དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ཐེག་པ་ཆེན་པོ་མངོན་པར་རྟོགས་པ་ཞེས་བྱ་བའི་རྒྱུད་ཀྱི་བཤད་པ་དེ་ཁོ་ན་ཉིད་སྣང་བར་བྱེད་པ་ཞེས་བྱ་བ

ชื่อสันสกฤต (อักษรทิเบต ตามตัวบท) སརྦ་ཏ་ཐཱ་ག་ཏ་ཏཏྟྭ་སྃ་གྲ་ཧ་མ་ཧཱ་ཡཱ་ན་ཨ་བྷི་ས་མ་ཡ་ནཱ་མ་ཏནྟྲ་ཏཏྟྭ་ཨཱ་ལོ་ཀ་ཀཱ་རི་ནཱ་མ་བྱཱ་ཁྱཱ

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

เล่ม ๕๗ · หน้า 299a

མཐར་ཐུག་པ་ཇི་ལྟ་བའི་རིམ་གྱིས་དམ་ཚིག་གི་ཕྱག་རྒྱའོ། །ལྷག་མ་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་གསུངས་པའི་དམ་ཚིག་གི་ཕྱག་རྒྱ་ཉིད་ཡིན་ནོ། །དེ་ནས་རྡོ་རྗེའི་རིགས་ཀྱི་ཆོས་ཀྱི་དམ་ཚིག་ནི་ཆོས་ཀྱི་ཕྱག་རྒྱའི་ཡེ་ཤེས་བསླབ་པའོ་ཞེས་བྱ་བ་ནི་

རྡོ་རྗེ་རིགས་ཀྱི་ཆོས་ཀྱི་དམ་ཚིག་ནི་ཆོས་ཀྱི་ཕྱག་རྒྱ་སྟེ། དེའི་ཡེ་ཤེས་བསླབ་ཅིང་བསྟན་པའོ། །ཕཊ་ཅེས་བྱ་བ་ནི་ཁྲོ་བོ་རྡོ་རྗེ་སེམས་དཔའི་ལྗགས་ལ་དགོད་པར་བྱའོ། །ཤཊ་ཅེས་བྱ་བ་ནི་རྒྱལ་པོའོ། །མཊ་ཅེས་བྱ་བ་ནི་ཆགས་པའིའོ། །སཊ་ཅེས་བྱ་བ་ནི་ལེགས་པའིའོ། །རཊ་ཅེས་བྱ་བ་ནི་

རིན་ཆེན་གྱིའོ། །ཏཊ་ཅེས་བྱ་བ་ནི་ཉི་མའིའོ། །དྷཊ་ཅེས་བྱ་བ་ནི་དབལ་གྱིའོ། །ཧཊ་ཅེས་བྱ་བ་ནི་བཞད་པའིའོ། །དྷེཊ་ཅེས་བྱ་བ་ནི་ཆོས་ཀྱིའོ། །ཧཊ་ཅེས་བྱ་བ་ནི་རྣོན་པོའིའོ། །ཕཊ་ཅེས་བྱ་བ་ནི་རྒྱུའིའོ། །དྷཊ་ཅེས་བྱ་བ་ནི་གསུངས་པའིའོ། །དྷཊ་ཅེས་བྱ་བ་ནི་ལས་ཀྱིའོ། །བྷཊ་ཅེས་བྱ་

བ་ནི་སྲུང་བའིའོ། །གྲིཊ་ཅེས་བྱ་བ་ནི་གནོད་སྦྱིན་གྱིའོ། །རིཊ་ཅེས་བྱ་བ་ནི་ཁུ་ཚུར་གྱིའོ། །ལྷག་མ་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་གསུངས་པ་གཟུང་བར་བྱའོ། །དེ་ནས་རྡོ་རྗེ་རིགས་ཀྱི་ཆོས་ཀྱི་དམ་ཚིག་གི་ལས་ཀྱི་ཕྱག་རྒྱའི་ཡེ་ཤེས་བསླབ་པའོ། །ཆོས་ཀྱི་

ཁུ་ཚུར་གཉིས་བྱས་ཏེ། །ཞེས་བྱ་བ་ནི་ཆོས་ཀྱི་དཀྱིལ་འཁོར་ལས་གསུངས་པའི་ཁྲོ་བོ་ལས་ཀྱི་ཕྱག་རྒྱ་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་ནི་ཆོས་ཀྱི་ཁུ་ཚུར་ཏེ། དེ་ཉིད་དུ་བཤད་པ་འདིའི་ཡང་ཡིན་ནོ། །དེ་ཉིད་གཉིས་སུ་བྱས་ནས། ལས་ཀྱི་ཕྱག་རྒྱ་ཐམས་ཅད་བཅིང་བར་བྱའོ། །སྦྱོར་བ་ནི་འདི་ཡིན་

ཏེ། གཡོན་པའི་རྡོ་རྗེ་མཛུབ་མོ་ནི། །གཡས་པའི་ནང་དུ་བསྒྲེང་བར་བྱ། །ཞེས་བྱ་བ་ནི་རྣམ་པར་སྣང་མཛད་ཀྱིའོ། །བསྒྱིངས་བཅས་གསོར་བ་གཉིས་ཀ་ཡིས། །རྡོ་རྗེ་ཧཱུཾ་མཛད་དང་། ཁྲོ་བོ་རྡོ་རྗེ་སེམས་དཔའ་དང་། ཁྲོ་བོ་རྡོ་རྗེ་སེམས་མའིའོ། །ལྕགས་ཀྱུ་འཛིན་ལྟར་གནས་པ་ནི། །རྡོ་རྗེ་

རྒྱལ་པོའིའོ། །མདའ་འཕང་བ་ཡི་ཚུལ་དང་ནི། །རྡོ་རྗེ་ཆགས་པའིའོ། །ལེགས་སོ་སྦྱིན་པ་སྙིང་གར་གཞག །རྡོ་རྗེ་ལེགས་པའིའོ། །དབང་བསྐུར་བ་ནི་རྡོ་རྗེ་གཉིས། །རིན་ཆེན་ཧཱུཾ་མཛད་དང་། ཁྲོ་བོ་ཁྲོ་གཉེར་དང་། ཁྲོ་མོ་རྡོ་རྗེ་རིན་ཆེན་མའིའོ། །སྙིང་གར་ཉི་མ་བསྟན་པར་བྱ། །ཁྲོ་བོ་ཉི་

เล่ม ๕๗ · หน้า 299b

མའིའོ། །གཡོན་པ་ལ་ནི་གྲུ་མོ་གཟུགས། །ཁྲོ་མོ་དཔལ་གྱིའོ། །དེ་བཞིན་ཁ་ཕྱོགས་བསྐོར་བར་བྱ། །ཁྲོ་བོ་བཞད་པའིའོ། །གཡས་པ་ཡི་ནི་གཡོན་པས་དབྱེ། །ཆོས་ཀྱི་ཧཱུཾ་མཛད་དང་། ཁྲོ་བོ་རྡོ་རྗེ་ཆོས་དང་། ཁྲོ་མོ་རྡོ་རྗེ་ཆོས་མའིའོ། །སྙིང་གར་གཡོན་པའི་རལ་གྲི་འདུད། །ཁྲོ་བོ་རྣོན་པོའིའོ། །

མགལ་མེའི་འཁོར་ལོ་བསྐོར་བ་དང་། །ཁྲོ་བོ་རྒྱུའིའོ། །རྡོ་རྗེ་གཉིས་ཀ་ཁ་ནས་དབྱུང་། །ཁྲོ་བོ་གསུངས་པའིའོ། །རྡོ་རྗེ་གར་ནི་བསྐོར་བ་ཡིས། །ཐལ་མོ་དགྲམ་པ་སྤྱི་བོར་གཞག །ལས་ཀྱི་ཧཱུཾ་མཛད་དང་། ཁྲོ་བོ་རྡོ་རྗེ་ལས་དང་། ཁྲོ་མོ་རྡོ་རྗེ་ལས་མའིའོ། །གོ་ཆ་ནི་ཁྲོ་བོ་སྲུང་བའིའོ། །མཐེའུ་ཆུང་གཉིས་

མཆེ་བ་དང་། །ཁྲོ་བོ་གནོད་སྦྱིན་གྱིའོ། །ཁུ་ཚུར་གཉིས་ནི་མནན་པའོ། །ཞེས་བྱ་བ་ནི་རྡོ་རྗེ་ཁུ་ཚུར་གྱིའོ། །རྡོ་རྗེ་བསྙེམས་པའི་ཚུལ་གྱིས་ནི། །བསམ་པ་གཡོས་པས་འདུད་པར་བྱའོ། །སྒེག་མོའི་ཕྱག་རྒྱའོ། །ཕྲེང་བ་བཅིང་བ་ནི་ཕྲེང་བ་མའིའོ། །ཁ་ནས་དབྱུང་ནི་གླུ་མའིའོ། །རྡོ་རྗེ་གར་ནི་བསྐོར་

བ་ནི། །གར་མའིའོ། །རྡོ་རྗེ་ཁུ་ཚུར་གྱིས་ནི། བདུག་པ་ཐུར་དུ་དེ་བཞིན་སྦྱིན་པ་ནི། བདུག་པ་མའིའོ། །རང་གི་ཁུ་ཚུར་གྱེན་དུ་འཐོར་ནི་མེ་ཏོག་མའིའོ། །མཐེ་བོ་བསྙམས་ཏེ་རབ་ཏུ་བསྡམས་ནི་མར་མེ་མའིའོ། །རབ་ཏུ་བརྐྱང་ནས་བྱུག་པ་ནི། །དྲི་ཆབ་མའིའོ། །མཛུབ་མོ་ལྕགས་ཀྱུ་བཅིང་

བ་ནི། །མཐེའུ་ཆུང་ལས་ཏེ་ལྕགས་ཀྱུ་ཆེ་ནི་ལྕགས་ཀྱུའིའོ། །མཁྲིག་མ་མདུད་པ་ནི་ཞགས་པའིའོ། །མཛུབ་གཉིས་མདུད་ནི་ལྕགས་སྒྲོག་གིའོ། །རྒྱབ་གཉིས་ཀྱང་ནི་བསྙམས་ཏེ་མནན། །ཞེས་བྱ་བ་ནི་རྡོ་རྗེ་འབེབས་པའིའོ། །ཐམས་ཅད་ཀྱང་གར་ལས་བྱུང་བས་ལས་ཀྱི་ཕྱག་

རྒྱའོ། །འཇིག་རྟེན་གསུམ་ལས་རྣམ་པར་རྒྱལ་བའི་ཆོས་ཀྱི་དཀྱིལ་འཁོར་གྱི་འགྲེལ་པ་རྫོགས་སོ།། །།དེ་ལྟར་ཆོས་ཀྱི་ཕྱག་རྒྱ་གཙོ་བོར་གྱུར་པའི་འཇིག་རྟེན་གསུམ་ལས་རྣམ་པར་རྒྱལ་བའི་ཆོས་ཀྱི་དཀྱིལ་འཁོར་བསྟན་ནས། ད་ནི་ལས་ཀྱི་ཕྱག་རྒྱ་གཙོ་བོར་གྱུར་པའི་འཇིག་རྟེན་

གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་དེས་འདུལ་བའི་འགྲོ་བ་རྣམས་རྗེས་སུ་གཟུང་བའི་ཕྱིར། སྡུད་པ་པོ་དེ་བཤད་པར་བཞེད་ནས། དེ་ནས་ཞེས་བྱ་བ་ལ་སོགས་པ་སྨོས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོར་སྦྱོར་བའི་རྗེས་ཐོགས་ལ། །ཞེས་བྱ་བའི་དོན་ཏོ། །འདིར་

เล่ม ๕๗ · หน้า 300a

དང་པོ་སྦྱོར་བའི་ཏིང་ངེ་འཛིན་ནི། འཇིག་རྟེན་གསུམ་ལས་རྣམ་པར་རྒྱལ་བའི་ཆོས་ཀྱི་དཀྱིལ་འཁོར་དུ་གསུངས་པ་ཉིད་དུ་གཟུང་བར་བྱའོ། །བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ལས་ཀྱི་དམ་ཚིག་ནི། བཅོམ་

ལྡན་འདས་རྣམ་པར་སྣང་མཛད་ཀྱི་རྡོ་རྗེའི་རིགས་ཀྱི་ལས་ཀྱི་དཀྱིལ་འཁོར་རོ། །གང་གི་ཕྱིར་ཐུགས་ཀའི་སེམས་དཔའི་རྡོ་རྗེ་ལས་བྱུང་བ་ནི། སེམས་དཔའི་རྡོ་རྗེ་ལས་བྱུང་བ་སྟེ་དེ་ལས་བྱུང་བའོ། །དེས་བྱིན་གྱིས་བརླབས་པ་ནི་ལས་ཀྱི་དཀྱིལ་འཁོར་བསྐྱེད་ཅིང་བརྟན་པར་བྱེད་པའི་ཏིང་ངེ་འཛིན་གང་ཡིན་

པ་དེ་ལ་མིང་དེ་སྐད་ཅེས་བྱ་བ་ལ་སྙོམས་པར་ཞུགས་ཤིང་མངོན་སུམ་དུ་མཛད་ནས་རང་གི་རིག་པ་དམ་པ་འདི་གསུངས་ཤིང་སྨྲས་པའོ། །འདི་སྐད་སྟོན་པ་ཡིན་ཏེ། བཅོམ་ལྡན་འདས་རྣམ་པར་སྣང་མཛད་ཀྱི་རྡོ་རྗེ་རིགས་ཀྱི་རྣལ་འབྱོར་རང་གི་ལས་ཀྱི་དཀྱིལ་འཁོར་བསྐྱེད་པའི་ཕྱིར་དང་། རྡོ་རྗེ་སེམས་

དཔའི་ཐུགས་ཀར་གནས་པའི་སེམས་དཔའི་རྡོ་རྗེ་བརྟན་པར་མཛད་པའི་ཕྱིར། ཐུགས་རྩེ་གཅིག་ཏུ་མཛད་དོ། །དེ་བཞིན་དུ་ཕྱག་ན་རྡོ་རྗེ་དང་། རྡོ་རྗེ་སྙིང་པོ་དང་། རྡོ་རྗེ་སྤྱན་དང་། རྡོ་རྗེ་སྣ་ཚོགས་པས་རང་རང་གི་རྡོ་རྗེ་རིགས་ཀྱི་བྱང་ཆུབ་སེམས་དཔའི་ལས་ཀྱི་དཀྱིལ་འཁོར་བསྐྱེད་པའི་ཕྱིར་དང་།

ཐུགས་ཀར་གནས་པའི་རྡོ་རྗེ་སེམས་དཔའ་བརྟན་པར་བྱ་བའི་ཕྱིར། ཐུགས་རྩེ་གཅིག་ཏུ་མཛད་ནས། རང་རང་གི་རིག་པ་འདི་གསུངས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ཞེས་བྱ་བ་ལ། དེ་ནས་ཞེས་བྱ་བ་ནི་དེ་མ་ཐག་པ་སྟེ། རིག་པ་རྣམ་པ་ལྔ་གསུངས་པའི་རྗེས་

ཐོགས་ཉིད་ལའོ། །ལྷ་མོ་རྣམས་རང་གི་སྙིང་ག་ནས་བསྐྱེད་དེ། ཟླ་བའི་དཀྱིལ་འཁོར་ལ་གནས་ཏེ་དགོད་དོ་ཞེས་བྱ་བར་སྦྱར་རོ། །ཕྱག་ན་རྡོ་རྗེ་ནི་འདིར་རྡོ་རྗེ་ཧཱུཾ་མཛད་དོ། །ཡང་ཞེས་བྱ་བ་ནི་རྡོ་རྗེ་རིགས་ཀྱི་ཆོས་ཀྱི་དཀྱིལ་འཁོར་ལ་ལྟོས་པས་ན་ཡང་ཞེས་བྱའོ། །རང་གི་རིགས་ནི་རྡོ་རྗེ་རིགས་སོ། །

མཆོད་པ་ནི་མཆོད་པ་ཆེན་པོའོ། །དབང་བསྐུར་བ་དང་། ཆོས་དང་། ལས་ཀྱི་མཚན་ཉིད་དོ། །དེའི་ཆོ་ག་རྒྱས་པ་ནི་འཇིག་རྟེན་གསུམ་ལས་རྣམ་པར་རྒྱལ་བའི་ཆོ་གས་བྱང་ཆུབ་ཏུ་སེམས་བསྐྱེད་པ་དང་། འགྲོ་བ་རྣམས་འདུལ་བ་དང་། སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་

เล่ม ๕๗ · หน้า 300b

པར་བྱེད་པའི་ལས་ཀྱི་ངོ་བོ་དེ་བསྐྱེད་པའི་ལྷ་མོ་རྣམས་ནི་མཆོད་པའི་ཆོ་ག་རྒྱས་པར་བྱེད་པའི་ལྷ་མོ་དེ་རྣམས་སོ། །རང་གི་སྙིང་ག་ལས་བསྐྱེད་པ་ནི་སྤྲུལ་པའོ། །ཅི་ཞིག་བྱེད་ཅེ་ན། འཇིག་རྟེན་གྱི་ཁམས་ཐམས་ཅད་དུ་ཞེས་བྱ་བ་སྨོས་ཏེ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་བཞུགས་

པའི་དེ་བཞིན་གཤེགས་པ་གང་ཡིན་པ་དེ་དག་ཐམས་ཅད་སྤྱན་དྲངས་པ་དང་། དབང་དུ་བྱ་བ་དང་། མཉེས་པར་བྱ་བ་དང་། ལས་ཐམས་ཅད་འགྲུབ་པར་བྱེད་པའི་དགོས་པ་བྱེད་པ་དེ་ཉིད་དུ་ཡང་དག་པར་སྦྱོར་བ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཀྱི་རྫུ་འཕྲུལ་དང་རྣམ་

པར་འཕྲུལ་པ་བྱས་ཏེ། དེ་སྤྱན་དྲང་བ་ནི་དགུག་པའོ། །དབང་དུ་བྱ་བ་ནི་རང་གི་དམ་ཚིག་གི་ཕྱག་རྒྱ་རང་གི་རིག་པ་ལ་སྦྱར་བའོ། །རྗེས་སུ་ཆགས་པ་ནི་དེའི་བདག་ཉིད་དུ་བསྒོམས་པས་དེའི་རང་བཞིན་མངོན་སུམ་དུ་བྱེད་པ་ན། ལས་ཐམས་ཅད་གྲུབ་པ་ནི་བྱང་ཆུབ་ཀྱི་སེམས་ལ་སོགས་པ་འགྲུབ་པའོ་

ཇི་སྐད་བཤད་པ་དེ་ཉིད་ཀྱི་འབྲས་བུ་དེ་དག་གི་དགོས་པ་བྱེད་པ་ཉིད་དུ་ཡང་དག་པར་སྦྱོར་བ་དེས་ན་དེ་ཉིད་ཀྱི་འབྲས་བུའི་ཕྱིར་རོ། །དེ་ལ་ཡང་དག་པར་སྦྱོར་བ་ནི་རབ་ཏུ་འཇོག་པའོ། །དེ་ལྟ་བུ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་ཇི་ལྟ་བའི་རྫུ་འཕྲུལ་དང་། རྣམ་པར་འཕྲུལ་པ་དེ་དང་དེ་

དག་མཛད་ནས་སོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ཚུལ་དུ་ཞེས་བྱ་བ་ནི། ཇི་ལྟར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་བཅོམ་ལྡན་འདས་རྣམ་པར་སྣང་མཛད་རྡོ་རྗེ་སེམས་དཔའ་ལ་སོགས་པས་ཕྱོགས་དང་མཚམས་སུ་ཡོངས་སུ་བསྐོར་ཞིང་བཞུགས་པ་དེ་བཞིན་དུ་འདིར་ཡང་བཅོམ་

ལྡན་འདས་ཕྱག་ན་རྡོ་རྗེ་ཧཱུཾ་མཛད་ལ་སོགས་པའི་གཟུགས་ཀྱིས་ཟླ་བའི་དཀྱིལ་འཁོར་ལ་བཞུགས་སོ། །དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་ནས། ཟླ་བའི་དཀྱིལ་འཁོར་ལ་གནས་ཏེ་འཁོད་དོ་ཞེས་བྱ་བའི་བར་གྱི་གཞུང་འདི་ཙམ་གྱིས་ནི་རྡོ་རྗེའི་རིགས་ཀྱི་ལས་ཀྱི་དཀྱིལ་

འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབས་པ་ནས་བརྩམས་ཏེ། རྡོ་རྗེ་དབྱིངས་སུ་བཤད་པའི་ཚུལ་གྱིས་རྡོ་རྗེའི་རིགས་ཀྱི་ལས་ཀྱི་དཀྱིལ་འཁོར་གྱི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་

เล่ม ๕๗ · หน้า 301a

གསུམ་པ་ཡིན་པར་ཤེས་པར་བྱའོ། །རྡོ་རྗེའི་རིགས་ཀྱི་ལས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་རྣམས་ནི་རྡོ་རྗེ་རིགས་ཀྱི་ལས་ཀྱི་དཀྱིལ་འཁོར་གྱི་དམ་ཚིག་དང་། དབང་བསྐུར་བ་ཐོབ་པས་བསྒྲུབ་པར་བྱའོ་ཞེས་བསྟན་པའི་ཕྱིར། དེ་ནས་ཕྱག་ན་རྡོ་རྗེ་

ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང་། སློབ་མ་འཇུག་པའི་ཆོ་ག་རྒྱས་པ་བསྟན་ཏོ། །དེ་ནས་ཞེས་བྱ་བའི་སྒྲ་ནི་སྐབས་སུ་བབས་པ་སྟེ། སློབ་དཔོན་གྱི་ལས་ཀྱི་ཆོ་ག་དང་། སློབ་མ་འཇུག་པའི་ཆོ་ག་རྒྱས་པ་རྩོམ་མོ་ཞེས་བྱ་བའི་ཐ་ཚིག་གོ། །འདི་ཞེས་བྱ་བ་ནི།

བློ་ལ་གནས་པའོ། །རྡོ་རྗེ་ལས་ཀྱི་དམ་ཚིག་ནི་དེ་བཞིན་གཤེགས་པ་ཐམས་ཅད་དགུག་པ་ལ་སོགས་པའི་ཆོ་གའོ། །རྒྱས་པ་ནི་རྣམ་པ་དུ་མ་སྟེ། རྣམ་པར་སྣང་མཛད་དང་། རྡོ་རྗེ་ཧཱུཾ་མཛད་དང་། རིན་ཆེན་དང་། ཆོས་དང་། ལས་ཀྱི་ཧཱུཾ་མཛད་ཀྱི་དཀྱིལ་འཁོར་གྱི་དབྱེ་བ་ཐ་དད་པ་ཞེས་བྱ་བའི་དོན་

ཏོ། །དེའི་ལས་ཀྱི་དཀྱིལ་འཁོར་དེ་གསུངས་པ་ནི་བཤད་པའོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། སྔོན་དུ་བསྙེན་པའི་རྗེས་ཐོགས་ལ་ཞེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་བཤད་པའི་ཆོ་གས་དཔལ་རྡོ་རྗེ་ཧཱུཾ་མཛད་

ཀྱི་རྣལ་འབྱོར་བྱས་ལ། དེ་ལས་གསུངས་པའི་རྣལ་འབྱོར་ཆེན་པོའི་བསྒྲུབ་པ་བྱས་ནས། དེ་ནས་རང་གི་སྙིང་གར་ལས་ཀྱི་དཀྱིལ་འཁོར་ཚིག་ཙམ་གྱིས་སྤྲུལ་ལ་རང་གི་རིག་པས་ལྷ་རྣམས་བཞག་ནས་བསྒོམ་པ་བྱས་ལ་རེ་རེ་ཞིང་ཡང་རང་གི་རིག་པ་ཁྲི་ཁྲི་བཟླས་པ་བྱའོ། །ཡང་ན་ལས་ཀྱི་དཀྱིལ་འཁོར་

ལས་གསུངས་པའི་ཏིང་ངེ་འཛིན་གསུམ་བསྒོམ་པ་སྔོན་དུ་འགྲོ་བས་རིག་པའི་བརྟུལ་ཞུགས་སྤྱད་ལ། ཇི་སྲིད་ལས་ཀྱི་དཀྱིལ་འཁོར་མངོན་སུམ་དུ་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་དཀྱིལ་འཁོར་དེ་བྲི་བར་བྱའོ། །དེ་ནས་ཞེས་བྱ་བ་ནི་རྒྱུ་དེའི་ཕྱིར་གྱི་དོན་ཏོ། །གང་གི་ཕྱིར་ལས་

ཀྱི་དཀྱིལ་འཁོར་དུ་འཇུག་པ་མེད་པ་ན། ལས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་རྣམས་བསྒྲུབ་པར་མི་འགྱུར་བ་དེའི་ཕྱིར། དངོས་གྲུབ་རྣམས་བསྒྲུབ་པའི་ལས་ཀྱི་དཀྱིལ་འཁོར་རབ་ཏུ་བཤད་པར་བྱའོ། །ལས་ཀྱི་དཀྱིལ་འཁོར་དམ་པ་སྟེ། །ཞེས་བྱ་བ་ནི་གོ་སླའོ། །དེ་ཅི་འདྲ་

เล่ม ๕๗ · หน้า 301b

བ་ཞིག་ཅེ་ན། རྡོ་རྗེ་དབྱིངས་དང་འདྲ་བས་ན། །ཞེས་བྱ་བ་སྨོས་ཏེ། སྤྲུལ་པའི་དཀྱིལ་འཁོར་དང་འདྲ་བ། །ཞེས་བྱ་བའི་དོན་ཏོ། །དེའི་མིང་གང་ཞིག་ཡིན་ཞེ་ན། ལས་ཀྱི་རྡོ་རྗེ་ཞེས་བཤད་དོ། །ཞེས་བྱ་བ་སྨོས་སོ། །དཀྱིལ་འཁོར་ཆེན་པོའི་ཚུལ་དུ་ནི། །དཀྱིལ་འཁོར་ཐམས་ཅད་སྲད་བུ་བྲེ། །

ཞེས་བྱ་བ་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་བཞིན་དུ་དཀྱིལ་འཁོར་འདི་ཐམས་ཅད་ཐིག་གདབ་པར་བྱའོ། །དབུས་ཀྱི་དཀྱིལ་འཁོར་དབུས་སུ་ནི། །སངས་རྒྱས་སྐུ་གཟུགས་གཞག་པར་བྱ། །ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་གཟུགས་

གཞག་པར་བྱའོ། །སངས་རྒྱས་ཀྱི་ནི་ཕྱོགས་ཀུན་དུ། །ཞེས་བྱ་བ་ནི། བཅོམ་ལྡན་འདས་རྣམ་པར་སྣང་མཛད་ཀྱི་ཕྱོགས་བཞིར་སེམས་མ་རྡོ་རྗེ་མ་ལ་སོགས་པའི་ཕྱག་རྒྱ་བཞི། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོའི་ཚུལ་གྱིས་བྲི་བར་བྱའོ། །དཀྱིལ་འཁོར་བཞི་

པོ་རྣམས་སུ་ཡང་། །རྡོ་རྗེ་ལ་སོགས་བཞི་པོ་རྣམས། །ཞེས་བྱ་བ་ནི་རྡོ་རྗེ་ཧཱུཾ་མཛད་དང་། རིན་ཆེན་ཧཱུཾ་མཛད་དང་། ཆོས་ཀྱི་ཧཱུཾ་མཛད་དང་། ལས་ཀྱི་ཧཱུཾ་མཛད་རྣམས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་བཤད་པའི་ཕྱག་རྒྱ་ཆེན་པོའི་ཚུལ་གྱིས་གཞག་པར་བྱའོ། །དེ་

རྣམས་ཀྱི་ནི་ཕྱོགས་ཀུན་དུ། །མཆོད་པ་ཆེན་པོ་རྣམ་གཞག་པ། །ཞེས་བྱ་བ་ནི་ཁྲོ་བོ་རྡོ་རྗེ་སེམས་དཔའི་རིག་པས་བྲི་བར་བྱའོ། །དེ་བཞིན་དུ་ཁྲོ་བོ་རྡོ་རྗེ་འབེབས་པའི་གཟུགས་འཛིན་པ་ནི་རྡོ་རྗེ་འབེབས་པའི་རིག་པས་བྲི་བར་བྱའོ་ཞེས་བྱ་བའི་བར་དུའོ། །བྱམས་པ་ལ་སོགས་པའི་གཟུགས་འཛིན་པ་ནི་

བྱམས་པ་ལ་སོགས་པའི་རིག་པས་བྲི་བར་བྱའོ། །རྡོ་རྗེ་ལས་ཀྱི་ཕྱག་རྒྱ་བཤད་དོ་ཞེས་བྱ་བ་ནི་ཁྲོ་བོ་རྡོ་རྗེ་སེམས་དཔའི་ལྷ་མོ་ནས་བརྩམས་ནས། ཇི་སྲིད་ཁྲོ་བོ་རྡོ་རྗེ་ཁུ་ཚུར་གྱི་བར་དུ་ལྷ་མོར་བཞུགས་པའི་རིག་པར་འགྱུར་རོ། །རྣམ་པར་སྣང་མཛད་ལ་སོགས་པ་བདག་པོ་ལྔར་སྤྲུལ་པའི་དུས་སུ་བཤད་

པའི་རིག་པ་དེ་ཉིད་ཀྱིས་ལས་ཐམས་ཅད་བྱེད་པར་འགྱུར་རོ། །ལྷག་མ་ནི་འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ཆེན་པོར་གསུངས་པའི་རིག་པ་ཡིན་པར་ཤེས་པར་བྱའོ། །དེ་ནས་དཀྱིལ་འཁོར་བྲིས་ནས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་

เล่ม ๕๗ · หน้า 302a

འཇུག་པའི་ཆོ་གས་སློབ་དཔོན་ཞུགས་ལ། དེ་ནས་སྣ་ཚོགས་རྡོ་རྗེ་བླངས་ལ་ཆོ་ག་རྒྱས་པར་བྱས་ནས། སློབ་མ་བཅུག་ནས་སྣ་ཚོགས་པའི་རྡོ་རྗེའི་དབང་བསྐུར་བ་དེ་བྱིན་ལ། དེ་བཞིན་གཤེགས་པ་ཐམས་ཅད་ལ་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་མཆོད་པ་བཅུ་དྲུག་

པོ་གང་ཡིན་པ་དེ་ཁྱོད་ཀྱིས་ཉི་མ་རེ་རེ་ཞིང་མཆོད་པར་བྱའོ་ཞེས་དམ་ཚིག་སྦྱིན་པར་བྱའོ། །སློབ་མ་འཇུག་པའི་ཆོ་ག་ལྷག་མ་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་གསུངས་པས་བྱའོ། །དེ་ལྟར་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པའི་ཆོ་ག་རྒྱས་པར་བསྟན་ནས། །

ད་ནི་འཇིག་རྟེན་གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པའི་སློབ་དཔོན་གྱི་ལས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ཀྱི་ཡེ་ཤེས་བསྟན་པར་བྱ་བ་ནི། རྡོ་རྗེ་རིགས་ཀྱི་ལས་ཀྱི་ཡེ་ཤེས་རྣམས་བསྐྱེད་དེ་ཞེས་གསུངས་སོ། །རྡོ་རྗེ་རིགས་ཀྱི་

ལས་ཀྱི་དཀྱིལ་འཁོར་གྱི་ཡེ་ཤེས་ཞི་བ་ལ་སོགས་པའི་ཡེ་ཤེས་ཀྱི་ལས་ཀྱི་དངོས་པོ་ངེས་པ་དེ་བསྐྱེད་ཅིང་བསྟན་པར་བྱ་ཞེས་བྱ་བའི་དོན་ཏོ། །དེ་ལ་དང་པོ་ཉིད་དུ་ཞི་བ་ལ་སོགས་པའི་ཡེ་ཤེས་བསླབ་བོ་ཞེས་བྱ་བ་ནི་ནད་ལ་སོགས་པ་ཞི་བར་བྱེད་པས་ཞི་བ་ཞེས་བརྗོད་དོ། །ཞི་བའི་ལས་ཀྱི་དོན་གྱི་ཕྱག་རྒྱ་

ནི་ཞི་བ་ལ་སོགས་པའི་ཕྱག་རྒྱ་སྟེ། བྱང་ཆུབ་མཆོག་གི་ཕྱག་རྒྱའོ། །དེའི་ཡེ་ཤེས་ནི་བསླབ་པའོ། །ཡམ་ཤིང་མངར་པོ་རྣམས་ཀྱི་མེ། །རབ་སྦར་རྡོ་རྗེ་ཁྲོ་བོ་ཡི། །ཞེས་བྱ་བ་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་གསུངས་པའི་རྡོ་རྗེ་ཧཱུཾ་མཛད་ཀྱི་རྣལ་འབྱོར་བྱས་ལ་

དེའི་སྔགས་ཀྱི་བཟླས་པ་འབུམ་བྱས་ནས། ཞི་བ་ལ་སོགས་པའི་ལས་ཀྱི་སྔགས་ཀྱང་འབུམ་བཟླས་ལ་དེ་ནས་སྦྱིན་སྲེག་བྱའོ། །དཀྱིལ་འཁོར་བྱས་པའམ། སྔོན་དུ་འགྲོ་བ་བྱས་ནས་ཞི་བ་ལ་སོགས་པའི་སྦྱིན་སྲེག་བྱའོ། །དེ་སྐད་དུ་ཡང་། སྔོན་འགྲོ་རྣམས་ནི་བྱས་ནས་ནི། །སྦྱིན་སྲེག་གི་ནི་

ལས་རྣམས་བྱ། །ཞེས་གསུངས་སོ། །ཞི་བའི་ཆོ་ག་ལ་ནི་པླཀྴ་ལ་སོགས་པ་འོ་མ་དང་བཅས་པ་མངར་བའི་བུད་ཤིང་ལ་མེ་སྤར་ལ། ཤིན་ཏུ་མཉམ་པར་བཞག་པས་ཡུན་རིང་དུ་བརྟུལ་ཞུགས་སྤྱད་དེ། རྣམ་པར་གཡེང་བ་མེད་པར་མཉམ་པར་བཞག་ལ། རྡོ་རྗེ་ཧཱུཾ་མཛད་དང་གཞན་གང་ཡང་རུང་བའི་

เล่ม ๕๗ · หน้า 302b

ལྷའི་རྣལ་འབྱོར་གྱིས་རྡོ་རྗེ་ཁྲོ་བོའི་སྙོམས་པར་འཇུག་པ་བྱས་ཏེ། ཏིལ་བསྲེག་པར་བྱའོ། །མེ་ཐབ་ཀྱི་དབུས་སུ་ཆོ་ག་བཞིན་དུ་ལྷ་བཞག་ལ་ཕྱག་ཏུ་དབུལ་བར་བྱའོ། །འདི་ཅི་ཞིག་བྱེད་ཅེ་ན། སྡིག་པ་སྲེག་པར་བྱེད་དོ་ཞེས་བྱ་བ་སྨོས་ཏེ། སྡིག་པ་དང་རིམས་དང་གདོན་ལ་སོགས་པའི་གཟུགས་སོ། །

ཡམ་ཤིང་དེ་དག་ཉིད་ཀྱིས་ནི། །ཞེས་བྱ་བ་ནི་བཤད་མ་ཐག་པའི་ཞི་བའི་ཆོ་ག་རྒྱས་པ་བྱའོ། །ཞི་བའི་ལས་ལ་དཱུར་བའི་ཡལ་ག་མར་དང་བཅས་པ་བསྲེགས་པས་ཚེ་འཕེལ་བར་འགྱུར་རོ། །ཡམ་ཤིང་དེ་དག་ཉིད་ཀྱིས་ནི། །ཞེས་བྱ་བ་ནི་ཞི་བའི་ཆོ་ག་ལས་བསྟན་པའི་མེ་སྤར་ལ་ཞི་བའི་ཆོ་གས་ཀུ་ཤའི་ཡལ་

ག་ལ་འབྲུ་མར་དང་བཅས་པ་སྲེག་བླུགས་བྱས་ན་རྟག་ཏུ་བསྲུང་བར་འགྱུར་རོ། །ཡམ་ཤིང་ཚ་བ་དང་པོར་ནི། །ཞེས་བྱ་བ་ནི། ནིམ་པ་ལ་སོགས་པའི་ཤིང་ལས་བྱུང་བའི་བུད་ཤིང་གིས་མེ་སྤར་ལ་དགུག་པའི་སྦྱིན་སྲེག་གི་ཆོ་གས་སེ་བ་ཚེར་མ་ཅན་གྱི་སྦྱིན་སྲེག་གིས་དགུག་པར་བྱེད་དོ། །ཡམ་ཤིང་

དེ་དག་ཉིད་ཀྱིས་ནི། །ཞེས་བྱ་བ་ནི། དགུག་པའི་ཆོ་གར་བསྟན་པས་སོ། །དབང་གི་སྦྱིན་སྲེག་གི་ཆོ་གས་མེ་ཏོག་དམར་པོའམ། འབྲས་བུའང་རུང་བས་སྲེག་བླུགས་བྱས་ན་སྐྱེ་བོ་རྣམས་ཆགས་པར་འགྱུར་རོ། །ཡམ་ཤིང་དེས་ནི་མེ་སྤར་ལ། །ཞེས་བྱ་བ་ནི་ནིམ་པ་ལ་སོགས་པ་ལས་བྱུང་བའི་ཁ་

བའི་བུད་ཤིང་ལ། མངོན་སྤྱོད་ཀྱི་ཆོ་གས་ལྕགས་ཀྱི་ཕྱེ་མ་ལས་སྦྱིན་སྲེག་བྱས་ན་བསྒྲུབ་པར་བྱ་བ་བཅིང་བར་འགྱུར་རོ། །ཡམ་ཤིང་དེ་དག་ཉིད་ཀྱིས་ནི། །ཞེས་བྱ་བ་ནི་སྔར་བཤད་པའི་བུད་ཤིང་གིས་མེ་སྤར་ལ། ནིམ་པ་ལ་སོགས་པའི་འབྲས་བུ་ཁ་བས་སྦྱིན་སྲེག་བྱས་ན། མངོན་སྤྱོད་ཀྱི་ཆོ་

གས་འཆི་བར་འགྱུར་རོ། །མཁས་པས་ཡམ་ཤིང་སྐྱུར་པོ་ཡིས། །ཞེས་བྱ་བ་ནི་ཡམ་ཤིང་སྐྱུར་བ་ལ་མེ་སྤར་ལ་དབང་དུ་བྱེད་པའི་སྦྱིན་སྲེག་གི་ཆོ་གས་སྐྱུར་བའི་མེ་ཏོག་དང་འབྲས་བུས་སྦྱིན་སྲེག་བྱས་ན། དབང་དུ་བྱ་བ་དམ་པ་མཆོག་ཏུ་འགྱུར་རོ། །ཡམ་ཤིང་དེ་དག་ཉིད་ཀྱིས་ནི། །ཞེས་བྱ་བ་ནི་བཤད་མ་

ཐག་པའི་བུད་ཤིང་གིས་མེ་སྤར་ལ། ཞི་བའི་ཆོ་གས་འདོད་པའི་འབྲས་བུའི་སྦྱིན་སྲེག་བྱས་ན། འདོད་པ་བཞིན་གྱི་གཟུགས་སུ་འགྱུར་རོ། །དེ་ལ་འདོད་པའི་འབྲས་བུ་ནི་ཤིང་མྱ་ངན་མེད་པའི་འབྲས་བུའོ། །ཁ་ཅིག་ནི་མ་ཏན་ཕ་ལ་ཡིན་ཟེར་རོ། །དེ་འདྲ་བ་ཡི་ཡམ་ཤིང་གིས། །ཞེས་བྱ་བ་ནི་བཤད་མ་ཐག་པའི་

เล่ม ๕๗ · หน้า 303a

བུད་ཤིང་གིས་མེ་སྤར་ལ། ཞི་བའི་ཆོ་གས་ཚེར་མའི་སྡོང་བུའི་རྩེ་མོས་ཡམ་ཤིང་བྱའོ། །མི་སྣང་མེ་ཏོག་གི་ཞེས་བྱ་བ་ནི་ཨུ་དུམྺཱ་ར་དང་། ཨ་ཤྭདྠཱ་དང་། ནྱ་གྲོ་དྷ་ལ་སོགས་པའི་སྦྱིན་སྲེག་བྱས་ལ་འདོད་ན་མི་སྣང་བར་འགྱུར་རོ། །ཡམ་ཤིང་དེ་དག་ཉིད་ཀྱིས་ནི། །ཞེས་བྱ་བ་ནི་

བཤད་མ་ཐག་པའི་བུད་ཤིང་གིས་མེ་སྤར་ལ། ནམ་མཁའི་ལྕུག་མའི་མེ་ཏོག་གིས་ཞི་བའི་ཆོ་གས་སྦྱིན་སྲེག་བྱས་ན། ནམ་མཁའ་ལ་འགྲོ་བར་འགྱུར་རོ། །དེ་ལ་ནམ་མཁའི་ལྕུག་མ་ནི་སྡོང་བུའི་སྟེང་དུ་ལྕུག་མ་བྱུང་བས་རྩ་བ་མེད་པའོ། །ཁྲོ་བོར་མཉམ་གཞག་ཡམ་ཤིང་ནི། །ཞེས་བྱ་བ་ནི་ནིམ་པའི་

ཤིང་ལས་བྱུང་བའི་བུད་ཤིང་གིས་མེ་སྤར་ལ། དབང་དུ་བྱེད་པའི་ཆོ་གས་རྡོ་རྗེ་མེ་ཏོག་གི་སྦྱིན་སྲེག་བྱས་ཏེ། ཟུར་བཞི་པའི་རྡོ་རྗེའི་ཤིང་དེའི་མེ་ཏོག་གིས་སྦྱིན་སྲེག་བྱའོ། །ཡམ་ཤིང་དེ་དག་ཉིད་ཀྱིས་ནི། །ཞེས་བྱ་བ་ནི་བཤད་མ་ཐག་པའི་བུད་ཤིང་གིས་མེ་སྤར་ལ། དབང་དུ་བྱེད་པའི་ཆོ་གས་དཔལ་རྡོ་རྗེ་

སེམས་དཔའ་ལ་སོགས་པ་ལ་ཕུལ་བ་གང་གི་ཕྲེང་བས་སྦྱིན་སྲེག་བྱས་ན། བཀའ་བཞིན་བྱེད་པར་འགྱུར་རོ། །ཡམ་ཤིང་དེས་ནི་མེ་སྤར་ཏེ། །ཞེས་བྱ་བ་ནི་བཤད་མ་ཐག་པའི་མེ་སྤར་ལ་དབང་དུ་བྱེད་པའི་ཆོ་གས། བཅོམ་ལྡན་འདས་རྡོ་རྗེ་ཧཱུཾ་མཛད་དང་། ཕྱག་ན་རྡོ་རྗེ་ལ་ཕུལ་བའི་ཕྲེང་བས་སྦྱིན་སྲེག་

བྱའོ། །ཡམ་ཤིང་དེ་དག་ཉིད་ཀྱིས་ནི། །ཞེས་བྱ་བ་ནི་བཤད་མ་ཐག་པའི་མེ་སྤར་ལ། དབང་དུ་བྱེད་པའི་ཆོ་གས་ཆོས་ཀྱི་སྦྱིན་སྲེག་བྱའོ། །འདི་སྐད་སྟོན་པ་ཡིན་ཏེ། དཔལ་རྡོ་རྗེ་ཧཱུཾ་མཛད་ལ་སོགས་པའི་རྣལ་འབྱོར་བྱས་ལ། ཇི་སྐད་བཤད་པའི་ཚུལ་གྱིས་དཀྱིལ་འཁོར་བྱས་པའམ། གཞན་དག་ཏུ་ཞི་བ་

ལ་སོགས་པའི་ཐབ་ཁུང་བྱའོ། །དེ་ལ་ཞི་བ་ནི་ཁ་དོག་དཀར་པོའི་ས་གཞི་ལ་ཟླུམ་པོ་རྒྱར་ཁྲུ་གང་བ། ཟབས་སུ་སོར་བཅུ་གཉིས་པ་བརྐོས་ཏེ། ནང་མ་ལ་སོར་བཞིའི་ཕྱི་རོལ་དུ་དོར་བ་དང་དཔངས་དང་རྒྱར་སོར་བཞི་པའི་ཚད་ཀྱི་ཁ་ཁྱེར་གྱིས་ཀུན་ནས་བསྐོར་བའོ། །ཁ་ཁྱེར་གྱི་མཚམས་བཞི་རུ་རྡོ་རྗེ་རྩེ་གསུམ་

པ་བྱའོ། །ཡང་ཐབ་ཁུང་གི་དབུས་སུ་དཀྱིལ་འཁོར་གྱི་དབུས་ཀྱི་པདྨ་ལ་རྡོ་རྗེ་རྩེ་ལྔ་པ་སོར་བརྒྱད་པའི་ཚད་དུ་བྱའོ། །ས་དཀར་པོས་ཐབ་ཁུང་བྱུགས་ལ། ཕྱི་རོལ་ཀུན་ནས་བའི་ལྕི་བས་བྱུག་པར་བྱའོ། །སླར་ཡང་ཐབ་ཁུང་ས་གཞི་ཙནྡན་དཀར་པོས་བྱུགས་ལ་མེ་ཏོག་དཀར་པོ་དྲི་ཞིམ་པོ་དགྲམ་པར་བྱའོ། །

เล่ม ๕๗ · หน้า 303b

རྒྱས་པ་ནི་ཟུར་བཞི་པ་ལ། ས་གཞི་སེར་པོ་ལ་རྒྱར་ཁྲུ་དོ། ཟབས་སུ་ཁྲུ་གང་པའི་ཐབ་ཁུང་བརྐོས་ལ། ནང་ནས་སོར་བརྒྱད་དོར་ལ་དཔངས་དང་རྒྱར་སོར་བརྒྱད་པས་ཀུན་ནས་བསྐོར་བའི་ཁ་ཁྱེར་བྱའོ། །ཐབ་ཁུང་གི་དབུས་སུ་འཁོར་ལོ་རྩིབས་བརྒྱད་པའི་ལྟེ་བར་སོར་དྲུག་པའི་ཚད་ཀྱི་རྡོ་རྗེ་རིན་པོ་ཆེ་

བྱས་ལ། ཐབ་ཁུང་ལ་ས་སེར་པོས་བྱུགས་ཏེ། ཁ་དོག་སེར་པོའི་དྲིས་ས་གཞི་ཐབ་ཁུང་ཀུན་ནས་བྱུགས་ལ། མེ་ཏོག་སེར་པོས་དགྲམ་པར་བྱའོ། །མངོན་སྤྱོད་ནི་རྩུབ་པ་དང་། ཚྭ་སྒོ་ཅན་དང་། གས་པ་དང་། མི་མཉམ་པ་དང་ནམ་མཁའི་མདོག་ལྟ་བུའི་ས་ཕྱོགས་སུ་གྲུ་གསུམ་པ། རྒྱར་

སོར་ཉི་ཤུ། ཟབས་སུ་སོར་བཅུ་པ། མགོ་བྱང་དུ་བལྟས་པའི་ཐབ་ཁུང་བརྐོ་བར་བྱའོ། །ནང་ནས་སོར་གསུམ་དོར་ལ། དཔངས་དང་རྒྱར་སོར་གསུམ་པའི་ཚད་ཀྱི་ཁ་ཁྱེར་གྱིས་ཀུན་ནས་བསྐོར་བའོ། །ཐབ་ཁུང་གི་དབུས་སུ་མདུང་རྩེ་གསུམ་པའི་སྟེང་དུ་སོར་བརྒྱད་ཀྱི་ཚད་ཀྱི་ཁྲོ་བོ་རྡོ་རྗེ་རྩེ་ལྔ་པ་བྱའོ། །

ས་ནག་པོས་ཐབ་ཁུང་བྱས་ལ། ཡང་ཐབ་ཁུང་གི་ས་གཞི་ནག་པོས་བྱུགས་ལ། བོང་བུ་དང་། རྔ་མོའི་སྦངས་དང་། རོ་བསྲེགས་པའི་ཐལ་བ་དང་། དྲི་མི་ཞིམ་པའི་མེ་ཏོག་གམ། ཡང་ན་དྲི་བྲལ་དགྲམ་པར་བྱ་བ་ཉིད་དོ། །སྔོ་དང་དམར་བའི་འབྲུ་རྣམས་དང་། །ཡང་ན་སྣུམ་པས་བྱ་བ་ཡིན། །ཞེས་

གསུངས་སོ། །འགུགས་པ་ནི་ས་གཞི་དམར་པོ་ལ་རྡོ་རྗེ་རྩེ་གཅིག་པ་ལྟ་བུ། རྒྱར་ཁྲུ་གང་བའི་ཚད་ལ། ཟབས་སུ་སོར་བཅུ་གཉིས་པའི་ཐབ་ཁུང་བརྐོས་ལ། ནང་ནས་སོར་བཞི་དོར་ནས། དཔངས་དང་རྒྱར་སོར་བཞི་པའི་ཁ་ཁྱེར་རྡོ་རྗེ་རྩེ་གཅིག་པ་ལྟ་བུས་ཀུན་ནས་བསྐོར་བར་བྱའོ། །ཐབ་ཁུང་

གི་དབུས་སུ་སོར་བརྒྱད་པའི་ཚད་ཀྱི་རྡོ་རྗེ་ལྕགས་ཀྱུ་གཞག་པར་བྱའོ། །དབང་དུ་བྱེད་པའི་ཆོ་ག་ལ་ཐབ་ཁུང་དུ་བྱུགས་པ་དང་དགྲམ་པ་ནི་ཆོ་ག་རྣམས་འཆད་པར་འགྱུར་བ་བཞིན་དུ་གཟུང་བར་བྱའོ། །དབང་དུ་བྱ་བ་ནི་ས་གཞི་དམར་པོ་ལ་གཞུའི་དབྱིབས་ཅན། རྒྱར་ཁྲུ་གང་བ། ཟབས་སུ་སོར་བཅུ་

གཉིས་པའི་ཐབ་ཁུང་བརྐོ་བར་བྱའོ། །ནང་ནས་སོར་བཞི་དོར་བ་དང་། དཔངས་དང་རྒྱར་སོར་བཞི་པའི་ཚད་ཀྱི་ཁ་ཁྱེར་གཞུའི་དབྱིབས་ཀྱིས་ཀུན་ནས་བསྐོར་བའི་ཐབ་ཁུང་གི་དབུས་སུ་རྡོ་རྗེ་པདྨ་འདབ་མ་བཅུ་དྲུག་པ་བྱས་ལ། དེ་ནས་ཐབ་ཁུང་ས་དམར་པོར་བྱུགས་ལ་ཡང་ཐབ་ཁུང་དྲི་དམར་པོས་

เล่ม ๕๗ · หน้า 304a

བྱུག་ཅིང་མེ་ཏོག་དམར་པོ་དགྲམ་པར་བྱའོ། །དེ་ནས་རྡོ་རྗེ་གནོད་སྦྱིན་གྱི་སྔགས་བཟླས་པའི་ལས་ཐམས་ཅད་པའི་ཆུའི་སྣོད་དང་རང་གི་ལྷའི་བཟླས་པ་བྱས་པའི་མཆོད་ཡོན་གྱི་སྣོད་དག་ནི་ཞི་བའམ། རྒྱས་པ་དང་། དབང་གི་ལས་རྣམས་ལ། གཡོན་ཕྱོགས་སུ་གཞག་པར་བྱའོ། །

ལས་ཐམས་ཅད་པ་ལ་ནི་ཇི་ལྟར་རྗེས་སུ་སྤྱད་པ། རང་ཉིད་ཀྱི་སྔགས་བཟླས་ལ་གཡས་ཕྱོགས་སུ་གཞག་པར་བྱའོ། །འགུགས་པ་དང་འཆིང་བ་རྣམས་ལ་སྣོད་གཉིས་གཡས་ཕྱོགས་སུ་བཞག་ལ། ཡོ་བྱད་ཐམས་ཅད་ནི་གཡོན་ཕྱོགས་སུ་གཞག་པར་བྱའོ། །དེ་ནས་བདག་ཉིད་བསྲུང་བར་བྱ་

སྟེ། དེ་ལ་ཞི་བ་དང་དབང་དུ་བྱེད་པ་ལ་ནི་རྡོ་རྗེ་གཙུག་ཏོར་གྱིས་བསྲུང་བར་བྱའོ། །རྒྱས་པ་ལ་ནི་རྡོ་རྗེ་མཛོད་སྤུ་དང་། ཐལ་བའི་ཐིག་ལེས་བསྲུང་བར་བྱའོ། །དགུག་པ་དང་། གསད་པ་དང་། བཅིང་བ་དང་། མངོན་སྤྱོད་ཀྱི་ལས་རྣམས་ལ་ནི། རྡོ་རྗེ་གཙུག་ཏོར་ལ་སོགས་པའི་སྔགས་དང་ཕྱག་

རྒྱས་བདག་ཉིད་བསྲུང་བར་བྱའོ། །དེ་ལ་སྤྱི་བོའི་ཕྱོགས་སུ་རྡོ་རྗེ་གཙུག་ཏོར་བཞག་ལ། སྔགས་ནི་འདི་ཡིན་ཏེ། ཨོཾ་ཧཱུཾ་བནྡྷ་ཧཾ་ཞེས་བྱའོ། །སྨིན་མཚམས་ཀྱི་ཕྱོགས་སུ་རྡོ་རྗེ་མཛོད་སྤུ། ཨོཾ་སརྦྦ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་བྷུར་བྷུ་བ་སྭཿ། ཁའི་ཕྱོགས་སུ་རིག་པ་མཆོག །ཨོཾ་དྷརྨྨ་ཞེས་བྱའོ། །

སྙིང་གའི་ཕྱོགས་སུ་འདོད་པའི་རྒྱལ་པོ། །ཊཀྐི་ཧཱུཾ་ཛཿ། ལྟེ་བའི་ཕྱོགས་སུ་གཤིན་རྗེ་གཤེད། ཨ་ཧོ་བཛྲ་ཧི་ཞེས་བྱའོ། །རྐེད་པའི་ཕྱོགས་སུ་རྡོ་རྗེ་སྐ་རགས། ཀ་ནེ་དུ་ནེ་ཧཱུཾ་ཕཊ་ཅེས་བྱའོ། །ཕྲག་པ་གཡས་སུ་རྡོ་རྗེ་ལྕགས་ཀྱུ། །ཨོཾ་བཛྲ་ཨཱ་ཀཪྵ་ཡ་ཧཱུཾ་ཛཿཞེས་བྱའོ། །ཕྲག་པ་གཡོན་

དུ་རྡོ་རྗེ་ཞགས་པ། ཨོཾ་མ་ཧཱ་བཛྲ་པཱ་ཤ་ཧྲཱིཿཞེས་བྱ་བའོ། །ལག་ངར་གཡས་པ་ལ་རྡོ་རྗེ་ཀཱི་ལི་ཀཱི་ལ། ཨོཾ་བཛྲ་ཀཱི་ལི་ཀཱི་ལ་ཧོ་ཏྭཾ་ཞེས་བྱ་བའོ། །ལག་ངར་གཡོན་པ་ལ་རྡོ་རྗེ་བསྙེམས་པ། ཧེ་བཛྲ་གརྦྷ་སིདྡྷཱི་སིདྡྷྱ་ཏ་ཊ་ཞེས་བྱ་བའོ། །ལག་པ་གཡས་པ་ལ་རྡོ་རྗེ་འཆིང་བ། ཨོཾ་བཛྲ་དྲྀ་ཌྷ་ས་

མ་ཡ་སྟྭཾ་ཞེས་བྱ་བའོ། །ལག་པ་གཡོན་པ་ལ་རྡོ་རྗེ་ཁུ་ཚུར། ཨོཾ་བཛྲ་མུཥྚི་རུ་ཏྲ་རུ་ཏྲ་མ་ཊ་ཧཱུཾ་ཕཊ་ཅེས་བྱའོ། །བརླ་གཡས་པ་ལ་རྡོ་རྗེ་སྡེ། ཨོཾ་ཧྲཱིཿཔདྨ་དྷ་ར་ཨཱ་བ་ལོ་ཀི་ཡ་མཾ་ཞེས་བྱའོ། །བརླ་གཡོན་པ་ལ་རྡོ་རྗེ་ཁྲོ་བོ་སྤྱི་གཙུག །ཧཱུཾ་བཛྲ་བི་ནཱ་ཡ་ཀ་ཨ་དྷི་པ་མཱ་ར་ཡ་ཊ་ཞེས་བྱའོ། །པུས་མོ་གཡས་

เล่ม ๕๗ · หน้า 304b

པའི་ལྷ་ང་ལ་རྡོ་རྗེ་རབ་ཏུ་འདུད་པ། ཨོཾ་མ་ཧཱ་བཛྲ་པྲ་ཎ་མྱ་ད་ཡ་ཧཱུཾ་ཞེས་བྱའོ། །གཡོན་པའི་པུས་མོའི་ལྷ་ང་ལ་རྡོ་རྗེ་ལྟུང་བྱེད། ཨོཾ་བཾ་བཛྲ་པྲ་པཏྟ་ཡ་སརྦ་གརྦྷ་ཡ་ཧཱུཾ་ཞེས་བྱའོ། །རྗེ་ངར་གཡས་པ་ལ་རྡོ་རྗེ་རྐང་གདུབ། ཨོཾ་ཧཱུཾ་བཛྲ་ནུ་པུ་ར་ཙ་ལ་བེ་ཚཾ་ཧཱུཾ་ཕཊ་ཅེས་བྱའོ། །གཡོན་པའི་རྗེ་ངར་ལ་རྡོ་རྗེ་

ལྕགས་སྒྲོག །ཨོཾ་ཧཱུཾ་བཛྲ་ཤཾ་ཀ་ལ་བནྡྷ་པི་ཏ་ཡ་ཀད་དྷེ་སྥོ་ཊ་ཡ་བཾ་ཕཊ་ཅེས་བྱ་བའོ། །རྐང་པ་གཡས་པ་ལ་རྡོ་རྗེ་རྣོན་པོ། །ཧཱུཾ་མ་ཧཱ་བཛྲ་ཨ་ཀྲ་མ་ཨ་ཀྲ་མ་སརྦ་ཧ་ར་ཧ་ར་བཛྲ་ཙྪི་ད་ཧཱུཾ་ཞེས་བྱའོ། །རྐང་པ་གཡོན་པ་ལ་རྡོ་རྗེ་ཤུགས་བཞག་ལ་སྙིང་པོ་ནི་འདི་ཡིན་ཏེ། ཨོཾ་མ་ཧཱ་བཛྲ་བི་ཀ་གཙྪ་དྷ་པ་ཨཱ་ན་ཡ་སརྦྦཾ་

ཧཱུཾ་ཕཊ་ཅེས་བྱ་བའོ། །དེ་དག་གི་ཕྱག་རྒྱ་ནི་འདི་ཡིན་ཏེ། རྡོ་རྗེ་ཁུ་ཚུར་གཉིས་བཅིངས་ལ། མཐེ་ཆུང་གཉིས་ལྕགས་སྒྲོག་ཏུ་སྦྲེལ་ནས། མཛུབ་མོ་གཉིས་བསྒྲེང་བ་ནི་ཐམས་ཅད་སློང་བའི་ཕྱག་རྒྱའོ། །དེ་ཉིད་བཟློག་ནས་མཛུབ་མོ་གཉིས་ཀྱི་རྩེ་མོ་སྤྱི་གཙུག་ཏུ་གཞག་པ་ནི་རྡོ་རྗེ་གཙུག་ཏོར་གྱི་ཕྱག་

རྒྱའོ། །དེ་ཉིད་བཟློག་ལ་མཛུབ་མོའི་རྩེ་མོ་གཉིས་སྨིན་མཚམས་སུ་གཞག་པ་ནི་རྡོ་རྗེ་མཛོད་སྤུའིའོ། །དེ་ཉིད་ཁར་གཞག་པ་ནི་རྡོ་རྗེ་རིག་པ་མཆོག་གིའོ། །དེ་ཉིད་སྙིང་གར་ལྕགས་ཀྱུས་འདྲེན་པ་ནི་འདོད་པའི་རྒྱལ་པོའོ། །དེ་ཉིད་བསྒྱུར་ནས་ལྟེ་བར་མཛུབ་མོའི་རྩེ་མོ་གཏད་ནས་གཞག་པ་ནི་

གཤིན་རྗེ་གཤེད་ཀྱིའོ། །ཁུ་ཚུར་དེ་ཉིད་རྐེད་པའི་ཕྱོགས་སུ་གཞག་པ་ནི། ཁྲོ་བོ་སྐེ་རགས་ཀྱིའོ། །དེ་ཉིད་ཀྱི་མཛུབ་མོ་གཉིས་ཀྱི་ལྕགས་ཀྱུ་ཕྲག་པ་གཡས་སུ་གཞག་པ་ནི་རྡོ་རྗེ་ལྕགས་ཀྱུའིའོ། །དེ་ཉིད་ཀྱི་མཛུབ་མོ་གཡས་པའི་ལྕགས་ཀྱུས་གཡོན་པའི་སྡིགས་མཛུབ་ཀྱི་དབུས་ནས་བཟུང་

སྟེ་ཕྲག་པ་གཡོན་པར་གཞག་པ་ནི་རྡོ་རྗེ་ཞགས་པའིའོ། །དེ་ཉིད་སྙིང་གའི་ཕྱོགས་སུ་རྡོ་རྗེ་མཛུབ་མོ་གཉིས་མདུད་པ་ནི་རྡོ་རྗེ་ཀཱི་ལི་ཀཱི་ལའིའོ། །དེ་ཉིད་ཀྱི་མཛུབ་མོའི་རྩེ་མོ་བརླ་གཡོན་པར་གཞག་པ་ནི་རྡོ་རྗེ་བསྙེམས་པའོ། །དེ་ཉིད་ཀྱི་མཛུབ་མོ་ཕན་ཚུན་ལྕགས་སྒྲོག་བཅིངས་ནས། སྙིང་གར་

གཞག་པ་ནི་རྡོ་རྗེ་བསྡམས་པའིའོ། །དེ་ཉིད་ཀྱི་མཛུབ་མོའི་རྩེ་མོ་གཉིས་ཀྱིས་མཐེ་བོང་གི་རྒྱབ་མནན་པ་ནི་རྡོ་རྗེ་ཁུ་ཚུར་གྱིའོ། །དེ་ཉིད་ཀྱི་མཛུབ་མོ་གཉིས་པདྨའི་འདབ་མ་ལྟར་བྱས་པ་ནི་རྡོ་རྗེ་སྡེའིའོ། །དེ་ཉིད་མདའ་འཕེན་པ་ལྟ་བུར་གཡས་པའི་མཛུབ་མོས་གཡོན་པའི་མཛུབ་མོ་བླངས་ནས་འདྲེན་

เล่ม ๕๗ · หน้า 305a

ཅིང་གཡོན་ཕྱོགས་སུ་གཞག་པ་ནི་སྤྱི་གཙུག་གིའོ། །དེ་ཉིད་ཁ་ཐུར་དུ་བསྟན་ནས་གཞག་པ་ནི་རྡོ་རྗེ་རབ་ཏུ་འདུད་པའིའོ། །དེ་ཉིད་གཡོན་དུ་དམའ་བར་ཕབ་ནས་མྱུར་དུ་དྲལ་བ་ནི་རྡོ་རྗེ་རབ་ཏུ་ལྟུང་བའིའོ། །དེ་ཉིད་ཀྱི་མཛུབ་མོ་དང་མཐེའུ་ཆུང་སྦྲེལ་བ་ནི་རྐང་གདུབ་ལྟ་བུ་སྟེ།

རྡོ་རྗེ་རྐང་གདུབ་ཀྱིའོ། །དེ་ཉིད་ཀྱི་མཛུབ་མོ་དང་མཐེབ་མོ་ལུ་གུ་རྒྱུད་དུ་སྦྲེལ་བ་ནི་རྡོ་རྗེ་ལྕགས་སྒྲོག་གིའོ། །དེ་ཉིད་མདུན་དུ་བསྐྱོད་པ་ནི་རྡོ་རྗེ་རྣོན་པོའིའོ། །དེ་ཉིད་མྱུར་དུ་བསྐོར་ནས་ཁར་བསྐྱོད་པ་ནི་རྡོ་རྗེ་ཤུགས་ཀྱིའོ། །དེ་ལྟར་བདག་ཉིད་བསྲུང་བ་བྱས་ནས། རྡོ་རྗེ་གནོད་སྦྱིན་བཟླས་པའི་

ཆུ་ཀུ་ཤའི་རྩེ་མོས་བླངས་ལ། ཡོ་བྱད་ཐམས་ཅད་གཡས་ཕྱོགས་ནས་བསང་བར་བྱའོ། །རྡོ་རྗེ་གནོད་སྦྱིན་གྱི་ཕྱག་རྒྱ་དང་སྔགས་ཀྱིས་མེ་བུད་པ་དང་། དེ་ཉིད་བཟླས་པའི་ཆུས་ལན་གསུམ་གྱི་བར་དུ་བསངས་ཏེ། ཐབ་ཁུང་དུ་བཅུག་ལ་རླུང་ཡབ་ཀྱིས་མེ་སྦར་བར་བྱ་ཞིང་། ཨོཾ་བཛྲ་ཛྭ་ལ་ཧཱུཾ་

ཞེས་བརྗོད་པར་བྱའོ། །ཡི་གེ་ཧཱུཾ་ལན་བདུན་བཟླས་ཏེ། མར་གྱིས་མེ་གསོ་བར་བྱའོ། །སྔགས་པས་མཉམ་པར་གཞག་པ་ཡིས། །ཀུ་ཤ་ལ་ནི་སྔགས་བཟླས་ཏེ། །དེ་ཡང་དེ་ནས་བཞག་བྱས་ནས། །དངོས་གྲུབ་ཐམས་ཅད་རབ་ཏུ་འགྲུབ། །དང་པོར་ཤར་དུ་ཁ་བལྟས་གཞག །གཉིས་

པའི་རྩེ་མོ་ལྷོར་བསྟན་ནས། །གསུམ་པའི་རྩེ་མོ་ནུབ་ཏུ་བསྟན། །བཞི་པ་བྱང་དུ་བསྟན་པར་བྱ། །ཡང་ཀུ་ཤའི་ཚོགས་མང་པོས་ཐབ་ཁུང་རྩེ་མོ་ཤར་ཕྱོགས་སུ་བསྟན་ལ་གཡོགས་པར་བྱའོ། །ཨོཾ་བཛྲ་སཏྭ་ཨཱཿཞེས་བྱ་བའི་སྔགས་ཀྱིས་ཀུ་ཤ་མངོན་པར་བསྔགས་ལ་གཞག་པར་བྱའོ། །

དེ་ནས་རང་གི་ལྷའི་ཆོས་ཀྱི་ཡི་གེས་ཐབ་ཁུང་བསྐྱེད་ལ། དེའི་དབུས་སུ་ཡི་གེ་ཨོཾ་ལས་པདྨའི་གདན། དེའི་སྟེང་དུ་སྔར་བཤད་པའི་སྙིང་པོས་རྡོ་རྗེ་མེ། མདོག་དམར་སེར། ཕྱག་གཡོན་གྱི་དང་པོ་ན་དབྱུ་གུ། གཉིས་པ་ན་རིལ་པ་སྤྱི་བླུགས། གཡས་ཀྱི་དང་པོ་ན་རྡོ་རྗེ་རྩེ་གསུམ། གཉིས་

པ་ན་དགང་གཟར། དབུའི་གཙུག་ཏོར་འབར་བའི་ཕྲེང་བ་འཁྲུགས་པ་བསམས་ལ། དེ་ནས་ཁྲོ་བོ་འདོད་པའི་རྒྱལ་པོས་སྤྱན་དྲངས་ནས་ཁྲོ་བོ་རྡོ་རྗེ་ལྕགས་ཀྱུ་ལ་སོགས་པའི་ལས་ཀྱི་ཕྱག་རྒྱས་དགུག་པ་དང་། གཞུག་པ་དང་། བཅིང་བ་དང་དབང་དུ་བྱས་ཏེ། དེ་མེ་ཐབ་ཀྱི་དབུས་སུ་གཞག་པ་འདི་མེ་ལྷའི་

เล่ม ๕๗ · หน้า 305b

གཟུགས་བྱས་ལ། རྡོ་རྗེ་གནོད་སྦྱིན་གྱིས་བགེགས་བསྐྲད་ནས་སྲུང་བ་བྱས་ཏེ། རྡོ་རྗེ་ཁུ་ཚུར་གྱིས་སྒོ་བཅད་ལ། རྡོ་རྗེ་གོ་ཆས་བསྲུང་བ་ཐམས་ཅད་ཡང་དག་པར་བསྲུངས་ཏེ། མེ་རང་གི་སྔགས་དང་། ཨོཾ་པྲ་ཝ་ར་སཏྐཱ་ར་པྲ་ཏཱིཙྪ་སྭཱ་ཧཱ་ཞེས་བྱ་བའི་རིག་པ་འདི་དང་། ཞབས་བསིལ་དང་མཆོད་

ཡོན་དབུལ་བར་བྱའོ། །ཕྱག་རྒྱ་ནི་འདི་ཡིན་ཏེ། གཡས་པའི་ཁུ་ཚུར་གྱི་སོར་མོ་ཐམས་ཅད་རྣ་ཆ་ལྟ་བུར་བྱས་ལ་མཐེ་བོང་དང་མཛུབ་མོ་གཉིས་སྐམ་པ་ལྟར་བྱས་པའི་ཕྱག་རྒྱས་མེ་ཏོག་ལ་སོགས་པ་དབུལ་བར་བྱ་སྟེ། དེ་ལྟར་ཕུལ་ནས་སོར་མོ་རྣམས་བརྐྱང་བར་བྱའོ། །དེ་ནས་མེའི་དམ་ཚིག་གི་

ཕྱག་རྒྱ་བཅིངས་ཏེ། མེ་བསྒྲུབས་ནས། ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལཱ་ཡ་སརྦྦ་བྷསྨིཾ་ཀུ་རུ་སརྦྦ་དུཥྚཱཾ་ཧཱུཾ་ཕཊ། དྲྀ་ཤྱ་ཛཿཧཱུཾ་བཾ་ཧོཿ། ས་མ་ཡ་སྟྭཾ་ས་མ་ཡ་སྟྭཾ་ཨ་ཧཾ། ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལཱ་ཡ་སརྦྦ་བྷསྨིཾ་ཀུ་རུ་སརྦྦ་དུཥྚཱཾ་ཧཱུཾ་ཕཊ་ཅེས་བྱ་བ་ལན་གསུམ་གྱི་བར་དུ་བརྗོད་པར་བྱའོ། །དེ་ནས་ཕྱག་རྒྱ་ནི་

འདི་ཡིན་ཏེ། ཕྱི་རོལ་གྱི་རྡོ་རྗེ་ཁུ་ཚུར་གཉིས་བཅིངས་ལ། གཡས་པ་འབར་བ་ལྟ་བུར་བྱས་པ་ནི། མེའི་དམ་ཚིག་གི་ཕྱག་རྒྱའོ། །མེ་རང་གི་ལྕེ་ལ་རྡོ་རྗེ་དཀར་པོ་བསམས་ནས། ཨོཾ་ཛྭ་ལ་ཛྭ་ལ་ཧཱུཾ་ཕཊ་ཅེས་བྱ་བ་ནི། མེ་ལྷའི་ལྕེ་ལ་དགོད་པར་བྱ་བ་དེ་ནི་ཆོས་ཀྱི་ཕྱག་རྒྱའོ། །ཡི་གེ་ཨ་ལས་རང་གི་

སྙིང་གར་སྣ་ཚོགས་རྡོ་རྗེ་བསམས་ཏེ། སྔགས་བརྗོད་ཅིང་གར་ལས་བྱུང་བའི་ཕྱག་རྒྱ་ཆེན་པོའི་ཚུལ་དུ་འཆིང་བར་བྱེད་པ་འདི་ནི་དེའི་ཕྱག་རྒྱའོ། །ཡི་གེ་ཧཱུཾ་ལས་རང་གི་སྙིང་གར་འབར་བའི་རྡོ་རྗེ་རྩེ་ལྔ་པ་བསམས་ཏེ། ཕྱག་གཡོན་པར་དབྱུ་གུ། ཕྱག་གཡས་པ་ན་རྡོ་རྗེ་རྩེ་གསུམ་པ་བླངས་ཏེ།

སྔགས་བརྗོད་ཅིང་དེའི་དབྱིབས་སུ་འདུག་པ་འདི་ནི་ཕྱག་རྒྱ་ཆེན་པོའོ། །དེ་ནས་དེ་ལ་རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་ལ། དམ་ཚིག་ལ་རབ་ཏུ་གནས་པར་བྱའོ། །ཨོཾ་བཛྲ་ས་མ་ཡ་གྲྀཧྞ་བནྡྷ་ས་མ་ཡ། བཛྲ་སཏྭ་ས་མ་ཡ། མ་ནུ་སྨ་ར་སརྦ་ཏ་ཐཱ་ག་ཏ་ས་མ་ཡ་སྟྭཾ། དྲྀ་ཌྷོ་མེ་བྷ་བ། སྠི་ཏོ་མེ་བྷ་

བ། ཨ་ཧཱ་རྱོ་མེ་བྷ་བ། ཨ་པྲ་ཏི་ཧཱ་རྱོ་མེ་བྷ་བ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོ་ཧཱུཾ་ཞེས་བྱ་བ་འདི་དང་། ཁྲོ་བོ་ཏི་རཱིནྟི་རིའི་ཕྱག་རྒྱ་བཅིང་བ་དང་། སླར་ཡང་། རྡོ་རྗེ་འདི་ནི་རྡོ་རྗེ་ཆེ། །སངས་རྒྱས་ཀུན་གྱིས་བྱིན་བརླབས་པ། །དམ་ཚིག་འདི་ལས་འདས་ན་ནི། །རིགས་རྣམས་མྱུར་དུ་ཐལ་བར་རློག །

เล่ม ๕๗ · หน้า 306a

ཨོཾ་ཧ་ན་ས་མ་ཡ་ཧཱུཾ་ཕཊ་ཅེས་བརྗོད་ལ་ངས་གང་སྨྲས་པ་དེ་བྱ་དགོས་སོ་ཞེས་བྱ་བ་དང་། ཕྱག་རྒྱའི་སྦྱོར་བས་དམ་ཚིག་ལ་གཞག་པར་བྱའོ། །དེ་ལ་ཕྱག་རྒྱ་ནི་འདི་ཡིན་ཏེ། སེམས་དཔའི་རྡོ་རྗེ་དམ་བྱས་ཏེ། །མཐེ་བོ་གཉིས་ཀྱི་བར་མནན་ཞིང་། །མཐེའུ་ཆུང་རྡོ་རྗེ་རྩེ་མོར་ནི། །རྣོན་པོའི་

དམ་ཚིག་འཛིན་པ་པོ། །ཞེས་བྱ་བ་འདི་དང་། ཨོཾ་བཛྲ་བནྡྷ་ཧཾ་ཞེས་བྱ་བ་འདིས། རང་གི་དམ་ཚིག་ལ་སྦྱར་བར་བྱའོ། །ཕྱག་རྒྱ་སྦྱར་ཞིང་འདི་སྐད་ཅེས་བརྗོད་པར་བྱ་སྟེ། མངོན་པར་འདོད་པར་གྱིས་ཤིག་ཅེས་བརྗོད་པར་བྱའོ། །དེ་ལ་ཕྱག་རྒྱ་ནི་འདི་ཡིན་ཏེ། རྡོ་རྗེ་སྲུང་བ་དམ་བཅིངས་ལ། །རྡོ་རྗེ་

བསྡམས་པ་དེས་མནན་པས། །འདི་ནི་སྲུང་བའི་དམ་ཚིག་སྟེ། །སེམས་ཅན་ཐམས་ཅད་བསྲུང་བའོ། །སླར་ཡང་སྔགས་པས་མཆོད་ཡོན་ཕུལ་ནས། ལན་གསུམ་གྱི་བར་དུ་འཐོར་འཐུང་བྱས་པས། རྡོ་རྗེ་གནོད་སྦྱིན་གྱི་བཟླས་པའི་ཆུས་ལན་གསུམ་གྱི་བར་དུ་བསངས་ཏེ། རྡོ་རྗེ་སྲུང་བའི་ཕྱག་

རྒྱས་ཡང་དག་པར་བསྲུངས་ལ། མཆོད་པ་རྣམ་པ་ལྔས་མཆོད་པར་བྱའོ། །དེ་ནས་སྒེག་མོ་ལ་སོགས་པའི་མཆོད་པ་བཞིས་ཡང་དག་པར་མཆོད་ལ། ལས་དང་རྗེས་སུ་མཐུན་པའི་མེ་ལ་རང་གི་སྔགས་ཀྱིས་མར་གྱི་སྲེག་བླུགས་གསུམ་དགང་གཟར་གྱིས་དབུལ་བར་བྱའོ། །དེ་ནས་བགེགས་

ཡོད་མེད་བརྟག་པར་བྱའོ། །དེ་ལ་ལས་དང་རྗེས་སུ་མཐུན་པར་བརྗོད་པ་ནི་འདི་ཡིན་ཏེ། དེ་ལ་ཞི་བ་བྱེད་ན། ལན་གསུམ་གྱི་བར་དུ་ཁྲུས་བྱ་བ་སྔོན་དུ་འགྲོ་བས། གོས་དཀར་པོ་མ་ཉམས་པའི་སྟོད་གཡོགས་དང་། སྨད་གཡོགས་བགོས་ཏེ། སྙིང་བརྩེ་བ་དང་། དུལ་བ་དང་། ཚངས་པར་སྤྱོད་

པས་ཁ་ཤར་ཕྱོགས་སུ་བལྟས་ཏེ། འཇམ་པའི་སྟན་འབོལ་བའམ། པདྨའི་སྟན་ལ་འདུག་སྟེ། ཙནྡན་དཀར་པོ་དྲི་ཞིམ་པོ་དང་། མེ་ཏོག་དཀར་པོ་དང་། ཙནྡན་གྱི་བདུག་པ་དང་། བ་དཀར་མོའི་མར་དང་། དཀར་གསུམ་གྱི་ལྷ་བཤོས་དང་། བྱང་ཆུབ་མཆོག་གི་ཕྱག་རྒྱས་དགང་གཟར་བླངས་ལ།

ཞི་བའི་ཉམས་དང་ལྡན་པས་མེའི་ལྷ་ཁ་དོག་དཀར་པོའི་གཟུགས་ཅན་བསམས་ལ། མར་གྱི་དགང་བླུགས་གསུམ་མེ་ལ་དབུལ་བར་བྱའོ། །རྒྱས་པ་ལ་ནི་དགའ་ཞིང་མགུ་བའི་གཟུགས་ཅན་མདོག་སེར་པོ། རྒྱན་སེར་པོ་དང་ལྡན་པའི་མེའི་ལྷ་བསམས་ལ། རང་གི་ལུས་དྲང་པོས་སྣ་ཚོགས་

เล่ม ๕๗ · หน้า 306b

པའི་གོས་སམ། གོས་སེར་པོ་གྱོན་ལ། རྒྱན་སེར་པོས་བརྒྱན་པ། གདོང་དྲི་ཞིམ་པོས་བྱུགས་ལ་མེ་ཏོག་གི་ཕྲེང་བ་བཏགས་ཏེ། སྟན་བཟང་པོ་ལ་འདུག་ལ། བྱང་ཕྱོགས་སུ་ཁ་བལྟས་ཏེ། དགའ་བར་བཅས་པའི་ཡིད་ཀྱིས་མཆོད་པ་རྣམ་པ་ལྔ་སེར་བ་དང་། སྒེག་མོ་ལ་སོགས་པའི་མཆོད་

པས་ཡང་དག་པར་མཆོད་ལ། རིན་པོ་ཆེའི་ཁུ་ཚུར་གྱིས་དགང་གཟར་བླངས་ལ་སྦྱིན་སྲེག་བྱའོ། །མངོན་སྤྱོད་ལ་ནི་མེའི་ལྷ་མདོག་ནག་མོ་མཆེ་བ་གཙིགས་པ། འཇིགས་སུ་རུང་བ། རུས་པའི་རྒྱན་ཆ་ཅན། གོས་ནག་པོའི་སྟོད་གཡོགས་དང་སྨད་གཡོགས་གཡོན་དུ་ཁ་བསྟན་ནས་བགོས་པ་

བསམ་པར་བྱའོ། །བདག་ཉིད་གོས་སྔོན་པོའི་སྟོད་གཡོགས་དང་སྨད་གཡོགས་བགོས་ལ། དྲི་ནག་པོ་ལ་སོགས་པ་མཆོད་པའི་རྫས་དང་། སྲ་བའི་སྟན་ལ་གཤིན་རྗེའི་ཕྱོགས་སུ་བལྟས་ཏེ་འདུག་ནས་དངོས་སུ་ཁྲོ་བོ་ལྟ་བུར་མངོན་དུ་གྱུར་པར་བྱས་ནས། མཆོད་པ་རྣམ་པ་ལྔ་སྔོན་པོ་དང་། སྒེག་མོ་

ལ་སོགས་པས་ཡང་དག་པར་མཆོད་ལ། གཡོན་པའི་ཁྲོ་བོའི་ཁུ་ཚུར་གྱིས་སྦྱིན་སྲེག་བྱའོ། །དབང་དང་དགུག་པ་ལ་ནི་ཐམས་ཅད་དམར་པོར་ཤེས་པར་བྱ་སྟེ། ཁྱད་པར་ནི་འདི་ཡིན་ཏེ། བདེ་བའི་སྟན་ལ་ནུབ་ཕྱོགས་སུ་ཁ་བལྟས་ནས་དབང་གི་ལས་ལ་རྡོ་རྗེ་སྐྱིལ་ཀྲུང་གིས་འདུག་པར་བྱའོ། །

དགུག་པ་ལ་ནི་སྟེང་དུ་ཁ་བལྟས་ཏེ། སྲ་བའི་སྟན་ལ་འདུག་པར་བྱའོ། །དེ་ལ་དབང་དུ་བྱེད་པ་ལ་པདྨའི་ཁུ་ཚུར་གྱིས་སོ། །འགུགས་པ་ལ་ཁྲོ་བོ་རྡོ་རྗེ་ལྕགས་ཀྱུའི་ཕྱག་རྒྱ་ཆེན་པོའི་ཁྲོ་བོ་ཁུ་ཚུར་གཡས་པ་དང་གཡོན་པས་སྦྱིན་སྲེག་བྱའོ། །དེ་ལྟར་དེ་སྐད་དུ་ཡང་། དགང་བླུགས་ལན་གསུམ་

བྱས་ལ། འབར་བའི་མེ་ལ་མཚན་ཉིད་མཁས་པས་མཚོན་པར་བྱའོ། །སྔགས་ཀྱིས་གྲུབ་པའི་རྒྱུ་མཚན་གྱིས། །དེ་ཡི་ངེས་པ་སྐྱེ་བར་འགྱུར། །འཇའ་ཚོན་ལྟ་བུར་དགེ་བ་དང་། །བྱི་རུ་བཅག་པའི་མདོག་འདྲ་དང་། །གཡས་སུ་འཁྱིལ་ཞིང་སྣུམ་པ་དང་། །ལྷམ་བུ་ཆུ་གཤེར་མདོག་འདྲ་

བ། །དགང་གཟར་བླུགས་གཟར་དབྱིབས་ལྟ་བུ། །ལེ་བརྒན་བཻཌཱུརྱ་འདྲའི་མདོག །རྩེ་གསུམ་རྡོ་རྗེ་དཔལ་བེའུ་དང་། །ཉ་དང་དུང་དང་པདྨ་དང་། །རྒྱལ་མཚན་གདུགས་དང་བུམ་པར་བཅས། །རྔ་ཡབ་གཡུང་དྲུང་ལྟ་བུར་འབྱུང་། །གླིང་བུ་རྔ་རིངས་ཟབ་པ་དང་། །དྲི་ཞིམ་ཡིད་དུ་འོང་བ་ཡི། །

เล่ม ๕๗ · หน้า 307a

གསེར་མདོག་དཀར་དང་དུད་མེད་དང་། །གསལ་དང་དྲི་མེད་ཉི་མའི་འོད། །གཡས་སུ་འཁྱིལ་ཞིང་འབར་བ་ཡི། །གང་ཞིག་བདེ་བར་འབར་བ་ནི། །ཞི་ལ་ཁ་དོག་དཀར་པོ་སྟེ། །རྒྱས་པ་ལ་ནི་སེར་པོའི་མདོག །རྗེས་སུ་ཆགས་པ་དམར་པོ་སྟེ། །མངོན་སྤྱོད་ལ་ནི་སྔོ་

དང་གནག །ཡང་ན་རྩེ་གཅིག་ཤིས་པ་སྟེ། །རྩེ་མོ་གཉིས་ལ་འབྲིང་དུ་འགྱུར། །རྩེ་མོ་གསུམ་ལ་ཐ་མ་རུ། །སྒྲུབ་པས་མདོར་བསྡུས་ཤེས་པར་བྱ། །ཞེས་གསུངས་སོ། །དེ་བཞིན་དུ་རྡོ་རྗེ་ལྕགས་ཀྱུ་དང་། མདའ་ལ་སོགས་པ་ཡང་ལྷ་ཐམས་ཅད་ཀྱི་ཕྱག་མཚན་ཡིན་པས་དངོས་གྲུབ་ཀྱི་

རྟགས་སུ་འགྱུར་རོ། །དུ་བ་འཚུབ་ཅིང་མེ་སྟག་འཕྲོ་བ་དང་། །རྐང་པས་ལྡང་ཞིང་འབར་བ་ཞན་པ་དང་། །མྱུར་བར་ཆད་ཅིང་གཟི་བརྗིད་མེད་པའི་འོད། །རྩུབ་ཅིང་མདོག་གནག་པ་ལ་ཤ་ཡི་མདོག །མདུང་དང་ཞིབ་མ་འདྲ་བ་དང་། །དེ་བཞིན་བ་གླང་མགོ་འདྲ་དང་། །མི་རོའི་དྲི་དང་ཉ་ཡི་དྲི། །ཡང་ན་

བོང་བུའི་སྒྲར་གྱུར་པ། །སྲེག་མཁན་འབར་བས་གདུངས་པ་དང་། །མྱུར་དུ་ཞི་བའི་རྣམ་པ་དང་། །མ་རུངས་འཇིགས་པར་བྱེད་པའི་གཟུགས། །མེ་ནི་བགེགས་དང་བཅས་པ་ཡིན། །དེ་ལྟར་བགེགས་དང་བཅས་པ་ཤེས་པར་བྱས་ལ། སྔ་མ་བཞིན་དུ་བསང་གཏོར་བྱས་ལ། རྡོ་རྗེ་གནོད་སྦྱིན་གྱི་

ཕྱག་རྒྱ་དང་། སྔགས་ཀྱིས་སྦྱངས་ནས་སྲུང་བས་ཡོངས་སུ་བསྐྱང་བར་བྱའོ། །ཨོཾ་བཛྲ་ཡཀྵ་ཀྲོ་དྷ་ཁ་ད་ཁ་ད་ཧཱུཾ་ཕཊ་ཅེས་བྱ་བས་མར་གྱི་དགང་གཟར་བདུན་བླུགས་པར་བྱའོ། །དེ་ནས་ལག་པ་གཡས་པའི་མཛུབ་མོའི་རྩེ་མོ་རང་གི་མཐེ་བོས་མནན་ལ་ཕྱག་རྒྱ་འདི་དང་མེ་ལྷ་རང་གི་སྔགས་བརྗོད་ཅིང་རྡོ་རྗེ་

གནོད་སྦྱིན་ཡང་ཡོངས་སུ་བཟླས་པའི་ཆུས་ལག་པས་ལན་གསུམ་གྱི་བར་དུ་འཐོར་འཐུང་བྱའོ། །སྔ་མ་བཞིན་དུ་བསང་གཏོར་བྱས་ལ། ལྕེ་ལ་ཡི་གེ་ཧཱུཾ་བཀོད་དེ། དགང་བླུགས་གསུམ་མམ་བདུན་བྱའོ། །ཅུང་ཟད་ཞལ་གདངས་པ་ལ་ཞི་བའི་ལས་ཀྱི་སྦྱིན་སྲེག་བྱའོ། །དེ་བཞིན་དུ་དབང་གི་ལས་དང་།

རྒྱས་པ་དང་། དགུག་པ་དང་། དྲག་པོ་ཉིད་ལ་ནི་ཤིན་ཏུ་ཞལ་གདངས་པར་མེའི་རང་གི་སྔགས་ཀྱིས་དབུལ་བར་བྱ་ཞེས་ཤེས་པར་བྱའོ། །ཞུ་བའི་རྫས་ཐམས་ཅད་ཞལ་དུ་དབུལ་བར་བྱའོ། །ཡམ་ཤིང་རྣམས་དང་དེ་བཞིན་དུ་མི་རུས་ཀྱི་ཕྱེ་མ་ལ་སོགས་པ་རྣམས་ནི་འོད་ཀྱི་དཀྱིལ་འཁོར་རོ། །ཞོ་དང་

เล่ม ๕๗ · หน้า 307b

བཟའ་བ་ལ་སོགས་པ་ནི་ཕྱག་ཏུའོ། །མེ་ཏོག་ནི་དབུ་ལའོ། །དྲི་ཆབ་ནི་ཐུགས་ལའོ། །བདུག་པ་ནི་སྣ་ལའོ། །དེ་ལྟར་དགང་བླུགས་བྱས་ནས། རྫས་ཐམས་ཅད་སོ་སོར་ལན་གསུམ་གསུམ་དབུལ་བར་བྱའོ། །རིམ་པ་འདི་ཡིན་ཏེ། འབར་བའི་མེ་ལ་ཡམ་ཤིང་སྟེ། །དེ་ནས་མར་དང་དེ་འོག་ཏིལ། །

དེ་འོག་ཞོ་དང་འབྲས་ཆན་སོགས། །ཆོ་ག་འདིས་ནི་མདོར་བསྡུས་པའོ། །དེ་ནས་འཐོར་འཐུང་དང་བསང་གཏོར་བྱས་ལ། མེ་ལྷ་འབར་བའི་གཟུགས་ཅན་ཞུ་བར་གྱུར་པའམ། ཡང་ན་ཤར་ལྷོའི་མཚམས་སུའམ། ཡང་ན་ཁྱམས་ལ་རང་གི་གཟུགས་ཀྱིས་གཞག་པར་བྱའོ། །དེ་ནས་ཞི་བ་ལ་

སོགས་པའི་ལས་དང་རྗེས་སུ་མཐུན་པའི་གནས་ལ་བཞུགས་པའི་མེའི་དབུས་སུ་ལྷའི་གདན་བསམ་པར་བྱའོ། །དེ་ལ་ཞི་བ་ལ་ནི་ཡི་གེ་ཨོཾ་ལས་པདྨ་དཀར་པོ་བསྐྱེད་ལ། དེའི་སྟེང་དུ་རྣམ་པར་སྣང་མཛད་སྐུ་མདོག་དཀར་པོ་བྱང་ཆུབ་མཆོག་གི་ཕྱག་རྒྱ་བཅིངས་པ་བཛྲ་དྷཱ་ཏུ་སྭཱ་ཧཱ་ཞེས་བྱ་བས་བསམ་པར་

བྱའོ། །དེ་ནས་བསྡུ་བ་བྱས་ལ། ཕྱི་རོལ་དུ་མཚན་བརྒྱ་རྩ་བརྒྱད་པས་བསྟོད་དེ། དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ལ། ཇི་ལྟར་བྲིས་པ་དེ་བཞིན་དུ་བསམས་ལ། རྡོ་རྗེ་གནོད་སྦྱིན་གྱིས་བགེགས་བསལ་བ་ལ་སོགས་པ་དང་། རྡོ་རྗེ་ཁུ་ཚུར་གྱིས་སྒོ་བཅད་ལ། རྡོ་རྗེ་

གོ་ཆས་སྲུང་བ་རྣམས་ཡང་དག་པར་བསྲུངས་ལ་མཆོད་ཡོན་ཕུལ་ནས། ཕྱག་རྒྱ་བཞིས་རྒྱས་བཏབ་ལ། དབང་བསྐུར་ཏེ་མེ་ཏོག་ལ་སོགས་པ་མཆོད་པ་ལྔ་དང་། སྒེག་མོ་ལ་སོགས་པ་མཆོད་པ་བརྒྱད་ཀྱིས་མཆོད་པར་བྱའོ། །དེ་ནས་ཕྱག་རྒྱ་བཞི་བྱས་ལ་བཅོམ་ལྡན་འདས་ལ་མཆོད་ཡོན་དང་

འཐོར་འཐུང་དང་། བསང་གཏོར་བྱས་ཏེ་ཆོ་ག་རྣམས་རྗེས་སུ་སྤྱད་ནས། དེའི་ལྗགས་ལ་ཡི་གེ་ཧཱུཾ་བསམས་ནས་མར་གྱི་དགང་བླུགས་གསུམ་མམ་བདུན་དབུལ་བར་བྱའོ། །ཞི་བའི་ལས་ལ་བྱང་ཆུབ་མཆོག་གི་ཕྱག་རྒྱས་དགང་གཟར་དང་བླུགས་གཟར་གཟུང་བར་བྱའོ། །དེ་ནས་སྔར་བཤད་

པ་བཞིན་དུ་རྗེས་སུ་མཐུན་པའི་རྫས་ཐམས་ཅད་རེ་རེ་ཞིང་ཡང་ལན་གསུམ་གྱི་བར་དུ་དབུལ་བར་བྱའོ། །དགང་གཟར་གྱིས་གཟུང་དུ་འདོད་པའི་རྫས་ཀྱི་ཁྱད་པར་དེ་དག་ནི་དགང་གཟར་གྱིས་དབུལ་བར་བྱའོ། །ཡམ་ཤིང་ནི་ལག་པས་དབུལ་བར་བྱའོ། །དེ་ནས་དགང་གཟར་གྱིས་ཏིལ་གྱི་སྦྱིན་སྲེག་

เล่ม ๕๗ · หน้า 308a

གིས་སྡིག་པ་བསྲེག་པར་བྱའོ། །དེ་ལ་འདི་ནི་ཞི་བའི་སྦྱིན་སྲེག་གི་སྙིང་པོ་ཡིན་ཏེ། ཨོཾ་སརྦྦ་པཱ་པཾ་ད་ཧ་ན་བཛྲ་ཡ་ཆེ་གེ་མོ་པཱ་པཾ་ནིར་ད་ཧ་ན་སྭཱ་ཧཱ། དེ་ལྟར་སྦྱིན་སྲེག་བྱས་པའི་མཐར། ཨོཾ་སརྦྦ་ཏ་ཐཱ་ག་ཏ་མུཥྚི་བཾ་ཞེས་བྱ་བ་རིགས་ཀྱི་སྙིང་པོ་བརྗོད་ནས། ལན་གསུམ་གྱི་བར་དུ་

མར་གྱི་དགང་བླུགས་ཀྱིས་མེ་སྤར་ལ་ཡི་གེ་ཧཱུཾ་བཟླས་ཏེ། མཆོད་ཡོན་ཕུལ་ནས། དེ་ནས་འཐོར་འཐུང་དང་བསང་གཏོར་བྱས་ལ་མཚན་བརྒྱ་རྩ་བརྒྱད་པས་བསྟོད་དེ། མཆོད་པ་ཐམས་ཅད་ཀྱིས་ཡང་དག་པར་མཆོད་ལ། ཕྱག་བྱས་ཏེ་མཆོད་ཡོན་ཕུལ་ནས། མངོན་པར་འདོད་པ་དངོས་གྲུབ་ཀྱི་

ཕྱིར། གསོལ་བ་བཏབ་ལ་ཕྱག་རྒྱ་དགྲོལ་བར་འདོད་ན། བཛྲ་ས་ཏྭ་བཛྲ་ས་ཏྭ་ཞེས་ཡང་དང་ཡང་བཟླ་བར་བྱའོ། །ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ཞེས་

གསོལ་བ་བཏབ་ནས་རྡོ་རྗེ་སེམས་མའི་ཕྱག་རྒྱ་བཅིངས་ཏེ། གྱེན་དུ་བཀྲོལ་ལ་བཛྲ་ས་ཏྭ་མུཿཞེས་བྱའོ། །དེ་ལྟར་རྒྱལ་བའི་བཞུགས་གནས་ཀྱི་དཀྱིལ་འཁོར་དུའམ། སངས་རྒྱས་ཀྱི་ཡུལ་དུ་སྒྲུབ་པ་པོ་མངོན་པར་འདོད་པའི་དབང་གིས་བཅོམ་ལྡན་འདས་གཤེགས་སུ་གསོལ་བར་བྱའོ། །སླར་

ཡང་མེ་ལྷའི་སྦྱོར་བས་མེ་ཏོག་གིས། དེའི་སྔགས་དང་ལྡན་པས་ཐབ་ཀྱི་དབུས་སུ་བཞུགས་སུ་གསོལ་ལ། བསང་གཏོར་དང་འཐོར་འཐུང་བྱས་ནས། སྦྱིན་སྲེག་གི་རྫས་ལྷག་མ་རྣམས་ཀྱི་སྦྱིན་སྲེག་གིས་ཚིམ་པར་བྱས་ལ། དགང་བླུགས་དང་འཐོར་འཐུང་ཕུལ་ལ། བསང་གཏོར་བྱས་ནས་མཆོད་

པ་དང་། མཆོད་ཡོན་ཕུལ་ཏེ། མངོན་པར་འདོད་པའི་དངོས་གྲུབ་དེས་བླང་བར་བྱའོ། །དེ་ནས་བཛྲ་ས་ཏྭ་ཞེས་སྔ་མའི་བཟླས་པ་བྱས་ལ། ཕྱག་རྒྱ་དགྲོལ་བ་ལ་སོགས་པ་བྱས་ནས། སྔ་མ་བཞིན་དུ་གཤེགས་པའི་ཕྱིར་བསྐུལ་ཏེ། བཛྲ་ཧཱུཾ་མུཿཞེས་བྱ་བས་སྤྱི་བོར་བཀྲོལ་ལ་གཤེགས་སུ་

གསོལ་བར་བྱའོ། །དེ་ནས་རང་གི་ལྷ་ཇི་ལྟ་བ་བཞིན་དུ་མཆོད་ནས་སྔ་མ་བཞིན་དུ་གཤེགས་སུ་གསོལ་ནས་ལྡང་བར་བྱའོ། །དེ་ལྟར་ཉིན་རེ་ཞིང་ཐུན་བཞིའི་སྦྱོར་བའམ། ཐུན་གསུམ་གྱི་སྦྱོར་བས་རྟག་ཏུ་བྱའོ། །ཇི་ལྟར་ཞི་བས་རང་དང་གཞན་ལ་བྱེད་པ་དེ་བཞིན་དུ་འདིར་ཡང་། ཡམ་ཤིང་

เล่ม ๕๗ · หน้า 308b

དམར་པོ་རྣམས་ཀྱིས་མེ། །རབ་སྦར་རྡོ་རྗེ་ཁྲོ་བོ་ཡི། །མཉམ་པར་གཞག་པས་སྙོམས་ཞུགས་ལ། །ཏིལ་བསྲེགས་པས་ནི་སྡིག་སྲེགས་ཤིག །ཅེས་བྱའོ། །རྒྱས་པ་ལ་ཡང་བཅོམ་ལྡན་འདས་རིན་ཆེན་འབྱུང་ལྡན་རྣམ་པར་སྣང་མཛད་བཞིན་དུ་ཐབ་ཁུང་གི་དབུས་སུ་བསྒོམས་ལ། ནོར་

བུའི་ཁུ་ཚུར་གྱིས་འབྲས་ཀྱི་སྦྱིན་སྲེག་བྱའོ། །ཨོཾ་བཛྲ་པུཥྚ་ཡེ་ཆེ་གེ་མོ་པུཥྚིཾ་ཀུ་རུ་སྭཱ་ཧཱ་ཞེས་བྱའོ། །དེ་ལྟར་རིམ་པ་འདིས། ཡམ་ཤིང་དེ་དག་ཉིད་ཀྱིས་ནི། །མེ་ནི་རབ་ཏུ་སྤར་ནས་ཀྱང་། །རྟག་ཏུ་འབྲས་ནི་བསྲེག་བྱས་ན། །གདོན་མི་ཟ་བར་ཁྱིམ་རྒྱས་འགྱུར། །ཞེས་བྱའོ། །ཚེ་རིང་བ་བསྒྲུབ་པ་

ན་བཅོམ་ལྡན་འདས་འོད་དཔག་ཏུ་མེད་པ་དེ་བཞིན་དུ་བསྒོམས་ལ། ཞི་བའི་ཐབ་ཁུང་གི་དབུས་སུ་དེ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ཁ་བྱང་ཕྱོགས་སུ་བལྟས་ནས་དཱུར་བའི་ཡལ་ག་མར་དང་བཅས་པ་སྙིང་པོ་འདིས་བསྲེག་པར་བྱའོ། །ཨོཾ་བཛྲ་ཨཱ་ཡུར་ཆེ་གེ་མོ་ཨཱ་ཡུརྡ་དེ་སྭཱ་ཧཱ་ཞེས་བྱ་

བས། ཡམ་ཤིང་དམར་པོ་རྣམས་ཀྱིས་ཀྱང་། །མཁས་པས་རབ་ཏུ་མེ་སྦར་ཏེ། །དཱུར་བའི་ཡལ་ག་མར་བཅས་པས། །སྲེག་པར་བྱེད་ན་ཚེ་འཕེལ་ལོ། །དེ་ནས་རང་དང་གཞན་སྲུང་བར་བྱེད་པར་འདོད་ན། ཞི་བའི་ཐབ་ཁུང་དེ་ཉིད་ལ་བཅོམ་ལྡན་འདས་དོན་ཡོད་པར་གྲུབ་པར་བསྒོམས་ལ། འབྲུ་

མར་གྱི་དགང་བླུགས་དེ་བཞིན་དུ་བྱས་ལ་ཀུ་ཤའི་ཡལ་ག་དང་འབྲུ་མར་གྱིས་སྦགས་ལ་སྔར་བཤད་པ་བཞིན་དུ་སྦྱིན་སྲེག་བྱའོ། །ཨོཾ་ཨ་པྲ་ཏི་ཧ་ཏ་བཛྲ་ཡ་ཆེ་གེ་མོ་རཀྵ་ཀུ་རུ་སྭཱ་ཧཱ་ཞེས་བྱ་བ་ནི། ཡམ་ཤིང་དེ་དག་ཉིད་ཀྱིས་ནི། །མེ་ནི་རབ་ཏུ་སྦར་བྱས་ལ། །ཀུ་ཤའི་ཡལ་ག་འབྲུ་མར་གྱིས། །བསྲེག་

པར་བྱས་ན་ངེས་པར་བསྲུང་། །ཞེས་བྱའོ། །རྡོ་རྗེ་རྩེ་གཅིག་པ་ལྟ་བུའི་ཐབ་ཁུང་དུ། ནིམ་པའི་ཤིང་ལ་སོགས་པ་ནས་བྱུང་བའི་བུད་ཤིང་གིས་མེ་སྦར་ནས་ཆོ་ག་ཐམས་ཅད་རྗེས་སུ་སྤྱད་ལ། ཁྲོ་བོ་རྡོ་རྗེ་ལྕགས་ཀྱུ་དེར་སྔ་མ་བཞིན་དུ་བསམས་ལ་སྦྱིན་སྲེག་བྱའོ། །ཧཱུཾ་བཛྲ་ཨཱ་ཀཪྵ་ཡ་ཆེ་གེ་མོ་སྭཱ་ཧཱ་

ཞེས་བྱ་བ་ནི། ཡམ་ཤིང་ཚ་བས་དང་པོར་ནི། །རྡོ་རྗེ་ཁྲོ་བོའི་ཏིང་འཛིན་གྱིས། །མེ་སྤར་ནས་ཀྱང་སེ་བ་ཡི། །ཚེར་མ་ཅན་གྱིས་འགུགས་པར་འགྱུར། །ཞེས་བྱའོ། །ཡང་ན་དབང་དུ་བྱེད་པའི་ཐབ་ཁུང་དུ། ནིམ་པ་ལ་སོགས་པའི་བུད་ཤིང་གིས་མེ་སྤར་ལ། དཀྱིལ་འཁོར་གྱི་དབུས་སུ་སྔ་མ་

เล่ม ๕๗ · หน้า 309a

བཞིན་དུ་བཅོམ་ལྡན་འདས་རྡོ་རྗེ་ཆགས་པ་བསྒོམ་པར་བྱའོ། །པདྨའི་ཁུ་ཚུར་གྱིས་མེ་ཏོག་དམར་པོ་དང་། འབྲས་བུ་དམར་པོའི་སྦྱིན་སྲེག་བྱའོ། །ཧཱུཾ་བཛྲ་རཱ་ག་ཡ་ཆེ་གེ་མོ་སྭཱ་ཧཱ་ཞེས་བྱ་བ་ནི། ཡམ་ཤིང་དེ་དག་ཉིད་ཀྱིས་ནི། །ཁྲོ་དང་ལྡན་པར་མེ་སྤར་ནས། །མེ་ཏོག་

མར་རམ་འབྲས་བུ་འང་རུང་། །སྦྱིན་སྲེག་བྱས་ན་སྐྱེ་བོ་རེངས། །ཞེས་བྱ་བ་ནི་མངོན་སྤྱོད་ཀྱི་ཐབ་ཁུང་དུ། ཇི་སྐད་བཤད་པའི་ཁའི་ཡམ་ཤིང་ལ་མེ་སྤར་ལ་ཐབ་ཁུང་གི་དབུས་སུ་བཅོམ་ལྡན་འདས་རྡོ་རྗེ་ལྕགས་སྒྲོག་བསམ་པར་བྱའོ། །ཁྲོ་བོའི་ཁུ་ཚུར་གྱིས་ལྕགས་ཀྱི་ཕྱེ་མའི་སྦྱིན་སྲེག་བྱས་ཏེ།

ཧཱུཾ་བཛྲ་བནྡྷ་ཡ་ཆེ་གེ་མོ་བནྡྷ་ཡ་སྭཱ་ཧཱ་ཞེས་བྱ་བ་ནི། རྣལ་འབྱོར་ཅན་གྱིས་ཁྲོས་ནས་ཀྱང་། །ཡམ་ཤིང་དེ་ནི་མེ་སྤར་ལ། །ལྕགས་ཀྱི་ཕྱེ་མ་བསྲེགས་ནས་ནི། །རྡོ་རྗེ་བཅིང་བ་ཉིད་དུ་འགྱུར། །ཞེས་བྱའོ། །དེ་བཞིན་དུ་མངོན་སྤྱོད་ཀྱི་ཐབ་ཁུང་དུ་བཅོམ་ལྡན་འདས་རྡོ་རྗེ་ཧཱུཾ་མཛད་ཇི་ལྟ་བ་བཞིན་དུ་བསམས་ལ།

ཁྲོ་བོའི་ཁུ་ཚུར་གྱིས་ནིམ་པ་ལ་སོགས་པ་ཁ་བའི་འབྲས་བུས་སྦྱིན་སྲེག་བྱ་སྟེ། ཧཱུཾ་བཛྲ་མ་ར་ཎ་ཡ་མ་རི་ཨུཏྤ་ཏ་ཡ་སྭཱ་ཧཱ་ཞེས་བྱ་བ་ནི། ཡམ་ཤིང་དེ་དག་ཉིད་ཀྱིས་ནི། །མཉམ་པར་བཞག་སྟེ་མེ་བུས་ལ། །འབྲས་བུ་ཁ་བ་ཁྲོ་ཞིང་བསྲེག །སྐད་ཅིག་ཏུ་ནི་འཆི་བར་འགྱུར། །ཞེས་བྱའོ། །དབང་

གི་ཐབ་ཁུང་དུ་བུད་ཤིང་སྐྱུར་བ་ལས། ཇི་ལྟ་བ་བཞིན་དུ་མེ་སྤར་ལ་བཅོམ་ལྡན་འདས་རྡོ་རྗེ་ཆགས་པ་ཐབ་ཁུང་གི་དབུས་སུ་བསམས་ལ། པདྨའི་ཁུ་ཚུར་གྱིས་འབྲས་བུ་དང་མེ་ཏོག་སྐྱུར་པོས་སྦྱིན་སྲེག་བྱས་ཏེ། ཨོཾ་བཛྲ་པཱ་ཤ་ཀ་ར་ཡེ་ཆེ་གེ་མོ་པ་ཤཾ་མ་ན་ཡ་སྭཱ་ཧཱ་ཞེས་བྱ་བ་ནི། མཁས་པས་ཡམ་ཤིང་

སྐྱུར་བ་ཡིས། །ཁྲོས་ནས་བྱིན་ཟ་སྦར་ནས་ནི། །འབྲས་བུ་ལོ་མ་སྐྱུར་བསྲེགས་ན། །དབང་དུ་བྱ་བ་དམ་པའོ། །ཞེས་བྱ་བའོ། །འདོད་པའི་འབྲས་བུའི་སྦྱིན་སྲེག་དང་། མི་སྣང་བའི་མེ་ཏོག་གི་སྦྱིན་སྲེག་དང་། ནམ་མཁའི་ལྕུག་མའི་སྦྱིན་སྲེག་རྣམས་ནི། ཞི་བའི་ཐབ་ཁུང་དུ་བཅོམ་ལྡན་འདས་རྣམ་པར་སྣང་མཛད་ཇི་ལྟ་བ་

བཞིན་དུ་བསམས་ལ། བྱང་ཆུབ་མཆོག་གི་ཕྱག་རྒྱས་སྲེག་བླུགས་གསུམ་བྱའོ། །རྡོ་རྗེ་བཀའ་བཞིན་བྱེད་པ་དང་། དཔའ་བོ་དང་། ཕྱག་ན་རྡོ་རྗེ་དང་། སངས་རྒྱས་དབང་དུ་བྱེད་པའི་སྦྱིན་སྲེག་རྣམས་ཀྱང་། དབང་དུ་བྱེད་པའི་ཐབ་ཁུང་གི་དབུས་སུ་བཅོམ་ལྡན་འདས་རྡོ་རྗེ་ཆགས་པ་བསམས་ལ། དེ་ནས་པདྨའི་ཁུ་ཚུར་

เล่ม ๕๗ · หน้า 309b

གྱིས་དགང་བླུགས་བཞི་དབུལ་བར་བྱའོ། །སྔར་བཤད་པའི་སྦྱིན་སྲེག་ཐམས་ཅད་ཀྱི་ཐུན་མོང་གི་རིམ་པ་ལ་ཁྱད་པར་ནི་འདི་ཡོད་དེ། འདི་ལྟར་ཧཱུཾ་བཛྲ་ཞེས་རིགས་ཀྱི་སྙིང་པོ་བརྗོད་པ་དང་། ཡི་གེ་ཧཱུཾ་གིས་མཆོད་ཡོན་ཕུལ་ལ། རྡོ་རྗེ་ཧཱུཾ་མཛད་དང་། རྡོ་རྗེ་ལྕགས་སྒྲོག་དང་། རྡོ་རྗེ་ལྕགས་ཀྱུའི་ཁྲོ་བོ་རྣམས་

དང་། ཁྲོ་བོ་ཏི་རཱིནྟི་རིའི་ཕྱག་རྒྱ་དང་། ཧཱུཾ་མུཿཞེས་བྱ་བས་གཤེགས་སུ་གསོལ་ལོ། །ཨོཾ་བཛྲ་སྥོ་ཊ་མ་ཧཱ་ཀྲོ་དྷ་བནྡྷ་བནྡྷ། སརྦ་མ་ཡ་ཧཱུཾ་བཾ་ཞེས་ཡི་གེ་བཾ་དང་བཅས་པས་ཁྲོ་བོ་ཆེན་པོས་རྡོ་རྗེ་ལྕགས་སྒྲོག་བཅིང་བའི་སྦྱོར་བ་བྱའོ། །ཨོཾ་སུཾ་བྷ་ནི་སུཾ་བྷ་ཧཱུཾ། གྲྀ་ཧྞ་གྲྀ་ཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ།

ཨཱ་ན་ཡ་ཧོ་བྷ་ག་བཱན། བཛྲ་ཧཱུཾ་ཕཊ་ཧཱུཾ་ཞེས་བྱ་བ་ཡི་གེ་ཧཱུཾ་གི་མཐའ་ཅན་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱིས་བསད་པའི་སྦྱོར་བ་བྱའོ། །ཨོཾ་བཛྲ་ཨཾ་གུ་ཤ་མ་ཧཱ་ཀྲོ་དྷ་ཨཱ་ཀཪྵ་ཡ་སརྦྦ་ས་མ་ཡ་ཧཱུཾ་ཛཿཛཿཞེས་ཡི་གེ་ཛཿདང་བཅས་པའི་ཁྲོ་བོ་རྡོ་རྗེ་ལྕགས་ཀྱུར་དགུག་པའི་སྦྱོར་བ་བྱའོ། །ཨོཾ་བཛྲ་དྷཱ་ཏུ་ཨོཾ་ཞེས་བྱ་བ་རྒྱས་

པ་ལ་བཅོམ་ལྡན་འདས་རིན་ཆེན་འབྱུང་ལྡན་ཡི་གེ་ཨོཾ་གྱི་མཐའ་ཅན་གྱི་སྦྱོར་བ་ཡང་བྱའོ། །དབང་དུ་བྱ་བ་ལ་ཨོཾ་བཛྲ་རཱ་ག་ཧོ་ཞེས་བྱ་བ་དང་། ཡི་གེ་ཧོ་དང་བཅས་པ་དང་། རྡོ་རྗེ་ཆགས་པས་སྦྱོར་བར་བྱའོ། །པླཀྵ་དང་། ཨུ་དུམྺཱ་ར་དང་། ནྱ་གྲོ་དྷ་དང་། མྱ་ངན་མེད་པ་དང་། ཙུ་ཏ་དང་། ཤ་མི་དང་། པ་

ལ་ཤ་དང་། ཀསྨརྫྱལ་སོགས་པ་མཆོད་སྦྱིན་གྱི་ཤིང་འོ་མ་ཅན་རྣམས་སམ། གཞན་དག་གི་ལྗོན་པ་རློན་པའི་རྩེ་མོའི་ཆ་ལས་བྱུང་བ་མཐོ་གང་གི་ཚད་ཙམ་རྩེ་མོ་གཉི་ག་སྦྲང་རྩི་དང་འོ་མ་དང་མར་ལ་སྤགས་ལ། ཙནྡན་དཀར་པོའི་ཆུར་ཡོངས་སུ་སྦངས་པའི་ཡམ་ཤིང་དང་། ནས་དང་། འོ་མ་དང་།

ཞོ་དང་། འབྲས་ཡོས་དང་། དཱུར་བ་དང་། ཀུ་ཤའི་མྱུ་གུ་དང་། ཙནྡན་དཀར་པོ་དང་། ཙུ་ཏའི་ལོ་མ་དང་། པྲི་ཡང་ཀུའི་མེ་ཏོག་དང་། འབྲས་ཆན་དང་། མེ་ཏོག་དཀར་པོ་དྲི་ཞིམ་པ་དང་། ནཱ་ག་གེ་སར་དང་། སྤོས་ཀྱི་རོང་བུ་དང་། སྦྲང་རྩི་དང་། མར་དང་། ཇི་ལྟར་རྙེད་པའི་རྫས་རྣམས་དང་། ཞི་བའི་

ལས་ལ་སྦྱིན་སྲེག་བྱ་སྟེ། མངར་གསུམ་དང་ནི་སྦྱར་བ་ཡི། །ཟས་མཆོག་གི་ནི་གོང་བུ་དང་། །སྦྲང་རྩི་མར་དང་ཞོ་སྦྱར་ལ། །ཏིལ་ནག་ཞོ་དང་མར་ནག་དང་། །ཤ་ཏ་པུཥྤ་བིལ་བ་དང་། །ཤཱ་ལིའི་འབྲས་དང་འབྲས་དཀར་དང་། །ནཱ་ག་གེ་སར་པདྨ་དང་། །ཀརྞི་ཀ་ཡི་མར་དང་བཅས། །འབྲུ་རྣམས་ཀུན་དང་

เล่ม ๕๗ · หน้า 310a

ལག་པན་དང་། །དེ་བཞིན་ཡམ་ཤིང་མཆོད་སྦྱིན་བྱ། །དེ་བཞིན་རྒྱས་པ་ལ་སོགས་ཀྱིས། །རྫས་རྣམས་དུ་མའི་སྦྱིན་སྲེག་བྱ། །ཡམ་ཤིང་སྦོམས་ནི་ཆང་པའི་ཚད། །ཆུར་ནི་ཁྲུ་གང་ཙམ་བྱས་ལ། །ཞོ་དང་འོ་མ་མར་སྦགས་ཏེ། །རྒྱས་པའི་ཆོ་གས་སྦྱིན་སྲེག་བྱ། །འདིར་ནི་

ཡམ་ཤིང་སེར་པོ་ཡི། །དྲི་ཡི་ཆུ་ལ་ཡམ་ཤིང་ནི། །དབུས་མའི་ཆ་ལས་བྱུང་བ་སྤང་། །ཞེས་འབྱུང་ངོ་། །ཡུངས་ཀར་ཚ་བའི་ཏིལ་མར་དང་། །རང་གི་ཁྲག་དང་ལན་ཚྭ་དང་། །སྐེ་ཚེ་ནིམ་པའི་ལོ་མ་དང་། །ཐལ་བ་དང་ནི་རྐང་རྗེས་ས། །བོང་བུ་སོགས་ཀྱི་སྦངས་དང་ནི། །རྟུག་པ་སྐྲ་དང་སེན་མོ་

དང་། །བྱ་རོག་སྒྲོ་འམ་རྐང་དང་ནི། །གཅི་བ་འམ་ནི་ཚེར་མ་དང་། །གྱོ་མོག་རུས་པའི་ཕྱེ་མ་དང་། །དེ་བཞིན་ཤ་ཆེན་ལ་སོགས་དང་། །ཀུ་པི་ད་ར་ནིམ་པ་དང་། །དུར་ཁྲོད་སོལ་བ་མགལ་དུམ་དང་། །ཚེར་མ་ཡི་ནི་ལྕུག་མ་དང་། །སེང་ལྡེང་གི་ནི་ཡམ་ཤིང་དང་། །མངོན་སྤྱོད་དོན་དུ་གཉེར་བ་

ཡི། །མཁས་པས་སྦྱིན་སྲེག་ཆོ་ག་བྱ། །དེ་བཞིན་སྲེག་རྫས་ཐམས་ཅད་ལ། །ཁྲག་གིས་བསྐུས་ནས་མངོན་སྤྱོད་བྱ། །ཀུན་ལ་ལན་ཚྭ་སྦྱར་བ་ཡི། །དགྲ་བོའི་མིང་ཡང་སྤེལ་བར་བྱ། །སོར་ནི་བཅུ་པའི་ཚད་དག་ནི། །རྩ་བ་ལས་བྱུང་བཀས་པ་ཡི། །ཡམ་ཤིང་རྩེ་གཉིས་རྣོན་པོ་ལ། །དུག་དང་

ཁྲག་དང་ཏིལ་སྦགས་ནས། །དགྲ་བོའི་གཟུགས་བརྙན་བྱས་ནས་ནི། །ཐལ་བ་སོལ་བ་ཕུབ་མ་སོགས། །ཡང་ན་སྦྱིན་སྲེག་རྫས་རྣམས་ནི། །སྐེ་ཚེ་དང་ནི་ཚྭ་རྣམས་སོ། །རང་གི་མིང་ངམ་གཟུགས་བརྙན་དག །གཏུབས་ཤིང་གཏུབས་ཤིང་སྦྱིན་སྲེག་བྱ། །དེ་ཡི་སྙིང་གར་མནན་ནས་

ཀྱང་། །སྦྱིན་སྲེག་ལས་རྣམས་བརྩམ་པར་བྱ། །པ་ལ་ཤ་དང་ཨུ་དུམྺཱ་ར་པླཀྵ་དང་། །ནྱ་གྲོ་དྷ་དང་སེང་ལྡེང་དང་ནི་ཉི་མ་སྐྱེས། །བྱི་ཏང་ག་དང་ཨ་མྲ་དང་ནི་ཀསྨརྫྱ། །ཤཾམྱ་དང་ནི་ཨ་པ་མརྒ་ལས་སྐྱེས་དང་། །མྱ་ངན་མེད་དང་བཅས་པ་ཡི། །ཡམ་ཤིང་བཅུ་གཉིས་དག་ཏུ་བཤད། །གསར་

དང་ཡལ་ག་གཅིག་པུ་ནི། །ཐམས་ཅད་ལས་ལ་སྦྱིན་སྲེག་བྱ། །གཅུ་དང་དྲང་དང་གསར་བ་དང་། །ལས་རྣམས་ཀུན་ལ་རྩེ་གཅིག་དང་། །རྩེ་མོ་གཉིས་པས་སྦྱིན་སྲེག་བྱ། །དྲི་བཟངས་ཆུ་ཡིས་བསྒོས་ནས་ནི། །ཞི་བའི་རྫས་རྣམས་གང་ཡིན་དང་། །རྒྱས་པ་ལ་ཡང་དེ་བཞིན་བཤད། །

เล่ม ๕๗ · หน้า 310b

བདག་ཉིད་བཟའ་བའང་གང་རུང་བ། །ལས་རྣམས་ཀུན་ལ་སྦྱིན་སྲེག་བྱ། །ཉིན་རེ་ཞིང་ནི་ཡམ་ཤིང་དང་། །རང་གི་བཟའ་བའང་རྟག་ཏུ་བསྲེག །པུས་མོའི་བར་དུ་རབ་བཞག་ནས། །སྲེག་བླུགས་ཡང་དག་སྤྱད་པར་བྱ། །ཏུ་རུསྐ་ནི་ཉུང་མར་སྦགས། །སོར་བཞི་ཡམ་ཤིང་བསྲེག་

བྱས་ན། །ལྷ་རྣམས་ཀུན་གྱིས་གསང་བ་དང་། །གསལ་དང་ནད་མེད་པ་རུ་གསུངས། །རྟག་ཏུ་གུ་གུལ་མར་ལ་སྤགས། །སྦྱིན་སྲེག་རབ་ཏུ་བསྔགས་པ་ཡིན། །སཱ་ལའི་ཤིང་གི་སྦྱིན་སྲེག་ནི། །སྔགས་རྣམས་ཐ་དད་པ་ལ་བསྔགས། །སྦྱིན་སྲེག་ལས་རྣམས་མཐོང་བ་ཡིས། །སྦྱིན་

སྲེག་ཆོ་ག་བྱ་བ་ཡིན། །ཞེས་གསུངས་པས། རྒྱུད་དང་རྟོག་པ་གཞན་ལ་བལྟ་བར་བྱའོ། །སྦྱིན་སྲེག་བྱེད་པ་ན་མི་སྨྲ་བས་བྱའོ། །དེ་ལ་དཀྱིལ་འཁོར་རམ་ལྷའི་ཁང་པའི་ཤར་ཕྱོགས་ཀྱི་ཆ་ལ་ཞི་བའི་ཐབ་ཁུང་དང་། དབང་གི་ཐབ་ཁུང་བྱའོ། །ལྷོ་ཕྱོགས་སུ་རྒྱས་པའི་ཐབ་ཁུང་དང་།

བྱང་ཕྱོགས་སུ་མངོན་སྤྱོད་ཀྱི་ཐབ་ཁུང་དང་། ནུབ་ཕྱོགས་ཀྱི་ཆ་ལ་རྡོ་རྗེའི་རྣམ་པ་ལྟ་བུའི་ཐབ་ཁུང་དུ་འགུགས་པའི་ལས་བྱའོ། །དེ་སྐད་དུ་ཡང་། བཅོམ་ལྡན་འདས་རྣམ་པར་སྣང་མཛད་ཀྱི་མདུན་དུ་ཞི་བ་དང་། དབང་ལ་སོགས་པ་རྣམས་ཀྱི་སྦྱིན་སྲེག་བྱའོ། །བཅོམ་ལྡན་འདས་ཀྱི་རྒྱབ་ཏུ་

དགུག་པ་དང་། བཅོམ་ལྡན་འདས་ཀྱི་གཡས་སུ་དགའ་ཞིང་མགུ་བས་རྒྱས་པའི་ལས་བྱའོ། །གཡོན་དུ་ཁ་ལྷོར་བལྟས་ལ་མངོན་སྤྱོད་ཀྱི་ལས་བྱའོ་ཞེས་གསུངས་སོ། །སྦྱིན་སྲེག་གི་ཆོ་གའོ། །དེ་ནས་ཡང་གསང་ཞིང་སྦ་བར་བྱ་བ་གསུངས་པ་ནི། ལས་ཀྱི་དཀྱིལ་འཁོར་གྱི་ཕྱག་རྒྱ་ནི་ལས་

ཀྱི་ཕྱག་རྒྱ་སྟེ། གསང་བ་དེའི་ལས་ཀྱི་ཕྱག་རྒྱ་ནི། གསང་བའི་ལས་ཀྱི་ཕྱག་རྒྱའོ། །དེའི་ཡུལ་གྱི་ཡེ་ཤེས་བསླབ་པར་བྱའོ། །ཡིད་འོང་བུད་མེད་ལྷན་ཅིག་ཏུ། །ཞེས་བྱ་བ་ནི་འདོད་པའི་ལྷའི་ཕྱག་རྒྱ་ཆེན་པོ་ནི། སྒྲུབ་པའི་ཡིད་དུ་འོང་བའི་བུད་མེད་དོ། །དེས་ལྷན་ཅིག་གཞག་པ་ནི། བདག་

ཉིད་དང་ལྷན་ཅིག་པ་སྟེ། རྡོ་རྗེ་ཧཱུཾ་མཛད་ལ་སོགས་པའི་སྐུའི་གསང་བ་དང་ལྷན་ཅིག་ཏུ་གྱུར་པར་མོས་པས་རྡོ་རྗེ་ཧཱུཾ་མཛད་དང་ལྷན་ཅིག་ཏུ་གྱུར་པར་མོས་པར་བྱའོ། །གནས་ཤིང་བུ་གར་ཨཉྫ་ན། །བཅུག་ནས་བསྐུལ་བ་བྱས་ནས་ཀྱང་། །ཞེས་བྱ་བ་ནི། བུ་ག་ནི་པདྨའོ། །ཨཉྫ་ན་ནི་ལིག་པུ་

เล่ม ๕๗ · หน้า 311a

མིག་གོ། །དེར་བཅུག་པ་ནི་བཞག་ནས་བསྒོམས་པའོ། །ཨཉྫ་ན་དེས་མིག་ལ་བསྐུས་ན། དཔལ་རྡོ་རྗེ་ཧཱུཾ་མཛད་ལ་སོགས་པ་རང་གི་ལྷ་དང་ལྷ་མོ་རྣམས་དབང་དུ་བྱེད་པར་འགྱུར་རོ། །འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་

པོར་གསུངས་པའི་ཕྱག་རྒྱ་བཞིས་དཔལ་རྡོ་རྗེ་ཧཱུཾ་མཛད་ལ་སོགས་པའི་རང་གི་ལྷའི་རྣལ་འབྱོར་བྱས་ལ། ཕྱིས་ལས་ཀྱི་དཀྱིལ་འཁོར་ལས་གསུངས་པའི་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། དེ་ནས་ཨོཾ་གུ་ཧྱ་ར་ཏི་བཛྲ་ཝ་ཤཾ་ཀ་ར་སིདྡྷི་སིདྡྷི་ཧཱུཾ་ཞེས་བྱ་བའི་སྙིང་པོ་ཡི་གེ་འབུམ་བཟླས་ནས་ཐུན་

བཞིའི་སྦྱོར་བ་ཇི་ལྟ་བ་བཞིན་དུ་བྱའོ། །དེ་ནས་ཟླ་བ་ཉ་ལ་དཀྱིལ་འཁོར་བྲིས་པའམ། རས་རིས་མདུན་དུ་བཞག་ལ། ཤྲཱི་པརྞི་ཀའི་ཤིང་ལ་པདྨ་དང་། རྡོ་རྗེའི་གཟུགས་བྱས་ལ། སྲོ་ཏ་ཨཉྫ་ན་སྟེང་དུ་བཞག་སྟེ། ཆོ་ག་ཐམས་ཅད་རྗེས་སུ་སྤྱད་ནས། རྡོ་རྗེ་བསྡམས་པ་བཅིངས་ཏེ། ཨོཾ་གུ་

ཧྱ་ར་ཏི་བཛྲ་ཝ་ཤཾ་ཀ་ར་སིདྡྷི་སིདྡྷི་ཧཱུཾ་ཞེས་བྱ་བ་འདི་དང་། མཚན་ཐོག་ཐག་བྱས་ན་དེས་འགྲུབ་པར་འགྱུར་རོ། །རྡོ་རྗེ་སྲུང་བ་དང་། གནོད་སྦྱིན་དང་། ཁྲོ་བོ་སེམས་དཔས་ཡང་དག་པར་བསྲུངས་ལ། ཡི་གེ་བརྒྱ་པས་བརྟན་པར་བྱའོ། །མིག་ལ་མིག་སྨན་བསྐུ་བར་བྱའོ། །དེ་སྐད་དུ་ཡང་། རང་གི་རིགས་ཀྱི་ལྷ་གང་ཡིན། །དེ་ནི་

ཡིད་འོང་བུད་མེད་བཤད། །མིག་སྨན་ཚོགས་ལ་དེས་བཟླས་ནས། །པདྨའི་སྟེང་དུ་གཞག་པར་བྱའོ། །བྷ་ག་པདྨ་ཞེས་སུ་བཤད། །བཅུག་ལ་བཞག་པར་བརྗོད་པ་ཡིན། །བྷ་གའི་སྦྱོར་བ་འདི་ཡིས་ནི། །མིག་སྨན་ལ་སོགས་བསྒྲུབ་པར་བྱ། །ཞེས་གསུངས་སོ། །ལྡོང་རོས་བུ་གར་བཅུག་

ནས་ནི། །ཞེས་བྱ་བ་ནི། དེ་བཞིན་དུ་ལྡོང་རོས་དང་། གོ་རོ་ཙ་ན་དང་། གུར་གུམ་དང་། ཡིད་དུ་འོང་བའི་བུད་མེད་དང་ལྷན་ཅིག་ཡང་དག་པར་སྦྱར་རོ་ཞེས་ཤེས་པར་བྱའོ། །ལྡོང་རོས་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །རྡོ་རྗེ་བསྡམས་པས་དེ་གཡོགས་ཏེ། །ཞེས་བྱ་བ་ནི་རྡོ་རྗེ་དབྱིངས་ཀྱི་

དཀྱིལ་འཁོར་ལས་གསུངས་པའི་རྡོ་རྗེ་བསྡམས་པ་བཅིངས་ལ། དེ་བཟུང་ནས་དེ་ཉིད་དང་མཚན་ཐོག་ཐག་བཟླས་པར་བྱའོ། །མཚན་མ་རྣམ་པ་བཞི་པོས་ནི། །དངོས་གྲུབ་རྣམ་པ་བཞིར་འགྱུར་རོ། །ཞེས་བྱ་བ་ནི་དེ་ལ་མཚན་མ་བཞི་ནི་དྲོ་བ་དང་། དུ་བ་དང་། རྡུལ་བ་དང་། འབར་བའོ། །དྲོ་བས་

เล่ม ๕๗ · หน้า 311b

ནི་དབང་དུ་བྱེད་དོ། །དུ་བས་ནི་རྐང་མགྱོགས་སོ། །རྡུལ་བས་ནི་མི་སྣང་བའོ། །འབར་བས་ནི་ནམ་མཁའ་ལ་འགྲོ་བའོ། །མིག་སྨན་བྱས་པ་དང་རྐང་པ་ལ་བྱུག་པ་དང་། ཡན་ལག་ལ་བྱུག་པ་དང་། དཔྲལ་བར་ཐིག་ལེ་བྱས་པས་འགྲུབ་པར་འགྱུར་རོ། །གོ་རོ་ཙ་ན་བུ་གར་བཅུག །ཅེས་བྱ་བ་ནི་

སྔ་མ་བཞིན་ནོ། །གསང་བའི་ཁུ་ཚུར་གྱིས་བཙིར་ན། །ཞེས་བྱ་བ་ནི་འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ལས་གསུངས་པའི་ཁྲོ་བོ་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱའི་གསང་བའི་ཁུ་ཚུར་དེས་གོ་རོ་ཙ་ན་པདྨའི་སྟེང་དུ་བཞག་ནས། མཚན་ཐོག་ཐག་

བཟླས་ནས་སྔར་བསྟན་པའི་ཚུལ་གྱིས་དངོས་གྲུབ་ཏུ་གྱུར་ཏེ། དཔྲལ་བར་ཐིག་ལེ་བྱས་ནས་ནམ་མཁའ་ལ་འགྲོ་བར་འགྱུར་བ་དང་། རྡོ་རྗེ་ཧཱུཾ་མཛད་དང་འདྲ་བར་འགྱུར་རོ། །གུར་གུམ་བུ་གར་བཅུག་ནས་ནི། །ཞེས་བྱ་བ་སྔ་མ་བཞིན་ནོ། །བུ་གར་སེམས་དཔའི་རྡོ་རྗེ་ཞེས་བྱ་བ་ནི། པདྨའི་

སྟེང་དུ་གུར་གུམ་སྔ་མ་བཞིན་དུ་བཞག་ལ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་རྡོ་རྗེ་སེམས་མའི་ཕྱག་རྒྱ་པདྨ་ལ་བཞག་སྟེ། མཚན་ཐོག་ཐག་བཟླས་ན་དེས་འགྲུབ་པར་འགྱུར་རོ། །དེས་ཐིག་ལེ་བྱས་ན་རྡོ་རྗེ་འཛིན་པ་དང་འདྲ་བར་འགྱུར་རོ། །དེ་ལྟར་དངོས་གྲུབ་ཀྱི་ཡེ་

ཤེས་བསྟན་ནས། ད་ནི་ལས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་རྣམས་ནི། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་བཤད་པའི་ལྷའི་རྣལ་འབྱོར་བྱས་ལ། ཕྱིས་ལས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་བཅིངས་ཏེ། ལས་ཀྱི་དཀྱིལ་

འཁོར་བྲིས་པ་དང་། བརྐོས་པ་ལ་སོགས་པའི་ལྷ་རྣམས་བསྒྲུབས་ལ་རང་གི་ཕྱག་རྒྱ་བཞིས་རྒྱས་བཏབ་ན་དངོས་གྲུབ་ཏུ་འགྱུར་བའི་ཕྱིར་རོ། །རྒྱས་བཏབ་ནས་ཇི་ལྟ་བ་བཞིན་དུ་བསྒྲུབ་པར་བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་གསུངས་ཏེ། དེ་ནས་ཞེས་བྱ་བ་ནི་དངོས་གྲུབ་ཀྱི་ཡེ་

ཤེས་བསླབ་པའི་རྗེས་ཐོགས་སུའོ། །རྡོ་རྗེ་རིགས་ཀྱི་ལས་ཀྱི་དཀྱིལ་འཁོར་གྱི་ཕྱག་རྒྱ་ཆེན་པོ་དེའི་ཡེ་ཤེས་བསླབ་པོ། །རྡོ་རྗེ་དགོས་པའི་ཚུལ་གྱིས་ནི། །ཞེས་བྱ་བ་ནི་རྡོ་རྗེ་དབྱིངས་ཀྱི་ལས་ཀྱི་དཀྱིལ་འཁོར་གྱི་ནི་རྡོ་རྗེ་དགོས་པ་སྟེ། དེའི་ཚུལ་གྱིས་ནི་རྡོ་རྗེའི་ཚུལ་གྱིས་ཏེ། དེའི་ཕྱག་རྒྱ་ཆེན་པོའོ། །

เล่ม ๕๗ · หน้า 312a

རྡོ་རྗེ་ཁུ་ཚུར་ཚུལ་གྱིས་ནི། །རྡོ་རྗེ་ཁྲོ་བོ་མཉམ་པར་གཞག །ཅེས་བྱ་བ་ནི་རིམ་གྱིས་བཅིང་བའོ། །འདི་སྐད་སྟོན་པ་ཡིན་ཏེ། རྡོ་རྗེ་ཁུ་ཚུར་གཉིས་མཚན་མ་དང་བཅས་པ་བཅིངས་ལ། སྙིང་ག་རྩིབ་ལོགས་རྒྱབ་སྦྱར་བ། །དཔྲལ་བ་ལ་སོགས་དེ་བཞིན་དུ། །ཁ་དང་རྣ་

བ་མགོ་ལྟག་པ། །སྤྱི་བོ་ཕྲག་པ་ཁ་རྐེད་གཞག །ཅེས་བྱ་བའི་རིམ་པ་འདིས། ཁྲོ་བོ་རྡོ་རྗེ་སེམས་དཔའི་གནས་ནས་བརྩམས་ནས། ཁྲོ་བོ་རྡོ་རྗེ་ཁུ་ཚུར་གྱི་གནས་ཀྱི་བར་དུ་བཤད་པའི་ལྷ་མོ་དེ་རྣམས་ཀྱི་ཕྱག་རྒྱ་ཆེན་པོར་འགྱུར་རོ། །ལྷག་མ་ནི་འཇིག་རྟེན་གསུམ་ལས་རྣམ་པར་རྒྱལ་བའི་

གཟུངས་ཀྱི་དཀྱིལ་འཁོར་དུ་བཤད་པ་ཉིད་འདིའི་ཕྱག་རྒྱ་ཆེན་པོ་ཡིན་པར་ཤེས་པར་བྱའོ། །ཧཱུཾ་ཞེས་མཛུབ་མོའི་ཚུལ་གྱིས་ནི། །དམ་ཚིག་མཆོག་ནི་འདིར་དེ་བཞིན། །ཞེས་བྱ་བ་ནི་དེ་ཉིད་ཀྱི་རྡོ་རྗེ་ཁུ་ཚུར་གཉིས་བཅིངས་ནས། མཚན་མ་སྤངས་པའི་སྡིགས་མཛུབ་གཉིས་སོ་སོར་བསྒྲེངས་ཏེ། སྙིང་

ག་རྩིབ་ལོགས་རྒྱབ་སྦྱོར་བ། །དཔྲལ་བ་ལ་སོགས་དེ་བཞིན་དུ། །ཁ་དང་རྣ་བ་མགོ་ལྟག་པ། །སྤྱི་བོ་ཕྲག་པ་ཁ་རྐེད་གཞག །ཅེས་བྱ་བ་འདིས་སྦྱར་བར་བྱའོ། །ལྷག་མ་རྣམས་ནི་འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ལས་གསུངས་པ་ཉིད་འདིའི་དམ་

ཚིག་གི་ཕྱག་རྒྱ་ཡིན་ནོ། །ཆོས་ཀྱི་ཕྱག་རྒྱའང་འདིར་དེ་བཞིན། །ཨོཾ་ཞེས་དང་པོའི་ཡི་གེ་ཨ། །ཞེས་བྱ་བ་ནི་ཡི་གེ་ཨས་ཉེ་བར་མཚོན་པའི་ཡི་གེ་གཞན་མ་རྣམས་ཀྱང་ཡི་གེ་ཨ་ཞེས་བྱའོ། །ཡི་གེ་ཨོཾ་ཞེས་བྱ་བ་དང་པོར་གྱུར་པ་གང་ཡིན་པའི་ཡི་གེ་རྣམས་ནི། ཡི་གེ་ཨ་ལ་སོགས་པ་སྟེ། །

ཨའི་ཡི་གེ་ལྷག་མ་དབྱངས་ཀྱི་ཡི་གེ་བཅུ་དྲུག་ཅེས་བྱ་བའི་དོན་ཏོ། །དབྱངས་ཀྱི་ཡི་གེ་བཅུ་དྲུག་པོ་དེ་དག་གིས་ཡི་གེ་ཨོཾ་དང་བཅས་པ་ནི། ཇི་ལྟར་རྡོ་རྗེ་དབྱིངས་ཀྱི་ལས་ཀྱི་དཀྱིལ་འཁོར་དུ་ཆོས་ཀྱི་ཕྱག་རྒྱར་བསྟན་པ་དེ་བཞིན་དུ་འདིས་ཀྱང་ཤེས་པར་བྱའོ། །དེ་ནི་འདིར་བརྗོད་པར་བྱ་སྟེ། ཨོཾ་ཨོཾ་

ཨོཾ་གྲ་ཨོཾ་ཨ་ཡི་ཨོཾ་ཨཱི། ས་ཨོཾ་ཨི་ཧྲིཿཨོཾ་ཨི་རཾ། ཨོཾ་ཨུ་ཀཾ་ཨོཾ། །རི་ན་ཨོཾ་རི། ཁཾ་ཨོཾ་ལེ་ཤཾ་ཨོཾ་ལཻ་ཧཱུཾ། ཨོཾ་ཨེ་ཧྲི་ཨོཾ་ཨེ། ཤ་ཨོཾ་ཨོཾ། །ནོ་ཨོཾ་ཨོ། །ཤོ་ཨོཾ་ཨཾ། སཾ་ཨོཾ་ཨཿཞེས་བྱ་བ་དང་ལྷག་མ་རྣམས་ནི། འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ལས་

เล่ม ๕๗ · หน้า 312b

གསུངས་པ་ཉིད་གཟུང་བར་བྱའོ། །ལས་ཀྱི་ཕྱག་རྒྱ་མདོར་བསྡུས་ན། །ལས་ཀྱི་ཕྱག་རྒྱ་གཉིས་སུ་བྱས། །ཞེས་བྱ་བ་ནི་ཁྲོ་བོའི་རྡོ་རྗེ་ཁུ་ཚུར་གྱི་གནས་སུ་བཤད་པའི་རྐེད་པར་གཞག་པ་ནི། རྡོ་རྗེ་ཁུ་ཚུར་གཉིས་སུ་བྱས་ལ་ལས་ཀྱི་ཕྱག་རྒྱ་ཐམས་ཅད་བཅིང་བར་བྱའོ། །རིམ་པ་ནི་འདི་ཡིན་ཏེ།

གཡོན་པ་རྡོ་རྗེ་མཛུབ་མོ་ནི། །གཡས་པའི་ནང་དུ་བསྒྲེང་བར་བྱ། །བྱང་ཆུབ་མཆོག་གི་ཕྱག་རྒྱ་སྟེ། །སངས་རྒྱས་བྱང་ཆུབ་སྦྱིན་བྱེད་པའོ། །བསྒྱིངས་བཅས་གསོར་བ་གཉི་གས་ནི་རྡོ་རྗེ་ཧཱུཾ་མཛད་དང་། ཁྲོ་བོ་རྡོ་རྗེ་སེམས་དཔའ་དང་། སེམས་མ་རྡོ་རྗེ་མའི་གནས་ཀྱིའོ། །ལྕགས་ཀྱུ་འཛིན་

ལྟར་གནས་པ་ཡི། །རྡོ་རྗེ་རྒྱལ་པོའི་གནས་ཀྱིའོ། །མདའ་འཕངས་པ་ཡི་ཚུལ་དང་ནི། །རྡོ་རྗེ་ཆགས་པའི་གནས་ཀྱིའོ། །ལེགས་སོ་ཞེས་པ་སྙིང་གར་གཞག་པ་ནི། རྡོ་རྗེ་ལེགས་པའི་གནས་ཀྱིའོ། །དབང་བསྐུར་བ་ནི་རྡོ་རྗེ་གཉིས་ནི་རིན་ཆེན་ཧཱུཾ་མཛད་དང་། ཁྲོ་བོ་ཁྲོ་གཉེར་དང་། རྡོ་རྗེ་རིན་ཆེན་

མའི་གནས་རྣམས་ཀྱིའོ། །སྙིང་གར་ཉི་མ་བརྟན་པར་བྱ་བ་ནི། རྡོ་རྗེ་ཉི་མའི་གནས་ཀྱིའོ། །གཡོན་པ་ལ་ནི་གྲུ་མོ་གཟུགས་ནི་དཔལ་གྱི་གནས་ཀྱིའོ། །དེ་བཞིན་དུ། ཁ་ཕྱོགས་བསྐོར་བར་བྱ་བ་ནི། བཞད་པའི་གནས་ཀྱིའོ། །གཡས་པ་ཡིས་ནི་གཡོན་པ་དབྱེ་བ་ནི། ཆོས་ཀྱི་ཧཱུཾ་མཛད་དང་། ཁྲོ་བོ་

རྡོ་རྗེ་ཆོས་དང་། རྡོ་རྗེ་ཆོས་མའི་གནས་ཀྱེའོ། །སྙིང་གར་གཡོན་པ་རལ་གྲི་མདུད་པ་ནི། རྡོ་རྗེ་རྣོན་པོའི་ལས་ཀྱིའོ། །མགལ་མེའི་འཁོར་ལོ་བསྐོར་བ་དང་། །ཞེས་བྱ་བ་ནི་རྡོ་རྗེ་རྒྱུའི་གནས་ཀྱིའོ། །རྡོ་རྗེ་གཉི་ག་ཁ་ནས་དབྱུང་བ་ནི། །གསུངས་པའི་གནས་ཀྱིའོ། །རྡོ་རྗེ་གར་བསྐོར་བཀྲོལ་བ་ཡིས། །

ཐལ་མོ་འགྲམ་པ་སྤྱི་བོར་གཞག །ལས་ཀྱི་ཧཱུཾ་མཛད་དང་། ཁྲོ་བོ་རྡོ་རྗེ་ལས་དང་། ལས་ཀྱི་རྡོ་རྗེ་མའི་གནས་ཀྱིའོ། །གོ་ཆ་ནི་རྡོ་རྗེ་སྲུང་བའི་གནས་ཀྱིའོ། །མཐེ་ཆུང་མཆེ་བ་དང་ནི་རྡོ་རྗེ་གནོད་སྦྱིན་གྱི་གནས་ཀྱིའོ། །ཁུ་ཚུར་གཉིས་ནི་མནན་པའོ། །ཁྲོ་བོ་རྡོ་རྗེ་ཁུ་ཚུར་གྱི་གནས་ཀྱིའོ། །རྡོ་རྗེ་བསྒྱིངས་པའི་

ཚུལ་གྱིས་ནི། །བསམ་པ་གཡོས་པར་འདུད་པར་བྱ། །ཕྲེང་བ་བཅིངས་དང་ཁ་ནས་དབྱུང་། །རྡོ་རྗེ་གར་ནི་བསྐོར་བ་ཡིན། །རྡོ་རྗེ་ཁུ་ཚུར་ཚུལ་གྱིས་ནི། །རྡོ་རྗེ་གཉི་ག་ཐུར་དུ་བླུགས། །གྱེན་འཐོར་མཐེ་བོ་བསྙམས་ཏེ་བསྡམས། །རབ་ཏུ་བརྐྱང་ནས་བྱུགས་པ་ཡིས། །མངོན་པར་འདོད་པ་

เล่ม ๕๗ · หน้า 313a

སྦྱར་བར་བྱ། །མཛུབ་མོ་ལྕགས་ཀྱུ་བཅིང་བ་ནི། །མཐེའུ་ཆུང་ལས་ཏེ་ལྕགས་ཀྱུ་ཆེ། །མཁྲིག་མ་མདུད་པ་མཛུབ་གཉིས་མདུད། །རྒྱབ་གཉིས་ཀྱང་ནི་བསྙམས་ཏེ་མནན། །ཞེས་བྱ་བ་ནི། རྡོ་རྗེ་སྒེག་མོའི་གནས་ནས་བརྩམས་ནས། ཁྲོ་བོ་རྡོ་རྗེ་འབེབས་པའི་མཐར་ཐུག་པ་དེ་དག་གི་

ལས་ཀྱི་ཕྱག་རྒྱའོ། །ཐམས་ཅད་འགྲུབ་བྱེད་དག་པ་སྟེ། །རྡོ་རྗེ་ལས་ཀྱི་ཚུལ་གྱིས་སོ། །ཞེས་བྱ་བ་ནི། རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པ་ཇི་སྐད་བཤད་པའི་དངོས་གྲུབ་འདོད་པ་དེས་ལས་ཀྱི་ཕྱག་རྒྱ་འདི་དག་ཐམས་ཅད་ཀྱིས་དངོས་གྲུབ་ཐམས་ཅད་བྱེད་དོ། །

དག་པ་ནི་ཀུན་དུ་ལམ་ངན་པ་སྤངས་པའོ། །རྡོ་རྗེ་ལས་ནི་གར་གྱི་སྦྱོར་བ་ལས་བྱུང་བའི་གར་ནི་དེ་དག་གི་ཡིན་ནོ་ཞེས་བྱ་བའི་དོན་ཏོ། །འཇིག་རྟེན་གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་གྱི་འགྲེལ་པ་རྫོགས་སོ།། །།དེ་ལྟར་རྒྱས་པ་ལ་དགའ་བའི་སེམས་ཅན་རྗེས་

སུ་གཟུང་བའི་ཕྱིར། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་དང་། གཟུངས་དང་། ཆོས་དང་ལས་ཀྱི་དཀྱིལ་འཁོར་རྣམས་བསྟན་ནས། ད་ནི་བར་མ་ལ་དགའ་བའི་སེམས་ཅན་རྣམས་རྗེས་སུ་གཟུང་བའི་ཕྱིར། འཇིག་རྟེན་གསུམ་ལས་རྣམ་པར་རྒྱལ་བའི་

དཀྱིལ་འཁོར་འཇིག་རྟེན་གསུམ་ལས་རྣམ་པར་རྒྱལ་བའི་དུམ་བུར་གསུངས་པའི་དངོས་གྲུབ་ཐམས་ཅད་བསྡུས་པར་གྱུར་པ། ཕྱག་རྒྱ་བཞི་པའི་དཀྱིལ་འཁོར་ནི། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་སོ། །དེ་ནས་ཞེས་བྱ་བ་ནི་དེ་མ་ཐག་པ་སྟེ། དང་པོར་སྦྱོར་བའི་

ཏིང་ངེ་འཛིན་གྱི་རྗེས་ཐོགས་ཉིད་ལའོ། །དེ་ལ་དང་པོ་སྦྱོར་བའི་ཏིང་ངེ་འཛིན་ཉིད་ནི་འཇིག་རྟེན་གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་ཉིད་དུ་གསུངས་པ་ཉིད་གཟུང་བར་བྱའོ། །བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །ཡང་ཞེས་བྱ་བ་ནི་འཇིག་རྟེན་གསུམ་ལས་

རྣམ་པར་རྒྱལ་བའི་ལས་ཀྱི་དཀྱིལ་འཁོར་ལ་ལྟོས་པས་ན། ཡང་ཞེས་བྱ་བ་སྨོས་ཏེ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་དམ་ཚིག་གི་ཕྱག་རྒྱ་བཅོམ་ལྡན་འདས་རྣམ་པར་སྣང་མཛད་དང་། འཇིག་རྟེན་གསུམ་ལས་རྣམ་པར་རྒྱལ་བ་ལ་ལྟོས་པའི་ཕྱག་རྒྱ་བཞིའི་དཀྱིལ་འཁོར་དེ་ཉིད་ཀྱིས།

เล่ม ๕๗ · หน้า 313b

སེམས་ཅན་གྱི་ཁམས་ལ་རྒྱས་འདེབས་པས་ན་ཕྱག་རྒྱའོ། །དེའི་བྱིན་གྱིས་བརླབས་པའི་བརྟན་པར་གྱུར་པའི་ཏིང་ངེ་འཛིན་གང་ཡིན་པ་མིང་དེ་སྐད་ཅེས་བྱ་བ་དེ་ལ་སྙོམས་པར་ཞུགས་ཤིང་མངོན་སུམ་དུ་མཛད་པའོ། །འདི་ཞེས་བྱ་བ་ནི་འཆད་པར་འགྱུར་བ་བློ་ལ་གནས་པའི་རང་གི་རིག་པ་དམ་པ་

གསུངས་པ་དེ་འཆད་པའོ། །འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་བཞི་པའི་དཀྱིལ་འཁོར་སྤྲུལ་པ་ལ་བརྟན་པར་བྱེད་པའི་རྣམ་པར་ཐུགས་རྩེ་གཅིག་ཏུ་མཛད་ནས། རིག་པ་དམ་པ་འདི་གསུངས་སོ། །དེས་དཀྱིལ་འཁོར་བསྐྱེད་པ་བརྟན་པའི་རྒྱུར་གྱུར་ཏོ་ཞེས་བྱ་བའི་དོན་ཏོ། །

དེ་ལྟར་རྡོ་རྗེ་ཧཱུཾ་མཛད་དང་། རིན་ཆེན་ཧཱུཾ་མཛད་དང་། ཆོས་ཀྱི་ཧཱུཾ་མཛད་དང་། ལས་ཀྱི་ཧཱུཾ་མཛད་རྣམས་ཀྱི་རང་གི་ཕྱག་རྒྱ་བཞི་པའི་དཀྱིལ་འཁོར་སྔ་མ་བཞིན་དུ་སྤྲུལ་པས་བརྟན་པར་བྱས་པ་ལ་ཡང་ཤེས་པར་བྱའོ། །འདི་སྐད་སྟོན་པ་ཡིན་ཏེ། དཀྱིལ་འཁོར་གྱི་བདག་པོ་ལྔས་སོ་སོར་རིག་

པ་གསུངས་ནས་གཅིག་ཏུ་གྱུར་ནས་བསྐྱེད་པ་ཡིན་ནོ། །ཇི་ལྟར་དེ་བཞིན་གཤེགས་པའི་ཕྱག་རྒྱ་བཞི་པའི་དཀྱིལ་འཁོར་སྤྲུལ་པའི་ཕྱིར། དང་པོར་སྦྱོར་བའི་ཏིང་ངེ་འཛིན་བསྐྱེད་པར་འདོད་པས་ཀྱང་འོག་མིན་དུ་མངོན་པར་བྱང་ཆུབ་ནས་དེ་བཞིན་གཤེགས་པ་རྣམ་པ་ལྔ་དང་བཅས་པ་

སྟེ། ཇི་སྐད་བཤད་པའི་རྩེ་མོ་རྡོ་རྗེ་དང་ནོར་བུ་རིན་པོ་ཆེ་ལས་བྱས་པའི་ཁང་པ་བརྩེགས་མར་བྱོན་པ་ཡིན་གྱི་གཅིག་པུ་བྱོན་པ་མེད་པའི་ཕྱིར་རོ། །རྡོ་རྗེ་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་འདིར་ཡང་བསྐྱེད་པའི་རྒྱུར་གྱུར་པའི་རྡོ་རྗེ་ཧཱུཾ་མཛད་ལ་སོགས་པ་བསྒོམ་པར་བྱའོ། །དེ་བས་ན་

དེ་བཞིན་གཤེགས་པའི་ཕྱག་རྒྱ་བཞི་པ་སྤྲུལ་ཅིང་བསྐྱེད་པའི་ཕྱིར་ཡེ་ཤེས་བཞིའི་བདག་ཉིད་རྡོ་རྗེ་ཧཱུཾ་མཛད་དང་། རིན་ཆེན་དང་། ཆོས་དང་། ལས་ཀྱི་ཧཱུཾ་མཛད་རྣམས་དགོད་པར་བྱའོ། །ཕྱག་རྒྱ་བཞི་པའི་དཀྱིལ་འཁོར་རྣམ་པ་ལྔ་པ་ཐམས་ཅད་སྤྲུལ་པར་བཤད་པས། རྡོ་རྗེ་ཧཱུཾ་མཛད་ལ་

སོགས་པའི་ཕྱག་རྒྱ་བཞི་པའི་དཀྱིལ་འཁོར་སྤྲུལ་པ་ཐམས་ཅད་དུ་ཡང་བལྟ་བར་བྱའོ། །དཔེར་ན་རྣམ་པར་སྣང་མཛད་ཀྱི་རིག་པ་གསུངས་ནས་ཐམས་ཅད་གཅིག་ཏུ་གྱུར་ཏེ། རྣམ་པར་སྣང་མཛད་ཀྱི་དཀྱིལ་འཁོར་བསྐྱེད་པ་དེ་བཞིན་དུ་ལས་ཀྱི་ཧཱུཾ་མཛད་ཀྱི་རིག་པ་གསུངས་ནས།

เล่ม ๕๗ · หน้า 314a

ཐམས་ཅད་གཅིག་ཏུ་གྱུར་ཏེ། ཕྱག་རྒྱ་བཞིའི་དཀྱིལ་འཁོར་བསྐྱེད་པ་ཡིན་ནོ་ཞེས་བྱ་བའི་བར་དུ་འགྱུར་རོ། །གཞུང་འདི་ཙམ་གྱིས་ནི། ཕྱག་རྒྱ་བཞི་པའི་དཀྱིལ་འཁོར་གྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ལྔ་པོ་གསུངས་པ་ཡིན་ནོ། །དེ་ནས་བསྡུ་བ་བྱ་བ་

ནས་བརྩམས་པ་ནི། ཕྱག་རྒྱ་བཞི་པའི་དཀྱིལ་འཁོར་གྱི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ལྔ་པོ་ཤེས་པར་བྱའོ། །འཇིག་རྟེན་གསུམ་ལས་རྣམ་པར་རྒྱལ་བའི་དུམ་བུ་ལས་གསུངས་པའི་དངོས་གྲུབ་ནི་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་བཞི་པའི་

དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པར་བསྒྲུབ་པར་བྱ་བའི་ཕྱིར། དེ་ནས་ཕྱག་ན་རྡོ་རྗེ་ཞེས་བྱ་བ་ལ་སོགས་པ་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པའི་ཆོ་ག་རྒྱས་པ་གསུངས་སོ། །དེ་ནས་ཞེས་བྱ་བ་ནི་གནས་སྐབས་ཏེ། ཕྱག་རྒྱ་བཞི་པའི་དཀྱིལ་འཁོར་སྟོན་

པ་ཞེས་བྱ་བའི་དོན་ཏོ། །ཡང་ཞེས་བྱ་བ་ནི་ལས་ཀྱི་དཀྱིལ་འཁོར་ལ་ལྟོས་པའོ། །དེ་ནས་ཞེས་བྱ་བ་ནི་དེ་མ་ཐག་པ་སྟེ། ཕྱག་རྒྱ་བཞི་བསྒོམ་པའི་བརྟུལ་ཞུགས་སྤྱད་པ་དེའི་རྗེས་ཐོགས་ལ་ཕྱག་རྒྱ་བཞི་པའི་དཀྱིལ་འཁོར་བྲི་བར་བྱའོ། །དེ་ནས་ཞེས་བྱ་བ་ནི་དེའི་རྒྱུ་དེའི་ཕྱིར་རོ་ཞེས་བྱ་

བའི་དོན་སྟོན་ཏོ། །གང་གི་ཕྱིར་ཕྱག་རྒྱ་བཞི་པའི་དཀྱིལ་འཁོར་དུ་འདུན་པ་མེད་ན་བར་མ་ལ་དགའ་བའི་སེམས་ཅན་རྣམས་རྗེས་སུ་གཟུང་བ་མེད་པ་དེའི་ཕྱིར་ཕྱག་རྒྱ་བཞི་པའི་དཀྱིལ་འཁོར་རབ་ཏུ་བཤད་པར་བྱས་པའོ། །རྡོ་རྗེ་དབྱིངས་དང་འདྲ་བས་ན། །ཞེས་བྱ་བ་ནི་སྤྲུལ་པའི་ཕྱག་རྒྱ་བཞི་

པའི་དཀྱིལ་འཁོར་དང་འདྲའོ། །རྡོ་རྗེ་ཁྲོ་བོ་ཞེས་སུ་བཤད། །ཅེས་བྱ་བ་ནི་དེ་བཤད་ཟིན་ཏོ། །དཀྱིལ་འཁོར་ཆེན་པོའི་ཚུལ་དུ་ནི། །དཀྱིལ་འཁོར་ཐམས་ཅད་སྲད་བུ་བྲེ། །ཞེས་བྱ་བ་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་བཞིན་དུ། དཀྱིལ་འཁོར་

འདི་ཐམས་ཅད་ཀྱི་ཐིག་ཀྱང་བཏབ་ལ། ཉེ་བའི་ཁྱམས་སྤངས་པའི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་བཞིན་དུ་བྲི་བར་བྱའོ། །སངས་རྒྱས་ཀྱི་ནི་ཕྱོགས་ཀུན་དུ། །ཞེས་བྱ་བ་ནི་འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་

เล่ม ๕๗ · หน้า 314b

དུ་མདུང་རྩེ་གསུམ་པའི་སྟེང་དུ་རྡོ་རྗེ་རྩེ་ལྔ་པ་འབར་བ་ལ་སོགས་པ་གང་ལ་ཡོད་པ་དེ་ནི་འཇིག་རྟེན་གསུམ་ལས་རྣམ་པར་རྒྱལ་བའི་རིན་པོ་ཆེ་དང་། ཆོས་དང་ལས་ཀྱི་ཧཱུཾ་མཛད་ལ་སོགས་པའི་ཕྱག་རྒྱ་ནི་འཇིག་རྟེན་གསུམ་ལས་རྒྱལ་བ་ལ་སོགས་པའོ། །འདི་སྐད་སྟོན་པ་ཡིན་ཏེ། འཇིག་རྟེན་གསུམ་

ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་གསུངས་པའི་ཚུལ་གྱིས་དཀྱིལ་འཁོར་གྱི་དབུས་སུ་རྣམ་པར་སྣང་མཛད། ཨོཾ་སརྦྦ་ཏ་ཐཱ་ག་ཏ་བཛྲ་ས་མ་ཡ་ཧཱུཾ་ཞེས་བརྗོད་ནས་གཞག་པར་བྱའོ། །རྡོ་རྗེ་ཧཱུཾ་མཛད་ཀྱི་གནས་སུ་གླང་པོ་ཆེའི་གདན་ལ་ཟླ་བའི་དཀྱིལ་འཁོར་ལ་མདུང་རྩེ་གསུམ་པའི་སྟེང་དུ་ཡི་གེ་

ཛྷི་ལས་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་རྡོ་རྗེ་རྩེ་ལྔ་པ་འབར་བ། རིན་ཆེན་འབྱུང་ལྡན་གྱི་གནས་སུ་རྟའི་གདན་གྱི་སྟེང་དུ་ཟླ་བའི་དཀྱིལ་འཁོར་དེའི་སྟེང་དུ་འཁོར་ལོ་རྩིབས་བརྒྱད་པའི་སྟེང་དུ་ཡི་གེ་ཛྷི་ལས་ཡིད་བཞིན་གྱི་ནོར་བུ་རིན་པོ་ཆེ་རྩེ་མོ་རྡོ་རྗེ་རྩེ་ལྔ་པས་མཚན་པ། འོད་དཔག་ཏུ་མེད་པའི་གནས་སུ་

རྨ་བྱའི་གདན་གྱི་སྟེང་དུ་ཟླ་བའི་དཀྱིལ་འཁོར་ལ་པདྨ་འདབ་མ་བརྒྱད་པ། དེའི་སྟེང་དུ་ཡི་གེ་དྷི་ལས་པདྨ་འདབ་མ་བཅུ་དྲུག་པ་རྡོ་རྗེས་མཚན་པ། དོན་ཡོད་པར་གྲུབ་པའི་གནས་སུ་མཁའ་ལྡིང་གི་གདན་གྱི་སྟེང་དུ་ཟླ་བའི་དཀྱིལ་འཁོར་ལ་བརྒྱ་བྱིན་གྱི་རྡོ་རྗེ་རྩེ་གསུམ་པ། དེའི་སྟེང་དུ་ཡི་གེ་ཧྲཱིཿལས་སྣ་ཚོགས་

རྡོ་རྗེ་ལ་སྣ་ཚོགས་རྡོ་རྗེ་ཕྲ་མོས་ཡོངས་སུ་བསྐོར་བ་བྲི་བར་བྱའོ། །དེ་ནས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོའི་སྦྱོར་བས་སློབ་དཔོན་གྱི་ལས་ཀྱི་ཆོ་ག་རྗེས་སུ་སྤྱད་ལ་ཇི་ལྟ་བ་བཞིན་བསྡུ་བར་བྱའོ། །དེ་ནས་མཚན་བརྒྱ་རྩ་བརྒྱད་པས་བསྟོད་པ་བྱས་ལ། དེ་ལྟར་དཀྱིལ་

འཁོར་འདིར་ཡང་དཀྱིལ་འཁོར་ཆེན་པོའི་ཚུལ་གྱིས་སྤྱན་དྲངས་པ་ལ་སོགས་པའི་ཆོ་ག་རྒྱས་པར་བྱའོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པའོ། །ཆོ་ག་ཐམས་ཅད་རྗེས་སུ་སྤྱད་ལ་མཚན་བརྒྱ་རྩ་བརྒྱད་པས་བསྟོད་པའི་རྗེས་ཐོགས་ལ་ཞེས་བྱའོ། །ཇི་ལྟར་འཇིག་རྟེན་གསུམ་ལས་རྣམ་པར་

རྒྱལ་བའི་དཀྱིལ་འཁོར་ཆེན་པོ་ལས། ཁྲོ་བོ་རྡོ་རྗེ་ལྕགས་ཀྱུའི་ལས་ཀྱི་ཕྱག་རྒྱས་དགུག་པར་བཤད་པ་དེ་བཞིན་དུ་འདིར་ཡང་དགུག་པ་དང་། ཞགས་པས་གཞུག་པ་དང་། ལྕགས་སྒྲོག་གིས་བཅིང་བ་དང་། ཁྲོ་བོ་རྡོ་རྗེ་འབེབས་པའི་ལས་ཀྱི་ཕྱག་རྒྱས་དབང་དུ་བྱས་ཏེ། རྡོ་རྗེ་གནོད་

เล่ม ๕๗ · หน้า 315a

སྦྱིན་གྱིས་བགེགས་བསྐྲད་ནས་ཕྱོགས་བཅིང་བ་ལ་སོགས་པ་བྱས་ནས། ཁྲོ་བོ་རྡོ་རྗེ་ཁུ་ཚུར་གྱིས་སྒོ་བཅད་ལ་ཁྲོ་བོ་རྡོ་རྗེ་སྲུང་བས་སྲུང་བ་ཐམས་ཅད་ཡང་དག་པར་བསྲུངས་ལ། ཕྱག་རྒྱ་བཞིའི་དཀྱིལ་འཁོར་ལྔ་ལས་བཤད་པའི་རིག་པས་མཆོད་ཡོན་ཕུལ་ལ།

དེ་ནས་བཅོམ་ལྡན་འདས་རྣམ་པར་སྣང་མཛད་དུ་བྱས་ནས། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་བཤད་པའི་ཕྱག་རྒྱ་བཞིས་རྒྱས་བཏབ་ནས། འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་བཞིས་མདུང་

རྩེ་གསུམ་པ་རྡོ་རྗེའི་ཕྱག་རྒྱས་མནན་པ་ལ་སོགས་པ་ཕྱག་རྒྱ་བཞིས་རྒྱས་གདབ་པར་བྱའོ། །བཅོམ་ལྡན་འདས་རྣམ་པར་སྣང་མཛད་ལ་རྡོ་རྗེ་དབྱིངས་སུ་བཤད་པའི་རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་བ་དང་། འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་ཕྱག་རྒྱ་བཞི་

ལ་དེ་བཞིན་གཤེགས་པའི་སྐུ་ལྔ་དང་རྡོ་རྗེ་རིན་པོ་ཆེའི་ཕྲེང་བའི་དབང་བསྐུར་བས་དབང་བསྐུར་ལ། སྔ་མ་བཞིན་མཆོད་པ་ཐམས་ཅད་ཀྱིས་ཡང་དག་པར་མཆོད་ལ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་གཟུངས་ཀྱི་དཀྱིལ་འཁོར་དུ་གསུངས་པའི་ཆོ་གས་སློབ་མ་འཇུག་

པའི་ཆོ་ག་རྒྱས་པར་བྱའོ། །དེ་ལྟར་སློབ་དཔོན་གྱི་ལས་ཀྱི་ཆོ་ག་རྒྱས་པ་དང་། སློབ་མ་འཇུག་པའི་ཆོ་ག་རྒྱས་པར་བཤད་ནས། དམ་ཚིག་དང་དབང་བསྐུར་བ་ཐོབ་པའི་སློབ་དཔོན་གྱིས་འཇིག་རྟེན་གསུམ་ལས་རྣམ་པར་རྒྱལ་བ་ལས་གསུངས་པའི་དངོས་གྲུབ་རྣམས་བསྒྲུབ་པར་བྱའོ་ཞེས་བསྟན་

པའི་ཕྱིར། བཅུག་ནས་ཕྱག་རྒྱ་བཞི་ཡི་དཀྱིལ་འཁོར་གྱི། །ཞེས་བྱ་བ་སྨོས་སོ། །ཕྱག་རྒྱ་བཞིའི་དཀྱིལ་འཁོར་གྱི་གསང་བའི་ཕྱག་རྒྱ་རྣམ་པ་བཞི་བསྒོམས་ནས་བུད་མེད་དང་ལྷན་ཅིག་ཏུ་གནས་པར་བྱའོ་ཞེས་བྱ་བ་དེའི་ངོ་བོའི་ཡེ་ཤེས་བསླབ་པའོ། །རང་གི་ཕྱག་རྒྱ་བཞིའི་དཀྱིལ་འཁོར་བྲིས་ནས་

ཆོས་ཉིད་དག་བརྗོད་ལ་ཞེས་བྱ་བ་ནི། ཨོཾ་སརྦྦ་ཏ་ཐཱ་ག་ཏ་བི་ཤུདྡྷ་དྷརྨྨ་ཏེ་ཧོ་ཞེས་བྱ་བ་དང་། རྡོ་རྗེ་ཧཱུཾ་མཛད་ལ་སོགས་པའི་སྦྱོར་བས་རིག་པ་འདི་བཟླས་ནས། ཇི་སྲིད་དུ་ཕྱག་རྒྱ་བཞི་པའི་དཀྱིལ་འཁོར་ཐུན་བཞིར་སྒོམ་པའི་སྦྱོར་བས་ཟླ་བ་གཅིག་གམ། ཟླ་བ་དྲུག་གམ། ལོ་གཅིག་གི་བར་དུ་དཀྱིལ་

เล่ม ๕๗ · หน้า 315b

འཁོར་དེ་མངོན་སུམ་དུ་མཐོང་བ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་ཟླ་བ་ཉ་བ་ལ་ཕྱག་རྒྱ་བཞི་པའི་དཀྱིལ་འཁོར་རང་ཉིད་ཀྱིས་བྲིས་ཏེ། གཞན་གྱིས་བྲི་བར་མི་བྱའོ། །དེ་ལྟར་བདག་ཉིད་ཀྱིས་རྣམ་པར་སྣང་མཛད་ལ་སོགས་པའི་ཕྱག་རྒྱ་བཞི་པའི་དཀྱིལ་འཁོར་བྲིའོ། །ཆོས་ཉིད་

དག་པ་བརྗོད་ཅེས་བྱ་བ་ནི། བཤད་མ་ཐག་པའི་རིག་པ་བཟླས་པའོ། །བུད་མེད་ལྷན་ཅིག་གནས་ན་ཡང་། །གྲུབ་པ་ཡང་ནི་ཐོབ་པར་འགྱུར། །ཞེས་བྱ་བ་ནི་རྡོ་རྗེ་ཧཱུཾ་མཛད་ལ་སོགས་པའི་ཕྱག་རྒྱ་ཆེན་པོས། བུད་མེད་དང་ལྷན་ཅིག་ཏུ་གྱུར་པར་ལྷག་པར་མོས་ནས་ལྷན་ཅིག་ཏུ་གནས་པ་

དེས་དངོས་གྲུབ་ཐོབ་པར་འགྱུར་རོ། །རང་ཉིད་ཀྱིས་ཕྱག་རྒྱ་བཞི་པའི་དཀྱིལ་འཁོར་བྲིས་ནས་ཞུགས་ལ་མཚན་ཐོག་ཐག་བསྒོམ་པར་བྱའོ། །དེ་ནས་ཉི་མ་ཤར་བའི་དུས་སུ་རྡོ་རྗེ་ཧཱུཾ་མཛད་དང་འདྲ་བར་འགྱུར་རོ། །རང་གི་ཕྱག་རྒྱ་བཞི་པའི་དཀྱིལ་འཁོར་བྲིས་པ་ཞེས་བྱ་བ་ནི་སྔ་མ་བཞིན་ནོ། །

ཆོས་ཉིད་དག་པ་བརྗོད་ལ་ཞེས་བྱ་བ་ནི། ཨོཾ་བཛྲ་བི་ཤུདྡྷ་དྲྀཥྚ་ཛཿཞེས་བརྗོད་ཅིང་། ཆགས་པས་བུད་མེད་བལྟས་ནས་ནི། །གྲུབ་པ་ཡང་ནི་ཐོབ་པར་འགྱུར། །ཞེས་བྱ་བ་ལ་ཤིན་ཏུ་བུད་མེད་ལ་ཆགས་པ་ནི་དེས་རང་གི་ཕྱག་རྒྱ་ཆེན་པོ་ལ་བལྟས་ལ་བསྒོམས་ཏེ། སྔར་བཤད་པའི་ཚུལ་གྱིས་

བསྒྲུབས་ན་དངོས་གྲུབ་ཐོབ་པར་འགྱུར་རོ། །གང་གི་ཕྱག་རྒྱ་བཞི་པའི་དཀྱིལ་འཁོར་བྲིས་ནས་ཞེས་བྱ་བ་ནི་སྔ་མ་བཞིན་ནོ། །ཆོས་ཉིད་དག་པ་བརྗོད་ལ་ཞེས་བྱ་བ་ནི། ཨོཾ་སྭ་བྷཱ་བ་བི་ཤུདྡྷ་མུ་ཁཱི་ཧཱུཾ་ཞེས་བརྗོད་དོ། །བུད་མེད་མཛེས་ལ་འཕྲད་པས་འགྲུབ། །ཅེས་བྱ་བ་ནི་འཇིག་རྟེན་གསུམ་

གྱི་དབང་ཕྱུག་གི་ཕྱག་རྒྱ་ཆེན་པོའི་ཕྱག་རྒྱ་ཆེན་པོ་སྦྱོར་བས་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་དུ་བྱས་ལ། འཇིག་རྟེན་དབང་ཕྱུག་གི་ཕྱག་རྒྱ་ཆེན་པོ་མངོན་སུམ་དུ་གྱུར་པ་ནི་དངོས་གྲུབ་ཐོབ་པའོ། །རང་གི་ཕྱག་རྒྱ་བཞི་པའི་དཀྱིལ་འཁོར་བྲིས་ནས་ཞེས་བྱ་བ་ནི་སྔ་མ་བཞིན་ནོ། །ཆོས་ཉིད་དག་པ་

བརྗོད་ལ་ཞེས་བྱ་བ་ནི། ཨོཾ་སྭ་བྷཱ་བ་བི་ཤུདྡྷ་ཀཱ་ཡ་བཱཀ་མ་ན་ཀརྨ་བཛྲི་ཧཾ་ཞེས་བརྗོད་དོ། །བཅོམ་ལྡན་འདས་ལས་ཀྱི་ཧཱུཾ་མཛད་དུ་བྱས་ལ། མདུན་དུ་གནས་པའི་རང་གི་ཕྱག་རྒྱ་ཆེན་པོ་ལ་འཁྱུད་ནས། རང་བཞིན་གྱིས་རྣམ་པར་དག་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་སྦྱོར་བ་བྱའོ། །དེས་

เล่ม ๕๗ · หน้า 316a

ཅིར་འགྱུར་ཞེ་ན། དངོས་གྲུབ་ཐོབ་པར་འགྱུར་ཏེ། ལས་ཀྱི་ཧཱུཾ་མཛད་དུ་འགྱུར་ཞེས་བྱ་བའི་ཐ་ཚིག་གོ། །དེ་ནས་ཞེས་བྱ་བ་ནི། གཞན་ཡང་ཞེས་བྱ་བའི་དོན་ཏོ། །ཕྱག་རྒྱ་བཞིའི་དཀྱིལ་འཁོར་གྱི་གསང་བ་སྦས་པའོ། །ཕྱག་རྒྱ་ནི་རིགས་ལྔ་བསྒོམ་པའོ། །རིགས་ལྔ་

བསྒོམས་པ་དེ་བསླབ་པར་བྱའོ། །དཀྱིལ་འཁོར་འདིར་ནི་ཞུགས་ནས་ཀྱང་། །ཞེས་བྱ་བ་ནི། སྔར་བཤད་པའི་བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་བཞི་པའི་དཀྱིལ་འཁོར་དུ་ཞུགས་ནས་ཕྱིས། འདོད་པའི་ཡོན་ཏན་ལྔ་ཡིས་ནི། །ཞེས་བྱ་བ་ནི་སྒྲུབ་པ་པོའི་ཡིད་དུ་འོང་བའི་རྒྱུར་

གྱུར་པའོ། །གཞན་གྱི་བུད་མེད་མཆོག་ཅེས་བྱ་བ་ནི། དེ་ལ་རྡོ་རྗེ་ཧཱུཾ་མཛད་ལ་སོགས་པའི་ཕྱག་རྒྱ་སྟེ། བུད་མེད་མཆོག་མཛེས་པར་གྱུར་པའོ། །ཡིད་དུ་འོང་བ་དེས་ཤིན་ཏུ་གྲུབ་པ་ཐོབ་པར་འགྱུར་ཞེས་བྱ་བའོ། །དེ་ལ་རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་།

སྣང་བ་མཐའ་ཡས་དང་། དོན་ཡོད་གྲུབ་པའི་རིག་པ་རྣམས་ནི་འདོད་པའི་ཡོན་ཏན་ལྔའོ། །འདོད་པར་བྱས་པས་ན་འདོད་པ་སྟེ། མངོན་པར་འདོད་ཅེས་བྱ་བའི་དོན་ཏོ། །དེ་ནི་དགེ་བ་སྟེ། ཡིད་ཀྱིས་འདོད་ཆགས་ལ་སོགས་པའི་ཉོན་མོངས་པ་སྤངས་པའི་ཕྱིར། ཡོན་ཏན་ཞེས་བྱ་བ་ནི། དཔལ་

གྱི་དོན་ཏེ་སྐལ་བ་དང་ལྡན་པར་འགྱུར་ཞེས་བྱ་བའི་དོན་ཏོ། །འདོད་པ་དམ་པར་གྱུར་པའི་དངོས་གྲུབ་ཐོབ། །ཅེས་བྱའོ། །དེ་སྐད་དུ་ཡང་། གསང་བ་སྲ་ཞིང་མཐོ་བ་ལས། །གསང་བ་ལྔ་ཡིས་བསྒྲུབ་པས་ནི། །འདོད་པའི་ཡོན་ཏན་ལྔ་ཞེས་བཤད། །དེ་བཞིན་གཤེགས་པའི་རིགས་

ལ་སོགས། །རོལ་པ་བསྒྲུབ་པ་ཉིད་ཡིན་ནོ། །གཞན་ཡང་མི་བསྐྱོད་ཡེ་ཤེས་རིགས། །རིན་ཆེན་ལ་གནས་དེ་བཞིན་རིགས། །འོད་དཔག་མེད་པའི་རིགས་རྣམས་དང་། །དེ་བཞིན་དོན་ཡོད་གྲུབ་པ་དང་། །འདིར་ནི་འདོད་ཡོན་ཞེས་སུ་བཤད། །སངས་རྒྱས་ཐམས་ཅད་རྫུ་འཕྲུལ་ཆེ། །

སེམས་ཅན་རྣམས་ལ་ཐུགས་བརྩེ་བ། །ཞེས་ཡང་དང་ཡང་དུ་རྒྱས་པར་བཤད་དོ། །ཧོ་བཛྲ་ཀརྨ་ཞེས་ལན་གསུམ་གྱི་བར་དུ་བརྗོད་ནས་འདོད་པའི་ཡོན་ཏན་རྣམ་པ་ལྔ་ལ་བསྒོམ་པར་བྱའོ། །འདི་སྐད་སྟོན་པ་ཡིན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་

เล่ม ๕๗ · หน้า 316b

གསུངས་པའི་ཚུལ་གྱིས། རྡོ་རྗེ་ཧཱུཾ་མཛད་ལ་སོགས་པའི་སྦྱོར་བས་ཇི་སྐད་གསུངས་པའི་རྣལ་འབྱོར་ཆེན་པོ་བྱས་ལ། རང་གི་སྙིང་གར་སྟོང་གསུམ་པའི་སངས་རྒྱས་ཀྱི་ཞིང་གི་ཚད་དང་མཉམ་པའི་ཟླ་བའི་དཀྱིལ་འཁོར་ལ། ནམ་མཁའ་དང་མཉམ་པའི་སྦྱོར་བས་ཞུགས་ཏེ། ཡིད་ཀྱིས་རྡོ་རྗེ་

ཧཱུཾ་མཛད་དུ་བསྐྱེད་ལ། ཧཱུཾ་ཞེས་བྱ་བས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་སྤྲུལ་ཏེ། ཨོཾ་སརྦྦ་ཏ་ཐཱ་ག་ཏ་ས་མ་ཡེ་ཧཱུཾ་ཞེས་བྱ་བས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ལ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་སྤྲུལ་ལ། བདག་

ཉིད་རྣམ་པར་སྣང་མཛད་དུ་གྱུར་པར་བྱའོ། །ཧཱུཾ་བཛྲ་མ་ཊ་ཅེས་བྱ་བས། རྡོ་རྗེ་ཧཱུཾ་མཛད་ཀྱི་ཕྱག་རྒྱ་ཆེན་པོ་བཅིང་བར་བྱའོ། །ཨོཾ་བྷྲྀ་ཀུ་ཊི་བཛྲ་རཏྣ་ཞེས་བྱ་བས་རིན་ཆེན་ཧཱུཾ་མཛད་ཀྱི་ཕྱག་རྒྱ་ཆེན་པོ་བཅིང་བར་བྱའོ། །ཧཱུཾ་པདྨ་བཛྲི་དྷྲྀཀ་ཅེས་བྱ་བས་ཆོས་ཀྱི་ཧཱུཾ་མཛད་ཀྱི་ཕྱག་རྒྱ་ཆེན་པོ་བཅིང་ངོ་། །ཧཱུཾ་བཛྲ་

ཀརྨྨ་ཨ་ཀྲྀད་ཅེས་བྱ་བས། ལས་ཀྱི་ཧཱུཾ་མཛད་ཀྱི་ཕྱག་རྒྱ་ཆེན་པོ་བཅིངས་ལ། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་བདག་ཉིད་ཀྱིས་སྤྲུལ་པར་བྱའོ། །ཨོཾ་བཛྲ་ཛྭ་ལ་ཨགྣ་པྲ་དཱི་པྟ་ཨཱ་ཀཪྵ་ཡ་སརྦྦ་ཏ་ཐཱ་ག་ཏཾ་མ་ཧཱ་ས་མ་ཡ་ཧཱུཾ་ཛཿཞེས་བྱ་བ་ནས། ཨོཾ་བཛྲ་ཨ་བྷི་ཤ་མ་ཧཱ་ཀྲོ་

དྷ་སརྦྦ་ས་མ་ཡ་ཧཱུཾ་ཨཿཞེས་བྱ་བའི་བར་དུ་ཚིག་ཙམ་གྱིས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོའི་ལྷ་ཐམས་ཅད་སྙིང་པོས་བཞུགས་སུ་གསོལ་ལ། ཨོཾ་བཛྲ་ཨཱཏྨ་ཀོ྅ཧཾ་ཞེས་བརྗོད་པས་ལྷ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེའི་བདག་ཉིད་དུ་བསྒོམ་

པར་བྱའོ། །ཨོཾ་སྭ་བྷཱ་བ་ཤུདྡྷོ྅ཧཾ་ཞེས་རང་བཞིན་གྱིས་རྣམ་པར་དག་པར་བསྒོམས་ལ། བདག་ཉིད་གཟུགས་བརྙན་དང་མཚུངས་པར་བསམ་པར་བྱའོ། །ཨོཾ་སརྦ་ས་མོ྅ཧཾ་ཞེས་བརྗོད་པས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་བདག་མེད་པའི་རང་བཞིན་དུ་བདག་གིས་བསམ་པར་

བྱའོ། །དེ་ནས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོའི་རང་བཞིན་ནི་ང་ཉིད་ཡིན་ནོ་ཞེས་ང་རྒྱལ་བསྐྱེད་ལ་འདི་སྐད་ཅེས་ལན་གསུམ་བརྗོད་དོ། །ཧོ་བཛྲ་ཀརྨྨ་ཞེས་བརྗོད་དོ། །དེ་ནས་རང་འདོད་པའི་ལྷའི་ཁྲོ་བོ་ཧཱུཾ་མཛད་བཞིའི་སྔགས་ཡིད་ཀྱིས་བསམ། རྡོ་རྗེའི་

เล่ม ๕๗ · หน้า 317a

ཚིག་གམ། ཁྲོ་བོའི་བཟླས་བརྗོད་བྱས་ལ། རང་གི་སྙིང་གའི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་བསྒོམས་ཏེ། ཇི་སྲིད་མངོན་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་དཀྱིལ་འཁོར་ཆེན་པོ་བྲིས་ལ་མཚན་ཐོག་ཐག་

བསྒོམས་ནས། འཇིག་རྟེན་གསུམ་ལས་རྣམ་པར་རྒྱལ་བའི་དཔལ་རྡོ་རྗེ་ཧཱུཾ་མཛད་ཉིད་དུ་འགྱུར་རོ། །གལ་ཏེ་འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་བསྒྲུབ་པར་འདོད་ན་རྣམ་པར་སྣང་མཛད་དང་། དེ་བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བ་དང་རིན་ཆེན་ཧཱུཾ་མཛད་

དང་། ལས་ཀྱི་ཧཱུཾ་མཛད་མ་རྣམས་ཀྱི་གཟུངས་ཀྱི་ཕྱག་རྒྱ་ཆེན་པོ་བཅིངས་ཏེ། ཨོཾ་སརྦྦ་ཏ་ཐཱ་ག་ཏ་བཛྲ་ས་མ་ཡེ་ཧཱུཾ་ཞེས་བྱ་བ་ལ་སོགས་པ། ཕྱག་རྒྱ་རྣམ་པ་ལྔས་སྔར་བཤད་པ་བཞིན་དུ་རང་གི་སྙིང་གར་གཟུངས་ཀྱི་དཀྱིལ་འཁོར་སྤྲུལ་ལ། འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་

ཀྱི་དཀྱིལ་འཁོར་ལས་གསུངས་པའི་རིག་པས་རང་གི་གནས་རྣམས་སུ་གཟུངས་ཐམས་ཅད་བཀོད་ནས། སྔར་བཤད་པའི་སྙིང་པོ་བརྗོད་པའི་རིམ་གྱིས་སྒོམ་པ་རྣམ་པ་བཞི་བྱས་ཏེ། རེ་རེ་ཞིང་བཟླས་བརྗོད་ཁྲི་བྱས་ནས་དེས་འགྲུབ་པར་འགྱུར་རོ། །དེ་ནས་གཟུངས་ཀྱི་དཀྱིལ་འཁོར་ཇི་ལྟ་

བ་བཞིན་དུ་བྲིས་ལ། མཚན་ཐོག་ཐག་སྒོམ་པ་བྱས་ན་འགྲུབ་པར་འགྱུར་རོ། །གལ་ཏེ་འཇིག་རྟེན་གསུམ་ལས་རྣམ་པར་རྒྱལ་བའི་ཆོས་ཀྱི་དཀྱིལ་འཁོར་བསྒྲུབ་པར་འདོད་ན་སྔ་མ་བཞིན་ཕྱག་རྒྱ་རྣམ་པ་ལྔས་རང་གི་སྙིང་གར་ཆོས་ཀྱི་དཀྱིལ་འཁོར་སྤྲུལ་ལ། ཆོས་ཀྱི་དཀྱིལ་འཁོར་ལས་

གསུངས་པའི་སྔགས་རྣམས་བརྗོད་པ་ཙམ་གྱིས་རྣམ་པར་སྣང་མཛད་ལ་སོགས་པ་ནས། ཁྲོ་བོ་རྡོ་རྗེ་འབེབས་པའི་མཐར་ཐུག་པ་རང་གི་གནས་སུ་བཀོད་ལ། སྔ་མ་བཞིན་དུ་སྙིང་པོ་བརྗོད་པའི་རིམ་གྱིས་དོན་རྣམ་པ་བཞི་བསྒོམས་ཏེ། དེ་ནས་སྣའི་རྩེ་མོར་སྙིང་ག་ན་གནས་པའི་ཆོས་

ཀྱི་འཁོར་ལོ་བཏེག་སྟེ། སྣའི་རྩེ་མོར་ཆོས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་ཧཱུཾ་མཛད་ཀྱི་སྔགས་ཡིད་ཀྱིས་བརྗོད་ཅིང་ཐམས་ཅད་བདག་ཡིན་ནོ་ཞེས་བསྒོམ་ཞིང་ཇི་སྲིད་མངོན་སུམ་དུ་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྤྲོ་བ་དང་། བསྡུ་བའི་སྦྱོར་བས་ཟླ་བ་གཅིག་བསྒོམས་ལ།

เล่ม ๕๗ · หน้า 317b

དེ་ནས་ཆོས་ཀྱི་དཀྱིལ་འཁོར་བྲིས་ཏེ། མཚན་ཐོག་ཐག་བསྒོམས་ན་ཏིང་ངེ་འཛིན་ཐམས་ཅད་ཐོབ་པར་འགྱུར་རོ། །གལ་ཏེ་འཇིག་རྟེན་གསུམ་ལས་རྣམ་པར་རྒྱལ་བའི་ལས་ཀྱི་དཀྱིལ་འཁོར་འགྲུབ་པར་འདོད་ན། དེ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ཨོཾ་བཛྲ་པཱ་ཎི་བཛྲ་ཀརྨྨ་ཀ་རོདྦྷ་

བ་ཞེས་བྱ་བའི་སྙིང་པོ་འདི་དང་། སྣ་ཚོགས་རྡོ་རྗེ་ཕྱག་རྒྱ་འདིས་གཟུང་ངོ་། །དེ་ལ་ཕྱག་རྒྱ་ནི་འདི་ཡིན་ཏེ། རྡོ་རྗེའི་ཕྱག་རྒྱ་གཉིས་བཅིངས་པས། །དེ་གཉིས་རྡོ་རྗེ་དམ་དུ་གཟུང་། །མཛུབ་མོ་མཐེའུ་ཆུང་བསྣོལ་བ་ནི། །རྡོ་རྗེ་གོས་མཆོག་དཀྱིལ་འཁོར་རོ། །ཞེས་བྱ་བའོ། །དེ་ལྟར་སྣ་

ཚོགས་རྡོ་རྗེ་བླངས་ནས། ཡིད་ཀྱིས་དེ་བཞིན་དུ་སྙིང་གར་ཞུགས་ཏེ། སྔ་མ་བཞིན་དུ་རིག་པ་རྣམ་པ་ལྔས་རང་གི་སྙིང་གར་ལས་ཀྱི་དཀྱིལ་འཁོར་གྱི་ལྷ་རྣམས་སྤྲུལ་ལ། ལས་ཀྱི་དཀྱིལ་འཁོར་ལས་བཤད་པའི་རིག་པ་རྣམས་ཀྱིས་རང་གི་གནས་སུ་བཞག་ལ་སྔར་བཤད་པའི་སྙིང་པོ་

བརྗོད་པའི་རིམ་གྱིས་དོན་རྣམ་པ་བཞི་བསྒོམས་ཏེ། རེ་རེ་ཞིང་བཟླས་པ་ཁྲི་བྱས་པས། དེ་ལྟར་ལས་ཀྱི་དཀྱིལ་འཁོར་འགྲུབ་པར་འགྱུར་རོ། །དེ་ནས་དཀྱིལ་འཁོར་བྲིས་ལ་མཚན་ཐོག་ཐག་བསྒོམས་ན་འགྲུབ་པར་འགྱུར་རོ། །ཉིན་རེ་ཞིང་རྣམ་འབྱོར་ཆེན་པོ་ལན་རེ་བྱས་ལ་ཐུན་བཞི་རུ་

བསྒོམས་ལ་ཇི་སྐད་བཤད་པ་བཞིན་དུ་བྱའོ། །ཇི་ལྟར་རྡོ་རྗེ་རིགས་ཀྱི་སྒྲུབ་པ་བཤད་པ་ཉིད་ཀྱིས་དེ་བཞིན་གཤེགས་པ་ལ་སོགས་པའི་སྒྲུབ་པ་ལ་ཡང་ཤེས་པར་བྱའོ། །དེའི་དོན་ནི་འདི་སྐད་འཆད་པ་ཡིན་ཏེ། འདིར་དབང་བསྐུར་བ་ཐམས་ཅད་ཀྱི་སློབ་དཔོན་དུ་གྱུར་ཏེ། རིགས་ཐམས་

ཅད་ཀྱི་སྒྲུབ་པ་གནང་བའི་ཕྱིར་རོ། །དེ་ལྟར་འདིར། འདོད་པའི་ཡོན་ཏན་ལྔ་ཡིས་ནི། །བུད་མེད་མཆོག་ནི་མགུ་བྱས་ན། །ཤིན་ཏུ་གྲུབ་པ་ཐོབ་པར་འགྱུར། །ཞེས་བྱ་བའི་རིགས་ཐམས་ཅད་སྒྲུབ་པའི་རྗེས་སུ་གནང་བའི་ཕྱིར་རོ། །ཐམས་ཅད་དུ་ཡང་ཧོ་བཛྲ་ཀརྨཱ་ཞེས་ལན་གསུམ་

བརྗོད་ཅིང་བསྒོམ་པ་དང་བཟླས་པ་བྱའོ། །དེ་ནས་ཕྱག་རྒྱ་ཐམས་ཅད་ཀྱི་དམ་ཚིག་སྨྲོས་ཤིག །བདག་ཉིད་ཆེན་པོ་གང་གང་གི །ཕྱག་རྒྱ་གང་དང་གང་བཅིང་བ། །བཟླས་པའི་སྙིང་པོའི་དོན་དུ་ནི། །དེར་ནི་བདག་ཉིད་བསྒོམ་པར་བྱ། །ཡེ་ཤེས་འདི་ཡི་ཚུལ་གྱིས་ནི། །ཕྱག་ན་རྡོ་རྗེས་

เล่ม ๕๗ · หน้า 318a

གསུངས་པ་བཞིན། །བདག་ཉིད་ཆེན་པོའི་ཕྱག་རྒྱ་ཀུན། །དེ་དག་ཀུན་གྱིས་འགྲུབ་པར་འགྱུར། །དེ་ནས་ཕྱག་རྒྱ་ཐམས་ཅད་ཀྱི་གསང་བ་བརྗོད་པར་བྱའོ། །རང་གི་དབང་པོ་བཤིག་ནས་ནི། །རྡོ་རྗེ་བཅིང་བས་གཟུང་བར་བྱ། །དེ་ཡིས་ཕྱག་རྒྱ་གང་རེག་པ། །དེ་མ་ཐག་

ཏུ་དེ་དབང་འགྱུར། །དེ་ནས་ཕྱག་རྒྱ་ཐམས་ཅད་ཀྱི་ཆོས་ཉིད་བརྗོད་པར་བྱའོ། །རྡོ་རྗེ་ཕྲ་མོའི་ཚུལ་སྦྱར་ལ། །ཡེ་ཤེས་ཕྱག་རྒྱ་བཅིང་བར་བྱ། །ཆོ་ག་འདི་ཡི་ཚུལ་གྱིས་ནི། །ཡེ་ཤེས་ཕྱག་རྒྱ་དབང་དུ་འགྱུར། །དེ་ནས་ཕྱག་རྒྱ་ཀུན་གྱི་ལས་བརྗོད་པར་བྱའོ། །གླུ་དང་གར་དང་ཟས་དང་བྲོ། །

སྤྱོད་པ་ལ་སོགས་བདེ་བ་རྣམས། །སངས་རྒྱས་རྣམས་ལ་ཕུལ་བྱས་ན། །ལས་ཀྱི་ཕྱག་རྒྱ་དབང་དུ་འགྱུར། །ཞེས་བྱའོ། །དེ་ལྟར་རིག་པ་ཐམས་ཅད་ཀྱི་དངོས་གྲུབ་ཀྱི་ཡེ་ཤེས་བཤད་ནས། ད་ནི་འཇིག་རྟེན་གསུམ་ལས་རྣམ་པར་རྒྱལ་བའི་དུམ་བུར་གསུངས་པའི་དངོས་གྲུབ་རྣམས་འཇིག་

རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་གསུངས་པའི་རང་གི་ལྷའི་རྣལ་འབྱོར་བྱས་ལ། དེར་བཤད་པའི་རང་གི་ལྷའི་ཕྱག་རྒྱ་བཞིས་རྒྱས་བཏབ་ནས། ཇི་ལྟ་བ་བཞིན་དུ་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་གསུངས་ཏེ།

དེ་ནས་ཞེས་བྱ་བ་ནི། དེ་བས་ན་ཞེས་བྱ་བའི་དོན་ཏོ། །ཇི་ལྟ་བ་བཞིན་དུ་ཞེས་བྱ་བ་ནི། ཇི་ལྟ་བ་བཞིན་དུ་དེ་ལ་འདིར་ཡང་ཞེས་བྱ་བའི་སྒྲའི་དོན་ཏོ། །འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ཧཱུཾ་མཛད་ཀྱི་སྦྱོར་བ་བྱས་ནས། དེ་ལས་བཤད་པའི་

རྣལ་འབྱོར་ཆེན་པོ་བྱས་ལ། དེ་ལ་ཕྱག་རྒྱ་བཞི་པའི་དཀྱིལ་འཁོར་ཇི་ལྟ་བ་བཞིན་དུ་བྲི་བར་བྱའོ། །དེ་ལ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་བཞི་པོ་རྣམས་ཀྱི་ཇི་ལྟ་བ་བཞིན་དུ་བཅོམ་ལྡན་འདས་རྣམ་པར་སྣང་མཛད་ལ། ཕྱག་རྒྱ་

བཞིས་རྒྱས་བཏབ་ནས། དེ་ནས་རྡོ་རྗེ་མནན་པའི་མདུང་རྩེ་གསུམ་པའི་ཕྱག་རྒྱ་བཞི་འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་ལས་བཤད་པའི་རང་གི་དམ་ཚིག་གི་ཕྱག་རྒྱ་བཞི་པོ་རྣམས་ཀྱིས་རྒྱས་གདབ་པར་བྱ་སྟེ། རང་ཇི་ལྟ་བ་བཞིན་དུ་ཞེས་བྱ་བ་སྨོས་པས་དཀྱིལ་

เล่ม ๕๗ · หน้า 318b

འཁོར་གྱི་སློབ་དཔོན་གྱི་དོན་འདི་བྱའོ་ཞེས་གསུངས་པ་ཡིན་ནོ། །ཁ་ཅིག་ན་རེ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་གསུངས་པའི་རང་གི་ཁྲོ་བོའི་ལྷའི་རྣལ་འབྱོར་བྱས་ལ་ཕྱིས་ལྷ་རྣམས་ཀྱི་ཕྱག་རྒྱ་བཅིང་བར་བྱ་བ་འདི་ནི་ཇི་ལྟ་བ་བཞིན་ནོ་ཞེས་བྱ་བའི་སྒྲའི་

དོན་བཤད་པ་དེ་ཡིན་ནོ་ཞེས་ཟེར་རོ། །འདི་ཡང་རྒྱུད་ཕྱི་མ་དང་བཤད་པའི་རྒྱུད་ལས་བཅོམ་ལྡན་འདས་ཀྱིས་གསུངས་པས། དེས་སྒྲུབ་པ་ཉམས་པས་དངོས་གྲུབ་ཐོབ་པར་མི་འགྱུར་རོ་ཞེས་བསམས་ནས། དེ་བས་ན་ཐམས་ཅད་དྲན་པར་བྱའོ་ཞེས་བརྗོད་དོ། །ཇི་སྐད་བཤད་པའི་

རྡོ་རྗེས་མནན་པའི་རྩེ་གསུམ་པ་དེ་ནི། རྡོ་རྗེས་མནན་པའི་རྩེ་གསུམ་པའི་ཕྱག་རྒྱ་སྟེ། དེ་ལ་སོགས་པ་གང་ཡིན་པ་དེ་ནི་རྡོ་རྗེས་མནན་པའི་རྩེ་གསུམ་པའི་ཕྱག་རྒྱ་ཕྱོགས་བཞིར་གནས་པའོ། །དེ་གང་ཡིན་ཞེ་ན། དམ་ཚིག་གི་ཕྱག་རྒྱ་ཞེས་བྱ་བ་སྨོས་ཏེ། འཇིག་རྟེན་གསུམ་ལས་

རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་གྱི་རྡོ་རྗེ་ཧཱུཾ་མཛད་དང་། རིན་ཆེན་དང་། ཆོས་དང་། ལས་ཀྱི་ཧཱུཾ་མཛད་ཀྱི་ཕྱག་རྒྱ་ཞེས་བྱ་བའི་དོན་ཏོ། །ཆོ་ག་རྒྱས་པ་དང་ལྡན་པ་ན་ཉེ་བར་མཚོན་པ་སྟེ། མནའ་བསྒག་པའི་བྱ་བ་སྔོན་དུ་འགྲོ་བའི་གཟུངས་ཀྱི་དཀྱིལ་འཁོར་ལས་བཤད་

པའི་ཆོ་ག་རྒྱས་པ་འདི་ནི་འདིར་ཆོ་ག་རྒྱས་པ་ཞེས་བརྗོད་དོ། །དེ་ལ་འདིའི་མཚན་ཉིད་ནི་འདི་ཡིན་ཏེ། རྡོ་རྗེ་ཁུ་ཚུར་གཉིས་བཅིངས་ནས། །དཔུང་པའི་རྡོ་རྗེ་གཉིས་བསྙམས་ལ། །མཐེའུ་ཆུང་གཉིས་ལྕགས་ཀྱུར་བཅིང་བ་བྱས་ནས། གཡོན་པའི་ཁུ་ཚུར་གྱི་སོར་མོ་གསུམ་མདུང་རྩེ་

གསུམ་པ་ལྟར་བྱས་ལ། མདུང་རྩེ་གསུམ་པའི་རྒྱབ་ཏུ་གཡས་པའི་མཛུབ་མོ་བརྐྱང་ལ་གཞག །འདི་ནི་རྡོ་རྗེས་མནན་པའི་རྩེ་གསུམ་པའི་ཕྱག་རྒྱའོ། །ཕྱག་རྒྱ་ཆེན་པོ་ནི་དམ་ཚིག་གི་ཕྱག་རྒྱ་ལྟར་སྦྱོར་བས་དམ་ཚིག་གི་ཕྱག་རྒྱའོ། །འཇིག་རྟེན་གསུམ་ལས་རྣམ་པར་རྒྱལ་བ་བཅིངས་

ཏེ། གཡོན་པའི་ཁུ་ཚུར་ཐང་གར་གཞག་པ་ནི་གཟུངས་ཀྱི་རིན་ཆེན་ཧཱུཾ་མཛད་ཀྱི་ཕྱག་རྒྱ་ཆེན་པོའོ། །དམ་ཚིག་གི་ཕྱག་རྒྱའི་ཁུ་ཚུར་གྱིས་ནི་དམ་ཚིག་གི་ཕྱག་རྒྱ་ཆེན་པོའོ། །རྡོ་རྗེ་ཁུ་ཚུར་གཉིས་བཅིངས་ལ་ལག་ངར་གཉིས་ཀྱི་རྡོ་རྗེ་བསྙམས་ནས། མཐེའུ་ཆུང་དང་མཐེ་བོ་གཉིས་ལུ་གུ་རྒྱུད་དུ་

เล่ม ๕๗ · หน้า 319a

སྦྲེལ་ལ། ཕྱག་རྒྱ་ཡོངས་སུ་བསྒྱུར་ལ་མཛུབ་མོ་ཁ་གྱེན་དུ་བསྟན་ཏེ། ཕན་ཚུན་བཅིངས་ལ་གུང་མོ་དང་སྲིན་མཛུབ་གཉིས་ཕན་ཚུན་རྒྱབ་སྦྱར་ལ་བཞི་ཀ་བསྒྲེངས་ནས་གཞག་པ་ནི། གཟུངས་ཀྱི་ཆོས་ཀྱི་ཧཱུཾ་མཛད་ཀྱི་ཕྱག་རྒྱ་ཆེན་པོའི་དམ་ཚིག་གི་ཕྱག་རྒྱའི་ཚུལ་གྱིས་ནི་དམ་ཚིག་གི་

ཕྱག་རྒྱའོ། །དེ་བཞིན་དུ་ཁམས་གསུམ་རྣམ་པར་རྒྱལ་བའི་ཕྱག་རྒྱ་བྱས་ལ། ཡོངས་སུ་བསྐོར་བ་དེ་ལས་གཡོན་པའི་མཛུབ་མོ་ཐད་གར་བཞག་ལ། གཡོན་པའི་མཛུབ་མོ་དེའི་སྟེང་དུ་གཡས་པའི་མཛུབ་མོ་གཞག་པ་ནི་གཟུངས་ཀྱི་ལས་ཀྱི་ཕྱག་རྒྱ་ཆེན་པོ་སྟེ། དམ་ཚིག་གིས་ནི་དམ་ཚིག་གི་ཕྱག་

རྒྱའོ། །ཡི་གེ་ཧཱུཾ་ནི་རྡོ་རྗེ་ཧཱུཾ་མཛད་ཀྱི་ཕྱག་རྒྱའོ། །ཡི་གེ་ཏྲཱཾ་ནི་རིན་ཆེན་ཧཱུཾ་མཛད་ཀྱིའོ། །ཡི་གེ་ཧྲཱིཿནི་ཆོས་ཀྱི་ཧཱུཾ་མཛད་ཀྱིའོ། །ཡི་གེ་ཨཿནི་ལས་ཀྱི་ཧཱུཾ་མཛད་ཀྱི་སྟེ། གཟུངས་རྣམས་ཀྱི་ཆོས་ཀྱི་ཕྱག་རྒྱའོ། །རྡོ་རྗེ་བསྡམས་པ་ནང་དུ་བཅིངས་ལ་མདུན་དུ་བཞག་ནས་གཉིས་སུ་བྱས་ནས་རྡོ་རྗེ་ཁུ་ཚུར་

གཉིས་སུ་འགྱུར་རོ། །འདི་བསྙེམས་བཅས་གསོར་བ་འདི་ཡིས་ནི། རྡོ་རྗེ་ཧཱུཾ་མཛད་ཀྱི་ལས་ཀྱི་ཕྱག་རྒྱའོ། །དབང་བསྐུར་བ་ནི་རྡོ་རྗེ་གཉིས། །རིན་ཆེན་ཧཱུཾ་མཛད་ཀྱིའོ། །གཡས་པ་ཡིས་ནི་གཡོན་པ་དབྱེ། །ཆོས་ཀྱི་ཧཱུཾ་མཛད་ཀྱིའོ། །རྡོ་རྗེ་གར་བསྐོར་དགྲོལ་བ་ཡིས། །ཐལ་མོ་འགྲམ་པ་སྤྱི་བོར་

གཞག །ལས་ཀྱི་ཧཱུཾ་མཛད་ཀྱིའོ། །གཟུངས་ཀྱི་ལས་ཀྱི་ཕྱག་རྒྱ་རྣམས་ཡིན་ཏེ། ཐམས་ཅད་ཀྱང་གར་ལས་བྱུང་བས་བྱའོ། །དེ་ལྟར་ཕྱག་རྒྱ་བཞི་པའི་དཀྱིལ་འཁོར་གྱི་དམ་ཚིག་གི་ཕྱག་རྒྱ་བཞི་བསླབ་པའོ། །ཕྱག་རྒྱ་བཞི་པའི་ཚུལ་འདིས་ནི། །འཆད་པར་འགྱུར་བའི་རྡོ་རྗེའི་སིལ་སྙན་དང་། རྔ་

བརྡུང་བ་བརྡབ་ནས་སོ། །འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་དུ་བཤད་པའི་སྒེག་མོ་ལ་སོགས་པ་མཆོད་པ་བརྒྱད་ཀྱི་ལས་ཀྱི་ཕྱག་རྒྱས། ཕྱག་རྒྱ་བཞི་པའི་དཀྱིལ་འཁོར་དུ་མཆོད་པ་བྱས་ཏེ། རྡོ་རྗེ་སེམས་དཔའ་བསྡུས་པས་ནི། །ཞེས་བྱ་བ་ནི། ཨོཾ་རྡོ་རྗེ་

སེམས་དཔའ་བསྡུས་པས་ནི། །རྡོ་རྗེ་རིན་ཆེན་བླ་ན་མེད། །རྡོ་རྗེ་ཆོས་ནི་གླུར་བླངས་པས། །རྡོ་རྗེ་ལས་རྣམས་བྱེད་པར་འགྱུར། །ཞེས་བྱ་བའི་རྡོ་རྗེ་གླུ་འདིས། དྲིལ་བུ་དཀྲོལ་ལ་བསྟོད་པ་ཐམས་ཅད་བྱས་ཏེ། སློབ་དཔོན་གྱི་གཡོན་པའི་ཁྲོ་བོའི་ཁུ་ཚུར་གྱིས་གཡས་པའི་སེམས་མ་རྡོ་རྗེ་མ་དྲལ་ཞིང་

เล่ม ๕๗ · หน้า 319b

སློབ་མ་ཐམས་ཅད་ལ་དབབ་པར་བྱ་སྟེ། བཛྲ་ཨཱ་བེ་ཤ་ཨཿཞེས་བརྗོད་དོ། །དེ་ནས་གཞུག་པའི་ཕྱག་རྒྱ་རྣམས་ཀྱིས་དབབ་པར་བྱའོ། །དེ་ནས་དེ་ལ་ཕྱག་རྒྱ་དང་། ལན་གྱི་ཕྱག་རྒྱ་དང་། ཉེ་བའི་ཕྱག་རྒྱ་དང་། ཡེ་ཤེས་ཀྱི་ཕྱག་རྒྱས་གར་གྱི་མཆོད་པས་མཆོད་པ་གྱིས་ཤིག་ཅེས་བྱའོ། །དེ་

ཐམས་ཅད་ཇི་ལྟར་བྱ་ཞེ་ན། དེ་ལ་གར་གྱི་མཆོད་པ་ཞེས་བྱ་བ་སྨོས་ཏེ། གར་གྱི་མཆོད་པའི་ཕྱག་རྒྱ་གར་ལས་བྱུང་བ་ནི་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་བཅིངས་ཏེ། སིདྡྷ་བཛྲ་ཞེས་བརྗོད་ཅིང་མཆོད་པ་བྱའོ། །ལན་གྱི་ཕྱག་རྒྱའི་མཆོད་པ་ནི། །ཨ་ཧེ་བཛྲ་ཞེས་བྱའོ། །

ཉེ་བའི་ཕྱག་རྒྱའི་མཆོད་པ་ནི། ཀརྨྨ་བཛྲ་ཞེས་བྱའོ། །ཡེ་ཤེས་ཀྱི་ཕྱག་རྒྱའི་མཆོད་པ་ནི། ནྲྀ་ཏྱ་བཛྲ་ཞེས་བརྗོད་ལ་མཆོད་པར་བྱའོ། །དེ་ལ་གར་གྱི་མཆོད་པས་མཆོད་པ་ནི་འདི་ཡིན་ནོ་ཞེས་བྱ་བ་ནི། གར་གྱི་མཆོད་པས་མཆོད་པའི་མཚན་ཉིད་འདི་ཡིན་ནོ་ཞེས་བྱ་བའི་དོན་ཏོ། །རྡོ་རྗེ་གར་གྱི་

སྦྱོར་བ་ཡིས། །ཞེས་བྱ་བ་ལ་སོགས་པ་ལ་ནི། རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་གཉིས་བརྐྱང་ལ། སིདྡྷ་བཛྲི་བཛྲ་ཞེས་བརྗོད་ཅིང་གར་བྱས་པ་ལ། རང་གི་སྙིང་གར་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་ལ། དེ་ནས་གཟུངས་ཀྱི་དཀྱིལ་འཁོར་ལས་གསུངས་པའི་ཆོ་གས་སམ། ཕྱག་རྒྱ་

དགྲོལ་བ་ཇི་ལྟ་བ་བཞིན་དུ་བྱས་ལ། མཉམ་པའི་ཐལ་མོས་མཉེས་པའི་བར་དུའོ། །དེ་བཞིན་ཡང་ཁྲོ་བོའི་ཁུ་ཚུར་གཉིས་བཅིངས་ཏེ། གཉིས་ཀར་བྱས་ནས། གཡས་པའི་ཁྲོ་བོའི་ཁུ་ཚུར་གྱིས་གཡོན་པའི་མཛུབ་མོ་བཟུང་སྟེ་ཡོངས་སུ་བསྒྱུར་ནས་དཔྲལ་བའི་ཕྱོགས་སུ་གཡས་པའི་མཛུབ་

མོའི་རྩེ་མོ་ཨ་ཧེ་བཛྲ་ཞེས་བྱ་བའི་སྙིང་པོ་འདིས་གཞག་པ་འདི་ནི་ལན་གྱི་ཕྱག་རྒྱའོ། །དེ་བཞིན་གར་ཡང་དཀྲོལ་ནས་ནི། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་གར་བྱས་ལ། མཛུབ་མོ་གཉིས་པདྨའི་འདབ་མ་འདྲ་བ་བྱས་ལ་རང་གི་སྙིང་གར་གཞག་པར་བྱའོ། །བསམ་པ་གཡོས་པས་

འདུད་པ་ཞེས་བྱ་བ་ནི་རབ་ཏུ་འདུད་པའོ། །སྙིང་པོ་ནི་འདི་ཡིན་ཏེ། ཀ་མ་ཡ་བཛྲ་ཞེས་པའོ། །རྡོ་རྗེ་ཁྲོ་བོའི་མཛུབ་བསྙམས་ཏེ། །བཀན་ནས་མཐེབ་མོ་སྤྲད་བྱས་ཏེ། །ཞེས་བྱ་བ་ལ་སོགས་པ་ནི། རྡོ་རྗེ་ཁྲོ་བོའི་མཛུབ་མོ་གཉིས་བསྙམས་ཏེ་བཀན་ཞིང་རྩེ་མོ་སྦྱར་བ་བྱས་ནས། ཡོངས་སུ་

เล่ม ๕๗ · หน้า 320a

བསྒྱུར་ཞིང་གཙུག་ཏོར་གྱི་ཕྱོགས་སུ་མཛུབ་མོ་གཉིས་ཀྱི་རྩེ་མོའི་ཕྱག་རྒྱ་བཞག་ལ། དེ་ནས་གཡོན་ཕྱོགས་སུ་གར་བྱ་བའི་སྦྱོར་བས་སྨད་པ་དང་། ཡང་གཡས་ཕྱོགས་སུ་གར་བྱ་བའི་སྦྱོར་བས་བསྟོད་དེ། སྙིང་གའི་ཕྱོགས་སུ་བཞག་ལ་ནྱ་ཊྱ་བཛྲ་ཞེས་བརྗོད་པར་བྱའོ། །ཕྱག་

རྒྱ་ཇི་ལྟ་བ་བཞིན་དུ་བཀྲོལ་ནས་མཉམ་པའི་ཐལ་མོས་མཉེས་པར་བྱ་བ་ནི་རེ་རེ་ཞིང་ཡང་བལྟ་བར་བྱའོ། །འཇིག་རྟེན་གསུམ་ལས་རྣམ་པར་རྒྱལ་བའི་དུམ་བུ་ལས། བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་བཞི་པའི་དཀྱིལ་འཁོར་གྱི་འགྲེལ་པའོ།། །།ཇི་ལྟར་བཅོམ་ལྡན་འདས་

རྣམ་པར་སྣང་མཛད་ཀྱི་ཕྱག་རྒྱ་བཞི་པའི་དཀྱིལ་འཁོར་ཇི་ལྟ་བ་དེ་བཞིན་དུ་རྡོ་རྗེ་ཧཱུཾ་མཛད་དང་། རིན་ཆེན་དང་། ཆོས་དང་། ལས་ཀྱི་ཧཱུཾ་མཛད་རྣམས་ཀྱང་རང་རང་གི་ཕྱག་རྒྱས་དཀྱིལ་འཁོར་བྲིས་ནས་དངོས་གྲུབ་ཐམས་ཅད་སྟེར་བར་འགྱུར་རོ། །དེ་ལ་རྡོ་རྗེ་ཧཱུཾ་མཛད་དབུས་སུ་བྲིས་ལ་མི་བསྐྱོད་པའི་གནས་སུ་

གཟུངས་ཀྱི་ཁྲོ་བོ་རྡོ་རྗེ་སེམས་དཔའི་མཚན་མའི་ཕྱག་རྒྱ་བྲི་བ་དང་། རིན་ཆེན་འབྱུང་ལྡན་གྱི་གནས་སུ་ཁྲོ་བོ་རྒྱལ་པོ་དང་། དོན་ཡོད་གྲུབ་པའི་གནས་སུ་ཁྲོ་བོ་ཆགས་པ་དང་། འོད་དཔག་ཏུ་མེད་པའི་གནས་སུ་གཟུངས་ཀྱི་ཁྲོ་བོ་ལེགས་པའི་མཚན་མའི་ཕྱག་རྒྱ་བྲི་བར་བྱའོ། །དེ་དག་གི་ཕྱག་རྒྱ་ནི་འདི་ཡིན་

ཏེ། ཧཱུཾ་བཛྲི་མ་ཊ་ཞེས་བྱ་བ་ནི་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱིའོ། །ཨོཾ་བཛྲ་ཀྲོ་དྷ་ས་མ་ཡེ་ཛྷི། ཨོཾ་བཛྲ་རོ་ཥ་ཎ་ཨཾ་ཀུ་ཤྱ་ཨ་ན་ཡ་སརྦྦ་ཛྷི། ཨོཾ་བཛྲ་རོ་ཥེ་ཀ་མ་བཛྲ་ནེ་ཝ་ཤ་མེ་ཨ་ཡ་ཧེ་ཛྷི། ཨོཾ་བཛྲ་ཏུཥྚ་ཀྲོ་དྷེ་ཏུ་ཝ་ཤ་ཡ་སརྦྦ་ཛྷི། ཞེས་བྱ་བ་ནི་ལྷག་མ་རྣམས་ཀྱིའོ། །དེ་བཞིན་དུ་དཀྱིལ་འཁོར་བྲིས་

ནས། དབུས་སུ་བཅོམ་ལྡན་འདས་རིན་ཆེན་ཧཱུཾ་མཛད་བྲི་བའི་ཕྱག་རྒྱ་ཧཱུཾ་བྷྲྀ་ཀུ་ཊི་བཛྲ་རཏྣ་ཞེས་བྱ་བ་འདིས་བྲིའོ། །མི་བསྐྱོད་པའི་གནས་སུ་གཟུངས་ཀྱི་ཁྲོ་བོ་རྡོ་རྗེ་ཁྲོ་གཉེར། ཨོཾ་བཛྲ་བྷྲྀ་ཀུ་ཊི་ཀྲོ་དྷ་ཧ་ར་སརྦྦ་ཨརྠཉྫི་ཞེས་བྱ་བ་འདིས་བྲིའོ། །རིན་ཆེན་འབྱུང་ལྡན་གྱི་གནས་སུ་ཉི་མ། ཨོཾ་བཛྲ་ཛྭ་ལ་མཱ་ལ་པྲ་བྷེ་མ་ཧཱ་ཀྲོ་དྷ་

ཨནྣེ་ཛྭ་ལ་ར་བེ་རོ་ཥ་ཛྷ། ཞེས་བྱ་བ་འདིས་བྲིའོ། །དོན་ཡོད་གྲུབ་པའི་གནས་སུ་ཁྲོ་བོ་རྡོ་རྗེ་རྒྱལ་མཚན་གྱི་རྩེ་མོའི་དཔུང་རྒྱན། ཨོཾ་བཛྲ་དྷྭ་ཛ་ཨ་གྲ་ཀེ་ཡཱུ་ར་ཀྲོ་དྷེ་དེ་ཧེ་ནི་སརྦྦ་ཛི་ཞེས་བྱ་བ་འདིས་བྲིའོ། །འོད་དཔག་ཏུ་མེད་པའི་གནས་སུ་གཟུངས་ཀྱི་ཁྲོ་བོ་བཞད་པའི་ཕྱག་རྒྱ། ཨོཾ་བཛྲ་ཨ་ཏ་ཧ་སི་ནི་ཧ་ས་ཧ་ས་

เล่ม ๕๗ · หน้า 320b

ཊྚ་ཊྚ་ཧ་སི་ནི་མ་ར་ཛི་ཞེས་བྱ་བ་འདིས་བྲིའོ། །དེ་བཞིན་དུ་དཀྱིལ་འཁོར་བྲིས་ལ། དབུས་སུ་བཅོམ་ལྡན་འདས་ཆོས་ཀྱི་ཧཱུཾ་མཛད་ཀྱི་ཕྱག་རྒྱ་ཧཱུཾ་པདྨ་བཛྲ་ཧྲི་དྷ་ཞེས་བྱ་བ་འདིས་བྲིའོ། །མི་བསྐྱོད་པའི་གནས་སུ་ཁྲོ་བོ་རྡོ་རྗེ་དག་པ། ཨོཾ་བཛྲ་ཤུདྡྷ་ཀྲོ་དྷ་ཧ་ནི་མཱ་ར་ཡ་སརྦྦ་དུཥྚཱཾ་དི་ཞེས་བྱ་བ་འདིས་བྲིའོ། །རིན་ཆེན་

འབྱུང་ལྡན་གྱི་གནས་སུ་ཁྲོ་བོ་རྡོ་རྗེ་རྣོན་པོ། ཨོཾ་ཏཱིཀྵྞ་ཀྲོ་དྷེ་ཙྪིནྡ་བཛྲ་ཀོ་ཥེ་ན་སརྦྦཾ་དི་ཞེས་བྱ་བ་འདིས་བྲི་བར་བྱའོ། །དོན་ཡོད་གྲུབ་པའི་གནས་སུ་ཁྲོ་བོ་ཆེན་པོ་རྡོ་རྗེ་རྒྱུ། ཨོཾ་བཛྲ་ཧེ་ཏུ་མ་ཧཱ་ཀྲོ་དྷེ་པྲ་བཱི་ཤེ་ཙཀྲཾ་པཱ་བི་ཤ་ཡ་སརྦྦཾ་དི་ཞེས་བྱ་བ་འདིས་བྲིའོ། །འོད་དཔག་ཏུ་མེད་པའི་གནས་སུ་ཁྲོ་བོ་ཆེན་པོ་རྡོ་རྗེ་ལྕེ། ཨོཾ་

བཛྲ་ཛི་ཧྭཱ་མ་ཧཱ་ཀྲོ་དྷ་བ་ཤ་བཾ་ཙ་མ་མུ་ཛི་བྷི་ཞེས་བྱ་བ་འདིས་ཕྱག་རྒྱ་བྲིའོ། །དེ་བཞིན་དུ་དཀྱིལ་འཁོར་བྲིས་ལ། དབུས་སུ་བཅོམ་ལྡན་འདས་ལས་ཀྱི་ཧཱུཾ་མཛད་ཀྱི་ཕྱག་རྒྱའི་ཧཱུཾ་བཛྲ་ཀརྨྨ་ཨ་གྲི་ཀྲིག་ཅེས་བྱ་བ་འདིས་བྲིའོ། །མི་བསྐྱོད་པའི་གནས་སུ་ལས་ཐམས་ཅད་པ། ཨོཾ་སརྦྦ་མུ་ཁཾ་ཀརྨྨ་བཛྲ་ཎི་མ་

ཧཱ་ཀྲོ་དྷེ་ཀུ་རུ་སརྦྦ་ཧྞི། རིན་ཆེན་འབྱུང་ལྡན་གྱི་གནས་སུ་ཁྲོ་བོ་རྡོ་རྗེ་གོ་ཆ། ཨོཾ་བཛྲ་ཀ་བ་ཀྲོ་དྷེ་ར་ཀྲ་མཾ་ཧྚ་ཞེས་བྱ་བ་འདིས་བྲིའོ། །དོན་ཡོད་པར་གྲུབ་པའི་གནས་སུ་རྡོ་རྗེ་གཏུམ་པོ། ཨོཾ་བཛྲ་བནྡྷ་ཀྲོ་དྷེ་མ་ཧཱ་ཨཱ་ཤ་ནི་བཛྲ་དཾཥྚྭཱ་ཀ་རཱ་ལོ་གྲ་བྷི་ཥ་ཎ་བྷ་ཤ་པ་ཡ་ཧྞི་ཞེས་བྱ་བ་འདིས་བྲིའོ། །འོད་དཔག་ཏུ་མེད་

པའི་གནས་སུ་གཟུངས་ཀྱི་ཁྲོ་བོ་རྡོ་རྗེ་ཁུ་ཚུར་གྱི་མཚན་མའི་ཕྱག་རྒྱ། ཨོཾ་བཛྲ་ཀྲོ་དྷེ་མུཥྚི་བནྡྷ་ཧྞི་ཞེས་བྱ་བ་འདིས་བྲི་བར་བྱའོ། །དེ་ལ་རྡོ་རྗེ་ཧཱུཾ་མཛད་ལ་སོགས་པ་རྣམ་པ་བཞི་ནི། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་གསུངས་པའི་སྔགས་དང་ཕྱག་རྒྱ་རང་རང་གི་

རྣམ་པ་བཞི་གཟུང་བར་བྱའོ། །ལྷག་མ་རྣམས་ནི་འཇིག་རྟེན་གསུམ་ལས་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་དུ་བཤད་པ་ཡིན་ནོ། །དེ་ལྟར་རས་དང་རྩིག་པ་དང་ནམ་མཁའ་ལ་བྲིས་པ་དེ་ཐམས་ཅད་ཀྱིས་ཕྱག་རྒྱ་བཞི་པའི་དཀྱིལ་འཁོར་གྱི་དངོས་གྲུབ་ཐམས་ཅད་ཐོབ་པ་ཡིན་པར་ཤེས་

པར་བྱའོ། །འཇིག་རྟེན་གསུམ་ལས་རྣམ་པར་རྒྱལ་བའི་དུམ་བུ་ལས། ཕྱག་རྒྱ་བཞི་པའི་དཀྱིལ་འཁོར་གྱི་བཤད་པ་རྫོགས་སོ།། །།དེ་ལྟར་བར་མ་ལ་དགའ་བའི་སེམས་ཅན་ཐམས་ཅད་རྗེས་སུ་གཟུང་བའི་ཕྱིར། ཕྱག་རྒྱ་བཞི་པའི་དཀྱིལ་འཁོར་གསུངས་ནས། ད་ནི་མདོར་བསྡུས་

เล่ม ๕๗ · หน้า 321a

པ་ལ་དགའ་བའི་སེམས་ཅན་རྗེས་སུ་གཟུང་བར་བྱ་བའི་ཕྱིར། དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ལ་སོགས་པ་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་གཅིག་པའི་དཀྱིལ་འཁོར་གསུངས་པ་ཡིན་ནོ། །དེ་ནས་ཞེས་

བྱ་བ་ནི་དེ་མ་ཐག་པ་སྟེ། དང་པོར་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལ་ཞེས་བྱ་བའི་དོན་ཏོ། །དེ་ལ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་གསུངས་པའི་ཚུལ་གྱིས་རྡོ་རྗེ་ཧཱུཾ་མཛད་ཀྱི་རྣལ་འབྱོར་བྱས་ལ། དེ་ལས་བཤད་པའི་རྣལ་འབྱོར་ཆེན་པོའི་སྒྲུབ་པ་བྱའོ། །

དེ་ནས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་ཆེན་པོ་བཅིངས་ཏེ། ནམ་མཁའི་ཕྱོགས་སུ་འདུག་ལ། སངས་རྒྱས་ཀྱི་ཞིང་འདི་དག་ཐམས་ཅད་ཨ་ཀཱ་རོ་མུ་ཁཾ་སརྦྦ་དྷརྨྨ་ཎཱཾ་ཨཱབྱ་ནུཏྤནྣ་ཏྭཱཏ་ཅེས་བྱ་བ་འདི་ཡིད་ཀྱིས་བརྗོད་པས་ནམ་མཁའ་དང་མཚུངས་པར་བསྒོམ་པར་བྱའོ། །དེ་ནས་འོག་ཏུ་ཡཾ་ལས་རླུང་

གི་དཀྱིལ་འཁོར། དེའི་སྟེང་དུ་བཾ་ལས་ཆུ། དེའི་སྟེང་དུ་སུཾ་ལས་གསེར་གྱི་ས་གཞི། ཡང་དེའི་སྟེང་དུ་ཡི་གེ་བཾ་ལས་རྒྱ་མཚོ་ཆེན་པོ། དེའི་དབུས་སུ་ཧཱུཾ་སུཾ་ཧཱུཾ་ཞེས་བྱ་བ་ལས་རིའི་རྒྱལ་པོ་རི་རབ་སྟེ། རིན་པོ་ཆེ་བཞིའི་རང་བཞིན་ཅན་ཟུར་བཞི་པ་རིན་པོ་ཆེ་དུ་མས་བརྒྱན་པ་སྟོང་གསུམ་པའི་སངས་རྒྱས་

ཀྱི་ཞིང་གི་ཚད་དང་མཉམ་པར་བསམ་པར་བྱའོ། །ཨོཾ་བཛྲ་དྀ་ཌྷོ་མེ་བྷབ་རཀྵ་སརྦྦཾ་སྭཱ་ཧཱ་ཞེས་བརྗོད་པ་དང་། རྡོ་རྗེ་བསྡམས་པ་བརྐྱང་བ་ས་ལ་རེག་པས་སྣ་ཚོགས་རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱའོ། །དེ་ནས་རྡོ་རྗེ་ཆེན་པོའི་རི་རབ་ཀྱི་རྩེ་མོར་ཡི་གེ་ཧཱུཾ་ལས་རྩེ་མོ་རྡོ་རྗེ་དང་། ནོར་བུ་དང་

རིན་པོ་ཆེ་ལས་བྱས་པའི་ཁང་བུ་བརྩེགས་པ་སྤྲུལ་ལ། ཡང་དག་པར་བསྲུངས་ཏེ། ཁང་བུ་བརྩེགས་པའི་དབུས་སུ་ཧཱུཾ་ག་ཧཱུཾ་ཞེས་བྱ་བས་གླང་པོ་ཆེའི་གདན་གཉིས་བསྐྱེད་ལ། དེའི་སྟེང་དུ་ཡི་གེ་ཨས་ཟླ་བའི་དཀྱིལ་འཁོར་གཉིས་བསྐྱེད་དེ། འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་

བཅིངས་ཏེ། ཧཱུཾ་བཞི་བརྗོད་ནས། འཇིག་རྟེན་གྱི་ཁམས་ཀྱི་རྡུལ་ཕྲ་རབ་དང་མཉམ་པ་དེ་བཞིན་གཤེགས་པ་ཐམས་ཅད་ཀྱི་ཐུགས་ལས་རྡོ་རྗེ་ཧཱུཾ་མཛད་ཀྱི་གཟུགས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པ་ཕྱུང་ནས། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་

เล่ม ๕๗ · หน้า 321b

པའི་འཇིག་རྟེན་གྱི་ཁམས་ཐམས་ཅད་ན་གནས་པའི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པའི་དེ་བཞིན་གཤེགས་པ་ཐམས་ཅད་རྡོ་རྗེ་རིགས་ཀྱི་གཟུགས་སུ་བྱིན་གྱིས་བརླབས་ནས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་གྱུར་པ་གང་ཡིན་པ་རྣམས་

དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ཏེ་རང་གི་དམ་ཚིག་ལ་བཞག་ནས། རྡོ་རྗེ་ཧཱུཾ་མཛད་ཀྱི་སྐུ་གཅིག་ཏུ་གྱུར་ཏེ། དེ་བཞིན་གཤེགས་པ་ཐམས་ཅད་ཀྱི་ཐུགས་ལ་ཞུགས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་གཡོན་བརྐྱང་བས་བཞུགས་

པ་ཡན་ལག་ཐམས་ཅད་ལས་བསྐལ་པའི་མེ་ཆེན་པོའི་འོད་དང་མཉམ་པ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྡོ་རྗེ་ཁྲོ་བོ་ཕྱུང་ནས་ཡང་བསྡུས་ཏེ་ཁང་པ་བརྩེགས་པའི་དབུས་སུ་སྔར་གྱི་གླང་པོ་ཆེའི་གདན་གྱི་སྟེང་དུ་བཞུགས་སོ་ཞེས་བྱ་བ་འདི་ནི་དང་པོར་སྦྱོར་

བའི་ཏིང་ངེ་འཛིན་ཡིན་ནོ། །ཕྱག་ན་རྡོ་རྗེ་ནི་བཤད་མ་ཐག་པའི་རྡོ་རྗེ་ཧཱུཾ་མཛད་དོ། །ཡང་ཞེས་བྱ་བ་ནི་ཕྱག་རྒྱ་བཞི་པའི་དཀྱིལ་འཁོར་ལ་ལྟོས་པས་ན་ཡང་ཞེས་བྱ་བ་སྨོས་སོ། །འདི་ཞེས་བྱ་བ་ནི་བློ་ལ་གནས་པའི་རྡོ་རྗེ་དམ་ཚིག་གི་ཁྲོ་བོ་འདི་གསུངས་སོ་ཞེས་བྱ་བའོ། །རང་ནི་བདག་ཉིད་དེ་ལས་

སྐྱེས་པའོ། །དམ་ཚིག་གི་ཁྲོ་བོ་ནི་འདའ་བར་མི་བྱ་བའི་ཁྲོ་བོ་སྟེ། རང་གི་རྡོ་རྗེ་དམ་ཚིག་གི་ཁྲོ་བོ་ནི་བཅོམ་ལྡན་འདས་རྡོ་རྗེ་ཧཱུཾ་མཛད་དེ་ཡི་གེ་ཧཱུཾ་ལས་དེ་སྐྱེད་པར་བྱེད་པའོ། །དེ་གསུངས་པ་ནི་བཤད་པའོ། །འདི་སྐད་སྟོན་པ་ཡིན་ཏེ། ཇི་སྐད་དུ་བཤད་པའི་གླང་པོ་ཆེའི་གདན་ལ་འདུག་ནས། བཅོམ་

ལྡན་འདས་རྡོ་རྗེ་ཧཱུཾ་མཛད་ཀྱི་རང་གི་ཐུགས་ལས་རྡོ་རྗེ་ཧཱུཾ་མཛད་སྤྲུལ་ལ། ཡི་གེ་ཧཱུཾ་འདོན་ཅིང་མདུན་དུ་བསྐྱེད་དེ། གླང་པོ་ཆེའི་སྟེང་དུ་ཤར་ཕྱོགས་སུ་ཁ་བལྟས་ཏེ་གཞག་པར་བྱའོ་ཞེས་བྱ་བ་འདི་ནི་རྡོ་རྗེ་ཧཱུཾ་མཛད་ཀྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་ཡིན་ནོ། །འདིར་ཡང་

རྣལ་འབྱོར་པས་ཏིང་ངེ་འཛིན་ཡང་དེ་བཞིན་དུ་རྗེས་སུ་སྦྱངས་ནས། དེ་ནས་བསྡུ་བ་བྱས་ཏེ་ལས་ཀྱི་རྒྱལ་པོ་མཆོག་བསྒོམ་པ་སྔ་མ་བཞིན་དུ་ཤེས་པར་བྱའོ། །འཇིག་རྟེན་གསུམ་ལས་རྣམ་པར་རྒྱལ་བའི་དུམ་བུར་གསུངས་པའི་དངོས་གྲུབ་ཐམས་ཅད་རྡོ་རྗེ་ཧཱུཾ་མཛད་ཀྱི་ཕྱག་རྒྱ་གཅིག་པའི་དཀྱིལ་

เล่ม ๕๗ · หน้า 322a

འཁོར་དུ་བཤད་པའི་དམ་ཚིག་དང་དབང་བསྐུར་བ་ཐོབ་པས་བསྒྲུབ་པར་བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་སྐབས་སུ་བབ་པའོ། །བཅོམ་ལྡན་འདས་རྡོ་རྗེ་ཧཱུཾ་མཛད་དཔའ་བོ་གཅིག་ཏུ་བཤད་མ་ཐག་པའི་

དཀྱིལ་འཁོར་ནི་འདི་ཡིན་ནོ། །དེ་ནས་ཞེས་བྱ་བ་ནི་བཤད་མ་ཐག་པའི་སྟེ་སྔོན་དུ་བསྙེན་པ་བྱས་པའི་རྗེས་ཐོགས་ལ་ཞེས་བྱ་བའི་དོན་ཏོ། །དེ་ནས་རྒྱུ་དེའི་ཕྱིར་རོ། །གང་གི་ཕྱིར་ཕྱག་རྒྱ་གཅིག་པའི་དཀྱིལ་འཁོར་དུ་འཇུག་པ་མེད་ན་མདོར་བསྡུས་པ་ལ་དགའ་བའི་དོན་གྲུབ་པར་མི་འགྱུར་བ་དེའི་ཕྱིར་

རབ་ཏུ་བཤད་པར་བྱའོ། །གསང་བའི་དཀྱིལ་འཁོར་དམ་པ་སྟེ། །ཞེས་བྱ་བ་ནི། དེ་ལ་འཇིག་རྟེན་གསུམ་ལས་རྣམ་པར་རྒྱལ་བའི་དུམ་བུ་ལས་གསུངས་པའི་དངོས་གྲུབ་ཐམས་ཅད་ནི་རྡོ་རྗེ་ཧཱུཾ་མཛད་གཅིག་པུས་དངོས་གྲུབ་ཐམས་ཅད་བསྡུས་པར་གྱུར་པའི་ཕྱག་རྒྱ་གཅིག་པའི་དཀྱིལ་འཁོར་ནི་

གསང་བས་ན་སྦ་བ་སྟེ། བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་གཅིག་པའི་དཀྱིལ་འཁོར་རོ། །གསང་བ་ཡང་ཡིན་ལ། དཀྱིལ་འཁོར་ཡང་ཡིན་པས་ན་གསང་བའི་དཀྱིལ་འཁོར་ཏེ་འདི་ནི་དམ་པའོ། །དེའི་དོན་ནི་འདི་སྐད་སྟོན་པ་ཡིན་ཏེ། བཤད་མ་ཐག་པའི་ཚུལ་གྱིས་བཅོམ་

ལྡན་འདས་རྡོ་རྗེ་ཧཱུཾ་མཛད་ཀྱི་ཏིང་ངེ་འཛིན་རྣམ་པ་གསུམ་བསྒོམས་པ་ནས་བརྩམས་ཏེ། ཧཱུཾ་ཞེས་བརྗོད་པས་ཕྱག་རྒྱ་གཅིག་པའི་དཀྱིལ་འཁོར་བསྒོམས་ཏེ། ཉིན་རེ་ཞིང་ཐུན་བཞིའི་སྦྱོར་བས་ཟླ་བ་གཅིག་གམ། ཟླ་བ་དྲུག་གམ། ལོ་གཅིག་གི་བར་དུ་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་

ཀྱི་བར་དུ་བསྒོམ་པར་བྱའོ། །དེའི་རྗེས་ལ་དཀྱིལ་འཁོར་བྲི་བར་བྱའོ། །རྡོ་རྗེ་དབྱིངས་དང་འདྲ་བས་ན། །ཞེས་བྱ་བ་ནི་སྤྲུལ་པའི་རྡོ་རྗེ་ཧཱུཾ་མཛད་ཀྱི་དཀྱིལ་འཁོར་དང་འདྲའོ། །རྡོ་རྗེ་ཧཱུཾ་ཞེས་བྱ་བ་སྟེ། །ཞེས་བྱ་བ་ནི་འདི་ལ་རྡོ་རྗེ་ཧཱུཾ་ཞེས་བྱ་བའི་མིང་བཏགས་པའོ། །དཀྱིལ་འཁོར་ཆེན་པོའི་ཚུལ་དུ་ནི། །

དཀྱིལ་འཁོར་ཐམས་ཅད་བྲི་བར་བྱ། །ཞེས་བྱ་བ་ནི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོའི་ཚུལ་གྱིས་ཉེ་བའི་ཁྱམས་བོར་ནས། དེ་ལས་བཤད་པའི་ཕྱི་རོལ་གྱི་དཀྱིལ་འཁོར་བྲི་བར་བྱའོ། །དེའི་དབུས་སུ་ཞེས་བྱ་བ་ནི་དཀྱིལ་འཁོར་གྱི་དབུས་སུའོ། །ཅི་ཞིག་བྱ་ཞེ་ན།

เล่ม ๕๗ · หน้า 322b

ལེགས་བྲི་བ་ཞེས་བྱ་བ་སྨོས་ཏེ། རྡོ་རྗེ་ཧཱུཾ་མཛད་ཀྱི་རྡོ་རྗེའོ། །གང་ལ་ཞེ་ན། ཟླ་བའི་དཀྱིལ་འཁོར་ལའོ་ཞེས་བྱ་བ་སྨོས་ཏེ། གླང་པོ་ཆེའི་སྟེང་གི་ཟླ་བའི་དཀྱིལ་འཁོར་རོ། །ཅི་འདྲ་བ་ཞིག་ཅེ་ན། རྡོ་རྗེ་ཧཱུཾ་གི་ཕྱག་རྒྱ་ཆེ། །ལག་ན་འཛིན་པ་རྡོ་རྗེ་བཅས། །ཞེས་བྱ་བ་ནི་རྡོ་རྗེ་དང་བཅས་པའི་ཧཱུཾ་

མཛད་ཀྱི་ཕྱག་རྒྱ་ཆེན་པོ་ཅན་ནི་ཕྱག་རྒྱ་ཆེན་པོ་སྟེ། འཇིག་རྟེན་གསུམ་ལས་རྣམ་པར་རྒྱལ་བའོ། །ལག་ན་འཛིན་པ་ནི་འཛིན་པ་སྟེ། ཕྱག་གིས་འཛིན་པས་ན་ལག་ན་འཛིན་པའོ། །རྡོ་རྗེ་ཧཱུཾ་མཛད་ཀྱི་ཕྱག་རྒྱ་ཆེན་པོ་རྡོ་རྗེ་དང་བཅས་པ་ཕྱག་གིས་འཛིན་པ་གང་ཡིན་པ་དེ་ལ་དེ་སྐད་ཅེས་བྱའོ། །

བརྐྱང་བསྐུམ་ཚུལ་དུ་གནས་པ་དང་། །ཞེས་བྱ་བ་ནི་བཤད་ཟིན་ཏེ། ཁ་དོག་གཟུགས་ནི་ཇི་བཞིན་བྱ། །ཞེས་བྱ་བ་ནི། ཨུཏྤལ་ཆེར་སྔོ་འཚེར་བའི་མདོག །སངས་རྒྱས་ཕྲེང་བ་ལ་སོགས་བརྒྱན། །མཆེ་བ་ཅུང་ཟད་ཕྱུང་བའི་ཞལ། །ཁྲོ་དང་བཅས་པས་འཛུམ་པ་ཡི། །ཞལ་

བཞི་ཕྱག་ནི་བརྒྱད་པ་སྟེ། །འབར་བའི་ཕྲེང་བ་འཁྲིགས་པའི་མདོག །གཡོན་པའི་ཞབས་ཀྱི་མཐིལ་གྱིས་ནི། །དབང་ཕྱུག་ཆེན་པོ་མནན་པར་བྱ། །གཡས་པའི་ཞབས་ཀྱིས་ཨུ་མ་ཡི། །ནུ་མའི་སྟེང་དུ་གནོན་པར་བྲི། །དེའི་སྙིང་པོ་ནི་འདི་ཡིན་ཏེ། ཡང་ན་ཞལ་གཅིག་ཕྱག་གཉིས་

པ་བྲི་བར་བྱའོ། །དེ་ནས་ཞེས་བྱ་བ་ནི་སྐབས་སུ་བབ་པའོ། །འདིར་ཞེས་བྱ་བ་ནི་བཤད་མ་ཐག་པའི་གསང་བའི་དཀྱིལ་འཁོར་རོ། །ཚོ་ག་ཐམས་ཅད་རྒྱས་པར་བྱ་སྟེ་ཞེས་བྱ་བ་ནི། འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་བཤད་པའི་ཚུལ་གྱིས་སློབ་དཔོན་གྱི་

ལས་ཀྱི་ཆོ་ག་རྒྱས་པ་དང་། སློབ་མ་འཇུག་པའི་ཆོ་ག་རྒྱས་པར་བྱས་ནས་ཞེས་བྱ་བའི་དོན་ཏོ། །རྡོ་རྗེ་ཧཱུཾ་མཛད་ཀྱི་ཕྱག་རྒྱ་གཅིག་པའི་དཀྱིལ་འཁོར་དུ་དབང་བསྐུར་བ་ཐོབ་པ་ལ་དངོས་གྲུབ་སྒྲུབ་པ་བསྟན་པར་བྱའོ་ཞེས་བསྟན་པའི་ཕྱིར། རྡོ་རྗེ་ཧཱུཾ་ཞེས་བྱ་བ་གསང་བའི་ཕྱག་རྒྱའི་ཡེ་ཤེས་ལ་

བསླབ་པའོ་ཞེས་བྱ་བ་སྨོས་སོ། །རྡོ་རྗེ་ཧཱུཾ་ཞེས་བྱ་བའི་གསང་བ་ནི་ཕྱག་རྒྱ་གཅིག་པའི་དཀྱིལ་འཁོར་རོ། །དེའི་ཕྱག་རྒྱ་ནི་ཁྲོ་བོའི་སོར་མོས་བསྒྲུབ་པའི་ཕྱག་རྒྱའོ། །དེའི་ཡེ་ཤེས་བསླབ་པ་ནི་བརྗོད་ཅིང་བཤད་དོ་ཞེས་བྱ་བའི་ཐ་ཚིག་གོ། །དཀྱིལ་འཁོར་འདིར་ནི་ཞུགས་ནས་ཀྱང་། །

เล่ม ๕๗ · หน้า 323a

ཞེས་བྱ་བ་ནི། རང་ཉིད་རྡོ་རྗེ་ཧཱུཾ་མཛད་ཀྱི་དཀྱིལ་འཁོར་འདིར་ཞུགས་པའོ། །འཇིག་རྟེན་གསུམ་རྒྱལ་མཛུབ་མོ་ནི། །བུ་གར་བཅུག་ནས་བསྒྲུབས་ནས་ནི། །ཞེས་བྱ་བ་ནི་གཡོན་པའི་ཁྲོ་བོའི་ཁུ་ཚུར་གྱི་སྡིགས་མཛུབ་ཀྱིས་སྒྲུབ་པའོ། །ཇི་ལྟར་སྒྲུབ་ཅེ་ན། བུ་གར་བཅུག་

ནས་ཞེས་བྱ་བ་སྨོས་ཏེ། གཡོན་པའི་ཁྲོ་བོའི་མཛུབ་མོ་གཡས་པའི་ཁྲོ་བོའི་ཁུ་ཚུར་གྱིས་བྱང་ཆུབ་མཆོག་གི་ཚུལ་དུ་གཞག་ཅིང་བསྒྲུབ་པར་བྱའོ། །དེ་སྐད་དུ་ཡང་། རིག་པ་ལ་གནས་བསྒྲུབས་ན་ནི། །ཞེས་གསུངས་སོ། །ལས་ཀུན་རབ་ཏུ་བསྒྲུབ་པར་འགྱུར། །ཞེས་བྱ་བ་ནི་འཇིག་རྟེན་

གསུམ་ལས་རྣམ་པར་རྒྱལ་བ་ལ་སོགས་པ་ལས་ཐམས་ཅད་ལ་ཐོགས་པ་མེད་པར་འགྲུབ་པར་འགྱུར་རོ། །འདི་སྐད་སྟོན་ཏེ། རྡོ་རྗེ་ཧཱུཾ་མཛད་ཀྱི་སྦྱོར་བས། ཧཱུཾ་བཛྲ་ས་མ་ཡ་ཀི་ཊ་ཞེས་བྱ་བའི་སྙིང་པོ་བརྗོད་ཅིང་ཐུན་བཞིའི་སྦྱོར་བས་ལོ་གཅིག་གི་བར་དུ་བསྒོམས་ལ། རང་གི་བྱ་བ་བྱས་ཏེ།

དེ་ནས་དཀྱིལ་འཁོར་བྲིས་ལ་འཇུག་པར་བྱའོ། །མཚན་ཐོག་ཐག་བཟླས་ཤིང་། འཇིག་རྟེན་གསུམ་ལས་རྣམ་པར་རྒྱལ་བའི་མཛུབ་མོས་བསྒྲུབ་པར་བྱས་ན་དེས་འགྲུབ་པར་འགྱུར་རོ། །དེ་ལྟར་དམ་ཚིག་གི་ཕྱག་རྒྱ་བསྒྲུབ་པ་བཤད་ནས། ད་ནི་ཕྱག་རྒྱ་ཆེན་པོ་བསྒྲུབ་པ་གསུངས་པ་ནི། དེ་

ནས་ཞེས་བྱ་བ་ལ་སོགས་པའོ། །དེ་ནས་ཞེས་བྱ་བ་ནི་དེའི་རྗེས་ལ་ཞེས་བྱ་བའི་དོན་ཏོ། །རྡོ་རྗེ་ཧཱུཾ་ཞེས་བྱ་བ་ནི་གསང་བའི་ཕྱག་རྒྱ་ནི་ཕྱག་རྒྱ་ཆེན་པོའོ། །དེའི་ཡེ་ཤེས་བསླབ་པར་བྱའོ། །དཀྱིལ་འཁོར་ལེགས་པར་ཞུགས་ནས་ནི། །ཞེས་བྱ་བ་ནི། བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་བཤད་མ་

ཐག་པའི་ཕྱག་རྒྱ་གཅིག་པའི་དཀྱིལ་འཁོར་དུ་རང་ཉིད་ཀྱིས་བྲིས་ལ་འཇུག་པར་བྱའོ། །ཇི་ལྟར་འཇུག་ཅེ་ན། ལེགས་པ་ཞེས་བྱ་བ་བསྒོམ་པར་བྱ་སྟེ། འདི་སྐད་སྟོན་པ་ཡིན་ཏེ། ཧཱུཾ་བཛྲ་ས་མ་ཡ་ཧཱུཾ་ཞེས་བྱ་བའི་སྙིང་པོ་སྔར་བཤད་པའི་ཚུལ་གྱིས་བཟླས་པ་བྱེ་བ་བྱས་ལ་ལོ་གཅིག་ཙམ་དུ་སྙིང་པོ་བརྗོད་

ཅིང་སྔར་བཤད་པའི་ཚུལ་གྱིས་བསྒོམ་པ་བྱ་སྟེ། རྟགས་བྱུང་བ་ན་དཀྱིལ་འཁོར་བྲིས་ལ་འཇུག་པར་བྱའོ། །དེ་ནས་ཧཱུཾ་བཛྲ་ས་མ་ཡ་ཧཱུཾ་ཞེས་བརྗོད་ཅིང་། རྡོ་རྗེ་ཧཱུཾ་མཛད་ཀྱི་ཕྱག་རྒྱ་ཆེན་པོ་བཅིངས་ཏེ། མཚན་ཐོག་ཐག་རྡོ་རྗེ་ཧཱུཾ་མཛད་དུ་བདག་ཉིད་བསྒོམས་ལ་འདི་ཙམ་གྱིས་ཕྱག་རྒྱ་ཆེན་པོ་མཆོག་

เล่ม ๕๗ · หน้า 323b

གནས་པའོ། །དེ་ལྟར་གནས་ན་རྡོ་རྗེ་ཧཱུཾ་ཞེས་བྱ་བ་ནས་སྒྲུབ་པ་པོས། ལས་རྣམས་ཀུན་ནི་བྱེད་པར་འགྱུར། །ཞེས་བྱའོ། །དེ་ལྟར་དམ་ཚིག་གི་ཕྱག་རྒྱ་སྒྲུབ་པ་དང་། ཕྱག་རྒྱ་ཆེན་པོ་སྒྲུབ་པ་རིག་པའི་ཐབས་གཞན་བཤད་ནས། ད་ནི་འཇིག་རྟེན་གསུམ་ལས་རྣམ་པར་རྒྱལ་བའི་དུམ་བུ་ལས་

བཤད་པའི་དངོས་གྲུབ་ཐམས་ཅད་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་བཤད་པའི་ཕྱག་རྒྱ་ཆེན་པོ་བཞིས་ཇི་ལྟ་བ་བཞིན་དུ་རང་གི་ལྷའི་རྣལ་འབྱོར་བྱས་ནས། ཕྱག་རྒྱ་གཅིག་པའི་དཀྱིལ་འཁོར་བསྒྲུབ་པར་བྱའོ། །འཇིག་རྟེན་གསུམ་ལས་རྣམ་པར་རྒྱལ་བའི་

དུམ་བུ་ལས་བཤད་པའི་དངོས་གྲུབ་ཐམས་ཅད་དཀྱིལ་འཁོར་ཆེན་པོར་བཤད་པའི་རྡོ་རྗེ་ཧཱུཾ་མཛད་ཀྱི་རྣལ་འབྱོར་དང་། དེ་ལས་བཤད་པའི་རྣལ་འབྱོར་ཆེན་པོ་བྱས་ལ། དེ་ལས་བཤད་པའི་ཕྱག་རྒྱ་རྣམས་ཀྱིས་བཅོམ་ལྡན་འདས་རྡོ་རྗེ་ཧཱུཾ་མཛད་དེ་ལ་རྒྱས་བཏབ་ནས་བསྒྲུབ་པར་བྱའོ་ཞེས་བསྟན་པའི་ཕྱིར་

རོ། །དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་དེ་མ་ཐག་པ་སྟེ་ཡེ་ཤེས་བསླབ་པའི་རྗེས་ཐོགས་ལ་ཞེས་བྱ་བའི་ཐ་ཚིག་གོ། །ཕྱག་རྒྱ་བཞི་བཅིང་བ་ཇི་ལྟ་བ་བཞིན་དུ་བསླབས་ཏེ་ཞེས་པ་ནི། ཇི་ལྟར་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་

མནའ་བསྒག་པ་སྔོན་དུ་སོང་བའི་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་བཞི་བསླབ་ཅིང་བསྟན་པ་དེ་བཞིན་དུ་འདིར་ཡང་བསྟན་པར་བྱ་བའི་དོན་ཏོ། །དེ་བཞིན་དུ་དངོས་གྲུབ་ཏུ་འགྱུར་རོ་ཞེས་བྱ་བ་ནི། ཇི་ལྟར་འཇིག་རྟེན་གསུམ་ལས་རྣམ་པར་རྒྱལ་བ་ལ་སོགས་པའི་

དཀྱིལ་འཁོར་རྣམས་སུ་དངོས་གྲུབ་ཏུ་འགྱུར་བ་དེ་བཞིན་དུ་འདིར་ཡང་འགྱུར་རོ་ཞེས་བྱ་བའི་དོན་ཏོ། །གང་གི་ཕྱིར་དངོས་གྲུབ་ཐམས་ཅད་བསྡུས་པར་གྱུར་པའི་དཀྱིལ་འཁོར་འདི་ཡིན་ནོ་ཞེས་དགོངས་པའི་ཕྱིར་རོ། །དཀྱིལ་འཁོར་དུ་ཇི་ལྟ་བ་དེ་བཞིན་དུ་རས་ལ་སོགས་པ་ལ་བྲིས་པ་དང་། ལུགས་

མ་ལ་སོགས་པའི་གཟུགས་ཐམས་ཅད་ལ་ཡང་དངོས་གྲུབ་འདི་ཐུན་མོང་ཡིན་ནོ་ཞེས་བྱ་བ་ནི། ཇི་ལྟར་ས་ལ་བྲིས་པའི་དཀྱིལ་འཁོར་དུ་ཐམས་ཅད་འགྲུབ་པར་འགྱུར་བ་དེ་བཞིན་དུ་རས་དང་རྩིག་པ་ལ་སོགས་པ་ལ་ཕྱག་རྒྱ་གཅིག་པའི་དཀྱིལ་འཁོར་བྲིས་ན་ཐམས་ཅད་འགྲུབ་པར་འགྱུར་རོ། །

เล่ม ๕๗ · หน้า 324a

ལུགས་མ་ལ་སོགས་པ་ཞེས་བྱ་བ་ནི། གསེར་ལ་སོགས་པའི་རང་བཞིན་རྣམས་སོ། །དེ་ལྟར་རྡོ་རྗེའི་རིགས་ཆེན་པོའི་དཀྱིལ་འཁོར་བསྟན་ནས། ད་ནི་བཅོམ་ལྡན་འདས་ཕྱག་ན་རྡོ་རྗེས་རྟོག་པའི་རྒྱལ་པོ་ཡུན་རིང་དུ་གནས་པར་བྱ་བའི་ཕྱིར། དེ་བཞིན་གཤེགས་པ་ཐམས་

ཅད་བོས་ཏེ། བྱིན་གྱིས་བརླབས་པར་གསོལ་བ་འདེབས་པའོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས། བདག་གི་རིགས་འདི་ལ་བྱིན་གྱིས་བརླབ་ཏུ་གསོལ། ཇི་ལྟར་ཡང་རིགས་ཐམས་ཅད་བྱིན་གྱིས་བརླབས་པས། སེམས་ཅན་ཐམས་ཅད་ཇི་ལྟར་དགའ་བ་བཞིན་དུ་

བགྱིས་ཀྱང་། དཀའ་བ་མེད་ཅིང་བརྟུལ་ཞུགས་མེད་པར་དངོས་གྲུབ་ཐམས་ཅད་ཐོབ་པར་བགྱི་བའི་སླད་དུའོ་ཞེས་བྱ་བས། དེ་ལྟར་བཅོམ་ལྡན་འདས་ཕྱག་ན་རྡོ་རྗེས་གསོལ་བ་བཏབ་པར་འགྱུར་ཏེ། དེ་ནས་ཞེས་བྱ་བ་ནི། དེའི་རྗེས་ཐོགས་ལ་ཡང་བཅོམ་ལྡན་འདས་དེ་བཞིན་གཤེགས་

པ་ཐམས་ཅད་གཅིག་ཏུ་འདུས་ཏེ་ཞེས་བྱ་བ་དང་། ཡང་གི་སྒྲ་ནི་སྔར་བཤད་པའི་བསྡུ་བ་ལ་ལྟོས་པའོ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པའི་རྒྱལ་པོ་བྱིན་གྱིས་བརླབ་པའི་ཕྱིར། རྡོ་རྗེ་སེམས་དཔའ་ཁྱོད་ལེགས་སོ་ཞེས་བཀའ་སྩལ་ཏོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་

ནི། བཅོམ་ལྡན་འདས་ཕྱག་ན་རྡོ་རྗེའི་ཐུགས་ཀར་གནས་པའི་རྡོ་རྗེ་འབར་བའོ། །དེའི་དམ་ཚིག་ནི་རྡོ་རྗེ་རིན་པོ་ཆེའི་རིགས་ཐམས་ཅད་ལས་སྐྱེས་པ་སྟེ། དེ་སྟོན་པར་བྱེད་པའི་དམ་ཚིག་གི་ཚོགས་ལ་ཡང་དེ་བཞིན་གཤེགས་པ་ཐམས་ཅད་ཀྱི་དོན་རྡོ་རྗེ་དམ་ཚིག་གི་ཡང་ཁྱད་པར་དུ་གྱུར་པས་ན་རྟོག་

པའི་རྒྱལ་པོའོ། །དེའི་ཕྱིར་རྟོག་པའི་རྒྱལ་པོ་རྡོ་རྗེ་ཆེན་པོའི་རིགས་ཀྱི་རྟོག་པའི་རྒྱལ་པོ་ཆེན་པོ་རྒྱས་པ་རྫོགས་པར་ཞེས་བྱ་བ་ནི་རྡོ་རྗེ་ཆེན་པོ་ནི་ཇི་སྐད་དུ་བཤད་པའི་རྡོ་རྗེ་འབར་བ་དེའི་རིགས་ལས་སྐྱེས་པའོ། །དེའི་རྟོག་པའི་ཆོ་ག་ནི་དཀྱིལ་འཁོར་ཆེན་པོ་ལ་སོགས་པ་སྟོན་པར་བྱེད་པའི་སྒྲའི་ཚོགས་

སོ། །དོན་རྒྱས་པ་ནི་དཀྱིལ་འཁོར་ཆེན་པོ་ལས་གསུངས་པའི་སྒྲུབ་པ་རྒྱས་པ་རྫོགས་སོ་ཞེས་བྱ་བ་ནི་རྩ་བའི་རྒྱུད་ཀྱི་མདོའི་རང་བཞིན་མཐར་ཐུག་པའོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་དེའི་རྗེས་སུ་འཇུག་པའི་དམ་ཚིག་གི་རང་བཞིན་ཕྱག་རྒྱ་བཞིའི་བདག་ཉིད་ལའང་དམ་ཚིག་གི་ཕྱག་

เล่ม ๕๗ · หน้า 324b

རྒྱ་ཞེས་བརྗོད་དེ། འདི་དག་ཐམས་ཅད་ནི་རྡོ་རྗེའི་རིགས་ཆེན་པོའི་ཁྲོ་བོས་ཁྲོ་བ་འདུལ་བའི་ཕྱིར་གསུངས་པ་ཡིན་ནོ། །གདུག་པ་མ་རུངས་འདུལ་བའི་ཕྱིར། །ཁྲོ་བོའི་སྤྲུལ་པར་རབ་གྲགས་པ། །བློ་ལྡན་རྡོ་རྗེ་སེམས་དཔའ་ཡིས། །རྟོག་པའི་རྒྱལ་པོ་འདི་གསུངས་སོ། །ལུས་ཅན་བྱང་

ཆུབ་བསྒྲུབ་པའི་ཕྱིར། །དྲི་མ་མེད་པ་དེ་ཉིད་ནི། །སྣང་བྱེད་དག་པ་འདི་བཤད་ལས། །བདག་གིས་བསོད་ནམས་གང་བསགས་པ། །དེ་ཡིས་འཇིག་རྟེན་མ་ལུས་པ། །སངས་རྒྱས་ཀུན་མཁྱེན་ཀུན་དགའ་ཆེ། །སྙིང་པོ་བསམ་མི་ཁྱབ་ཆེན་གཙོ། །རྡོ་རྗེ་འཛིན་ཆེན་རྒྱལ་གྱུར་ཅིག །རྡོ་རྗེ་ཆེན་

པོའི་རིགས་འཇིག་རྟེན་གསུམ་ལས་རྣམ་པར་རྒྱལ་བའི་དུམ་བུ་བཤད་པ་དེ་ཁོ་ན་ཉིད་སྣང་བར་བྱེད་པ་ཞེས་བྱ་བ་རྫོགས་སོ།། །།དེ་ལྟར་ཁྲོ་བོས་ཁྲོ་བ་སྤངས་པའི་ཕྱིར་རྡོ་རྗེའི་རིགས་བསྟན་ནས། ད་ནི་ཁྱབ་འཇུག་ལ་སོགས་པས་དང་པོ་རབ་ཏུ་དགའ་བ་རྟོགས་ནས། ཕྱིར་མི་ལྡོག་པ་ལ་གཞག་

ཅིང་དངོས་སུ་བསྒྲུབས་ནས། ཕྱི་རོལ་གྱི་རྡོ་རྗེའི་རིགས་ལ་མོས་པའི་སེམས་ཅན་རྣམས་ཀྱི་དོན་དུ། འཇིག་རྟེན་གསུམ་གྱི་དཀྱིལ་འཁོར་ཆེན་པོ་གསུངས་པ་ནི། དེ་ནས་ཡང་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོར་སྦྱོར་

བའི་རྗེས་ཐོགས་ཉིད་ལའོ། །དེ་ལ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་གསུངས་པའི་དང་པོ་སྦྱོར་བའི་ཏིང་ངེ་འཛིན་རྫོགས་པར་བྱས་ནས། རྡོ་རྗེ་ཧཱུཾ་མཛད་དང་། རིན་ཆེན་ཧཱུཾ་མཛད་དང་། ཆོས་ཀྱི་ཧཱུཾ་མཛད་དང་། ལས་ཀྱི་ཧཱུཾ་མཛད་སྤྲུལ་ནས། འཇིག་རྟེན་པའི་

འཁོར་ལོ་ཐམས་ཅད་འདོད་པའི་རྒྱལ་པོས་བཀུག་ནས། ཇི་ལྟ་བ་བཞིན་དུ་རང་གི་བཀའ་བསྒོ་བ་ལ་ངེས་པར་སྦྱར་བར་བྱའོ་ཞེས་བྱ་བ་འདི་ཙམ་ནི་དང་པོ་སྦྱོར་བའི་ཏིང་ངེ་འཛིན་ཏེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་དང་། མི་བསྐྱོད་པ་ལ་

སོགས་པའི་དེ་བཞིན་གཤེགས་པ་ཐམས་ཅད་སླར་ཡང་གཅིག་ཏུ་འདུས་པའོ། །ཡང་གི་སྒྲ་ནི་རྡོ་རྗེ་ཆེན་པོའི་རིགས་བྱིན་གྱིས་བརླབ་པའི་ཕྱིར། འདུས་པ་ལ་ལྟོས་པའི་ཕྱིར་རོ། །མཁྱེན་བཞིན་དུ་ཞེས་བྱ་བ་ནི། ཁོ་བོ་ཅག་གི་བཀས་དབང་ཕྱུག་ཆེན་པོའི་ལུས་ཞབས་ཀྱི་འོག་ནས་ངེས་པར་

ที่มาและสัญญาอนุญาต

ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ

สัญญาอนุญาต Public Domain · หลักฐาน

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

  • หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
  • ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด