འཕགས་པ་རིག་པ་མཆོག་གི་རྒྱུད་ཆེན་པོ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๙๕ · หน้า 117a
རོ། །དམངས་རིགས་ནི་ཞག་གཅིག་གིས་དབང་དུ་འགྱུར་རོ། །ལས་བྱེད་པའི་ཚེ་ཅི་སྟེ་ལ་ལ་ཞིག་འོངས་ཏེ་ནོར་གྱིས་འདྲིད་པར་བྱེད་ན་ཡང་ལས་ཡོངས་སུ་མ་རྫོགས་ཀྱི་བར་དུ་ནོར་དེ་བླང་བར་མི་བྱའོ། །གཡོག་བྱེད་པ་མ་གཏོགས་པར་གཞན་དང་ལྷན་ཅིག་ཏུ་
གཏམ་ཡང་མི་བྱའོ། །ཅི་སྟེ་རྨི་ལམ་དུ་ལྷ་མོ་ལས་འོད་ཟེར་འབྱུང་བར་རྨིས་ན་དེ་ཡང་དེའི་དངོས་གྲུབ་ཀྱི་མཚན་མ་ཡིན་ནོ། །བསྒྲུབ་པར་འདོད་པ་ནི་ཅི་སྟེ་བུད་མེད་ཀུན་འོངས་ཏེ་མེ་ཏོག་གམ། འབྲས་བུ་སྦྱིན་པར་བྱེད་ན་དེས་ན་དངོས་གྲུབ་འགྲུབ་པར་ཤེས་པར་བྱོས་ཤིག །ལོ་ཏོག་མ་རུངས་པར་འདོད་
ན་ཞག་བདུན་གྱི་བར་དུ་དུས་གསུམ་དུ་ལན་བརྒྱད་སྟོང་བཟླས་བརྗོད་བྱས་ནས་འབྲུ་མ་རུངས་པར་བྱ་བ་གང་ཡིན་པའི་འབྲུ་དེ་ཉིད་ཀྱི་སྦྱིན་སྲེག་བྱ་སྟེ། མཆོད་པ་ཡང་ཅི་འབྱོར་པས་བྱའོ། །གསོ་སྦྱོང་དང་ལྡན་པས་པ་ལ་ཤའི་སྦྱིན་སྲེག་བྱས་ན་ཞི་བར་འགྱུར་རོ། །ཉ་པ་རྣམས་ཀྱི་ཉ་མི་
སོད་པར་བྱ་ན་ཉ་པ་ཉིད་ཀྱི་ཁྱིམ་ནས་མེའམ་ཤིང་བླངས་ལ་ཉ་པ་དེ་ཉིད་ཀྱི་ཁྱིམ་ནས་ཉ་བླངས་ནས་མར་གྱི་ནང་དུ་སྨྱུགས་ཏེ། ཉ་པ་དེ་དག་ཉིད་ཀྱི་ཁྱིམ་གྱི་གྲྭར་སྦྱིན་སྲེག་བྱས་ན་ཉ་མི་སོད་པར་འགྱུར་རོ། །དེ་བཞིན་དུ་རི་དགས་དང་ཕག་དང་མ་ཧེ་དང་རི་བོང་ལ་སོགས་པའི་ཆོ་ག་དེ་དང་འདྲ་སྟེ། ལམ་
གྱི་བཞི་མདོར་སྦྱིན་སྲེག་བྱས་ཀྱང་རུང་གཏོར་མ་ཡང་སྦྱིན་པར་བྱའོ། །གསོད་པ་དང་འཆིང་བར་བྱེད་པ་ལ་ནི་རྩིག་ངོས་ལ་རྡོ་རྗེ་ཁུ་ཚུར་མ་བྲིས་ཏེ། དེའི་མགོ་བོར་ཡང་བཅོམ་ལྡན་འདས་ཀྱི་སྐུ་གཟུགས་བྲིས་ལ་ཟས་སུ་དཀར་གསུམ་ཟ་བ་དང་། གསོ་སྦྱོང་གི་ཡན་ལག་དང་ལྡན་པས་བྱ་ཞིང་
བཅོམ་ལྡན་འདས་ལ་དྲི་ལ་སོགས་པས་མཆོད་པར་བྱའོ། །རྡོ་རྗེ་ཁུ་ཚུར་མ་ནི་མདོག་དཀར་པོར་བྱ་སྟེ། ལག་པ་གཡོན་པ་ཁུ་ཚུར་བཅངས་ལ། ལག་པ་གཡས་པས་དབུགས་འབྱིན་པར་བྱའོ། །སྒྲུབ་པ་པོ་ཡང་པུས་མོ་གཡས་པ་ས་ལ་བཙུགས་ཏེ་སྙིམ་པར་མེ་ཏོག་ཐོགས་པར་བྱའོ། །དེ་
ནས་ཡམ་སྲེག་ཤིང་གང་འདོད་པ་དང་གུ་གུལ་ཡུངས་མར་གྱི་ནང་དུ་སྨྱུགས་པས་ནུབ་མོ་སྦྱིན་སྲེག་བྱས་ན་དེས་འགྲུབ་པར་འགྱུར་རོ། །ལས་ཐམས་ཅད་ལ་ཡང་སྤྱན་དང་ལྷན་ཅིག་སྦྱར་བར་བྱའོ། །ལྷ་རྣམས་རིག་སྔགས་ཀྱི་རྒྱལ་མོ་ཆེན་མོ་རྡོ་རྗེ་ཁུ་ཚུར་མའི་ལས་རྣམས་ནི་ངས་བཤད་ཟིན་ཏེ་དེ་ལ་
เล่ม ๙๕ · หน้า 117b
དྲག་ཏུ་བསྐུལ་བའི་རིག་སྔགས་དྲན་པ་ཙམ་གྱིས་མདུན་དུ་གནས་པར་འགྱུར་བ་ཡང་ངས་བཤད་པར་བྱའོ། །ན་མོ་བཛྲ་པཱ་ཎི་སྱ། རུ་ཏུ་རུ་ཏུ་མ་ཏ་སྭཱ་ཧཱ། དེ་ནས་ལྷ་དེ་དག་འཇིགས་པའི་སེམས་ཀྱིས་ལག་ན་རྡོ་རྗེའི་ཞལ་དུ་ལྟ་ཞིང་ཚིག་འདི་སྐད་དུ་རིག་སྔགས་འཆང་གི་རྒྱལ་པོ་ཆེན་པོ་རིག་སྔགས་
ཀྱི་རྒྱལ་མོ་ཆེན་མོ་རྡོ་རྗེ་ཁུ་ཚུར་མའི་སྙིང་པོའི་ལས་རྣམས་ཤོད་ཅིག་ཤོད་ཅིག་ཅེས་ཀྱང་སྨོས་སོ། །དེ་ནས་རིག་སྔགས་ཀྱི་རྒྱལ་པོ་ལག་ན་རྡོ་རྗེ་སྙིང་པོའི་ལས་རྣམས་བཤད་པ། རས་མ་ཉམས་པ་ཁ་ཚར་མ་བཅད་པ་ལ་ཚོན་རྩི་སྦྱིན་དང་མ་སྦྱར་བས་སངས་རྒྱས་ཀྱི་སྐུ་གཟུགས་སེང་གེའི་ཁྲི་
ལ་བཞུགས་ཤིང་ཆོས་སྟོན་ཅིང་བཞུགས་པ་འདྲིར་གཞུག་གོ། །གློ་གཡོན་ལོགས་སུ་ལག་ན་རྡོ་རྗེ་ཨུཏྤལ་སྔོན་པོའི་མདོག་ཅན་རྒྱན་ཐམས་ཅད་ཀྱིས་བརྒྱན་པ་ལ་ཚིག་གུའི་ཤམ་ཐབས་གྱོན་ཞིང་ལག་ན་རྔ་ཡབ་ཐོགས་པ་བྲིའོ། །གཡས་ལོགས་སུ་ནི་རྡོ་རྗེ་ཁུ་ཚུར་མ་མདོག་སྔོ་བསངས་མ་
རྒྱན་ཐམས་ཅད་ཀྱིས་བརྒྱན་ལ། ལག་པ་གཡོན་པ་ན་རྡོ་རྗེ་ཐོགས། གཡས་ན་ཤིང་ཐོག་ཐོགས་པ་བྲིའོ། །དེ་ནས་རིག་སྔགས་འཆང་གིས་འོ་མའི་ལྡེ་གུའམ། སློང་མོའི་ཟས་ཟ་ཞིང་ཕྱོགས་གཙང་མར་ལན་དྲུག་འབུམ་བཟླས་བརྗོད་བྱའོ། །དེའི་འོག་ཏུ་རི་མོའི་སྐུ་གཟུགས་ཕྱོགས་
གཙང་མར་བཀྲམ་སྟེ། ཟས་དཀར་གསུམ་བཟའ་ཞིང་དུས་གསུམ་དུ་ཁྲུས་བྱས་ལ། ཡར་གྱི་ངོ་ཚེས་གཅིག་ལ་བརྩམས་ཏེ་ཞག་གསུམ་སྨྱུང་བ་བྱས་ཏེ་མེ་སྦར་ནས་གུ་གུལ་གྱི་རིལ་བུ་མོན་སྲན་རྩྭའི་འབྲུ་ཙམ་ལ་དུ་རུ་སྐའི་མར་གྱི་ནང་དུ་སྨྱུགས་པ་བརྒྱད་སྟོང་སྦྱིན་སྲེག་བྱས་ན། དེ་ནས་སྐུ་
གཟུགས་འགྲུབ་པར་འགྱུར་ཏེ། ལྷ་མོ་འོངས་ནས་དམ་པ་གང་སྩོལ་བར་ཐོབ་པར་འགྱུར་རོ། །མཆོད་པའང་ཅི་འབྱོར་བར་བྱའོ། །དགེ་སློང་དག་ལ་ཡང་མཆོད་སྟོན་གསོལ་བར་བྱ་སྟེ། འདི་ནི་གཞན་གྱིས་མི་ཐུབ་པའི་དངོས་གྲུབ་ཡིན་ནོ། །སྐུ་གཟུགས་དེ་ཉིད་ཀྱི་མདུན་དུ་ལག་པ་གཡོན་
པ་ཁུ་ཚུར་བཅངས་ཏེ་ལན་སུམ་འབུམ་བཟླས་བརྗོད་བྱས་ན་ཁུ་ཚུར་བཅངས་པས་ལུས་མི་སྣང་བར་འགྱུར་ཞིང་ཕྱེ་ནས་སྣང་བར་འགྱུར་རོ། །ཆོ་ག་སྔ་མ་བཞིན་དུ་ས་ཕྱོགས་གཙང་མར་ཧཱུྃ་དང་ལྡན་པར་ལན་ཉི་ཁྲི་བཟླས་བརྗོད་བྱས་ན་གླང་པོ་ཆེ་རྒྱགས་པ་དག་ཀྱང་སྒྱེལ་བར་བྱེད་ཅིང་འདྲེན་པར་བྱེད།
เล่ม ๙๕ · หน้า 118a
དབང་དུ་འགུགས་པར་བྱེད། འཆིང་བར་བྱེད་དོ། །འགྲོལ་བར་བྱེད་དོ། །ཁུ་ཚུར་བཅངས་པས་གང་ལ་བསྡིགས་པ་དེ་སྲོག་དང་འབྲལ་བར་འགྱུར་རོ། །ཀླུ་རྣམས་ཀྱང་རེངས་པར་བྱེད། འཁྲུལ་འཁོར་རྣམས་ཀྱང་སྒྱེལ་བར་བྱེད་དོ། །གདོན་རྣམས་ཀྱང་རེངས་པར་
བྱེད་ཅིང་སྒྱེལ་བར་བྱེད་དོ། །དེ་བཞིན་གདོན་དང་ཡི་དགས་ཐམས་ཅད་བརླག་པར་བྱེད་དོ། །ནམ་མཁའ་ལ་གྱེན་དུ་བསྡིགས་ན་རིག་སྔགས་འཆང་ཐམས་ཅད་ལྟུང་བར་བྱེད་ཅིང་འཆིང་བར་བྱེད་དོ། །ཀླུ་རྣམས་རེངས་པར་བྱེད། གྲུ་རྣམས་ཐོགས་པར་བྱེད། མེ་དབལ་གསོད་པར་
བྱེད། དམག་གི་དཔུང་རེངས་པར་བྱེད། ཆུ་བརྟན་པར་བྱེད། རྒྱ་མཚོ་སྐེམས་པར་བྱེད། མཆེ་བ་ཅན་ཐམས་ཅད་ཁ་བཅིངས་པར་བྱེད། མོ་མཚན་བཅིངས་པར་བྱེད། ཁ་བཅིངས་པར་བྱེད། བྲག་བརྙིལ་བར་བྱེད་ཅིང་ཕྱེ་མར་རློག་པར་བྱེད་དེ། ལས་གང་དང་གང་བྱེད་ན་བཅོམ་ལྡན་འདས་
མ་དྲན་པར་བྱ་སྟེ། ཁུ་ཚུར་ཡང་བཅངས་ན་ཐམས་ཅད་འགྲུབ་པར་འགྱུར་རོ། །ཕུག་གི་འཁྲུལ་འཁོར་རྣམས་ཕྱེ་མར་རློག་པར་བྱེད། འཇིག་པར་བྱེད། གནས་པར་བྱེད་དོ། །གཏེར་གྱི་འཁྲུལ་འཁོར་རྣམས་གཅོད་པར་བྱེད་དེ། དེ་བཞིན་དུ་ལས་ཐམས་ཅད་ལ་བཅོམ་ལྡན་འདས་ལ་
སྦྱར་བར་བྱའོ། །མིའི་གཙོ་བོ་དང་མི་ཆེན་པོ་འང་དབང་དུ་འགུགས་པར་བྱེད་དོ། །སེམས་ཅན་ཐམས་ཅད་སྨྲར་འཇུག་ཅིང་འཛིན་དུ་འཇུག་ལ། རྒྱས་པར་བྱེད། འཆིང་བར་བྱེད་དོ། །དུས་གསུམ་གདུག་པས་ཟིན་པས་སྨྲར་འཇུག་སྟེ་ཁུ་ཚུར་གྱིས་ལས་བྱའོ། །བསྲུང་བའི་ཆོ་ག་ལ་ནི་
བཅོམ་ལྡན་འདས་མ་ལ་མཆོད་པ་བྱ་སྟེ། ལན་ཁྲི་བཟླས་བརྗོད་བྱས་ན་འགྲུབ་པར་འགྱུར་རོ། །སྒྲུབ་པའི་ཚེའང་འདིས་དཀྱིལ་འཁོར་གྱི་མཚམས་བཅད་པར་བྱ་སྟེ། ཐལ་བའམ། ཡུངས་ཀར་རམ། ཆུའམ། བོང་པའམ། སྐུད་པའམ། ཕུར་བུའམ། རྡོ་རྗེས་བསྐོར་བར་བྱའོ། །
ཁང་བཟངས་སུ་ལན་འབུམ་བཟླས་བརྗོད་བྱས་པའི་ཡུངས་ཀར་གྱིས་རྡོ་རྗེ་བྲིས་ན་དག་པར་འགྱུར་རོ། །དེ་བཞིན་དུ་ཐམས་ཅད་ལ་ཡང་བསྲུང་བ་བྱས་པར་འགྱུར་རོ། །གསོ་སྦྱོང་དང་ལྡན་པས་ལན་སུམ་འབུམ་བཟླས་བརྗོད་བྱས་ལ་ཧཱུྃ་དང་ལྡན་པས་སྐེ་ཚེའི་སྦྱིན་སྲེག་སུམ་འབུམ་བྱས་
เล่ม ๙๕ · หน้า 118b
ན་མིའི་གཙོ་བོ་དང་བུད་མེད་ཀྱི་གཙོ་མོར་ཡང་དབང་དུ་ཁུགས་པར་འགྱུར་རོ། །ལན་འབུམ་སྦྱིན་སྲེག་བྱས་ན་བྲམ་ཟེ་དང་རྒྱལ་རིགས་དབང་དུ་ཁུགས་པར་འགྱུར་རོ། །དེའི་འོག་ཏུ་ལན་བརྒྱད་སྟོང་སྦྱིན་སྲེག་བྱས་ན་མི་ཆེན་པོ་རྣམས་དབང་དུ་ཁུགས་པར་འགྱུར་རོ། །ལན་ཅིག་བརྗོད་པས་
གསང་སྔགས་རེངས་པར་བྱེད་ཅིང་བཅིངས་པ་གྲོལ་བར་བྱེད་དོ། །ལན་གསུམ་པས་ནི་ཕ་རོལ་གྱི་རིག་སྔགས་གཅོད་པར་བྱེད་དོ། །ཁྱེའུ་དང་བུ་མོ་ཁྲུས་བྱེད་དུ་གཞུག་པར་འདོད་ན་བུམ་པ་མི་ནག་ཅིང་རྩ་བ་མེད་པ་བཞིའམ། བཅུ་གཉིས་སམ། བཅུ་དྲུག་ཀྱང་རུང་སྟེ། དཀྱིལ་འཁོར་
གྱི་སྟེང་དུ་བཞག་ལ། ས་བོན་དང་སྨན་ཐམས་ཅད་བླུགས་ཏེ་མཆོད་པ་བྱས་ཏེ་ལྷ་བཤོས་ཀྱང་དབུལ་ལ། ལན་བརྒྱད་སྟོང་སྦྱིན་སྲེག་བཟླས་བརྗོད་བྱས་ཏེ་ཁྲུས་བྱེད་དུ་བཅུག་ན་ཐམས་ཅད་ཀྱི་ཡིད་དུ་འོང་བར་འགྱུར་རོ། །བུད་མེད་བུ་ཚོལ་བ་ཡང་བུ་ཡོད་པར་འགྱུར་རོ། །དེ་ནས་རལ་གྲི་
དང་དགྲ་སྟ་དང་གསལ་ཤིང་དང་དབྱུག་པ་དང་མདུང་ཐུང་དང་། ཆུང་ངུ་ན་ཤིང་ལྷམ་དང་གོས་དང་སྐ་རགས་དང་སོར་གདུབ་ལ་སོགས་པ་འགྲུབ་པར་འདོད་ན་ཆོ་ག་སྔར་བཤད་པ་བཞིན་དུ་བྱས་ཏེ། ལྷ་མོའི་མདུན་དུ་ཀུ་ཤའི་སྟན་ལ་འདུག་ནས་འབར་བར་གྱུར་གྱི་བར་བཟླས་བརྗོད་བྱས་ན་དེ་ནས་
འགྲུབ་པར་འགྱུར་ཏེ། དེ་བླངས་པས་ནམ་མཁའ་ལ་འགྲོ་ཞིང་གྲུབ་པ་རྣམས་ཀྱིས་མི་སོད་པར་འགྱུར་རོ། །ལུས་མི་སྣང་བར་སྒྲུབ་པ་ནི་ལུས་མི་སྣང་བ་གྲུབ་པ་རྣམས་ཀྱི་རྒྱལ་པོར་འགྱུར་རོ། །དྲོ་བར་གྱུར་ན་ནི་རྐང་པས་འགྲོ་བ་རྣམས་ཀྱི་བདག་པོར་འགྱུར་རོ། །ལྷ་རྣམས་རིག་སྔགས་
ཀྱི་རྒྱལ་མོ་རྡོ་རྗེ་ཁུ་ཚུར་མའི་སྙིང་པོ་མཆོག་གི་ལས་རྣམས་ངས་བཤད་ཟིན་ཏོ། དེ་ནས་བཅོམ་ལྡན་འདས་ལག་ན་རྡོ་རྗེ་རྡོ་རྗེ་སྤྱན་གྱི་སྤྱི་བོ་ལ་དབང་བསྐུར་ནས་རྡོ་རྗེ་འབར་བའི་ཏིག་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་ལག་ན་རྡོ་རྗེ་རྡོ་རྗེ་འབར་བའི་ཏིང་ངེ་འཛིན་ལ་སྙོམས་
པར་ཞུགས་མ་ཐག་ཏུ་དེ་ནས་ལྷ་འདུས་པ་ཐམས་ཅད་ཡིད་འཇིགས་པར་གྱུར་ནས། ལྷ་ཆེན་པོ་ནི་བཅོམ་ལྡན་འདས་ཀྱི་གློ་གཡོན་ཕྱོགས་སུ་འདུག་གོ། །སྤྱན་གྱི་གཡས་ཕྱོགས་སུ་འདུག་གོ། །དྲུག་མ་དང་དཀའ་ཟློག་མ་ནི་རྒྱབ་ལོགས་སུ་འདུག་སྟེ། ལྷ་ཐམས་ཅད་གཅིག་ལ་གཅིག་
เล่ม ๙๕ · หน้า 119a
ལྟ་ཞིང་། ལག་ན་རྡོ་རྗེ་སྟོབས་པོ་ཆེ་ལ་བསྐུལ་བ། རིག་སྔགས་ཀྱི་རྒྱལ་པོ་ཆེན་པོ་སྤྱན་གྱི་ལས་རྣམས་ཤོད་ཅིག་ཤོད་ཅིག །དེ་ནས་བཅོམ་ལྡན་འདས་ལག་ན་རྡོ་རྗེས་སྤྱན་གྱི་ལས་གང་དག་མཐོང་བས་ལག་ན་རྡོ་རྗེས་བཤད་པ་བཞིན་དུ་དངོས་གྲུབ་དམ་པ་ཐོབ་པར་
འགྱུར་བ་བཤད་དེ། མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ལ་ལག་ན་རྡོ་རྗེའི་མདུན་དུ་ཏ་གར་དཀར་པོའི་མེ་ཏོག་བརྒྱད་སྟོང་སྦྱིན་སྲེག་བྱས་ན་འགྲུབ་པར་འགྱུར་རོ། །ཟླ་བ་གཅིག་གི་བར་དུ་ཟས་སུ་འོ་མ་དང་ཕྱེའི་འདག་གུ་ཟོས་ལ་ཟླ་བ་ཉ་ལ་ཞག་གཅིག་སྨྱུང་བ་བྱས་ཏེ་ལག་
ན་རྡོ་རྗེའི་མདུན་དུ་རིག་སྔགས་ལན་བརྒྱད་སྟོང་བཟླས་བརྗོད་བྱས་ན། དེ་ནས་རིག་སྔགས་འཆང་གིས་ནང་པར་དགེ་སློང་མཆོད་སྟོན་བྱིན་ཏེ་ཅི་འབྱོར་པས་མཆོད་པ་ཡང་བྱའོ། །དེའི་འོག་ཏུ་རིག་སྔགས་འཆང་གིས་རས་མ་ཉམས་པ་ལ་རི་མོ་མཁན་གསོ་སྦྱོང་དང་ལྡན་པ་དེ་བཞིན་གཤེགས་
པའི་སྐུ་གཟུགས་འདྲིར་འཇུག་སྟེ། དེ་བཞིན་གཤེགས་པའི་གཡས་ཕྱོགས་སུ་ནི་སངས་རྒྱས་ཀྱི་སྤྱན་བྲིའོ། །གཡོན་ཕྱོགས་སུ་ནི་འཕགས་པ་ལག་ན་རྡོ་རྗེ་བྲིའོ། །དེ་བཞིན་གཤེགས་པ་ནི་གསེར་གྱི་མདོག་ཅན་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པར་བྱའོ། །
བཅོམ་ལྡན་འདས་མ་དེ་ཡང་གསེར་གྱི་མདོག་ཅན་ལ་ཡིད་ཙམ་གྱིས་འདུད་དེ་ལོ་བཅུ་དྲུག་ལོན་པའི་གཟུགས་ཅན་རྒྱན་ཐམས་ཅད་ཀྱིས་བརྒྱན་ལ། ལག་པ་གཉིས་པདྨ་འཛིན་པར་བྱ་སྟེ་པདྨ་ཡང་རྡོ་རྗེའི་མཚན་མ་དང་ལྡན་པར་བྱའོ། །ལག་ན་རྡོ་རྗེ་མདོག་སྔོ་བསངས་ལ་རྒྱན་ཐམས་ཅད་
ཀྱིས་བརྒྱན་པ་དར་ལའི་གོས་གྱོན་ཅིང་པདྨ་ལ་འདུག་པ་བྲིའོ། །དེ་ནས་རིག་སྔགས་འཆང་གིས་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ་སྐུ་གཟུགས་ལ་མཆོད་པ་རྒྱས་པར་བྱ་ཞིང་། ལྷ་བཤོས་ཀྱང་རྒྱས་པར་ཕུལ་ནས་རིག་སྔགས་ཀྱི་རྒྱལ་པོ་དང་བཅས་པར་ལྷ་སྤྱན་དྲང་
བར་བྱའོ། །སྤྱན་གྱིས་ནི་ལས་ཐམས་ཅད་ལ་བསྲུང་བར་བྱའོ། །དེའི་མདུན་དུ་ཕོ་དང་མོའི་མིང་དང་ལྡན་པའི་རྫས་མར་གྱི་ནང་དུ་སྨྱུགས་པས་ལན་བརྒྱད་སྟོང་སྦྱིན་སྲེག་བྱས་ན་བཅོམ་ལྡན་འདས་མའི་གཟུགས་འགུལ་བར་འགྱུར་རོ། །ཡང་ན་མེ་ཏོག་གི་ཕྲེང་བ་འགུལ་བར་འགྱུར་ན་ལས་
เล่ม ๙๕ · หน้า 119b
དེ་འགྲུབ་པ་ཡིན་ཏེ། འདོད་དགུར་སྒྱུར་བའི་གཟུགས་ཅན་དུ་འགྱུར་ཞིང་ལུས་མི་སྣང་བར་འགྱུར་ལ། ཚེ་ལོ་དགུ་སྟོང་ཐུབ་པར་འགྱུར་རོ། །གང་གི་ཚེ་བུད་མེད་ཀྱི་གཟུགས་སྤྲུལ་པར་བྱ་ན་དེའི་ཚེ་མོའི་མིང་དང་ལྡན་པའི་ས་བོན་རྣམས་བླངས་ལ། ལག་ན་རྡོ་རྗེའི་མདུན་དུ་ཆུའི་བུམ་པ་
བཞག་པ་དེའི་ནང་དུ་བླུགས་ཏེ། དེ་ནས་རིག་སྔགས་བརྗོད་ན་དེ་དེས་བུད་མེད་དུ་འགྱུར་ཏེ། བུད་མེད་དེ་ཡང་བུད་མེད་རིན་པོ་ཆེའི་ཡོན་ཏན་དང་ལྡན་པར་འགྱུར་ལ། ཡིད་ལ་ཅི་བསམས་པ་དེ་སྤྲུལ་པར་བྱེད་དོ། །གང་གི་ཚེ་སྐྱེས་པའི་གཟུགས་སྤྲུལ་པར་བྱེད་ན་དེའི་ཚེ་ཕོའི་མིང་དང་ལྡན་པའི་
ས་བོན་རྣམས་བླངས་ཏེ། བླུགས་ནས་ཡིད་ཀྱིས་བསྔགས་ན་སྐྱེས་པའི་གཟུགས་སུ་གནས་པར་འགྱུར་ཏེ། སྐྱེས་པ་དེ་ཡང་བསྒོ་བ་བཞིན་དུ་བྱེད་ཅིང་ཡིད་ལ་ཅི་བསམས་པ་དེ་བྱེད་པར་འགྱུར་རོ། །འཇིམ་པས་བསྐུས་ན་མི་གཙང་བ་དང་གླང་པོ་ཆེའི་རྟུག་པ་དང་རྟ་རྟུག་ཀྱང་བཟའ་རུ་རུང་བར་
བྱེད་དོ། །ཆུ་ཡང་འོ་མར་འགྱུར་ལ་འོ་མ་ཡང་ཆུར་འགྱུར་རོ། །ཉིན་མོ་ཡང་མཚན་མོར་སྒྱུར་ལ། མཚན་མོ་ཡང་ཉིན་མོར་འགྱུར་རོ། །བྱེ་མ་ཡང་ཀ་རར་འགྱུར་རོ། །ལུས་ཀྱང་སྐད་ཅིག་གིས་མི་སྣང་བར་འགྱུར་རོ། །ཚེ་ལོ་བརྒྱད་ཁྲི་ཐུབ་པར་འགྱུར་རོ། །ཤི་ན་ཡང་བདེ་བ་ཅན་དུ་
སྐྱེ་བར་འགྱུར་རོ། །འཕགས་པ་ལག་ན་རྡོ་རྗེའི་མདུན་དུ་ཡུངས་ཀར་གྱིས་རྡོ་རྗེའི་དབྱིབས་བྲིས་ལ་སྤྱན་གྱི་རིག་སྔགས་ཀྱི་རྒྱལ་པོ་དང་ལྡན་པར་བཟླས་བརྗོད་བྱེད་བཞིན་དུ་ཁམ་ཕོར་རམ་ལོ་མས་བཀབ་ལ། དེ་ནས་རིག་སྔགས་ལན་བརྒྱད་བརྒྱ་བརྒྱད་བརྒྱ་བཟླས་བརྗོད་བྱ། ཞག་
བདུན་གྱི་ཐ་མར་གོས་ཕྲུགས་གཅིག་ཐོབ་པར་འགྱུར་རོ། །བཅོམ་ལྡན་འདས་གསང་བ་པ་རྣམས་ཀྱི་ཆོ་ག་རྒྱས་པར་བསྒྲུབ་པ་དང་། ཆོ་ག་རྒྱས་པ་རྣམས་མ་རུང་བར་བགྱི་བའི་ལས་འདི་ནི་ཤིན་ཏུ་ངོ་མཚར་ཆེ་བ་ལགས་སོ། །ལས་དམ་པ་འདིས་འཕགས་པ་ལག་ན་རྡོ་རྗེའི་མདུན་
དུ་རྡོ་རྗེའི་རིགས་སྤྱན་དང་བཅས་པའམ། གདོང་དྲུག་པ་རྡོ་རྗེ་གསུམ་པ་འདུག་པར་ཡིད་ཀྱིས་བསམས་ལ། བཅོམ་ལྡན་འདས་མ་རིགས་ཀྱི་རྒྱལ་པོ་དང་ལྡན་པར་ལན་བརྒྱད་སྟོང་བཟླས་བརྗོད་བྱས་ན་མིང་འགྲུབ་པར་བྱེད་དེ། བཅོམ་ལྡན་འདས་མ་མིང་དེ་ཉིད་ཀྱིས་སྨན་ལ་བསང་གཏོར་
เล่ม ๙๕ · หน้า 120a
བྱས་ན་གྲོལ་བར་འགྱུར་རོ། །ཆོ་ག་རྒྱས་པར་མ་རུང་བར་བྱེད་པར་བཤད་པར་བྱ་སྟེ། མ་རུང་བར་བྱེད་པ་ལག་ན་རྡོ་རྗེས་རྣམ་པར་བསྒྱིངས་པའི་ལས་དམ་པ་འདིས་ཕྱོགས་གཙང་མར་ཆོ་ག་རྒྱས་པའི་ལྷ་བྲིས་ལ། རིག་སྔགས་ཀྱི་ལྷའི་བ་སྤུ་རྣམས་སུ་ཡང་རྡོ་
རྗེ་ཕྱེད་ནུབ་པ་རྣམས་བྲི་སྟེ། རིག་སྔགས་ཀྱང་ལན་བརྒྱད་སྟོང་བཟླས་བརྗོད་བྱས་ན་རིག་སྔགས་ཀྱི་ལྷ་ཐམས་ཅད་དང་། ཆོ་ག་རྒྱས་པ་ཐམས་ཅད་ཕུར་བུས་བཏབ་པ་དང་མ་རུང་བར་བྱས་པར་འགྱུར་རོ། །ཞི་བར་བྱ་ན་སོལ་བས་རྡོ་རྗེ་བྲིས་ལ་དེ་ཉིད་ཀྱིས་སྨན་ལ་བསང་གཏོར་བྱས་
ན་གྲོལ་བར་འགྱུར་རོ། །རིག་སྔགས་བསྒྲུབ་པར་འདོད་པ་ལ་རིག་སྔགས་གང་ཡིན་པ་དེ་ལས་སྒྲུབ་པར་མི་བྱེད་ན་འཕགས་པ་ལག་ན་རྡོ་རྗེའམ། ལྷ་ཆེན་པོའི་མདུན་དུ་མེ་ཐ་མལ་པའི་ནང་དུ་སྤྱན་གྱིས་མོན་སྲན་གྲེའུ་ཡིས་སྦྱིན་སྲེག་ལན་བརྒྱད་སྟོང་བྱས་ན་རིག་སྔགས་ལ་ཡང་ལན་
བརྒྱད་བརྒྱ་སྦྱིན་སྲེག་བྱས་ན་དེས་དངོས་གྲུབ་མྱུར་དུ་སྦྱིན་པར་བྱེད་དོ། །བུད་མེད་དབང་དུ་བྱ་ན་ཞག་བདུན་གྱི་བར་དུ་དུས་གསུམ་དུ་ཕུབ་མའི་སྦྱིན་སྲེག་བརྒྱ་རྩ་བརྒྱད་བྱས་ན་དབང་དུ་འགྱུར་རོ། །ལྷ་རྣམས་དེ་ལ་ནི་རིག་སྔགས་དང་། ཆོ་ག་རྒྱས་པ་གྲུབ་པ་དང་མ་རུང་བར་བྱ་བ་དང་། རིག་
སྔགས་འཆང་རྣམས་ལ་དངོས་གྲུབ་སྦྱིན་དུ་གཞུག་པར་དེ་བཞིན་གཤེགས་པས་གནང་གི་དེ་ལ་ཕྱག་བྱས་ལ་དེ་བཞིན་གཤེགས་པའི་བཀས་ངས་བཤད་པར་བྱའོ། །དེ་ནས་དེ་བཞིན་གཤེགས་པ་རྣམས་ལ་ཕྱག་བྱས་ནས་འཁོར་རྣམས་ལ་བལྟས་ཏེ་སྙིང་པོ་མཆོག་བཤད་པ། ན་མཿ
སརྦ་བྷཱུ་ཏ་ཧྲྀ་ད་ཡ་ཨ་ནུ་ག་ཏེ། ཨེ་ཧྱེ་ཧི་བྷ་ག་བ་ཏེ། ཨོྃ་ཀུ་རུཾ་གི་ནི་སྭཱ་ཧཱ། ཨོྃ་ལོ་ཙ་ནི་པྲ་བ་རི་བྷྲ་མ་རི་ནི་སུམྦྷ། ཨོྃ་ཛྭ་ལི་ཏི་སྭཱ་ཧཱ། སྙིང་པོའོ། །ཨོྃ་བི་ད་དཱུ་ཏེ་ཧཱུྃ་བ་རི་ནི་ཕཊ། བཅོམ་ལྡན་འདས་མ་སྤྱན་གྱི་ཉེ་བའི་སྙིང་པོའོ། །གསང་སྔགས་བཤད་པ་ནས་རྣམ་པ་དྲུག་ཏུ་གཡོས་
སོ། །རིག་སྔགས་ཀྱི་ལྷ་ཐམས་ཅད་ཀྱང་སྙིང་འདར་ཞིང་མདུན་དུ་འཁོད་ནས་བྱང་ཆུབ་སེམས་དཔའ་ཆེན་པོ་བདག་ཅག་གིས་ཅི་བགྱིས་པ་གསུངས་ཤིག་གསུངས་ཤིག་ཅེས་སྨྲས་སོ། །དེ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །
เล่ม ๙๕ · หน้า 120b
ལྷ་རྣམས་ཉོན་ཅིག །རིག་སྔགས་འཆང་གང་བཅོམ་ལྡན་འདས་མ་མཆོག་ལ་དྲག་ཏུ་བསྐུལ་བའི་སྙིང་པོ་དམ་པ་འཆང་བ་དེ་ལ་ཁྱོད་ཀྱིས་དངོས་གྲུབ་དམ་པ་བྱིན་ཅིག །ཅི་སྟེ་མ་བྱིན་ན་ངས་རྡོ་རྗེ་ཀུན་ཏུ་འབར་བས་སྤྱི་བོར་གཞག་གོ། །དེ་ནས་ལྷ་དེ་དག་རྟབ་རྟབ་པོར་གྱུར་
ཏེ་ལག་ན་རྡོ་རྗེའི་རྐང་པ་ལ་གཏུགས་ནས་བཅོམ་ལྡན་འདས་དྲག་ཏུ་བསྐུལ་བའི་བཅོམ་ལྡན་འདས་མའི་སྙིང་པོ་འཆང་བའམ། ཕྱག་འཚལ་བ་གང་ཡིན་པ་དེ་དབང་ཕྱུག་ཆེན་པོ་ལ་སོགས་པ་བདག་ཅག་ལྷ་རྣམས་ཀྱིས་རྟག་ཏུ་བསྲུང་བར་བགྱིའོ། །བཅོམ་ལྡན་འདས་མ་རྟག་ཏུ་རྗོད་
པར་བྱེད་པའམ། སྒྲུབ་པར་བྱེད་པའམ། མཆོད་པར་བྱེད་པ་གང་ཡིན་པ་དེའི་མདུན་དུ་ཡང་འཁོད་པར་བྱ་སྟེ། དངོས་གྲུབ་ཀྱང་སྦྱིན་པར་བྱའོ། །རིག་སྔགས་མཆོག་འདི་ནི་བཟླས་བརྗོད་བྱས་པ་ཙམ་གྱིས་དངོས་གྲུབ་འགྲུབ་པར་བྱེད་ཅིང་མ་གྲུབ་པ་ཡང་གྲུབ་པར་བྱེད་པ་ཡིན་ཏེ།
འདི་ནི་ཆོ་ག་རྒྱས་པ་རྣམས་ཀྱི་ས་བོན་ལྟ་བུར་གྱུར་པ་དངོས་གྲུབ་སྦྱིན་པར་བྱེད་པ་ཡིན་ནོ། །བཅོམ་ལྡན་འདས་མའི་སྙིང་པོ་མཆོག་ལ་དྲག་ཏུ་བསྐུལ་བ་ཆོ་ག་རྒྱས་པ་འདི་འཆང་བ་གང་ཡིན་པ་དེ་ལ་ནི་ལག་ན་རྡོ་རྗེའི་བཀས་ཆོ་ག་རྒྱས་པ་འགྲུབ་པར་འགྱུར་རོ། །འཕགས་པ་ལག་ན་རྡོ་རྗེའི་
མདུན་དུ་མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་རྐང་པ་གཡས་པའི་མཐེ་བོང་བཟུང་ལ་ལན་བརྒྱད་སྟོང་བཟླས་བརྗོད་བྱས་ནས་རྐང་པའི་མཐེ་བོང་མི་ལ་རེག་པའི་ཉམས་འདྲ་བར་གྱུར་ན་དེས་གྲུབ་པར་ཤེས་པར་གྱིས་ཤིག །དེ་ནས་བགེགས་བསླང་བར་འདོད་ན་
འཕགས་པ་ལག་ན་རྡོ་རྗེའི་མདུན་དུ་ཀོ་ཤ་ཏའི་མེ་ཏོག་གིས་མཆོད་པ་བྱས་ཏེ་ལན་བརྒྱད་སྟོང་བཟླས་བརྗོད་བྱས་ན་བགེགས་ལྡང་བར་འགྱུར་རོ། །ལྷ་རྣམས་བཅོམ་ལྡན་འདས་མ་སྤྱན་གྱི་རྒྱུད་ཕྱི་མ་ངས་བཤད་དོ། །དབང་ཕྱུག་ཆེན་པོ་དང་ཕུར་བུ་གསུམ་པས་བཤད་པའི་མ་མོ་རྣམས་ཀྱི་
རྒྱུད་ཕྱི་མ་ཡང་ངས་བཤད་པར་བྱ་སྟེ་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ནས་འཕགས་པ་ལག་ན་རྡོ་རྗེའི་མདུན་དུ་ལན་བརྒྱད་སྟོང་བཟླས་བརྗོད་བྱས་ན་བགེགས་ལྡང་བར་འགྱུར་རོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་མདུན་དུ་པ་ལ་ཤའི་ཤིང་གིས་མེ་སྦར་
เล่ม ๙๕ · หน้า 121a
ནས་བཻ་ཀངྐ་ཏའི་འབྲས་བུ་མར་གྱི་ནང་དུ་སྨྱུགས་པ་བརྒྱད་སྟོང་སྦྱིན་སྲེག་བྱས་ན་རིག་སྔགས་ཀྱི་ལྷ་ཐམས་ཅད་དམ་པ་སྦྱིན་པར་བྱེད་དོ། །ཡར་གྱི་ངོ་ཟླ་བ་ཉ་ལ་ཞག་གཅིག་སྨྱུང་བ་བྱས་ཏེ། འཕགས་པ་ལག་ན་རྡོ་རྗེའི་མདུན་དུ་ས་གཞི་བ་ཀོ་ཙམ་སྐྱོང་ནུལ་གྱིས་བྱུགས་ནས་དྲི་དང་།
མེ་ཏོག་དང་བདུག་པས་བརྒྱན་ཏེ་ལྷ་བཤོས་ཀྱང་རྒྱས་པར་ཕུལ་ལ་ལས་ཐམས་ཅད་བཅོམ་ལྡན་འདས་མས་བྱའོ། །དེ་ནས་རིག་སྔགས་འཆང་གིས་བྱིས་པ་གཞོན་ནུ་ཟླ་བ་དྲུག་ལོན་པ་བླངས་ཏེ། དྲི་དང་། མེ་ཏོག་བདུག་པས་བརྒྱན་ནས་དཀྱིལ་འཁོར་གྱི་དབུས་སུ་བཞག་ལ། དེ་
ནས་རིག་སྔགས་འཆང་གིས་བྱིས་པའི་རྐང་པ་གཡས་པ་ནས་བཟུང་སྟེ་རིག་སྔགས་ལན་བརྒྱད་སྟོང་བཟླས་བརྗོད་བྱའོ། །དེ་ནས་དེ་ན་རེ་ཅི་བགྱི་ཞེས་ཟེར་བ་དང་ཡིད་ལ་གང་འདོད་པ་དེ་སྨྲོས་ལ་ཚེ་རིང་བའམ། རྒྱལ་པོའམ། རིག་སྔགས་འཆང་རྣམས་ལས་གཅིག་ཡིད་ལ་བསམས་
ཏེ་བསྒྲུབ་པར་བྱའོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་མདུན་དུ་མེ་ཏོག་དང་དྲི་དང་བདུག་པ་ཕུལ་ནས་ནི་མ་པའི་ཤིང་གིས་མེ་སྦར་ཏེ། མེ་ཏོག་དཀར་པོ་ཡུངས་མར་གྱི་ནང་དུ་སྨྱུགས་པ་བརྒྱད་སྟོང་སྦྱིན་སྲེག་བྱའོ། །དེ་ནས་རིག་སྔགས་
འཆང་གིས་སྦྱིན་སྲེག་བྱས་པའི་ཐལ་བ་བླངས་ལ། རིག་སྔགས་ལན་བརྒྱད་སྟོང་བཟླས་བརྗོད་བྱས་ནས་དྲོ་བར་གྱུར་ན་གྲུབ་པ་ཡིན་ཏེ། མཁའ་འགྲོ་མ་མཐོང་ན་ནི་བཅིངས་པར་འགྱུར་རོ། །ཞི་བར་བྱ་ན་རིག་སྔགས་ཀྱི་རྒྱལ་པོས་ཡུངས་ཀར་ལ་བསྔགས་ཏེ་བསྣུན་ན་གྲོལ་བར་འགྱུར་རོ། །
ཡར་གྱི་ངོ་ཟླ་བ་ཉ་ལ་ཞག་གཅིག་སྨྱུང་བ་བྱས་ཏེ་བྱང་ཆུབ་ཀྱི་ཤིང་དྲུང་དུ་སོང་ནས་མཆོད་པ་རྒྱས་པར་བྱས་ལ་ལྷ་བཤོས་ཀྱང་རྒྱས་པར་ཕུལ་ཏེ། རིག་སྔགས་ཀྱི་རྒྱལ་པོ་དང་བཅས་པས་ལས་ཐམས་ཅད་བྱའོ། །དེ་ནས་རིག་སྔགས་འཆང་གིས་བྱང་ཆུབ་ཀྱི་ཤིང་ལག་པ་གཉིས་ཀྱིས་བཟུང་སྟེ།
རིག་སྔགས་ལན་བརྒྱད་སྟོང་བཟླས་བརྗོད་བྱས་ན་བྱང་ཆུབ་ཀྱི་ཤིང་ལས་ལག་པ་རྐྱོང་བར་འགྱུར་ཞིང་རིག་སྔགས་འཆང་གི་མགོ་ལ་རེག་པར་བྱེད་དེ། རེག་མ་ཐག་ཏུ་སྐྲ་ལྕང་ལོ་འཁྱིལ་ཞིང་ཉི་མ་ཤར་བའི་མདོག་དང་ལྡན་ལ་ལོ་བཅུ་དྲུག་ལོན་པའི་གཟུགས་དང་ལྡན་པར་འགྱུར་ཏེ། ཅི་འདོད་པའི་
เล่ม ๙๕ · หน้า 121b
ཟས་ལ་ལོངས་སྤྱོད་ཅིང་ཚེ་ལོ་དགུ་སྟོང་ཐུབ་པར་འགྱུར་རོ། །བསྲུང་བ་ནི་ལན་བདུན་བཟླས་བརྗོད་བྱས་པའི་སྐུད་པས་བྱའོ། །གནས་བསྲུང་བ་ནི་ལན་གསུམ་བཟླས་བརྗོད་བྱས་པའི་ཆུས་བྱ་སྟེ། བཅོམ་ལྡན་འདས་མ་སྤྱན་གྱི་སྙིང་པོ་ངས་བཤད་པའི་བཅོམ་ལྡན་འདས་མ་གང་ཡིན་པ་
དང་ལྡན་པ་རྟག་ཏུ་སྦྱར་བར་བྱའོ། །དེ་དང་མ་སྦྱར་བ་ཤས་ཆེར་རྨོངས་པར་འགྱུར་རོ། །བཅོམ་ལྡན་འདས་མ་སྤྱན་གྱི་རྒྱུད་ཕྱི་མ་རྫོགས་སོ།། །།དེ་ནས་བཅོམ་ལྡན་འདས་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །ཁྱེད་རྣམས་ཉོན་ཅིག་གཟི་བརྗིད་དྲག་པོ་ངས་
བཅོམ་ལྡན་འདས་མ་མ་མོ་རྣམས་ཀྱི་ཆོ་ག་རྒྱས་པའི་གསང་སྔགས་བཤད་པར་བྱའོ། །དེ་ནས་ལྷ་དེ་དག་སྙིང་འདར་བཞིན་དུ་བཅོམ་ལྡན་འདས་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རྡོ་རྗེ་འཛིན་སྙིང་པོ་ལ་དྲག་ཏུ་སྐུལ་བར་བྱེད་པའི་གསང་སྔགས་འདི་བརྗོད་ན་བཅོམ་ལྡན་འདས་མ་རྣམས་
བདག་ཅག་ལ་གནོད་ཀྱིས་ཐོང་ཤིག་ཐོང་ཤིག །དེ་ནས་རིག་སྔགས་ཀྱི་རྒྱལ་པོ་ལག་ན་རྡོ་རྗེས་ལྷ་དེ་དག་ལ་སྨྲས་པ། བཟོད་ལྡན་དག་རིག་སྔགས་འདི་ནི་གང་ཚེ་ཁྱེད་རྣམས་ཀྱིས་ཅི་སྟེ་དངོས་གྲུབ་སྐྱོང་བར་བྱེད་ན་དེའི་ཚེ་བརྗོད་དགོས་སོ། །དེ་ནས་བཅོམ་ལྡན་འདས་ལག་ན་རྡོ་རྗེའི་གཟི་
བརྗིད་དྲག་པོས་དེ་བཞིན་གཤེགས་པ་ཐམས་ཅད་ལ་ཕྱག་འཚལ་ནས། །བཅོམ་ལྡན་འདས་མ་རྣམས་ཀྱི་སྙིང་པོ་ལ་དྲག་ཏུ་བསྐུལ་བའི་གསང་སྔགས་བཤད་པ། ན་མོ་བཛྲ་པཱ་ཎི་སྱ། ཨོྃ་བ་ཧི་པྲོ་ཏ་རི་ཎི་སྭཱ་ཧཱ། བཅོམ་ལྡན་འདས་མ་རྣམས་ཀྱི་སྙིང་པོ་ལ་དྲག་ཏུ་བསྐུལ་བའི་གསང་སྔགས་
བཤད་མ་ཐག་ཏུ་དེ་ཐོས་པས་ལྷ་རྣམས་སྙིང་འདར་ཞིང་ལག་ན་རྡོ་རྗེའི་ཞལ་དུ་ལྟ་བར་འགྱུར་རོ། །དེ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །ལྷ་རྣམས་རྡོ་རྗེ་ཕྲེང་བ་མའི་སྙིང་པོ་གནོད་པར་བྱེད་པ་ནི་དམ་ཚིག་ལས་འགལ་བར་བྱེད་པ་དང་།
བཅོམ་ལྡན་འདས་མ་རྣམས་ཀྱི་དངོས་གྲུབ་སྦྱིན་པར་བྱེད་པ་དེ་དག་ལ་རྡོ་རྗེ་ཕྲེང་བ་མས་ཁྲག་འཐུང་བར་བྱེད་པའམ། ཡང་ན་རྡོ་རྗེས་གཤག་པར་བྱེད་པར་ཟད་ཀྱིས་མ་འཇིགས་ཤིག །དེའི་ལས་ཀྱང་བཤད་པར་བྱ་སྟེ། མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ།
เล่ม ๙๕ · หน้า 122a
འཕགས་པ་ལག་ན་རྡོ་རྗེའི་མདུན་དུ་དྲི་དང་མེ་ཏོག་དང་བདུག་པ་ཕུལ་ནས་དེའི་མདུན་དུ་བཅོམ་ལྡན་འདས་མ་ཨུཏྤལ་དང་ལྡན་པ་སྨན་ཆེན་མོ་སྟོབས་པོ་ཆེ་ངས་བཤད་པ་གང་ཡིན་པ་དེས་དཀྱིལ་འཁོར་བྱའོ། །དེ་ནས་རྡོ་རྗེ་ཕྲེང་བ་མ་ལན་བརྒྱད་སྟོང་བཟླས་བརྗོད་བྱས་ན་བཅོམ་ལྡན་
འདས་མ་རྣམས་འགྲུབ་པར་འགྱུར་རོ། །རྡོ་རྗེ་ཕྲེང་བ་མ་ཆོ་ག་རྒྱས་པ་ལ་དྲག་ཏུ་བསྐུལ་བ་འདི་ནི་དམ་ཚིག་མི་ཤེས་པ་དང་། ཤིན་ཏུ་མི་གཟོ་བ་དང་ལོ་གཅིག་གི་བར་དུ་མ་བསྟེན་པ་དང་སྟོང་སྙེད་མ་བྱིན་པ་ལ་སྦྱིན་པར་མི་བྱའོ། །ལྷ་རྣམས་མ་མོ་རྣམས་ཀྱི་ཆོ་ག་རྒྱས་པའི་ལས་
ངས་བཤད་ཟིན་ཏོ། །མ་མོ་འཇིག་རྟེན་གྱི་མ་རྣམས་ཀྱི་ཡང་མདོ་ཅུང་ཟད་ཙམ་བཤད་པར་བྱ་སྟེ། འཕགས་པ་ལག་ན་རྡོ་རྗེའི་མདུན་དུ་མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་མ་མོའི་གནས་སུ་སོང་ནས་དྲི་དང་མེ་ཏོག་དང་བདུག་པ་ཕུལ་ལ་ལྷ་བཤོས་ཀྱང་རྒྱས་པར་ཕུལ་
ཏེ། དེ་ཉིད་ཀྱི་སྔགས་ཀྱིས་ལས་ཐམས་ཅད་བྱའོ། །དེ་ནས་རིག་སྔགས་འཆང་གིས་ལས་གཅིག་བསམས་ལ་བསྒྲུབ་པར་བྱ་སྟེ། རིག་སྔགས་ལན་བརྒྱ་སྟོང་བཟླས་བརྗོད་བྱས་ན་དེ་ནས་འཇིག་རྟེན་གྱི་མ་མོ་རྣམས་དམ་པ་སྦྱིན་པར་འགྱུར་རོ། །ཧཱུྃ་ཞེས་བྱ་བས་འབེབས་པར་
བྱེད་དོ། །དུག་ལ་ནི་བལྟས་པས་དུག་མེད་པར་བྱེད་དོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ་ཕག་མོ་གཅིག་པུ་གནས་པར་སོང་ནས་དྲི་དང་། མེ་ཏོག་དང་བདུག་པས་བརྒྱན་ལ། རིག་སྔགས་ལན་བརྒྱད་སྟོང་བཟླས་ན་བཅོམ་ལྡན་འདས་མ་ཕག་མོ་ཆེན་མོ་དེ་
འགུལ་ཏེ་གྲུབ་པར་འགྱུར་ཞིང་ལོངས་སྤྱོད་ཀྱི་གཞི་སྦྱིན་པར་བྱེད་དོ། །ལྷ་རྣམས་འཇིག་རྟེན་གྱི་མ་མོ་རྣམས་ཀྱི་ལས་ངས་བཤད་ཟིན་ནོ། །སྙིང་པོ་ལ་དྲག་ཏུ་བསྐུལ་བའི་རིག་སྔགས་ཀྱང་བཤད་པར་བྱའོ། །ན་མོ་བཛྲ་པཱ་ཎི་སྱ། ཏ་ཀི་ཏ་ཀི་པུ་ཏ་ཀི་སྭཱ་ཧཱ། རིག་སྔགས་འདིས་འཕགས་
པ་ལག་ན་རྡོ་རྗེའི་མདུན་དུ་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ། དྲི་དང་མེ་ཏོག་དང་བདུག་པ་ཕུལ་ནས་དྲི་ཆུ་སེར་པོ་དང་། དཀར་པོ་དང་། དམར་པོ་དང་ནག་པོ་ལ་སོགས་པས་དཀྱིལ་འཁོར་བྱས་ཏེ་མཆོད་པ་ཡང་ཅི་རིགས་པར་བྱའོ། །དེ་ནས་རིག་སྔགས་ལན་བརྒྱད་
เล่ม ๙๕ · หน้า 122b
སྟོང་བཟླས་བརྗོད་བྱས་ན་འཇིག་རྟེན་གྱི་མ་མོ་རྣམས་དམ་པ་སྦྱིན་པར་འགྱུར་རོ། །འཇིག་རྟེན་གྱི་མ་མོ་རྣམས་ཀྱི་ཆོ་ག་རྫོགས་སོ།། །།ལྷ་རྣམས་འཇིག་རྟེན་གྱི་མ་མོ་རྣམས་ཀྱི་ལས་རྣམས་ངས་བཤད་དོ། །རྡོ་རྗེ་ཁྲོ་བོ་ཆེན་པོ་བདུད་རྩི་ཐབ་སྦྱོར་སྟོབས་དང་ཕ་རོལ་གནོན་པ་དཔག་ཏུ་
མེད་པ་ལས་ཕྱི་མ་ཡང་བཤད་པར་བྱའོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་མདུན་དུ་ཁྲོ་བོ་བཞག་ནས་མཆོད་པ་རྒྱས་པར་བྱས་ལ་བཅོམ་ལྡན་འདས་མས་ལས་ཐམས་ཅད་བྱ་ཞིང་མེ་ཏོག་དཀར་པོ་རེ་རེ་ལ་ལན་རེ་རེ་བཟླས་བརྗོད་བྱེ་བ་བརྒྱད་
སྟོང་གིས་འཕགས་པ་རྡོ་རྗེ་ཁྲོ་བོའི་བྲང་དུ་བསྣུན་ན་དམ་པ་སྦྱིན་པར་འགྱུར་རོ། །ལན་བདུན་བཟླས་བརྗོད་བྱས་པའི་གུ་གུལ་བདུག་པས་ནི་འབེབས་པར་བྱེད་དོ། །ཆུའམ་ཡང་ན་རྣམ་པར་བཟླས་བརྗོད་བྱས་པས་ནི་རྒྱ་འཇོམས་པར་བྱེད་དོ། །ལོ་མས་ནི་དུག་སེལ་བར་བྱེད་དོ། །
བསྲུང་བ་ནི་སྐུད་པའམ། གོས་ཀྱི་གྲྭར་མདུད་པ་བྱ་སྟེ། དེ་དག་ཐམས་ཅད་ཀྱང་ལན་བདུན་བདུན་བཟླས་བརྗོད་བྱས་པས་ནི་ལོངས་སྤྱོད་ཀྱི་གཞི་འདོད་ན་རས་མ་ཉམས་པ་ལ་རི་མོ་མཁན་གསོ་སྦྱོང་དང་ལྡན་པས་འཕགས་པ་རྡོ་རྗེ་ཁྲོ་བོ་མདོག་གནག་ལ་མིག་དམར་བ་ཤམ་ཐབས་
སེར་པོ་གྱོན་ཞིང་སྐྲ་ཁམ་པར་འདུག་ལ། སྦྲུལ་གྱི་ཕྲེང་བས་བརྒྱན་ཏེ་པདྨ་ལ་འདུག་པ་འདྲིར་གཞུག་གོ། །དེ་ནས་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ། སྐུ་གཟུགས་ཀྱི་མདུན་དུ་བྱང་ཆུབ་ཀྱི་ཤིང་བུད་ཤིང་གིས་མེ་སྦར་ནས་པདྨ་དཀར་པོ་ཞོ་དང་སྦྲང་རྩི་དང་མར་གྱི་
ནང་དུ་སྨྱུགས་པ་བརྒྱད་སྟོང་སྦྱིན་སྲེག་བྱས་ན་དངོས་གྲུབ་པའི་མཚན་མར་མེ་ཏོག་གི་ཕྲེང་བ་འགུལ་པར་འགྱུར་ཏེ། གྲུབ་ནས་ཀྱང་ཁམས་གཅིག་གི་རྒྱལ་པོར་འགྱུར་རོ། །མཆོད་པའང་ཅི་འབྱོར་པས་བྱའོ། །བཟླས་བརྗོད་བྱས་པ་ཙམ་གྱིས་གདོན་ཐམས་ཅད་འཇོམས་པར་བྱེད་
དོ། །ལོ་མའམ་ཆུས་ནི་དུག་སེལ་བར་བྱེད་དོ། །སས་ནི་ཁམ་ཕོར་ལག་པ་ལ་འབེབས་པར་བྱེད་དོ། །མིའི་ཐོད་པ་དང་བུམ་པ་ལའང་འབེབས་པར་བྱེད་དོ། །ཡན་ལག་ཀྱང་མ་རུངས་བར་བྱེད་ནུས་སོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ་ལི་ཁྲི་བླངས་ལ་ཐོད་
เล่ม ๙๕ · หน้า 123a
པའི་ནང་དུ་བཞག་སྟེ་ལྷ་ཆེན་པོའི་གནས་སུ་སོང་ལ་གཟུགས་ཀྱི་གཡས་ལོགས་སུ་དུར་ཁྲོད་ཀྱི་ཤིང་གིས་མེ་སྦར་ཏེ། ལི་ཁྲི་བཙོ་བར་བྱ་ཞིང་རིག་སྔགས་ཀྱི་རྒྱལ་པོས་བསྲུང་བར་བྱའོ། །དེ་ནས་རིག་སྔགས་འཆང་གིས་ལི་ཁྲི་བླངས་ཏེ་ཁྱིམ་དུ་ཁྱེར་ལ་དྲི་དང་།
མེ་ཏོག་དང་བདུག་པས་བརྒྱན་ནས་མར་གྱི་ངོ་ཞག་བརྒྱད་ཀྱི་བར་དུ་དུས་གསུམ་དུ་བཟླས་བརྗོད་ལན་བརྒྱད་བརྒྱ་བརྒྱད་བརྒྱ་བྱའོ། །དེ་ནས་རིག་སྔགས་འཆང་གིས་ཞག་གཅིག་སྨྱུང་བ་བྱས་ཏེ། འཕགས་པ་ལག་ན་རྡོ་རྗེའི་མདུན་དུ་མཆོད་པ་བྱས་ལ། དྲི་དང་མེ་ཏོག་དང་བདུག་
པ་རྣམས་ཀྱང་བཅོམ་ལྡན་འདས་མའི་སྔགས་ཀྱིས་དབུལ་ལོ། །རིག་སྔགས་ཀྱི་རྒྱལ་པོས་ནི་བསྲུང་བར་བྱའོ། །དེ་ནས་རིག་སྔགས་འཆང་གིས་ལི་ཁྲི་བླངས་ཏེ། ཨ་ཤྭཏྠའི་ལོ་མ་བདུན་གྱི་སྟེང་དུ་བཞག་ལ་དྲོ་བར་གྱུར་གྱི་བར་དུ་རིག་སྔགས་བརྗོད་ན་འགྲུབ་པར་འགྱུར་ཏེ། གྲུབ་
ནས་ཀྱང་ཐིག་ལེ་བྱས་ན་ལུས་མི་སྣང་བ་དང་། འདོད་དགུར་སྒྱུར་བའི་གཟུགས་ཅན་དུ་འགྱུར་ལ་རིག་སྔགས་འཆང་ཐམས་ཅད་ཀྱིས་མི་སོད་ལ་ཅི་འདོད་པའི་ཁ་ཟས་རྣམས་ལོངས་སྤྱོད་ཅིང་ཚེ་ལོ་ལྔ་སྟོང་ཐུབ་པར་འགྱུར་རོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ་
སྐུ་གདུང་དང་ལྡན་པའི་མཆོད་རྟེན་གྱི་དྲུང་དུ་མཆོད་པ་རྒྱས་པར་བྱས་ལ་ལྷ་བཤོས་ཀྱང་རབ་ཏུ་རྒྱས་པར་ཕུལ་ཏེ། བཅོམ་ལྡན་འདས་མས་ལས་ཐམས་ཅད་བྱའོ། །དེ་ནས་རིག་སྔགས་འཆང་གི་མཆོད་རྟེན་གྱི་མདུན་དུ་ལྡོང་རོས་ཀྱི་རལ་གྲི་བྲིས་ལ་ལག་མཐིལ་དུ་རྡོ་རྗེ་བྲིས་ཏེ། ལག་
པས་རལ་གྲི་བཟུང་ནས་འཕར་ཞིང་ཀུ་ཅོའི་སྒྲ་ཐོས་པར་འགྱུར་གྱི་བར་དུ་རིག་སྔགས་ཀྱི་རྒྱལ་པོ་བརྗོད་པར་བྱའོ། །དེ་ནས་རིག་སྔགས་འཆང་གིས་བཅོམ་ལྡན་འདས་མ་དང་རིག་སྔགས་ཀྱི་རྒྱལ་པོ་དང་བཅས་པར་དྲན་པར་བྱའོ། །དེ་ནས་ལག་ཏུ་འོང་བར་འགྱུར་ཏེ། དེ་ལག་ན་འོངས་
པས་ཉི་མ་ཤར་བའི་མདོག་དང་ལྡན་ཞིང་སྐྲ་ལྕང་ལོ་འཁྱིལ་ལ་ལོ་བཅུ་དྲུག་ལོན་པའི་གཟུགས་དང་ལྡན་པར་འགྱུར་ཏེ། འཁོར་ལོས་སྒྱུར་བ་མ་གཏོགས་པར་རིག་སྔགས་འཆང་ཐམས་ཅད་ཀྱིས་མི་སོད་པ་དང་། བུད་མེད་བདུན་གྱིས་བསྐོར་ནས་ནམ་མཁའ་ལ་འགྲོ་བར་འགྱུར་བ་དང་
เล่ม ๙๕ · หน้า 123b
སྡད་བར་སེམས་གང་ཡིན་པ་དེ་དག་ཐམས་ཅད་བསམས་པ་ཙམ་གྱིས་ཆོམས་པར་འགྱུར་ཏེ་ཚེ་ལོ་ཁྲི་སུམ་སྟོང་ཐུབ་པར་འགྱུར་རོ། །ལྷ་རྣམས་རྡོ་རྗེ་ཁྲོ་བོ་ཆེན་པོ་བདུད་རྩི་ཐབ་སྦྱོར་སྟོབས་དང་ཕ་རོལ་གནོན་པ་དཔག་ཏུ་མེད་པའི་ལས་རྣམས་ངས་བཤད་ཟིན་ཏོ། །འདི་ལ་དྲག་
ཏུ་བསྐུལ་བའི་སྙིང་པོ་མཆོག་གི་རིག་སྔགས་ཀྱང་བཤད་པར་བྱའོ། །ན་མོ་བཛྲ་པཱ་ཎི་སྱ། ཧཱུྃ་ཛྭ་ལཱ་ན་ཡ་ཕཊ་སྭཱ་ཧཱ། གསང་སྔགས་འདི་ནི་ཆོ་ག་རྒྱས་པ་ཐམས་ཅད་ལ་དྲག་ཏུ་བསྐུལ་བ་ཡིན་ཏེ། རིག་སྔགས་ཐམས་ཅད་ཀྱང་འགྲུབ་པར་བྱེད་དོ། །མར་གྱི་ངོ་ཞག་བཅུ་བཞི་
ལ་ཞག་གཅིག་སྨྱུང་བ་བྱས་ཏེ། འཕགས་པ་ལག་ན་རྡོ་རྗེའི་མདུན་དུ་དྲི་དང་། མེ་ཏོག་དང་། བདུག་པ་ཕུལ་ནས་དཀྱིལ་འཁོར་ཙནྡན་དམར་པོས་སྐྱོང་ནུལ་བྱུགས་ལ་ཀ་ར་བཱི་རའི་མེ་ཏོག་བརྒྱད་བརྒྱས་འཕགས་པ་ལག་ན་རྡོ་རྗེ་ལ་བསྣུན་ནས་འཕགས་པ་བདུད་རྩི་ཐབ་སྦྱོར་
འགྲུབ་པར་འགྱུར་རོ། །དེ་ཕྱིན་ཅད་ལས་ཐམས་ཅད་བྱེད་ནུས་པར་འགྱུར་རོ། །ལྷ་རྣམས་རྡོ་རྗེ་ཁྲོ་བོ་ཆེན་པོ་བདུད་རྩི་ཐབ་སྦྱོར་སྟོབས་དང་ཕ་རོལ་གནོན་པ་དཔག་ཏུ་མེད་པའི་ལས་རྣམས་ངས་བཤད་ཟིན་ཏོ། །ཚངས་པས་བཤད་པའི་ལས་ཀྱང་བསྟན་པར་བྱ་སྟེ། སྲུང་
བ་ནི་ལན་བདུན་བཟླས་བརྗོད་བྱས་པའི་ཐལ་བས་བྱའོ། །གདོན་བསྐྱོད་པ་ནི་མཐེ་བོས་བྱའོ། །ལོ་ཏོག་མ་རུང་བར་བྱ་བ་ན་ཡིད་ཀྱིས་བྱའོ། །ཆུ་མ་རུང་བར་བྱ་བ་ནི་ལན་གསུམ་བཟླས་བརྗོད་བྱས་པའི་གསེག་མས་བྱའོ། །དགྲ་བསད་པར་འདོད་ན་དགྲ་གང་ན་འདུག་པ་དེ་
ལོགས་སུ་ཁ་བལྟས་ཏེ་ཞག་བདུན་གྱི་བར་དུ་དུས་གསུམ་དུ་ལན་བརྒྱད་བརྒྱ་བརྒྱད་བརྒྱ་བཟླས་བརྗོད་བྱས་ན་ཞག་བདུན་གྱི་ཉིན་པར་དགྲ་འཆི་བར་འགྱུར་རོ། །བུད་མེད་དབང་དུ་བྱ་བར་འདོད་ན་འཕགས་པ་ལག་ན་རྡོ་རྗེའི་མདུན་དུ་ཀ་ར་བཱི་རའི་མེ་ཏོག་བརྒྱད་བརྒྱས་འཕགས་པ་ལག་ན་
རྡོ་རྗེ་ལ་བསྣུན་ན་དབང་དུ་འགྱུར་རོ། །ཁྲག་འཛག་པར་བྱ་ན་ཞག་གསུམ་གྱི་བར་དུ་རྒྱ་སྐྱེགས་ཀྱིས་སྦྱིན་སྲེག་བརྒྱད་བརྒྱ་བརྒྱད་བརྒྱ་བྱས་ན་ཁྲག་མང་དུ་འཛག་པར་འགྱུར་རོ། །འོ་མའི་སྦྱིན་སྲེག་བྱས་ན་ཞི་བར་འགྱུར་རོ། །ཕ་རོལ་གྱི་ཡུལ་འཁོར་གཞོམ་ན་སྔར་ངས་ལས་བཤད་
เล่ม ๙๕ · หน้า 124a
པའི་ལས་གང་ཡིན་པ་དེས་རྐང་རྗེས་ཀྱི་རྡུལ་གྱིས་ཞག་བདུན་གྱི་བར་དུ་སྦྱིན་སྲེག་བྱའོ། །ལྷ་རྣམས་ཚངས་པའི་སྙིང་པོ་ལ་དྲག་ཏུ་བསྐུལ་བའི་གསང་སྔགས་ཀྱང་བཤད་པར་བྱའོ། །ན་མོ་བཛྲ་པཱ་ཎི་སྱ། ནམཿཔི་ཏམ་ཧཱ་སྱ། ཨོྃ་སྭ་ཡམྦྷུ་བེ་ཛྭ་ལ་ཕཊ་སྭཱ་ཧཱ།
མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་མདུན་དུ་དྲི་དང་མེ་ཏོག་དཀར་པོ་བརྒྱད་སྟོང་གིས་འཕགས་པ་ལག་ན་རྡོ་རྗེ་ལ་བསྣུན་ན་དེ་ནས་ཚངས་པས་དམ་པ་སྦྱིན་པར་འགྱུར་རོ། །ལྷ་རྣམས་ཚངས་པ་ཆེན་པོས་
བཤད་པའི་རིག་སྔགས་ཀྱི་ལས་རྣམས་ངས་བཤད་ཟིན་ཏོ། །འཇིག་རྟེན་སྐྱོང་བ་བཞིས་བཤད་པའི་དགའ་བྱེད་གདོང་གི་ལས་ཀྱང་བཤད་པར་བྱ་སྟེ། སྲུང་བ་ནི་ལན་བདུན་བཟླས་བརྗོད་བྱས་པའི་སྐུད་པས་བྱའོ། །དཀྱིལ་འཁོར་གྱི་ཆོ་ག་ལ་ནི་ལས་ཐམས་ཅད་ལ་ཡང་སྦྱར་བར་
བྱའོ། །བཅོམ་ལྡན་འདས་མས་ནི་ལྷ་རྣམས་སྤྱན་དྲང་བར་བྱའོ། །སྙིང་པོས་ནི་སླར་གཏང་བར་བྱའོ། །གདོན་ཐམས་ཅད་ཀྱི་མཚམས་བཅད་པ་ནི་ཡིད་ཀྱིས་བྱ་སྟེ། །དགྲོལ་བ་ཡང་ཡིད་ལ་བྱའོ། །དགྲ་གཞིག་པར་འདོད་ན་མར་གྱི་ངོ་ཞག་བརྒྱད་ལ་བརྩམས་ཏེ། དུས་
གསུམ་དུ་ཕུབ་མའི་སྦྱིན་སྲེག་ལན་བརྒྱད་བརྒྱ་བརྒྱད་བརྒྱ་སྦྱིན་སྲེག་བྱས་ན་ཞག་བདུན་གྱི་ཉིན་པར་དགྲ་འཇིག་པར་འགྱུར་རོ། །སྐྱེས་པ་དབང་དུ་བྱ་ན་ཡར་གྱི་ངོ་ཚེས་བདུན་ལ་བརྩམས་ཏེ། འཕགས་པ་ལག་ན་རྡོ་རྗེའི་མདུན་དུ་མཆོད་པ་བྱས་ནས་ཨརྐའི་ཤིང་གིས་མེ་སྦར་ལ་
ཏིལ་ནག་པོས་སྦྱིན་སྲེག་ལན་བརྒྱད་སྟོང་བྱས་ན་དབང་དུ་འགྱུར་རོ། །བུད་མེད་དབང་དུ་བྱ་ན་འཕགས་པ་ལག་ན་རྡོ་རྗེའི་མདུན་དུ་འབྲས་ཡོས་ཀྱིས་ལན་བརྒྱད་སྟོང་སྦྱིན་སྲེག་བྱས་ན་བུད་མེད་དབང་དུ་འགྱུར་རོ། །གདོན་གྱིས་ཟིན་པ་རྣམས་ལ་ནི་ལན་བདུན་བཟླས་བརྗོད་བྱས་པའི་
ཡུངས་ཀར་གྱིས་གཏོར་བས་ཞི་བར་འགྱུར་རོ། །བཟླས་བརྗོད་བྱས་པ་ཙམ་གྱིས་ནི་གདོན་ཐམས་ཅད་སྐྲག་པར་འགྱུར་རོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ། འཕགས་པ་ལག་ན་རྡོ་རྗེའི་མདུན་དུ་མཆོད་པ་བྱས་ནས་བྱང་ཆུབ་ཀྱི་ཤིང་གིས་མེ་སྦར་ནས་
เล่ม ๙๕ · หน้า 124b
ཨ་པ་ར་ཛི་ཏེ་དཀར་པོའི་མེ་ཏོག་གི་ལན་བརྒྱད་སྟོང་སྦྱིན་སྲེག་བྱས་ན་དགའ་བྱེད་གདོང་གིས་དམ་པ་བྱིན་པར་འགྱུར་རོ། །གདོན་གྱིས་ཟིན་པ་རྣམས་ལ་ཨ་པ་ར་ཛི་ཏའི་མེ་ཏོག་ལན་བདུན་བཟླས་བརྗོད་བྱས་ཏེ་གདོན་གྱི་ཁ་ཟས་ཀྱི་ནང་དུ་བྱིན་ན་གདོན་ལག་པ་ཕན་ཚུན་འཆིང་བར་བྱེད་
ཅིང་ཀུན་ཏུ་རྒྱུགས་ཏེ་ཅི་བསྒོ་བ་བཞིན་བྱེད་པར་འགྱུར་རོ། །ཆོ་ག་རྒྱས་པའི་རྒྱུད་ཕྱི་མ་དང་བཅས་པར་མཐོང་ཞིང་ལྡན་པར་དེ་ལ་ནི་གདོན་རྣམས་ཀྱང་ཡིད་དགའ་བར་འགྱུར་རོ། །གདོན་རྣམས་ཀྱིས་ཀྱང་མི་འདོད་ཅིང་མཐོང་ན་འབྱེར་བར་འགྱུར་རོ། །
ལྷ་རྣམས་འདི་དག་གི་སྙིང་ལ་དྲག་ཏུ་བསྐུལ་བའི་གསང་སྔགས་ཀྱང་བཤད་པར་བྱའོ། །ན་མོ་བཛྲ་བཱ་ཎི་སྱ། བཛྲིཾ་བཛྲིཾ་བ་ལོ་ཀ་པཱ་ལཱ་ཡ་སྭཱ་ཧཱ། མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ། འཕགས་པ་ལག་ན་རྡོ་རྗེའི་མདུན་དུ་མཆོད་པ་བྱས་ནས་
ལན་བརྒྱད་སྟོང་སྦྱིན་སྲེག་བྱས་ན་དགའ་བྱེད་གདོང་གིས་དམ་པ་སྦྱིན་པར་བྱེད་དོ། །རིག་སྔགས་ཐམས་ཅད་ལ་ཡང་བསྒྲུབ་པའི་ཚེ་ཐོག་མ་ཁོ་ནར་སྙིང་ལ་དྲག་ཏུ་བསྐུལ་བའི་གསང་སྔགས་ཀྱིས་མར་དང་། གུ་གུལ་གྱིས་ལན་བརྒྱད་བརྒྱ་སྦྱིན་སྲེག་བྱས་ལ་དེ་ནས་རིག་སྔགས་བསྒྲུབ་
པར་བྱའོ། །ལས་ཀྱི་མཇུག་ཏུ་ཡང་ཡུངས་ཀར་མར་དང་སྦྱར་བས་ལན་བརྒྱད་བརྒྱ་སྦྱིན་སྲེག་བྱའོ། །དེ་ནས་བྱས་ན་ལས་དེས་དྲག་ཏུ་བསྐུལ་བའི་རིག་སྔགས་ཐམས་ཅད་ཀྱིས་དངོས་གྲུབ་སྦྱིན་པར་བྱེད་དོ། །དེ་ནས་ལྷ་དག་ལས་འདི་ཐོས་པས་ཡིད་འཇིགས་ཤིང་སྙིང་འདར་ཏེ་ལག་
ན་རྡོ་རྗེའི་ཞལ་དུ་བལྟའོ། །དེ་ནས་བཅོམ་ལྡན་འདས་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །བཟོད་ལྡན་དག་ཁྱེད་སེམས་རྩེ་གཅིག་ཏུ་གྱིས་ལ་ཉོན་ཅིག །ཅི་སྟེ་དམ་ཚིག་འདི་ལས་འགལ་བར་བྱས་ཏེ། དངོས་གྲུབ་སྦྱིན་པར་མི་བྱེད་ན་ངས་རྡོ་རྗེ་ཀུན་ཏུ་འབར་བས་སྤྱི་བོ་
གཤག་གོ། །དེ་ནས་རྡོ་རྗེ་ཁྲོ་བོས་ཅ་ཅོའི་སྒྲ་བཏོན་ཏེ་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེ་གང་ན་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་ཁྱོད་ཀྱིས་སེམས་ཅན་ཐམས་ཅད་ལ་ཕན་པའི་ཕྱིར་ཞུས་ཏེ།
เล่ม ๙๕ · หน้า 125a
ཆོ་ག་རྒྱས་པ་ཆེན་པོ་རིག་པ་མཆོག་གི་རྒྱུད་ཕྱི་མ་དང་བཅས་གསང་བ་དང་བཅས་པར་བཤད་ན་བདག་གིས་ཀྱང་སེམས་ཅན་རྣམས་ཀྱི་དོན་གྱི་ཕྱིར་དད་གདོན་དང་དྲག་ཤུལ་ཅན་མི་རྣམས་ལ་གང་འཚེ་བ་ཡིན་པའི་གདོན་དེ་དག་ངེས་པར་གཞིག་པའི་ཕྱིར་བཅོམ་
ལྡན་འདས་ལ་འདྲི་བར་བགྱིས། །བཅོམ་ལྡན་འདས་སྙིང་རྗེའི་སེམས་ཀྱིས་གདོན་རྣམས་ཀྱི་རུས་དང་རིགས་མིང་དེ་དག་ཁ་དག་ལ་གསུངས་ཤིག །དེ་སྐད་ཅེས་སྨྲས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཅོམ་ལྡན་འདས་ལག་ན་རྡོ་རྗེས་རྡོ་རྗེ་ཁྲོ་བོ་ལ་འདི་སྐད་ཅེས་སྨྲས་
སོ། །བདུད་རྩི་ཐབ་སྦྱོར་གང་ཁྱོད་སེམས་ཅན་ལ་ཕན་པའི་ཕྱིར་ཞུགས་ཏེ། སེམས་ཅན་རྣམས་ཀྱི་དོན་གྱི་ཕྱིར་གདོན་རྣམས་ཀྱི་རུས་དང་མིང་ང་ལ་དྲིས་པ་ལེགས་སོ་ལེགས་སོ། །དེ་ངས་བཤད་པ་བཞིན་དུ་ཉོན་ཅིག །འཇིག་རྟེན་དག་ན་གདོན་རྣམས་ནི། །དྲག་ཅིང་སྦྱོར་བ་སྣ་
ཚོགས་ཡོད། །གདོན་ཡོད་དེ་དག་ཅི་འདྲ་བ། །གོ་རིམས་བཞིན་དུ་བཤད་པར་བྱ། །གདོན་རྣམས་སྟོང་ཕྲག་བརྒྱད་ཅུ་ནི། །མི་ཡི་འཇིག་རྟེན་དག་ན་གནས། །དེ་ལས་ས་འདིར་རྒྱུ་བ་ཡི། །གདོན་ནི་བཅྭ་བརྒྱད་ཤེས་པར་བྱ། །གདོན་རྣམས་འོང་བར་འཇུག་པ་དང་། །
དེ་བཞིན་མཚན་མ་དག་དང་ནི། །གསོ་རུང་མི་རུང་དཔྱད་པ་དང་། །གསོ་བའི་ཐབས་ནི་ཐ་དད་དང་། །རིགས་རྣམས་ལ་ནི་གང་བསྟེན་དང་། །གང་གིས་རུས་ནི་གང་ཡིན་དང་། །དེ་ལས་གཞན་ཡང་བཤད་བྱ་སྟེ། །ངས་བཤད་དེ་ནི་མཉན་པར་གྱིས། །གཟུགས་ཀྱང་མེད་
ལ་དྲི་ཡང་མེད། །སྒྲ་ཡང་མེད་ཅིང་ཁྱད་པར་དུ། །མཉན་དུ་མེད་ཅིང་བལྟར་མེད་དེ། །མཚན་མ་ཙམ་ལས་ཤེས་པར་བྱ། །མེ་ལོང་དང་ནི་ཆུ་དག་ལས། །གྲིབ་མ་ཇི་ལྟར་སྣང་བ་བཞིན། །དེ་ལྟར་དེ་དག་རྟོགས་བྱ་ཞིང་། །དེ་ལས་གདོན་རྣམས་ཤེས་པར་བྱའོ། །ཐམས་
ཅད་རླུང་དང་འདྲ་བ་སྟེ། །མཐོང་བ་ཙམ་གྱིས་འཛིན་པར་བྱེད། །མཚན་མ་དང་ནི་ཚུལ་རྣམས་དང་། །སྤྱོད་པས་ཀྱང་ནི་རྟོགས་པར་བྱ། །གདོན་རྣམས་ལུས་ལ་ཞུགས་ནས་ནི། །མི་ལས་མི་མ་ཡིན་པར་བྱེད། །གྲིབ་མ་དང་ནི་འགྲོས་དང་མདོག །དེ་བཞིན་ང་རོ་འགྱུར་
เล่ม ๙๕ · หน้า 125b
བར་བྱེད། །གདོན་རྣམས་རིགས་བཞི་ཡན་ལག་བཞི། །རྣམ་པ་བཞི་ཡོད་ཤེས་པར་བྱ། །རིགས་བཞི་དག་ལ་སྤྱོད་པ་ཡང་། །མདོར་ན་དེ་དག་ཤེས་པར་བྱ། །རླུང་ཅན་གྱིས་ནི་རླུང་ཅན་འཛིན། །དེ་དག་གིས་ནི་མིང་དང་གཟུགས། །སོ་སོར་ཡང་ནི་བཤད་
བྱ་སྟེ། །གཅིག་ནི་ལྷ་གདོན་ཤེས་པར་བྱ། །གཅིག་ནི་འབྱུང་པོའི་གདོན་ཡིན་ཏེ། །དེ་བཞིན་གཅིག་ནི་དྲི་ཟ་ཉིད། །གཅིག་ནི་གནོད་སྦྱིན་གདོན་ཡིན་ཏེ། །གཅིག་ནི་སྲིན་པོར་ཤེས་པར་བྱ། །ཤ་ཟའི་གདོན་ནི་རྣམ་གསུམ་དང་། །ཀླུ་ཡི་གདོན་ནི་ཤེས་པར་བྱ། །
ཚངས་པའི་སྲིན་པོ་ཉིད་དང་ནི། །ལོག་འདྲེན་གདོན་ནི་ཤེས་པར་བྱ། །དེ་བཞིན་བརྗེད་བྱེད་གདོན་དག་དང་། །གཞོན་ནུའི་གདོན་ནི་རྣམ་བཞིར་ཤེས། །གཅིག་ནི་སྨྱོ་བྱེད་ཉིད་ཡིན་ཏེ། །ལྷ་མིན་གདོན་ནི་ཤེས་པར་བྱ། །དེ་ལྟར་གདོན་རྣམས་བཅྭ་བརྒྱད་དེ། །གང་གིས་ཚེ་
ན་གང་རྒྱུ་དང་། །གང་གི་དུས་ནི་གང་ཡིན་དང་། །གང་གི་མདོག་ནི་ཅི་འདྲ་བ། །དེ་ནི་བདག་གིས་བཤད་ཀྱིས་ཉོན། །གདོན་རྣམས་བཅྭ་བརྒྱད་གང་ཡིན་པ། །དུས་ཚིགས་དག་ཏུ་འཛིན་བྱེད་དེ། །ལོ་གྲངས་བཅུ་གཉིས་ལོན་པ་ཡི། །གདོན་རྣམས་གསོ་རུ་རུང་
པར་བཤད། །དེ་ལས་འདས་པར་གནས་པ་ཡི། །གསོ་རུང་རུང་བ་མ་ཡིན་ནོ། །དེ་ལས་གཞན་ཡང་མཚན་རྣམས་ཀྱིས། །ཁྱད་པར་དག་ཀྱང་བཤད་པར་བྱ། །ལྷ་གདོན་ཤེས་པར་བྱ་བ་ལ། །དེ་ནི་གཏོར་མ་འདོད་པ་སྟེ། །རིགས་བཞི་སོ་སོར་རྒྱུ་བར་བྱེད། །
གཙང་ཞིང་གཙང་སྦྲ་སྤྱོད་པ་དང་། །དཀའ་ཐུབ་གནོད་པ་མཐར་ཕྱིན་དང་། །ཚུལ་ཁྲིམས་ལྡན་པའི་མི་དག་ལ། །ལྷ་ཡི་གདོན་ནི་འཛིན་པར་བྱེད། །ལྷ་ཡི་གདོན་གྱིས་ཟིན་པ་ནི། །ཤེས་པས་ལེགས་པར་རྟོགས་བྱ་སྟེ། །དགའ་བར་མི་འགྱུར་འཁྲུག་མི་འགྱུར། །ཁ་
ཟས་ལ་ཡང་མི་སེམས་ལ། །ཅུང་ཟད་ཀྱང་ནི་སྨྲ་མི་བྱེད། །དེ་ནི་གཉིད་ཀྱང་མི་ལོག་སྟེ། །ཕྱི་ས་དང་ནི་གཅིན་དག་ཀྱང་། །རང་དགར་འབྱུང་བར་མི་འགྱུར་ལ། །ཁྲུས་བྱས་ཁྲུས་མ་བྱས་ཀྱང་རུང་། །དྲི་བསུང་མང་པོའི་ངད་ལྡན་ཞིང་། །དེ་ཡི་གདོང་ནི་པདྨ་བཞིན། །
เล่ม ๙๕ · หน้า 126a
ལེགས་པར་བྱས་པར་འགྱུར་བ་སྟེ། །གང་ལ་ཚུལ་ནི་འདི་དག་ཡོད། །དེ་ནི་ལྷ་ཡི་གདོན་དུ་བཤད། །གང་གིས་བདེ་བར་འགྱུར་བ་ཡི། །གཏོར་མའི་ཆོ་ག་འདི་དག་བྱ། །མེ་ཏོག་དྲི་དང་མེ་ཏོག་ཕྲེང་། །མར་མེ་ཡང་ནི་དེ་ལ་སྦྱིན། །པདྨ་ཨུཏྤལ་
པུ་ཤེལ་ཙི། །ཆང་དང་འབྲས་ཆན་སྦྱིན་དུ་གཞུག །གདུགས་དཀར་དག་བྱེད་སྲང་བུ་དང་། དེ་བཞིན་མེ་ཏོག་ཕྲེང་དཀར་དག །དེ་ནི་ལྷ་ཡི་གནས་ཀྱང་རུང་། །ལམ་གྱི་བཞི་མདོར་སྦྱིན་པར་བྱ། །གཏོར་མའི་ལས་ནི་འདི་ཉིད་ཀྱིས། །གདོན་དེ་མྱུར་དུ་གཏོང་བར་འགྱུར། །
ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་བ། །འདི་ནི་དེ་ལ་སྦྱར་བར་བགྱི། །ན་ག་ཏ་མ་ཤྲ་ཤ་ཡི། །མེ་ཏོག་རྩ་བ་འབྲས་བུ་དང་། །ཤུན་ལྤགས་དང་ནི་དེ་བཞིན་དུ། །ཤུ་དག་དཀར་པོ་ཡུངས་ཀར་དང་། །ཚོགས་རྣམས་དེ་དག་སོགས་ནས་
ཀྱང་། །མེ་ནི་ཆུང་དུས་བྱས་པ་ལ། །མར་ནི་ཕུལ་བཞིའི་ནང་དུ་བཙོ། །དེ་ནས་དེ་ལ་བླུད་པར་བྱ། །དེ་བཞིན་དུ་ནི་སྣར་ཡང་བླུགས། །མིག་བསྐུས་ལུས་བྱུགས་འཇིགས་པར་འགྱུར། །སྣར་བླུགས་འཇིགས་པས་གཟིར་བ་དང་། །མར་འཐུངས་པས་ཀྱང་འཇིགས་
འགྱུར་ནས། །གདོན་དེ་རབ་ཏུ་འབྲོས་པར་འགྱུར། །ཅི་སྟེ་དེས་ཀྱང་མ་བཏང་ན། །ལས་འདི་ཡང་ནི་ལེགས་པར་བརྩམ། །རྒྱལ་བའི་བློ་གྲོས་མ་སྔགས་ཀྱིས། །དུར་ཁྲོད་ཀྱི་སོལ་བ་ལས་གཟུགས་བརྙན་བྱས་ལ་རྡོ་རྗེ་ལྕགས་སྒྲོག་གིས་བཅིངས་ནས་མདུན་དུ་གཟུགས་
བརྙན་མཚོན་རྣོན་པོས་བཅད་ནས་གདོན་གྱིས་ཀུ་ཅོ་བཏོན་ཏེ་འབྲོས་པར་འགྱུར་རོ། །ཅི་སྟེ་དེ་ལྟར་བྱས་ཀྱང་མ་བྲོས་ན་རྒྱལ་བའི་བློ་གྲོས་མས་ལན་ཚྭ་དང་སྐེ་ཚེ་ལན་བརྒྱད་བརྒྱས་བྱས་ན་ཀུ་ཅོ་བཏོན་ཏེ་འབྲོས་པར་འགྱུར་རོ། །ལྷའི་གདོན་གྱི་སྐབས་རྫོགས་སོ།། །།སྔར་
བཤད་པ་ནི་གང་ཡིན་པའི། །འབྱུང་པོའི་གདོན་ཡང་ཤེས་པར་བྱ། །བྲམ་ཟེ་དང་ནི་རྒྱལ་རིགས་ལ། །འཛིན་པར་བྱེད་དེ་དེ་བཞིན་དུ། །དེ་ནི་གཏོར་མ་འདོད་ཕྱིར་རྒྱུ། །དེ་ཡི་ཚུལ་རྣམས་ང་ལ་ཉོན། །གཙང་ཞིང་གཙང་སྦྲར་སྤྱོད་པ་དང་། །གཟུགས་བཟང་བ་ཡི་མི་རྣམས་
เล่ม ๙๕ · หน้า 126b
ལ། །འབྱུང་པོའི་གདོན་ནི་འཛིན་པར་བྱེད། །དེ་ཡི་ཚུལ་རྣམས་ང་ལས་ཉོན། །ཚེས་གྲངས་བཅུ་གསུམ་བཅུ་བཞིའང་རུང་། །གཉི་གའི་ཕྱོགས་ལའང་དེ་བཞིན་ཏེ། །བཅུ་བཞི་ལ་ནི་བརྟག་པ་ཡིན། །དགའ་སྟོན་དག་དང་འདུས་པ་དང་། །ལྷ་རྣམས་ཀྱི་ནི་གནས་དག་
དང་། །སྐབས་འདི་དག་ཏུ་གཟུགས་བཟང་བའི། །མི་རྣམས་ལ་ནི་འཛིན་པར་བྱེད། །གཙང་ཞིང་གཙང་སྦྲར་སྤྱོད་པ་དང་། །དཀའ་ཐུབ་གདོན་པ་མཐར་ཕྱིན་དང་། །རྟག་ཏུ་གོས་དཀར་གྱོན་པ་དང་། །སྨྱུང་བ་དགའ་བ་དེ་བཞིན་ནོ། །འབྱུང་པོའི་གདོན་གྱིས་ཟིན་པ་ཡི། །
ཚུལ་འདི་དག་ནི་ང་ལས་ཉོན། །སེམས་པ་དང་ནི་དགོད་པ་དང་། །ནམ་མཁའ་ལ་ནི་ལྟ་བར་བྱེད། །མདོག་ཀྱང་ནམ་མཁའ་འདྲ་བར་འགྱུར། །གསེར་གྱི་མདོག་ལྟར་མཛེས་པ་སྟེ། །ཟས་དང་སྐོམ་ལ་དགའ་བ་དང་། །ལྷ་དང་བྲམ་ཟེ་མཆོད་ལ་དགའ། །འབྱུང་པོའི་གདོན་གྱིས་
ཟིན་པ་ཡི། །མཚན་མ་ཡང་ནི་དེ་དག་ཡིན། །དེ་ནི་གང་གིས་བདེར་འགྱུར་བའི། །གསོ་བའི་ཐབས་ཀྱང་བཤད་པར་བྱ། །ཏིལ་ཟན་དང་ནི་འབྱུང་པོའི་ཟས། །ཤ་བཙོས་རྗེན་པ་དེ་བཞིན་ཏེ། །མེ་ཏོག་དྲི་དང་གཏོར་མ་དང་། །མེ་ཏོག་ཕྲེང་བ་སྣ་ཚོགས་པ། །གཏོར་
མ་དེ་དག་བསྡུས་ནས་ནི། །ལྷོ་ཕྱོགས་སུ་ཡང་སྦྱིན་པར་བྱ། །རྡོ་རྗེ་སེར་སྐྱའི་སྔགས་ཀྱིས་ཀྱང་། །སྲེག་བླུགས་གསུམ་དང་བདུན་པ་དབུལ། །གཏོར་མའི་ལས་ནི་འདི་ཉིད་ཀྱིས། །གདོན་དེ་མྱུར་དུ་གཏོང་བར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་
གཏོང་འགྱུར་བའི། །ཐབས་གཞན་འདི་ནི་སྦྱོར་བར་བྱ། །གནད་མ་ལ་དུ་མ་བི་དང་། །བ་ལ་ཨ་ཏི་བ་ལ་དང་། །པུ་ཤེལ་ཙེ་དང་ཐལ་ཏྲེས་དང་། །ཤུ་ག་ན་ས་སྒོག་པ་དང་། །ཚོགས་རྣམས་དེ་དག་བསགས་ནས་ནི། །མར་ནི་ཕུལ་གང་བཞི་དག་དང་། །བ་གཅིན་
ཕུལ་བཞིའི་ནང་དུ་བཙོ། །མེ་ནི་ཆུང་དུས་བཙོ་བར་བྱ། །དེ་ནས་དེ་དག་བླུད་པར་བྱ། །དེ་བཞིན་དུ་ནི་སྣར་ཡང་བླུགས། །མིག་བསྐུས་ལུས་བྱུགས་འཇིགས་གྱུར་ནས། །འབྱུང་པོ་རབ་ཏུ་འབྲོས་པར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་
เล่ม ๙๕ · หน้า 127a
གཏོང་འགྱུར་བའི། །ཐབས་གཞན་འདི་ནི་སྦྱར་བར་བྱ། །རྡོ་རྗེ་སེར་སྐྱའི་སྔགས་ཀྱིས་ལས་བརྩམས་ཏེ། །དཀྱིལ་འཁོར་བྲིས་ནས་ལན་ཚྭ་དང་། སྐེ་ཚེའི་སྦྱིན་སྲེག་ལན་བརྒྱད་བརྒྱ་བྱས་ན་གདོན་གྱིས་ཀུ་ཅོ་བཏོན་ཏེ་འབྲོས་པར་འགྱུར་རོ། །འབྱུང་པོའི་
གདོན་གྱི་སྐབས་རྫོགས་སོ།། །།སྔར་བཤད་པ་ནི་གང་ཡིན་པའི། །དྲི་ཟའི་གདོན་ཡང་ཤེས་པར་བྱ། །བྲམ་ཟེ་རྒྱལ་རིགས་འཛིན་པར་བྱེད། །ཡར་གྱི་དོ་ཡི་ཚེས་བཅུ་གཉིས། །མར་གྱི་ངོ་ཡང་དེ་བཞིན་ཏེ། །དྲི་ཟ་རྟག་ཏུ་རྒྱུ་བར་བྱེད། །ལྷག་མའི་དུས་སུ་
འཚེ་མི་བྱེད། །གཏོར་མ་འདོད་ཅིང་ཞི་བ་དགའ། །གདོན་དེ་དགའ་བ་འདོད་པ་སྟེ། །གླུ་ལ་དགའ་ཞིང་དགའ་ལ་སྲེད། །གཙང་ཞིང་གཙང་སྦྲར་སྤྱོད་པ་དང་། །གཟུགས་བཟང་པ་ཡི་མི་དག་ལ། །དྲི་ཟ་དག་ནི་སྟེན་པར་བྱེད། །དེ་ཡི་ཚུལ་ནི་ང་ལ་ཉོན། །གླུ་ལེན་
ཅིང་ནི་གར་བྱེད་ཅིང་། །ཁ་ནས་རོལ་མོའི་སྒྲ་ཡང་འབྱིན། །ཟས་དང་སྐོམ་ལ་དགའ་བར་བྱེད། །དེ་བཞིན་ཁྲུས་དང་ཕྲེང་ལ་དགའ། །ཆགས་ཤིང་དྲི་ཞིམ་ངད་ཀྱང་ལྡང་། །དྲི་ཟ་ཡིས་ནི་ཟིན་པ་ཡི། །མཚན་མ་རྣམས་ནི་དེ་དག་ཡིན། །
གང་གིས་དེས་ནི་བདེར་འགྱུར་བ། །གསོ་པའི་ཐབས་ཀྱང་བསྟན་པར་བྱ། །གཙང་ཞིང་གཙང་སྦྲར་སྤྱོད་པ་དང་། །དགའ་བཞིན་པས་ནི་གསོ་བར་བྱ། །མེ་ཏོག་ཕྲེང་དམར་དེ་བཞིན་ཏེ། །འབྲས་ཆན་དམར་པོའང་དེ་བཞིན་ཏེ། །བ་དན་དམར་པོ་སྦྱིན་པར་བྱེད། །ཙནྡན་དམར་པོ་ཉིད་
དག་དང་། །སྐུད་པ་དམར་པོ་དག་དང་ནི། །དེ་དག་ཐམས་ཅད་སྦྱིན་པར་བྱ། །ནད་པ་གོས་དམར་བསྐོན་བྱས་ལ། །མེ་ཏོག་ཕྲེང་མར་བྱུགས་པར་ལྡན། །མེ་ཏོག་ཕྲེང་མར་ལུས་བསྐུས་པའི། །དགེ་སློང་བྲམ་ཟེ་བཀྲ་ཤིས་གདོན། །ཁ་ཟས་དམར་པོ་བྱིན་ནས་ཀྱང་། །
དེ་ནས་ནུབ་མོ་གཏོར་མ་སྦྱིན། །གཏོར་མའི་ལས་ནི་འདི་ཉིད་ཀྱིས། །གདོན་དེ་མྱུར་དུ་གཏོང་བར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་བའི། །ཐབས་གཞན་འདི་ནི་སྦྱར་བར་བྱ། །གསོད་དང་ཚ་བ་གསུམ་པོ་དང་། །སེང་
เล่ม ๙๕ · หน้า 127b
ལྡེང་གི་ནི་སྙིང་པོ་དང་། རྩ་བ་ལྔ་པ་གཉིས་ཀྱང་འཇུག །སྒོག་སྐྱ་བརྒྱ་ཡང་གཞུག་པར་བྱ། །དེ་ནས་ཚོགས་རྣམས་བསོགས་ནས་ཀྱང་། །མར་ནི་ཕུལ་ཏག་བཞི་དག་དང་། །བ་གཅིན་བཞི་ཆས་བཙོ་བྱ་ཞིང་། །མེ་ནི་ཆུང་ངུས་བཙོ་བར་བྱ། །དེ་ནས་དེ་
ལ་བླུད་པར་བྱ། །དེ་བཞིན་དུ་ནི་སྣར་ཡང་བླུགས། །མིག་བསྐུས་ལུས་བྱུགས་འཇིགས་པར་འགྱུར། །སྣར་བླུགས་འཇིགས་པས་གཟིར་བ་དང་། །མར་འཐུངས་པས་ཀྱང་འཇིགས་འགྱུར་ནས། །གདོན་དེ་རབ་ཏུ་འབྲོས་པར་འགྱུར། །ཅི་སྟེ་དེས་ཀྱང་མ་བཏང་
ན། །གང་གིས་གདོན་དེ་གཏོད་འགྱུར་བའི། །ཐབས་གཞན་འདི་ནི་སྦྱར་བར་བྱ། །དཀྱིལ་འཁོར་གྱི་དབུས་སུ་རྡོ་རྗེ་མའམ། ཡང་ན་བདུད་རྩི་ཐབ་སྦྱོར་གྱིས་ནིམ་པའི་ཡམ་སྲེག་ཤིང་དུག་དང་ཁྲག་གི་ནང་དུ་སྨྱུགས་པ་བརྒྱད་སྟོང་སྦྱིན་སྲེག་བྱས་ན་དེ་ནས་གདོན་ངུ་ཞིང་
འབྲོས་པར་འགྱུར་ཏེ། གདོན་རྣམ་པ་གསུམ་པོ་འདི་དག་གང་གིས་མ་གོགས་ནས་འབྲོས་པར་འགྱུར་བའི་ངོ་ལོན་རྣམ་པ་སྣ་ཚོགས་ཀྱི་གཞིག་པར་བྱའོ། །གདོན་བཅྭ་བརྒྱད་ལས་ཀྱང་དེ་བཞིན་དུ་གསོ་བར་བྱའོ། །དེ་ནས་རྡོ་རྗེ་འཛིན་པའི་སྔགས་ནི། །ཕོ་ཉ་མོ་རྡོ་རྗེ་མའི་
སྔགས་ཏེ། །ན་མཤྩཎྜ་བཛྲ་པཱ་ཎི་སྱ། མ་ཧཱ་ཡཀྵ་སེ་ནཱ་པ་ཏི་སྱ། ཏདྱ་ཐཱ། །ཛི་ཛི་རུ་རུ། །ཁུ་རི་བི་ཁུ་རི། ཏིཥྛ་ཏིཥྛ། པཱ་ལ་ཡཱ། ཡཏྟ་ཏ། བཛྲ་པཱ་ཎི་སྱ། ཨ་གྲ་ཏོ་བ་ཤི། ཏ་ན་ཏ་ན། སྨ་ར་སྨ་ར། བནྡྷ་བནྡྷ་སྭཱ་ཧཱ། ན་མོ་རཏྣ་ཏྲ་ཡཱ་ཡ། ན་མཿབཛྲ་ཀྲོ་དྷཱ་ཡ། ཧུ་ལུ་
ཧུ་ལུ། ཏིཥྛ་ཏིཥྛ། ཨ་མྲྀ་ཏ་མུཎྜ་ལི། ཁ་ཁ་ཁཱ་ཧི་ཁཱ་ཧི། བནྡྷ་བནྡྷ་སྭཱ་ཧཱ། །དྲི་ཟའི་གདོན་གྱི་སྐབས་རྫོགས་སོ།། །།སྔར་བཤད་གང་ཡིན་ཚངས་པ་ཡི། །སྲིན་པོའི་གདོན་ཡང་ཤེས་པར་བྱ། །གཏུམ་ཞིང་དྲག་ལ་སྟོབས་པོ་ཆེ། །ལྕི་ལ་ཚུགས་པར་དཀའ་
བ་སྟེ། །ཡར་གྱི་ངོ་ཡི་ཚེས་བརྒྱད་དང་། །ཟླ་བ་ཉ་ལ་འཛིན་པར་བྱེད། །གདོན་དང་དཀའ་ཐུབ་ལྡན་པ་དང་། །ཚངས་པར་སྤྱོད་ལ་གནས་པ་ལ། །ཚངས་པའི་སྲིན་པོ་འཛིན་པར་བྱེད། །ལྷ་ལ་འདྲན་ཏོར་བྱེད་པ་དང་། །གང་ཞིག་སྙིང་ནི་སྡང་བ་དང་། །བྲམ་ཟེ་མ་ཡིན་
เล่ม ๙๕ · หน้า 128a
བྲམ་ཟེར་སྨྲ། །བྲམ་ཟེ་གང་དག་གཙང་སྦྲ་ཉམས། དཔའ་བོ་གང་དག་འདྲན་ཏོར་བྱེད། །ལྷ་གནས་དག་ཏུ་གར་རྩེ་ཞིང་། །ཚངས་པར་སྤྱོད་ལས་ཉམས་གྱུར་པ། །དེ་ལ་ཚངས་པའི་སྲིན་པོ་འཚེ། །དེ་ཡི་ཚུལ་ནི་ང་ལ་ཉོན། །གཤེ་ཞིང་འགྱོད་
པར་བྱེད་པ་དང་། །གར་ཡང་བྱེད་ཅིང་གདོན་པར་བྱེད། །བསྒྲགས་པར་མི་འགྱུར་སྨྲ་མི་བྱེད། །ལྷ་རྣམས་ལ་ཡང་མཆོད་བྱེད་ཅིང་། །བྲམ་ཟེ་མཐོང་ན་མཆོད་པར་བྱེད། །རྡོ་བ་དག་དང་ཤིང་དག་དང་། །དེ་བཞིན་ལག་པ་རྐང་པ་ཡིས། །རང་གི་ལུས་ལ་གནོད་
པར་བྱེད། །ཚངས་པའི་སྲིན་པོས་ཟིན་པ་ནི། །སྙན་ཚིག་རིག་བྱེད་ལྷུར་ལེན་ཅིང་། །དེས་བརྗོད་རིག་བྱེད་རྗོད་པར་བྱེད། །བསྟན་བཅོས་ཀུན་ལ་མཁས་པ་སྟེ། །དྲི་བ་དག་ཀྱང་འདི་བྲ་བྱེད། །སྔགས་འཆང་ལ་ནི་བརྙས་པར་བྱེད། །དགོད་ཅིང་རབ་ཏུ་རྒྱུག་
པར་བྱེད། །ཚངས་པའི་སྲིན་པོས་ཟིན་པ་ཡི། །མཚན་མ་ཡང་ནི་དེ་དག་ཡིན། །གང་གིས་གདོན་དེ་གཏོང་འགྱུར་བ། །དེ་ཡི་གཏོར་མ་བཤད་པར་བྱ། །ནས་ནི་བྲེ་གསུམ་བཙོས་པ་དང་། །དེ་བཞིན་ཁུར་བ་ཏིལ་ཟན་དང་། །མེ་ཏོག་ཕྲེང་དམར་བདུག་པ་དང་། །
ཤིང་ཏོག་རྣམ་པ་སྣ་ཚོགས་དག །ཏིལ་ནག་དེ་བཞིན་འབྲས་ཡོས་དང་། །དེ་བཞིན་ཞོ་དང་འོ་མ་དང་། །གང་བའི་སྣོད་དང་དེ་བཞིན་བདུགས། །དེ་ཡི་བྱུག་པ་ཤུ་དག་སྟེ། །ཁྲུས་བྱས་བསྒྲིམས་ཏེ་གཙང་བྱས་པས། །ལྷོ་ཕྱོགས་སུ་ནི་སྦྱིན་པར་བྱ། །གཏོར་མའི་
ལས་ནི་འདི་ཉིད་ཀྱིས། །གདོན་ནི་མྱུར་དུ་གཏོང་བར་འགྱུར། །ཅི་སྟེ་དེས་ཀྱང་མ་བཏང་ན། །གདོན་དེ་མྱུར་དུ་གཏོང་བ་ཡི། །ཐབས་གཞན་འདི་ནི་སྦྱར་བར་བྱ། །ནག་ཏ་མ་ལ་ཤྲི་བ་ཡི། །འབྲས་བུ་རྩ་བ་ཤུན་ལྤགས་དང་། །དེ་བཞིན་མེ་ཏོག་ཐམས་ཅད་དང་། །
བ་ཏ་ལི་དང་ཨ་ཤ་ན། །བིལ་པའི་རྩ་བ་གཞུག་པར་བྱ། །དུག་མོ་ཡུངས་ཀྱང་དེ་བཞིན་ཏེ། །ཐང་ཤིང་དང་ནི་བིལ་བ་དང་། དེ་བཞིན་ཚབ་གསུམ་པོ་དང་། །རྩ་བ་ལྔ་པ་གཉིས་ཀྱང་གཞུག །སྒོག་སྐྱ་དང་ནི་ཕུལ་བདུན་མར། །བ་གཅིན་ཀྱང་ནི་ཉི་ཤུ་དང་། སེང་ལྡེང་
เล่ม ๙๕ · หน้า 128b
ཤུན་ལྤགས་བཤུས་པ་ནི། སྲང་གྲངས་ཉི་ཤུ་རྩ་བཞི་དང་། །འདི་དག་ཐམས་ཅད་བསྲེས་པ་ནི། །མེ་ཆུང་གིས་ནི་དལ་ནས་བཙོ། །དེ་ནས་དེ་ལ་བླུད་པར་བྱ། །དེ་བཞིན་དུ་ནི་སྣར་ཡང་བླུགས། །མིག་བསྐུས་ལུས་བྱུགས་འཇིགས་པར་འགྱུར། །སྣར་བླུགས་འཇིགས་
པར་གཟིར་བ་དང་། །མར་འཐུངས་བས་ཀྱང་འཇིགས་འགྱུར་ནས། །གདོན་དེ་རབ་ཏུ་འབྲོས་པར་འགྱུར། །ཅི་སྟེ་དེ་ནས་མ་བཏང་ན། །གང་གིས་གདོན་དེ་གཏོང་འགྱུར་བའི། །ཐབས་གཞན་འདི་ནི་སྦྱར་བར་བྱ། །དཀྱིལ་འཁོར་ཟླུམ་པོ་བྲིས་ནས་ཀྱང་། །དེར་ནི་གདོན་ཡང་
དགུག་པར་བྱ། །གང་གིས་གདོན་དེ་གཏོང་འགྱུར་བའི། །ངོ་ལོན་དག་ནི་དེར་བྱ་སྟེ། །རིག་པའི་མཆོག་གམ་ཡང་ན་ནི། །དགའ་བྱེད་གདོན་གྱིས་གཞོམ་པར་བྱ། །གང་གིས་གདོན་ཏེ་གཏོང་འགྱུར་བའི། །སྔགས་གཞན་གྱིས་ཀྱང་ཡང་ན་གཞོམ། །ཚངས་
པའི་སྲིན་པོའི་གདོན་གྱི་སྐབས་རྫོགས་སོ།། །།སྔར་བཤད་པ་ནི་གང་ཡིན་པའི། །སྲིན་པོའི་གདོན་ཡང་ཤེས་པར་བྱ། །གཏུམ་ཞིང་དྲག་ལ་གཟུ་ལུམས་ཅན། །ལྕི་ཞིང་ཚུགས་པར་དཀའ་བ་སྟེ། །མར་གྱི་ངོ་ནི་ཞག་བརྒྱད་དང་། །མར་གྱི་ངོ་ནི་བཅུ་བཞི་
ལ། །མི་ནི་གཏུམ་ཞིང་གཟུ་ལུམས་ཅན། །སྤྱི་བརྟོལ་ཅན་ནི་གང་ཡིན་དང་། བརླང་ཞིང་འཐབ་ལ་སྲེད་པ་དང་། །རྟག་ཏུ་ཚིག་ནི་རྩུབ་པོར་སྨྲ། །དེ་ལ་སྲིན་པོ་སྟེན་པར་བྱེད། །སྲིན་པོས་ཟིན་པ་དེ་ཡི་ནི། །མཚན་མ་རྣམས་ཀྱང་ཤེས་པར་བྱ། །སྐད་ཅིག་གིས་ནི་ངུ་
བར་བྱེད། །དགའ་ཞིང་གླུ་ཡང་ལེན་པར་བྱེད། །དོན་དང་ལྡན་པའི་ཚིག་སྨྲ་ཞིང་། །དོན་མེད་པ་ཡི་ཚིག་ཀྱང་སྨྲ། །ཟས་དང་སྐོམ་ལ་དགའ་བ་དང་། །དེ་བཞིན་མེ་ནི་ཤ་ལ་སྲེད། །གཤེ་བར་བྱེད་ཅིང་རྨུགས་པར་བྱེད། །དེ་བཞིན་ཟན་ཟ་གླུ་ཡང་ལེན། །མི་ནི་གློ་
བུར་དག་ཏུ་ལེན། །ལག་པས་ས་ལ་རྐོ་བར་བྱེད། །སྲིན་པོའི་གདོན་གྱིས་ཟིན་པ་ཡི། །མཚན་མ་རྣམས་ནི་དེ་ཡིན་ཏེ། །གང་གིས་གདོན་དེ་གཏོང་འགྱུར་ཏེ། །དེ་ཡི་ངོ་ལོན་བཤད་པར་བྱ། །ཁུ་བ་ཟས་དང་དེ་བཞིན་དྲི། །དེ་བཞིན་ཤ་བཙོས་རྗེན་པ་དང་། ཟས་དང་སྐོམ་
เล่ม ๙๕ · หน้า 129a
དང་ཏིལ་ཟན་རྣམས། །སྡིག་མེད་ཁྲག་གིས་གཏོར་བ་དང་། །དྲི་ཞིམ་པ་ཡི་མེ་ཏོག་རྣམས། །ཁ་དོག་སྣ་ཚོགས་རྣམས་ཀྱིས་བསྲེག །དེ་ནས་ཁྲུས་བྱས་གཙང་གྱུར་པའི། །དགེ་སློང་བྲམ་ཟེ་བཀྲ་ཤིས་གདོན། །ལྷོ་ཕྱོགས་དང་ནི་ནུབ་ཕྱོགས་སུ། །
གཏོར་མ་དེ་དག་སྦྱིན་པར་བྱ། །གཏོར་མའི་ལས་ནི་འདི་ཉིད་ཀྱིས། །གདོན་དེ་མྱུར་དུ་གཏོང་བར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་བའི། །ཐབས་གཞན་འདི་ནི་བཤད་པར་བྱ། །དུག་མོ་ཡུངས་དང་ཤ་རི་ཤ། །ནག་ཏ་མ་ལའི་ལོ་
མ་དང་། །རྩ་བ་འབྲས་བུ་ཤུན་ལྤགས་དང་། །མེ་ཏོག་སྐམ་པོ་རྣམས་དང་ནི། །པ་ཏ་ལི་དང་ཀ་ཏ་བི། །ཚ་བ་གསུམ་པོ་རྣམས་དང་ནི། །སྐྱུ་རུ་ར་ཡི་འབྲས་བུ་དང་། །ལང་ཏང་རྩ་བའང་གཞུག་པར་བྱ། །སྒོག་སྐྱ་དང་ནི་ཤིང་ཀུན་དང་། །དེ་བཞིན་རྒྱམ་ཚ་ཡུངས་ཀར་
རྣམས། །དེ་དག་ཆ་ནི་མཉམ་བྱས་ལ། །ར་གཅིན་དང་ནི་བཏག་པར་བྱ། །མར་ནི་ཕུལ་བཞི་ལྡན་པ་དང་། །བ་གཅིན་དག་ནི་བཞི་འགྱུར་དང་། །མེ་ནི་ཆུང་དུས་དལ་ནས་བཙོ། །དེ་ནས་དེ་ལ་བླུད་པར་བྱ། །དེ་བཞིན་དུ་ནི་སྣར་ཡང་བླུགས། །མིག་བསྐུས་ལུས་
བྱུགས་འཇིགས་པར་འགྱུར། །སྣར་བླུགས་འཇིགས་པས་གཟིར་བ་དང་། །མར་འཐུངས་པས་ཀྱང་འཇིགས་གྱུར་ནས། །གདོན་དེ་རབ་ཏུ་འབྲོས་པར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་བའི། །ཐབས་གཞན་འདི་ནི་སྦྱར་བར་བྱ། །
སྔགས་དང་སྦྱིན་སྲེག་སྣ་ཚོགས་ཀྱིས། །དེ་ཡི་ངོ་ལོན་བྱ་བ་སྟེ། །ལྷ་མིན་གཡུལ་དུ་འཇོམས་པ་ལྟར། །རྡོ་རྗེ་མས་ཀྱང་གཞོམ་པར་བྱ། །རྡོ་རྗེ་མས་ནི་འཇིགས་སྐྲག་ནས། །གདོན་དེ་རབ་ཏུ་འབྲོས་པར་འགྱུར། །སྲིན་པོའི་གདོན་གྱི་སྐབས་རྫོགས་སོ།། །།སྔར་
བཤད་པ་ནི་གང་ཡིན་པའི། །ཤ་ཟའི་གདོན་ཡང་ཤེས་པར་བྱ། །གཏུམ་ཞིང་དྲག་ལ་གཟུ་ལུམས་ཅན། །ལྕི་ཞིང་ཚུགས་པར་དཀའ་བ་སྟེ། །མི་རྣམས་ང་རྒྱལ་ཅན་དག་དང་། །ཕྲ་མ་ཅན་དང་བརྐམ་པ་དང་། །བདག་གི་ཕྱོགས་ནི་འཇོམས་བྱེད་དང་། །གཞེན་
เล่ม ๙๕ · หน้า 129b
ནོར་འཕྲོག་པ་འཛིན་པར་བྱེད། །ཚེས་གཉིས་དང་ནི་ཚེས་གསུམ་དང་། །དེ་བཞིན་བརྒྱད་དང་བཅུ་བཞི་དང་། །ཚེས་གསུམ་ལ་ནི་རྟག་ཏུ་རྒྱུ། །ཤ་ཟ་ཡིས་ནི་ཟིན་པ་ཡི། །མཚན་མ་དག་ཀྱང་ཤེས་པར་བྱ། །ཚེས་གཉིས་ལ་ནི་གང་རྒྱུ་བ། །དེ་ཡི་ཚུལ་རྣམས་ང་ལས་
ཉོན། །སྐྱེས་པ་ཡི་ནི་མདོག་དང་ལྡན། །ཚིལ་དང་རུལ་པའི་དྲི་མནམ་ཞིང་། །སྐྱེ་བོ་མཐོང་ན་དགོད་པར་བྱེད། །དྲག་ཏུ་ཡང་ནི་གཤེ་བ་དང་། །ཕྱི་སའི་དྲི་དང་ལྡན་པ་དང་། །དེ་བཞིན་ཁྲག་གི་དྲི་ཡང་མནམ། །གང་མ་ཤེས་བྱའི་ཤ་ཟ་ཡིན། །གཉིས་པའི་མཚན་ཡང་ང་
ལས་ཉོན། །ལུས་ཀུན་ཡང་ནི་འདར་བ་སྟེ། །སྐད་ཅིག་རེ་རེར་རབ་ཏུ་རྒྱུག །ངུ་ཞིང་གླུ་ཡང་ལེན་པར་བྱེད། །སྐད་ཅིག་རེ་རེར་གར་ཡང་བྱེད། །ཁང་སྟོང་དག་ཏུ་བསྟེན་པ་དང་། །དེ་བཞིན་སྐྱེ་བོ་འཇིགས་པར་བྱེད། །ཟས་དང་སྐོམ་ལ་དགའ་བ་དང་། །དེ་བཞིན་ཤ་
དང་ཆང་ལ་དགའ། །སྤྲུལ་པ་ཞེས་བྱ་ཤ་ཟ་ཡིན། །གསུམ་པའི་མཚན་མའང་ང་ལས་ཉོན། །ནད་པ་དག་གིས་མིག་ཀྱང་ནི། །ནམ་མཁའ་ལ་ཡང་ལྟ་བར་བྱེད། །ཁ་ཟས་བྱིན་པ་རྣམས་དང་ནི། །གནས་དང་གནས་མིན་རྣམས་སུ་འདོར། །དེ་ནི་ཤ་དང་ཆང་དག་གི། །
ཇི་ལྟར་བྱས་ཀྱང་ཆོག་མི་ཤེས། །ཐབ་ཁུང་དག་ཏུ་ཉལ་བར་བྱེད། །ཚུལ་ཡང་མེད་ཅིང་ལྟོ་ཆེ་ལ། །རྟག་ཏུ་ཕྱི་བ་རེག་པར་བྱེད། །བུད་མེད་ལམ་དུ་འགོག་པར་བྱེད། །ཤ་ཟ་གཟུ་ལུམས་ཅན་ཞེས་བྱ། །གསུམ་པ་ཡང་ནི་བཤད་པ་ཡིན། །དེ་ནི་གང་གིས་བདེར་འགྱུར་
བའི། །གསོ་བའི་ཐབས་ཀྱང་ཟ་ཤད་པར་བྱ། །ཏིལ་ཟན་ལ་ཕུག་སྒོག་སྐྱ་དང་། །ཏིལ་གྱི་ཚིགས་མ་ནས་ཀྱི་ཟས། །ཞོ་དང་ཤ་བཙོས་རྗེན་པ་དང་། །བཏུང་བ་དང་ནི་དེ་བཞིན་ཟས། །དེ་ཡི་གཏོར་མ་སྨན་པས་བླངས། །ནུབ་ཕྱོགས་སུ་ནི་རང་བཞིན་སྦྱིན། །གཏོར་མའི་ལས་
ནི་འདི་ཉིད་ཀྱིས། །གདོན་དེ་མྱུར་དུ་གཏོང་བར་འགྱུར། །ཅི་སྟེ་དེས་ཀྱང་མ་བཏང་ན། །གང་གང་གདོན་དེ་གཏོང་འགྱུར་བའི། །ཐབས་གཞན་འདི་ནི་སྦྱིན་པར་བྱ། །པྲི་ཡངྐུ་ཡི་མེ་ཏོག་དང་། །ཚ་བ་འདི་ཡང་དེ་བཞིན་ཏེ། །འབྲས་བུ་གསུམ་དང་སྒོག་སྐྱའང་གཞུག །ཤུ་
เล่ม ๙๕ · หน้า 130a
དག་དང་ནི་ཤིང་ཀུན་དང་། ཕལ་ཏ་དང་བཅས་པར་གཞུག །ཀ་ཏ་བ་ཀའང་དེ་བཞིན་ཏེ། །ཤྲི་རི་ཤ་ཡི་མེ་ཏོག་དང་། །དེ་དག་ཆ་ནི་མཉམ་བྱས་ལ། །ར་གཅིན་དང་ནི་བཏག་པར་བྱ། །མར་ནི་ཕུལ་བཞིར་ལྡན་པ་དང་། །བ་གཅིན་དག་ནི་བཞི་འགྱུར་ནང་།
མེ་ནི་ཆུང་ངུས་དལ་ནས་བཙོ། །མིག་ཀྱང་བསྐུས་ཤིང་སྣར་ཡང་བླུགས། །དེ་བཞིན་དུ་ནི་མར་ཀྱང་བཏུང་། །མིག་བསྐུས་ལུས་བྱུགས་འཇིགས་པར་འགྱུར། །སྣར་བླུགས་འཇིགས་པས་གཟིར་བ་དང་། །མར་འཐུངས་པས་ཀྱང་འཇིགས་འགྱུར་ནས། །གདོན་དེ་རབ་ཏུ་
འབྲོས་པར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་བའི། །ཐབས་གཞན་འདི་ནི་སྦྱར་བར་བྱ། །སེམས་ཅན་རྣམས་ལ་ཕན་འདོད་པས། །དཀྱིལ་འཁོར་དུ་ནི་ལེགས་པར་གཞུག །འཇིགས་པའི་ཕྱག་རྒྱ་སྦྱིན་སྲེག་ལས། །ནག་མོ་ཡིས་
ནི་མྱུར་དུ་གཞོམ། །སྦྱིན་སྲེག་ལས་ཀྱིས་འཇིགས་སྐྲག་ནས། །གདོན་དེ་རབ་ཏུ་འབྲོས་པར་འགྱུར། །ཤ་ཟའི་གདོན་གྱི་སྐབས་རྫོགས་སོ།། །།སྔར་བཤད་པ་ནི་གང་ཡིན་པའི། །ཀླུ་ཡི་གདོན་ཡང་བཤད་པར་བྱ། །གཏུམ་ཞིང་སྟོབས་ཆེ་ཁྲོ་བ་དང་། །དྲག་
ཅིང་སོས་ཀྱང་འདེབས་པར་བྱེད། །འཇོམས་པར་བྱེད་ཅིག་སེམས་ཅན་འཚེ། །ཡར་ངོ་གཉིས་ཀྱི་ཚེས་ལྔ་དང་། །དེ་བཞིན་མར་གྱི་ཚེས་བདུན་དང་། །དུས་ཚིགས་ཀུན་དང་གུང་གི་ཚེ། །དད་པ་ཅན་གྱི་བྲམ་ཟེ་ལ། །ཀླུ་དབང་གདོན་ནི་རྒྱུ་བར་བྱེད། །གདོན་གྱིས་ཟིན་པ་འདར་
བ་དང་། །འཁོར་ཞིང་ས་ལ་འགྱེལ་བར་འགྱུར། །ཧ་རེར་ཡང་ནི་བལྟ་བ་དང་། །མིག་ཀྱང་དམར་བར་འགྱུར་བ་དང་། །ལྕེ་ཡང་འབྱིན་པར་བྱེད་པ་དང་། །ཡང་དང་ཡང་དུ་དབུགས་ཀྱང་གཏོང་། །འབྲས་བུ་མེ་ཏོག་ཕྲེང་བ་དགའ། །དེ་བཞིན་འོ་མ་མར་ལ་དགའ། །རྟག་
ཏུ་ཡང་ནི་ཁྲོ་བར་འགྱུར། །སོ་ཡང་འཐམས་པར་འགྱུར་བ་སྟེ། །གང་གི་མཚན་མ་དེ་དག་ནི། །ཀླུ་ཡི་གདོན་དུ་བཤད་པ་ཡིན། །དེ་ནི་གང་གི་བདེར་འགྱུར་བའི། །གསོ་བའི་ཐབས་ཀྱང་བསྟན་པར་བྱ། །རིག་སྔགས་འཆང་གིས་ཁྲུས་བྱས་ལ། །གཙང་ཞིང་ཡིད་ནི་དགེ་
เล่ม ๙๕ · หน้า 130b
བ་ཡིས། །བསྒྲིམས་ཏེ་གཏོར་མ་སྦྱིན་པར་བྱ། །བཀྲ་ཤིས་འབྲས་ཡོས་བུ་རམ་དང་། །སྣུམ་ཁུར་འབྲས་ཆན་བུ་རམ་སྦྱར། །པདྨ་ཨུཏྤལ་པུ་ཤེལ་ཙི། །དེ་བཞིན་ཨུཏྤལ་དམར་པོ་དང་། །ཟས་མཆོག་དག་ནི་འོ་མ་ཞོ། །ས་ནག་ཀྱང་ནི་དེ་བཞིན་ཏེ། །མེ་ཏོག་ཕྲེང་
མང་བདུག་པ་དང་། །ཀླུ་ཡི་མེ་ཏོག་སྦྱིན་པར་བྱ། །དྲི་མར་དག་ནི་དེ་བཞིན་ཏེ། །སྐུད་པ་དམར་པོ་སྦྱིན་པར་བྱ། །གུ་གུལ་དང་ནི་ཤང་ཤིང་གི། །བདུག་པ་དེ་ལ་སྦྱིན་པར་བྱ། །བྱང་ཕྱོགས་དང་ནི་ཤར་ཕྱོགས་སུ། །གཏོར་མ་སྲོད་ལ་སྦྱིན་པར་བྱ། །གཏོར་མའི་ལས་ནི་
འདི་ཉིད་ཀྱིས། །གདོན་དེ་མྱུར་དུ་གཏོང་བར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་བའི། །ཐབས་གཞན་འདི་ནི་སྦྱིན་པར་བྱ། །ལིག་བུ་མིག་ནི་ཆུ་གྲང་དང་། །བཏགས་ནས་མིག་བསྐུ་ཡང་ན་བླུགས། །ཤྭ་ཏ་བ་ལ་
གསེར་ཕྲོམ་དང་། །རྒྱས་སྤོས་དང་ནི་ཡུངས་ཀར་དང་། །ནག་ཏ་མ་ལ་ཏུམ་ཕྱི་དང་། །ཐང་ཤིང་དང་ནི་རྣམ་པ་བདུན། །ཚོགས་རྣམས་དེ་དག་བསོགས་ནས་ནི། །མེ་ནི་ཆུང་དུས་བཙོ་བྱ་ཞིང་། །མར་ནི་ཕུལ་ཏག་བཞི་དག་དང་། །བ་གཅིན་ཕུལ་བཞིའི་ནང་
དུ་བཙོ། །དེ་ནས་དེ་ལ་བླུད་པར་བྱ། །དེ་བཞིན་དུ་ནི་སྣར་ཡང་བླུགས། །མིག་བསྐུས་ལུས་བྱུགས་འཇིགས་པར་འགྱུར། །སྣར་བླུགས་འཇིགས་པས་གཟིར་བ་དང་། །མར་འཐུངས་པས་ཀྱང་འཇིགས་གྱུར་ནས། །གདོན་དེ་རབ་ཏུ་འབྲོས་པར་འགྱུར། །ཅི་སྟེ་དེས་ཀྱང་
མ་བཏང་ན། །གང་གིས་གདོན་དེ་གཏོང་འགྱུར་བའི། །ཐབས་གཞན་འདི་ནི་སྦྱར་བར་བྱ། །གང་གིས་གདོན་དེ་གཏོང་འགྱུར་བའི། །སྦྱིན་སྲེག་ལས་ནི་སྦྱར་བར་བྱ། །སྦྱིན་སྲེག་ལས་ནི་མི་བཟད་དང་། །རྡོ་རྗེ་ལྟེ་བས་བཅོམ་བྱས་ན། །སྦྱིན་སྲེག་ལས་ནི་འཇིགས་
གཟིར་བས། །ཀླུ་ཡིས་མི་ནོ་གཏོང་བྱེད་ཅིང་། །ཀླུ་ནི་མྱུར་དུ་འབྲོས་པར་འགྱུར། །ཀླུ་ཡི་གདོན་གྱིས་ཟིན་པ་ལ། །གང་གིས་གཞན་དུ་འགལ་བར་བྱེད། །རིག་སྔགས་འཆང་དང་མི་དག་ལ། །བརྩེ་བའི་ཕྱིར་ནི་འོང་བྱེད་ན། །གོ་ཆ་བརྟན་པར་བགོ་བྱ་ཞིང་། །རིག་པ་མཆོག་
เล่ม ๙๕ · หน้า 131a
གི་གོ་བགོས་ལ། །མ་རུངས་དུག་ནི་མི་བཟད་པ། །ཕོ་ཉ་མས་ནི་ངེས་པར་འཇོམས། །ལག་ན་རྡོ་རྗེ་རིགས་མཆོག་མ། །ཕོ་ཉ་སྟོབས་ཆེན་གང་ཡིན་པའི། །སྙིང་པོ་དྲག་ཅིང་འཇིགས་པ་ཡི། །ལས་ཀྱིས་སྤྱི་བོར་འཇོམས་པར་བྱེད། །བཅོམ་པ་དེས་
ན་དབྱེ་བྱེད་ཅིང་། །གདོན་དེ་ངེས་པར་བརླག་པར་འགྱུར། །ཀླུའི་གདོན་གྱི་སྐབས་རྫོགས་སོ།། །།སྔར་བཤད་པ་ནི་གང་ཡིན་པའི། །ལོག་འདྲེན་གདོན་ཡང་ཤེས་པར་བྱ། །གཏུམ་ཞིང་དྲག་ལ་གཟུ་ལུམས་ཅན། །ལྕི་ཞིང་འཇིག་རྟེན་འཇོམས་པ་སྟེ། །མར་
གྱི་ངོ་ཡི་ཚེས་ལྔ་དང་། །ཚེས་གྲངས་བཅུ་བཞི་གནམ་སྟོང་ལ། །སྐྱེ་བོ་གནས་དང་འགྲོ་བ་ལ། །དུས་ཀུན་དུ་ནི་འཚེ་བར་བྱེད། །དྲི་མ་ཅན་ལ་གོས་ངན་ཅན། །དེ་བཞིན་ཁ་ཟས་ཁྱོས་མ་ཟ། །དགའ་བར་འགྱུར་དང་ཁྲོ་བ་དང་། །བུད་མེད་ཀྱིས་སྤངས་གང་ཡིན་དང་། །ཆུ་
ངོགས་བུད་མེད་བལྟས་པ་དང་། །ཤིང་ལ་འཛེག་ཅིང་བཤང་གཅི་བྱེད། །འགྲེང་ཞིང་བཤང་གཅི་བྱེད་པ་དང་། །གཅེར་བུར་རྒྱུག་པ་གང་ཡིན་དང་། །གཞན་གྱི་གོས་དང་འདྲེས་པ་དང་། །གོས་ཀྱི་མཐའ་མས་གཡབ་པ་ཡི། །མི་རྣམས་གང་གིས་ཟིན་པ་ཡི། །ཞུམ་ཞིང་
ངུ་བར་བྱེད་པ་དང་། །ནོར་རྣམས་ཀྱང་ནི་ཆུད་ཟ་ཞིང་། །གཞན་གྱི་ཡིད་དུ་མི་འོང་དང་། །སྐྱེས་པ་ཆུང་མ་རྙེད་མི་འགྱུར། །བུད་མེད་ཀྱི་ནི་ཁྱོ་མི་རྙེད། །ཚོང་བྱེད་ན་ཡང་ཟོང་དག་གིས། །ཁེ་སྤོགས་རྙེད་པར་མི་འགྱུར་ཞིང་། །ཞིང་གཤིན་དག་ལ་རྨོས་བཏབ་
ཀྱང་། །རྨོས་པའི་འབྲས་བུ་ཐོབ་མི་འགྱུར། །མཚན་ནི་ཐམས་ཅད་རྫོགས་པ་ཡི། །ཆུང་མ་ལས་ཀྱང་བུ་མི་འབྱུང་། །དོན་གཞན་བྱ་བར་བརྩམས་ཀྱང་ནི། །ལོག་པའི་བློ་ནི་གཞན་དུ་འགྱུར། །དེ་དག་གང་ལ་སྣང་གྱུར་པའི། །དེ་ཡི་གསོ་བའི་ཐབས་ཀྱང་བཤད། །
ཁང་པ་མཉམ་ཞིང་གསར་བྱས་ལ། །རིན་ཆེན་ཐམས་ཅད་བསགས་པར་བྱ། །བུམ་པ་བཞི་ཡང་དེར་བཞག་ཅིང་། །བཀྲ་ཤིས་རྣམས་ཀྱང་དབུལ་བར་བྱ། །རྫས་རྣམས་དང་ནི་འབྲས་རྣམས་དང་། །བུམ་པ་བ་དན་སྔོན་པོ་དང་། །ཤ་བཙོས་དང་ནི་རྗེན་པ་དང་། །དེ་བཞིན་
เล่ม ๙๕ · หน้า 131b
ཁུ་བ་ཟས་རྣམས་དང་། །དྲི་དང་མེ་ཏོག་དཀར་པོ་དང་། །འབྲས་ཀྱི་འོ་ཐུག་དེར་སྦྱིན་བྱ། །གཏོར་མའི་ལས་ནི་འདི་ཉིད་ཀྱིས། །དེ་ནི་ཁྲུས་ཀྱང་བྱེད་དུ་གཞུག །པ་ལ་ཨ་ཏི་བ་ལ་དང་། །ཀནྟ་ཀ་རི་འབྲི་ཧ་ཏི། །པ་ཏྲ་དང་ནི་པུ་ཤེལ་ཙི། །བྲི་ཡངྐུ་དང་ཤུ་ཏི་དང་། །ཕྱེ་
མའི་གོང་བུ་འདི་ཡིས་ནི། །རབ་ཏུ་མཉམ་གཞག་ཁྲུས་བྱེད་གཞུག །རིག་སྔགས་འཆང་ནི་ཤར་ཕྱོགས་བལྟ། །ནད་པ་ནུབ་ཕྱོགས་བསྟན་བྱས་ལ། །གོས་དཀར་ཅན་གྱི་སྙིང་པོ་དང་། །ལྡན་པའི་ཆུས་ནི་དབང་ཡང་བསྐུར། །དེ་ནས་བློ་ལྡན་ཡིད་གཞུངས་པས། །
བདུད་རྩི་ཐབ་སྦྱོར་ལྡན་པ་ཡི། །སྦྱར་སྨན་གྱིས་ནི་ལུས་ཀྱང་བསྐུ། །གུ་གུལ་དང་ནི་ཡུངས་ཀར་དང་། །གིའུ་ཝང་ཤུ་དག་རུ་རྟ་དང་། །སུག་སྨེལ་ཡང་ནི་དེ་བཞིན་ཏེ། །སྒྲོན་ཤིང་དང་ནི་ཐང་ཤིང་དང་། །ཙནྡན་དང་ནི་ཨ་ག་རུ། །ཀ་ལེ་ཡ་ཡི་པད་འདྲ་དང་། །གེ་སར་
རྣམས་ནི་ཆ་བསྙམས་ལ། །ཆུ་དང་ལྷན་ཅིག་བཏག་པར་བྱ། །གང་ན་སྦྱར་སྨན་འདི་གནས་པ། །དེར་ནི་འཇིགས་པ་མི་འབྱུང་སྟེ། །ཆོམ་རྐུན་མ་ཡིན་མཚོན་རྣམས་མིན། །སྦྲུལ་རྣམས་མ་ཡིན་ལྷ་མིན་མིན། །ལག་ན་རྡོ་རྗེ་འདིས་བསྐུས་པས། །ས་སྟེངས་དག་ཏུ་རྒྱལ་བར་
འགྱུར། །འདི་ཡིས་ལུས་ལ་བསྐུས་ན་ནི། །ལོག་འདྲེན་རྣམས་ལས་ཐར་བར་འགྱུར། །སྦྱར་སྨན་དོན་ཀུན་སྒྲུབ་པ་ནི། །སྔར་ཡང་ངས་ནི་བཤད་པ་ཡིན། །ལོག་འདྲེན་གྱི་གདོན་གྱི་སྐབས་རྫོགས་སོ།། །།སྔར་བཤད་པ་ནི་གང་ཡིན་པའི། །བརྗེད་བྱེད་
གདོན་ཡང་ཤེས་པར་བྱ། །དྲག་ཅིང་ཁྲོ་ལ་གཏུམ་པ་དང་། །གཟུ་ལུམས་ཅན་དེ་ཚུགས་པར་དཀའ། །ཚེས་གཉིས་དང་ནི་ཚེས་བཞི་དང་། །དེ་བཞིན་དགུ་དང་བཅུ་གཉིས་དང་། །མར་གྱི་བཅུ་བཞི་དེ་བཞིན་ཏེ། །བརྗེད་བྱེད་དག་ནི་འཇུག་པར་འགྱུར། །དང་པོའི་ཐུན་
ནི་འདས་ནས་ཀྱང་། །ལྷག་མ་རྣམས་ལ་དེ་བཞིན་ལྡང་། །ཕྱི་ནས་རླུང་བཞིན་ཡང་དང་ཡང་། །དེ་ནས་ཡུད་ཙམ་ཉིན་ཞག་དང་། །དེ་བཞིན་ཟླ་ཕྱེད་ཟླ་དང་ལོར། །དབུ་བ་སྐྱུག་ཅིང་བརྒྱལ་བར་འགྱུར། །ལུས་ལས་རྡུལ་ཡང་འབྱུང་བར་འགྱུར། །གདོན་གྱིས་ཟིན་པ་
เล่ม ๙๕ · หน้า 132a
འཁོར་བ་དང་། །ས་ལ་འགྱེལ་ཞིང་འཁོར་བར་འགྱུར། །བརྗེད་བྱེད་གདོན་གྱིས་ཟིན་པ་ཡི། །དེ་ཡི་མཚན་མ་དེ་དག་ཡིན། །གང་གིས་གདོན་དེ་གཏོང་འགྱུར་བའི། །གསོ་བའི་ཐབས་ཀྱང་བཤད་པར་བྱ། །བདུག་པ་དྲི་དང་མེ་ཏོག་ཕྲེང་། །དེ་བཞིན་
ཤ་བཙོས་རྗེན་པ་དང་། །ཏིལ་ཟན་དང་ནི་འབྱུང་པོའི་ཟས། །དེ་བཞིན་ཤུག་པ་བུ་ཤེལ་ཙི། །བྱུག་པ་དང་ནི་མར་ཡང་བླུད། །འབྲས་བུ་གསུམ་ལས་སྲང་གཅིག་དང་། །ཚ་བ་གསུམ་ལས་སྲང་གཅིག་གཞུག །སྒོག་སྐྱ་བརྒྱ་ཡང་གཞུག་པར་བྱ། །ཡུངས་ཀར་སྟོང་ཡང་
དེ་བཞིན་ཏེ། །ནག་ཏ་མ་ལའི་ས་བོན་དང་། །བིལ་བའི་རྩ་བ་དེ་བཞིན་ཏེ། །དེ་དག་ཆ་ནི་མཉམ་བྱས་ལ། །ར་གཅིན་དང་ནི་བཏག་པར་བྱ། །མར་དང་བ་གཅིན་བཞི་འགྱུར་གྱི། །མར་དུ་ཡང་ནི་བཙོ་བར་བྱ། །མིག་ཀྱང་བསྐུ་ཞིང་སྣར་ཡང་བླུགས། །དེ་བཞིན་མར་ཡང་
བཏུང་བར་བྱ། །མིག་བསྐུས་ལུས་བྱུགས་འཇིགས་པར་འགྱུར། །སྣར་བླུགས་འཇིགས་པས་གཟིར་བ་དང་། །ཆོ་ག་འདི་དག་རྣམས་ཀྱིས་ཀྱང་། །གདོན་དེ་རབ་ཏུ་འབྲོས་པར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་བའི། །ཐབས་
གཞན་འདི་ཡང་བཤད་པར་བྱ། །དཀྱིལ་འཁོར་བྲིས་ཏེ་གཞུག་པར་བྱས་ལ་སྤྱན་ནམ་ཡང་ན་བདུད་རྩི་ཐབ་སྦྱོར་རམ། །ཚོགས་ཆེན་པོ་ལྕགས་ཅན་གྱིས་བེ་ཀངྐ་ཏའི་ཡམ་སྲེག་ཤིང་གི་སྦྱིན་སྲེག་བྱས་ན་གདོན་དེ་འབྲོས་པར་འགྱུར་རོ། །བརྗེད་བྱེད་ཀྱི་གདོན་གྱི་སྐབས་རྫོགས་སོ།། །།
སྔར་བཤད་པ་ནི་གང་ཡིན་པའི། །སྨྱོ་བྱེད་གདོན་ཡང་ཤེས་པར་བྱ། །དྲག་ཅིང་གཏུམ་ལ་གཟུ་ལུམས་ཅན། །ལྕི་ཞིང་ཚུགས་པར་དཀའ་བ་སྟེ། །མར་གྱི་ངོ་ཡི་ཞག་གཉིས་དང་། །ཞག་དགུ་ལ་ནི་འཚེ་བྱེད་ཅིང་། །རླུང་དང་བད་ཀན་རང་བཞིན་གྱི། །སྨྱོ་བྱེད་གདོན་ནི་འཇུག་
པར་འགྱུར། །དེ་ཡི་ཚུལ་ནི་བཤད་པར་བྱ། །ངས་བཤད་དེ་ནི་མཉན་པར་གྱིས། །གཟུགས་ནི་རབ་ཏུ་མཛེས་པ་ཡིན། །ཤིན་ཏུ་དགའ་ཞིང་སྤྲོ་བར་འགྱུར། །དཔའ་བོ་དང་ནི་གཟུགས་བཟང་དང་། །མི་ནི་གླུ་ལ་སྲེད་པ་ལ། །རྩེད་མོ་ལ་སོགས་གཏམ་དག་ལས། །
เล่ม ๙๕ · หน้า 132b
སྨྱོ་བྱེད་འཛིན་ཏེ་ཐེ་ཚོམ་མེད། །མཚན་འདི་དག་གིས་ཤེས་པར་བྱ། །ཚུལ་རྣམས་ཀྱང་ནི་འདིར་ཉོན་ཅིག །གླུ་ལེན་ཅིང་ནི་གར་བྱེད་དང་། །དགོད་པར་བྱེད་ཅིང་ངུ་བ་དང་། །དྲི་དང་མེ་ཏོག་ཕྲེང་ལ་དགའ། །རླུང་དང་བད་ཀན་གནས་པ་ཡིན། །རབ་ཏུ་རྒྱུག་གམ་ཡང་
ན་འགྲེང་། །དལ་ནས་ཀྱང་ནི་དགོད་པ་དང་། །གཉིད་ཀྱང་ཆེ་བར་མི་འགྱུར་ལ། །ཅུང་ཟད་ཀྱང་ནི་སྨྲ་མི་བྱེད། །ཁ་ཟས་ལ་ཡང་དགའ་བ་རྣམས། །རླུང་མཁྲིས་བད་ཀན་གནས་པ་ཡིན། །ཤིན་ཏུ་དྲག་ཏུ་སྨྲ་བ་དང་། །མང་དུ་ཡང་ནི་སྨྲ་བ་དང་། །གཏམ་གྱི་
ཚུལ་ལ་དགའ་བའི་རྣམས། །བད་ཀན་གནས་ལ་བརྟེན་པ་དང་། །གནས་གསུམ་ལ་ནི་རྟེན་འགྱུར་ལ། །ཚུལ་ཀུན་ཡང་ནི་བྱེད་གྱུར་ན། །དེ་ནི་གསོར་མེད་ཤེས་པར་བྱ། །དེ་ལ་སྤྱད་པར་བྱ་བ་མེད། །ལྷ་རྣམས་ལག་ན་རྡོ་རྗེ་ངའི་མཚམས་རླུང་འདི་ནི་གསོར་མི་རུང་བ་ལ་
ཚར་གཅོད་པ་ཡིན་ནོ། །གདོན་གང་ངའི་མིང་ཐོས་ཀྱང་མི་འབྲོས་པ་དེ་ལ་ནི་ངས་རྡོ་རྗེ་དྲག་པོས་སྤྱི་བོ་གཤག་པར་བྱའོ། །སྨན་དང་གསང་སྔགས་གང་གིས་སྨྱོ་བྱེད་ཀྱི་གདོན་སྟོབས་པོ་ཆེ་ལ་གསོ་བའང་བཤད་པར་བྱ་སྟེ། །དྲི་ཀུན་དང་ནི་མེ་ཏོག་ཕྲེང་། །དེ་བཞིན་རོལ་མོའི་སྤྱད་
ཀུན་དང་། །འབྲས་ཆན་དྲི་ཞིམ་གཙང་མ་དང་། །འོ་ཐུག་འབྲུ་ཆང་སྦྱར་བའི་ཆང་། །དེ་ལྟར་གཏོར་མ་རྣམས་བསོགས་ལ། །ལམ་གྱི་བཞི་མདོར་སྦྱིན་པར་བྱ། །གཏོར་མའི་ལས་ནི་འདི་དག་གིས། །གདོན་དེ་མྱུར་དུ་གཏོང་བར་འགྱུར། །ཅི་སྟེ་དེས་ཀྱང་མ་བཏང་ན། །
གང་གིས་གདོན་དེ་གཏོང་འགྱུར་བའི། །ཐབས་གཞན་འདི་ནི་སྦྱར་བར་བྱ། །མར་རྙིང་ལོ་ནི་སུམ་ཅུ་གཉིས། །ལོན་པའི་མར་དེ་ཕུལ་བཞི་དང་། །འོ་མ་ཕུལ་བཞི་དག་དང་ནི། །སྦྲང་རྩི་ཕུལ་བཞིར་ལྡན་པར་བྱ། །བ་ལང་ཀོ་བ་བསྲེགས་པ་ཡི། །ཕྱེ་མ་ཕུལ་བཞི་གཞུག་
པར་བྱ། །སྒོག་སྐྱ་བརྒྱ་ཡང་གཞུག་པར་བྱ། །སྲང་གྲངས་སུམ་ཅུ་ཨ་རུ་ར། །སྲང་གྲངས་ཉིས་འགྱུར་ཚ་བ་གསུམ། །གསོ་བ་པོས་ནི་གཞུག་བྱ་སྟེ། །ལྷན་ཅིག་ཕྱེ་མ་ཞིབ་མོར་བྱ། །གང་ཚེ་ཐམས་ཅད་ཆོས་གྱུར་ནས། །དེ་བཞིན་དུ་ནི་ཐམས་ཅད་ཀྱི། །ཕྱི་རུ་ཡང་ནི་
เล่ม ๙๕ · หน้า 133a
དབྱུང་བར་བྱ། །མི་ཡི་འཇིག་རྟེན་གནས་པ་ཡི། །གདོན་རྣམས་ཐམས་ཅད་ཇི་སྙེད་པ། །རླུང་ཅན་དང་ནི་མཁྲིས་པ་ཅན། །བད་ཀན་ཅན་དང་འདུས་པ་ཅན། །གདོན་གྱི་གཟུགས་ནི་ཐམས་ཅད་དང་། །སྨན་རྣམས་ཀྱང་ནི་འདི་ཡིན་ཏེ། །རྡོ་རྗེ་ལྷ་ཡི་མར་
ཞེས་བྱ། །གདོན་ཀུན་གཏོང་བར་འགྱུར་བ་དང་། །གདོན་ཀུན་ཞི་བར་བྱེད་པ་དང་། །སེམས་ཅན་རྣམས་ལ་ཕན་པའི་ཕྱིར། །ང་ཡིས་སུ་ནི་བཤད་པ་ཡིན། །གང་ཞིག་སྨན་གྱི་རྒྱལ་པོ་ཡི། །མིང་ནི་ལེགས་པར་དྲན་བྱེད་པ། །དེ་
ལ་གདོན་རྣམས་ཐམས་ཅད་ཀྱིས། །གླགས་བཙལ་ཕྱིར་ནི་བརྩོན་མི་བྱེད། །དེ་ཕྱིར་དེ་ལ་བླུད་པར་བྱ། །དེ་བཞིན་སྣར་ཡང་བླུག་པར་བྱ། །ཆོ་ག་འདི་དག་གིས་ཀྱང་ནི། །གདོན་དེ་རབ་ཏུ་འབྲོས་པར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་
བའི། །ཐབས་གཞན་འདི་ནི་སྦྱར་བར་བྱ། །དཀྱིལ་འཁོར་བྲིས་ལ་དེར་གཞུག་པར་བྱ་སྟེ། །དཀྱིལ་འཁོར་དེར་རིག་སྔགས་ཀྱི་རྒྱལ་པོའམ། །ཚོགས་ལྕགས་ཅན་ནམ། །རྨུགས་བྱེད་ཀྱིས་སྦྱིན་སྲེག་བྱའོ། །ལྷ་རྣམས་འདི་ནི་ལག་ན་རྡོ་རྗེའི་མཚམས་རླུང་ཡིན་ཏེ། །གསོར་མི་
རུང་བ་རྣམས་ཀྱང་ཚར་གཅོད་པར་བྱེད་དོ། །གདོན་གང་ངའི་མིང་ཐོས་ནས་མི་འབྲོས་པ་དེ་ལ་རྡོ་རྗེ་དྲག་པོས་སྤྱི་བོ་གཤག་པར་བྱའོ། །ལྷ་རྣམས་དེ་བཞིན་གཤེགས་པའི་བཀས་མ་རུངས་པ་རྣམས་གཞོམ་པ་བཟང་པོ་རྣམས་ངས་བཤད་ཟིན་ཏོ། །སྨྱོ་བྱེད་ཀྱི་གདོན་གྱི་སྐབས་
རྫོགས་སོ།། །།སྔར་བཤད་པ་ནི་གང་ཡིན་གདོན། །ལྷ་མ་ཡིན་གདོན་ཤེས་པར་བྱ། །གཏུམ་ཞིང་གཟུ་ལུམས་ཆེ་བ་དང་། །འཇིག་རྟེན་འཚེ་བར་བྱེད་པའི་སྟེ། །གཟི་བརྗིད་ཅན་དང་ལུས་ཆེ་དང་། །གཟུགས་བཟང་ཡོན་ཏན་ལྡན་པ་ལ། །ལྷ་མ་ཡིན་ནི་འཇུག་
པར་བྱེད། །དེ་ཡི་མཚན་མ་ཚུལ་བཞིན་ཉོན། །རིག་སྔགས་འཆང་ལ་བརྙས་པར་བྱེད། །རིག་བྱེད་ཀྱང་ནི་སྨྲ་བར་བྱེད། །སྐེམ་བྱེད་ང་ཡིན་ཁྱབ་འཇུག་ང་། །ཞེས་ནི་བརྫུན་ཡང་སྨྲ་བར་བྱེད། །གདོན་ཀུན་གྱི་ནི་ཚུལ་དག་དང་། །རྣམ་པ་མང་པོར་སྒྱུར་བར་བྱེད། །ངུ་ཞིང་
เล่ม ๙๕ · หน้า 133b
རེས་འགས་སོས་ཀྱང་འཛིན། །རེས་འགའ་ཟས་ཀྱང་ཟ་བར་བྱེད། །ལག་པས་རྩྭ་དག་བླངས་ནས་ཀྱང་། །སྐད་ཅིག་གིས་ནི་མི་ལ་འཚེ། །ཚིག་ངན་དག་ཀྱང་སྨྲ་བར་བྱེད། །ཤིན་ཏུ་ཡང་ནི་དགོད་པར་བྱེད། །ལྷ་མ་ཡིན་གྱི་གདོན་རྣམས་ཀྱི། །མཚན་མ་ཡང་ནི་དེ་ཡིན་
ཏེ། །ཆོ་ག་ཡང་ནི་དེ་བཞིན་དུ། །དེ་ཡི་ངོ་ལོན་གང་དག་གིས། །གདོན་དེ་གཏོང་བར་འགྱུར་བར་བྱ། །མེ་ཏོག་ཀུན་དང་དྲི་དག་དང་། །མེ་ཏོག་ཕྲེང་བ་སྣ་ཚོགས་དང་། །པདྨ་ཨུཏྤལ་པུ་ཤེལ་ཙི། །ཨུཏྤལ་དམར་པོའི་འདབ་མ་དང་། །ཤ་བཙོས་དང་ནི་རྗེན་པ་ཡིན། །
ངོ་ལོན་དག་ནི་འཇམ་པོར་བྱ། །དེ་ནས་རིག་སྔགས་འཆང་དག་གིས། །གཙང་སྦྲ་བྱ་སྟེ་ནུབ་ཕྱོགས་སྦྱིན། །གཏོར་མ་ལས་ནི་འདི་ཉིད་ཀྱིས། །གདོན་དེ་མྱུར་དུ་གཏོང་བར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་བའི། །ཐབས་གཞན་
འདི་ནི་སྦྱར་བར་བྱ། །འབྲས་བུ་གསུམ་དང་ཚ་བ་དང་། །བ་ལ་ཨ་ཏི་བ་ལ་དང་། །ཐལ་ཏྲེས་དང་ནི་བུ་ཤེལ་ཙི། །རྩ་བ་ལྔ་རྣམས་བསོགས་ནས་ནི། །མར་ནི་ཕུལ་ཏག་བཞི་དག་དང་། །བ་གཅིན་ཕུལ་བཞིའི་ནང་དུ་བཙོ། །མེ་ནི་ཆུང་དུས་དལ་ནས་བཙོ། །དེ་ནས་དེ་ལ་
བླུད་པར་བྱ། །དེ་བཞིན་དུ་ནི་སྣར་ཡང་བླུགས། །མིག་བསྐུས་ལུས་བྱུགས་འཇིགས་པར་འགྱུར། །སྣར་བླུགས་འཇིགས་པས་གཟིར་བ་དང་། །མར་འཐུངས་པས་ཀྱང་འཇིགས་གྱུར་ནས། །གདོན་དེ་རབ་ཏུ་འབྲོས་པར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་བའི། །ཐབས་
གཞན་འདི་ནི་སྦྱར་བར་བྱ། །རྡོ་རྗེ་སེར་སྐྱས་སྦྱིན་སྲེག་བྱ། །རྡོ་རྗེ་སྒྲོག་གིས་བཅིང་བར་བྱ། །དེ་དག་སྔགས་ཀྱིས་ཚར་ཡང་བཅད། །ལྷ་མ་ཡིན་གྱི་གདོན་གྱི་སྐབས་རྫོགས་སོ།། །།དེ་ནས་ངས་ནི་སྔར་བཤད་གང་། །གཞོན་ནུའི་གདོན་བཞིན་ཤེས་པར་བྱ། །གཏུམ་
ཞིང་ཁྲོ་ལ་གཟུ་ལུམས་ཅན། །འགྲོ་བའི་གནས་དང་མི་གནས་འཇོམས། །ཚེས་གཉིས་དང་ནི་བཅུ་གཅིག་དང་། །མར་གྱི་ངོ་ཡི་ཞག་ལྔ་དང་། །ཕལ་ཆེར་ཚེས་བཅུ་དག་ལ་རྒྱུ། །གཞོན་ནུའི་སྲོག་ནི་གཅོད་བྱེད་པ། །རྟག་ཏུ་གསུམ་ཞིང་རྒྱུ་བར་བྱེད། །བྱིས་པས་གསོད་ཅིང་
เล่ม ๙๕ · หน้า 134a
མི་སྲུན་ན། །རིགས་བཞི་ལྡན་ཞིང་རྟག་ཏུ་རྒྱུ། །གཏོར་མ་འདོད་པའི་གདོན་ཆེན་ཡིན། །དེ་ལས་གཞན་པ་གང་དག་གིས། །རིགས་རྣམས་ཅི་འདྲ་བཤད་པར་གྱིས། །ནམ་གྲུ་བྲམ་ཟེར་ཤེས་པར་བྱ། །བྱ་ནི་རྒྱལ་རིགས་ཡིན་པར་བསྟན། །སྐེམ་
བྱེད་རྗེའུ་རིགས་ཤེས་པར་བྱ། །གཞོན་ནུ་དམངས་རིགས་ཤེས་པར་བྱ། །གྱེན་དུ་ལྟ་བ་གང་ཡིན་དང་། །སྐད་ཅིག་སྐད་ཅིག་འཁོར་བར་བྱེད། །རིམས་དང་ལུད་པ་དབུགས་མི་བདེ། །དེ་ནི་ནམ་གྲུའི་གདོན་ཡིན་ནོ། །མིག་ཕབ་པ་ནི་གང་ཡིན་དང་། །སོ་ཡང་འཆའ་བར་བྱེད་པ་དང་། །
རྔམ་པ་ཅན་དང་རིམས་བཏབ་གང་། །དེ་ནི་བྱ་ཉིད་ཡིན་པར་བསྟན། །གློ་བུར་དུ་ནི་ངུ་བ་གང་། །རིམས་ཀྱིས་བཏབ་ཅིང་རབ་ཏུ་རྒྱུག། །དངངས་ཞིང་དགོད་པར་བྱེད་པ་དང་། །དེ་བཞིན་འདར་ཞིང་གླལ་བར་བྱེད། །བྱིས་པ་གང་གིས་ཁ་དག་ནས། །དྲི་ང་བ་ནི་འབྱུང་བ་དང་། །
ལུས་ལ་རྨ་དང་འབྲུམ་བུ་འབྱུང་། །ཚ་ཞིང་མེ་ཡི་མདོག་དང་འདྲ། །མཚན་མོ་དུས་མཚམས་ལྡང་བར་འགྱུར། །དུས་མཚམས་དག་ཏུ་བབ་པ་ན། །འཁྲུ་ཞིང་རིམས་འདེབས་སྐྱུག་པ་དང་། །ལུས་ཀྱང་སྔོན་པོར་གྱུར་པ་དང་། །གང་ཞིག་ལུས་ནི་རྡེབ་པར་བྱེད། །རིམས་ཀྱིས་
ཀྱང་ནི་འཚེ་བ་དང་། །ནུ་མ་ཤིན་ཏུ་སོས་ཀྱང་འདེབས། །ལན་གྲངས་མང་དུ་ངུ་ཞིང་འདར། །མིག་ཀྱང་དམར་པོར་གྱུར་པ་དང་། །མི་དགའ་མཆུ་ཡང་མུར་བར་བྱེད། །བྱིས་པ་སྐེམ་བྱེད་ཟིན་པ་ཡིན། །ལག་པ་དང་ནི་རྐང་པ་གཅིག །ལས་བྱས་པས་ནི་ཚིགས་ཀྱང་
ན། །མིག་ནི་འཁོར་ཞིང་ལྟ་བར་བྱེད། །མིག་གཅིག་ཀྱང་ནི་འཛུམས་པར་བྱེད། །རྣག་དང་ཁྲག་གི་དྲི་ཡང་མནམ། །སྨིན་མ་ཡ་གཅིག་འདེགས་པར་བྱེད། །སྐེམ་བྱེད་བརྗེད་བྱེད་གདོན་རྣམས་ཀྱི། །མཚན་མ་དག་ཏུ་བསྟན་པ་ཡིན། །གཞོན་ནུའི་གདོན་ལ་གཏོར་མ་
བྱ། །ལེགས་པར་ཁྲུས་བྱས་གཙང་མས་སྒྲིམས། །དབྱིག་རྣམས་དང་ནི་གསེར་རྣམས་དང་། །གོས་ཀྱང་དེ་ལ་སྦྱིན་པར་བྱ། །སྣུམ་ཁུར་བཀྲ་ཤིས་འབྲས་ཡོས་དང་། །འབྲས་ཆན་དང་ནི་ཟན་དྲོན་དང་། །ཤ་བཙོས་དང་ནི་རྗེན་པ་དང་། །ཆང་དང་ཏིལ་
เล่ม ๙๕ · หน้า 134b
ཟན་རྣམས་དང་ནི། །ཏིལ་དང་འབྲས་ཆན་པུ་ཤེལ་ཙི། །འབྲས་ཀྱི་འོ་ཐུག་ཡུངས་ཀར་ལྡན། །བ་ལང་གི་ནི་ཆུ་ཀ་འམ། །ཤིང་སྐམ་མ་མོའི་གནས་དག་ཏུ། །གཏོར་མ་མེ་མར་བཅས་པ་འདི། །སྲོད་ལ་ཡང་ནི་སྦྱིན་པར་བྱ། །གཏོར་མའི་
ལས་ནི་འདི་ཉིད་ཀྱིས། །གདོན་དེ་མྱུར་དུ་གཏོང་བར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་བ་ཡི། །ཐབས་གཞན་དག་ནི་སྦྱར་བར་བྱ། །བུ་ཚང་རྡོ་དང་རམ་ཉེ་བ། །གསེར་ཕྲོམ་དང་ནི་སྐྱེར་བ་ཡུང་། །ཀ་པིད་ཏ་ཡི་ཁུ་བ་དང་། །པ་ལ་ཤ་ཡི་
ལོ་མ་དང་། །སྦྲང་རྩི་རན་ཙམ་གཞུག་པར་བྱ། །སེང་ལྡེང་སྙིང་པོ་ཚ་བ་གསུམ། །བཙོད་དང་ཤིང་མངར་ཐམས་ཅད་དང་། །དེ་དག་ཆ་ནི་མཉམ་བྱས་ལ། །ར་གཅིན་དང་ནི་བཏག་པར་བྱ། །མར་ནི་ཕུལ་བཞི་གཞུག་པར་བྱ། །བ་གཅིན་ཡང་ནི་བཞི་འགྱུར་བླུགས། །གོ་
ཕྱེའི་ལོ་མ་དག་དང་ནི། །བར་བ་ར་ཀ་རུལ་པ་དང་། །ཏིལ་རུལ་ནས་ཀྱི་ལོ་མ་ཡིན། །བླུགས་པའི་སྨན་ནི་བྱ་བ་ཡིན། །མར་ནི་ཕུལ་ཏག་ཕྱེད་ཀྱིས་ཀྱང་། །གོང་བུའི་སྨན་མཆོག་གཙོ་བོར་བྱ། །དུས་མཚམས་གཉིས་སུ་མཁས་པ་ཡིས། །དེ་ནི་ཁྲུས་ཀྱང་བྱེད་དུ་
གཞུག །གཞོན་ནུའི་གདོན་ནི་ཐམས་ཅད་ལས། །གསོ་བའི་ཐབས་ནི་དམ་པ་ཡིན། །ཀུན་ནས་གསོ་བའི་ཐབས་ཡོད་དེ། །ཐམས་ཅད་ཀྱང་ནི་འཚོ་བ་ཡོད། །ཆོ་ག་འདི་དག་གིས་ཀྱང་ནི། །གདོན་དེ་རབ་ཏུ་འབྲོས་པར་འགྱུར། །ཅི་སྟེ་དེས་ཀྱང་མ་བཏང་ན། །གང་
གིས་གདོན་དེ་གཏོང་འགྱུར་བའི། །ཐབས་གཞན་འདི་ནི་སྦྱོར་བར་བྱ། །དགའ་བྱེད་གདོང་གིས་ཁྲུས་བྱ་ཞིང་། །གཏོར་མ་ཡང་ནི་དེ་ལ་སྦྱིན། །ཡང་ན་རིག་པ་མཆོག་གིས་བྱ། །དེས་ན་གདོན་དེ་གཏོང་བར་འགྱུར། །གཞོན་ནུའི་གདོན་གྱི་སྐབས་རྫོགས་སོ།། །།
སྔར་བཤད་པ་ནི་གང་ཡིན་པའི། །གནོད་སྦྱིན་གདོན་ཡང་ཤེས་པར་བྱ། །གཏུམ་ཞིང་གཟུ་ལུམས་ཆེ་བ་སྟེ། །འཇིག་རྟེན་དག་ལའང་འཚེ་བར་བྱེད། །ངོ་གཉིས་ཚེས་ནི་བཅུ་གསུམ་དང་། །ཡར་གྱི་ཚེས་ལྔ་དག་ལ་རྒྱུ། །སྐྱེད་མོས་ཚལ་དང་ལྷ་གནས་སུ། །གཙང་
เล่ม ๙๕ · หน้า 135a
ཞིང་སྤྱོད་པ་གཙང་བ་དང་། །མི་རྣམས་གཟུགས་ནི་བཟང་བ་དང་། །རྒྱན་པོས་རྩེ་ལ་རབ་ཆགས་དང་། །བཞི་མདོར་གང་དུ་རྩེ་བ་ན། །བྲམ་ཟེ་རྒྱལ་རིགས་རྟག་ཏུ་འཛིན། །གནོད་སྦྱིན་གདོན་གྱིས་ཟིན་གྱུར་པ། །དེ་ཡི་མཚན་མ་ཤེས་པར་བྱ། །
དྲི་དང་མེ་ཏོག་ཕྲེང་ལ་དགའ། །ཟས་དང་སྐོམ་ལའང་དེ་བཞིན་དགའ། །ཁྲོ་བ་མེད་ཅིང་མི་དུ་ལ། །ཡང་དང་ཡང་དུ་ཟས་ཀྱང་ཟ། །དབང་ཡང་ཆེ་ཞིང་ནོར་མང་ལ། །དེ་བཞིན་རྟག་ཏུ་སྦྱིན་ལ་དགའ། །རྟག་ཏུ་ཤིན་ཏུ་གཙང་སྦྲར་ལྡན། །དེ་ནི་གསོ་བའི་ཐབས་ཀྱང་
བཤད། །ཟས་ཀུན་དང་ནི་དྲི་ཀུན་དང་། །དེ་བཞིན་མེ་ཏོག་ཐམས་ཅད་དང་། །ཤིང་ཏོག་ཀུན་དང་སྦྱར་ཐུག་དང་། །དེ་བཞིན་འབྲས་ཀྱི་འོ་ཐུག་དང་། །ཤ་བཙོས་དང་ནི་རྗེན་པ་དང་། །ཏིལ་ཟན་དང་ནི་འབྱུང་པོའི་ཟས། །གདུགས་སེར་དང་ནི་མཆོད་ཕྱིར་ཐོགས། །
དེ་བཞིན་སྐུད་པ་སེར་པོ་དང་། །དབྱིག་རྣམས་དང་ནི་གསེར་དག་དང་། །རིན་ཆེན་རྣམ་པ་སྣ་ཚོགས་རྣམས། །ཚུལ་བཞིན་དུ་ནི་སྦྱིན་པར་བྱ། །གཏོར་མ་དེ་དག་བསོགས་ནས་ཀྱང་། །བྱང་ཕྱོགས་སུ་ནི་སྦྱིན་པར་བྱ། །གཏོར་མའི་ལས་ནི་འདི་ཉིད་ཀྱིས། །གདོན་དེས་
མྱུར་དུ་གཏོང་བར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་བའི། །ཐབས་གཞན་འདི་ནི་སྦྱར་བར་བྱ། །གྲོ་རྣམས་དང་ནི་ནས་རྣམས་དང་། །མོན་སྲན་གྲེའུ་དང་རྒྱ་སྲན་དང་། །འབྲས་བུ་གསུམ་དང་ཚབ་གསུམ། །དེ་བཞིན་ཡུངས་
ཀར་པྲི་ཡངྐུ། །ཤུ་དག་དང་ནི་ཤིང་ཀུན་དང་། །དེ་བཞིན་རྩ་བ་ལྔ་པ་གཉིས། །ཏིལ་རྣམས་སྒོག་སྐྱ་ལྡན་པར་གཞུག །མར་ནི་ཕུལ་བཞི་ནང་དུ་བཙོ། །འོ་མ་ཕུལ་བཞི་སྦྲང་རྩི་བཞི། །བ་གཅིན་ཕུལ་བཞི་བླུག་པར་བྱ། །བ་ལང་ཀོ་བ་བསྲེགས་པ་ཡི། །
ཕྱེ་མ་ཕུལ་བཞི་གཞུག་པར་བྱ། །མེ་ནི་ཆུང་དུས་དལ་ནས་བཙོ། །དེ་ནས་དེ་ལ་བླུད་པར་བྱ། །དེ་བཞིན་དུ་ནི་སྣར་ཡང་བླུགས། །མིག་བསྐུས་ལུས་བྱུགས་འཇིགས་པ་དང་། །སྣར་བླུགས་འཇིགས་པས་གཟིར་བར་གྱུར། །ཆོ་ག་འདི་དག་གིས་ཀྱང་ནི། །གདོན་དེ་
เล่ม ๙๕ · หน้า 135b
རབ་ཏུ་འབྲོས་པར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་བའི། །ཐབས་གཞན་འདི་ཡང་སྦྱར་བར་བྱ། །དཀྱིལ་འཁོར་བྲིས་ཏེ་དེར་བཅུག་ལ། །སྦྱིན་སྲེག་གི་ལས་མི་བཟད་པས་མེའི་ནང་དུ་རིག་པ་མཆོག་གིས་གཞོམ་པར་བྱའོ། །
ཡང་ན་རྡོ་རྗེ་ནག་མོས་གཞོམ་པར་བྱ་སྟེ། །དེས་ནི་གདོན་འབྲོས་པར་འགྱུར་རོ། །གནོད་སྦྱིན་གྱི་གདོན་གྱི་སྐབས་རྫོགས་སོ།། །།དེ་ལས་གཞན་ཡང་གདོན་རྣམས་ཀྱི། །མཚན་མའི་བྱེ་བྲག་བཤད་པར་བྱ། །གདོན་རྣམས་དག་ནི་ཐམས་ཅད་ལ། །རིགས་
བཞི་དག་ནི་ཡོད་པར་བཤད། །དེ་དག་ཀྱང་ནི་མིང་གཅིག་དང་། །མཚན་མ་གཅིག་པུ་འཁྲུལ་བར་བྱེད། །གདོན་རྣམས་གང་དག་གང་དུ་འཛིན། །དེ་ཡང་བདག་གིས་བཤད་པར་བྱ། །ལྷ་དང་འབྱུང་པོ་གནོད་སྦྱིན་དང་། །དེ་བཞིན་དྲི་ཟ་ཚངས་པའི་སྲིན། །གདོན་
རྣམས་ལྔ་པོར་ཤེས་པ་ནི། །བྲམ་ཟེ་རྒྱལ་རིགས་སྤྱོད་པར་བཤད། །ཀླུ་ཡི་གདོན་དུ་ཤེས་པ་དང་། །སྲིན་པོ་ཡི་ནི་གདོན་ཉིད་དང་། །གདོན་དེ་གཉིས་སུ་ཤེས་པ་ནི། །རྗེའུ་རིགས་དམངས་རིགས་འཚེ་བ་ཡིན། །ལྷ་མིན་གདོན་ནི་རྒྱལ་རིགས་ཀྱིས། །ལྷག་མའི་
རིགས་རྣམས་འཚེ་བ་ཡིན། །ཤ་ཟའི་གདོན་ནི་དམངས་རིགས་ཀྱིས། །ལྷག་མའི་རིགས་རྣམས་འཚེ་བ་ཡིན། །སྨྱོ་བྱེད་དང་ནི་ལོག་འདྲེན་དང་། །བྱིས་པའི་གདོན་ནི་གང་ཡིན་པ། །གདོན་རྣམས་འདི་གསུམ་ཤེས་པ་ནི། །རིགས་བཞི་དག་ལ་སྤྱོད་པར་བཤད། །
གདོན་གང་རིགས་མཐུན་གང་ལ་སྤྱོད། །དེ་ནི་གསོ་བར་སླ་བ་ཡིན། །ཅི་སྟེ་གདོན་གང་འགའ་བཙལ་ཞིང་། །གཞན་ལ་སྟོན་པར་འགྱུར་ན་ནི། །ལག་ན་རྡོ་རྗེས་བཤད་པ་བཞིན། །དེ་ལ་གསོན་དུ་རེ་བའམ་མེད། །ཉི་མ་ནུབ་མོ་སྣང་མི་བྱེད། །ཟླ་བ་ཉིན་མོ་སྣང་མི་བྱེད། །
བསྟན་པ་དེ་ཡི་ཚུལ་གྱིས་ན། །གདོན་ནི་རང་གི་རིགས་ལ་སྤྱོད། །གདོན་རྣམས་བཅྭ་བརྒྱད་གང་ཡིན་པ། །ཐམས་ཅད་དུས་ཚིགས་རྣམས་སུ་རྒྱུ། །ལོ་གྲངས་བཅུ་གཉིས་ཚུན་ཆད་ཀྱི། །གདོན་རྣམས་གསོ་བའི་ཐབས་བཤད་དེ། །དེ་ལས་འདས་པའི་གདོན་རྣམས་ཀྱིས། །
เล่ม ๙๕ · หน้า 136a
གསོ་བའི་ཐབས་ནི་ཡོང་མེད་དོ། །མཚན་གཅིག་གནས་དང་ཆུ་ཡི་ནང་། །མེ་འགྲམ་དང་ནི་ཁྲོན་པའི་དྲུང་། །དེ་བཞིན་མ་མོ་རྣམས་ཀྱི་གནས། །བ་ལང་དབུས་དང་རྟ་ཞོན་དང་། །གླང་ཆེན་ཞོན་དང་གཡུལ་དུ་ཕམ། །རི་བོ་དང་ནི་དུར་ཁྲོད་དང་། །ཤིང་དྲུང་དང་ནི་འདྲེག་
མཁན་ཁྱིམ། །གནས་འདི་དག་ནི་ཐམས་ཅད་དུ། །གདོན་ནི་གང་ཞིག་འཇུག་འགྱུར་ན། །ལག་ན་རོད་རྗེས་བཤད་པ་བཞིན། །དེ་ལ་གསོན་དུ་རེ་བ་མེད། །དེ་ལས་གཞན་ཡང་མི་བཟད་གདོན། །གསོ་བའི་ཐབས་ཀྱང་བཤད་པར་བྱ། །གྲིབ་གནོན་གདོན་ནི་གཉིས་
ཡོད་དེ། །མཐོང་བ་ཙམ་གྱི་འབྲང་བར་བཤད། །དེ་ཡི་མཚན་མའང་ང་ལས་ཉོན། །གྲིབ་གནོན་གདོན་གཉིས་གང་ཡིན་དེ། །ཐམས་ཅད་དུ་ནི་འཇུག་པར་བྱེད། །གདོན་རྣམས་དང་ནི་ཐམས་ཅད་ཀྱང་། །གྲིབ་གནོན་གྱིས་ནི་ཉེ་བར་མཚོན། །སཽ་གནྡྷི་དང་ཨུཏྤལ་
གྱི། །མཚན་མ་རྣམས་ཀྱང་ང་ལས་ཉོན། །དེ་ལས་སཽ་གནྡྷི་ཀ་ནི། །གཟུ་ལུམས་ཆེ་ཞིང་དྲག་པ་སྟེ། །ཚེས་གྲངས་ཉིན་ཞག་ངེས་པ་མེད། །ཤིང་དྲུང་དང་ནི་སྐྱེད་མོས་ཚལ། །ལམ་གྱི་བཞི་མདོར་འཇུག་པར་བྱེད། །གདོན་དེ་ཁུས་འདེབས་ངུ་བ་དང་། །ལུས་རྣམས་ཀྱང་
ནི་འཇོམས་པར་བྱེད། །ཉིན་མོ་ཐུན་གཅིག་འདས་པ་ན། །གསོད་པར་ཡག་ནི་བྱེད་པ་སྟེ། །སཽ་གནྡྷི་ཀས་ཟིན་འགྱུར་བ། །དེ་ཡི་མཚན་མ་དེ་དག་ཡིན། །བདུད་རྩི་ཐབ་སྦྱོར་རམ། །དགའ་བྱེད་གདོང་གིས་ཆུ་ལ་བསྔགས་ཏེ་ཁྲུས་བྱེད་དུ་བཅུག་ལ་བདུག་པས་བདུགས་ན་གཏོང་
བར་འགྱུར་རོ། །ཨུཏྤ་ལ་ཡང་ང་ལས་ཉོན། །ངུ་ཞིང་དགོད་པར་བྱེད་པ་དང་། །སོ་རྣམས་ཀྱང་ནི་གཙིགས་པར་བྱེད། །ནུ་མ་ཡང་ནི་མི་ཤེས་དེ། །དུས་ཚིགས་མེད་པར་རྒྱུ་བར་བྱེད། །ཨུཏྤལ་ལས་ནི་ཟིན་གྱུར་བ། །དེ་ཡི་མཚན་མ་དེ་དག་ཡིན། །གང་གིས་གདོན་དེ་གཏོང་
འགྱུར་བའི། །གཏོར་མ་ཡང་ནི་དེ་ལ་སྦྱིན། །འབྲས་ཀྱི་འོ་ཐུག་སྦྱར་ཐུག་དང་། །ལག་པན་འབྲས་ཆན་བུ་རམ་ཆན། །ཤ་བཙོས་པ་དང་རྗེན་པ་དང་། །ཆང་དང་ཏིལ་གྱི་ཟན་དག་དང་། །འབྲས་ཆན་ཤ་དང་སྦྱར་བ་སྦྱིན། །ཏིལ་དག་དང་ནི་དེ་བཞིན་དབྱིག །ཆང་དང་སྦྱར་
เล่ม ๙๕ · หน้า 136b
བའི་ཆང་སྦྱིན་ཞིང་། །ལམ་གྱི་བཞི་མདོར་གཏོར་མ་སྦྱིན། །གཏོར་མ་ལས་ནི་འདི་ཉིད་ཀྱིས། །གདོན་དེ་མྱུར་དུ་གཏོང་བར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་བའི། །ཐབས་གཞན་འདི་ནི་སྦྱར་བར་བྱ། །ཡུངས་ཀར་ཤུ་དག་ཤིང་
ཀུན་དང་། །པི་པི་ལིང་དང་ན་ལེ་ཤམ། །འབྲས་བུ་གསུམ་ནི་ཆ་མཉམ་དང་། །གི་རི་ཀར་ནི་དཀར་པོ་དང་། །རུ་རྟ་དང་ནི་བྲི་ཡངྐུ། །དེ་བཞིན་བཅའ་སྒ་དག་དང་ནི། །ཐང་ཤིང་དང་ནི་པུ་ཤེལ་ཙི། །ནག་ཏ་མ་ལའི་འབྲས་བུ་དང་། །ཚོགས་རྣམས་འདི་དག་བསོགས་
ནས་ནི། །བ་གཅིན་དག་དང་བཏག་པར་བྱ། །མར་གྱི་ནང་དུ་བཙོ་བྱ་ཞིང་། །བ་གཅིན་བཞི་འགྱུར་བླུག་པར་བྱ། །མིག་ཀྱང་བསྐུ་ཞིང་སྣར་ཡང་བླུགས། །བཏུང་བར་བྱ་ཞིང་ལུས་ཀྱང་བྱུག །འདི་ནི་གདོན་རྣམས་ཐམས་ཅད་ཀྱི། །སྨན་རྣམས་ཀྱི་ནི་དམ་པ་ཡིན། །གང་
ན་སྦྱར་སྨན་འདི་གནས་པ། །དེ་ནི་ཀི་ཏ་ལུ་ཏ་དང་། །བྱིས་པ་ཡང་ནི་དེ་བཞིན་ཏེ། །དེ་དག་གིས་ནི་འཇིགས་པ་མེད། །ཆོ་ག་འདི་དག་གིས་ཀྱང་ནི། །གདོན་དེ་རབ་ཏུ་འབྲོས་པར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་བའི། །
ཐབས་གཞན་འདི་ནི་སྦྱར་བར་བྱ། །བདུད་རྩི་ཐབ་སྦྱོར་རམ། །དགའ་བྱེད་གདོང་ངམ། །གོས་དཀར་ཅན་གྱི་དཀྱིལ་འཁོར་དུ་བཞག་ན་གདོན་ཐམས་ཅད་མ་རུངས་པར་འགྱུར་རོ། །སཽ་གནྡྷི་དང་ཨུཏྤལ་གཉིས་ཀ་ཡང་ལས་གཅིག་ཡིན་པར་ཤེས་པར་བྱའོ། །དེ་ནས་བྱང་ཆུབ་
སེམས་དཔའ་བདུད་རྩི་ཐབ་སྦྱོར་གྱིས་བཅོམ་ལྡན་འདས་ལག་ན་རྡོ་རྗེ་ལ་དྲིས་པ། །མ་རུངས་གདོན་ལས་གསོ་བའི་ཐབས། །བཅོམ་ལྡན་ཤེས་པར་བགྱི་བར་འཚལ། །གང་ལ་ཤིང་བུ་བབ་པ་དང་། །གང་དག་དཀྱིལ་འཁོར་སྤོང་བ་དང་། །གོས་ཤིང་ཞེན་པ་གྱུར་པ་དང་། །
ཕྱིར་ཡང་ལྡོག་བྱེད་གང་ཡིན་དང་། །ནམས་ཀྱང་གཏོང་བར་མི་བྱེད་ལ། །གསང་སྔགས་དང་ནི་རྩི་སྨན་དང་། །སྦྱིན་སྲེག་ལས་ཀྱིས་གཞིག་པ་ནི། །གདོན་རྣམས་གཞིག་པའི་དམ་པ་སྟེ། །མར་བཏུང་བ་ཡི་ཆོ་ག་དང་། །ཆོ་ག་ཅི་འདྲ་གཏོར་མའི་ལས། །གསང་བ་
เล่ม ๙๕ · หน้า 137a
ཡི་ནི་ཐེ་ཚོམ་དང་། །གང་གིས་གནོད་སྦྱིན་གཏོང་འགྱུར་དང་། །བསྲེག་པ་དང་ནི་བཅད་པ་དང་། །བསད་ཅིང་རུས་པ་གཞོམ་པ་དང་། །དེ་དག་ཆོ་ག་རབ་བཤད་པ། །དེ་ནི་སྟོབས་ཆེན་བདག་ལ་གསུངས། །དེ་ལྟར་བློ་ཅན་ཆེ་བ་ཉིད། །བདུད་རྩི་ཐབ་
སྦྱོར་གྱིས་དྲིས་ནས། །ལག་ན་རྡོ་རྗེ་སྐལ་ཆེན་གྱིས། །འདི་སྐད་ཅེས་ནི་ཚིག་ཀྱང་སྨྲས། །བདུད་རྩི་ཐབ་སྦྱོར་ཁྱོད་ཀྱིས་སུ། །ང་ལ་གང་དྲིས་བཤད་པར་བྱ། །ལྷ་རྣམས་འཁོད་པའི་ནང་དུ་ཉོན། །མ་རུངས་པ་ཡི་གདོན་ཉིད་ནི། །གཡོ་དང་མི་གཡོ་ཞེས་བྱ་བ། །སེམས་
ཅན་ཀུན་ལ་འཚེ་བ་ཡོད། །སྦྱིན་སྲེག་ལས་ནི་དུ་མས་ཀྱང་། །གཡོ་དང་མི་གཡོའི་འབྲོས་མི་འགྱུར། །དེ་ཡི་མཚན་མ་ངས་བཤད་ཀྱིས། །གོ་རིམས་བཞིན་དུ་ལྷ་རྣམས་ཉོན། །དྲིས་པ་ཡི་ནི་དོན་རྣམས་ཀྱང་། །རབ་ཏུ་ཡང་ནི་སྨྲ་བར་བྱེད། །ངུ་བར་བྱེད་ཅིང་རབ་ཏུ་ཁྲོ། །
དེ་ནི་མ་རུངས་མཚན་མར་ཤེས། །འདུས་ཤིང་འཚོགས་པའི་ནང་དག་ཏུ། །ཤིན་ཏུ་ཡོངས་སུ་སྲུང་བ་གང་། །ཁང་སྟོང་དག་ཏུ་དགའ་བར་བྱེད། །དེ་ནི་མ་རུངས་མཚན་མར་ཤེས། །གང་གིས་རྟག་ཏུ་ཕྱག་འཚལ་དང་། །སྙན་པར་ཡང་ནི་སྨྲ་བར་བྱེད། །སྟན་དག་ཀྱང་ནི་
སྟོབས་པར་བྱེད། །དེ་ནི་མ་རུངས་མཚན་མར་ཤེས། །སྟན་དག་ལས་ནི་སྟན་དག་ལ། །ཅི་སྟེ་འཕོ་ཞིང་ལྡང་བར་བྱེད། །དེ་ནི་མ་རུངས་མཚན་མར་ཤེས། །ང་ནི་ལྷ་ཡིན་ཁྱབ་འཇུག་ང་། །ཚངས་པ་ང་ཡིན་དབང་ཕྱུག་ང་། །སྐྱེ་དགུའི་བདག་པོ་ང་ཡིན་ཞེས། །
དེ་སྐད་ཀྱི་ནི་ཚིག་སྨྲ་ཞིང་། །གདོན་ཀུན་གྱི་ནི་ཚུལ་ཡང་བྱེད། །གང་གིས་གདོན་ཏེ་གཏོར་འགྱུར་བ། །དེ་ཡི་གསོ་བའི་ཐབས་ཀྱང་བཤད། །ཨ་ཤྭ་གནྡྷ་ཤུ་དག་དང་། །འབྲས་བུ་གསུམ་དང་པུ་ཙེ་ཤེལ། །ཀནྟ་ཀ་རི་བྲི་ཧ་ཏི། །ཀི་རི་ཀར་ནི་དཀར་པོ་དང་། །ནག་ཏ་
མ་ལའི་འབྲས་བུ་དང་། །ཤི་རི་ཤ་ཡི་མེ་ཏོག་དང་། །དེ་བཞིན་གསོ་མ་པ་ཏ་ལི། །པ་ལ་ཤ་ཡི་ལོ་མ་དང་། །བུ་ཚང་རྡོ་དང་རམ་ཉེ་བ། །བ་ལ་ཨ་ཏི་བ་ལ་དང་། །བིལ་བ་ཨརྒ་གཉིས་ཀྱི་རྩ། །དེ་བཞིན་རྩ་བ་ལྔ་པ་གཉིས། །ལོ་ནི་སུམ་ཅུ་ལོན་པ་ཡི། །མར་ནི་
เล่ม ๙๕ · หน้า 137b
རྙིང་བ་གང་ཡིན་པའི། །མར་ནི་ཕུལ་བཞི་ལྡན་པར་བྱ། །འོ་མ་ཕུལ་བཞི་སྦྲང་རྩི་བཞི། །བ་ལང་ཀོ་བ་བསྲེགས་པ་ཡི། །ཕྱེ་མ་ཕུལ་པ་ཞི་གཞུག་པར་བྱ། །སྒོག་སྐྱ་བརྒྱ་ཡང་གཞུག་པར་བྱ། །སྲང་གྲངས་སུམ་ཅུའི་ཨ་རུ་ར། །ཚ་བ་གསུམ་ཡང་དེ་བཞིན་ཏེ། །དེ་བཞིན་
འབྲུ་མར་བླུག་པར་བྱ། །ཤིང་ཀུན་ཡང་ནི་སྲང་གཅིག་དང་། །ལྷན་ཅིག་ཕྱེ་མ་ཞིབ་མོར་བྱ། །གང་ཚེ་ཐམས་ཅད་ཚོགས་གྱུར་ནས། །བ་གཅིན་ཕུལ་བཞི་བླུག་པར་བྱ། །དེ་ནས་མེ་ནི་ཆུང་ངུས་བཙོ། །རླུང་ཅན་དང་ནི་མཁྲིས་པ་ཅན། །བད་ཀན་ཅན་དང་འདུས་པ་ཅན། །
གདོན་གྱི་གཟུགས་ནི་ཐམས་ཅད་ཀྱི། །སྨན་རྣམས་ཀྱང་ནི་འདི་ཡིན་ཏེ། །ཆོ་ག་དང་ནི་འདི་ཉིད་ཀྱིས། །གདོན་དེས་མྱུར་དུ་གཏོང་བར་འགྱུར། །ཅི་སྟེ་དེས་ཀྱང་མ་བཏང་ན། །གང་གིས་གདོན་དེ་གཏོང་འགྱུར་བའི། །ཐབས་གཞན་འདི་ནི་སྦྱར་བར་བྱ། །ལྕགས་སྒྲོག་གིས་
ནི་བཅིང་བྱ་ཞིང་། །སྐྲ་ཡི་ཐག་པས་བཅིང་བར་བྱ། བདུག་པ་སྣ་ཚོགས་ཀྱིས་ཀྱང་བདུག །ལུས་ཀྱང་བསྐུ་ཞིང་བྱུག་པར་བྱ། །དེ་ནས་ཆོ་ག་སྦྱར་བྱ་ཞིང་། །དུས་ལས་ཀྱང་ནི་བཤོལ་མི་བྱ། །དཀྱིལ་འཁོར་ཡངས་ལ་བཞག་ནས་ནི། །ཁོར་ཡུག་ནས་ནི་གཟིར་བར་བྱ། །
གདོན་གྱིས་ཟིན་པ་དབུས་བཞག་སྟེ། །ལྕགས་ཐག་གིས་ནི་གདགས་པར་བྱ། །དེ་ནི་བརྟན་པོས་འཁོར་དུ་གཞུག །བདུག་པས་ལེགས་པར་བདུག་བྱ་ཞིང་། །ལན་གྲངས་བརྒྱར་ནི་ཚང་བར་བྱ། །དེ་བཞིན་ཀོ་བ་ཆུ་དྲོན་དང་། །ཤིང་ཀུན་དང་ནི་སྒོག་སྐྱ་དང་། །བུན་པ་དང་
ནི་བཅའ་བ་དང་། །འདི་དག་ཆུ་དང་སྦྱར་བྱ་ཞིང་། །ཆུ་ཡི་ནང་དུ་ནུབ་པར་བྱ། །མིས་ནི་གདོན་ཟིན་ངལ་ཡང་བསོ། །དེ་ལྟར་ནུབ་པར་བྱས་པ་ཡི། །ཆོ་ག་འདི་དག་གིས་ཀྱང་ནི། །ཅི་སྟེ་གདོན་དེས་མི་གཏོང་ན། །ལས་ལ་མཁས་པས་རབ་བསྒྲིམས་ཏེ། །ཆོ་ག་འདི་ནི་སྦྱར་བར་
བྱ། །བདུག་པ་སྦྱར་བ་འདི་དག་གིས། །མྱོས་པ་ཉིད་དུ་བྱ་བ་སྟེ། །འདིར་ནི་དྲེད་སྤུ་སེན་མོ་དང་། །དེ་བཞིན་སྟག་གི་སེན་མོ་བླང་། །ཤ་ལྱ་ཀ་ཡི་འབྲས་བུ་དང་། །ཁྱི་དང་དོམ་གྱི་རྟུག་པ་དང་། །བ་ལང་བྱི་བའི་པགས་པ་དང་། །བ་ཏུ་ན་ཡི་རྟུག་པ་དང་། །རྔ་མོ་བོང་བུའི་
เล่ม ๙๕ · หน้า 138a
རྟུག་པ་དང་། །སྤུ་དང་རྟ་ཡི་རྨིག་པ་དང་། །དེ་བཞིན་བ་ལང་རྭ་དག་དང་། །སྤྲེའུའི་རུས་པ་སྒོག་སྐྱ་དང་། །དེ་བཞིན་དུ་ནི་སྤེན་མ་རྣམས། །དེ་དག་ཆ་ནི་མཉམ་བྱས་ལ། །ཆུ་དང་ལྷན་ཅིག་བཏག་པར་བྱ། །ལག་ན་རྡོ་རྗེ་ཕྱག་བྱས་ལ། །བདུག་པ་
འདི་ནི་སྦྱར་བྱས་ཏེ། །ཡུད་ཙམ་ངལ་ཡང་བསོ་བྱ་ཞིང་། །བདུག་པས་ཡང་དང་ཡང་དུ་བདུག །དུང་དང་འོ་མ་ཤིང་ཀུན་དང་། །དེ་བཞིན་ཀུ་ཤ་ན་ས་དང་། །ཨ་ནན་ཐལ་ཏྲེས་པུ་ཤེལ་ཙེ། །ངལ་བསོ་དེ་ལ་ཕན་པ་སྟེ། །སྣར་ཡང་བླུགས་ཤིང་འཐུང་དུ་གཞུག། །ལེགས་
པར་ཡང་ནི་བླུག་པར་བྱ། །ཕན་པར་འདོད་པས་གདོན་ཟིན་གྱི། །ལུས་ལ་ཡང་ནི་བསྐུ་བར་བྱ། །རྒྱམ་ཚ་དང་ནི་བཅའ་སྒ་དང་། །བྱི་ཏང་ཀ་དང་ཚ་བ་གསུམ། །བ་བླ་དང་ནི་རུ་རྟ་རྣམས། །ཆ་མཉམ་པར་ནི་བསྲེག་པར་བྱ། །ར་ཡི་གཅིན་དང་བཏག་བྱ་སྟེ། །
མིག་བསྐུས་ནས་ནི་གདོན་ཀུན་སེལ། །སྣར་བླུགས་ན་ཡང་གདོན་ཀུན་སེལ། །ནིར་གུན་ད་དང་བྱེའུ་རུག་དང་། །ལུང་ཏང་ཡུངས་ཀར་པི་པི་ལིང་། །དེ་དག་མི་བཟད་གདོན་རྣམས་ཀྱིས། །ཟིན་པ་ལ་ནི་སྣར་ཡང་བླུགས། །བཀྲུ་སྨན་ཡང་ནི་གཏང་བྱ་ཞིང་། །སྨན་གྱིས་མིག་
བསྐུས་ལུས་ཀྱང་བྱུག །དེ་ལྟ་བུ་ནི་བྱས་ན་ཡང་། །ཅི་སྟེ་གདོན་ནི་མི་གཏོང་ན། །གང་གིས་གདོན་དེ་གཏོང་འགྱུར་བའི། །ཐབས་གཞན་འདི་ནི་སྦྱར་བར་བྱ། །སྡོང་ཆེན་ལ་ནི་གདགས་བྱ་ཞིང་། །སྒྲེན་མོར་ཤིན་ཏུ་སྐྲག་པར་བྱ། །ཐག་པ་སྦོམ་པོས་བཅིང་བྱ་ཞིང་། །ལུས་
ནི་ཤིན་ཏུ་བསྒྲིམ་པར་བྱ། །ཁྲོན་པ་ནས་ནི་བཅུས་པའི་ཆུ། །རབ་ཏུ་ཡང་ནི་གཏོང་བར་བྱ། །གདོན་པ་དེས་ནི་རབ་ཟིན་ནས། །མི་བཟད་པས་ནི་ལུས་ཀྱང་བསྐུ། །བདུག་པ་སྦྱར་བའི་ལུས་རིམས་ཀྱིས། །གདོན་དེ་མྱུར་དུ་མེད་པར་འགྱུར། །ངལ་བསོ་བ་ཡང་བྱ་བ་སྟེ། །
ཤུ་དག་ནིམ་པའི་ལོ་མ་དང་། །པ་དག་དང་ནི་པུ་ཙེ་ཤེལ། །ཀ་པིད་ཏ་ཡི་ལོ་མ་དང་། །སྒོག་སྐྱ་སྦྲུལ་ལྤགས་རྗེས་པས་བསྲེ། །འདི་ནི་ཞི་བར་བྱེད་པར་བཤད། །ཆོ་ག་འདི་དག་གིས་ཀྱང་ནི། །གདོན་དེས་ཅི་སྟེ་མི་གཏོང་ན། །གང་གིས་གདོན་དེ་གཏོང་འགྱུར་བའི། །
เล่ม ๙๕ · หน้า 138b
ཐབས་གཞན་འདི་ནི་སྦྱར་བར་བྱ། །འདི་ལ་ཐེ་ཚོམ་མེད་པར་ནི། །མི་བཟད་གསང་སྔགས་སྦྱར་བར་བྱ། །རྨུགས་བྱེད་ལྕགས་ཅན་སོ་ཅན་དང་། །མཚན་སྦྱིན་བདུད་རྩི་ཐབ་སྦྱོར་སོགས། །ཚོགས་རྣམས་སོ་སོའི་ལས་ཀྱིས་གཞོམ། །བཅིངས་ནས་ཀརྐ་ཏ་ཀ་ཡི། །
བདུག་པ་མི་བཟད་བདུག་བྱ་སྟེ། །མགོ་དང་ལྐོག་མ་དེ་བཞིན་དབུས། །ཕྲག་པ་གཉིས་ཀྱང་ངེས་པར་བདུག །དྲག་པོའི་ལས་ཀྱིས་དྲག་པོ་རྣམས། །སྐྲག་པར་བྱས་ནས་གཏོང་བར་འགྱུར། །ཡིད་ནི་འབྱུང་བར་བྱེད་པ་ཡི། །གསང་སྔགས་སྦྱར་སྨན་ལྡན་དེ་བཞིན། །ཡུངས་
ཀར་རེག་བདུག་དྲག་པོ་ཡིས། །བློ་ངན་དེ་ནི་སྐྲག་པར་བྱ། །བློ་ཅན་རྒྱུད་ལ་འཇིགས་མེད་ཅིང་། །དེ་ཉིད་རྟོགས་པས་གཏོང་དུ་གཞུག །ཆོ་ག་འདི་དག་ཉིད་ཀྱིས་ཀྱང་། །ཅི་སྟེ་གདོན་དེས་མི་གཏོང་ན། །གདོན་རྣམས་རབ་ཏུ་ཚར་གཅོད་པའི། །ཐབས་གཞན་འདི་ནི་སྦྱར་བར་
བྱ། །ངེས་པར་ཡང་ནི་ཁྱད་པར་དུ། །གསང་སྔགས་ཀྱི་ནི་སྦྱོར་བར་བྱ། །ལག་ན་རྡོ་རྗེས་བྱས་པ་ཡིས། །གཞིག་པའི་ཐབས་ཀྱང་རབ་ཏུ་བྱ། །གཙང་སྦྲ་བྱ་ཞིང་ཞག་ལྔའི་བར། །གསོ་སྦྱོང་དག་ནི་ལྡན་པར་བྱ། །གཙང་མས་དུར་ཁྲོད་གཙང་མའི་དབུས། །དཀྱིལ་འཁོར་
ཡང་ནི་བྲི་བར་བྱ། །རྫས་བཞི་སྦྱར་བ་གང་ཡིན་པ། །དེ་ཡང་ལེགས་པར་བཤད་པར་བྱ། །ལུང་ཏང་ཕྲེང་ཡང་དེ་བཞིན་དུ། །ཤིང་ཤ་པ་དང་སེང་ལྡེང་དང་། །བ་རུ་ར་དང་རྒྱ་སྲན་དང་། །ཀ་ཀུ་བྷ་དང་ཨརྫུ་ན། །ཐང་ཤིང་ཡམ་སྲེག་ཤིང་རྣམས་བསྡུ། །ཆུ་ཡི་བུམ་པ་
བཞི་དག་ཀྱང་། །ཁྲག་གིས་སུ་ནི་གཏོར་བར་བྱ། །ཤ་བཙོས་པ་དང་རྗེན་པ་དང་། །ཏིལ་ཟན་ལ་ཕུག་སྦྲང་རྩི་དང་། །མར་རྙིང་དག་གི་ཚོགས་རྣམས་དང་། །ཡུངས་ཀར་དག་ནི་བྲེ་བཞི་ཡི། །ཚོགས་རྣམས་དང་ནི་བ་བླ་དང་། །ཨ་ཏི་པ་ལའང་དེ་བཞིན་ནོ། །
དྲི་ཀུན་ཡང་ནི་དེ་བཞིན་ཏེ། །སིདྷ་དང་སྟྲའི་མེ་ཏོག་དང་། །ས་ཧ་དེ་བའང་གཞུག་པར་བྱ། །གསེར་དག་དང་ནི་དངུལ་རྣམས་དང་། །འབྲུ་ཀུན་ཡང་ནི་གཞུག་པར་བྱ། །ཁ་དོག་དག་ཀྱང་ངན་པར་བྱ། །ཁྲག་གིས་ཀྱང་ནི་བསྲེག་པར་བྱ། །དྲི་དང་འབྲས་བུ་མེ་ཏོག་
เล่ม ๙๕ · หน้า 139a
ཕྲེང་། །ཚོན་རྩི་བཏགས་དང་མ་བཏགས་དང་། །ཨ་ཀ་རུ་ནི་མཉམས་སྤོས། །ཏ་མེ་རུ་དང་གུ་གུལ་མར། །པི་ཙུ་མ་རྔའི་ལི་མ་དང་། །དེ་བཞིན་སྐུད་པ་ཤུས་པ་སྟེ། །མིག་སྨན་གྱི་ནི་རིལ་བུ་དང་། །དེ་བཞིན་སྣར་ཡང་བླུག་པར་བྱ། །ལུས་ལ་ཡང་
ནི་བསྐུ་བར་བྱ། །དེ་ནས་ཁྲུས་ཀྱང་བྱ་བ་སྟེ། །ཞི་བའི་ལས་ཀྱི་ཆོ་གས་ཀྱང་། །གདོན་རྣམས་དྲག་ཏུ་ཚར་གཅོད་པ། །དངོས་གྲུབ་མཆོག་འདོད་གང་ཡིན་པས། །རབ་ཏུ་བསྒྲིམས་ཏེ་བྱ་བ་ཡིན། །འབྱུང་པོའི་བདག་དང་འབྱུང་པོ་ཡི། །གོ་ཆ་དེ་ལ་བཤད་པར་བྱ། །
དཀྱིལ་འཁོར་ཕུན་སུམ་ཚོགས་པ་དེར། །ས་བོན་ཐམས་ཅད་བཀོད་པ་ཡི། །དཀྱིལ་འཁོར་ཤེས་རབ་ཅན་གྱིས་བྲིས། །འབྱུང་པོའི་བདག་པོ་ཆུང་མར་བྱས། །མཁས་པ་ཡིས་ནི་གཞག་པར་བྱ། །སོ་ཅན་དང་ནི་ལྕགས་ཅན་དང་། །དེ་བཞིན་རྨུགས་བྱེད་རྫོགས་ལྡན་
རྣམས། །དེ་དག་ཕྱོགས་རྣམས་གཞག་པར་བྱ། །ཀུན་ནས་ལག་ན་བདུག་པ་ཐོགས། །ལྷོ་ཕྱོགས་ཀྱི་ནི་ངོས་སུ་ཡང་། །དགའ་བྱེད་གྲོང་ཁྱེར་འོད་དང་བཅས། །དམ་པ་བརྒྱད་པོ་གང་བཤད་བྲིས། །ཁོ་ར་ཁོར་ཡུག་དག་ནས་ཀྱང་། །ཡམ་སྲེག་ཤིང་ནི་དགྲམ་པར་
བྱ། །ནང་དུ་བཀོད་པ་དེ་དག་ཀྱང་། །བསམ་པར་བྱ་ཞིང་ཤེས་པར་བྱ། །ངོས་རྣམས་བཀྲ་ཤིས་འབར་བ་དང་། །མ་རུངས་གདོན་ནི་མཁས་པས་བྲི། །ངེས་པར་ཡང་ནི་མཆོད་བྱས་ནས། །མེ་ཏོག་ཕྲེང་དང་དྲིས་རྒྱས་པས། །ལག་ན་རྡོ་རྗེས་ལེགས་བཤད་པའི། །ལས་
རྣམས་ཀྱང་ནི་སྦྱར་བྱ་ཞིང་། །རྒྱུད་མཐོང་བ་ཡི་ལས་ཀྱིས་ནི། །མ་རུངས་གདོན་རྣམས་དགུག་པར་བྱ། །དཀྱིལ་འཁོར་འདི་ནི་འབྱུང་རྣམས་ཀྱི། །འབྱུང་པོའི་རིགས་ནི་བརླག་པར་འགྱུར། །དྲག་པོ་ཆེན་པོ་མི་བཟད་པ། །ཆོས་ལུགས་མི་བཟད་གང་ཡིན་པ། །དེ་དག་
ང་ཡི་དཀྱིལ་འཁོར་གཞུག །དྲག་པོ་གཡོ་དང་མི་གཡོ་བ། །དྲག་ཏུ་འཁྲུལ་ཅིང་སེམས་ཅན་རྣམས། །ང་ཡི་དཀྱིལ་འཁོར་ནང་དུ་གཞུག །དེ་མཐོང་སེམས་ཅན་འཆི་བར་འགྱུར། །གདོན་རྣམས་ཀྱི་ནི་དཀྱིལ་འཁོར་དུ། །འཐབ་པ་དྲག་པ་དེར་གཞུག་ཅིང་། །ཤིན་
เล่ม ๙๕ · หน้า 139b
ཏུ་ཚར་ཡང་གཅད་པར་བྱ། །རིག་པའི་མཆོག་གམ་སྤྱན་གྱིས་ནི། །འཇིག་རྟེན་དཀྱིལ་འཁོར་བྲི་བར་བྱ། །གདོན་གྱི་དཀྱིལ་འཁོར་རྫོགས་སོ།། །།དེ་ནས་གདོན་སྐྲག་པའི་མཚན་མ་རྣམས་དང་། མེད་པར་འགྱུར་བའི་མཚན་མ་རྣམས་བལྟ་བར་བྱ་སྟེ།
འདི་ནི་བཏང་བར་མ་གྱུར་ཅིང་། །སྐྲག་པའི་མཚན་མར་ཤེས་པར་བྱ། །ལུས་ཀུན་ཡང་ནི་འདར་བ་དང་། །མགོ་བོ་ཡང་ནི་འདར་བར་བྱེད། །དབུགས་ཀྱི་ཤུགས་ཀྱང་འབྱིན་པར་བྱེད། །དེ་ནི་སྐྲག་པའི་མཚན་མར་ཤེས། །ཤིན་ཏུ་དགོད་པར་བྱེད་པ་དང་། །ཡང་དང་
ཡང་དུ་ཁྲོ་བར་བྱེད། །ཚིག་ཀྱང་ཤིན་ཏུ་འཛིན་པར་བྱེད། །དེ་ནི་སྐྲག་པའི་མཚན་མར་ཤེས། །མཐོང་ན་ཡང་ནི་ཞི་བར་འགྱུར། །ཞི་བའི་ཚུལ་གྱིས་བལྟ་བ་དང་། །བདུག་པ་ཡང་ནི་སྣོམ་པར་བྱེད། །ཧཱུྃ་ཞེས་བྱ་བས་སྡོད་པར་འགྱུར། །དེ་ནི་སྐྲག་པའི་མཚན་མར་ཤེས། །
ངལ་ཞིང་རིམས་ནད་འདེབས་གྱུར་པ། །དེ་ནི་མེད་པའི་མཚན་མར་ཤེས། །སྨྲས་པས་རྟོགས་པ་གང་ཡིན་དང་། །ཐམས་ཅད་མྱུར་དུ་འཛིན་པ་དང་། །ཡང་ན་ཤིན་ཏུ་འདར་བར་འགྱུར། །དེ་ནི་མེད་པའི་མཚན་མར་ཤེས། །གང་ཞིག་མཐོང་ན་རང་དབང་དང་། །སླར་ནི་
རང་དགར་འགྱུར་བ་དང་། །མི་ཡི་ཚུལ་ནི་སྤྱོད་གྱུར་པ། །དེ་ནི་མེད་པའི་མཚན་མར་ཤེས། །འཇིགས་བཞིན་འདྲེན་པ་གང་ཡིན་དང་། །ཞི་བའི་ཚུལ་གྱིས་བལྟ་བ་དང་། །མི་ནི་ངོ་མཚར་ལྡན་གྱུར་པ། །དེ་ནི་མེད་པའི་མཚན་མར་ཤེས། །དེ་བཞིན་འདུན་གྱིས་མི་ཕྱོགས་
ལ། །དྲིས་ན་ཡང་ནི་སྨྲ་མི་བྱེད། །རིམས་ནད་བྱང་ཞིང་རྨོངས་མེད་པ། །དེ་ནི་མེད་པའི་མཚན་མར་ཤེས། །ཁྱོད་ཀྱིས་ང་ལ་གང་དྲིས་པ། །དེ་ཀུན་ཁྱོད་ལ་བཤད་པར་བྱ། །བཅོམ་ལྡན་ཇི་ལྟར་གདོན་འབྲོས་དང་། །མི་ནི་འབྲོས་ཚུལ་
ཅི་འདྲ་དང་། །གནས་པའི་ཚུལ་ནི་ཅི་འདྲ་དང་། །བྱ་བ་བསྒྲུབ་པར་ཇི་ལྟར་འགྱུར། །ཇི་ལྟར་མི་འཇོམས་མཉན་པར་འཚལ། །ལག་ན་རྡོ་རྗེ་སྟོབས་ཆེན་གྱིས། །དེ་ཡི་ཚིག་དེ་ཐོས་གྱུར་ནས། །བདུད་རྩི་ཐབ་སྦྱོར་ཁྱོད་ཀྱིས་སུ། །ང་ལ་དྲིས་པ་གང་ཡིན་པ། །གདོན་རྣམས་ཉན་པར་འགྱུར་པ་ཡི། །
เล่ม ๙๕ · หน้า 140a
ལས་དེ་སོ་སོར་ཅི་རིགས་ཉོན། །དཀྱིལ་འཁོར་དག་ནི་བཞི་མདོ་དང་། །དེ་བཞིན་ཁྱིམ་དང་བ་ལང་ལྷས། །དུར་ཁྲོད་དང་ནི་ཤིང་གཅིག་དྲུང་། །དེ་ནི་མཁས་ཤིང་འཇིགས་མེད་པས། །གདོན་དེ་གཏོང་དུ་གཞུག་པར་བྱ། །ཐོག་མར་ཆོ་གར་བྱ་བ་ནི། །
ཞག་གསུམ་ཡང་ན་ཞག་ལྔའམ། །ཞག་བདུན་བར་དུ་ཅུང་ཟད་བསྟེན། །ཡང་ན་ཟླ་བ་ཕྱེད་ཀྱི་བར། །དེ་བཞིན་ཞག་ནི་ཉི་ཤུ་གཅིག། །རིག་སྔགས་སྟོབས་ནི་ཆེ་བ་དང་། །བདག་ཉིད་རིག་སྔགས་གསང་བ་ཡི། །རིག་སྔགས་དེ་བཞིན་ཤེས་ནས་ནི། །ཅི་ནས་དེ་ནི་དབང་
འགྱུར་ཞིང་། །ཉན་དུ་ཡང་ནི་གཞུག་པར་བྱ། །ཕྱེ་མ་རེད་ཀྱི་ནི་དུས་མཚམས་སུ། །བབ་ན་བདུད་རྩི་ཐབ་སྦྱོར་གྱིས། །འབྱུང་པོ་རྣམས་ཀྱི་དཀྱིལ་འཁོར་ནི། །ཁྲུ་གསུམ་གྲུ་བཞི་མཛེས་པ་བྲི། །དེས་ནི་ཐེ་ཚོམ་མེད་པར་ཡང་། །གསང་བ་བདག་ནི་ཉན་པར་འགྱུར། །བདག་
ཉིད་འབྱོར་བར་གང་འདོད་པས། །གསང་བ་ཡང་ནི་འདིས་བྱ་ཞིང་། །གསང་སྔགས་འདི་ཡིས་འབྱུང་པོ་རྣམས། །ཉན་པར་འགྱུར་བ་ཞེས་བྱ་བ། །འདི་ནི་མཁས་པས་བྱེད་དུ་གཞུག །ལོ་ནི་བཅུ་གཉིས་དག་ཏུ་ཡང་། །མ་བསྙེན་པ་ལ་སྦྱིན་མི་བྱ། །སྟོང་སྙེད་མ་བྱིན་སྦྱིན་མི་བྱ། །
སྡིག་པའི་ཚུལ་ཅན་སྦྱིན་མི་བྱ། །གང་གིས་གདོན་ནི་ཉན་པར་འགྱུར། །གང་གིས་གསང་སྔགས་དབང་འགྱུར་བ། །ཕྱག་རྒྱའི་ཆོ་ག་ངེས་པ་ཡིས། །གསང་སྔགས་དཀྱིལ་འཁོར་འདི་ཡང་བཤད། །ཕྱག་རྒྱ་ཚོགས་དང་བཅས་བཏང་ཞིང་། །གསང་བའི་ཕྱག་རྒྱས་བཏང་བྱས་ནས། །བརྟགས་ནས་
རྟག་ཏུ་འཛིན་པར་བྱེད། །གསོད་པ་བྱས་པའི་ཕྱག་རྒྱ་ཡི། །དཀྱིལ་འཁོར་མཆོག་ཏུ་གསང་བ་འདི། །གསང་བ་པ་རྣམས་གཞིག་པ་དང་། །ཆོ་ག་བསྒྲུབ་ཕྱིར་བཤད་པར་བྱ། །དེ་ནས་བཅོམ་ལྡན་འདས་ལག་ན་རྡོ་རྗེ་རྣལ་འབྱོར་དམ་པ་ལ་གནས་ནས་གདོན་ཉན་པར་འགྱུར་
བའི་ཕྱག་རྒྱའི་དཀྱིལ་འཁོར་འདི་བཤད་དེ། ཁྲུ་གསུམ་པ་ཚོན་སྣ་ལྔའི་ཕྱེ་མས་དབུས་སུ་བཅོམ་ལྡན་འདས་ལག་ན་རྡོ་རྗེ་བྲིའོ། །དེ་ནས་ཕྱག་རྒྱ་དགོད་པར་བྱ་སྟེ། ཤར་ཕྱོགས་ཀྱི་སྒོ་ལོགས་སུ་ནི་རྒྱལ་བ་ཞེས་བྱ་བའི་ཕྱག་རྒྱ་དང་། རྣམ་པར་རྒྱལ་བ་དང་། རྡོ་རྗེ་མཚན་མ་
เล่ม ๙๕ · หน้า 140b
དང་། རྡོ་རྗེའི་མཚན་རྟགས་རྣམས་དགོད་དོ། །ལྷོ་ཕྱོགས་སུ་ནི་བཀྲ་ཤིས་དང་། ཤིན་ཏུ་བཀྲ་ཤིས་དང་། ཀླུ་ལག་དང་། པདྨའི་མཚན་རྣམས་དགོད་དོ། །བྱང་ཕྱོགས་སུ་ནི་འཚེ་བ་དང་། པདྨའི་ཕྲེང་བ་དང་། གཡུང་དྲུང་རིས་དང་། མདུང་རྩེ་གསུམ་པ་དགོད་དོ། །
ནུབ་ཕྱོགས་སུ་ནི་མདུང་ཐུང་དང་། རྡོ་རྗེ་དང་། ཞགས་པ་དང་། རལ་གྲི་རྣམས་དགོད་དོ། །གདོན་གྱི་དབྱུག་པ་ཡང་གཡོན་ལོགས་སུ་བཞག་གོ། །འཁོར་ལོ་ནི་གཡས་ཕྱོགས་སུ་བཞག་གོ། །དེ་ནས་རིག་སྔགས་འཆང་གིས་ལྷ་བཤོས་རྣམ་པ་སྣ་ཚོགས་དབུལ་ཞིང་དྲི་དང་།
མེ་ཏོག་རྣམས་ཀྱང་འབུལ་ལོ། །རིགས་སྔགས་ཀྱང་ལན་བརྒྱད་སྟོང་བཟླས་བརྗོད་བྱའོ། །གདོན་གྱིས་ཟིན་པ་ཡང་བུམ་པའི་ཆུས་ཁྲུས་བྱེད་དུ་གཞུག་གོ། །དེ་ནས་གདོན་གྱིས་གཏོང་བར་འགྱུར་བའི་རིག་སྔགས་བཀླག་པར་བྱའོ། །དེས་ན་གདོན་གྱིས་རིག་སྔགས་འཆང་ཇི་སྐད་
ཟེར་བ་བཞིན་བྱེད་པར་འགྱུར་ཏེ། སོང་ཤིག་སོང་ཤིག་ཅེས་བྱས་ན་འགྲོ་བར་འགྱུར་རོ། །དེ་ནས་གདོན་བཀོལ་བར་འདོད་ན་གདོན་གང་དང་གང་དུ་དགོས་པ་དེ་ཐམས་ཅད་བྱེད་པར་འགྱུར་རོ། །ལྷ་རྣམས་གསང་བ་དང་། གསང་ཆེན་དང་། གདོན་ཉན་པར་འགྱུར་བའི་ཕྱག་རྒྱའི་
ཚོགས་ཀྱིས་ཕྱག་རྒྱའི་དཀྱིལ་འཁོར་ཐམས་ཅད་ངས་པ་ཤད་ཟིན་ཏོ། །ཕྱག་རྒྱ་རྣམས་ཀྱི་ཅུང་ཟད་དཔེ་ཙམ་དུ་བྱ་བ་དེ་ངས་བཤད་པར་བྱ་སྟེ། རིག་པ་མཆོག་གི་ཆོ་ག་རྒྱས་པ་ཆེན་པོའི་རྒྱུད་ཕྱི་མ་དང་བཅས་པ། ཕྱག་རྒྱ་རྣམས་ཀྱིས་བཏབ་པ་འདི་འཆང་བ་གང་ཡིན་
པ་དང་། ཀློག་པ་དང་། ཕྱག་འཚལ་བ་གང་ཡིན་པ་དེ་ལའང་ལྷ་རྣམས་ཡིད་དགའ་བར་འགྱུར་ན་བཅོམ་ལྡན་འདས་རིག་སྔགས་ཀྱི་རྒྱལ་པོ་སྤྱན་དང་བཅས་པ་འདི་འཆང་བའམ། ཕྱག་འཚལ་བལྟ་ཅི་སྨོས་ཏེ། དེའི་མདུན་དུ་གདོན་ཐམས་ཅད་སྙིང་འདར་ཞིང་མྱུར་དུ་
འཁོད་པར་འགྱུར་རོ། །བཅོམ་ལྡན་འདས་རིག་པ་མཆོག་གི་ཆོ་ག་རྒྱས་པ་ཆེན་པོ་བཅོམ་ལྡན་འདས་མ་སྤྱན་དང་བཅས་པ་གང་ཡིན་པ་ངས་བཤད་ཟིན་ཏོ། །སྙིང་པོའི་རྒྱལ་པོའི་ལས་གང་གིས་ཆོ་ག་རྒྱས་པ་ཐམས་ཅད་འགྲུབ་པར་འགྱུར་བའམ། འཇོམས་པར་བྱེད་པ་ཡང་ངས་
เล่ม ๙๕ · หน้า 141a
བཤད་པར་བྱ་སྟེ། སྙིང་པོའི་རྒྱལ་པོ་བཅོམ་ལྡན་འདས་མ་དང་བཅས་པ། རྒྱུད་ཕྱི་མ་དང་ལྡན་པ་ལ་གནས་པ་དང་། འཆང་བ་གང་ཡིན་པ་དེ་ལ་ནི་ལག་ན་རྡོ་རྗེས་བཤད་པ་བཞིན་དུ་རིང་པོ་མི་ཐོགས་པར་དངོས་གྲུབ་འགྲུབ་པར་འགྱུར་རོ། །གང་གིས་དངོས་གྲུབ་
འགྲུབ་པར་འགྱུར་བ་དེ་ཡང་བཤད་པར་བྱ་སྟེ། ཚེས་གྲངས་འདམ་མི་དགོས། སྨྱུང་བ་ཡང་བྱ་མི་དགོས་པར་བ་ལང་གི་ལྕི་བས་དཀྱིལ་འཁོར་སྐྱོང་ནུལ་གྱིས་བྱུགས་ལ། དེར་ཙནྡན་དམར་པོ་ལས་བྱས་པའི་རྡོ་རྗེ་བཞག་ནས་དེའི་མདུན་དུ་མིའི་གཟུགས་བྱས་ཏེ་སྙིང་པོའི་རྒྱལ་
པོ་བཟླས་བརྗོད་བྱེད་ཅིང་བ་ཀ་ལའི་མེ་ཏོག་གིས་བསྣུན་ན་ཆོ་ག་རྒྱས་པའི་གདོན་བཅོམ་པར་འགྱུར་རོ། །ཆོ་ག་དེ་ཉིད་ཀྱིས་སྣ་མའི་མེ་ཏོག་གིས་བསྣུན་ན་ཆོ་ག་རྒྱས་པ་འགྲུབ་པར་འགྱུར་ཏེ་དམ་པ་སྦྱིན་པར་འགྱུར་རོ། །ཟླ་བ་གཅིག་གི་བར་དུ་སློང་མོའི་ཟས་སམ། །འོ་མ་དང་ཕྱེ་མའི་
འདག་གུ་ཟ་ཞིང་མཆོད་རྟེན་དྲུང་དུ་སོང་ལ་སྙིང་པོའི་རྒྱལ་པོ་བཟླས་བརྗོད་བྱས་ན་གང་བསྒྲུབ་པ་དེ་ལ་འབྲས་བུ་ཡོད་པར་འགྱུར་རོ། །དེ་ནས་རིག་སྔགས་འཆང་གིས་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ། གོས་གཙང་མ་བགོས་ནས་མཆོད་རྟེན་གྱི་ཁུང་བུར་
སོང་ལ་དྲི་དང་། མེ་ཏོག་དང་། བདུག་པས་བརྒྱན་ནས་ཀུ་ཤའི་སྟན་གཉིས་བཞག་སྟེ། རིག་སྔགས་འཆང་ཤར་ཕྱོགས་སུ་ཁ་བལྟ་ཞིང་རིག་སྔགས་འཆང་གཅིག་ནུབ་ཕྱོགས་སུ་ཁ་བལྟས་ཏེ་འདུག་ལ་དེ་ནས་རིག་སྔགས་འཆང་གི་ལག་པས་རིག་སྔགས་འཆང་གི་ལག་པ་
བཟུང་ནས། རིག་སྔགས་ཀྱི་རྒྱལ་པོ་ལན་བརྒྱད་སྟོང་བཟླས་བརྗོད་བྱའོ། །དེ་ནས་འཕགས་པ་ལག་པ་སྦྱར་བའི་ནང་ནས་འོད་ཟེར་འབྱུང་བར་འགྱུར་རོ། །འོད་ཟེར་དེ་ཡང་རྣམ་པ་གཉིས་སུ་འགྱུར་ཏེ། རིག་སྔགས་འཆང་ལ་གཡས་ཕྱོགས་སུ་བསྐོར་ནས་མི་སྣང་བར་གྱུར་
པ་དང་། རིག་སྔགས་འཆང་གི་མགོ་བོ་ལ་གཙུག་གི་ནོར་བུར་འགྱུར་ཏེ། དེ་མགོ་ལ་འདུག་པས་རིག་སྔགས་འཆང་གི་འཁོར་ལོས་སྒྱུར་བར་གྱུར་ཏེ། རིག་སྔགས་འཆང་ཐམས་ཅད་ཀྱིས་མི་སོད་ལ་འདོད་དགུར་སྒྱུར་བའི་གཟུགས་ཅན་དུ་འགྱུར་ཞིང་བསྐལ་པར་གནས་
เล่ม ๙๕ · หน้า 141b
པ་དང་། སྲེད་མེད་ཀྱི་བུའི་སྟོབས་ཕྱེད་དང་ལྡན་པར་འགྱུར་ཏེ། དེ་གཉིས་ཀ་ཡང་སྲེད་མེད་ཀྱི་བུའི་སྟོབས་ཕྱེད་དང་ལྡན་པར་འགྱུར་ཞིང་དཔག་ཚད་ཉིས་སྟོང་དུ་གྱེན་དུ་འཕགས་པར་འགྱུར་རོ། །ཟླ་བ་ཕྱེད་ཀྱི་བར་དུ་ཟས་སུ་འོ་མ་དང་ཕྱེ་མའི་འདག་གུ་ལ་རིག་སྔགས་བཟླས་བརྗོད་
བྱས་ལ་དེ་ནས་མར་གྱི་ངོ་ཞག་བཅུ་བཞི་ལ་ལྷ་ཆེན་པོའི་གནས་སུ་སོང་སྟེ། རིག་སྔགས་ལན་བརྒྱད་སྟོང་བཟླས་བརྗོད་བྱའོ། །དེ་ནས་རིག་སྔགས་འཆང་ཟླ་བ་ཉ་ལ་ནྱ་གྲོ་དྷའི་ཤིང་གཅིག་འགྲེང་གི་དྲུང་དུ་སོང་ལ་དེའི་དྲུང་དུ་ཁྲུ་ལྔ་ཙམ་བྱི་དོར་བྱས་ནས་ཕོའི་མིང་དང་ལྡན་པའི་ཤིང་
ལས་མདུང་བྱས་ཏེ། དྲི་དང་། མེ་ཏོག་དང་བདུག་པོས་བརྒྱན་ལ། བཅོམ་ལྡན་འདས་མ་དང་རིག་སྔགས་ཀྱི་རྒྱལ་པོས་ལས་བྱས་ཏེ། དེ་ནས་རིག་སྔགས་འཆང་དེ་ནྱ་གྲོ་དྷའི་ཤིང་ལ་འཛེགས་ལ། རིག་སྔགས་ལན་བརྒྱད་སྟོང་བཟླས་བརྗོད་བྱས་ཏེ། བཟླས་བརྗོད་བྱེད་བཞིན་དུ་མདུང་
གི་སྟེང་དུ་བདག་ཉིད་མཆོངས་ནས་དེས་རེག་མ་ཐག་ཏུ་ལྕང་ལོ་འཁྱིལ་ཞིང་ལོ་བཅུ་དྲུག་ལོན་པའི་གཟུགས་ཅན་དུ་འགྱུར་ཏེ། རིག་སྔགས་འཆང་ཐམས་ཅད་ཀྱིས་མི་སོད་ལ། ཚེ་ལོ་ཁྲི་ཉིས་སྟོང་ཐུབ་པར་འགྱུར་ཏེ། ལུས་ཞིག་པའི་ཚེ་ཡང་འཕགས་པ་ལག་ན་རྡོ་རྗེ་མཐོང་བར་འགྱུར་
རོ། །ཡུམ་དང་སྙིང་པོའི་རྒྱལ་པོ་འཆང་བ་གང་ཡིན་པ་དེ་ལ་ནི་ལྷ་རྣམས་ཡིད་དགའ་བས་དངོས་གྲུབ་སྦྱིན་པར་འགྱུར་རོ། །ཆོ་ག་རྒྱས་པ་རྒྱུད་ཕྱི་མ་དང་བཅས་པ་འདི་འཆང་བའམ། ཀློག་པ་གང་ཡིན་པ་དེ་དག་ལ་ནི་ལྷ་ཐམས་ཅད་སྲུང་བ་དང་། སྐྱོབ་པ་དང་། སྦེད་པར་འགྱུར་ཏེ།
སྡིག་པ་ཐམས་ཅད་ལས་ཀྱང་གྲོལ་བར་འགྱུར་རོ། །སྙིང་པོའི་རྒྱལ་པོ་འཆང་བ་གང་ཡིན་པས་ནི་ལག་ན་རྡོ་རྗེས་བཤད་པ་བཞིན་དུ་རིང་པོ་མི་ཐོགས་པར་དངོས་གྲུབ་ཐོབ་པར་འགྱུར་རོ། །གདོན་ཐམས་ཅད་ཀྱང་འདི་ཉིད་ཀྱིས་དབང་དུ་བྱའོ། །གདོན་འཁྲུགས་པར་བྱ་འདོད་ན་ན་ལེ་ཤམ་
བླངས་ལ་ཀ་ན་ཀའི་འབྲས་བུའི་ནང་དུ་བཙོས་ནས་ན་ལེ་ཤམ་དེས་གདོན་ལ་བདུགས་ན་སྨྱོ་བར་འགྱུར་རོ། །གུ་གུལ་གྱི་བདུག་པའམ་གཏོར་མས་གཏོང་བར་འགྱུར་རོ། །མིག་འཁྲུལ་བར་བྱ་བར་འདོད་ན་བ་བླ་བླངས་ཏེ་རྩངས་པ་ཟར་བཅུག་སྟེ། བ་བླ་རྩངས་པའི་ཁ་ནས་བྱུང་བ་
เล่ม ๙๕ · หน้า 142a
བླངས་ནས་མིག་སྔར་བསྟན་ན་མིག་འཁྲུལ་བར་འགྱུར་ཏེ། །མར་དང་སྦྲང་རྩིས་བསྐུས་ན་སླར་འཚོ་བར་འགྱུར་རོ། །གདོན་གྱི་ཀླད་པ་ན་བར་བྱ་ན་བ་ལ་ཏ་ཀའི་འབྲས་བུ་བླངས་ལ་ཕྱེ་མར་བཏགས་ཏེ་མེ་ཏོག་དང་ལྷན་ཅིག་ཏུ་སྣོམ་དུ་བཅུག་ན་བསྣམས་མ་ཐག་ཏུ་ཀླད་
པའི་ནད་ཀྱིས་འདེབས་པར་འགྱུར་རོ། །གུ་གུལ་གྱི་བདུག་པའམ་གཏོར་མས་གཏོང་བར་འགྱུར་རོ། །དེ་ནས་གདོན་མཁྲིས་པའི་རིམས་ཀྱིས་འདེབས་པར་འདོད་ན་ཨ་ག་ནི་མ་སྡུ་བ་གཅིན་བགོས་ལ། བགོས་ནས་ཕྱེ་མ་ཞིབ་མོར་བཏགས་ཏེ་མེ་ཏོག་དང་ལྷན་ཅིག་ཏུ་སྣོམ་དུ་བཅུག་ན་
བསྣམས་མ་ཐག་ཏུ་མཁྲིས་པའི་རིམས་གྱིས་འདེབས་པར་འགྱུར་ཏེ། གུ་གུལ་གྱི་བདུག་པ་དང་། གཏོར་མས་གཏོང་བར་འགྱུར་རོ། །པྲི་ཏི་པི་པི་ཏ་དང་། ཙནྡན་དམར་པོ་དང་། མིའི་ཐོད་པ་ལྷན་ཅིག་ཏུ་སྦྱར་ཏེ་འཐུང་དུ་བཅུག་ན་གདོན་མྱོས་པར་འགྱུར་ཏེ། མར་དང་། སྦྲང་
རྩིའམ་གཏོར་མས་གཏོང་བར་འགྱུར་རོ། །ཏུ་མ་པའི་རྩ་བ་དང་། ཀ་ཤ་ཏ་ཀི་དང་། ཀ་ན་ཀའི་འབྲས་བུ་ལྷན་ཅིག་ཏུ་བཏགས་ཏེ་བླུད་ན་ཡང་མྱོས་པར་འགྱུར་རོ། །བུ་རམ་དང་རྩ་བས་སམ་གཏོར་མས་གཏོང་བར་འགྱུར་རོ། །གདོན་ནི་ཆོ་གས་གཏོང་བར་འགྱུར་བའི་བདུག་པ་
བཤད་པར་བྱ་སྟེ། གཞོན་ནུ་ལ་ནི་ལྷག་པར་ཡང་། །རྨ་བྱའི་སྒྲོ་དང་དྷ་ཏ་ཀི། །གསེར་ཕྲོམ་ལུག་རུ་བ་ལང་རྭ། །དེ་བཞིན་མ་ཧཱ་ས་གནྡྷ། །སྦྲུལ་ལྤགས་རྗེན་པ་དག་དང་ནི། །རྒྱ་སྐྱེགས་བྱི་ལའི་པགས་པ་དང་། །མོན་སྲན་སྡེའུ་མ་རུའི་རྩ་བ་དང་། །ན་ལེ་ཤམ་དཀར་འབྲུ་
བཞི་དང་། །རས་བལ་ཚི་གུ་བིལ་བའི་རྩ། །ཐང་ཤིང་ཙནྡན་དམར་པོར་བཅས། །ཐེ་ཚོམ་མེད་པར་གནོད་སྦྱིན་མོ། །བདུག་པ་འདི་དག་སྦྱིན་བྱ་ཞིང་། །བྱིས་པ་རྣམས་ལ་ཕན་འདོགས་པས། །བདུག་པ་འདི་ནི་སྦྱར་བར་བྱ། །གདོན་རྣམས་ཀྱི་ནི་ངོ་ལོན་དང་། །
གཏོང་བར་བྱེད་པ་དང་། །འཁྲུལ་བར་བྱེད་པ་དེ་ངས་བཤད་ཟིན་ཏོ། །སེམས་ཅན་རྣམས་ལ་ཕན་གདགས་པའི་ཕྱིར་རིག་སྔགས་ཀྱིས་གདོན་རྣམས་བཅད་པ་དང་། གཞོམ་པ་དང་། ཕྱིར་བསླང་བར་བྱ་བ་ངས་བསྟན་པ་དེ་ཡང་བཤད་པར་བྱའོ། །ན་མོ་བཛྲ་པཱ་ཎི་སྱ་
เล่ม ๙๕ · หน้า 142b
ཧུ་རུ་ཧུ་རུ་པ་ཧུ་མེ། ཨུཏྟིཥྛ། ཨི་མེ་སྭཱ་ཧཱ། ཕྱིར་བསླང་བ་ནི་ཆུས་བྱའོ། །ལྷ་རྣམས་གདོན་རྣམས་ཀྱི་མཚན་མ་དང་། གསོ་བའི་ཐབས་ངས་བཤད་ཟིན་ཏོ། །རིག་པ་མཆོག་གི་ཆོ་ག་རྒྱས་པ་མ་ལུས་པའི་དབང་དུ་བྱས་ཏེ། ལས་བྱེད་པ་གང་ཡིན་པའམ་ཡང་ན་བཅོམ་
ལྡན་འདས་རིག་སྔགས་ཀྱི་རྒྱལ་པོ་སྤྱན་དང་བཅས་པར་འཆང་བ་གང་ཡིན་པ་དེས་ཀྱང་གདོན་རྣམས་མ་རུང་བར་བྱ་བ་དང་བསད་པར་ནུས་སོ། །གང་ཞིག་བཟོད་ལྡན་ཁྲོ་ཐུལ་བ། །ཚངས་པར་སྤྱོད་ཅིང་དབང་པོ་ཐུལ། །གཙང་ཞིང་སྤྱོད་པ་གཙང་བ་དང་། །བྱང་ཆུབ་ཏུ་ནི་ངེས་
བྱས་དང་། །རིག་པ་མཆོག་གི་དེ་ཉིད་རྟོགས། །ཆོ་གའི་ལྷ་རྣམས་མཆོད་བྱེད་པ། །དེ་འདྲར་སྤྱོད་པ་མཁས་པ་ཡིས། །གསང་བ་པ་རྣམས་གཞིག་པར་བྱ། །གདོན་ཐམས་ཅད་ཀྱི་ངོ་ལོན་རྫོགས་སོ།། །།དེ་ནས་སའི་ལྷ་མོས་ལག་ན་རྡོ་རྗེའི་ཞབས་གཉིས་
ལ་གཏུགས་ནས་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་ཆོ་ག་རྒྱས་པ་ལེགས་པར་གསུངས་སོ། །བདག་གིས་ཀྱང་རིག་སྔགས་འཆང་རྣམས་ཀྱི་དོན་གྱི་ཕྱིར་བཅོམ་ལྡན་འདས་རིག་སྔགས་འཆང་གིས་རིག་སྔགས་ནི་ཇི་ལྟར་བསྒྲུབ་པར་བགྱི། ཇི་ལྟར་ནི་
འཇུག་པར་བགྱི། ནོར་བསྒྲུབ་པའི་ལས་ཀྱི་དུས་ནི་གང་། དྲག་ཤུལ་བྱ་བའམ། ཞི་བའམ། རྒྱས་པའི་ལས་ཀྱི་དུས་ནི་གང་། རིག་སྔགས་ནི་གང་དུ་བསྒྲུབ་པར་བགྱི། དེ་ནས་བཅོམ་ལྡན་འདས་ལག་ན་རྡོ་རྗེས་སའི་ལྷ་མོ་ལ་འདི་སྐད་ཅེས་སྨྲས་སོ། །སའི་ལྷ་མོ་ཁྱོད་
སེམས་ཅན་ཐམས་ཅད་ལ་ཕན་པའི་ཕྱིར་ཞུགས་ཏེ། ང་ལ་དྲིས་པ་གང་ཡིན་པ་དེ་ལེགས་སོ་ལེགས་སོ། །སེམས་ཅན་རྣམས་ཀྱི་དོན་གྱི་ཕྱིར་ལྷ་མོ་ཁྱོད་ལ་བཤད་པར་བྱ་སྟེ། རིག་སྔགས་འཆང་རིག་སྔགས་བསྒྲུབ་པ་ཟླ་བ་ཕྱེད་དམ། ཞག་ཉི་ཤུའི་བར་དུ་རིག་སྔགས་བསྟེན་
པར་བྱ་སྟེ། དེ་ཡང་དོར་བར་བྱའོ། །གསུམ་པ་ནི་རོ་སྨད་དཀྲིས་ནས་ལྷའི་ཐད་དུ་འགྲོ་བར་བྱའོ། །རིག་སྔགས་འཆང་རིག་སྔགས་གང་དེ་ཉིད་ཀྱིས་ཆུ་ལ་སྔགས་ཏེ་ཁྲུས་བྱ་ཞིང་། ཁྲུས་བྱེད་པའི་ཚེ་སུ་ལ་ཡང་སྨྲ་བར་མི་བྱ་སྟེ། རིག་སྔགས་ལ་ཕྱག་བྱས་ནས་ཁྲུས་བྱའོ། །
เล่ม ๙๕ · หน้า 143a
རིག་སྔགས་བསྒྲུབ་པ་ན་སྐྱིལ་མོ་ཀྲུང་བརྟན་པོར་འདུག་པར་བྱ་སྟེ། རྒྱས་པའམ་རིག་སྔགས་བསྒྲུབ་པ་ལ་ནི་སྐྱིལ་མོ་ཀྲུང་གིས་འདུག་པར་བྱའོ། །དྲག་ཤུལ་ལ་ནི་རྐང་པས་རྐང་པ་མནན་ཏེ་འདུག་པར་བྱའོ། །རྒྱས་པའི་ལས་དང་ནོར་བསྒྲུབ་པ་དང་། བསྒྲུབ་པ་ཆེན་
པོ་རྣམས་ལ་ནི་ནང་པར་ལས་བྱ་སྟེ། དེའི་ཚེ་ལྷ་ཐམས་ཅད་མངོན་དུ་ཕྱོགས་པར་འགྱུར་བས་ན་དེའི་ཕྱིར་ལས་འགྲུབ་པར་འགྱུར་རོ། །དྲག་ཤུལ་གྱི་ལས་རྣམས་ལ་ནི་ཉི་མ་གུང་ངམ་ནམ་ཕྱེད་ན་ལས་བྱ་སྟེ། དེའི་ཚེ་ཡི་དགས་ཐམས་ཅད་མངོན་དུ་ཕྱོགས་པར་འགྱུར་བས་ན་དེ་ཕྱིར་
དེ་དག་མ་རུང་བར་བྱེད་པ་ལ་འཇུག་པར་འགྱུར་རོ། །ཞི་བ་དང་རིག་སྔགས་བསྒྲུབ་པ་ནི་སྲོད་ཀྱི་དུས་སུ་བྱ་སྟེ། དེའི་ཚེ་གནས་གཙང་མའི་རིགས་ཀྱི་ལྷ་རྣམས་རིག་སྔགས་འཆང་ལ་ལྟ་བར་བྱེད་པས་ན་དེའི་ཕྱིར་དེ་ལ་ཞི་བ་འགྲུབ་པར་འགྱུར་རོ། །ནུབ་མོ་ཡང་ཆོ་ག་འདི་བཞིན་དུ་
ལས་བྱའོ། །ལྷ་མོ་གཞན་ཡང་བཤད་པར་བྱ་སྟེ། རིག་སྔགས་གང་གི་སྦྱིན་སྲེག་ནུབ་མོ་བྱ་བར་བཤད་པ་དེའི་སྦྱིན་སྲེག་ནི་ནུབ་མོ་བྱ་སྟེ། བཟླས་པ་ཉིད་ནི་ཉིན་མོ་བྱའོ། །ལྷ་མོ་གང་གི་སྦྱིན་སྲེག་ཉིན་པར་བྱ་བ་དེའི་བཟླས་བརྗོད་ནི་ནུབ་མོ་བྱའོ། །ལྷ་མོ་ཆོ་ག་དེས་ན་རིག་
སྔགས་ཐམས་ཅད་བདེ་བླག་ཏུ་འགྲུབ་པར་འགྱུར་རོ། །དེ་ནས་སའི་ལྷ་མོ་དེ་མགུ་ཞིང་རབ་ཏུ་དགའ་ནས། རིག་པ་མཆོག་གི་ཆོ་ག་རྒྱས་པ་མངོན་པར་འཕེལ་བར་བྱ་བའི་ཕྱིར་ལག་ན་རྡོ་རྗེའི་ཞབས་ལ་ཕྱག་བྱ་བའི་གསང་སྔགས་སྨྲས་པ། ན་མོ་བཛྲ་པཱ་ཎི་སྱ། །བལ་གུ་བལ་གུ་
ཧུ་ལུ་ཧུ་ལུ། ཏཾ་གི་ནི་སྭཱ་ཧཱ། །དེ་ནས་སའི་ལྷ་མོ་དེས་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་རིག་སྔགས་ཀྱི་ལས་རྣམས་ཤོད་ཅིག་ཤོད་ཅིག །དེ་ནས་བཅོམ་ལྡན་འདས་ལག་ན་རྡོ་རྗེས་རིག་སྔགས་ཀྱི་ལས་རྣམས་བཤད་པ། རིག་སྔགས་བསྒྲུབ་པ་ན་རིག་
སྔགས་འཆང་གིས་ཟླ་བ་ཕྱེད་ཀྱི་བར་དུ་ཟས་སུ་འོ་མ་དང་འདག་གུ་ཟ་ཞིང་རིག་སྔགས་བཟླས་བརྗོད་བྱའོ། །དེ་ནས་ཡར་གྱི་ངོ་ཚེས་བརྒྱད་ལ་ཙནྡན་དཀར་པོ་ལས་སའི་ལྷ་མོའི་གཟུགས་བྱས་ལ། ཙནྡན་དམར་པོ་ལས་ལག་ན་རྡོ་རྗེའི་གཟུགས་བྱས་ཏེ། དཀྱིལ་འཁོར་སྐྱོང་ནུལ་གྱིས་
เล่ม ๙๕ · หน้า 143b
བྱུགས་ནས་དཀྱིལ་འཁོར་གྱི་དབུས་སུ་ལག་ན་རྡོ་རྗེའི་གཟུགས་བཞག་ལ། དབུས་དེར་སའི་ལྷ་མོ་ཡང་བཞག་སྟེ། ལག་ན་རྡོ་རྗེ་དང་སའི་ལྷ་མོ་ལ་མཆོད་པ་བྱས་ལ་ལྷ་བཤོས་རྒྱས་པར་ཕུལ་ནས་ལག་ན་རྡོ་རྗེའི་དྲུང་དུ་ནི་བ་དན་དམར་པོ་གཞག་གོ། །སའི་ལྷ་མོའི་དྲུང་དུ་ནི་བ་དན་དཀར་པོ་
གཞག་གོ། །ཕྱོགས་བཞིར་ཡང་གོས་དམར་པོ་གྱོན་པའི་མི་རྣམས་གཞག་གོ། །རིག་སྔགས་འཆང་གིས་ཀྱང་གོས་དམར་པོ་བགོས་ལ་ངེས་པར་གནས་པར་བྱ་སྟེ། རིག་སྔགས་བསྒྲུབ་པ་བྱའོ། །དེ་ནས་ཉི་མའི་འོད་ལས་བྱུང་བའི་མེས་བིལ་བའི་ཤིང་སྦྱར་ཏེ། བིལ་
བའི་མེ་ཏོག་ཞོ་དང་། སྦྲང་རྩི་དང་། མར་གྱི་ནང་དུ་སྨྱུགས་པ་བརྒྱད་སྟོང་སྦྱིན་སྲེག་བྱས་ན་སའི་ལྷ་མོ་འགུལ་བར་འགྱུར་རོ། །དེ་ནས་རིག་སྔགས་འཆང་གིས་སའི་ལྷ་མོ་དེ་ལག་ན་རྡོ་རྗེའི་ཞབས་ཀྱི་དྲུང་དུ་གཞག་གོ། །དེ་ནས་རིག་སྔགས་འཆང་གིས་ལག་ན་རྡོ་རྗེ་ལ་
ཙནྡྲན་དམར་པོའི་མཆོད་ཡོན་ཕུལ་བ་ལ་ཙི་ར་ཀནྡ་ཀའི་ཕྱེ་མ་ཡུངས་མར་དང་སྦྱར་བས་ལན་བརྒྱ་སྟོང་སྦྱིན་སྲེག་བགྱིའོ། །དེ་ནས་ནམ་མཁའ་ལས་སའི་ལྷ་མོ་འགྲུབ་པོ་ཞེས་སྒྲ་འབྱུང་བར་འགྱུར་རོ། །དེ་ནས་རིག་སྔགས་འཆང་གིས་སའི་ལྷ་མོ་དེ་བླངས་ལ། བླངས་ནས་ཕྱེ་
མ་ཞིབ་མོར་བཏགས་ན་ཕྱེ་མས་གང་ལ་རེག་པ་དེ་ལས་གྲུབ་ནས་ས་ལ་གནས་པའི་རིག་སྔགས་འཆང་རིགས་སྔགས་འཆང་ཐམས་ཅད་མངོན་དུ་ཕྱོགས་པར་འགྱུར་ཞིང་། རིན་པོ་ཆེ་ཐམས་ཅད་དང་། སྨན་ཐམས་ཅད་མངོན་དུ་ཕྱོགས་པར་འགྱུར་རོ། །ས་ཡང་དེ་ལས་གནས་སྦྱིན་
པར་འགྱུར་ཞིང་། འདོད་དགུར་སྒྱུར་བའི་གཟུགས་ཅན་དུ་འགྱུར་ཏེ། ཚེ་ལོ་བདུན་སྟོང་ཐུབ་པར་འགྱུར་རོ། །ལས་ཐམས་ཅད་ལ་ལན་གསུམ་བཟླས་བརྗོད་བྱས་པའི་ཐལ་བས་བསྲུང་བར་བྱའོ། །བསྐྲད་པ་ནི་མར་གྱི་ངོ་ཞག་བཅུ་བཞི་ལ་ཟ་མ་གཅིག་པར་བྱ་སྟེ། ལམ་གྱི་སུམ་
མདོའམ། བཞི་མདོའམ། དུར་ཁྲོད་ཀྱི་ཐལ་བས་སའི་ལྷ་མོའི་གཟུགས་བྱས་ལ་དེའི་སྟེང་དུ་ཙནྡན་དམར་པོས་གཏོར་བར་བྱ་སྟེ། ཐལ་བར་བླངས་ལ་དུར་ཁྲོད་ཀྱི་ཤིང་གིས་མེ་སྦར་ལ་ལན་བརྒྱད་སྟོང་སྦྱིན་སྲེག་བྱས་ན་ཞག་གསུམ་གྱིས་འབྲོས་པར་འགྱུར་རོ། །གཟེར་ཐབས་
เล่ม ๙๕ · หน้า 144a
ཀྱིས་གདབ་པར་འདོད་ན། མར་གྱི་ངོ་ཞག་བརྒྱད་ལ་རྫ་མཁན་གྱི་འཇིམ་པ་ལ་གཟུགས་བྱས་ཏོ། །མདུང་རྩེ་གསུམ་པའམ། མ་ད་ནའི་ཚེར་མ་དབུས་ནས་བླངས་པའི་མ་ད་ནའི་ཚེར་མ་ལ་ལན་བརྒྱད་བརྒྱ་བཟླས་བརྗོད་བྱས་པས་བཙུགས་
ན་གང་དུ་བཙུགས་པ་དེར་གཟིར་བར་འགྱུར་ཏེ། ཕྱུང་ན་གཏོང་བར་འགྱུར་རོ། །ཐིག་ལེ་བསྒྲུབ་པར་འདོད་ན་ཞག་གསུམ་སྨྱུང་བར་བྱས་པས་མར་གྱི་ངོ་ཞག་བརྒྱད་དམ་ཞག་བཅུ་བཞི་ལ་ལམ་གྱི་བཞི་མདོའམ། དུར་ཁྲོད་དུ་བ་ལང་གི་ལྕི་བས་དཀྱིལ་འཁོར་སྐྱོང་ནུལ་གྱིས་བྱུགས་ཏེ། ལྷ་བཤོས་
རྣམ་པ་སྣ་ཚོགས་ཕུལ་ནས་ཙནྡན་དམར་པོའི་ཆུས་དཀྱིལ་འཁོར་བསང་གཏོར་བྱས་ལ། དཀྱིལ་འཁོར་གྱི་དབུས་སུ་དུར་ཁྲོད་ཀྱི་ཐལ་བ་བཞག་སྟེ། རིག་སྔགས་འཆང་ཀུ་ཤའི་སྟན་ལ་འདུག་པས་ཐལ་བ་ལག་པས་མནན་ནས་ལྷ་མོའི་གཟུགས་སྣང་བར་འགྱུར་གྱི་བར་དུ་རིག་སྔགས་
བཟླས་བརྗོད་བྱའོ། །དེ་ནས་འགྲུབ་པར་འགྱུར་ཏེ། ལྷ་ཐམས་ཅད་ལ་ཕྱག་བྱས་ནས་སའི་ལྷ་མོ་སྤྱན་དྲངས་ན་དེར་འདུག་པར་འགྱུར་ཏེ། དེ་འདུག་པས་བགེགས་རྣམས་འབྱུང་བར་མི་འགྱུར་ཞིང་དངོས་གྲུབ་ཀྱང་མྱུར་དུ་ཐོབ་པར་འགྱུར་རོ། །སའི་སྟེང་ན་སྡང་བར་སེམས་པ་གང་ཡིན་པ་
དེ་དག་གིས་ཀྱང་གླགས་མི་རྙེད་དོ། །ལྷ་ཐམས་ཅད་ཀྱང་མངོན་དུ་ཕྱོགས་པར་མི་འགྱུར་ཏེ། དེ་ནས་དངོས་གྲུབ་ཐོབ་པར་འགྱུར་རོ། །དགུན་ཟླ་ཐ་ཆུང་ས་ལ་ཟས་སུ་འོ་མ་དང་ཕྱེའི་ལྡེ་གུ་ཟ་ཞིང་ཤིང་ཨ་ཤོ་ཀའི་དྲུང་དུ་ལན་འབུམ་བཟླས་བརྗོད་བྱས་ཏེ། ཞག་གསུམ་སྨྱུང་བ་བྱས་པས་
ཡར་གྱི་ངོ་ཟླ་བ་ཉ་ལ་ཤིང་དེ་ཉིད་ཀྱི་དྲུང་དུ་ཨ་ཤོ་ཀའི་ཤིང་གིས་མེ་སྦར་ལ་གུ་གུལ་གྱི་རིལ་བུ་བརྒྱད་སྟོང་གིས་སྦྱིན་སྲེག་བྱས་ན་ཤིང་མི་སྣང་བར་གྱུར་ན་ལས་དེ་འགྲུབ་པ་ཡིན་ནོ། །དེ་ནས་ནམ་མཁའ་ལ་འཕགས་པར་འགྱུར་ཏེ། འདོད་དགུར་སྒྱུར་བའི་གཟུགས་ཅན་དུ་འགྱུར་ཞིང་ཚེ་ལོ་ལྔ་
སྟོང་ཐུབ་པར་འགྱུར་རོ། །ལྷ་བཤོས་ཀྱང་རྒྱས་པར་འབུལ་ལོ། །ལྷ་མོ་ཁྱོད་ཀྱི་རིག་སྔགས་ཀྱི་ལས་རྣམས་ངས་བཤད་ཟིན་ཏོ། །ངས་ཀྱང་ལྷ་མོ་ཁྱོད་ལ་དྲག་ཏུ་བསྐུལ་བའི་རིག་སྔགས་གང་བརྗོད་ན་ཁྱོད་ཀྱི་མདུན་དུ་གནས་པར་འགྱུར་བ་བཤད་པར་བྱའོ། །ན་མོ་བཛྲ་པཱ་ཎི་སྱ། ཨོྃ་
เล่ม ๙๕ · หน้า 144b
སིདྡྷི་རྀ་ཥི་ནི་སྭཱ་ཧཱ། བསྒྲུབ་པའི་ཚེ་རིག་སྔགས་འདིས་མ་ད་ནའི་ཚེར་མ་ཁྲག་གི་ནང་དུ་སྨྱུགས་པ་བརྒྱད་སྟོང་གིས་སྦྱིན་སྲེག་བྱས་ན་བགེགས་ཐམས་ཅད་འབྱུང་བར་མི་འགྱུར་རོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་འཕགས་པ་ལག་ན་རྡོ་རྗེའི་མདུན་དུ་ཙནྡན་དམར་པོས་
དཀྱིལ་འཁོར་བྱས་ནས་རིག་སྔགས་ལན་བརྒྱད་སྟོང་བཟླས་བརྗོད་བྱས་ན་སའི་ལྷ་མོ་འགྲུབ་པར་འགྱུར་ཏེ། །དེ་ཕྱིན་ཅད་ལས་ཐམས་ཅད་བྱེད་ནུས་པར་འགྱུར་རོ། །སའི་ལྷ་མོའི་ཆོ་ག་རྫོགས་སོ།། །།དེ་ནས་ལྷའི་དྲང་སྲོང་མེས་སའི་ལྷ་མོའི་ཚམ་བརླང་མཐོང་ནས་
ལག་ན་རྡོ་རྗེའི་ཐད་དུ་སོང་སྟེ་སྨྲས་པ། རྡོ་རྗེ་འཛིན་ཆེན་པོ་བདག་གིས་ཀྱང་རིག་སྔགས་འཆང་ཐམས་ཅད་གང་གིས་དངོས་གྲུབ་མྱུར་དུ་ཐོབ་པར་འགྱུར་བའི་དངོས་གྲུབ་བསྟན་པར་བྱའོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་སྟན་ལས་ལངས་ནས་ལྷའི་དྲང་
སྲོང་མེ་ལ་འདི་སྐད་ཅེས་སྨྲས་སོ། །དྲང་སྲོང་ཆེན་པོ་ཁྱོད་སེམས་ཅན་ཐམས་ཅད་ལ་ཕན་པའི་ཕྱིར་བརྩོན་པ་དང་། སེམས་ཅན་ཐམས་ཅད་ལ་ཕན་པའི་ཕྱིར་ཞུགས་པ་གང་ཡིན་པ་ནི་ལེགས་སོ་ལེགས་སོ། །དྲང་སྲོང་ཆེན་པོ་ཁྱོད་ནི་ལྷ་ཐམས་ཅད་ཀྱི་ཞལ་ཡིན་ནོ། །དྲང་སྲོང་ཆེན་པོ་ཁྱོད་
ནི་ལྷ་ཐམས་ཅད་ཀྱི་རྗེ་ཡིན་གྱིས་དྲང་སྲོང་ཆེན་པོ་སེམས་ཅན་རྣམས་ཀྱི་དོན་གྱི་ཕྱིར་དངོས་གྲུབ་ཀྱི་རྒྱུ་ཤོད་ཅིག་ཤོད་ཅིག །དེ་ནས་ལྷའི་དྲང་སྲོང་མེ་ལག་ན་རྡོ་རྗེས་བསྟོད་པས་ཡིད་དགའ་བར་གྱུར་ནས་ལག་ན་རྡོ་རྗེ་སྟོབས་པོ་ཆེ་ལ་འདི་སྐད་ཅེས་སྨྲས་སོ། །གནོད་སྦྱིན་གྱི་བདག་པོ་བདག་འོང་བ་ནི་
དངོས་གྲུབ་འགྲུབ་པའི་རྒྱུར་འགྱུར་ཏེ། གང་གི་བདག་འོང་བར་འགྱུར་བའི་བདག་སྤྱན་དྲང་བའི་གསང་སྔགས་བཤད་པར་བྱའོ། །ན་མོ་བཛྲ་པཱ་ཎི་སྱ། །ཨོྃ་ཨགྣི་དེ་བ་ཏཱ་ཡ། དྷུ་པ་ཏ་ཡེ་ཛྭ་ལི་ནི་སྭཱ་ཧཱ། རིག་སྔགས་འདི་སྤྱན་དྲང་བའི་སྔགས་སོ། །ན་མོ་བཛྲ་པཱ་ཎི་སྱ། ན་མོ་ཨགྣ་
ཡེ། ཀུ་ཏི་ཀུ་ཏི། །ག་ཏི་ཡེ་གཙྪ་གཙྪ། ཤོ་ཥནྟི་ལ་ལི་པུ་ཏྲ་སྭཱ་ཧཱ། རིག་སྔགས་དེ་སླར་བཏང་བའི་སྔགས་སོ། །རིག་སྔགས་འཆང་གང་དག་བདག་ལ་ལྟ་བ་དེ་དག་གིས་ནི་དངོས་གྲུབ་ངེས་པར་ཐོབ་པར་འགྱུར་རོ། །བདག་འོང་བའི་མཚན་མ་ལྟ་བ་ནི་སྒྲུབ་པ་ཐམས་ཅད་ལ་ཡང་
เล่ม ๙๕ · หน้า 145a
བདག་མདུན་དུ་བཞག་ལ་པ་ལ་ཤའི་ཤིང་གིས་མེ་སྦར་ནས་འབྲས་ཡོས་མར་དང་སྦྱར་བས་ལན་བརྒྱད་སྟོང་སྦྱིན་སྲེག་བྱའོ། །དེ་ནས་མེའི་དབུས་སྔོ་བྲེ་ངེར་འདུག་པ་དང་། མཐའ་སྔོ་བ་དང་། མེའི་རྩེ་མོ་རྒྱས་པ་དང་། དྲུང་སྔོ་ཞིང་མགྱོགས་པ་ལས་བརྟག་སྟེ། དེ་ནས་
རྟགས་བཤད་པ་དེ་དག་གིས་འོང་བར་ཤེས་པར་བྱའོ། །དེ་ནས་རིག་སྔགས་འཆང་གིས་ལྷ་བཤོས་ཕུལ་ཏེ། མར་གྱི་སྲེག་བླུགས་བདུན་གྱིས་སྦྱིན་སྲེག་བྱའོ། །བདག་འདུག་པ་དང་བགེགས་ཐམས་ཅད་མི་འབྱུང་ཞིང་རིག་སྔགས་ཀྱང་འགྲུབ་པར་འགྱུར་རོ། །དེ་ནས་ལྷའི་དྲང་སྲོང་
མེས་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བྱང་ཆུབ་སེམས་དཔའ་ཆེན་པོ་རིག་སྔགས་ཀྱི་ལས་རྣམས་ཤོད་ཅིག་ཤོད་ཅིག །དེ་ནས་བཅོམ་ལྡན་འདས་ལག་ན་རྡོ་རྗེ་ཡིད་དགའ་བར་གྱུར་ནས་རིག་སྔགས་ཀྱི་ཚོགས་རྣམས་ལ་བལྟས་ཏེ། རིག་སྔགས་ཀྱི་ལས་རྣམས་བཤད་པ་ལས་ཐམས་
ཅད་ལ་ཡང་པ་ལ་ཤའི་ཤིང་གིས་མེ་སྦར་ལ། འབྲས་ཡོས་ཞོ་དང་། སྦྲང་རྩི་དང་། མར་དང་སྦྱར་བས་ལན་བརྒྱད་སྟོང་སྦྱིན་སྲེག་བྱས་ན་ལས་འགྲུབ་པར་འགྱུར་ཏེ། མེ་ཡང་དམ་པ་སྦྱིན་པར་བྱེད་ཅིང་གང་འབར་བ་སྣང་བ་དེར་བསྲུང་བར་འགྱུར་རོ། །ལྷ་དབབ་ན་བྱེའུ་རུག་པའི་ལོ་མའམ་ཆུས་
བྱའོ། །སྐྱེས་པ་དབང་དུ་བྱ་ན་ཡར་གྱི་ངོ་ཚེས་བཅུ་བཞི་ལ་ཞག་གཅིག་སྨྱུང་བ་བྱས་ཏེ། སྦྱིན་སྲེག་གི་གནས་སམ། ཁང་སྟོང་དབེན་པའི་ཕྱོགས་སུ་མེའི་སྦྱིན་སྲེག་བྱས་པའི་མེས་བིལ་བའི་ཤིང་གིས་མེ་སྦར་ཏེ། ཀུནྡའི་མེ་ཏོག་ཁ་མ་བྱེ་བ་མར་གྱི་ནང་དུ་སྨྱུགས་པ་སུམ་སྟོང་གིས་སྦྱིན་སྲེག་
བྱས་ན་སྐྱེས་པ་དབང་དུ་འགྱུར་རོ། །དེ་ནས་མེ་བསྒྲུབ་པར་འདོད་ན་ཞག་བདུན་གྱི་བར་དུ་ཟས་འོ་མ་དང་ཕྱེའི་ལྡེ་གུ་ཟ་ཞིང་རིག་སྔགས་བཟླས་བརྗོད་བྱས་ན་དེ་ནས་ཡར་གྱི་ངོ་ཚེས་བཅུ་གཉིས་ལ་ཞག་གཅིག་སྨྱུང་བར་བྱས་ཏེ། ཁང་སྟོང་དུ་སོང་ལ་ནང་དུ་ཞུགས་ནས་གཙང་མར་བྱས་ཏེ། ཕྱོགས་
བཞིར་གཏོར་མ་བྱིན་ལ་དཀྱིལ་འཁོར་གྱི་དབུས་སུ་ལག་ན་རྡོ་རྗེའི་གཟུགས་བཞག་ནས། དེའི་མདུན་དུ་མེའི་སྦྱིན་སྲེག་བྱས་པའི་མེས་བིལ་བའི་ཤིང་གིས་མེ་སྦར་ལ། དེ་ནས་མེ་ཏོག་དཀར་པོ་དང་། གུ་གུལ་གྱིས་བདུག་པས་མེ་ལྷ་སྤྱན་དྲང་ངོ་། །དེ་ནས་རིག་སྔགས་འཆང་གིས་
เล่ม ๙๕ · หน้า 145b
རྩྭ་དཱུར་བའི་སྟན་བྱས་ཏེ་རྩྭ་དཱུར་བའི་སྟན་ལ་འདུག་ལ། སྣ་མའི་ཡམ་སྲེག་ཤིང་ཞོ་དང་། སྦྲང་རྩི་དང་མར་གྱི་ནང་དུ་སྨྱུགས་པ་བརྒྱད་སྟོང་གིས་སྦྱིན་སྲེག་བྱའོ། །དེ་ནས་མེ་སྟག་གང་གིས་རྩྭ་རོལ་བར་བྱེད་ན་རིག་སྔགས་འཆང་གིས་རིག་པ་མཆོག་དྲན་པར་བྱ་ཞིང་རིག་པ་མཆོག་
ཉིད་ཀྱིས་སྲེག་བླུགས་ལན་བདུན་དུ་སྦྱིན་སྲེག་བྱས་ན་དེས་ཞི་བར་འགྱུར་རོ། །དེ་ནས་འོད་ཟེར་ཅིག་བྱུང་སྟེ། རིག་སྔགས་འཆང་ལ་གཡས་ཕྱོགས་ནས་བསྐོར་ནས་སླར་དེ་ཉིད་དུ་ཞུགས་ན་འགྲུབ་པར་འགྱུར་ཏེ། གྲུབ་ནས་ལག་སྟངས་ཙམ་བྱས་པས་ཀྱང་སྦྱིན་སྲེག་གི་ལས་ཐམས་ཅད་
འགྲུབ་པར་འགྱུར་རོ། །དེ་ནས་རིག་སྔགས་བསྒྲུབ་པར་འདོད་ན་མེའི་ཐབ་ཁུང་དེ་ཉིད་ནས་སོལ་བ་བླངས་ཏེ། ཆོ་ག་འདི་ཉིད་ཀྱིས་ལག་ན་རྡོ་རྗེའི་མདུན་དུ་བཟླས་བརྗོད་བྱས་ནས་དངོས་གྲུབ་རྣམ་པ་གསུམ་དུ་འགྱུར་རོ། །དེ་ནས་མེ་འབྱུང་བར་འདོད་ན་མར་གྱི་ངོ་ཞག་གཅིག་སྨྱུང་བ་
བྱས་ཏེ། སྦྱིན་སྲེག་གི་གནས་སུ་སོང་ནས་ཨ་མྲ་ར་ཏེ་ཀའི་རུས་པས་ལན་བརྒྱད་སྟོང་སྦྱིན་སྲེག་བྱས་ན་མེའི་ཁ་ནས་མེ་སྟག་འབྱུང་བར་འགྱུར་ཏེ། ཆེ་གེ་མོ་ཞིག་བསྲེག་ཅིང་ཡུལ་དེ་ཚིག་པར་གྱིས་ཤིག་ཅེས་ཡིད་ཀྱིས་བཟླས་ན་ཡིད་ལ་བསམས་མ་ཐག་ཏུ་ལས་ཐམས་ཅད་བྱེད་པར་འགྱུར་
རོ། །དགྲ་བསད་པར་འདོད་ན་མར་གྱི་ངོ་ཞག་བརྒྱད་དམ་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ། དུར་ཁྲོད་ཀྱི་ཤིང་བླངས་ནས། འབྱུང་པོའི་གཏེར་མ་ཡང་བྱིན་ལ་ཤིང་བླངས་པ་ལ་ལན་བརྒྱད་སྟོང་བཟླས་བརྗོད་བྱས་ཏེ་ཆེ་གེ་མོ་ཞིག་ཆོམས་ཤིག་ཅེས་སྨྲས་ན་
རིམས་ཚ་བས་བཏབ་སྟེ་ཞག་བདུན་གྱིས་འཆི་བར་འགྱུར་རོ། །ནོར་འདོད་ན་རྟག་ཏུ་མར་དང་འབྲས་ཀྱི་སྦྱིན་སྲེག་བྱས་ན་ནོར་འཕེལ་བར་འགྱུར་རོ། །ལྷ་བསྒྲུབ་པར་འདོད་ན་གང་གི་ཉིན་མོ་ཡང་རུང་སྟེ། གློ་བུར་དུ་མེ་འབར་བ་མཐོང་ན་དེ་བླངས་ལ་མར་གྱི་ངོ་ཞག་བཅུ་བཞིའི་བར་དུ་བཞག་
སྟེ་དུས་གསུམ་དུ་ཁྲུས་བྱེད་ཅིང་ཞག་བདུན་དུ་བཟླས་བརྗོད་བྱའོ། །དེ་ནས་ཞག་གསུམ་སྨྱུང་བ་བྱས་ཏེ། མར་གྱི་ངོ་ཞག་བཅུ་བཞི་ལ་ལག་ན་རྡོ་རྗེའི་མདུན་དུ་ལྷ་བཤོས་རྣམ་པ་སྣ་ཚོགས་ཕུལ་ཏེ། ཀུ་ཤའི་སྟན་ལ་འདུག་ཅིང་མེ་དེ་ཉིད་ཀྱིས་ཤ་མེའི་ཤིང་གིས་མེ་སྦར་ནས་མེ་དེའི་ནང་
ที่มาและสัญญาอนุญาต
ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด