དཀར་ཆག
ชื่อนี้มาจากชื่อไฟล์ของเล่มในต้นทาง
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๒๑๓ · หน้า 463a
རྒྱ་གར་གྱི་མཁན་པོ་ཤཱི་ལེནྡྲ་བོ་དྷི་དང༌། ཞུ་ཆེན་གྱི་ལོ་ཙཱ་བ་ཡེ་ཤེས་སྡེའི་འགྱུར། ལུགས་ཀྱི་བསྟན་བཅོས་ཚིགས་སུ་བཅད་པའི་མཛོད་ཅེས་བྱ་བ་སློབ་དཔོན་ཉི་མ་སྦས་པས་མཛད་པ། ཟ་ཧོར་གྱི་མཁན་པོ་ཛྙཱ་ན་ཤཱནྟི་དང༌། བོད་ཀྱི་ལོ་ཙཱ་བ་དཔལ་གྱི་ལྷུན་པོ་སྡེའི་འགྱུར། ཚིགས་སུ་བཅད་པ་
བརྒྱ་པ་ཞེས་བྱ་བ་སློབ་དཔོན་ཆེན་པོ་མཆོག་སྲེད་ཀྱིས་མཛད་པ། རྒྱ་གར་གྱི་མཁན་པོ་བི་ནཱ་ཡ་ཙནྡྲ་དང༌། བོད་ཀྱི་ལོ་ཙཱ་བ་དགེ་སློང་ཆོས་ཀྱི་ཤེས་རབ་ཀྱི་འགྱུར། དྲི་མ་མེད་པའི་དྲིས་ལན་རིན་པོ་ཆེའི་ཕྲེང་བ་ཞེས་བྱ་བ་རྒྱལ་པོ་ཆེན་པོ་སྙན་དངགས་མཁན་གྱི་དམ་པ་སློབ་དཔོན་དོན་ཡོད་འཆར་གྱིས་མཛད་པ།
རྒྱ་གར་གྱི་མཁན་པོ་ཀ་མ་ལ་གུཔྟ་དང༌། ཞུ་ཆེན་གྱི་ལོ་ཙཱ་བ་རིན་ཆེན་བཟང་པོའི་འགྱུར། ཙ་ན་ཀའི་རྒྱལ་པོའི་ལུགས་ཀྱི་བསྟན་བཅོས་རྒྱ་གར་གྱི་མཁན་པོ་པྲ་བྷཱ་ཀ་ར་ཤྲཱི་མི་ཏྲ་དང༌། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོའི་འགྱུར། མ་སུ་རཀྵས་བྱས་པའི་ལུགས་ཀྱི་བསྟན་བཅོས་རྒྱ་གར་གྱི་མཁན་པོ་
ཨཱ་ཙཱརྱ་དྷརྨ་ཤྲཱི་བྷ་དྲ་དང༌། ལོ་ཙཱ་བ་དགེ་སློང་ཤཱཀྱ་བློ་གྲོས་ཀྱི་འགྱུར། མི་དཔྱད་ཀྱི་བསྟན་བཅོས་རྒྱ་མཚོས་བསྟན་པའི་སྐྱེས་པའི་མཚན་བཅོ་ལྔ་པ་དང་བུད་མེད་ཀྱི་མཚན་བཅུ་པ་པཎྜི་ཏ་པྲ་བྷཱ་ཀ་ར་དང༌། བོད་ཀྱི་ལོ་ཙཱ་བ་དགེ་སློང་ཨོ་ཌྱཱན་པ་རིན་ཆེན་དཔལ་གྱི་འགྱུར། མི་དཔྱད་ཀྱི་བསྟན་བཅོས་བསྡུས་པ་རྡོ་
རྗེ་གདན་དུ་ཨོ་ཌྱཱན་པས་བསྒྱུར་བ། མིའི་མཚན་ཉིད་བསྟན་པ་རྒྱ་མཚོ་ཞེས་བྱ་བ་སྡེ་སྣོད་འཛིན་པ་ཆེན་པོ་བྷོ་ཊ་པཎྜི་ཏའི་གསུང་ལ་བརྟེན་ནས། པཎྜི་ཏ་དྷརྨ་དྷ་ཏའི་ཞལ་སྔ་ནས། ཡར་ལུངས་པ་གྲགས་པ་རྒྱལ་མཚན་གྱིས་དཔལ་ས་སྐྱའི་གཙུག་ལག་ཁང་དུ་བསྒྱུར་བ། སློབ་དཔོན་པདྨ་དགེ་བསྙེན་གྱིས་
འཇིག་རྟེན་དབང་ཕྱུག་ལས་གྲུབ་པ་ཐོབ་པའི་ལོ་རྒྱུས། པཎྜི་ཏ་བི་ནཱ་ཡ་ཤྲཱི་མི་ཏྲ་དང༌། ལོ་ཙཱ་བ་ལྡན་མ་ཚུལ་ཁྲིམས་སེང་གེའི་འགྱུར། ཙནྡྲ་གོ་མིའི་གཏམ་རྒྱུད། པཎྜི་ཏ་བི་ཁྱཱ་ཏ་དེ་ཝས་ཐུགས་རྗེ་ཆེན་པོ་ལས་གྲུབ་པ་ཐོབ་པའི་གཏམ་རྒྱུད། ཤིང་བཟོ་བས་གྲུབ་པ་ཐོབ་པའི་གཏམ་རྒྱུད། བུད་མེད་ཀྱིས་གྲུབ་
པ་ཐོབ་པའི་གཏམ་རྒྱུད། ཚོང་དཔོན་གྱི་བུ་སུ་ཁ་དེ་ཝས་གྲུབ་པ་ཐོབ་པའི་གཏམ་རྒྱུད་རྣམས་པཎྜི་ཏ་བི་ནཱ་ཡ་ཤྲཱིས་བསྒྱུར། གཞོན་ནུ་འབྱུང་བའི་མ་བྱུང༌བསྟན་བཅོས་ཇི་ལྟར་བྱུང་བའི་གཏམ་རྒྱུད་པཎྜི་ཏ་སུ་མ་ན་ཤྲཱིའི་ངག་བཞིན་བུ་སྟོན་ལོ་ཙཱ་བས་བསྒྱུར་བ། དྲང་སྲོང་ཆེན་པོ་ཤ་ལི་ཧོ་ཏྲས་ཡང་དག་པར་བསྡུས་པའི་
เล่ม ๒๑๓ · หน้า 463b
རྟའི་ཚེའི་རིག་བྱེད་མཐའ་དག་རྗེས་སུ་བསྟན་པ་ཞེས་བྱ་བ་རྒྱས་པ་རྒྱ་གར་གྱི་མཁན་པོ་ཨཱ་ཙཱརྱ་དྷརྨ་ཤྲཱི་བྷ་དྲ་དང༌། བུདྡྷ་ཤྲཱི་ཤཱནྟི་དང༌། ཞུ་ཆེན་གྱི་ལོ་ཙཱ་བ་ཆེན་པོ་དགེ་སློང་རིན་ཆེན་བཟང་པོས་བསྒྱུར་བ་རྣམས་བཞུགས་སོ། །གང་ལ་བརྟེན་ནས་འཇིག་རྟེན་འདིར་བདེ་ཞིང༌། །མཐོ་རིས་ཐར་པའི་དཔལ་ཡང་འབྱུང་
གྱུར་པའི། །ལུགས་ཀྱི་བསྟན་བཅོས་ཀུན་དང་གཏམ་རྒྱུད་སོགས། །བཅུ་ཕྲག་གཅིག་ལ་དགུ་ཡིས་བརྒྱན་པ་བཞུགས། །དེ་དག་གིས་ནི་ཐུན་མོང་པ་ལུགས་ཀྱི་བསྟན་བཅོས་སྐོར་བཞུགས་པའི་རྣམ་གྲངས་རྣམས་བཀོད་ཟིན་ཏོ།། །།དེ་ལྟར་མཚན་ཉིད་ཀྱི་ཕྱོགས་ཀུན་དྲིལ་བས་ལྔ་བརྒྱ་དང་སུམ་ཅུ་རྩ་དྲུག་
མཆིས་སོ། །མཚན་ཉིད་ཀྱི་བསྟན་བཅོས་སྐབས་ཏེ་གསུམ་པའོ།། །།ད་ནི་བོད་ཀྱི་མཁས་པ་ཆེན་པོ་རྣམས་ཀྱིས་མཛད་པའི་དཔེ་དཀོན་པ་ཅི་རིགས་པ་དང༌། མཛད་པ་པོའི་མཚན་མ་སྨོས་པའི་མཚན་གྱི་རྣམ་གྲངས་ལ། ཅོ་པ་ལ། ལོ་པཎ་མང་པོས་མཛད་པའི་སྒྲ་བྱེ་བྲག་ཏུ་རྟོག་བྱེད་ཆེན་མོ། །བྱེ་བྲག་ཏུ་རྟོགས་
བྱེད་འབྲིང་པོ་སྒྲ་སྦྱོར་བམ་པོ་གཉིས་པ་ཕོ་བྲང་འོན་ཅང་རྡོར་བོད་དང༌། རྒྱ་གར་གྱི་མཁན་པོ་ཐམས་ཅད་ཀྱིས་ཆོས་སྐད་གཏན་ལ་ཕབ་སྟེ་མཁས་པ་རྣམས་འཚོགས་ཏེ་མིང་དུ་བཏགས། ལྷ་བཙན་པོ་ཁྲི་སྲོང་ལྡེ་བཙན་གྱིས་བསྐུལ་ནས་བཀས་བཅད་དེ་མི་བཅོས་པར་བཞག་པ། འདིར་བྱེ་བྲག་ཏུ་རྟོགས་བྱེད་ཆུང་ངུ་
རྙེད་ན་བྲིའོ། །ཐོན་མི་ཨ་ནུས་བྱས་པའི་སྒྲའི་བསྟན་བཅོས་ལུང་དུ་སྟོན་པའི་རྩ་བ་སུམ་ཅུ་པ་དང༌། ལུང་དུ་སྟོན་པ་རྟགས་ཀྱི་འཇུག་པ་ཞེས་བྱ་བ་སློབ་དཔོན་ཨ་ནུས་མཛད་པ། ལྕེ་ཁྱི་འབྲུག་གིས་མཛད་པའི་བྱཱ་ཀ་ར་ཎའི་སྐད་མདོ་ཙམ་ཞིག་བསྒྱུར་བ་གནས་བརྒྱད་ཀྱི་རྩ་བ་དང༌། སྒྲའི་བསྟན་བཅོས་གནས་
བརྒྱད་ཀྱི་འགྲེལ་པ་དང༌། སྒྲའི་རྣམ་པར་དབྱེ་བ་མ་བྱུང༌བསྟན་པ་སུ་བནྟ་དང༌། བཀའ་ཡང་དག་པའི་ཚད་མ་ལས་མདོར་བསྡུས་པ་ལེའུ་བཅོ་ལྔ་པ་རྒྱལ་པོ་ཁྲི་སྲོང་ལྡེ་བཙན་གྱིས་མཛད་པ། ཤྲཱི་སིངྷས་མཛད་པའི་ཤེར་སྙིང་གི་འགྲེལ་པ་མདོ་སྡེ་ལས་སྔགས་སུ་བཀྲོལ་བ་པ་གོར་བཻ་རོ་ཙཱ་ནས་རྒྱལ་པོ་ཁྲི་སྲོང་ལྡེ་བཙན་ལ་
གདམས་པ་དོན་གསལ་བའི་སྒྲོན་མ་དང༌། སློབ་དཔོན་བཻ་རོ་ཙཱ་ནས་རྒྱལ་པོ་ཁྲི་སྲོང་ལྡེ་བཙན་ལ་གདམས་པ་རིན་པོ་ཆེ་རྩོད་པའི་འཁོར་ལོ། གཅེས་པ་བསྡུས་པའི་ཕྲིན་ཡིག་བཙུན་པ་ཆེན་པོ་དཔལ་དབྱངས་ཀྱིས་བོད་རྗེ་འབངས་ལ་བརྫངས་པ། ལྟ་བའི་རིམ་པའི་མན་ངག་སྐ་བ་དཔལ་བརྩེགས་ཀྱིས་མཛད་པ། གསུང་
เล่ม ๒๑๓ · หน้า 464a
རབ་རིན་པོ་ཆེའི་གཏམ་རྒྱུད་དང་ཤཱཀྱའི་རབས་རྒྱུད་མཁན་པོ་དཔལ་བརྩེགས་ཀྱིས་མཛད་པ་རྣམས་བཞུགས་སོ།། །།ཆོ་ཇོ་གཉིས་ལ། འཕགས་པ་དགོངས་པ་ངེས་པར་འགྲེལ་པའི་མདོའི་རྣམ་པར་བཤད་པ་བཞུགས། འདི་འཕགས་པ་ཐོགས་མེད་ཀྱིས་མཛད་ཟེར་བ་མི་
བདེན་ཏེ། འདིའི་འཐད་པ་བསྒྲུབས་པའི་གཏན་ཚིགས་ཀྱི་སྐབས་ནས། ལྷ་བཙན་པོ་བྱང་ཆུབ་རྫུ་འཕྲུལ་གྱིས་མཛད་པའི་བཀའ་ཡང་དག་པའི་ཚད་མ་ལས་བལྟ་བར་བྱའོ་ཞེས་བོད་ཀྱིས་བྱས་པའི་བསྟན་བཅོས་ལ་ཁ་འཕང་ཡོད་པའི་ཕྱིར་རོ། །སྔོན་གྱི་དཀར་ཆག་ལས། ལོ་ཙཱ་བ་ཀླུའི་རྒྱལ་མཚན་
གྱིས་མཛད་པའི་མདོ་སྡེ་དགོངས་འགྲེལ་གྱི་འགྲེལ་པ་བམ་པོ་བཞི་བཅུ་ཞེས་འབྱུང་བ་དེ་ཡིན་པར་སེམས་སོ། །འཕགས་པ་བཟང་པོ་སྤྱོད་པའི་སྨོན་ལམ་ལ་ཕྱོགས་ཀྱི་གླང་པོས་འགྲེལ་པ་མཛད་པ་དང༌། ཤཱཀྱ་བཤེས་གཉེན་དང༌། སངས་རྒྱས་གྲགས་པ་དང་རྒྱན་བཟང་པོས་ཊཱི་ཀ་མཛད་པ་དང༌། རྣམ་
པ་བཞིའི་དོན་དང་འཕྲལ་དུ་མཁན་པོ་དག་ལས་ཐོས་པ་དང༌། མདོ་སྡེ་ནས་འབྱུང་བ་ཡང་སྦྱར་ཏེ་བཤད་པ་ལོ་ཙཱ་བ་ཡེ་ཤེས་སྡེས་བརྡ་ཕྲད་སླ་བར་བརྗེད་བྱང་དུ་བྱས་པ། ལྟ་བའི་ཁྱད་པར་མཁན་པོ་ཡེ་ཤེས་སྡེས་མཛད་པ། སངས་རྒྱས་གཙོའི་རྒྱ་ཆེར་འགྲེལ་པ་བོད་ཀྱི་ལོ་ཙཱ་བ་ཞང་ཡེ་ཤེས་སྡེས་མཛད་པ།
ཆོས་ཀྱི་རྣམ་གྲངས་ཀྱི་བརྗེད་བྱང་དང༌། ཆོས་ཀྱི་རྣམ་གྲངས་ཀྱི་བརྗེད་བྱང་གི་རྩ་བ་ཨཱ་ཙཱརྱ་དཔལ་བརྩེགས་ཀྱིས་མཛད་པ། འབྲུག་གི་ལོ་ལ་ཕོ་བྲང་སྟོང་ཐང་ལྡན་དཀར་གྱི་བཀའ་དང་བསྟན་བཅོས་འགྱུར་རོ་ཅོག་གི་དཀར་ཆག་ལོ་ཙཱ་བ་དཔལ་བརྩེགས་དང༌། ནམ་མཁའི་སྙིང་པོ་ལ་སོགས་པས་མཛད་པ་རྣམས་
བཞུགས་སོ།། །།ཉོ་པ་ལ། མཛད་པ་པོའི་མཚན་མ་སྨོས་པ་ལ། དོན་རྣམ་པར་གདོན་མི་ཟ་བའི་འགྲེལ་པ། འདི་འགྲེལ་པ་བཟང་པོ་ཅིག་སྣང་སྟེ་མཛད་བྱང་འགྱུར་བྱང་ལ་སོགས་མི་འདུག་པས་འདིར་བཞུགས་སུ་བཅུག །ལྷག་མཐོང་བསྐྱེད་པའི་ཐབས་ཅུང་ཟད་བྲིས་པ། སེམས་གནས་
པ་སྤྱིའི་ཡི་གེ། མི་སྡུག་པའི་སྒོ་ནས་སེམས་གནས་པའི་ཐབས། བྱམས་པ་བསྒོམ་པའི་སྒོ་ནས་སེམས་གནས་པར་བྱ་བའི་ཐབས། རྟེན་ཅིང་འབྲེལ་པར་འབྱུང་བ་བགྲང་བའི་སྒོ་ནས་སེམས་གནས་པར་བྱ་བའི་ཐབས། ཁམས་རབ་ཏུ་དབྱེ་བའི་སྒོ་ནས་སེམས་གནས་པར་བྱ་བའི་ཐབས། དབུགས་
เล่ม ๒๑๓ · หน้า 464b
བགྲང་བའི་སྒོ་ནས་སེམས་གནས་པར་བྱ་བའི་ཐབས། ཞི་གནས་སྐུ་ལ་བསྒོམ་པའི་ཐབས་ཆུང་ངུ༌། ཞི་གནས་ལ་འཇུག་པའི་ཐབས་རྣམས་ཅུང་ཟད་བྲིས་པ། བསམ་གཏན་ལ་འཇུག་པ་བསྡུས་པ། སེམས་ཀྱི་ཉམས་ཅུང་ཟད་ཙམ་ཞིག་མདོར་བསྡུས་ནས་བརྗོད་པ་རྣམས་
སོ། །རྣམ་འཕྲུལ་དཔག་ཡས་རྒྱལ་བའི་མཛད་པ་ཅན། །གངས་རིའི་ཁྲོད་འདིར་བྱོན་པའི་སྐྱེས་བུ་མཆོག །མཁས་པས་མཛད་གཞུང་ཆ་ཙམ་བྲིས་པ་ཡི། །ངོ་མཚར་བསྟན་བཅོས་སུམ་ཅུ་རྩ་གསུམ་བཞུགས། །དེ་དག་གིས་ནི་བོད་ཀྱི་མཁས་པ་རྣམས་ཀྱིས་མཛད་པའི་བསྟན་
བཅོས་ལས་དཔེ་དཀོན་པ་ཕྱོགས་ཙམ་བྲིས་པ་བཞུགས་པའི་རྣམ་གྲངས་རྣམས་བཀོད་ཟིན་ཏོ།། །།དེ་ལྟར་བོད་ཀྱི་མཁས་པ་རྣམས་ཀྱིས་མཛད་པའི་བསྟན་བཅོས་ཀྱི་སྐོར་རྣམས་བཀོད་ནས། ད་ནི་གསར་བཅུག་མདོ་དང་རིག་གནས་ལ་སོགས་པའི་བསྟན་བཅོས་སྣ་
ཚོགས་ཀྱི་སྐོར་ལ། རྡོ་རྗེ་གཅོད་པའི་བཤད་སྦྱར་ཚིག་ལེའུར་བྱས་པ་འགྱུར་བྱང་མེད་པ། འདུས་བྱས་དང་འདུས་མ་བྱས་རྣམ་པར་ངེས་པའི་བསྟན་བཅོས་སློབ་དཔོན་དགྲ་ལས་རྣམ་པར་རྒྱལ་བས་མཛད་པ། པཎྜི་ཏ་ཀ་ན་ཀ་ཤྲཱི་མི་ཏྲ་དང༌། ལོ་ཙཱ་བ་ཤེས་རབ་གྲགས་ཀྱི་འགྱུར།
སྣང་བའི་ཕྲེང་བ་ཞེས་བྱ་བ་བཙུན་པ་ངོ་བོ་ཉིད་མེད་པས་མཛད་པ། པཎྜི་ཏ་གཞོན་ནུ་བུམ་པ་དང༌། ལོ་ཙཱ་བ་ཤཱཀྱ་འོད་ཀྱི་འགྱུར། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བསྡུས་པའི་ཚིག་ལེའུར་བྱས་པ་སློབ་དཔོན་ཕྱོགས་ཀྱི་གླང་པོས་མཛད་པ། འཕགས་པ་ཤེས་རབ་
ཀྱི་ཕ་རོལ་ཏུ་ཕྱིན་པ་ཚིགས་སུ་བཅད་པ་ཆེན་པོ་སློབ་དཔོན་ཨཱརྱ་དེ་ཝས་མཛད་པ། པཎྜི་ཏ་ཆེན་པོ་མི་ཕམ་མགོན་པོའི་རང་འགྱུར། བྱང་ཆུབ་སེམས་དཔའི་སྤྱོད་པ་ལ་འཇུག་པའི་བཤད་པ་ཇོ་བོ་ཆེན་པོ་དཱི་པཾ་ཀ་ར་ཤྲཱི་ཛྙཱ་ནས་མཛད་པ། ཤེར་ཕྱིན་དོན་བསྡུས་སྒྲོན་མེ་དང༌།
སྨན་བླའི་སྒྲུབ་ཐབས་པཎྜི་ཏ་དཱི་པཾ་ཀ་ར་ཤྲཱི་ཛྙཱ་ནས་མཛད་པ། པཎྜི་ཏ་དེ་ཉིད་དང༌། ནག་ཚོ་ལོ་ཙཱ་བ་ཚུལ་ཁྲིམས་རྒྱལ་བའི་འགྱུར། མངོན་པ་མཛོད་ཀྱི་འགྲེལ་པ་གནམ་ལྕགས་ཐོག་སེར་བློ་གྲོས་བརྟན་པས་མཛད་པ། ཞྭ་ལུ་ལོ་ཆེན་དྷརྨ་པཱ་ལ་བྷ་དྲས་བསྒྱུར་བ། སྨན་དཔྱད་གཅེས་
เล่ม ๒๑๓ · หน้า 465a
པ་གྲུབ་པ་རྟ་མཁན་བགྲོད་དཀས་བསྲུངས་པའི་བུ་ཉི་མ་བསྲུང་པས་བྱས་པ། མཁན་པོ་ཛི་ན་མི་ཏྲ་དང༌། ལོ་ཙཱ་བ་ཙནྡྲས་བསྒྱུར། འཕགས་པ་ཀླུ་སྒྲུབ་ཀྱིས་མཛད་པའི་གསང་སྔགས་ཟབ་མོ་རྗེ་ཞྭ་ལུ་ལོ་ཙཱ་བ་དྷརྨ་པཱ་ལ་བྷ་དྲས་བསྒྱུར་བ། ཚེའི་རིག་བྱེད་
མཐའ་དག་གི་སྙིང་པོ་བསྡུས་པ་འཕགས་ཡུལ་ནུབ་ཕྱོགས་མ་ཧོ་རའི་བྲམ་ཟེ་སཾ་ནྱའི་གོ་ཏ་ར་རཉྩོ་དང༌། མ་ཧཱ་ལོ་ཙཱ་བ་སེ་དཀར་རིགས་ཀྱི་ཐིག་ལེ་འདར་པ་ངག་དབང་ཕུན་ཚོགས་ལྷུན་གྲུབ་ཀྱིས་ཕོ་བྲང་ཆེན་པོ་པོ་ཏ་ལར་བསྒྱུར་བ། འཕགས་ཡུལ་བ་ཧའི་སྨན་པ་ད་ན་དཱ་པའི་
སྨན་བཅོས་དང་ཕན་བྱེད་ཀྱི་ཙཀྲ་རིགས་མི་གཅིག་པ་བདུན་ཅུ་དོན་གཉིས་རྣམས་ལོ་པཎ་དེ་གཉིས་ཀྱིས་བསྒྱུར་བ། ཡང་ཚངས་པ་རིག་བྱེད་རྒྱ་མཚོའི་ཡན་ལག་འཛིན་པ་གཡོ་བ་ཅན་ཞེས་པའི་བསྟན་བཅོས་དང༌། ཕན་བྱེད་ཀྱི་མན་ངག་ལག་ལེན་ཐོར་བུ་གཉིས་འཕགས་ཡུལ་
མ་དྷུ་རའི་རིག་བྱེད་འཛིན་པ་རཱ་ཀུ་ནཱ་ཐ་དང༌། མ་ཧཱ་ལོ་ཙཱ་བ་འདར་པ་ངག་དབང་ཕུན་ཚོགས་ལྷུན་གྲུབ་ཀྱིས་ཕོ་བྲང་ཆེན་པོ་པོ་ཏ་ལར་བསྒྱུར་བ། མིག་འབྱེད་མཐོང་བ་དོན་ལྡན་འཕགས་ཡུལ་ཤཱ་ཛང་གི་སྨན་པ་མ་ཧོ་དང༌། མ་ཧཱ་ལོ་ཙཱ་བ་འདར་བ་ངག་དབང་ཕུན་ཚོགས་ལྷུན་གྲུབ་ཀྱིས་ཕོ་བྲང་
ཆེན་པོ་པོ་ཏ་ལར་བསྒྱུར་བ། ཀ་ལཱ་པའི་བྱིངས་མདོ་འཇམ་དབྱངས་རལ་གྲིའི་འགྱུར། ཙནྡྲ་པའི་བྱིངས་མདོ་སློབ་དཔོན་གང་བའི་ཟླ་བས་མཛད་པ། ལོ་ཆེན་བྱང་ཆུབ་རྩེ་མོའི་འགྱུར། ཙནྡྲ་པའི་ཨུ་ཎའི་མདོ་ལོ་ཆེན་ནམ་མཁའ་བཟང་པོའི་འགྱུར། དེའི་རང་འགྲེལ་ལོ་ཆེན་གྱི་དཔལ་
བཟང་གི་འགྱུར། བྱིངས་ཀྱི་མདོ་བུ་སྟོན་རིན་ཆེན་གྲུབ་ཀྱི་འགྱུར་མི་འདྲ་ཙམ། སུབ་མཐའ་རིན་ཆེན་འབྱུང་གནས་དང་སུ་བནྟའི་བསྒྱུར་འཕྲོ། རྐྱེན་གསུམ་རབ་ཏུ་བཤད་པ་རོང་ཟོམ་ཆོས་བཟང་གི་འགྱུར། ཏི་སོགས་ཀྱི་བྱ་བའི་ཐ་ཚིག་གསལ་བ་མཁན་པོ་དགའ་བའི་གྲགས་པས་མཛད་པ།
མངོན་བརྗོད་ཀྱི་བསྟན་བཅོས་སྣ་ཚོགས་གསལ་བ་པཎྜི་ཏ་དཔལ་འཛིན་སྡེས་མཛད་པ། སྒྲ་གཅིག་དོན་མང་ནོར་བུའི་ཕྲེང་བ་རྣམས་ཞྭ་ལུ་ལོ་ཆེན་ཆོས་སྐྱོང་བཟང་པོའི་འགྱུར། དུས་ཀྱི་འཁོར་ལོའི་རྩིས་ཀྱི་མན་ངག་དུས་ཞབས་པ་ཆུང་བ་བོ་དྷི་བྷ་དྲས་མཛད་པ། དཔལ་སྟག་ལུང་ཐང་གི་
เล่ม ๒๑๓ · หน้า 465b
གཙུག་ལག་ཁང་དུ་ཞྭ་ལུ་ལོ་ཆེན་དྷརྨ་པཱ་ལ་བྷ་དྲས་བསྒྱུར་བ། གཏོར་མའི་ཕྲེང་བ་སློབ་དཔོན་བློ་བཟང་སེང་གེས་མཛད་པ། པཎྜི་ཏ་བྷིཀྵུ་དྷརྨ་དཱི་ཀ་ར་དང་ཞྭ་ལུ་ལོ་ཙཱ་བ་ཆོས་སྐྱོང་བཟང་པོས་ཨེ་ཝཾ་ཆོས་འཁོར་དུ་བསྒྱུར་བ། སྡེབ་སྦྱོར་གྱི་བསྟན་བཅོས་རིན་ཆེན་འབྱུང་གནས་ཞི་བས་
མཛད་པ་སྟག་ཚང་ལོ་ཙཱའི་འགྱུར། བརྡ་སྤྲོད་པའི་བསྟན་བཅོས་དབྱངས་ཅན་བྱཱ་ཀ་ར་ཎའི་མཚམས་སྦྱོར་འགྲེལ་པ་པཎྜི་ཏ་ཀྲྀཥྞ་བྷཊྚ་དང༌། ལོ་ཙཱ་བ་ཇོ་ནང་ཀུན་དགའ་སྙིང་པོའི་འགྱུར། སྐྱེས་རབས་ཀྱི་དཀའ་འགྲེལ་བཱིརྱ་སིངྷས་མཛད་པ། དབང་ཕྱུག་བྱེད་པ་པོ་དང་ཁྱབ་འཇུག་བྱེད་
པ་པོ་གཅིག་ཉིད་སེལ་བ་ཞྭ་ལུ་ལོ་ཙཱ་བའི་འགྱུར། ཚིགས་བཅད་དགུ་པ་དང་བདུན་པ་ལ་ཝ་པས་མཛད་པ་བུ་སྟོན་གྱི་འགྱུར། ཤམྦྷ་ལར་འགྲོ་ཚུལ་གྱི་ལམ་ཡིག་འཕགས་པ་དོན་ཡོད་ལྕགས་ཀྱུས་གསུངས་པ། ཇོ་ནང་ཀུན་དགའ་སྙིང་པོས་བལ་དཔེ་ལས་བསྒྱུར་ཞིང་གོ་དཀའ་བ་རྣམས་
བྲམ་ཟེའི་པཎྜི་ཏ་ཀྲྀཥྞ་བྷཊྚ་ལ་དྲིས་ཤིང་གཏན་ལ་ཕབ། ཙནྡྲ་པའི་ཡི་གེའི་འགྲེལ་པ་སྐྱོག་ལོ་ངག་དབང་རིན་ཆེན་བཀྲ་ཤིས་ཀྱིས་གྲྭ་ཐང་དུ་བསྒྱུར་བ། འཇམ་དཔལ་བྱཱ་ཀ་ར་ཎའི་རྩ་བ་སཱ་དྷུ་ཀཱིརྟིས་མཛད་པ། དཔལ་ལྡན་ཀ་ལིངྐའི་དབང་ཕྱུག་བྱང་ཆུབ་སེམས་དཔའི་ཡུལ་གྱི་སློབ་དཔོན་
རྒྱལ་པོའི་ལྷས་མཛད་པ་རྣམས་སོ། །གཞན་ཡང་སླན་ཆད་དཔེ་འབྱོར་ན་འདིར་འཇུག་ཀྱང་རུང་བ། རྒྱ་འགྱུར་དང་བཀའ་བཙན་ནམ་མི་བཙན་སྙམ་པའི་བོད་ཀྱི་བསྟན་བཅོས་ཀྱི་སྐོར་ལ། རྒྱུད་ཀྱི་སྤྱི་འགྲེལ་སྐོར། རྨ་རིན་ཆེན་མཆོག་གི་བཤད་ཐབས་བཅུ་པ། ལོ་ཆེན་
བཻ་རོས་མཛད་པའི་རྩ་རྒྱུད་ཀྱི་འགྲེལ་པ། བརྒྱད་ཅུ་པ་ལ་གནུབས་སངས་རྒྱས་ཡེ་ཤེས་ཀྱི་མངོན་རྟོགས་འགྲེལ། ཕྲ་མོའི་ནང་ཚན་ལྟ་བ་ལ། བཻ་རོས་བསྟན་པའི་སྙིང་པོ་ཛྙཱ་ནའི་འཕྲུལ་གྱི་མེ་ལོང་དགུ་སྐོར། རྩ་འགྲེལ་འདི་ལྟའི་དཔེ་རྒྱུན་ལ་བི་མ་ལའི་ཡིན་ཟེར་ཀྱང་དཀར་ཆག་
རྙིང་པ་རྣམས་ན་ཛྙཱ་ནའི་ཡིན་པར་བཤད། གཉེན་དཔལ་དབྱངས་ཀྱིས་མཛད་པའི་ཐུགས་ཀྱི་སྒྲོན་མ། ཡང་དག་སྒྲོན་མ། མཐའ་མུན་སེལ་སྒྲོན་མ། ཐབས་ཤེས་སྒྲོན་མ། རྣལ་འབྱོར་སྤྱོད་པའི་ལུགས་ངེས་དོན་ལ་ཇི་བཞིན་བསྒོམ་ཐབས། ལྟ་བ་རིན་ཆེན་སྒྲོན་མ་
เล่ม ๒๑๓ · หน้า 466a
སྟེ་སྒྲོན་མ་དྲུག་གོ །དབང་ལ། རྨ་རིན་ཆེན་མཆོག་གི་ངེས་འབྱེད་ཆེ་བ། དམ་ཚིག་ལ་དར་རྗེའི་ཁྲུས་ལུང༌། ཕྲིན་ལས་ལ་གཉགས་ཛྙཱ་ནའི་ས་ལམ་ལུང་ཕྲན་དང༌། བཅོལ་དང་བསྐང་བའི་ལུང་ཕྲན། གནད་ཀྱི་གེགས་སེལ་གཟེར་བཅོ་བརྒྱད་
པ་རྣམས་སོ། །སྒྲུབ་པ་ལ། ནམ་སྙིང་གི་ཞི་ཁྲོ་ལས་ཀྱི་གལ་ཕྲེང༌། ཏིང་ངེ་འཛིན་ལ། གནུབས་སངས་རྒྱས་ཡེ་ཤེས་ཀྱི་ཕྱག་རྒྱ་བསམ་གཏན་གྱི་འགྲེལ་པ་རྣམས་ཏེ། གཞན་ཡང་ཟུར་ཆེ་ཆུང་གི་བསྟན་བཅོས་རྣམས་ཀྱང་དེ་དང་འདྲ་ཞེས་རྒྱལ་དབང་ལྔ་པའི་དཀར་ཆག་ཏུ་
འབྱུང་ངོ༌། །མདོའི་འགྲེལ་པ་མུན་པའི་གོ་ཆ་དང༌། དཀའ་གཅོད་སྨྲ་བའི་མཚོན་ཆ། སྐ་བ་དཔལ་བརྩེགས་ཀྱི་མདོའི་དཀའ་འགྲེལ་མི་ཤེས་མདུད་འགྲོལ། ཉེར་བསྒྱུར་གྱི་མཚན་ཉིད་འགྲེལ་བཤད་སློབ་དཔོན་དབང་པོས་བྱིན་གྱིས་མཛད་པ། ལོ་ཙཱ་བ་ནམ་མཁའ་དཔལ་
བཟང་གི་འགྱུར་ཞེས་པ་རྣམས་རྒྱལ་དབང་ལྔ་པའི་དཀར་ཆག་ན་བཞུགས་པ་ལྟར་མ་འོངས་པར་འདི་དག་གི་དཔེ་འབྱོར་བར་གྱུར་པ་འདྲི་བའི་འདུན་པས་བྲིས་པ་ཡིན་གྱི་ད་ལྟའི་དཔེ་དངོས་ལ་ནི་མི་བཞུགས་སོ། །གཤེགས་བཞུགས་རྒྱལ་བས་གསུངས་པའི་སྒྱུ་འཕྲུལ་དོན། །
དགོངས་འགྲེལ་སྔར་བྱུང་དཔེ་བདུན་མ་རྙེད་པ། །བཅུ་དྲུག་ལ་སོགས་བསྣན་ཚེ་སྐྱེ་དགུ་ཡི། །འཆིང་རྒྱ་གཅོད་ལ་རྣོན་པོའི་མཚོན་ཆ་མཆོག །དེ་དག་གིས་ནི་བོད་ཀྱི་མཁས་པ་ཆེན་པོ་རྣམས་ཀྱིས་མཛད་པའི་དཔེ་དཀོན་པ་དང༌། མཛད་པ་པོའི་མཚན་མ་སྨོས་པ་དང༌།
གསར་བཅུག་སྟེ་བསྟན་བཅོས་སྣ་ཚོགས་པའི་ཆོས་སྐོར་བཞུགས་པའི་རྣམ་གྲངས་རྣམས་བཀོད་ཟིན་ཏོ། །བསྟན་བཅོས་སྣ་ཚོགས་ཀྱི་སྐབས་ཏེ་བཞི་པའོ།། །།ད་ནི་ལས་བྱས་པ་དོན་ཡོད་པར་བྱ་བའི་ཕྱིར་བསྔོ་བ་དང༌། སྨོན་ལམ་དང༌། བཀྲ་ཤིས་ཀྱི་
སྐོར་ལ། འཕགས་པ་བཟང་པོར་སྤྱོད་པའི་སྨོན་ལམ་གྱི་རྒྱལ་པོ། །འཕགས་པ་བྱམས་པའི་སྨོན་ལམ་གྱི་རྒྱལ་པོ། །འཕགས་པ་གསེར་འོད་དམ་པ་ལས་གསུངས་པའི་སྨོན་ལམ། རྒྱལ་པོ་གསེར་གྱི་ལག་པའི་སྨོན་ལམ། ལག་བཟང་གིས་ཞུས་པའི་མདོ་
เล่ม ๒๑๓ · หน้า 466b
ལས་བྱུང་བའི་སྨོན་ལམ། སྦྱིན་པའི་རབས་ཀྱི་སྨོན་ལམ། རིན་ཆེན་ཕྲེང་བ་(*མ་བྱུང༌)ནས་བྱུང་བའི་སྨོན་ལམ། བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས་བྱུང་བའི་སྨོན་ལམ། འཕགས་པ་ཀླུ་སྒྲུབ་ཞབས་ཀྱིས་མཛད་པའི་རྡོ་རྗེའི་སྨོན་ལམ། རྒྱ་གར་ཤར་ཕྱོགས་ཀྱི་པཎྜི་
ཏ་ཆེན་པོ་དངོས་གྲུབ་བརྙེས་པའི་དབང་ཕྱུག་དཔལ་ནགས་ཀྱི་རིན་ཆེན་དང༌། དེ་ཉིད་ཀྱི་བཀའ་དྲིན་ལས་ལེགས་པར་སྦྱར་བའི་ཚུལ་རིག་པ་དགེ་སློང་ཆོས་སྨྲ་བ་བསོད་ནམས་རྒྱ་མཚོའི་སྡེ་ཞེས་བྱ་བས་དཔལ་ཀུན་ཏུ་བཟང་པོའི་ནགས་ཁྲོད་དུ་བསྒྱུར་བ། བྱང་ཆུབ་འབྱུང་བའི་
སྨོན་ལམ་འཕགས་པ་ཀླུ་སྒྲུབ་ཀྱིས་མཛད་པ། སློབ་དཔོན་ཙནྡྲ་གོ་མིས་མཛད་པའི་བཙུན་པ་ཟླ་བའི་སྨོན་ལམ་རབ་ཏུ་བསྔགས་པའི་གནས་ཆེན་པོ་ཉེ་བའི་འཐུང་གཅོད་བལ་པོ་ཡམ་བུའི་གྲོང་ཁྱེར་དུ་བལ་པོའི་པཎྜི་ཏ་ཛེ་ཏ་ཀརྞའི་ཞལ་སྔ་ནས། བོད་ཀྱི་ལོ་ཙཱ་བ་དགེ་སློང་ཉི་མ་
རྒྱལ་མཚན་དཔལ་བཟང་པོའི་འགྱུར། འཕགས་པ་ཀླུ་སྒྲུབ་ཀྱིས་མཛད་པའི་སྨོན་ལམ། རྒྱལ་པོ་ལ་གཏམ་བྱ་བ་རིན་པོ་ཆེའི་ཕྲེང་བ་ལས་བྱུང་བའི་སྨོན་ལམ་གྱི་ཚིགས་སུ་བཅད་པ་ཉི་ཤུ་པ། རིགས་ཀྱི་སྨོན་ལམ་ཞེས་བྱ་བ་སློབ་དཔོན་མཁས་པ་ཆེན་པོ་དཔལ་མར་
མེ་མཛད་ཡེ་ཤེས་ཀྱི་ཞལ་སྔ་ནས་མཛད་པ། སློབ་དཔོན་བཙུན་པ་རྟ་དབྱངས་ཀྱིས་མཛད་པའི་བསྔོ་བ་ཤིན་ཏུ་བསྡུས་པ། པཎྜི་ཏ་དཱ་ན་ཤཱི་ལའི་རང་འགྱུར། རྒྱལ་བའི་ལམ་ལ་འཇུག་པ་ནས་བྱུང་བའི་སྨོན་ལམ། པཎྜི་ཏ་སངས་རྒྱས་དཔལ་ཡེ་ཤེས་ཀྱིས་མཛད་པ།
སློབ་དཔོན་བཙུན་པ་གཞན་ལ་ཕན་པའི་དབྱངས་དགོན་པ་བ་གསུང་རབ་མཐའ་དག་ཆུབ་པར་བྱས་པ་སྟག་གིས་རོང་ལ་བསྐྱོན་ཏེ་ནགས་ཁུང་དུ་ཕྱིན་པ་ན་སྙིང་རྗེས་གདུངས་པའི་ཡིད་ཀྱིས་འགྲོ་བའི་དོན་སྒྲུབ་པའི་སྨོན་ལམ་བདུན་ཅུ་པ་མཛད་པ། པཎྜི་ཏ་དྷརྨ་ཤྲཱི་པྲ་བྷ་དང༌།
ལོ་ཙཱ་བ་དཔལ་གྱི་ལྷུན་པོའི་སྡེའི་འགྱུར། སློབ་དཔོན་ཀ་མ་ལ་ཤཱི་ལའི་སྨོན་ལམ་མུ་གཉིས་མ་ཞེས་བྱ་བ། དཔལ་ལེགས་པར་གྲུབ་པར་བྱེད་པའི་རྒྱུད་ལས་གསུངས་པའི་སྨོན་ལམ། སྨོན་ལམ་རིན་པོ་ཆེའི་རྒྱལ་པོ་ཞེས་བྱ་བ་སློབ་དཔོན་ཀླུ་སྒྲུབ་ཀྱིས་མཛད་པ།
เล่ม ๒๑๓ · หน้า 467a
རྒྱ་གར་ཤར་ཕྱོགས་སཏྣ་ག་རའི་པཎྜི་ཏ་ཆེན་པོ་གནས་བརྟན་ནགས་ཀྱི་རིན་ཆེན་དང༌། དགེ་སློང་ཆོས་སྨྲ་བ་བསོད་ནམས་རྒྱ་མཚོའི་སྡེས་དཔལ་བསམ་ཡས་ལྷུན་གྱིས་གྲུབ་པའི་ཕོ་བྲང་དུ་བསྒྱུར་བ། མཆོག་གི་སྤྱོད་པའི་སྨོན་ལམ།
འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་ཕྱོགས་ཀྱི་སྨོན་ལམ། འཕགས་པ་སྟོང་ཕྲག་བརྒྱ་པ་ལ་སོགས་པ་མདོ་སྡེ་ཆེན་པོ་བཀླག་པའི་ཆོས་ཀྱི་སྦྱིན་པའི་བསྔོ་བ། བླ་ཆེན་དགོངས་པ་རབ་གསལ་གྱིས་མཛད་པའི་ཆོས་ཀྱི་སྦྱིན་པའི་བསྔོ་བ། སྤྱིའི་བསྔོ་བ་དང་(*མ་བྱུང༌)གསུམ།
བཀྲ་ཤིས་ཀྱི་ཚིགས་སུ་བཅད་པ། ལྷས་ཞུས་པའི་བདེ་ལེགས་ཀྱི་ཚིགས་སུ་བཅད་པ། ལྷས་ཞུས་པའི་བདེ་ལེགས་སུ་འགྱུར་བའི་ཚིགས་སུ་བཅད་པ། བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱི་བཀྲ་ཤིས་ཀྱི་ཚིགས་སུ་བཅད་པ། རབ་འཚེ་མ་དང༌།
རབ་དགའ་ལྡན་རྣམས་ཀྱིས་བཀྲ་ཤིས་ཀྱི་ཚིགས་སུ་བཅད་པས་བསྟོད་པ་ཕལ་པོ་ཆེ་ལས་འབྱུང་བ་དང༌། ཚོང་དཔོན་ག་གོན་དང་བཟང་པོའི་ལེའུ་ལས་འབྱུང་བ་ཤིས་པར་བརྗོད་པའི་ཚིགས་སུ་བཅད་པ། ཡངས་པའི་གྲོང་ཁྱེར་དུ་འཇུག་པའི་བདེ་ལེགས་ཀྱི་ཚིགས་བཅད།
འཕགས་པ་སྟོང་ཆེན་པོ་རབ་ཏུ་འཇོམས་པ་ལས་གསུངས་པའི་བདེ་ལེགས་སུ་འགྱུར་བའི་ཚིགས་སུ་བཅད་པ། སྟོང་ཆེན་པོ་རབ་ཏུ་འཇོམས་པ་ལས་གསུངས་པའི་སྨོན་ལམ། རྨ་བྱ་ཆེན་མོ་ལས་གསུངས་པའི་སྨོན་ལམ་གྱི་བདེན་ཚིག །དཀོན་མཆོག་གསུམ་དང་མཛད་
པ་བཅུ་གཉིས་ཀྱི་བཀྲ་ཤིས་ཀྱི་ཚིགས་སུ་བཅད་པ་འཕགས་པ་ཀླུ་སྒྲུབ་ཀྱིས་མཛད་པ། རྒྱ་གར་གྱི་མཁན་པོ་ཛི་ན་མི་ཏྲ་དང༌། ཞུ་ཆེན་གྱི་ལོ་ཙཱ་བ་ཡེ་ཤེས་སྡེའི་འགྱུར། འདི་རྡོ་རྗེ་འབྱུང་བའི་ནང་ན་ཇི་ལྟ་བ་བཞིན་ཡོད་པར་དེ་ཕྱུང་བ་འདྲའོ། །སློབ་དཔོན་འཕགས་པ་
ཀླུ་སྒྲུབ་ཀྱིས་མཛད་པའི་བཀྲ་ཤིས་མཚན་མངས། རྒྱ་གར་གྱི་མཁན་པོ་ཛ་ན་མི་ཏྲ་དང༌། ཞུ་ཆེན་གྱི་ལོ་ཙཱ་བ་ཡེ་ཤེས་སྡེའི་འགྱུར། སངས་རྒྱས་རབས་བདུན་གྱི་བཀྲ་ཤིས་ཀྱི་ཚིགས་བཅད། བཅོམ་ལྡན་འདས་ཀྱིས་ཁྱིམ་བདག་དེས་པ་ལ་གསུངས་པའི་དཀོན་མཆོག་
เล่ม ๒๑๓ · หน้า 467b
གསུམ་གྱི་བཀྲ་ཤིས་ཀྱི་ཚིགས་བཅད། རྒྱ་གར་གྱི་མཁན་པོ་ཛི་ན་མི་ཏྲ་དང༌། ཞུ་ཆེན་གྱི་ལོ་ཙཱ་བ་ཡེ་ཤེས་སྡེའི་འགྱུར། དཀོན་མཆོག་གསུམ་གྱི་བཀྲ་ཤིས་ཀྱི་ཚིགས་སུ་བཅད་པ། ཡང་དཀོན་མཆོག་གསུམ་གྱི་བཀྲ་ཤིས་ཀྱི་ཚིགས་སུ་བཅད་པ། དཀོན་མཆོག་
གསུམ་གྱི་བདེ་ལེགས་ཀྱི་ཚིགས་སུ་བཅད་པ། རིགས་གསུམ་གྱི་བཀྲ་ཤིས་ཀྱི་ཚིགས་བཅད། ཡང་རིགས་གསུམ་གྱི་བཀྲ་ཤིས་ཀྱི་ཚིགས་བཅད་གཅིག །བདེན་པ་བརྗོད་པ་རྒྱལ་བའི་བཀྲ་ཤིས་ཀྱི་ཚིགས་སུ་བཅད་པ། རྒྱ་གར་གྱི་དཔེ་ལས་འགོས་ལོ་ཙཱ་བ་དྷརྨ་པཱ་ལ་
བྷ་དྲས་བསྒྱུར་བ་རྣམས་བཞུགས་སོ། །བསྔོ་བ་དང༌། སྨོན་ལམ་དང༌། བཀྲ་ཤིས་ཀྱི་སྐོར་འདི་རྣམས་ལ་བཀའ་དང་བསྟན་བཅོས་ཅི་རིགས་པར་སྣང་ཡང༌། སྔོན་གྱི་རྣམས་ཀྱིས་ཀྱང་བཀྲ་ཤིས་པའི་ཡན་ལག་ཏུ་བསྟན་བཅོས་ཀྱི་མཇུག་ཏུ་བཀོད་འདུག་པས་འདིར་ཡང་དེ་
བཞིན་དུ་བཀོད་པ་ཡིན་ནོ། །གང་ཞིག་བརྗོད་ན་དོན་རྣམས་ཀུན་འགྲུབ་ཅིང༌། །གནས་སྐབས་ཀུན་དུ་བདེ་ལེགས་འགྱུར་བ་ཡི། །བསྔོ་བ་སྨོན་ལམ་བཀྲ་ཤིས་ཚིགས་བཅད་སྐོར། །བཅུ་ཕྲག་བཞི་ལ་དྲུག་གིས་བརྒྱན་པ་བཞུགས། །དེ་དག་གིས་ནི་ཐུན་མོང་དུ་བསྔོ་
བ་སྨོན་ལམ་དང་བཀྲ་ཤིས་ཀྱི་ཆོས་སྐོར་བཞུགས་པའི་རྣམ་གྲངས་རྣམས་བཀོད་ཟིན་ཏོ། །བསྔོ་བ་སྨོན་ལམ་དང་བཀྲ་ཤིས་ཀྱི་བསྟན་བཅོས་སྐབས་ཏེ་ལྔ་པའོ།། །།ཞར་ལས་བྱུང་བ་ཏོ་པ་ལ། བརྡ་སྤྲོད་པ་པཱ་ཎི་ནིའི་མདོ་སྒྲའི་གཙུག་ལག་ཐམས་ཅད་ཀྱི་
ཕྱི་མོ་ལྟ་བུར་གྱུར་པ་མཉམ་མེད་ཤཱཀྱའི་རྒྱལ་པོས་འཇམ་དཔལ་རྩ་བའི་རྒྱུད་སོགས་སུ་ལུང་བསྟན་པའི་བྲམ་ཟེ་པཱ་ཎི་ནི་ལ་འཇིག་རྟེན་དབང་ཕྱུག་གིས་དངོས་སུ་སྩལ་བ་པཱ་ཎི་ནི་བྱཱ་ཀ་ར་ཎ་གཞུང་འགྲེལ་གྱི་གོ་དོན་ཆོ་ག་དཔེར་བརྗོད་སོགས་རེག་ཟིག་ཏུ་བཀོད་པ་ལེགས་བཤད་
ནོར་བུ་འདྲེན་པའི་ཤིང་རྟ་ཞེས་བྱ་བ། སེའི་རིགས་ལ་འཁྲུངས་པ་ངག་དབང་ཕུན་ཚོགས་ལྷུན་གྲུབ་བམ། མིང་གཞན་ཚེ་དབང་རབ་བརྟན་རྡོ་རྗེར་བོད་པས་འཕགས་ཡུལ་ཀུ་རུ་ཀྵེ་ཏྲར་བྲམ་ཟེའི་རིགས་སུ་སྐུ་འཁྲུངས་པ་གནས་ལྔ་རིག་པའི་
เล่ม ๒๑๓ · หน้า 468a
པཎྜི་ཏ་ཆེན་པོ་བ་ལ་བྷ་དྲ་དང༌། གོ་ཀུ་ལ་ནཱ་ཐ་མི་ཤྲ་མཆེད་ཀྱི་དྲུང་དུ་ལེགས་པར་གསན་ཏེ་གཞུང་བོད་སྐད་དུ་བསྒྱུར། སློབ་དཔོན་རཱ་མ་ཙནྡྲས་མཛད་པའི་འགྲེལ་པ་པྲ་ཀྲཱྀ་ཡ་གཞིར་བཞག །ཀུན་བཤད་སོགས་ཆོ་ག་རྟོགས་དཀའ་
བ་རྣམས་ལ་མཁས་པའི་གསུང་རྒྱུན་གྱིས་བརྒྱན་པའོ། །པཱ་ཎིའི་གཞུང་འདི་གོང་གི་སྒྲ་རིག་པའི་བསྟན་བཅོས་ཀྱི་སྐབས་དེར་འཇུག་ཏུ་རུང་ནའང་ཕྱིས་སུ་རྙེད་ནས་འདིར་རྩ་འགྲེལ་སྟབས་སུ་བྲིས་པ་ཡིན་ནོ། །འདིར་སྨྲས་པ། ཐུབ་པ་(*ཆ་ཤས་ཅན་གྱི་གཟུགས་ཅན།) སྐྱེ་དགུ་ཡོངས་ཀྱི་བླ་མའི་དགོངས་
པ་དང༌། །གཞར་ཡང་མི་མཐུན་མེད་པར་ཡང་དག་བཀོད་པའི་ཆོས། །ངེས་པར་འབྱུང་བའི་གནས་གསུམ་གང་ལ་མངོན་ཕྱོགས་པར། །བདེ་བར་ཕྱིན་པར་བྱེད་ལ་ཆོས་ཀྱི་ཤིང་རྟ་བརླིང༌། །འདི་(*བསྡུས་ཤིང་མ་བསྡུས་པའི་གཟུགས་ཅན།) ཉིད་ལས་བྱུང་ལེགས་བཤད་
ཉི་མའི་ཐིགས་པ་རེ། །གང་དག་ཐོས་པ་འཛིན་བྱེད་སྦྲང་རྩིའི་སྣོད་དག་ཏུ། །ལྷུང་བའི་སྐལ་བ་བཟང་པོའི་འདབ་མ་ཡངས་བྱས་པའི། །ཕན་པ་དེ་ཡི་ཕ་རོལ་བརྗོད་པས་ཕྱིན་པ་མེད། །པདྨའི་(*སྲིད་མིན་གྱི་དཔེ།) གཉེན་གྱི་དཀྱིལ་འཁོར་གྱིས་
བསྐྱེད་མུན་པ་དང༌། །ལམ་གསུམ་འབབ་པའི་འཇུག་ངོགས་ལ་བརྟེན་སྐོམ་པ་བཞིན། །ཐོས་པའི་བློ་ཡིས་ཕུང་པོ་ཁམས་དང་སྐྱེ་མཆེད་སོགས། །ཤེས་བྱའི་མུན་པར་བྱས་པའི་གཏམ་ནི་ཆོས་ལ་མེད། །བླང་རྒྱུའི་གཟུགས་ཅན། དོར་ཡི་གེ་མ་འཁྲུགས་སྟོན་
ཕྱིར་དམིགས་བུ་སྟེ། །ཚུལ་མ་ཡིན་པར་ལྟུང་བ་ལས་འཛིན་དཔུང་པའི་འདབ། །དོན་མེད་མངོན་པར་འདུ་བྱེད་རེག་གཅོད་སྤུ་གྲིའི་རྣོ། །ཐར་བའི་བདེ་བ་དམ་པར་བསུ་ཕྱིར་གྲོགས་ཀྱི་མཆོག །ཐོས་(*དངོས་པོའི་རྒྱུའི་སྐྱེད་བྱེད་འགྲུབ་པའི་རྒྱུ།) པའི་ཆོས་དོན་བསམ་པ་ལས་
བྱུང་རྣམ་འབྱེད་ཀྱི། །འཁོར་ལོ་གང་གི་སྔ་རོལ་མ་ཤེས་ཤེས་པར་འགྱུར། །ལོག་ཤེས་དེ་བཞིན་འཕྱང་མོ་ཉུག་ལ་བརྟེན་པའི་བློ། །འགྲོལ་བའི་ལས་འདི་བློ་ལྡན་རྣམས་ཀྱི་སྙིང་ལ་གནས། །ཚུལ་བཞིན་
เล่ม ๒๑๓ · หน้า 468b
(*མ་བསྡུས་པའི་གཟུགས་ཅན།) བསྒོམས་པས་བརྡར་བ་བདག་མེད་རིག་པའི་མཚོན། །སྙིང་རྗེ་ཀུན་ནས་རྒྱས་པའི་ལག་པར་ཐོགས་པ་ན། །སྒྲིབ་པ་གསུམ་གྱི་དགྲ་སྡེ་ཡང་འབྱུང་མེད་པར་བཅོམ། །དོན་གཉིས་ལྡན་པའི་རྒྱལ་སྲིད་སྐྱོང་བའི་དབང་ཕྱུག་བྱེད། །(*ཡོན་ཏན་གྱི་རང་བཞིན་བརྗོད་པ།) དེ་བཞིན་དུ་ནི་ཀློག་
དང་འཛིན་འཆང་བྱ་བ་རེས། །རྟག་ཏུ་ཐམས་ཅད་མཁྱེན་པའི་ཆོས་ལ་ཆོས་ཀྱི་མིག །དྲི་མ་མེད་འགྱུར་སྨྲ་བའི་རོ་འཛིན་ཡངས་པར་བྱེད། །བསོད་ནམས་ཕུང་པོ་ནམ་མཁའི་མཐའ་ལ་འབྱམས་པར་སྤྱོད། །
དཀོན་པ་ཨུ་དུམྦ་(*དེ་ཉིད་བརྗོད་པའི་དཔེ།) རའི་མེ་ཏོག་མཚུངས་ཀྱང་དེ། །མ་ཡིན་འབྱུང་བར་དཀའ་ལ་ཕན་ཡོན་ཆེ་བའི་ཆོས། །འདོད་པའི་རེ་སྐོང་དབང་གི་རྒྱལ་པོ་འདྲ་ཡང་དེ། །མ་ཡིན་བླ་ན་མེད་པའི་དཔལ་གྱི་འབྱུང་གནས་སོ། །ཨེ་(*གཅིག་ལ་གཅིག་བརྟེན་གྱི་རབ་སྤེལ།) མ་འཁོར་བ་འདི་ནི་བཅུད་ཀྱིས་
དབེན་པ་ཡི། །གྲགས་པ་དེ་ཡང་ད་ནི་སྒྲ་མེད་གཉིད་ལ་ཡུར། །ལེགས་བཤད་སློང་བ་རྣམས་ཀྱི་དཔག་བསམ་ཤིང་ཆེན་ང༌། །འདི་ན་མཆིས་ཞེས་སྦྱིན་པའི་རྔ་ཆེན་བརྡུང་བ་སྙམ། །འཕགས་
ཡུལ་(*དངོས་མེད་ཀྱི་རྒྱུ་ལས་སྔ་ནས་མེད་པའི་བྱེད་རྒྱུ།) བགྲོད་པའི་གོམ་པ་གཅིག་ཅིག་བཀོད་པ་མེད། །ལང་ཚོའི་མཛེས་པ་ཉི་དང་ལྷགས་པར་མ་བྱིན་ཞིང༌། །བརྡ་སྤྲོད་མ་སྦྱངས་རྒྱ་གར་སྨ་ར་ཅན་གྱི་ཆོས། །ཐོབ་པའི་འགྲོ་བ་འདི་ནི་སྐལ་པ་ཨེ་མ་སྦོམ། །ཐམས་ཅད་མཁྱེན་པ་ཆེན་པོ་ཉི་མའི་
གཉེན་གྱི་བཀའ་ལུང་སྤྱི་དང་བྱེ་བྲག་གི་དགོངས་དོན་མ་ལུས་པ་རྣམ་པར་འགྲེལ་བའི་བསྟན་བཅོས་གངས་ཅན་པའི་སྐད་དུ་འགྱུར་རོ་འཚལ་གྱི་ཆོས་སྦྱིན་རྒྱུན་མི་ཆད་པའི་ངོ་མཚར་འཕྲུལ་གྱི་ཕྱི་མོ་རྫོགས་ལྡན་
བསྐལ་པའི་བསོད་ནམས་ཀྱི་སྤྲིན་ཕུང་རྒྱས་པར་དཀྲིགས་པའི་ཚུལ་ལས་བརྩམས་པའི་གཏམ་ངོ་མཚར་ཆུ་གཏེར་འཕེལ་བའི་ཟླ་བ་གསར་པ་ལས། དགོས་དོན་རྟོགས་པར་སླ་ཕྱིར་ཆོས་ཀྱི་བཞུགས་བྱང་སྨོས་པའི་སརྒ་སྟེ་བདུན་པའོ།། །
เล่ม ๒๑๓ · หน้า 469a
༄༅། །ནིརྤཱཔཾཧིམརཛསཉྩིཏྶམུཏྠཱཾ། སྭཱགཏྱཿཀུཤལགཎཱཔྤརཤཱིཏདྷཱརཱ། སཾབོདྷིརྒུཎཡཏཝེམཧཱསམུདྲེ། མུནྱེགྲཱནྨཏིཔརིཎཱམསམགྷཝཱཡཾ།།
༄༅། །(*ཆ་ཤས་ཀྱི་གཟུགས་ཅན།)སྡིག་བྲལ་ཀུན་ནས་སློང་བ་ཁ་བའི་རྡུལ་བརྩེགས་ལས། །ལེགས་པར་བབས་པའི་དགེ་ཚོགས་རབ་བསིལ་ཆུ་ཡི་རྒྱུན། །བྱང་ཆུབ་ཡོན་ཏན་རྒྱ་མཚོ་ཆེན་པོར་ངལ་བསོའི་སླད། །ཡོངས་བསྔོ་འདི་ནི་ཐུབ་མཆོག་ལས་བྱུང་བློ་གྲོས་ཡིན། །
เล่ม ๒๑๓ · หน้า 469b
(*དེ་ཉིད་བརྗོད་པའི་དཔེ།) འཁོར་བའི་གདུང་བ་འཕྲོག་པའི་རྒྱལ་པོ་དགེ་བ་ཉིད། །ཡིན་གྱི་མ་ལ་ཡར་སྐྱེས་དཔལ་གྱི་དུམ་བུ་མིན། །རྣམ་པ་ཐམས་ཅད་བསམས་ཀུན་འཇོ་བ་བསོད་ནམས་སྟོབས། །ཡིན་གྱི་འཇིག་རྟེན་ཕ་རོལ་འབྲས་མེད་དཔག་བསམ་མིན། །བསྐལ་(*གཟུགས་བརྙན་གྱི་དགའ་བ།) བ་རྒྱ་ལམ་རྙེད་དཀའ་དེ་བཞིན་གཤེགས་པ་
སྟེ། །དེ་དེའི་གསང་བ་རྣམ་གསུམ་མཚོན་པའི་ལེགས་བྱས་ཞིང༌། །སྐུ་དང་གསུང་དང་ཐུགས་ཀྱི་རྟེན་རབ་བསྐྲུན་པ་ཡིས། །བསོད་ནམས་ཕུང་པོས་འཇིག་རྟེན་ཀུན་དགའ་ཅི་ཡང་བསྐྱེད། །མཆོག་(*ཁྱད་འཕགས་ཕུལ་བྱུང༌།) ཏུ་སྟོན་པ་བླ་ན་མེད་པའི་ཞལ་གྱི་ལུང༌། །འདྲི་
དང་ཀློག་དང་ཀུན་ཆུབ་པ་དང་གཞན་ལ་སྟོན། །ཐོས་དང་དཔྱད་དང་བསྒོམས་པའི་བསོད་ནམས་ཕྱོགས་རེའི་མཐའ། །གཞལ་དུ་བླ་ན་ནམ་མཁའི་འདོམ་གྱིས་མཚོན་དུ་མེད། །དེ་(*ཆ་ཤས་ཅན་གྱི་གཟུགས་ཅན།) བས་ཀྱང་ནི་བཀའ་ལུང་དགོངས་པ་ཟབ་ཡངས་མའི། །ངོ་མཚར་ལྟད་མོ་མཐའ་དག་བླ་མེད་
བྱང་ཆུབ་བར། །བལྟ་བར་ནུས་པའི་བསྟན་བཅོས་འཇིག་རྟེན་ཀུན་གྱི་མིག །འགྲོ་ལ་ལེགས་པར་བྱིན་པའི་ཡོན་ཏན་དཔག་ནུས་མིན། །བསམ་(*སེམས་མེད་རབ་རྟོག།) གྱིས་མི་ཁྱབ་ཡོན་ཏན་སྙིང་པོ་དེ་དག་ཀྱང༌། །འཐོབ་པ་གླེགས་བམ་ཕྲེང་བ་འདི་དག་མ་བརྟེན་པར། །གཞན་
དུ་འཚོལ་བ་རྣམ་པར་རྨོངས་ཞེས་ཡི་གེ་དང༌། །མིང་དང་ཚིག་རྣམས་ཁྲེལ་བའི་གད་མོ་འབྱིན་པ་བཞིན། །མངོན་(*རབ་སྤེལ་གྱི་རྒྱན།) པར་འདུས་བྱས་དགེ་བ་མཁའ་ལྟར་རྒྱ་ཆེ་ཡང༌། །འབྲས་བུ་ཐམས་ཅད་མཁྱེན་པའི་ཁམས་སུ་བསྔོས་མིན་པ། །དེ་སྲིད་ལྟར་སྣང་བདེ་བས་འཐུང་
དང་སྡིག་པས་ཀྱང༌། །བྱང་ཆུབ་ལ་སྡང་དེ་ཡི་ཆོམ་རྐུན་བྱེད་ཀྱིས་དོགས། །(*བྱ་བའི་རང་བཞིན་བརྗོད་པ།) དེས་ན་སེམས་ཅན་ཀུན་གྱི་མཉེས་གཤིན་བྱང་ཆུབ་སེམས། །གང་དང་ཡང་དག་འགྲོགས་པའི་དམིགས་མེད་ཤེས་རབ་ཀྱི། །སྣང་ཆེན་ཀུན་ཏུ་འགྲོ་བས་དགེ་བའི་རྩ་བ་རྣམས། །བྱང་ཆུབ་མཆོག་ཏུ་ཡོངས་སུ་
བསྔོ་བ་རྣམ་གསལ་བྱེད། །སྤྱི་དོན་བརྒྱད་པ་བརྩམས་པ་དོན་ཡོད་ཆེད་དུ་དགེ་བ་བྱང་ཆུབ་ཏུ་བསྔོ་བ་ལ། ཕན་ཡོན་བསྟན་པ་དང༌། དེ་བྱང་ཆུབ་ཏུ་བསྔོ་བ་དངོས་སོ། །དང་པོ་ཕན་ཡོན་ནི། སྤྱིར་འཇིག་རྟེན་གསུམ་པོ་མ་ལུས་པ་ན་བསླུ་བ་མིན་པའི་སྐྱབས་ཀྱི་གནས་བླ་ན་
เล่ม ๒๑๓ · หน้า 470a
མེད་པ་དང༌། ཡོན་གྱི་གནས་བླ་ན་མེད་པར་གྱུར་པ་ནི་དཀོན་མཆོག་གསུམ་དང་མཚུངས་པ་འགའ་ཡང་ཡོད་པ་མ་ཡིན་ཏེ། ཆོས་ཐམས་ཅད་ཀྱི་རྒྱལ་པོའི་མདོ་ལས། ལྷ་དང་བཅས་པའི་འཇིག་རྟེན་ན། །དཀོན་མཆོག་གསུམ་པོ་མ་གཏོགས་པའི། །ཡོན་གྱི་གནས་འགའ་ཡོད་མ་
ཡིན། །ཞེས་སོ། །དེ་ཅིའི་ཕྱིར་ཞེ་ན། དེ་དག་ལ་མཆོད་པ་ཕུལ་བ་དང་གསོལ་བ་བཏབ་པ་ལ་སོགས་པས་བར་ཆད་མེད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་གོ་འཕང་བདེ་བླག་ཉིད་དུ་སྟེར་བའི་མཁྱེན་པ་དང་བརྩེ་བ་དང་ནུས་པའི་ཡོན་ཏན་མ་ལུས་པ་ལྷུན་གྱིས་གྲུབ་པའི་ཚུལ་
དུ་རྫོགས་པའི་ཕྱིར་རོ། །དེ་སྐད་དུ་ཡང༌། སངས་རྒྱས་ཕལ་པོ་ཆེ་ལས། རིགས་པར་ལྡན་པ་དཀོན་མཆོག་གསུམ་རྣམས་ལ། །སྦྱོར་བ་སྐྱེ་བ་མེད་པས་མཆོད་བྱས་ན། །དེ་དག་བདུད་བཞིའི་ལམ་ལས་རབ་འདས་ཏེ། །བྱང་ཆུབ་བླ་མེད་མྱུར་དུ་རེག་པར་འགྱུར། །ཞེས་གསུངས་སོ། །དེ་ལྟ་
བུའི་སྐྱབས་གནས་རྣམ་པ་གསུམ་གྱི་ནང་ནས་ཀྱང་སངས་རྒྱས་དཀོན་མཆོག་ནི་སྐྱབས་གཞན་དང་དབྱེར་མེད་ཀྱང་ཡིན་ཞིང༌། གཞན་གཉིས་ཀྱི་འབྱུང་གནས་ཀྱང་ཡིན་པའི་ཕྱིར་དང༌། ཐེག་པ་ཆེན་པོར་ཞུགས་པའི་གང་ཟག་གིས་གཏན་གྱི་སྐྱབས་གནས་ཉག་གཅིག་ཡིན་པའི་ཕྱིར་ཆེས་མཆོག་
ཏུ་གྱུར་པ་སྟེ། སོར་མོའི་ཕྲེང་བ་ལ་ཕན་པའི་མདོ་ལས། ཆོས་དང་དཀོན་མཆོག་དོན་གཅིག་སྟེ། །དེ་བཞིན་གཤེགས་པ་ཆོས་ཀྱི་སྐུ། །དགེ་འདུན་དེ་བཞིན་གཤེགས་ཀྱི་མིང༌། །དགེ་འདུན་གཉིས་ནི་དེ་བཞིན་གཤེགས། །ཆོས་དང་དགེ་འདུན་གཉིས་ནི་ཐབས་ཀྱི་སྐྱབས་ལེགས་ཏེ། །
དེ་བཞིན་གཤེགས་ནི་ཐབས་མེད་སྐྱབས་དང་དོན་དམ་སྐྱབས། །དེ་བཞིན་གཤེགས་པ་སྐྱབས་མེད་རྣམས་ནི་སྐྱབས་ལགས་ཏེ། །དེ་ཡི་སླད་དུ་དེ་བཞིན་གཤེགས་ལ་སྐྱབས་སུ་མཆི། །ཞེས་དང༌། རྒྱུད་བླ་མ་ལས། སྤང་ཕྱིར་བསླུ་བའི་ཆོས་ཅན་ཕྱིར། །མེད་ཕྱིར་འཇིགས་དང་བཅས་
པའི་ཕྱིར། །ཆོས་རྣམ་གཉིས་དང་འཕགས་པའི་ཚོགས། །གཏན་གྱི་སྐྱབས་མཆོག་མ་ཡིན་ནོ། །དམ་པའི་དོན་དུ་འགྲོ་བ་ཡི། །སྐྱབས་ནི་སངས་རྒྱས་ཉག་གཅིག་ཡིན། །ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཕྱིར། །འབྱུང་བ་དཀོན་མཆོག་དྲི་མེད་ཕྱིར། །
เล่ม ๒๑๓ · หน้า 470b
མཐུ་ལྡན་ཕྱིར་དང་འཇིག་རྟེན་གྱི། །རྒྱན་གྱུར་ཕྱིར་དང་མཆོག་ཉིད་ཕྱིར། །འགྱུར་བ་མེད་ཕྱིར་དཀོན་མཆོག་ཉིད། །ཅེས་སོ། །དེ་ལྟ་བུའི་ཡོན་ཏན་དཔག་ཏུ་མེད་པ་དང་ལྡན་ཡང་གདུལ་བར་བྱ་བ་སེམས་ཅན་དངོས་དང་བརྒྱུད་པས་དེ་བཞིན་གཤེགས་པ་ལ་མཆོད་པས་མཉེས་པར་
བྱས་པ་ལ་སོགས་པ་བསོད་ནམས་ཀྱི་སྐལ་བ་དང་ལྡན་པ་རྣམས་ཡོངས་སུ་སྨིན་པར་འགྱུར་གྱི། སྐལ་བ་དང་མི་ལྡན་པ་རྣམས་ནི་དེ་ལྟ་མ་ཡིན་ཏེ། དཔེར་ན་ཉི་མའི་དཀྱིལ་འཁོར་ལེགས་པར་ཤར་བ་ནའང་པདྨ་ཁ་འབྱེད་པའི་དུས་སུ་བབ་པ་རྣམས་ཡོངས་སུ་ཁ་འབྱེད་ཀྱི། དུས་སུ་མ་
བབ་པ་རྣམས་ལ་ནི་མ་ཡིན་པ་ལྟར་རོ། །དེ་ལྟར་ཡང་མདོ་ལས། ཇི་ལྟར་ཉི་མ་ཤར་བ་ན། །ཡོངས་སྨིན་པདྨ་ཁ་འབྱེད་ལྟར། །དེ་བཞིན་དེ་བཞིན་གཤེགས་བྱུང་ཡང༌། །བསམ་པ་ཡོངས་དག་ཁོ་ན་སྦྱོང༌། །ཞེས་སོ། །དེས་ན་དེ་བཞིན་གཤེགས་པ་དོན་གཉིས་མཐར་ཕྱིན་པའི་
བདག་ཉིད་ཅན་གྱི་བསོད་ནམས་བརྒྱ་པའི་མཚན་གྱིས་བརྒྱན་པའི་སྐུ་དང་གསུང་དང་ཐུགས་ཀྱི་རྟེན་དུ་གཏོགས་པ་གང་དག་བཞེངས་པ་དང་དེ་དག་ལ་བརྟེན་ནས་ཚོགས་བསགས་པ་ལ་སོགས་པ་དགེ་བའི་རྩ་བ་བསྐྲུན་པའི་ཕན་ཡོན་བརྗོད་ཀྱིས་མི་ལྡང་བ་བཀའ་དང་བསྟན་བཅོས་རྣམས་
སུ་རྒྱ་ཆེར་འབྱུང་བ་ལས། འདིར་མདོ་ཙམ་ཞིག་བསྙད་ན། དང་པོ་སྐུའི་རྟེན་ནི་དེ་བཞིན་གཤེགས་པའི་སྐུ་གཟུགས་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པ། རྒྱུ་རིན་པོ་ཆེ་ལ་སོགས་པ་གང་ཡང་རུང་བ་ལས་བྱས་པའམ་རི་མོར་བྲིས་པའི་བསོད་ནམས་ཀྱིས་དགེ་བའི་རྩ་བ་
ཤིན་ཏུ་སྟོབས་ཆེ་བ་མང་པོ་བསྒྲུབ་པར་དཀའ་བའི་ཏིང་ངེ་འཛིན་གྱི་མཆོག་ཀྱང་རིང་པོར་མི་ཐོགས་པར་འགྲུབ་པར་འགྱུར་ཏེ། ཏིང་ངེ་འཛིན་རྒྱལ་པོའི་མདོ་ལས། སངས་རྒྱས་སྐུ་གཟུགས་ཤིན་ཏུ་མཛེས་པ་དག །རིན་ཆེན་བྱི་དོར་ལེགས་པར་བྱས་པ་ཡང༌། །ལྟ་ན་སྡུག་ཅིང་ཤིན་
ཏུ་མཛེས་པར་གྱིས། །རིང་པོར་མི་ཐོགས་ཏིང་འཛིན་མཆོག་འདི་ཐོབ། །དེ་བཞིན་གསེར་དག་དང་ནི་དངུལ་དག་དང༌། །ཙནྡན་གྱི་ནི་སྐུ་གཟུགས་བཟང་པོ་དག །མཛེས་ཤིང་ཤིན་ཏུ་ལྟ་ན་སྡུག་པ་གྱིས། །རིང་པོར་མི་ཐོགས་ཏིང་འཛིན་མཆོག་འདི་ཐོབ། །འཇིམ་པ་དང་ནི་དེ་
เล่ม ๒๑๓ · หน้า 471a
བཞིན་རྡོ་བ་དང༌། །ཤིང་ལ་རི་མོར་བྲིས་པའི་སྐུ་གཟུགས་ཀྱང༌། །མཛེས་ཤིང་ཤིན་ཏུ་ལྟ་ན་སྡུག་པ་གྱིས། །རིང་པོར་མི་ཐོགས་ཏིང་འཛིན་མཆོག་འདི་ཐོབ། །ཅེས་དང༌། དམ་པའི་ཆོས་པདྨ་དཀར་པོ་ལས། ལ་ལས་དེ་བཞིན་རིན་ཆེན་གཟུགས་བྱས་པ། །
སུམ་ཅུ་རྩ་གཉིས་མཚན་དང་ལྡན་པའི་གཟུགས། །གང་གིས་དེ་ཕྱིར་བྱས་པ་དེ་དག་ཀྱང༌། །དེ་དག་ཐམས་ཅད་བྱང་ཆུབ་ཐོབ་པར་གྱུར། །ལ་ལས་དེར་ནི་རིན་ཆེན་སྣ་བདུན་དང༌། །ལ་ལས་དེ་བཞིན་ཟངས་དང་ཁར་བ་ལས། །བདེ་བར་གཤེགས་པ་རྣམས་ཀྱི་གཟུགས་བྱས་པ། །
དེ་དག་ཐམས་ཅད་བྱང་ཆུབ་ཐོབ་པར་གྱུར། །རོ་ཉེ་དང་ནི་ལྕགས་སམ་ས་ཡང་རུང༌། །བདེ་བར་གཤེགས་པ་རྣམས་ཀྱི་གཟུགས་བྱས་ཏེ། །ལྟ་ན་སྡུག་པ་འཇིམ་པའི་ལས་བྱེད་བཅུག །དེ་དག་ཐམས་ཅད་བྱང་ཆུབ་ཐོབ་པར་གྱུར། །གང་གིས་རྩིག་ངོས་གཟུགས་ཀྱི་རི་མོ་
དག ། བསོད་ནམས་བརྒྱ་མཚན་ཡོངས་སུ་རྫོགས་པའི་སྐུ། །བདག་གིས་བྲིས་སམ་འདྲི་རུ་བཅུག་ཀྱང་རུང༌། །དེ་དག་ཐམས་ཅད་བྱང་ཆུབ་ཐོབ་པར་གྱུར། །ཞེས་དང༌། གཞན་ཡང་དེ་བཞིན་གཤེགས་པ་ལས་གཞན་པའི་མཆོད་པའི་འོས་སུ་གྱུར་པ་མཐའ་དག་ལ་བསྐལ་པ་བགྲང་
བ་ལས་འདས་པ་མང་པོར་བསོད་སྙོམས་ཕུལ་བ་བས་ཀྱང་བསོད་ནམས་ཆེས་མང་དུ་འཐོབ་པར་འགྱུར་ཏེ། དད་པའི་སྟོབས་བསྐྱེད་པ་ལ་འཇུག་པའི་ཕྱག་རྒྱའི་མདོ་ལས། འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འཇིག་རྟེན་གྱི་ཁམས་
ཐམས་ཅད་ཀྱི་རྡུལ་སྙེད་ཀྱི་རང་སངས་རྒྱས་དག་ལ་ཉིན་གཅིག་བཞིན་དུ་ལྷའི་ཞལ་ཟས་རོ་བརྒྱ་དང་ལྡན་པ་བྱིན་པ་དང༌། དེ་བཞིན་དུ་ལྷའི་གོས་རྣམས་སྦྱིན་པར་བྱིན་པ་བས། འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གཞན་གང་ལ་ལ་ཞིག་སངས་རྒྱས་ཀྱི་སྐུ་གཟུགས་གཅིག་རི་མོར་
བྲིས་པ་འདི་ནི་དེ་བས་བསོད་ནམས་གྲངས་མེད་པར་བསྐྱེད་དོ་ཞེས་དང༌། སངས་རྒྱས་ཀྱི་སྐུ་གཟུགས་བྱས་པས་ཚེ་རབས་རྟག་ཏུ་སངས་རྒྱས་དང་ཕྲད་པར་འགྱུར་བའང་ཀླུའི་རྒྱལ་པོ་རྒྱ་མཚོས་ཞུས་པ་ལས། ཀླུའི་བདག་པོ་བྱང་ཆུབ་སེམས་དཔའ་ཆོས་བརྒྱད་དང་ལྡན་ན་རྟག་ཏུ་རྒྱུན་མི་ཆད་པར་སངས་
เล่ม ๒๑๓ · หน้า 471b
རྒྱས་དང་ཕྲད་པ་འཐོབ་བོ། །བརྒྱད་གང་ཞེ་ན། སེམས་ཅན་སངས་རྒྱས་ཀྱི་གཟུགས་ལ་ལྟ་བ་ཡང་དག་པར་འཛིན་དུ་འཇུག་པ་དང༌། དེ་བཞིན་གཤེགས་པ་ལ་རིམ་གྲོ་བྱེད་པ་དང༌། རྒྱུན་མི་ཆད་པར་དེ་བཞིན་གཤེགས་པའི་བསྔགས་པ་བརྗོད་པ་དང༌། དེ་བཞིན་གཤེགས་
པའི་སྐུ་གཟུགས་བྱེད་པ་དང༌། སེམས་ཅན་ཐམས་ཅད་དེ་བཞིན་གཤེགས་པ་ལ་ལྟ་བ་ཡང་དག་པར་འཛིན་དུ་འཇུག་པ་དང༌། སངས་རྒྱས་ཀྱི་ཞིང་གང་ན་དེ་བཞིན་གཤེགས་པའི་སྒྲ་གྲག་པའི་སངས་རྒྱས་ཀྱི་ཞིང་དེར་སྨོན་ལམ་འདེབས་པ་དང༌། རྒྱུན་ཞུམ་པ་མེད་པ་དང༌། རྒྱུན་
རྒྱ་ཆེན་པོར་གྱུར་ནས་སངས་རྒྱས་ཀྱི་ཡེ་ཤེས་འཚོལ་བའོ་ཞེས་དང༌། འཕགས་པ་སངས་རྒྱས་ཀྱི་སྟོབས་བསྐྱེད་པ་ཆོ་འཕྲུལ་རྣམ་པར་འཕྲུལ་བ་ལས། མཆོད་རྟེན་དང་ནི་རི་མོ་དང༌། །སྐུ་གཟུགས་བྱེད་དུ་གཞུག་པ་དང༌། །མཆོད་དང་བཀུར་སྟི་བྱ་བའི་ཕྱིར། །གང་དག་མཚན་ནི་
དྲན་བྱེད་པ། །བྱང་ཆུབ་ཕྱིར་ནི་གནས་པ་རྣམས། །ཐམས་ཅད་ཐར་པ་ཐོབ་པར་འགྱུར། །ཞེས་སོ། །དེ་ནི་མངལ་གྱི་དྲི་མས་མི་གོས་པར་སྐྱེ་བར་ཡང་འགྱུར་ཏེ། དཀོན་མཆོག་སྤྲིན་གྱི་མདོ་ལས། རིགས་ཀྱི་བུ་ཆོས་བཅུ་དང་ལྡན་ན་མངལ་གྱི་དྲི་མས་མི་གོས་པར་སྐྱེའོ། །བཅུ་
གང་ཞེ་ན། འདི་ལྟ་སྟེ། དེ་བཞིན་གཤེགས་པའི་སྐུ་གཟུགས་བྱེད་པ་དང༌། མཆོད་རྟེན་ཞིག་པ་འཆོས་པ་དང༌། དེ་བཞིན་གཤེགས་པའི་མཆོད་རྟེན་དག་ལ་སྤོས་ཀྱི་ཕྱུག་པ་འབུལ་བ་དང༌། དེ་བཞིན་གཤེགས་པའི་སྐུ་གཟུགས་དག་ལ་ཁྲུས་ཀྱི་སྤོས་ཆུ་འབུལ་བ་དང༌། དེ་བཞིན་
གཤེགས་པའི་མཆོད་རྟེན་དག་ལ་ཕྱག་དར་རྐྱང་ནུལ་གྱི་བྱ་བ་འབུལ་བ་དང༌། ཕ་མ་ལ་ལུས་ཀྱི་རིམ་གྲོ་བྱེད་པ་དང༌། མཁན་པོ་དང་སློབ་དཔོན་དག་ལ་ལུས་ཀྱི་རིམ་གྲོ་བྱེད་པ་དང༌། ཚངས་པ་མཚུངས་པར་སྤྱོད་པ་རྣམས་ལ་ལུས་ཀྱི་རིམ་གྲོ་བྱེད་པ་དང༌། དེ་ཡང་ཟང་ཟིང་མེད་པའི་སེམས་
ཀྱིས་ཏེ་ཟང་ཟིང་དང་བཅས་པས་མ་ཡིན་པ་དང༌། དགེ་བའི་རྩ་བ་དེ་ཡང་དེ་ལྟར་བྱས་པའི་དགེ་བའི་རྩ་བ་འདིས་སེམས་ཅན་ཐམས་ཅད་མངལ་གྱི་དྲི་མས་མི་གོས་པར་སྐྱེ་བར་གྱུར་ཅིག་ཅེས་བསྔོ་བའོ་ཞེས་སོ། །སྐྱེ་བོ་གང་ལ་ལས་ཆོས་སྤོང་བའི་ལས་ཐམས་ཅད་དང༌། མཚམས་མེད་པ་
เล่ม ๒๑๓ · หน้า 472a
ལྔ་ལ་སོགས་པའི་ལས་ཀྱི་སྒྲིབ་པ་ཇི་སྙེད་བསགས་པ་དང༌། ངན་སོང་ཏུ་འགྲོ་བ་དང་སྐྱེས་པ་རྣམས་ཀྱི་ཕྱིར་དུ་ཡང་དེ་བཞིན་གཤེགས་པའི་སྐུ་གཟུགས་བྱས་པས་ཡོངས་སུ་བྱང་ཞིང་བསྐལ་པར་གནས་པའི་ལས་ཀྱི་སྒྲིབ་པ་ཐམས་ཅད་དག་པར་ཡང་འགྱུར་ཏེ། སངས་
རྒྱས་ཀྱི་སྟོབས་བསྐྱེད་པ་ཆོ་འཕྲུལ་རྣམ་པར་འཕྲུལ་པའི་མདོ་ལས། རྒྱལ་པོ་ཆེན་པོ་དེ་བཞིན་གཤེགས་པ་དེ་དག་མྱ་ངན་ལས་འདས་ནས་ལོ་བྱེ་བ་ཁྲག་ཁྲིག་བརྒྱ་སྟོང་ལོན་པའམ། མྱ་ངན་ལས་འདས་ནས་བསྐལ་པ་བརྒྱ་ལོན་པའི་སངས་རྒྱས་བཅོམ་ལྡན་འདས་རྣམས་ཀྱི་མཚན་བཟུང་
བ་དང༌། རིང་བསྲེལ་གྱི་མཆོད་རྟེན་བྱེད་དུ་འཇུག་པ་དང༌། རི་མོ་དང་སྐུ་གཟུགས་བྱེད་དུ་འཇུག་པ་དང༌། མར་མེ་དང༌། སྤོས་དང༌། མེ་ཏོག་དང༌། དྲི་དང༌། བྱུག་པ་རྣམས་ཀྱིས་མཆོད་ཅིང་བཀུར་སྟི་བྱས་པ་དང༌། བསླབ་པ་འཛིན་པ་དང༌། བརྟུལ་ཞུགས་དང༌། དཀའ་ཐུབ་དང༌།
སྡོམ་པ་དང༌། ཉེ་བར་གནས་པ་རྣམས་ཀྱིས་སེམས་ཅན་ཐམས་ཅད་ངན་སོང་དང༌། ངན་འགྲོ་ཐམས་ཅད་ལས་ཡོངས་སུ་གྲོལ་བར་འགྱུར་རོ། །བསྐལ་པར་གནས་པའི་ལས་ཀྱི་སྒྲིབ་པ་མཚམས་མེད་པ་ལྔ་ལ་སོགས་པ་ཡང་ཡོངས་སུ་དག་པར་འགྱུར་ཏེ། བདེ་འགྲོར་འགྲོ་བར་འགྱུར་
ཞིང་ངན་འགྲོར་འགྲོ་བར་མི་འགྱུར་བ་ནས་རིམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་མངོན་པར་རྫོགས་པར་འཚང་རྒྱའོ། །གཞན་ཡང་སངས་རྒྱས་ཀྱི་སྐུ་གཟུགས་བྱས་པས་ཆེད་དུ་སྦྱིན་པ་པོ་ལ་ཕན་ཡོན་གྱི་ཚོགས་ཆེན་པོ་ལྔ་ཡང་ཐོབ་པར་འགྱུར་ཏེ། དེ་བཞིན་གཤེགས་
པའི་སྐུ་བརྙན་བཞག་པའི་ཕན་ཡོན་ཡང་དག་པར་བརྗོད་པ་ཞེས་བྱ་བའི་ཆོས་ཀྱི་རྣམ་གྲངས་ལས། དགེ་སློང་དག་དེ་བཞིན་གཤེགས་པའི་གཟུགས་བརྙན་བྱེད་པའི་གང་ཟག་སྦྱིན་པ་པོ་ལ་ཕན་ཡོན་འདི་ལྔ་ཡོད་དེ། ལྔ་གང་ཞེ་ན། གཞལ་མེད་ཁང་ཆེན་པོར་གནས་པ་དང༌། བོང་སྟོད་བཟང་
པོར་གྲགས་པ་དང༌། སྤྲོ་བ་མང་བ་དང༌། ཚེ་རིང་བ་དང༌། གྲགས་པ་དང་ལྡན་པ་དང༌། བདེ་བར་མང་བ་སྟེ། དགེ་སློང་དག་འདི་ནི་དེ་བཞིན་གཤེགས་པའི་གཟུགས་བརྙན་བྱེད་པའི་གང་ཟག་སྦྱིན་པ་པོའི་ཕན་ཡོན་དང་པོ་ཡིན་ནོ། །གཞན་ཡང་ཕྱུག་པོ་དང༌། ནོར་མང་བ་དང༌། ལོངས་
เล่ม ๒๑๓ · หน้า 472b
སྤྱོད་ཆེ་བ་དང༌། ནོར་རྫས་དང༌། ཡོ་བྱད་མང་བ་དང༌། བདག་དབང་བ་བདག་གིར་བྱ་བ་མང་བ་དང༌། ནོར་དང༌། འབྲུ་དང༌། དབྱིག་དང༌། གསེར་དང༌། མཛོད་དང༌། བང་བའི་ཚོགས་མང་བ་དང༌། རྟ་དང༌། གླང་པོ་ཆེ་དང༌། བ་ལང་དང༌། ལུག་དང༌། བྲན་དང༌། བྲན་
མོ་དང༌། ལས་བྱེད་པ་དང༌། ཞོ་ཤས་འཚོ་བ་མང་བ་དང༌། བློན་པོ་དང༌། མཛའ་བཤེས་དང༌། གཉེན་དང༌། སྣག་གི་གཉེན་མཚམས་མང་པོར་འགྱུར་ཏེ། དགེ་སློང་དག་འདི་ནི་དེ་བཞིན་གཤེགས་པའི་གཟུགས་བརྙན་བྱེད་པའི་གང་ཟག་སྦྱིན་པ་པོའི་ཕན་ཡོན་གཉིས་པ་ཡིན་
ནོ། །དགེ་སློང་དག་གཞན་ཡང་གཟུགས་བཟང་པོ་དང༌། བལྟ་ན་སྡུག་པ་དང༌། མཛེས་པ་དང༌། མདོག་གསེར་ལྟར་བཟང་བ་དང༌། མགོ་གདུགས་ལྟར་ཟླུམ་པ་དང༌། ལག་པ་རིང་བ་དང༌། དཔྲལ་བ་དབྱེས་ཆེ་བ་དང༌། སྨིན་མཚམས་བར་མ་ཆད་པ་དང༌། ཡན་ལག་ཉིང་
ལག་ཐམས་ཅད་དང་ལྡན་པ་དང༌། རྒྱན་ཐམས་ཅད་ཀྱིས་བརྒྱན་པར་འགྱུར་ཏེ། དགེ་སློང་དག་འདི་དག་ནི་དེ་བཞིན་གཤེགས་པའི་གཟུགས་བརྙན་བྱེད་པའི་གང་ཟག་སྦྱིན་པ་པོའི་ཕན་ཡོན་གསུམ་པ་ཡིན་ནོ། །དགེ་སློང་དག་གཞན་ཡང་འཁོར་ལོས་སྒྱུར་བའི་རྒྱལ་པོ་འཁོར་བཟང་པོ་རིན་
པོ་ཆེ་སྣ་བདུན་དང་ལྡན་པ་དང༌། བུ་སྟོང་གིས་བསྐོར་བར་འགྱུར་ཏེ། དེའི་བུའམ། ཆུང་མའམ། བྲན་ནམ། ཉེ་བར་འཚོ་བ་གང་ཡིན་པ་དེ་དག་ཐམས་ཅད་དེ་ལ་གུས་པར་ཉན་པ་དང༌། བཀའ་ཉན་པར་བྱེད་དེ། དགེ་སློང་དག་འདི་ནི་དེ་བཞིན་གཤེགས་པའི་གཟུགས་བརྙན་བྱེད་པའི་གང་
ཟག་སྦྱིན་པ་པོའི་ཕན་ཡོན་བཞི་པ་ཡིན་ནོ། །དགེ་སློང་དག་གཞན་ཡང་དེ་ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་གྱི་ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། དེར་སྐྱེས་ནས་ལྷའི་རྒྱལ་པོ་ཁྱད་པར་ཅན་ལྷ་དང༌། ལྷའི་བུ་དང་ལྷའི་བུ་མོ་རྣམས་ཀྱི་རྟེན་དུ་འགྱུར་ལ། གནས་བཅུ་པོ་
ལྷའི་ཚེ་དང༌། ལྷའི་མདོག་དང༌། ལྷའི་སྟོབས་དང༌། ལྷའི་བདེ་བ་དང༌། ལྷའི་དབང་ཕྱུག་ལ་དབང་བྱེད་པ་དང༌། ལྷའི་གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་རྣམས་ཀྱིས་དགའ་བར་བྱེད་དེ། དགེ་སློང་དག་འདི་ནི་དེ་བཞིན་གཤེགས་པའི་གཟུགས་བརྙན་བྱེད་པའི་གང་ཟག་
เล่ม ๒๑๓ · หน้า 473a
སྦྱིན་པ་པོའི་ཕན་ཡོན་ལྔ་པ་ཡིན་ནོ་ཞེས་དང༌། སྟོན་པའི་སྐུ་གཟུགས་མཚན་ཉིད་དང་ལྡན་པར་བྱས་པས། མཚན་སུམ་ཅུ་རྩ་གཉིས་དང་ལྡན་པའི་ལུས་ཀྱི་མཆོག་ཐོབ་པ་དང་ཀུན་གྱི་མཆོད་པའི་གནས་སུ་འགྱུར་ཏེ། འཕགས་པ་སྤྱན་རས་གཟིགས་ཀྱི་མདོ་ལས། གང་ཞིག་
སྟོན་པ་མི་མཆོག་གཟུགས་བྱེད་པ། །རས་འདྲི་རྩིག་ངོས་འདྲིའམ་གསེར་ལས་བྱས། །དེ་ཡི་ཆོས་ཀྱི་ཁྱད་པར་གང་ཡིན་པ། །དེ་དག་མ་ལུས་རབ་ཏུ་བསྟན་གྱིས་ཉོན། །དེ་ནི་བལྟ་མིན་ལོང་བར་ཞར་མི་འགྱུར། །སྒུར་བོར་མི་འགྱུར་ཡན་ལག་མི་སྡུག་མིན། །དེ་ནི་གཟུགས་དང་ལྡན་ཞིང་ཁ་
དོག་ལྡན། །སུམ་ཅུ་རྩ་གཉིས་མཚན་གྱི་གོ་ཆར་འགྱུར། །ལུས་ནི་རྣམ་པར་དག་ཅིང་ཁྱད་པར་འཐོབ། །སྤོབས་པ་འཐོབ་ཅིང་སྒྲ་སྙན་ཡིད་དུ་འོང༌། །ཤེས་བཞིན་ལྡན་ཞིང་འཇིག་རྟེན་ཀུན་གྱི་གཙོ། །དེ་མཐོང་སེམས་ཅན་བདེ་ཞིང་དགའ་བར་འགྱུར། །སྡིག་བྱེད་མི་འགྱུར་ཞེ་སྡང་མེད་
སེམས་ལྡན། །གཡོ་མེད་མི་བརྐུ་རྒྱལ་པོ་འཁྲུག་མི་བྱེད། །མཐུ་དང་ལྡན་ཞིང་དབང་ཆེ་གྲགས་པར་འགྱུར། །བྱམས་ལ་གནས་ཤིང་མི་དམན་སེམས་དང་ལྡན། །འདྲེན་པའི་སྐུ་གཟུགས་རབ་ཏུ་མཛེས་བྱས་ན། །དེ་ནི་མཆོག་འགྱུར་སྐྱེ་བོ་མང་མཆོད་འོས། །བློ་ལྡན་ཕྱུག་ཅིང་དེ་ཉིད་རྒྱ་ཆེར་
ལྡན། །དབང་ལྡན་འཁོར་ལོས་སྒྱུར་བའི་རྒྱལ་པོར་འགྱུར། །འདྲེན་པའི་སྐུ་གཟུགས་རབ་ཏུ་མཛེས་བྱས་ན། །ལྷ་ཡི་དབང་པོ་དབང་ཕྱུག་དབང་ཐོབ་པ། །ལྷུན་པོའི་ཟོམ་ན་དབང་ཐོབ་བརྒྱ་བྱིན་འགྱུར། །བདག་པོ་ལྷུན་པོའི་ཟོམ་ན་རྒྱལ་སྲིད་སྟོན། །དེ་ནི་དྲན་དང་བློ་གྲོས་མི་ལྡན་མིན། །དེ་
ནི་རྟོགས་མོས་ཤེས་རབ་ཚང་བར་འགྱུར། །འཇིག་རྟེན་ཀུན་ན་དབུགས་ཕྱིན་ཐོབ་འགྱུར་ཏེ། །འདི་ནི་ཡེ་ཤེས་ལྡན་ཞིང་དམྱལ་བ་སྤངས། །སེམས་ཅན་སྙིང་པོ་མཚུངས་མེད་མཆོད་བྱས་ན། །དུད་འགྲོའི་སྐྱེ་གནས་གཤིན་རྗེའི་ཡུལ་མི་འགྲོ། །ངན་འགྲོ་གསུམ་པོ་དེས་ནི་རྣམ་སྤངས་ཏེ། །
བདག་དེར་ཕྱིས་མི་སྐྱེ་བར་ཤེས་པར་འགྱུར། །འདྲེན་པའི་སྐུ་གཟུགས་རབ་ཏུ་མཛེས་བྱས་ན། །དབང་ལྡན་དབང་ཕྱུག་ཉིད་ཀྱི་ལྷར་འགྱུར་ཏེ། །མི་དམན་དགའ་བའི་སེམས་ཀྱིས་སངས་རྒྱས་མཆོད། །རྒྱལ་བ་མཆོག་གི་བསྟན་ལ་དད་པར་འགྱུར། །ཚངས་པའི་འཇིག་རྟེན་དབང་ཐོབ་ཚངས་པར་
เล่ม ๒๑๓ · หน้า 473b
འགྱུར། །ཡིད་འོང་ཤིན་ཏུ་མཛེས་པའི་སྤོས་ངད་ལྡན། །འཛམ་བུའི་ཀླུང་གསེར་འོད་བྱེད་དགའ་འགྱུར་བའི། །གཞལ་མེད་ཁང་མཆོག་བལྟ་སྡུག་ཐོབ་པར་འགྱུར། །ཞེས་དང༌། ཁྱད་པར་གསང་སྔགས་ཀྱི་རྒྱུད་སྡེ་རིན་པོ་ཆེ་རྣམས་ཀྱི་བདེ་མཆོག་སྡོམ་པ་འབྱུང་བ་ལས། སྔགས་པ་
ལས་ནི་དང་པོ་པས། །གཟུགས་བརྙན་ལ་སོགས་བྱ་བ་སྟེ། །བྲིས་སྐུ་བསྒྲུབས་ན་མྱུར་བར་ནི། །དངོས་གྲུབ་རྒྱ་ཆེན་ཐོབ་པར་འགྱུར། །ཞེས་དང༌། གཞན་ཡང་དཔལ་ཀྱེ་རྡོ་རྗེ་དང༌། དུས་ཀྱི་འཁོར་ལོ་དང༌། འཇམ་དཔལ་རྩ་བའི་རྒྱུད་དང༌། གཤིན་རྗེའི་གཤེད་དང༌། ངན་སོང་སྦྱོང་བའི་རྒྱུད་
རྣམས་ལས་ཐུན་མོང་དང་ཐུན་མོང་མ་ཡིན་པའི་རས་བྲིས་བྲི་བའི་ཚུལ་དང༌། དེ་དག་གི་ཕན་ཡོན་དང་བཅས་པ་རྒྱ་ཆེར་གསུངས་པ་རྣམས་ཀྱི་སྟེང་དུ་རྟོགས་པར་བྱ་བས་ཤེས་པ་དང༌། གཞན་ཡང་དེ་བཞིན་གཤེགས་པ་ལ་དད་པའི་སྒོ་ནས་སྐུ་གཟུགས་དང་མཆོད་རྟེན་བྱས་པའི་རྒྱུ་ལ་རྡུལ་ཕྲ་རབ་ཀྱི་གྲངས་ཅི་ཙམ་
སོང་བ་དེ་སྙེད་ཀྱི་གྲངས་དང་མཉམ་པའི་ལྷ་དང་མིའི་རྒྱལ་སྲིད་ཆེན་པོ་ཐོབ་པ་དང༌། ཡིད་དུ་འོང་བའི་གཟུགས་དང་ལང་ཚོར་ལྡན་ཞིང་དབང་པོ་དུལ་བ་དང༌། བདེ་བ་དང༌། འབྱོར་པ་རྒྱས་པ་དང༌། གསུང་རབ་མང་པོའི་ཚིག་དང་དོན་ལ་མཁས་པ་དང༌། ཏིང་ངེ་འཛིན་གྲུབ་པ་ལ་སོགས་པ་ཡོན་ཏན་མང་པོ་དང་
ལྡན་པ་དང༌། སྡུག་བསྔལ་ཐམས་ཅད་དང་བྲལ་ནས་བྱང་ཆུབ་དམ་པ་ཐོབ་པ་ལ་སོགས་པ་གནས་སྐབས་དང་མཐར་ཐུག་གི་བདེ་ལེགས་ཐམས་ཅད་འབྱུང་བར་འགྱུར་བ་ཉིད་དེ། གསལ་རྒྱལ་གྱིས་ཞུས་པའི་ཚིགས་སུ་བཅད་པ་ལས། བཅོམ་ལྡན་འདས་ཀྱི་མཆོད་རྟེན་རྣམས་དང་ནི། །
སྐུ་གཟུགས་རྣམས་ལ་རྡུལ་ཕྲན་ཅི་སོང་བ། །དེ་ཡི་གྲངས་སྙེད་དེ་བྱེད་མི་རྣམས་ཀྱིས། །ལྷ་ཡུལ་ས་སྟེངས་ངེས་པར་རྒྱལ་སྲིད་འཐོབ། །གཟུགས་དང་གཟུགས་མེད་ཁམས་ཀྱི་ཏིང་ངེ་འཛིན། །ཕུན་སུམ་ཚོགས་པའི་ས་མཆོག་ཀུན་མྱོང་ནས། །ཐ་མར་སྐྱེ་དང་རྒ་ལ་སོགས་པ་
ཡི། །སྡུག་བསྔལ་མེད་པའི་སངས་རྒྱས་གོ་འཕང་འཐོབ། །སུ་དག་འདིར་ནི་རྒྱལ་བའི་གཟུགས་བྱེད་པ། །དེ་དག་གཟུགས་བཟང་ཡིད་འོང་ཡོན་ཏན་ལྡན། །དབང་པོ་བསྡམས་ཤིང་འོད་འབར་ཉི་མ་བཞིན། །འཇིག་རྟེན་དག་ན་མིག་ཏུ་སྡུག་པར་འགྱུར། །སུ་དག་བདེ་བར་
เล่ม ๒๑๓ · หน้า 474a
གཤེགས་པའི་གཟུགས་བྱེད་པ། །དེ་ཡི་ལུས་ནི་དྲི་མ་མེད་པ་དང༌། །པདྨའི་སྙིང་པོ་ལྟ་བུར་འཇམ་ཞིང་ཡངས། །ནད་དང་མྱ་ངན་སྡུག་བསྔལ་འཇིགས་ལས་ཐར། །སུ་ཞིག་འཇིག་རྟེན་མགོན་པོའི་གཟུགས་བྱེད་པ། །བྲན་དུ་མི་སྐྱེ་མངག་གཞུག་སྐྱེ་མི་
འགྱུར། །དབུལ་པོར་མི་འགྱུར་རིགས་དམན་མི་འགྱུར་ཞིང༌། །དབང་པོ་རྣམས་ཀྱང་ཉམས་པར་ཡོངས་མི་འགྱུར། །ཐུབ་དབང་མཆོད་རྟེན་བྱེད་པའི་མི་རྣམས་ནི། །མྱ་ངན་ཡོངས་མེད་ལུས་ཀུན་བརྟན་པ་དང༌། །ལོངས་སྤྱོད་མཆོག་ལྡན་རིན་ཆེན་མཛོད་མང་ལྡན། །དགྲ་ཡི་
ཚོགས་རྣམས་ཀྱང་ནི་ཐུབ་པར་འགྱུར། །ཞེས་དང༌། དེ་དང་དོན་མཐུན་པར་མཁས་པ་དཔའ་བོས་སྐུ་གཟུགས་ཀྱི་གཏམ་ལས། སངས་རྒྱས་སྐུ་གཟུགས་བཞེངས་གསོལ་བ། །དང་པོར་མྱ་ངན་སེལ་བར་བྱེད། །རྩོད་པ་ཀུན་སྤངས་མཐོང་ན་དགའ། །སྐལ་ལྡན་གཏེར་
ཚོགས་དཔལ་དང་ལྡན། །ལུས་སྟོབས་ལྡན་ཞིང་སྙན་པར་སྨྲ། །གཟི་བརྗིད་ལྡན་ཞིང་གཟུགས་མཛེས་ལ། །གསུང་རབ་ཀུན་ལ་མཁས་འགྱུར་ཞིང༌། །དབང་པོའི་རྟ་ནི་ཐམས་ཅད་ཐུལ། །བློ་ལྡན་གཏོང་དང་ལྡན་པར་འགྱུར། །བཅོམ་ལྡན་སྐུ་གཟུགས་མཆོད་རྟེན་ལ། །ཕྲ་
རབ་རྡུལ་ནི་ཇི་སྙེད་སོང༌། །དེ་སྙེད་ས་འོག་ས་སྟེང་འདིར། །དེ་སྙེད་རྒྱལ་པོར་ངེས་པར་འགྱུར། །གཟུགས་དང་གཟུགས་མེད་ཏིང་འཛིན་འགྲུབ། །ཐམས་ཅད་བདེ་བ་མ་ལུས་སྤྱོད། །ཐ་མར་སྐྱེ་དགུའི་རྒུད་སྤངས་ནས། །དེ་དག་བྱང་ཆུབ་གོ་འཕང་ཐོབ། །བདེ་གཤེགས་སྐུ་
གཟུགས་བཞེངས་གསོལ་བ། །མཚན་བཟང་གིས་མཚན་འཁོར་ལོས་སྒྱུར། །སུམ་ཅུ་རྩ་གཉིས་ལུས་མཛེས་ཐོབ། །ངེས་པར་དགྲ་འཇོམས་རྒྱལ་བར་འགྱུར། །དབང་པོ་རྣམས་ནི་མ་ཚང་མེད། །དཔལ་ལྡན་ངན་འགྲོ་རྣམས་ལས་རིང༌། །མི་ཡི་རིགས་སུ་སྐྱེ་འགྱུར་ཞིང༌། །
ངག་ནི་བཙན་པ་ཉིད་དུ་འགྱུར། །སྐྱེ་བར་ཐོས་དང་དྲན་ལྡན་བརྟན། །མངོན་པར་འདོད་པར་འབྱུང་འགྱུར་ཞིང༌། །གནས་ལ་མངོན་པར་དད་པ་དང༌། །འདོད་ཆགས་སོགས་ཀྱིས་གནོད་པ་མེད། །འདི་རྒྱལ་རྫོགས་པའི་བྱང་ཆུབ་ཀྱི། །ཁྱད་ལེགས་པ་ཡི་གཞུང་ལ་བརྟེན། །གང་
เล่ม ๒๑๓ · หน้า 474b
འདི་རྒྱལ་བའི་སྐུ་གཟུགས་བཞེངས། །སངས་རྒྱས་སྐུའམ་མཆོད་རྟེན་ནམ། །བཞེང་བྱེད་སྲོག་དང་ལྡན་པ་དེ། །བྲན་དང་དབུལ་བོར་མི་སྐྱེ་ཞིང༌། །མངག་གཞུག་བར་མིན་རིགས་དམན་མིན། །ཞེས་སོགས་མང་དུ་གསུངས་ཏེ་འདིར་དེ་ཙམ་ལས་འདྲི་བར་མ་ནུས་སོ། །དེ་
བཞིན་དུ་དེ་བཞིན་གཤེགས་པའི་ཐུགས་ཀྱི་རྟེན་མཆོད་རྟེན་བཞེངས་པའི་ཕན་ཡོན་ནི། སྤྱིར་མཆོད་རྟེན་ཞེས་བྱ་བ་ནི་གཙོ་བོར་དེ་བཞིན་གཤེགས་པའི་ཐུགས་ཆོས་ཀྱི་སྐུའི་རང་བཞིན་ཅན་གྱི་མཚོན་བྱེད་མཆོད་རྟེན་ཉིད་ཡིན་ནའང༌། དེར་མ་ཟད་སྐུ་གསུང་ཐུགས་རྟེན་དང་ཡོན་གྱི་ཞིང་
དམ་པར་གྱུར་པ་འཕགས་པའི་དགེ་འདུན་ལ་སོགས་པ་ལའང་འཇུག་པ་ལས། འདིར་ཆོས་ཀྱི་སྐུའི་རྟེན་ནམ་ཐུགས་ཀྱི་རྟེན་ལ་མཆོད་རྟེན་ཞེས་བྱ་བ་ནི། དགེ་བའི་རྩ་བ་ཡོངས་སུ་འཛིན་པའི་མདོ་ལས། ཤ་ར་དྭ་ཏིའི་བུ་འདི་ལ་བྱང་ཆུབ་སེམས་དཔའ་དེ་བཞིན་གཤེགས་པའི་མཆོད་རྟེན་
ཞིག་པ་མཐོང་ནས་བཅོས་པའི་ཕྱིར་སྤྲོ་བར་བྱེད་ཅིང་ཐ་ན་འཇིམ་པའི་གོང་བུ་གཅིག་ཙམ་ཡང་རྩིག་པར་བྱེད་པ་ཡིན། ཤ་ར་དྭ་ཏིའི་བུ་གཞན་ཡང་མ་བརྩིགས་པའི་ས་ཕྱོགས་ལམ་པོ་ཆེའི་བཞི་མདོ་སྐྱེ་བོ་མང་པོ་འདུ་བའི་སར་མཆོད་རྟེན་དང་ཁང་པ་བརྩེགས་པའམ། རྡོ་བའི་ཀ་བ་དང༌། དེ་
བཞིན་གཤེགས་པའི་སྐུའམ། དེ་བཞིན་གཤེགས་པའི་ཡོན་ཏན་རྗེས་སུ་དྲན་པ་གང་ཡང་རུང་བ་བྱེད་དེ། འདི་ལྟ་སྟེ་དཔེར་ན་ཆོས་ཀྱི་འཁོར་ལོ་བསྐོར་བའམ། མངོན་པར་འབྱུང་བའམ། བྱང་ཆུབ་ཀྱི་ཤིང་དྲུང་དུ་བདུད་འཇོམས་པའམ། དེ་བཞིན་གཤེགས་པའི་ཆོ་འཕྲུལ་ཆེན་
པོའམ། དེ་བཞིན་གཤེགས་པའི་ཡོངས་སུ་མྱ་ངན་ལས་འདས་པ་ཆེན་པོ་ཡང་དག་པར་བསྟན་པའམ། ལྷ་ལས་བབས་པའམ། ལྷ་ཡུལ་དུ་མངོན་པར་འཛེག་པར་བྱེད་པའི་དེ་བཞིན་གཤེགས་པའི་མཆོད་རྟེན་རྩིག་པར་བྱེད་པ་ཡིན། ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་
དཔའ་སེམས་དཔའ་ཆེན་པོ་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་བྱེ་ཞིང་འཐབ་པ་དང༌། རྩོད་པ་འབྱུང་བ་མཐོང་ནས་མི་དབྱེ་བ་དང༌། མཐུན་པར་བསྡུམ་པའི་ཕྱིར་བརྩོན་པ་ཡིན་ཞེས་དང༌། འཕགས་པ་ཀླུ་སྒྲུབ་ཀྱིས། ཤཱཀ་ཐུབ་མཆོད་རྟེན་བརྒྱད་པོ་དང༌། །ཕྱོགས་
เล่ม ๒๑๓ · หน้า 475a
བཅུ་གཞན་དང་གཞན་རྣམས་ན། །བཞུགས་པའི་ཆོས་སྐུ་ཀུན་ལ་འདུད། །ཅེས་དང༌། མཆོད་རྟེན་སྤྱིའི་བསྟོད་པར། སྣ་ཚོགས་པདྨ་ཟླ་བའི་གདན་སྟེང་དུ། །སྣ་ཚོགས་རིན་ཆེན་ཁམས་ལས་གྲུབ་པ་ཡི། །སྤྲུལ་པའི་མཆོད་རྟེན་སྣ་ཚོགས་རྒྱན་
གྱིས་བརྒྱན། །ཆོས་སྐུའི་རང་བཞིན་ཅན་ལ་ཕྱག་འཚལ་ལོ། །ཞེས་སོ། །རྣམ་པ་དེ་ལྟ་བུའི་མཆོད་རྟེན་ཆོས་ཀྱི་སྐུའི་རིང་བསྲེལ་ཅན་བཞེངས་པའི་ཕན་ཡོན་བསམ་གྱིས་མི་ཁྱབ་ཀྱང༌། འདིར་མདོར་བསྡུས་ཙམ་ཞིག་བརྗོད་ན། འཕགས་པ་སྒྲ་ཆེན་པོའི་མདོ་ལས། བཅོམ་
ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ལེགས་སོ་ལེགས་སོ། །ཀུན་དགའ་བོ་ཁྱོད་གང་ཞིག་གིས་ཁང་པ་བརྩེགས་པ་དེ་ལྟ་བུ་ཞིག་བྱས་ཏེ་ཕྱོགས་བཞིའི་དགེ་སློང་གི་དགེ་འདུན་ལ་འབུལ་བར་བྱེད་ལ། གང་ཞིག་གིས་དེ་
བཞིན་གཤེགས་པ་ཡོངས་སུ་མྱ་ངན་ལས་འདས་པའི་རིང་བསྲེལ་ཡུངས་འབྲུ་ཙམ་མཆོད་རྟེན་གྱི་བུམ་པ་སྐྱུ་རུ་ར་ཙམ་གྱི་ནང་དུ་བཅུག་སྟེ། སྲོག་ཤིང་ཁབ་ཙམ་བཙུགས་ནས་གདུགས་རྒྱ་ཤུག་གི་ལོ་མ་ཙམ་འདོགས་པར་བྱེད་པའམ། དེ་བཞིན་གཤེགས་པའི་སྐུ་གཟུགས་ཚོན་
གང་ཙམ་ཞིག་བྱེད་ན། དེ་གཉིས་ལས་གང་བསོད་ནམས་ཆེས་མང་དུ་འཕེལ་ཞེས་པ་ནི་ཁྱོད་ཀྱི་ཞུ་བ་བཟང་ལ་སྤོབས་པ་ལེགས་ཏེ་དཔྱོད་པ་དགེའོ། །ཀུན་དགའ་བོ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །ཀུན་དགའ་བོ་གང་ཞིག་གི་ཁང་པ་
བརྩེགས་པ་དེ་ལྟ་བུ་ཞིག་བྱས་ནས་ཕྱོགས་བཞིའི་དགེ་སློང་གི་དགེ་འདུན་ལ་དབུལ་བར་བྱེད་ལ། གང་ཞིག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་རིང་བསྲེལ་ཡུངས་འབྲུ་ཙམ་མཆོད་རྟེན་གྱི་བུམ་པ་སྐྱུ་རུ་ར་ཙམ་གྱི་ནང་དུ་བཅུགས་སྟེ། སྲོག་ཤིང་ཁབ་ཙམ་བཙུགས་
ནས་གདུགས་རྒྱ་ཤུག་གི་ལོ་མ་ཙམ་འདོགས་པར་བྱེད་པའམ། དེ་བཞིན་གཤེགས་པའི་སྐུ་གཟུགས་ཚོན་གང་ཙམ་ཞིག་བྱེད་ན། ཀུན་དགའ་བོ་བསོད་ནམས་འདི་ལ་བསོད་ནམས་སྔ་མ་དེས་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆ་དང༌། འབུམ་གྱི་ཆ་དང༌། གྲངས་
เล่ม ๒๑๓ · หน้า 475b
དང༌། ཆ་དང༌། དཔེ་དང༌། རྒྱུར་ཡང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་དཔག་ཏུ་མེད་པའི་ཆོས་འདི་ལྟ་བུ་དག་དང་ལྡན་ཏེ། ཚུལ་ཁྲིམས་དཔག་ཏུ་མེད་པ་དང༌། ཏིང་ངེ་འཛིན་དཔག་ཏུ་
མེད་པ་དང༌། ཤེས་རབ་དཔག་ཏུ་མེད་པ་དང༌། རྣམ་པར་གྲོལ་བ་དཔག་ཏུ་མེད་པ་དང༌། རྣམ་པར་གྲོལ་བའི་ཡེ་ཤེས་གཟིགས་པ་དཔག་ཏུ་མེད་པ་དང་ལྡན་པའི་ཕྱིར་རོ། །ཀུན་དགའ་བོ་ཛམྦུའི་གླིང་ཆུ་ཞེང་དང་རྒྱར་དཔག་ཚད་བདུན་སྟོང་ཡོད་པ་འདི་རྒྱུན་དུ་ཞུགས་པ་རྣམས་དང༌།
ལན་ཅིག་ཕྱིར་འོང་བ་རྣམས་དང༌། ཕྱིར་མི་འོང་བ་རྣམས་དང༌། དགྲ་བཅོམ་པ་རྣམས་དང༌། རང་སངས་རྒྱས་རྣམས་ཀྱིས་འདི་ལྟ་སྟེ། འབྲས་སཱ་ལུའི་ཞིང་ངམ། ཏིལ་གྱི་ཞིང་ངམ། སྨྱིག་མའི་ཚལ་ལམ། འདམ་བུའི་ཚལ་ལམ། བུ་རམ་ཤིང་གི་ཚལ་བཞིན་དུ་གང་བར་གྱུར་པ་དེ་དག་ལ་
མི་ལ་ལ་ཞིག་གིས་ཇི་སྲིད་འཚོའི་བར་དུ་ཆོས་གོས་དང༌། བསོད་སྙོམས་དང༌། མལ་སྟན་དང༌། ནད་ཀྱི་གསོས་སྨན་དང༌། ཡོ་བྱད་རྣམས་ཀྱིས་ཅི་འདོད་པ་བསྟབས་ཏེ། དེ་དག་ཐམས་ཅད་ཡོངས་སུ་མྱ་ངན་ལས་འདས་ནས་ཀྱང་མཆོད་རྟེན་བྱས་ཏེ་གདུགས་དང༌། སིལ་སྙན་
དང༌། བ་དན་ད་ང༌། དྲི་དང༌། བདུག་པ་དང༌། ཕྲེང་བ་དང༌། ཕྱེ་མ་དང༌། བྱུག་པ་དག་གིས་མཆོད་པ་བྱེད་ལ། གང་ཞིག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་རིང་བསྲེལ་ཡུངས་འབྲུ་ཙམ་མཆོད་རྟེན་གྱི་བུམ་པ་སྐྱུ་རུ་ར་ཙམ་གྱི་ནང་དུ་བཅུག་སྟེ།
སྲོག་ཤིང་ཁབ་ཙམ་བཙུགས་ནས་གདུགས་རྒྱ་ཤུག་གི་ལོ་མ་ཙམ་འདོགས་པར་བྱེད་པའམ། དེ་བཞིན་གཤེགས་པའི་སྐུ་གཟུགས་ཚོན་གང་ཙམ་ཞིག་བྱེད་ན། ཀུན་དགའ་བོ་བསོད་ནམས་འདི་ལ་བསོད་ནམས་སྔ་མ་དེས་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆ་དང༌། འབུམ་
གྱི་ཆ་དང༌། གྲངས་དང༌། ཆ་དང༌། དཔེ་དང༌། རྒྱུ་ཡང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་དཔག་ཏུ་མེད་པའི་ཆོས་འདི་ལྟ་བུ་དག་དང་ལྡན་ཏེ། ཚུལ་ཁྲིམས་དཔག་ཏུ་མེད་པ་དང༌།
เล่ม ๒๑๓ · หน้า 476a
ཏིང་ངེ་འཛིན་དཔག་ཏུ་མེད་པ་དང༌། ཤེས་རབ་དཔག་ཏུ་མེད་པ་དང༌། རྣམ་པར་གྲོལ་བ་དཔག་ཏུ་མེད་པ་དང༌། རྣམ་པར་གྲོལ་བའི་ཡེ་ཤེས་གཟིགས་པ་དཔག་ཏུ་མེད་པ་དང་ལྡན་པའི་ཕྱིར་རོ། །ཀུན་དགའ་བོ་ཤར་གྱི་ལུས་འཕགས་གླིང་ཆུ་ཞེང་དང་རྒྱར་
དཔག་ཚད་བརྒྱད་སྟོང་ཡོད་པ། རྒྱུན་དུ་ཞུགས་པ་རྣམས་ཀྱིས་ཀྱང་གང་བར་གྱུར་ཞེས་བྱ་བ་ནས་རྣམ་པར་གྲོལ་བའི་ཡེ་ཤེས་གཟིགས་པ་ཞེས་བྱ་བའི་བར་དུ་རྒྱ་ཆེར་སྔ་མ་བཞིན་དུ་བརྗོད་པར་བྱའོ། །ཀུན་དགའ་བོ་ནུབ་ཀྱི་བ་ལང་སྤྱོད་ཀྱི་གླིང་ཆུ་ཞེང་དང་རྒྱར་དཔག་ཚད་དགུ་སྟོང་ཡོད་
པ་རྒྱུན་དུ་ཞུགས་པ་རྣམས་ཀྱིས་ཀྱང་གང་བར་གྱུར་ཞེས་བྱ་བ་ནས་སྔ་མ་བཞིན་དུ་རྒྱས་པར་སྦྱར་རོ། །ཀུན་དགའ་བོ་བྱང་གི་སྒྲ་མི་སྙན་གྱི་གླིང་ཆུ་ཞིང་དུ་དཔག་ཚད་ཁྲི་ཡོད་པ་རྒྱུན་དུ་ཞུགས་པ་རྣམས་ཀྱིས་ཀྱང་གང་བར་གྱུར་ཞེས་བྱ་བ་ནས་སྔ་མ་བཞིན་དུ་རྒྱས་པར་སྦྱར་རོ། །ཀུན་དགའ་བོ་
ལྷའི་དབང་པོ་བརྒྱ་བྱིན་གྱི་ཁང་བཟངས་རྣམ་པར་རྒྱལ་བ་ཞེས་བྱ་བ་ཀཱ་བ་བརྒྱད་ཁྲི་བཞི་སྟོང་རབ་ཏུ་བརྟན་པ་དག་ཡོད་དེ། ཀ་བ་དེ་དག་ཐམས་ཅད་ཀྱང་ལྷའི་བཻ་ཌཱུརྱ་སྔོན་པོ་ཡིན་ནོ། །ཀུན་དགའ་བོ་ཁང་བཟངས་རྣམ་པར་རྒྱལ་བ་གསེར་གྱི་བྱེ་མ་བརྡལ་བ་ལ་ཙནྡན་གྱི་ཆུས་ཆག་ཆག་བཏབ་
པ། གསེར་གྱི་དྲྭ་བས་གཡོགས་ཤིང་གསེར་གྱི་དྲིལ་བུ་གཡེར་ཁས་བསྐོར་བ་སྟེ། ཀུན་དགའ་བོ་གང་ཞིག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁང་བཟངས་དེ་ལྟ་བུ་ཤ་སྟག་གིས་བཀང་སྟེ། ཕྱོགས་བཞིའི་དགེ་སློང་གི་དགེ་འདུན་ལ་དབུལ་བར་བྱེད་ལ། གང་ཞིག་
གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་སྐུ་གདུང་ཡུངས་འབྲུ་ཙམ་ཞེས་བྱ་བ་ནས་རྒྱ་ཆེར་སྔ་མ་བཞིན་དུ་སྦྱར་རོ། །ཀུན་དགའ་བོ་ལུས་འཕགས་མོའི་བུ་ཡུལ་མ་ག་དྷའི་རྒྱལ་པོ་མ་སྐྱེས་དགྲས་ཕ་རྒྱུན་དུ་ཞུགས་པ་བསད་ནས་དེ་དེ་བཞིན་གཤེགས་པའི་སྐུ་གདུང་
ལ་མཆོད་པ་བྱ་བའི་ཕྱིར་སྐུ་གདུང་གི་བརྒྱད་ཆ་ལ་བཀུར་སྟིར་བྱ་བ་དང༌། བླ་མར་བྱ་བ་དང༌། རི་མོར་བྱ་བ་དང༌། མཆོད་པར་བྱ་བ་དང༌། རྗེད་པར་བྱ་བ་དང༌། གསོལ་བར་བྱ་བ་ལ་བརྩོན་པར་འགྱུར་རོ་ཞེས་སངས་རྒྱས་ཀྱིས་བསྔགས་པའི་དགེ་བའི་ལས་དེ་དེས་བྱས་པས་སེམས་
เล่ม ๒๑๓ · หน้า 476b
ཅན་དམྱལ་བར་ལན་ཅིག་སོང་ནས་ལས་དེ་ཉིད་དང༌། དགེ་བའི་རྩ་བ་དེ་ཉིད་དང༌། སྔོན་ལེགས་པར་སྤྱད་པ་དེ་ཉིད་ཀྱིས་དེ་ལས་ཐར་ནས་བསྐལ་པ་ཉི་ཤུར་ལོག་པར་ལྟུང་བར་མི་འགྱུར་ལ། སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ། ཡང་དག་པར་ཁྱིམ་ནས་ཁྱིམ་
མེད་པར་རབ་ཏུ་བྱུང་ནས་རང་བྱང་ཆུབ་མངོན་དུ་བྱེད་པར་འགྱུར་ཏེ། རང་སངས་རྒྱས་རྣམ་པར་རྒྱལ་བའི་སྡེ་ཞེས་བྱ་བར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་དཔག་ཏུ་མེད་པའི་ཆོས་འདི་ལྟ་བུ་དག་
དང་ལྡན་ཏེ། ཚུལ་ཁྲིམས་དཔག་ཏུ་མེད་པ་དང༌། ཏིང་ངེ་འཛིན་དཔག་ཏུ་མེད་པ་དང༌། ཤེས་རབ་དཔག་ཏུ་མེད་པ་དང༌། རྣམ་པར་གྲོལ་བ་དཔག་ཏུ་མེད་པ་དང༌། རྣམ་པར་གྲོལ་བའི་ཡེ་ཤེས་གཟིགས་པ་དཔག་ཏུ་མེད་པ་དང་ལྡན་པའི་ཕྱིར་རོ། །ཀུན་དགའ་བོ་འདི་
ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དཔག་ཏུ་མེད་པའི་ཆོས་རྣམས་དང་ལྡན་པ་དེའི་ཕྱིར་དེ་ལ་མཆོད་པའི་རྣམ་པར་སྨིན་པ་ཡང་དེ་ལྟར་དཔག་ཏུ་མེད་པར་ཤེས་པར་བྱའོ་ཞེས་དང༌། རྒྱལ་བ་མྱ་ངན་ལས་འདས་
པའི་མཆོད་རྟེན་རིན་པོ་ཆེ་ལ་སོགས་པའི་རྒྱུ་ལས་ལེགས་པར་བཞེངས་ཏེ་མཆོད་པ་ཕུལ་ན་བསོད་ནམས་དཔག་ཏུ་མེད་པ་ཐོབ་ཅིང༌། སྡུག་བསྔལ་མཐའ་དག་ལས་རིང་དུ་འདས་པའི་བདེ་བ་དམ་པ་ཐོབ་པར་འགྱུར་ཏེ། མྱ་ངན་ལས་འདས་པ་ལས། ལྷ་དང་མི་དང་
འཁོར་རྣམ་པ་བཞིས་རིན་པོ་ཆེ་སྣ་བདུན་གྱི་མཆོད་རྟེན་བྱས་ཏེ་རིང་བསྲེལ་ལ་མཆོད་ན་བསོད་ནམས་དཔག་ཏུ་མེད་པ་ཐོབ་ཅིང༌། སེམས་ཅན་དེ་དག་སྲིད་པ་གསུམ་གྱི་སྡུག་བསྔལ་སྤངས་ནས་མྱ་ངན་ལས་འདས་པའི་བདེ་བ་ཐོབ་པར་འགྱུར་རོ་ཞེས་དང༌། དམ་པའི་
ཆོས་པདྨ་དཀར་པོ་ལས། རྒྱལ་བ་མྱ་ངན་འདས་པ་དེ་དག་གི །རྒྱལ་བའི་རིང་བསྲེལ་དག་ལ་སུས་མཆོད་ཅིང༌། །རིན་ཆེན་མཆོད་རྟེན་སྟོང་ཕྲག་དུ་མ་དག །གསེར་དང་དངུལ་དང་འོན་ཏེ་ཤེལ་གྱིའམ། །རྡོ་ཡི་སྙིང་པོའི་མཆོད་རྟེན་གང་གིས་བྱས། །བཻ་ཌཱུརྱ་
เล่ม ๒๑๓ · หน้า 477a
མཆོག་དེ་བཞིན་ཨནྡ་རྙིལ། །ལ་ལས་མུ་ཏིག་ཀེ་ཀེ་རུ་ལས་བྱས། །དེ་དག་གིས་ཀྱང་བྱང་ཆུབ་ཐོབ་པར་འགྱུར། །གང་གིས་མཆོད་རྟེན་རྡོ་ལས་བྱས་པ་དང༌། །གང་གིས་ཨ་ག་རུ་དང་ཙནྡན་ནམ། །གང་གིས་ཐང་ཤིང་མཆོད་རྟེན་
བྱས་པ་དང༌། །ལ་ལས་ཤིང་མང་གཞན་ལས་བྱས་པ་དང༌། །ས་དང་སོ་ཕག་ལས་ནི་བརྩིགས་པ་ཡི། །རྒྱལ་བའི་མཆོད་རྟེན་དགའ་ཞིང་བྱས་པ་དང༌། །དེ་ཕྱིར་ས་རྡུལ་ཕུང་པོ་དག་ལས་ཀྱང༌། །མྱ་ངམ་དགོན་པ་དག་ཏུ་བྱས་པ་དང༌། །བྱིས་པ་རྩེ་མོར་དེ་དང་དེ་དག་ཏུ། །
གང་གིས་རྒྱལ་ལ་དེ་ཕྱིར་མཆོད་རྟེན་དག །བྱེ་མ་ལས་ནི་ཕུང་པོ་བྱས་པ་ཡང༌། །དེ་རྣམས་ཀྱིས་ཀྱང་བྱང་ཆུབ་ཐོབ་པར་གྱུར། །ཞེས་དང༌། གཞན་ཡང་སེམས་ཅན་དད་པ་ཅན་གང་ལ་ལས་ཛམྦུའི་གླིང་ནས་བརྩམས་ཏེ་ཤར་གྱི་ལུས་འཕགས་པོ་དང༌། ནུབ་
ཀྱི་བ་ལང་སྤྱོད་པ་དང༌། བྱང་གི་སྒྲ་མི་སྙན་དང༌། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་བར་ཐམས་ཅད་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། རྒྱུན་དུ་ཞུགས་པ་ནས་དགྲ་བཅོམ་པའི་བར་དང༌། རང་སངས་རྒྱས་རྣམས་སམ། ཕྱོགས་
བཞིའི་དགེ་སློང་གི་དགེ་འདུན་རྣམས་ལ་འབུལ་བར་བྱེད་པ་ནས། གང་ཞིག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པའི་མཆོད་རྟེན་འཇིམ་པ་ལས་སྐྱུ་རུ་ར་ཙམ་བྱེད་དུ་འཇུག་ལ། སྐུ་གཟུགས་
ནས་འབྲུ་ཙམ་ལ་སྐུ་གདུང་ཡུངས་ཀར་གྱི་འབྲུ་ཙམ་འཇུག་པར་བྱེད་ན། དེ་བས་བསོད་ནམས་རྒྱུ་མཚན་དང་བཅས་ཏེ། ཁང་བུ་བརྩེགས་པའི་མདོ་ལས་གསུངས་སོ། །གཞན་ཡང་དེ་བཞིན་གཤེགས་པའི་མཆོད་རྟེན་ཞིག་པ་གསོ་བ་དང་གསར་དུ་བརྩིགས་པས་
གནས་སྐབས་སུ་རྒྱལ་པོ་ཆེན་པོའི་རིགས་སུ་སྐྱེ་བར་འགྱུར་བ་དང༌། གཟུགས་བཟང་བར་འགྱུར་བ་དང༌། མཛེས་ཤིང་ཀུན་གྱི་མིག་ཏུ་སྡུག་པར་འགྱུར་བ་དང༌། དབང་ཆེ་བར་འགྱུར་བ་དང༌། འཁོར་གཡོག་རྒྱ་ཆེན་པོ་ཐོབ་པར་འགྱུར་བ་དང༌། གཡོག་མི་བྱེད་པར་འགྱུར་བ་
เล่ม ๒๑๓ · หน้า 477b
དང༌། ལོངས་སྤྱོད་ཆེན་པོར་འགྱུར་བ་དང༌། འཇིག་རྟེན་པ་རྣམས་འཁོར་ཞིང་འདུ་བར་འགྱུར་བ་དང༌། ཀུན་གྱི་རྟེན་དུ་འགྱུར་བ་དང༌། ཕྱོགས་བཅུར་བརྗོད་པ་དང༌། སྒྲ་དང་ཚིགས་སུ་བཅད་པ་ཡངས་པར་འགྱུར་བ་དང༌། ལྷ་དང་བཅས་པའི་འཇིག་རྟེན་ན་བསྔགས་པར་འགྱུར་བ་དང༌།
ཕྱུག་ཅིང་ནོར་མང་པོ་དང་ལྡན་པར་འགྱུར་བ་དང༌། འཁོར་ལོས་སྒྱུར་བའི་རྒྱལ་སྲིད་ཐོབ་པར་འགྱུར་བ་དང༌། ཚེ་རིང་བར་འགྱུར་བ་དང༌། ལུས་རྡོ་རྗེ་ལྟར་མཁྲེགས་པར་འགྱུར་བ་དང༌། ལུས་མཚན་བཟང་པོ་དང་ལྡན་པར་འགྱུར་བ་དང༌། མཐོ་རིས་སུ་སྐྱེ་བར་འགྱུར་བ་དང༌། མཐར་
ཐུག་མྱ་ངན་ལས་འདས་པ་མཆོག་གི་གོ་འཕང་ཐོབ་པར་འགྱུར་བ་ལ་སོགས་པའི་ཡོན་ཏན་རྣམས་འཐོབ་པར་འགྱུར་ཏེ། དགེ་བའི་རྩ་བ་ཡོངས་སུ་འཛིན་པའི་མདོ་ལས། སངས་རྒྱས་མཆོད་རྟེན་མཐོང་ནས་སུ། །ཞིག་པ་ཕྱིར་ནི་བཅོས་པར་བྱ། །དེ་ཕྱིར་སྟོབས་ནི་ཆེ་བ་དང༌། །ལུས་ཆེ་
བ་དང་མི་འཇིགས་འགྱུར། །གང་དུ་དད་པ་སྐྱེ་འགྱུར་བའི། །ལམ་ཆེན་བཞི་མདོ་ཕྱོགས་སུ་ནི། །རིང་བསྲེལ་གྱི་ནི་སྐུ་བྱེད་ཅིང༌། །སངས་རྒྱས་ཡོན་ཏན་རྣམས་སྟོན་པ། །བསོད་ནམས་མང་པོ་སྐྱེད་པར་བྱེད། །གང་ཞིག་ལམ་གྱི་བཞི་མདོར་ནི། །འཇིག་རྟེན་མཆོད་པའི་མཆོད་རྟེན་
བྱེད། །དེ་ཡི་གྲགས་པ་འཕེལ་བར་འགྱུར། །ཕན་ཚུན་དུ་ནི་རྩོད་པ་ཡི། །ཉན་ཐོས་བྱེ་བ་རྣམས་མཐོང་ནས། །གཅིག་ལ་གཅིག་ནི་བཟོད་གསོལ་ཏེ། །དེ་དག་རྣམས་ནི་མཐུན་བྱེད་པ། །དགེ་བའི་རྩ་བ་དེ་ཡིས་སུ། །མི་འཇིགས་དཔའ་བོར་འགྱུར་བ་ཡིན། །སྲེད་མེད་བུ་ལྟར་མཁྲེགས་
པ་ཡི། །ལུས་ནི་མངོན་པར་འགྲུབ་པ་ཡིན། །ཞེས་དང༌། གསལ་རྒྱལ་གྱིས་ཞུས་པ་ལས། ཐུབ་དབང་མཆོད་རྟེན་བྱེད་པའི་མི་རྣམས་ནི། །མྱ་ངན་ཡོངས་མེད་ལུས་ཀུན་བརྟན་པ་དང༌། །ལོངས་སྤྱོད་མཆོག་ལྡན་རིན་ཆེན་མཛོད་མང་ལྡན། །དགྲ་ཡི་ཚོགས་རྣམས་ཀྱང་ནི་ཐུབ་པར་འགྱུར། །
རྒྱལ་བའི་མཆོད་རྟེན་སྲོག་ཤིང་ཕུལ་བ་ཡིས། །ཆོས་དང་རྗེས་མཐུན་ཆོས་ལ་སྒྲུབ་པ་དང༌། །ཚུལ་ཁྲིམས་ཐོས་དང་བཟོད་པའི་མཆོག་དང་ལྡན། །འཇིག་རྟེན་དག་ན་དོན་ཀུན་འགྲུབ་པར་འགྱུར། །མཆོད་རྟེན་སོགས་ལ་གདུགས་བརྩེགས་ཕུལ་བ་ཡི། །ལྷ་དང་མི་ཡི་ནང་ན་སྐྱེ་བ་
เล่ม ๒๑๓ · หน้า 478a
དང༌། །སྲེད་མེད་བུ་ཡི་ལུས་འདྲ་ལུས་ཀུན་བརྟན། །བཀུར་སྟི་བྱ་བའི་ཡོན་ཏན་ལྡན་པར་འགྱུར། །ཐུབ་དབང་མཆོད་རྟེན་རྡོ་ཐལ་བྱུགས་པ་ཡིས། །ལྷ་མིའི་འཇིག་རྟེན་དག་ན་ཚེ་རིང་ཞིང༌། །ལུས་སེམས་ནད་དང་མྱ་ངན་བྱེད་སྤངས་ཏེ། །རྟག་ཏུ་སྐྱིད་ཅིང་ནོར་
གྱིས་ཕྱུག་པར་འགྱུར། །གསེར་དངུལ་སྤ་བའི་གླེགས་མོས་གཡོགས་པ་ཡི། །ཐུབ་པའི་དབང་པོའི་མཆོད་རྟེན་བྱས་པ་ཡིས། །མི་རྣམས་སྲིད་པའི་ཁྱད་པར་གཞན་དག་ཏུ། །ལུས་མཁྲེགས་འོད་ཀྱང་འབར་ཞིང་མཛེས་པར་འགྱུར། །ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །བྱེ་
བྲག་ཏུ་གསུང་གི་རྟེན་གླེགས་བམ་བྲིས་པའི་ཕན་ཡོན་ནི། སྤྱིར་རང་དང་གཞན་གྱི་རྒྱུད་ལ་བསོད་ནམས་ཀྱི་ཕུང་པོ་དཔག་ཏུ་མེད་པ་རྫོགས་པ་ནས་མཐར་ཐུག་བླ་ན་མེད་པའི་བྱང་ཆུབ་ཐོབ་པའི་བར་གྱི་ཡོན་ཏན་ཐམས་ཅད་རྒྱུད་ལ་བསྐྱེད་པར་འདོད་པས་བརྩམ་པར་བྱ་བའི་སྙིང་པོ་ནི་ཆོས་སྤྱོད་རྣམ་པ་བཅུའི་
བདག་ཉིད་ཅན་གྱི་བྱ་བ་སྟེ། དེ་ནི་དམ་པའི་ཆོས་ཀྱི་ཡི་གེ་འདྲི་བ་དང༌། མཆོད་པ་དང༌། གཞན་དག་ལ་སྦྱིན་པ་དང༌། གཞན་ཀློག་པ་ལས་ཉན་པ་དང༌། བདག་ཉིད་ཀློག་པ་དང༌། ལེན་པ་དང༌། ཚིག་དང་དོན་མ་ནོར་བར་འཆད་པ་དང༌། ཁ་ཏོན་བྱེད་པ་དང༌། དོན་སེམས་པར་བྱེད་
པ་དང༌། ཚུལ་བཞིན་དུ་སྒོམ་པར་བྱེད་པ་སྟེ། འདི་དག་ལ་སྤྱོད་པ་ནི་འབྲས་བུ་ཆེ་བར་བསྟན་པ་ཡིན་ཏེ། དབུས་དང་མཐའ་རྣམ་པར་འབྱེད་པ་ལས། ཡི་གེ་འདྲི་མཆོད་སྦྱིན་པ་དང༌། །ཉན་དང་ཀློག་དང་ལེན་པ་དང༌། །འཆད་དང་ཁ་ཏོན་བྱེད་པ་དང༌། །དེ་སེམས་པ་དང་བསྒོམ་པའོ། །
སྤྱོད་པ་འདི་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཅེས་སོ། །དེ་ལྟ་བུའི་ཕན་ཡོན་ཆེན་པོ་དང་ལྡན་པའི་ཆོས་སྤྱོད་ཀྱི་རིམ་པ་དེ་ལ་ཡང་ཐོག་མཐའ་བར་གསུམ་ཐམས་ཅད་དུ་གསུང་རབ་དྲི་མ་མེད་པ་ཡི་གེར་བྲིས་པའི་གླེགས་བམ་ལ་མ་བརྟེན་པར་རང་དགའ་ཙམ་
གྱིས་འབད་པ་ལ་ནི་སྙིང་པོ་མེད་པའི་ཕྱིར་རོ། །དེ་བས་ན་ཡོན་ཏན་རིན་པོ་ཆེ་མཐའ་དག་འབྱུང་བའི་གཞིར་གྱུར་པ་སངས་རྒྱས་བཅོམ་ལྡན་འདས་ཀྱི་ཆོས་རྣམས་གླེགས་བམ་དུ་འདྲི་བ་ལ་སོགས་པ་ལྷུར་བགྱིས་པའི་བསོད་ནམས་ཀྱི་ཕུང་པོ་བརྗོད་ཀྱིས་མི་ལྡང་བ་ཉིད་འབྱུང་ནའང་འདིར་མདོ་
เล่ม ๒๑๓ · หน้า 478b
ཙམ་ཞིག་བརྗོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། དེ་བཞིན་གཤེགས་པའི་བྱིན་གྱིས་རླབས་ཀྱིས་གླེགས་བམ་ཆེན་པོ་ལ་ཡི་གེ་གསལ་ཞིང་རབ་ཏུ་གསལ་བ་ལེགས་པར་བྲིས་ཏེ། མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་
མ་དང༌། རོལ་མོ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དང༌། ཁོར་ཡུག་ཏུ་མར་མེའི་ཕྲེང་བ་དང༌། མཆོད་པ་རྣམ་པ་མང་པོ་དག་གིས་བཀུར་སྟིར་བྱ། བླ་མར་བྱ། རྗེད་པར་བྱ། མཆོད་པར་བྱ། རི་མོར་བྱ། བསྙེན་བཀུར་བྱ་སྟེ།
ཀུན་དགའ་བོ་འདི་ནི་ངའི་རྗེས་སུ་བསྟན་པའོ། །དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་འགྱུར་རོ་ཞེས་སོགས་ཡི་གེ་གསལ་བར་བྲིས་པའི་གླེགས་བམ་ལ་མཆོད་པའི་བསོད་ནམས་དཔག་ཏུ་མེད་པར་བཤད་
པ་དང༌། བླ་ན་མེད་པའི་བྱང་ཆུབ་ཀྱི་གནས་ཐོབ་པ་དང༌། དེའི་ཡོན་ཏན་མང་པོ་རྒྱུད་ལ་བསྐྱེད་པའི་ཐབས་ཀྱང་གླེགས་བམ་དུ་ཡི་གེར་འདྲི་བ་དང་གཟུང་བ་ལ་སོགས་པ་བསོད་ནམས་ཀྱི་མཐུ་ལ་རག་ལས་པ་ཡིན་ཏེ། དེ་སྐད་དུའང༌། སྒོ་མཐའ་ཡས་པ་སྒྲུབ་པའི་གཟུངས་
ལས། མདོ་སྡེ་ཐོས་ནས་རྗེས་སུ་ཡི་རང་དང༌། །ཡི་གེར་བྲིས་དང་གཟུངས་དང་བཀླགས་པ་ཡི། །བསོད་ནམས་ཆུ་བོ་ཇི་ཙམ་བསྐྱེད་པ་ནི། །སེམས་ཅན་ཀུན་གྱིས་ཤེས་པར་ཡོང་མི་ནུས། །དེ་ནི་ཚེ་རབས་ཀུན་ཏུ་རྒྱལ་བ་མཐོང༌། །དེ་དག་ལ་ཡང་དད་པ་བསམ་ཡས་
རྙེད། །མདོ་སྡེ་ཟབ་མོའི་ཚུལ་ཡང་ཤེས་པར་འགྱུར། །དེ་ནི་མྱུར་དུ་བྱང་ཆུབ་མཆོག་འཚང་རྒྱ། །བླ་མེད་བྱང་ཆུབ་མ་རེག་བར་དུ་ཡང༌། །དེ་ནི་ཏིང་ངེ་འཛིན་དང་མངོན་ཤེས་དང༌། །གཟུངས་རྣམས་དང་ནི་གཟུགས་དང་ལོངས་སྤྱོད་དང༌། །སངས་རྒྱས་མཐོང་ལས་ཉམས་པར་
ཡོངས་མི་འགྱུར། །ཞེས་དང༌། གཞན་ཡང་དམ་པའི་ཆོས་པདྨ་དཀར་པོ་ལས། གང་ཞིག་མདོ་འདི་འཛིན་པ་དེས། །ང་ཡི་མདུན་དུ་དགེ་འདུན་ལ། །མཆོད་པ་མང་པོ་བྱས་པ་ཡིན། །མོས་པ་སྙིང་པོར་གང་གྱུར་ཏེ། །གང་ཞིག་མདོ་འདི་ཀློག་པའམ། །ཡི་གེར་འདྲི་བར་བྱེད་པ་སྟེ། །དེ་བས་
เล่ม ๒๑๓ · หน้า 479a
བསོད་ནམས་མང་དུ་ཐོབ། །མི་འགའ་ལ་ལས་གླེགས་བམ་ལ། །ཤིན་ཏུ་ངེས་ཚིག་འདྲིར་བཅུག་སྟེ། །སྤོས་དང་ཕྲེང་བ་བྱུག་པ་ཡིས། །གླེགས་བམ་དེ་ལ་མཆོད་པ་བྱེད། །སྤོས་ཀྱི་འབྲུ་མར་བཀང་བ་ཡི། །མར་མེ་རྟག་ཏུ་སུ་འབུལ་ཞིང༌། །སྣ་མ་ཨུཏྤལ་སིལ་མ་
དང༌། །ཙམ་པ་ཀས་ཀྱང་རབ་ཏུ་གཏོར། །གླེགས་བམ་དག་ལ་འདི་འདྲ་བའི། །མཆོད་པ་བྱེད་པའི་མི་དེ་ནི། །བསོད་ནམས་མང་པོ་རབ་འཕེལ་ཏེ། །དེ་ལ་ཚད་ཀྱང་ཡོད་མེད་དོ། །ཇི་ལྟར་ནམ་མཁའི་ཁམས་ཀྱི་ཚད། །ཕྱོགས་བཅུ་དག་ནི་ཐམས་ཅད་དུ། །རྟག་ཏུ་རྙེད་པར་འགྱུར་
མ་ཡིན། །བསོད་ནམས་ཕུང་པོ་འདི་དེ་འདྲ། །ཞེས་དང༌། གང་གིས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ཐོས་པ་དང༌། གང་ཡི་གེར་འདྲི་བ་དང༌། གང་ཡི་གེར་འདྲིར་འཇུག་པ་དང༌། སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་གང་གིས་ཆོས་ཀྱི་རྣམ་
གྲངས་འདི་བཟུང་ངམ། བསྟན་ནམ། ཐོས་སམ། ཡི་གེར་བྲིས་སམ། ཡི་གེར་འདྲིར་འཇུག་གམ། གླེགས་བམ་དུ་བྱས་ཏེ་བསྟི་སྟང་དུ་བྱེད་པ་དང༌། བཙུན་པར་བྱེད་པ་དང༌། བཀུར་སྟིར་བྱེད་པ་དང༌། མཆོད་པ་དང༌། མེ་ཏོག་དང༌། བདུག་པ་དང༌། སྤོས་དང༌། ཕྲེང་བ་དང༌།
བྱུག་པ་དང༌། ཕྱེ་མ་དང༌། གོས་དང༌། གདུགས་དང༌། རྒྱལ་མཚན་དང༌། བ་དན་དང༌། རོལ་མོའི་སྒྲ་དང༌། ན་བཟའ་དང༌། ཐལ་མོ་སྦྱར་བའི་ལས་དང༌། མར་གྱི་མར་མེའམ། འབྲུ་མར་གྱི་མར་མེའམ། སྤོས་མར་གྱི་མར་མེའམ། ཙམ་པ་ཀའི་མར་གྱི་མར་མེའམ། སྣ་
མ་དང༌སྐྱ་སྣར་དང༌། བར་ཤ་ཀ་དང༌། ན་བ་མ་ལི་ཀའི་མར་གྱི་མར་མེའམ། མཆོད་པ་རྣམ་པ་མང་པོ་དག་གིས་བསྟི་སྟང་དུ་བྱེད། བཙུན་པར་བྱེད། རིམ་གྲོར་བྱེད། མཆོད་པར་བྱེད་པའི་བསོད་ནམས་མངོན་པར་འདུ་བྱེད་པ་ཇི་སྙེད་ཅིག་འཕེལ་བར་འགྱུར་བའི་བསོད་ནམས་མངོན་པར་འདུ་བྱེད་
པ་དེ་དག་གི་མཐའ་ནི། སངས་རྒྱས་ཀྱི་ཡེ་ཤེས་ཀྱིས་ཀྱང་རྟོགས་པར་མི་ནུས་སོ་ཞེས་དང༌། གང་ལ་ལ་ཞིག་གིས་དེ་བཞིན་གཤེགས་པའི་ཡོན་ཏན་གྱི་ཚོགས་ཡང་དག་པ་ཐོབ་པར་འདོད་པས་དམ་པའི་ཆོས་འཛིན་པ་ལ་སོགས་པ་ལ་གུས་པར་བྱས་པས་དབང་པོ་དྲུག་ཡོངས་སུ་དག་
เล่ม ๒๑๓ · หน้า 479b
པར་འགྱུར་བ་ནི། དེ་ཉིད་ནས་རིགས་ཀྱི་བུ་གང་ལ་ལ་ཆོས་ཀྱི་རྣམ་གྲངས་འདི་འཛིན་པའམ། ཀློག་པའམ། སྟོན་པའམ། ཡི་གེར་འདྲི་བ་ཡང་རུང་སྟེ་རིགས་ཀྱི་བུ་དེ་མིག་གི་ཡོན་ཏན་བརྒྱད་བརྒྱ་ཐོབ་པར་འགྱུར་རོ། །རྣ་བའི་ཡོན་ཏན་སྟོང་ཉིས་བརྒྱ་ཐོབ་པར་འགྱུར་རོ། །སྣའི་
ཡོན་ཏན་བརྒྱད་བརྒྱ་ཐོབ་པར་འགྱུར་རོ། །ལྕེའི་ཡོན་ཏན་སྟོང་ཉིས་བརྒྱ་ཐོབ་པར་འགྱུར་རོ། །ལུས་ཀྱི་ཡོན་ཏན་བརྒྱད་བརྒྱ་ཐོབ་པར་འགྱུར་རོ། །ཡིད་ཀྱི་ཡོན་ཏན་སྟོང་ཉིས་བརྒྱ་ཐོབ་པར་འགྱུར་རོ། །དེ་ཡོན་ཏན་བརྒྱ་ཕྲག་མང་པོས་དབང་པོ་དྲུག་གི་གྲོང་ཡོངས་སུ་དག་ཅིང༌།
ཤིན་ཏུ་ཡོངས་སུ་དག་པར་འགྱུར་རོ་ཞེས་དང༌། དེར་མ་ཟད་ས་ཕྱོགས་གང་དག་ཏུ་ཡི་གེ་འདྲི་བ་དང་ཀློག་པ་ལ་སོགས་པ་བྱས་པའི་ས་ཕྱོགས་དེ་ཡང་འཇིག་རྟེན་ཀུན་གྱི་མཆོད་རྟེན་དུ་འགྱུར་བ་ནི། མདོ་དེ་ཉིད་ལས། རིགས་ཀྱི་བུ་དག་ས་ཕྱོགས་གང་ན་ཆོས་ཀྱི་རྣམ་གྲངས་འདི་ཀློག་
གམ། སྟོན་ནམ། རབ་ཏུ་འཆད་དམ། ཡི་གེར་འདྲིའམ། སེམས་སམ། འདོན་ཏམ། ཁ་ཏོན་བྱེད་དམ། གླེགས་བམ་དུ་བྱས་པ་ཀུན་དགའི་རྭ་བའམ། གཙུག་ལག་ཁང་ངམ་ཁྱིམ་མམ་གནས་སམ་ཤིང་དྲུང་ངམ་ཁང་པའམ་གནས་ཁང་ངམ་ཕུག་ན་འདུག་ཀྱང་རུང་སྟེ། ས་ཕྱོགས་
དེར་དེ་བཞིན་གཤེགས་པའི་མཆོད་རྟེན་དུ་བྱའོ། །དེ་ཅིའི་ཕྱིར་ཞེ་ན། ས་ཕྱོགས་དེ་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སྙིང་པོར་རིག་པར་བྱ་བ་དང༌། ས་ཕྱོགས་དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་རིག་པར་བྱ་བ་དང༌། ས་ཕྱོགས་དེར་དེ་བཞིན་གཤེགས་པ་ཐམས་ཅད་ཀྱིས་ཆོས་ཀྱི་འཁོར་ལོ་རབ་ཏུ་བསྐོར་བ་དང༌། ས་ཕྱོགས་དེར་དེ་བཞིན་གཤེགས་པ་ཐམས་ཅད་ཡོངས་སུ་མྱ་ངན་ལས་འདས་པར་རིག་པར་བྱ་བ་ཡིན་
པའི་ཕྱིར་རོ་ཞེས་དང༌། འཇིག་རྟེན་རྣམ་འདྲེན་མྱ་ངན་འདས་པ་ན། །མདོ་སྡེ་མཆོག་འདི་གང་དག་འཛིན་པ་ཡི། །བདེར་གཤེགས་སྲས་པོ་རྣམས་ཀྱི་བསྔགས་པ་ནི། །བསྐལ་པ་བྱེ་བ་སྟོང་ཕྲག་མང་བརྗོད་ཀྱང༌། །དེ་དག་གི་ནི་ཡོན་ཏན་མཐའ་ཡས་ཏེ། །ཇི་ལྟར་ཕྱོགས་རྣམས་སུ་ནི་ནམ་མཁའ་བཞིན། །
เล่ม ๒๑๓ · หน้า 480a
གང་དག་རྟག་ཏུ་མདོ་སྡེ་འདི་འཛིན་པ། །དེ་དག་ཡོན་ཏན་བསམ་གྱིས་མི་ཁྱབ་འགྱུར། །འཇིག་རྟེན་འདྲེན་པ་མྱ་ངན་འདས་འདི་དང༌། །ང་དང་འདྲེན་པ་འདི་དག་ཐམས་ཅད་མཐོང༌། །བྱང་ཆུབ་སེམས་དཔའ་མང་པོ་འདི་ཀུན་དང༌། །འཁོར་བཞི་རྣམས་ཀྱང་དེ་ཡིས་མཐོང་བ་ཡིན། །དེ་
ཡིས་དེང་འདིར་ང་ནི་མཉེས་པར་བྱས། །རྒྱལ་བའི་དབང་པོ་མྱ་ངན་འདས་འདི་དང༌། །ཕྱོགས་བཅུ་རྣམས་ན་གང་དག་གཞན་བཞུགས་པ། །འདྲེན་པ་དེ་དག་ཐམས་ཅད་མཉེས་པར་བྱས། །གང་ཞིག་མདོ་སྡེ་འདི་ནི་འཛིན་བྱེད་པ། །འདས་དང་ད་ལྟར་མ་བྱོན་སངས་རྒྱས་དང༌། །ཕྱོགས་བཅུ་
དག་ན་གང་དག་བཞུགས་པ་ཡང༌། །དེ་ཀུན་མཐོང་ཞིང་ཤིན་ཏུ་མཆོད་པར་འགྱུར། །མདོ་སྡེ་ཡང་དག་ཆོས་འདི་གང་འཛིན་པས། །བྱང་ཆུབ་སྙིང་པོ་རྣམ་པར་གང་དགོངས་པ། །སྐྱེས་མཆོག་རྣམས་ཀྱི་གསང་ཆེན་ཤེས་པར་འགྱུར། །དེ་ནི་དེ་ཡང་མྱུར་དུ་རྗེས་སུ་སེམས། །གང་ཞིག་མདོ་སྡེ་
དམ་པ་འདི་འཛིན་པ། །དེ་ཡི་སྤོབས་པ་དག་ནི་མཐའ་ཡས་འགྱུར། །ཇི་ལྟར་རླུང་ནི་གང་དུའང་ཐོགས་མེད་བཞིན། །ཆོས་དང་དོན་དང་ངེས་པའི་ཚིག་ཀྱང་ཤེས། །འདྲེན་པ་རྣམས་ཀྱིས་དགོངས་ཏེ་གང་གསུངས་པ། །མདོ་སྡེ་རྣམས་ཀྱི་མཚམས་སྦྱར་རྟག་ཏུ་ཤེས། །རྣམ་པར་འདྲེན་པ་
མྱ་ངན་འདས་པ་ཡི། །མདོ་སྡེ་རྣམས་ཀྱི་ཡང་དག་དོན་དེ་ཤེས། །ཟླ་བ་ཉི་མ་འདྲ་བར་དེ་འགྱུར་ཏེ། །དེ་ནི་ཤིན་ཏུ་སྣང་ཞིང་གསལ་བྱེད་འགྱུར། །དེ་ནི་ས་ལ་རྒྱུ་ཞིང་དེ་དང་དེར། །བྱང་ཆུབ་སེམས་དཔའ་མང་པོ་ཡང་དག་འཛུད། །དེ་བས་བྱང་ཆུབ་སེམས་དཔའ་མཁས་གང་དག །འདི་འདྲ་
བ་ཡི་ཕན་ཡོན་འདི་ཐོས་ནས། །མྱ་ངན་ང་འདས་མདོ་འདི་ཟུངས་ཤིག་དང༌། །དེ་དག་ཐེ་ཚོམ་མེད་པར་བྱང་ཆུབ་འགྱུར། །ཞེས་དང༌། བསོད་ནམས་མཐའ་ཡས་པར་འཕེལ་བ་དང༌། ལྷ་ལ་སོགས་པའི་འགྲོ་བ་ཐམས་ཅད་ཀྱི་སྡང་སེམས་ལ་སོགས་པའི་གནོད་པ་ཐམས་ཅད་ཞི་བར་བྱེད་པ་དང༌། བདེ་ལེགས་
ཐམས་ཅད་འཕེལ་བར་བྱེད་པ་ཅི་རིགས་པ་ལའང་དམ་པའི་ཆོས་ཀྱི་གླེགས་བམ་འདྲི་བ་དང་ཀློག་པ་ལ་སོགས་པ་ལས་ཆེས་མཆོག་ཏུ་འགྱུར་བ་འགའ་ཡང་མེད་པ་ནི། སྙིང་རྗེ་པདྨ་དཀར་པོ་ལས། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཆོས་ཀྱི་རྣམ་གྲངས་འདི་ཉན་པ་དང༌། འཛིན་པ་དང༌། འཆང་བ་
เล่ม ๒๑๓ · หน้า 480b
དང༌། ཀློག་པ་དང༌། གཞན་དག་ལ་ཡང་ཐ་ན་ཚིགས་སུ་བཅད་པ་གཅིག་ཙམ་ཡང་རྒྱ་ཆེར་ཡང་དག་པར་སྟོན་པར་བགྱིད་པ་དེ་བསོད་ནམས་ཇི་སྙེད་ཅིག་བསྐྱེད་པར་འགྱུར་ལགས། བཀའ་སྩལ་པ། ངས་དེའི་བསོད་ནམས་སྔར་ཡང་སྨྲས་ཏེ། ད་ཡང་མདོར་
བསྡུས་ཏེ་བརྗོད་པར་བྱའོ། །གང་ལ་ལ་ཞིག་ཆོས་ཀྱི་རྣམ་གྲངས་འདི་ཉན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། གཞན་དག་ལ་ཡང་ཐ་ན་ཚིགས་སུ་བཅད་པ་གཅིག་ཙམ་རྒྱ་ཆེར་ཡང་དག་པར་སྟོན་པར་བྱེད་པ་དང༌། གང་ཡང་མ་
འོངས་པའི་དུས་ལྔ་བརྒྱ་པ་ན་ཐ་ན་བྲིས་ཏེ་འཆང་བར་བྱེད་ན་དེ་བསོད་ནམས་ཆེས་མང་དུ་སྐྱེད་པར་འགྱུར་གྱི། བྱང་ཆུབ་སེམས་དཔའ་གང་དག་བསྐལ་པ་ཆེན་པོ་བཅུའི་བར་དུ་ཕ་རོལ་ཏུ་ཕྱིན་པ་དྲུག་ལ་སྤྱོད་པའི་བསོད་ནམས་ཀྱི་ཕུང་པོ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། ལྷ་
དང་བཅས་པ་དང༌། བདུད་དང་བཅས་པ་དང༌། ཚངས་པ་དང་བཅས་པ་དང༌། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པ་དང༌། གནོད་སྦྱིན་དང༌། ཀླུ་དང༌། དྲི་ཟ་དང༌། གྲུལ་བུམ་དང༌། ཡི་དྭགས་དང༌། ཤ་ཟ་དང༌། མིའམ་ཅི་དང༌། ལྷ་མ་
ཡིན་རྣམས་དང་བཅས་པའི་འཇིག་རྟེན་གྱི་སྡང་བའི་སེམས་རབ་ཏུ་དྭང་བར་བྱ་བ་དང༌། ནད་ཐམས་ཅད་རབ་ཏུ་ཞི་བར་བྱ་བ་དང༌། འཐབ་མོ་དང༌། འཐབ་པ་དང༌། རྩོད་པ་དང༌། འགྱེད་པ་ཐམས་ཅད་ཉེ་བར་ཞི་བར་བྱ་བ་དང༌། དུས་མ་ཡིན་པའི་རླུང་དང༌། དུས་མ་
ཡིན་པའི་ཆར་པ་དང༌། འཆི་བ་དང༌། ནད་ཐམས་ཅད་རབ་ཏུ་ཞི་བར་བྱ་བ་དང༌། མུ་གེ་ཐམས་ཅད་རབ་ཏུ་ཞི་བར་བྱ་བ་དང༌། བདེ་བར་བྱ་བ་དང༌། ལོ་ལེགས་པར་བྱ་བ་དང༌། ནད་མེད་པ་ཚོགས་པར་བྱ་བ་དང༌། སྐྲག་པ་རྣམས་འཇིགས་པ་མེད་ཅིང་བདེ་བར་བྱ་བ་དང༌།
ཉོན་མོངས་པ་ཉེ་བར་ཞི་བར་བྱ་བ་དང༌། དགེ་བའི་རྩ་བ་རྣམ་པར་འཕེལ་བ་བྱ་བ་དང༌། ངན་སོང་གསུམ་གྱི་སྡུག་བསྔལ་ལས་ཐར་བར་བྱ་བ་དང༌། ཐེག་པ་གསུམ་པོ་དག་གི་ལམ་ཡང་དག་པར་བསྟན་པར་བྱ་བ་དང༌། ཏིང་ངེ་འཛིན་དང༌། གཟུངས་དང༌། བཟོད་པ་
เล่ม ๒๑๓ · หน้า 481a
ཐོབ་པར་བྱ་བ་དང༌། སེམས་ཅན་ཐམས་ཅད་ཉེ་བར་འཚོ་བར་བྱ་བ་དང༌། རྡོ་རྗེའི་གདན་ལ་འདུག་པར་བྱ་བ་དང༌། བདུད་བཞི་གཞོམ་པར་བྱ་བ་དང༌། བྱང་ཆུབ་ཀྱི་ཕྱོགས་མངོན་པར་རྫོགས་པར་འཚང་རྒྱ་བར་བྱ་བ་དང༌། ཆོས་ཀྱི་འཁོར་ལོ་བསྐོར་བར་
བྱ་བ་དང༌། འཕགས་པའི་ནོར་བདུན་དང་བྲལ་བའི་སེམས་ཅན་རྣམས་བྱང་ཆུབ་ཀྱི་ཕྱོགས་དང་ལྡན་པར་བྱ་བ་དང༌། འཁོར་མང་པོར་བྱ་བ་དང༌། མི་འཇིགས་པའི་གྲོང་ཁྱེར་གྱི་གནས་སུ་འཇུག་པར་བྱ་བའི་ཕྱིར་ངས་ཆོས་ཀྱི་རྣམ་གྲངས་འདི་བཤད་པའི་ཕྱིར་རོ་ཞེས་དང༌། དེ་བཞིན་
དུ། ཆོས་ཐམས་ཅད་ཀྱི་ཡོན་ཏན་བཀོད་པའི་རྒྱལ་པོའི་མདོ་ལས་ཀྱང༌། བཅོམ་ལྡན་འདས་སྤྱན་རས་གཟིགས་དབང་ཕྱུག་གི་མིང་ཙམ་ལ་རྟོག་པ་གང་ལགས་པ་དེ་ཡང་བསམ་པ་ཐམས་ཅད་ཡོངས་སུ་རྫོགས་པར་འགྱུར་ན། གང་དག་ཆོས་ཀྱི་རྣམ་གྲངས་འདི་ལ་དད་པ་དང༌།
འཆང་བ་དང༌། ཀློག་པ་དང༌། ཡི་གེར་འདྲི་བ་དང༌། ཡི་གེར་འདྲིར་སྩོལ་བ་དང༌། གོས་དང་རྒྱན་གྱི་མཆོད་པ་ཆེན་པོ་དག་གིས་མཆོད་པར་བགྱིད་པ་དང༌། རྒྱན་གྱིས་བརྒྱན་ནས་ཡི་གེར་འདྲི་བ་དང༌། ཡི་གེར་འདྲིར་སྩོལ་བ་ལྟ་སྨོས་ཀྱང་ཅི་འཚལ་ལགས་ཞེས་དང༌། སུ་
ཞིག་གིས་སངས་རྒྱས་ཀྱི་ཞིང་རབ་འབྱམས་མ་ལུས་པ་རིན་པོ་ཆེའི་མཆོད་རྟེན་གྱིས་ཡོངས་སུ་བཀང་སྟེ། བསྐལ་པ་ལས་ལྷག་པའི་ཡུན་དུ་འགྲོ་བ་མ་ལུས་པས་རང་གི་གྲོགས་སུ་བཀུག་སྟེ་མཆོད་པ་ཕུལ་བ་བས་ཀྱང་དེ་བཞིན་གཤེགས་པ་ཀུན་གྱི་འབྱུང་གནས་སུ་གྱུར་པ་དམ་པའི་ཆོས་
ཀྱི་རྣམ་གྲངས་གཅིག་ཅིག་གླེགས་བམ་དུ་བྲིས་ནས་བསྟི་སྟང་དུ་བྱས་པ་ན་དེས་བསོད་ནམས་ཀྱི་ཕུང་པོ་ཆེས་མང་དུ་འཕེལ་བ་ནི། སྡུད་པ་ཚིགས་སུ་བཅད་པ་ལས། ལ་ལས་བདེ་གཤེགས་ཡོངས་སུ་མྱ་ངན་འདས་པ་ཡི། །མཆོད་རྟེན་རིན་ཆེན་བདུན་ལས་བྱས་
ཤིང་མཆོད་བྱེད་ལ། །བདེ་བར་གཤེགས་པའི་མཆོད་རྟེན་དེ་དག་གངྒཱ་ཡི། །བྱེ་མ་སྙེད་ཀྱི་བྱེ་བ་ཕྲག་སྟོང་ཞིང་བཀང་སྟེ། །ཡོངས་སུ་བརྟག་བཟུང་ཞིང་རྣམས་བྱེ་བ་མཐའ་ཡས་ན། །སེམས་ཅན་ཇི་སྙེད་འཁོད་པ་དེ་དག་ཐམས་ཅད་ཀྱིས། །ལས་གཞན་མི་བྱེད་ལྷ་ཡི་
เล่ม ๒๑๓ · หน้า 481b
མེ་ཏོག་སྤོས་རབ་དང༌། །བྱུག་པས་དུས་གསུམ་བསྐལ་པའམ་དེ་བས་ལྷག་མཆོད་ལ། །གང་ཞིག་གང་ལས་རྣམ་འདྲེན་སྟོབས་བཅུ་འབྱུང་འགྱུར་བ། །བདེ་བར་གཤེགས་ཀྱི་ཡུམ་འདི་གླེགས་བམ་ལ་བྲིས་ཏེ། །འཆང་ཞིང་མེ་ཏོག་བྱུག་པས་བསྟི་སྟང་བྱེད་གྱུར་ན། །མཆོད་
རྟེན་བྱས་མཆོད་བསོད་ནམས་དེས་ནི་ཆར་མི་ཕོད། །ཅེས་དང༌། དེ་བཞིན་དུ་འཕགས་པ་སངས་རྒྱས་ཀྱི་སྟོབས་བསྐྱེད་པའི་ཆོ་འཕྲུལ་རྣམ་པར་འཕྲུལ་པ་བསྟན་པའི་མདོ་ལས་ཀྱང༌། གང་ཡང་ཛམྦུའི་གླིང་འདིར་དེ་བཞིན་གཤེགས་པའི་རིང་བསྲེལ་གྱི་མཆོད་རྟེན་རིན་པོ་ཆེ་སྣ་བདུན་
ལས་བྱས་པས་གང་བར་བྱས་ཏེ། ལྷའི་ཕྲེང་བ་དང༌། བྱུག་པ་དང༌། མེ་ཏོག་དང༌། མར་མེ་དང༌། རིན་པོ་ཆེའི་གདུགས་དང༌། སིལ་སྙན་དང༌། རྒྱལ་མཚན་དང༌། བ་དན་རྣམས་ཀྱིས་ལོ་འབུམ་དུ་བཀུར་སྟི་བྱས་ཏེ་རྗེད་ཅིང་མཆོད་པ་བས། གང་ཆོས་ཀྱི་
རྣམ་གྲངས་འདི་འཆང་བ་དང༌། ཀློག་པ་དང༌། མཆོད་པ་དང༌། འདྲི་བ་དང༌། འདྲིར་འཇུག་པ་དང༌། གཞན་དག་ལ་ཡང་དག་པར་རབ་ཏུ་བསྟན་ན་དེ་བས་འདི་ཆེས་བསོད་ནམས་མང་དུ་འཕེལ་ལོ། །རིགས་ཀྱི་བུ་གང་ལ་ལ་ཞིག་གིས་ཛམྦུའི་གླིང་གི་སེམས་ཅན་དེ་དག་
འཕགས་པའི་ལམ་ཡན་ལག་བརྒྱད་པ་ལ་འཇོག་ཅིང༌། བཞག་ནས་ཀྱང་ལྷའི་ལོ་སྟོང་དུ་ཡོ་བྱད་ཐམས་ཅད་ཀྱིས་མི་བྲེལ་བར་རྗེད་ཅིང་མཆོད་པ་བས། གང་གིས་ཆོས་ཀྱི་རྣམ་གྲངས་འདི་ལས་ཚིག་བཞི་པའི་ཚིགས་སུ་བཅད་པ་གཅིག་ཙམ་ཡང་ཉན་པ་དང༌། འཆང་བ་
དང༌། འདྲི་བ་དང༌། འདྲིར་བཅུག་པ་དང༌། གཞན་ལ་རྒྱས་པར་བྱེད་ན་དེ་བས་འདི་ཆེས་བསོད་ནམས་མང་དུ་འཕེལ་ལོ་ཞེས་གསུངས་ཤིང༌། ཁྱད་པར་སུ་ཞིག་གིས་འཇིག་རྟེན་གྱི་ཁམས་ན་གང་དག་འཁོད་པའི་སེམས་ཅན་མ་ལུས་པ་ཉན་ཐོས་ཀྱི་དགྲ་བཅོམ་པའི་བྱང་ཆུབ་ཏུ་བཀོད་
པ་ལས་ཀྱང་ཐེག་པ་ཆེན་པོ་ལ་ཞུགས་པའི་སེམས་ཅན་མཆོག་ལ་དེ་བཞིན་གཤེགས་པ་ཀུན་གྱི་ཡུམ་དུ་གྱུར་པའི་དམ་པའི་ཆོས་ཀྱི་གླེགས་བམ་བྱིན་པའི་བསོད་ནམས་ཆེས་ཁྱད་པར་དུ་འཕགས་ཏེ། མདོ་སྡུད་པ་ལས། ལ་ལས་གངྒཱའི་ཀླུང་གི་ཇི་སྙེད་ཞིང་རྣམས་ན། །སེམས་ཅན་ཇི་སྙེད་འཁོད་ཀུན་
เล่ม ๒๑๓ · หน้า 482a
དགྲ་བཅོམ་ཉིད་བཏུལ་བས། །གང་གིས་ཤེས་རབ་ཕ་རོལ་ཕྱིན་འདི་ཡིག་བྲིས་ཏེ། །སེམས་ཅན་མཆོག་ལ་གླེགས་བྱིན་བསོད་ནམས་ཁྱད་པར་འཕགས། །ཞེས་སོགས་རྒྱ་ཆེར་གསུངས་སོ། །དེས་ན་དམ་པའི་ཆོས་ཀྱི་རྣམ་གྲངས་རེ་རེ་ཡང་ཡི་གེར་འདྲི་བ་
དང༌། འཛིན་པ་དང༌། འཆང་བ་དང༌། ཉན་པ་དང༌། ཀློག་པ་ལ་སོགས་པའི་ཕན་ཡོན་བསམ་གྱིས་མི་ཁྱབ་པ་དེ་ལྟར་གསུངས་ན་དེ་བཞིན་གཤེགས་པའི་ལུང་རབ་འབྱམས་ཀྱི་ཚིག་དང་དོན་མ་ལུས་པ་གཏན་ལ་འབེབས་པ་དང༌། ཤིན་ཏུ་གསལ་བར་བྱེད་པའི་བསྟན་བཅོས་ཀྱི་ཉི་མ་ཆེན་པོ། བཀའ་
ལུང་རྒྱ་ཆེན་པོ་རྣམས་ཉེ་བར་སྡུད་པའི་སྒོ་ནས་གསལ་བར་བྱེད་པ་དང༌། ཟབ་ཅིང་བརླིང་བ་རྣམས་ནི་རྣམ་པར་འགྲེལ་པའི་སྒོ་ནས་གསལ་བར་བྱེད་པ་དང༌། འཁྲུགས་པ་རྣམས་གོ་རིམས་སུ་སྡེབས་པའི་སྒོ་ནས་གསལ་བར་བྱེད་པའི་བསྟན་བཅོས་ཀྱི་ཚོགས་ཐམས་ཅད་ཀྱི་གླེགས་བམ་འདི་དག
ནམ་ཡང་འཛད་པ་མེད་པའི་ཆོས་སྦྱིན་གྱི་རྒྱུན་ཆེན་པོའི་འབྱུང་གནས་སུ་གྱུར་པའི་ལེགས་བྱས་འདི་དག་བསྒྲུབས་པའི་བསོད་ནམས་ཀྱི་ཕུང་པོ་བརྒྱའི་ཆ་དང་སྟོང་གི་ཆར་ཡང་བསྐལ་པ་བྱེ་བ་བརྒྱ་སྟོང་ཕྲག་དུ་མའི་བར་དུ་བརྗོད་ཀྱང་མཐར་ཕྱིན་པ་མེད་པའི་རང་བཞིན་དུ་འགྱུར་བ་ནི་ལྟ་ཡང་ཅི་
ཞིག་སྨོས། དེའི་རྒྱུ་མཚན་ཡང༌། ཤེས་རབ་ཀྱི་ཕ་རོལ་ཏུ་ཕྱིན་པ་སྡུད་པ་ལས། ཅི་ཕྱིར་ཞེ་ན་སྨྲ་མཆོག་དེ་དག་འདིར་བསླབས་ནས། །ཆོས་རྣམས་ཐམས་ཅད་སྟོང་པ་ཉིད་དུ་འདིར་སྟོན་བྱེད། །དེ་ཐོས་ཉན་ཐོས་མྱུར་དུ་རྣམ་པར་གྲོལ་ལ་རེག །ང་རྒྱལ་བྱང་ཆུབ་དང་ནི་སངས་རྒྱས་བྱང་
ཆུབ་རེག །ཅེས་འབྱུང་བ་ལྟར། གང་དག་འདས་པའི་དུས་ཀྱི་སངས་རྒྱས་བཅོམ་ལྡན་འདས་གང་ཇི་སྙེད་ཅིག་བྱོན་པ་དང༌། ད་ལྟར་བའི་དུས་ཀྱི་སངས་རྒྱས་བཅོམ་ལྡན་འདས་གང་ཇི་སྙེད་ཅིག་འཚོ་ཞིང་གཞེས་པ་དང༌། མ་འོངས་པའི་དུས་ཀྱི་སངས་རྒྱས་བཅོམ་ལྡན་འདས་གང་ཇི་སྙེད་ཅིག་འབྱོན་
པ་ཐམས་ཅད་ཀྱང༌། རྣམ་པ་ཐམས་ཅད་མཁྱེན་པའི་ཡོན་ཏན་རྒྱ་མཚོའི་འཇུག་ངོགས་སུ་གྱུར་པའི་ཤེས་པར་བྱ་བ་རིག་པའི་གཞུང་ལུགས་རྣམ་པ་ལྔ་པོ་འདི་དག་ལ་ཡོངས་སུ་བསླབས་པ་དང༌། བསླབ་པར་མི་འགྱུར་བ་ནི་འགའ་ཡང་མེད་དོ། །ཇི་ལྟར་བསླབ་པར་བགྱི་བའི་གནས་དེ་དག་
เล่ม ๒๑๓ · หน้า 482b
ལ་ལེགས་པར་བསླབས་ཤིང༌། བསླབས་ནས་ཀྱང་ཤེས་བྱ་ཇི་ལྟ་བ་དང་ཇི་སྙེད་པ་ཐམས་ཅད་ལ་དབང་འབྱོར་པ་དམ་པའི་ཕ་རོལ་ཏུ་སོན་པ་རྣམ་པ་ཐམས་ཅད་མཁྱེན་པའི་གོ་འཕང་དུ་མངོན་པར་རྫོགས་པར་སངས་རྒྱས་པ་དང༌། འཚང་རྒྱ་བར་བགྱིད་པ་དང༌། འཚང་རྒྱ་བར་བགྱི་བ་ཐམས་
ཅད་ཀྱང་ཚུལ་འདི་དག་ལ་བརྟེན་ནས་འབྱུང་དགོས་པའི་ཕྱིར་རོ། །གལ་ཏེ་དེ་ལྟ་ན་ཇི་ལྟར་བྱང་ཆུབ་ཀྱི་འབྲས་བུ་མངོན་དུ་མཛད་པ་དེའི་ཆེ་བའི་ཡོན་ཏན་གྱི་ཁྱད་པར་ནི་ཅི་ལྟ་བུ་ཞེ་ན། དེའི་ཡོན་ཏན་གྱི་ཁྱད་པར་ནི། དེ་བཞིན་གཤེགས་པའི་ཡེ་ཤེས་ཁོ་ན་ལས། གཞན་བློ་ལྡན་རྒྱལ་བའི་
སྲས་ཆེན་རྣམས་ཀྱི་ཀྱང་བརྗོད་པའི་ཡུལ་ལས་ཡོངས་སུ་འདས་ན་བྱིས་པ་སོ་སོའི་སྐྱེ་བོ་རྣམས་ཀྱིས་རྣམ་པ་ཀུན་ཏུ་ལྟ་ག་ལ་ཞིག །འོན་ཀྱང་དྲི་མ་མེད་པའི་ལུང་དོན་བཞིན་དུ་གསང་བ་གསུམ་གྱི་ཡོན་ཏན་གྱི་ཁྱད་པར་མཚོན་ཙམ་ཞིག་སྨོས་ན། སྐུ་མི་ཟད་པ་རྒྱན་གྱི་འཁོར་ལོ། གསུང་མི་ཟད་པ་
རྒྱན་གྱི་འཁོར་ལོ། ཐུགས་མི་ཟད་པ་རྒྱན་གྱི་འཁོར་ལོའོ། །དེའི་དང་པོ་སྐུ་མི་ཟད་པ་རྒྱན་གྱི་འཁོར་ལོ་ལ་གཉིས་ལས། སྐུའི་གསང་བ་བསམ་གྱིས་མི་ཁྱབ་པ་ནི་སངས་རྒྱས་ཀྱི་སྐུའི་ཚད་གཞན་སུས་ཀྱང་བཟུང་བར་མི་ནུས་པ་སྟེ། བཅོམ་ལྡན་འདས་མངོན་པར་རྫོགས་པར་སངས་རྒྱས་
ནས་རིང་པོར་མ་ལོན་ཏེ། ཆོས་ཀྱི་འཁོར་ལོ་བསྐོར་ནས་གྲོང་ཁྱེར་ཝཱ་རཱ་ཎ་སཱིར་དྲང་སྲོང་ལྷུང་བ་རི་དྭགས་ཀྱི་ནགས་ན་བཞུགས་པའི་དུས་ཤིག་ཏུ། ཤར་ཕྱོགས་ལོགས་ཀྱི་དེ་བཞིན་གཤེགས་པ་ཙམ་པ་ཀའི་མདོག་གི་སངས་རྒྱས་ཀྱི་ཞིང་ཁམས་དགྲ་འདུལ་ནས་འོངས་པའི་བྱང་ཆུབ་
སེམས་དཔའ་ཤུགས་འཆང་གིས་བཅོམ་ལྡན་འདས་ཀྱི་སྤྱི་གཙུག་བལྟར་མི་མཐོང་བ་དང༌། སྐུ་ཚད་མེད་ཅིང་མཐའ་ཡས་པའི་ཚད་དང་མཐའ་ཡོངས་སུ་བཙལ་བར་འདོད་ནས་བྱང་ཆུབ་སེམས་དཔའ་ཤུགས་འཆང་རང་གི་ལུས་དཔག་ཚད་བརྒྱད་ཁྲི་བཞི་སྟོང་དུ་བྱིན་གྱིས་བརླབས་
ཏེ་བལྟས་པས། དེ་བཞིན་གཤེགས་པའི་སྐུ་དཔག་ཚད་འབུམ་ཕྲག་དྲུག་ཅུ་རྩ་བརྒྱད་པར་མཐོང་ནས་དེས་འདི་སྙམ་དུ་སེམས་ཏེ། བདག་ནི་མངོན་པར་ཤེས་པ་ཐོབ་པ་རྫུ་འཕྲུལ་གྱི་རྐང་པས་རྣམ་པར་རྩེ་བ་ཡིན་གྱིས། བདག་གིས་དེ་བས་ཀྱང་རྫུ་འཕྲུལ་གྱི་སྟོབས་རྒྱ་ཆེར་སྐྱེད་དེ།
เล่ม ๒๑๓ · หน้า 483a
དེ་བཞིན་གཤེགས་པའི་སྐུའི་ཚད་བཙལ་བར་བྱའོ་སྙམ་ནས། དེ་སངས་རྒྱས་ཀྱི་མཐུ་དང་རང་གི་རྫུ་འཕྲུལ་གྱི་སྟོབས་བསྐྱེད་པས། སྟེང་ཕྱོགས་ཀྱི་ལོགས་སུ་སངས་རྒྱས་ཀྱི་ཞིང་གངྒཱ་བྱེ་བ་ཕྲག་བརྒྱའི་བྱེ་མ་སྙེད་བརྒལ་ཏེ་འཇིག་རྟེན་གྱི་ཁམས་པདྨོ་ཅན་
ཞེས་བྱ་བ་ན། དེ་བཞིན་གཤེགས་པ་པདྨོའི་དཔལ་གྱི་སྙིང་པོའི་རྒྱལ་པོ་བཞུགས་པའི་གནས་སུ་ཕྱིན་ཏེ་བལྟས་ཀྱང་དབུའི་གཙུག་ཏོར་གྱི་མཐའ་མ་མཐོང་ནས། སླར་སངས་རྒྱས་ཀྱི་མཐུ་དང་རང་གི་རྫུ་འཕྲུལ་གྱི་སྟོབས་ཀྱིས་ཤཱཀྱ་ཐུབ་པའི་སྤྱན་སྔར་ཕྱིན་ཏེ་ལན་བདུན་དུ་བསྐོར་བ་
བྱས་ཏེ་ཆེད་དུ་བརྗོད་པ་དཀོན་མཆོག་བརྩེགས་པའི་མདོ་ལས་བཤད་པ་ལྟ་བུའོ། །སྐུ་ཐམས་ཅད་པ་ནི་སྤྲུལ་པ་མཆོག་ནས་བཟུང་སྟེ། གྲུ་དང༌། གཟིངས་དང༌། ཟམ་པ་ལ་སོགས་པ་གདུལ་བྱ་གང་ལ་གང་གིས་འདུལ་བ་དེ་ལ་དེ་དང་རྗེས་སུ་འཚམ་པའི་སྐུར་བསྟན་ནས་དོན་
མཛད་དེ། དེ་བཞིན་གཤེགས་པས་སྤྲུལ་པ་གང་སྤྲུལ་ཡང་འདི་སྙམ་དུ་ངས་སྤྲུལ་པ་དག་སྤྲུལ་ཏོ། །སྤྲུལ་ལོ། །སྤྲུལ་བར་བྱའོ་སྙམ་དུ་མི་དགོངས་མོད་ཀྱི། སྤྲུལ་པས་འདུལ་བའི་སེམས་ཅན་མཐོང་བ་ན་འཇིག་རྟེན་གྱི་ཁམས་འདིའམ་འཇིག་རྟེན་གྱི་ཁམས་གྲངས་མེད་པ་རྣམས་
སུ་ཇི་སྙེད་མཆིས་པ་དག་ཏུ་སྤྲུལ་པའི་གཟུགས་ཀྱིས་བཞུད་དེ་སེམས་ཅན་ཡོངས་སུ་སྨིན་པར་མཛད་པའོ། །གསུང་ལ་ཡང་གཉིས་ལས། གསུང་གི་གསང་བ་བསམ་གྱིས་མི་ཁྱབ་པ་ནི། སངས་རྒྱས་ཀྱི་གསུང་དེ་དྲུང་ནས་ཉན་ཀྱང་ཆེ་བ་མེད་ལ། དཔག་ཚད་དང་རྒྱང་གྲགས་
ལ་སོགས་པ་ནས་ཉན་ཀྱང་ཆུང་ངུ་མེད་པ་སྟེ། དེ་ཡང་མཽད་གལ་གྱི་བུས་ནུབ་ཕྱོགས་བདེ་བ་ཅན་དང༌། དེ་ནས་ཀྱང་འཇིག་རྟེན་གྱི་ཁམས་བྱེ་བ་ཕྲག་བརྒྱ་འདས་པ་ན་འོད་ཟེར་ཅན་གྱི་འཇིག་རྟེན་གྱི་ཁམས་ཞེས་བྱ་བ་ན་དེ་བཞིན་གཤེགས་པ་འོད་ཟེར་ཀུན་ནས་འབྱུང་བ་འཁོར་དང་བཅས་
པ་བཞུགས་པའི་གནས་སུ་བྱོན་ཏེ་ཉན་པས་ཀྱང་ཆུང་དུ་མེད་པ་ཐོས་པ་ལྟ་བུའོ། །གསུང་ཐམས་ཅད་པ་ནི་དག་པ་ལྷའི་སྐད་ནས་བཟུང་སྟེ་ཀླུ་དང་གནོད་སྦྱིན་དང་སྲིན་པོ་ལ་སོགས་པ་འགྲོ་བ་སོ་སོའི་སྐད་དུ་ཆོས་སྟོན་ནུས་པ་སྟེ། དཀོན་མཆོག་བརྩེགས་པ་ལས། ས་བླའི་ལྷ་དང་དེ་
เล่ม ๒๑๓ · หน้า 483b
བཞིན་བར་སྣང་ལྷ། །དེ་དག་སྒྲ་སྐད་འཇུག་པ་ཅི་འདྲ་བ། །དེ་ལྟར་དེ་ལ་དེ་ཡི་སྒྲ་ཡང་འཇུག །རྣམ་པར་ངེས་བདེན་གཏམ་ཡང་དེ་འདྲའོ། །ངང་པ་ཁྲུང་ཁྲུང་ཀ་ལ་པིང་ཀ་དང༌། །རྨ་བྱ་ནེ་ཙོ་ཁུ་བྱུག་ཤང་ཤང་ཏེའུ། །རི་སྐེགས་དང་ནི་ངུར་པ་ཀུན་ལ་ཀུན། །ཇི་ལྟའི་སྐད་ཀྱིས་དེ་
ནི་ཚིམ་པར་བྱེད། །སྟག་དང་སེང་གེ་དེ་བཞིན་དོམ་དང་སྤྲེའུ། །གཟིག་དང་བྱི་ལ་རི་དྭགས་གླང་ཆེན་བསེ། །རྟ་དང་ཁྱི་དང་ཕག་དང་འུག་པ་ཀུན། །ཇི་ལྟའི་སྐད་ཀྱིས་དེ་ནི་ཚིམ་པར་བྱེད། །གང་དག་རྐང་བཞི་པ་དང་རྐང་གཉིས་པ། །རྐང་མངས་དང་ནི་དེ་བཞིན་རྐང་མེད་རྣམས། །
བསྐུལ་དང་ཆད་པས་བཅད་དང་ཕན་གདགས་ཕྱིར། །ཀུན་ལ་དེ་ཡི་སྒྲ་སྐད་ཤེས་པ་འཇུག །སེམས་ཅན་གང་དག་སྟོང་གསུམ་འཇིག་རྟེན་ན། །རབ་བམ་འབྲིང་ངམ་འོན་ཏེ་ཐ་མའམ། །དམྱལ་བ་དུད་འགྲོ་གཤིན་རྗེའི་འཇིག་རྟེན་དང༌། །ལྷ་མི་རྣམས་དང་དེ་ནི་སྐད་ཀྱང་མཐུན། །
ཇི་ལྟར་རིགས་པར་བྱེད་པ་སྟོན་ཀྱང་ནི། །མི་སེམས་འདུ་ཤེས་མེད་ཅིང་རྟོག་པ་མེད། །ཅེས་དང༌། འཇིག་རྟེན་དང་རྗེས་སུ་མཐུན་པར་འཇུག་པ་ལས། སྐུ་དང་སྐུ་ཡི་ཕྲིན་ལས་དང༌། །གསུང་གིས་གང་དག་བརྗོད་པ་དང༌། །ཡིད་དང་ཡིད་ཀྱི་རྣམ་རྟོག་རྣམས། །རྒྱལ་བའི་ཐམས་
ཅད་འཇིག་རྟེན་འདས། །འཇིག་རྟེན་ན་ནི་ཐུགས་བརྩེ་བས། །འཇིག་རྟེན་མགོན་པོ་འོད་མཛད་པ། །འཇིག་རྟེན་ཇི་ལྟར་རྟོགས་པ་བཞིན། །སེམས་ཅན་རྣམས་ལ་ཆོས་སྟོན་ཏོ། །ཞེས་གསུངས་སོ། །ཐུགས་ལ་ཡང་གཉིས་ལས། ཐུགས་ཀྱི་གསང་བ་བསམ་གྱིས་མི་
ཁྱབ་པ་ནི། དེ་བཞིན་གཤེགས་པའི་ཐུགས་ནི་རྣམ་པ་ཐམས་ཅད་དུ་ལྡོག་པ་མི་མངའ་བ་དང༌། རྟོག་པ་མི་མངའ་བ་དང༌། དཔྱོད་པ་མི་མངའ་བ་དང༌། འགྱུར་བ་མི་མངའ་བ་དང༌། ཚད་མི་མངའ་བ་ལ་སོགས་པས་ཆོས་གང་ཡང་མངོན་པར་མི་སྒྲུབ་པས་ན་ཐུགས་ཡོངས་སུ་
དག་པའོ། །དེས་ན་ཆོས་ཐམས་ཅད་ལ་ཡང་ཆགས་པ་དང་ཐོགས་པ་ཅུང་ཟད་ཀྱང་མི་མངའ་སྟེ། དཀོན་མཆོག་བརྩེགས་པ་ལས། ཞི་བའི་བློ་གྲོས་དེ་བཞིན་གཤེགས་པ་ནི་དེ་ལྟར་ཐུགས་ཡོངས་སུ་དག་པ་སྟེ། ཐུགས་ཀྱིས་ཆོས་གང་ལ་ཡང་མངོན་པར་མི་སྒྲུབ་ལ།
เล่ม ๒๑๓ · หน้า 484a
ཆོས་ཐམས་ཅད་ལ་ཡང་དེའི་ཡེ་ཤེས་མ་ཆགས་མ་ཐོགས་པར་འཇུག་གོ་ཞེས་གསུངས་པས། སངས་རྒྱས་ཀྱི་ཐུགས་ཀྱིས་ཤེས་བྱ་མཁྱེན་པ་བཞིན་གཞན་སུས་ཀྱང་མི་མཁྱེན་པ་སྟེ། མཽད་གལ་གྱི་བུ་འཕགས་པ་དགྲ་བཅོམ་པ་རྫུ་འཕྲུལ་དང་ལྡན་
པས་ཀྱང་རང་གི་མ་གང་དུ་སྐྱེས་མ་མཁྱེན་པ་བཅོམ་ལྡན་འདས་ཀྱིས་མཁྱེན་པ་ལྟ་བུ་དང༌། དགྲ་བཅོམ་པ་གཞན་སུས་ཀྱང་ཁྱིམ་བདག་དཔལ་སྐྱེས་ལ་ཐར་པའི་ས་བོན་ཡོད་པ་མ་མཁྱེན་པར་རབ་ཏུ་འབྱུང་མ་ནུས་པ་ལ། བཅོམ་ལྡན་འདས་ཀྱིས་དཔལ་སྐྱེས་སྐྱེ་བ་བདུན་གྱི་གོང་རོལ་
དུ་ཁྱིར་སྐྱེས་པ་ན། ཕག་གིས་བདས་ནས་མཆོད་རྟེན་ཞིག་ལ་བསྐོར་བ་བྱས་པའི་དགེ་བའི་ས་བོན་ཡོད་པར་མཁྱེན་ནས་རབ་ཏུ་འབྱུང་བར་གནང་བ་ལྟ་བུའོ། །ཐུགས་ཐམས་ཅད་པ་ནི་ཇི་ལྟ་བ་དང་ཇི་སྙེད་པ་ཐམས་ཅད་མཁྱེན་པའི་ཡེ་ཤེས་མངའ་བ་སྟེ། དེ་ཡང་ཇི་ལྟ་བ་ནི་དངོས་
པོའི་གནས་ལུགས་མ་བཅོས་པ་མཁྱེན་ཅིང་མངོན་དུ་གྱུར་པ་ཡིན་ལ། ཇི་སྙེད་པ་མཁྱེན་པ་ནི། ཚེར་མ་རྣོ་བ། སྲན་མ་ཟླུམ་པ། ཕ་ཝང་ལོང་བུ་གྲུ་བཞིར་འོང་བ། རྨ་བྱའི་མདོངས་འདྲ་བ་ལ་སོགས་པ་ཆོས་ཐམས་ཅད་ཀྱི་རྒྱུ་དང་འབྲས་བུའི་རྟེན་འབྲེལ་མ་ལུས་པ་ཐུགས་
སུ་ཆུད་པས་གང་ཡང་མ་འདྲེས་པར་མཁྱེན་པའོ། །རྒྱན་ནི་མཛེས་པར་བྱེད་པ་སྟེ། རང་གཞན་གཉི་གའི་དོན་འབད་མེད་ལྷུན་གྲུབ་ཏུ་འབྱུང་བས་མཛེས་པའོ། །འཁོར་ལོ་ནི་མཛད་པ་ཕྲིན་ལས་ཀྱི་འཁོར་ལོ་སྟེ། དེ་བཞིན་གཤེགས་པས་སེམས་ཅན་བྱེ་བ་ཁྲག་ཁྲིག་དཔག་ཏུ་
མེད་པའི་དོན་ལ་ཆོས་ཀྱི་འཁོར་ལོ་བསྐོར་བས། དེ་རྣམས་ཀྱིས་ཀྱང་ཁྱད་པར་ལྷག་པར་རྟོགས་ཏེ། ལ་ལ་ནི་རྒྱུན་དུ་ཞུགས་པའི་འབྲས་བུ་དང༌། ལ་ལ་ནི་ལན་ཅིག་ཕྱིར་འོང་བའི་འབྲས་བུ་དང༌། ལ་ལ་ནི་ཕྱིར་མི་འོང་བའི་འབྲས་བུ་དང༌། ལ་ལ་ནི་དགྲ་བཅོམ་པ་ཉིད་མངོན་དུ་
བྱེད། ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་དེ་བཞིན་གཤེགས་པ་ཉིད་དུ་ལུང་བསྟན་པར་འགྱུར་ཏེ། མདོར་ན་འཁོར་བ་ཕལ་མོ་ཆེ་སངས་རྒྱས་ལ་གཞོལ་བ་དང༌། ཆོས་ལ་འབབ་པ་དང༌། དགེ་འདུན་ལ་བབ་པར་མཛད་དོ། །དེ་རྣམས་
เล่ม ๒๑๓ · หน้า 484b
རེ་རེས་ཀྱང་ཆོས་ཀྱི་ཕུང་པོ་བསམ་གྱིས་མི་ཁྱབ་པ་བསྟན་པས་སྲོག་ཆགས་ཀྱི་ཚོགས་དེ་སྙེད་ཅིག་གིས་བྱང་ཆུབ་ཀྱི་འབྲས་བུ་མངོན་དུ་མཛད་པ་དང༌། དེ་དག་གིས་ཀྱང་ཕྱི་མ་ཕྱི་མའི་སེམས་ཅན་རྣམས་ལ་ཆོས་བསྟན་པ་ལ་སོགས་པ་མདོར་ན་འཁོར་བ་མ་སྟོངས་ཀྱི་བར་དུ་དེ་བཞིན་གཤེགས་
པའི་ཕྲིན་ལས་ཀྱི་འཁོར་ལོ་རྒྱུན་ཆད་མེད་པའི་བདག་ཉིད་ཅན་ཏེ། དེ་དག་ཐམས་ཅད་ཀྱང་ཆོས་ཀྱི་ཚུལ་འདི་དག་ལས་འབྱུང་བའི་ཐབས་དང་ཤེས་རབ་ཟུང་དུ་འཇུག་པའི་ལམ་སྲོལ་ཆེན་པོ་འདི་དག་ལ་ལེགས་པར་བསླབས་པའི་འབྲས་བུ་ལས་གཞན་མ་ཡིན་པའི་ཕྱིར་རོ། །དེས་ན་
ཆོས་ཀྱི་སྦྱིན་པ་འདི་ནི་དེ་བཞིན་གཤེགས་པ་ཐམས་ཅད་ཀྱི་འབྱུང་གནས་ཆེན་པོ་ཉིད་དུ་ངེས་པའི་ཕྱིར། བསོད་ནམས་ཀྱི་ཕུང་པོའི་མཐའ་ནི་བསྐལ་པ་མང་པོར་བརྗོད་ཀྱང་མཐར་ཕྱིན་པར་མི་འགྱུར་བའི་རྒྱུ་མཚན་ནི་དེ་ལྟར་ལགས་སོ། །གཉིས་པ་དེ་བྱང་ཆུབ་ཏུ་བསྔོ་བ་ལ། རྣམ་གཞག་
སྤྱིར་བཤད་པ་དང༌། སོ་སོར་བཤད་པ་དང༌། སྐབས་སུ་བབ་པའི་བསྔོ་བ་དངོས་སོ། །དང་པོ་ལའང་མཚན་ཉིད་དང༌། སྒྲ་དོན་དང༌། དགོས་པ་སྟེ་རྣམ་པ་གསུམ་ལས། དང་པོ་མཚན་ཉིད་ནི། ཟག་བཅས་དང་ཟག་མེད་ཀྱིས་བསྡུས་པའི་དགེ་བའི་རྩ་བ་མངོན་པར་འདུ་
བགྱིས་པ་ཐམས་ཅད་བླ་ན་མེད་པའི་བྱང་ཆུབ་ཀྱི་ཕྱིར་ཡོངས་སུ་སྒྱུར་བའི་ཐབས་ཁྱད་པར་ཅན་དུ་གྱུར་པ་གང་ཡིན་པ་སྟེ། དཔེར་ན་གསེར་གྱི་དངོས་པོ་ཞིག་རྒྱན་གྱི་དམ་པ་ཉིད་དུ་སྒྱུར་བའི་བཟོ་མགར་གྱི་ལས་ལྟ་བུའོ། །དེ་ལྟར་ཡང་འགྲེལ་པ་དོན་གསལ་བ་ལས། ཡོངས་སུ་བསྔོ་བ་
ཡིད་ལ་བྱེད་པས་ནི། གསེར་མགར་གྱིས་རྒྱན་བཞིན་དུ་ཡང་དག་པར་རྫོགས་པའི་བྱང་ཆུབ་ཀྱི་ཡན་ལག་ཏུ་བྱེད་དོ་ཞེས་བྱ་བ་དང༌། མངོན་པར་རྟོགས་པའི་རྒྱན་ལས། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ནོ། །ཞེས་གསུངས་སོ། །གཉིས་པ་
སྒྲ་དོན་ནི། སྐད་རིགས་རྣམ་པ་བཞི་ལས་ལེགས་པར་སྦྱར་བའི་སྐད་དུ། པ་རི་ཎ་ཏ་ཞེས་བྱ་བ་འབྱུང་སྟེ། དེ་ནི་ཡོངས་སུ་སྒྱུར་བའམ་ཡོངས་སུ་སྤེལ་བ་ལའང་འཇུག་སྟེ། དགེ་བའི་རྩ་བ་ཐམས་ཅད་སྒྱུ་མའི་རྣམ་པ་ལྟར་སྣང་ལ་རང་བཞིན་མེད་པར་ཡོངས་སུ་སྒྱུར་བར་བྱེད་
เล่ม ๒๑๓ · หน้า 485a
པའམ། བྱང་ཆུབ་ཀྱི་བར་དུ་བར་མ་དོར་ཆུད་འཛའ་བར་མི་འགྱུར་བའི་སྟོབས་དང་ལྡན་པ་ཉིད་དུ་སྤེལ་བར་བྱེད་ཅེས་པའི་ཐ་ཚིག་ཅན་ཏེ། དེ་ལ་ཡོངས་སུ་བསྔོ་བ་ཞེས་སྔོན་གྱི་ལོ་ཙཱ་བ་རྣམས་ཀྱིས་དོན་འགྱུར་དུ་མཛད་པ་ཡིན་ནོ། །གསུམ་པ་དགོས་པ་ནི། སྤྱིར་
བསོད་ནམས་བྱས་པའི་དགེ་ཚོགས་ཐམས་ཅད་ཡོངས་སུ་བསྔོ་བའི་རྒྱས་འདེབས་པར་བྱེད་པ་ནི། མུ་སྟེགས་བྱེད་ཀྱི་གཞུང་དག་ལ་མ་གྲགས་པ། རྣམ་པ་ཐམས་ཅད་མཁྱེན་པ་ཆེན་པོ་ཉིད་ཀྱི་ཁྱད་པར་གྱི་ཆོས་ཏེ། ཁྱད་པར་དུ་འཕགས་པའི་བསྟོད་པ་ལས། བསོད་ནམས་
བྱས་པའི་ཚོགས་དག་ནི། །སེམས་ཅན་རྣམས་ལ་ཡོངས་བསྔོ་བ། །བཅོམ་ལྡན་ཁྱོད་ཀྱིས་གང་གསུངས་པ། །དེ་གཞན་བསྟན་བཅོས་ལས་མ་བཤད། །ཅེས་སོ། །དེས་ན་སྟོན་པ་བཅོམ་ལྡན་འདས་ཐུབ་པའི་དབང་པོ་དེའི་རྗེས་སུ་སློབ་ཅིང༌། རྗེས་སུ་སྒྲུབ་པ་ལ་མི་སྤྲོ་བ་
མེད་པའི་བློ་དང་ལྡན་པ་རྣམས་ཀྱིས། བསོད་ནམས་ཀྱི་དངོས་པོ་གང་དག་བསགས་པ་ཐམས་ཅད་ཡོངས་སུ་བསྔོ་བའི་རྒྱས་འདེབས་པ་ལ་ཤིན་ཏུ་གུས་པར་བྱ་དགོས་པ་ཡིན་ནོ། །གལ་ཏེ་ན་དགེ་བའི་རྩ་བ་ཆུང་ངུ་ཞིག་ནའང་བརྙས་པར་མི་བྱ་བར་མི་གནས་པའི་མྱ་ངན་ལས་འདས་པའི་གོ་
འཕང་དུ་ཡོངས་སུ་བསྔོ་བས་ཡོངས་སུ་བསྔོས་ན། ནམ་ཞིག་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་བར་མ་དོར་ཟད་པར་མི་འགྱུར་བ་དང༌། བསམ་གྱིས་མི་ཁྱབ་པར་འཕེལ་བར་འགྱུར་བ་དང༌། བྱང་ཆུབ་ཀྱི་རྒྱུར་སྨིན་པ་ལ་སོགས་པའི་དགོས་པ་དཔག་ཏུ་མེད་པ་ཡོད་དེ། དཔེར་ན་ཆུའི་
ཐིགས་པ་གཅིག་ཅིག་རྒྱ་མཚོ་ཆེན་པོའི་ནང་དུ་ལྷུང་བའི་རྒྱུན་དེ་ནི་བསྐལ་པའི་བར་དུ་ཡང་འཛད་པར་འགྱུར་བའི་གནས་ཡོད་པ་མ་ཡིན་པ་ལྟ་བུའོ། །དེ་སྐད་དུ་ཡང་བློ་གྲོས་རྒྱ་མཚོས་ཞུས་པའི་མདོ་ལས། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང༌། །རྒྱ་མཚོ་མ་ཟད་བར་དུ་དེ་མི་ཟད། །དེ་བཞིན་
བྱང་ཆུབ་ཡོངས་བསྔོས་དགེ་བ་ཡང༌། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་དང༌། བློ་གྲོས་མི་ཟད་པའི་མདོ་ལས་ཀྱང་དེ་དང་མཐུན་པར་འབྱུང་ངོ༌། །གཞན་ཡང་དེང་གི་ལེགས་བྱས་སྒྲུབ་པ་པོ་འབྲེལ་པ་དང་བཅས་པས་བྱས་པའི་དགེ་བ་ཁོ་ནར་མ་ཟད། ཕྱོགས་ཐ་དད་པ་དང༌།
เล่ม ๒๑๓ · หน้า 485b
དུས་ཐ་དད་པ་དང༌། གང་ཟག་ཐ་དད་པ་དག་གིས་བསགས་པའི་དགེ་བ་ཐམས་ཅད་ཀྱང༌། འཁོར་གསུམ་གྱི་རྣམ་པར་རྟོག་པས་མ་བསྒྲིབས་པར་ཡོངས་སུ་བསྔོས་ན་ཆུ་ཀླུང་མང་པོ་རྒྱ་མཚོར་འབབ་པ་གཞོལ་བ་དེ་བཞིན་དུ། འཁོར་འདས་ཀྱི་དགེ་བ་ཐམས་ཅད་ཀྱང་བྱང་ཆུབ་མཆོག་གི་
རྒྱུར་འགྱུར་བའི་དགོས་པ་ཡོད་དེ། ནམ་མཁའ་མཛོད་ཀྱི་མདོ་ལས། ཐ་དད་ཕྱོགས་ནས་ཆུ་ཀླུང་མང་པོ་དག །རྒྱ་མཚོ་ཆེར་འབབ་རོ་གཅིག་འགྱུར་བ་ལྟར། །ཐ་དད་ཕྱོགས་ནས་དགེ་བ་བསགས་བྱས་པ། །བྱང་ཆུབ་བསྔོས་པ་རྣམས་ཀྱང་རོ་གཅིག་འགྱུར། །ཞེས་སོ། །གཞན་
ཡང་དགེ་བ་ཇི་ལྟ་བུའི་སྟོབས་དང་ལྡན་པ་བསགས་ཀྱང་བྱང་ཆུབ་ཏུ་མ་བསྔོས་ན་བར་མ་དོར་ཆུད་འཛའ་བར་འགྱུར་བ་སྟེ། ཇི་སྐད་དུ། ཕལ་ཆེར་དོན་མེད་དོན་ཡོད་དང༌། །རྣམ་པ་ཀུན་དུ་དོན་ཡོད་པ། །ཞེས་གསུངས་པས། མོས་པས་སྤྱོད་པའི་དགེ་བ་ཕལ་ཆེར་དོན་མེད་འགྲོ་བ་མང་སྟེ།
དགེ་བའི་ལས་ཀྱི་འཕེན་པས་གནས་སྐབས་སུ་བདེ་འགྲོའི་གནས་སུ་འཕངས་ནས་དེར་བདེ་བ་ཅུང་ཟད་ཅིག་མྱོང་བའི་སྐལ་བ་ཅན་དུ་གྱུར་ནས། དེ་ཙམ་གྱིས་ཟད་པར་གྱུར་པའམ། ཡོངས་སུ་ཟད་པར་མ་གྱུར་ནའང་བསོད་ནམས་ཀྱི་སྟོབས་ཆུང་ངུར་གྱུར་ཏེ། །ཕྱི་ནས་འབྲས་བུ་འབྱིན་པའི་
མཐུ་དམན་པར་འགྱུར་བ་དང༌། ཡུལ་ཁྱད་པར་ཅན་ལྟ་བུ་ལ་ཁོང་ཁྲོ་བ་སྐྱེས་པ་ལ་སོགས་པའི་སྡིག་པའི་ལས་རེ་རེས་ཀྱང་ཡོངས་སུ་གཏུགས་པར་འགྱུར་བ་ཡོད་དེ། དབུ་མ་འཇུག་པ་ལས། སྤྱད་དང་དངོས་སུ་ཡོངས་སུ་ཟད་པ་ན། །ཕྱིན་ཆད་དེ་ལས་ལོངས་སྤྱོད་འབྱུང་མི་འགྱུར། །
ཞེས་དང༌། ལིཙྪ་བཱིས་ཞུས་པའི་མདོ་ལས། མང་པོ་ཡང་ཉུང་ངུར་རིག་པར་བྱ་སྟེ། ཀུན་མཁྱེན་དུ་མ་བསྔོས་པའི་ཕྱིར་རོ་ཞེས་དང༌། སྤྱོད་འཇུག་ལས་ཀྱང༌། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་
དེ་ཀུན་ཀྱང༌། །ཁོང་ཁྲོ་གཅིག་གིས་འཇོམས་པར་བྱེད། །ཅེས་སོ། །དེས་ན་དགེ་བའི་རྩ་བ་ཡོངས་སུ་བསྔོས་པ་ནི་དེ་ལྟ་བུའི་རྐྱེན་གྱིས་འཇིག་པར་མི་འགྱུར་བ་ལ་སོགས་པའི་དགོས་པ་དཔག་ཏུ་མེད་པ་ཡོད་དོ། །གཉིས་པ་སོ་སོར་བཤད་པ་ལ། གང་ཞིག་བསྔོ་བར་བྱ་བ་བསོད་
เล่ม ๒๑๓ · หน้า 486a
ནམས་ཀྱི་ཁྱད་པར། གང་དུ་བསྔོ་བ་ཡུལ་གྱི་ཁྱད་པར། ཇི་ལྟར་བསྔོ་བ་ལམ་གྱི་ཁྱད་པར་ཏེ་གསུམ་ལས། དང་པོ་བསྔོ་བར་བྱ་བའི་བསོད་ནམས་ནི། །སྤྱིར་དགེ་བའི་མིང་གིས་བཏགས་པ་ཐམས་ཅད་བསྔོ་བས་བསྒྱུར་དུ་རུང་ངམ་སྙམ་ན། མ་ཡིན་ཏེ། མངོན་
པའི་གཞུང་རྣམས་ལས་དེ་བཞིན་ཉིད་ལའང་དགེ་བ་ཞེས་གསུངས་པ་ཡོད་དེ། དེ་ནི་དགོངས་པའི་དབང་གིས་གསུངས་པ་ཡིན་པའི་ཕྱིར། བསྔོ་བར་བྱ་བའི་རྒྱུ་མ་ཡིན་པ་དང༌། བསྔོས་ཀྱང་འགྱུར་བ་མེད་པར་གསུངས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་ལས། ཆོས་
ཀྱི་དབྱིངས་ལ་ཡོངས་སུ་བསྔོ་བ་མེད་དོ་ཞེས་བྱ་བ་ལ་སོགས་པ་བསྔོ་བའི་རྒྱུར་བྱས་ན་གནོད་བྱེད་མང་དུ་ཡོད་པར་གསུངས་པའི་ཕྱིར་རོ། །གལ་ཏེ་དེ་ལྟར་ཡིན་ན་བསྔོ་བའི་རྒྱུར་བཏུབ་པའི་དགེ་བའི་རྩ་བ་དེ་ནི་གང་དག་ཡིན་སྙམ་ན། བཤད་པར་བྱ་སྟེ། དུག་གསུམ་མེད་པའི་སེམས་
ཀྱིས་ཀུན་ནས་བསླངས་པའི་སྒོ་གསུམ་གྱི་ལས་གང་དག་བསགས་པ་སྟེ། རིན་ཆེན་ཕྲེང་བ་ལས། མ་ཆགས་ཞེ་སྡང་གཏི་མུག་མེད། །དེས་བསྐྱེད་ལས་ནི་དགེ་བའོ། །ཞེས་གསུངས་པ་ལྟར་རོ། །དེ་ཉིད་ལེགས་པར་སྦྱར་བའི་སྐད་དུ། ཀུ་ས་ལ་མཱུ་ལ་ཞེས་འབྱུང་ངོ༌། །དེའང་
ཀུ་ས་ལ་ནི་དགེ་བ་དང༌། མཱུ་ལ་ནི་རྩ་བ་སྟེ། དོན་དུ་རྣམ་པར་སྨིན་པ་བདེ་བ་སྐྱེད་པས་ན་དགེ་བ་སྟེ། དེའང་ཇི་སྐད་དུ། དགེ་བ་ལེགས་པར་སྤྱད་པ་སྟེ། །རྣམ་སྨིན་བདེ་བ་སྐྱེད་པའོ། །ཞེས་སོ། །དེ་ཉིད་ཀྱང་བསོད་ནམས་བྱ་བའི་དངོས་པོའི་སྒོ་ནས་དབྱེ་ན། སྦྱིན་པ་ལས་བྱུང་བའི་
བསོད་ནམས་བྱ་བའི་དངོས་པོ་དང༌། ཚུལ་ཁྲིམས་ལས་བྱུང་བའི་བསོད་ནམས་བྱ་བའི་དངོས་པོ་དང༌། བསྒོམ་པ་ལས་བྱུང་བའི་བསོད་ནམས་བྱ་བའི་དངོས་པོ་སྟེ་གསུམ་དུ་འགྱུར་བ་ལས། དེང་འདིར་སྐབས་སུ་བབ་པ་ནི་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་སྟེ། དེའང་
སྦྱིན་པའི་སྒྲ་ནི་དབུལ་བ་འདོར་བའི་དོན་ཏེ། འཇིག་རྟེན་དང་འཇིག་རྟེན་ལས་འདས་པའི་དབུལ་བ་འདོར་བར་བྱེད་པས་སྦྱིན་པ་ཞེས་སམ། ཡང་ན་འཆི་བ་དང་ཆོས་དང་སྲིད་པ་གཞན་གོ་བར་བྱེད་པས་སྦྱིན་པ་སྟེ། སློབ་དཔོན་འཕགས་པ་ལྷས། འཆི་དང་ཆོས་དང་སྲིད་པ་གཞན། །སྦྱིན་
เล่ม ๒๑๓ · หน้า 486b
པའི་སྒྲ་ཡིས་གསལ་བར་བྱེད། །དེས་ན་བྱང་ཆུབ་སེམས་དཔའ་ལ། །སྦྱིན་པའི་སྒྲ་ནི་ཤིན་ཏུ་བསྟན། །ཞེས་སོ། །དེ་ལྟ་བུའི་སྦྱིན་པ་ལའང་དབྱེ་ན། ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཞེས་པ་ལྟར་རྣམ་པ་བཞི་ལས། འདིར་སྡོམ་བརྩོན་
སྐྱེ་དགུའི་བདག་པོའི་ཐུགས་བསྐྱེད་རྒྱ་མཚོ་ལྟ་བུ་ལས་བྱུང་བའི་ལེགས་བྱས་ཀྱི་ཕུང་པོ་འདི་ནི་སྦྱིན་པ་རྣམ་པ་བཞི་ག་ཚང་བའི་སྒོ་ནས་སྒྲུབ་དགོས་ཤིང༌། བྱེ་བྲག་ཏུ་ཟང་ཟིང་གི་སྦྱིན་པ་དང་ཆོས་ཀྱི་སྦྱིན་པ་གཉིས་ནི་ཤིན་ཏུ་གཙོ་ཆེ་བ་སྟེ། དང་པོ་ནི། དུས་སུ་སྦྱིན་དང་འགྱོད་པ་མེད་པ་
དང༌། །ཡིད་འོང་སྦྱིན་དང་རྣམ་སྨིན་མི་རེ་བ། །ཞེས་གསུངས་པ་ལྟ་བུ་སྟེ་སངས་རྒྱས་ཀྱི་རྒྱུ་ཉིད་དུ་བསྔོར་མི་རུང་བ་མེད་པ་དང༌། ཆོས་ཀྱི་སྦྱིན་པ་ནི་གོང་དུ་ལུང་དྲངས་པ་རྣམས་ལས་ཇི་ལྟར་འབྱུང་བའི་ཕན་ཡོན་བསམ་གྱིས་མི་ཁྱབ་པ་དང་ལྡན་པ་དེ་ཉིད་དོ། །དེར་ཡང་མ་ཟད་ས་སྐྱོང་བསྟན་
པའི་སྲི་ཞུ་པ་ཆེན་པོ་ནས་དཀོན་མཆོག་མཆོད་པ་ལ་སོགས་པ་དུས་གསུམ་དང་རྗེས་སུ་འབྲེལ་བར་རང་ཉིད་ཀྱིས་བསགས་པ་དང་གཞན་ལ་བསྐུལ་བ་ལ་སོགས་པ་ལེགས་བྱས་ཀྱི་ཚོགས་ཇི་སྙེད་མཆིས་པ་རྣམས་དང༌། གཞན་ཡང་ཕྱོགས་བཅུའི་འཇིག་རྟེན་གྱི་ཁམས་ཀྱི་འགྲོ་བ་སུ་ཡང་
རུང་བ་དང༌། དུས་ནམ་ཡང་རུང་བ་དང༌། བསོད་ནམས་གང་ཡང་རུང་བ་བྱས་པ་ཐམས་ཅད་ཀྱང་འདིར་བསྔོར་རུང་བ་ཡིན་ཏེ། ཤིན་ཏུ་རྒྱས་པའི་སྡེ་སྣོད་ལས། འགྲོ་ཀུན་དགེ་བ་ཇི་སྙེད་ཡོད་པ་དང༌། །བྱས་དང་བྱེད་འགྱུར་དེ་བཞིན་བྱེད་པ་དང༌། །བཟང་པོ་ཇི་བཞིན་དེ་འདྲའི་
ས་དག་ལ། །ཀུན་ནས་ཀུན་ཀྱང་བཟང་པོར་རེད་གྱུར་ཅིག །ཅེས་གསུངས་སོ། །གཞན་ཡང་ཕྱོགས་བཅུའི་འཇིག་རྟེན་གྱི་ཁམས་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྲངས་མེད་པ་ཡོད་དེ། དེ་དག་ཏུ་ཇི་ལྟར་འདས་པའི་སངས་རྒྱས་བཅོམ་ལྡན་འདས་བགྲང་ལས་འདས་པ་
གང་དག་བྱུང་བ་རྣམས་ཀྱིས། དང་པོར་བྱང་ཆུབ་ཏུ་སེམས་བསྐྱེད་པ་ནས་བཟུང་སྟེ། མངོན་པར་རྫོགས་པར་སངས་རྒྱས་པའི་བར་དང༌། ཡོངས་སུ་མྱ་ངན་ལས་འདས་པ་ནས་དམ་པའི་ཆོས་ཡོངས་སུ་ཟད་ཀྱི་བར་ཏེ། དེ་དག་གི་བར་དུ་སངས་རྒྱས་བཅོམ་ལྡན་འདས་དེ་དག་གིས་
เล่ม ๒๑๓ · หน้า 487a
ཕ་རོལ་ཏུ་ཕྱིན་པ་དྲུག་ལས་བརྩམས་པའི་དགེ་བའི་རྩ་བ་གང་དག་བསགས་པ་དང༌། ཡོན་ཏན་གྱི་ཚོགས་བསམ་གྱིས་མི་ཁྱབ་པ་བརྙེས་པ་དང༌། ཆོས་ཀྱི་འཁོར་ལོ་བསྐོར་བ་དང༌། ཆོས་དེ་དག་ལ་བསླབས་པའི་བྱང་ཆུབ་སེམས་དཔའ་བྱང་ཆུབ་ཏུ་ལུང་བསྟན་
པ་དང༌། རང་སངས་རྒྱས་དང༌། ཉན་ཐོས་སློབ་པ་དང༌། མི་སློབ་པ་དང༌། སངས་རྒྱས་བཅོམ་ལྡན་འདས་དེ་དག་གིས་རྗེས་སུ་བསྟན་པ་རྗེས་སུ་ཐོས་པའི་ལྷ་དང་མི་ལ་སོགས་པས་དགེ་བའི་རྩ་བ་ཟག་བཅས་དང་ཟག་མེད་གང་དག་བསྐྲུན་པ་རྣམས་ཀྱང་ཡོངས་སུ་བསྔོ་བར་བྱ་བ་
ཉིད་དེ། དེ་སྐད་དུ་ཡང་སྡུད་པ་ཚིགས་སུ་བཅད་པ་ལས། འདས་དུས་སྔོན་གྱི་སངས་རྒྱས་བྱེ་བ་ཁྲག་ཁྲིག་གང༌། །ཞིང་མང་མཐའ་ཡས་བྱེ་སྟོང་དག་ན་གང་བཞུགས་དང༌། །གང་ཡང་མྱ་ངན་འདས་པ་འཇིག་རྟེན་མགོན་པོ་རྣམས། །སྡུག་བསྔལ་ཟད་པར་བྱ་ཕྱིར་རིན་ཆེན་
ཆོས་སྟོན་པ། །དང་པོ་བྱང་ཆུབ་མཆོག་ཏུ་སེམས་བསྐྱེད་བསྐྱེད་པ་ནས། །རྣམ་པར་འདྲེན་པ་རྣམས་ཀྱི་དམ་ཆོས་ཟད་ཀྱི་དུས། །དེ་བར་རྒྱལ་བ་དེ་དག་བསོད་ནམས་གང་ཡིན་པ། །ཕ་རོལ་ཕྱིན་དང་ལྡན་དང་སངས་རྒྱས་ཆོས་གང་དང༌། །གང་ཡང་སངས་རྒྱས་སྲས་རྣམས་དང་
ནི་ཉན་ཐོས་དང༌། །སློབ་དང་མི་སློབ་དགེ་བ་ཟག་བཅས་ཟག་མེད་པ། །བསྡུས་ནས་བྱང་ཆུབ་སེམས་དཔའ་རྗེས་སུ་ཡི་རངས་ཤིང༌། །འགྲོ་བའི་དོན་རྒྱུ་བྱང་ཆུབ་ཕྱིར་ནི་ཐམས་ཅད་བསྔོ། །ཞེས་དང༌། ཕལ་པོ་ཆེ་ལས། ཕྱོགས་བཅུའི་འཇིག་རྟེན་དག་ན་གང་ཡོད་པའི། །
དགེ་བ་དེ་དག་ཡང་ཡང་བསྒྲུབས་པས་ན། །འགྲོ་བ་ཀུན་ལ་ཕན་དང་བདེ་སེམས་ཀྱི། །ཡེ་ཤེས་མཁས་པ་དེ་དག་ཡོངས་སུ་བསྔོ། །ཞེས་པ་ལྟར་ཏེ། མདོར་ན་སྒོ་གསུམ་གྱིས་མངོན་པར་འདུ་བགྱིས་པའི་བསོད་ནམས་ཀྱི་ཚོགས་ཇི་སྙེད་པ་དག་ནི་རྫོགས་པའི་བྱང་ཆུབ་ཀྱི་
ཕྱིར་ཡོངས་སུ་བསྔོ་བར་བྱ་བའི་ཆོས་སོ། །གཉིས་པ་གང་དུ་བསྔོ་བའི་ཡུལ་ནི། དགེ་བ་དེ་དག་ཀྱང་སངས་རྒྱས་ཀྱིས་ལས་གཞན་པ་འཇིག་རྟེན་པའི་ཆེན་པོ་ཚངས་པ་དང༌། བརྒྱ་བྱིན་དང༌། སྟོང་འཁོར་ལོས་སྒྱུར་བའི་རྒྱལ་པོ་དང༌། ཁམས་ཀྱི་རྒྱལ་ཕྲན་དང༌། འཁོར་
เล่ม ๒๑๓ · หน้า 487b
དང་ལོངས་སྤྱོད་ཆེན་པོ་དང་ལྡན་པ་ལ་སོགས་པ་འཁོར་བའི་བདེ་འབྲས་སྒྲུབ་པའི་ཆེད་དུ་བསྔོ་བར་བྱ་བ་ནི་མ་ཡིན་ཏེ། དེ་དག་ནི་དངོས་སམ་བརྒྱུད་ནས་སྡུག་བསྔལ་རྒྱུ་དང་བཅས་པ་ལས་མ་བརྒལ་བ་ཡིན་ལ། དགེ་བ་ནི་གཏན་གྱི་འདུན་མ་བསྒྲུབ་པའི་ཕྱིར་བསགས་པ་ཡིན་པས་
སོ། །དེར་མ་ཟད་རང་ཉིད་གཅིག་པུ་སྡུག་བསྔལ་དང་བྲལ་བ་ཙམ་གྱི་འབྲས་བུ་ཉན་ཐོས་ཀྱི་སའམ་རང་སངས་རྒྱས་ཀྱི་སར་ཡོངས་སུ་བསྔོ་བ་ཡང་མ་ཡིན་ཏེ། དེ་དག་ནི་རང་དོན་ཞི་བའི་བདེ་བ་ལྷུར་བྱེད་པས། གཞན་དོན་དུ་རྫོགས་པའི་བྱང་ཆུབ་ཐོབ་པའི་གེགས་སུ་བྱེད་པའི་
ཕྱིར་རོ། །དེ་བས་ན་སྲིད་པ་དང་ཞི་བའི་མཐའ་ལ་མི་གནས་པ་རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་ས་འབའ་ཞིག་ནི་བསྔོ་བའི་ཡུལ་དུ་གྱུར་པ་ཡིན་ནོ། །དེ་སྐད་དུ་ཡང་རྒྱལ་བའི་ཡུམ་ལས། དགེ་བའི་རྩ་བ་ཐམས་ཅད་རྣམ་པ་ཐམས་ཅད་མཁྱེན་པ་ཉིད་མ་གཏོགས་
པར་ཉན་ཐོས་ཀྱི་སའམ། རང་སངས་རྒྱས་ཀྱི་སར་ཡོངས་སུ་བསྔོར་མི་འཇུག་པ་ཡིན་ནོ་ཞེས་དང༌། མགོན་པོ་བྱམས་པས་ཀྱང༌། ཁམས་གསུམ་གཏོགས་པ་མ་ཡིན་དང༌། །ཞེས་བྱ་བ་ལ་སོགས་པ་གཞན་ཡང་མང་དུ་འབྱུང་ངོ༌། །གལ་ཏེ་དེ་ལྟར་ཡིན་དུ་ཆུག་ཀྱང༌། ཚེ་
རིང་བ་དང༌། ནད་མེད་པ་དང༌། དཔལ་འབྱོར་རྒྱས་པ་དང༌། རིགས་བཟང་པོར་སྐྱེ་བ་ལ་སོགས་པ་གནས་སྐབས་ཀྱི་ཕུན་སུམ་ཚོགས་པའི་ཆེད་དུ་བསྔོ་བའང་དངོས་སུ་མཐོང་བ་ཅི་ཞིག་ཅེ་ན། གནས་སྐབས་ཀྱི་ཕུན་སུམ་ཚོགས་པ་འབའ་ཞིག་གི་ཕྱིར་བསྔོ་བ་ནི་དམིགས་པ་དམན་
པ་ཡིན་པས་འཇིག་རྟེན་པའི་བསྔོ་བ་ལས་མ་འདས་པའི་ཕྱིར་བསྔོ་ཉེས་པ་ཡིན་ལ། མཐར་ཐུག་གི་འབྲས་བུ་ཐམས་ཅད་མཁྱེན་པའི་ཕྱིར་གཙོ་བོར་དམིགས་ནས། དེ་ཉིད་མངོན་དུ་མ་གྱུར་བར་གྱི་སྐྱེ་བ་དང་ཚེ་རབས་ཐམས་ཅད་དུ་གནས་སྐབས་ཀྱི་འབྲས་བུ་ཕུན་སུམ་ཚོགས་པའི་
ཕྱིར་བསྔོ་བ་ནི་མི་འགལ་ཏེ། བྱང་ཆུབ་སྒྲུབ་པ་ལའང་འགལ་རྐྱེན་མེད་པ་དང༌། མཐུན་རྐྱེན་ཕུན་སུམ་ཚོགས་པ་ནི་ལམ་མྱུར་དུ་མཐར་ཕྱིན་པའི་གྲོགས་སུ་འགྱུར་བའི་ཕྱིར་དང༌། བརྒྱུད་ནས་གཞན་དོན་དུ་རྫོགས་པའི་བྱང་ཆུབ་ཀྱི་རྒྱུར་འགྱུར་བའི་ཕྱིར་རོ། །གསུམ་པ་ཇི་ལྟར་བསྔོ་
เล่ม ๒๑๓ · หน้า 488a
བ་ལམ་ལ་གཉིས་ལས། དང་པོ་མི་མཐུན་པའི་ཕྱོགས་སྤོང་བར་བསྟན་པ་ནི། གལ་ཏེ་བསོད་ནམས་བྱས་པ་བསྔོ་བ་ལ་གུས་པ་ལྷུར་བྱེད་ནའང་འཁོར་གསུམ་དུ་དམིགས་པ་མེད་པའི་ཤེས་རབ་ཀྱིས་མ་ཟིན་པའི་བསྔོ་བ་ནི་ཡོངས་སུ་བསྔོ་བར་མི་ཆུད་དེ།
དཔེར་ན་སྐྱེས་བུ་གང་ལ་ལ་ཞིག་གིས་ལུས་ཟུང་བརྟས་པའི་ཆེད་དུ་ཁ་ཟས་རོ་བཟང་པོ་དང་ལྡན་པ་གཡོས་ནའང༌། དུག་དང་སྦྲགས་ཏེ་ཟོས་པས་ཕན་པར་མི་འགྱུར་བ་ཁོ་ནར་མ་ཟད་ལུས་འཇིག་པའི་རྐྱེན་དུ་འགྱུར་བ་ལྟར། སངས་རྒྱས་ཀྱི་བྱང་ཆུབ་མངོན་པར་འདོད་པས་ཀུན་ནས་
བསླངས་ཏེ་བསོད་ནམས་བྱ་བའི་དངོས་པོ་མངོན་པར་འདུས་བྱས་ནས་བསྔོ་བ་ན་འཁོར་གསུམ་དུ་མཚན་མར་འཛིན་པའི་འདུ་ཤེས་ཅན་གྱིས་བསྔོ་བ་བྱས་ན་དེ་ནི་དམིགས་པ་དུག་དང་བཅས་པའི་བསྔོ་བར་འགྱུར་ཏེ། བརྒྱད་སྟོང་པ་ལས། དམིགས་པའི་འདུ་ཤེས་ཅན་ལ་ཡོངས་སུ་བསྔོ་
བ་མེད་དོ། །དེ་ཅིའི་ཕྱིར་ཞེ་ན། དམིགས་པ་ནི་དུག་དང་བཅས་པའོ་ཞེས་དང༌། སྡུད་པ་ལས་ཀྱང༌། གལ་ཏེ་མཚན་མར་བྱེད་ན་དེ་ནི་བསྔོ་མ་ཡིན། །ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། །ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་
པའང་དེ་འདྲར་རྒྱལ་བས་གསུངས། །ཞེས་སོ། །གཞན་ཡང་དེ་ལྟ་བུའི་རྣམ་པར་རྟོག་པ་དེ་ནི་ཤེས་བྱའི་སྒྲིབ་པའང་ཡིན་ཏེ། མགོན་པོ་བྱམས་པས། འཁོར་གསུམ་རྣམ་པར་རྟོག་པ་གང༌། །དེ་ནི་ཤེས་བྱའི་སྒྲིབ་པར་འདོད། །ཅེས་སོ། །དེས་ན་དམིགས་པའི་ཟུག་རྔུ་
ཅན་གྱི་བསྔོ་བ་ནི་སྤོང་བར་བྱ་བ་ཉིད་དུ་བསྟན་ཏོ། །གཉིས་པ་མཐུན་པའི་ཕྱོགས་སྒྲུབ་པར་བསྟན་པ་ནི། ཐབས་དང་ཤེས་རབ་ཀྱིས་ཟིན་པའི་བསྔོ་བས་ཡོངས་སུ་བསྔོས་ན་བཟང་པོ་བཞི་དང་ལྡན་པའི་བསྔོ་བར་ཡང་འགྱུར་ཏེ། དམིགས་པ་བཟང་དང་སྟོན་པ་བཟང༌། །ཐབས་
བཟང་བ་དང་ངེས་འབྱུང་དང༌། །སྤྱོད་པ་བཟང་པོའི་བདག་ཉིད་ཀྱིས། །ཡང་དག་སྨོན་ལམ་ཡིན་པར་བཤད། །ཅེས་པ་ལྟར་རོ། །དེ་ལས་ཐབས་ནི་བྱང་ཆུབ་ཀྱི་སེམས་ཀྱི་རྩིས་ཟིན་པ་སྟེ། ཇི་ལྟར་བསྒྲུབས་པའི་དགེ་བ་ཐམས་ཅད་ཀྱང་ནམ་མཁའ་དང་མཉམ་པའི་སེམས་ཅན་
เล่ม ๒๑๓ · หน้า 488b
ཐམས་ཅད་དང་ཐུན་མོང་དུ་བྱས་ཏེ་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་མྱུར་དུ་ཐོབ་པའི་ཕྱིར་ཡོངས་སུ་བསྔོ་སྙམ་པའི་འདུན་པ་དང་མ་བྲལ་བ་སྟེ། སྤྱོད་འཇུག་ལས། དངོས་སམ་ཡང་ན་བརྒྱུད་ཀྱང་རུང༌། །སེམས་ཅན་དོན་ལས་གཞན་མི་སྤྱད། །
སེམས་ཅན་ཁོ་ནའི་དོན་གྱི་ཕྱིར། །ཐམས་ཅད་བྱང་ཆུབ་ཕྱིར་བསྔོའོ། །དེ་ལྟ་བུའི་བྱང་ཆུབ་སེམས་ཀྱི་སྟོབས་ཀྱིས་ཡོངས་སུ་ཟིན་པའི་བསོད་ནམས་ཀྱི་འབྲས་བུ་ནི་ནམ་ཡང་ཟད་པ་མེད་ཅིང་འཕེལ་བར་འགྱུར་བའི་ཕྱིར་དགེ་བ་གཞན་ཐམས་ཅད་ལས་མཆོག་ཏུ་གྱུར་པ་དཔག་བསམ་
གྱི་ཤིང་གི་དཔེས་བསྟན་ཏེ། ཇི་སྐད་དུ། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་སྤྱད་པས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང༌། །འབྲས་བུ་འབྱིན་པས་མི་ཟད་འཕེལ་བར་བྱེད། །ཅེས་དང༌། སེམས་ཅན་ཚད་མེད་པ་ལ་དམིགས་
པས་བསོད་ནམས་ཀྱང་ཚད་མེད་པ་འབྱུང་སྟེ། རིན་ཆེན་ཕྲེང་བ་ལས། སེམས་ཅན་ཁམས་ནི་ཚད་མེད་ལ། །ཕན་འདོད་དེ་ནི་དེ་འདྲའོ། །ཞེས་སོ། །ཅིག་ཤོས་ཤེས་རབ་ནི་ཆོས་ཐམས་ཅད་ལྟ་བ་བདག་མེད་པས་ཟིན་པ་སྟེ། དེའང་དོན་དམ་པར་ཆོས་ཐམས་ཅད་ཀྱི་རང་
བཞིན་སྤྲོས་པའི་མཐའ་ཐམས་ཅད་དང་བྲལ་བར་ཤེས་ནས། འདིར་དངོས་པོ་དང་བསམ་པ་དང་ཡུལ་ཏེ། འཁོར་གསུམ་པོ་ཡོངས་སུ་དག་པའི་ཚུལ་གྱིས་མི་དམིགས་པའི་རྣམ་པ་ཅན་ཏེ། སྡུད་པ་ལས། གལ་ཏེ་འདི་ལྟར་ཆོས་འདི་འགགས་ཤིང་ཟད་པ་དང༌། །གང་དུ་ཡོངས་
སུ་བསྔོ་བ་དེ་ཡང་ཟད་པ་དང༌། །ཆོས་ཀྱིས་ཆོས་ལ་ནམ་ཡང་མི་བསྔོ་ཤེས་གྱུར་ན། །དེ་ལྟར་རབ་ཏུ་ཤེས་པས་ཡོངས་སུ་བསྔོས་པ་ཡིན། །ཞེས་དང༌། མངོན་པར་རྟོགས་པའི་རྒྱན་ལས། དེ་ནི་དམིགས་མེད་རྣམ་པ་ཅན། །ཕྱིན་ཅི་མ་ལོག་མཚན་ཉིད་དོ། །ཞེས་སོ། །ཐ་སྙད་ཀུན་
རྫོབ་ཏུ་སྒྱུ་མ་མཁན་གྱིས་སྤྲུལ་པའི་སྤྲུལ་པ་ལྟར་སྣང་ཡང་རང་བཞིན་མི་དམིགས་པ་ཉིད་དུ་བསྔོ་བ་སྟེ། མདོ་ཏིང་ངེ་འཛིན་རྒྱལ་པོ་ལས། སྒྱུ་མ་བྱེད་པ་དག་གིས་གཟུགས་སྤྲུལ་ཏེ། །རྟ་དང་གླང་པོ་ཤིང་རྟ་སྣ་ཚོགས་བྱས། །དེ་ལ་ཇི་བཞིན་སྣང་བ་གང་ཡང་མེད། །ཆོས་རྣམས་ཐམས་
เล่ม ๒๑๓ · หน้า 489a
ཅད་དེ་འདྲར་ཤེས་པར་གྱིས། །ཞེས་གསུངས་སོ། །དེ་ལྟ་བུའི་ཚུལ་གྱིས་བསྔོ་བའང༌། སྤྱོད་འཇུག་ལས། སངས་རྒྱས་བྱང་ཆུབ་སེམས་དཔའ་དག །ཀུན་ཏུ་ཐོགས་མེད་གཟིགས་པ་ལྡན། །དེ་དག་ཀུན་གྱི་སྤྱན་སྔ་ན། །བདག་ནི་རྟག་པར་གནས་སོ་ཞེས། །ཞེས་གསུངས་
པ་ལྟར་ཕྱོགས་བཅུ་རབ་འབྱམས་མུར་ཐུག་པ་མེད་པའི་ཞིང་ཁམས་རྣམས་སུ་བཞུགས་པའི་བཅོམ་ལྡན་འདས་སྲས་དང་སློབ་མར་བཅས་པ་ཐམས་ཅད་དཔང་པོར་བཞུགས་ནས་ཇི་ལྟར་བསྔོས་པ་དེ་ལྟར་དུ་འགྲུབ་པར་བྱིན་གྱིས་རློབས་པར་མོས་ནས་བསོད་ནམས་བྱ་བའི་དངོས་པོ་ཐམས་ཅད་བླ་ན་མེད་
པའི་བྱང་ཆུབ་ཀྱི་ཕྱིར་ཡོངས་སུ་བསྔོ་བ་ནི་ཇི་ལྟར་བསྔོ་བའི་ཚུལ་དུ་བཤད་པ་ལགས་སོ། །གསུམ་པ་དེ་བྱང་ཆུབ་ཏུ་བསྔོ་བ་ནི། དེའང་ཇི་ལྟར་སྔོན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང་ཀུན་ཏུ་བཟང་པོ་ལ་སོགས་པ་འཕགས་པ་རྣམས་ཀྱི་སྤྱོད་པའི་རྗེས་སུ་སློབ་
ཅིང་རྗེས་སུ་སྒྲུབ་པའི་འདུན་པ་དང་བཅས་ཏེ། གཞལ་དུ་མེད་པའི་ལེགས་བྱས་ཀྱི་ཕུང་པོ་འདི་ཉིད་སེམས་ཅན་ཐམས་ཅད་ཀྱི་དོན་དུ་བླ་ན་མེད་པའི་བྱང་ཆུབ་ཀྱི་རྒྱུར་ཡོངས་སུ་བསྔོ་སྟེ། དེའང་མདོ་སྡེ་དྲན་པ་ཉེ་བར་གཞག་པ་ལས། སངས་རྒྱས་ཆོས་དང་དགེ་འདུན་ལ་བསྟོད་པ། །གསལ་
བར་འགྱུར་བའི་སྙན་དངགས་འབད་པར་བྱ། །ཞེས་དང༌། དམ་པའི་ཆོས་ཤིན་ཏུ་གསལ་བར་བྱེད་པའི་སྙན་དངགས་བྱའོ། །དེ་ལས་མྱ་ངན་ལས་འདས་པའི་མཐར་ཐུག་པར་འགྱུར་རོ། །ངལ་བ་འབྲས་བུ་དང་བཅས་པར་འགྱུར་རོ། །གཞན་དག་གིས་དེ་རབ་ཏུ་བསྔགས་པར་འགྱུར་རོ། །
ལུས་ཞིག་ནས་ཤི་བའི་འོག་ཏུའང་ལྷ་རྣམས་སུ་སྐྱེ་བར་འགྱུར་རོ་ཞེས་གསུངས་པ་ལྟར་འདིར་ཇི་ལྟར་བསྔོ་བའི་ཚིགས་སུ་བཅད་པའང་འཕགས་པའི་ཡུལ་གྱི་པཎྜི་ཏ་ཆེན་པོ་དཔལ་ལྡན་དབྱུག་པ་ཅན་གྱི་གཞུང་གི་རྗེས་སུ་འབྲངས་ནས། རྒྱན་གྱི་སྦྱོར་བ་ཕུན་སུམ་ཚོགས་པའི་ཁོངས་ལས་ཉེ་བར་
དྲངས་ཏེ་ཅུང་ཟད་ཅིག་བརྗོད་པ་ནི། འདི་ལྟ་སྟེ། ཨོཾ་སྭསྟི་སིདྡྷོ་བྷ་ཝ་ཏུ། (*རང་བཞིན་བརྗོད་པ་ལས་ཡོན་ཏན་གྱི་རང་བཞིན་བརྗོད་པ།) གང་གི་རང་བཞིན་སྐྱེ་དང་གནས་དང་འཇིག་ལས་རྣམ་གྲོལ་འདུས་མ་བྱས། །ལྷུན་གྲུབ་ཞི་བ་ཆེན་པོའི་སྐུ་ནི་སྤྲོས་མཐར་ནམ་ཡང་གནས་པ་མིན། །འགྲོ་བ་ཐམས་ཅད་རང་གི་
เล่ม ๒๑๓ · หน้า 489b
གོ་འཕང་འཁྲིད་པའི་ཐབས་མཁྱེན་ཐུགས་རྗེ་ཆེ། །བསམ་གྱིས་མི་ཁྱབ་ནུས་པའི་བདག་ཉིད་སངས་རྒྱས་རྣམས་ལ་སྐྱབས་སུ་མཆི། ༡ །རྙོག་བྲལ་(*ཡན་ལག་གཅིག་པའི་གཟུགས་ཅན།) ཡེ་ཤེས་དམ་པ་ལས་གཞན་སྒྲ་རྟོག་ཡུལ་ལས་རིང་དུ་འདས། །གཉིས་སུ་བགྱི་དང་ཀུན་དུ་རྟོག་པའི་སྒྲིབ་པ་ཀུན་གྱིས་མ་བསྒྲིབས་པ། །དེ་ཉིད་
ཐོབ་བྱེད་མཐོང་དང་བསྒོམ་ལམ་རྨོངས་པ་ཟ་བའི་གསུས་པོ་ཆེ། །ཤེས་བྱའི་གནས་ལུགས་ཡང་དག་སྣང་བྱེད་དམ་པའི་ཆོས་ལ་སྐྱབས་སུ་མཆི། ༢ །རིང་(*་ཆ་ཤས་ཀྱི་གཟུགས་ཅན།) མོའི་དུས་ནས་ལེགས་སྦྱངས་བློ་གྲོས་སྣང་བའི་གཏེར་གྱི་དཀྱིལ་འཁོར་རྒྱས། །ཟབ་ཡངས་ཆོས་ཚུལ་ཡིད་
བཟངས་རྐང་པ་བཀོད་པའི་གནས་སུ་ཆགས་ཐོགས་བྲལ། །ཕྲིན་ལས་འོད་རླབས་གཞལ་དུ་མེད་པས་ལུང་རྟོགས་ཆོས་ཀྱི་འདབ་སྟོང་ཚལ། །རྒྱ་ཆེར་འབྱེད་པའི་རྩ་ལག་རྨད་བྱུང་འཕགས་པའི་ཚོགས་ལ་སྐྱབས་སུ་མཆི། ༣ །འགྲོ་(*གཟུགས་ཅན་གྱི་གཟུགས་ཅན།) ལ་ཕན་པའི་བློ་གྲོས་འབྲུག་སྒྲའི་གར་གྱི་
གླུ་དབྱངས་ལེན་པ་མོས། །དགེ་ཚོགས་བྱང་ཆུབ་སྨིན་པའི་ཡོན་ཏན་སྤྲིན་གྱི་མཛའ་བོ་ལ་ཆགས་ནས། །ལེགས་བྱས་སྤུ་སྡུག་མཐའ་དག་བསྡེབས་པའི་སྣ་ཚོགས་གོས་ཀྱིས་ལེགས་པར་བརྒྱན། །འབྲས་བུ་ཡིད་འོང་འགུགས་པའི་སྨོན་ལམ་འཕྲིན་ཡིག་སྙན་པའི་
རྒྱུད་མངས་འཁྲོལ། ༤ །(*བྱ་བའི་རང་བཞིན་བརྗོད་པ།) བཟོད་པར་ལྡན་པས་བརྒྱན་པའི་འཇིག་རྟེན་འདི་ཡི་གདུལ་བྱ་རིགས་ཅན་གསུམ། །ཐ་དད་བློ་དང་འཚམ་པར་ཐེག་པའི་ཆོས་ཀྱི་འཁོར་ལོ་ལེགས་བསྐོར་བས། །མངོན་མཐོ་ངེས་པར་ལེགས་པའི་ཕན་པ་ཅི་ཡང་འབྱུང་གནས་བླ་ན་མེད། །བསྟན་པ་འདི་ཡི་
བྱེད་པོར་གྱུར་པ་སྟོན་མཆོག་དམ་པ་ཤཱཀྱའི་གཙོ། ༥ །(*རྐང་པ་གསུམ་གྱི་ཐོག་མར་ཡོད་པའི་ཟུང་ལྡན།) དེ་ཉིད་ཀྱིས་མཚོན་ཕྱོགས་བཅུ་དག་ཏུ་ལྷ་ཡི་རྫིང་རིང་རབ་སོང་བ། །དེ་དག་རྣམས་སུ་ཁྱབ་པར་བརྡལ་བར་ཕྲ་རབ་རྡུལ་གྱི་གོ་སར་ཡང༌། །བགྲང་བ་ལས་འདས་ཞིང་གི་བཀོད་པ་ཚར་དུ་དངར་བས་གཏམས་གྱུར་པ། །
དེ་དག་ཀུན་དུ་བྱོན་དང་འབྱོན་འགྱུར་འཚོ་ཞིང་གཞེས་པའི་སངས་རྒྱས་རྣམས། ༦ །(*ངག་དོན་ཀྱི་དཔེ་ལས་བཞིན་སྒྲ་གཅིག་པ་ཅན།) སྟོན་མཆོག་དེ་དག་རེ་རེ་ལ་ཡང་གདུང་འཚོབ་འགྱུར་བ་རྒྱལ་བའི་སྲས། །སློབ་མར་གྱུར་པའི་འཕགས་པ་དང་བཅས་འཁོར་ཚོགས་བྱེ་བ་ཁྲག་
เล่ม ๒๑๓ · หน้า 490a
ཁྲིག་གིས། །མདུན་ནས་ལེགས་པར་བདར་བའི་ངོ་མཚར་རྒྱུ་སྐར་ཚོགས་ཀྱི་དོ་ཤལ་ཅན། །ཀུན་དུ་ཕན་པ་གཞོན་ནུས་བརྒྱན་བཞིན་མཛེས་པར་གྱུར་པ་གང་དག་ཡོད། ༧ །འདི་(*བསྡུས་ཤིང་མ་བསྡུས་པའི་གཟུགས་ཅན།) ན་བསོད་ནམས་མྱུ་གུ་གཞོན་ནུས་ཕྱོགས་རབ་དཀྲིགས་པ་དབྱར་གྱི་དཔལ། །གནས་
སྐབས་མཐར་ཐུག་སྙིང་པོ་གང་ཡིན་སྟོན་དུ་ཉེ་བར་བསུ་བའི་ཚེ། །གང་བསམ་དོན་གྱི་སྙེ་མ་ཀུན་ནས་སྨིན་བྱེད་དུས་ཀྱི་རྒྱལ་མོ་ཡིས། །བསྔོ་བྱ་སྨོན་པའི་དངོས་པོ་ཐམས་ཅད་སྙན་དངགས་དམ་པའི་རྒྱང་གླུ་ལེན། ༨ །(*རབ་ཏུ་སྤེལ་བ།) འོན་ཏེ་སྐྱེ་བའི་འཁྲི་ཤིང་གར་མའི་ལག་པ་
བཞིན་དུ་བསྒྱུར་བའི་ཚེ། །གཡོ་སྒྱུའི་གཏམ་དང་ཀྱལ་བ་ལ་སོགས་འཕྱོན་འདྲིད་སྤངས་པ་ཡང་མི་དྲན། །དྲང་སྲོང་ངག་གི་མཚོན་ཆ་རྣོན་པོར་ལྡན་པའི་སྐྱེ་བ་ཉིད་ཀྱང་མིན། །རིག་སྔགས་གྲུབ་པའི་གཙུག་ཏོར་ཡང་མིན་དེ་སྲིད་ཐམས་ཅད་གཞན་གྱི་དབང༌། ༩ །(*སྤང་གནས་མེད་པའི་བྱེད་རྒྱུ།) དེ་སླད་དུ་ནི་
བགྲང་ལས་འདས་པའི་སྐྱེ་བར་སྐྱོན་རྣམས་བསྐམས་བྱས་པས། །ཡོན་ཏན་མཐའ་དག་ལྷུན་གྲུབ་རང་བཞིན་དབུགས་ཀྱི་རྒྱུ་བའི་རྒྱུན་རེར་ཡང༌། །གཞན་དོན་ཉིད་དུ་མི་འགྱུར་འགའ་ཡང་མེད་པའི་དབང་བཅུ་ལྡན་པ་རྣམས། །དེ་རིང་བདག་ཅག་ཇི་ལྟར་སྨོན་པ་སྙིང་པོ་
ཀུན་གྱིས་ལྕི་བར་མཛོད། ༡༠ །(*རབ་རྟོག་བཞིན་སྒྲ་ཅན།) ཕྱག་གི་འོས་གྱུར་དེ་དག་སོ་སོའི་སྤྱན་སྔ་རུ། །གྲངས་མེད་སྤྲུལ་པའི་སྨྲ་བ་མཁས་པ་དང་འགྲོགས་ཏེ། །ཡོན་ཏན་ཕུང་པོ་གཏམ་དུ་གླེང་བའི་ཁུར་ལྕི་བས། །ཡན་ལག་ལྔ་ཡང་དུབ་པས་ས་ལ་ངལ་བསོ་བཞིན། ༡༡ །(*བསྡུས་ཤིང་མ་བསྡུས་པའི་གཟུགས་ཅན།) རང་སེམས་སྒྱུ་མའི་རྒྱལ་པོ་འདིས་ནི་སྐད་ཅིག་རེར།) །
བསྐལ་པ་ཀུན་གྱི་ཉེར་སྤྱད་ཉིད་དུ་རྟག་འཇོ་བའི། །གྱ་ནོམ་མེ་ཏོག་བདུག་པ་ལ་སོགས་ལྷ་མིའི་དཔལ། །སྣང་སྟོང་མཆོད་པའི་ལྟད་མོ་ཅི་ཡང་ངོམ་ལ་དགའ། ༡༢ །(*རིགས་མཐུན་ལྡོག་པ་ཅན།) ཞོ་འཐུང་རུས་པའི་སྤྱད་ཀྱིས་བརྡར་ཡང་ཉམས་པ་མེད། །པཀྵུའི་
རྒྱུན་གཙང་ཕབ་པས་ཀྱང་ནི་དག་མིན་པའི། །རང་བཞིན་བཅས་པར་བགོས་པའི་དྲི་མ་ནག་པོ་ཡིས། །ཐར་པ་སྒྲིབ་པར་བྱེད་དེ་སྟོབས་བཞིའི་ཆོ་གས་སྦྱང༌། ༡༣ །(*རྨད་དུ་བྱུང་བའི་དཔེ།) ཟླ་གཞོན་ཡིད་འོང་ཟེར་གྱི་ཐིགས་པ་འཛག་པ་འདིས། །འཁོར་བ་མྱ་ངན་ལས་འདས་
เล่ม ๒๑๓ · หน้า 490b
དགེ་བ་དཀར་པོ་ཡང༌། །ཆེས་དཀར་བྱེད་པའི་ནུས་པ་ཡོད་ན་ད་ལྟ་བདག །དགེ་ལ་ཡི་རངས་བསྒོམས་པའི་རྗེས་སུ་ཅིས་མི་འགྲོ། ༡༤ །(*འོས་ཤིང་མི་འོས་པའི་དོན་གཞན་བཀོད་པ།) ཡོན་ཏན་མ་རྫོགས་དེ་སྲིད་དབེན་པ་ལ་དགའ་མོད། །མི་མཆོག་བདུད་རྩིའི་གཏམ་ལ་སྤྲོ་མེད་རིགས་པ་མིན། །གོང་བུར་འཐུམས་པའི་ཆུ་སྐྱེས་སྒྲ་མེད་ཡུར་
བའི་ལས། །འདབ་སྟོང་ཡོངས་སུ་གྲོལ་བས་མི་འོས་པ་མིན་ནམ། ༡༥ །(*གཞན་གྱི་དབང་གིས་འགོག་པ།) ཟབ་ཞི་བདེ་དབྱིངས་སྤྲོས་པ་བརྟུལ་ལ་དགྱེས་པ་རྣམས། །རྒྱལ་བའི་སྲས་ཆེན་འགྲོ་ལ་སྙིང་རྗེས་སེམས་འཁྲུགས་ནས། །དུས་དྲུག་རྒྱལ་བའི་ཐུགས་རྗེས་བསྐུལ་བ་ཐམས་ཅད་
ལ། །གྲོས་སུ་དྲིས་དང་བདག་ཀྱང་དེ་དང་མཐུན་པར་སྨྲ། ༡༦ །(*མ་བསྡུས་པའི་གཟུགས་ཅན།) དེ་ལྟའི་ཞིང་བསམ་སྦྱོར་བ་དག་པའི་མྱོས་བུམ་ལས། །དགེ་བའི་ཟིལ་མངར་མུ་ཏིག་མདངས་འཚེར་རབ་འཐུངས་པས། །ཡོན་ཏན་མི་ཟད་མཆོག་གི་ལང་ཚོ་དར་བའི་འཛུམ། །ཆོས་ཀྱི་འོད་
རླབས་བྱེ་བ་ཕྲག་མང་གསལ་གྱུར་ཅིག ༡༧ །འདི་(*ཡན་ལག་གཅིག་པའི་གཟུགས་ཅན།) ན་རིང་མོའི་དུས་ན་རྒྱལ་བའི་བསྟན་པ་ལ། །ཕན་པའི་སྨོན་ལམ་སྙན་དངགས་དམ་པའི་སྐུད་པ་ཡིས། །ལན་བརྒྱར་བཙེམས་པ་དུས་འདིར་སྡོམ་བརྩོན་རྒྱལ་པོ་ཡི། །བརྟུལ་ཞུགས་ལ་བརྟེན་དམ་པའི་ཚུལ་
ལ་སྤྲོ་བ་ཅན། ༡༨ །གང་དེ་ཇེ་(*མ་བསྡུས་པའི་གཟུགས་ཅན།) མཐོའི་རིགས་ཀྱི་མ་ལ་ཡ་ཡི་ནགས། །སྐྱེ་བ་དམ་པའི་དཔལ་གྱི་དུམ་བུར་འཁྲུངས་གྱུར་པ། །གང་ཚེ་མཆེད་ཟླར་གྱུར་པའི་སཱ་ལ་ཟུང་དང་བཅས། །བྱང་ཆུབ་སྤྱོད་པར་ཡང་དག་ཞུགས་པའི་དགའ་སྟོན་དུ། ༡༩ །(*བྱ་བ་བརྗོད་པ་ཐ་མའི་གསལ་བྱེད།) དྲང་སྲོང་ཆེན་
པོའི་བཀའ་ལུང་ཡོངས་ཀྱི་རྣམ་པར་འགྲེལ། །འཇིག་རྟེན་ཁམས་སུ་རིང་པོར་བརྟན་པའི་ཆོ་ག་རུ། །མི་ཟད་ཆོས་ཀྱི་གཏོང་བ་རྟག་ཏུ་འབྱུང་བའི་དཔྱིད། །པར་ཞེས་བྱ་བའི་ཡི་གེ་རབ་ཏུ་གསལ་བ་བསྐྲུན། ༢༠ །ཚུལ་(*ཡོན་ཏན་བརྗོད་པ་ཐ་མའི་གསལ་བྱེད།) འདི་ཐོག་མར་མངོན་
པར་བརྩམས་པའི་གཡར་དམ་བཅས། །བར་དུ་སྙིང་སྟོབས་ཞུམ་པ་མེད་པར་གཏོང་བ་རྩོམ། །ཐ་མར་ལེགས་པར་ཕ་རོལ་ཕྱིན་ལ་དགྱེས་པའི་འཛུམ། །བརྒྱ་ཕྲག་གྲོལ་བ་ལས་བྱུང་དགེ་བ་དཀར་པོ་དང༌། ༢༡ །(*སྟོང་བ་མཚུངས་པའི་རབ་སྤེལ།) དེ་ཡི་དྲིན་གྱིས་སྲིད་པ་
เล่ม ๒๑๓ · หน้า 491a
གསུམ་གྱི་ཁོངས་དག་ཏུ། །བསོད་ནམས་གོམ་པ་བགྲང་དུ་མེད་པ་གང་དག་བཀོད། །དུས་གཞན་དུ་ཡང་སྡིག་པའི་སྙིང་ལ་འབིགས་སྙམ་ཅན། །བདེ་བའི་འབྱུང་གནས་ཟླ་འོད་འདྲ་བ་བསགས་པ་དང༌། ༢༢ །མི་(*དངོས་པོའི་དཔེ།) བདག་འཁོར་ལོ་རིན་ཆེན་གང་དུ་བགྲོད་པ་
དེར། །དཔུང་གི་ཚོགས་ཀྱང་དེ་ན་མངོན་ཕྱོགས་རྒྱུ་བ་བཞིན། །དེང་འདིར་ས་བདག་ཆེན་པོས་དགེ་བ་བརྩམས་རྗེས་སུ། །དངོས་དང་བརྒྱུད་པའི་གྲོགས་ལྡན་གང་དག་ཡོད་པ་དང༌། ༢༣ །ལེགས་(*ཡོངས་སུ་བརྗེས་པ།) བྱས་གང་ལས་འཕོས་པར་གྱུར་པའི་ཡི་གེའི་འཛུམ། །ཕྱོགས་ཀྱི་དཀྱིལ་
འཁོར་མཛེས་པའི་རྒྱན་དུ་ལེགས་བྱིན་པས། །དེ་དག་ཀུན་ནས་དམ་པའི་ཆོས་ཕྱིར་དམིགས་པའི་རྫས། །གང་དག་ལེགས་བསྟབས་འགྲོ་བ་རྣམས་ཀྱི་དགེ་བས་མཚོན། ༢༤ །ཕྱོགས་(*ཡོན་ཏན་བརྗོད་པ་ཐ་མའི་གསལ་བྱེད།) བཅུའི་དེ་བཞིན་གཤེགས་པ་སྲས་དང་སློབ་མར་བཅས། །དང་པོར་ཐེག་པ་
གང་དང་གང་དུ་ཞུགས་པ་ནས། །དེ་དེའི་བྱང་ཆུབ་སྙེ་མ་ཉིད་དུ་རབ་སོང་བ། །ཕྲིན་ལས་འགྲོ་བའི་དཔལ་དུ་གནས་གྱུར་དགེ་བ་དཀར། ༢༥ །དེ་(*ལྡན་པའི་གཟུགས་ཅན།) བཞིན་སོ་སོ་སྐྱེ་བོར་གཏོགས་པ་གང་དག་གིས། །ཀུན་གཞིའི་ཞིང་ལ་བཅས་དང་རང་བཞིན་རྣམ་པར་དཀར། །ས་
བོན་མ་རྨས་གང་དག་བཏབ་པ་ཡི་རང་གི། །འཛུམ་རླབས་མུ་ཏིག་མདངས་སུ་གསལ་བས་མདུན་བསུའོ། ༢༦ །ཨེ་(*སྤངས་ནས་མེད་པའི་བྱེད་རྒྱུ།) མ་ཡོངས་བསྔོ་མཁས་པ་རྣམས་ཀྱི་བློ་གྲོས་ལ། །མཚན་མར་དམིགས་པའི་ཟུག་རྔུ་གཞར་ཡང་ཡོད་མ་ཡིན། །དེ་ཕྱིར་དམ་པ་རྣམས་ཀྱི་རྣམ་
པར་བྱང་བ་ཡི། །ཡོན་ཏན་ཐམས་ཅད་ལྷུན་གྱིས་གྲུབ་པའི་ཚུལ་དུ་འཕེལ། ༢༧ །(*འདི་ནས་བརྩམས་ཤིས་པ་བརྗོད་པའི་རྒྱན་ཏེ་མ་བསྡུས་པའི་གཟུགས་ཀྱིས་སྤྱིར་ཤེས་པ་བརྗོད་པ་ནི།) དེ་བཞིན་འདིར་ཡང་སྨན་འདོད་སེམས་ཀྱི་རྒྱལ་པོ་དང༌། །མཉམ་འགྲོགས་དམིགས་པས་སྟོང་པའི་ཤེས་རབ་འཁོར་ལོ་ཡིས། །བསོད་ནམས་ཚོགས་ཀྱི་རྒྱ་མཚོའི་ཕ་རོལ་ཕྱིན་
འགྲོ་བས། །བྱང་ཆུབ་མཆོག་ཏུ་སྒྱུ་མའི་རོལ་པས་འཇུག་གྱུར་ཅིག ༢༨ །ཚུལ་ཆེན་(*གཞི་གཅིག་གིས་ལས་འགལ་བའི་ཤིས་བརྗོད།) གང་གིས་དགེ་བ་བཟང་པོར་རློམ་པ་ཡི། །མཚན་མས་བྱང་ཆུབ་རེག་པར་བགྱི་བ་མེད་ན་ཡང༌། །དེ་མཐུས་
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด