འཕགས་པ་ལག་ན་རྡོ་རྗེ་དབང་བསྐུར་བའི་རྒྱུད་ཆེན་པོ
ชื่อสันสกฤต (อักษรทิเบต ตามตัวบท) ཨཱརྱ་བཛྲ་པཱ་ཎི་ཨ་བྷི་ཥེ་ཀ་མ་ཧཱ་ཏནྟྲ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๘๗ · หน้า 140b
ཏེ་རྡོ་རྗེ་འཆང་གྱུར་ཀྱང་། །བགེགས་རྣམས་ཐམས་ཅད་དྲང་བར་བྱ། །ཀུན་ནས་ཤིན་ཏུ་དྲངས་ནས་ཀྱང་། །དེ་ནས་ཕྱག་རྒྱ་གཏང་བར་བྱ། །རྡོ་རྗེའི་ཞགས་པས་བཅིང་བྱས་ན། །གནོད་པར་གྱུར་པས་ཀུན་དུ་ཡང་། །ཨ་ལ་ལ་ཞེས་སྒྲ་འབྱིན་ཅིང་། །སེམས་ནི་བློང་ཞེས་གྱུར་པ་ཡིས། །
བློ་ལྡན་ལག་ན་རྡོ་རྗེ་ལ། །ལུང་ནི་ཡོངས་སུ་ནོད་པར་བྱེད། །ཕྱིན་ཅད་བགེགས་ནི་མ་བྱེད་ཅེས། །ལག་ན་རྡོ་རྗེས་ལུང་བསྒོའོ། །རྡོ་རྗེས་གཟིར་བའི་ཕྱག་རྒྱའོ། །སྔགས་པ་ཅི་ལྟར་འདོད་པ་བཞིན། །དེ་ནས་སྙིང་རྗེ་ཡང་བསྐྱེད་དེ། །སྔགས་པས་མཉམ་གཞག་ས་ལ་ནི། །མེ་ཏོག་ཐལ་མོ་སྦྱར་
ནས་སུ། །དེ་ཡི་ཚེ་ན་དེ་དག་ལ། །གང་ཚེ་སྔགས་པ་མཉམ་གཞག་སྟེ། །ཁྱེད་ཅག་བགེགས་ནི་མ་བྱེད་པར། །གནས་སུ་དེང་ཞེས་བརྗོད་པར་བྱ། །གཡས་བརྐྱང་སྟང་སྟབས་བྱས་ནས་སུ། །ལག་པ་གྱེན་དུ་བསྒྲེང་བར་བྱ། །གཡས་དང་གཡོན་པའི་ཚུལ་གྱིས་ཀྱང་། །ཁུ་ཚུར་
མཆན་ཁུང་གཉིས་སུ་གཞག །ཧཱུཾ་ཞེས་བྱ་བའི་སྒྲ་ལྡན་པ། །སྔགས་པ་དྲག་པོའི་ལས་བྱེད་པས། །ཕྱོགས་རྣམས་ཐམས་ཅད་ཀུན་ནས་ཀྱང་། །རྡོ་རྗེ་གཟིར་བས་གཟིར་བར་བྱ། །གཞན་ཡང་གང་དག་ལོག་འདྲེན་བགེགས། །སྲིན་པོ་གང་དག་གྲགས་པ་དང་། །རྒོད་མ་རྟ་ཡི་ཁ་
གདངས་པར། །དེ་དག་ཐམས་ཅད་གཟིར་གྱུར་ཅིག །རྡོ་རྗེ་གཟིར་བའི་ཕྱག་རྒྱ་ཡིས། །གཟིར་ནས་དེ་དག་ལྷགས་གྱུར་ཏེ། །ཤིན་ཏུ་མི་བཟད་འདར་བྱེད་ཅིང་། །སྲོག་ཟད་གྱུར་ན་མི་རུང་གིས། །ཅི་འཚལ་བཀའ་ནི་མྱུར་གསོལ་ཅེས། །བསྒོ་བའི་ལུང་ནི་ནད་པར་བྱེད། །སྔགས་པས་ཅི་
འདོད་ལུང་བཞིན་དུ། །གལ་ཏེ་ལུང་ནི་ནོད་བྱེད་ན། །དེ་ལྟ་ན་ནི་ཐར་བར་འགྱུར། །གཞན་དུ་ན་ནི་ནམ་ཡང་མིན། །ཤིན་ཏུ་མི་བཟད་གཟིར་བས་ན། །ཁྱོད་ནི་ཅི་བཞེད་དེ་བཞིན་དུ། །བགྱིད་ཀྱིས་བཀའ་ལུང་སྩོལ་ཅིག་ཅེས། །དེ་ཚེ་དེ་དག་དེ་སྐད་སྨྲ། །མཚོག་མར་རྡོ་རྗེ་ཐལ་བཞག་ནས། །དེ་ནས་
དེ་དག་དམ་ཚིག་སྦྱིན། །ས་ལ་བགེགས་ཀྱི་གཟུགས་བྲིས་ལ། །གཡས་པ་བརྐྱང་བས་མནན་ནས་སུ། །རྡོ་རྗེ་རལ་གྲིའི་ཕྱག་རྒྱ་ཡིས། །བགེགས་རྣམས་ཐམས་ཅད་གཏུབ་པར་བྱ། །གཏུབ་པར་བྱས་པས་དེ་དག་ཀུན། །དེ་ལ་སྐྱབས་སུ་འགྲོ་བར་བྱེད། །སྙིང་རྗེར་ལྡན་པའི་སེམས་ཀྱིས་སུ། །དེ་
เล่ม ๘๗ · หน้า 141a
ནས་ཕྱག་རྒྱ་གཏང་བར་བྱ། །སྙིང་རྗེའི་སེམས་ཀྱིས་དེ་དག་ལ། །མ་འཇིགས་ཤིག་ཅེས་སྨྲ་བར་བྱ། །སྔགས་པས་དེ་ཡི་འདོད་པ་བཞིན། །དེ་ནས་དེ་དག་རང་གནས་འདོད། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་དང་ལྡན་པའི་འཁོར་ལ་བཀའ་སྩལ་པ།
རིགས་ཀྱི་བུ་དག་ཕྱག་རྒྱ་གསུམ་ཡོད་དེ། གང་ངས་བསྐལ་པ་དགུ་བཅུ་རྩ་གཅིག་ཏུ་བྱང་ཆུབ་སེམས་དཔའི་སྤྱད་པ་སྤྱོད་པ་དེའི་ཚེ། བཅོམ་ལྡན་འདས་དེ་བཞིན་གཤེགས་པ་སྤྱོད་པའི་རྒྱན་གྱི་སྙིང་པོ་ལས་ཕྱག་རྒྱ་གསུམ་ཐོབ་སྟེ། བསྐལ་པ་དུ་མར་དེ་བསྟན་པ་ཙམ་གྱིས་བགེགས་རྣམས་ཀྱིས་ང་ལ་མ་གཙེས་
ཀྱིས་སེམས་རྩེ་གཅིག་ཏུ་བསྒྲིམས་ལ་དེ་ཉོན་ཅིག །གཡས་བརྐྱང་རྐང་སྟབས་བྱས་ནས་སུ། །ལག་པ་གཡོན་པ་སྙིང་གར་བཞག །གཡས་པ་གར་དང་བཅས་པ་ཡིས། །མཚོག་མར་ལེགས་པར་གཞག་པར་བྱ། །བགེགས་རྣམས་རྟག་ཏུ་གཞིག་པ་ཡི། །དམ་ཚིག་འདི་ནི་བརྗོད་པ་ཡིན། །
འདི་ནི་བསྟན་པ་ཙམ་གྱིས་ཀྱང་། །འབྲོས་པར་འགྱུར་ཏེ་ཐེ་ཙོམ་མེད། །ཕྱིར་ཟློག་པ་ནི་ཡང་བྱས་ལ། །ས་ལ་ལག་པ་བརྡབ་པར་བྱ། །ལག་པ་གཉིས་ནི་བཏེག་ནས་སུ། །དེ་ཚེ་མཁུར་བ་བུད་པར་བྱ། །རྡོ་རྗེའི་ཕྱག་རྒྱ་བཅིང་བས་ན། །དེ་ཚེ་བགེགས་རྣམས་བཅོམ་པར་འགྱུར། །རྡོ་རྗེ་ཅན་ནི་ཉིད་
གྱུར་ཀྱང་། །རྡོ་རྗེའི་ཕྱག་རྒྱས་བཅོམ་འགྱུར་ན། །མཐོང་བ་ཙམ་གྱིས་བགེགས་རྣམས་ཀུན། །ཕུང་བར་གྱུར་པ་སྨོས་ཅི་དགོས། །སྔགས་པ་ཤར་ཕྱོགས་བལྟས་འདུག་ལ། །ལག་པ་གཡས་པ་དཀུར་བརྟེན་ཏེ། །གཡོན་པ་བརྐྱང་བ་ལེགས་བྱས་ལ། །གཡོན་པས་ཐམས་ཅད་དགུག་
པར་བྱ། །ས་བཅུར་གནས་པ་ཀུན་ཀྱང་དགུག །ཐམས་ཅད་ནས་ནི་བཀུག་ནས་སུ། རྡོ་རྗེའི་ཕྱག་རྒྱས་བསྣུན་པར་བྱ། །རྡོ་རྗེའི་ཕྱག་རྒྱས་བསྣུན་པས་ན། །དེ་ཡི་མོད་ལ་ཕྱེ་མར་འགྱུར། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་བཀའ་སྩལ་པ།
ལག་ན་རྡོ་རྗེ་ངའི་སློབ་མ་རྣམས་མ་གཏོགས་པར་ཁྱོད་ཀྱིས་སུ་ལ་བསྙད་པར་མི་བྱའོ། །དེ་ཅིའི་ཕྱིར་ཞེ་ན། སེམས་ཅན་མ་དད་པ་དེ་དག་ནི་ཚུལ་འདི་ལ་ཡིད་མི་ཆེས་ཤིང་དེ་དག་འདི་སྐད་དུ། འདི་ནི་སངས་རྒྱས་ཀྱིས་གསུངས་པ་མ་ཡིན་ནོ་ཞེས་སྨྲ་བར་འགྱུར་བས། དེ་དག་གི་རྣ་ལམ་དུ་ཡང་བསྒྲག་པར་མི་བྱ་
เล่ม ๘๗ · หน้า 141b
ན་ཕྱག་རྒྱ་ལྟ་ཅི་སྨོས། གསང་བ་པའི་བདག་པོ་དེ་ལ་སློབ་དཔོན་གྱིས་སློབ་མ་རྣམས་ཀྱི་མཚན་ཉིད་ཤེས་ནས་སྦྱིན་པར་བྱའི་གཞན་དུ་ནི་མ་ཡིན་ནོ། །དེ་ནས་ལག་ན་རྡོ་རྗེས་བཅོམ་ལྡན་འདས་ཀྱི་ཞབས་ལ་གཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དག་
སློབ་དཔོན་ལ་བརྙས་པར་བགྱིད་པ་དེ་དག་གི་རྣམ་པར་སྨིན་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ལྷ་དང་བཅས་པའི་འཇིག་རྟེན་སྐྲག་པར་འགྱུར་གྱིས་དེ་སྐད་མ་སྨྲ་ཤིག །གསང་བ་པའི་བདག་པོ་འོན་ཀྱང་ཅུང་ཞིག་བརྗོད་པར་བྱའི། དཔའ་བོ་བསྒྲིམས་ཏེ་
དེ་ཉོན་ཅིག །མཚམས་མེད་ལ་སོགས་མི་བཟད་པ། །དམྱལ་བ་གང་དག་ངས་བཤད་པ། །དེ་རྣམས་ཀྱི་ནི་གནས་སུ་བརྗོད། །དེར་ནི་བསྐལ་པ་མཐའ་ཡས་སོ། །དེ་ལྟ་བས་ན་རྣམ་ཀུན་དུ། །དེ་ལ་ནམ་ཡང་བརྙས་མི་བྱ། །གསང་བ་པའི་བདག་པོ་སློབ་དཔོན་ལ་སློབ་མས་ཇི་ལྟར་
བལྟ་བར་བྱ་ཞེ་ན། སངས་རྒྱས་བཅོམ་ལྡན་འདས་ལ་ཇི་ལྟ་བ་བཞིན་དུའོ། །དེ་ཡི་སེམས་ནི་དེ་ལྟ་ན། །རྟག་ཏུ་དགའ་བ་སྐྱེ་བར་འགྱུར། །དེ་ནི་འཇིག་རྟེན་ཐམས་ཅད་ལ། །ཕན་པར་བྱེད་པའི་སངས་རྒྱས་འགྱུར། །ལག་ན་རྡོ་རྗེ་དབང་བསྐུར་བའི་མདོ་སྡེའི་དབང་པོའི་རྒྱལ་པོ་ལས་སྟང་སྟབས་ཀྱི་རིམ་པར་
ཕྱེ་བ་རྫོགས་སོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཤིན་ཏུ་རྒྱས་པ་ཆེན་པོས་བདག་ཉིད་རྒྱས་པ་དེ་དག་གི་ཚིག་གི་འཁོར་ལོའི་དཀྱིལ་འཁོར་དུ་འཇུག་པར་བྱ་བའི་ཕྱིར་ཆོས་ཀྱི་དབྱིངས་ཡངས་པ་ལ་དམིགས་ནས་འཇུག་
ཅིང་། །བཅོམ་ལྡན་འདས་རྣམ་པར་སྣང་མཛད་དུ་བདག་ཉིད་བྱིན་གྱིས་བརླབས་ནས། སངས་རྒྱས་འབྱུང་བ་མངོན་དུ་བྱེད་ཅིང་སངས་རྒྱས་ཀྱི་གསུང་དབྱངས་བཀོད་པའི་རྒྱན་གྱི་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ། དེ་
ནས་དེའི་མོད་ལ་དེ་བཞིན་གཤེགས་པ་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་ཀྱི་རྡུལ་སྙེད་དག་གིས། ཡེ་ཤེས་ཤིན་ཏུ་རྒྱས་པ་དཔག་ཏུ་མེད་པ་བསྒྲུབ་པའི་དོན་དུ་ཐུགས་སུ་ཆུད་ནས་དེ་དག་ཉིད་ན་བཞུགས་བཞིན་དུ་ཕྱག་བརྐྱང་སྟེ་ལག་ན་རྡོ་རྗེའི་སྤྱི་བོར་བཞག་གོ། །བཞག་ནས་ལག་ན་རྡོ་
เล่ม ๘๗ · หน้า 142a
རྗེ་ལ་འདི་སྐད་ཅེས་བཀའ་སྩལ་ཏོ། །སེམས་དཔའ་ཆེན་པོ་ལེགས་སོ་ལེགས། །རྡོ་རྗེ་ཡེ་ཤེས་རྫོགས་བྱེད་པ། །ཁྱེད་ནི་སངས་རྒྱས་བྱས་པ་གཟོ། །སངས་རྒྱས་སྲས་པོ་རྫུ་འཕྲུལ་ཆེ། །ཐམས་ཅད་མཁྱེན་པའི་ཡེ་ཤེས་མཆོག །དམ་པ་གསང་བ་ཁྱོད་ཀྱིས་ཤོད། །
གཟུངས་སྔགས་ཚུལ་དུ་དགོད་བྱོས་ལ། །གང་དུ་ཞུགས་མ་ཐག་ཏུ་ནི། །སྡིག་པ་ཐམས་ཅད་མེད་གྱུར་པ། །དཀྱིལ་འཁོར་འདིར་ནི་བཤད་པར་གྱིས། །དེ་ནས་དེ་བཞིན་གཤེགས་པ་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་ཀྱི་རྡུལ་སྙེད་དེ་དག་ཐམས་ཅད་ཕྱག་སླར་བསྐུམས་སོ། །དེ་ནས་ལག་
ན་རྡོ་རྗེ་ཏིང་ངེ་འཛིན་དེ་ལས་ལངས་ཏེ། དེ་བཞིན་གཤེགས་པ་ཐམས་ཅད་སྐྱེད་མ། སྡིག་པ་ཐམས་ཅད་བྱང་བར་བྱེད་མ། ནད་ཐམས་ཅད་རབ་ཏུ་ཞི་བར་བྱེད་མ། བགེགས་ཐམས་ཅད་རྣམ་པར་འཇིག་པར་བྱེད་མ། ཕུན་སུམ་ཚོགས་པ་ཐམས་ཅད་སྐྱེད་མ། གཟུངས་སྔགས་ཆེན་མོའི་
མཆོག་འདི་སྨྲས་སོ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧེ་བུད་དྷ་མ་ཏི་རི། སརྦ་བཱ་པ་ནི་ཥ་ཎི། གརྫ་གརྫ། བྷཉྫ་བྷཉྫ། མརྡ་མརྡ། གམྦྷཱི་རི། གམྦྷཱིར། ཧ་ས་ཧ་ས། ད་མ་ད་མ། མ་ཐ་མ་ཐ། བི་དྷྭ་ནས་ཡ་བིདྷྭ་ན་ས་ཡ། སརྦ་ཤ་ཏྲཱུཾ་ཏ་ར་མ་ཏི། བི་མ་ལེ། པཱུར་ཡ་པཱུར་ཡ།
པྲ་ཏི་ཛྙཱ་ན། སརྦ་བྷཱུ་ཏ། རཱུ་པ་སི་ཏེ། བྷ་ག་བ་ཏི། ག་ན་ག་ན། ཛ་ཧི་ཛ་ཧི། བི་མ་ལ་ས་ནི། ཀྲ་མ་ཎི། ཧ་ད་བ་ནི། ར་མ་ཎི། མ་ཏཾ་གི་ཀེ་སྭཱ་ཧཱ། ལག་ན་རྡོ་རྗེས་གཟུངས་སྔགས་གསང་བ་འདི་སྨྲས་མ་ཐག་ཏུ་དེ་ནས་དེའི་མོད་ལ་ས་ཆེན་པོ་འདི་འགུལ་ལོ། །འུར་འུར་རབ་ཏུ་འུར་འུར་རོ། །ལྡེག་རབ་ཏུ་ལྡེག་
གོ །ལྷོ་ཕྱོགས་མཐོ་ན་ནུབ་ཕྱོགས་དམའོ། །བྱང་ཕྱོགས་མཐོ་ན་ཤར་ཕྱོགས་དམའོ། །ཉི་མ་དང་ཟླ་བ་ཡང་ས་ལ་ལྷུང་ངོ་། །རིག་སྔགས་འཆང་རྣམས་ཀྱང་ལྷུང་ངོ་། །བྱང་ཆུབ་སེམས་དཔའ་གང་དག་གཟུངས་ཐམས་ཅད་ལ་དབང་ཐོབ་པ་དེ་དག་ཀྱང་མོག་མོག་པོར་གྱུར་ཏོ། །ཐམས་ཅད་
དང་ལྡན་པའི་འཁོར་དེ་ཡང་བློང་བློང་པོར་གྱུར་ཏེ། འཇམ་དཔལ་གཞོན་ནུར་གྱུར་པ་ལ་ཡིད་ཀྱིས་ཕྱག་འཚལ་ཞིང་གནས་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་འཁོར་དེ་བླང་བླང་པོར་གྱུར་པ་མཐོང་ནས་དེ་དག་ལ་འདི་སྐད་ཅེས་སྨྲས་སོ། །ཀྱེ་གྲོགས་པོ་དག་ཁྱོད་ཀྱིས་ཡེ་ཤེས་
เล่ม ๘๗ · หน้า 142b
ཆེན་པོར་དབང་བསྐུར་བའི་གཟུངས་སྔགས་ཆེན་མོ་དྲན་པར་གྱིས་ཤིག །དེ་ནས་འཇམ་དཔལ་གཞོན་ནུར་གྱུར་པས། བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །ལག་ན་རྡོ་རྗེ་གཟུངས་འདི་ནི་མཐུ་ཆེན་པོ་ནི་ཡིན་ན། སྒྲུབ་པ་པོ་གང་ལ་ལ་ཞིག་འདི་འཛིན་པ་དང་།
ཡིད་ལ་བྱེད་པ་དང་། མཆོད་པ་བྱེད་པའི་མཐུ་ཅི་ལྟ་བུར་རིག་པར་བྱ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་ལག་ན་རྡོ་རྗེས། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གཟུངས་སྔགས་འདིའི་མཐུའམ། ནུས་མཐུའམ་མཐུ་
བསྒྱིངས་པ་ཅི་འདྲའོ། །འཇམ་དཔལ་ཤར་ཕྱོགས་ལོགས་ན་འཇིག་རྟེན་གྱི་ཁམས་འོད་ཟེར་དྲི་མ་མེད་པ་ཞེས་བྱ་བ་ཡོད་དེ། འཇིག་རྟེན་གྱི་ཁམས་དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་དྲི་མ་མེད་པ་ཞེས་བྱ་བ་འཇིག་རྟེན་དུ་བྱུང་
ནས། བཅོམ་ལྡན་འདས་དེས་ཐམས་ཅད་འབྱུང་བ་ཞེས་བྱ་བའི་གཟུངས་སྔགས་འདི་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཏོག་ལ་འཛིན་དུ་གཞུག་པའི་ཕྱིར་བྱིན་ནོ། །བྱང་ཆུབ་སེམས་དཔའ་དེ་ལ་བྱིན་མ་ཐག་ཏུ། དེའི་མོད་ལ་གཟུངས་སྔགས་འདིའི་
མཐུས་དེའི་སྤུའི་ཁུང་བུ་ཐམས་ཅད་ནས་སངས་རྒྱས་ཀྱི་གཟུགས་རྣམས་བྱུང་ཞིང་ཞུགས་ཏེ། མཐའ་རྟོགས་པར་ནི་མི་ནུས་སོ། །སངས་རྒྱས་ཀྱིས་བྱིན་གྱིས་བརླབས་མ་གཏོགས་པར། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་གཟུངས་ཐམས་ཅད་
ལ་དབང་ཐོབ་པ་དེ་དག་གིས་ཀྱང་འདི་ཅི་འདྲ་བ་ཡིན་ཞེས་བསྟན་པར་མི་ནུས་སོ། །དེ་བཞིན་གཤེགས་པའི་གཟུགས་དེ་དག་གིས་ནམ་མཁའི་དཀྱིལ་འཁོར་ཏིལ་གྱི་གང་བུ་བཞིན་དུ་གང་བར་གྱུར་ནས་གནས་ཏེ། དེ་བཞིན་གཤེགས་པའི་གཟུགས་དེ་དག་གིས། བྱང་
ཆུབ་སེམས་དཔའ་སེམས་དཔའ་ཆེན་པོ་དེ་ལ་འོད་ཟེར་གྱིས་དབང་བསྐུར་ནས་སྐུ་དེ་ཉིད་དུ་ཞུགས་སོ། །དེ་ཅིའི་ཕྱིར་ཞེ་ན། གཟུངས་སྔགས་ཆེན་པོ་འདི་ཉིད་ཀྱི་མཐུས་སོ། །དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས། བྱང་ཆུབ་སེམས་དཔའ་
เล่ม ๘๗ · หน้า 143a
ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བྱང་ཆུབ་སེམས་དཔའ་ཆེན་པོ་ཁྱོད་དེ་བཞིན་གཤེགས་པ་ཐམས་ཅད་ཀྱིས་ཆོས་ཐམས་ཅད་ཀྱི་བདག་པོར་དབང་བསྐུར་བ་ཡིན་ན། ཁྱོད་ཀྱིས་ཀྱང་གཟུངས་སྔགས་ཆེན་པོའི་དཀྱིལ་འཁོར་བསྟན་པའི་ཕྱིར།
གཟུངས་སྔགས་ཆེན་པོའི་དཀྱིལ་འཁོར་ཤོད་ཅིག །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་དོན་ཡོད་པར་གྲུབ་པར་བྱ་བའི་ཕྱིར། དེ་
བཞིན་གཤེགས་པ་ཐམས་ཅད་ཀྱིས་ཡེ་ཤེས་གང་དག་གཟུངས་སྔགས་ཀྱི་ཚུལ་དུ་གནས་ཤིང་། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་དག་ཉོན་ཅིག །དེ་དག་གང་ཞེ་ན། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཨ་མ་རི། ཨ་མ་རི།
ཊ་ཏ། བཉྫ། ཛྷ་ཛྷ། མི་ཙི་མི་ཙི། སྥོ་ཊ་སྥོ་ཊ། མ་ཏ་མ་ཏ། དུ་ར་དཱ་ནྟ་དམ་ཀ་སྭཱ་ཧཱ། ན་མཿསརྦ་ཏ་ཐཱ་ག་ཏེ་བྷྱ སརྦ་མུ་ཁེ་བྷྱཿ། སརྦ་ཐཱ། ཧེ་ཧེ། ཀ་ཎི་ཊི་ཀ་ནི་ཏི། སརྦ་ཏ་ཐཱ་ག་ཏ་བ་ན་ཀེ །བོ་ད་ནྡི་དེ། ཏྲ་ཊ་ཊ་ཏྲ་ཊ་ཊ། ཧཱུཾ་ཕཊ་ཧཱུཾ་ཕཊ། གརྫ་གརྫ། བར་མ་ཏི། བི་ཧཱུཾ་རི་ཀ་སྭཱ་ཧཱ། ན་
མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ། བྷ་ག་བ་ཏེ། པྲཛྙཱ་པཱ་ར་མི་ཏཱ་ཨཱ། སརྦ་པཱ་པཀྵ་ཡཾ་ཀ་རི། ཛྙཱ་ན་ཨ་པ་སྥ་ར་ཎི། བྷཉྫ་བྷཉྫ། མ་ཐ་མ་ཐ། ད་མ་ད་མ། ཨཱ་ན་ཡ། ཨཱ་ན་ཡ། ས་ར་ས་ར། མཱ་ར་ཡ་མཱ་ར་ཡ། སརྦ་བྷཱུ་ཏེ་ཛ་ན་ཏྲི་ཡེ་སྭཱ་ཧཱ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་
མུ་ཁེ་བྷྱཿ། སརྦཐཱ། གརྫ་གརྫ། མ་ཐ་མ་ཐ། ཧཱ་མ་ཧཱ་མ། བྷཉྫ་བྷཉྫ། དུནྡུ་བྷི་སྭ་ར་ནིར་གྷོ་ཥེ། ཧ་ན་ཧ་ན། བི་དྷྭན་ས་ཡ་བི་དྷྭན་ས་ཡ། མོཊ་ཡ་མོཊ་ཡ། ད་ཧ་ད་ཧ། བི་པུ་ལ་ནི་རྨ་ལ་ནི་ར་ཛཱ་ཏེ། ཨཱ་ཧ་ར་ཨཱ་ཧ་ར། ཨཱ་གཙྪ་ཨཱ་གཙྪ། སརྦ་བུད་དྷ་ས་རཱུ་པ་པི་ཏེ་མཱ་བི་ལཾ་བ་སྭཱ་ཧཱ། འཇམ་དཔལ་
གཟུངས་སྔགས་ཆེན་པོ་འདི་ནི་དེ་བཞིན་གཤེགས་པ་ཐམས་ཅད་ཀྱི་དབྱིངས་ཕྱུག་མ་ཞེས་བྱ་བ། དེ་བཞིན་གཤེགས་པ་ཐམས་ཅད་སྐྱེད་མ། བྱང་ཆུབ་ཀྱི་སྙིང་པོ་སྟོན་པར་བྱེད་མ། དེ་བཞིན་གཤེགས་པ་ཐམས་ཅད་ཀྱི་གསུང་མ་ནོར་བའོ། །དེ་ནས་འཇམ་དཔལ་གཞོན་ནུར་གྱུར་པས་མིག་མི་
เล่ม ๘๗ · หน้า 143b
འཛུམས་པར་བྱང་ཆུབ་སེམས་དཔའ་ལག་ན་རྡོ་རྗེ་ལ་བལྟས་ཏེ། འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱང་དེ་བཞིན་གཤེགས་པ་ཉིད་དུ་བལྟ་བར་བྱའོ། །དེ་ཅིའི་ཕྱིར་ཞེ་ན། ཁྱོད་ནི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཆེན་པོ་སྔོན་མ་མཐོང་བ་རྣམས་དང་།
དམ་ཚིག་ལ་སོགས་པ་སངས་རྒྱས་ཀྱི་མཛད་པ་གཅིག་ནས་གཅིག་ཏུ་རྒྱུན་མི་འཆད་པར་བྱ་བའི་ཕྱིར། ཡེ་ཤེས་ཆེན་པོར་དབང་བསྐུར་བ་དང་ལྡན་པའི་གཟུངས་སྔགས་འདི་ཡིད་ལ་བྱེད་པའི་ཕྱིར་རོ། །དེ་ནས་དེའི་མོད་ལ་འཇམ་དཔལ་གཞོན་ནུར་གྱུར་པས། དབང་ཆེན་
པོ་བསྐུར་བའི་གཟུངས་སྔགས་ལ་སོགས་པ་ཡེ་ཤེས་བྱེ་བ་ཕྲག་དགུ་བཅུ་རྩ་དགུ་ལས་ངེས་པར་བྱུང་བའི་ཡེ་ཤེས་ཆེན་པོའི་རྡོ་རྗེ་རྟོགས་པར་གྱུར་ཏོ། །ཡེ་ཤེས་ཆེན་པོའི་རྡོ་རྗེ་རྟོགས་མ་ཐག་ཏུ། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་མཆོད་
པའི་སྤྲིན་ཆེན་པོ་དག་བྱུང་བར་གྱུར་ཏོ། ཀྱེ་མའོ་ཡེ་ཤེས་ཆེན་པོར་དབང་བསྐུར་བས། །འཇམ་དཔལ་འདི་ལ་དབང་བསྐུར་ཏོ། །ཞེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་སྒྲ་འུར་ཅེས་གྲགས་སོ། །དེའི་མཐུས་འཇམ་དཔལ་གཞོན་ནུར་གྱུར་
པས། དེ་བཞིན་གཤེགས་པའི་གཟུགས་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་ཀྱི་རྡུལ་སྙེད་དག་ཨུཏྤ་ལ་ཆེན་པོའི་ནང་དུ་ཞུགས་པར་མཐོང་ངོ་། །དེ་བཞིན་གཤེགས་པའི་གཟུགས་རྣམས་ཞུགས་མ་ཐག་ཏུ། དེ་ནས་ཆོས་ཀྱི་སྐུ་རྟོགས་པའི་མཐུས། དེའི་མོད་
ལ་འཇམ་དཔལ་གཞོན་ནུར་གྱུར་པའི་སྤུའི་ཁུང་བུའི་མཚམས་རྣམས་དང་། ཅོད་པན་དང་། རྒྱན་དང་། ཡན་ལག་དང་། ཉིང་ལག་ཐམས་ཅད་ནས་དེ་བཞིན་གཤེགས་པའི་གཟུགས་རྣམས་བྱུང་ཞིང་ཞུགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་ལ་
གནས་པ། སེམས་ཀྱི་དབང་ཐམས་ཅད་ཐོབ་པ་དེ་དག་གིས་ཀྱང་སྤུའི་ཁུང་བུ་གཅིག་གི་ཚད་ཀྱང་རྟོགས་པར་མ་ནུས་ན། ཉན་ཐོས་དང་རང་སངས་རྒྱས་རྣམས་དང་། གཞན་འཇིག་རྟེན་པ་རྣམས་ཀྱིས་ལྟ་ཅི་སྨོས། དེ་ནས་འཇམ་དཔལ་གཞོན་ནུར་གྱུར་པས་ཡིད་ལ་བྱེད་པ་དེ་
เล่ม ๘๗ · หน้า 144a
བཏང་སྟེ། ཡང་བྱང་ཆུབ་སེམས་དཔའ་ལག་ན་རྡོ་རྗེ་ལ་མིག་མི་འཛུམས་པར་རིང་དུ་བལྟས་ནས། ཞིང་རྣམས་འདི་དག་ཡོངས་སུ་སྦྱང་བར་བྱ། །རྒྱལ་སྲས་ཀུན་གྱི་སྨོན་ལམ་མཐུ་རྫོགས་བྱ། །སེམས་ཅན་ཕན་དང་སྙིང་བརྩེ་ནད་མེད་ཅིང་། །ཞི་བ་བདུད་རྩི་རྙེད་དཀའ་ཡེ་
ཤེས་བསྟན། །ཡེ་ཤེས་དམ་པ་གཅེས་པ་འདི་ཐོབ་ནས། །སངས་རྒྱས་ཞིང་ནས་སེམས་ཅན་ཁྲག་ཁྲིག་ཕྲག །གྲངས་མེད་ཁྱོད་ཀྱིས་བརྗོད་པ་དགྲོལ་བར་བྱ། །ཁྱོད་ཀྱིས་ཏིང་འཛིན་བསྟན་པ་མཆོག་ཏུ་བྱ། །ཞེས་ཆེད་དུ་བརྗོད་པ་འདི་ཆེད་དུ་བརྗོད་དོ། །དེ་ནས་བྱང་ཆུབ་
སེམས་དཔའ་ལག་ན་རྡོ་རྗེས། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ལེགས་སོ་ལེགས་སོ། །འཇམ་དཔལ་ཁྱོད་ཀྱིས་ཚིག་འདི་སྨྲས་པ་ནི་ཤིན་ཏུ་གཙིགས་ཏེ་ཁྱོད་ཡང་ལེགས་སོ། །འཇམ་དཔལ་ཁྱོད་འདི་ལྟ་བུའི་གཟུངས་སྔགས་
ཆེན་པོའི་གསང་སྔགས་ཀྱི་གཞི་རྣམས་ཡིད་ལ་བྱེད་པ་ནི་ཤིན་ཏུ་དཀའ་བ་བྱེད་པའོ། །འཇམ་དཔལ་ཡང་བྱང་ཆུབ་སེམས་དཔའ་ཆེན་པོ་གང་དག་ཡེ་ཤེས་ཆེན་པོ་འདི་ལྟ་བུ་དག་ཡིད་ལ་བྱེད་པ་དང་། འཛིན་པ་དང་། བསྒྲུབ་པ་དང་། གླེགས་བམ་དུ་བྱས་ནས་ཉིན་གཅིག་བཞིན་དུ་ཕྱག་
འཚལ་བ་དེ་དག་ནི་ཤིན་ཏུ་དཀའ་བ་བྱེད་པ་སྟེ། དེ་དག་ནི་ངེས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་རོ། །དེ་དག་འཆི་བའི་དུས་ཀྱི་ཚེ་ཉེ་བར་གནས་པ་ན་ཡང་དེ་བཞིན་གཤེགས་པ་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་ཀྱི་རྡུལ་སྙེད་དག་མཐོང་བ་སྦྱིན་པར་འགྱུར་
ཏེ། རྟག་ཏུ་དེ་བཞིན་གཤེགས་པ་རྣམས་ཀྱིས་བྱིན་གྱིས་བརླབས་པར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །གང་གི་ཚེ་འདི་ཉིད་ལ་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་ཚུལ་འདི་རྟོགས་ནས། ཐམས་ཅད་
མཁྱེན་པ་ཉིད་ཀྱི་གོ་འཕང་ཐོབ་པར་བྱ་བའི་ཕྱིར་མངོན་པར་བརྩོན་པར་བྱེད་པ་དག་གོ་འཕང་དེ་ཐོབ་པར་གྱུར་པ་ཡེ་ཤེས་ཆེན་པོར་དབང་བསྐུར་བའི་གཟུངས་སྔགས་ཀྱི་དཀྱིལ་འཁོར་ཆོས་ཀྱི་འཁོར་ལོ་བསྐོར་བ་སྔོན་མ་བྱུང་བ་དེ་སེམས་ཅན་ཆེན་པོ་ཤོད་ཅིག །དེ་སྐད་ཅེས་སྨྲས་པ་དང་། བྱང་ཆུབ་
เล่ม ๘๗ · หน้า 144b
སེམས་དཔའ་ལག་ན་རྡོ་རྗེས། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གང་དུ་ཞུགས་པ་ཙམ་གྱིས་མཚམས་མེད་པ་ལྔ་པོ་དག་ཡོངས་སུ་བྱང་བར་འགྱུར་བ་དང་། དོན་ཐམས་ཅད་ཀྱང་འབྱོར་པར་འགྱུར་བ་དང་། དཔལ་
ཐམས་ཅད་སྐྱེད་པར་འགྱུར་བ་དང་། སྡིག་པ་ཐམས་ཅད་ལས་རབ་ཏུ་གྲོལ་བར་འགྱུར་བ་དང་། ཡེ་ཤེས་ཆེན་པོར་དབང་བསྐུར་བའི་གཟུངས་སྔགས་ཀྱི་དཀྱིལ་འཁོར་གྱི་རྣམ་པར་དགོད་པ་དེ་ཉོན་ཅིག །འཇམ་དཔལ་དཀྱིལ་འཁོར་བརྗོད་པར་བྱའོ། །འཇམ་དཔལ་དེ་ལ་
ལུས་ཅན་ཐམས་ཅད་ལ་གསང་ཆེན་དང་བཅས་པ། སློབ་དཔོན་རྣམས་ཀྱི་གསང་ཆེན་མཆོག །གསང་བ་བས་ཀྱང་ཆེས་གསང་བ། །དེ་བཞིན་གཤེགས་པ་ཐམས་ཅད་གཟུངས་སྔགས་འདི་དག་གི་མིང་དུ་གྱུར་པའི་དཀྱིལ་འཁོར་བརྗོད་པར་བྱའོ། །འཇམ་དཔལ་དེ་ལ་དཀྱིལ་འཁོར་
གྱི་ཚད་ལ། ཚད་ནི་ཁྲུ་བརྒྱད་ཐམ་པ་སྟེ། །སློབ་དཔོན་ཉིད་ཀྱི་ཁྲུ་ཡིས་བྱ། །ཡེ་ཤེས་འབྱུང་བའི་དཀྱིལ་འཁོར་དེར། །ཆ་ནི་རྣམ་པ་གསུམ་དུ་བྱ། །བློ་དང་ལྡན་པས་ཆ་གསུམ་དུ། །དེར་ནི་སྒོ་ཁྱུད་རྣམས་བྱས་ཏེ། །དེར་ནི་སྒོ་ཡང་བཞི་གཏོད་དོ། །གྲུ་བཞི་ལྷམ་པ་ཁ་ཁྱེར་བཅས། །སྔོན་གྱི་
བཞིན་དུ་ཆ་གསུམ་ལ། །ཆ་ནི་རྣམ་པ་བརྒྱད་བརྒྱད་བྱ། །མཁས་པས་ཆ་བརྒྱད་བྱས་ནས་སུ། །དབུས་ཀྱི་ཆར་ནི་འཇུག་པར་བྱ། །ཆོས་རྣམས་ཐམས་ཅད་མ་སྐྱེས་པར། །ཐང་ཅིག་ཐང་ཅིག་བསམ་བྱས་ལ། །ཕུན་སུམ་ཚོགས་པ་ཀུན་བྱེད་པ། །དཀྱིལ་འཁོར་རྒྱལ་པོ་བྲི་བར་བྱ། །སྔགས་པས་དེ་ཡི་
དབུས་སུ་ནི། །པདྨ་མཆོག་ཏུ་མཛེས་པ་བྲི། །ཀུན་ཀྱང་མ་རྒད་འདྲ་བ་སྟེ། །འདབ་མ་བརྒྱད་པ་བརྗོད་པ་ཡིན། །དེ་ཡི་སྟེང་དུ་བུམ་པ་སྟེ། །བུམ་པའི་སྟེང་དུ་ཨུཏྤལ་ལོ། །ཨུཏྤལ་སྟེང་དུ་དུང་བྲི་སྟེ། །མེ་ལྕེ་ཕྲེང་བས་འཁྲིགས་པས་མཛེས། །ཤེས་རབ་ཕ་རོལ་ཕྱིན་དེ་ནི། །ཡེ་ཤེས་ཆེན་པོར་དབང་བསྐུར་
ལྡན། །ཆ་བརྒྱད་གང་དག་བརྗོད་པ་ཡང་། །དབུས་ཀྱི་ཆ་ལས་བྱུང་བ་སྟེ། །གཟུངས་ཀྱི་ཚུལ་དུ་བྲི་བ་ཡང་། །ཆོ་གའི་རིམ་བཞིན་མཐུན་པར་བྱ། །དེ་ལ་ཤར་ཕྱོགས་སུ་ནི་བཅོམ་ལྡན་འདས་མ་སོ་སོར་འབྲང་བ་ཆེན་མོ་དབང་པོ་ཆེན་པོའི་དཀྱིལ་འཁོར་ན་གནས་པ་ཨུཏྤ་ལའི་ཕྱག་རྒྱར་བྲི་བར་བྱ་
เล่ม ๘๗ · หน้า 145a
སྟེ། མཐའ་རྣམས་སུ་ཨུཏྤལ་བཀྲམ་ཞིང་མེ་ལྕེ་འབར་བའི་དཀྱིལ་འཁོར་གྱི་དབུས་སུ་གནས་པར་བྱའོ། །བཅོམ་ལྡན་འདས་མ་སོ་སོར་འབྲང་བ་ཆེན་མོའི་གཟུངས་སྔགས་ནི་འདི་ཡིན་ཏེ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་རཱ་ཨོཾ་བྷ་ག་
བ་ཏི། སརྦ་ཏ་ཐཱ་ག་ཏི་ཛ་ནི་ཀེ །སུ་རཱ་ཡ་པྲ་ཏིན། ཏ་ཏ་ཊ་ཊ། མརྡ་མརྡ། ཨཱ་ཧ་ར་ཨཱ་ཧ་ར། ཧཱུྃ་ཧཱུྃ་ཛ་ཧི་ཛ་ཧི་སྭཱ་ཧཱ། དབང་ལྡན་གྱི་ཕྱོགས་སུ་བཅོམ་ལྡན་འདས་མ་རྡོ་རྗེ་མི་ཕམ་པ་མེ་ལྕེ་ཞེས་བྱ་བའི་གཟུངས་བྲི་བར་བྱ་སྟེ། །ཆུ་ཡི་དཀྱིལ་འཁོར་དབུས་སུ་ནི། །པདྨ་ཤིན་ཏུ་
མཛེས་པ་བྲི། །དེ་ཡི་སྟེང་དུ་འཁོར་ལོ་སྟེ། །མེ་ལྕེའི་ཕྲེང་བས་འཁྲིགས་པ་མཛེས། །དེ་ལ་གཟུངས་སྔགས་ནི་འདི་ཡིན་ཏེ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐ་ཧུྃ་ཧྲིཿ། སརྦ་པདྨ། ཏ་ཧྲཱིཿབྷཉྫ་བྷཉྫ། མ་ཐ་མ་ཐ། ད་མ་མ་ནི་དམ་མ་ནི། གརྒྷ་རི་གརྒྷ་རི་
ཧྲཱིཿསྭཱ་ཧཱ། མེའི་ཕྱོགས་སུ་བརྟེན་ནས། བཅོམ་ལྡན་འདས་མ་སྡིག་པ་ཐམས་ཅད་སྤོང་བ་ཞེས་བྱ་བའི་གཟུངས་བྲི་བར་བྱ་སྟེ། ཆུ་དང་དབང་ཆེན་ལྡན་པ་ཡི། །ཕྱག་རྒྱ་གཟུགས་རྣམས་བྲི་བར་བྱ། །པདྨའི་སྟེང་དུ་རྡོ་རྗེ་སྟེ། །མེ་ལྕེའི་ནང་དུ་ཤིན་ཏུ་མཛེས། །དེ་ལ་གཟུངས་སྔགས་འདི་ཡིན་ཏེ། །
ནམཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཏྲ་ཊ་ཏྲ་ཊ། མུ་ཧཱུ་མུ་ཧཱུ། སརྦ་པཱ་པྃ་ཤོ་དྷ་ནེ་སྭཱ་ཧཱ། ལྷོ་ཕྱོགས་སུ་ནི་གདུལ་དཀའ་བ་ཞེས་བྱ་བའི་གཟུངས་བྲི་བར་བྱ་སྟེ། མེ་དང་རླུང་དང་ལྡན་པ་ཡི། །ཨུཏྤ་ལ་ནི་དེར་བྲིའོ། །དེ་ཡི་སྟེང་དུ་རིན་པོ་ཆེ། །བསམ་པ་ཐམས་ཅད་ཡོངས་སྐོང་
སྟེ། །མེ་ལྕེ་ཕྲེང་བ་འཁྲིགས་ཞི་བ། །པདྨ་རྣམས་ཀྱིས་ཡོངས་སུ་བསྐོར། །དེ་ལ་གཟུངས་སྔགས་ནི་འདི་ཡིན་ཏེ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ། དྷ་ཀདྷ་ཀ མོ་ཊ་མོ་ཊ། ད་ཧ་ད་ཧ། སརྦ་ཏ་ཐཱ་ག་ཏ་ཛྙཱ་ན་ནི་རྫཱུ་ཏེ་སྭཱ་ཧཱ། བདེན་བྲལ་ཕྱོགས་སུ་ནི་
བདུད་ཐམས་ཅད་རྣམ་པར་འཇོམས་པ་ཞེས་བྱ་བའི་གཟུངས་བྲི་བར་བྱ་སྟེ། དེ་ཡི་མེ་ཡི་དཀྱིལ་འཁོར་ཏེ། །པདྨའི་དབུས་སུ་གནས་པ་ཡིན། །དེ་ཡི་སྟེང་དུ་སྔགས་པ་ཡིས། །ལྕགས་ཀྱུ་ཤིན་ཏུ་མཛེས་པ་བྲི། །ཕན་ཚུན་འབྲེལ་བའི་རྡོ་རྗེ་དག །བློ་དང་ལྡན་པས་དེར་དགོད་དོ། །
เล่ม ๘๗ · หน้า 145b
དེ་ལ་གཟུངས་སྔགས་འདི་ཡིན་ཏེ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཧ་ཧ། མི་ཧུ་མི་ཧུ། ད་མ་ད་མ། ཁཱ་ཧི་ཁཱ་ཧི། དྷུ་ན་དྷུ་ན། མི་ཙི་མི་ཙི། དུར་དཱནྟད་མ་ནི་སྭཱ་ཧཱ། བྱང་ཕྱོགས་སུ་ནི་བཅོམ་ལྡན་འདས་མ་སྒོ་མཐའ་ཡས་པ་བསྒྲུབ་པ་ཞེས་བྱ་བའི་གཟུངས་
བྲི་བར་བྱ་སྟེ། དེ་ཡི་དཀྱིལ་འཁོར་བྲི་བ་ནི། །ཟླ་བའི་དཀྱིལ་འཁོར་འདྲ་བ་ཡིན། །དེ་ཡི་སྟེང་དུ་པདྨ་སྟེ། །འོད་ནི་དུས་མཐའི་མེ་ལྟ་བུ། །དེ་ཡི་སྟེང་དུ་རལ་གྲི་སྟེ། །འོད་ཟེར་རྣམས་ཀྱིས་རབ་ཏུ་བསྐོར། །མེ་ལྕེ་ཕྲེང་བ་འཁྲིགས་ལྡན་པའི། །ཨུཏྤལ་རྣམས་ཀྱིས་ཀུན་ཁྱབ་བྱ། །
དེ་ལ་གཟུངས་སྔགས་འདི་ཡིན་ཏེ། །ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་མི་ཙི་མི་ཙི། གརྫ་གརྫ། སྥོ་ཊ་ཡ་སྥོ་ཊ་ཡ། མ་ཐ་མ་ཐ། ད་མ་ད་མ། སྭཱ་ཧཱ། རླུང་གི་ཕྱོགས་སུ་ནི་དཀོན་མཆོག་འབྱུང་གནས་ཞེས་བྱ་བའི་གཟུངས་བྲི་བར་བྱ་སྟེ། །དེ་ཡི་རླུང་གི་དཀྱིལ་འཁོར་
ཏེ། །ཆ་གསུམ་ལ་ནི་གཙུག་ཏོར་གནས། །ལྕགས་ཀྱུས་ཐམས་ཅད་དགབ་པར་བྱ། །མེ་ལྕེ་འབར་བའི་ཕྲེང་བར་ལྡན། །ནུབ་ཕྱོགས་སུ་ནི་བཅོམ་ལྡན་འདས་མ་སྐུལ་བྱེད་མ་བྲི་བར་བྱ་སྟེ། དེ་ཡི་དབང་ལྡན་དཀྱིལ་འཁོར་ཏེ། །དེ་ལ་རྡོ་རྗེ་ལེགས་པར་གནས། །དེ་ཡི་སྟེང་དུ་པདྨ་ཆེ། །
དེ་ཡི་སྟེང་དུ་བགྲང་ནོར་ཕྲེང་། །དེ་དག་མེ་ལྕེ་ཕྲེང་གིས་དཀྲིས། །སྟེང་དུ་པདྨ་རྣམས་ཀྱིས་དགབ། །དེ་ནས་ཆ་གསུམ་པ་ལ་ནི། །བྱང་ཆུབ་སེམས་དཔའ་རྫུ་འཕྲུལ་ཆེ། །སྔགས་པས་ཅི་རིགས་བྲི་བར་བྱ། །བརྒྱད་རྣམས་སུ་ཡང་སྔ་མ་བཞིན། །དེ་ལ་ཤར་དུ་རྣལ་འབྱོར་པས། །
འཇིག་རྟེན་དབང་པོའི་འོད་ཆེན་བྲི། །པདྨ་ཤིན་ཏུ་མཛེས་པ་ནི། །དེ་ཡི་ཕྱག་རྒྱར་བརྗོད་པ་ཡིན། །མེའི་ཕྱོགས་སུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོའི་ཕྱག་རྒྱ་ཡིད་བཞིན་གྱི་ནོར་བུ་བྲི་བར་བྱའོ། །དབང་བདག་ཕྱོགས་སུ་ནི་འཇམ་དཔལ་གཞོན་ནུར་གྱུར་པའི་
ཕྱག་རྒྱ་ཨུཏྤ་ལ་བྲི་བར་བྱའོ། །ལྷོ་ཕྱོགས་སུ་ནི་ལག་ན་རྡོ་རྗེའི་ཕྱག་རྒྱ་རྡོ་རྗེ་བྲི་བར་བྱའོ། །བྱང་ཕྱོགས་སུ་ནི་བྱམས་པའི་ཕྱག་རྒྱ་རིལ་བ་སྤྱི་བླུགས་བྲི་བར་བྱའོ། །རླུང་གི་ཕྱོགས་སུ་ནི་སྒྲིབ་པ་ཐམས་ཅད་རྣམ་པར་སེལ་བའི་ཕྱག་རྒྱ་པདྨ་བྲི་བར་བྱའོ། །བདེན་བྲལ་གྱི་ཕྱོགས་སུ་ནི་ནམ་མཁའི་སྙིང་
เล่ม ๘๗ · หน้า 146a
པོའི་ཕྱག་རྒྱ་རལ་གྲི་བྲི་བར་བྱའོ། །ནུབ་ཕྱོགས་སུ་ནི་སའི་སྙིང་པོའི་ཕྱག་རྒྱ་པདྨ་བྲི་བར་བྱའོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །ལག་ན་རྡོ་རྗེ་ལེགས་སོ་ལེགས་སོ། །ལག་ན་རྡོ་རྗེ་ཁྱོད་ཀྱིས་སེམས་
ཅན་ཐམས་ཅད་ལ་ཕན་པ་དང་བདེ་བའི་ཕྱིར་ཡེ་ཤེས་ཆེན་པོས་དབང་བསྐུར་བའི་གཟུངས་སྔགས་ཆེན་པོའི་དཀྱིལ་འཁོར་བརྗོད་པ་ཁྱོད་ཡང་ལེགས་སོ། །དེ་སྐད་ཅེས་སྨྲས་པ་དང་། ལག་ན་རྡོ་རྗེས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཡེ་ཤེས་ཆེན་པོར་དབང་
སྐུར་བའི་དཀྱིལ་འཁོར་ཆེན་པོ་འདི་སུའི་ལག་ན་གནས་པ་དེ་ཉོན་མོངས་པ་དང་བྲལ་བར་འགྱུར་རོ། །འཇིགས་པ་དང་དགྲ་དང་བྲལ་བར་འགྱུར་རོ། །གལ་ཏེ་ཆོམ་རྐུན་གྱི་ནང་ན་འདུག་གམ། སྲིན་པོའི་ནང་ན་འདུག་གམ། དགྲའི་ནང་ན་འདུག་གམ། འཐབ་པའི་ནང་ན་འདུག་ཀྱང་རུང་
སྟེ། དེའི་ལུས་ལ་མཚོན་གྱིས་མི་ཚུགས་པར་འགྱུར་རོ། །ཆོམ་རྐུན་གྱིས་འཇོམས་པར་མི་འགྱུར། སྲིན་པོ་ལ་སོགས་པས་གཙེ་བར་མི་འགྱུར་རོ། །དེ་ལ་དུས་མ་ཡིན་པར་འཆི་བའི་འཇིགས་པ་མི་འབྱུང་། རྟག་ཏུ་དཔལ་དང་ལྡན་པར་འགྱུར། སྡིག་པ་ཐམས་ཅད་ཡོངས་སུ་བྱང་
བར་འགྱུར། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ལ་དགེ་བའི་རྩ་བ་བསགས་པ་ཡང་དེ་ལ་ཉིན་གཅིག་བཞིན་མངོན་དུ་འགྱུར། འཆི་བའི་དུས་ཀྱི་ཚེ་ན་ཡང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཡོངས་སུ་གཟིགས་པར་འགྱུར། ཤི་ནས་ཀྱང་བདེ་བ་ཅན་དུ་སྐྱེ་བར་འགྱུར་ན།
གང་དུ་འཛིན་པ་དང་ཀློག་པ་དང་ཡིད་ལ་བྱེད་པ་དང་མིང་ཙམ་ཡང་འཛིན་པ་ལྟ་ཅི་སྨོས་ཏེ་དེའི་སྒྲིབ་པ་ཐམས་ཅད་འབྱང་བར་འགྱུར་རོ། །དེས་ངན་སོང་གི་སྒོ་རྣམས་གཅད་པར་འགྱུར། དེས་ངན་སོང་དང་ངན་འགྲོ་རྣམས་རྒྱང་རིང་དུ་འགྱུར་རོ། །གང་ཞིག་ནང་པར་ལངས་ནས་སུ། །ལན་ཅིག་ཀློག་
པར་བྱེད་པའི་མི། །སྲིད་པའི་ཉམ་ངར་བྱས་པ་ཡི། །སྡིག་ལས་གྲོལ་བར་དེ་འགྱུར་རོ།། །།འཕགས་པ་ལག་ན་རྡོ་རྗེ་དབང་བསྐུར་བ། བམ་པོ་བཅུ་གཉིས་པ་སྟེ་ཐ་མ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་
เล่ม ๘๗ · หน้า 146b
ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །གསང་བ་པའི་བདག་པོ་སུ་དཀྱིལ་འཁོར་གྱི་རྒྱལ་པོ་འདི་བྲིས་ནས་དེར་ཞུགས་པར་གྱུར་ན། དེའི་བསོད་ནམས་ཀྱི་ཕུང་པོ་ཇི་ཙམ་དུ་འགྱུར། ལག་ན་རྡོ་རྗེས་སྨྲས་པ། འཇམ་དཔལ་ཁོ་བོས་ནི་དེའི་བསོད་ནམས་ཀྱི་ཕུང་པོའི་ཚད་བསྟན་པར་མི་ནུས་མོད་
ཀྱི། འོན་ཀྱང་འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་དེའི་བསོད་ནམས་ཀྱི་ཕུང་པོ་ནི་སའི་རྡུལ་ཇི་སྙེད་ཡོད་པ་དེ་དེ་སྙེད་དུ་རིག་པར་བྱའོ། །འཇམ་དཔལ་མ་འོངས་པའི་དུས་ན་སེམས་ཅན་སྡིག་ཅན་གང་ཚུལ་འདི་ལ་ཡིད་མི་ཆེས་པ་དག་ཡོད་དེ། འཇམ་དཔལ་ཐེ་ཚོམ་མང་བ་དང་། རྣམ་
པར་རྟོག་པ་སྣ་ཚོགས་ཀྱི་རང་བཞིན་ཅན་དང་། མི་དགེ་བའི་བཤེས་གཉེན་གྱིས་ཡོངས་སུ་ཟིན་པ་དང་། ཕ་ལ་མ་གུས་པ་དང་། མ་ལ་མ་གུས་པ་དང་། སློབ་དཔོན་དང་བླ་མ་ལ་སྨོད་པ་དང་། བླ་མའི་སྐྱོན་འདྲུ་བའི་སེམས་ཅན་དེ་དག་ལ་ནི་ཡེ་ཤེས་ཆེན་པོར་དབང་བསྐུར་བའི་གཟུངས་སྔགས་
ཀྱི་དཀྱིལ་འཁོར་འདི་ལག་ཏུ་འཆང་དུ་མི་གཞུག་གོ། །རྣ་ལམ་དུ་ཡང་གྲག་པར་མི་བྱའོ། །འཇམ་དཔལ་དེ་དག་གི་མདུན་དུ་ནི་གཏམ་ཡང་མི་བྱའོ། །གླེགས་བམ་དུ་བྲིས་པ་ཡང་དེ་དག་གི་མདུན་དུ་དབྱེ་བར་མི་བྱ་སྟེ། སེམས་ཅན་སྡིག་ཅན་དེ་དག་གིས་སྤོང་བ་ཅུང་ཟད་བྱས་པས་ཀྱང་ངན་སོང་སེམས་
ཅན་དམྱལ་བར་འགྲོ་བར་མྱུར་དུ་འོང་ངོ་། །འདི་སྐད་དུ་འདི་ནི་སངས་རྒྱས་ཀྱིས་གསུངས་པ་མ་ཡིན་ནོ་ཞེས་ཟེར་ཏེ། དེ་དག་ནི་བདག་ཀྱང་ཕུང་ལ་གཞན་དག་ཀྱང་ཕུང་བར་བྱེད་དོ། །དེ་ལྟར་བྱེད་པའི་སེམས་ཅན་དེ་དག་ལ་ནི་གསང་སྔགས་ཀྱི་དངོས་གྲུབ་མེད་དོ་ཞེས་ཁོ་བོ་སྨྲའོ། །སངས་རྒྱས་དང་
བྱང་ཆུབ་སེམས་དཔའ་རྣམས་ཀྱང་རྟག་ཏུ་རྒྱབ་ཀྱིས་ཕྱོགས་པར་འགྱུར་ཏེ། དེ་དག་རྒྱབ་ཀྱིས་ཕྱོགས་པར་གྱུར་ནས་ངེས་པར་འབྱིན་པ་དང་གསང་སྔགས་ཀྱི་དངོས་གྲུབ་གཏན་མེད་དོ། །དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་
ཅེས་སྨྲས་སོ། །གསང་སྔགས་ཀྱི་ཚུལ་འདི་ལ་དད་པ་གང་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་ཤིན་ཏུ་དཀའ་བ་བྱེད་པ་ཡིན་ནོ། །འཇམ་དཔལ་ཁྱོད་ཀྱིས་ཇི་སྐད་སྨྲས་པ་བཞིན་ཏེ། །དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པ་ཡིན་ཏེ། དེ་དག་ལ་ནི་
เล่ม ๘๗ · หน้า 147a
དེ་བཞིན་གཤེགས་པ་རྣམས་བྱིན་གྱིས་རློབ་པར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བྱང་ཆུབ་སེམས་དཔའ་ཆེན་པོ་གང་ཡེ་ཤེས་ཆེན་པོར་དབང་བསྐུར་བའི་གཟུངས་སྔགས་ཆེན་པོའི་དཀྱིལ་འཁོར་
ཆེན་པོ་འདི་ཡི་གེར་འདྲི་བ་དང་ཀློག་པ་དང་འཛིན་པ་དེའི་བསོད་ནམས་ཀྱི་ཕུང་པོ་ཇི་ཙམ་ཡོད་པར་རིག་པར་བྱ། ལག་ན་རྡོ་རྗེས་སྨྲས་པ། འཇམ་དཔལ་སངས་རྒྱས་ཀྱིས་ཞིང་བཅུའི་རྡུལ་ཕྲ་རབ་ཀྱི་རྡུལ་ཇི་སྙེད་པ་དེ་སྙེད་ཀྱི་དེ་བཞིན་གཤེགས་པ་རྣམས་ཀྱི་བསོད་ནམས་ཀྱི་ཕུང་པོ་ཇི་ཙམ་པ་དེའི་བསོད་ནམས་
ཀྱི་ཕུང་པོ་ཡང་དེ་ཙམ་དུ་རིག་པར་བྱའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཉིད་གཟུངས་སྔགས་འདིའི་རང་བཞིན་དུ་བཞུགས་ཏེ། ཚུལ་འདི་མ་རྟོགས་པ་བླུན་པོ་དེ་དག་གིས་ནི་མི་ཤེས་སོ། །འཇམ་དཔལ་གཞན་ཡང་བྱང་ཆུབ་སེམས་དཔའ་གཟུངས་ཐོབ་པ་དང་སེམས་ཅན་ཐམས་ཅད་
ལ་དབང་ཐོབ་པ་ཇི་སྙེད་པ་རྣམས་རྫུ་འཕྲུལ་དང་ཆོ་འཕྲུལ་སྣ་ཚོགས་བྱེད་པ་དང་། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་མཆོད་པའི་སྤྲིན་རྣམས་པ་སྣ་ཚོགས་སྟོན་པ་དེ་དག་ཐམས་ཅད་ཀྱང་གཟུངས་སྔགས་འདི་དག་གི་མཐུ་ཡིན་ནོ། །བྱང་ཆུབ་སེམས་དཔའ་ཆེན་པོ་གང་དག་
བདུད་ཕམ་པར་བྱེད་པ་དང་། བྱང་ཆུབ་མངོན་པར་རྫོགས་པར་རྟོགས་པ་དང་། ཆོས་ཀྱི་འཁོར་ལོ་བསྐོར་བ་དེ་དག་ཀྱང་གཟུངས་སྔགས་འདི་དག་གི་མཐུ་ཡིན་ནོ། །འཇམ་དཔལ་སུ་གསང་བའི་ཡེ་ཤེས་ཆེན་པོར་དབང་བསྐུར་བའི་དཀྱིལ་འཁོར་འདིར་དབང་བསྐུར་བ་དེ་ནི་དམ་ཚིག་ཐམས་ཅད་ལ་
ཞུགས་པ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཉིད་དེ་ལྟ་བུའི་རང་བཞིན་ནམ་གཟུངས་སྔགས་ཀྱི་རང་བཞིན་ནམ་དཀྱིལ་འཁོར་གྱི་རང་བཞིན་དུ་གནས་པའི་ཕྱིར་ཏེ། དེ་བས་ན་གཟུངས་སྔགས་ཀྱི་དཀྱིལ་འཁོར་འདི་མ་གཏོགས་པ་དེ་ལས་གཞན་མེད་དོ། །དེ་ཅིའི་ཕྱིར་ཞེ་ན།
དཀྱིལ་འཁོར་འདི་ནི་དེ་བཞིན་གཤེགས་པའི་རང་བཞིན་ཡིན་པའི་ཕྱིར་རོ། །དེ་བས་ན་སུ་འདིར་དབང་བསྐུར་བ་དེ་ནི་དཀྱིལ་འཁོར་ཐམས་ཅད་ཀྱི་དབང་བསྐུར་བ་ཡིན་ནོ། །འཇམ་དཔལ་ཕྱོགས་གང་དུ་ཡེ་ཤེས་ཆེན་པོར་དབང་བསྐུར་བའི་གཟུངས་སྔགས་ཀྱི་དཀྱིལ་འཁོར་འདི་བྱེད་པའམ་གང་
เล่ม ๘๗ · หน้า 147b
གི་ལག་ན་འཆང་བའམ་གང་གི་ཕྱིར་འདྲི་བའམ། གང་ཞིག་ཉིན་གཅིག་བཞིན་དུ་ནང་པར་ལངས་ནས་ལན་རེ་ཀློག་པ་དེ་ལ་འཇིགས་པ་རྣམས་མི་འབྱུང་ངོ་། །དེ་བཞིན་གཤེགས་པ་ཐམས་ཅད་ཀྱང་དེ་ལ་ཉིན་གཅིག་བཞིན་དུ་གཟིགས་པར་འགྱུར་རོ། །འཆི་ཀར་ཡང་དེ་ལ་དེ་བཞིན་གཤེགས་པ་
ཐམས་ཅད་སྐུ་སྟོན་པར་མཛད་དོ། །འཇམ་དཔལ་ལྟོས་དང་ས་ལ་གནས་པའི་ཤིང་དང་ནགས་ཚལ་ཐམས་ཅད་ནི་ས་མེད་ན་དེ་དག་ཀྱང་མེད་དོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་ཆེན་པོ་སེམས་ལ་དབང་ཐོབ་པ་རྣམས་ཀྱང་གཟུངས་
སྔགས་འདི་དག་ལ་གནས་ཏེ། འདི་དག་གིས་བྱིན་གྱིས་བརླབས་པས་ཐམས་ཅད་མཁྱེན་པ་ཉིད་ཀྱི་གོ་འཕང་རྙེད་དོ། །བདུད་ལས་རྣམ་པར་རྒྱལ་བར་བྱེད་དོ། །ཆོས་ཀྱི་འཁོར་ལོ་སྐོར་བར་བྱེད་དོ། །བྱང་ཆུབ་ཏུ་མངོན་པར་རྫོགས་པར་འཚང་རྒྱའོ། །དེ་ནས་སེམས་ཅན་གྱི་དོན་རྣམ་པ་སྣ་
ཚོགས་ཀྱང་བྱེད་དེ། འདི་དག་ཐམས་ཅད་གཟུངས་སྔགས་འདི་དག་གི་མཐུ་ཡིན་ནོ། །འཇམ་དཔལ་དེ་ལྟ་བས་ན་ཁྱོད་ཀྱིས་ཀྱང་ཆོངས་ཤིག །ལྷོགས་ཤིག །ཡིད་ལ་བྱོས་ཤིག །གཞན་དག་ལ་རྒྱ་ཆེར་ཡང་དག་པར་སྟོན་ཅིག་དང་། དེས་སེམས་ཅན་ཐམས་ཅད་ལ་ཕན་པ་དང་བདེ་
བར་འགྱུར་རོ། །འཇམ་དཔལ་ས་ཕྱོགས་གང་ན་ཡེ་ཤེས་ཆེན་པོར་དབང་བསྐུར་བའི་གཟུངས་སྔགས་ཆེན་པོའི་དཀྱིལ་འཁོར་འདི་བྱེད་པའི་ས་ཕྱོགས་དེ་མཆོད་རྟེན་ལྟ་བུར་འགྱུར་རོ། །གང་གི་ལག་ན་འཆང་བའི་སྔགས་པ་དེ་ལ་ཡང་སྟོན་པའི་འདུ་ཤེས་བསྐྱེད་པར་བྱའོ། །འཇམ་དཔལ་སྔགས་
པ་དེ་ལ་ནཾ་དེ་བཞིན་གཤེགས་པ་ཐམས་ཅད་རྟག་ཏུ་བྱིན་གྱིས་རློབ་པར་འགྱུར་རོ། །སྔགས་པ་དེས་ཀྱང་གཟུངས་སྔགས་ཆེན་པོའི་དཀྱིལ་འཁོར་འདི་རིན་པོ་ཆེའི་ཟ་མ་ཏོག་བཞིན་དུ་རྟག་ཏུ་བསྲུང་བར་བགྱིའོ། །དེ་ཅིའི་ཕྱིར་ཞེ་ན། འཇམ་དཔལ་སེམས་ཅན་གང་སངས་རྒྱས་དང་བྱང་ཆུབ་སེམས་
དཔའ་རྣམས་ལ་གུས་པ་མེད་པའི་རང་བཞིན་ཅན་དང་སློབ་དཔོན་གྱི་སྐྱོན་འདྲུ་བ་དག་ཡོད་པའི་ཕྱིར་ཏེ། འཇམ་དཔལ་དེ་དག་ལ་ནི་ཆུང་ངུ་ན་གཏམ་དུ་ཡང་བཟླས་པར་མི་བྱ། གླེགས་བམ་ཡང་བསྟན་པར་མི་བྱ་ན། ནན་གྱིས་དཀྱིལ་འཁོར་དུ་ཡང་དབང་བསྐུར་བ་དང་ཀློག་ཏུ་གཞུག་པ་དང་བལྟར་
เล่ม ๘๗ · หน้า 148a
གཞུག་པ་ལྟ་ཅི་སྨོས། འཇམ་དཔལ་འདི་ལྟ་བུ་དག་ལྟར་གཞུག་པ་དང་ཚིག་ཏུ་འབྱུང་བ་ནི་བྱང་ཆུབ་སེམས་དཔའ་དེའི་འཁྲུལ་པ་ཡིན་ཏེ། འཇམ་དཔལ་བྱང་ཆུབ་སེམས་དཔའི་བག་མེད་པ་ཆེན་པོར་རིག་པར་བྱའོ། །དེ་ནི་འཁྲུལ་པ་ཆེན་པོ་དང་ཤིན་ཏུ་ཁ་ན་མ་ཐོ་བ་ཆེན་པོ་ཡིན་ནོ། །
འཇམ་དཔལ་སངས་རྒྱས་དང་བྱང་ཆུབ་སེམས་དཔའ་ཆེན་པོ་ལ་བསླུ་བ་ནི་སླའི། གཟུངས་སྔགས་ཀྱི་ཚིག་འདི་དག་སྤོང་བ་ནི་དེ་ལྟ་མ་ཡིན་ནོ། །འཇམ་དཔལ་སངས་རྒྱས་རྣམས་འབྱུང་བ་ནི་དཀོན་ཏེ། དཔེར་ན་ཨུ་དུམ་བཱ་རའི་མེ་ཏོག་བཞིན་ནོ། །དེ་བས་ཀྱང་གཟུངས་སྔགས་འདི་འདྲ་བ་དག་
སྟོན་པ་ནི་དཀོན་ནོ། །དེ་བས་ཀྱང་ནན་ཏན་གྱིས་སྒྲུབ་པ་ནི་དཀོན་ནོ། །དེ་བས་ཀྱང་འདི་གང་དག་གི་ལག་ན་འཆང་བ་དང་གང་དག་འདི་ཉན་པ་དང་། ཀློག་པ་དང་། འཛིན་པ་དང་། ཡང་ན་དཀྱིལ་འཁོར་འདྲི་བའི་སེམས་ཅན་དེ་དག་ནི་ཤིན་ཏུ་དཀོན། སེམས་ཅན་འདི་དག་གི་བསོད་ནམས་
ཀྱི་ཕུང་པོའི་མཐའ་ཡང་རྟོགས་པར་མི་ནུས་ན། གང་དག་ནང་བར་ལངས་ནས་ལན་ཅིག་ཀློག་པ་ལྟ་སྨོས་ཀྱང་ཅི་དགོས་ཏེ། དེའི་མཚམས་མེད་པ་ལྔ་ལ་སོགས་པ་རྣམས་ཡོངས་སུ་བྱང་བར་འགྱུར་རོ། །དེ་ལ་འཇིགས་པ་ཐམས་ཅད་འབྱུང་བར་མི་འགྱུར་རོ། །དུས་མ་ཡིན་པར་འཆི་བ་ཐམས་
ཅད་དང་ཕྱིར་རྒོལ་བའི་འཇིགས་པ་ཐམས་ཅད་ཀྱང་འབྱུང་བར་མི་འགྱུར་རོ། །དེའི་ལུས་ལ་ནད་ཐམས་ཅད་འབྱུང་བར་མི་འགྱུར་རོ། །གང་ལ་ལས་དབེན་པའི་ཕྱོགས་སུ་བ་ལང་གི་ལྕི་བས་དཀྱིལ་འཁོར་བྱུགས་ལ་མེ་ཏོག་ཕུལ་ནས་ཚེས་གྲངས་དང་ཞག་ཕྱེད་པ་དང་ཡུད་ཙམ་དང་དུས་བཟང་པོ་ལ་
གྲོག་ལ་བྲིས་སམ། ཡང་ན་ཡར་ངོའི་ཚེས་བརྒྱད་དམ་ཚེས་བཅྭ་ལྔ་ལ་སྤོས་དང་མེ་ཏོག་དང་བདུག་པ་དང་ལྷ་བཤོས་ཕུལ་ལ། མར་གྱི་མར་མེ་བརྒྱད་དང་གསེར་གྱི་བུམ་པ་ལྔ་བཞག་ནས་གྲོག་ལ་བྲིས་ཏེ་མགུལ་པའམ་དཔུང་བའམ་ལག་ངར་རམ་རྐེད་པ་ལ་བཏགས་ལ། ཐབ་མོ་འགྱེད་
པའི་ནང་དུ་འགྲོའམ་ལམ་དུ་འགྲོ་འམ་རྒྱལ་པོའི་ཕོ་བྲང་དུ་འགྲོ་ན་ཡང་དེ་ལ་འཇིགས་པ་དེ་དག་ཐམས་ཅད་འབྱུང་བར་མི་འགྱུར་རོ། །འཇམ་དཔལ་འདི་ནི་སེམས་ཅན་ལ་བསྲུང་བའི་མཆོག་ཡིན་ཏེ། ཁྱིམ་མམ་གཙུག་ལག་ཁང་ངམ་གནས་ཁང་གང་ན་གཟུངས་སྔགས་འདི་དག་འདུག་པའི་
เล่ม ๘๗ · หน้า 148b
གནས་དེར་བསྲུང་བའི་མཆོག་ཏུ་འགྱུར་རོ། །འཇམ་དཔལ་གང་གིས་གཟུངས་སྔགས་འདི་དག་ལས་གང་ཡང་རུང་བས་བསྲུང་བ་བྱས་པ་ལ་འགལ་བར་བྱེད་པ་ནི་ལྷ་དང་བཅས་པ་དང་། བདུད་དང་བཅས་པའི་འཇིག་རྟེན་ན་ངས་མ་མཐོང་སྟེ། དེའི་མགོ་བོ་ལག་ན་རྡོ་རྗེ་ངས་རྡོ་རྗེ་ཀུན་དུ་
འབར་ཞིང་མེ་ལྕེ་གཅིག་ཏུ་གྱུར་པས་འགེམས་སོ། །འཇམ་དཔལ་ཆར་མི་འབབ་ན་ཡང་གཟུངས་སྔགས་འདི་དག་བཀླག་པར་བྱའོ། །ཕ་རོལ་གྱི་དམག་ཚོགས་འོང་ན་ཡང་བཀླག་པར་བྱའོ། །མི་ནད་ཀྱི་གནོད་པ་བྱུང་བ་ལ་ཡང་བཀླགས་ན་འཇིགས་པ་ཐམས་ཅད་རབ་ཏུ་ཞི་བར་འགྱུར་ཏེ་
དེའི་མོད་ལ་ཞི་བར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བྱང་ཆུབ་སེམས་དཔའ་ཆེན་པོ་གཟུངས་སྔགས་ཆེན་པོའི་དཀྱིལ་འཁོར་ཤིན་ཏུ་རྒྱ་ཆེ་བ་འདི་དང་ཤིན་ཏུ་ཟབ་པ་འདི་དང་གཏིང་དཔག་དཀའ་བ་དང་གསང་བ་
བས་ཀྱང་ཆེས་གསང་བ་སེམས་ཅན་སྡིག་ཅན་རྣམས་ལ་བསྟན་དུ་མི་རུང་བ་འདི་ནི་ལག་ན་རྡོ་རྗེ་ཁྱོད་ཀྱིས་ཤིན་ཏུ་དཀོན་པ་ཞིག་སྨྲས་ཏེ། འདི་ནི་སྔོན་མ་ཐོས་ན་འདི་སེམས་ཅན་ཇི་ལྟ་བུ་དག་ལ་བཤད་པར་བྱ། ལག་ན་རྡོ་རྗེས་སྨྲས་པ། འཇམ་དཔལ་གང་དག་བྱང་ཆུབ་ཀྱི་སེམས་སྒོམ་པ་ལ་
ཞུགས་པ་དང་གང་གི་ཚེ་དེ་དག་གི་བྱང་ཆུབ་ཀྱི་སེམས་གྲུབ་པར་གྱུར་པ་དེའི་ཚེ། འཇམ་དཔལ་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་དེ་དག་ཡེ་ཤེས་ཆེན་པོར་དབང་བསྐུར་བའི་གཟུངས་སྔགས་ཀྱི་དཀྱིལ་འཁོར་དུ་གཞུག་པར་བྱའི། གང་དག་གི་བྱང་
ཆུབ་ཀྱི་སེམས་རྫོགས་པར་མ་གྱུར་པ་དེ་དག་ནི་གཞུག་པར་མི་བྱ་སྟེ། དེ་དག་ནི་དཀྱིལ་འཁོར་ཡང་ལྟར་མི་གཞུག་གོ། །དེ་དག་ལ་ནི་ཕྱག་རྒྱ་དང་གསང་སྔགས་ཀྱང་བསྟན་པར་མི་བྱའོ། །འཇམ་དཔལ་གཟུངས་སྔགས་ཆེན་པོའི་དཀྱིལ་འཁོར་འདི་བྱིན་གྱིས་བརླབ་པར་བྱ་བའི་ཕྱིར་ཕྱག་
རྒྱ་ཆེན་པོ་གང་བཅིངས་པ་ཙམ་གྱིས་ཐམས་ཅད་བྱིན་གྱིས་བརླབས་པར་འགྱུར་བ་བཤད་ཀྱིས་ཉོན་ཅིག །ལག་པ་གཉིས་སྦྱར་ལ་གཡས་པའི་གུང་མོ་བཀུག་པ་ནི་གཟུངས་སྔགས་ཐམས་ཅད་འདྲེན་པའི་ཕྱག་རྒྱ་སྟེ། གསང་སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐ་
เล่ม ๘๗ · หน้า 149a
ཨཱ་གཙྪ་པུ་ནིཏྟི། བ་རི་པཱུ་ར་ཎི། ས་མི་ས་མི། མྃ་ག་ལི་མྃ་ག་ལི་ཧཱུྃ་ཕཊ། དེ་ཉིད་ཀྱི་གུང་མོ་སྔ་མ་བཞིན་དུ་བཞག་ན་དཀྱིལ་འཁོར་དུ་གཟུངས་སྔགས་རྣམས་ཀྱི་བྱིན་གྱིས་རློབ་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཕྱག་རྒྱ་ནི། ལག་པ་གཉིས་ཁུ་
ཚུར་བཅངས་ལ་མཛུབ་མོ་གཉིས་བཀུག་ན་ཐམས་ཅད་དྲངས་པར་འགྱུར་རོ། །དེའི་གསང་སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ་ཏ་ཐཱ་ག་ཏ། བོ་དྷི་སཏྭ་མ་དྷ་རི། ཨཱ་གཙྪ་ཨཱ་གཙྪ། ས་ནི་ད་དྷྃ། ཀུ་རུ་ཀུ་རུ། ཧཱུྃ་ཧཱུྃ་ཕཊ་ཕཊ། དེ་ནས་མཆོད་པ་མཆོག་
འབྱུང་བའི་ཕྱག་རྒྱ་བཅིང་བར་བྱ་སྟེ། ལག་པ་གཉིས་སྦྱར་ནས་མཛུབ་མོ་གཉིས་བཀྱེད་པ་ནི་མཆོད་པ་འབྱུང་བའི་ཕྱག་རྒྱ་སྟེ། འདི་མཆོད་པའི་མཆོག་བྱིན་གྱིས་བརླབ་པར་བྱའོ། །གསང་སྔགས་ལ། ན་མཿསརྦ་ཏ་ཐཱ་ག་ཏེ་བྷྱཿ། སརྦ་མུ་ཁེ་བྷྱཿ། སརྦ་ཐཱ། མ་ཧཱ་བཱུ་ཛ། པྲ་བརྟ་
ནི། ཧཱུྃ་ཕཊ། པྲ་བརྟ་ཡ་པྲ་བརྟ་ཡ། །སརྦ་ཏ་ཐཱ་ག་ཏ་ས་མ་ཡེ་སྭཱ་ཧཱ། འཇམ་དཔལ་དེ་ནས་སློབ་དཔོན་གྱིས་ཆོ་ག་སྔ་མ་བཞིན་དུ་སློབ་མ་ཡོངས་སུ་གཟུང་བར་བྱ་སྟེ། བྱང་ཆུབ་ཀྱི་སེམས་བསྒོམ་པ་གྲུབ་པ་ལ་དཀྱིལ་འཁོར་འདི་དང་ཕྱག་རྒྱ་བསྟན་པར་བྱའོ། །དེ་མ་ཡིན་པ་གཞན་པ་ལ་ནི་
གླེགས་བམ་ཡང་བལྟར་གཞུག་པར་མི་བྱའོ། །འཇམ་དཔལ་གལ་ཏེ་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་དམ་ཚིག་མི་ཤེས་པའི་སེམས་ཅན་ལ་དཀྱིལ་འཁོར་བསྟན་ཏམ་ཕྱག་རྒྱ་བསྟན་ན། དེས་སངས་རྒྱས་དང་བྱང་ཆུབ་སེམས་དཔའ་རྣམས་
བསླུས་བར་འགྱུར་རོ། །མཚམས་མེད་པ་ལྔ་ཡང་བྱེད་པར་འགྱུར་རོ། །འཇམ་དཔལ་བྱང་ཆུབ་སེམས་དཔས་མཚམས་མེད་པ་ལྔ་བྱས་པ་ནི་སླའི། དམ་ཚིག་མི་ཤེས་པ་དང་ལུས་ཡོངས་སུ་མ་སྦྱངས་པ་དང་། བྱང་ཆུབ་ཀྱི་སེམས་བསྒོམ་པ་མ་གྲུབ་པ་ལ་སྟོན་པ་ནི་དེ་ལྟ་མ་ཡིན་ཏེ། འཇམ་
དཔལ་སེམས་ཅན་དེ་དག་གི་མདུན་དུ་ནི་ནམ་ཡང་ཚིག་ཏུ་བརྗོད་པར་མི་བྱའོ། །དེ་ཅིའི་ཕྱིར་ཞེ་ན། སེམས་ཅན་སྡིག་ཅན་དེ་དག་ནི་སངས་རྒྱས་དང་བྱང་ཆུབ་སེམས་དཔའ་རྣམས་ལ་དྲིན་དུ་མི་གཟོ་བ་དང་། དད་པ་མེད་པ་ཡིན་པའི་ཕྱིར་རོ། །དེ་ནས་འཇམ་དཔལ་གཞོན་ནུར་གྱུར་པ་སེམས་
เล่ม ๘๗ · หน้า 149b
དེ་ལ་ཡ་མཚན་དུ་འཛིན་པར་གྱུར་ཏེ། སངས་རྒྱས་ཀྱི་ཡུལ་འདི་ནི་བསམ་གྱིས་མི་ཁྱབ་བོ་སྙམ་ནས། ཅང་མི་ཟེར་བར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བྱང་ཆུབ་སེམས་དཔའ་སེམས་དཔའ་ཆེན་
པོ་གཟུངས་སྔགས་འདི་དག་མཉན་པ་དང་དཀྱིལ་འཁོར་དུ་འཇུག་པ་དང་ཀློག་པ་དང་དྲན་པར་བྱེད་པ་དང་། ཆུང་ངུ་ནི་རྣ་ལམ་དུ་གྲག་པ་ཙམ་དུ་གྱུར་པ་དེ་ཡང་ཤིན་ཏུ་དཀའ་བ་ཡིན་ནོ། །ལག་ན་རྡོ་རྗེས་སྨྲས་པ། འཇམ་དཔལ་དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། འཇམ་དཔལ་
གང་དག་གཟུངས་སྔགས་འདི་ལ་མཆོད་པ་བྱེད་པ་དང་ཡི་གེར་འདྲི་བའི་སེམས་ཅན་དེ་དག་ནི་ཤིན་ཏུ་དཀོན་པར་རིག་པར་བྱའོ། །སུ་གྲོ་གའམ་གཞན་ལ་བྲིས་ནས་ཡན་ལག་དང་ཉིང་ལག་གང་ཡང་རུང་བ་ལ་འཆང་ན་དེ་ལ་འཇིགས་པ་ཐམས་ཅད་མི་འབྱུང་ཞིང་སྡིག་པ་ཐམས་ཅད་ལས་གྲོལ་བར་
འགྱུར་ཏེ། དེའི་དགེ་བའི་རྩ་བ་ཉིན་གཅིག་བཞིན་དུ་སངས་རྒྱས་སྟོང་ལས་བསགས་པར་འགྱུར་རོ། །འཇམ་དཔལ་ཕྱོགས་གང་ན་གཟུངས་སྔགས་ཆེན་པོའི་དཀྱིལ་འཁོར་བསྟན་པ་འདི་གནས་པའམ། གང་གི་ལག་ན་ཡོད་པའི་ས་ཕྱོགས་དེ་ནི་མཆོད་རྟེན་ལྟ་བུར་འགྱུར་རོ། །དེ་ནས་
འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བྱང་ཆུབ་སེམས་དཔའ་ཆེན་པོ་གཟུངས་སྔགས་འདི་དག་འཆང་བ་དང་ཀློག་པ་དང་ཁ་ཏོན་བྱེད་པ་གང་ཡིན་པ་དེ་ལ་ནི། ཁོ་བོས་མཆོད་པ་དང་བསྙེན་བཀུར་བྱའོ། །དེའི་ཕྱི་བཞིན་དུ་ཡང་རྟག་
ཏུ་འབྲང་བར་བྱའོ། །གང་གི་ཚེ་འཆི་བའི་དུས་བྱེད་པ་དེའི་ཚེ་ན་ཡང་ཁོ་བོས་དེའི་དགེ་བའི་བཤེས་གཉེན་བྱ་སྟེ་རྟག་ཏུ་བྱང་ཆུབ་ཀྱི་ལམ་ཉེ་བར་སྟོན་པར་བྱའོ། །འཇམ་དཔལ་ལེགས་སོ་ལེགས་སོ། །ཚིག་འདི་ནི་ལེགས་པར་སྨྲས་སོ། །འཇམ་དཔལ་ཁོ་བོས་ཀྱང་དེ་ལ་མཆོད་པ་བྱའོ། །
རྟག་ཏུ་དེའི་ཕྱི་བཞིན་དུ་ཡང་འབྲང་བར་བྱའོ། །རྟག་ཏུ་བསྲུང་བར་ཡང་བྱའོ། །འཆི་བའི་ཚེ་ན་ཡང་དེ་ལ་ལུང་བསྟན་པར་བྱའོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བྱང་ཆུབ་སེམས་དཔའ་ཆེན་པོ་གང་
เล่ม ๘๗ · หน้า 150a
བསྒྲུབས་པས་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་བཞིན་གཤེགས་པའི་རིགས་སུ་སྐྱེ་བར་འགྱུར་བ་དང་། གཟུངས་སྔགས་གང་བསྒྲུབས་ན་སྔགས་པས་ཚེ་འདི་ཉིད་ལ་ཡིད་ལ་ཅི་འདོད་པའི་
དངོས་གྲུབ་ཐོབ་པར་འགྱུར་བའི་གཟུངས་སྔགས་དེ་དག་གི་དངོས་གྲུབ་བསྒྲུབ་པའི་རིམ་པར་ཕྱེ་བ་རྒྱས་པར་ཤོད་ཅིག །དེ་སྐད་ཅེས་སྨྲས་པ་དང་བྱང་ཆུབ་སེམས་དཔའ་ལག་ན་རྡོ་རྗེས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གཟུངས་སྔགས་འདི་དག་གི་
བསྒྲུབ་པ་སངས་རྒྱས་རྣམས་ཀྱིས་ཇི་སྐད་གསུངས་པ་བཤད་ཀྱིས་ཉོན་ཅིག །ཚེས་གྲངས་དང་རྒྱུ་སྐར་དང་ཡང་སྦྱར་མི་དགོས། སྨྱུང་བ་ཡང་བྱ་མི་དགོས། བགེགས་ཀྱང་འབྱུང་བར་མི་འགྱུར་ཏེ། གཟུངས་སྔགས་བསྒྲུབ་པའི་ཚེ་ཡང་རྟག་ཏུ་སངས་རྒྱས་རྫུ་འཕྲུལ་ཆེན་པོ་ཐམས་ཅད་
ཀྱིས་བྱིན་གྱིས་བརླབས་པར་འགྱུར་རོ། །འཇམ་དཔལ་ཐོག་མར་རེ་ཞིག་གཟུངས་སྔགས་འདི་དག་གི་རི་མོའི་སྐུ་གཟུགས་ཀྱི་ཆོ་ག་འབྱུང་སྟེ། ཁ་ཐབས་བཞིན་དུ་རས་ཉོས་ལ་སྐྲ་ལ་སོགས་མེད་པར་བྱའོ། །དེ་ནས་བ་ལས་འབྱུང་བའི་སྣ་ལྔས་བཀྲུས་ལ་སྤོས་ཆུས་བསྐུའོ། །དེ་ནས་ཚེས་
གྲངས་དང་ཞག་ཕྱེད་པ་དང་ཡུད་ཙམ་བཟང་པོ་ལ་རི་མོ་བྲིས་ཏེ་རི་མོ་མཁན་གསོ་སྦྱོང་དང་ལྡན་པ་འདྲིར་གཞུག་གོ། །རི་མོ་མཁན་དེ་ཡང་འཁོར་ལོས་སྒྱུར་བས་བསྲུང་བར་བྱའོ། །ཉིན་གཅིག་བཞིན་དུ་ལྷ་བཤོས་དང་མཆོད་པ་ཡང་དབུལ་བར་བྱའོ། །དེ་ནས་རི་མོ་མཁན་གྱིས་དབུས་སུ་བཅོམ་
ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་བྲི་བར་བྱ་སྟེ། སྐྱིལ་མོ་ཀྲུང་དུ་འདུག་ལ་ཐོར་ཚུགས་ཅན་ཏིང་ངེ་འཛིན་ལ་སྙོམས་པར་ཞུགས་པར་བྱ། བཅོམ་ལྡན་འདས་མའི་གཡོན་རོལ་དུ་སོ་སོར་འབྲང་བ་ཆེན་མོ་བྲི་བར་བྱ་སྟེ། ཨུཏྤ་ལའི་རྒྱལ་པོ་ཆེན་པོ་ལ་འདུག་ཅིང་ཏིང་ངེ་འཛིན་ལ་སྙོམས་པར་
ཞུགས་ལ་ལྕང་ལོ་ཅན་འཕྱང་བར་བྱ། གཡས་ལོགས་སུ་རྡོ་རྗེ་མི་ཕམ་པའི་མེ་པདྨ་དཀར་པོ་ལ་འདུག་ཅིང་རྒྱན་རྣམ་པ་སྣ་ཚོགས་ཀྱིས་ལུས་བརྒྱན་ལ། ལག་པ་གཡོན་པ་ན་འཁོར་ལོ་ཐོགས་པ། གཡས་པ་བཅོམ་ལྡན་འདས་མ་ལ་ཕྱག་འཚལ་བར་བྱ། སྟེང་གི་ཕྱོགས་སུ་ཡང་རིག་
เล่ม ๘๗ · หน้า 150b
སྔགས་འཆང་གཉིས་མེ་ཏོག་གི་ཆར་འབེབས་པ་བྲི། འོག་ལོགས་སུ་སྒྲུབ་པ་པོའམ་ལག་ན་པོག་ཕོར་ཐོགས་པ། བཅོམ་ལྡན་འདས་མ་ལ་བལྟ་ཞིང་ཡལ་ག་མེ་ཏོག་ཅན་ཐོགས་པ་སྐྱིལ་མོ་ཀྲུང་གིས་འདུག་པར་བྱའོ། །དེ་ནས་བྱང་ཆུབ་སེམས་དཔའི་སྤྱོད་པ་གསང་སྔགས་ཀྱི་སྒོ་
སྤྱོད་པའི་བྱང་ཆུབ་སེམས་དཔའ་ས་ཕྱོགས་གཙང་མའམ། དབེན་པའམ། རིའམ་ནགས་ཚལ་ལམ། གཙུག་ལག་ཁང་ངམ། གང་ཡིད་དང་འཐད་པ་དེར་འདུག་ལ། སློང་མོའི་ཟས་ཟ་ཞིང་ནང་གི་གཙང་སྦྲ་སྤྱོད་པས་རི་མོའི་སྐུ་གཟུགས་དེའི་མདུན་དུ་གཟུངས་སྔགས་གང་
ཡང་རུང་བ་གཅིག་བཟུང་སྟེ། བཞི་འབུམ་བཟླས་བརྗོད་བྱས་ལ། ཐ་མར་ཟླ་བ་ཉ་ལ་ཅི་འབྱོར་པས་མཆོད་པ་བྱས་ཏེ། མཚན་ར་ངས་བཟླས་བརྗོད་བྱས་ན་ནང་པར་རམ་ཉི་མ་འཆར་ཀར་མཚན་མ་འབྱུང་སྟེ། སྔགས་པའི་ལུས་ལ་འོད་ཟེར་སྣང་བ་འབྱུང་ཞིང་སྐུ་གཟུགས་ལ་མེ་ཏོག་
གི་ཆར་འབབ་པར་འགྱུར། རིག་སྔགས་འཆང་རྣམས་ཅ་ཅོའི་སྒྲ་འདོན་པར་འགྱུར། འབྲུག་སྒྲ་གྲག་པར་འགྱུར། བཅོམ་ལྡན་འདས་མ་ཡང་བུ་ང་གྲུབ་ཟིན་གྱིས་ལོངས་ཞེས་ཚིག་བརྗོད་པར་འགྱུར་རོ། །དེ་ནས་རིག་སྔགས་འཆང་གིས་མཆོད་ཡོན་ཕུལ་ནས། བཅོམ་ལྡན་འདས་མ་
ལ་འདི་སྐད་དུ་བདག་གི་བསམ་པ་རྫོགས་པར་མཛོད་ཅིག་ཅེས་སྨྲོས་ཤིག །འོན་ཀྱང་བཅོམ་ལྡན་འདས་མས་རིག་སྔགས་འཆང་གི་ལག་པ་ནས་བཟུང་ནས། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་འཇོག་སྟེ། བཅོམ་ལྡན་འདས་མའི་མཐུས་སྐད་ཅིག་ཐང་ཅིག་ཡུད་
ཙམ་ཅིག་དེ་ལ་དེ་བཞིན་གཤེགས་པ་ཐམས་ཅད་ཀྱི་མཆོད་པ་སྒྲུབ་པར་བྱེད་ཅིང་། སེམས་ཅན་གྱི་ཁམས་ཐམས་ཅད་སྐད་ཅིག་རེ་རེ་ལ་དགའ་བར་བྱེད་དོ། །རིག་སྔགས་འཆང་གི་འཁོར་དུ་མ་དང་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་གནས་པར་འགྱུར་རོ། །འཇམ་
དཔལ་བཅོམ་ལྡན་འདས་མའི་རི་མོའི་སྐུ་གཟུགས་ཀྱི་ཆོ་ག་རྒྱས་པའི་མདོ་འདི་ནི་དོན་ཐམས་ཅད་སྒྲུབ་པ། སྡིག་པ་ཐམས་ཅད་རབ་ཏུ་སེལ་བ། འཇིགས་པ་ཐམས་ཅད་རབ་ཏུ་སྦྱོང་བ། དུས་མ་ཡིན་པར་འཆི་བ་ཐམས་ཅད་རབ་ཏུ་ཞི་བར་བྱེད་པ་ཡིན་ནོ། །འཇམ་དཔལ་གང་རི་མོའི་སྐུ་གཟུགས་
เล่ม ๘๗ · หน้า 151a
འདི་མཐོང་བ་དང་མཆོད་པ་བྱེད་པ་དང་སུའི་ལག་ན་འདུག་པ་དང་སུ་ཡི་གེར་འདྲི་བ་དེ་ལ་ནི་བྱང་ཆུབ་སེམས་དཔའ་རྣམས་བྱང་ཆུབ་ཀྱི་ལམ་སྟོན་པར་འགྱུར་ཞིང་སྡིག་པ་ཐམས་ཅད་དང་བྲལ་བར་འགྱུར། དེ་བཞིན་གཤེགས་པ་ཐམས་ཅད་ཀྱི་བསོད་ནམས་ལས་སྐྱེས་པར་འགྱུར།
འཇིགས་པ་ཐམས་ཅད་དང་བྲལ་བར་འགྱུར། བདུད་སྡིག་ཅན་རྣམས་ཀྱིས་གཙེ་བར་མི་འགྱུར། འཆི་བའི་ཚེ་སངས་རྒྱས་མཐོང་བར་འགྱུར་རོ། །ལག་ན་རྡོ་རྗེ་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། བྱང་ཆུབ་སེམས་དཔའ་ཆེན་པོ་རིགས་ཀྱི་བུའམ། རིགས་ཀྱི་བུ་མོ་གང་
རི་མོའི་སྐུ་གཟུགས་འདི་མཐོང་བ་དང་རི་མོར་འདྲི་བ་དང་། གང་གི་ལག་ཏུ་འདུག་པ་དེ་ནི་ཡོན་ཏན་དཔག་ཏུ་མེད་པ་དང་ལྡན་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་ཞིང་ངན་སོང་ངན་འགྲོར་ཡང་འགྲོ་བར་མི་འགྱུར། དེ་བཞིན་གཤེགས་པའི་རིགས་
སུ་ཡང་རྟག་ཏུ་སྐྱེ་བར་འགྱུར་ཏེ་སྨོན་ལམ་ཐམས་ཅད་ཡོངས་སུ་རྫོགས་པར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་གསོལ་བ་བཏབ་པ། བྱང་ཆུབ་སེམས་དཔའ་ཆེན་པོ་གཟུངས་སྔགས་འདི་དག་གི་སྤྱིའི་དངོས་གྲུབ་བསྒྲུབ་པའི་རིམ་པར་
དབྱེ་བ་གང་གིས་བྱང་ཆུབ་ཀྱི་སྤྱད་པ་གསང་སྔགས་ཀྱི་སྒོ་སྤྱོད་པ་རྣམས་ཀྱིས་ཚེགས་ཆུང་དུས། སངས་རྒྱས་དང་བྱང་ཆུབ་སེམས་དཔའ་རྣམས་མཉེས་པར་བྱ་བར་འགྱུར་བ་དང་རྫུ་འཕྲུལ་གྱི་ཆོ་འཕྲུལ་རྣམ་པ་སྣ་ཚོགས་བྱེད་པར་འགྱུར་བ་དང་། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་
དཀྱིལ་འཁོར་དུ་སེམས་ཅན་ཐམས་ཅད་སྡུག་བསྔལ་ཐམས་ཅད་ལས་ཐར་བར་བྱེད་པར་འགྱུར་བ་ཁྱོད་ཀྱིས་ཤོད་ཅིག །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་ལག་ན་རྡོ་རྗེས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་སེམས་ཅན་རྣམས་
ལ་ཕན་གདགས་པའི་ཕྱིར་གཟུངས་སྔགས་འདི་དག་གི་སྤྱིའི་བསྒྲུབ་པའི་རྣམ་པར་ཕྱེ་བ་བཤད་གྱིས་ཉོན་ཅིག །འཇམ་དཔལ་དེ་ལ་བྱང་ཆུབ་ཀྱི་སྤྱོད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་གང་ཡང་རུང་སྟེ། རི་མོའི་རི་སྐུ་གཟུགས་བཞག་ལ། བཅོམ་ལྡན་འདས་མ་
เล่ม ๘๗ · หน้า 151b
གཟུགས་སམ། ཁ་དོག་གམ། དབྱིབས་སམ། ཡི་གེར་ཡིད་ལ་བསམས་ཏེ། ཟླ་བ་དྲུག་གི་བར་དུ་བསྒོམས་ན་ལས་ཐམས་ཅད་ནུས་པར་འགྱུར་ཏེ། དུག་ནི་མཐོང་བ་ཙམ་གྱིས་འབྲོས་པར་འགྱུར་རོ། །གདོན་གྱིས་ཟིན་པ་ནི་བསྡིགས་པ་ཙམ་གྱིས་འབྲོས་པར་འགྱུར་རོ། །
གཞན་ཅི་ཡང་རུང་བས་ཟིན་པ་ཡང་མཐོང་བ་ཙམ་གྱིས་གཏོང་བར་འགྱུར་རོ། །དཔག་ཚད་བརྒྱའི་ཕ་རོལ་ན་གནས་པ་ཡང་ལས་ཐམས་ཅད་བྱེད་དོ། །འཇིགས་པ་ཐམས་ཅད་ལ་ནི་ལན་བརྒྱ་རྩ་བརྒྱད་བཟླས་བརྗོད་བྱས་པའི་སྐུད་པས་བསྲུང་བ་བྱས་པར་འགྱུར་རོ། །བགེགས་
ཐམས་ཅད་ལ་ནི་ཆུས་སྲུང་བར་བྱེད་དོ། །སྒྲུབ་པོ་རྣམས་སམ་རོ་ལངས་བསྒྲུབ་པ་རྣམས་ལ་གསང་སྔགས་འདི་དག་ལས་གང་ཡང་རུང་བ་གཅིག་གིས་བདག་བསྲུང་བ་དང་། གཞན་བསྲུང་བ་དང་། ཕྱོགས་བཅིང་བ་དང་། དཀྱིལ་འཁོར་གྱི་མཚམས་གཅད་པར་བྱའོ། །དེ་
ནས་ལུས་མི་སྣང་བར་བྱེད་འདོད་ན་སྐར་མ་རྒྱལ་ལ། ལྡོང་རོས་ཁ་ཐབས་བཞིན་དུ་ཉོས་ཏེ་རང་གི་ཁྲག་གིས་བསྒོས་ལ། དེ་ནས་ཕྱུང་སྟེ་རི་མོའི་སྐུ་གཟུགས་ཀྱི་མདུན་དུ་གཞག་གོ། །དེ་ནས་ཟས་སུ་འོ་མ་དང་ཕྱེའི་འདེ་གུ་ཟ་ཞིང་ཞག་བདུན་གྱི་བར་དུ་དུས་གསུམ་དུ་ལན་བརྒྱ་རྩ་བརྒྱད་བཟླས་
བརྗོད་བྱའོ། །དེ་ནས་མར་གྱི་ངོ་ཞག་བརྒྱད་ལ་ཁ་ཟས་མི་ཟ་བར་ལག་པ་གཡོན་པར་བཞག་སྟེ། བཅོམ་ལྡན་འདས་མ་བཟླས་བརྗོད་བྱས་ན་འགྲུབ་པར་འགྱུར་ཏེ། ཐིག་ལེ་བྱས་བས་ལུས་ནི་སྣང་བར་འགྱུར་ཞིང་འདོད་དགུར་སྒྱུར་བའི་གཟུགས་ཅན་ལོ་ལྔ་སྟོང་ཐུབ་པར་འགྱུར་རོ། །
བཅོམ་ལྡན་འདས་མ་མཐོང་བར་འདོད་ན་ཟླ་བ་གཅིག་གི་བར་དུ་སློང་མོའི་ཟས་ཟ་ཞིང་རིའི་རྩེ་མོར་སོང་སྟེ་བཅོམ་ལྡན་འདས་མ་བཟླས་བརྗོད་བྱའོ། །དེ་ནས་ཞག་གསུམ་སྨྱུང་བ་བྱས་ཏེ། ཟླ་བ་ཉ་ལ་བྱང་ཆུབ་ཀྱི་ཤིང་དྲུང་དུ་ཅི་འབྱོར་པས་ལྷ་བཤོས་དབུལ་ཞིང་མཆོད་པ་བྱས་ཏེ་བཅོམ་ལྡན་འདས་
མ་ལ་བཟླས་བརྗོད་བྱའོ། །དེ་ནས་ནམ་ཕྱེད་ན་བཅོམ་ལྡན་འདས་མ་ཉིད་འོང་བར་འགྱུར་ཏེ། དེ་ལ་མེ་ཏོག་དཀར་པོ་དག་གིས་མཆོད་ཡོན་དབུལ་ལོ། །དེ་ནས་བཅོམ་ལྡན་འདས་མས་སྒྲུབ་པ་པོའི་སྤྱི་བོར་བྱུགས་ནས་བུ་ལེགས་སོ། །ཁྱོད་ལ་མཆོག་ཅི་ཞིག་སྦྱིན་པར་བྱ་ཞེས་དེ་ཉིད་ཟེར་
เล่ม ๘๗ · หน้า 152a
བ་དང་ཅི་འདོད་པ་དེ་བསླང་བར་བྱ་སྟེ། འདོད་ན་ཞོའམ། རིག་སྔགས་འཆང་ཉིད་དམ། ལུས་མི་སྣང་བའམ། སའི་འོག་ཏུ་འགྲོ་བའམ། །གཞན་ཡང་ཡིད་ལ་གང་འདོད་པ་ཅི་ཡང་རུང་བ་དེ་ཐམས་ཅད་བསླང་བར་བྱའོ། །ཅི་སྟེ་དང་པ་བསྒྲུབ་པར་འདོད་ན་ལི་ཁྲི་
ལས་དང་པའི་གཟུགས་བྱས་ཏེ། རི་མོའི་སྐུ་གཟུགས་ཀྱི་མདུན་དུ་བཞག་ལ་ཀུནྡའི་མེ་ཏོག་གིས་མཆོད་པ་རྒྱས་པར་བྱས་ནས་མཚན་རངས་བཅོམ་ལྡན་འདས་མ་བཟླས་བརྗོད་བྱས་ན་ནང་པར་རམ་ཉི་མ་འཆར་ཀར་གྲུབ་པར་འགྱུར་ཏེ། དེ་ལ་ཞོན་ནས་ནམ་མཁའ་ལ་འཕགས་པ་དང་
ཚངས་པ་གཉིས་པར་འགྱུར་རོ། །ཅི་སྟེ་རྨ་བྱ་བསྒྲུབ་པར་འདོད་ན་འཇིམ་པ་ལ་རྨ་བྱའི་གཟུགས་བྱས་ཏེ། རི་མོའི་སྐུ་གཟུགས་ཀྱི་མདུན་དུ་བཞག་ལ་ཟླ་བ་དྲུག་ཏུ་བཅོམ་ལྡན་འདས་མ་བཟླས་བརྗོད་བྱས་པའི་མཇུག་ཏུ་ཟླ་བ་ཉ་ལ་ཅི་འབྱོར་པས་མཆོད་པ་བྱས་ཏེ། མཚན་རངས་བཟླས་
བརྗོད་བྱས་ན་ཉི་མ་འཆར་ཀར་རྨ་བྱའི་སྐད་འབྱིན་པར་འགྱུར་ཏེ། སྐད་བྱུང་མ་ཐག་ཏུ་སྔགས་པས་བསླང་བར་བྱའོ། །དེ་བླངས་བ་ཙམ་གྱིས་སྔགས་པ་སྨིན་དྲུག་གི་བུ་དང་འདྲ་བར་འགྱུར་རོ། །ཆོ་ག་དེ་བཞིན་དུ་ས་སྲུང་གི་བུ་བསྒྲུབས་ན་བརྒྱ་བྱིན་དང་འདྲ་བར་འགྱུར་རོ། །ལུས་མི་སྣང་བ་
བསྒྲུབ་པར་འདོད་ན། མིའི་ཐོད་པ་བླངས་ལ་ཤིང་མངར་དང་ལྷན་ཅིག་ཏུ་ཞིབ་མོར་བཏགས་ཏེ། ཐ་མར་ཡར་གྱི་ངོའི་ཚེས་བརྒྱད་ལ་ཨརྒའི་ཤིང་གི་མེ་བུས་ལ་རི་མོའི་སྐུ་གཟུགས་ལ་མཆོད་པ་རྒྱས་པར་ཕུལ་ནས་མཚན་རངས་སྦྱིན་སྲེག་བྱས་ཏེ། ནད་པར་དེའི་ཐལ་བས་སེན་མོའི་
སེན་རིས་བྱས་ན་ལུས་མི་སྣང་བར་འགྱུར་ཏེ། ལུས་མི་སྣང་བ་ཐམས་ཅད་ཀྱི་རྒྱལ་པོར་འགྱུར་རོ། །སྦྱོར་བ་གཞན་ཡང་འབྱུང་སྟེ། ལི་ཁྲི་མར་དང་ལྷན་ཅིག་ཏུ་བསྲེགས་ལ། དེ་ནས་ཟངས་ཀྱི་སྣོད་དུ་བཞག་སྟེ། རི་མོའི་སྐུ་གཟུགས་ལ་མཆོད་པ་རྒྱས་པར་བྱས་ན་ཤེལ་བཞིན་དུ།
འབར་བར་གྱུར་གྱི་བར་དུ་མཚན་རངས་བརྗོད་པར་བྱའོ། །དེ་ནས་གྲུབ་པར་འགྱུར་ཏེ་དེས་ཐིག་ལེ་བྱས་ན་ལུས་མི་སྣང་བར་འགྱུར་ཏེ། ལོ་ལྔ་སྟོང་ཐུབ་པར་འགྱུར་རོ། །ཅི་སྟེ་མིག་སྨན་བསྒྲུབ་པར་འདོད་ན་སྣ་མའི་མེ་ཏོག་དང་ལིག་བུ་མིག་བླངས་ཏེ་ཞིབ་མོར་བྱས་ལ། དེ་ནས་སྔ་མ་བཞིན་
เล่ม ๘๗ · หน้า 152b
དུ་ཟངས་ཀྱི་སྣོད་དུ་བཞག་སྟེ། མཆོད་པ་བྱས་ནས་ཟླ་བ་གཅིག་གི་བར་དུ་བཟླས་བརྗོད་བྱའོ། །དེ་ནས་དེ་སྔོན་དུ་གྱུར་ནས་དེས་མིག་བསྐུས་ན་ཕྱོགས་གང་དུ་བལྟས་པ་དེ་ཐམས་ཅད་དབང་དུ་འགྱུར་རོ། །ཅི་སྟེ་དེས་མིག་བསྐུས་ན་རྒྱལ་པོ་དང་བློན་པོ་དང་རྒྱལ་པོའི་བཙུན་མོ་དམ་པ་
དང་རྒྱལ་པོའི་བུ་མོ་དང་གཞན་ཡང་གང་སུ་ལ་བལྟས་པ་དེ་ཐམས་ཅད་དེའི་དབང་དུ་འགྱུར་རོ། །དེ་ནས་མིག་སྨན་གྱི་མཆོག་བསྒྲུབ་པར་འདོད་ན། མར་གྱི་ངོ་ཞག་བརྒྱད་ལ་མི་རོ་རྨ་མེད་པ་བླངས་ཏེ། ཙནྡན་དམར་པོ་དང་ལྡན་པའི་ལྷ་བཤོས་ཕུལ་ལ། དེ་ནས་མི་རོའི་ལག་ཏུ་མིག་སྨན་
བཞག་ལ་བཟླས་བརྗོད་བྱའོ། །བཟླས་བརྗོད་བྱས་པ་དང་མི་རོའི་ལག་ན་མིག་སྨན་འདུག་པ་དེ་འགུལ་བར་འགྱུར་རོ། །དེ་ནས་འགྲུབ་པར་འགྱུར་ཏེ། དེས་མིག་བསྐུས་ན་གང་ལ་བལྟས་པ་དེ་དབང་དུ་འགྱུར་རོ། །སྣ་མའི་མེ་ཏོག་བརྒྱད་སྟོང་གིས་སྦྱིན་སྲེག་བྱས་ན། ལས་ཐམས་
ཅད་བདེ་བླག་ཏུ་འགྲུབ་པར་འགྱུར་རོ། །རྒྱ་མཚོར་འབབ་པའི་ཆུ་ཀླུང་གི་ནང་དུ་ཞུགས་ཏེ། མར་གྱི་ངོ་ཞག་བརྒྱད་ལ་བརྩམས་ནས། བསོད་སྙོམས་ཀྱི་ཟས་ཟ་ཞིང་ལན་འབུམ་བཟླས་བརྗོད་བྱས་ན་ཡར་ཀྱི་ངོ་ཚེས་བརྒྱད་ལ་ཡང་ཡུལ་སྦྱིན་པར་འགྱུར་རོ། །ཡར་གྱི་ངོ་ཚེས་བརྒྱད་ལ་
བསོད་སྙོམས་ཀྱི་ཟས་ཟ་ཞིང་རི་མོའི་སྐུ་གཟུགས་ཀྱི་མདུན་དུ་ལན་སྟོང་རྩ་བརྒྱད་བཟླས་བརྗོད་བྱས་ན་ཕ་རོལ་གྱི་དམག་ཚོགས་རབ་ཏུ་ཞི་བར་འགྱུར་རོ། །དེ་ནས་ཟས་སུ་འོ་མ་འཐུང་ཞིང་ལན་འབུམ་བཟླས་བརྗོད་བྱས་ན་ཕ་རོལ་གྱི་དམག་འབྱེར་བར་འགྱུར་རོ། །མར་གྱི་ངོ་ཞག་བརྒྱད་ལ་ཞག་
གཅིག་སྨྱུང་བ་བྱས་ཏེ། རི་མོའི་སྐུ་གཟུགས་ཀྱི་མདུན་དུ་མཆོད་པ་རྒྱས་པ་བྱས་ལ་མཚན་རངས་བཟླས་བརྗོད་བྱས་ན། དེ་ནས་རི་མོའི་སྐུ་གཟུགས་ལས་འོད་ཟེར་འབྱུང་བར་འགྱུར་རོ། །དེ་ནས་འགྲུབ་པར་འགྱུར་ཏེ་ར་ཛྱྃ་ད་དཱ་ཏི་ལོ་ལྔ་བརྒྱ་ཐུབ་པར་འགྱུར་རོ། །རྒྱ་མཚོར་འབབ་པའི་ཆུ་ཀླུང་
གི་ནང་དུ་ཞུགས་ལ་ལན་འབུམ་བཟླས་བརྗོད་བྱས་ཏེ་ཟས་སུ་ཆུ་འཐུངས་ན། དེ་ནས་ནམ་མཁའ་ལ་རལ་གྲི་ཐོགས་པར་འགྱུར་ཏེ། དེས་མཆོད་ཡོན་ཕུལ་ལ་བླང་བར་བྱའོ། །དེས་བླངས་པ་ཙམ་གྱིས་སྐྲ་ལྕང་ལོར་འཁྱིལ་ཞིང་ལོ་བཅུ་དྲུག་ལོན་པའི་ཤ་ཚུགས་དང་འདྲ་བར་འགྱུར་ལ།
เล่ม ๘๗ · หน้า 153a
རིག་སྔགས་འཆང་དུ་མས་བསྐོར་ཅིང་སིལ་སྙན་དང་ཕེག་རྡོབ་པ་མང་པོས་རོལ་མོ་བྱེད་ཅིང་འགྲོ་བར་འགྱུར་རོ། །ཉིན་གཅིག་བཞིན་དུ་སངས་རྒྱས་ཀྱི་ཞིང་དུ་མ་མཐོང་བར་འགྱུར་རོ། །ཐམས་ཅད་དུ་ཡང་མཆོད་པ་རྣམ་པ་སྣ་ཚོགས་ཀྱི་སྤྲིན་དག་གྲུབ་པར་བྱེད་དོ། །
གང་གི་ཚེ་ཤི་བར་གྱུར་པ་དེའི་ཚེ་ཡང་སངས་རྒྱས་ཀྱི་ཞིང་རྣམ་པར་དག་པ་རྣམས་སུ་སྐྱེ་བར་འགྱུར་ཞིང་། དེ་བཞིན་གཤེགས་པ་ཐམས་ཅད་ཀྱི་རིགས་སུ་སྐྱེ་བར་འགྱུར་རོ། ཅི་སྟེ་རལ་གྲི་བསྒྲུབ་པར་འདོད་ན་དགོན་པར་སོང་ལ་ཆུ་འཐུང་ཞིང་ཟླ་བ་གཅིག་བཟླས་བརྗོད་བྱས་ལ་དེའི་འོག་ཏུ་ཟླ་བ་ཉ་
ལ་ཅི་འབྱོར་པས་རི་མོའི་སྐུ་གཟུགས་ཀྱི་མདུན་དུ་མཆོད་པ་རྒྱ་ཆེར་བྱས་ཏེ། མཚན་རངས་བཟླས་བརྗོད་བྱས་ན་དེ་ནས་རལ་གྲི་འབར་བར་འགྱུར་ཏེ། དེ་བླངས་པ་ཙམ་གྱིས་རིག་སྔགས་འཆང་དུ་འགྱུར་ཏེ། རིག་སྔགས་འཆང་ཐམས་ཅད་ཀྱི་རྒྱལ་པོར་འགྱུར་རོ། །ལོ་དྲུག་ཁྲིར་འཚོ་བར་
འགྱུར་རོ། །དེ་ཡང་མཆོད་པ་བྱེད་པར་འགྱུར་རོ། །འདོད་པ་བཞིན་དུ་དགོས་པ་ཐམས་ཅད་བྱེད་དོ། །གང་གི་ཚེ་ཤི་བར་གྱུར་པ་དེའི་ཚེ་ས་དང་པོ་ལ་དབང་བར་འགྱུར་རོ། །ཅི་སྟེ་ཟས་མི་ཟད་པར་འབྱུང་བར་འདོད་ན་སྤོ་མའི་རྩ་བ་བླངས་ལ། སླེ་ཏྲེས་དང་ལྷན་ཅིག་སྦྱིན་སྲེག་བྱས་
ན་ཁ་ཟས་མི་ཟད་པར་འགྱུར་རོ། །མིག་ན་ན་རྒྱམ་ཚ་བཏགས་པ་ལ་ལན་བདུན་བསྔགས་ཏེ་མིག་བཀབ་ན་མིག་ནད་སོས་པར་འགྱུར་རོ། །ཀ་ལ་པིང་ཀའི་རྩ་བ་སྲོག་ཆགས་མེད་པའི་ཆུ་དང་བཏགས་ལ་ལྟེ་བའི་ཕྱོགས་སུ་བསྐུས་ན་བུད་མེད་བདེ་བར་བུ་བཙའ་བར་འགྱུར་རོ། །ཟླ་བ་སྦྱང་
ཀིས་ཟིན་པའི་ཚེ་བ་སེར་སྐྱའི་མར་ཟངས་ཀྱི་སྣོད་དུ་བཅུག་སྟེ་ཙི་རི་རི་ཟེར་གྱི་བར་དུ་བཟླས་བརྗོད་བྱས་ལ་དེ་འཐུངས་ན་ཐོས་པ་འཛིན་པར་འགྱུར་རོ། །ཉེ་བའི་གསོ་སྦྱོང་བྱས་པས་ཚེས་བཅུ་དྲུག་ནས་བརྩམས་ཏེ། ཏིལ་དང་སྦྲང་རྩི་བསྲེས་པ་སྦྱིན་སྲེག་བྱས་ན་རཱ་ཛྱྃ་པྲ་ཏི་ལ་བྷྱ་ཏེ་རི་མོའི་གཟུགས་
ཀྱི་དྲུང་དུ་བྱེ་བ་ཕྲག་གཅིག་བཟླས་བརྗོད་བྱས་ན། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་མཐོང་བར་འགྱུར་ཏེ་ཆོས་སྟོན་པར་ཡང་བྱེད་དོ། །དེ་ཐོས་པས་ཕྱིར་མི་ལྡོག་པར་ཡང་འགྱུར་རོ། །ཙནྡན་དམར་པོ་ལས་རྡོ་རྗེ་བྱས་ལ་དེ་གློར་བཞག་སྟེ་འབར་བའི་བར་དུ་བཟླས་བརྗོད་
เล่ม ๘๗ · หน้า 153b
བྱས་ན་དེ་ལ་རེག་པ་ཙམ་གྱིས་གླིང་བཞིའི་རྒྱལ་པོར་འགྱུར་རོ། །ཤིང་པ་ཏའི་འབྲས་བུ་སྦྱིན་སྲེག་བྱས་ན་གང་གི་མིང་ནས་བརྗོད་པ་དེ་དབང་དུ་འགྱུར་རོ། །རྒྱ་ཤུག་གི་འབྲས་བུ་རྣམས་ཀྱང་དེ་བཞིན་ཏེ་གང་གི་མིང་ནས་བརྗོད་ཅིང་སྦྱིན་སྲེག་བྱས་པ་དེ་དབང་དུ་འགྱུར་རོ། །ཡང་ན་ནི་མ་
པའི་འབྲས་བུ་སྦྱིན་སྲེག་བྱས་ན་གང་གི་མིང་ནས་བརྗོད་པ་དེ་དབང་དུ་འགྱུར་རོ། །བ་རུ་རའི་མེ་ཏོག་གི་སྦྱིན་སྲེག་བྱས་ན་ཡུལ་ཆེན་པོ་རྙེད་པར་འགྱུར་རོ། །མ་ལི་ཀའི་མེ་ཏོག་གི་སྦྱིན་སྲེག་བྱས་ན་ཟས་ཟད་མི་ཤེས་པར་འགྱུར་རོ། །ཀ་ར་བཱི་རའི་མེ་ཏོག་འབྲས་བུ་འབུམ་ཕྲག་
གཅིག་སྦྱིན་སྲེག་བྱས་ན་ཏི་ན་ར་འབུམ་རྙེད་པར་འགྱུར་རོ། །སྣ་མའི་མེ་ཏོག་ཁྲི་སྦྱིན་སྲེག་བྱས་ན་མདུན་ན་འདོན་མཆོག་ཏུ་འགྱུར་རོ། །བྲ་མའི་ཁུ་བ་དང་སྦྲང་རྩི་ལྷན་ཅིག་ཟངས་ཀྱི་སྣོད་ཀྱི་ནང་དུ་བཞག་སྟེ་ཏི་ན་ར་རྙེད་ཀྱི་བར་དུ་བཟླས་བརྗོད་བྱའོ། །གུ་གུལ་གྱི་སྦྱིན་སྲེག་གིས་ནི་རྒྱལ་ཕྲན་
ཐོབ་པར་འགྱུར་རོ། །ཤིང་བིལ་བའི་མེའི་མེ་བུས་ལ་མ་ལི་ཀའི་མེ་ཏོག་འབུམ་ཕྲག་གཅིག་སྦྱིན་སྲེག་བྱས་ན་ཀླུ་ཐམས་ཅད་དབང་དུ་འགྱུར་རོ། །བ་རུ་རའི་ཤིང་གི་མེ་བུས་ལ་ཨ་ག་རུའི་ཡམ་སྲེག་ཤིང་ཁྲིའི་སྦྱིན་སྲེག་བྱས་ན་གནོད་སྦྱིན་ཐམས་ཅད་དབང་དུ་འགྱུར་རོ། །ལྷ་ཆེན་པོའི་གནས་
སུ་སོང་སྟེ་བའི་ལྕི་བ་ས་ལ་མ་ལྷུང་བས་དཀྱིལ་འཁོར་བྱས་ལ་ཨརྒའི་མེ་ཏོག་སྟོང་རྩ་བརྒྱད་ཕུལ་ན། ལྷ་ཆེན་པོ་མཐོང་བར་འགྱུར་ཏེ་དངོས་གྲུབ་གང་འདོད་པ་སྦྱིན་པར་བྱེད་དོ། །ལྷ་ཆེན་པོའི་གནས་སུ་རི་མོའི་སྐུ་གཟུགས་བྲིས་ལ་འབུམ་ཕྲག་གཅིག་བཟླས་བརྗོད་བྱས་ན། དཀའ་ཐུབ་ཟློག་
གི་ཁྱོ་མཐོང་བར་འགྱུར་ཏེ་དངོས་གྲུབ་གང་འདོད་པ་སྦྱིན་པར་བྱེད་དོ། །དུར་ཁྲོད་ཆེན་པོར་རི་མོའི་སྐུ་གཟུགས་བྲིས་ཏེ་ལན་བརྒྱ་རྩ་བརྒྱད་བཟླས་བརྗོད་བྱས་ན་རོ་ལངས་ཆེན་པོ་མཐོང་བར་འགྱུར་ཏེ། མཆེ་བ་མི་སྡུག་པ་གཙིགས་ལ་མེ་ཕུང་ཆེན་པོ་ལྟར་བྱུང་ན་ཡང་དེ་ལ་འཇིགས་པར་མི་བྱ་བར་ཕྱག་རྒྱ་
བཅིངས་ལ་བསྣུན་ན་དེས་འགྱེལ་བར་འགྱུར་ཏེ། དེ་ལ་དམ་པ་བསླངས་ན་རྒྱལ་སྲིད་དམ་གཏེར་རམ་མི་སྣང་བའམ་ཡུལ་ལམ་རྐང་པས་རྒྱུ་བ་ཡང་རུང་སྟེ། དམ་པ་ལྔ་པོ་དག་ལས་གང་ཡང་རུང་བ་ཞིག་སྦྱིན་པར་བྱེད་དོ། །ལན་ཚྭའི་སྦྱིན་སྲེག་གིས་ནི་ལྷའི་བུད་མེད་འགུགས་པར་བྱེད་དོ། །
เล่ม ๘๗ · หน้า 154a
སྣ་མའི་མེ་ཏོག་ཁམ་བྱེ་བ་སྟོང་རྩ་བརྒྱད་སྦྱིན་སྲེག་བྱས་ན། ཉིན་གཅིག་བཞིན་ཏི་ན་ར་རེ་རེ་རྙེད་པར་བྱེད་དོ། །ཅི་སྟེ་དགྲ་སྲོག་དང་བྲལ་བར་འདོད་ན། ལན་ཚྭའི་སྲེག་བླུགས་ལན་འབུམ་སྦྱིན་སྲེག་བྱས་ན་སྲོག་དང་བྲལ་བར་འགྱུར་རོ། །ཅི་སྟེ་ནམ་མཁའ་ལྡིང་
བསྒྲུབ་པར་འདོད་ན། གྲོག་མཁར་གྱིས་ལས་ནམ་མཁའ་ལྡིང་གི་གཟུགས་བྱས་ཏེ། བ་ལས་བྱུང་བའི་སྣ་ལྔས་བསྐུས་ལ། དེ་ནས་ནམ་མཁའ་ལྡིང་གི་གཟུགས་དེ་རི་མོའི་གཟུགས་ཀྱི་མདུན་དུ་བཞག་ལ་འབུམ་ཕྲག་གཅིག་བཟླས་བརྗོད་བྱས་ན། དེ་ནས་གྲུབ་པར་འགྱུར་ཏེ་
དེ་ལ་ཞོན་ནས་གང་དུ་འདོད་པ་དེར་འགྲོའོ། །དེ་ལ་ཡོ་བྱད་ཐམས་ཅད་ཀྱང་སྒྲུབ་པར་བྱེད་དོ། །འཇིགས་པ་ཐམས་ཅད་དང་བྲལ་བར་འགྱུར་རོ། །ཀླུ་ཐམས་ཅད་དེའི་དབང་དུ་འགྱུར་རོ། །ཇི་སྟེ་འཁོར་ལོས་སྒྱུར་བ་བསྒྲུབ་པར་འདོད་ན། ལྕགས་ཨུར་མོའི་འཁོར་ལོ་བྱས་ལ་སྤོས་
ཆུས་བཀྲུས་ཏེ་གུར་གུམ་གྱིས་བྱུགས་ལ། དེ་ནས་ཨ་ཤྭཏྠའི་ལོ་མའི་སྟེང་དུ་བཞག་སྟེ། རི་མོའི་སྐུ་གཟུགས་ཀྱི་མདུན་དུ་མངོན་པར་བཞག་ལ་སུམ་འབུམ་བཟླས་བརྗོད་བྱས་ན་དེས་གྲུབ་པར་འགྱུར་ཏེ། དེ་བཟུང་བ་ཙམ་གྱིས་རིག་སྔགས་འཆང་འཁོར་ལོས་སྒྱུར་བར་འགྱུར་ཏེ།
རིག་སྔགས་འཆང་ཐམས་ཅད་ཀྱི་རྒྱལ་པོར་འགྱུར་རོ། །རིག་སྔགས་འཆང་བྱེ་བ་ཕྲག་དུ་མས་ཡོངས་སུ་བསྐོར་ཅིང་། ལྷའི་བུ་མོ་བྱེ་བ་ཕྲག་དུ་མས་ཡོངས་སུ་བསྐོར་ནས། ལྷའི་གཞལ་མེད་ཁང་གི་ནང་ནས་ནམ་མཁའ་ལ་འགྲོ་ཞིང་རྟག་ཏུ་མཆོད་པ་བྱེད་པར་འགྱུར་རོ། །ཅི་སྟེ་
བཅོམ་ལྡན་འདས་མ་བསྒྲུབ་པར་འདོད་ན། རི་མོའི་སྐུ་གཟུགས་ཀྱི་མདུན་དུ་བཟླས་བརྗོད་དྲུག་འབུམ་བྱས་ན། བཅོམ་ལྡན་འདས་མ་མངོན་སུམ་དུ་མཐོང་བར་འགྱུར་ཏེ། མཐོང་བ་ཙམ་གྱིས་དེ་བཞིན་གཤེགས་པའི་རྗེས་སུ་སྤྱོད་པར་འགྱུར་རོ། །ཏིང་ངེ་འཛིན་ཀྱང་ཐོབ་པར་
འགྱུར་རོ། །བྱང་ཆུབ་སེམས་དཔའ་རྣམས་དང་འགྲོགས་པ་ཡང་འཐོབ་བོ། །ཅི་སྟེ་ཞི་བར་བྱེད་པར་འདོད་ན། པདྨ་ཁ་མ་བྱེ་བ་སྟོང་རྩ་བརྒྱད་ཕུལ་ན་སུའི་ཆེད་དུ་ཕུལ་བ་དེ་ཞི་བར་འགྱུར་རོ། །སྣ་མའི་མེ་ཏོག་སྟོང་རྩ་བརྒྱད་སྦྱིན་སྲེག་བྱས་ན། དེའི་ནད་ཐམས་ཅད་མེད་པར་
เล่ม ๘๗ · หน้า 154b
འགྱུར་རོ། །བ་རུ་རའི་མེ་ཏོག་སྟོང་རྩ་བརྒྱད་སྦྱིན་སྲེག་བྱས་ན། དུས་མ་ཡིན་པར་འཆི་བ་མེད་པར་འགྱུར་རོ། །དཔལ་གྱིས་ཟིན་པར་འགྱུར་རོ། །ཨ་ཏི་མུཀྟ་ཀ་ཁ་མ་བྱེ་བ་ཁྲི་སྦྱིན་སྲེག་བྱས་ན་གང་གི་ཆེད་དུ་བྱས་པ་དེ་གདོན་གང་གིས་ཟིན་པར་གྱུར་པ་དེ་ལ་བལྟས་པ་ཙམ་
གྱིས་གཏོང་བར་འགྱུར་རོ། །ཟླ་བ་སྤྱང་ཀིས་ཟིན་པའི་ཚེ་མར་ཟངས་ཀྱི་སྣོད་དུ་བཞག་སྟེ་དུ་བ་འཐུལ་གྱི་བར་དུ་བཟླས་བརྗོད་བྱས་ནས། དེ་འཐུངས་ན་ཐོས་པ་འཛིན་པར་འགྱུར་རོ། །ཅི་སྟེ་རྨ་བྱ་བསྒྲུབ་པར་འདོད་ན། ཆུ་ངོགས་གཉི་གནས་ས་བླངས་ཏེ་ཙནྡན་དང་བསྲེས་ལ་རྨ་བྱའི་
གཟུགས་བྱས་ཏེ། དེ་ནས་རྨ་བྱ་དེ་རི་མོའི་གཟུགས་ཀྱི་མདུན་དུ་བཞག་ལ། རྨ་བྱའི་སྒྲ་འབྱིན་གྱི་བར་དུ་བཟླས་བརྗོད་བྱས་ན་དེ་ནས་དངོས་གྲུབ་ཏུ་འགྱུར་རོ། །ཅི་སྟེ་རྫས་བསྒྲུབ་པར་འདོད་ན། ཀར་བཱི་རའི་མེ་ཏོག་འབུམ་ཕུལ་ན་ཉིན་གཅིག་བཞིན་ཏི་ན་ར་ལྔ་ལྔ་རྙེད་པར་འགྱུར་རོ། །མིད་
པ་ནུབ་ཙམ་གྱི་ཆུར་ཞུགས་ལ་འབུམ་བཟླས་བརྗོད་བྱས་ན་གཏེར་རྙེད་པར་འགྱུར་རོ། །སྣ་མའི་མེ་ཏོག་ཁ་མ་བྱེ་བ་འབུམ་སྦྱིན་སྲེག་བྱས་ན་བུད་མེད་གང་འདོད་པ་དེ་རྙེད་པར་འགྱུར་རོ། །ཨ་ཏི་མུཀྟ་ཀའི་མེ་ཏོག་ཁྲི་ཕུལ་ན་ལུས་ལ་ནད་ཅི་ཡོད་པ་ཐམས་ཅད་བྱབས་པས་མེད་པར་འགྱུར་ཞིང་ཕྱིས་མི་
ལྡང་ངོ་། །ཚེ་རིང་བར་ཡང་འགྱུར་རོ། །ལུས་ལ་སྐལ་བ་བཟང་པོ་འབྱུང་བར་འགྱུར་རོ། །ལོ་བརྒྱ་འཚོ་བར་འགྱུར་རོ། །ཅི་སྟེ་ཕ་རོལ་གྱི་དམག་གཞིག་པར་འདོད་ན་མཛུབ་མོ་ལ་ལན་བདུན་སྔགས་ཏེ་བསྡིགས་ན་དམག་འབྲོས་པར་བྱེད་དོ། །འཐབ་པར་འདོད་ན། འུག་པའི་སྒྲོ་འབུམ་
སྦྱིན་སྲེག་བྱས་ན་ཚེར་འཐབ་པར་འགྱུར་རོ། །དགྲ་ཕུང་བར་བྱེད་པར་འདོད་ན་སྐེ་ཚེ་འབུམ་སྦྱིན་སྲེག་བྱས་ན་དགྲ་སྲོག་དང་བྲལ་བར་འགྱུར་རོ། །རྒྱ་ཤུག་གི་འབྲས་བུ་ཚ་བ་གསུམ་གྱི་མར་དུ་སྨྱུགས་པ་ཁྲི་སྦྱིན་སྲེག་བྱས་ན་བགེགས་ཐམས་ཅད་ཀྱིས་མི་གཙེ་བར་འགྱུར་རོ། །བ་རུ་རའི་འབྲས་
བུ་ཡུངས་ཀར་གྱི་མར་དུ་སྨྱུགས་པ་སྟོང་རྩ་བརྒྱད་སྦྱིན་སྲེག་བྱས་ན་ཉི་མ་ལྔས་དགྲ་ཕུང་བར་འགྱུར་རོ། །དབང་དུ་བྱ་ན་འབྲས་སྭཱ་ལུའི་ཕྱེ་མ་ལས་གཟུགས་བྱས་ལ་གཏུབ་ཅིང་སྦྱིན་སྲེག་བྱས་ན་ཞག་བདུན་གྱིས་བརྒྱ་བྱིན་ཡང་དབང་དུ་འགྱུར་རོ། །ཀ་ར་བཱི་བ་རི་མེ་ཏོག་ཁམ་བྱེ་བ་སྦྱིན་སྲེག་བྱས་ན་
เล่ม ๘๗ · หน้า 155a
གནོད་སྦྱིན་མོ་དབང་དུ་འགྱུར་རོ། །སྣ་མའི་ལོ་མ་སྦྱིན་སྲེག་བྱས་ན་གང་འདོད་པ་དེ་སྨྱོ་བར་བྱེད་དོ། །ཛ་ཏི་ཀ་ལི་ཀ་ནན་ལ་ཀྵྃ་ཛུ་ཧུ་ཡད་རཱ་ཛཱ་ནྃ་བ་ཤི་ཀ་རོ་ཏི། ཨ་ཏི་མུཀྟ་ཀའི་མེ་ཏོག་སྟོང་རྩ་བརྒྱད་སྦྱིན་སྲེག་བྱས་ན་ཡུལ་དབང་དུ་འགྱུར་རོ། མར་གྱི་སྦྱིན་སྲེག་གིས་ཞག་
བཞི་པ་མེད་པར་འགྱུར་རོ། །སྣ་མའི་མེ་ཏོག་སྦྲང་རྩི་དང་བསྲེས་པ་སྦྱིན་སྲེག་བྱས་ན་ཉིན་གཅིག་བཞིན་དུ་ཏི་ནར་རེ་རེ་རྙེད་པར་འགྱུར་རོ། །དེ་ནས་ཀླུ་བསྒྲུབ་བར་འདོད་པས་མ་ལི་གའི་མེ་ཏོག་ཁ་མ་བྱེ་བ་འབུམ་སྦྱིན་སྲེག་བྱས་ན་ཀླུ་ཐམས་ཅད་འགྲུབ་པར་འགྱུར་ཏེ་དེ་དག་ཡོད་པ་ཐམས་ཅད་ཀྱིས་
ཅི་འདོད་པ་བཞིན་སྒྲུབ་བོ། །མྱ་ངན་འཚང་གི་མེ་ཏོག་ཁམ་བྱེ་བ་ཁྲི་སྦྱིན་སྲེག་བྱས་ན། གནོད་སྦྱིན་མོ་ཐམས་ཅད་འགྲུབ་པར་འགྱུར་ཏེ། ཉིན་གཅིག་བཞིན་གཡོག་ལྔ་བརྒྱའི་གོས་ཟས་འབུལ་ལོ། །ཅི་སྟེ་གནོད་སྦྱིན་མོ་དབང་དུ་བྱ་བར་འདོད་ན། ཨ་ག་རུའི་ཡམ་སྲེག་ཤིང་
འབུམ་སྦྱིན་སྲེག་བྱས་ན་གནོད་སྦྱིན་མོ་ཐམས་ཅད་དབང་དུ་འགྱུར་ཏེ། དེ་དག་ཅི་འདོད་པ་བཞིན་སྒྲུབ་བོ། །ཅི་སྟེ་ལག་ན་རྡོ་རྗེ་བསྒྲུབ་པར་འདོད་ན་རི་མོའི་སྐུ་གཟུགས་ཀྱི་མདུན་དུ་བཞི་འབུམ་བཟླས་བརྗོད་བྱས་ལ་ཐ་མར་ཟླ་བ་ཉ་ལ་ཨུཏྤ་ལའི་མེ་ཏོག་ཅི་འབྱོར་པས་མཆོད་པ་བྱས་ཏེ་མཚན་
རངས་བཟླས་བརྗོད་བྱས་ན་ནང་པར་རམ་ཉི་མ་ཤར་ན་ལག་ན་རྡོ་རྗེ་འོངས་ཏེ། འོངས་ནས་རིག་སྔགས་འཆང་གི་མགོ་ལ་རེག་པར་བྱེད་དེ་རེག་པ་ཙམ་གྱིས་མངོན་པར་ཤེས་པ་ལྔ་དང་ལྡན་པར་འགྱུར་རོ། །རིག་སྔགས་འཆང་ཉིད་དམ་གཞན་ཅི་ཡང་རུང་བ་ཞིག་ཀྱང་རྙེད་པར་འགྱུར་རོ། །དེས་
ཅི་འདོད་པ་ཐམས་ཅད་རྙེད་པར་འགྱུར་རོ། །ཕྱག་ན་རྡོ་རྗེའི་གཟུགས་ཀྱི་མདུན་དུ་ཤིང་ཀིང་ཤུ་ཀའི་མེ་ཏོག་འབུམ་ཕུལ་ན་ཏིན་ར་སྟོང་རྙེད་པར་འགྱུར་རོ། །ཕྱག་ན་རྡོ་རྗེའི་གཟུགས་ཀྱི་ལག་པ་ནས་བཟུང་སྟེ་ཟླ་བ་གཅིག་བཟླས་བརྗོད་བྱས་ན་ཉིན་གཅིག་བཞིན་ཏི་ན་ར་རེ་རེ་སྦྱིན་པར་བྱེད་དོ། །
ཕྱག་ན་རྡོ་རྗེའི་གཟུགས་པདྨའི་འདབ་མའི་སྟེང་དུ་བཞག་སྟེ། སྣ་མའི་མེ་ཏོག་ཁ་མ་བྱེ་བ་ཁྲི་ཕུལ་ན་ཉིན་གཅིག་བཞིན་ཀཱར་ཥཱ་པ་ཎ་རེ་རེ་སྦྱིན་པར་བྱེད་དོ། །ཟླ་བ་གཅིག་ཏུ་ནམ་ཕྱེད་ན་ལངས་ཏེ་ཉིན་གཅིག་བཞིན་གི་ཝང་གིས་དཀྱིལ་འཁོར་བྱས་ལ། བཅོམ་ལྡན་འདས་མ་བཟླས་བརྗོད་
เล่ม ๘๗ · หน้า 155b
བྱས་ན་ལས་ཐམས་ཅད་ནུས་པར་འགྱུར་རོ། །བགེགས་རྣམས་ཀྱང་མི་འཚེ་བར་འགྱུར་རོ། །ཟླ་བ་གཅིག་ཏུ་ཙནྡན་དམར་པོས་དཀྱིལ་འཁོར་བསྐུས་ལ། བཅོམ་ལྡན་འདས་མ་བཟླས་བརྗོད་བྱས་ན་ཤ་ཟ་ཐམས་ཅད་དབང་དུ་འགྱུར་ཏེ་ཅི་འདོད་པ་དེ་བྱེད་དོ། །རང་གི་ཁྲག་གིས་དཀྱིལ་
འཁོར་བསྐུས་ཏེ། ཟླ་བ་གཅིག་ཏུ་བཟླས་བརྗོད་བྱས་ན་མཁའ་འགྲོ་མ་ཐམས་ཅད་དབང་དུ་འགྱུར་ཏེ་ཅི་འདོད་པ་བྱེད་དོ། །ཤུ་དག་དཀར་པོ་འབུམ་སྦྱིན་སྲེག་བྱས་ན་མ་མོ་ཐམས་ཅད་འགྲུབ་པར་འགྱུར་ཏེ། དེ་དག་ཅི་འདོད་པ་དེ་ཐམས་ཅད་བསྒྲུབ་བོ། །ལི་ག་དུར་འབྲུ་སྟོང་སྦྱིན་སྲེག་
བྱས་ན་ཉིན་གཅིག་བཞིན་སྣོད་གང་བ་རྙེད་པར་འགྱུར་རོ། །སྒེའུ་གཤེར་གྱི་རྩ་བ་སྦྱིན་སྲེག་བྱས་ན། ཉིན་གཅིག་བཞིན་ཀཱར་ཥཱ་པ་ཎ་བཞི་བཞི་རྙེད་པར་འགྱུར་རོ། །ཨ་པ་མརྒའི་སྙིང་པོ་ཁྲི་སྦྱིན་སྲེག་བྱས་ན། ལོངས་སྤྱོད་ཟད་མི་ཤེས་པ་འབྱུང་བར་འགྱུར་རོ། །ན་ལེ་ཤམ་གྱི་འབྲུ་
སྟོང་རྩ་བརྒྱད་སྦྱིན་སྲེག་བྱས་ནས་ཐལ་བ་བླངས་ཏེ་ཐིག་ལེ་བྱས་ལ། མོན་སྲན་སྡེའུ་ལ་སོགས་པའི་ཕུང་པོའི་ནང་དུ་གཏོར་ན་དེ་མི་ཟད་པར་འགྱུར་རོ། །ཅི་སྟེ་འཇམ་དཔལ་བསྒྲུབ་པར་འདོད་ན། ཨ་ག་རུ་དང་བསྲེས་པའི་གི་ཝང་གིས་དཀྱིལ་འཁོར་བསྐུས་ལ། དེར་གཟུགས་བཞག་
སྟེ་ཟླ་བ་གཅིག་གི་བར་དུ་བཟླས་བརྗོད་བྱས་ན། བདག་ཉིད་འཇམ་དཔལ་མཐོང་བར་འགྱུར་ཏེ་དེས་ཆོས་སྟོན་ཏོ། །དེ་མཐོང་ན་ཐོས་པ་འཛིན་པར་འགྱུར་རོ། །རིག་སྔགས་འཆང་ཉིད་ཀྱང་ཐོབ་པར་འགྱུར་རོ། །དེ་ཇི་སྲིད་འདོད་ཀྱི་བར་དུ་ཡོངས་སུ་རྫོགས་པར་བྱེད་དོ། །པདྨ་དཀར་
པོ་སྟོང་རྩ་བརྒྱད་ཕུལ་ན། དེ་ལ་འཇམ་དཔལ་གྲུབ་པར་འགྱུར་ཏེ། རྒྱལ་སྲིད་དམ་པའམ། ས་འོག་ཏུ་འཇུག་པའམ། མི་སྣང་བར་བྱ་བའམ། ཐོས་པ་འཛིན་པའམ། སྨན་བཅུད་ཀྱིས་ལེན་ཡང་རུང་སྟེ། དམ་པ་ལྔ་ལས་གང་ཡང་རུང་བ་ཞིག་སྦྱིན་པར་བྱེད་དོ། །སྐྱུ་
རུ་རའི་ཡམ་སྲེག་ཤིང་སྟོང་རྩ་བརྒྱད་སྦྱིན་སྲེག་བྱས་ན། གནོད་སྦྱིན་མོ་ཇི་སྙེད་ཡོད་པ་དེ་དག་ཐམས་ཅད་དབང་དུ་འགྱུར་ཏེ། དེ་དག་ཅི་འདོད་པ་སྒྲུབ་པར་བྱེད་དོ། །བིལ་བའི་འབྲས་བུ་འབུམ་སྦྱིན་སྲེག་བྱས་ན། དཔལ་ཇི་སྙེད་ཡོད་པ་དེ་དག་ཐམས་ཅད་གྲུབ་པར་འགྱུར་ཏེ།
เล่ม ๘๗ · หน้า 156a
ཅི་འདོད་པ་བཞིན་དུ་སྒྲུབ་བོ། །ན་ཛྱ་དི་མ་པྲ་ཡད་ཙནྟི། བ་རུ་རའི་འབྲུ་འབུམ་སྦྱིན་སྲེག་བྱས་ན། དབྱངས་ཅན་ཐམས་ཅད་གྲུབ་པར་འགྱུར་ཏེ། དེ་དག་གྲུབ་པས་ཚིག་ཐོགས་པ་མེད་པར་འགྱུར་རོ། །པྲི་ཡང་ཀུའི་མེ་ཏོག་ཁ་མ་བྱེ་བ་ཁྲི་སྦྱིན་སྲེག་བྱས་ན་
ཉིན་གཅིག་བཞིན་ཀཱ་ར་ཥཱ་པ་ཎ་ལྔ་ལྔ་རྙེད་པར་འགྱུར་རོ། །ཅི་སྟེ་ཐམས་ཅད་གཉིད་ཀྱིས་ལོག་པར་བྱེད་འདོད་ན། གྲོང་ཁྱེར་གྱི་བདག་པོའི་ལྷའི་གཟུགས་རི་མོར་བྲིས་པ་བྲིས་ལ། སྐེ་ཚེའི་སྦྱིན་སྲེག་བྱས་ལ་དེའི་ཐལ་བ་ཐོགས་ལ་གྲོང་ཁྱེར་དུ་སོང་སྟེ་གཏོར་ན། དེ་དག་ཐམས་
ཅད་གཉིད་ཀྱིས་ལོག་ཅིང་འདུག་པར་འགྱུར་ཏེ་ཅི་འདོད་པ་བྱེད་དོ། །གྲོང་ཁྱེར་ལ་ཇི་ལྟ་བ་བཞིན་དུ་ཡུལ་ལ་ཡང་དེ་བཞིན་དུ་བྱའོ། །མཚེའུ་སྐམ་པར་འདོད་པས་སྐེ་ཚེའི་སྲེག་བླུགས་རང་གི་ཁྲག་དང་སྦགས་པ་ཁྲི་སྦྱིན་སྲེག་བྱས་ལ་དེའི་ཐལ་བ་བླངས་ཏེ། མཚེའུ་དེར་གཏོར་ན་མཚེའུ་སྐམ་
པར་འགྱུར་ཏེ། དེ་ན་གནས་པའི་ཀླུ་རྣམས་ཀྱིས་ཅི་འདོད་པ་བཞིན་དུ་རིན་པོ་ཆེ་རྣམས་འབུལ་ལོ། །ཨ་པ་མར་གའི་ཡམ་སྲེག་ཤིང་འབུམ་སྦྱིན་སྲེག་བྱས་ན་ལྷ་མོ་དཔལ་མཐོང་བར་འགྱུར་ཏེ། ས་ཙ་རཱ་ཛྱ་མ་པྲ་ཡཙྪ་ཏི། བིལ་བའི་འབྲས་བུ་སྟོང་རྩ་བརྒྱད་སྦྱིན་སྲེག་བྱས་ན།
རྒྱལ་པོ་ཆེན་པོའི་མདུན་ན་འདོན་དུ་འགྱུར་རོ། །མྱ་ངན་འཚང་གི་ཡམ་སྲེག་ཤིང་འབུམ་སྦྱིན་སྲེག་བྱས་ན། རྐང་བཞི་པ་ཐམས་ཅད་དབང་དུ་འགྱུར་རོ། །སྣ་མའི་མེ་ཏོག་འབུམ་སྦྱིན་སྲེག་བྱས་ན། རྒྱལ་པོའི་ཕོ་བྲང་འཁོར་དུ་ཚིག་གཟུང་བར་འོས་པར་འགྱུར་རོ། །སྣ་མའི་
མེ་ཏོག་འབུམ་སྦྱིན་སྲེག་བྱས་ན། བུད་མེད་ཐམས་ཅད་དབང་དུ་བྱས་པར་འགྱུར་རོ། །སྐེ་ཚེའི་སྡོང་བུའི་ཡམ་སྲེག་ཤིང་སྦྲང་རྩི་ལ་སྨྱུགས་པ་བརྒྱ་སྦྱིན་སྲེག་བྱས་ན། གདོན་ཐམས་ཅད་དེ་ལ་ཞི་བར་བྱེད་པར་འགྱུར་རོ། །འབྲས་ཀྱི་འོ་ཐུག་དང་སྦྲང་རྩི་འབབ་ཆུའི་ནང་དུ་
གཏོར་ན། ཀླུ་མོ་ཐམས་ཅད་དེའི་དབང་དུ་འགྱུར་ཏེ། རང་རང་གི་གནས་སུ་ཡང་ཁྲིད་པར་བྱེད་དོ། །ལོག་འདྲེན་བསྒྲུབ་པར་འདོད་ན། ཨ་ཏི་མུཀྟ་ཀའི་མེ་ཏོག་འབུམ་གཏོར་ན། ལོག་འདྲེན་ཐམས་ཅད་དངོས་གྲུབ་སྦྱིན་པར་བྱེད་དོ། །ཨ་ཤྭཏྠའི་ལོ་མ་སྦྲང་རྩི་ལ་
เล่ม ๘๗ · หน้า 156b
སྨྱུགས་པ་སྟོང་རྩ་བརྒྱད་སྦྱིན་སྲེག་བྱས་ན། གནོད་སྦྱིན་མོ་ཐམས་ཅད་རིག་སྔགས་འཆང་དེ་ལ་ཉིན་གཅིག་བཞིན་སྣོད་གང་བ་ཅི་འདོད་པ་འབུལ་ལོ། །རྨ་བྱའི་སྒྲོ་སྟོང་རྩ་བརྒྱད་སྦྱིན་སྲེག་བྱས་ན། བདུད་ཀྱི་གནོད་པ་ཐམས་ཅད་བསལ་བར་འགྱུར་རོ། །ཨ་ག་རུས་
མརྡ་ནྃ་ཨསྟ་ཧ་ས་སྲན་ཛུ་ཧུ་ཡཱ་ད་རཱ་ཛ་བ་ཤོ་བྷ་བ་ཏི། པྲི་ཡང་ཀུའི་ཡམ་སྲེག་ཤིང་གིས་ནི། མ་ཧཱ་རཱ་ཛ་གྲ་མ་ཧི་ཤི་བ་ཤོ་བྷ་བ་ཏི། ཨ་ག་རུའི་ཡམ་སྲེག་ཤིང་གི་མེ་བུས་ལ་ཏིལ་འབྲུ་ཁྲི་སྦྱིན་སྲེག་བྱས་ན་ཡུལ་དབང་དུ་འགྱུར་རོ། །ཤིང་འོ་མ་ཅན་གྱི་མེ་བུས་ལ་ཏིལ་
འབྲུ་འབུམ་སྦྱིན་སྲེག་བྱས་ན། ཤ་ཟ་ཐམས་ཅད་དབང་དུ་འགྱུར་ཏེ་ཅི་འདོད་པ་བྱེད་དོ། །ཤིང་མ་ད་ཀས་མེ་བུས་ལ་ན་ལེ་ཤམ་གྱི་འབྲུ་སྟོང་རྩ་བརྒྱད་སྦྱིན་སྲེག་བྱས་ན། འབྱུང་པོ་ཐམས་ཅད་དབང་དུ་འགྱུར་ཏེ། འབྱུང་པོའི་བདག་པོ་རེ་རེ་ལ་ཡང་ཉིན་གཅིག་བཞིན་དུ་གཡོག་
བརྒྱའི་གོས་ཟས་སྦྱིན་པར་བྱེད་དོ། །གར་འགྲོ་འདོད་པ་དེར་ཕྲག་པ་ལ་ཞོན་ཏེ་འགྲོའོ། །མོན་སྲན་གྲེའུ་འབྲུ་འབུམ་སྦྱིན་སྲེག་བྱས་ན། འབྱུང་པོ་ཐམས་ཅད་དབང་དུ་འགྱུར་ཏེ། དེ་དག་རིག་སྔགས་འཆང་དེའི་ཡོ་བྱད་ཐམས་ཅད་སྒྲུབ་བོ། །འཇམ་དཔལ་
འདི་དག་ལ་སོགས་པ་གཟུངས་སྔགས་འདི་རྣམས་ཀྱི་བསྒྲུབ་པ་དག་གི་ནང་དུ་སྦྱོར་བ་དེའི་དངོས་གྲུབ་སྦྱིན་པར་བྱེད་དེ། འདོད་པ་དང་སྦྱོར་བ་ཐ་དད་པ་དང་། སྦྱོར་བ་མང་ཡང་རུང་། ཉུང་ཡང་རུང་བས་ཀྱང་སྒྲུབ་པར་བྱེད་དོ། །འཇམ་དཔལ་གཞན་ཡང་གསང་
སྔགས་འདི་དག་འཛིན་པ་དང་སྒྲུབ་པ་རྣམས་ལ་ནི། བགེགས་རྣམས་ཀྱིས་སྐབས་མེད་དོ། །ཕྱག་ན་རྡོ་རྗེ་དབང་བསྐུར་བ་ལས། དེ་བཞིན་གཤེགས་པ་ཐམས་ཅད་ཀྱི་ཡུམ་རྣམས་ཀྱི་དངོས་གྲུབ་བསྒྲུབ་པའི་ཆོ་ག་རྫོགས་སོ།། །།འཕགས་པ་ལག་ན་རྡོ་རྗེ་དབང་
བསྐུར་བའི་རྒྱུད་ཆེན་པོའི་རྒྱལ་པོ་རྫོགས་སོ།། །།རྒྱ་གར་གྱི་མཁན་པོ་ཤཱི་ལེནྡྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།།
ที่มาและสัญญาอนุญาต
ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด