ตัวบทไม่มีชื่อ — ประโยคแรก: འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་འགྲེལ་པ་བཞུགས
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๖๔ · หน้า 261b
པོ་ནི་ཤེས་རབ་ཀྱི་རང་བཞིན་གྱི་ས་དང་ཕ་རོལ་ཏུ་ཕྱིན་པའི་དོན་མཐའ་དག་ཕྱིན་ཅི་མ་ལོག་པར་རྟོགས་པ་ནི། རྡོ་རྗེ་བློ་གྲོས་དོན་བཞིན་རིག །ཅེས་བྱ་ལ་དེ་ཉིད་ཕ་རོལ་ཏུ་ཕྱིན་པ་བཅུ་ལ་སོགས་པ་ཕ་རོལ་ཏུ་ཕྱིན་པ་ཐམས་ཅད་རྫོགས་པ་དང་། གསང་བའི་པདྨ་ཆོས་ཀྱི་དབྱིངས་ཀྱི་མཚན་
ཉིད་དང་། ཕ་རོལ་ཏུ་ཕྱིན་པའི་ས་རབ་ཏུ་དགའ་བ་ནས་རྡོ་རྗེ་འཛིན་པ་ཆེན་པོ་གོ་འཕང་གི་ས་དང་མཐུན་པར་ཆ་ཕྲ་ཞིང་ལྟོ་བ་ཡངས་པ། སྟོན་ཀའི་དུས་ཟླ་བ་ཡོངས་སུ་རྫོགས་པའི་ཟླ་བ་ལྟར་དྲི་མ་དང་བྲལ་བར་གནས་པ་ནི་གསང་བའི་རྡོ་རྗེ་མཉམ་པར་སྦྱར་བའི་གནས་སྐབས་ནི་གོང་ནས་
གོང་དུ་བདེ་བ་འཕེལ་བའི་ཕྱིར་ན། །ཕ་རོལ་ཕྱིན་པ་ཀུན་རྫོགས་པ། །ས་རྣམས་ཀུན་གྱི་རྒྱན་དང་ལྡན། །ཞེས་བྱ་ལ། དེ་ཉིད་དྲི་མ་དང་བྲལ་ཞིང་རྣམ་པར་དག་པའི་ཆུས་ཡང་དང་ཡང་དུ་འཁྲུད་ཅིང་གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བར་བྱེད་པ་ནི། རྣམ་པར་དག་
པ་བདག་མེད་ཆོས། །ཞེས་བྱའོ། །ཡང་དག་ཡེ་ཤེས་ཟླ་འོད་བཟང་། །ཞེས་པ་ནི། བྱང་ཆུབ་ཀྱི་སེམས་རྡོ་རྗེའི་བུམ་པའི་ནང་ན་གནས་པ་ནི་ཡང་དག་པའི་ཡེ་ཤེས་ཟླ་བའི་དཀྱིལ་འཁོར་ལྟར་རྣམ་པར་རྟོག་པའི་འཆིང་བ་གདུང་བ་ཆེན་པོ་རིམས་དང་འདྲ་བ་སེལ་བར་མཛད་པ་གང་
ཡིན་པ་དེ་ལ་དེ་སྐད་ཅེས་བྱ་ལ། དེས་མྱུར་བ་ཉིད་དུ་ཡེ་ཤེས་ཆེན་པོའི་མཚན་ཉིད་ཐོབ་པར་བྱེད་ཅིང་ཕྱག་རྒྱ་བཞིའི་བདག་ཉིད་དང་ལྡན་པ་ནི་གཞོན་ནུ་མའི་པྲ་ཕབ་པ་དང་འདྲ་བར་གནས་པ་ན། དེ་བྱ་བ་དང་། སྤྱོད་པ་དང་། རྣལ་འབྱོར་དང་། གཉི་གའི་རྒྱུད་ཐམས་ཅད་བདག་ཉིད་
བལྟ་བ་དང་། ལག་པ་བཅངས་པ་དང་། འཁྱུད་པ་དང་སྙོམས་པར་འཇུག་པའི་ཚུལ་དུ་ཀུན་གྱི་རྒྱུར་གྱུར་པ་ན། རྒྱུད་ཀུན་གྱི་ནི་བདག་པོ་མཆོག །ཅེས་བྱ་བ་ཉིད་དོ། །རྡོ་རྗེའི་གདན་ནི་མ་ལུས་ལྡན། །ཞེས་བྱ་བ་ནི་དུས་གསུམ་གྱི་དེ་བཞིན་གཤེགས་པ་ཐམས་ཅད་མངོན་པར་སངས་
རྒྱས་པའི་གནས་གསང་བའི་པདྨ་ཡིན་ཏེ། རྣམ་པར་རྟོག་པའི་བདུད་ཀྱི་དཔུང་ཐམས་ཅད་འཇོམས་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། རྒྱུད་དང་བྲལ་བའི་ཡེ་ཤེས་རྣམ་པ་སྣ་ཚོགས་པ་མ་ལུས་པ་འཆང་བར་གྱུར་པས་ན། ཡེ་ཤེས་སྐུ་རྣམས་མ་ལུས་འཆང་། །ཞེས་བྱའོ། །
เล่ม ๖๔ · หน้า 262a
ཡེ་ཤེས་ཀྱི་སྐུ་དེ་རྣམས་ཉིད་ངེས་པར་སྟོན་པ་ནི། ཀུན་དུ་བཟང་པོ་བློ་གྲོས་བཟང་། །ཞེས་བྱ་བ་ལ་སོགས་པ་གསུངས་ཏེ། དེ་ལ་ཀུན་དུ་བཟང་པོ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀུན་དུ་བཟང་པོ་ཤེས་རབ་ཆེན་པོའི་ངོ་བོ་ནི་སངས་རྒྱས་ཀྱི་སྐུ་རྣམས་ཀྱི་གཙོ་
བོ་དང་བཟང་པོ་ཞེས་བྱ་སྟེ་དེ་ཉིད་ཆོས་ཀྱི་སྐུ་ཞེས་བྱའོ། །དེ་ལྟར་ཆོས་ཀྱི་སྐུ་ལས་བྱུང་བའི་ལོངས་སྤྱོད་རྫོགས་པའི་སྐུ་ནི་ས་བཅུའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྙིང་པོར་གྱུར་ཅིང་། རྣམ་པར་དག་པའི་འགྲོ་བ་འཛིན་པའི་ཕྱིར་ན། ས་ཡི་སྙིང་པོ་འགྲོ་བ་འཛིན། །
ཞེས་བྱ་བ་ལོངས་སྤྱོད་རྫོགས་པའི་སྐུ་ལས་བྱུང་བའི་སྤྲུལ་པའི་སྐུ་ནི་དུས་གསུམ་གྱི་སངས་རྒྱས་ཐམས་ཅད་ཀྱི་སྙིང་པོ་ཡིན་ཏེ་དྲག་པོ་ལ་སོགས་པའི་གཟུགས་ནི་རྟོགས་པར་དཀའ་བའི་ཕྱིར། སངས་རྒྱས་ཀུན་གྱི་སྙིང་པོ་ཆེ། །ཞེས་བྱ་ཞིང་། སྤྲུལ་པའི་སྐུ་རྣམ་པ་སྣ་ཚོགས་དེ་ཉིད་སྲིད་
པ་གསུམ་པོ་ཐམས་ཅད་རིམ་པ་ཇི་ལྟ་བ་བཞིན་དུ་འགྲོ་བ་རྣམས་གྲོལ་བར་མཛད་པས་ན། སྤྲུལ་པའི་འཁོར་ལོ་སྣ་ཚོགས་འཆང་། །ཞེས་བྱ་བ་ཉིད་དོ། །དེ་ལྟར་སོ་སོར་རྟོག་པའི་ཡེ་ཤེས་ལ་ཡང་སྐུ་གསུམ་གྱི་བདག་ཉིད་དུ་བཤད་ནས། སྐུ་གསུམ་བདག་ཉིད་ཡེ་ཤེས་ཆེན་པོ་
དེ་ནི་སྐུ་དང་ཡེ་ཤེས་དང་རྟ་དང་གླང་པོ་ཆེ་ལ་སོགས་པ་སྲིད་པ་དང་མྱ་ངན་ལས་འདས་པའི་དངོས་པོ་ཐམས་ཅད་ཀྱི་རང་བཞིན་དུ་གནས་པ་དང་། དངོས་པོ་ཐམས་ཅད་ཀྱི་རང་བཞིན་དུ་འབྱུང་བའི་ཕྱིར་ན། དངོས་པོ་ཀུན་གྱི་རང་བཞིན་མཆོག །དངོས་པོ་ཀུན་གྱི་རང་བཞིན་
འཛིན། །ཞེས་བྱ་བ་ཉིད་དོ། །དེ་ལྟར་ཆོས་ཐམས་ཅད་སྐྱེ་བ་མེད་པའི་ཚུལ་ལས་འགྲོ་བ་རྣམས་ཀྱི་བསམ་པའི་དབང་གིས་དེ་བཞིན་གཤེགས་པའི་སྨོན་ལམ་གྱི་མཐུ་ཆེན་པོ་དངོས་པོ་རྣམ་པ་སྣ་ཚོགས་སུ་སྣང་བ་ནི། སྐྱེ་མེད་ཆོས་དེ་སྣ་ཚོགས་དོན། །ཞེས་བྱ་ལ་དེ་ཉིད་ཟག་པ་
དང་བཅས་པའི་ཆོས་དང་ཟག་པ་མེད་པའི་ཆོས་ཐམས་ཅད་ཀྱི་བདག་ཉིད་དུ་སྟོན་པ་ནི། ཆོས་ཀུན་ངོ་བོ་ཉིད་འཆང་བ། །ཞེས་བྱ་བ་ཉིད་དོ། །ཤེས་རབ་ཆེན་པོ་སྐད་ཅིག་ལ། །ཞེས་བྱ་ཞིང་རྒྱུའི་ཡེ་ཤེས་རྣམ་པར་རྟོག་པ་ཐམས་ཅད་དང་བྲལ་བ་བདེ་བ་ཆེན་པོའི་སྐད་ཅིག་
เล่ม ๖๔ · หน้า 262b
ནི་ཤེས་པ་ཐམས་ཅད་ཀྱི་གཙོ་བོའམ་དམ་པར་གྱུར་པས་ན། ཤེས་རབ་ཆེན་པོ་ཞེས་བྱ་ལ་ཡོངས་སུ་དག་པའི་སྐད་ཅིག་མ་དེ་ལ་ཀུན་རྫོབ་ཀྱི་དངོས་པོ་ཐམས་ཅད་བདེ་བ་ཆེན་པོའི་དངོས་པོར་རྟོགས་པ་སྟེ་དངོས་ཞེས་བྱ་བ་ཉིད་དོ། །ཐུབ་པ་བློ་མཆོག་འབྱུང་པོ་སེལ། །ཞེས་པ་ནི་དེ་ལ་
དེ་ལྟ་བུའི་ཡེ་ཤེས་ཆེན་པོ་དེས་ཕྱིན་ཅི་ལོག་གི་རྟོག་པས་བསྐྱེད་པའི་བག་ཆགས་ནི་སྲེག་པར་བྱེད་པའི་ཕྱིར་འབྱུང་པོ་ཡིན་ལ། ཤེས་རབ་ཆེན་པོའི་མཚན་ཉིད་ཀྱིས་སེལ་བར་བྱེད་པ་གང་ཡིན་པ་དེ་ལ་དེ་སྐད་ཅེས་བྱ་ལ། ཕྱི་རོལ་གྱི་རྣམ་པར་རྟོག་པ་གཡེང་བ་ལ་སོགས་པ་བཀོད་པར་
མི་ནུས་པ་དང་། ཡིད་བཞིན་གྱི་ནོར་བུ་དང་བ་ལྟར་དྲི་མ་དང་བྲལ་བའི་བདག་ཉིད་དུ་གནས་པ་དང་ཡང་དག་པར་རྫོགས་པའི་སངས་རྒྱས་ཀྱི་བྱང་ཆུབ་ནི་ཆོས་ཀྱི་དབྱིངས་རྟོགས་པའི་མཚན་ཉིད་དུ་གནས་ཤིང་རབ་ཏུ་དང་བའི་མཚན་ཉིད་དེ་དེས་ཡོངས་སུ་འཛིན་པའི་ཕྱིར་ན། མི་གཡོ་
རབ་ཏུ་དང་བའི་བདག །རྫོགས་པའི་སངས་རྒྱས་བྱང་ཆུབ་འཆང་། །ཞེས་པ་ཉིད་དོ། །སངས་རྒྱས་ཀུན་གྱི་མངོན་སུམ་པ། །ཞེས་པ་ནི་དེ་ཉིད་ཀྱིས་སངས་རྒྱས་ཐམས་ཅད་ཀྱི་དོན་དམ་པ་མངོན་སུམ་གྱི་ཤེས་པ་འདྲ་བས་རྟོགས་པར་བྱེད་པའི་ཕྱིར་ན། རབ་ཏུ་རྟོགས་
པ་མངོན་སུམ་པ་དེ་ལ་དེ་སྐད་ཅེས་བྱ་ལ། དེ་ཉིད་སྤྲོས་པ་དང་བྲལ་བའི་ཡེ་ཤེས་ཆེན་པོ་ནི་རྣམ་པར་རྟོག་པའི་བུད་ཤིང་ཐམས་ཅད་སྲེག་པར་བྱེད་པའི་ཕྱིར་ན་མེ་ཡིན་ལ། མ་རིག་པའི་མུན་པ་ཐམས་ཅད་སེལ་བ་དང་ཉོན་མོངས་པའི་གདུང་བ་སེལ་བའི་ཕྱིར་ན། ཡེ་ཤེས་
མེ་ལྕེ་འོད་འབར་བ། །ཞེས་བྱ་སྟེ་དེ་ལྟར་སོ་སོར་རྟོག་པའི་ཡེ་ཤེས་ནི་གསུང་ཉེ་བར་འཛིན་པ་ཡིན་ཏེ། ཡོན་ཏན་ལས་ནི་དེའི་ཡོན་ཏན་དང་ལས་ཡིན་ལ། དེ་བས་ན་མཉམ་པ་ཉིད་དང་བྱ་བ་གྲུབ་པའི་སྔོན་དུ་འགྲོ་བས་ཀུན་གྱི་དུས་སུ་བཤད་པ་ཡིན་ལ། དེ་ཉིད་ངེས་པ་ལྔའི་
ཚུལ་དུ་བཤད་པ་སྟེ་བཞི་པའོ། །དེ་ལྟར་ཡེ་ཤེས་དང་སྐུ་དང་གསུང་དང་ཐུགས་རྣམས་བསྟན་ནས། ད་ནི་དེ་རྣམས་ཡོན་ཏན་དུ་འགྱུར་བ་མཉམ་པ་ཉིད་ཀྱི་ཡེ་ཤེས་ཀྱི་བདག་ཉིད་དུ་བཤད་པ་ནི། འདོད་པའི་དོན་གྲུབ་དམ་པ་སྟེ། །ཞེས་པ་ལ་སོགས་པ་གསུངས་ཏེ་དེ་ཉིད་ང་རྒྱལ་ཆེན་པོའི་གང་ཟག་རྣམས་
เล่ม ๖๔ · หน้า 263a
འདུལ་བའི་དོན་དུ་ང་རྒྱལ་ཆེན་པོའི་སྐུ་རིན་ཆེན་འབྱུང་ལྡན་ནི། ནོར་བུ་རིན་པོ་ཆེའི་རྒྱལ་མཚན་གྱིས་གདུལ་བྱའི་སྐྱེ་བོ་ཐམས་ཅད་ཀྱི་འདོད་པའི་དོན་ཐམས་ཅད་གྲུབ་པར་མཛད་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་ཀྱི་ང་རྒྱལ་ཉེ་བར་མཚོན་ནས་འདོད་ཆགས་ལ་སོགས་པ་
ཐམས་ཅད་ཉོན་མོངས་པ་ང་རྒྱལ་འགྲོ་བའི་རྒྱུ་ཡིན་ལ། དེ་ཉིད་ཡང་དག་པར་སྦྱོང་བའི་ཕྱིར་ན། ངན་སོང་ཐམས་ཅད་རྣམ་སྦྱོང་བ། །ཞེས་བྱའོ། །མགོན་པོ་སེམས་ཅན་ཀུན་གྱི་མཆོག །ཅེས་པ་ནི་དེ་ལྟར་ཉོན་མོངས་པ་ཐམས་ཅད་ཀྱི་ཡིད་ཡོངས་སུ་དག་པ་ལས་མཉམ་པ་ཉིད་ཀྱི་ཡེ་ཤེས་ནི་བདག་གཞན་གྱི་
རྒྱུད་མཉམ་སྟེ། དེ་སེམས་ཅན་ཐམས་ཅད་དང་མཚུངས་པ་མེད་པ་དང་། འགྲོ་བ་ཐམས་ཅད་ཀྱི་མགོན་དུ་གྱུར་པས་ན་དེ་སྐད་ཅེས་བྱ་ཞིང་། དེ་ཉིད་གདུལ་བྱའི་སྐྱེ་བོ་རྣམས་ངེས་པར་གྲོལ་བར་མཛད་པས་ན། སེམས་ཅན་ཐམས་ཅད་གྲོལ་བར་བྱེད། །ཅེས་བྱ་བ་ལ་འདོད་ཆགས་དང་ཞེ་སྡང་ལ་སོགས་པ་རྣམས་
ནི་སྨ་འབེབས་པའི་ཕྱིར་གཡུལ་ཡིན་ལ། དེ་ཉིད་དུ་ཡེ་ཤེས་ཆེན་པོའི་མཚན་ཉིད་ནི་ཕ་རོལ་གྱི་དཔུང་འཇོམས་པར་བྱེད་པའི་ངོ་བོར་གྱུར་པ་དང་། མ་རིག་པ་ལ་སོགས་པའི་མི་ཤེས་པའི་བདག་ཉིད་ནི་གཞན་ལ་ལྟོས་པ་མེད་པའི་ཚུལ་གྱིས་དྲེགས་པ་ཡིན་ལ་དེ་རབ་ཏུ་འཇོམས་པར་མཛད་པས་ན། ཉོན་མོངས་
གཡུལ་དུ་གཅིག་དཔའ་བ། །མི་ཤེས་དགྲ་ཡི་དྲེགས་པ་འཇོམས། །ཞེས་བྱ་བ་ཉིད་དོ། །བློ་ལྡན་སྒེག་འཆང་དཔལ་དང་ལྡན། །ཞེས་པ་ནི་འཇམ་དཔལ་ཞེས་བྱ་བ་ཉིད་འདིས་གཟུང་བ་སྟེ། མཉམ་པ་ཉིད་ཀྱི་ཡེ་ཤེས་འདི་ཡང་ཤེས་རབ་ཕུལ་དུ་བྱུང་བའི་མཚན་ཉིད་ཡིན་པ་དང་། རིན་པོ་ཆེའི་རྒྱན་གྱིས་
སེམས་ཅན་རྣམས་མཛེས་པར་མཛད་པ་བསོད་ནམས་དང་ཡེ་ཤེས་ཀྱི་ཚོགས་རྫོགས་པར་མཛད་པ་དེ་ལ་དེ་སྐད་ཅེས་བྱ་ལ། སེམས་ཅན་གདུག་པ་དང་ལྡན་པ་དེ་རྣམས་འདུལ་བའི་དོན་དུ་དྲག་པོའི་སྐུ་གཟུགས་སྟོན་ཀྱང་ཆོས་ཀྱི་དབྱིངས་ལས་མི་འགྱུར་བའི་ཕྱིར། བརྟན་པོ་མི་སྡུག་གཟུགས་འཆང་བ། །
ཞེས་བྱ་ལ་དེ་ཉིད་རིགས་བརྒྱའི་མཚན་ཉིད་ཀྱིས་ཕྱོགས་ཐམས་ཅད་དུ་གཤེགས་པར་མཛད་པ་གང་ཡིན་པ་དེ་ལྟ་བུའི་ཚུལ་གྱིས་ཐེག་པ་ཆེན་པོ་ཡོངས་སུ་རྫོགས་པའི་གོ་འཕང་གི་སྟོབས་ཀྱིས་གོང་ནས་གོང་དུ་སྤྱོད་པར་མཛད་པ་གང་ཡིན་པ་དེ་ལ་དེ་སྐད་བྱ་ལ། ལག་པ་བརྒྱ་པོ་ཀུན་བསྐྱོད་ཅིང་། །གོམ་
เล่ม ๖๔ · หน้า 263b
པའི་སྟོབས་ཀྱིས་གར་བྱེད་པ། །ཉིད་དོ། །དཔལ་ལྡན་ལག་པ་རྒྱས་གང་ལ། །ཞེས་པ་ནི་དེ་ལྟར་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པའི་རིགས་བརྒྱ་ལ་སོགས་པས་ནི་སེམས་ཅན་རྣམས་ཀྱི་ཉོན་མོངས་པ་འཛད་པ་ནི་གྲོལ་བའི་ལམ་ལ་ངེས་པར་འཇོག་པའི་ཕྱིར་དེ་སྐད་ཅེས་བྱའོ། །
དེ་ལྟ་བུའི་གཟུགས་ཀྱིས་ནམ་མཁའི་མཐར་ཐུག་པ་གདུལ་བྱ་གང་དང་གང་ན་གནས་པ་དེ་དང་དེ་ན་བསྐྱོད་པའི་གཟུགས་ཀྱིས་གནས་པ་ནི། ནམ་མཁའ་ཁྱབ་པ་གར་བྱེད་པ། །ཞེས་བྱ་ཞིང་། དེ་ཉིད་ཀྱིས་ས་དང་པོ་རབ་ཏུ་དགའ་བ་ནས་ས་བཅུ་གསུམ་པ་རྡོ་རྗེ་འཛིན་པ་ཆེན་པོའི་བར་དུ་ཡོངས་སུ་དགའ་
བའི་སྙིང་པོ་བདེ་བ་ཆེན་པོའི་མཚན་ཉིད་རྩེ་གཅིག་པ། སྤྲོས་པ་ཐམས་ཅད་དང་བྲལ་བས་གནོན་ཅིང་བགྲོད་པར་མཛད་པ་ནི། ས་ཡི་དཀྱིལ་འཁོར་བཞི་ཡི་ཁྱོན། །རྐང་པ་ཡ་གཅིག་མཐིལ་གྱིས་གནོན། །ཞེས་བྱ་བ་ཉིད་དོ། །རྐང་མཐེབ་སེན་མོའི་ཁྱོན་གྱིས་ཀྱང་། །ཚངས་པའི་ཡུལ་ས་རྩེ་ནས་གནོན། །
ཞེས་བྱ་བ་ནི། དེ་ལ་རྐང་མཐེབ་སེན་མོ་ནི་རྐང་པའི་བགྲོས་གོ་འཕང་ཡིན་ལ། ཐེག་པའི་སྒྲས་ནི་ལྕགས་ཀྱུ་བཤད་ལ། སེན་མོའི་སྒྲས་ནི་གྲུར་བཤད་དོ། །དེ་ལྟར་རྡོ་རྗེ་འཛིན་པའི་གོ་འཕང་ལས་བྱུང་བའི་ལྕགས་ཀྱུ། འཇིག་རྟེན་པའི་ཚངས་པ་ཆེན་པོའི་ང་རྒྱལ་ནི་དུག་དང་བཅས་པའི་ཕྱིར་རླུང་དང་འདྲལ་དེ་
ཉིད་ང་རྒྱལ་གནས་པའི་ཕྱིར་རོ། །ཡུལ་ས་ཡིན་ཏེ་དེ་བཞིན་གཤེགས་པའི་ཐུགས་རྗེ་ཆེན་པོས་གནོན་པར་མཛད་པས་ན་དེ་སྐད་ཅེས་བྱའོ། །དེ་ལྟར་ཡེ་ཤེས་ཆེན་པོའི་མཚན་ཉིད་འདི་ནི་དུས་གསུམ་གྱི་སངས་རྒྱས་ཐམས་ཅད་ཀྱི་བྱ་བ་རྫོགས་པའི་དོན་གཅིག་ཉིད་ཡིན་ཞིང་ལེགས་པར་གསུངས་པའི་ཆོས་མཐའ་
དག་གིས་གྲུབ་པའི་འབྲས་བུ་ཆེན་པོའི་དོན་དུ་གྱུར་པས་ན། དོན་གཅིག་གཉིས་མེད་ཆོས་ཀྱི་དོན། །ཞེས་བྱ་ཞིང་། དེ་ཉིད་རྣམ་པ་ཐམས་ཅད་ཀྱི་མཆོག་དང་ལྡན་པ་དོན་བཟང་པོ་ཡིན་ཞིང་འཁོར་བའི་འཇིགས་པ་ཐམས་ཅད་དང་བྲལ་བས་ན། དམ་པའི་དོན་ནི་འཇིགས་པ་མེད། །ཅེས་བྱ་ལ། ཡེ་ཤེས་
ཆེན་པོའི་དོན་དེ་ཉིད་རང་རིག་པའི་ཕྱི་རོལ་གྱི་དོན་རྣམ་པ་སྣ་ཚོགས་པར་སྣང་ཞིང་ཤེས་པ་ལ་ཕྱི་རོལ་ན་མེད་པའི་ཕྱིར་ན། རྣམ་རིག་སྣ་ཚོགས་གཟུགས་དོན་ཅན། །ཞེས་བྱ་བ་ཉིད་དོ། །སེམས་དང་རྣམ་ཤེས་རྒྱུད་དང་ལྡན། །ཞེས་བྱ་བ་ལ་སོགས་པ་དང་རྣམ་པར་ཤེས་པ་དང་ཀུན་གཞི་རྣམ་པར་ཤེས་
เล่ม ๖๔ · หน้า 264a
པ་དང་ཡིད་ཅེས་བྱ་བས་ན་གྲངས་ཏེ། སྣ་ཚོགས་པའི་གཟུགས་འཛིན་པ་དང་། བག་ཆགས་ཀྱི་རྣམ་པར་སྣང་བའི་ཕྱིར་དེ་སྐད་ཅེས་བྱ་ཞིང་། དེ་ཉིད་སེམས་ཀྱི་རང་བཞིན་གྱི་རྣམ་པར་དག་པའི་དངོས་པོའི་མཚན་ཉིད་དོན་རབ་ཏུ་གསལ་བར་གྱུར་པ་ནི། དངོས་དོན་མ་ལུས་
རྣམས་ལ་དགའ། །ཞེས་བྱ་བ་ཉིད་དོ། །དེ་ལྟ་བུའི་ཡེ་ཤེས་ཆེན་པོ་དངོས་པོ་ཐམས་ཅད་ཀྱི་བདག་ཉིད་དུ་མཚུངས་པའི་ལམ་ཐམས་ཅད་ཇི་ལྟ་བུས་གསལ་བར་གྱུར་ཅིང་གང་གིས་ཐོབ་ཅེ་ན། སྟོང་པ་ཉིད་དགའ་འདོད་ཆགས་བློ། །ཞེས་པ་ལ་སོགས་པ་གསུངས་ཏེ། དེ་ལ་ཤེས་རབ་ཡེ་ཤེས་ཀྱི་
དབང་གི་དུས་སུ་ཐོབ་པའི་ལྷན་ཅིག་སྐྱེས་པའི་ཡེ་ཤེས་ནི་ཆོས་ཀྱི་དབྱིངས་ལ་སོགས་པ་བྲལ་བའི་མཚན་ཉིད་བདེ་བ་ཆེན་པོ་ལ་མངོན་པར་ཞེན་པས་ན་འདོད་ཆགས་ཞེས་བྱ་ལ། དེ་ཉིད་ཆེན་པོའི་མཚན་ཉིད་དུ་གནས་པས་ན་རྣམ་པར་རྟོག་པའི་ཚོགས་མཐའ་དག་འགགས་པས་ན་སྟོང་པ་ཞེས་བྱ་ཞིང་དེ་ཉིད་
སོ་སོའི་སྐྱེ་བོ་ལ་སོགས་པའི་འདོད་ཆགས་འཛག་པ་དང་བཅས་པའི་བདེ་བ་མངོན་པར་ཞེན་པ་ངན་འགྲོའི་རྒྱུར་གྱུར་པ་སྤངས་པ་ཉིད་ལ། སྲིད་པའི་འདོད་ཆགས་སོགས་སྤངས་པ། །ཞེས་བྱ་བ་ཉིད་དོ། །སྲིད་གསུམ་དགའ་བ་ཆེན་པོ་པ། །ཞེས་བྱ་བ་ནི་སྐད་ཅིག་མ་ལ་འདོད་པ་དང་གཟུགས་
དང་གཟུགས་མེད་པའི་ཁམས་གསུམ་པ་ཐམས་ཅད་བདེ་བ་ཆེན་པོར་གཅིག་པའི་ཕྱིར་ན། ཁམས་གསུམ་པ་ལ་དེ་སྐད་ཅེས་བྱ་ཞིང་། རྣམ་པར་རྟོག་པའི་ཚོགས་མཐའ་དག་སྲེག་པར་བྱེད་པ་དང་ཡེ་ཤེས་ཆེན་པོའི་སྟོབས་གོང་ནས་གོང་དུ་འཕེལ་བར་བྱེད་པ་དང་། ཉེས་པའི་དྲི་མ་ཐམས་ཅད་དང་བྲལ་བའི་
ཕྱིར་ན། སྤྲིན་དཀར་དག་པ་བཞིན་དུ་དཀར། །ཞེས་བྱ་བ་ཉིད་དོ། །དཀར་བའི་སྒྲས་ནི་སྲེད་པ་ལས་གྱུར་པའི་དགའ་བ་དང་སྟོབས་ཞེས་བརྗོད་དོ། །འོད་བཟང་སྟོན་ཀའི་ཟླ་བའི་འོད། །ཅེས་པ་ནི་ཐབས་ཀྱི་གསང་བའི་རྡོ་རྗེ་ལས་བྱུང་བའི་བྱང་ཆུབ་ཀྱི་སེམས་ནི་དྲི་མ་དང་བྲལ་བའི་ཕྱིར། སྟོན་ཀའི་ཟླ་བའི་
དཀྱིལ་འཁོར་ལྟར་གསལ་བ་ཡིན་ལ། དེ་ལས་བྱུང་བའི་བདེ་བ་ཆེན་པོ་ནི་ཟླ་བའི་འོད་ཟེར་ལྟར་མ་རིག་པའི་མུན་པ་ཐམས་ཅད་སེལ་བར་བྱེད་པའི་ཕྱིར་ན་དེ་སྐད་ཅེས་བྱ་ལ། ཤེས་རབ་མའི་གསང་བའི་པདྨ་ལས་བྱུང་བའི་བྱང་སེམས་ནི་རང་བྱུང་གི་མེ་ཏོག་དང་འདྲེས་པའི་ཕྱིར་ན། ཉི་མ་ཤར་བའི་དཀྱིལ་
เล่ม ๖๔ · หน้า 264b
འཁོར་ལྟར་དམར་སྐྱར་སྣང་ཞིང་། དེ་ཉིད་དྲི་མ་དང་བྲལ་བ་དང་རབ་ཏུ་དང་བའི་བདག་ཉིད་དུ་གནས་པ་མཛེས་པའི་ཕྱིར་ན། ཉི་མ་ཤར་ཀའི་དཀྱིལ་ལྟར་མཛེས། །ཞེས་བྱ་བ་ལ། དེ་ལས་འབྱུང་བ་ཆེན་པོ་ནི་ཉི་དཀྱིལ་གྱི་འོད་ལྟར་སྤྲོས་པ་དང་བྲལ་བའི་ཆགས་པ་ཆེན་པོར་གནས་པ་ནི། སེན་མོའི་འོད་
ནི་ཤས་ཆེར་དམར། །ཞེས་བྱ་བ་ཉིད་དོ། །ཐབས་དང་ཤེས་རབ་གཉིས་ཀྱི་བྱང་སེམས་དུས་མཚུངས་པ་ཉིད་ལས་ལྷན་ཅིག་སྐྱེས་པའི་ཡེ་ཤེས་རྣམ་པར་རྟོག་པ་ཐམས་ཅད་དང་བྲལ་བ་ཚིག་གི་བརྗོད་པ་ཐམས་ཅད་དང་བྲལ་བ་བདེ་བ་ཆེན་པོ་ཉིད་རྩེ་གཅིག་པའི་སེམས་ཀྱིས་བསྒོམ་པར་བྱའོ་ཞེས་བྱ་བའི་དོན་
ཏོ། །ཅི་དེ་འཛག་པ་དང་བཅས་པ་ལ་སོགས་པ་ཐོབ་པར་འགྱུར་རམ་དེ་ལྟ་ན་ནི་སོ་སོའི་སྐྱེ་བོ་ཐ་མལ་པ་རྣམས་དང་ཁྱད་པར་མེད་དོ་ཞེ་ན། ཅོད་པན་བཟང་པོ་མཐོན་ཀའི་རྩེ། །ཞེས་པས་ཏེ། དེ་ལ་ཅོད་པན་ནི་མགོ་ལ་བཅིངས་པ་ཉིད་ལ་བྱ། བཟང་པོ་ནི་ཡིད་བཞིན་གྱི་ནོར་བུ་རིན་པོ་ཆེའི་རྒྱན་ཏེ་མཐོན་ཀ་ནི་མཐིང་
ནག་ཅེས་བྱ་བའི་དོན་ཏོ། །རང་གི་བྱང་ཆུབ་ཀྱི་སེམས་ཀྱི་ཅོད་པན་གྱི་གནས་བདེ་བ་ཆེན་པོའི་འཁོར་ལོར་རྡོ་རྗེ་ནོར་བུ་ནས་བཀུག་སྟེ་ཅོད་པན་དུ་བྱ་ལ་རང་གི་གནས་བཞག་པ་ལས་ཟག་པ་མེད་པའི་བདེ་བ་ཆེན་པོ་སྐྱེའོ་ཞེས་བྱ་བར་དགོངས་སོ། །སྐྲ་མཆོག་མཐོན་ཀ་ཆེན་པོ་འཆང་། །ཞེས་པ་ནི། དེ་ཉིད་དུས་གསུམ་
གྱི་དེ་བཞིན་གཤེགས་པ་ཐམས་ཅད་ཀྱི་ཡོན་ཏན་གྱིས་བརྒྱན་ཅིང་རྣམ་རྟོག་རླུང་གིས་བསྐྱོད་མི་ནུས་ཤིང་མི་འགྱུར་བ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ནི་ཡིད་བཞིན་གྱི་ནོར་བུ་རིན་པོ་ཆེ་དེ་ལྟར་དགོས་པ་ཐམས་ཅད་སྒྲུབ་པར་བྱེད་པ་དང་བདེ་བ་ཆེན་པོའི་འོད་ཟེར་གྱིས་སྲིད་པ་གསུམ་གྱི་མུན་པ་ཐམས་ཅད་
འཇོམས་པར་བྱེད་ཅིང་རང་གི་རྒྱུད་ཉིད་རོ་མཉམ་པ་ཉིད་ཀྱིས་འཚེད་པར་བྱེད་པས་ན། ནོར་བུ་ཆེན་པོ་འོད་ཆགས་དཔལ། །ཞེས་བྱའོ། །དེ་ལྟ་བུའི་ཟག་པ་མེད་པའི་བདེ་བའི་ཕན་ཡོན་བསྟན་པ་ནི། སངས་རྒྱས་སྤྲུལ་པའི་རྒྱན་དང་ལྡན། །ཞེས་པ་ལ་སོགས་པ་གསུངས་ཏེ། དེ་ལྟར་བདེ་བ་ཆེན་པོ་དེ་ཉིད་ལས་
གྲུབ་པས་དེ་བཞིན་གཤེགས་པ་དེའི་སྤྲུལ་པ་དང་འདྲ་བས་བསྐལ་པ་གྲངས་མེད་པ་ཁམས་གསུམ་པ་རྣམས་ཀྱི་སྤྱི་གཙུག་གི་ནོར་བུའི་རྒྱན་དུ་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་ཀྱི་སྤྲུལ་པའི་གཟུགས་རྣམ་པ་སྣ་ཚོགས་པ། འཇིག་རྟེན་གྱི་ཁམས་བརྒྱ་ཕྲག་སྟོང་ལ་སོགས་པར་འགྲོ་བའི་
เล่ม ๖๔ · หน้า 265a
དོན་མཛད་པ་ཉིད་དང་རྫུ་འཕྲུལ་ཆེན་པོའི་ཐུགས་ཀྱིས་སྐད་ཅིག་པས་འདུལ་བྱའི་ཞིང་ཐམས་ཅད་ཤེས་པའི་ཕྱིར་ན། འཇིག་རྟེན་ཁམས་བརྒྱ་ཀུན་བསྐྱོད་པ། །རྫུ་འཕྲུལ་རྐང་པའི་སྟོབས་ཆེན་ལྡན། །ཞེས་བྱ་བ་ཉིད་དོ། །ཡོངས་སུ་རྫོགས་པའི་མཐར་མངོན་པར་བྱང་ཆུབ་ན་བཞུགས་
པའི་གནས་སྐབས་ན་སེམས་ཅན་ཐམས་ཅད་མངོན་པར་རྫོགས་པར་འཚང་རྒྱ་བར་མཛད་པར་ཞལ་གྱིས་བཞེས་པ་ཉིད་ནི་སྔོན་གྱི་སྨོན་ལམ་རྗེས་སུ་དྲན་ཞེས་བྱ་ལ། དེ་ཉིད་མི་བསྙེལ་བའི་ཚུལ་གྱིས་རབ་ཏུ་འཛིན་པ་གང་ཡིན་པ་དེ་ལ་དེ་སྐད་ཅེས་བྱ་ལ། དེ་ཉིད་འགྲོ་བ་རྣམས་ལ་གསུམ་གཟུང་བའི་ཚུལ་གྱི་སངས་
རྒྱས་དང་ཆོས་དང་དགེ་འདུན་དང་། ལྷ་ཉིད་རྗེས་སུ་དྲན་པར་རྩེ་གཅིག་པའི་ཚུལ་གྱིས་གནས་པའི་ཕྱིར་ན། དྲན་པ་བཞི་པོ་ཏིང་འཛིན་རྒྱལ། །ཞེས་བྱ་ཞིང་། དེ་ཉིད་ཀྱིས་ཕྱིན་ཅི་ལོག་གི་ཤེས་པ་ལ་སྐྱེད་པའི་དྲི་མ་རྣམས་སེལ་བར་མཛད་པ་དང་། སྤྲུལ་པའི་གཟུགས་ཀྱིས་འཁོར་བའི་གནས་ནས་ཀྱང་སྲིད་
པའི་བཅིངས་པ་ལས་གྲོལ་བའི་ཕྱིར་གནས་པ་དང་། དེ་ཉིད་མཚན་དང་དཔེ་བྱད་དང་། སྟོབས་དང་མི་འཇིགས་པ་ལ་སོགས་པ་དེ་བཞིན་གཤེགས་པའི་ཡོན་ཏན་དཔག་ཏུ་མེད་པ་རྣམས་ཀྱི་རྒྱུར་གྱུར་པས་ན། བྱང་ཆུབ་ཡན་ལག་མེ་ཏོག་སྤོས། །དེ་བཞིན་གཤེགས་པའི་ཡོན་ཏན་མཚོ། །ཞེས་བྱ་བ་ཉིད་དོ། །
ལམ་གྱི་ཡན་ལག་བརྒྱད་ཚུལ་རིག །ཅེས་བྱ་བ་ནི། དེ་ལྟ་བུའི་བདེ་བ་ཆེན་པོས་འཕགས་པའི་ལམ་ཡན་ལག་བརྒྱད་ཀྱི་ཚུལ་ཡང་དག་པར་རིག་པ་དང་། འབྲས་བུ་ཡོངས་སུ་རྫོགས་པའི་མཚན་ཉིད་ཆོས་ཀྱི་སྐུ་ཡོངས་སུ་རིག་པར་གྱུར་པ་གང་ཡིན་པ་དེ་ནི། ཡང་དག་སངས་རྒྱས་ལམ་རིག་པ། །ཞེས་
བྱ་བ་ཉིད་དོ། །སེམས་ཅན་ཀུན་ལ་ཤས་ཆེར་ཆགས། །ཞེས་བྱ་བ་ནི་ནམ་མཁའ་འདི་གྲུབ་པའི་རྟེན་དང་འདྲ་བར་གཟུགས་ཀྱི་སྐུས་ནི་ཁམས་གསུམ་གྱི་སེམས་ཅན་ཐམས་ཅད་ལ་བུ་གཅིག་པ་ལྟར་བྱམས་པ་ཆེན་པོའི་ཚུལ་གྱིས་གནས་པ་དེ་ལ་དེ་སྐད་ཅེས་བྱ་ཞིང་། དེ་ཉིད་རྣམ་པར་རྟོག་པ་ཐམས་ཅད་དང་བྲལ་
བའི་མཚན་ཉིད་སྟོན་ཀའི་ནམ་མཁའ་དང་བ་ལྟར་དྲི་མ་དང་བྲལ་ཞིང་མི་འགྱུར་བར་གནས་པ་ནི། ནམ་མཁའ་ལྟ་བུར་ཆགས་པ་མེད། །ཅེས་བྱ་བ་ཉིད་དོ། །དེ་ལྟར་ཡེ་ཤེས་ཆེན་པོའི་མཚན་ཉིད་ནི་ཁམས་གསུམ་གྱི་སེམས་ཅན་ཐམས་ཅད་ཀྱི་སེམས་ལ་འཇུག་པའི་ཕྱིར་ན། སེམས་ཅན་ཀུན་གྱི་ཡིད་ལ་འཇུག །
เล่ม ๖๔ · หน้า 265b
ཅེས་བྱ་ཞིང་ཁམས་གསུམ་གྱི་སེམས་ཅན་ཐམས་ཅད་ལ་གང་དང་གང་གིས་འདུལ་བ་ལ་དེ་དང་དེའི་གཟུགས་ཀྱིས་ཐོག་མ་སྐྱེ་བ་ལ་སོགས་པའི་མཚན་ཉིད་རྣམས་ལ་དེ་ཡོངས་སུ་འཛིན་པའི་མཚན་ཉིད་ཐོགས་པ་མེད་པར་འཇུག་པས་ན། སེམས་ཅན་ཀུན་གྱི་ཡིད་ལྟར་མགྱོགས། །ཞེས་བྱ་བ་ཉིད་དོ། །སེམས་
ཅན་ཀུན་གྱི་དབང་དོན་ཤེས། །ཞེས་བྱ་བ་ནི་དེ་ལྟར་འདུལ་བ་ལ་ཉེ་བར་བརྩོན་པའི་སེམས་ཅན་རྣམས་ཐབས་གང་ཡོངས་སུ་ཤེས་པ་འཇུག་པ་ཞེས་བྱ་བ་སྟེ། དེ་ཉིད་བདག་དང་གཞན་གྱི་དོན་ཆེན་པོར་རབ་ཏུ་གྱུར་པ་ཡིན་ལ་ངེས་པར་འབྱུང་བའི་ཚུལ་དུ་ཤེས་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། ཞི་བ་ཆེན་
པོ་ངེས་པའི་ཚུལ་གྱིས་སེམས་ཅན་གང་དང་གང་གི་རྒྱུད་ལ་བརླན་པ་དེ་དང་དེའི་ཡིད་ངེས་པར་མཛད་པ་དང་། དེ་ལྟར་རྣམ་པར་རྟོག་པའི་ཚོགས་མཐའ་དག་རབ་ཏུ་ནུབ་པར་གྱུར་པ་ལས་དེའི་ཡིད་གོང་ནས་གོང་དུ་ཞེན་ཅིང་མི་འབྲལ་བའི་ཚུལ་དུ་གནས་ན། སེམས་ཅན་ཀུན་གྱི་ཡིད་འཕྲོག་པ། །ཞེས་བྱ་བ་ཉིད་
དོ། །དེ་ལྟ་བུའི་སྤྲོས་པ་དང་བྲལ་བའི་བདེ་བ་ཆེན་པོ་ནི་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྣམས་བདེ་བ་ཆེན་པོའི་མཚན་ཉིད་དུ་རིག་པ་ནི་ཕྱིན་ཅི་ལོག་གི་ཤེས་པས་བསྐྱེད་པ་གཟུགས་སུ་མངོན་པར་ཞེན་པ་ལ་སོགས་པ་སྤངས་ཤིང་ཕྱིན་ཅི་ལོག་རྟོགས་པས་ན།
ཕུང་པོ་ལྔ་པོ་དེ་ཉིད་ཤེས། །ཞེས་བྱ་ཞིང་། དེ་ལྟར་བདེ་བ་ཆེན་པོ་བྱིན་གྱིས་བརླབ་པའི་གནས་སྐབས་ནས་ཀུན་ནས་ཉོན་མོངས་པའི་ཕུང་པོ་ལྔ་རྣམ་པར་དག །རྣམ་པར་དག་པའི་ཕུང་པོ་ལྔ་ཡོངས་སུ་རྫོགས་པར་གྱུར་ལ་དེ་ཉིད་རྣམ་པར་སྣང་མཛད་དང་མི་བསྐྱོད་པ་ལ་སོགས་པ་དེ་བཞིན་གཤེགས་པ་རྣམ་པ་
ལྔའི་བདག་ཉིད་དུ་གནས་པས་ན། རྣམ་དག་ཕུང་པོ་ལྔ་འཆང་བ། །ཞེས་བྱའོ། །དེ་ལྟ་བུའི་བདེ་བ་ཆེན་པོའི་སྤྲོས་པ་དང་བྲལ་བ་ཉིད་སྣོད་ཀྱི་གནས་སྐབས་ཀྱི་བདག་ཉིད་ནི་བདག་དང་གཞན་གཉིས་ཀ་ན་ངེས་པར་འབྱུང་བ་རྟོག་པ་དང་བྲལ་བའི་མཚན་ཉིད་ཡང་དག་པའི་མཐའ་ལ་རབ་ཏུ་གནས་པ་དང་། རྒྱུ་
ནུས་པ་ཐོགས་པ་མེད་པའི་མཚན་ཉིད་འདོད་པ་དང་གཟུགས་དང་གཟུགས་མེད་པའི་མཚན་ཉིད་ལས་ངེས་པར་འབྱུང་བའི་བདེ་བ་ཆེན་པོ་རབ་ཏུ་རྟོགས་པ་དང་། དེ་ཉིད་ཆུ་བོ་ཆེན་པོའི་རྒྱུན་ལྟར་ལམ་གྱི་གནས་སྐབས་རྒྱུན་མི་འཆད་པ་བདེ་བ་ཆེན་པོར་རང་དང་གཞན་གྱི་རྣམ་པའི་ཆ་མཐའ་དག་ནུབ་པར་གྱུར་པ་ལ་
เล่ม ๖๔ · หน้า 266a
རབ་ཏུ་གནས་ནས་ལམ་གྱི་ངེས་པར་འབྱུང་བ་དང་། ལམ་ལ་ངེས་པར་འབྱུང་བའི་ལས་ཐོབ། འབྲས་བུ་ངེས་པར་འབྱུང་བ་ནི་བདག་ཉིད་ངེས་པར་འབྱུང་བ་ལས་གཞན་གྱི་དོན་ཕུན་སུམ་ཚོགས་པས་འགྲོ་བ་གཞན་ལ་བདག་ཉིད་དང་པོ་ཐབས་ཇི་ལྟ་བུས་མངོན་པར་རྫོགས་པར་བྱང་ཆུབ་པ་དེ་ལྟར་ཕྱིན་ཅི་
མ་ལོག་པའི་ཚུལ་གྱིས་སྟོན་པར་མཛད་ཅིང་། རྒྱུད་བཞིའི་ཚུལ་དུ་གནས་པར་བསྟན་པ་ནི། ངེས་འབྱུང་ཀུན་གྱི་ལམ་ལ་གནས། །ངེས་པར་འབྱུང་བ་ཀུན་ལ་མཁས། །ངེས་པར་འབྱུང་བ་ཀུན་སྟོན་པ། །ཞེས་བྱ་བ་ཉིད་དོ། །ཡན་ལག་བཅུ་གཉིས་སྲིད་རྩ་བཏོན། །ཞེས་པ་ནི་དེ་ལ་ཡན་ལག་བཅུ་གཉིས་ནི་མ་རིག་པ་
དང་འདུ་བྱེད་ལ་སོགས་པ་ནང་རྟེན་ཅིང་འབྲེལ་པ་བཅུ་གཉིས་ཡིན་ལ་དེ་ཉིད་ཡང་དང་ཡང་དུ་འབྱུང་བས་སྲིད་པའི་རྩ་བ་ཉིད་དོ། །དེ་བདེ་བ་ཆེན་པོ་སྤྲོས་པ་དང་བྲལ་བས་ཕྱིན་ཅི་མ་ལོག་པའི་ཚུལ་གྱིས་བཏོན་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་རྣམ་པར་དག་པ་ལས་དེ་བཞིན་གཤེགས་པའི་
གནས་སྐབས་དང་སྒྱུ་མ་ལྟ་བུའི་མཛད་པ་བཅུ་གཉིས་པར་དུ་འཛིན་པར་མཛད་པས་ན། དག་པ་རྣམ་པ་བཅུ་གཉིས་འཆང་། །ཞེས་བྱ་བ་ཉིད་དོ། །དེ་ཉིད་སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་གྱི་བདེན་པ་ལས་ཡོངས་སུ་གྲུབ་པ་བདག་ཉིད་དུ་གནས་པ། བདེན་བཞིའི་ཚུལ་གྱི་རྣམ་པ་ཅན། །ཞེས་བྱ་ལ།
མིག་གི་རྣམ་པར་ཤེས་པ་ལ་སོགས་པ་རྣམ་པར་དག་པ་ལས་སའི་སྙིང་པོ་ལ་སོགས་པའི་བྱང་ཆུབ་སེམས་དཔའ་བརྒྱད་དུ་ངེས་པར་ལྡན་པ་ནི། ཤེས་པ་བརྒྱད་པོ་རྟོགས་པ་འཆང་། །ཞེས་བྱ་ཞིང་དེ་ཉིད་ཆོས་ཀྱི་འཁོར་ལོ་ཡོངས་སུ་དག་པའི་ལས་མ་རིག་པ་ལ་སོགས་པ་ཉིད་དག་པའི་ཚུལ་གྱི་བདེན་པ་ཡིན་ལ་དེས་གྲོལ་བ་ངེས་
པར་སྟོན་པའི་ཚུལ་གྱིས་དེ་བཞིན་གཤེགས་པའི་ཕུན་སུམ་ཚོགས་པ་དང་ལྡན་པས། བདེན་དོན་རྣམ་པ་བཅུ་གཉིས་ལྡན། །ཞེས་བྱ་བ་ཉིད་དོ། །དེ་ཉིད་རྣམ་པ་བཅུ་དྲུག་རིག །ཅེས་བྱ་བ་ནི་ཡེ་ཤེས་ཀྱི་སྐུའི་སྐུ་དང་གསུང་དང་ཐུགས་དང་ཡེ་ཤེས་དང་ཆོས་ཀྱི་སྐུའི་སྐུ་དང་གསུང་དང་ཐུགས་དང་ཡེ་ཤེས་དང་ལོངས་སྤྱོད་རྫོགས་པའི་སྐུའི་སྐུ་དང་
གསུང་དང་ཐུགས་དང་ཡེ་ཤེས་དང་སྤྲུལ་པའི་སྐུའི་སྐུ་དང་གསུང་དང་ཐུགས་དང་ཡེ་ཤེས་རྣམ་པར་དག་པ་རིག་པར་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ལ། རྣམ་པ་ཉི་ཤུས་བྱང་ཆུབ་པ། །ཞེས་པ་ནི་རྒྱུའི་མཚན་ཉིད་ཀྱི་གནས་སྐབས་ན་སྐུ་དང་གསུང་དང་ཐུགས་དང་ཡེ་ཤེས་དང་ཆོས་ཀྱི་དབྱིངས་ཀྱི་མཚན་ཉིད་ཀྱི་སྒོ་
เล่ม ๖๔ · หน้า 266b
ནས་དེ་དག་ཐམས་ཅད་རྣལ་འབྱོར་གྱི་ལམ་གྱི་གནས་སྐབས་སུ་དགའ་བ་དང་། མཆོག་ཏུ་དགའ་བ་དང་། ལྷན་ཅིག་སྐྱེས་པའི་དགའ་བ་དང་། དགའ་བྲལ་གྱི་དགའ་བའི་ཚུལ་གྱིས་རྣམ་པར་ཕྱེ་བ་དེ་ལ་དེ་སྐད་ཅེས་བྱའོ། །རྣམ་པ་སངས་རྒྱས་ཀུན་རིག་མཆོག །ཅེས་བྱ་བ་ནི་དེ་ལྟར་རྣམ་པ་ཉི་ཤུ་མངོན་
པར་བྱང་ཆུབ་པའི་བདེ་བ་ཆེན་པོ་ནི་བརྟན་པ་དང་གཡོ་བའི་དངོས་པོ་ཐམས་ཅད་གཉིས་སུ་མེད་པར་རྟོགས་ཤིང་རང་རིག་པའི་ཕུང་པོའི་བདེ་བ་ཆེན་པོར་རིག་ཅིང་། དེ་ཉིད་འཇིག་རྟེན་པའི་བདེ་བ་ལས་ཁྱད་པར་དུ་འཕགས་པས་དེ་སྐད་ཅེས་བྱ་ལ། རང་རིག་པའི་བདེ་བ་ཆེན་པོ་དེ་ཉིད་ཉན་ཐོས་འགོག་པའི་སྙོམས་པར་
འཇུག་པ་ལྟར་བདག་ཉིད་འབའ་ཞིག་བདེ་བའི་རྒྱུན་དང་ལྡན་པ་མ་ཡིན་ཞིང་བརྟན་པ་དང་གཡོ་བ་དང་དངོས་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་བདེ་བ་ཆེན་པོའི་གཟུགས་ཀྱི་སྤྲུལ་པ་དཔག་ཏུ་མེད་པས་ཁྱབ་པར་བྱེད་ཅིང་། སངས་རྒྱས་ཀྱི་མཛད་པ་དང་འདྲ་བས་འགྲོ་བ་རྣམས་ཀྱི་སྡུག་བསྔལ་སེལ་
བར་མཛད་པ་ནི། སངས་རྒྱས་ཀུན་གྱི་སྤྲུལ་པའི་སྐུ། །བྱེ་བ་དཔག་མེད་འགྱེད་པ་པོ། །ཞེས་པ་ཉིད་དོ། །དེ་ལྟ་བུའི་བདེ་བ་ཆེན་པོ་སྐད་ཅིག་ལ་དུས་ཀྱི་མཐའི་སྐད་ཅིག་མ་དཔག་ཏུ་མེད་པ་ཐམས་ཅད་བདེ་བ་ཆེན་པོའི་ངོ་བོར་རྟོགས་པ་གང་ཡིན་པ་དེ་ནི། སྐད་ཅིག་ཐམས་ཅད་མངོན་པར་རྟོགས། །ཞེས་བྱ་
ཞིང་། བདེ་བ་ཆེན་པོ་ཉིད་རྣམ་པར་རྟོག་པ་ཐམས་ཅད་ཟད་པར་གྱུར་ཅིང་། གཉིས་སུ་མེད་པར་གྱུར་པ་ནི་སྐད་ཅིག་མའི་སྒྲར་བརྗོད་ཅིང་སྐད་ཅིག་མ་ནི་ཡེ་ཤེས་དང་གཅིག་ཏུ་བརྗོད་ཅིང་ཀྵ་དང་ན་ནི་མ་ནིང་གི་རྟགས་ཏེ། ཟད་ཅིང་མེད་པ་ཞེས་བྱ་བ་དང་། འཛག་པ་མེད་པ་ཞེས་བྱ་བ་ཉིད་དོ། །འདིར་ཡང་དུས་ཀྱི་
མཐའི་སྐད་ཅིག་མ་ཐམས་ཅད་ཟད་ཅིང་མེད་པར་གྱུར་པ་དང་། དེ་ཉིད་ཟག་པ་མེད་པའི་བདེ་བ་ཉིད་དུ་གནས་པས་ན་དེ་སྐད་ཅེས་བྱ་སྟེ་གང་དུ་ཡང་འགལ་བ་མེད་ལ། དེ་ཉིད་དོན་དམ་པའི་བྱང་ཆུབ་ཀྱི་སེམས་ཀྱིས་དངོས་པོའི་དོན་མཐའ་དག་ལས་རིག་པར་གྱུར་པ་ནི། སེམས་ཀྱི་སྐད་ཅིག་དོན་ཀུན་རིག་པ་ཉིད་དོ། །
ཐེག་པ་སྣ་ཚོགས་ཐབས་ཚུལ་གྱིས། །འགྲོ་བའི་དོན་ལ་རྟོགས་པ་པོ། །ཞེས་པ་ནི་དེ་ལ་ཉན་ཐོས་ཀྱི་ཐེག་པ་དང་། རང་རྒྱལ་གྱི་ཐེག་པ་དང་། བྱང་ཆུབ་སེམས་དཔའི་ཐེག་པ་རྣམས་ལ་རང་རང་གི་ལྷག་པའི་ཤེས་རབ་ཀྱི་ངོ་བོས་དོན་གྱི་དངོས་པོ་རྣམ་པ་སྣ་ཚོགས་པ་ཡིན་ལ། དེ་ལྟ་བུའི་ཐབས་ཀྱིས་
เล่ม ๖๔ · หน้า 267a
འགྲོ་བ་གང་དང་གང་ལ་དོན་གྱི་མཚན་ཉིད་ངེས་པར་གྱུར་པ་དེ་ལ་དེ་སྐད་ཅེས་བྱ་སྟེ། དེ་ཇི་ལྟ་བ་བཞིན་དུ་འདིར་ཡང་རྟོག་པའི་བྱེ་བྲག་གི་ཆོས་ཀྱིས་ཉན་ཐོས་དང་། རང་རྒྱལ་དང་། བྱང་ཆུབ་སེམས་དཔའ་དང་། ཐེག་པ་ཆེན་པོ་ལ་སོགས་པ་རྣམས་དང་པོ་ནས་རྣམ་པ་ཉི་ཤུའི་
བར་དུ་ངེས་པར་ཚང་བའི་ཕྱིར་ན་དེ་སྐད་བྱ་བ་ཉིད་དོ། །ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་བྱ་བ་ནི། དེ་ལ་ཐེག་པ་གསུམ་ནི་ཉན་ཐོས་དང་། རང་རྒྱལ་དང་བྱང་ཆུབ་སེམས་དཔའི་ཐེག་པ་ཡིན་ལ། དེ་དག་ལས་རིམ་པ་ཇི་ལྟ་བ་བཞིན་དུ་ལུས་དང་ངག་རྣམས་
ཡང་དག་པར་སྦྱངས་པ་ནི་ལམ་གྱི་གནས་སྐབས་ཀྱི་མཚན་ཉིད་ལ་གོང་ནས་ངེས་པར་འབྱུང་བ་ཞེས་བྱ་ལ་བདག་ཉིད་ཀྱི་སེམས་ཡང་དག་པར་སྦྱང་བའི་ཕྱིར་ཐེག་པ་རྣམས་ཀྱི་རབ་བམ་མཆོག་ཆེན་པོར་འགྱུར་བའི་རྡོ་རྗེ་ཐེག་པ་ཆེན་པོའི་གནས་ན་བདེ་བ་ཆེན་པོའི་ཚུལ་གྱིས་འབྲས་བུ་ཉིད་ལམ་དུ་བྱས་ནས་མྱུར་བ་
ཉིད་དུ་འབྲས་བུ་ལ་གནས་པར་བྱེད་པ་ནི་འབྲས་བུའི་ས་ལ་རབ་ཏུ་གནས་སོ་ཞེས་བྱ་བར་དགོངས་སོ། །དེ་ལྟ་བུ་འབྲས་བུའི་ཐེག་པའི་ཡོན་ཏན་ཇི་ལྟ་བུ་ཡིན་སྙམ་པ་ལ། ཉོན་མོངས་ཁམས་རྣམས་དག་པའི་བདག །ཅེས་གསུངས་ཏེ། དེ་ལྟར་འབྲས་བུའི་མཚན་ཉིད་རྡོ་རྗེ་ཐེག་པའི་འདོད་ཆགས་
ལ་སོགས་ཉོན་མོངས་པའི་དྲི་མ་རྣམས་རྗེས་སུ་མཐུན་པའི་སྟོབས་ཀྱིས་དག་པར་བྱེད་པ་དེ་ལ་དེ་སྐད་ཅེས་བྱ་ལ། དེ་ཉིད་ཀྱི་ལས་ཀྱི་རྒྱུ་དང་ལས་ཀྱི་འབྲས་བུ་ཐམས་ཅད་ཟད་པར་བྱེད་པ་ནི། ལས་ཀྱི་ཁམས་རྣམས་ཟད་བྱེད་པ། །ཞེས་བྱའོ། །དེ་ཉིད་ལས་དང་ཉོན་མོངས་པ་དཔག་ཏུ་མེད་པ་ཡང་དང་ཡང་དུ་འབྱུང་
བར་གྱུར་པའི་རྒྱུར་གྱུར་པས་ན་ཁམས་ཞེས་བྱ་སྟེ། དེ་ཡང་གསང་འདུས་རྒྱུད་ཕྱི་མ་ལས། ཉོན་མོངས་རྡོ་རྗེ་བདུད་རྩི་དག །ལས་རྣམས་ཐམས་ཅད་འགྲུབ་པར་འགྱུར། །ལས་རྣམས་ཐམས་ཅད་དག་པ་ལས། །ལས་ལས་སྐྱེས་པའི་འབྲས་བུ་དག །ཅེས་གསུངས་པའི་ཕྱིར་རོ། །ཆུ་བོ་
རྒྱ་མཚོ་ཀུན་ལས་རྒལ། །ཞེས་བྱ་བ་ནི་ཆུ་བོ་ནི་འཁོར་བའི་སྡུག་བསྔལ་དཔག་ཏུ་མེད་པ་ཡིན་ལ། དེ་ལས་རབ་ཏུ་རྒལ་ཞེས་བྱ་བ་ཉིད་དོ། །དེ་ལྟ་བུའི་ཐབས་དེ་དང་ཤེས་རབ་དེ་དང་བདེ་བ་ཆེན་པོར་མཉམ་པར་སྦྱོར་བ་སྤྲོས་པ་དང་བྲལ་བའི་མཚན་མ་ལས་ཡང་དག་པར་བྱུང་བ་ཡིན་ལ། སྦྱོར་བའི་
เล่ม ๖๔ · หน้า 267b
དགོན་པ་ལས་བྱུང་བ། །ཞེས་བྱ་བ་ཉིད་དོ། །དེ་ལྟར་ཐབས་དང་ཤེས་རབ་མཉམ་པར་སྦྱོར་བ་ལས་བྱུང་བའི་མཚན་ཉིད་ཀྱིས་མཚམས་མེད་པ་རྣམ་པ་ལྔ་དང་། སྲོག་གཅོད་པ་ལ་སོགས་པའི་ཕས་ཕམ་པར་གྱུར་པའི་ཆོས་བཞི་དང་། ཚིག་རྩུབ་མོ་ལ་སོགས་པ་ཕྲ་མོའི་ཉོན་མོངས་པ་མ་ལུས་པ་
རྣམས་དང་། དེ་ལས་བྱུང་བ་བག་ཆགས་ཀྱི་ས་བོན་མ་ལུས་པ་ཐམས་ཅད་ཕྱིས་ས་བོན་མི་འཇོག་པའི་ཚུལ་གྱིས་སྤངས་པ་གང་ཡིན་པ་དེ་ལ། ཉོན་མོངས་ཉེ་བ་ཀུན་ཉོན་མོངས། །བག་ཆགས་བཅས་པ་གཏན་སྤངས་པ། །ཞེས་བྱ་བ་ཉིད་དོ། །སྙིང་རྗེ་ཆེན་པོ་ཤེས་རབ་ཐབས། །ཞེས་བྱ་བ་ནི་ལས་ཀྱི་
ཕྱག་རྒྱ་དང་། རྣལ་འབྱོར་པའི་མཚན་ཉིད་སྟོང་པ་ཉིད་དང་། ཡེ་ཤེས་ཀྱི་བདག་ཉིད་ནི་ཤེས་རབ་དང་ཐབས་ཀྱི་ངོ་བོ་སྟེ། དེ་ཉིད་རོ་མཉམ་པ་ལས་བྱུང་བའི་བདེ་བ་ཆེན་པོ་ནི་ཁམས་གསུམ་གྱི་སེམས་ཅན་ཐམས་ཅད་ལ་ཁྱབ་པའི་ཕྱིར་ན་སྙིང་རྗེ་ཆེན་པོ་ཞེས་བྱ་ཞིང་། དེ་ལྟ་བུའི་ཚུལ་གྱིས་འགྲོ་བའི་དོན་
འབྲས་བུ་དང་བཅས་པའི་བྱེད་པ་གང་ཡིན་པ་དེ་ནི། དོན་ཡོད་འགྲོ་བའི་དོན་བྱེད་པ། །ཞེས་བྱ་བ་ཉིད་དོ། །དེ་ལྟར་དེ་ལྟ་བུའི་བདེ་བ་ཆེན་པོའི་སྟོབས་ཕྱིན་ཅི་ལོག་གི་ཤེས་པ་སྣ་ཚོགས་པའི་ཡུལ་ལ་མཚན་མའི་དངོས་པོར་འཛིན་པའི་མཚན་མའི་རྣམ་པར་རྟོག་པ་མ་ལུས་པར་སྤངས་པར་གྱུར་པ་གང་ཡིན་
པ་དེ་ནི། འདུ་ཤེས་ཀུན་གྱི་དོན་སྤངས་ཤིང་། །བྱ་བ་ལ་བག་ཆགས་ཀྱི་རྣམ་པར་སྣང་བའི་དོན་རྟ་དང་གླང་པོ་ལ་སོགས་པའི་གནས་དང་། ལུས་དང་ལོངས་སྤྱོད་དུ་སྣང་བ་ཐམས་ཅད་འགག་པར་བྱེད་པ་ནི། རྣམ་ཤེས་དོན་ནི་འགོག་པར་བྱེད། །ཅེས་བྱ་སྟེ། གཉིས་སུ་མེད་པའི་བདེ་བ་ཆེན་པོ་སྐྱེས་པ་དང་
དུས་མཚུངས་པར་མིག་ལ་སོགས་པའི་དབང་པོ་ཐམས་ཅད་དང་གཟུགས་ལ་སོགས་པའི་ཡུལ་ཐམས་ཅད་འགག་པར་མཛད་ཅིང་རང་རིག་པའི་ཡེ་ཤེས་སད་པར་མཛད་ཅེས་པར་དགོངས་སོ། །དེ་ལྟ་བུའི་རྒྱུ་དྲི་མ་དང་བྲལ་བའི་མཚན་ཉིད་ལས་ཡོངས་སུ་གྲུབ་པའི་འབྲས་བུའི་དྲི་མ་དང་བྲལ་བའི་བདག་ཉིད་
ཀྱི་དོན་ཕུན་སུམ་ཚོགས་པ་བཤད་ནས། དེ་ལས་བྱུང་བ་གཞན་གྱི་དོན་ཕུན་སུམ་ཚོགས་པར་བསྟན་པ་ནི། སེམས་ཅན་ཀུན་ཡིད་ཡུལ་དང་ལྡན། །ཞེས་པ་ལ་སོགས་པ་གསུངས་ཏེ། དེ་ལ་དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ནི། སེམས་ཅན་ལ་མོས་པ་རྣམ་པ་སྣ་ཚོགས་ཀྱི་དབང་གིས་འདོད་པའི་
เล่ม ๖๔ · หน้า 268a
དོན་གང་དང་གང་བསམས་པ་དེ་དང་དེ་ཐམས་ཅད་ཀྱི་རེ་བ་ཕུན་སུམ་ཚོགས་པར་མཛད་པ་དང་། དེ་བཞིན་དུ་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་བྱིན་རླབས་ཆེན་པོ་ནི་ཁམས་གསུམ་གྱི་སེམས་ཅན་ཐམས་ཅད་ཀྱི་སྐྱབས་དང་མགོན་དང་
རེ་བ་ཐམས་ཅད་ཀྱི་ཡུལ་དུ་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་བཞིན་གཤེགས་པའི་ཐུགས་ཡེ་ཤེས་བླ་ན་མེད་པ་གདུལ་བྱའི་སེམས་ཅན་ཐམས་ཅད་ཀྱི་སེམས་ཀྱི་བསམ་པ་རྣམ་པ་སྣ་ཚོགས་པ་རྣམས་ཡང་དག་པར་མཁྱེན་པ་གང་ཡིན་པ། སེམས་ཅན་ཀུན་གྱི་ཡིད་
རིག་པ། །ཞེས་བྱ་བ་ལ། སེམས་ཅན་ཀུན་གྱི་ཡིད་ལ་གནས་པ་ནི་ཡེ་ཤེས་ཆེན་པོ་ཡིན་ལ། དེ་ཉིད་དེ་བཞིན་གཤེགས་པ་ཐམས་ཅད་ཀྱི་ངོ་བོ་ཡིན་ལ། ཆོས་ཐམས་ཅད་ཀྱི་རང་བཞིན་དང་ལྷན་ཅིག་སྐྱེས་པའི་བདེ་བ་ཆེན་པོ་ཞེས་པ་ཉིད་དོ། །དེ་ལྟ་བུའི་ཚུལ་གྱིས་
སེམས་ཅན་ཐམས་ཅད་ཀྱི་ཡིད་ལ་ང་གནས་ཞེས་བྱ་བ་སྟེ། དེ་ཡང་ལེའུ་དང་པོ་ལས། ང་ནི་དེ་བཞིན་གཤེགས་ཀུན་དང་། །འབྱུང་བ་ཀུན་གྱི་སྙིང་ལ་གནས། །སྤྲོས་པ་ཀུན་དང་བྲལ་བ་སྟེ། །དངོས་ཀུན་ངོ་བོར་རྟག་ཏུ་བཞུགས། །ཞེས་གསུངས་པའི་ཕྱིར་
རོ། །དེ་དག་སེམས་དང་མཐུན་པར་འཇུག །ཅེས་པ་ནི་དེ་ལྟར་གདུལ་བྱའི་སྐྱེ་བོ་ཐམས་ཅད་ཀྱི་སེམས་གདུག་པ་དང་བཅས་པ་དེ་ཐམས་ཅད་ཀྱང་རྗེས་སུ་མཐུན་པའི་ཚུལ་གྱིས་འདུལ་བར་མཛད་པ་སྟེ། དཔེར་ན། སྨད་འཚང་མའི་དབང་ཕྱུག་ཆེན་མོ་ཨུཏྤ་ལའི་གཟུགས་
འཁྲིག་པའི་ཆོས་ལ་རྟག་ཏུ་ཉེ་བར་ཆགས་ཤིང་སྐྱེས་བུའི་མཚན་མ་རྟག་ཏུ་ཆེ་བ་འདོད་ལ། དྲན་པའི་ཚུལ་གྱིས་ཚིམ་པར་བྱས་པ་ལས། ངན་འགྲོའི་ལམ་ལས་གྲོལ་ནས། དགྲ་བཅོམ་པའི་འབྲས་བུ་ཐོབ་པ་བཞིན་དེ་ཉིད་འབྲས་བུ་ཕུན་སུམ་ཚོགས་པའི་བདག་ཉིད་ཡུལ་
ལ་མངོན་པར་དགའ་བ་དང་། དེ་ཡིན་པ་ལ་ཡིད་ཆེས་པར་གྱུར་པ་ལས། ཁམས་གསུམ་གྱི་སེམས་ཅན་ཐམས་ཅད་ཡི་རངས་པར་གྱུར་པ་དང་། དེ་ཉིད་ལས་ད་ལྟར་བྱུང་བ་དང་། མ་འོངས་པའི་འབྲས་བུ་ལ་ཡིད་མངོན་པར་དགའ་བར་གྱུར་པ་
เล่ม ๖๔ · หน้า 268b
ནི། སེམས་ཅན་ཀུན་ཡིད་ཚིམ་པར་བྱེད། །སེམས་ཅན་ཀུན་གྱི་ཡིད་དགའ་བ། །ཞེས་བྱ་ལ། དེ་བཞིན་གཤེགས་པའི་ཡོན་ཏན་ཕུན་སུམ་ཚོགས་པ་བཅུ་གསུམ་གྱི་མངའ་བདག་ཏུ་གྱུར་པ་དང་། སྤྲོས་པ་དང་བྲལ་བའི་ཡེ་ཤེས་ཆེན་པོ་ནི་ཤེལ་དག་པ་ལྟར་
ཉེས་པའི་སྐྱོན་མཐའ་དག་སྤངས་པ་ནི། གྲུབ་པ་མཐར་ཕྱིན་འཁྲུལ་པ་མེད། །ཅེས་བྱ་ཞིང་། འཁྲུལ་པའི་ཆོས་མཐའ་དག་སྤངས་པ་ཉིད་དོ། །ནོར་པ་ཐམས་ཅད་རྣམ་པར་སྤངས། །ཞེས་བྱ་བ་ཉིད་དོ། །དེ་ལྟར་གཞན་གྱི་དོན་ཕུན་སུམ་ཚོགས་པ་ཉིད་འདས་པ་དང་། མ་འོངས་
པ་དང་། ད་ལྟར་བྱུང་བ་རྣམས་ཀྱི་སྣོད་དང་། རྒྱུ་དང་འབྲས་བུའི་ངོ་བོ་ཕྱིན་ཅི་མ་ལོག་པར་ཤེས་ཤིང་སོམ་ཉི་དང་རྣམ་པར་བྲལ་བར་གྱུར་ཅིང་། མཐའ་གཅིག་གི་ངེས་པར་གནས་པ་ནི། དོན་གསུམ་ཐེ་ཚོམ་མེད་པའི་བློ། ཞེས་བྱ་ཞིང་། དེ་ཉིད་ལས་བདག་གི་
དོན་དང་། གཞན་གྱི་དོན་ཕུན་སུམ་ཚོགས་པའི་བདག་ཉིད་ཆོས་ཀྱི་སྐུ་དང་། ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུའི་རང་བཞིན་དུ་གནས། ཀུན་དོན་ཡོན་ཏན་གསུམ་གྱི་བདག །ཅེས་བྱའོ། །ཕུང་པོ་ལྔ་དོན་དུས་གསུམ་དུ། །སྐད་ཅིག་གཅིག་གིས་བྱེ་བྲག་
ཕྱེད། །སྐད་ཅིག་གཅིག་གིས་རྫོགས་སངས་རྒྱས། །ཞེས་པ་ནི། དེ་ཉིད་དུས་མེད་པའི་བདེ་བ་ཆེན་པོ་སྤྲོས་པ་དང་བྲལ་བ་ནི། སྒྲུབ་པར་བྱེད་པའི་བྱ་བ་ཐམས་ཅད་ཀྱི་སྐད་ཅིག་མ་ཡོངས་སུ་རྫོགས་པ་ཞེས་བྱ་ཞིང་། དེ་ཉིད་བྱ་བ་རྫོགས་པའི་སྐད་ཅིག་མ་ཞེས་བྱ་སྟེ། དེ་བྱ་བ་རྫོགས་པའི་སྐད་ཅིག་མ་དེ་
ལ་དུས་ཀྱི་མཐའི་སྐད་ཅིག་མ་ཐམས་ཅད་བྱེ་བྲག་མེད་ཅིང་དེའི་ཕུང་པོ་ལྔ་ལས་ཉེ་བར་མཚོན་ནས། ཕུང་པོ་ཁམས་དང་། སྐྱེ་མཆེད་དང་། སྣོད་ཀྱི་འཇིག་རྟེན་ལ་སོགས་པ་ཐམས་ཅད་གཉིས་སུ་མེད་པའི་བདེ་བ་ཆེན་པོར་དུས་གསུམ་དུ་རབ་ཏུ་རྟོགས་པ་གང་ཡིན་པ་དེ་
ལ་དེ་སྐད་ཅེས་བྱ་ཞིང་། དེ་ཉིད་སྐད་ཅིག་མ་གཅིག་ལ་མངོན་པར་རྫོགས་པར་སངས་རྒྱས་པ་དེ་ལ་དེ་སྐད་ཅེས་བྱ་ཞིང་། བདེ་བ་ཆེན་པོ་དེ་ཉིད་དུས་གསུམ་གྱི་སངས་རྒྱས་ཐམས་ཅད་རང་བཞིན་འཛིན་པའི་ཕྱིར་ནི། སངས་རྒྱས་ཀུན་གྱི་རང་བཞིན་འཆང་། །ཞེས་བྱ་བ་ཉིད་དོ། །མཉམ་པ་ཉིད་ཀྱི་ཡེ་ཤེས་
เล่ม ๖๔ · หน้า 269a
ཀྱི་སྐུ་གསུམ་གྱི་མཚན་ཉིད་དུ་བསྟན་པ་ནི། ལུས་མེད་ལུས་ཏེ་ལུས་ཀྱི་མཆོག །ཅེས་གསུངས་ཏེ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྐུ་ནི་རྡུལ་ཕྲ་རབ་ཀྱིས་བསྒྲུབས་པ་ཁ་དོག་དང་དབྱིབས་ཀྱི་རྣམ་པ་མེད་ཅིང་སྐུ་གཉིས་ཀྱི་རྟེན་དུ་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་།
ལུས་ཀྱི་མཐའ་ནི་རྟོག་པ་པོ། །ཞེས་པ་ནི། དེ་བཞིན་གཤེགས་པ་ཐམས་ཅད་ཀྱི་ལོངས་སྤྱོད་རྫོགས་པའི་སྐུ་ནི་གཟུགས་ཅན་མཐའ་དག་གི་རབ་ཀྱི་མཐར་ཐུག་པ་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་ཡོངས་སུ་བརྒྱན་པ་དག་པ་རྣམ་པ་གསུམ་ལས་ལོངས་སྤྱོད་པར་
གྱུར་པ། ཏིང་ངེ་འཛིན་གྱི་སྒོ་ནས་ཆོས་སྟོན་པར་གྱུར་པ་དེ་ལ་དེ་སྐད་ཅེས་བྱའོ། །གཟུགས་རྣམས་ཐམས་ཅད་ཀུན་དུ་སྟོན། །ཞེས་པ་ནི་དེ་བཞིན་གཤེགས་པའི་སྤྲུལ་པའི་སྐུ་སྟེ་སྤྲུལ་པའི་སྐུ་བྱེ་བ་དཔག་ཏུ་མེད་པ་གང་དང་གང་དུ་འདུལ་བ་དེ་དང་དེའི་གཟུགས་ཀྱིས་ཀུན་དུ་སྟོན་ཞེས་བྱའོ། །དེ་ལྟར་སྐུ་
གསུམ་གྱི་མཚན་ཉིད་ནི་འགྲོ་བ་རྣམས་ཀྱི་ཡིད་བཞིན་ནོར་བུ་རིན་པོ་ཆེ་རྒྱལ་མཚན་གྱི་དབང་དུ་གྱུར་པ་ནི། ནོར་བུ་ཆེན་པོ་རིན་ཆེན་ཏོག །ཅེས་བྱའོ། །དེ་ལྟར་དེ་བཞིན་གཤེགས་པའི་ཡོན་ཏན་ཕུན་སུམ་ཚོགས་པ་དཔག་བསམ་གྱི་ཤིང་ལྟར་འགྲོ་བ་ཐམས་ཅད་ཀྱི་རེ་བ་སྐོང་བར་མཛད་པ་མཉམ་པ་ཉིད་ཀྱི་
ཡེ་ཤེས་ངེས་པ་ལྔའི་ཚུལ་དུ་བཤད་པ་སྟེ་ལྔ་པའོ།། །།དེ་ལྟར་ཡེ་ཤེས་དང་ཐུགས་དང་གསུང་དང་སྐུ་དང་ཡོན་ཏན་གྱི་བདག་ཉིད་དུ་བཤད་ནས། ད་ནི་སངས་རྒྱས་ཐམས་ཅད་ཀྱི་ཕྲིན་ལས་སྒོ་ལྔའི་རྣམ་པར་ཤེས་པ་རྣམ་པར་དག་པ་བྱ་བ་གྲུབ་པའི་ཡེ་ཤེས་བསྟན་པ་ནི། སངས་རྒྱས་ཀུན་གྱིས་རྟོག་བྱ་བ། །ཞེས་
གསུངས་ཏེ་དེ་ལ་རྟོག་བྱ་བ་ཞེས་པ་ནི་རྟགས་ཅན་ཡིན་པས་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱེ་བ་ཕྲག་དུ་མ་རྣམས་སུ་གདུལ་བྱ་རྣམས་ཀྱི་དོན་དུ་སྙོམས་པར་འགྲོ་བར་ཤེས་པར་བྱ་ཞིང་བྱ་བ་འདིས་ནི། བྱ་བ་གྲུབ་པའི་ཡེ་ཤེས་ཉིད་ངེས་པར་གཟུང་བའོ། །སངས་རྒྱས་བྱང་ཆུབ་བླ་ན་
མེད། །ཅེས་པ་ནི་ཉན་ཐོས་ཀྱི་བྱང་ཆུབ་ལྟར་བདག་ཉིད་འབའ་ཞིག་གི་དོན་མ་ཡིན་ཞིང་ཁམས་གསུམ་གྱི་སེམས་ཅན་ཐམས་ཅད་ཀྱི་དོན་མ་ལུས་པར་མཛད་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་དེ་ཉིད་ཐེག་པ་ཆེན་པོ་གསང་སྔགས་ཀྱི་ཚུལ་ལས་བྱུང་ཞིང་རྣམ་པར་རྟོག་པ་ཐམས་ཅད་སྤངས་པར་གྱུར་པས་
เล่ม ๖๔ · หน้า 269b
ན། གསང་སྔགས་ལས་བྱུང་ཡི་གེ་མེད། །ཅེས་བྱ་སྟེ། དེ་ཉིད་གདུལ་བྱ་རྣམས་ཀྱི་དོན་བྱ་བ་དང་སྤྱོད་པ་དང་། རྣལ་འབྱོར་གྱི་རྒྱུད་གསུམ་གྱི་ཚུལ་གྱིས་དུས་ངེས་པར་སྟོན་ཅིང་། བསྒྲུབ་བར་བྱ་བ་དོན་གྱི་མཚན་ཉིད་ནི་གསང་སྔགས་ཐམས་ཅད་ཀྱི་དོན་འཇིག་རྟེན་དང་འཇིག་རྟེན་ལས་འདས་པའི་དངོས་
གྲུབ་རྣམ་པ་སྣ་ཚོགས་སྐྱེད་པར་བྱེད་པའི་དོན་དམ་པར་བྱང་ཆུབ་ཀྱི་སེམས་ཆེན་པོ་གང་ཡིན་པ་དེ། གསང་སྔགས་ཆེན་པོའི་རིགས་གསུམ་པ། །གསང་སྔགས་དོན་ཀུན་སྐྱེད་པ་པོ། །ཞེས་བྱ་བ་ཉིད་དོ། །དེ་ལྟར་དོན་དམ་པ་བྱང་ཆུབ་ཀྱི་སེམས་དེ་ཉིད་སྟོང་པ་ཉིད་ཀྱི་བརྡར་གྱུར་ཅིང་།
རྣམ་པར་རྟོག་པ་ཐམས་ཅད་དང་བྲལ་བ་གང་ཡིན་པ་དེ་ལ། ཐིག་ལེ་ཆེན་པོ་ཡི་གེ་མེད། །ཅེས་བྱ་ཞིང་། དེ་ལས་རིགས་ལྔ་དང་རིགས་དྲུག་དང་རིགས་བརྒྱ་ལ་སོགས་པ་དཔག་ཏུ་མེད་པར་འགྱུར་བར་བསྟན་པ་ནི། སྟོང་པ་ཆེན་པོ་ཡི་གེ་ལྔ། ཐིག་ལེ་སྟོང་པ་ཡི་གེ་བརྒྱ། །ཞེས་བྱ་སྟེ། ཐིག་
ལེ་ནི་ནམ་མཁའ་དང་འདྲ་བ་ཡིན་ལ། ནམ་མཁའ་ལྟར་སྟོང་པ་ཞེས་བྱ་བར་དགོངས་སོ། །རྣམ་པ་ཀུན་ལྡན་རྣམ་པ་མེད། །ཅེས་བྱ་བ་ལ་དེ་རྣམ་པ་ཀུན་ཞེས་པ་ནི་རིགས་ལྔ་དང་རིགས་བརྒྱའི་བར་དུ་ཡིན་ནོ། །རྣམ་པ་ནི་སྟོང་པ་ཞེས་བྱ་བ་ཉིད་དེ་སྔར་གྱི་ངེས་པར་བཤད་པའོ། །དེ་ལྟ་བུའི་རྣམ་པ་དང་
བཅས་ཞིང་རྣམ་པ་མེད་པ་དག་དང་གཞན་གྱི་དོན་ཕུན་སུམ་ཚོགས་པའི་བདག་ཉིད་གང་ལས་ཐོབ་ཅེ་ན། བཅུ་དྲུག་ཕྱེད་ཕྱེད་ཐིག་ལེ་ཅན། །ཞེས་བྱ་བ་ལ་སོགས་པ་གསུངས་ཏེ། དེ་ཉིད་དབང་རྣམས་ཀྱི་མཆོག་ཏུ་གྱུར་པ་བཞི་པ་ངེས་པར་བསྟན་པ་ཉིད་ལ། དེ་ལ་བཅུ་དྲུག་གི་ཕྱེད་ནི་
བརྒྱད་ཡིན་ལ། བརྒྱད་ཀྱི་ཕྱེད་ནི་བཞི་ཡིན། ལྷན་ཅིག་སྐྱེས་པའི་བདེ་བ་ཆེན་པོའི་ཡེ་ཤེས་དེ་ཉིད་དགའ་བ་བཞིའི་བདག་ཉིད་ཅན་ཞེས་བྱ་བར་དགོངས་ཤིང་། སྐབས་འདིར་ཐིག་ལེའི་སྒྲས་ནི་གཉིས་རྣམ་པར་སྤངས་པ་ཞེས་བརྗོད་ལ། གཉིས་ནི་ཆར་བྱེད་པ་ཡིན་ཏེ། གཟུང་བ་
དང་། འཛིན་པ་དང་། ཐབས་དང་ཤེས་རབ་ལ་སོགས་པ་གཉིས་སུ་འཛིན་པ་མཐའ་དག་སྤངས་པ་བདེ་བ་ཆེན་པོ་ཞེས་བྱ་བར་དགོངས་སོ། །དེ་ཉིད་རང་གི་ངོ་བོ་བསྟན་པ་ནི། ཡན་ལག་མེད་པའི་རྩིས་ལས་འདས། །ཞེས་གསུངས་ཏེ། དེ་ལ་ཡན་ལག་གི་དངོས་པོའི་རྣམ་
เล่ม ๖๔ · หน้า 270a
པར་རྟོག་པ་དང་། མཚན་མའི་རྣམ་པར་རྟོག་པ་ཐམས་ཅད་ཡིད་ལ་མེད་པར་གྱུར་ཅིང་ངག་གིས་བརྗོད་པའི་ཚད་ལས་འདས་པ་གང་ཡིན་པ་དེ་ལ་དེ་སྐད་ཅེས་བྱའོ། །བསམ་གཏན་བཞི་ཡི་རྩེ་མོ་ཅན། །ཞེས་བྱ་བ་ནི། དགའ་བ་དང་། མཆོག་ཏུ་
དགའ་བ་དང་། ལྷན་ཅིག་སྐྱེས་པའི་དགའ་བ་དང་། དགའ་བྲལ་གྱི་དགའ་བ་རྣམས་ཀྱི་བླ་མར་གྱུར་ཅིང་གོང་ན་མེད་པ་ནི་རྩེ་གཅིག་པའི་བསམ་གཏན་ཡིན་ལ། བརྗོད་པ་དང་བྲལ་བ་ཀུན་གྱི་མཚན་ཉིད་དམ། ཀུན་གྱི་རྣམ་པ་སྤངས་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ལ་ཡང་
དག་པར་རྫོགས་པའི་སངས་རྒྱས་བྱང་ཆུབ་ཀྱི་ལམ་ཆེན་པོའི་རིམ་པའམ། ནམ་མཁའི་རྡོ་རྗེ་ལ་སོགས་པའི་ཐབས་ཀྱི་ཡན་ལག་དཔག་ཏུ་མེད་པ་ཐམས་ཅད་འབྲས་ཆེན་སྣོད་དུ་སྡུད་པ་ལྟར་དངོས་པོ་ཀུན་བསྡུས་པའི་ངོ་བོ་ཡིན་པ་དང་། དེ་ཤེས་པ་ལས་དངོས་པོ་མཐའ་དག་ཤེས་པར་
གྱུར་པ་ཉིད་དང་། དེ་ཉིད་ལ་མཉམ་པར་བརྟན་པའི་ཚུལ་གྱིས་མཉམ་པར་གཞག་ན་བདག་ཉིད་ཀྱི་ཕུང་པོ་དང་། ཁམས་དང་། སྐྱེ་མཆེད་ལ་སོགས་པ་རྣམ་པར་དབྱེ་བ་རིགས་ཀྱི་མཚན་ཉིད་དང་། སེམས་ཀྱི་རང་བཞིན་ཕྱིན་ཅི་མ་ལོག་པར་རིག་པར་གྱུར་པ་གང་ཡིན་པ་དེ་ལ།
བསམ་གཏན་ཡན་ལག་ཀུན་ཤེས་ཤིང་། །ཏིང་འཛིན་རིག་དང་རྒྱུད་རིག་པ། །ཞེས་བྱ་བ་ཉིད་དོ། །དེ་ལྟ་བུའི་བདེ་བ་ཆེན་པོ་ཡོངས་སུ་རྫོགས་པའི་མཚན་ཉིད་ལས་འབྲས་བུ་སྐུ་གསུམ་ཕུན་སུམ་ཚོགས་པར་བསྟན་པ་ནི། ཏིང་འཛིན་ལུས་ཅན་ལུས་ཀྱི་མཆོག །ཅེས་པ་ལ་སོགས་པ་
གསུངས་སོ། །དེ་ལ་ཆོས་ཀྱི་སྐུ་ནི་མཚན་མའི་སྤྲོས་པ་ཐམས་ཅད་དང་བྲལ་ཞིང་བདེ་བ་ཆེན་པོ་ནི་རྩེ་གཅིག་པའི་ཚུལ་གྱི་ཏིང་ངེ་འཛིན་ཡིན་ལ། དེ་བཞིན་གཤེགས་པའི་སྐུ་ཐམས་ཅད་ཀྱི་མཆོག་ཏུ་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་བཞིན་གཤེགས་པ་ཐམས་ཅད་ཀྱི་ལོངས་སྤྱོད་
རྫོགས་པའི་སྐུ་ནི་ས་བཅུའི་བྱང་ཆུབ་སེམས་དཔའ་རྣམས་ཀྱི་རྒྱལ་པོར་གྱུར་པས་ན། ལོངས་སྤྱོད་རྫོགས་སྐུ་ཀུན་གྱི་རྒྱལ། །ཞེས་བྱ་སྟེ་དེ་བཞིན་གཤེགས་པ་ཐམས་ཅད་ཀྱི་སྤྲུལ་པའི་སྐུ་ནི་ཁམས་གསུམ་གྱི་འགྲོ་བའི་སེམས་ཅན་ཐམས་ཅད་ཀྱི་དོན་ཕུན་སུམ་ཚོགས་པར་མཛད་པ་ནི། གདུལ་བྱའི་ཞིང་རྒྱ་ཆེན་པོ་ལ་མཛད་
เล่ม ๖๔ · หน้า 270b
པ་རྒྱ་ཆེན་པོར་མཛད་པའི་ཕྱིར་ན། སྤྲུལ་པའི་སྐུ་སྟེ་སྐུ་ཡི་མཆོག །ཅེས་བྱ་བ་ཉིད་དོ། །དེ་ལྟར་ལྷན་ཅིག་སྐྱེས་པ་བདེ་བ་ཆེན་པོའི་ཡེ་ཤེས་དེ་ལྟ་བུ་སྐུ་གསུམ་གྱི་བདག་ཉིད་དུ་གནས་ཤིང་། སྤྲུལ་པ་དཔག་ཏུ་མེད་པ་འབྱུང་བའི་རྒྱུར་གྱུར་པ་ནི། སངས་རྒྱས་སྤྲུལ་པའི་རྒྱུད་འཆང་བ། །ཞེས་བྱ་ཞིང་ཁམས་གསུམ་གྱི་
སེམས་ཅན་ཐམས་ཅད་བདེ་བ་ཆེན་པོའི་རང་བཞིན་གྱི་སྤྲོས་པ་མཛད་ཅིང་ཞི་བ་ལ་སོགས་པའི་ཚུལ་གྱིས་འགྲོ་བ་རྣམས་ཀྱི་དོན་ཇི་ལྟ་བ་བཞིན་དུ་མཛད་པ་ནི། ཕྱོགས་བཅུར་སྤྲུལ་པ་སྣ་ཚོགས་འགྱེད། །ཇི་བཞིན་འགྲོ་བའི་དོན་བྱེད་པ། །ཞེས་བྱ་བ་ཉིད་དོ། །ལྷ་ཡི་དབང་པོ་ལྷ་ཡི་ལྷ། །ཞེས་པ་ནི་དེ་ལ་ལྷ་ནི་བདེ་བྱེད་ལ་སོགས་
པ་ཡིན་ལ་དེའི་ལྷ་ནི་ལྷའི་དབང་པོ་བརྒྱ་བྱིན་ཡིན་ཏེ། དེའི་ལྷ་ནི་དབང་ཕྱུག་ཆེན་པོ་ཡིན་ལ། དབང་ཕྱུག་ཆེན་པོའི་ལྷ་ནི་དེ་བཞིན་གཤེགས་པ་ཉིད་དོ། །དེ་ལྟར་བདེ་བ་ཆེན་པོ་འདིས་ཀྱང་འཇིག་རྟེན་པའི་དངོས་གྲུབ་ཕུན་སུམ་ཚོགས་པ་སྟེར་བར་བྱེད་པ་དང་། འཇིག་རྟེན་ལས་འདས་པའི་དངོས་གྲུབ་དེ་
བཞིན་གཤེགས་པའི་ཕུན་སུམ་ཚོགས་པ་སྟེར་བར་བྱེད་ཅེས་བྱ་བར་དགོངས་སོ། །དེ་ལྟ་བུའི་དངོས་གྲུབ་ཕུན་སུམ་ཚོགས་པ་སྟེར་བར་བྱེད་པའི་བདག་པོར་གྱུར་པ་དང་། ལྷ་མ་ཡིན་གྱི་སྒྲས་ནི་མི་སྐྱོ་བ་ཞེས་བྱ་ལ། དེ་ལ་སྐྱོ་བ་ནི་སེམས་རང་གི་ངོ་བོ་ལས་ཕྱི་རོལ་གྱི་མི་མ་ཡིན་པ་ལ་སོགས་པས་སེམས་
བསྒྱུར་ཏེ་རྣམ་པ་གཞན་དུ་འགྱུར་བ་བྱེད་པ་ལྟར་ཐ་མལ་པའི་གནས་སྐབས་སེམས་རང་བཞིན་གྱིས་རྣམ་པར་དག་པ་ཉིད་དུ་ཕྱིན་ཅི་ལོག་གི་མངོན་པར་ཞེན་པའི་སྟོབས་ཀྱིས་གཟུང་བ་དང་འཛིན་པའི་རྣམ་པར་རྟོག་པ་དག་འགོག་པར་གྱུར་པའི་བདག་པོར་གྱུར་པ་གང་ཡིན་པ་དེ་ལ། ལྷ་ཡི་དབང་པོ་ལྷ་མིན་
བདག །ཅེས་པ་ཉིད་དེ། །འཆི་མེད་དབང་པོ་ལྷ་ཡི་བླ། །ཞེས་པ་ནི་བདེ་བ་ཆེན་པོའི་སྤྲོས་པ་དང་བྲལ་བའི་མཚན་ཉིད་ཀྱིས་རྣམ་པར་རྟོག་པའི་རྐྱེན་ལས་བྱུང་བ་འཆི་འགོག་ལྟར་བྱེད་པ་དང་། མི་འཆི་བ་ལ་དབང་བ་སྟེར་བར་བྱེད་པ་བླ་མར་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེའི་སྟོབས་ཀྱིས་བདུད་
དང་དབང་ཕྱུག་ལ་སོགས་པ་རབ་ཏུ་འཇོམས་ཤིང་ཉོན་མོངས་པ་མཐའ་དག་འཇོམས་པར་མཛད་པ་ནི། འཇོམས་བྱེད་འཇོམས་བྱེད་དབང་ཕྱུག་པོ། །ཞེས་བྱ་ལ་དེ་ཉིད་ཀྱི་སྲིད་པའི་འཇོམས་པ་ཆེན་པོ་རབ་ཏུ་རྒལ་བར་གྱུར་པ་ནི། །སྲིད་པའི་དགོན་པ་ལས་བརྒལ་བ། །ཞེས་བྱ་བ་ཉིད་དོ། །དེ་ལྟར་
เล่ม ๖๔ · หน้า 271a
ལྷན་ཅིག་སྐྱེས་པའི་ཞི་བ་གང་ཡིན་པ་དེ་ལ་བདག་ཉིད་གཅིག་པུའི་བླ་མ་ཞེས་བྱ་བ་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཡོན་ཏན་ཕུན་སུམ་ཚོགས་པ་སྟེར་བར་བྱེད་པའི་བླ་མར་གྱུར་པ་གང་ཡིན་པ་དེ་ལ། སྟོན་པ་གཅིག་པུ་འགྲོ་བའི་བླ། །ཞེས་བྱ་བ་ལ་དེ་ཉིད་སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་ཡེ་ཤེས་ཆེན་པོར་རབ་ཏུ་གནས་པར་གྱུར་པ་དང་། སངས་རྒྱས་ཀྱི་ཆོས་སྟོབས་དང་མི་འཇིགས་པ་ལ་སོགས་པ་ཐམས་ཅད་སྟེར་བར་བྱེད་པའི་ཕྱིར་བདག་པོར་གྱུར་པ་དེ་ལ། འཇིག་རྟེན་ཕྱོགས་བཅུར་རབ་གྲགས་པ། །ཆོས་ཀྱི་སྦྱིན་བདག་ཆེ་
བ་པོ། །ཞེས་བྱའོ། །བདེ་བ་ཆེན་པོ་བཞི་པ་འདི་ཉིད་དཔའ་བོ་གོ་ཆ་དང་ལྡན་པས་རབ་ཏུ་མི་ཟད་པའི་མཚོན་ཐོགས་ཏེ། ཕ་རོལ་གྱི་དཔུང་ཐམས་ཅད་འདུལ་བར་བསྟན་པ་ནི། བྱམས་པའི་གོ་ཆ་ཆས་པ་སྟེ། །ཞེས་བྱ་བ་ལ་སོགས་པ་གསུངས་ཏེ། ཁམས་གསུམ་གྱི་སེམས་ཅན་ཐམས་ཅད་ལ་རབ་
ཏུ་ཕན་པར་འདོད་པ་བདག་ཉིད་དུ་གནས་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་སེམས་ཅན་ཐམས་ཅད་ཀྱི་སྡུག་བསྔལ་ལ་ཉེ་བར་དམིགས་པ་ལ་མཎྜལ་གྱི་ཚུལ་དུ་བགོས་པས་ཐམས་ཅད་ཤེས་རབ་རལ་གྲི་དང་མདའ་གཞུའི་ཚུལ་ཐོགས་ཏེ། འདོད་ཆགས་ལ་སོགས་པ་ཉོན་མོངས་པའི་ཚོགས་ནི་རྣམ་པར་
གཡེང་བའི་ཚུལ་གྱི་གཡུལ་ངོ་ཡིན་ལ་རབ་ཏུ་སེལ་བར་མཛད་པ་གང་ཡིན་པ་དེ་ནི། སྙིང་རྗེ་ཡི་ནི་ཡ་ལད་བགོས། །ཤེས་རབ་རལ་གྲི་མདའ་གཞུ་ཐོགས། །ཉོན་མོངས་མི་ཤེས་གཡུལ་ངོ་སེལ། །ཞེས་བྱ་བ་ཉིད་དོ། །དེ་ལྟ་བུའི་བདེ་བ་ཆེན་པོ་དེ་ཉིད་གཞོམ་པའི་རྣམ་པར་རྟོག་པ་མཐའ་དག་རྟོག་པ་མེད་
པར་འཇོམས་པ་པོར་གྱུར་ཅིང་། བདག་ལ་གནོད་པར་བྱེད་པའི་བདུད་ཀྱི་དགྲ་ཐམས་ཅད་ཐུལ་བར་གྱུར་པ་དང་། ད་ལྟར་དང་མ་འོངས་པའི་དུས་སུ་བདུད་བཞིའི་འཇིགས་པ་སེལ་བར་བྱེད་པ་དང་། བདུད་ཀྱི་དཔུང་ཐམས་ཅད་ཕམ་པར་བྱེད་པས་ན། དཔའ་བོ་བདུད་དགྲ་བདུད་འདུལ་བ། །བདུད་བཞིའི་འཇིགས་
པ་སེལ་བར་བྱེད། །བདུད་ཀྱི་དཔུང་རྣམས་ཕམ་བྱེད་པ། །ཞེས་བྱ་བ་ཉིད་དོ། །དེ་ལྟ་བུའི་སྤྲོས་པ་དང་བྲལ་བའི་བདེ་བ་ཆེན་པོས་མི་མཐུན་པའི་ཚོགས་མཐའ་དག་རབ་ཏུ་བཅིལ་ནས་དེའི་སྐད་ཅིག་མའི་ཡོན་ཏན་ཆེན་པོའི་གནས་སུ་བསྟན་པ་ནི། རྫོགས་པའི་སངས་རྒྱས་འཇིག་རྟེན་འདྲེན། །ཞེས་པ་ལ་སོགས་
เล่ม ๖๔ · หน้า 271b
པ་གསུངས་ཏེ། གཉིས་སུ་མེད་པར་མངོན་པར་རྟོགས་པའི་མཚན་ཉིད་ཀྱིས་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་ཤིང་འཇིག་རྟེན་པ་ཐར་པ་ཆེན་པོའི་གྲོང་ཁྱེར་དུ་འདྲེན་པར་མཛད་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་ལ་དྲིན་ཆེན་པོའི་ཚུལ་གྱིས་སྤོས་དང་། མེ་ཏོག་
ལ་སོགས་པའི་མཆོད་པ་དང་། ཡོན་ཏན་བསྔགས་པའི་ཚུལ་གྱིས་བསྟོད་པ་དང་། ཡན་ལག་ལྔས་ཕྱག་འཚལ་བའི་གནས་སུ་གྱུར་པས་ན། མཆོད་འོས་བསྟོད་འོས་ཕྱག་གི་གནས། །ཞེས་བྱ་བ་ཉིད་དོ། །དེ་ལྟར་གཉིས་སུ་མེད་པའི་ཡེ་ཤེས་སྤྲོས་པ་དང་བྲལ་བ་གང་ཡིན་པ་དེ་
དུས་རྟག་ཏུ་ཡིད་ལ་གུས་པར་རབ་ཏུ་བྱ་བ་དང་། རྗེས་སུ་བསྔགས་པའི་ཚུལ་གྱིས་ཡོན་ཏན་གྱི་ཚོགས་བརྗོད་པར་བྱ་བ་དང་། ལུས་དང་ངག་དང་ཡིད་ཀྱིས་ཕྱག་བྱ་བའི་གནས་བླ་མའི་རབ་ཏུ་གྱུར་པ་གང་ཡིན་པ་དེ་ལ། རྟག་ཏུ་རི་མོར་བྱ་བའི་འོས། །བཀུར་འོས་མཆོད་པར་བྱ་བའི་མཆོག །
ཕྱག་བྱར་འོས་པ་བླ་མའི་རབ། །ཅེས་བྱ་བ་ཉིད་དོ། །དེ་ལྟར་བཀུར་སྟི་དང་རིམ་གྲོ་ཐམས་ཅད་ཀྱི་གནས་སུ་གྱུར་པ་དེ་ལ་ཡོན་ཏན་ཇི་ལྟ་བུ་ཞེ་ན། འཇིག་རྟེན་གསུམ་པོ་གོམ་གཅིག་བགྲོད། །ཅེས་པ་ལ་སོགས་པ་གསུངས་ཏེ། དེ་ལ་འཇིག་རྟེན་གསུམ་ནི་འདོད་པ་དང་། གཟུགས་
དང་། གཟུགས་མེད་པ་གསུམ་དང་། ས་འོག་དང་ས་སྟེངས་དང་ས་བླ་གསུམ་ཡིན། དེ་ཐམས་ཅད་བདེ་བ་ཆེན་པོའི་སྐད་ཅིག་མ་ལས་སྤྲོས་པ་དང་བྲལ་བའི་དངོས་པོ་འདོད་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་ནམ་མཁའ་ལྟར་མཐའ་ཡས་ཤིང་དཔག་ཏུ་མེད་པ་རྣམ་
པར་རྟོག་པའི་ཚོགས་མཐའ་དག་གནོན་པར་མཛད་པས་ན། མཁའ་ལྟར་མཐའ་མེད་རྣམ་པར་གནོན། །ཞེས་བྱ་བ་ལ། དེ་ཉིད་ལ་ལྷའི་མིག་གི་མངོན་པར་ཤེས་པ་དྲུག་གིས་འདས་པ་དང་། མ་འོངས་པ་དང་། ད་ལྟར་བྱུང་བའི་དུས་གསུམ་ཡང་དག་པར་རིག་པར་གྱུར་ཅིང་། སངས་
རྒྱས་རྗེས་སུ་དྲན་པ་ལ་སོགས་པ་རྗེས་སུ་དྲན་པ་དྲུག་གི་བདག་ཉིད་དུ་གནས་པ་ཡིན་པ་དེ་ལ། གསུམ་རིག་གཙང་མ་དག་པ་སྟེ། མངོན་ཤེས་དྲུག་ལྡན་རྗེས་དྲན་དྲུག །ཅེས་བྱ་བ་ཉིད་དོ། །བྱང་ཆུབ་སེམས་དཔའ་སེམས་དཔའ་ཆེ། །ཞེས་བྱ་བ་ན། དེ་ལ་སེམས་དཔའི་སྒྲས་ནི་རྟག་ཏུ་འཇུག་
เล่ม ๖๔ · หน้า 272a
པ་དང་གནས་པ་ཞེས་བྱ་བ་ལ། ཡེ་ཤེས་ཆེན་པོའི་མཚན་ཉིད་དེ་ཡང་རྟག་ཏུ་མི་འགྱུར་བར་གནས་ཤིང་འགྲོ་བའི་དོན་ལ་རྟག་ཏུ་འཇུག་པ་སྟེ། ཆོས་ཀྱི་དབྱིངས་མངོན་པར་རྟོགས་པར་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། མྱུར་བ་ཉིད་དུ་སངས་རྒྱས་ཀྱི་རྫུ་འཕྲུལ་ཆེན་པོ་འཇིག་རྟེན་པའི་ཆོས་ལས་ཡང་
དག་པར་འདས་པ་དེ་ལ། རྫུ་འཕྲུལ་ཆེན་པོ་འཇིག་རྟེན་འདས། །ཞེས་བྱའོ། །ཤེས་རབ་ཕ་རོལ་ཕྱིན་པའི་མཐའ། །ཞེས་པ་ནི། དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ནི། རྣམ་པར་རྟོག་པ་ཐམས་ཅད་དང་བྲལ་བ་ཡིན་ལ། ཡེ་ཤེས་ཀྱི་ཡུལ་དུ་གྱུར་པ་ཆོས་ཀྱི་དབྱིངས་ནི་ཡང་དག་པའི་མཐའ་ཞེས་བྱ་སྟེ། དེ་ལྟ་བུ་ཉིད་ཤེས་པར་གྱུར་པ་གཉིས་
སུ་མེད་པའི་ཡེ་ཤེས་ནི་རྣམ་པར་རྟོག་པ་དང་བྲལ་བའི་ཚུལ་གྱིས་མ་ནོར་བ་ཉིད་ཐོབ་པ་གང་ཡིན་པ་དེ་ལ། ཤེས་རབ་ཀྱིས་ནི་དེ་ཉིད་ཐོབ། །ཅེས་བྱའོ། །དེ་ལྟར་ཤེས་པ་དང་ཤེས་བྱ་གཅིག་པར་གྱུར་པ་དེས་བདག་དང་གཞན་རིག་པར་གྱུར་པ་དེ་ལ། བདག་རིག་གཞན་རིག་ཐམས་ཅད་པ། །ཞེས་བྱ་ཞིང་དེ་ལྟ་བུ་ནུས་པ་ཆེན་པོ་དང་ལྡན་པའི་མཚན་ཉིད་ཀྱི་
ཁམས་གསུམ་པ་ཐམས་ཅད་ལ་སྡུག་བསྔལ་ཉེ་བར་སྤོང་བའི་ལེགས་པའི་ལམ་བདེ་བའི་འབྲས་བུ་ཕུན་སུམ་ཚོགས་པ་འགྲོ་བ་གཞན་ལ་ཕན་འདོགས་པའི་གཙོ་བོར་གྱུར་ལ། དེ་ལྟ་བུ་ཉིད་ཁ་ཟས་ལ་སོགས་པ་ཕན་འདོགས་པའི་མཚན་ཉིད་ཀུན་གྱིས་མཚུངས་པ་མེད་ཅིང་བརྗོད་པ་དང་བྲལ་བའི་ངོ་བོར་གནས་པ་གང་ཡིན་པ་དེ་ལ། ཀུན་ལ་
ཕན་པའི་གང་ཟག་མཆོག །དཔེར་བྱ་ཀུན་ལས་འདས་པ་སྟེ། །ཞེས་བྱ་བ་ཉིད་དོ། །ཤེས་དང་ཤེས་བྱའི་བདག་པོ་མཆོག །ཅེས་བྱ་བ་ནི་དེ་ལ་ཤེས་པ་ནི་མེ་ལོང་ལྟ་བུ་ལ་སོགས་པའི་ཡེ་ཤེས་རྣམ་པ་སྣ་ཚོགས་པ་ཡིན་ལ་ཤེས་བྱ་ནི་སྟོང་པ་ཉིད་ལ་སོགས་པ་དངོས་པོ་མེད་པ་དང་། དངོས་པོའི་མཆོག་མཐའ་དག་ཡིན་ཏེ་དེ་ལྟ་
བུ་ཡུལ་དང་ཡུལ་ཅན་གྱི་བདག་པོ་གཙོ་བོར་གྱུར་པ་ནི་འབྲེལ་པ་བརྒྱུད་པའི་སྒོ་ནས་དེ་ལ་དེ་སྐད་ཅེས་བྱ་ལ། དེ་ལྟ་བུ་དེས་སངས་རྒྱས་ཆོས་ཀྱི་མཚན་དང་དཔེ་བྱད་དང་སྟོབས་དང་། མི་འཇིགས་པ་རྣམས་སྟེར་བར་བྱེད་པའི་གཙོ་བོར་གྱུར་པས་ན། གཙོ་བོ་ཆོས་ཀྱི་སྦྱིན་བདག་སྟེ། །ཞེས་བྱ་བ་ཉིད་དོ། །ཕྱག་རྒྱ་བཞི་པོའི་དོན་སྟོན་
པ། །ཞེས་པ་ནི་འཇིག་རྟེན་པའི་དངོས་གྲུབ་ཀྱི་མཚན་ཉིད་ལས་ཀྱི་ཕྱག་རྒྱ་དང་། དམ་ཚིག་གི་ཕྱག་རྒྱ་དང་། འཇིག་རྟེན་ལས་འདས་པའི་དངོས་གྲུབ་ཀྱི་མཚན་ཉིད་ཆོས་ཀྱི་ཕྱག་རྒྱ་དང་། ཕྱག་རྒྱ་ཆེན་པོ་རྣམ་པ་བཞིའི་ངེས་པ་དང་ལྡན་པའི་དོན་ཕྱིན་ཅི་ལོག་པར་སྟོན་པས་ན་དེ་སྐད་ཅེས་བྱ་ཞིང་། དེ་ཉིད་གང་
เล่ม ๖๔ · หน้า 272b
དུ་བསྟན་པ་ལྟར་བཀུར་སྟི་དང་རིམ་གྲོ་ཐམས་ཅད་ཀྱི་གནས་སམ་འོས་སུ་གྱུར་པ་གང་ཡིན་པ་དེ་ལ། འགྲོ་བའི་བསྙེན་བཀུར་གནས་ཀྱི་མཆོག །ཅེས་བྱ་ལ། ངེས་འབྱུང་གསུམ་པོ་བགྲོད་རྣམས་ཀྱིས། །ཞེས་པ་ནི་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། བྱང་ཆུབ་སེམས་དཔའི་
ཐེག་པ་རྣམ་པ་གསུམ་གྱིས་ངེས་པར་འབྱུང་བ་ཉིད་བགྲོད་པས་ན་ཐེག་པ་ཡིན་ལ་དེ་རྣམས་དོན་གྱི་དོན་ཆེན་པོ་མཆོག་ཕུན་སུམ་ཚོགས་པ་ཐམས་ཅད་ཀྱི་རྣམ་པར་དག་པའི་འབྲས་བུ་གང་ཡིན་པ་དེ་ལ། དོན་གྱི་དམ་པ་རྣམ་དག་དཔལ། །ཞེས་བྱའོ། །ཡེ་ཤེས་ཆེན་པོ་དེ་ཉིད་འདོད་པ་དང་གཟུགས་དང་གཟུགས་མེད་པའི་
ཁམས་གསུམ་དུ་དངོས་གྲུབ་ཆེན་པོ་ཡོངས་སུ་རྫོགས་པའི་སྣོད་བཟང་པོར་གྱུར་ཅིང་། དེ་ཉིད་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ནི་བདེ་བ་དང་ལྡན་པར་བྱེད་པས་ན་འབྱོར་པ་ཡིན་ལ་དེ་ཉིད་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པར་བྱེད་པ་གང་ཡིན་པ་དེ་ལ། འཇིག་རྟེན་
གསུམ་ན་སྐལ་བཟང་ཆེ། །དཔལ་ལྡན་འབྱོར་པ་ཀུན་བྱེད་པ། །ཞེས་བྱ་བ་ཉིད་དོ། །འཇམ་དཔལ་དཔལ་དང་ལྡན་པའི་མཆོག །ཅེས་བྱ་བ་འདིས་ནི་འཇམ་དཔལ་ཉིད་ངེས་པར་གཟུང་བ་སྟེ། བྱ་བ་གྲུབ་པའི་ཡེ་ཤེས་འདི་ཉིད་ཀྱང་སྟོང་པ་ཉིད་དང་སྙིང་རྗེ་དབྱེར་མེད་པའི་མཚན་ཉིད་བདེ་བ་ཆེན་པོའི་སྐུ་འཇམ་
དཔལ་ཞེས་བསྟན་པ་སྟེ། དེ་ལྟར་དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཀྱི་བདག་ཉིད་བྱ་བ་གྲུབ་པའི་ཡེ་ཤེས་ངེས་པའི་ཚུལ་དུ་བཤད་པ་སྟེ་དྲུག་པའོ།། །།ད་ནི་ཡེ་ཤེས་རྣམ་པ་ལྔ་ངོ་བོ་ལས་བྱུང་བའི་འགྲོ་བ་རྣམས་འདུལ་བའི་སྐུར་གྱུར་པ་དེ་བཞིན་གཤེགས་པ་ལྔ་ལ་བསྟོད་པ་ནི།
མཆོག་སྦྱིན་རྡོ་རྗེ་མཆོག་ཁྱོད་འདུད། །ཅེས་པ་ལ་སོགས་པ་གསུངས་ཏེ། དེ་ལ་མེ་ལོང་ལྟ་བུའི་ཡེ་ཤེས་ལས་བྱུང་བ་དེ་བཞིན་གཤེགས་པ་ཐམས་ཅད་ཀྱི་མི་བསྐྱོད་པ་ནི་རྡོ་རྗེའི་རིགས་ཀྱི་གཙོ་བོར་གྱུར་ཅིང་རྣམ་པར་དག་པའི་ཡེ་ཤེས་མཆོག་ཏུ་མི་འགྱུར་བའི་དེ་ཁོ་ན་ཉིད་སྟེར་བར་མཛད་པས་མཆོག་ཁྱོད་ཅེས་
བྱ་ལ། དེ་ལ་ཡང་དག་པར་བསྟོད་ཅེས་བྱ་བའི་ཐ་ཚིག་གོ། །དེ་ལྟ་བུའི་དེ་ཉིད་ཡང་དག་པའི་མཐར་འགྱུར་བའི་གཙོ་བོ་ཤེས་རབ་ཀྱི་ཕ་རོལ་ཏུ་ཕྱིན་པ་ལས་བྱུང་ཞིང་སྐད་ཅིག་མ་གཅིག་ལ་མངོན་པར་རྫོགས་པར་བྱང་ཆུབ་པ་དང་། རྣམ་པ་ལྔས་མངོན་པར་རྫོགས་པར་བྱང་ཆུབ་པ་དང་རྣམ་པ་ཉི་ཤུས་མངོན་
เล่ม ๖๔ · หน้า 273a
པར་རྫོགས་པར་བྱང་ཆུབ་པ་དང་། སྒྱུ་འཕྲུལ་དྲ་བས་མངོན་པར་རྫོགས་པར་བྱང་ཆུབ་པ་ལས་ཡང་དག་པར་བྱུང་ཞིང་ཁྱོད་ཅེས་བྱ་བའི་སྒྲ་ནི་དེ་ཁོ་ན་ཉིད་ཀྱི་སྒྲས་བརྗོད་ལ། དེ་ལྟ་བུའི་མཚན་ཉིད་ལ་བསྟོད་པར་གྱུར་པ་ནི། །ཡང་དག་མཐར་གྱུར་ཁྱོད་ལ་བསྟོད། །སྟོང་
ཉིད་ལས་བྱུང་ཁྱོད་ལ་བསྟོད། །སངས་རྒྱས་བྱང་ཆུབ་ཁྱོད་ལ་བསྟོད། །ཅེས་བྱ་བ་ཉིད་དོ། །སོ་སོར་རྟོག་པའི་ཡེ་ཤེས་ཀྱི་བདག་ཉིད་དེ་བཞིན་གཤེགས་པ་ཐམས་ཅད་ཀྱི་གསུང་རྣམ་པར་དག་པ་འོད་དཔག་མེད་ལ་ཡང་དག་པར་བསྟོད་པ་ནི། སངས་རྒྱས་ཆགས་པ་ཁྱོད་ལ་བསྟོད། །ཅེས་གསུངས་ཏེ།
བཅོམ་ལྡན་འདས་འོད་དཔག་ཏུ་མེད་པ་དེ་ཉིད་ཆགས་པས་འདུལ་བའི་སེམས་ཅན་རྣམས་ཀྱི་དོན་དུ་པདྨ་རིགས་ཀྱི་གཙོ་བོ་ཆགས་པ་ཆེན་པོའི་བདག་ཉིད་དུ་བཞུགས་ལ། དེ་ཉིད་བདེ་བ་ཆེན་པོའི་བདག་ཉིད་ཡིན་པས་ན། སངས་རྒྱས་འདོད་ལ་ཕྱག་འཚལ་བསྟོད། །ཅེས་བྱ་ཞིང་། དེ་ཉིད་དགྱེས་པ་ཆེན་པོ་ཉིད་དུ་
གྱུར་པ་དང་། ཐབས་དང་ཤེས་རབ་གཉིས་སུ་མེད་པའི་རོལ་པ་ཆེན་པོར་གྱུར་པ་གང་ཡིན་པ་དེ་ལ། སངས་རྒྱས་དགྱེས་པ་ཁྱོད་ལ་བསྟོད། །སངས་རྒྱས་རོལ་ལ་ཕྱག་འཚལ་བསྟོད། །ཅེས་བྱ་བ་ཉིད་དོ། །མཉམ་པ་ཉིད་ཀྱི་ཡེ་ཤེས་ཀྱི་བདག་ཉིད་ལ་དེ་བཞིན་གཤེགས་པ་ཐམས་ཅད་ཀྱི་ཡོན་ཏན་ཆེན་པོའི་སྐུ་བཅོམ་ལྡན་
འདས་རིན་ཆེན་འབྱུང་ལྡན་ལ་བསྟོད་པ་ནི། སངས་རྒྱས་འཛུམ་པ་ཁྱོད་ལ་བསྟོད། །ཅེས་གསུངས་ཏེ། འཛུམ་པ་ཞེས་པ་ནི་སངས་རྒྱས་ཀྱི་མཛད་པའི་འབྲས་བུ་གདུལ་བྱ་ལ་ངེས་པར་བརྩོན་པར་བྱ་བའི་མིང་བྱེད་པ་ལ་བཏགས་ཏེ། ང་རྒྱལ་ཆེན་པོའི་བདག་ཉིད་ཡིད་བཞིན་གྱི་ནོར་བུའི་རྒྱལ་མཚན་གྱི་
དཔལ་གྱི་ཁམས་གསུམ་པ་ཐམས་ཅད་ལ་སྦྱིན་པ་ཕུན་སུམ་ཚོགས་པར་མཛད་པས་ཡི་རངས་པའི་མཚན་ཉིད་ཀྱིས་བཞིན་རབ་ཏུ་འཛུམ་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་ལས་སྒྲ་དང་ལྡན་པའི་མཚན་ཉིད་ཀྱིས་བགད་ཅིང་བསྟོད་པའི་ཚིག་དང་ལྡན་པའི་ངག་གིས་བསྟོད་པ་ནི། ཡང་དག་པར་
རྫོགས་པའི་སངས་རྒྱས་ཐམས་ཅད་ཀྱི་ཡོན་ཏན་ལས་གྱུར་པ་ཁམས་གསུམ་པ་ཐམས་ཅད་ཀྱི་ཡི་རང་བར་བྱེད་པ་གང་ཡིན་པ་དེ་ལ། སངས་རྒྱས་བཞད་ལ་ཕྱག་འཚལ་བསྟོད། །སངས་རྒྱས་གསུང་ཉིད་ཁྱོད་ལ་བསྟོད། །སངས་རྒྱས་ཐུགས་ལ་ཕྱག་འཚལ་བསྟོད། །ཅེས་པ་ཉིད་དོ། །བྱ་བ་གྲུབ་པའི་ཡེ་
เล่ม ๖๔ · หน้า 273b
ཤེས་ཀྱི་བདག་ཉིད་ལས་དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཀྱི་སྐུ་དོན་ཡོད་གྲུབ་པ་ལ་བསྟོད་པ། མེད་པ་ལས་བྱུང་ཁྱོད་ལ་བསྟོད། །ཅེས་གསུངས་ཏེ། ཕྲག་དོག་ཆེན་པོའི་སྐུས་དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཀྱི་བྱ་བ་ཡོངས་སུ་རྫོགས་པའི་མཚན་ཉིད་གདུལ་བྱ་རྣམས་ལ་
ཕྲིན་ལས་རྣམ་པ་སྣ་ཚོགས་པ་མཛད་པའི་སྐུར་སྣང་བ་གང་ཡིན་པ་དེ་ཉིད་བྱ་བ་བྱས་པའི་ཚུལ་གང་ཡིན་པ་དེ་ལ་དེ་སྐད་ཅེས་བྱ་ཞིང་། ཐེག་པ་ཆེན་པོ་བླ་ན་མེད་པའི་དོན་ལ་ཡིད་རབ་ཏུ་མགུ་ཞིང་ཞལ་འཛུམ་པ་དང་ལྡན་པས་དཔྲལ་བར་ཐལ་མོ་སྦྱར་ཏེ་རྒྱུ་དང་ལམ་གྱི་སེམས་ཅན་ཐམས་ཅད་ཀྱི་
མགོན་པོར་གྱུར་པ་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། །འདི་སྐད་ཅེས་གསོལ་ཏོ་ཞེས་བྱ་བར་བསྟན་པ་ནི། དགའ་ཞིང་མགུ་ནས་ཐལ་མོ་སྦྱར། །མགོན་པོ་བཅོམ་ལྡན་དེ་བཞིན་གཤེགས། །རྫོགས་སངས་རྒྱས་ལ་
ཕྱག་འཚལ་ནས། །ཞེས་བྱ་བ་ཉིད་དོ། །དེ་ནི་མགོན་པོ་གསང་བའི་བདག །ཅེས་པ་ནི་ཚིག་དང་པོ་ཉེ་བར་མཚོན་པ་སྟེ། དེ་ལ་ཁམས་གསུམ་པ་ཐམས་ཅད་ཀྱི་མགོན་མཛད་པས་ན་མགོན་པོ་ཡིན་ལ། དེ་དེ་བཞིན་གཤེགས་པ་ཐམས་ཅད་ཀྱི་གསང་བའི་བདག་པོ་གང་ཡིན་པ་དེ་ལ་དེ་སྐད་ཅེས་བྱ་ཞིང་། ལག་ན་
རྡོ་རྗེ་ཁྲོ་བོའི་རྒྱལ། །ཞེས་པ་ནི། དེ་ལ་ལག་ན་རྡོ་རྗེ་ནི་གསང་བའི་བདག་པོ་ཡིན་ལ། ཁྲོ་བོའི་རྒྱལ་ཞེས་པ་ནི་མ་ནིང་གི་རྟགས་ཏེ། དངོས་གཞི་འདི་ཉིད་ལས་ངེས་པར་སྦྱར་བ་ནི་གསང་བའི་བདག་པོ་ལག་ན་རྡོ་རྗེ་ཁྲོ་བོའི་རྒྱལ་པོ་མགོན་པོ་དེ་ནི་ཞེས་བྱ་བ་དམིགས་པ་ཉེ་བར་འཛིན་པའི་ཚིག་གོ། །ཅི་གསང་
བའི་བདག་པོ་དེ་ཁོ་ནས་སམ་ཤེ་ན་མ་ཡིན་ཏེ། སྣ་ཚོགས་གཞན་དང་ལྷན་ཅིག་ཏུ། །གསང་བསྟོད་ནས་ནི་ཚིག་འདི་གསོལ། །ཞེས་གསུངས་ཏེ། རྡོ་རྗེའི་རིགས་ཀྱི་ཁྲོ་བོའི་རྒྱལ་པོ་གཞན་སྣ་ཚོགས་པ་དང་ལྷན་ཅིག་ཏུ་ཡིད་མངོན་པར་དགའ་བའི་ཚུལ་གྱིས་གཟེངས་བསྟོད་ནས། ངག་ཏུ་ཚིག་འདི་སྐད་ཅེས་བསྟོད་
དོ་ཞེས་བྱ་བ་ཉིད་དོ། །ཚིག་གི་དོན་ཇི་ལྟ་བུས་བསྟོད་ཅེ་ན། མགོན་པོ་བདག་ཅག་ཡི་རང་ངོ་། །ཞེས་པ་ལ་སོགས་པ་གསུངས་ཏེ། དེ་ལ་མགོན་པོ་ཞེས་བྱ་བ་ནི་དེ་བཞིན་གཤེགས་པ་ལ་བོད་པའི་ཚིག་ཡིན་ལ། བདག་ཅག་འཁོར་དང་བཅས་པ་ཟབ་མོའི་དོན་ལ་ཡིད་མངོན་པར་དགའོ་ཞེས་བྱ་བ་ཉིད་དོ། །
เล่ม ๖๔ · หน้า 274a
ལེགས་སོ་ལེགས་སོ་ལེགས་པར་གསུངས། །ཞེས་པ་ནི། མ་ནིང་གི་རྟགས་སྟོན་པ་རྣམས་ཀྱི་གསུམ་ལ་བསྟོད་པ་དང་། དབང་དང་གྲུབ་པ་དང་འབྲས་བུ་ལ་བསྟོད་པ་སྟེ། དེ་ལ་ཟབ་མོའི་དོན་འདི་ཉིད་དེ་བཞིན་གཤེགས་པ་རྣམས་དང་མ་འོངས་པའི་དེ་བཞིན་གཤེགས་པ་རྣམས་དང་། ད་ལྟར་
བྱུང་བའི་དེ་བཞིན་གཤེགས་པ་རྣམས་ཀྱིས་གསུངས་པ་དང་། གསུང་བར་འགྱུར་བ་ཉིད་ལེགས་སོ་ཞེས་པ་དང་། ཐོག་མར་སྐད་ཅིག་མའི་བདེ་བ་དང་ལེགས་པ་དང་། བར་དུ་དུས་ཀྱི་བདེ་བ་དང་ལེགས་པ་དང་། མཐའ་མར་རྒྱུན་གྱི་བདེ་བ་དང་ལེགས་པ་གང་ཡིན་པ་དེ་ལ་ལེགས་སོ་ཞེས་བྱ་བ་བྱིན་ཏེ། ཇི་ལྟ་བུའི་ཚུལ་གྱིས་ལེགས་
སྙམ་པ་ལ། རྣམ་གྲོལ་འབྲས་བུའི་ཚུལ་གྱིས་ནི། །འགྲོ་བ་མགོན་མེད་རྣམས་དང་ནི། །བདག་ཅག་ཡང་དག་རྫོགས་པ་ཡི། །བྱང་ཆུབ་ཐོབ་པའི་དོན་ཆེན་མཛད། །ཅེས་གསུངས་ཏེ། དེ་ལ་རྣམ་པར་གྲོལ་བའི་འབྲས་བུ་འདོད་པ་ནི་མ་ནིང་གི་རྟགས་ཅན་ཏེ། དོན་ཆེན་གཉིས་ལ་གོ་བར་བྱ་ཞིང་། དེ་བཞིན་གཤེགས་པ་ཐམས་ཅད་
ཡོངས་སུ་རྫོགས་པའི་སྐུ་མཚན་དང་དཔེ་བྱད་ཀྱིས་བརྒྱན་པ་གཟུགས་རྣམ་པ་སྣ་ཚོགས་པ་འབྱུང་བ་གང་ཡིན་པ་དེའི་དོན་དང་པོའི་ཚིག་སྟེ། སངས་རྒྱས་འབྱུང་བ་ཁྱོད་ལ་འདུད། །ཅེས་བྱ་ལ། སྤྲུལ་པའི་སྐུ་དེ་ཉིད་ཆོས་ཀྱི་སྐུ་རྣམ་རྟོག་ཐམས་ཅད་དང་བྲལ་བ་ནམ་མཁའ་ལྟར་མཐའ་ཡས་པའི་མཚན་ཉིད་ལས་བྱུང་བ། ལོངས་སྤྱོད་རྫོགས་པའི་སྐུ་
ཡེ་ཤེས་ཆེན་པོའི་རོས་ཡོངས་སུ་གང་བའི་ཏིང་ངེ་འཛིན་ཕུན་སུམ་ཚོགས་པའི་བདག་ཉིད་ལས་བྱུང་བ་གང་ཡིན་པ་དེ་ལ། ནམ་མཁའ་ལས་བྱུང་ཁྱོད་ལ་འདུད། །ཡེ་ཤེས་ལས་བྱུང་ཁྱོད་ལ་བསྟོད། །ཅེས་བྱ་བ་ཉིད་དོ། །ཆོས་ཀྱི་དབྱིངས་ཀྱི་བདག་ཉིད་དེ་བཞིན་གཤེགས་པ་ཐམས་ཅད་ཀྱི་གཏི་མུག་ཆེན་པོའི་སྐུ་རྣམ་པར་སྣང་མཛད་
ལ་བསྟོད་པ་ནི། སྒྱུ་འཕྲུལ་དྲ་བ་ཁྱོད་ལ་བསྟོད། །ཅེས་བྱ་བ་གསུངས་ཏེ། དེ་ལ་སྒྱུ་འཕྲུལ་ནི་མེད་པའི་དངོས་པོ་ལས་རྣམ་པ་སྣ་ཚོགས་པར་སྣང་བ་ཡིན་ལ། དྲ་བ་ནི་ཕྱོགས་བཞི་ཐག་པ་ལས་མདུད་པའི་ཚུལ་དུ་དཀྱིལ་ན་གནས་པ་ཕྱོགས་ཀུན་ཏུ་སྦྲེལ་བ་ཡིན་ཏེ། དེ་བཞིན་དུ་ཆོས་ཀྱི་དབྱིངས་ཡེ་ཤེས་
སྤྲོས་པ་མེད་པའི་མཚན་ཉིད་ལས་ཕྱོགས་ཐམས་ཅད་དུ་རིགས་དང་མཐུན་པའི་སྐུ་ཉེ་བར་སྟོན་པ་གསལ་ཞིང་འབར་བས་རིགས་བཞིའི་གཙོ་བོར་གྱུར་པས་དབུས་ན་བཞུགས་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་དུས་གསུམ་གྱི་སངས་རྒྱས་ཐམས་ཅད་ཀྱི་ཡབ་ཀྱི་ཚུལ་དུ་བཞུགས་པ་
เล่ม ๖๔ · หน้า 274b
དང་། དེ་བཞིན་གཤེགས་པའི་རིགས་ཀྱི་འཁོར་ལོས་སྒྱུར་བ་དང་། དེ་བཞིན་གཤེགས་པའི་རིགས་ཐམས་ཅད་ཀྱིས་གུས་པ་དང་ལྡན་པའི་ཚུལ་གྱིས་ཀུན་དུ་ཞལ་དུ་མངོན་པར་ཕྱོགས་པར་གྱུར་པ་དང་། དེ་བཞིན་གཤེགས་པ་ཐམས་ཅད་ལོངས་སྤྱོད་རྫོགས་པའི་སྐུ་བསྔགས་པ་ཆེན་པོའི་ཚུལ་གྱིས་
བསྟོད་པ་གང་ཡིན་པ་དེ་ལ་ནི། སངས་རྒྱས་རོལ་སྟོན་ཁྱོད་ལ་བསྟོད། །ཐམས་ཅད་ཐམས་ཅད་ཁྱོད་ལ་བསྟོད། །ཡེ་ཤེས་སྐུ་ཉིད་ཁྱོད་ལ་བསྟོད། །ཅེས་བྱ་བ་ཉིད་དོ། །དེ་ལྟར་རིགས་དྲུག་གི་བདག་ཉིད་ཡིན་པས་བསྡུ་བ་དང་བཅས་པ་བསྟན་ཅིང་ཐབས་དང་ཤེས་རབ་ཀྱི་སྔགས་རྣམ་པ་གཉིས་ཀྱང་སྒྲུབ་པའི་
ཐབས་ཀྱི་སྐབས་སུ་རྒྱས་པར་བསྟན་ནས། ད་ནི་དེ་བཞིན་གཤེགས་པའི་ཡང་བཀའ་ཟབ་མོའི་དོན་འདི་ཉིད་ཀྱི་ཞུ་བ་པོ་ས་བཅུའི་དབང་ཕྱུག་གསང་བའི་བདག་པོ་ལག་ན་རྡོ་རྗེ་དང་། དེའི་འཁོར་དུ་གྱུར་པ་རྡོ་རྗེ་འཆང་བ་དཔག་ཏུ་མེད་པ་རྣམས་དང་རྗེས་སུ་ཡི་རངས་ཤིང་མངོན་པར་དགའ་
བའི་ཚུལ་གྱིས་བསྟོད་པ་ནི། དེ་ནས་དཔལ་ལྡན་རྡོ་རྗེ་འཆང་། །ཞེས་པ་ལ་སོགས་པ་གསུངས་ཏེ། དེ་ལ་དེ་ནས་ཞེས་པ་ནི། བཀྲ་ཤིས་པའི་ཚུལ་གྱིས་འདས་པ་ཉེ་བར་རྫོགས་པ་སྟེ། ཤེས་རབ་ཀྱི་སྔགས་བརྗོད་པ་རྫོགས་པའི་རྗེས་ལ་ཞེས་བྱ་བ་ཡིན་ལ། དཔལ་དང་ལྡན་པ་
དང་། རྡོ་རྗེ་འཆང་ནི་གོང་དུ་བཤད་ཟིན་ལ། དོན་གྱིས་ན་གསང་བའི་བདག་པོ་ལག་ན་རྡོ་རྗེ། འགྲོ་བ་མགོན་མེད་པ་ནི་མི་ལ་སོགས་པ་ངན་འགྲོའི་རྒྱུད་དང་ལྡན་པ་ཐམས་ཅད་ཡིན་ལ། བདག་ཅག་ཅེས་པ་ནི་གསང་བའི་བདག་པོ་ལ་སོགས་པ་རྣམས་ཡོངས་སུ་རྫོགས་པའི་འབྲས་བུའི་མཚན་ཉིད་ཡིན་
ཡང་། གདུལ་བྱའི་དོན་དུ་རྒྱུ་ལ་རག་ལས་པ་ལྟར་བསྟན་པ་ནི་དེ་རྣམས་དང་བདག་ཅག་ཡང་དག་པར་རྫོགས་པའི་བྱང་ཆུབ་ཐོབ་པར་བྱེད་པའི་དོན་ཆེན་པོ་མཛད་ཅེས་བྱ་བ་ཉིད་དོ། །དེ་ལ་རྩ་བའི་རྒྱུད་ལས་གང་གསུངས་སྙམ་པ་ལ། །སྒྱུ་འཕྲུལ་དྲ་བའི་ཚུལ་བསྟན་པ། །ཞེས་གསུངས་ཏེ། མཚན་ཡང་དག་པར་བརྗོད་པ་
འདི་ཉིད་རྒྱུད་ཆེན་པོ་སྟོང་ཕྲག་བཅུ་དྲུག་པ་སྒྱུ་འཕྲུལ་དྲ་བའི་ཚུལ་ཇི་ལྟ་བ་བཞིན་དུ་བསྟན་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་རྣམ་པར་དག་པའི་དྲི་མ་དང་བྲལ་བའི་ལམ་དུ་གྱུར་པ་དང་རྟོགས་པར་དགའ་ཞིང་འབྲས་བུའི་དོན་རྒྱ་ཆེན་པོར་གྱུར་པ་དང་ལྡན་པ་དང་། བདག་གི་དོན་ཕུན་སུམ་ཚོགས་པ་དང་།
เล่ม ๖๔ · หน้า 275a
གཞན་གྱི་དོན་ཕུན་སུམ་ཚོགས་པ་གྲུབ་པ་དེ་ཉིད་ཟབ་མོའི་དོན་འདི་སྟེ། འདི་ནི་རྣམ་དག་ལེགས་པའི་ལམ། །ཟབ་ཅིང་ཡངས་ལ་རྒྱ་ཆེ་སྟེ། །དོན་ཆེན་འགྲོ་བའི་དོན་བྱེད་པ་ཉིད་དོ། །སངས་རྒྱས་རྣམས་ཀྱི་ཡུལ་འདི་ནི། །ཞེས་བྱ་བ་ནི་དེ་ལ་ཡུལ་ནི་འདོད་པའི་ཡུལ་ཡིན་
ལ་དེ་བཞིན་དུ་འདོད་པའི་དོན་འདི་ཉིད་དུས་གསུམ་ན་བཞུགས་པའི་སངས་རྒྱས་ཐམས་ཅད་ཀྱི་འདོད་པར་བྱ་བའི་ཡུལ་ཡིན་པས་ན་དེ་སྐད་ཅེས་བྱ་ཞིང་། འདི་ཉིད་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱིས་བཤད་པས་ན། རྫོགས་པའི་སངས་རྒྱས་ཀུན་གྱིས་བཤད། །ཅེས་བྱ་བ་ཉིད་དོ། །དེ་
ལྟར་ཡོངས་སུ་རྫོགས་པ་ཟབ་མོའི་དོན་དེ་ཆོས་ཀྱི་དབྱིངས་དང་། ཡེ་ཤེས་གཉིས་སུ་མེད་པ་དོན་དམ་པ་ཉིད་ཡང་དག་པར་གླུར་བླངས་པ་གང་ཡིན་པ་དེ་ནི་མཚན་བཅོམ་ལྡན་འདས་འཇམ་དཔལ་ཡེ་ཤེས་སེམས་དཔའི་དོན་དམ་པའི་མཚན་ཡང་དག་པར་བརྗོད་པ་ཞེས་བྱ་ལ། འདི་ཉིད་
བཅོམ་ལྡན་འདས་ཤཱཀྱ་ཐུབ་པས་གསུངས་པས་སོ་ཞེས་བྱ་བ་ཉིད་དོ། །རྫོགས་ལྡན་སངས་རྒྱས་ཐམས་ཅད་ཀྱིས། །དོན་དམ་སྙིང་པོ་གཙོར་གྱུར་པ། །སྒྲིབས་གཡོགས་སྐྱེ་བོ་ཐམས་ཅད་ཀྱི། །མུན་པ་བསལ་ཕྱིར་ལེགས་བྱས་པའི། །དགེ་བ་རྒྱ་ཆེན་གང་ཐོབ་དེས། །འགྲོ་བ་སྐྱེ་བའི་ཚོགས་ཀུན་དང་། །
བདག་ཉིད་དྲི་མ་གསུམ་སྤངས་ནས། །བདེ་ཆེན་རྡོ་རྗེ་འཛིན་གྱུར་ཅིག །བསྟན་བཅོས་འདི་ཡི་ཚད་གྱུར་པ། །ཚིགས་སུ་བཅད་པ་སྟོང་དང་ནི། །དྲུག་བརྒྱ་ལྔ་བཅུ་ཐམ་པར་བསྒྱུར། །མཚན་ཡང་དག་པར་བརྗོད་པའི་འགྲེལ་པ། སློབ་དཔོན་ཆེན་པོ་ཕྱག་རྒྱ་ཆེན་པོའི་དངོས་གྲུབ་བརྙེས་པ་
ཌོམྦི་ཧེ་རུ་ཀའི་ཞལ་སྔ་ནས་མཛད་པ་རྫོགས་སོ།། །།བོད་ཀྱི་ལོ་ཙཱ་བ་ཁྱུང་གྲགས་ཀྱིས་བསྒྱུར་བར་གྲགས་པའོ། །ས་ཕོ་སྤྲེའུ་དཔྱིད་ཟླ་ཐ་ཆུངས་ཡར་གྱི་ངོ་ཚེས་བཅོ་ལྔ་ལ། གཟའ་མིག་མར་གྱི་ཉིན་པར་དབང་ཕྱུག་དམ་པའི་མངའ་བདག་དཔལ་ལྷ་བཙན་པོ་ཁྲི་དབང་ཕྱུག་རིན་པོ་ཆེ་དོན་ཐམས་ཅད་སྒྲུབ་པའི་བཀའ་ལུང་གིས།
རྒྱལ་མོ་སུམ་བུ་བྲ་ལུན་གྱི་འོད་ཟེར་གྱིས་སྐུ་གཉེར་མཛད་ནས། བཀྲ་ཤིས་ཀྱི་གདན་ས་ཆེན་པོ། །ཙོང་ཀ་སེར་ཏོ་བླ་ཁར་གྱི་ནང་དུ་བོད་ཀྱི་ལོ་ཙཱ་བ་ཁྱུང་གྲགས་ཀྱིས་འཇམ་དཔལ་སྒྱུ་འཕྲུལ་དྲ་བ་བསྒྱུར་ཞིང་གཏན་ལ་ཕབ་པའོ།། །།
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด