རལ་པ་གྱེན་བརྫེས་ཀྱི་རྟོག་པ་ཆེན་པོ

ชื่อสันสกฤต (อักษรทิเบต ตามตัวบท) ཨཱུརྡྷ་ཛ་ཊཱ་མ་ཧཱ་ཀལྤ་མ་ཧཱ་བོ་དྷི་སཏྭ་བི་ཀུརྦྦ་ཎ་པ་ཊ་ལ་བི་ས་རཱད་བྷ་ག་བ་ཏཱ་ཨཱརྱ་ཏཱ་རཱ་མཱུ་ལ་ཀལྤ་ནཱ་མ

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

เล่ม ๙๔ · หน้า 172a

པ་དག་ཀྱང་རུང་སྟེ། མནན་པར་མི་བྱའོ། །ཡང་ན་མེས་ལེགས་པར་བསྲེག་པར་བྱ་བ་ཉིད་དོ། །དཀྱིལ་འཁོར་གྱི་སྒྲུབ་པ་ཐམས་ཅད་ལ་ཡང་གཏོར་མ་གཤེགས་པའི་ཆོ་གའོ། །ཕྱི་ནས་ཟླ་བ་ལས་བྱུང་བའི་དཀྱིལ་འཁོར་ཕྱོགས་སུ་ལྔ་བྱས་པ་ཞེས་པ་བཏགས་

པ་མ་ཡིན་པ་ལ་སངས་རྒྱས་ཀྱི་གཟུགས་བརྙན་བྱས་ནས་རང་གནས་སུ་གཞག་པར་བྱའོ། །འདི་རྣམས་བྱབ་པའི་ཐབས་སོ། །ཆོ་ག་བཞིན་དུ་ཐམས་ཅད་དུ་རྫོགས་པའི་རིག་པ་དང་། སྙིང་པོས་ལས་ཆེན་པོ་ཐམས་ཅད་ཇི་སྲིད་པར་དེ་བཞིན་ཁོ་ན་རས་ལ་མ་ལྷུང་བའི་བ་

སེར་སྐྱའི་བ་བྱུང་གིས་སྔར་བརྗོད་པའི་ཆོ་གས་དཀྱིལ་འཁོར་བྱས་ནས་དེ་བཞིན་ཁོ་ནས་གཏོར་མ་གཞག་པར་བྱའོ། །བདུག་པ་དང་། མེ་ཏོག་ཀྱང་ཇི་སྐད་གསུངས་པ་བཞིན་ཕུལ་ནས་བྱབ་པར་བྱའོ། །སྲད་བུ་བཅིང་བར་བྱའོ། །བདག་ཉིད་བསྲུང་བར་བྱའོ། །གང་

ཞིག་ལས་ཆེན་པོར་རྒྱས་པར་བྱེད་པར་འདོད་པས་ཆོ་ག་དེ་ཉིད་ཀྱིས་བསྒྲུབ་པར་བྱའོ། །སྔ་མ་ཁོ་ན་དེ་སྲིད་དུའོ། །ཇི་ལྟར་རྙེད་པའི་གོས་སྐྲ་དང་བྲལ་བ་ལ་སངས་རྒྱས་ཀྱི་གཟུགས་བརྙན་མ་འདྲེས་པའི་ཚོན་གྱིས་འདྲིར་གཞུག་པར་བྱ། གཟུགས་བརྙན་ཞལ་ནུབ་ཏུ་ཕྱོགས་

པ་དེའི་གཡོན་གྱི་གཞོགས་སུ་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་འདྲིར་གཞུག་པར་བྱའོ། །ཕྱག་བཞི་པ་གི་ཝང་དཔལ་བེའུ་བྱའོ། །ཇི་སྲིད་དུ་བསྒྲུབ་པར་བྱ་བའི་རིག་པ་དེ་ཡང་དེའི་དབུས་སུ་རྒྱ་སྐྱེགས་ཀྱི་མདོག་ཏུ་སྣང་བ་གུར་གུམ་གྱིས་བྲི་

བར་བྱའོ། །དཔྲལ་བར་ཡང་རུང་སྟེ་གསེར་ལས་བྱུང་བའི་དར་ཐོང་བྱའོ། །བྱང་ཆུབ་སེམས་དཔའི་གཡས་སུ་བཅོམ་ལྡན་འདས་མ་སྒྲོལ་མ་གསེར་དང་སྔོ་བསངས་ན་བཟའ་དཀར་པོ་མནབས་པ། མཆོད་ཕྱིར་ཐོགས་པ་ཅན། ཨུཏྤ་ལ་སྔོན་པོ་ཕྱག་ན་ཐོགས་པ། གཡས་པས་

མཆོག་སྦྱིན་པ། དེའི་གཡས་སུ་རིག་པའི་རྒྱལ་མོ་རྨ་བྱ་ཆེན་མོ་ཕྱག་བཞི་པའོ། །རྨ་བྱ་ཆེན་མོའི་བར་དུ་རྨ་བྱའི་རྒྱལ་པོ་གསེར་དུ་སྣང་བ་ཞེས་བྱ་བ་གསེར་ལས་བྱུང་བའི་གཤོག་པ་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པར་བྱའོ། །རིག་པ་རྨ་བྱ་ཆེན་མོ་ནི་དཀར་ཞིང་དག་པ་འདྲིར་

เล่ม ๙๔ · หน้า 172b

གཞུག་པར་བྱའོ། །འདིའི་གཡས་ཀྱི་ཕྱོགས་སུ་འཛམ་བུའི་གླིང་རྩེ་མོ་གསུམ་པ། ཤིང་རྟའི་གདོང་གི་རྣམ་པའོ། །ནུབ་ཏུ་ནུབ་བ་ལང་སྤྱོད་ཀྱི་གླིང་ཟླུམ་པོ་འདྲིར་གཞུག་པར་བྱའོ། །བྱང་གི་ཕྱོགས་སུ་བྱང་སྒྲ་མི་སྙན་གྱི་གླིང་གྲུ་བཞི་མཉམ་པ་བྱའོ། །ཤར་དུ་ལུས་འཕགས་

པོར་རྒྱལ་པོ་ཆེན་པོ་ཡུལ་འཁོར་སྲུང་དྲི་ཟའི་བདག་པོ་འཁོར་དང་བཅས་པ་འདྲིར་གཞུག་པར་བྱའོ། །འཛམ་བུའི་གླིང་གི་གཞོགས་སུ་རྒྱལ་པོ་ཆེན་པོ་འཕགས་སྐྱེས་གྲུལ་བུམ་གྱི་བདག་པོ་བྱའོ། །ནུབ་ཀྱི་བ་ལང་སྤྱོད་ཀྱི་གཞོགས་སུ་རྒྱལ་པོ་ཆེན་པོ་མིག་མི་བཟང་ཀླུ་རྣམས་ཀྱི་

བདག་པོ་སངས་རྒྱས་ཀྱི་གཟུགས་བརྙན་གྱི་སྟེང་དུ་གསེར་གྱི་སྟན་ལ་གོས་དཀར་པོ་ཅན་པ་ལང་གི་མིག་ཅན་བྱའོ། །འཕགས་པ་ཀུན་དགའ་བོ་བཅོམ་ལྡན་འདས་ཀྱི་གཞོགས་སུ་ཐལ་མོ་སྦྱར་བ་བྱས་པ་པུས་མོ་གཉིས་ས་ལ་བཙུགས་པར་བྱའོ། །གཡས་ཀྱི་གཞོགས་ཀྱི་གཅིག་

གི་རྒྱབ་ཏུ་ཕྱག་ན་རྡོ་རྗེ་ཕྱག་ན་རྔ་ཡབ་ཐོགས་པར་བྱའོ། །སངས་རྒྱས་ཀྱི་གཟུགས་བརྙན་གྱི་ཁོར་ཡུག་ཐམས་ཅད་དུ་མེ་ཏོག་དང་། འབྲས་བུ་ཕྲ་མོ་རྣམས་སོ། །སངས་རྒྱས་ཀྱི་ཤར་གྱི་ཕྱོགས་སུ་ཤར་གྱི་ལུས་འཕགས་ཀྱི་གླིང་ངོ་། །བྱང་གི་སྒྲ་མི་སྙན་གྱི་གཞོགས་སུ་རྒྱལ་

པོ་ཆེན་པོ་ངལ་སོས་པོ་གནོད་སྦྱིན་གྱི་བདག་པོ་ཆེན་པོ་འཁོར་དང་བཅས་པ་འདྲིར་གཞུག་པར་བྱའོ། །དེ་ནས་དཀར་པོའི་ཚེས་གཅིག་ནས་བརྩམས་ཏེ་ཚངས་པར་སྤྱོད་པ་བསྙེན་གནས་ཡན་ལག་བརྒྱད་པ་དང་། འོ་མ་དང་ཟན་བཟའ་ཞིང་དུས་གསུམ་དུ་ཀུན་ཏུ་རུའི་བདུག་པ་སྲེག་ཅིང་

རས་རིས་དེ་ལ་རིག་པ་ལན་ཉི་ཤུ་རྩ་གཅིག་ཏུ་བརྗོད་པར་བྱའོ། །འདི་སྐད་ཅེས་བརྗོད་པར་བྱ་སྟེ། རིག་པའི་དངོས་གྲུབ་བདག་ལ་གྱུར་ཅིག །ཉི་མ་ཕྱི་མ་གསུམ་ལ་གསོ་སྦྱོང་ལ་གནས་པ་ཉིད་ཀྱིས་བཅོ་ལྔ་ལ་དགའ་བར་འགྱུར་རོ། །དཀར་པོའི་ཕྱོགས་ལ་ས་བོན་བཏང་བ་ལས་

ཁང་བ་ཅན་གྱིས་ཉེ་བར་སྦྱར་བ་དང་། བྲམ་ཟེ་གཞོན་ནུས་བཀལ་བའི་སྲད་བུ་དང་། གཞོན་ནུ་མས་བྱས་པ་ཉེ་བར་བླངས་ཏེ་སངས་རྒྱས་ཀྱི་གཟུགས་ཀྱི་ཞབས་ཀྱི་དྲུང་དུ་བྱའོ། །ལྕགས་ལྔ་རྒྱ་ཤུག་གི་ཚིག་གུའི་ཚད་ཀྱི་གསེར་དང་དངུལ་དང་ཟངས་དང་ཚོན་མོ་སྟེང་སྟེ། ནག་པོ་

เล่ม ๙๔ · หน้า 173a

དང་། ལྕགས་རྣམས་སངས་རྒྱས་ཀྱི་གཟུགས་བརྙན་གྱི་ཞབས་དྲུང་དུ་བྱའོ། །རིག་པ་གྲུབ་པ་ལ་ལྕགས་དེ་རྣམས་ལ་དབུལ་བར་བྱའོ། །ཡང་ན་སངས་རྒྱས་ལ་མཆོད་པའི་ལས་རྣམས་སོ། །དེ་ནས་ས་ལ་མ་ལྷུང་བའི་བ་བྱུང་བ་སེར་སྐྱ་ལས་བྱུང་བས་བ་

ལང་གི་ལག་པའི་རྣམ་པ་ཤར་དུ་མགོ་བོ་བསྟན་པར་ཉེ་བར་བྱུགས་ནས་ཁའི་རྩ་བར་ཤར་གྱི་ལུས་འཕགས་ཀྱི་གླིང་ཟླུམ་པོ་བྱའོ། །ལྷོའི་རྐད་པ་གཉིས་སུ་འཛམ་བུའི་གླིང་ཟུར་གསུམ་པ། ལྷོ་ནུབ་ཏུ་རས་རིས་ཀྱི་སྤྱན་སྔར་ནུབ་བ་ལང་སྤྱོད་ཀྱི་གླིང་ཟླུམ་པོ་བྱའོ། །ནུབ་ཀྱི་རྐང་པའི་

མདུན་དུ་བྱང་སྒྲ་མི་སྙན་གྱི་གླིང་གྲུ་བཞི་མཉམ་པའོ། །ངག་སྦྱིན་གྱི་ཕྱོགས་སུ་སངས་རྒྱས་ཀྱི་གཟུགས་བརྙན་ཞལ་ནུབ་ཏུ་ཕྱོགས་པ་གཞག་པར་བྱའོ། །དེའི་གཡོན་གྱི་གཞོགས་སུ་བཅོམ་ལྡན་འདས་མ་སྒྲོལ་མ་འདྲིར་གཞུག་པར་བྱའོ། །རི་མོར་བྱས་སམ་ས་ལས་བྱུང་བ་

གཞག་པར་བྱའོ། །དེ་ནས་སངས་རྒྱས་ལ་གུས་པ་དང་བཅས་པས་དྲི་དང་མེ་ཏོག་ལ་སོགས་པ་སེར་པོ་ཇི་ལྟ་བ་དང་། ཚད་མེད་པའི་མར་གྱི་མར་མེ་རྣམས་དབུལ་བར་བྱའོ། །བཅོམ་ལྡན་འདས་མའི་སྤྱན་སྔར་མར་གྱི་མར་མེ་དབུལ་བར་བྱའོ། །གླིང་པར་རྣམས་སུ་སྦྲང་རྩིས་

བཀང་བ་དང་། མར་གྱི་མར་མེའམ། ཏིལ་མར་གྱི་མར་མེ་དབུལ་བར་བྱའོ། །ཤར་གྱི་ཕྱོགས་སུ་ཙནྡན་བཏགས་པའི་བདུག་པ་དྲི་ཟ་རྣམས་ལ་དབུལ་བར་བྱའོ། །བུ་རམ་གྱིས་བཀང་བ་དང་། ཕྱེའི་སྐྱོ་མ་དང་། འོ་ཐུག་རྣམས་ལྷོའི་ཕྱོགས་སུ་བདུག་པ་དང་། འབྲས་ཡོས་

དང་། ཡུངས་ཀར་དང་། ཏིལ་དང་། འབྲས་ཐུག་པོ་ཆེ་རྣམས་བསྲེས་པ་དང་། ཏིལ་གྱི་ཐུག་པ་དང་། ཆང་གིས་བཀང་བ་ཡང་གྲུལ་བུམ་རྣམས་ལ་དབུལ་བར་བྱའོ། །ནུབ་ཀྱི་ཕྱོགས་སུ་མར་དང་གུ་གུལ་གྱི་བདུག་པ་དབུལ་ཞིང་འོ་མས་བཀང་བ་དང་། འོ་ཐུག་རྣམས་ཀྱང་ཀླུ་

དང་འདབ་བཟང་རྣམས་ལ་དབུལ་བར་བྱའོ། །བྱང་གི་ཕྱོགས་སུ་ཀུན་ཏུ་རུའི་བདུག་པ་དང་། རྩབ་མོ་དང་། ཞོ་ཟན་ཡང་གནོད་སྦྱིན་རྣམས་ལ་དབུལ་བར་བྱའོ། །ཀུན་ཏུ་རུ་ཀ་མ་རྙེད་ན་ཙནྡན་བཏགས་པའམ། སྲ་རྩི་པོག་ཀྱང་རུང་ངོ་། །ཕྱེའི་སྐྱོ་མ་དང་། སྦྲང་རྩིས་བཀང་བ་

เล่ม ๙๔ · หน้า 173b

ཡང་ཕྱོགས་བཞིར་རབ་ཏུ་གྲགས་ཤིང་ཇི་སྐད་བརྗོད་པའི་ཡུལ་འཁོར་སྲུང་ལ་སོགས་པའི་བཟའ་བ་ཤེས་པའི་གནས་ཀྱིས་བརྟག་པར་བྱས་པ། ཆུ་ཀླུང་འཁྱིལ་པས་བཀང་བའི་བུམ་པ་རེ་རེ་འབྲུ་དང་། ཇི་ལྟར་རྙེད་པའི་རྒྱ་ཤུག་དང་། ཨུ་དུམ་བཱ་ར་དང་ཁ་སྟུར་དང་། རྒུན་འབྲུམ་ལ་སོགས་

པ་རྣམས་དབུལ་བར་བྱའོ། །ས་བོན་ཐམས་ཅད་ཀྱང་ཉུང་ངུ་ཉུང་ངུ་ལྷག་མ་དང་བཅས་པ་བྱའོ། །དེ་ལ་གལ་ཏེ་རིག་པ་བསྒྲུབ་པར་བྱ་བཞིན་པ་ལ་ཤར་གྱི་ཕྱོགས་སུ་ཅེ་སྤྱང་མོའི་སྒྲ་གྲག་པར་འགྱུར་ན་དེ་ལ་གནས་ནས་འདས་པས་ཤར་གྱི་ཕྱོགས་གང་ཡིན་པར་གཏོར་མ་ལྷག་མ་དང་བཅས་པར་བཞག་

སྟེ། རྟག་ཏུ་གཏོར་བར་བྱའོ། །གལ་ཏེ་ལྷོའི་ཕྱོགས་སུ་གཏོར་མ་ལྷག་མ་དང་བཅས་པ་བཞག་པ་ཅན་གྱིས་གནས་དེར་འཇིགས་པ་འཇིགས་པས་གཏོར་བར་བྱའོ། །དེ་བཞིན་དུ་ནུབ་དང་བྱང་གི་ཕྱོགས་སུ་གཏོར་བར་བྱ་སྟེ། འདི་ནི་ཡོངས་སུ་སྤྱོད་པ་པོས་བྱའོ། །རིག་པ་སྒྲུབ་པ་པོས་རིག་པ་ཀུན་ཏུ་སྒྲུབ་པ་ལ་དྲང་

བར་བྱའོ། །རིག་པ་འཛིན་པའི་སྔ་མའི་རྩ་བར་ཁ་ཤར་དུ་ཕྱོགས་ཏེ་ཀུ་ཤ་བླངས་ནས་ཉེ་བར་འདུག་ཅིང་། ཉེ་བར་འདུག་ནས་རིག་པ་འཛིན་པས་གླིང་བཞི་རྣམས་ཀྱི་ཕྱི་རོལ་དུ་ཕྱོགས་བཞིར་ཁོར་ཡུག་གི་རིའི་ངོས་བཞི་ལ་ཟླུམ་པོ་སེར་སྐྱའི་བ་བྱུང་དེ་ཉིད་ཀྱིས་བྱའོ། །བླངས་ནས་ཉེ་

བར་འདུག་པ་དེའི་སྟན་ལ་སངས་རྒྱས་ཀྱི་གཟུགས་བརྙན་གྱི་བར་དུ་སོལ་བ་དང་བ་བྱུང་དང་། པ་ལཱ་ཤ་ལས་བྱུང་བ་རྣམས་གཞག་པར་བྱའོ། །ལྷག་མ་ལ་སོགས་པ་ཡང་མེད་ལ་སྟོང་ཕྲག་བརྒྱད་སྦྱིན་སྲེག་བྱའོ། །བསྒྲུབ་པར་བྱ་བར་བསྒོམས་ཏེ་དང་པོར་མཚོན་ཆ་དང་།

དེ་ནས་ཡོངས་སུ་བཟླས་པའི་སྭཱ་ཧཱའི་མཐར་རབ་ཏུ་གཞུག་པར་བྱའོ། །ས་ལཱིའི་ཡམ་ཤིང་དང་ཨརྒ་མ་རྙེད་ན་ཨུ་དུམ་བཱ་ར་དང་། པ་ལཱ་ཤ་དང་། ཨ་པཱ་མརྒ་དང་། གཞན་གང་ཡང་རུང་བ་ཀུན་ནས་བསྲེག་ཏུ་གཞུག་པར་བྱའོ། །དེ་ནས་གཞོན་ནུ་མས་བཀལ་བའི་སྲད་བུ་གང་

ཡིན་པ་དེ་ལ་སྔགས་འདིས་མིང་ནས་སྨོས་པར་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ཨ་བ་ལོ་ཀི་ཏེ་སྭཱ་ཧཱ། སྔགས་འདི་བརྒྱད་བརྒྱར་བཟླས་ལ་མདུད་པ་བརྒྱད་བྱས་ཏེ་རཀྵ་སྭཱ་ཧཱ། ཞེས་བྱའོ། །སྲད་བུ་དེ་དག་

เล่ม ๙๔ · หน้า 174a

བདག་ཉིད་སྲུང་བའི་དོན་དུ་བདག་ཉིད་ཀྱི་ལག་པ་ལ་བཅིང་བར་བྱའོ། །སངས་རྒྱས་དེ་དང་དེ་དུས་གྲུབ་པ་ལ་ལྷག་མ་སྲད་བུ་དང་། ས་བོན་ལ་སོགས་པ་རྣམས་བླངས་ནས་ཡོངས་སུ་སྤྱོད་པ་པོས་ལྷའི་ཁང་པ་ནམ་མཁའ་ལ་གཞག་པར་བྱའོ། །ལྷ་མཆོད་

པོས་མཆོད་པར་བྱའོ། །དེ་ནས་ནད་པ་རྣམས་ཀྱིས་ལྷུང་བཟེད་བཟའ་བ་དང་བཏུང་བ་ལ་སོགས་པ་རྣམས་དབུལ་བར་བྱའོ། །ལྷག་མ་ཡིད་ཀྱིས་བགོས་ཏེ་ཆུ་ཀླུང་དུ་རབ་ཏུ་བླུག་པར་བྱའོ། །རྫིད་སྐམ་པོའམ། ཁྲོན་པའམ། བླ་གབ་ཅན་གྱིས་ཕྱོགས་སུ་ས་ལ་བསྐོར་

བར་བྱའོ། །མེས་ལེགས་པར་བསྲེག་པར་བྱའོ། །གང་ལ་ལ་བཅོམ་ལྡན་འདས་མ་སྒྲོལ་མ་སྒྲུབ་པར་འདོད་པ་བཅོམ་ལྡན་འདས་ཀྱིས་གསུངས་པའི་དོན་འདིས་དང་པོ་ཁོ་ནར་བྱང་ཆུབ་ཀྱི་སེམས་ལྷན་ཅིག་བསྐྱེད་པར་བྱའོ། །བཅོམ་ལྡན་འདས་ཀྱིས་གསུངས་པ་ཐམས་ཅད་ཀྱང་

བྱང་ཆུབ་ཆེན་པོའི་མཆོག་གི་དངོས་གྲུབ་ཀྱི་གནས་སོ། །དེ་ལ་སངས་རྒྱས་ཞེས་བྱ་བ་ནི་རིག་པ་འགོག་པ་དང་། རིག་པ་སྐྱེ་བ་སྟེ། དེའི་ཕྱིར་དེ་ལ་རིག་པ་བསྒྲུབ་པར་བྱ་སྟེ། དེ་ལ་བགེགས་བྱེད་པར་མི་ནུས་སོ། །ཐོག་མ་ཁོ་ནར་གཞན་དུ་རིག་པ་སྒྲུབ་པར་བྱེད་པའི་དུས་

ནི་ས་གའི་ཟླ་བའི་བཅོ་ལྔ་ཉའམ། དབོའམ། ཆུ་སྟོད་དམ། སྨིན་དྲུག་གི་དཀར་པོའི་བཅོ་ལྔ་ལ་རྣམ་པར་གང་དུ་ཡང་རུང་སྟེ། གང་ཞིག་དྲག་པོ་སྒྲུབ་པར་བྱེད་པར་འདོད་པ་དེ་རྣམ་པ་འདིས་ནག་པོའི་ཕྱོགས་ཀྱི་ཚེས་གཅིག་ནས་ཉེ་བར་བླངས་ཏེ་ནག་པོའི་བཅུ་བཞི་པ་ལ་སྔགས་

འདིས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཨོྃ་བེ་ད་བིད་སྭཱ་ཧཱ། སྔགས་འདིས་སྔོན་དུ་སྲད་བུ་དམར་པོ་བཅིངས་ཏེ་དུར་ཁྲོད་དུ་བ་ལང་གི་པགས་པའི་རྣམ་པར་སེར་སྐྱའི་བ་བྱུང་གིས་ཉེ་བར་

བྱུགས་པ་བྱས་ནས་དེ་བཞིན་ཁོ་ནར་གཏོར་མའི་ཆོ་གས་འབྱུང་པོ་གཞན་རྣམས་ལ་གཏོར་མ་སྣ་ཚོགས་བྱའོ། །ཡོངས་སུ་སྤྱོད་པར་བྱེད་པ་པོ་བཞིས་མཚོན་ཆ་དང་བཅས་པས་ཡམ་ཤིང་སྲེག་ཏུ་གཞུག་པར་བྱའོ། །སྲད་བུ་ལ་མདུད་པ་བརྒྱད་བརྒྱ་བྱས་ནས་བདག་ཉིད་སྲུང་བའི་དོན་

เล่ม ๙๔ · หน้า 174b

དུ་བཅིང་བར་བྱའོ། །སངས་རྒྱས་དེས་འབྱུང་པོ་དང་། ཡི་དགས་དང་། ཤ་ཟ་དང་། ཚངས་པའི་སྲིན་པོ་ལ་སོགས་པ་རྣམས་དབང་དུ་འགྱུར་རོ། །རིག་པ་གྲུབ་པ་ན་དེ་བཞིན་ཁོ་ནར་གཏོར་མའི་ཆོ་ག་གཤེགས་སུ་གསོལ་ལོ། །རིག་པ་སྒྲུབ་པ་ཐམས་ཅད་ལ་གང་རིག་པ་

སྒྲུབ་པར་བྱེད་པར་འདོད་པ་དེས་མཚན་མོ་གཙང་མས་གཙང་མར་གྱུར་པའི་གོས་བགོས་ཏེ་རང་བསྒྲུབ་པར་བྱ་བར་འགྱུར་རོ། །ཀུན་ཏུ་རུ་འམ་ཨ་ག་རུ་ནག་པོའི་བདུག་པ་བསྲེག་ཅིང་ཁ་ཤར་དུ་ཕྱོགས་པས་ལན་བཅུར་བརྗོད་པར་བྱའོ། །འདི་སྐད་ཅེས་ཀྱང་བརྗོད་པར་བྱ་སྟེ། བཅོམ་

ལྡན་འདས་མ་རང་ཉིད་བྱོན་ནས་མེ་ཏོག་དང་གཏོར་མ་ཡང་སོ་སོར་བཞེས་ནས་བདག་གི་བྱ་བ་འདི་མཛོད་ཅིག་ཅེས་སོ། །དེ་བཞིན་དུ་ལྷོ་ཤར་དུ་ཁ་ཕྱོགས་པ་དང་། ལྷོ་ནུབ་དང་། ནུབ་བྱང་དང་། བྱང་ཤར་དང་། སྟེང་དང་། འོག་ཏུ་ཡང་བརྗོད་པར་བྱ་བར་འགྱུར་རོ། །

རང་ཉིད་ཀྱིས་བྱོན་ཏེ་བདུག་པ་དང་། མེ་ཏོག་ལ་སོགས་པ་དང་། མར་མེ་སོ་སོར་བཞེས་ནས་བདག་གི་བྱ་བ་ཡང་བྱའོ་ཞེས་སོ། །ཕྱིར་ཞིང་ཐོ་རངས་ཞིབ་ཡང་ལན་བདུན་ནམ། བཅུར་དེ་བཞིན་ཉིད་དུ་ཕྱོགས་བཅུ་རྣམས་སུ་སྤྱན་དྲང་བར་འགྱུར་རོ། །བྱོན་པ་དང་བདུག་

སྤོས་ལ་སོགས་དབུལ་བར་བྱའོ། །སླར་ཡང་ཉིན་མོ་རྣམ་པར་མནན་ཏེ་གཏོར་མའི་ལས་ཐམས་ཅད་བྱས་ནས་ཀུ་ཤ་བླངས་ཏེ་ཉེ་བར་འདུག་པར་འདོད་པས་དེ་བཞིན་ཉིད་དུ་ཕྱོགས་བཅུར་སྤྱན་དྲང་བར་བྱའོ། །བཅོམ་ལྡན་འདས་མ་བྱོན་པ་དང་། དྲི་དང་མེ་ཏོག་ལ་སོགས་

པ་ཡང་བཞེས་ཏེ་བདག་གི་བྱ་བ་ཡང་མཛོད་ཅིག་ཅེས་སོ། །དེ་ནས་ཀུ་ཤ་བླངས་ཏེ་ཉེ་བར་འདུག་སྟེ་ཇི་སྐད་བཤད་པའི་བསྒྲུབ་པ་བྱའོ། །རིག་པ་སྒྲུབ་པ་ལ་མཚན་མ་འདི་རྣམས་འབྱུང་སྟེ། རིག་པའི་ཆེད་དུ་རྨི་ལམ་མཐོང་བ་ནི་གླང་པོ་ཆེ་དང་། རྟ་དང་། ལྷའི་ཁྱིམ་དང་།

ཁང་བཟངས་མཐོང་བ་དང་། འཛེགས་པ་དང་། རིག་པའི་དངོས་གྲུབ་ཀྱི་མཚན་ཉིད་རྣམས་ཀྱང་རྟ་མཐོང་བས་རླུང་གི་བྱ་བའི་དངོས་གྲུབ་གྲུབ་བོ། །དེ་བཞིན་དུ་མ་དང་། ཕ་དང་། མེས་པོ་དང་། ཡང་མེས་དང་། རྒྱལ་པོ་ཆེན་པོ་དང་། བུ་མོ་རྒྱན་གྱིས་བརྒྱན་

เล่ม ๙๔ · หน้า 175a

པ་མཐོང་བ་དང་། གོས་དཀར་པོ་བགོ་བ་དང་། ཟན་དང་། བ་ལང་དང་། བྲམ་ཟེ་གཞོན་ནུ་དང་། གསེར་དང་། རླན་དང་། རྨ་བྱ་དང་། ཤ་དང་། ཉ་དང་། འོ་མ་དང་། ཞོ་དང་། མར་གྱི་གཏོར་མའི་ལས་ལ་སོགས་པ་རྣམས་འཇུག་བཞིན་པས་ནོན་

པར་སྨྲ་བ་རྣམས་དང་། མེ་ཏོག་དང་འབྲས་བུ་ལ་སོགས་པ་མཐོང་ན་ཇི་ལྟ་བར་ལྡན་པའོ། །དེ་ནས་སོས་ཀ་དང་། དབྱར་ཉེ་བར་མ་མཐོང་བ་དང་། རླན་ལ་གནས་པའི་ནས་དང་གྲོ་རྣམས་མཐོང་ན་ཕྱིན་ཅི་ལོག་གི་དུས་ཀྱི་ཆར་པ་དང་། ཇི་ལྟར་རབ་ཏུ་བསྔགས་པའི་ཞི་བ་འདོད་པ་

ནི་བུམ་པ་གང་བ་དང་། འོ་མ་དང་། ཞོ་དང་། མར་དང་། མེ་ཏོག་དང་། འབྲས་བུ་རྣམས་མཐོང་ན་རབ་ཏུ་འཇུག་པར་བྱ་བཞིན་པ་འདི་རྣམས་ནི་མཆོག་ལས་སོ། །བ་ལ་དང་། བྲམ་ཟེ་དང་། གཞོན་ནུ་དང་། གསེར་དང་། རྨ་བྱ་ལ་སོགས་པ་རྣམས་མཐོང་བ་

དང་བལྟས་ནས་དངོས་གྲུབ་བོ་ཞེས་རིག་པ་ཐམས་ཅད་སྒྲུབ་པའི་བྱ་བ་རྣམས་ལ་ལས་རྣམས་བརྩམ་པར་བྱའོ། །ཕྱིན་ཅི་ལོག་འདི་རྣམས་མཐོང་ན་གཉིད་མི་ལོག་སྟེ། རྨི་ལམ་དུ་སྡིག་པ་དང་། བོང་བུ་དང་། རྔ་མོ་དང་། ཕག་དང་། སྤྲེའུ་དང་། བྱ་རོག་དང་། འུག་

པ་དང་། བྱ་རྒོད་ཐམས་ཅད་དང་། བྱི་བ་དང་། བྱི་ལ་དང་། དབྱིག་དང་། གཅེར་བུ་དང་། སི་ཏ་རུཀྵ་དང་། སྣོད་སྟོང་པ་དང་། ཤིང་སྐམ་པོ་དང་། དུར་ཁྲོད་ཀྱི་སོལ་བ་དང་། ཆུ་ཀླུང་བསྐམས་པ་དང་། ལོག་པར་འདྲེན་པ་རྣམས་ཏེ་མི་ཤིས་པ་མཐོང་ན་

རིག་པ་མི་འགྲུབ་བོ། །བྱ་བ་ཐམས་ཅད་ལ་བགེགས་འབྱུང་བར་འགྱུར་རོ། །དེ་ལ་སྔགས་འདི་བགེགས་ཐམས་ཅད་ལ་རབ་ཏུ་སྦྱར་བར་བྱའོ། །ཨོྃ་བཛྲ་ཁུ་རུ་བི་ཀྲི་ཏཱ་ན་ན་ཧཱུྃ་ཧཱུྃ་ཕཊ། སྔགས་འདི་ནི་རྟ་མགྲིན་ཞེས་བྱ་བ་ཁྲོ་བོའི་རྒྱལ་པོའི་སྟེ། སྔགས་འདི་ལྷག་པར་གནས་

པས་བདག་ཉིད་བསྲུང་བ་བྱས་པ་དང་། ལས་ཐམས་ཅད་སྒྲུབ་པ་ལ་འཇིགས་པ་མི་འབྱུང་ངོ་། །དེ་ནས་རིམས་རྣམས་དང་། བྱིས་པ་གདོན་གྱིས་ཟིན་པ་རྣམས་ལ་བྱ་བས་པ་དང་། སྲད་བུ་བཅིང་བར་བྱ་སྟེ། དུག་བྱབས་པ་ཡང་ཇི་སྲིད་དུ་རིག་པ་ལན་ཅིག་བཟླས་པས་འགྲུབ་པར་

เล่ม ๙๔ · หน้า 175b

བྱེད་དོ། །དེ་ལ་བུམ་པ་ལ་འདྲིར་གཞུག་པར་བྱ་སྟེ། གཞོན་ནུ་མས་བཀལ་བའི་སྲད་བུ་གཙོ་བོའི་སྔགས་ཀྱིས་མདུད་པ་བརྒྱད་བརྒྱ་བྱས་ནས་བུམ་པ་དེ་ལ་བཅིང་བར་བྱའོ། །རིམ་པ་དེ་དངོས་གྲུབ་དང་དངོས་གྲུབ་མེད་པར་སྟོན་པར་བྱེད་དོ། །ཉི་མ་གཉིས་པ་ལ་མདུད་པ་

ཐམས་ཅད་དགྲོལ་བར་བྱའོ། །རྣམ་པ་གཞན་དུ་ན་རིག་པས་བཅིངས་ཏེ་མ་གྲོལ་བཞིན་པ་དོན་མེད་པར་བྱེད་པོ་དེ་ལྟ་བུ་ལ་སོགས་པ་སྔགས་དེ་ལས་བཅོ་བརྒྱད་དུ་འགྱུར་རོ། །འདི་ནི་ལྷག་པར་གནས་པ་ཐམས་ཅད་དང་སྔགས་ཐམས་ཅད་ཀྱི་སྒྲུབ་པའི་ཐབས་ཏེ། དེ་ལ་རིག་

པའི་སྔགས་ཀྱི་སྦྱོར་བའི་ཁྱད་པར་བརྗོད་པར་བྱ་སྟེ། གང་དུ་བསྒྲུབ་པ་བྱ་བཞིན་པའི་སྐྱེས་བུ་ལ་མཐོང་བ་སྦྱིན་པ་བྱེད་དེ། དེ་ལ་སྐྱེས་བུ་ལྷག་པའི་ལྷ་དེ་སྐྱེས་བུ་ལ་ཉེ་བར་གནས་པར་རྟོག་པར་བྱེད་དེ། སྔགས་དེ་གང་གིས་བསྒྲུབ་པར་བྱ་བཞིན་པ་ལ་མཐོང་བ་སྦྱིན་པར་བྱེད་དོ། །

ལྷག་པའི་ལྷ་དེ་ཉེ་བར་གནས་པར་རྟོག་པར་བྱེད་དོ། །འདི་ནི་རིག་པའི་སྔགས་ཀྱི་ཁྱད་པར་རོ། །སྔགས་འདིའི་སྒྲུབ་པའི་ཐབས་ཀྱི་ཆོ་ག་ནི་དཀྱིལ་འཁོར་གྲུ་བཞི་པ་ཉེ་བར་བྱུགས་ཏེ་དེའི་དབུས་སུ་སངས་རྒྱས་ཀྱི་གཟུགས་བརྙན་ཞལ་ནུབ་ཏུ་ཕྱོགས་པར་བཞུགས་ནས་དེའི་

གཡས་ཀྱི་ཕྱོགས་སུ་བཅོམ་ལྡན་འདས་མ་གཞག་པར་བྱའོ། །གཡོན་དུ་ཁྲོ་བོའི་རྒྱལ་པོ་རྟ་མགྲིན་ནོ། །དེ་ནས་མྱུར་དུ་ཤར་དུ་མངོན་པར་ཕྱོགས་པས་གནས་ནས་ཀུ་ཤ་བླངས་ཏེ། བཅོམ་ལྡན་འདས་ཀྱི་གཟུགས་བརྙན་ལ་དྲི་དང་མར་མེ་ལ་སོགས་པ་མཆོད་པ་བྱས་ཨ་

ག་རུ་དང་ཏུ་རུཥྐའི་བདུག་པ་བསྲེགས་ཏེ་གཏོར་མ་ཐོབ་པ་ཡང་སྦས་པའི་ཕྱོགས་བཞི་རྣམས་སུ་ཕུལ་ནས་སངས་རྒྱས་ཀྱི་གཟུགས་བརྙན་གྱི་སྤྱན་སྔར་ཀུ་ཤ་བླངས་ནས་ཉེ་བར་འདུག་སྟེ། ནད་ཐམས་ཅད་ཁྱད་པར་བྱབ་པར་བྱའོ། །ནད་ཐམས་ཅད་རྣམ་པར་ཐིམ་ཞིང་གྲོལ་བར་འགྱུར་རོ། །

ཉི་མ་བདུན་པའི་ཐོ་རངས་སམ་མཚན་མོ་གསུམ་ལའོ། །སྒྲོལ་མའི་རྒྱུད་དེ་ཐམས་ཅད་ཀྱི་ཆོ་ག་འཁོར་དང་བཅས་པ་འཆང་བར་བྱེད་དོ། །རྒྱ་མཚོ་དང་། རི་བོ་དང་། དུར་ཁྲོད་རྣམས་སུ་སོ་སོར་གནས་པའི་དགེ་སློང་མ་གཞན་གང་ལ་ལས་བདག་ཉིད་སྲུང་བའི་དོན་དུ་

เล่ม ๙๔ · หน้า 176a

བཟླས་པ་དབུལ་བར་བྱའོ། །ཤ་ཟའི་གནོད་སྦྱིན་ལ་སོགས་པ་གང་ཡིན་པ་དེ་རྣམས་ཀྱི་འཇིགས་པ་མི་འབྱུང་ངོ་། །དེ་ལ་ཤར་གྱི་ཕྱོགས་སུ་འགྲོ་བར་འདོད་པས་དཀྱིལ་འཁོར་གྲུ་བཞི་པ་བྱས་ནས་དེར་དྲི་དང་མེ་ཏོག་དང་། བདུག་པ་ལ་སོགས་པ་ཕུལ་ནས་

བདག་ཉིད་སྲུང་བའི་དོན་དུ་ལན་ཉི་ཤུ་རྩ་བདུན་བཟླས་པ་དབུལ་བར་བྱའོ། །དེ་བཞིན་དུ་མཚན་མོའི་དུས་ལ་བབ་པ་ན་ལམ་དུ་བཟླས་པ་དབུལ་བར་བྱའོ། །རྟག་ཏུ་ཡིད་ལ་བྱའོ། །སྲད་བུ་ཡང་བདག་ཉིད་ལ་བཅིང་བར་བྱའོ། །སྔར་བརྗོད་པས་དེ་རྣམས་ཀྱིས་ཀྱང་

ལན་བདུན་མངོན་པར་བསྔགས་པས་བྲིས་པར་འགྱུར་རོ། །དེ་བཞིན་དུ་སྙིང་པོར་གདོན་རྣམས་ལ་སྔར་བརྗོད་པའི་ཆོ་གས་ཀུ་ཤས་བྱབ་པར་བྱའོ། །སྔར་བརྗོད་པ་དེ་རྣམས་ཀྱིས་ཀྱང་རིག་པ་བདུན་པོ་དེ་རྣམས་ཀྱིས་སོ། །དེ་བཞིན་དུ་ལྷོའི་ཕྱོགས་སུ་འགྲོ་བར་འདོད་པས་

བདུག་པ་དང་། མེ་ཏོག་ཕུལ་ནས་ལན་ཉི་ཤུ་རྩ་གཅིག་ཏུ་བཟླས་པ་དབུལ་བར་བྱའོ། །དེ་བཞིན་དུ་གྲུལ་བུམ་གྱི་གདོན་རྣམས་ལ་སྔར་བརྗོད་པའི་ཆོ་གས་བྱབ་པར་བྱའོ། །སྲད་བུ་ཡང་བཅིང་བར་བྱ་སྟེ་ཞི་བར་འགྱུར་རོ། །དེ་བཞིན་དུ་ནུབ་ཀྱི་ཕྱོགས་སུ་འགྲོ་བར་འདོད་པས་དེ་

བཞིན་དུ་ཀླུ་དང་། འདབ་བཟང་གི་གདོན་རྣམས་ལ་སྔར་བརྗོད་པས་བྱབ་པར་བྱའོ། །སྔར་བརྗོད་པའི་ཆོ་གས་སོ། །དེ་བཞིན་དུ་བྱང་གི་ཕྱོགས་སུ་འགྲོ་བར་འདོད་པས་དེ་བཞིན་དུ་གནོད་སྦྱིན་གྱི་གདོན་རྣམས་ལ་སྔར་བརྗོད་པའི་ཆོ་གས་སོ། །དེ་བཞིན་དུ་ཕྱོགས་བྲལ་རྣམས་

སུ་ཡང་ངོ་། །དེ་ནས་སྤྱན་རས་གཟིགས་དབང་ཕྱུག་གིས་སླར་ཡང་ལྷ་དང་གནོད་སྦྱིན་ལ་སོགས་པ་རྣམས་ལ་སྨྲས་པ། གྲོགས་པོ་ཁྱེད་རྣམས་ཉོན་ཅིག །དེ་བཞིན་གཤེགས་པའི་གཟུགས་མཚན་ཐམས་ཅད་རྫོགས་པའི་དེ་བཞིན་གཤེགས་པའི་སྐུ་མཐོང་ནས་གཡས་པས་

མཆོག་སྦྱིན་པ་དང་། ཆོས་སྟོན་པར་མཛད་བཞིན་པ། མི་འཇིགས་པ་རབ་ཏུ་སྦྱིན་པའོ། །དེར་རིག་པ་བསྒྲུབ་པར་བྱའོ། །མངོན་སྤྱོད་ཅན་ནི་བསྒྲུབ་པར་མི་བྱ་སྟེ། སྒྲོལ་མས་ནོན་པའི་ཁྲོ་བོ་དང་། ཉེ་བར་བསྒྲུབ་པར་བྱའོ། །ཇི་སྲིད་རལ་གཅིག་མའི་མདུན་ན་ཕྱག་ན་རྡོ་

เล่ม ๙๔ · หน้า 176b

རྗེ་དང་ཉེ་བར་རོ། །ཁྲོ་བོའི་མཚན་ཉིད་ཀྱང་འཆང་བར་བྱེད་དོ། །མཚན་ཉིད་ཐམས་ཅད་ཡང་དག་པར་རྫོགས་པར་སྣུམ་ཞིང་སྔོ་བསངས་སྔར་བརྗོད་པའི་རྣམ་པ་ལས་ཞི་བའི་གཟུགས་ཅན་གྱི་མདུན་དུ་རིག་པ་གཞན་ཡང་བསྒྲུབ་པར་བྱའོ། །མངོན་སྤྱོད་ཅན་གྱི་རྣམ་པར་

འགྱུར་བའི་གཟུགས་ཅན་དུ་བྱའོ། །ཞི་བ་ཅན་དང་རྒྱས་པ་ཅན་ནི་ཞི་བའི་གཟུགས་ཅན་ནོ། །གང་དུ་སྒྲུབ་པ་པོ་མངོན་པར་ཕྱོགས་ནས་བལྟས་པ་དེར་བསྒྲུབ་པར་བྱའོ། །རལ་པ་གྱེན་བརྫེས་སུ་བརྗོད་པའི་རིག་པ་ཐམས་ཅད་ཀྱི་སྒྲུབ་པའི་ཐབས་ཀྱི་ཆོ་ག་རྗེས་སུ་གནང་བ་ཡང་

བུད་མེད་གང་ཡིན་པའི་བུད་མེད་དེའི་མཚན་ཉིད་དང་། གཟུགས་དང་། ཆ་བྱད་འཆང་བར་བྱའོ། །སྐྱེས་པ་ཡོད་ན་སྐྱེས་པའི་མཚན་ཉིད་དང་ཡང་དག་པར་ལྡན་པར་གྱུར་པ་སྐྱེས་པའི་རྒྱན་གྱིས་བརྒྱན་པར་བྱས་པ་ལག་ཆ་དང་བཅས་པ་ཇི་འདྲ་བའམ་སྔར་བརྗོད་པ་དེ་འདྲ་བ་

བྱའོ། །ཕྱིན་ཅི་ལོག་གི་གཟུགས་ཀྱིས་དངོས་གྲུབ་མི་འབྱུང་ངོ་། །ཇི་སྲིད་དུ་ལྷ་དྲག་པོ་དེའི་ཉེ་ལོགས་སུ་དེ་བཞིན་གཤེགས་པ་གཞག་པར་བྱའོ། །མཆོད་རྟེན་ནམ། སླར་ཡང་རྟེན་ཅིང་འབྲེལ་པར་འབྱུང་བའི་སྙིང་པོ་ཅན་མ་གས་ཤིང་དུམ་བུར་མ་གྱུར་པ་དངོས་གྲུབ་

སྦྱིན་པར་བྱེད་དོ། །དེ་ལ་བཅོམ་ལྡན་འདས་མ་འཕགས་མ་སྒྲོལ་མའི་དཀྱིལ་འཁོར་འདི་ནི་དམ་ཚིག་ཐམས་ཅད་སྐྱེད་པར་བྱེད་པ་ཞེས་བྱ་བའི་དཀྱིལ་འཁོར་ཏེ་རྣམ་པར་རྒྱལ་བ་མངོན་པར་དབང་བསྐུར་བ་ཞེས་བྱ་བ་བཀྲ་ཤིས་དང་བསོད་ནམས་ཀྱི་ལས་ཐམས་ཅད་བྱེད་པ་དང་། ལོ་

ཐོག་དང་། ཚེ་དང་། ནད་མེད་པ་འཕེལ་བར་བྱེད་པ་དམ་ཚིག་ཉམས་པ་རྣམས་ཀྱང་དམ་ཚིག་སྐྱེད་པར་བྱེད་པ་པོར་འགྱུར་རོ། །སྣ་ཚོགས་པའི་ཆུ་ཀླུང་གི་འགྲམ་མམ། པདྨའི་མཚོའི་འགྲམ་དུ་དཀྱིལ་འཁོར་འདི་བྲི་བར་བྱའོ། །ཆུའི་ལེགས་པར་སྦྱངས་པའི་ས་གཞིའི་ཆར་

བྱས་ནས་སྐྲ་དང་། ཕུབ་མ་དང་། སོལ་བ་དང་། ཐལ་བ་དང་། ཤིང་དང་། སོ་ཕག་དང་། གསེག་མ་དང་། ཐོད་པ་དང་། ཀེང་རུས་དང་བྲལ་བ། མགྲིན་པའམ། ཆུའི་ཚད་གང་དུ་ཉེ་ལོགས་ན་ཆུ་ཡོད་པའི་གཡས་ཀྱི་གཞོགས་སམ། ནུབ་ཏུ་གང་དུ་མེ་ཏོག་

เล่ม ๙๔ · หน้า 177a

དང་འབྲས་བུར་ལྡན་པའི་ཤིང་ཡོད་པ་དང་། གང་ཡང་ཡིད་དུ་མངོན་པར་འོང་བ་གང་དུ་ནོར་ཡོད་པའི་ཕྱོགས་སུ་གྲུ་བཞི་པ། སྒོ་བཞི་པ། ཚོན་སྣ་ལྔ་པའི་ས་ལཱིའི་ཕྱེ་མས་དཀྱིལ་འཁོར་ཀུན་ཏུ་བྲི་བར་བྱའོ། །ཚོན་སྣ་ལྔ་པའི་སྲད་བུ་ཉིད་ཀྱིས་ཐིག་བཏབ་

ནས་ཨུ་དུམ་བཱ་རའི་ཕུར་བུ་རྣམས་ཀྱིས་ཀྱང་ངོ་། །དཀར་པོའི་ཕྱོགས་ཚེས་གྲངས་དང་། བྱེད་པ་དང་། ཡུད་ཙམ་དང་། རྒྱུ་སྐར་དང་། སྦྱོར་བ་དགེ་བ་ལ་དེ་རྣམས་ཀྱིས་དང་པོར་དཀར་པོ། གཉིས་པར་དམར་པོ། གསུམ་པར་སེར་པོ། བཞི་པར་སྔོན་པོ། ལྔ་པར་ནག་

པོ་ཞེས་སོ། །ལྷག་མ་ཤར་གྱི་དབུས་སུ་ལྷ་རྣམས་བྲི་བར་བྱའོ། །པདྨའི་དབུས་སུ་འབྲུ་དང་། རིན་པོ་ཆེ་དང་། སྨན་དང་། མེ་ཏོག་ཐམས་ཅད་ཀྱིས་ཡོངས་སུ་བཀང་བའི་བུམ་པ་རབ་ཏུ་གཞག་པར་བྱའོ། །དེའི་ཤར་དུ་སངས་རྒྱས་བཅོམ་ལྡན་འདས་ཀྱི་གཡས་སུ་

འཕགས་པ་སྤྱན་རས་གཟིགས་དབང་ཕྱུག་གོ། །གཡོན་དུ་དྲི་མ་མེད་པར་འགྲོ་བའོ། །འཕགས་པ་སྤྱན་རས་གཟིགས་དབང་ཕྱུག་གི་གཞོགས་སུ་སྒྲོལ་མ་བདུན་ནོ། །གཡོན་དུ་དྲི་མ་མེད་པར་འགྲོ་བའི་བུད་མེད་བདུན་ནོ། །དཔལ་ལྷ་མོའི་གཞོགས་སུ་གོས་དཀར་

མོའོ། །སྒྲོལ་མ་རྣམས་ཀྱི་གཞོགས་སུ་ཟླ་བ་མ་གཞག་པར་བྱའོ། །ཟླ་བ་མ་ནས་བརྩམས་ནས་དཔལ་མོ་གྲགས་ལྡན་མོ་དང་། དཀར་མོ་ཡང་ངོ་ཞེས་སོ། །གཞོགས་སུ་དཀར་མོ་ཆེན་མོ་དང་ཁྲོ་གཉེར་ཅན་ནོ། །སྒོའི་ཕྱོགས་སུ་སྙིང་སྟོབས་མ་དང་ནུས་པའོ། །དཀྱིལ་

འཁོར་གྱི་ནང་གི་གཞོགས་གཉིས་ཀར་ཚངས་པ་དང་། དྲག་པོ་ཡང་ངོ་། །དྲག་པོའི་གཞོགས་སུ་ལྷ་མོ་ཨུ་མའོ། །ཚངས་པའི་དབྱངས་ཅན་མའོ། །སྒོའི་ནང་དུ་དབྱུག་གུ་དང་། རིལ་བ་སྤྱི་བླུགས་སོ། །གཅིག་ཏུ་ཤེས་རབ་ཀྱི་ཕ་རོལ་ཏུ་ཕྱིན་མའོ། །གཅིག་ཏུ་

ཞི་བ་ཐོབ་པའོ། །སྒོ་རུ་མངོན་ཕྱོགས་དང་། རྟ་མགྲིན་ཞེས་བྱ་བའི་ཁྲོ་བོ་གཞག་པར་བྱའོ། །དེའི་གཞོགས་སུ་སྲིན་མོ་རལ་གཅིག་མ་ཞེས་བྱ་བ་དགོད་པར་བྱའོ། །འདི་ནི་བཅོམ་ལྡན་འདས་མ་འཕགས་མ་སྒྲོལ་མའི་དཀྱིལ་འཁོར་བཅིང་བ་སྟེ། ཁྲུ་བཞི་པའམ། ཁྲུ་བརྒྱད་

เล่ม ๙๔ · หน้า 177b

པའམ། ཁྲུ་བཅུ་གཉིས་པའམ། ཁྲུ་བཅུ་དྲུག་པའི་དཀྱིལ་འཁོར་ཀུན་ཏུ་བྲི་བར་བྱའོ། །གཟུགས་དང་ཕྱག་རྒྱ་རྣམས་དགོད་པར་ཐམས་ཅད་དུ་བཅོམ་ལྡན་འདས་ཀྱི་པདྨ་ནི་པདྨའི་ཕྱག་རྒྱ་རྒྱས་པར་བྱ་བའོ། །བྱང་ཆུབ་སེམས་དཔའ་རྣམས་ཀྱི་རིགས་བཟང་པོའོ། །འཕགས་

མ་སྒྲོལ་མའི་ནི་ཨུཏྤ་ལའོ། །དཔལ་མོ་ནི་མེ་ཏོག་ཁ་ཕྱེ་བ་དང་པདྨ་དཀར་པོའོ། །གོས་དཀར་མོའི་དེ་ཉིད་སྡོང་བུ་དང་བཅས་པ་མཆོག་ཏུ་རྒྱས་པའོ། །འཕགས་མ་གྲགས་ལྡན་མའི་སྡོང་བུ་དང་བཅས་པའི་མེ་ཏོག་གོ། །སྒོ་རྣམས་ཐམས་ཅད་དུ་དང་། གྲྭ་རྣམས་

ཐམས་ཅད་དུ་ཡང་ཀུ་ཤ་རེ་རེ་ལ་ཙུ་ཏའི་ཡལ་འདབ་བཅུ་དགོད་དེ། སྟོད་དུ་བ་དན་བསྒྲེང་བར་བྱའོ། །དེ་ནས་རང་རང་གི་སྔགས་ཀྱིས་སྤྱན་དྲང་བར་བྱ་སྟེ་གཤེགས་སུ་གསོལ་བ་ཡང་ངོ་། །ཡང་ན་འཕགས་པ་སྤྱན་རས་གཟིགས་དབང་ཕྱུག་གི་སྙིང་པོ་ཚར་བ་རིག་པས་སོ། །

ཡང་ན་འཕགས་མ་སྒྲོལ་མའི་སྙིང་པོས་མེ་ཏོག་དཀར་པོས་སྤྱན་དྲང་བ་དང་། གཤེགས་སུ་གསོལ་ལོ། །མཚན་མོ་དྲི་དང་། མེ་ཏོག་དང་། བདུག་པ་དང་། མར་མེས་མཆོད་པ་བྱས་ནས་གཏོར་མས་ཉེ་བར་མཆོད་དེ། བཀྲ་ཤིས་ཅན་དང་། ཨུལློ་པི་ཀ་དང་། མོན་

སྲན་གྲེའུ་དང་། སྣུམ་ཁུར་ལ་སོགས་པ་དང་། མོན་སྲན་སྡེའུའི་ལ་དུ་དང་། ཏིལ་གྱི་ཐུག་པ་དང་། འོ་ཐུག་དང་། ཞོའི་ཟན་དང་། དར་བ་དང་། ཐུག་པ་དང་། འབྱུང་བའི་ཟས་སྣུམ་ཁུར་གཞན་རྣམས་དང་། བྱན་བུ་རམ་དང་། ཞོ་ཡང་སྟེ་གཏོར་མའི་ཆོ་གའོ། །

དེ་ནས་སླར་ཡང་དྲི་བཟང་པོའི་དྲི་དང་མེ་ཏོག་གི་མཆོད་པ་མཆོད་པ་བྱས་ནས་ཆུ་ལས་སྐྱེས་པ་ནི་ཁྱད་པར་དུའོ། །དེ་ནས་རེ་རེ་སྔགས་ལན་བདུན་བདུན་བརྗོད་པར་བྱའོ། །ཡང་ན་འཕགས་མ་སྒྲོལ་མ་བརྒྱད་བརྒྱར་བཟླས་པར་བྱའོ། །ནང་གི་བུམ་པ་གང་ཡིན་པ་དེ་ལ་སྙིང་པོ་ཡི་གེ་

ལྔས་སྟོང་བརྒྱད་བརྒྱ་བཟླས་པར་བྱའོ། །དེ་ནས་མེའི་གནས་སུ་མེ་ཉེ་བར་བཟུང་ནས། མར་དང་། ཏིལ་མར་དང་། ཟས་ཉིད་ཀྱིས་སྦྱིན་སྲེག་གི་ཆོ་ག་ཇི་ལྟར་གཟུགས་དང་། གྲངས་མེད་པར་དེ་ལྟར་སྦྱིན་སྲེག་ཀྱང་བྱའོ། །ཕྱི་ནས་སློབ་མ་ལེགས་པར་ཡོངས་སུ་བཏགས་

เล่ม ๙๔ · หน้า 178a

པའི་སྣོད་དང་ལྡན་པའི་སྒྲུབ་པ་པོས་ཡང་རབ་ཏུ་གཞུག་པར་བྱའོ། །གོས་ཀྱིས་གདོང་གཡོགས་ཏེ་ཐལ་མོ་མེ་ཏོག་གིས་བཀང་བ་རབ་ཏུ་བཅུག་སྟེ་གཏོར་བར་བྱའོ། །གང་དུ་ལྷུང་བ་དེའི་རིགས་སུ་འགྱུར་རོ། །དེ་ལྟར་དཀྱིལ་འཁོར་དུ་རབ་ཏུ་བཅུག་སློབ་མ་

དམ་ཚིག་ཤེས་པར་འགྱུར་རོ། །དབང་བསྐུར་གང་འདོད་པ་དེ་བྱིན་ཏེ་ལྷོ་དང་ནུབ་ནས་ཤར་དུ་མངོན་པར་ཕྱོགས་ནས་སྲ་རྩི་པོག་གི་བདུག་པ་མར་དང་བསྲེས་པས་ཉེ་བར་བདུག་གོ། །ཉི་མ་གུང་ལ་བུམ་པས་སོ། །སྔགས་ཐམས་ཅད་བདུན་བདུན་བཟླས་པའི་སྲེག་བླུགས་

སྲེག །སྲེག་བླུགས་བསྲེགས་ནས་དེ་ནས་བཅོམ་ལྡན་འདས་མའི་ལས་ཆེན་པོས་སློབ་མ་གཡོན་གྱི་ཕྱོགས་སུ་བཞག་སྟེ། དེ་ནས་དཀྱིལ་འཁོར་ལ་བསྐོར་བ་བྱེད་དུ་གཞུག་གོ། །སྙིང་པོ་ཡང་སྦྱིན་ནོ། །དེས་འཕགས་མ་སྒྲོལ་མ་འདིའི་ཕྱག་རྒྱ་བཅིངས་ནས་བཟླས་པར་བྱའོ། །

དེ་ལྟ་བུས་མངོན་པར་དབང་བསྐུར་བར་འགྱུར་རོ། །དེ་རྣམས་ཐམས་ཅད་དུ་ཐམས་ཅད་བྱས་ན་འདི་མྱུར་དུ་ཞི་བར་འགྱུར་རོ། །བཅོམ་ལྡན་འདས་མ་ལ་རབ་ཏུ་དད་པར་བྱེད་དོ། །སེང་གེའི་ཁྲི་ལ་གནས་པ་ལྟ་བུའི་རྒྱལ་སྲིད་འདོད་པས་མངོན་པར་དབང་བསྐུར་བར་བྱའོ། །

ལོངས་སྤྱོད་འདོད་པས་རྒྱ་སྐྱེགས་ཀྱི་འདབ་མ་ལ་གནས་པའོ། །ལོག་པར་འདྲེས་པ་ཉེ་བར་ཕྱུང་བ་བདག་གིས་སོ་ཕག་ལ་ཀུན་ཏུ་གནས་པའོ། །ཚེ་འདོད་པས་ཐུང་ངུ་བཅུ་ལ་གཡོ་བའི་སའི་སྙིང་པོ་ལ་གནས་པའོ། །སློབ་དཔོན་རྒྱས་པར་འདོད་པས་ཨ་རིཥྚ་དང་། ཐོད་

པ་ལ་ཀུན་ཏུ་གནས་པ་ཅན་ཉེ་བར་ཕྱུང་བ་མངོན་པར་དབང་བསྐུར་བར་བྱའོ། །ལན་བདུན་དུ་མངོན་པར་དབང་བསྐུར་བས་ནི་དཔལ་མེད་པ་རབ་ཏུ་ཞི་བར་བྱེད་དོ། །ལན་བཅུ་གཉིས་མངོན་པར་དབང་བསྐུར་བས་ནི་རྒྱལ་པོར་འགྱུར་རོ། །ལན་ལྔར་མངོན་པར་དབང་བསྐུར་

བས་ནི་དབུལ་པོ་ནོར་དང་ལྡན་པར་འགྱུར་རོ། །ཕྱི་ནས་སླར་ཡང་མཆོད་དེ་གཤེགས་སུ་གསོལ་བར་བྱའོ། །འདི་ནི་འཕགས་མ་སྒྲོལ་མའི་རྣམ་པར་རྒྱལ་བའི་དབང་བསྐུར་བ་ཞེས་བྱ་བའི་དཀྱིལ་འཁོར་གྱི་ཆོ་གའོ། །དཀྱིལ་འཁོར་འདི་ཀུན་ཏུ་བྲིས་ནས་རིང་པོར་མི་ཐོགས་པ་ཉིད་

เล่ม ๙๔ · หน้า 178b

དུ་བཅོམ་ལྡན་འདས་མ་རབ་ཏུ་དགྱེས་པར་བྱེད་དོ། །དེ་ནས་ཡང་བྱང་ཆུབ་སེམས་དཔའ་མཐུ་ཆེན་ཐོབ་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་སྨྲས་པ། རལ་པ་གྱེན་བརྫེས་ཀྱི་རྒྱུད་ཕྱི་མ་དང་བཅས་པ་འདི་སངས་རྒྱས་ཀྱི་ཞིང་དུ་རྗེས་སུ་བརྩེ་བས་རྡོ་རྗེའི་རིགས་ཐམས་

ཅད་ཀྱི་བསྟན་པ་ཀུན་སྲུང་བ་དང་། ཡོངས་སུ་བསྐྱང་བའི་ཆེད་དུ་རྡོ་རྗེའི་རིགས་ཐམས་ཅད་ཉིད་དུ་དངོས་གྲུབ་བྱེད་པ་སྙིགས་མ་ལྔས་ཉོན་མོངས་པ་འདི་ལ་ཡང་ཆོས་ཀྱི་ཚུལ་ཐམས་ཅད་ལྷག་པར་གནས་པའི་ཆེད་དུ་སྒྲོལ་མས་ནོན་པ་དང་མཚུངས་པ་ལས་བྱེད་པ། ཕྱི་མ་འདིའི་

ལམ་རབ་ཏུ་གནས་པའི་ཆེད་དུ་འདི་སྐད་དུས་ཀྱང་སྨྲས་སྨྲས་སོ། །བཅོམ་ལྡན་འདས་རབ་ཏུ་གནས་པ་དང་། སྨོན་ལམ་བརྗོད་པར་བགྱིའོ། །སྔགས་ཀྱི་སྤྱོད་པ་དེ་ལྟ་བུ་འདི་ནི་ཅི་ནས་དེ་སེམས་ཅན་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱུར་ཡོངས་སུ་འགྱུར་བ་

དང་། ཅི་ནས་དེ་ཐམས་ཅད་འཐབ་པ་དང་། རྩོད་པ་དང་། མུ་གེ་དང་། ནད་ཀྱིས་འཇིགས་པ་དང་། ཕ་རོལ་གྱི་དམག་ཚོགས་དང་། དུས་མ་ཡིན་པའི་ཆར་ལྷུང་བ་དང་། སྡིགས་པའི་ཆར་བྱེད་པའི་མི་དང་། མི་མ་ཡིན་པ་དང་། དུད་འགྲོའི་འཇིགས་པ་

ཐམས་ཅད་དང་། དེ་ལ་ཡང་བཀྲ་མི་ཤིས་པ་དང་། རྨི་ལམ་དང་། མཚན་མ་ངན་པ་དང་། གདུག་པའི་གནོད་སྦྱིན་དང་། སྐྱེས་བུ་དང་། རོ་དང་བྲལ་བ་དང་། ཁ་བ་དང་། ཚ་བ་དང་། དྲི་ངན་པ་དང་། རེག་པ་ངན་པ་དང་། དུག་བསལ་བར་བགྱིའོ། །

བཅོམ་ལྡན་འདས་མ་འཕགས་མ་སྒྲོལ་མ་བུད་མེད་ཀྱི་གཟུགས་དང་། ཆ་བྱད་ཀྱིས་དེ་ལ་ཆོམ་རྐུན་དང་། ཆུ་དང་། མུ་གེ་དང་། རྣམ་པར་འཚེ་བ་སེལ་བར་བགྱིའོ། །རྒྱལ་པོ་དང་། སེང་གེ་དང་། སྟག་དང་། མ་ཧེ་དང་། སྤྱང་ཀི་དང་། དུག་དང་། ཆོམ་

རྐུན་དང་། མི་དང་། མི་མ་ཡིན་པའི་འཇིགས་པ་ཐམས་ཅད་རབ་ཏུ་ཞི་བར་བགྱིའོ། །སེམས་ཅན་ཐམས་ཅད་ཀྱང་སྔགས་སྒྲུབ་པའི་ཆོ་ག་ལ་མཁས་པ་ཡོངས་སུ་ལོངས་སྤྱོད་པ་རྣམ་པ་སྣ་ཚོགས་པའི་འབྲས་བུ་དང་། སྨན་དང་། མེ་ཏོག་དང་། འབྲས་བུའི་རོ་བཟའ་

เล่ม ๙๔ · หน้า 179a

བ་དང་། བཏུང་བ་དང་། གོས་དང་། གནས་དང་། མལ་ཆ་དང་། སྟན་རྣམས་རྫོགས་པར་བགྱི་བ་དང་། སེམས་ཅན་ཐམས་ཅད་ཆོས་འདོད་པ་ཉིད་དང་། དགེ་བའི་ཆོས་ཀྱི་སྤྱོད་པ་ལ་སྦྱར་བར་བགྱིའོ། །འདི་ནི་བདག་གིས་སངས་རྒྱས་ཐམས་ཅད་

ཀྱི་སྤྱན་སྔར་སྨོན་ལམ་མཐར་ཐུག་པ་སྟེ། གང་དུ་བདག་ལ་སངས་རྒྱས་བཅོམ་ལྡན་འདས་ཐམས་ཅད་ཀྱིས་གནང་བར་གྱུར་ཅིག །བདག་ལ་སངས་རྒྱས་བཅོམ་ལྡན་འདས་ཀྱི་ལས་ཀྱི་དངོས་གྲུབ་ཡིད་ཀྱི་ཤིང་རྟ་ཡོངས་སུ་རྫོགས་པ་དང་། བདག་དང་སྐྱེས་བུའི་རྣམ་པ་འདི་ངེས་པར་

སྒྲོལ་བའི་ཆེད་དུ་དེ་ལྟ་བུའི་གཟུགས་ཀྱིས་བདག་དང་། ཕྱག་ན་རྡོ་རྗེ་བུད་མེད་ཀྱི་གཟུགས་ཀྱིས་དང་། སྣ་ཚོགས་པའི་གཟུགས་དང་། ཆ་བྱད་ཀྱིས་སེམས་ཅན་ཡོངས་སུ་སྨིན་པར་བགྱིའོ། །དེ་ནས་ཡང་སངས་རྒྱས་བཅོམ་ལྡན་འདས་སྤྱན་རས་གཟིགས་དབང་

ཕྱུག་ལ་རྗེས་སུ་བརྩེ་བས་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་གཞན་རྣམས་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ལ་སོགས་པ་རྣམས་

དགུག་པར་བྱས་ནས་དེ་ལྟ་བུའི་གཟུགས་ཀྱིས་སྐྱེས་བུ་ཆེན་པོའི་རྣམ་པ་བྱེད་པར་འགྱུར་རོ། །དེ་ནས་སངས་རྒྱས་བཅོམ་ལྡན་འདས་དེ་རྣམས་ཐམས་ཅད་ཀྱིས་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གྲུབ་པར་འགྱུར་རོ། །དེ་

ནས་ཤཱཀྱ་ཐུབ་པས་བྱང་ཆུབ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་འདི་ནི་བདུད་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་གཞན་རྣམས་དང་། ལྷ་དང་། ཀླུ་དང་། གནོད་སྦྱིན་

དང་། དྲི་ཟ་དང་། ལྷ་མ་ཡིན་དང་། གཟི་བརྗིད་ཆེ་ཞིང་གཟི་བརྗིད་ཆེ་བའི་མི་རྣམས་ཡོང་བར་བྱེད་ཅིང་སངས་རྒྱས་ཐམས་ཅད་ཀྱིས་ཡོངས་སུ་བཟུང་ཞིང་བྱིན་གྱིས་བརླབས་པ། ཁྱེད་ཀྱི་རིག་པ་དང་། སྔགས་ཀྱི་ཚིག་རྣམས་ནི་གང་ཁྱོད་ཀྱིས་ནུས་པ་དེ་ལྟ་བུའི་གཟུགས་

เล่ม ๙๔ · หน้า 179b

དང་སྐྱེས་བུའི་རྣམ་པར་བྱས་པའོ། །རིགས་ཀྱི་བུ་ཁྱོད་ཀྱང་སྐད་ཅིག་གིས་ཚངས་པའི་ཆ་བྱད་ཀྱིས་སངས་རྒྱས་ཐམས་ཅད་ཀྱི་ཆོས་ཀྱི་ཚུལ་ཡང་དག་པར་སྦྱོར་བར་བྱེད་དོ། །ཡུད་ཙམ་གྱིས་དགེ་སློང་གི་ཆ་བྱད་ཀྱིས་དང་། སྐད་ཅིག་གིས་སྨན་དང་། རྩིའི་གཟུགས་ཀྱིས་དང་།

ཡུད་ཙམ་གྱིས་བརྒྱ་བྱིན་གྱི་གཟུགས་ཀྱིས་འཕགས་པའི་ལམ་དུ་འཇུག་པར་བྱའོ། །སྐད་ཅིག་གིས་བདུད་ཀྱི་གཟུགས་ཀྱིས་གཞན་གྱི་གཟུགས་སྤྲུལ་ཏེ་དབང་སྒྱུར་གྱི་ལྷའི་དབང་པོ་དང་། དགའ་ལྡན་དང་། མཚེ་མ་དང་། འོག་མིན་དང་། རྒྱལ་པོ་ཆེན་པོ་བཞི་དང་། འབྱུང་

པོ་ཐམས་ཅད་པ་དང་། དུར་ཁྲོད་དང་། དྲག་པོ་དང་། ཁྱབ་འཇུག་དང་། ནོར་ལྷའི་བུ་དང་། ནོར་སྦྱིན་དང་། དབང་ཕྱུག་ཆེན་པོ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། སྲིན་པོ་དང་།

ཡི་དགས་དང་། ཤ་ཟ་དང་། གྲུལ་བུམ་དང་། རྒྱལ་རིགས་དང་། བྲམ་ཟེའི་རིགས་དང་། རྗེ་རིགས་དང་། དམངས་རིགས་དང་། སེང་གེ་དང་། གླང་པོ་ཆེ་དང་། མ་ཧེ་དང་། སྤྲེའུ་དང་། ཕག་སྣ་ཚོགས་པའི་གཟུགས་ཀྱི་འདབ་ཆགས་དང་། རི་དང་།

ཤིང་དང་། འབྲས་བུ་དང་། གོས་དང་། ཆོས་གོས་དང་། བཞོན་པ་དང་། མལ་སྟན་དང་། རྔ་པ་ཊ་ཧ་དང་། དུང་དང་། རིན་པོ་ཆེ་སྣ་ཚོགས་དང་། རྒྱན་གྱིས་བརྒྱན་པའི་གཟུགས་ཀྱིས་སྤྲས་པ་དང་། སངས་རྒྱས་ཀྱི་གཟུགས་དང་མཚུངས་པར་འགྱུར་

ཏེ། རིགས་ཀྱི་བུ་འདི་ནི་ཁ་དོག་དང་། གཟུགས་དང་། རྟགས་དང་། དབྱིབས་བརྒྱད་ཅུ་རྩ་བཞིའི་གཟུགས་དང་མཚུངས་པར་འགྱུར་ཏེ། དེ་བཞིན་གཤེགས་པ་འོད་དཔག་མེད་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་ཏོ། །རིགས་ཀྱི་བུ་འདི་ནི་བྱང་ཆུབ་

སེམས་དཔའ་སྤྱན་རས་གཟིགས་དབང་ཕྱུག་གི་མཐུ་ཆེན་པོས་འདིར་འོངས་པ་སྟེ། བདུད་དཔུང་དང་བཅས་པའི་ཡུལ་ལ་ཉན་ཐོས་དང་། རང་སངས་རྒྱས་ཐམས་ཅད་དང་། གང་དུ་བདུད་དཔུང་དང་བཅས་པའི་ཡུལ་དུ་གནས་པ་བྱང་ཆུབ་སེམས་དཔའ་སྤྱན་རས་གཟིགས་

เล่ม ๙๔ · หน้า 180a

དབང་ཕྱུག་གི་རིག་པ་དང་། སྔགས་ཀྱི་སྤྱོད་པའི་ཐབས་ཀྱིས་སེམས་ཅན་རྣམས་ཡོངས་སུ་སྤྱོད་པར་བྱེད་དོ། །ཇི་འདྲ་བའི་སེམས་ཅན་ཕྱོགས་བཅུ་རྣམས་སུ་ཚད་མེད་ཅིང་གྲངས་མེད་པ་རྣམས་ཡོངས་སུ་དག་པ་དང་། ཡོངས་སུ་མ་དག་པའི་སངས་རྒྱས་ཀྱི་ཞིང་

རྣམས་སུ་སྒྲིབ་པ་མེད་པའི་ཡེ་ཤེས་ཀྱི་སྤྱན་གྱིས་གཟིགས་པར་འགྱུར་རོ། །བསམ་པ་ཇི་ལྟ་བའི་གཟུགས་ཀྱིས་རང་དང་ཇི་ལྟ་བུས་གདུལ་བར་བྱ་བའི་སེམས་ཅན་རྣམས་གནས་ལ་གསུམ་པ་ཕྱིར་མི་ལྡོག་པ་ལ་འཇོག་པར་བྱེད་དོ། །ཇི་སྲིད་སངས་རྒྱས་ཀྱི་གཟུགས་ཀྱིས་གང་ཡང་སེམས་

ཅན་གྱི་ཆགས་པ་ཟིལ་གྱིས་མནན་ཏེ་རྣམ་པ་སྣ་ཚོགས་པའི་ཡོ་བྱད་དང་། ཡོངས་སུ་ལོངས་སྤྱོད་པར་འདོད་པ་དེ་རྣམས་ཀྱི་ཞེན་པ་སྤང་བའི་ཆེད་དུ་དེ་རྣམས་ལ་ཡོ་བྱད་རྣམས་བྱིན་ནས་ཕྱིར་མི་ལྡོག་པ་ཉིད་ལ་རབ་ཏུ་འཇོག་པར་བྱེད་དོ། །ངེས་པར་སླར་ཡང་དམ་ཚིག་དེས་བྱང་ཆུབ་སེམས་

དཔའ་འཕགས་པ་སྤྱན་རས་གཟིགས་དབང་ཕྱུག་གིས་ཐམས་ཅད་དང་ལྡན་པའི་འཁོར་ལ་སྨྲས་པ། རིགས་ཀྱི་བུ་ཁྱེད་རྣམས་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་

ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ལ་སོགས་པ་རྣམས་ཡིད་ཀྱིས་བཤད་པ་ལ་བདག་རབ་ཏུ་སྤྲོ་བ་ཆེན་པོ་བགྱིད་དོ། །བདག་རྟ་མགྲིན་ཞེས་བྱ་བའི་ཁྲོ་བོའི་རྒྱལ་པོ་ཆེན་པོ་སྨྲས་པ་ཡང་བཅོམ་ལྡན་འདས་དང་ཕན་ཚུན་ཕན་པ་དང་། འཇམ་པའི་སེམས་སུ་གྱུར་ཅིག །འདི་ནི་བདག་

གི་གསང་སྔགས་འབྲས་བུ་ཆེན་པོ་གཟི་བརྗིད་ཆེན་པོ་ལས་ཀྱི་དོན་ཐམས་ཅད་སྒྲུབ་པ་པོར་འགྱུར་ཏེ། ཡང་འདིར་ན། ན་མོ་རཏྣ་ཏྲ་ཡཱ་ཡ། ན་མོ་ཨ་མི་ཏཱ་བྷཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུད་དྷཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་

ཧཱ་ཀཱ་རུ་ཎི་ཀཱ་ཡ། སརྦ་སཏྭཱ་ཡ། ཨ་ནུ་ཀཾ་པ་ཀཱ་ཡ། སརྦྦ་སཏྭཱ་བྱ་ས་ན་གྷཱི་ཏེ་ནི། སརྦ་སཏྭཱ་མ་ཀྵ་ཀ་རཱ་ཡ། སརྦྦ་བཱིརྱ་རཱ་ཛ་ཨ་དྷི་བྷི་ཀྲཱཾ་ཏཱ་ཡ་མ་ཧཱ་རཱ་ཛཱ་པྲོཀྟེ། འདི་རྣམས་ལ་ཕྱག་བྱས་ནས་འཕགས་པ་སྤྱན་རས་གཟིགས་དབང་ཕྱུག་གི་ཞལ་ནས་གསུངས་པ་སེམས་ཅན་ཐམས་ཅད་

เล่ม ๙๔ · หน้า 180b

ཀྱི་དོན་སྒྲུབ་པ། བགེགས་ཐམས་ཅད་གསོད་པར་བྱེད་ཅིང་ཐམས་ཅད་འཇོམས་པར་བྱེད་པའི་སྔགས་བརྗོད་པར་བགྱིའོ། །ཨོྃ་ཧུ་ཧུ་ཧུ། ཏ་རུ་ལེ། བི་ཏ་རུ་ལེ། སརྦྦ་བི་ཥ། གྷཱ་ཏ་ཀ །ཛྭ་ལི་ཏ་བི་ཕུ་ལིངྐ། ཏྲི་ཧཱ་ས། ཀེ་ཤ་རཱ་ཊེ་པ། བཛྲ་ཁུར་ནིར་གྷཱ་ཏ། ཀ་ཙ་ལི་ཏ།

བ་སུ་དྷཱ་ཏ་ལ། ནི་ཤྭཱ་ས། མཱ་རུ་ཏི་ཏྐྵིཔྟི། དྷ་ར་ཎཱི་དྷ་ར། བྷཱི་ཥ་ཎཱ། ཏྲི་ཧ་ས། ཨ་པ་རི་མི་ཏ་བཱ་ལཱ་ཀྲ་མ་བྷཱི་ཏ་བྷུ་ཏ་ག་ནི། བུ་གྷྣ་བུ་གྷྣ། ཧ་ཡ་གྲཱི་བ། ཁཱ་ད་ཁཱ་ད། པ་ར་མནྟྲཾ་སིདྡྷི་མེ་དི་ན། ཨཱ་བེ་ཤཱ་ཡ། ཛྭ་ལ་ར་པི་ཤཱ་ཙ་གྲ་ཧེ་ཥུ། ཨ་པྲ་ཏི་ཧ་ཏོ། བྷ་བ། བཛྲ་

ཀིཉྩ་རཱ་ཡ་སི། ཨི་མཾ་དུཥྚ་གྲ་ཧ་དུཥྚ་སརྦྦཾ་བཱ། དྷུ་ན་དྷུ་ན། པ་ཊ་པ་ཊ། པནྡྷ་བནྡྷ། བུདྡྷ་དྡྷརྨྨ་སྃ་གྷ། ཨ་ནུ་ཛྙཱ་ཀཱ་ར་ཤཱི་གྷྲཾ། ཧ་ཡ་གྲཱི་བ་ཕཊ། བཛྲ་ག་ཏྲཱ་ཡ་ཕཊ། བཛྲ་ནེ་ཏྲཱ་ཡ་ཕཊ། བཛྲ་དཾཥྚཱ་ཡ་ཕཊ། བཛྲ་ཁུ་རཱ་ཡ་ཕཊ། བཛྲ་ཨཱརྱ་ཁུ་རཱ་ནི་གྷཱ་ཏ་ནཱ་ཡ་ཕཊ། པ་

ར་མནྟྲ་བི་ནཱ་ཤཱ་ནཱ་ཡ་ཕཊ། ཏྲཻ་ལོཀྱ་བྷ་ཡཾ་ཀཱ་རཱ་ཡ་ཕཊ། སརྦྦ་ཀརྨྨེ་ཥུ་ཨ་པྲ་ཏི་ཧ་ཏཱ་ཡ་ཕཊ། བཛྲ་ཀུ་ལོ་ཏྲ་ས་ནཱ་ཡ་ཕཊ། ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་ཕཊ་སྭཱ་ཧཱ། ཧཱུྃ་ཡིག་གསུམ་དང་། ཕཊ་ཡིག་བཞིས་བཅོ་བརྒྱད་ཀྱིས་ལྷག་པའི་བཅུ་བཞི་ལ་བརྟེན་པའི་རྟ་མགྲིན་གྱི་ཞལ་གྱི་

སྔགས་རྫོགས་སོ།། །།ཨོྃ་བཛྲ་ཁུ་ར་བི་ཀྲྀ་ཏཱ་ན་ན་ཧཱུྃ་ཕཊ། ཉེ་བའི་སྙིང་པོའོ། །ཨོྃ་ཧ་ཡ་གྲཱི་བ་ཧྲྀ་ད་ཡ། མཱ་བརྟ་ཡི་ཥྱ་མི། ཨེ་ཧི་ཨེ་ཧི། མ་ཧཱ་བཱ་ལ། བཛྲ་ན་ཁ། བཛྲ་རོ་མ། བཛྲ་ཀོ་ཊ། བཛྲ་ཀོ་ཥ། བཛྲ་ཁུ་ར། བཛྲ་དཾཥྚ། ཧ་ན་ཧ་ན། ད་

ཉ་ད་ཧ། པ་ཙ་པ་ཙ། གྲྀཧྞ་གྲྀཧྞ། བནྡྷ་བནྡྷ། རངྒ་རངྒ། ས་ཧ་ས་ཧ། ཛལྤ་ཛལྤ། ཏུ་རུ་ཏུ་རུ། རུ་ཊུ་རུ་ཊུ། དྷུ་ན་དྷུ་ན། བི་དྷུ་ན་བི་དྷུ་ན། མ་ཐ་མ་ཐ། ཀམྤ་ཀམྤ། ཀཊ་ཀཊ། སརྦྦ་དེ་བཱཾ། སརྦྦ་ཡཀྵ། སརྦྦ་བི་ཧེ་ཋ་ཀཱ། སརྦྦ་བི་ཥཱི་པྲ་བི། པྲ་

བེ་པྲ་བི་ཤ། །ཧ་ཡ་གྲཱི་བ་པྲི་ཡ་ཛྭཱ་ལ་ཨ་བི་ཤ །ཨཱ་བི་ཤ །བཛྲ་ཁུར། མཱ་བི་ལམྦ། བུདྡྷ་དྷརྨྨ་སཾ་གྷ་བ་ཙ་ན། མ་ནུ་སྨ་ར། ཛ་ཏི་མ་ནུ་སྨ་ར། ཧྲྀ་ད་ཡམ་ནུ་སྨར། པི་ཀིར་པི་ཀི་ར། ག་ཛ་ག་ཛ། ནནྡ་ནནྡ། གུ་ལུ་གུ་ལུ། མུ་ལུ་མུ་ལུ། ནི་ཧ་ན་

เล่ม ๙๔ · หน้า 181a

ནི་ཧ་ན། ཧཱུྃ་ཧཱུྃ། ཕཊ་ཕཊ་སྭཱ་ཧཱ། སྙིང་པོའི་སྔགས་སོ། །ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། འདི་ཡང་སྟོབས་དང་ཕ་རོལ་གནོན་པ་དཔག་ཏུ་མེད་པ་རིག་པའི་རྒྱལ་པོ་ཆེན་པོ་ལུས་ཀྱི་མཆོག་གི་གཟི་བརྗིད་རྣམ་པར་འཇིག་པར་བྱེད་པ། དེ་བཞིན་གཤེགས་

པ་ཐམས་ཅད་ཀྱི་རྗེས་སུ་འཇུག་ཅིང་མཆོད་པའི་རྗེས་སུ་གནང་བ། རྣམ་པར་འཚེ་བ་ཐམས་ཅད་རྣམ་པར་གནོན་པ། རིག་པའི་ཚོགས་ཐམས་ཅད་ཀྱིས་མཆོད་པ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་།

མིའམ་ཅི་དང་། ལྟོ་འཕྱེ་ཆེན་པོས་ཡང་དག་པར་བསྟོད་པ། ཡི་དགས་དང་། ཤ་ཟ་དང་། གྲུལ་བུམ་གྱིས་མཆོད་པ། རྣམ་པར་འགྱུར་བ་ཆེན་པོ་མཆེ་བ་གཙིགས་པ། རྟ་མགྲིན་གྱི་རྒྱལ་པོའི་ཆོ་གར་འགྱུར་རོ། །སྡིག་པ་བྱང་བར་བྱས་ནས་མཆོད་

རྟེན་དུ་འབུམ་ཕྲག་གསུམ་བཟླས་སོ། །དེ་ནས་སྒྲུབ་པ་བརྩམ་པར་བྱ་སྟེ། དཀར་པོའི་བཅོ་ལྔ་ལ་མཚན་མོ་གསུམ་དུ་སྨྱུང་བར་གནས་པས། ཁ་ཚར་གྱི་རྩེ་མོ་མ་བཅད་པ་སྐྲ་དང་བྲལ་བའི་རས་ལ་རི་མོ་མཁན་གསོ་སྦྱོང་ཅན་གྱིས་ཁ་དོག་མ་འདྲེས་པའི་ཚོན་གྱིས་པིར་

གཙང་མ་སར་པས་བཅོམ་ལྡན་འདས་ཀྱི་གཟུགས་བརྙན་པདྨའི་གདན་ལ་གནས་པ། ཆོས་སྟོན་པར་མཛད་བཞིན་པ་འདྲིར་གཞུག་པར་བྱའོ། །གཡོན་གྱི་གཞོགས་སུ་འཕགས་པ་སྤྱན་རས་གཟིགས་དབང་ཕྱུག་མཆོད་ཕྱིར་ཐོགས་དཀར་པོ་ཅན་སྟོན་ཀའི་སྤྲིན་ལྟར་

དཀར་བ། པདྨའི་ལུས་དང་། རལ་པའི་ཅོད་པན་འཆང་བའི་དབུས་སུ་འོད་དཔག་མེད་དཀར་པོ་སྦྱངས་པའི་སྣོད་ཀྱི་ནང་དུ་གནས་པ། ཕྱག་གཡས་པས་མི་འཇིགས་པ་རབ་ཏུ་སྦྱིན་པ། གཡོན་པས་པདྨ་རབ་ཏུ་སྦྱིན་པས་ཕྱག་བྲེལ་བའོ། །སྒྲུབ་པ་པོ་ཡང་

ངེས་པར་རྟོག་བཞིན་པའོ། །འཕགས་པ་སྤྱན་རས་གཟིགས་དབང་ཕྱུག་གི་འོག་གི་གཡོན་དུ་སྟོན་ཀའི་སྤྲིན་ལྟར་དཀར་བའི་རྟ་མགྲིན་རིག་པའི་རྒྱལ་པོ་བྲི་བར་བྱའོ། །རྣམ་པར་འགྱུར་བའི་ཞལ་སྤྱན་དམར་པོ། སྐྲ་སེར་སྐྱ། ཨེ་ནེ་ཡའི་ཕྱག་ཆེན་པོ།

เล่ม ๙๔ · หน้า 181b

རས་ཡུག་གིས་དཀྲིས་པ། དྲག་པོ་གསུས་པ་འཕྱང་བ། སྦྲུལ་གྱི་མཆོད་ཕྱིར་ཐོགས་པ་ཅན། སྤྱན་རས་གཟིགས་དབང་ཕྱུག་ལ་ངེས་པར་རྟོག་བཞིན་པ། འབར་བའི་ཞལ་པདྨའི་ཕྲེང་བ་དྲུག་ཅུས་དབུ་ལ་བརྒྱན་པའོ། །དེའི་ཉེ་ལོགས་སུ་བརྩོན་འགྲུས་དང་ལྡན་

པའི་རིག་པ་འཛིན་པ་ལག་ན་སྤོས་ཕོར་གྱིས་བྲེལ་བ་པུས་མོ་གཉིས་བཙུགས་པའོ། །དེ་ནས་བཅོམ་ལྡན་འདས་ཀྱི་གཡོན་གྱི་གཞོགས་སུ་ཁྲོ་བོ་ལ་ངེས་པར་རྟོག་བཞིན་པ་ཅུང་ཟད་འཛུམ་པའི་བཞིན་རྡོ་རྗེ་ལ་ཉུག་པར་བྱེད་བཞིན་པ། འབར་བའི་ཕྲེང་བས་འཁྲུགས་

པའོ། །བཅོམ་ལྡན་འདས་ཀྱི་འོག་ཏུ་ཆོས་ཀྱི་འཁོར་ལོའི་གཞོགས་གཉིས་སུ་པདྨའི་སྟེང་དུ་གནས་པ་པདྨ་དེ་ཡང་ཀླུ་གཞོན་ནུས་ཡོངས་སུ་ཟིན་པའོ། །དེ་ནས་རིག་པ་འཛིན་པས་རི་མོའི་ལས་རྫོགས་པ་དང་། མཆོད་པ་རྒྱ་ཆེན་པོ་བྱས་ཏེ། མཚན་མོ་གསུམ་

དུ་སྨྱུང་བར་གནས་པས་བགྲང་ཕྲེང་བཞག་ནས་མར་གྱི་མར་མེ་རྒྱ་ཆེན་པོ་དང་། དཀར་པོའི་གཏོར་མ་ཕུལ་ནས། དེ་ནས་རིག་པ་འཛིན་པས་སྔོན་སྤྱད་པ་བྱས་པས་མཚན་མོ་གཅིག་ཏུ་རབ་ཏུ་བཅུག་སྟེ་གཞག་པར་བྱའོ། །དེ་ནས་ཕྱུང་སྟེ་རྒྱལ་གྱི་ལྕགས་ལས་བྱུང་

བའི་འཁོར་ལོ་གསོ་སྦྱོང་ཅན་གཙང་མ་དབང་པོ་མ་ཚང་བ་མ་ཡིན་པའི་ལས་བྱེད་པས་བྱེད་དུ་བཅུག་ནས་སོར་བརྒྱད་པ་རྒྱས་པ། ཡོངས་སུ་ཟུམ་པ། རྡོ་རྗེ་འབར་བའི་ཕྲེང་བས་འཁྲུགས་པའོ། །དེ་ནས་རིག་པ་འཛིན་པས་འཁོར་ལོ་དེ་ཡང་བ་བྱུང་ལྔར་མཚན་མོ་གཅིག་ཏུ་

བཅུག་ནས་གཞག་པར་བྱའོ། །དེ་ནས་བཏོན་ནས་ཁྲུས་དང་རྗེས་སུ་མཐུན་པར་བྱས་ཏེ། གོས་དཀར་པོས་ཀུན་ནས་དཀྲིས་ནས་རས་རིས་ཞལ་ནུབ་ཏུ་ཕྱོགས་པར་བཞག་སྟེ། བདུག་པ་དང་། གཏོར་མ་དང་། མཆོད་ཡོན་གྱི་སྣོད་བླངས་ནས་ལྷ་ཐམས་ཅད་

སྤྱན་དྲང་བར་བྱའོ། །མཆོད་ཡོན་ཕུལ་ནས་སླར་ཡང་གཤེགས་སུ་གསོལ་བ་ཡང་བདག་ལ་བྱས་ནས། རྩ་བའི་སྔགས་ཀྱིས་ཡན་ལག་བདུན་བཟླས་པའི་ཐལ་བས་ཐལ་བའི་ར་བ་དང་། སྒྲོན་མེ་ལ་ལན་བདུན་བཟླས་པས་སྒྲོན་མེའི་ར་བ་དང་། དེ་ནས་སྲུང་བའི་ཆོ་ག་བྱས་

เล่ม ๙๔ · หน้า 182a

ནས་ཡུངས་ཀར་ལ་ལན་བདུན་བཟླས་པས། ས་གཞི་བཅིང་པ་དང་། ཆུ་ལ་ལན་བདུན་མངོན་པར་བསྔགས་པས་ནམ་མཁའ་བཅིང་བའོ། །དེ་ནས་རིག་པ་འཛིན་པས་དྲིའི་ཆུས་ཡོངས་སུ་བཀང་བ་མེ་ཏོག་དཀར་པོ་དང་ལྷན་ཅིག་པ་པུས་མོ་གཉིས་བཙུགས་པའི་རིག་པ་

འཛིན་པས་རྩ་བའི་སྔགས་ཀྱིས་རང་གི་ལྷ་སྤྱན་དྲང་བར་བྱས་ནས་མཆོད་ཡོན་ཕུལ་ཏེ་སྟན་དེ་ལ་ལྷ་རྣམས་ཚིམ་པར་བྱའོ། །མར་དང་སྦྲང་རྩི་དང་། འོ་མས་སྲེག་བླུགས་ལན་བདུན་སྦྱིན་སྲེག་བྱའོ། །དེ་ནས་རིག་པ་འཛིན་པས་ལག་པ་གཉིས་ཀྱིས་འཁོར་ལོ་བླངས་ནས་ཇི་སྲིད་དུ་

འབར་བར་གྱུར་པ་དེ་སྲིད་དུ་བཟླས་པར་བྱའོ། །རྔ་བོ་ཆེའི་སྒྲ་ཐོས་པ་དང་སྤྲིན་ལས་གོ་ལུ་གོ་ལུ་སྒྲོགས་པ་དང་མར་མེའི་རྩེ་མོ་འཕེལ་བ་དང་། རས་རིས་འགུལ་བ་དང་། དུང་གི་སྒྲ་ཐོས་པ་དང་། དྲིལ་བུའི་སྒྲ་སྒྲོགས་པ་དང་། ཧ་ཧའི་སྒྲ་སྒྲོགས་པ་དང་། རིགས་ཀྱི་བུ་དེ་རྣམས་

གྲུབ་པ་ལེགས་སོ་ལེགས་སོ། །འཁོར་ལོ་འདི་བྱང་ཆུབ་སེམས་དཔའི་ལམ་བགྲོད་པ། སྲིད་པའི་རྒྱ་མཚོ་ཆེན་པོ་སྒྲོལ་བར་བྱེད་དོ། །དེ་ནས་རིག་པ་འཛིན་པས་རིངས་པ་རིངས་པར་ཇི་སྲིད་འཕགས་པ་སྤྱན་རས་གཟིགས་དབང་ཕྱུག་མ་བྱོན་གྱི་བར་དུ་བཟླས་པར་བྱའོ། །བྱོན་པ་ན་ཡང་

མཆོད་ཡོན་དབུལ་བར་བྱའོ། །དེ་ནས་སྒྲུབ་པ་པོས་མཆོད་ཡོན་ཕུལ་ནས་དེ་ནས་འཕགས་པ་སྤྱན་རས་གཟིགས་དབང་ཕྱུག་གིས་སྒྲུབ་པ་པོ་ལ་གསུངས་པ། བུ་བདུད་ཀྱི་ཕྱོགས་དེ་རྣམས་ངེས་པར་ཐུལ་བ་དང་། བྱང་ཆུབ་སེམས་དཔའི་ལམ་དེ་རྣམས་བགྲོད་པ་ཅི་བྱ་ཞེས་སོ། །དེ་ནས་

བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་སྒྲུབ་པ་པོ་ལ་ཕྱག་གཡས་པས་སྤྱི་བོར་ཉུག་པར་མཛད་དོ། །ཉུགས་པའི་སྐད་ཅིག་དེ་ཉིད་ལས་དཔག་ཚད་སྟོང་དུ་རྒྱ་ཆེ་བའི་བླ་རེ་གཡེར་ཁའི་དྲ་བ་འཕྱང་བ་གསེར་གྱི་འདབ་མས་རབ་ཏུ་འཕྱང་བཞིན་པས་སྒྲོལ་མ་བཅིངས་པ། ཨིནྡྲ་

ནཱི་ལ། པདྨ་རཱ་ག །སཽ་གནྡྱི་ཀ་དང་། རྒྱན་གྱི་ཁྱད་པར་གཞན་རྣམས་ཀྱིས་ཀྱང་རྡོ་རྗེའི་ནུས་པས་རྣམ་པར་སྤྲས་ཤིང་ཉེ་བར་སྤྲས་པ། བཀྲ་ཤིས་པ་གཞན་གྱིས་ཀྱང་རིག་པ་འཛིན་པའི་བུ་མོ་གཟུགས་བཟང་ཞིང་མཛེས་པ་གླུ་ལེན་བཞིན་པ་སྙན་པའི་སྒྲ་དབྱངས་སྒྲོགས་པ། པི་ཝང་

เล่ม ๙๔ · หน้า 182b

དང་། རྫ་རྔ་དང་། གླིང་བུ་དང་། ཕེག་རྡོབ་རྗེས་སུ་སྒྲུབ་པའི་འཕགས་པ་སྤྱན་རས་གཟིགས་དབང་ཕྱུག་གི་སྒྲུབ་པ་པོའི་བླ་རེ་འདི་རང་ཉིད་རིག་པའི་རྒྱལ་པོ་དེའི་མཐུས་ཇི་སྲིད་ཟླ་བ་དང་ཉི་མ་དང་སྐར་མ་རྣམས་ཡོད་ཀྱི་བར་དུ་འཁོར་དང་བཅས་པ་རོལ་པར་བྱེད་པ་དང་། རིག་པའི་རྒྱལ་པོ་འདིའི་མཐུས་

རིག་པ་འཛིན་པ་ཐམས་ཅད་ཀྱི་འཁོར་ལོས་སྒྱུར་བ་རྣམས་ཀྱི་མངའ་བདག་གོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་བྱ་བ་བྱས་ནས་ཡོངས་སུ་སྤྱོད་པར་བྱེད་པ་པོ་དང་། ལྷན་ཅིག་གཞལ་མེད་ཁང་ལ་འཛེགས་ནས་འགྲོ་བར་བྱེད་དོ། །འཁོར་ལོ་དེ་ཡང་འབར་བཞིན་པ་

གཞལ་མེད་ཁང་གི་རྩེ་མོར་རིག་པ་ཐམས་ཅད་ཀྱི་འཁོར་ལོས་སྒྱུར་བ་རྣམ་པར་འགྲོ་བའི་ཡིད་ཀྱིས་བདེ་བ་ཅན་དུ་འགྲོ་བར་བྱེད་དོ། །གང་དུ་དེ་བཞིན་གཤེགས་པ་འོད་དཔག་མེད་བཞུགས་པ་དེར་ལྷ་དང་ཀླུ་དང་གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་

ཅི་དང་། ལྟོ་འཕྱེ་ཆེན་པོ་དང་། རིག་པ་འཛིན་པས་ཀྱང་བསྟོད་པར་བྱ་བཞིན་པ། མེ་ཏོག་གི་ཆར་རབ་ཏུ་འབབ་པ་རྣམས་ཀྱིས་བསྐལ་པར་གནས་ཤིང་རིག་པ་འཛིན་པ་ཐམས་ཅད་ཀྱི་འཁོར་ལོས་སྒྱུར་བའི་མངའ་བདག་སྟེ། གང་གི་ཚེ་འཆི་བ་ན་བྲམ་ཟེ་རྣམས་སུ་སྐྱེ་བར་འགྱུར་ཞིང་སྐྱེ་བ་དྲན་པ་དང་།

མཚན་ཐམས་ཅད་ཡོངས་སུ་རྫོགས་པ་དང་། དུས་ཐམས་ཅད་མངོན་པར་ཤེས་པ་དང་། ནོར་ཆེན་པོ་དང་། ལོངས་སྤྱོད་ཆེན་པོ་དང་། བརྩོན་འགྲུས་ཆེན་པོས་ཕ་རོལ་གནོན་པ་དང་། སེམས་ཅན་ཐམས་ཅད་ཀྱིས་མཐོང་ན་དགའ་བ་དང་། སྙིང་རྗེ་ཅན་དང་། སངས་རྒྱས་ལ་མངོན་པར་དང་

བ་དང་། ཡིད་གཞུངས་པ་དང་། ཐོས་པ་འཛིན་པ་དང་། བཟོ་དང་། ཡི་གེ་དང་། རི་མོ་ཐམས་ཅད་ལ་མཁས་པ་དང་། བསམ་གྱིས་མི་ཁྱབ་པ་གང་སེམས་པར་བྱེད་པ་དེ་ཡིད་ཀྱིས་རྟོགས་པར་བྱའོ། །ནད་ཐམས་ཅད་རྣམ་པར་སྤངས་པའི་བྲམ་ཟེའི་རིགས་སུ་སྐྱེའོ་ཞེས་སོ། །

ལན་བདུན་མངོན་པར་བསྔགས་གཙུག་ཕུད་བཅིངས་པ་དང་། ཧཱུྃ་ཡིག་གིས་འཕེལ་བ་དང་། གནོན་པ་དང་། རྨོངས་པར་བྱེད་དོ། །ཛ་ཡིག་གིས་གཤེགས་སུ་གསོལ་ལོ། །གྷ་ཡིག་གིས་གསོད་པའོ། །སྭཱ་ཧཱའི་ཡི་གེས་ཞི་བའི་དོན་དང་། འཚོ་བར་བྱེད་པའོ། །མདོར་བསྡུས་

เล่ม ๙๔ · หน้า 183a

ན་སྟོན་པར་བྱེད་དེ། རིག་པ་འཛིན་པ་གསང་ཆེན་མཆོག་སྒྲུབ་པར་འདོད་པ་དེ་གཅོད་པ་དང་། གསོད་པ་དང་། དབྱེ་བ་དང་། རླག་པར་བྱེད་པ་དང་། བསྡིགས་པ་དང་། གསོད་པར་བྱེད་པ་གཞན་ཐམས་ཅད་ཀྱང་འདིར་བྱའོ། །ཐམས་ཅད་སྙིང་རྗེའི་བདག་ཉིད་ཀྱིས་ཏེ་

དྲག་པོ་ཡིས་ནི་མ་ཡིན་པ་ཁོ་ནའོ། །ཇི་སྲིད་དུ་རིག་པའི་རྒྱལ་པོ་རབ་ཏུ་སྦྱར་བར་མི་བྱ་བའི་གནས་སུ་རབ་ཏུ་སྦྱར་བར་མི་བྱ་སྟེ། གང་རབ་ཏུ་སྦྱོར་བར་བྱེད་པ་དེའི་མཆོག་གི་སྒྲུབ་པ་མི་འགྲུབ་བོ། །དམ་ཚིག་ཤེས་པ་མེད་པར་ཡང་འགྱུར་རོ། །དངོས་གྲུབ་འདི་ནི་སྒྲུབ་ཐབས་ཐམས་ཅད་དང་། རྒྱུད་

ཐམས་ཅད་དུའོ། །སོར་མོ་ལ་ལན་བདུན་མངོན་པར་བསྔགས་པར་བྱས་ནས་སྤྲིན་གནོན་པར་བྱེད་དོ། །མགོ་རེག་བྱས་ནས་རྒྱན་པོ་རྒྱལ་བར་བྱེད་དོ། །ཐ་སྙད་ཐམས་ཅད་ཉིད་ལ་ཡང་ངོ་། །ཡུངས་ཀར་ལ་ལན་བདུན་བསྔགས་པ་བྱས་ནས་རིལ་བསྣུན་པར་བྱས་ཏེ་རྣམ་པར་རྙིལ་བར་བྱེད་དོ། །མཱ་

ལ་རེའི་མེ་ཏོག་ལ་ལན་བདུན་མངོན་པར་བསྔགས་ཏེ་བུད་མེད་གང་གིས་བསྣམས་པར་སྦྱིན་པའམ། མགོ་བོར་བླུགས་ན་དེ་དབང་དུ་འགྱུར་རོ། །རུ་རྟ་དང་། ཤིང་ཚ་དང་། ཨ་ག་རུ་ནག་པོ་དང་། ཙནྡན་དང་། གུར་གུམ་དང་། ས་ཧཱ་ཀ་རའི་སྙེ་མ་དང་། ཚ་བ་གསུམ་གྱི་འདབ་མ་དང་། ན་

ལི་ཤམ་དང་། བ་ཀུ་ལའི་མེ་ཏོག་དང་། པྲི་ཡང་ཀུའི་མེ་ཏོག་རྣམས་ཕྱེ་མ་ཞིབ་མོར་བྱས་ནས་སྦྲང་རྩིས་སྦྱར་ཏེ་ཙ་ན་ཀའི་འདབ་མར་རིལ་བུ་བྱེད་དུ་གཞུག་པར་བྱའོ། །འདི་རྣམས་ལན་ལྔར་ཡོངས་སུ་བཟླས་ཏེ་བྱིན་པ་དེ་དབང་དུ་འགྱུར་རོ། །རྩ་བའི་སྔགས་ཀྱིས་སྐྱེས་པ་དང་ལྷན་ཅིག་བུད་

མེད་དབང་དུ་འགྱུར་རོ། །སྒྲུབ་པ་ལ་ཞུགས་པས་གང་དང་དེར་གནས་པ་དེ་ཉིད་ཀྱིས་ཕྱེ་མས་ཡང་དག་པར་བརྩམ་པར་བྱ་སྟེ་ལོག་འདྲེན་རྣམས་ཀྱིས་ཟིལ་གྱིས་མི་ནོན་ནོ། །འདི་ཉིད་ཀྱིས་སྲིན་པོ་དང་ཡི་དགས་ལ་སོགས་པ་རྣམས་ཀྱིས་སོ། །ཀུ་ཏྱཛའི་ས་བོན་དང་། ནཱ་ག་གེ་སར་དང་

པདྨའི་འདབ་མ་དང་། ཤྲཱི་ཥའི་མེ་ཏོག་དང་། སྤང་སྤོས་དང་། རྒྱ་སྤོས་དང་། རུ་རྟ་དང་། ལག་སྐྱེས་ཀྱི་ས་བོན་དང་། ཙནྡན་དམར་པོ་དང་། གཞན་གྱིས་མི་ཐུབ་པ་དཀར་པོའི་མེ་ཏོག་དང་། ས་བོན་རྣམས་གཅིག་ཏུ་བྱས་ནས་བ་སེར་སྐྱའི་གཅིན་གྱིས་བུ་མོའི་ལག་པར་བཏགས་པར་

เล่ม ๙๔ · หน้า 183b

བྱའོ། །དེ་ནས་རིལ་བུ་བྱས་ནས་གྲིབ་མ་ལ་མཱ་ལ་ཏཱིའི་མེ་ཏོག་དཀར་པོས་བསྒོ་བར་བྱའོ། །འདི་རྣམས་ཀྱིས་ལུས་བྱུགས་ན་ལོག་པར་འདྲེན་པ་དང་། ཡི་དགས་དང་། གྲུལ་བུམ་དང་། ཤ་ཟ་ལ་སོགས་པ་རྣམས་གང་གིས་ཀྱང་ཟིལ་གྱིས་གནོན་པར་མི་འགྱུར་རོ། །གལ་ཏེ་མི་སྦྱིན་ན་བ་

ལང་གི་གཅིན་ལ་ལན་བདུན་མངོན་པར་བསྔགས་པར་བྱས་ནས་ནད་རབ་ཏུ་འཇོམས་པར་བྱེད། །གུ་གུལ་དང་པི་ཙུ་མར་ཏའི་ས་བོན་དང་། ཙནྡན་དང་། ཏུ་ཏུཥྐ་དང་། ཤྲཱི་བཱ་ལ་ས་ཀ་འདི་རྣམས་ཕྱེ་མར་བྱས་ནས་གོས་ལ་བདུག་པར་གྱིས་ཤིག །གང་གིས་ཀྱང་ཟིལ་གྱིས་གནོན་པར་མི་འགྱུར་རོ། །

ལྡོང་རོས་དང་། གི་ཝང་དང་། ལག་སྐྱེས་དང་། བ་རུ་ར་དང་། ཀ་དམ་པའི་མེ་ཏོག་དང་། ཤིང་མངར་དང་། སེ་ཕ་ལི་ཀའི་མེ་ཏོག་དང་། ཤིང་ཙ་དང་། ན་ལེ་ཤམ་དཀར་པོའི་ས་བོན་དང་། ཡུང་བ་གཉིས་དང་། ཤུ་དག་རྣམས་བ་སེར་སྐྱའི་གཅིན་གྱིས་བྲམ་ཟེའི་བུ་མོའི་ལག་པར་

གསོ་སྦྱོང་ཅན་གྱེས་བཏགས་པར་བྱའོ། །རིལ་བུ་བྱས་ནས་ཨུཏྤ་ལས་བསྒོ་བར་བྱའོ། །ཨ་ཏི་མུཀྟ་ཀ་དང་། སཱ་ལ་དང་། མེ་ཏོག་སྔོན་པོས་བསྒོས་པར་བྱའོ། །ལོག་པར་འདྲེན་པ་རྣམས་སམ། གཞན་རྣམས་སམ། ཡི་དགས་དང་། ཤ་ཟ་དང་། གྲུལ་བུམ་དང་། སྲིན་པོ་ལ་

སོགས་པ་རྣམས་གང་གིས་ཀྱང་ཟིལ་གྱིས་གནོན་པར་མི་འགྱུར་རོ། །ནད་མེད་པའི་ལེའུ་རྫོགས་སོ།། །།དེ་ནས་རོ་ལངས་སྒྲུབ་པ་འབྱུང་སྟེ་སྐྱེས་པའི་རོ་མ་ཉམས་པ་རབ་ཏུ་མཛེས་པ་ལ་དཀར་པོའི་བཅོ་ལྔ་ལ་རྗེས་སུ་བྱུགས་པ་བྱས་ནས་སྦྱངས་པའི་སྣོད་དུ་བཞག་ནས་གསོ་

སྦྱོང་ཅན་དེས་ཀྱང་སྐྲ་བཞོར་དུ་བཅུག་ནས་མེ་ཏོག་གི་ཕྲེང་བ་མགྲིན་པ་ལ་བཅིངས་ཏེ་ཁྲོན་པ་སྐམ་པོར་ཞུགས་ནས་སེར་སྐྱའི་བ་བྱུང་གི་རིང་བསྲེལ་དང་བཅས་པའི་མཆོད་རྟེན་དེ་ཉིད་དུ་ཁྲོན་པར་བཞག་ནས། མཆོད་པ་རྒྱ་ཆེན་པོ་བྱས་ཏེ་གཏོར་མ་དང་། སེང་ལྡེང་གི་ཕུར་བུ་བཞི་རྣམས་ཀྱིས་

བཅིང་བ་དང་། ཕྱོགས་སྐྱོང་བ་རྣམས་གཞག་པར་བྱའོ། །རོ་དེ་ལ་འབྲས་ཡོས་དང་། ཕྱེ་བ་སེར་སྐྱའི་འོ་མ་དང་སྦྱར་ཏེ་ཇི་སྲིད་དུ་རོ་དེའི་ལྕེ་བྱུང་གི་བར་དེ་སྲིད་དུ་ཁར་སྲེག་བླུགས་གྱིས་ཤིག །དེ་བཅད་ནས་རལ་གྲིའི་རིག་པ་འཛིན་པར་འགྱུར་རོ། །དཔའ་བོ་ཆེན་པོ་ཕ་རོལ་

เล่ม ๙๔ · หน้า 184a

གནོན་པར་འགྱུར་རོ། །ཉི་མ་འཆར་བ་དང་། མཉམ་པའི་འོད་དུ་འགྱུར་རོ། །ལོ་སྟོང་ཕྲག་ལྔར་འཚོ་བར་བྱེད་དོ། །རོ་ལངས་ཀྱི་སྒྲུབ་པ་གཉིས་པ་འབྱུང་སྟེ་དུར་ཁྲོད་ཀྱི་ཐལ་བས་རོ་ལངས་བྲིས་ནས་མཆོད་པ་རྒྱ་ཆེན་པོ་དང་། གཏོར་མ་བྱས་ཏེ་དེའི་མདུན་དུ་ཀུ་ཤའི་ཁྲེས་

ལ་ཉེ་བར་འདུག་ནས་སེང་ལྡེང་གི་ཡམ་ཤིང་ལ་ཚ་བའི་ཏིལ་མར་གྱིས་བཏགས་པས་ཇི་སྲིད་རོ་ལངས་ལངས་ཀྱི་བར་དེ་སྲིད་དུ་སྦྱིན་སྲིག་བྱའོ། །གང་ཡིད་ཀྱིས་སེམས་པར་བྱེད་པ་དེ་མྱུར་དུ་འགུགས་པར་བྱེད་དོ། །བཅུད་ཀྱིས་ལེན་སྦྱིན་པར་བྱེད་དོ། །དེ་ལ་ཞོན་ནས་སྦྱིན་སྲེག་གིས་འགྲོ་བར་བྱེད་

དེ། ལོ་སྟོང་ཕྲག་བཅུ་གསུམ་དུ་འཚོ་བར་བྱེད་དོ། །རོ་ལངས་སྒྲུབ་པ་གསུམ་པ་འབྱུང་སྟེ། སེར་སྐྱའི་བ་བྱུང་གིས་དཀྱིལ་འཁོར་ཉེ་བར་བྱུགས་ནས་མེ་ལ་སྦྱིན་སྲེག་བྱས་པའི་ཐལ་བས་རོ་ལངས་བྲིས་ནས་མཆོད་པ་རྒྱ་ཆེན་པོ་བྱས་ཏེ་དེ་བཞིན་དུ་ཡང་དག་པར་བཞག་ནས་བེ་ཀངྐ་ཏའི་

སྲེག་བླུགས་ཀྱིས་སྦྱིན་སྲེག་བྱེད་ཅིང་རིག་པ་འཛིན་པས་བེ་ཀངྐ་ཏས་ཀུན་ནས་བསྣུན་པར་བྱའོ། །རྩ་བའི་སྔགས་དྲན་པས་འདི་སྐད་ཅེས་བརྗོད་པར་བྱའོ། །ལོངས་ཤིག་ལོངས་ཤིག་དུ་བར་བྱེད་པ་དང་། དྲག་ཏུ་དགོད་པས་གྲོལ་བར་བྱེད་ན་འཇིགས་པར་བྱེད་དོ། །ཇི་སྲིད་རང་ཉིད་

ལས་ཀྱི་བར་དུ་རྒྱབ་ན་རྗེས་སུ་འགྲོ་བར་བྱེད་དེ་དབང་པོའི་ཆུང་མ་ཡང་མྱུར་དུ་འགུགས་པར་བྱེད་དོ། །བཅུད་ཀྱིས་ལེན་དུ་འགྱུར་རོ། །དེ་ཟོས་ནས་ལོ་སྟོང་ཕྲག་བཅུ་གསུམ་དུ་འཚོ་བར་བྱེད་དོ། །གང་གི་ཚེ་འཆི་བ་དེའི་ཚེ་ནོར་ཆེན་པོའི་རིགས་སུ་སྐྱེ་བར་འགྱུར་རོ། །སྐྱེ་བ་དྲན་པར་ཡང་

འགྱུར་རོ། །རོ་ལངས་སྒྲུབ་པར་འགྱུར་བའོ། །རྨ་བྱ་དང་ནམ་མཁའ་ལྡིང་དང་། གླང་པོ་ཆེ་དང་། རྟ་དང་གྲོག་མཁར་གྱིས་དང་། འོ་མས་དཀར་པོའི་བཅོ་ལྔ་ལ་ལེགས་པར་བཙགས་པ་བྱས་ནས་ཆུ་རྣམ་པར་དབྱེ་བ་གསུམ་རྣམས་རྩ་བའི་སྔགས་ཀྱིས་ཡོངས་སུ་བཟླས་ནས་དེ་

སེར་སྐྱ་སྤྱོད་དུ་གཞུག་གོ། །དེ་ནས་རིག་པ་འཛིན་པས་རྣམ་པར་དབེན་པའི་བ་བྱུང་གིས་གསོ་སྦྱོང་ཅན་གྱིས་སེར་སྐྱ་དེའི་འོ་མ་བླངས་ནས་སའི་གོང་བུ་དེ་མཉེ་བར་བྱའོ། །དེ་ནས་རྨ་བྱ་དང་། ནམ་མཁའ་ལྡིང་དང་། གླང་པོ་ཆེ་དང་། རྟ་གང་ཡང་རུང་བར་རི་མོ་འམ་གང་ཡང་རུང་བ་བྱས་

เล่ม ๙๔ · หน้า 184b

ནས་རི་མོ་མཁན་གསོ་སྦྱོང་ཅན་གྱིས་འདྲིར་གཞུག་པར་བྱའོ། །རས་རིས་ཀྱི་ཞལ་ནུབ་ཏུ་ཕྱོགས་པར་བཞག་ནས་མཆོད་པ་རྒྱ་ཆེན་པོ་བྱས་ཏེ། མར་མེ་རྣམས་དང་། སྲུང་བའི་ཆོ་ག་བྱས་ནས་ཨུ་དུམ་བཱ་རའི་ཡམ་ཤིང་གིས་སྲེག་བླུགས་བདུན་གྱིས་སྦྱིན་སྲེག་བྱའོ། །དྲིའི་ཆུས་ལྷ་

རྣམས་སྤྱན་དྲངས་ནས་སླར་ཡང་རྣམ་པར་ཕྱེ་སྟེ་མཆོད་ཡོན་ཕུལ་ཏེ་རྨ་བྱ་དེ་རས་རིས་ཀྱི་མདུན་དུ་བཞག་ནས་ཇི་སྲིད་འབར་བར་གྱུར་པ་དེ་སྲིད་དུ་བཟླས་པར་བྱའོ། །དེ་ནས་རིག་པ་འཛིན་པས་རིངས་པ་རིངས་པར་བཟླས་པར་བྱ་སྟེ་གལ་ཏེ་རྨ་བྱ་སྒྲུབ་པར་བྱེད་ན་དེའི་དངོས་གྲུབ་ཀྱི་མཚན་མར་

འགྱུར་བ་ནི་རྨ་བྱ་སྐད་འབྱིན་པ་དང་། གླང་པོ་ཆེ་གུ་ལ་གུ་ལ་སྒྲོགས་པ་དང་། རྟ་འཚེར་བ་དང་། ནམ་མཁའ་ལྡིང་གཤོག་པ་གཡོ་བ་སྟེ། དངོས་གྲུབ་ཀྱི་མཚན་མ་འདི་རྣམས་སུ་གྱུར་ན་རྨ་བྱའི་རྒྱལ་པོ་སྨིན་དྲུག་གཉིས་པར་འགྱུར་ཏེ། བརྩོན་འགྲུས་ཆེན་པོས་སྟོབས་

དང་ཕ་རོལ་གནོན་པར་འགྱུར་རོ། །ལྷ་རྣམས་ཀྱི་རྒྱགས་པ་གནོན་པར་བྱེད་དོ། །བར་གྱི་བསྐལ་པར་འཚོ་བར་བྱེད་དོ། །གང་གི་ཚེ་འཆི་བ་དེའི་ཚེ་བྲམ་ཟེའི་རིགས་སུ་སྐྱེ་བར་འགྱུར་ཏེ། འདི་ནི་དངོས་གྲུབ་བོ། །དེ་ནས་རྡོ་རྗེ་རྣམ་པར་བྱེད་པ་དེས་ཨ་ཀ་རུ་ལས་བྱུང་བའམ།

ཙནྡན་ལས་བྱུང་བའམ། ལྷའི་ཤིང་ལས་བྱུང་བའམ། སེང་ལྡེང་ལས་བྱུང་བའམ། དྲི་ལས་བྱུང་བའམ། ནིམྦའི་ཤིང་ལས་བྱུང་བའམ། རྒྱལ་གྱི་ལྕགས་ལས་བྱུང་བའམ། གྲོག་མཁར་ལས་བྱུང་བའམ། ཤེལ་ལས་བྱུང་བའམ། སར་ལས་བྱུང་བའི་འཁོར་

ལོ་དང་། ལྕགས་ཀྱུ་དང་། དགྲ་སྟ་དང་། མདུང་ཐུང་དང་། རྡོ་རྗེ་དང་། རྩེ་གསུམ་ཁ་གདེང་སྒྲུབ་པར་བྱེད་དོ། །རྡོ་རྗེ་རྩེ་བཞི་པ་སོར་བཅུ་དྲུག་པ་ལས་བྱེད་པ་གསོ་སྦྱོང་ཅན་གྱིས་ཆ་མ་ཚང་བ་མེད་པ་བྱེད་དུ་བཅུག་ནས་སེར་སྐྱའི་བ་བྱུང་ལྔས་རབ་ཏུ་བཀྲུ་བར་བྱས་ནས་དཀར་པོའི་བཅོ་

ལྔ་ལ་རས་རིས་ཀྱི་སྤྱན་སྔར་གཏོར་མ་དང་། མར་མེ་དང་། མཆོད་པ་རྒྱ་ཆེན་པོ་བྱས་ཏེ། རྡོ་རྗེ་དྲིའི་ཆུས་འཁྲུར་བཅུག་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བཀོད་པའི་གཟུགས་བརྙན་བྱས་ཏེ་དྲིའི་ཆུ་དང་། རྩ་བའི་སྔགས་བརྗོད་དོ། །རང་གི་ལྷ་རྣམས་སྤྱན་

เล่ม ๙๔ · หน้า 185a

དྲང་བ་བྱས་ནས་མཆོད་ཡོན་ཡང་དང་ཡང་ཕུལ་ཏེ། སླར་ཡང་གཤེགས་སུ་གསོལ་ནས་མར་གྱི་སྲེག་བླུགས་སྦྱིན་སྲེག་གྱིས་ཤིག །དེ་ནས་རིག་པ་འཛིན་པས་ལག་པ་གཡས་པས་རྡོ་རྗེ་ཐོགས་ཏེ་ཇི་སྲིད་འབར་བ་དང་། ཙི་ཊི་ཙི་ཊིའི་སྒྲ་སྒྲོགས་པ་དེ་སྲིད་དུ་བཟླས་པར་

བྱའོ། །དེ་ནས་རིག་པ་འཛིན་པས་རིངས་པ་ཉིད་དུ་བཟླས་པར་བྱ་སྟེ་ཇི་སྲིད་ཤར་གྱི་ཕྱོགས་སུ་མཐོང་བ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ཅན་བྱང་ཆུབ་སེམས་དཔའི་སྒྲོལ་བ་པོ་ཕ་རོལ་ཏུ་ཕྱིན་པ་ཐམས་ཅད་ཀྱིས་ཡོངས་སུ་བསྐོར་བ་དང་། རྟ་མགྲིན་རྒྱལ་པོ་རིག་པ་བྱེ་བས་ཡོངས་

སུ་བསྐོར་བ་དང་། འཕགས་པ་ཁྲོ་གཉེར་ཅན་དང་། སྒྲོལ་མ་དང་། གོས་དཀར་མོ་དང་། རི་ཁྲོད་ལོ་མ་ཅན་དང་། བྱང་ཆུབ་སེམས་དཔའི་སྙིང་པོ་རེ་རེ་ལ་བྱེ་བ་ལྔ་རྣམས་ཀྱིས་ཡོངས་སུ་བསྐོར་བ་བཅོམ་ལྡན་འདས་ཀྱི་ཕྱི་བཞིན་རྗེས་སུ་འབྲངས་པས་འོང་བར་བྱེད་དོ། །དེ་ནས་

འཕགས་པ་སྤྱན་རས་གཟིགས་དབང་ཕྱུག་ལྷ་རྣམས་ཀྱིས་མེ་ཏོག་གི་ཆར་གྱི་ཆར་འབེབས་པས་མཆོད་པ་བྱ་བཞིན་པ་འཕགས་པ་སྤྱན་རས་གཟིགས་དབང་ཕྱུག་རིལ་བ་སྤྱི་བླུགས་དང་དབྱུག་གུའི་ཤིང་བསྣམས་པ། གཡས་པས་སྒྲུབ་པ་པོ་ལ་དབུགས་འབྱིན་པར་མཛད་བཞིན་པ་སྟོན་ཀའི་

སྤྲིན་ལྟར་དཀར་བ་སྦྱངས་པའི་སྣོད་དཀར་པོ་ངེས་པར་གནས་པ། གཡང་གཞི་ནག་པོ་འཆང་བ། རལ་པའི་ཅོད་པན་འཆང་བའི་དབུས་ན་དེ་བཞིན་གཤེགས་པ་འོད་དཔག་མེད་ཉི་མ་ལྟར་འབར་བ་གསེར་གྱི་སྲང་བུའི་མཆོད་ཕྱིར་ཐོགས་པ་ཅན་སྒྲུབ་པ་པོ་ལ་རྔ་བོ་ཆེའི་སྒྲ་ཟབ་མོའི་ཚིག་

གིས་དབུགས་འབྱིན་པར་མཛད་བཞིན་པའོ། །དེ་ནས་སྒྲུབ་པ་པོས་བྱོན་ཅིང་བྱོན་པ་རྣམས་ལ་མཆོད་ཡོན་དང་གདན་ཕུལ་ཏེ། སྨོན་ལམ་གདབ་པ་བྱས་ནས་རྗེས་སུ་བརྩེ་བས་བཅོམ་ལྡན་འདས་ལ་རྗེས་སུ་བརྩེ་བ་ཉེ་བར་བླངས་ནས་གསུངས་ཤིག །སྡིག་པ་བྱེད་པ་དང་བསོད་

ནམས་དང་དངོས་གྲུབ་གཞན་པ་ལ་བཅོམ་ལྡན་འདས་ཐུགས་རྗེ་ཆེན་པོས་ཡོངས་སུ་སེམས་ཅན་ཐམས་ཅད་བྱང་ཆུབ་སེམས་དཔའ་ཆེན་པོ་ཐུགས་རྗེ་ཆེན་པོ་ཐུགས་རྗེ་ཆེན་པོའི་བདག་ཉིད་ཅན་གསུངས་ཤིག །བདག་གི་སྡིག་པ་བྱས་པ་ལ་ནོར་གྱི་དངོས་གྲུབ་དང་། སྒྲུབ་པ་

เล่ม ๙๔ · หน้า 185b

པོས་ལན་བཅུ་གསུམ་དུ་སྨོན་ལམ་བཏབ་པ་བྱས་ནས་བཅོམ་ལྡན་འདས་ལ་དངོས་གྲུབ་གསོལ་བར་བྱའོ། །དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་སྒྲུབ་པ་པོའི་སྤྱི་བོར་ཕྱག་གཡས་པ་རེག་པར་མཛད་དོ། །འདི་སྐད་ཅེས་གསུངས་སོ། །བུ་ཅི་བྱ། དེ་ནས་མཆོད་ཡོན་

དང་། མེ་ཏོག་གི་ཆུན་པོ་ཕུལ་ནས་པུས་མོ་གཉིས་བཙུགས་ཏེ་འདི་སྐད་ཅེས་བརྗོད་པར་བྱའོ། །བཅོམ་ལྡན་འདས་རྡོ་རྗེའི་དངོས་གྲུབ་བདག་ལ་སྩོལ་ཅིག །ཁྱེད་ཀྱིས་ཕྲིན་ལས་བརྩོན་འགྲུས་ཆེན་པོ་དང་། སྟོབས་ཆེན་པོས་རིག་པ་འཛིན་པའི་རྒྱལ་པོ་རིག་པ་འཛིན་པ་ཐམས་ཅད་ཀྱི་མངའ་

བདག་ཕྱག་ན་རྡོ་རྗེ་དང་འདྲ་བའི་ལུས་སུ་མཛོད་ཅིག །དེ་ནས་བཅོམ་ལྡན་འདས་ཀྱིས་གསུངས་པ་བུ་དེ་རྣམས་གྲུབ་བོ། །རྡོ་རྗེ་འདི་ནི་བརྩོན་འགྲུས་ཆེན་པོའི་སྟོབས་དང་། ཕ་རོལ་གནོན་པ། རིག་པ་འཛིན་པའི་རྒྱལ་པོ་ཐོགས་པ་མེད་པར་འགྲོ་བ་མཐུ་ཆེན་པོ་ཕྱག་ན་རྡོ་རྗེ་དང་འདྲ་བའི་

ལུས་སོ། །དེ་ནས་རིག་འཛིན་པས་རྡོ་རྗེ་བླངས་ནས་བཅོམ་ལྡན་འདས་ལ་བསྐོར་བ་བྱས་ཏེ། རིག་པའི་རྒྱལ་པོར་འགྱུར་རོ། །རིག་པ་འཛིན་པ་བྱེ་བ་ལྔས་ཡོངས་སུ་བསྐོར་བ་རིག་པ་འཛིན་པའི་བུ་མོ་རྣམས་ཀྱིས་ལྷན་ཅིག་རོལ་པར་བྱེད་པ། གཟུགས་བཟང་པོ་རབ་ཏུ་མཛེས་

པ། མཚན་ཐམས་ཅད་ཡང་དག་པར་རྫོགས་པ། བར་གྱི་བསྐལ་པར་འཚོ་བར་བྱེད་དོ། །གང་གི་ཚེ་འཆི་བ་དེའི་ཚེ་བྲམ་ཟེའི་རིགས་སུ་སྐྱེ་བར་འགྱུར་རོ། །སྐྱེ་བ་དྲན་ཏེ་འདི་ནི་དངོས་གྲུབ་བོ། །དེ་ནས་མིག་སྨན་སྒྲུབ་པར་འདོད་ན་ཉི་མ་གུང་ལ་དཔའ་བོའི་རིན་གྱིས་རྣ་བའི་

མིག་སྨན་བླངས་ནས་བ་སེར་སྐྱའི་འོ་མས་ལན་བདུན་དུ་བཀྲུ་བར་བྱས་ནས་བ་སེར་སྐྱའི་བ་བྱུང་ལྔ་པོ་དེ་ཉིད་ཀྱིའོ། །དེའི་འོག་དེ་ནས་མིག་སྨན་ཟངས་ཀྱི་སྣོད་དུ་བྱས་ནས་བཏགས་པར་བྱའོ། །དེ་ནས་མེ་ནས་བཏོན་ཏེ་རས་རིས་མཆོད་པ་རྒྱ་ཆེན་པོ་དང་། གཏོར་མ་བྱས་ནས་མིག་སྨན་

ཁར་བཅུག་སྟེ་དཀར་པོའི་བརྒྱད་པའམ། ཟླ་བ་གཟས་བཟུང་བ་ན་མཚན་མོ་གསུམ་དུ་སྨྱུང་བར་གནས་པས་ཇི་སྲིད་དྭོ་བ་དང་། དུ་བ་འཐུལ་བ་དང་། འབར་བར་བྱེད་པ་དེ་སྲིད་དུ་བཟླས་པར་བྱའོ། །དྲོ་བར་གྱུར་པས་ནི་དབང་དུ་བྱེད་དོ། །དུ་བ་འཐུལ་བས་ནི་མི་སྣང་བའོ། །

เล่ม ๙๔ · หน้า 186a

འབར་བས་ནི་ནམ་མཁའ་ལ་འགྲོ་བར་བྱེད་དོ། །མིག་ལ་བསྐུས་པས་ལོ་སྟོང་ཕྲག་ལྔར་འཚོ་བར་བྱེད་དོ། །གང་གི་ཚེ་འཆི་བ་དེའི་ཚེ་ནོར་ཆེན་པོའི་ཕྱུག་པོའི་རིགས་སུ་སྐྱེ་བར་འགྱུར་རོ། །སྐྱེ་བ་དྲན་ནོ། །དེ་ནས་གནོད་སྦྱིན་མོ་སྒྲུབ་པར་འདོད་ན་སྐྲ་དང་བྲལ་

བའི་རས་གཞི་ལ་རི་མོ་མཁན་གསོ་སྦྱོང་ཅན་གྱིས་ཁ་དོག་མ་འདྲེས་པའི་ཚོན་གྱིས་བདེ་བར་གཤེགས་པའི་མཐོ་གང་གི་ཚད་ཀྱི་གཟུགས་བརྙན་རྒྱན་ཐམས་ཅད་ཀྱིས་རྣམ་པར་བརྒྱན་པ་ཅུང་ཟད་འཛུམ་པའི་ཞལ། ཕྱག་གཡས་པས་མྱ་ངན་མེད་པ་འཆང་བཞིན་པ་

བསྣམས་པ་འདྲིར་གཞུག་པར་བྱའོ། །རིག་པ་འཛིན་པས་དཀར་པོའི་བརྒྱད་པ་ལ་བཅོམ་ལྡན་འདས་ཀྱི་གཟུགས་བརྙན་གྱི་སྤྱན་སྔར་རས་རིས་བཞུགས་ནས་གཏོར་མ་དང་། མཆོད་པ་རྒྱ་ཆེན་པོ་བྱས་ཏེ་མཚན་མོ་གསུམ་དུ་སྨྱུང་བར་གནས་པས་རང་གི་ལྷ་སྤྱན་དྲངས་ནས་

མཆོད་ཡོན་དང་གདན་ཕུལ་ཏེ་སླར་ཡང་གཤེགས་སུ་གསོལ་བའི་མཆོད་ཡོན་ཕུལ་ནས་རྩ་བའི་སྔགས་ཀྱིས་འོ་མའི་སྲེག་བླུགས་བརྒྱད་སྦྱིན་སྲེག་གྱིས་ཤིག །དེ་ནས་རིག་པ་འཛིན་པས་ཀུ་ཤའི་ཁྲེས་ལ་ཉེ་བར་འདུག་པས་ཇི་སྲིད་གནོད་སྦྱིན་མོ་རང་ཉིད་འོངས་ཀྱི་བར་དུ་བཟླས་པ་བྱའོ། །

འོངས་པ་དང་མཆོད་ཡོན་ཕུལ་ནས་འདི་སྐད་ཅེས་བརྗོད་པར་བྱའོ། །སོ་སོར་བཞེས་ཤིག་སོ་སོར་བཞེས་ལ་བཞུགས་ཤིག་ཅེས་སོ། །རབ་ཏུ་འཛུམ་པའི་བཞིན་གྱིས་ལེགས་སོ་ཞེས་སྨྲས་ཏེ་བཀའ་སྒོ་བར་བྱེད་པ་ཅི་ཞིག་བགྱི་ཞེས་སོ། །དེ་ནས་སྒྲུབ་པ་པོས་ཆུང་མའོ་ཞེས་བརྗོད་

པར་བྱའོ། །གལ་ཏེ་སྲིང་མོའོ་ཞེས་རྗོད་པར་བྱེད་ན་དེ་ནས་སྒྲུབ་པ་པོ་འཚོ་བ་ལས་བྲལ་བར་བྱེད་དོ། །དེ་ནས་ཆུང་མའོ་ཞེས་རྗོད་པར་བྱེད་ན་དེ་ནས་སྒྲུབ་པ་པོ་ལག་པས་བཟུང་ནས་འཛུམ་པའི་བཞིན་གྱིས་རང་གི་གནས་སུ་འགྲོ་བར་བྱེད་དོ། །བཅུད་ཀྱིས་ལེན་སྦྱིན་པར་བྱེད་དོ། །

ཟོས་པས་སྐད་ཅིག་དེ་ཉིད་ལ་སྐྲ་ལི་ཞིང་འཁྱིལ་བ་ལོ་བརྒྱད་གཉིས་ལོན་པའི་རྣམ་པ་ཉི་མ་འཆར་བའི་ཁ་དོག་འདྲ་བ་ལྷའི་གཟུགས་བརྙན་གཟུགས་བཟང་པོ་རབ་ཏུ་མཛེས་པ་ལོ་སྟོང་ཕྲག་ལྔར་འཚོ་བར་བྱེད་དོ། །དེ་དང་ལྷན་ཅིག་རོལ་པར་བྱེད་དོ། །གང་གི་ཚེ་འཆི་བ་དེའི་ཚེ་ཆེན་པོའི་

เล่ม ๙๔ · หน้า 186b

རིགས་སུ་སྐྱེ་བར་འགྱུར་ཏེ། སྐྱེ་བ་དྲན་ནོ། །ཆོ་ག་དེ་ཉིད་ཀྱིས་ཁ་ཚར་མ་བཅད་པའི་རས་ལ་རི་མོ་མཁན་གསོ་སྦྱོང་ཅན་གྱིས་ཁ་དོག་མ་འདྲེས་པས་བདེ་བར་གཤེགས་པའི་མཐོ་གང་གི་ཚད་ཀྱི་ག་པུར་པྲི་ཡང་ཀུའི་ཤིང་ལ་འཕྱང་བ་གོས་གཅིག་པ་ཟར་མའི་མེ་ཏོག་དང་མཚུངས་པའི་གནོད་སྦྱིན་

མོ་འདྲིར་གཞུག་པར་བྱའོ། །དེ་ནས་སྒྲུབ་པ་པོས་དཀར་པོའི་བརྒྱད་པ་ལ་མཚན་མོ་སྨྱུང་བར་གནས་པས་གོས་གཙང་མ་བགོས་ཏེ་རིང་བསྲེལ་དང་བཅས་པའི་མཆོད་རྟེན་དུ་མཆོད་པ་དང་གཏོར་མ་དང་མར་མེ་བྱས་ནས་རང་གི་ལྷ་སྤྱན་དྲང་བར་བྱས་ཏེ་མཆོད་ཡོན་དང་གདན་ཕུལ་ནས་སླར་ཡང་གཤེགས་སུ་

གསོལ་ཏེ་པྲི་ཡང་ཀུའི་ཡམ་ཤིང་བ་སེར་སྐྱའི་མར་གྱིས་བཏགས་པ་སྲེག་བླུགས་བརྒྱད་སྦྱིན་སྲེག་གྱིས་ཤིག །དེ་ནས་རིག་པ་འཛིན་པས་ཇི་སྲིད་གནོད་སྦྱིན་མོ་རང་ཉིད་འོངས་པ་དེ་སྲིད་བཟླས་པར་བྱའོ། །འོངས་པ་ལ་མཆོད་ཡོན་དབུལ་བར་བྱའོ། །འདི་སྐད་ཟེར་ཏེ་བཀའ་བསྒོ་བ་

ཅི་བགྱི། དེ་ནས་སྒྲུབ་པ་པོས་འདི་སྐད་ཅེས་བརྗོད་པར་བྱ་སྟེ། བདག་གི་ཆུང་མ་མཛོད་ཅིག་ཅེས་སྒྲུབ་པ་པོས་སྨྲས་པ་དང་རབ་ཏུ་འཛུམ་པའི་བཞིན་གྱིས་ཁྱོད་ཀྱིས་ཇི་ལྟར་བསྒོ་བ་བཞིན་དུའོ་ཞེས་ཟེར་རོ། །སྒྲུབ་པ་པོས་ལག་པས་བཟུང་ནས་རང་གི་གནས་སུ་འགྲོ་བར་བྱེད་དོ། །

བཅུད་ཀྱིས་ལེན་སྦྱིན་པར་བྱེད་དོ། །སྐད་ཅིག་དེ་ཉིད་ལ་གཟུགས་བཟང་པོ་རབ་ཏུ་མཛེས་པར་འགྱུར་རོ། །ལོ་སྟོང་ཕྲག་ལྔར་འཚོ་བར་བྱེད་དོ། །ཆོ་ག་དེ་ཉིད་ཀྱིས་ཁ་ཚར་མ་བཅད་པའི་རས་ལ་རི་མོ་མཁན་གསོ་སྦྱོང་ཅན་གྱིས་གནོད་སྦྱིན་མོ་འདྲིར་གཞུག་པར་བྱའོ། །གསེར་ལྟར་

སེར་བ་གོས་གཅིག་པ། སྐྲ་གྲོལ་བ་ཀུན་ཏུ་ཆགས་པའི་སེམས་ཀྱིས་སྒྲུབ་པ་པོ་ལ་ངེས་པར་རྟོག་བཞིན་པ་ཨ་ཏི་མུཀྟའི་ཤིང་ལ་འཕྱང་བཞིན་པ་ཅུང་ཟད་འཛུམ་པའི་བཞིན་ཅན་ཕྱག་གཡས་པའི་སོར་མོས་སྒྲུབ་པ་པོ་ལ་སྡིགས་པར་བྱེད་པའོ། །དེ་ནས་སྒྲུབ་པ་པོས་རིང་བསྲེལ་དང་

བཅས་པའི་མཆོད་རྟེན་དུ་རས་རིས་བཞུགས་སུ་གསོལ་ཏེ་གོས་གཙང་མ་བགོས་ནས་རས་རིས་ཀྱི་སྤྱན་སྔར་མཚན་མོ་གསུམ་སྨྱུང་བར་གནས་ཏེ་མཆོད་པ་རྒྱ་ཆེན་པོ་བྱས་ནས་མཆོད་ཡོན་དང་རི་མོ་བྱ་བ་དང་སླར་ཡང་མཆོད་ཡོན་ཕུལ་ནས་གཤེགས་སུ་གསོལ་ཏེ་འོ་མའི་སྲེག་བླུགས་

เล่ม ๙๔ · หน้า 187a

ཉི་ཤུ་རྩ་བརྒྱད་སྦྱིན་སྲེག་གྱིས་ཤིག །དེ་ནས་སྒྲུབ་པ་པོས་རྩ་བའི་སྔགས་ཀྱིས་ལན་བདུན་བསྔགས་པའི་མཱ་ལ་ཏིའི་མེ་ཏོག་རེ་རེས་ཇི་སྲིད་རང་ཉིད་འོངས་ཀྱི་བར་དུ་གནོད་སྦྱིན་མོ་ལ་བསྣུན་པར་བྱའོ། །སྒྲུབ་པ་པོ་ལག་པས་བཟུང་ནས་རང་གི་གནས་སུ་འགྲོ་

བར་བྱེད་དོ། །གནས་སུ་སོང་ནས་བཅུད་ཀྱིས་ལེན་སྦྱིན་པར་བྱེད་དོ། །སྐད་ཅིག་དེ་ཉིད་ལ་གཟུགས་བཟང་པོར་འགྱུར་ཏེ། དེ་ཡིས་ལྷན་ཅིག་རོལ་པར་བྱེད་དོ། །ལོ་སྟོང་ཕྲག་ལྔར་འཚོ་བར་བྱེད་དོ། །གང་གི་ཚེ་འཆི་བ་དེའི་ཚེ་ནོར་ཆེན་པོའི་རིགས་སུ་སྐྱེ་བར་འགྱུར་

རོ། །སྐྱེ་བ་དྲན་པར་འགྱུར་རོ། །ཆོ་ག་འདི་ཉིད་ཀྱིས་ཙནྡན་དང་། རྒྱ་སྤོས་དང་། རུ་རྟ་དང་། ཤིང་རྩ་དང་། པ་རི་པཱ་ལ་པཱ་དང་། གུར་གུམ་དང་། ལྡོང་རོས་དང་། གི་ཝང་དང་། པདྨའི་འདབ་མ་དང་། པདྨའི་ས་བོན་རྣམས་གཅིག་ཏུ་བྱས་ནས་དྲིའི་

ཁུ་བ་དང་། ནམ་མཁའི་ཆུས་བྲམ་ཟེའི་བུ་མོ་གསོ་སྦྱོང་ཅན་གྱི་ལག་པར་བསྟབས་པར་བྱའོ། །དྲི་དཀར་པོའི་གཟུགས་བརྙན་བྱས་ནས་རིང་བསྲེལ་དང་བཅས་པའི་མཆོད་རྟེན་དུ་དཀར་པོའི་བརྒྱད་པ་ལ་མཆོད་པ་བྱས་ནས་མཚན་མོ་གསུམ་དུ་སྨྱུང་བར་གནས་པ་

གཟུགས་བརྙན་དེ་མཆོད་རྟེན་གྱི་སྤྱན་སྔར་བཞུགས་ནས་རྩ་བའི་སྔགས་ཀྱིས་རང་གི་ལྷ་སྤྱན་དྲང་བར་བྱ་སྟེ་མཆོད་ཡོན་དང་གདན་ཕུལ་ནས་སླར་ཡང་གཤེགས་སུ་གསོལ་བའི་མཆོད་ཡོན་ཕུལ་ཏེ། ཀུ་ཤའི་ཁྲེས་ལ་ཉེ་བར་འདུག་པས་པདྨ་གེ་སར་ལ་བ་སེར་སྐྱའི་མར་གྱིས་

བཏགས་པའི་སྲེག་བླུགས་བདུན་སྦྱིན་སྲེག་གྱིས་ཤིག །དེ་ཉིད་དུ་ཀུ་ཤའི་ཁྲེས་ལ་ཉེ་བར་འདུག་པས་ཇི་སྲིད་གནོད་སྦྱིན་མོ་རང་ཉིད་འོངས་པ་དེ་སྲིད་དུ་བཟླས་པར་བྱའོ། །འོངས་པ་ལ་མཆོད་ཡོན་དབུལ་བར་བྱའོ། །དེ་ནས་དེ་ན་རེ་བཀས་བསྒོ་བ་ཅི་ཞིག་བགྱི་ཞེས་ཟེར་རོ། །འདི་

སྐད་ཅེས་བརྗོད་པར་བྱའོ། །ཆུང་མ་མཛོད་ཅིག་ཅེས་སོ། །དེ་ནས་དེས་སྨྲས་པ་དེ་བཞིན་བྱའོ་ཞེས་སྒྲུབ་པ་པོ་ལག་པས་བཟུང་ནས་རང་གི་གནས་སུ་འགྲོ་བར་བྱེད་ཅིང་བཅུད་ཀྱིས་ལེན་སྦྱིན་པར་བྱེད་དོ། །ལྷའི་གཟུགས་ཅན་དུ་འགྱུར་རོ། །ལོ་སྟོང་ཕྲག་ལྔར་འཚོ་བར་

เล่ม ๙๔ · หน้า 187b

བྱེད་དོ། །གང་གི་ཚེ་འཆི་བ་དེའི་ཚེ་བྲམ་ཟེའི་རིགས་སུ་སྐྱེ་བར་འགྱུར་རོ། །སྐྱེ་བ་དྲན་པར་ཡང་འགྱུར་རོ། །ཆོ་ག་དེ་ཉིད་ཀྱིས་བ་སེར་སྐྱའི་མར་སར་པ་ལ་གཟུགས་བརྙན་བྱས་ནས་རས་རིས་ཀྱི་སྤྱན་སྔར་གཏུབ་ཅིང་གཏུབ་ཅིང་སྦྱིན་སྲེག་བྱའོ། །ཇི་སྲིད་གནོད་སྦྱིན་མོ་བྱུང་བའི་བར་དུའོ། །

ཆོ་ག་འདི་ཉིད་ཀྱིས་ཙནྡན་དམར་པོ་ལས་བྱུང་བའི་གཟུགས་བརྙན་བྱས་ནས་རྩ་བའི་སྔགས་ཀྱིས་ལན་ཉི་ཤུ་རྩ་གཅིག་ཡོངས་སུ་བཟླས་ཏེ་ཆུ་ཀླུང་དུ་གཞུག་གོ། །སྐད་ཅིག་དེ་ཉིད་ལ་གཟུགས་བཟང་པོའི་གནོད་སྦྱིན་མོ་འོང་ཞིང་འདོད་པ་ཐམས་ཅད་རབ་ཏུ་སྦྱིན་པར་འགྱུར་རོ། །ནིམྦའི་ཤིང་ལས་

བྱུང་བའི་བདེ་བར་གཤེགས་པའི་མཐོ་གང་གི་ཚད་ཀྱི་གནོད་སྦྱིན་མོ་བྱེད་དུ་བཅུག་ནས་རི་མོ་མཁན་གསོ་སྦྱོང་ཅན་གྱིས་ཁ་དོག་མ་འདྲེས་པའི་ཚོན་གྱིས་འདྲིར་གཞུག་པར་བྱའོ། །རིང་བསྲེལ་དང་བཅས་པའི་མཆོད་རྟེན་དུ་ཆོ་གས་གཏོར་མ་དང་། མར་མེའི་མཆོད་པ་རྒྱ་ཆེན་པོ་བྱས་ནས།

དེ་ནས་སྒྲུབ་པ་པོས་རྣམ་པར་དབེན་པར་སྦྱངས་པའི་སྣོད་དང་གོས་ཀྱི་རྩ་བའི་སྔགས་ཀྱིས་ལྷ་རྣམས་སྤྱན་དྲང་བར་བྱ་སྟེ་མཆོད་པ་དང་གདན་ཕུལ་ནས། སླར་ཡང་གཤེགས་སུ་གསོལ་ཏེ་ཇི་སྲིད་དུ་གནོད་སྦྱིན་མོ་རང་ཉིད་ཀྱིས་གཟུགས་གསལ་བར་བྱེད་བཞིན་པ་མེ་ཏོག་གི་ཕྲེང་བ་བྱས་

ནས་འོང་བར་བྱེད་དོ། །དེ་སྲིད་དུ་བཟླས་པར་བྱའོ། །དེ་སྨྲ་བ་དང་དེ་ནས་སྒྲུབ་པ་པོས་ཆུང་མ་མཛོད་ཅིག་ཅེས་བརྗོད་པར་བྱའོ། །དེ་ནས་དེ་རབ་ཏུ་འཛུམ་པའི་བཞིན་གྱིས་སྒྲུབ་པ་པོ་ལ་མེ་ཏོག་ཕྲེང་བ་སྦྱིན་པར་བྱེད་དོ། །རང་གི་ལག་པས་བཟུང་ནས་བཅོམ་ལྡན་འདས་ཀྱི་དྲུང་དུ་

འགྲོ་བར་བྱེད་དོ། །བཅུད་ཀྱིས་ལེན་སྦྱིན་པར་བྱེད་དོ། །སྐད་ཅིག་དེ་ཉིད་ལ་ལྷའི་གཟུགས་ཅན་དུ་འགྱུར་རོ། །གཟུགས་བཟང་པོ་རབ་ཏུ་མཛེས་པར་འགྱུར་རོ། །དེའི་ལྷན་ཅིག་རོལ་པར་བྱེད་ཅིང་དགའ་མགུར་ཡོངས་སུ་སྤྱོད་པར་བྱེད་དོ། །ལོ་སྟོང་ཕྲག་ལྔར་འཚོ་བར་བྱེད་དེ་

ལྷའི་ཚེའོ། །གང་གི་ཚེ་འཆི་བ་དེའི་ཚེ་ནོར་ཆེན་པོའི་རིགས་སུ་སྐྱེ་བར་འགྱུར་རོ། །རབ་ཏུ་མཛེས་པ་དང་སེམས་ཅན་ཐམས་ཅད་ཀྱིས་མཐོང་ན་དགའ་བ་དང་། ལོངས་སྤྱོད་ཆེན་པོ་དང་། ནོར་ཆེན་པོ་དང་། འདོད་པ་ཆེན་པོ་དང་། སྙིང་རྗེ་ཅན་དང་། ཐམས་ཅད་སྦྱིན་པ།

เล่ม ๙๔ · หน้า 188a

བརྩོན་འགྲུས་ཆེན་པོ་སྐྱེ་བ་དྲན་པའོ། །གནོད་སྦྱིན་མོའི་ལེའུ་རྫོགས་སོ།། །།པདྨའི་མཚོར་སོང་ནས་སྒྲུབ་པ་པོས་དཔལ་མོ་འོངས་ཀྱི་བར་སྦྱིན་སྲེག་བྱའོ། །རུ་རྟ་དང་། རྒྱ་སྤོས་དང་། པདྨའི་ས་བོན་དང་། པདྨའི་གེ་སར་དང་། ཙནྡན་སྦྲང་རྩིས་ལྷན་

ཅིག་བཏགས་པར་བྱའོ། །གང་ལ་བྱིན་པ་དེ་དབང་དུ་འགྱུར་རོ། །རྩ་བའི་སྔགས་ཀྱིས་མེ་ཏོག་གི་ཕྲེང་བ་ལ་ཡོངས་སུ་བཟླས་ཏེ་གང་ལ་བྱིན་པ་དེ་དབང་དུ་འགྱུར་རོ། །དེ་ནས་རྩལ་བྱེད་པར་འདོད་པས་རྟེན་ཅིང་འབྲེལ་པར་འབྱུང་བའི་སྙིང་པོ་ཅན་མཆོད་རྟེན་ཇི་སྲིད་དུ་མཆོད་རྟེན་ཕྱི་

མ་རབ་ཏུ་གཡོ་བ་བྱེད་པ་དེ་སྲིད་དུ་བྱའོ། །དེ་ནས་ལས་ཀྱི་སྒྲིབ་པ་ཟད་པར་བྱས་ནས་མཚམས་མེད་པ་ལྔ་བྱས་པས་ཀྱང་འགྲུབ་པར་འགྱུར་ཏེ། རྣམ་པ་གཞན་དུ་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔའི་རྣམ་པར་བསྒྱིངས་པའོ། །དེ་ནས་འཕགས་པ་སྤྱན་རས་གཟིགས་

དབང་ཕྱུག་བསྒྲུབ་པར་འདོད་ན། ཁ་ཚར་མ་བཅད་པའི་རས་སྐྲ་དང་བྲལ་བ་ལ་ཁ་དོག་མ་འདྲེས་པའི་ཚོན་གྱིས་རི་མོ་མཁན་གསོ་སྦྱོང་ཅན་གྱིས་པིར་སར་པས་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གསེར་ལྟར་སེར་བ་རལ་པ་འཕྱང་བ། འོད་

དཔག་མེད་དབུ་ལ་འཛིན་པ་ཕ་རོལ་ཏུ་ཕྱིན་པ་ཐམས་ཅད་ཀྱིས་ཡོངས་སུ་བསྐོར་བ་འདྲིར་གཞུག་པར་བྱའོ། །འོག་ཏུ་སྒྲུབ་པ་པོ་སྤོས་ཕོར་ལག་ན་ཐོགས་པས་པུས་མོ་གཉིས་བཙུགས་པ་བྱང་ཆུབ་ལ་ངེས་པར་རྟོག་བཞིན་པའོ། །དེ་ནས་རིག་པ་འཛིན་པས་དཀར་པོའི་

ཕྱོགས་ཀྱི་ཚེས་གཅིག་ནས་བརྩམས་ཏེ་རས་རིས་ཀྱི་སྤྱན་སྔར་ཉི་མ་རེ་རེ་ཞིང་རྒྱུན་མི་འཆད་པའི་མཆོད་པ་དང་། གཏོར་མ་དང་། མར་མེ་ཡང་ཇི་སྲིད་དུ་ཟླ་བ་ཉ་བའི་བར་དུ་བྱའོ། །ཟླ་བ་ཉ་ལ་མཆོད་པ་རྒྱ་ཆེན་པོ་དང་། གཏོར་མ་དང་། མར་མེ་ཡང་བྱས་ནས་སྨོན་ལམ་བཏབ་

པར་ཡང་བྱ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་བྱ་བ་བྱས་ནས་མཱ་ལ་ཏིའི་མེ་ཏོག་གིས་ཡོངས་སུ་བཀང་བའི་དྲིའི་ཆུའི་སྣོད་ལག་པ་གཉིས་ཀས་བླངས་ནས་པུས་མོ་གཉིས་བཙུགས་ཏེ་རྩ་བའི་སྔགས་ལན་བདུན་བརྗོད་ནས་རང་གི་ལྷ་རྣམས་སྤྱན་

เล่ม ๙๔ · หน้า 188b

དྲང་བར་བྱ་སྟེ་མཆོད་ཡོན་དང་གདན་ཕུལ་ནས་སླར་ཡང་བྱབས་ཏེ་བ་སེར་སྐྱའི་མར་ལ་བཏགས་པའི་མཱ་ལ་ཏིའི་མེ་ཏོག་གིས་སྦྱིན་སྲེག་བྱའོ། །ལྷ་རྣམས་ཚིམ་པར་བྱས་ནས་སྲུང་བ་བྱས་པ་ཀུ་ཤའི་ཁྲེས་ལ་ཉེ་བར་འདུག་སྟེ། ང་རྒྱལ་དང་བྲལ་བ་མི་སྨྲ་བས་གཡོ་བཅོམ་སྟེ།

དྲན་པ་མཆོག་གིས་དམིགས་པར་བྱས་ལ་ཇི་སྲིད་འཕགས་པ་སྤྱན་རས་གཟིགས་དབང་ཕྱུག་རང་ཉིད་ཕ་རོལ་ཏུ་ཕྱིན་པ་ཐམས་ཅད་ཀྱིས་ཡོངས་སུ་བསྐོར་བ་བྱོན་པ་དེ་སྲིད་དུ་བཟླས་པར་བྱའོ། །སེམས་དཔའ་ཆེན་པོ་བྱོན་པ་དང་། ས་གཡོ་བ་དང་། རིའི་རྩེ་མོ་ཉིལ་བ་དང་།

སེམས་ཅན་ཐམས་ཅད་ཀྱི་ནད་ཐམས་ཅད་རབ་ཏུ་ཞི་བར་བྱེད་པ་དང་། ལྷ་ཐམས་ཅད་མེ་ཏོག་གི་ཆར་རབ་ཏུ་འབེབས་པར་བྱེད་པ་དང་། རིག་པ་འཛིན་པ་ཐམས་ཅད་ཀྱང་ཙནྡན་གྱི་ཕྱེ་མའི་ཆར་འབེབས་པ་དང་། གནས་གཙང་མའི་ལྷ་རྣམས་རིན་པོ་ཆེ་ཆེན་པོའི་ཆར་

རབ་ཏུ་འབེབས་པ་དང་། ལྷ་མ་ཡིན་ཐམས་ཅད་ཨུཏྤ་ལའི་ཆར་རབ་ཏུ་འབེབས་པར་བྱེད་དོ། །དྲག་པོ་ཐམས་ཅད་ཁྲོ་བ་དང་བྲལ་བར་འགྱུར་རོ། །དམྱལ་བ་པ་རྣམས་ཀྱང་སྐད་ཅིག་དེ་ལ་བདེ་བ་སྐྱེས་ཏེ། མཆོག་ཏུ་འཇིགས་པ་སྨྲ་བར་བྱེད་དོ། །དྲི་ཟ་རྣམས་གླུ་

སྙན་པའི་སྒྲ་ཐོས་པར་བྱེད་དོ། །རིག་པ་འཛིན་པ་ཐམས་ཅད་ཀྱང་རང་གི་རིག་པས་ཡོངས་སུ་བསྐོར་ཏེ་ཇི་ལྟར་རྣམ་པར་འཕྲུལ་པའི་བྱང་ཆུབ་སེམས་དཔའི་དྲུང་དུ་ཉེ་བར་འོང་བར་བྱེད་དོ། །ལོག་འདྲེན་ཐམས་ཅད་དང་། བགེགས་ཐམས་ཅད་དང་། སྲིན་པོ་ཐམས་

ཅད་དང་། ཡི་དགས་ཐམས་ཅད་དང་། ཇི་སྲིད་དུ་དྲག་པོ་སྣ་ཚོགས་པ་རྣམས་བྱང་ཆུབ་སེམས་དཔའ་བྱོན་པ་མཐོང་ནས་ཞི་བའི་སེམས་སུ་འགྱུར་རོ། །སྤྲིན་ལས་གུ་ལུ་གུ་ལུའི་སྒྲ་སྒྲོགས་པ་དང་ས་རྣམ་པ་དྲུག་ཏུ་གཡོ་བ་དང་། ཕྱོགས་བཞི་སྐྱོང་བ་རྣམས་བྱང་

ཆུབ་སེམས་དཔའི་དྲུང་དུ་ཉེ་བར་འོང་བར་བྱེད་དོ། །ལོག་པར་འདྲེན་པ་ཐམས་ཅད་དང་བགེགས་ཐམས་ཅད་འོངས་ཏེ་ཕྱོགས་བཞི་རབ་ཏུ་ཞི་བར་འགྱུར་རོ། །རླུང་འགྲོ་བ་དང་། དྲག་པོ་རབ་ཏུ་འགྲོ་བར་བྱེད། དུས་མ་ཡིན་པར་ཤིང་ལ་མེ་ཏོག་ཏུ་འགྱུར་རོ། །འཇིག་

เล่ม ๙๔ · หน้า 189a

རྟེན་པའི་རིག་པ་འཛིན་པ་ཐམས་ཅད་འོངས་ཏེ་ཕྱོགས་གང་དུ་རིག་པ་འཛིན་པ་སྒྲུབ་པ་བྱེད་པ་དེར་སེམས་དཔའ་ཆེན་པོའི་དགའ་སྟོན་ལ་ཐམས་ཅད་ཉིད་འདུས་སོ། །སྒྲུབ་པ་པོས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་མཐོང་ནས་མཆོད་ཡོན་ཕུལ་ནས་

ཕྱག་བྱའོ། །ལྷ་ཐམས་ཅད་དང་། རིག་པ་འཛིན་པ་ཐམས་ཅད་ལ་མཆོད་ཡོན་དང་གདན་ཕུལ་ནས་དེ་ནས་ལྷ་ཐམས་ཅད་དང་། རིག་པ་འཛིན་པ་ཐམས་ཅད་ཀྱིས་སྒྲུབ་པ་པོ། །བྱང་ཆུབ་སེམས་དཔའ་ལ་ལེགས་སོ་ཞེས་བྱ་བ་བྱིན་ཏེ་སྲིད་པ་གསུམ་གྱི་ཆུ་བོ་ཆེན་པོ་ལས་བསྒྲལ་

བར་བྱས་པ་དེ་རྣམས་ངེས་པར་རྒྱལ་བ་ཀུན་ཏུ་སྣང་བས་མནན་པ་བྱང་ཆུབ་སེམས་དཔའི་ལམ་དང་ལྷན་ཅིག་འཚོ་བའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་གིས་ལྷ་ཐམས་ཅད་ལ་ལེགས་སོ་ཞེས་བྱ་བ་བྱིན་ཏེ། བྱང་ཆུབ་སེམས་དཔའི་ཕྱག་གཡས་པ། སྒྲུབ་

པ་པོའི་སྤྱི་བོར་ཉུག་པར་མཛད་དོ། །དེ་ནས་སྒྲུབ་པ་པོས་གང་ཡིད་ལ་སྙིང་པོ་བསམ་པ་དེར་འགྱུར་རོ། །རིག་པ་འཛིན་པའི་འཁོར་ལོས་སྒྱུར་བ་དང་། རིག་པ་འཛིན་པའི་རྒྱལ་པོ་ལྷ་ཉིད་གང་འདོད་པ་དེ་རྣམས་ཆེས་གཞན་དུ་སྣང་སྟེ་འདི་སྐད་ཅེས་བརྗོད་པར་བྱའོ། །བཅོམ་

ལྡན་འདས་འཕགས་པ་སྤྱན་རས་གཟིགས་དབང་ཕྱུག་གྲུ་འཛིན་དེང་མཐོང་བར་འཚལ་ལོ། །བྱང་ཆུབ་སེམས་དཔའ་སྐྱེས་བུ་ཆེན་པོ་ཕྱག་གཡས་པས་བཟུང་སྟེ་རིག་པའི་རྒྱལ་པོ་རྟ་མགྲིན་ལ་ཡང་དག་པར་གཏད་པར་གྱུར་ཏོ། །གྲུ་འཛིན་དུ་སོང་ཤིག །གང་འདོད་པ་དེ་

སྦྱིན་པར་འགྱུར་རོ། །དེ་ནས་རིག་པའི་རྒྱལ་པོ་རིག་པའི་རྒྱལ་པོའི་ཚོགས་ཀྱིས་བསྐོར་བ་དང་བཅས་པ་སྒྲུབ་པ་པོའི་ལག་པ་གཡས་བཟུང་ནས་རྒྱ་མཚོའི་དབུས་སུ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་

ཅི་དང་། ལྟོ་འཕྱེ་ཆེན་པོ་ལ་སོགས་པ་སྒྲུབ་པ་པོའི་རིག་པའི་ཚོགས་ལ་མེ་ཏོག་གི་ཆར་འབེབས་པ་དང་། རྔ་བོ་ཆེ་དང་། རྔ་པ་ཊ་ཧ་དང་། རྔ་དང་། རྫ་རྔ་ཁ་གཅིག་པ་དང་། རྫ་རྔ་རྣམས་སྒྲ་འབྱིན་བཞིན་དུ་གྲུ་འཛིན་དུ་འགྲོ་བར་བྱེད་དོ། །རྒྱ་མཚོའི་སྟེང་དེར་རྒྱ་

เล่ม ๙๔ · หน้า 189b

མཚོ་ཆེན་པོ་རིག་པའི་རྒྱལ་པོས་མཐོང་ནས་སྐྱེས་བུ་དམ་པ་དེ་ཡང་ཆུ་ཀླུང་ཐམས་ཅད་ཀྱིས་ཡོངས་སུ་བསྐོར་བའི་རིན་པོ་ཆེའི་མཆོད་ཡོན་རབ་ཏུ་སྩོལ་བར་བྱེད་པར་འགྱུར་རོ། །ལེགས་སོ་ཞེས་བྱ་བ་ཡང་གནང་བར་མཛད་དོ། །རིགས་ཀྱི་བུ་ལེགས་སོ་ལེགས་པར་འཚོ་བ་

དང་། གཟི་བརྗིད་དང་ལྡན་པའི་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གི་གནས་སོ། །དེ་ནས་རྒྱ་མཚོ་ཆེན་པོ་བསྒྲལ་ནས་གྲུ་འཛིན་དུ་སོང་སྟེ། མཐོང་བ་དང་དེར་གང་རིག་པ་འཛིན་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་

མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་རྣམས་ཐམས་ཅད་མཆོད་ཡོན་གྱིས་སྣོད་ཀྱི་མེ་ཏོག་གི་ཆར་ཆེན་པོས་སྒྲུབ་པ་པོ་ལ་བསུ་བ་ལ་འོང་བར་བྱེད་དོ། །དེ་ནས་གྲུ་འཛིན་མཐོང་ནས་སྣ་ཚོགས་པའི་ནོར་བུ་དང་སྨན་གྱིས་བསྐུས་པ།

མུ་ཏིག་གི་དོ་ཤལ་རབ་ཏུ་འཕྱང་བཞིན་པ། གསེར་དང་། ཤེལ་ལས་བྱུང་བ་དང་། བཻཎཱུརྱ་ལས་བྱུང་བ་དང་། ཨིནྡྲ་ནཱི་ལ་ལས་བྱུང་བ་དང་། མཐོན་ཀ་ཆེན་པོ་ལས་བྱུང་བའི་ཐེམ་སྐས་དང་། སྣམ་བུ་རྣམས་ཀྱིས་སྣ་ཚོགས་པའི་མེ་ཏོག་ཉེ་བར་མཛེས་པས་

རིག་པའི་རྒྱལ་པོ་དང་། སྒྲུབ་པ་པོ་དེ་ལ་མངོན་པར་དབང་བསྐུར་བ་བྱས་ནས་སྒྲུབ་པ་པོ་ལ་སྨྲས་པ་གནས་འདི་ནི་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གི་གནས་རིན་པོ་ཆེ་སྣ་བཞི་ལས་བྱུང་བ་ཁང་པ་དབུས་མར་ཇི་སྲིད་དུ་བྱང་ཆུབ་ཀྱི་བར་དུ་རང་གི་གནས་

བཞིན་དུ་ཀུན་ཏུ་སྤྱོད་ཅིང་གནས་སོ། །དེ་ནས་རིག་པ་འཛིན་པའི་རྒྱལ་པོ་ལ་མངོན་པར་དབང་བསྐུར་ཏེ་རིག་པའི་རྒྱལ་པོ་རབ་ཏུ་བགྲོད་པར་གྱུར་ཏོ། །འདི་ནི་དངོས་གྲུབ་སྟེ། བཅོམ་ལྡན་འདས་འདིའི་མཐུ་རྣམ་པར་བསྒྱིངས་པས་མཚམས་མེད་པ་བྱེད་པས་ཀྱང་།

འདི་འགྲུབ་པར་བྱེད་དོ། །རྟ་མགྲིན་རྒྱལ་པོས་རིག་པའི་རྒྱལ་པོ་ཐམས་ཅད་ལ་སྨྲས་པ། བཅོམ་ལྡན་འདས་མ་དང་འཕགས་པ་སྤྱན་རས་གཟིགས་དབང་ཕྱུག་གི་གནས་རིན་པོ་ཆེ་སྣ་བཞི་ལས་བྱུང་བ་དབུས་མའི་ཁང་པར་རང་གི་གནས་བཞིན་དུ་གཞི་ལ་གནས་པའི་རིག་པ་

เล่ม ๙๔ · หน้า 190a

སྒྲོལ་མ་དང་། ཁྲོ་གཉེར་ཅན་དང་། གཞན་རིག་པ་ཐམས་ཅད་ཕ་རོལ་གནོན་པ་ཆེན་པོའོ། །རིག་པའི་རྒྱལ་པོ་འདི་ནི་མ་བསྒྲུབས་པ་ཉིད་དུ་ལས་བྱེད་དེ་གཏན་པ་གཅོད་པར་བྱེད་པ་དང་། ཧཱུྃ་ཡིག་གིས་རྒྱ་མཚོ་སྐེམས་པར་བྱེད་པ་དང་། སོར་མོའི་སྡིགས་

མཛུབ་ཀྱིས་ཐམས་ཅད་རེངས་པར་བྱེད་པ་དང་། ཨོྃ་ཡིག་གིས་འགུགས་པར་བྱེད་པ་དང་། ཕཊ་ཡིག་གིས་ལྷུན་པོ་རྣམས་ཡང་རྣམ་པར་འཇོམས་པར་བྱེད་པ་དང་། ཡིད་ཀྱིས་བཟླས་པས་སེམས་ཅན་ཐམས་ཅད་དབང་དུ་བྱེད་པ་དང་། ཨོཾ་ཡིག་གིས་སྤྱན་དྲངས་པ་དང་། ཧཱུྃ་

ཡིག་གིས་གཤེགས་སུ་གསོལ་བ་དང་། ཕཊ་ཡིག་གིས་གསོད་པ་དང་། སྭཱ་ཧཱའི་ཡི་གེས་འཚོ་བར་བྱེད་པ་སྟེ། མདོར་ན་རིག་པ་རྣམས་ཀྱི་ཆོ་ག་ཇི་སྙེད་ཡོད་པ་དེ་ཐམས་ཅད་རིག་པ་འདི་ཉིད་ཀྱིས་འཇིག་རྟེན་ལས་འདས་པ་བསྒྲུབ་པར་བྱའོ། །འདི་ནི་སྔགས་

ཐམས་ཅད་ཀྱི་ཆོ་ག་ཐུན་མོང་བ་སྟེ། གང་ལ་ཆོ་ག་མེད་པ་དང་། སྡིག་པ་བྱེད་པས་ཀྱང་ལན་གསུམ་དུ་བཟླའོ། །རྟ་མགྲིན་རིག་པའི་རྒྱལ་པོ་བརྩོན་འགྲུས་ཆེན་པོ་སངས་རྒྱས་ཐམས་ཅད་ཀྱི་རྗེས་སུ་གནང་བ་སྟོབས་དང་ཕ་རོལ་གནོན་པ་ཆེན་པོ་འདི་ལན་གསུམ་གྱིས་མཚམས་

མེད་པ་བྱེད་པས་ཀྱང་འགྲུབ་པར་བྱེད་དོ། །དད་པས་བྱང་ཆུབ་ཀྱི་སེམས་ཡོངས་སུ་བཟུང་བ་འདོད་པ་ཆེན་པོ་དང་། སྙིང་རྗེའི་བདག་ཉིད་ཅན། སེར་སྣ་མེད་པ་དང་། བྱས་པ་གཟོ་བ་དང་། སངས་རྒྱས་དང་ཆོས་ལ་མངོན་པར་དད་པ་དང་། མ་དང་། ཕ་དང་།

མ་དང་ཕར་ཤེས་པ་དང་། མྱུར་བ་ཁོ་ནར་བཟོད་པ་དང་། ཚུལ་ཁྲིམས་དང་། སྦྱིན་པ་སྦྱིན་པར་བྱེད་པ་མ་བསྒྲུབས་པར་འགྲུབ་པར་ཡང་བྱེད་དོ། །མདོར་ན་ལས་ཐམས་ཅད་པ་ནི་བརྗོད་ནས་རིག་གཅོད་པར་འདོད་པ་དང་། སེལ་བར་འདོད་པས་འདི་བརྗོད་ནས་ཏེ་འདི་ནི་ལས་ཐམས་

ཅད་པའོ། །འདི་ནི་བྱང་ཆུབ་སེམས་དཔའི་ཏིང་ངེ་འཛིན་གྱི་ཁྱད་པར་གཞན་གྱིས་སྦྱིན་པའི་ཕ་རོལ་ཏུ་ཕྱིན་པ་འདི་ལྟ་སྟེ། རིག་པའི་རྒྱལ་པོ་སེམས་ཅན་ཐམས་ཅད་ཀྱི་བདེ་བ་རྫོགས་པའི་ཆེད་དུ་རྟ་མགྲིན་རྒྱལ་པོའི་མགུལ་དུའོ། །བྱང་ཆུབ་སེམས་དཔའི་མཐུ་རྣམ་པར་

เล่ม ๙๔ · หน้า 190b

བསྒྱིངས་པ་ཞེས་བྱ་བའི་ལེའུ་རྫོགས་སོ།། །།དེ་ནས་འོད་དཔག་མེད་མཐོང་བར་འདོད་ན་ཁ་ཚར་མ་བཅད་ཅིང་སྐྲ་དང་བྲལ་བའི་རས་ལ་རི་མོ་མཁན་གསོ་སྦྱོང་ཅན་གྱིས་ཁ་དོག་མ་འདྲེས་པའི་ཚོན་གྱིས་བདེ་བ་ཅན་གྱི་འཇིག་རྟེན་གྱི་ཁམས་སུ་འཕགས་པ་འོད་དཔག་མེད་གསེར་

ལྟར་སེར་པ། པདྨ་ལ་བཞུགས་པ་འདྲིར་གཞུག་པར་བྱའོ། །འོག་ཏུ་ཆོས་ཀྱི་འཁོར་ལོའི་གཞོགས་གཡོན་དུ་རྟ་མགྲིན་རྒྱལ་པོ་ཞལ་རྣམ་པར་འགྱུར་བ་འཇིགས་པར་བྱེད་པ་གསུས་པ་འཕྱང་བ་པདྨ་ལ་བཞུགས་པ་འདྲིར་གཞུག་པ། མེ་དམར་སེར་འབར་བ་འཕྲོ་

བཞིན་པ། རིན་པོ་ཆེའི་ཕྲེང་བའི་མཆོད་ཕྱིར་ཐོགས་པ་ཅན། ལག་འགྲོའི་རྒྱན་གྱིས་བརྒྱན་པ། རལ་པ་འོད་དཔག་མེད་འཛིན་པ། སོར་མོས་ལོག་པར་འདྲེན་པ་ལ་སྡིགས་པར་བྱེད་པ། དེའི་རྒྱབ་ནས་ལོག་པར་འདྲེན་པ་འབྲོས་པར་བྱེད་བཞིན་པའོ། །གཡས་

ཀྱི་གཞོགས་སུ་རྣམ་པར་བརྒྱན་པ་སྦྱངས་པའི་སྣོད་དང་། གོས་དང་ཕྱག་གཡས་པ་སྒྲུབ་པ་པོ་ལ་དབུགས་འབྱིན་པར་མཛད་བཞིན་པའི་འཕགས་པ་སྤྱན་རས་གཟིགས་དབང་ཕྱུག་གསེར་ལྟར་སེར་བ་རལ་པའི་ཅོད་པན་འཆང་བའི་དབུས་སུ་འོད་དཔག་མེད་མགོ་བོས་

འཛིན་པར་བྱེད་པ། ཕ་རོལ་གནོན་པའོ། །འོད་དཔག་མེད་ཀྱི་སྟེང་གི་སྤྲིན་དེ་ལ་སྤྲིན་གསེབ་ནས་གནས་གཙང་མ་མེ་ཏོག་རབ་ཏུ་འཐོར་བཞིན་པ་འདྲིར་གཞུག་པར་བྱའོ། །བཅོམ་ལྡན་འདས་ཀྱི་པདྨ་དེ་ཡང་ཀླུ་གཞོན་ནུ་རྣམས་ཀྱིས་འཛིན་པའོ། །འོག་ཏུ་

ལག་ན་སྤོས་ཕོར་ཐོགས་པའི་སྒྲུབ་པ་པོ་པུས་མོ་གཉིས་བཙུགས་པ་འོད་དཔག་མེད་ལ་རྣམ་པར་ལྟ་བཞིན་པའོ། །རི་མོའི་ལས་ཡོངས་སུ་རྫོགས་པ་དང་། སྒྲུབ་པ་པོས་གཏོར་མ་དང་། མར་མེ་དང་། མཆོད་པ་རྒྱ་ཆེན་པོ་བྱས་ཏེ་ཟླ་བ་ཉ་ལ་མཚན་མོ་གསུམ་

དུ་སྨྱུང་བར་གནས་པས་སྦྱངས་པའི་སྣོད་དང་གོས་འདི་ཉིད་ཀྱིས་རིག་པའི་རྒྱལ་པོ་རྟ་མགྲིན་བཀུག་ནས་མཆོད་ཡོན་ཕུལ་ཏེ་སྒྲུབ་པ་དང་། སླར་ཡང་གཤེགས་སུ་གསོལ་ཏེ་བ་སེར་སྐྱའི་མར་དང་། པདྨའི་ས་བོན་དང་། ནཱ་ག་གེ་སར་རྣམས་གཅིག་ཏུ་བྱས་ནས། ཉི་མ་བདུན་དུ་

เล่ม ๙๔ · หน้า 191a

སྦྱིན་སྲེག་གྱིས་ཤིག །དེ་ནས་རིག་པ་འཛིན་པས་ལྷ་རྣམས་ཚིམ་པར་བྱེད་པ་བྱས་ཀུ་ཤའི་ཁྲེས་ལ་ཉེ་བར་འདུག་པས་སྨོན་ལམ་གདབ་པར་བྱ་སྟེ། ཇི་སྲིད་དུ་ས་རྣམ་པར་འགྱུར་བ་དྲུག་ཏུ་གཡོ་བ་དང་། མར་མེའི་རྩེ་མོ་འཕེལ་བ་དང་། སྤྲིན་ལས་གུ་ལུ་གུ་ལུའི་

སྒྲ་སྒྲོགས་པ་དང་། མེ་ཏོག་གི་ཆར་རབ་ཏུ་འབེབས་པ་དང་། ཙནྡན་གྱི་ཕྱེ་མའི་ཆར་འབེབས་པ་དང་། དྲིལ་བུའི་སྒྲ་ཐོས་པ་དེ་སྲིད་དུ་བཟླས་པར་བྱའོ། །དེ་ནས་རིག་པ་འཛིན་པས་རིངས་པ་རིངས་པར་བཟླས་པར་བྱ་སྟེ། ཇི་སྲིད་དུ་རིག་པའི་རྒྱལ་པོ་བརྩོན་འགྲུས་ཆེན་པོས་ཕ་རོལ་གནོན་

པ་རྟ་མགྲིན་རིག་པ་ཐམས་ཅད་ཀྱིས་སྒྲུབ་པ་ས་ལ་འོང་བ་དེ་སྲིད་དུའོ། །དེ་ནས་སྒྲུབ་པ་པོས་མེ་ཏོག་དཀར་པོ་དང་། དྲིའི་ཆུས་ཡོངས་སུ་བཀང་བའི་སྣོད་ཀྱིས་མཆོད་ཡོན་ཕུལ་ནས་སྨོན་ལམ་གདབ་པོ། །འདི་སྐད་ཅེས་སྨྲས་སོ། །ཁྱོད་ལེགས་པར་འོངས་སོ། །འཕགས་པ་སྤྱན་

རས་གཟིགས་དབང་ཕྱུག་ཕ་རོལ་ཏུ་ཕྱིན་པ་དང་བཅས་པའི་ཆེད་དུ་སླར་ཡང་ལེགས་པར་འོངས་སོ། །རྟ་མགྲིན་འདི་ནི་བརྩོན་འགྲུས་ཆེན་པོ་སྟོབས་དང་ཕ་རོལ་གནོན་པ་རིག་པའི་ཚོགས་ཐམས་ཅད་ཀྱིས་མཆོད་པའོ། །དེ་ནས་རིག་པ་འཛིན་པས་སྤྱན་རས་གཟིགས་དབང་ཕྱུག་ལ་ལན་གསུམ་

བསྐོར་བ་བྱས་ཏེ་པུས་མོ་བཙུགས་ནས་འདི་སྐད་ཅེས་བརྗོད་པར་བྱའོ། །ཁྱོད་ལ་སྣང་བར་གྱུར་པ་གང་ཡིན་པ་དེ་རྣམས་ལྷན་ཅིག་འཚལ་ལོ། །དེ་ནས་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གིས་ཕྱག་གཡས་པ་སྒྲུབ་པ་པོའི་སྤྱི་བོར་ཉུག་པར་མཛད་དེ་འདི་སྐད་ཅེས་

གསུངས་སོ། །སྐྱེས་བུ་དམ་པ་བརྩོན་འགྲུས་ཆེན་པོ་སྟོབས་དང་ཕ་རོལ་གནོན་པ་ཁྱོད་ཀྱིས་གང་བརྩོན་འགྲུས་ཆེན་པོས་ཕ་རོལ་གནོན་པས་རིག་པའི་རྒྱལ་པོ་བསྒྲུབ་པ་ལེགས་སོ་ལེགས་སོ། །ཁྱོད་ཅག་གིས་མངོན་པར་འདོད་པ་སྨྲོས་ཤིག །མཆོག་སྦྱིན་པར་བྱའོ། །འདི་སྐད་ཅེས་

བརྗོད་པར་བྱ་སྟེ་བཅོམ་ལྡན་འདས་བདེ་བ་ཅན་དུ་འགྲོ་བར་འཚལ་ལོ། །དེ་ནས་བཅོམ་ལྡན་འདས་འཕགས་པ་འོད་དཔག་མེད་དེ་དང་། བྱང་ཆུབ་སེམས་དཔའ་རྣམས་དང་། འཇིག་རྟེན་གྱི་ཁམས་སུའོ། །དེ་ནས་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་ཕྱག་གཡས་

เล่ม ๙๔ · หน้า 191b

པ་བརྐྱང་སྟེ་སྒྲུབ་པ་པོ་ཕྱག་གཡས་པས་བཟུང་ནས་རྟ་མགྲིན་རྒྱལ་པོ་ལ་ཡང་དག་པར་གཏད་པར་གྱུར་ཏོ། །རིག་པའི་རྒྱལ་པོ་ཆེན་པོ་སྐྱེས་བུ་དམ་པ་འདི་བཟུང་ནས་མེ་ཏོག་གི་ཆར་རབ་ཏུ་འབབ་པའི་བདེ་བ་ཅན་གྱི་འཇིག་རྟེན་གྱི་ཁམས་སུ་སོང་ཞིག །གང་དུ་དེ་བཞིན་གཤེགས་པ་འོད་

དཔག་མེད་བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་དང་བཅས་པ་དེར་བསྟོད་དུ་བཅུག་ནས་སླར་ཡང་གྲུ་འཛིན་གང་ན་ཡོད་པ་དེར་ཤོག་ཤིག །དེ་ནས་རྟ་མགྲིན་རིག་པའི་རྒྱལ་པོས་སྒྲུབ་པ་པོ་བཟུང་ནས་མེ་ཏོག་གི་ཆར་འབེབས་པའི་བདེ་བ་ཅན་གྱི་འཇིག་རྟེན་གྱི་ཁམས་སུ་

སོང་སྟེ། སྒྲུབ་པ་པོས་སྨྲས་པ། སྐྱེས་བུ་དམ་པ་དེ་བཞིན་གཤེགས་པ་འོད་དཔག་མེད་དེ་བྱང་ཆུབ་སེམས་དཔའ་རྣམས་ལ་ཆོས་སྟོན་པ་ལ་ལྟོས་ཤིག་ལྟོས་ཤིག །དེ་ནས་རིག་པའི་རྒྱལ་པོས་དེ་བསྟོད་དུ་བཅུག་ནས་སླར་ཡང་འཕགས་པ་སྤྱན་རས་གཟིགས་དབང་ཕྱུག་གི་

གྲུ་འཛིན་པ་དེར་འོང་བར་མཛད་དོ། །དེ་ནས་སྒྲུབ་པ་པོ་འཇིག་རྟེན་གྱི་ཁམས་དེར་འཕགས་པ་འོད་དཔག་མེད་ཀྱི་དྲུང་དུ་ཆོས་ཉན་ནོ། །དངོས་གྲུབ་འདི་ནི་གནས་མ་ཡིན་པ་རྣམས་ལ་གང་སྦྱར་བར་མི་བྱ་སྟེ། གང་ཞིག་བྱེད་ན་དམ་ཚིག་ལས་འདའ་བར་འགྱུར་རོ་ཞེས་བརྗོད་ནས་མཆོག་

གི་སྒྲུབ་པ་རྣམས་ལ་འདི་གནས་མ་ཡིན་པ་རྣམས་ལ་རབ་ཏུ་མི་སྦྱོར་ཏེ་དེའི་དམ་ཚིག་མེད་དོ། །ལས་དེ་རྣམས་ཐམས་ཅད་རྩ་བའི་སྔགས་ཀྱིས་བྱེད་དུ་གཞུག་གོ། །ཐལ་བས་ཐལ་བའི་ར་བའོ། །སྒྲོན་མེ་གསུམ་གྱིས་མེའི་ར་བའོ། །ཆུ་ལ་ལན་བདུན་མངོན་པར་བསྔགས་

པས་ནམ་མཁའ་བཅིང་བའོ། །ཡུངས་ཀར་དཀར་པོས་ས་གཞི་བཅིང་བའོ། །ཏིལ་གྱི་སྦྱིན་སྲེག་གིས་ལོག་པར་འདྲེན་པ་ཐམས་ཅད་དབང་དུ་འགྱུར་རོ། །སྐྱེ་ཚེའི་སྦྱིན་སྲེག་གིས་ཡི་དགས་དང་། ཤ་ཟ་ཐམས་ཅད་དབང་དུ་འགྱུར་རོ། །ཀ་ར་བཱི་རའི་མེ་ཏོག་གི་སྦྱིན་སྲེག་

གིས་ཁྲོ་བོ་ཐམས་ཅད་འགྲུབ་པར་བྱེད་དོ། །མེ་ཏོག་ཐམས་ཅད་ཚ་བའི་ཏིལ་མར་གྱིས་བཏགས་པའི་སྦྱིན་སྲེག་གིས་འཇིག་རྟེན་པའི་རིག་པའི་རྒྱལ་པོ་ཐམས་ཅད་དབང་དུ་འགྱུར་རོ། །དྷུ་དྷུའི་སྦྱིན་སྲེག་གིས་དབང་ཕྱུག་ཆེན་པོ་དབང་དུ་འགྱུར་རོ། །པྲི་ཡང་ཀུའི་མེ་ཏོག་དང་། མཱ་ལཱ་ཏི་

เล่ม ๙๔ · หน้า 192a

དང་། སཽ་གནྡྷི་དང་། གུ་གུལ་བ་སེར་སྐྱའི་མར་དང་ལྷན་ཅིག་ཏུ་བྱས་ནས་སྦྱིན་སྲེག་བྱེད་ན་རིག་པ་ཐམས་ཅད་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། མིའམ་ཅི་དང་། རྐང་གཉིས་དང་། རྐང་བཞི་པ་ཐམས་ཅད་དབང་དུ་བྱེད་དོ། །

གི་ཝང་ལ་ལན་བདུན་མངོན་པར་བསྔགས་པ་བྱས་ནས་ཐིག་ལེ་བྱས་ཏེ། མཆེ་བས་ཐ་དད་པར་ཟ་བར་བྱེད་པ་དང་། ཐ་སྙད་ལས་རྒྱལ་བར་བྱེད་དོ། །སྔར་བརྗོད་པའི་ཆོ་གས་བ་སེར་སྐྱའི་མར་བླངས་ནས་ལུས་ལ་མངོན་པར་བྱུགས་ཏེ་མེར་རབ་ཏུ་འཇུག་པར་བྱེད་དོ། །སེང་ལྡེང་

ལས་བྱུང་བའི་རྡོ་རྗེ་བླངས་ཏེ། ཧཱུྃ་ཡིག་དང་ལྷན་ཅིག་པས་ཕུག་གི་སྒོར་ལྷ་མ་ཡིན་གྱི་བུ་མོ་བྱུང་བ་དང་། རབ་ཏུ་ཞུགས་པ་འཁོར་ལོའི་འཇིགས་པ་མི་འབྱུང་ངོ་། གལ་ཏེ་འཁོར་ལོ་རབ་ཏུ་འཇུག་པར་བྱེད་ན་དམ་ཚིག་དྲན་པས་ཧཱུྃ་ཡིག་གིས་ཕུང་པོས་འཁོར་ལོ་ཕྱེ་མར་བྱས་པར་

འགྱུར་རོ། །དེ་ནས་རིལ་བུའི་སྒྲུབ་པ་འབྱུང་སྟེ། རིག་པ་འཛིན་པ་རིལ་བུ་སྒྲུབ་པར་བྱེད་པས་ཙནྡན་དམར་པོ་དང་། མེ་ཏོག་ལྔ་པ་དང་། པདྨ་གེ་སར་དང་། འབྲས་སཱ་ལུ་དམར་པོའི་ཕུབ་མ་དང་། ཀཏྣི་ཀའི་མྱུ་གུ་དང་། ཎཱུ་ཀའི་ས་བོན་དང་། འབྲུ་དང་། མ་ཤའི་མྱུ་གུ་དང་།

རུ་རྟ་དང་། རྒྱ་སྤོས་དང་། ཏུ་རུ་ཥྐའི་ཏིལ་མར་རྣམས་གཅིག་ཏུ་བྱས་ཏེ། ཆ་མཉམ་པ་གཅིག་ཏུ་བྱས་ནས་རྒྱུད་མཚུངས་པའི་བ་སེར་སྐྱའི་འོ་མ་ལ་གསོ་སྦྱོང་ཅན་གྱིས་སེར་སྐྱ་དེ་ལ་རྣམ་པར་དབེན་པར་རྩ་བའི་སྔགས་སུ་བཟླས་ནས་ཁྱིམ་དུ་བཏགས་ཏེ། ལེགས་པར་

བཙགས་པའི་ཆུ་ལ་མངོན་པར་བསྔགས་ནས་ཉི་མ་བདུན་སྤྱད་པར་བྱའོ། །ཁྱིམ་དུ་འམ་རྣམ་པར་དབེན་པའི་ཕྱོགས་སུ་ཡང་རུང་སྟེ། དེ་ནས་སྲུང་བ་བྱས་པའི་བ་ལང་གི་རྫི་དེས་བ་བཞོ་བར་བྱའོ། །དེ་ནས་འོ་མ་དེ་གཙང་མའི་ཕྱོགས་རྣམ་པར་དབེན་པར་བུམ་པ་ལ་བཟླས་

པར་བྱའོ། །དེ་ནས་རིག་པ་འཛིན་པས་བྲམ་ཟེའི་བུ་མོ་ལ་སྲུབ་པར་བྱེད་དུ་གཞུག་གོ། །མར་དེས་རྫས་རྣམས་བཏགས་པ་བྱས་ཏེ་ལྕགས་གསུམ་གྱིས་ཡོངས་སུ་དཀྲིས་པ་བྱས་ནས་དེ་ཡང་བ་སེར་སྐྱའི་བ་བྱུང་ལྔར་རིལ་བུར་མཚན་མོ་གཅིག་ཏུ་བཅུག་ནས་གཞག་

เล่ม ๙๔ · หน้า 192b

པར་བྱའོ། །དེ་ནས་བཏོན་ནས་དྲིའི་ཆུ་ལས་གཞག་པར་བྱའོ། །བཀྲུས་ཏེ་པདྨའི་འདབ་མར་གི་ཝང་གིས་བྱུགས་ལ་གཞག་པར་བྱའོ། །དེ་ནས་རས་རིས་ཞལ་ནུབ་ཏུ་ཕྱོགས་པར་བཞག་ནས་སྲུང་བའི་ཆོ་ག་བྱས་པས་གཏོར་མ་དང་། མར་མེ་དང་། མཆོད་པའི་ཆོ་ག་རྒྱ་ཆེན་པོ་

བྱས་ཏེ། དེ་ནས་རིག་པ་འཛིན་པས་ལག་པ་གཉིས་ཀས་པདྨའི་འདབ་མ་རྣམས་ཀྱི་རིལ་བུ་བརྒྱད་བླངས་ཏེ་པདྨ་ཁ་སྦྱོར་དུ་བཞག་ནས་བ་སེར་སྐྱའི་མར་དེ་ཉིད་མཱ་ལ་ཏིའི་མེ་ཏོག་དང་གཅིག་ཏུ་བྱས་ནས་སྲེག་བླུགས་བདུན་སྦྱིན་སྲེག་བྱའོ། །དེ་ནས་རྩ་བའི་སྔགས་ཀྱིས་རང་

གི་ལྷ་སྤྱན་དྲང་བ་བྱས་ནས་འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་ཇི་སྲིད་དུ་དུ་བ་འཐུལ་བར་བྱེད་པ། འབར་བར་བྱེད་པ་དེ་སྲིད་དུ་བཟླས་པར་བྱའོ། །དུ་བ་འཐུལ་བཞིན་པས་མི་སྣང་བ་དང་། དབང་དུ་བྱེད་པ་དང་། ནམ་མཁའ་ལ་འགྲོ་བའི་རིག་པ་འཛིན་པར་

འགྱུར་རོ། །ཉི་མ་འཆར་ཀ་དང་མཚུངས་པའི་འོད་ཀྱིས་རིག་པ་འཛིན་པ་མཚན་ཐམས་ཅད་ཡང་དག་པར་རྫོགས་པ་རིག་པ་འཛིན་པའི་བུ་མོ་རྣམས་ཀྱིས་ལྷན་ཅིག་རྩེ་བར་བྱེད་དགའ་བར་བྱེད་དོ། །ལོ་སྟོང་ཕྲག་ལྔར་འཚོ་བར་བྱེད་དོ། །གང་གི་ཚེ་འཆི་བ་དེའི་ཚེ་རྒྱལ་རིགས་ཀྱི་ཁྱིམ་དུ་

སྐྱེ་བར་འགྱུར་རོ། །སྐྱེ་བ་དྲན་པར་ཡང་འགྱུར་རོ། །འདི་ཉིད་ཀྱིས་པདྨའི་ས་བོན་དང་། པཎྜཱི་ཏ་ཀ་རའི་ས་བོན་དང་། ཏུ་རུཥྐ་དང་། ཨ་ག་རུ་ནག་པོ་དང་། ཙནྡན་དམར་པོ་དང་། སཽ་གནྡྷི་ཀ་དང་། མཱ་ལའི་མེ་ཏོག་དང་། གུར་གུམ་དང་། ལྡོང་རོས་དང་། གི་ཝང་རྣམས་བ་སེར་སྐྱའི་

བ་བྱུང་རྣམས་གཞོན་ནུ་མ་གསོ་སྦྱོང་ཅན་དབང་པོ་མ་ཚང་བ་མ་ཡིན་པས་བཏགས་པར་བྱའོ། །དེ་ནས་རིག་པ་འཛིན་པས་པྲི་ཡང་ཀུའི་ཤིང་བླངས་ནས་ཁང་པ་བརྩེགས་པ་གཙང་མར་ཤིང་བཟོ་བ་གསོ་སྦྱོང་ཅན་བྱང་ཆུབ་ཏུ་སེམས་བསྐྱེད་པ་དབང་པོ་མ་ཚང་བ་མ་ཡིན་པའི་ལག་པས་

ཟ་མ་ཏོག་བྱེད་དུ་གཞུག་གོ། །ཟ་མ་ཏོག་དེར་རིལ་བུ་ཉི་ཤུ་རྩ་གཅིག་བཅུག་ནས་རས་རིས་ཀྱི་སྤྱན་སྔར་མཆོད་པ་རྒྱ་ཆེན་པོ་བྱས་ཏེ་གཏོར་མ་ཡང་ཕུལ་ནས་ཟ་མ་ཏོག་བླངས་ཏེ་གོས་གཙང་མས་གཡོགས་ནས་མཚན་མོ་གསུམ་དུ་སྨྱུང་བར་གནས་པ་རིག་པའི་ལྷ་རྣམས་སྤྱན་དྲང་

เล่ม ๙๔ · หน้า 193a

པར་བྱས་ནས་ཇི་སྲིད་དུ་དྲོ་བར་བྱེད་པ་དང་། དུ་བ་འཐུལ་བར་བྱེད་པ་དང་། འབར་བར་བྱེད་པ་དེ་སྲིད་དུ་བཟླས་པར་བྱའོ། །དྲོ་བཞིན་པ་ལ་དབང་དུ་བྱེད་དོ། །མི་སྣང་བར་འགྱུར་རོ། །དུ་བ་འཐུལ་བཞིན་པ་ལ་རིག་པ་འཛིན་པ་གཞོན་ནུའི་མཆོག་གཅིག་གོ། །

འབར་བར་བྱེད་པ་ནི་རིག་པ་འཛིན་པ་དྲུག་དང་ལྷན་ཅིག་འགྲོ་སྟེ། རིག་པ་འཛིན་པའི་བུ་མོ་རྣམས་ཀྱིས་ཡོངས་སུ་བསྐོར་ནས་ལྷུན་པོའི་རྩེ་མོར་རྩེ་བར་བྱེད་དགའ་བར་བྱེད་དགའ་མགུར་ཡོངས་སུ་སྤྱོད་པར་བྱེད་དོ། །ལོ་སྟོང་ཕྲག་ལྔར་འཚོ་བར་བྱེད་དོ། །གང་གི་ཚེ་འཆི་བ་དེའི་

ཚེ་ནོར་ཆེན་པོ་རྣམས་སུ་སྐྱེ་བར་འགྱུར་རོ། །སྐྱེ་བ་དྲན་པར་ཡང་འགྱུར་རོ། །འདི་ཉིད་ཀྱིས་མིག་སྨན་ལྡོང་རོས་སྒྲུབ་པར་བྱེད་དོ། །དཀར་པོའི་བཅོ་ལྔ་ལ་དཔའ་བོའི་རིན་གྱིས་ཉོས་པའི་གི་ཝང་བླངས་ནས་མཚན་མོ་གཅིག་ཏུ་སྨྱུང་བར་གནས་པས་ཉི་མ་གུང་ལ་བྲམ་ཟེའི་བུ་མོ་

གསོ་སྦྱོང་ཅན་གྱིས་པདྨའི་འདབ་མ་བ་སེར་སྐྱའི་འོ་མས་བཏགས་པར་བྱའོ། །རས་རིས་ལ་མཆོད་པ་རྒྱ་ཆེན་པོ་བྱས་ཏེ་རས་རིས་ཞལ་ནུབ་ཏུ་ཕྱོགས་པར་བཞུགས་ནས་སྲུང་བའི་ཆོ་ག་བྱས་པས་རང་གི་ལྷ་རྣམས་སྤྱན་དྲང་པར་བྱས་ཏེ། མཆོད་ཡོན་དང་གདན་ཕུལ་ནས་པྲི་ཡང་

ཀུའི་མེ་ཏོག་དང་བ་སེར་སྐྱའི་འོ་མས་སྲེག་བླུགས་བདུན་སྦྱིན་སྲེག་གྱིས་ཤིག་ལྷ་རྣམས་ཚིམ་པར་བྱེད་པ་བྱས་ནས་སླར་ཡང་ལྷ་དེ་རྣམས་མདུན་དུ་པདྨ་ཁ་སྦྱོར་དུ་རིལ་བུ་བཅུག་ནས་ཇི་སྲིད་དུ་དུ་བ་འཐུལ་བ་དང་། དྲོ་བར་བྱེད་པ་དང་། འབར་བར་བྱེད་པ་དེ་སྲིད་དུ་བཟླས་

པར་བྱའོ། །དྲོ་བཞིན་པ་ལ་ནི་ཐིག་ལེ་བྱས་པའི་སྐྱེ་བོ་ཐམས་ཅད་དགའ་བར་འགྱུར་རོ། །དུ་བ་འཐུལ་བཞིན་པ་ལ་ནི་མི་སྣང་བར་འགྱུར་རོ། །རབ་ཏུ་འབར་བས་ཐིག་ལེ་བྱས་ནས་རིག་པ་འཛིན་པ་དྲུག་གིས་ཡོངས་སུ་བསྐོར་བའི་རིག་པ་འཛིན་པའི་བུ་མོ་རྣམས་ཀྱིས་

ལྷན་ཅིག་རྩེ་བར་བྱེད་དོ། །གང་གི་ཚེ་འཆི་བ་དེའི་ཚེ་ནོར་ཆེན་པོའི་ཁྱིམ་དུ་སྐྱེ་བར་འགྱུར་རོ། །སྐྱེ་བ་དྲན་པར་ཡང་འགྱུར་རོ། །ཏིལ་གྱི་སྦྱིན་སྲེག་གྱིས་ཤིག་ཀླུ་དབང་དུ་འགྱུར་རོ། །ཉ་དང་ཤའི་སྦྱིན་སྲེག་གྱིས་ཤིག །ཡི་དགས་དབང་དུ་འགྱུར་རོ། །མཱ་ལ་

เล่ม ๙๔ · หน้า 193b

ཏིའི་མེ་ཏོག་གི་སྦྱིན་སྲེག་བྱེད་ན་ལྷ་མོ་ཆུས་བྱུང་དབང་དུ་འགྱུར་རོ། །པྲི་ཡང་ཀུའི་མེ་ཏོག་གི་སྦྱིན་སྲེག་གྱིས་ཤིག་ལྷ་དབང་དུ་འགྱུར་རོ། །སཽ་གནྡྷི་ཀའི་སྦྱིན་སྲེག་བྱེད་ན་གནོད་སྦྱིན་དབང་དུ་འགྱུར་རོ། །ཡུངས་ཀར་དཀར་པོ་ལ་ལན་བདུན་མངོན་པར་བསྔགས་པས་

གང་གི་སྤྱི་བོར་བྱིན་པ་དེ་དབང་དུ་འགྱུར་རོ། །གདོན་གྱིས་ཟིན་པ་དང་། རིམས་ཀྱིས་བཏབ་པ་དང་། སྲིན་པོས་ཟིན་པའི་མདུན་དུ་སྐེ་ཚེ་ལ་ལན་བདུན་མངོན་པར་བསྔགས་པས་སྦྱིན་སྲེག་བྱེད་ཅིང་དེའི་ཐལ་བས་སྣུན་པར་བྱེད་ན་གྲོལ་བར་འགྱུར་རོ། །རྟ་

མགྲིན་རྒྱལ་པོའི་ཆོ་ག་ཞིབ་མོ་འདི་ཡང་རྫོགས་སོ།། །།འཕགས་པ་སྤྱན་རས་གཟིགས་དབང་ཕྱུག་གི་མཐུ་བསྒྱིངས་པ་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་དུ་འགྱུར་བ་དེ་འབྱུང་སྟེ། རིག་པའི་རྒྱལ་པོ་གང་ལ་ཆོ་ག་མེད་པ་དེ་

རྣམས་ཆོ་ག་འདི་ཉིད་ཀྱིས་སྒྲུབ་པ་དང་རྟོག་པའི་རྒྱལ་པོ་དེ་ཉིད་ཀྱིས་ཐམས་ཅད་བྱས་ཏེ་མདོར་ན་མཚམས་མེད་པ་ལྔ་བྱས་པ་ཡང་ལན་གསུམ་གྱིས་འགྲུབ་པར་འགྱུར་རོ། །རིགས་ཀྱི་བུ་གང་དད་པ་དང་ལྡན་པ་སེར་སྣ་མེད་པ་གཡོ་མེད་པ། ཕྲ་མ་མེད་པ།

རིག་པའི་རྒྱལ་པོ་ལ་གུས་པའི་གང་རྟོག་པ་པ་ལ་མཆོད་པར་བྱེད་པ་དང་། ཀློག་པར་བྱེད་པ་དང་། ཁ་ཏོན་བྱེད་པ་དང་། གཞན་ལ་སྟོད་པར་བྱེད་པ་དང་། སེར་སྣ་མེད་པར་གྱུར་ནས་སྐྱེ་བ་དྲན་པར་འགྱུར་རོ། །དགེ་བའི་བཤེས་གཉེན་གྱིས་ཡོངས་

སུ་ཟིན་པ་དང་། སངས་རྒྱས་དང་། ཆོས་དང་། དགེ་འདུན་ལ་མངོན་པར་དད་པའོ། །རལ་པ་གྱེན་བརྫེས་ཀྱི་རྒྱུད་ཕྱི་མར་རྟ་མགྲིན་རྒྱལ་པོའི་ཆོ་ག་ཞིབ་མོའོ། །སླར་ཡང་དུས་དེ་ནས་ཤར་གྱི་ཕྱོགས་ཀྱི་ཆ་ནས་མངོན་པར་དགའ་བའི་འཇིག་རྟེན་

གྱི་ཁམས་ན་སྒྲོལ་མ་མི་འཁྲུགས་པ་ཞེས་བྱ་བའི་དེ་བཞིན་གཤེགས་པ་གཞལ་བར་བྱ་བ་དང་། བགྲང་བར་བྱ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས། སངས་རྒྱས་ཐམས་ཅད་ཀྱི་ཡུལ་གྱི་རྣམ་པར་འཕྲུལ་པ་བྱིན་གྱིས་

เล่ม ๙๔ · หน้า 194a

བརླབས་པའི་སྟོབས་ཀྱིས་སྐད་ཅིག་གཅིག་གིས་སངས་རྒྱས་ཀྱི་ཞིང་འདིར་གསང་སྔགས་ཐོབ་པ་གང་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་བཞུགས་པ་གླིང་བཞི་པ་བར་མ་འདི་ཉིད་དུ་འོངས་ནས་

ཇི་ལྟར་བྱུང་བའི་པདྨའི་གདན་ལ་གནས་པ་དེ་རྣམས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་འཕེལ་བའི་སྟོབས་དང་སྒྲུབ་པས་པདྨའི་གདན་དེ་ལ་བཞུགས་སོ། །དེ་ལྟ་བུ་ལ་སོགས་པ་གཞལ་དུ་མེད་ཅིང་གྲངས་མེད་པའི་སངས་རྒྱས་ཀྱི་ཞིང་གི་རྡུལ་

ཕྲ་རབ་དང་མཉམ་པའི་སངས་རྒྱས་བཅོམ་ལྡན་འདས་ཇི་སྙེད་བཞུགས་པ་དེ་རྣམས་སྐད་ཅིག་ཐང་ཅིག་ཡུད་ཙམ་གྱིས་གླིང་བཞི་པ་བར་མའི་སངས་རྒྱས་ཀྱི་ཞིང་དུའོ། །དེ་ནས་མི་འཁྲུགས་པ་ལ་སོགས་པའི་དེ་བཞིན་གཤེགས་པ་དེ་རྣམས་རྟོག་པའི་རྒྱལ་པོ་ཆེན་པོའི་རྒྱུད་

ཕྱི་མ་འདིར་བཅོམ་ལྡན་འདས་སྤྱན་རས་གཟིགས་དབང་ཕྱུག་གི་སྔགས་ཀྱིས་སྤྱད་པ་ལ་སོ་སོར་རྗེས་སུ་རང་བའི་ཆེད་དང་། བསྲུང་བ་དང་། བསྐྱབ་པ་དང་། སྔ་བའི་ཆེད་དང་། ལས་ཀྱི་སྒྲིབ་པ་ཐམས་ཅད་ཟད་པའི་ཆེད་དང་། བཅོམ་ལྡན་འདས་མ་

འཕགས་མ་སྒྲོལ་མའི་དངོས་གྲུབ་ཀྱི་ཆེད་དུ་བསོད་ནམས་ཀྱི་སྟོབས་ཀྱིས་བསྒྲུབ་པའི་གཟུངས་ཀྱི་སྔགས་ཀྱི་ཚིག་རྣམས་གསུངས་པ། ན་མོ་རཏྣ་ཏྲ་ཡཱ་ཡ། ན་མ་ཨཀྵོ་བྷྱཱ་ཡ། ཏ་ཐཱ་ག་ཏཱ་ཡ། ཨཪྷ་ཏེ། སམྱཀྶཾ་བུདྡྷཱ་ཡ། ཏདྱ་ཐཱ། ཀཾ་ཀ་ནི་ཀཾ་ཀ་ནི།

རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲཱ་ས་ནི་ཏྲཱ་ས་ནི། པྲ་ཏི་ཧ་ན་པྲ་ཏི་ཧ་ན། སརྦྦ་ཀརྨྨ་པ་རཾ་པ་རཱ་ཎི་སྭཱ་ཧཱ། ན་མོ་རཏྣ་ཏྲ་ཡཱ་ཡ། ན་མཤྩཎྜ་སཱུརྱཱ་ཡ། ཏ་ཐཱ་ག་ཏཱ་ཡ། ཨཪྷ་ཏེ། སམྱཀྶཾ་བུདྡྷཱ་ཡ། ཏདྱ་ཐཱ། ཙནྡྲེ། མ་ཏི། ཙནྡྲེ། ཀར་ཎེ། མི་

ལཱ་མི་ལཱ། བུདྡྷ་ཨ་དྷིཥྛི་ཏེ། སི་ལི་སི་ལི། དྷརྨྨ་ཨ་དྷིཥྛི་ཏེ། ཀི་ལི་ཀི་ལི། སཾ་གྷ་ཨ་དྷིཥྛི་ཏེ་སྭཱ་ཧཱ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་དེ་བཞིན་གཤེགས་པ་འདིའི་མཚན་འཛིན་པར་འགྱུར་བ་དང་། རྟག་ཏུ་རྒྱུན་མི་འཆད་པ་བསྐལ་

เล่ม ๙๔ · หน้า 194b

པར་བརྗོད་དེ་ཡིད་ལ་བྱེད་པར་འགྱུར་བ་དེ་རྟག་ཏུ་བསྐལ་པ་སྟོང་ཕྲག་བཞི་བཅུར་འཚོ་བར་བྱེད་དོ། །སྐྱེ་བ་དྲན་པར་འགྱུར་རོ། །བྱང་ཆུབ་ཀྱི་སེམས་མི་བརྗེད་པ་ཐོབ་པར་འགྱུར་རོ། །ན་མོ་རཏྣ་ཏྲ་ཡཱ་ཡ། ན་མཿཔུཥྤེ་ཀེ་ཏ་བེ། ཏ་ཐཱ་ག་ཏཱ་ཡ། ཨརྷ་ཏེ།

སམྱཀྶཾ་བུདྡྷཱ་ཡ། ཏདྱ་ཐཱ། པུཥྤེ་པུཥྤེ་པུཥྤེ་པུཥྤེ་པུཥྤེ་པུཥྤེ་སུ་པུཥྤེ་སྭཱ་ཧཱ། གཟུངས་འདི་མེ་ཏོག་ལ་ལན་ཉི་ཤུ་རྩ་གཅིག་ཡོངས་སུ་བཟླས་ཏེ་ཆོ་ག་ཇི་ལྟ་བ་དང་། འདུ་ཤེས་ཇི་ལྟ་བ་བཞིན་དུ་བྱས་པས་དེ་བཞིན་གཤེགས་པའི་མཆོད་རྟེན་ལ་རབ་ཏུ་གཏོར་བར་

བྱའོ། །དེའི་མངོན་པར་འདོད་པ་ཐམས་ཅད་ཡོངས་སུ་རྫོགས་པ་དང་། ལས་ཀྱི་སྒྲིབ་པ་ཐམས་ཅད་ཟད་པར་འགྱུར་རོ། །ན་མོ་རཏྣ་ཏྲ་ཡཱ་ཡ། ན་མཿསརྦ་ནི་བར་ཎ། བིཥྐཾ་བྷི་ནེ་ཏ་ཐཱ་ག་ཏཱ་ཡ། ཨརྷ་ཏེ། སམྱཀྶཾ་བུདྡྷཱ་ཡ། ཏདྱ་ཐཱ། སྥུ་ཊ་སྥུ་ཊ།

སྥུ་ཊནྡུ་མེ། སརྦ་པཱ་པཱ་ནི། སརྦ་བུད་དྷ་ས་ཏྱེ། དྷརྨ་ས་ཏྱེ་ན། སཾ་གྷ་ས་ཏྱེ་ན། ཨིནྡྲ་ས་ཏྱེ་ན། བ་རུ་ཎ་ས་ཏྱེ་ན། ཡེ་ལོ་ཀ་ས་ཏྱེ་ན། བིར་ཎ་ས་ཏྱེ་ན། ས་ཏྱ་ས་ཙ་ནེ་ན་སྥུ་ཊནྟུ། སརྦ་པཱ་པཱ་ནི་སརྦ་བུད་དྷ་ཨ་དྷིཥྛཱ་ནེ་ན་སྭཱ་ཧཱ། མཚན་མོ་ཉི་ཤུ་

རྩ་གཅིག་གིས་ལས་ཐམས་ཅད་ཟད་པར་བྱེད་དོ། །ཉིན་མོ་དང་མཚན་མོ་གསུམ་བྱས་ནས་དྲུག་ཏུ་རབ་ཏུ་སྦྱོར་བས་མཚམས་མེད་པ་ངེས་པར་ཟད་པར་བྱེད་དོ། །ན་མོ་རཏྣ་ཏྲ་ཡཱ་ཡ། ན་མོ་བཻ་རོ་ཙ་ནཱ་ཡ། ཏ་ཐཱ་ག་ཏཱ་ཡ། ཨརྷ་ཏེ། སམྱཀྶཾ་བུད་དྷཱ་ཡ། ན་མ་ཨཱ་

ཀཱ་ཤ་གརྦྷཱ་ཡ། བོ་དྷི་ས་ཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཀ་ལ་ཀ་ལ། ཀི་ལི་ཀི་ལི། ཧུ་རུ་ཧུ་རུ། བཻ་རོ་ཙ་ན། ར་སྨི་སཉྩོ་དི་དེ། ཨཱ་གཙྪ་ཨཱརྱ་ཨཱ་ཀཱ་ཤ་གརྦྷ་མ་ཧཱ་ཀཱ་རུ་ཎི་ཀ །པཱུ་རཱ་ཡ། ཤུ་བཾ། དརྴ་ཡ། བུད་དྷ་པི་ཥ་ཡ་ར་ཙ་ར་ཙ་ར།

ཙི་རི་ཙི་རི་སྭཱ་ཧཱ། འདི་ནི་རྣམ་པར་སྣང་མཛད་ཀྱི་སྙིང་པོ་ཞེས་བྱ་བའི་གཟུངས་བཀླགས་པས་འགྲུབ་པ་སྟེ། སྐྲག་པ་དང་། རྒྱན་པོ་དང་། དུག་དང་། དུག་བརྟན་པོ་དང་། བྱད་སྟེམས་དང་། རྒྱལ་པོ་དང་། ཆོམ་རྐུན་ལ་སོགས་པ་རྣམས་གནོན་པར་བྱེད་དོ། །གང་དུ་བྲིས་

เล่ม ๙๔ · หน้า 195a

པ་གནས་པའམ། མགོ་དང་ལག་པས་བཅང་བར་བྱེད་པ་དེ་ལ་ཉེ་བར་འཚེ་བ་དང་། ནད་འགོ་བ་ཐམས་ཅད་མི་འབྱུང་ངོ་། །འདི་རྟག་ཏུ་བཟླས་པས་དྲི་མ་མེད་པའི་ཏིང་ངེ་འཛིན་སོ་སོར་རྙེད་དོ། །ན་མེ་རཏྣ་ཏྲ་ཡཱ་ཡ། ན་མོ་བ་རོ་ཙ་ནཱ་ཡ། ཏ་ཐཱ་ག་ཏཱ་ཡ། ན་མ་

ཨཱ་ཀཱ་ཤ་གརྦྷཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། བཛྲམྦུ་བཛྲམྦུ། བཛྲ་དྷྭ་ཛེ། ཤཱུ་ནྱ་ཏཱ་པྲ་དེ་ཤེ། བཻ་རོ་ཙ་ན་གརྦྷེ་སཉྩ་ཨིནྡྲི་ཡ་ཤོ་དྷ་ནེ་སྭཱ་ཧཱ། ཆོ་ག་ནི་རྟག་ཏུ་བཟླས་པས་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་གནས་སོ་སོར་རྙེད་དོ། །བདུད་

ཐམས་ཅད་དང་། ཕྱིར་རྒོལ་བ་ཐམས་ཅད་དང་། དགྲ་ཐམས་ཅད་དང་བགེགས་དང་ལོག་པར་འདྲེན་པ་ཐམས་ཅད་ཀྱིས་ཐུབ་དཀའ་བར་འགྱུར་རོ། །དེ་བཞིན་དུ་གང་བྲིས་ནས་ལག་ཏུ་བཅང་བར་བྱེད་པ་དེ་ཡང་ཡོན་ཏན་འདི་རྣམས་སོ། །ན་མོ་རཏྣ་ཏྲ་ཡཱ་ཡ། ན་མཿསརྦ་

དུརྒ་ཏི་པ་རི་ཤོ་དྷཱ་ཡ། ཏ་ཐཱ་ག་ཏཱ་ཡ། ཨརྷ་ཏེ། སམྱཀྶཾ་བུད་དྷཱ་ཡ། ཏདྱ་ཐཱ། ཤོ་དྷ་ནེ་ཤོ་དྷ་ནེ། སརྦ་པཱ་པཾ་བི་ཤོ་དྷ་ནེ། ཤུདྡྷེ་བི་ཤུདྡྷེ་སརྦ་ཀརྨྨ་ཨཱ་བ་ར་ཎི་བི་ཤུདྡྷེ་སྭཱ་ཧཱ། གཟུངས་འདིའི་ཆོ་ག་ནི་འདི་ཡིན་ཏེ། རྟག་ཏུ་བཟླས་པས་སྡིག་པ་ཐམས་ཅད་གྲོལ་བར་འགྱུར་རོ། །སངས་རྒྱས་

ཀྱི་བྱིན་གྱིས་བརླབས་པས་སྐྱེ་བ་བཞར་སྐྱེ་བ་དྲན་པར་འགྱུར་རོ། །ཇི་སྲིད་བྱང་ཆུབ་ཀྱི་སྙིང་པོ་ལ་མཐར་ཐུག་པའི་བར་དུ་དགེ་བའི་རྩ་བ་ཡོངས་སུ་ཟད་པར་འགྲོ་བར་མི་འགྱུར་རོ། །ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝ་ཏི་ཨཱརྱ་པྲཛྙཱ་པཱ་ར་མི་ཏཱ་ཡཻ། ཨོྃ་ཤྲུ་ཏི། སྨྲྀ་ཏི། བི་ཛ་ཡེ།

སྭཱ་ཧཱ། འདི་གཟུང་བས་ཤེས་རབ་ཀྱི་ཕ་རོལ་ཏུ་ཕྱིན་པ་བཟུང་བར་འགྱུར། འདིའི་ཆོ་ག་ནི་འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བཞུགས་ནས་དེའི་མདུན་དུ་ས་ལ་མ་ལྷུང་བའི་བ་སེར་སྐྱའི་བ་བྱུང་གིས་དཀྱིལ་འཁོར་ཉེ་བར་བྱུགས་ཏེ་ཉིན་མཚན་དུ་

སྨྱུང་བར་གནས་པས་གནས་དེར་མཆོད་པ་རྒྱ་ཆེན་པོ་བྱས་ནས་བའི་མར་གྱི་མར་མེ་ཕུལ་ཏེ་བྱ་བ་ཡིད་ལ་དྲན་པར་གྱུར་པས་གདོན་པར་བྱའོ། །དེ་ཉིད་དུ་ཀུ་ཤ་བཏིང་ནས་གསེར་གྱི་ཁ་དོག་གི་དེ་བཞིན་གཤེགས་པའི་སྐུ་མཐོང་ངོ་། །དེ་འདི་ལ་ཡང་དག་པར་ལྟ་བ་བཞིན་སྟོན་

เล่ม ๙๔ · หน้า 195b

པར་བྱེད་དོ། །ཐོ་རངས་སམ། མཚན་མོ་ཉིད་དུ་ཡང་རུང་སྟེ། ཚིག་ཏུ་གདོན་པར་བྱའོ། །སངས་རྒྱས་རྗེས་སུ་དྲན་པ་བསྒོམ་པར་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཛ་ཡེ་ཛ་ཡེ། མ་ཧཱ་ཛ་ཡེ།

ཛ་ཡ་བཱ་ཧཱི་ནི། ཛ་ལ་ཨུཏྟ་རེ། ཀ་ལ་ཀ་ལ། མ་ལ་མ་ལ། ཙ་ལ་ཙ་ལ། ཧུ་ལུ་ཧུ་ལུ། ཀྵི་ཎི་ཀྵི་ཎི། སརྦ་ཀརྨྨ་ཨཱ་བ་ར་ཎཱ་ནི། མེ་བི་ཤྭ་དྷཱ་ཡ། བྷ་ག་བ་ཏེ། ས་ཧ་སྲ། ཨཱ་བརྟ། སརྦྦ་བུད་དྷ་ཨ་བ་ལོ་ཀི་ཏེ། ཙཀྵུ། ཤྲོ་ཏྲ། གྷྲཱ་ཎ། ཛི་ཧྭཱ། ཀཱ་ཡ། མ་ནོ་བིཛྙཱ་ན། ཤོ་དྷ་ནི། སུ་རུ་སུ་རུ། པྲ་སུ་ར་པྲ་སུ་

ར། སརྦྦ་བུད་དྷ། ཨ་དྷིཥྛི་ཏེ་སྭཱ་ཧཱ། དྷརྨ་དྷཱ་ཏུ་གརྦྷེ་སྭཱ་ཧཱ། ཨ་བྷཱ་བ། སརྦ་དྷརྨ་ཨ་བི་བྷེ་ད་ནི་སྭཱ་ཧཱ། གཟུངས་འདིའི་ཆོ་ག་ནི་འདི་ཡིན་ཏེ། མཚན་མོ་གཅིག་ཏུ་དྲན་པར་བྱས་ནས་རྟག་ཏུ་བཟླས་པས་བསྐལ་པ་སྟོང་དུ་བསགས་པའི་སྒྲིབ་པ་ཡང་ཟད་པར་འགྱུར་རོ། །སངས་རྒྱས་སྟོང་

གིས་ཉེ་བར་བསགས་པའི་དགེ་བའི་རྩ་བར་འགྱུར་རོ། །བསྐལ་པ་སྟོང་གི་འཁོར་བ་ལས་ཕྱིར་ཕྱོགས་པར་བྱེད་དོ། །སྐྱེ་བ་བརྗེས་ཏེ་ལྷ་རྣམས་སུ་སྐྱེ་བར་འགྱུར་རོ། །མིའི་རྒྱལ་སྲིད་དམ་ཡོངས་སུ་དག་པའི་སངས་རྒྱས་ཀྱི་ཞིང་རྣམས་སུ་སྐྱེ་བར་འགྱུར་རོ། །ཉི་མ་ཉི་ཤུ་རྩ་གཅིག་

བཟླས་པས་ཇི་ལྟར་འདོད་པའི་རྨི་ལམ་མཐོང་བར་བྱེད་དོ། །འདི་ནི་སྟོང་འཁྱིལ་བ་ཞེས་བྱ་བའི་གཟུངས་ཡིན་ཏེ། ཕན་ཡོན་ཆེན་པོ་བྱང་ཆུབ་སེམས་དཔའ་ཡང་དག་པར་བརྗོད་པའི་མདོ་བཀླག་པར་བྱ། རྟག་ཏུ་ཡིད་ལ་བྱའོ། །ན་མོ་རཏྣ་ཏྲ་ཡཱ་ཡ། ན་མོ་བུད་དྷཱ་ཡ། ན་མོ་དྷརྨཱ་

ཡ། ན་མ་སྃ་གྷཱ་ཡ། ན་མཿཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། སྭེ་ཏཱ་ཡ། སྭེ་ཏཱ་བྷུ་ཛཱ་ཡ། དྭཱ་ད་ཤ་བྷུ་ཛཱ་ཡ། ཨེ་ཧི་ཨེ་ཧི། བྷ་ག་ཝཱ་ན། ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བུད་དྷ་བུད་དྷ་བུད་དྷ། ཨཱརྱ་མ་ནུ་སྨ་ར། བུད་དྷ་མ་ནུ་སྨ་ར། དྷརྨྨ་སཏྱ་མ་ནུ་སྨ་ར།

སཾ་གྷ་སཏྱ་མ་ནུ་སྨ་ར། ཏདྱ་ཐཱ། ན་ཏུ་ན་ཏུ། ཀི་ཎི་ཀི་ཎི། ཏུ་རུ་ཏུ་རུ། བྷྱོ་བྷྱོ། ཀུ་རུ་ཀུ་རུ། སརྦ་སརྦཾ། མེ་སཱ་དྷ་ཡཾ་ཧི་རི་མི་རི་ཊི་ཊི། ནི་ནི། མ་མ་ས་བ་རི་ཝཱ་ར་སྱ། སི་དྷྱནྟུ། མནྟྲ་པ་དཱ་སྭཱ་ཧཱ། དེ་ནས་དེ་བཞིན་གཤེགས་པ་འོད་དཔག་མེད་ཀྱིས་གཟུངས་འདི་གསུངས་ནས་བྱང་ཆུབ་

เล่ม ๙๔ · หน้า 196a

སེམས་དཔའ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་དཔའ་རྣམས་ཀྱི་རྩ་བའི་རིག་པའི་གཟུངས་འདི་ནི་བཀླགས་པས་འགྲུབ་པ། མ་བསྒྲུབས་པ་ཡང་ལས་རྣམས་འབྱུང་བ་སྟེ། ཟླ་བ་ཉ་ལ་གསོ་སྦྱོང་ཅན་གྱིས་ཉིན་

མཚན་དུ་སྨྱུང་བར་གནས་ཡང་རུང་ངོ་། །སྤྱན་རས་གཟིགས་དབང་ཕྱུག་གི་སྤྱན་སྔར་བྱང་ཆུབ་ཀྱི་ཤིང་གིས་མེ་རབ་ཏུ་སྦར་ནས་ཏིལ་ནག་པོ་སྟོང་ཕྲག་བརྒྱད་སྦྱིན་སྲེག་གྱིས་ཤིག །དེ་བཞིན་དུ་ཉི་མ་བདུན་དུ་ལན་རེའམ་ཐུན་གསུམ་དུ་བྱས་ན་རྒྱལ་པོའམ། རྒྱལ་པོའི་བློན་པོ་

དབང་དུ་འགྱུར་རོ། །མཚན་མོ་གསུམ་དུ་སྨྱུང་བར་གནས་པས་ཡུངས་ཀར་དཀར་པོ་སྟོང་ཕྲག་བརྒྱད་སྦྱིན་སྲེག་གྱིས་ཤིག །ཕྱོགས་སམ་ཟླ་བར་ཡུལ་གྱིས་དོན་དུ་གྲོག་མཁར་བདུན་གྱི་རྩེ་མོར་སོང་ནས་རེ་རེ་འཛེགས་ཏེ། ཉི་མ་སྔ་དྲོ་ནས་ཇི་སྲིད་ཕྱི་དྲོའི་བར་བཟླས་པར་

བྱའོ། །མཚམས་མེད་པ་གྲོལ་བར་བྱེད་དོ། །བུ་འདོད་ན་འོ་མའི་སྦྱིན་སྲེག་གྱིས་ཤིག །མཚན་ཐམས་ཅད་ཡང་དག་པར་རྫོགས་པའི་ཁྱེའུ་འབྱུང་ངོ་། །གཟུངས་འདི་ཉིད་ཀྱིས་བདག་ཉིད་སྲུང་བ་དང་། གནོད་པས་གདོན་འབྲོས་པར་བྱེད་པ་ལ་བྱ་བས་པས་སམ། རྫས་

སུ་བཅིངས་པས་ཀྱང་རུང་ངོ་། །ཡང་ན་ཆོམ་རྐུན་ཐམས་ཅད་དབང་དུ་འགྱུར་རོ། །རྟག་པར་རྒྱུན་དུ་ཟློས་བཞིན་པ་ནི་ནོར་ཉེ་བར་བསགས་པར་འགྱུར་ཞིང་། དགྲ་རྣམས་ལས་ཀྱང་རྒྱལ་བར་འགྱུར་རོ། །དེ་ནས་དེ་བཞིན་གཤེགས་པ་འོད་དཔག་མེད་ཀྱིས་སླར་ཡང་རལ་

པ་གྱེན་བརྫས་ཀྱི་རྒྱུད་ཕྱི་མར་གཟུངས་ཀྱི་གསང་སྔགས་ཀྱི་ཚིག་རྣམས་གསུངས་པ། ན་མོ་བུ་ད་དྷཱ་ཡ། ན་མོ་དྷརྨཱ་ཡ། ན་མཿསཾ་གྷཱ་ཡ། ཏདྱ་ཐཱ། ཧུ་ལུ་ཧུ་ལུ། བི་མ་ལེ། ནིར་མ་ལེ། ཤོ་དྷ་ནི། ཀཱ་ཙ་ཏི། མིར་པ་ཊ་ལ། སརྦྦ་ནི་རོ་གཿ། བི་ན་ཤ་ནིཙྪ་ད་ནི། ཙྪ་ད་ནི། བཱ་ཏ་ས་

མུ་ཏྛི་ཏཾ་བཱ་ཏ་ས་མུ་ཏིཥྛི་ཏཾ། ཤླེཥྨ། སནྣི་པཱ་ཏ་ས་མུཏྛི་ཏཾ་སརྦྦ་ནཱ་ཤཱ་ནི། ཨཱརྱ་ཨ་བ་ལོ་ཀི་ཏེ་ཤྭ་ར་སྱ། ཏེ་ཛ་ན་ན་སྱནྟུ། ཨཀྵི་རོ་གཿསྭཱ་ཧཱ། གཟུངས་འདིའི་ཆོ་ག་ནི་འདི་ཡིན་ཏེ། བཅོམ་ལྡན་འདས་ཀྱི་སྤྱན་སྔར་དཀྱིལ་འཁོར་བྱས་ནས་མི་སྣང་བར་གྱུར་ནས་ལག་པའམ་

เล่ม ๙๔ · หน้า 196b

ཀུ་ཤ་ལ་བརྒྱད་བརྒྱར་ཡོངས་སུ་བསྔགས་ནས་མིག་ལ་བྱབ་པར་བྱའོ། །ལོང་བས་ཀྱང་མིག་སོ་སོར་རྙེད་དོ། །ཟླ་བ་དྲུག་གིས་རྟག་ཏུ་དྲན་པར་བྱེད་ན། མིག་ནད་འབྱུང་བར་མི་འགྱུར་རོ། །དེ་ནས་དེ་བཞིན་གཤེགས་པ་ཤཱཀྱ་ཐུབ་པས་བྱང་ཆུབ་སེམས་དཔའ་སྤྱན་རས་གཟིགས་

དབང་ཕྱུག་དང་གྲུ་འཛིན་ན་གནས་པའི་འཁོར་ཆེན་པོ་ལ་ལེགས་པར་གཟིགས་ནས་བྱང་ཆུབ་སེམས་དཔའ་མཐུ་ཆེན་ཐོབ་ལ་བཀའ་སྩལ་པ། རིགས་ཀྱི་བུ་གྲུབ་པའི་གཟུངས་ཀྱི་སྔགས་ཀྱི་ཚིག་འདི་ནི་རྟོག་པའི་རྒྱལ་པོས་རྒྱུད་ཕྱི་མ་འདིར་བརྗོད་པ་སྔོན་གྱི་སངས་རྒྱས་ཀྱིས་གསུངས་

པ་སྟེ། བཅོམ་ལྡན་འདས་མ་འཕགས་མ་སྒྲོལ་མའི་སྒྲུབ་པ་པོས་རྟག་ཏུ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་ཆོས་གོས་ཀྱི་རྣ་བའམ། གོས་ཀྱི་མཐའ་ལ་མདུད་པ་བྱའོ། །གང་ལ་ལ་ཞིག་བཅོམ་ལྡན་

འདས་མ་སྒྲོལ་མ་སྒྲུབ་པར་བྱེད་པ་དེས་ལན་ཅིག་བརྗོད་ནས་གསུམ་གྱིས་གོས་ལ་བགོས་པས་དགྲ་དབང་དུ་ཉེ་བར་འགྲོ་བར་འདོད་པ་དང་། གདུག་པ་ཐམས་ཅད་རིངས་པར་འདོད་པ་དང་། དངོས་གྲུབ་ཐམས་ཅད་རྟོགས་པར་འདོད་པ་དང་། དོན་ཐམས་

ཅད་ཡོངས་སུ་རྫོགས་པར་བྱེད་པར་འདོད་པ་དང་། རྒྱལ་པོའི་ཕོ་བྲང་དུ་འཇུག་པར་འདོད་པ་དང་། མི་མཛའ་བ་རྣམ་པར་འཇོམས་པར་འདོད་པ་དེ་ཅིའི་རྒྱུ་དང་། དེ་བཞིན་དུ་བྱང་ཆུབ་སེམས་དཔའི་རིགས་ཅན་དོན་ཐམས་ཅད་བྱ་བ་ལ་རབ་ཏུ་འཇུག་

པ་འཛིན་པར་བྱེད་དོ། །དེ་ལ་ཡིད་ལ་གྲུབ་པའི་གཟུངས་ཀྱི་སྔགས་ཀྱི་ཚིག་རྣམས་ནི། ན་མོ་རཏྣ་ཏྲ་ཡཱ་ཡ། ན་མོ་ཨ་མི་ཏཱ་བྷཱ་ཡ། ཏ་ཐཱ་ག་ཏཱ་ཡ། ཨརྷ་ཏེ། སམྱཀྶཾ་བུད་དྷཱ་ཡ། ན་མཿ ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། ན་མ་

ཨཱརྱ་མ་ཧཱ་སྠཱ་མ་པྲཔྟཱ་ཡ། བོ་དྷི་སཏྭཱ། བཱ་མ་ནེ་ཏྲཱནྣ་མ་སྱཱ་མི་ཏཱནྣ་མཿ། སྱཱ་མི་བཱ་མ་ནེ། པི་ཤཱ་ཙི་པརྞ་ཤ་ཝ་རི། པརྞ་ཤ་ཝ་རི། པི་ཤཱ་ཙ། བྷ་ག་བ་ཏི། པཱ་ཤ་ཧ་སྟ། པཪྴུ་དྷ་ར་ཎི། ཡཱ་ནི། ཀཱ་ནི། ཚྪ་ཏ། བྷ་ཡ་ནི། ཨུཏྤ་ཏྱནྟེ། ཡཀྵ་ཤྩ། རི་ཏཱ་ཡོ། ཡཱ་ཀཤྩི་ཏ། མ་ཧཱ་

เล่ม ๙๔ · หน้า 197a

བཱ་དྱོ། ཡེ་ཀོ་ཙི་ཏ། ཨུ་པ་དྲ་བཱི། ཡེ་ཀེ་ཙི་ཏ། ཨཱརྱ་བཀྴ། ཡེ་ཀེ་ཙི་ཏ། ཨུ་པ་སརྒ། ཨ་ཨུ་བ་སརྒ། སམྦྷ་དྷ་བ། ཨཏྤ་ཏྱནྟེ། སརྦྦ་ཎི་ཏཱ་ནེ། སརྦྦཱཾ་སྟཾ། སརྦེ་ཏེ། བཱ་ལ་ཏ་དྷ་ན། ཨུཏྤ་ཏྱནྟ་ནེ། པཎྜི་ཏ། ཨ་ནེ་ན། ས་ཏྱེ་ན། སཏྱ་བཱ་ཀེ་ན། ཨི་བྷིཿཔཎྜི་ཏ། ཨ་དྷིཥྛ་ཏཻ་རྨ་ནྟྲ་བ་རཻ་རྨ་མ་རཀྵིཾ་ཀུ་རུ་པ་རི་ཏྲ་ཎཾ་ཀུ་རུ་པ་རི་གྲ་

ཧཾ་ཀུ་རུ་པ་རི་པཱ་ལ་ནཾ་ཀུ་རུ་སྭ་སྟི། ཡ་ནཾ་ཀུ་རུ་དཎྜ་པ་རི་ཧ་རཾ། ཀུ་རུ་བི་ཥ་པ་རི་ཧ་རཾ་ཀུ་རུ། བི་ཥདྦུ་ཥ་ཎཾ་ཀུ་རུ། བི་ཥ་ནཱ་ཤ་ནཾ་ཀུ་རུ། ཏདྱ་ཐཱ། ཨ་མྲི་ཏེ་ཨ་སྭ་ཏརྒེ་མཱ། མ་ར་མ་ར་ས་མ། པྲ་ས་མ། ཨུ་པ་ས་མ་ཏུ་ནུ་བི་ཏུ་ནུ། ཏུ་ལེ་ཏུ་མུ་ལེ། མ་མ་སརྦ་སཏྭཱ་ནཱཉྩ་རཀྵཾ་ཀུ་རུ་སྭཱ་ཧཱ། འདི་ནི་རི་ཁྲོད་ལོ་མ་ཅན་ཞེས་བྱ་བའི་

གཟུངས་ཏེ་བཟླས་པ་དང་། སྦྱིན་སྲེག་གིས་ནད་ཐམས་ཅད་དང་། གདོན་ཐམས་ཅད་དང་། ཉེ་བར་འཚེ་བ་ཐམས་ཅད་འཇོམས་པར་བྱེད་དོ། །འདི་ལྟ་སྟེ་མི་རྣམས་ལ་ཡམས་ཀྱིས་ཉེ་བར་འཚེ་བ་ལ་ཤིང་ཤ་མའི་ཡམ་ཤིང་གི་མེ་རབ་ཏུ་སྦར་ནས་གང་བའི་སྲེག་བླུགས་སྟོང་ཕྲག་བརྒྱད་ཐུན་

གསུམ་དུ་ཇི་ལྟར་ནུས་པས་སྦྱིན་སྲེག་གྱིས་ཤིག །བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་བྱས་ནས་རི་ཁྲོད་ལོ་མ་ཅན་ལ་ཡང་བྱའོ། །དེ་བཞིན་ལས་བྱས་པས་ཉེ་བར་འཚེ་བ་ཐམས་ཅད་འཇོམས་པར་བྱེད་དོ། །བ་ལང་གི་ཉེ་བར་འཚེ་བ་ལ་བ་ལང་གི་སྤུ་དང་རུས་

པས་སྦྱིན་སྲེག་བྱ་སྟེ་ཞི་བར་འགྱུར་རོ། །མ་ཧེའི་ནད་ཐམས་ཅད་ལ་སྐྲ་དང་རུས་པས་ཉི་མ་བདུན་དུ་སྦྱིན་སྲེག་བྱ་སྟེ། ཞི་བར་འགྱུར་རོ། །རྒྱུ་སྐར་གྱིས་གནོད་པ་ལ་ཉི་མ་བདུན་དུ་འོ་མའི་སྦྱིན་སྲེག་བྱའོ། །དངོས་གྲུབ་ཐམས་ཅད་རྟོགས་པར་འདོད་པ་ཉི་མ་བདུན་དུ་ཉེ་བར་འཚེ་བ་ལ་སེང་ལྡེང་གི་ཕྱེ་མའི་སྦྱིན་སྲེག་

གོ། །མགོ་བོ་ན་བ་ལ་དྲི་བཟང་པོའི་མེ་ཏོག་ལ་ཡོངས་སུ་བཟླས་ནས་བསྣམས་ནས་མེར་གཞུག་པར་བྱའོ། །རང་གི་གནས་སུ་འགྱུར་རོ། །རིམས་ལ་སྲད་བུ་བཅིང་བར་བྱ་སྟེ། རང་གི་གནས་སུ་འགྱུར་རོ། །ཟ་བ་དང་སྦྱིན་སྲེག་ཀྱང་བྱའོ། །གདོན་ལ་བག་ཟན་ལས་བྱུང་བའི་གཟུགས་བརྙན་བྱས་

ལ་ལན་བདུན་བཟླས་ཏེ་ཉི་མ་བདུན་ནས་གྲོལ་བར་འགྱུར་རོ། །མིག་ན་བ་ལ་མིག་སྨན་གྱིས་སྦྱིན་སྲེག་གྱིས་ཤིག །ཉི་མ་བདུན་གྱིས་གྲོལ་ལོ། །ཞི་བར་འདོད་པས་དཱུར་བའི་སྦྱིན་སྲེག་གྱིས་ཤིག །ཞི་བར་འགྱུར་ཏེ། རྒྱས་པར་འདོད་པས་ཡུངས་ཀར་གྱི་སྦྱིན་སྲེག་གྱིས་ཤིག །རྒྱས་པར་འགྱུར་རོ། །

เล่ม ๙๔ · หน้า 197b

རྒྱལ་བ་ལ་ཤུ་དག་གི་སྦྱིན་སྲེག་གྱིས་ཤིག །རྒྱལ་བར་འགྱུར་རོ། །ལན་ཚྭ་ལས་བྱུང་བའི་གཟུགས་བརྙན་བྱས་ནས་སྦྱིན་སྲེག་གྱིས་ཤིག །དབང་དུ་འགྱུར་རོ། །སྦྲུལ་གྱི་མཆེ་བས་ཟིན་པ་ལ་ཡལ་འདབ་ཀྱི་ལས་སོ། །སྦྲུལ་ལས་བྱུང་བའི་ཉི་མ་བདུན་ལ་དབང་དུ་བྱེད་དོ། །འབྱུང་པོ་དང་ཤ་ཟའི་རྒྱས་

བཏབ་པ་ལ་ལན་ཉི་ཤུར་བཟླས་པའི་ཡུངས་ཀར་གྱིས་བསྣུན་པར་བྱས་ཏེ་རང་གི་གནས་སུ་འགྲོའོ། །རྟག་ཏུ་བཟླས་པས་སྐྱེ་བོ་ཐམས་ཅད་དགའ་བར་འགྱུར་རོ། །རྒྱལ་པོའི་ཕོ་བྲང་དུ་འཇུག་པས་ལན་ཉི་ཤུ་རྩ་གཅིག་གདོང་ལ་ཡོངས་སུ་བཟླས་ན་གང་མཐོང་བ་དེ་དབང་དུ་འགྱུར་རོ། །སྦྱིན་སྲེག་གི་ལས་

ཐམས་ཅད་ལ་ཉི་མ་བདུན་དུ་སྦྱིན་སྲེག་བྱའོ། །མདོར་ན་ཉེ་བར་འཚེ་བ་ཐམས་ཅད་འཇོམས་པར་འགྱུར་རོ། །སྣ་མའི་མེ་ཏོག་གི་སྦྱིན་སྲེག་གིས་ལས་ཐམས་ཅད་བྱེད་དོ། །ལས་ཐམས་ཅད་ལ་དང་པོར་གང་བའི་སྲེག་བླུགས་སྦྱིན་སྲེག་གྱིས་ཤིག །ལས་ཐམས་ཅད་ལ་ཡང་ལས་འདི་ཉིད་གྱིས་

ཤིག་ཅེས་བྱའོ། །གསོ་སྦྱོང་ཅན་གྱིས་བྱ་བའོ། །སེམས་དཔའ་ཐམས་ཅད་ལ་སེམས་ཀྱིས་དམིགས་པས་ས་ལས་བྱུང་བའི་ཀ་པཱ་ལ་དང་། སེལླ་ཀ་ལ་བརྒྱད་བརྒྱར་མངོན་པར་བསྔགས་པར་བྱས་ནས་གཞོན་ནུ་མས་མདུད་པ་བརྒྱད་བརྒྱ་བྱའོ། །དེ་ནས་དེ་དྲིའི་ཆུས་བཀྲུས་ནས་ཤིང་ལ་བཞག་སྟེ།

དེའི་མགོ་ལ་བཅིང་བར་བྱའོ། །དེ་བཞིན་དུ་མ་ཧེ་རྣམས་དང་། ར་རྣམས་དང་། ཕྱུགས་རྣམས་ལ་ཆོམ་རྐུན་གྱིས་ཉེ་བར་འཚེ་བ་ལ་རྭ་ལ་བཅིང་བར་བྱའོ། །བུམ་པ་ཆུས་གང་བར་བྱས་ནས་གཙང་མས་བརྒྱད་བརྒྱར་མངོན་པར་བསྔགས་པར་བྱས་ཏེ་ནད་པའི་རྐེད་པ་ལ་བཅིང་བར་བྱའོ། །རང་གི་གནས་

སུ་འགྱུར་རོ། །ཁྱིམ་དུ་ཚངས་པའི་སྲིན་པོ་དང་། ཤ་ཟས་ཉེ་བར་འཚེ་བ་རྣམས་ལ་སྦྱིན་སྲེག་གྱིས་ཤིག །ཇི་ལྟར་ནུས་པའི་གཏོར་མ་བྱའོ། །ཞེས་ཏེ་འདི་ནི་རི་ཁྲོད་ལོ་མ་ཅན་ཞེས་བྱ་བའི་གཟུངས་རལ་པ་གྱེན་བརྫེས་ཀྱི་རྒྱུད་ཕྱི་མ་གསུངས་པ་བྱང་ཆུབ་སེམས་དཔའ་ཡང་དག་པར་བརྗོད་པའི་མདོ་སྡེ་ཡང་ངོ་། །

སླར་ཡང་དུས་དེའི་ཚེ་སངས་རྒྱས་བཅོམ་ལྡན་འདས་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་སྤྱི་བོར་ཕྱག་གཡས་པ་རབ་ཏུ་བརྐྱང་ནས་ཉུག་པར་མཛད་དེ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་རིན་ཆེན་ཕྲེང་བཞེས་བྱ་བའི་གཟུངས་

เล่ม ๙๔ · หน้า 198a

ཡོད་དེ་འདི་ཀློག་པར་བྱེད་པས་འགྲུབ་པར་སངས་རྒྱས་ཐམས་ཅད་ཀྱིས་རྗེས་སུ་ཡི་རང་བས་གསུངས་སོ། །རྟོག་པའི་རྒྱལ་པོ་ཆེན་པོ་ཕྱི་མ་དེ་ལ་བསྲུང་བ་དང་བསྐྱབ་པ་དང་། སྨྲ་བའི་ཆེད་དང་། རལ་པ་གྱེན་བརྫེས་ཀྱི་རྒྱུད་ཕྱི་མར་བཅོམ་ལྡན་འདས་མ་འཕགས་མ་སྒྲོལ་མའི་སྒྲུབ་པོའི་དངོས་གྲུབ་བྱེད་

པ་རྟག་ཏུ་བྱེད་དུ་གཞུག་གོ། །བློ་གྲོས་དང་ལྡན་པས་གང་དགེ་བའི་ཚེས་གྲངས་ལ་བྲིས་ནས་སོ། །དེ་ནས་དེ་བཞིན་གཤེགས་པ་ཤཱཀྱ་ཐུབ་པས་སྔགས་ཀྱི་ཚིག་རྣམས་བཀའ་སྩལ་ཏོ། །ན་མོ་བུདྡྷཱ་ཡ། ན་མོ་དྷརྨཱ་ཡ། ན་མཿསཾགྷཱ་ཡ། ན་མཿསཔྟཱ་ནཱཾ། སམྱཀྶཾ་བུདྡྷཱ་ཀོ་ཊཱི་ནཱཾ་ན་མོ་མེ་ཏྲེ་ཡ། པྲ་མུ་ཁཱ་ནཱཾ། སརྦ་བུདྡྷ་བོ་དྷི་

ས་ཏྭཱ་ནཱཾ། ན་མཿསམྱ་གྒ་ཏཱ་ནཱཾ། ན་མཿསམྱཀྤྲ་ཏི་པནྣཱ་ནཱཾ། ན་མོ་ཨརྷ་ཏཱཾ། ན་མོ་ནཱ་གཱ་མཱི་ནཱཾ། ན་མཿས་ཀྲི་དཱ་གཱ་མཱི་ནཱཾ། ན་མཿཤྲོ་ཏཱ་པནྨཱ་ནཱཾ། ན་མོ་ཨརྷ་ཏེ། མརྡྷྭ་ཏུ། ཨ་པ་རཱ་ཛེ་ཏ་ཧྲྀ་ད་ཡཾ། མ་བརྟ་ཡིཥྱ་མི་སམྱཀྶཾ་བུདྡྷ། བྷཱ་ཥི་ཏ། མ་ནུ་མོ་ད་ཏཾ། དེ་བ་ག་ནཻ་སརྦ་ཀརྨ་ཀ་རཾ། ཤུ་བྷཾ། པ་པི་ཏྲཉྩ་བཱ། མཾ་ག་ལྱཾ། དྷ་ནྱཾ། ཤུ་བྷྱ་ཀ་རཾ།

ཤུ་བྷཾ་རཱཀྵོ། གྷྣ་སརྦ་སཏྭཱ་ནཱཾ། དེ་བཉྩ་ཨ་པ་རཱ་ཛི་ཏཱ་ཧྲྀ་ད་ཡཾ། མཱ་བརྟ་མི་སརྦ་པཱ་པ། པྲ་ཤ་མཱ་ནཱཾ། སརྦ་ཨརྠ་སཱ་དྷ་ནཱཾ། དྷ་ནྱཾ། སརྦ་གྲ་ཧ་བི་ནཱ་ཤ་ནཱཾ། ནི་ཏྱཾ་ཛ་ཡ། ཀ་རི་ཧྱེ་ཥ་ཤ་ཀྲ་སྱེ་བ་ཨ་པ་རཱ་ཛི་ཏ་པ་ཥ་ཀྲི་ཏྱེ། ནཱ་ཤ་ནེ་ཙེ་བ། རཱ་ཛཱ། ཨགྣི་རི་པུ་ནཱ་ཤ་ནཱི་ཀྲིཏྱ་ཀརྨཱ་ཎི། བེ་ཏ་ཌོ་དུཿསྭཔྷདུཿསྭཔྣཱ་བི་ཨ་ཐ་སྤུ་ཏ་ན་དེ་བ་དཱ་ན་བ། གནྡྷ་རྦ།

ཡཀྵ་རཱཀྵ་ས། པནྣཱ་ག། རཀྵཾ། ཀུརྦ་ནྟུ་མེ་ནི་ཏྱཾ་ས་མཱནྟ་ཙ། ཏེ་ཛ་ནཾ་ཨེ་ཧི་ཀཱ། དྲི་ཏཱི་ཡ་ཀ་ཛྭ་རཱ་ཏྲི་ཏཱི་ཡཀྵ། ཙ་ཏུརྠ་ཀེ་བྷྱོ་རཀྵ་ཡཾ་བི་ཥ་མ་ཛྭ་ར་ཀརྨཱ་ཎི་བི་ཥ་བྷུཀྟཾ་ག་རཾ་ཙཻ་བ་བྷྱོ་ཛྱེ་བརྫ་ཡི་ཥྱ་ཏི། ཡ་སྱ་བཱ་ན་བྷ་བ་ཏ་གརྦྷོ་ཧ་ཡནྟེ་ཡ་སྱ་དཱ་ཀ་ར་ཀ། རཏྣ་མཱ་ལ་ཨི་ཡཾ་ཏེ་ཥཱཾ་ཀྵི་པྲ་མ་མ་བ་ཧ་ཏེ། ཛཱ་ཡ་མརྠ། ཀཱ་མོ་ལ་བ་ཏརྠེ། ཤྲཱི་ཀཱ་

མོ་ལ་བྷ་ཏེ། ཤྲཱི་ཡཾ། བི་ཐ་ཏེ་ར་ཎ། སཾ་གྲ་ཧེ། ཀྵི་པྲ་མཱ་བཱ་ཏེ། ཛ་པཾ། ཨ་ཏྲ་བི་ཏྱཾ། པྲ་བཀྵཱ་མི། རཏྣ་མཱ་ལ་ཏི། བི་པྲུ་ཏཾ། ཏ་བ་ཏཱ་ལོ་ཀ་ནཱ་ཐ་ཧྲི་དྲིཥྚ་སཏྭཱ་ནུ་པ་དྲུ་ཏཱཾ། ཏདྱ་ཐཱ། ཨོཾ་དྷ་ན་ཀ་རི་བི་པུ་ལ་ཀ་རི་ཡ་ཤ་ཀ་རི། བིདྡྷ་ཀ་རི་ཨ་ཡུནྟ་ཏི་ཨ་ལཀྵི་པྲ་ས་མ་ནི་དྷཾ་ནརྦཱ་ནྱ་བི་ནྱ་བི་བརྡྷ་ནི་བ་ཤྲཱི་ཀ་རི། སརྦ་གྲ་ཧ་ནཀྵ་ཏྲ་བ་ཤ།

བརྟི་ནི་མེ། ཏྷཱ་ཛ་ན་ནི། སུ་ཏྲ་ཛ་ན་ནི་བ་རི་བཱ་ར་བདྷྱ་ནི། ཨཱ་ཡུནྡ་ནི། པྲཱི་ཏི་ཀཱ་རི། ཛམྦྷ་ནི། སྟམྦྷ་ནི། ཨ་མོ་ཧ་ཤཀྟི་ཀཱཉྩ་ན་མཱ་ལ་གྲ་ཧ་སཽ་མྱ། ཀ་ར་ཎི་སརྦ་ཀཱ་ལི་ཀཱ་ལཱ་ཧཱ་བི་གྲ་ཧ། བི་བཱ་ད་པྲ་ཤ་མ་ནི། པར་ཙ་ཏྲ། ནི་བཱ་ར་ཎི་པ་ར་སཻ་ནྱ་སྟམྦྷཱ་ནི་ཙིཏྟ་ནི་རྨ་ལཱི་ཀར་ཎི། སརྦ་པཱ་པྲ་ཤ་མ་ནི་སརྦ་ཀིལྦི་ཥ་ནཱ་ཤ་ནི་སྭཱ་ཧཱ། ཙུ་ཊུ་ཙུ་ཊུ།

เล่ม ๙๔ · หน้า 198b

ཏུ་ཊུ་ཏུ་ཊུ། མུ་ཊུ་མུ་ཊུ་སྭཱ་ཧཱ། སརྦ་དེ་བ་ཨ་ནུཛྙྭཱ་ཏེ་སྭཱ་ཧཱ། སརྦ་ནཱ་གསཾ་རཀྵི་ཏེ་སྭཱ་ཧཱ། ཨོྃ་ནི་རི་ཕཊ། ཧ་ན་ཧ་ན་ཕཊ། ད་ཧ་ད་ཧ་ཕཊ། པ་ཙ་པ་ཙ་ཕཊ། ཡེ་ཥཱཾ་བིདྷྭ་ཥནྟི་བི་ཤ་མ་ཙིཏྟཱ་ཡནྟི། ཧ་ཧ་ནི། ཀ་ཁོ་རྡ་ཀུརྦ་ནྟི་ཀ་ར་ཡནྟི། ཀྲྀ་ཏཉྩ་ཨ་བྷ་ཡཱ་ནུ་མོ་དེ་ནརྠ་བ་ཕཊ་སྭཱ་ཧཱ། ཨགྣིཾ་སྟམྦྷ་ཡཱ་མི་བི་ཥཾ་ཤསྟ་ཨུ་ད་ཀ་ཙཽ་རི་སརྦ་

དུཥྚ་སརྦ་བྱཱ་དྷི་ཏ། ཙན་ཏྲཾ་ཛ་ན་ཡཱ་མི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། གཞན་གྱིས་མི་ཐུབ་པའི་འདབ་མས་ཁྲུས་བྱས་ཏེ་རིན་པོ་ཆེའི་ཕྲེང་བས་རྣམ་པར་བརྒྱན་པ་ལས་ཐམས་ཅད་བྱེད་པ་འདི་ནི་རྟག་ཏུ་སྲུང་བར་བྱེད་པའོ། །དེ་བཞིན་ཉིད་དུ་ཡང་གྲོ་གའི་འདབ་མ་ལ་བྲིས་པའམ་གང་དུའམ་དེར་ཡང་རུང་སྟེ་ལ་ལའི་

བགེགས་སྲུང་བ་དང་། བསོད་ནམས་མཆོག་དང་། སྡིག་པ་དང་། དྲི་མ་འཇོམས་པ་དང་། གཡུལ་དུའམ། རྩོད་པའམ། ཐམས་ཅད་དུ་རྒྱལ་བ་སྦྱིན་ཞིང་དགེ་བའོ། །གང་འདི་འཛིན་པ་ལ་རིག་པ་བཞི་པ་བྲིས་པ་དང་། སྐྱེས་པས་རྟག་ཏུ་ཀློག་པ་དེ་ལ་འཇིགས་པ་འབྱུང་བར་མི་འགྱུར་རོ། །ཀློག་པ་དང་

འཛིན་པ་ཐམས་ཅད་རྟག་ཏུ་སྲུང་བར་བྱེད་དོ། །གསང་བ་རྣམས་ཀྱིས་ཡོངས་སུ་སྐྱོང་བར་བྱེད་དོ། །ཆོ་གའི་རྒྱལ་པོ་འདི་རྟག་ཏུ་མཐར་བྱེད་པ་ནི་ཇི་ལྟར་རིན་པོ་ཆེས་སྤྲས་པའི་ཕྲེང་བ་སྟེང་དུ་རྣམ་པར་འབར་བའི་དཔལ་གང་ཡིན་པ་དེ་རིག་པ་འཛིན་པར་བྱེད་དོ། །འདི་ལས་གདོན་དེ་རྣམ་པར་

ཉམས་པར་བྱེད་དོ། །ནད་རྣམས་ཀྱང་མི་འབྱུང་ངོ་། །བུ་ཚ་བོ་རྣམས་ཀྱང་འཕེལ་ལོ། །འཁོར་བཟང་པོ་ཅན་རྣམ་པར་གནས་སོ། །རིག་པ་འདི་ནི་ཐམས་ཅད་ནས་དེ་བཞིན་གཤེགས་པ་རྣམས་ཀྱིས་སེམས་ཅན་ལ་ཕན་པའི་དོན་གྱི་ཆེད་དང་། བྱིས་པ་རྣམས་ཁྱད་པར་དུ་བསྲུང་བར་བྱ་བའི་ཆེད་དོ། །

ལྷ་དང་། རྒྱལ་པོ་དང་། བྱང་ཆུབ་སེམས་དཔའ་རྣམས་དང་། དེ་བཞིན་དུ་དེ་བཞིན་གཤེགས་པ་དེ་ཡང་ཕྱོགས་བཅུ་རྣམས་སུ་ཀུན་ནས་གཟིགས་པར་མཛད་དོ། །དགེ་བའི་དོན་རྣམ་པར་འཕེལ་བ་དང་། སྡིག་པ་ཐམས་ཅད་ཀུན་ནས་ཟད་པར་འགྲོ་བ་དང་། རྨི་ལམ་ངན་པ་རྣམས་དང་། ཉེས་པར་

བྱས་པ་རྣམས་ལས་ཀྱང་གྲོལ་ཏེ་འདིར་ཐེ་ཚོམ་མེད་དོ། །རལ་པ་གྱེན་བརྫེས་ཀྱི་རྒྱུད་ཕྱི་མའི་གཟུངས་སོ། །དེ་ནས་འདི་ལས་རྒྱུད་འདིར་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་ཕྱག་རྒྱའི་མཚན་ཉིད་གསུངས་སོ། །འདི་ལྟ་སྟེ། གཙུག་ཕུད་དང་། གོ་ཆ་དང་། ར་བ་དང་། སྙིང་

เล่ม ๙๔ · หน้า 199a

པོ་དང་། ཉེ་བའི་སྙིང་པོ་དང་། ཞེས་པ་སྟེ་རྣམ་པ་ལྔའོ། །རྩ་བའི་རིག་པ་ལ་ནི་དྲུག་ཅུར་བཤད་དོ། །དོན་ཐམས་ཅད་སྒྲུབ་པ་དེ་ལ་དང་པོར་རེ་ཞིག་ར་བི་ཏ་དང་། བི་ཎི་ཀ་དང་། སངས་རྒྱས་ཀྱི་མཐར་ཐུག་པ་རྣམས་སོ། །མཐེ་ཆུང་ཁབ་ཀྱི་རྣམ་པས་ངེས་པར་བཙིར་བའི་

གུང་མོ་དང་མཐེ་བོང་དག་ཏུ་བཤད་དོ། །འདི་ནི་འཕགས་མ་སྒྲོལ་མའི་གང་བའི་ཕྱག་རྒྱའོ། །ཞེས་རྣམ་པར་གྲགས་ཏེ་དོན་ཐམས་ཅད་སྒྲུབ་པའོ། །རིག་པ་ཚིམ་པར་བྱེད་པ་ལ་མཐེ་ཆུང་གཉིས་བསྣུན་པར་བྱ་སྟེ་རྣམ་པར་ཚིམ་པར་འགྱུར་རོ། །ལྷག་པར་གནས་པ་ནི་མཐེ་བོང་གཉིས་ཀ་

ཁབ་ཀྱི་རྣམ་པས་སོ་སོར་གཡོ་བར་བྱ་སྟེ། སྙིང་པོ་རྣམ་པར་ཤེས་པར་བྱའོ། །བསྟོད་པ་ཁོ་ནའི་མིང་གིས་སོ། །ཉེ་བའི་སྙིང་པོ་ལ་མཐེ་བོང་གཉིས་འདི་ལྟ་སྟེ། ནང་ཁོ་ནའི་ཁུ་ཚུར་རོ། །མཐེ་ཆུང་ལྕགས་སྒྲོག་གི་ཆའི་སྒྲ་དང་། སྡིགས་མཛུབ་ཁ་ཕྱེ་བ་ཁབ་ཏུ་བྱས་པ་འདི་ནི་གོ་ཆའི་མཚན་

ཉིད་དེ། རྟག་ཏུ་བདག་ཉིད་ལ་རབ་ཏུ་སྦྱར་བར་བྱའོ། །སྡིགས་མཛུབ་གཉིས་ངེས་པར་བཙིར་ནས་གུང་མོ་དཀྲིས་ཏེ་ཁབ་ཀྱི་རྣམ་པས་བསྡིགས་པ་འདི་ནི་གཙུག་ཕུད་ཀྱི་ཕྱག་རྒྱའི་མཚན་མ་སྟེ། བདག་ཉིད་ཀྱི་གཙུག་ཕུད་བཅིངས་པའི་དུས་སུ་རབ་ཏུ་སྦྱར་བར་བྱའོ། །སླར་ཡང་ཁུ་ཚུར་བཅིངས་

ནས། སྡིགས་མཛུབ་ཁ་ཕྱེ་བ་ཁབ་ཀྱི་རྣམ་པ་སྟེ། འདི་ནི་བཟླས་པའི་ཕྱག་རྒྱའི་མཚན་ཉིད་དོ། །དེ་ལྟ་བུ་ཁོ་ན་ཡོངས་སུ་གྱུར་པས་སྡིགས་མཛུབ་ཁབ་ཀྱི་རྣམ་པས་ར་བའི་ཕྱག་རྒྱ་བྱའོ། །ཁུ་ཚུར་བཅིངས་ནས་སྡིགས་མཛུབ་གཉིས་ལྕགས་སྒྲོག་གི་རྣམ་པ་སྟེ། མཚན་མ་འདི་ནི་དམ་ཚིག་

སྲུང་བའི་ཕྱག་རྒྱའོ། །རྐང་པ་བསྙམས་པ་ལ་གཡས་པའི་རྐང་པ་རབ་ཏུ་བཞག་ནས་གར་གྱི་སྦྱོར་བས་ཡོངས་སུ་བསྐོར་བར་བྱ་སྟེ། གཞན་དུ་བསྐོར་ནས་ལག་པ་གཉིས་ཀས་རྩ་བའི་ཕྱག་རྒྱའི་ལས་སྦྱར་རོ། །དཔྲལ་བར་ཡང་ལས་ཐམས་ཅད་ཀྱི་དམ་ཚིག་གི་ཕྱག་རྒྱར་འགྱུར་རོ། །དེ་ནས་

ཕྱག་རྒྱ་བཅིང་བ་དང་། བཟླས་པའི་དུས་དང་། ཉལ་བའི་དུས་དང་། རྣམ་པ་གཞན་དུ་ཡང་རབ་ཏུ་སྦྱར་བར་བྱའོ། །གདོན་གྱི་ལས་དང་ལས་ཐམས་ཅད་ལ་རྩ་བའི་ཕྱག་རྒྱ་རབ་ཏུ་སྦྱར་བར་བྱའོ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་རལ་པ་གྱེན་བརྫེས་ཀྱི་

เล่ม ๙๔ · หน้า 199b

རྒྱུད་ཕྱི་མར་སྤྱན་རས་གཟིགས་དབང་ཕྱུག་ལ་རྗེས་སུ་བརྩེ་བས་བཅོམ་ལྡན་འདས་མ་འཕགས་མ་སྒྲོལ་མ་སྒྲུབ་པའི་དོན་དུ་ཕྱག་རྒྱ་བཅིངས་པ་གསུངས་སོ། །དེ་ལ་འདི་རྣམས་ཡང་དག་སྦྱར་བྱ་བ། །ཡམས་ནི་བདེ་བར་བྱ་དང་མཁས་པས་ཕྱག་འཚལ་བ། །རིག་གསུམ་ལ་ཡང་ཐུན་མོང་ཕྱག་རྒྱ་ནི། །

དེ་རྣམས་ཉེ་བར་དྲངས་བ་ཕྱག་འཚལ་ཕྱག་རྒྱ་ནི། །གཡས་པའི་སོར་མོའི་ཚིགས་ལ་ཚིགས་ཀྱིས་རྩེ་མོ་ཀུན། །ཕྱག་རྒྱ་ཉིད་ནི་རྗེས་སུ་བཅིང་བར་གྱིས་ཤིག་དང་། །རྟག་ཏུ་གསོལ་བ་འདེབས་ལ་གཙང་མ་གསོལ་འདེབས་པའི། །ཕྱག་རྒྱ་དེ་བཞིན་ཁོ་ནར་གཡས་པ་སོར་མོ་ཡི། །ཚིགས་རྣམས་

ཚེགས་སུ་བྱས་ནས་རྗེས་སུ་ཡི་རང་བྱ། །མཆོད་པ་ཐམས་ཅད་ཁོ་ན་གཙང་མས་རྟག་ཏུ་ནི། །མཆོད་པ་རྟག་ཏུ་རྗེས་སུ་ཡི་རང་བྱེད་པ་དང་། །སོར་མོ་རྣམས་ཀྱི་བདུད་རྩི་ཐམས་ཅད་ཡང་དག་ལྡན། །ཚིགས་ཀྱི་རྩེ་མོ་མཐེ་བོང་སྙིང་པོར་ཡང་དག་ལྡན། །འདི་རྣམས་རྒྱལ་བ་ཡི་ནི་ཕྱག་རྒྱར་འགྱུར། །སོར་མོའི་རྩེ་མོ་ཡང་དག་སྦྱར་

བ་གུང་མོ་དང་། །མཐེ་བོང་གཉིས་ཀར་གང་དུ་མི་འགྱུར་ཕྱག་རྒྱ་ཡིས། །བཟླས་པས་མཆོག་སྦྱིན་ཡིད་ཀྱི་བཟླས་པས་ཕྱག་རྒྱའོ། །དེ་ནས་ཡང་བཅོམ་ལྡན་འདས་དེ་རྣམས་ཐམས་ཅད་རང་རང་གི་སངས་རྒྱས་ཀྱི་ཞིང་དུ་གཤེགས་པའི་མཚན་མ་སྟོན་པར་མཛད་བཞིན་པས་སླར་བཞེངས་པའི་མཚན་མ་མཛད་དོ། །དེ་ནས་

ཐམས་ཅད་དང་ལྡན་པའི་འཁོར་ས་དང་། ནམ་མཁའ་ལ་གནས་པ་དང་། སེམས་རབ་ཏུ་འགུལ་བ་དང་ཐམས་ཅད་དང་ལྡན་པའི་ས་འདི་རང་འགུལ་བས་སྐྲག་ཅིང་མེ་ཏོག་གི་ཆར་འབབ་པ་དང་། བར་སྣང་ལས་སྤྱོད་པའི་འབྱུང་པོ་བྱེ་བས་ཐམས་ཅད་དུ་འགྲོ་བའི་གདུག་པ་རབ་ཏུ་བཏུལ་ལོ། །དེ་ནས་ཡང་བྱང་ཆུབ་

སེམས་དཔའ་མཐུ་ཆེན་ཐོབ་ཀྱིས་དེ་བཞིན་གཤེགས་པ་ཤཱཀྱ་ཐུབ་པ་ལ་ཡོངས་སུ་ཞུས་པ། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེས་ན་རལ་པ་གྱེན་བརྫེས་ཞེས་བྱ་བར་ཡང་ཟུངས་ཤིག །རྟོག་པའི་རྒྱལ་པོ་ཞེས་བྱ་བར་ཡང་ཟུངས་

ཤིག །སྤྱན་རས་གཟིགས་དབང་ཕྱུག་གིས་ཞུས་པ་ཞེས་བྱ་བར་ཡང་ཟུངས་ཤིག །རིག་པ་དང་གསང་སྔགས་ཀྱི་སྤྱོད་པའི་མདོ་སྡེ་ཞེས་བྱ་བར་ཡང་ཟུངས་ཤིག །རྟོག་པའི་རྒྱལ་པོ་ཆེན་པོའི་ལེའུ་རབ་འབྱམ་ཞེས་བྱ་བར་ཡང་ཟུངས་ཤིག །ཐབས་ཀྱི་སྤྱོད་པ་ཞེས་བྱ་བར་ཡང་ཟུངས་ཤིག །དེ་ནས་བྱང་ཆུབ་སེམས་དཔའ་བྱམས་

ที่มาและสัญญาอนุญาต

ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ

สัญญาอนุญาต Public Domain · หลักฐาน

README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

  • หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
  • ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด