འཕགས་པ་རིག་པ་མཆོག་གི་རྒྱུད་ཆེན་པོ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๙๕ · หน้า 89b
ལ། ལག་ན་པོག་ཕོར་ཐོགས་ནས་ཕྱེ་མ་རེད་ཀྱི་དུས་མཚམས་སུ་དཔལ་གྱི་ལྷ་མོའི་རིག་སྔགས་ཀྱིས་ལྷ་རྣམས་སྤྱན་དྲང་བར་བྱའོ། །དེ་ནས་ནམ་ཕྱེད་ཀྱི་དུས་སམ། ཡང་ན་ནང་པར་དཀྱིལ་འཁོར་བྲི་བར་བྱ་སྟེ་ཅི་སྟེ་གསེར་གྱི་ཕྱེ་མས་བྲི་ན་ནི་ལྷའི་དཔལ་འཐོབ་པར་འགྱུར་རོ། །དངུལ་
གྱིས་ནི་དགྲ་ལས་རྒྱལ་བར་འགྱུར་རོ། །ཟངས་ཀྱིས་ནི་ཞི་བར་འགྱུར་རོ། །ཡང་ན་ཙནྡན་གྱི་ཕྱེ་མས་བྲིས་ན། ནི་དཔལ་ཐོབ་པར་འགྱུར་རོ། །ཙནྡན་དམར་པོའི་ཕྱེ་མས་ནི་དགྲ་ལས་རྒྱལ་བར་འགྱུར་རོ། །པུ་ཤེལ་ཅིས་ནི་གྲོང་ཁྱེར་ཞི་བར་འགྱུར་རོ། །ཡང་ན་འབྲས་ཕྱེ་དཀར་པོས་
བྲིས་ན་ནི་དཔལ་ཐོབ་པར་འགྱུར་རོ། །ནས་རྗེན་པའི་ཕྱེས་བྲིས་ན་ནི་དགྲ་ལས་རྒྱལ་བར་འགྱུར་རོ། །ཡང་ན་མེའི་བསྲེག་བྱ་བྱས་པའི་ཐལ་བས་བྲིས་ན་ནི་ཞི་བར་འགྱུར་རོ། །ཅི་སྟེ་སོ་ཕག་གི་ཕྱེ་མའམ་སོལ་ཕྱེའམ། དུར་ཁྲོད་ཀྱི་ཐལ་བ་ཡང་རུང་སྟེ། ཚོན་རྩི་འདི་གསུམ་
གྱིས་དཀྱིལ་འཁོར་བྲིས་ན་ནི་ཡུལ་འཁོར་ལ་གནོད་པར་འགྱུར་རོ། །རིག་སྔགས་འཆང་བ་བདག་ཉིད་དག་པར་བྱ་སྟེ། །རྒྱུ་སྐར་དང་མཐུན་པའི་དུས་སུ་སྨྱུང་བ་བྱས་ལ། ཉི་མ་བཟང་བའམ་ཡང་ན་ཡར་གྱི་ངོ་ཚེས་ལྔ་ལ་དཀྱིལ་འཁོར་ཁྲུ་བཅུ་དྲུག་པའམ་ཡང་ན་ཁྲུ་བཅུ་བཞི་པ་བྲིའོ། །ཅི་
སྟེ་ཐོག་མར་ཤར་ཕྱོགས་སུ་ཐིག་བཏབ་ན་ནི་རིག་སྔགས་འཆང་རྣམས་ཀྱི་དཔལ་འཕེལ་བར་འགྱུར་རོ། །ཅི་སྟེ་ལྷོ་ཕྱོགས་སུ་ཐིག་བཏབ་ན་ནི་གྲོང་ཁྱེར་ལ་གནོད་པར་འགྱུར་རོ། །ཅི་སྟེ་ནུབ་ཕྱོགས་སུ་ཐིག་བཏབ་ན་ནི་རིག་སྔགས་འཆང་རྣམས་ཕན་ཚུན་མི་མཐུན་པར་འགྱུར་རོ། །ཅི་སྟེ་
བྱང་ཕྱོགས་སུ་ཐིག་བཏབ་ན་ནི་དགྲ་ཐམས་ཅད་ལས་རྒྱལ་བར་འགྱུར་རོ། །ཅི་སྟེ་ཐོག་མར་ཚོན་དཀར་པོ་བཀྱེ་ན་ནི་རྒྱལ་པོ་རྒྱལ་བར་འགྱུར་ཞིང་རིག་སྔགས་འཆང་རྣམས་ཀྱི་ལས་འགྲུབ་པར་འགྱུར་རོ། །ཅི་སྟེ་ཚོན་དམར་པོ་བཀྱེ་ན་ནི་གྲོང་ཁྱེར་ཞི་བར་འགྱུར་རོ། །ཅི་སྟེ་ནག་པོ་
བཀྱེ་ན་ནི་གྲོང་ཁྱེར་ལ་མི་དགེ་བར་འགྱུར་རོ། །དེ་ནས་རིག་སྔགས་འཆང་གིས་རིག་སྔགས་ཀྱི་རྒྱལ་པོ་བཟླས་བརྗོད་བྱེད་བཞིན་དུ་དཀྱིལ་འཁོར་བྲི་བར་བྱ་སྟེ། །བྱང་ཕྱོགས་སུ་ནི་གངས་ཀྱི་རི་གཞག་གོ། །ལྷོ་ཕྱོགས་སུ་ནི་རི་འབིགས་བྱེད་གཞག་གོ། །དེ་ནས་ཁོར་ཡུག་གི་རིས་བསྐོར་
เล่ม ๙๕ · หน้า 90a
བར་བྱའོ། །དབུས་སུ་ནི་སངས་རྒྱས་བཅོམ་ལྡན་འདས་བྲིའོ། །གཡོན་ལོགས་སུ་ནི་ལག་ན་རྡོ་རྗེ་བྲིའོ། །བཅོམ་ལྡན་འདས་ཀྱི་གཡས་ལོགས་སུ་ནི་དཔལ་ལྷ་མོ་ཆེན་མོ་བྲིའོ། །ལག་ན་རྡོ་རྗེའི་དྲུང་དུ་ནི་ཕོ་ཉ་མ་དྲུག་བྲིའོ། །བྱང་ཕྱོགས་ངོས་སུ་ནི་ཁྱབ་འཇུག་
དང་ལྷ་ཆེན་པོ་དང་ཚངས་པ་རྣམས་དེ་དག་དང་མཐུན་པའི་འཁོར་དང་བདུད་རྩི་གཞག་གོ། །ནུབ་ཕྱོགས་སུ་དྲུག་མ་དང་། དཀའ་བཟློག་མ་དང་། གཞོན་ནུ་འཁོར་དང་བཅས་པ་གཞག་གོ། །ལྷོ་ཕྱོགས་སུ་ནི་ཚོགས་དྲུག་ཅུ་རྩ་བཞི་པོ་རྣམས་གཞག་གོ། །སྒོ་རེ་རེར་ཡང་ཚོགས་
རྣམས་གཞག་པར་བྱ་སྟེ། །ཤར་ཕྱོགས་ཀྱི་སྒོར་གཏུམ་བྱེད་དང་། གསར་ཅན་གཉིས་གཞག་གོ། །ལྷོ་ཕྱོགས་ཀྱི་སྒོར་ནི་བདུད་རྩི་ཐབ་སྦྱོར་དང་། རྨུགས་བྱེད་གཉིས་གཞག་གོ། །ནུབ་ཕྱོགས་ཀྱི་སྒོར་ནི་རྫོང་ལྡན་དང་། མཚན་སྦྱིན་གཉིས་གཞག་གོ། །
བྱང་ཕྱོགས་ཀྱི་སྒོར་ནི་ལྕགས་ཅན་དང་སོ་ཅན་གཉིས་གཞག་གོ། །ནང་དུ་ནི་བཅོམ་ལྡན་འདས་ཚིག་ལྡན་མ་དྲི་ཟའི་འཁོར་གྱིས་བསྐོར་བ་གཞག་གོ། །ཀཱརྵཱ་པ་ཎ་བརྒྱ་རྩ་ཚང་བའམ། ཡང་ན་པཱ་ཎ་བརྒྱས་རྡོ་རྗེ་བྱས་ཏེ་བཞག་ལ་དེའི་སྟེང་དུ་སྤྱན་གྱིས་བཟླས་བརྗོད་བྱས་པའི་བུམ་པ་
མི་གནག་ཅིང་རྩ་བ་མེད་ལ་མགྲིན་བཅིངས་དང་བཅས་པ་གཞག་པར་བྱ་སྟེ། བུམ་པ་དེའི་ནང་དུ་ས་བོན་ཐམས་ཅད་དང་། རིན་པོ་ཆེ་ཐམས་ཅད་གཞུག་ཅིང་། འོ་མ་ཡོད་པའི་ཤིང་གི་ཡལ་ག་གཞག་གོ། །གྲྭ་བཞིར་ཡང་བུམ་པ་བཞིར་གཞག་པར་བྱ་སྟེ། མགྲིན་བཅིངས་དང་ལྡན་
པ་ལ་ས་བོན་དང་རིན་པོ་ཆེ་ཐམས་ཅད་བཅུག་སྟེ་འོ་མ་ཡོད་པའི་ཤིང་གི་ཡལ་ག་གཞུག་གོ། །དེ་ནས་རིག་སྔགས་འཆང་གང་དག་དཔལ་ལམ་རིག་སྔགས་འཆང་ལས་བྱུང་བའི་འབྲས་བུ་འདོད་ན། རིག་སྔགས་འཆང་དེས་བླ་མ་ལ་བསྙེན་བཀུར་བྱའོ། །བླ་མ་དེས་ཀྱང་རིག་སྔགས་འཆང་
སྨྱུང་བར་བྱས་པ། བྱང་ཆུབ་ཀྱི་སེམས་ཡོངས་སུ་གཟུང་བ། གསོ་སྦྱོང་གི་ཡན་ལག་དང་ལྡན་པ། གོས་གཙང་མ་བགོས་པ། དར་དཀར་གྱིས་གདོང་གཡོགས་པ། དཀྱིལ་འཁོར་དུ་གཞུག་པར་བྱའོ། །དེ་ལ་ནུབ་ཕྱོགས་ཀྱི་སྒོར་བཅུག་ན་ནི་དཔལ་མངོན་པར་འཕེལ་བར་འགྱུར་
เล่ม ๙๕ · หน้า 90b
རོ། །ལྷོ་ཕྱོགས་སུ་ནི་རྟག་ཏུ་རྒྱལ་བར་འགྱུར་རོ། །ཤར་ཕྱོགས་སུ་ནི་འཐབ་མོ་འབྱུང་བར་འགྱུར་རོ། །བྱང་ཕྱོགས་སུ་ནི་བླ་མའི་སྒོ་ཡིན་ཏེ་འཇུག་པར་མི་བྱའོ། །དེ་ནས་བླ་མས་རིག་སྔགས་འཆང་དུ་གུ་ལའི་རས་དཀར་པོས་གདོང་གཡོགས་ལ། དཔལ་གྱི་ལྷ་
མོའི་རིག་སྔགས་ཀྱིས་མགོ་བོར་བསང་གཏོར་བྱས་ཏེ་གཞུག་གོ། །དེ་ནས་འགྲོན་བུ་བརྒྱད་བརྒྱ་ལྷ་ལ་དོར་བར་བྱའོ། །འགྲོན་བུ་དེ་ཡང་ལོ་མས་དཀྲིས་ན་ནི་རིག་སྔགས་འགྲུབ་པར་འགྱུར་རོ། །རས་དཀར་པོས་དཀྲིས་ཏེ་བོར་ན་ནི་ཞག་བདུན་གྱིས་དཔལ་འོང་བར་འགྱུར་
རོ། །རིག་སྔགས་འཆང་དེ་དག་ལ་ལྷ་རྣམས་ཀྱང་བསྟན་པར་བྱའོ། །དེ་ནས་ཕྱིར་བྱུང་སྟེ་བྱང་ཕྱོགས་སུ་སོང་ལ་དབུས་ཀྱི་བུམ་པའི་ཆུ་ཁྱོར་བའི་ནང་དུ་སྦྱིན་ནོ། །རིག་སྔགས་འཆང་རྣམས་ཀྱིས་ཀྱང་ལག་པ་གཡོན་པས་མནོས་ཏེ་བཏུང་བར་བྱའོ། །རིག་སྔགས་རྣམས་
ལ་ཡང་སེམས་ཅན་ཐམས་ཅད་བདག་གིས་ཡོངས་སུ་གཟུང་ངོ་ཞེས་སྨྲོས་ཤིག་ཅེས་བསྒོ་བར་བྱའོ། །དེའི་འོག་ཏུ་དེ་དག་གི་དོན་གྱི་ཕྱིར་བདག་གིས་ཕ་རོལ་ཏུ་ཕྱིན་པ་དྲུག་པོ་རྣམས་ཡོངས་སུ་རྫོགས་པར་བྱའོ་ཞེས་སྨྲར་གཞུག་གོ། །དེའི་འོག་ཏུ་དེ་དག་གི་དོན་གྱི་ཕྱིར་རིག་སྔགས་
ཀྱི་ཚོགས་རྣམས་བདག་ལ་འགྲུབ་པར་གྱུར་ཅིག་ཅེས་སྨྲར་གཞུག་གོ། །དེ་ནས་རིག་སྔགས་འཆང་བ་སྤུ་ལྡང་བར་འགྱུར་ཞིང་བསྟོད་པའི་གླུའི་སྒྲ་ཡང་ཐོས་པར་འགྱུར་ཏེ། དེའི་འོག་ཏུ་འོང་བའི་བྲམ་ཟེ་རྣམས་ཀྱང་རྒྱལ་བར་གྱུར་ཅིག །དར་བར་གྱུར་ཅིག་ཅེས་བརྗོད་པར་འགྱུར་
རོ། །དུང་གི་སྒྲ་དང་རྔ་སྒྲ་ཡང་ཐོས་པར་འགྱུར་རོ། །ཅི་སྟེ་བུད་མེད་གོས་དཀར་པོ་བགོ་ཞིང་སྣོད་གང་བ་ཐོགས་པ་མཐོང་ན་ནི་ལག་ན་རྡོ་རྗེས་ཇི་སྐད་བཤད་པ་བཞིན་དུ་རིག་སྔགས་འཆང་དེ་ལ་དཔལ་འོང་བར་འགྱུར་རོ། །ཅི་སྟེ་ཐུབ་གང་བ་མཐོང་ན་ནི་རྒྱལ་སྲིད་དམ། །ཡུལ་གྲུའམ། །གྲོང་
གི་བདག་པོ་ཐོབ་པར་འགྱུར་རོ། །དེ་ནས་རིག་སྔགས་འཆང་གི་དཔལ་ཐོབ་པར་འདོད་ན་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་འདི་མཐོང་ན་རིག་སྔགས་འཆང་ཐམས་ཅད་ཀྱི་རྒྱལ་པོར་འགྱུར་ཏེ། རིག་སྔགས་འཆང་ཐམས་ཅད་ལས་རྒྱལ་བར་འགྱུར་
เล่ม ๙๕ · หน้า 91a
རོ། །ཅི་སྟེ་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཐམས་ཅད་མཐོང་ན་ནི་དེ་ཡང་རྒྱལ་བར་འགྱུར་ཏེ། དགྲ་རྣམས་བཏུལ་ནས་སའི་སྟེང་འཁོལ་བར་འགྱུར་རོ། །མི་ཕལ་པ་གང་ལ་ལ་དཔལ་འདོད་པས་དཔལ་ཐམས་ཅད་མངོན་པར་འབྱུང་བར་བྱེད་པའི་
དཀྱིལ་འཁོར་ཆེན་པོ་མཐོང་ན་ཡང་སྐལ་བ་ཅན་གྱི་ཁྱད་པར་དུ་འགྱུར་ཞིང་། རྒྱལ་སྲིད་དམ། ཡུལ་གྲུའི་བདག་པོའམ། གྲོང་གི་བདག་པོར་འགྱུར་ཏེ་དཀྱིལ་འཁོར་ཆེན་པོ་འདིའི་ལས་འདི་ནི་དོན་ཡོད་པ་ཡིན་ནོ། །ཞེས་རྡོ་རྗེ་འཛིན་པས་བཤད་དོ། །དེ་ནས་རིག་སྔགས་འཆང་
རིག་སྔགས་ཀྱི་དངོས་གྲུབ་འདོད་པས་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་མཐོང་ལ་མཐོང་ནས་ཞག་ཉི་ཤུ་རྩ་གཅིག་གི་བར་དུ་ངེས་པར་གནས་པར་བྱ་སྟེ། རིག་སྔགས་གང་འདོད་པ་བཟླས་བརྗོད་བྱས་ན་ཞག་ཉི་ཤུ་རྩ་གཅིག་གིས་དེ་ལ་རིག་སྔགས་དེ་
འགྲུབ་པར་འགྱུར་རོ། །རྒྱལ་པོ་མཐོང་སྟེ་ཞག་ཉི་ཤུ་རྩ་གཅིག་གི་བར་དུ་ངེས་པར་གནས་ན་ཡང་ཡིད་ལ་བསམས་པ་ཐམས་ཅད་ཐོབ་པར་འགྱུར་རོ། །ལས་རྣམས་ཟིན་ནས་རིག་སྔགས་ཀྱི་ལྷ་བཤོས་སྣ་ཚོགས་དང་། མེ་ཏོག་སྣ་ཚོགས་རྙིང་པ་དེ་རྣམས་ཀྱང་བསྡུས་ལ་དུར་ཁྲོད་དམ།
ཆུ་ཀླུང་གང་ཡང་རུང་བར་དོར་བར་བྱའོ། །དེ་ནས་རིག་སྔགས་འཆང་དབང་ཕྱུག་ཉམས་པའམ། རྒྱལ་པོའི་དཔལ་ཉམས་པ་སླར་གྲོན་པར་འདོད་ན་རིག་སྔགས་འཆང་དེས་ཞག་གསུམ་སྨྱུང་བ་བྱས་ཏེ། ཟླ་བ་ཉའི་ནུབ་མོ་གནས་དབེན་པའམ། ཡང་ན་ནྱ་གྲོ་དྷའི་དྲུང་དུ་དཔལ་
ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཁྲུ་བཅུ་དྲུག་པ། སྒོ་བཞི་ཡོད་པ། མེའི་སྦྱིན་སྲེག་བྱས་པའི་ཐལ་བས་བྲི་ཞིང་དཔལ་གྱི་ལྷ་མོའི་རིག་སྔགས་དང་སྦྱར་ཏེ་དེའི་དབུས་སུ་སངས་རྒྱས་བཅོམ་ལྡན་འདས་བྲིའོ། །གཡོན་ཕྱོགས་སུ་ནི་རྡོ་རྗེ་བྲིའོ། །དེ་བཞིན་གཤེགས་
པའི་གཡས་ཕྱོགས་སུ་ནི་དཔལ་གྱི་ལྷ་མོ་ཆེན་མོ་བྲིའོ། །དེ་ནས་རིག་སྔགས་འཆང་གིས་དཀྱིལ་འཁོར་གྱི་ཤར་ཕྱོགས་ཀྱི་ངོས་སུ་བུམ་པ་ཉི་ཤུ་རྩ་བདུན་དགོད་པར་བྱའོ། །བྱང་དང་ནུབ་དང་ལྷོར་ཡང་དེ་བཞིན་དུ་དགོད་པར་བྱའོ། །བུམ་པ་དེ་དག་གི་ནང་དུ་ཡང་ས་བོན་དང་། རིན་པོ་ཆེ་ཐམས་
เล่ม ๙๕ · หน้า 91b
ཅད་གཞུག་གོ། །བུམ་པ་ཐམས་ཅད་ཀྱང་མགྲིན་བཅིངས་དང་ལྡན་པར་བྱའོ། །བུམ་པ་དེ་དག་ཐམས་ཅད་དུ་འོ་མ་ཡོད་པའི་ཤིང་གི་ཡལ་ག་ཡང་བཅུག་སྟེ་ལན་བདུན་བདུན་བསྔགས་སོ། །དེ་ནས་སངས་རྒྱས་བཅོམ་ལྡན་འདས་དང་། འཕགས་པ་ལག་ན་རྡོ་རྗེ་དང་
དཔལ་གྱི་ལྷ་མོ་ཆེན་མོ་ལ་ལྷ་བཤོས་རྒྱས་པར་དབུལ་ཞིང་མཆོད་པ་རྒྱས་པར་བྱའོ། །སངས་རྒྱས་བཅོམ་ལྡན་འདས་ཀྱི་སྤྱན་སྔར་དཀྱིལ་འཁོར་གུར་གུམ་གྱིས་སྐྱོང་ནུལ་དུ་བྱུགས་ལ་དེའི་མདུན་དུ་བིལ་བའི་ཤིང་གིས་མེ་སྦར་ཏེ། བ་སེར་མོ་བེའུ་ཡོད་པའི་མར་གྱི་ནང་དུ་ཨ་ག་
རུའི་ཡམ་སྲེག་ཤིང་ངམ། །ཡང་ན་པདྨ་བརྒྱད་སྟོང་སྨྱུགས་ཏེ་སྦྱིན་སྲེག་བྱས་ལ་མར་གྱི་མར་མེ་བརྒྱད་སྟོང་སྦར་ཏེ་དེ་ནས་ལས་བྱའོ། །ལས་ཟིན་ནས་བུམ་པ་དེ་དག་གིས་རྒྱལ་པོ་དེ་ཁྲུས་བྱེད་དུ་བཅུག་ལ་ཞག་ཉི་ཤུ་རྩ་གཅིག་གི་བར་དུ་ངེས་པར་གནས་པར་བྱས་ན་ཟིན་པའི་རྗེས་ལ་རྒྱལ་
སྲིད་ཐོབ་པར་འགྱུར་རོ། །ཕལ་པ་གང་ལ་ལས་ཁྲུས་བྱས་ན་དེའི་ལོངས་སྤྱོད་ཀྱི་གཞི་འགྲུབ་པར་འགྱུར་ཏེ། །རྒྱལ་སྲིད་དམ། ཡུལ་གྲུའི་བདག་པོའམ། གྲོང་གི་བདག་པོར་འགྱུར་རོ། །ཅི་སྟེ་བ་ལང་དང་བྲམ་ཟེ་གསོད་པར་བྱེད་ན་ཡང་སྡིག་པ་ཐམས་ཅད་ལས་ཐར་བར་འགྱུར་རོ། །
གང་དང་གང་འདོད་པའི་ཕྱིར་བྱས་ན་ཡང་འདོད་པ་དེ་དང་དེ་ཐོབ་པར་འགྱུར་ཏེ། ཇི་ལྟར་ང་དེ་བཞིན་གཤེགས་པའི་ཞམ་རིང་ན་རྟག་ཏུ་གནས་པ་དེ་བཞིན་དུ་དཔལ་གྱི་ལྷ་མོ་ཆེན་མོ་འདི་དེའི་ཐད་ན་གནས་པར་འགྱུར་རོ། །ཇི་ལྟར་རྡོ་རྗེ་འདི་རྟག་ཏུ་ང་ལ་གནས་པ་དེ་བཞིན་དུ་དཔལ་གྱི་ལྷ་མོ་འདི་
རྟག་ཏུ་དེ་ལ་གནས་པར་འགྱུར་རོ། །གང་ཞིག་རྟག་ཏུ་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་འཆང་དེ་ལ་ནི་རྟག་ཏུ་ལྷ་རྣམས་སྲུང་བར་བྱེད་ཅིང་ཞི་བ་དང་བདེ་ལེགས་སུ་འགྱུར་རོ། །རིག་སྔགས་འཆང་ངམ། རིག་སྔགས་འཆང་གི་བུའམ། རིག་སྔགས་
འཆང་མ་གང་ཞིག་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་མཐོང་ན་ཐམས་ཅད་འཕེལ་བར་བྱེད་པའི་དཔལ་ཐོབ་པར་འགྱུར་རོ། །དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་རྫོགས་སོ།། །།དེ་ནས་དྲང་སྲོང་ལྔ་དགའ་བའི་
เล่ม ๙๕ · หน้า 92a
ཚལ་དུ་འཁོད་ནས་གཅིག་ལ་གཅིག་བལྟས་ཏེ་འདི་སྐད་སྨྲས་སོ། །བྱང་ཆུབ་སེམས་དཔའ་སེམས་དཔའ་ཆེ། །རྡོ་རྗེ་འཛིན་པ་འདི་ཉིད་ནི། །སེམས་ཅན་རྣམས་ལ་ཕན་འདོད་ཕྱིར། །ཐུབ་པའི་དྲུང་ན་གསང་བའི་སྔགས། །རྣམ་པ་སྣ་ཚོགས་ཐབས་ཀྱིས་སུ། །
རིག་མཆོག་ཆོ་ག་ཆེན་པོ་གང་། །ལྷ་རྣམས་ལ་ནི་གྲུབ་སྦྱིན་ཞིང་། །ཐོས་ནས་རྟག་ཏུ་ལྷ་རྣམས་ནི། །ལྷ་མིན་ལས་རྒྱལ་སྔོན་བྱེད་ཀྱིས། །སེམས་ཅན་རྣམས་ཀྱི་དོན་གྱི་ཕྱིར། །གསང་བའི་བདག་པོ་སྟོབས་པོ་ཆེ། །ཞི་བ་དང་ནི་དུལ་བ་ཡི། །ཐད་དུ་སོང་ནས་བྲི་བར་
བྱ། །དེ་ནས་ལྷའི་དྲང་སྲོང་འོད་ཟེར་ཅན་དང་། འོད་སྲུང་དང་། ཀུན་ཤེས་དང་། གནས་འཇོག་དང་། མི་སྦྱིན་གྱི་བུ་ལ་སོགས་པ་བཅོམ་ལྡན་འདས་དང་། ལག་ན་རྡོ་རྗེ་དང་། དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་གྱི་རྒྱལ་པོ་ག་ལ་བ་དེར་དོང་སྟེ་ཕྱིན་ནས་
ལྷའི་གླུ་དབྱངས་ཀྱིས་བཅོམ་ལྡན་འདས་ལག་ན་རྡོ་རྗེ་ལ་མངོན་པར་བསྟོད་དོ། །དེ་ནས་བཅོམ་ལྡན་འདས་ལག་ན་རྡོ་རྗེས་དཀྱིལ་འཁོར་དེ་ནས་ལངས་ནས་ལྷའི་དྲང་སྲོང་དེ་དག་ལ་སྨྲས་པ། དྲང་སྲོང་ཆེན་པོ་ཁྱེད་རྣམས་སེམས་ཅན་ཐམས་ཅད་ལ་ཕན་པའི་ཕྱིར་བརྩོན་པ་དང་། སེམས་
ཅན་ཐམས་ཅད་ལ་ཕན་པའི་ཕྱིར་ཞུགས་པ་དང་། དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་གྱི་རྒྱལ་པོའི་ནང་དུ་འོངས་པ་ལེགས་སོ་ལེགས་སོ། །དེ་ནས་དགའ་བའི་ཚལ་ཆེན་པོ་ཡིད་དུ་འོང་བ་དང་། ཤིང་ཆེན་པོ་ཡོངས་འདུལ་གནས་པའི་སྲིན་མོ་ནམ་གྲུ་ཞེས་
བྱ་བ་སྟོབས་ཆེན་མོ། བརྩོན་འགྲུས་ཆེན་མོ། འཇིག་རྟེན་གསུམ་ན་བྱིས་པ་རྣམས་གསོད་པ། འདོད་དགུར་སྒྱུར་བའི་གཟུགས་ཅན་དེ་ཡང་དྲང་སྲོང་དེ་དག་གི་ཐད་དུ་སོང་སྟེ་མཐོང་ནས་ལྟད་མོར་གྱུར་ཏེ། དཀྱིལ་འཁོར་དེ་དང་ཉེ་བ་ཞིག་ཏུ་སོང་ནས་རྒྱང་ན་འདུག་ཅིང་རྡོ་རྗེ་འབར་བའི་གཟི་བྱིན་
གྱིས་དེའི་ནང་དུ་འོང་མ་ནུས་སོ། །དེ་ནས་དབང་ཕྱུག་ཆེན་པོ་ལ་སོགས་པ་ལྷ་རྣམས་དང་། མི་སྦྱིན་གྱི་བུ་ལ་སོགས་པ་དྲང་སྲོང་རྣམས་ལག་ན་རྡོ་རྗེའི་ཞལ་དུ་བལྟ་ཞིང་། རྡོ་རྗེ་འཛིན་སྲིན་མོ་ནམ་གྲུ་ཞེས་བྱ་བ་སྟོབས་ཆེན་མོ། །བརྩོན་འགྲུས་ཆེན་མོ། །འདི་ནི་སྐྱེ་བོ་གནས་པ་དང་འགྲོ་
เล่ม ๙๕ · หน้า 92b
བ་འཇིག་པར་བྱེད་པ་ལགས་ཀྱིས། །རྡོ་རྗེ་འཛིན་ཆེན་པོ་སྲིན་མོའི་འཇིགས་པ་དེ་ལས་བདག་ཅག་ཡོངས་སུ་སྐྱོབས་ཤིག །དེ་ནས་དཔལ་དང་ལྡན་པ་རྡོ་རྗེ་འཛིན་ཁྲོས་ཏེ་མིག་དམར་པོར་བསྒྱུར་ནས་རང་གི་དཔུང་ལ་བལྟས་ཏེ་ལྷ་དེ་དག་ལ་འདི་སྐད་ཅེས་སྨྲས་སོ། །ལྷ་རྣམས་རེ་ཞིག་
འཁོད་ཅིག་དང་། འཇིག་རྟེན་ན་སྡང་བ་གང་ཇི་སྙེད་ཡོད་པ་དེ་དག་གཞིག་པར་བྱའོ། །དེ་ནས་ལྷ་རྣམས་དང་། དྲང་སྲོང་དེ་དག་གིས་ལག་ན་རྡོ་རྗེ་དང་། སྤྱན་ལ་བསྟོད་ནས་རྡོ་རྗེ་འཛིན་སྲིན་མོ་ཆེན་མོ། བརྩོན་འགྲུས་ཆེན་མོ། སྟོབས་ཆེན་མོ། ཁྱོད་ཀྱི་དཀྱིལ་འཁོར་དུ་འཇུག་
མི་ནུས་ཀྱིས། རྡོ་རྗེ་འཛིན་ཁྱོད་ཀྱིས་ཀྱང་སྲིན་མོ་ཆེན་མོ་འདི་ལ་བསྟོད་པར་མཛོད་ཅིག་དང་། དེས་ན་དཀྱིལ་འཁོར་དུ་འོང་བར་འགྱུར་རོ། །དེ་ནས་བཅོམ་ལྡན་འདས་ལག་ན་རྡོ་རྗེས་ལྷ་དེ་དག་ལ་སྙིང་རྗེའི་སེམས་ཀྱིས་བལྟས་ནས་སྲིན་མོ་ནམ་གྲུ་ལ་རང་གི་ཆོ་འབྲང་ལས་བསྟོད་པ། ནམ་
གྲུ་ཁྱོད་ཀྱི་ཆོ་འབྲང་དང་། །མཚན་ཉིད་དག་ནི་བཤད་བྱ་ན། །ནོར་བུའི་རང་བཞིན་ཁྱོད་ཀྱི་ལུས། །རྒྱབ་ནི་འཛམ་བུ་ཆུ་བོའི་གསེར། །ཁྱོད་ཀྱི་གདོང་ཡང་དངུལ་ཡིན་ཏེ། །ལྟོ་བའི་ངོས་ནི་རྡོ་རྗེས་གཏམས། །མིང་པོ་མཛོད་དང་མཛོད་སྲུང་བ། །ཁྱོད་ཀྱི་མ་ནི་ཀུན་འགྲོ་མ། །
ཁྱོད་ཀྱི་ཕ་ནི་རླུང་ཞེས་བྱ། །སྐལ་ལྡན་ཤིང་རྟ་ཁྱོད་ཀྱི་རུས། །ལྷ་ཡུལ་དག་ཏུ་གྲགས་པ་ཡིན། དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་སྲིན་མོ་ནམ་གྲུ་རང་གི་ཆོ་འབྲང་ལ་བསྟོད་ནས། སངས་རྒྱས་བཅོམ་ལྡན་འདས་ལ་མགོ་བོས་ཕྱག་འཚལ་ཏེ། །རྡོ་རྗེ་འཛིན་པ་
བདག་ཉིད་ཆེ། །ཚངས་དང་གསུམ་ལ་ཕྱག་འཚལ་ཏེ། །དབང་ཕྱུག་ཆེ་ལ་ཕྱག་འཚལ་ནས། །ས་འཛིན་ཀླུ་རྣམས་གང་ཡིན་དང་། །གང་དག་གནོད་སྦྱིན་སྟོབས་པོ་ཆེ། །གྲུབ་པ་རྒྱུ་བ་དྲི་ཟ་རྣམས། །དྲང་སྲོང་ལྷ་དང་ལྷ་མིན་པ། །དེ་ནས་འབྱུང་པོ་ཐམས་ཅད་དང་། །
འོད་ཟེར་ཅན་དང་འོད་སྲུང་དང་། །ཀུན་ཤེས་དང་ནི་གནས་འཇོག་དང་། །ཐུབ་པ་ཆེན་པོ་མི་སྦྱིན་བུ། །དབང་པོ་གཏུམ་པོ་ཁྱབ་འཇུག་དང་། །འདི་རྣམས་བདག་ལ་གྲུབ་སྦྱིན་ཤོག །ནམ་གྲུ་མོ་ནི་བཤད་བྱ་ན། །མཚན་མོ་ནག་མོ་འཇིགས་བྱེད་མ། །གཤིན་རྗེའི་སྲིང་མོ་
เล่ม ๙๕ · หน้า 93a
ཆེན་མོ་སྟེ། །ཡོངས་འདུའི་ཤིང་ལ་གནས་པ་ཡིན། །རི་ལ་ཁྱབ་འཇུག་གཅིག་པུ་ནི། །བདེ་བར་ཉལ་བར་མི་ཉམ་སྟེ། །དེས་ནི་བྱ་ཡི་གཟུགས་ཀྱིས་སུ། །མཚན་མོ་ཁྱབ་འཇུག་སྐྲག་པར་བྱེད། །ལྷ་མོ་ནག་མོ་སྟོབས་མོ་ཆེས། །དེ་མཐོང་ནས་
ནི་འོང་བར་འགྱུར། །དེ་ནས་རྩེད་མོ་བྱེད་བཞིན་དུ། །བྱིས་པ་གསོད་པའི་མགྲིན་པ་ནས། །ལག་པ་གཡོན་པས་བཟུང་ནས་ནི། །འཇིགས་པའི་སྒྲ་ཡང་འབྱིན་པར་བྱེད། །རྣ་གཉིས་ཀྱང་ནི་མི་མཐོང་སྟེ། །སེམས་ཉམས་པས་ནི་དེ་མཐོང་ནས། །ཤིན་ཏུ་བྲེད་ཅིང་བཞིན་
ཡང་འགྱུར། །ཁྱོད་ནི་ང་ལ་མ་འཚེ་བར། །ལྷ་ཡི་དགའ་གནས་དགའ་བར་གྱིས། །དེ་ནས་ཁྲོས་ནས་དེ་ཉིད་དུ། །བྱིས་པ་གསོད་ལ་བསྒོ་བ་ནི། །ལོ་གཅིག་པ་དང་ལོ་གཉིས་དང་། །ལོ་དགུ་པ་ལ་མ་འཇུག་པར། །བཟང་མོ་སོང་ལ་སྐྱེ་དགུ་འདི། །རང་གི་ལས་ཀྱིས་
བཟའ་བར་གྱིས། །བ་ལང་རྣམས་ལ་གོར་ཡང་བྱོས། །ཝ་རྣམས་ལ་ནི་ཝ་གསོད་དང་། །རི་དགས་ལ་ནི་རི་དགས་ནད། །མི་རྣམས་ལ་ནི་མི་ངས་བྱོས། །ཁྱོད་ཀྱི་ལུས་ལ་དེང་བརླག་གྱུར། །བྱིས་པ་རྣམས་ནི་རྩེ་གྱུར་ཅིག །བྱིས་པ་རྣམས་ལ་ཕན་གདགས་ཕྱིར། །མ་མོ་
རྣམས་ལ་སྙེམས་པའི་མཆོག །མི་རྣམས་ཀྱང་ནི་རིམ་བཞིན་དུ། །དེ་ནི་བདག་གིས་བཤད་པར་བྱ། །དཀྱིལ་འཁོར་འདི་ནི་མཐོང་བ་ལ། །གདོན་ནི་གང་ཞིག་ལྡོག་མི་བྱེད། །གདོན་མང་དག་གིས་དེ་སྤངས་ནས། །མུན་པ་མི་བཟད་གནས་པར་འགྱུར། །གང་གིས་
སུ་ནི་ཞི་འགྱུར་བ། །འདི་ཡང་ལྷ་རྣམས་མཉན་པར་གྱིས། །གང་ན་བུད་མེད་སྲུང་བྱེད་པ། །དེར་ནི་བྱིས་པ་བསྲུང་བྱ་སྟེ། །གསེར་དག་དང་ནི་ལུང་ཏང་རྣམས། །པུད་ཏྲན་ཛི་བ་ལིག་བུ་མིག །གི་ཝང་མར་དང་སྦྲང་རྩི་དང་། །ཡང་ན་ཤུ་དག་གྲོ་བ་རྣམས། །འདི་དག་
གང་གི་ཁྱིམ་ན་ཡོད། །དེར་ནི་བྱིས་པ་བསྲུང་བར་བྱ། །དེ་ནས་གསང་བའི་བདག་པོ་ལག་ན་རྡོ་རྗེ་སྟོབས་པོ་ཆེས་རིག་སྔགས་བཤད་པ། ན་མོ་བཛྲ་པཱ་ཎི་སྱ། ཙི་ལི་ཙི་ལི། བྷིནྡ་བྷིནྡ། མུཉྩ་མུཉྩ། ཧི་བ་ལ་ཀཾ་སྭཱ་ཧཱ། བཛྲ་པཱ་ཎི་རཱ་ཛྙཱ་པ་ཡ་ཏི་སྭཱ་ཧཱ། དེ་བཱ་ས་མཱ་ཛྙཱ་པ་ཡ་ཏི་སྭཱ་ཧཱ།
เล่ม ๙๕ · หน้า 93b
རི་ཥཱ་ཡ། ས་མཱཛྙཱ་པ་ཡ་ཏི་སྭཱ་ཧཱ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་སྟོབས་པོ་ཆེས་འདི་བཤད་མ་ཐག་ཏུ་སྲིན་མོ་སྟོབས་མོ་ཆེ་ནམ་གྲུས་སྐད་ཆེན་པོ་ཕྱུང་ནས། དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་གང་ན་བ་དེར་སོང་སྟེ་ཕྱིན་
ནས། བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །སྟོབས་པོ་ཆེ་ཚོགས་མི་བཟད་པ་མཆོག་ཏུ་མི་བཟད་པ་མཆོག་ཏུ་འཇིགས་པ་ལས་བདག་བསྐྱབ་ཏུ་གསོལ། །དེ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་སྲིན་མོ་དེ་དག་ལ་འདི་སྐད་
ཅེས་སྨྲས་སོ། །སྲིན་མོ་མ་འཇིགས་ཤིག །མ་འཇིགས་ཤིག །རིག་སྔགས་ཀྱི་རྒྱལ་པོ་ཆེན་པོ་དྲན་པར་གྱིས་ཤིག །བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་དྲན་པར་གྱིས་ཤིག་དང་། དེས་ན་འཇིགས་པར་མི་འགྱུར་རོ། །སྐལ་བ་ཆེན་པོ་ལྡོག་
པར་གྱིས་ཤིག །སྟོབས་པོ་ཆེ་ངའི་བཀའ་ཉོན་ཅིག །དེ་ནས་སྲིན་མོ་ཆེན་མོ་ནམ་གྲུས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བྱང་ཆུབ་སེམས་དཔའ་ཆེན་པོ་བདག་གིས་གཏང་ལགས་ཀྱིས། །བདག་གིས་ཅི་བགྱི་བ་བཀའ་སྩོལ་ཅིག །
དེ་ནས་བཅོམ་ལྡན་འདས་ལག་ན་རྡོ་རྗེས་སྲིན་མོ་དེ་ལ་སྨྲས་པ། གང་ན་རིག་སྔགས་ཀྱི་རྒྱལ་པོ་གནས་པ་དེར་ཁྱོད་མ་འདུག་ཤིག །དཔལ་ཐམས་ཅད་འབྱུང་བར་བྱེད་པའི་དཀྱིལ་འཁོར་ཆེན་པོ་མཐོང་བ་གང་ཡིན་པ་དང་། །ཁྱོད་ཀྱི་ཆོ་འབྲང་དང་། མཚན་ཉིད་གྲོ་ག་ལ་བྲིས་ཏེ་འཆང་བ་
དེར་ཡང་ཁྱོད་ཀྱིས་སྲུངས་ལ་ཞི་བ་དང་བདེ་ལེགས་སུ་གྱིས་ཤིག །སྨྲས་པ། སྟོབས་པོ་ཆེ་དེ་ལྟར་བགྱི་སྟེ་གང་བདག་གི་ཆོ་འབྲང་དང་། མཚན་ཉིད་གྲོ་ག་ལ་གི་ཝང་གིས་བྲིས་ནས་སྣོད་དུ་བཅུག་སྟེ་འཆང་བ་དང་། དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་
ཆེན་པོ་མཐོང་བ་དང་། ཡུལ་ལམ་གྲོང་ཁྱེར་གང་ན་དཀྱིལ་འཁོར་ཆེན་པོ་འདི་འདྲི་བའི་ཡུལ་དེ་ཞི་བ་དང་བདེ་ལེགས་སུ་འགྱུར་ཏེ། དེས་ན་སེམས་ཅན་སྡང་བར་སེམས་པ་རྣམས་ཀྱིས་ཁྱོད་ཀྱི་བཀའ་མཉན་ནས་སྲུང་བར་བྱེད་དེ་ཞི་བ་དང་བདེ་ལེགས་སུ་འགྱུར་རོ། །བྱིས་པ་གང་
เล่ม ๙๕ · หน้า 94a
ནམ་གྲུའི་ཆོ་འབྲང་དང་མཚན་ཉིད་སྣོད་དུ་བཅུག་སྟེ་འཆང་བ་དེ་ལ་ནི་གདོན་ཐམས་ཅད་ཀྱིས་འཇིགས་པར་མི་འགྱུར་རོ། །གང་ཞིག་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་བྲིས་པའི་དབུས་སུ་རྡོ་རྗེའི་དབྱིབས་ཀྱི་ཐབ་ཁུང་བྱས་ཏེ། རབ་
ཏུ་གྲུབ་པར་བྱེད་པའི་རྒྱུད་ཆེན་པོ་ལས་ཁྲོ་བོ་སྟོབས་པོ་ཆེ་ངས་བཤད་པ་གང་ཡིན་པའམ། ཡང་ན་རིག་སྔགས་ཀྱི་རྒྱལ་པོ་ཆེན་པོས་གུ་གུལ་ལམ་འབྲུའི་སྦྱིན་སྲེག་བྱས་ན་ལག་ན་རྡོ་རྗེས་བཤད་པ་བཞིན་དུ་ཡུལ་ལམ། གྲོང་ཁྱེར་གྱི་མི་ནད་ཞི་བར་འགྱུར་རོ། །ཞི་བའི་ཆོ་ག་
རྫོགས་སོ།། །།དེ་ནས་བཅོམ་ལྡན་འདས་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །བཟོད་ལྡན་དག་ཁྱེད་ཉོན་ཅིག །དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་ལས་ངས་རིག་སྔགས་བཤད་པ་གང་ཡིན་པ་དེ་དག་གི་ལས་ཀྱི་
འབྲས་བུ་སྟོན་པ་རྣམ་པ་སྣ་ཚོགས་ངས་བཤད་པར་བྱའོ། །སྨྲས་པ། །རིག་སྔགས་ཀྱི་རྒྱལ་པོ་སྔགས་ཐམས་ཅད་ཀྱི་ལས་ཤོད་ཅིག་ཤོད་ཅིག། སྨྲས་པ། ལྷ་རྣམས་ངའི་བཀའ་གཅོག་པ་དེ་ནི་ངས་རྡོ་རྗེ་འབར་བ་ཀུན་ཏུ་རབ་ཏུ་འབར་བར་སྤྱི་བོ་གཤེག་པར་བྱའོ། །དཔལ་ཐམས་ཅད་
མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོའི་ཆོ་ག་ངས་བཤད་པ་གང་ཡིན་པ་དེ་ཡང་དེ་བཞིན་དུ་གྱིས་ཤིག །ནམ་གྲུའི་ཆོ་འབྲང་དང་། མཚན་ཉིད་ཀྱི་ཆོ་ག་བཤད་པར་བྱ་སྟེ། ཡུལ་གང་དུ་མི་ནད་ཀྱི་གནོད་པ་བྱུང་བ་དེར་ངས་ཆོ་ག་བཤད་པའི་ཆོ་ག་དེས་དཔལ་ཐམས་ཅད་
མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་བྲིས་ལ། དེའི་དབུས་སུ་རབ་ཏུ་གྲུབ་པར་བྱེད་པའི་རྒྱུད་ལས་བཤད་པའི་རྡོ་རྗེ་ཁྲོ་བོས་གུ་གུལ་ལས་འབྲུའི་སྦྱིན་སྲེག་བྱའོ། །སྲིན་མོ་ཆེན་མོ་དེའི་གཏོར་མ་གང་གིས་མི་ནད་ཞི་བར་གྱུར་པ་ཡང་བཤད་པར་བྱ་སྟེ། འབྲས་ཀྱི་འོ་
ཐུག་སྦྱར་ཐུག་དང་། །འབྲས་ཅན་མོན་སྲན་གྲེའུ་སྦྱར་དང་། །འབྲས་ཅན་བུ་རམ་སྦྱར་བ་དང་། །ཏིལ་དང་སྦྱར་བའི་སྣུམ་འཁུར་དང་། །འབྲས་ཀྱི་ཞིང་དེ་ངུ་ཞོ་དང་། །པེན་ཙེར་འཁུར་བ་བཀྲ་ཤིས་ལྡན། །འབྲས་ཀྱི་ཆུང་པེད་ལ་ཕུག་ཏིལ། །བུར་མར་འོ་མ་ཉ་དང་ཤ། །
เล่ม ๙๕ · หน้า 94b
ཏིལ་ཕྱེ་ལས་བྱས་འཁུར་བ་དང་། །ཆང་དང་དབྱིག་དང་བཅས་པ་དང་། །མེ་ཏོག་ཕྲེང་བ་དྲི་དང་བྱུག །གཏོར་མ་དེ་དག་བྱིན་ན་ནི། །མི་ནད་ཀུན་ཞི་ཕན་པར་འགྱུར། །ལྷ་ཐམས་ཅད་ལ་ཡང་བཤོས་སྣ་ཚོགས་དབུལ་བར་བྱ་ཞིང་དེར་ཤིན་ཏུ་བཀྲ་ཤིས་པའི་ཚིགས་སུ་
བཅད་པ་ཡང་བཀླག་པར་བྱའོ། །རྣམ་པར་རྒྱལ་བའི་རྒྱུད་ཆེན་པོ་ལས་བཅོམ་ལྡན་འདས་ཀྱིས་གསུངས་པའི་རིག་སྔགས་ཀྱི་རྒྱལ་མོ་ཆེན་མོ་རྨ་བྱ་ཆེན་མོའི་རིག་སྔགས་བདུན་བརྒྱས་བསྐོར་བ་གང་ཡིན་པ་དེ་ཡང་དེར་བཀླག་པར་བྱ་སྟེ། །རིམ་གྲོ་བྱ་ཞིང་བླ་མར་བྱས་ལ་དྲི་དང་།
མེ་ཏོག་དང་། བདུག་པ་དང་། བཤོས་རྣམས་ཀྱིས་མཆོད་པར་བྱའོ། །ནམ་གྲུའི་ཆོ་འབྲང་དང་། མཚན་ཉིད་ཀྱང་བཀླག་པར་བྱ་སྟེ། གྲོ་ག་ལ་བྲིས་ནས་མགོ་ལ་བཏགས་ན་ཡུལ་དེར་ཞི་བ་དང་བདེ་ལེགས་སུ་འགྱུར་ཏེ། ཡུལ་དེར་མི་ནད་ཀྱི་གནོད་པ་འབྱུང་བར་མི་འགྱུར་
རོ། །ནམ་གྲུའི་ཆོ་འབྲང་མཚན་ཉིད་ནི། །ལག་ན་རྡོ་རྗེས་བཤད་པ་བཞིན། །དེ་ནི་བདག་གིས་ངེས་པར་བསྟན། ཕོ་ཉ་མོ་སྟོབས་ཆེན་མོ་རྣམས་ཀྱི་ལས་ཀྱང་བཤད་པར་བྱ་སྟེ། དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་ལ་ཕོ་ཉ་མོ་སྟོབས་
ཆེན་མོ་དྲུག་ངས་བཤད་པ་གང་ཡིན་པ་རྣམས་དང་། ཚོགས་རྣམས་ཀྱི་ནང་ན་ཕོ་ཉ་མོ་རྣམས་ཀྱི་ལས་སྒྲུབ་པ་ལྕགས་ཅན་བསྟན་པ་གང་ཡིན་པ་དང་། མཐོང་བར་དགའ་བར་བཤད་པ་ཕོ་ཉ་ཚོགས་དྲུག་གིས་བསྐོར་བ་ཚོགས་ཆེན་པོ་ལྕགས་ཅན་གང་གིས་མཐོང་བ་དེས་ཕོ་
ཉ་མོ་རྣམས་དང་། འགྲོགས་པ་མི་བཟད་པ་དཔའ་བོ་ཚོགས་ཆེན་པོ་དང་། ཕོ་ཉ་མ་རྣམས་དང་ལྷན་ཅིག་གནས་པ་དྲག་པོ་མི་བཟད་པ་ལས་དྲག་པོ་བྱེད་པ། གཟུགས་བཟང་པོ་དང་། ལྕགས་ཅན་ཕོ་ཉ་མ་རྣམས་དང་ལྷན་ཅིག་ན་གནས་པ་སྟོབས་པོ་ཆེ་སྒྲུབ་པ་ནི་མར་གྱི་
ངོ་ཞག་བརྒྱད་ལ་སྨྱུང་བར་བྱས་ཏེ་བཅོམ་ལྡན་འདས་ལག་ན་རྡོ་རྗེའི་མདུན་དུ་མཆོད་པ་རྣམ་པ་སྣ་ཚོགས་དེ་བཞིན་དུ་བྱས་ལ། དེ་ནས་ཕོ་ཉ་མ་སྟོབས་མོ་ཆེ་དྲུག་གཞག་པར་བྱའོ། །དེ་ལ་དབུས་སུ་ནི་ལག་ན་རྡོ་རྗེ་སྟོབས་པོ་ཆེ་དྲག་པོའི་ལས་བྱེད་པ་གཟུགས་བཟང་པོ་གཞག་གོ། །
เล่ม ๙๕ · หน้า 95a
འོག་ལོགས་སུ་ནི་རྐང་པ་གཡས་པའི་ལྷོ་ཕྱོགས་སུ་ནི་ཕོ་ཉ་མོ་སྟོབས་མོ་ཆེ་དྲུག་གཞག་གོ། །རྐང་པ་གཡས་པ་དེ་ཡང་འདེགས་པར་བྱ་སྟེ། ཚོགས་ཆེན་པོ་ལྕགས་ཅན་སྟོབས་པོ་ཆེ་ཚོགས་བདུན་གྱིས་བསྐོར་བས་ལག་པ་གཉིས་ཀྱིས་རྡོ་རྗེ་འཛིན་ཆེན་
པོའི་རྐང་པ་གཡས་པ་སྟོན་ཅིང་འཛིན་པར་བྱའོ། །དེ་ནས་ལྕགས་ཅན་གྱི་འོག་ལོགས་སུ་རིན་པོ་ཆེ་ཐམས་ཅད་དང་འབྲུ་ཐམས་ཅད་གཞག་པར་བྱའོ། །ཡང་ན་ཀཱརྵཱ་པ་ཎི་བརྒྱ་རྩ་བརྒྱད་ཚང་བར་དབུལ་བར་བྱའོ། །ལག་ན་རྡོ་རྗེ་དང་ལྕགས་ཅན་ལ་སོགས་པ་ཚོགས་
རྣམས་དང་། ཕོ་ཉ་མོ་སྟོབས་མོ་ཆེ་དེ་དག་ཀྱང་ཚོན་རྩི་སྣ་གསུམ་གྱིས་བྲི་བར་བྱའོ། །དེ་ནས་ལག་ན་རྡོ་རྗེ་དང་ཚོགས་ཆེན་པོ་རྣམས་དང་། ཕོ་ཉ་མོའི་ཚོགས་དེ་དག་ལ་ལྷ་བཤོས་སྣ་ཚོགས་དབུལ་བར་བྱའོ། །དེ་ནས་ཚོགས་ཆེན་པོ་ལྕགས་ཅན་གྱི་སྔགས་ལན་བརྒྱ་རྩ་བརྒྱད་བཟླས་
པར་བྱའོ། །དེ་ནས་མཚན་མོ་རྨི་ལམ་བཟང་པོ་རྨི་བར་འགྱུར་རོ། །ཡང་ན་སྐྱེས་པའམ། བུད་མེད་མཐོང་བར་འགྱུར་ཏེ། ཅི་སྟེ་སྐྱེས་པ་ནག་པོ་མིག་དམར་ལ་གོས་སེར་པོ་གྱོན་པ་ཞིག་མཐོང་ན་ནི་དེ་ཕྱིན་ཅད་རིག་སྔགས་འཆང་གི་ཞི་བ་དང་རྒྱས་པ་དང་དྲག་ཤུལ་གྱི་ལས་རྣམས་འགྲུབ་
པར་འགྱུར་རོ། །ཅི་སྟེ་བུད་མེད་གོས་དཀར་པོ་གྱོན་པ་མདོག་ནག་པའམ་སྔོ་བསངས་སམ་དཀར་པོ་མཐོང་བར་གྱུར་ན་དེ་ཇི་སྟེ་དཀར་པོ་མཐོང་ན་ནི་ལྡོང་རོས་བསྒྲུབ་པར་བྱའོ། །ཅི་སྟེ་སྔོ་བསངས་མཐོང་ན་ནི་མཚོན་ཆ་ཐམས་ཅད་འགྲུབ་པར་འགྱུར་རོ། །ཅི་སྟེ་ནག་པོ་མཐོང་ན་ནི་ལིག་བུ་མིག་དང་
ཕ་བང་ལོང་བུ་དང་། སྟང་ཟིལ་ལ་སོགས་པའི་མིག་སྨན་རྣམས་འགྲུབ་པར་འགྱུར་རོ། །ཕོ་ཉ་མ་རྣམས་ཀྱི་ལས་ཐམས་ཅད་ལ་ནི་ནང་པར་བླ་མ་དང་ཚོགས་ལག་ན་རྡོ་རྗེ་དང་འདྲ་བར་བྱ་སྟེ། བདག་ཉིད་ཀྱིས་ཕོ་ཉ་མོ་རྣམས་ཀྱི་ཐབས་སུ་བུད་མེད་གང་ཡང་རུང་བ་ཀུ་ཤའི་སྟན་བྱས་
པ་ལ་འདུག་པ་ལ་ཅི་རིགས་པའི་ཁ་ཟས་ཀྱིས་སྟོན་ན་ཕོ་ཉ་མོ་དྲུག་དང་། ཚོགས་སྟོབས་པོ་ཆེ་བརྒྱད་པོ་རྣམས་འགྲུབ་པར་འགྱུར་ཏེ་ཞག་གསུམ་ན་ཕོ་ཉ་མའི་ཚོགས་རྣམས་ཡོངས་སུ་མགུ་བར་གྱུར་པས་གློ་བུར་དུ་སྐྱེས་པ་དང་། བུད་མེད་ཀྱི་གཟུགས་ཀྱིས་ཤིང་ཐོག་སྦྱིན་པར་བྱེད་དོ། །
เล่ม ๙๕ · หน้า 95b
དེ་ནས་རིག་སྔགས་འཆང་གིས་ཤིང་ཐོག་བླངས་ལ་བདག་གྲུབ་པོ་སྙམ་དུ་ཤེས་པར་བྱས་ནས་ལག་ན་རྡོ་རྗེ་དང་ཕོ་ཉ་མའི་ཚོགས་རྣམས་ལ་མཆོད་པར་བྱའོ། །བཅོམ་ལྡན་འདས་ལག་ན་རྡོ་རྗེ་ཕོ་ཉ་མའི་ཚོགས་དང་ལྷན་ཅིག་ཏུ་ཚོན་རྩི་སྣ་གསུམ་གྱིས་བྲིས་པ་འདི་ནི་གང་
གིས་མཐོང་ན་ཡང་ཕོ་ཉ་མའི་ཚོགས་ཐམས་ཅད་འགྲུབ་པར་འགྱུར་ན་སྒྲུབ་པ་དང་འཆང་བ་ལྟ་ཅི་སྨོས། དབྱིག་དེ་དག་ཀྱང་ལག་པར་བཞག་སྟེ་བླ་མ་ལ་དབུལ་བར་བྱའོ། །ཕུལ་ནས་ཀྱང་ཕོ་ཉ་མོའི་ཚོགས་རྣམས་བདག་ལ་གྲུབ་པར་གྱུར་ཅིག །ཅེས་སྨྲས་ལ། དེ་ནས་
ཀྱང་བསྒྲིམས་ཏེ་ཕོ་ཉ་མོའི་ཚོགས་ཀྱིས་བལྟས་པའི་ལུས་འདི་བསྒྲུབ་པར་བྱའོ། །དེ་ནས་ཕོ་ཉ་མོ་དྲུག་དང་། ཚོགས་སྟོབས་པོ་ཆེ་བརྒྱད་པོ་རྣམས་ལས་སྣ་ཚོགས་ཀྱིས་བསྒྲུབ་པར་བྱའོ། །ཕོ་ཉ་མོ་རྣམས་ཀྱི་ལས་སྣ་ཚོགས་རྣམས་བཤད་པར་བྱ་སྟེ། མེ་ལྕེ་མའི་ལས་འདི་
རྣམས་བསྲུང་བ་ནི་ལན་བདུན་བཟླས་བརྗོད་བྱས་པའི་སྐུད་པས་བྱའོ། །མཚམས་བཅད་པ་ནི་ཐལ་བས་བྱའོ། །དུག་ལས་གསོ་བ་ནི་ཡལ་གས་བྱའོ། །གདོན་ཐམས་ཅད་ལ་ནི་ཡུངས་ཀར་གྱིས་གདབ་པའི་ལས་བྱའོ། །གཞོན་ནུའི་གདོན་ལ་ནི་རྣ་བར་བཤིབས་ཏེ་བཟླས་
བརྗོད་བྱས་པས་གཏོང་བར་བྱེད་དེ། གཞོན་ནུ་ཐམས་ཅད་ལ་རྟག་ཏུ་སྦྱར་བར་བྱའོ། །དབབ་པ་ནི་གུ་གུལ་གྱིས་བདུག་པར་བྱའོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ། འཕགས་པ་ལག་ན་རྡོ་རྗེ་ལ་མེ་ཏོག་དཀར་པོ་སྟོང་གིས་བསྣུན་ན་ལོངས་སྤྱོད་ཀྱི་གཞི་
སྦྱིན་པར་བྱེད་དོ། །ཟླ་བ་གཅིག་གི་བར་དུ་སློང་མོའི་ཟས་བཟའ་ཞིང་རིག་སྔགས་བཟླས་བརྗོད་བྱས་ནས་མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ། འཕགས་པ་ལག་ན་རྡོ་རྗེའི་མདུན་དུ་ལྕགས་ཅན་བཞག་ནས་མཆོད་པ་རྒྱས་པར་བྱས་ལ། དེའི་མདུན་དུ་དོང་ཀའི་
ཤིང་གིས་མེ་སྦར་ལ་ལྡོང་རོས་བ་ལང་གི་མཁྲིས་པ་དང་སྦྱར་བས་ལན་བརྒྱད་སྟོང་སྦྱིན་སྲེག་བྱས་ན་གློ་བུར་དུ་ཧ་ཧ་ཞེས་བྱ་བའི་སྒྲ་ཐོས་པར་འགྱུར་ཏེ། དེ་ནས་ཚོགས་ཆེན་པོ་རྨུགས་བྱེད་འོང་བར་འགྱུར་རོ། །འོངས་ནས་རྨུགས་བྱེད་ཀྱིས་ལྡོང་རོས་སྦྱིན་པར་བྱེད་དེ། དེ་ཐོགས་པས་
เล่ม ๙๕ · หน้า 96a
འདོད་དགུར་སྒྱུར་བའི་གཟུགས་ཅན་དུ་འགྱུར་ཞིང་ལྕགས་ཅན་དང་། ཁ་དོག་མཚུངས་ལ་བསྐལ་པར་གནས་པར་འགྱུར་རོ། །ཡང་ན་སློང་མོའི་ཟས་བཟའ་ཞིང་དབེན་པའི་གནས་སུ་ལན་འབུམ་བཟླས་བརྗོད་བྱས་ན་ཚོགས་ཆེན་པོ་ལྕགས་ཅན་གྱིས་རལ་གྲི་སྦྱིན་པར་
བྱེད་དེ། དེ་ཐོགས་པས་སྟོབས་དང་ཕ་རོལ་གནོན་པ་དཔག་ཏུ་མེད་ཅིང་བསྐལ་པར་གནས་པར་འགྱུར་རོ། །བྱན་ལག་གི་ཚང་ནས་ཤིང་བུ་བླངས་ལ། འཕགས་པ་ལག་ན་རྡོ་རྗེའི་མདུན་དུ་ལན་འབུམ་བཟླས་བརྗོད་བྱས་ན་དེ་ཐོགས་པས་ཡིད་ལ་གང་བསམས་པ་དེ་འགྲུབ་པར་འགྱུར་
ཏེ། སྐྱེས་པ་དང་། བུད་མེད་དང་། ཟས་དང་། གོས་དང་། མལ་སྟན་རྣམས་ཡིད་ལ་བསམས་པས་འགྲུབ་པར་འགྱུར་རོ། །དེ་ལྟ་བུའི་ཤིང་བུ་ཆུ་ཀླུང་ཆེན་པོར་བོར་ཏེ་དེ་ནས་ཉི་མ་ལ་བལྟས་ལ་ཆུ་ངོགས་སུ་བཟླས་བརྗོད་བྱས་ན་ཡིད་ལ་གང་བསམས་པ་དེ་དག་ཐམས་ཅད་འགྲུབ་
ཅིང་ཚེ་ལོ་ཁྲི་ཐུབ་པར་འགྱུར་ཏེ། མིའི་ཐོད་པ་ལ་དབབ་པ་དང་། རལ་གྲི་དང་། མེ་ལོང་ལ་དབབ་པ་ཡང་བྱེད་ནུས་པར་འགྱུར་རོ། །ཡར་གྱི་ངོ་ཟླ་བ་ཉ་ལ་བརྩམས་ཏེ་སློང་མོའི་ཟས་ཟ་ཞིང་། འཕགས་པ་ལག་ན་རྡོ་རྗེའི་ཞབས་ཀྱི་དྲུང་དུ་ལན་འབུམ་བཟླས་བརྗོད་བྱས་ན་བུད་མེད་ཐོབ་པར་
འགྱུར་རོ། །དཔལ་ཐམས་ཅད་མངོན་པར་འབྱུང་བར་བྱེད་པའི་ལས་བྱ་བ་དང་། ལྷ་རྣམས་ལ་དྲི་དབུལ་བ་ཡང་འདིའི་རིག་སྔགས་ཀྱིས་བྱའོ། །མེ་ལྕེ་མའི་ཆོ་ག་སྟེ་དང་པོ་རྫོགས་སོ།། །།མེ་སྟག་མའི་ལས་རྣམས་འབྱུང་སྟེ། དབབ་པ་ནི་ལན་བདུན་བཟླས་བརྗོད་བྱས་
པའི་ཆུས་བྱའོ། །རྒྱ་གཞོམ་པ་ནི་སོ་ཕག་གིས་བྱའོ། །དུག་ལས་གསོ་བ་ནི་ཡལ་གས་བྱའོ། །སྡོམ་དང་ལུ་ཏས་ཟིན་པ་རྣམས་ལ་ནི་བྱ་བ་པས་བྱའོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་དུར་ཁྲོད་ཀྱི་གསེག་མ་བླངས་ནས་འཕགས་པ་ལག་ན་རྡོ་རྗེའི་མདུན་དུ་
ལན་བརྒྱད་སྟོང་བཟླས་བརྗོད་བྱས་ན་གསེག་མ་དེ་ཐོགས་པས་གང་ལ་བསྡིགས་པ་དེ་རྒྱས་བཏབ་པར་འགྱུར་ལ། གུ་གུལ་གྱིས་བདུགས་ན་གྲོལ་བར་འགྱུར་རོ། །མི་རོ་ལ་བལྟས་ཏེ་ལོངས་ཞེས་སྨྲས་ན་ལྡང་བར་འགྱུར་ཏེ་དོན་དུ་གཉེར་བའི་མཆོག་སྟོན་པར་འགྱུར་རོ། །དེ་ནས་རྨ་བྱ་སྒྲུབ་
เล่ม ๙๕ · หน้า 96b
པར་འདོད་ན་ཞག་གསུམ་སྨྱུང་བ་བྱས་ཏེ་མར་གྱི་ངོ་ཞག་བཅུ་བཞི་ལ་གཞོན་ནུའི་གནས་སུ་སོང་ལ་ཚོན་རྩི་སྣ་གསུམ་གྱིས་རྨ་བྱ་བྲིས་ནས་དེའི་ལུས་ལ་རྨ་བྱའི་སྒྲོ་བཞག་སྟེ། ལྷ་བཤོས་སྣ་ཚོགས་ཕུལ་ལ་དེ་ནས་སྐད་ལན་གསུམ་ཕྱུང་གི་བར་དུ་རིག་སྔགས་བཟླས་བརྗོད་བྱས་ན་དེ་ཕྱིན་ཆད་
དུག་གསོ་བའི་ལས་ཐམས་ཅད་འགྲུབ་པར་འགྱུར་རོ། །རྨ་བྱའི་སྒྲོ་དེ་ཡང་དུད་པ་བཀག་སྟེ་བསྲེགས་ལ་དེས་མིག་བསྐུས་ན་ཕྱེ་མ་རེད་ལུས་མི་སྣང་བར་འགྱུར་ཏེ་ཡིད་ལ་གང་བསམས་པའི་དོན་དེ་བྱེད་ནུས་པར་འགྱུར་རོ། །སེམས་ཅན་ཐམས་ཅད་ལ་ཡང་མཚམས་བཅད་པར་ནུས་
སོ། །འབྲུའི་ཞིང་གི་སྟེང་དུ་སོང་ལ་ལན་སྟོང་བཟླས་བརྗོད་བྱས་ན་འབྲུ་རྣམས་རྒྱས་པར་འགྱུར་རོ། །འབྲུ་མ་རུང་བར་བྱ་བར་འདོད་ན་མིའི་རུས་པའི་ཕུར་བུ་ལ་ལན་སྟོང་བཟླས་བརྗོད་བྱས་ཏེ་བཙུགས་ནམ་རུངས་པར་འགྱུར་རོ། །དཔལ་ཐམས་ཅད་མངོན་པར་འབྱུང་བར་བྱེད་
པའི་དཀྱིལ་འཁོར་ཆེན་པོ་ལ་མེ་ཏོག་དབུལ་བ་དང་། ལྷ་ཐམས་ཅད་ལ་ཡང་ལྷ་བཤོས་དབུལ་བ་ཡང་འདིའི་རིག་སྔགས་ཀྱིས་བྱའོ། །མེ་སྟག་མའི་ཆོ་ག་སྟེ་གཉིས་པ་རྫོགས་སོ།། །།ཕྲེང་ལྡན་མའི་ལས་རྣམས་འབྱུང་སྟེ། བུད་མེད་དབང་དུ་བྱ་ན་ཞག་གསུམ་
གྱི་བར་དུ་དུས་གསུམ་དུ་ལན་ཚྭའི་སྦྱིན་སྲེག་བྱས་ན་དབང་དུ་འགྱུར་རོ། །ཟླ་བ་གཅིག་གི་བར་དུ་དུས་གསུམ་དུ་ཁྲུས་བྱས་ཏེ་དུས་གསུམ་དུ་ལན་སྟོང་རྩ་བརྒྱད་བཟླས་བརྗོད་བྱས་ན་ཟླ་བ་གཅིག་ལོན་ནས་བཅོམ་ལྡན་འདས་ལག་ན་རྡོ་རྗེ་མཐོང་བར་འགྱུར་ཏེ་བསམས་པ་ཐམས་ཅད་
ཡོངས་སུ་རྫོགས་པར་བྱེད་ཅིང་ཚེ་ལོ་ལྔ་བརྒྱ་ཐུབ་པར་འགྱུར་རོ། །ཡར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་དགོན་པའི་གནས་སུ་ལན་བརྒྱད་སྟོང་བཟླས་བརྗོད་བྱས་ན་གློ་བུར་དུ་འོང་བར་འགྱུར་ཏེ། འོངས་ནས་གཏེར་སྦྱིན་པར་བྱེད་ལ་དེ་ཡང་མི་ཟད་པར་འགྱུར་རོ། །ཞག་
གསུམ་སྨྱུང་བ་བྱས་ཏེ་ཡར་གྱི་ངོ་ཚེས་ལྔ་ལ་བུམ་པ་ས་བོན་དང་རིན་པོ་ཆེ་ཐམས་ཅད་ཀྱིས་བཀང་སྟེ་མགྲིན་བཅིངས་དང་བཅས་པར་བཞག་སྟེ། རིག་སྔགས་ཀྱང་ལན་བརྒྱད་སྟོང་བཟླས་བརྗོད་བྱས་ལ་ཆུ་དེས་རྒྱལ་པོ་འམ། རྒྱལ་པོའི་བུ་ཁྲུས་བྱེད་དུ་བཅུག་ན་ཡུལ་དེ་དཔལ་དང་ལྡན་
เล่ม ๙๕ · หน้า 97a
པར་འགྱུར་རོ། །དེ་ནས་གནོད་སྦྱིན་དབང་དུ་བྱ་བར་འདོད་ན་དགོན་པའི་གནས་སྐྱེས་པ་དང་བུད་མེད་མེད་པའི་ཕྱོགས་སུ་ཟླ་བ་གཅིག་གི་བར་དུ་སློང་མོའི་ཟས་བཟའ་ཞིང་ས་ལས་གནོད་སྦྱིན་གྱི་གཟུགས་བྱས་ཏེ་དུས་གསུམ་དུ་ལན་བརྒྱད་བརྒྱའམ། ལན་སྟོང་
བཟླས་བརྗོད་བྱས་ན་ཟླ་བ་དྲུག་ལོན་པ་ན་གནོད་སྦྱིན་གྱི་བདག་པོ་འོང་བར་འགྱུར་ཏེ། དེ་ན་རེ་བདག་ཅག་གིས་ཅི་ཞིག་བྱ། དམ་པ་སློངས་ཤིག་ཅེས་ཟེར་བ་དང་། དེ་ནས་དེས་འདི་སྐད་དུ་དཔག་ཚད་བརྒྱ་ཚུན་ཆད་ཀྱི་གནོད་སྦྱིན་ཐམས་ཅད་བདག་གི་དབང་དུ་གྱུར་ཅིག་ཅེས་སྨྲོས་ཤིག །
དེ་ན་རེ་དེ་ལྟར་བྱའོ་ཞེས་སྨྲས་ནས་མི་སྣང་བར་འགྱུར་ཏེ། ཡིད་ལ་ཅི་བསམས་པ་དེ་ཐམས་ཅད་བྱེད་ཅིང་དུས་མ་ཡིན་པར་རྩ་བ་དང་། མེ་ཏོག་དང་། འབྲས་བུ་དང་། ཟས་དང་། གོས་དང་། རིན་པོ་ཆེ་དང་། ཏི་ན་ར་གང་འདོད་པ་རྣམས་སྦྱིན་པར་བྱེད་དོ། །དེ་ནས་ལོངས་སྤྱོད་
ཀྱི་གཞི་བླང་བར་འདོད་ན་ཞག་དྲུག་སྨྱུང་བར་བྱས་ཏེ་བཅོམ་ལྡན་འདས་ལག་ན་རྡོ་རྗེ་ལ་མཆོད་པའི་ཕྱིར་ཞིང་རྒྱས་པར་བྱས་ལ། ཟླ་བ་ཉའི་ནུབ་མོ་ཨ་ག་རུ་དང་། གུ་གུལ་དང་། དུ་རུ་སྐ་བསྲེགས་ཤིང་ནམ་ནངས་ཀྱི་བར་དུ་བཟླས་བརྗོད་བྱས་ཏེ་ཞག་བདུན་གྱི་བར་དུ་ངེས་པར་གནས་
ན་དེ་ནས་ལོངས་སྤྱོད་ཀྱི་གཞི་ཆེན་པོ་ཐོབ་པར་འགྱུར་རོ། །དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོའི་མར་མེ་རྣམས་ཀྱང་འདིའི་རིག་སྔགས་ཀྱིས་དབུལ་བར་བྱའོ། །ཕྲེང་ལྡན་མའི་ཆོ་ག་སྟེ་གསུམ་པ་རྫོགས་སོ།། །།མཛོད་ལྡན་མའི་
ལས་རྣམས་འབྱུང་སྟེ། འཕགས་པ་ལག་ན་རྡོ་རྗེའི་མདུན་དུ་ལན་འབུམ་བཟླས་བརྗོད་བྱས་ན་ནད་ཐམས་ཅད་ཐམས་ཅད་ལས་ཐར་བར་འགྱུར་རོ། །དབབ་པ་ནི་གུ་གུལ་གྱིས་བདུག་པར་བྱའོ། །མར་གྱི་ངོ་ཞག་བརྒྱད་ལ་ཞག་གསུམ་ལ་སྨྱུང་བ་བྱས་ལ་གུ་གུལ་དང་། བིལ་བ་ལྷན་ཅིག་ཏུ་སྦྱར་ཏེ་
ལན་སྟོང་བཟླས་བརྗོད་བྱས་ན་ཏི་ན་ར་སྟོང་ཐོབ་པར་འགྱུར་རོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་དུར་ཁྲོད་དུ་སོང་ནས་མིའི་ཐོད་པ་བླངས་ལ་རའི་འོ་མས་བཀང་སྟེ། ཐོད་པ་གསུམ་གྱི་སྟེང་དུ་བཞག་ནས་རིག་སྔགས་བཟླས་བརྗོད་བྱེད་བཞིན་དུ་འབྲས་སཱ་ལུའི་
เล่ม ๙๕ · หน้า 97b
འོ་ཐུག་བཙོས་ལ། ཟིན་པའི་འོག་ཏུ་རིག་སྔགས་བཟླས་བརྗོད་བྱེད་བཞིན་དུ་འཐུངས་ཏེ་སླར་ཐོད་པའི་ནང་དུ་སྐྱུག་པར་བྱའོ། །དེ་ནས་ཡི་དགས་འོང་བར་འགྱུར་ཏེ་ཡི་དགས་ན་རེ་རིག་སྔགས་འཆང་ང་ལ་འོ་ཐུག་བྱིན་ཅིག་ཅེས་ཟེར་བ་དང་། དེ་ནས་རིག་སྔགས་འཆང་གིས་
རིག་སྔགས་ཐམས་ཅད་ཀྱི་རྒྱལ་པོ་བཟླས་བརྗོད་བྱེད་བཞིན་དུ་ཡི་དགས་དེ་ལ་སྦྱིན་པར་བྱའོ། །ཡི་དགས་དེས་འོ་ཐུང་འཐུངས་ནས་འཆི་བར་འགྱུར་ཏེ་དེའི་ལག་ན་ལྡོང་རོས་འདུག་པ་བླངས་ནས་དེ་ཐོགས་པས་ལག་ན་རྡོ་རྗེ་དང་མཐུ་སྟོབས་མཉམ་ཞིང་བསྐལ་པར་གནས་པར་འགྱུར་རོ། །
རིག་སྔགས་འཆང་གིས་ཟླ་བ་གཅིག་གི་བར་དུ་སློང་མོའི་ཟས་ཟ་ཞིང་། རིག་སྔགས་བཟླས་བརྗོད་བྱས་ན་འདོད་པ་ཐམས་ཅད་ཡོངས་སུ་རྫོགས་པར་འགྱུར་རོ། །ཀུན་དགའ་ར་བར་ཟླ་བ་གཅིག་གི་བར་དུ་སློང་མོའི་ཟས་ཟ་ཞིང་ལན་འབུམ་བཟླས་བརྗོད་བྱས་པའི་མཇུག་ཏུ་
ཞག་གསུམ་སྨྱུང་བ་བྱས་ཏེ། མཚན་རངས་པར་བཟླས་བརྗོད་བྱས་ན་དེ་ནས་ཤིང་གི་ལྷས་གཟུགས་སྟོན་པར་བྱེད་དེ། དེ་ལས་འགྲུབ་པར་འགྱུར་ལ་དེ་ཕྱིན་ཆད་ནགས་ཀྱི་ལྷས་ཁ་ཟས་སྦྱིན་པར་འགྱུར་རོ། །དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོའི་
ལྷ་ཐམས་ཅད་ལ་བདུག་པ་དབུལ་བ་ཡང་འདིའི་རིག་སྔགས་ཀྱིས་བྱའོ། །མཛོད་ལྡན་མའི་ཆོ་ག་སྟེ་བཞི་པ་རྫོགས་སོ།། །།འབར་ལྡན་མའི་ཆོ་ག་རྣམས་འབྱུང་སྟེ། དབབ་པ་ནི་གུ་གུལ་གྱིས་བདུག་པར་བྱའོ། །བསྲུང་བ་ནི་སྐུད་པས་བྱའོ། །མཚམས་
བཅད་པ་ནི་སོ་ཕག་གིས་བྱའོ། །བསྐྲད་པ་ནི་ཐལ་མོ་བརྡབས་པས་བྱའོ། །སས་ནི་འབྲས་དང་ཕོལ་མིག་རྣམས་མེད་པར་འགྱུར་རོ། །ཟླ་བ་གཅིག་གི་བར་དུ་མེ་ཏོག་དཀར་པོ་ལ་ལན་བདུན་བསྔགས་ཏེ་ཕྱེ་མ་རེད་བྱང་ཕྱོགས་སུ་བོར་ནས་ཟླ་བ་གཅིག་ལོན་པ་ན་བཅོམ་ལྡན་
འདས་མ་འགྲུབ་པར་འགྱུར་ཏེ་བསམ་པ་ཐམས་ཅད་ཡོངས་སུ་རྫོགས་པར་འགྱུར་ཞིང་ལོ་ལྔ་བརྒྱ་ཐུབ་པར་འགྱུར་རོ། །རྣ་བར་བཤིབས་ཏེ་བཟླས་བརྗོད་བྱས་ན་གདོན་ཐམས་ཅད་ཀྱིས་གཏོང་བར་འགྱུར་ཏེ། གཞོན་ནུ་རྣམས་ལ་རྟག་ཏུ་སྦྱར་བར་བྱའོ། །མར་གྱི་ངོ་ཞག་
เล่ม ๙๕ · หน้า 98a
བརྒྱད་ལ་ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེ་ལ་མེ་ཏོག་དཀར་པོ་སྟོང་གིས་བསྣུན་ན་ལོངས་སྤྱོད་ཀྱི་གཞི་སྦྱིན་པར་འགྱུར་རོ། །ཟླ་བ་གཅིག་གི་བར་དུ་སློང་མོའི་ཟན་བཟའ་ཞིང་རིག་སྔགས་བཟླས་བརྗོད་བྱས་ནས་ཞག་གསུམ་སྨྱུང་བ་བྱས་ཏེ་མར་
གྱི་ངོ་ཞག་བཞི་ལ་འཕགས་པ་ལག་ན་རྡོ་རྗེའི་མདུན་དུ་ལྕགས་ཅན་བཞག་ནས་མཆོད་པ་རྒྱས་པར་བྱས་ཏེ་ལྷ་བཤོས་རྒྱས་པར་ཕུལ་ནས། དེའི་མདུན་དུ་དོང་ཀའི་ཤིང་གིས་མེ་སྦར་ལ་ལྡོང་རོས་ལ་བ་ལང་གི་མཁྲིས་པ་དང་སྦྱར་བས་ལན་བརྒྱད་སྟོང་སྦྱིན་སྲེག་བྱས་ན་གློ་བུར་དུ་ཧ་ཧ་
ཞེས་བྱ་བའི་སྒྲ་ཐོས་ནས་ཚོགས་ཀྱི་བདག་པོ་ཆེན་པོ་རྨུགས་བྱེད་འོང་བར་འགྱུར་རོ། །འོངས་ནས་རྨུགས་བྱེད་ཀྱིས་ལྡོང་རོས་སྦྱིན་པར་བྱེད་དོ། །དེ་ནས་འདོད་དགུར་སྒྱུར་བའི་གཟུགས་ཅན་དུ་འགྱུར་ཞིང་ལྕགས་ཅན་དང་མཐུ་སྟོབས་མཉམ་ལ་བསྐལ་པར་གནས་པར་འགྱུར་
རོ། །ཡར་གྱི་ངོ་ཟླ་བ་ཉ་ལ་བརྩམས་ཏེ་སློང་མོའི་ཟས་བཟའ་ཞིང་འཕགས་པ་ལག་ན་རྡོ་རྗེའི་ཞབས་དྲུང་དུ་ལན་འབུམ་བཟླས་བརྗོད་བྱས་ན་དཔལ་ཐོབ་པར་འགྱུར་རོ། །དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོའི་ལས་བྱ་བ་དང་། ལྷ་རྣམས་ལ་
དྲི་དབུལ་བ་ཡང་འདིའི་རིག་སྔགས་ཀྱིས་བྱའོ། །འབར་ལྡན་མའི་ཆོ་ག་སྟེ་ལྔ་པ་རྫོགས་སོ།། །།ཁ་འབར་མའི་ལས་རྣམས་འབྱུང་སྟེ། དབབ་པ་ནི་ཆུས་བྱའོ། །བསྲུང་བ་ནི་ཡུངས་ཀར་གྱིས་བྱའོ། །མཚམས་བཅད་པ་ནི་སོ་ཕག་གིས་བྱའོ། །དུར་ཁྲོད་ཀྱི་ཐལ་
བ་བླངས་ཏེ་མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ནས་ལག་ན་རྡོ་རྗེའི་མདུན་དུ་ལན་སྟོང་བཟླས་བརྗོད་བྱས་ན་ཐལ་བ་དེས་གང་ལ་རིག་པར་བྱས་པ་དེ་གདོན་གྱིས་འདེབས་པར་འགྱུར་ཞིང་། ཚིག་གིས་བསྒོ་བས་གཏོང་བར་འགྱུར་རོ། །ལུས་གཙང་བར་བྱས་ཏེ་ལན་
འབུམ་བཟླས་བརྗོད་བྱས་ན་བ་ལང་བརྒྱ་ཐོབ་པར་འགྱུར་རོ། །དེ་ནས་སྐྱེས་པ་དབང་དུ་བྱ་བར་འདོད་ན་ཟླ་བ་ཉ་ལ་ཞག་གཅིག་སྨྱུང་བ་བྱས་ཏེ། མཆོད་པ་རྒྱས་པར་བྱས་ནས་གུར་གུམ་དང་གསེར་ཕྱེ་མར་དང་སྦྱར་བས་ལན་བརྒྱད་སྟོང་སྦྱིན་སྲེག་བྱས་ན་བརྒྱ་བྱིན་ཡང་དབང་དུ་འགྱུར་
เล่ม ๙๕ · หน้า 98b
ན་མི་རྣམས་ལྟ་ཅི་སྨོས། དགེ་སློང་དང་བྲམ་ཟེ་བརྒྱད་བརྒྱ་ལ་མཆོད་སྟོན་བྱིན་ལ་སེམས་ཅན་ཐམས་ཅད་ལ་ཡང་བྱམས་པ་བསྒོམས་ན་ནི་བྲམ་ཟེ་གསོད་པས་ཀྱང་འགྲུབ་པར་འགྱུར་རོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་མདུན་དུ་
དུར་ཁྲོད་ཀྱི་ཤིང་གིས་མེ་སྦར་ནས་དུར་ཁྲོད་ཀྱི་ཡམ་སྲེག་ཤིང་སྐུད་པ་དམར་པོས་དཀྲིས་པ་བརྒྱད་སྟོང་སྦྱིན་སྲེག་བྱས་ན་དེ་ནས་རྨི་ལམ་དུ་ཚོགས་ཆེན་པོ་ལྕགས་ཅན་སྟོན་པར་བྱེད་དེ་དེ་ནས་འགྲུབ་པར་འགྱུར་རོ། །ཆུ་ཁྱོར་གང་ལ་ལན་བདུན་བསྔགས་ནས་གང་ལ་བལྟས་ཏེ་གཏོར་བ་དེ་
གདོན་གྱིས་ཐེབས་པར་འགྱུར་ལ། ཆུ་ཀླུང་གི་ནང་དུ་ཞུགས་ཏེ་ལན་བརྒྱད་སྟོང་བཟླས་བརྗོད་བྱས་ན་གཏོང་བར་འགྱུར་རོ། །ཁ་འབར་མའི་ཆོ་ག་སྟེ་དྲུག་པ་རྫོགས་སོ།། །།དེ་ནས་བཅོམ་ལྡན་འདས་ཀྱིས་ལྷ་དེ་དག་ལ་སྨྲས་པ། ལྷ་རྣམས་དཔལ་ཐམས་ཅད་མངོན་
པར་འབྱུང་བར་བྱེད་པའི་དཀྱིལ་འཁོར་ཆེན་པོ་ལ་ཕོ་ཉ་མོ་རྣམས་ཀྱི་ལས་རྣམས་འབྱུང་བ་ངས་བཤད་ཟིན་ཏེ། ཚོགས་ཆེན་པོ་རྣམས་ཀྱི་ཡང་བཤད་པར་བྱའོ། །བདུད་རྩི་ཐབ་སྦྱོར་གྱི་ལས་སྔར་ངས་གང་བཤད་པ་གང་ཡིན་པའི་ལས་ཏེ་ཚོགས་ཐམས་ཅད་ལ་སྦྱར་བར་
བྱའོ། །རབ་ཏུ་གྲུབ་པར་བྱེད་པའི་རྒྱུད་ཆེན་པོ་ལས་རྡོ་རྗེ་ཁྲོ་བོ་ངས་བཤད་པ་གང་ཡིན་པ་དེའི་ལས་ཀྱིས་ཀྱང་ཚོགས་ཆེན་པོ་སྟོབས་པོ་ཆེ་རྣམས་ལ་སྦྱར་བར་བྱའོ། །ལྷ་རྣམས་འབྱུང་པོའི་བུ་གཞོན་ནུ་མཆོག་སྨིན་དྲུག་གི་བུ་སྟོབས་པོ་ཆེའི་ལས་རྣམས་ངས་བཤད་ཀྱིས་སེམས་རྩེ་
གཅིག་ཏུ་བྱོས་ལ་ཉོན་ཅིག།།གང་ལ་བསམས་ཏེ་བཟླས་བརྗོད་བྱས་ན་དེའི་དབང་དུ་འགྱུར་རོ། །རྒྱ་གཞོམ་པ་ནི་ཆུས་བྱའོ། །བསྲུང་བ་ནི་སྐུད་པས་བྱའོ། །མཚམས་བཅད་པ་ནི་ཐལ་བས་བྱའོ། །བུད་མེད་དབང་དུ་བྱ་བ་ནི་ཞག་བདུན་གྱི་བར་དུ་དུས་གསུམ་དུ་ཡུངས་ཀར་
གྱིས་ལན་སྟོང་རྩ་བརྒྱད་བརྒྱད་སྦྱིན་སྲེག་བྱས་ན་དབང་དུ་འགྱུར་རོ། །མིའི་གཙོ་བོ་དབང་དུ་བྱ་བར་འདོད་ན་ཞག་བདུན་གྱི་བར་དུ་ཟས་སུ་འོ་མ་དང་ཕྱེའི་འདག་གུ་ཟ་ཞིང་འཕགས་པ་ལག་ན་རྡོ་རྗེ་ལ་མཆོད་པ་བྱས་ཏེ་དུས་གསུམ་དུ་བཻ་ཀངྐ་ཏའི་ཡམ་སྲེག་ཤིང་གིས་འབྲུ་མར་དྲི་ཞིམ་པའི་
เล่ม ๙๕ · หน้า 99a
ནང་དུ་སྨྱུགས་པ་སྟོང་རྩ་བརྒྱད་བརྒྱད་སྦྱིན་སྲེག་བགྱིས་ན་དབང་དུ་འགྱུར་རོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་མདུན་དུ་གཞོན་ནུ་སྨིན་དྲུག་གི་བུ་བཞག་ནས་དེའི་མདུན་དུ་ཙནྡན་དམར་པོའི་ཤིང་གིས་མེ་སྦར་ནས་
སེང་ལྡེང་གི་ཡམ་སྲེག་ཤིང་མར་གྱི་ནང་དུ་སྨྱུགས་པ་བརྒྱད་སྟོང་སྦྱིན་སྲེག་བྱས་ན་གཞོན་ནུའི་མེ་ཏོག་གི་ཕྲེང་བ་འགུལ་བར་འགྱུར་རོ། །དེ་ནས་འགྲུབ་པར་འགྱུར་ཏེ་ཞག་བདུན་ཚུན་ཆད་ཀྱིས་གཞོན་ནུའི་སྡེའི་བདག་པོ་ཐོབ་པར་འགྱུར་རོ། །མི་རྣམས་ཀྱིས་མི་སོད་ལ་བདག་གི་
ཚེའི་ཚད་ཀྱང་ཤེས་པར་འགྱུར་རོ། །ཟླ་བ་གཅིག་གི་བར་དུ་སློང་མོའི་ཟས་བཟའ་ཞིང་དེ་ནས་མར་གྱི་ངོ་ཞག་བརྒྱད་དམ། །ཞག་བཅུ་བཞི་ལ་ཞག་གསུམ་སྨྱུང་བ་བྱས་ཏེ། ཙནྡན་དམར་པོའི་མདུང་ཐུང་བདེ་བར་གཤེགས་པའི་མཐོ་གང་གི་ཚད་དུ་བྱས་པ་རས་དམར་པོའི་སྟེང་དུ་
བཞག་ནས་མཆོད་པ་རྒྱས་པར་བྱ་ཞིང་ལྷ་བཤོས་རྒྱས་པ་ཕུལ་ལ། དེ་ནས་རིག་སྔགས་འཆང་བ་རྩྭ་ཀུ་ཤའི་སྟན་གྱི་སྟེང་དུ་འདུག་པའི་ལག་པ་གཡས་པས་མནན་ལ་འབར་བར་གྱུར་གྱི་བར་དུ་བཟླས་བརྗོད་བྱས་ན་འགྲུབ་པར་འགྱུར་ཏེ། དེ་ཐོགས་པས་ཕ་རོལ་གྱི་ཡུལ་འཁོར་འབྱེད་
པར་བྱེད་ཅིང་གདོན་ཐམས་ཅད་འཇོམས་པར་བྱེད་པར་འགྱུར་ཏེ། ཡུལ་གང་དུ་བཙུགས་པ་དེར་རྒྱལ་བར་འགྱུར་རོ། །ཀླུའམ། ཀླུ་མོའམ། དྲི་ཟའམ། རིག་སྔགས་འཆང་རྣམས་ལ་བལྟས་ཏེ་བསྡིགས་ན་དེ་དག་ཐམས་ཅད་བཀའ་བཞིན་དུ་འགྱུར་རོ། །གླང་པོ་ཆེ་རྒྱགས་
ཤིང་མྱོས་པ་ལ་བལྟས་ཤིང་བསྡིགས་ན་གླང་པོ་ཆེ་དབང་དུ་འགྱུར་རོ། །སློང་མོའི་ཟས་ཟ་ཞིང་ཆོ་ག་འདི་བཞིན་དུ་འཁོར་ལོ་བསྒྲུབས་ན་རིག་སྔགས་འཆང་གི་འཁོར་ལོས་སྒྱུར་བའི་རྒྱལ་པོར་འགྱུར་ཏེ། བསྐལ་པར་གནས་ཤིང་རིག་སྔགས་འཆང་བརྒྱས་བསྐོར་བ་ལ་མེ་ལོང་ལ་དབབ་
པ་དང་། མཐེ་བོང་ལ་དབབ་པ་དང་། བུམ་པ་ལ་དབབ་པ་ཡང་ནུས་པར་འགྱུར་རོ། །དབྱེ་བར་བྱ་ན་ཞག་གསུམ་གྱི་བར་དུ་ཕུབ་མའི་སྦྱིན་སྲེག་ལན་སྟོང་རྩ་བརྒྱད་བརྒྱད་བྱས་ན་འབྱེ་བར་འགྱུར་རོ། །སྨིན་དྲུག་གི་བུའི་ཆོ་ག་རྫོགས་སོ།། །།ལྷ་མོ་ཆེན་མོ་དྲུག་མའི་
เล่ม ๙๕ · หน้า 99b
ལས་རྣམས་ཀྱང་བཤད་པར་བྱ་སྟེ། བསྲུང་བ་ནི་ཐལ་བས་བྱའོ། །དུག་ལས་གསོ་བ་ནི་ཆུས་བྱའོ། །མཚམས་བཅད་པ་ནི་སོ་ཕག་གིས་བྱའོ། །དེ་ནས་ལོངས་སྤྱོད་ཀྱི་གཞི་བསླང་བར་འདོད་ན་གཞོན་ནུའི་གནས་སུ་སོང་ལ་ལྷ་མོ་ལ་མཆོད་པ་བྱས་ཏེ་སྨིག་མའི་ཤིང་གིས་
མེ་སྦར་ནས་འོ་ཐུག་དང་མར་དང་། སྦྲང་རྩིར་སྦྱར་བས་ལན་བརྒྱད་སྟོང་སྦྱིན་སྲེག་བྱས་ལ་དེ་ནས་ནང་པར་ལངས་ལ་འཕགས་པ་ལག་ན་རྡོ་རྗེ་ལ་མཆོད་པ་བྱས་ཏེ། །གུར་གུམ་མར་དང་སྦྱར་བས་ལན་སྟོང་རྩ་བརྒྱད་བརྒྱད་སྦྱིན་སྲེག་བྱས་ན་ཞག་བདུན་པའི་ཉིན་པར་སྡེའི་བདག་པོར་འགྱུར་རོ། །
དེ་ནས་འཕགས་པ་ལག་ན་རྡོ་རྗེའི་ཞབས་ཀྱི་དྲུང་དུ་ལེགས་ལྡན་ལྷ་ཆེན་པོ་དང་། གཞོན་ནུ་སྨིན་དྲུག་གི་བུ་དང་། ལྷ་མོ་དྲུག་མ་ཚོན་རྩི་སྣ་གསུམ་གྱིས་བྲིས་ལ་རིག་སྔགས་འཆང་ཟས་སུ་འོ་མ་དང་ཕྱེའི་འདག་གུ་ཟ་ཞིང་ལན་འབུམ་བཟླས་བརྗོད་བྱས་ན་ལྷ་མོ་མཐོང་བར་འགྱུར་ཏེ། དེ་
ཡང་འདོད་པ་ཐམས་ཅད་སྦྱིན་པར་བྱེད་དོ། །བཏོན་པ་ཙམ་གྱིས་རྒྱན་སྐུགས་ལས་རྒྱལ་བར་འགྱུར་རོ། །དེ་ནས་བདག་ཉིད་ཀྱི་ཚེའི་ཚད་ཤེས་པར་འདོད་ན་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ། བཅོམ་ལྡན་འདས་ལག་ན་རྡོ་རྗེ་ལ་ཡང་མཆོད་པ་རྒྱས་པར་བྱས།
ཨ་ག་རུའི་བདུག་པ་དང་། །དུ་རུ་སྐ་དང་། གུར་གུམ་དང་། གུ་གུལ་དང་། སྦྲང་རྩི་དང་། བ་མར་གྱི་མར་མེ་བཞི་ཕྱོགས་བཞིར་སྦར་ལ། དེ་ཉིད་དུ་རིག་སྔགས་བཟླས་བརྗོད་བྱས་ཏེ་དེ་ཉིད་དུ་ཉལ་ན་འཇིག་རྟེན་གསུམ་ན་ཡོད་པའི་དོན་རྨི་ལམ་དུ་སྟོན་པར་འགྱུར་རོ། །ཁྱོད་ཀྱི་ཚེ་འདི་
སྲིད་དུ་ཐུབ་པར་འགྱུར་རོ། །ཞེས་སྨྲ་ཞིང་ནམ་འཆི་བ་འང་སྟོན་པར་བྱེད་དེ། ག་གེ་མོ་ཞིག་ཏུ་ཆེ་གེ་མོ་ཞིག་གི་ཚེ་སྲོག་འདོར་རོ་ཞེས་སྟོན་པར་འགྱུར་ཏེ། འདི་ནི་དངོས་གྲུབ་མཆོག་གི་ལམ་ཡིན་ནོ། །དེ་ནས་འདས་པ་དང་། མ་འོངས་པའི་ལམ་ཤེས་པར་འདོད་ན་སློང་
མོའི་ཟས་ཟ་ཞིང་འཕགས་པ་ལག་ན་རྡོ་རྗེའི་ཞབས་དྲུང་དུ་ཟླ་བ་གཅིག་གི་བར་དུ་བཟླས་བརྗོད་བྱས་ན་དེ་ནས་བུང་བ་འོང་བར་འགྱུར་ཏེ། །བུང་བ་དེའང་རྣ་བྲུང་དུ་མི་སྣང་བར་གྱུར་ནས་འཇིག་རྟེན་གསུམ་ན་ཡོད་པའི་དོན་སྟོན་པར་འགྱུར་ཞེས་རྡོ་རྗེ་འཛིན་གྱིས་བཤད་དོ། །དྲུག་མའི་ཆོ་
เล่ม ๙๕ · หน้า 100a
ག་རྫོགས་སོ།། །།ལྷ་མོ་དཀའ་ཟློག་མའི་དྲིལ་མཛེས་ཀྱི་ལས་ཀྱང་བཤད་པར་བྱ་སྟེ། མིག་ལ་བསྔགས་ན་གང་བལྟས་པ་དེ་ཐོབ་པར་འགྱུར་རོ། །གདོང་ལ་ལག་པ་བྱུགས་ཏེ་ཉལ་ན་རྨི་ལམ་ངན་པ་རྨི་བར་མི་འགྱུར་རོ། །དེ་ནས་སྡེ་དཔོན་འདོད་ན་ཡར་
གྱི་ངོ་ཚེས་དགུ་ལ་ཞག་གཅིག་སྨྱུང་བ་བྱས་ཏེ་གཏུམ་མོ་ནུབ་ཕྱོགས་སུ་བསྟན་པ་ལ་བལྟས་ནས། མཆོད་པ་རྒྱས་པར་བྱས་ལ་མར་དང་གུ་གུལ་གྱིས་ལན་སྟོང་སྦྱིན་སྲེག་བྱས་ན་སྡེ་དཔོན་ཐོབ་པར་འགྱུར་རོ། །དེ་ནས་མིའི་གཙོ་བོ་དབང་དུ་བྱ་བར་འདོད་ན་མར་གྱི་ངོ་ཞག་བརྒྱད་ལ་
ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་མདུན་དུ་མཆོད་པ་བྱས་ནས་མཚན་རངས་པར་བཟླས་བརྗོད་བྱས་ན་མིའི་གཙོ་བོ་དབང་དུ་ཁུགས་པར་འགྱུར་རོ། །དེ་ནས་རལ་གྲི་བསྒྲུབ་པར་འདོད་ན་ཟླ་བ་གཅིག་གི་བར་དུ་སློང་མོའི་ཟས་ཟ་ཞིང་རིག་སྔགས་ལན་བདུན་
འབུམ་བཟླས་བརྗོད་བྱས་ལ་དེ་ནས་ཞག་གསུམ་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་མདུན་དུ་མཆོད་པ་རྒྱས་པར་བྱས་ནས་རིག་སྔགས་ཀྱི་རྒྱལ་པོས་བསྲུང་བའི་ཆོ་ག་ཐམས་ཅད་བྱའོ། །དེ་ནས་ལག་པ་གཉིས་གུ་གུལ་གྱིས་བསྐུས་ལ་ལག་པས་རལ་གྲི་བཟུང་སྟེ་
རིག་སྔགས་བཟླས་བརྗོད་བྱས་ན་དངོས་གྲུབ་རྣམ་པ་གསུམ་དུ་འགྱུར་ཏེ། རལ་གྲི་དེ་ལག་ན་ཐོགས་པས་རིག་སྔགས་འཆང་གི་རྒྱལ་པོ་བསྐལ་པར་གནས་པར་འགྱུར་ཞིང་ལྷ་ཆེན་པོའི་ཕོ་བྲང་ན་འདུག་པར་འགྱུར་ཏེ། ལེགས་ལྡན་ལྷ་ཆེན་པོ་དེ་དག་ཀྱང་འབྲས་བུ་ཐོབ་པ་སྦྱིན་པར་
བྱེད་དོ། །དེ་ནས་བྱང་ཆུབ་སེམས་དཔའ་རྣམས་དང་ལྷན་ཅིག་ཏུ་གནས་པར་འགྱུར་ཞིང་། འཕགས་པ་སྤྱན་རས་གཟིགས་ཀྱི་དབང་ཕྱུག་དང་ལྷན་ཅིག་གནས་པར་འགྱུར་ལ། དེ་དང་ལྷན་ཅིག་ཏུ་དེ་བཞིན་གཤེགས་པ་མཐོང་ཞིང་བསྙེན་བཀུར་བྱེད་པར་འགྱུར་ཏེ། ལུས་དང་
བྲལ་བའི་ཚེ་ཡང་བདེ་བ་ཅན་དུ་སྐྱེ་བར་འགྱུར་རོ། །དེ་ནས་ལྷའི་གསང་བ་མངོན་སུམ་དུ་མཐོང་བར་འདོད་ན་ཞག་གསུམ་སྨྱུང་བ་བྱས་ཏེ། ཟླ་བ་ཉ་ལ་སངས་རྒྱས་བཅོམ་ལྡན་འདས་དང་། ལག་ན་རྡོ་རྗེ་གཉིས་ལ་ཅི་ནུས་ཀྱིས་མཆོད་པར་བྱའོ། །དེ་ནས་ཡུད་ཙམ་བཟང་པོ་ལ་བདག་
เล่ม ๙๕ · หน้า 100b
དང་། རྒྱལ་པོའམ། གཞན་ཡང་རུང་སྟེ་དུ་གུ་ལའི་རས་དཀར་པོ་བགོས་ཏེ་དེ་ནས་ཨ་ག་རུ་བསྲེག་ཅིང་རྒྱལ་པོ་དང་གཉིས་ཀ་ཐད་ཀར་འདུག་སྟེ་མིག་མི་འཛུམས་པར་བཟླས་བརྗོད་བྱས་ན་མིག་སྔ་ན་འདུག་པའི་ལྷས་གང་གི་དོན་བསྟན་པ་དེ་རྒྱལ་པོས་ཀྱང་ཇི་ལྟར་ཐོས་པ་དེ་བཞིན་དུ་
མཐོང་བར་འགྱུར་རོ། །ཆོ་ག་འདི་ནི་བསྟེན་ནས་ལོ་གཅིག་མ་ལོན་པར་ལ་སྦྱིན་པར་མི་བྱའོ། །སྟོང་རྙེད་མ་བྱིན་པ་ལ་ཡང་སྦྱིན་པར་མི་བྱ་སྟེ། ཆོས་ཅན་དད་པ་དང་ལྡན་པ་ལ་སྦྱིན་པར་བྱའོ། །དཀའ་ཟློག་མའི་ཆོ་ག་རྫོགས་སོ།། །།ལྷ་རྣམས་དཔལ་ཐམས་ཅད་མངོན་
པར་འབྱུང་བར་བྱེད་པའི་དཀྱིལ་འཁོར་ཆེན་པོ་ལས་འབྱུང་བའི་རིག་སྔགས་ཀྱི་ལྷ་རྣམས་ཀྱི་ལས་ངས་བཤད་ཟིན་ཏོ། །ངས་ཀྱང་ལྷ་དེ་དག་བསྒྲུབ་པ་དང་། གཞེན་གདབ་པ་དང་། གནོན་པར་བྱ་བ་དང་། བསད་པ་དང་། བསྐམས་པ་དང་། དཔལ་བསྐྱེད་པ་དང་། ལས་
ཉམས་པ་རྣམས་ཀྱི་ལས་སྒྲུབ་པ་དང་། རིག་སྔགས་ཉམས་པ་རྣམས་ཀྱི་རིག་སྔགས་བཀང་བ་དང་། མི་ནད་ཀྱི་གནོད་པ་འབྱུང་བ་ལ་མི་ནད་ཞི་བར་བྱ་བའི་ཕྱིར་རིག་སྔགས་བཤད་པར་བྱའོ། །ན་མོ་བཛྲ་པཱ་ཎི་སྱ། ཨོྃ་བཛྲ་ཛྭ་ལ་བྷཻ་ར་བཱ་ཡ་ཕཊ། ཧཱུྃ་ཛྭ་ལཱ་ན་ཡ་ཕཊ་སྭཱ་ཧཱ། དེ་
ནས་ལྷ་དེ་དག་གིས་རྡོ་རྗེ་འབར་བ་འདི་ཐོས་ནས་སྙིང་འདར་ཞིང་ལག་ན་རྡོ་རྗེའི་ཞལ་དུ་བལྟས་སོ། །དེ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །ལྷ་རྣམས་མ་འཇིགས་ཤིག །མ་འཇིགས་ཤིག །རྡོ་རྗེ་འབར་བ་ཞེས་བྱ་བ་
ཁྲོ་བོ་ཆེན་པོའི་རྒྱུད་དང་མཐུན་པ་འདི་ནི་ལྷ་རྣམས་བསྒྲུབ་པ་དང་། གཞེན་འདེབས་པ་དང་། གནོད་པ་བྱེད་པ་དང་། བསད་པ་དང་། སྐེམས་པ་དང་། དཔལ་བསྐྱེད་པ་དང་། ལས་ཉམས་པ་རྣམས་ཀྱི་ལས་སྒྲུབ་པ་དང་། རིག་སྔགས་ཉམས་པ་རྣམས་ཀྱི་རིག་སྔགས་བསྐྱོད་པ་
དང་། མི་ནད་ཀྱི་གནོད་པ་བྱུང་བ་ལ་མི་ནད་ཞི་བར་བྱེད་པ་ཡིན་ཏེ། ལྷ་རྣམས་ཀྱི་ཆོ་ག་རྒྱས་པ་འགྲུབ་པར་བྱེད་པ་འདི་ནི་རྣམ་པར་རྒྱལ་བའི་རྒྱུད་ཆེན་པོ་ལས་ཀྱང་ངས་བཤད་དོ། །ད་ལྟར་ཡང་ཁྱེད་རྣམས་འགྲུབ་པར་བྱེད་པ་རྡོ་རྗེ་འབར་བ་ཞེས་བྱ་བ་ཁྲོ་བོ་ཆེན་པོ་འདི་ངས་བཤད་པ་
เล่ม ๙๕ · หน้า 101a
ཡིན་ནོ། །འདིའི་ལས་ཀྱང་བཤད་པར་བྱ་སྟེ། གང་གིས་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་འགྲུབ་པར་བྱེད་པ་དང་། གང་གིས་དཀྱིལ་འཁོར་གྱི་ནང་དུ་གཏོགས་པའི་ལྷ་རྣམས་འགྲུབ་པར་བྱེད་པ་དང་། རིག་སྔགས་འཆང་
མཐུ་ཟད་པ་གང་ཡིན་པ་དག་དང་། རྒྱལ་པོ་དབང་ཕྱུག་ལས་ཉམས་པ་གང་ཡིན་པ་དག་དང་། ལྷའམ། ལྷའི་བུའམ། ཀླུའམ། ཀླུའི་བུའམ། གནོད་སྦྱིན་ནམ། གནོད་སྦྱིན་གྱི་བུའམ། སྲིན་པོའམ། སྲིན་པོའི་བུའམ། དྲི་ཟའམ། དྲི་ཟའི་བུ་མཐུ་ཆུང་ངུ་གང་ཡིན་
པ་དེ་དག་གི་མཐུ་བསྐྱེད་པའི་ཕྱིར་ཡང་ངས་བཤད་པར་བྱའོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ་གནས་དབེན་པའམ། ནྱ་གྲོ་དྷའི་དྲུང་དུ་རྣམ་པར་རྒྱལ་བའི་རྒྱུད་ཆེན་པོ་ལས་སྨན་ཨུཏྤ་ལ་དང་ལྡན་པ་ཞེས་བྱ་བ་བརྩོན་འགྲུས་ཆེན་མོ། །སྟོབས་ཆེན་མོ། །བཅོམ་ལྡན་
འདས་ཀྱིས་གསུངས་པའི་སྨན་དེའི་ཕྱེ་མས་བཅོམ་ལྡན་འདས་རྡོ་རྗེ་ཁྲོ་བོ་བྲི་བར་བྱ་སྟེ། ལག་པ་གཡོན་པ་ན་རྡོ་རྗེ་ཐོགས་ལ་ལག་པ་གཡས་པ་མཆོག་སྦྱིན་པར་བྱའོ། །དེའི་མདུན་དུ་བུམ་པ་མི་གནག་ཅིང་རྩ་བ་མེད་ལ་མགྲིན་ཆིངས་དང་བཅས་པ་ས་བོན་ཐམས་ཅད་ཀྱིས་གང་བར་
བྱས་ཏེ། བུམ་པ་དེའི་ནང་དུ་སྨན་ཨུཏྤལ་དང་ལྡན་པ་ཡང་གཞུག་གོ། །བུམ་པ་དེ་ཡང་གསེར་ལས་བྱས་ལ་འགྲོན་བུ་བཀྲམ་པ་ལས་བྱས་པའི་རྡོ་རྗེའི་སྟེང་དུ་རས་དཀར་པོ་བཞག་སྟེ། དེའི་དབུས་སུ་བུམ་པ་གཞག་པར་བྱའོ། །དེ་ནས་རིག་སྔགས་འཆང་གིས་བསམ་པ་རྒྱ་
ཆེན་པོས་ལྷ་བཤོས་དང་མཆོད་པ་རྒྱས་པར་བྱ་སྟེ། །གུ་གུལ་གྱིས་བདུག་པ་ཡང་དབུལ་ལོ། །དེ་ནས་རིག་སྔགས་འཆང་གིས་དཔལ་གྱི་ལྷ་མོའི་རིག་སྔགས་ལན་བརྒྱད་བརྒྱ་བཟླས་བརྗོད་བྱས་ནས་དེའི་འོག་ཏུ་རྡོ་རྗེ་འབར་བ་ཁྲོ་བོ་ཆེན་པོ་ལན་བརྒྱ་སྟོང་བཟླས་བརྗོད་བྱའོ། །དེ་ནས་
ནང་པར་བུམ་པ་དེས་བདག་ཉིད་ཁྲུས་བྱའོ། །འགྲོན་བུ་ལས་བྱས་པའི་རྡོ་རྗེ་དང་གོས་དེ་ཡང་འཕགས་པ་ལག་ན་རྡོ་རྗེ་ལ་ཕུལ་ནས། བླ་མ་ཡང་དེ་དང་འདྲ་བའི་ཕྱིར་བླ་མ་ལ་དབུལ་ལོ། །དེ་ཕུལ་ནས་ཀྱང་ཡིད་ལ་བསམས་པ་བསླང་བར་བྱའོ། །དགེ་སློང་གི་དགེ་འདུན་རྣམས་
เล่ม ๙๕ · หน้า 101b
ཀྱང་ཅི་ནུས་ཀྱིས་སྟོན་པར་བྱའོ། །དེས་ན་ལྷ་ཐམས་ཅད་ཀྱི་ལས་མངོན་སུམ་དུ་འགྱུར་རོ། །ལས་འདི་ནི་སྐལ་བ་མེད་པས་མཐོང་བར་མི་འགྱུར་ཏེ། རིག་སྔགས་ལས་བྱུང་བའི་འབྲས་བུ་ཐོབ་པའམ། རིག་སྔགས་འཆང་གི་རིགས་དང་ལྡན་པ་གང་ཡིན་པ་དེ་དག་གིས་
མཐོང་བར་འགྱུར་རོ། །ལས་འདིས་དཀྱིལ་འཁོར་གྱི་ནང་དུ་གཏོགས་པའི་རིག་སྔགས་རྣམས་འགྲུབ་པར་འགྱུར་ཏེ། རིག་སྔགས་དེ་དག་དྲན་པ་ཙམ་གྱིས་བསྒྲུབ་པ་དང་། བསད་པར་ཡང་ནུས་པར་འགྱུར་རོ། །དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་
ཆེན་པོ་རྫོགས་སོ།། །།དེ་ནས་བཅོམ་ལྡན་འདས་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །ལྷ་རྣམས་བཅོམ་ལྡན་འདས་མ་ཡུམ་གང་སྤྱི་བོར་བཀུར་ནས་རྡོ་རྗེ་འབར་པའི་ཏིང་ངེ་འཛིན་ཐོབ་པར་གྱུར་པ་དང་། གང་བཟུང་བ་དང་། བཀླགས་པ་དང་བསྒྲུབས་
ན་རིག་སྔགས་འཆང་གིས་ང་དང་འདྲ་བའི་འབྲས་བུ་ཐོབ་པར་འགྱུར་བའི་བཅོམ་ལྡན་འདས་མ་ཡུམ་དེ་བཤད་ཀྱིས། ཁྱེད་རྣམས་ཀྱིས་རྒྱགས་པ་མེད་པའི་སེམས་ཀྱིས་ཉོན་ཅིག །དེ་ནས་དབང་ཕྱུག་ཆེན་པོ་ལ་སོགས་པ་ལྷ་རྣམས་དགའ་ཞིང་མགུ་ལ་ཡི་རངས་ཏེ་བདེ་བ་
དང་། ཡིད་བདེ་བར་གྱུར་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་བསྟོད་པ། བྱང་ཆུབ་སེམས་དཔའ་ཆེན་པོ་ལེགས་སོ་ལེགས་སོ། །སྟོབས་དང་ཕ་རོལ་གནོད་པ་དཔག་ཏུ་མེད་པ་ལེགས་སོ། །ཁྱོད་ཀྱིས་སེམས་ཅན་རྣམས་ཀྱི་དོན་གྱི་ཕྱིར་བྱང་ཆུབ་སེམས་
དཔའ་ཆེན་པོ་བསྐྱེད་པར་བྱེད་པ་ཤོད་ཅིག་ཤོད་ཅིག །དེ་ནས་རིག་སྔགས་ཀྱི་རྒྱལ་པོ་ལག་ན་རྡོ་རྗེས་རང་གི་རིག་སྔགས་ཀྱི་ཚོགས་རྣམས་ལ་གླང་པོ་ཆེའི་ལྟ་སྟངས་ཀྱིས་བལྟས་སོ། །འཁོར་འདུས་པ་དེ་དག་ཐམས་ཅད་ལ་ཡང་བལྟས་ནས་བཅོམ་ལྡན་འདས་ལ་ཕྱག་
འཚལ་ཏེ། སྙིང་དགའ་བར་བྱེད་པའི་ཡུམ་བཤད་དོ། །ན་མོ་རཏྣ་ཏྲ་ཡ་སྱ། ན་མཿཙཎྜ་བཛྲ་པཱ་ཎི་སྱ། མ་ཧཱ་ཡཀྵ་སཻ་ནཱ་པ་ཏི་སྱ། ན་མ་ལ་ག་ཧྲྀ་ད་ཡེ། ན་མཿཤངྐ་རེ། ཤཱིནྟཾ་ཀ་རེ། གྷུ་ཊ་གྷུ་ཊ། གྷུ་ཊི་ནི། གྷ་ཊཱ་ཡ། གྷུ་ཊི་ནི་སྭཱ་ཧཱ། བྱང་ཆུབ་སེམས་དཔའ་ལག་ན་རྡོ་རྗེས་
เล่ม ๙๕ · หน้า 102a
འཇིག་རྟེན་ཡུམ་བཤད་མ་ཐག་ཏུ་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ཏེ། མུན་པ་དང་ར་བ་རིབ་དང་ལིང་ཏོག་གི་མུན་ནག་ཐམས་ཅད་མེད་པར་གྱུར་ཏོ། །སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་ཡི་དགས་
རྣམས་ཀྱི་སྡུག་བསྔལ་ཐམས་ཅད་ཀྱང་མེད་པར་གྱུར་ཏོ། །ལྷ་རྣམས་ཐམས་ཅད་ཀྱང་ངོ་མཚར་དུ་གྱུར་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིག་སྔགས་ཀྱི་རྒྱལ་པོ་ཆེན་པོ་ལྷའི་ཡུམ་གྱི་ལས་རྣམས་ཤོད་ཅིག་ཤོད་ཅིག །བཅོམ་ལྡན་
འདས་བདག་ཅག་གིས་ཀྱང་ཡུམ་འཆང་བའི་རིག་སྔགས་འཆང་བའི་རིག་སྔགས་འཆང་དེ་ལ་ཡོངས་སུ་དགའ་ནས་མྱུར་དུ་དངོས་གྲུབ་སྦྱིན་ཞིང་བསྲུང་བ་དང་བསྐྱབ་པར་བགྱིའོ། །དེ་ནས་རིག་སྔགས་ཀྱི་རྒྱལ་པོ་ཆེན་པོ་རྡོ་རྗེ་འཛིན་གྱིས་ལྷ་རྣམས་ལ་འདི་སྐད་ཅེས་སྨྲས་སོ། །བཟོད་ལྡན་དག་དེ་དེ་
བཞིན་ནོ། །དེ་དེ་བཞིན་དུ་མཱ་མ་ཀཱི་འཆང་བ་གང་ཡིན་པ་དེ་ནི་ངན་འགྲོ་ལོག་པར་ལྟུང་བར་མི་འགྱུར་རོ། །ལྷ་དང་བདུད་དུ་བཅས་པའི་འཇིག་རྟེན་དང་དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་ལས་གང་ཞིག་ཡུམ་དང་སྲས་གཉིས་ཀའི་མིང་ཙམ་འཆང་བ་དེ་ཅི་སྟེ་ངན་འགྲོ་ལོག་
པར་ལྟུང་བར་འགྱུར་བ་ནི་ངས་ཡང་དག་པར་རྗེས་སུ་མ་མཐོང་སྟེ། དེ་ནི་གནས་མེད་དོ། །དེ་ཅིའི་ཕྱིར་ཞེ་ན། དཔེར་ན་ནོར་བུ་རིན་པོ་ཆེ་མགོ་ལ་ཐོགས་པ་ལ་ནད་དོ་ཅོག་མི་འབྱུང་ཞིང་གདོན་ཐམས་ཅད་འབྱེར་བར་འགྱུར་བ་བཞིན་ཏེ། འདི་ལྟར་ངན་འགྲོ་རྣམས་ལས་སྒྲོལ་བ་འདི་ནི་
ཡུམ་དང་སྲས་སུ་བཅས་པའི་མཐུ་ཡིན་པའི་ཕྱིར་རོ། །དེ་ནས་བཅོམ་ལྡན་འདས་ལག་ན་རྡོ་རྗེས་དེ་བཞིན་གཤེགས་པ་ལ་ཕྱག་འཚལ་ནས། ཡུམ་གྱི་ལས་རྣམས་བཤད་པ། སྒྲུབ་པ་ཐམས་ཅད་ལ་ཕྱག་རྒྱ་གཅིག་བཅིངས་ལ་སྒྲུབ་པའི་རྫས་ལ་ཕྱག་རྒྱས་བཏབ་ན་མྱུར་དུ་དངོས་
གྲུབ་ཀྱི་མཚན་མ་འབྱུང་བར་འགྱུར་རོ། །དམ་ཚིག་མི་ཤེས་པ་ལ་ནི་ཕྱག་རྒྱ་བསྟེན་པར་མི་བྱའོ། །གང་གི་ཚེ་རིག་སྔགས་འཆང་གིས་རིག་སྔགས་འཆང་བ་ལ་ཕྱག་རྒྱ་སྟོན་པ་ན། དེའི་ཚེ་བཅོམ་ལྡན་འདས་ལག་ན་རྡོ་རྗེའི་མདུན་དུ་འགྲོན་བུ་བརྒྱད་བརྒྱས་རྡོ་རྗེ་བྱས་ལ་དེའི་མདུན་དུ་ཕྱག་
เล่ม ๙๕ · หน้า 102b
རྒྱ་བསྟན་པར་བྱའོ། །དེ་ཡང་འབྲས་ཆན་བུ་རམ་དང་སྦྱར་བའི་མཆོད་ཡོན་རྡོ་རྗེ་ལ་ཕུལ་ནས་ཕྱག་རྒྱ་བསྟན་པར་བྱའོ། །དེ་མཐོང་ན་ལག་ན་རྡོ་རྗེ་མཐོང་བ་ཡིན་ཏེ། བྱང་ཆུབ་ཀྱི་སེམས་བསྐྱེད་པ་རྣམས་ལ་བསྟན་པར་བྱའི། སྡིག་པ་བྱེད་པ་རྣམས་ལ་བསྟན་པར་མི་བྱའོ། །
སྡིག་པ་བྱེད་པ་གང་ཡིན་པ་དེ་དག་གིས་ནི་ཕྱག་རྒྱའི་ཚོགས་ཀྱི་མིང་ཡང་ཐོས་པར་མི་འགྱུར་རོ། །དགེ་བའི་རྩ་བ་བྱས་པ་གང་ཡིན་པ་དེ་དག་གིས་ནི་ཕྱག་རྒྱ་དེ་དག་ཐོས་པར་འགྱུར་རོ། །ངའི་གསང་བའི་ཕྱག་རྒྱའི་ཚོགས་འདི་ནི་གཙང་ཞིང་དབེན་པར་བྱས་པས་བལྟ་བར་བྱའོ། །
གང་གིས་ཕྱག་རྒྱའི་ཚོགས་མཐོང་བ་དེ་ལ་ནི་རིག་པ་མཆོག་གི་ཆོ་ག་རྒྱས་པ་གསང་བ་དང་བཅས། གསང་ཆེན་དང་བཅས་པ་དེའི་ལག་ཏུ་འདུག་པར་འགྱུར་ཏེ། རིག་སྔགས་འཆང་གིས་ཀྱང་ཕྱག་རྒྱའི་ཚོགས་ཀྱི་གཟི་བྱིན་བསྐྱེད་པར་བྱ་བའི་ཕྱིར་བླ་མ་ལ་དཔག་ཏུ་མེད་པའི་ཡོན་
དབུལ་ཞིང་བླ་མའི་ལག་ནས་རིག་པ་མཆོག་གི་ཆོ་ག་རྒྱས་པ་མནོད་པར་བྱའོ། །བླ་མས་ཀྱང་བླ་མ་ལ་གུས་པའི་སློབ་མ་ལ་ལག་ནས་མངོན་པར་དངོས་གྲུབ་སྦྱིན་པར་བྱའོ། །དེ་ལྟར་བྱས་ན་ལག་ན་རྡོ་རྗེས་བྱིན་པ་ཡིན་ཏེ། ཆོ་ག་རྒྱས་པ་ཡང་འགྲུབ་པར་འགྱུར་རོ། །ཅི་སྟེ་
བླ་མའི་ལག་ནས་ཕྱག་རྒྱ་མཐོང་བ་ཙམ་གྱིས་ལས་བྱས་ན་ཕྱག་རྒྱ་དེ་ཉིད་ཀྱིས་ཀྱང་གནོད་པ་མེད་པར་འགྱུར་རོ། །དེ་བཞིན་གཤེགས་པའི་གནས་སམ་སྐུ་གདུང་གི་གནས་སུ་ཕྱག་རྒྱའི་ཚོགས་གཞག་པར་བྱའོ། །ཕྱག་རྒྱ་མཐོང་བ་གང་ཡིན་པ་དེ་དག་ནི་ཕྱིར་མི་ལྡོག་པ་
ཡིན་པར་བལྟ་བར་བྱ་སྟེ། དེ་དག་ཐམས་ཅད་ལྷ་རྣམས་ཀྱིས་ཕྱག་བྱ་བའི་གནས་སུ་འགྱུར་རོ། །ང་གང་ན་གནས་པ་དེ་ན་དེ་དག་གནས་ཏེ། ང་མཐོང་བས་དེ་དག་ངེས་པར་ཕྱིར་མི་ལྡོག་པའི་འབྲས་བུ་དང་ལྡན་པར་འགྱུར་ཞིང་ལུས་དང་བྲལ་བ་ན་ལག་ན་རྡོ་རྗེའི་གནས་ཡིད་དུ་འོང་
བའམ། བདེ་བ་ཅན་དུ་སྐྱེ་བར་འགྱུར་རོ། །ཕྱག་རྒྱ་མཐུ་སྟོབས་ཆེན་པོ་ནན་ཏན་དུ་བལྟ་བར་བྱ་སྟེ། ཕྱག་རྒྱའི་རྣམ་པ་ལག་པའི་ཚུལ་གྱིས་བསྟན་པར་བྱའོ། །དཀྱིལ་འཁོར་གྱི་རྣམ་པ་བྲིས་པ་མཐོང་ནས་ཕྱག་རྒྱ་ཆེན་པོ་རྣམ་པ་སྣ་ཚོགས་དགོད་པར་བྱའོ། །བཅོམ་ལྡན་
เล่ม ๙๕ · หน้า 103a
འདས་མཱ་མ་ཀཱིའི་ལས་རྣམས་འབྱུང་བར་འགྱུར་ཏེ་ཟས་སུ་འོ་མའམ། འདག་གུའམ། ལོ་མའམ། སློང་མོའི་ཟས་ཟ་ཞིང་ལན་འབུམ་བཟླས་བརྗོད་བྱས་ན་སྔར་བསྙེན་པ་བྱས་པར་འགྱུར་རོ། །དེ་ནས་རས་མ་ཉམས་པ་དང་ཁ་ཚར་མ་བཅད་པ་དང་སྤུ་མེད་པ་
ལ་ཚོན་རྩི་སྦྱིན་དང་མ་སྦྱར་བས་རི་མོ་མཁན་གསོ་སྦྱོང་དང་ལྡན་པས་སངས་རྒྱས་ཀྱི་སྐུ་གཟུགས་སེང་གེའི་ཁྲི་ལ་བཞུགས་ཤིང་ཆོས་འཆད་པའི་ཚུལ་དུ་འདྲིར་གཞུག་གོ། །དེའི་གཡོན་ལོགས་སུ་འཕགས་པ་ལག་ན་རྡོ་རྗེ་མདོག་སྔོ་བསངས་རྒྱན་ཐམས་ཅད་ཀྱིས་བརྒྱན་པ་རྡོ་
རྗེ་དང་རྔ་ཡབ་ཐོགས་པར་བྲིའོ། །གཡས་ལོགས་སུ་ནི་བཅོམ་ལྡན་འདས་མཱ་མ་ཀཱི་མདོག་སྔོ་བསངས་ལག་པ་གཡོན་པ་རྡོ་རྗེ་ཐོགས་ཤིང་ལག་པ་གཡས་པ་ན་ཡིད་བཞིན་གྱི་ནོར་བུ་ཐོགས་པ། རྒྱན་ཐམས་ཅད་ཀྱིས་བརྒྱན་པ་འདྲིར་གཞག་གོ། །དེ་ནས་སྐུ་གདུང་དང་ལྡན་
པའི་མཆོད་རྟེན་གྱི་དྲུང་དུ་རི་མོའི་གཟུགས་བཀྲམ་ལ་ཡར་ངོའི་ཚེས་ཞག་གཅིག་ནས་བརྩམས་ཏེ་ཉའི་བར་དུ་བཟླས་བརྗོད་བྱས་པའི་མཇུག་ཏུ་ཞག་གསུམ་སྨྱུང་བར་བྱས་ལ་མཆོད་པ་སྣ་ཚོགས་རྒྱས་པར་བྱ་སྟེ། འོ་མ་ཡོད་པའི་ཤིང་གི་མེ་སྦར་ལ་དུད་པ་མེད་པའི་མདག་མ་ལ་
ཨ་ག་རུ་ནག་པོའི་ཡམ་སྲེག་ཤིང་དུ་རུ་སྐའི་མར་གྱི་ནང་དུ་སྨྱུགས་པ་བརྒྱ་སྟོང་ཕྲག་གསུམ་སྦྱིན་སྲེག་བྱའོ། །དེ་ནས་ལས་ཟིན་པའི་འོག་ཏུ་འཕགས་པ་ལག་ན་རྡོ་རྗེ་འོང་བར་འགྱུར་ཏེ། དེ་འོང་བའི་རྟགས་སུ་མེ་ཏོག་གི་ཕྲེང་བ་འགུལ་བ་དང་། མར་མེའི་མེ་ལྕེ་ཆེན་པོར་འགྱུར་བ་
དང་། སྔོན་མ་བྱུང་བའི་དྲི་བསུང་ཞིམ་པོའི་ངད་ལྡང་བར་འགྱུར་བ་དང་། འདི་རྣམས་འབྱུང་བར་འགྱུར་ཏེ། །དེ་ལ་སྤོས་ཆུ་མེ་ཏོག་དང་ལྡན་པའི་མཆོད་ཡོན་དབུལ་བར་བྱའོ། །ཡང་ན་ལྷ་མོ་འོང་བར་འགྱུར་ཏེ་ཕྱག་བྱས་ལ་དམ་པ་རྣམ་པ་བརྒྱད་ལ་དམ་པ་རྣམ་པ་གཅིག་
བླང་བར་བྱ་སྟེ། །རིག་སྔགས་འཆང་གིས་འཁོར་ལོས་སྒྱུར་བ་དང་བཅུད་ཀྱིས་ལེན་ཆེན་པོ་དང་། གཙུག་ལག་དང་བཟོ་ཐམས་ཅད་ཤེས་པ་ཐོབ་པ་དང་། མངོན་པར་ཤེས་པ་ལྔ་ཐོབ་པ་དང་། གཟུངས་ལ་འཇུག་པ་དང་རིན་པོ་ཆེའི་ཆར་འབབ་པ་དང་ལྷ་མ་ཡིན་གྱི་ཕུག་ཏུ་
เล่ม ๙๕ · หน้า 103b
འཇུག་པ་དང་བསྐལ་པར་གནས་པ་སྟེ། དམ་པ་བརྒྱད་འདི་དག་ལས་གཅིག་བླང་བར་བྱའོ། །ལན་བདུན་བསྒྲུབས་པའི་ཐ་མལ་མཚམས་མེད་པ་ལྔ་བྱེད་བྱེད་པས་ཀྱང་འགྲུབ་པར་འགྱུར་རོ། །དེ་ནས་བསྒྲུབ་པར་འདོད་པས་ལྡོང་རོས་བླངས་ལ་བུད་མེད་ཀྱི་ནུ་ཞོ་དང་བཏགས་ཏེ་
རིལ་བུ་ལྔ་བྱས་ཏེ། ཡུངས་ཀར་དང་ལྷན་ཅིག་ཏུ་ཨ་ག་རུའི་སྒྲོམ་བུའི་ནང་དུ་བཅུག་ལ་ཟླ་བ་སྤྱང་ཀིས་ཟིན་པའམ། ཉི་མ་སྤྱང་ཀིས་ཟིན་པའི་ཚེ་གཏོར་མའི་ཆོ་ག་བྱས་ཏེ་བསྒྲུབ་པར་བྱའོ། །གང་གི་ཚེ་ཡུངས་ཀར་རྣམས་ཚེག་ཚེག་ཟེར་བའི་ཚེ་ནི་སྐྱེ་བོ་ཐམས་ཅད་དབང་དུ་འགྱུར་
བའི་དངོས་གྲུབ་དང་པོ་སྟེ། དེས་ན་འཇིག་རྟེན་པ་ཐམས་ཅད་དབང་དུ་འགྱུར་ཞིང་གང་བསྒོ་བ་དེ་དག་ཐམས་ཅད་བྱེད་པར་འགྱུར་རོ། །ཡང་ན་དུད་པ་འཐུལ་བར་འགྱུར་ན་ནི་ལུས་མི་སྣང་བར་འགྱུར་བ་ཐམས་ཅད་ཀྱི་རྒྱལ་པོར་འགྱུར་རོ། །ཡང་ན་འབར་བར་འགྱུར་ན་ནི་དེའི་ཚེ་ལྷ་
གཞོན་ནུར་འགྱུར་ཏེ། ཉི་མ་ཤར་ཀའི་གཟི་བྱིན་དང་ལྡན་ཞིང་རིག་སྔགས་འཆང་གི་རྒྱལ་པོར་འགྱུར་ལ། བསྐལ་པ་ཆེན་པོ་གཅིག་གི་བར་དུ་འཚོ་བར་འགྱུར་རོ། །གི་ཝང་དང་བ་བླ་ལ་སོགས་པའི་རྫས་རྣམས་ཀྱང་དེ་བཞིན་དུ་བསྒྲུབ་པར་བྱའོ། །དེ་ནས་མིག་རྩི་བསྒྲུབ་པར་འདོད་
ན་ལིག་བུ་མིག་དང་། ཨུཏྤ་ལ་སྔོན་པོ་དང་རུ་རྟ་དང་། ཙནྡན་རྣམས་ལྷན་ཅིག་སྦྱར་ཏེ་ཟངས་ཀྱི་སྣོད་དུ་བཅུག་ལ་ཟླ་བ་སྤྱང་ཀིས་ཟིན་པའི་ཚེ་དུད་པ་བྱུང་གི་བར་དུ་བཟླས་བརྗོད་བྱས་ནས་དེས་མིག་བསྐུས་ན་ལུས་མི་སྣང་བར་འགྱུར་ཞིང་འདོད་དགུར་སྒྱུར་བའི་གཟུགས་ཅན་དུ་འགྱུར་ལ་
ལུས་མི་སྣང་བར་འགྱུར་བ་ཐམས་ཅད་ཀྱི་རྒྱལ་པོར་འགྱུར་རོ། །དེ་ནས་རལ་གྲི་བསྒྲུབ་པར་འདོད་ན་རལ་གྲི་འཕན་མེད་པ་བླངས་ལ། མར་གྱི་ངོ་ཞག་བརྒྱད་དམ་ཞག་བཅུ་བཞི་ལ་རི་མོའི་གཟུགས་ལ་མཆོད་པ་རྒྱས་པར་བྱས་ཏེ་གཏོར་མའི་ཆོ་ག་བྱས་ནས་བསྲུང་བའི་ཆོ་ག་ཡང་
ནན་ཏན་དུ་བྱས་ལ། ལག་པ་གཡས་པས་རལ་གྲི་བཟུང་སྟེ་འགུལ་བར་གྱུར་གྱི་བར་དུ་བཟླས་བརྗོད་བྱས་ནས་འགུལ་བར་གྱུར་ན་ནི་གཅིག་པུ་གནས་པའི་རིག་སྔགས་འཆང་དུ་འགྱུར་རོ། །འབར་ན་ནི་འཁོར་དང་བཅས་པར་འགྱུར་ཏེ་རིག་སྔགས་འཆང་ཐམས་ཅད་ཀྱི་རྒྱལ་
เล่ม ๙๕ · หน้า 104a
པོ་སྟོབས་དང་ཕ་རོལ་གནོན་པ་ཐོགས་པ་མེད་པར་གྱུར་པ་ནས་གཡས་པས་རལ་གྲི་བཟུང་སྟེ། འགུལ་བར་གྱུར་གྱི་བར་དུ་བཟླས་བརྗོད་བྱས་ནས་འཕགས་པར་འགྱུར་རོ། །དེ་ནས་རྡོ་རྗེ་བསྒྲུབ་པར་འདོད་ན། །ལྕགས་ཞུན་མ་ལས་རྡོ་རྗེ་སོར་བཅུ་དྲུག་པ་ཐོར་ཏོ་
གཉིས་ཀ་རྩེ་གསུམ་པར་བྱས་ཏེ། ཙནྡན་དམར་པོའི་ལྡེ་གུས་ཕྱུགས་ལ་ཆོ་འཕྲུལ་ཆེན་པོའི་ཟླ་བ་ཚེས་ནས་བརྩམ་ཞིང་། རི་མོའི་གཟུགས་ལ་མཆོད་པ་རྒྱས་པར་བྱས་ནས་བཟླས་བརྗོད་བྱེད་ཅིང་ཉིན་གཅིག་བཞིན་དུ་ཕྱིར་ཞིང་རྒྱས་པར་བྱའོ། །དགེ་སློང་རྣམས་སྟོན་པའི་
རྗེས་སུ་ཞག་གསུམ་སྨྱུང་བ་བྱས་ཏེ་རི་མོའི་གཟུགས་སྐུ་གདུང་དང་ལྡན་པའི་མཆོད་རྟེན་གྱི་དྲུང་དུ་བཀྲམ་ལ་མཆོད་པ་རྒྱས་པར་བྱས་ཏེ་མར་གྱི་མར་མེ་བརྒྱད་སྦར་ནས་རྩྭ་ཀུ་ཤ་ལས་སྟན་བྱས་པ་ལ་འདུག་ལ་རྡོ་རྗེ་ལག་པ་གཉིས་ཀས་བཟུང་སྟེ་འབར་བར་གྱུར་གྱི་བར་དུ་བཟླས་བརྗོད་བྱས་
ན་རྡོ་རྗེ་དེ་ཐོགས་པས་འཁོར་དང་བཅས་པ་འཕགས་པར་འགྱུར་ཏེ། རིག་སྔགས་ཀྱི་འཁོར་ལོས་སྒྱུར་བར་འགྱུར་ལ། སྟོབས་དང་ཕ་རོལ་གནོན་པ་ལག་ན་རྡོ་རྗེ་དང་མཉམ་ཞིང་བསྐལ་པ་ཆེན་པོའི་བར་དུ་འཚོ་བར་འགྱུར་ཏེ། ལུས་དང་བྲལ་ན་ཡང་རྡོ་རྗེའི་རིགས་སུ་སྐྱེ་བར་
འགྱུར་རོ། །དེ་བཞིན་དུ་མདུང་རྩེ་གསུམ་པ་དང་མདུང་ཐུང་ལ་སོགས་པ་མཚོན་ཆ་ཐམས་ཅད་ཀྱང་འགྲུབ་པར་འགྱུར་རོ། །རས་དང་ཤིང་ལྷམ་དང་། མཆོད་ཕྱིར་ཐོགས་དང་། ཁར་བ་དང་། ཤིང་ལ་སོགས་པ་རྣམས་ཀྱང་ཆོ་ག་གོང་མའི་ཚུལ་གྱིས་བསྒྲུབས་ན་ཐམས་ཅད་
དངོས་གྲུབ་རྣམ་པ་གསུམ་དུ་འགྱུར་རོ། །ཞི་བར་བྱ་བར་འདོད་ན་ཐབ་ཁུང་པདྨའི་དབྱིབས་འདྲ་བར་བྱས་ལ་མཆོད་སྦྱིན་ལ་འོས་པའི་བུད་ཤིང་དག་གིས་མེ་སྦར་ཏེ། འབྲས་བཟང་པོའི་ཆེན་གྱི་སྲེག་བླུགས་ཞོ་དང་སྦྲང་རྩི་དང་མར་སྦྱར་བ་བླུགས་གཟར་གྱིས་ལན་བརྒྱད་སྟོང་སྦྱིན་
སྲེག་བྱས་ན་ཞག་གསུམ་བྱས་པས་ནི་བདག་གམ་གཞན་ཞི་བར་འགྱུར་རོ། །ཞག་བདུན་བྱས་པས་ནི་གྲོང་ངམ་གྲོང་ཁྱེར་ཞི་བར་འགྱུར་རོ། །མི་ནད་ཆེན་པོའི་གནོད་པ་ལ་ནི་ཤི་མི་ཡམ་སྲེག་ཤིང་ཞོ་དང་སྦྲང་རྩི་དང་མར་གྱི་ནང་དུ་སྨྱུགས་པའི་སྦྱིན་སྲེག་བྱའོ། །ཕྱུགས་ཀྱི་གོར་
เล่ม ๙๕ · หน้า 104b
ལ་ནི་ཨུ་དུམ་བཱ་རའི་ཡམ་སྲེག་ཤིང་ཞོ་དང་སྦྲང་རྩི་དང་མར་གྱི་ནང་དུ་སྨྱུགས་པའི་སྦྱིན་སྲེག་བྱའོ། །ཆར་མི་འབབ་པ་ལ་ནི་མངར་གསུམ་གྱིས་སྦྱིན་སྲེག་བྱ་སྟེ། ཐམས་ཅད་ལ་ཡང་ལན་སྟོང་རྩ་བརྒྱད་བརྒྱད་བྱ་ཞིང་ཞག་བདུན་བདུན་དུ་བྱས་ན་ཐམས་ཅད་འགྲུབ་པར་འགྱུར་རོ། །
དཱུར་བའི་ཉག་མ་ཞོ་དང་སྦྲང་རྩི་དང་མར་གྱི་ནང་དུ་སྨྱུགས་པ་བརྒྱད་སྟོང་སྦྱིན་སྲེག་བྱས་ན་ཞག་བཅུས་དུས་མ་ཡིན་པར་འཆི་བ་ཞི་བར་འགྱུར་རོ། །ལན་འབུམ་སྦྱིན་སྲེག་བྱས་ན་འཆི་བ་དག་ལས་རྒྱལ་ཏེ་ཚེ་རིང་བར་འགྱུར་རོ། །སློང་མོའི་ཟས་ཟ་ཞིང་ལན་འབུམ་བཟླས་བརྗོད་བྱས་པའི་
མཇུག་ཏུ་ཞག་གསུམ་སྨྱུང་བ་བྱས་ཏེ། ཟླ་བ་སྤྱང་ཀིས་ཟིན་པའི་ཚེ་བ་ནག་མོའི་འོ་མ་ལ་ལན་བརྒྱད་བརྒྱ་བསྔགས་ཏེ་འཐུངས་ན་སྨན་བཅུད་ཀྱིས་ལེན་དུ་འགྱུར་རོ། །རྒྱས་པར་འདོད་ན་ཞོའི་སྦྱིན་སྲེག་བརྒྱ་སྟོང་བྱས་ན་རྒྱས་པར་འགྱུར་རོ། །ཕ་རོལ་གྱི་དཔུང་རེངས་པར་བྱས་ན་ལྕགས་ཀྱི་
ཕྱེ་མ་ཏིལ་མར་དང་སྦྱར་བས་ལན་སུམ་སྟོང་སྦྱིན་སྲེག་བྱའོ། །རྒྱལ་མཚན་དང་དུང་ལ་སོགས་པ་ལ་བསྔགས་ན་ཡང་དེ་མཐོང་ཞིང་ཐོས་པས་ཕ་རོལ་གྱི་དཔུང་རེངས་པར་འགྱུར་རོ། །བུམ་པ་སར་པ་འབྲུ་ཐམས་ཅད་དང་སྤོས་ཆུས་བཀང་སྟེ། ལན་བརྒྱད་སྟོང་བཟླས་བརྗོད་བྱས་པས་ལོག་
འདྲེན་གྱིས་ཟིན་པ་ཁྲུས་བྱེད་དུ་བཅུག་ན་གཏོང་བར་འགྱུར་རོ། །སྦྲུམ་མ་ཁྲུས་བྱེད་དུ་བཅུག་ན་བདེ་བར་བུ་བཙའ་བར་འགྱུར་རོ། །བྱིས་པ་རྣམས་གདོན་ནོ་ཅོག་གིས་ཟིན་པ་ཁྲུས་བྱེད་དུ་བཅུག་ན་གཏོང་བར་འགྱུར་རོ། །དབང་བསྐུར་བ་འདིས་ནི་སྡིག་པ་ཐམས་ཅད་ལས་གྲོལ་བར་
འགྱུར་ཏེ། བྱུར་ངན་པོ་ཡང་དཔལ་དང་ལྡན་པར་འགྱུར་རོ། །དཀྱིལ་འཁོར་གྱི་ལས་ཀྱིས་ཀྱང་གདོན་ཐམས་ཅད་ཀྱི་ལས་བྱེད་དོ། །རྨ་བྱའི་མཇུག་མ་ལ་ལན་བརྒྱད་སྟོང་གིས་བསྔགས་པ་ནི་དུག་གོ་ཅོག་སེལ་བར་བྱེད་དེ་ཤི་ཟིན་པ་ཡང་འཚོ་བར་བྱེད་དོ། །རིམས་དང་མི་ནད་
ལ་སོགས་པ་ཡང་དེ་ཉིད་ཀྱིས་སེལ་བར་བྱེད་དོ། །སྐུད་པས་ནི་རིམས་སོ་ཅོག་མེད་པར་བྱེད་དོ། །རྡོ་རྗེ་ལ་ལན་བརྒྱད་སྟོང་བཟླས་བརྗོད་བྱས་པས་ནི་ལྷ་མ་ཡིན་གྱི་འཁྲུལ་འཁོར་ཐམས་ཅད་འཇོམས་པར་བྱེད་དོ། །སེང་ལྡེང་གི་ཡམ་སྲེག་ཤིང་ཞོ་དང་སྦྲང་རྩི་དང་མར་གྱི་ནང་དུ་སྨྱུགས་
เล่ม ๙๕ · หน้า 105a
པ་བརྒྱད་སྟོང་སྦྱིན་སྲེག་བྱས་ན་གཏེར་ཆེན་པོ་མཐོང་བར་འགྱུར་ལ། དེ་ཡང་སྤྱད་བཞིན་དུ་ཟད་པར་མི་འགྱུར་རོ། །རྒྱ་མཚོར་འབབ་པའི་ཆུ་ཀླུང་གི་ནང་དུ་ཞུགས་ཏེ། པདྨ་ཙནྡན་དམར་པོའི་ནང་དུ་སྨྱུགས་པ་འབུམ་སྦྱིན་སྲེག་བྱས་ན་པདྨའི་ཕུང་པོ་དང་མཉམ་པའི་
གཏེར་སྦྱིན་པར་འགྱུར་རོ། །བིལ་པའི་སྲེག་བླུགས་མར་གྱི་ནང་དུ་སྦྱིན་སྲེག་བྱས་ན་ལོངས་སྤྱོད་འཕེལ་བར་འགྱུར་རོ། །ཏིལ་རྣམས་ལྷན་ཅིག་ཏུ་བསྡུས་ཏེ་མར་དང་སྦྱར་བས་ལན་འབུམ་སྦྱིན་སྲེག་བྱས་ན་ཁ་ཟས་འཕེལ་ཏེ་ཟད་པར་མི་འགྱུར་རོ། །དེ་ནས་ལྷ་རྣམས་དབང་དུ་བྱ་བར་འདོད་ན་
ཞག་ཉི་ཤུ་རྩ་གཅིག་གི་བར་དུ་དུས་གསུམ་དུ་ཨ་ག་རུའི་ཡམ་སྲེག་ཤིང་མར་གྱི་ནང་དུ་སྨྱུགས་པ་བརྒྱ་སྟོང་སྦྱིན་སྲེག་བྱས་ན་ལྷ་ཐམས་ཅད་དབང་དུ་འགྱུར་རོ། །གནོད་སྦྱིན་མོ་རྣམས་ལ་ནི་ཨ་ཤོ་ཀའི་ཡམ་སྲེག་ཤིང་གིས་བྱའོ། །ཀླུ་རྣམས་ལ་ནི་ཀླུ་ཤིང་གི་མེ་ཏོག་གིས་བྱའོ། །
རིག་སྔགས་འཆང་རྣམས་ལ་མཁན་པའི་ཡམ་སྲེག་ཤིང་གིས་བྱའོ། །འཕགས་པ་ལག་ན་རྡོ་རྗེ་ལ་ནི་ཨ་ག་རུའི་ཡམ་སྲེག་ཤིང་དུ་རུ་སྐའི་མར་གྱི་ནང་དུ་སྨྱུགས་པས་བྱའོ། །དྲི་ཟ་རྣམས་ལ་ནི་ཐང་ཆུའི་སྤོས་ཀྱིས་སྦྱིན་སྲེག་བྱའོ། །མིའམ་ཅི་རྣམས་ལ་ནི་པོག་གི་སྦྱིན་སྲེག་གིས་བྱའོ། །
ཡི་དགས་རྣམས་ལ་ནི་སྲ་རྩི་པོག་གི་སྦྱིན་སྲེག་གིས་བྱའོ། །ལོག་འདྲེན་རྣམས་ལ་ནི་ཏིལ་གྱི་ཚིགས་མའི་སྦྱིན་སྲེག་གིས་བྱའོ། །འབྱུང་པོ་རྣམས་ལ་ནི་འབྱུང་པོའི་ཟས་ཀྱིས་སྦྱིན་སྲེག་ལན་བརྒྱད་བརྒྱ་ཞག་བདུན་ནམ་ཞག་ཉི་ཤུ་རྩ་གཅིག་གི་བར་དུ་བྱའོ། །མིའི་གཙོ་བོའམ་མི་ཆེན་པོ་
དབང་དུ་བྱ་བར་འདོད་ན་ཞག་བདུན་གྱི་བར་དུ་དུས་གསུམ་དུ་ཡུངས་ཀར་གྱི་སྲེག་བླུགས་ཏིལ་མར་དང་སྦྱར་བས་ལན་བརྒྱད་སྟོང་སྦྱིན་སྲེག་བྱའོ། །མིའི་གཙོ་བོའི་བུ་མོ་ལ་ནི་སྐེ་ཚེའི་སྲེག་བླུགས་ཀྱིས་བྱའོ། །མདུན་ན་འདོན་པ་ལ་ནི་མར་གྱི་སྲེག་བླུགས་ཀྱིས་བྱའོ། །བུ་མོ་རྣམས་ལ་ནི་སྣ་
མའི་མེ་ཏོག་གིས་བྱའོ། །བུད་མེད་ཐམས་ཅད་ལ་ནི་ལན་ཚྭའི་སྲེག་བླུགས་ཀྱིས་བྱའོ། །བྲམ་ཟེ་ལ་ནི་འབྲས་བཟང་པོའི་ཆན་གྱི་སྲེག་བླུགས་ཀྱིས་བྱའོ། །རྒྱལ་རིགས་ལ་ནི་ཞོའི་སྲེག་བླུགས་ཀྱིས་བྱའོ། །རྗེའུ་རིགས་ལ་ནི་འབྲས་ཀྱི་སྦྱར་ཐུག་གི་སྲེག་བླུགས་ཀྱིས་བྱའོ། །དམངས་
เล่ม ๙๕ · หน้า 105b
རིགས་ལ་ནི་མོན་སྲན་གྲེའུའི་སྲེག་བླུགས་ཀྱི་སྦྱིན་སྲེག་གིས་བྱའོ། །སེམས་ཅན་ཐམས་ཅད་ལ་ནི་མར་དང་ཏིལ་སྦྱར་བས་བྱ་སྟེ། ཐམས་ཅད་ལ་ཡང་སྦྱིན་སྲེག་ལན་བརྒྱད་བརྒྱའི་བར་བྱའོ། །ཉི་མ་ལ་ཕྱོགས་དེ་ལན་འབུམ་བཟླས་བརྗོད་བྱས་ན་སྡིག་པ་ཐམས་ཅད་ལས་གྲོལ་བར་
འགྱུར་ཏེ། ཟས་སུ་བའི་གཅིན་དང་བྱེའི་འདག་གུ་ཟ་ཞིང་ལས་བྱའོ། །རིག་སྔགས་འཆང་ཐམས་ཅད་གསོ་བར་འདོད་ན་ཞག་བདུན་གྱི་བར་དུ་ཞོ་དང་སྦྲང་རྩི་དང་མར་ལ་སྦྱར་བའི་ཏིལ་གྱིས་ལན་བརྒྱད་སྟོང་སྦྱིན་སྲེག་བྱའོ། །བཅད་པ་དང་བཅོམ་པ་དང་མ་རུངས་པར་གྱུར་པ་དང་ཕུར་
བུས་བཏབ་པ་རྣམས་གསོ་བར་འདོད་ན། པུ་ཤེལ་ཙི་ལས་གཟུགས་བྱས་ཏེ་མེ་ཏོག་དཀར་པོས་མཆོད་པ་ལན་བརྒྱད་བརྒྱ་བཟླས་བརྗོད་བྱས་པའི་འོ་མས་བཀྲུ་ཞིང་འོ་མའི་སྦྱིན་སྲེག་ཀྱང་བྱ་སྟེ། ཨ་ག་རུའི་བདུག་པ་ཡང་ཕུལ་ན་ཕྱིར་སོས་པར་འགྱུར་རོ། །དེ་ནས་བཅོམ་ལྡན་འདས་མ་
ཡུམ་བརྗོད་ལ་སྔགས་ཀྱིས་མཆོད་ཡོན་ཕུལ་ན་སྤྱན་དྲངས་པར་འགྱུར་ཞིང་བཟླས་བརྗོད་ཀྱང་བསྲུངས་པར་འགྱུར་རོ། །ལན་ཅིག་བརྗོད་པས་ནི་བདག་ཉིད་ལ་སྲུང་བར་བྱེད་དོ། །ལན་གཉིས་བརྗོད་པས་ནི་གཞན་ལ་སྲུང་བར་བྱེད་དོ། །ལན་གསུམ་བརྗོད་པས་ནི་རྫས་སྲུང་བར་
བྱེད་དོ། །ཡུངས་ཀར་གྱི་བསྲུང་བར་བྱ་བའི་རྫས་སྔགས་ཀྱི་གཟི་བྱིན་བསྐྱེད་ན་རྒྱས་པར་འགྱུར་ཞིང་དངོས་གྲུབ་ཏུ་འགྱུར་རོ། །གི་ཝང་གིས་བཅོམ་ལྡན་འདས་མའི་གསང་སྔགས་གང་འདོད་པ་བར་ཐག་ཡངས་པར་ཡི་གེ་བྲིས་ཏེ། གི་ཝང་དང་། སྨྱུ་གུ་ཡང་དེར་བཞག་ལ་དེར་
སྔགས་དེས་ལན་བརྒྱད་བརྒྱ་བཏབ་སྟེ། བཅོམ་ལྡན་འདས་ལ་མཆོད་པ་བྱས་ནས་ཉལ་ན་འོང་བར་འགྱུར་ཏེ་ལྷག་ཆད་སྐོང་བར་འགྱུར་རོ། །ཡང་ན་རྨི་ལམ་དུ་སྟོན་པར་འགྱུར་རོ། །ལན་བརྒྱད་བརྒྱ་བཟླས་བརྗོད་བྱས་ཏེ་རྩྭ་ཀུ་ཤའི་སྟན་ལ་ཉལ་ན་ལེགས་ཉེས་སྟོན་པར་འགྱུར་
རོ། །བཅོམ་ལྡན་འདས་མ་འདི་ནི་རིག་པ་མཆོག་གི་རྒྱུད་ཐམས་ཅད་ཀྱི་སྙིང་པོར་གྱུར་པ་དོན་ཐམས་ཅད་བསྒྲུབ་པ་སྟེ། བཅོམ་ལྡན་འདས་མ་མཱ་མ་ཀཱི་འདི་ནི་རིག་སྔགས་ཀྱི་རྒྱལ་པོ་རིག་པ་མཆོག་གི་ལས་གང་ཡིན་པ་རྣམས་དང་། ཕོ་ཉ་མ་བཅྭ་བརྒྱད་གང་ཡིན་པ་རྣམས་དང་།
เล่ม ๙๕ · หน้า 106a
ཕྱག་རྒྱ་ཆེན་པོ་གང་ཡིན་པ་རྣམས་ཀྱི་སོ་སོའི་ཆོ་ག་ཤིན་ཏུ་མྱུར་བར་བྱེད་ཅིང་གཞན་གྱིས་མི་ཚུགས་ཤིང་མྱུར་དུ་འགྲུབ་པར་འགྱུར་རོ། །གྲོག་མཁར་གྱིས་དང་ཡུངས་ཀར་བསྲེས་པ་ལས་རྡོ་རྗེ་བྱས་ཏེ་ཙནྡན་དམར་པོས་བྱུགས་ལ་བླངས་ན་ལམ་མི་གཟུར་བ་དང་། མི་སྨྲ་
བར་ལན་འབུམ་བཟླས་བརྗོད་བྱས་ནས་བཟླས་བརྗོད་བྱས་པའི་མཇུག་ཏུ་ཟླ་བ་སྤྱང་ཀིས་ཟིན་པའི་ཚེ་རྡོ་རྗེ་ཡུངས་ཀར་གྱི་དབུས་སུ་བཞག་སྟེ། ཡུངས་ཀར་ཚེག་ཚེག་ཟེར་གྱི་བར་དུ་བཟླས་བརྗོད་བྱས་ན་རྡོ་རྗེ་འགྲུབ་པར་འགྱུར་ཏེ་རྡོ་རྗེ་དེས་ལས་ཐམས་ཅད་བྱེད་ལ་བྲག་གི་རྩེ་མོ་ཕྱེ་མར་རློག་ཅིང་
རྙིལ་བར་བྱེད་དོ། །ཆུ་ཀླུང་གྱེན་དུ་ཟློག་པར་བྱེད་དོ། །མཚོ་སྐོམ་པར་བྱེད་དོ། །ཀླུ་རྣམས་འབྱེར་བར་བྱེད་དོ། །དུག་རྣམས་ཀྱི་དུག་མེད་པར་བྱེད་དོ། །སྲོག་ཆགས་རྣམས་རེངས་པར་བྱེད་དོ། །རྨོངས་པར་བྱེད་དོ། །སྒྱེལ་བར་བྱེད་དོ། །འཁྲུལ་འཁོར་རྣམས་ཕྱེ་མར་
རློག་གོ། །ཤིང་རྟ་ལ་སོགས་པ་རེངས་པར་བྱེད་ཅིང་ཕྱེ་མར་ཡང་རློག་སྟེ། དེ་ལ་སོགས་པའི་ལས་ཐམས་ཅད་བྱེད་དོ། །བཅོམ་ལྡན་འདས་མཱ་མ་ཀཱི་འདི་ནི་རོ་ལངས་ཐམས་ཅད་སྒྲུབ་པ་སྟེ། ལས་སྣ་ཚོགས་བྱེད་པ་ཡིན་ནོ། །རིའི་རྩེ་མོར་སོང་སྟེ་ལྕགས་ཞུན་མ་ལས་བྱས་
པའི་རྡོ་རྗེ་ཐོགས་ལ་ལག་པ་གཡོན་པས་བཟུང་ལ་ལན་དྲུག་འབུམ་བཟླས་བརྗོད་བྱས་ན་དེ་ནས་རི་འགུལ་བར་འགྱུར་ཏེ། རི་འགུལ་ན་འཁོར་དང་བཅས་པ་འཕགས་པར་འགྱུར་རོ། །སློང་མོའི་ཟས་ཟ་ཞིང་རིའི་རྩེ་མོར་བྱེ་བ་གཅིག་བཟླས་བརྗོད་བྱས་ན་ཡིད་ལ་གང་འདོད་པ་དེ་ཐམས་ཅད་
དེས་ཐོབ་པར་འགྱུར་རོ། །ལྷ་རྣམས་བཅོམ་ལྡན་འདས་མཱ་མ་ཀཱི་འདི་ནི་ཐམས་ཅད་འགྲུབ་པ་སྟེ། ལས་སྣ་ཚོགས་བྱེད་པ་ཡིན་ནོ། །བཅོམ་ལྡན་འདས་མ་འཇིག་རྟེན་གྱི་ཡུམ་གྱི་ལས་རྣམས་ངས་བཤད་ཟིན་ཏེ། དེ་ལ་དྲག་ཏུ་འགྲུབ་པར་བྱེད་པའི་སྔགས་ཀྱང་བཤད་པར་བྱའོ། །
ན་མོ་བཛྲ་པཱ་ཎི་སྱ། ཨོྃ་ཛྭ་ལ་མཱ་མ་ཀཱི་སྥོ་ཊ་ཡ་ཧཱུྃ་ཕཊ་སྭཱ་ཧཱ། ལྷ་རྣམས་འདིའི་ལས་ཀྱང་བཤད་པར་བྱ་སྟེ། བཅོམ་ལྡན་འདས་མའི་ལས་ངས་བཤད་པ་གང་ཡིན་པ་དེ་དག་ལས་ཉིས་འགྱུར་དུ་བསྟེན་པར་བྱས་ན་ཐམས་ཅད་བྱེད་པར་འགྱུར་རོ། །དེ་ནས་བཅོམ་ལྡན་འདས་ལག་ན་རྡོ་རྗེ་
เล่ม ๙๕ · หน้า 106b
འཁོར་དེའི་ནང་ནས་ལངས་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རིག་པ་མཆོག་གི་ཆོ་ག་ཆེན་པོ་ལས་བདག་གིས་ལྷ་རྣམས་བཤད་པ་གང་ལགས་པ་དེ་དག་ཐམས་ཅད་ཀྱིས་སྒྲུབ་པ་པོ་གཙང་སྦྲ་དང་
ཆོ་ག་དང་སྤྱོད་ཡུལ་དང་ལྡན་པ་གང་ལགས་པ་བསྲུང་བ་དང་། བསྐྱབ་པ་དང་། སྦ་བར་བགྱིད་ཅིང་དངོས་གྲུབ་ཀྱང་ཐོབ་པར་འགྱུར་བ་དང་། ཚོར་བ་རྗེས་སུ་དྲན་པར་བགྱིས་པས་བགེགས་དང་ལོག་འདྲེན་དེ་དག་ཐམས་ཅད་བརླག་པར་འགྱུར་བ་དང་། གཙང་སྦྲ་བགྱིས་ཀྱང་རུང་གཙང་
སྦྲ་མ་བགྱིས་ཀྱང་རུང་བ་ན་བསྲུང་བ་དང་བསྐྱབ་པ་དང་སྦ་བ་དང་སེམས་ཅན་རྣམས་ཀྱི་དོན་གྱི་སླད་དུ་བདག་གིས་རྡོ་རྗེ་ཁྲོ་བོ་སྟོབས་པོ་ཆེ་བཤད་པར་བགྱི་ན། བཅོམ་ལྡན་འདས་ཀྱིས་གནང་བར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་
འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་དཔའ་ལེགས་སོ་ལེགས་སོ་སྟོབས་དང་ཕ་རོལ་གནོན་པ་དཔག་ཏུ་མེད་པ་ཁྱོད་སེམས་ཅན་ཐམས་ཅད་ལ་ཕན་པའི་ཕྱིར་ཞུགས་པ་དེ་ནི་ལེགས་སོ། །ཁྱོད་ལ་དེ་བཞིན་གཤེགས་པས་གནང་བར་མཛད་ཀྱིས་སེམས་ཅན་ལམ་དུ་ཞུགས་
པ་རྣམས་དང་། ལམ་མ་ཡིན་པར་ཞུགས་པ་རྣམས་དང་། གཙང་སྦྲ་བྱས་པ་རྣམས་དང་། གཙང་སྦྲ་མ་བྱས་པ་རྣམས་བསྲུང་བའི་ཕྱིར་ཤོད་ཅིག་ཤོད་ཅིག །དེ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་འཁོར་འདུས་པ་ལ་གླང་པོ་ཆེའི་ལྟ་སྟངས་ཀྱིས་བལྟས་ནས་རྡོ་རྗེ་ཁྲོ་
བོ་སྟོབས་པོ་ཆེ་བཤད་པ། ན་མོ་རཏྣ་ཏྲ་ཡ་སྱ། ན་མོ་བཛྲ་པཱ་ཎི་སྱ། ན་མཤྩཎྜ་བཛྲ་པཱ་ཎི་སྱ། མ་ཧཱ་ཡཀྵ་སེ་ནཱ་པ་ཏི་སྱ། ཨོྃ་བཛྲ་ཀྲོ་དྷ་མ་ཧཱ་བ་ལ། ཧ་ན་ད་ཧ་པ་ཙ། བི་ཏྭཾ་ས་ཡ། ཛ་ཊི་ལཾ་བོ་ད་ར། ཨུཙྪུཤྨ་ཀྲོདྷཱ་ཡ་ཧཱུྃ་ཕཊ་སྭཱ་ཧཱ། དེ་ནས་ལྷ་དེ་དག་ངོ་མཚར་དུ་གྱུར་ཏེ། ལག་
ན་རྡོ་རྗེའི་ཞལ་དུ་ལྟ་ཞིང་ཚིག་འདི་སྐད་ཅེས་སྨྲས་སོ། །རིག་སྔགས་ཀྱི་རྒྱལ་པོ་ཆེན་པོ་རྡོ་རྗེ་ཁྲོ་བོ་སྟོབས་པོ་ཆེའི་ལས་རྣམས་ཤོད་ཅིག་ཤོད་ཅིག །དེ་ནས་ལག་ན་རྡོ་རྗེ་དྲག་པོ་ཆེན་པོས་སྙིང་རྗེའི་སེམས་ཀྱིས་ལས་རྣམས་བཤད་པ། རིག་པ་མཆོག་སྒྲུབ་པའི་རིག་སྔགས་འཆང་
เล่ม ๙๕ · หน้า 107a
ལམ་དུ་འཇུག་གམ། བཤང་བ་དང་གཅི་བ་ལ་སོགས་པ་བྱེད་ན་ཐོག་མར་ལན་ཅིག་བརྗོད་ན་བསྲུང་བར་བྱས་པར་འགྱུར་རོ། །ལམ་དུ་འཇུག་ན་ལན་གསུམ་བརྗོད་ནས་སོང་ན་ཆོམ་རྐུན་ལ་སོགས་པའི་འཇིགས་པ་འབྱུང་བར་མི་འགྱུར་རོ། །དེ་བཞིན་དུ་ཆུ་ཀླུང་རྒལ་བ་ན་
ཡང་ཆུ་སྲིན་ན་ཀྲ་ལ་སོགས་པའི་འཇིགས་པ་འབྱུང་བར་མི་འགྱུར་རོ། །དེ་ནས་བསྒྲུབ་པར་འདོད་ན་ཚེས་གྲངས་དང་རྒྱུ་སྐར་འདམ་མི་འཚལ། སྨྱུང་བའང་བྱ་མི་དགོས་པར་ཁྲོ་བོ་ཉིད་བརྩོན་པར་བྱ་སྟེ། ཉིན་པར་ཡང་རུང་། མཚན་མོའང་རུང་། ཟན་ཟོས་ཀྱང་རུང་། ཅི་སྟེ་མ་ཟོས་
ཀྱང་རུང་། གཙང་སྦྲ་བྱས་ཀྱང་རུང་། གཙང་སྦྲ་མ་བྱས་ཀྱང་རུང་སྟེ། ལན་སུམ་འབུམ་བཟླས་བརྗོད་བྱས་ན་སྔར་བསྙེན་པ་བྱས་པར་འགྱུར་རོ། །དེ་ནས་པ་ལ་ཤའི་ཤིང་ངམ། བིལ་བའི་ཤིང་གིས་མེ་སྦར་ཏེ་འབྲས་ཡོས་སམ། ཏིལ་ཡང་རུང་མར་དང་སྦྱར་བས་ལན་
བརྒྱད་སྟོང་སྦྱིན་སྲེག་བྱས་ན་འགྲུབ་པར་འགྱུར་རོ། །དེ་ནས་ལས་རྣམས་འབྱུང་སྟེ། མིའི་གཙོ་བོའམ། མི་ཆེན་པོ་དབང་དུ་བྱ་བར་འདོད་ན་དོང་ཀའི་བུད་ཤིང་གིས་མེ་སྦར་ལ་ཡུངས་ཀར་གྱིས་ལན་བརྒྱད་སྟོང་སྦྱིན་སྲེག་བྱས་ན་དབང་དུ་འགྱུར་རོ། །དམག་དཔོན་དབང་དུ་བྱ་
བར་འདོད་ན་དམག་དཔོན་གྱི་རྐང་རྗེས་ཀྱི་རྡུལ་བླངས་ལ་ལག་པ་གཡོན་པས་ལན་བརྒྱད་སྟོང་སྦྱིན་སྲེག་བྱས་ན་དབང་དུ་འགྱུར་རོ། །སྐྱེས་པ་དབང་དུ་བྱ་ན་ལན་ཚྭ་ལས་གཟུགས་བྱས་ལ་རྐང་པ་གཡས་པ་ནས་བརྩམས་ཏེ། བཅད་ཅིང་བཅད་ཅིང་ལག་པ་གཡོན་པས་ལན་བརྒྱ་སྟོང་སྦྱིན་
སྲེག་བྱས་ན་སྐྱེས་པ་དབང་དུ་འགྱུར་རོ། །བུ་མོ་དབང་དུ་བྱ་ན་འབྲས་སཱ་ལུའི་ཕྱེ་མ་ལས་གཟུགས་བྱས་ལ་རྐང་པ་གཡོན་པ་ནས་བརྩམས་ཏེ། བཅད་ཅིང་བཅད་ཅིང་ལག་པ་གཡས་པས་ལན་བརྒྱད་སྟོང་སྦྱིན་སྲེག་བྱས་ན་དབང་དུ་འགྱུར་རོ། །ཡུགས་ས་མོ་དབང་དུ་བྱ་ན་དུར་ཁྲོད་དམ།
གདོལ་པའི་ཁྱིམ་ནས་མེ་བླངས་ལ་དུར་ཁྲོད་ཀྱི་ཤིང་གསེབ་ལ་ལམ་གྱི་སུམ་མདོར་མེ་སྦར་ཏེ། མོན་སྲན་གྲེའུ་སྦྱིན་སྲེག་ལན་བརྒྱད་སྟོང་བྱས་ན་དབང་དུ་འགྱུར་རོ། །བུ་མོ་དབང་དུ་བྱ་ན་ལག་ན་རྡོ་རྗེའི་མདུན་དུ་བུ་མོས་སྤྱད་པའི་མེ་ཏོག་རྙིང་པ་བརྒྱད་སྟོང་སྦྱིན་སྲེག་བྱས་ན་དབང་དུ་འགྱུར་རོ། །
เล่ม ๙๕ · หน้า 107b
དགྲ་དབང་དུ་བྱ་ན་གི་ཝང་ངམ། ལྡོང་རོས་ལ་ལན་བརྒྱ་སྟོང་བསྔགས་ཏེ་བདག་ཉིད་ཀྱི་ལུས་བསྐུས་ན་དགྲའི་ནང་དུ་འཇིགས་པར་མི་འགྱུར་རོ། །ལིག་བུ་མིག་བླངས་ཏེ་ཨ་ཤྭཏྠའི་ལོ་མའི་སྟེང་དུ་བཞག་ལ་སྐུ་གདུང་དང་ལྡན་པའི་མཆོད་རྟེན་གྱི་དྲུང་དུ་ལན་བརྒྱ་སྟོང་བཟླས་བརྗོད་བྱས་པས་མིག་
ལ་བསྐུས་ན་སྐྱེ་བོ་ཐམས་ཅད་ཀྱི་སྙིང་དུ་སྡུག་པར་འགྱུར་རོ། །གི་ཝང་ཡང་ཆོ་ག་དེ་དང་འདྲའོ། །སྐྱེས་པ་དབང་དུ་བྱ་ན་ཨ་མྲའི་ཤིང་གི་མེ་སྦར་ལ། ནས་དང་གྲོ་དང་ནཱ་ག་གེ་སར་ལ་སོགས་པས་ལན་བརྒྱད་སྟོང་སྦྱིན་སྲེག་བྱས་ན་དབང་དུ་འགྱུར་རོ། །གྲུབ་པར་མ་གྱུར་ན་ལས་འདི་
དག་བྱས་ཏེ་བིལ་བའི་ཤིང་གིས་མེ་སྦར་ཏེ་ཏིལ་ནག་པོ་བརྒྱད་སྟོང་སྦྱིན་སྲེག་བྱས་ན་འགྲུབ་པར་འགྱུར་རོ། །ཕྱིན་ཅད་དབང་དུ་བྱ་བ་དང་། བསྐྲད་པ་དང་། དབྱེ་བ་དང་། གཞིག་པ་དང་། བསད་པ་དང་། སྒོ་གླེགས་བཅག་པ་དང་འཁྲུལ་འཁོར་སྒོ་གཏན་དང་གཤེག་པ་དང་གཞོམ་པ་
ལ་སོགས་པ་བྱེད་ནུས་པར་འགྱུར་རོ། །མིའི་གཙོ་བོ་དབང་དུ་བྱ་ན་དུར་ཁྲོད་ཀྱི་ཤིང་གིས་མེ་སྦར་ལ། སྐེ་ཚེ་ཡུངས་མར་དང་སྦྱར་བས་ལན་བརྒྱ་སྟོང་སྦྱིན་སྲེག་བྱས་ན་དབང་དུ་འགྱུར་རོ། །མེ་ཏོག་ལ་ལན་བདུན་བསྔགས་ན་གང་ལ་བྱིན་པ་དེ་དབང་དུ་འགྱུར་རོ། །སྤོས་སམ་ཤིང་ཐོག་
གམ་སོ་རྩི་རྣམས་ཀྱང་ཆོ་ག་དེ་བཞིན་དུ་བྱའོ། །མིག་སྨན་ལ་བསྔགས་ཏེ་མིག་གཉིས་ལ་བསྐུས་ན་གང་ལ་བལྟས་པ་དེ་དབང་དུ་འགྱུར་རོ། །བསྐྲད་པར་བྱས་ན་ཨརྐའི་ཤིང་གི་མེ་སྦར་ལ་ལུང་ཏང་གི་མེ་ཏོག་གིས་ལན་བརྒྱ་སྟོང་སྦྱིན་སྲེག་བྱས་ན་ཞག་བདུན་གྱིས་འབྲོས་པར་འགྱུར་
རོ། །དབྱེ་བར་བྱ་ན་ཆོ་ག་དེ་དང་འདྲ་བར་བྱ་སྟེ་ཕུབ་མའི་སྦྱིན་སྲེག་བྱས་ན་འབྱེ་བར་འགྱུར་རོ། །གཞིག་པར་བྱ་ན་དུར་ཁྲོད་ནས་མེ་བླངས་པའི་ནང་དུ་དུར་ཁྲོད་ཀྱི་ཐལ་བས་སྦྱིན་སྲེག་བྱས་ན་འཇིག་པར་འགྱུར་རོ། །གསད་པར་བྱ་ན་སྐེ་ཚེའི་ཡུངས་མར་དང་སྦྱར་བའི་སྦྱིན་སྲེག་བྱས་ན་དེ་མ་
ཐག་ཏུ་འཇིག་པར་འགྱུར་རོ། །བསྐམ་པར་བྱ་ན་གོས་གཤེར་བ་བགོས་ལ་ཁྲོས་བཞིན་དུ་ཉི་མ་ལ་ཕྱོགས་ཏེ་བཟླས་བརྗོད་བྱས་ན་ཇི་ཙམ་དུ་གོས་བསྐམས་པར་འགྱུར་བ་དེ་ཙམ་དུ་དགྲའི་སྲོག་སྐམ་པར་འགྱུར་རོ། །ཁྲོས་བཞིན་དུ་མཚན་གཅིག་འདུག་པའི་སྟེང་དུ་ལག་པས་མནན་ཏེ་བཟླས་
เล่ม ๙๕ · หน้า 108a
བརྗོད་བྱས་ན་དེ་མ་ཐག་ཏུ་དགྲ་མེད་པར་འགྱུར་རོ། །འཕགས་པ་ལག་ན་རྡོ་རྗེའི་མདུན་དུ་སེ་གོལ་གཏོགས་ཤིང་གསང་སྔགས་བཟླས་བརྗོད་བྱས་ན་དེ་མ་ཐག་ཏུ་དགྲ་འཆི་བར་འགྱུར་རོ། །ཆོ་ག་ཇི་ལྟར་བྱས་ཀྱང་རུང་སྟེ། ཁྲོས་བཞིན་དུ་བཟླས་བརྗོད་བྱས་ན་ཆོ་ག་དེས་
དེ་མ་ཐག་ཏུ་དགྲ་འཇིགས་པ་དང་འཆི་བར་འགྱུར་རོ། །ཞི་བར་བྱ་བ་དང་ཕྱིར་གསོ་བ་ཐམས་ཅད་ལ་ནི་པ་ལ་ཤའི་ཤིང་གིས་མེ་སྦར་ཏེ། འོ་མ་དང་མར་སྦྱར་བས་ལན་བརྒྱད་སྟོང་སྦྱིན་སྲེག་བྱས་ན་ཕྱིར་འཚོ་བར་འགྱུར་རོ། །ཧཱུྃ་ཞེས་བྱས་པས་ནི་སྒོ་གླེགས་དང་སྒོ་གཏན་ཆོམས་པར་འགྱུར་
རོ། །ཕཊ་ཅེས་བྱས་པས་ནི་ལྷ་མ་ཡིན་གྱི་འཁྲུལ་འཁོར་ཐམས་ཅད་ཆོམས་པར་འགྱུར་རོ། །ནིམ་པའི་ཤིང་གིས་མེ་སྦར་བའི་ནང་དུ་སྐེ་ཚེ་ཁྲག་དང་སྦྱར་བས་ལན་བརྒྱ་སྟོང་སྦྱིན་སྲེག་བྱས་པས་དགྲ་ལ་ཇི་ལྟར་འདོད་པ་བཞིན་དུ་བྱེད་ནུས་པར་འགྱུར་རོ། །ཁྱི་ནག་པོའི་ལྕེ་བླངས་ལ་གུ་
གུལ་དང་ལྷན་ཅིག་ཏུ་བཏགས་ཏེ་རིལ་བུར་བྱས་ཏེ་ཟངས་དང་འཁར་བ་དང་། ར་གན་གཅིག་ཏུ་སྦྱར་བས་གཡོགས་ལ་གོ་ཕྱེའི་ཤིང་གི་གབ་ཚེར་བཅུག་སྟེ། མར་གྱི་ངོ་ཞག་བརྒྱད་དང་ཞག་བཅུ་བཞི་གང་ཡང་རུང་བ་ལ་ལག་ན་རྡོ་རྗེའི་མདུན་དུ་ལན་བརྒྱད་སྟོང་བཟླས་བརྗོད་བྱས་ཏེ། དེ་ནས་
སྒྲ་ཏུག་ཏུག་ཟེར་བར་གྱུར་ནས་དེ་དག་ལས་གཅིག་ཁར་བཅུག་ན་ལུས་མི་སྣང་བར་འགྱུར་ལ། །ཕྱིར་ཕྱུང་ན་སྣང་བར་འགྱུར་ཏེ་ཚེ་ལོ་ཁྲི་ཐུབ་པར་འགྱུར་རོ། །རིའི་རྩེ་མོར་སོང་སྟེ་ལན་འབུམ་བཟླས་བརྗོད་བྱས་ན་ལྷ་མ་ཡིན་གྱི་ཕུག་གི་འཁྲུལ་འཁོར་ཐམས་ཅད་ཧཱུྃ་ཞེས་བྱ་བའམ། ཕཊ་ཅེས་བྱས་
པས་ཆོམས་པར་འགྱུར་རོ། །ལྷ་མ་ཡིན་གྱི་ཕུག་སྒོར་ཡུངས་ཀར་དུག་དང་། ཁྲག་དང་སྦྱར་བས་ལན་བརྒྱ་སྟོང་སྦྱིན་སྲེག་བྱས་པས་ལྷ་མ་ཡིན་གྱི་བུ་མོ་གཅིག་བཞིན་ཕྱིར་བྱུང་ནས་སྒྲུབ་པ་པོ་ནང་དུ་ཁྲིད་པར་འགྱུར་རོ། །ལིག་བུ་མིག་གི་རྒྱུད་མ་ཆད་པར་ལན་སྟོང་སྦྱིན་སྲེག་བྱས་ལ་ཟླ་བ་སྤྱང་
ཀིས་ཟིན་པའི་ཚེ་ཟླ་བ་མ་བཏང་གི་བར་དུ་བཟླས་བརྗོད་བྱས་ཏེ་དེས་མིག་བསྐུས་ན་ལུས་མི་སྣང་བར་འགྱུར་ཞིང་ཚེ་ལོ་སྟོང་ཐུབ་པར་འགྱུར་རོ། །གང་ལ་དམིགས་ཏེ་ལན་ཁྲི་བཟླས་བརྗོད་བྱས་ན་དེ་བྲན་དུ་འགྱུར་རོ། །ཡང་ན་འཆི་བར་འགྱུར་རོ། །དུར་ཁྲོད་ཀྱི་རས་ཁྲུ་གང་ཙམ་བླངས་ལ་དེ་
เล่ม ๙๕ · หน้า 108b
ཚོན་རྩི་སྦྱིན་མེད་པས་ཁྲོ་བོའི་གཟུགས་མི་སྡུག་ཅིང་མཆེ་བ་གཙིགས་ལ་ལུས་ཀྱི་མདོག་གནག་ཅིང་མེ་ལྕེ་འབར་བས་བསྐོར་ཏེ་སྐྲ་ཁམ་པ་གྱེན་དུ་བརྫེས་ཤིང་ཁྲོས་པའི་མིག་གིས་བལྟས་ལ་ལག་པ་གཡོན་པ་རྡོ་རྗེ་ཐོགས། ལག་པ་གཡས་པ་ན་དབྱུག་པ་ཐོགས་པ་འདྲིར་གཞུག་གོ། །
འོག་ལོགས་སུ་ནི་སྒྲུབ་པ་པོ་ལག་ན་པོག་ཕོར་ཐོགས་པ་བྲིས་ལ་མར་གྱི་ངོ་ཞག་བརྒྱད་དམ། བཅུ་བཞི་གང་ཡང་རུང་བ་ལ་དེའི་མདུན་དུ་མེ་ཏོག་དམར་པོ་ཕུལ་ཏེ་ལྡོང་རོས་དང་། ལིག་བུ་མིག་དང་གི་ཝང་དང་དགའ་བྱེད་ཀྱི་སྲད་བུ་དང་། དོང་ཀའི་ཤིང་ལྷམ་དང་། གོས་དང་། རྡོ་རྗེ་
འཁོར་ལོ་དང་། མདུང་རྩེ་གསུམ་པ་དང་། རལ་གྲི་ལ་སོགས་པ་ལས་གང་ཡང་རུང་བ་བླངས་ནས་ཆོ་ག་བཞིན་དུ་དག་པར་བྱས་ལ། ཨ་ཤྭཏྠའི་ལོ་མ་བཞག་སྟེ་དངོས་གྲུབ་རྣམ་གསུམ་གྱུར་གྱི་བར་དུ་བཟླས་བརྗོད་བྱས་ན་དྲོ་བར་གྱུར་ན་ནི་རྐང་པས་མགྱོགས་པར་འགྱུར་རོ། །དུད་པ་ཐུལ་ན་
ནི་ལུས་མི་སྣང་བར་འགྱུར་རོ། །འབར་བར་གྱུར་ན་ནི་ནམ་མཁའ་ལ་འགྲོ་བའི་རིག་སྔགས་འཆང་དུ་འགྱུར་ཏེ་བསྐལ་པར་གནས་པར་འགྱུར་རོ། །དེ་ནས་གནོད་སྦྱིན་མོ་དབང་དུ་བྱ་བར་འདོད་ན་སྐུ་གདུང་དང་ལྡན་པའི་མཆོད་རྟེན་གྱི་དྲུང་དུ་ཨ་ཤྭཏྠའི་ཤིང་གིས་མེ་སྦར་ལ་ཨ་ཤྭཏྠའི་མེ་ཏོག་
བརྒྱད་སྟོང་སྦྱིན་སྲེག་བྱས་ན་གནོད་སྦྱིན་མོའི་མིང་ནས་སྨོས་པས་དབང་དུ་འགྱུར་རོ། །ཀླུའི་བུ་མོ་དབང་དུ་བྱ་བར་འདོད་ན་ཤི་བ་ལིཾ་གའི་ཤིང་གིས་མེ་སྦར་ལ་ནག་པུས་པ་བརྒྱ་སྟོང་སྦྱིན་སྲེག་བྱས་ན་དབང་དུ་འགྱུར་རོ། །དགུག་པར་བྱ་ན་མར་གྱི་ངོ་ཞག་བརྒྱད་དང་ཞག་བཅུ་བཞི་གང་ཡང་
རུང་བའི་ཕྱེ་མ་རེད་ཨརྐའི་ཤིང་གིས་མེ་སྦར་ལ་ཡུངས་ཀར་གྱི་ལན་བརྒྱད་སྟོང་སྦྱིན་སྲེག་བྱས་ན་མིང་ནས་གང་སྨྲོས་པ་ཁུགས་པར་འགྱུར་ཏེ། ཞག་གཅིག་སྨྱུང་བ་བྱས་པ་ལས་བྱའོ། །ཞག་བདུན་གྱི་བར་དུ་དུས་གསུམ་དུ་བྱས་ན་ནི་བརྒྱ་བྱིན་ཡང་ཁུགས་པར་འགྱུར་རོ། །ལན་
ཚྭ་དང་བདག་གི་ཁྲག་སྦྱར་བས་སྦྱིན་སྲེག་བྱས་ན་ནི་གང་གི་མིང་ནས་སྨོས་པ་དེ་དབང་དུ་འགྱུར་རོ། །དེ་ནས་ལོག་འདྲེན་གཞིག་པར་འདོད་ན་མར་གྱི་ངོ་ཞག་བཅུ་བཞི་ལ་ལག་ན་རྡོ་རྗེའི་མདུན་དུ་མཆོད་པ་བྱས་ཏེ། དེ་ཉིད་ཀྱིས་བསྲུང་བར་བྱས་ནས་ཞག་གསུམ་སྨྱུང་བ་བྱས་ལ། ཐབ་
เล่ม ๙๕ · หน้า 109a
ཁུང་རྡོ་རྗེའི་དབྱིབས་འདྲ་བར་བྱ་སྟེ། གུ་གུལ་གྱི་རིལ་བུ་བརྒྱད་སྟོང་སྦྱིན་སྲེག་བྱས་ན་བགེགས་ཐམས་ཅད་ཞི་བར་འགྱུར་རོ། །ཡར་གྱི་ངོ་ཚེས་གཅིག་ལ་བརྩམས་ཏེ་དུས་གསུམ་དུ་གུ་གུལ་གྱི་རིལ་བུ་མར་གྱི་ནང་དུ་སྨྱུགས་པ་བརྒྱ་སྟོང་སྦྱིན་སྲེག་བྱས་པའི་མཇུག་ཏུ་ཞག་
གསུམ་སྨྱུང་བ་བྱས་ལ་དེའི་མདུན་དུ་མཆོད་པ་ཆེན་པོ་བྱས་ཏེ། རྡོ་རྗེ་ཁྲོ་བོའི་ཁ་ནས་བློ་བུར་དུ་ང་གྲུབ་བོ་ཞེས་ཟེར་བའི་སྒྲ་འབྱུང་གི་བར་དུ་བཟླས་བརྗོད་བྱས་ན་དེ་ནས་སྐྲ་ལྕང་ལོར་འཁྱིལ་ཞིང་ཉི་མ་ཤར་བའི་མདོག་འདྲ་བ་ལ། །རིག་སྔགས་འཆང་གི་འཁོར་ལོས་སྒྱུར་བར་འགྱུར་ཞིང་བསྐལ་པར་
གནས་ཤིང་ལག་ན་རྡོ་རྗེ་དང་མཐུ་སྟོབས་མཉམ་པར་འགྱུར་རོ། །དེ་ནས་ལིག་བུ་མིག་བསྒྲུབ་པར་འདོད་ན། རི་མོའི་གཟུགས་དེ་ཉིད་ཀྱི་མདུན་དུ་ཡར་གྱི་ངོ་ལས་བརྩམས་ཏེ་དུས་གསུམ་དུ་ལན་བརྒྱ་སྟོང་བཟླས་བརྗོད་བྱས་ནས་དེའི་མདུན་དུ་ཞག་གསུམ་སྨྱུང་བ་བྱས་ལ། ལིག་བུ་མིག་
གམ་ལྡོང་རོས་ཨ་ཤྭཏྠའི་ལོ་མའི་སྟེང་དུ་བཞག་སྟེ་ལག་པ་གཡོན་པས་མནན་ལ་དྲོ་བར་གྱུར་པ་དང་། དུད་པ་འཐུལ་བ་དང་འབར་བར་གྱུར་གྱི་བར་དུ་བཟླས་བརྗོད་བྱས་ན་དྲོ་བར་གྱུར་ན་ནི་འགྲོ་བ་རྣམས་དབང་དུ་བྱེད་པར་འགྱུར་རོ། །དུད་པ་འཐུལ་ན་ནི་ལུས་མི་སྣང་བར་འགྱུར་ཏེ་རིག་སྔགས་
འཆང་ཐམས་ཅད་ཀྱི་སྤྱོད་ཡུལ་དུ་མི་འགྱུར་ཞིང་། རིག་སྔགས་འཆང་གཅོད་པ་ཐམས་ཅད་ཀྱིས་མི་ཚུགས་ལ་རིག་སྔགས་འཆང་ཐམས་ཅད་ཀྱིས་བྱར་མེད་པར་འགྱུར་རོ། །འབར་བར་གྱུར་ན་ནི་ནམ་མཁའ་ལ་འགྲོ་ཞིང་འཁོར་སྟོང་དང་ལྡན་ལ་གཡོག་རྣམས་འཆང་བར་འགྱུར་རོ། །ཅི་སྟེ་
མི་འདོད་ན་ཡང་རིག་སྔགས་འཆང་རྣམས་གཡོག་ཏུ་འགྱུར་ཏེ། རིག་སྔགས་འཆང་ཐམས་ཅད་ཀྱིས་མི་སོད་པར་འགྱུར་རོ། །དེ་ནས་རྡོ་རྗེ་བསྒྲུབ་པར་འདོད་ན་འཛམ་བུ་ཆུ་བོའི་གསེར་ལས་རྡོ་རྗེ་སོར་བཅུ་གཉིས་རྩེ་གསུམ་དུ་བྱས་ལ་ཆུ་ཀླུང་རྒྱ་མཚོར་འབབ་པའི་འགྲམ་དུ་མར་གྱི་ངོ་ཞག་གཅིག་
ལས་བརྩམས་ཏེ་ཕྱི་མར་ཡར་གྱི་ངོ་ཚེས་བཅུ་གཉིས་ཀྱི་བར་དུ་དུས་གསུམ་དུ་བཟླས་བརྗོད་བྱའོ། །དེ་ནས་ཞག་གསུམ་སྨྱུང་བ་བྱས་ཏེ་འཕགས་པར་གྱུར་གྱི་བར་དུ་བཟླས་བརྗོད་བྱས་ན་དེ་ནས་རིག་སྔགས་འཆང་ཐམས་ཅད་ཀྱིས་ཕྱག་བྱ་བར་འགྱུར་ཞིང་སུམ་ཅུ་རྩ་གསུམ་པའི་ལྷ་རྣམས་
เล่ม ๙๕ · หน้า 109b
ཀྱིས་ཀྱང་མཆོད་དེ། ལག་ན་རྡོ་རྗེ་དང་འགྲན་པ་དང་བསྐལ་པར་གནས་པར་འགྱུར་རོ། །སྐུ་གདུང་དང་ལྡན་པའི་མཆོད་རྟེན་གྱི་དྲུང་དུ་ལིག་བུ་མིག་ལ་ལན་འབུམ་བཟླས་བརྗོད་བྱས་ཏེ། དེ་ནས་ཡར་གྱི་ངོ་ཚེས་བཅྭ་ལྔ་ལ་ཟླ་བ་སྤྱང་ཀིས་ཟིན་པའི་ཚེ་ཁར་བཅུག་སྟེ་ཟླ་བ་མ་བཏང་གི་བར་དུ་
བཟླས་བརྗོད་བྱས་ཏེ་དེས་མིག་ལ་བསྐུས་པས་ལུས་མི་སྣང་བར་འགྱུར་རོ། །ཡང་ན་བུད་མེད་གང་སྐྱེས་པ་དང་མ་ཕྲད་པར་ཤི་བ་དེའི་མོ་མཚན་དུ་མར་གྱི་ངོ་ཞག་བཅུ་བཞི་ལ་ལིག་བུ་མིག་དང་ལྡོང་རོས་བཅུག་སྟེ། ཉི་མ་ཤར་གྱི་བར་དུ་བཟླས་བརྗོད་བྱས་ཏེ་དེས་མིག་བསྐུས་པས་སེམས་ཅན་
ཐམས་ཅད་ཀྱི་སྙིང་དུ་སྡུག་པར་འགྱུར་ཞིང་ཤགས་འགྱེད་དོ་ཅོག་ལས་ལན་ཐེབས་པར་འགྱུར་རོ། །ཤུ་དག་ལ་ལན་བརྒྱད་བརྒྱ་བཟླས་བརྗོད་བྱའོ། །དེ་ནས་ཕྱུང་སྟེ་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ལ། ལྷ་ཆེན་པོའི་གཟུགས་ཀྱི་གཡས་ལོགས་སུ་ལན་བརྒྱ་སྟོང་བཟླས་
བརྗོད་བྱས་ན་དེ་ལག་པ་ལ་བཏགས་པས་རྒྱལ་པོ་ལས་རྒྱལ་བར་འགྱུར་ཞིང་རྩོད་པ་དང་འཐབ་པ་ལ་ལན་ཐེབས་པར་འགྱུར་ཏེ། རྒྱལ་པོའམ་བློན་པོ་ལ་གང་སྨྲས་པ་ཐམས་ཅད་ཚིག་ཉན་པར་འགྱུར་ཞིང་གང་བླངས་པ་དེ་ཡང་ཐོབ་པར་འགྱུར་རོ། །ལིག་བུ་མིག་ལ་ལན་བརྒྱད་སྟོང་བསྔགས་
ཏེ་མིག་ལ་བསྐུས་ན་ཀུན་གྱི་ཡིད་དུ་འོང་བར་འགྱུར་རོ། །གི་ཝང་གིས་ལུས་བསྐུས་ན་སྐྱེ་བོ་ཐམས་ཅད་ཀྱི་སྙིང་དུ་སྡུག་པར་འགྱུར་རོ། །དེ་ནས་རིག་སྔགས་འཆང་ལ་ལས་ལིག་བུ་མིག་གམ། ལྡོང་རོས་ཕྲོགས་པར་གྱུར་ན་ཞག་གསུམ་སྨྱུང་བར་བྱས་ལ་ལན་སུམ་འབུམ་བཟླས་བརྗོད་
བྱས་ནས་བ་ལང་གི་ལྕི་བ་ས་ལ་མ་ལྷུང་བ་ལས་རིག་སྔགས་འཆང་གི་གཟུགས་བྱས་ཏེ་ཁྲག་གིས་བསྐུས་ལ། ཀ་ར་བཱི་རའི་མེ་ཏོག་གིས་མཆོད་ནས་ལྕགས་ཞུན་མའི་མཚོན་གྱིས་བཅད་ན། རིག་སྔགས་འཆང་གིས་ལིག་བུ་མིག་གམ། ལྡོང་རོས་ཕྱིར་བྱིན་པར་འགྱུར་རོ། །
དེ་ནས་རིག་སྔགས་དག་པར་འདོད་ན་དེ་བཞིན་དུ་ཞག་གསུམ་སྨྱུང་བ་བྱས་ཏེ། ལན་འབུམ་བཟླས་བརྗོད་བྱས་ན་པོག་གི་ཆུས་རིག་སྔགས་བྲིས་ལ་ཆུ་ཀླུང་རྒྱ་མཚོར་འབབ་པའི་ནང་དུ་བཅུག་སྟེ་ལན་བརྒྱད་སྟོང་བྱས་ནས་དེ་ཉིད་དུ་ཉལ་ན་ཕྱི་དེ་ཉིན་པར་ལྷག་ཆད་དག་པར་བྱ་སྟེ་ཕྱིར་འབྱུང་
เล่ม ๙๕ · หน้า 110a
བར་འགྱུར་རོ། །མིའི་གཙོ་བོའམ་མི་ཆེན་པོ་དབང་དུ་བྱ་བར་འདོད་ན་ཐབ་ཁུང་རྡོ་རྗེའི་དབྱིབས་འདྲ་བར་བྱས་ལ་ལུང་ཏང་གི་བུད་ཤིང་གིས་མེ་སྦར་ཏེ། རྒྱ་སྐྱེགས་ཀྱིས་སྲེག་བླུགས་ལན་བརྒྱ་སྟོང་སྦྱིན་སྲེག་བྱས་ན་དེ་དེའི་བྲན་བཞིན་དུ་འོང་བར་འགྱུར་རོ། །ཡང་ན་གྲོག་མཁར་
གྱི་ས་ལས་གཟུགས་བྱས་ཏེ་དེའི་མདུན་དུ་བ་ལང་གི་ཤས་ལན་བརྒྱ་སྟོང་སྦྱིན་སྲེག་བྱས་ན་ནང་མིའི་གཙོ་བོ་དབང་དུ་འགྱུར་ལ། དབྱེ་བར་བྱ་འདོད་ན་གཉིས་ཀའི་སེན་མོ་བཅད་པ་བླངས་ལ་ཏིལ་ནག་པོ་དང་བསྲེས་ཏེ་ཚ་བ་གསུམ་དང་ཡུངས་ཀར་མར་དང་སྦྱར་བས་ཞག་བདུན་གྱི་བར་དུ་དུས་གསུམ་
དུ་ལན་བརྒྱ་རྩ་བརྒྱད་སྦྱིན་སྲེག་བྱས་ན་དབྱེ་བར་འགྱུར་རོ། །གྲོང་ཁྱེར་འཕོ་བར་འདོད་ན་ཞག་བདུན་གྱི་བར་དུ་དུས་གསུམ་དུ་ཕུབ་མས་ལན་སྟོང་རྩ་བརྒྱད་བཟླས་བརྗོད་བྱས་ན་འབྲོས་པར་འགྱུར་རོ། །ཡང་ན་འཇིགས་པར་འདོད་ན་ཞག་གསུམ་གྱི་བར་དུ་དུས་གསུམ་དུ་ཁྱི་ཤས་ལན་སྟོང་རྩ་
བརྒྱད་བརྒྱད་སྦྱིན་སྲེག་བྱས་ན་འཇིགས་པར་འགྱུར་རོ། །ཕྱིར་གསོ་བ་ཐམས་ཅད་ལ་ནི་ཨུ་དུམ་བཱ་རའི་ཡམ་སྲེག་ཤིང་ཞོ་དང་སྦྲང་རྩི་དང་མར་གྱི་ནང་དུ་སྨྱུགས་པ་ལན་བརྒྱད་སྟོང་སྦྱིན་སྲེག་བྱས་ལ་རྡོ་རྗེ་ཁྲོ་བོ་ལའང་མར་གྱི་བདུག་པ་བསྲེགས་ན་ཕྱིར་ཞི་བར་འགྱུར་རོ། །དེ་ནས་གདོན་གྱིས་ཟིན་
པར་བྱ་བར་འདོད་དམ་ཡང་ན་གང་ལ་རིམས་ཀྱིས་འདེབས་པར་འདོད་ན་ཞག་བདུན་གྱི་བར་དུ་དུས་གསུམ་དུ་ཨརྐའི་ཤིང་གིས་མེ་སྦར་ལ་མི་རིམས་ཀྱིས་བཏབ་པ་གང་ཡིན་པ་དེའི་རྐང་རྗེས་ཀྱི་རྡུལ་བླངས་ཏེ། དུག་དང་ཁྲག་དང་སྦྱར་བས་སྦྱིན་སྲེག་བྱས་ན་རིམས་གྱིས་འདེབས་པར་འགྱུར་རོ། །ཡང་ན་
ཀུ་ཤ་ལས་གཟུགས་བྱས་ཏེ་སྙིང་གར་རྐང་པ་གཡོན་པས་མནན་ལ་ཕྱེ་མ་རེད་ནས་བརྩམས་ཏེ་ནམ་ལངས་ཀྱི་བར་དུ་བཟླས་བརྗོད་བྱའོ། །དེ་ལྟར་བྱས་ན་ཞག་བདུན་གྱིས་རིམས་ཆེན་པོས་འདེབས་པར་འགྱུར་ཏེ་ཅིས་ཀྱང་མི་སློངས་པར་ཞག་བདུན་གྱིས་འཆི་བར་འགྱུར་རོ། །ཕྱིར་གསོ་ན་ཡུངས་
ཀར་ཞོ་དང་སྦྲང་རྩི་དང་མར་དང་སྦྱར་བས་ལན་བརྒྱད་སྟོང་སྦྱིན་སྲེག་བྱས་ལ་བུམ་པ་མི་གནག་ཅིང་རྩ་བ་མེད་པ་བླངས་ཏེ་ཆུས་བཀང་ལ་ལན་སྟོང་བསྔགས་པས་ཁྲུས་བྱེད་དུ་བཅུག་ན་གཏོང་བར་འགྱུར་རོ། །དེ་ནས་གདོན་གྱིས་ཟིན་པར་བྱ་འདོད་ན་ཞག་གསུམ་སྨྱུང་བར་བྱས་ཏེ་དུར་ཁྲོད་དུ་གྲོང་ཁྱེར་
เล่ม ๙๕ · หน้า 110b
གྱི་སྒོ་བཞིའི་ས་བླངས་པས་རྔ་མོའི་གཟུགས་བྱས་ཏེ། དེས་དེ་མ་ཡིན་པའི་མིའི་གཟུགས་བྱས་པའི་མགོ་བོ་ལ་འཛིན་པར་བྱས་ལ་སྙིང་ག་དང་སྟ་ཟུར་དུ་ལྕགས་ཞུན་མའི་ཕུར་བུས་བཏབ་སྟེ། རྐང་པ་གཡོན་པས་མནན་ལ་མཚན་རངས་པར་བཟླས་བརྗོད་བྱས་ན་གདོན་དྲག་པོས་ཟིན་པར་འགྱུར་
ཏེ་ཅིས་ཀྱང་མི་སློངས་པར་ཞག་བདུན་གྱིས་འཆི་བར་འགྱུར་རོ། །སྦྲུལ་གྱིས་འཛིན་དུ་གཞུག་ན་ཡང་ཆོ་ག་འདི་ཉིད་ཀྱིས་བྱས་ན་ཅིས་ཀྱང་མི་ཟློག་པར་དེ་མ་ཐག་ཏུ་འཆི་བར་འགྱུར་རོ། །ཕྱིར་གསོ་བ་ནི་འབྱུང་པོའི་གནས་སུ་དཀྱིལ་འཁོར་བྲིས་ལ་འབྱུང་པོའི་ཁ་ཟས་ལན་བརྒྱ་སྟོང་བསྔགས་
པ་དབུལ་ལོ། །སྦྲུལ་གྱིས་ཟིན་པ་གསོ་བ་ན་སྦྲང་རྩི་དང་འོ་ཐུག་ཕུལ་ཏེ་བྱབ་པ་འང་བྱས་ན་གཏོང་བར་འགྱུར་རོ། །མཛེ་ནད་ཀྱིས་འདེབས་པར་བྱ་ན་ཞག་བདུན་གྱི་བར་དུ་དུས་གསུམ་དུ་རི་བོང་གི་སྤུ་དུག་དང་ཁྲག་གི་ནང་དུ་སྨྱུགས་པ་སྟོང་རྩ་བརྒྱད་བརྒྱད་སྦྱིན་སྲེག་བྱས་ན་མཛེ་ནད་ཀྱིས་འདེབས་
པར་འགྱུར་རོ། །ཆོ་ག་དེ་བཞིན་དུ་དུག་དང་ཁྲག་གི་སྦྱིན་སྲེག་བྱས་ན་ནད་ཁོང་སྐེམས་ཀྱིས་འདེབས་པར་འགྱུར་རོ། །ཕྱིར་གསོ་བ་ནི་བུ་རམ་དང་འོ་མ་ལ་ལན་བརྒྱད་སྟོང་བསྔགས་པ་སྐོམ་དུ་བླུད་ན་གཏོང་བར་འགྱུར་རོ། །བ་ལང་གི་ལྕི་བ་ས་ལ་མ་ལྷུང་བ་ལས་གཟུགས་བྱས་ཏེ་སེང་ལྡེང་གི་
ཕུར་བུ་ལ་ལན་བརྒྱད་སྟོང་བསྔགས་པས་བཙུགས་ན་ཟག་པར་འགྱུར་རོ། །ཕྱིར་གསོ་བ་ནི་ཕུར་བུ་ཕྱུང་ལ་མར་གྱི་ལན་བརྒྱད་སྟོང་སྦྱིན་སྲེག་བྱའོ། །བུད་མེད་ཀྱི་མཚན་ཟག་པར་འདོད་ན་ཞག་གཅིག་སྨྱུང་བར་བྱས་ཏེ་ཕག་ཤ་ལས་མོ་མཚན་གྱི་གཟུགས་བྱས་ལ། ཁྱིའི་རུས་པའི་ཕུར་བུ་ལ་
ལན་བརྒྱ་སྟོང་བཟླས་བརྗོད་བྱས་པ་བཙུགས་ན་ཟག་པར་འགྱུར་རོ། །ཕྱིར་གསོ་བ་ནི་འོ་མས་ལན་བརྒྱད་བརྒྱ་སྦྱིན་སྲེག་བྱའོ། །དེ་ནས་བསད་པར་འདོད་ན་མ་དའི་ཚེར་མ་དང་། སྐེ་ཚེ་དང་ཚ་བ་གསུམ་དང་དུག་རྣམས་ཡུངས་ཀར་མར་དང་སྦྱར་ཏེ། དུར་ཁྲོད་ནས་མེ་བླངས་པའི་ནང་དུ་དུས་
གསུམ་དུ་ལན་བརྒྱད་བརྒྱ་སྦྱིན་སྲེག་བྱས་ན་དུས་ལ་བབ་པར་ཞག་བདུན་གྱིས་འཆི་བར་འགྱུར་ཏེ། ཞག་དྲུག་གི་བར་དུ་ནི་ཕྱིར་གསོར་རུང་ངོ་། །ཞི་བར་འདོད་ན་དཀྱིལ་འཁོར་སྐྱང་ནུལ་གྱིས་བྱུགས་ཏེ་ལན་བརྒྱད་བརྒྱ་བཟླས་བརྗོད་བྱས་པའི་བུམ་པས་ཁྲུས་བྱེད་དུ་བཅུག་ལ། དཱུར་བ་མར་
เล่ม ๙๕ · หน้า 111a
གྱི་ནང་དུ་སྨྱུགས་པས་ལན་བརྒྱ་སྟོང་སྦྱིན་སྲེག་བྱས་ན་ཞི་བར་འགྱུར་རོ། །ཕ་རོལ་གྱི་དམག་གཞོམ་པར་འདོད་ན། བ་རུ་རའི་ཤིང་གིས་མེ་སྦར་བའི་ནང་དུ་མཚོན་ཆ་ཕྱེ་མར་བྱས་པ་ཁྲག་དང་སྦྱར་བས་ལན་བརྒྱ་སྟོང་སྦྱིན་སྲེག་བྱས་ལ་དེའི་ཐལ་བས་བདག་གི་དམག་དང་
དམག་དཔོན་རྣམས་ལ་ཐིག་ལེ་བྱས་ནས། རྒྱལ་མཚན་གྱི་རྩེ་མོ་ལ་ཡང་བྱུགས་ཏེ་བསྟན་ན་མཐོང་བ་ཙམ་གྱིས་ཕ་རོལ་གྱི་དམག་ཚོགས་དང་དམག་དཔོན་དེ་དག་ཕམ་པར་འགྱུར་རོ། །ཡང་ན་གླང་པོ་ཆེ་དང་རྟ་ཤི་བའི་ཤ་བླངས་ཏེ་ཕུབ་མ་དང་བ་རུ་རའི་ཤིང་བསྲེས་པའི་མེར་གཡུལ་འགྱེད་
པའི་ཚེ་སྦྱིན་སྲེག་བྱས་ན་སྲེག་བླུགས་བླུགས་པ་ཙམ་གྱིས་ཕམ་པར་འགྱུར་རོ། །ཡུངས་ཀར་དམར་པོ་བླངས་ཏེ་ལན་བརྒྱ་སྟོང་བསྔགས་པས་བདག་གི་དམག་འཁོད་པའི་ས་ལ་གཏོགས་པའི་ས་གཏོར་ཏེ་མགོ་ལ་ཡང་གཏོར་ན་བདག་གི་དམག་དང་དམག་དཔོན་རྣམས་མཐོང་བ་ཙམ་གྱིས་
ཕ་རོལ་གྱི་དམག་ཕམ་པར་འགྱུར་ཏེ། ནམ་ཡང་ཕ་རོལ་གྱི་དམག་གིས་ནོན་པར་མི་འགྱུར་རོ། །ཡང་ན་བདག་གི་ནང་དུ་འདུག་སྟེ་བཟླས་བརྗོད་བྱས་ན་ཕ་རོལ་གྱི་དམག་ཕམ་པར་འགྱུར་རོ། །དེ་ནས་རྒྱལ་སྲིད་སྒྲུབ་པར་འདོད་ན་རིའི་རྩེ་མོར་སོང་ལ་སློང་མོའི་ཟས་ཟ་ཞིང་ལན་བྱེ་བར་
བཟླས་བརྗོད་བྱས་ན་བཟླས་བརྗོད་ཟིན་པའི་འོག་ཏུ་རྡོ་རྗེ་ཁྲོ་བོ་འོང་སྟེ་རང་གི་གཟུགས་བསྟན་ནས་དམ་པ་སྦྱིན་པར་བྱེད་དེ། འཁོར་ལོས་སྒྱུར་བའི་རྒྱལ་པོ་དང་འདྲ་བར་འགྱུར་རོ། །དེ་ནས་གཏེར་ཆེན་པོ་མཐོང་བར་འདོད་ན་ནོར་གྱི་སྤྱན་རྒྱན་ཐམས་ཅད་ཀྱིས་བརྒྱན་པ་གནོད་སྦྱིན་གྱི་ཚོགས་ཀྱིས་
བསྐོར་བ་བྲི་བར་བྱའོ། །གློ་གཡས་གཡོས་སུ་ཡང་གཏེར་དུང་དང་པདྨ་གཉིས་བྲིས་ལ། དེའི་མདུན་དུ་རྡོ་རྗེ་ཁྲོ་བོ་ལིག་བུ་མིག་དང་སྤྲིན་གྱི་མདོག་ཅན་མཆེ་བ་གཙིགས་པ། སྐྲ་གྱེན་དུ་འགྲེང་ལ་ས་ལ་ལྟ་ཞིང་འདུག་པ་བྲིས་ཏེ། ཡུངས་ཀར་དང་ཨ་ཀ་རུ་གཅིག་ཏུ་སྦྱར་ནས་ཡར་གྱི་ངོ་ཚེས་ཞག་
གཅིག་ལ་བརྩམས་ལ་ཟས་སུ་འོ་མའི་འདག་གུའམ། སློང་མོའི་ཟས་ཟ་ཞིང་ལན་འབུམ་བཟླས་བརྗོད་བྱས་ཏེ། ཅི་འབྱོར་པས་མཆོད་པ་བྱས་པའི་མཇུག་ཏུ་ཞག་གསུམ་སྨྱུང་བ་བྱས་ཏེ། ཟླ་བ་ཉ་ལ་མར་གྱི་མར་མེ་བཞི་ཕུལ་ནས་གཏེར་གཅིག་ལས་ཏི་ན་རའི་ཆར་བབ་ཀྱི་བར་དུ་བཟླས་བརྗོད་བྱའོ། །
เล่ม ๙๕ · หน้า 111b
ཏི་ན་ར་དེ་དག་ཀྱང་བླང་བར་མི་བྱའོ། །དེ་ནས་ནམ་ལངས་པ་དང་སའི་འོག་ནས་གཏེར་ཆེན་པོ་མཐོང་བར་འགྱུར་ལ་དེ་ཡང་ཟད་པར་མི་འགྱུར་ཏེ། ཐོག་མར་དཀོན་མཆོག་གསུམ་གྱི་ཕྱིར་སྤྱད་པར་བྱའོ། །འབྲུ་མ་རུངས་པར་བྱ་བ་དང་འཕེལ་བར་བྱ་འདོད་ན། ཞིང་གི་དབུས་སུ་བཟླས་
བརྗོད་བྱས་ན་རྒྱས་པར་བྱ་བའམ། མ་རུངས་པར་བྱ་བའི་བསམ་པ་ཇི་ལྟ་བུས་བཟླས་བརྗོད་བྱས་པ་དེ་བཞིན་དུ་འགྱུར་རོ། །གྲོང་བཤིག་པར་འདོད་ན་གྲོང་གི་དབུས་སུ་ཞག་གཅིག་སྨྱུང་བ་བྱས་ཏེ། ཨརྐའི་ཡམ་སྲེག་ཤིང་སྦྱིན་སྲེག་བརྒྱ་སྟོང་བྱས་ན་གྲོང་འཇིག་པར་འགྱུར་རོ། །གྲོང་ཁྱེར་
བཤིག་པ་ནི་ཆོ་ག་དེ་བཞིན་དུ་ཞག་བདུན་གྱི་བར་དུ་བྱས་ན་འཇིག་པར་འགྱུར་རོ། །རྒྱལ་པོའི་གྱོད་ལ་ཐོགས་པར་བྱ་ན་ཞག་གསུམ་སྨྱུང་བ་བྱས་ཏེ་རྒྱལ་པོའི་གྱོད་ལ་ཐོགས་པར་བྱའོ་སྙམ་དུ་བསམས་ལ་ལོག་འདྲེན་གྱི་གཟུགས་བྱས་ནས། རཱ་ཛ་ཨརྐའི་ཡམ་སྲེག་ཤིང་ཡུངས་མར་གྱི་ནང་དུ་
སྨྱུགས་པ་བརྒྱད་སྟོང་སྦྱིན་སྲེག་བྱའོ། །ཁ་ཟས་འདོད་ན་ཉི་མ་ཤར་ཁར་ལན་བརྒྱད་བརྒྱ་བཟླས་བརྗོད་བྱས་ན་ཁ་ཟས་རོ་དྲུག་དང་ལྡན་པར་འགྲུབ་པར་འགྱུར་རོ། །གོས་འདོད་ན་ཉི་མ་ཤར་བར་རས་ཀྱི་ཁ་ཚར་རེ་རེ་ལ་བཟླས་བརྗོད་ལན་རེ་རེ་བྱས་པ་བརྒྱད་སྟོང་སྦྱིན་སྲེག་བྱས་ན་གོས་ཐོབ་
པར་འགྱུར་རོ། །བུད་མེད་དབང་དུ་ཐོབ་པར་འདོད་ན་རས་བལ་གྱི་འདབ་མ་རྒྱ་སྐྱེགས་ཀྱིས་ཁ་བསྒྱུར་བ་དང་། མ་ད་ནའི་ཚེར་མ་རྒྱ་སྐྱེགས་ཀྱི་ནང་དུ་སྨྱུགས་པ་དུས་གསུམ་དུ་ལན་བརྒྱད་བརྒྱ་སྦྱིན་སྲེག་བྱས་ན་དབང་དུ་འགྱུར་རོ། །ཡུགས་ས་མོ་དབང་དུ་བྱ་བར་འདོད་ན་རྡོ་རྗེ་ཁྲོ་བོའི་
མདུན་དུ་དུས་གསུམ་དུ་ཡུངས་ཀར་གྱིས་ལན་སྟོང་རྩ་བརྒྱད་སྦྱིན་སྲེག་བྱས་ན་ཞག་བདུན་གྱིས་བྲན་བཞིན་དུ་འོང་བར་འགྱུར་རོ། །ཕུབ་མའི་སྦྱིན་སྲེག་གིས་ནི་དགྲ་མ་རུངས་པར་འགྱུར་རོ། །རྒྱ་སྐྱེགས་ཀྱིས་ནི་གཟི་བྱིན་མེད་པར་བྱེད་དོ། །ཏིལ་བཏགས་པའི་སྦྱིན་སྲེག་གིས་ནི་ལོག་
འདྲེན་གྱིས་ཟིན་པར་འགྱུར་རོ། །གང་ཞིག་ཕ་རོལ་གྱི་རིག་སྔགས་བཅད་པར་འདོད་ན་ཀུ་ཤ་ལས་གཟུགས་བྱས་ཏེ་ཞག་བདུན་གྱི་བར་དུ་དུས་གསུམ་དུ་ལན་བརྒྱད་བརྒྱ་བརྒྱད་བརྒྱ་བཟླས་བརྗོད་བྱས་ལ། ཞག་བདུན་གྱི་ཉིན་པར་ལྕགས་ཞུན་མའི་མཚོན་གྱིས་བཅད་ཅིང་སྦྱིན་སྲེག་
เล่ม ๙๕ · หน้า 112a
བྱས་ན་ཞག་གཅིག་གིས་རིག་སྔགས་བཅད་པར་འགྱུར་རོ། །བོང་བུའི་རྟུག་པའམ། གླང་པོ་ཆེའི་རྟུག་པས་དུས་གསུམ་དུ་ལན་སྟོང་རྩ་བརྒྱད་སྦྱིན་སྲེག་བྱས་ན་ཞག་བདུན་གྱིས་རིག་སྔགས་ཐམས་ཅད་བཅིངས་པར་འགྱུར་རོ། །ཕྱིར་གསོ་བར་འདོད་ན་དེ་ཉིད་དུ་དེ་ཉིད་
ཀྱི་སྦྱིན་སྲེག་བྱས་ན་གཏོང་བར་འགྱུར་རོ། །བདག་དང་གཞན་གྱི་ཕྱིར་ལོག་འདྲེན་གཞིག་པར་འདོད་ན། གླང་པོ་ཆེའི་མགོ་ཅན་གྱི་གཟུགས་སྔ་ནས་ཡོད་པ་དེར་སོང་ལ། བགེགས་ཀྱི་གཟུགས་བྲིས་ནས་དེར་མེ་སྦར་ཏེ་གླང་པོ་ཆེའི་ཤས་སྦྱིན་སྲེག་བྱས་ན་ལོག་འདྲེན་རྣམས་མ་
རུངས་པར་འགྱུར་རོ། །ཕྱིན་ཆད་བགེགས་མེད་དོ། །གྲུ་ཐོགས་པར་བྱ་བར་འདོད་ན་ཆུ་སྲིན་ཀུམྦྷི་རའི་མཆེ་བ་ལ་ལན་བརྒྱད་བརྒྱ་བཟླས་བརྗོད་བྱས་ཏེ་ཆུའི་ནང་དུ་བཅུག་ན་གྲུ་ཐོགས་པར་འགྱུར་ལ་ཕྱུང་ན་འགྲོ་བར་འགྱུར་རོ། །ཕ་རོལ་གྱི་དམག་རེངས་པར་བྱ་ན་མདའ་ལ་ལན་བརྒྱད་
སྟོང་བཟླས་བརྗོད་བྱས་ཏེ་འཕངས་ན་རེངས་པར་འགྱུར་ཏེ་མཚོན་འདེབས་ཤིང་འཕེན་མི་ནུས་པར་འགྱུར་རོ། །ཆོམ་རྐུན་རེངས་པར་བྱ་ན་ཡིད་ལ་བཟླས་བརྗོད་བྱས་ན་རེངས་པར་འགྱུར་རོ། །མི་མ་ཡིན་པ་རེངས་པར་བྱ་ན་དུར་ཁྲོད་ཀྱི་ལྕགས་ཀྱི་ཕུར་བུ་ལ་བསྔགས་ཏེ། བཙུགས་
ན་བཅིངས་པ་དང་རེངས་པར་འགྱུར་ལ་ཕྱུང་བ་ན་གྲོལ་བར་འགྱུར་རོ། །དྲན་པ་ཙམ་གྱིས་ངན་འགྲོར་འགྲོ་བར་མི་འགྱུར་ཏེ། མཚམས་མེད་པ་ལས་ཐར་བར་འགྱུར་རོ། །དངོས་གྲུབ་འདི་དག་ནི་བཟླས་བརྗོད་བྱས་པ་ཙམ་གྱིས་ལས་ཐམས་ཅད་བྱེད་པར་འགྱུར་ཏེ། དེ་དུག་ལས་གསོ་
ནམ་དན་འམ། རྨ་བྱའི་མདོངས་སམ་ཡལ་གས་བྱའོ། །རིམས་སོ་ཅོག་གསོ་བ་ནི་ཚོན་རྩི་སྣ་ལྔའི་སྐུད་པས་བྱའོ། །མཚམས་བཅད་པ་ནི་ཡུངས་ཀར་རམ་ཐལ་བའམ་ཆུས་བྱའོ། །གདོན་དབབ་པ་ནི་གུ་གུལ་གྱིས་བདུག་པར་བྱའོ། །སྦྲུལ་གྱིས་ཟིན་པ་ལ་ནི་ཤིང་ཀུན་དང་
ཤུ་དག་དང་བྱིས་ཀུ་དང་ལུང་ཐང་དང་རྨ་བྱའི་མདོངས་དང་རྨ་བྱའི་མཁྲིས་པ་དང་ནེའུ་ལེའི་སྤུ་དང་ཚ་བ་གསུམ་དང་འདི་རྣམས་སྔ་དྲོ་ན་ག་བུས་པའི་ཁུ་བ་དང་བཏག་ཅིང་གྲིབ་མར་བསྐམས་པ་ལན་བདུན་གྱི་བར་དུ་བྱས་ལ། དེ་ནས་ལག་ན་རྡོ་རྗེའི་མདུན་དུ་མཆོད་པ་བྱས་ཏེ་ཡར་གྱི་ངོ་ཚེས་
เล่ม ๙๕ · หน้า 112b
བཅྭ་ལྔ་ལ་ཞག་གཅིག་སྨྱུང་བ་བྱས་ནས་ལན་བརྒྱད་སྟོང་བཟླས་བརྗོད་བྱས་ལ། སྦྱིན་པའི་ཚེ་ལན་བདུན་བསྔགས་ནས་སྦྱིན་པར་བྱ་སྟེ། གསོན་པོ་ཞིག་ན་ནི་བླུད་པར་བྱའོ། །ཤི་ཟིན་པ་ཞིག་ན་ནི་སྣར་བླུགས་ཤིང་མིག་ལ་བསྐུས་ན་འཇོག་པོས་ཟིན་པ་ཡང་འཚོ་བར་འགྱུར་རོ། །
སྦྲུལ་གྱིས་ཟིན་ཏེ་ཤི་ནས་བསྲེགས་ཟིན་པ་ཡང་ཐལ་བས་གཟུགས་བྱས་ལ་རྡོ་རྗེ་ཁྲོ་བོའི་རིག་པ་མཆོག་དང་ལྡན་པ་གཅིག་ཏུ་ལན་འབུམ་བཟླས་བརྗོད་བྱས་པའི་རྗེས་ལ་དེ་ཉིད་དུ་ཞག་གསུམ་སྲུང་བ་བྱས་ཏེ་ཡར་གྱི་ངོ་ཚེས་བཅྭ་ལྔ་ལ་ཞི་བ་ལ་འོས་པའི་མེ་ཏོག་གིས་མཆོད་པ་བྱས་ནས་ནཱ་ག་
གེ་སར་གྱི་ཤིང་གིས་མེ་སྦར་ཏེ། མངར་གསུམ་གྱིས་ལན་བརྒྱད་སྟོང་སྦྱིན་སྲེག་བྱས་ལ་གཟུགས་རས་དཀར་པོས་བཀབ་སྟེ། དེ་ནས་རིག་པ་མཆོག་བཟླས་བརྗོད་བྱེད་བཞིན་དུ་རས་བཤུས་ལ་ཤི་བ་དེ་ན་ཚོད་དང་གཟུགས་ཅི་འདྲ་བ་དེ་འདྲ་བའི་ན་ཚོད་དང་གཟུགས་ཅན་གྱི་སེམས་ཅན་ལྡང་བར་འགྱུར་རོ། །དེ་ནས་
རྡོ་རྗེ་ཁྲོ་བོའི་གསང་སྔགས་རིག་པ་མཆོག་དང་ལྡན་པ་ལ་ལན་བདུན་བཟླས་བརྗོད་བྱས་ན་ལངས་ཏེ་ཁྱིམ་དུ་འགྲོ་བར་འགྱུར་རོ། །ཅི་སྟེ་རས་ཀྱིས་བཀབ་ཀྱང་མིའི་གཟུགས་སུ་མ་གྱུར་ན་རྨ་བྱའི་སྒྲོ་རང་ལྷུང་བས་སྦྱིན་སྲེག་བྱས་ན་གདོན་མི་ཟ་བར་དེ་བཞིན་དུ་འགྱུར་ཏེ་འགྲུབ་པར་འགྱུར་རོ། །ཆར་
དབབ་པར་འདོད་ན་ཐབ་ཁུང་པདྨའི་དབྱིབས་འདྲ་བར་བྱས་ལ་མངར་གསུམ་གྱིས་ལན་བརྒྱད་སྟོང་སྦྱིན་སྲེག་བྱས་ན་ཆར་ཆེན་པོ་ཞག་བདུན་གྱི་བར་དུ་འབབ་པར་འགྱུར་རོ། །ཅི་སྟེ་ཆར་མ་བབ་པར་གྱུར་ན་མེ་དེ་ཉིད་ཀྱི་ནང་དུ་མངར་གསུམ་དུག་དང་ཁྲག་དང་སྦྱར་ཏེ་སྦྱིན་སྲེག་བྱས་ན་
འབབ་པར་འགྱུར་རོ། །བཅད་པར་བྱ་ན་མངར་གསུམ་དཀར་དང་སྦྱར་བས་སྦྱིན་སྲེག་བྱས་ན་འཆད་པར་འགྱུར་རོ། །གཏེར་འབྱུང་བར་བྱ་ན་ཡུངས་ཀར་གྱི་འཁྲུལ་འཁོར་ཐམས་ཅད་ཆོམས་པར་འགྱུར་རོ། །བཟླས་བརྗོད་བྱས་པ་ཙམ་གྱིས་ལས་ཐམས་ཅད་བྱེད་པར་འགྱུར་རོ། །ལས་
བྱས་པ་ལས་ཅི་སྟེ་འགྲུབ་པར་མ་གྱུར་ན་རིག་པ་མཆོག་དང་ལྡན་པར་བྱས་ན་ལས་ཐམས་ཅད་མྱུར་དུ་ངེས་པར་འགྱུར་རོ། །དེ་ནས་གནོད་སྦྱིན་ཆེན་པོ་རྨུགས་བྱེད་རྣམས་ལྷ་མ་ཡིན་རྣམས་ཀྱིས་གཙེས་ནས་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་གང་ན་བ་དེར་དོང་
เล่ม ๙๕ · หน้า 113a
ངོ་། །དེ་ནས་སྐྱབས་མ་རྙེད་པའི་གནོད་སྦྱིན་དེ་དག་ལག་ན་རྡོ་རྗེ་ལ་སྐྱབས་སུ་སོང་སྟེ། རྡོ་རྗེ་འཛིན་ཆེན་པོ་ལྷ་མ་ཡིན་མཆོག་ཏུ་འཇིགས་པ་ལས་སྐྱོབས་ཤིག་ཅེས་སྨྲས་སོ། །དེ་ནས་བཅོམ་ལྡན་འདས་ལག་ན་རྡོ་རྗེས་གནོད་སྦྱིན་ཆེན་པོ་རྨུགས་བྱེད་དེ་དག་ལ་བཟོད་ལྡན་དག་ཁྱེད་
ནི་སྡིག་པ་མེད་པ་ཡིན་ཏེ། དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོའི་རྒྱལ་པོ་གང་ན་བ་དེར་ཕྱིན་ལ་ལག་ན་རྡོ་རྗེས་ང་བསྟན་པར་གནས་པས་ནམ་འཇིགས་ཤིག་མ་འཇིགས་ཤིག་ཅེས་དབུགས་ཕྱུང་ངོ་། །དེ་ནས་དབང་ཕྱུག་ཆེན་པོ་ལ་སོགས་པ་ལྷ་རྣམས་
དང་དྲང་སྲོང་དེ་དག་གིས་བཅོམ་ལྡན་འདས་ལག་ན་རྡོ་རྗེ་དང་སྤྱན་ལ་མངོན་པར་བསྟོད་པ། གཟི་བརྗིད་ཆེན་པོ་ལེགས་སོ་ལེགས་སོ། །སྟོབས་པོ་ཆེ་ཕ་རོལ་གནོན་པ་ཁྱོད་ཀྱིས་ལྷ་དང་བཅས་པའི་འཇིག་རྟེན་གྱི་དོན་གྱི་ཕྱིར་གང་གིས་ལྷ་ཐམས་ཅད་རྒྱལ་བར་འགྱུར་ལ། ལྷ་མ་ཡིན་རྣམས་
ཕམ་པར་འགྱུར་བའི་དཔལ་ཐམས་ཅད་མངོན་པར་འབྱུང་བར་བྱེད་པའི་དཀྱིལ་འཁོར་ཆེན་པོ་བཤད་པ་ལེགས་སོ་ལེགས་སོ། །དེ་ནས་བཅོམ་ལྡན་འདས་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །བཟོད་ལྡན་དག་འཇིག་རྟེན་ན་སྡང་བ་གང་ཇི་སྙེད་ཡོད་པ་དེ་དག་དེང་ཤིག་
པར་བྱས་མ་འཇིགས་ཤིག་མ་འཇིགས་ཤིག །དེ་ནས་བཅོམ་ལྡན་འདས་ལག་ན་རྡོ་རྗེ་དང་སྤྱན་ལ་ཕྱག་བྱས་ནས་ལྷ་མ་ཡིན་རྣམས་དང་ཟས་སུ་ཁྲག་འཐུང་བའི་གདོན་རྣམས་གཞིག་པའི་ཕྱིར་རྡོ་རྗེ་ཁུ་ཚུར་གྱི་རིག་སྔགས་ཆེན་མོ་བརྗོད་དོ། །དེ་ནས་ལྷ་མ་ཡིན་དེ་དག་གི་ཁུ་ཚུར་གྱི་མིང་ཐོས་
ནས་བྲག་ལ་གནམ་ལྕགས་ཀྱིས་ཕོག་པ་བཞིན་དུ་མ་རུང་བར་འགྱུར་རོ། །དེ་ནས་བཅོམ་ལྡན་འདས་ལག་ན་རྡོ་རྗེས་སྤྱན་ལ་སྤྱི་བོས་ཕྱག་བཙལ་ཏེ་མཉམ་པར་བཞག་ནས་རྡོ་རྗེ་ཁུ་ཚུར་བཤད་པ། ན་མོ་རཏྣ་ཏྲ་ཡ་སྱ། ན་མཥྩཎྜ་བཛྲ་པཱ་ཎི་སྱ། མ་ཧཱ་ཡཀྵ་སེནཱ་པ་ཏི་སྱ། དེ་བ་ཨ་རུ་ར་
སཾ་ཀྲ་མེ། དེ་བ་ནཱ་མ་བྷ་ཡ་ཀ་རི། བཛྲ་མུཥྚི། ས་མུཏྤཱ་ནན། ཨ་སུ་རཱནྡཾ། ཀྵ་ཡཾ་ཀ་རི་ག་ཏ་ནི་སརྦ་ཤ་ཏྲཱུ་ཎཱཾ། ནཱ་གཱ་ནཱཾ་བ་ཤ་བརྟེ་ནི་བཛྲ་མུཥྚི་མ་པྲ་བྷ་ཀྵ་མི་བྷཱུ་ཏཱ་ནཱཾ། མརྨ་བེ་ཏ་ནི་ཧ་ཧ་བཛྲ་པཱ་ཎི། ཧི་ཧི་བཛྲ་པཱ་ཎི། ཧ་ན་ཧ་ན་བཛྲ་པཱ་ཎི། ཨ་བེ་རི་ཨ་བེ་རི་བཛྲ་པཱ་ཎི། ཨོྃ་ཀུ་ཧུ་སྭཱ་ཧཱ།
เล่ม ๙๕ · หน้า 113b
གསང་བདག་བློ་དང་ལྡན་པ་ཡིས། །གསང་སྔགས་བཤད་པ་ཙམ་གྱིས་ནི། །དཀྱིལ་འཁོར་དེ་ན་སྡང་བ་གང་། །དེ་དག་ཡོངས་སུ་ཚིག་གྱུར་ནས། །སྟོབས་ཆེན་ཕ་རོལ་གནོན་པ་ཡིས། །རྡོ་རྗེ་ཁུ་ཚུར་རབ་འཇིགས་ལས། །བདག་ཅག་བསྐྱབ་པ་གྱིས་ཤིག་ཅེས། །
ལག་ན་རྡོ་རྗེའི་སྐྱབས་སུ་སོང་། །དེ་ནས་དཀོན་མཆོག་གསུམ་པོ་ཡིས། །བརྒྱན་པར་སེམས་ནི་བསྐྱེད་པར་གྱིས། །འོན་ཏ་ང་ཞི་བ་ཉིད་དུ་འགྱུར། །དེ་ནས་ལྷ་དེ་དག་གིས་འཇིགས་པའི་སེམས་ཀྱིས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེ་ལ་མངོན་པར་བསྟོད་ནས། རིག་
སྔགས་ཀྱི་རྒྱལ་པོ་རྡོ་རྗེ་ཁུ་ཚུར་གྱིས་རིག་སྔགས་ཆེན་མོའི་ལས་རྣམས་ཤོད་ཅིག་ཤོད་ཅིག་ཅེས་སྨྲས་ནས། ལག་ན་རྡོ་རྗེ་སྟོབས་ཆེན་གྱིས། །སྤྱན་ལ་སྤྱི་བོས་ཕྱག་འཚལ་ནས། །མཉམ་གཞག་རྡོ་རྗེ་ཁུ་ཚུར་གྱི། །ཆོ་ག་བཤད་པ་རབ་བསྟན་པ། །ཆུ་ཀླུང་གི་འགྲམ་
མམ། སྐུ་གདུང་དང་ལྡན་པའི་མཆོད་རྟེན་གྱི་དྲུང་དུ་སྒྲ་སྐད་གྲག་པ་མེད་པའི་གནས་སུ་གཙང་སྦྲ་དང་། ཚངས་པར་སྤྱད་པ་དང་། ཟ་གཅིག་པ་དང་སློང་མོའི་ཟས་ཟ་ཞིང་མི་སྨྲ་བར་ལན་སུམ་འབུམ་མམ། ལྔ་འབུམ་བཟླས་བརྗོད་བྱའོ། །ཆུ་ཀླུང་ངམ། པདྨའི་རྫིང་བུར་མེ་ཏོག་
ལ་ལན་རེ་རེ་བཟླས་བརྗོད་བྱས་ཏེ་དོར་བར་བྱའོ། །སློང་མོའི་ཟས་ཟ་ཞིང་རིའམ་དགོན་པར་བ་ལང་གི་ལྕི་བ་བསྲེག་པར་བྱའོ། །ཆུའི་ནང་དུ་ཟིན་ཐིག་ལེའི་ལོ་མ་བཅད་ཅིང་བཅད་ཅིང་དོར་བར་བྱའོ། །ལས་འདི་དག་བྱས་ན་ལྷ་ཉིད་རང་གི་ཆ་ལུགས་ཀྱིས་འོང་བར་བྱེད་དེ་འགོག་
པར་བྱེད་དོ། །སྒྲུབ་པའམ། བདག་ཉིད་སད་པར་འདོད་པའམ། ཡུལ་གྲུ་འདོད་ཀྱང་རུང་སྟེ་རས་མ་ཉམས་པ། སྐྲ་མེད་པ། ཁ་ཚར་མ་བཅད་པ་ལ་ཚོན་རྩི་སྦྱིན་དང་མ་སྦྱར་བ་སྣོད་སར་པའི་ནང་དུ་བཅུག་སྟེ། ཕྱིས་སར་པས་རི་མོ་མཁན་གཙང་མ་གསོ་སྦྱོང་གི་ཡན་ལག་
བརྒྱད་དང་ལྡན་པ་བཅོམ་ལྡན་འདས་ཀྱི་སྐུ་གཟུགས་འདྲིར་གཞུག་གོ། །རྡོ་རྗེའི་སྡེ་ཡང་མིའི་གཟུགས་སུ་བྱས་ལ་མགོ་བོར་རྡོ་རྗེ་བཞག་སྟེ་འཕགས་པ་རྡོ་རྗེ་འཛིན་ལག་པ་གཡོན་པས་སྙེས་པར་བྱའོ། །རྡོ་རྗེའི་སྡེ་ཡང་སྒ་ལྕང་ལོར་འཁྱིལ་ཞིང་རྒྱན་ཐམས་ཅད་ཀྱིས་བརྒྱན་པར་བྱའོ། །
เล่ม ๙๕ · หน้า 114a
བཅོམ་ལྡན་འདས་ལག་ན་རྡོ་རྗེའི་མགོ་ལོགས་སུ་ནི་གཙུག་ནས་བྱུང་གཞོན་ནུའི་གཟུགས་ལ་རྒྱན་ཐམས་ཅད་ཀྱིས་བརྒྱན་པ་གསེར་གྱི་ཁ་དོག་ཅན། བཅོམ་ལྡན་འདས་ལ་ཕྱག་འཚལ་ཞིང་འདུག་པར་བྲིའོ། །བཅོམ་ལྡན་འདས་ཀྱི་གཡས་ལོགས་སུ་ནི་རྡོ་རྗེ་ཁུ་ཚུར་
མ་གཞོན་ནུའི་གཟུགས་འཛིན་པ་རྒྱན་ཐམས་ཅད་ཀྱིས་བརྒྱན་ཅིང་དཔུང་རྒྱན་དང་། གདུ་བུའི་རྒྱན་གྱིས་བརྒྱན་ལ་གསེར་གྱི་མདོག་ཅན་བཅོམ་ལྡན་འདས་ལ་ཕྱག་འཚལ་ཞིང་འདུག་པ་བྲིའོ། །སྒྲུབ་པ་པོ་ཡང་འོག་ལོགས་སུ་པུས་མོ་གཡས་པའི་ལྷ་ང་ས་ལ་བཙུགས་ཏེ་ལག་པ་གཡས་
པ་ན་པོག་ཕོར་ཐོགས། ལག་པ་གཡོན་པ་ན་མེ་ཏོག་གི་ཟ་མ་ཏོག་ཐོགས་པར་བྲིའོ། །དེ་ནས་ཡར་གྱི་ངོ་ཚེས་གཅིག་ལ་བརྩམས་ཏེ་ཚེས་བཅུ་གསུམ་གྱི་བར་དུ་ཟས་སུ་འོ་མ་དང་འབྲས་ཆན་ཟ་ཞིང་ཟ་གཅིག་པར་བྱས་ལ་དུས་གསུམ་དུ་ལན་སྟོང་རྩ་བརྒྱད་བཟླས་བརྗོད་བྱའོ། །དེ་ནས་
ཞག་གཉིས་སམ་གསུམ་དུ་སྨྱུང་བ་བྱས་ཏེ། །དུས་གསུམ་དུ་ཁྲུས་བྱེད་ཅིང་གོས་གཙང་མ་བགོས་ལ། མཚན་མོ་ནི་སྦྱིན་སྲེག་བྱ། ཉིན་མོ་ནི་བཟླས་བརྗོད་བྱ་སྟེ། །ཡུལ་གྲུ་འདོང་ན་ནི་ཤུ་ཏི་མར་གྱི་ནང་དུ་སྨྱུགས་པས་སྦྱིན་སྲེག་བྱའོ། །ཞག་གྲངས་ངུའི་སྦྱིན་སྲེག་བྱེད་པ་དེ་
སྲིད་དུ་བཟླས་བརྗོད་བྱ་སྟེ། ལས་སོ་ཅོག་ལ་དུས་གསུམ་དུ་ལན་སུམ་སྟོང་བཟླས་བརྗོད་བྱའོ། །དངོས་གྲུབ་ཀྱི་མཚན་མར་རྨི་ལམ་དུ་མེ་ཏོག་གམ། འབྲས་བུ་རྙེད་པའམ། འཛིན་པ་རྨིས་ན་ལྷ་འགྲུབ་པར་འགྱུར་རོ། །ཤགས་འགྱེད་པའི་ཆོ་ག་འདི་ཡིན་ཏེ། རྒྱ་སྐྱེགས་
ཡུངས་མར་གྱི་ནང་དུ་སྨྱུགས་པས་སྦྱིན་སྲེག་བྱའོ། །བུ་འདོད་པས་ནི་ཏིལ་དང་འབྲས་ཀྱིས་བྱའོ། །དགྲ་གཞིག་པ་ལ་ནི་གུ་གུལ་འབྲུ་མར་དང་སྦྱར་ཏེ་ཁྲག་དང་བསྲེས་པས་བྱའོ། །འཇིགས་པ་ཐམས་ཅད་ལ་ནི་བིལ་བའི་ཡམ་སྲེག་ཤིང་གིས་བྱའོ། །ལྷ་བཤོས་ནི་འབྲས་ཀྱི་འོ་ཐུག་དང་
འོ་མ་འབྲས་ཀྱིས་སྦྱར་བས་བྱའོ། །ཕྱོགས་བཞིར་ཡང་འཇིག་རྟེན་སྐྱོང་བ་རྣམས་ལས་འབྱུང་པོའི་ཟས་ཀྱི་གཏོར་མ་ཤ་དང་ཆང་དང་བཅས་པར་ནུབ་མོ་སྦྱིན་པར་བྱའོ། །ལས་རྣམས་ལ་ནི་ནས་དང་ཡུངས་ཀར་དང་འབྲས་ཡོས་དང་སོ་སོར་སྦྱིན་སྲེག་བྱའོ། །གདོན་ལས་ཐར་བར་བྱ་ན་
เล่ม ๙๕ · หน้า 114b
བ་རུ་རའི་ཡམ་སྲེག་ཤིང་སྐེ་ཚེས་བྱའོ། །ལོ་ཏོག་རྒྱས་པར་བྱ་ན་ནས་དང་ཨུ་དུམ་བཱ་རའི་ཡམ་སྲེག་ཤིང་གིས་བྱའོ། །དགྲ་གཞིག་པར་བྱ་ན་སྐེ་ཚེའི་འབྲུ་བཏགས་ཏེ་ཏིལ་དང་སྦྱར་བ་དང་། མད་ནའི་ཚེར་མའི་ཡམ་སྲེག་ཤིང་གིས་བྱའོ། །གཏན་དུ་བསྐྲད་པར་བྱ་ན་ནི་བིལ་བའི་འབྲས་བུ་
ཡུངས་མར་གྱི་ནང་དུ་སྨྱུགས་པ་དང་། བིལ་བའི་ཡམ་སྲེག་ཤིང་དང་། བིལ་བའི་ཕྱེ་མ་དང་། རྒྱ་སྐྱེགས་ཕྱེ་མར་བྱས་ཏེ་སྦྱིན་སྲེག་བྱའོ། །འཕགས་པ་ལག་ན་རྡོ་རྗེའི་སྐུ་གཟུགས་ཀྱང་འདྲེར་གཞུག་གོ། །བུད་མེད་དབང་དུ་བྱ་བར་འདོད་ན་ཉིན་མཚན་དུ་ལན་ཚྭས་བྱའོ། །ཀ་ཀ་དང་ཨུ་
དུ་བའི་ཡམ་སྲེག་ཤིང་དང་། ལན་ཚྭ་ལས་གཟུགས་བྱས་ཏེ་བུད་མེད་ལ་ནི་རྐང་པ་གཡོན་པ་ནས། སྐྱེས་པ་ལ་ནི་རྐང་པ་གཡས་པ་ནས་བརྩམ་མོ། །སྐྱེས་པ་ལ་ནི་ནིམ་པའི་ཡམ་སྲེག་ཤིང་དང་། སྐྱེས་པའི་གཟུགས་བྱས་ལ་ལན་ཚྭ་ཨེ་རཎྜའམ། ཟར་མའི་མར་དང་སྦྱར་ཏེ་སྦྱིན་སྲེག་
བྱའོ། །ཆོ་ག་གཞན་ཡང་རྩིག་ངོས་སམ། ཤིང་ལེབ་ལ་འཕགས་པ་ལག་ན་རྡོ་རྗེའི་གཟུགས་བྲིས་ཏེ་མགོ་བོར་ཡང་བཅོམ་ལྡན་འདས་ཀྱི་གཟུགས་བྲིའོ། །རྡོ་རྗེ་འཛིན་གྱིས་ལག་པ་གཡོན་པ་ལ་རྡོ་རྗེ་བསྟོད་དེ་འཛིན་པར་བྱ། ལག་པ་གཡས་པའི་མཛུབ་མོ་ནི་བསྡིགས་པའི་ཚུལ་དུ་
བྱ་སྟེ། གཡོན་ཕྱོགས་སུ་རྡོ་རྗེ་ཁུ་ཚུར་མ་མདོག་ནག་མོར་བྲི། གཡས་ཕྱོགས་སུ་སྒྲུབ་པ་པོ་ལག་ན་རྡོ་རྗེའི་ཞལ་དུ་བལྟ་ཞིང་པུས་མོ་གཉིས་ས་ལ་བཙུགས་ཏེ་རྡོ་རྗེ་འཛིན་ལ་སྙིམ་པར་མེ་ཏོག་འཐོར་བར་བྱ། རྡོ་རྗེ་ཁུ་ཚུར་མ་ཡང་ལག་པ་གཡོན་པ་ཁུ་ཚུར་བཅངས་ལ་རབ་ཏུ་འབར་བར་བྱ།
ལག་པ་གཡས་པ་ནི་མཛུབ་མོར་བསྡིགས་པར་བྱ་སྟེ། ཁྲོས་ཤིང་གོས་སེར་པོ་གྱོན་པར་བྱའོ། །མར་གྱི་ངོ་ཞག་བརྒྱད་ནས་བརྩམས་ཏེ་མར་གྱི་ངོ་ཞག་བཅྭ་ལྔའི་བར་ཞག་བདུན་དུ་སྔར་བསྙེན་པ་མི་སྨྲ་བར་དུས་གསུམ་དུ་ལན་བརྒྱད་བརྒྱ་བརྒྱད་བརྒྱ་བཟླས་བརྗོད་བྱས་ཏེ་ཟས་སུ་འོ་མ་དང་
འབྲས་ཆན་ཟ་ཞིང་མར་གྱི་མར་མེ་དང་དྲི་དང་མེ་ཏོག་གི་ཕྲེང་བ་དང་བདུག་པ་ལ་སོགས་པས་མཆོད་པ་བྱ་ཞིང་དུས་གསུམ་དུ་ཁྲུས་བྱས་ལ་ནུབ་གཅིག་བཞིན་དུ་གཏོར་མ་རྣམ་པ་སྣ་ཚོགས་དབུལ་ཞིང་རྟག་ཏུ་དུས་གསུམ་དུ་ཡང་དབུལ་ལོ། །ཞག་བདུན་གྱི་བར་དུ་བཟླས་བརྗོད་བྱས་ལ་ཡར་གྱི་
เล่ม ๙๕ · หน้า 115a
ངོ་ཚེས་གཅིག་ལ་བརྩམས་ཏེ་ཀར་བཱི་ར་དམར་པོ་ཡུངས་མར་གྱི་ནང་དུ་སྨྱུགས་པ་དང་། ཨརྐའི་ཡམ་སྲེག་ཤིང་གིས་སྦྱིན་སྲེག་བྱ་སྟེ་ཆོ་ག་འདི་ནི་སྔ་མ་བཞིན་ནོ། །མེ་ཏོག་དཀར་པོས་བྱ་ནའང་ཡམ་སྲེག་ཤིང་ནི་སྔ་མ་ཉིད་དེ། མར་གྱི་ནང་དུ་སྨྱུགས་པར་བྱའོ། །
ལས་འདི་རྣམས་གཉིས་ཏེ་དགྲ་སྡིག་ཅན་ལ་བྱའོ། །རྩོད་པའི་སའམ་གྲོང་གི་ལོགས་སུ་རླུང་ཕྱོགས་གང་ནས་འགྲོ་བ་དེར་ཉེའུ་ཤིང་དུམ་བུ་དུམ་བུར་གཏུབས་པ་དང་། བ་ལ་ཤའི་ཡམ་སྲེག་ཤིང་གིས་སྦྱིན་སྲེག་བྱ་སྟེ་ལྷ་བཤོས་སུ་ཞོ་དང་འབྲས་ཆན་སྦྱར་བ་དབུལ་ཞིང་སྨྱུང་བ་བྱས་པས་
བྱ་སྟེ། སྐུ་གཟུགས་ཀྱི་ཆོ་ག་ནི་སྔ་མ་བཞིན་ནོ། །དགྲའི་བ་ལང་ངམ། མ་ཧེ་རྣམས་མ་རུང་པར་བྱ་ན་བ་ལང་གི་ཤ་དང་མ་ཧེའི་ཤས་སྦྱིན་སྲེག་བྱའོ། །རྡོ་རྗེ་ཁུ་ཚུར་གྱི་ཆོ་གའི་སྐབས་སུ་ལྷ་བཤོས་དབུལ་ཞེས་འབྱུང་བ་ཀུན་རྡོ་རྗེ་ཁུ་ཚུར་ཉིད་དབུལ་མི་རྣམས་ལ་ནི་མི་ཤས་སྦྱིན་
སྲེག་བྱའོ། །ཚ་བ་གསུམ་དང་སྐེ་ཚེ་འབྲུ་མར་དང་སྦྱར་བའི་སྦྱིན་སྲེག་ཀྱང་བྱའོ། །མི་རྣམས་ལ་ནི་བེ་ཀངྐ་ཏའི་ཡམ་སྲེག་ཤིང་གིས་བྱའོ། །བ་ལང་རྣམས་ལ་ནི་བ་ལང་གི་ལྕི་བས་བྱའོ། །མ་ཧེ་རྣམས་ལ་ནི་མ་ཧེའི་ལྕི་བས་བྱའོ། །མི་དང་བ་ལང་མ་ཧེ་རྣམས་ཀྱི་ནད་ཀྱི་གནོད་པ་ལ་ཡང་
དེ་དང་འདྲ་སྟེ། མི་རྣམས་ལ་ནི་སྐྲ་དང་སེན་མོ་དང་བྱི་བའི་རྟུག་པ་དང་ལན་ཚྭ་རྣམས་ཡུངས་མར་དང་སྦྱར་ཏེ་སྦྱིན་སྲེག་བྱའོ། །བ་ལང་གི་ནད་ལ་ནི་པགས་པ་དང་མཇུག་མ་དང་སྤུ་དང་རྨིག་པ་རྣམས་དང་བེག་ཚོང་དང་ལྷན་ཅིག་ཏུ་ཕྱེ་མར་བྱས་ཏེ་ཡུངས་མར་དང་སྦྱར་བས་བ་ལང་གི་ལྷས་
སམ། བ་ལང་གི་ར་བའམ། ཡང་ན་གང་ན་བ་ལང་གནས་པ་ཡང་རུང་སྟེ། དེར་སྦྱིན་སྲེག་བྱ་ཞིང་ཉིན་མཚན་བརྒྱད་ཀྱི་བར་བཅོམ་ལྡན་འདས་ལ་མཆོད་པ་བྱའོ། །དགེ་སློང་རྣམས་ལ་ཡང་མཆོད་སྟོན་བྱས་ཏེ། འདིར་ཡང་སྐུ་གཟུགས་ཀྱི་ཆོ་ག་སྔ་མ་བཞིན་གཏོར་མའི་ཆོ་ག་
ཡང་བྱའོ། །མི་རྣམས་ལ་ནི་གྲོང་ངམ་གྲོང་ཁྱེར་གྱི་ནང་དུ་སྒོའི་ཐེམ་པ་ནོན་པར་བྱ་སྟེ། དེ་ཉིད་དུ་ཁྱིམ་དུ་བྱས་ལ་མི་རྣམས་ལ་ནི་སེང་ལྡེང་གི་སོལ་བས་བྱའོ། །བ་ལང་རྣམས་ལ་ནི་སྤོས་ཀྱིས་བྱའོ། །མ་ཧེ་རྣམས་ལ་ནི་ནིམ་པའི་ཡམ་སྲེག་ཤིང་གིས་བྱས་ན་ཞི་བར་འགྱུར་རོ། །
เล่ม ๙๕ · หน้า 115b
ལྡོང་རོས་དང་ལིག་བུ་མིག་དང་གི་ཝང་ལ་སོགས་པ་བསྒྲུབ་པར་འདོད་ན་སྔར་བཤད་པའི་བསྙེན་པ་བྱས་ལ། ཟངས་དང་ལྕགས་དང་ར་གན་ལ་སོགས་པས་ཡམ་སྲེག་ཤིང་གིས་མིག་སྨན་བྱ་སྟེ། ལིག་བུ་མིག་དང་ལྡོང་རོས་དང་གི་ཝང་ལ་སོགས་པ་ལས་གང་ཡང་རུང་བ་བླངས་ལ་
བུ་མོ་གཞོན་ནུ་གསོ་སྦྱོང་དང་ལྡན་ཞིང་གོས་དཀར་པོ་གྱོན་པས་སྤོས་ཆུ་དང་སྦྱར་ཏེ་བཏགས་ནས། སྐུ་གདུང་དང་ལྡན་པའི་མཆོད་རྟེན་ནས་སྐུ་གཟུགས་ཀྱི་མདུན་དུ་ཡར་གྱི་ངོ་ཚེས་བརྒྱད་ནས་བརྩམས་ཏེ་ཚེས་བཅྭ་ལྔའི་བར་དུ་ཉིན་པར་སྔར་བསྙེན་པར་བྱས་ལ་ནུབ་མོ་བསྒྲུབ་པར་བྱའོ། །
གཏོར་མ་ཡང་ནུབ་མོ་སྦྱིན་པར་བྱའོ། །དེ་ནས་ལག་པ་གཉིས་དྲི་ཆུས་བཀྲུས་ལ་མིག་སྨན་དེ་བླངས་དེ་མཆོད་ནས། མར་གྱི་ངོ་ཞག་གཅིག་ལ་བུད་མེད་ཤི་བ་མཐོང་བ་དང་དེའི་ཁར་མིག་སྨན་དེ་བཅུག་ལ་རས་མཉམས་པར་ཁ་བཅིང་བར་བྱའོ། །བུད་མེད་དེ་ཡང་ཐོག་མ་ཁོ་ནར་སྣུམ་གྱིས་
བསྐུ་ཞིང་དྲིལ་ཏེ་ཁྲུས་བྱས་ནས་སྤོས་ཀྱིས་བྱུགས་ལ་མིག་གཉིས་མིག་རྩིས་བསྐུའོ། །རྐང་པ་གཉིས་ཀྱི་མཐིལ་ཡང་རྒྱ་སྐྱེགས་ཀྱིས་བསྐུས་ལ་རས་མ་ཉམས་པ་ཟུང་གཅིག་བསྐོན་ཏེ་ཀུ་ཤའི་སྟན་ལ་མགོ་ནུབ་ཕྱོགས་སུ་བསྟན་ཏེ་བཞག་གོ། །དེ་ནས་དཀྱིལ་འཁོར་གྱི་མཚམས་བཅད་
པར་བྱ་སྟེ། དང་པོར་ཚོན་སྣ་ལྔའི་སྐུད་པས་བྱའོ། །རིམ་པ་གཉིས་པ་ཐལ་བས་བྱའོ། །གསུམ་པ་ནི་ཡུངས་ཀར་གྱིས་བྱའོ། །བཞི་པ་ནི་ཆུས་བྱས་ལ་ཤར་ཕྱོགས་སུ་ཁ་བལྟས་ཏེ་འདུག་ནས། བུད་མེད་དེ་ཡང་སེང་ལྡེང་གི་ཕུར་བུའམ། ལྕགས་ཀྱི་ཕུར་བུ་བཞི་ལ་གདགས་སོ། །
རིག་སྔགས་དག་གིས་ཀྱང་དཀྱིལ་འཁོར་གྱི་མཚམས་བཅད་པར་བྱ་སྟེ། དང་པོ་ནི་སངས་རྒྱས་བྱམས་པས་བྱའོ། །གཉིས་པ་ནི་གོས་དཀར་མོས་བྱའོ། །གསུམ་པ་ནི་གཟུགས་ཆེན་པོས་བྱའོ། །བཞི་པ་ནི་རྡོ་རྗེ་ཁྲོ་བོས་བྱ་སྟེ། རིག་སྔགས་འཆང་གིས་རྐང་པ་གཡོན་པ་ནི་
ས་ལ་གཞག། །གཡས་པ་ནི་སྙིང་གར་མནན་ལ་འབྱུང་པོའི་གཏོར་མ་ཐམས་ཅད་ཀྱང་སྦྱིན་ཞིང་མིའི་ཐོད་པ་བཞིའི་ནང་དུ་ཕྱོགས་བཞིར་གཏོར་མ་བྱིན་ནས་ནམ་ལངས་ཀྱི་བར་དུ་བཟླས་བརྗོད་བྱའོ། །རིག་སྔགས་འཆང་གི་གློག་གཡས་གཡོན་དུ་ནི་ལག་ན་མཚོན་ཐོགས་པའི་མི་གཉིས་
เล่ม ๙๕ · หน้า 116a
གཞག་པར་བྱ་སྟེ། གཡོན་ཕྱོགས་སུ་ཡང་གཅིག །གཡས་ཕྱོགས་སུ་ཡང་གཅིག་གཞག་གོ། །ཕྱོགས་བསྲུང་བ་ཡང་བཞིར་མི་བཞི་བཞག་སྟེ། དཀྱིལ་འཁོར་གཉིས་པ་ལ་གཞག་གོ། །དེ་ནས་རིག་སྔགས་འཆང་གིས་བརྩོན་འགྲུས་བརྟུན་ལ་ནམ་ཤར་
ཕྱོགས་སུ་ཅེ་སྤྱང་གི་སྐད་འབྱིན་གྱི་བར་དུ་བཟླས་བརྗོད་བྱ་སྟེ། རིག་སྔགས་འཆང་གིས་འགྲུབ་པར་ཤེས་པར་བྱའོ། །བུད་མེད་ཀྱི་ཁ་ནས་ཀྱང་འོད་ཟེར་འབྱུང་བར་འགྱུར་ཏེ། འོད་ཟེར་བྱུང་བ་དང་གཏོར་མ་སྦྱིན་པར་བྱའོ། །བགེགས་བྱུང་ན་ཡང་གཏོར་མ་བྱིན་ན་གྲུབ་པ་ཡིན།
དེ་བླངས་པས་བདག་གི་གྲོགས་རྣམས་དང་བཅས་ཏེ་གྱེན་དུ་འཕགས་པར་འགྱུར་ཞིང་སྐྲ་ལྕང་ལོར་འཁྱིལ་ལ་ཉི་མ་ཤར་ཀའི་མདོག་ཅན་དང་ལྡན་པ་དང་། རིག་སྔགས་འཆང་གི་རྒྱལ་པོར་འགྱུར་ཞིང་ལག་ན་རྡོ་རྗེ་དང་མཐུ་སྟོབས་མཉམ་ཞིང་ཨིནྡྲ་ནཱི་ལའི་མདོག་ཅན་དཔག་ཚད་གཅིག་ཏུ་
དྲི་བསུང་གིས་ཁྱབ་པ་དང་བསྐལ་པར་གནས་པར་འགྱུར་ཏེ། འདིའི་རི་མོའི་སྐུ་གཟུགས་ཀྱི་ཆོ་ག་ཡང་སྤྱི་དང་འདྲའོ། །ཨ་པ་མརྒ་སྒྲུབ་པ་ཡང་འདིར་བཤད་པར་བྱ་སྟེ། རིའི་རྩེ་མོར་བཅོམ་ལྡན་འདས་བཞུགས་པར་བྱ་སྟེ། པདྨའི་གདན་ལ་བཞུགས་ལ་བཅོམ་ལྡན་འདས་ཀྱི་ཕྱག་
གཡས་པ་མི་འཇིགས་པའི་ཕྱག་རྒྱར་བྱའོ། །འོག་གི་གཡོན་རོལ་དུ་ནི་རྡོ་རྗེ་འཛིན་མདོག་ནག་པོར་བྲིའོ། །རྡོ་རྗེ་སྡེ་ཡང་རྡོ་རྗེ་འཛིན་དང་འདྲ་བར་བྱ་སྟེ། ལག་ན་རྡོ་རྗེ་ལ་ལྟ་ཞིང་འདུག་པར་བྲིའོ། །རྡོ་རྗེ་འཛིན་གྱི་ལག་པ་གཡོན་པ་ཡང་རྡོ་རྗེ་སྡེའི་སྟེང་དུ་བཞག་ལ། གང་གི་ཕྱིར་
བསྒྲུབ་པ་དེ་ཡང་པུས་མོ་གཡས་པ་ས་ལ་བཙུགས་ཏེ་མེ་ཏོག་གིས་སྙིམ་པ་བཀང་ལ་རྡོ་རྗེ་འཛིན་ལ་ལྟ་ཞིང་འདུག་པར་བྱ། རྡོ་རྗེ་འཛིན་ཡང་སྒྲུབ་པ་པོ་ལ་ལྟ་ཞིང་ལག་པ་གཡས་པས་དབུགས་འབྱིན་པར་བྱའོ། །རྡོ་རྗེ་ཁུ་ཚུར་མ་ཡང་གཞོན་ནུའི་གཟུགས་ཅན་རྒྱན་ཐམས་ཅད་ཀྱིས་བརྒྱན་
པར་བྱ་སྟེ། དེའི་ལག་པ་གཡོན་པ་ན་རྡོ་རྗེ་ཐོགས། གཡས་པ་ན་པདྨ་འམ་ཨུཏྤལ་ཐོགས་ཏེ་རྡོ་རྗེ་འཛིན་ལ་ལྟ་ཞིང་པདྨའམ། ཨུཏྤ་ལ་དེ་རྡོ་རྗེ་འཛིན་ལ་དབུལ་བར་བལྟ་བར་བྱའོ། །རི་མོ་མཁན་གྱི་ཆོ་ག་དང་རས་ཀྱི་ཆོ་ག་ནི་སྔར་བཤད་པ་དང་འདྲ་བར་བྱ་སྟེ། རི་མོ་མཁན་གཙང་མས་
เล่ม ๙๕ · หน้า 116b
བྱའོ། །མར་གྱི་ངོ་ཟླ་བ་ཕྱེད་ཀྱི་བར་དུ་བཟླས་བརྗོད་ལན་བརྒྱད་སྟོང་བརྒྱད་སྟོང་བྱས་ལ། ཡར་གྱི་ངོ་ཚེས་གཅིག་ནས་བརྩམས་ཏེ་ཞག་གསུམ་སྨྱུང་བར་བྱས་ལ་བསྒྲུབ་པར་བྱ་སྟེ། མར་གྱི་ངོ་ལ་ནི་སྔར་བསྟན་པ་ཡིན་ནོ། །ཡར་གྱི་ངོ་ཚེས་གཅིག་ལ་ཨ་པ་མརྒའི་ཡམ་སྲེག་ཤིང་
མར་དང་སྦྲང་རྩིའི་ནང་དུ་སྨྱུགས་པ་ལན་བརྒྱ་སྟོང་བཟླས་བརྗོད་བྱས་པས་སྦྱིན་སྲེག་བྱའོ། །ཕྱི་རོལ་གྱི་གཏོར་མ་ཡང་ཅི་འབྱོར་པས་བྱའོ། །ནང་གི་ལྷ་བཤོས་ཀྱང་ཞོ་དང་འབྲས་ཆན་སྦྱར་བའམ། འབྲས་ཀྱི་འོ་ཐུག་འབུལ་བར་བྱས་ན་ཟླ་བ་ཕྱེད་ཚུན་ཆད་ཀྱིས་འདོད་པ་ཐམས་
ཅད་སྦྱིན་པར་འགྱུར་རོ། །ཡང་ན་ཨ་པ་མརྒའི་ཡམ་སྲེག་ཤིང་འབུམ་སྦྱིན་སྲེག་བྱའོ། །གྲོང་དང་གྲོང་ཁྱེར་དང་མི་ཉེ་བའི་བྱང་ཤར་གྱི་ཕྱོགས་མཚམས་ན་ཙ་པ་ཏའི་ཤིང་ངམ། ཡང་ན་ཤིང་འོ་མ་ཅན་གྱི་དྲུང་དུ་སོང་ལ་ཉི་མ་གུང་གི་དུས་སུ་གྲིབ་མས་ཇི་ཙམ་ཁེབས་པ་དེ་ཙམ་གྱི་
ཕྱོགས་བྱི་དོར་བྱ་སྟེ། གྲོག་མཁར་གྱི་སས་སྐྱོང་ནུལ་བྱུགས་ལ། ས་དེ་ཉིད་ཀྱིས་སྟེགས་བུ་གསུམ་བྱ་སྟེ། གཅིག་ནི་སངས་རྒྱས་བཅོམ་ལྡན་འདས་ཀྱི། གཅིག་ནི་རྡོ་རྗེ་འཛིན་གྱི། གཅིག་ནི་རྡོ་རྗེ་ཁུ་ཚུར་མའི་བྱའོ། །མདུན་ལོགས་དེར་ཐབ་ཁུང་རྡོ་རྗེའི་དབྱིབས་འདྲ་བར་བྱས་
ལ་གྲོག་མཁར་གྱི་སས་རྡོ་རྗེ་བྱས་ནས་ས་དེ་ཉིད་ཀྱིས་སྐྱོང་ནུལ་བྱུགས་ཏེ། ཙནྡན་དམར་པོས་མཆོད་ལ་ཀ་ར་བཱི་ར་དམར་པོས་མཆོད་པ་བྱའོ། །ལྷ་བཤོས་ཀྱང་ཅི་འབྱོར་པས་འབྲས་ཆན་བུ་རམ་དང་སྦྱར་བ་དང་འབྲས་ཆན་ཞོ་དང་སྦྱར་བ་དབུལ་ལོ། །དེའི་ནང་དུ་རྩྭ་དཱུར་བ་རྩེ་མོ་མ་
ཉམས་པའི་སྟན་བཏིང་ལ་ཁ་ཤར་ཕྱོགས་སུ་བལྟ་སྟེ། གཏོར་མ་རྣམ་གསུམ་ལ་སོགས་པ་སྦྱིན་ཞིང་། བཅོམ་ལྡན་འདས་དེའི་མདུན་ལོགས་ཀྱི་དཀྱིལ་འཁོར་ལ་ཐབ་ཁུང་རྡོ་རྗེའི་དབྱིབས་འདྲ་བར་བ་ཤར་ནུབ་ཏུ་དཀྱུས་རིང་བར་བྱས་པའི་ནང་དུ་ཤིང་འོ་མ་ཅན་ཚེར་མ་མེད་ཅིང་རྩ་བ་དང་བཅས་
པ་བཅད་དེ། སྦྱིན་སྲེག་བྱས་ན་རྒྱལ་སྲིད་དམ་ནོར་སྦྱིན་པར་འགྱུར་ཏེ། མིའི་གཙོ་བོ་དབང་དུ་བྱ་བར་འདོད་ན་སྦྱིན་སྲེག་བྱས་ན་མིའི་གཙོ་བོ་དེ་ཡང་དེ་ཉིད་དུ་འོང་བར་འགྱུར་ཏེ། རྒྱལ་རིགས་ནི་ཞག་གསུམ་གྱིས་དབང་དུ་འགྱུར་རོ། །རྗེའུ་རིགས་ནི་ཞག་གཉིས་ཀྱིས་དབང་དུ་འགྱུར་
ที่มาและสัญญาอนุญาต
ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด