་། །ཤིན་ཏུ་དྲག་པོ་མཐོང་ནས་ནི། །འཇམ་པོ་ཉིད་དུ་མི་སྦྱོར་རོ། །ཤེས་རབ་ཐབས་ཀྱི་སྙིང་སྟོབས་ཅན། །རྡོ་རྗེ་སེམས་དཔའ་དེ་བཞིན་གཤེགས། །སྙིང་རྗེའི་སྙིང་སྟོབས་ཁྲོས་གྱུར་པ། །སེམས་ཅན་རྣམས་ལ་ཕན་བྱེད་པས། །དེ་ནས་ཕ་རོལ་གནོན་པ་ཡིས། །སེམས་
เล่ม ๘๗ · หน้า 128a
ཅན་ཁམས་ནི་དུ་མ་གནོན། །སྡིག་མེད་ནན་གྱི་སྟོབས་ཀྱིས་སུ། །ཐམས་ཅད་དབང་དུ་དགོད་པར་བྱ། །ཕ་རོལ་གནོན་པའི་རིགས་ཚུལ་གྱིས། །ཇི་ལྟར་བྱང་ཆུབ་འདོད་བྱས་ནས། །སེམས་ཅན་ཁམས་ནི་དུ་མ་དག །ཐམས་ཅད་དབང་དུ་དགོད་པར་བྱས། །རྡོ་རྗེ་
སློབ་དཔོན་ཆེན་པོ་ཡིས། །ལོག་འདྲེན་བགེགས་རྣམས་དེ་ལྟར་དགོད། །བྱང་ཆུབ་སེམས་དྲན་བསྒོམ་བྱས་ན། །སྐྱོན་གྱིས་གོས་པར་མི་འགྱུར་རོ། །དེ་ཕྱིར་སྔགས་པ་ཆེ་ཁྲོས་ལ། །བསྐལ་པའི་མེ་ཡི་མཐུ་ལྟ་བུས། །རྡོ་རྗེ་རལ་གྲིའི་ཕྱག་རྒྱ་ཡིས། །བགེགས་རྣམས་ཐམས་ཅད་
གཅད་པར་བྱ། །རྐང་པའི་ཚུལ་ནི་དེ་ཉིད་ཀྱིས། །རྡོ་རྗེ་གར་གྱིས་གར་བྱས་ལ། །རྐང་པ་གཡོན་པ་བརྐྱང་ཞེས་འདོར། །རྐང་གཡས་བརྐྱང་བའི་གནས་བརྟེན་ཏེ། །བསྣུན་བྱ་རྐེད་པའི་གནས་སུ་ནི། །རལ་གྲི་ཤུབས་སུ་ཞུགས་པར་བྱ། །མནན་པ་མེད་པའི་ཚུལ་གྱིས་ནི། །
ཤུགས་ཀྱིས་ལག་པ་སར་བསྡམས་ལ། །རྐང་པ་སྤོ་བའི་ཚུལ་གྱིས་སུ། །རལ་གྲི་ཕྱུང་བ་འདྲ་བར་བཟུང་། །རལ་གྲི་ཚུལ་དུ་གཞུག་པ་ནི། །མཛུབ་མོ་གུང་མོ་གཤིབ་པར་བྱ། །དེ་ནས་ལག་པ་གཡོན་པ་ཡིས། །རལ་གྲི་ཤུབས་སུ་བྱ་བ་ནི། །མཐེའུ་ཆུང་དང་ནི་སྲིན་
ལག་དང་། །མཐེ་བོས་རལ་གྲི་ཤུབས་སུ་བྱ། །དེ་ནས་རྐང་པ་གཡས་པ་ཡིས། །ས་ལ་བགེགས་ཀྱི་གཟུགས་བྲིས་ཏེ། །སོ་ཡིས་མཆུ་མནན་ཁྲོས་བྱས་ལ། །རང་གི་རྡོ་རྗེ་ཉི་འབར་བས། །རྐང་པས་མགོ་ནི་མནན་བྱས་ལ། །ལག་པས་རལ་གྲི་ཕྱུང་ནས་སུ། །དེ་ནི་རྡོ་རྗེ་
གོམ་སྟབས་ཀྱིས། །གར་གྱི་ཚུལ་དུ་ཀུན་བསྐྱོད་ཅིང་། །རྡོ་རྗེ་རལ་གྲིའི་ཕྱག་རྒྱ་ཡིས། །བགེགས་རྣམས་ཐམས་ཅད་གཅད་པར་བྱ། །རྡོ་རྗེ་ལྡན་དེས་གང་བཅོམ་པ། །དེ་ཡི་སྲོག་ལ་མི་སེམས་སོ། །དེ་ནས་དེ་དག་ཞི་བར་འགྱུར། །ཡང་ན་འཆིར་འགྱུར་ཐེ་ཙོ་མ་མེད། །བརྒྱ་
བྱིན་མཚུངས་པའི་བགེགས་ཞིག་ནའང་། །དེ་ཡི་མོད་ལ་བརླག་པར་འགྱུར། །དེ་ནས་རྡོ་རྗེ་སློབ་དཔོན་ཆེ། །སྙིང་རྗེ་སྙིང་བརྩེ་སེམས་ལྡན་པས། །ཇི་ལྟར་དེ་ཡང་སྐྱེ་བར་འགྱུར། །དེ་ལྟར་དེ་ལ་སྙིང་བརྩེར་བྱ། །རྡོ་རྗེ་རལ་གྲིའི་སྟང་སྟབས་སོ། །དེ་ནས་རྡོ་རྗེ་སློབ་དཔོན་ཆེས། །
เล่ม ๘๗ · หน้า 128b
རྡོ་རྗེས་གཏུབ་པར་བྱ་བ་བྱས། །རྡོ་རྗེ་འཁོར་ལོའི་ཕྱག་རྒྱ་ཡིས། །གནོད་པར་སེམས་པ་ཐམས་ཅད་གཏུབ། །རྡོ་རྗེ་འབྱུང་བར་འདུག་ནས་སུ། །རྡོ་རྗེ་མཐུ་རྩལ་བརྩམ་བྱས་ལ། །རྐང་པ་བཏེག་ཅིང་བཞག་ཚུལ་གྱིས། །རྡོ་རྗེ་གར་ནི་རབ་ཏུ་བྱ། །འཁོར་ལོ་རྒྱས་པར་བྱ་རིམ་གྱིས། །
པདྨའི་ཐལ་མོ་སྦྱར་བྱས་ལ། །རྐང་པ་རྣམ་པར་བཞག་བྱས་ནས། །ས་ལ་འཁོར་ལོ་འཕང་བར་བྱ། །རྟིང་སྤྲད་གནས་སུ་འདུག་བྱས་ནས། །འབྲུག་སྒྲ་དལ་འདྲའི་ཧཱུཾ་བརྗོད་དེ། །ཐལ་མོ་བརྡབ་པའི་ཚུལ་གྱིས་སུ། །ས་ལ་འཁོར་ལོས་བསྣུན་པར་བྱ། །བཟློག་སྟེ་ལན་བུར་བྱས་ནས་
སུ། །ལག་པ་སྦྱོར་བའི་ཚུལ་གྱིས་ནི། །འཁོར་ལོ་ལྟ་བུར་བྱས་ནས་སུ། །གྱེན་དུ་འཕངས་ལ་གཞིག་པར་བྱ། །བཀུག་སྟེ་རྐང་པས་མགོ་མནན་ནས། །བགེགས་རྣམས་ལ་ནི་བསྣུན་པར་བྱ། །འོན་ཏམ་རབ་ཏུ་ཞི་བར་འགྱུར། །ཡང་ན་ཤི་འགྱུར་ཐེ་ཙོམ་མེད། །དེ་ལྟར་
རིམ་པའི་ཚུལ་འདི་ཡིས། །བགེགས་རྣམས་ལ་ནི་གནོད་པར་བྱ། །སྡིག་པའི་གནོད་པ་མེད་པར་ནི། །བསྐུལ་ཡང་བདེ་བར་མི་འགྱུར་རོ། །གལ་ཏེ་རྡོ་རྗེ་སེམས་དཔའ་ཆེ། །སྙིང་རྗེའི་སེམས་དང་ལྡན་འགྱུར་བས། །བགེགས་ལ་ཞི་བར་བྱ་འདོད་ན། །ཆོ་ག་འདི་ཡི་ཚུལ་དུ་བྱ། །
བ་ལང་གི་ནི་ལྕི་བ་ལས། །དེ་འདྲ་བ་ཡི་གཟུགས་བྱས་ལ། །སྔགས་པས་ཞི་བའི་སེམས་ཀྱིས་ནི། །སྔགས་པས་འོ་མས་བཀྲུས་ནས་སུ། །མོད་ལ་སྔ་མཁོ་བཞིན་དུ་འགྱུར། །དེ་ལྟར་ཀུན་དུ་བགེགས་རྣམས་ནི། །ཀུན་ལ་ཆོ་ག་བཞིན་དུ་བྱ། །རིམ་པ་འདི་ཡི་ཚུལ་གྱིས་ནི། །
གསང་སྔགས་རྣམས་ལའང་སྦྱར་བྱ་སྟེ། །གཅད་དང་གནོན་པ་བྱས་པ་དང་། །བཀག་པ་དང་ནི་བཅིངས་པ་འང་རུང་། །གལ་ཏེ་བསྒྲུབ་པར་འདོད་ན་ནི། །དེ་ནས་སྔ་མ་ཁོ་བཞིན་དུ་འགྱུར། །འོན་ཏམ་གསང་སྔགས་རྣམས་ལ་ནི། །བྱེ་བྲག་ཏུ་ནི་སྤོས་ཀྱིས་བྱ། །བ་ནི་སེར་མོའི་
འོ་མའམ། །ཡང་ན་མར་གྱི་སྦྱིན་སྲེག་བྱ། །ཡང་ན་བརྒྱ་དང་རྩ་བརྒྱད་ཀྱིས། །སྦྱིན་སྲེག་གིས་ནི་ཀུན་ཞིར་འགྱུར། །ཞི་བའི་སེམས་ཀྱིས་ཞི་བ་སྟེ། །དགའ་བའི་སེམས་ཀྱིས་རྒྱས་པར་རོ། །དྲག་ཤུལ་སྤྱོད་ལས་གང་ཡིན་པ། །དེ་ནི་ཁྲོས་པ་བརྩམ་པར་བྱ། །ཇི་ལྟར་ལས་
เล่ม ๘๗ · หน้า 129a
ནི་ཅི་རིགས་པར། །གསང་སྔགས་རྣམས་ལ་སྔགས་པས་བྱ། །གཞན་དུ་ན་ནི་མི་བྱ་སྟེ། །ལས་ཀྱི་འབྲས་བུ་མེད་པར་འགྱུར། །རྡོ་རྗེ་འཁོར་ལོའི་སྟང་སྟབས་སོ། །རྡོ་རྗེ་ཚུལ་གྱིས་དེ་ནས་ཀྱང་། །རྡོ་རྗེ་འབྱུང་བར་བྱས་ནས་སུ། །མཚོག་མར་ཐལ་མོ་སྦྱར་
ནས་དེ། །རྡོ་རྗེ་གར་ནི་རབ་ཏུ་བྱ། །རྟིང་སྤྲད་གནས་ཀྱི་ཚུལ་གྱིས་སུ། །སྨིན་བསྒྱུར་རྐང་པས་རེག་པར་བྱ། །ལག་པ་གཉི་ག་ས་ལ་བྱུག །དེ་བཞིན་ཕྱོགས་བཞི་རྣམས་སུ་ཡང་། །ཡིད་ཀྱིས་བསྐོར་བའི་ཚུལ་གྱིས་སོ། །རྐང་པ་འཁོར་ལོ་བཞིན་དུ་བསྐོར། །ལག་གཉིས་རྐེད་པའི་གནས་
བཞག་ལ། །རྡོ་རྗེ་བགད་པ་རབ་བྱེད་ཅིང་། །ལག་པ་གཡས་པ་བསྒྲེང་བར་བྱ། །རྡོ་རྗེའི་མཛུབ་མོས་རབ་ཏུ་བསྡིགས། །ཧཱུཾ་བརྗོད་བསྒྱིངས་དང་བཅས་པར་བྱ། །རྡོ་རྗེ་ཉི་མའི་མིག་ལྡན་པས། །རྡོ་རྗེའི་མཛུབ་མོས་བསྡིགས་ནས་ནི། །བདུད་ཀྱི་དབང་ཕྱུག་བདག་ཉིད་ཀྱང་། །བལྟས་
པས་དེ་ནི་མོད་ལ་འབྲོས། །བྱ་རོག་བོང་རྡོ་འཕེན་མཐོང་བཞིན། །རྡོ་རྗེ་བགད་པའོ། །དེ་ནས་རྡོ་རྗེ་སྔགས་པ་ཆེས། །རྡོ་རྗེ་འབྱུང་བར་བྱས་ནས་སུ། །མི་མཐུན་རྐང་སྟབས་བྱས་ནས་སུ། །ལག་པ་བསྣོལ་ཏེ་ཁུ་ཚུར་བཅང་། །མཐེ་བོ་གྱེན་དུ་བསྒྲེང་བྱས་ལ། །གུང་མོ་གཤིབས་ཏེ་
བསྒྲེང་བར་བྱ། །མཛུབ་མོ་དེ་གཉིས་ཟླ་བ་བསྒྲེང་། །རྡོ་རྗེ་ཁ་ཞེས་བརྗོད་པ་ཡིན། །རྐང་པ་གཡས་པ་བཏེག་པར་བྱ། །གཡོན་པ་གཟུགས་ཤིང་དེ་བཞིན་བྱ། །རྡོ་རྗེ་ལྕེ་ནི་མེ་ལྟར་འབར། །རྒོད་མའི་ཁ་ལྟར་མངོན་སུམ་བྱ། །འབྲུག་སྒྲ་དལ་འདྲའི་ཧཱུཾ་བརྗོད་དེ། །ཁ་ཡི་ཐད་ཀར་
གཞག་པར་བྱ། །ཕྱོགས་བཞི་དག་ནི་ཐམས་ཅད་ཀྱི །རྒྱ་མཚོ་བཞི་ཡི་ཆུ་འཐུངས་ན། །མིག་སྔར་སྣང་བར་གྱུར་པ་ཡི། །སྡང་བ་ཀུན་ལྟ་སྨོས་ཅི་དགོས། །དེ་ལྟར་བྱས་ན་ཕྱོགས་བཞི་པོ། །ཀུན་ནས་འབྱུང་བ་ཐམས་ཅད་སྐེམས། །འཚུབ་མ་ཀུན་དང་ལྕེ་འབབ་དང་། །སྤྲིན་
རྣམས་ཀུན་ནས་འདུ་བ་ཡང་། །རྡོ་རྗེ་ཁ་ནི་གླལ་བ་དང་། །གཏོར་བས་རབ་ཏུ་འཐོར་བར་འགྱུར། །འཇིག་རྟེན་དུ་ནི་ལྟས་བྱུང་བ། །ཀུན་ནས་གནས་གྲུབ་གང་ཡིན་པ། །སྔགས་པས་རྡོ་རྗེ་མེ་ལྕེ་ཡི། །མེ་ལྕེ་ལྟར་བསྒྱུར་དེ་ཀུན་ཞི། །རྡོ་རྗེ་ཁ་ཡི་ཕྱག་རྒྱ་ཡིས། །བགེགས་རྣམས་ཐམས་
เล่ม ๘๗ · หน้า 129b
ཅད་བཟའ་བར་བྱ། །རྡོ་རྗེ་འབར་བའི་ཕྱག་རྒྱ་ཡིས། །བགེགས་རྣམས་ཐམས་ཅད་བཅའ་བར་བྱ། །རྡོ་རྗེ་ཁ་གླལ་བའི་སྟང་སྟབས་སོ། །དེ་ནས་རྡོ་རྗེ་རྣལ་འབྱོར་ཆེ། །རྡོ་རྗེ་ཡེ་ཤེས་བསྒྱུར་ནས་སུ། །བགེགས་ལ་གསོ་བ་བྱས་ནས་ནི། །ཉེས་པ་ཡོད་པ་མ་ཡིན་ནོ། །རྒྱལ་བའི་ཡེ་ཤེས་
ལས་བྱུང་བའི། །རྡོ་རྗེ་སློབ་དཔོན་གསོ་བྱེད་པས། །བདག་འདྲར་བསྔགས་པ་དེ་འདྲ་སྟེ། །སྔགས་པ་ཅི་འདྲར་རྒྱལ་དེ་བཞིན། །སེམས་ཅན་ཀུན་ལ་སྙིང་རྗེ་དང་། །བྱང་ཆུབ་སེམས་ནི་བརྟན་བྱ་སྟེ། །ཐབས་ཀྱིས་དམ་པ་ཐོབ་འགྱུར་བས། །རྣམ་པར་འཕྲུལ་བ་ཐམས་ཅད་ལ། །གཞན་
དུ་ན་ནི་ཕྱོགས་རྣམས་ན། །བཞུགས་པའི་སངས་རྒྱས་བསྔགས་མི་འགྱུར། །བྱང་ཆུབ་སེམས་དང་བྲལ་བ་ནི། །ལྷ་ཡི་མཆོད་འོས་མ་ཡིན་ནོ། །ཐབས་དང་ཤེས་རབ་བྲལ་འགྱུར་བ། །རྒྱལ་བའི་སྲས་པོ་ཉན་ཐོས་དང་། །གང་ཡང་རང་སངས་རྒྱས་རྣམས་ནི། །དཀའ་ཐུབ་
གནས་ལ་གནས་པ་སྟེ། །བདག་དོན་ཕན་པའི་སེམས་ལྡན་པས། །དེ་དག་ལ་ནི་བྱ་བ་མེད། །ཐབས་དང་ཡེ་ཤེས་ལས་བྱུང་བའི། །བྱང་ཆུབ་སེམས་ནི་སྙིང་རྗེ་ཅན། །བྱང་ཆུབ་སེམས་ཀྱི་ཤིང་རྟ་དང་། །བྱམས་དང་སྙིང་རྗེའི་ཁ་སྒྱུར་དང་། །ས་དང་ཕ་རོལ་ཕྱིན་པ་
དང་། །བསྡུ་བ་བཞི་ཡི་རྡོ་རྗེ་དང་། །ཐམས་ཅད་མཁྱེན་པ་ཉིད་ས་དང་། །བྱང་ཆུབ་ཕྱོགས་ཀྱི་རྩ་ལག་ལ། །བརྟེན་ནས་སངས་རྒྱས་སྲས་པོ་རྣམས། །སེམས་ཅན་དོན་དགའི་རྩེ་བས་རྩེ། །དེ་ལྟར་སློབ་དཔོན་རྡོ་རྗེ་འཆང་། །ཐབས་དང་ཡེ་ཤེས་མཁས་པ་ཡིས། །སྡང་
བ་རྣམས་ནི་ཐམས་ཅད་ཀྱི། །སེམས་ནི་རབ་ཏུ་གསོ་བར་བྱ། །རྡོ་རྗེའི་ཚུལ་གྱིས་དེ་ནས་ཡང་། །རྡོ་རྗེ་འབྱུང་བར་བྱས་ནས་ནི། །རྐང་པ་མཐུན་པའི་གནས་བཞག་སྟེ། །རྡོ་རྗེ་ཐལ་མོ་གཞུམ་བྱས་ལ། །རྡོ་རྗེ་གར་ནི་བྱས་ནས་སུ། །ལག་པ་གཡས་པ་གྱེན་དུ་བསྒྲེང་། །གཡོན་
པ་ཀོ་སྐོར་བརྟེན་ནས་སུ། །གུང་མོ་དང་ནི་མཛུབ་མོ་གཤིབ། །མཐེའུ་ཆུང་མཐེ་བོ་སྒྲད་པར་བྱ། །གཡས་པ་ལྷ་ཡི་བ་དན་གསུམ། །གཡས་བརྐྱང་རྐང་པར་མནན་ནས་སུ། །རྡོ་རྗེ་བགད་པའི་ཚུལ་གྱིས་ནི། །ཀྱེ་མའོ་བདག་ཉིད་རྡོ་རྗེ་ཅན། །བདག་ཉིད་དུ་ནི་བདག་གནས་སོ། །
เล่ม ๘๗ · หน้า 130a
ཧཱུཾ་བརྗོད་བ་སྙེམས་དང་ཁྲོས་པ་ཡིས། །རྡོ་རྗེ་གར་གྱིས་གཏང་བར་བྱ། །ཕྱག་རྒྱ་འདི་ནི་རྡོ་རྗེས་བསྡིགས། །རྡོ་རྗེ་བགད་པས་བསྡིགས་པས་ན། །ལྷ་དང་ལྷ་མིན་གསང་བར་བཅས། །དཀྱིལ་འཁོར་ཚེའམ་བསྒྲུབ་པའི་ཚེ། །བགེགས་བྱེད་ཕྱིར་ནི་འགྲོ་མི་འགྱུར། །རྡོ་རྗེ་འཛིན་
གྱིས་ཐོག་མར་བཅིང་། །གཙུག་ནས་བྱུང་བ་ཉིད་ཀྱང་ནི། །བགེགས་བྱེད་ཕྱིར་ནི་འགྲོ་མི་འགྱུར། །རྡོ་རྗེ་འཛིན་པ་མངོན་སུམ་ཤེས། །བགེགས་རྣམས་ཕན་ཚུན་སྨྲ་བྱེད་ཅིང་། །བསྲུང་བའི་ཕྱིར་ནི་དེ་དག་ཀུན། །ལྷན་ཅིག་དཀྱིལ་འཁོར་དྲུང་དུ་དོང་། །རྡོ་རྗེ་སྟངས་ཀྱིས་བསྐུལ་བས་ན། །རྡོ་རྗེ་
སློབ་དཔོན་སྐལ་བ་ཆེ། །བསོད་ནམས་ཚོགས་ནི་བསགས་པ་ལ། །གཞན་རྣམས་ཐམས་ཅད་ཕྱག་འཚལ་ལོ། །རྡོ་རྗེའི་ཚུལ་གྱིས་དེ་ན་ཡང་། །རྡོ་རྗེ་གར་ནི་རབ་བྱས་ལ། །པདྨ་ཐལ་མོ་སྦྱར་ནས་སུ། །ཕྱོགས་རྣམས་ཀུན་དུ་རྒྱས་པར་བྱ། །གཡས་པ་བརྐྱང་བའི་སྟབས་བྱས་ཏེ། །
སྐལ་པའི་མེ་ཡི་འོད་འདྲ་བས། །ཐལ་མོ་བརྡབ་པའི་ཚུལ་གྱིས་སུ། །ཁྲོས་པས་ལག་པ་བརྡབ་པར་བྱ། །ལག་གཉིས་རྡོ་རྗེ་ཚུལ་གྱིས་སུ། །མཐེའུ་ཆུང་མཐེ་བོ་སྤྲད་བྱས་ལ། །གཡོན་པ་ཀོ་སྐོར་བརྟེན་ནས་སུ། །གཡས་པ་གྱེན་དུ་བསྒྲེང་བྱས་ལ། །ཨཱཿཧཱུཾ་ཧཱུཾ་ཧཱུཾ་བརྗོད་
དེ་བསྐུལ་བ་ཡིས། །སྔགས་པས་ཀུན་དུ་སྒྲ་ཡང་བརྗོད། །རྡོ་རྗེ་སྒྲ་ནི་བྱུང་བ་ན། །སྡང་བ་ཐམས་ཅད་ཕུང་བར་འགྱུར། །བརྒྱ་བྱིན་ཚངས་དང་ཟླ་བ་སོགས། །རྫུ་འཕྲུལ་ཆེ་བའི་གཟའ་ཆེན་ཡང་། །ཐོས་པ་ཙམ་གྱིས་ཀུན་གཡོས་ཏེ། །ཀུན་དུ་སྒྲ་ཡི་སེམས་ཀྱང་ཉམས། །དེ་ཚེ་
ཐལ་མོ་སྦྱར་ཏེ་འདུད། །རྡོ་རྗེ་སྒྲ་ཆེན་གང་ན་བར། །ཐམས་ཅད་ལྷན་ཅིག་ལྷགས་ནས་སུ། །རྡོ་རྗེ་སྒྲ་ཡིས་གཟིར་འགྱུར་ཞིང་། །སྟན་ལས་སེམས་ནི་ཉམས་པས་ན། །མངའ་བདག་སུག་ལས་ཅི་འཚལ་བ། །བདག་ཅག་མྱུར་དུ་བཀའ་སྩོལ་ཅེས། །སྔགས་པ་ལ་ནི་ལུང་ཡང་
ནོད། །སྔགས་པས་བསམས་ཏེ་གར་བྱས་ན། །ལྷ་རྣམས་མྱུར་དུ་གྲོལ་བར་འགྱུར། །དེ་ནས་བྱམས་པའི་སེམས་བསྐྱེད་ལ། །བརྟུལ་ཞུགས་ཅན་གྱིས་ཕྱག་རྒྱ་དགྲོལ། །རྡོ་རྗེ་ཀུན་དུ་སྒྲའོ། །རྡོ་རྗེ་འབྱུང་བར་འདུག་ནས་སུ། །རྡོ་རྗེ་གར་ནི་འབར་བྱས་ལ། །རྡོ་རྗེ་ཐལ་
เล่ม ๘๗ · หน้า 130b
མོ་སྦྱར་ནས་སུ། །ཕྱོགས་རྣམས་ཀུན་དུ་རྒྱས་བྱས་ཏེ། །མི་མཐུན་རྐང་སྟབས་བྱས་ནས་སུ། །བསྣོལ་ཏེ་ཁུ་ཚུར་བཅངས་བྱས་ལ། །མཐེ་བོ་གཉིས་ནི་གཤིབས་ཏེ་བསྒྲེང་། །གུང་མོ་གཉིས་ནི་གཤིབས་བྱས་ལ། །མཛུབ་མོ་དབུ་མའི་ཚིགས་བཀུག་སྟེ། །གུང་མོ་གཉིས་
ལ་སྦྱར་བར་བྱ། །རྡོ་རྗེ་ཁ་ནི་བྱས་པས་ན། །སྡང་བ་ཐམས་ཅད་ཞི་བར་འགྱུར། །ཁ་ཡི་ཐད་ཀར་བཞག་ན་ནི། །རྡོ་རྗེ་སྒྲ་ཡང་འབྱུང་བར་འགྱུར། །བདག་ནི་རྡོ་རྗེ་ཆེན་པོ་ཅན། །རྡོ་རྗེ་ཡེ་ཤེས་སྟོབས་དང་ལྡན། །ཧྲི་ཧ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། །རྡོ་རྗེའི་གོམ་སྟབས་ཚུལ་གྱིས་ནི། །
རྡོ་རྗེ་གནོན་པོའི་གོམ་པ་ཡིས། །བཞག་དང་འདེགས་པས་འགྲོ་བྱེད་ཅིང་། །ཕྱོགས་རྣམས་བཞི་པོར་བརྗོད་པར་བྱ། །རྡོ་རྗེ་སྒྲ་འབྱུང་བསྐུལ་བས་ན། །བགེགས་ཆེན་རྣམས་དང་གྲགས་རྣམས་དང་། །རྫུ་འཕྲུལ་ཆེན་པོའི་ལྷ་རྣམས་ཀྱང་། །དེ་ཡི་མདུན་དུ་འགྲོ་བར་བྱེད། །རྡོ་རྗེ་
སྒྲ་ཡིས་བདག་ཅག་ཚིག །རྡོ་རྗེ་སྒྲ་ཡིས་བསྐུལ་བས་ན། །བདག་ཅག་རང་གི་གནས་ནས་གཡོས། །རྡོ་རྗེ་དབང་པོ་བཀའ་མྱུར་སྩོལ། །གལ་ཏེ་དཔལ་གྱི་སྒོ་བཞེད་དམ། །རྒྱལ་སྲིད་དངུལ་ཆུ་མིག་བསྐུ་དང་། །ཀུན་ནས་གཏེར་རྣམས་གཟིགས་བཞེད་དམ། །བཀའ་
སྩོལ་ཅིག་ཅེས་དེ་སྐད་སྨྲ། །དགའ་བས་བྱིན་ནས་སྒྲུབ་པོ་ལ། །ཕྱག་འཚལ་མཆོད་པ་བྱས་ནས་དོང་། །རྡོ་རྗེའི་ཚུལ་གྱིས་དེ་ནས་ཡང་། །རྡོ་རྗེ་སློབ་དཔོན་མཐུ་ཆེན་གྱིས། །རྡོ་རྗེའི་གར་ནི་རབ་བྱས་ལ། །རྡོ་རྗེ་ཅན་གྱིས་ཕྱག་རྒྱ་བཅིང་། །རྐང་པ་པུས་མོར་བཙུགས་ནས་སུ། །ལག་
པ་གཉིས་ནི་ཁུ་ཚུར་བཅང་། །གུང་མོ་གཉིས་ནི་བསྒྲེང་ནས་སུ། །མཛུབ་མོ་གཉིས་ནི་ངོས་ལ་སྦྱར། །གཡས་བརྐྱང་གོམ་སྟབས་བྱས་ནས་སུ། །མྱུར་དུ་རྡོ་རྗེའི་གོམ་སྟབས་ཀྱིས། །འཁྲུལ་འཁོར་ཀུན་ལས་བསྣུན་བྱས་ལ། །སྒོ་རྣམས་ཐམས་ཅད་དབྱེ་བར་བྱ། །ལྷ་མིན་གནོད་
སྦྱིན་རྒྱལ་པོ་དང་། །སྲིན་པོ་རྫུ་འཕྲུལ་ཆེ་རྣམས་ཀྱང་། །ཐམས་ཅད་རང་གི་གནས་ནས་གཡོས། །བསྐལ་པ་ཟད་དམ་ཇི་སྙམ་སེམས། །རྡོ་རྗེའི་ཕྱག་རྒྱས་བསྣུན་པས་ན། །སེམས་ནི་བློང་ཞེས་གྱུར་ནས་སུ། །རྡོ་རྗེ་ཡེ་ཤེས་ཆེར་ལྡན་པ། །ག་ལ་བ་དེར་ཉེ་བར་དོང་། །
เล่ม ๘๗ · หน้า 131a
རྡོ་རྗེ་འབར་བས་བདག་ཅག་ཚིག །སྔགས་པས་དཔལ་གྱི་སྒོ་བཞེད་དམ། །འོན་ཏེ་དངུལ་ཆུ་བཅུད་ལེན་བཞེད། །རྡོ་རྗེ་དབང་པོས་བཀའ་མྱུར་སྩོལ། །སྨྲས་ནས་ཀུན་གྱིས་དེ་མོད་ལ། །ཡིད་ལ་འདོད་པ་སྦྱིན་པར་བྱེད། །གལ་ཏེ་ལྷ་དང་ལྷ་མིན་དང་། །གསང་བ་
བཀོལ་བར་འདོད་ན་ཡང་། །འདོད་པས་དེ་དག་ལྷགས་ནས་སུ། །འདོད་པ་བཞིན་དུ་ལས་བྱེད་དོ། །ལུང་དང་འགལ་བར་བྱེད་པ་ད་ག །ཅི་སྟེ་དམ་བཅས་མི་འོང་ན། །སློབ་དཔོན་རྡོ་རྗེ་འཆང་བ་བོ། །རྡོ་རྗེའི་ཕྱག་རྒྱ་ཡོངས་ལྡན་པ། །སོས་ནི་མཆུ་མནན་ཁྲོས་པ་དང་། །མེ་འབར་ལྟ་
བུར་འཇིགས་རུང་བས། །མྱུར་དུ་རྡོ་རྗེའི་གོམ་སྟབས་ཀྱིས། །ས་རྣམས་ཀུན་ལ་བསྣུན་པར་བྱ། །གཡས་བརྐྱང་གོམ་སྟབས་བྱས་ནས་སུ། །ཇི་སྟེ་དམ་བཅས་མི་འོང་ན། །རྡོ་རྗེའི་ཕྱག་རྒྱས་བསྣུན་པར་བྱ། །རྡོ་རྗེའི་ཕྱག་རྒྱས་བསྣུན་པས་ན། །ཨ་ལ་ལ་ཞེས་དེ་སྐད་སྨྲ། །སྟན་
ལས་ལུས་ཀྱང་རབ་ཏུ་ཉམས། །ལུས་ནི་མེ་ཡིས་རབ་ཏུ་འབར། །རྡོ་རྗེ་རྣལ་འབྱོར་ཆེན་པོ་པ། །ག་ལ་བ་དེར་ཉེ་བར་དོང་། །སྐལ་བ་ཆེན་པོས་ཡོངས་སུ་སྐྱོབས། །བཀའ་ལུང་མྱུར་དུ་བདག་ཅག་སྩོལ། །ཀླུ་དང་གསང་བ་ལྷ་མིན་རྣམས། །འཕྲལ་དུ་བསྒོ་བའི་ལུང་བཞིན་
བྱེད། །བསྒོ་བའི་ལུང་ནི་བསྒྲུབས་ནས་སུ། །རང་རང་གི་ནི་གནས་སུ་དོང་། །དེ་ལྟ་ན་ནི་ལྷ་དབང་སོང་། །དེ་ལྟ་མ་ཡིན་མི་གཏོང་ངོ་། །དེ་ནས་བསྒོ་ལུང་བཞིན་བྱས་ནས། །དེ་དག་མྱུར་དུ་གནས་སུ་དོང་། །སློབ་དཔོན་རྡོ་རྗེ་འཆང་བ་པོས། །དེ་ནས་ཕྱག་རྒྱ་བཏང་བྱས་ཏེ། །རྡོ་
རྗེའི་གར་གྱི་ཚུལ་གྱིས་སུ། །རྐེད་པའི་གནས་སུ་གཞག་པར་བྱ། །རྡོ་རྗེའི་ཚུལ་གྱིས་དེ་ནས་ཡང་། །རྡོ་རྗེའི་གར་ནི་རབ་བྱས་ལ། །རྡོ་རྗེ་ཞགས་པའི་ཕྱག་རྒྱ་ཡིས། །སྡང་བ་ཐམས་ཅད་བཅིང་བར་བྱ། །དུས་བཞི་རབ་ཏུ་བསྐུལ་བྱས་ལ། །གལ་ཏེ་བསྒོ་ལུང་འགལ་བྱེད་
ན། །རྡོ་རྗེའི་ལྕགས་ཀྱུས་དགུག་བྱ་ཞིང་། །རྡོ་རྗེའི་ཞགས་པས་བཅིང་བར་བྱ། །རྡོ་རྗེ་རྣམ་པའི་སྒྲའོ། །རྡོ་རྗེ་ཐལ་མོ་བཙུམ་ནས་སུ། །མཐུན་པའི་སྟབས་སུ་གནས་བྱས་ཏེ། །ལག་པས་རྒྱབ་ཏུ་བསྣུན་བྱས་ལ། །རྡོ་རྗེ་གྱེན་དུ་འཕང་བར་བྱ། །དེ་ནས་རྡོ་རྗེ་བལྟ་བྱས་ལ། །
เล่ม ๘๗ · หน้า 131b
འབྲུག་སྒྲ་དལ་འདྲའི་ཧཱུཾ་བརྗོད་དེ། །རྐང་པ་སྤོ་བའི་ཚུལ་གྱིས་སུ། །གཡས་དང་དེ་བཞིན་གཡོན་པ་སྤོ། །ལག་པ་གཡོན་པའི་མཛུབ་མོ་དང་། །མཐེ་བོ་སྤྲད་དེ་ཞགས་པར་བྱ། །ལག་པ་གཡས་པའི་མཛུབ་མོ་ཡིས། །རྩེ་བཀུག་ལྕགས་ཀྱུས་བརྟན་པོར་བྱ། །རྡོ་རྗེ་རྒྱགས་པའི་མིག་
ལྡན་པ། །སོ་ཡིས་མཆུ་མནན་ཁྲོས་པ་ཡིས། །གང་ལ་བགེགས་ནི་ཡོད་པ་དེར། །རྡོ་རྗེ་སྟབས་ཀྱིས་མྱུར་སོང་ལ། །རྐང་པ་གཡས་བརྐྱང་སྟབས་བྱས་ལ། །རྡོ་རྗེའི་ལྕགས་ཀྱུའི་ཕྱག་རྒྱ་ཡིས། །བགེགས་རྣམས་ཐམས་ཅད་དགུག་བྱ་ཞིང་། །རྡོ་རྗེ་ཞགས་པས་བཅིང་བར་བར་བྱ། །
གལ་ཏེ་འཁོར་ལོ་ཅན་དང་ནི། །དབང་བཅས་དྲག་པོ་ཚངས་བཅས་པ། །གལ་ཏེ་རྡོ་རྗེ་འཆང་སྲུང་ཡང་། །སྔགས་པས་གཞི་ནས་དྲངས་ཏེ་དགུག །བཀུག་ནས་རྡོ་རྗེས་བཅིངས་པ་ཡིས། །རྡོ་རྗེའི་གཟེབ་ཏུ་གཞུག་པར་བྱ། །ཇི་སྲིད་འདོད་པ་རྫོགས་འགྱུར་བ། །དེ་སྲིད་བར་
དུ་གཞག་པར་བྱ། །བསྒོ་བའི་ལུང་ནི་མི་ཉན་ཏེ། །གལ་ཏེ་འདོད་པ་མ་རྫོགས་ན། །བདག་གི་འདོད་པ་འབྱོར་འདོད་པས། །དེ་ལ་ཆད་པས་གཅད་པར་བྱ། །དེ་ཡི་གཟུགས་ནི་བྱས་ནས་སུ། །རྡོ་རྗེ་རྐང་པས་གཟིར་བྱས་ན། །ཨ་ལ་ལ་ཞེས་སྒྲ་འབྱིན་ཅིང་། །ལྷ་ཡི་དབང་
པོའང་འོང་བར་འགྱུར། །དེ་ལ་བསྒོ་བའི་ལུང་ཡང་དབོག །རྡོ་རྗེ་གར་གྱིས་དེ་ནས་ཡང་། །ཐལ་མོ་ཤིན་ཏུ་སྦྱར་བྱས་ལ། །དབང་ཆེན་སྟབས་ཀྱིས་འདུག་ནས་སུ། །ཕྱོགས་རྣམས་ཀུན་དུ་རྒྱས་པར་བྱ། །རྐང་པ་སྤོ་བའི་ཚུལ་གྱིས་སུ། །གཡས་དང་དེ་བཞིན་གཡོན་པ་སྤོ། །
ལག་པ་གཉིས་ནི་སྦྱར་ནས་སུ། །ཕན་ཚུན་བསྣོལ་ཏེ་ཁུ་ཚུར་བཅང་། །གུང་མོ་གཉིས་ནི་གཤིབས་ནས་སུ། །མཛུབ་མོ་དེ་ལ་གཟུགས་པར་བྱ། །ང་ཡི་རྡོ་རྗེའི་ཕྱག་རྒྱ་དེ། །བགེགས་རྣམས་ཀུན་གྱི་དམ་ཚིག་ཡིན། །སྔ་མ་བཞིན་གྱི་སྟབས་ཚུལ་གྱིས། །ཕྱག་རྒྱས་
བགེགས་རྣམས་བཀུག་ནས་སུ། །ཁྲོ་བོ་ཡི་ནི་རྡོ་རྗེ་འདིས། །དེ་ལ་དམ་ཚིག་སྦྱིན་པར་བྱ། །རྡོ་རྗེ་སྟབས་ཀྱི་ཕྱག་རྒྱ་བཅིང་། །ཧཱུྃ་ཞེས་བྱ་བའི་སྒྲ་ཕྱུང་ལ། །བདག་ཉིད་རྡོ་རྗེར་བསྒྱུར་ནས་སུ། །བགེགས་རྣམས་ཐམས་ཅད་དགུག་པར་བྱ། །ལན་ནི་སྨྲ་བར་མི་བྱེད་ན། །དེ་ནི་གཏང་
เล่ม ๘๗ · หน้า 132a
བར་མི་བྱའོ། །གལ་ཏེ་ཅུང་ཟད་མི་སྨྲ་ན། །དེ་ལ་ཆད་པས་གཅད་བྱ་སྟེ། །ཤིང་གི་དུག་དང་སྟར་བུ་དང་། །ཡུངས་ཀར་དག་ནི་བསྲེས་པ་ལས། །དེ་ཡི་གཟུགས་ནི་བྱས་ནས་སུ། །མེ་ཡི་ནང་དུ་བོར་བྱས་ན། །གལ་ཏེ་ཚངས་པས་བསྲུངས་ན་ཡང་། །བགེགས་དེ་དེ་ཡི་
མོད་ལ་འགྲོ། །སྔགས་པས་དེ་ལ་བསྒོ་བར་བྱ། །དེ་ནས་དེ་ལ་རྒྱས་པར་བྱ། །བྱམས་པའི་སེམས་ནི་བསྐྱེད་ནས་སུ། །ཕྱག་རྒྱ་བཏང་བར་བསམ་བྱས་ན། །གཟིར་དང་བཅིང་དང་དགུག་པ་རྣམས། །ཐར་ནས་བདེ་བར་གནས་པར་འགྱུར། །དེ་ནས་སློབ་དཔོན་རྡོ་རྗེ་འཆང་། །ཡེ་ཤེས་
ཆེ་ལ་རབ་གཞོལ་ཞིང་། །སེམས་ཅན་དོན་ལ་སྙིང་རྗེ་བས། །རྡོ་རྗེ་ཉིད་དུ་ཡང་བསྒྱུར་ཏེ། །མཐུན་པའི་རྐང་སྟབས་བྱས་ནས་སུ། །རྡོ་རྗེ་གར་ནི་རབ་བྱས་ལ། །རྡོ་རྗེ་ཐལ་མོ་ལེགས་སྦྱར་ཏེ། །ཕྱོགས་རྣམས་ཀུན་དུ་རྒྱས་པར་བྱ། །གོམ་པ་སྤོ་བའི་ཚུལ་གྱིས་སུ། །གཡས་
དང་དེ་བཞིན་གཡོན་པ་སྤོ། །ལག་པ་གར་བྱེད་ཚུལ་གྱིས་ནི། །དེ་ནས་ཐལ་མོ་རབ་སྦྱར་རོ། །གོམ་པ་བསྐྱོད་པའི་ཚུལ་གྱིས་སུ། །མཁས་པས་ཕྱོགས་བཞི་རྣམས་སུ་བསྐོར། །རྡོ་རྗེས་རེངས་བྱེད་ཕྱག་རྒྱ་ཡིས། །བགེགས་རྣམས་ཐམས་ཅད་རེངས་པར་བྱ། །མྱུར་དུ་
རྡོ་རྗེ་གོམ་པ་ཡིས། །ཕྱོགས་རྣམས་རྡོ་རྗེ་རེངས་པར་བྱ། །རྩེ་མོ་བརྒྱད་པའི་ལྷུན་པོ་ཆེ། །རྡོ་རྗེ་མཚན་ཅན་བསམ་པར་བྱ། །འོག་ཏུ་ལག་པ་རྡོ་རྗེ་ཅན། །སྟེང་དུ་གཡས་པའང་རྡོ་རྗེ་ཅན། །རྡོ་རྗེས་རེངས་བྱེད་རབ་བྱེད་ཅིང་། །ཕྱོགས་རྣམས་ཀུན་དུ་བསྐོར་བྱས་ན། །གང་དག་
སྡང་བའི་སེམས་ལྡན་པའི། །བགེགས་རྣམས་ཐམས་ཅད་རེངས་པར་འགྱུར། །རྡོ་རྗེ་རེངས་བྱེད་བྱས་པས་ན། །བགེགས་བྱེད་ཕྱིར་ནི་འཚེ་མི་བྱེད། །དེ་ཡི་སྤྱི་བོར་རྡོ་རྗེ་ནི། །ལེགས་པར་འདུག་པར་བསམས་བྱས་ན། །ཚངས་པའི་གནས་ལ་ཐུག་པ་ནས། །ས་འོག་
བདུན་ལ་ཐུག་པའི་བར། །རྡོ་རྗེས་རེངས་པས་རེངས་འགྱུར་ཏེ། །རྨོངས་ཤིང་སེམས་ཀྱང་མེད་པར་འགྱུར། །སྔགས་པ་མཁས་པས་འདོད་བར་དུ། །དེ་སྲིད་དུ་ནི་རེངས་པར་བྱེད། །རྡོ་རྗེ་ཚུལ་གྱིས་དེ་ནས་ཀྱང་། །རྡོ་རྗེའི་གར་ནི་རབ་བྱས་ལ། །མཚོག་མར་ཐལ་མོ་
เล่ม ๘๗ · หน้า 132b
སྦྱར་བྱས་ཏེ། །ཕྱོགས་རྣམས་ཀུན་དུ་རྒྱས་བྱས་ན། །ཀུན་ནས་བྱུང་བའི་ཆུ་རྣམས་ཀྱང་། །སྔགས་པས་བསྐམ་པར་བྱེད་པར་ནུས། །མཐུན་པའི་རྐང་སྟབས་བྱས་ནས་སུ། །རྡོ་རྗེའི་ཐལ་མོ་གཞུམ་བྱས་ལ། །ལག་པ་གཡས་པ་གྱེན་དུ་ནི། །ཞགས་པ་བཅས་པས་བརྐྱང་བར་བྱ། །དེ་
བཞིན་རྐང་པ་གཡོན་པ་ནི། །གཡོན་དང་ལྷན་ཅིག་གདེག་པར་བྱ། །དེ་བཞིན་ཕྱོགས་བཞི་རྣམས་སུ་ཡང་། །གོམ་པ་འདོར་བའི་ཚུལ་གྱིས་ནི། །མངོན་དུ་བསྐལ་པའི་མེ་ལྟ་བུ། །སོ་ཡིས་མཆུ་མནན་ཁྲོས་པ་ཡིས། །འོག་ལོགས་སུ་ནི་མིག་བལྟས་ཏེ། །རྡོ་རྗེའི་གོམ་པས་མྱུར་སོང་
ལ། །རྐང་པ་གཡོན་པ་བསྐུམ་བྱས་ཏེ། །ལྷུན་པོའི་རྩེ་མོར་གཞག་པར་བྱ། །འོག་མ་ཤུགས་ནས་འབྱིན་པའི་ལག །གཡས་པ་སྟེང་ནས་དེ་བཞིན་ཏེ། །མཆོད་པའི་རྐང་སྟབས་སྦྱར་བ་ཡིས། །ཁ་ཡི་ཚུལ་དུ་འདུག་པར་བྱ། །རྒོད་མ་རྟ་ཡི་ཁ་ཚུལ་གྱིས། །རྒྱ་མཚོའི་ཆུ་
རྣམས་བཏུང་བར་བྱ། །རྡོ་རྗེ་ལྡན་པས་བཤད་པ་ཡི། །བསམ་གཏན་སྔགས་པ་ལྡན་གྱུར་ན། །ཆུ་ནི་ཨ་ལ་ལ་ཞེས་སུ། །སྒྲ་འབྱིན་ཀུན་ནས་འདུ་འགྱུར་ན། །འབབ་ཆུ་དང་ནི་ཆུ་ཀླུང་དང་། །སྤྲིན་ལས་བྱུང་བ་སྨོས་ཅི་དགོས། །བསྐྱོད་ན་གལ་ཏེ་འོ་མ་ཡི། །ཆུ་ལས་བྱུང་
བའང་སྐམ་པར་འགྱུར། །རྡོ་རྗེའི་ཚུལ་གྱིས་དེ་ནས་ཡང་། །རྡོ་རྗེའི་ཐལ་མོ་མཚོག་མར་སྦྱར། །ཕྱོགས་རྣམས་ཀུན་དུ་རྒྱས་བྱས་ཏེ། །སྤྲིན་བཞིན་ཡོངས་སུ་རྒྱས་པར་བྱ། །དབང་ཆེན་གོམ་སྟབས་བྱས་ནས་སུ། །རྐང་པ་སྤོ་བའི་ཚུལ་གྱིས་ནི། །རྐང་པ་གཡོན་པ་བཏེག་
བྱ་སྟེ། །དེ་ནས་ས་ལ་གཞག་པར་བྱ། །རྐང་པ་གཡས་པ་བཏེག་ནས་སུ། །གཡས་ཕྱོགས་སུ་ནི་བསྐོར་བར་བྱ། །ལག་གཉིས་ཁུ་ཚུར་ཚུལ་གྱིས་སུ། །རྡོ་རྗེ་ལྡན་པ་གཡས་པ་བསྒྲེང་། །གཡོན་པ་མཁུར་བར་བརྟེན་ནས་སུ། །འཁོར་ལོ་བཞིན་དུ་ཡོངས་སུ་བསྐོར། །
དེ་བཞིན་གཡས་པ་བཞག་ནས་སུ། །ལག་པ་གཡོན་པས་ཡོངས་སུ་བསྐོར། །གཡས་པ་མཁུར་བར་བརྟེན་ནས་སུ། །རྡོ་རྗེ་ལྡན་པའི་གཡོན་པ་བསྒྲེང་། །རྡོ་རྗེ་གོམ་པས་མྱུར་སོང་ལ། །གཡས་པ་བརྐྱང་བའི་གོམ་སྟབས་ཀྱིས། །ཏི་སེའི་རྩེ་མོར་རྐང་བཞག་སྟེ། །རྐང་སྟབས་
เล่ม ๘๗ · หน้า 133a
སྦྱར་བའི་ཚུལ་གྱིས་ནི། །ལུས་ནི་འདུད་པ་བྱས་ནས་སུ། །རེངས་བྱེད་རྩ་བར་སྦྱོར་ལྡན་པས། །སོ་ཡིས་མཆུ་མནན་ཁྲོས་གྱུར་ཅིང་། །བདག་ཉིད་མེ་དང་འདྲར་གྱུར་པ། །སྟོབས་ཆེན་སྒྲ་ཡང་ཆེར་ལྡན་པ། །གཏུམ་པོ་ཆེན་པོ་ཕ་རོལ་གནོན། །རྡོ་རྗེའི་ཚུལ་གྱིས་སྟེང་བསྐོར་
ལ། །ངེས་པར་གནོན་པ་བླང་བར་བྱ། །སྔགས་པ་སྔགས་ལ་འཇིགས་མེད་པ། །དེས་ནི་གང་དུ་ཁྲོས་པ་འདོར། །རྡོ་རྗེ་དེས་གནོན་ཚུལ་གྱིས་ནི། །རྐང་པ་གཡོན་པ་བཙུགས་ནས་སུ། །རྡོ་རྗེ་གནོན་པས་བསྣུན་བྱས་ན། །དབང་པོ་ཆེན་པོའང་ཕྱེ་མར་རློག །རྡོ་རྗེ་གནོན་པས་བསྣུན་
བྱས་ན། །ས་རྣམས་ཐམས་ཅད་རབ་ཏུ་གཡོ། །ལྷུན་པོ་མནྡཱར་ཏི་སེ་དང་། །འཁོར་རི་རྣམས་ནི་གཡོ་འགྱུར་ན། །ལྷ་མིན་སྒོ་ལྟ་སྨོས་ཅི་དགོས། །རྡོ་རྗེ་ལྡན་པས་བཤད་ནའོ། །བསྣུན་པས་རྣམ་པ་བརྒྱར་འགྱུར་ཏེ། །ཕུབ་མ་སྦར་གང་རླུང་གཏོར་བཞིན། །སློབ་དཔོན་རྡོ་རྗེ་འཆང་བ་
པོས། །ས་སྦྱང་བརྩམ་པར་བྱ་བ་ནི། །རྡོ་རྗེའི་ཐལ་མོ་སྦྱར་ནས་སུ། །སྙིང་གར་བཞག་སྟེ་རྒྱས་པར་བྱ། །རྐང་པ་རྟིང་པ་སྤྲད་ནས་སུ། །ལག་པ་གར་བྱེད་སྤྱོད་པ་དང་། །རྐང་པ་བཞག་པའི་ཚུལ་གྱིས་སུ། །གཡས་དང་གཡོན་པ་གཞག་པར་བྱ། །རྐང་པ་བསྐྱོད་པ་བྱས་ནས་
སུ། །དེ་ནས་རྟིང་པ་ཡང་སྤྲད་དེ། །གར་གྱི་ཚུལ་ནི་དེ་ཉིད་ཀྱིས། །ཕྱོགས་བཞིར་ཡོངས་སུ་བསྐོར་བར་བྱ། །ཁྲོས་པས་དབུས་ཀྱི་གནས་སུ་ནི། །རྡོ་རྗེ་གོམ་པས་མྱུར་སོང་ལ། །རྡོ་རྗེ་ཐལ་མོ་སྦྱར་ནས་སུ། །གུང་མོས་སྲིན་ལག་འཁྱུད་བྱས་ལ། །གཉི་ག་ཁུ་ཚུར་བཅངས་
བྱས་ལ། །རྟིང་པ་སྤྲད་པའི་རྐང་སྟབས་ཀྱིས། །ས་ལ་བཞག་དང་བཏེག་བྱ་སྟེ། །གཡས་སུ་ཡོངས་སུ་བརྐྱང་བྱས་ལ། །བར་བུར་ཐམས་ཅད་བསལ་བར་བྱ། །མེ་མེ་ཞེས་ནི་བརྗོད་བྱས་ལ། །ནང་ན་གང་དག་ཅི་ཡོད་པ། །སྔགས་པས་ཐམས་ཅད་བསལ་བར་བྱ། །ཧཱུྃ་དང་
བཅས་ཤིང་ཕཊ་བཅས་པའི། །གསང་སྔགས་མཁས་པས་བརྗོད་པར་བྱ། །འོག་དང་ས་ཡི་སྟེང་ན་ནི། །བར་བུར་ཐམས་ཅད་ཞིར་འགྱུར་ཏེ། །ཀུན་དུ་བགེགས་ནི་མེད་གྱུར་ན། །སྔགས་པས་མཉམ་གཞག་ལས་རྣམས་བྱ། །དེ་ནས་སློབ་དཔོན་རྡོ་རྗེ་འཆང་། །རྡོ་རྗེ་བཞག་པ་
เล่ม ๘๗ · หน้า 133b
ལེགས་བསླབས་པས། །རྡོ་རྗེ་གར་ནི་རབ་བྱས་ལ། །ཚངས་པའི་རྐང་སྟབས་བྱས་ནས་སུ། །པདྨའི་ཐལ་མོ་སྦྱར་བྱས་ཏེ། །སྙིང་གའི་ཐད་ཀར་བསྐོར་བར་བྱ། །གར་བྱེད་ཚུལ་གྱིས་ལག་པ་གཉིས། །རྡོ་རྗེ་ཁུ་ཚུར་བཅངས་བར་བྱ། །གཡོན་པ་གཡོན་དུ་བརྐྱང་བར་བྱ། །
གཡས་པ་གཡས་སུ་བརྐྱང་བར་བྱ། །མཐུན་པའི་རྐང་སྟབས་བྱས་ནས་སུ། །ཧཱུཾ་ཞེས་བྱ་བའི་སྒྲ་བརྗོད་ལ། །སྔགས་པས་འཁོར་ལོ་བཞིན་དུ་བསྐོར། །རྡོ་རྗེ་གོམ་པས་མྱུར་སོང་ལ། །གཡས་བརྐྱང་གོམ་པའི་ཚུལ་གྱིས་ནི། །རྐང་པ་བཞག་པའི་ཚུལ་གྱིས་སུ། །དེ་ཉིད་
ཀྱིས་ནི་ཡང་བསྐོར་རོ། །ཧཱུཾ་ཞེས་བྱ་བའི་སྒྲ་ཕྱུང་ལ། །དེ་བཞིན་ཕྱོགས་བཞི་རྣམས་སུ་ཡང་། །རྡོ་རྗེ་ཁུ་ཚུར་བསྐོར་བས་ན། །བགེགས་རྣམས་ཐམས་ཅད་འདར་བར་འགྱུར། །རྡོ་རྗེ་བློ་དང་ལྡན་པ་ཡིས། །ས་བསྡུས་འདོར་བར་འདོད་ན་ནི། །གོམ་པ་བཞག་པའི་འགྲོས་ཀྱིས་སུ། །
མྱུར་དུ་གཡས་པ་བརྐྱང་བྱས་ལ། །གཅིག་ནི་རི་རབ་རྩེ་ལ་བཞག །ཅིག་ཤོས་ཏི་སེའི་རྩེ་མོར་བཞག །དེ་ལྟར་རྐང་སྟབས་བཞག་པ་ནི། །ཀུན་དུ་འདོར་བར་རབ་བྱེད་ཅིང་། །ས་འོག་ན་ནི་ལག་པ་གཡོན། །གཡས་པས་ཡི་སྟེང་ན་སྟེ། །ཨ་ལ་ལ་ཞེས་སྒྲ་འབྱིན་ཅིང་། །
འཇིག་རྟེན་ཁམས་ཀུན་འཕེན་བྱེད་ན། །བགེགས་རྣམས་གཞན་ལྟ་ཅི་ཞིག་སྨོས། །ལོག་འདྲེན་སྡང་བ་དྲག་པོ་རྣམས། །མི་ཡི་འཇིག་རྟེན་འདི་ནས་ནི། །གཞན་དུ་འཕེན་པ་ཅི་ཞིག་སྨོས། །ཅི་སྟེ་འཇིག་རྟེན་ཁམས་རྣམས་ཀྱང་། །ཀུན་ནས་ཚིག་པར་བྱེད་འདོད་ན། །རྐང་
སྟབས་ཚུལ་ནི་དེ་ཉིད་ཀྱིས། །ཕྱོགས་བཞི་དག་ཏུ་འཇུག་པར་འགྱུར། །རྡོ་རྗེའི་གོམ་པས་མྱུར་སོང་ལ། །གཡས་པ་བརྐྱང་བའི་སྟབས་ཚུལ་གྱིས། །ཉི་མ་བཅུ་གཉིས་ལྟ་བུར་ནི། །མེ་ལྕེ་ཕྲེང་ལྡན་བཟོད་དཀའ་བ། །རྐང་པ་གཡོན་པ་བརྟན་བྱས་ལ། །རྡོ་རྗེ་འཛིན་དེ་ལག་
པ་བསྒྲེང་། །ལུས་ནི་བཏུད་པར་བྱས་ནས་སུ། །རྐང་པ་གཡས་པ་བཏེག་བྱས་ལ། །སྔགས་པས་འཁོར་ལོ་བཞིན་དུ་བསྐོར། །རླུང་རྣམས་ཀུན་ཡང་སྡུད་བྱེད་ཅིང་། །ནམ་མཁའ་མེ་འདྲར་བསྒྱུར་ནས་སུ། །བསྲེག་པའི་བསྐལ་པ་ལྟ་བུར་འཇུག །ལག་ན་འཛིན་པའི་
เล่ม ๘๗ · หน้า 134a
རྡོ་རྗེ་ནི། །ཀུན་དུ་རི་རབ་འདྲར་བསམས་ལ། །ཧཱུྃ་ཞེས་བྱ་བའི་སྒྲས་གནོན་ཞིང་། །རྡོ་རྗེ་འོག་ཏུ་འཕངས་བྱས་ན། །རི་དང་ནགས་སུ་བཅས་པ་ཡི། །ས་རྣམས་ཐམས་ཅད་འཁྲུག་པར་འགྱུར། །དེ་ནས་ཐལ་བ་ཉིད་གྱུར་ཏེ། །མེར་ནི་ཤིང་བལ་བཅུག་པ་བཞིན། །སློབ་
དཔོན་རྡོ་རྗེ་འཆང་བ་པོས། །དེ་ནས་བསྡུ་བ་བརྩམ་བྱས་ཏེ། །རྐང་སྟབས་ཚུལ་ནི་དེ་ཉིད་དེ། །བྱེ་བྲག་ཏུ་ནི་ལག་པ་བསྒྲེང་། །རྡོ་རྗེ་གོམ་པས་མྱུར་སོང་ལ། །མཆོངས་པ་བསྐོར་བ་བྱས་ནས་སུ། །ཕྱག་རྒྱ་ཡི་ནི་སྟང་སྟབས་བྱ། །རྒྱབ་ནས་སྟང་སྟབས་ཚུལ་གྱིས་ནི། །དབུས་ཀྱི་
གནས་སུ་ཕྱིན་པར་བྱ། །དེ་བཞིན་ཕྱོགས་བཞི་རྣམས་སུ་ཡང་། །རྡོ་རྗེ་བསྣུན་པས་བརྡེག་པར་བྱ། །སྟང་སྟབས་ཚུལ་ནི་དེ་ཉིད་དང་། །སྔགས་པ་བློ་ལྡན་ལག་ཚུལ་གྱིས། །ས་རྣམས་ཐམས་ཅད་བླངས་བྱས་ལ། །དེ་ཉིད་དུ་ནི་གཞག་པར་བྱ། །ཀུན་ནས་བསྡུ་བར་བྱེད་ཅིང་ནི། །མཁས་
པས་གསང་སྔགས་བརྗོད་བྱས་ལ། །རྡོ་རྗེ་ཅན་གྱིས་བཤད་པ་བཞིན། །ས་རྣམས་ཀུན་དུ་གཞག་པར་བྱ། །རིམ་པ་ཡི་ནི་འདི་ཉིད་ཀྱིས། །མཁས་པ་ཐམས་ཅད་ཀུན་དུ་བཞག །དེ་ནས་སློབ་དཔོན་རྡོ་རྗེ་འཆང་། །རྡོ་རྗེ་ཞགས་པ་ལེགས་བསླབས་པས། །སྡང་བ་ལྷ་དང་ལྷ་
མིན་དང་། །མི་རྣམས་གཞག་བྱ་གདུལ་བར་བྱ། །བསམ་དབང་བཞིན་དུ་འབྱུང་བ་ཡི། །རྡོ་རྗེའི་ཡེ་ཤེས་ལེགས་བསླབས་པས། །འདུལ་བའི་ཚོགས་ནི་ཐ་དད་པ། །ཐམས་ཅད་རྣམ་པར་གདུལ་བར་བྱ། །གདུང་བས་འདུལ་བའི་འཇིག་རྟེན་ནི། །གདུང་བ་ཉིད་ཀྱིས་འགྲུབ་པར་
འགྱུར། །གཡས་དང་གཡོན་གྱི་ཚུལ་གྱིས་སུ། །དཔའ་བོ་ལྔ་པོ་ཀུན་དུ་བྱ། །མཐུན་པའི་རྐང་སྟབས་བྱས་ནས་སུ། །གཡས་བརྐྱང་སྟབས་ཀྱིས་གནོན་པར་བྱ། །རྐང་སྟབས་བཞག་པའི་ཚུལ་གྱིས་ནི། །འབེན་ལ་ལྟ་ཞིང་ལག་པས་གཏང་། །སྲིན་ལག་མཐེའུ་ཆུང་
སྤྲད་བྱས་ལ། །ལག་གཉིས་ལུ་གུ་རྒྱུད་དུ་བྱ། །གཡོན་པའི་གུང་མོ་མཐེབ་མཚུངས་ས་སྦྱར། །གཡས་པ་ཡི་ནི་མཛུབ་མོ་དེ། །བརྐྱང་བའི་ཚུལ་དུ་བྱས་པ་ནི། །གཞུ་དང་མདའ་ཞེས་བརྗོད་པ་ཡིན། །གུང་མོ་ཡི་ནི་རྒྱབ་ལོགས་སུ། །མཛུབ་མོ་མདའ་ཡི་ཚུལ་དུ་བཞག །གཡས་
เล่ม ๘๗ · หน้า 134b
བརྐྱང་སྟང་སྟབས་ཚུལ་གྱིས་སུ། །ཧཱུྃ་བཅས་བརྗོད་དེ་ཕོག་པར་བསྣུན། །གལ་ཏེ་ས་ཡི་འོག་གནས་སམ། །ཚངས་པའི་གནས་ན་གནས་གྱུར་ཏམ། །དྲག་པོས་བསྲུངས་པར་གྱུར་ཀྱང་རུང་། །རྡོ་རྗེ་འཕང་བར་བྱས་ནས་སུ། །རྡོ་རྗེ་མདའ་ཡིས་ཕོག་གྱུར་ན། །དེ་ནི་གསོན་པར་མི་
བསམ་མོ། །འཕང་བའི་སྟང་སྟབས་སོ། །དེ་ནས་སློབ་དཔོན་རྡོ་རྗེ་འཆང་། །ཐབས་ཤེས་པ་ལ་མཁས་གྱུར་ཅིང་། །འཕང་པའི་ཚུལ་དུ་ལེགས་བསླབས་པ། །སྡང་བའི་སེམས་ཅན་གདུལ་བར་བྱ། །དེ་ནས་སློབ་དཔོན་རྡོ་རྗེ་འཆང་། །རྡོ་རྗེ་ཞགས་པ་ལེགས་བསླབས་པས། །
སྲིད་པ་གསུམ་ལ་ཁྱབ་ལུས་ཀྱིས། །བགེགས་རྣམས་ཐམས་ཅད་གདུལ་བར་བྱ། །མཐུན་པའི་རྐང་སྟབས་བྱས་ནས་སུ། །རྐང་པ་བཞག་པའི་ཚུལ་གྱིས་ནི། །ལག་པ་གཡས་དང་གཡོན་པ་ཡིས། །ཐལ་མོ་ཁོང་སྟོང་སྦྱར་བར་བྱ། །དེ་ཡི་ཕྱག་རྒྱ་བཅིངས་ནས་སུ། །ཕྱོགས་
རྣམས་ཀུན་དུ་བསྐོར་བྱས་ན། །སྲིད་པ་གསུམ་ཡང་འགུགས་འགྱུར་ན། །ལོག་འདྲེན་བགེགས་རྣམས་སྨོས་ཅི་དགོས། །དགུག་པའི་རྡོ་རྗེའི་ཕྱག་རྒྱའོ། །དེ་ནས་སློབ་དཔོན་རྡོ་རྗེ་འཆང་། །མཐུན་པའི་རྐང་སྟབས་བྱས་ནས་སུ། །པདྨའི་ཐལ་མོ་སྦྱར་བྱས་ལ། །ཕྱོགས་
རྣམས་ཀུན་དུ་རྒྱས་པར་བྱ། །རྐང་སྟབས་བཞག་པའི་ཚུལ་གྱིས་སུ། །གནས་ནི་མྱུར་དུ་བཟུང་བྱས་ལ། །རྡོ་རྗེ་ཁུ་ཚུར་སྙིང་གར་བཞག །ཁྲོས་པས་ཧཱུྃ་གི་སྒྲ་བརྗོད་དེ། །རྒྱ་མཚོ་བཞི་པོའི་ཀླུ་རྣམས་ལ། །རྡོ་རྗེའི་ལག་པས་བསྣུན་པར་བྱ། །ཀླུ་སྐྲག་ཐལ་མོ་སྦྱར་བ་དག །རྒྱ་མཚོ་
ནས་ནི་འཐོན་པར་གྱུར། །གང་དག་ས་ཡི་འོག་གནས་པ། །ལྷ་མིན་སྲིན་པོ་གསང་བ་རྣམས། །བསྒོ་བའི་ལུང་ལ་བརྩོན་ཡིད་ཀྱིས། །ཅི་ཚོལ་ཅིག་ཅེས་འཁོད་པར་བྱེད། །རྡོ་རྗེ་འབར་བས་བདག་ཉིད་གཟིར། །གནོད་སྦྱིན་མོའམ་སྲིན་མོའམ། །ལྷ་མིན་མོའམ་ཀླུ་མོའམ། །
བཅུད་ཀྱིས་ལེན་ནམ་དངུལ་ཆུའམ། །རིན་ཆེན་རྣམས་དང་ནོར་བུ་རྒྱལ། །དཔལ་དང་ཕུན་སུམ་འདོད་ལྡན་ནམ། །ཐུགས་ལ་ཅི་དང་ཅི་བཞེད་པ། །བདག་ཅག་རྣམས་ལ་བཀའ་མྱུར་སྩོལ། །སྔགས་པས་གང་ཡང་རུང་བླངས་ལ། །གསང་བ་ཀུན་དུ་གཏད་བར་བྱ། །བསྒོ་
เล่ม ๘๗ · หน้า 135a
བའི་ལུང་དང་འགལ་བར་བྱེད། །ཅི་སྟེ་བསྒོ་ཡང་མི་འོང་ན། །རྐང་སྟབས་ཚུལ་ནི་དེ་ཉིད་ཀྱིས། །གཡོན་བརྐྱང་སྟབས་ཀྱིས་གནོན་པར་བྱ། །ལྷུན་པོ་ལ་ནི་རྐང་བཞག་སྟེ། །ལག་པས་དབྱུག་པའི་སྦྱོར་བ་ཡིས། །སྒྲ་སྒྲོག་ཅིང་ནི་ཐམས་ཅད་གནས། །ས་འོག་
ཐམས་ཅད་གནོན་པར་བྱ། །ཧ་ཧ་ཞེས་ནི་སྒྲ་འདོན་ཅིང་། །བསྒོ་བའི་ལུང་དང་འགལ་བྱེད་པ། །ཐམས་ཅད་ཀྱིས་ནི་བཟུང་ནས་སུ། །ཤིན་ཏུ་མྱུར་དུ་དབུག་པར་བྱེད། །སྔགས་པས་དེ་གཅིག་ཚར་བཅད་དེ། །ལྷག་མ་ཐམས་ཅད་གཏང་བར་བྱ། །བསྒོ་བའི་ལུང་ལ་དེ་བཞག་
ལ། །མཁས་པས་ལེགས་པར་བསླབ་པར་བྱ། །གསང་བ་སྲིན་པོ་ཐམས་ཅད་ལ། །དགྱེས་པའི་སེམས་ནི་ཡང་བསྐྱེད་དེ། །དེ་དག་དམ་ཚིག་བྱིན་ནས་ནི། །དེ་རྣམས་ཀུན་དུ་གཏང་བར་བྱ།། །།འཕགས་པ་ལག་ན་རྡོ་རྗེ་དབང་བསྐུར་བ། བམ་པོ་བཅུ་གཅིག་པ།
དེ་ནས་སློབ་དཔོན་རྡོ་རྗེ་འཆང་། །སྙིང་བརྩེ་སྙིང་རྗེའི་སེམས་ལྡན་པས། །མི་དང་མི་མིན་ལ་སོགས་པ། །ཤིན་ཏུ་གནོད་བྱེད་ལྷ་རྣམས་དང་། །ལྷ་མིན་གསང་བར་བཅས་རྣམས་དང་། །གཞན་ཡང་སྡང་བའི་གདོན་ལ་སོགས། །ནད་སྦྲུལ་དུག་ལ་སོགས་རྣམས་ཀྱིས། །སེམས་
ཅན་རྣམས་ལ་གནོད་བྱེད་ཅིང་། །དམ་ཚིག་ལ་ནི་མི་གནས་ཏེ། །རྒྱགས་པའི་ཡིད་དང་ལྡན་པ་དག །ནད་དང་མུ་གེ་ལ་སོགས་པས། །སེམས་ཅན་རྣམས་ལ་གནོད་བྱེད་དེ། །ཕ་རོལ་གནོད་བྱེད་མངོན་དགའ་བ། །དེ་དག་སྙིང་རྗེ་མེད་པ་དང་། །བསྟན་པ་ལས་ནི་འགལ་བྱེད་ཅིང་། །
ཤིན་ཏུ་རྒྱགས་པའི་ཤས་ཆེ་བ། །མཐོང་ནས་དེ་དག་ཚར་གཅད་ཕྱིར། །སྔགས་ལ་མཁས་པས་སྦྱར་བར་བྱ། །བདག་ལ་སྡིག་པར་འགྱུར་སྙམ་དུ། །བདག་ཉིད་ལས་ནི་མི་སེམས་ཤིང་། །བདག་ཉིད་ལམ་མིན་ཞུགས་གྱུར་ལ། །གཞན་དང་གཞན་ཡང་ཕུང་བྱེད་པ། །གཞན་
ལ་གནོད་པ་དེ་དག་ལ། །སྔགས་པས་བཟོད་པ་མི་བྱ་སྟེ། །སྐྲག་པར་བྱ་ཞིང་བཅིང་བར་བྱ། །གཏུབ་པར་བྱ་ཞིང་གསད་པར་བྱ། །དེ་ནས་སློབ་དཔོན་རྡོ་རྗེ་འཆང་། །རྡོ་རྗེ་ཞགས་པ་ལེགས་བསླབས་པས། །ནམ་མཁའ་གོ་སྐབས་མེད་བྱས་ཏེ། །རྡོ་རྗེ་དབྱིབས་སུ་བསྒྱུར་
เล่ม ๘๗ · หน้า 135b
ནས་སུ། །གུས་པས་བསྒྲིམས་བཅས་འཇོ་ཚུལ་དང་། །བཞིན་འཛུམ་རྒྱགས་དང་ལྡན་པ་ཡིས། །རྡོ་རྗེའི་གར་ནི་རབ་བྱས་ལ། །ལག་པ་བསྐྱོད་པའི་སྦྱོར་བ་ཡིས། །ཕྱོགས་རྣམས་ཀུན་དུ་གར་བྱ་ཞིང་། །དངོས་དང་མཐུན་པར་བཟུང་བྱས་ལ། །བསྒོམ་པ་ལ་ནི་སེམས་བཞག་ཅིང་། །
རྡོ་རྗེའི་རང་བཞིན་ལུས་སྲ་བས། །མི་མཐུན་རྐང་སྟབས་ཚུལ་གྱིས་ནི། །རྡོ་རྗེ་འཆང་བས་ལག་བསྒྲེང་སྟེ། །རྡོ་རྗེ་མིག་གིས་ཀུན་བལྟས་ལ། །སྲིད་པ་གསུམ་པོ་ཐམས་ཅད་གནོན། །དཔའ་བོའི་གནས་སུ་གནས་ནས་སུ། །རྐང་པ་གདེངས་པའི་ཚུལ་གྱིས་སུ། །ཧཱུྃ་བརྗོད་འཇིགས་
པ་འཇིགས་སུ་རུང་། །མིག་གཉིས་ཉི་མ་ཟླ་བ་སྟེ། །ཁ་ནི་རྒོད་མ་རྟ་ཡི་ཁ། །ལྟེ་བ་དགའ་བོ་ཉེ་དགའ་བོ། །ལྟོ་བ་རྒྱ་མཚོར་བསམ་པར་བྱ། །ལྷུན་པོ་དེ་ཡི་མགོ་བོར་བྱ། །དེ་བཞིན་ལག་པ་འཁོར་ཡུག་རི། །ས་ནི་རྐང་པ་གཉིས་ཡིན་ཏེ། །ནོར་རྒྱས་བུ་སྤྲུལ་གསང་བསྲེལ་ཡིན། །
རླུང་ནི་དེ་ཡི་རྣ་བ་གཉིས། །དེ་ཡི་སྐྲ་རྣམས་མེ་ཡིན་ཏེ། །ལྕེ་ནི་འཇིགས་པ་ཆེན་པོའི་གློག །ཨ་ལ་ལ་ཞེས་སྒྲ་ཆེན་ལྡན། །འབྲུག་སྒྲ་ཧཱུཾ་ཞེས་སྒྲ་ཕྱུང་བས། །ཕྱོགས་རྣམས་ཀུན་དུ་ཡོངས་སུ་བསྐོར། །རབ་ཏུ་བསྐུལ་བས་དེ་ནས་ནི། །རྡོ་རྗེའི་སྒྲ་ཡིས་བསྒྱེལ་གྱུར་ནས། །ཀླུ་དང་
དྲི་ཟ་སྲིན་པོ་དང་། །ལྷ་དང་ལྷ་མིན་སོགས་ཀུན་དོང་། །ཧཱུྃ་བརྗོད་པས་ནི་འཇིགས་གྱུར་ཞིང་། །འཆི་བར་འགྱུར་ཏེ་ཐེ་ཚོམ་མེད། །རྡོ་རྗེ་སྒྲ་ཡིས་ཚིག་འགྱུར་ཞིང་། །བློང་བར་གྱུར་ཅིང་དམན་པར་བལྟ། །རྡོ་རྗེ་རྣལ་འབྱོར་ཆེར་ལྡན་པ། །ག་ལ་བ་དེར་ཉེ་བར་དོང་། །རྡོ་རྗེ་ཆེན་པོས་བཀའ་
སྩོལ་ལ། །ལྷན་ཅད་དེ་ལྟར་མ་མཛད་ཅིག །དེ་ནས་དམ་ཚིག་བཞག་བྱས་ལ། །ལྷ་རྣམས་ཐམས་ཅད་གཏང་བར་བྱ། །རྡོ་རྗེ་འཇིགས་པ་གཏུམ་ཆེ་བ། །འཇིགས་པ་ཆེན་པོ་འཇིགས་བྱེད་པ། །འཇིགས་པར་བྱ་རྣམས་འཇིགས་བསྐྱེད་པ། །ཆེན་པོས་མཆོད་འོས་རྨད་བྱུང་བས། །
མི་དང་མི་མ་ཡིན་རྣམས་ལ། །འཇིགས་ཆེན་ལྟས་འབྱུང་ཆེ་འབྱུང་དང་། །ལྷ་དང་ཀླུ་དང་ཤ་ཟ་དང་། །གཟའ་དང་མ་མོ་བརྩེ་མེད་རྣམས། །ནད་དང་མུ་གེ་ལ་སོགས་དང་། །ཡུལ་འཁྲུགས་པ་དང་འཆི་བྱེད་དང་། །བདུད་རྣམས་དང་ནི་ལོག་འདྲེན་དང་། །སྲུལ་པོ་སྲིན་པོ་ལ་སོགས་
เล่ม ๘๗ · หน้า 136a
པའང་། །བདག་ཡུལ་གཞན་ཡུལ་ལས་བྱུང་བའི། །གནོད་པ་གཞན་ཡང་དུ་མ་རྣམས། །དེ་དག་རྣམ་པར་གཞིག་པའི་ཕྱིར། །རྡོ་རྗེ་འཇིགས་བྱེད་སྦྱར་བར་བྱ། །རྐང་པ་རྒྱས་པར་བྱ་ཚུལ་གྱིས། །ཧཱུྃ་ཞེས་བྱ་བའི་སྒྲ་བརྗོད་ན། །རྡོ་རྗེ་འཇིགས་པས་རབ་བསྐུལ་
བས། །ཐམས་ཅད་མྱུར་དུ་འཇིགས་པར་འགྱུར། །འདི་ནི་དོན་ཡོད་ཐོགས་པ་མེད། །རྡོ་རྗེ་འཇིགས་པ་མི་བཟད་པ། །སྔགས་པས་ཀུན་དུ་སྦྱོར་བྱས་ནས། །སྲིད་པ་གསུམ་ཡང་དབང་འགྱུར་ན། །མི་ཡི་འཇིག་རྟེན་མངག་གཞུག་པ། །བྱེད་པར་གྱུར་པ་སྨོས་ཅི་དགོས། །
ཚིག་གིས་ཅུང་ཟད་བསྐུལ་བས་ན། །གང་དག་ཤིན་ཏུ་དྲེགས་ལྡན་པས། །སྲིན་པོ་ལྷ་མིན་གསང་བ་པ། །དེ་དག་ཐམས་ཅད་དབང་དུ་འགྱུར། །རྡོ་རྗེ་ཡེ་ཤེས་ལེགས་བསླབས་པས། །དབང་ཕྱུག་ཀུན་དང་ཡོན་ཏན་ཐོབ། །ལྷ་རྣམས་ཀུན་གྱི་རྒྱལ་པོར་འགྱུར། །མཁས་
པས་དབང་ལ་འགོད་པར་བྱེད། །ཀླུ་ཡི་གནས་སུ་ཀླུ་རྣམས་དང་། །གནོད་སྦྱིན་རྒྱལ་དང་གནོད་སྦྱིན་དང་། །དྲི་ཟ་རྣམས་ཀྱི་བདག་པོར་འགྱུར། །ལྷ་མིན་གནས་སུ་ལྷ་མིན་དང་། །མཁའ་ལྡིང་གནས་སུ་མཁའ་ལྡིང་དང་། །མི་ཅི་རྣམས་ཀྱི་བདག་པོར་འགྱུར། །ལྷ་དང་ལྷ་མིན་
མིར་བཅས་པ། །བསྒོ་བའི་ལུང་བཞིན་གུས་སེམས་ཀྱིས། །རྡོ་རྗེ་འཇིགས་སྒྲ་ཆེར་ལྡན་པ། །དེ་ཡི་དབང་དུ་ཐམས་ཅད་འགྱུར། །རྡོ་རྗེ་འཇིགས་སུ་རུང་བ་ཡི། །སྒྲ་ཆེན་པོ་ཡི་ཕྱག་རྒྱའོ། །ཀུན་ལ་རྡོ་རྗེ་རབ་འཕྲུལ་བ། །དེ་ཡི་འོག་ཏུ་བརྗོད་པར་བྱ། །དཔལ་ལྡན་མཆོད་པ་བྱེད་
པ་པོས། །ཕྱོགས་བཅུ་དག་ན་བཞུགས་རྣམས་ཀྱི། །སངས་རྒྱས་རྣམ་པ་ཀུན་དུ་མཆོད། །སྲིད་པར་བདག་ཉིད་ཆེ་རྣམས་ཀྱི། །བསམ་ཡས་མཆོད་མིན་གང་ཡང་མེད། །འཛུམ་དང་བཅས་ཤིང་མིག་རྒྱས་པས། །གཡས་པ་དང་ནི་གཡོན་ཚུལ་གྱིས། །རྡོ་རྗེའི་ཐལ་མོ་
བཙུམ་བྱས་ལ། །ཕྱོགས་བཅུ་རྣམ་པ་ཀུན་དུ་འདུད། །དཔྲལ་བར་ཐལ་མོ་སྦྱར་བྱས་ལ། །ཕྱོགས་རྣམས་ཀུན་དུ་ཡོངས་བསྐོར་ཞིང་། །དུས་གསུམ་རྣམ་པར་བཞུགས་པ་ཡི། །སངས་རྒྱས་ཀུན་ལ་ཕྱག་བྱའོ། །བདེ་གཤེགས་ཀུན་ལ་ཕྱག་བྱ་མཆོད། །སེམས་ཅན་འདུལ་
เล่ม ๘๗ · หน้า 136b
བའི་མཆོད་པ་ནི། །བསམ་པ་ཇི་བཞིན་འཇུག་པ་སྟེ། །བསམ་པ་ཐ་དད་སེམས་ཅན་ཁམས། །བསམ་པ་སྣ་ཚོགས་རྣམ་པར་འཕེལ། །བསམ་པ་སྣ་ཚོགས་རྣམ་རྟོག་པ། །བསམ་པ་ཆགས་མེད་དེ་དང་དེས། །སྔགས་པས་རྣམ་པ་ཐམས་ཅད་དུ། །སེམས་ཅན་ཁམས་
མང་གདུལ་བར་བྱ། །དེ་ནས་སློབ་དཔོན་རྡོ་རྗེ་འཆང་། །ཀུན་ལ་ཤེས་པའི་ཆེར་བྱུང་བའི། །སྒེག་དང་དཔའ་དང་སྙིང་རྗེ་དང་། །རྒོད་དང་ཁྲོ་དང་འཇིགས་བྱེད་དང་། །འཇིགས་རུང་རྨད་བྱུང་ཞི་བ་རྣམས། །བསམ་པ་ཆགས་པས་རྣམ་དགུར་དགོངས། །དེ་ནས་སློབ་དཔོན་རྡོ་རྗེ་
འཆང་། །ཀུན་ལ་ཡེ་ཤེས་འབྱུང་བྱེད་པའི། །རྐང་པ་གཡས་དང་གཡོན་པ་ནི། །གོམ་པས་མཛེས་དང་ལྡན་པ་ཡིས། །ལག་པ་གཡས་དང་གཡོན་པ་ནི། །གར་བྱེད་པ་ཡི་ཚུལ་གྱིས་སུ། །མཛུབ་མོ་མཐེ་བོ་རྩེ་སྤྲད་ལ། །གཡོན་ཕྱོགས་སུ་ནི་བལྟ་བར་བྱ། །གཡས་
དང་གཡོན་པ་སྦྱར་ཚུལ་གྱིས། །འཛུམ་བཅས་རྒྱས་པ་གུས་བསྒྲིམས་ཤིང་། །ལག་ན་རྡོ་རྗེ་གསོར་ལྡན་པས། །རྗེས་སུ་ཆགས་པས་གར་བྱའོ། །ལྷ་རྣམས་ཀུན་དང་གསང་བ་དང་། །ལྷ་མ་ཡིན་དང་མི་རྣམས་དང་། །འདོད་ཁམས་དབང་ཕྱུག་བདག་པོ་དང་། །ས་གསུམ་
གནས་རྣམས་ཆགས་བྱེད་ཅིང་། །མིག་ཟུར་བགྲད་དང་ལྟ་བ་ཡིས། །དེ་དག་ཐམས་ཅད་དབང་དུ་འགྱུར། །ས་གསུམ་ཐམས་ཅད་འགུགས་བྱེད་ན། །ས་སྟེང་མི་རྣམས་སྨོས་ཅི་དགོས། །ལྷ་ཡི་རྒྱལ་པོ་སོགས་བཀུག་ནས། །སྡོམ་པ་ཅན་གྱི་དབང་འཇོག་སྟེ། །
ཐམས་ཅད་བསྒོ་བ་བཞིན་བྱེད་ཅིང་། །མངག་གཞུག་པར་ནི་རབ་ཏུ་དགོད། །རྡོ་རྗེ་ཆེར་ལྡན་ཀུན་ཤེས་ནས། །རྡོ་རྗེ་གླུ་ནི་བླང་བར་བྱ། །རྡོ་རྗེ་གླུ་ཡིས་བསྐུལ་བས་ན། །རྗེས་སུ་ཆགས་དང་ཆགས་ཆེན་འགྱུར། །རྡོ་རྗེ་སེམས་དཔར་མོས་པ་ཡིས། །གླུ་དང་གར་ནི་རབ་ཏུ་བྱ། །
བསམ་པ་ཆགས་པས་བརྒྱ་ལ་གྱུར་ནས། །སེམས་ཅན་ཁམས་ནི་རྗེས་ཆགས་བྱ། །རྡོ་རྗེའི་གླུ་ནི་འདི་ཡིན་ནོ། །ས་གསུམ་དག་ན་འབར་བའི་སྐུ་མངའ་རྗེས་སུ་ཆགས་མཛད་འདུལ་ལྡན་པས། །ཉི་མ་སྟོང་ཕྲག་བཅུ་བས་རྣོ་བའི་འོད་ཟེར་སྟོང་དང་ལྡན་པ་པོས། །རྣམ་མང་
เล่ม ๘๗ · หน้า 137a
ཆ་བྱད་གཟུགས་ཀྱིས་སེམས་ཅན་འགྲོ་བ་རྗེས་སུ་ཆགས་མཛད་པ། །རྡོ་རྗེ་སེམས་དཔའ་དབང་ཕྱུག་དམ་པ་མཛེས་པའི་སྟོབས་ལྡན་གར་མཛད་གསོལ། །ཥ་ཊ་བ་ལ་སོགས་པའི་གླུ། །རྡོ་རྗེ་གར་གྱིས་བྱ་བ་ན། །ས་གསུམ་ཐམས་ཅད་འགུགས་བྱེད་ན། །ས་
སྟེང་མི་རྣམས་སྨོས་ཅི་དགོས། །རྡོ་རྗེ་གར་གྱི་ཕྱག་རྒྱའོ། །དེ་ནས་སློབ་དཔོན་རྡོ་རྗེ་འཆང་། །རྡོ་རྗེ་ཉིད་དུ་ཡང་སྒྱུར་ཞིང་། །རྡོ་རྗེ་གར་གྱི་སྦྱོར་བ་ཡིས། །ཐམས་ཅད་ལ་ནི་གར་མཁན་བྱ། །གོམ་སྟབས་ཐམས་ཅད་མཛེས་ལྡན་པར། །གཡས་པ་དགུག་པའི་ཕྱག་རྒྱ་དང་། །གཡོན་
པས་བཏང་བའི་ཕྱག་རྒྱ་བྱ། །མིག་ཟུར་བགྲད་དང་ལྟ་བ་ཡིས། །ལག་པ་གཡས་དང་གཡོན་པ་ཡིས། །འཁྱུད་པར་བྱེད་པའི་སྦྱོར་ལྡན་པས། །ཚངས་པ་ལ་སོགས་ལྷ་རྣམས་ནི། །རྣམ་པ་ཀུན་དུ་དབང་བསྒྱུར་ཏེ། །མངག་གཞུག་པ་ནི་རབ་བྱེད་ཅིང་། །རྡོ་རྗེ་ཅན་གྱི་ལུང་ལ་
བརྩོན། །རྡོ་རྗེ་ཆགས་པས་ཆགས་བྱས་པས། །ཤིན་ཏུ་ཆགས་པས་དྲེགས་མྱོས་པའི། །ལྷ་དང་མི་དང་གསང་བ་པ། །བསྒྲུབ་བྱ་རྣམས་ཀྱང་སྔགས་པས་བསྒྲུབ། །རྡོ་རྗེའི་ལུས་ལ་ཡོངས་ཆགས་པས། །འདོད་ཆགས་ཐམས་ཅད་ཡོངས་སུ་འདོར། །རྡོ་རྗེའི་གླུ་སྙན་ལྡན་
པ་ཡིས། །སེམས་ཅན་ཁམས་རྣམས་ཆགས་པར་བྱ། །རྗེས་སུ་ཆགས་པས་ཆགས་པའི་ཕྱིར། །ལྷ་རྣམས་ཐམས་ཅད་དབང་དུ་འགྱུར། །རྡོ་རྗེའི་གླུ་ཡི་སྙན་པའི་སྒྲ་རྣམས་ཐམས་ཅད་དང་། །གཟོད་ནས་རང་བཞིན་དག་པས་རྡོ་རྗེ་སེམས་དཔའ་བསྐུལ། །སྒྱུ་མའི་
དངོས་པོ་རྣམ་མང་དང་། །སྙན་པའི་སྒྲ་ནི་དེ་ཉིད་དང་། །སངས་རྒྱས་རྣམ་འཕྲུལ་ཐམས་ཅད་ཀྱིས། །དབང་བསྒྱུར་དེ་ནས་སངས་རྒྱས་སྣང་། །འཇིག་རྟེན་ཐམས་ཅད་ཡོངས་སུ་འདྲེན། །བདུད་རྣམས་ཐམས་ཅད་ཡོངས་སུ་འདུལ། །ཤེས་པ་ཐམས་ཅད་ཡོངས་སུ་སྦྱོང་། །
སེམས་ཅན་ཐམས་ཅད་ཡོངས་སྨིན་བྱེད། །གླུ་འདི་རབ་ཏུ་ལེན་བྱེད་ཅིང་། །རྡོ་རྗེའི་གར་ནི་རབ་བྱས་ན། །ལྷ་དང་གང་དག་གནོད་སྦྱིན་དང་། །ལྷ་མིན་ཀླུར་བཅས་ཐམས་ཅད་འགྲུབ། །རྡོ་རྗེའི་གླུས་ནི་འདྲེན་པའོ། །དེ་ནས་སློབ་དཔོན་རྡོ་རྗེ་འཆང་། །རྡོ་རྗེ་སེམས་དཔར་ཡང་བསྒྱུར་
เล่ม ๘๗ · หน้า 137b
ཏེ། །དཔའ་ཆེན་བསམ་པར་ཀུན་ཆགས་པས། །དཔའ་བོས་ལྔ་པོ་བསྟན་པར་བྱ། །མཐུན་པའི་རྐང་སྟབས་བྱས་ནས་སུ། །གཡས་པ་བརྐྱང་བས་ཕ་རོལ་གནོན། །གཡོན་པ་བརྐྱང་བའི་ཚུལ་གྱིས་ནི། །སེང་གེ་བཞིན་དུ་བསྒྱིངས་བར་བྱ། །ཚངས་པའི་གནས་ལ་ཡང་གནས་
ཏེ། །རྡོ་རྗེ་སེ་གོལ་སྦྱོར་བ་དང་། །རྡོ་རྗེ་བསྣུན་སྟབས་ཚུལ་གྱིས་ནི། །ཚངས་པ་ལ་སོགས་བསྡུ་བར་བྱ། །རྡོ་རྗེའི་གླུ་ནི་ལེན་བྱེད་ཅིང་། །ས་གསུམ་འབར་བའི་སྐུ་ལྡན་པ། །ཉི་མ་བྱེ་བ་འབར་མཚུངས་པ། །ནམ་མཁའ་མཚུངས་ཤིང་མཉམ་མེད་པ། །ཆོས་དང་རྒྱལ་མཆོག་
རྣམས་ཀྱི་གཙོ། །སངས་རྒྱས་སྐུ་མཆོག་དེ་ལ་འདུད། །སོ་ཡིས་མཆུ་ནི་རབ་གནོན་ཅིང་། །ཀུན་ནས་མིག་ཅན་ཁྲོ་གཉེར་བཞིན། །རྐེད་པར་རྡོ་རྗེ་བརྟེན་ནས་སུ། །ཕྱོགས་བཅུ་ཀུན་དུ་བལྟ་བར་བྱ། །གཡས་པ་རྡོ་རྗེ་ཚུལ་གྱིས་ནི། །ཕྱོགས་རྣམས་ཀུན་དུ་རབ་བསྒྲགས་པས། །
ལྟ་འཇིགས་འོད་ཟེར་འབར་ལྡན་ཞིང་། །བསྲེག་པའི་བསྐལ་པ་གཞན་ལྟ་བུ། །གྲུབ་འགྱུར་རྡོ་རྗེ་མེ་འབར་བ། །འཇིགས་པ་ཆེ་ལྟར་བཟོད་དཀའ་བས། །བགེགས་རྣམས་ལ་ནི་སྦྱོར་བར་བྱ། །འཇིག་རྟེན་གསུམ་པོ་ཐལ་བར་རློག །ཉེས་པ་ཆེན་པོ་མ་ཡིན་ལ། །ཕྱག་རྒྱ་
འདི་ནི་སྦྱར་མི་བྱ། །ཐུན་མོང་མ་ཡིན་དགོས་པ་ནི། །ཐ་མའི་ཚེ་ན་སྦྱར་བར་བྱ། །རྡོ་རྗེ་འཆང་བས་བསྲུངས་གྱུར་ཀྱང་། །ཧཱུཾ་བརྗོད་པས་ནི་ཐལ་བར་རློག །འཇིག་པའི་མེ་ལྟར་བཟོད་དཀའ་བ། །རྡོ་རྗེ་ཆེན་པོའི་ཕྱག་རྒྱའོ། །དེ་ནས་སློབ་དཔོན་རྡོ་རྗེ་འཆང་། །རྡོ་རྗེའི་ཡེ་
ཤེས་ལེགས་བསླབས་པས། །སྙིང་གར་རྡོ་རྗེ་ཁུ་ཚུར་གཉིས། །བཞག་ནས་འདི་སྙམ་བསམ་པ་སྟེ། །སེམས་དམྱལ་ཡི་དགས་དུད་འགྲོ་དང་། །གང་གཞན་སྡུག་བསྔལ་སྡུག་བསྔལ་རྣམས། །ལག་པས་དྲང་བའི་སྦྱོར་བ་ཡིས། །བདེ་བ་ཀུན་གྱིས་བསྟབས་
པར་བྱ། །བཟའ་བཏུང་ལ་སོགས་ཆར་པ་དང་། །གོས་དང་རིན་ཆེན་རྒྱན་གྱི་ཆར། །དེ་དག་རྣམས་ལ་ཀུན་དུ་ད་བབ། །ཅི་བདེར་ཡང་དག་བསྟབས་པས་ན། །སྙིང་རྗེ་སྤྱན་རས་གཟིགས་དབང་བཞིན། །ཀུན་དུ་ཡོངས་སུ་རྒྱས་པར་བྱ། །སེམས་ཅན་ཀུན་གྱི་བླ་མེད་བདེ། །
เล่ม ๘๗ · หน้า 138a
ཐོབ་པར་ཤོག་ཅེས་བསམ་པར་བྱ། །སྙིང་རྗེའི་ཕྱག་རྒྱའོ། །དེ་ནས་སློབ་དཔོན་རྡོ་རྗེ་ཅན། །རྡོ་རྗེ་ཡེ་ཤེས་ལེགས་བསླབས་པས། །རྡོ་རྗེའི་ཕྱག་རྒྱ་བཅིང་བྱ་ཞིང་། །མཚོག་མར་ཐལ་མོ་སྦྱར་བར་བྱ། །བཏེག་དང་སྒེག་པའི་སྦྱོར་བ་ཡིས། །དེ་ནས་མྱུར་དུ་སྨད་པར་
བྱ། །རྡོ་རྗེ་བགད་ཆེན་ཕྱག་རྒྱ་འདི། །རྡོ་རྗེ་འཆང་ཉིད་བཞིན་དུ་དགོད། །བགད་པ་ཆེན་པོའི་ཕྱག་རྒྱའོ། །དེ་ནས་ལག་པ་གཡས་བཏེག་སྟེ། །གཡོན་པ་རྐེདཔའི་ཕྱོགས་སུ་བཞག །གཡོན་བརྐྱང་རྐང་སྟབས་བྱས་ནས་སུ། །དེ་ནས་ཐལ་མོ་ཡང་སྦྱར་ཏེ། །འཇིགས་རུང་སྒྲ་ནི་གྲག་བྱེད་
ཅིང་། །ཐལ་མོ་སྦྱར་བ་བཏུད་པར་བྱ། །འཇིགས་སུ་རུང་བ་ཆེན་པོའི་སྒྲའི་ཕྱག་རྒྱའོ། །གཡས་བརྐྱང་རྐང་པའི་སྟབས་བྱས་ཏེ། །ལག་པ་གཉིས་ཀྱིས་རྒྱལ་རོལ་དུ། །ཁུ་ཚུར་གཉིས་ནི་བཅང་བར་བྱ། །བགེགས་ཀུན་འདར་བར་བྱ་བའི་ཕྱིར། །མགུལ་པ་ངེས་པར་སྨད་བྱ་ཞིང་། །
སྒྲ་ཆེན་རབ་ཏུ་བརྗོད་བྱས་ན། །ཕྱག་རྒྱ་འདི་ཡི་སྦྱོར་བ་ཡིས། །བགེགས་རྣམས་ཐམས་ཅད་འདར་བར་འགྱུར། །མཐུན་པའི་རྐང་སྟབས་བྱས་ནས་སུ། །མཚོག་མར་ཐལ་མོ་སྦྱར་བྱས་ལ། །ལག་པ་གཉི་ག་ལྟོ་བར་གཞག །གཡས་བརྐྱང་རྐང་སྟབས་སྦྱོར་བ་ཡིས། །སྔགས་
པས་འཁོར་ལོ་བཞིན་དུ་བསྐོར། །ཧ་ཧ་ཞེས་པས་རབ་བརྒྱན་པ། །ཕྱག་རྒྱ་འདི་ནི་རྒྱ་ཆེན་ཏེ། །རི་རྣམས་ཕྱེ་མར་རློག་བྱེད་ན། །སྡང་བའི་སེམས་ཅན་ཅི་སྨོས་ཏེ། །སྔགས་པའི་འདོད་པ་བཞིན་དུ་འགྱུར། །མཐུན་པའི་རྐང་སྟབས་བྱས་ནས་སུ། །ལག་པ་གྱེན་དུ་བསྒྲེང་
བྱས་ལ། །གདུ་བུའི་ཕྱག་རྒྱ་བཅིང་བར་བྱ། །དེ་བཞིན་སོ་ཡིས་མ་མཆུ་མནན། །གཡོན་པ་བརྐྱང་བ་ལེགས་སྦྱར་བས། །བགེགས་རྣམས་ཀུན་ལ་བསྣུན་པར་བྱ། །ཕྱག་རྒྱ་འདི་ནི་སྒྲ་ཆེན་ཏེ། །བགེགས་རྣམས་ཐམས་ཅད་བཟློག་པ་ཡིན། །ཕྱག་རྒྱ་འདི་ནི་ལེགས་
སྦྱར་བས། །ཐམས་ཅད་བཟློག་པར་གྱུར་པ་ཡིན། །མཐུན་པའི་རྐང་སྟབས་བྱས་ནས་སུ། །ལག་གཉིས་བྲང་ལ་སྦྱར་བ་ལས། །ལག་པ་གཡས་པ་བསྒྲེང་བྱས་ཏེ། །རྐང་པ་གཡོན་བརྐྱང་ལེགས་སྦྱར་བས། །ཐོ་བ་ཡི་ནི་ཕྱག་རྒྱ་ཡིས། །རྡོ་རྗེ་འཆང་ཉིད་ཡིན་པའང་
เล่ม ๘๗ · หน้า 138b
བསྣུན། །རྡོ་རྗེ་ཐོ་བས་བསྣུན་པས་ན། །དེ་ཡི་མོད་ལ་ཕྱེ་མར་འགྱུར། །ཐོ་བའི་སྟང་སྟབས་སོ། །གཡས་དང་གཡོན་པའི་སྦྱོར་བ་ཡང་། །ལག་པ་མཆན་ཁུང་གཞུག་པར་བྱ། །ཉི་མ་འབར་འདྲའི་ལྟ་འདྲ་བས། །ཧུྃ་བརྗོད་བསྙེམས་པས་ཐུར་དུ་བལྟ། །ལག་ན་རྡོ་རྗེ་ཉིད་བསྒྱུར་
ཏེ། །འཇིགས་སུ་རུང་བའི་སྒྲ་ཕྱུང་ལ། །རྒྱ་མཚོ་མན་དཱར་བཅས་པ་ཡི། །ས་རྣམས་ཐམས་ཅད་གཡོ་བར་བྱ། །སོ་ཡིས་མཆུ་ནི་མནན་བྱ་ཞིང་། །རྡོ་རྗེ་རྐང་པས་བསྣུན་པར་བྱ། །ཕྱག་རྒྱ་འདི་ནི་ལེགས་སྦྱར་བས། །དེ་དག་ཐམས་ཅད་འདར་བར་འགྱུར། །གཡས་བརྐྱང་
རྐང་སྟབས་བྱས་ནས་སུ། །ལག་གཉིས་ཁུ་ཚུར་བཅང་ཚུལ་གྱིས། །གཡོན་པ་བྲང་ལ་སྦྱར་བར་བྱ། །གཡས་པ་གྱེན་དུ་བསྒྲེང་བྱས་ལ། །མཛུབ་མོ་མྱུར་དུ་བསྒྲེང་བྱས་ཤིང་། །རྡོ་རྗེའི་སྒྲ་ནི་དབྱུང་བྱས་ན། །གལ་ཏེ་སངས་རྒྱས་ཉིད་གྱུར་ཀྱང་། །བགེགས་རྣམས་ཐམས་
ཅད་བསྒྱེལ་བར་བྱ། །རྡོ་རྗེ་ཅན་གྱིས་བཤད་ཡིན་ནོ། །སྡང་བའི་སེམས་ཅན་སྨོས་ཅི་དགོས། །ཕྱག་རྒྱ་འདི་ནི་བསྐྱོད་པས་ན། །དེ་དག་ཐམས་ཅད་དུལ་བར་འགྱུར། །མཐུན་པའི་རྐང་སྟབས་བྱས་ནས་སུ། །གཡས་པ་གྱེན་དུ་བསྒྲེང་བྱས་ལ། །ལག་པ་ཐལ་མོ་བརྐྱང་
བར་བྱ། །གཡོན་པ་བྲང་དུ་སྦྱར་བར་བྱ། །ལག་པས་མྱུར་དུ་བསྣུན་སྟབས་ཀྱིས། །ཧཱུཾ་དང་བཅས་པས་ས་ལ་བསྣུན། །ནམ་མཁའ་མེ་འབར་འདྲ་བ་ཡི། །རལ་གྲིའི་ཕྱག་རྒྱ་བཅིང་བྱས་ལ། །བགེགས་རྣམས་ཐམས་ཅད་གཏུབ་པར་བྱ། །རྡོ་རྗེ་ཅན་གྱིས་བཤད་ཡིན་
ནོ། །མཐུན་པའི་རྐང་སྟབས་བྱས་ནས་སུ། །ལག་པ་འོག་ཏུ་བཅུག་ནས་ནི། །རྐང་པའི་དབུས་ནས་བཟུང་བྱས་ལ། །དེ་ནི་གྱེན་དུ་བཏེག་པར་བྱ། །ཧཱུཾ་ཞེས་རྡོ་རྗེ་སྒྲ་དང་ནི། །ཁྲོས་ཤིང་ཁྲོ་གཉེར་བཅས་པ་ཡིས། །རྐང་པ་དེ་ཡིས་ཡང་བསྣུན་ལ། །དེར་ནི་བགེགས་ནི་
བསམ་པར་བྱ། །རྡོ་རྗེའི་རྐང་པས་བསྣུན་བྱས་ན། །རི་རབ་རྣམས་ཀྱང་ཕྱེ་མར་རློག །རྡོ་རྗེ་རྐང་པའི་སྟང་སྟབས་སོ། །གཡས་བརྐྱང་རྐང་སྟབས་སྦྱོར་བ་ཡིས། །ལག་གཉིས་འཁོར་ལོའི་ཚུལ་དུ་བརྐྱང་། །སོ་ཡིས་མཆུ་མནན་ཁྲོས་པ་ཡིས། །ཀུན་དུ་འཁོར་ལོ་
เล่ม ๘๗ · หน้า 139a
འཕང་བར་བྱ། །ཕྱོགས་རྣམས་ཀུན་ན་གནས་པ་ཡི། །སངས་རྒྱས་ཞིང་རྣམས་གཞིག་པར་འགྱུར། །ཞིག་པར་འགྱུར་བའི་ཞིང་རྣམས་ནས། །རྒྱལ་བ་དམ་པ་རྣམས་ཀྱང་འབྱོན། །བྱང་ཆུབ་སེམས་དཔའ་རྫུ་འཕྲུལ་ཆེ། །གང་གཞན་དབང་ནི་ཐོབ་འགྱུར་ར་རྣམས། །བློང་
ཞེས་གྱུར་ནས་བློ་ལྡན་པ། །ལག་ན་རྡོ་རྗེའི་གན་དུ་དོང་། །སྲོག་ཟད་ན་ནི་མི་རུང་གིས། །བུ་གཅིག་ངེད་ཀྱིས་ཅི་ཞིག་བྱ། །ཁྱོད་ནི་ཇི་ལྟར་འདོད་པ་བཞིན། །ངེད་ཀྱིས་མྱུར་དུ་སྒྲུབ་བོ་ཞེས། །རྡོ་རྗེ་སེམས་དཔའ་བློ་ལྡན་ལ། །ལུང་ནི་ཡོངས་སུ་ནོད་པར་མཛད། །བསྐལ་པ་མེ་ལྟར་གྱུར་
པ་ཡིས། །གཡས་བརྐྱང་སྟང་སྟབས་བྱས་ནས་སུ། །འབར་བའི་ཕྱག་རྒྱ་ལེགས་སྦྱར་བས། །ས་གསུམ་ཐམས་ཅད་འབར་བར་བྱ། །ས་གསུམ་འབར་བར་མཐོང་གྱུར་ནས། །སྔགས་པ་རྣམས་ལ་རྟག་འཚེ་བ། །བགེགས་བྱེད་མ་རུངས་ཆེན་པོ་པ། །སྲིན་པོ་སྡང་བ་
རྣམས་སྐྲག་གོ། །ཕྱག་རྒྱ་འདི་འདྲ་མཐོང་གྱུར་ནས། །དེ་ནས་དེ་དག་ཞི་བར་འགྱུར། །མཐུན་པའི་རྐང་སྟབས་བྱས་ནས་སུ། །དེ་ཚེ་ངེས་པར་བསྣུན་བླངས་ལ། །སྔགས་པས་གྱེན་དུ་འཕང་བར་བྱ། །དེ་ཚེ་སོས་ནི་མཆུ་མནན་ལ། །མྱུར་དུ་གོམ་པ་གཅིག་བོར་ཏེ། །ངེས་པར་
བསྣུན་པས་བསྣུན་དེ་ཚེ། །སྲིན་པོ་སྡང་བ་བགེགས་བྱེད་པ། །དེ་དག་ཐམས་ཅད་ཕྱེ་མར་འགྱུར། །རྡོ་རྗེ་ངེས་བསྣུན་ཕྱག་རྒྱ་ཡིས། །དེ་དག་ཐམས་ཅད་བཟློག་པར་བྱ། །དབང་ཆེན་གནས་ལ་གནས་ནས་སུ། །ལག་པ་གཉིས་ནི་བསྒྲེང་བྱས་ལ། །ལྷུན་པོའི་རྒྱལ་པོ་བླངས་ནས་སུ། །
ལག་པ་གཉིས་སུ་དེ་བཞག་ནས། །སྔགས་པ་ལ་ནི་བགེགས་བྱེད་པ། །སྡང་བའི་སེམས་ཅན་རྣམས་ལ་བསྣུན། །བསྣུན་པས་རྣམ་པར་ཕུང་འགྱུར་ཅིང་། །འཆི་བར་འགྱུར་ཏེ་ཐེ་ཚོམ་མེད། །རྣལ་འབྱོར་གཞོལ་བའི་སྔགས་པ་ལ། །གང་ཚེ་བགེགས་ཤིག་བགེགས་བྱེད་ན། །དེ་ཚེ་
སྔགས་པ་སྟོབས་ཆེན་གྱིས། །ཕྱག་རྒྱ་འདི་ལ་སྦྱར་བར་བྱ། །ཕྱག་རྒྱ་འདི་ལ་རབ་སྦྱར་བ། །མཐོང་ནས་དེ་དག་འདར་བར་འགྱུར། །དེ་ནས་སློབ་དཔོན་རྡོ་རྗེ་འཆང་། །རྡོ་རྗེ་ཡེ་ཤེས་ལེགས་བསླབས་པས། །རྒྱལ་བ་ཀུན་ལ་ཕྱག་བྱས་ནས། །ཅོད་པན་སྟབས་ཀྱི་ཐབས་བཤད་དོ། །སྔགས་
เล่ม ๘๗ · หน้า 139b
པས་ཤར་ཕྱོགས་ཁ་བལྟས་ལ། །ལག་པ་གཡས་པ་མཚོག་མར་བཞག །གཡོན་པ་རྐེད་པའི་ཕྱོགས་སུ་བཞག །ཧཱུྃ་ཞེས་བྱ་བའི་སྒྲ་ཕྱུང་ལ། །འབྲུག་སྒྲ་དལ་འདྲའི་ཕྱག་རྒྱ་ཡིས། །ཕྱོགས་རྣམས་ཀུན་དུ་བསྐོར་བར་བྱ། །གཡས་བརྐྱང་བ་ཡི་ཚུལ་གྱིས་ཀྱང་། །དང་པའི་རྩལ་གྱི་སྦྱོར་
བ་ཡིས། །ལག་པ་གཡས་པ་གདེངས་བྱས་ན། །རྒྱ་མཚོ་རྣམས་ཀྱང་བཏེག་པར་འགྱུར། །ངང་པའི་རྩལ་གྱི་ཕྱག་རྒྱའོ། །རྐང་པ་གཡས་པ་བཏེག་ནས་སུ། །ལག་པ་གཉིས་ནི་སར་བཙུགས་ལ། །ཨ་ལ་ལ་ཞེས་རྣམ་བརྒྱན་པས། །ས་གསུམ་ཐམས་ཅད་བཏེག་བྱས་ན། །རྒྱ་མཚོར་
བཅས་པའི་རི་རབ་ཀྱང་། །ཐམས་ཅད་ཤིན་ཏུ་བཏེག་པར་འགྱུར། །མན་དཱ་ར་དང་ཏི་སེ་དང་། །གཞན་ཡང་གང་དག་རི་རྣམས་ཀྱང་། །ཧ་ལ་ཧ་ལའི་ཕྱག་རྒྱ་ཡིས། །བསྣུན་པ་དེ་དག་སླར་མི་འཆགས། །གཡས་དང་གཡོན་པའི་སྦྱོར་བ་ཡང་། །ལག་པ་གཉིས་ནི་ལྟོ་བར་བཞག །ཧཱུཾ་
རྗོད་སྙེམས་པས་མར་བལྟས་ཏེ། །སོ་ཡིས་མཆུ་ནི་མནན་བྱས་ལ། །རྡོ་རྗེ་ཅོད་པན་ཕྱག་རྒྱ་ཡིས། །བགེགས་རྣམས་ཐམས་ཅད་བཟའ་བར་བྱ། །གཡོན་པ་བརྐྱང་བའི་སྦྱོར་བ་ཡིས། །དེ་ཡི་ཚེ་ན་གཡོན་བཏེག་སྟེ། །ཁྲོས་དང་བཅས་པས་རྐང་བཞག་པས། །ས་གསུམ་ཐམས་ཅད་དྲང་བར་བྱ། །
དྲང་བའི་ཅོད་པན་གྱི་ཕྱག་རྒྱའོ། །མཐུན་པའི་རྐང་སྟབས་བྱས་ནས་སུ། །ལག་པ་གཉིས་ནི་བཏེག་བྱས་ལ། །བགེགས་རྣམས་ཐམས་ཅད་འཆིང་བྱེད་ཅིང་། །འཁོར་ལོ་བཞིན་དུ་ཕྱོགས་སུ་བསྐོར། །ཕྱག་རྒྱ་འདི་ལ་ལེགས་སྦྱར་བས། །དེ་དག་བཅིངས་དང་གཟིར་བར་འགྱུར། །བགེགས་
རྣམས་ཐམས་ཅད་སེལ་བར་བྱེད། །རྡོ་རྗེ་ཅན་ནི་ཉིད་ཀྱིས་བཤད། །བགེགས་སྐྲག་པར་བྱེད་པའི་ཕྱག་རྒྱའོ། །རྣལ་འབྱོར་སྟན་ལ་འདུག་ནས་སུ། །རྐང་པ་གཡས་པ་བཏེག་ནས་ནི། །ལག་གཉིས་འཁོར་ལོའི་ཚུལ་དུ་བྱ། །རྐང་པ་གཅིག་ནི་ཡོངས་སུ་བསྐོར། །འཁོར་ལོ་ཅོད་པན་ཕྱག་རྒྱ་ཡིས། །
བགེགས་རྣམས་ཐམས་ཅད་བསྒྱེལ་བར་བྱ། །མཐུན་པའི་རྐང་སྟབས་བྱས་ནས་སུ། །མེ་ཏོག་ཐལ་མོ་སྦྱར་ཚུལ་གྱིས། །དེ་ཡི་ཚེ་ནས་ལ་བཞག །དེ་ནས་མྱུར་དུ་ཡང་བཏེག་གོ། །འདིས་མཆོད་པས་ན་སྔགས་པ་ལ། །ཐམས་ཅད་བགེགས་བྱེད་མི་འགྱུར་རོ། །མཆོད་པའི་ཅོད་པན་གྱི་ཕྱག་རྒྱའོ། །
เล่ม ๘๗ · หน้า 140a
དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་སྐྲག་པར་བྱེད་པ་ཞེས་བྱ་བའི་སྟང་སྟབས་ཡོད་དེ། ང་བྱང་ཆུབ་སེམས་དཔར་གྱུར་པ་ན། བསྐལ་པ་དཔག་ཏུ་མེད་པར་གྱུར་པ་དེའི་ཚེ་དེའི་དུས་ན། བཅོམ་
ལྡན་འདས་དེ་བཞིན་གཤེགས་པ་སངས་རྒྱས་རྒྱན་གྱི་དབྱངས་ལས་ངས་ཐོས་ཀྱིས། དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དངངས་ཁྱོད་ལ་བཤད་དོ། །དེ་ཡིས་སྐྲག་པར་བྱས་ནས་བགེགས། །ལོག་འདྲེན་ཐམས་ཅད་གདུངས་པར་འགྱུར། །ཕྱོགས་རྣམས་ཀུན་དུ་འབྲོས་བྱེད་ཅིང་། །
འཆི་བར་གྱུར་ཏེ་ཐེ་ཚོམ་མེད། །ལག་གཉིས་ཕན་ཚུན་བསྣོལ་ནས་སུ། །གཡོན་པ་བརྐྱང་བར་རབ་སྦྱར་ཏེ། །ཕྱོགས་རྣམས་ཀུན་དུ་བསྐོར་བར་བྱ། །དེ་ནས་རྐང་པས་ཡང་མནན་ནོ། །སྐྲག་བྱེད་འདི་ནི་སྐྲག་པ་ཆེ། །བགེགས་རྣམས་ཐམས་ཅད་བཟློག་པ་སྟེ། །སྐྲག་པས་རྣམ་པར་ཕུང་འགྱུར་
ཞིང་། །འཆི་བར་གྱུར་ཏེ་ཐེ་ཚོམ་མེད། །དེ་ནས་རྐང་པའི་ཚུལ་གྱིས་ཀྱང་། །མིག་ནི་ཐུར་དུ་བལྟ་བྱས་ལ། །ལག་པ་གཡས་པ་བསྒྲེང་ནས་ནི། །གཡོན་པ་བྲང་ལ་བཅར་བྱས་ཏེ། །ལག་པ་ས་ལ་བརྡབས་ནས་ནི། །རྡོ་རྗེའི་ཐལ་མོས་བསྣུན་པར་བྱ། །རྡོ་རྗེ་ཐལ་མོའི་སྟང་སྟབས་སོ། །རྣལ་
འབྱོར་སྟན་ལ་ཡང་འདུག་སྟེ། །མཚོག་མར་ཐལ་མོ་སྦྱར་བྱས་ལ། །རྐང་པ་གཡས་པ་བཏེག་ནས་སུ། །འཁོར་ལོ་བཞིན་དུ་ཡོངས་སུ་བསྐོར། །འདི་ནི་རླུང་འཆིང་ཆེན་པོ་སྟེ། །སྔོན་གྱི་རྒྱལ་བ་རྣམས་ཀྱིས་གསུངས། །གལ་ཏེ་རྣམ་འཐོར་རླུང་བྱུང་ཡང་། །དེ་ཡང་མི་གཡོ་འདུག་པར་
འགྱུར། །རླུང་འཆིང་བ་ཡི་སྟང་སྟབས་སོ། །གར་གྱི་ཚུལ་གྱིས་ལེགས་བསླབས་པས། །རྐང་པ་སྤོ་བར་བྱས་པས་ཡང་། །ལག་པ་ཐུར་དུ་སྨད་བྱས་ལ། །ལག་གཉིས་མཐེ་བོ་སྲིན་ལག་སྤྲད། །གཡོན་པ་བརྐྱང་བ་ལེགས་སྦྱར་ཏེ། །ལག་པ་གཡས་པས་གར་བྱའོ། །གར་གྱིས་
བགེགས་རྣམས་ཐམས་ཅད་ནི། །ཤིན་ཏུ་དགའ་བ་སྐྱེ་བར་འགྱུར། །དགའ་བས་སྔགས་པ་དེ་ལ་ནི། །དེ་དག་ཕྱིན་ཅད་བགེགས་མི་བྱེད། །མཐུན་པའི་རྐང་སྟབས་བྱས་ནས་སུ། །ལག་པ་གཡས་པ་བསྒྲེང་བྱ་སྟེ། །གཡོན་པ་རལ་གྲིའི་ཚུལ་བྱས་ལ། །གཉི་ག་གཅིག་ཏུ་སྦྱར་བར་བྱ། །གལ་
ที่มาและสัญญาอนุญาต
ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด