རྡོ་རྗེ་སློབ་དཔོན་གྱི་བྱ་བ་ཀུན་ལས་བཏུས་པ

ชื่อสันสกฤต (อักษรทิเบต ตามตัวบท) བཛྲ་ཙཱ་ཪྻ་ཀྲྀ་ཡ་ས་མུཙྪ་ཡ

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

เล่ม ๗๖ · หน้า 207a

རྟེན་ནོ། །བྷུ་ཝ་ཞེས་པ་རླུང་གི་དཀྱིལ་འཁོར་ལ་སོགས་པ་འཁོར་དང་བཅས་པའི་ས་འོག་གོ། །སྭཿཞེས་པ་ནི་མཐོ་རིས་ཏེ་འདུ་ཤེས་མེད་མིན་སྐྱེ་མཆེད་ཀྱི་མཐར་ཐུག་པའོ། །དེ་གསུམ་ཆར་ཡང་ཁྱོད་ཡིན་ཏེ། གང་གི་ཕྱིར་དེ་རྣམས་ཀྱི་རང་བཞིན་ཏེ་དེ་ཁོ་ན་ཉིད་ཀྱི་

དམ་ཚིག་སྟེ་རབ་ཏུ་དགའ་བའི་ས་ལ་སོགས་པ་རིམ་གྱིས་རྟོགས་པར་ནུས་པ་ཉིད་ཀྱི་ཕྱིར་རོ་ཞེས་པ་ནི། ས་མ་ཡ་སྟྭཾ་བྷུརྦྷུ་ཝ་སྭཿཞེས་པ་འདིའི་དོན་ཏོ། །ཆོ་ག་ཇི་ལྟ་བ་བཞིན་དུ་དངོས་གྲུབ་བསྒྲུབས་ཏེ་ཆོས་བསྟན་པ་ལ་སོགས་པ་རྣམས་ཀྱིས་སེམས་ཅན་གྱི་དོན་གྱིས་ཤིག་ཅེས་པ་ནི་རྗེས་སུ་

གནང་བའོ། །ཁྱོད་ཀྱིས་འདོད་པ་རྣམས་ལ་ཉེ་བར་ལོངས་སྤྱོད་ཀྱང་སྒྲིབ་པ་ཐམས་ཅད་ལས་ངེས་པར་གྲོལ་བའི་སངས་རྒྱས་ཉིད་དེ་རང་ངོ་ཞེས་དཀྱིལ་འཁོར་དུ་འཇུག་པ་ལ་སོགས་པ་བྱས་པས་རྒྱས་པར་འོས་པ་ལ་མངོན་པར་སྦྱོར་བ་རྟོགས་པར་བྱ་བའི་ཆེད་དུ་དབུགས་དབྱུང་བའོ། །ཕྱི་དང་གསང་བ་དང་དེ་ཁོ་

ཉིད་ཀྱི་དམ་ཚིག་གསུམ་བསྲུང་བའི་དོན་དུ་དམ་ཚིག་བསྒྲག་པའི་ཆོ་གའོ། །རྡོ་རྗེའི་བརྟུལ་ཞུགས་ལ་སོགས་པ་ལྔ་པོ་འདི་རྣམས་ཀྱང་སློབ་དཔོན་གྱི་དབང་གི་རྗེས་དང་། རིག་པའི་དབང་གི་རྗེས་ལ་དེ་དང་དེ་ཙམ་གྱིས་ཚིམ་པ་རྣམས་ལ་ཤེས་པར་བྱའོ་ཞེས་པ་ནི་ཁ་ཅིག་ཏུའོ། །སྔགས་དང་མིག་སྨན་

དང་མེ་ལོང་དང་མདའ་འཕང་བ་རྣམས་ནི་རིག་པའི་དབང་གི་རྗེས་ལའོ། །རིག་མའི་བརྟུལ་ཞུགས་ནི་ཤེས་རབ་དང་ཡེ་ཤེས་ཀྱི་དབང་བསྐུར་བའི་རྗེས་ལ་ཡང་ཁ་ཅིག་ཏུའོ། །ཁ་ཅིག་ཏུ་ནི་སླར་ཡང་སྔགས་ལ་སོགས་པ་དང་སྤྱོད་པའི་བརྟུལ་ཞུགས་དང་། སྤྱིར་རྗེས་སུ་གནང་བ་དང་དམ་ཚིག་གསུམ་ནི་

སྐལ་བ་དང་ལྡན་པ་རྣམས་ལའང་མ་བཤད་དེ། ཇི་ལྟར་རིགས་པར་དབང་གཞན་རྣམས་སུ་དེ་དང་དེའི་དོན་ཡོད་པ་རྣམས་ལ་དགོངས་པས་སོ། །ཁ་ཅིག་རྗེས་སུ་གནང་བ་དང་དབུགས་དབྱུང་བ་དག་གི་ཕྱིར་མི་ལྡོག་པའི་དབང་དུ་བསྡུས་ཏེ། འདིར་ནི་ཐམས་ཅད་ཐ་དད་དུ་བརྗོད་དོ། །གང་ཡང་

མཁའ་འགྲོ་མ་རྡོ་རྗེའི་གུར་ལས། དང་པོ་ཆུ་ཡི་དབང་ཡིན་ཏེ། །གཉིས་པ་ཅོད་པན་གྱི་ནི་དབང་། །གསུམ་པ་རྡོ་རྗེའི་དབང་ཡིན་ཏེ། །བཞི་པ་རང་གི་བདག་པོ་ཡིན། །ལྔ་པ་མིང་གི་དབང་ཡིན་ཏེ། །དྲུག་པ་རྫོགས་པའི་སངས་རྒྱས་དབང་། །བུམ་པའི་དབང་ནི་བདུན་པ་སྟེ། །བརྒྱད་པ་

เล่ม ๗๖ · หน้า 207b

གསང་བའི་དབང་ཡིན་ནོ། །དགུ་པ་ཤེས་རབ་དབང་བསྐུར་ཏེ། །དེ་ཉིད་རྡོ་རྗེའི་སྦྱོར་བ་ཡིས། །ཀུན་དུ་རྡོ་རྗེའི་བརྟུལ་ཞུགས་སྦྱིན། །རང་ཉིད་སྟོན་པས་ལུང་སྟོན་ཏེ། །འདི་དག་དབང་མཆོག་རིམ་པའོ། །ཞེས་གསུངས་ཤིང་འདི་ཉིད་བརྟག་པའི་རྒྱལ་པོ་གཉིས་པར་ཡང་། །སློབ་དཔོན་གསང་

བ་ཤེས་རབ་དང་། །བཞི་པ་དེ་ཡང་དེ་བཞིན་ནོ། །ཞེས་གསུངས་སོ། །དེ་ལ་ཆུ་དང་ཅོད་པན་དང་རྡོ་རྗེ་དང་བདག་པོ་དང་མིང་དང་སློབ་དཔོན་གྱི་དབྱེ་བ་དྲུག་ནི་བུམ་པའི་དབང་སྟེ། ཐམས་ཅད་དུ་དེ་བཞིན་གཤེགས་པ་རྣམས་དང་སྤྱན་མ་ལ་སོགས་པའི་རིམ་པ་རྣམས་ཀྱིས་བུམ་པས་མངོན་པར་དབང་

བསྐུར་བའི་ཕྱིར་རོ། །སློབ་དཔོན་གྱི་དབང་ནི་མཆོག་ཏུ་ཉེ་བར་བླང་བར་བྱ་བ་ཉིད་ཀྱིས་ཕུལ་དུ་བྱུང་བ་དང་བཅས་པར་དབང་བསྐུར་བའི་ཕྱིར། བུམ་པའི་དབང་ནི་བདུན་པ་སྟེ། །ཞེས་གསུངས་ལ། སློབ་དཔོན་གྱི་དབང་དེ་འབྱུང་བའི་རྒྱུ་ཡིན་པས་ཆུའི་དབང་ལ་སོགས་པ་ལྔ་ཡང་སློབ་དཔོན་གྱི་དབང་དུ་བརྗོད་དེ།

དེས་ན་ཐམས་ཅད་ལ་འགལ་བ་མེད་དོ་ཞེས་པ་འདི་ནི་གཞན་དབང་བསྐུར་བའི་ཆོ་གའོ།། །།རང་ཉིད་ཀྱང་དམ་ཚིག་ཉམས་ན་འདི་ལྟ་བུའི་དབང་བསྐུར་བ་ཉིད་ཇི་ལྟར་སློབ་དཔོན་འཇུག་པའི་ཆོ་གར་གཟུང་ཞིང་བཤད་པ་དེ་བཞིན་དུ་བླང་བར་བྱའོ། །འོན་ཀྱང་གལ་ཏེ་བླ་མ་དམ་པ་དང་ཤིན་ཏུ་རིང་བ་དང་ལམ་

བགྲོད་དཀའ་བ་ལ་སོགས་པའི་ཉེ་བར་འཚེ་བས་བགྲོད་མི་ནུས་པའི་ཕྱོགས་ན་གནས་པ་སྟེ་གཞན་དུ་མ་ཡིན་ནོ། །རྟག་ཏུ་ཡི་དམ་བྱེད་པ་ནི་ཤེས་རབ་དང་ཐབས་རོ་གཅིག་པར་རང་གི་འདོད་པའི་ལྷའི་རྣལ་འབྱོར་གྱི་ཡིད་ཀྱིས་རང་བཞིན་གྱི་དཀྱིལ་འཁོར་བསྒོམས་ནས་དཀྱིལ་འཁོར་གྱི་དབང་ཕྱུག་ལས་

ཆུའི་དབང་ལ་སོགས་པ་དང་གསང་བ་དང་ཤེས་རབ་ཡེ་ཤེས་དང་བཞི་པའི་མཐར་ཐུགས་པ་རྣམས་དང་དབུགས་དབྱུང་བའི་མཐར་ཐུག་པ་བླང་བར་བྱའོ་ཞེས་པ་རང་དབང་བསྐུར་བའི་ཆོ་གའོ།། །།རྡོ་རྗེ་སེམས་དཔའི་སྡོམ་པ་དང་ལྡན་པ་འདིའི་ཡང་ལྟུང་བ་ནི་རིགས་རྣམ་པ་གཉིས་ཏེ།

རྩ་བའི་ལྟུང་བ་དང་སྦོམ་པོའི་ལྟུང་བའོ། །དེ་རྣམས་ཇི་ལྟར་ན། །བླ་མ་དམ་པའི་ཐུགས་དཀྲུགས་པ། །རྩ་བའི་ལྟུང་བ་དང་པོར་གསུངས། །བདེ་གཤེགས་བཀའ་ལས་འདས་པ་ནི། །ལྟུང་བ་གཉིས་པར་བརྗོད་པ་ཡིན། །རྡོ་རྗེ་སྤུན་ལ་ཁྲོས་པ་ཡིས། །ཉེས་པ་གསལ་བྱས་

เล่ม ๗๖ · หน้า 208a

གསུམ་པ་སྟེ། །སེམས་ཅན་རྣམས་ལ་བྱམས་པ་སྤོང་། །བཞི་པ་ཡིན་པར་རྒྱལ་བས་གསུངས། །ཆོས་ཀྱི་རྩ་བ་བྱང་ཆུབ་སེམས། །དེ་སྤོང་བ་ནི་ལྔ་པ་སྟེ། །རང་དང་གཞན་གྱི་གྲུབ་པའི་མཐའི། །ཆོས་ལ་སྨོད་པ་དྲུག་པ་ཡིན། །ཡོངས་སུ་མ་སྨིན་སེམས་ཅན་ལ། །གསང་བ་སྒྲོགས་པ་

བདུན་པ་སྟེ། །ཕུང་པོ་ལྔ་བདག་སངས་རྒྱས་ཉིད། །དེ་ལ་སྨོད་པ་བརྒྱད་པའོ། །རང་བཞིན་དག་པའི་ཆོས་རྣམས་ལ། །སོམ་ཉི་ཟ་བ་དགུ་པ་སྟེ། །གདུག་ལ་རྟག་ཏུ་བྱམས་ལྡན་པར། །བྱེད་པ་དེ་ནི་བཅུ་པའོ། །ཐོག་མཐའ་བྲལ་བའི་ཆོས་རྣམས་ལ། །དེར་རྟོག་པ་ནི་བཅུ་གཅིག་པ། །སེམས་ཅན་དད་

དང་ལྡན་པ་ཡི། །སེམས་སུན་འབྱིན་པ་བཅུ་གཉིས་པ། །དམ་ཚིག་རྫས་ནི་ཇི་བཞིན་རྙེད། །མི་བསྟེན་པ་ནི་བཅུ་གསུམ་པ། །ཤེས་རབ་རང་བཞིན་བུད་མེད་ལ། །སྨོད་པར་བྱེད་པ་བཅུ་བཞི་པ། །ཞེས་པ་ནི་རྩ་བའི་ལྟུང་བའོ། །རྣལ་འབྱོར་སྡོམ་ལྡན་རྣལ་འབྱོར་མར། །རྣལ་འབྱོར་པ་གང་

སྟོབས་ཀྱིས་གཙེ། །སྦོམ་པོའི་ལྟུང་བ་དང་པོར་བཤད། །དེ་ལ་མཐོ་བཙམས་པ་ཡང་ངོ་། །རྒྱུད་ལས་གསུངས་པའི་རྗེས་འབྲངས་ནས། །བྱིན་རླབས་མེད་པའི་བདུད་རྩི་ཡང་། །དེ་ཡི་སྦོམ་པོའི་ལྟུང་བ་ནི། །གཉིས་པ་རབ་ཏུ་སྐྱེ་བར་བྱེད། །ཚོགས་ཀྱི་འཁོར་ལོར་རྩོད་པ་དང་། །དམ་ཚིག་ལ་ནི་

དམོད་པ་དག །རྣལ་འབྱོར་པ་དེའི་སྦོམ་པོ་ཡི། །ལྟུང་བ་གསུམ་པར་བཤད་པ་ཡིན། །གང་ཚེ་གསང་བའི་ཆོས་མཐོང་ལ། །གཡོ་སྒྱུའི་བློ་ཡིས་མི་སྦེད་པར། །རབ་ཏུ་གསལ་བར་བྱ་ན་དེའི། །སྦོམ་པོའི་ལྟུང་བ་བཞི་པར་འགྱུར། །གང་ཞིག་དད་པའི་སེམས་ཅན་ནི། །གསང་བའི་ཆོས་ལ་

དགའ་བ་ཡི། །ཕྱིན་ཅི་ལོག་ནི་འཆད་བྱེད་པ། །སྦོམ་པོའི་ལྟུང་བ་ལྔ་པར་འགྱུར། །ཉན་ཐོས་ཐེག་པ་དམན་པ་རྣམས། །ཞག་བདུན་ལྷན་ཅིག་གནས་པ་དང་། །དེ་ལ་སྦོམ་པོའི་ལྟུང་བ་ནི། །ཤིན་ཏུ་ལྕི་བ་དྲུག་པ་སྐྱེ། །རྣལ་འབྱོར་ངེས་པར་མི་ཤེས་པར། །རྣལ་འབྱོར་མངོན་པའི་ང་

རྒྱལ་སེམས། །དེ་ཡི་སྦོམ་པོའི་ལྟུང་བ་ནི། །བདུན་པར་འགྱུར་བར་ཐེ་ཚོམ་མེད། །སྣོད་དུ་གྱུར་པའི་སེམས་ཅན་གང་། །ཕྱི་ཡི་ཆོས་ལ་དགའ་བ་ལ། །གསང་བའི་ཆོས་རྣམས་ཡང་དག་འཆད། །དེ་ཡི་སྦོམ་པོའི་ལྟུང་བ་ནི། །བརྒྱད་པ་ཉིད་དུ་འགྱུར་བ་ཡིན། །ཞེས་པ་ནི་སྦོམ་

เล่ม ๗๖ · หน้า 208b

པོའི་ལྟུང་བའོ། །དེའི་ཕྱིར་ལྟུང་བ་གཉིས་ཀྱིས་གཟུང་བས་དམ་ཚིག་མེད་ན་ཇི་ལྟར་ནུས་པའི་སྟོན་མོ་སྦྱིན་པ་སྔོན་དུ་འགྲོ་བའི་འབུལ་བ་བྱས་ནས་བླ་མ་དམ་པའི་མདུན་དུ་སྡིག་པ་བཤགས་པ་དང་སྔར་གྱི་གསུམ་ལ་སྐྱབས་སུ་འགྲོ་བ་ལ་སོགས་པ་བརྩམས་ཏེ་སྔར་བཞིན་དུ་རྡོ་རྗེ་འཛིན་པའི་སྡོམ་པ་གཟུང་བར་

བྱའོ་ཞེས་པ། གདམས་པ་དང་བཅས་ཤིང་འཁོར་དང་བཅས་པའི་དབང་གི་ཆོ་གའོ།། །།འདིར་ཞི་བ་ལ་སོགས་པའི་དོན་དུ་སྦྱིན་སྲེག་བྱའོ་ཞེས་སྔར་གསུངས་ཏེ། དེས་ན། དཀྱིལ་འཁོར་སྦྱིན་སྲེག་དང་བྲལ་བའི། །རབ་གནས་འདིར་ནི་བསྟན་པ་མེད། །དེའི་ཕྱིར་སློབ་མར་ཕན་འདོད་པས། །སྦྱིན་

སྲེག་ཆོ་ག་ཡང་དག་བྱ། །སེམས་ཅན་དབྱེ་བས་མཐའ་ཡས་ཏེ། །རིགས་ཀྱི་དབྱེ་བས་རྣམ་པ་ལྔ། །ལས་ཀྱི་དབྱེ་བས་རྣམ་པ་བཞི། །ཐབ་ཁུང་ཞེས་བྱའི་མཚན་ཉིད་འདི། །རྣམ་མང་བརྗོད་པ་ཡོངས་སྔངས་ནས། །དེ་ནི་བདག་གིས་ལེགས་བསྡུས་ཏེ། །ཞི་བ་ལ་སོགས་རབ་དབྱེ་བས། །

ཐབ་ཁུང་མཚན་ཉིད་བརྗོད་པར་བྱ། །ཞི་བའི་ཐབ་ཁུང་ཟླུམ་པ་སྟེ། །ཁ་ཁྱེར་འདམ་སྐྱེས་གེ་སར་བཅས། །དབུས་སུ་ཆུ་སྐྱེས་འདབ་བརྒྱད་དང་། །སོར་བརྒྱད་པ་ཡི་འཁོར་ལོ་དགོད། །རྒྱར་ནི་ཀུན་ནས་ཁྲུ་གང་བ། །སོར་བཞི་ཡང་དག་སྤངས་བའོ། །ཁ་ཁྱེར་ལ་ནི་སོར་བཞི་སྟེ། །རྒྱ་

ནི་དཔངས་ཀྱི་ཚད་ཡིན་ནོ། །རྒྱས་པ་ལ་ནི་གྲུ་བཞི་འམ། །གང་ཡང་ཟུར་བརྒྱད་ཁྲུ་དོ་པ། །ཀུན་ནས་སོར་བརྒྱད་སྤངས་པར་ཏེ། །དབུས་སུ་ཆུ་སྐྱེས་འདབ་བརྒྱད་ལ། །སོར་དྲུག་པ་ཡི་རིན་པོ་ཆེ། །རྒྱར་ནི་དཔངས་ཀྱི་ཚད་ལྡན་པའི། །སོར་མོ་བརྒྱད་པའི་ཁ་ཁྱེར་གྱིས། །ཀུན་

ནས་ཡོངས་སུ་འཁོར་བའོ། །དབང་ལ་ཞི་རྒྱས་ཐབ་དེ་བཞིན། །ཅུང་ཟད་ཁ་ནི་རྒྱས་པའོ། །སྟེགས་བུ་ལ་སོགས་ཞི་བ་ཡི། །ཐབ་ཁུང་བཞིན་དུ་བཤད་པར་བྱ། །དགུག་པ་ལ་ཡང་དེ་བཞིན་འདོད། །པདྨའི་དབུས་སུ་དབང་ལ་ནི། །བྷ་ག་ལྟ་བུ་འདོད་པ་སྟེ། །དགུག་པའི་

དབུས་སུ་ལྕགས་ཀྱུ་དགོད། །རྡོ་རྗེ་རྩེ་གཅིག་རྣམ་པ་ཅན། །མངོན་སྤྱོད་ལ་ནི་བརྗོད་པར་བྱ། །རྩུབ་ཅིང་གསེག་མའི་ས་གཞིའི་ཆར། །ཐབ་ཁུང་གྲུ་གསུམ་རྒྱ་ལ་ནི། །སོར་མོ་ཉི་ཤུ་པ་ཡི་ཚད། །སོར་མོ་གསུམ་ནི་སྤངས་པ་སྟེ། །རྒྱ་དང་དཔངས་ནི་ཚད་མཉམ་པ། །ཕྱི་

เล่ม ๗๖ · หน้า 209a

རོལ་ཁ་ཕྱིར་གཞོལ་གྱུར་བའི། །ཁ་ཁྱེར་སོར་མོ་གསུམ་པའོ། །མཐིལ་དབུས་རྩེ་གསུམ་ལ་གནས་པའི། །རྡོ་རྗེ་རྣོན་པོ་སོར་བརྒྱད་པའི། །རྩེ་མོ་བྱང་དུ་ཕྱོགས་པ་སྟེ། །རོ་བསྲེགས་ཐལ་བ་རྔ་མོའི་བྲུན། །མེ་ཏོག་དྲི་ངན་ལ་སོགས་གཏོར། །ལས་ཀུན་པ་ཡི་ཐབ་ཁུང་

ནི། །ཞི་བའི་ཐབ་དང་མཉམ་པ་སྟེ། །འོན་ཀྱང་རབ་རྒྱས་པདྨ་འདྲ། །ཁ་ཁྱེར་རྡོ་རྗེ་ཕྲེང་བས་བསྐོར། །དབུས་སུ་མཉམ་པར་གནས་པ་ནི། །རྡོ་རྗེ་རིན་ཆེན་ཆུ་སྐྱེས་དང་། །སྣ་ཚོགས་རྡོ་རྗེས་ཡོངས་བསྐོར་དག །འཁོར་ལོ་རྩིབས་བརྒྱད་མཛེས་པའོ། །ཞི་དང་དབང་གི་ཐབ་ནི་ཤར། །རྒྱས་

པ་བྱང་གི་ཕྱོགས་སུ་སྟེ། །ལྷོ་ཕྱོགས་སུ་ནི་དགུག་པ་བཤད། །གཤིན་རྗེའི་ཕྱོགས་སུ་མངོན་སྤྱོད་དོ། །ཞི་དང་རྒྱས་དང་དེ་བཞིན་དུ། །དབང་དང་མངོན་སྤྱོད་ཐབ་ཀྱི་སར། །བྱུག་པ་འཇིམ་པ་མེ་ཏོག་དྲི། །དཀར་སེར་དམར་པོ་ནག་པོའོ། །རྒྱ་ཡི་ཆ་ཡི་ཚད་གང་ཡིན། །དེ་ཡི་ཕྱེད་ན་

ཟབས་སུ་འདོད། །རང་རང་ཐབ་དབྱིབས་ཁ་ཁྱེར་ཏེ། །ས་སོགས་མ་ལུས་དབང་བཞིན་ནོ། །ལས་ཀྱི་དབྱེ་བས་ཐབ་རྣམས་ལ། །རྡུལ་ཚོན་རང་བཞིན་དགྲམ་པར་བྱ། །སློབ་དཔོན་ལ་ཡང་དེ་དང་དེའི། །ཡོལ་བ་ལ་གནས་དུས་ལྡན་འགྱུར། །ཞེས་པ་ཐབ་ཁུང་གི་ཆོ་གའོ།། །།དགང་

གཟར་གསེར་དང་ཟངས་ལས་བྱས། །དེ་བཞིན་ནིམ་པའི་རང་བཞིན་བསྟན། །མཆོད་སྦྱིན་ཤིང་ལས་བྱས་པའང་རུང་། །དེ་དག་གི་ཡང་ཡུ་བ་ནི། །སོར་མོ་ཉི་ཤུ་རྩ་བཞི་པའི། །ཚད་ཅན་ཟླུམ་པོར་འདོད་པ་སྟེ། །རྡོ་རྗེ་ལ་སོགས་ཁུ་ཚུར་གྱིས། །གཟུང་དུ་རུང་ཞིང་སྦོམ་པ་ཉིད། །ཡུ་

བའི་རྩེ་མོར་འདབ་མ་ནི། །སོར་བཞི་པ་སྟེ་གྲུ་བཞིའོ། །ཟབས་སུ་སོར་གཉིས་གྲུ་བཞི་ཡང་། །དབུས་སུ་རྡོ་རྗེས་མཚན་པ་ཉིད། །དགང་གཟར་རྩེ་མོར་བུག་པ་ནི། །སོར་གང་ཙམ་དུ་རབ་བསྟན་པའོ། །ཆུ་སྐྱེས་འདབ་ལ་སོར་བཞི་པའི། །དབུས་སུ་རྩེ་གསུམ་དགོད་པར་བྱ། །ཡུ་

བའི་རྩ་བར་སོར་དྲུག་པའི། །རྡོ་རྗེ་རིན་ཆེན་གྱིས་མཚན་འདོད། །བླུགས་གཟར་ཡུ་བ་དགང་གཟར་བཞིན། །རྩ་བར་རྡོ་རྗེའི་དབྱུག་པ་ཉིད། །བླུགས་གཟར་ཀུན་དུ་ཁྲུ་གང་ཙམ། །རྩེ་མོར་ཀུན་ནས་སོར་གཉིས་པའི། །ཆུ་སྐྱེས་འདབ་མའི་རྣམ་པ་སྟེ། །དབུས་སུ་རྡོ་རྗེ་དགོད་

เล่ม ๗๖ · หน้า 209b

པར་བྱ། །དགང་གཟར་བླུགས་གཟར་མེད་གྱུར་ན། །སོར་མོ་ལྔ་དང་གསུམ་པོ་ཡང་། །རབ་ཏུ་སྦྱར་བ་དག་གིས་ནི། །བདེ་ལེགས་རྫོགས་པར་གཞན་དག་གསུངས། །ཞེས་པ་དགང་གཟར་དང་བླུགས་གཟར་གྱི་ཆོ་གའོ།། །།ཨ་ཤྭདྠ་དང་པླཀྵ་སོགས། །འོ་མ་ཅན་ཤིང་ལོ་མར་བཅས། །རྩེ་མོ་

མཉམ་བཅད་མཐོ་གང་ཙམ། །རླན་བཅས་རྨ་མེད་རྩེ་མོ་དག །འོ་མ་སྦྲང་རྩི་མར་ལ་བསྙུགས། །རྩེ་གཅིག་དཀར་པོའི་དྲི་ཡིས་བྲན། །ཟུང་དག་མཉམ་པར་གྱུར་པ་ཡི། །ཡམ་ཤིང་རྣམས་ཀྱིས་སྦྱིན་སྲེག་བྱ། །ཆག་པ་གས་པ་ཕྲ་དང་སྦོམ། །རྩེ་མོ་ཉམས་དང་རྩེ་གཉིས་པ། །སྐམ་པོ་སྒུར་པོ་

མི་འདོད་པར། །ཤེས་བྱ་བསྲེག་བྱ་གཞན་བཤད་བྱ། །ཞོ་དང་འོ་མ་ཟས་མཆོག་དང་། །དཱུར་བ་འབྲས་ཡོས་ནས་དང་ཏིལ། །ཀུ་ཤ་ཙུ་ཏའི་འདབ་མ་དང་། །མེ་ཏོག་དཀར་པོའི་གེ་སར་དང་། །ཙནྡན་པྲི་ཡང་ཀུ་དང་ནི། །མེ་ཏོག་ཐང་ཆུའི་སྲེག་རྫས་གསུངས། །ཇི་ལྟར་རྙེད་པས་སྦྱིན་སྲེག་

བྱ། །སྦྲང་དང་མར་བསྲེས་ཞི་བ་ལའོ། །རྒྱས་པར་ཡམ་ཤིང་དེ་རྣམས་ཉིད། །ཚད་ནི་གང་ཞིག་ཁྲུ་གང་སྟེ། །འོ་མ་ཞོ་དང་མར་བསྲེས་པ། །ལག་གཟུངས་སེར་པོ་དྲི་ཡིས་བྲན། །ཟས་མཆོག་གོང་བུ་ཞོ་ཟན་དང་། །ཀརྞི་ཀ་ར་ཏིལ་ཆེན་པོ། །པདྨ་དང་ནི་དཔལ་འབྲས་དང་། །སཱ་ལུའི་

འབྲས་དང་འབྲུ་རྣམས་དང་། །དེ་བཞིན་ནཱ་ག་གེ་སར་དང་། །མེ་ཏོག་བརྒྱ་པ་ལྷན་ཅིག་ཏུ། །ཀུན་ནས་མངར་གསུམ་བསྲེས་པ་ཡི། །སྲེག་རྫས་རྒྱས་ལ་ཇི་བཞིན་འདོད། །ཙམྤ་ཀ་དང་ཨ་ཤོ་ཀ །བ་ཀུ་ལ་དང་པྲི་ཡང་ཀུ། །ལ་གུ་ཙ་དང་ཨ་མྲ་སོགས། །སོར་ལྔའི་ནཱ་ག་གེ་སར་གྱི། །གེ་སར་

རྣམས་དང་དམར་པོ་ཡི། །འབྲས་བུ་རྣམས་དང་མེ་ཏོག་གི །སྲེག་རྫས་རྣམས་ནི་དབང་ལའོ། །དགུག་པ་ལ་ཡང་དེ་བཞིན་ཉིད། །འོན་ཀྱང་ཚེར་ལྡན་ལྕགས་ཀྱུའི་དབྱིབས། །ལས་ཀུན་པ་ལ་འདབ་ལྡན་པའི། །ཨུ་དུམྦཱ་ར་པཱ་ལ་ཤ། པླཀྵ་ཨ་ཤྭདྠ་སེང་ལྡེང་། །ས་མཱི་ཨ་བ་མརྒ་དང་།

ཨརྐ་ཀཱཥྨ་རྫྱ་ཨ་མྲ། །བཻ་ཀཾ་ཀ་ཏ་ནྱ་གྲོ་དྷ། །གསར་བའི་ཡམ་ཤིང་འདི་རྣམས་གཟུང་། །མཛུབ་གང་རྩེ་གཅིག་སྦྱིན་སྲེག་འགྱུར། །མངོན་སྤྱོད་ལ་ནི་ཡུངས་ཀར་དང་། །ཚ་བའི་ཏིལ་མར་ཁྲག་དང་ནི། །ནིམ་པའི་འདབ་མ་ཀེ་ཚེ་དང་། །རྔ་མོ་ལ་སོགས་བྲུན་རྣམས་དང་། །བཤང་གཅི་རོ་བསྲེགས་

เล่ม ๗๖ · หน้า 210a

ཐལ་བ་དང་། །སྐྲ་དང་ཚེར་མ་ཁྭ་སོགས་ཀྱི། །གཤོག་པ་རུས་པ་རྐང་པའི་རྡུལ། །ཤ་ཆེན་ཚིལ་བུ་ལ་སོགས་པའི། །རྫས་འདི་རྣམས་དང་དགྲ་ཡི་ལུས། །བྱས་ནས་དུམ་བུར་བཅད་པ་ལ། །རེ་རེ་དུག་དང་ཁྲག་ལན་ཚྭ། །མངོན་པར་བསྲེག་པའི་སྲེག་རྫས་འགྱུར། །གང་ཞིག་

ཞི་དང་རྒྱས་པའི་རྫས། །གང་ཡིན་བདག་ཉིད་བཟའ་བ་ཡང་། །མར་དང་བསྲེས་པའི་གུ་གུལ་དང་། །སྤོས་དཀར་དེ་ཀུན་རྟག་ཏུ་སྦྱར། །སྭཱ་ཧཱའི་བདག་ཉིད་སྔགས་ཀྱིས་ནི། །དབྱེ་བས་སྦྱིན་སྲེག་མང་དུ་བྱ། །དྲི་དང་མེ་ཏོག་ཉེར་སྤྱོད་རྣམས། །ལས་ཀྱི་སྦྱོར་བས་བྱ་བ་ཉིད། །ཅེས་པ་སྲེག་

རྫས་ཀྱི་ཆོ་གའོ།། །།ཞི་བའི་བུད་ཤིང་ཐབ་ཁུང་ལས། །ཅུང་ཟད་ཐུང་བའི་མཆོད་སྦྱིན་ཤིང་། །འབྲོག་དགོན་བ་ལང་ལྕི་བ་དག །སྲོག་ཆགས་མེད་པ་ལྷན་ཅིག་འདོད། །རྒྱས་པའི་བུད་ཤིང་འབྲོག་དགོན་པའི། །བ་ལང་ལྕི་བ་མ་གཏོགས་པ། །ཇི་སྐད་གསུངས་བཞིན་བསྟན་པ་སྟེ། །

རང་གི་ཐབ་མཉམ་འབྲས་བུར་བཅས། །དབང་ལ་ནིམ་པ་སྐྱུར་བའི་ཤིང་། །མེ་ཏོག་ལྡན་པའི་བུད་ཤིང་སྟེ། །དགུག་པར་ཚེར་མ་ཅན་ཞེས་བྱ། །མངོན་སྤྱོད་ལ་ནི་སྐམ་པོ་དང་། །ཚ་བ་ཚེར་ལྡན་དྲི་ངན་དང་། །དེ་བཞིན་དུར་ཁྲོད་སྐྱེས་པའི་ཤིང་། །བོང་བུ་རྔ་མོ་ལ་སོགས་སྤངས། །ལས་ཀུན་

ལ་ཡང་དེ་རྣམས་ཀུན། །ཞེས་པ་བུད་ཤིང་གི་ཆོ་གའོ།། །།ཞི་བར་དཀར་པོའི་ཚེས་གཅིག་ནས། །བརྩམས་ཏེ་དཀར་པོའི་གོས་སོགས་ཅན། །སྲོད་ལ་ཤར་དུ་ཁ་བལྟས་ནས། །སྟན་བཟང་པདྨའི་གདན་གྱིས་འདུག །ལས་དང་རྗེས་མཐུན་བསམ་གཏན་བསྒྲུབ། །བྱམས་དང་སྙིང་རྗེ་

དང་ལྡན་པས། །ལས་དང་མཐུན་པའི་རྣལ་འབྱོར་གྱིས། །ཞི་བའི་ཡིད་ཀྱིས་ཡང་དག་སྤྱད། །རྒྱས་པར་ཟླ་བ་གང་བ་ནས། །བརྩམས་ཏེ་སེར་པོའི་གོས་སོགས་ཅན། །སྔ་དྲོ་ཤར་དུ་ཁ་བལྟས་ནས། །བཟང་པོའི་འདུག་སྟངས་ཀྱིས་གནས་བརྩམས། །དབང་ལ་དམར་པོའི་གོས་སོགས་ཅན། །

ནུབ་ཏུ་ཁ་བལྟས་མཐོན་པོ་ཡི། །གདན་ལ་རྡོ་རྗེའི་སྐྱིལ་ཀྲུང་གནས། །བདེ་ཞིང་དགའ་བས་བྱ་བར་གསུངས། །དགུག་པ་ལ་ནི་ཐམས་ཅད་མཚུངས། །འོན་ཀྱང་སྟེང་དུ་ཁ་བལྟས་འདོད། །ལྷ་རྣམས་མཉེས་པར་བྱེད་པ་ལའང་། །ནུབ་ཏུ་ཁ་བལྟས་ཡང་དག་སྤྱད། །མངོན་སྤྱོད་སྔོན་

เล่ม ๗๖ · หน้า 210b

པོའི་གོས་སོགས་སམ། །གང་ཡང་ཁྲོ་ཞིང་ཁྲག་ལྡན་གོས། །ཁ་ནི་གཤིན་རྗེར་བལྟས་ཏེ་འདུག །སྲ་བའི་སྟན་ནམ་རྩུབ་མོའི་ས། །བསྒྲུབ་བྱའི་གཟུགས་བརྙན་བྲང་ལ་ནི། །བརྟན་པར་ཀུན་ནས་གནས་པ་འམ། །ཡང་ན་སྟན་ནི་མེད་པར་ཡང་། །རྐང་པས་རྐང་པ་མནན་ཏེ་བསྡད། །ནག་པོ་

ཡི་ནི་ཚེས་གཅིག་གི །ཉི་མ་གུང་ངམ་མཚན་ཕྱེད་ལ། །སོ་རྣམས་འཆའ་ཞིང་སྨིན་མ་དག །ཁྲོ་གཉེར་བསྡུས་ཏེ་སྤྱད་པར་བྱ། །རེངས་དང་རྨོངས་པ་དབང་ལྡན་བལྟ། །དེ་བཞིན་རྡོ་རྗེ་སྐྱིལ་ཀྲུང་སྟེ། །པཽ་ཥཊ་སྔགས་ཀྱི་མཐར་ལྡན་པས། །ཐབ་ཁུང་གྲུ་བཞིར་བྱས་པ་ལ། །སེར་དང་དཀར་

བའི་རྒྱན་གྱིས་སྤྲས། །རྒྱས་མཚུངས་ཆོ་གས་གང་དག་གནས། །བསྐྲད་ལ་དེ་བཞིན་མེར་ཕྱོགས་ཏེ། །རྔ་མོ་ལ་སོགས་སྦངས་ཀྱིས་བྱུག །དཀར་གནག་གིས་བརྒྱན་དུག་གིས་བྲི། །རྫས་དང་སྔགས་ནི་འདི་དག་སྟེ། །ཁྭ་ཏ་ལ་སོགས་གཤོག་པ་མཆོག །སྤེལ་ཚིག་དང་ནི་ཡང་དག་ལྡན། །འདིར་

ནི་ཁྭ་སོགས་གཤོག་པ་དང་། །ཆེ་གེ་མོ་ཨུ་ཙྪ་ཊ་ཡ། །ཧཱུཾ་ཕཊ་ཅེས་པའི་སྔགས་རྣམས་ནི། །བྲིས་པ་དག་དང་ལྡན་པའོ། །དབྱེ་བ་དེ་བཞིན་བདེན་བྲལ་དུ། །ཕྱོགས་དེར་རྐང་པ་བཟློག་པས་འདུག །སེར་པོ་ནག་པོས་རྣམ་པར་བརྒྱན། །ཚ་བའི་ཏིལ་མར་དུག་གིས་བྲི། །ཐམས་ཅད་དུ་

ཕྱོགས་དང་ཕྱོགས་བྲལ་གང་དུ་ཁ་བལྟས་པའི་ཐད་ཀའི་ཕྱོགས་དང་ཕྱོགས་བྲལ་དུ་གནས་པས་སོ། །ཡང་དོན་དམ་པར་ཕྱོགས་རང་རྒྱུད་པ་མ་ཡིན་པའི་ཕྱིར་ཇི་ལྟ་བ་བཞིན་དུ་ངེས་པར་གནས་པ་དེའི་ང་རྒྱལ་ཆེན་པོའི་ཡིད་ཀྱིས་ཏིང་ངེ་འཛིན་དང་ལྡན་པས་དེ་ཁོ་ན་བཞིན་ཐམས་ཅད་བྱའོ། །གསེར་

དངུལ་རྡོ་དང་ཟངས་དང་ཤིང་། །སས་བྱས་ཉ་ཕྱིས་དུང་དང་ནི། །འདབ་མའི་ཀྱོང་བུ་ཞབས་བསིལ་དང་། །བསང་གཏོར་ཞལ་བསིལ་མཆོད་ཡོན་སྣོད། །ཞི་བར་དེར་གནས་འོ་མ་དང་། །དཀར་པོའི་དྲི་སོགས་འདུས་བྱས་ཏེ། །སྔགས་རིག་བདག་ཉིད་སྔགས་པ་ཡིས། །ཆུ་ལ་སྭཱ་ཧཱའི་མཐའ་

ཅན་བཟླས། །རྒྱས་པར་དེར་ནི་ཏིལ་ཞོ་བསྲེ། །སེར་པོའི་དྲི་སོགས་འདུས་བྱས་ཏེ། །ཆུ་ལ་ཨོཾ་ཡིག་མཐའ་ཅན་ཏེ། །རང་གི་སྔགས་ཀྱི་བཟླས་པ་བྱ། །དབང་ལ་དམར་པོའི་དྲི་ལ་སོགས། །འདུས་བྱ་ཆུ་ལ་ཧོཿཡིག་གི །མཐའ་ཅན་སྔགས་ཀྱི་བཟླས་པ་བྱ། །དགུག་པར་ཛཿཡིག་མཐའ་ཅན་

เล่ม ๗๖ · หน้า 211a

བདུན། །མངོན་སྤྱོད་ལ་ནི་ཁྲག་དང་བཅས། །བ་ལང་ཆུ་དང་ཀོ་ཊ་བ། །ནག་དང་ངན་པའི་དྲི་སོགས་ལྡན། །ཆུ་ལ་ཕཊ་མཐའི་སྔགས་བཟླས་བྱ། །ཀུན་དུ་དྲི་དང་མེ་ཏོག་དང་། །ཀུ་ཤ་འབྲས་ཡོས་ཏིལ་དང་ལྡན། །ལས་དང་རྗེས་མཐུན་ཆུ་ལ་ནི། །ཇི་ལྟར་རྙེད་པ་རབ་ཏུ་གཞུག །མཆོད་

ཡོན་སྣོད་དང་དེ་བཞིན་དུ། །ལས་ཀུན་པ་ཡི་ཆུ་ཡི་སྣོད། །ལས་ཀུན་པ་ཡི་ཆུ་སྔགས་ནི། །རང་གི་སྔགས་ཀྱིས་བསྔགས་པར་བྱ། །པདྨའི་སྣོད་གཉིས་གཡོན་ལོགས་སུ། །རྣམ་པར་བཀོད་པར་གྱུར་པའི་ཆུ། །ལག་པ་གཡས་པས་བཟུང་བ་ཡིས། །ཡམ་ཤིང་སོགས་ལ་བསང་གཏོར་བྱ། །

བསྲེག་པར་བྱ་བའི་རྫས་རྣམས་གཞན། །རང་གི་གཡས་སུ་གཞག་བྱ་སྟེ། །བསད་དང་བསྐྲད་དང་དགུག་པ་ལ། །བསང་གཏོར་དགོད་པ་བཟློག་སྟེ་བྱ། །ཞི་བར་འོ་མ་ཅན་གྱི་ཤིང་། །གཙུབས་པའམ་གང་ཡང་དགོན་པའི་མེ། །རྒྱས་པར་ནགས་ཆེན་ཚིག་པ་འམ། །རྒྱལ་པོ་ལ་སོགས་ཁྱིམ་བྱུང་

སྟེ། །དབང་ལ་སྨད་འཚོང་རྗེའུ་རིགས་ཁྱིམ། །དགུག་པར་གར་མཁན་འགྲོན་སོགས་ལས། །དྲག་པོར་རོ་བསྲེགས་རུས་པའམ་རྡོ། །གདོལ་བའི་ཁྱིམ་ནས་བྱུང་བའི་མེ། །དྲག་པོའི་དགུག་པར་ཡང་འདི་ཉིད། །ཇི་བཞིན་རང་རང་ལས་ཀུན་ལའོ། །ཞེས་པ་མེའི་མཚན་ཉིད་ཀྱི་ཆོ་གའོ།། །།དེ་ནས་མེ་རྣམས་བླང་བྱ་སྟེ། །

གཙང་མའི་སྣོད་དུ་ཡང་དག་གཞག །གཏོར་མ་སྦྱིན་ཞིང་བསྲུང་བ་བྱ། །སྔོན་དུ་དྲིལ་བུ་དཀྲོལ་བ་ཉིད། །བགེགས་མཐར་བྱེད་པའི་སྔགས་དང་ནི། །དེ་ནས་སླར་ཡང་ཡི་གེ་གསུམ། །མཆོད་ཡོན་ཞབས་བསིལ་ལ་སོགས་དབུལ། །དེ་དག་དང་ནི་བཟླས་པའི་ཆུ། །ཀུ་ཤའི་རྩེ་མོས་བཟུང་

བ་ཡིས། །ལན་གསུམ་གཡས་སྐོར་གཏོར་བར་བྱ། །མངོན་སྤྱོད་ལ་ནི་གཡོན་པ་ཡིས། །མཆོད་ཡོན་ལ་སོགས་ཐམས་ཅད་བྱ། །སྐམ་པོའི་རྩྭ་དང་ལྷན་ཅིག་མེ། །ཐབ་ཁུང་དུ་ནི་རབ་ཏུ་གཞུག །ཨོཾ་ཛྭ་ལ་ཛྭ་ལ་ཧཱུཾ་བརྗོད་དེ། །རླུང་ཡབ་ལས་བྱུང་རླུང་དང་ནི། །རིགས་ཀྱི་

སྙིང་པོ་བདུན་བཟླས་པའི། །བླུགས་གཟར་གནས་པའི་མར་གྱིས་སྦར། །དེ་ཡིས་ཡང་དག་འབར་བའི་མེར། །གསང་ལ་ཚ་བའི་ཏིལ་མར་རོ། །ཀུ་ཤ་གསར་པ་མ་གྲུགས་པ། །ལྗང་གུ་བ་ལང་རྣ་བ་ཙམ། །ཨོཾ་བཛྲ་སཏྭ་ཨཱཿཞེས་པ། །སྔགས་ཀྱིས་ཡོངས་སུ་བཟླས་པ་རྣམས། །

เล่ม ๗๖ · หน้า 211b

སྒྲུབ་པོས་དང་པོར་ཀུ་ཤ་གཉིས། །གཡོན་ནས་སོ་སོར་ཁ་ཁྱེར་ལ། །རྩེ་མོ་ཤར་དུ་བསྟན་པ་དང་། །གཤིན་རྗེར་ཕྱོགས་དང་ནུབ་ཏུ་བསྟན། །རྩེ་མོ་བྱང་དང་དེ་ནས་ཤར། །ཐབ་ལ་ཀུ་ཤས་གཡོགས་པར་བྱ། །རྒྱས་དང་དབང་དང་མངོན་སྤྱོད་ཀྱི། །ཐབ་ལ་རིམ་པ་ཇི་བཞིན་དུ། །རྩེ་མོ་བྱང་

དང་རྩེ་མོ་ནུབ། །རྩེ་མོ་ལྷོ་རུ་དེ་བཞིན་ཉིད། །དང་པོར་ཀུ་ཤ་གཉིས་གཡོན་ནས། །དེ་ལྟར་ཁ་ཁྱེར་ལ་ཡང་དགོད། །འདིར་ཡང་སྒྲུབ་པ་པོ་གང་དུ་མངོན་པར་ཕྱོགས་པ་དེ་ལ་ལྟོས་ནས་ཤར་ལ་སོགས་པའི་ཕྱོགས་ཀྱི་ཐ་སྙད་བྱས་ཏེ། དོན་དམ་པར་ན་ཕྱོགས་དངོས་པོར་མེད་པའི་ཕྱིར་རོ། །དེ་

ནས། སྔགས་རིག་རང་གི་ལྷག་པའི་ལྷའི། །ས་བོན་ལས་ནི་ཐབ་ཁུང་བསྐྱེད། །མེ་རྣམས་འབར་བ་ཤེས་གྱུར་ནས། །དེ་དབུས་བདག་མེད་བསྒོམ་པར་བྱ། །དེ་ནས་རཾ་ཡིག་ལས་སྐྱེས་པའི། །གྲུ་གསུམ་མེ་ནི་བསྐྱེད་པའི་དབུས། །པདྨ་ཉི་མ་ལ་གནས་པའི། །རཾ་ཡིག་ས་བོན་ལས་བྱུང་

བའི། །བོང་ཐུང་ལྟོ་བ་འཕྱང་ཤ་རྒྱས། །ཞལ་གསུམ་ཕྱག་དྲུག་འབར་བ་སྟེ། །སྤྱན་གསུམ་རལ་པའི་ཅོད་པན་ཅན། །སྨ་ར་མཆོད་ཕྱིར་ཐོགས་དང་ལྡན། །ལས་དང་རྗེས་མཐུན་སྐུ་མདོག་དང་། །གོས་དང་རྒྱན་རྣམས་དག་གིས་བརྒྱན། །དང་པོའི་ཕྱག་གཉིས་རོལ་པ་ཡིས། །རང་

འོད་ལ་ནི་ཡང་དག་འཁྱུད། །གཡོན་ན་དབྱུག་པ་སྤྱི་བླུགས་ཏེ། །གཡས་ན་བགྲང་ཕྲེང་མི་འཇིགས་སྦྱིན། །དེ་བཞིན་དུ་རྣམ་པར་ཤེས་པའི་འོད་ཟེར་གྱི་ཕྲེང་བ་དང་རྒྱས་འདེབས་ཀྱི་དབང་པོ་དང་ཡང་དག་པར་ལྡན་པ་མེའི་དཀྱིལ་འཁོར་ལ་གནས་པའི་ས་བོན་རཾ་དེ་ཉིད་དང་སྙིང་གར་མེ་ལྷ་རྣམ་པར་

བསྒོམས་ལ། དམ་ཚིག་སེམས་དཔའི་སྙིང་གའི་ས་བོན་གྱི་འོད་ཟེར་གྱི་ལྕགས་ཀྱུས་ནམ་མཁར་དམ་ཚིག་སེམས་དཔའ་དང་འདྲ་བའི་མེ་ལྷ་ཡེ་ཤེས་སེམས་དཔའ་མེའི་མཚམས་ནས་བྱོན་པ་དྲང་སྲོང་གི་ཚོགས་ཀྱིས་ཡོངས་སུ་བསྐོར་བ་རྩ་བའི་ཞལ་ནི་སྐུ་མདོག་དང་མཐུན་པ་སྟེ། དེ་ཉིད་

དཀར་པོ་ཡིན་ན་གཡས་པ་དང་གཡོན་པའི་ཞལ་ནག་པོ་དང་དམར་པོ་དག་དང་། སེར་པོ་དང་དམར་པོ་དང་ལྗང་གུ་ཉིད་ལ་ནི་སྔོན་པོ་དང་དཀར་པོ་དག་དང་། སྔོན་པོ་ཉིད་ལ་ནི་དཀར་པོ་དང་དམར་པོ་དག་རྣམ་པར་བལྟས་ནས་གཡས་པའི་མཐེ་བོ་མི་འཇིགས་པས་བསྐྱོད་པ་དང་སྔགས་འདིས་

เล่ม ๗๖ · หน้า 212a

སྤྱན་དྲང་བར་བྱའོ། །ཨོཾ་ཨེ་ཧྱེ་ཧི་མཧཱ་བྷཱུ་ཏ་དེ་བ་རྀ་ཥི་དྭི་ཛ་ས་ཏ་མ། གྲྀ་ཧི་ཏཱ་ཧུ་ཏི། མ་ཧཱ་ར་ཨསྨིན་སནྣི་ཧི་ཏྭ་བྷ་ཝ། ཞེས་པས་སྤྱན་དྲངས་པ་དེ་དང་ལྷན་ཅིག་འོངས་པའི་བགེགས་གཤིན་རྗེ་གཤེད་ལ་སོགས་པས་བསྐྲད་ནས་དེ་ཉིད་ཛཿཧཱུཾ་བཾ་ཧོཿ། ཞེས་བརྗོད་པས་རིམ་པ་ཇི་

ལྟ་བ་བཞིན་དུ་དགུག་པ་དང་གཞུག་པ་དང་བཅིང་བ་དང་མཉེས་པར་བྱའོ། །དེ་ནས་ཨོཾ་ཨཱཿཧཱུཾ་ཨརྒྷཾ་པྲ་ཏཱིཙྪ་ཧཱུཾ་ཞེས་པ་འདིས་མཆོད་ཡོན་དབུལ་ཞིང་ཨརྒྷཾ་གྱི་སྒྲའི་གནས་སུ་པཱ་ཏྱཾ་ཞེས་པ་ལ་སོགས་པ་བཅུག་པས་ཞབས་བསིལ་དང་ཞལ་བསིལ་དང་བསང་གཏོར་རྣམས་ཀྱང་ཕུལ་ནས་ལས་དང་རྗེས་

སུ་མཐུན་པའི་མེ་ཏོག་ལ་སོགས་པ་རྣམས་དང་གསང་བའི་མཆོད་པས་ཀྱང་མཆོད་པར་བྱའོ། །དེ་ལ་འདིའི་མཆོད་ཡོན་ལ་སོགས་པའི་རིམ་པ་ནི། ཀུ་ཤ་ཡི་ནི་ཆུན་པོ་ཡིས། །དང་པོའི་སྣོད་དུ་བསང་གཏོར་གསུམ། །ཀུན་དུ་བཟླས་བྱས་ཆུ་ཡིས་ནི། །དེ་ཉིད་དུ་ནི་ཞབས་བསིལ་དབུལ། །

ཁུ་ཚུར་འོག་ཏུ་ཕྱོགས་པ་ཡི། །མཛུབ་མོས་མེ་ཏོག་གཟུང་བྱས་ནས། །མཐེ་ཆུང་མིང་མེད་གུང་མོ་དང་། །མཛུབ་མོ་རིམ་གྱིས་བཀྲོལ་བས་སོ། །གཉིས་པ་དུང་གི་མཆོད་ཡོན་ཏེ། །གཉིས་པ་ཉིད་དུ་སོ་སོར་དབུལ། །རྡོ་རྗེ་སྙིམ་པ་ཕྱེ་བས་སོ། །གསུམ་པར་ཞལ་བསིལ་

དབུལ་བྱ་སྟེ། །ཁུ་ཚུར་མཛུབ་མོ་མཐེ་བོང་གི། །སྐམ་པས་གཟུང་བའི་མེ་ཏོག་རྣམས། །སངས་རྒྱས་རྣམས་ཀྱི་སྤྱན་སྔ་རུ། །སོར་མོ་རིམ་གྱིས་ལན་གསུམ་བསྐོར། །མཛུབ་མོ་གུང་མོ་མིང་མེད་དང་། །མཐེ་ཆུང་རྣམས་ནི་བཀྲོལ་བས་སོ། །ཞེས་པ་ནི་མན་ངག་གོ། །དེ་

ནས། ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལ་ཡ་སརྦ་བྷསྨི་ཀུ་རུ་སརྦ་དུཥྚཱན་ཧཱུཾ་ཕཊ་དྲྀ་ཤྱ་ཛཿཧཱུཾ་ས་མ་ཡ་སྟྭཾ་ས་མ་ཡོ྅ཧཾ་ཞེས་པ་གསུམ་གྱིས་དམ་ཚིག་བསྒྲག་པར་བྱའོ། །དེ་ནས། དྲིལ་བུ་ཡོངས་གྱུར་དགང་གཟར་ཏེ། །བླུགས་གཟར་རྡོ་རྗེ་ལས་བྱུང་འདོད། །ཅེས་བསམས་གསང་སྔགས་རིག་པ་

ཡིས། །རིམ་པ་འདིས་ནི་སྦྱིན་སྲེག་བྱ། །ལག་པ་གཡོན་པ་གན་རྐྱལ་དུ། །མར་གྱིས་གང་བའི་དགང་གཟར་གཟུང་། །གཡས་པའི་ཁུ་ཚུར་ཁ་སྦུབ་ཀྱིས། །བླུགས་གཟར་གན་རྒྱལ་མར་གྱིས་དགང་། །ཀུན་ནས་དགང་གཟར་ལ་གནས་པ། །བྱང་ཆུབ་མཆོག་གིས་དེ་

เล่ม ๗๖ · หน้า 212b

དག་གཟུང་། །ལག་པ་པུས་མོའི་ནང་བྱས་ནས། །ཏིང་འཛིན་མཆོག་ནི་བསམ་བྱ་སྟེ། །སླར་ཡང་རྡོ་རྗེ་མེ་ལྷའི་ཁར། །ལྕེ་ལ་ཧཱུཾ་ཡིག་དགོད་པར་བྱ། །དགང་གཟར་གཡས་སྐོར་བྱས་ནས་ནི། སྲེག་བླུགས་རྫོགས་པར་དབུལ་བར་བྱ། །དེ་ལ་སྔགས་ནི་འདི་ཡིན་ཏེ། ཨོཾ་ཨགྣ་

ཡེ་དི་པྱཱ་དི་པྱ་ཨ་བི་ཥ་ཨ་བི་ཥ་མ་ཧཱ་ཤྲི་ཡེ་ཧ་བྱ་ཀ་བྱ་བཱ་ཧཱ་ན་ཡ་སྭཱ་ཧཱ། ཞེས་པས་སྦྱིན་བདག་ནུས་པའི་དབང་གིས་སྲེག་བླུགས་རྫོགས་པ་གསུམ་མམ་བདུན་ནམ་ཉི་ཤུ་རྩ་གཅིག་དབུལ་བར་བྱའོ། །ཨོཾ་ཨགྣ་ཡེ་སྭཱ་ཧཱ། ཞེས་པ་ནི་མར་གྱི་སྲེག་བླུགས་ཀྱི་སྔགས་

སོ། །ཞི་རྒྱས་ལ་སོགས་སྔགས་རྣམས་ལ། །བྱང་ཆུབ་མཆོག་དང་ནོར་བུ་དང་། །པདྨ་ཁྲོ་བོའི་ཁུ་ཚུར་བཞིས། །དགང་གཟར་བླུགས་གཟར་གཟུང་བ་བསྟན། །མངོན་སྤྱོད་ཚ་བའི་ཏིལ་མར་དང་། །དུག་དང་བཅས་པས་སྦྱིན་སྲེག་བྱ། །ཁྲོ་བོ་ཡི་ནི་གཡོན་སྐོར་ཏེ། །ལག་པ་པུས་

མོའི་ཕྱི་ནས་སོ། །འདམ་སྐྱེས་འདབ་མ་སོ་གཉིས་སྣོད། །མར་གང་བུ་ག་ཅུང་ཟད་གནས། །ཀུ་ཤའི་རྩེ་མོ་ལས་འཛག་པ། །ཐབ་ཀྱི་སྟེང་དེར་དགོད་པར་བྱ། །ཡེ་ཤེས་ཀྱི་ནི་རྒྱུན་རབ་ཏུ། །ཐབ་ཁུང་ལྟེ་བར་འབབ་པར་བྱ། །དྲག་པོར་ཚ་བའི་ཏིལ་མར་དང་། །དུག་དང་བཅས་པ་

འབབ་པའོ། །དགང་གཟར་བླུགས་གཟར་གྱི་ཁ་ལ་ཡི་གེ་གསུམ་དགོད་པར་བྱ་ཞིང་རང་གི་ལྷའི་ས་བོན་ལས་བྱུང་བ་བསྒོམ་པར་བྱའོ། །ཞི་བ་དང་རྒྱས་པ་དང་དབང་དུ་བྱ་བ་དང་དབང་དུ་བྱས་པའི་དགུག་པ་རྣམས་ལ་སྭཱ་ཧཱ་དང་ཨོཾ་དང་ཧོཿདང་ཛཿསྟེ་དྲག་པོ་ལ་ནི་ཧཱུཾ་ཧཱུཾ་ཕཊ་ཅེས་པ་སྔགས་ཀྱི་

མཐར་བརྗོད་པར་བྱ་ཞིང་། ཞལ་ཅུང་ཟད་གདངས་པ་དང་དྲག་པོ་དང་དྲག་པོའི་དགུག་པ་ནི་ཞལ་ཤིན་ཏུ་གདངས་པའོ། །དེ་ནས་འབར་བའི་མཚན་མ་ནི། །བགེགས་དང་བྲལ་བ་མཚོན་བྱ་སྟེ། །འོད་ཟེར་དང་བཅས་གཡས་སྐོར་དང་། །སྣུམ་ཞིང་དེ་བཞིན་དུ་བ་མེད། །གསེར་དང་དངུལ་

དང་བྱི་རུ་སོགས། །འདྲ་ཞིང་རྔ་ཡབ་དབྱིབས་ཅན་དང་། །རྩེ་གསུམ་རྡོ་རྗེ་དུང་དང་ནི། །ཆུ་སྐྱེས་ཉ་དང་དཔལ་བེའུ་འདྲ། །བུམ་པ་བཀྲ་ཤིས་གདུགས་དང་ནི། །རྒྱལ་མཚན་རལ་གྲི་བླུགས་གཟར་དབྱིབས། །རྔ་སྒྲ་ཟབ་མོ་དྲི་ཞིམ་ལྡན། །ཤིན་ཏུ་དྲི་མ་མེད་པ་དང་། །མེ་ཏོག་བཻ་ཌཱུརྱ་

เล่ม ๗๖ · หน้า 213a

འདྲ་དང་། །དབང་པོའི་གཞུ་དང་མཚུངས་རྣམས་དགེ། །ཞེས་པ་ཐུན་མོང་བསྟན་པ་སྟེ། །ད་ནི་ཁྱད་པར་བརྗོད་པར་བྱ། །ཞི་བར་ཁ་དོག་དཀར་པོར་སྣང་། །རྒྱས་པ་ལ་ནི་སེར་པོར་མཚུངས། །དབང་ལ་དམར་ཞིང་རྩེ་མོ་མཆོག །མངོན་སྤྱོད་ལ་ནི་སྔོ་ནག་གོ། །རྩེ་མོ་གཅིག་

པ་མཆོག་ཏུ་བསྟན། །རྩེ་མོ་གཉིས་པ་འབྲིང་དུ་འདོད། །རྩེ་མོ་འབར་བ་དམན་པ་ཡིན། །སྒྲུབ་པོས་མདོར་བསྡུས་ཤེས་པར་བྱ། །རྣམ་པར་ཆད་ཅིང་འབར་བར་དཀའ། །རྩུབ་མོའི་སྒྲ་ལྡན་དེ་མི་འདོད། །མེ་སྟག་འཕྲོ་དང་དེ་བཞིན་དུ། །འོད་ཟེར་དམན་དང་དུ་བ་མང་། །རོ་ཡི་དྲི་དང་རུལ་

པའི་དྲི། །ཁ་དོག་མི་སྣུམ་རྩེ་མོ་གུག །དེ་བཞིན་གཡོན་དུ་འཁོར་བ་དང་། །བསྲེག་ཕོར་མེ་ཡིས་ལྡག་པའི་དབྱིབས། །དྲག་པོའི་ལས་ལ་ཤིས་པ་སྟེ། །དེ་ལྟར་མི་དགེའི་ལས་ལའོ། །དེ་བཞིན་གཤེགས་པས་བགེགས་བསལ་ཏེ། །ལས་རྣམས་ཐམས་ཅད་རང་གིས་བྱས། །ཡན་

ལག་དེ་དག་ཉིད་ཀྱིས་ནི། །མར་གྱི་སྲེག་བླུགས་བདུན་དབུལ་ལོ། །སླར་ཡང་མར་སོགས་སྔགས་རྣམས་ཀྱིས། །སྔར་བཞིན་དགང་གཟར་མར་གྱིས་གང་། །སྲེག་བླུགས་རྫོགས་པ་གསུམ་མམ་བདུན། །ཡང་ན་གཅིག་རྣམས་དབུལ་བར་བྱ། །དེ་ལ་དང་པོར་སྔགས་འདི་རྣམས་

ཀྱིས་ཡམ་ཤིང་ལ་སོགས་པ་སྦྱང་བར་བྱ་སྟེ། ཨོཾ་ཨཱཿཧཱུཾ་སྭཱ་ཧཱ། ཡམ་ཤིང་སྦྱང་བའོ། །ཨོཾ་ཤྲིཾ་སྭཱ་ཧཱ། མར་གྱིའོ། །ཨོཾ་སྭ་སྭཱ་ཧཱ། རྫས་རྣམས་བཀྲུ་བའོ། །ཨོཾ་ཛྲྀཾ་སྭཱ་ཧཱ། འབྲུ་རྣམས་སྦྱང་བའོ། །ཨོཾ་ཀུ་རུ་ཀུ་རུ་སྭཱ་ཧཱ། རྫས་གཞན་རྣམས་སྦྱང་བའི་སྔགས་སོ། །འདིར་ནི་རིམ་པས་

ཡམ་ཤིང་དག །བསྲེགས་ནས་ཡམ་ཤིང་མེ་ལ་མར། །ཏིལ་དང་དཱུར་བ་འབྲས་ཞོ་ཟན། །ཀུ་ཤ་ལ་སོགས་བསྲེག་པར་བྱ། །དེ་ལ་ཡམ་ཤིང་རྣམས་རིམ་པས་བཟུང་སྟེ་འཆད་པར་འགྱུར་བའི་རང་རང་གི་སྔགས་ཀྱིས་ཡམ་ཤིང་དང་དཱུར་བ་དང་ཀུ་ཤ་རྣམས་མིང་མེད་དང་མཐེ་བོང་གིས་

བླངས་ནས་སོ། །རྩ་བ་དང་ནི་རྩེ་མོ་ཡིས། །ཞི་གྱུར་རྒྱས་ལ་དེ་བཞིན་ནོ། །རྩེ་མོས་དབང་སྟེ་དེ་བཞིན་དགུག །རེངས་དང་རྨོངས་པ་དག་ལའང་དེ། །རྩ་བའི་ཆ་ཡིས་འཆི་བར་འགྱུར། །དབུས་ཀྱིས་བསྐྲད་པར་འདོད་པ་ཡིན། །སྙིང་རྗེ་ལྡན་པས་དེ་ཤེས་ནས། །སྦྱིན་སྲེག་ཆོ་ག་ཇི་

เล่ม ๗๖ · หน้า 213b

བཞིན་བྱ། །ཨོཾ་བཛྲ་བྲཧྨ་ནེ་སྭཱ་ཧཱ། པ་ལཱ་ཤའི་འོ། །ཨོཾ་བཛྲ་ཡཛྙཱ་ཡ་སྭཱ་ཧཱ། ཨུ་དུམྺཱ་རའི་འོ། །ཨོཾ་ས་ཧ་ཀ་རཱ་ཡ་སྭཱ་ཧཱ། ཨ་མྲའི་འོ། །ཨོཾ་ཀ་དམྤཱ་ཡ་སྭཱ་ཧཱ། ཀ་དམྤའི་འོ། །ཨོཾ་སརྦ་ཏོ་བྷ་དྲཱ་ཡ་སྭཱ་ཧཱ། གམྦྷ་རིའི་འོ། །ཨོཾ་བོ་དྷི་བྲྀཀྵཱ་ཡ་སྭཱ་ཧཱ། ཨ་ཤྭདྠའི་འོ། །ཨོཾ་བཛྲ་ལཱ་ཏཱ་ཡ་སྭཱ་ཧཱ།

པླཀྵའིའོ། །ཨོཾ་བཛྲ་ཤཱི་བཱ་སྭཱ་ཧཱ། ས་མཱིའི་འོ། །ཨོཾ་བཛྲ་ཀུ་བེ་རཱ་ཡ་སྭཱ་ཧཱ། ནྱ་གྲོ་དྷའི་འོ། །ཨོཾ་ག་ཏྲཱ་ཡ་སྭཱ་ཧཱ། སེང་ལྡེང་གིའོ། །ཨོཾ་བཛྲ་ཨ་ཤོ་ཀཱ་ཡ་སྭཱ་ཧཱ། མྱ་ངན་མེད་པའི་འོ། །ཨོཾ་བཛྲ་ལ་ཀུ་ཙཱ་ཡ་སྭཱ་ཧཱ། ལ་ཀུ་ཙའིའོ། །ཨོཾ་བཛྲ་ཨརྐ་ཡ་སྭཱ་ཧཱ། ཨརྐའི་འོ། །ཨོཾ་བཛྲ་སྲུ་བཱ་ཡ་སྭཱ་ཧཱ།

བེ་ཀངྐའི་འོ། །ཨོཾ་བཛྲ་བི་ལོ་ཌྷ་ཀཱ་ཡ་སྭཱ་ཧཱ། བི་ལོ་ཌྷ་ཀའིའོ། །ཨོཾ་བཛྲ་མ་ད་ནཱ་ཡ་སྭཱ་ཧཱ། མྱོས་བྱེད་ཚེར་མ་ཅན་གྱིའོ། །ཨོཾ་བཛྲ་ཤི་ཁ་རཱ་ཡ་སྭཱ་ཧཱ། ཨ་པ་མརྒའིའོ། །ཨོཾ་བཛྲ་ཨངྒུ་ཤཱ་ཡ་སྭཱ་ཧཱ། འདི་ནི་ཚེར་མ་ཅན་གྱི་ཤིང་ཐམས་ཅད་ཀྱིའོ། །ཨོཾ་ཨགྣ་ཡེ་སྭཱ་ཧཱ། མར་གྱིའོ། །ཨོཾ་སརྦ་པཱ་པཾ་

ད་ཧ་ན་བཛྲ་ཡ་སྭཱ་ཧཱ། ཏིལ་གྱིའོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། དཱུར་བ་ཀུན་དའི་འོ། །ཨོཾ་བཛྲ་པུཥྚ་ཡེ་སྭཱ་ཧཱ། འབྲས་མ་ཆག་པ་རྣམས་ཀྱིའོ། །ཨོཾ་སརྦ་སཾ་པ་དེ་སྭཱ་ཧཱ། ཞོ་ཟན་དང་བུར་ཟན་དང་ཟས་མཆོག་གིའོ། །ཨོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཏིལ་མར་གྱིས་བྱུགས་པའི་ཀུ་ཤ་རྣམས་ཀྱིའོ། །

ཨོཾ་བཛྲ་བི་ཛཱ་ཡ་སྭཱ་ཧཱ། སོ་བའི་འོ། །ཨོཾ་བཛྲ་བེ་གཱ་ཡ་སྭཱ་ཧཱ། ནས་ཀྱིའོ། །ཨོཾ་བཛྲ་གྷསྨ་རཱི་ཡ་སྭཱ་ཧཱ། གྲོའི་འོ། །ཨོཾ་བཛྲ་མ་ཧཱ་བ་ལཱ་ཡ་སྭཱ་ཧཱ། སྲན་མ་ཤའིའོ། །ཨོཾ་བཛྲ་ལཱ་ཛཱ་ཡ་སྭཱ་ཧཱ། འབྲས་ཡོས་ཀྱིའོ། །ཡང་ན་ཚིམ་པར་བྱ་བའི་ཆེད་དུ་སོ་བ་ལ་སོགས་པ་རྣམས་ལྷའི་

སྔགས་ཀྱིས་སོ། །པྲི་ཡང་ཀུ་དང་ཙནྡན་དང་གུ་གུལ་གྱི་རིལ་བུ་ལ་སོགས་པའི་རྫས་ཀྱི་ཁྱད་པར་རྣམས་ལྷའི་སྔགས་ཁོ་ནས་བསྲེག་པར་བྱའོ། །བསྲེག་བྱའི་རྫས་ཐམས་ཅད་ཀྱང་བཤད་པ་ལ་སོགས་པའི་བདུད་རྩི་ལྔས་བྲན་ཞིང་བདུད་རྩིའི་དངོས་པོར་བསྒོམས་པས་སྲེག་བླུགས་བྱའོ་ཞེས་

མན་ངག་རིག་ཅིང་མང་དུ་མཁྱེན་པ་རྣམས་གསུང་ངོ་། །ཐམས་ཅད་དུ་ཁུ་བའི་རྫས་རྣམས་ནི་ཞལ་དུའོ། །ཡམ་ཤིང་དང་མི་རུས་ཀྱི་ཕྱེ་མ་རྣམས་ནི་འོད་ཀྱི་དཀྱིལ་འཁོར་ལའོ། །ཞོ་ཟན་དང་བཟའ་བ་དང་ཞལ་བསིལ་དང་ཏིལ་དང་དཱུར་བ་དང་ཆུ་རྣམས་ནི་ཕྱག་ཏུའོ། །དྲི་ནི་ཐུགས་ཀར་རོ། །

เล่ม ๗๖ · หน้า 214a

མེ་ཏོག་ནི་དབུ་ལའོ། །བདུག་སྤོས་ནི་ཤངས་ལའོ། །ཞབས་བསིལ་ནི་ཞབས་དག་ལའོ། །མར་མེ་དང་མཆོད་ཡོན་ནི་མདུན་དུ་སྟེ་མཆོད་ཡོན་གྱི་ཆུ་ནི་སྣོད་དུ་བླུགས་པར་བྱའོ། །དེའི་རྗེས་སུ་ཞབས་བསིལ་དང་བསང་གཏོར་བྱས་ནས། །མེ་ལྷ་ནི་འབར་བའི་རྣམ་པས་ཐབ་ཏུའང་རང་གི་

གཟུགས་ཀྱིས་མེའི་ཕྱོགས་སུ་གཞག་པར་བྱའོ་ཞེས་པ་མེ་ལྷ་མཉེས་པར་བྱེད་པའི་ཆོ་གའོ།། །།སྦྱིན་སྲེག་ལ་ནི་ཉེར་མཁོ་ཀུན། །ཇི་ལྟར་གསུངས་བཞིན་སྔགས་པ་ཡིས། །ཆོ་ག་བཞིན་བྱ་བསང་གཏོར་བྱ། །སླར་ཡང་མཉམ་བཞག་མེ་དབུས་སུ། །རྟག་པ་ལ་སོགས་ཆོ་ག་བཞིན། །ལས་

དང་རྗེས་མཐུན་བསམ་བྱས་ནས། །བསྲེག་བྱ་གང་སོགས་སྔ་མ་བཞིན། །ཕྱི་ཡི་རྫས་སོགས་དབུལ་བར་བྱ། །ཀུན་གྱི་མཐར་ཡང་བདག་པོ་ཡི། །སྙིང་པོ་ཉི་ཤུ་རྩ་གཅིག་གམ། །བདུན་ནམ་དེ་བཞིན་གསུམ་བཟླས་པའི། །མར་གྱི་སྲེག་བླུགས་རྣམས་ཀྱིས་སྦར། །སླར་ཡང་བདག་པོའི་སྙིང་

པོའི་སྔགས། །བཟླས་པས་སྲེག་བླུགས་གང་བ་བྱ། །ཤིན་ཏུ་མཉམ་གཞག་དེ་ཉིད་བཟླས། །བརྟུལ་ཞུགས་ཅན་གྱིས་མཆོད་ཡོན་དབུལ། །དེ་ནས་བསང་གཏོར་དང་ཞལ་བསིལ་དང་གོས་གསར་པ་དང་རྡོ་ཐལ་མེད་པའི་སོ་རྩི་དང་། དྲག་པོའི་ལས་ལ་ནི་རྡོ་ཐལ་དང་བཅས་པའི་སོ་རྩི་ཕུལ་

ནས་སྔར་བཞིན་དུ་ཡང་དག་པར་མཆོད་ཅིང་བསྟོད་དེ་ཕྱག་བྱས་ནས་ཡོན་དབུལ་ཞིང་མེ་ཏོག་དང་བཅས་པའི་ཐལ་མོ་སྙིང་གར་སྦྱར་ལ་བཅོམ་ལྡན་འདས་ལ་བཟོད་པར་གསོལ་བའི་ཆེད་དུ་འདི་སྐད་ཅེས་བརྗོད་པར་བྱ་སྟེ། གང་ཡང་བདག་རྨོངས་བློ་ཡིས་ནི། །ཉེས་བྱས་ཅུང་ཟད་གང་བགྱིས་པ། །གང་ཕྱིར་

ལུས་ཅན་སྐྱབས་ཡིན་ཕྱིར། །དེ་ཀུན་མགོན་ཁྱོད་བཟོད་པར་མཛོད། །མ་རྙེད་ཡོངས་སུ་མ་ཤེས་དང་། །གང་ཡང་ནུས་པ་མ་མཆིས་ལས། །འདིར་ནི་བྱ་བ་གང་བགྱིས་པ། །དེ་ཀུན་གཙོ་བོས་བཟོད་མཛད་རིགས། །ཞེས་པས་བཟོད་པར་གསོལ་ནས་མངོན་པར་འདོད་པ་གྲུབ་པའི་ཆེད་དུ་གསོལ་

བ་གདབ་ཅིང་ཆད་པ་དང་ལྷག་པའི་ཉེས་པ་ཞི་བར་བྱ་བའི་ཆེད་དུ་ཐར་པའི་བསམ་པས། ཨོཾ་བཛྲ་སཏྭ་ཨཿཞེས་མང་དུ་བརྗོད་ནས་ཡི་གེ་བརྒྱ་པ་བཀླག་པར་བྱའོ། །ཨོཾ་བཛྲ་སཏྭ་ས་མ་ཡ་མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་བྷོ་མེ་བྷ་ཝ། སུ་ཏོཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་

เล่ม ๗๖ · หน้า 214b

རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ་སརྦྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ་ཧ་ཧ་ཧ་ཧ་ཧོ་བྷ་ག་ཝཱན་སརྦྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་ཝ་མ་ཧཱ་ས་མ་ཡ་སཏྭ་ཨཱཿ། དེའི་རྗེས་ལ། ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་

ནས་ཀྱང་། །སླར་ཡང་འབྱོན་པར་མཛད་དུ་གསོལ། །ཞེས་པས་ཡང་དག་པར་བསྐུལ་ནས་རང་གི་སྔགས་ཡི་གེ་གསུམ་གྱི་ནང་དུ་བཅུག་པའི་མཐར་མུཿཞེས་པའི་ཡི་གེ་བརྗོད་ཅིང་རང་གི་བདག་པོའི་མགོན་པོ་ཡིད་ཀྱིས་ཆོ་ག་བཞིན་དུ་གཤེགས་སུ་གསོལ་བར་བྱའོ། །དེ་ནས་མེ་ལྷ་ཐབ་ཁུང་

དུ་སྤྱན་དྲངས་ཏེ། སླར་ཡང་དག་པར་མཆོད་ནས་བསང་གཏོར་དང་ཞལ་བསིལ་དང་རྡོ་ཐལ་མེད་པའི་སོ་རྩི་དང་། དྲག་པོ་ལ་ནི་རྡོ་ཐལ་དང་བཅས་པའི་སོ་རྩི་དང་། གོས་གསར་པ་ཡང་ཕུལ་ལ་ཡོ་བྱད་ལྷག་མ་རྣམས་ཀྱིས་སྦྱིན་སྲེག་བྱས་ནས་དྲིལ་བུ་དཀྲོལ་ཞིང་། མི་བསྐྱོད་རྡོ་རྗེ་ཞེས་པ་ལ་

སོགས་པའི་ཚིགས་སུ་བཅད་པ་རྣམས་ཀྱིས་བསྟོད་པར་བྱའོ། །ཆོ་ག་འདི་ནི་ཕལ་ཆེར་རང་གི་མངོན་པར་འདོད་པའི་དངོས་གྲུབ་བསྒྲུབ་པའི་ཆེད་དུའོ། །རབ་ཏུ་གནས་པ་ལ་སོགས་པ་གཞན་གྱི་དོན་འདོད་པ་རྣམས་ཀྱི་ཁྱད་པར་ནི་འདི་ཡིན་ཏེ། ཡོན་ཕུལ་བའི་སློབ་མའི་མཐེ་བོང་གཡོན་

པའི་མཐེ་ཆུང་གིས་བཟུང་ནས། ཐབ་ཁུང་ལ་གཡས་སྐོར་གསུམ་བྱས་ལ་བླུགས་གཟར་གྱིས་མགོ་ལ་གཡས་སྐོར་གྱིས་བྱུགས་པས་ལན་བདུན་དུ་སྲེག་བླུགས་བྱས་ཏེ་སྲེག་བླུགས་གང་བ་འབུལ་དུ་གཞུག་པར་བྱའོ། །འཁྱིལ་པས་བཟླས་པའི་སྲུང་སྐུད་དེའི་ལག་པ་

ལ་བཅིངས་ཏེ་བསང་གཏོར་བྱའོ། །ཡོད་པར་གྱུར་ན་རྒྱལ་པོ་ལ་སོགས་པའི་དགེ་བ་ལ་དམིགས་ནས་ཀྱང་སྲེག་བླུགས་རྫོགས་པ་དབུལ་བར་བྱ་སྟེ། དེ་ལྟར་ཡང་རྒྱལ་པོ་དང་འཇིག་རྟེན་སྐྱོང་བ་རྣམས་དང་སེམས་ཅན་ཐམས་ཅད་དང་གང་ལ་མངོན་པར་འདོད་པ་རྣམས་ཀྱི་ཡང་

སོ་སོར་སྲེག་བླུགས་ལན་གསུམ་བྱ་ཞིང་ཆོ་ག་བཞིན་དུ་ཡོན་ཡང་དབུལ་དུ་གཞུག་པར་བྱའོ་ཞེས་གསུངས་སོ། །དེའི་རྗེས་སུ་ཞལ་བསིལ་ཕུལ་ནས་བསང་གཏོར་བྱ་ཞིང་ཡང་དག་པར་མཆོད་དེ་མཆོད་ཡོན་ཕུལ་ལ་བཟོད་པར་གསོལ་ཞིང་མངོན་པར་འདོད་པའི་དངོས་གྲུབ་ཞུས་ནས་

เล่ม ๗๖ · หน้า 215a

ཨོཾ་བཛྲ་སཏྭ་ཨཱཿཞེས་བརྗོད་པས་སྔ་མ་བཞིན་དུ་གཤེགས་པར་ཡང་དག་པར་བསྐུལ་ལ། ཨོཾ་མུཿཞེས་བརྗོད་ཅིང་ཆོ་ག་བཞིན་དུ་གཤེགས་སུ་གསོལ་བར་བྱའོ། །དེ་ལྟར་ཉི་མ་རེ་རེ་ཞིང་ངམ། བཤད་པའི་དུས་སམ། ཐུན་གསུམ་མམ་ཐུན་བཞིར་བྱའོ། །སོར་མོ་ཡང་དག་པར་

བརྐྱང་ཞིང་སྦྱར་བས་དེ་ནས་འོ་མ་དང་འབྲས་མ་ཆག་པ་དང་། མར་དང་སྦྲང་རྩི་དང་ཀ་ར་རྣམས་དགང་གཟར་དང་བླུགས་གཟར་གྱིས་བླུགས་ཤིང་དེ་དག་མེད་ན་པིཔྤ་ལའི་འདབ་མ་འམ་སོར་མོ་ཡང་དག་པར་བརྐྱང་ཞིང་སྦྱར་བས་མན་ཛིའི་སྟེང་དུ་གནས་པའི་ཟངས་ལ་སོགས་པར་ཙཱ་རུའི་བཟའ་བ་བླུགས་

ལ་ལས་དང་རྗེས་སུ་མཐུན་པའི་དྲིས་བྱུགས་ཏེ་མགུལ་པར་མེ་ཏོག་གི་ཕྲེང་བ་བཅིངས་ནས་གཡོན་པའི་དྲིལ་བུ་དང་ལྷན་ཅིག་ཕྲེང་བ་བཟུང་ལ་གཡས་པའི་བགྲང་ཕྲེང་དང་རྡོ་རྗེ་ཡོངས་སུ་གྱུར་པ་ལས་བདུད་རྩིར་བྱས་པར་བསྒོམ་ཞིང་སྔགས་བཟླས་པར་བྱའོ། །བདུད་རྩིའི་རང་བཞིན་དུ་འོ་

ཐུག་རྫོགས་པར་བྱས་ནས་ཐབ་ཁུང་གི་མེ་ལ་ཇི་ལྟ་བ་བཞིན་དུ་རང་ཉིད་རྣལ་འབྱོར་ལ་མཉམ་པར་བཞག་པས་ལྷ་དང་འཇིག་རྟེན་སྐྱོང་བ་དང་བདག་ཉིད་དང་སྦྱིན་བདག་རྣམས་ཀྱང་ཚིམ་པར་བྱ་སྟེ། འདི་ནི་དེ་བཞིན་གཤེགས་པ་ཡི། །ལྷག་མའོ་སྡིག་པ་ཉམས་བྱེད་ཟོ། །ཞེས་སློབ་དཔོན་གྱིས་

བརྗོད་ཅིང་ལྷག་མ་དོན་དུ་གཉེར་བ་རྣམས་ལ་ཡང་བགོ་བཤའ་བྱའོ། །མེ་གཞིལ་བ་ནི་ཞི་བ་ལ། །འོ་མའོ་རྒྱས་པ་བསྒྲུབ་པ་ལ། །སེར་པོའི་ཆུ་ཡིས་དབང་དྲག་ལ། །འོ་མ་དམར་དང་ནག་པོས་སོ། །ཞེས་པ་ལྷ་མཉེས་པར་བྱ་བའི་ཆེད་དུ་ཕྱི་རོལ་གྱི་སྦྱིན་སྲེག་གི་ཆོ་གའོ།། །།འདི་རྣམས་

ཐམས་ཅད་ཆད་པ་དང་ལྷག་པ་མེད་པར་ཡིད་ཀྱིས་བསྒོམ་པར་བྱས་ན་ངེས་པར་མངོན་པར་འདོད་པ་རྣམས་རྫོགས་པར་འགྱུར་རོ་ཞེས་པས། ཕྱི་རོལ་གྱི་དངོས་པོ་རྣམས་ལ་ལྟོས་པ་མེད་པར་ནི་ཡིད་ཀྱི་སྦྱིན་སྲེག་གོ། །རང་གི་འདོད་པའི་ལྷའི་རྣལ་འབྱོར་དང་ལྡན་པས་དེའི་ངོ་བོ་འམ།

རྡོ་རྗེ་སེམས་དཔའི་གཟུགས་སམ་རིམ་པ་ཇི་ལྟ་བ་བཞིན་དུ་རང་རང་གི་རང་བཞིན་རྣམ་པར་དག་པ་རྣམ་པར་སྣང་མཛད་ལ་སོགས་པའི་ངོ་བོས་གཟུགས་ལ་སོགས་པའི་འདོད་པ་ལྔ་ཇི་ལྟར་རྙེད་པ་ལ་ཐེ་ཚོམ་མེད་པར་ལོངས་སྤྱད་པར་བྱ་སྟེ། ཟ་བའི་དུས་སུ་ནི་རང་གི་བཟའ་བ་ཐམས་ཅད་མཉམ་

เล่ม ๗๖ · หน้า 215b

པ་ཉིད་དུ་རྣམ་པར་དག་པའི་བདུད་རྩིར་བྱས་ནས་ལྟེ་བའི་ཐབ་ཁུང་གི་མེས་འཁྱུད་ཅིང་སྙིང་གར་གནས་པའི་རང་གི་འདོད་པའི་ལྷའི་འཁོར་ལོ་ལག་པའི་དགང་གཟར་ལ་སོགས་པས་ཆོ་ག་བཞིན་དུ་ཡང་དག་པར་མཉེས་པར་བྱའོ་ཞེས་པ་ཕྱིའི་རྫས་ཀྱིས་ནང་གི་སྦྱིན་སྲེག་གི་ཆོ་གའོ།། །།དེ་ནས་ཆོ་ག་ཇི་ལྟ་བ་

བཞིན་དུ་ཞི་བ་དང་རྒྱས་པའི་སྦྱིན་སྲེག་བྱས་ཏེ་རང་ཉིད་ཀྱིས་དཀྱིལ་འཁོར་ཡང་དག་པར་མཆོད་ནས་ཐམས་ཅད་དུ་ཇི་ལྟར་ནུས་པས་དེ་བཞིན་གཤེགས་པ་ལ་སོགས་པ་རྣམས་ལ་མཆོད་པ་གྱིས་ཤིག་ཅེས་སློབ་མ་ལ་སོགས་པ་རྣམས་མཆོད་པ་བྱེད་དུ་བཅུག་ལ་དེར་ཞུགས་པ་རྣམས་ཀྱང་

དམ་ཚིག་གི་ཀུན་དུ་སྤྱོད་པས་ཚིམ་པར་བྱའོ། །དེ་ལ་འདི་ནི་དམ་ཚིག་གི་ཆོ་ག་སྟེ། དང་པོར་རྡོ་རྗེ་སེམས་དཔའ་དང་། །ཆོས་སྟོན་དེ་བཞིན་དཔའ་བོ་དང་། །དཔའ་མོའི་དབང་ཕྱུག་ལ་བཏུད་ནས། །ཚོགས་ཀྱི་སྟོན་མོ་བདག་གིས་བཤད། །སྟོན་མོ་དེ་བཞིན་སྟོན་མོ་ཆེ། །ཚོགས་ཀྱི་

འཁོར་ལོ་འཁོར་ལོ་ཆེ། །མཚན་མོའི་འཁོར་ལོ་མཚན་མོར་བཤད། །དེ་བཞིན་ཕྱོགས་ཕྲེང་འཁོར་ལོའོ། །དགེ་འདུན་སྟོན་མོ་སྟོན་མོ་ཆེ། །གཎྜཱི་བརྡུངས་པ་སྟོན་མོ་ཆེ། །ཚོགས་པ་ལྷན་ཅིག་འཁོར་ལོ་སྟེ། །དེ་བས་ལྷག་པ་འཁོར་ལོ་ཆེ། །ཉིན་རེའམ་ཟླ་བ་སོ་སོ་འམ། །དེ་

བཞིན་དུ་ནི་ལོ་རེ་འམ། །བརྒྱད་དང་བཅུ་བཞི་གཞན་ཡང་འདིར། །རྒྱས་པ་ཡི་ནི་ཚེས་རྣམས་ལ། །མཆོད་སྟོན་རྣམས་ནི་ངེས་པར་བྱ། །དམ་ཚིག་བསྲུང་བའི་དོན་དུ་སྟེ། །འདུས་སྟོན་མཚན་མོའི་འཁོར་ལོ་ཡང་། །བྱང་ཆུབ་འགྲུབ་པའི་ཆེད་དུ་བྱ། །བཟའ་བཅའ་དེ་བཞིན་འགམ་བྱ་དང་། །

གཞིབ་དང་བལྡག་པ་མྱང་བྱ་རྣམས། །བཏུང་བ་ལ་སོགས་མཉམ་ལྡན་པའི། །རོ་དྲུག་ལྡན་པ་སྟོན་མོར་འདོད། །ཡོ་བྱད་ཐམས་ཅད་བསྒྲུབས་ནས་ནི། །ཁྱད་པར་དུས་ལ་སྤྱན་དྲང་བྱ། །དང་པོར་མཎྜལ་བྱས་ནས་ནི། །མེ་ཏོག་རྣམས་དང་སོ་རྩི་སྦྱིན། །སངས་རྒྱས་དགེ་འདུན་ཡོ་བྱད་

རྣམས། །སྔ་མོར་ཉེ་བར་དབུལ་བྱ་སྟེ། །གླུ་གར་དེ་བཞིན་རོལ་མོ་ཡིས། །དེ་བཞིན་གཤེགས་ལ་བསྙེན་བཀུར་བྱ། །དེར་ཡང་སྨོན་ལམ་བྱས་ནས་ནི། །དགེ་འདུན་སྟོན་མོ་བརྩམ་པར་བྱ། །བ་བྱུང་བྱུགས་པའི་ས་ཡི་ཆར། །མེ་ཏོག་དེ་བཞིན་བདུག་སྤོས་ལྡན། །གྱོ་མོ་གསེག་མ་

เล่ม ๗๖ · หน้า 216a

རྣམས་བསལ་ནས། །གདན་རྣམས་རབ་ཏུ་བརྟག་པར་བྱ། །སངས་རྒྱས་རྗེས་སུ་རིམ་པ་ཡིས། །ཀུན་ལ་ཕྱག་སོགས་བྱས་ནས་ཀྱང་། །ཇི་བཞིན་གདན་ལ་ཡང་དག་འདུག །ལུས་ངག་སེམས་ནི་ཡང་དག་བསྡམ། །ནག་པོ་ཆེན་པོར་གཏོར་མ་སྦྱིན། །དེ་བཞིན་དུ་ཡང་གོང་

བུའི་ཟས། །ཁང་པར་ཟ་བར་འདོད་རྣམས་ཀྱང་། །དེ་ལྟར་འདོད་བཞིན་ཡང་དག་གཞག །སོ་རྩི་དེ་བཞིན་སྣོད་རྣམས་དང་། །འདག་ཆལ་དང་ནི་སོ་ཤིང་དང་། །དྲི་ཡི་ཆུ་རྣམས་དེ་བཞིན་སྦྱིན། །སྦྱིན་པ་འདུས་པས་ལོངས་སྤྱོད་དེ། །སླར་ཡང་ཞལ་བསིལ་ལ་སོགས་དབུལ། །འདུས་པ་རྣམས་

ལ་ཡོན་ཕུལ་ཏེ། །དེ་ཀུན་བསོད་ནམས་ཐུན་མོང་དུ། །བློ་ལྡན་མཁས་པ་རྣམས་ཀྱིས་བྱ། །ཕྱག་འཚལ་བཟོད་པར་གསོལ་ནས་ནི། །དགེ་འདུན་སྟོན་མོ་གཤེགས་སུ་གསོལ། །ཞེས་པ་ནི་སྟོན་མོའོ།། །།ཆོས་སྒྲོགས་ཉིད་དང་དེ་བཞིན་དུ། །གནས་བརྟན་ཉེ་བར་སྤྱན་འདྲེན་དང་། །ཁྱད་པར་དུས་ཀྱི་

སྤྱན་འདྲེན་ལའང་། །གཎྜཱི་ཀུན་ནས་བརྡུང་བར་བྱ། །སྔར་བཞིན་བདེ་གཤེགས་སྤྱན་དྲངས་ཏེ། །བླ་ན་མེད་པའི་མཆོད་པ་དང་། །ཉེར་སྤྱོད་ལྔ་ཡི་མཆོད་པ་རྣམས། །དེ་ཉིད་ཡིད་ཀྱིས་མཆོད་པར་བྱ། །ལྷག་མའི་རྡོ་རྗེ་འཁོར་ལོ་དང་བཅས་པ་སྤྱན་དྲངས་ཏེ་ཞི་བ་ལ་སོགས་པའི་གཟུགས་ཀྱིས་

བཏུང་བའི་དོན་དུ་ལག་པ་གཉིས་རབ་ཏུ་བརྐྱང་བར་བལྟས་ལ་འཁོར་ལོ་བསྐོར་བའི་མདུན་དུ་བཟླས་པའི་ཁྱད་པར་རྣམས་བླངས་ནས་དེར་གཞུག་པར་བྱ་ཞིང་དམ་ཚིག་གི་སྤོས་ལ་སོགས་པ་སྦྱིན་པར་བྱའོ། །དེ་ནས་སྔགས་བརྗོད་ཅིང་ལག་པ་གཉིས་ཁ་དང་ཉེ་བར་རབ་ཏུ་བརྐྱང་སྟེ། ཁ་བདུད་རྩིས་

གང་བས་གཏོར་ན་ལྷག་མའི་རྡོ་རྗེ་འཁོར་དང་བཅས་པ་དེས་མགུ་བར་འགྱུར་རོ། །འཁོར་དང་བཅས་པ་རྨི་ལམ་དུ་མཐོང་ཞིང་བྱ་བ་ཡང་བྱེད་པར་འགྱུར་རོ། །དེ་ལ་སྔགས་ནི་འདི་ཡིན་ཏེ། །ཨོཾ་ཀུ་རུ་ཀུ་རུ་བཏྟ་ལི་བཏྟ་ལི་མ་ཧཱ་བཏྟ་ལི་སིདྡྷི་མུ་ཁེ། སྨ་ཤཱ་ན་བཱ་སི་ནི་པྲེ་ཏ་མུ་ཁེ། ཙཎྜ་ཀཱ་ར་ལི་རུ་དྷི་

ར་པྲྀ་ཡེ། ས་མ་ཡཱ་རཀྵི། ཡོ་གཱཾ་བ་རི། ཀི་ལ་ཀི་ལ། རཱ་བེ་པི་ཏྲི་བ་ན་མ་དྷྱེར། བྷུ་ཛ་ཧ་བྷ་ཀ་ཁ་ཧ། ས་ཧ་ག་ན་རཱུ་དྷེ། དྷཱུ་མཱཾ་ག་རི། ཙཎྜ་ཀཱ་ར་ལི། ཏིཥྛ་སྭི་ཀུ་རུ་ཀུ་རུ་ཧཱུྃ། གྲྀཧྞ་གྲྀཧྞ་སརྦ་དུཥྚཱན་བྷཀྵ་བྷཀྵ་ཧོཿཕཻཾ་ཕཻཾ་ཆེ་གེ་མོའི་སརྦ་བིགྷྣཱན་ཤཱནྟིཾ་ཀུ་རུ་ཀུ་རུ་ཕཊ་སྭཱ་ཧཱ། ཞེས་པ་ནི་ཐམས་ཅད་དུ་ལྷག་

เล่ม ๗๖ · หน้า 216b

མའི་གཏོར་མའི་སྔགས་སོ།། །།དེ་ནས་དེར་ནི་དྲི་བཟངས་ཆུ། །ཞལ་བསིལ་རྣམས་ནི་སྦྱིན་པར་བྱ། །དྲི་དང་མེ་ཏོག་སོ་རྩི་རྣམས། །བྱིན་ནས་སློབ་དཔོན་སྔོན་འགྲོ་བས། །སྦྱིན་པའི་ཚིགས་སུ་བཅད་པ་བརྗོད། །དེ་ཡི་འབྲས་བུ་ཡོངས་སུ་བསྔོ། །ནུས་པ་ཡིས་ནི་ཡོན་ཕུལ་ནས། །ཚོགས་

ཀྱི་འཁོར་ལོ་གཤེགས་སུ་གསོལ། །དེ་ལ་སྦྱིན་པའི་ཚིགས་སུ་བཅད་པ་ནི། དུད་འགྲོའི་སྐྱེ་གནས་རྣམས་ལ་ཡོན་ནི་བརྒྱ་འགྱུར་སྡིག་པ་ཅན་གྱི་མི་ལའང་སྟོང་ཕྲག་སྟེ། །ཚུལ་ཁྲིམས་ལྡན་པ་རྣམས་ལ་སྟོང་ཕྲག་བརྒྱ་འགྱུར་དུ་ནི་གསུང་གི་དབང་ཕྱུག་གིས་རབ་གསུངས། །ཕྱི་རོལ་འདོད་པ་

རྣམས་ལ་ཆགས་བྲལ་ཉེ་བར་གནས་པ་ལ་ནི་བྱེ་བ་བརྒྱ་ཕྲག་བརྒྱ། །ལམ་ལ་གནས་པ་རྣམས་ལ་སླར་ཡང་ཚད་མེད་འབྲས་བུ་སྟེར་བར་ཡོན་ལས་ཡང་དག་འབྱུང་། །བསོད་ནམས་འདི་ཡིས་ཐམས་ཅད་གཟིགས་པ་ཡི། །གོ་འཕང་ཐོབ་ནས་སྐྱོན་གྱི་དགྲ་བཅོམ་སྟེ། །རྒ་ནད་

འཆི་བའི་རླབས་ཆེན་འཁྲུགས་པ་ཡི། །སྲིད་པའི་མཚོ་ལས་འགྲོ་བ་འདོན་པར་ཤོག །ཅེས་པས་བསོད་ནམས་ཡོངས་སུ་བསྔོ་བར་བྱའོ་ཞེས་པ་ནི་ཚོགས་ཀྱི་འཁོར་ལོའོ།། །།འདི་ཉིད་ཕྱི་རོལ་དུ་སོང་ནས། །དུར་ཁྲོད་དུ་ནི་བྱེད་པ་ན། །སྐལ་བ་དང་ལྡན་སློབ་དཔོན་གྱིས། །འཁོར་

ལོ་ཆེན་པོར་དེ་བརྗོད་བྱ། །མེ་ཏོག་བདུག་སྤོས་སྣང་གསལ་དང་། །དེ་བཞིན་དྲི་དང་ཕྲེང་བ་སྤོས། །ཇི་ལྟར་ཡོད་བཞིན་བཏུང་བ་དང་། །བཟའ་བ་རྣམས་ཀྱང་རིག་པར་བྱ། །དབུས་སུ་བཏུང་བ་ཡི་ནི་སྣོད། །དེར་ནི་གཡོ་བ་མེད་པར་གཞག །ལྷག་མའི་འཁོར་ལོ་སྤྱན་དྲངས་ལ། །

བསྙེན་བཀུར་བྱས་ཏེ་རབ་ཏུ་གཞག །དེ་ཡི་སྟེང་དུ་ཐོད་པ་ནི། །མཚན་ཉིད་དང་ལྡན་དགོད་པར་བྱ། །མེ་ཏོག་སྤོས་སོགས་མཆོད་པ་རྣམས། །ལས་ཀྱི་རྡོ་རྗེ་ཅན་གྱིས་དབུལ། །བདུད་རྩི་ལྔ་དང་ཤ་ལྔ་རྣམས། །སྔགས་ཀྱི་བྱིན་གྱིས་བརླབས་ནས་སླར། །ཡོ་བྱད་ཐམས་ཅད་

རབ་ཏུ་གཞུག །ལྷ་ཡི་རྣམ་པའི་རྣལ་འབྱོར་གྱིས། །སྣ་ཚོགས་བཤེས་གཉེན་སོགས་ཐོད་པར། །བཏུང་བའི་སྣོད་རྣམས་རབ་ཏུ་བརྟག །བཟའ་དང་བཏུང་བ་ལ་སོགས་ཀུན། །ཇི་ལྟར་སྔར་གྱི་དེ་བཞིན་འདིར། །སྔགས་ཀྱི་ཁུ་བའི་རང་བཞིན་ཕྱིར། །སྔགས་ཀྱི་བཏུང་བ་ཞེས་པར་

เล่ม ๗๖ · หน้า 217a

དྲན། །སྔགས་ཀྱི་ལྷ་ཡི་རྣལ་འབྱོར་བདག །སྔགས་ཀྱི་བཏུང་བ་ཡང་དག་སྤྱོད། །ཚོགས་ཀྱི་འཁོར་ལོ་གཤེགས་གསོལ་བྱ། །གོ་ཡུ་ལ་སོགས་འབྲས་བུ་དབུལ། །བླ་མར་གུས་པས་ཕྱག་བྱས་ནས། །གནས་ཇི་ལྟ་བར་བྱོན་པར་གསོལ། །ཞེས་པ་ནི་འཁོར་ལོ་ཆེན་པོའོ།། །།

རི་ཡི་ཕུག་དང་སྨན་ལྗོངས་དང་། །རྒྱ་མཚོའི་འགྲམ་དང་སྐྱེད་མོས་ཚལ། །ནགས་ཚལ་དག་གམ་རྫིང་བུར་ཡང་། །མཚན་མོའི་འཁོར་ལོ་ཡང་དག་བརྩམ། །བདུད་རྩི་ལྔ་དང་ཤ་ལྔ་རྣམས། །སངས་རྒྱས་ལྔ་ཡི་རང་བཞིན་དགེ །སྟན་ལྔ་ལ་ནི་མཉམ་པར་འདུག །རིགས་ལྔ་དག་ཏུ་རྣམ་

པར་གནས། བརྡ་དང་དགོངས་པར་ནན་ཏན་བྱ། །རྣལ་འབྱོར་པ་ཉིད་འོངས་གྱུར་ན། །དེ་ལ་སྔོན་དུ་གདན་བྱིན་ཏེ། །མཚན་མོའི་འཁོར་ལོ་ཀུན་ནས་བརྩམ། །སྒོ་བཞི་རྣམས་སུ་ཁྲོ་བོ་བཞི། །གནོད་མཛེས་གཙུག་ཏོར་ལས་བྱེད་པ། །གཟུགས་ཀྱི་རྡོ་རྗེ་མ་ལ་སོགས། །རྣལ་འབྱོར་མ་

རྣམས་རང་སར་དགོད། །སློབ་དཔོན་མི་ཡི་པགས་པ་ལ། །བ་ལང་སོགས་ལ་གཞན་རྣམས་ཀྱང་། །མཚན་མོ་དག་པའི་བློ་ཡིས་ནི། །སངས་རྒྱས་ལྔ་རྣམས་མཆོད་པར་བྱ། །ཁྲི་ལ་སོགས་པར་མཉམ་གནས་པའི། །དཔའ་བོ་དཔའ་མོའི་དབང་ཕྱུག་མཉམ། །དེ་ནས་འཁོར་

ལོ་བྱིན་གྱིས་བརླབ། །མཉམ་པར་སྙིང་རྗེ་བརྟན་པས་སོ། །ཚིགས་བཅད་ལན་གསུམ་བརྗོད་པ་ཡིས། །སྟེང་དུ་མེ་ཏོག་སོགས་གཏོར་ཏེ། །དེ་ཚེ་ལྷ་རྣམས་སྤྱན་དྲང་བྱ། །ཡང་དང་ཡང་དུ་ཕྱག་རྒྱའོ། །མཚན་མོའི་འཁོར་ལོ་གསལ་བྱས་ནས། །ཡེ་ཤེས་འཁོར་ལོ་རབ་ཏུ་

གཞུག །འཇམ་པའི་རྡོ་རྗེ་བདག་ཉིད་ཀྱི། །རྣལ་འབྱོར་པ་ཡི་དཀྱིལ་འཁོར་མཆོད། །མཆོད་ནས་རྣལ་འབྱོར་མ་འཁོར་ལོ། །ཇི་ལྟར་དགའ་བ་མི་སྤང་སྟེ། །གཡས་དང་གཡས་མིན་སྦྱོར་བ་ཡིས། །ཀུན་སྤྱོད་དེར་ནི་བརྟག་པར་བྱ། །རྣལ་འབྱོར་རྣལ་འབྱོར་མ་རྒྱུད་དུ། །གང་གསུངས་

ཚོགས་ཀྱི་འདུས་པ་རྣམས། །ཚོགས་དེ་མཆོད་ཅིང་དམ་ཚིག་གི །ཀུན་སྤྱོད་རིག་པའི་བླ་མས་སོ། །རྣམ་པ་ལྔ་ནི་རྣམ་དག་པའི། །དེ་བཞིན་གཤེགས་རྣམས་མཆོད་པར་བྱ། །སྙིང་རྗེར་ཞུགས་པའི་རྣལ་འབྱོར་པས། །སེམས་ཅན་དོན་བྱེད་ངེས་པར་རོ། །རྡོ་རྗེ་པདྨར་རབ་

เล่ม ๗๖ · หน้า 217b

གནས་པས། །བྱང་ཆུབ་སེམས་ནི་སྤྲོ་མི་བྱ། །དེར་ནི་དགའ་བ་སོགས་དབྱེ་བའི། །དེ་བཞིན་ཉིད་ལས་དེ་བཞིན་རྟོགས། །བསམ་པ་ཐམས་ཅད་ཡོངས་སྤངས་ཏེ། །ལྷ་ཡི་གཟུགས་སུ་སེམས་པ་འམ། །རྣམ་པར་མི་རྟོག་རང་བཞིན་ལས། །དེར་ནི་རྣལ་འབྱོར་པས་གནས་བྱ། །མཚན་

མོའི་འཁོར་ལོའི་ཆོ་ག་ལས། །འགའ་ཡང་དོར་བ་ཉིད་མིན་ཏེ། །མ་མ་སྲིང་མོ་ཉིད་དང་ནི། །བུ་མོ་དང་ནི་ཚ་མོ་དང་། །བདག་ཅན་དེ་བཞིན་ཆུང་མ་དང་། །སྒྱུག་མོ་དང་ནི་དེ་བཞིན་ཡང་། །ཕ་ཡི་སྲིང་མོ་མ་རྣམས་ཏེ། །ཤེས་རབ་བརྒྱད་རྣམས་གྲུབ་མཆོག་སྟེར། །དེ་རྣམས་མཆོད་

པའི་བྱ་བ་ནི། །བོ་ལ་ཀཀྐོ་ལ་སྦྱར་ནས། །སངས་རྒྱས་ཉིད་ནི་སངས་རྒྱས་ཀུན། །རང་གིས་ཡང་ཡང་རྟོགས་པར་བྱ། །སྔགས་ཀྱི་བཟླས་མེད་དཀའ་ཐུབ་མེད་ཅིང་སྦྱིན་སྲེག་མེད། །དཀྱིལ་འཁོར་ཅན་ཡང་མེད་ཅིང་དཀྱིལ་འཁོར་ཡང་ནི་མེད། །དེ་ནི་སྔགས་བཟླས་དཀའ་ཐུབ་དེ་སྦྱིན་སྲེག། །

དེ་ནི་དཀྱིལ་འཁོར་ཅན་དང་དཀྱིལ་འཁོར་ཡང་། །མདོར་བསྡུས་ནས་ནི་སེམས་ནི་འདུས་པའི་གཟུགས་ཅན་ཉིད། །ཡིད་ནི་བརྟན་ནམ་གཡོ་འམ་ཅི། །རང་གི་སེམས་ལ་སོ་སོར་བརྟག །གང་བཤད་འཇིགས་པའི་གཟུགས་ཅན་གྱི། །སྤྱོད་པ་ལོངས་སྤྱོད་ཕྱི་རམ་གསུངས། །དེ་ལྟའི་

ཆོ་གས་མཚན་མོ་ཡི། །འཁོར་ལོར་བློ་བཟང་དབང་བསྐུར་སླར། །བསྒོམས་པའི་སྟོབས་ཀྱིས་དངོས་གྲུབ་ནི། །འདི་ཉིད་ཀྱི་ནི་སྲིད་པར་སྐྱེ། །བསྒོམ་པ་ལ་སོགས་དེ་བཞིན་འདིར། །ཉུང་བ་འམ་བྱས་པ་མེད་ན་ཡང་། །གལ་ཏེ་ལྟུང་བ་མེད་གྱུར་ན། །བདུན་པར་དེ་ཡི་དངོས་གྲུབ་

འགྱུར། །ཨེ་མ་ཐབས་དང་ནུས་པ་ཡིས། །ཐེག་པ་ཆེན་པོར་ལེགས་འོངས་ནས། །འདོད་ལྡན་མ་ལ་བརྟན་འཁྱུད་དེ། །འདོད་པའི་ལྷ་ནི་བསྟེན་པར་བྱ། །སྔར་བཞིན་གཏོར་མ་མཆོད་པ་སོགས། །བྱས་ནས་འཁོར་ལོ་གཤེགས་སུ་གསོལ། །འཁོར་ལོའི་དབང་པོའི་ཕྱག་བྱས་

ནས། །ཇི་ལྟར་བདེ་བར་གནས་པར་བྱ། །ཞེས་པ་ནི་མཚན་མོའི་འཁོར་ལོའོ།། །།འཐུང་གཅོད་ཀྱི་ནི་དམ་ཚིག་བྱ། །དེ་ཡང་གྲོང་གི་དབུས་རྣམས་སམ། །དཀྱིལ་འཁོར་ཁང་པའི་ཕྱི་རོལ་དུའང་། །མཁས་པས་ཕྱོགས་ཕྲེང་སྦྱིན་པར་བྱ། །གདོང་ནི་འགའ་ཡང་མི་བལྟ་སྟེ། །

เล่ม ๗๖ · หน้า 218a

ཡོངས་སུ་དྲི་ཉིད་འགའ་ཡང་མིན། །སྣ་ཚོགས་གཟུགས་ཀྱིས་སེམས་ཅན་རྣམས། །ངེས་པར་དེར་ནི་འོངས་གྱུར་ན། །བྱོན་ནས་བྱོན་ལ་ལེགས་ཤེས་བྱ། །འདབ་མའམ་སྣོད་རྣམས་རབ་ཏུ་བརྟག །གཟའ་བཏུང་ལ་སོགས་དེ་རྣམས་སྦྱིན། །ཐམས་ཅད་ཇི་ལྟར་འདོད་

བཞིན་བྱ། །དང་པོ་བར་དང་མཐའ་རྣམས་སུ། །གཏོར་མ་གསུམ་ནི་མཁས་པས་སྦྱིན། །སོ་རྩི་དྲི་དང་མེ་ཏོག་སོགས། །ཕུལ་ནས་འཁོར་ལོ་གཤེགས་སུ་གསོལ། །ཞེས་པ་ནི་ཕྱོགས་ཕྲེང་འཁོར་ལོའོ།། །།དམ་ཚིག་གང་ལ་ཐམས་ཅད་རྣལ་འབྱོར་མར་གྱུར་ཅིང་བདེ་བའི་དོན་དུ་འཁོར་ལོའི་དབང་

ཕྱུག་མའི་གཡོན་ཕྱོགས་སུ་ཐབས་གཅིག་ཡོད་པར་གྱུར་ན་ནི་དཔའ་མོའི་དབང་ཕྱུག་མའི་འཁོར་ལོའོ། །གང་དུ་ཐམས་ཅད་དཔའ་བོར་གྱུར་ཅིང་བདེ་བའི་དོན་དུ་འཁོར་ལོའི་དབང་ཕྱུག་གི་གཡོན་དུ་རྣལ་འབྱོར་མ་གཅིག་ཡོད་པར་གྱུར་པ་ནི་དཔའ་བོའི་འཁོར་ལོའོ། །འཁོར་ལོ་འདི་གཉིས་ཉིན་པར་ཡང་དགའ་

བ་ན་བུག་པ་མེད་པའི་ཁང་པར་ཐུན་གཉིས་ཡན་ཆད་བྱ་བར་ཤེས་པར་བྱའོ། །དེའི་ཕྱིར་དཔའ་བོ་དང་དཔའ་མོའི་དབང་ཕྱུག་གི་འཁོར་ལོ་དག་ལ་གལ་ཏེ་ཤེས་རབ་གཅིག་དང་ཐབས་གཅིག་ཀྱང་མེད་པར་གྱུར་ན་དེའི་ཚེ་སྦྱིན་པའི་བདག་པོའི་བསོད་ནམས་ལས་བཟློག་པར་འགྱུར་རོ། །ཤེས་རབ་ཐབས་ཀྱི་

བདེ་བ་དག །མེད་ན་འཁོར་ལོ་ཐབས་མི་འགྱུར། །གང་ཞིག་ཤེས་རབ་ཀྱིས་དམན་པའི། །འཁོར་ལོ་དེ་ནི་རྩོད་མེད་དང་། །ལྷན་ཅིག་པ་ཡི་འཁོར་ལོའོ། །ཞེས་པ་འདི་བཅོམ་ལྡན་འདས་ཀྱི་གསུང་ངོ་། །ཚོགས་ཀྱི་འཁོར་ལོའི་ཆོ་གའོ།། །།དེ་གསུངས་པ་ཚོགས་ཀྱི་འཁོར་ལོའི་ཆོ་གས་

དཀྱིལ་འཁོར་གྱི་ཁང་པར་བཟའ་བ་དང་བཏུང་བ་ལ་སོགས་པ་རྣམས་འཁོར་ལོ་ལ་ཕུལ་ཏེ། །དེར་ཞུགས་པ་རྣམས་ཡང་དག་པར་ཚིམ་པར་བྱའོ། །དེ་རྣམས་དང་ལྷན་ཅིག་མཚན་མོ་མི་ཉལ་བར་གར་དང་གླུ་ལ་སོགས་པ་དང་བྱང་ཆུབ་སེམས་ཀྱི་རྟོག་པས་ཡང་དག་པར་མཆོད་ནས་ཁྱེད་རྣམས་ཀྱིས་

འཇུག་པ་འདི་སུ་ལའང་སྨྲ་བར་མི་བྱའོ་ཞེས་བརྗོད་པར་བྱའོ། །དེ་ནས་སློབ་མ་རྣམས་གཞག་སྟེ་ཕྱི་རོལ་དུ་ཕྱོགས་ཀྱི་གཏོར་མ་དང་མཆོད་པ་ལ་སོགས་པ་བྱས་ལ་ནང་དུ་ཞུགས་ནས་འཁོར་ལོ་ལ་ཕྱག་འཚལ་ཏེ། མཆོད་ཡོན་ལ་སོགས་པ་འཁོར་ལོའི་དབང་པོ་ལ་ཕུལ་ནས་དགེ་

เล่ม ๗๖ · หน้า 218b

བ་རྣམས་ཡོངས་སུ་བསྔོས་ཏེ། དཀྱིལ་འཁོར་ལ་ལན་གསུམ་གཡས་སྐོར་བྱས་ལ། བཅོམ་ལྡན་འདས་ལ་མངོན་པར་ཕྱོགས་པས་ཤར་སྒོར་འདུག་སྟེ་ཡི་གེ་བརྒྱ་པ་ལན་གསུམ་བརྗོད་ནས་མ་རྙེད་པ་ཞེས་པ་ལ་སོགས་པས་བཟོད་པར་གསོལ་ཞིང་། ཁྱེད་ཀྱིས་སེམས་ཅན་དོན་ཀུན་མཛད། །ཅེས་པ་ལ་སོགས་

པ་དང་། ཨོཾ་ཨཱཿཧཱུཾ་བཛྲ་མུཿཞེས་པས་ཡེ་ཤེས་ཀྱི་དཀྱིལ་འཁོར་གཤེགས་སུ་གསོལ་ནས། རང་གི་སྤྲུལ་པའི་དཀྱིལ་འཁོར་བདག་ཉིད་ལ་བསྟིམ་སྟེ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨ་དྱ་ནུཏྤནྣ་ཏྭཏ་ཨོཾ་ཨཱཿཧཱུཾ་ཕཊ་སྭཱ་ཧཱ། ཨོཾ་ཨཱཿཧཱུཾ་མུཿཞེས་འདོན་ཅིང་ཆོས་ཐམས་ཅད་སྐྱེ་བ་མེད་པར་མོས་པས་

དྲིལ་བུ་དཀྲོལ་ཞིང་ལག་པར་གནས་པའི་རྡོ་རྗེས་ཤར་གྱི་སྒོ་ནས་བརྩམས་ཏེ་ཚངས་པའི་ཐིག་གི་ལམ་ནས་གཙོ་བོའི་གནས་ཀྱི་བར་དུ་དབྱི་ཞིང་མགོ་བོ་ལ་རྡུལ་ཚོན་ཅུང་ཟད་བླུགས་ནས་པདྨ་ལ་སོགས་པ་དབྱི་བར་བྱའོ། །དེ་ནས་སྒོ་རྣམས་དང་ཟུར་རྣམས་ཀྱང་ལག་པ་ན་གནས་པའི་རྡོ་རྗེའི་རྩེ་མོས་

མངོན་པར་གཞིག་པར་བྱའོ། །དེའི་རྗེས་སུ་ཨོཾ་བཛྲ་ཀཱི་ལ་ཨུཏྐཱི་ལ་ཡ་སརྦ་ཀཱི་ལན་བཛྲ་དྷ་ར་ཨཱཛྙཱ་ཡ་ཧཱུཾ་ཧཱུཾ་ཧཱུཾ་ཧཱུཾ་ཕཊ་ཧོཿཞེས་པ་ཧཱུཾ་བཞི་པས་གཡོན་བརྐྱང་དང་སྐམ་པའི་ཕྱག་རྒྱས་ཕུར་བུ་རྣམས་བཏོན་ལ། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནེ་སརྦ་ཨརྠ་སཱ་དྷ་ནེ་སྭཱ་ཧཱ། ཞེས་པ་བརྒྱ་རྩ་བརྒྱད་བཟླས་

པའི་འོ་མས་བཀྲུ་བར་བྱའོ། །ཕུར་བུའི་ལྷ་རྣམས་ཀྱང་གཤེགས་སུ་གསོལ་ཞིང་ཕུར་བུའི་ཁུང་བུ་རྣམས་ཀྱང་དགང་བར་བྱའོ། །ཞི་བ་ལ་སོགས་པ་དོན་དུ་གཉེར་བ་རྣམས་ལ་རྡུལ་ཚོན་ཅུང་ཟད་སྦྱིན་པར་བྱའོ། །དེ་བཞིན་དཀྱིལ་འཁོར་ཁང་པ་ཉིད་དུ་སྐྱེ་བོ་མེད་པར་བྱས་ནས་རྡུལ་ཚོན་ཡང་དག་

བསྡུས། །ཕྱི་ནས་བ་ལས་བྱུང་བ་རྣམས་ཀྱིས་འདི་ལྟར་མཐའ་དག་འཁོར་ལོ་ལ་ནི་མཁས་པས་གཏོར། །དེ་ནས་བ་བྱུང་རྣམས་ཀྱིས་བྱུག་པ་རབ་ཏུ་བྱ་སྟེ་རི་མོ་རྣམས་ཀྱང་བྱུག་པར་བྱ། །མེ་ཏོག་རྣམས་ནི་ངེས་པར་དགྲམ་ཞིང་ཕྱག་བྱས་ནས་ནི་ས་ཡི་ལྷ་མོ་མཉེས་པར་བྱ། །ཕྱི་ནས་དཔལ་

ལྡན་རྣམ་རྒྱལ་རྡུལ་ཚོན་རྣམས་ཀྱིས་རབ་ཏུ་བཀང་སྟེ་ཐབ་ཀྱི་ཐལ་བ་སོགས། །བགེགས་དགྲའི་བུམ་པར་དེ་བཞིན་ཉིད་དེ་ཆོ་གས་དམ་པའི་གོས་རྣམས་འདི་དག་མགྲིན་པ་ལའོ། །རྣལ་འབྱོར་མ་ཡིས་བཟུང་ནས་གླང་ཆེན་སྟེང་དུ་དེ་ལྟར་མཐོན་པོར་སྤྲོ་བས་ཁྱེར་ནས་ནི། །ཀླུ་ཡི་གཏོར་

เล่ม ๗๖ · หน้า 219a

མ་བྱས་ནས་ཆུ་ཀླུང་རྣམས་སམ་མཚོ་རྣམས་སུ་ནི་བླུགས་པར་བྱ། །ཆོ་ག་འདི་ནི་སྦྱིན་བདག་གིས་བྱིན་པའི་རས་ཀྱིས་བརྒྱན་པའི་རྣལ་འབྱོར་མ་རྣམས་ཀྱིས་བཟུང་ལ་འདོ་ལི་ལ་གནས་པའི་སློབ་དཔོན་ནམ་སློབ་མས་དྲིལ་བུའི་སྒྲ་དང་བཀྲ་ཤིས་ཀྱི་གླུ་དང་རོལ་མོའི་སྒྲ་དང་གདུགས་དང་རྒྱལ་མཚན་

དང་བ་དན་ལ་སོགས་པའི་མཆོད་པ་རྣམས་དང་ལྡན་པས་ཁྱེར་ནས་ཆུ་ཀླུང་ཆེན་པོ་དང་མཚོ་ཆེན་པོ་དང་ཆུ་ཟབ་མོའི་འགྲམ་དུ་འདུག་ལ་བ་བྱུང་གིས་བྱུགས་པའི་སའི་ཆར་དཀར་པོའི་དྲིས་མཎྜལ་བྱས་ཏེ། དེའི་དབུས་སུ་པདྨ་འདབ་མ་བརྒྱད་བྲིས་ཏེ། ལྟེ་བར་རྡོ་རྗེ་སེམས་དཔའ་དང་འདབ་མ་བརྒྱད་ལ་

ཀླུ་རྣམས་སྔ་མ་བཞིན་དུ་མཆོད་ཅིང་ཀླུ་གཏོར་གྱི་སྔགས་ཀྱིས་འོ་ཐུག་གི་གཏོར་མ་ཕུལ་ནས་མཆོད་དེ་ཀླུ་རྣམས་ལ་བྱིན་གྱིས་བརླབས་པའི་རྡུལ་ཚོན་གཏོར་ནས་ཆུ་ལ་བསྐུར་བར་བྱའོ། །ཀླུ་རྣམས་ཀྱིས་བཀུར་སྟི་ཆེན་པོས་ས་འོག་གི་གཞི་ལ་ཁྱེར་བར་བསམ་པར་བྱའོ། །གང་རྡུལ་ཚོན་ཁྱེར་བའི་

བུམ་པ་དེ་དག་ཆུས་བཀང་ནས་དེ་ཁོ་ན་ཉིད་དུ་ཁྱེར་ཏེ་དེ་དག་གིས་ཞི་བའི་དོན་དུ་དཀྱིལ་འཁོར་ཁང་པ་ལ་སོགས་པར་གཏོར་བར་བྱའོ། །ཕྱི་ནས་དེ་ཡི་ཆེན་པོའི་བསམ་པ་ཡིས་ནི་མཐའ་དག་གཉེན་དང་བཅས་པའི་རིགས་རྣམས་ཀྱིས། །སྤྲོ་བ་ཆེན་པོས་ཆོ་ག་བཞིན་དུ་གཞོན་ནུ་མ་ཡི་སྟོན་

མོ་བདེ་བ་ཆེན་པོ་བྱ། །སྡུག་བསྔལ་ཅན་ལའང་འབྱོར་བའི་རྗེས་སུ་མཐུན་པའི་སྦྱིན་པ་དྲི་མེད་མཁས་པས་སྦྱིན་པར་བྱ། །དགེ་འདུན་རྣམས་ལ་ཡང་ནི་སྟོན་མོ་གོས་དང་བཅས་ཤིང་ཡོན་དང་བཅས་པ་གུས་པས་སོ། །དེ་ལ་འདི་ནི་གཞོན་ནུ་མ་མཆོད་པའི་ཆོ་ག་སྟེ། གཞོན་ནུ་མ་རྣམས་ལྷ་མོའི་

གཟུགས། །ཡང་དག་གནས་པ་ཆོ་གས་མཆོད། །དཀྱིལ་འཁོར་ཡང་དག་བྱས་ནས་ནི། །ས་དེར་ནུས་པས་སྤྱད་པར་བྱ། །དཀྱིལ་འཁོར་གང་དུ་ལྷ་མོ་ཇི་སྙེད་ཡོད་པ་དེ་སྙེད་ཀྱི་གཞོན་ནུ་མ་རྣམས་ཉི་མ་སྔོན་མ་ལ་མཎྜལ་ལ་སོགས་པ་སྔོན་དུ་འགྲོ་བས་སྙན་གསན་དབབ་པར་བྱ་ཞིང་། དེ་ནས་

གཅིག་གམ་གཉིས་སམ་གསུམ་མམ་བཞི་ལ་སོགས་པ་སྦྱིན་བདག་གི་ནུས་པའི་དབང་གིས་མཆོད་པར་བྱའོ། །དེ་ཡང་རྡུལ་ཚོན་དོར་བའི་རྗེས་སུ་དྲི་བཟངས་ལ་སོགས་པས་ཁྲུས་བྱ་ཞིང་གོས་དམར་པོས་བརྒྱན་པར་བྱས་ནས་གུས་པ་དང་བཅས་ཏེ་སྤྱན་དྲངས་པ་རྣམས་བཅོམ་ལྡན་

เล่ม ๗๖ · หน้า 219b

འདས་མ་བཞིན་དུ་ཡོངས་སུ་བརྟགས་ལ། ཞབས་བསིལ་དང་། ཞལ་བསིལ་ལ་སོགས་པ་ཕུལ་ནས་དཀྱིལ་འཁོར་གྱི་ཁང་པར་གཞུག་པར་བྱའོ། །ཤར་དུ་མངོན་པར་ཕྱོགས་པར་བྱས་ནས་ཀུ་ཤའི་ཆུན་པོ་རྣམས་གདན་གྱི་འོག་ཏུ་བྱིན་ལ་དེའི་སྟེང་དུ་འདུག་པར་བྱའོ། །དེའི་རྗེས་སུ་སློབ་དཔོན་གྱིས་

ཇི་ལྟ་བར་དཀྱིལ་འཁོར་དུ་ས་བོན་དང་མཚན་མ་ཡོངས་སུ་གྱུར་པ་ལས་སྐད་ཅིག་གིས་དཀྱིལ་འཁོར་དབང་ཕྱུག་རྣམ་པར་བསྒོམས་ཏེ། ཡེ་ཤེས་སེམས་དཔའ་དང་དབྱེར་མེད་པ་ལ་མཆོད་ཡོན་ལ་སོགས་པ་ཕུལ་ནས་མགོ་བོར་སིནྡྷུ་ར་དང་མགྲིན་པར་སྐུད་པའི་ཕྲེང་བ་དང་མིག་ལ་ཐུར་མས་མིག་

སྨན་དང་མེ་ཏོག་དམར་པོའི་རྒྱན་རྣམས་ཀྱང་སྦྱིན་པར་བྱའོ། །དེ་ནས་བཞི་མཉམ་ལ་སོགས་པ་ཇི་ལྟར་རྙེད་པ་འམ་དྲི་བཟངས་ཀྱིས་དཔྲལ་བ་དང་སྙིང་ག་དང་ལག་པ་དང་རྐང་པ་དག་ལ་བྱུག་པར་བྱའོ། །གཏོར་མ་བྱིན་ཏེ་དེ་ནས་ནི། །སྔགས་པས་བཟའ་བ་དེ་དག་དབུལ། །བཟའ་དང་བཅའ་དང་

དེ་བཞིན་འགམ། །མྱང་དང་གཞིབ་དང་བལྡག་པ་དང་། །ཙཱ་རུ་སྒྲོན་མ་ཆང་བཅས་ཀུན། །ཡང་དག་སྦྱངས་ཏེ་དབུལ་བར་བྱ། །བསྟོད་དང་མཆོད་པ་ཡང་དག་ལྡན། །སྔགས་ཀྱི་བཟླས་པར་རྟག་ཏུ་བརྩོན། །ཕྱག་རྒྱ་ཆེན་པོ་མངོན་འདོད་པའི། །མཁས་པས་གཞོན་ནུ་མ་རྣམས་མཆོད། །དེ་

ལྟར་ཡང་། ཆང་དང་ཤ་རྣམས་ཀྱིས་ཀྱང་རྡོ་རྗེའི་ལྷ་མོ་རྣམས། །མྱུར་བར་རབ་ཏུ་འབད་པས་སོ་སོར་མཆོད་བྱེད་ན། །གུས་དང་ལྡན་པས་དེ་རྣམས་མཆོད་སྦྱིན་སྐྱེ་བོ་ནི། །དཔལ་ལྡན་རྡོ་རྗེའི་ཐེག་པར་གནས་དགར་གནས་དེ་ལ། །ཡང་དག་ཚིམ་པར་སེམས་ལ་མཆོག་ནི་སྟེར་བར་འགྱུར། །དེ་ཡི་

ལག་པར་མཆོག་རྣམས་ངེས་པར་གནས་པའོ། །ཞེས་བཅོམ་ལྡན་འདས་ཀྱིས་དཔལ་སྡོམ་པ་འབྱུང་བ་ལས་གསུངས་སོ། །དགེ་དང་མི་དགེའི་མཚན་མ་རྣམས། །རྒྱས་པར་དེ་ཉིད་ཤེས་བྱ་སྟེ། །ཡང་དག་བསྡུས་ཕྱིར་འདིར་མ་བརྗོད། །བདག་ནི་མངས་པས་འཇིགས་ཕྱིར་རོ། །དེ་ནས་ཞབས་བསིལ་

ཕུལ་ནས་ནི། །དྲི་བཟངས་རྣམས་ཀྱིས་ལག་པ་བྱུག །སོ་རྩི་རྣམས་དང་ཡོན་ཕུལ་ནས། །ལག་པར་མེ་ཏོག་རབ་ཏུ་དབུལ། །ཤིས་པ་བརྗོད་པ་དེ་ཐོབ་ནས། །བསོད་ནམས་ཡོངས་སུ་བསྔོ་བར་བྱ། །ཐམས་ཅད་གཤེགས་གསོལ་བྱས་ནས་ནི། །ཕྱག་བྱ་རང་ཁྱིམ་བྱོན་པར་གསོལ། །

เล่ม ๗๖ · หน้า 220a

ཞེས་པས་དཀྱིལ་འཁོར་དུ་གཞོན་ནུ་མའི་མཆོད་པ་བྱས་ནས། དེ་ཡི་རྗེས་སུ་བཟའ་དང་བཅའ་དང་འགམ་པ་རྣམས་དང་སྣ་ཚོགས་རོ་མཆོག་རྣམས་དང་བཏུང་བ་དང་། །གཞིབ་དང་བལྡག་དང་མེ་ཏོག་སོ་རྩི་རྣམས་དང་དེའི་གོས་རྣམས་དང་ཡོན་རྣམས་རབ་ཏུ་དབུལ་བྱ་སྟེ། །འཁོར་ལོའི་ཁང་པར་འཁོར་ལོ་

འོ་དེ་རྗེས་འབྱོར་པས་བཟོ་བོ་འདུས་པ་རྣམས་ཀྱང་ཚིམ་པར་བྱ། །ཕྱི་ནས་རབ་ཏུ་གནས་པའི་ལྷ་དང་དེ་རྗེས་ལྗོངས་ཀྱི་སྐྱེ་བོ་མཆོད་པར་བྱ་ཞིང་ཚིམ་པར་བྱ། །ཁང་པ་རྣམས་དང་སྒོ་དང་སྟེགས་བུ་ལྷག་པར་གནས་པའི་ཆོ་ག་དང་ནི་ཐབ་ཁུང་ཁྲི་རྣམས་ལས། །གང་གང་དངོས་པོ་རབ་ཕུལ་དེ་དང་དེ་རྣམས་

མཐའ་དག་འདིར་ནི་སློབ་དཔོན་རྒྱལ་པོ་ཉིད་ཀྱིས་ཏེ། །འདི་རྣམས་སློབ་དཔོན་ལས་ནི་གཞན་གྱིས་མ་ཡིན་དེ་བཞིན་བཟོ་རྣམས་ལ་ཡང་ཅུང་ཟད་ཉིད་མི་འགྱུར། །དེ་རྣམས་ཐམས་ཅད་སྦྱིན་པ་དང་ནི་བསོད་ནམས་ལ་ཡང་བླ་མའི་རང་ཉིད་འདོད་པས་སྦྱར་བར་བྱ། །སྦྱིན་བདག་རྣམས་ཀྱིས་རབ་ཏུ་གནས་པ་བྱས་པས་

སྐུ་གཟུགས་ལ་སོགས་སྐྱེད་དུ་རུང་བ་རྣམས། །རོལ་མོ་ལ་སོགས་པ་ཡི་མཆོད་པས་རང་གི་གནས་སུ་ཁྱེར་ལ་མཆོད་པ་བྱའོ། །མན་ངག་རྣམས་ཀྱིས་ཡོངས་སུ་སྦྱངས་པའི་དགེ་བ་མཆོད་སྦྱིན་རྣམས་ཀྱིས་འབྲས་བུར་གྱུར་པ་ནི། །གཉིས་ཀས་སངས་རྒྱས་རྣམས་ཀྱི་འབྲས་བུ་ཐོབ་ཅིང་ཕན་པར་བྱེད་པའི་

སྦྱིན་པས་སྦྱིན་བདག་བདེ། །སློབ་དཔོན་གྱིས་ཀྱང་སེམས་ཅན་ཀུན་ལ་བདེ་བ་སྦྱིན་པ་ཐོབ་ཅིང་རབ་གནས་བདག་ཉིད་ཀྱི། །རྒྱལ་པོ་གནས་ཀྱི་བདག་པོ་རྣམས་དང་སྐྱེ་བོ་རྣམས་ལ་ངེས་པར་ཀུན་དུ་དགེ་བ་སྟེ། །ཞེས་པ་དཀྱིལ་འཁོར་ཉེ་བར་བསྡུ་བའི་ཆོ་གའོ།། །།དེ་ལྟར་འདི་ནི་བྲིས་པའི་དཀྱིལ་འཁོར་གྱི་

ཆོ་ག་སྟེ། །ཡིད་ཀྱིས་རྗེས་སུ་བསྒྲུབ་པའི་ཆོ་ག་ཉིད་འབྲས་བུ་དང་ལྡན་ནོ་ཞེས་པ་ཡིད་ཀྱི་ཆོ་ག་ཁོ་ན་མཆོག་ཡིན་ནོ། །དེའི་ཕྱིར་དཀྱིལ་འཁོར་གྱི་མངའ་བདག་གི་གཟུགས་ཀྱིས་ས་ཡོངས་སུ་གཟུང་བ་ལ་སོགས་པ་དང་སྐུ་གཟུགས་ལ་སོགས་པའི་རབ་གནས་དང་། སློབ་མ་ལ་མངོན་པར་དབང་

བསྐུར་བ་དང་གཤེགས་སུ་གསོལ་བ་དང་ཞི་བའི་སྦྱིན་སྲེག་གི་མཐར་ཐུག་པ་ཐམས་ཅད་ཡིད་ཀྱིས་བྱའོ། །དེ་ཉིད་ཀྱི་ཕྱིར་འདི་ལྟར་གང་གི་ཚེ་འདི་དག་ཐམས་ཅད་ཡོ་བྱད་འགའ་ཞིག་དང་བྲལ་བས་བྱ་བར་མི་ནུས་པའམ། །མི་རིགས་པའམ་མ་རྙེད་པ་དེའི་ཚེ་བསམ་པས་ཐམས་ཅད་བྱའོ། །

เล่ม ๗๖ · หน้า 220b

ཕྱི་རོལ་གྱི་དངོས་པོ་ཡོད་པ་ལ་ཡང་བསམ་གཏན་ཁོ་ན་གཙོ་བོ་ཡིན་ནོ། །འཇིག་རྟེན་པས་མཐོང་བས་ན་སྦྱིན་པ་ལ་མངོན་པར་དད་པ་ལ་སོགས་པས་བསོད་ནམས་འཕེལ་བར་བྱ་བའི་ཆད་འབའ་ཞིག་ཏུ་ཕྱིའི་ཆོ་ག་འདོད་དོ། །ཡོ་བྱད་དང་བྲལ་བས་ནི་བསམ་པ་ཁོ་ནས་ཆོ་ག་ཐམས་ཅད་བསྒྲུབ་པར་བྱའོ། །

དེའང་། དངོས་པོ་ཐམས་ཅད་མེད་གྱུར་ན། །བསམ་པ་ཉིད་ཀྱིས་ཡོངས་སུ་བརྟག །ཅེས་གསུངས་སོ། །དེའི་ཕྱིར་ལས་དང་པོ་པས་ཀྱང་སེམས་བརྟན་པོས་ཡིད་ཀྱིས་སྤྲུལ་པའི་དཀྱིལ་འཁོར་དུ་རབ་ཏུ་གནས་པ་ལ་སོགས་པ་བྱ་ཞིང་སྐལ་བ་དང་ལྡན་པའི་སྐྱེ་བོ་རྣམས་ཀྱང་མངོན་པར་དབང་བསྐུར་བར་བྱའོ། །

དེ་ལྟར་དཔལ་ལྡན་སངས་རྒྱས་ཐོད་པའི་རྒྱུད་དུ། ཤེས་རབ་པདྨའི་ནང་དུ་ནི། །དཔག་ཚད་བྱེ་བའི་དཀྱིལ་འཁོར་ལ། །རིགས་གསུམ་དཀྱིལ་འཁོར་དེ་དབུས་སུ། །མཁས་པས་སློབ་མ་དབང་བསྐུར་བྱ། །ཞེས་གསུངས་ཤིང་གཞན་དུའང་། ཡིད་ཀྱིས་འགའ་ཞིག་ཉིད་དུ་ནི། །རྒྱལ་བས་དཀྱིལ་

འཁོར་བྱ་བར་བཞེད། །ཞེས་གསུངས་ཏེ་ཡིད་ཀྱི་དཀྱིལ་འཁོར་གྱི་ཆོ་གའོ།། །།འདིར་བརྗོད་པའི་ཆོ་ག་རྣམས་ཀྱང་བྱ་བ་གཞན་རྣམས་ལ་ཡང་དང་པོ་དང་མཐར་བགེགས་ཐམས་ཅད་ཉེ་བར་ཞི་བའི་ཆེད་དུ་གཏོར་མ་སྦྱིན་པར་བྱའོ། །དེ་ལ་འདི་ནི་ཆོ་ག་སྟེ་རེ་ཞིག་དང་པོར་སློབ་དཔོན་ཇི་ལྟར་རྙེད་པའི་

ཅོད་པན་ལ་སོགས་པས་རྣམ་པར་བརྒྱན་པ་དཔལ་རྡོ་རྗེ་སེམས་དཔའི་མདུན་དུ་ཤ་ཀ་ཊ་དང་པི་ཊ་ཀ་ལ་སོགས་པའི་སྣོད་ཆེན་པོ་རྣམས་སུ་ཟན་དང་ཁུར་བ་དང་ལ་དུ་དང་ཛམྦུ་ཏི་ལ་སོགས་པ་དང་ཉ་ཤ་དང་བཙོང་དང་སྒོག་སྐྱ་དང་ཆང་དང་ཆུ་དང་འོ་མ་ལ་སོགས་པ་དང་མེ་ཏོག་དང་ལྡན་པ། བླ་རེ་ལ་སོགས་པས་

བརྒྱན་ཅིང་རོལ་མོ་མཁན་གྱི་མདུན་དུ་བསྟར་བ་འམ་ཟན་དང་ཆུ་ལ་སོགས་པ་ཙམ་ཡང་རུང་ཇི་ལྟར་རྙེད་པ་ཡང་དག་པར་བཀོད་ནས་བཟའ་བ་དང་བཅའ་བ་དང་བལྡག་པ་དང་བཏུང་བ་ལ་སོགས་པ་རྣམས་སྔར་ཚོགས་ཀྱི་འཁོར་ལོར་བཤད་པའི་བདུད་རྩི་བསྒྲུབ་པའི་ཆོ་གས་བདུད་རྩིར་བསྐྱེད་པར་བྱའོ། །དེ་

ནས་བསྡུས་པའི་རིམ་པའི་ཆོ་ག་འམ་ཡན་ལག་བཞི་པའི་ཆོ་ག་འམ་ས་བོན་ལ་སོགས་པ་ལས་སམ་སྐད་ཅིག་གིས་ཀྱང་རྡོ་རྗེ་སེམས་དཔའི་གཟུགས་ཀྱི་མདུན་དུ་དྲི་བཟངས་ལ་སོགས་པས་མཎྜལ་བྱས་པར་རང་གི་འཁོར་ལོའི་དབང་ཕྱུག་ལ་སོགས་པའི་དེ་བཞིན་གཤེགས་པ་ལ་སོགས་པ་ཐམས་ཅད་ཡང་དག་

เล่ม ๗๖ · หน้า 221a

པར་མཆོད་ནས། མི་བསྐྱོད་རྡོ་རྗེ་ཞེས་པ་ལ་སོགས་པའི་ཚིགས་སུ་བཅད་པ་དྲིལ་བུ་འཁྲོལ་བ་སྔོན་དུ་འགྲོ་བས་བསྟོད་དེ། རང་གི་སྙིང་གའི་ས་བོན་གྱི་འོད་ཟེར་གྱིས་ཁྲོ་བོ་དང་བཅས་པའི་སྲུང་བའི་འཁོར་ལོ་རྩིབས་བཅུ་པའི་ལྟེ་བ་ལ་གནས་པའི་གཞལ་ཡས་ཁང་གི་ནང་ན་བཞུགས་པའི་

དཀྱིལ་འཁོར་དང་དབང་པོ་ལ་སོགས་པ་འཁོར་དང་བཅས་པ་དང་ཀླུ་རྣམས་དང་སེམས་ཅན་ཐམས་ཅད་ཀྱང་བཀུག་ནས་དབང་པོ་ལ་སོགས་པ་སྐད་ཅིག་གིས་འོད་གསལ་བར་རབ་ཏུ་ཞུགས་པའི་རྗེས་ལ་འདུས་པའི་ལྷ་ཤེས་རབ་དང་བཅས་པའི་ངོ་བོར་རྣམ་པར་བསམས་ཏེ། མདུན་དུ་ཞབས་བསིལ་ལ་

སོགས་པ་སྔོན་དུ་འགྲོ་བས་དྲིལ་བུ་དཀྲོལ་ཞིང་རྡོ་རྗེ་གསོར་ཏེ་སྟོང་པ་ཉིད་དང་སྙིང་རྗེ་དབྱེར་མེད་པའི་བྱང་ཆུབ་ཀྱི་སེམས་སུ་ལྷག་པར་མོས་པ་དང་འཁོར་གསུམ་ཡོངས་སུ་དག་པས་གཏོར་མ་རྣམས། ཨོཾ་ཨཱཿཧཱུཾ་ཆེ་གེ་མོ་བཛྲ་ཞེས་རང་གི་འཁོར་ལོའི་དབང་པོ་ལ་སོགས་པ་ནས་གནོད་མཛེས་ཀྱི་བར་

གྱི་ལྷ་རྣམས་རེ་རེ་ནས་མིང་ནས་སྤྲོས་ཤིང་དེ་དག་གི་ས་བོན་ཡང་བརྗོད་དེ། སརྦ་དུཥྚ་ས་མ་ཡ་མུ་དྲ་པྲ་བྷཉྫ་ཀ་མ་མ་ཤཱནྟིཾ་རཀྵཉྩ་ཀུ་རུ་སྭཱ་ཧཱ་ཧཱུཾ། ཨོཾ་སརྦ་ཏྲྱ་དྷྭ་ཛ་ད་ཤ་དི་ཀ། ལོ་ཀ་དྷཱ་ཏྭ་ནནྟ་ག་ག་ན། ས་མུ་དྲ་མེ་གྷ་བྱཱུ་ཧ་པྲ་ས་ར། པ་ར་མཱ་ནུ་ར་ཛོ་མཎྜ་ལ། པ་རཾ་པ་ར་ཨ་ནནྟརྒ་ཏ། ས་མཱ་པཏྟྱ་པ་སྠི་ཏཱ།

དྷརྨ་དྷཱ་ཏུ་ས་མ་བ་ས་ར་ཎཱ། ཨཱ་ཀཱ་ཤ་དྷཱ་ཏུ་པརྱ་བ་སཱ་ནཾ། སརྦ་ཏྲྱ་དྷྭ་ཛ་ད་ཤ་དི་ཀ །ལོ་ཀ་དྷཱ་ཏུ་ཨ་ནནྟ་མེ་གྷ་བྷཱུ་ཧ། པྲ་ས་ར་ག་ག་ན་ས་མཱ། སརྦ་ལོ་ཀ་པཱ་ལཱཿསརྦ་སཏྭཉྩ། ཏདྱ་ཐཱ། བཛྲ་ཡུ་དྷ་མཱ་ཡ་བཛྲ། བཛྲཱ་ན་ལ་བཛྲ་ཀཱ་ལ་བཛྲ་མུ་ས་ལ་ནཱ་ག་བཛྲ། བཛྲཱ་ནི་ལ། བཛྲ་བྷཻ་ར་ཝ། བཛྲ་ཤཽཎྜ་བཛྲ་ཀྲོ་དྷ། བཛྲ་

ཀུཎྜ་ལི་བཛྲ་པྲ་བྷཱ། མོ་ན་བཛྲ་བེ་མ་ཙི་ཏྲི། པྲྀ་ཐི་བཱི་དེ་ཝ་ཏཱ་ས་པ་རི་ཝཱ་རཱཿ། ཨི་མཾ་པུཥྤཾ་དྷཱུ་པ་དཱི་པ་གནྡྷ་ནཻ་ཝི་དྱཾ་ཨཱ་དི་སཾ་ཡུཀྟ་བ་ལི་ཨུ་པ་ཧ་རཾ། པྲ་ཏཱིཙྪ་ཨུ་པ་བྷུ་ཛྱ། མ་མ་ཧི་ར་ཎྱ་སུ་ཝརྞ། དྷ་ན་དྷྱཱ་ན་ཨཱ་ཡུཿཡཽ་ཝན་ཨ་རོ་གྱ་སཏྶུ་ཁ། པྲཱ་ཧཱ་ར་ཀཱན་སརྦ་བིགྷྣཱཾ་བི་ནཱ་ཡ་ཀཱན། སརྦ་དུཥྚཱ་ན་པྲ་དུཥྚཱན། མ་ནུ་

ཥྱ་ཨ་མ་ནུ་ཥྱཱ། ཛམྦྷ་ཡ་སྟམྦྷ་ཡ་བནྡྷ་ཡ་བི་དྷྭནྶ་ཡ། མ་མ་ཧི་ར་ཎྱ་སཱུ་ཝརྞ་དྷ་ན་དྷཱ་ནྱ་ཨཱ་ཡུཿཡཽ་བ་ན། ཨ་རོ་གྱ་སཏྶུ་ཁཱ་ནི། མ་ཧཱ་སུ་ཁ་པྲ་བྲྀདྡྷ་ཡེ། བཱ་ཡད་ཨཱ་བོ་དྷ་མཎྜ་པ་ཪྻནྟཾ། ཌྷཽ་ཀ་ཡ་ཏི་ས་དཱ་ས་ཧཱ་ཡི་ཀ་ཤཱནྟིཾ་རཀྵཉྩ་ཀུ་རུ་ཧཱུྃ། ཞེས་པའི་སྔགས་རྣམས་དང་ཀླུ་གཏོར་གྱི་སྔགས་ཀྱིས་ཀྱང་དབུལ་བར་

เล่ม ๗๖ · หน้า 221b

བྱའོ། །དེ་རྣམས་ཀྱང་རང་གི་དཀྱིལ་འཁོར་གྱི་བདག་པོ་ནས་བརྩམས་ཏེ་གནོད་མཛེས་ཀྱི་མཐར་ཐུག་པ་རྣམས་དང་། དེ་ནས་དབང་པོ་ལ་སོགས་པ་འཁོར་དང་བཅས་པ་རྣམས་དང་དེའི་རྗེས་སུ་ཀླུ་རྣམས་དང་། དེ་ནས་སེམས་ཅན་ཐམས་ཅད་ཀྱི་ལྕེ་ཧཱུཾ་ལས་བྱུང་བའི་རྡོ་རྗེ་རྩེ་གཅིག་པ་དམར་པོ་རྣམས་ཀྱི་

འོད་ཟེར་གྱི་སྦུ་གུས་སམ། ཡིད་ཀྱིས་བདུད་རྩི་བཀུག་པ་རྣམས་ཉེ་བར་གསོལ་བས་བདེ་བ་ཆེན་པོའི་རང་བཞིན་སྟོང་པ་ཉིད་དང་རོ་གཅིག་པ་ཇི་སྲིད་འདོད་ཀྱི་བར་དུ་བསམ་པར་བྱའོ། །ཞལ་བསིལ་དང་དྲི་བཟང་པོ་ཅན་གྱི་ཙནྡན་དང་སོ་རྩི་ལ་སོགས་པ་རྣམས་ཕུལ་ནས་ཡང་དག་པར་མཆོད་དེ། བྱ་བ་

བསྒྲུབ་པ་ལྷུར་བྱེད་པ་རྣམས་ལ་བཟོད་པར་གསོལ་ཞིང་སྔར་བཤད་པའི་ཡི་གེ་བརྒྱ་པའི་སྔགས་བཟླས་ལ། ཨོཾ་ཡོ་ག་ཤུདྡྷཿསརྦ་དྷརྨཱཿཡོ་ག་ཤུདྡྷོ྅ཧཾ། ཞེས་བརྗོད་ནས་པད་ཀོར་དང་འཁྱུད་པའི་ཕྱག་རྒྱ་བྱས་ཏེ་རང་གི་ལྷའི་འཁོར་ལོ་བདག་ཉིད་ལ་རབ་ཏུ་གཞུག་གོ། །བསྲུང་བའི་འཁོར་ལོ་ལ་

གནས་པའི་ཁྲོ་བོ་བཅུ་དང་། དབང་པོ་ལ་སོགས་པ་བསྲུང་ཞིང་འདོད་པ་བསྒྲུབ་པ་ལ་མཁས་པ་རྣམས་དཀྱིལ་འཁོར་གྱི་ཁང་པའི་ཕྱི་རོལ་གྱི་ཕྱོགས་བཅུར་རྣམ་པར་དགོད་པར་བྱ་སྟེ། དཀྱིལ་འཁོར་གྱི་ལས་རྩོམ་པ་ནས་གཟུང་སྟེ་ཇི་སྲིད་མཐར་ཐུག་པའི་བར་རོ། །རྡུལ་ཚོན་གྱི་དཀྱིལ་འཁོར་

གཤེགས་སུ་གསོལ་བའི་རྗེས་སུ་ནི་གཏོར་མ་སྦྱིན་པ་ལ་སོགས་པ་བྱས་ནས་ཁྲོ་བོ་རྣམས་བདག་ཉིད་ལ་རབ་ཏུ་གཞུག་ཅིང་སེ་གོལ་གསུམ་བྱས་ནས་དབང་པོ་ལ་སོགས་པ་རྣམས་གནས་ཇི་ལྟ་བར་གཤེགས་སུ་གསོལ། གཞན་ཡང་ཉི་མ་སོ་སོ་ལ་གཏོར་མ་དབུལ་བ་ནི་དེ་ལྟ་ཉིད་དོ། །འདི་ནི་

གཤེགས་སུ་གསོལ་བའི་སྔགས་ཏེ། །ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་གནང་། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། ཨོཾ་ཨཱཿཧཱུཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཏྱཱ་ནུཏྤནྣ་ཏྭཱཏ་ཧཱུཾ་མུཿཞེས་པའམ།

ཨོཾ་ཨཱཿཧཱུཾ་བཛྲ་མུཿཞེས་བརྗོད་པས་གཤེགས་སུ་གསོལ་ལོ། །འདིར་ཞི་བ་ལ་སོགས་པའི་བྱ་བ་གཙོ་ཆེ་བའི་དབྱེ་བ་དུས་དང་ཕྱོགས་དང་ཁ་དོག་གི་དབྱེ་བ་རྟོགས་པར་བྱའོ། །དཀྱིལ་འཁོར་གྱི་ཁང་པའི་ཕྱི་རོལ་ཤར་ལ་སོགས་པའི་ཕྱོགས་རྣམས་སུ་ཁྲོ་བོ་བཅུའི་གོང་བུ་རྣམས་དང་ཉེ་བར་དྲན་

เล่ม ๗๖ · หน้า 222a

ལ་སོགས་པའི་གཏོར་མས་སེན་ཐི་ལ་སོགས་པ་བཀང་བ་འམ་ཁམ་ཕོར་རྣམས་སམ་སྙིམ་པས་དབུལ་བར་བྱའོ། །སའི་གོང་བུ་རྣམས་ལས་ཕྱི་རོལ་དུ་སའི་གོང་བུ་བཅོ་ལྔ་དང་། དེ་དག་མེད་ན་མཎྜལ་རྣམས་ཀྱི་སྟེང་དུ་དབང་པོ་ལ་སོགས་པ་བཅོ་ལྔ་པོ་རྣམས་ལ་སྦྱིན་པར་བྱའོ། །

དབང་པོའི་གཡས་ཕྱོགས་སུ་སྒྱུ་མ་རྡོ་རྗེ་སྟེ་ཁྱབ་འཇུག་དང་རྡོ་རྗེ་འཇིགས་བྱེད་ནི་ལུས་ངན་ཏེ། དེའི་གཡས་ཕྱོགས་སུ་ལོག་འདྲེན་དང་། རྡོ་རྗེ་ཁྲོ་བོ་ནི་དབང་ལྡན་ཏེ་དབང་ལྡན་དང་ཉེ་བའི་དབང་ལྡན་དག་གི་དབུས་སུ་ཉི་མ་དང་ཟླ་བ་དང་ཚངས་པ་རྣམས་དང་ཆུ་ལྷ་དང་བདེན་བྲལ་གྱི་བར་དུ་ཐག་བཟངས་རིས་

དང་སའི་ལྷ་མོ་དག་ལའོ། །དེ་ལྟར་དབང་པོ་ལ་སོགས་པའི་བ་དན་བཅོ་ལྔ་ནི་རང་རང་གི་ཕྱོགས་སུའོ། །དབང་པོ་ལ་སོགས་པའི་གོང་བུ་ལས་ཕྱི་རོལ་དུ་སའི་གོང་བུ་བརྒྱད་དམ་བ་བྱུང་གི་མཎྜལ་བྱས་པ་རྣམས་སུ་ཀླུ་རྣམས་ལ་ཁམ་ཕོར་དུའོ་ཐུག་ལ་སོགས་པ་སྦྱིན་པར་བྱའོ། །ཕྱི་རོལ་དུ་གཏོར་མའི་

ཟན་ལ་སོགས་པ་ལ་མར་དང་སྦྲང་རྩི་དང་ཆུ་དང་ཆང་དང་འོ་མ་སྟེ་རྒྱུན་པ་ལྔས་གཡས་སྐོར་དུ་གཏོར་བར་བྱའོ། །གཞན་གྱི་དོན་དུ་གཏོར་མ་སྦྱིན་པ་ན་ཡང་སྔགས་ལ་ཇི་ལྟར་ཡོད་པའི་བདག་གམ་ལ་འམ་བདག་གི་ཞེས་པ་ནི་ཇི་ལྟར་གནས་པ་བཞིན་དུ་བཀླག་པར་བྱ་སྟེ། དེ་ཡང་བདག་ཉིད་དུ་ལྷག་པར་མོས་པར་

བྱའོ། །འདི་ལ་ཕན་བཏགས་པ་ན་བདག་ཉིད་ལ་ཕན་བཏགས་པར་འགྱུར་ཏེ། བར་དག་ཏུ་ཡང་དོན་རྣམ་པར་ཤེས་པར་བྱའོ་ཞེས་པ་འདུས་པའི་འབྱུང་པོ་ཐམས་ཅད་པའི་གཏོར་མའི་ཆོ་གའོ།། །།དྷརྨ་དྷ་ཏུ་ས་མ་བ་ས་ར་ཎཱ་ཞེས་པ་ནི་སྟོང་པ་ཉིད་དང་སྙིང་རྗེ་རོ་གཅིག་པ་དང་སྟོང་པ་ཉིད་ཀྱི་མཐར་ཐུག་པ་

ཞེས་པའི་དོན་ཏོ། །གཏོར་མའི་ཆོ་ག་ལ་ཁྲོ་བོ་བཅུ་པོ་རྣམས་ཀྱི་གཏོར་མ་རྣམས་སོ་སོའི་སྔགས་རྒྱུད་དུ་གསུངས་པ་རྣམས་ཀྱིས་འབུལ་བ་ནི་ཤིན་ཏུ་ཁྱད་པར་དུ་སྔགས་པར་འགྱུར་ཏེ། སྔགས་དེ་རྣམས་ཀྱང་མང་བས་འཇིགས་ནས་འདིར་མ་བརྗོད་དོ། །གང་ཡང་དཔལ་འཁོར་ལོ་སྡོམ་པའི་

རྣལ་འབྱོར་དང་ལྡན་པས་དྲི་བཟངས་ལ་སོགས་པའི་མཎྜལ་བྱས་པར་རང་གི་འཁོར་ལོ་ཡང་དག་པར་མཆོད་ཅིང་རྐང་པ་བརྒྱད་པའི་སྔགས་ཀྱིས་བསྟོད་དེ་རང་གི་སྙིང་གར་གནས་པའི་ཧཱུཾ་ཡིག་གི་འོད་ཟེར་རྣམས་ཀྱིས་ཁྲོ་བོ་དང་བཅས་པའི་སྲུང་བའི་འཁོར་ལོ་རྩིབས་བཅུ་པའི་ལྟེ་བར་ཆུད་པའི་

เล่ม ๗๖ · หน้า 222b

གཞལ་ཡས་ཁང་གི་ནང་ན་གནས་པའི་དཀྱིལ་འཁོར་དང་སྲུང་བའི་འཁོར་ལོའི་ཕྱི་རོལ་གྱི་ཕྱི་ཕྱོགས་རྣམས་སུ་དབང་པོ་ལ་སོགས་པ་འཁོར་དང་བཅས་པ་དང་སེམས་ཅན་དཔག་ཏུ་མེད་པ་རྣམས་ཀྱང་ནང་དུ་བཀུག་ནས་དཔྲལ་བའི་དབྱིངས་སུ་འབར་བའི་ཕྱག་རྒྱ་བཅིངས་ཏེ་འགྱིང་བ་དང་བཅས་པས་ཕེཾ་

ཞེས་པ་ལན་གསུམ་བརྗོད་ཅིང་མདུན་དུ་དཀྱིལ་འཁོར་སྤྱན་དྲང་ངོ་། །ཨོཾ་ཀྐཀ་ཌྷ་ན། བནྡྷ་ན་ཁ་ཀ་ཁཱ་ད་ན་སརྦ་དུཥྚཱ་ནཱཾ། ཧ་ན་ཧ་ན་གྷ་གྷ་གྷ་ཏ་ཡ་ཆེ་གེ་མོའི་ཤཱི་ནྟཾ་ཀུ་རུ་ཧཱུཾ་ཧཱུཾ་ཕཊ་ཕཊ་ཛཿསྭཱ་ཧཱ། ཞེས་པ་འདིས་དབང་པོ་ལ་སོགས་པ་བཀུག་ནས་སྐད་ཅིག་གིས་སྟོང་པ་ཉིད་ལ་རབ་ཏུ་ཞུགས་པའི་རྗེས་

ལ་རིག་པ་དང་བཅས་པའི་བདེ་མཆོག་གི་ལྷའི་སྐུར་རྣམ་པར་བསྒོམས་ཏེ་ཞལ་བསིལ་ལ་སོགས་པ་དབུལ་བ་སྔོན་དུ་འགྲོ་ཞིང་སྔ་མ་བཞིན་དུ་འཁོར་གསུམ་ཡོངས་སུ་དག་པས་ལག་པ་གཡོན་པའི་མཐིལ་དུ་ཟླ་བ་ལ་གནས་པའི་ཧཱུཾ་ལས་སྐྱེས་པའི་སྣ་ཚོགས་རྡོ་རྗེའི་ལྟེ་བར་བདུད་རྩིའི་སྣོད་བཀོད་པའམ་

བསྒོམ་པ་ལག་པ་གཡས་པ་རྡོ་རྗེ་ཁུ་ཚུར་བྱས་པའི་སྡིགས་མཛུབ་བརྐྱང་པས་དེ་སྟོན་ཅིང་། བཅོམ་ལྡན་འདས་དང་དེའི་ཤེས་རབ་མ་དང་མཁའ་འགྲོ་མ་ལ་སོགས་པ་དང་ཁྭ་གདོང་མ་ལ་སོགས་པ་ལ་ཇི་ལྟར་རིགས་པར་ཕྱོགས་སུ་གཡོན་སྐོར་དང་མེའི་ཟུར་ནས་བརྩམས་ཏེ་ཕྱོགས་བྲལ་རྣམས་

སུ་གཡས་སྐོར་གྱིས་ཏེ། ཨོཾ་བཛྲ་ཌཱ་ཀ་ཨི་མཾ་བ་ལིཾ་གྲྀཧྞ་གྲྀཧྞ་ཧཱུཾ་ཕཊ། ཨོཾ་ཛཿཧཱུཾ་བཾ་ཧོཿས་མ་ཡ་སྟྭཾ་དྲྀ་ཤྱ་ཧོཿཞེས་པའི་སྔགས་ལན་གཅིག་དང་གཉིས་དང་གསུམ་དང་བཞི་དང་ལྔ་བརྗོད་པས་ཕུལ་ནས་འཁོར་ལོ་གསུམ་གྱི་ལྷ་རྣམས་ལ། ཨོཾ་ཀ་ར་ཀ་ར་ཀུ་རུ་ཀུ་རུ་བནྡྷ་བནྡྷ་ཏྲཱ་ས་ཡ་ཏྲཱ་ས་ཡ་

ཀྵོ་བྷ་ཡ་ཀྵོ་བྷ་ཡ་ཧྲཽཾ་ཧྲཽཾ་ཧྲཿཧྲ་ཕཻཾ་ཕཻཾ་ཕཊ་ཕཊ་ད་ཧ་ད་ཧ་པ་ཙ་པ་ཙ་བྷཀྵ་བྷཀྵ་བ་ས་རུ་དྷི་ར་ཨནྟ་མཱ་ལ་བ་ལ་མྦི་ནེ་གྲྀཧྞ་གྲྀཧྞ་སཔྟ་པཱ་ཏཱ་ལ་ག་ཏ་བྷུ་ཛངྒ་སརྦཾ་བཱ་ཏརྫ་ཡ་ཏརྫ་ཡ་ཨཱ་ཀཌྜྷྱ་ཨཱ་ཀཌྜྷྱ་ཧྲིཾ་ཧྲིཾ་ཛྞཽཾ་ཛྞཽཾ་ཀྵྨཾ་ཀྵྨཾ་ཧཱཾ་ཧཱཾ་ཧིཾ་ཧིཾ་ཧཱུཾ་ཧཱུཾ་ཀི་ལི་ཀི་ལི་སི་ལི་སི་ལི་ཧི་ལི་ཧི་ལི་དྷི་ལི་དྷི་ལི་ཧཱུཾ་ཧཱུཾ་ཕཊ་སྭཱ་ཧཱ། ཞེས་

པའི་སྔགས་ལན་ཅིག་བརྗོད་པས་དབུལ་བར་བྱའོ། །དེའི་རྗེས་སུ་སྲུང་བའི་འཁོར་ལོའི་རྩིབས་ལ་གནས་པའི་ཁྲོ་བོ་བཅུ་པོ་རྣམས་ལ་ཨོཾ་ཁཿབཛྲ་དྷྲིཀ་བཛྲ་ཧཱུཾ་ཀ་ར་བཛྲ་ཧཱུཾ་ཕཊ། ཨོཾ་བཛྲ་དཎྜ་བཛྲ་ཧཱུཾ་ཕཊ། ཨོཾ་བཛྲ་ཨ་ནཱ་ལཱརྐ་བཛྲ་ཧཱུཾ་ཕཊ། ཨོཾ་བཛྲ་ཀུཎྜ་ལི་བཛྲ་ཧཱུཾ་ཕཊ། ཨོཾ་བཛྲ་

เล่ม ๗๖ · หน้า 223a

ཡཀྵ་བཛྲ་ཧཱུཾ་ཕཊ། ཨོཾ་བཛྲ་ཀཱ་ལ་བཛྲ་ཧཱུཾ་ཕཊ། ཨོཾ་བཛྲ་མ་ཧཱ་བ་ལ་བཛྲ་ཧཱུཾ་ཕཊ། ཨོཾ་བཛྲ་བྷི་ཥ་ཎ་བཛྲ་ཧཱུཾ་ཕཊ། ཨོཾ་བཛྲ་ཨུཥྞཱི་ཥ་ཙཀྲ་བརྟི་བཛྲ་ཧཱུཾ་ཕཊ། ཨོཾ་བཛྲ་པཱ་ཏ་ལ་བཛྲ་ཧཱུཾ་ཕཊ། ཅེས་བའི་སྔགས་བཅུའི་ཧཱུཾ་ཕཊ་ཅེས་པའི་སྔོན་དུ་ཨི་མཾ་བ་ལིཾ་གྲྀཧྞ་གྲྀཧྞ་ཆེ་གེ་མོའི་ཤཱནྟི་ཀུ་རུ་རཀྵ་ཀུ་རུ་

ཞེས་པ་བཅུག་ལ། ལན་རེ་བརྗོད་པ་རྣམས་ཀྱིས་གཡོན་དང་གཡས་སུ་བསྐོར་བ་དག་དང་སྟེང་དང་འོག་ཏུ་དབུལ་བར་བྱའོ། །ཕྱི་རོལ་དུ་དབང་པོ་ལ་སོགས་པ་རྣམས་ལ་ཨོཾ་ཁ་ཁ་ཁཱ་ཧི་ཁཱ་ཧི་སརྦ་དེ་བ་ནཱ་ག་ཡཀྵ་རཀྵ་ས་བྷཱུ་ཏ་པྲེ་ཏ་པི་ཤཱ་ཙ་ཨུནྨ་ད་ཨ་པ་སྨཱ་ར་ཌཱ་ཀ་ཌཱ་ཀི་ནྱ་དཱ་ཡ་ཨི་མཾ་བ་ལིཾ་གྲྀཧྣནྟུ་ས་མ་ཡ་

རཀྵནྟུ། སརྦ་སིདྡྷི་མྨེ་པྲ་ཡ་ཙྪནྟུ་ཡ་ཐཻ་བཾ། ཡ་ཐཻཥྚཾ། བྷུཉྫ་ཐ། པི་པ་ཐ། ཛི་གྷ་ཐ། མཱ་ཏི་ཀྲ་མ་ཐ། མ་མ་སརྦཱ་ཀཱརྟ་ཡཱ་སཏྶུ་ཁཾ་བི་བྲྀདྡྷ་ཡེ། ས་ཧཱ་ཡི་ཀཱ་བྷ་ཝནྟུ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་འདི་ལན་བཞི་བརྗོད་པས་བསྐོར་ཕྱོགས་གཉིས་དང་སྟེང་འོག་ཏུ་དབུལ་བར་བྱའོ། །འདིར་ཡང་

དེ་རྣམས་དང་དཀྱིལ་འཁོར་གྱི་བདག་བོ་ནས་བརྩམས་ཏེ་གནོད་མཛེས་ཀྱི་མཐར་ཐུག་པ་ཞེས་པ་ལ་སོགས་པ་དང་སྔགས་གཞན་རྣམས་ཀྱང་ཤེས་པར་བྱའོ། །ཡི་གེ་བརྒྱ་པ་ནི་འདིར་གཞན་ཡིན་ཏེ། ཨོཾ་བཛྲ་ཧེ་རུ་ཀ་ས་མ་ཡ་མ་ནུ་པཱ་ལ་ཡ། ཧེ་རུ་ཀ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ།

ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ་སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ་ཧ་ཧ་ཧ་ཧ་ཧོཿབྷ་ག་ཝཱན་བཛྲ་ཧེ་རུ་ཀ་མཱ་མེ་མུཉྩ་ཧེ་རུ་ཀ་བྷ་ཝ་མ་ཧཱ་ས་མ་ཡ་སཏྭ་ཨཱཿཧཱུཾ་ཕཊ་སྭཱ་ཧཱ། ཞེས་པའོ། །འདིར་བརྗོད་པའི་ཁྲོ་བོ་བཅུ་མངོན་པར་བརྗོད་པ་བླ་མར་གསུངས་པ་རྣམས་ཀྱི་

སྐུ་མདོག་དང་ཕྱག་མཚན་ལ་སོགས་པ་ནི་ཡང་དག་པར་བསྡུས་ཏེ་སྔར་བརྗོད་པའི་དཔལ་བདེ་མཆོག་གི་དཀྱིལ་འཁོར་དུ་ཤེས་པར་བྱའོ། །བདེ་མཆོག་གི་འབྱུང་པོ་ཐམས་ཅད་པའི་གཏོར་མའོ།། །།ཡང་ན་དཔལ་ཀྱེའི་རྡོ་རྗེའི་གཟུགས་ཀྱིས་སྙིང་གར་གནས་པའི་ཧཱུཾ་ཡིག་གི་འོད་ཟེར་རྣམས་

ཀྱིས་ཁྲོ་བོ་དང་བཅས་པའི་སྲུང་བའི་འཁོར་ལོ་རྩིབས་བཅུ་པའི་ལྟེ་བར་ཆུད་པའི་གཞལ་ཡས་ཁང་ན་བཞུགས་པའི་དཀྱིལ་འཁོར་དང་སྲུང་བའི་འཁོར་ལོའི་ཕྱི་རོལ་གྱི་ཕྱོགས་རྣམས་སུ་དབང་པོ་ལ་སོགས་པ་འཁོར་དང་བཅས་པ་དང་། སེམས་ཅན་དཔག་ཏུ་མེད་པ་རྣམས་ཀྱང་བཀུག་

เล่ม ๗๖ · หน้า 223b

ནས་དབང་པོ་ལ་སོགས་པ་འོད་གསལ་བར་རབ་ཏུ་ཞུགས་པ་རྣམས་ཤེས་རབ་དང་བཅས་པའི་ཧེ་རུ་ཀའི་གཟུགས་སུ་གྱུར་པར་རྣམ་པར་བསམས་ལ། ཞབས་བསིལ་ལ་སོགས་པ་དབུལ་བ་སྔོན་དུ་འགྲོ་བས་སྔ་མ་བཞིན་དུ་སྦྱངས་པའི་གཏོར་མ་རྣམས། །ཨོཾ་དེ་བ་པི་ཙུ་བཛྲ་ཨི་མཾ་བ་ལིཾ་གྲྀཧྞ་གྲྀཧྞ་ཆེ་གེ་མོའི་

ཤཱནྟིཾ་རཀྵཉྩ་ཀུ་རུ་ཀུ་རུ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པའི་སྔགས་ཀྱིས་བཅོམ་ལྡན་འདས་ལ་དབུལ་བར་བྱ་སྟེ། ཨོཾ་ཨཱཿནཻ་རཱཏྨ་ཞེས་པ་ལ་སོགས་པས་མཚན་པ་བརྗོད་ཅིང་ས་བོན་ཡང་སྨོས་ནས་ཨི་མཾ་བ་ལིཾ་གྲྀཧྞ་གྲིཧྞ་ཆེ་གེ་མོའི་ཤཱནྟིཾ་རཀྵཉྩ་ཀུ་རུ་སྭཱ་ཧཱ། ཞེས་པ་འདིས་བདག་མེད་མ་ལ་སོགས་པ་རྣམས་

ལའོ། །ན་མཿས་མནྟ་བུདྡྷེ་བྷྱོ། ན་མོ་བཛྲ་མུངྒ་ར་ཧ་སྟཱ་ཡ། ཙནྟྲ་ལཱཀྵེ་པ་ཀཱ་རཱ་ཡ་ཧཱུཾ་ཕཊ། ན་མཿས་མནྟ་བུདྡྷེ་བྷྱོ། མ་ཧཱ་དཎྜ་དྷཱ་ར་བི་བི་དྷ་སུ་ར་ཨ་སུ་ར་མརྡ་ན་བྷཱུ་ཏནྣི་ར་མ་ཐན་ཧཱུཾ་ཕཊ། ན་མཿས་མནྟ་བུདྡྷེ་བྷྱོ། ཧུ་ལུ་ཧུ་ལུ་མ་ཧཱ་པདྨ་ཨ་མྲྀ་ཏཱི་ཀུ་རུ་མ་ཧཱ་བི་ཥཱ་ཨཿན་མཿས་མནྟ་བུདྡྷེ་བྷྱོ། ན་མོ་བཛྲ་ཀྲོ་དྷཱ་ཡ་མ་ཧཱ་དཾཥྚྲོ་ཏ་

ཀ་ཊ་བྷཻ་ར་བཱ་ཡ་བཛྲ་སཾ་དོ་ཧ་དརྤཱ་ཡ་ཨ་མྲྀ་ཏ་ཀུཎྜ་ལི་ཧཱུཾ་ཕཊ། ན་མཿས་མནྟ་བུདྡྷེ་བྷྱོ། ན་མོ་ཨ་ཙ་ལ་ཀཱཉྩེ་ཊ་མོ་ཊ་མོ་ཊ་ཏུ་ཊ་ཏུ་ཊ་གྷ་གྷ་གྷཱ་ཏ་ཡ་གྷཱ་ཏ་ཡ་ཧཱུཾ་ཕཊ། ན་མཿས་མནྟ་བུདྡྷེ་བྷྱོ། ཊཀྐི་ཧཱུཾ་ཛཿ། ན་མཿས་མ་ནྟ་བུདྡྷེ་བྷྱོ། ཨོཾ་ཡ་མ་དཎྜ་ཡ་ནཱི་ལ་དཎྜ་ཡ་ཏུ་རུ་ཏུ་རུ་མུ་རུ་མུ་རུ་སརྦ་དུ་ཥྚཱན་མཱ་ར་ཡ་ཧཱུཾ་

ཕཊ། ན་མཿས་མནྟ་བུདྡྷེ་བྷྱོ། ན་མོ་མ་ཧཱ་བཱ་ལ་ཨུ་ཙུཥྨ་ཀྲོ་དྷ་རཱ་ཛཱ་ཡ་སརྦ་ནཱ་ག་ནཱཾ་ཧྲྀ་ད་ཡ་ཏཱ་ཌ་ཡ་ཧཱུཾ་ཕཊ། ན་མཿས་མནྟ་བུདྡྷཱ་ནཱཾ། ན་མཿས་མནྟ་དྷརྨཱ་ཎཱཾ། ན་མཿས་མནྟ་སཾ་གྷཱ་ནཱཾ། ཨོཾ་སི་ཏཱ་ཏ་པ་ཏྲེ། ཨོཾ་བི་མ་ལ། ཨོཾ་ཤངྐར། ཨོཾ་པྲ་ཏྱཾ་གི་ར། བཛྲ་ཨུཥྞཱི་ཥ་ཙཀྲ་བརྟི་སརྦ་ཡནྟྲ་མནྟྲ་མཱུ་ལ་ཀརྨ་བནྡྷ་ནཾ། ཏཱ་ཌ་ནཾ་ཀཱི་ལ་ནམྤ་མ་

མ་ཀྲྀ་ཏེ། ཡེ་ན་ཀེ་ན་ཙི་ཏ་ཀྲྀ་ཏཾ། སརྦནྟུ་ཚིནྡ་ཚིནྡ་བྷིནྡྷ་བྷིནྡྷ་ཅི་རི་ཙི་རི་གི་རི་གི་རི་མ་ར་མ་ར་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ། ཨཱ་ན་ཡ་ཧོ་བྷ་ག་ཝཱན་བི་དྱཱ་རཱ་ཛ་ཧཱུཾ་ཕཊ། ཅེས་པའི་སྔགས་བཅུས་ཤར་ལ་སོགས་པ་དང་དབང་ལྡན་ལ་

སོགས་པར་གཡས་སྐོར་དང་སྟེང་དང་འོག་ཏུ་གཤིན་རྗེ་གཤེད་ལ་སོགས་པའི་ཁྲོ་བོ་བཅུ་མཁའ་འགྲོ་མ་རྡོ་རྗེ་གུར་དུ་གསུངས་པ་རྣམས་ལའོ། །ཨོཾ་ཨིནྡ་ཛ་མ་ཛ་ལ་ཛཀྑ་བྷཱུ་ཏ་བཧྣི་བཱ་ཨུ་རཀྑ་ཙནྡ་སུཛྫ། མཱ་ད་པཔྤ་ཏ་ལ་པ་ཏ་ལ་ཨཊྚ་སཔྤ་སཱ་ཏ། ཨི་དཾ་བ་ལིཾ་བྷུཉྫ། ཛིགྷ་ཕུལླ་དྷཱུ་པ་མཾ་ས་

เล่ม ๗๖ · หน้า 224a

སིངྒྷ་ཨཾ་བྷ་ཀཛྫ་སཔྤ། སཱ་ད་ཁནྟི་ཁུ་ཎི་ཕེ་ཌ་ག་ད། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱཱ་ནུཏྤནྣ་ཏྭཱཏ་ཨོཾ་ཨཱཿཧཱུཾ་ཕཊ་སྭཱ་ཧཱ། ཞེས་པའི་སྔགས་ཀྱིས་དབང་པོ་ལ་སོགས་པ་རྣམས་ལའོ། །ཨོཾ་ཨིནྡ་ཞེས་པ་ལ་སོགས་པ་མིང་ནས་འབོད་པ་རྣམས་ནི་རང་རང་གི་ཕྱོགས་ཀྱི་སེམས་ཅན་

དཔག་ཏུ་མེད་པ་མཚོན་པར་བྱེད་པའོ། །གཱ་དང་ཞེས་པ་ནི་ལུས་ལའོ། །འདི་ཡང་དེ་རྣམས་ཀྱི་མངའ་བདག་ནས་བརྩམས་ཏེ་གནོད་མཛེས་ཀྱི་མཐར་ཐུག་པ་ཞེས་པ་ལ་སོགས་པ་ནི་འདུས་པའི་གཏོར་མའི་ཆོ་ག་བཞིན་དུ་ཤེས་པར་བྱའོ། །འདིར་ཡང་ཁྲོ་བོའི་སྔགས་རྣམས་ཀྱི་ཧཱུཾ་ཡིག་རྣམས་དང་།

ཨཿཡིག་སྔོན་དུ་ཨི་མཾ་བ་ལིཾ་གྲྀཧྞ་གྲྀཧྞ་ཞེས་བརྗོད་པར་བྱ་སྟེ། ཁྲོ་བོ་རྣམས་ཀྱི་སྐུ་མདོག་དང་ཕྱག་མཚན་ལ་སོགས་པ་ནི་སྔར་བཤད་པའི་འཇམ་པའི་རྡོ་རྗེའི་དཀྱིལ་འཁོར་བཞིན་ནོ་ཞེས་པ་ནི། ཀྱེའི་རྡོ་རྗེའི་འབྱུང་པོ་ཐམས་ཅད་པའི་གཏོར་མའི་ཆོ་གའོ།། །།དེ་བཞིན་དུ་ཁྱིམ་དང་གཙུག་

ལག་ཁང་ལ་སོགས་པ་བསྲུང་བ་དང་བདེ་ལེགས་སུ་བྱ་བའི་དོན་དུ་དཔལ་ལྡན་དཔུང་པ་བཟང་པོས་ཡོངས་སུ་ཞུས་པ་རྣལ་འབྱོར་གྱི་རྒྱུད་ཆེན་པོར་གསུངས་པའི་སྔགས་ཀྱི་ཚིགས་སུ་བཅད་པ་རྣམས་ཀྱིས་ཆོ་ག་བཞིན་དུ་གཏོར་མ་སྦྱིན་པར་བྱའོ། །དེ་ལ་འདི་ནི་ཆོ་ག་སྟེ། ཞོ་དང་འོ་མ་དང་མར་

དང་སྦྲང་རྩི་དང་ཀ་ར་དང་ཤ་མེད་པའི་ཚོད་མ་དང་བཟའ་བ་དང་དྲི་བཟང་པོའི་ཆུ་དང་དྲི་བཟང་པོ་ཅན་གྱི་མེ་ཏོག་དཀར་པོ་དང་། རྩེ་མོར་མེ་ཏོག་གི་ཕྲེང་བ་དང་མེ་ཏོག་སིལ་མ་དང་། ཙནྡན་དཀར་པོ་ལ་སོགས་པ་དྲི་བཟང་པོའི་རྫས་རྣམས་དང་། ཨ་ཀ་རུ་དང་གུ་གུལ་དང་། ཡན་ལག་བཅུ་པའི་བདུག་སྤོས་

དང་སྣང་གསལ་ལ་སོགས་པ་ཇི་ལྟར་རྙེད་པ་དང་ཇི་ལྟར་ནུས་པས་བདེ་ལེགས་སུ་འགྱུར་བའི་དོན་རྣམས་ཉེ་བར་གསོག་པར་བྱེད་དོ། །གྲོང་ཁྱེར་ལ་སོགས་པའི་བགེགས་ཞི་བའི་ཆེད་དུ་ཤ་ཀ་ཊ་ལ་སོགས་པའི་སྣོད་ཆེན་པོ་ཞེས་པ་ནི་རྣམ་པར་རྒྱས་པ་ཉིད་དེ། ཁུར་བ་དང་ཏིལ་དང་འབྲས་ཡོས་དང་། སྲིཏ་སིནྣ་དང་།

ཛམྦུ་ཏི་ཀ་དང་། ངེས་པ་ཉིད་དུ་འབྱོར་པ་དང་རྗེས་སུ་མཐུན་པ་རྣམས་སྦྱིན་བདག་ལས་ཉེ་བར་བླང་བར་བྱ་ཞིང་འདི་རྣམས་ཐམས་ཅད་ཆ་གཉིས་སུ་ཡོངས་སུ་བརྟགས་པ་དྲི་བཟང་པོས་རྣམ་པར་བསྒོས་པ་རྣམས་ཆུ་ཤིང་གི་འདབ་མ་འམ་ཞིབ་མ་སར་པ་ལ་སོགས་པར་སོ་སོར་གཞག་པར་བྱའོ། །སློབ་དཔོན་

เล่ม ๗๖ · หน้า 224b

གྱིས་ཁྲུས་དང་གཙང་སྦྲ་དང་ཡན་ལག་དྲི་ཞིམ་པོ་དང་ལྡན་པས་ལུས་ལ་གོས་གཙང་མ་བགོས་ཏེ་ཇི་ལྟར་རྙེད་པའི་ཅོད་པན་ལ་སོགས་པས་བརྒྱན་ནས་སྙིང་རྗེ་དང་བྱམས་པ་ལ་ཡོངས་སུ་གནས་པའི་ཡིད་ཀྱིས་པུས་མོ་གཡས་པའི་ལྷ་ང་སའི་གཞི་ལ་བཙུགས་ཏེ་ལག་པ་ཐལ་མོ་སྦྱར་བ་བྱས་ལ། ཤར་རམ་བྱང་

དུ་ཁ་བལྟས་ནས་ཆ་གཅིག་གིས་གདོན་རྣམས་མཆོད་པའི་ཆེད་དུ་ཚིགས་སུ་བཅད་པ་འདི་རྣམས་བརྗོད་པར་བྱའོ། །ལྷ་དང་ལྷ་མིན་ཀླུ་དང་གྲུབ་པ་ཀུན། །འདབ་བཟངས་ནམ་མཁའ་ལྡིང་དང་ལུས་སྲུལ་པོ། །དྲི་ཟ་གནོད་སྦྱིན་གདོན་གྱི་རིགས་རྣམས་དང་། །གང་ཡང་ས་ལ་གནས་པའི་ལྷ་རྣམས་ནི། །

བུ་སྨད་བཅས་ཤིང་གཡོག་འཁོར་བཅས་པ་ལ། །བདག་གི་པུས་མོ་ས་ལ་བཙུགས་ནས་ནི། །ཐལ་མོ་སྦྱར་ཏེ་ཁྱེད་ལ་གསོལ་འདེབས་ཀྱིས། །གསན་ནས་ཕན་གདགས་སླད་དུ་འདིར་གཤེགས་ཤིག །འབྱུང་པོ་གང་དག་རི་རབ་སྟེང་གནས་དང་། །དགའ་བའི་ཚལ་དང་ལྷ་ཡི་གནས་ཁང་

དང་། །ཤར་ནུབ་རི་དང་ཉི་ཟླའི་ཁྱིམ་རྣམས་དང་། །རི་བོ་ཀུན་ལ་གང་དག་གནས་པ་དང་། །ཆུ་བོ་ཀུན་དང་ཆུ་བོ་འདུས་རྣམས་དང་། །རིན་ཆེན་གནས་ན་ལྷག་པར་གང་གནས་དང་། །མཚོ་དང་རྫིང་བུ་ལྟེང་ཀ་ཁྲོན་པ་དང་། །ཁྲུས་ཀྱི་ཆུ་དང་རི་ཡི་ཆུ་རྣམས་དང་། །གྲོང་དང་ཕྱུགས་ལྷས་རྣམས་དང་བས་

མཐའ་དང་། །ཁང་སྟོང་དག་དང་ལྷ་ཡི་ཁྱིམ་རྣམས་དང་། །དཀའ་ཐུབ་གནས་དང་ཚོགས་ཁང་གླང་ཆེན་བྲེས། །འབྱུང་པོ་སྣ་ཚོགས་ཕུག་གནས་གང་དག་དང་། །ལམ་སྲང་རྣམས་དང་ཚོང་འདུས་གཞི་མདོ་དང་། །གང་དག་ཤིང་གཅིག་དྲུང་དང་ལམ་པོ་ཆེ། །དུར་ཁྲོད་ཆེན་པོ་ནགས་ཚལ་ཆེན་པོ་དང་། །

སེང་གེ་དྲེད་དང་གླང་ཆེན་གནས་རྣམས་དང་། །འབྲོག་ཆེན་འཇིགས་སུ་རུང་བར་གང་གནས་དང་། །གང་དག་གླིང་མཆོག་དག་ན་གནས་པ་དང་། །ལྷུན་པོ་དུར་ཁྲོད་དག་ན་གནས་པ་རྣམས། །དེ་རྣམས་རབ་ཏུ་དགེ་བར་གྱུར་ནས་སུ། །མེ་ཏོག་དྲི་དང་ཕྲེང་བ་བདུག་སྤོས་དང་། །གཏོར་མ་སྣང་

གསལ་ཆོ་གས་གུས་འབུལ་གྱིས། །འདི་རྣམས་བཞེས་ནས་གསོལ་ཞིང་བཏུང་བར་མཛོད། །འདིར་ཡང་ལས་ཀྱི་འབྲས་བུ་ལྡན་པར་མཛོད། །དེ་ལྟར་གདོན་རྣམས་ལ་མཆོད་པ་བྱས་ནས་ཕྱོགས་ཀྱི་མཆོད་པ་གཅིག་པའི་ཡིད་ཀྱིས་རབ་ཏུ་བྱའོ་ཞེས་པ། ཆ་གཞན་གྱིས་ཕྱོགས་ཀྱི་བདག་

เล่ม ๗๖ · หน้า 225a

པོ་རྣམས་མཆོད་པའི་ཆེད་དུ་ཚིགས་སུ་བཅད་པ་འདི་རྣམས་བརྗོད་པར་བྱའོ། །དབང་པོ་ཅན་གྱི་ལྷ་ཚོགས་འཁོར་དང་བཅས། །ཁྱད་འཕགས་གཏོར་མ་འདི་ནི་བཞེས་སུ་གསོལ། །མེ་དང་གཤིན་རྗེ་བདེན་བྲལ་ས་ཡི་བདག །ཆུ་བདག་རླུང་དང་ནོར་གྱི་བདག་པོ་དང་། །དབང་དང་ལྡན་པ་

འབྱུང་པོའི་ལྷ་རྣམས་དང་། །སྟེང་གི་ཉི་ཟླ་ཚངས་པ་ཆེན་པོ་དང་། །ལྷ་རྣམས་ཀུན་དང་གང་དག་ས་སྟེང་ཀླུ། །ས་འཛིན་ལྷ་དང་གཙང་བའི་ཚོགས་བཅས་ལ། །སོ་སོ་སོ་སོར་རེ་རེས་ཕུལ་བ་རྣམས། །ཚིམ་ཞིང་ཐོབ་པས་བཞེས་པར་མཛད་ནས་སུ། །རང་རང་ཕྱོགས་སུ་ལེགས་པར་བཞུགས་

ནས་ཀྱང་། །རང་རིགས་སྡེ་དང་སྲས་བཅས་གྲོགས་སུ་བཅས། །སྤོས་དང་གཏོར་མ་མེ་ཏོག་ཞལ་ཟས་རྣམས། །འདི་དག་གསོལ་ཞིང་བསྣམས་ཏེ་བཏུང་མཛད་ནས། །འདིར་ཡང་ལས་ཀྱི་འབྲས་བུ་ལྡན་པར་མཛོད། །དེ་ནས་ཁྱིམ་དང་གཙུག་ལག་ཁང་དང་གྲོང་ཁྱེར་ལ་སོགས་པའི་དབང་

ལྡན་གྱི་མཚམས་སུ་ཡོ་བྱད་དེ་རྣམས་ཐམས་ཅད་ཉིད་གཞག་པར་བྱའོ། །ཞོ་དང་ཟན་དང་ཛམྦུ་ཏི་ཀ་རྣམས་སྣོད་གཅིག་ཏུ་བསྲེས་ནས་པི་ཌ་ཀ་ལ་སོགས་པར་བྱ་ཞིང་། ཏིལ་དང་འབྲས་ཡོས་ནི་སྣོད་སོ་སོར་བྱས་ནས་གཡས་སྐོར་གྱིས་ཁྱིམ་ལ་སོགས་པའི་ཕྱི་རོལ་ནས་ཞུགས་ཏེ་གཏོར་མ་

སྦྱིན་པར་བྱའོ། །སྣང་གསལ་ལ་སོགས་པའི་ཡོ་བྱད་གཞན་རྣམས་ནི་དབང་ལྡན་གྱི་མཚམས་ཉིད་དུ་གཞག་པར་བྱ་ཞིང་སྤོས་དང་ཆུ་ནི་དོར་བར་བྱའོ། །དེ་ལྟར་ཡང་གཏོར་མ་བྱིན་པའི་ཟན་ལ་སོགས་པ་ཇི་ལྟར་དབང་ལྡན་གྱི་མཚམས་ཇི་སྲིད་པར་རོ་ཞེས་སོ། སྔ་དྲོའམ་དུས་ཁྱད་

པར་ཅན་གྱི་དུས་སུ་གཏོར་མ་དབུལ་བར་བྱ་ཞིང་སྔ་དྲོའི་ཉི་མ་ལ་གཏོར་མ་བྱིན་པའི་ཕྱི་ནས་སློབ་དཔོན་གྱིས་ཁ་ན་མ་ཐོ་བ་མེད་པའི་བཟའ་བ་རྣམས་ཆུ་ཚོད་བདུན་ན་བཟའ་བར་བྱ་སྟེ། ཉི་མ་ནུབ་པ་ན་ཡང་གཏོར་མ་མང་དུ་དབུལ་བ་ཉིད་དོ། །སློབ་དཔོན་ལ་ཡང་ཇི་ལྟར་ནུས་པའི་ཡོན་དབུལ་

བར་བྱ་སྟེ། འདི་དག་ནི་བགེགས་ཉེ་བར་ཞི་བའི་དོན་དང་གཞན་ཡང་འདོད་པའི་བྱ་བའི་དོན་དང་བསོད་ནམས་ཀྱི་དོན་དུ་ཡང་རྗེས་སུ་གནས་པའོ་ཞེས་པ་ནི་དཔུང་པ་བཟང་པོས་ཡོངས་སུ་ཞུས་པའི་མདོ་རྒྱུད་ཆེན་པོར་གསུངས་པའི་གཏོར་མའི་ཆོ་གའོ།། །།གཏོར་མ་བཞི་པོ་འདི་དག་ནི་བསྐྱེད་པའི་

เล่ม ๗๖ · หน้า 225b

རིམ་པ་ལའོ། །རྫོགས་པའི་རིམ་པ་ལ་ནི་ཤེས་རབ་དང་ཐབས་ལས་གཡོ་བ་མེད་པའི་སེམས་ཀྱིས་དགོངས་པར་གསོལ་བ་ཙམ་གྱིས་སྤྱན་དྲངས་པའི་ཤེས་རབ་དང་ཐབས་ཀྱི་རང་བཞིན་ཉིད་དང་འདོད་པའི་དཀྱིལ་འཁོར་གྱི་དབང་ཕྱུག་ལ་སོགས་པའི་ལྷ་དང་བཅས་པའི་དབང་པོ་ལ་སོགས་པ་རྣམས་ལ་ཡེ་

ཤེས་ཀྱི་རོ་དང་ཐ་མི་དད་པའི་གཏོར་མ་དབུལ་བ་ནི་གཏོར་མའི་ཆོ་གའོ།། །།གདོན་སོགས་ཉེས་པ་ཉེ་བར་ཞི་བའི་ཆེད་ཉིད་དང་། །དབུལ་བའི་སྡུག་བསྔལ་རབ་ཏུ་ཉམས་པར་བྱ་ཕྱིར་དང་། །ཚེ་ཐུང་བ་རྣམས་ཚེ་ནི་འཕེལ་བའི་རྒྱུ་ཡི་ཕྱིར། །དཀྱིལ་འཁོར་གསུམ་གྱིས་བདེ་ལེགས་བྱེད་པ་རབ་ཏུ་བསྟན། །

དེ་ཕྱིར་མི་རྣམས་རང་ལ་ཕན་པའི་བསམ་པ་ཡིས། །གདོན་གྱི་ཉེས་པ་ཉེ་བར་ཞི་བ་ཉིད་བྱ་སྟེ། །ཆོ་ག་འདི་ནི་ཤིན་ཏུ་རྣམ་དག་ཐུགས་ལྡན་པའི། །སངས་རྒྱས་རྣམས་ཀྱིས་འགྲོ་བའི་དོན་གྱི་རྒྱུར་གསུངས་ཕྱིར་རོ། །གཟའ་ཡུམ་གྱི་ནི་དཀྱིལ་འཁོར་ལ། །ཐིག་རྣམས་བྲི་བར་བྱ་སྟེ་སླར། །རྩ་བའི་

ཐིག་གི་ནང་དུ་ནི། །ཆ་ཆུང་བཞི་ནི་སྤངས་བྱས་ནས། །སྔགས་པས་དེར་ནི་སྦྱིན་བྱ་སྟེ། །ཟུར་ཐིག་གཉིས་ཀྱི་བར་དུའོ། །དེ་ཡི་ནང་དུ་ཟླུམ་པོ་ནི། །དེ་ཡི་མཐར་ཐུག་བར་དུ་བྱ། །ཆ་ཆུང་གཅིག་ནས་སླར་ཡང་བསྐོར། །དེ་ལ་རྡོ་རྗེ་ཕྲེང་བ་བྱ། །ལྷག་མ་དེ་ཡང་ཆ་གསུམ་ལ། །པདྨ་འདབ་

མ་བརྒྱད་པ་བྱ། །དེ་ལ་ཟུར་ཐིག་ལ་སོགས་རྣམས། །གསང་སྔགས་རིག་པས་དབྱེ་བར་བྱ། །རྩ་བའི་ཐིག་གི་ནང་དུ་ནི། །སྒོ་ཡི་བར་ནི་སྤངས་པ་དང་། །དེ་ཡང་ནང་དུ་ཐིག་བྱ་སྟེ། །ཆ་ཆུང་བཞི་ཡི་བར་དེ་བཞིན། །ལྷག་མ་པདྨ་འདབ་བརྒྱད་ཚང་། །འདི་ལས་ལྷག་དང་ཆད་པ་མིན། །ནོར་རྒྱུན་མ་

ཡི་དཀྱིལ་འཁོར་ཏེ། །ཆོ་ག་རིག་པ་རྣམས་ཀྱིས་བྱ། །ཚངས་ལས་ཆ་ཆུང་རིག་བྱེད་མཐར། །ཟླུམ་པོ་གཅིག་ནི་བསྐོར་བར་བྱ། །དེ་ནས་ཆ་ཆུང་ཕྱེད་སྤངས་ཏེ། །ཟླུམ་པོ་གཉིས་པའི་ཐིག་ཡིན་ནོ། །དེ་ནས་ཆ་ཆུང་བཞི་སྤངས་པར། །རྩིབས་ཀྱི་ཟླུམ་པོ་གསུམ་པ་སྟེ། །དེ་ནས་ཆ་ཆུང་ཡོངས་དོར་

བར། །མུ་ཁྱུད་ཟླུམ་པོ་བཞི་པའོ། །དེ་ནས་ཆ་ཆུང་གཉིས་སྤངས་ནས། །ཟླུམ་པོ་གེ་སར་ཐིག་ཡིན་ཏེ། །ཆ་ཆུང་རིག་བྱེད་སྤངས་ནས་ནི། །ཟླུམ་པོ་པདྨའི་འདབ་མའི་ཡང་། །དེ་ཡི་ཕྱི་རོལ་ཟླུམ་པོ་གསུམ། །ཆ་ཆུང་གཉིས་པར་དུའོ་སླར། །པདྨ་འདབ་བརྒྱད་བྲི་བྱ་སྟེ། །ཕྱོགས་དང་

เล่ม ๗๖ · หน้า 226a

ཕྱོགས་བྲལ་རྣམས་སུའོ་སླར། །རྣམ་པར་རྒྱལ་བའི་འཁོར་ལོ་ནི། །དོན་ཀུན་གྲུབ་པར་བྱེད་པ་སྟེ། །སེམས་ཅན་ཀུན་ལ་ཕན་བལྟས་ནས། །འདི་ནི་ཡེ་ཤེས་རྡོ་རྗེས་བྱ།། །།དེ་ལ་དང་པོར་གཟའ་ཡུམ་གྱི་ཆོ་ག་བྲི་བར་བྱའོ། །དབུས་ཀྱི་ལྟེ་བར་པདྨ་དཀར་པོའི་སྟེང་དུ་གུར་གུམ་གྱི་

དྲིའི་མཎྜལ་ལ་ལྷ་ཉི་མ་བསམ་པར་བྱ་སྟེ། དཀའ་ཐུབ་ཅན་གྱི་གཟུགས་འཛིན་པ་སྐུ་མདོག་དམར་པོ་ཕྱག་དག་གིས་ཆུ་སྐྱེས་དཀར་པོ་བསྣམས་པ། ཉི་མ་བྱེ་བའི་འོད་དང་མཚུངས་པའོ། །འདི་ལ་ནི་འོ་ཐུག་གི་བཟའ་བ་དང་། །ཀུན་དུ་རུའི་བདུག་སྤོས་ཀྱང་དབུལ་བར་བྱ་སྟེ། ཨོཾ་ཨཱཿམེ་གྷ་ཨུ་

ལ་ཀཱ་ཡ་སྭཱ་ཧཱ། ཞེས་པ་སྙིང་པོའི་སྔགས་ཀྱིས་མཆོད་པར་བྱའོ། །ཤར་གྱི་འདབ་མར་ཆུ་སྐྱེས་དམར་པོའི་སྟེང་དུ་པྲི་ཡང་ཀུའི་དྲིའི་མཎྜལ་ལ་ཟླ་བ་བྲམ་ཟེའི་གཟུགས་འཛིན་པ་སྐུ་མདོག་དཀར་པོ་རལ་པའི་ཅོད་པན་ཅན། །ཕྱག་གིས་བགྲང་ཕྲེང་དང་མེ་ཏོག་ཀུ་མུ་ད་ལ་གནས་པའི་སྤྱི་བླུགས་འཛིན་པའོ། །

འདི་ལ་ནི་མར་གྱི་བཟའ་བ་དང་སིཧླའི་བདུག་སྤོས་དབུལ་བར་བྱ་སྟེ། ཨོཾ་ཙནྡྲ་ཨ་མྲྀ་ཏ་བི་ཀྲ་མཱ་ཡ་ཤཱི་ཏ་ཨཾ་ཤ་བེ་ཨཱཿསྭཱ་ཧཱ། ལྷོའི་འདབ་མར་པདྨ་དཀར་པོའི་སྟེང་དུ་ཙནྡན་གྱི་དྲིའི་མཎྜལ་ལ་བཀྲ་ཤིས་ནི་དགེ་སློང་གི་གཟུགས་འཛིན་པ། སྐུ་མདོག་དམར་པོ་གོས་དམར་པོ་དང་ཅོད་པན་ཅན། གཡོན་

པས་ཤཀྟི་འཛིན་ཅིང་གཡས་པས་མཆོག་སྦྱིན་མཛད་པའོ། །འདི་ལ་ནི་སྲན་མ་ནག་པོའི་ཟན་ནམ་བུ་རམ་གྱི་ཟན་གྱི་བཟའ་བ་དང་། གུ་གུལ་གྱི་བདུག་སྤོས་ཀྱང་དབུལ་བར་བྱ་སྟེ། ན་མོ་རཀྟ་ཨངྒ་ར་ཛྭ་ལ་ཀུ་མཱ་རཱ་ཡ་སྭཱ་ཧཱ། ནུབ་ཀྱི་འདབ་མར་ཆུ་སྐྱེས་དམར་པོའི་སྟེང་དུ་ཨ་ཀ་རུ་ནག་པོའི་དྲིའི་

མཎྜལ་ལ་གཟའ་ལྷག་ཏུ་གྲགས་པ་ནི་ཚངས་པར་སྤྱོད་པའི་གཟུགས་ཅན་སྐུ་མདོག་སེར་པོ་སྨ་ར་དམར་པོ་ཅན། གཡས་པ་དང་གཡོན་པ་དག་གིས་བགྲང་ཕྲེང་དང་སྤྱི་བླུགས་འཛིན་པའོ། །འདི་ལ་ནི་སྲན་མུངྒ་དང་རྒྱ་སྲན་སྦྱར་པའི་བཟའ་བ་དང་གནྡྷ་ར་སའི་བདུག་སྤོས་ཏེ། རཱ་ཛ་སུ་ཏྲ་བུདྡྷ་

སུ་པཱི་ཏ་ཝརྞཱ་ཡ་ན་མཿཨོཾ་བུདྡྷཱ་ཡ་སྭཱ་ཧཱ། བྱང་གི་འདབ་མར་ཆུ་སྐྱེས་དཀར་པོའི་ལྟེ་བར་དེ་བ་དཱ་རུའི་དྲིའི་མཎྜལ་ལ་ཕུར་བུ་དགེ་སློང་གི་རྣམ་པ་གསེར་བཙོ་མའི་འོད་ཅན། སྨ་ར་དམར་པོ་དང་ལྡན་པ་བགྲང་ཕྲེང་དང་སྤྱི་བླུགས་འཛིན་པའོ། །འདི་ལ་ནི་ཞོ་ཟན་ནམ་འོ་ཐུག་གི་བཟའ་བ་དང་སྦང་དང་མར་གྱི་

เล่ม ๗๖ · หน้า 226b

བདུག་སྤོས་ཏེ། ལོ་ཏི་ཏ་ཝརྞ་ནིར་ག་མཱ་ཡ་བྲྀ་ཧ་ས་པཱ་ད་ཡེ་ཨོཾ་ན་མོ་བྷོ་ག་སྤཱ་དཱ་ཡ་སྭཱ་ཧཱ། མེའི་འདབ་མར་ཙནྡན་གྱི་དྲིའི་མཎྜལ་ལ་པ་སངས་ནི་ཕྱུགས་བདག་གི་བརྟུལ་ཞུགས་འཛིན་པ་སྐུ་མདོག་དཀར་པོ་རལ་པའི་ཅོད་པན་ཅན། བགྲང་ཕྲེང་དང་སྤྱི་བླུགས་འཛིན་པའོ། །འདི་ལ་ནི་འོ་ཐུག་གི་བཟའ་

བ་དང་ག་བུར་གྱི་བདུག་སྤོས་ཀྱང་དབུལ་བར་བྱ་སྟེ། ཨོཾ་ན་མཿཤཱུཀྲ་ཨ་དྷི་པ་ཏ་ཡེ་ཨ་སུ་ར་ཨུཏྟ་མཱ་ཡ་ཤུདྡྷེ་བི་ར་ཛེ་སྭཱ་ཧཱ། བདེན་བྲལ་གྱི་འདབ་མར་འདམ་སྐྱེས་དཀར་པོའི་སྟེང་དུ་སྔོན་པོ་དང་ཙནྡན་གྱི་དྲིའི་མཎྜལ་ལ་སྤེན་པ་ནི་ནག་པོ་ཕྱོགས་ཀྱི་གོས་ཅན་དུ་ཤེས་པར་བྱ་སྟེ། རལ་པ་སེར་སྐྱའི་

ཅོད་པན་ཅན་སྨ་ར་ཅན་བགྲང་ཕྲེང་དང་འཁར་གསིལ་འཛིན་པའོ། །འདི་ལ་ནི་སྲན་ནག་ལས་སྦྱར་བའི་ཟན་གྱི་བཟའ་བ་དང་གནྡྷ་ར་སའི་བདུག་སྤོས་དབུལ་བར་བྱ་སྟེ། ཨོཾ་ཤ་ན་ནཱི་ལ་ཨ་པ་སུ་ཀྲྀཥྞཱ་ཡ་ཀྲྀཥྞཱ་བརྞ་བྷུ་ག་སྭཱ་ཧཱ། རླུང་གི་འདབ་མར་ཆུ་སྐྱེས་དམར་པོའི་སྟེང་དུ་པཎྜི་ཏ་ཀ་རིའི་དྲིའི་མཎྜལ་ལ་

སྒྲ་གཅན་ནི་ཐོད་པ་དང་ལྡན་པ་ལུས་ཕྱེད་ཉི་མའི་ཤིང་རྟ་ལ་གནས་ཤིང་འཇིགས་སུ་རུང་བའི་སྤྱན་གཉིས་དང་ལྡན་པ། མཆེ་བ་རྣམ་པར་གཙིགས་ཤིང་སྨིན་མའི་ཁྲོ་གཉེར་དཔྲལ་བར་བསྡུས་པ་ཁ་དོག་ལྔ་པའི་སྤྲིན་གྱི་གསེབ་ན་གནས་བ། ཕྱག་གིས་ཉི་མ་དང་ཟླ་བ་ཟ་བའི་ཚུལ་གྱིས་གནས་པའོ། །

འདི་ལ་ནི་ཉ་དང་ཤ་འམ་ཏིལ་ལས་སྦྱར་བའི་བཟའ་བ་དང་བིལ་བའི་བདུག་སྤོས་ཏེ། ཨོཾ་ན་མོ་པི་ཀྲྀ་ཏ་པ་ཀྭ་རུ་དྷི་ར་རཱ་ཧོ་བྷིངྒ་ཨཉྫ་སིནྣཱ་བྷཱ་ཡ་ཨ་མྲྀ་ཏ་པྲི་ཡཱ་ཡ་སྭཱ་ཧཱ། དབང་ལྡན་གྱི་འདབ་མར་པདྨ་དམར་པོའི་སྟེང་དུ་སྦྱར་སྤོས་ཀྱི་དྲིའི་མཎྜལ་ལ་གཏུམ་པོའི་གཟུགས་ཅན་མཇུག་རིངས་ནི་དུ་བའི་

མདོག་ཅན་ཐལ་མོ་སྦྱར་བ་ཀླུའི་རྣམ་པ་ཅན་གྱི་མཇུག་མ་འཁྱིལ་བའོ། །འདི་ལ་ནི་སྣུམ་ཁུར་གྱི་བཟའ་བ་དང་སྤོས་དཀར་གྱི་བདུག་སྤོས་ཀྱང་དབུལ་བར་བྱའོ། །ཨོཾ་ན་མོ་དྷཱུ་མྲ་ཨཱ་བྷ་ཝརྞ་སནྣི་བྷཱ་ཡ་ཛྱོ་ཏི་ཀ་ཏ་བེ་སྭཱ་ཧཱ། དཀྱིལ་འཁོར་གྱི་ཤར་གྱི་སྒོར་སངས་རྒྱས་བཅོམ་ལྡན་འདས་

གསེར་གྱི་མདོག་ཅན་ཏིང་ངེ་འཛིན་གྱི་ཕྱག་རྒྱ་མཛད་པའོ། །ལྷོའི་སྒོར་ཕྱག་ན་རྡོ་རྗེ་སྔོ་བསངས་ཕྱག་གཡས་པས་རྡོ་རྗེ་ཐུགས་ཀར་འཛིན་ཞིང་ཕྱག་གཡོན་པ་ས་ལ་གནས་པའོ། །ནུབ་ཀྱི་སྒོར་འཇིག་རྟེན་དབང་ཕྱུག་དམར་པོ་གཡས་པས་མཆོག་སྦྱིན་དང་གཡོན་པས་མི་འཇིགས་

เล่ม ๗๖ · หน้า 227a

པ་མཛད་པའོ། །བྱང་གི་སྒོར་འཇམ་དཔལ་གཞོན་ནུ་གུར་གུམ་གྱི་མདོག་ཅན་ཆོས་འཆད་ཀྱི་ཕྱག་རྒྱ་མཛད་པའོ། །དབང་ལྡན་དུ་ནི་གཟའ་ཐམས་ཅད་དེ་སྣ་ཚོགས་པའི་མདོག་དང་། སྣ་ཚོགས་པའི་དབྱིབས་དང་རྣམ་པ་སྣ་ཚོགས་པའི་གཟུགས་ཅན་ནོ། །མེར་ནི་རྒྱུ་སྐར་ཐམས་ཅད་དེ་རང་

རང་གི་བཞོན་པ་ལ་ཡང་དག་པར་གནས་ཤིང་ཐམས་ཅད་ཐལ་མོ་ཡང་དག་པར་སྦྱར་བའོ། །བདེན་བྲལ་དུ་ནི་ཉེ་བར་འཚེ་བར་བྱེད་པ་ཐམས་ཅད་དེ་འཇིགས་སུ་རུང་བའི་གཟུགས་ཅན་ནོ། །རླུང་དུ་ནི་རྡོ་རྗེ་བཙུན་མ་རིག་པ་ཆེན་པོ་སྟེ་དཀར་པོ་དང་སྔོན་པོ་དང་དམར་པོའི་ཞལ་གསུམ་མ་རྩ་བའི་ཕྱག་དག་

ནི་རྣམ་པར་བཤད་པའི་ཕྱག་རྒྱ་འཛིན་ཅིང་། གཡས་པ་དག་ན་པདྨ་དང་རིན་པོ་ཆེ་འབར་བ་དང་གཡོན་པ་དག་ན་ཞགས་པ་དང་ཤཀྟི་བསྣམས་པ། རིན་པོ་ཆེའི་ཅོད་པན་ཅན་ཟླ་བའི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་པ་ལོ་བརྒྱད་གཉིས་ལོན་པ་རྒྱན་ཐམས་ཅད་དང་ལྡན་པའོ། །དཀྱིལ་

འཁོར་གྱི་སྒོའི་ཕྱི་རོལ་དུ་ཤར་དུ་ཡུལ་འཁོར་སྐྱོང་དང་། ལྷོར་འཕགས་སྐྱེས་པོ་དང་། ནུབ་ཏུ་སྤྱན་མི་བཟང་དང་། བྱང་དུ་ལུས་ངན་པོ་ནི་སེར་པོ་དང་ནག་པོ་དང་དམར་པོ་དང་སེར་པོ་སྟེ་རང་རང་གི་ཕྱག་མཚན་དང་ལྡན་པའོ། །དེ་ལ་སངས་རྒྱས་ལ་སོགས་པའི་ཞལ་ཟས་ནི་སངས་རྒྱས་ལ་འོ་ཐུག་དང་།

ཕྱག་ན་རྡོ་རྗེ་ལ་འོ་མ་དང་། འཇིག་རྟེན་དབང་ཕྱུག་ལ་བུ་རམ་གྱི་ཟན་དང་། འཇམ་དཔལ་ལ་ཞོའི་ཟན་དང་། གཟའ་ཐམས་ཅད་ལ་མར་གྱི་ཟན་དང་། རྒྱུ་སྐར་ཐམས་ཅད་ལ་ཞོའི་ཟན་དང་། ཉེར་འཚེ་བྱེད་པ་ཐམས་ཅད་ལ་སྲན་ནག་གི་ཟན་དང་། བཅོམ་ལྡན་འདས་མ་ལ་འོ་མ་དང་དྲི་བཟང་པོའི་

བདུག་སྤོས་དང་། ཐམས་ཅད་ལ་སྤོས་དཀར་གྱི་བདུག་སྤོས་དང་རང་རང་གི་མདོག་ཅན་གྱི་བ་དན་རྣམས་རང་རང་གི་མདོག་ཅན་གྱི་སྡོང་བུ་རྣམས་ལ་མར་གྱི་སྣང་གསལ་དང་། རང་རང་གི་མདོག་ཅན་གྱི་རས་བཟང་པོ་རྣམས་ཀྱང་དབུལ་བར་བྱའོ། །སངས་རྒྱས་ལ་སོགས་པའི་སྔགས་ཀྱི་ཚིག་

རྣམས་ནི། ཨོཾ་ན་མོ་བུདྡྷཱ་ཡ་སྭཱ་ཧཱ། ཨོཾ་བཛྲ་དྷཱ་རཱ་ཡ་ན་མཿསྭཱ་ཧཱ། ཨོཾ་པདྨ་དྷཱ་རཱ་ཡ་ན་མཿསྭཱ་ཧཱ། ཨོཾ་ཀུ་མཱ་རཱ་ཡ་ན་མཿསྭཱ་ཧཱ། ཨོཾ་སརྦ་གྲ་ཧ་ནཱཾ་ན་མཿསྭཱ་ཧཱ། ཨོཾ་སརྦ་ནཀྵ་ཏྲཱ་ཎཱཾ་སྭཱ་ཧཱ། ཨོཾ་སརྦ་ཨུ་པ་དྲ་བཱ་ནཱཾ་སྭཱ་ཧཱ། ཨོཾ་མ་ཧཱ་བིདྱེ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་དྷྲྀཏ་རཥྚཱ་ཡ་སྭཱ་ཧཱ། ཨོཾ་བི་རཱུ་ཌྷ་ཀཱ་ཡ་

เล่ม ๗๖ · หน้า 227b

སྭཱ་ཧཱ། ཨོཾ་བི་རཱུ་པ་ཀྵཱ་ཡ་སྭཱ་ཧཱ། ཨོཾ་ཀུ་བཻ་རཱ་ཡ་སྭཱ་ཧཱ། འདི་རྣམས་ཐམས་ཅད་ལ་རང་རང་གི་སྔགས་དེ་ཉིད་ཀྱིས་མཆོད་ཡོན་དབུལ་བར་བྱ་སྟེ། དེའང་ཉི་མ་ལ་ནི་ཏིལ་དམར་པོ་དང་ཟངས་དང་ཙནྡན་དམར་པོས་སོ། །ཟླ་བ་ལ་ནི་དངུལ་དང་ཏིལ་དཀར་པོ་དང་ཙནྡན་དཀར་པོས་སོ། །བཀྲ་ཤིས་ལ་ནི་

ཟངས་དང་འབྲས་དམར་པོ་དང་ཙནྡན་དམར་པོས་སོ། །གཟའ་ལྷག་ལ་ནི་ནས་དང་བྱི་རུ་དང་གུར་གུམ་གྱིས་སོ། །ཕུར་བུ་ལ་ནི་གསེར་དང་ཡུངས་ཀར་དང་གུར་གུམ་གྱིས་སོ། །པ་སངས་ལ་ནི་མུ་ཏིག་དང་འབྲས་མ་ཆག་པ་དང་ཙནྡན་དཀར་པོས་སོ། །སྤེན་པ་ལ་ནི་ལྕགས་དང་སྲན་ནག་དང་གླ་

རྩིས་སོ། །སྒྲ་གཅན་ལ་ནི་ལྕགས་དང་ཏིལ་ནག་པོ་དང་དྲི་ཐམས་ཅད་ཀྱིས་སོ། །མཇུག་རིངས་ལ་ནི་ལྕགས་དང་སྲན་མུངྒ་དང་དྲི་བཟང་པོས་སོ། །ལྷག་མ་རྣམས་ལ་ནི་མར་དང་སྦྲང་རྩིས་དུང་བཀང་སྟེ་རིན་པོ་ཆེ་ལྔ་བཅུག་ནས་མཆོད་ཡོན་དབུལ་ལོ། །ཛཿཧཱུཾ་བཾ་ཧོཿཞེས་པའི་

སྔགས་ཀྱིས་དགུག་པ་དང་གཞུག་པ་དང་བཅིང་བ་དང་མཉེས་པའི་ཆོ་གས་རོ་མཉམ་པར་གྱུར་པར་རྣམ་པར་བསམས་ཏེ་སྔར་བཤད་པའི་མེ་ཏོག་དང་བདུག་སྤོས་ལ་སོགས་པས་སོ་སོའི་སྔགས་ཀྱིས་ཡང་དག་པར་མཆོད་པར་བྱའོ། །དེ་ལ་འདི་དག་གིས་རིམ་པ་ཇི་ལྟ་བར་འདི་རྣམས་

ཐམས་ཅད་མཆོད་པ་བྱས་ནས་གཟའ་ཐམས་ཅད་ཀྱི་སྔགས་རྣམས་རེ་རེ་ཞིང་ལན་བརྒྱ་རྩ་བརྒྱད་བཟླས་པར་བྱའོ། །དེའི་རྗེས་སུ་གཟའ་རྣམས་ཀྱི་ཡུམ་ཞེས་བྱ་བའི་གཟུངས་ལན་བདུན་བཀླག་པར་བྱའོ། །དེ་ནས་གཟའ་ཡུམ་གྱི་སྙིང་པོའི་སྔགས་བརྒྱ་རྩ་བརྒྱད་དམ་སྟོང་ངམ་

གཞན་ཡང་ཇི་ལྟར་ནུས་པ་ཡོངས་སུ་བཟླས་ཏེ་རང་གི་མངོན་པར་འདོད་པའི་དངོས་གྲུབ་ཞུས་ནས་ཡི་གེ་བརྒྱ་པས་བརྟན་པར་བྱ་ཞིང་ཆོ་ག་བཞིན་དུ་གཤེགས་སུ་གསོལ་ལ་སྔར་བཞིན་དུ་ཆུ་ཀླུང་གི་ཆུ་རྣམས་ལ་དོར་བར་བྱའོ། །ཕྱི་ནས་སློབ་དཔོན་ལ་སོགས་པ་རྣམས་ཁ་ན་མ་ཐོ་པ་མེད་

པའི་བཟའ་བ་ལ་སྤྱད་པར་བྱ་ཞིང་ཡོན་ལ་སོགས་པ་ཇི་ལྟར་ནུས་པ་དབུལ་བར་བྱའོ་ཞེས་པ་གཟའ་ཡུམ་གྱིས་བདེ་ལེགས་སུ་བྱེད་པའི་ཆོ་གའོ།། །།ནོར་རྒྱུན་མའི་ཆོ་ག་བཤད་པར་བྱ་སྟེ། སྟོང་པ་ཉིད་བསྒོམས་པའི་མཐར་ཧྲཱིཿཡིག་ཡོངས་སུ་གྱུར་པ་ལས་པདྨ་སེར་པོའི་སྟེང་དུ་ཨ་

เล่ม ๗๖ · หน้า 228a

ཡིག་ལས་ཟླ་བའི་དཀྱིལ་འཁོར་དང་། སླར་ཡང་དེའི་སྟེང་དུ་བྷྲཱུཾ་ཡིག་ཡོངས་སུ་གྱུར་བ་ལས་རིན་པོ་ཆེའི་རི་བོ་དང་དེའི་སྟེང་དུ་བྷྲཱུཾ་ཡིག་གི་ས་བོན་ལས་ནོར་རྒྱུན་མ་བསྒོམ་པར་བྱ་སྟེ། སྐུ་མདོག་སེར་པོ་ཞལ་གཅིག་ཕྱག་དྲུག་མ་རོལ་པའི་འདུག་སྟངས་ཀྱིས་བཞུགས་པ། དེ་

བཞིན་གཤེགས་པའི་ཅོད་པན་ཅན་ཕྱག་གཡས་ཀྱི་དང་པོས་མཆོག་སྦྱིན་གྱི་ཕྱག་རྒྱས་གཏེར་སྟོན་པར་མཛད་པ། གཉིས་པས་རིན་པོ་ཆེའི་ཆར་འབེབས་པར་མཛད་པ། །གསུམ་པས་དེ་བཞིན་གཤེགས་པ་རྡོ་རྗེ་འཛིན་པ་རྒྱ་མཚོའི་དབྱངས་ལ་ཕྱག་མཛད་པ། ཕྱག་གཡོན་གྱི་དང་པོས་

བུམ་པ་བཟང་པོ་དང་། གཉིས་པས་འབྲས་ཀྱི་སྙེ་མ་དང་། གསུམ་པས་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་འཛིན་པ་རྒྱན་ཐམས་ཅད་དང་ལྡན་པར་བསམ་པར་བྱའོ། །སྣམ་བུ་གཉིས་པ་ལ་ནུབ་ཀྱི་ཕྱོགས་སུ་དེ་བཞིན་གཤེགས་པ་རྡོ་རྗེ་འཛིན་པ་རྒྱ་མཚོའི་ངེས་པར་སྒྲོགས་པ་སེར་

པོ་རྡོ་རྗེའི་སྐྱིལ་ཀྲུང་གི་བརླ་ལ་ཕྱག་གཡོན་པ་བཞག་ཅིང་གཡས་པས་མཆོག་སྦྱིན་མཛད་པའོ། །གཡས་སུ་འཕགས་པ་སྤྱན་རས་གཟིགས་དབང་ཕྱུག་དང་། གཡོན་དུ་ཕྱག་ན་རྡོ་རྗེ་སྟེ་དེ་དག་ཀྱང་དམར་པོ་དང་ལྗང་གུ་མཆོག་སྦྱིན་དང་རྡོ་རྗེའི་ཕྱག་ཅན་གཡོན་པ་དག་ནི་རྒྱལ་པོ་རོལ་པའི་ཚུལ་གྱིས་

གནས་པ། རྡོ་རྗེ་སྐྱིལ་ཀྲུང་གིས་བཞུགས་པའོ། །ཤར་དུ་ལྷ་མོ་ཨི་ལཱ་ཉེ་བར་མཁོ་བ་ཐམས་ཅད་ལ་དབང་བྱེད་པ་སེར་མོའོ། །དེའི་གཡོན་དུ་ཆུ་བདག་རོ་བཅུད་ལ་དབང་བྱེད་པ་དཀར་པོའོ། །དེའི་གཡས་སུ་ཛམྦྷ་ལ་སྔོན་པོའོ། །མེ་མཚམས་སུ་ཙི་པི་ཀུཎྜ་ལི་ཅུང་ཟད་དམར་པོའོ། །

བདེན་བྲལ་དུ་ཀི་ལི་མཱ་ལི་མ་ར་ཀ་ཏ་ལྟར་ལྗང་བའོ། །རླུང་དུ་སྒོའི་དབང་པོ་སེར་པོའོ། །དབང་ལྡན་དུ་སྤྱོད་པའི་དབང་པོ་དཀར་སེར་རོ། །སྣམ་བུ་གསུམ་པ་ལ་མེར་སྦས་པའི་ལྷ་མོ་ལྗང་གུའོ། །བདེན་བྲལ་དུ་ཤིན་ཏུ་སྦས་པའི་ལྷ་མོ་དམར་མོ་གདུགས་འཛིན་པའོ། །རླུང་དུ་ལྷ་མོ་དབྱངས་ཅན་མ་སེར་

མོ་ཕྱག་ན་རྒྱལ་མཚན་ནོ། །དབང་ལྡན་དུ་ཟླ་བ་ཆུ་ཤེལ་གྱི་ལྷ་མོ་དཀར་མོ་བ་དན་གྱི་ཕྱག་རྒྱ་ཅན་ནོ། །ཤར་དུ་གང་བ་བཟང་པོ་གུར་གུམ་གྱི་མདོག་ཅན་ནེའུ་ལེ་དང་བི་ཛ་པཱུ་ར་ཀའི་ཕྱག་རྒྱ་ཅན་ནོ། །ལྷོར་ནོར་བུ་བཟང་པོ་སྔོན་མོ་འོད་དང་ལྡན་པ་རིན་པོ་ཆེ་དང་བི་ཛ་པཱུ་ར་ཀའི་ཕྱག་རྒྱ་ཅན་ནོ། །ནུབ་ཏུ་

เล่ม ๗๖ · หน้า 228b

ནོར་སྦྱིན་མ་དམར་མོ་བུམ་པ་བཟང་པོ་དང་བི་ཛ་པཱུ་ར་ཀའི་ཕྱག་རྒྱ་ཅན་ནོ། །བྱང་དུ་རྣམ་ཐོས་སྲས་སེར་པོ་རིན་པོ་ཆེའི་མྱུ་གུ་དང་བི་ཛ་པཱུ་ར་ཀའི་ཕྱག་རྒྱ་ཅན་ནོ། །ཐམས་ཅད་སེམས་དཔའི་སྐྱིལ་ཀྲུང་ཅན་ཏེ། གང་མ་བཤད་པ་དེ་རྣམས་ནི་གཡས་པ་བི་ཛ་པཱུ་ར་ཀའི་ཕྱག་ཅན་དང་། གཡོན་

པ་བརླ་ལ་བརྟེན་པའོ། །འདི་དག་ནི་ལྷ་རྣམས་དགོད་པའི་རིམ་པའོ། །བཅོམ་ལྡན་འདས་མའི་རྩ་བའི་སྔགས་ནི། ཨོཾ་བ་སུ་དྷཱ་ར་སྭཱ་ཧཱ། ཨོཾ་ལཀྵྨཱ་བྷུ་ཏ་ལ་ནི་བཱ་སི་ནཱི་ཡེ་སྭཱ་ཧཱ། ཉེ་བའི་སྙིང་པོའོ། །ཐམས་ཅད་ལ་ཡང་དང་པོར་ཨོཾ་ཡིག་དང་མཐར་སྭཱ་ཧཱ་དང་། རང་རང་གི་མིང་སྤེལ་བའི་སྔགས་ཀྱིས་

མཆོད་པར་བྱའོ། །དེ་ནས་གང་སུ་ཡང་རུང་རིགས་ཀྱི་བུ་འམ་རིགས་ཀྱི་བུ་མོ་མཆོག་ཏུ་དད་པ་དང་ལྡན་པས་ནོར་རྒྱུན་མའི་སྐུ་གཟུགས་སམ་བྲིས་སྐུ་རབ་ཏུ་བཀོད་དེ་ཇི་ལྟར་འབྱོར་པའི་མཆོད་པ་བྱས་ནས་ཉི་མ་རེ་རེ་ཞིང་མ་ཆད་པར་མཉམ་པར་གཞག་སྟེ། གཟུངས་རྣམས་མ་ཆད་པར་བཀླག་

པར་བྱའོ། །དེའི་རིམ་པས་ནི་ཐམས་ཅད་དུ་ཕུན་སུམ་ཚོགས་པར་འགྱུར་རོ། །དེ་ནས་ཉིན་པར་སྔ་མོ་ནས་རྡུལ་ཚོན་སེར་པོའི་དཀྱིལ་འཁོར་བྱས་ཏེ་བརྟུལ་ཞུགས་དང་ལྡན་པས་མཚན་མོ་འདས་པར་བྱས་ནས། སླར་ཡང་སྔ་མོར་དྲི་བཟང་པོའི་ཆུས་ཁྲུས་བྱས་ལ་གཙང་ཞིང་

དྲི་མ་མེད་པའི་གོས་གྱོན་ཏེ་ཚངས་པར་སྤྱོད་པར་གྱུར་པས་དགེ་བའི་གནས་སུ་སྐུ་གཟུགས་སམ་བྲིས་སྐུ་རབ་ཏུ་བཀོད། ཙནྡན་གྱི་མཎྜལ་བྱས་ཏེ་ཐེ་ཚོམ་མེད་པས་གཟུངས་རྣམས་བར་མ་ཆད་པར་ལན་གསུམ་བཀླག་པར་བྱའོ། །དེ་ལྟ་ན་རིགས་ཀྱི་བུའམ་རིགས་ཀྱི་བུ་མོ་དེའི་ཁྱིམ་སྐྱེས་

བུ་ཆེན་པོའི་ཚད་ཙམ་དུ་ནོར་གྱི་རྒྱུན་གྱིས་གང་བར་འགྱུར་ཏེ་ནོར་ཐམས་ཅད་དང་། སོ་བ་དང་། གསེར་དང་དངུལ་དང་ཉེ་བར་མཁོ་བ་ཐམས་ཅད་ཀྱིས་སོ། །ཉེ་བར་འཚེ་བ་ཐམས་ཅད་ཀྱང་མེད་པར་འགྱུར་རོ། །གང་ཡང་དེ་བཞིན་ཉིད་དུ་མཎྜལ་ཟླུམ་པོ་བྱས་ནས་སླར་ཡང་སྔ་མོར་དྲི་

ཞིམ་པོའི་ཆུས་ཁྲུས་བྱས་པ་གཙང་ཞིང་དྲི་མ་མེད་པའི་གོས་གྱོན་ཏེ། མྱོས་བྱེད་ཀྱི་བཏུང་བ་ལ་སོགས་དང་བྲལ་ཞིང་ཁ་ན་མ་ཐོ་བ་དང་ལན་ཚྭ་མེད་པའི་བཟའ་བ་དང་ཚངས་པར་སྤྱོད་པ་དང་ལྡན་པར་གྱུར་པས། རྒྱས་པའི་དོན་དུ་རང་གི་ཁྱིམ་མམ་གཞན་གྱི་ཁྱིམ་མམ་དགེ་བའི་གནས་

เล่ม ๗๖ · หน้า 229a

སམ་ཁང་པའི་མཛོད་མིག་ཏུ་ཙནྡན་གྱི་མཎྜལ་གྲུ་བཞི་པ་བྱས་ལ། བཅོམ་ལྡན་འདས་དེ་བཞིན་གཤེགས་པ་དང་འཕགས་པ་སྤྱན་རས་གཟིགས་དབང་ཕྱུག་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་སྔགས་ཀྱི་ལྷ་རྣམས་ཀྱི་སྤྱན་སྔར་ཇི་ལྟར་འབྱོར་པའི་མཆོད་པ་

རྒྱ་ཆེན་པོ་བྱས་ཏེ། ཤིན་ཏུ་མཉམ་པར་གཞག་པས་བཅོམ་ལྡན་འདས་མ་དེ་ཉིད་བསྒོམ་པར་བྱ་ཞིང་། སེམས་རྩེ་གཅིག་པས་སྦྱིན་བདག་ལ་ཕན་པ་དང་བདེ་བའི་བསམ་པ་དང་དད་པ་དང་མཆོག་ཏུ་ཐེ་ཚོམ་མེད་པས་གཟུངས་འདི་ཉིན་མཚན་གཅིག་གམ་ཉིན་མཚན་བདུན་དུ་གཞན་

དང་མི་སྨྲ་ཞིང་རྒྱུན་མ་ཆད་པར་བཀླག་པར་བྱའོ། །སློབ་དཔོན་གྱིས་དེ་བཞིན་གྱི་བརྟུལ་ཞུགས་དང་ལྡན་པས་མཚན་མོ་གསུམ་དུ་བྱ་ཞིང་། ཉིན་མོའང་གསུམ་དུ་བྱས་ནས་མཆོད་པ་དང་གཏོར་མ་དང་ཉེ་བར་མཁོ་བ་ཐམས་ཅད་ཀྱིས་མཆོད་པར་བྱའོ། །དེ་བཞིན་དུ་སྦྱིན་བདག་གིས་

ཀྱང་བརྟུལ་ཞུགས་དང་ལྡན་པས་ཐམས་ཅད་བརྩམ་པར་བྱ་ཞིང་ཀློག་པའི་དུས་སུ་ཡང་ཇི་ལྟར་ནུས་པས་སེམས་ཅན་རྣམས་ལ་གསེར་ལ་སོགས་པའི་སྦྱིན་པ་གཏང་བར་བྱ་སྟེ། དེ་ནས་བཀླགས་པས་འགྲུབ་པར་འགྱུར་རོ། །དེ་ལ་མིག་བཙུམས་པ་ཙམ་ལ་ནོར་རྒྱུན་མས་སྐྱེས་བུ་ཆེན་

པོ་དང་འཚམ་པའི་ནོར་གྱི་རྒྱུན་གྱིས་སྦྱིན་བདག་གི་ཁྱིམ་ཡོངས་སུ་འགེངས་པར་འགྱུར་ཏེ། ནོར་ཐམས་ཅད་དང་སོ་བ་དང་གསེར་དང་དངུལ་དང་ཉེ་བར་མཁོ་བ་ཐམས་ཅད་ཀྱིས་སོ། །ཉེ་བར་འཚེ་བ་ཐམས་ཅད་ཀྱང་མེད་པར་འགྱུར་རོ། །དེ་ནས་སྔར་བཞིན་དུ་རྡུལ་ཚོན་གྱི་དཀྱིལ་འཁོར་

གཤེགས་སུ་གསོལ་ལ་རྡུལ་ཚོན་ཐམས་ཅད་ཁང་པའི་མཛོད་མིག་དུ་བཅུག་ནས་གཞག་པར་བྱ་སྟེ། གང་དུ་རྡུལ་ཚོན་བཅུག་པ་དེར་ནི་ཐམས་ཅད་ཟད་པ་མེད་པར་འགྱུར་རོ། །རྒྱལ་མཚན་དང་བ་དན་ལ་སོགས་པ་གཞན་དག་ནི་ཆུ་ཀླུང་གི་ཆུ་ལ་དོར་བར་བྱའོ། །སློབ་དཔོན་ལ་སོགས་

པ་རྣམས་ཀྱང་ཁ་ན་མ་ཐོ་བ་མེད་པའི་བཟའ་བ་དང་ཡོན་ལ་སོགས་པས་མཉེས་པར་བྱའོ་ཞེས་པ་ནོར་རྒྱུན་མའི་གཟུངས་བཀླག་པའི་ཆོ་གའོ།། །།རིགས་ཀྱི་བུ་དག་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་རྣམ་པར་རྒྱལ་མ་ཞེས་པའི་གཟུངས་འདི་ནི། འཆི་བའི་ཆད་པ་ཆེན་པོ་

เล่ม ๗๖ · หน้า 229b

འཛིན་པ་རྣམས་དག་པར་བྱེད་ཅིང་སྡིག་པ་སེལ་བར་བྱེད་པ་སྟེ་གང་སུ་དག་ཚེ་རིང་བར་འདོད་པ་རྣམས་ཀྱིས་འཆད་པར་འགྱུར་བའི་རིམ་པས་དེ་ཉིད་བཀླག་པར་བྱའོ། །རྣམ་པར་རྒྱས་པའི་ས་ཕྱོགས་འགའ་ཞིག་ཏུ་འཇིམ་པ་དང་བ་བྱུང་རྣམས་ཀྱིས་ཉེ་བར་བྱུགས་ཏེ་དྲི་བཟང་པོའི་ཆུས་མངོན་པར་གཏོར་

ལ། རྣམ་པར་བཀྲ་བའི་བླ་རེ་བྲེས་ནས་རྡུལ་ཚོན་དཀར་པོས་འཁོར་ལོ་རྩིབས་བརྒྱད་པ་རྣམ་པར་བཀོད་པས་བརྒྱན་པར་བྱས་པ་དེའི་དབུས་སུ་ནི། དེ་བཞིན་གཤེགས་པ་རང་བཞིན་ནམ་རྣམ་པར་རྒྱས་པའི་གཙུག་ཏོར་ཏེ། རིམ་པ་ཇི་ལྟ་བར་ཤར་ལ་སོགས་པའི་རྩིབས་རྣམས་སུ་ནམ་མཁའ་

དང་མཉམ་པ་ལས་བྱུང་བའི་གཙུག་ཏོར་དང་། སའི་སྙིང་པོ་ལས་བྱུང་བའི་གཙུག་ཏོར་དང་། ནོར་བུའི་སྙིང་པོ་ལས་བྱུང་བའི་གཙུག་ཏོར་དང་། རོའི་སྙིང་པོ་ལས་བྱུང་བའི་གཙུག་ཏོར་དང་། དཔག་ཏུ་མེད་པ་ལས་བྱུང་བའི་གཙུག་ཏོར་དང་། གཟི་བརྗིད་སྙིང་པོ་ལས་བྱུང་བའི་གཙུག་ཏོར་དང་། རྔ་སྒྲའི་

དབྱངས་ལས་བྱུང་བའི་གཙུག་ཏོར་དང་། རླུང་གི་སྙིང་པོ་ལས་བྱུང་བའི་གཙུག་ཏོར་རྣམས་དགོད་པར་བྱའོ། །དེའི་ཕྱི་རོལ་དུ་ཤིན་ཏུ་མཛེས་པའི་པདྨ་འདབ་མ་བཅུ་དྲུག་པ་བྱས་ནས་འདབ་མ་རེ་རེ་ཞིང་རིམ་པ་ཇི་ལྟ་བར་སོ་སོར་ཟླ་བ་བཅུ་དྲུག་ལ་དེ་བཞིན་གཤེགས་པ་བཅུ་དྲུག་དགོད་པར་བྱ་སྟེ། ནང་

སྟོང་པ་ཉིད་ལས་བྱུང་བའི་གཙུག་ཏོར་དང་། ཕྱི་སྟོང་པ་ཉིད་ལས་བྱུང་བའི་གཙུག་ཏོར་དང་། ཕྱི་ནང་སྟོང་པ་ཉིད་ལས་བྱུང་བའི་གཙུག་ཏོར་དང་། སྟོང་པ་ཉིད་སྟོང་པ་ཉིད་ལས་བྱུང་བའི་གཙུག་ཏོར་དང་། འདུས་བྱས་སྟོང་པ་ཉིད་ལས་བྱུང་བའི་གཙུག་ཏོར་དང་། འདུས་མ་བྱས་སྟོང་པ་ཉིད་ལས་

བྱུང་བའི་གཙུག་ཏོར་དང་། མཐའ་ལས་འདས་པ་སྟོང་པ་ཉིད་ལས་བྱུང་བའི་གཙུག་ཏོར་དང་། ཐོག་མ་དང་ཐ་མ་མེད་པ་སྟོང་པ་ཉིད་ལས་བྱུང་བའི་གཙུག་ཏོར་དང་། དོར་བ་མེད་པ་སྟོང་པ་ཉིད་ལས་བྱུང་བའི་གཙུག་ཏོར་དང་། རང་བཞིན་སྟོང་པ་ཉིད་ལས་བྱུང་བའི་གཙུག་ཏོར་དང་། ཆོས་ཐམས་

ཅད་སྟོང་པ་ཉིད་ལས་བྱུང་བའི་གཙུག་ཏོར་དང་། རང་གི་མཚན་ཉིད་སྟོང་པ་ཉིད་ལས་བྱུང་བའི་གཙུག་ཏོར་དང་། མི་དམིགས་པ་སྟོང་པ་ཉིད་ལས་བྱུང་བའི་གཙུག་ཏོར་དང་། དངོས་པོ་མེད་པ་སྟོང་པ་ཉིད་ལས་བྱུང་བའི་གཙུག་ཏོར་དང་། ངོ་བོ་ཉིད་སྟོང་པ་ཉིད་ལས་བྱུང་བའི་གཙུག་ཏོར་དང་།

เล่ม ๗๖ · หน้า 230a

དངོས་པོ་མེད་པའི་ངོ་བོ་ཉིད་སྟོང་པ་ཉིད་ལས་བྱུང་བའི་གཙུག་ཏོར་རྣམས་སོ། །དེ་བཞིན་གཤེགས་པ་འདི་དག་གིས་གདན་གྱི་མཎྜལ་བྱས་ནས་དུས་ཇི་ལྟ་བར་མེ་ཏོག་གི་ཚོམ་བུ་དགོད་པར་བྱའོ། །འདིའི་སྟེང་དུ་མན་ཇིའི་ཁར་ཆུའི་སྣོད་དུ་རྣམ་པར་སྣང་མཛད་ཀྱི་སྙིང་པོ་ཅན་གྱི་མཆོད་རྟེན་གཞག་

ཅིང་། གསེར་གྱི་བྱང་བུ་ལ་སྔགས་དང་སྤེལ་བའི་བསྒྲུབ་བྱའི་མིང་མངོན་པར་བྲིས་ལ་གཞག་སྟེ་བུམ་པ་ཆུས་དགང་བར་བྱའོ། །པདྨའི་ཕྱི་རོལ་ཕྱོགས་བཞིར་ཆུས་གང་བའི་བུམ་པ་བཞི་གཞག་པར་བྱའོ། །ཡལ་འདབ་དང་བཅས་པ་དང་གདུགས་དང་བ་དན་གྱིས་ཉེ་བར་མཛེས་པར་བྱས་ནས། སླར་

ཡང་ཤར་དུ་བགེགས་རབ་ཏུ་ཞི་བར་བྱེད་པའི་ལྷ་མོ་རྣམ་པར་རྒྱལ་མ་དང་། ལྷོར་འཆི་བ་རབ་ཏུ་ཞི་བར་བྱེད་པའི་ལྷ་མོ་རྣམ་པར་རྒྱལ་མ་དང་། ནུབ་ཏུ་ཉོན་མོངས་པ་རབ་ཏུ་ཞི་བར་བྱེད་པའི་ལྷ་མོ་རྣམ་པར་རྒྱལ་མ་དང་། བྱང་དུ་ཕུང་པོའི་ནད་ཞི་བར་བྱེད་པའི་ལྷ་མོ་རྣམ་པར་རྒྱལ་མ་དང་། མེར་

རྡོ་རྗེའི་ཕྲེང་བ་ཚེ་སྦྱིན་མ་དང་། བདེན་བྲལ་དུ་སྒྱུ་འཕྲུལ་ཆེན་མོ་དང་། རླུང་དུ་གསེར་གྱི་འོད་ཅན་མ་དང་། དབང་ལྡན་དུ་ཚེ་སྟེར་བར་བྱེད་པ་གསེར་གྱི་ཕྲེང་བ་མ་རྣམས་ཏེ། སྣོད་བཞི་ཆུས་ཡོངས་སུ་བཀང་ནས་དྲི་བཟང་པོ་དང་བསྲེས་ཏེ་མེ་ཏོག་གི་ཕྲེང་བ་འཕྱང་བ་བཞི་དགོད་པར་བྱའོ། །རྡུལ་ཚོན་བཀྱེ་

བའི་རེ་ཁཱ་གསུམ་གྱི་ནང་མའི་ནང་མ་ལ་སཱ་ལུའི་ཟན་ནམ་འཇིམ་པ་ལས་མཆོད་རྟེན་སྟོང་བྱའོ། །གལ་ཏེ་མ་འབྱོར་ན་བརྒྱ་གཞག་པར་བྱའོ། །ཕྱོགས་བཞིར་བསྙེན་བཀུར་བའི་ཕྱིར་མཆོད་པ་རྒྱ་ཆེན་པོ་བྱ་སྟེ། དཱུར་བ་དང་ཀུནྡ་གཟུང་སྟེ་ཆོས་ཀློག་པ་པོས་གཟུངས་འདི་བཀླག་པར་བྱ་ཞིང་།

མཆོད་རྟེན་སོ་སོའི་དབུ་ལ་མཆོད་པར་བྱས་ལ་རབ་ཏུ་གནས་པར་བྱའོ། །འབྲས་མ་ཉམས་པ་དང་དཱུར་བ་དང་ཀུནྡ་སྟོང་གིས་དབུས་ཀྱི་མཆོད་རྟེན་གྱི་དབུ་ལ་དོར་ནས་མཆོད་པར་བྱ་ཞིང་། མེ་ཏོག་དང་བདུག་སྤོས་དང་སྣང་གསལ་དང་དྲི་དང་གཏོར་མ་དང་ཞལ་ཟས་དང་གདུགས་དང་བ་དན་ལ་

སོགས་པའི་མཆོད་པ་ཐམས་ཅད་རེ་རེ་ཞིང་ངེས་པར་སྟོང་སྟོང་གི་ཕྲེང་བ་བྱས་ནས་ཡང་དག་པར་མཆོད་པར་བྱའོ། །ཡོངས་སུ་རྫོགས་པ་ཇི་སྲིད་པར་མར་མེའི་ཕྲེང་བ་མ་ཆད་པར་བྱ་ཞིང་། རྟག་ཏུ་མཉམ་པར་གཞག་པས་གཙང་མའི་དངོས་པོར་བྱའོ། །ཆོས་སྟོན་པ་པོ་སློབ་དཔོན་དང་

เล่ม ๗๖ · หน้า 230b

ལས་ཀྱི་རྡོ་རྗེ་རྣམས་ཀྱིས་དྲི་བཟང་པོའི་ཆུས་ཁྲུས་བྱས་ཏེ། དཀར་པོའི་རང་བཞིན་གྱི་གོས་དང་རྒྱན་གྱིས་བརྒྱན་ཏེ་སྡོམ་པ་དང་ལྡན་པས་ཤར་དུ་མངོན་པར་ཕྱོགས་ཏེ་བཀླག་པར་བྱའོ། །དེ་ལྟར་བྱས་ན་ཞག་བདུན་གྱི་ཚེ་ནི་ལོ་བདུན་གྱི་ཚེར་འགྱུར་ལ། ལོ་བདུན་གྱི་ཚེ་ནི་ལོ་བདུན་ཅུར་

འཚོ་བར་འགྱུར་ལ་དུས་མ་ཡིན་པར་འཆི་བའང་མི་འབྱུང་བར་འགྱུར་རོ། །ཞེས་པ་གཙུག་ཏོར་རྣམ་པར་རྒྱལ་མ་བཀླག་པའི་ཆོ་གའོ།། །།འདིར་རྡུལ་ཚོན་གྱི་དཀྱིལ་འཁོར་བྲིས་པ་ལ་སོགས་པ་ན་གལ་ཏེ་ས་འོག་ནས་ཆུ་རྡོལ་བ་དང་མེ་དང་རླུང་དང་། སྤྲིན་དང་ཐོག་དང་མི་དང་ལྷའི་སྡེ་དང་

གླང་པོ་ལ་སོགས་པ་བགེགས་ཀྱི་ཉེ་བར་འཚེ་བ་ལྷས་བྱས་པ་འམ། མི་ལ་སོགས་པས་བྱས་པ་འབྱུང་བ་སྲིད་དེ། དེའི་ཚེ་ཆོ་ག་ཇི་ལྟ་བ་བཞིན་དུ་རྡོ་རྗེའི་རང་བཞིན་གྱི་ས་གཞི་དང་། ར་བ་དང་། གུར་དང་མདའི་དྲ་བ་དང་། བླ་རེ་རྣམས་ཀྱི་ནང་གི་བར་སྣང་ལ་གནས་པའི་རྩིབས་ཀྱི་རྩེ་མོ་ལ་བརྟན་

པར་བཞུགས་པའི་ཤིན་ཏུ་འཇིགས་སུ་རུང་བའི་ཁྲོ་བོ་བཅུར་བྱིན་གྱིས་བརླབས་པའི་རྩིབས་བཅུ་པའི་འཁོར་ལོ་སེར་པོ་གཡས་སུ་བསྐོར་བའི་ལྟེ་བའི་དབུས་སུ་གནས་པའི་གཞལ་ཡས་ཁང་གི་རྣམ་པར་དཀྱིལ་འཁོར་ཁང་པར་ཤིན་ཏུ་བརྟན་པར་སྐད་ཅིག་གིས་ལྷག་པར་མོས་པར་

བྱ་སྟེ། རྡོ་རྗེའི་རང་བཞིན་ཉིད་ལ་སོགས་པས་བགེགས་ཐམས་ཅད་བཟློག་པར་འགྱུར་རོ་ཞེས་སོ། །གང་ཡང་རྒྱུན་མི་འཆད་པར་སྙིང་རྗེ་ཆེན་པོ་དང་རོ་གཅིག་པའི་སྟོང་པ་ཉིད་ཀྱི་ཏིང་ངེ་འཛིན་གོམས་པར་བྱེད་པ་དེ་ལ་ནི་དཔག་ཏུ་མེད་པའི་བགེགས་རྣམས་ཀྱང་རབ་ཏུ་ཞི་བར་འགྱུར་ཏེ་

དེའི་ཕྱེད་དུ་ནི་རིམ་པ་འདི་དག་མ་ཡིན་ནོ་ཞེས་པ་བགེགས་བཟློག་པའི་ཆོ་གའོ།། །།སངས་རྒྱས་རྣམ་པ་བྱས་པའི་འབྲས། །བཅོམ་ལྡན་འདས་ཀྱིས་གང་གསུངས་ཏེ། །དེས་ན་སངས་རྒྱས་རྣམས་ཀྱི་སྐུའི། །མཚན་ཉིད་འདིར་ཡང་བྲི་བར་བྱ། །སྐུ་གཟུགས་མཚན་ཉིད་

ཐམས་ཅད་ནི། །རབ་རྫོགས་བདེ་བ་སྟེར་བའོ། །གང་ཚེ་དེ་ཉིད་རྣམ་ཉམས་འགྱུར། །དེ་ཚེ་སྡུག་བསྔལ་རབ་སྦྱིན་བྱེད། །བདེ་བ་ཅི་ཞེ་ན་དེ་བཤད་པ། །བཅོམ་ལྡན་འདས་ཀྱི་མཆོད་རྟེན་རྣམས་དང་སྐུ་གཟུགས་ལ་ཡང་ཕྲ་རབ་རྡུལ་ནི་ཇི་སྙེད་པ། །དེ་སྙེད་དེ་དག་

เล่ม ๗๖ · หน้า 231a

བྱེད་པ་པོ་ནི་ལྷ་ཡི་ས་གཞིར་ངེས་པ་ཉིད་དུ་རྒྱལ་སྲིད་དང་། །གཟུགས་དང་གཟུགས་མེད་ཏིང་ངེ་འཛིན་གྱི་ཕུན་སུམ་ཚོགས་པ་མཐའ་དག་སྤྱད་པར་གྱུར་ནས་ཀྱང་། །བདེ་བ་ཀུན་རྫོགས་མཐར་ནི་སྐྱེ་རྒར་ལྷུང་བ་བྲལ་ནས་སངས་རྒྱས་གོ་འཕང་ཐོབ་པར་འགྱུར། །དེའི་ཕྱིར་གཟུགས་ཀྱི་

སྐུའི་མཚན་ཉིད་བཤད་པར་བྱའོ། །དེ་ལ་ཡང་དག་པར་རྫོགས་པའི་སངས་རྒྱས་རྣམས་དང་། རྡོ་རྗེ་འཛིན་པ་རྣམས་ཀྱི་སྐུའི་རིང་བར་དཔུང་པ་གཉིས་ངོས་སུ་རབ་ཏུ་བརྐྱང་བ་སྟེ་ཞེང་དུ་ཡང་ངོ་། །ཚད་རྣམས་ཅི་ཞེ་ན། རང་གི་སོར་གྱི་སོར་ཕྱེད་དང་བཅས་པའི་བཅུ་གཉིས་ནི་མཐོའོ། །མཐོ་

དེ་ཉིད་བཅུ་ལ་ནི་སོར་ཉི་ཤུ་རྩ་ལྔ་ལྷག་པའི་བརྒྱའོ། །སྤྱན་མ་ལ་སོགས་པ་ལྷ་མོ་རྣམས་ཀྱི་ནི་སོར་བཅུ་གཉིས་ལ་མཐོའོ། །མཐོ་དེ་ཉིད་དགུ་ལ་སོར་བརྒྱ་དང་བརྒྱད་དེ་ཞེང་དུ་ཡང་ངོ་། །བྱང་ཆུབ་སེམས་དཔའ་རྣམས་ཀྱི་ཡང་སོར་བཅུ་གཉིས་པའི་མཐོ་བཅུ་པ་ཉིད་དོ། །ཐུང་ཞིང་ལྟོ་བ་

འཕྱང་བ་རྣམས་དང་། ཁྲོ་བོ་རྣམས་ཀྱི་ཡང་མཐོ་བརྒྱད་པ་སྟེ་སོར་དགུ་བཅུ་རྩ་དྲུག་གོ། །རོལ་པའི་ཁྲོ་བོ་རྣམས་ཀྱི་ནི་མཐོ་བཅུ་པ་དང་། སོར་བརྒྱད་དང་ཉི་ཤུ་པ་སྟེ་དཔངས་དང་ཞེང་དུ་ཡང་ངོ་། །ཡན་ལག་དང་ཉེ་བའི་ཡན་ལག་ཐམས་ཅད་ཀྱང་ཤེས་པར་བྱའོ། །སྟོན་པ་ཆོས་འཆད་པ་ལ་

བྱོན་པའི་དུས་སུ། ཤཱ་རིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མི་བཞུགས་པ་ན་དད་པའི་རིགས་ཀྱི་བུའམ་རིགས་ཀྱི་བུ་མོ་རྣམས་ཀྱིས་ཅི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ང་ཡོངས་སུ་མྱ་ངན་ལས་

འདས་པར་གཤེགས་པ་ནའང་མཆོད་པ་དང་བསྙེན་བཀུར་བྱ་བའི་དོན་དུ་སྐུ་གཟུགས་བྱའོ། །ནྱ་གྲོ་དྷའི་དཀྱིལ་འཁོར་ནི་ཇི་སྙེད་པའི་ཞེང་དེ་སྙེད་པའི་ལུས་ཏེ། ཇི་སྙེད་པའི་སྐུ་ཡང་དེ་སྙེད་པའི་ཞེང་ངོ་། །ཐམས་ཅད་དུ་ཡན་ལག་དང་ཉེ་བའི་ཡན་ལག་སྟེ་ལུས་ཀྱི་ཆ་ཤས་རྣམས་སྦོམ་

ཞིང་སྣུམ་པ་དང་། རོལ་པ་དང་སྒེག་པ་དང་བདུན་མཐོ་བ་དང་འགྲམ་པ་ཆེ་བ་ཉིད་དང་། སྤྱི་བོ་གདུགས་ཀྱི་རྣམ་པ་དང་ཕྲག་པ་ལེགས་པར་གནས་པ་དང་། གཙུག་ཏོར་ལ་སོགས་པ་ཤིན་ཏུ་ལེགས་པར་གནས་པའོ། །དེ་ཡང་དཔངས་དང་ཞེང་དང་མཐོ་དང་ཚིགས་བསྐུམ་པ་དང་། བརྐྱང་

เล่ม ๗๖ · หน้า 231b

བ་རྣམས་ཀྱི་ཚད་ནི་སངས་རྒྱས་ཀྱི་སྐུ་རྣམས་དང་བྱང་ཆུབ་སེམས་དཔའ་རྣམས་ཀྱི་ཡང་ངོ་ཞེས་པའི་གསུང་ལས་སོ། །དེ་ལ་སྣུམ་པ་ནི་པགས་པ་སྣུམ་པའོ། །རོལ་པ་ནི་ཡིད་འཕྲོག་པའོ། །སྒེག་པ་ནི་གསུམ་དུ་འཁྱོག་པ་ཉིད་ལ་སོགས་པའི་ཡོན་ཏན་གྱིས་སོ། །བདུན་མཐོ་བ་ཞེས་པ་ལ་

བདུན་ནི་ལུས་ཀྱི་ཆ་ཤས་ཡིན་ཞིང་མཐོ་བ་ནི་ངེས་པར་མཐོ་བ་དང་ཤིན་ཏུ་མཐོ་བ་ཞེས་པའི་རྣམ་གྲངས་སོ། །དེ་དག་གང་ཞེ་ན། ཞབས་གཉིས་དང་། ཕྱག་གཉིས་དང་། ཕྲག་པ་གཉིས་དང་། མགུལ་པ་རྣམས་སོ། །གཞན་ནི་རབ་ཏུ་གྲགས་ཏེ་ཅུང་ཟད་མཐོ་བ་ཡང་མཐོ་བ་ཞེས་བྱའོ། །དེ་ལ་

གཙུག་ཏོར་ནི་སོར་བཞི་སྟེ་སྐྲའི་གནས་ཀྱང་ངོ་། །དེ་བཞིན་ཉིད་དུ་དཔྲལ་བ་དང་ཤངས་ལའོ། །ཤངས་ཀྱི་འོག་ནས་ཀོ་སྐོའི་མཐར་ནི་ནས་བཞི་ལྷག་པའི་སོར་བཞིའོ། །འདི་ཉིད་ནི་ཆ་ཆུང་ཕྱེད་དང་བཅུ་གསུམ་སྟེ་ཞལ་གྱི་ཆའོ། །ཀོ་སྐོ་ནི་སོར་གཉིས་སུ་འགྱུར་བ་དཔངས་ལ་སྟེ་རྒྱ་ལ་ཡང་དེ་བཞིན་

དུ་སོར་བཞིར་འདོད་དོ། །འགྲམ་པ་དག་ལ་སོར་བཞི་སྟེ་རྣ་བའི་རྩ་བར་སོན་པ་ལའོ། །སྤྱན་གྱི་འོག་གི་པགས་པ་དག་ལས་འོག་གི་ཆ་ནི་འཁུར་བར་འགྱུར་རོ། །དེ་དག་ནི་སོར་གཉིས་སུ་མཐོ་བ་དང་རྒྱར་ཡང་དེ་དག་སོར་གཉིས་པ་སྟེ། བྱང་ཆུབ་སེམས་ལ་ལྟོས་པའི་འོ། །ལྷག་པ་དང་བཅས་

ཤིང་ཡོངས་སུ་རྫོགས་པར་གྱུར་པས་སེང་གེ་ཆེན་པོའི་འགྲམ་པ་ཇི་ལྟ་བ་ནི་སངས་རྒྱས་དང་རྡོ་རྗེ་འཛིན་པ་རྣམས་ཀྱི་སྟེ་ཅུང་ཟད་མཐོ་བའོ་ཞེས་པའི་དོན་ཏོ། །ཁྲོ་བོ་རྣམས་ཀྱི་ནི་ལེབ་མོར་རྣམ་པར་རྒྱས་ཤིང་ལྷག་པའོ། །མ་མཆུའི་རྒྱ་ལ་སོར་གཉིས་ཏེ་དཔངས་ལ་ནི་ཆ་ཆུང་གསུམ་མོ། །སོར་

སུམ་ཆ་ལ་ནི་ཆ་ཆུང་ཞེས་བྱའོ། །མཆུའི་དབུས་སུ་ནི་བིམ་པའི་འབྲས་བུ་ལྟ་བུའོ། །སོར་གཅིག་ནི་ཞལ་གྱི་གྲུ་སྟེ་ཞལ་གྱི་ཞེང་ལ་སོར་བཞིའོ། །ཇི་ལྟ་བར་སྐྱེས་ཤིང་བཀོད་པའི་ཚེམས་བཞི་བཅུ་ནི་རྒྱལ་པོའི་ཚེམས་ལ་སོགས་པའི་རིམ་པས་སོ། །ཡ་མཆུ་དག་ལ་སོར་ཕྱེད་དང་ནས་

བཞི་ནི་རྒྱ་དང་དཔངས་དག་ལའོ། །ཤངས་ཀྱི་རྩེ་མོའི་འོག་ཏུ་མཆུ་ལ་སོར་སུམ་ཆ་པད་འདབ་ཀྱི་རྣམ་པ་བྱ་སྟེ་སྨ་རའི་དབུས་ནི་མཆུའི་སྒྲོས་སོ། །ཤངས་ཀྱི་ཞེང་ལ་ནི་སོར་གཉིས་ཏེ་དེའི་ཕྱེད་སོར་ནི་དཔངས་ལའོ། །སངས་རྒྱས་རྣམས་ཀྱི་ནི་ཅུང་ཟད་ལྷག་པའོ། །ཤིན་ཏུ་ཁྲོས་པ་རྣམས་ཀྱི་

เล่ม ๗๖ · หน้า 232a

ཅུང་ཟད་ལེབ་ཅིང་ངོས་སུ་སོན་པའོ། །སོར་ཕྱེད་པར་མཉམ་ཞིང་ཟླུམ་པ་ནི་ཤངས་ཀྱི་བུག་པའོ། །དེའི་ཤངས་ཀྱི་ཀ་བ་དང་ཤངས་ཀྱི་རྩེ་མོའི་འཁྱོག་པ་རྒྱ་ལ་སོར་ཕྱེད་དོ། །སྤྱན་གྱི་སྦུབས་ལ་སོར་བཞིའོ། །དེའི་དབུས་ལ་སོར་གཅིག་གི་རྒྱའོ། །སྨིན་མའི་འོག་ནས་བརྩམས་ཏེ་

འོག་གི་མཐར་ཐུག་པ་ལ་སོར་གསུམ་མོ། །སྤྱན་དག་གི་བར་དུ་ཤངས་ཀྱི་རྩ་བ་སོར་གཅིག་གོ། །སྨིན་མ་ནི་སོར་བཞི་སྟེ་དེ་ནི་གཞུའི་རྣམ་པའོ། །དབུས་ཀྱི་ཞེང་ལ་སོར་གཉིས་ཏེ་རྡོ་རྗེ་འཛིན་པ་རྣམས་ཀྱིའོ། །ཁྲོ་བོ་རྣམས་ཀྱི་ནི་འཁྱོག་པོའོ། །སངས་རྒྱས་རྣམས་ཀྱི་ཏིང་ངེ་འཛིན་གྱི་གཟིགས་

སྟངས་ལ་ནས་གཉིས་ཏེ་རྒྱར་སོར་གཉིས་དང་ནས་དྲུག་ལྷག་པ་ཉའི་རྣམ་པའོ། །བྱང་ཆུབ་སེམས་དཔའ་རྣམས་ཀྱི་ནི་ཞེང་ལ་ནས་བཞི་དང་རིང་བར་ནས་ཉི་ཤུ་སྟེ་ཨུཏྤ་ལའི་རྣམ་པའོ། །ཐམས་ཅད་བུད་མེད་སྒེག་མོ་རྣམས་ཀྱི་ནི་རིང་བར་ནས་བཅོ་བརྒྱད་དང་ཞེང་ལ་ནས་དྲུག་སྟེ་ཉའི་ལྟོ་བའི་རྣམ་

པའོ། །ཤངས་དང་ཉེ་བའི་སྤྱན་གྱི་མཐའ་སྟེ་ནང་ཟུར་ལ་ནས་བཞིའོ། །ཕ་རོལ་གྱི་མཐའ་སྟེ་ཕྱི་ཟུར་ལ་ནས་བཞིའོ། །སྤྱན་གྱི་ནོར་བུ་ལ་སོར་གསུམ་མོ། །འབུར་པོར་ནས་གཉིས་སུ་མཐོ་བའོ། །ནག་པོ་ལ་ནི་མཉམ་པར་ནས་ལྔའི་ཚད་དེ་ཞལ་གྲྭའི་ཐིག་དང་མཉམ་པའོ། །སྤྱན་གྱི་

དབུས་སུ་པུ་ཏ་ལི་ག་ནི་སོར་ཕྱེད་དང་གཉིས་ཀྱི་ལྔ་ཆའི་ཞེང་སྟེ་སོར་གཅིག་ནི་སྤྱན་འབྲས་ཡིན་ལ། སོར་གསུམ་གྱི་བཞི་ཆ་ནི་རབ་ཏུ་གསལ་བ་སྤྱན་གྱི་བུའོ། །པདྨའི་འདབ་མའི་རྣམ་པ་སྤྱན་གྱི་སྦུབས་ནི་སོར་གསུམ་མོ། །ནང་ཟུར་གྱི་ཆ་ནི་ཤངས་ཀྱི་བུ་གའི་ཐིག་དང་མཉམ་པའོ། །སྤྱན་འབྲས་

དང་མཉམ་པར་ཀོ་སྐོ་དང་ཞལ་གྱི་གྲྭ་ཟུར་ཡང་དེ་བཞིན་ནོ། །སྨིན་མ་དག་གི་བར་ལ་ནི་སོར་ཕྱེད་དང་གཉིས་སོ། །དེ་ཉིད་དུ་མཛོད་སྤུ་ནི་སོར་གཅིག་པ་སྟེ་ཟླ་བ་གང་བ་ལྟ་བུའོ། །ཤངས་དང་མཛོད་སྤུ་དང་གཙུག་ཏོར་རྣམས་ཀྱི་ཐིག་ནི་མཚུངས་པའོ། །སྨིན་མ་དག་ནི་རི་མོ་དང་མཉམ་པར་

སྙན་དག་སྟེ། དཔངས་སུ་སོར་བཞི་དང་ཞེང་དུ་སོར་གཉིས་སོ། །དེའི་འདབ་མ་ནི་ནས་བཞིའོ། །དེ་དག་གི་སྟེང་གི་འདབ་མའང་ནས་བཞི་སྟེ་དེའི་དཔངས་སུ་ནི་སོར་གཅིག་གོ། །བུག་པ་ནི་ནས་བཞིའོ། །འགྲམ་པ་དང་སྙན་གྱི་བུག་པའི་བར་དུ་སྙན་གྱི་འཁྱིལ་པ་ནི་གདེངས་ཀའི་

เล่ม ๗๖ · หน้า 232b

རྣམ་པ་སྟེ་ནས་གཉིས་སོ། །སྙན་ཤལ་དག་ནི་སོར་བཞིར་རིང་བ་སྟེ་སྦོམས་སུ་ནི་ཇི་ལྟར་མཛེས་པའོ། །སྔར་གྱི་གཙུག་ཏོར་ལ་སོགས་པ་ནས་མགྲིན་པའི་མཐར་ཐུག་པ་ལ་ནི་ནས་བཞི་ལྷག་པའི་སོར་ཉི་ཤུར་བཤད་དོ། །ད་ནི་མགྲིན་པ་ལ་སོགས་པ་ནས་ལོང་བུའི་འོག་གི་མཐར་

ཐུག་པའི་ཆ་དབྱེ་བར་བྱ་སྟེ་མགྲིན་པ་ལ་ནི་སོར་བཞིའོ། །མགྲིན་པ་ནས་ཐུགས་ཀ་ལ་སོར་ཕྱེད་དང་བཅུ་གསུམ་མོ། །ཐུགས་ཀ་ནས་ལྟེ་བའི་མཐར་ཐུག་པ་ལ་ཡང་དེ་བཞིན་ནོ། །ལྟེ་བ་ནས་གསང་གནས་ཀྱི་མཐར་ཐུག་པ་ལ་ཡང་སོར་ཕྱེད་དང་བཅུ་གསུམ་མོ། །བརླ་ལ་ནི་སོར་

ཉི་ཤུ་རྩ་ལྔ་སྟེ་བྱིན་པ་ལ་ཡང་དེ་བཞིན་ནོ། །པུས་མོ་ལ་སོར་དྲུག་གོ། །ལོང་བུ་ལ་སོར་གཉིས་སོ། །ལོང་བུའི་འོག་ཏུ་སོར་བཞིའོ། །ཡང་དག་པར་རྫོགས་པའི་སངས་རྒྱས་དང་རྡོ་རྗེ་འཛིན་པ་དང་བྱང་ཆུབ་སེམས་དཔའ་རྣམས་མཐོ་བཅུ་པར་བཤད་པའི་རྣམ་པར་དབྱེ་བ་སྟེ།

གཞན་རྣམས་ནི་ཇི་ལྟར་རིགས་པར་ཤེས་པར་བྱའོ། །སྤྱིའི་ནོར་བུ་ནི་ཇི་ལྟར་མཛེས་ཤིང་དྲི་མ་མེད་པ་བྱའོ། །རྡོ་རྗེ་འཛིན་པ་རྣམས་ཀྱི་ནོར་བུ་ནི་གཙུག་ཏོར་གྱི་དབུས་སུ་རལ་པའི་ཅོད་པན་སོར་བཅུ་གཉིས་པ་བྱ་ཞིང་། དཔའ་བོ་རྣམས་དང་བྱང་ཆུབ་སེམས་དཔའ་རྣམས་ཀྱི་ཡང་རལ་

པའི་ཅོད་པན་སོར་བརྒྱད་པའོ་ཞེས་པ་ཁྱད་པར་ཏེ། སོར་བཅུ་པའོ་ཞེས་པ་ནི་འགའ་ཞིག་གིའོ། །གཙུག་ཏོར་གྱི་འོག་ཏུ་བསྐོར་བ་ལ་སོར་བཅུ་གཉིས་སོ། །དཔྲལ་བའི་སྟེང་དུ་ནི་གདུགས་ཀྱི་རྣམ་པ་སྟེ་སྔོན་པོ་གཡས་སུ་འཁྱིལ་པ་ནི་སྟེང་དུ་ཡང་ངོ་། །སྤྱི་བོ་ནི་མཐོ་བ་སྟེ་སྙན་གྱི་མདུན་

དང་རྒྱབ་ཏུ་བསྐོར་བ་ལ་སོར་སུམ་ཅུ་སོ་གཉིས་ནི་སྤྱི་བོའི་རྒྱའོ། །མགྲིན་པའི་ཞེང་ལ་སོར་བརྒྱད་དེ་དེའི་མཐའ་སྐོར་ལ་སོར་ཉི་ཤུ་རྩ་བཞི་འོ། །མགྲིན་པའི་སོར་བརྒྱད་སྤངས་ནས་སྙན་དང་ཉེ་བའི་སོར་བཞི་དང་བཅས་པའི་སོར་བཅུ་གཉིས་ནི་ཕྲག་པའི་ཟླུམ་པོ་ལ་འགྱུར་ཏེ་མཚན་

ཉིད་དང་ལྡན་པ་རྣམས་ལའོ། །ཕྲ་བའི་གནས་དང་བྲལ་བའི་ཕྲག་པ་ནས་གྲུ་མོའི་བར་ལ་སོར་ཉི་ཤུ་ནི་དཔུང་པའོ། །གྲུ་མོ་ལ་ནི་སོར་གཅིག་གོ། །གྲུ་མོའི་འོག་ནས་ནོར་བུ་འཆིང་བའི་སྟེང་ནི་ཕྱག་ངར་ཏེ་སོར་བཅུ་དྲུག་གོ། །ནོར་བུ་འཆིང་བ་ལ་ནི་སོར་གཅིག་གོ། །ནོར་བུ་འཆིང་བའི་འོག་

เล่ม ๗๖ · หน้า 233a

ནས་སོར་མོ་གུང་མོའི་རྩེ་མོའི་མཐར་ཐུག་པ་ལ་ནི་སོར་བཅུ་གཉིས་ཏེ་ཕྱག་ལག་གོ། །དེ་ལྟར་སོར་ལྔ་བཅུའོ། །དཔུང་པའི་དབུས་ནས་བསྐོར་བ་ལ་བ་ལ་སོར་ཉི་ཤུ་སྟེ། ཉེ་བའི་དཔུང་པའི་དབུས་ནས་བསྐོར་བ་ལ་སོར་བཅུ་དྲུག་གོ། །ནོར་བུ་འཆིང་བའི་མཐའ་སྐོར་ལ་ནི་སོར་བཅུ་གཉིས་

ཏེ། ནོར་བུ་འཆིང་བ་ནས་ཕྱག་གི་མཐིལ་ལ་སོར་བདུན་ནོ། །སོར་མོ་གུང་མོ་ལ་ཆ་ཆུང་ལྔའོ། །དེའི་ཚིགས་ཕྱེད་ཀྱིས་ཐུང་བ་ནི་མཛུབ་མོ་སྟེ་མིང་མེད་ནི་དེ་དང་མཉམ་པའོ། །ཚིགས་གཅིག་གིས་ཐུང་བ་ནི་མཐེའུ་ཆུང་སྟེ་སོར་མོ་ཐམས་ཅད་ནི་ཚིགས་གསུམ་པའོ། །དེ་རྣམས་ཀྱི་ཚིགས་ཕྱེད་

ཀྱིས་སེན་མོའོ། །ནོར་བུ་འཆིང་བ་ལས་སོར་བཞི་སྤངས་ནས་སེན་མོའི་རྩེ་མོ་ཇི་སྲིད་པ་ལ་སོར་བཞི་ནི་མཐེ་བོང་སྟེ་ཚིགས་གཉིས་པའོ། །ནས་ཕྱེད་ནི་སོར་མོའི་རྩ་བའོ། །མཐེ་བོང་གི་མཐའ་སྐོར་ལ་ནི་སོར་བཞིའོ། །མཐེ་བོང་ནས་མཛུབ་མོ་ལ་ནི་སོར་བཞིའམ་གསུམ་མོ། །ནོར་བུ་འཆིང་

བ་ནས་མཐེ་ཆུང་གི་རྩ་བའི་མཐར་ཐུག་པ་ལ་ནི་སོར་ལྔའོ། །ཕྲག་པ་ནས་མཆན་ཁུང་གི་མཐར་ཐུག་པ་ལ་སོར་དགུ་སྟེ་མཆན་ཁུང་ནས་ནུ་མ་ཇི་སྲིད་པ་ལ་སོར་བཅུ་དྲུག་གོ། །བྲང་ནས་རྒྱབ་དག་གི་མཐའ་སྐོར་ལ་སོར་ལྔ་བཅུ་དྲུག་སྟེ། ནུ་མ་དག་གི་བར་ལ་སོར་ཕྱེད་དང་བཅུ་གསུམ་མོ། །

ནུ་མ་ནས་ལྟེ་བའི་བར་ལ་སོར་བཅུ་དྲུག་གོ། །ལྟེ་བ་ནས་བརྩམས་ཏེ་རྒྱབ་དང་ལྷན་ཅིག་ལྟེ་བ་ཇི་སྲིད་པ་ལ་སོར་བཞི་བཅུ་དྲུག་གོ། །ལྟེ་བའི་ཁུང་བུ་ལ་སོར་གཅིག་སྟེ་མཐའ་སྐོར་ལ་ཡང་ངོ་། །དེ་བཞིན་དུ་རྐེད་པའི་རྒྱ་ལ་སོར་བཅོ་བརྒྱད་དོ། །ཚང་ར་དག་གི་རྒྱ་དང་དཔངས་ལ་ནི་

སོར་བཞི་བཞིའོ། །བརླའི་རྩ་བ་དག་གི་དབུས་ལ་སོར་བཅུ་གཉིས་ཏེ་མཐའ་སྐོར་དུ་ནི་སུམ་འགྱུར་རོ། །དེ་དག་གི་བར་གྱི་དཔངས་ལ་སོར་ལྔའོ། །རྒྱ་ལ་སོར་ལྔ་ནི་སྒོ་ངའི་ཤུབས་དག་ལའོ། །དེའི་སྟེང་དུ་སོར་གཉིས་ཀྱི་ཞེང་ནི་གསང་བ་ལ་སྟ་རིང་བ་ལ་ནས་གཉིས་དང་བཅས་པའི་

དྲུག་གོ། །བརླའི་དབུས་ཀྱི་མཐའ་སྐོར་ལ་སོར་སུམ་ཅུ་རྩ་གཉིས་སོ། །པུས་མོའི་མཐའ་སྐོར་ལ་སོར་ཉི་ཤུ་རྩ་བརྒྱད་དོ། །བྱིན་པའི་དབུས་ཀྱི་མཐའ་སྐོར་ལ་སོར་ཉི་ཤུ་རྩ་བཞི་སྟེ། བྱིན་པའི་འོག་གི་མཐའ་སྐོར་ལ་ནི་སོར་ཉི་ཤུ་རྩ་གཅིག་གོ། །ཞབས་ཀྱི་ལོང་བུའི་འོག་ཏུ་རྟིང་པ་ལ་

เล่ม ๗๖ · หน้า 233b

སོར་བཞི་སྟེ་འོག་དང་སྟེང་ལ་སོར་དྲུག་གོ། །ཞེང་གི་རྒྱ་ཡོངས་སུ་བསྐོར་བ་ལ་ནི་སོར་བཅོ་བརྒྱད་དེ་ལོང་བུ་ལས་ཕ་རོལ་མཐེ་བོང་གི་སེན་མོའི་ཇི་སྲིད་པ་ལའོ། །ཞབས་དག་ལ་ནི་སོར་བཅུ་གཉིས་ཏེ་ཞེང་ལ་སོར་དྲུག་གོ། །སྟེང་དང་འོག་ཏུ་སོར་གཉིས་ཏེ་ཞབས་དག་གི་ངོས་ཀྱི་ཞེང་ལའོ། །ཞབས་

ཀྱི་སོར་མོ་ལྔ་ནི་ཚིགས་གཉིས་གཉིས་པའོ། །དེ་རྣམས་ཀྱི་རྩེ་མོར་ཚིགས་ཕྱེད་ཀྱིས་སེན་མོའོ། །ཞབས་ཀྱི་མཐེ་བོང་གི་ཟླུམ་ལ་སོར་ལྔ་སྟེ་རིང་བར་ནི་སོར་གསུམ་མོ། །དེ་དང་མཉམ་པའི་མཛུབ་མོའོ། །དེ་ལས་ནས་ཕྱེད་ཀྱིས་དམན་པ་ནི་གུང་མོའོ། །དེ་ལས་བརྒྱད་ཆས་དམན་

པ་ནི་མིང་མེད་དེ། དེ་ལས་ཀྱང་བརྒྱད་ཆས་དམན་པ་ནི་མཐེའུ་ཆུང་ངོ་། །སོར་མོ་རྣམས་ཀྱི་དཔངས་ལ་ནི་སོར་གཅིག་སྟེ་སོར་མོའི་རྩེ་མོ་ནི་སོར་ཕྱེད་ཀྱིས་མཐོ་བའོ། །ཞབས་དག་གི་ཕྱི་རོལ་གྱི་སྟེང་ནི་རུས་སྦལ་གྱི་རྒྱབ་དང་མཚུངས་པ་སྟེ། །དེ་དག་གི་འོག་ཏུ་འཁོར་ལོ་ལ་སོགས་པས་

བརྒྱན་པའོ། །བྱ་གག་གི་སྒོ་ང་དང་ཏིལ་གྱི་རྣམ་པ་དང་གྲུ་བཞི་དང་ཟླུམ་པོ་རྣམས་ཐམས་ཅད་དུ་མཉམ་པའི་རྟགས་ཀྱི་ཞལ་བྱ་སྟེ་རྣམ་པ་བཞིའོ། །རྫོགས་པའི་སངས་རྒྱས་རྣམས་དང་རྡོ་རྗེ་འཛིན་པ་རྣམས་ཀྱི་ཞལ་ནི་བྱ་གག་གི་སྒོ་ངའི་རྣམ་པའོ། །སྤྱན་མ་ལ་སོགས་པ་ལྷ་མོ་གཞོན་ནུ་

རྣམས་ཀྱི་ནི་ཏིལ་གྱི་གཟུགས་ཀྱི་རྣམ་པའོ། །བྱམས་པ་ལ་སོགས་པ་བྱང་ཆུབ་སེམས་དཔའ་རྣམས་ཀྱི་ཞལ་ནི་རྡོ་རྗེ་འཛིན་པ་ཆེན་པོ་རྣམས་དང་འདྲ་བའོ། །རོལ་པའི་ཁྲོ་བོ་རྣམས་ཀྱི་ནི་བྱང་ཆུབ་སེམས་དཔའ་རྣམས་དང་འདྲའོ། །ཐུང་ཞིང་ལྟོ་བ་འཕྱང་བའི་ཁྲོ་བོ་རྣམས་ཀྱི་ཞལ་ནི་མནྜལ་

གྱི་རྣམ་པ་སྟེ་ཟླུམ་པོའོ། །གཤིན་རྗེ་ལ་སོགས་པ་རྣམས་ཀྱི་གདོང་ནི་གྲུ་བཞི་སྟེ་བསྣུན་པའི་ལྟ་བ་ཅན་ནོ། །གྲུ་བཞི་དང་ཟླུམ་པོའི་ཞལ་གཉིས་ནི་རྣམ་པར་འགྱུར་བའི་རྣམ་པ་ཅན་ནོ། །ཞི་བའི་ཞལ་རྣམས་ནི་མཉམ་པར་གཟིགས་པ་དང་རབ་ཏུ་དང་བ་དང་སྣུམ་པ་དང་ངེས་པར་གཟིགས་

པ་ན་སྟེང་དུ་མ་ཡིན་པ་དང་མི་རིག་པ་དང་འོག་ཏུ་མ་ཡིན་པར་ཐམས་ཅད་མཐོང་བར་བྱའོ་ཞེས་པའོ། །སྤྱན་མ་ལ་སོགས་པ་རྣལ་འབྱོར་མ་རྣམས་ཀྱི་ནི་གཙུག་ཏོར་དང་གསང་བ་དང་བརླ་དང་རྒྱབ་ཀྱི་ཟླུམ་པ་ལས་སོར་བཅུ་དང་བཅས་པ་དང་མཁྲེགས་ཤིང་སྟུག་པའི་ནུ་མ་དག་གོ། །ལྟེ་

ที่มาและสัญญาอนุญาต

ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ

สัญญาอนุญาต Public Domain · หลักฐาน

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

  • หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
  • ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด