འཕགས་པ་རིག་པ་མཆོག་གི་རྒྱུད་ཆེན་པོ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๙๕ · หน้า 146a
ནས་པདྨ་འདབ་མ་སྟོང་པ་དཔག་ཚད་བརྒྱད་དྲི་བསུང་གིས་ཁྱབ་པ་བྱུང་གི་བར་དུ་བཟླས་བརྗོད་བྱའོ། །དེ་ནས་རིག་སྔགས་འཆང་གིས་རིག་སྔགས་ཀྱི་རྒྱལ་པོ་བཟླས་བརྗོད་བྱེད་བཞིན་དུ་བླངས་ན་དེ་བླངས་མ་ཐག་ཏུ་མཐུ་སྟོབས་ཆེ་ཞིང་ཉི་མ་ཤར་བའི་མདོག་དང་ལྡན་ལ། དཔག་ཚད་བརྒྱད་
དྲི་བསུང་གིས་ཁྱབ་པ་དང་། གཞན་གྱིས་མི་ཚུགས་པའི་འདོད་པའི་ལོངས་སྤྱོད་དང་ལྡན་ལ་སྲེག་པའི་རང་བཞིན་ཅན་འདོད་དགུར་སྒྱུར་བའི་གཟུགས་དང་ལྡན་པ་དང་བསྐལ་པར་གནས་པར་འགྱུར་རོ། །ལྷ་རྣམས་དྲང་སྲོང་ཆེན་པོའི་ལས་རྣམས་ངས་བཤད་ཟིན་ཏོ། །དེ་ལ་དྲག་ཏུ་བསྐུལ་
བའི་གསང་སྔགས་ཀྱང་བཤད་པར་བྱ་སྟེ། ན་མོ་བཛྲ་པཱ་ཎི་སྱ། ཧུ་ཏཱ་ཤ་ཎ། ཨི་ཧ་ཨཱ་གཙྪ། པྲ་ཏི་གྲྀཧྞ་ཨི་མ་མཱ་ཧཱུ་ཏ་ནི། པྲ་ཏི་བུདྡྷ། མ་ཧཱ་བྷ་ག །ཛྱེཥྛ་སྟྭཾ། པྲ་པཱུ་ར་བ་བྷ་ཡ། ཨ་ཧཱ་དུཥྚ་གྲ་ཧ་སརྦ་བུ་ན་ར། ཨཱ་བརྟི་ཏཤྩ་ཡེ། ནི་རུན་ཏི་ནི་རུན་ཏི། བཛྲ་པཱ་ཎི་སྟྭཾ། དེ་བ་དེ་བ་
ན་མཿསྭཱ་ཧཱ། བསྒྲུབ་པ་ཐམས་ཅད་ལ་རིག་སྔགས་འདིས་མར་དང་། འབྲས་ཡོས་ཀྱིས་སྲེག་བླུགས་ལན་ཉི་ཤུ་རྩ་གཅིག་སྦྱིན་སྲེག་བྱས་ན་དེས་ཐམས་ཅད་བྱེད་ནུས་པར་འགྱུར་རོ། །འཕགས་པ་ལག་ན་རྡོ་རྗེའི་མདུན་དུ་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བར་བྱས་ཏེ་མཆོད་པ་
བྱ་ཞིང་ལྷ་བཤོས་ཀྱང་ལྷག་པར་ཕུལ་ལ་དེ་ནས་ལན་བརྒྱད་སྟོང་བཟླས་བརྗོད་བྱས་ན་མེས་དམ་པ་སྦྱིན་པར་འགྱུར་རོ། །མེའི་ཆོ་ག་རྫོགས་སོ།། །།དེ་ནས་ལྷ་མོ་ཚིག་ལྡན་མས་རབ་ཏུ་རོལ་པ་མཐོང་ནས་ལག་ན་རྡོ་རྗེའི་གཡས་ཕྱོགས་ནས་བསྐོར་བ་བྱས་ཏེ། དྲི་ཟའི་འཁོར་
གྱིས་བསྐོར་ནས་འཁོར་དེ་ཉིད་ཀྱི་ནང་དུ་སོང་སྟེ་ཕྱིན་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །ལག་ན་རྡོ་རྗེ་བདག་ནི་ལྷ་ཐམས་ཅད་དང་། རིག་སྔགས་འཆང་ཐམས་ཅད་དང་། སེམས་ཅན་ཐམས་ཅད་ཀྱི་མཆོག་ཏུ་གྱུར་པ་དང་། སྒྲུབ་པར་བྱེད་པ་དང་།
རབ་ཏུ་སྟོན་པར་བྱེད་པ་ཡིན་ནོ། །སྟོང་གསུམ་གྱི་འཇིག་རྟེན་གྱི་ཁམས་འདི་དག་ཐམས་ཅད་ནི་རྒྱགས་པས་མྱོས་པ་སྟེ། བདག་མེད་དུ་ཟིན་ན་དེ་དག་མ་རུང་བར་འགྱུར་རོ། །དེ་བས་ན་སེམས་ཅན་ཐམས་ཅད་ལ་ཕན་པའི་ཕྱིར་རིག་པ་མཆོག་གི་ཆོ་ག་རྒྱས་པའི་དངོས་གྲུབ་སྦྱིན་པར་བྱ་སྟེ།
เล่ม ๙๕ · หน้า 146b
བཅོམ་ལྡན་འདས་བདག་གི་གསང་སྔགས་འཆང་བ་གང་ཡིན་པ་དེ་དག་ལ་ནི་བདག་རྟག་ཏུ་འགྲུབ་ཅིང་དེའི་མདུན་དུ་རྟག་ཏུ་རབ་ཏུ་དགའ་བའི་སེམས་ཀྱིས་གནས་སོ། །དེ་ནས་བྱང་ཆུབ་སེམས་དཔའ་ལག་ན་རྡོ་རྗེས་ལྷ་མོ་ཆིག་ལྡན་མ་ལ་འདི་སྐད་ཅེས་སྨྲས་སོ། །ལེགས་སོ་ལེགས་སོ། །
ལྷ་མོ་ཚིག་ལྡན་མ་ལེགས་སོ། །ལྷ་མོ་འཇིག་རྟེན་གྱི་མ་ཁྱོད་ངས་ཤེས་ཏེ་མཆོག་ཏུ་གྱུར་པ་དང་། སྒྲུབ་པར་བྱེད་པ་དང་། དངོས་གྲུབ་སྦྱིན་པ་ཡིན་ནོ། །ལྷ་མོ་འཇིག་རྟེན་གྱི་མ་ཁྱོད་ལེགས་ཀྱིས་རིག་པ་མཆོག་གི་ཆོ་ག་རྒྱས་པ་ཆོ་ག་ཆེན་པོའི་གསང་སྔགས་ཤོད་ཅིག་ཤོད་ཅིག །དེ་ནས་
ལྷ་མོ་ཚིག་ལྡན་མ་དེ་ལག་ན་རྡོ་རྗེས་བསྟོད་པས་དགའ་ཞིང་མགུ་ལ་ཡིད་རབ་ཏུ་དགའ་ནས་རིག་སྔགས་ཀྱི་ཚོགས་ལ་ཡང་བལྟས། བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་ཡང་བལྟས་ཏེ། ཕྱག་འཚལ་ནས་རིག་སྔགས་བཤད་པ། ན་མོ་བཛྲ་པཱ་ཎི་སྱ། ན་མཿས་
ར་སྭ་ཏྱཻ། ལོ་ཀ་ཏཱ་ཡ། ལོ་ཀ་ཨུཾ་མི་ལི་ཀ་ལ། དཱ་མ་ཡནྟི་ཀཱ་ཡ། ཙཎྜི་ཀཱ་ཡ། ས་ཀཱ་ཡ། བ་དྱཱི་ཡ། དི་བྱ་རཱུ་པཱ་ཡ། དེ་བྱ་སྭཱ་ཧཱ། ནུ་མ་དཱ་ཡ་སྭཱ་ཧཱ། ཀུ་རུ་ཀུ་རུ། ཀརྨི་ཀཱ་ཡ། མརྡ་ནཱི་ཡ། ལོ་ཀ་དཱ་ཡི་ཀཱ་ཡ། སར་སྭ་ཏྱཻ་སྭཱ་ཧཱ། དེ་ནས་ལྷ་མོ་ཚིག་ལྡན་མ་ཡིད་
རབ་ཏུ་དགའ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིག་སྔགས་ཀྱི་རྒྱལ་པོ་ཆེན་པོ་རིག་པ་མཆོག་འདིའི་ལས་རྣམས་ཤོད་ཅིག་ཤོད་ཅིག །དེ་ནས་བཅོམ་ལྡན་འདས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེ་གཟི་བརྗིད་དྲག་པོས་འཇིག་རྟེན་གྱི་མ་ཚིག་
ལྡན་མའི་ལས་ཐམས་ཅད་བཤད་པ། རས་མ་ཉམས་པ་ལ་རི་མོ་མཁན་གསོ་སྦྱོང་དང་ལྡན་པས་འཕགས་པ་ལག་ན་རྡོ་རྗེའི་གཟུགས་འདྲིར་བཅུག་སྟེ། དེའི་གཡས་ལོགས་སུ་འཇིག་རྟེན་གྱི་མ་ཚིག་ལྡན་མདོག་སྔོ་བསངས་ལ་ལག་ན་བི་བང་ཐོགས་ཤིང་གླུ་ལེན་ཏེ། བྱང་ཆུབ་སེམས་དཔའ་
ལག་ན་རྡོ་རྗེ་ལ་བསྟོད་ཅིང་འདུག་པའི་ཚུལ་དུ་འདྲིར་གཞུག་གོ། །ལྷ་བཤོས་ཀྱང་རྒྱས་པར་འབུལ་ལོ། །དེ་ནས་རིག་སྔགས་འཆང་ཞག་གསུམ་སྨྱུང་བར་བྱས་པས་ཡར་གྱི་ངོ་ཚེས་ལྔ་ལ་སྐུ་གཟུགས་ཀྱི་མདུན་དུ་མཆོད་པ་རྒྱས་པར་བྱས་ཏེ་ཀུ་ཤའི་སྟན་ལ་འདུག་ཅིང་ལྷ་ལ་མཆོད་པར་བྱའོ། །
เล่ม ๙๕ · หน้า 147a
ལྷ་བཤོས་ཀྱང་རྒྱས་པར་དབུལ་ལོ། །དེ་ནས་རིག་སྔགས་འཆང་གིས་ཙནྡན་དཀར་པོས་མེ་སྦར་ལ། ཨ་ག་རུའི་ཡམ་སྲེག་ཤིང་བརྒྱད་སྟོང་གིས་སྦྱིན་སྲེག་བྱས་ན་དངོས་གྲུབ་ཀྱི་མཆོག་མཚན་མར་མེ་ཏོག་གི་ཕྲེང་བ་འགུལ་བར་འགྱུར་རོ། །གྲུབ་ནས་ཀྱང་ཚིག་གྲུབ་
པ་དང་། རིག་སྔགས་ཐམས་ཅད་ཀྱང་འགྲུབ་པར་འགྱུར་ཏེ། ལས་རྣམ་པ་སྣ་ཚོགས་སྟོང་ཡང་བྱེད་ནུས་པར་འགྱུར་རོ། །འཇིག་རྟེན་གྱི་མ་རྣམས་དབབ་ན་ཡང་ལན་བདུན་བཟླས་བརྗོད་བྱས་པའི་བྱེའུ་རུག་པའི་ལོ་མའམ་ཐལ་བས་བྱའོ། །བསྲུང་བ་ནི་ལན་གསུམ་དུ་བཟླས་བརྗོད་བྱས་པའི་
སྐུད་པས་བྱའོ། །མཚམས་བཅད་པ་ནི་ཆུའམ་ཡིད་ཀྱིས་བྱའོ། །སྦྲུལ་གསོད་ན་ལན་ཚྭ་དང་སྐེ་ཚེས་སྦྱིན་སྲེག་བྱའོ། །ཕྱིར་གསོ་བ་ནི་ཡིད་ཀྱིས་བྱའོ། །དུག་ལས་གསོ་བ་ནི་ཡལ་གས་བྱའོ། །མོ་མཚན་འཛག་པར་བྱ་ན་སྲེད་མེད་ཀྱི་བུའི་ཆུང་མ་ལ་ཕུལ་བའི་རས་བལ་གྱི་འདབ་མ་རྒྱ་
སྐྱེགས་ཀྱི་ཁུ་བས་ཁ་དོག་བསྒྱུར་བ་ལས་གཟུགས་བྱ་སྟེ། མིའི་རུས་པའི་ཕུར་བུ་ལ་ལན་སྟོང་རྩ་བརྒྱད་བཟླས་བརྗོད་བྱས་པས་མོ་མཚན་དུ་བཙུགས་ན་ཁྲག་འཛག་པར་འགྱུར་ཏེ། ཕྱུང་ན་གཏོང་བར་འགྱུར་རོ། །གྲོང་ཁྱེར་བཤིག་པར་བྱ་ན་བེ་ཀངྐ་ཏའི་ཕུར་བུ་མིའི་མཁྲིས་པས་བགོས་ཏེ་དུག་དང་
ཁྲག་གི་ནང་དུ་སྨྱུགས་པ་ལ་ལན་བརྒྱད་སྟོང་བཟླས་བརྗོད་བྱས་ཏེ། སྒོའི་ཐེམ་པ་ལ་བཙུགས་ན་ཞག་གསུམ་གྱི་གྲོང་ཁྱེར་བ་རྣམས་འབྲོས་པར་འགྱུར་རོ། །ཕུར་བུ་ཕྱུང་སྟེ་མར་དང་སྦྲང་རྩི་བསྐུས་ན་དེས་ཞི་བར་འགྱུར་རོ། །ཕྱིར་ཡང་སྔ་མ་ཁོ་ན་བཞིན་དུ་གནས་པར་འགྱུར་རོ། །ཆང་མ་
རུང་བར་བྱ་འདོད་ན་ཀ་ལ་ཧ་ཀ་རི་ཀ་བླངས་ལ་ལན་བདུན་བཟླས་བརྗོད་བྱས་ཏེ་ཁྱིམ་དུ་བཙུགས་ན་ཆང་མ་རུང་བར་འགྱུར་རོ། །དེ་ནས་ལྡོང་རོས་བསྒྲུབ་པར་འདོད་ན་རྒྱུ་སྐར་རྒྱལ་ལ་བབ་པའི་ཚེ་ལྡོང་རོས་ཚོང་པའི་ཁ་ཐབས་བཞིན་དུ་ཉོས་ལ་ཕག་གི་མཁྲིས་པས་བགོས་ཏེ་ཕྱུང་ནས་ལག་ན་རྡོ་རྗེའི་
ཞབས་ཀྱི་དྲུང་དུ་བཞག་ལ། དེ་ནས་ཟས་སུ་འོ་མ་དང་ཕྱེའི་ལྡེ་གུ་ཟ་ཞིང་ཞག་བཅུ་བདུན་གྱི་བར་དུ་དུས་གསུམ་དུ་སྟོང་རྩ་བརྒྱད་བཟླས་བརྗོད་བྱས་ནས་མར་གྱི་ངོ་ཞག་བརྒྱད་ལ་ཁ་ཟས་མི་བཟའ་བར་ལྡོང་རོས་ལག་པ་གཡོན་པས་བཟུང་སྟེ། ལན་བརྒྱད་སྟོང་བཟླས་བརྗོད་བྱས་ན་འགྲུབ་པར་
เล่ม ๙๕ · หน้า 147b
འགྱུར་ཏེ། ཐིག་ལེ་བྱས་ན་ལུས་མི་སྣང་བར་འགྱུར་ཞིང་སྒྱུ་འཕྲུལ་ཐམས་ཅད་བྱེད་པ་དང་། འདོད་དགུར་སྒྱུར་བའི་གཟུགས་ཅན་དུ་འགྱུར་ཏེ། ཚེ་ལོ་ལྔ་སྟོང་ཐུབ་པར་འགྱུར་རོ། །དེ་ནས་ལྷ་མོ་ཚིག་ལྡན་མ་མཐོང་བར་འདོད་ན་ཟླ་བ་གཅིག་གི་བར་དུ་སློང་མོའི་ཟས་ཟ་ཞིང་དགོན་
པར་རིག་སྔགས་བཟླས་བརྗོད་བྱས་ལ་ཞག་གསུམ་སྨྱུང་བ་བྱས་པས་ཟླ་བ་ཉ་ལ་ཤིང་སཱ་ལའི་དྲུང་དུ་ཅི་འབྱོར་པས་མཆོད་པ་བྱ་ཞིང་། ལྷ་བཤོས་ཀྱང་པུ་ལ་ནས་རིག་སྔགས་བཟླས་བརྗོད་བྱའོ། །དེ་ནས་ནམ་ཕྱེད་ཀྱི་དུས་སུ་གཅིག་པུ་རང་འོང་བར་འགྱུར་ཏེ། དེ་ལ་མེ་ཏོག་དཀར་པོ་དང་
ལྡན་པའི་མཆོད་ཡོན་ཕུལ་ཞིང་བཅོམ་ལྡན་འདས་མ་བྱོན་པ་ལེགས་སོ་ལེགས་སོ་ཞེས་སྨྲོས་ཤིག །དེ་ནས་ལྷ་མོ་དེ་དགོད་པ་དང་། རིག་སྔགས་འཆང་གིས་དེ་ལ་འཇིགས་པར་མི་བྱ་བར་རིག་པ་མཆོག་དྲན་པར་བྱའོ། །དེ་ནས་ལྷ་མོ་དེ་ན་རེ་བུ་ཁྱོད་ལ་དམ་པ་ཅི་ཞིག་སྦྱིན་ཟེར་བ་དང་། དམ་
པ་གང་འདོད་པ་དེ་བླང་བར་བྱ་སྟེ། རྒྱལ་རིགས་དང་། རིག་སྔགས་འཆང་དང་། ལུས་མི་སྣང་བ་དང་། གཏེར་མཐོང་བ་དང་། རིན་པོ་ཆེ་མཐོང་བ་དང་། རྒྱ་མཚོ་ཆེན་པོ་མཐོང་བ་དང་། འདོད་དགུར་སྒྱུར་བའི་གཟུགས་ཅན་དང་། ཡིད་གཞུངས་པ་དང་། འདི་རྣམས་ལས་
གཅིག་བླང་བར་བྱ་ཞིང་སྔ་ནས་བསམས་ཏེ་ལས་བསྒྲུབ་པར་བྱའོ། །གང་ཡིད་ལ་བསམས་ཏེ་ལས་སྒྲུབ་པ་དེ་ཉིད་དེ་ལ་བླང་བར་བྱའོ། །དེ་ལྟར་མ་བྱས་ན་མ་རུང་བར་འགྱུར་རོ། །དེ་ལ་རྒྱལ་སྲིད་གྲུབ་པ་ནི་དགྲ་མེད་པར་འགྱུར་རོ། །རིག་སྔགས་འཆང་དུ་གྲུབ་པ་ནི་གཞན་གྱིས་མི་ཚུགས་
པའི་གནས་ཐོབ་ཅིང་ཉི་མ་ཤར་བའི་མདོག་དང་ལྡན་ལ། རིག་སྔགས་འཆང་གི་རྒྱལ་པོ་དཔག་ཚད་བརྒྱད་དྲི་བསུང་གིས་ཁྱབ་པ་ཞེས་བྱ་བར་འགྱུར་ཏེ། ཡིད་ལ་ཅི་བསམས་པ་དེ་ཐམས་ཅད་འགྲུབ་པར་འགྱུར་རོ། །ལུས་མི་སྣང་ན་ནི་བསམས་པ་ཙམ་གྱིས་འདོད་དགུར་སྒྱུར་བའི་
གཟུགས་ཅན་དུ་འགྱུར་ཞིང་ཚེ་ལོ་དགུ་སྟོང་ཐུབ་པར་འགྱུར་རོ། །གཏེར་མཐོང་བ་གྲུབ་པ་ནི་གཏེར་མི་ཟད་པར་འགྱུར་རོ། །རིན་པོ་ཆེ་མཐོང་བ་གྲུབ་ནི་ནི་ཡིད་ལ་ཅི་བསམས་པ་དེ་ཐམས་ཅད་འགྲུབ་པར་འགྱུར་ཞིང་མགོ་བོ་ལ་གཙུག་གི་ནོར་བུར་འགྱུར་ཏེ། གཙུག་གི་ནོར་བུ་མཐོང་བ་
เล่ม ๙๕ · หน้า 148a
གང་ཡིན་པ་དེ་དག་ཀྱང་ནད་མེད་ཅིང་ཚེ་ལོ་ཉིས་སྟོང་ཐུབ་པར་འགྱུར་རོ། །རིག་སྔགས་འཆང་ཉིད་ནི་ཚེ་ལོ་ལྔ་སྟོང་ཐུབ་པར་འགྱུར་རོ། །རྒྱ་མཚོ་ཆེན་པོ་མཐོང་བ་གྲུབ་ན་ནི་ཇི་ལྟར་འདོད་པ་བཞིན་དུ་དེ་ཉིད་དུ་གནས་པར་འགྱུར་རོ། །མི་འདོད་ན་ཡང་རིན་པོ་ཆེ་རྣམས་ལེན་ནུས་
པར་འགྱུར་རོ། །ཡང་ན་ལྷ་མ་ཡིན་གྱི་བུ་མོ་དང་ལྷན་ཅིག་ཏུ་གནས་ཤིང་ལྷ་མ་ཡིན་རྣམས་ཀྱི་ལོངས་སྤྱོད་ལ་ལོངས་སྤྱོད་པར་འགྱུར་རོ། །འདོད་དགུར་སྒྱུར་བའི་གཟུགས་ཅན་དུ་འགྲུབ་ན་ནི་ཡིད་ཀྱིས་ཇི་ལྟར་འདོད་པ་དེ་ཐམས་ཅད་དུ་འགྱུར་རོ། །ཡིད་གཞུགས་པ་གྲུབ་ན་ནི་ཐོས་པ་
འཛིན་པར་འགྱུར་ཏེ། གང་ཅི་ཐོས་པ་དེ་ཐམས་ཅད་འཛིན་ནུས་པར་འགྱུར་རོ། །དེ་ནས་ཚིག་འགྲུབ་པ་བསྒྲུབ་པ་འདོད་ན་མར་གྱི་ངོ་ཞག་བརྒྱད་ལ་ཕ་བོང་གཅིག་པུ་གནས་པར་སོང་ལ། མཚན་ཐམས་ཅད་རྫོགས་པར་མཐོང་བ་དང་མཆོད་པ་རྒྱས་པར་བྱ་ཞིང་། །ལྷ་བཤོས་རྒྱས་
པར་ཕུལ་ནས་དེའི་སྟ་ཟུར་ཕྱོགས་སུ་མར་དང་སྦྲང་རྩི་བྱུགས་ལ། རིག་སྔགས་ལན་བརྒྱད་སྟོང་བཟླས་བརྗོད་བྱས་ཏེ་ལྕེས་དྲུད་པར་བྱའོ། །དེ་ནས་བུད་མེད་ལ་རེག་པའི་ཉམས་འདྲ་བར་གྱུར་ནས་ལས་གྲུབ་པར་ཤེས་པར་བྱ་སྟེ། དེ་ཕྱིན་ཅད་ཐོས་པ་འཛིན་པར་འགྱུར་ཞིང་། སུ་དང་
གཏམ་བྱས་པ་དེ་དབང་དུ་འགྱུར་བ་དང་། ཡིད་ལ་ཅི་བསམས་པ་དེ་དེ་བཞིན་དུ་འགྱུར་བ་དང་། གླུ་མཆོག་ཏུ་སྙན་པ་ལེན་པར་འགྱུར་བ་དང་། དུག་ཀྱང་ཟ་ནུས་པར་འགྱུར་རོ། །རིག་པ་མཆོག་སྒྲུབ་པའི་རིག་སྔགས་འཆང་གིས་ཚུལ་བསྔགས་ཏེ་གདོང་བཀྲུས་ལ་ཉེ་རེག་བྱས་ན་དེས་
རིག་སྔགས་ཀྱི་ལྷ་ཐམས་ཅད་དྲན་མ་ཐག་ཏུ་འོང་བར་འགྱུར་རོ། །སྒྲུབ་པའི་ཚེ་ཡང་ཚིག་ལྡན་མ་སྤྱན་དྲང་བར་བྱ་སྟེ། མ་དང་ཡནྟི་ཀའི་ཤིང་གིས་མེ་སྦར་ལ་ཤི་ཀྲུའི་མེ་ཏོག་གི་སྲེག་བླུགས་ཉི་ཤུ་རྩ་གཅིག་སྦྱིན་སྲེག་བྱས་ན་གནས་གར་བཏབ་པ་དེར་གནས་པར་འགྱུར་རོ། །དེ་འོངས་པས་རིག་
སྔགས་འཆང་གི་སྔོན་གྱི་བསོད་ནམས་མ་ཡིན་པ་རྣམས་བྱེད་པར་འགྱུར་རོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ། ལག་ན་རྡོ་རྗེའི་མདུན་དུ་ཙནྡན་དམར་པོས་དཀྱིལ་འཁོར་བྱས་ནས་ལན་བརྒྱད་སྟོང་བཟླས་བརྗོད་བྱས་ན་དེས་ཆོ་ག་རྒྱས་པའི་ལྷ་ཐམས་ཅད་དམ་པ་སྦྱིན་པར་བྱེད་
เล่ม ๙๕ · หน้า 148b
དོ། །དེ་ནས་བཅོམ་ལྡན་འདས་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །ལྷ་རྣམས་འཇིག་རྟེན་གྱི་མའི་ལས་རྣམས་ངས་བཤད་ཟིན་ཏོ། །ངས་ཀྱང་དྲན་པར་བྱེད་དུ་གཞུག་པ་དང་། དམ་ཚིག་འཛིན་དུ་གཞུག་པའི་གསང་སྔགས་བཤད་པར་བྱའོ། །ན་མོ་བཛྲ་པཱ་ཎི་
སྱ། ན་མཿས་ར་སྭ་ཏྱཻ། ཨོྃ་ས་ར་སྭ་ཏྱཻ་སྭཱ་ཧཱ། ལྷ་རྣམས་རིག་སྔགས་འདིའི་ལས་རྣམས་ཀྱང་འབྱུང་སྟེ། འཕགས་པ་ལག་ན་རྡོ་རྗེའི་མདུན་དུ་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ། རིག་སྔགས་འདིས་འོད་མའི་ཤིང་གིས་མེ་སྦར་ལ། ཡུངས་ཀར་ཞོ་དང་།
སྦྲང་རྩི་དང་མར་དང་སྦྱར་བས་ལན་བརྒྱད་སྟོང་སྦྱིན་སྲེག་བྱས་ན་ཚིག་ལྡན་མ་འགྲུབ་པར་འགྱུར་ཏེ། ལས་ཀྱི་མཆོག་སྟོང་བྱེད་ནུས་པར་འགྱུར་རོ། །སྒྲུབ་པའི་ཚེ་ཡང་མདུན་དུ་གུ་གུལ་གྱིས་ལན་བརྒྱད་སྟོང་སྦྱིན་སྲེག་བྱས་ན་ལྷ་མོ་ཡོངས་སུ་གཟིར་ཅིང་ཚིག་བཞིན་དུ་མྱུར་དུ་འོང་བར་འགྱུར་ཏེ་སྡིག་
པའི་ལས་བྱེད་པར་མི་བྱའོ། །ཚིག་ལྡན་མའི་ཆོ་ག་རྫོགས་སོ།། །།དེ་ནས་རྫོང་རིའི་ལྷ་མོས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེའི་གཟུགས་སུ་སྤྲུལ་ནས་ནམ་མཁའི་དཀྱིལ་འཁོར་ན་རྩེ་ཞིང་གར་བྱེད་དེ་རབ་ཏུ་འཇོམས་པའི་ཚོགས་ཀྱིས་བསྐོར་ལ་ལྷ་མོ་རྫོང་གི་འཕགས་པ་མ་རྔ་འབུམ་རྡུང་
ཞིང་གར་བྱེད་དེ་ལྷ་མོ་རྩེ་ཞིང་ང་ནི་ལག་ན་རྡོ་རྗེ་ཡིན་ནོ། །ང་ནི་ལག་ན་རྡོ་རྗེ་ཡིན་ནོ། །ཞེས་སྐད་ཆེན་པོས་སྨྲ་ཞིང་གར་བྱེད་དེ། ལྷ་མོ་རྫོང་གི་འཕགས་མ་ཆ་ལུགས་མི་བཟད་ཅིང་སྟོབས་དང་ཕ་རོལ་གནོན་པ། གཞན་གྱིས་མི་ཚུགས་པའི་ལྷ་མོ་རབ་ཏུ་འཇོམས་མའི་ཚོགས་
ཀྱིས་བསྐོར་ཏེ་རྩེ་བར་བྱེད་དོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་མིག་ཡིད་ཙམ་བཏེག་སྟེ་བལྟས་ནས་བགད་དོ། །དེ་ནས་ལྷ་མོ་རྫོང་གི་འཕགས་མ་ཆ་ལུགས་མི་བཟད་ཅིང་སྟོབས་དང་ཕ་རོལ་གནོན་པ་གཞན་གྱིས་མི་ཚུགས་པའི་ལྷ་མོ་རབ་ཏུ་འཇོམས་པའི་ཚོགས་ཀྱིས་
བསྐོར་བ་དེ་སའི་སྟེང་དུ་ལྷུང་ངོ་དེ་ནས་ལྷ་མོ་དེས་ལག་ན་རྡོ་རྗེའི་རྐང་པ་གཉིས་ལ་གཏུགས་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་བརྩོན་འགྲུས་དང་ཕ་རོལ་གནོན་པ་ཆེན་པོ་ཁྱོད་ཀྱི་བདག་སའི་སྟེང་དུ་ལྟུང་བར་བྱེད་ནུས་ཀྱི་ལྷར་བཅས་
เล่ม ๙๕ · หน้า 149a
པའི་འཇིག་རྟེན་དང་། བདུད་དུ་བཅས་པ་དང་། ཚངས་པར་བཅས་པ་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུའི་ནང་ན་བདག་ལ་བལྟ་ནུས་པ་ཡང་གཞན་སུ་ཞིག་ཡོད་ན་ལྟུང་བར་བྱེད་པ་ལྟ་ཅི་སྨོས། ཁྱོད་ནི་ལྷའི་ལྷ་སྟོབས་དང་ཕ་རོལ་གནོན་པ་དཔག་ཏུ་མེད་པ་ཡིན།
ཁྱོད་ནི་རིག་སྔགས་ཀྱི་རྒྱལ་པོ་འཇིག་རྟེན་ཐམས་ཅད་འཇོམས་པ། འཇིག་རྟེན་ཐམས་ཅད་ཀྱིས་ཕྱག་བྱ་བ་ཡིན་ནོ། །ཁྱོད་ནི་འཇིག་རྟེན་ཐམས་ཅད་ཀྱི་རྗེ་ཡིན་ཏེ། དེ་བས་ན་བདག་སའི་སྟེང་དུ་ལྟུང་བར་བྱེད་ཀྱི་ལྷར་བཅས་པའི་འཇིག་རྟེན་དང་། བདུད་དུ་བཅས་པ་དང་། ཚངས་པར་
བཅས་པ་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུའི་ནང་ན་བདག་ལ་བལྟ་བར་ནུས་པ་ཡང་གཞན་སུ་ཞིག་ཡོད་ན། ལྟུང་བར་བྱེད་པ་ལྟ་ཅི་སྨོས་ཞེས་ཚིག་དེ་སྐད་སྨྲ་ཞིང་འཁོར་འདུས་པ་དེའི་ནང་དུ་འདུག་ནས། ལྷ་གང་འཁོར་དེར་འདུས་པ་དེ་དག་སྐྲག་ཅིང་འཇིགས་ཏེ། ལག་ན་
རྡོ་རྗེའི་ཞལ་དུ་བལྟ་བར་གྱུར་ཏོ། །དེ་ནས་ལྷ་མོ་ཆ་ལུགས་མི་བཟད་པ་དེས་ལྷ་མོ་ལག་ན་རྡོ་རྗེའི་གཟུགས་ཀྱིས་ལྷ་དེ་དག་ལ་འདི་སྐད་ཅེས་སྨྲས་སོ། །ལྷ་རྣམས་ཁྱེད་ཀྱིས་སེམས་ཅན་རྣམས་ལ་ཕན་པའི་ཕྱིར་ངས་བསྐལ་པ་སྟོང་ཕྲག་དགུ་བཅུ་རྩ་དགུའི་བར་དུ་དེ་བཞིན་གཤེགས་པ་མཉེས་པར་
བྱས། མཆོད་པར་བྱས། བཀུར་སྟིར་བྱས། བླ་མར་བྱས། རི་མོར་བྱས་པ་ལ་ལྟོས། ངས་ལས་གཅིག་གིས་རིག་པ་མཆོག་གི་ཆོ་ག་རྒྱས་པ་ཆེན་པོའི་རྒྱལ་པོ་བསྒྲུབས་པ་གང་ཡིན་པ་དང་། ལས་གཅིག་གིས་ལྷ་ཐམས་ཅད་མངོན་དུ་ཕྱོགས་པར་བྱས་ཤིང་། བསྒྲུབས་པ་
གང་ཡིན་པ་དེ་ངས་བཤད་ཀྱིས་བཟོད་ལྡན་དག་རྒྱགས་པ་མེད་པའི་སེམས་ཀྱིས་ཉོན་ཅིག །ལྷ་དང་བཅས་པ་དང་། བདུད་དང་བཅས་པ་དང་། ཚངས་པ་དང་བཅས་པ་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུའི་ནང་ན་ལས་གཅིག་ཤེས་པ་ཡང་གཞན་སུ་ཞིག་ཡོད་ན་བཤད་
པ་ལྟ་ཅི་སྨོས། དེ་ནས་ལྷ་དེ་དག་རྟབ་རྟབ་པོར་གྱུར་ཏེ། མིག་ས་ལ་ཕབ་བོ། །དེ་ནས་བཅོམ་ལྡན་འདས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །རྫོང་གི་འཕགས་པ་ཆ་ལུགས་མི་བཟད་པ་རབ་ཏུ་འཇོམས་པའི་ཚོགས་ཀྱིས་བསྐོར་བ་འདི་ནི་རིག་པ་
เล่ม ๙๕ · หน้า 149b
མཆོག་གི་ཆོ་ག་རྒྱས་པ་ཆེན་པོའི་རྒྱལ་པོ་ཆེན་པོའི་རིག་སྔགས་བཤད་པར་བྱ་བའི་ཕྱིར་འོངས་པ་ཡིན་གྱིས་བཟོད་ལྡན་དག་མ་འཇིགས་ཤིག །མ་འཇིགས་ཤིག །ལྷ་མོ་འདིས་ནི་བསྐལ་པ་སྟོང་ཕྲག་དགུ་བཅུ་རྩ་དགུའི་བར་དུ་དེ་བཞིན་གཤེགས་པ་མཉེས་པར་བྱས། མཆོད་པར་བྱས།
བཀུར་སྟིར་བྱས། རི་མོར་བྱས། བླ་མར་བྱས་ནས། རིག་པ་མཆོག་གི་ཆོ་ག་རྒྱས་པ་ཆེན་པོ་ཡང་བསྒྲུབས་ཏེ། དེས་ན་ལྷ་མོ་འདི་ནི་ངའི་གཟུགས་འཛིན་པར་བྱེད་ཀྱི་ལྷར་བཅས་པའི་འཇིག་རྟེན་དང་། བདུད་དུ་བཅས་པ་དང་། ཚངས་པར་བཅས་པ་དང་། དགེ་སྦྱོང་དང་བྲམ་
ཟེར་བཅས་པའི་སྐྱེ་དགུའི་ནང་ན་ངའི་གཟུགས་འཛིན་པར་ནུས་པ་གཞན་སུ་ཡོད། དེ་ནས་བཅོམ་ལྡན་འདས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་རྫོང་གི་ལྷ་མོ་ལ་འདི་སྐད་ཅེས་སྨྲས་སོ། །ལྷ་མོ་གང་ཁྱོད་སེམས་ཅན་ཐམས་ཅད་ཀྱི་དོན་གྱི་ཕྱིར་རིག་པ་མཆོག་གི་ཆོ་ག་རྒྱས་
པ་ཆེན་པོའི་རྒྱལ་པོ་བཤད་པར་བྱ་བའི་དོན་ལ་འོངས་པ་ལེགས་སོ་ལེགས་སོ། །ལྷ་མོ་སེམས་ཅན་རྣམས་ཀྱི་དོན་གྱི་ཕྱིར་རིག་པ་མཆོག་གི་ཆོ་ག་རྒྱས་པ་ཆེན་པོའི་རྒྱལ་པོའི་གསང་སྔགས་དེ་ཤོད་ཅིག་ཤོད་ཅིག །དེ་ནས་ལྷ་མོ་རྫོང་གི་འཕགས་པ་མ་ཡིད་རབ་ཏུ་དགའ་བར་གྱུར་ནས་
དེ་བཞིན་གཤེགས་པ་ཐམས་ཅད་ལ་ཕྱག་འཚལ་ཏེ། བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིག་སྔགས་ཀྱི་རྒྱལ་པོ་ཆེན་པོ་རིག་པ་མཆོག་གི་ཆོ་ག་རྒྱས་པ་ཆེན་པོའི་རྒྱལ་པོ་གསང་སྔགས་དང་། བདག་གི་ལས་སྔོན་བདག་གིས་བསྒྲུབས་
པ་བདག་གིས་བཤད་པར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །བཟོད་ལྡན་དག་ལྷ་མོ་རྫོང་གི་འཕགས་པས་གསང་སྔགས་བཤད་པ་ཁྱོད་ཀྱིས་ཉོན་ཅིག །ལྷ་མོས་ཀྱང་ཤོད་ཅིག་ཤོད་ཅིག །དེ་ནས་ལྷ་མོ་དེས་དེ་བཞིན་
གཤེགས་པ་ཐམས་ཅད་ལ་ཕྱག་འཚལ་ནས་རིག་སྔགས་བཤད་པ། །ན་མོ་རཏྣ་ཏྲ་ཡ་སྱ། ན་མོ་བཛྲ་པཱ་ཎི་སྱ། མ་ཧཱ་ཡཀྵ་སེ་ནཱ་པ་ཏི་སྱ། །ན་མཿཀྲོདྷ་གི་རིཀྵ་ཡ། སིདྷ་ཤརྡཱུ་ལ་བཱ་ཧ་ནཱ་ཡ། །ཨེ་ཧྱེ་ཧི། །བྷ་ག་བ་ཏི། །བཛྲ་པཱ་ཎི། །ས་ཏྱེ་ན། སྠཱ་ནེ་ཤྭ་རི། ཨཱ་གཙྪ་ཨ་
เล่ม ๙๕ · หน้า 150a
གཙྪ། ནནྟི་ནི། མ་མ་ཀརྨ། སཱ་དྷ་ཡ། བུདྡྷ་ས་ཏྱ། ཨ་མོ་གྷ་གཱ་མི་ནི། ཡ་ཤོ་དྷ་རི། ཧུ་རུ་ཧུ་རུ། དྷུ་ན་དྷུ་ནམ་ནི་ན། ཀརྨཱ་ཎི་ཧུད་དྲུ་སྭཱ་ཧཱ། གསང་སྔགས་འདི་བཤད་པའི་ཚེས་རྣམ་པ་དྲུག་ཏུ་གཡོས་སོ། །ལྷ་རྣམས་རྟབ་རྟབ་པོར་གྱུར་ཏེ་འབྲོས་པ་ལ་
ཞུགས་སོ། །དེ་ནས་བཅོམ་ལྡན་འདས་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །བཟོད་ལྡན་དག་ཁྱེད་ཀྱིས་ལྷ་དྲན་པར་གྱིས་ཤིག །དེ་ནས་ལྷ་མོ་དེས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིག་སྔགས་ཀྱི་རྒྱལ་པོ་ཆེན་པོ་སྔོན་
བདག་གིས་བསྒྲུབས་པ་གང་ཡིན་པའི་རིག་སྔགས་ཀྱི་ལས་ཤོད་ཅིག་ཤོད་ཅིག །དེ་ནས་བཅོམ་ལྡན་འདས་ལག་ན་རྡོ་རྗེ་དྲེག་པ་ཆེན་པོས་རྗེས་སུ་དྲན་པར་བྱ་བའི་རིག་སྔགས་ཀྱི་ལས་བཤད་པ། རིག་སྔགས་འདི་ཞག་བདུན་གྱི་བར་དུ་དབེན་པར་འདུག་ལ་གཅེར་བུའམ་ཡང་ན་ཁྱེད་
རིངས་སུ་བྱས་ཏེ། རིག་སྔགས་བཟླས་བརྗོད་བྱས་ན་ཞག་བདུན་པའི་ཉིན་པར་མཚན་མ་འབྱུང་བར་འགྱུར་ཏེ། ནམ་ཕྱེད་ཀྱི་དུས་སུ་སྐར་མདའ་ལྔས་བསྐོར་བའི་སྐར་མདའ་ལྟུང་བར་འགྱུར་རོ། །དེ་ནས་རིག་པ་མཆོག་གི་ཆོ་ག་གྲུབ་པར་ཤེས་པར་བྱ་སྟེ། ནང་པར་གྱི་དུས་སུ་འཕགས་
པ་ལག་ན་རྡོ་རྗེའི་མདུན་དུ་སིནྡུ་ར་སྔོན་པོའི་ཡམ་སྲེག་ཤིང་བརྒྱད་སྟོང་གིས་སྦྱིན་སྲེག་བྱས་ལ། དགེ་སློང་བདུན་ལ་མཆོད་སྟོན་བྱ་ཞིང་བྲམ་ཟེ་དག་ཀྱང་སྟོན་ནས་ལས་དེ་གྲུབ་ན་ལག་ན་རྡོ་རྗེ་དང་མཐུ་སྟོབས་མཉམ་ཞིང་། བསྐལ་པར་གནས་པ་དང་། འདོད་དགུར་སྒྱུར་བའི་གཟུགས་
ཅན་དང་། སྟོབས་དང་ཕ་རོལ་གནོན་པ་གཞན་གྱིས་མི་ཐུབ་པ་དང་། རིག་སྔགས་འཆང་གི་འཁོར་ལོས་སྒྱུར་བར་འགྱུར་ཏེ། རིག་སྔགས་འཆང་ཐམས་ཅད་ཀྱིས་མི་སོད་ལ་མཐུ་སྟོབས་ཆེ་བ་དང་། བདག་ན་མ་འཆི་བ་ཤེས་པ་དང་། ཕ་རོལ་ནམ་འཆི་བ་ཤེས་པ་དང་། འཛམ་བུའི་
གླིང་ན་ཡོད་པའི་དོན་འདས་པ་དང་། མ་འོངས་པ་དང་། ད་ལྟར་བྱུང་བ་ཐམས་ཅད་ཡང་དག་པ་ཇི་ལྟ་བ་བཞིན་དུ་ཤེས་ཏེ། ལུས་ཞིག་ནས་ཀྱང་ལག་ན་རྡོ་རྗེའི་གནས་ཡིད་དུ་འོང་བར་སྐྱེ་བར་འགྱུར་རོ། །ཕོ་ཉ་མ་རྣམས་སྒྲུབ་པའི་ཐབས་ཀྱང་དེ་བཞིན་ཏེ། ཞག་གསུམ་སྨྱུང་བར་བྱས་ལ་
เล่ม ๙๕ · หน้า 150b
དངོས་གྲུབ་ཀྱི་མ་ལ་ཕྱག་བྱས་ནས་བྱའོ། །ལྷ་ཐམས་ཅད་ཀྱི་ལས་རྣམས་ལ་ཡང་ཆོ་ག་དེ་ཉིད་ཡིན་ཏེ། ཞག་ལྔས་འགྲུབ་པར་འགྱུར་རོ། །སྦྱིན་སྲེག་ཀྱང་ལས་འདི་ཉིད་ཀྱིས་བྱས་ན་ལས་ཐམས་ཅད་འགྲུབ་པར་འགྱུར་རོ། །མཇུག་ཏུ་ཡུངས་ཀར་གྱི་སྦྱིན་སྲེག་བྱའོ། །རས་མ་
ཉམས་པ་ལ་རི་མོ་མཁན་གསོ་སྦྱོང་དང་ལྡན་པ་ཚོན་རྩི་སྦྱིན་མེད་པས་སངས་རྒྱས་ཀྱི་སྐུ་གཟུགས་འདྲིར་གཞུག་གོ། །དེའི་གཡས་ལོགས་སུ་ལྷ་མོ་མདོག་དཀར་ཞིང་འབྱུང་པོའི་ཚོགས་ཀྱིས་བསྐོར་བ་བྲིའོ། །བཅོམ་ལྡན་འདས་ཀྱི་གཡོན་རོལ་དུ་འཕགས་པ་ལག་ན་རྡོ་རྗེ་མདོག་སྔོ་
བསངས་སམ། ཡང་ན་དམར་པོ་བྱ་སྟེ། རྒྱན་ཐམས་ཅད་ཀྱིས་བརྒྱན་པ། དར་རམ་རས་ཀྱི་ཤམ་ཐབས་ཅན་བྲིའོ། །འོག་ཏུ་ནི་སྒྲུབ་པ་པོ་བྲིའོ། །མཐའ་མར་ནི་རིའི་རྩེ་མོ་རྣམས་བྲིའོ། །ལག་ན་རྡོ་རྗེ་ཡང་རིག་སྔགས་ཐམས་ཅད་ཀྱིས་བསྟོད་ཅིང་འདུག་པར་བྲིའོ། །སྟེང་
དུ་ནི་ནམ་མཁའ་ལ་རྒྱུ་བའི་མ་མོ་བདུན་བྲིའོ། །དེ་ནས་རིག་སྔགས་འཆང་གིས་ཞག་གསུམ་སྨྱུང་བ་བྱས་ཏེ། །ས་ཕྱོགས་གཙང་མར་སྐུ་གཟུགས་བཀྲམ་ལ་མར་གྱི་ངོ་ཞག་བཅུ་བཞི་ལ་སྣ་མའི་མེ་ཏོག་བརྒྱད་སྟོང་གིས་འཕགས་པ་ལག་ན་རྡོ་རྗེའི་རྐང་པ་གཡོན་པ་ལ་བསྣུན་ན་དེས་
གཟུགས་འགུལ་ཞིང་སྤུ་ཟིང་ཞེས་བྱེད་པར་འགྱུར་རོ། །ལས་དེ་གྲུབ་པ་དང་དེ་ཕྱིན་ཅད་ལས་བསྒྲུབ་ན་ཆོ་ག་རྒྱས་པའི་རིག་སྔགས་ཐམས་ཅད་དང་། རིག་སྔགས་གཞན་དག་ཀྱང་བདེ་བླག་ཏུ་འགྲུབ་པར་འགྱུར་རོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་ལྷ་དེ་དག་ལ་
འདི་སྐད་ཅེས་སྨྲས་སོ། །ལྷ་རྣམས་ལྷ་མོ་ཆེན་མོ་འདི་ནི་དྲག་ཅིང་རྫུ་འཕྲུལ་ཆེ་བ་ཡིན་ནོ། །དེ་ནས་ལྷ་རྣམས་ཀྱིས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །སྟོབས་པོ་ཆེ་ཁྱོད་ནི་མཆོག་སྦྱིན་པ་ཡིན། ཁྱོད་ནི་གཙོ་བོ་སྟེ་བརྩོན་འགྲུས་དང་ཕ་རོལ་གནོན་
པ་ཆེན་པོ་ཡིན་གྱིས་གང་གིས་མི་རྣམས་འགྲུབ་པར་འགྱུར་བའི་སྦྱིན་སྲེག་དང་། བཟླས་བརྗོད་དང་། ཡམ་སྲེག་ཤིང་རྣམས་ཀྱི་ལས་ལེགས་པར་སྦྱར་བ་ཐམས་ཅད་མ་ལུས་པར་ཤོད་ཅིག། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་སེམས་ཅན་ཐམས་ཅད་ལ་ཕན་པར་
เล่ม ๙๕ · หน้า 151a
དགའ་བའི་ལྷ་རྣམས་ལ་སྦྱིན་སྲེག་དང་། བཟླས་བརྗོད་དང་། ཡམ་སྲེག་ཤིང་རྣམས་ཀྱི་ཆོ་གའི་རིམ་པ་བཤད་པ་ལྷ་རྣམས་ཉོན་ཅིག །ནོར་བསྒྲུབ་པའི་སྦྱིན་སྲེག་རྣམས་ལ་ནི་འབྲས་མ་དྲུས་པ་དང་། ཤི་ཏི་དང་། ཐང་ཆུ་ལ་སོགས་པའི་རྫས་རྣམས་ཀྱིས་བྱའོ། །
དྲག་ཤུལ་ལ་ནི་ཕུབ་མ་དང་། ལན་ཚྭ་དང་། སྐེ་ཚེ་དང་། དུག་དང་། ཁྲག་ལ་སོགས་པའི་རྫས་རྣམས་ཀྱིས་བྱའོ། །ཞི་བ་ལ་ནི་མར་དང་། འོ་མ་དང་། སྦྲང་རྩི་དང་། ཀ་ར་ལ་སོགས་པའི་རྫས་རྣམས་ཀྱིས་བྱའོ། །ལྷ་རྣམས་ཡམ་སྲེག་ཤིང་རྣམས་ཀྱང་ཉོན་ཅིག །བུད་མེད་
དབང་དུ་བྱ་བ་ལ་ནི་མོའི་མིང་དང་ལྡན་པའི་ཡམ་སྲེག་ཤིང་རྣམས་ཀྱིས་བྱའོ། །ནོར་བསྒྲུབ་པ་དང་དབང་དུ་བྱ་བ་ལ་སོགས་པ་ལ་ནི་བིལ་པ་དང་། པ་ལ་ཤ་དང་། ཨུ་དུམ་བཱ་ར་དང་། ཨ་པ་མརྒ་དང་། བ་ས་ཀ་ལ་སོགས་པས་བྱའོ། །དྲག་ཤུལ་ལ་ནི་མ་དན་དང་། །སེང་ལྡེང་དང་།
བེ་ཀངྐ་ཏ་དང་། ནིམ་པའི་ཤིང་ལ་སོགས་པས་བྱའོ། །རྒྱས་པ་ལ་ནི་བིལ་བ་དང་། ཨམྲ་དང་། པ་ནས་ལ་སོགས་པས་བྱའོ། །ལྷ་རྣམས་མེ་ཏོག་རྣམས་ཀྱང་བཤད་ཀྱིས་ཉོན་ཅིག །ཞི་བའི་ལས་ནི་པདྨ་དང་། ཨུཏྤལ་དང་། སཽ་གནྡྷི་ཀ་དང་། སྣ་མའི་མེ་ཏོག་དང་། ཨ་ཏི་
མུཀྟ་ཀ་དང་། ཀླུ་ཤིང་གི་མེ་ཏོག་དང་། ཨ་ཤོ་ཀ་ལ་སོགས་པ་ཡིན་ནོ། །དྲག་ཤུལ་གྱི་ལས་ཀྱི་ནི་ཀ་ར་བཱི་ར་དང་། ཏ་ཀ་ར་དང་། ཀུ་རནྟ་ཀ་ལ་སོགས་པ་ཡིན་ནོ། །ལྷ་རྣམས་ཡམ་སྲེག་ཤིང་གི་མཚན་མ་སྣ་ཚོགས་ཀྱང་ཉོན་ཅིག །ནོར་བསྒྲུབ་པ་ལ་ནི་མཐོ་གང་གི་ཚད་དུ་བྱའོ། །
དྲག་ཤུལ་ལ་ནི་མཛུབ་གང་གི་ཚད་དུ་བྱའོ། །ལྷ་མཐོང་བར་བྱ་བ་ལ་ནི་མཐེའུ་ཆུང་གི་ཚད་དུ་བྱའོ། །དབང་དུ་བྱ་བ་ལ་བུད་མེད་ཀྱི་ནི་རྩེ་མོའི་ཡམ་སྲེག་ཤིང་གིས་བྱའོ། །སྐྱེས་པའི་ནི་དབུས་ཀྱིས་བྱའོ། །དྲག་ཤུལ་དང་མིའི་གཙོ་བོ་དབང་དུ་བྱ་བ་ལ་ནི་དྲུང་བས་བྱའོ། །རྒྱལ་པོའི་ལས་ལ་
ནི་ས་ལའི་དྲུང་བས་བྱའོ། །དབུས་ཀྱིས་བྱ་བ་ལ་ཡང་དབུས་ཀྱིས་བྱའོ། །དྲུང་བས་བྱ་བ་ལ་ཡང་དྲུང་བར་བྱའོ། །རིག་སྔགས་ཐམས་ཅད་ལ་ཡང་ལས་འདི་ཉིད་ཀྱིས་སྦྱར་བར་བྱ་སྟེ། རིག་སྔགས་གང་གིས་ཞི་བ་དང་། རྒྱས་པའི་ལས་རྣམས་ལ་མེ་ཏོག་དང་། ཡམ་སྲེག་
เล่ม ๙๕ · หน้า 151b
ཤིང་གང་བསྟན་པ་དེ་ཉིད་ཀྱིས་ལས་བྱས་ན་འགྲུབ་པར་འགྱུར་རོ། །ཡང་ན་རིག་སྔགས་ཀྱི་རིགས་གསང་བ་ལས་མེ་ཏོག་དང་། ཡམ་སྲེག་ཤིང་ངས་བཤད་པ་གང་ཡིན་པ་དེ་ལས་བྱས་ན་བདེ་བླག་ཏུ་འགྲུབ་པར་འགྱུར་རོ། །ལྷ་རྣམས་ཡམ་སྲེག་ཤིང་རྣམས་ཀྱི་སྦྱོར་བ་གསང་
བ་འདི་དག་ངས་བཤད་ཟིན་ཏོ། །གཞན་ཡང་དོན་ཡོད་པའི་ལས་གང་གིས་གསང་སྔགས་རྣམས་འགྲུབ་པར་འགྱུར་བའི་སྐུ་གཟུགས་ཀྱི་མཚན་ཉིད་བཤད་པར་བྱའོ། །དེ་ནས་ལྷ་རྣམས་ཡིད་རབ་ཏུ་དགའ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་རྫོང་གི་འཕགས་མ་དང་
བཅས་པ་ལ་བསྟོད་ཅིང་མངོན་པར་བསྟོད་དོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །བཟོད་ལྡན་དག་ཁྱོད་ཀྱིས་དེ་བཞིན་གཤེགས་པའི་གཟུགས་ཉོན་ཅིག །དེ་བཞིན་གཤེགས་པའི་གཟུགས་བརྙན་མཚན་ཐམས་ཅད་
ཡོངས་སུ་རྫོགས་ཤིང་དཔལ་གྱི་བེའུས་བརྒྱན་པ། ཕྱག་གཡས་པ་མཆོག་སྦྱིན་པའི་ཚུལ་དུ་མཛད་པ་ལ་བལྟས་ཏེ། དེས་རིག་སྔགས་བསྒྲུབ་པར་བྱའོ། །ཡང་ན་དེ་བཞིན་གཤེགས་པ་ཆོས་སྟོན་ཅིང་བཞུགས་ལ་སྐྱབས་སྦྱིན་པའི་ཚུལ་དུ་མཛད་པ་ལ་བལྟས་ཏེ་དེར་བསྒྲུབ་པར་
བྱའོ། །དེ་བཞིན་གཤེགས་པའི་སྤྱན་སྔར་དྲག་ཤུལ་བསྒྲུབ་པར་མི་བྱ་སྟེ། དེ་ནི་ལག་ན་རྡོ་རྗེའི་མདུན་དུ་བསྒྲུབ་པར་བྱའོ། །ལག་ན་རྡོ་རྗེའི་གཟུགས་ཀྱང་བཤད་པར་བྱ་སྟེ། མཚན་ཐམས་ཅད་ཡོངས་སུ་རྫོགས་པ་མདོག་སྡུག་ཅིང་སྔོ་བསངས་ལ་ཞི་བའི་གཟུགས་ཅན་མཆོག་སྦྱིན་
པའི་ཚུལ་དུ་འདུག་པ་དེའི་མདུན་དུ་རིག་སྔགས་བསྒྲུབ་པར་བྱ་སྟེ། ཞི་བ་ནི་སྐྱིལ་མོ་ཀྲུང་བཅས་པས་བྱའོ། །དྲག་ཤུལ་ནི་འགྲེང་བས་བྱ་སྟེ། དྲག་ཤུལ་ནི་གཟུགས་མི་སྡུག་པས་བྱའོ། །ཞི་བ་དང་རྒྱས་པ་ལ་ནི་ཞི་བའི་གཟུགས་སུ་བྱའོ། །སྐུ་གཟུགས་ལ་ཐད་ཀར་བལྟ་ཞིང་བསྒྲུབ་
པར་བྱ་སྟེ། གཞན་དུ་བལྟ་ཞིང་བསྒྲུབ་པར་མི་བྱའོ། །ཡན་ལག་ཉམས་པ་དང་། ལུས་སྐྱོན་ཅན་དང་། གཟི་བྱིན་མེད་པས་བསྒྲུབ་ན་ནི་ལག་ན་རྡོ་རྗེས་བཤད་པ་བཞིན་དུ་གནོད་པར་འགྱུར་རོ། །རིག་སྔགས་ཀྱི་ལྷ་བྲི་བ་དེ་གང་ཡིན་པ་དེ་ཅི་སྟེ་མདོག་སྔོ་བསངས་སམ། སེར་
เล่ม ๙๕ · หน้า 152a
རམ། དམར་བའམ། དཀར་ཤམ་ཞིང་ན་དེ་ཡང་དེའི་ཁ་དོག་ཏུ་བྲི་བར་བྱའོ། །བུད་མེད་གང་ཡིན་པ་དེའི་ནི་བུད་མེད་ཀྱི་ཆ་བྱད་ཅན་དུ་བྱའོ། །སྐྱེས་པ་གང་ཡིན་པ་དེ་ནི་སྐྱེས་པའི་མཚན་དང་ལྡན་པར་བྱ་ཞིང་། གཟུགས་གང་ཡིན་པ་དང་། ཁ་དོག་གང་ཡིན་
པ་དང་། མཚོན་ཆ་དང་ལྡན་པར་བྱའོ། །ཅི་སྟེ་མཚོན་ཆ་མེད་པ་ཞིག་ནའང་མཚོན་ཆ་ཐོགས་པར་བྱའོ། །གཟུགས་ལོག་པར་བྱས་པས་ནི་དངོས་གྲུབ་འགྲུབ་པར་མི་འགྱུར་རོ། །དྲག་ཤུལ་གྱི་ལས་རྣམས་ལ་ལྷ་དྲག་པོ་གང་ཡིན་པ་དེའི་དྲུང་དུ་དེ་བཞིན་གཤེགས་པ་གཞག་པར་
བྱའོ། །མཆོད་རྟེན་ནམ་མཚན་གྱི་དྲུང་དུ་བསྒྲུབ་ན་མཆོད་རྟེན་ནི་བྱ་གག་གི་སྒོ་ང་འདྲ་བར་འདུག་ན་དངོས་གྲུབ་སྦྱིན་པར་འགྱུར་རོ། །མཚན་ཡང་མཚན་ཉིད་རྟགས་དང་ལྡན་པར་བྱ་སྟེ། །འདི་དག་ནི་གཟུགས་ཀྱི་མཚན་ཉིད་དོ། །དེ་ནས་ལྷ་དེ་དག་ཡིད་དགའ་བར་གྱུར་ནས་ལག་ན་རྡོ་རྗེ་
ལ་ལེགས་སོ་ཞེས་བྱ་བ་བྱིན་ཏེ། བྱང་ཆུབ་སེམས་དཔའ་ཆེན་པོ་གང་ཁྱོད་སེམས་ཅན་ཐམས་ཅད་ལ་ཕན་པའི་ཕྱིར་ཞུགས་ཏེ། སེམས་ཅན་ཐམས་ཅད་ཀྱི་དོན་གྱི་ཕྱིར་རིག་པ་མཆོག་གི་ཆོ་ག་རྒྱས་པ་ཆེན་པོ་མཚན་ཉིད་དང་བཅས། །ཆོ་ག་དང་བཅས་པར་བཤད་པ་ལེགས་སོ་ལེགས་
སོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །བཟོད་ལྡན་དག་ཁྱེད་ཉོན་ཅིག །གང་གིས་དེ་བཞིན་གཤེགས་པའི་སྐུའི་མཚན་ཉིད་འདི་མཐོང་ན། དེ་མཐོང་མ་ཐག་ཏུ་དེ་བཞིན་གཤེགས་པ་བྱེ་བ་ཕྲག་དགུ་བཅུ་རྩ་དགུ་དངོས་གྲུབ་
སྩོལ་བར་མཛད་དོ། །རིག་པ་མཆོག་ཕོ་ཉ་མའི་ཚོགས་ཀྱི་དཀྱིལ་འཁོར་དང་བཅས་པས་ཀྱང་དངོས་གྲུབ་སྦྱིན་པར་འགྱུར་རོ། །ཡར་གྱི་ངོ་ཚེས་བརྒྱད་ལ་ཞག་གཅིག་སྨྱུང་བ་བྱས་ཏེ། འཕགས་པ་ལག་ན་རྡོ་རྗེ་ལ་མཆོད་པ་བྱས་ནས་མེ་ཏོག་དཀར་པོ་ལ་ལན་རེ་བཟླས་བརྗོད་བྱས་པ་བརྒྱད་སྟོང་
གིས་འཕགས་པ་ལག་ན་རྡོ་རྗེ་ལ་བསྣུན་ལ། དེ་ནས་མཆོད་རྟེན་ནམ་མཚན་ལ་བལྟས་ཏེ་རིག་སྔགས་བསྒྲུབས་ན་བདེ་བླག་ཏུ་འགྲུབ་པར་འགྱུར་རོ། །ལྷ་རྣམས་ལྷ་མོ་རྫོང་གི་འཕགས་མའི་ལས་རྣམས་ངས་བཤད་ཟིན་ཏོ། །དེ་ལ་དྲག་ཏུ་བསྐུལ་བའི་གསང་སྔགས་དྲན་པར་བྱས་ནས་མདུན་
เล่ม ๙๕ · หน้า 152b
དུ་གནས་པར་འགྱུར་བ་ཡང་བཤད་པར་བྱའོ། །ན་མོ་བཛྲ་པཱ་ཎི་སྱ། ཨོྃ་ཤྭེ་ཏ་རཱུ་པ་དྷཱ་རི་ཎི་སྭཱ་ཧཱ། མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བར་བྱས་ཏེ། རིག་སྔགས་འདིས་ལྷ་མོ་ཨུཏྤལ་དང་ལྡན་པར་བྱས་ནས། །འཕགས་པ་ལག་ན་རྡོ་རྗེའི་མདུན་དུ་བཞག་ལ་མཆོད་པ་ཆེན་པོ་བྱས་
ཏེ། ལྷ་བཤོས་ཀྱང་རྒྱས་པར་ཕུལ་ནས་པ་ལ་ཤའི་ཤིང་གིས་མེ་སྦར་ལ། གུ་གུལ་སྦྲང་རྩི་དང་མར་དང་སྦྱར་བས་ལན་བརྒྱད་སྟོང་སྦྱིན་སྲེག་བྱས་ན་ལྷ་མོ་ཆེན་མོ་རྫོང་གི་འཕགས་མ་འགྲུབ་པར་འགྱུར་ཏེ། ལས་ཐམས་ཅད་བྱེད་ནུས་པར་འགྱུར་རོ། །རྫོང་གི་འཕགས་མའི་ཆོ་ག་རྫོགས་
སོ།། །།དེ་ནས་འགྲོ་བའི་བདག་པོ་སྲེད་མེད་ཀྱི་བུས་བྱང་ཆུབ་སེམས་དཔའ་ཆེན་པོ་འཕགས་པ་ལག་ན་རྡོ་རྗེ་རིག་སྔགས་ཀྱི་ཆོ་ག་རྒྱས་པ་འཆད་པ་མཐོང་ནས་འཁོར་དེ་ཉིད་ཀྱི་ནང་དུ་འདུས་པར་གྱུར་ཏེ་འདུས་ནས་ལག་ན་རྡོ་རྗེ་ལ་བསྟོད་པ། བྱང་ཆུབ་སེམས་དཔའ་ཆེན་པོ་སྟོབས་དང་ཕ་
རོལ་གནོན་པ་དཔག་ཏུ་མེད་པ་ཁྱོད་སེམས་ཅན་ཐམས་ཅད་ལ་ཕན་པའི་ཕྱིར་ཞུགས་པ་དང་། སེམས་ཅན་ཐམས་ཅད་ལ་ཕན་པའི་ཕྱིར་བརྩོན་པ་གང་ཡིན་པ་ནི་ལེགས་སོ་ལེགས་སོ། །བྱང་ཆུབ་སེམས་དཔའ་ཆེན་པོ་བདག་གིས་ཀྱང་རིག་སྔགས་མཆོག་གི་ཆོ་ག་རྒྱས་པའི་ལས་རིག་
སྔགས་འཆང་རྣམས་བརྒྱན་པ་དང་། འགྲུབ་པར་བྱ་བའི་ཕྱིར་གསང་སྔགས་བཤད་པར་བྱའོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་འགྲོ་བའི་བདག་པོ་སྲེད་མེད་ཀྱི་བུ་ལ་འདི་སྐད་ཅེས་སྨྲས་སོ། །འགྲོ་བའི་བདག་པོ་སྲེད་མེད་ཀྱི་བུ་ཁྱོད་སེམས་ཅན་
ཐམས་ཅད་ལ་ཕན་པའི་ཕྱིར་ཞུགས་པ་གང་ཡིན་པ་ལེགས་སོ་ལེགས་སོ། །རིག་སྔགས་འཆང་རྣམས་བརྒྱན་པའི་ཕྱིར་གསང་སྔགས་ཤོད་ཅིག་ཤོད་ཅིག །དེ་ནས་བྱང་ཆུབ་སེམས་དཔའ་ཆེན་པོ་སྲེད་མེད་ཀྱི་བུས་དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །རིག་སྔགས་ཀྱི་
ཚོགས་ལ་བལྟས་ནས་གསང་སྔགས་བཤད་པ། ན་མོ་བཛྲ་པཱ་ཎི་སྱ། ན་མོ་ནཱ་རཱ་ཡ་ཎཱ་ཡ། ན་མོ་བཻ་ཤྲ་བ་ཎཱ་ཡ། ཤྲཱི་བད་ས་ཙཀྲ་དྷ་རཱ་ཡ། མ་པ་དནྟ། ཏྭ་བ་བྷནྡྷན་བནྡྷཱ་མི། ནི་པ་ངནྟཾ། ཙ་ཏུཥྤ་དནྟ། ཨ་ཤི་བྱི་ཤཱ་ནཤྩ་བནྡྷཱ་མི། སརྦ་དུཥྚཾ་ཤྩ། ད་རུ་ཎཱཾ། ཨི་ཏི་མི་ཏི་
เล่ม ๙๕ · หน้า 153a
ནི། མ་ཧཱ་ཤ་མི་ར། ན་མོ་དེ་བ་བཱ་ཡུ། ཙ་ཏུརྦྷུ་ཛཱ་ཡ། མ་སྤུ་ར། མ་སྤུན་སྭཱ་ཧཱ། དེ་ནས་འགྲོ་བའི་བདག་པོ་སྲེད་མེད་ཀྱི་བུས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རྡོ་རྗེ་འཛིན་ཆེན་པོ་རིག་སྔགས་ཀྱི་ལས་ཤོད་ཅིག་ཤོད་ཅིག །
དེ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་རིག་སྔགས་ཀྱི་ཚིག་ལ་བལྟས་ནས་རིག་སྔགས་ཀྱི་ལས་བཤད་པ། རིག་སྔགས་འཆང་གི་ལས་གཅིག་པུས་རིག་སྔགས་མཆོག་ལ་སོགས་པ་རིག་སྔགས་ཐམས་ཅད་བསྒྲུབ་པར་འདོད་ན། ཟླ་བ་གཅིག་གི་བར་དུ་སློང་མོའི་ཟས་
ཟ་ཞིང་གནས་དབེན་པར་རིག་སྔགས་བཟླས་བརྗོད་བྱས་ལ། ཟླ་བ་གཅིག་ཚང་ནས་ཞག་གཅིག་སྨྱུང་བ་བྱས་ཏེ། ཡུངས་ཀར་གྱིས་ལན་བརྒྱད་སྟོང་སྦྱིན་སྲེག་བྱས་ན། རིག་སྔགས་ཀྱི་རྒྱལ་པོ་ཆེན་པོ་མཐོང་བར་འགྱུར་ཏེ། ཡིད་ལ་གང་འདོད་པ་དེ་དག་ཐམས་ཅད་བྱེད་པར་འགྱུར་
རོ། །བསྲུང་བ་ནི་ཆོས་དཀར་ཅན་གྱིས་བྱའོ། །དེ་ནས་འགྲོ་བའི་བདག་པོ་སྲེད་མེད་ཀྱི་བུས་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རྡོ་རྗེ་འཛིན་བདག་གིས་ཀྱང་རིག་སྔགས་འཆང་རྣམས་བརྒྱན་པར་བྱ་བའི་ལས་གང་གིས་རིག་སྔགས་འཆང་རྣམས་རིན་པོ་ཆེས་བརྒྱན་པར་གྱུར་པ་བཤད་
པར་བྱའོ། །དེ་ནས་ལག་ན་རྡོ་རྗེ་གྲགས་པ་ཆེན་པོས་འགྲོ་བའི་བདག་པོ་སྲེད་མེད་ཀྱི་བུ་ལ་འདི་སྐད་ཅེས་སྨྲས་སོ། །འགྲོ་བའི་བདག་པོ་གང་གིས་རིག་སྔགས་འཆང་རྣམས་རིན་པོ་ཆེས་བརྒྱན་པར་གྱུར་པ་ཤོད་ཅིག་ཤོད་ཅིག །དེ་ནས་འགྲོ་བའི་བདག་པོ་སྲེད་མེད་ཀྱི་བུས་རིག་སྔགས་
རྣམས་རིན་པོ་ཆེས་བརྒྱན་པར་བྱ་བའི་ལས་བཤད་པ། རོ་ཉེ་ཕ་བོང་ལོང་བུ་དང་། །ཚོན་མོ་སྟེང་དང་ཟངས་རྣམས་དང་། །ལན་ཚྭ་ཆུ་ཡི་བཅུ་ཆ་རྣམས། །ཏིལ་གྱི་ཐལ་བའི་ཆུ་དང་བཏགས། །ཨགྣི་ཏིལ་མར་དག་དང་སྦྱར། །མི་ཐོད་ནང་དུ་བཙོ་བར་བྱ། །གསེར་མཆོག་དག་ཏུ་
འགྱུར་བ་སྟེ། །ཡིད་གཉིས་སུ་ནི་བྱ་བ་མེད། །སྦྱོར་བ་གཅིག་ནི་ངས་བཤད་ཟིན། །སྦྱོར་བ་གཉིས་པ་ང་ལས་ཉོན། །མཚལ་དང་དུག་བཅས་པ་བླ་དང་ནི་མུ་ཟིར་ལྡན། །ཤིང་ཐོག་ཁུ་བས་བཏགས་ཏེ་ཟངས་མ་གླེ་བས་ལ་བསྐུ། །དུད་པ་བཀག་སྟེ་བསྲེགས་ནས་བཏགས་
เล่ม ๙๕ · หน้า 153b
ན་གསེར་དང་འདྲ། །གསེར་ཁ་སྐྱ་བོའི་ཆ་བརྒྱད་ཆ་ཡིས་བསྒྱུར་བར་ནུས། །མཚལ་དང་དུག་བཅས་བྷུ་མི་བལ་ལི་བ་བླར་བཅས། །ཙིན་ཚའི་ཤིང་བརྙན་ཚྭ་དང་ཚྭ་ཆུར་ལྡན་བྱས་ལ། །མི་ཐོད་གསར་ནང་ཨགྣིའི་ཏིལ་མར་ལྡན་བྱས་ན། །ལྷ་ཡི་རྒྱན་དུ་རུང་བའི་གསེར་གྱི་སྦྲམ་
བུར་འགྱུར། །མཚལ་དང་ལྡོང་རོས་བཅས་དང་རྟ་ཁྲག་པ་བླར་ལྡན། །ཙིན་ཚའི་ཤིང་བརྙན་ཚྭ་དང་ཚྭ་ཆུར་ལྡན་བྱས་ལ། །མི་ཐོད་གསར་ནང་ཨགྣིའི་ཏིལ་མར་ལྡན་བྱས་ལ། །ལྷ་ཡི་རྒྱན་དུ་རུང་བའི་གསེར་གྱི་སྦྲམ་བུར་འགྱུར། །གསེར་དང་ར་གན་དངུལ་རྣམས་ཁ་བསྒྱུར་ཏེ། །བཙོང་དང་
གོ་བྱེ་དག་གིས་ནད་དུ་བསྒོས་བྱས་ལ། །མི་ཐོད་གསར་པ་དག་གི་ནང་དུ་བཙོ་བྱས་ན། །འཛམ་བུ་ཆུ་བོའི་གསེར་དག་དང་ནི་འདྲ་བར་འགྱུར། །མཚལ་ཕྱེ་ཞིབ་མོར་ཁ་ལུང་ཁུ་བས་ལན་བདུན་བསྒོ། །ཤིང་ཀུན་ཤ་ཡི་ཁུ་བས་ཀྱང་ནི་ལན་བདུན་བྱ། །མི་ཐོད་གསར་ནང་ཨགྣིའི་ཏིལ་
མར་ལྡན་བྱས་ན། །ལྷ་ཡི་རྒྱན་དུ་རུང་བའི་གསེར་གྱི་སྦྲམ་བུར་འགྱུར། །སྦྱོར་བ་འདི་དག་བདག་གིས་བཤད་ཟིན་གྱིས། །བཻ་ཌཱུརྱ་སྔོན་པོའི་ཆོ་ག་ཡང་བདག་ལས་གསོན་ཅིག །མཆིང་བུའི་སྔོན་པོའི་ཆ་བཞི་དང་། པདྨ་རཱ་ག་དེ་དང་མཉམ་པ་དང་། བཻ་ཌཱུརྱ་སུམ་འགྱུར་དང་།
མ་ར་ཀ་ཏའི་ཆའི་ཕྱེད་དང་། དུན་ལས་བྱི་ལའི་མིག་གི་མདོག་འདྲ་བ་སུམ་འགྱུར་དང་། ཟངས་དེའི་ཕྱེད་རྣམས་སྦྱར་ན་བཻ་ཌཱུརྱ་སྔོན་པོ་བཟང་པོར་འགྱུར་རོ། །མཁས་པ་དག་གིས་ལི་ཁྲི་དང་། མཚལ་དང་བ་སོ་སྦྱར་ནས་ར་གསར་དུ་འབྲངས་པའི་འོ་མས་སྤྲུས་ལ་བློ་དང་ལྡན་པས་བྱི་རུ་བྱས་
ཏེ་གྲིབ་མར་ལེགས་པར་བསྐམས་ནས་ཉའི་ཁོང་དུ་བཅུག་ལ་ཡུངས་མར་བརྔོས་ཏེ། གཏུན་གྱི་ནང་དུ་མོན་སྲན་གྲེའུ་སྐམ་པོ་བཅུག་ནས་སྣུམ་ཅུང་ཟད་ཙམ་དང་ལྡན་པར་བྱས་ལ་བྱི་རུ་དེར་བཅུག་སྟེ། འཇམ་པོར་འགྱུར་གྱི་བར་དུ་མཁས་པས་གཏུན་བུས་བརྡུང་ན་བྱི་རཱུ་བཟང་
པོར་འགྱུར་རོ། །ཆོ་ག་དེ་ལྟར་བྱས་ཏེ་ཐིང་ཤིན་བླུགས་ན་ནི་ཨིནྡྲ་ནཱི་ལར་འགྱུར་རོ། །ཉ་ཕྱིས་ཀྱི་ཕྱེ་མ་བླུགས་ན་ནི་མུ་ཏིག་ཏུ་འགྱུར་རོ། །གཞན་དག་ཀྱང་ཁ་དོག་ཅི་འདྲ་བའི་བྱེ་བྲག་དང་སྦྱར་ཏེ་དེ་བཞིན་དུ་བྱའོ། །བཅོམ་ལྡན་འདས་རིན་པོ་ཆེའི་རྒྱན་རྣམ་པ་སྣ་ཚོགས་འདི་དག་ནི་
เล่ม ๙๕ · หน้า 154a
བདག་གིས་བཤད་ཟིན་གྱིས། གསེར་གྱི་དོན་དུ་བདག་གིས་རྫས་བཤད་པ་གང་ཡིན་པའི་རྫས་དེ་དག་གི་མཚན་ཉིད་ཀྱང་གསོན་ཅིག །བདར་ན་མདོག་གི་དམར་སེར་འགྱུར། །ལྕི་ཞིང་འོད་ཀྱང་ཆགས་པ་དང་། །མཉེན་ཞིང་མདོག་ཀྱང་མི་གནག་པ། །དེ་ནི་
གསེར་གྱི་མཆོག་ཏུ་བཤད། །རྡུལ་ཞིང་འཇམ་ཞིང་ལྕི་ལ་སྣུམ། །བསྲེགས་ན་དངས་ལ་ཤིན་ཏུ་དཀར། །འོད་བཟངས་མཉེན་བག་ཡོད་པའི་ཡུལ། །གང་ཡིན་དེ་ནི་རབ་ཏུ་བཟང་། །ཕྱི་རོལ་ཉི་མ་འཆར་ཀའི་མདོག །བཅག་འཕྲོ་དངུལ་ཆུའི་མདོག་དང་འདྲ། །ལྕི་ཞིང་
མདོག་སྡུག་དེ་འདྲའི་ཟངས། །གང་ཡིན་དེ་ནི་རབ་ཏུ་བཟང་། །ཕྱི་རོལ་ཕུག་རོན་མིག་འདྲ་ཞིང་། །བཅག་འཕྲོ་གསེར་གྱི་ཕྱེ་མ་འདྲ། །ལྕི་ཞིང་མདོག་སྡུག་དེ་འདྲ་བ། །མཚལ་གྱི་མཆོག་ཏུ་བཤད་པ་ཡིན། །ཕྱི་རོལ་ནེ་ཙོའི་སྒྲོ་མདོག་འདྲ། །བཅག་འཕྲོ་གསེར་གྱི་ཕྱེ་མ་བཞིན། །
ལྕི་ཞིང་མདོག་སྡུག་དེ་འདྲ་བ། །མུ་ཟིའི་མཆོག་ཏུ་བཤད་པ་ཡིན། །ཉི་མ་འཆར་ཀའི་མདོག་འདྲ་ཞིང་། །ཀ་ར་བཱི་རའི་མེ་ཏོག་འདྲ། །ཡང་ན་ལ་ལ་གསེར་འདྲ་བ། །ལྡོང་རོས་ཀྱི་ནི་གཙོ་བོར་བཤད། །གསེར་གྱི་གྱིམ་བག་མདོག་འདྲ་ཞིང་། །རིམ་པའི་སུལ་གྱིས་གང་བ་དང་། །
མདོག་ཀྱང་སྡུག་ཅིང་ལྕི་བ་དང་། །བ་བླའི་མཆོག་ཏུ་བཤད་པ་ཡིན། །རྫས་འདི་དག་ནི་བདག་གིས་བཤད། །བཟང་པོར་བཅོས་པའང་བདག་ལས་གསོན། །གསེར་གླེབས་ལ་ཁ་ལུང་གི་ཁུ་བ་དང་ཚྭ་ཆུ་དང་སྣུམ་དང་ལྡན་པར་བྱས་ཏེ། བ་ལང་གི་ལྕི་བའི་མེའི་ནང་དུ་ལན་བདུན་
བསྲེགས་ན་དེས་གསེར་དུལ་བར་འགྱུར་རོ། །ར་གན་གྱི་ཆོ་ག་ཡང་འདི་ཡིན་ཏེ། མཁས་པས་བུ་རམ་དང་། ཁ་ལུང་དང་། བྲམྷི་དང་། ལན་ཚྭ་དང་། ཀེང་ཤུ་ཀ་རྣམས་སོ་སོའི་ནང་དུ་ཞག་བདུན་བདུན་གཞག་གོ། །ཐབས་དེ་ལྟ་བུར་བྱས་ན་དངུལ་དང་ཟངས་ཀྱང་དུལ་བར་
འགྱུར་རོ། །ལྡོང་རོས་ནི་བ་ལང་གི་ཤའི་ནང་དུ་བཅུག་ལ་བཏགས་ཏེ། ཁ་ལུང་གི་ཁུ་བའི་ནང་དུ་ལན་བདུན་བདུན་བཅུག་ན་དེས་དུལ་བར་འགྱུར་རོ། །མཚལ་ཡང་མུ་ཟིའི་ཆོ་གར་བསྟན་པ་བཞིན་དུ་བྱས་ན་དུལ་བར་འགྱུར་རོ། །བ་བླ་ནི་རས་ཀྱིས་དཀྲིས་ལ་ཤི་སྣུ་ཧའི་
เล่ม ๙๕ · หน้า 154b
སྦུབས་སུ་བཅུག་སྟེ་བ་ལང་གི་ལྕི་བས་གཡོགས་ནས་བདུགས་ལ་ལན་བདུན་གྱི་བར་དུ་བ་ལང་གི་ལྕི་བའི་ཁུ་བའི་ནང་དུ་བཅུག་ན་བ་བླ་དུལ་བར་འགྱུར་རོ། །བྱི་རུ་ལ་སོགས་པའི་རྫས་རྣམས་གདུལ་བ་ཡང་དེ་ལྟར་བྱས་ན་དུལ་བར་འགྱུར་རོ། །དངུལ་ལ་སོགས་པའི་རྫས་རྣམས་སྔར་ལེགས་པར་
བཏུལ་ཏེ། དྲི་མ་མེད་པར་བྱས་ནས་གདོད་སྦྱོར་བ་ཐམས་ཅད་ལ་སྦྱར་བར་བྱའི་དེ་མ་ཡིན་པ་ཡེ་མི་བྱའོ། །བཅོམ་ལྡན་འདས་འདི་དག་ནི་བདག་གིས་སེམས་ཅན་རྣམས་ལ་ཕན་པའི་ཕྱིར་བཤད་དེ། གང་ཞིག་དེ་དང་མི་མཐུན་པའི་ལས་བྱེད་ན་ལས་གྲུབ་པ་མེད་དོ། །བཅོམ་ལྡན་
འདས་གཞན་ཡང་གང་དག་བདག་གི་གསང་སྔགས་འཆང་བ་དེ་དག་ལ་ཐམས་ཅད་དུ་བསྲུང་བར་འགྱུར་བ་འདི་ཡང་བཤད་པར་བགྱིའོ། །དེ་ནས་བཅོམ་ལྡན་འདས་ལག་ན་རྡོ་རྗེས་འགྲོ་བའི་བདག་པོ་སྲེད་མེད་ཀྱི་བུ་ལ་འདི་སྐད་ཅེས་སྨྲས་སོ། །འགྲོ་བའི་བདག་པོ་ངས་ཀྱང་ཁྱོད་ལ་དྲག་
ཏུ་བསྐུལ་བའི་གསང་སྔགས་བཤད་པར་བྱའོ། །ན་མོ་བཛྲ་པཱ་ཎི་སྱ། ཨོྃ་ལོ་ལཱ་ཙཀྲཱ་ཡ་སྭཱ་ཧཱ། གསང་སྔགས་འདིས་ལག་ན་རྡོ་རྗེའི་མདུན་དུ་མར་ངོའི་ཚེས་བཅུ་བཞི་ལ་ཞག་གཅིག་སྨྱུང་བ་བྱས་ཏེ། ལན་བརྒྱད་སྟོང་བཟླས་བརྗོད་བྱས་ན་སྲེད་མེད་ཀྱི་བུ་འགྲུབ་པར་འགྱུར་ཏེ། ལས་ཐམས་
ཅད་བྱེད་པར་ནུས་སོ། །སྲེད་མེད་ཀྱི་བུའི་ཆོ་ག་རྫོགས་སོ།། །།དེ་ནས་གང་ག་ཀླུང་ལ་སོགས་པ་ཀླུང་ཆེན་པོ་བཞི་འཁོར་བརྒྱད་ཁྲི་བཞི་སྟོང་གིས་བསྐོར་བ་རྣམས་ལག་ན་རྡོ་རྗེའི་ཞབས་དྲུང་དུ་སོང་སྟེ། ཕྱིན་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་
སོ། །བྱང་ཆུབ་སེམས་དཔའ་ཆེན་པོ་བདག་ཅག་གིས་ཀྱང་སེམས་ཅན་ཐམས་ཅད་ལ་ཕན་པའི་ཕྱིར་རིག་པ་མཆོག་གི་ཆོ་ག་རྒྱས་པ་ཆེན་པོའི་གསང་སྔགས་བཤད་པར་བགྱིའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་གང་གཱ་ཀླུང་ལ་སོགས་པ་ཀླུང་བརྒྱད་ཁྲི་བཞི་སྟོང་གིས་བསྐོར་
བ་རྣམས་ལ་འདི་སྐད་ཅེས་སྨྲས་སོ། །བཟོད་ལྡན་དག་ཁྱེད་སེམས་ཅན་ཐམས་ཅད་ལ་ཕན་པའི་ཕྱིར་ཞུགས་པ་དང་། །སེམས་ཅན་ཐམས་ཅད་ལ་ཕན་པའི་ཕྱིར་བརྩོན་པ་ལེགས་སོ་ལེགས་སོ། །བཟོད་ལྡན་དག་རིག་པ་མཆོག་གི་ཆོ་ག་རྒྱས་པ་ཆེན་པོའི་གསང་སྔགས་ཤོད་ཅིག་ཤོད་
เล่ม ๙๕ · หน้า 155a
ཅིག །དེ་ནས་གང་གཱ་ཀླུང་ལ་སོགས་པ་ཀླུང་ཆེན་པོ་བརྒྱད་ཁྲི་བཞི་སྟོང་གིས་བསྐོར་བ་རྣམས་གཅིག་ཏུ་ཕྱོགས་པར་གྱུར་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་ཕྱག་འཚལ་ཏེ་རིག་སྔགས་བཤད་པ། ན་མོ་བཛྲ་པཱ་ཎི་སྱ། ན་མཤྩ་ཏུརྞཱཾ། མ་ཧཱ་ས་མ་དྲཱ་
ཎཱཾ། གང་གཱ་ན་དཱི། པྲ་མུ་ཁཱ་ཎཱཾ། ཙ་ཏུརྴཱི་ཏི་ནཱ་དྷ་སིཾ་ཧ་ས་ནཱཾ། མ་ཡ་གོ་གི་ནི་བ་སི་ནཱཾ། ས་རི་ཏི་དྷཱ་རི་ཎཱཾ། ཤྭེ་ཏ་བཱ་ས་སཱ་ནཱཾ། ཛ་ཊ་མུ་ཀུ་ཊ་དྷཱ་རི་ཎཱཾ། ན་མོ་སྟུ་ཏེ་ཀཱི་ལི་ཀཱི་ལི་སྭཱ་ཧཱ། ཡོ་ག་དྷཱ་རི་ཎི། མ་ཧཱ་ཡོ་ག་དྷཱ་རི་ཎི་སྭཱ་ཧཱ། དེ་ནས་གང་གཱ་ཀླུང་ལ་སོགས་པ་ཀླུང་ཆེན་
པོ་བཞི་ཀླུང་བརྒྱད་ཁྲི་བཞི་སྟོང་གིས་བསྐོར་བ་རྣམས་ཀྱིས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིག་སྔགས་ཀྱི་རྒྱལ་པོ་ཆེན་པོ་རིག་སྔགས་ཀྱི་ལས་རྣམས་ཤོད་ཅིག་ཤོད་ཅིག །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་རིག་སྔགས་ཀྱི་
ལས་བཤད་པ། དགུན་ཟླ་ཐ་ཆུང་ས་ཆོས་བདུན་ལ་ཞག་གཅིག་སྨྱུང་བ་བྱས་ཏེ། གང་གཱའི་ཀླུང་གི་ནང་དུ་ཆུ་ལྟེ་བར་ཕྱིན་པ་ཙམ་དུ་ཞུགས་ལ། རིག་སྔགས་ལན་བརྒྱད་སྟོང་བཟླས་བརྗོད་བྱས་ཏེ། གང་གཱའི་ལྷ་མོ་ལ་ཟངས་ཀྱི་སྣོད་ཀྱི་ནང་ནས་ཙནྡན་དམར་པོ་དང་། མེ་ཏོག་དམར་པོ་
དད་ལྡན་པའི་མཆོད་ཡོན་དབུལ་ལོ། །དེ་ནས་འགྲུབ་པར་འགྱུར་ཏེ། ཀླུང་ཆེན་པོ་བཞི་དང་། ཀླུང་ཐམས་ཅད་ཀྱང་འགྲུབ་པར་འགྱུར་རོ། །ཀླུང་གི་ཆུ་གང་གཱའི་ནང་དུ་ཞུགས་ཏེ། བསྒྲུབས་ནས་ཡང་དེ་དག་མྱུར་དུ་འགྲུབ་པར་འགྱུར་རོ། །ལྷ་རྣམས་ཀླུང་ཆེན་པོ་རྣམས་ཀྱི་ལས་ངས་
བཤད་ཟིན་ཏོ། །དེ་དག་ལ་དྲག་ཏུ་བསྐུལ་བའི་གསང་སྔགས་ཀྱང་བཤད་པར་བྱ་སྟེ། ཡར་གྱི་ངོ་ཚེས་བརྒྱད་ལ་ཞག་གཅིག་སྨྱུང་བ་བྱས་ནས་འཕགས་པ་ལག་ན་རྡོ་རྗེའི་མདུན་དུ་སྣ་མའི་མེ་ཏོག་བརྒྱད་སྟོང་ཕུལ་ན་ཀླུང་ཆེན་པོ་བཞི་འགྲུབ་པར་འགྱུར་རོ། །ན་མོ་བཛྲ་པཱ་ཎི་སྱ། ཨོྃ་ཤྭེ་ཏ་
ཛ་ཊི་ཀྲྀཥྞ་རཱུ་པ་དྷཱ་རི་ཎི་སྭཱ་ཧཱ། ཀླུང་ཆེན་པོ་བཞིའི་ཆོ་ག་རྫོགས་སོ།། །།དེ་ནས་བཅོམ་ལྡན་འདས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེ་འཁོར་དེ་ཉིད་ཀྱི་ནང་ནས་ལངས་ཏེ། གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ངས་ལ་བཙུགས་ཏེ། བཅོམ་ལྡན་
เล่ม ๙๕ · หน้า 155b
འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་རིག་སྔགས་ཀྱི་རྒྱལ་པོ་ཆེན་པོའོ། །རིག་སྔགས་ཀྱི་རྒྱལ་པོ་ཆེན་པོ་རིག་སྔགས་ཀྱི་བདག་པོ་ཆེན་པོ། རིག་སྔགས་ཐམས་ཅད་ཀྱི་བདག་པོ་
རིག་སྔགས་ཐམས་ཅད་སྒྲུབ་པ་དང་། ཕུར་བུས་འདེབས་པ་དང་། །གཅོད་པར་བགྱིད་པ་ལགས་ཏེ། བཅོམ་ལྡན་འདས་བདག་གིས་སེམས་ཅན་ཐམས་ཅད་ལ་སྨན་པ་དང་། སེམས་ཅན་ཐམས་ཅད་ལ་ཕན་པ་དང་བདེ་བའི་སླད་དུ་རིག་པ་མཆོག་གི་ཆོ་ག་རྒྱས་པ་བཤད་
པ་ལགས་སོ། །བཅོམ་ལྡན་འདས་སེམས་ཅན་རྣམས་ལ་སྨན་པར་འཚལ་བའི་སླད་དུ། ལྷ་ཐམས་ཅད་ཀྱིས་མ་འཚལ་བ་དང་། མ་ཐོས་པ་གང་ལགས་པ་དེ་ཡང་བཤད་པར་འཚལ་ལོ། །བཅོམ་ལྡན་འདས་འདི་ནི་རིག་པ་མཆོག་གི་ཆོ་ག་རྒྱས་པའི་སྙིང་པོར་གྱུར་པ་ལགས་སོ། །
འདི་ནི་ཡང་དག་པ་ལགས་སོ། །བཅོམ་ལྡན་འདས་འདི་ནི་བདག་གི་རླབས་ཆེན་པོ་ལགས་ཏེ། ཐབས་འདི་འབའ་ཞིག་གིས་རིག་སྔགས་ཐམས་ཅད་བསྒྲུབ་པར་འཚལ་ལོ། །ཐབས་འདི་འབའ་ཞིག་གིས་གསང་སྔགས་ཐམས་ཅད་ཕུར་བུས་གདབ་པར་འཚལ་ལོ། །དེ་ནས་
བཅོམ་ལྡན་འདས་ཀྱིས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །རིག་སྔགས་ཀྱི་རྒྱལ་པོ་བྱང་ཆུབ་སེམས་དཔའ་ཆེན་པོ་གང་གིས་སེམས་ཅན་རྣམས་འགྲུབ་པའི་ཉེ་བར་བསྒྲུབ་པའི་ལས་རྣམས་ཤོད་ཅིག་ཤོད་ཅིག །དེ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་སྙིང་རྗེའི་
སེམས་ཀྱིས་རིག་སྔགས་ཀྱི་ཚོགས་ལ་བལྟས་ནས། སེམས་ཅན་རྣམས་ཀྱི་དོན་གྱི་ཕྱིར་རིག་སྔགས་འཆང་གི་གསང་བ་བཤད་པ། མི་གང་མདོག་སྡུག་པ་དང་། ལག་པ་རིང་བ་དང་། སེན་མོ་ཟངས་ཀྱི་མདོག་ལྟ་བུ་དང་། རྐང་པ་རུ་སྦལ་འདྲ་བའི་རིག་སྔགས་འཆང་དེ་ལ་
ནི་རིག་སྔགས་འཆང་དེ་དག་གིས་རིག་སྔགས་འཆང་གི་ལས་རྣམས་འགྲུབ་པར་འགྱུར་རོ། །མི་གང་མདོག་གནག་པ་དང་། མིག་དམར་བ་དང་། སྣ་ཡོ་བ་དང་། སེན་མོ་སེར་བ་དང་། སེན་མོ་སྔོ་བ་དང་། མཛེ་ཅན་དང་། ཤ་གཟིག་གུ་དང་། ཤུ་བ་དང་།
เล่ม ๙๕ · หน้า 156a
འབྲུམ་བུ་ཕྲ་མོས་ཡོག་པ་དང་། མ་རུངས་པའི་ལས་བྱེད་པ་གང་ཡིན་པ་དེ་དག་ལ་ནི་ལས་དྲག་པོ་འགྲུབ་པར་འགྱུར་རོ། །མི་གང་མདོག་སྔོ་བསངས་དང་། ལག་པ་རིང་བ་དང་། མདོག་སྡུག་པ་དང་། མིག་རྩ་དམར་བ་དང་། སེན་མོ་རུ་སྦལ་ལྟ་བུ་དང་། རྐང་
པ་རུ་སྦལ་ལྟ་བུ་ཤ་བཀྲའི་མིག་ལྟ་བུའི་རིག་སྔགས་འཆང་དེ་དག་ལ་ནི་རིག་སྔགས་འཆང་གི་གསང་སྔགས་འགྲུབ་པར་འགྱུར་རོ། །མི་གང་སྐྲ་དམར་བ་དང་། མིག་སེར་བ་དང་། སེན་མོ་སྔོ་བ་དག་ནི་མ་རུངས་པའི་ལས་བྱེད་པ་ཡིན་ཏེ། དེ་དག་ལ་ནི་དྲག་ཤུལ་གྱི་ལས་རྣམས་འགྲུབ་
པར་འགྱུར་རོ། །མི་གང་མདོག་སྔོ་བསངས་དང་། སྐྲ་འཇམ་པ་དང་། ཤ་བཀྲའི་མིག་ལྟ་བུ་དང་། མགོ་གདུགས་ལྟ་བུ་དང་། ཤིང་ནྱ་གྲོ་དྷ་ལྟ་བུ་ཆུ་ཞེང་གབ་པ་དང་། བྱིན་པ་རི་དགས་ཨེ་ན་ཡ་ལྟ་བུའི་རིག་སྔགས་འཆང་རྣམས་ལ་ནི་ལས་ཐམས་ཅད་འགྲུབ་པར་འགྱུར་རོ། །
མི་གང་སོར་མོ་རྡུམ་པ་དང་། ལག་པ་རྡུམ་པ་དང་། སྒུར་བུ་དང་། ཞར་བ་དང་། མིག་ཡོ་བ་དང་། ཤེལ་མིག་ཅན་དང་། ཁ་དོག་གཅིག་གི་ཤས་ཆེ་བ་དེ་དག་ལ་ནི་ལས་ཕྲན་ཚེགས་འགྲུབ་པར་འགྱུར་ཏེ། དེ་དག་ལ་གཞན་ཅི་ཡང་འགྲུབ་པར་མི་འགྱུར་རོ། །མི་གང་
ལག་པ་རིང་བ་དང་། པྲི་ཡངྐུའི་མདོག་ལྟ་བུར་འདུག་པ་དང་། སྐྲ་དང་། ལུས་དང་རྐང་པ་མདོག་སྣུམ་པ་དེ་དག་ནི་རིག་སྔགས་འཆང་གི་རྒྱལ་པོ་ཡིན་ཏེ་ལས་ཐམས་ཅད་འགྲུབ་པར་འགྱུར་རོ། །ལྷ་རྣམས་མི་གང་དག་གིས་རིག་པ་མཆོག་གི་ཆོ་ག་རྒྱས་པ་ཆེན་པོ་འགྲུབ་པར་འགྱུར་
བའི་མིའི་མཚན་མ་ངས་བཤད་ཟིན་ཏོ། །མི་མཆོག་དེ་དག་ལ་གསང་བ་གང་གིས་བདེ་བླག་ཏུ་ལྷ་རྣམས་དགའ་བར་འགྱུར་བའི་གསང་བ་ངས་བཤད་པར་བྱའོ། །སྟེང་ན་རྒྱུ་བའི་རིག་སྔགས་ཀྱི་ལྷ་གང་ཡིན་པ་དེ་དག་ལ་ནི་སྣ་མའི་མེ་ཏོག་གིས་ཞག་བརྒྱད་ཀྱི་བར་དུ་ལྷ་དེ་དག་
མཆོད་པ་བྱས་ཏེ། ག་པུར་དང་། །གུ་གུལ་གྱི་བདུག་པ་ཡང་ཕུལ་ན་དེ་དག་འགྲུབ་པར་འགྱུར་རོ། །ཅི་སྟེ་སྟེང་དུ་རྒྱུ་བའི་རིག་སྔགས་ཀྱིས་ལྷ་རྣམས་དགུག་པར་འདོད་ན་དཀྱིལ་འཁོར་བྱས་ཏེ། །ཞག་གསུམ་གྱི་བར་དུ་ལྷ་དེ་ལ་ཀོ་ཤ་ཏ་ཀའི་མེ་ཏོག་གིས་མཆོད་པ་བྱས་ཏེ་ཀ་ར་
เล่ม ๙๕ · หน้า 156b
བཱིར་ཁ་འབུས་པའི་འདུག་པ་ཡང་ཕུལ་ན་དེས་ལྷ་མཐོང་བར་ཡང་མི་འགྱུར་ན་དངོས་གྲུབ་ལྟ་ཅི་སྨྲོས། རིག་སྔགས་ཀྱི་ལྷ་ས་འོག་ན་རྒྱུ་བ་གང་ཡིན་པ་དེ་དག་ཅིས་དགའ་བར་འགྱུར་བ་དེ་ཡང་བཤད་པར་བྱ་སྟེ། དཀྱིལ་འཁོར་བྱས་ལ་ཞག་ཉི་ཤུ་རྩ་གཅིག་གི་བར་དུ་པྲི་ཡངྐུའི་མེ་ཏོག་གིས་
མཆོད་དེ། ཨ་ག་རུ་དང་པོག་གི་བདུག་པ་ཡང་དབུལ་བར་བྱའོ། །ཅི་སྟེ་དཀྲུག་པར་འདོད་ན་ཞག་གསུམ་གྱི་བར་དུ་ཀུ་རནྟ་ཀ་སྔོན་པོའི་མེ་ཏོག་གིས་མཆོད་དེ། དེ་ཉིད་ཀྱི་རྩ་བའི་བདུག་པ་ཡང་དེ་ལ་ཕུལ་ན་དེས་ལྷ་ཡང་མཐོང་བར་མི་འགྱུར་ན་དངོས་གྲུབ་ལྟ་ཅི་སྨོས། རིག་སྔགས་ཀྱི་
ལྷ་དུར་ཁྲོད་དུ་དགའ་བ་གང་ཡིན་པ་དེ་དག་ཅིས་དགའ་བར་འགྱུར་དེ་ཡང་བཤད་པར་བྱ་སྟེ། ཞག་བདུན་གྱི་བར་དུ་བ་རུ་རའི་མེ་ཏོག་གིས་མཆོད་དེ། ཉ་ཤ་དང་ཤའི་བདུག་པ་ཡང་དབུལ་ལོ། །ཅི་སྟེ་དཀྲུག་པར་འདོད་ན་ཞག་གསུམ་གྱི་བར་དུ་པདྨའི་མེ་ཏོག་གིས་མཆོད་དེ། ཙནྡན་
དང་ག་པུར་གྱི་བདུག་པ་ཕུལ་ནས་དེ་ནས་ལྷ་ཡང་མཐོང་བར་མི་འགྱུར་ན་དངོས་གྲུབ་ལྟ་ཅི་སྨོས། ལྷ་ཕལ་པ་རྣམས་ལ་ནི་དཀྱིལ་འཁོར་སྐྱོང་ནུལ་གྱིས་བྱུགས་ཏེ་ཞག་བཅུའི་བར་དུ་མེ་ཏོག་དཀར་པོ་དང་། གུ་གུལ་གྱི་བདུག་པ་ཡང་དབུལ་ལོ། །ཅི་སྟེ་དཀྲུག་པར་འདོད་ན་དཀྱིལ་འཁོར་
བྱས་ལ་ཞག་གཅིག་གི་བར་དུ་དུག་ཏི་ཀའི་མེ་ཏོག་གིས་མཆོད་དེ། གནྡྷ་ཧ་སྟིའི་རྩ་བའི་བདུག་པ་ཕུལ་ན་དེས་ལྷ་ཡང་མཐོང་བར་མི་འགྱུར་ན་དངོས་གྲུབ་ལྟ་ཅི་སྨོས། ལྷ་རྣམས་ཀྱི་མཆོག་ཏུ་གསང་བ་འདིས་ནི་ལས་ཐམས་ཅད་ཀྱང་ལས་གཅིག་གིས་འགྲུབ་པར་འགྱུར་ཏེ་རིག་སྔགས་ཀྱི་རིགས་ཀྱི་རིམ་པ་
བཞིན་དུ་ལས་བྱའོ། །དེ་ནས་ཆོ་ག་རྒྱས་པ་གཞིག་པར་འདོད་ན་རིག་སྔགས་ཀྱི་ཆོ་ག་ཐམས་ཅད་ལ་ཡང་དཀྱིལ་འཁོར་སྐྱོང་ནུལ་གྱིས་བྱུགས་ལ་ཞག་གསུམ་གྱི་བར་དུ་དེས་དེ་བཞིན་དུ་ལྷ་བཤོས་དང་། མེ་ཏོག་དང་། བདུག་པ་ཐམས་ཅད་བླངས་ཏེ། ཆོ་ག་རྒྱས་པ་མིང་ནས་སྨོས་ཤིང་མཆོད་
པ་བྱས་ན་ཆོ་ག་རྒྱས་པའི་ལྷ་ཡང་མཐོང་བར་མི་འགྱུར་ན་དངོས་གྲུབ་ལྟ་ཅི་སྨོས། རབ་ཏུ་གྲུབ་པར་བྱ་ན་ཡང་ཆོ་ག་དེ་ཉིད་ཡིན་ནོ། །བཅོམ་ལྡན་འདས་རིག་སྔགས་ཀྱི་ལྷ་ཐམས་ཅད་ཀྱི་གསང་བ་དང་། གསང་ཆེན་བདག་གིས་བཤད་ལགས་ཏེ། ལྷར་བཅས་པའི་འཇིག་རྟེན་བདུད་དུ་
เล่ม ๙๕ · หน้า 157a
བཅས་པ་དང་། ཚངས་པར་བཅས་པ་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་གཞན་ལྟ་སུ་ཞིག་གིས་འཚལ་བར་མི་ནུས་ན། བཤད་པ་ལྟ་སྨོས་ཀྱང་ཅི་འཚལ། བདག་གིས་རིག་པ་མཆོག་གི་ཆོ་ག་རྒྱས་པ་ཆེན་པོ་བཤད་པ་རིག་པ་མཆོག་གི་སྙིང་པོར་གྱུར་
པ། རིག་སྔགས་ཀྱི་ལྷ་ཐམས་ཅད་ཀྱི་སྙིང་པོ་གསང་བའི་ལས་འདི་ནི་དཀོན་མཆོག་གསུམ་ལ་དང་བ་ལ་སྩལ་བར་བགྱིའོ། །སྡིག་པའི་ལས་ཅན་དག་ལ་ནི་གསང་བ་འདི་སྩལ་བར་མི་བགྱིའོ། །ལྷ་རྣམས་མཆོད་པར་བྱ་བ་དང་དཀྲུག་པར་བྱ་བའི་ཆོ་ག་རྫོགས་སོ།། །།
དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་རིག་སྔགས་ཀྱི་ཚོགས་ཐམས་ཅད་ལ་བལྟས་ནས་ལྷ་དེ་དག་ལ་འདི་སྐད་ཅེས་སྨྲས་སོ། །བཟོད་ལྡན་དག་ཁྱེད་རྒྱགས་པ་མེད་པའི་སེམས་ཀྱིས་ཉོན་ཅིག །སེམས་ཅན་རྣམས་ཀྱི་དོན་གྱི་ཕྱིར་ངས་རིག་པ་མཆོག་གི་ཆོ་ག་རྒྱས་པ་ཆེན་པོ་
བཤད་པ་དང་། རིག་སྔགས་ཀྱི་ལྷ་རྣམས་ཀྱི་རིག་སྔགས་གསང་བ་བཤད་པ་དང་། ཆོ་ག་རྒྱས་པའི་ལྷ་རྣམས་བཤད་པ་འདི་ནི་ཆོ་ག་རྒྱས་པ་ཆེན་པོའི་སྙིང་པོ་ཡིན་ཏེ། ཆོ་ག་རྒྱས་པ་གསང་བའི་དཀྱིལ་འཁོར་དང་ལྡན་པ་འདི་དང་། དཔལ་ཐམས་ཅད་མངོན་པར་འབྱུང་བ་གང་གིས་
མཐོང་བའི་རིག་སྔགས་འཆང་དེ་དག་ནི་རིང་པོར་མི་ཐོགས་པར་དངོས་གྲུབ་འགྲུབ་པར་འགྱུར་ཏེ། ཆོ་ག་རྒྱས་པ་ཆེན་པོ་གསང་སྔགས་དང་ལྡན་པ་གང་གིས་མཐོང་བའི་རིག་སྔགས་འཆང་དེ་དག་རིང་པོར་མི་ཐོགས་པར་དངོས་གྲུབ་འགྲུབ་པར་འགྱུར་བར་ལག་ན་རྡོ་རྗེ་ངས་བཤད་དོ། །ཆོ་ག་
རྒྱས་པ་འདི་གང་གིས་མཐོང་བ་དང་། །ལྷ་ཐམས་ཅད་ལ་བརྟེན་པ་བྱས་པ་དེ་ལ་དགའ་བ་དང་། ཡིད་རབ་ཏུ་དགའ་བས་དངོས་གྲུབ་བྱིན་ཅིག །གསང་བའི་དཀྱིལ་འཁོར་གྱི་ཆོ་ག་དམ་པ་འདི་གང་གིས་མཐོང་བ་དེ་ལ་ནི་དངོས་གྲུབ་སྦྱིན་པའི་ཕྱིར་ང་རྟག་ཏུ་ཕྱི་བཞིན་འབྲང་ངོ་། །རིག་
སྔགས་འཆང་གསོ་སྦྱོང་འཛིན་ཅིང་སྨྱུང་བ་བྱས་པ་དང་། གཙང་བ་དང་། གོས་གཙང་མ་བགོས་པས་ཕྱོགས་གཙང་ཞིང་དབེན་པའི་སའམ། ཁྱིམ་གཙང་མར་དཀྱིལ་འཁོར་ཁྲུ་བཞི་པའམ། ཁྲུ་བཅུ་གཉིས་པ་བྱས་ལ་ཅི་འབྱོར་པའི་ཚོན་རྩི་སྣ་གསུམ་གྱིས་ཚོན་པ་ཀྱེ་སྟེ། ཐོག་མར་
เล่ม ๙๕ · หน้า 157b
སངས་རྒྱས་བཅོམ་ལྡན་འདས་གཞག་གོ། །དེའི་གཡོན་ལོགས་སུ་འཕགས་པ་ལག་ན་རྡོ་རྗེ་ཕོ་ཉ་མའི་ཚོགས་ཀྱི་འཁོར་དང་བཅས་པ་གཞག་གོ། །དེའི་དྲུང་དུ་འཕགས་པ་རྡོ་རྗེ་སྡེ་ལག་པ་ན་པདྨ་ཐོགས་པ་གཞག་གོ། །དེའི་གཡོན་ལོགས་སུ་འཕགས་པ་གཙུག་ནས་འབྱུང་བ་གཞག་
གོ། །དེའི་དྲུང་དུ་ལྷ་ཆེན་པོ་དང་། ཚངས་པ་དང་། ཁྱབ་འཇུག་དང་། མ་མོ་བདུན་གཞག་གོ། །དེའི་དྲུང་དུ་ཚོགས་དྲུག་ཅུ་རྩ་བཞི་དང་། ལོག་འདྲེན་སུམ་ཅུ་རྩ་གཉིས་གཞག་གོ། །བཅོམ་ལྡན་འདས་ཀྱི་སྤྱན་སྔར་ནི་སྤྱན་གསུམ་གཞག་པར་བྱའོ། །བཅོམ་ལྡན་འདས་ཀྱི་
གཡས་ལོགས་སུ་ནི་འཕགས་པ་སྤྱན་རས་གཟིགས་དབང་ཕྱུག་གོས་དཀར་ཅན་དང་ལྷན་ཅིག་ཏུ་གཞག་གོ། །དེའི་དྲུང་དུ་རྒྱལ་པོ་ཆེན་པོ་བཞི་དཔུང་དང་བཅས་པར་གཞག་གོ། །ལྷ་ཐམས་ཅད་ཀྱང་ཇི་ལྟ་བ་བཞིན་དུ་མཚོན་ཆ་ཐོགས་པར་བྱའོ། །ནང་དུ་ཡང་ཀླུང་ཆེན་པོ་བཞི་
འདབ་ཆགས་སུ་གཞག་གོ། །གང་གཱའི་བུམ་པ་ནི་མགྲིན་ཆིངས་དཀྲི་བར་བྱའོ། །བུམ་པའི་ནང་དུ་སྙིང་པོ་གསུམ་གཞག་པར་བྱའོ། །སྒོ་དང་པོའི་ནང་དུ་ནི་རྫོང་གི་འཕགས་མ་དང་། ཚིག་ལྡན་མ་གཞག་པར་བྱའོ། །བྱང་ཕྱོགས་སུ་ནི་ལྕགས་ཅན་གཞག་གོ། །ནུབ་ཕྱོགས་
སུ་ནི་རྒྱལ་པོའི་བློ་གྲོས་མ་གཞག་གོ། །ལྷོ་ཕྱོགས་སུ་ནི་བདུད་རྩི་ཐབ་སྦྱོར་གཞག་གོ། །བུམ་པའི་མདུན་དུ་ནི་ལྷའི་དྲང་སྲོང་མེ་འབར་བ་དང་ལྡན་པར་གཞག་གོ། །སྒོ་བཞིར་ཡང་བུམ་པ་མགྲིན་ཆིངས་དང་བཅས་པ་བཞི་གཞག་གོ། །སྒོ་རེ་རེར་ཡང་སྐྲའི་སྐུད་པ་མཚོན་ཆ་དང་བཅས་
པར་གཞག་གོ། །དབུས་སུ་ཡང་ཚོགས་རྣམས་ཀྱི་ཏ་ལའི་ཐོ་བ་གཅིག་དང་། སྐྲའི་སྐུད་པ་གཞག་གོ། །ཐོག་མར་ཐིག་གདབ་པ་ནི་རིག་པ་མཆོག་གིས་བྱའོ། །ལྷ་ཐམས་ཅད་བྲི་བ་ནི་སྙིང་པོས་བྱའོ། །ལྷ་ཐམས་ཅད་སྤྱན་དྲང་བ་ནི་བཅོམ་ལྡན་འདས་མས་བྱའོ། །དྲི་དང་མེ་ཏོག་དང་
བདུག་པ་དབུལ་བ་ཡང་དེས་བྱའོ། །དཀྱིལ་འཁོར་གྱི་བགེགས་བྱེད་པ་གང་ཡིན་པ་དེ་དག་ཀྱང་སྙིང་པོས་སྦྱིན་སྲེག་བྱ་སྟེ། ཡུངས་ཀར་དང་ཞོ་དང་སྦྲང་རྩི་དང་མར་དང་ལྡན་པས་ལན་བརྒྱ་རྩ་བརྒྱད་སྦྱིན་སྲེག་བྱའོ། །དེ་ནས་རིག་སྔགས་འཆང་གིས་རིག་སྔགས་འཆང་ཞག་གཅིག་སྨྱུང་
เล่ม ๙๕ · หน้า 158a
བ་བྱེད་དུ་བཅུག་ལ་བྱང་ཆུབ་ཀྱི་སེམས་སྦྱིན་པར་བྱའོ། །དེ་ནས་བཅོམ་ལྡན་འདས་མའི་སྙིང་པོ་མགོ་བོར་བསྔགས་ལ་ཉེ་བའི་སྙིང་པོ་རྣ་བར་བཞག་སྟེ། ནག་མོའི་སྔགས་བཟླས་བརྗོད་བྱེད་བཞིན་དུ་གཞུག་ཅིང་ཤར་ཕྱོགས་ཀྱི་སྒོའི་བྱང་སྟོད་དུ་བབ་པའི་ལྷ་རྣམས་ལ་
ཕྱག་འཚལ་དུ་བཅུག་ལ་མེ་ཏོག་གམ། འགྲོན་བུའི་ཕུར་མ་འདོར་དུ་བཅུག་ན་གང་ལ་བབ་པ་དེ་དག་གི་རིགས་ཡིན་ཏེ། །དེ་དག་ནི་གསང་བའི་རིགས་ཞེས་བཤད་དོ། །གསང་བ་དང་ལྷ་ཐམས་ཅད་ཀྱི་གསང་བའི་ཕྱག་རྒྱ་ཡང་དེར་བསྟན་པར་བྱའོ། །གདོན་ཉན་དུ་གཞུག་པའི་
སྐབས་ནས་ངས་བཤད་པའི་ཕྱག་རྒྱ་དང་། ལྷ་གང་ཡིན་པ་དེ་དག་ཀྱང་རིག་སྔགས་འཆང་རྣམས་ལ་བསྟན་པར་བྱའོ། །ལྷ་ཐམས་ཅད་ཀྱི་ཕྱག་རྒྱ་ནི་མདུང་རྩེ་གསུམ་པ་ཡིན་ནོ། །ལག་ན་རྡོ་རྗེའི་ནི་རྡོ་རྗེ་ཡིན་ཏེ་རྡོ་རྗེ་གང་ཡིན་པ་དེ་ནི་མདུང་རྩེ་གསུམ་པ་ཡིན་ལ། །མདུང་རྩེ་གསུམ་
པ་གང་ཡིན་པ་དེ་ཡང་རྡོ་རྗེ་ཡིན་པར་བལྟ་བར་བྱའོ། །གསང་བ་འདི་དག་རྟོགས་ནས་གསང་བ་རྣམས་ལ་ཡང་མཆོད་པར་བྱའོ། །གསང་བའི་ཕྱག་རྒྱ་ལྷ་ཐམས་ཅད་ཀྱི་གསང་ཆེན་འདི་གང་གིས་མཐོང་བ་དེ་ལ་ནི་ལྷ་ཐམས་ཅད་ཡིད་དགའ་ནས་དངོས་གྲུབ་སྦྱིན་པར་བྱེད་དེ་དེའི་ལས་རྣམས་
ལ་རིག་སྔགས་བདེ་བླག་ཏུ་འགྲུབ་པར་འགྱུར་རོ། །དེ་ནས་རིག་སྔགས་འཆང་གིས་ལག་ན་རྡོ་རྗེ་དང་འདྲ་བར་བླ་མ་ལ་ཕྱག་བྱས་ནས་བཅོམ་ལྡན་འདས་ལ་ཡོན་དབུལ་ལོ། །དེའི་འོག་ཏུ་བྱང་ཕྱོགས་སུ་སོང་ལ་དེ་ནས་རིག་སྔགས་འཆང་རྣམས་ལ་ཕྱག་འཚལ་དུ་གཞུག་གོ། །གསང་
བའི་དཀྱིལ་འཁོར་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་འདི་སུས་མཐོང་བ་དེ་ནི་སངས་རྒྱས་ཀྱི་བསམ་པ་དང་འདྲ་བར་མི་འགྱུར་ཏེ། བདེ་བ་ཅན་དུ་ཡང་སྐྱེ་བར་འགྱུར་རོ། །ཆོ་ག་རྒྱས་པ་འདི་སུ་འཆང་བ་དེ་ནི་ལག་ན་རྡོ་རྗེ་དང་འདྲའོ། །དཀྱིལ་འཁོར་འདི་མཐོང་
ན་ཆོ་ག་རྒྱས་པ་ཆེན་པོ་བརྒྱད་བདེ་བླག་ཏུ་འགྲུབ་པར་འགྱུར་རོ། །རིག་སྔགས་ཀྱི་ལྷ་ཐམས་ཅད་ཀྱང་རྟག་ཏུ་སྲུང་བར་བྱེད་དོ། །རིག་པ་མཆོག་གི་ཆོ་ག་རྒྱས་པར་རྒྱུད་ཕྱི་མ་དང་བཅས་པ་ཕོ་ཉ་མའི་ཚོགས་ཀྱི་འཁོར་དང་བཅས་པ། ཕྱག་རྒྱའི་རྒྱན་དང་བཅས་པ། གསང་ཆེན་
เล่ม ๙๕ · หน้า 158b
དང་བཅས་པ་གང་བ་དང་བཅས་པ་ལག་ན་རྡོ་རྗེས་བཤད་པ། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་འདི་ཐམས་ཅད་མ་ལུས་པར་སུ་འཆང་བ་དེའི་ལུས་ཀྱི་སྤྱི་བོར་ནི་དཔལ་དང་ལྡན་པ་རྡོ་རྗེ་འཛིན་རྟག་ཏུ་གནས་པར་འགྱུར་རོ། །གསང་བའི་དཀྱིལ་འཁོར་རྫོགས་སོ།། །།
དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་དཔའ་ཆེན་པོ་ཁྱོད་ལེགས་སོ་ལེགས་སོ། །བྱང་ཆུབ་སེམས་དཔའ་ཆེན་པོ་ཁྱོད་སེམས་ཅན་ཐམས་ཅད་ལ་ཕན་པའི་ཕྱིར་ཞུགས་པ་དང་། སེམས་
ཅན་ཐམས་ཅད་ལ་ཕན་པའི་ཕྱིར་བརྩོན་པ་ཡིན་ཏེ། ཆོ་ག་རྒྱས་པ་ཆེན་པོ་བཤད་པ་གང་ཡིན་པ་དེ་ནི་ལེགས་སོ། །རིག་པ་མཆོག་གི་ཆོ་ག་རྒྱས་པ་ཆེན་པོ་འདི་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་རྗེས་སུ་
གནང་སྟེ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་དང་། དེ་བཞིན་གཤེགས་པ་ཐམས་ཅད་ཀྱིས་བསྟོད་ཅིང་བསྔགས་པ་ཡིན་ནོ། །རིག་སྔགས་འཆང་གང་སྤྱན་གྱི་སྙིང་པོ་དང་བཅས་པ། རིག་སྔགས་ཀྱི་རྒྱལ་པོ་ཆེན་པོ་དང་བཅས་པར་དྲན་པར་
བྱེད་དམ། དུས་གསུམ་དུ་ཕྱག་འཚལ་བ་དེ་དག་ལ་ནི་ངན་འགྲོ་ལོག་པར་ལྟུང་བར་འགྱུར་བ་དེ་དག་མེད་དོ། །འཆི་བའི་ཚེའང་དེ་བཞིན་གཤེགས་པ་ཐམས་ཅད་མངོན་སུམ་དུ་ཕྱོགས་པར་འགྱུར་ཏེ། དེས་ན་དེ་དག་ལ་ངན་འགྲོ་ལོག་པར་ལྟུང་བར་འགྱུར་བ་མེད་དོ། །སེམས་ཅན་མཚམས་
མེད་པ་ལྔ་དང་ལྡན་པ་དག་ཀྱང་མནར་མེད་པར་སྐྱེ་བར་མི་འགྱུར་རོ། །འདི་ནི་རིག་སྔགས་ཀྱི་རྒྱལ་པོ་ཆེན་པོའི་མཐུ་ཡིན་ནོ། །དཔེར་ན་ནོར་བུ་རིན་པོ་ཆེ་གཙུག་ཕུད་ཅན་ཞེས་བྱ་བ་མཐོང་མ་ཐག་ཏུ་ནད་ཐམས་ཅད་ཞི་བར་འགྱུར་ཞིང་གདོན་ཐམས་ཅད་ཀྱང་འབྱེར་བར་འགྱུར་བ་དེ་བཞིན་དུ་
རིག་སྔགས་ཀྱི་རྒྱལ་པོ་འདི་སྤྱན་དང་སྙིང་པོ་དང་བཅས་པར་དྲན་པ་ཙམ་གྱིས་ལས་ཀྱི་སྒྲིབ་པ་ཐམས་ཅད་བྱང་བར་བྱེད་དོ། །འདི་ནི་རིག་སྔགས་ཀྱི་རྒྱལ་པོ་ཆེན་པོའི་རྒྱུ་དང་མཐུན་པ་ཡིན་ཏེ། སངས་རྒྱས་བཅོམ་ལྡན་འདས་རྣམས་ཀྱི་གཞན་དུ་གསུངས་པ་མ་ཡིན་ནོ། །རིགས་ཀྱི་བུའམ་
เล่ม ๙๕ · หน้า 159a
རིགས་ཀྱི་བུ་མོ་གང་ལ་ལ་བྱང་ཆུབ་སེམས་དཔའ་རྣམ་པར་འཕྲུལ་པའམ། འཇིག་རྟེན་གྱི་སྣ་ཚོགས་བྱེད་པར་འདོད་ན་དེས་རིག་སྔགས་ཀྱི་རྒྱལ་པོ་བཙལ་བར་བྱ་ཞིང་བསྒྲུབ་པར་བྱའོ། །སེམས་ཅན་དགེ་བའི་རྩ་བ་བསྐྱེད་པ་གང་ཡིན་པ་དེ་དག་གི་ལག་ཏུ་ནི་ཐམས་ཅད་མ་
ལུས་པར་འོང་བར་འགྱུར་རོ། །སེམས་ཅན་བསོད་ནམས་མ་བྱས་པ་དག་གི་ལག་ཏུ་ནི་འོང་བར་མི་འགྱུར་རོ། །རིག་སྔགས་ཀྱི་རྒྱལ་པོ་ཆེན་པོ་གང་གི་ལག་ཏུ་འོངས་པར་འགྱུར་བ་དེ་དག་ལ་ནི་ལྷར་བཅས་པའི་འཇིག་རྟེན་གྱིས་ཕྱག་བྱ་བར་འགྱུར་རོ། །དེ་ནས་ལྷ་དེ་དག་སྙིང་འདར་ཞིང་དེ་
བཞིན་གཤེགས་པ་ལ་བལྟ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་རིག་སྔགས་ཀྱི་རྒྱལ་པོ་འདི་ནི་ཐོགས་པ་མེད་པའི་ལས་ཡིན་ཏེ། ལས་ཐམས་ཅད་ལ་དོན་ཡོད་པ་ཡིན་ནོ། །སེམས་
ཅན་མ་རུངས་པའི་ལས་བྱེད་པ་གང་ཡིན་པ་དེ་དག་གིས་ཀྱང་ཇི་ལྟར་འདོད་པ་བཞིན་དུ་ལས་སྣ་ཚོགས་བྱེད་ནུས་ཤིང་ལྷ་རྣམས་ལ་ཡང་འཚེ་བར་ནུས་ཏེ་དགེ་བའི་རྩ་བ་བསྐྱེད་ཅིང་། །དགེ་བ་བཅུའི་ལས་ཀྱི་ལམ་དང་ལྡན་པའི་ལྷ་དེ་དག་ལ་ཡང་གནོད་པ་བྱེད་ནུས་སོ། །བརྟུལ་ཕོད་པའི་མི་དེ་དག་
ལ་རིག་སྔགས་ཐམས་ཅད་ཀྱི་སྙིང་པོ་གསང་བ་བསྟན་པར་བྱ་སྟེ། སེམས་ཅན་དེ་དག་གིས་དེ་མཐོང་ན་ཇི་ལྟར་འདོད་པ་བཞིན་དུ་བྱེད་པར་འགྱུར་རོ། །སེམས་ཅན་ངའི་གསང་བའི་ཕྱག་རྒྱའི་ཚོགས་མཐོང་བ་གང་ཡིན་པ་དེ་དག་གིས་ནི་དོན་ཡོད་པའི་ལས་ཀྱི་མཆོག་གིས་ལྷ་ཐམས་ཅད་དང་
ང་ལ་གཙེ་བར་ནུས་སོ། །དེ་ནས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷ་རྣམས་ལ་སྨན་པའི་སླད་དུ་དེ་བཞིན་གཤེགས་པ་རྣམས་ཀྱི་བཀའ་རིག་སྔགས་ཀྱི་རྒྱལ་པོ་ཆེན་པོའི་གསང་བ་རིག་སྔགས་ཐམས་ཅད་ཀྱི་སྙིང་པོ་མཱ་མ་ཀཱིའི་ཕྱག་རྒྱས་
བཏབ་པ་བདག་གིས་བཤད་པར་འཚལ་ལོ། །དེ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་རིག་སྔགས་ཀྱི་རྒྱལ་པོ་ཆེན་པོ་རིག་པ་མཆོག་གི་རིག་སྔགས་ཆོ་ག་རྒྱས་པ་ཆེན་པོ་དོན་ཡོད་པར་བསྒྲུབ་པ་བཤད་དོ། །བཅོམ་ལྡན་
เล่ม ๙๕ · หน้า 159b
འདས་ལྷ་ཐམས་ཅད་ཀྱིས་རིག་པ་མཆོག་གི་ཆོ་ག་རྒྱས་པ་ཆེན་པོའི་རིག་སྔགས་བཤད་པ་གང་ལགས་པའི་རིག་སྔགས་དེ་དག་བསྒྲུབ་པའི་སླད་དུ་ཡང་རིག་སྔགས་ཐམས་ཅད་ཀྱི་སྙིང་པོ་གང་ཐོས་ན་རིག་སྔགས་ཐམས་ཅད་དངོས་གྲུབ་ཏུ་འགྱུར་བ་བཤད་པར་འཚལ་ལོ། །དེ་ནས་བཅོམ་ལྡན་
འདས་ལག་ན་རྡོ་རྗེས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་རིག་སྔགས་ཐམས་ཅད་ཀྱི་སྙིང་པོ་བཤད་པ། ན་མོ་རཏྣ་ཏྲ་ཡ་སྱ། ནམཤྩཎྜ་བཛྲ་པཱ་ཎི་སྱ། མ་ཧཱ་ཡཀྵ་སེ་ནཱ་པ་ཏི་སྱ། ཏདྱ་ཐཱ། ཨུཥྚི་རི་ལི། མཾ་ག་ལྱེ། སཾ་ཧ་རི་བ་ལ་ན་རི་སྭཱ་ཧཱ། རིག་སྔགས་ཐམས་ཅད་
ཀྱི་སྙིང་པོ་ཐོས་མ་ཐག་ཏུ་ས་རྣམ་པ་དྲུག་ཏུ་གཡོས་ཏེ། གཡོ་བ་དང་མི་གཡོ་བའི་རྒྱུ་སྐར་དང་། གཟའ་ཆེན་པོ་རྣམས་འཁྲུགས་སོ། །བཅོམ་ལྡན་འདས་རིག་སྔགས་ཐམས་ཅད་ཀྱི་སྙིང་པོ་འདི་ནི་བདག་གི་རིག་པ་མཆོག་ལགས་ཏེ། མཉམ་པ་མ་མཆིས་ལ་སྟོབས་ཆེ་ཞིང་
རྨད་དུ་བྱུང་བ་ལགས་སོ། །འདི་ནི་བདག་གི་གསང་བ་ལགས་ཏེ། མུ་འདི་ཆོ་ག་དང་ལྡན་པར་འདོད་པ་དེས་ནི་དེ་བཞིན་གཤེགས་པའི་སྤྱན་སྔར་དྲི་དང་མེ་ཏོག་དང་བདུག་པ་ཕུལ་ལ། ལག་ན་རྡོ་རྗེ་ལ་ཡང་མེ་ཏོག་དམར་པོ་ཕུལ་ཏེ། ཞག་གཅིག་སྨྱུང་བ་བགྱིས་ཏེ་བྱང་ཆུབ་ཀྱི་
སེམས་ཡོངས་སུ་བཟུང་ལ་བླ་མ་ལ་ཡང་མཆོད་ཅིང་ཡོན་ཕུལ་ནས་རིག་སྔགས་ཐམས་ཅད་ཀྱི་སྙིང་པོ་དང་། རིག་པ་མཆོག་གདོན་པར་བགྱིའོ། །དེ་ནས་ལྷ་ཐམས་ཅད་ཡིད་རབ་ཏུ་དགའ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བྱང་ཆུབ་སེམས་
དཔའ་ཆེན་པོ་ལེགས་སོ་ལེགས་སོ། །རིག་སྔགས་ཐམས་ཅད་ཀྱི་སྙིང་པོ་འཛིན་པའི་རིག་སྔགས་འཆང་དེ་ལ་མྱུར་དུ་དངོས་གྲུབ་སྩོལ་ཅིག །དེ་ནས་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །བཟོད་ལྡན་དག་ཁྱོད་ཉོན་ཅིག །ངས་གསང་བའི་དཀྱིལ་འཁོར་བཤད་པ་ལས་
གསང་བ་དང་རིག་སྔགས་ཐམས་ཅད་ཀྱི་སྙིང་པོ་བསྟན་པ་གང་ཡིན་པ་འདི་དང་། རིག་པ་མཆོག་སུ་འདོད་པའམ་མཆོད་པར་བྱེད་པ་དེ་ལ་ནི་རིག་སྔགས་ཀྱི་རྒྱལ་པོ་ཆེན་པོ་དམ་པ་སྦྱིན་པར་འགྱུར་རོ། །ཅི་སྟེ་རིག་སྔགས་ཐམས་ཅད་ཀྱི་སྙིང་པོ་དང་། །རིག་སྔགས་ཀྱི་རིགས་མ་མཐོང་བ་
เล่ม ๙๕ · หน้า 160a
ཞིག་ཡིན་ན་ནི་མྱོས་པར་འགྱུར་རེ། །འདི་མཐོང་ན་ནི་ཆོ་ག་རྒྱས་པ་ཆེན་པོ་བརྒྱད་ཀྱང་འགྲུབ་པར་འགྱུར་རོ། །བཅོམ་ལྡན་འདས་བདག་གི་གསང་བའི་རིག་སྔགས་ཐམས་ཅད་ཀྱི་སྙིང་པོ་འདི་ནི་སངས་རྒྱས་དང་། ཆོས་དང་། དགེ་འདུན་ལ་དད་པ་དང་འཕགས་
བ་ལག་ན་རྡོ་རྗེའི་རིགས་ལ་དང་བར་བགྱིད་པ་དང་། བླ་མ་ལ་ཕན་འདོགས་པར་བགྱིད་པ་དེ་ལ་སྩལ་བར་བགྱིའོ། །དེ་ལྟར་མ་བགྱིས་ན་མ་རུང་བར་འགྱུར་རོ། །བདག་གི་རིག་སྔགས་ཀྱི་རྒྱལ་པོའི་ཆོ་ག་རྒྱས་པ་འདི་ནི་དེ་ལ་གནས་པར་འགྱུར་རོ། དེ་ནས་བཅོམ་ལྡན་འདས་ལག་ན་
རྡོ་རྗེ་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རིག་སྔགས་ཐམས་ཅད་ཀྱི་སྙིང་པོའི་ལས་བདག་གིས་བཤད་པར་འཚལ་ལོ། །དེ་ནས་དབང་ཕྱུག་ཆེན་པོ་ལ་སོགས་པ་དཀྱིལ་འཁོར་དེར་ལྷ་འདུས་པ་
རྣམས་ཀྱིས་རྡོ་རྗེ་འཛིན་གྱི་ཚིག་དེ་ཐོས་ཏེ་ཐོས་ནས་དེ་དག་འབྲོས་པ་ལ་ཞུགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་རིག་སྔགས་ཐམས་ཅད་སྙིང་པོའི་ལས་འདི་ནི་ལྷ་རྣམས་ལ་གནོད་ཀྱིས་
ཐོང་ཤིག །དེ་ནས་རིག་སྔགས་ཀྱི་བདག་པོ་ལག་ན་རྡོ་རྗེ་སྟན་དེ་ལས་ལངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷ་རྣམས་ལྟ་གར་མཆིས་ཀྱིས་དེ་བཞིན་གཤེགས་པས་རིག་སྔགས་ཐམས་ཅད་ཀྱི་སྙིང་པོའི་ལས་གནང་བར་མཛད་དུ་གསོལ། དེ་ནས་
བཅོམ་ལྡན་འདས་སེམས་ཅན་རྣམས་ཀྱི་དོན་གྱི་སླད་དུ་རིག་སྔགས་ཐམས་ཅད་ཀྱི་སྙིང་པོ་ལས་བདག་གིས་བཤད་བར་འཚལ་ན་དེ་བཞིན་གཤེགས་པས་གནང་མཛད་དུ་གསོལ། བདེ་བར་གཤེགས་པས་གནང་བར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་རིག་
སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ལྷ་རྣམས་ལ་གནོད་ཀྱིས་ཐོང་ཤིག་ཐོང་ཤིག །དེ་ནས་བཅོམ་ལྡན་འདས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
เล่ม ๙๕ · หน้า 160b
ལྡན་འདས་ལྷ་རྣམས་དམ་ཚིག་བསྲུང་ན་བདག་གིས་བསྐྱང་བར་བགྱིའོ། །བཅོམ་ལྡན་འདས་ལྷ་གང་རིག་སྔགས་ཐམས་ཅད་ཀྱི་སྙིང་པོའི་མིང་ཐོས་པ་ནའང་དངོས་གྲུབ་སྩོལ་བར་མི་བགྱིད་པ་དེ་ལ་ནི་བདག་གིས་དགུམ་པའི་སླད་དུ་ཕྱག་རྒྱའི་ཚོགས་མི་བཟད་པ་བཏང་བར་འཚལ་ལོ། །དེ་ནས་
བཅོམ་ལྡན་འདས་ལག་ན་རྡོ་རྗེས་རྣལ་འབྱོར་དམ་པ་ལ་གནས་ནས་ཕྱག་རྒྱའི་ཚོགས་རྗེས་སུ་དྲན་པར་བྱས་སོ། །བཅོམ་ལྡན་འདས་མ་ཕྱག་རྒྱའི་རྒྱལ་མོ་ཕྱག་རྒྱ་ལ་འཚེ་བ། ཕྱག་རྒྱ་ལ་ཕུར་བུ་འདེབས་པ། །ལྷ་ཐམས་ཅད་སྐྲག་པར་བྱེད་པ། གནོད་སྦྱིན་གྱི་ཚོགས་ཐམས་ཅད་ཚར་
གཅོད་པ། གསོད་པ་གནོད་པར་བྱེད་པ། ཕུར་བུས་འདེབས་པ། སྐྲག་པར་བྱེད་པ། ཞི་བར་བྱེད་པ། རྒྱས་པར་བྱེད་པ། བདེ་བར་བྱེད་པ། ཕྱག་རྒྱ་བཞིའི་བདག་མོའི་རྒྱལ་མོ་མཱ་མ་ཀཱིའང་རྗེས་སུ་དྲན་པར་བྱས་སོ། །དེ་ནས་བཅོམ་ལྡན་འདས་མ་ཕྱག་རྒྱའི་ཚོགས་བརྒྱད་ཅུས་
བསྐོར་བ་འབར་བ་དང་བཅས་པ། མེ་སྟག་འཕྲོ་བ་དང་བཅས་པ། བསྲེག་པའི་རང་བཞིན་ཅན་གྱིས་ལག་ན་རྡོ་རྗེ་གཙོ་བོར་བྱས་ནས་དེ་བཞིན་གཤེགས་པ་ཤཱཀྱ་ཐུབ་པའི་སྤྱན་སྔར་འདུག་གོ། །དེ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་དེ་བཞིན་གཤེགས་པ་ལ་ཕྱག་འཚལ་ནས་
གསང་སྔགས་བཤད་པ། ན་མོ་རཏྣ་ཏྲ་ཡ་སྱ། ཨོྃ་ཀུ་ལནྡྷ་རི་སྭཱ་ཧཱ། དེ་ནས་གསང་བའི་བདག་པོ་བློ་དང་ལྡན་པས་འདི་སྨྲས་མ་ཐག་ཏུ་དབང་ཕྱུག་ཆེན་པོ་ལ་སོགས་པ་ལྷ་དེ་དག་ཕྱག་རྒྱ་རྣམས་ཀྱིས་བཅོམ་ནས་ལག་ན་རྡོ་རྗེའི་དཀྱིལ་འཁོར་དུ་ཞུགས་སོ། །གདོན་དྲག་པོ་དང་སྲིན་པོ་མ་
རུངས་པ་གང་ཡིན་པ་དེ་དག་ཐམས་ཅད་ཀྱང་ཕྱག་རྒྱ་རྣམས་ཀྱིས་ཞེ་བཅིལ་ནས་ཁྲག་སྐྱུག་བཞིན་དུ་ལག་ན་རྡོ་རྗེའི་ཞབས་དྲུང་དུ་བཞག་གོ། །དེ་ནས་ལྷ་དེ་དག་རྟབ་རྟབ་ཏུ་གྱུར་ཏེ་ཕྱག་རྒྱ་རྣམས་ཀྱིས་བཅོམ་ནས་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རྡོ་རྗེ་འཛིན་ཆེན་པོ་ཕྱག་རྒྱའི་
ཚོགས་ཀྱིས་ཤིན་ཏུ་འཇིགས་ཀྱིས་བདག་ཅག་ཡོངས་སུ་བསྐྱབ་པར་གསོལ། དེ་ནས་བཅོམ་ལྡན་འདས་ལག་ན་རྡོ་རྗེས་ལྷ་དེ་རྣམས་ལ་འདི་སྐད་ཅེས་སྨྲས་སོ། །ལྷ་རྣམས་མ་འཇིགས་ཤིག་མ་འཇིགས་ཤིག །ཕྱག་རྒྱའི་ཚོགས་དེ་ཉིད་དྲན་པར་གྱིས་ཤིག་དང་། དེས་ཞི་བར་འགྱུར་
เล่ม ๙๕ · หน้า 161a
རོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །རྡོ་རྗེ་འཛིན་ཆེན་པོ་ལྷ་འདི་དག་ཡང་དག་པར་དབུགས་ཕྱུང་ཤིག །དེ་ནས་བཅོམ་ལྡན་འདས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་
ཅེས་གསོལ་ཏོ། །བཅོམ་ལྡན་འདས་བདག་གིས་གསང་བའི་དཀྱིལ་འཁོར་ལས་ལྷ་རྣམས་དང་རིག་སྔགས་འཆང་རྣམས་དང་། གདོན་རྣམས་ཀྱི་གསང་བ་བཤད་པ་དེ་ནི་བཅོམ་ལྡན་འདས་འགལ་བར་བགྱིར་མི་རུང་ལགས་ཏེ། སུ་འགལ་བར་བགྱིད་པ་དེ་ལ་བདག་ཁྲོས་ཏེ་ཕྱག་རྒྱའི་
ཚོགས་འཇིགས་པ་བཏང་བར་འཚལ་ལོ། །དེ་ནས་བདུད་རྩི་ཐབ་སྦྱོར་དེའི་ནང་ནས་ཡངས་ཏེ་འདི་སྐད་ཅེས་སྨྲས་སོ། །གདོན་རྣམས་ཆོས་ལུགས་མི་བཟད་པ། །མདའ་དང་གསང་སྔགས་གང་དག་དང་། །རྩི་སྨན་དང་ནི་སྦྱིན་སྲེག་གི། །ལས་ཀྱི་ཆོ་ག་གཏོང་འགྱུར་བ། །
ཤོད་ཅིག་ཤོད་ཅིག་རིག་རྒྱལ་ཆེ། །མར་བཏུང་བ་ཡི་ཆོ་ག་དང་། །གཏོར་མའི་ལས་ནི་ཚུལ་བཞིན་དང་། །གསང་བ་དང་ནི་ཐེ་ཚོམ་དང་། །གང་གིས་གསང་བ་གཏོང་གྱུར་པའི། །བསྲེག་པ་དང་ནི་བཅད་པ་དང་། །བསད་ཅིང་རུས་པ་གཞོམ་བྱ་བ། །དེ་དག་ཆོ་གར་གང་བཤད་
པ། །དེ་ནི་སྟོབས་ཆེན་བདག་ལ་གསུངས། །བདུད་རྩིའི་བདག་ཉིད་ཆེན་པོ་ཡིས། །འདོད་པ་དེ་སྐད་དྲིས་ནས་ནི། །དཔལ་དང་ལྡན་པ་རྡོ་རྗེ་འཛིན། །དཔའ་བོས་ཚིག་ནི་འདི་སྐད་སྨྲས། །མ་རུངས་གདོན་ལས་གསོ་བ་ཡི། །གསང་སྔགས་སྦྱོར་བའི་ཆོ་གའི་རིམ། །ང་ལ་སྟོབས་
ཆེན་ཁྱོད་ཀྱིས་དྲིས། །དྲིས་པ་གང་ཡིན་བཤད་པར་བྱ། །ལྷ་ཀུན་འཁོད་པའི་ནང་དུ་ཉོན། །གདོན་རྣམས་ཚར་ནི་གཅད་པ་དང་། །དེ་བཞིན་ལྷ་རྣམས་བསྐྱོད་པ་དང་། །ལྷ་རྣམས་ཕྱག་རྒྱས་གདབ་པ་དང་། །དེ་བཞིན་འཛིན་བྱེད་གསལ་བ་དང་། །རིག་སྔགས་རྣམས་ཀྱང་བསྒྲུབ་
པ་དང་། །རིག་སྔགས་ཆོ་ག་རྒྱས་གདབ་དང་། །དེ་བཞིན་གདོན་རྣམས་དཀྲུག་པ་དང་། །རིག་སྔགས་འཆང་ལ་བརྩེ་བ་དང་། །ཤིན་ཏུ་བྱིན་རླབས་དཀྱིལ་འཁོར་དང་། །ཕྱག་རྒྱའི་ཆོ་ག་འདིར་བཤད་དེ། །དཔའ་བོ་ལ་ནི་ཕྱག་འཚལ་ནས། །སྙིང་པོ་དགའ་བར་བྱེད་པའི་ཡུམ། །
เล่ม ๙๕ · หน้า 161b
འབྱུང་པོ་རྣམས་ནི་སྐྲག་བྱེད་ཅིང་། །ཆོ་གའི་དངོས་གྲུབ་སྩོལ་བར་བཤད། །སངས་རྒྱས་དཔའ་བོས་གསུངས་པ་ཡི། །གདོན་ཀུན་འགུགས་པའི་ལྕགས་ཀྱུ་མ། །དེ་ཡང་མགོ་བོས་ཕྱག་འཚལ་ནས། །གདོན་ཀུན་ལྕགས་ཀྱུ་བཤད་པར་བྱ། །ན་མོ་རཏྣ་ཏྲ་ཡ་སྱ། ན་མཥྩ་ཎྵ་
བཛྲ་པཱ་ཎི། རཱ་ཛྙཱ་པ་ཡ་ཏི་སྭཱ་ཧཱ། །མ་ཧཱ་ཡཀྵ་སེ་ནཱ་པ་ཏི་སྱ། ཏདྱ་ཐཱ། བཛྲེ་བཛྲི་ཎི། །བཛྲི་ལི། བཛྲ་ཨངྐུ་ཤི། །ཧི་རི་ཧི་རི། །བཛྲ་མུཥྚི། །ཨོྃ་བཛྲ་ཛྭ་ལ། ཨངྐུ་ཤཱ་ཡ་ཕཊ། སིདྡྷ་ཤྩཎྜ། བཛྲ་པཱ་ཎི་རཱ་ཛྙཱ་པ་ཡ་ཏི་སྭཱ་ཧཱ། གསང་བའི་དབང་པོ་བློ་ལྡན་གྱིས། །རིག་སྔགས་
འདི་ནི་བཤད་ནས་བྱང་། །དེ་ནས་ཟས་སུ་ལྷ་རྣམས་དང་། །གདོན་རྣམས་ཀྱི་ནི་ཁྲག་འཐུང་བའི། །ཕྱག་རྒྱ་དེ་དག་ལྷགས་པར་གྱུར། །དེ་ནས་ཅ་ཅོའི་སྒྲ་བཏོན་ནས། །གསང་བའི་དབང་པོ་སྟོབས་ཆེན་གྱིས། །གདོན་རྣམས་ཀྱི་ནི་གསང་བའི་མཆོག །རབ་ཏུ་གསང་
བ་འདི་བཤད་དེ། །ཕྱག་རྒྱ་དག་ནི་བཅྭ་བརྒྱད་རྣམས། །ཆོ་གའི་དངོས་གྲུབ་སྦྱིན་བྱེད་པ། །ཕྱག་རྒྱ་འབར་བའི་སྟོབས་པོ་ཆེ། །གདོན་རྣམས་སེལ་བ་འདི་བཤད་དོ། །གསང་བ་པ་ཡང་འཇིག་བྱེད་པའི། །ཕྱག་རྒྱ་རྒྱལ་དང་རྣམ་རྒྱལ་བ། །རྡོ་རྗེ་མཚན་དང་རྡོ་རྗེ་རྟགས། །
བཀྲ་ཤིས་ཤིན་ཏུ་བཀྲ་ཤིས་དང་། །པདྨ་དང་ནི་པདྨ་ཕྲེང་། །གཡུང་དྲུང་རིས་ཀྱང་དེ་བཞིན་ཏེ། །མདུང་རྩེ་གསུམ་པ་རྡོ་རྗེ་དང་། །མཆེ་བ་དང་ནི་མདུང་ཐུང་དང་། །ཀླུ་ལག་དང་ནི་ཞགས་པ་དང་། །རལ་གྲི་དབྱིག་པ་འཁོར་ལོ་རྣམས། །དྲག་ཅིང་ཕ་རོལ་གནོན་པ་ཡི། །ཕྱག་
རྒྱ་འདི་དག་བདག་གིས་བཤད། །དེ་ནས་ལྷ་ཚོགས་དེ་དག་དང་། །འབྱུང་པོ་དང་ནི་ཟ་བ་དང་། །དེ་བཞིན་སྲིན་པོ་རྣམས་སྐྲག་ནས། །གཅིག་ལ་གཅིག་བལྟས་མགོ་བོ་ཡིས། །ལག་ན་རྡོ་རྗེ་ཕྱག་འཚལ་ནས། །འདི་སྐད་ཀྱི་ནི་ཚིག་སྨྲས་པ། །རབ་འཇིགས་ཕྱག་རྒྱའི་ཚོགས་
རྣམས་ལས། །གསང་བའི་དབང་པོས་བསྐྱབ་པར་གསོལ། དེ་ནས་རིག་སྔགས་ཀྱི་རྒྱལ་པོ་ཆེན་པོ་ལག་ན་རྡོ་རྗེས་ལྷ་དེ་དག་ལ་འདི་སྐད་ཅེས་སྨྲས་སོ། །མ་འཇིགས་མ་འཇིགས་བཟོད་ལྡན་དག །མངའ་བདག་རིག་སྔགས་ཀུན་དབང་པོ། །ཕྱག་རྒྱ་བཅྭ་བརྒྱད་གོ་ཆ་ཅན། །ཕོ་ཉ་
เล่ม ๙๕ · หน้า 162a
མོར་བཅས་བལྟས་པའི་མཆོག །རིག་སྔགས་ཀུན་གྱིས་བསྐོར་བའི་རྗེ། །རིག་སྔགས་རྒྱལ་པོ་དྲན་པར་གྱིས། །བཅོམ་ལྡན་འདས་མས་གྲུབ་སྟན་དང་། །རིག་སྔགས་ཀུན་གྱི་སྙིང་པོ་ལས། །བཤད་པ་དག་ཀྱང་དྲན་པར་གྱིས། །དེ་དག་དྲན་པས་
འཇིགས་མེད་ཅིང་། །ཕྱག་རྒྱ་རྣམས་ཀྱིས་གསང་བར་མཐོང་། །སྤྱོད་གཟུགས་སྣ་ཚོགས་གདོན་རྣམས་ལ། །རྡོ་རྗེའི་ཕྱག་རྒྱ་གང་བཏབ་ན། །གདོན་རྣམས་ཕྱོགས་བརྒྱར་འབྱེར་བ་ཡི། །ཕྱག་རྒྱའི་ཚུལ་ཡང་བསྟན་པར་གྱིས། དེ་ནས་ལྷའི་ཚོགས་དེ་དག་གིས་
ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་གང་ན་ཕྱག་རྒྱ་འདི་དག་གི་མིང་ཙམ་གནས་པ་དེར་ཡང་དཔག་ཚད་ལྔའི་ནང་ཚུན་ཆད་དུ་བདག་ཅག་ཡོངས་སུ་མི་གནས་སོ། །བཟོད་ལྡན་དག་དེ་དེ་བཞིན་ཏེ། དེ་དེ་བཞིན་ནོ། །ང་ཡང་རིག་སྔགས་ཀྱིས་བསྐོར་བའི་
ཕྱག་རྒྱ་འདི་དག་གང་ན་གནས་པ་དེ་ན་གནས་སོ། །གདོན་རྣམས་ལ་ནི་རྟག་ཏུ་ཕྱག་རྒྱའི་མཚན་ཉིད་བསྟན་པར་བྱའོ། །གདོན་ཐམས་ཅད་ལ་རྡོ་རྗེ་སྨོས་པའི་ལྕགས་ཀྱུ་མ། རྡོ་རྗེ་ལྕགས་ཀྱུ་མའི་ཕྱག་རྒྱ་དང་ལྡན་པས་ཀྱང་སྦྱར་བར་བྱའོ། །དེ་ལ་ཕྱག་རྒྱ་རྣམས་ཀྱི་རྟགས་
དང་མཚན་ཉིད་ངས་བཤད་པར་བྱ་སྟེ། ལག་པ་གཡས་པའི་མཐེ་བོས་སོར་མོ་རྣམས་ཀྱི་སེན་མོ་མནན་ཏེ། ཁུ་ཚུར་བཅངས་ལ་མཛུབ་མོ་བརྐྱང་སྟེ་རྡོ་རྗེ་ལྟར་བྱས་པ་ནི་རྒྱལ་བའིའོ། །གུང་མོ་ཡང་བརྐྱང་ལ་སོར་མོའི་བར་ནས་གང་ཙམ་གྱིས་ཕྱེ་བ་ནི་རྣམ་པར་རྒྱལ་བའི་འོ། །
སྲིན་ལག་དང་བཅས་པར་བརྐྱང་ལ་སོར་མོ་དེ་དག་གི་བར་ནས་གཉིས་ཙམ་གྱིས་ཕྱེ་བ་ནི་རྡོ་རྗེ་མཚན་གྱིའོ། །དེ་ཉིད་ལས་སོར་མོ་ཐར་ཕྲལ་ཏེ་བྲང་གི་དཀྱིལ་དུ་བཞག་པ་ནི་རྡོ་རྗེ་རྟགས་ཀྱིའོ། །ཕྱག་འཚལ་བའི་ཐལ་མོ་ལས་སོར་མོ་རྣམས་ཀྱི་བར་དུ་སོར་མོ་ཐབས་བཙུག་ནས་ལག་པའི་རྒྱབ་
ཏུ་ལེགས་པར་སྦྱར་ལ་གུང་མོ་དང་མཐེའུ་ཆུང་གཉིས་གཤིབས་ཏེ་བཞག་ནས་བྲང་གི་དཀྱིལ་དུ་བཞག་པ་ནི་བཀྲ་ཤིས་ཀྱིའོ། །དེ་ཉིད་ལྟེ་བའི་གནས་སུ་བཟུང་བ་ནི་ཤིན་ཏུ་བཀྲ་ཤིས་ཀྱིའོ། །ཕྱག་འཚལ་བའི་ཐལ་མོ་ལས་པདྨའི་སྦུབས་འདྲ་བར་བྱས་ལ་གུང་མོ་གཉིས་སྤྲད་དེ་ལྷག་མ་རྣམས་
เล่ม ๙๕ · หน้า 162b
ཡིད་ཙམ་གྱིས་མ་ཕྲད་པར་བྱས་པ་ནི་པདྨ་མཚན་གྱིའོ། །དེ་ཉིད་ལས་མཐེ་བོང་དང་མཐེའུ་ཆུང་གཉིས་སྤྲད་པ་ལ་ལྷག་མ་རྣམས་མི་སྤྲད་པ་ནི་པདྨ་ཕྲེང་བའི་འོ། །ལག་པ་གཉིས་བཀན་ཏེ་མཛུབ་མོ་དང་སྲིན་ལག་རྣམས་བསྣོལ་བར་དཀྲིས་ལ་མཐེ་བོང་གཉིས་ལག་པའི་ནང་དུ་བཀུག་
ནས་སོར་མོ་ལྷག་མ་རྣམས་ནི་ཐམས་ཅད་ཀྱང་འདྲ་བར་སོ་སོ་ནས་ལག་པའི་གཏིང་དུ་གདུ་བུ་ལྟར་བཀུག་པ་ནི་གཡུང་དྲུང་རིས་ཀྱིའོ། །སོར་མོ་ཕན་ཚུན་བསྣོལ་ཏེ་ཁུ་ཚུར་བཅངས་ལ་ལག་ངར་ཡང་གཅིག་ཏུ་སྦྱར་ནས་གུང་མོ་བསྒྲེངས་ཏེ་གཤིབས་ལ་མཛུབ་མོ་གཉིས་བརྐྱང་སྟེ་ནང་དུ་ཡང་མི་
དགུག །ཕྱི་རོལ་དུ་ཡང་མི་དགྱེ་བར་ཐ་མལ་པར་བསྒྲེང་ནས་མཐེ་བོང་གཉིས་ནང་དུ་གཞུག་པ་ནི་མདུང་རྩེ་གསུམ་པའི་འོ། །ཕྱག་འཚལ་བའི་ཐལ་མོ་ལས་སྲིན་ལག་ལུ་གུ་རྒྱུད་ལྟར་དཀྲིས་ལ་མཐེ་བོས་སྲིན་ལག་གི་སེན་མོ་གཉིས་མནན་ནས་མཛུབ་མོ་དང་གུང་མོ་དང་། མཐེའུ་ཆུང་རྣམས་
གཞིབས་ཏེ་བཞག་ལ་སོར་མོ་དེ་རྣམས་ཀྱི་བར་ནས་གཉིས་ཙམ་གྱི་ཚད་ཙམ་དུ་བྱས་ཏེ། དྲུང་དུ་ཁོང་སྟོང་དུ་བྱ་བ་འདི་ནི་རྡོ་རྗེའི་འོ། །ཕྱག་འཚལ་བའི་ཐལ་མོ་ལས་སོར་མོ་རྣམས་ནང་དུ་བསྣོལ་ཏེ་ཁུ་ཚུར་བཅངས་པ་ལག་པ་གཡས་པའི་གུང་མོའི་སྟེང་དུ་ཕྱུང་སྟེ། བརྐྱང་བ་མཆོད་སྡོང་གི་དབྱིབས་
ལྟར་བྱས་ཏེ་བཞག་པ་ནི་མཆེ་བའི་འོ། །ཕྱག་འཚལ་བའི་ཐལ་མོ་ལས་སོར་མོ་རྣམས་ཕྱི་རོལ་དུ་བསྣོལ་ཏེ། ཁུ་ཚུར་བཅས་ལ་སོར་མོ་ལག་པའི་རྒྱབ་ཏུ་གཞར། ལག་ངར་གཉིས་གཤིབས་ཏེ་གཅིག་ལ་གཅིག་སྦྱར་ཏེ་ལག་པའི་རྟིང་སྤྲད་ལ་གུང་མོ་བརྐྱང་སྟེ་གཤིབས་པ་ནི་མདུང་ཐུང་གིའོ། །
ཕན་ཚུན་བསྣོལ་མར་དཀྲིས་ལ་ལག་པ་གཉིས་ཀྱི་མཐེ་བོང་དང་། མཐེའུ་ཆུང་རྣམས་ལུ་གུ་རྒྱུད་དུ་སྦྲེལ་ནས་སོར་མོ་ལྷག་མ་རྣམས་རྡོ་རྗེའི་མཚན་ཉིད་ལས། ཀླུ་མགོའི་གདེངས་ཀ་ལྟར་བྱས་ཏེ། བར་རྣམས་ནས་གང་ཙམ་དུ་བྱ་བ་ནི་ཀླུའི་ལག་གིའོ། །ལག་པ་གཉིས་ཀའི་མཐེ་བོས་མཐེའུ་
ཆུང་གི་སེན་མོ་མནན་ཏེ། ཞགས་མིག་གི་དབྱིབས་ལྟར་བྱས་ལ་ལག་པ་གཡོན་པ་བཀན་ནས་ལག་པ་གཡས་པ་ཁས་ཕུབ་སྟེ་སྦྱར་ལ་སོར་མོ་རྣམས་ཀྱི་ངོས་སོ་སོར་ལེགས་པར་ཕྲད་པར་བྱ་བ་ནི་ཞགས་པའི་འོ། །སོར་མོ་རྣམས་ཕན་ཚུན་ནང་དུ་བསྣོལ་ལ། ལག་པ་གཉིས་ཀྱི་གྲུ་མོ་སྦྱར་
เล่ม ๙๕ · หน้า 163a
ཏེ་གུང་མོ་གཉིས་གཤིབས་ནས་མཐེ་བོ་གཉིས་ཀྱི་ནང་དུ་གུང་མོ་གཉིས་ཀྱི་གནས་སུ་བཅུག་ནས་ལག་པ་གཡས་པའི་གུང་མོ་དྲང་པོར་བསྒྲེང་ལ། གཡོན་པའི་གུང་མོ་བཀུག་པའི་རྩེ་མོ་མཐེ་བོང་དང་ཕྲད་པ་ནི་རལ་གྲིའིའོ། །དེ་ཉིད་ལས་གཡས་པའི་གུང་མོ་རང་གི་གནས་
སུ་ནང་དུ་བཅུག་ལ་ལག་པ་གཡོན་པའི་གུང་མོ་གྱེན་དུ་དྲང་པོར་བསྲང་བ་ནི་དབྱུག་པའིའོ། །ལག་པ་གཡོན་པ་བཀན་ལ་ལག་པ་གཡས་པ་ཁས་བུབ་སྟེ། གཅིག་ལ་གཅིག་ངོས་སྦྱར་ནས་གཡོན་པའི་མཐེའུ་ཆུང་སྟེང་ན་འདུག་པའི་ཚིགས་ཀྱི་སྲུབས་བཞག་སྟེ། ཚིགས་གཅིག་ཙམ་
ཕྱིར་ལྷག་པར་བྱ། གཡོན་པའི་མཐེའུ་ཆུང་གི་རྩེ་མོར་གཡས་པའི་མཐེ་བོའི་ཚིགས་ཀྱི་སྲུབས་བཞག་སྟེ། ཚིགས་གཅིག་ཙམ་ཕྱིར་ལྷག་པར་བྱ་སྟེ། སེན་མོ་ལྷག་མ་རྣམས་ནི་མདུང་རྩེ་གསུམ་པའི་ཚུལ་དུ་བཞག་སྟེ། འཁོར་ལོའི་མཚན་ཉིད་བྱས་ལ་སོར་མོ་རྣམས་ཀྱི་ཐོར་ཏོ་ལག་
པའི་སྟེང་དུ་དམར་པོས་བཀྲམ་པ་ནི་འཁོར་ལོའིའོ། །དེ་ལ་དེ་དག་གསང་སྔགས་རྣམས། །བདག་གིས་སུ་ནི་མདོར་བཤད་དེ། །རིམ་བཞིན་དུ་ནི་ངས་བཤད་པ། །ཅི་རིགས་པར་ནི་མཉན་པར་གྱིས། །ན་མོ་བཛྲ་པཱ་ཎི་སྱ། ཨོྃ་ཛ་ཡེ་ཛ་ཡ་བ་ཧེ་སྭཱ་ཧཱ། རྒྱལ་བའི་གསང་
སྔགས་སོ། །ན་མོ་བཛྲ་པཱ་ཎི་སྱ། ཨོྃ་བི་ད་ཡེ་བི་ཀྲ་མེ། ཏྲཻ་ལོ་ཀྱ་བི་ཀྲ་མེ་སྭཱ་ཧཱ། རྣམ་པར་རྒྱལ་བའི་གསང་སྔགས་སོ། །ན་མོ་བཛྲ་པཱ་ཎི་སྱ། ཨོྃ་བཛྲཱཾ་ཀེ་སྭཱ་ཧཱ། རྡོ་རྗེ་མཚན་གྱི་གསང་སྔགས་སོ། །ན་མོ་བཛྲ་པཱ་ཎི་སྱ། ཨོྃ་བཛྲ་ཙིཧྣི་སྭཱ་ཧཱ། རྡོ་རྗེ་རྟགས་ཀྱི་གསང་སྔགས་
སོ། །ན་མོ་བཛྲ་པཱ་ཎི་སྱ། ཨོྃ་སྭ་སྟི་ཀ་བི་ཤུདྡྷ་རཏྣེ་སྭཱ་ཧཱ། བཀྲ་ཤིས་ཀྱི་གསང་སྔགས་སོ། །ན་མོ་བཛྲ་པཱ་ཎི་སྱ། ཨོྃ་ཏྲི་ཤངྐུ་སྭཱ་ཧཱ། ཤིན་ཏུ་བཀྲ་ཤིས་ཀྱི་གསང་སྔགས་སོ། །ན་མོ་བཛྲ་པཱ་ཎི་སྱ། ཨོྃ་ཤྲཱི་བ་ཧེ་སྭཱ་ཧཱ། པདྨ་མཚན་གྱི་གསང་སྔགས་སོ། །ན་མོ་བཛྲ་པཱ་ཎི་སྱ།
ཨོྃ་བི་ཤུདྡྷེ་སྭཱ་ཧཱ། པདྨ་ཕྲེང་གི་གསང་སྔགས་སོ། །ན་མོ་བཛྲ་པཱ་ཎི་སྱ། །ཨོྃ་པྲ་མརྡི་ནི་སྭཱ་ཧཱ། གཡུང་དྲུང་རིས་ཀྱི་གསང་སྔགས་སོ། །ན་མོ་བཛྲ་པཱ་ཎི་སྱ། །ཨོྃ་བ་ཏྲ་ས་ནི་པྲ་མ་རྡ་ནི་ཙྪིནྡ་བིནྡ་ནི་སྭཱ་ཧཱ། མདུང་རྩེ་གསུམ་པའི་གསང་སྔགས་སོ། །ན་མོ་བཛྲ་པཱ་ཎི་སྱ། ཨོྃ་བི་ནཱ་ཡ་
เล่ม ๙๕ · หน้า 163b
ཀ་ནཱ་ཤ་ནི་སྭཱ་ཧཱ། རྡོ་རྗེའི་གསང་སྔགས་སོ། །ན་མོ་བཛྲ་པཱ་ཎི་སྱ། ཨོྃ་སརྦ་དུཥྚཾ་པྲ་མརྡ་ནི་ཡེ་སྭཱ་ཧཱ། མཆེ་བའི་གསང་སྔགས་སོ། །ན་མོ་བཛྲ་པཱ་ཎི་སྱ། ཨོྃ་ཨ་ཏི་ཤ་ཡཱ་བི་ཀྲ་མེ་སྭཱ་ཧཱ། མདུང་ཐུང་གི་གསང་སྔགས་སོ། །ན་མོ་བཛྲ་པཱ་ཎི་སྱ། །ཨོྃ་ཧཱུྃ་ཕཊ་སྭཱ་ཧཱ། ཀླུ་
ལག་གི་གསང་སྔགས་སོ། །ན་མོ་བཛྲ་པཱ་ཎི་སྱ། ཨོྃ་པཱ་ཤེ་སྭཱ་ཧཱ། ཞགས་པའི་གསང་སྔགས་སོ། །ན་མོ་བཛྲ་པཱ་ཎི་སྱ། ཨོྃ་བིད་ཏྲཱ་ས་ནི་སྭཱ་ཧཱ། རལ་གྲིའི་གསང་སྔགས་སོ། །ན་མོ་བཛྲ་པཱ་ཎི་སྱ། ཨོྃ་མ་ཧཱ་དཎྜ་སྭཱ་ཧཱ། དབྱུག་པའི་གསང་སྔགས་སོ། །ན་མོ་བཛྲ་
པཱ་ཎི་སྱ། ཨོྃ་ཙཀྲ་ཨ་སྤུ་ཏངྐེ་སྭཱ་ཧཱ། འཁོར་ལོའི་གསང་སྔགས་སོ། །ཕྱག་རྒྱའི་ལས་རྣམས་མཐུ་བསྐྱེད་ཕྱིར། །གསང་སྔགས་འདི་དག་བཤད་པ་ཡིན། །ཕྱག་རྒྱ་ཡི་ནི་ལས་རྣམས་ཀྱི། །མཚན་ཉིད་བདག་གིས་བཤད་པར་བྱ། །དེ་ལ་རྒྱལ་བའི་ཕྱག་རྒྱ་ནི། །ལྷ་ཡི་
གདོན་ལ་བསྟན་པར་བྱའོ། །རྣམ་པར་རྒྱལ་བའི་ཕྱག་རྒྱ་ནི་དྲི་ཟ་ལ་བསྟན་པར་བྱའོ། །རྡོ་རྗེའི་མཚན་ནི་འབྱུང་པོ་ལ་བསྟན་པར་བྱའོ། །རྡོ་རྗེ་རྟགས་ནི་ལྷ་མ་ཡིན་རྣམས་ལ་བསྟན་པར་བྱའོ། །བཀྲ་ཤིས་ནི་ཚངས་པའི་སྲིན་པོ་རྣམས་ལ་བསྟན་པར་བྱའོ། །ཤིན་ཏུ་བཀྲ་ཤིས་ནི་
གནོད་སྦྱིན་རྣམས་ལ་བསྟན་པར་བྱའོ། །པདྨ་མཚན་གྱི་ནི་སྲིན་པོ་རྣམས་ལ་བསྟན་པར་བྱའོ། །པདྨ་ཕྲེང་བཞི་ནི་གཟུ་ལུམས་ཅན་རྣམས་ལ་བསྟན་པར་བྱའོ། །གཡུང་དྲུང་རིས་ཀྱི་ནི་བེ་ས་ར་ལ་བསྟན་པར་བྱའོ། །མདུང་རྩེ་གསུམ་པ་ནི་སྨྱོ་བྱེད་རྣམས་ལ་བསྟན་པར་བྱའོ། །རྡོ་རྗེ་ནི་
ལོག་འདྲེན་རྣམས་ལ་བསྟན་པར་བྱའོ། །མཆེ་བ་ནི་ཤ་ཟ་རྣམས་ལ་བསྟན་པར་བྱ་སྟེ། ལྷག་པར་ཡང་ཙི་བ་ནི་ལ་བསྟན་པར་བྱའོ། །མདུང་ཐུང་ནི་བརྗེད་བྱེད་རྣམས་ལ་བསྟན་པར་བྱའོ། །ཀླུ་ལག་ནི་དུག་རྒྱས་པར་བྱེད་པའི་ཀླུ་རྣམས་ལ་བསྟན་པར་བྱའོ། །ཞགས་པ་ནི་ནམ་གྲུ་ལ་བསྟན་
པར་བྱའོ། །རལ་གྲི་ནི་བྱ་ལ་བསྟན་པར་བྱའོ། །དབྱུགས་པ་ནི་སྐེམ་བྱེད་ལ་བསྟན་པའོ། །འཁོར་ལོ་ནི་གཞོན་ནུ་ལ་བསྟན་པར་བྱའོ། །མཱ་མ་ཀཱི་ནི་ཐམས་ཅད་ལ་བསྟན་པར་བྱའོ། །རྟགས་བཅས་མཚན་ཉིད་བཅས་པ་ཡི། །ཕྱག་རྒྱ་འདི་དག་བདག་གིས་བཤད། །གདོན་རྣམས་
เล่ม ๙๕ · หน้า 164a
རྣམ་པར་འཕྲུལ་པ་ལ། །རྡོ་རྗེ་ལྕགས་ཀྱུ་བསྟན་བྱ་ཞིང་། །རྡོ་རྗེ་འཛིན་པ་བཟླས་བརྗོད་བྱ། །ལག་ན་རྡོ་རྗེས་བཤད་པ་ཡི། །ཕྱག་རྒྱ་འདི་ནི་གཅོད་བྱེད་པ། །གང་ཡིན་དེ་ལ་བདག་གིས་སུ། །རྡོ་རྗེ་འབར་བ་རབ་འབར་གྱིས། །སྤྱི་བོ་ཡང་ནི་གཞོམ་པར་
བྱ། །ལག་ན་རྡོ་རྗེས་སྔགས་བསྟན་པ། །གདོན་རྣམས་འཇིག་པར་བྱེད་པ་འདི། །རིག་སྔགས་རྣམས་ནི་བསྒྲུབ་པའི་ཕྱིར། །ལག་ན་རྡོ་རྗེའི་བཀའ་མཆོག་གིས། །རང་གི་མཚན་ནི་བསྟན་ན་འགྲུབ། །མཱ་མ་ཀཱི་ནི་ཕྱག་རྒྱ་ཡི། །རྟགས་བཅས་མཚན་མ་གར་གནས་པ། །
ལྷ་རྣམས་ཀུན་གྱིས་ཚུགས་མི་འགྱུར། །ཕྱག་རྒྱ་ཀུན་ལྡན་མཱ་མ་ཀཱིའི། །ཕྱག་རྒྱ་འདི་ནི་བདག་གིས་བཤད། །མདུང་རྩེ་གསུམ་པ་ཕྱེད་མཚན་ཅན། །མཱ་མ་ཀཱི་ཡི་ཕྱག་རྒྱ་ནི། །གང་དུ་བསྟན་པ་དེ་དག་ཏུ། །ལྷ་དང་དྲི་ཟ་སྲིན་མི་གནས། །ལག་ན་རྡོ་རྗེའི་བཀའ་མཆོག་གིས། །གདོན་
རྣམས་ཐམས་ཅད་མ་རུངས་འགྱུར། །མཱ་མ་ཀཱི་ཡི་རྒྱས་བཏབ་པའི། །ཆོ་ག་རྒྱས་པ་འདི་བསྒྲུབ་ཅིང་། །དངོས་གྲུབ་འདོད་པ་གང་ཡིན་དེས། །གསང་བ་འདི་ནི་བསྟན་པར་བྱེད། །མཱ་མ་ཀཱི་ཡི་རྒྱས་བཏབ་པའི། །ཕྱག་རྒྱ་འདི་ནི་མཐོང་བ་དང་། །མཱ་མ་ཀཱི་ཡི་གསང་མཐོང་བས། །
ཆོ་ག་ཚུལ་བཞིན་བསྒྲུབ་པར་བྱ། །བསྒྲུབ་པ་གང་གིས་མ་ཀཱིའི། །མཐོང་ན་རིང་པོར་མི་ཐོགས་པར། །དངོས་གྲུབ་མཆོག་ཐོབ་ཐེ་ཚོམ་མེད། །མཱ་མ་ཀཱི་ཡི་ཕྱག་རྒྱའི་མཚན། །གསང་བ་བདག་གིས་བཤད་པ་ཡི། །ཕྱག་རྒྱ་འདི་ནི་གང་དག་ཏུ། །བཞག་ནས་དངོས་གྲུབ་ཕྱིར་
བསྒྲུབས་ན། །མཱ་མ་ཀཱི་ཡི་རྒྱ་མཐོང་བས། །རིང་པོར་མི་ཐོགས་དངོས་གྲུབ་ཐོབ། །ཕྱག་རྒྱ་ལྕགས་ཀྱུ་ལྷན་ཅིག་ཏུ། །གདོན་རྣམས་ཀུན་ལ་སྦྱར་བར་བྱ། །རིག་སྔགས་རྣམས་དང་སྦྱིན་སྲེག་ལས། །གཏོར་མ་བྱས་ཤིང་མར་འཐུངས་ཀྱང་། །དྲག་ཅིང་མི་བཟད་ཕ་རོལ་གནོན། །
གདོན་རྣམས་གང་དུ་མི་འགྲོ་དེར། །ཕྱག་རྒྱ་མཐོང་ན་མི་བཟད་རྣམས། །ལྕགས་ཀྱུ་མ་དང་ལྷན་ཅིག་སྦྱར། །སོ་སོར་བསྟན་ཀྱང་གདོན་རྣམས་གང་། །འགྲོ་བར་མི་བྱེད་གང་ཡིན་པ། །དེ་ལ་ལག་ན་རྡོ་རྗེ་ཡི། །བཀའ་མཆོག་གིས་ནི་ཕྱག་རྒྱའི་ཚོགས། །མི་བཟད་རྣམས་
เล่ม ๙๕ · หน้า 164b
ཀྱང་བསྟན་པར་བྱ། །གཏུམ་པའི་གཟུགས་ཅན་མཱ་མ་ཀཱིའི། །གཅིག་པུ་མི་བཟད་བསྟན་པར་བྱ། །མཐོང་ནས་སེམས་ནི་མཱ་མ་ཀཱིས། །འཇིགས་ནས་གདོན་རྣམས་འབྱེར་བར་བྱེད། །ཕྱག་རྒྱའི་རྣམ་པར་འཕྲུལ་པ་སྣ་ཚོགས་ཀྱང་བཤད་པར་བྱ་སྟེ། གདོན་ནི་ཆོས་
ལུགས་མི་བཟད་པ། རིག་སྔགས་ལ་འདའ་བར་བྱེད་པ་གང་ཡིན་པའི་གདོན་ཐམས་ཅད་གང་ཡིན་པ་དེ་ལ་ནི་ལས་འདི་བྱ་སྟེ། ས་ཕྱོགས་གཙང་མར་བརྟགས་ནས་རིག་སྔགས་ཀྱི་རྒྱལ་པོ་ཡོངས་སུ་སྦྱང་བར་བྱས་ལ། དེར་རྡོ་རྗེ་ལྕགས་ཀྱུ་མའི་ཕྱག་རྒྱ་མིང་དང་ལྡན་པར་གཞག་གོ། །
ཚོན་རྩི་སྣ་གསུམ་གྱི་ཕྱེ་མས་རྒྱལ་བ་དང་། རྣམ་པར་རྒྱལ་བ་དང་། །རྡོ་རྗེའི་མཚན་ནི་ཤར་ཕྱོགས་སུ་དགོད་དོ། །རྡོ་རྗེ་རྟགས་དང་། བཀྲ་ཤིས་དང་། ཤིན་ཏུ་བཀྲ་ཤིས་ནི་བྱང་ཕྱོགས་སུ་དགོད་དོ། །པདྨ་མཚན་དང་། པདྨ་ཕྲེང་དང་། གཡུང་དྲུང་རིས་ནི་ལྷོ་ཕྱོགས་སུ་དགོད་དོ། །
མདུང་རྩེ་གསུམ་པ་དང་། རྡོ་རྗེ་དང་། མཆེ་བ་ནི་ནུབ་ཕྱོགས་སུ་དགོད་དོ། །དཀྱིལ་འཁོར་གྱི་ནང་དུ་སོང་ལ་མདུང་ཐུང་ནི་ཤར་ཕྱོགས་སུ་གཞག་གོ། །ཀླུ་ལག་ནི་བྱང་ཕྱོགས་སུ་གཞག་གོ། །རལ་གྲི་ནི་ནུབ་ཕྱོགས་སུ་གཞག་གོ། །ཕྱག་རྒྱ་བཞིས་ནི་བསྐོར་ནས་ཀྱང་། བློ་ངན་དེ་ནི་
སྐྲག་པར་བྱ། དེ་ནས་དུག་བཞིན་དུ་དབྱུག་པའི་ཚུལ་དུ་བསྟན་ན་གདོན་དེ་ངུ་ཞིང་ཚིག་བཞིན་དུ་དཀྱིལ་འཁོར་དེར་འོང་བར་འགྱུར་ཏེ། དེར་རྡོ་རྗེ་ལྕགས་ཀྱུ་མས་བཟླས་བརྗོད་བྱས་ནས་ཕྱག་རྒྱའི་ཚུལ་བསྟན་ན་དེ་མཐོང་བས་དེ་ཉིད་དུ་འགྱེལ་ཏེ། གདོན་གྱི་རིགས་ཀྱང་བཅོམ་པར་འགྱུར་རོ། །
རིག་སྔགས་རྣམས་ཀྱི་གསང་བ་ཡི། །དཀྱིལ་འཁོར་འདི་ནི་གསང་མཆོག་ཡིན། །རིག་པ་མཆོག་གི་གསང་བའི་རྒྱུ། །གསང་བ་འདི་ནི་གང་མཐོང་དང་། །གང་གིས་ཕྱག་རྒྱ་འདི་མཐོང་བ། །དེ་ལ་ང་ནི་གནས་པ་ཡིན། །ཕྱག་རྒྱའི་གོ་ཆ་བགོས་ནས་ནི། །ལག་ན་རྡོ་རྗེའི་
བཀའ་མཆོག་གིས། །ཕྱག་རྒྱས་དྲང་ཞིང་མཐོང་བྱེད་གང་། །དེ་ལ་ང་ནི་རྟག་ཏུ་ཡང་། །ཕྱག་རྒྱ་བཅིངས་པས་དངོས་གྲུབ་སྦྱིན། །དངོས་གྲུབ་མཆོག་ཕྱིར་བསྟན་པ་ཡིས། །ཆོ་ག་ཇི་ལྟར་མཐོང་བ་བཞིན། །སྒྲུབ་པ་ཀུན་ལ་ཕྱག་རྒྱ་དགོད། །དེ་ནས་ལས་རྣམས་བརྩམ་
เล่ม ๙๕ · หน้า 165a
པར་བྱ། །བསྒྲུབ་པ་རྣམས་ཀྱི་དངོས་གྲུབ་ཕྱིར། །གང་གིས་མི་རྣམས་གྲུབ་ཕྱིར། །གང་གིས་མི་རྣམས་གྲུབ་འགྱུར་བ། །མཱ་མ་ཀཱི་ནི་རྟག་པར་གཞག །ཕྱོགས་གང་དུ་རིག་སྔགས་བསྒྲུབ་པ་དེར་མཱ་མ་ཀཱིའི་ཕྱག་རྒྱ་བྲི་བར་བྱའོ། །གང་དུ་བཅོམ་ལྡན་འདས་མཱ་མ་ཀཱིའི་དྲག་ཏུ་བསྐུལ་བའི་མཆོག་
སྤངས་པ་དེར་ནི་ལག་ན་རྡོ་རྗེས་བཤད་པ་བཞིན་དུ་དངོས་གྲུབ་མེད་དོ། །མཱ་མ་ཀཱི་བསྟན་པས་ནི་གདོན་རྣམས་ལ་རྒྱས་འདེབས་པར་འགྱུར་ཏེ། སྨྲས་པས་ལས་ཐམས་ཅད་བྱེད་དོ། །བཅོམ་ལྡན་འདས་གང་ལག་ན་རྡོ་རྗེ་གང་དུ་སྤྱན་དྲང་བ་དེར་ནི་མཱ་མ་ཀཱིའི་ཕྱག་རྒྱ་གཞག་པར་བྱ་སྟེ། གང་
ན་མཱ་མ་ཀཱི་གནས་པ་དེ་ན་ང་གནས་སོ། །གང་ན་ཕྱག་རྒྱའི་ཚོགས་གནས་པ་དེ་ན་ང་རིག་སྔགས་ཀྱི་རྒྱལ་པོ་དང་ལྷན་ཅིག་ཏུ་རིག་སྔགས་ཐམས་ཅད་དང་ལྡན་པ་དང་། ཕོ་ཉ་མའི་ཚོགས་ཀྱི་འཁོར་དང་གནས་སོ། །དུས་གསུམ་དུ་ནི་ཕྱག་རྒྱ་ལ། །ཕྱག་བྱས་དངོས་གྲུབ་དམ་པ་
བསྒྲུབ། །ང་ཡི་རྡོ་རྗེ་ཕྱག་རྒྱ་ཡིས། །བཏབ་པས་དེ་ལ་དངོས་གྲུབ་སྦྱིན། །མཱ་མ་ཀཱི་ནི་དེར་གཞག་ན། །རིག་སྔགས་ངེས་པར་འགྲུབ་འགྱུར་ཏེ། །དེ་ལ་ཡིད་གཉིས་མི་བྱའོ། །གང་ཞིག་ཕྱག་རྒྱ་འདི་དག་དང་། །མཱ་མ་ཀཱི་ཡི་ཕྱག་རྒྱར་ལྡན། །དེ་ནི་རིག་མཆོག་ཆོ་ག་ཡི། །
གསང་དང་གསང་ཆེན་ལྡན་པ་ཡིན། །དེ་ལ་ལྷ་རྣམས་མགུ་བ་ཡི། །ཡིད་ཀྱིས་དངོས་གྲུབ་སྦྱིན་པར་བྱེད། །ཕྱག་རྒྱ་འདི་དག་དྲན་བྱེད་དང་། །ལྷག་པར་ཡང་ནི་སྟོན་བྱེད་པ། །དེ་ལ་ལྷ་རྣམས་དགའ་བའོ། །སེམས་ཀྱིས་དངོས་གྲུབ་སྦྱིན་པར་བྱེད། །ལྷ་རྣམས་བྱེ་བས་
བཤད་པ་ཡི། །ཕྱག་རྒྱ་འདི་དག་གར་གནས་པ། །དེར་ནི་དངོས་གྲུབ་སྦྱིན་པའི་ཕྱིར། །ང་ནི་རྟག་ཏུ་གནས་པར་འགྱུར། །མཱ་མ་ཀཱི་ཡི་ཕྱག་རྒྱའི་མཚན། །ཕྱག་རྒྱ་ཀུན་གྱི་མཆོག་ཡིན་ཏེ། །ཕྱག་རྒྱ་ཐམས་ཅད་སྟོན་པ་ན། །མཱ་མ་ཀཱི་ཡི་ཕྱག་རྒྱ་ཡང་། །བསྟན་པར་བྱས་ན་དོན་
ཡོད་འགྱུར། །གང་དུ་ཕྱག་རྒྱའི་ཚོགས་བཤད་ཅིང་། །མཱ་མ་ཀཱི་ཡི་གསང་མཆོག་བསྟན། །དེར་ནི་ང་ཡང་གནས་པར་འགྱུར། ཕྱག་རྒྱ་འདི་དག་ནི་ཆར་ཡང་འབེབས་པར་བྱེད་དོ། །ལྷ་རྣམས་ལ་ཡང་རྒྱས་འདེབས་པར་བྱེད་དོ། །མདོར་ན་ཡིད་ལ་ཇི་ལྟར་འདོད་པ་བཞིན་དུ་ཆོ་ག་སྣ་ཚོགས་
เล่ม ๙๕ · หน้า 165b
ཀྱིས་ལས་བྱེད་དེ། ཕྱག་རྒྱའི་ཚུལ་བསྟན་པས་ལས་བྱེད་པར་འགྱུར་རོ། །ཕྱག་རྒྱ་ཐམས་ཅད་ལ་ཡང་རྡོ་རྗེ་ལྕགས་ཀྱུ་མ་དང་སྦྱར་བར་བྱ་སྟེ། ཕྱག་རྒྱ་འདི་རྣམས་ནི་གདོན་ལ་བསྟན་པར་མི་བྱའོ། །ཕྱག་རྒྱ་རྣམས་བསྟན་ན་ལྷ་རྣམས་འཇིགས་ཤིང་སྐྲག་པར་འགྱུར་ལ་རིག་སྔགས་འཆང་
ཡང་བརླག་པར་འགྱུར་རོ། །མཱ་མ་ཀཱིས་ཕུར་བུས་བཏབ་ན་རྟག་ཏུ་ཞི་བར་བྱེད་པར་འགྱུར་རོ། །སྐྲག་པས་དངོས་གྲུབ་སྦྱིན་པར་བྱེད་དོ། །ཕྱག་རྒྱའི་ཚུལ་ནི་ལག་པའི་སྟབས་ཀྱིས་བསྟན་པར་མི་བྱའོ། །དཀྱིལ་འཁོར་དུ་ཡང་མིང་དང་ཕྱག་རྒྱའི་ཚུལ་བྲིའོ། །མཱ་མ་ཀཱི་ནི་ལས་ཐམས་
ཅད་ལ་ཡང་བསྟན་པར་བྱའོ། །གང་ན་མཱ་མ་ཀཱི་གནས་པ་དེ་ན་ང་གནས་ལ། གང་ན་མཱ་མ་ཀཱི་གནས་པ་དེ་ན་ལག་པས་ཇི་ལྟར་བསྟན་པར་བྱ་བ་དེ་བཞིན་དུ་ས་ལ་ཡང་བྲིའོ། །ཕྱག་རྒྱ་གང་དག་གི་ཚུལ་གྱིས་བསྐུལ་བས་ཀྱང་མི་རྣམས་དངོས་གྲུབ་འགྲུབ་པར་འགྱུར་བསྟན་ན་དེས་ཆོ་
ག་དང་། ལས་དང་། །གནས་རྣམས་ཀྱིས་ཀྱང་ལས་སུ་རུང་བར་བྱེད་དོ། །དེ་ནས་ཕྱག་རྒྱའི་ཚོགས་བསྟན་ནས་ལས་རྣམས་བྱ་སྟེ། མཐུ་སྟོབས་ཆེན་པོ་སྣ་ཚོགས་རྣམས་བསྟན་པར་བྱའོ། །དཀྱིལ་འཁོར་འདི་ནི་གསང་བའི་མཆོག་ཡིན་ནོ། །ང་ལ་བལྟ་བར་འདོད་པ་གང་
ཡིན་པ་དེས་ནི་མཱ་མ་ཀཱི་ལ་སོགས་པའི་ཕྱག་རྒྱའི་ཚོགས་རྣམས་ཀྱི་ཕྱག་རྒྱའི་ཚོགས་རྣམས་ཀྱི་ཕྱག་རྒྱའི་དཀྱིལ་འཁོར་བལྟ་བར་བྱའོ། །ཕྱག་རྒྱའི་ཚོགས་ཀྱི་མིང་ཐོས་ནས་ཕྱག་འཚལ་བ་གང་ཡིན་པ་དེ་ནི་འཇིགས་པར་བྱ་བ་རྣམས་ཀྱིས་འཇིགས་པར་མི་འགྱུར་རོ། །ཅི་སྟེ་ཕྱག་རྒྱའི་ཚོགས་མ་མཐོང་ན་
དེ་ལ་དམ་ཚིག་གིས་དངོས་གྲུབ་སྦྱིན་པར་མི་འགྱུར་རོ། །གང་གིས་མཱ་མ་ཀཱིའི་ཕྱག་རྒྱ་མཐོང་བ་དེའི་མདུན་དུ་ངས་དངོས་གྲུབ་སྦྱིན་པར་བྱའོ། །ཕྱག་རྒྱའི་ཚོགས་ཀྱིས་བསྐོར་བའི་མཱ་མ་ཀཱིའི་ཕྱག་རྒྱས་བཀོད་ལ་མཱ་མ་ཀཱིའི་གཟུགས་ཀྱང་གཞག་པར་བྱ་སྟེ། དེ་ནས་རིག་སྔགས་
འཆང་གིས་མཱ་མ་ཀཱིའི་ཕྱག་རྒྱ་བལྟ་བར་བྱའོ། །དེ་ནས་མཱ་མ་ཀཱིའི་ལས་ཞི་བ་དང་། རྒྱས་པ་དང་། དྲག་ཤུལ་ལ་སོགས་པའི་ལས་བྱ་སྟེ། མཱ་མ་ཀཱིའི་མདུན་དུ་བཟླས་བརྗོད་བྱས་པ་དེས་བསྲུང་བར་བྱའོ། །མཱ་མ་ཀཱིའི་ཕྱག་རྒྱའི་ཚོགས་བྲིས་པ་གང་ན་འདུག་པ་དེ་ནང་ཕོ་ཉ་
เล่ม ๙๕ · หน้า 166a
མ་རྣམས་ཀྱི་ཚོགས་ཀྱིས་བསྐོར་བ་ཡང་གནས་སོ། མཆོད་རྟེན་གྱི་དྲུང་ངམ་སྐུ་གཟུགས་ཀྱི་གནས་སུ་ཕྱག་རྒྱའི་ཚོགས་དགོད་པར་བྱའོ། །ཡང་ན་གླེགས་བམ་ལ་བྲིས་ཏེ་གླེགས་བམ་དེ་ཡང་དེ་བཞིན་གཤེགས་པའི་གནས་སུ་གཞག་གོ། །གཞན་དུ་བཞག་
ན་བརྟག་པའམ་གནོད་པ་བྱེད་པར་འགྱུར་རོ། །ཕྱག་རྒྱའི་ཚོགས་ལ་བྲིས་ནས་དེར་སྤྱད་སྤྱད་པ་མཚོར་གནས་པའི་ཆུ་ཀླུང་དུ་དོར་བར་བྱའོ། །ལྕགས་ཀྱུ་མས་ཡོངས་སུ་སྦྱང་བ་བྱས་ལ་གྱོ་མོ་དང་གསེག་མ་མེད་པའི་ས་ཕྱོགས་སུ་ལྕགས་ཀྱུ་མས་ཕྱག་རྒྱའི་ཚོགས་བྲི་བར་བྱའོ། །མཱ་མ་ཀཱིའི་
ཕྱག་རྒྱའི་ཚོགས་ཀྱིས་བསྐོར་བ་ཡང་གཞག་པར་བྱ་སྟེ་གཟུགས་སུ་གཞག་པར་བྱའོ། །ཟུག་རྔུ་ཡོད་པའི་ས་ར་བྲིས་ན་ནི་གནོད་པར་བྱེད་པར་འགྱུར་ཏེ། ཡུལ་དང་། གྲོང་ཁྱེར་དང་། རྒྱལ་པོ་ལ་ཡང་མི་དགེ་བ་བསྐྱེད་པར་འགྱུར་རོ། །མཱ་མ་ཀཱི་ཡང་ངས་རིག་པ་མཆོག་གི་ཆོ་ག་རྒྱལ་
པོ་ཆེན་པོའི་དངོས་གྲུབ་སྟོན་དུ་གཞུག་གོ། །ཕྱག་རྒྱའི་ཚོགས་སྟོབས་ཆེན་མོ་མི་བཟད་པ་འདི་བཤད་ཟིན་ཏོ། །རྟགས་དང་མཚན་མའི་ཚུལ་བསྟན་པ་དེ་དག་ཀྱང་བཤད་ཟིན་ཏོ། །དེ་ནས་མཱ་མ་ཀཱི་བལྟ་བར་འདོད་པས་ནི་ང་ལ་བལྟ་བར་བྱའོ། །ང་བལྟ་བར་འདོད་པས་ནི་མཱ་མ་ཀཱི་
སྨན་བརྒྱད་ཀྱིས་བསྐོར་བ་ཚང་པ་དང་། སྨན་བརྒྱད་དང་བཅས་པའི་ཨུཏྤལ་དང་ལྡན་པའི་ཡིད་དུ་འོང་བ་བལྟ་བར་བྱའོ། །དེ་ནས་རིག་སྔགས་འཆང་ང་ལ་བལྟ་བར་འདོད་པས་བྱང་ཆུབ་ཀྱི་སེམས་བསྐྱེད་ལ་གསོ་སྦྱོང་ཡན་ལག་བརྒྱད་དང་ལྡན་པ་དང་། ཞག་གཅིག་སྨྱུང་བར་བྱས་
པའི་ཉི་མ་བཟང་བ་ལ་རིག་པའི་རྒྱལ་པོས་བསྲུང་བའི་ཆོ་ག་བྱས་ཏེ། དྲི་དང་། མེ་ཏོག་དང་། བདུག་པ་ཕུལ་ནས་སྨན་གྱིས་ལུས་ཀྱི་ཡན་ལག་རྣམས་དབྱུང་བར་བྱ་སྟེ། དེ་བཞིན་གཤེགས་པས་གསུངས་པའི་སྨན། །ས་མ་ཛི་ནི་དབྱུང་བར་བྱ། །ལྷ་ཆེན་གྱིས་བྱིན་
གཉིས་པ་སྟེ། །འབམ་པོ་ཡང་ནི་དབྱུང་བར་བྱ། །དེ་བཞིན་སྲེད་མེད་བུས་བྱིན་པ། །ནི་ལ་སུ་སྲི་དབྱུང་བར་བྱ། །དེ་བཞིན་ཚངས་པས་བཤད་པ་ཡི། །བྲམ་ཧི་ཡང་ནི་དབྱུང་བར་བྱ། །འཇིག་རྟེན་སྐྱོང་གིས་བཤད་པ་ཡི། །རམ་ཉེ་བ་ཡང་དབྱུང་བར་བྱ། །རྫོང་གི་
เล่ม ๙๕ · หน้า 166b
འཕགས་མས་བྱིན་པ་ཡི། །ཤེ་ཏྭ་ཛྷ་ཡང་དེ་བཞིན་དབྱུང་། །ཚིག་ལྡན་མས་ནི་བྱིན་པ་ཡི། །ནི་ལ་ཛྭ་ཡང་དབྱུང་བར་བྱ། །ཡན་ལག་ཀུན་གྱི་ཨུཏྤལ་ལྡན། །ལག་ན་རྡོ་རྗེས་བཤད་པ་དགེ། །དེ་ནས་སྨན་གྱི་ལུས་ཐམས་ཅད་ཕྱུང་ནས་ལྷན་ཅིག་ཏུ་གཞག་གོ། །དེ་
ནས་རིག་སྔགས་འཆང་གིས་བསྲུང་བའི་ཆོ་ག་བྱས་ནས་གཏོར་མའི་ཆོ་ག་བྱས་ལ། ཀུ་ཤའི་སྟན་ལ་འདུག་སྟེ་རྡོ་ལེབ་ཤིན་ཏུ་བཀྲུས་པ་ལ་དབྱིག་དང་གསེར་བཀྲམ་ནས། རིག་སྔགས་ཀྱི་རྒྱལ་པོ་བཟླས་བརྗོད་བྱེད་བཞིན་དུ་སྨན་རྣམས་བཅོམ་ལྡན་འདས་མ་ཙནྡན་དམར་པོའི་ཆུས་
བཀྲུས་པའི་ཆུ་ལ་སྔགས་ཀྱིས་བཏབ་པ་དེ་དང་བཏགས་ཏེ། སྨན་གྱི་ལུས་ཐམས་ཅད་བླངས་ལ། གསེར་རམ། རྡོའི་སྣོད་དམ། ཁམ་པའི་སྣོད་ཀྱི་ནང་དུ་བཞག་ནས། ཀཱརྵཱ་པཎ་བརྒྱ་རྩ་བརྒྱད་ཀྱིས་རྡོ་རྗེ་རྫོགས་པར་བྱས་ཏེ། ཤིན་ཏུ་མཉམ་པར་བཞག་པས་ཙནྡན་
དམར་པོའི་ཆུས་བསང་གཏོར་བྱས་ལ་ལག་པས་མནན་ནས། རིག་སྔགས་ཐམས་ཅད་ཀྱི་སྙིང་པོ་ལན་བརྒྱད་བརྒྱད་བཟླས་བརྗོད་བྱས་ཏེ། རྡོ་རྗེའི་དབུས་སུ་ལྷ་མོའི་གཟུགས་རྣམས་བཞག་ལ་གཟུགས་བཟང་མ་ལན་བརྒྱད་བཟླས་བརྗོད་བྱའོ། །དེ་ནས་མཱ་མ་ཀཱིའི་གཟུགས་སུ་
བྱས་ལ། དེ་ནས་རིག་སྔགས་འཆང་གིས་རས་དཀར་པོའི་སྟེང་དུ་བཞག་སྟེ། །མཱ་མ་ཀཱིའི་རིག་སྔགས་ཀྱིས་བརྗོད་པར་བྱའོ། །གདུ་བུ་ལ་ཡང་རིན་པོ་ཆེ་སྣ་ཚོགས་ཀྱིས་སྤྲས་པར་བྱའོ། །དེར་ཡང་ལས་རྣམས་སྦྱར་བར་བྱ། དེ་རིན་པོ་ཆེ་ཐམས་ཅད་དང་། ས་བོན་ཐམས་
ཅད་ཀྱི་མཆོད་ཡོན་དབུལ་བར་བྱའོ། །གཏོར་མའི་ཆོ་ག་ཡང་རྒྱས་པར་བྱའོ། །རིག་སྔགས་ཀྱི་རྒྱལ་པོ་ཡང་མཱ་མ་ཀཱིའི་དྲུང་དུ་གཞག་པར་བྱའོ། །ལྷ་ཐམས་ཅད་ཀྱི་གཟུགས་ཀྱང་སྤྱན་དྲངས་ལ། མཱ་མ་ཀཱིའི་མདུན་དུ་རིག་སྔགས་ཀྱི་རྒྱལ་པོ་ལན་བརྒྱད་བརྒྱ་བཟླས་བརྗོད་
བྱའོ། །དེ་ནས་མེ་ཏོག་གི་ཕྲེང་བ་འགུལ་བ་དང་། མར་མེའི་མེ་ལྕེ་ཆེན་པོར་འགྱུར་བ་དང་། སྤུ་ཟིང་ཞེས་བྱེད་པ་དང་། སེམས་དགའ་བ་འབྱུང་བར་འགྱུར་རོ། །དེ་ནས་རིག་སྔགས་འཆང་གི་ཚོགས་རྣམས་ལ་གཏོར་མ་སྦྱིན་པར་བྱའོ། །དེ་ནས་ནང་པར་བླ་མ་ལ་མཆོད་
เล่ม ๙๕ · หน้า 167a
པ་བྱ་སྟེ། རིན་ཐང་མེད་པའི་རིན་པོ་ཆེའི་ཡོན་ཕུལ་ལ། དེ་ནས་རིག་སྔགས་ཀྱི་རྒྱལ་པོ་བཟླས་བརྗོད་བྱེད་བཞིན་དུ་དངོས་གྲུབ་གསོལ་དུ་བཅུག་ན་ཆོ་ག་རྒྱས་པའི་དངོས་གྲུབ་སྦྱིན་པར་བྱེད་དམ། ཡང་ན་ལས་གཅིག་གི་དངོས་གྲུབ་སྦྱིན་པར་བྱེད་དེ། བླ་མས་ཇི་
སྐད་སྨྲས་པ་དེ་ཡིད་ལ་བཞག་ནས་ཚིག་དེ་ཡང་མཉན་པར་བྱའོ། །དེ་ནས་རིག་སྔགས་འཆང་གིས་བླ་མ་ལ་མཱ་མ་ཀཱི་བསྟན་པར་བྱ་སྟེ། མཐོང་ན་ཇི་སྐད་སྨྲས་པ་དེ་དེ་ལ་འགྲུབ་པར་འགྱུར་ཏེ། །ཅི་སྟེ་ཁྲོ་བའི་སེམས་ཀྱིས་སྨྲས་ན་ནི་ལས་དྲག་པོར་འགྲུབ་པར་འགྱུར་རོ། །ཅི་སྟེ་དགའ་བའི་
སེམས་ཀྱིས་སྨྲས་ན་ནི་དངོས་གྲུབ་མཆོག་འགྲུབ་པར་འགྱུར་ཏེ། བླ་མས་མཱ་མ་ཀཱི་རྒྱ་མཚོར་འབབ་པའི་ཆུ་ཀླུར་གི་ནང་དུ་བཏང་ལ་བླ་མའི་ལས་པས་མཱ་མ་ཀཱི་བཙལ་བར་བྱ་སྟེ། །ལག་ཏུ་ཐོབ་ན་མཱ་མ་ཀཱིའི་ཆོ་ག་རྒྱས་པའི་དངོས་གྲུབ་བདེ་བླག་ཏུ་འགྲུབ་པར་འགྱུར་རོ། །རིག་སྔགས་འཆང་
གིས་ཀྱང་ཆོ་གའི་གཟུགས་རྒྱ་མཚོར་འབབ་པའི་ཆུ་ཀླུང་གི་ནང་དུ་གཏང་བར་བྱའོ། །བསྒྲུབ་པའི་ཚེ་སྤྱན་གྱིས་མཱ་མ་ཀཱི་གཞག་པར་བྱའོ། །ཨུཏྤལ་དང་ལྡན་པས་ཀྱང་མཱ་མ་ཀཱི་གཞག་པར་བྱའོ། །ཨོྃ་ཧ་རཾ་ཛྭ་ན་བེ་ཏ་རཉྫ་ན་བེ་སྭཱ་ཧཱ། ཆོ་ག་འདི་ཉིད་ཀྱིས་མར་གྱི་ངོ་ཞག་བརྒྱད་ལ་
མཱ་མ་ཀཱིའི་མདུན་དུ་རྡོ་རྗེ་དབུས་སུ་པདྨ་བརྒྱད་སྟོང་གིས་སྦྱིན་དོར་བྱའོ། །དེ་ནས་ཆོ་ག་རྒྱས་པ་འགྲུབ་པར་འགྱུར་ཏེ། །ནང་བར་གྱི་དུས་སུ་བླ་མ་ལ་མཆོད་པ་བྱས་ནས་དངོས་གྲུབ་གསོལ་དུ་གཞུག་གོ། །དངོས་གྲུབ་བྱིན་ནས་ཀྱང་ཞག་བདུན་པའི་ཉིན་པར་གློ་བུར་དུ་མི་ནག་པོ་མཐོང་བར་འགྱུར་
ཏེ། མཐོང་ན་ཆོ་ག་རྒྱས་པ་འགྲུབ་པར་ཤེས་པར་བྱའོ། །སྡིག་པའི་ལས་ནི་བྱེད་པ་དང་། །བྲམ་ཟེ་གསོད་དང་མི་གསོད་དང་། །ཚུལ་ཁྲིམས་འཆལ་ལ་སྦྱིན་མི་བྱ། །མི་བཟད་པ་ནི་གང་ཡིན་པའི། །མི་རྣམས་ཀྱིས་ནི་ཐོབ་མི་འགྱུར། །རྡོ་རྗེ་རིགས་མཆོག་གང་དད་པ། །
མཱ་མ་ཀཱི་ནི་དེ་མདུན་གནས། །ཚུལ་ཁྲིམས་འཆལ་དང་སྡིག་པ་ཅན། །དེ་དག་གིས་ནི་གཟུགས་མི་མཐོང་། །གང་ན་མི་བཟད་སྡིག་བྱེད་པ། །དེ་ན་བདག་གི་མིང་ཡང་མེད། །དེར་ནི་མི་མཐོང་ཅི་ཞིག་སྨོས། །གང་དང་དགེ་བ་བཅུ་པོ་ཡི། །ལས་ཀྱི་ལམ་དང་ལྡན་པའི་
เล่ม ๙๕ · หน้า 167b
མི། །དེ་དག་གིས་ནི་ང་ཡང་མཐོང་། །གང་དག་ཚུལ་ཁྲིམས་ལྡན་པ་དང་། །རྡོ་རྗེ་རིགས་ལ་དད་པའི་མི། །དེ་དག་གིས་ནི་ང་མཐོང་ཞིང་། །རེག་འགྱུར་སེམས་ཅན་དེ་དག་ནི། །ང་ཡི་རིགས་སུ་གཏོགས་པ་ཡིན། །མཱ་མ་ཀཱི་ནི་གང་གིས་མཐོང་། །སྟོབས་ཆེན་དེ་དག་
ང་ཡི་གནས། །ཡིད་དུ་འོང་བར་སྐྱེ་བར་འགྱུར། །གང་གི་ཚེ་ཆོ་ག་རྒྱས་པ་དེའི་ཚེ་བླ་མ་ལ་ཡོན་ཕུལ་ནས་མཱ་མ་ཀཱི་བསླང་བར་བྱའོ།། བླ་མས་ཨུཏྤལ་ནི་མཚན་དང་ལྡན་པའི་སྔགས་ཀྱིས་མཱ་མ་ཀཱིའི་གཟུགས་སོར་བཞི་པ་བྱས་ལ། །དེ་ནས་བླ་མས་སྦྱིན་པར་བྱ་སྟེ། དངོས་
གྲུབ་ཀྱང་གསོལ་དུ་གཞུག་གོ། །ཕོ་ཉ་མ་རྣམས་དང་། ཚོགས་རྣམས་ལ་ཡང་གཏོར་མ་སྦྱིན་པར་བྱའོ། །ས་ཡོངས་སུ་སྦྱང་བ་དང་། དཀྱིལ་འཁོར་གྱི་བགེགས་ཀྱི་སྦྱིན་སྲེག་ཀྱང་བྱའོ། །ཕོ་ཉ་མ་རྣམས་ཀྱི་ལས་རྣམས་ལ་ནི་ལན་འབུམ་བཟླས་བརྗོད་བྱས་ན་འགྲུབ་པར་འགྱུར་
རོ། །ཞི་བའི་ལས་རྣམས་ལ་ནི་རི་མོ་ལ་ལྷ་མོ་མདོག་གནག་པ་གཅིག་བྲིས་ཏེ། སྤྱི་བོ་ན་དེ་བཞིན་གཤེགས་པ་བཞུགས་པ་ལ་སྐྱབས་སྦྱིན་པའི་ཕྱག་རྒྱ་དང་། ལག་པ་གཡོན་པ་ལ་རྡོ་རྗེ་འབར་བ་ཐོགས་པར་བྲིའོ། །དེ་ནས་མར་གྱི་ངོ་ཞག་བཅུ་བཞི་ལ་བརྩམས་ཏེ་ཞག་བདུན་
གྱི་བར་དུ་གུ་གུལ་ཡུངས་མར་དང་སྦྱར་བའི་སྦྱིན་སྲེག་བྱའོ། །ཚོགས་རྣམས་ལ་ཡང་གཏོར་མའི་ཆོ་ག་བྱའོ། །ཚོགས་རྣམས་ཀྱང་ལས་ལ་ཡང་བདུད་རྩི་ཐབ་སྦྱོར་གྱི་སྐབས་སུ་ངས་ལས་བཤད་པ་གང་ཡིན་པའི་ལས་དེས་སྦྱར་བར་བྱའོ། །ཕྱག་རྒྱ་དེ་དག་གི་སོ་སོའི་རྟགས་ཀྱང་བཤད་པར་
བྱ་སྟེ། མཱ་མ་ཀཱིའི་རྟགས་ནི་སྟེགས་བུ་ལ་རྡོ་རྗེ་རྩེ་གསུམ་པ་ཁ་གཅིག་པ་བྲིའོ། །དེའི་གཡོན་ལོགས་སུ་རྡོ་རྗེ་རྩེ་གསུམ་པ་དབྱུག་པ་ལ་བཙུགས་པར་བྲིའོ། །གཡས་ལོགས་སུ་རྡོ་རྗེ་རྩེ་གསུམ་པ་ཁ་གཉིས་པ་དབུས་ཀྱི་ཆང་ཟུངས་དྲང་པོར་འདུག་ལ་ཆང་ཟུངས་ནས་དགྲ་སྟ་སྲབ་མོའི་ཁ་ཕྱི་
རོལ་དུ་བལྟས་པ་བྲིའོ། །རྒྱལ་བའི་སྟེགས་བུའི་སྟེང་དུ་རྡོ་རྗེ་རྩེ་གསུམ་ཁ་གཉིས་པ་དབུས་ཀྱི་ཆང་ཟུངས་དྲང་པོར་འདུག་པར་བྱའོ། །རྣམ་པར་རྒྱལ་བའི་ནི་དེ་ཉིད་ལས་དབུས་ནས་འབྲས་བུ་བྱས་ལ་གཡས་ཕྱོགས་སུ་རྡོ་རྗེ་རྩེ་གསུམ་ཁ་གཅིག་པ་མེ་ལྕེ་འབར་བ་གསུམ་དང་ལྡན་པ་དབྱུག་པ་ལ་
เล่ม ๙๕ · หน้า 168a
བཙུགས་པ་ཡིན་ནོ། །རྡོ་རྗེ་མཚན་གྱི་ནི་སྟེགས་བུའི་སྟེང་དུ་རྡོ་རྗེ་རྩེ་གསུམ་ཁ་གཉིས་པ་དབུས་དྲང་པོར་བྱས་པའོ། །རྡོ་རྗེ་རྟགས་ཀྱི་ནི་དེ་ཉིད་ལ་དབུས་ནས་འབྲས་བུ་འདུག་པ་ཡིན་ནོ། །བཀྲ་ཤིས་ཀྱི་སྟེགས་བུའི་སྟེང་དུ་རྡོ་རྗེ་རྩེ་གཅིག་པ་ཁ་གཉིས་པ་རྩེ་མོ་ཀ་ནྱའི་དབྱིབས་
འདྲ་བར་བྱས་པ་དེའི་གཡས་ལོགས་སུ་རྡོ་རྗེ་རྩེ་གསུམ་ཁ་གཉིས་པ་དབུས་དྲང་པོར་འདུག་པར་བྱའོ། །ཤིན་ཏུ་བཀྲ་ཤིས་ཀྱི་ནི་སྟེགས་བུའི་སྟེང་དུ་ཐོར་ཚུགས་ཀྱི་ཕུང་པོ་བཅིངས་པ་བཞག་སྟེ། ཐོར་ཚུགས་ཀྱི་མཐའ་འབར་བའི་ཕྲེང་བས་བསྐོར་ལ། དེའི་གཡས་ལོགས་སུ་རྡོ་རྗེ་རྩེ་
གསུམ་ཁ་གཉིས་པ་དབུས་དྲང་པོར་བྱས་ལ་པདྨའི་སྟེང་ན་འདུག་པར་བྲིའོ། །པདྨ་མཚན་གྱི་ནི་སྟེགས་བུའི་སྟེང་དུ་པདྨ་ཡིད་ཙམ་གྱིས་ཁ་ཕྱེ་བ་རྩ་བ་དང་། སྡོང་བུ་དང་བཅས་པར་འདུག་པར་བྱས་ལ། དེའི་གཡོན་ལོགས་སུ་རྡོ་རྗེ་རྩེ་གསུམ་པ་ཁ་གཉིས་པ་དབུས་དྲང་པོར་འདུག་པར་བྲིའོ། །
གཡས་ལོགས་སུ་རྩེ་གསུམ་ཁ་གདེངས་མདུང་རྩེ་གསུམ་པ་འདྲ་བར་བྱའོ། །པདྨ་ཕྲེང་གི་ནི་པདྨ་ཁ་བྱེ་བ་བཅུ་གཅིག་ལ་གཅིག་འཁྲིལ་བ་བྲིས་ལ་དེའི་དབུས་སུ་རྡོ་རྗེ་རྩེ་གསུམ་ཁ་གཉིས་པ་དབུས་ནས་འབྲས་སུ་འདུག་པ་གཞག་གོ། །གཡུང་དྲུང་རིས་ཀྱི་སྟེང་དུ་ནི་དཀྱིལ་འཁོར་གྲུ་བཞི་
ལྷམ་པ་ཉི་རིམ་དུ་བྲིས་ཏེ་ངོས་བཞི་ནས་ཤད་བཞི་དྲངས་ལ་ཚིགས་བཅག་སྟེ་གཡས་ཕྱོགས་སུ་འཁྱིལ་པ་བྲིའོ། །ཤད་བཞི་པོ་དེ་དག་ཀྱང་རིན་པོ་ཆེའི་ཕྲེང་བས་བསྐོར་བར་བྱའོ། །དེ་དག་གི་སྟེང་དུ་རྡོ་རྗེ་རྩེ་གཅིག་པ་མར་གྱི་མེ་ལྕེ་འདྲ་བ་རྣམས་བྲི། དེའི་གཡོན་ལོགས་སུ་རྡོ་རྗེ་རྩེ་གསུམ་
པ་ཁ་གདེངས་པ་བྲིའོ། །གཡས་ལོགས་སུ་རྡོ་རྗེ་རྩེ་གསུམ་ཁ་གཉིས་པ་དབུས་དྲང་པོར་བྱའོ། །མདུང་རྩེ་གསུམ་པ་ནི་སྟེགས་བུའི་སྟེང་དུ་མདུང་རྩེ་གསུམ་པ་ཁ་གཉིས་པ་དབུས་དྲང་པོར་བྱས་ལ། དེའི་གཡས་ལོགས་སུ་རྩེ་གསུམ་ཁ་གདེངས་རྡོ་རྗེ་འདྲ་བར་བྱའོ། །རྡོ་རྗེ་ནི་སྟེགས་
བུའི་སྟེང་དུ་རྡོ་རྗེ་རྩེ་གསུམ་ཁ་གཉིས་པ་རྩེ་མོ་དབུས་མ་ཀ་ན་ཡའི་རྩེ་མོའི་དབྱིབས་ལྟར་འདུག་པར་བྱས་ལ། །དེའི་གཡས་ལོགས་སུ་རྩེ་གསུམ་ཁ་གདེངས་མདུང་རྩེ་གསུམ་པ་འདྲ་བར་བྱའོ། །མཆེ་བའི་སྟེགས་ནི་རྡོ་རྗེ་རྩེ་གསུམ་ཁ་གཉིས་པ་དབུས་ཀྱི་ཆང་ཟུངས་དྲང་པོར་འདུག་པར་བྲིས་
เล่ม ๙๕ · หน้า 168b
ལ། དེའི་གཡས་ལོགས་སུ་པདྨ་ཁ་མ་བྱེ་བ་ལ་མཆེ་བའི་ཕྱིར་དགུ་བོར་འདུག་པར་བྲིའོ། །མདུང་ཐུང་གི་སྟེགས་བུའི་སྟེང་དུ་རྡོ་རྗེ་རྩེ་གསུམ་ཁ་གཉིས་པ་དབུས་ནས་འབྲས་བུ་འདུག་པ་བྲིས་ལ། དེའི་གཡས་ལོགས་སུ་མདུང་ཡུ་བ་ཅན་རྩེ་མོ་ཀ་ན་ཡའི་དབྱིབས་འདྲ་བར་བྲིའོ། །ཀླུ་ལག་གི་
ནི་སྦྲུལ་གཉིས་གཅིག་ལ་གཅིག་མཇུག་མ་སྦྲེལ་ཏེ་ཚམ་ངམ་བྱེད་ཅིང་དམིགས་རྩ་བསྒྲིམས་ལ་ལྕེ་འབྱིན་ཅིང་གཅིག་ལ་གཅིག་བལྟ་བར་བྲིས་ཏེ། དེ་གཉིས་ཀྱི་མགོ་བོ་ལ་འབར་བ་གསུམ་དང་ལྡན་པའི་ནོར་བུ་ཐོགས་ལ། དེ་གཉིས་ཀྱི་བར་ན་རྡོ་རྗེ་གསུམ་ཁ་གཉིས་པ་དབུས་ནས་འབྲས་བུ་
འདུག་པ་སྦྲུལ་གྱི་མཇུག་མའི་སྟེང་ན་འདུག་པར་བྱའོ། །ཞགས་པའི་ནི་སྟེགས་བུའི་སྟེང་དུ་རྡོ་རྗེ་རྩེ་གསུམ་ཁ་གཉིས་པ་དབུས་ནས་འབྲས་ལྟར་འདུག་པར་བྱའོ། །དེའི་གཡས་ལོགས་སུ་མདུང་རྩེ་གསུམ་པ་ཡུ་བ་ཅན་རྩེ་གསུམ་ཁ་གདེངས་འདྲ་བར་བྲིའོ། །གཡོན་ལོགས་སུ་ཀླུའི་
ཞགས་པ་ཚམ་ངམ་བྱེད་པ་བྲིའོ། །རལ་གྲི་ནི་སྟེགས་བུའི་སྟེང་དུ་རལ་གྲི་བྲིས་ལ་དེའི་གཡོན་ལོགས་སུ་རྡོ་རྗེ་རྩེ་གསུམ་ཁ་གཉིས་པ་དབུས་ནས་འབྲས་བུ་འདུག་པར་བྱའོ། །དབྱུག་པའི་སྟེགས་བུའི་སྟེང་དུ་དབྱུག་པ་གླ་གོར་ཞོ་ཤའི་ཤིང་ལྟར་འདུག་ཅིང་། སྙེ་མ་ལྔ་པོ་ཡོད་པར་བྲིས་ལ། མགོར་ནི་
ཆང་ཟུངས་བྱ། དྲུང་དུ་ནི་སྐྱུ་རུ་རའི་འབྲས་བུ་འདྲ་བར་བྱ། དེའི་གཡོན་ལོགས་སུ་རྡོ་རྗེ་རྩེ་གསུམ་ཁ་གཉིས་པ་དབུས་ནས་འབྲས་སུ་འདུག་ལེ་རྩེ་མོ་དབུས་མ་ཀ་ན་ཡའི་རྩེ་མོའི་དབྱིབས་ལྟར་བྱ། གཡོན་ལོགས་སུ་མདུང་རྩེ་གསུམ་པ་རྡོ་རྗེ་འདྲ་བ་དབྱུག་པ་ལ་བཙུགས་པ་བྲིའོ། །འཁོར་
ལོའི་སྟེགས་བུའི་སྟེང་དུ་འཁོར་ལོ་རྩིབས་བཅུ་དྲུག་པ་འབར་བས་བསྐོར་བར་བྲིས་ལ། དེའི་གཡས་ལོགས་སུ་རྡོ་རྗེ་རྩེ་གསུམ་ཁ་གཉིས་པ་དབུས་ནས་འབྲས་བུ་འདུག་པར་བྱའོ། །སེམས་ཅན་རྣམས་ལ་ཕན་གདགས་ཕྱིར། །ཕྱག་རྒྱ་འདི་དག་བདག་གིས་བཤད། །ཕྱག་རྒྱ་འདི་
དག་སོ་སོར་མཐོང་བའི་ལས་ཀྱང་བཤད་པར་བྱའོ། །ཕྱག་རྒྱ་སྣ་ཚོགས་དག་གི་ལྷ་རྣམས་ཀྱང་བསྟན་པར་བྱའོ། །རྒྱལ་བའི་ཕྱག་རྒྱ་ནི་ཕོ་ཉ་མ་ཐམས་ཅད་ཀྱིའོ། །རྣམ་པར་རྒྱལ་བའི་ནི་ཚངས་པའིའོ། །རྡོ་རྗེ་མཚན་ནི་ལྷ་ཆེན་པོའིའོ། །རྡོ་རྗེ་རྟགས་ནི་ལོག་འདྲེན་རྣམས་ཀྱིའོ། །
เล่ม ๙๕ · หน้า 169a
བཀྲ་ཤིས་ནི་རྡོ་རྗེ་སྡེའིའོ། །ཤིན་ཏུ་བཀྲ་ཤིས་ནི་ཕུར་བུ་གསུམ་པའིའོ། །པདྨའི་མཚན་ནི་འཕགས་པ་སྤྱན་རས་གཟིགས་དབང་ཕྱུག་གོ། །པདྨའི་ཕྲེང་ནི་དཔལ་ཆེན་པོའི་ཡིན་པར་བཤད་དོ། །དེ་བཞིན་དུ་གཡུང་དྲུང་རིས་རྣམས་ནི་ཚོགས་རྣམས་ཀྱིའོ། །
མདུང་རྩེ་གསུམ་པའི་ནི་རྫོང་གི་འཕགས་མའིའོ། །རྡོ་རྗེ་ནི་ཁྲོ་བོ་ཡིན་པར་བཤད་དོ། །མཆེ་བ་ནི་མ་མོ་རྣམས་ཀྱིའོ། །དེ་བཞིན་དུ་མདུང་ཐུང་ནི་དྲུག་པ་རྣམས་ཀྱིའོ། །ཀླུ་ལག་ནི་རྒྱ་མཚོ་ཆེན་པོའིའོ། །དེ་བཞིན་དུ་ཞགས་པ་ནི་འཇིག་རྟེན་སྐྱོང་བ་རྣམས་ཀྱིའོ། །རལ་
གྲི་ནི་མེའི་ཡིན་པར་བཤད་དོ། །དབྱུག་པ་ནི་སའི་ལྷ་མོའིའོ། །འཁོར་ལོ་ནི་ནོར་ལྷའི་བུའིའོ། །ལྷ་རྣམས་ཀུན་གྱི་ཕྱག་རྒྱ་འདི་དག་དང་ལས་སྣ་ཚོགས་བསྟན་པ་རྣམས་ངས་བཤད་ཟིན་ཏེ། ཕྱག་རྒྱ་རྣམས་ནི་ཕྱག་རྒྱའི་མཚན་ཉིད་འདིར་མཆོག་ཏུ་གསང་བ་ཡིན་ནོ། །ཕྱག་
རྒྱ་འདི་དག་བསྒྲུབ་པ་གང་ཡིན་པ་དེས་ནི་མཱ་མ་ཀཱིའི་ཕྱག་རྒྱའི་མཚན་ཉིད་གཟུང་བར་བྱའོ། །གང་གི་ཕྱིར་ང་རྡོ་རྗེ་འཛིན་ཡིན་པས་ན་དེའི་ཕྱིར་ངས་ཕྱག་རྒྱའི་ལས་ཀྱི་མཆོག་བཤད་པར་བྱའོ། །མཱ་མ་ཀཱིའི་ལས་ངས་བཤད་པ་གང་ཡིན་པ་ལ་ཡང་ཞི་བ་དང་། རྒྱས་པ་དང་། དྲག་
ཤུལ་རྣམ་གསུམ་དུ་བཤད་པའི་ལས་གང་ཡིན་པ་དེ་དག་གི་རིམ་པ་སྣ་ཚོགས་ཀྱང་བཤད་པར་བྱའོ། །དྲག་ཤུལ་གྱི་ལས་རྣམས་ལ་ནི་མཱ་མ་ཀཱིའི་མཚན་ཉིད་ཇི་ལྟ་བ་བཞིན་བཞག་ལ་རྡོ་རྗེ་མཚན་དང་། རྡོ་རྗེ་རྟགས་དང་། འཁོར་ལོ་དང་། མཆེ་བ་དང་། གཡུང་དྲུང་རིས་
དང་། མདུང་རྩེ་གསུམ་པ་དང་། ཕྱག་རྒྱ་འདི་དག་གིས་བསྐོར་བར་བྱ་སྟེ། དེའི་མདུན་དུ་སྦྱིན་སྲེག་གི་ཆོ་གར་བསྟན་པ་གང་ཡིན་པ་དེ་ལ་ཡང་དེ་བཞིན་དུ་བྱའོ། །བཟླས་བརྗོད་ཀྱི་བསྒྲུབ་པ་ལ་ཡང་བཟླས་བརྗོད་བྱའོ། །དེ་ནས་རྒྱས་པ་བྱེད་ན་རྒྱལ་བ་དང་། བཀྲ་ཤིས་དང་། ཤིན་
ཏུ་བཀྲ་ཤིས་དང་། ཀླུ་ལག་དང་། པདྨའི་ཕྲེང་དང་། རྡོ་རྗེ་དང་། འདི་རྣམས་གཞག་པར་བྱའོ། །མཱ་མ་ཀཱི་ཡང་མཚན་ཉིད་ཇི་ལྟ་བ་བཞིན་གཞག་པར་བྱ་སྟེ། དེའི་མདུན་དུ་སྦྱིན་སྲེག་གི་ཆོ་གའི་ལས་གང་ཡིན་པ་བ་ཤ་ཀའི་ཡམ་སྲེག་ཤིང་ངམ། །འབྲས་ཆན་གྱིས་བྱའོ། །
เล่ม ๙๕ · หน้า 169b
མཱ་མ་ཀཱིའི་མདུན་དུ་རྣམ་པར་རྒྱལ་བའི་རྒྱུད་ཆེན་པོ་ལས་ཉི་མ་དང་ཟླ་བ་སྟོབས་དང་ཕ་རོལ་གནོན་པ་གཞན་གྱིས་མི་ཐུབ་པ་དང་། གཞོན་ནུ་མཆོག་གི་ཕྱག་རྒྱ་ངས་བཤད་པ་གང་ཡིན་པ་དེ་དག་ཀྱང་གཞག་པར་བྱ་སྟེ། ཉི་མ་དང་ཟླ་བའི་གཡོན་ལོགས་སུ་ནི་གཞུ་གཞག་གོ། །གཡས་
ལོགས་སུ་ནི་གཞོན་ནུའི་མདུང་རྩེ་གསུམ་པ་བཞག་སྟེ། འདི་དག་ཐམས་ཅད་ཀྱང་གཟུགས་སུ་གཞག་པར་བྱའོ། །ཡང་ན་ཡིད་ཀྱིས་གཞག་གོ། །དྲི་ཆབ་ཀྱི་རི་མོས་གཞག་པར་བྱ་སྟེ། དེའི་མདུན་དུ་གཡས་ལོགས་སུ་སྲེག་བླུགས་བདུན་བདུན་སྦྱིན་སྲེག་བྱའོ། །དེ་ནས་
བཟླས་བརྗོད་བྱས་ན་ལས་གྲུབ་པར་འགྱུར་རོ། །ལིག་བུ་མིག་དང་ལྡོང་རོས་ལ་སོགས་པའི་ལས་ཀྱང་དེ་བཞིན་དུ་བྱའོ། །དེ་ནས་ཞི་བའི་ལས་བྱེད་ན་རྣམ་པར་རྒྱལ་བ་དང་། པདྨ་མཚན་དང་། མདུང་ཐུང་དང་། ཞགས་པ་དང་། རལ་གྲི་དང་། དབྱུག་པ་རྣམས་
མཱ་མ་ཀཱི་དང་ལྷན་ཅིག་ཏུ་གཞག་པར་བྱ་སྟེ། མཱ་མ་ཀཱི་ཡང་མཚན་ཉིད་ཇི་ལྟ་བ་བཞིན་དུ་གཞག་པར་བྱའོ། །དེའི་མདུན་དུ་རབ་ཏུ་འགྲུབ་པར་བྱེད་པའི་རྒྱུད་ཆེན་པོ་ལས་ལྷ་མོ་འཇིག་རྟེན་གྱི་མ་རྣམས་ཀྱི་ཕྱག་རྒྱའི་ཚོགས་ངས་བཤད་པ་གང་ཡིན་པ་རྣམས་ཀྱང་གཞག་པར་བྱའོ། །དེའི་
མདུན་དུ་སྲེག་བླུགས་བདུན་གྱིས་སྦྱིན་སྲེག་བྱའོ། །དེ་ནས་ལས་བརྩམ་པར་བྱའོ། །དེ་ནས་བཟླས་བརྗོད་བྱས་ན་ལས་འགྲུབ་པར་འགྱུར་རོ། །ལྷ་གང་བསྒྲུབ་པར་འདོད་པའི་ལྷ་དེའི་མདུན་དུ་བདག་གི་ཕྱག་རྒྱ་དང་། མཱ་མ་ཀཱིའི་གཟུགས་དྲི་ཆབ་ཀྱི་རི་མོར་བྲིས་ཏེ་གཞག་གོ། །
དེའི་མདུན་དུ་གཏོར་མའི་ཆོ་ག་བྱས་ཏེ་དེ་ནས་ལས་བརྩམ་པར་བྱའོ། །ཕྱག་རྒྱ་འདི་དག་གི་གཏོར་མའི་ཆོ་ག་བཤད་པར་བྱ་སྟེ། རྒྱལ་བ་ལ་ནི་མོན་སྲན་གྲེའུ་དང་པེན་ཙེ་སྦྱིན་པར་བྱའོ། །རྣམ་པར་རྒྱལ་བ་ལ་ནི་མར་དང་འབྲས་ཀྱིའོ། །རྡོ་རྗེ་མཚན་ལ་ནི་འབྱུང་པོའི་ཟས་སྦྱིན་ནོ། །རྡོ་རྗེ་རྟགས་
ལ་ནི་ཏིལ་མར་གྱི་ཚིགས་མ་དང་། །འབྲས་ཆན་བསྲེས་པ་སྦྱིན་ནོ། །བཀྲ་ཤིས་ལ་ནི་གཏོར་མ་སྣ་ཚོགས་སྦྱིན་ནོ། །ཤིན་ཏུ་བཀྲ་ཤིས་ལ་ནི་ཤ་སྦྱིན་ནོ། །པདྨ་མཚན་ལ་ནི་འབྲས་ཅན་འོ་མ་དང་སྦྱར་བ་སྦྱིན་ནོ། །པདྨ་ཕྲེང་ལ་ནི་ཁུ་བ་ལ་སོགས་གཏོར་མ་སྣ་ཚོགས་སྦྱིན་ནོ། །
เล่ม ๙๕ · หน้า 170a
གཡུང་དྲུང་རིས་ལ་ནི་མོན་སྲན་གྲེའུའི་ཆན་དང་འབྲས་དྲུས་བརྡུངས་པ་ལ་སོགས་པ་སྦྱིན་ནོ། །མདུང་རྩེ་གསུམ་པ་ལ་ནི་འབྲས་ཆན་ཞོ་དང་སྦྱར་བ་སྦྱིན་ནོ། །རྡོ་རྗེ་ལ་ནི་གཏོར་མ་སྣ་ཚོགས་སྦྱིན་ནོ། །མཆེ་བ་ལ་ནི་མོན་སྲན་གྲེའུ་དང་ཟན་དྲོན་སྦྱིན་ནོ། །མདུང་ཐུང་
ལ་ནི་འབྲས་ཀྱི་འོ་ཐུག་སྦྱིན་ནོ། ཀླུ་ལག་ལ་ནི་མངར་གསུམ་གྱི་གཏོར་མ་སྦྱིན་ནོ། །ཞགས་པ་ལ་ནི་མོན་སྲན་གྲེའུའི་ཆན་དང་། འབྲས་དྲུས་བརྡུངས་པ་དང་། སྦྱར་ཐུག་དང་། སྦྲང་རྩི་སྦྱིན་ནོ། །རལ་གྲི་ལ་ནི་མར་དང་། ཞོ་དང་འབྲས་ཡོས་སྦྱིན་ནོ། དབྱུག་པ་ལ་ནི་འབྱུང་
པོའི་ཟས་ཐམས་ཅད་ཀྱི་གཏོར་མ་སྦྱིན་ནོ། །འཁོར་ལོ་ལ་ནི་ཁུ་བ་བཀྲ་ཤིས་ལྡན་དང་པེན་ཙེ་སྦྱིན་ནོ། །ཕྱག་རྒྱ་རྣམས་གསང་སྟེ་བལྟ་བའི་གཏོར་མ་འདི་དག་བདག་གིས་བཤད་ཟིན་ཏོ། །ཕྱག་རྒྱ་ཐམས་ཅད་ཀྱི་གཏོར་མར་བསྟན་པ་གང་ཡིན་པ་འདི་དག་ནི་བཅོམ་ལྡན་འདས་མཱ་མ་ཀཱི་ལ་
ཡང་དབུལ་བར་བྱའོ། །དེ་ནས་ཕྱག་རྒྱ་བསྒྲུབ་ན་ཟླ་བ་གཅིག་གི་བར་དུ་སློང་མོའི་ཟས་བཟའ་ཞིང་མཱ་མ་ཀཱི་ལ་ཡང་བསྙེན་བཀུར་བྱས་ན་ཕྱག་རྒྱ་ཐམས་ཅད་འགྲུབ་པར་འགྱུར་རོ། །རིག་པ་མཆོག་གི་ལས་སྔར་ངས་བཤད་པ་གང་ཡིན་པའི་རིག་སྔགས་ཀྱི་རྒྱལ་པོ་ནི་སྙིང་པོ་དང་ལྷན་ཅིག་ཏུ་སྦྱར་བར་
བྱའོ། །སྙིང་པོ་ཡང་ཉེ་བའི་སྙིང་པོ་དང་ལྷན་ཅིག་ཏུ་སྦྱར་བར་བྱའོ། །རིག་སྔགས་ཀྱི་རྒྱལ་པོ་ནི་སྤྱན་དང་ལྷན་ཅིག་ཏུ་སྦྱར་བར་བྱའོ། །སྤྱན་ཡང་སྙིང་པོའི་རྒྱལ་པོ་དང་ལྷན་ཅིག་ཏུ་སྦྱར་བར་བྱའོ། །ལྷ་རྣམས་འདི་ཡང་ངས་བཤད་པར་བྱའོ། །སེམས་རྩེ་གཅིག་ཏུ་གྱིས་ལ་
ཉོན་ཅིག །ཞི་བའི་ལས་རྣམས་ལ་ནི་སྙིང་པོ་དང་ལྷན་ཅིག་ཏུ་སྦྱར་བར་བྱའོ། །རྒྱས་པ་རྣམས་ལ་ནི་སྤྱན་དང་ལྷན་ཅིག་ཏུ་སྦྱར་བར་བྱའོ། །དྲག་ཤུལ་རྣམས་ལ་ནི་ཉེ་བའི་སྙིང་པོ་དང་ལྷན་ཅིག་ཏུ་སྦྱར་བར་བྱའོ། །བཅོམ་ལྡན་འདས་མའི་དྲག་ཤུལ་ལ་ནི་རིག་སྔགས་ཀྱི་རྒྱལ་པོ་
དང་ལྷན་ཅིག་ཏུ་བཟླས་བརྗོད་བྱའོ། །རྒྱས་པའི་ལས་ལ་ནི་མཱ་མ་ཀཱི་གཞན་ལས་གཟུགས་བཟང་བ་དང་ལྷན་ཅིག་ཏུ་བཟླས་བརྗོད་བྱའོ། །མཱ་མ་ཀཱི་ཉིད་ཀྱི་རྒྱས་པའི་ལས་ལ་ནི་མཱ་མ་ཀཱིའི་སྙིང་པོའི་རྒྱལ་པོ་དང་། །ལྷན་ཅིག་ཏུ་བཟླས་བརྗོད་བྱའོ། །ཕོ་ཉ་མ་རྣམས་ལ་ནི་ལྕགས་
เล่ม ๙๕ · หน้า 170b
ཅན་དྲན་པར་བྱ་སྟེ་བཟླས་བརྗོད་བྱའོ། །ཡང་ན་ཚོགས་ཀྱི་ཕྱག་རྒྱ་རྣམས་བཀོད་ལ་བསྒྲུབ་པར་བྱའོ། །ཆོ་ག་རྒྱས་པའི་ལྷ་ཐམས་ཅད་ཀྱང་རང་རང་གི་ཕྱག་རྒྱའི་གཟུགས་བཞག་ནས་བསྒྲུབ་པར་བྱའོ། །ཕྱག་རྒྱ་བྲིས་ནས་སྦྱིན་སྲེག་བསྙེན་བཀུར་བྱའོ། །དེ་ནས་ལྷ་རྣམས་ཀྱིས་
བཅོམ་ལྡན་འདས་ལག་ན་རྡོ་རྗེ་ལ་བསྟོད་དེ་སྨྲས་པ། རྡོ་རྗེ་འཛིན་ཆེན་པོ་བདག་ཅག་སྙིང་དགའ་བར་བྱེད་པའི་གཟུགས་བཟང་མའི་ཕྱག་རྒྱའི་མཆོག་རྣམས་ཀྱི་ལས་གང་རྗེས་སུ་དྲན་པར་བྱས་ན་མི་རྣམས་ལ་བདག་ཅག་དངོས་གྲུབ་སྩོལ་བར་འགྱུར་བའི་ལས་རྣམས་ཤོད་ཅིག །ལྷ་རྣམས་
དེ་དེ་ལྟར་བྱའོ། །དེ་དེ་ལྟར་བྱ་སྟེ། སྙིང་དགའ་བར་བྱེད་པའི་ལས་རྣམས་བཤད་པར་བྱའོ། །དེ་ནས་བཅོམ་ལྡན་འདས་ལག་ན་རྡོ་རྗེ་རྣལ་འབྱོར་དམ་པ་ལ་གནས་ནས་གཟུགས་བཟང་མ་བཤད་པ། །ན་མོ་རཏྣ་ཏྲ་ཡཱ་ཡ། ན་མཿཀཱ་ལ་ཏྲི་ཏནྟཱ་རུ་ཏི་ནི་ཤཾ་ཀ་རེ་ཤི་ཀ་རེ། གྷ་ཊ་གྷ་ཊ།
གྷུ་ཊི་ནི། པཱ་ཏ་ནི་སྭཱ་ཧཱ། རྣམ་པར་རྒྱལ་བའི་རྒྱུད་ཆེན་པོའི་སྙིང་པོ་བདུན་གྱིས་བརྒྱན་པ། གང་ལས་སངས་རྒྱས་ཀྱི་སྙིང་པོ་དཔའ་བོ་ཆེན་པོ་བཅོམ་ལྡན་འདས་ཀྱིས་གསུངས་པ་དང་། སོག་མེད་གཏུམ་པོ་དང་། དེ་བཞིན་དུ་ལུས་དམར་དྲག་པོ་དང་། སྟོབས་ཆེན་རྒྱས་པ་
དང་། དེ་བཞིན་དུ་དཔལ་བྱེད་ཞི་བར་གྲགས་པ་དང་། ལས་སྣ་ཚོགས་ཀྱིས་བརྩེ་བ་དང་། ལྷ་རྣམས་འགྱེལ་བར་བྱེད་པ་དྲག་པོའི་ཕྲེང་བ་འཛིན་པ་རྣམས་ངས་བཤད་པ་གང་ཡིན་པའི་སྙིང་པོ་སྟོབས་པོ་ཆེ་འདི་དག་ནི་རྣམ་པར་རྒྱལ་བ་དེ་ལས་འབྱུང་སྟེ། །སྟོབས་ཆེ་ཞིང་ཕ་རོལ་
གནོན་པ་ཡིན་ནོ། །དེ་ལ་ངས་བཤད་པ་གང་ཡིན་པ་དེ་དག་གི་ནང་ན་ནི་ཕྱག་རྒྱ་སྟོབས་པོ་ཆེ་ཕ་རོལ་གནོན་ཀླུ་མགོ་ཅན་དང་། ཕྲེང་བ་འཛིན་དང་ཕྱག་རྒྱ་འདི་ཉིད་གྲུབ་པ་ཡིན་ཏེ་གྲུབ་པ་ཕ་རོལ་གནོན་པ་ཡིན་ནོ། །རབ་ཏུ་འགྲུབ་པར་བྱེད་པའི་རྒྱུད་ཆེན་པོ་སྙིང་པོ་གསུམ་གྱིས་བརྒྱན་པ་ལས་
འགྲོ་ལྡིང་དང་། རྩེད་མོ་ཅན་དང་། གྲུབ་པ་གཏུམ་མོ་རྩེད་མོ་ཅན་ངས་བཤད་པ་གང་ཡིན་པ་དང་། དེ་བཞིན་དུ་དེ་ལས་ཕྱག་རྒྱ་འཇིག་རྟེན་གྱི་མ་ངས་བཤད་པ་དང་། དེ་ལས་སྙིང་པོའི་རྒྱལ་པོ་སྟོབས་པོ་ཆེ་བཤད་པ་འདི་དག་གི་ནང་ན་ནི་གདོང་དམར་བསྟན་པའི་ཕྱག་རྒྱ་སྟོབས་པོ་
เล่ม ๙๕ · หน้า 171a
ཆེ་དེ་ཆོ་ག་རྒྱས་པ་དེའི་དངོས་གྲུབ་སྦྱིན་པར་བྱེད་པ་ཡིན་ནོ། །རིག་པ་མཆོག་གི་ཆོ་ག་རྒྱས་པ་ཆེན་པོ་བཅོམ་ལྡན་འདས་མ་ལ་དྲག་ཏུ་སྐུལ་བར་བྱེད་པ་ངས་བཤད་པ་གང་ཡིན་པ་དང་། ཆོ་ག་རྒྱས་པ་ཆེན་པོ་འདི་དག་གི་ནང་ན་ནི་རིག་པ་མཆོག་གཙོ་བོ་ཡིན་པར་ངས་བཤད་དོ། །
དེའི་ནང་ནས་ངས་བཤད་པའི་མཱ་མ་ཀཱིའི་ཕྱག་རྒྱའི་མཚན་ཉིད་གདོང་དམར་དང་། ཀླུ་མགོ་ཅན་དང་། ཕྲེང་བ་འཛིན་དང་། མཱ་མ་ཀཱི་ལ་དྲག་ཏུ་བསྐུལ་བའི་མཆོག་གི་ཕྱག་རྒྱ་འདི་རྣམས་དང་ལྡན་པར་མཁས་པ་གང་ཞིག་ཟླ་བ་གཅིག་གི་བར་དུ་འཛིན་པར་བྱེད་ལ་སློང་མོའི་ཟས་ཟ་ཞིང་ཚངས་
པར་སྤྱོད་པ་དེས་ནི་དེ་བཞིན་དུ་དུས་གསུམ་དུ་མཆོད་པ་བྱས་ཏེ། དེར་མཱ་མ་ཀཱིའི་མིང་བསྒྲགས་པ་ཡང་བརྗོད་ན་ཟླ་བ་ཚང་ནས་བཅོམ་ལྡན་འདས་ལག་ན་རྡོ་རྗེ་ཕྱག་རྒྱའི་ལྷ་དང་ཐབས་ཅིག་ཏུ་མཐོང་བར་འགྱུར་ཏེ། ཡིད་ལ་སྨོན་པ་ཐམས་ཅད་ཡོངས་སུ་རྫོགས་པར་བྱེད་དོ། །དེ་ནས་ཟླ་
བ་ཕྱེད་ཀྱི་བར་དུ་སློང་མོའི་ཟས་བཟའ་ཞིང་ཁང་པ་སྟོང་པར་དུས་གསུམ་དུ་རིག་སྔགས་ཀྱི་རྒྱལ་པོ་སྟོང་དང་ལྡན་པར་མིང་ཡང་དག་པར་བརྗོད་པར་བྱའོ། །ཡང་ན་ཏ་ལའི་ལོ་མའམ་གྲོ་ག་ལ་བྲིས་ཏེ་མཆོད་ན་ཡང་ཟླ་བ་ཕྱེད་ཀྱིས་ཕྱག་རྒྱའི་ལྷ་མཐོང་བར་འགྱུར་ཏེ། ཅི་འདོད་པ་བཞིན་དུ་ལྷ་དེས་བྱེད་
པར་འགྱུར་རོ། །ཕྱག་རྒྱ་དེ་དག་ལས་གང་ཡང་རུང་བ་བཞག་ནས་བསྙེན་བཀུར་བྱས་ན་ཕྱག་རྒྱ་རྣམས་འགྲུབ་པར་འགྱུར་ཏེ། དེ་ཕྱིན་ཆད་ལས་ཐམས་ཅད་ལ་ཕྱག་རྒྱ་བཞག་ནས་ལས་བསྒྲུབ་པར་བྱའོ། །ཟླ་བ་གཅིག་གི་བར་དུ་སློང་མོའི་ཟས་ཟ་ཞིང་། ཁང་པ་སྟོང་པར་རིག་སྔགས་ཀྱི་
རྒྱལ་པོས་མཱ་མ་ཀཱི་དང་། གདོང་དམར་དང་། ཀླུ་མགོ་ཅན་དང་། ཕྲེང་བ་འཛིན་དང་། ཕྱག་རྒྱའི་རྒྱལ་མོ་འདི་དག་ལ་བསྙེན་བཀུར་བྱས་ཏེ། མཇུག་ཞག་གསུམ་གྱི་བར་དུ་སྨྱུང་བར་བྱས་ནས། དབེན་པའི་ཕྱོགས་སུ་དཀྱིལ་འཁོར་སྐྱོང་ནུལ་གྱིས་བྱུགས་ནས་མར་གྱི་ངོ་ཞག་བཅུ་བཞི་
ལ་རྫས་དེ་དག་གིས་མཱ་མ་ཀཱིའི་གཟུགས་བྱས་ཏེ་གཞག་གོ། །གདོང་དམར་གྱི་གཟུགས་ཙནྡན་དཀར་པོའི་ཕྱེ་མ་ལས་བྱས་ཏེ་གཡས་ཕྱོགས་སུ་གཞག་གོ། །ཀླུ་མགོ་ཅན་དང་། ཕྲེང་བ་འཛིན་ནི་ཙནྡན་དམར་པོའི་ཕྱེ་མ་ལས་བྱས་ཏེ་གཞག་གོ། །དེ་ནས་རིག་སྔགས་འཆང་གི་
เล่ม ๙๕ · หน้า 171b
ཕྱག་རྒྱ་དེ་དག་གི་མིང་བརྗོད་པར་བྱ་སྟེ། ལྷ་བཤོས་གཙང་མ་སྣ་ཚོགས་ཅི་འདོད་པ་ཡང་དབུལ་ལོ། །དེ་ནས་རིག་སྔགས་འཆང་གིས་གློ་ཕྱོགས་སུ་བུམ་པ་བཞག་ལ་དེའི་ནང་དུ་ལུས་ཀྱི་ཡན་ལག་གི་གཟུགས་གཞུག་པར་བྱའོ། །དེ་ནས་རིག་སྔགས་འཆང་གི་རྒྱལ་པོ་བཟླས་བརྗོད་བྱེད་བཞིན་དུ་
ཆུ་སྐྱོར་བ་རེ་རེ་ནས་ལན་བརྒྱད་སྟོང་ཚང་བའི་བར་དུ་ཕྱག་རྒྱ་མཆོག་དེ་དག་ལ་བསྣུན་པར་བྱ། དེ་ནས་ལྷ་དེ་དེར་འོང་བར་འགྱུར་རོ། །དེ་ནས་གང་འདོད་པ་དེ་ཉིད་བླང་བར་བྱའོ། །དེ་ནས་ཡིད་ལ་ཅི་བསམས་པ་དེ་ལྷ་དེས་བྱེད་པར་འགྱུར་རོ། །ཅི་སྟེ་ལས་འདི་བྱས་ཀྱང་མ་འོངས་ན་མཱ་མ་ཀཱིའི་ཕྱག་རྒྱ་རྣམས་ཀྱི་སྦྱིན་
སྲེག་ལན་བརྒྱ་བྱས་ན་ལྷ་དེ་ཚིག་བཞིན་དུ་དེ་ཉིད་དུ་འོང་བར་འགྱུར་རོ། །དེ་ནས་ལྷའི་ཚོགས་དེ་དག་སྐྲག་ཅིང་སྒྱིད་ལུག་ནས་བཅོམ་ལྡན་འདས་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །སྟོབས་པོ་ཆེ་ལས་འདི་ནི་དྲག་ཅིང་མི་བཟད་ལ་གཏུམ་པ་ཡིན་གྱིས་མིང་བརྗོད་པ་ཙམ་གྱིས་ཀྱང་དངོས་
གྲུབ་ཆེན་པོ་སྦྱིན་པར་བྱ་ན་འཆང་བ་དང་མཆོད་པ་བྱེད་པ་གང་ཡིན་པ་ལྟ་ཅི་སྨོས། དུས་གསུམ་དུ་ཁྲུས་བྱེད་ལ་སློང་མོའི་ཟས་ཟ་ཞིང་ཟླ་བ་གཅིག་གི་བར་དུ་བཅོམ་ལྡན་འདས་མ་རྣམས་ཀྱི་མིང་བརྗོད་པར་བྱ་བ་སྙིང་དགའ་བར་བྱེད་པ་སྟོབས་པོ་ཆེས་བཤད་པ་དེས་ནང་པར་ལངས་ནས་དྲན་
པར་བྱེད་ཅིང་ཀློག་པ་གང་ཡིན་པ་དེ་ལ་ནི་ལས་འགྲུབ་པ་སྦྱིན་ཞིང་རྟག་ཏུ་བསྲུང་བར་ཡང་བགྱིའོ། །ལྷ་རྣམས་དེ་དེ་བཞིན་ནོ། །དེ་དེ་བཞིན་ཏེ། སྙིང་དགའ་བར་བྱེད་པའི་ལས་ཀློག་ཅིང་རྗོད་པར་བྱེད་པ་དང་། མཱ་མ་ཀཱིའི་ལས་ལ་སོགས་པའི་ཕྱག་རྒྱའི་ཚོགས་རྣམས་ཆོ་ག་འདི་བཞིན་དུ་ཏ་ལའི་
ལོ་མ་ལ་བྲིས་ཏེ་མཆོད་ཅིང་རི་མོར་བྱེད་པ་གང་ཡིན་པ་དེ་ལ་ངའི་བཀས་ཁྱོད་ཀྱིས་དངོས་གྲུབ་སྦྱིན་པར་གྱིས་ཤིག །སུ་ངའི་བཀའ་གཅོག་པ་དེ་ནི་དེ་བཞིན་གཤེགས་པ་ཐམས་ཅད་ལ་སྙིང་རིངས་པ་ཡིན་ཏེ། དེའི་མགོ་བོ་ངས་རྡོ་རྗེ་ཀུན་ཏུ་འབར་ཞིང་རབ་ཏུ་འབར་བས་གཞོམ་པར་བྱའོ། །
གང་ཞག་བདུན་གྱི་བར་དུ་མཱ་མ་ཀཱི་དང་བཅས་པའི་ཕྱག་རྒྱའི་ཚོགས་ཀྱི་ལས་ནང་པར་ཞིང་ཀློག་པར་བྱེད་པ་དེ་ལ་ནི་དེ་དག་གིས་དགའ་བའི་སེམས་ཀྱིས་མྱུར་དུ་དངོས་གྲུབ་སྩོལ་བར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱང་མངོན་དུ་ཕྱོགས་པར་འགྱུར་ཏེ། རྨི་ལམ་དུའང་སྟོན་པར་མཛད་
เล่ม ๙๕ · หน้า 172a
དོ། །བཅོམ་ལྡན་འདས་ལག་ན་རྡོ་རྗེའང་རྟག་ཏུ་རྗེས་སུ་འབྲང་བར་འགྱུར་རོ། །རྡོ་རྗེའི་རིགས་ཀྱང་རྟག་ཏུ་སྟོན་པར་བྱེད་དོ། །ཆོ་ག་འདི་དག་ལྟར་ཕྱག་རྒྱའི་ཚོགས་ཀྱི་མིང་བརྗོད་ན་ཡང་སེམས་ཅན་དམྱལ་བར་འགྲོ་བར་མི་འགྱུར་ན་མཱ་མ་ཀཱི་འཆང་བ་དང་། ཀླུ་མགོ་ཅན་ཆེན་
མོ་དང་། ཕྲེང་བ་འཛིན་དང་། གདོང་དམར་རྣམས་འཆང་བ་དང་། དྲན་པ་དང་མཆོད་པར་བྱེད་པ་ལྟ་ཅི་སྨོས་ཏེ། དེ་ངན་འགྲོ་ལོག་པར་ལྟུང་བ་དག་ཏུ་སྐྱེ་བར་འགྱུར་བ་ནི་གནས་མེད་དོ། །སྐལ་བ་མེད་ཅིང་བསོད་ནམས་མ་བྱས་པ་གང་ཡིན་པ་དེ་དག་གིས་ནི་མིང་ཡང་མི་ཤེས་སོ། །བསོད་
ནམས་བྱས་པ་གང་ཡིན་པ་དེ་ནི་ལག་ན་རྡོ་རྗེས་ཡོངས་སུ་བཟུང་བ་དང་། ལག་ན་རྡོ་རྗེའི་བུ་ཡིན་ཏེ་དེ་དག་གིས་ནི་མཱ་མ་ཀཱི་དང་། ཀླུ་མགོ་ཅན་ཆེན་མོ་དང་། གདོང་དམར་དང་། ཕྲེང་བ་འཛིན་རྣམས་ཀྱི་མིང་ཐོས་པར་འགྱུར་རོ། །རྡོ་རྗེའི་རིགས་གཙོ་བོར་གཏོགས་པ་དེ་ལས་ཤི་འཕོས་ནས་འདིར་
སྐྱེས་པ་གང་ཡིན་པ་དེ་དག་གིས་ནི་དེ་དག་མཐོང་བར་འགྱུར་ཏེ། མིང་བརྗོད་པ་དང་ལྷག་པར་ཡང་བསྒྲུབ་པར་འདོད་པ་གང་ཡིན་པ་ལ་རིག་སྔགས་ཀྱི་རྒྱལ་པོ་ཚོགས་དང་བཅས་པ་དེ་དག་གིས་དངོས་གྲུབ་སྦྱིན་པར་འགྱུར་རོ། །གང་གི་ཉིན་པར་ཡང་རུང་སྟེ། ཟས་སུ་འོ་མ་དང་། འབྲས་
ཆན་བཟའ་ཞིང་བཅོམ་ལྡན་འདས་མ་ལག་ན་རྡོ་རྗེ་དང་བཅས་པ་ལ་མཆོད་པ་ཕྱི་དེ་ཉིན་པར་སྨྱུང་བ་བྱས་ཏེ། དེ་ནས་རིག་སྔགས་འཆང་དུས་གསུམ་དུ་ཁྲུས་བྱས་པས་རིག་སྔགས་ཀྱི་རྒྱལ་པོ་བཟླས་བརྗོད་བྱེད་བཞིན་དུ་བཅོམ་ལྡན་འདས་མ་ལ་མཆོད་པ་བྱའོ། །དེ་ནས་ཕྱེ་མ་རེད་ལག་ན་པོག་
ཕོར་ཐོགས་ལ་གཙོ་བོ་ལག་ན་རྡོ་རྗེ་དང་བཅོམ་ལྡན་འདས་མ་སྤྱན་དྲང་བར་བྱའོ། །དེ་ནས་ནུབ་མོ་རྨི་ལམ་དུ་ལྷ་མོ་མཐོང་བར་འགྱུར་རོ། །དེ་ནས་ནང་པར་ལངས་ཏེ་ཁྲུས་བྱས་ལ་གཙོ་བོ་ལག་ན་རྡོ་རྗེ་དང་། །བཅོམ་ལྡན་འདས་མ་ལ་མཆོད་པ་བྱས་ནས་བླ་མ་དང་། དགེ་སློང་གང་ཡང་རུང་བ་གཅིག་
དང་། བདག་དང་མི་གསུམ་ལ་མཆོད་སྟོན་བྱས་ཏེ། བླ་མ་ནི་རིག་སྔགས་ཀྱི་རྒྱལ་པོ་བཟླས་བརྗོད་བྱེད་བཞིན་དུ་བླ་མའི་སྟན་ལ་ལྷོ་ཕྱོགས་སུ་ཁ་བལྟས་ཏེ་འདུག་ཏུ་གཞུག་གོ། །དགེ་སློང་ཅིག་ཤོས་ནི་ཤར་ཕྱོགས་སུ་ཁ་བལྟས་ཏེ་འདུག་ཏུ་གཞུག་ཅིང་གཟུགས་བཟང་མ་བཟླས་བརྗོད་བྱེད་
เล่ม ๙๕ · หน้า 172b
བཞིན་དུ་གཞུག་པར་བྱའོ། །བདག་ནི་སྤྱན་བཟླས་བརྗོད་བྱེད་བཞིན་དུ་ནུབ་ཕྱོགས་སུ་ཁ་བལྟས་ཏེ་འདུག་ལ་བླ་མའི་མདུན་དུ་དྲི་དང་། མེ་ཏོག་དང་། བདུག་པ་དབུལ་བར་བྱའོ། །དགེ་སློང་དེ་ལ་ཡང་དབུལ་བར་བྱའོ། །བདག་གི་རྐང་པ་ལ་ཡང་དབུལ་བར་བྱའོ། །བླ་མ་ལ་ནི་ས་མ་
ཏའི་ཁུར་བ་ལ་སོགས་པ་ཟས་སྣ་ཚོགས་སྦྱིན་པར་བྱའོ། །དགེ་སློང་དེ་ལ་ནི་འོ་མའི་ཐུག་པ་དང་། ཞོའི་ཐུག་པ་དང་། སྦྱར་ཐུག་གི་ཟས་སྦྱིན་པར་བྱའོ། །བདག་གིས་ཀྱང་དེ་བཞིན་དུ་ཞོ་དང་། འོ་མ་དང་། མར་ལ་སོགས་པ་དང་ལྡན་པའི་ཟས་གནང་བ་གང་ཡིན་པ་རྣམས་བཟའ་བར་
བྱ་སྟེ། མགོ་མཉམ་དུ་ཟས་བཟའ་ཞིང་ཟས་སློང་བ་ལ་གང་གིས་ཀྱང་ཟས་སྦྱིན་པར་མི་བྱའོ། །བླ་མའི་སྣོད་ནི་རིག་སྔགས་ཀྱི་རྒྱལ་པོས་གདབ་པར་བྱའོ། །དགེ་སློང་དེའི་ཡང་གཟུགས་བཟང་མས་གདབ་བོ། །བདག་གི་ནི་བཅོམ་ལྡན་འདས་མ་བཏབ་སྟེ་བཟའ་བར་བྱའོ། །དེ་ནས་ཟོས་ཟིན་ནས་
བླ་མ་ལ་རྡོ་རྗེའི་རིགས་བདག་ལ་དགའ་བར་གྱུར་ཅིག་ཅེས་སྨྲོས་ཤིག །དགེ་སློང་ལ་ཡང་ཕྱག་རྒྱའི་ཚོགས་བདག་ལ་དགའ་བར་གྱུར་ཅིག་ཅེས་སྨྲོས་ཤིག །བདག་གིས་ཀྱང་རིག་སྔགས་ཀྱི་རྒྱལ་པོ་གཟུགས་བཟང་མ་དང་། སྤྱན་བཟླས་བརྗོད་བྱེད་བཞིན་དུ་ཆོ་ག་རྒྱས་པའི་ལྷ་རྡོ་རྗེའི་རིགས་
དང་བཅས་པ་བདག་ལ་དགའ་བར་གྱུར་ཅིག་ཅེས་སྨྲ་བར་བྱ་སྟེ། བླ་མའི་ལག་པ་གཡས་པ་ནས་བཟུང་ནས་ལན་གསུམ་དུ་སྨྲོས་ཤིག །དེ་ནས་ཆོ་ག་རྒྱས་པའི་ལྷ་ཐམས་ཅད་རྡོ་རྗེ་རིགས་དང་བཅས་པ་རྣམས་གྲུབ་པར་འགྱུར་ཏེ། དེའི་ནུབ་མོ་ནམ་ཕྱེད་ཀྱི་དུས་སུ་བཅོམ་ལྡན་འདས་ལག་ན་རྡོ་རྗེ་
ལྷ་ཐམས་ཅད་ཀྱིས་བསྐོར་བ་མཐོང་བར་འགྱུར་ཏེ་ནང་བར་མཆོད་པ་བྱའོ། །འདི་ནི་ལས་ཐམས་ཅད་ཀྱི་ནང་ནས་ལས་དམ་པ་སྟེ་མཆོག་ཏུ་གསང་བ་ཡིན་ནོ། །ཇི་ལྟར་ཚོགས་ཐམས་ཅད་ཀྱི་ནང་ན་རིག་སྔགས་ཀྱི་རྒྱལ་པོ་མཆོག་ཡིན་པ་བཞིན་དུ་མཱ་མ་ཀཱི་དང་། ཀླུ་མགོ་ཅན་དང་། ཕྲེང་བ་འཛིན་
དང་། གདོང་དམར་རྣམས་ཀྱང་དེ་དང་འདྲ་བར་བསྟན་ཏེ། དེ་ལྟར་ན་འདི་ནི་ལས་ཐམས་ཅད་དུ་ལྷ་ཐམས་ཅད་ལ་དྲག་ཏུ་བསྐུལ་བ་ཞེས་བྱ་བ་དང་། ལྷ་རྣམས་དབང་དུ་བྱེད་པ་ཞེས་བྱ་བ་ཡིན་ཏེ། ཆོ་ག་རྒྱས་པ་འདི་ཁུང་སྟོང་གཙང་མར་འདོན་པར་བྱེད་པ་གང་ཡིན་པ་དེ་ལ་ནི་ལག་ན་རྡོ་རྗེས་
เล่ม ๙๕ · หน้า 173a
བཤད་པ་བཞིན་དུ་མཱ་མ་ཀཱིའི་ཚོགས་དང་བཅས་པར་ངེས་པར་འགྲུབ་པར་འགྱུར་རོ། །ནང་པར་ལངས་ནས་ཚོགས་རྣམས་དང་། མཱ་མ་ཀཱི་དང་བཅས་པའི་མིང་ཡང་དག་པར་དྲན་པར་བྱེད་པ་གང་ཡིན་པ་དེ་ནི་མཚམས་མེད་པའང་གྲོལ་བར་འགྱུར་ཏེ། དེའི་ཕ་རོལ་ཏུ་
ཕྱིན་པ་རྣམས་འཕེལ་བར་འགྱུར་རོ། །དེ་ནས་མཱ་མ་ཀཱི་བསྒྲུབ་པར་བྱ་སྟེ། ཐོག་མར་གཟུགས་བཟང་མས་ལས་བྱས་ལ་དེ་ནས་མཱ་མ་ཀཱི་བཟླས་བརྗོད་བྱ་སྟེ། དེར་མཱ་མ་ཀཱིས་བསྟན་ན་ལྷ་ཐམས་ཅད་འོང་བར་འགྱུར་ཏེ། དེ་དག་ལ་གཟུགས་བཟང་མས་དྲི་དང་། མེ་ཏོག་དང་། བདུག་
པ་དབུལ་བར་བྱའོ། །ཇི་ལྟར་བསྟན་པ་བཞིན་དུ་རིག་སྔགས་འཆང་གིས་བླ་མ་ལ་མཆོད་པ་བྱས་ནས་མཱ་མ་ཀཱི་བསླང་བར་བྱའོ། །བླ་མས་ཀྱང་སེམས་མཉམ་པར་གཞག་པས་དེ་བཞིན་གཤེགས་པ་ཐམས་ཅད་ལ་ཕྱག་བྱས་ལ་རིག་སྔགས་ཀྱི་རྒྱལ་པོ་བཟླས་བརྗོད་བྱེད་བཞིན་དུ་སྦྱིན་པར་
བྱའོ། །དེ་ནས་རིག་སྔགས་འཆང་གིས་མཱ་མ་ཀཱི་བསླངས་ནས་དངོས་གྲུབ་བླངས་པར་བྱས་ཏེ་བླ་མས་གང་སྨྲས་པ་དེ་དེ་ལ་འགྲུབ་པར་འགྱུར་རོ། །ལྷ་རྣམས་ངས་ཀྱང་མཱ་མ་ཀཱི་བླངས་ནས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱས་སོ། །རིག་སྔགས་འཆང་མཱ་མ་ཀཱི་མཆོད་དམ་འཆང་བར་བྱེད་
པ་གང་ཡིན་པ་དེ་ལ་ཕ་རོལ་ཏུ་ཕྱིན་པ་དྲུག་མངོན་དུ་ཕྱོགས་པར་འགྱུར་རོ། །ཕ་རོལ་ཏུ་ཕྱིན་པ་དྲུག་མངོན་དུ་ཕྱོགས་པར་འགྱུར་བས་རིག་སྔགས་འགྲུབ་པར་འགྱུར་ཏེ། ངན་འགྲོའི་འཇིགས་པ་ཡང་མེད་པར་འགྱུར་རོ། །མཱ་མ་ཀཱི་ལ་ཕྱག་འཚལ་ཞིང་མེ་ཏོག་གིས་མཆོད་པ་བྱེད་པ་དང་
དྲི་དང་། བདུག་པ་དང་། གསེར་གྱིས་མཆོད་པ་གང་ཡིན་པ་དེས་ནི་དེ་བཞིན་གཤེགས་པའི་རང་བཞིན་ལ་བཀུར་སྟི་བྱས་པ་དང་། བླ་མར་བྱས་པ་དང་། བརྗོད་པ་དང་། མཆོད་པ་བྱས་པར་འགྱུར་རོ། །གང་གིས་མཱ་མ་ཀཱིའི་སྐུ་གཟུགས་བྱས་ལ་ཆོ་ག་སྔ་མ་བཞིན་དུ་བཞག་ནས་ཀུ་
ཤའི་སྟན་ལ་འདུག་སྟེ། ཉི་མ་བཟང་བ་ལ་པདྨ་སྟོང་གིས་བསྣུན་ན་མཱ་མ་ཀཱིའི་ཁོང་ནས་འོད་ཟེར་གཅིག་འབྱུང་སྟེ། རིག་སྔགས་འཆང་དེ་ལ་གཡས་ཕྱོགས་སུ་བསྐོར་ནས་རྣ་བ་གཡས་པའི་ནང་དུ་འཇུག་པར་འགྱུར་རོ། །དེ་ནས་རིག་སྔགས་འཆང་གིས་མངོན་པར་ཤེས་པ་ཐོབ་པར་འགྱུར་
เล่ม ๙๕ · หน้า 173b
ཏེ་དེ་བཞིན་གཤེགས་པ་རྣམས་དང་། བྱང་ཆུབ་སེམས་དཔའ་རྣམས་ཀྱང་མཐོང་བར་འགྱུར། བཅོམ་ལྡན་འདས་ལག་ན་རྡོ་རྗེ་ཕོ་ཉ་མའི་ཚོགས་ཀྱི་འཁོར་དང་བཅས་པ་ཡང་མཐོང་བར་འགྱུར་རོ། །དེ་ནས་བཅོམ་ལྡན་འདས་ལག་ན་རྡོ་རྗེས་རིག་སྔགས་དེ་བླངས་ནས་དགའ་ལྡན་གྱི་གནས་སུ་
འཇོག་པར་བྱེད་དོ། །འཕགས་པ་བྱམས་པ་དང་ལྷན་ཅིག་ཏུ་གནས་པར་འགྱུར་རོ། །མཱ་མ་ཀཱི་སྨན་བརྒྱད་དང་ལྡན་པ་མཐོང་བ་གང་ཡིན་པ་དེ་ནི་མཐོང་བས་ཆོ་ག་རྒྱས་པར་འགྲུབ་པར་འགྱུར་ཏེ། རིག་སྔགས་འགྲུབ་པར་འགྱུར་བའི་མཚན་མ་དག་ཀྱང་འབྱུང་བར་འགྱུར་ཞིང་འདོད་དགུར་
སྒྱུར་བའི་གཟུགས་ཅན་གྱི་བར་དུ་ཡང་འགྱུར་རོ། །བཅོམ་ལྡན་འདས་མའི་ཆོ་ག་ཡང་བཤད་པར་བྱ་སྟེ། བསྒྲུབ་པ་ཐམས་ཅད་ལ་ཕྱག་རྒྱ་གཅིག་གཞག་པར་བྱའོ། །ཕྱག་རྒྱས་བཏབ་ན་བསྒྲུབ་པ་ལ་མྱུར་དུ་དངོས་གྲུབ་ཀྱི་མཚན་མ་འབྱུང་བར་འགྱུར་རོ། །དམ་ཚིག་མི་ཤེས་པ་
ལ་ནི་ཕྱག་རྒྱ་བསྟན་པར་མི་བྱའོ། །གང་གི་ཚེ་རིག་སྔགས་འཆང་གིས་རིག་སྔགས་འཆང་ལ་ཕྱག་རྒྱ་བསྟན་པ་དེའི་ཚེ་བཅོམ་ལྡན་འདས་ལག་ན་རྡོ་རྗེའི་མདུན་དུ་འགྲོན་བུ་བརྒྱད་བརྒྱས་རྡོ་རྗེ་བྱས་ལ་རྡོ་རྗེ་དེའི་མདུན་དུ་ཕྱག་རྒྱ་བསྟན་པར་བྱའོ། །བླ་མ་ལ་དད་པས་ཀྱང་རྡོ་རྗེ་ལ་མཆོད་
ཡོན་ཕུལ་ནས་བླ་མ་ལ་ཡོན་ཕུལ་ཏེ་ཕྱག་རྒྱ་བལྟ་བར་བྱའོ། །མཐོང་ན་ལག་ན་རྡོ་རྗེ་མཐོང་བ་ཡིན་ཏེ་བྱང་ཆུབ་ཀྱི་སེམས་བསྐྱེད་པ་རྣམས་ལ་བསྟན་པར་བྱའོ། །སྡིག་པ་བྱེད་པ་རྣམས་ལ་བསྟན་པར་མི་བྱའོ། །སྡིག་པ་བྱེད་པ་གང་ཡིན་པ་དེ་དག་གིས་ནི་ཕྱག་རྒྱའི་ཚོགས་ཀྱི་མིང་ཡང་མི་
ཤེས་ཏེ། དགེ་བའི་རྩེ་བ་བསགས་པ་གང་ཡིན་པ་དེ་དག་གིས་ནི་ཕྱག་རྒྱ་འདི་ཐོབ་པར་འགྱུར་རོ། །ངའི་ཕྱག་རྒྱའི་ཚོགས་གསང་བ་འདི་ནི་གཙང་བ་དང་། དབེན་པར་བལྟ་བར་བྱ་སྟེ། ཕྱག་རྒྱ་མཐོང་བ་གང་ཡིན་པ་དེ་དག་ལ་ནི་རིག་པ་མཆོག་གི་ཆོ་ག་རྒྱས་པ་གསང་བ་དང་བཅས།
གསང་ཆེན་དང་བཅས་པ་ལག་ཏུ་སོན་པ་ཡིན་ནོ། །རིག་སྔགས་འཆང་གིས་ཀྱང་ཕྱག་རྒྱའི་ཚོགས་ཀྱི་དྲུང་དུ་བླ་མ་ལ་དཔག་ཏུ་མེད་པའི་ཡོན་ཕུལ་ལ་བླ་མའི་ལག་ནས་རིག་པ་མཆོག་གི་ཆོ་ག་རྒྱས་པ་མནོད་པར་བྱ་སྟེ། བླ་མ་ལ་དད་པ་དེ་ལ་མངོན་པར་དགའ་བའི་དངོས་གྲུབ་སྦྱིན་པར་
ที่มาและสัญญาอนุญาต
ตัวบท: e-text กังยูร์ฉบับเดเกของ Esukhia (Esukhia/derge-kangyur · commit a582cf47) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-kangyur ที่ commit a582cf471b7c (เปิดอ่านแล้ว ๓ ต.ค. ๒๕๖๙): "This work is a mechanical reproduction of a Public Domain work, and as such is also in the Public Domain." · สำเนาคำต่อคำ: data/kangyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด