ཚད་མ་རྣམ་འགྲེལ་རྒྱན་གྱི་འགྲེལ་བཤད་ཤིན་ཏུ་ཡོངས་སུ་དག་པ་ཞེས་བྱ་བ
ชื่อสันสกฤต (อักษรทิเบต ตามตัวบท) པྲ་མཱ་ཎ་བཱརྟི་ཀཱ་ལང་ཀ་ར་ཊཱི་ཀཱ་སུ་པ་རི་ཤུདྡྷ་ནཱ་མ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๑๘๖ · หน้า 28a
དངོས་པོ་དང་དངོས་པོ་མེད་པའི་ཐུན་མོང་ཞེས་བྱ་བ་ནི་སྤྱིའོ། །གཞན་ཞེས་བྱ་བ་ནི་དངོས་པོ་དང་དངོས་པོ་མེད་པ་ལས་ཐ་དད་པ་མེད་པ་སྟེ། དངོས་པོ་དང་དངོས་པོ་མེད་པ་ལ་མེད་པའི་ཕྱིར་རོ། །བ་ལང་ཉིད་ནི་དངོས་པོའི་རང་བཞིན་ནམ་དངོས་པོ་མེད་པའི་རང་བཞིན་དུ་ངེས་པར་
འགྱུར་གྱི། དངོས་པོའི་རང་བཞིན་གྱི་བ་ལང་ཉིད་ལ་ཐུན་མོང་བའི་རང་བཞིན་གཞན་ནི་ཡོད་པ་མ་ཡིན་ཏེ། སྤྱི་ལ་ནི་སྤྱི་མེད་དོ་ཞེས་བྱ་བ་གཞུང་ལུགས་ཡིན་པའི་ཕྱིར་རོ། །གཞན་མེད་པའི་ཕྱིར་ཞེས་བྱ་བའི་གཏན་ཚིགས་མ་གྲུབ་པའི་དོགས་པ་བསུ་བ་ནི། རྣམ་པར་རྟོག་པ་ཡིན་ཞེས་བྱ་བའོ། །ཕྱི་
རོལ་ན་གནས་པའི་དངོས་པོ་དང་དངོས་པོ་མེད་པ་ལ་ནི་རྣམ་པར་རྟོག་པའི་སྣང་བ་ཐུན་མོང་མ་ཡིན་ནོ་ཞེས་བྱ་བའི་དོན་ཏོ། །ལན་འདེབས་པ་ནི་དེ་ལྟ་ན་ཞེས་བྱ་བའོ། །རྣམ་པར་རྟོག་པ་ལ་སྣང་བའི་ཆོས་ཅན་ལ་དངོས་པོའི་ཉེ་བར་ལེན་པ་ཅན་མ་ཡིན་པ་བསྒྲུབ་པ་ན་སྣང་བ་མི་དམིགས་པ་ཁོ་ན་ཡིན་གྱི་
ཁྱབ་པར་བྱེད་པ་མི་དམིགས་པ་ནི་མ་ཡིན་ནོ། །ཁྱེད་ཀྱིས་ནི་ཁྱབ་པར་བྱེད་པ་མི་དམིགས་པ་ཉིད་རྩ་བའི་གཏན་ཚིགས་སུ་གཞུང་འཛུགས་པར་བྱ་བ་ཡིན་ནོ། །དེས་ན་གཞན་ཟོས་ནས་གཞན་སྐྱུགས་པ་ཞེས་བྱ་བའི་ཚུལ་འདི་ཅི་ཡིན། མི་དམིགས་པ་ནི་སྣང་བ་མི་དམིགས་པའོ། །གཞན་ཞེས་བྱ་
བ་ནི་ཁྱབ་བྱེད་མི་དམིགས་པ་ལ་ལྟོས་ནས་གཞན་ནོ། །དེ་ནས་སློབ་དཔོན་ཆོས་མཆོག་གིས་བཞེད་པ་འདི་ནི་གྱི་ནའོ། །ཉེ་བར་སྡུད་པ་ནི་དེའི་ཕྱིར་ཞེས་བྱ་བའོ། །འདིར་ཞེས་བྱ་བ་ནི་ཆོས་ཅན་སྤྱི་གསལ་བ་ལས་ཐ་དད་པ་ལ། བྲལ་བའི་ཕྱིར་ཞེས་བྱ་བ་རྩ་བའི་གཏན་ཚིགས་ནི་མ་ཡིན་གྱི། འོན་ཀྱང་
ཐལ་བ་དང་བཟློག་པ་གཉི་ག་ཡང་དེ་ཁོ་ནར་གཞི་མ་གྲུབ་པའི་ཕྱིར་ན་འགལ་བ་སྟོན་པར་བྱེད་པའི་འབྲས་བུ་ཅན་ཡིན་ནོ། །ཅིའི་ཕྱིར་ཞེ་ན། སྤྱི་ཞེས་གསུངས་སོ། །སྤྱི་ཐ་མི་དད་པའི་ཕྱོགས་ལ་ནི་འདི་ཐལ་བའི་སྒྲུབ་པར་བྱེད་པ་མ་ཡིན་ནོ་ཞེས་བརྗོད་པ་ནི། གཟུགས་ལ་སོགས་པ་ཉིད་ཅེས་
བྱ་བའོ། །འདི་ཞེས་བྱ་བ་ནི་བྲལ་བའི་ཕྱིར་ཞེས་བྱ་བ་དང་། གསལ་བ་གཅིག་གི་མཐར་ཐུག་པའི་ཕྱིར་ཞེས་བྱ་བ་ཐལ་བ་བསྒྲུབ་པ་མ་ཡིན་གྱིས། འོན་ཀྱང་ཁྱབ་པ་ཡིན་པའི་ཕྱིར་ཞེས་བྱ་བ་ཉིད་ཐལ་བའི་སྒྲུབ་པར་བྱེད་པ་ཡིན་ཏེ། རང་གི་ངོ་བོ་མ་གྲུབ་པའི་ཕྱིར་རོ། །འདི་སྒྲུབ་པར་བྱེད་པ་
เล่ม ๑๘๖ · หน้า 28b
མ་ཡིན་པ་ཅིའི་ཕྱིར་ཞེ་ན། དེ་དག་ཁྱབ་པ་ཞེས་གསུངས་ཏེ། གཟུགས་ལ་སོགས་པ་གསལ་བ་གཅིག་གི་མཐར་ཐུག་པ་ནི་མངོན་སུམ་གྱིས་གྲུབ་པ་ཉིད་དོ། །དེས་ན་ཐལ་བའི་སྒྲུབ་བྱེད་མ་ཡིན་ནོ། །དེ་ལྟར་ན་གཉི་ག་ལྟར་ན་ཡང་ཐལ་བའི་སྒྲུབ་པར་བྱེད་པ་ལས་ནི་བསྒྲུབ་བྱ་འགྲུབ་པ་མ་ཡིན་
ཏེ། འོན་ཀྱང་ཁྱབ་པ་བསྒྲུབ་པའི་འབྲས་བུ་ཅན་ཡིན་ནོ་ཞེས་བསྟན་ནས། སྐབས་ཉེ་བར་སྡུད་པ་ནི། དེའི་ཕྱིར་ཞེས་བྱ་བའོ། །དེ་ལྟར་རང་གིས་མཐོང་བ་སྨོས་པའི་རྣམ་པར་གཅད་པར་བྱ་བ་བསྟན་ནས། དོན་སྨོས་པའི་རྣམ་པར་གཅད་པར་བྱ་བ་བསྟན་པའི་དོན་དུ་ཕྱོགས་སྔ་མ་འགོད་པ་ནི།
གལ་ཏེ་ཞེས་བྱ་བའོ། །ཕ་རོལ་པོ་དོན་སྨོས་པའི་འབྲས་བུ་ནི་དེ་ལྟར་མ་ཡིན་པར་ཡང་འགྲུབ་པོ་ཞེས་བསྟན་པའི་དོན་དུ་སྨྲ་བ་ནི་གལ་ཏེ་མ་གྲུབ་པ་ཞེས་བྱ་བ་ལ་སོགས་པའོ། །རྟོག་པས་སྦྱར་བ་ནི་གཏན་ཚིགས་མ་ཡིན་པ་མ་ཡིན་ནོ། །ཞེས་བྱ་བའི་དོན་ཏོ། །ཅི་ལྟར་ཞེ་ན། གལ་ཏེ་ཞེས་བྱ་
བའོ། །འདི་ལ་ནི་རྟོག་པས་སྦྱར་བ་ལའོ། །རང་གི་དོན་གྱི་རྗེས་སུ་དཔག་པའི་ཞེས་བྱ་བ་ནི། རྗེས་སུ་དཔག་པར་བྱ་བ་ལ་ཚུལ་གསུམ་པའི་རྟགས་ལས་ཤེས་པ་གང་ཡིན་པ་ཞེས་བྱ་བ་དང་། འབྲེལ་པ་ཅན་གྱི་ཆོས་དག་ལས་ཆོས་ཅན་ལ་རྟོགས་པ་སྐྱེ་བ་གང་ཞེས་བྱ་བ་རང་གི་དོན་གྱི་རྗེས་སུ་དཔག་
པའི་མཚན་ཉིད་ཡིན་པས། དེ་ཉིད་ལས་རྟོགས་པ་ཙམ་གྱིས་བཀོད་པ་གཏན་ཚིགས་ཡིན་པ་བཟློག་པར་འགྱུར་རོ། །ཚུལ་གསུམ་པའི་རྟགས་ལ་མ་གཏོགས་པའི་དོན་གཞན་ནི། གཞན་གྱི་དོན་གྱི་རྗེས་སུ་དཔག་པར་བརྗོད་པ་ཡང་མ་ཡིན་ནོ་ཞེས་བརྗོད་པར་ནི་གཞན་གྱི་ཞེས་བྱ་བའོ། །
འདིར་ཞེས་བྱ་བ་ནི་གཞན་གྱི་དོན་གྱི་རྗེས་སུ་དཔག་པར་རོ། །དེར་ཡང་ཞེས་བྱ་བ་ནི་རང་དོན་དུའོ། །དེ་ཉིད་དུ་ཞེས་བྱ་བ་ནི་རང་དོན་རྗེས་དཔག་ཉིད་དུའོ། །ཡང་ན་དགོས་པའི་ཁྱད་པར་ཡོད་པའི་ཕྱིར་འདི་ཉིད་དུ་དོན་སྨོས་པར་བྱ་བ་ཡིན་ནོ་ཞེས་བརྗོད་པ་ནི་འདིར་བྱས་པ་ཞེས་བྱ་བའོ། །རང་གི་དོན་དུ་
ཞེས་བྱ་བ་ནི་རང་གི་དོན་གྱི་རྗེས་དཔག་ཏུའོ། །ཅིའི་ཕྱིར་ཞེ་ན། སུ་ཡང་ཞེས་བྱ་བའོ། །རྟོག་པ་སྔོན་དུ་བྱེད་པ་ནི་རང་རྟོགས་པའི་དོན་དུ་དངོས་པོ་མ་ཡིན་པའི་རྟགས་སུ་རྗེས་སུ་འབྲང་བ་ནི་མེད་དོ། །གཞན་ཁོ་ན་བླའི་བདག་ཉིད་ནི་མ་ཡིན་ནོ། །འདིར་ཞེས་བྱ་བ་ནི་གཞན་དོན་རྗེས་དཔག་ཏུའོ། །གལ་ཏེ་
เล่ม ๑๘๖ · หน้า 29a
གང་གིས་དོན་སྨོས་པས་གསལ་བར་བྱ་བ་རྟོག་པས་སྒྲོ་བཏགས་པ་གཏན་ཚིགས་ཡིན་ན་ཅི་ཉེས་ཤེ་ན། དོན་དམ་པར་ནི་ཞེས་བྱ་བའོ། །རྟོག་པས་སྒྲོ་བཏགས་པའི་གཏན་ཚིགས་ནི་ཕྱོགས་དང་ཕྱོགས་གང་ཡང་རུང་བ་ཉིད་ལ་སོགས་པའོ། །དངོས་པོའང་གཞན་དུ་སྲིད་པའི་ཕྱིར་
ཞེས་བྱ་བ་ནི་འདོད་པ་དང་དངོས་པོ་མི་མཐུན་པར་ཡང་འགྱུར་བའི་ཕྱིར་རོ། །རྟགས་དང་ཕྱོགས་དང་མཐུན་ཕྱོགས་གང་རུང་ཉིད་ལ་སོགས་པ་ནི་འཁྲུལ་པ་ཁོ་ནའོ། །དེ་ཉིད་ཀྱིས་ནི་དོན་སྨོས་པ་ཉིད་ཀྱིས་སོ། །དོན་སྨོས་པ་མེད་ན་ནི་མ་འབྲེལ་པ་ཡང་རྟགས་ཡིན་པར་འགྱུར་རོ། །གལ་ཏེ་སློབ་དཔོན་
ཕྱོགས་ཀྱི་གླང་པོའི་གཞུང་ལ་འབྲེལ་པ་སྟོན་པར་བྱེད་པ་ཡོད་པ་མ་ཡིན་ནམ། དེ་ཉིད་ཅི་ལྟར་འདི་ཉིད་ཀྱིས་འབྲེལ་པ་འཕེན་ཞེས་བརྗོད་ཅེ་ན། གང་དུ་ཡང་ཞེས་གསུངས་སོ། །གང་གིས་དོན་སྨོས་པར་འདི་གསལ་བར་བྱ་བ་ཅི་ལྟར་འདི་མ་ངེས་པ་ཡིན་སྙམ་ན། ཕྱོགས་དང་ཞེས་གསུངས་
སོ། །ཅིའི་ཕྱིར་ཞེ་ན། གང་དང་ཞེས་བྱ་བ་ནི། འདི་སྙམ་དུ་ཕྱོགས་དང་མཐུན་པའི་ཕྱོགས་གང་ཡང་རུང་བའི་ཕྱིར་ཞེས་བྱ་བའི་དོན་སྒྲ་དང་བུམ་པའི་མི་རྟག་པ་ཉིད་ཀྱི་སྤྱི་ལ་མི་འཁྲུལ་པའི་ཆོས་དང་ལྡན་པའི་ཕྱིར་རོ་ཞེས་བྱ་བ་ནི་མི་འདོད་ཀྱི། འོན་ཀྱང་ཕྱོགས་སུ་བྱས་པ་ཅིག་ཤོས་ཉིད་དུའོ། །
ཕྱོགས་སུ་བྱས་པའི་ཅིག་ཤོས་ཉིད་ཅེས་བྱ་བ་གང་ཡང་རུང་བ་ཉིད་དེ། ཅིག་ཤོས་ཀྱི་སྒྲས་ནི་ཕྱོགས་སུ་བྱས་པ་ཉིད་བརྗོད་པར་འདོད་པ་ཡིན་ནོ། །དེས་ན་བརྗོད་མ་ཐག་པའི་ཉེས་པར་མི་འགྱུར་རོ་ཞེས་སེམས་པའོ། །དེ་ཙམ་གྱིས་ཞེས་བྱ་བ་ནི་མི་རྟག་པ་ཉིད་དུ་བརྗོད་པར་འདོད་པ་ཙམ་གྱིས་སོ། །
ཅིའི་ཕྱིར་མི་འགྲུབ་སྙམ་ན། རྟག་པ་ཉིད་དུ་བརྗོད་པར་འདོད་ན་མི་རྟག་པ་ཉིད་མེད་པར་འགྱུར་བའི་ཕྱིར་རོ། །འོན་ཏེ་དངོས་པོ་ལ་མི་རྟག་པ་ཉིད་ཀྱི་ཕྱོགས་སུ་འགྲུབ་པ་དེས་ན་རྟག་པ་ཉིད་དུ་བརྗོད་པར་འདོད་ཀྱང་དེ་མེད་པར་མི་འགྱུར་རོ་ཞེས་དོགས་ན་གལ་ཏེ་དངོས་པོ་ལ་ཞེས་བྱ་བའོ། །སྒྲུབ་པར་
བྱེད་པ་ནི་གྲུབ་པས་བསྒྲུབ་བྱ་བསྒྲུབ་པར་ནུས་པ་མ་ཡིན་ནོ། །དེས་ན་གལ་ཏེ་མི་རྟག་པ་ཉིད་ཀྱི་ཕྱོགས་ཉིད་ཡིན་པ་དངོས་པོའི་སྒྲུབ་པར་བྱེད་པ་གྲུབ་པར་གྱུར་ན། དེའི་ཚེ་སྒྲ་ནི་མི་རྟག་པའི་ཕྱིར་ན་མི་རྟག་པ་ཡིན་ནོ་ཞེས་བྱ་བ་གྲུབ་པ་ལ་སྒྲུབ་པ་ཉིད་དུ་འགྱུར་རོ། །དེ་ལྟར་ནི་རིགས་པ་མ་ཡིན་ཏེ།
เล่ม ๑๘๖ · หน้า 29b
དེས་ན་ཕྱོགས་སུ་བྱས་པ་གཞན་ཉིད་དུ་བརྗོད་པར་འདོད་པའི་ཕྱིར་ཞེས་བྱ་བ་ནི་གཏན་ཚིགས་ཀྱི་དོན་མ་ཡིན་ནོ། །སྐབས་ཉེ་བར་སྡུད་པ་ནི་དེའི་ཕྱིར་ཞེས་བྱ་བའོ། །གལ་ཏེ་དེ་ལྟར་ན་རང་གིས་མཐོང་བའི་དོན་སྒྲུབ་པར་བྱེད་པར་འགྱུར་མོད། ཚུལ་གསུམ་པ་ཁོ་ན་ཡིན་ནོ་ཞེས་བྱ་བ་ནི་ག་ལས་ཤེ་ན།
རང་ལ་ཞེས་བྱ་བ་སྟེ་གཞན་ནི་སྒྲུབ་པར་བྱེད་པ་ཉིད་དུ་མི་རུང་བའི་ཕྱིར་རོ་ཞེས་དགོངས་པའོ། །དེས་ན་ཞེས་བྱ་བ་ནི་ཚུལ་གསུམ་པའི་རྟགས་སྟོན་པ་གཞན་གྱི་དོན་གྱི་རྗེས་སུ་དཔག་པ་ཡིན་པས་ནའོ། །དེ་ནི་ཞེས་བྱ་བ་ཕྱགས་ནི་མ་གྲུབ་པས་ཀྱང་བསྒྲུབ་བྱ་ཅི་སྟེ་མི་འགྲུབ་སྙམ་ན། བསྒྲུབ་བྱ་
ཞེས་གསུངས་སོ། །བསྒྲུབ་བྱ་ཉིད་ནི་བསྒྲུབ་བྱ་སྒྲུབ་པར་བྱེད་པ་མ་ཡིན་ནོ་ཞེས་འབྲེལ་ཏོ། །ཚིག་ཅེས་བྱ་བ་ནི་དམ་བཅའ་བའི་ཚིག་གོ། །བསྒྲུབ་བྱ་མ་གྲུབ་ཀྱང་ཚིག་གྲུབ་པའི་ཕྱིར་སྒྲུབ་པར་བྱེད་པ་ཡིན་ནོ་ཞེས་བསམ་པའོ། །འགོག་པ་ནི་ཚིག་ནི་ཞེས་བྱ་བའོ། །ཅིའི་ཕྱིར་འབྲེལ་པ་
མེད་སྙམ་ན། ཚིག་གིས་ཞེས་གསུངས་སོ། །གང་ཞིག་དོན་ཙམ་དང་ཡང་མ་འབྲེལ་པ་དེ་བསྒྲུབ་པར་བྱ་བའི་དོན་དང་ག་ལ་འབྲེལ་ཞེས་བྱ་བའི་དོན་ཏོ། །དེའི་ཕྱིར་ནི་མ་འབྲེལ་པའི་ཕྱིར་རོ། །སྒྲ་ནི་མི་རྟག་སྟེ་བྱས་པའི་ཕྱིར་རོ་ཞེས་བྱ་བའི་ཚིག་འདི་ལ། ཚུལ་གསུམ་དང་ལྡན་པའི་བྱས་པ་ཉིད་
རྟགས་ཡིན་པས་བསྒྲུབ་པར་བྱ་བ་མི་རྟག་པ་ཉིད་གོ་བར་བྱེད་པ་ཡིན་ཏེ། ཚུལ་གསུམ་པའི་བྱས་པ་དེ་མི་རྟག་པ་དེ་ལ་མི་འཁྲུལ་པའི་ཕྱིར་རོ། །ངེས་པར་གཟུང་བའི་རྣམ་པར་གཅད་པ་བརྗོད་པ་ནི་ཕྱོགས་ཀྱི་ཚིག་གིས་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བའི་ཚིག་གོ་བར་བྱེད་པ་ཡིན་ནའོ། །དེའི་
ཞེས་བྱ་བ་གཏན་ཚིགས་ཀྱི་ཚིག་གི་དོན་གཞལ་བྱ་བ་ཉིད་མི་རྟག་པ་ཉིད་དེར་མ་འབྲེལ་པའི་ཕྱིར་གཞལ་བྱ་ཉིད་གཏན་ཚིགས་མ་ཡིན་ནོ། །འོན་ཏེ་དམ་བཅས་པ་ཙམ་ནི་ཞེས་བྱ་བ་ནི་གཞན་གྱིའོ། །ལན་ནི་ཅི་ལྟར་དམ་བཅས་པའི་ཚིག་སྒྲུབ་པར་བྱེད་པ་མ་ཡིན་པ་སྒྲུབ་པར་བྱེད་པ་ཡིན་ཏེ། གཏན་
ཚིགས་ཉིད་དུ་ཉེ་བར་བཀོད་པའི་ཕྱིར་རོ། །ལྷན་ཅིག་པ་སྟེ་གཏན་ཚིགས་ཀྱི་ཚིག་དང་བཅས་པ་སྒྲུབ་པར་བྱེད་པ་ཡིན་གྱི་འབའ་ཞིག་ནི་མ་ཡིན་ཏེ། དཔེར་ན་ས་བོན་དང་བཅས་པ་མྱུ་གུའི་སྒྲུབ་པར་བྱེད་པ་ཡིན་པ་བཞིན་ནོ། །མཁོ་བ་མེད་པ་ཞེས་བྱ་བ་ནི་ཕྱོགས་ཀྱི་ཚིག་སྟེ་མ་འབྲེལ་པའི་ཕྱིར་རོ། །
เล่ม ๑๘๖ · หน้า 30a
ཅི་ལྟར་ན་བསྒྲུབ་པར་བྱ་བ་གྲུབ་པའི་དོན་དུ་གཏན་ཚིགས་ཀྱི་ཚིག་དང་ལྷན་ཅིག་ཏུ་བྱེད། གཏན་ཚིགས་ཀྱི་ཚིག་ཀྱང་ཕྱོགས་ཀྱི་ཚིག་དང་ལྷན་ཅིག་ཏུ་ཅི་ལྟར་བྱེད། རྡོའི་དུམ་བུ་ནི་མྱུ་གུ་བསྐྱེད་པའི་དོན་དུ་ཆུ་ལ་སོགས་པས་ལྷན་ཅིག་པར་ལྟོས་པར་བྱ་བ་མ་ཡིན་ནོ། །ལྟོས་ན་
ཡང་མྱུ་གུའི་སྐྱེད་བྱེད་དུ་འགྱུར་བ་མ་ཡིན་ནོ། །དངོས་པོ་ལ་ཅིའི་ཕྱིར་ཚད་མ་མ་ཡིན་ཞེ་ན། དེ་ལས་ཐེ་ཚོམ་དག་ཅེས་བྱ་བའོ། །དེར་ཞེས་བྱ་བ་ནི་དོན་ལའོ། །དེ་ལྟ་མ་ཡིན་ན་ཞེས་བྱ་བ་ནི་དམ་བཅའ་བའི་ཚིག་དོན་དང་མ་འབྲེལ་ནའོ། །འོ་ན་ཞེས་བྱ་བ་ནས་ཅེའི་བར་ནི་གཞན་གྱིའོ། །དེ་ལས་
ཞེས་བྱ་བ་ནི་ཚིག་ལས་སོ། །དེར་ཡང་ནི་སྒྲུབ་པར་བྱེད་པ་ལ་ཡང་ཚིག་དེ་འབྲེལ་པ་མེད་པ་ཉིད་དོ། །འབྲེལ་པ་ཡིན་ན་ནི་ཞེས་བྱ་བ་ནི་གལ་ཏེ་དེ་སྒྲུབ་པར་བྱེད་པ་ལ་འབྲེལ་ནའོ། །དེའི་ཚེ་བསྒྲུབ་པར་བྱ་བ་དང་འབྲེལ་པ་གང་གིས་ཟློག་པར་བྱེད་དེ་འགལ་བ་མེད་པ་ཁོ་ནའོ། །དམ་བཅའི་ཚིག་
འབྲས་བུ་དང་བཅས་པ་སྟོན་པ་ནི་སྒྲུབ་པར་བྱེད་པ་ལ་ཡང་ཞེས་བྱ་བའོ། །དེར་ནི་ཞེས་བྱ་བ་ནི་སྒྲུབ་པར་བྱེད་པ་དུ་མ་ལ་སོགས་པའོ། །འོ་ན་ཁྱབ་པར་བརྗོད་པ་ཡང་དོན་མེད་དོ་ཞེ་ན། ཚིག་གིས་ནི་ཞེས་བྱ་བའོ། །སྔོན་ཞུགས་པའི་ཚད་མ་དེ་ལའོ། །དེ་ལ་ཚིག་གིས་ཞེས་བྱ་བ་ནི་མངོན་སུམ་
གྱིས་གྲུབ་པའི་སྒྲུབ་པར་བྱེད་པ་ལའོ། །དེའི་ཕྱིར་ན་ཚིག་གིས་སྒྲུབ་པར་བྱེད་པའི་ཚད་མ་ནི་འཕེན་པ་མ་ཡིན་པའི་ཕྱིར་ན་བསྒྲུབ་པར་བྱ་བ་ལ་ཡང་ཚིག་གི་ཚད་མ་འཕེན་པར་ག་ལ་འགྱུར། ཅིའི་ཕྱིར་སྒྲུབ་པར་བྱེད་པ་མ་ཡིན་སྙམ་ན། རང་ཉིད་མི་ནུས་པ་ནི་ཞེས་བྱ་བ་སྨོས་སོ། །ནུས་པ་ལ་
མ་བརྟེན་པར་ནུས་པ་དང་ལྡན་པར་མི་འགྱུར་རོ། །འོ་ན་ཕྱོགས་ཀྱི་ཚིག་སྒྲུབ་པར་བྱེད་པར་འགྱུར་རོ་ཞེ་ན། ཕྱོགས་ཀྱི་ཚིག་གིས་ནི་ཞེས་གསུངས་སོ། །འོ་ན་གཏན་ཚིགས་ཀྱི་ཚིག་ཅི་ལྟར་སྒྲུབ་པར་བྱེད་པ་ཡིན་ཞེ་ན་གཏན་ཚིགས་ཀྱི་ཞེས་སྨོས་སོ། །འདི་ཉིད་བསལ་བར་བྱེད་པ་ནི་བསྒྲུབ་
བྱའི་དོན་ལ་ཞེས་བྱ་བའོ། །གང་གི་ཕྱིར་དེ་ལྟར་ཚིག་གཞན་གྱི་དོན་གྱི་རྗེས་སུ་དཔག་པ་ཡིན་པ་དེས་ནི་གང་བརྗོད་པ་དེ་ཡང་བསལ་བ་ཡིན་ཏེ་ཞེས་འབྲེལ་ཏོ། །ཅི་སྐད་བརྗོད་པ་དེ་ཞེ་ན། གཞན་དོན་དང་ཞེས་བྱ་བའོ། །ཅི་ལྟར་འགལ་སྙམ་ན་འདི་ལྟར་ཞེས་བྱ་བའོ། །རང་གི་དོན་ཉིད་
เล่ม ๑๘๖ · หน้า 30b
ཡིན་གྱི་གཞན་གྱི་དོན་ནི་མ་ཡིན་ནོ། །རྗེས་སུ་བརྗོད་པ་ཙམ་ནི་ཚད་མ་མ་ཡིན་པའོ། །བསྟན་པར་བྱ་བ་ལ་ལྟོས་ནས་ནི་རང་གི་དོན་ཉིད་དོ་ཞེས་གང་བརྗོད་པ། རེ་ཞིག་སུན་འབྱིན་པ་ནི་འདི་ལྟར་ཞེས་བྱ་བའོ། །དེ་ནི་ཚིག་གོ། །གྱི་ན་བརྗོད་པ་ཉིད་དེ་ཞེས་བྱ་བ་ནི་བསྟན་པར་བྱ་བ་ལ་
ལྟོས་ཏེ་ཚིག་རང་གི་དོན་གྱི་རྗེས་དཔག་མ་ཡིན་པའི་ཕྱིར་རོ། །འདི་ཉིད་སྟོན་པ་ནི་དེ་ལ་ནི་ཞེས་བྱ་བའོ། །ཚིག་རང་གི་དོན་མ་ཡིན་ཏེའོ། །ཅིའི་ཕྱིར་ཞེ་ན། ཚིག་དེ་ལས་དོན་བསྒྲུབ་པར་བྱ་བ་རྟོགས་པ་མེད་པའི་རྒྱུའི་ཕྱིར་རོ། །དྲན་པར་ཞེས་བྱ་བ་ནི་དོགས་པ་བསུ་བའོ། །དྲན་པར་བྱེད་
པའི་བྱེད་པས་དེ་ཡང་སྟེ་བསྒྲུབ་པར་བྱ་བ་ཡང་ངོ་། །སྒྲུབ་པར་བྱེད་པ་དྲན་པའི་བྱེད་པས་ཚིག་ཕན་འདོགས་པར་བྱེད་པས་འབའ་ཞིག་ཏུ་ནི་མ་ཟད་ཀྱི། འོན་ཀྱང་བསྒྲུབ་པར་བྱ་བ་དྲན་པ་སྐྱེད་པའི་ཚིག་ཀྱང་རྟོགས་པའི་རྒྱུ་མཚན་ཡིན་ཏེ། དེས་ན་རྟོགས་པར་བྱ་བ་ལ་ལྟོས་ནས་རང་གི་དོན་གྱི་
རྗེས་སུ་དཔག་པར་བརྗོད་དོ་ཞེ་ན། མ་ཡིན་ཏེ་ཞེས་འགོག་པའོ། །རྟོགས་པར་བྱ་བ་ལ་ལྟོས་ནས་ཀྱང་ཚིག་ནི་རྗེས་སུ་བརྗོད་པ་ཙམ་ཡིན་ནོ་ཞེས་བྱ་བའི་དོན་ཏོ། །འོ་ན་ཅི་ལྟར་གཞན་གྱི་དོན་ཡིན་སྙམ་ཏེ། དེའི་ཞེས་སྨོས་སོ། །རྒོལ་བ་ལ་ལྟོས་ན་གཞན་ཕྱིར་རྒོལ་བ་གང་ཡིན་པ་དེ་ལ་ཚིག་
དེ་དགོས་པ་ཉིད་ནི་ལྟོས་པར་འགྱུར་བའི་རྒོལ་བ་ལ་ལྟོས་ནས་ཡིན་ནོ། །ཅིའི་ཕྱིར་ཞེ་ན། སྟོན་པར་བྱེད་པ་ལ་ནི་ཞེས་སྨོས་སོ། །དེ་ལྟར་གཞན་གྱི་དོན་དུ་འགྱུར་མོད། རྗེས་སུ་དཔག་པ་ཅི་ལྟར་ཡིན་ཞེ་ན། དེའི་ཞེས་སྨོས་སོ། །ཚིག་ནི་ཆོས་ཅན་ཕྱིར་རྒོལ་བ་ལ་རྗེས་སུ་དཔག་པ་སྐྱེད་
པར་བྱེད་པ་ཡིན་ཏེ། དེས་ན་ཕྱིར་རྒོལ་བ་ལ་ལྟོས་པ་ཁོ་ནས་རྗེས་སུ་དཔག་པའི་རྒྱུ་ཡིན་པའི་ཕྱིར་ཚིག་རྗེས་སུ་དཔག་པ་ཡིན་ནོ། །རྒོལ་བའི་རྗེས་སུ་དཔག་པ་ནི་ཚུལ་གསུམ་པའི་རྟགས་ཁོ་ནས་སྐྱེད་ཀྱི་ཚིག་དེས་ནི་མ་ཡིན་ནོ། །དེས་ན་དེ་ལ་ལྟོས་ནས་ནི་ཚིག་རྗེས་སུ་དཔག་པ་མ་ཡིན་མོད་ཀྱི་
གཞན་གྱི་དོན་དུ་ནི་འགྱུར་བ་ཁོ་ནའོ། །དེས་ན་ཚིག་གཅིག་ཁོ་ན་རྒོལ་བ་དང་། ཕྱིར་རྒོལ་བ་ལ་ལྟོས་ནས་གཞན་དོན་དང་རྗེས་སུ་དཔག་པར་ཡང་བརྗོད་པར་ཡིན་གྱི་དོན་དམ་པར་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལྟ་མ་ཡིན་ན་ཞེས་བྱ་བ་ནི་སྟོན་པར་བྱེད་པ་ལ་ལྟོས་ནས་ཀྱང་རྗེས་སུ་དཔག་
เล่ม ๑๘๖ · หน้า 31a
པའི་རྒྱུ་ཉིད་ཡིན་ནའོ། །དགོས་པ་ཡང་བཤད་ཟིན་ཏོ་ཞེས་བྱ་བ་ནི་ཚིག་རྗེས་སུ་དཔག་པའི་རྒྱུ་ཡིན་པ་ཉིད་ཀྱིས་དོན་སྟོན་པར་བྱེད་པ་ཡིན་གྱི། དེའི་རྒྱུ་ཡིན་པ་ཉིད་མ་རྟོགས་པར་ནི་རང་རྒྱུད་དུ་དོན་སྟོན་པར་བྱེད་པ་མ་ཡིན་ནོ་ཞེས་སོ། །གལ་ཏེ་ཞེས་བྱ་བ་ནི་གཞན་གྱིའོ། །དེ་ཉིད་ཀྱི་
ཕྱིར་ཞེས་བྱ་བ་ནི་གྲུབ་པའི་མཐའོ། །ཚད་མ་མ་ཡིན་པ་ཉིད་ཀྱི་ཕྱིར་ཚིག་ལས་ཚད་མ་མ་ཡིན་པ་ནི་དྲན་པ་འབྱུང་བར་ཡིན་ནོ། །སྒྲ་རྣམས་ཕྱིའི་དོན་ལ་ཚད་མ་མ་ཡིན་པ་ཉིད་དུ་ཡང་བསྟན་ཟིན་པ་ཁོ་ནའོ། །དེ་ལྟ་མ་ཡིན་ན་ཞེས་བྱ་བ་ནི་ཚིག་ཚད་མ་ཉིད་ཡིན་ནའོ། །དེ་ལས་ནི་ཚིག་ལས་སོ། །ཚད་མར་གྱུར་
པའི་ཚིག་ལས་ནི་ཚད་མར་གྱུར་པའི་ཤེས་པ་ཁོ་ན་སྐྱེ་བར་འགྱུར་རོ་ཞེས་བསྟན་ཏོ། །ལྡོག་པ་བརྗོད་པ་ནི་དྲན་པ་མ་ཡིན་ནོ་ཞེས་བྱ་བའོ། །དྲན་པ་ནི་ཚད་མ་མ་ཡིན་པའི་ཕྱིར་རོ། །ཚིག་ནི་དྲན་པ་ལ་ཡང་ཚད་མ་མ་ཡིན་ཏེ། བྱེད་པ་པོ་ཡིན་པའི་ཕྱིར་རོ་ཞེས་བརྗོད་པ་ནི་དྲན་པ་ལ་ཡང་ཞེས་བྱ་བའོ། །དོན་དང་
ཞེས་བྱ་བ་ལ་སོགས་པ་ནི་རྩོད་པའོ། །དོན་དང་མ་འབྲེལ་པའི་ཕྱིར་ཚིག་དེ་ལས་དྲན་པ་དེ་ཉིད་ཅི་ལྟར་འབྱུང་། ཅིའི་ཕྱིར་ཞེ་ན། དུ་བ་ནི་ཞེས་སྨོས་སོ། །གཏན་ཚིགས་འདི་མ་ངེས་པ་ཡིན་ནོ་ཞེས་བསྟན་པའི་དོན་དུ་དེ་ནི་མ་ཡིན་ཏེ་ཞེས་གསུངས་སོ། །འབྲེལ་པ་ལ་དྲན་པ་ཙམ་མམ། དྲན་པའི་ཁྱད་པར་འབྱུང་
བར་འགྱུར། དེ་ལ་རེ་ཞིག་དྲན་པ་ཙམ་ནི་འབྲེལ་པ་ཁོ་ན་ལས་ཡིན་ནོ་ཞེས་ངེས་པ་མེད་དོ། །ཅིའི་ཕྱིར་ཞེ་ན། དྲན་པ་ཡང་ཞེས་བྱ་བའོ། །མཐོང་བའི་དོན་འདས་པའི་ཡུལ་ལ་མ་འབྲེལ་པའི་འབད་པའི་རྩོལ་བ་ལམ་དྲན་པ་བསྐྱེད་པ་མིན་ནམ་ཅི་སྟེ་སྐྱེ་བ་ཁོ་ནའོ། །ད་ལྟར་བའི་དོན་མེད་ཀྱང་འབད་རྩོལ་ཡོད་པའི་
ཕྱིར་རོ། །གང་དུ་དོན་འགའ་ཞིག་ལས་ཞེས་བྱ་བ་ནི་མ་འབྲེལ་པ་ལྷན་ཅིག་སྤྱོད་པའི་དོན་ལས་སོ། །ཅི་རེས་འགའ་ཁོ་ན་ལྷན་ཅིག་སྤྱོད་པ་ལས་སམ་ཞེ་ན། མང་དུ་ཞེས་བྱ་བ་སྟེ། ཕལ་ཆེར་རོ། །དཔེར་ན་མཚོན་གྱིས་ཆོད་པ་དང་ལྷན་ཅིག་སྤྱོད་པའི་བྱ་བ་ཉིད་ལས་དྲན་པ་འབྱུང་བའམ། ཡང་དཔེར་ན་གོས་འཁྲུད་
མཁན་མཐོང་བ་ལས་བོང་བུ་དྲན་པ་བཞིན་ནོ། །གཉིས་པའི་དབང་དུ་བྱས་ནས་བཤད་པ་ནི། འོན་ཏེ་ཞེས་བྱ་བའོ། །ངེས་པའི་རང་བཞིན་ཞེས་བྱ་བ་ནི་དུ་བ་ལས་མེ་ལ་དྲན་པའོ། །གྲུབ་པའི་མཐའ་སྨྲ་བ་ཁས་ལེན་པ་ནི་དེ་ནི་རིགས་ཏེ་ཞེས་བྱ་བའོ། །ཅི་ལྟར་རིགས་སྙམ་ན། འབྲེལ་པ་མེད་པར་ཞེས་བྱ་བའོ། །
เล่ม ๑๘๖ · หน้า 31b
དེ་ནི་དུ་བའོ། །དེ་ནི་མེ་ལའོ། །གལ་ཏེ་རྟགས་ལས་བཞིན་དུ་སྒྲ་ལས་ཀྱང་ངེས་པར་ཅི་སྟེ་མི་འདོད་སྙམ་ན། འོན་ཀྱང་ཞེས་བྱ་བའོ། །དེས་ན་ཞེས་བྱ་བ་ནི་ངེས་པའི་རང་བཞིན་མ་གྲུབ་པས་ན་སྒྲ་རྣམས་དོན་དང་འབྲེལ་པ་མི་འགྲུབ་བོ། །འདི་ཉིད་བརྗོད་པ་ནི་འདི་ལྟར་ཞེས་བྱ་བའོ། །སྒྲུབ་པར་བྱེད་པས་བསྒྲུབ་པར་
བྱ་བ་ལ་འབྲེལ་པ་མ་བརྟགས་པའི་སྐྱེས་བུ་དག་ནི་རྟགས་བརྗོད་པ་ལས་ཐེ་ཚོམ་ཉིད་དུ་འགྱུར་གྱིས་ངེས་པར་ནི་མ་ཡིན་ནོ། །གང་དང་གང་ན་དུ་བ་ཡོད་པ་དེ་དང་དེ་ན་མེ་ཡོད་དོ་ཞེས་བརྗོད་པ་ལས་ནི་འབྲེལ་པ་མི་ཤེས་པ་ཡང་འདི་ནི་མེ་ཡོད་དེ་ཞེས་ངེས་པར་འགྱུར་བ་མ་ཡིན་ནོ། །ཅིའི་ཕྱིར་ཞེ་ན། རྒྱུ་ལས་ཞེས་
གསུངས་སོ། །འོ་ན་ཅི་ལྟར་ཞེས་བྱ་བ་ནི་གཞན་གྱིའོ། །གལ་ཏེ་སྒྲ་ལས་ཐེ་ཚོམ་ཁོ་ནར་འགྱུར་ན་འོ་ན་ཅི་ལྟར་ངེས། ངེས་པའི་རྣམ་པ་ཉིད་བརྗོད་པ་ནི། རྣམ་གང་གིས་དེས་སྒྲ་སྨྲས་པ་དེ་ནི་དེ་ཁོ་ན་ལྟར་ཡིན་ཏེ། ངེས་པ་ཁོ་ན་ཡིན་ནོ་ཞེས་བྱ་བའོ། །སྒྲ་འདིས་དོན་གང་ཞིག་བསྟན་པ་དེ་ནི་དེ་ཁོ་ན་ལྟར་ཡིན་གྱི་
གཞན་དུ་ནི་མ་ཡིན་ནོ་ཞེས་བྱ་བའི་དོན་ཏོ། །མ་ཡིན་ཏེ་ཞེས་བྱ་བ་ནི་ལན་ནོ། །ངེས་པ་དེ་ནི་ཞེས་བྱ་བ་ནི་དོན་ངེས་པ་ནིའོ། །མ་ངེས་པ་ནི་སྒྲ་ལས་མ་ཡིན་གྱི། འོན་ཀྱང་ཚད་མ་ལས་ཡིན་ནོ། །འདི་ག་ལས་ཤེ་ན། འདི་ལྟར་ཞེས་བྱ་བའོ། །ཚད་མ་ལས་མ་ངེས་པར་འགྱུར་མོད། ཚད་མར་ངེས་པ་ནི་སྒྲ་ལས་ཡིན་ནོ། །
དེ་ལྟར་ན་ཡང་ཞེས་བྱ་བ་ནི་ཚད་མར་ངེས་པ་བསྐྱེད་པ་ན་ཡང་ངོ་། །དེ་ལྟར་ཞེས་བྱ་བའི་ཚིག་དེ་ནི་ཚད་མ་འདི་ལ་ཚད་མར་འདོད་པ་ཁོ་ནའོ། །རང་ཉིད་དེ་རང་བཞིན་ཉིད་ཀྱིས་ནི། དོན་ལ་ཚིག་དེ་ཚད་མ་མ་ཡིན་ནོ། །གལ་ཏེ་དེ་ལྟར་ཡིན་ན་ཚིག་ཚད་མ་ཉིད་མི་འདོད་པ་ཐོག་ཏུ་བབ་པོ་ཞེ་ན། གང་ཕྱིར་དོན་འདི་ཞེས་
གསུངས་སོ། །སྔར་ཞུགས་པ་འབྲེལ་པ་འཛིན་པར་བྱེད་པའི་ཚད་མའི་ཡུལ་འདི་ལ་ཚིག་ཚད་མར་གྲུབ་ཀྱང་དེ་ལ་ཚད་མ་ཅི་ཡང་མེད་པ་ཁོ་ན་སྟེ། དེས་ན་མི་འདོད་པ་ཐོག་ཏུ་བབ་པ་ཡིན་ནོ། །འདི་ཐམས་ཅད་ནི་ཁས་བླངས་ནས་བརྗོད་པར་ཟད་ཀྱི། ད་ནི་དེ་ཡང་མ་ཡིན་ནོ་ཞེས་བརྗོད་པ་ནི་ཚད་མ་ཡང་ཞེས་བྱ་བས་
སོ། །གཞན་གྱིས་སྨྲས་པས་སོ། །གཞན་གྱིས་སྨྲས་པ་ནི་ཅི་ཚིག་མེད་པར་ཡང་ངེས་པར་ཡིན་ནམ་ཅི་ཞེས་བྱ་བའོ། །ལེན་ནི་ཡིན་པ་ཉིད་དེ་ཞེས་བྱ་བའོ། །འོན་ཏེ་བདེན་པའི་ཚིག་ཚད་མ་ཡིན་ནོ་སྙམ་ན། བདེན་པ་དང་ཞེས་བྱ་བའོ། །འོན་ཏེ་དོན་ལ་མི་འཁྲུལ་པ་ཉིད་ཀྱིས་སམ། གཞན་དུ་ཡང་ཁྱད་པར་རྟོགས་
เล่ม ๑๘๖ · หน้า 32a
པ་ཡོད་པ་ཁོ་ནའོ་སྙམ་ན། དོན་ལ་ཞེས་བྱ་བ་སྟེ། གལ་ཏེ་ཚིག་གིས་ཁྱད་པར་བདེན་པ་དང་མི་བདེན་པ་ཉིད་དུ་རྟོགས་པར་ཁས་ལེན་ན་དེའི་ཚེ་ལྐོག་ཏུ་གྱུར་པའི་དོན་ལ་ཚིག་དེ་རང་གི་དོན་གྱི་རྗེས་དཔག་ཁོ་ནར་འགྱུར་ཏེ། དུ་བ་བཞིན་ནོ། །དོན་མེད་ན་མི་འབྱུང་བ་ཉིད་དུ་ངེས་པའི་ཚིག་ལས་ནི་རང་
ཉིད་དོན་རྟོགས་པའི་ཕྱིར་རོ། །ཁ་ཅིག་ནི་ཚིག་ལ་འཁྲུལ་པ་སྤང་བའི་དོན་དུ་འདི་ལྟར་སྦྱོར་བར་བྱེད་དེ། གལ་ཏེ་དུ་བ་ལ་སོགས་པ་འབྲེལ་བའི་དོན་ལ་རྟོགས་པར་ཁས་ལེན་ན་དེའི་ཚེ་དེ་ནི་རང་གི་དོན་གྱི་རྗེས་སུ་དཔག་པ་ཁོ་ནར་འགྱུར་གྱི་གཞན་གྱི་དོན་ནི་མ་ཡིན་ཏེ། རྟགས་ལས་སྐྱེས་པའི་ཕྱིར་དང་། གཞན་གྱི་དོན་
ནི་ཚིག་གི་བདག་ཉིད་ཡིན་པའི་ཕྱིར་རོ་ཞེས་བྱ་བར་རོ། །གལ་ཏེ་སྒྲ་རྣམས་དོན་དང་འབྲེལ་པ་མེད་ན་དེ་ལས་ཅི་ལྟར་དྲན་དེ་ན་ཚིག་ལ་ཁྱད་པར་མཐོང་བ་མེད་ཅེས་ཅི་ལྟར་བརྗོད་སྙམ་ན། དྲན་པ་ལོག་པར་འཇུག་པ་ནི་ཞེས་བྱ་བའོ། །འོ་ན་སྔར་གྱི་ཚད་མའི་རང་བཞིན་ངེས་པར་འཛིན་པར་བྱེད་པའི་ཚིག་ནི་དེ་ལ་ཚད་
མར་འགྱུར་རོ་སྙམ་ན། དེའི་ཕྱིར་ཞེས་བྱ་བའོ། །རྟགས་གང་ཞིག་ཤིན་ཏུ་དཔྱད་པ་སྟེ། རྟགས་འགའ་ཞིག་པོ་དེ་ལས་སྔར་གྱི་འབྲེལ་པ་འཛིན་པའི་ཚད་མ་བཞིན་ཏེ་ངེས་པ་སྟེ་རྗེས་སུ་མཐུན་པ་དྲན་པ་ཡིན་གྱི་ཚིག་ལས་ནི་མ་ཡིན་ནོ། །དེས་ན་ཚིག་གི་ཚད་མ་ལ་ཚད་མ་མ་ཡིན་ནོ། །དོན་ཕྱི་རོལ་ལ་
ཡང་མ་ཡིན། འབད་རྩོལ་ལ་ཡང་མ་ཡིན་ནོ། །ཡང་འབད་རྩོལ་ཡང་ཕྱིའི་དོན་ལ་ཚད་མ་མ་ཡིན་ནོ། །གང་གི་ཕྱིར་དེ་ལྟར་ཚིག་ཚད་མ་མ་ཡིན་པ་དེས་ན་ལྐོག་ཏུ་གྱུར་པའི་ཞེས་བྱ་བའོ། །ཕ་རོལ་པོ་རྗེས་སུ་དཔག་པའི་དུས་ན་འབྲེལ་པ་འཛིན་པའི་ཚད་མ་མེད་པའི་ཕྱིར་ན་འབྲེལ་བ་ངེས་པ་མེད་པར་བརྗོད་
པ་ནི། གལ་ཏེ་ཞེས་བྱ་བའོ། །ཚད་མ་དེས་ཞེས་བྱ་བ་ནི་ལན་ནོ། །ཚད་མ་ལས་ཞེས་བྱ་བ་ནི་མེ་དུད་ཀྱི་འབྲེལ་པ་འཛིན་པ་ལས་སོ། །དྲན་པ་ནི་ཞེས་བྱ་བ་ནི་དུས་གཞན་དུ་རི་ལ་དུ་བ་མཐོང་བ་ལས་དུ་བ་འདི་ནི་ཐམས་ཅད་དུ་མེ་དང་འབྲེལ་པ་ཡིན་ན་ཞེས་ཁྱབ་པ་ལྷག་པར་ཞེན་པ་ནི། རྒྱུད་ནས་སྐྱེས་པས་ཉེ་
བར་བཏགས་ནས་ཚད་མ་ཅི་ལྟར་མ་ཡིན། འདི་ནི་གདོན་མི་ཟ་བར་ཁས་བླངས་པར་བྱས་པ་ཡིན་ཏེ། དེ་ལྟར་མ་ཡིན་ན་རྗེས་སུ་དཔག་པ་སྐྱེ་བ་མེད་པའི་ཕྱིར་རོ། །ཧ་ཅང་ཐལ་བ་ཡང་མ་ཡིན་ཏེ། ཉེ་བར་མ་བཏགས་ན་ནི་གཉིས་ཁོ་ན་ཚད་མ་ཡིན་ལ། ཉེ་བར་བཏགས་པ་ལས་ནི་ཚིག་ཀྱང་ཡིན་
เล่ม ๑๘๖ · หน้า 32b
ནོ་ཞེས་འདོད་པའི་ཕྱིར་རོ། །དེ་ལྟར་ན་འོ་ན་དྲན་པ་མཐའ་དག་ཚད་མར་འགྱུར་རོ་སྙམ་ན། ཚད་མ་ཡིན་ལ་ཞེས་བྱ་བའོ། །དེ་ནི་དྲན་པའོ། །དྲན་པ་འདི་ནི་ཞེས་བྱ་བ་ན་ཉེར་འཇོག་ཉིད་ཅེས་བྱ་བའི་རྩོད་པའོ། །ཁྱབ་པ་འཛིན་པའི་མཚན་མ་ལས་ནི་ཁྱབ་པ་ངེས་པའི་རང་བཞིན་གྱི་དྲན་པ་སྐྱ་བ་ཡིན་ནོ་
ཞེས་ཚད་མ་དང་དྲན་པ་དག་རྒྱུ་དང་འབྲས་བུའི་དངོས་པོར་འཛིན་པའི་ཚད་མ་ནི་དྲན་པ་ཁོ་ན་ཡིན་ནོ། །འཛིན་པར་བྱེད་པའི་དྲན་པ་དེ་ཡང་གཟུང་བར་བྱ་བ་དེ་གཉིས་དང་འབྲེལ་པ་ནི་དྲན་པ་གཞན་གྱིས་ཤེས་པར་བྱ་བ་ཡིན་ཏེ། དེ་ལྟར་མ་ཡིན་པར་འབྲེལ་པ་ཅི་ལྟར་འཛིན། དྲན་པ་གཉིས་པ་དེ་ཡང་དེ་དག་དང་
འབྲེལ་པར་འགྱུར་བ་ཡིན་ལ། དེའི་འབྲེལ་པ་ཡང་དྲན་པ་གཞན་གསུམ་ལ་ཡིན་ནོ། །དེ་ཚད་མ་དང་དྲན་པ་གཉིས་དང་འབྲེལ་པ་ཡང་དྲན་པ་གཞན་གྱིས་ཤེས་པར་བྱ་བ་ཡིན་པའི་ཕྱིར་ཐུག་པ་མེད་པས་དྲན་པ་ལས་ངེས་པ་སྐྱེ་བར་ག་ལ་འགྱུར་ཏེ། མི་འགྱུར་བ་ཁོ་ནའོ་ཞེས་བྱ་བའི་དོན་ཏོ། །དྲན་པ་འདི་
བསྟན་པ་ཡིན་ཞེ་ན་ཞེས་བྱ་བ་ནི་དྲན་པ་དང་པོ་ཉིད་དྲན་པ་གཞན་ལ་མི་ལྟོས་པར་འདི། འདི་ལས་བྱུང་བ་ཡིན་ནོ་ཞེས་ངེས་པར་བྱེད་པ་ཡིན་ནོ་ཞེས་བྱ་བའོ། །ལོག་པ་ལ་དྲན་པ་བསྟན་པ་ཉིད་མེད་དམ་ཅི་སྟེ་མེད་པ་ལ་ཡང་དྲན་པ་བསྟན་པ་མཐོང་ངོ་ཞེས་བྱ་བའི་དོན་ཏོ། །བསྟན་པ་ནི་དོན་ཐོབ་པའི་ཕྱིར་ལོག་པ་མ་
ཡིན་ནོ་སྙམ་ན། ཐོབ་པ་ནི་གྲུབ་པ་ཉེར་འཇོག་ཉིད་དོ། །གལ་ཏེ་གནོད་པ་མེད་པ་ལ་ཚད་མར་ཅི་སྟེ་མི་འདོད་དེ། དོན་དམ་པར་ནི་གཉི་ག་ཡང་མི་སྲིད་པའི་ཕྱིར་རོ་སྙམ་ན། ཐ་སྙད་ཀྱང་ཞེས་གསུངས་སོ། །གཞན་ཞེས་བྱ་བ་ནི་གནོད་པ་མེད་པ་ཉིད་ཀྱི་མཚན་ཉིད་དོ། །རྟོགས་པ་དང་ལྡན་པ་གནོད་པ་དང་
བྲལ་བ་དོན་དུ་གཉེར་བས་ཚད་མའམ་ཚད་མ་མ་ཡིན་པ་ཚོལ་བ་ནི་མ་ཡིན་གྱི། འོན་ཀྱང་དོན་བྱ་བའི་དོན་དུ་གཉེར་བས་མ་ཡིན་ནོ། །དེས་ན་དོན་ཐོབ་པའི་མཚན་ཉིད་ཀྱི་ཐ་སྙད་ཁོ་ན་ཚད་མའི་རྒྱུ་མཚན་ཡིན་གྱི་གཞན་ནི་མ་ཡིན་ནོ། །ཐ་སྙད་ལས་ནི་ཞེས་བྱ་བ་དོན་ཐོབ་པའི་མཚན་ཉིད་ལས་ནི་མ་ཡིན་པའོ། །
ཐོབ་པ་ལ་བརྟེན་ནས་ཞེས་བྱ་བ་ནི། ཐོབ་པ་ཡང་དག་པར་རྒྱུན་མི་འཆད་པར་བརྟེན་པ་ལས་དེ་ཡོངས་སུ་བཟུང་བ་ལས་སོ། །དོན་བྱ་བ་གོམས་པ་ལས་ཞེས་བྱ་བའི་དོན་ཏོ། །དེ་ལྟ་ཡིན་མོད། ཅི་ཉེས་སྙམ་ན། གཞན་ཞེས་སྨོས་ཏེ། དོན་བྱ་བའི་ཤེས་པའོ། །གཞན་དུ་ཞེས་བྱ་བ་ནི་དྲན་པ་ལའོ། །
เล่ม ๑๘๖ · หน้า 33a
དོན་བྱ་བ་མྱོང་བ་དང་གོམས་པ་དེས་ན་དེ་ཉིད་བསྟན་པར་འགྱུར་མོད། དྲན་པ་ནི་མ་ཡིན་ནོ། །དེས་ན་དྲན་པ་འགའ་ཞིག་རང་ཉིད་ལས་བསྟན་པ་ཡིན་ནོ་ཞེས་ཅི་ལྟར་བརྗོད་ཅེས་བྱ་བའི་དོན་ཏོ། །འཆད་པར་འགྱུར་ན་དེ་ལྟ་ཡང་མ་ཡིན་ནོ་ཞེས་བྱ་བའོ། །དེའི་ཕྱིར་ཞེས་བྱ་བ་ནི་མཇུག་སྡུད་པའོ། །
དེས་ན་འདི་འདི་ལས་བྱུང་བའོ་ཞེས་དྲན་པ་ནི་རྣམ་པ་དེ་ལྟ་བུའི་དོན་ཐོབ་པས་ན་མངོན་པར་འདོད་པ་ལ་མི་སླུ་བ་ཁོ་ནས་ཚད་མ་ཡིན་པའི་ཕྱིར་ཐུག་པ་མེད་པ་མ་ཡིན་ནོ་ཞེས་བྱ་བའི་དོན་ཏོ། །སློབ་དཔོན་ནི་ཕྱོགས་ཀྱི་གླང་པོའོ། །དེ་ཉིད་བརྗོད་པ་ནི་རང་ཉིད་ཅེས་བྱ་བའོ། །རྗེས་སུ་དཔག་པར་བྱ་བ་བསྟན་པ་ཞེས་བྱ་བ་ནི་བསྟན་
བཅོས་སུ་ཞེས་བྱ་བར་བལྟའོ། །འོ་ན་དོན་གང་ཡིན་སྙམ་ན། འོན་ཀྱང་ཞེས་བྱ་བའོ། །སྒྲ་མི་རྟག་གོ་ཞེས་དང་པོར་དམ་བཅའ་བ་བསྟན་པར་བྱ་བ་མ་ཡིན་ལ། དེའི་ཕྱིར་ན་སྒྲ་མི་རྟག་གོ་ཞེས་ཐ་མར་མཇུག་བསྡུ་བར་ཡང་བསྟན་པར་བྱ་བ་མ་ཡིན་ནོ། །ཅིའི་ཕྱིར་ཞེ་ན། ཚུལ་གཉིས་པ་ཙམ་གྱིས་ཞེས་བྱ་བའོ། །
དེ་ལའང་ཞེས་བྱ་བ་ནི་ཕྱོགས་ཀྱི་ཚིག་ལའང་ངོ་། །དམ་བཅའ་བའི་ཚིག་འབའ་ཞིག་ཏུ་ནི་མ་ཟད་ཀྱི། འོན་ཀྱང་མི་མཐུན་པའི་ཕྱོགས་ཁས་ལེན་པ་ལ་ཡང་གཏན་ཚིགས་ཀྱི་ཚིག་འཇུག་པ་འདི་ནི་མཚུངས་སོ། །དེས་ན་སྒྲུབ་པར་བྱེད་པའི་ཚིག་གི་ཆ་རྣམས་ཐུག་པ་མེད་དོ། །དེ་ཡང་ཞེས་བྱ་བ་ནི་བསྒྲུབ་བྱའི་
ཚིག་གོ། །འདི་དག་སྒྲུབ་པར་བྱེད་པ་ཡིན་ཡང་ཅི་ལྟར་ངག་ཡན་ལག་རྣམ་པ་བཅུར་འགྱུར་ཞེ་ན། འདི་ནི་འདིར་ཞེས་བྱ་བ་ལ་སོགས་པའོ། །དེའི་ཕྱིར་ཞེས་བྱ་བ་ནི་གཏན་ཚིགས་ཀྱི་ཚིག་འཇུག་པའི་ཕྱིར་རོ། །དེ་ཡང་ནི་མི་མཐུན་པའི་ཚིག་ཀྱང་དམ་བཅའ་བ་བརྗོད་པ་དེ་དང་ལྷན་ཅིག་གོ། །ཅི་དེ་ཞེས་
བྱ་བ་ནི་གཞན་གྱིའོ། །དོན་ལ་ཞེས་བྱ་བ་གཞན་དུ་བྱ་བ་ལ་གནས་པའི་དོན་ཏེ་དགོས་པའོ། །གལ་ཏེ་ཞེས་བྱ་བ་ལ་སོགས་པ་ནི་ལན་ནོ། །དེ་ཞེས་བྱ་བ་ནི་དམ་བཅའ་བའི་ཚིག་གོ། །འོ་ན་བསྒྲུབ་བྱ་འགྲུབ་པའི་ནང་གི་ཡན་ལག་གི་ནུས་པ་གང་ཡིན་ཞེ་ན། གང་གིས་ཞེས་བྱ་བའོ། །དེ་ལ་ནི་ཚུལ་གསུམ་
ལའོ། །དེ་ཚིག་ཉིད་ཅེས་བྱ་བ་ཚུལ་གསུམ་གྱི་ཚིག་ཉིད་ལ་ཏོ། །དམ་བཅའ་བའི་ཚིག་ལ་ནི་མ་ཡིན་པའོ། །དང་པོ་ཉིད་དུ་ཞེས་བྱ་བ་ནི་གཏན་ཚིགས་བསྟན་པའི་གོང་རོལ་དུའོ། །དེ་ནི་བསྒྲུབ་བྱའོ། །གཞན་གྱི་དོན་གྱི་རྗེས་སུ་དཔག་པར་ཡང་དང་པོར་བསྒྲུབ་བྱ་དགོད་པ་མ་ཡིན་ནོ་ཞེས་བྱ་བའོ། །
เล่ม ๑๘๖ · หน้า 33b
དེ་ལྟར་དམ་བཅའ་བ་བརྗོད་པ་བསལ་ནས་མཇུག་བསྡུ་བ་བརྗོད་པ་བསལ་བའི་དོན་དུ་དོགས་པ་བསུ་བ་ནི་ཕྱིར་ཞེས་བྱ་བའོ། །ཕ་རོལ་པོ་ཞེས་བྱ་བ་རྟོགས་པར་བྱ་བ་ལ་ཡང་ངོ་། །ཚུལ་གསུམ་ལས་ཞེས་བྱ་བ་ནི་ཚུལ་གསུམ་པའི་ཕྱོགས་བརྗོད་པའི་འོག་རོལ་ཏུ་ཚུལ་གསུམ་པའི་རྟགས་མཐོང་བ་ལ་རྟོགས་
པ་ཉེ་བར་སྐྱེ་བའི་ཚེའོ། །དེའི་ཚེ་རྟོགས་པ་དེ་རང་གི་དོན་གྱི་རྗེས་སུ་དཔག་པ་དང་ཁྱད་པར་ཅི་ཡོད་དེ་ཅི་ཡང་མེད་པ་ཁོ་ནའོ། །གཞན་གྱི་རྟོགས་པ་ཡང་རང་ལ་གྲུབ་པའི་རྟགས་ཀྱིས་རྗེས་སུ་འབྲང་བ་ཁོ་ནའོ་ཞེས་བྱ་བའི་དོན་ཏོ། །འོ་ན་ཉེ་བར་གཏོད་པ་ནི་བརྗོད་པར་བྱའོ་སྙམ་ན། ཉེ་བར་གཏོད་པ་ཡང་
ཞེས་བྱ་བའོ། །མཐོང་བའི་ནུས་པ་ཅན་གྱི་གཏན་ཚིགས་གང་ཡིན་པ་དེ་སྟོན་པ་དོན་དུ་གཉེར་བ་ཡིན་པའི་ཕྱིར་རོ། །གཏན་ཚིགས་གང་ཞིག་བསྒྲུབ་པར་བྱ་བ་རྟོགས་པ་ལ་ནུས་པ་མཐོང་བ་དེ་ཉིད་ཉེ་བར་བསྟོད་པས་སྟོན་པར་ཟད་ཀྱིས་ལྷག་པ་ནི་མ་ཡིན་ནོ། །དེས་ན་གལ་ཏེ་དང་པོ་བསྒྲུབ་པར་བྱ་བ་རྟོགས་
པ་སྐྱེས་ན། དེའི་ཚེ་ཉེ་བར་གཏད་པས་ཅི་བྱ། འོན་ཏེ་མ་སྐྱེས་ན་དེའི་ཚེ་ནུས་པ་མཐོང་བའི་གཏན་ཚིགས་ཡང་བརྗོད་པ་ནི་ཉེ་བར་གཏོད་པའོ་ཞེས་བྱ་བ་ཉེ་བར་གཏོད་པའི་མཚན་ཉིད་ཉམས་སོ། །དེས་ན་ནུས་པ་མཐོང་བ་སྟོན་པ་ཙམ་ལྷུར་ལེན་པའི་ཕྱིར་ན་ཉེ་བར་གཏོད་པ་ནི་བརྗོད་པར་བྱ་བ་མ་ཡིན་ནོ། །རྣམ་
པ་གཞན་གྱི་སྒོ་ནས་ཀྱང་ཉེ་བར་སྡུད་པ་བརྗོད་པ་ནི་དོན་མེད་དེ་ཞེས་བརྗོད་པ་ན་དེ་དེ་ན་ཞེས་བྱ་བའོ། །གཏན་ཚིགས་དེ་རི་ལ་སོགས་པའི་ཆོས་ཅན་དེ་ནའོ། །ཕྱོགས་ཀྱི་ཆོས་ཉིད་ལས་ཞེས་བྱ་བ་ནི། བྱས་པའི་ཕྱིར་ཞེས་བྱ་བ་དེ་ལྟ་བུའི་རང་བཞིན་ལས་སོ། །ཚད་མ་ཞེས་བྱ་བ་ནས་ཞེ་ནའི་བར་ནི་གཞན་
གྱིས་བརྗོད་པའོ། །གང་ཡིན་པ་ཞེས་བྱ་བ་ནི་གང་གི་ཕྱིར་ཏེ། གང་གི་ཕྱིར་ཚད་མ་ཐམས་ཅད་ཀྱི་བྱེད་པ་འཇུག་པ་དེས་ནའོ། །རྒྱུའི་དབང་ཞེས་བྱ་བ་ནི་ཚད་མ་ཐམས་ཅད་ཀྱི་བྱེད་པ་འཇུག་པ་ནི་རང་གི་རྒྱུའི་དབང་གིས་བྱུང་བའི་ཕྱིར་རོ། །དེ་ལྟར་ཞེས་བྱ་བ་ནི་རྒྱུའི་དབང་གིས་བྱེད་པ་འཇུག་པའོ། །
རྒལ་ཞིང་བརྟག་པའི་རྣམ་པ་བརྗོད་པ་ནི་ཅི་སྟེ་འདི་ལྟར་འགྱུར་ཞེས་བྱ་བའོ། །གལ་ཏེ་ཞེས་བྱ་བ་ནི་གྲུབ་པའི་མཐའོ། །གལ་ཏེ་དེ་ལྟར་ཚད་མར་འགྱུར་ན་དེ་བདེན་པ་ཞིག་ན། དེ་ལྟར་ནི་ཚད་མ་མ་ཡིན་ནོ་ཞེས་བྱ་བའི་དོན་ཏོ། །དེ་ཉིད་བརྗོད་པ་ནི། དམ་བཅའ་བ་ནི་ཞེས་བྱ་བའོ། །ཉེ་བར་འཇལ་
เล่ม ๑๘๖ · หน้า 34a
བ་ནི་རྩོད་པའོ། །གྲུབ་པའི་མཐའ་སྨྲ་བ་ཉིད་ཕྱོགས་ཀྱི་ཆོས་ཉིད་ཁས་ལེན་དུ་གཞུག་པའི་དོན་དུ་ཕ་རོལ་ལ་འདྲི་བ་ནི། སྤྱིར་འབྲེལ་པ་གཟུང་བ་ནི་ཞེས་བྱ་བའོ། །བྱས་པ་ཉིད་ལ་སོགས་པ་ཞེས་བྱ་བ་ནི་གཞན་གྱི་ལན་ནོ། །ཁྱད་པར་གྱི་རྟེན་ཅན་དེ་ཉིད་ཅེས་བྱ་བ་ནི་གྲུབ་པའི་
མཐའོ། །ཉེ་བར་འཇལ་བར་རབ་ཏུ་གྲགས་པའི་ཕྱོགས་ཀྱི་ཆོས་གང་ཡིན་པ་དེས་སོ། །དེ་ཡང་ཞེས་བྱ་བ་ནི་ཉེ་བར་འཇལ་བའི་ཡུལ་ལོ། །དེར་ཞེས་བྱ་བ་ནི་སྒྲའི་ཁྱད་པར་དང་འབྲེལ་པ་སྒྲུབ་པ་ལའོ། །སྒྲ་དང་འབྲེལ་པ་ནི་ཉེ་བར་འཇལ་བའི་ཡུལ་ཡིན་པར་འདོད་དོ། །དེ་ཡང་བརྒྱུད་པའམ་དངོས་སུ་རྟོགས་
གྲང་ན། དེ་ལ་རེ་ཞིག་དངོས་སུ་རྟོགས་ན་ནི་མངོན་སུམ་དུ་ཐལ་བར་འགྱུར་རོ། །བརྒྱུད་ནས་རྟོགས་ན་ཡང་དེ་དེ་དང་འབྲེལ་པ་གཟུང་བར་བྱ་བ་ཡིན་ལ། དེ་ཡང་འགའ་ཞིག་ཏུ་དེ་མཐོང་བ་སྔོན་དུ་འགྲོ་བ་ཅན་ཁོ་ནས་དེ་ལྟ་ན་ཡང་ཚུལ་གསུམ་དང་ལྡན་པའི་ཕྱིར་རྗེས་སུ་དཔག་པའི་ནང་དུ་འདུས་པ་ཁོ་ན་ཡིན་
ནོ། །འོ་ན་དེ་ལ་ཚད་མ་གཉིས་འཇུག་པར་འགྱུར་རོ་སྙམ་ན། དེའི་ཕྱིར་ཉེ་བར་འཇལ་བར་སྨྲ་བ་ཞེས་བྱ་བའོ། །ཉེ་བར་འཇལ་བ་ནི་ཚད་མའི་ཡུལ་ལ་ནི་ཉེ་བར་འཇལ་བར་སྨྲ་བ་རྣམས་ཀྱིས་ཀྱང་རྗེས་སུ་དཔག་པའི་ཚད་མ་གཞན་དུ་འདོད་པ་མ་ཡིན་ནོ། །དེའི་ཞེས་བྱ་བ་ནི་ཉེ་བར་འཇལ་བའིའོ། །
དབྱིག་པ་ཐོགས་པའི་སྐྱེས་བུ་གཉིས་པོ་དེ་ལས་མ་གཏོགས་པར་དབྱིག་པ་ཅན་ཞེས་བྱ་བའི་འདྲ་བ་ནི་ཅུང་ཟད་ཀྱང་མེད་དོ། །དེ་ལ་ཞེས་བྱ་བ་ནི་གཞན་གྱིའོ། །གལ་ཏེ་དེ་ལ་འདྲ་བ་གཞན་མེད་ན། དེའི་ཚེ་འདི་འདྲ་བའི་ཞེས་རྟོགས་པ་ཅི་ལྟར་ཡིན། རྟོགས་པ་འདིས་ནི་གོང་བུ་ཙམ་ལས་བླ་ན་
ལྷག་པའི་དོན་ལ་རེག་པ་ཡིན་ཏེ། གོང་བུ་ཙམ་ཞིག་ཡིན་ན་ནི་འདི་ནི་ཁྲ་བོ་འདི་ནི་བ་ལང་ངོ་ཞེས་རྟོགས་པར་འགྱུར་གྱི་འདི་འདྲ་བ་ཞེས་བྱ་བར་མ་ཡིན་ནོ། །འདི་ནི་འདྲ་བའོ་ཞེས་རྟོགས་པ་ཡང་ཡོད་པ་ཡིན་ཏེ་དེས་ན་གོང་བུ་ལས་ལྷག་པའི་འདྲ་བ་གཞན་རྟོགས་པར་འགྱུར་རོ་ཞེ་ན། དེ་ནི་མ་ཡིན་ཏེ་ཞེས་
བྱ་བ་ནི་གྲུབ་པའི་མཐའོ། །འབྲས་བུ་ལས་རྒྱུ་རྟོགས་པ་ནི་རྣམ་པ་གཉིས་ཏེ། དུ་བ་ལས་མེ་བཞིན་དུ་རྒྱུ་དང་ལྷན་ཅིག་འབྲལ་བ་མཐོང་བ་ལས་སམ། ནུས་པའི་རྒྱུ་གཞན་ཡོད་ཀྱང་འབྲས་བུ་མི་སྐྱེ་བ་ལས་ཏེ། དཔེར་ན་དེའི་ཉེས་པ་མི་སྐྱེ་བ་ལས་དབང་པོ་བཞིན་ནོ། །དེ་རེ་ཞིག་དང་པོ་སེལ་བ་ནི་གལ་ཏེ་
เล่ม ๑๘๖ · หน้า 34b
ཞེས་བྱ་བ་སྟེ། གལ་ཏེ་མངོན་སུམ་དང་མི་དམིགས་པ་དག་གི་རྒྱུ་དང་སྐད་ཅིག་འབྲེལ་པ་མཐོང་བའི་འབྲས་བུ་ལས་རྒྱུ་རྟོགས་པ་ཡིན་ན། དེའི་ཚེ་འདྲ་བའི་མཚན་ཉིད་ཀྱི་རྒྱུ་ཡང་མཐོང་བ་ཉིད་འཐོབ་བོ། །དཔེར་ན་དུ་བ་ལས་བརྟག་པར་བྱ་བའི་མེ་བཞིན་ནོ། །མཐོང་བ་ཡང་མ་ཡིན་ཏེ་དེས་ན་ཅི་ལྟར་འབྲེལ་
བ་མཐོང་བའི་འབྲས་བུ་ལས་དེ་བརྟག་པར་བྱ་བ་ཡིན་ན། མངོན་སུམ་གྱིས་ཀྱང་འདྲ་བ་བརྟག་པར་བྱ་བ་མ་ཡིན་ནོ་ཞེས་གསུངས་པ་ནི། གཞན་ཡང་ཞེས་བྱ་བའོ། །དེ་ཉིད་དུ་ཞེས་བྱ་བ་ནི་འདྲ་བ་ཉིད་དམ་སྲ་བ་ཉིད་དོ། །འོ་ན་རྣམ་པར་རྟོག་པ་ལ་ནི་སྣང་བར་འགྱུར་རོ་སྙམ་ན། དངོས་པོའི་ཞེས་བྱའོ། །
དེ་ལྟ་ན་ཡང་འདྲ་བ་རྣམ་པར་འཇོག་པར་བྱེད་དོ་ཞེ་ན་རང་སྣང་མེད་པར་བྱའོ། །རྣམ་པར་རྟོག་པ་གཉིས་པའི་དབང་དུ་བྱས་ནས་བརྗོད་པ་ནི་འདྲ་བ་ཐོགས་མེད་ཅེས་བྱ་བའོ། །ཡོངས་བརྟགས་ན་ཞེས་བྱ་བ་རྣམ་པར་དཔྱད་པ་ན་དེ་ཁོ་ན་ཉིད་དུ་རང་བཞིན་འགའ་ཞིག་ཀྱང་འདྲ་བ་དེ་ལ་ཡོད་པ་མ་ཡིན་ཏེ། དེས་ན་འདྲ་
བ་ནི་མེད་པ་ཁོ་ནའོ། །འོ་ན་ཅི་ལྟར་འདི་ནི་འདྲ་བའོ་ཞེས་རྣམ་པར་རྟོག་པས་མི་སླུ་བའི་ཐ་སྙད་དུ་འགྱུར་ཞེ་ན། དངོས་དང་ཞེས་བྱ་བའོ། །འདིས་ཞེས་བྱ་བ་འདི་ནི་འདྲ་བའོ་སྙམ་པའི་ཤེས་པས་དོན་བྱ་བའི་བྱེད་པའི་དངོས་པོའི་ཐ་སྙད་འགྲུབ་པ་ཡིན་ནོ། །གང་ལས་ཤེ་ན་དངོས་པོ་དོན་དམ་པ་དང་བརྒྱུད་ནས་
འབྲེལ་པའི་ཕྱིར་རོ། །དེས་ན་འདི་ནི་འདྲ་བའོ་སྙམ་པའི་ཤེས་པས་གཞན་དུ་མི་འཐད་པ་ལས་ནི་འདྲ་བ་རྟག་པར་བྱ་བ་མ་ཡིན་ནོ། །འོ་ན་འདྲ་བའི་དོན་བྱ་བ་གཞན་དུ་མི་འཐད་པས་འགྱུར་རོ་ཞེ་ན། འདྲ་བ་ཉིད་ལས་ནི་དོན་ཡང་ཞེས་བྱ་བ་འདྲ་བའི་དོན་བྱ་བ་བྱེད་པ་མཐོང་བ་མེད་དེ། མ་ཧེ་ལ་སོགས་པ་ལས་
ཀྱང་འོ་མ་ལ་སོགས་པའི་དོན་བྱ་བ་མཐོང་བའི་ཕྱིར་རོ། །ནང་ཁྱད་ཅེས་བྱ་བ་ནི་འདྲ་བ་དང་ཅིག་ཤོས་ཀྱིས་བསྐྱེད་པའི་དོན་བྱ་བ་དག་ལའོ། །དེར་ཡང་ཞེས་བྱ་བ་ནི་འདྲ་བ་རྣམས་ལ་ཡང་ངོ་། །འདྲ་བ་ཉིད་ལས་ནི་ཞེས་བྱ་བ་ལ་སོགས་པ་འཆད་པ་ནི་གང་གིས་ཞེས་བྱ་བའོ། །དེས་ན་འདྲ་བའི་དོན་བྱེད་པ་ལས་
མི་སླུ་བ་ཉིད་མེད་དེ་འདྲ་བར་བརྟག་པའི་ཤེས་པ་མ་ངེས་པའི་ཕྱིར་རོ། །གཞན་དུ་ཞེས་བྱ་བ་ནི་འདྲ་བ་རྣམས་ལའོ། །ཅི་ལྟར་འདྲ་བའི་དོན་གཞན་བསྟན་པ་དེ་བཞིན་དུ་མི་འདྲ་བ་ཡང་བརྟག་དགོས་སོ་ཞེས་བྱ་བའི་དོན་ཏོ། །འདྲ་བ་བཞིན་དུ་ནི་མི་འདྲ་བ་ནི་གཞན་གྱི་འདོད་པ་ཡང་མ་ཡིན་ནོ། །དེ་ནི་ཞེས་བྱ་བ་ནི་
เล่ม ๑๘๖ · หน้า 35a
རྩོད་པ་ནི་མི་འདྲ་བ་དེའོ། །ལན་ནི་འདྲ་བ་ཡང་ཞེས་བྱ་བའོ། །འདྲ་བ་ཉིད་ཅེས་བྱ་བ་ནི་དོགས་པ་སྟེ། དངོས་པོའི་རང་བཞིན་ཉིད་དོ། །ཅི་ལྟར་ཞེས་བྱ་བ་ནི་ལན་ནོ། །འདི་ནི་མེད་པར་དགག་པའི་ཕྱོགས་ལ་བརྟེན་ནས་བརྗོད་པ་ཡིན་ནོ། །གཞན་ཡང་མི་འདྲ་བ་མེད་པ་
གསོག་ཏུ་གྱུར་པའི་རང་བཞིན་ཉིད་འདྲ་བ་ཡིན་ནོ་ཞེས་བྱ་བར་ཅི་སྟེ་མི་འགྱུར། འོན་ཏེ་འདྲ་བ་མེད་པར་འདྲ་བའི་ཐ་སྙད་དུ་མི་འགྱུར་རོ་ཞེ་ན། མི་འདྲ་བ་ཉིད་ནི་ཞེས་བྱ་བའོ། །དེ་ཞེས་བྱ་བ་མི་འདྲ་བ་མེད་པ་ཙམ་གྱིས་སོ། །དེ་ནས་འདྲ་བ་ནི་མེད་པ་ཁོ་ན་ཡིན་པས་དེའི་ཡུལ་ནི་འདྲ་བ་ཡིན་ན་ཞེས་ཅི་ལྟར་
བརྗོད། དེས་ན་ཉེ་བར་འཇལ་བ་ནི་ཚད་མ་མ་ཡིན་ཏེ་ཡུལ་མེད་པའི་ཕྱིར་རོ། །འདི་ཉིད་མཇུག་སྡུད་པ་ནི་དེའི་ཕྱིར་ཞེས་བྱ་བའོ། །དེ་ལྟར་དམ་བཅའ་བ་ཚད་མ་ཡིན་པ་བསལ་ནས་ད་ནི་ལུང་ཉིད་བསལ་བའི་དོན་དུ་དོགས་པ་བསུ་བ་ནི་འོན་ཏེ་ཞེས་བྱ་བའོ། །དམ་བཅས་པས་ཅི་ཞིག་བྱ་ཞེས་བྱ་བ་
ནི་ལུང་གིས་རྟོགས་པར་བྱས་པའི་དོན་སྟོན་པར་བྱེད་པ་ཡིན་ན་དམ་བཅས་པ་དོན་མེད་པའི་ཕྱིར་རོ། །གལ་ཏེ་ལུང་གིས་མ་གྲུབ་ན། དམ་བཅས་ཅི་ཞིག་བྱ་སྟེ། ལུང་ཉིད་མེད་པའི་ཕྱིར་རོ། །གལ་ཏེ་དམ་བཅའ་བའི་དོན་ལུང་གིས་གྲུབ་པས་དམ་བཅའ་བ་ལུང་ཡིན་ན། དེའི་ཚེ་ལུང་མེད་པའི་དོན་ཚད་
མས་ཅི་སྟེ་མི་སྒྲུབ་སྟེ་སྒྲུབ་པ་ཁོ་ནའོ། །དེའི་ཚེ་ཡང་དམ་བཅའ་བ་ལུང་དུ་མི་འགྱུར་ཏེ། དེའི་དོན་ལུང་གིས་མ་བསྒྲུབས་པའི་ཕྱིར་རོ། །ཅི་སྟེ་ཡང་གལ་ཏེ་དམ་བཅའ་བའི་དོན་ལུང་གིས་གྲུབ་པ་ཡིན་ན། དམ་བཅའ་བའི་དོན་བྱེད་མེད་པར་འགྱུར་བ་ཞིག་ན། འོན་ཀྱང་དེ་ནི་ལུང་གི་དོན་ཉིད་ཀྱིས་སྒྲུབ་པར་
བྱེད་པ་ཡིན་ནོ་ཞེ་ན་ལུང་བཅས་ཞེས་བྱ་བའོ། །དེ་ལུང་གི་དོན་ནི་དམ་བཅས་པ་ཙམ་གྱིས་སྒྲུབ་པར་བྱེད་པ་མ་ཡིན་ཏེ། གཏན་ཚིགས་ཉེ་བར་བཀོད་པ་དོན་མེད་པར་ཐལ་བའི་ཕྱིར་རོ། །འོན་ཏེ་ཡང་གལ་ཏེ་བཤད་པའི་ཚུལ་གྱིས་དམ་བཅའ་བ་ཉེ་བར་མཁོ་བ་མ་ཡིན་པ་དེ་ལྟ་ན་ཡང་ཤིན་ཏུ་གོམས་
པ་ལས་དམ་བཅའ་བའི་ཚིག་དང་གཏན་ཚིགས་དེ་དག་ཉིད་དེ་ཙམ་སྟེ། དེ་ལས་གཞན་ལ་རྟོགས་པ་གྲུབ་པ་ཡོད་པ་དེས་ན་དམ་བཅའ་བའི་ཚིག་ནི་དགོས་པ་དང་ལྡན་པ་ཡིན་ནོ་ཞེ་ན། ལན་ནི་དེ་ཚེའང་ཞེས་བྱ་བའོ། །གཞན་ཡང་གོམས་པའི་དུས་དེའི་ཚེ་དམ་བཅའ་བ་ཡང་སྦྱར་བར་བྱ་བ་མ་ཡིན་ནོ། །
เล่ม ๑๘๖ · หน้า 35b
གང་གི་ཕྱིར་ཕྱོགས་ཀྱི་ཆོས་བསྟན་པ་ཉིད་ལས་རྟོགས་པ་གྲུབ་པའི་ཕྱིར་རོ། །སྔར་བརྗོད་པའི་རྩོད་པ་ཉིད་ལན་བཏབ་ཟིན་བཞིན་དུ་ལྷག་པ་བརྗོད་པའི་དོན་དུ་བཟློག་པ་ནི། འོ་ན་ཞེས་བྱ་བའོ། །གལ་ཏེ་དམ་བཅའ་བ་ཡང་སྦྱར་བར་མི་བྱ་ན་འོ་ན་ཅི་ལྟར་ཞེས་བྱ་བའོ། །དེ་ཉིད་ཅེས་བྱ་བ་ནི་བརྗོད་མ་ཐག་པའོ། །
རྩོད་པའི་རྣམ་འགྲེལ་འདི་ཉིད་རྣམ་པར་འགྲེལ་པ་ནི། བྱས་པའི་ཕྱིར་ཞེས་བྱ་བ་ལ་སོགས་པའོ། །གཞན་དུ་ཞེས་བྱ་བ་ནི་སྒྲུབ་པར་བྱེད་པ་ཉིད་དུའོ། །དེ་ལྟར་མ་ཡིན་ན་བྱ་བ་ནི་སྔར་གདོན་མི་ཟ་བར་ཡོད་པ་མ་གཏོགས་པར་རོ། །ཟུག་ཟེར་ཞེས་བྱ་བ་ནི་ཁྱབ་འཇུག་པ་དག །དབང་ཕྱུག་ཆེན་པོ་པར་ཐལ་
བས་འཇིགས་ནས་ཟུག་ཟེར་ལ་འཁོར་ལོའི་སྒྲས་རྗོད་པར་བྱེད་པ་དེ་བཞིན་དུ་སངས་རྒྱས་པ་ཡང་དམ་བཅའ་བ་སྒྲུབ་བྱེད་དུ་ཐལ་བའི་འཇིགས་པས་དམ་བཅའ་བ་ལ་ཚད་མའི་འབྲས་བུའི་སྒྲས་བརྗོད་པ་ཡིན་ནོ། །དེ་ནི་དམ་བཅས་པའི་ཚིག་གིའོ། །ཅི་ཞིག་བརྗོད་ཟིན་སྙམ་ན། ཐེ་ཚོམ་ལ་སོགས་པ་ཞེས་བྱ་
བའོ། །འདི་ལ་ཉེས་པ་གཞན་ཡང་བརྗོད་པའི་དོན་དུ་རྣམ་པར་རྟོག་པར་བྱེད་པ་ནི། གཞན་དུ་ཞེས་བྱ་བ་ནི་གཏན་ཚིགས་ཀྱི་སྔོན་རོལ་ཉིད་དུའོ། །དེ་མེད་ཀྱང་ཞེས་བྱ་བ་ནི་དམ་བཅའ་བའི་ཚིག་མེད་ཀྱང་ངོ་། །ཅི་སྟེ་ཞེས་བྱ་བ་ནི་ཕྱིར་རྒོལ་བས་འགལ་བའི་གཏན་ཚིགས་ངེས་པར་བྱ་བའི་དོན་དུ་དམ་བཅའ་
བའི་ཚིག་ཉེ་བར་འགོད་དོ་ཞེས་བྱ་བའི་དོན་ཏོ། །ཕྱིར་རྒོལ་བ་གཞན་དག་གིས་སོ། །འདིར་བརྒལ་ཤིང་བརྟག་པ་འདི་སུ་ལ་ཡིན་ཏེ། རྒོལ་བའམ། བསྟན་བཅོས་བྱེད་པ་ལ་ཡིན། རེ་ཞིག་རྒོལ་བ་ལ་ནི་མ་ཡིན་ནོ་ཞེས་བསྟན་པའི་དོན་དུ་རྒོལ་བ་ལའོ་ཞེ་ན་ཞེས་དོགས་པ་བྱས་སོ། །བསྟན་བཅོས་
བྱེད་པའི་ཉེས་པ་ཡང་མ་ཡིན་ནོ་ཞེས་བརྗོད་པ་ནི། བསྟན་བཅོས་བྱེད་པས་ཞེས་བྱ་བའོ། །དེ་ནི་ཞེས་བྱ་བ་ནི་བསྟན་བཅོས་བྱེད་པའོ། །གཞན་ལ་ནི་རྒོལ་བ་ལའོ། །དེའི་ཕྱིར་གལ་ཏེ་དམ་བཅའ་བའི་ཚིག་མེད་པར་བསྒྲུབ་པར་བྱ་བའི་རྟོགས་པ་སྐྱེ་བ་ཡིན་ན། དེ་ཉེ་བར་བླངས་པས་འགལ་བའི་
གཏན་ཚིགས་ངེས་པར་བྱས་པས་ཅི་ཞིག་བྱ། ཁྱབ་པ་ཕྱིན་ཅི་ལོག་པ་ཉིད་ལས་ཞེས་བྱ་བ་ནི་མི་རྟག་པ་ཉིད་ཀྱིས་ཁྱབ་པར་ཁོ་ན་ལས་འགལ་བ་ཉིད་དུ་རྟོགས་པར་འགྱུར་དམ་བཅའ་བའི་ཚིག་ལས་ནི་མ་ཡིན་ནོ། །དེའི་ཕྱིར་རྣམ་པ་གཉི་ག་ལྟར་ཡང་དམ་བཅའ་བའི་ཚིག་ནི་དོན་མེད་པ་ཁོ་ནའོ། །
เล่ม ๑๘๖ · หน้า 36a
དེ་ཉིད་ལ་ཉེས་པ་གཞན་ཡང་བརྗོད་པ་ནི་གཞན་ཡང་ཞེས་བྱ་བའོ། །གལ་ཏེ་དམ་བཅའ་བའི་ཚིག་འགལ་བ་ངེས་པའི་དོན་དུ་ཡིན་ན། དེའི་ཚེ་སྒྲ་རྟག་སྟེ་ཞེས་དམ་བཅའ་བ་ནི་ཚིག་རབ་ཏུ་སྦྱར་བའི་རྟག་པ་ཉིད་ལ་སོགས་པ་གང་ཡིན་པ་དེ་ལ་ལྟོས་ནས་འགལ་བ་བརྗོད་པའམ་ཞེས་
བྱའོ། །གང་གི་ཚེ་ཞེ་ན། སྒྲ་རྟག་སྟེ་ཞེས་བྱ་བའོ། །གལ་ཏེ་དེ་ལྟར་འགལ་བ་བརྗོད་པ་ཡིན་ན། དེའི་ཚེ་སྒྲ་རྟག་སྟེ་བྱས་པའི་ཕྱིར་རོ་ཞེས་བྱ་བའི་སྐབས་ཁོ་ནར་ཡིན་གྱི། སྒྲ་མི་རྟག་སྟེ་བྱས་པའི་ཕྱིར་རོ་ཞེས་བྱ་བའི་སྐབས་སུ་ནི་འགལ་བ་བརྗོད་པ་མ་ཡིན་ནོ། །དེས་ན་འདིར་དམ་བཅའི་ཚིག་དགོས་པ་
མེད་པའི་ཕྱིར་ན་བྱ་བ་ཉིད་མ་ཡིན་ནོ་ཞེས་བྱ་བར་འགྱུར་རོ། །དེ་ནི་བསྒྲུབ་བྱ་རྟོགས་པའི་དོན་དུ་ཉེ་བར་བཀོད་པ་ཡིན་གྱི། འགལ་བ་ངེས་པའི་དོན་དུ་ནི་མ་ཡིན་ནོ། །བསྒྲུབ་བྱ་རྟོགས་པ་ཡང་དམ་བཅའ་བ་མེད་པ་ཁོ་ནར་གྲུབ་སྟེ། དེས་ན་དམ་བཅའ་བའི་ཚིག་གིས་ནི་ཅི་ཡང་བྱར་མེད་དོ། །
ཁ་ཅིག་ནི་འདི་ལྟར་མི་འཆད་དེ་དམ་བཅའ་བའི་ཚིག་སྦྱོར་བ་རྐང་མིག་པ་ལ་སོགས་པ་གང་ཡིན་པའོ། །དེ་ལ་ལྟོས་ནས་ནི་དམ་བཅའ་བ་ལ་ལྟོས་ནས་དེའི་ལུགས་ལ་འགལ་བར་བརྗོད་པ་ཡིན་གྱི། སངས་རྒྱས་པའི་ལུགས་ལ་ནི་མ་ཡིན་པ་སྟེ། ཁྱབ་པ་བསྟན་པར་བྱ་བ་ཁོ་ནས་འགལ་བས་
རྟོགས་པས་རྟོགས་པའི་ཕྱིར་རོ་ཞེས་བྱ་བའོ། །དེ་དང་ཞེས་བྱ་བ་སྒྲུབ་པར་བྱེད་པ་དང་མ་འབྲེལ་བའོ། །དེ་ཞེས་བྱ་བ་སྒྲུབ་པར་བྱེད་པ་དང་མ་འབྲེལ་པ་མ་ཚང་བས་སོ། །མ་ཚང་བ་མེད་པ་ཉིད་ཅེས་བྱ་བ་ཡོངས་སུ་རྟོགས་པ་ཉིད་མེད་པར་འགྱུར་ཏེ། གང་ཞིག་ཉེ་བར་མི་མཁོ་བས་ཉེ་བ་མ་ཡིན་པ་
དེ་ཉིད་ཀྱིས་མ་ཚང་བར་ཐལ་བའི་ཕྱིར་རོ། །དེ་ལྟ་མ་ཡིན་ན་ཞེས་བྱ་བ་ནི་ཉེ་བར་མི་མཁོ་བ་ཡིན་ནའོ། །དམ་བཅའ་བའི་ཚིག་མེད་པ་ལ་ཡང་མ་ཚང་བ་མ་ཡིན་པ་ཉིད་མཚུངས་སོ། །དེའི་ཕྱིར་དམ་བཅའ་བ་ལ་སོགས་པ་ལས་གང་ཡང་རུང་བ་ཞིག་མ་ཚང་ན་མ་ཚང་བ་ཡིན་ནོ་ཞེས་བརྩད་པར་མི་བྱའོ། །
ཧ་ཅང་ཁྱབ་ཆེས་པ་ཞེས་བྱ་བ་ནི། གང་ཞིག་གང་གིས་བསྒྲུབ་པར་བྱ་བ་བསྟན་པ་དེ་ཐམས་ཅད་དམ་བཅའ་བ་ཡིན་པའི་ཕྱིར་ན། དམ་བཅའ་བའི་མཚན་ཉིད་ཧ་ཅང་ཁྱབ་ཆེས་པར་འགྱུར་རོ། །ཅི་ལྟར་ཞེ་ན། བསྒྲུབ་པར་བྱ་བ་ཞེས་བྱ་བའོ། །གང་ཞིག་ཅེས་བྱ་བ་ནི་སངས་རྒྱས་པའོ། །བསྒྲུབ་བྱ་
เล่ม ๑๘๖ · หน้า 36b
བརྗོད་པ་དམ་བཅའ་ནའང་ཞེས་བྱ་བ་ནི་དམ་བཅའ་བ་སྒྲུབ་པར་བྱེད་པ་མ་ཡིན་ཏེ། མ་ཚང་བའི་ཉེས་པ་མེད་པ་འབའ་ཞིག་ཏུ་མ་ཟད་ཀྱི། བསྒྲུབ་པར་བྱ་བ་བརྗོད་པ་དམ་བཅའ་བའི་མཚན་ཉིད་ཡིན་པར་སྨྲ་ཡང་སངས་རྒྱས་པ་དེ་ལ་མ་གྲུབ་པའི་གཏན་ཚིགས་བརྗོད་པ་ཡང་དམ་བཅའ་བར་འགྱུར་རོ་
ཞེས་བྱ་བ་དེ་ལྟ་བུ་ལ་སོགས་པའི་སྐྱོན་འཐད་པ་མ་ཡིན་ནོ། །ཅིའི་ཕྱིར་ཞེ་ན། སྒྲུབ་བྱེད་ཅེས་བྱ་བའོ། །དེར་ཞེས་བྱ་བ་ནི་གཏན་ཚིགས་ལྟར་སྣང་བ་མིག་གིས་གཟུང་བ་ཉིད་དམ་བཅའ་བར་ཐལ་བར་མི་འགྱུར་རོ། །འདི་ཉིད་གསལ་བར་བྱེད་པ་ནི་གཏན་ཚིགས་ལྟར་སྣང་བ་ནི་ཞེས་བྱ་བའོ། །འདི་ལ་བརྗོད་
པ་ཞེས་བྱ་བ་ནི། བསྒྲུབ་པར་བྱ་བ་བསྟན་པ་ཞེས་བྱ་བ་འདི་ལ་རྣམ་པར་རྟོག་པ་གཉིས་ཏེ། ཅི་བསྒྲུབ་པར་བྱ་བ་ཉིད་དུ་བསྟན་པའམ། འོན་ཏེ་བསྒྲུབ་པར་བྱ་བའི་བསྟན་པ་ཞེས་བྱ་བའོ། །དེ་ལ་ཕྱོགས་དང་པོ་ལ་བརྗོད་པ་ནི། གལ་ཏེ་ཞེས་བྱ་བའོ། །སྒྲུབ་པར་བྱེད་པ་ལྟར་སྣང་བ་ཞེས་བྱ་བ་ནི་སྒྲུབ་པར་
བྱེད་པ་ལྟར་སྣང་བ་བསྟན་པའོ། །འོ་ན་ཕྱོགས་འདི་ལ་དམ་བཅའ་བའི་མཚན་ཉིད་སྐྱོན་མེད་པར་གྱུར་ཏོ་ཞེ་ན། འོན་ཀྱང་ཞེས་གསུངས་སོ། །བསྟན་པར་བྱ་བ་ཞེས་བྱ་བ་ནི་མཚན་ཉིད་ཀྱིས་རྟོགས་པར་བྱ་བ་མཚན་ཉིད་ཀྱི་ཚིག་གིས་མ་བསྟན་པར་འགྱུར་རོ། །བསྟན་པར་བྱ་བ་མ་བསྟན་ན་ཡང་ཉེས་
པ་བརྗོད་པ་ནི་བསྒྲུབ་པར་བྱ་བ་ཉིད་དུ་བསྟན་པར་ཞེས་བྱ་བའོ། །གང་ཞེས་བྱ་བ་ནི་བསྒྲུབ་པར་བྱ་བའམ་སྒྲུབ་པར་བྱེད་པའོ། །ཕྱོགས་གཉིས་པ་ལ་བརྗོད་པ་ནི་འོན་ཏེ་ཞེས་བྱ་བའོ། །དེའི་ཚེ་ཡང་ཅི་ལྟར་བསྟན་ཞེས་མི་ཤེས་པར་འགྱུར་རོ། །འབྲེལ་ཏོ་ཅིའི་ཕྱིར་ཞེ་ན། སྒྲུབ་པར་བྱེད་པ་ཉིད་དུ་
ཞེའམ་བསྒྲུབ་པར་བྱ་བ་ཉིད་དུ་ཞེས་བྱ་བའི་སྐབས་མ་བསྟན་པའི་ཕྱིར་རོ། །གྲུབ་པའི་མཐའ་སྨྲ་བ་གཞན་ལ་འདྲི་བ་ནི་ཅི་ལྟར་ན་ཞེས་བྱ་བའོ། །གཞན་གྱི་ལན་ནི་ལྔ་པ་ཞེས་བྱ་བའོ། །ཡང་ན་རྣམ་པར་དབྱེ་བ་དང་པོ་ལས་གཞན་དང་པོ་མ་གཏོགས་པས་བསྟན་པ་སྟེ། དུ་བ་ཡོད་པས་དུ་བ་ཡོད་པ་
ནི་ཞེས་བྱ་བས་ནི་བསྟན་པ་དེ་ནི་སྒྲུབ་པར་བྱེད་པ་ཉིད་དུ་བསྟན་པ་ཡིན་ནོ་ཞེས་བྱ་བ་བརྗོད་པར་བྱའོ། །གང་ཞིག་སྒྲ་ནི་མི་རྟག་གོ་ཞེས་དང་པོ་བསྟན་པར་བྱ་བ་དེ་ནི་བསྒྲུབ་པར་བྱ་བ་ཉིད་དུ་ཡིན་ནོ་ཞེ་ན། གྲུབ་པའི་མཐའ་པ་གཞན་ལ་འདྲི་བ་ནི་འདི་ག་ལས་ཞེས་བྱ་བའོ། །ཕ་རོལ་པོ་གཏན་ཚིགས་སྨྲ་བ་ནི་དེ་
เล่ม ๑๘๖ · หน้า 37a
ལྟར་སྒྲའི་དོན་ཞེས་བྱ་བའོ། །ལན་ནི་གལ་ཏེ་ཞེས་བྱ་བའོ། །ཅིའི་ཕྱིར་ཞེ་ན། བསྒྲུབ་པར་བྱ་བ་ཉིད་དུ་ཞེས་བྱ་བའོ། །འོ་ན་ཕྱོགས་ཀྱི་མཚན་ཉིད་ཀྱང་བརྗོད་པར་བྱ་བ་མ་ཡིན་པར་འགྱུར་རོ་ཞེ་ན། ཕྱོགས་ཀྱི་ཞེས་བྱ་བའོ། །གཉི་ག་ལྟར་ཡང་ངེས་པར་གཟུང་བའི་ཉེས་
པ་ཉེ་བར་སྡུད་པ་ནི། དེའི་ཕྱིར་ཞེས་བྱ་བ་ནི། དོན་མེད་པས་ཞེས་བྱ་བ་ནི་འཇིག་རྟེན་ན་གྲུབ་ཟིན་པའི་ཕྱིར་རོ། །འདི་ལྟར་བསྒྲུབ་པར་བྱ་བ་བསྟན་པ་ཉིད་དམ་བཅའ་བ་ཡིན་ནོ་ཞེས་བྱ་བ་འདིར་བསྒྲུབ་པར་བྱ་བ་བསྟན་པ་ནི་ངེས་པ་མེད་ལ་དམ་བཅའ་བ་ནི་ངེས་པར་འཇིག་རྟེན་ན་གྲགས་པ་ཡིན་ནོ། །
བསྒྲུབ་པར་བྱ་བ་བསྟན་པ་ནི་དམ་བཅའ་བ་ཉིད་དོ་ཞེས་བྱ་བའི་མཚན་ཉིད་ལ་ནི་བསྒྲུབ་པར་བྱ་བ་བསྟན་པ་དམ་བཅའ་བ་ལ་ངེས་པ་ཡིན་ལ། དམ་བཅའ་བ་ནི་བསྒྲུབ་པར་བྱ་བ་བསྟན་པ་ལ་མ་ངེས་པ་ཡིན་ནོ། །དེས་ན་སྒྲུབ་པར་བྱེད་པ་ལྟར་སྣང་བ་ཡང་དམ་བཅའ་བར་འགྱུར་རོ། །ཁྱེད་ཀྱིས་
ཞེས་བྱ་བ་ནི་རྩོད་པ་སངས་རྒྱས་པའི་ཕྱོགས་ལའོ། །ལན་ནི་སྒྲུབ་པར་བྱེད་པ་ཞེས་བྱ་བའོ། །གལ་ཏེ་ཞེས་བྱ་བ་ནི་དོགས་པ་བསུ་བའོ། །སྒྲུབ་པར་བྱེད་པར་གྱུར་པའི་བསྒྲུབ་པར་བྱ་བ་བསྟན་པ་ཡང་བརྒྱ་ལ་དམ་བཅའ་བར་འགྱུར་རོ་ཞེས་དེ་ལྟར་ཐེ་ཚོམ་ཟ་བ་ལྡོག་པའི་རྒྱུ་ཅི་ཡིན་ཞེ་ན། ལན་
ནི་རིགས་མི་མཐུན་པ་ཉིད་ཐེ་ཚོམ་ལྡོག་པའི་རྒྱུ་ཡིན་ནོ་ཞེས་བྱ་བའོ། །འདི་ལྟར་སྒྲུབ་པར་བྱེད་པས་བསྟན་པ་དང་བསྒྲུབ་པར་བྱ་བ་བསྟན་པ་ནི་སྒྲུབ་པར་བྱེད་པ་ཡིན་པ་དང་མ་ཡིན་པ་ཉིད་ཀྱིས་རིགས་མི་མཐུན་པ་ཁོ་ན་སྟེ་དེས་ན་དོགས་པར་མི་འགྱུར་རོ། །འདི་ཉིད་སྟོན་པ་ནི་འདི་ལྟར་ཞེས་བྱ་བའོ། །
རིགས་གཅིག་ཅེས་བྱ་བ་ནི་རིགས་མི་མཐུན་པ་ལ་ནི་ཐེ་ཚོམ་འཇུག་པ་མ་ཡིན་ནོ་ཞེས་བྱ་བའི་དོན་ཏོ། །ཕ་རོལ་པོ་ཧ་ཅང་ཁྱབ་པ་ཡོད་པ་ནི་ཤེས་པར་བྱེད་པའོ་ཞེས་བྱ་བའོ། །བུམ་པ་ནི་སྐྱེད་པར་བྱེད་པའི་རྒྱུའི་དབང་དུ་བྱས་ནས་བསྒྲུབ་པར་བྱ་བ་ཡིན་ཏེ། དེས་ན་དེ་སྟོན་པར་ནི་དམ་བཅའ་བ་མ་
ཡིན་ནོ་ཞེས་གྲུབ་པའི་མཐའ་པ་ངའི་ལན་ཡང་འདི་ཁོ་ན་ཡིན་ནོ་ཞེས་སྟོན་པ་ནི། གལ་ཏེ་དེ་ལྟར་ཞེས་བྱ་བའོ། །རྩོད་པའི་ཚེ་འཆད་པ་ནི་གལ་ཏེ་གཞན་ཞེས་བྱ་བའོ། །སྒྲུབ་པར་བྱེད་པ་མ་ཡིན་པ་སྒྲུབ་པར་བྱེད་པ་ལྟར་སྣང་བ་ཡང་དམ་བཅའ་བར་འགྱུར་རོ་ཞེ་ན། སྒྲུབ་པར་བྱེད་པ་མ་ཡིན་པའི་
เล่ม ๑๘๖ · หน้า 37b
ཕྱིར་ནི་ཞེས་བྱ་བའོ། །སྒྲུབ་པའི་མཐའི་ཆ་རྣམ་པར་འགྲེལ་པ་ནི་གལ་ཏེ་ཞེས་བྱ་བའོ། །འོན་ཏེ་ཞེས་བྱ་བ་ནས་ཞེ་ནའི་བར་ནི་རྩོད་པའོ། །ལན་ནི་གལ་ཏེ་ཞེས་བྱ་བའོ། །དམ་བཅའ་བ་ནི་ཞེས་བྱ་བ་ནི་དོགས་པ་སྟེ། མིག་གིས་གཟུང་བ་ཉིད་ནི་དམ་བཅའ་གཅིག་ཡིན་ཏེ། སྒྲ་མི་རྟོག་གོ་ཞེས་བྱ་བའི་
དམ་བཅའ་བ་གཉིས་པ་འདིའི་སྒྲུབ་པར་བྱེད་པ་མ་ཡིན་པར་འགྱུར་རོ། །དེས་ན་ཞེས་བྱ་བ་སྒྲུབ་པར་བྱེད་པ་མ་ཡིན་པས་ན་མ་གྲུབ་པའི་མཚན་ཉིད་ནི་སྐྱོན་ཉིད་དོ་ཞེ་ན། ལན་ནི་སྒྲུབ་པར་བྱེད་པ་ཞེས་བྱ་བའོ། །དམ་བཅའ་བ་ཉིད་ཀྱིས་ན་མིག་གིས་གཟུང་བ་ཉིད་སྒྲུབ་པར་བྱེད་པ་ཡིན་ན། དེའི་ཚེ་ཅི་ལྟར་
སྒྲུབ་པར་བྱེད་པ་མ་ཡིན། རང་གི་དོན་ནི་རང་གིས་བརྗོད་བྱ་སྟེ་མིག་གིས་གཟུང་བའི་ཕྱིར་ཞེས་བྱ་བ་འདི་བརྗོད་པར་བྱ་བ་མིག་གིས་གཟུང་བ་ཉིད་ནི་མིག་གིས་གཟུང་བ་ཡིན་པའི་ཕྱིར་རོ་ཞེས་བྱ་བས་སྒྲུབ་པར་བྱེད་པ་ཡིན་ནོ་ཞེས་བྱ་བའི་འཐད་པའོ། །མ་ཡིན་ཏེ་ཞེས་བྱ་བ་ནི་ལན་ནོ། །ཚིག་ཙམ་ནི་འགའ་
ཡང་སྒྲུབ་བྱེད་མ་ཡིན་གྱི། འོན་ཀྱང་བརྗོད་པར་བྱ་བ་དང་བཅས་པའི་ཚིག་སྒྲུབ་པར་བྱེད་པ་ཡིན་ནོ། །དེ་ལྟར་མ་ཡིན་ན་ནི་དུ་བ་ཞེས་བྱ་བའི་ཚིག་ཙམ་སྒྲུབ་བྱེད་ཡིན་པར་འགྱུར་གྱི། དུ་བ་ཉིད་ནི་མ་ཡིན་ནོ། །དེ་བས་ན་བརྗོད་པར་བྱ་བ་མིག་གིས་གཟུང་བྱ་ཉིད་དང་བཅས་པའོ། །མིག་གིས་གཟུང་བྱ་ཡིན་
པའི་ཕྱིར་ཞེས་བྱ་བའི་ཚིག་སྒྲུབ་པར་བྱེད་པ་ཡིན་ནོ། །གང་གི་མིག་གིས་གཟུང་བྱ་ཉིད་སྒྲུབ་བྱེད་ཡིན་པར་འགྱུར་བ་ཆོས་ཅན་སྒྲ་ལ་ཚོགས་པ་གྲུབ་པར་ཡང་མ་ཡིན་ནོ། །འོ་ན་བདག་ཉིད་ཀྱི་སྒྲུབ་བྱེད་ཡིན་ནོ་སྙམ་ན། དེ་ཉིད་ནི་ཞེས་གསུངས་ཏེ། ཚིག་དང་བཅས་པ་མིག་གིས་གཟུང་བྱའི་མཚན་
ཉིད་ཀྱི་དོན་ཏོ། །རང་གི་ཚིག་དང་བཅས་པའི་མིག་གིས་གཟུང་བྱ་ནི་བདག་ཉིད་ཀྱི་སྒྲུབ་པར་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །སྒྲ་འབའ་ཞིག་ཀྱང་སྒྲུབ་པར་བྱེད་པ་མ་ཡིན་ནོ་ཞེས་གསུངས་པ་ནི་སྒྲའི་ཕུར་མ་ཞེས་བྱ་བའོ། །མེ་བསྒྲུབ་པར་བྱ་བ་ལ་ཡང་དུ་བ་ཡོད་པའི་ཕྱིར་ཞེས་བྱ་བའི་ཚིག་ཙམ་ནི་
སྒྲུབ་བྱེད་མ་ཡིན་གྱི། འོན་ཀྱང་ཕྱི་རོལ་གྱི་དོན་ཉིད་ཡིན་ཏེ། སྒྲ་རྣམས་ཕྱིའི་དོན་དང་འབྲེལ་པ་མེད་པའི་ཕྱིར་རོ། །འོ་ན་སྒྲ་གང་གི་སྒྲུབ་པར་བྱེད་པ་ཉིད་ཡིན་སྙམ་ན། བསམ་པ་ཞེས་བྱ་བ་སྨོས་སོ། །འོན་ཏེ་ཞེས་བྱ་བ་ནི་སྒྲ་བསམ་པའི་སྒྲུབ་པར་བྱེད་པ་ནི་མ་ཡིན་གྱི། འོན་ཀྱང་མེ་ལ་སོགས་པ་
เล่ม ๑๘๖ · หน้า 38a
དོན་ཉིད་ཀྱི་ཡིན་ནོ་ཞེས་བྱ་བའོ། །དེ་ཉིད་ཀྱིས་ཞེས་བྱ་བ་ནི་དམ་བཅའ་བའི་ཚིག་ཉིད་ཀྱིས་སོ། །དེས་ན་གཏན་ཚིགས་ཀྱི་ཚིག་དོན་མེད་དོ་ཞེས་དགོངས་པའོ། །དེ་ལས་བྱ་བ་ནི་དམ་བཅའ་བའི་ཚིག་ལས་སོ། །གཞན་དག་བརྗོད་པ་ཞེས་བྱ་བ་ནི་རིགས་པའི་སྒོའི་ཊཱི་ཀ་བྱེད་པའོ། །
འོ་ན་ཅི་ལྟར་མ་ངེས་པ་སྤོང་སྙམ་ན་དེ་ནི་ཞེས་བྱ་བའོ། །མ་ངེས་པ་དེའོ། །འདི་ནི་སྔར་བཤད་ཟིན་ཏེ་ཞེས་བྱ་བ་ནི་རང་གི་དོན་གྱི་རྗེས་སུ་དཔག་པར་རོ། །དེ་ཉིད་བརྗོད་པ་ནི་འདོན་པ་ནི་ཞེས་བྱ་བའོ། །འདི་ནི་ཞེས་བྱ་བ་ནི་རིག་བྱེད་ཀྱི་ཁྱད་པར་ཅན་ཡིན་པའི་ཕྱིར་རོ་འདི་ནི་ལན་མ་ཡིན་པའོ། །དེ་ལྟ་མ་ཡིན་
ན་ཞེས་བྱ་བ་ནི་མི་མཐུན་པའི་ཕྱོགས་དང་མི་འགལ་བའི་བར་ཡང་མི་མཐུན་པའི་ཕྱོགས་ལས་ཟློག་པར་བྱེད་པ་ཉིད་དུ་ཁས་ལེན་ན། དེ་ལྟ་བུ་མ་ཡིན་ན་ཞེས་བྱ་བ་སུས་བརྗོད་པར་མི་ནུས། འདི་ལྟར་སྒྲ་ནི་མི་རྟག་སྟེ་གཞལ་བྱ་ཡིན་པའི་ཕྱིར་ཞེས་བརྗོད་པ་ནི། གལ་ཏེ་ཕ་རོལ་ནམ་མཁས་འཁྲུལ་པར་བརྗོད་
ན། དེའི་ཚེ་ནམ་མཁའ་མ་ཡིན་པ་ཞེས་བརྗོད་པར་བྱའོ། །ཡང་ཕྱོགས་ལ་སོགས་པས་འཁྲུལ་པར་བརྗོད་ན། ཕྱོགས་མ་ཡིན་པ་ཞེས་སོ། །དེ་ལྟ་ཡིན་དང་གཞལ་བྱ་ཉིད་ཀྱང་སྒྲུབ་བྱེད་དུ་འགྱུར་རོ། །དམ་བཅའ་བ་སྒྲུབ་པར་བྱེད་པ་མེད་པ་ལ་ཡང་ཉེས་པ་ཅི་ཡོད་སྙམ་ན། དམ་བཅའ་བར་སྒྲུབ་
པར་བྱེད་པ་ཡིན་པ་ལ་ཞེས་བྱ་བའོ། །དེ་ཕྱོགས་ཡིན་ནམ་ཞེས་བྱ་བ་ནི་གཏན་ཚིགས་ལས་གོ་བར་བྱེད་པ་ཉིད་ཕྱོགས་སུ་བརྗོད་པ་ཡིན་ལ། གོ་བར་བྱེད་པ་དེ་ཡང་གྲུབ་པ་མ་ཡིན་ནམ། གྲུབ་པ་ཡིན་ཞེས་བྱ་བའི་དཔྱད་པ་འདིས་ཅི་བྱ། ཅི་ལྟར་སྒྲུབ་པར་བྱ་བ་ཉིད་དམ། གྲུབ་པ་ཉིད་དུ་རྟོགས་པ་དེ་
ལྟར་འགྱུར་རོ། །བསྒྲུབ་པར་བྱ་བ་དང་ཅིག་ཤོས་ཞེས་ཟླས་དབྱེ་སྟེ། དེ་དག་ལ་ལོག་པར་ཏེ་བསྒྲུབ་པར་བྱ་བ་ལ་ལོག་པར་བསྒྲུབ་བྱ་མ་ཡིན་པ་དང་། ཅིག་ཤོས་བསྒྲུབ་བྱ་མ་ཡིན་པ་ལ་བཟློག་པ་བསྒྲུབ་པར་བྱ་བ་ཉིད་དེ། ཡུལ་དེ་ལ་བསྒྲུབ་པར་བྱ་བ་ལ་བསྒྲུབ་པར་བྱ་བ་མ་ཡིན་པ་དང་། བསྒྲུབ་
པར་བྱ་བ་མ་ཡིན་པ་ལ་ནི་བསྒྲུབ་པར་བྱ་བ་ཡིན་ནོ་ཞེས་ལོག་པར་རྟོགས་པའོ། །ལོག་པར་རྟོགས་པ་ཉིད་སྟོན་པ་ནི་འདི་ལྟར་ཞེས་བྱ་བའོ། །གཞན་གྱི་དོན་ཙམ་ཞེས་བྱ་བ་ནི་མིག་ལ་སོགས་པ་གཞན་གྱི་དོན་བྱེད་པ་ཙམ་ནི་གྲངས་ཅན་གྱིས་བསྒྲུབ་པར་བྱ་བ་མ་ཡིན་ཏེ། བདག་གི་དོན་བསྒྲུབ་པར་བྱ་
เล่ม ๑๘๖ · หน้า 38b
ཡིན་པའི་ཕྱིར་རོ། །དེ་ལྟ་ན་ཡང་རྗེས་སུ་འགྲོ་བ་མེད་པའི་ཉེས་པ་སྤང་བའི་དོན་དུ་གྲངས་ཅན་གྱིས། གཞན་ཙམ་ཞིག་སྒྲུབ་པར་བྱེད་པར་སྨྲས་པ་ཡིན་ནོ། །བདག་གི་དོན་གྱི་བསྒྲུབ་པར་བྱ་བ་ཡིན་ཡང་བསྒྲུབ་པར་བྱ་བ་མ་ཡིན་པར་སྨྲ་སྟེ། སངས་རྒྱས་པ་ལ་དཔེ་མ་གྲུབ་པའི་ཕྱིར་རོ། །བསྟན་
བཅོས་ལས་གྲུབ་པ་ཡང་ཞེས་བྱ་བ་ནི། ནམ་མཁའི་ཡོན་ཏན་ཉིད་ལ་སོགས་པ་བསྟན་བཅོས་ལས་གྲུབ་པ་ཡང་བསྒྲུབ་པར་བྱ་བ་ཡིན་པར་སྨྲ་བའོ། །ཁས་མ་བླངས་ཀྱང་ཞེས་བྱ་བ་ནི་རྒོལ་བས་ཁས་མ་བླངས་ཀྱང་ངོ་། །གང་གི་ཕྱིར་དེ་སྲིད་ཀྱི་ལོག་པར་རྟོགས་པ་ཡོད་པའི་གཏན་ཚིགས་དེ་བས་ན་
ལོག་པར་རྟོགས་པ་དེ་བསལ་བའི་ཕྱིར་རོ། །ཕྱིན་ཅི་ལོག་དེ་ཞེས་བྱ་བ་ནི། མ་གྲུབ་པ་ལ་སོགས་པ་དེ་དག་ལས་བཟློག་པ་གྲུབ་པ་ལ་སོགས་པ་བསལ་བར་རིག་པར་བྱའོ། །གང་གིས་དེ་བསལ་ནས་མཚན་ཉིད་བརྗོད་པ་གྲུབ་པ་ལ་སོགས་པ་བསྒྲུབ་པར་བྱ་བ་མ་ཡིན་པ་ཉིད་ཅིའི་ཕྱིར་ཞེ་ན། དེ་ལ་
ཞེས་གསུངས་ཏེ་བསལ་བ་ལའོ། །རིགས་སྟོན་པ་ཉིད་ནི་གལ་ཏེ་ཞེས་བྱ་བའོ། །དོན་འདི་ཞེས་བྱ་བ་ནི་དབང་ཕྱུག་ལ་སོགས་པའོ། །གཞན་ཕྱིར་རྒོལ་བ་ལ་བསྟན་བཅོས་ཚད་མ་མ་ཡིན་པ་དེས་ན་ཚད་མ་གཞན་དག་ནི་གཞན་དེའི་དོན་དུ་ཡིན་ནོ་ཞེ་ན། ལན་ནི་བདག་ཉིད་ཅེས་བྱ་བའོ། །
ཁས་བླངས་པ་ཞེས་བྱ་བ་ནི་དགོས་པའོ། །ལན་འདེབས་པ་ནི་གཞན་གྱིས་ཞེས་བྱ་བའོ། །གལ་ཏེ་རྒོལ་བས་ཁས་བླངས་པས་བསྟན་བཅོས་ཚད་མ་ཡིན་ན་དེའི་ཚེ་ཕྱིར་རྒོལ་བས་ཀྱང་བསྟན་བཅོས་ཁས་བླང་བར་བྱའོ། །དེ་ལྟར་རང་གི་སྒྲའི་རྣམ་པར་གཅོད་པ་བརྗོད་ནས། ཁོ་ནའི་སྒྲའི་
རྣམ་པར་གཅད་པ་བརྗོད་པ་ནི། དེ་བཞིན་དུ་ཞེས་བྱ་བའོ། །དེ་ནི་མིག་གིས་གཟུང་བ་ཉིད་དོ། །འདོད་པའི་སྒྲའི་རྣམ་པར་གཅད་པར་བྱ་བ་ལ། རིགས་པ་བརྗོད་པ་ནི་དོན་བརྗོད་པ་ཞེས་བྱ་བའོ། །དོན་གྱི་བརྗོད་པ་ཕྱིར་རྒོལ་བ་ལ་བསྒྲུབ་པར་བྱ་བ་མ་ཡིན་ན་ཕྱིར་རྒོལ་བ་དག་གི་དོན་ཤེས་པ་ཉིད་
དུ་མི་འགྱུར་རོ། །གཞན་དུ་ཡང་ཞེས་བྱ་བ་ནི་དངོས་སུ་བརྗོད་པའི་གཞན་གྱི་དོན་ཙམ་ལ་ཡང་གྲུབ་པ་ལ་སྒྲུབ་པ་ཉིད་དུ་འགྱུར་རོ། །དོན་གྱིས་བརྗོད་པ་ཅི་ལྟར་ངེས་ཤེ་ན་སྐབས་དང་ཞེས་བྱ་བའོ། །གལ་ཏེ་ཕྱིར་རྒོལ་བ་སྐབས་མངོན་པར་མི་ཤེས་པ་གང་ཡིན་པ་དེ་ལ་ལྟོས་ནས་དོན་གྱི་བརྗོད་པ་བསྒྲུབ་
เล่ม ๑๘๖ · หน้า 39a
པར་བྱ་བ་མ་ཡིན་པ་ཁོ་ནའོ་ཞེ་ན། སྐབས་མི་ཤེས་པས་ནི་ཞེས་བྱ་བའོ། །གལ་ཏེ་སྐབས་ལ་སོགས་པ་ལས་དོན་ངེས་པ་ཡིན་ནོ་ཞེས་བྱ་བ་འདི་ཁྱེད་ཉིད་ཀྱི་འདོད་པ་མ་ཡིན་ནམ་སྙམ་ན། དེ་སྐད་དུ་ཡང་ཞེས་བྱ་བའོ། །སྐབས་ལ་སོགས་པ་ལས་དོན་ངེས་པ་འདི་ནི་ཐམས་ཅད་འདོད་པ་
ཡིན་ནོ་ཞེས་བྱ་བའི་དོན་ཏོ། །སྐབས་སུ་གཞན་བབ་ལ་ཞེས་བྱ་བ་ནི་བདག་གི་དོན་ཉིད་དོ། །བསྒྲུབ་པར་བྱ་བ་གཞན་ཡིན་ན་ཞེས་བྱ་བ་ནི་གཞན་གྱི་དོན་ཙམ་མོ། །དེ་ལ་ནི་རྒོལ་བ་ལའོ། །འཆད་པ་ནི་གལ་ཏེ་ཞེས་བྱ་བའོ། །རྒོལ་བ་འདི་དེ་སྐབས་སུ་བབ་པ་ཡིན་ཡང་བདག་ནི་བསྒྲུབ་པར་བྱ་བ་མ་ཡིན་ནོ་ཞེས་བདག་ཉིད་
སྨྲ་ན། དེའི་ཚེ་རྒོལ་བ་དེས་བདག་ཉིད་ལ་སྐབས་སུ་མ་བབ་པ་བརྗོད་པའི་སྒོ་ནས་སྐྱོན་བརྗོད་པར་འགྱུར་རོ། །ཕ་རོལ་གྱིས་སྨྲས་པ། རྒོལ་བ་དེ་ལ་སྐྱོན་ཡོད་མོད། ཕྱིར་རྒོལ་བ་སངས་རྒྱས་པ་ལ་ཡང་སྐྱོན་ཡོད་པ་ཉིད་དོ་ཞེས་འབྲེལ་ཏོ། །ཅི་ལྟར་ཞེ་ན་ཡང་དག་པའི་སྐྱོན་མི་བརྗོད་པས་སོ། །ལན་ནི་མ་ཡིན་ཏེ་ཞེས་བྱ་
བའོ། །གལ་ཏེ་དོན་བསྟན་པས་ཞེས་བྱ་བ་ནི་གལ་ཏེ་འདི་ལྟར་བསྒྲུབ་པར་བྱ་བ་ཡིན་ནོ་ཞེས་བྱ་བ་འདིས་སོ། །འདི་ཉིད་གསལ་བར་བྱ་བའི་ཕྱིར་བཤད་པ་ནི་ཅི་སྐད་དུ་བྱ་བ་སྟེ་རྩ་བའི་སློབ་དཔོན་གྱིས་སོ། །གལ་ཏེ་འདོད་པས་ཁྱབ་པ་ཞེས་བྱ་བ་ལ་སོགས་པས་ནི་གཞན་འདོད་ཐམས་ཅད་ཅེས་བྱ་བ་ལ་སོགས་པའོ་
རྣམ་འགྲེལ་ལ་འཇུག་པའོ། །འོ་ན་ནི་ཞེས་བྱ་བ་ནི་རྩོད་པ་གཉིས་པའོ། །མ་བརྗོད་པ་དང་བསྒྲུབ་པར་བྱ་བ་ཉིད་དུ་བསྟན་པའི་ཕྱིར་འབའ་ཞིག་གི་འདོད་པ་བཟློག་པའི་དོན་དུ་ཡང་ཡིན་ནོ། །འདིས་ནི་འདོད་པ་སྨོས་པའི་རྒོལ་བ་གཉིས་བསྟན་ནས་གཉིས་པ་མི་འཐད་དོ་ཞེས་བརྗོད་པ་ནི། མི་འདོད་པ་ཞེས་བྱ་བ་ནི་ཞེས་བྱ་
བའོ། །ཕྱོགས་གཉིས་པ་གསལ་བ་ན་ཕྱོགས་དང་པོ་ཉེ་བར་སྡུད་པ་ནི་དེ་ན་ཞེས་བྱ་བའོ། །དེ་ལ་ཞེས་བྱ་བ་ནི་འདོད་པ་སྨོས་པ་ནའོ། །དེས་ན་བསྟན་བཅོས་བྱེད་པའི་འདོད་པ་བཟློག་པའི་དོན་དུ་རང་ཉིད་སྨོས་པར་བྱ་བ་མ་ཡིན་ནོ་ཞེས་བརྗོད་པ་ནི། གལ་ཏེ་ཞེས་བྱ་བའོ། །དེ་ཞེས་བྱ་བ་བསྟན་བཅོས་བྱེད་པའི་འདོད་པ་ལྡོག་
པའོ། །རྩོད་པ་སྨྲ་བ་ཉིད་དོགས་པ་བསུ་བར་བྱེད་པ་ཉིད་འདོད་པ་མ་ཡིན་ནོ་ཞེས་བྱ་བ་སྟེ་བསྟན་བཅོས་བྱེད་པ་འདོད་པ། རྒོལ་བའི་འདོད་པ་ལ་ཡིན་པ་ཉིད་ན་རང་ཉིད་སྨོས་པས་ལྡོག་གོ། །དེ་ཉིད་ཀྱིས་ཞེས་བྱ་བ་ནི་འདོད་པ་སྨོས་པ་ཉིད་ཀྱིས་སོ། །དེ་ལྟར་འདོད་པ་སྨོས་པ་ཉིད་ཀྱིས་ཕྱིར་རྒོལ་བ་དང་། ཉན་པ་པོ་དང་
เล่ม ๑๘๖ · หน้า 39b
བསྟན་བཅོས་བྱེད་པའི་འདོད་པ་བསྒྲུབ་བྱ་ཡིན་པ་བཟློག་པའི་ཕྱིར་རང་ཉིད་སྨོས་པ་དོན་མེད་དེ་ཞེས་བསྟན་ནས། རང་ཉིད་སྨོས་པ་ཉིད་ཀྱིས་གཞན་འདོད་པ་མཐའ་དག་བཟློག་པར་གྲུབ་པ་ན་སློབ་དཔོན་གྱིས་བསྟན་བཅོས་བྱེད་པའི་འདོད་པ་བཟློག་པ་ཙམ་འབྲས་བུར་བརྗོད་ཅེས་སྨྲ་བ་ནི། རང་ཉིད་སྨོས་པས་ཞེས་བྱ་བའོ། །
དགོས་པ་འདི་གཞུང་གང་གིས་བརྗོད་སྙམ་ན་རང་ཉིད་ཅེས་བྱ་བ་ནི་ཞེས་བྱ་བའོ། །འདི་ལ་ཞེས་བྱ་བ་ནི། གལ་ཏེ་འདོད་པས་ཞེས་བྱ་བ་ལ་སོགས་པའི་རྩོད་པ་ལའོ། །སྒྲ་བཤད་པ་ཞེས་བྱ་བ་ནི་སློབ་དཔོན་ཕྱོགས་ཀྱི་གླང་པོས་སོ། །གལ་ཏེ་འགྲེལ་པ་དེའི་དོན་དུ་ཡིན་ཡང་དོན་ནི་དོན་གཞན་ཡིན་ནོ་སྙམ་ན། འདི་ནི་དེ་
དོན་བྱས་པ་ཡིན་ཞེས་གསུངས་ཏེ། དེའི་དོན་ཞེས་བྱ་བ་བསྟན་བཅོས་བྱེད་པའི་འདོད་པ་བཟློག་པར་བསྟན་པའི་འབྲས་བུར་རོ། །ཡང་ན་རང་ཉིད་སྨོས་པས་གཞན་གྱི་འདོད་པ་ཐམས་ཅད་བཟློག་པའི་ཕྱིར་ན། བསྟན་བཅོས་བྱེད་པའི་འདོད་པ་བཟློག་པ་ཁོ་ན་དེའི་དགོས་པ་ཡིན་ནམ་ཞེས་དགོས་ན། འདི་ནི་ཞེས་བྱ་
བའོ། །བསྟན་བཅོས་བྱེད་པའི་འདོད་པ་བཟློག་པའི་འབྲས་བུ་དེ་ག་ལ་ཡོད་པ་དེ་ལ་དེ་སྐད་ཅེས་བརྗོད་དོ། །དེ་ལྟ་མ་ཡིན་ན་ཞེས་བྱ་བ་ནི་བསྟན་བཅོས་བྱེད་པའི་འདོད་པ་རྒོལ་བའི་འདོད་པ་མ་ཡིན་ན་བསྟན་བཅོས་དང་འགལ་བའི་གཏན་ཚིགས་གོ་བར་བྱེད་པ་མ་ཡིན་ནོ། །གང་གི་ཕྱིར་རྣམ་པ་དེ་འདྲ་བར་འདོད་པའི་
གཏན་ཚིགས་དེས་ནའོ། །མཇུག་བསྡུ་བའི་སྒོ་ནས་འདི་ནི་དེའི་དོན་བྱས་པ་ཡིན་ཞེས་བྱ་བ་རྣམ་པར་འགྲེལ་བས། རང་ཉིད་སྨོས་པས་ཀྱང་ཞེས་བྱ་བའི་རྩོད་པའི་ལན་འདེབས་པ་ནི། དེ་ཉིད་ཀྱི་ཕྱིར་ཞེས་བྱ་བ་སྟེ། དོགས་པའི་གནས་བཟློག་པ་ཉིད་ཀྱི་ཕྱིར་རོ། །འོ་ན་གཞན་གྱི་འདོད་པ་ཅི་ལྟར་ལྡོག་སྙམ་ན།
གཞན་གྱིས་ཞེས་བྱ་བའོ། །གང་གི་ཕྱིར་གཞན་གྱི་འདོད་པ་ལྡོག་པ་ལ་ལོག་པར་རྟོགས་པ་མེད་པས་འབད་པ་མེད་པ་ཁོ་ནར་གྲུབ་པ་དེའི་ཕྱིར་འདོད་པའོ། །དེ་ཉིད་ཡིན་ཏེ་ཞེས་བྱ་བ་ནི་བསྟན་བཅོས་བྱེད་པའི་འདོད་པ་བཟློག་པ་ཉིད་དོ། །དེ་ཉིད་བརྗོད་པ་ནི་མ་བརྗོད་ཀྱང་ཞེས་བྱ་བའོ། །གང་དུ་རྣམ་པ་འདི་ལྟ་བུ་
བསྒྲུབ་བྱ་ཡིན་པར་འདོད་སྙམ་ན། འདོད་པ་སྨོས་པས་ནི་ཞེས་བྱ་བའོ། །གལ་ཏེ་ཞེས་བྱ་བ་ལ་སོགས་པས་ནི་རྣམ་འགྲེལ་ལ་འཇུག་པར་བྱེད་པའོ། །དེ་ནི་ཞེས་བྱ་བ་ནི་འདས་པ་མ་ཡིན་པའི་གཞན་གྱི་དོན་བྱེད་པའི་མཚན་ཉིད་དོ། །ཆོས་དང་ཆོས་ཅན་དག་གི་ཞེས་བྱ་བ་ལ། ཆོས་གཞན་གྱི་དོན་བྱེད་པ་
เล่ม ๑๘๖ · หน้า 40a
ཙམ་དང་། ཆོས་ཅན་མིག་ལ་སོགས་པའིའོ། །གལ་ཏེ་ཁྱད་པར་འདི་བསྒྲུབ་བྱ་ཉིད་ཡིན་ན་དེའི་ཚེ་ཅི་ལྟར་ཁྱད་པར་དུ་འགྱུར། གང་དུ་ཡང་ཁྱད་པར་ནི་བསྒྲུབ་པར་བྱ་བ་མ་ཡིན་ཏེ། སྤྱི་བསྒྲུབ་པར་བྱ་བ་ཡིན་པའི་ཕྱིར་རོ། །འོན་ཏེ་བསྒྲུབ་པར་བྱ་བ་དང་ཁྱད་པར་དག་གཅིག་པའི་ཕྱིར་ན་
ཁྱད་པར་ཡང་བསྒྲུབ་པར་བྱ་བ་ཁོ་ནའོ་ཞེ་ན། བསྒྲུབ་པར་བྱ་བ་དང་ཞེས་སོ། །དེའི་ཕྱིར་ཁྱད་པར་བསྒྲུབ་བྱ་མ་ཡིན་པས་ན་དེ་ཅི་ལྟར་འདོད་པ་སྨོས་པས་འདི་སྒྲུབ་པར་བྱེད། འོ་ན་ཁྱད་པར་བསྒྲུབ་པར་བྱ་བ་མ་ཡིན་པ་ཁོ་ནའོ་ཞེ་ན། སློབ་དཔོན་གྱིས་ཞེས་སྨོས་སོ། །གལ་ཏེ་ཁྱད་པར་བསྒྲུབ་པར་བྱ་བ་མ་ཡིན་ན་དེའི་
ཚེ་ཆོས་ཀྱི་ཁྱད་པར་ཕྱིན་ཅི་ལོག་ཏུ་བསྒྲུབ་པའི་ཕྱིར་འགལ་བ་ཡིན་ནོ་ཞེས་སློབ་དཔོན་ཕྱོགས་ཀྱི་གླང་པོ་ཅི་ལྟར་གསུང་པར་འགྱུར། སོགས་པའི་སྒྲས་ནི་ཆོས་ཅན་གྱི་ཁྱད་པར་ཕྱིན་ཅི་ལོག་པར་ཞེས་བྱ་བ་ལ་སོགས་པའོ། །དེས་ན་ཁྱད་པར་ཡང་བསྒྲུབ་པར་བྱ་བ་ཡིན་པར་འདོད་དོ་ཞེས་རྟོགས་པ་ཡིན་ན། རིགས་པ་
ཡང་མ་ཡིན་ཏེ། སྔར་བརྗོད་པའི་ཉེས་པ་ཡོད་པའི་ཕྱིར་རོ། །དེ་ནས་ཁྱད་པར་གྱི་སྒོ་ནས་ནི་རྗེས་སུ་འགྲོ་བ་མེད་པ་ལ་སོགས་པའི་ཉེས་པར་མི་འགྱུར་རོ་ཞེས་བསམས་པའོ། །དེ་བཤད་པ་ཞེས་བྱ་བ་ནི། གང་གི་ཕྱིར་གཞན་གྱི་ལན་འདི་ཡིན་པ་དེས་ན་བརྗོད་པའོ། །འདུས་པ་མ་ཡིན་པ་གཞན་གྱི་དོན་བྱེད་པའི་
མཚན་ཉིད་ཁྱད་པར་དེ་ནི། སློབ་དཔོན་ཕྱོགས་ཀྱི་གླང་པོ་བརྗོད་པ་ཙམ་བསྒྲུབ་པར་བྱ་བར་ཡིན་པར་སྨྲ་བ་ལ་ལྟོས་ནས་ཆོས་དང་ཆོས་ཅན་དག་གི་ཁྱད་པར་ཡིན་པར་བརྗོད་ཀྱི་དོན་དམ་པར་ནི་འདི་འདོད་པས་ཡུལ་དུ་བྱས་པ་ཡིན་པའི་ཕྱིར་བསྒྲུབ་པར་བྱ་བ་ཁོ་ནའོ། །ཅི་ལྟར་གཞན་ལ་ལྟོས་ནས་བསྒྲུབ་པར་བྱ་བ་ཁྱད་པར་
དུ་བརྗོད་ཅེ་ན། ཤེས་རབ་ཤིན་ཏུ་ཞེས་བྱ་བའོ། །ཕ་རོལ་གྱིས་ནི་གྲངས་ཅན་གྱིས་སོ། །དེ་དོན་ནི་བདག་གི་དོན་ཏོ། །དེ་བསྒྲུབ་མིན་ཞེས་བྱ་བ་ནི་བདག་གི་དོན་ཉིད་བསྒྲུབ་པར་བྱ་བ་མ་ཡིན་ཏེ། གཞན་གྱི་དོན་ཉིད་བསྒྲུབ་པར་བྱ་བ་ཡིན་པའི་ཕྱིར་རོ། །དེས་བདག་དཔེ་ལ་མ་གྲུབ་ཀྱང་ཉེས་པ་མ་ཡིན་ནོ་ཞེས་གཞན་དག་
སེམས་ན། ལན་ནི་འོ་ན་ཞེས་བྱ་བའོ། །གཞན་གྱི་དོན་དེའི་ཁྱད་པར་བདག་ནི་དོན་གྱི་མཚན་ཉིད་ཡིན་པར་འགྱུར་རོ། །བདག་ནི་ཞེས་བྱ་བ་ནི་རྣམ་པར་འགྲེལ་པའོ། །གལ་ཏེ་བདག་གི་དོན་བསྒྲུབ་བྱ་མ་ཡིན་གྱི། འོན་ཀྱང་གཞན་གྱི་དོན་ཙམ་བསྒྲུབ་པར་བྱ་བ་ཡིན་ན་དེའི་ཚེ་བདག་གི་དོན་གྱི་མཚན་ཉིད་ཁྱད་པར་
เล่ม ๑๘๖ · หน้า 40b
དེ་གཞན་གྱི་དོན་ཙམ་དེའི་ཁྱད་པར་ཡིན་པར་འགྱུར་རོ། །དེས་ན་འདུས་པ་ཡིན་པའི་ཕྱིར་ཞེས་བྱ་བའི་གཏན་ཚིགས་ནི་ཁྱད་པར་དང་འགལ་བར་འགྱུར་ཏེ། འདུས་པ་མ་ཡིན་པའི་གཞན་གྱི་དོན་ལས་བཟློག་པ་བསྒྲུབ་པའི་ཕྱིར་རོ། །བདག་གི་དོན་བསྒྲུབ་པར་བྱ་བ་ཡིན་ནམ། གཞན་གྱི་དོན་ཙམ་ཡིན། ཕྱོགས་
དང་པོ་ལ་ནི་འགྲོ་བ་མེད་པའོ། །གཉིས་པ་ལ་ནི་ཁྱད་པར་དང་འགལ་བའོ། །སྨས་པ་ཙམ་བསྒྲུབ་པར་བྱ་བ་ཡིན་ནོ་ཞེས་སྤྱིར་བརྗོད་དོ། །དེ་ལྟ་ན་ཡང་གཞན་གྱི་དོན་ཉིད་སྒྲུབ་པར་བྱེད་པས་མ་འདུས་པ་གཞན་གྱི་དོན་བྱེད་པ་ཉིད་མ་སྨྲས་ཀྱང་བསྒྲུབ་པར་བྱ་བར་འདོད་པའི་ཕྱིར་གྲངས་ཅན་གྱི་སྔ་ཕྱི་འགལ་ལོ། །བསྒྲུབ་
བྱ་ཉིད་དུ་ཞེས་བྱ་བ་ནི་སློབ་དཔོན་ཕྱོགས་ཀྱི་གླང་པོ་འདོད་པས་ཡུལ་དང་བྱས་པ་མ་སྨྲས་པ། གཞན་གྱི་ལུགས་ལ་མ་ལྟོས་པར་རང་གི་གྲུབ་པའི་མཐའ་ཁོ་ན་ལ་གནས་ནས་བསྒྲུབ་པར་བྱ་བ་ཉིད་དུ་ཅི་ལྟར་མི་བསྒྲུབ་པར་མི་བྱེད། སྐབས་སུ་མ་བབ་པ་བརྗོད་པ། ཆོས་ཀྱི་ཁྱད་པར་ལས་བཟློག་པ་བསྒྲུབ་པའི་ཕྱིར་
འགལ་བ་ཡིན་ནོ་ཞེས་བྱ་བ་ལ་སོགས་པ་བརྗོད་པས་ཅི་བྱ་ཞེས་བྱ་བའི་དོན་ཏོ། །འགོག་པ་ནི་མ་ཡིན་ཏེ་ཞེས་བྱ་བའོ། །གཞན་ལ་ཏེ་གྲངས་ཅན་ལ་ལྟོས་ནས་སོ། །གྲངས་ཅན་ནི་སྨྲས་པ་ཙམ་བསྒྲུབ་བྱ་ཡིན་པར་དམ་བཅས་ནས་མ་སྨྲས་པ་ཡང་སྒྲུབ་པར་བྱེད་དེ། དེས་ན་དེའི་བསམ་པ་ལ་ལྟོས་པ་ཁོ་
ནས་ཉེས་པ་བརྗོད་པ་ཡིན་ནོ། །དེ་ཙམ་གྱིས་ཞེས་བྱ་བ་ནི་གཞན་ལ་ལྟོས་ནས་ལན་འདེབས་པའི་བསམ་པ་ཙམ་གྱིས་གཞན་བཟློག་པ་གྲུབ་པ་ན། རང་གི་ཕྱོགས་མ་སྨྲས་ཀྱང་བསྒྲུབ་པར་བྱ་བ་ཡིན་ནོ་ཞེས་བྱ་བ་དེ་ལྟ་བུའི་རང་བཞིན་བསྒྲུབ་པའི་དོན་དུ་སྒྲུབ་པར་བྱེད་པ་འགོད་པའི་འབད་པ་བྱས་པས་ཅི་
བྱ། རྣམ་འགྲེལ་ལ་འཇུག་པའི་དོན་དུ་སྐབས་ཀྱི་གཞི་འདི་ངེས་པ་ནི་ད་ནི་ཞེས་བྱ་བའོ། །གལ་ཏེ་དེ་བསྒྲུབ་པར་བྱ་བ་ཉིད་དུ་མ་བསྟན་ན་ད་ནི་ཅི་ལྟར་ཞེས་བྱ་བའོ། །འོ་ན་ཅི་ཞིག་བསྒྲུབ་པར་བྱ་བ་ཡིན་ཞེ་ན། བརྗོད་པ་ཡིན་པའི་ཕྱིར་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་མ་བརྗོད་པ་ལ་བསྒྲུབ་པར་བྱ་བ་ཉིད་ཡིན་
ནའོ། །དེ་ཉིད་གསལ་བར་བྱེད་པ་ནི། མ་བརྗོད་པ་ཞེས་བྱ་བའོ། །ཐམས་ཅད་བསྒྲུབ་བྱ་ཡིན་མོད་ཅི་སྐྱོན་སྙམ་ན། ཐམས་ཅད་ཅེས་བྱ་བའོ། །འདིས་ནི་དཔེ་བསྒྲུབ་པར་བྱ་བ་མ་ཚང་བ་བརྗོད་དོ། །དེ་ལྟ་ཡིན་དང་གཏན་ཚིགས་ཀྱི་སྐྱོན་དུ་ཡང་འགྱུར་རོ་ཞེས་བརྗོད་པ་ནི་དེ་ལྟ་ན་ནི་ཞེས་བྱ་བའོ། །ཅི་ཞིག་
เล่ม ๑๘๖ · หน้า 41a
བཤད་སྙམ་ན་བདག་གཞན་ཞེ་ན་ཞེས་བྱ་བའོ། །གྲངས་ཅན་འདིས་གཞན་གྱི་དོན་ཙམ་དེ་ཉིད་དོ། །འདིར་ནི་བསྒྲུབ་པའི་ཚིག་ལའོ། །འདི་ཞེས་བྱ་བ་ནི་བདག་གི་དོན་གྱི་མཚན་ཉིད་དོ། །དམ་པ་སྟེ་མཁས་པ་འགྲོ་བའི་ཚུལ་ལུགས་ལ་གནས་པ་དག་ནི་གང་གིས་མཐར་ཐུག་སྟེ། སྒྲ་རྣམས་ཅི་
ཙམ་ཞིག་ལ་ཕྱོགས་བརྟགས་ནས་ངག་གི་དོན་ངེས་པར་བྱ་བ་ལ་འཇུག་གི་གཞན་དུ་ནི་མ་ཡིན་པའོ། །གང་ལ་དེ་ལྟར་འཇུག་སྙམ་ན། མཁས་པའི་ཞེས་བྱ་བའི་སྐབས་སུ་བབ་པ་ལ་ངག་གི་དོན་གང་ཡིན་ཞེས་དོགས་པ་བཟློག་པས་རྣམ་འགྲེལ་གྱི་ཕྱེད་སྔ་མ་རྣམ་པར་འགྲེལ་པ་ནི། མིག་ལ་སོགས་པ་ཞེས་བྱ་
བའོ། །ཕྱེད་ཕྱི་མ་རྣམ་པར་འགྲེལ་པ་ནི། དེ་ཉིད་ཀྱི་ཕྱིར་ཞེས་བྱ་བའོ། །དེ་ལ་ཏེ་བདག་གི་དོན་ལ་ལྟོས་ནས་སོ། །དེ་ཞེས་བྱ་བ་བདག་གི་དོན་ཏོ། །འོན་ཏེ་སུན་འབྱིན་པ་འདི་ནི་སློབ་དཔོན་བཞེད་པ་མ་ཡིན་ནོ་ཞེ་ན། སློབ་དཔོན་གྱིས་ཞེས་བྱ་བའོ། །ཅི་ལྟར་ཞེས་བྱ་བ་ནི་སྐབས་སུ་བབ་པ་ཡང་མ་ཡིན་ལ་བསྒྲུབ་
པར་བྱ་བ་ཡང་མ་ཡིན་ནོ་ཞེས་བྱ་བའི་དོན་ཏོ། །གཞན་དུ་ཞེས་བྱ་བ་ནི་གལ་ཏེ་གང་ལ་རྩོད་པས་སྒྲུབ་པ་བཀོད་པའི་འདུས་པ་མ་ཡིན་པ་གཞན་གྱི་དོན་དེ་བསྒྲུབ་པར་བྱ་བ་མ་ཡིན་ན། དེའི་ཚེ་མི་འདོད་པ་འགལ་བར་འགྱུར་ཏེ། འདུས་པ་གཞན་གྱི་དོན་བསྒྲུབ་པའི་ཕྱིར་རོ། །འོན་ཏེ་ཉེས་པ་འདིས་འཇིགས་ནས་གཞན་
གྱི་དོན་བྱེད་པ་ཙམ་ཞིག་སྒྲུབ་པར་བྱེད་ན། དེའི་ཚེ་འབྲས་བུ་མེད་པ་ཉིད་དུ་འགྱུར་ཏེ། གྲུབ་པ་ལ་བསྒྲུབ་པའི་ཕྱིར་རོ། །གཞན་གྱི་དོན་ཙམ་ལ་ནི་རྒོལ་བ་དང་ཕྱིར་རྒོལ་བ་དག་རྩོད་པ་མེད་དོ། །གལ་ཏེ་དེ་བསྒྲུབ་པར་བྱ་བ་ཡིན་ན་དེའི་ཚེ་རྒོལ་བའི་མི་འདོད་པ་ཉིད་དུ་འགྱུར་ལ། ཕྱིར་རྒོལ་བ་ལ་ལྟོས་ནས་ནི་
འབྲས་བུ་མེད་པར་འགྱུར་ཏེ། གྲུབ་པ་ལ་བསྒྲུབ་པའི་ཕྱིར་རོ་ཞེས་བྱ་བ་ནི་ཛ་ཡནྟའི་བཤད་པའོ། །གཞན་ཞེས་བྱ་བ་ནི་བདག་གི་དོན་ལས་གཞན་གྱི་དོན་ཙམ་བསྒྲུབ་ན་ཡང་མ་འབྲེལ་བ་དེའི་ཕྱིར་ན། འགའ་ཡང་བསྒྲུབ་པར་བྱ་བ་མ་ཡིན་པར་འགྱུར་རོ། །ཅི་ལྟར་གཞན་བསྒྲུབ་པར་བྱ་བ་མ་འབྲེལ་སྙམ་ན།
དེ་ལྟ་ན་ནི་ཞེས་བྱ་བའོ། །བདག་གི་དོན་དང་གཞན་གྱི་དོན་ཙམ་གྱི་ཕྱོགས་གཉིས་གྲུབ་པ་ལ་ལྟོས་ཏེའོ། །དེ་ཞེས་བྱ་བ་བདག་གི་དོན་ཉིད་སྤངས་ནས་སོ། །འོན་ཏེ་ཞེས་བྱ་བ་ནི་གཞན་ཙམ་བསྒྲུབ་པ་ན་གྲུབ་པར་གྱུར་པས་ན་བདག་བསྒྲུབ་པར་བྱ་བ་མ་ཡིན་ཡང་འགྲུབ་པ་ཡིན་ནོ། །དེས་ན་བདག་དངོས་སུ་
เล่ม ๑๘๖ · หน้า 41b
ནི་བསྒྲུབ་པར་བྱ་བ་མ་ཡིན་ཏེ། དེས་ན་རྗེས་སུ་འགྲོ་བ་མེད་པའི་ཉེས་པ་མེད་དོ། །གཞན་ནི་གཞན་གྱི་དོན་ཉིད་དོ། །འདོད་འགྲུབ་ནི་བདག་གི་དོན་འགྲུབ་པའོ། །དེ་ལྟ་ཡིན་ན་ཞེས་བྱ་བ་ནི་འདོད་པ་ལྟར་རོ། །ཅི་སྟེ་ཀུན་འགྲུབ་སྙམ་ན། ཉེ་བའི་ཁྱད་པར་མེད་པ་ན་གཞན་མི་འགྲུབ་པོ་ཞེས་བྱ་བ་དེ་ག་ལས་ཡིན་ཏེ་མ་ཡིན་
པ་ཁོ་ནའོ། །དེས་ན་འདོད་པ་བཞིན་དུ་ཀུན་འགྲུབ་པར་འགྱུར་རོ་ཞེས་བྱ་བའི་དོན་ཏོ། །དེ་ལྟ་ཡིན་དང་ཞེས་བྱ་བ་ནི། ཕྱིན་ཅི་ལོག་གྲུབ་དང་ངོ་། །ཐམས་ཅད་བསྒྲུབ་པར་བྱ་བར་ཐལ་བའི་ལན་གྱི་དོགས་པ་བསུ་བ་ནི། འདོད་པའི་ཕྱིར་ཞེས་བྱ་བའོ། །དེ་ཉིད་ནི་བདག་གི་དོན་ཉིད་དོ། །གཞན་མི་འདོད་པ་ནི་མ་
ཡིན་པའོ། །འགོག་པ་ནི་མ་ཡིན་ཏེ་ཞེས་བྱ་བའོ། །ཅིའི་ཕྱིར་ཞེ་ན། འདོད་པའི་ཞེས་བྱ་བའོ། །བསམས་པ་ནི་འདི་ཡིན་ཏེ། གལ་ཏེ་གཞན་བསྒྲུབ་པ་ན་གཞན་སྒྲུབ་པར་བྱེད་པས་འགྲུབ་པར་ནུས་ན་དེའི་ཚེ་འདོད་པས་ཅི་བྱ་སྟེ། འདོད་པས་ནི་གཏན་ཚིགས་ཀྱི་བྱེད་པ་རྣམ་པར་དབྱེ་བར་བྱ་མི་ནུས་སོ་ཞེས་
བྱ་བའོ། །འདོད་པས་གཏན་ཚིགས་ཀྱི་བྱེད་པ་རྣམ་པར་འབྱེད་པར་བྱེད་པ་དེ་ལྟ་ན་ཡང་ཉེས་པ་ཡོད་པ་ཉིད་དོ་ཞེས་བརྗོད་པ་ནི། དེ་ལྟ་ཡིན་ན་ནི་ཞེས་བྱ་བ་སྟེ། འདོད་པས་གཏན་ཚིགས་ཀྱི་བྱེད་པ་རྣམ་པར་འབྱེད་པ་ཡིན་ན་ཡང་ངོ་། །རྒོལ་བ་གཞན་གྱི་ལྡོག་པ་འགྲུབ་པ་དགག་ཏུ་མེད་དོ། །ཅིའི་ཕྱིར་ཞེ་ན། ཕྱིར་
རྒོལ་བ་བཟློག་པ་འདོད་པའི་ཕྱིར་རོ། །འོན་ཏེ་རྒོལ་བའི་འདོད་པ་ཁོ་ན་འགྲུབ་ཀྱི་གཞན་འགོད་པ་ནི་མ་ཡིན་ནོ་ཞེ་ན། འདོད་པར་ཞེས་སྨོས་སོ། །འོན་ཏེ་གང་གིས་རྒོལ་བའི་འདོད་པ་འགྲུབ་པར་འགྱུར་བ་འབྲེལ་པའི་ཁྱད་པར་ཡོད་པ་ཉིད་དོ་ཞེ་ན། གང་གིས་ཞེས་སྨོས་སོ། །དེའི་ཕྱིར་གལ་ཏེ་གཞན་བསྒྲུབས་
པས་གཞན་འགྲུབ་ན་དེའི་ཚེ་ཐམས་ཅད་འགྲུབ་པར་འགྱུར་རོ་ཞེས་བྱ་བ་འདི་གནས་སོ། །དཔེ་བསྒྲུབ་བྱས་སྟོང་པར་འགྱུར་ཏེ་ཞེས་བརྗོད་པ་གང་ཡིན་པ་དེའི་ལན་ནི་དོགས་པ་བསུ་བ་ནི་བརྗོད་པར་འདོད་པའི་ཞེས་བྱ་བ་སྟེ། བརྗོད་པའི་ཆོས་ལ་ལྟོས་ནས་བརྗོད་པར་འདོད་པའོ། །ལན་ནི་གལ་ཏེ་ཞེས་བྱ་བའོ། །
འདིར་འདི་ལྟར་འདོད་པ་ཡིན་ཏེ། གཞན་གྱིས་ཀྱང་འགའ་ཞིག་ནི་འགལ་བའི་གཏན་ཚིགས་ལྟར་སྣང་བར་འདོད་པ་འགའ་ཞིག་ནི་ཁྱད་པར་འགལ་བར་རོ། །དེ་ལ་གལ་ཏེ་བརྗོད་པ་ཁོ་ན་བསྒྲུབ་པར་བྱ་བ་ཡིན་ན་དེའི་སྨྲས་པའི་ཆོས་ཕྱིན་ཅི་ལོག་ཏུ་བསྒྲུབ་པ་ཁོ་ན་ལ་འགལ་བར་འགྱུར་གྱི་ཁྱད་པར་འགལ་
เล่ม ๑๘๖ · หน้า 42a
བ་ནི་མི་འགྱུར་རོ། །དེ་བས་ན་ཁྱད་པར་འགལ་བའི་གཏན་ཚིགས་ལྟར་སྣང་བ་གཞུང་གཟུགས་པའི་ཕྱིར་གཞན་གྱིས་ཀྱང་མ་སྨྲས་པ་ཡང་ཁས་བླང་དགོས་སོ། །གང་ཞིག་ཕ་རོལ་པོས་ཁྱད་པར་འགལ་བར་བརྗོད་པ་ཁོ་ན་དེ་འདོད་པ་ལ་གནོད་པར་བྱེད་པའི་འགལ་བར་བརྗོད་པ་ཡིན་ནོ་ཞེས་བྱ་བའོ། །
ཐམས་ཅད་ལ་ཞེས་བྱ་བ་ནི་སྒྲུབ་བྱེད་ཡང་དག་པ་ལ་ཡང་ངོ་། །གཏན་ཚིགས་ལྟར་སྣང་གི་དབང་དུ་བྱས་ཏེ་བརྗོད་པ་ནི་བརྗོད་པ་ཞེས་བྱ་བའོ། །འོ་ན་ཅི་ལྟར་ཁྱད་པར་འགལ་བ་ཡིན་ཞེ་ན། ཁྱད་པར་ཞེས་བྱ་བའོ། །གཞན་དུ་སྨྲས་པ་ལ་ལྟོས་ནས་ནི་ཁྱད་པར་དང་འགལ་བ་ཉིད་མེད་པའི་ཕྱིར་རོ། །དེའི་ཕྱིར་བརྗོད་
པར་འདོད་པའི་ཆོས་རྗེས་སུ་འགྲོ་བ་མེད་པས་ནི་ཉེས་པར་འགྱུར་བ་མ་ཡིན་པའི་ཕྱིར་དཔེ་ཐམས་ཅད་བསྒྲུབ་བྱ་མ་ཚང་བར་འགྱུར་རོ་ཞེས་གནས་སོ། །རྗེས་སུ་འགྲོ་བ་མེད་པ་དང་འགལ་བའི་ཉེས་པ་གཞན་ལ་ཡང་བསྒྲེ་བ་ནི། འདིས་ནི་ཞེས་བྱ་བའོ། །འོན་ཏེ་བསྒྲུབ་པར་བྱ་བ་གང་ཡང་རུང་བས་གཉིས་པ་དང་
བཅས་པ་ཙམ་གྱི་སྤྱིར་འདོད་ཀྱི། རྣམ་པ་དེ་ལྟ་བུའི་སྐྱེས་བུས་གཉིས་པ་དང་བཅས་པ་ཉིད་ནི་མ་ཡིན་ཏེ། དེས་ན་རྗེས་སུ་འགྲོ་བ་མེད་པའི་སྐྱོན་མེད་དམ་སྙམ་ན། ལན་བཏབ་པ་ནི་གང་ཡང་རུང་བས་གཉིས་པ་དང་བཅས་པ་དེ་ཉིད་ནི་རྣམ་པ་དེ་ལྟ་བུའི་ལུས་མི་འགྱུར་ན་ཏེ་ལུས་དོར་ན་འགྲུབ་པ་ནི་མ་ཡིན་ནོ། །ཅིའི་ཕྱིར་
ཞེ་ན། དོན་གསལ་བ་གཞན་མེད་པའི་ཕྱིར་རོ། །གཉི་ག་ལས་གཅིག་དོར་ན་གང་ཡང་རུང་བའི་སྤྱི་འགྲུབ་པ་ནི་མ་ཡིན་ནོ། །དེས་ན་ཚུ་རོལ་མཛེས་པ་པ་བརྗོད་བྱས་སྟོང་པ་བརྗོད་པ་རྣམས་ཀྱི། གཉིས་པ་དང་བཅས་པའི་སྒྲུབ་པར་བྱེད་པ་ཉིད་ནི་འདི་དེ་ནི་མི་ཤེས་ཀྱི་བསླད་ཡིན་ཏེ་མ་འབྲེལ་པ་ཡིན་ནོ་ཞེས་བྱ་
བའི་དོན་ཏོ། །གང་ལ་རྗེས་སུ་འགྲོ་བ་མེད་པ་ལ་སོགས་པའི་ཉེས་པར་འགྱུར་བ་གཉིས་པ་དང་བཅས་པའི་སྦྱོར་བ་དེ་ཡང་གང་ཡིན་ཞེ་ན། འདི་ལྟར་ཞེས་སྨོས་སོ། །ལུས་གང་ལ་མངོན་པར་གསལ་བའི་སེམས་པ་ཡོད་པའི་ལུས་དེའི་མཚན་ཉིད་སྐྱེས་བུས་གང་ཡིན་པ་དེ་ལ་དེ་སྐད་ཅེས་བྱའོ། །བུམ་པ་ནི་དེ་ལྟ་
བུའི་སྐྱེས་བུ་དང་། བུམ་པ་དེ་དག་ལས་གང་ཡང་རུང་བས་གཉིས་པ་དང་བཅས་པ་ཡིན་ཏེའོ། །ཤུགས་ཀྱིས་ན་བུམ་པ་ནི་དེ་ལྟ་བུའི་སྐྱེས་བུས་གཉིས་པ་དང་བཅས་པར་འདོད་པ་ཡིན་གྱི་བརྗོད་པ་ནི་མ་ཡིན་ཏེ། རྗེས་འགྲོ་མེད་པའི་ཉེས་པས་འཇིགས་པའི་ཕྱིར་རོ། །སྦྱོར་བ་འདི་ཉིད་འཆད་པ་ནི་སྐྱེས་བུ་ནི་ཞེས་བྱ་བའོ། །
เล่ม ๑๘๖ · หน้า 42b
རིགས་པ་ཅན་ལ་སོགས་པས་མངོན་པར་འདོད་པའི་བདག་ལ་སོགས་པ་ནི་མ་ཡིན་པའོ། །དེ་ལ་ཡང་ཞེས་བྱ་བ་ནི་བསྒྲུབ་པར་བྱ་བ་འཇིག་རྟེན་ཕ་རོལ་ཅན་མ་ཡིན་པའི་སྐྱེས་བུ་ལའོ། །གཏན་ཚིགས་ནི། ཨུཏྤ་ལ་མ་ཡིན་པའོ། །བསམ་པ་ནི་རྒྱང་འཕེན་པའིའོ། །དེ་ལྟ་བུ་ཞེས་བྱ་བ་ནི་མངོན་པར་གསལ་བའི་མཚན་
ཉིད་འཇིག་རྟེན་ཕ་རོལ་ཅན་མ་ཡིན་པའོ། །དེ་ལྟ་བུའི་སྐྱེས་བུས་གཉིས་པ་དང་བཅས་པ་ཉིད་དུ་དངོས་སུ་ཅི་སྟེ་མི་བསྒྲུབ་སྙམ་ན། ཐབས་ཡིན་ནོ་ཞེས་བྱ་བ་སྟེ། དངོས་དང་ཕལ་པའི་བསམ་པས་ཅི་ཞིག་བྱ་སྟེ་རྣམ་པ་གང་ཡང་རུང་བའི་སྒོ་ནས་ཨུཏྤ་ལ་མ་ཡིན་པ་ལ་སོགས་པ་ནི་བསྒྲུབ་བྱ་འགྲུབ་པའི་ཐབས་
ཡིན་ནོ་ཞེའོ། །གཅིག་ཏུ་ངེས་པར་འགོག་པའི་དོན་ཡིན་མོད་དེ་ལྟ་ན་ཡང་འདི་ལ་སྔར་བརྗོད་པའི་སྐྱོན་ཅི་ལྟར་ཡོད་སྙམ་ན། འདི་ལྟར་ཞེས་སྨོས་སོ། །འོན་ཏེ་ཞེས་བྱ་བ་ནི་གང་ཡང་རུང་བས་གཉིས་པ་དང་བཅས་པ་ཉིད་ནི་བསྒྲུབ་པར་བྱ་བ་ཡིན་ལ། དེ་གྲུབ་པས་ཀྱང་ཁྱད་པར་སྐྱེས་བུ་བསྒྲུབ་པར་བྱ་བ་
མ་ཡིན་ཡང་འགྲུབ་པ་ཡིན་གྱི། ཁྱད་པར་ཅན་གྱི་སྐྱེས་བུའི་རང་བཞིན་དེ་ནི་བསྒྲུབ་པར་བྱ་བ་མ་ཡིན་ནོ་ཞེ་ན། འདི་ལ་ལན་ནི། དེའི་ཚེ་ཡང་ཞེས་བྱ་བའོ། །བསྟན་ཟིན་པ་ནི། གལ་ཏེ་གཞན་གྲུབ་ན་ཡང་བསྒྲུབ་བྱ་མིན་ཞེས་བྱ་བ་དེར་རོ། །བསྒྲུབ་པར་བྱ་བ་སྤྱིར་འདོད་ན་ཞེས་བྱ་བ་རྣམ་པར་འགྲེལ་པ་ནི། འདིར་
ཞེས་བྱ་བ་ལ་སོགས་པའོ། །གང་ཡང་རུང་བ་ཉིད་ཀྱི་སྤྱི་བསྒྲུབ་པར་བྱ་བ་ཡིན་གྱི། རྣམ་པ་དེ་འདྲ་བའི་སྐྱེས་བུ་འཕངས་པ་ནི་མ་ཡིན་པའོ། །དེ་ཉིད་ཅེས་བྱ་ལ་སོགས་པ་རྣམ་པར་འགྲེལ་པས་ལན་འདེབས་པ་ནི། དེ་ནི་ཞེས་བྱ་བའོ། །གསལ་བ་ཞིག་ཀྱང་ཞེས་བྱ་བ་ནི་དོགས་པའོ། །གལ་ཏེ་གསལ་བ་ཞིག་
ཀྱང་སྤྱི་མི་འཇིག་ན། དེའི་ཚེ་གསལ་བས་སྟོང་པའི་ཡུལ་དུ་ཡང་ཅི་སྟེ་ཡོད་པར་ཐ་སྙད་མི་བྱེད་སྙམ་ན། གསལ་བར་བྱེད་པ་ཞེས་སྨྲས་སོ། །ལན་ནི་མ་ཡིན་ཏེ་ཞེས་བྱ་བའོ། །འདིར་ནི་སྐྱེས་བུ་ལའོ། །ཅི་ལྟར་མེད་སྙམ་ན་དེ་ལྟ་བུའི་ཞེས་སྨོས་སོ། །དེ་བཞིན་དུ་གང་ཡང་རུང་བའི་སྤྱི་ཡང་ཐ་སྙད་ཀྱི་ཡུལ་མ་
ཡིན་ནོ། །དེས་ན་དེས་ཁྱབ་པ་ཅི་ལྟར་འགྲུབ་མ་མཐོང་བའི་མེས་དུ་བ་ལ་ཁྱབ་པ་ནི་གང་དུ་ཡང་རྟོགས་པ་མེད་དོ། །ཚད་མ་འདི་ཉིད་ལས་ཞེས་བྱ་བ་ནི་དོགས་པ་བསུ་བ་སྟེ་ཨུཏྤ་ལ་མ་ཡིན་པའི་རྟགས་ལས་སོ། །ལན་ནི་མ་ཡིན་ཏེ་ཞེས་བྱ་བའོ། །ཁྱབ་པའི་དུས་ན་སྤྱི་ཡོད་པར་གྲུབ་ན་རྗེས་སུ་དཔོག་པ་
เล่ม ๑๘๖ · หน้า 43a
ཡིན་ནོ། །ཅི་ལྟར་ན་ཁྱབ་པའི་དུས་སུ་སྤྱི་མ་གྲུབ་ན་གང་གིས་ཕན་ཚུན་བདེན་པའི་ཉེས་པར་འགྱུར་སྙམ་ན། མ་གྲུབ་པ་ལ་ནི་ཞེས་སྨོས་ཏེ། ཁྱད་པར་མ་གྲུབ་པ་ལ་ནི་སྤྱིའི་རྣམ་པ་སྲིད་པ་མ་ཡིན་ནོ། །ཁྱད་པར་དང་བྲལ་བའི་སྤྱི་ནི་མེད་དོ་ཞེས་བྱ་བའི་དོན་ཏོ། །གཏན་ཚིགས་མ་ཡིན་པ་
ཞེས་བྱ་བ་ནི་སྒྲ་མི་རྟག་པ་ཉིད་དུ་བསྒྲུབ་པར་བྱ་བ་ལ་སོགས་པ་དང་མཐུན་ཕྱོགས་གང་རུང་ཡིན་པའི་ཕྱིར་ཞེས་བྱ་བ་གཏན་ཚིགས་མ་ཡིན་པ་དེ་བཞིན་དུ་ཨུཏྤ་ལ་མ་ཡིན་པའི་གཏན་ཚིགས་ཀྱིས་བསྒྲུབ་པར་བྱ་བ་ཡང་མ་ཡིན་ནོ། །ཅིའི་ཕྱིར་གཏན་ཚིགས་མ་ཡིན་ཞེ་ན། འདི་ལྟར་ཞེས་བྱ་བའོ། །ཅི་ལྟར་སྒྲ་ལ་
མེད་སྙམ་ན། སྒྲ་ལ་ཞེས་གསུངས་སོ། །འགལ་བ་མེད་པ་མ་ཡིན་པ་འགལ་བའི་ཕྱིར་རོ་ཞེས་བྱ་བའི་དོན་ཏོ། །འགལ་བ་ཉིད་བརྗོད་པ་ནི། གང་ཡང་རུང་བ་ཞེས་བྱ་བ་སྟེ། འདི་ལྟར་རམ་ཡང་ན་འདི་ལྟར་ཞེས་རྣམ་པར་རྟོག་པའི་ཡུལ་ཡིན་པའི་ཕྱིར་ཆོས་ཅན་སྒྲ་ལ་གཉི་ག་ནི་འགལ་ལོ། །དེ་ལ་ནི་
ཕྱོགས་ཁོ་ན་ཡོད་པའི་ཕྱིར་རོ། །གལ་ཏེ་ཕྱོགས་ཁོ་ན་ཡོད་མོད་དེ་ལྟ་ན་ཡང་དེ་ལས་གཞན་ཉེ་བར་དགོད་པར་འགྱུར་རོ་སྙམ་ན། ངེས་པའི་ཆོས་ཞེས་སྨོས་སོ། །གཞལ་བྱ་འགལ་བར་བརྗོད་ནས། སྒྲ་འགལ་བར་བརྗོད་པ་ནི། གཞན་ཞེས་བྱ་བའོ། །འདི་ནི་ཞེས་བྱ་བ་ནི་གང་ཡང་རུང་བ་སྒྲུབ་བྱེད་དམ་བསྒྲུབ་
བྱ་ཡིན་པའོ། །སྣམ་བུ་ཞེས་བྱ་བ་ནི་བུམ་པ་ཆོས་ཅན་དུ་བྱེད་པ་དོར་ནས་སྣམ་བུ་ཉིད་ཆོས་ཅན་དུ་བྱེད་པར་འགྱུར་རོ་ཞེས་བྱ་བའི་དོན་ཏོ། །སྤྱིར་ཞེས་བྱ་བ་ནི་གལ་ཏེ་བུམ་པ་ཆོས་ཅན་མ་ཡིན་ནའོ། །ཉེས་པ་འདི་ཉིད་ཅེས་བྱ་བ་ནི་གྲུབ་པ་ལ་བསྒྲུབ་པའི་མཚན་ཉིད་དོ། །དེ་ཞེས་བྱ་བ་རྣམ་པ་དེ་འདྲ་བའི་སྐྱེས་
བུ་མི་འཕེན་ནའོ། །འབྲས་བུ་ཅི་ཡིན་ཞེས་བྱ་བ་ནི་གྲུབ་པ་ལ་བསྒྲུབ་པའི་ཕྱིར་རོ། །མི་འདོད་པ་ཞེས་བྱ་བ་ནི་བཟློག་པ་བསྒྲུབ་པ་ལས་སོ། །གཉི་གར་ཞེས་བྱ་བ་ནི་བུམ་པ་ནི་སྐྱེས་བུ་དང་བུམ་པ་གང་ཡང་རུང་བས་ཞེས་བུམ་པ་ལན་གཉིས་བཀོད་པའོ། །འདིར་ནི་སྦྱོར་བ་ལའོ། །རང་གི་ཚིག་དང་
འགལ་ལོ་ཞེས་བྱ་བ་ནི་གང་ཡང་རུང་བ་སྨོས་པས་ནི་མ་ངེས་པར་བསྟན་ལ། བསྒྲུབ་བྱ་ཞེས་བྱ་བ་ལ་ནི་ངེས་པར་རོ། །འདི་ཉིད་གཞུང་འཛུགས་པ་ནི། འདི་ལྟར་ཞེས་བྱ་བའོ། །འོན་ཏེ་དེ་ལྟ་ན་ཡང་གང་ཡང་རུང་བ་བརྗོད་པ་ནི། ངེས་པ་ལས་བཟློག་པ་སྟོན་པར་བྱེད་པ་ཡིན་ནོ་སྙམ་ན། གལ་ཏེ་གཉི་
เล่ม ๑๘๖ · หน้า 43b
གར་ཞེས་བྱ་བའོ། །དེ་ལས་ཏེ་ངེས་པ་ལས་བཟློག་པ་བསྒྲུབ་པ་ཅི་ལྟར་དེ་མ་ཡིན་པ་ཁོ་ནའོ། །ཕ་རོལ་པོས་མ་ཡིན་ཏེ་ཞེས་སྨྲས་སོ། །གྲུབ་པའི་མཐའ་སྨྲ་བ་ཚུ་རོལ་མཛེས་པ་པ་ལ་འདྲི་བ་ནི། ཅི་ལྟར་ཞེས་བྱ་བའོ། །གཞན་གྱི་ལན་ནི་ཤུགས་ཞེས་བྱ་བའོ། །གྲུབ་པའི་མཐའ་པ་རྣམ་པར་བརྟག་པ་བྱས་ནས་
སུན་འབྱིན་པ་ནི་ཤུགས་དེ་ཞེས་བྱ་བའོ། །གཏན་ཚིགས་ཀྱི་ཞེས་བྱ་བ་ནི་ཨུཏྤལ་མ་ཡིན་པའིའོ། །ཚིག་གི་ནི་ཨུཏྤལ་མ་ཡིན་པའི་ཕྱིར་ཞེས་བྱ་བའིའོ། །མ་ངེས་པ་ཉིད་བརྗོད་པ་ནི་འདི་ལྟར་ཞེས་བྱ་བའོ། །གཞན་ཡང་ནི་འཇིག་རྟེན་ཕ་རོལ་དང་ལྡན་པའི་སྐྱེས་བུ་ཡང་ངོ་། །ཕྱོགས་གཉིས་པ་འགོག་
པ་ནི། འོན་ཏེ་ཞེས་བྱ་བའོ། །ཟ་ཞེས་བྱ་བ་འདིས་ནི་ཟ་བའི་དོན་བརྗོད་པར་འདོད་པ་ཡིན་ནོ། །འོན་ཏེ་རྣམ་པ་དེ་ལྟ་བུའི་སྐྱེས་བུས་གཉིས་པ་ལ་རྗེས་སུ་འགྲོ་བ་གྲུབ་ན། སྦྱོར་བ་ཡང་དེ་ཁོ་ན་ལྟར་བསྟན་པར་བྱའོ་ཞེས་བརྗོད་པ་ནི། གལ་ཏེ་བུམ་པ་བཞིན་དུ་ཞེས་བྱ་བའོ། །བུམ་པ་བཞིན་དུ་ཞེས་
བྱ་བ་ནི་ཅི་ལྟར་ཆོས་ཅན་བུམ་པ་ཚད་མས་གྲུབ་པ་ལྟར་རོ། །ཁྱབ་པ་འཛིན་པའི་དུས་སུ་ཚད་མས་སྒྲུབ་པར་བྱེད་པའི་ཁྱབ་པར་བྱེད་པ་ཉིད་དུ་ཐོབ་པ་སྟེ་ངེས་པའི་ཡོད་པ་ཉིད་ག་ལ་ཡོད་པ་དེ་ལ་དེ་སྐད་ཅེས་བྱའོ། །ཚིག་ཅེས་བྱ་བ་ནི་གང་ཨུཏྤལ་མ་ཡིན་པ་དེ་ནི་རྣམ་པ་དེ་ལྟ་བུའི་སྐྱེས་བུས་གཉིས་པ་
དང་བཅས་པ་ཡིན་ནོ་ཞེས་བྱ་བ་དེ་ལྟ་བུའི་རང་བཞིན་ནོ། །འདི་ཉིད་ཀྱིས་ཞེས་བྱ་བ་ནི་མངོན་པར་གསལ་བའི་སེམས་པ་ཅན་ཞེས་བྱ་བ་ལ་སོགས་པ་ཉིད་ཀྱིས་སོ། །དེ་ལྟ་ཡིན་ན་སྐྱེས་བུ་བསྒྲུབ་པར་བྱ་བ་ལ་ཡང་། སུན་འབྱིན་པ་བརྗོད་པ་གང་ཡིན་པ་དེ་རྣམ་རྟོག་མཚུངས་པ་ཡིན་ནོ། །སྒྲ་དང་ཞེས་བྱ་བ་
ལ་སོགས་པས་ནི་རྩོད་པ་རྗེས་སུ་བརྗོད་ནས་སུན་འབྱིན་པ་ནི། མ་ཡིན་ཞེས་བྱ་བ་སྟེ་མཚུངས་པའོ། །ཅིའི་ཕྱིར་ཞེ་ན། དཔེ་ལ་འཇིག་པ་གྲུབ་པས་སྒྲ་འཇིག་པ་དེ་དང་ལྡན་པར་བསྒྲུབ་པའི་ཕྱིར་རོ། །ཅི་ལྟར་འཇིག་པ་སྔར་གྲུབ་པ་དེ་བཞིན་དུ། རྩིག་པ་ལ་སོགས་པ་དོན་གཞན་ལ་དེ་ལྟ་བུའི་སྐྱེས་བུ་སྔར་
གྲུབ་པ་ཡོད་པ་ཡིན་ན་བུམ་པའང་དེ་ལྟ་བུའི་སྐྱེས་བུ་དེ་དང་ལྡན་པར་འགྱུར་རོ། །ངག་གི་ཞེས་བྱ་བ་ནི་བུམ་པ་ནི་ཞེས་བྱ་བ་ལ་སོགས་པའི་ངག་གི་ཤུགས་ཀྱིས་ཐོབ་པའིའོ། །དེ་བཞིན་དུ་མི་རྟག་པ་སྒྲུབ་པར་བྱེད་པ་ལ་ཁྱབ་པར་མ་གྲུབ་པོ་ཞེས་བྱ་བ་འདི་ནི་མ་ཡིན་གྱི། འོན་ཀྱང་གྲུབ་པ་ཁོ་ནའོ་ཞེས་བྱ་
เล่ม ๑๘๖ · หน้า 44a
བའི་དོན་ཏོ། །འདི་ནི་བསྒྲུབ་བྱའི་སྒོ་ནས་བརྗོད་པ་ཡིན་ནོ། །སྒྲུབ་པར་བྱེད་པའི་སྒོ་ནས་བརྗོད་པ་ནི། དེ་བཞིན་དུ་ཅི་ལྟར་ཞེས་བྱ་བའོ། །ཅི་ལྟར་ཕྱོགས་དང་མཐུན་པའི་ཕྱོགས་ལས་གང་ཡང་རུང་བ་ཉིད་མ་གྲུབ་པ་དེ་བཞིན་དུ་བྱས་པ་ཉིད་ཀྱང་མ་གྲུབ་པོ་ཞེས་བྱ་བ་དེ་ནི་མ་ཡིན་ནོ་ཞེས་འབྲེལ་
ཏོ། །ཅི་ལྟར་མི་རྟག་པ་ཉིད་བསྒྲུབ་སྙམ་ན། སྔ་ན་ཞེས་བྱ་བའོ། །གལ་ཏེ་ཞེས་བྱ་བ་ལ་སོགས་པ་ནི་རྩོད་པའོ། །དེ་དང་འདྲ་བ་ཞེས་བྱ་བ་ནི་གྲུབ་པའི་མཐའོ། །རྗེས་སུ་འགྲོ་བ་ཞེས་བྱ་བ་ནི་རྩོད་པའོ། །བུམ་པ་གཞན་དང་སྒྲ་གཞན་ཅི་ལྟར་འདྲ་བ་འགྲུབ་པར་འགྱུར། བུམ་པ་དང་སྒྲ་དག་ལ་མི་རྟག་པ་ཉིད་
རྗེས་སུ་འགྲོ་བ་ན་འདྲ་བ་ཡིན་ནོ་ཞེ་ན། དེ་ཡིན་ན་འོ་ན་རྩིག་པ་དང་བུམ་པ་དག་ཀྱང་གང་ཡང་རུང་བས་གཉིས་པ་དང་བཅས་པ་ཙམ་གྱིས་རྗེས་སུ་འགྲོ་བ་སྐྱེས་བུ་ཡང་འགྲུབ་པར་འགྱུར་ཏེ། དེའི་གྲུབ་པའི་མཐའ་སྨྲ་བའི་ལན་དོན་མེད་དོ། །གཞན་ཉིད་ཡིན་པ་ཁོ་ནས་འདྲ་བར་འགྱུར་བ་ཡིན་ཏེ། དེ་ལྟ་མ་ཡིན་
ཏེ། །གཞན་ཉིད་མ་ཡིན་ན་འདྲ་བ་དེ་ཅི་ལྟར་ཡིན། ཅིའི་ཕྱིར་ཞེ་ན། གཅིག་ལ་ཞེས་བྱ་བའོ། །འདི་ལྟར་ཞེས་བྱ་བ་ལ་སོགས་པས་ནི་འདྲ་བ་ཉིད་སྦྱོར་བར་བྱེད་པའོ། །དེ་ནི་རྣམ་པ་དེ་ལྟ་བུའི་སྐྱེས་བུ་དང་ལྡན་པའོ། །འདིར་ཞེས་བྱ་བ་ནི་གང་བྱས་པ་དེ་ནི་མི་རྟག་གོ་ཞེས་བྱ་བའི་སྦྱོར་བ་ལའོ། །མི་རྟག་པ་ཉིད་རྗེས་
སུ་འགྲོ་བར་འགྱུར་ན། ཆོས་ཅན་གྱི་ཁྱད་པར་ཅན་དུ་འགྱུར་བ་ཡིན་ནོ། །འདི་ག་ལས་ཤེ་ན་བསྒྲུབ་པར་བྱ་བ་ནི་ཞེས་བྱ་བའོ། །སྔར་ཞེས་བྱ་བ་ནི་སྒྲུབ་པར་བྱེད་པ་འགོད་པའི་སྔར་རོ། །གལ་ཏེ་ཞེས་བྱ་བ་ནི་དོགས་པའོ། །འབའ་ཞིག་ཅེས་བྱ་བ་ནི་ཆོས་ཅན་གྱི་རྣམ་པར་མ་དཔྱད་པ་རྗེས་སུ་འགྲོ་བས།
ཆོས་ཅན་གྱི་ཁྱད་པར་ཅན་གྱི་མི་རྟག་པ་ཉིད་ཅི་ལྟར་འགྲུབ། གཞན་དང་ནི་འབའ་ཞིག་པ་དང་། གཞན་འགྲུབ་ན་ཞེས་བྱ་བ་མ་འབྲེལ་པ་བཞིན་དུ་འགྲུབ་ན་ནིའོ། །དེ་ལྟ་ན་ནི་ཞེས་བྱ་བ་ནི་ཐམས་ཅད་བསྒྲུབ་བྱ་ཡིན་ནའོ། །སངས་རྒྱས་པའི་དོགས་པ་བསུ་བ་ནི། སྨྲས་པ་ནི་ཞེས་བྱ་བའོ། །སྐྱོན་འདིར་ཞེས་བྱ་
བ་ནི་གཏན་ཚིགས་འགལ་བ་དང་དཔེ་བསྒྲུབ་བྱ་མ་ཚང་བར་རོ། །གཞན་ལ་ཞེས་བྱ་བ་ནི་མ་སྨྲས་པའི་ཆོས་བསྒྲུབ་པ་ལའོ། །མ་ཡིན་ཏེ་ཞེས་བྱ་བ་ནི་གཞན་གྱིས་སུན་འབྱིན་ནོ། །མ་ཡིན་ཏེ་ཞེས་བྱ་བ་ནི་གྲུབ་པའི་མཐའ་སྨྲས་པས་གསུངས་པའོ། །སྐྱེས་བུ་འགྲུབ་པ་ལ་ཡང་དེ་ལྟར་འགྱུར་རོ་ཞེ་ན།
เล่ม ๑๘๖ · หน้า 44b
སྐྱེས་བུ་བསྒྲུབ་པ་ལ་ནི་ཞེས་བྱ་བའོ། །དེས་ཀྱང་ཞེས་བྱ་བ་ནི་གང་ཡང་རུང་བས་གཉིས་པ་དང་བཅས་པས་ཀྱང་མཚུངས་པ་ཉིད་མ་ཡིན་པའི་ཕྱིར་རོ། །འདིར་ནི་ཞེས་བྱ་བ་ནི་རྒྱང་འཕན་པའི་སྦྱོར་བ་ལ་ནིའོ། །གལ་ཏེ་སོ་སོར་ཞེས་བྱ་བ་ནི་གཞན་གྱིའོ། །ལེན་ནི་འདིར་ཞེས་བྱ་བ་སྟེ་ལྷས་བྱིན་དང་མཆོད་སྦྱིན་དག་
ལས་གང་ཡང་རུང་བ་ལ་ཟས་བྱིན་ཅིག་ཅེས་བྱ་བར་རོ། །དེ་ཡང་ནི་ངེས་པའོ། །མངོན་སུམ་གྱིས་ཞེས་བྱ་བ་ནི་ཚིག་ཙམ་གྱི་བྱེད་པ་ཉམས་པར་བྱེད་པའོ། །དངོས་པོའི་ཤུགས་ཀྱིས་ཞེས་བྱ་བ་ནི་འབྲས་ཆན་ལ་སོགས་པ་གཉི་གས་བཟའ་བའི་ཡུལ་མ་ཡིན་པ་རུང་བ་ལ་སོགས་པ་དེའི་ཤུགས་ཀྱིས་
སྐྱེས་བུ་གཅིག་ཁོ་ན་ལ་བཟར་གཞུག་པར་ངེས་པ་ཡིན་གྱི་ལྷས་བྱིན་དང་མཆོད་སྦྱིན་དག་ལས་གང་ཡང་རུང་བ་ལ་ཟན་བྱིན་ཅིག་ཅེས་བྱ་བའི་ཚིག་གི་ཤུགས་ཀྱིས་ནི་མ་ཡིན་ནོ། །རྗེ་བོས་གང་ཡང་རུང་བ་ལ་ཟན་བྱིན་ཅིག་ཅེས་བརྗོད་པས་ཁོལ་པོ་ནན་གྱིས་འཇུག་པ་ནི་མ་ཡིན་ལ། ཟ་བ་པོ་ཡང་
འཇུག་པ་མ་ཡིན་ཞིང་། བྱིན་ཅིག་ཅེས་བརྗོད་པས་སྟེར་བ་པོ་འཇུག་པ་ཡང་མ་ཡིན་ཏེ། གསུམ་ཀ་ཡང་རང་གི་འདོད་པས་འཇུག་པའི་ཕྱིར་རོ། །འདི་ལྟར་རྗེ་བོས་གང་ཡང་རུང་བ་ལ་བཞེས་པ་དྲོངས་ཤིག་ཅེས་སྨྲས་ཀྱང་སྙོམ་ལས་ཀྱིས་ཟན་འདྲེན་པ་ལ་མི་འཇུག་ལ། ཟ་བ་པོ་ཡང་ན་བ་ལ་སོགས་
པའི་དབང་གིས་ཟ་བ་ལ་འཇུག་པ་མ་ཡིན་ཞིང་། བསླངས་ཀྱང་གཏོང་བ་པོ་གཏོང་བ་ལ་མི་འཇུག་པ་མ་ཡིན་ནོ། །དེ་ཉིད་ཀྱི་ཕྱིར་ཟ་བ་པོའམ་ཞེས་སྨོས་ཏེ། ཟ་བ་པོའམ་སྟེར་བ་པོ་རང་གི་འདོད་པས་འཇུག་པའི་ཕྱིར་རོ་ཞེས་འབྲེལ་ཏོ། །འདིར་ཡང་ཞེས་བྱ་བ་ནི་གཉིས་པ་དང་བཅས་པའི་སྦྱོར་བ་
ལ་ཡང་ངོ་། །སྒྲུབ་པར་བྱེད་པའི་ཞེས་བྱ་བ་ནི་ཨུཏྤ་ལ་མ་ཡིན་པ་ལ་སོགས་པའིའོ། །བཟློག་པ་ལ་ཡང་ཞེས་བྱ་བ་ནི་དེ་འདྲ་བའི་སྐྱེས་བུ་མེད་པ་ལ་ཨུཏྤ་ལ་མ་ཡིན་པ་ཉིད་སྲིད་པའི་ཕྱིར་རོ། །འདིས་ནི་ཞེས་བྱ་བ་ནི་རྗེས་སུ་འགྲོ་བ་མེད་པ་དང་འགལ་བར་བསྟན་པས་སོ། །ཅི་ལྟར་འདི་བསལ་
བ་ཡིན་ཞེ་ན། གང་གི་ཕྱིར་ཞེས་བྱ་བ་ལ་སོགས་པའོ། །གྲུབ་པ་ལ་བསྒྲུབ་པར་འགྱུར་བ་ཡིན་ནོ་ཞེས་བྱ་བ་ནི། ཡུལ་ངེས་པ་མ་ཡིན་པ་ནི་ཁྱབ་པ་སྒྲུབ་པའི་ཚད་ཀྱིས་གྲུབ་པའི་ཕྱིར་རོ། །གལ་ཏེ་སྒྲ་ལ་ཞེས་བྱ་བ་ནི་མི་རྟག་པ་ཉིད་སྒྲ་ལ་སྒྲུབ་པ་མ་ཡིན་པ་དེ་ལྟ་ན་ཡང་དེ་སྤྱི་ཡིན་ནོ་ཞེས་འགལ་བ་ཡིན་ནོ། །
เล่ม ๑๘๖ · หน้า 45a
འདི་ཉིད་གསལ་འདེབས་པ་ནི། གལ་ཏེ་ཞེས་བྱ་བའོ། །མེ་ཙམ་གྱིས་སྤྱི་དེ་ལ་ཁྱད་པར་གྱི་མཐར་ཐུག་པ་ཉིད་ནི། ཕྱོགས་ཀྱི་ཆོས་དང་ལྡན་པ་ལས་འགྱུར་བ་ཡིན་ནོ། །འབྲེལ་པ་བཟུང་བ་ལས་གཞན་ཞེས་བྱ་བ་ནི་ཁྱབ་པ་དྲན་པའི་རྗེས་ཐོགས་སུ་འགྱུར་བ་ཡིན་ནོ། །ཆོས་ཅན་གྱི་ཁྱད་
པར་ཉིད་ནི་ཕྱོགས་ཀྱི་ཆོས་ཀྱི་ཤུགས་ཀྱིས་འགྱུར་བ་ཡིན་གྱི། འབྲེལ་པ་དྲན་པའི་དབང་གིས་ནི་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་གང་གིས་དཔེ་ལ་རྗེས་སུ་འགྲོ་བར་མཐོང་བ་དེ་འདི་ན་མེད་པའི་ཕྱིར་ཅི་ལྟར་དེའི་ཁྱད་པར་ཅན་དུ་འགྲུབ་སྙམ་ན། དེ་ཉིད་དོ་ཞེས་གསུངས་སོ། །འདི་ནི་གཅིག་ཉིད་ཀྱི་རྣམ་པའོ། །
ཁྱད་པར་དང་འབྲེལ་པ་རྟོགས་པ་ལ་ཉེས་པ་ཅི་ཡོད་སྙམ་ན། ཡུལ་དང་ཞེས་བྱ་བའོ། །གལ་ཏེ་ཡུལ་ལ་སོགས་པར་ངེས་པའི་ཆུ་སྐོམ་ཞི་བར་བྱེད་པ་གདང་བ་ཡིན་ནོ། །དེའི་དོན་དུ་ཉེ་བར་གཞན་དུ་འཇུག་པར་མི་འགྱུར་བའི་ཕྱིར་ན། ཁྱད་པར་དང་འབྲེལ་པ་རྟོགས་ན་ཐ་སྙད་མེད་པར་འགྱུར་རོ། །དེས་ན་ཁྱབ་
པ་ནི་སྤྱི་ཉིད་ལ་ངེས་པ་ཡིན་ནོ། །གལ་ཏེ་ཞེས་བྱ་བ་ལ་སོགས་པ་ནི་གཞན་གྱིའོ། །སྤྱི་ནི་སྒྲུབ་པར་བྱེད་པའི་སྤྱིའོ། །བསྒྲུབ་པར་བྱ་བ་དང་ལྷན་ཅིག་སྤྱི་རྟོགས་པ་ཁོ་ནའོ་ཞེ་ན། བསྒྲུབ་པར་བྱ་བ་ཡང་ཞེས་བྱ་བའོ། །བསམ་པ་ནི་འདི་ཡིན་ཏེ། ཅི་སྲིད་བསྒྲུབ་པར་བྱ་བ་དང་ལྷན་ཅིག་སྒྲུབ་པར་བྱེད་པ་མ་
རྟོགས་པ་དེ་སྲིད་དུ་ནི་རྗེས་སུ་དཔག་པ་མེད་ལ། ཅི་སྲིད་རྗེས་སུ་དཔག་པ་མེད་པ་དེ་སྲིད་དུ་ཡང་བསྒྲུབ་བྱ་དང་ལྷན་ཅིག་སྒྲུབ་བྱེད་མི་རྟོགས་ཏེ་དེས་ན་ནང་གི་ཁྱབ་པ་ནི་མི་འཐད་པ་ཁོ་ནའོ་ཞེས་བྱ་བའོ། །དེ་ལྟ་ན་འོ་ན་ཕྱིའི་ཁྱབ་པར་འགྱུར་རོ་ཞེ་ན། ཕྱིའི་ཞེས་བྱ་བའོ། །ཅིའི་ཕྱིར་འགྲུབ་པ་མ་ཡིན་ཞེ་ན། ཕྱོགས་
ཞེས་བྱ་བའོ། །ཕྱོགས་མ་ཡིན་པའི་ཞེས་བྱ་བ་ལ་སོགས་པ་ནི། བསྟན་པར་མི་བྱ་བའོ། །ཁྱབ་པའི་རྣམ་པ་བརྗོད་པའོ། །རྣམ་པ་འདི་འདྲ་བའི་ཁྱབ་པ་ལ་ནི་བསྒྲུབ་བྱ་འགྲུབ་པ་ཡོད་པ་མ་ཡིན་ཏེ། བསྒྲུབ་པར་བྱ་བ་ཁྱབ་པར་མ་འདུས་པའི་ཕྱིར་རོ། །རྩོད་པ་འདི་ཉིད་སྡུད་པ་ནི། དེས་ན་ཞེས་བྱ་བ་ལ་སོགས་པའོ། །
ནང་གི་ཁྱབ་པ་མི་འགྲུབ་པ་ནི་ཕན་ཚུན་བརྟེན་པའི་ཉེས་པས་སོ། །དེས་ན་ཕྱིའི་ཁྱབ་པ་ལ་བརྟེན་པར་བྱ་བ་ཡིན་ན། ཕྱིའི་ཁྱབ་པ་དེ་ལ་ནི་ནམ་ཡང་བསྒྲུབ་བྱ་འགྲུབ་པ་མེད་དོ། །ཅིའི་ཕྱིར་ཞེ་ན། གལ་ཏེ་གཞན་ཞེས་བྱ་བ་ལ་སོགས་པའོ། །ནང་གི་ཁྱབ་པ་དང་ཕྱིའི་ཁྱབ་པའི་ཚུལ་འདི་ནི་གཞན་ལ་ལྟོས་ནས་
เล่ม ๑๘๖ · หน้า 45b
བརྗོད་པ་ཡིན་གྱི། རང་གི་སྡེ་པ་ལ་ལྟོས་ནས་ནི་མ་ཡིན་ནོ། །གཞན་དག་ནི་གྲུབ་པ་ལ་སྒྲུབ་པའི་ཉེས་པ་སྤང་བའི་དོན་ཏུ་ཕྱོགས་ནང་དུ་མ་བསྡུས་པར་ཁྱབ་པར་རྟོགས་པར་བྱེད་ཅིང་སྟོན་པར་ཡང་བྱེད་དོ། །དེས་ན་འདི་ནི་ཕྱིའི་ཁྱབ་པ་སྨྲ་བ་ཞེས་བྱ་བའོ། །ཡང་གང་ཞིག་ཕྱོགས་ནང་དུ་བསྡུས་ནས་ཁྱབ་པ་སྟོན་
པ་དེ་ནི་ནང་གི་ཁྱབ་པ་སྨྲ་བ་ཡིན་གྱི། བྲམ་ཟེ་ཨར་ཙ་ཊ་ལྟ་བུ་ནི་མ་ཡིན་ནོ། །ཆོས་ཅན་དང་བཅས་པའི་ཁྱབ་པའི་རྣམ་པ་བརྗོད་པ་ནི། གང་གང་ཞེས་བྱ་བ་ལ་སོགས་པའོ། །འདིས་ནི་ཕྱོགས་ནང་དུ་བསྡུས་པ་ཁོ་ནས་སྒྲུབ་པར་བྱེད་པ་ལ་བསྒྲུབ་བྱས་ཁྱབ་པ་བསྒྲུབ་པར་བྱ་བ་ཡིན་གྱི། གང་གིས་ཁྱབ་པ་
མ་གྲུབ་པར་བསྒྲུབ་པ་རྗེས་སུ་དཔག་པ་དེ་ཉིད་ལས་བསྒྲུབ་པར་བྱ་བ་རྟོགས་པ་ནི་མ་ཡིན་གྱི་འོན་ཀྱང་ཚད་མ་གཞན་ལས་ཡིན་ནོ་ཞེས་བསྟན་པ་ཡིན་ནོ། །གལ་ཏེ་སོ་སོར་ངེས་པའི་ཡུལ་ན་གནས་པའི་མེ་ཁྱབ་པའི་དུས་སུ་ཅི་ལྟར་བཟུང་ན་ཡང་རྗེས་སུ་དཔག་པ་དོན་མེད་པར་འགྱུར་རོ་ཞེས་དོགས་ན། ཕྱོགས་འདི་ནི་ཞེས་བྱ་བའོ། །ཕྱོགས་
འདི་ནི་མེ་དང་ལྡན་པ་ཡིན་ཏེ་དུ་བ་དང་ལྡན་པའི་ཕྱིར་ཚང་བང་ནི་ཕྱོགས་བཞིན་ནོ་ཞེས་བྱ་བར་རྗེས་སུ་དཔག་པས་གཟུང་བར་ལྡན་པའི་དོན་ནི། སྔར་ཞེས་བྱ་བ་ཁྱབ་པ་འཛིན་པའི་དུས་ཉིད་དུ་གཟུང་ངོ་ཞེས་བརྗོད་པར་ཟད་ཀྱི་དེ་ཁོ་ནར་ནི་གཟུང་བ་མེད་དོ། །དེ་ཁོ་ནར་མ་བཟུང་ན་གཟུང་ཞེས་ཅི་ལྟར་བརྗོད་སྙམ་ན། དེ་ལྟ་
བུ་ཉིད་རྟོགས་པའི་ཞེས་བྱ་བའོ། །ཁྱབ་པ་འཛིན་པའི་དུས་སུ་འོལ་སྤྱིའི་རྣམ་པ་ཙམ་དུ་ལྡན་པའི་དོན་རྟོགས་པའི་ཤུགས་ཀྱིས་སོ། །དེ་ལྟ་མ་ཡིན་ཏེ་ཞེས་བྱ་བ་ནི་གལ་ཏེ་འདོད་པ་ཙམ་གྱི་ཤུགས་ཀྱིས་མི་བརྗོད་ཀྱིས་འོན་ཀྱང་ཡུལ་ལ་སོགས་པར་ངེས་པའི་བསྒྲུབ་པར་བྱ་བ་རྟོགས་པ་ཉིད་དུ་བརྗོད་ནའོ། །
འདི་ཉིད་བརྗོད་པ་ནི་གལ་ཏེ་ཞེས་བྱ་བའོ། །དེའི་ཚེ་རྗེས་སུ་དཔག་པས་ཅི་བྱ། སྔར་གྱི་ཞེས་བྱ་བ་ཚང་བང་ན་གནས་པའི་དུ་བ་རྟོགས་པ་ཉིད་དུའོ། །དེས་ན་ཁྱབ་པ་འཛིན་པའི་དུས་ན། དེ་ཁོ་ནར་བསྒྲུབ་བྱ་རྟོགས་པ་ནི་ཡོད་པ་མ་ཡིན་ནོ། །དེ་རྟོགས་པ་ནི་སྲིད་པ་ཡང་མ་ཡིན་ནོ་ཞེས་བརྗོད་པ་ནི།
འབྱུང་བར་འགྱུར་བ་ཞེས་བྱ་བའོ། །ཁྱབ་པ་འཛིན་པའི་དུས་ན་མེད་པ་ཡིན་ནོ། །ཅིའི་ཕྱིར་གང་གི་ཕྱིར་འབྱུང་བར་འགྱུར་བ་ཡིན་པས་སོ། །དེའི་རང་བཞིན་ཞེས་བྱ་བ་ཁྱབ་པའི་དུས་ཀྱི་འོལ་སྤྱིར་རྟོགས་པ་ཡོད་པ་ཉིད་ཀྱིས་སོ། །གཞན་གྱི་ཐ་སྙད་ཙམ་གྱི་ཞེས་སྨྲས་སོ། །གལ་ཏེ་ཁྱབ་པའི་
เล่ม ๑๘๖ · หน้า 46a
ཚེ་ལྷག་པར་ཞེན་པས་དངོས་པོ་མ་བཟུང་ན་དེའི་ཚེ་ལྷག་པར་ཞེན་པ་དེ་བསླུ་བར་འགྱུར་རོ་ཞེས་བྱ་བའི་དོན་ཏོ། །ལན་ནི་དེ་ལྟ་བུའི་ཞེས་བྱ་བའོ། །གལ་ཏེ་ཁྱབ་པའི་ལྷག་པར་ཞེན་པ་སྲེག་བྱེད་མ་ཡིན་པ་ལ་སོགས་པར་འགྱུར་བ་ཡིན་ན་དེའི་ཚེ་སླུ་བར་འགྱུར་རོ་གང་གི་ཚེ་མེ་དང་དུ་བ་དག་ལ་སྲེག་
པ་ལ་སོགས་པར་བྱེད་པ་དང་མཚུལ་དུ་བརྐུ་བ་ལ་སོགས་པར་བྱེད་པར་ལྷག་པར་ཞེན་པར་བྱེད་པ་དེའི་ཚེ་ནི་སླུ་བ་མ་ཡིན་ནོ། །ངེས་པ་འདི་ཞེས་བྱ་བ་ནི་དེ་ལྟ་བུའི་དོན་བྱ་བ་བྱེད་པ་ཁོ་ན་ལ་ཁྱབ་པར་ལྷག་པར་ཞེན་གྱི་གཞན་ལ་མ་ཡིན་ནོ་ཞེས་བྱ་བའི་ངེས་པ་འདི་ཅི་ཡོད་དེ་འགའ་ཡང་མེད་དོ་ཞེས་བྱ་བའི་དོན་
ཏོ། །རྒྱུ་དང་འབྲས་བུ་ཞེས་བྱ་བ་ནི་མེ་དང་དུ་བ་དག་ལ་ཁྱབ་པ་ཞེན་པར་བྱེད་པ་ནི་བརྒྱུད་ནས་མེ་དང་དུ་བ་སྔོན་དུ་འགྲོ་བ་ཅན་ཡིན་ཏེ། དེས་ན་དེ་གཉིས་ལ་ངེས་པ་ཡིན་ནོ། །ངེས་པ་ཞེས་བྱ་བ་ནི་མེ་དང་དུ་བ་དག་ལ་ཁྱབ་པ་ལྷག་པར་ཞེན་པ་འབྲས་བུ་ཡིན་ནོ་ཞེས་བྱ་བ་དེ་ཉིད་ཅི་ལྟར་འཛིན། ཐ་སྙད་ཅེས་བྱ་བ་ནི།
ཁྱབ་པར་ངེས་པ་མེ་དང་དུ་བ་དག་ལ་ངེས་པ་ཞེས་བྱ་བའི་ཐ་སྙད་གང་ཡིན་པ་འདི་ཉིད་ལས་སོ། །འདི་ནི་ཞེས་བྱ་བ་འདོད་པ་བསྒྲུབ་བྱ་ཉིད་དུ་བརྗོད་པས་སོ། །དེ་ལས་བཟློག་པ་ཞེས་བྱ་བ་ཐལ་བར་བྱས་པ་ལས་བཟློག་པ་བསྒྲུབ་པའི་ཕྱིར་རོ། །ཅི་ལྟར་སྙམ་ན་ཅི་ལྟར་གཏན་ཚིགས་འདི་ཞེས་སྨྲས་སོ། །
ཆོས་ཅན་ལས་གཞན་གྱིས་ཁྱད་པར་དུ་འགྱུར་བའི་མི་རྟག་པ་ཉིད་གང་ཡིན་དེ་མེད་པ་ཡང་སྒྲུབ་པར་བྱེད་པ་ཡིན་ཏེ། བཟློག་པས་ཁྱབ་པར་རྟོགས་པའི་ཕྱིར་རོ། །མི་རྟག་པའི་སྒྲ་ཞེས་བྱ་བ་ནི། གང་ལ་མི་རྟག་པའི་སྒྲ་ཡོད་པ་དེའི་དངོས་པོ་སྟེ་དེ་ལྟར་ནི་སྒྲ་ལ་སྒྲུབ་པ་མ་ཡིན་ནོ། །དེ་ལྟ་བུའི་ཉིད་དུ་ཞེས་
བྱ་བ་ནི་མི་རྟག་པ་ཙམ་བསྒྲུབ་པ་ཁོ་ནས་སོ། །དེས་ན་རྣམ་པ་དེ་འདྲ་བའི་སྤྱིའོ། །འོ་ན་གང་གི་ཚེ་ཉེས་པར་འགྱུར་ཞེ་ན། མི་རྟག་པ་ཙམ་ཞེས་བྱ་བའོ། །དེ་ལྟ་བུ་ཉིད་དུ་ཞེས་བྱ་བ་འབའ་ཞིག་པའི་ཆོས་བསྒྲུབ་པ་ཉིད་ཀྱིས་སོ། །གཅིག་ལ་ཞེས་བྱ་བ་ནི་ཆོས་ཅན་ལ་གཉིས་པ་མི་རྟག་པ་ཉིད་བསྒྲུབས་ན་ཕན་
ཚུན་གྱི་ཁྱད་པར་ཅན་ཚོགས་པ་འགྲུབ་པའི་ཕྱིར་རོ། །གལ་ཏེ་གཅིག་ལ་གཉིས་པ་བསྒྲུབས་པས་ཚོགས་པར་འགྲུབ་ན་འོ་ན་ཅི་ལྟར་ཞེས་བྱ་བའོ། །ཚོགས་པ་བཟློག་པ་འབའ་ཞིག་འགལ་བར་འགྱུར་བ་ཞིག་ན་དེ་ལས་གཞན་བཟློག་པ་ཡང་ཡིན་ཏེ་དེས་ན་སྒྲའི་ཁྱད་པར་ཅན་གྱི་མི་རྟག་པ་ཉིད་ལ་
เล่ม ๑๘๖ · หน้า 46b
སོགས་པར་བསྒྲུབ་པར་བྱ་བ་ཡིན་ལ། དེ་ཕྱིན་ཅི་ལོག་ཏུ་བྱེད་པའི་ཕྱིར་ན་གཏན་ཚིགས་འགལ་བ་ཡིན་ནོ་ཞེས་གཞན་དག་སེམས་པའོ། །ལན་ནི་དེའི་སྒོ་ཉིད་ནས་ཞེས་བྱ་བའོ། །ཆོས་ཀྱི་ཁྱད་པར་ལ་སོགས་པ་བཟློག་པའི་སྒོ་ནས་སོ། །འདི་ཉིད་གསལ་བར་བྱེད་པ་ནི། གང་གི་ཞེས་བྱ་བའོ། །ཆོས་ཀྱི་
ཁྱད་པར་འགོག་པ་ལ་སོགས་པའི་དཔེར་བརྗོད་པ་དག་ནི། ཆོས་དང་ཆོས་ཅན་ཁྱད་པར་དང་། །ཆོས་ཅན་རང་གི་ངོ་བོ་ལ། །ཞེས་བྱ་བ་འདིའི་ནང་དུ་སྟོན་པར་འགྱུར་རོ། །དོགས་པ་བསུ་བ་ནི་སྒྲ་ནི་ཞེས་བྱ་བའོ། །སྒྲ་གང་ལ་མི་རྟག་པའི་སྒྲ་ཡོད་པ་ཞེས་ཚིག་སྦྱར་རོ། །ཆོས་ཅན་གཞན་ལ་ཞེས་
བྱ་བ་ནི་ཆོས་ཅན་སྒྲ་གཞན་ལ་མི་རྟག་པའི་ཁྱད་པར་ཅན་གྱི་སྒྲ་གཞན་བསྒྲུབ་ཏུ་མེད་དེ། གྲུབ་པ་ཉིད་དུ་རྟོགས་པ་ནི་མ་ཡིན་ནོ། །དེའི་ཕྱིར་ཞེས་བྱ་བ་ནི། ཆོས་ཅན་སྒྲ་ལ་སྒྲ་དང་མི་རྟག་པ་ཉིད་ཀྱི་སྤྱི་གཞན་སྒྲུབ་པ་མི་སྲིད་པའི་ཕྱིར་རོ། །གལ་ཏེ་ཞེས་བྱ་བ་ལ་སོགས་པས་ནི་རང་ཉིད་སྨོས་པ་དོན་མེད་པར་
ཕྱོགས་སྔ་མ་འགོག་པའོ། །འདོད་པ་སྨོས་པ་ཉིད་ཀྱིས་རང་ཉིད་ཀྱི་སྒྲའི་གཅད་བྱ་བཟློག་པའི་ཕྱིར་ན་རང་ཉིད་ཀྱི་སྒྲ་དོན་མེད་དོ་ཞེས་བྱ་བའི་དོན་ཏོ། །ཁ་ཅིག་ན་རེ་ཞེས་བྱ་བ་ནས་སྐྱོན་ཡིན་ནོ་ཞེས་བྱ་བའི་བར་ནི་ཐམས་ཅད་ཀྱང་རྣམ་འགྲེལ་ལ་འཇུག་པའི་དོན་དུ་རྩོད་པ་བྱེད་པའོ། །དམ་བཅའ་བ་ནི་
ཞེས་བྱ་བ་ནས་གཞན་དུ་ནི་མ་ཡིན་ནོ་ཞེས་བྱ་བའི་བར་ནི་རིགས་པའི་བཤད་པའོ། །རྣམ་འགྲེལ་ལས་ཞེས་བྱ་བ་ནི་གསལ་བྱེད་ཀྱི་སྟེ། གཞན་དུ་ནི་ལུང་ཞེས་བྱ་བ་ནས་འདི་ལྟར་གྱི་ལྟག་ཡན་ཆད་དོ། །གཞན་དུ་ན་ཞེས་བྱ་བ་ནི། གལ་ཏེ་ལུང་གི་དོན་སྟོན་པའི་ཕྱིར་དམ་བཅའ་བ་ལུང་ཡིན་ནོ་ཞེས་མི་
བརྗོད་ན་དེའི་ལུང་ཚད་མ་ཞེས་བྱ་བ་ལ་སོགས་པའོ། །དེའི་དོན་ལ་ཞེས་བྱ་བ་དམ་བཅའ་བའི་དོན་ལ་གནོད་ནའོ། །དེའི་དོན་ལ་གནོད་ན། དམ་བཅའ་བའི་སྐྱོན་ཡང་ཡིན་ནོ་ཞེས་འབྲེལ་ཏེ། གང་གིས་དམ་བཅའ་བའི་སྐྱོན་དུ་འགྱུར་བ་དེའི་དོན་ལ་གནོད་པ་ཉིད་དུ་ཅི་ལྟར་འགྱུར་སྙམ་ན། མི་
རྟག་པ་ཉིད་ཀྱང་ཞེས་བྱ་བའོ། །ནམ་མཁའི་ཡོན་ཏན་ཉིད་དང་ལྷན་ཅིག་སྒྲ་ལ་འདུ་བ་མི་རྟག་པ་ཉིད་ག་ལ་ཡོད་པའི་མི་རྟག་པ་དེ་ཉིད་བསྒྲུབ་པར་བྱ་བ་སྟེ། དམ་བཅའ་བ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ཡིན་མོད་དེ་ལྟ་ན་ཡང་ཅི་ལྟར་དམ་བཅའ་བའི་ཉེས་པ་ཡིན་སྙམ་ན། ཅི་ལྟར་ཞེས་བྱ་
เล่ม ๑๘๖ · หน้า 47a
བ་ལ་སོགས་པའོ། །བསྟན་བཅོས་ལ་བརྟེན་པ་ཡིན་པའི་ཕྱིར་ཞེས་བྱ་བའི་གཏན་ཚིགས་རྣམ་པ་འབའ་ཞིག་གིས་སྒྲ་དེ་ལ་ནམ་མཁའི་ཡོན་ཏན་ཉིད་བསྒྲུབ་པར་བྱ་བ་ལྟར་རོ། །དམ་བཅའ་བའི་དོན་དེ་བསྒྲུབ་པར་བྱ་བ་ནི་དེ་ལྟ་བུའི་ཞེས་བྱ་བ་སྒྲ་དེ་ལ་འདུ་བའི་མི་རྟག་པ་ཉིད་ཡིན་ནོ། །དེ་
ཡང་ཞེས་བྱ་བ་ནི་ནམ་མཁའི་ཡོན་ཏན་ཉིད་དོ། །དེས་ནི་མི་རྟག་པ་ཉིད་སྒྲུབ་པའི་རྟགས་ཀྱིས་སོ། །དམ་བཅའ་བའི་སྐྱོན་དེ་ལུང་དང་འགལ་བ་ཡིན་ནོ། །གལ་ཏེ་གཏན་ཚིགས་འདིས་མི་རྟག་པ་ཉིད་སྒྲུབ་པར་བྱེད་པ་དེ་ལྟ་ན་ཡང་དག་གི་བསྟན་བཅོས་ཀྱི་དོན་བཀག་པས་འགལ་བར་འགྱུར་བ། ནམ་མཁའ་ཡོན་ཏན་
ཉིད་ཅི་ལྟར་སེལ་བར་བྱེད་པ་ཡིན་སྙམ་ན། འདི་ལྟར་ཞེས་སྨྲས་སོ། །སྐད་ཅིག་དེ་མ་ཐག་ཏུ་འཇིག་གམ། དུས་གཞན་དུ་འཇིག་ཀྱང་རུང་ཏེ། ནམ་མཁའ་ཡོན་ཏན་ཉིད་རྣམ་པར་གནས་པ་མ་ཡིན་ནོ། །དེས་ན་བྱས་པའི་ཕྱིར་ཞེས་བྱ་བའི་གཏན་ཚིགས་ནི། བསྟན་བཅོས་ལ་གནོད་པའི་ཕྱིར་འགལ་བ་ཡིན་ནོ་ཞེས་བྱ་
བའི་དོན་ཡིན་ནོ། །ཕ་རོལ་པོ་དག་རྣམ་པ་འགའ་ཞིག་ལྟར་ནམ་མཁའ་འཛིན་པ་ལ་ཉེ་བར་མཁོ་བ་བརྗོད་པ་ནི་རླུང་གིས་ཞེས་བྱ་བའོ། །དེ་དག་གིས་ནི་ནམ་མཁས་སོ། །དེས་ནི་ཞེས་བྱ་བ་སྒྲ་ལའོ། །གང་གིས་ནམ་མཁའ་འཛིན་པར་སྟོན་པར་རླུང་གིས་ཁྱེར་བར་ཅི་ལྟར་འགྱུར་ཞེ་ན། དེ་ནི་དེའི་རང་བཞིན་ཉིད་
ཅེས་བྱ་བའོ། །ལན་ནི་འཇིག་རྒྱུ་མེད་ཀྱི་བར་དུ་ཞེས་བྱ་བའོ། །འོ་ན་རྟག་པར་གནས་པ་རྣམས་ལ་རྟེན་ཡོད་པར་འགྱུར་རོ་སྙམ་ན་བརྗོད་པ། གལ་ཏེ་སྐད་ཅིག་གནས་པའི་སྒྲ་ལ་བཤད་ཟིན་པའི་ཚུལ་དུ་རྟེན་བྱེད་པ་ཡིན་ལ་དུས་གཞན་གནས་པའང་ཡོད་པ་མ་ཡིན་ནོ། །དེའི་རྟག་པ་དུས་ཐམས་ཅད་དུ་གནས་
པ་ལ་ཡང་རྟེན་ཉིད་ཡོད་པ་མ་ཡིན་ནོ། །ཅིའི་ཕྱིར་ཞེ་ན། གང་གི་ཕྱིར་དོན་མེད་པ་ཡིན་པས་སོ། །དེས་ན་དོན་དམ་པར་ན་རྟེན་དང་བཅས་པ་ནི་འགའ་ཡང་ཡོད་པ་མ་ཡིན་ནོ། །ཕ་རོལ་པོ་ཅི་སྐད་བརྗོད་པའི་སུན་འབྱིན་པ་ཁས་ལེན་པས་སྒྲ་དུས་གཞན་དུ་གནས་པའི་ཕྱོགས་ལ་ཁྱད་པར་ཉེ་བར་སྟོན་པ་ན་
རྟེན་དང་བཅས་པར་རྟོགས་པ་ནི་རིགས་པ་ཡིན་ནོ་ཞེས་བརྗོད་པ་ནི། དེ་བདེན་ཞེས་བྱ་བ་སྟེ། བརྗོད་མ་ཐག་པ་སུན་འབྱིན་པ་དེའོ། །དེ་ལྟ་ན་ཡང་། དུས་ཅུང་ཟད་གནས་པའི་སྒྲའི་རང་བཞིན་ནི་རྟེན་དང་བཅས་པའི་མཚན་ཉིད་ལྷན་ཅིག་སྐྱེས་པའི་རང་བཞིན་ནོ། །ཅིའི་ཕྱིར་ཞེ་ན། འདི་ལ་ཞེས་བྱ་བའོ། །དེའི་
เล่ม ๑๘๖ · หน้า 47b
ཕྱིར་ཞེས་བྱ་བ་ནི་གསལ་བྱེད་ཀྱི་ལུགས་ཉེ་བར་སྡུད་པའོ། །མི་རྟག་པ་ཞེས་བྱ་བ་སྐད་ཅིག་མ་ཉིད་དུའོ། །དུས་ཅུང་ཟད་གནས་པའི་མི་རྟག་པ་ཉིད་ལ་ནི་རྟེན་དང་བཅས་པ་ཉིད་མི་འགལ་བས་གཏན་ཚིགས་དང་དམ་བཅའ་བའི་ཉེས་པར་མི་འགྱུར་རོ། །གཞན་ལའང་ཞེས་བྱ་བ་ནི་ནམ་མཁའི་ཡོན་
ཏན་ཉིད་ལ་སོགས་པ་ལ་ཡང་སྐབས་མ་ཡིན་པ་དེ་ནི་མཚུངས་སོ། །བཟློག་པ་བསྒྲུབ་པ་ལ་ཡང་སྐྱོན་དུ་འགྱུར་རོ་ཞེས་འབྲེལ་ཏོ། །གང་གིས་དེ་ལས་བཟློག་པ་བསྒྲུབ་པ་ལ་སྐྱོན་དུ་འགྱུར་བ། ཅི་སྟེ་བསྒྲུབ་པར་བྱ་བ་ཡིན་ནམ་ཞེ་ན། གང་གིས་ཕྱིར་ཞེས་བྱ་བའོ། །དེས་ཞེས་བྱ་བ་བསྟན་བཅོས་ཀྱིས་བརྗོད་
པ་སྒྲ་དེའི་ཆོས་ནམ་མཁའི་ཡོན་ཏན་ཉིད་གང་ཡིན་པ་དེ་དང་འབྲེལ་བར་གྱུར་པའི་མི་རྟག་པ་ཉིད་དེ་ནི་བསྒྲུབ་པར་བྱ་བ་ཡིན་པ་དེ་བཞིན་དུ་བསྟན་བཅོས་བྱེད་པས་འདོད་པའི་དྲི་ཞེས་བྱ་བ་སྒྲ་ཆོས་ཅན་ལ་ལྟོས་ནས་ཆོས་ཅན་གཞན་དེ་དང་འབྲེལ་པ་སའི་ཡོན་ཏན་ཉིད་འབྲེལ་པ་ཉིད་ཀྱི་བསྟན་བཅོས་ཏེ། དེ་
སྟོན་པར་བྱེད་པ་ཡིན་པའི་ཕྱིར་རོ། །བསྟན་བཅོས་དེས་བསྒྲུབས་པའི་མི་རྟག་པ་ཡང་བསྒྲུབ་པར་བྱ་བ་ཡིན་པར་འགྱུར་རོ་ཞེས་སྦྱར་རོ། །དེ་བཀག་ན་ཡང་ཞེས་བྱ་བ་ནི་སའི་ཡོན་ཏན་བཀག་ན་ཡང་སྟེ། ནམ་མཁའི་ཡོན་ཏན་བཀག་པ་འབའ་ཞིག་ཏུ་ནི་མ་ཟད་པའོ། །བསྟན་བཅོས་གང་
དུ་སྒྲ་ནམ་མཁའི་ཡོན་ཏན་དུ་བརྗོད་པའི་བསྟན་བཅོས་དེ་དང་འབྲེལ་བར་བསྟན་པའི་ཕྱིར་མི་རྟག་པ་ཉིད་མི་འཐད་དོ། །དེའི་ཕྱིར་དམ་བཅའ་བའི་སྐྱོན་དུ་འགྱུར་བ་ཉིད་དོ། །ཆོས་ཅན་ཞེས་བྱ་བ་ནི་སྒྲའོ། །ཆོས་ཅན་གཞན་དུའང་ཞེས་བྱ་བ་ནི་དྲི་ལའོ། །འཆད་པ་ནི་གལ་ཏེ་ཞེས་བྱ་བའོ། །དེའི་
སྟེ་མི་རྟག་པ་ཉིད་ཀྱི་ཆོས་ཀྱི་གཞི་ཡིན་པས་ཏེ། ནམ་མཁའི་ཡོན་ཏན་ཉིད་ཀྱི་གཞི་ཡིན་པས་ནི་མ་ཡིན་པའོ། །ཆོས་གཞན་ཞེས་བྱ་བ་ནམ་མཁའི་ཡོན་ཏན་ཉིད་ཀྱི་རྟེན་ཡིན་པས་ཀྱང་སྐབས་སུ་བབ་པའོ། །ལན་ནི་དེ་ལྟར་ན་ཞེས་བྱའོ། །དེའི་ཕྱོགས་གཅིག་ཏུ་གྱུར་པའི་བསྟན་བཅོས་
ཀྱིས་བརྗོད་པའི་ཆོས་ཅན་སྒྲ་ཞེས་བྱ་བ་གང་ཡིན་པ་དེ་ལས་ཆོས་ཅན་གཞན་དྲི་དེ་དང་འབྲེལ་པའི་ཆོས་སའི་ཡོན་ཏན་ཉིད་དེ་དང་འབྲེལ་པ་ཡང་ཆོས་ཅན་སྒྲའི་སྐབས་ཡིན་པའི་ཕྱིར་ཞེས་སྦྱར་རོ། །འོན་ཏེ་ཡང་མི་རྟག་པ་ཉིད་ཀྱི་ཆོས་དེའི་གཞིར་གྱུར་པའི་སྒྲའོ། །ཆོས་གཞན་ཡང་ཞེས་
เล่ม ๑๘๖ · หน้า 48a
བྱ་བ་ནི་ནམ་མཁའི་ཡོན་ཏན་ཉིད་དོ། །ཆོས་ཅན་ཆོས་སོགས་ཞེས་བྱ་བ་ནི། ཆོས་ཅན་གྱིས་ཆོས་ཡིན་པའི་ཕྱིར་རོ། །སྤྱིའི་ཕྱོགས་གཅིག་ཡིན་པའི་ཕྱིར་ཞེས་བྱ་བའོ། །འདོད་པ་དང་སྒྲུབ་པར་བྱེད་པ་འཇུག་པ་ཞེས་བྱ་བ་ནི། སྤྱིའི་ཕྱོགས་གཅིག་གི་ཁྱད་པར་ཉིད་ནི་རྟག་ཏུ་ཡོད་
པའི་ཕྱིར་ན། ཡོད་པ་ཙམ་གྱིས་བསྒྲུབ་པར་བྱ་བའི་འདོད་པ་འཇུག་པར་བྱེད་པར་འགྱུར་ལ། དེ་བཞིན་དུ་བྱས་པ་ཉིད་ལ་སོགས་པའི་སྒྲུབ་པར་བྱེད་པ་ཡང་བསྒྲུབ་བྱར་སྒྲུབ་པའི་དོན་ཏུ་ཉེ་བར་སྦྱོར་བར་འགྱུར་རོ། །དོགས་པ་བསུ་བ་ནི་འོན་ཏེ་ཞེས་པའོ། །བསྒྲུབ་པར་བྱ་བའི་སྤྱི་ནི་མི་རྟག་པ་ཉིད་ཀྱི་
ཆོས་དང་བཅས་པའི་སྒྲ་ཡིན་ལ་དེའི་ཕྱོགས་གཅིག་གི་ཁྱད་པར་ནི་ནམ་མཁའི་ཡོན་ཏན་གྱི་མཚན་ཉིད་ཀྱི་ཆོས་ཏེ། དེར་འདོད་པའི་ཕྱིར་རོ། །དེ་ལྟར་ཞེས་བྱ་བ་ནུས་པ་ཐོགས་པ་མེད་པ་ཉིད་དུའོ། །དེའི་སྟེ་སྐབས་ཀྱི་འབྲས་བུའོ། །སྒྲ་མི་རྟག་སྟེ་ཞེས་བརྗོད་པ་ལས་མི་རྟག་པ་ཉིད་སྐབས་སུ་
བབ་པ་ཡིན་ནོ་ཞེས་རྟོགས་པར་འགྱུར་བའོ། །དེ་ལྟར་ན་རྟོགས་པ་ཡང་དེ་དག་གིས་ཞེས་བྱ་བའི་རྣམ་འགྲེལ་གྱི་ཆ་ལ་རྩོད་པ་ཉེ་བར་བཀོད་ནས་ལན་འདེབས་པ་ནི་འདིར་བརྗོད་པ་ཞེས་བྱ་བའོ། །འདོད་པ་ལ་སྐབས་དེ་ཉིད་ཀྱི་ནུས་པ་ཡོད་པ་ནི་ཚིག་ལས་རྟོགས་པར་འགྱུར་བ་ཡིན་ནོ། །དེའི་ཕྱིར་ན་ཚིག་
དེ་ལས་སྐབས་རྟོགས་པ་ཉིད་ཡིན་ནོ། །གལ་ཏེ་ཚིག་ཉིད་ལས་འདོད་པ་རྟོགས་ཀྱི་སྐབས་ལས་ནི་མ་ཡིན་ནོ་སྙམ་ན། འདོད་པ་ཞེས་སྨོས་སོ། །ཚིག་ལས་ནི་འདོད་པ་ཙམ་ཞིག་རྟོགས་ཀྱི་འདོད་པའི་ཁྱད་པར་ནི་མ་ཡིན་ནོ། །དེས་ན་འདོད་པའི་དོན་ལ་ངེས་པ་ཉིད་དུ་ནི་སྐབས་ལས་རྟོགས་པ་ཡིན་ནོ་
ཞེས་བརྗོད་དོ། །གལ་ཏེ་ཚིག་ལས་སྐབས་ཀྱི་ནུས་པ་ན་འདོད་པ་ཉིད་ཅི་སྟེ་མི་རྟོགས་སྙམ་ན། ཚིག་ལས་ནི་ཞེས་སྨོས་སོ། །འོ་ན་སྐབས་འདོད་པའི་གོ་བར་བྱེད་པར་འགྱུར་རོ་སྙམ་ན། སྐབས་ནི་ཤེས་བྱའོ། །འོ་ན་ཇི་ལྟར་སྐབས་ཀྱིས་འདོད་པའི་ཁྱད་པར་གོ་བར་བྱེད་སྙམ་ན། དེས་ན་ཞེས་
བྱ་བ་སྟེ། གང་གི་ཕྱིར་ཚིག་གིས་འདོད་པའི་ཁྱད་པར་མི་རྟོགས་ལ། ནུས་པ་མེད་པའི་རྒྱུར་གྱུར་པའི་སྐབས་ལས་ཀྱང་མ་ཡིན་དེས་ནའོ། །སྐབས་གང་ལ་ཚིག་གིས་རྟོགས་པའི་ནུས་པ་ཐོགས་པ་མེད་པ་ཡོད་པ་དེ་ལ་དེ་སྐད་ཅེས་བརྗོད་དོ། །འདོད་པའི་མི་རྟག་པ་ཉིད་ལ་སོགས་པ་
เล่ม ๑๘๖ · หน้า 48b
སྒྲུབ་པའི་བསྒྲུབ་པར་བྱ་བ་ལ། སོ་སོར་ངེས་པ་གང་ཡིན་པ་དེ་གོ་བར་བྱེད་པའོ། །སྒྲ་ཞེས་བྱ་བ་ནི་རུང་བ་ཉིད་ཀྱི་རྗེས་སུ་དཔག་པ་ལ་བསམས་ནས་སམ། གཞན་གྱིས་བསམ་པས་བརྗོད་པ་ཡིན་ནོ། །དེ་ལ་རེ་ཞིག་སྒྲ་སྐབས་ཀྱིས་ནི་ནམ་མཁའི་ཡོན་ཏན་འདོད་པ་གོ་བར་བྱེད་པ་མ་ཡིན་ནོ་ཞེས་སྟོན་པ་ནི་
སྒྲ་ཡང་སྐབས་ཡིན་ནོ་ཞེས་བྱ་བའོ། །ཅིའི་ཕྱིར་ཞེ་ན། ནམ་མཁའི་ཡོན་ཏན་དེ་ལ་སྐབས་དེ་མེད་པའི་ཕྱིར་རོ། །འོ་ན་འབྲས་བུས་དེ་འདོད་པར་གོ་བ་ཡིན་ནོ་ཞེ་ན་འབྲས་བུ་ཚིག་ཅེས་བྱ་བའོ། །དེ་ཡང་ཞེས་བྱ་བ་ནི་སྒྲ་མི་རྟག་གོ་ཞེས་བྱ་བའི་ཚིག་དེ་ཡང་ནམ་མཁའི་ཡོན་ཏན་ལ་མེད་དོ་ཞེས་བྱ་
བའོ། །དེ་ལྟ་ན་ཡང་ཞེས་བྱ་བ་ནི་འདོད་པ་གོ་བར་བྱེད་པའི་རྟགས་མེད་ཀྱང་ངོ་། །ཅི་ལྟར་འབྲས་བུའི་རྟགས་མེད་སྙམ་ན། བསྒྲུབ་པར་བྱ་བའི་ཞེས་སྨོས་སོ། །འོ་ན་ནི་སྒྲར་འགྱུར་རོ་སྙམ་ན། ནུས་པ་ཞེས་བྱའོ། །འོ་ན་ཅི་སྟེ་འདྲ་བ་ཞིག་གནོད་ན། དམ་བཅའ་བ་དང་གཏན་ཚིགས་ཀྱི་ཉེས་
པ་ཡིན་སྙམ་ན་མེད་ན་མི་འབྱུང་བའི་ཞེས་སྨོས་སོ། །འོན་ཏེ་མངོན་སུམ་ཡང་ལུང་ལ་ལྟོས་པ་ཁོ་ནས་ཚད་མ་ཡིན་ནོ་སྙམ་ན། གང་ཅུང་ཟད་ཅེས་བྱ་བ་སྟེ། ལུང་ལ་མི་ལྟོས་པ་ཁོ་ནའོ་ཞེས་བྱ་བའི་དོན་ཏོ། །ཅི་སྟེ་ཞེས་བྱ་བ་ནི་དོགས་པ་བསུ་བའོ། །འདི་ག་ལས་ཤེ་ན་ལུང་གིས་ཞེས་བྱ་བའོ། །གལ་
ཏེ་ལུང་ལ་མི་ལྟོས་པར་གྱུར་ན་དེའི་ཚེ་ལུང་གིས་མི་གནོད་པ་ཞིག་གོ། །གལ་ཏེ་མངོན་སུམ་ལུང་གིས་གནོད་པས་འཁྲུལ་པར་འགྱུར་ན། མངོན་སུམ་གྱིས་གནོད་པས་ཀྱང་ལུང་འཁྲུལ་པར་ཅི་སྟེ་མི་འགྱུར་ཞེ་ན། ལྷ་ནི་ཞེས་བྱའོ། །ཅིག་ཤོས་ཀྱི་ཞེས་བྱ་བ་ནི་རབ་རིབ་མེད་པའི་མཐོང་བའོ། །
གལ་ཏེ་ག་ལ་ལྷ་མིག་ཡིན་པ་སྟེ། ལུང་གི་ཚིག་ཀུན་གྱི་བྱེད་པ་པོ་སྟེ་ཡིན་པར་གྲུབ་ན་དེའི་ཚེ་ཁོ་བོ་ཅག་ལ་སོགས་པའི་མངོན་སུམ་དེས་བྱས་པའི་ལུང་གིས་གནོད་པ་ཡིན་ནོ་ཞེས་བྱ་བའི་ཚིག་འདི་རིགས་པར་འགྱུར་བ་ཡིན་ན་དེ་ལྟར་གྲུབ་པ་ཡང་མ་ཡིན་ཏེ། ཕན་ཚུན་འགལ་བའི་དོན་བརྗོད་པའི་
ཕྱིར་རོ། །འོན་ཏེ་འདི་རྣམས་ལས་འགའ་ཞིག་ལྷའི་མིག་དང་ལྡན་པར་འགྱུར་བ་ཡིན་ནོ་སྙམ་ན། དེ་འདི་འགའ་ཞིག་ཅེས་བྱ་བ་སྟེ། ལྷའི་མིག་ཅན་ནམ། དེས་བྱས་པའི་ལུང་འགའ་ཞིག་གོ། །དེ་ནི་ཞེས་བྱ་བ་ནི་སྐྱེས་བུའམ་ལུང་ངོ་། །དེ་བཞིན་ཞེས་བྱ་བ་ནི་ལྷའི་མིག་གམ་དེས་བྱས་
เล่ม ๑๘๖ · หน้า 49a
པའོ། །དེ་ལྟར་ནི་བདག་ཅག་གིས་གསལ་བར་ངེས་པ་མ་ཡིན་ནོ། །འོན་ཏེ་ལུང་བྱེད་པ་མཐའ་དག་ནི་ཐམས་ཅད་ག་ལ་ཡིན་ནོ་སྙམ་ན། ཚིག་ཕན་ཚུན་ཞེས་བྱ་བའོ། །གཞན་གྱིས་ཐམས་ཅད་མཁྱེན་པ་ཞེས་བྱ་བའོ། །ཁྱེད་ཅག་པས་ཀྱང་གཞན་པ་སྟེ་ངན་པ་ནི་མ་ཡིན་ཏེ་འོན་ཀྱང་ཁྱེད་
པས་ནི་དྲག་གོ་ཞེས་བྱ་བའི་དོན་ཏོ། །དེས་ན་དེ་དག་གི་ཚིག་དང་མི་འགལ་བར་རྗེས་སུ་དཔག་པ་འཇུག་པ་ཡིན་ནོ་ཞེས་བྱ་བར་བསམ་པའོ། །ལན་ནི་དེ་ལྟ་ན་འོ་ན་ཞེས་བྱ་བའོ། །ལུང་བྱེད་པ་ཐམས་ཅད་ཁྱེད་ཅག་པས་མི་དྲག་རྒྱུ་མེད་པའི་ཕྱིར་ལུང་གཅིག་གི་ཕྱོགས་སུ་ལྷུང་བར་མི་རིགས་སོ། །དེ་ན་ཅི་
ལྟར་རང་གི་བསྟན་བཅོས་དང་འགལ་བ་སྤོང་བ་དེ་བཞིན་དུ་གཞན་གྱི་བསྟན་བཅོས་དང་འགལ་བ་ཡང་སྤང་བར་བྱ་ན། དེ་ཡང་མི་ནུས་པ་ཁོ་ནའོ། །དེས་ན་ཞེས་བྱ་བ་ནི་ལུང་ཐམས་ཅད་དང་འགལ་བ་སྤང་བར་མི་ནུས་པས་ནའོ། །སྐྱེ་བར་མི་འགྱུར་བས་ཞེས་བྱ་བ་ནི། སྤྱི་ལ་སོགས་པ་རྗེས་སུ་དཔག་པ་
འཇུག་པས་སངས་རྒྱས་པའི་ལུང་གནོད་པར་འགྱུར། སྤྱི་མེད་པའི་རྗེས་སུ་དཔག་པ་འཇུག་ན་ཡང་གཞན་གྱི་ལུང་ལ་གནོད་པས་སོ། །དེས་ན་གཞན་གྱི་ལུགས་ལ་རྗེས་སུ་དཔག་པ་མི་སྲིད་པ་ཁོ་ནའོ། །རྗེས་སུ་དཔག་པ་ཚད་མ་མ་ཡིན་ཏེ་ཞེས་བྱ་བ་ནི་རྟགས་བསྟན་བཅོས་ལས་གནོད་པར་བྱེད་པས་
འགལ་བ་ཡིན་པའི་ཕྱིར་རོ། །དེ་ཉིད་བརྗོད་པ་ནི། བསྟན་བཅོས་དང་ཞེས་བྱའོ། །ཕྱིས་ཞེས་བྱ་བ་ལུང་དང་འགལ་བའི་སྒོ་ནས་བསྒྲུབ་བྱ་མ་གྲུབ་པར་མི་འགྱུར་བའོ། །དེ་དང་ཞེས་བྱ་བ་རྗེས་སུ་དཔག་པས་གྲུབ་པ་དང་འགལ་བའི་ལུང་ངོ་། །ཁས་བླངས་པ་ལ་ཞེས་བྱ་བ་ནི་ཁས་བླངས་པའི་བསྟན་
བཅོས་ལ་ལྟོས་ནས་བསྟན་བཅོས་དང་འགལ་བར་ཡང་འགྱུར་བའོ། །གཞན་དུ་ནི་ཞེས་བྱ་བ་ཁས་མ་བླངས་པའི་བསྟན་བཅོས་ལ་ལྟོས་ནས་ནི་མ་ཡིན་པའོ། །ཐམས་ཅད་ལ་ཞེས་བྱ་བ་ནི་ངེས་པའི་རྒྱུ་མཚན་མེད་པའི་ཕྱིར་རོ། །གཞན་གྱི་དོགས་པ་བསུ་བ་ནི། རྟག་མི་བཟོད་པའི་ཞེས་བྱ་བའོ། །
ངེས་པའི་བསྟན་བཅོས་ཁས་ལེན་པའི་རྒྱུ་ནི་རྟག་པ་ཉིད་ཡིན་ནོ་ཞེས་བྱ་བའི་དོན་ཏོ། །ཚད་མ་ཡིན་ལ་ཞེས་བྱ་བ་ནི་རྗེས་སུ་དཔག་པའི་རང་བཞིན་ཡིན་པའི་ཕྱིར་རོ། །བརྟག་པ་དེ་ཉིད་ཀྱང་ཁས་བླངས་པ་དེས་སོ། །འདི་ལ་བསམ་པ་ནི་འདི་ཡིན་ཏེ། གལ་ཏེ་བརྟག་པར་འོས་པ་ཁོ་ན་ཁས་བླང་བར་
เล่ม ๑๘๖ · หน้า 49b
བརྗོད་ན། དེའི་ཚེ་ཁས་བླངས་པས་བརྟག་པ་གནོད་པར་བྱེད་དོ་ཞེས་ཁས་བླང་བར་མི་བྱ་བར་འགྱུར་ན། ཁྱོད་ཀྱི་འདོད་པས་ནི་ཁས་བླངས་པས་བརྟག་པ་ལ་གནོད་པ་ཡང་ཡིན་ཏེ། སྒྲ་མི་རྟག་པར་རྗེས་སུ་དཔོག་པ་ལ་ནམ་མཁའི་ཡོན་ཏན་ཉིད་དུ་སྟོན་པའི་བསྟན་བཅོས་ཀྱིས་གནོད་པར་ཁས་བླངས་པའི་
ཕྱིར་རོ། །དེའི་ཚེ་ནི་རྟོགས་པའི་དུས་ནའོ། །དེ་ནི་བསྟན་བཅོས་སོ། །དེའི་ཚེ་ཞེས་བྱ་བ་ནི་བསྟན་བཅོས་ལ་མི་ལྟོས་པའི་དུས་ནའོ། །དེའི་ཚེ་ཞེས་བྱ་བ་ནི་རྩོད་པའི་དུས་ནའོ། །ཁས་བླངས་མེད་ཕྱིར་ཞེས་བྱ་བ་ནི། བསྟན་བཅོས་ཁས་མ་བླངས་པའི་ཕྱིར་རོ། །ཁས་ལེན་པར་བྱ་བ་ལ་ཐབས་ཏེ་རྒྱུའོ། །
འདི་ཉིད་ནི་དཔྱོད་པའོ། །དེ་ཚེ་སྟེ་རྩོད་པའི་དུས་ན་ཁས་བླངས་པ་དེ་ཡོད་ཀྱང་སྟེ། ཡོད་པ་ཡིན་པ་ཡང་བརྟག་པ་ལ་གནོད་པའི་ཡན་ལག་མིན་ཏེ་རྒྱུ་མ་ཡིན་ནོ། །གལ་ཏེ་དེ་ཙམ་གྱིས་ཡོངས་སུ་མ་ཚིམ་ན་ཞེས་བྱ་བ་ནི་མངོན་སུམ་དང་རྗེས་སུ་དཔག་པའི་སྤྱོད་ཡུལ་ཙམ་གྱིས་ཐར་པ་འདོད་པ་དག་ཕུང་
པོ་གསུམ་པ་མེད་པར་ཡོངས་སུ་མ་ཚིམ་ནའོ། །ཅིའི་ཕྱིར་དེའི་ཚེ་བསྟན་བཅོས་ཀྱིས་གནོད་སྙམ་ན། གང་གི་ཕྱིར་གནས་གསུམ་པར་ནི་འཕོ་བ་ན་སྟེ། འཕོ་བའི་དོན་དུ་བསྟན་བཅོས་ལེན་པར་རིགས་ལྡན་ཡིན་ཏེ། དེས་ན་དེ་ཉིད་ཀྱི་ཚེ་བསྟན་བཅོས་ཀྱིས་གནོད་ཀྱི་གཞན་གྱི་ཚེ་ནི་མ་ཡིན་ནོ། །ཅི་ལྟར་
ན་བསྟན་བཅོས་ཡོངས་སུ་འཛིན་པ་ཡང་དེའི་རྒྱུ་མཚན་ཡིན་ཞེ་ན། དེས་གྲུབ་དོན་ལ་ཞེས་བྱའོ། །གལ་ཏེ་གནས་གསུམ་པར་འཕོ་བ་ན་བསྟན་བཅོས་ཁས་མི་ལེན་ན། དེའི་ཚེ་དེས་གྲུབ་པའི་དོན་རྣམས་ལ། བསྟན་བཅོས་དང་འགལ་བར་སེམས་པ་ཡང་མི་རུང་བར་འགྱུར་ཏེ། ཆོས་ཅན་མ་གྲུབ་པའི་
ཕྱིར་རོ། །གལ་ཏེ་བརྟག་པ་སྔོན་དུ་འགྲོ་བ་ཅན་གྱི་ཁས་ལེན་པ་ཡང་དེས་གྲུབ་པའི་དོན་རྣམས་ལ་སེམས་པ་ཅི་ལྟར་འཐད་སྙམ་ན། བརྟགས་ནས་ཞེས་བྱའོ། །དེ་ནི་ཅི་ལྟར་དེ་ལ་དམ་བཅས་གནོད་ཅེས་བྱ་བ་ནི་རྒོལ་བ་དེ་དང་འབྲེལ་བའི་བསྟན་བཅོས་ཚད་མས་གྲུབ་པའི་མི་རྟག་པ་ཉིད་སྟོན་
པར་བྱེད་པ་དེ་ལ། ནམ་མཁའི་ཡོན་ཏན་ཉིད་དུ་དམ་བཅའ་བས་ཅི་ལྟར་གནོད་དེ་མི་གནོད་པ་ཁོ་ནའོ། །འོན་ཏེ་ཡང་བསྟན་བཅོས་རྟོགས་པ་དེས་ན་དེ་ལ་དམ་བཅའ་བས་གནོད་དོ་སྙམ་ན། བསྟན་བཅོས་དེ་ལ་སླར་ཡང་བརྟག་པར་བྱ་བ་མ་ཡིན་ཏེ་བརྟགས་ཟིན་པའི་ཕྱིར་རོ། །གལ་ཏེ་དེ་ལྟར་
เล่ม ๑๘๖ · หน้า 50a
ན་ཡང་རྟོག་ན་ནི། དེའི་ཚེ་བསྟན་བཅོས་དེ་ནི་སྔར་བརྟགས་པར་མི་འགྱུར་རོ། །ཡང་ཞེས་བྱ་བ་ནི་མ་བརྟགས་པར་བསྟན་བཅོས་ཁས་བླངས་པར་ཡང་ངོ་། །ཚད་མས་གྲུབ་པ་ཞེས་བྱ་བ་ནི་མི་རྟག་པ་ཉིད་དོ། །ཚད་མས་མ་གྲུབ་པ་ཞེས་བྱ་བ་ནི་ནམ་མཁའི་ཡོན་ཏན་ཉིད་དོ། །གསུམ་
པ་ལས་གཞན་དུ་ཞེས་བྱ་བ་ནི་མངོན་སུམ་དང་རྗེས་སུ་དཔག་པའི་ཡུལ་ལའོ། །གལ་ཏེ་དེ་ནི་ཞེས་བསྒྲུབ་པར་བྱ་བ་མི་རྟག་པ་ཉིད་ལ་སོགས་པའོ། །གལ་ཏེ་ཞེས་བྱ་བ་ལ་སོགས་པ་ནི་རྩོད་པའོ། །གལ་ཏེ་བསྟན་བཅོས་ཁས་མི་ལེན་ན་དེའི་ཚེ་བསྟན་བཅོས་ཀྱིས་གནོད་པར་དོགས་པའི་དོན་ཞེས་
བྱ་བ་ནི་བསྟན་བཅོས་ཀྱིས་གནོད་པར་བྱས་པའོ། །མ་ཡིན་ཏེ་ཞེས་བྱ་བ་ལ་སོགས་པ་ནི་ལེན་ནོ། །ཚད་མས་གྲུབ་པ་མི་རྟག་པ་ཉིད་ནའོ། །ཚད་མས་གྲུབ་པ་ནི་མི་གནོད་པས་ལྡོག་པ་མ་ཡིན་ཏེ་དེས་ན་དེས་བསྒྲུབ་པར་བྱ་བ་ནི་མ་ཡིན་ནོ་ཞེས་བྱ་བ་ནི་མི་རིགས་པར་བརྗོད་པའོ། །བསྟན་བཅོས་
དང་སྐྱེས་བུ་འབྲེལ་པ་མེད་པའི་ཕྱིར་རོ། །འོ་ན་བསྟན་བཅོས་དེ་སྐྱེས་པ་ཡིན་པར་ཅི་ལྟར་འགྱུར་ཞེ་ན་བསྟན་བཅོས་ནི་ཡོན་ཏན་དང་ལྡན་པས་དེ་ཡུལ་གསུམ་ཡོངས་སུ་དག་པའི་མཚན་ཉིད་དང་ལྡན་པས་སྐྱེས་བུའི་ཡིན་ནོ། །ཡོན་ཏན་དང་ལྡན་པའི་བསྟན་བཅོས་ནི་ལྡོག་པ་དང་ལྡན་པས་འཛིན་གྱི་ཡོན་
ཏན་དང་མི་ལྡན་པ་ནི་མི་འཛིན་པའི་ཕྱིར་རོ། །ཅི་ལྟར་འབྲེལ་པ་མེད་སྙམ་ན། འདི་ལྟར་ཞེས་བྱ་བའོ། །འོ་ན་དེ་ནི་ཡོན་ཏན་དང་ལྡན་པ་ཉིད་ཀྱིས་དེའི་ཞེ་ན་ཡོན་ཏན་ཉེས་པ་ཞེས་བྱ་བའོ། །གལ་ཏེ་བསྟན་བཅོས་མ་ཡིན་ན་འོ་ན་འདི་ཅི་ཡིན་ཞེ་ན། གྲུབ་མཐའ་ཞེས་གསུངས་སོ། །དེ་ལས་ཞེས་བྱ་
བ་ནི་གདོན་མི་ཟ་བ་ལས་སོ། །འདིས་ནི་ཕྱེད་ཕྱི་མ་བཤད་ནས་ཕྱེད་སྔ་མ་འཆད་པ་ནི། ལྷན་ཅིག་ཅེས་བྱ་བ་སྟེ། སྐྱེས་བུ་དང་བསྟན་བཅོས་དག་གི་ལྷན་ཅིག་སྐྱེས་པའི་འབྲེལ་བ་ཉིད་ལས་སོ། །དེ་ལྡན་ནི་ལུང་དང་ལྡན་པའོ། །ལུང་གིས་ཚད་མ་ལ་གནོད་ན་ཚད་མ་དོར་བའི་ཕྱིར་ན་ཡོན་ཏན་དང་སྐྱོན་རྣམ་
པར་དབྱེ་བ་མེད་པར་འགྱུར་རོ་ཞེས་བརྗོད་པ་ནི། ཚད་མ་ཞེས་བྱ་བའོ། །དེ་དང་ཞེས་བྱ་བ་ནི་བསྟན་བཅོས་དང་འགལ་བ་སྤང་བའི་དེ་དང་རྗེས་སུ་མཐུན་པའི་དཔེས་སོ། །ཚད་མ་མ་ཡིན་པ་ཉིད་ན་ཡང་འགལ་བ་སྤངས་པ་མ་ཡིན་ཏེ་ཞེས་འབྲེལ་ཏོ། །ཆོས་ཅན་དེ་ཉིད་ཅེས་བྱ་བ་ཆོས་ཅན་སྒྲས་དེ་ཉིད་ཀྱི་
เล่ม ๑๘๖ · หน้า 50b
ཆོས་ནམ་མཁའི་ཡོན་ཏན་ཉིད་ལ་མི་རྟག་པ་ཉིད་སྒྲུབ་པར་བྱེད་པའི་བྱས་པ་ཉིད་ཀྱིས་གནོད་ན། བརྗོད་པ་ལ་སྟེ་མི་རྟག་པ་ལ་ཡང་ངོ་། །འོན་ཏེ་མི་རྟག་པ་ཉིད་འདི་ནི་ནམ་མཁའི་ཡོན་ཏན་ཉིད་ཀྱིས་སྒྲུབ་པར་བྱེད་པ་ཡིན་ནོ། །དེས་ན་གནོད་པར་བྱེད་པ་ནི་ཞེས་བྱའོ། །དེ་ལས་གཞན་ཞེས་བྱ་བ་མེ་སྒྲུབ་པར་བྱེད་
པས་མེ་མེད་པ་ལ་གནོད་པར་བྱ་བའོ། །འབྲེལ་པ་མེད་ན་ཆོས་ནམ་མཁའི་ཡོན་ཏན་ཉིད་མ་གྲུབ་པས་མི་རྟག་པ་ཉིད་མ་གྲུབ་པར་ནི་ཅི་ལྟར་འགྱུར། དེ་གྲུབ་ཡིན་ན་ཏེ་མི་རྟག་པ་ཉིད་གྲུབ་པ་ཡིན་ན། མི་རྟག་པ་ཉིད་དེ་བསྒྲུབ་པར་བརྗོད་པའོ། །གང་གིས་དེ་སྐད་བརྗོད་པ་དེ་ལྟར་མཐོང་བ་ཡོད་དམ་
ཅི་སྙམ་ན། དུ་བ་གཅིག་གིས་ཀྱང་ཞེས་བྱ་བའོ། །འགལ་བའི་ཕྱིར་ཞེས་བྱ་བ་ནི་རྩོད་པའོ། །མེ་དང་གྲང་བའི་རེག་པ་དག་འགལ་བའི་ཕྱིར་ན། དུ་བས་གྲང་བ་དང་འགལ་བའི་མེ་སྒྲུབ་པར་བྱེད་ཀྱང་དུ་བ་འགལ་བའི་གཏན་ཚིགས་ལྟར་སྣང་བ་མ་ཡིན་ནོ། །འགལ་བ་མཚུངས་སོ་ཞེས་བྱ་བ་ནི་མི་
རྟག་པ་ཉིད་དུ་གྱུར་ན་ཡོན་ཏན་ཉིད་མེད་པའི་ཕྱིར་རོ། །ཡོན་ཏན་དང་ཡོན་ཏན་ཅན་གྱི་དངོས་པོ་ནི་རྟག་པའི་དངོས་པོ་ལ་ཡིན་ནོ། །དངོས་པོ་མི་རྟག་པ་དང་། དངོས་པོ་མེད་པ་ནམ་མཁའི་ཡོན་ཏན་དག་གོ། །དེའི་ཞེས་བྱ་བ་བསྟན་བཅོས་ལས་བརྗོད་པ་ནམ་མཁའི་ཡོན་ཏན་ཉིད་ལ་སོགས་པའི་ཆོས་
ཉེ་བར་བླངས་པ་མེད་པར་རོ། །དེ་ལས་ཏེ་སེམས་པ་ཅན་དང་མེ་ལ་སོགས་པ་ལས་གཞན་པའི་ཆོས་སེམས་པ་མེད་པ་དང་། མེ་མ་ཡིན་པ་ལ་སེམས་པའོ། །འབྲས་བུ་དང་ཁྱབ་བྱའི་མཚན་ཉིད་ཀྱི་ངོ་བོ་ཉིད་དེ་ནི་འདོད་པའི་བསྒྲུབ་པར་བྱ་བ་མེ་དང་ཤིང་གི་མཚན་ཉིད་ཀྱི་དོན་དང་། མེད་ན་མི་འབྱུང་བར་ཚད་མས་
རྟོགས་པའི་ཕྱིར་རྒོལ་བ་གཞན་དག་འབྲས་བུ་དང་རང་བཞིན་གྱི་གཏན་ཚིགས་དེས་ཅི་ལྟར་རྟོགས་པར་འགྱུར་བ་ཡིན་ཏེ། རྟོགས་པར་འགྱུར་བ་ཁོ་ནའོ་ཞེས་བྱ་བའི་དོན་ཏོ། །ནུས་པ་ཞེས་བྱ་བ་ལ། ནུས་པ་ཐོགས་པ་མེད་པའི་རྒྱུ་ལས་གཞན་གང་ཡིན་པ་ཐ་མར་མ་གྱུར་པ་འབྲས་སུ་སྐྱེད་པ་ཞུགས་པ་ནི་དེ་ནི་
བཟློག་པར་ནུས་པའོ། །ཤེས་པར་བྱེད་པ་ཡང་དེ་བཞིན་དུ་འགྱུར་རོ་ཞེ་ན། ཤེས་པར་བྱེད་པ་ནི་རྟོགས་པ་སྐྱེད་པ་བཟློག་པར་ནུས་པ་མ་ཡིན་ནོ། །སུ་ལ་རྟོགས་པ་སྐྱེད་པ་ཞེ་ན། ཚུལ་གསུམ་རྟོགས་པའི་སྐྱེས་བུ་ལའོ། །དེ་ཉིད་ཀྱིས་ནི་སྐྱེས་བུ་ཉིད་ཀྱིས་སོ། །རྟགས་ལས་ཏེ་གཏན་ཚིགས་ལས།
เล่ม ๑๘๖ · หน้า 51a
གལ་ཏེ་བསྒྲུབ་པར་བྱ་བ་མི་ངེས་ཏེ་མི་རྟོགས་ན་དེའི་ཚེ་སྐྱེས་བུ་མི་འདོད་བཞིན་དུ་ནི། མེས་ཚིག་པར་གྱུར་པ་ཚིག་པའི་སྡུག་བསྔལ་ལ་འདོད་པ་རབ་ཏུ་བཟློག་པར་འགྱུར་རོ། །ཁྱད་པར་གྱིས་ཞེས་བྱ་བ་ནི་བསྒྲུབ་པར་བྱ་བ་ལྟོས་ཏེ་སྒྲུབ་པར་བྱེད་པའི་མི་འཁྲུལ་པ་ཉིད་དེ་དེས་ན་བསྒྲུབ་པར་བྱ་
བ་ནི་ཁྱད་པར་ཡིན་ལ། སྒྲུབ་པར་བྱེད་པའི་མི་འཁྲུལ་བ་ཉིད་ནི་ཁྱད་པར་དང་ལྡན་པ་ཡིན་ནོ། །མེད་ན་མི་འབྱུང་བར་རྟོགས་པ་ནི་བསྒྲུབ་པར་བྱ་བ་རྟོགས་པ་མེད་ན་མི་འབྱུང་བ་ཡིན་ནོ་ཞེས་བྱ་བའི་དོན་ཏོ། །གཞན་གྱིས་སྨྲས་པ་དེ་མ་ཐག་པར་བརྗོད་པ་ཐམས་ཅད་ཡིན་མོད་ཀྱི་སྟེ་དེ་ལྟར་བདེན་ཡང་འོན་ཏེ་བསྟན་
བཅོས་དང་འགལ་བའི་སྒྲུབ་པའི་ཕྱིར་ན་རྒོལ་བ་མི་རིགས་པ་བྱེད་པར་འགྱུར་རོ་ཞེའོ། །འགལ་ན་ཞེས་བྱ་བ་ནི་བསྟན་བཅོས་འགལ་ནའོ། །རྒོལ་བས་འདིར་མི་རིགས་པ་ཅི་བྱས། དེས་ནི་རྒོལ་བས་སོ། །དེ་ཞེས་བྱ་བ་ནི་བྱས་པ་ལ་སོགས་པའི་གཏན་ཚིགས་སོ། །དེ་ལྟ་བུའི་ཞེས་བྱ་བ་ནི་བསྟན་
བཅོས་ལ་གནོད་པའོ། །གཞན་ཞེས་བྱ་བ་བསྟན་བཅོས་ལ་མི་གནོད་པ་མེད་པའི་ཕྱིར་རོ། །འདོད་པ་དེ་བསྒྲུབ་པའི་ཕྱིར་ན་བྱས་པའི་མཚན་ཉིད་ཀྱི་གཏན་ཚིགས་འདིར་སྐྱོན་དུ་འགྱུར་བ་མ་ཡིན་ནོ་ཞེས་འབྲེལ་ཏོ། །བྱས་པ་ཉིད་འདིར་ནི་ཉེས་པ་མེད་དེ་བསྒྲུབ་བྱ་སྒྲུབ་པའི་ཕྱིར་རོ། །འོ་ན་གང་གི་ཚེ་ཉེས་པ་
ཡོད་སྙམ་ན། བྱས་པའི་གཏན་ཚིགས་འདིར་ནི་མ་བརྗོད་པ་ཉིད་ནི་རྒོལ་བའི་སྐྱོན་ཡིན་ནོ། །འདིར་ཡང་ཞེས་བྱ་བ་ནི་གཏན་ཚིགས་ལྟར་སྣང་བ་རྣམས་ལ་ཡང་ངོ་། །སྒྲུབ་པར་བྱེད་པ་ཡང་ནི་བྱས་པ་ལ་སོགས་པའོ། །གལ་ཏེ་ནམ་མཁའི་ཡོན་ཏན་ཉིད་ཀྱི་གནོད་བྱེད་མ་ཡིན་པའི་གཏན་ཚིགས་ཀྱང་ཡོད་
པར་སྲིད་པ་ཉིད་མ་ཡིན་ནམ། དེས་ན་དེ་མ་བརྗོད་པ་ཡང་ཉེས་པ་ཁོ་ནའོ་ཞེ་ན། འདིར་ནི་ཞེས་སྨོས་ཏེ་མི་རྟག་པ་ཉིད་དུ་སྒྲུབ་པ་ལའོ། །གནོད་པར་བྱེད་པ་ཁོ་ན་སྲིད་པ་ཡིན་ནོ་ཞེས་བྱ་བའི་དོན་ཏོ། །དེ་ཉིད་ཀྱིས་ཏེ་བསྟན་བཅོས་ཀྱི་དོན་དུ་གྱུར་པ་ནམ་མཁའི་ཡོན་ཏན་ཉིད་ཀྱིས་མ་ངེས་པའི་ཕྱིར་ཏེ།
ནམ་མཁའི་ཡོན་ཏན་ཉིད་བཞིན་དུ་མི་རྟག་པ་མེད་ཀྱང་ཡོད་པའི་ཕྱིར་རོ། །མི་རྟག་པ་ཉིད་ལ་སོགས་པའི་རིགས་པ་གཞན་ཡང་ངོ་། །འགའ་ཞིག་ཉིད་ལ་ནི་ནམ་མཁའི་ཡོན་ཏན་ཅན་གྱི་བསྟན་བཅོས་ལའོ། །དེ་ནི་འགལ་བའོ། །འདི་ལ་ནི་མི་རྟག་པ་ལའོ། །མི་རིགས་པ་ནི་ནམ་མཁའི་ཡོན་ཏན་ནོ། །རིགས་
เล่ม ๑๘๖ · หน้า 51b
པ་ནི་མི་རྟག་པ་ལའོ། །སྐབས་ཀྱི་ཞེས་བྱ་བ་མི་རྟག་པ་ཉིད་དང་འབྲེལ་པ་ཙམ་ལ་བྱས་པ་ལྟོས་པའོ། །དེ་ལྟ་མ་ཡིན་ན་ཞེས་བསྟན་བཅོས་ཐམས་ཅད་དང་མི་འགལ་བས་སྒྲུབ་པར་བྱེད་པ་ནི་མི་སྲིད་པའི་ཕྱིར་རོ། །གཞན་ལ་ཡང་ཞེས་བྱ་བ་ནི་བསྟན་བཅོས་ཀྱི་དོན་ལས་གཞན་པ་ལ་ཡང་མི་འགལ་
བར་བྱ་བར་འགྱུར་ཏེ། སྐབས་མ་ཡིན་པར་ཁྱད་པར་མེད་པའི་ཕྱིར་རོ། །བསྟན་བཅོས་ཀྱང་འགལ་བ་ཡང་སྟེ་བསྟན་བཅོས་ཀྱི་དོན་ལས་གཞན་གྱི་འགལ་བ་འབའ་ཞིག་ཏུ་ནི་མ་ཟད་པའོ། །བྱས་པ་ཡིན་ན་ཞེས་བྱ་བ་ནི་དང་པོར་ཁས་བླངས་པ་བྱས་པ་ཡིན་ནའོ། །ཕྱིས་ཀྱང་སྟེ་ཚད་མ་དང་འགལ་བ་
ནའོ། །གལ་ཏེ་འདི་ནི་གཞན་དག་ཀྱང་འདོད་པ་ཉིད་མ་ཡིན་ནམ། དེས་ན་བརྗོད་པ་འདིས་ཅི་བྱ་ཞེ་ན། ཕ་རོལ་པོ་ཞེས་བྱ་བའོ། །འདོད་པ་ཉིད་སྟོན་པ་ནི་དམ་བཅའ་བ་ཞེས་བྱ་བ་ནས་ཞེའོ་ཞེས་བྱ་བའི་བར་རོ། །འདི་ལ་ཡང་ཉེས་པ་སྔར་བརྗོད་ཟིན་པས་ཡང་མི་བརྗོད་དོ། །དེར་ཡང་ནི་འགལ་བ་
མི་འཁྲུལ་པ་ལའོ། །འདིར་ཡང་བྱས་པ་ལ་སོགས་པར་རོ། །འགལ་ངེས་ལ་ཏེ་འགལ་བ་འཁྲུལ་པ་ཅན་གྱི་གཏན་ཚིགས་གཉིས་ལ་གནོད་པར་འགྱུར་ཏེ་ཕན་ཚུན་སྟོབས་མཚུངས་པའི་ཕྱིར་རོ། །འགལ་བའི་དོན་དག་ནི་ཆོས་ཅན་གཅིག་ལ་བསྒྲུབ་པ་མ་ཡིན་ཏེ། མི་ལྟུང་བའི་ཕྱིར་རོ། །བྱས་པ་ཉིད་
འདིར་ནི་འགལ་བ་མི་འཁྲུལ་པ་ལྟར་བསྟན་བཅོས་དང་འགལ་བ་ཡོད་པ་མ་ཡིན་ཏེ། དངོས་པོའི་སྟོབས་ཀྱིས་ཞུགས་པའི་རྗེས་སུ་དཔག་པ་ནི་བསྟན་བཅོས་ཀྱིས་གནོད་པ་མ་ཡིན་ནོ། །ལུང་ནི་དེ་ལྟ་བུ་ཞེས་བྱ་བ་དངོས་པོའི་སྟོབས་ཀྱིས་ཞུགས་པ་མ་ཡིན་པའོ། །དེ་དག་ནི་སྟེ་བསྟན་བཅོས་དང་
རྗེས་སུ་དཔག་པ་དག་ནི་ཕན་ཚུན་གནོད་པ་མ་ཡིན་ཏེ། རྗེས་སུ་དཔག་པ་ཁོ་ན་གནོད་བྱེད་ཡིན་པའི་ཕྱིར་རོ་ཞེས་བྱ་བའི་དོན་ཏོ། །གལ་ཏེ་འགལ་བ་མི་འཁྲུལ་པ་ཅན་དག་གིས་འགལ་བ་གཉིས་བསྒྲུབ་པར་ཅི་སྟེ་མི་འགྱུར་དེས་ན་ཕན་ཚུན་གནོད་པ་མ་ཡིན་ནོ་ཞེ་ན། གཉི་ག་ཞེས་གསུངས་སོ། །
ཚད་མ་ཉིད་མ་ཡིན་པས་གནོད་བྱེད་མ་ཡིན་ནོ་ཞེས་ལྷག་མའོ། །དེས་ན་ཞེས་བྱ་བ་ནི་གནོད་པར་བྱེད་པ་ཉིད་མ་ཡིན་པས་ནའོ། །དེའི་སྟེ་ལུང་གི་དོན་རྗེས་སུ་དཔག་པར་བྱ་བའོ། །བསྟན་བཅོས་ཀྱི་དོན་གནོད་པར་བྱེད་པ་ནི་མ་ཡིན་ནོ། །གང་གིས་དེ་གནོད་བྱེད་མ་ཡིན་པ་ཅི་ལྟར་བསྟན་བཅོས་
เล่ม ๑๘๖ · หน้า 52a
ཚད་མ་མ་ཡིན་ཞེ་ན་ཚད་མའི་ཞེས་བྱ་བའོ། །ཅི་སྟེ་ཞེས་བྱ་བ་ལ་སོགས་པས་ནི་བསྟན་བཅོས་དང་རྗེས་སུ་དཔག་པ་དག་ཕན་ཚུན་གནོད་པར་སྟོན་པའོ། །དེ་ཅི་ལྟར་རྗེས་སུ་དཔག་པས་གནོད་ཅེས་བྱ་བ་ནི། འགལ་བ་མི་འཁྲུལ་པ་ལྟར་ཕན་ཚུན་གནོད་པར་འགྱུར་རོ་ཞེས་བྱ་བའི་
དོན་ཏོ། །དེས་ནི་བསྟན་བཅོས་ཀྱིས་སོ། །འདིར་ཡང་ནི་རྗེས་སུ་དཔག་པ་ལ་ཡང་ངོ་། །གལ་ཏེ་འགལ་བའི་རྗེས་སུ་དཔག་པ་ལ་བསྟན་བཅོས་ཀྱིས་གནོད་ན་དེའི་ཚེ་ཚད་མ་མཐའ་དག་ཉམས་པར་འགྱུར་རོ། །དེས་ན་ལུང་འབའ་ཞིག་ལུས་པ་ཡིན་ནོ། །དོགས་པ་ནི་འོན་ཏེ་ཞེས་བྱ་བའོ། །དེ་ནི་བསྟན་
བཅོས་སོ། །ལན་ནི་ཚད་མ་མ་ཡིན་པ་ཞེས་བྱ་བའོ། །དོགས་པ་ནི་རྗེས་སུ་དཔག་པས་གནོད་པའི་བསྟན་བཅོས་ཚད་མ་མ་ཡིན་གྱི། ཐམས་ཅད་ནི་སྟེ་མི་གནོད་པ་ནི་མ་ཡིན་ནོ་ཞེ་ན། ལན་དུ་བསྟན་བཅོས་ཀྱིས་ཞེས་བྱ་བའོ། །བརྟགས་པ་ཞེས་བྱ་བ་ནི་བརྟགས་པའི་བསྟན་བཅོས་གང་ཡིན་པ་དེ་རྗེས་སུ་
དཔག་པའི་གནོད་བྱེད་ཡིན་ལ། མ་བརྟགས་པའི་བསྟན་བཅོས་ནི་རྗེས་སུ་དཔག་པས་ཚུར་གནོད་པ་ཡིན་ནོ་ཞེས་བྱ་བའོ། །རྗེས་སུ་དཔག་པ་ཉིད་ཅེས་བྱ་བ་ནི་གྲུབ་པའི་མཐའོ། །ཅིའི་ཕྱིར་བསྟན་བཅོས་ཚད་མའི་རྒྱུ་མ་ཡིན་ཞེ་ན། དེ་ལ་ཞེས་བྱ་བའོ། །རྗེས་སུ་དཔག་པ་དེ་ལ་མེད་པའི་ཚད་མས་
ནི། །ལུང་དེ་ལ་ཡོད་པའི་ཚད་མ་ཡོད་པར་བྱེད་པ་ནི་མ་ཡིན་ནོ། །དེས་ཏེ་རྗེས་སུ་དཔག་པས་སོ། །རྗེས་སུ་དཔག་པ་དེའི་གཉེན་པོ་ལུང་མ་ཡིན་ནོ། །འདིར་ཡང་ནི་བསྟན་བཅོས་དང་རྗེས་སུ་དཔག་པ་དག་ལའོ། །བྱས་པ་ལ་སོགས་པའི་སྒྲུབ་པར་བྱེད་པ་སྐྱོན་དང་ལྡན་པ་ནི་མ་ཡིན་པའོ། །
དེ་དག་ཅེས་བྱ་བ་ནི་ནམ་མཁའི་ཡོན་ཏན་མ་ཡིན་པ་དང་མི་རྟག་པ་དག་གོ། །འབྲེལ་པ་མེད་ཀྱང་ཞེས་བྱ་བ་ནི་ནམ་མཁའི་ཡོན་ཏན་དང་མི་རྟག་པ་ཉིད་ལ་མེད་ན་མི་འབྱུང་བ་མེད་ཀྱང་ངོ་། །བསྟན་བཅོས་ཀྱི་དོན་ནི་ནམ་མཁའི་ཡོན་ཏན་ཏེ་དེས་བསླད་པའི་ཕྱིར། གལ་ཏེ་བྱས་པ་ཉིད་གནོད་ན་དེའི་
ཚེ་སྒྲུབ་པར་བྱེད་པ་ཐམས་ཅད་ཐམས་ཅད་ཀྱི་གནོད་བྱེད་དུ་འགྱུར་རོ། །གྲུབ་པའི་མཐའི་ཚད་མ་རྣམ་པར་འགྲེལ་པ་ནི་སྐབས་ཀྱི་ཞེས་བྱ་བའོ། །བྱས་པ་དེ་དེ་ཉིད་དམ་གཞན་རྩོལ་བ་ལས་བྱུང་བ་ལ་སོགས་པས་སོ། །ནམ་མཁའི་ཡོན་ཏན་ཉིད་ཆོས་ཅན་དེ་དང་འབྲེལ་པའི་ཆོས་ཅན་དེ་ཉིད་
เล่ม ๑๘๖ · หน้า 52b
ལ་གནོད་པའི་ཕྱིར་ཏེ་ཆོས་ཅན་གཞན་ལ་ནི་མ་ཡིན་པའི་ཕྱིར་གནོད་པ་ཡིན་ནོ་ཞེས་འབྲེལ་ཏོ། །དེ་ནི་ནམ་མཁའི་ཡོན་ཏན་ཉིད་དོ། །བྱས་པ་དེ་རང་གིས་སྒྲུབ་པར་བྱེད་པ་མི་རྟག་པ་ལ་མི་མཐུན་པ་མེད་ཀྱང་ངོ་། །དེ་ལས་གཞན་འབྲེལ་པ་མེད་པ་ནམ་མཁའི་ཡོན་ཏན་ཉིད་ལ་གནོད་པས་སོ། །བདག་མེད་པ་ལྟར་མེད་ན་
བསྒྲུབ་པར་བྱ་བ་མི་རྟག་པ་ཉིད་མི་འབྱུང་བའི་འབྲེལ་བ་དེ་ནི་ནམ་མཁའི་ཡོན་ཏན་ཉིད་འདིར་རྟོག་པ་མེད་དོ། །བསྟན་བཅོས་ལ་གནོད་པ་དེ་ཆོས་ཅན་གཞན་ལ་གཏན་ཚིགས་གཞན་གྱིས་བསྟན་བཅོས་གནོད་པར་བྱས་པ་ལ་ཡང་མཚུངས་སོ། །བསྒྲུབ་པར་བྱ་བ་མི་རྟག་པ་ཉིད་ཀྱི་ཁྱད་པ་བྱེད་པ་
བདག་མེད་པ་གང་ཡིན་པ་དེ་མེད་པར་སྒྲུབ་པ་ནི་སྤང་པར་བྱ་བ་ཡིན་གྱིས། ཁྱབ་པར་བྱེད་པ་མ་ཡིན་པ་ནམ་མཁའི་ཡོན་ཏན་ཉིད་མེད་པར་སྒྲུབ་པ་ནི་མ་ཡིན་ནོ། །ཅིའི་ཕྱིར་འདི་སྤང་བར་བྱ་སྙམ་ན། བསྒྲུབ་པར་བྱ་བ་ཞེས་བྱ་བའོ། །གང་ཡིན་པ་དེ་ལ་ཞེས་བྱ་བ་བདག་མེད་པ་ལའོ། །དེ་མེད་
ན་ནི་བདག་མེད་པ་མེད་ན་ཁྱབ་པར་བྱ་བ་མི་རྟག་པ་ཉིད་ཀྱང་ལྡོག་པའི་ཕྱིར་རོ། །འོ་ན་ནམ་མཁའི་ཡོན་ཏན་ཉིད་ལ་སོགས་པ་ཡང་སྤང་བར་བྱ་བ་ཡིན་ནོ་སྙམ་ན། ནམ་མཁའི་ཞེས་བྱ་བའོ། །དེ་མེད་ཀྱང་ནི་ནམ་མཁའི་ཡོན་ཏན་མེད་ཀྱང་ངོ་། །གཞན་བྱེ་བྲག་པ་ལ་སོགས་པ་ཞེས་བྱ་བ་ནི་
ཚད་མ་ཀུན་ལས་བཏུས་པའི་བཤད་པ་བྱེད་པར་ནི་མ་ཟད་པའོ། །རིགས་པ་ཅན་ལ་སོགས་པ་དེ་ལྟར་ན་ཡང་ངོ་། །བསྟན་པ་མ་ཡིན་པ་ཞེས་བྱ་བ་ནི་འདི་ན་མེ་ཡོད་དོ་ཞེས་བྱ་བ་ལ་སོགས་པའོ། །བསྟན་བཅོས་ཀྱི་དོན་བསྟན་པ་ནི་དམ་བཅའ་བར་འགྱུར་བ་ཉིད་དོ། །བསྟན་བཅོས་སུ་
བསྟན་པའི་དོན་ནི་དམ་བཅའ་བ་ཡིན་ལ། མ་བསྟན་པའི་དོན་ནི་དམ་བཅའ་བ་མ་ཡིན་ནོ་ཞེས་སྟོན་པ་ནི། འདི་ལྟར་ཞེས་བྱ་བའོ། །གང་དང་གང་ལུང་ཡིན་པ་དེ་ནི་དམ་བཅའ་བ་ཡིན་ནོ། །དེས་ན་མ་གྲུབ་པའི་གཏན་ཚིགས་ལ་སོགས་པ་ཡང་ལུང་ལ་ལྟོས་པ་ཉིད་དུ་ཐལ་བའི་ཕྱིར་མ་གྲུབ་པ་ཉིད་ལ་
སོགས་པའི་ཉེས་པར་མི་འགྱུར་རོ་ཞེས་དེ་མ་ཐག་ཏུ་སྟོན་པར་འགྱུར་རོ། །གཞན་གྱིས་གལ་ཏེ་ཞེས་བྱ་བ་ལ་སོགས་པའོ། །འདིས་ནི་ལུང་གི་དོན་ཡང་ཡིན་ལ་དམ་བཅའ་བ་ཡང་མ་ཡིན་ཏེ། དེས་ན་མ་གྲུབ་པའི་གཏན་ཚིགས་ལ་སོགས་པ་བརྗོད་པ་ནི་དམ་བཅའ་བར་མི་འགྱུར་རོ་ཞེས་བསྟན་པ་ཡིན་
เล่ม ๑๘๖ · หน้า 53a
ནོ། །ལན་ནི་མ་ཡིན་ཏེ་ཞེས་བྱ་བའོ། །རང་གི་ངོ་བོས་ནི་དམ་བཅའ་བ་ལུང་མ་ཡིན་ཏེ། འདི་ན་མེ་ཡོད་དོ་ཞེས་བྱ་བ་ལ་སོགས་པ་ཡང་ལུང་དུ་ཐལ་བའི་ཕྱིར་རོ། །གང་གི་ཕྱིར་དེ་ལྟར་རང་གི་ངོ་བོས་དམ་བཅའ་བ་ལུང་མ་ཡིན་གྱི། འོན་ཀྱང་དམ་བཅའ་བའི་དོན་སྟོན་པ་ལས་ཡིན་པ་དེས་ནའོ། །
དེ་ཡང་ཞེས་བྱ་བ་གཏན་ཚིགས་མ་གྲུབ་པ་ལ་སོགས་པ་ཡང་ངོ་། །བསྟན་བཅོས་ཀྱི་དོན་མཐའ་དག་ཅེས་བྱ་བ་ནས་དམ་བཅའ་བ་མ་ཡིན་ནོ་ཞེ་ན་ཞེས་བྱ་བའི་མཐར་ཐུག་པ་ནི་རྩོད་པའོ། །དེ་ལྟ་ན་ཡང་ཞེས་བྱ་བ་ནི་བསྟན་བཅོས་ཀྱི་དོན་མཐའ་དག་བསྒྲུབ་བྱ་ཡིན་ཡང་ངོ་། །བསྒྲུབ་པར་བྱ་བ་ཉིད་དུ་
འདོད་པ་མ་ཡིན་པ་དམ་བཅའ་བ་མ་ཡིན་པ་ཉིད་ག་ལས་ཤེ་ན། རབ་ཏུ་བྱེད་པ་ཞེས་བྱ་བའོ། །གཞན་དག་རྣམ་པ་གཞན་གྱི་སྒོ་ནས་ཀྱང་སྒྲུབ་པར་བྱེད་པར་བསྟན་པ་དམ་བཅའ་བ་མ་ཡིན་ནོ་ཞེས་བརྗོད་པ་ནི། ཚད་མ་ཀུན་ལས་བཏུས་པ་ལས་ཀྱང་ཞེས་བྱ་བའོ། །རང་གི་ངོ་བོ་ཁོ་ནར་ཞེས་ངེས་
པར་གཟུང་བའི་ཕྱིར་སྒྲུབ་པར་བྱེད་པར་བསྟན་པ་ནི་དམ་བཅའ་བ་མ་ཡིན་ནོ་ཞེས་འབྲེལ་ཏོ། །གལ་ཏེ་སྒྲུབ་བྱེད་ཉིད་བརྗོད་པ་ཞེས་བྱ་བ་ནི། མ་གྲུབ་པའི་གཏན་ཚིགས་དང་དཔེ་སྒྲུབ་བྱེད་ཉིད་དུ་བརྗོད་པ་དག་ནི་དམ་བཅའ་བ་མ་ཡིན་ཏེ། འདོད་པ་སྨོས་ཕྱིར་ན་ཞེས་བྱ་བ་བསྒྲུབ་པར་བྱ་བ་ཉིད་དུ་འདོད་
པ་ནི་ཕྱོགས་ཡིན་ནོ་ཞེས་བརྗོད་པའི་ཕྱིར་རོ་ཞེ་ན། འདི་ནི་དེ་ལྟར་མི་འཐད་དོ། །ནི་ཞེས་བྱ་བ་ནི་གང་ཕྱིར་ཏེ། བསྒྲུབ་པར་བྱ་བ་རིགས་པས་ཐོབ་པ་ནི་བསྒྲུབ་པར་བྱ་བ་ཉིད་དུ་འདོད་པའི་ཕྱོགས་ཡིན་ནོ་ཞེས་བྱ་བའི་ཚིག་ལས་ལྡོག་པ་མ་ཡིན་ནོ། །དེས་ཅི་ཏེ་མི་ལྡོག་སྙམ་ན་རིགས་པ་སྟོན་པའི་ཞེས་བྱ་
སྟེ་བསྒྲུབ་པར་བྱ་བ་ཉིད་དུ་འདོད་པ་ཕྱོགས་ཡིན་ནོ་ཞེས་བྱ་བ་ནི་རིགས་པ་སྟོན་པ་ཡིན་ནོ། །རིགས་པ་ཉིད་ནི་བསྟན་བཅོས་ཁས་བླངས་ཕྱིར་ཞེས་བྱ་བའོ། །འོན་ཏེ་ཞེས་བྱ་བ་ནི་བསྒྲུབ་པར་བྱ་བ་ཉིད་དུ་འདོད་པ་ཕྱོགས་ཡིན་ནོ་ཞེས་བྱ་བའི་ཚིག་གིས་བསྟན་པ་རིགས་པ་ཡང་སྒྲུབ་པར་བྱེད་པ་ཉིད་དུ་གང་
གི་ཕྱིར་ཞེ་ན། སྒྲུབ་པར་བྱེད་པ་ཉིད་དུ་བསྟན་པ་བསྒྲུབ་པར་བྱ་བ་མ་ཡིན་པའོ། །འགལ་བ་མི་འཁྲུལ་པ་ཅན་འགྱུར་ཏེ་ཞེས་བྱ་བ་ནི། བསྟན་བཅོས་ཁས་བླངས་པའི་ཕྱིར་ཞེས་བྱ་བ་འདི་ནི་སྒྲུབ་པར་བྱེད་པ་གཅིག་གོ། །འདོད་པ་ལ་འགལ་བ་བརྗོད་པ་ནི་གཞན་ཡིན་པས། འདི་གཉིས་འགལ་བ་
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด