ཚད་མ་རྣམ་འགྲེལ་རྒྱན་གྱི་འགྲེལ་བཤད་ཤིན་ཏུ་ཡོངས་སུ་དག་པ་ཞེས་བྱ་བ

ชื่อสันสกฤต (อักษรทิเบต ตามตัวบท) པྲ་མཱ་ཎ་བཱརྟི་ཀཱ་ལང་ཀ་ར་ཊཱི་ཀཱ་སུ་པ་རི་ཤུདྡྷ་ནཱ་མ

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

เล่ม ๑๘๖ · หน้า 53b

མི་འཁྲུལ་པ་ཅན་དུ་འགྱུར་རོ། །དེ་ལྟ་ན་ཡིན་དང་ཞེས་བྱ་བ་ཐེ་ཚོམ་སྐྱེད་པར་བྱེད་པ་ཡིན་དང་། བསྟན་བཅོས་ཁས་བླངས་པའི་ཕྱིར་ཞེས་བྱ་བའི་གཏན་ཚིགས་གང་ཡིན་པ་དེ་སྒྲུབ་པར་བྱེད་པ་མ་ཡིན་ནོ། །དེའི་ཕྱིར་བསྟན་བཅོས་ལས་མཐོང་བ་སྒྲུབ་པར་བྱེད་པ་ཉིད་དུ་འདོད་པ་ཡིན་ཡང་། བསྒྲུབ་པར་

བྱ་བ་ཉིད་ཡིན་པར་ག་ལ་འགྱུར་ཏེ། མི་འགྱུར་པ་ཁོ་ན་སྟེ་འདོད་པའི་ཚིག་ལ་སོགས་པ་སྒྲུབ་པར་བྱེད་པ་མ་ཡིན་པའི་ཕྱིར་རོ། །དེ་ལྟ་ན་ཞེས་བྱ་བ་རིགས་པ་མ་ཡིན་པ་ནའོ། །གཞན་ཡང་ཞེས་བྱ་བ་ནི་ནམ་མཁའི་ཡོན་ཏན་ཉིད་ལ་སོགས་པའོ། །དེ་དང་ལྡན་པའི་ཕྱིར་ཞེས་བྱ་བ་ནམ་མཁའི་ཡོན་

ཏན་དང་ལྡན་པའི་ཕྱིར་རོ། །སྐྱེས་པའི་གནས་ལས་གཞན་དུ་རྣ་བའི་ཡུལ་དུ་ཡང་ངོ་། །དེ་ཉིད་དུ་ཞེས་བྱ་བ་ནི་སྐྱེས་པའི་གནས་ཉིད་དུའོ། །གཞན་གྱི་ཐག་རིང་ན་འདུག་པ་ཞེས་སྨྲས་སོ། །ལན་ནི་འོ་ན་ཞེས་བྱ་བའོ། །གཟུགས་ཀྱང་རྒྱང་རིང་བ་དང་མི་རིང་བ་དག་གིས་མཐོང་ཏེ་དེས་ན་དེ་ཡང་

ནམ་མཁའི་ཡོན་ཏན་ཉིད་དུ་འགྱུར་རོ། །དེའི་ནི་ནམ་མཁའི་ཡོན་ཏན་ནོ། །དེ་ལྟར་ནི་ཐོས་པ་ཡང་མ་ཡིན་ཏེ་དེའི་ཕྱིར་རོ། །གང་ལས་ཀྱང་ནི་ཚད་མ་ལས་སོ། །གཏན་ཚིགས་འདི་ཉིད་ལས་ཞེས་བྱ་བ་ནི་རྟེན་པ་མ་ཡིན་པ་མི་འཐད་པའི་ཕྱིར་ཞེས་བྱ་བ་ལས་སོ། །གཞན་གྱིས་སྨྲས་པ་ས་ལ་སོགས་པ་

ནི་ནམ་མཁའ་ལ་བརྟེན་པ་ཉིད་མ་ཡིན་ནོ། །ཅིའི་ཕྱིར་ཞེ་ན། ཡོན་ཏན་མ་ཡིན་པའི་ཕྱིར་ཏེ་རྫས་ཡིན་པའི་ཕྱིར་རོ། །ལན་ནི་བརྟེན་པ་ཉིད་ཡིན་ན་ཞེས་བྱ་བ་སྟེ། གཏན་ཚིགས་དེ་ཉིད་ལས་བརྟེན་པ་ཉིད་ཡིན་པར་གྲུབ་པ་ནི། ཡོན་ཏན་མ་ཡིན་པ་དེ་ཉིད་མི་འགྲུབ་པོ། །ནམ་མཁའ་རྟེན་ཡིན་ན་ཞེས་བྱ་བ་

ནི་ལན་ནོ། །དེ་ཉིད་ཅེས་བྱ་བ་ནི་ཡོན་ཏན་གྱི་རྟེན་ཉིད་དོ། །ཅིའི་ཕྱིར་ཞེ་ན། གཟུགས་ལ་སོགས་པ་ཞེས་བྱ་བའོ། །དོགས་པ་བསུ་བ་ནི་ས་ལ་སོགས་པ་དང་ཞེས་བྱ་བའོ། །ནམ་མཁའ་ལ་མི་འདུ་བའི་ཕྱིར། ནམ་མཁའ་རྟེན་མ་ཡིན་ཏེ་ཞེས་འབྲེལ་ཏོ། །དེ་ཉིད་གསལ་བར་བྱེད་པ་ནི། གཟུགས་ལ་སོགས་

པ་ནི་ཞེས་བྱ་བའོ། །འཕྲོད་པ་འདུ་བ་ཞེས་བྱ་བ་ནི་ལན་ནོ། །དེ་དང་ཞེས་བྱ་བ་ནི་ནམ་མཁའ་དང་ངོ་། །དྲི་ཡང་ས་དང་ལྷན་ཅིག་གཅིག་ཏུ་དབྱེར་མེད་པར་མ་རྟོགས་པའི་ཕྱིར་སའི་ཡོན་ཏན་མ་ཡིན་པར་འགྱུར་རོ། སྒྲ་དེའི་གནས་དེ་རྟེན་ཡང་ནམ་མཁའ་དེ་ཉིད་ཡིན་ནོ་ཞེ་ན། ལན་འོ་ན་ཞེས་

เล่ม ๑๘๖ · หน้า 54a

བྱ་བའོ། །ཅིའི་ཕྱིར་ནམ་མཁའི་ཡོན་ཏན་མ་ཡིན་སྙམ་ན། འདི་ལྟར་ཞེས་བྱ་བའོ། །གཞན་ནམ་མཁའ་རྟག་པས་སོ། །གང་གིས་གང་ཞིག་འཛིན་པ་དེའི་ཡོན་ཏན་དེ་ཡིན་ནོ་ཞེས་བྱ་བའི་རིགས་པ་ཐམས་ཅད་དུ་རུང་བ་མ་ཡིན་ནོ་ཞེས་སྟོན་པ་ཅི་ལྟར་ཞེས་བྱ་བའོ། །དེ་བཞིན་དུ་སྒྲ་ཡང་

ནམ་མཁས་བཟུང་ཡང་ནམ་མཁའི་ཡོན་ཏན་མ་ཡིན་ནོ། །འདི་ག་ལས་སྙམ་ན། སྒྲ་ཡང་ཞེས་བྱ་བའོ། །ཡོན་ཏན་དང་ཞེས་བྱ་བ་ནི་ནམ་མཁའི་ཡོན་ཏན་སྒྲ་དང་ངོ་། །ལྡན་པ་མེད་པ་ནི་རླུང་ངོ་ཞེས་བྱ་བ་ནི་ལྡན་པ་མེད་པ་དེའི་ཕྱིར་རོ། །ས་ཡིན་པའི་ཕྱིར་རོ་ཞེས་བྱ་བ་ནི་སའི་རྫས་ཡིན་པའི་ཕྱིར་ཤིང་བལ་

དང་ས་རླུང་ལྡན་པ་མི་འགལ་ལོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་རྫས་མ་ཡིན་པ་ཡང་རླུང་གིས་ཁྱེར་ནའོ། །དེ་ནི་གྲིབ་མ་ལ་སོགས་པའོ། །དེའི་ཞེས་བྱ་བ་ནི་ཤིང་ལ་མེ་ཏོག་སོགས་པའོ། །ཤིང་དང་འདུས་པ་ནི་གྲིབ་མ་ཡིན་ལ། རླུང་དང་ནི་འོད་ཀྱི་རྫས་ལྡན་པ་ཡིན་ནོ། །དེས་ན་འབྱེར་བ་འདུས་

པའི་རླུང་གིས་གྲིབ་མ་འདེད་པ་ཡིན་ནོ་ཞེ་ན། རྟོག་པ་འདིའང་ཞེས་བྱ་བའོ། །གལ་ཏེ་རླུང་དང་ནམ་མཁའ་འང་དུ་ལྡན་པ་དེ་ལྟ་ན་ཡང་ནམ་མཁའ་ནི་རླུང་གིས་འདེད་པ་མ་ཡིན་ཏེ་བྱ་བ་མེད་པའི་ཕྱིར་རོ། །གལ་ཏེ་འབྱེར་བར་འདུས་པས་གྲིབ་མ་དང་ཉི་མ་ལ་སོགས་པ་ཁྱེར་བར་འདོད་ན་དེའི་ཚེ་རླུང་དང་

འདུ་བའི་འབྲེལ་པས་འདུས་པའི་སྒྲ་དེད་པ་ཡིན་པར་ཅིས་མི་འགྱུར། དེས་ན་ནམ་མཁའ་དང་འཕྲོད་པ་འདུ་བར་མི་རྟག་གོ། །དེའི་སྒོ་ནས་ནི་རླུང་གི་སྒོ་ནས་སོ། །དེ་ནི་སྒྲའོ། །འབྱོར་བ་འདུས་པ་ཉིད་ཀྱིས་ཡོན་ཏན་ཁྱེར་བ་ནི་མ་ཡིན་ནོ་ཞེས་བརྗོད་པ་ནི། ཡོན་ཏན་ཡིན་ཡང་ཞེས་བྱ་བའོ། །དེར་ཡང་

ཞེས་བྱ་བ་ནི་དྲི་ལ་ཡང་ངོ་། །དེ་དམིགས་ཀྱང་ནི་དྲི་དམིགས་ཀྱང་ངོ་། །དེ་ལས་ནི་ས་ལ་སོགས་པ་ལས་སྐྱེས་པའི་དྲིའོ། །འདིའི་ནི་ཡོན་ཏན་སྨྲ་བའིའོ། །འོན་ཏེ་ཡོན་ཏན་བཀག་པ་བཞིན་དུ་བྱ་བ་དང་བཅས་པ་ཡང་མི་འདོད་དོ་ཞེ་ན། གལ་ཏེ་བསྟན་བཅོས་ལ་ལའི་ཡོན་ཏན་ཉིད་ལ་སོགས་པ་རིགས་པ་

ཡིན་པ་བཀག་པར་བྱ་བ་དང་བཅས་པ་རིགས་པ་ཡིན་ཡང་ཡོན་ཏན་འདི་ལ་མི་འདོད་པ་འདི་ནི་རྒྱལ་པོའི་ཆོས་ལུགས་ཡིན་ནོ། །འདི་ན་བྱ་བ་དང་བཅས་པར་ཁས་བླངས་ནས་བརྗོད་པ་ཡིན་ནོ། །དེ་ནི་འགའ་ལ་ཡང་ཡོད་པ་མ་ཡིན་ནོ་ཞེས་བརྗོད་པ་ནི་གཞན་ཡང་ཞེས་བྱ་བའོ། །འདི་ག་ལས་ཤེ་ན་བྱ་

เล่ม ๑๘๖ · หน้า 54b

བ་དང་ཞེས་བྱ་བའོ། །བྱ་བ་ཙམ་མི་སྲིད་པའི་ཕྱིར་བྱ་བའི་ཁྱད་པར་སྲིད་པ་མ་ཡིན་ཏེ། དེས་ན་ཡུལ་གཞན་དང་གཞན་དུ་སྐད་ཅིག་འདྲ་བ་གཞན་སྐྱེ་བ་ཉིད་བྱ་བ་ཡིན་ནོ་ཞེས་དགོངས་པའོ། །འོན་ཏེ་འདི་ཡང་རྫས་ཁོ་ན་ལ་སྲིད་ཀྱི་ཡོན་ཏན་དག་ལ་ནི་མ་ཡིན་ནོ་ཞེ་ན། དེ་འདྲའི་ཞེས་བྱ་བའོ། །སྒྲ་ལ་དེ་

ལྟར་ཅི་ལྟར་འགྱུར་ཞེ་ན། གཞན་དག་ཅེས་བྱ་བའོ། །འདི་ནི་གཞན་ཡང་འདོད་པ་ཡིན་ནོ་ཞེས་བྱ་བའི་དོན་ཏོ། །རྫས་མེད་པའི་ཕྱིར་ཡོན་ཏན་ཡང་མེད་དེ། དེས་ན་ནི་འབྱོར་བར་འདུ་བས་ནི་འདོད་པ་མ་ཡིན་ནོ་ཞེས་བརྗོད་པ་ནི། གཞན་ཡང་ཞེས་བྱ་བའོ། །ཡོན་ཏན་ཅན་ནི་རྫས་སོ། །འབྱོར་པར་

འདུ་བས་ཁྱེར་བར་ཁས་བླངས་ནས་ཀྱང་ཉེས་པ་བརྗོད་པ་ནི། གལ་ཏེ་ཞེས་བྱ་བའོ། །གཞན་གྱིས་སྨྲས་པ་ནི་གནས་པ་ལ་ཞེས་བྱ་བ་ནས་ནམ་མཁའི་ཡིན་ནོ་ཞེ་ནའི་བར་རོ། །གལ་ཏེ་གནས་པ་ལ་གེགས་མེད་པའི་ཕྱིར་ན། འབྱུང་བ་ཆེན་པོ་ནམ་མཁའ་གནས་པར་རྟོག་ན། དེའི་ཚེ་འདི་མ་

འབྲེལ་ཏེ། ཅིའི་ཕྱིར་ཞེ་ན་ཕན་ཚུན་ཞེས་བྱ་བ་ལ་སོགས་པའོ། །དེ་ཉིད་སྒྲུབ་པ་ནི་གལ་ཏེ་ཞེས་བྱ་བའོ། །དེས་ན་མེད་པ་ཙམ་ཉིད་ནམ་མཁའ་ཡིན་པར་འགྱུར་རོ་ཞེས་བརྗོད་པ་ནི། འབྱུང་ཚེ་གཞན་མེད་པ་ཙམ་ཞེས་བྱ་བའོ། །གཞིའི་ངོ་བོ་ཉིད་ཁས་བླངས་ནས་ཀྱང་ཉེས་པ་བརྗོད་པ་ནི། ཅི་

ལྟར་ནམ་མཁའ་ཞེས་བྱ་བའོ། །ནམ་མཁའ་ནི་རླུང་གི་ཡང་གཞི་མ་ཡིན་ནོ་ཞེས་བརྗོད་པ་ནི་འགྲོ་བ་ཞེས་བྱ་བའོ། །གེགས་བྱེད་པ་དང་སྟེ་ལུས་ཅན་དང་བྲལ་བས་ཡིན་ནོ། །ལུས་ཅན་མ་ཡིན་པས་བྱས་པ་ཡིན་གྱི་ནམ་མཁས་བྱས་པ་ནི་མ་ཡིན་ནོ་ཞེས་བྱ་བའི་དོན་ཏེ། གཞན་དག་ཐུག་པ་མེད་པའི་ཉེས་

པ་སྤོང་བ་ནི། འོན་ཏེ་ཞེས་བྱ་བའོ། །འདི་ལ་ནི་ནམ་མཁའ་ལའོ། །ལན་ནི་གཟུགས་མེད་པ་དང་ཞེས་བྱ་བའོ། །དེ་ཉིད་ནི་བདག་གོ། །གཞན་གྱི་ནི་སྒྲའིའོ། །འོན་ཏེ་གང་ཞིག་བདག་མི་འདོད་པ་དེའི་འདོད་པ་ལ་ལྟོས་ཏེ་ནམ་མཁའ་སྟོན་པ་ཡིན་ནོ་ཞེ་ན། གང་ལ་ཞེས་བྱ་བའོ། །དེ་འདྲ་བ་ཞེས་བྱ་བ་

ནི་ནམ་མཁའ་དང་འདྲ་བའོ། །གང་ལ་བདག་གིས་དོན་དེ་བྱེད་པ་མ་ཡིན་པ་དེ་ལ་ནམ་མཁས་ཀྱང་དོན་དེ་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །གང་ལ་བདག་མེད་པ་དེས་གདོན་མི་ཟ་བར་ནམ་མཁའ་ཁས་བླང་བར་བྱ་བ་ཡང་མ་ཡིན་ཏེ། དེ་ལྟར་མ་ཡིན་པར་ཡང་ནམ་མཁའི་བྱ་བ་འགྲུབ་པའི་

เล่ม ๑๘๖ · หน้า 55a

ཕྱིར་ཞེས་བརྗོད་པ་ནི། ཡུལ་ཡང་ཞེས་བྱ་བའོ། །འདི་ནས་ཁས་བླངས་ནས་བརྗོད་པར་ཟད་ཀྱི། ཁྱབ་པའི་དངོས་པོ་ནི་སྲིད་པ་ཡང་མ་ཡིན་ནོ་ཞེས་བརྗོད་པ་ནི། ཕན་ཚུན་དུ་ནི་ཞེས་བྱ་བའོ། །དེས་ན་སྒྲ་ནམ་མཁའ་ལ་བརྟེན་པ་ཡིན་ན། བདག་ལ་བརྟེན་པ་ཉིད་དུ་འགྱུར་རོ་ཞེས་བསམས་

པའོ། །ཕ་རོལ་པོ་ཁྱབ་པ་རྣམས་གཅིག་ཉིད་ཡིན་པ་སྤང་བ་ནི། གལ་ཏེ་ཞེས་བྱ་བའོ། །གྲུབ་པའི་མཐའ་པ་ཡང་གཅིག་ཏུ་ཐལ་བ་བོར་ནས་སྐབས་སུ་བབ་པ་གཞན་གྱིས་བརྟགས་པའི་ནམ་མཁའ་མེད་པར་བརྗོད་པ་ནི། གལ་ཏེ་ཞེས་བྱ་བའོ། །འོ་ན་ཐ་སྙད་དུ་ནམ་མཁའ་ཅི་ཡིན་སྙམ་ན་བུ་ག་ཞེས་བྱ་བའོ། །

ཅི་ལྟར་འདི་ལ་ནམ་མཁའ་ཞེས་ཐ་སྙད་དུ་བྱེད་སྙམ་ན། བུ་ག་མེད་པར་ཞེས་བྱ་བའོ། །དེའི་ཕྱིར་ཐ་སྙད་ཀྱི་དབང་གིས་ནམ་མཁའ་གཞན་མེད་པ་ཁོ་ནའོ། །གལ་ཏེ་བུ་ག་ནམ་མཁར་མི་འདོད་ཀྱི་འོན་ཀྱང་གཞན་ཡིན་པ་དེའི་ཚེ། དེ་ལ་ཉེས་པ་འདིར་འགྱུར་བ་ཡིན་ནོ་ཞེས་སྟོན་པ་ནི་གང་གི་ཚེ་ཞེས་བྱ་བའོ། །

བུ་ག་མེད་པར་ཞེས་བྱ་བ་སྟེ། མགོ་ཡོར་ཅན་གྱི་དངོས་པོ་ཡོད་པ་དེའི་ཚེ་བུ་གའི་མཚན་ཉིད་ཀྱི་ནམ་མཁའ་གར་སོང་། དེ་མེད་ན་ཡང་ཞེས་བྱ་བ་ནི་གློ་ནས་བུད་པར་དམིགས་པ་མེད་ན་ཡང་ངོ་། །དེ་དང་ནི་དངོས་པོའི་གསེབ་ནའོ། །གཞན་ན་ནི་གློ་ནའོ། །དེ་ཉིད་ན་ཞེས་བྱ་བ་ནི་མགོ་ཡོར་ཅན་ལའོ། །འགལ་

ལོ་ཞེས་བྱ་བ་ནི་ནམ་མཁའ་ནི་བུ་ག་ཉིད་ཡིན་པའི་ཕྱིར་རོ། །གཞན་གྱི་དེ་ན་ཡང་ཞེས་བྱ་བ་སྟེ་བུ་ག་མེད་པའི་གནས་ནའོ། །དེ་ལྟ་མ་ཡིན་ན་ཞེས་བྱ་བ་ནི་དེ་ན་ནམ་མཁའ་མེད་ནའོ། །དེ་ཞེས་བྱ་བ་ནི་བུ་ག་མེད་པར་བྱེད་པའི་དངོས་པོའོ། །གྲུབ་པའི་མཐའ་ལས་རྣམ་པར་བརྟགས་ནས་སེལ་བ་ནི་ཅི་སྟེ་ཞེས་

བྱ་བའོ། །གང་ལས་ཞེས་བྱ་བ་ནི་བེར་ག་ལ་སོགས་པ་ལས། དེ་ནི་བུམ་པ་ལ་སོགས་པའོ། །བེར་ག་ལ་སོགས་པ་དེ་མེད་ན། བུམ་པ་ལ་སོགས་པ་དེ་ཐོགས་པ་ཉིད་དེར་འགྱུར་གྱིའོ། །དེ་ལས་གཞན་དག་ཏུ་ཞེས་བྱ་བ་ནི་འབྱུང་བ་ཆེན་པོ་བཞི་པོ་མེད་པ་ལས་གཞན་ནམ་མཁའ་ལའོ། །བསྙད་

པ་ཚད་མ་མེད་དོ། །ཡང་ན་བསྙད་པ་དང་ཚད་མ་ཡང་མེད་དོ་ཞེས་སྦྱར་རོ། །འོ་ན་ཡུལ་ལ་གནོད་པ་མེད་དོ་སྙམ་ན། འདིས་ནི་ཞེས་གསུངས་སོ། །སོགས་པ་ཞེས་བྱ་བའི་སྒྲས་ནི་ཤར་ལ་སོགས་པའི་རྟོགས་པའི་ཡུལ་ཡོངས་སུ་གཟུང་ངོ་། །གལ་ཏེ་ཡུལ་ཁྱབ་པ་ནི་ནམ་མཁའ་བཞིན་དུ་སྐབས་འབྱེད་

เล่ม ๑๘๖ · หน้า 55b

པ་མ་ཡིན་མོད། ཤར་ལ་སོགས་པ་རྟོགས་པའི་ཡུལ་གྱི་ཅི་ལྟར་མ་ཡིན་སྙམ་ན། འདི་ལྟར་ཞེས་བྱ་བའོ། །ཡུལ་ཁྱབ་པར་ཁས་ལེན་པ་ལ་ནུབ་ལ་སོགས་པ་རྟོགས་པར་མི་འགྱུར་ཏེ་ཐ་དད་པ་མེད་པའི་ཕྱིར་རོ། །གཞན་པ་ལས་ཏེ་ཁྱབ་པ་མ་ཡིན་པ་ལས་ཀྱང་ནུབ་ལ་སོགས་པའི་ཐ་སྙད་དུ་འགྱུར་བ་མ་ཡིན་ཞིང་།

ཡུལ་དེ་རྣམ་པ་གཉིས་ལ་མ་གཏོགས་པ་རྣམ་པ་གཞན་ཡང་ཡོད་པ་མ་ཡིན་ནོ། །དེ་ནི་ཞེས་བྱ་བ་ནུབ་པ་ལ་སོགས་པ་མེད་པར་ཐལ་བའི་ཕྱིར་རོ། །གཞན་དུ་ཞེས་བྱ་བ་ནི་ཕ་རོལ་ཏུ་གནས་པའི་སྐྱེས་བུའིའོ། །གཉི་གའི་རང་བཞིན་ནི་ཤར་ནུབ་ཀྱི་རང་བཞིན་ནོ། །དེ་ལྟར་གྱུར་པ་ཞེས་བྱ་བ་ནི་ནུབ་ལ་

སོགས་པར་རོ། །འདི་ཉིད་གསལ་འདེབས་པ་ནི་སྐྱེས་བུ་ཞེས་བྱ་བ་ལ་སོགས་པའོ། །གཞན་གྱིས་གལ་ཏེ་ཞེས་སྨྲས་སོ། །དེས་ཞེས་བྱ་བ་ནི་ཡུལ་གསལ་བར་བྱེད་པས་སོ། །འདི་ནི་ཕན་ཚུན་ཞེས་བྱ་བ་ནི་སུན་འབྱིན་པའོ། །དེ་ཙམ་གྱིས་ཞེས་བྱ་བ་ནི་དངོས་པོ་རྣམས་ཉིད་ཕན་ཚུན་ལྟོས་པ་

ཙམ་གྱིས་སོ། །ཕན་ཚུན་བརྟེན་པའི་ཉེས་པ་སྤོང་བ་ནི་གལ་ཏེ་ཞེས་བྱ་བའོ། །དཔེར་ན་དྲང་པོ་ཞེས་བྱ་བའི་ཐ་སྙད་འཁྱོག་པོ་ལ་མ་ལྟོས་པ་ཁོ་ནར་འགྱུར་བ་ཡིན་ན་དེ་ལྟ་ན་ཡང་འཁྱོག་པོ་ནི་དོན་གཞན་ཁོ་ན་ཡིན་མོད། དེ་བཞིན་དུ་ཡུལ་ལ་མ་ལྟོས་པ་ཁོ་ནར་ཤར་ལ་སོགས་པའི་འགྱུར་བ་ཡིན་ཡང་།

ཡུལ་དོན་གཞན་ཡང་འགྱུར་བ་ཁོ་ནའོ་ཞེས་བྱ་བའི་དོན་ཏོ། །དེར་ཡང་ནི་དྲང་པོ་ལའོ། །དྲང་ངོ་ཞེས་རྣམ་པར་རྟོག་པའི་ཤེས་པས་མཐོང་བ་ནི་ལྟོས་པར་བྱ་བའི་ཁྱད་པར་འཁྱོག་པོ་ལས་འགྱུར་བ་ཡིན་ནོ། །འོ་ན་ཅི་ལྟར་འཁྱོག་པོ་ལ་མ་ལྟོས་པ་ཁོ་ནར་འདི་དྲང་པོ་ཞིག་གོ་ཞེས་ཐ་སྙད་བྱེད་པ་

ཡོད་སྙམ་ན་ནས་ཞེས་སྨོས་སོ། །གཞན་མེད་པར་ནི་འཁྱོག་པོ་ལ་སོགས་པ་མེད་པར་ནིའོ། །འདི་ཉིད་གསལ་བར་བྱེད་པ་ནི་འདི་ལྟར་ཞེས་བྱ་བ་ལ་སོགས་པའོ། །ལྟོས་པར་བྱ་བ་འཁྱོག་པོ་ལ་སོགས་པ་མེད་ཀྱང་ངོ་། །དེའི་ཕྱིར་ཕན་ཚུན་བརྟེན་པའི་ཕྱིར་ནི་བཟློག་ཏུ་མེད་པ་ཁོ་ན་ཡིན་པ་

དེས་ན་ཡུལ་དོན་གཞན་བརྟག་པར་མི་བྱའོ། །ཕ་རོལ་པོ་དག་འདི་ག་ལས་ཤེས་འདྲི་སྟེ་དངོས་པོ་ཉིད་ཤར་ལ་སོགས་པ་ཤེས་པ་རྒྱུ་མཚན་ཡིན་པ་ག་ལས་གྲུབ་ཅེས་བྱ་བའོ། །ལན་ནི་གཞན་དུ་ཡང་ཞེས་བྱ་བའོ། །དངོས་པོ་ཉིད་ཡུལ་གྱི་རྣམ་པར་དབྱེ་བ་ངེས་པའི་རྒྱུ་ཡིན་པར་སྟོན་པ་

เล่ม ๑๘๖ · หน้า 56a

ནི་འདི་ལྟར་ཞེས་བྱ་བའོ། །གལ་ཏེ་དེ་ལྟ་ན་ཡང་རྒྱུ་སྐར་ལ་སོགས་པའི་སྒོ་ནས་ཕྱོགས་ཉིད་ངེས་པ་ཡིན་ནོ་སྙམ་ན། སྐར་མ་ལ་སོགས་ཞེས་བྱ་བའོ། །ཅིའི་ཕྱིར་ཡུལ་མི་རྟོག་སྙམ་ན། འདི་ལྟར་ཞེས་བྱ་བའོ། །རྒྱུ་སྐར་ལ་སོགས་པ་ལས་ཀྱང་ཕྱོགས་ཀྱི་རྣམ་པར་དབྱེ་བ་ངེས་པ་མ་ཡིན་

ནོ་ཞེས་བརྗོད་པ་ནི། དེ་ནི་མ་ཡིན་ཏེ་ཞེས་བྱ་བའོ། །གཞན་དུ་ཞེས་བྱ་བ་ཤར་ཉིད་དུ་སྣང་ཡང་། ཉི་མ་ལ་སོགས་པས་ཉེ་བར་མཚོན་པའི་ཤར་ཕྱོགས་དེ་ཉིད་ནི་ཉི་མའི་དབང་གིས་སྣང་བ་ནི་མ་ཡིན་ནོ་ཞེས་འབྲེལ་ཏོ། །གང་ལ་མི་སྣང་སྙམ་ན། ཕྱོགས་ལ་རྨོངས་པའི་ཞེས་བྱ་བའོ། །ཕྱོགས་ལ་རྨོངས་པ་དང་

ལྡན་པའི་ཡིད་ག་ལ་ཡོད་པའི་སྐྱེས་བུ་རྣམས་དེ་ལའོ། །གསལ་འདེབས་པ་ནི་འདི་ལྟར་ཞེས་བྱ་བའོ། །གྲོང་དང་ཀུན་དགའ་ར་བ་ལ་སོགས་པ་གང་ལ་མ་འཁྲུལ་པའི་ཡིད་དང་ཞེས་བྱ་བ་ནི་ངེས་པ་དེ་དང་འབྲེལ་པའི་ཉི་མ་འཆར་བ་དང་ནུབ་པ་མཐོང་བར་གྱུར་པ་ཤིན་ཏུ་གོམས་པའི་ཡུལ་དེ་ཉིད་མ་འཁྲུལ་བར་

ངེས་པར་བྱ་བ་དེ་ལ་ཤིན་ཏུ་གོམས་པ་ཡིན་ནོ། །ཅི་ལྟར་གྱུར་པ་ཞིག་སྙམ་ན་ཀུན་དགའ་གྲོང་སོགས་ཞེས་བྱ་བའོ། །གྲོང་དང་ཀུན་དགའ་ར་བ་ལ་སོགས་པ། རྟག་པར་རྒྱུན་དུ་དམིགས་པ་ཞེས་འབྲེལ་ཏོ། །དེ་ལ་གོམས་པ་ཞེས་བྱ་བ་ཉི་མ་རེ་ལ་གོམས་པ་དེས་ཉམས་པའི་ཕྱིར་ཏེ་རྫོགས་པའི་ཕྱིར་རོ། །དེས་ཞེས་

བྱ་བ་ཉི་མས་ཉེ་བར་མཚོན་པ་དེ་ཉིད་ཕྱོགས་ཡིན་ནོ། །དོན་དང་ཞེས་བྱ་བ་ཤར་དང་ནུབ་ལ་སོགས་པའི་མཚན་ཉིད་དང་བྲལ་བའི་ཕྱིར་རོ། །ཤར་དང་ནུབ་ལ་སོགས་པའི་དོན་དང་བྲལ་བ་ཉིད་ཅི་ལྟར་ཞེ་ན། དེའི་རང་བཞིན་མ་ངེས་ན་འོ་ན་ཅི་ལྟར་དེ་ལྟར་ཐ་སྙད་བྱེད་སྙམ་ན་འོན་ཀྱང་ཞེས་བྱ་བའོ། །སོང་བའི་

རྗེས་སུ་འགྲོ་བ་དེ་ལ་ཡོད་པའི་ཚུལ་ནི་སོང་བའི་རྗེས་སུ་འགྲོ་བའི་ཚུལ་ཏེ། དེས་ཡིད་ཉམས་པ་གང་དག་ཡིན་པ་དེ་དག་གི་དངོས་པོ་ནི་ཉིད་དེ་དེས་སོ། །འོན་ཏེ་ཤར་དང་ནུབ་ལ་སོགས་པའི་རྟོག་པ་ནི་ཐོག་མ་མེད་པ་ཡིན་ཏེ། དེས་ན་དོན་དང་འབྲེལ་པའི་ཕྱིར་བདེན་པ་ཁོ་ནའོ་སྙམ་ན། གལ་ཏེ་ཞེས་བྱ་

བའོ། །གལ་ཏེ་ཐོག་མ་མེད་པའི་ཕྱིར་ཤར་དང་ནུབ་ལ་སོགས་པའི་རྟོག་པ་རྣམས་བདེན་པར་ཁས་མི་ལེན་ན་དེའི་ཚེ་མེད་པ་པ་ཐམས་ཅད་མཁྱེན་པ་མེད་དོ་ཞེས་དེ་ལྟར་རྟོགས་པ་རྣམས་ཀྱང་བདེན་པར་འགྱུར་རོ། །དེ་ལྟར་ཡིན་དང་འཇིག་རྟེན་པའི་རྟོགས་པ་མཐའ་དག་ཀྱང་ཚད་མར་འགྱུར་ཏེ།

เล่ม ๑๘๖ · หน้า 56b

ཐོག་མ་མེད་པའི་ཕྱིར་རོ། །གལ་ཏེ་ཐོག་མ་མེད་པས་བདེན་པ་ཡིན་ན་དེའི་ཚེ་གང་ཞིག་དབང་ཕྱུག་གམ་གཙོ་བོ་མི་འདོད་པ་དེའི་ལྟར་ན་ཡང་དབང་ཕྱུག་ལ་སོགས་པའི་རྣམ་པར་རྟོག་པ་བདེན་པ་ཉིད་དུ་ཐལ་ལོ་ཞེས་བརྗོད་པ་ནི་དབང་ཕྱུག་ཅེས་བྱ་བའོ། །འདི་ནི་ཡུལ་ཡིན་ནོ་སྙམ་ན་ནི་ཐ་སྙད་ཙམ་དུ་ཟད་དེ་དངོས་

པོས་སྟོང་པ་ཡིན་ནོ། །འོན་ཏེ་བསྟན་བཅོས་རྣམས་ཐོག་མ་མེད་པའི་ཕྱིར་བདེན་པ་ཉིད་ཡིན་ཏེ། དེས་ན་དེ་ལས་འོངས་པའི་ཐ་སྙད་ནི་བདེན་པ་ཁོ་ནའོ་སྙམ་ན་ཐོག་མེད་ཅེས་སྨོས་སོ། །ཅིའི་ཕྱིར་ཞེ་ན། ཕན་ཚུན་ཞེས་བྱ་བའོ་ཞེས་བྱ་བ་ལ་སོགས་པའི་མིང་གང་ཡིན་པ་དེ་བཀོད་པ་ཡིན་ནོ། །ཅིའི་དོན་དུ་ཞེ་

ན། །ཐ་སྙད་ཀྱི་དོན་དུའོ། །ནང་གི་ཚུ་རོལ་གྱི་ཕྱོགས་ལ་ཡང་བརྗོད་པ་ནི། འདུ་བྱེད་པ་ཞེས་བྱ་བའོ། །གལ་ཏེ་དུས་མེད་ན་དངོས་པོ་འདི་ནི་ད་ལྟར་བའི་དུས་ཅན་ཡིན་ནོ་ཞེས་ཐ་དད་པའི་ཐ་སྙད་དུ་ཅི་ལྟར་འགྱུར་སྙམ་ན། ཐ་དད་པ་ཞེས་བྱ་བའོ། །གལ་ཏེ་གང་གིས་ཐ་དད་པར་ཉེ་བར་བསྟན་པའི་དངོས་

པོའི་རང་བཞིན་ཉིད་དུས་ལ་སོགས་པའི་བརྗོད་པ་ལ་སྟོན་པར་འགྱུར་བ། དུས་མེད་པ་ཉིད་དུ་ཅི་ལྟར་གྲུབ་སྙམ་ན། འདི་ལྟར་ཞེས་སྨོས་སོ། །གལ་ཏེ་བྱུང་བར་གྱུར་ཏེ་ཞེས་བྱ་བ་ལ་སོགས་པའི་རྟོགས་པ་དག་ལས་འདས་པ་ལ་སོགས་པའི་དུས་སུ་ལྷས་བྱིན་ལ་སོགས་པ་གནས་པ་ཡིན་ན་དེའི་ཚེ་

དུས་དེ་བྱུང་བར་གྱུར་ཏོ་ཞེས་བྱ་བ་ལ་སོགས་པའི་རྟོག་པ་ལས་ཀྱང་དུས་ཀྱང་དུས་གཞན་ན་གནས་པར་འགྱུར་ཞིང་། དེ་བཞིན་དུ་དུས་གཞན་ཡང་དུས་གཞན་ལ་གནས་པར་འགྱུར་བའི་ཕྱིར་ཐུག་པ་མེད་དོ། །ཕྱོགས་ཀྱང་དེ་བཞིན་ཏེ་ཤར་ལ་སོགས་པའི་རང་བཞིན་རང་གི་ངོ་བོས་ཡིན་གྱི། ཡུལ་གཞན་

ལ་ལྟོས་ནས་ནི་མ་ཡིན་ནོ་ཞེས་བྱ་བ་སྦྱར་རོ། །དེས་ན་རང་གི་ངོ་བོར་གྱུར་པའི་ཆོས་ཐ་དད་པས་དེ་ལྟར་ཐ་སྙད་བྱེད་པ་ཡིན་ནོ། །ཐ་སྙད་ཀྱི་ཚུལ་བསྟན་པ་ནི། ཤར་ནི་ཞེས་བྱ་བའོ། །དེ་དང་ཞེས་བྱ་བ་དུས་ལ་སོགས་པ་དང་འབྲེལ་པའིའོ། །གལ་ཏེ་དུས་ཀྱི་འདས་པ་ཉིད་དངོས་པོ་ལ་ལྟོས་པ་ཡིན་

ན་དེའི་ཚེ་དངོས་པོའི་འདས་པ་ཉིད་ཀྱང་དུས་ལ་ལྟོས་པར་འགྱུར་རོ། །དེ་ལྟར་གྱུར་ན་ཅི་སྐྱོན་སྙམ་ན། ཕན་ཚུན་ཞེས་བྱ་བའོ། །གཅིག་ཀྱང་ཞེས་བྱ་བ་དུས་སམ་དངོས་པོ་ཡང་འདས་པ་ཉིད་དུ་གནས་པ་མེད་པར་འགྱུར་རོ། །འདིའི་དོགས་པ་བསུ་བ་ནི་གལ་ཏེ་ཞེས་བྱ་བའོ། །ཡུན་རིང་པོར་འདས་

เล่ม ๑๘๖ · หน้า 57a

པའི་དོན་དང་དུས་དག་ཅིག་ཅར་འདས་པ་ཉིད་ཡིན་གྱི། གང་གི་ཕན་ཚུན་བརྟེན་པའི་ཉེས་པར་འགྱུར་བ་རིམ་གྱིས་ནི་མ་ཡིན་ནོ། །ལན་ནི་འདས་པ་ཉིད་ཐུག་པ་མེད་པར་འགྱུར་ཞེས་སྦྱར་རོ། །ཅི་ལྟར་ཐུག་པ་མེད་སྙམ་ན། ཅིག་ཅར་ཞེས་བྱ་བའོ། །གཉིས་དག་ཅེས་བྱ་བ་ནི་

ཡུན་རིང་མོར་འདས་པའི་དོན་དང་དུས་དག་གོ། །དེས་ན་ཅི་ལྟར་ཅིག་ཅར་ཉིད་ཕན་ཚུན་འདས་པར་འགྱུར་སྙམ་དུ་བསམ་པའོ། །དོགས་པ་བསུ་བ་ནི་དེ་དག་ཅེས་བྱ་བ་སྟེ་ཅིག་ཅར་བའི་ཡུན་རིང་པོར་འདས་པའི་དོན་དང་དུས་དག་གཞན་ལ་འདས་པ་ཡིན་ནའོ། །ལན་ནི་དེ་ལའང་ཞེས་བྱ་བའོ། །གཞན་

གྱིས་འདས་པ་ཡང་དེ་ལས་གཞན་ལས། དེའི་ཡང་དེ་ལས་གཞན་ལས་ཡིན་པའི་ཕྱིར་འདས་པ་ཉིད་ཐུག་པ་མེད་པར་འགྱུར་རོ། །དེས་ན་དུས་ལ་སོགས་པ་ནི་མེད་པ་ཁོ་ནའོ། །དེས་ན་ཐ་དད་པའི་ཉེ་བར་བསྟན་པའི་རང་བཞིན་དེ་ཉིད་དུས་ལ་སོགས་པའི་བརྗོད་པ་ལ་སྟོན་པ་ཡིན་ནོ་ཞེས་གནས་

སོ། །དེ་ལྟར་ནམ་མཁའ་དགག་པའི་ཞར་ལ་ཡུལ་དང་དུས་དག་བཀག་ནས། ཡང་དུས་ལ་ཡོན་ཏན་མེད་པར་བརྗོད་པ་ནི་གཞན་ཡང་ཞེས་བྱ་བའོ། །བདག་ལ་སོགས་པ་ལ་ཡང་དེ་བཞིན་དུ་ཡོན་ཏན་གང་ཡིན་པར་བརྗོད་པར་བྱ། འོན་ཏེ་ཞེས་བྱ་བ་ནི་གཞན་གྱིའོ། །ལན་ནི་དེ་ནི་ཞེས་བྱ་བ་སྟེ། ཆེན་

པོ་ཉིད་ལ་སོགས་པ་ནིའོ། །དེས་བདག་ལ་སོགས་པ་རྣམས་ཀྱི་བདག་ཉིད་ཀྱི་སོ་སོར་ངེས་པ་འགའ་ཞིག་བརྗོད་པར་བྱ་བ་སྟེ། དེ་ལྟར་མ་ཡིན་ན་བདག་དང་དུས་གཉིས་ཐ་དད་པར་རྣམ་པར་གཞག་པ་མེད་པར་འགྱུར་རོ། །གནང་བ་ནི་དངོས་པོའི་བདག་ཉིད་ཐོབ་པ་ཡོད་པ་ཡིན་ལ། འགོག་པ་ནི་དེ་

མེད་པའོ། །དེ་སྐད་དུ་ཡང་། དུས་ཀྱིས་འབྱུང་པོ་སྨིན་བྱེད་དེ། །དུས་ཀྱིས་སྐྱེ་དགུ་འཇིག་པར་བྱེད། །ཅེས་བརྗོད་པ་ཡིན་ནོ། །སྨན་པ་ནི་སྐྱེད་པར་བྱེད་པ་སྟེ་གནས་པར་བྱེད་པའོ། །འཇིག་པ་ནི་མེད་པར་བྱེད་པ་སྟེ་འགོག་པར་བྱེད་པའོ། །དེ་གཉིས་ནི་དུས་ཀྱི་ཡོན་ཏན་ཡིན་ནོ་ཞེས་བྱ་བའི་དོན་ཏོ། །ལན་

ནི་དེ་དག་ནི་ཞེས་བྱ་བའོ། །དེའི་ཕྱིར་དུས་ཀྱིས་ནི་གནས་པ་དང་འགོག་པར་མི་ཐེག་གོ། །ཡང་ན་ཡིན་མོད། དེ་ལྟ་ན་ཡང་བདག་ལ་སོགས་པ་ལས་ཐ་དད་པ་མ་ཡིན་ནོ་ཞེས་བརྗོད་པ་ནི། གཞན་ཡང་ཞེས་བྱ་བའོ། །གལ་ཏེ་དུས་ཁྱབ་པ་དང་རྟགས་ཀྱིས་ཀྱང་གནས་པ་དང་བཀག་པ་ནུས་ན་ནི།

เล่ม ๑๘๖ · หน้า 57b

དེའི་ཚེ་བདག་ཀྱང་དེ་ལྟར་ནུས་པ་ཐོབ་པར་འགྱུར་རོ། །ཅིའི་ཕྱིར་ཞེ་ན། འདོད་པའི་དུས་ལས་གཞན་བདག་ལ་ཁྱབ་པ་དང་རྟག་པ་ཉིད་དུ་ཁྱད་པར་མེད་པའི་ཕྱིར་རོ། །ཅི་ལྟར་ཁྱད་པར་མེད་སྙམ་ན། འདི་ལྟར་ཞེས་བྱ་བའོ། །འདི་ནི་ཞེས་བྱ་བ་ནི་དུས་ཀྱིས་སོ། །འདིས་ནི་མ་ཡིན་ནོ་ཞེས་བྱ་བ་ནི་བདག་ལ་

སོགས་པས་སོ། །དེ་ལྟར་ནམ་མཁའ་ལ་སོགས་པ་བཀག་ནས། སྒྲ་ནམ་མཁའི་མ་ཡིན་ན་ཚད་མ་དང་འགལ་བར་ཡང་ཞེས་གང་བརྗོད་པ་དེ་ལ་གྲུབ་པའི་མཐའི་མཇུག་སྡུད་པ་ནི། དེས་ན་ཞེས་བྱ་བའོ། །འདི་ནི་ནམ་མཁའ་ཉིད་དུ་ཞེས་བྱ་བ་ནི་རྩོད་པའོ། །འདི་ནི་སྒྲ་སྟེ་རྟོགས་ནའོ། །ལན་ནི་

འབར་སོགས་ཞེས་བྱ་བའོ། །མཐོང་བ་མིན་ནམ་ཞེས་བྱ་བ་ནི་མཐོང་བ་ཁོ་ནའོ་ཞེས་བྱ་བའོ། །དེ་ལྟར་ཡིན་ན་ཡང་། ཅི་ན་སྟེ་ཅིའི་ཕྱིར་འབར་བ་ལ་སོགས་པ་སྟེ་ནམ་མཁའ་དེའི་ཡོན་ཏན་དུ་མི་བརྗོད། དོགས་པ་ནི་དེ་ཞེས་བྱ་བ་འབར་བ་ལ་སོགས་པ་དེ་ལ་རྟེན་ནམ་མཁའ་ལས་གཞན་ཡང་ཡོད་ཅེས་

བྱ་བའོ། །ལན་ནི་འཐད་པ་མིན་ཏེ་ཞེས་བྱ་བའོ། །ཡང་ན་ནམ་མཁའ་ཡོད་དུ་ཆུག་ཀྱང་དེས་གནས་པར་བྱེད་པ་ནི་མ་ཡིན་ནོ་ཞེས་བརྗོད་པ་ནི་ནམ་མཁའ་ནི་ཞེས་བྱ་བའོ། །ནམ་མཁའ་དེ་མ་བརྟགས་པར་ཡོད་པ་ཁོ་ན་ཡིན་གྱི། དོན་དམ་པར་ཡོད་པ་ནི་མ་ཡིན་ནོ་ཞེས་སྟོན་པ་ནི་སྣང་བ་ཡོད་ན་

ཞེས་བྱ་བའོ། །འདི་ནི་ཉེ་བར་མཚོན་པ་སྟེ་མུན་པ་ཡོད་ན་ཡང་ཞེས་རྟོགས་པར་བྱའོ། །དེའི་ཕྱིར་རང་ཉིད་སྨོས་པ་ནི་བསྟན་བཅོས་བྱེད་པའི་འདོད་པ་བསྒྲུབ་པར་བྱ་བ་ཡིན་པ་སྤངས་པ་ཡིན་ནོ། །བསྟན་བཅོས་བྱེད་པའི་འདོད་པ་བསྒྲུབ་པར་བྱ་བ་ཡིན་ན། སློབ་དཔོན་ཕྱོགས་ཀྱི་གླང་པོའི་

གཞུང་འཆད་པ་པོ་རྣམས་ཀྱང་ལྟར། རང་ཉིད་སྨོས་པ་དོན་མེད་པར་འགྱུར་རོ་ཞེས་སུན་འབྱིན་པ་གཞན་བརྗོད་པ་ནི། གཞན་ཡང་ཞེས་བྱ་བའོ། །གལ་ཏེ་བསྟན་བཅོས་བྱེད་པའི་འདོད་པ་ཡང་རང་ཉིད་སྨོས་པས་སྟོན་པ་ཡིན་ན། དེའི་ཚེ་རང་ཉིད་སྨོས་པ་ཡང་དོན་མེད་པར་འགྱུར་

རོ། །ཅིའི་ཕྱིར་ཞེ་ན། གང་གི་ཕྱིར་ཕྱོགས་ཀྱི་མཚན་ཉིད་ལས་ཕྱི་རོལ་གྱི་དོན་ཅན་ཡིན་པས་སོ། །མཚན་ཉིད་བྱེད་པ་ནི་ལོག་པར་རྟོགས་པ་བསལ་བའི་དོན་དུ་ཡིན་ན། བསྟན་བཅོས་བྱེད་པའི་འདོད་པ་བསྒྲུབ་པར་བྱ་བ་ཉིད་དུ་ཁས་ལེན་ན་ནི་རང་ཉིད་སྒྲ་མ་འབྲེལ་པར་འགྱུར་རོ། །

เล่ม ๑๘๖ · หน้า 58a

འཆད་པ་ནི་རང་ཉིད་ཀྱི་ཞེས་བྱ་བའོ། །དེ་ཞེས་བྱ་བ་བསྟན་བཅོས་བྱེད་པའི་འདོད་པ་བཟློག་པའི་དོན་ཉིད་དོ། །དེ་ཡང་ཞེས་བྱ་བ་ནི་བསྟན་བཅོས་བྱེད་པའི་འདོད་པ་ཡང་ངོ་། །དེ་ཞེས་བྱ་བ་ནི་རང་ཉིད་སྨོས་པའོ། །ཅིའི་ཕྱིར་སྙམ་ན། དེ་ལྟར་ཡིན་ན་ཞེས་སྨོས་ཏེ། བསྟན་བཅོས་བྱེད་པ་

འདོད་པ་ཡང་བསྒྲུབ་བྱ་ཡིན་ནའོ། །ཕྱོགས་ཀྱི་མཚན་ཉིད་ཀྱི་དོན་ལོག་པར་རྟོགས་པ་བསལ་བ་སྟེ། དེ་དང་མ་འབྲེལ་པའི་ཕྱིར་རོ། །རང་ཉིད་ཀྱི་སྒྲའི་དགོས་པ་གཞན་ཡིན་པར་དོགས་པ་བསུ་བ་ནི། གལ་ཏེ་ཞེས་བྱ་བའོ། །ལན་ནི་འོ་ན་ཞེས་བྱ་བའོ། །བསམ་པ་ནི་འདི་ཡིན་ཏེ། གལ་ཏེ་འགའ་

ཞིག་གིས་བསྟན་བཅོས་བྱེད་པའི་འདོད་པ་བསྒྲུབ་པར་བྱ་བ་མ་ཡིན་ནོ་ཞེས་བརྗོད་ན། དེའི་ཚེ་བསྟན་བཅོས་བྱེད་པས་འདོད་པ་བསྒྲུབ་པར་བྱ་བ་མ་ཡིན་ནོ་ཞེས་དོགས་པར་འགྱུར་གྱི། གང་གི་ཚེ་ཐམས་ཅད་ཀྱིས་ཀྱང་བསྟན་བཅོས་བྱེད་པའི་འདོད་པ་བསྒྲུབ་པར་བྱ་བ་ཡིན་ནོ་ཞེས་ཁས་བླངས་པ་དེའི་

ཚེ་བཟློག་པར་ག་ལ་དོགས། དེས་ན་རང་ཉིད་སྨོས་པ་འདོད་པ་བཟློག་པའི་དོན་དུ་བྱས་པ་ནི་མ་ཡིན་ནོ་ཞེས་བྱ་བ་ཡིན་ནོ། །གང་ཞིག་རང་ཉིད་སྨོས་པས་བསྟན་བཅོས་དག་ལ་འདོད་པས་འཇུག་པར་བྱ་བའི་རྟོག་པ་སྔོན་དུ་གཏོང་བ་དེ་ཚད་མས་འགོག་པ་མ་ཡིན་པའམ་འགོག་པ་ལ་ཡིན། དེ་ལ་གལ་ཏེ་

ཚད་མ་མི་འགོག་ན། དེའི་ཚེ་གང་གིས་རང་ཉིད་སྨོས་པས་གཞུག་པར་བྱ་བ་བསྟན་བཅོས་འཛིན་པ་སུས་བཟློག །འོ་ན་ཚད་མས་བཀག་ན་དེའི་ཚེ་ཡང་གང་གིས་རང་ཉིད་སྨོས་པས་དོན་དང་བཅས་པར་འགྱུར་བ་ཚིག་ལས་རྒོལ་བ་གང་གིས་འཇུག །རྟོག་པ་དང་ལྡན་པའི་འདོད་པ་ཡང་ཚད་མའི་རྩ་བ་ཅན་

ཁོ་ན་ཡིན་ནོ་ཞེས་བྱ་བའི་དོན་ཏོ། །འོན་ཏེ་རྟོག་པ་སྔོན་དུ་བྱེད་པ་མ་ཡིན་པ་འཇུག་པའི་དོན་དུ་རང་ཉིད་སྨོས་སོ་སྙམ་དུ་དོགས་ན་དེ་དག་ཅིས་གསུངས་སོ། །ཅིས་མི་འཐོབ་སྟེ་འཐོབ་པ་ཁོ་ན་འདོད་པ་ཡོད་པའི་ཕྱིར་རོ། །དེས་ན་རྟོག་པ་སྔོན་དུ་བྱེད་པ་མ་ཡིན་པར་འཇུག་པའི་དོན་དུ་ཡང་རང་ཉིད་སྨོས་པ་

དོན་མེད་དོ། །དེས་ན་རང་ཉིད་ཀྱི་སྒྲ་ནི་ཕྱོགས་ཀྱི་མཚན་ཉིད་ལས་ཕྱི་རོལ་དུ་གྱུར་པ་ཁོ་ནའོ། །འདིས་ནི། གལ་ཏེ་བསྟན་བཅོས་འདོད་འཇུག་དོན། །ཞེས་བྱ་བ་ལ་སོགས་པ་ནི་གསལ་བར་མ་བཤད་པས། ད་ནི་ཚད་མས་བཀག་མེད་ན། །ཞེས་བྱ་བ་ལ་སོགས་པ་རྣམ་པར་བསྐལ་པ་ཡིན་ནོ། །ལུང་ཐམས་

เล่ม ๑๘๖ · หน้า 58b

ཅད་ལ་ཡོངས་སུ་བརྟགས་ནས་འཇུག་པའི་ཕྱིར་ན། སོ་སོར་ངེས་པའི་ལང་ལ་འཇུག་པར་བྱ་བའི་དོན་དུ་རང་ཉིད་སྨོས་པ་ཡིན་ནོ་སྙམ་ན་བསྟན་བཅོས་ཐམས་ཅད་ནི་ཞེས་བྱ་བའོ། །དེས་ན་ཞེས་བྱ་བ་ནི་རྣམ་པར་དཔྱད་མི་བཟོད་པས་ནའོ། །དེ་ནི་ཚད་མས་གནོད་པའང་ཡིན་ལ། དེ་ཉིད་ཀྱིས་ན་ཡོངས་

སུ་མ་དག་པ་ཡིན་ཏེ། དེ་ལྟ་བུའི་བསྟན་བཅོས་ལས་འཇུག་པ་མ་ཡིན་པ་ཉིད་དོ། །དེ་བས་ན་རང་ཉིད་སྨོས་པས་བསྟན་བཅོས་ག་ལ་འཇུག་པ་གང་ཡིན་པ་དེ་ག་ལ་སྲིད་དེ་མི་སྲིད་པ་ཁོ་ནའོ། །འདི་ནི་གལ་ཏེ་ཚད་མས་བཀག་ན། ཡང་ཞེས་བྱ་བའི་རྣམ་འགྲེལ་གྱི་འགྲེལ་པ་ཡིན་ནོ། །ད་ནི་རྣམ་

འགྲེལ་ལྷག་མ་རྣམ་པར་འགྲེལ་པ་ནི། གལ་ཏེ་རྟོག་ལྡན་མིན་ན་ནི་ཞེས་བྱ་བའོ། །དང་པོ་ནི་འདོད་པས་བསྟན་བཅོས་ཁས་ལེན་ལ། གཉིས་པར་ནི་རང་ཉིད་སྨོས་པ་ལས་ཡིན་ནོ་ཞེ་ན། དེ་ནི་དང་པོ་ཞེས་བྱ་བའོ། །དེ་ཙམ་ནི་འདོད་པ་ཙམ་སྟེ་དེས་ཞུགས་པའོ། །དེས་ན་ནི་འདོད་པས་ནའོ། །

དེ་བཞིན་དུ་ནི་དང་པོ་ཁས་བླངས་པ་བཞིན་དུའོ། །དེའི་ཕྱིར་རྟོག་པ་གཉི་ག་ལ་ལྟོས་ནས་ཀྱང་རང་ཉིད་སྨོས་པ་དོན་མེད་པ་ཁོ་ནའོ། །དེ་དག་དོན་དུ་ཞེས་བྱ་བ་ནི་དོགས་པ་བསུ་བའོ། །འདོད་པས་བསྟན་བཅོས་དག་ལ་འཇུག་པར་བྱ་བའི་དོན་དུ་དེ་དག་རང་ཉིད་སྨོས་པའི་རང་བཞིན་གྱིས་སློབ་པ་ཡིན་

ནོ་ཞེ་ན། ལན་ནི་འདོད་པ་ཙམ་གྱིས་ནི་བསྟན་བཅོས་ལ་འཇུག་པ་མ་ཡིན་གྱི། འོན་ཀྱང་ཡོངས་སུ་བརྟགས་པས་ཡིན་ནོ་ཞེས་རྟོགས་པར་བྱ་བ་དེ་བསླབ་པར་བྱ་བ་ཡིན་ནོ། །འདི་ཉིད་འཆད་པ་ནི་གལ་ཏེ་ཞེས་བྱ་བའོ། །བསྒྲུབ་པར་བྱ་བའི་རྣམ་པ་བརྗོད་པ་ནི་སྔ་མ་བཞིན་དུ་ཞེས་བྱ་བའོ། །འདིར་ཞེས་

བྱ་བ་ནི་བསྟན་བཅོས་ཁས་བླངས་པ་ལའོ་ཞེས་དེ་ལྟར་རིགས་པ་བསྟན་པར་རིགས་སོ། །ཅི་ལྟར་གྱུར་པ་ཞིག་ཅེ་ན། འདོད་པས་ཞེས་བྱ་བའོ།། །།ཚད་མ་རྒྱན་གྱི་ཊཱི་ཀ་བམ་པོ་དྲུག་ཅུ་རྩ་དྲུག་པ་གཞན་དག་རྒོལ་བའི་འདོད་པ་ཡང་ཚད་མ་དང་། གཞན་དག་ཁོ་ནས་ལེན་པ་དང་

འདོར་བར་འགྱུར་བ་ཡིན་པས་ན་རང་ཉིད་སྨོས་པས་ཅི་བྱ་ཞེས་བརྗོད་པ་ནི། དེ་ལྟ་ན་འོ་ན་ཞེས་བྱ་བའོ། །གལ་ཏེ་རྒོལ་བའི་འདོད་པ་ལ་ཚད་མས་གནོད་ན་ཞེས་སྐབས་ཡིན་ནོ། །འདི་ཡང་མི་ནུས་པ་དང་མི་དགོས་པ་ཉིད་ཉེས་པ་ཡིན་ནོ་ཞེས་བྱ་བའི་དོན་ཏོ། །འདོད་པ་མི་རྟག་པ་ཉིད་ལ་གནོད་

เล่ม ๑๘๖ · หน้า 59a

པ་མེད་དེ་མི་འགལ་བའི་ཕྱིར་དང་། མི་འགལ་བ་ཡང་བསྟན་བཅོས་བྱེད་པའི་འདོད་པ་མེད་ན་མི་འབྱུང་བ་མ་ཡིན་པའི་ཕྱིར་རོ། །བསྒྲུབ་པར་བྱ་བ་མིན་པ་ནི་བསྟན་བཅོས་བྱེད་པའི་འདོད་པ་སྟེ། མེད་ན་མི་འབྱུང་བ་མ་ཡིན་པའི་ཕྱིར་རོ། །མེད་ན་མི་འབྱུང་བ་མ་ཡིན་ཡང་བསྟན་

བཅོས་ལས་འདོད་པ་བསྒྲུབ་པར་བྱ་བ་ཡིན་ན་ཐུག་པ་མེད་པར་འགྱུར་ཏེ། གཏན་ཚིགས་ཐམས་ཅད་ལ་སྐུར་བར་འགྱུར་རོ། །འདོད་པ་ལ་གནོད་པ་མེད་པ་དང་ཞེས་བྱ་བ་ལ་སོགས་པ་མདོར་གཞག་པའི་ངག་རྣམ་པར་འགྲེལ་པ་ནི། བསྟན་བཅོས་ལས་ཞེས་བྱ་བའོ། །བསྒྲུབ་བྱ་ཡིན་ལ་ཞེས་བྱ་

བ་ནི་ནམ་མཁའི་ཡོན་ཏན་ཉིད་དོ། །དེ་སྒྲུབ་ན་ཞེས་བྱ་བ་ནམ་མཁའི་ཡོན་ཏན་སྒྲུབ་ནའོ། །དེས་ན་འདི་ནི་མ་ཡིན་ནོ་ཞེས་བྱ་བ་ནི་དེ་ལྟ་ན་འོ་ན་ཞེས་བྱ་བ་ལ་སོགས་པ་བརྩད་པའོ། །དེ་ལྟར་ལོག་པར་རྟོགས་པ་བསལ་བའི་སྒོ་ནས་དོགས་པའི་གནས་བཟློག་པའི་དོན་ཡིན་པའི་ཕྱིར་རང་སྨོས་པ་

དོན་མེད་པ་མ་ཡིན་ནོ་ཞེས་བསྟན་པ་ཡིན་ནོ། །རང་གི་ཕྱོགས་པ་འགའ་ཞིག་མ་གྲུབ་པའི་ཉེས་པར་འགྱུར་བའི་ཕྱིར། གཞུང་ལུགས་ཀྱིས་ཉེ་བར་བཀོད་པའི་ཆོས་ཅན་ལ་སྒྲུབ་པར་བྱེད་ན་མི་སྲིད་པའི་ཕྱིར་ན། དེ་ཡོངས་སུ་སྤངས་ཏེ་ཆོས་ཅན་ཚད་མས་གྲུབ་པ་གཟུང་བར་བྱ་བ་ཡིན་ནོ་ཞེས་ཤེས་

པར་བྱ་བའི་དོན་དུ་རང་ཉིད་སྨོས་པ་ཡིན་ནོ་ཞེས་བརྗོད་པ་ནི། གཞུང་ལུགས་ཞེས་བྱ་བའོ། །གཞན་གྱིས་ཞེས་བྱ་བ་བསྟན་བཅོས་ཀྱིས་གཞག་པ་ནའོ། །གལ་ཏེ་དངོས་པོ་ལ་བརྟེན་པའི་རྣམ་པར་དཔྱོད་པ་ནི། གཞུང་ལུགས་ལས་གྲུབ་པ་དངོས་པོ་མ་ཡིན་པ་ལ་མ་གྲུབ་པའི་ཕྱིར་ན་རང་

ཉིད་དུ་མི་འགྱུར་བ་མ་ཡིན་ནམ་དེའི་དོན་དུ་རང་ཉིད་སྨོས་པས་ཅི་བྱ་ཞེས་བརྗོད་པ་ནི་དཔྱད་པ་ཉིད་ཀྱི་ཞེས་བྱ་བའོ། །བྱས་པའི་ཕྱིར་ཞེས་བྱ་བའི་སྒྲུབ་བྱེད་འདི་ནི་མངོན་པར་འདོད་པའི་བསྒྲུབ་བྱ་གྲུབ་པའི་དོན་དུ་རབ་ཏུ་སྦྱར་བ་ཡིན་པས། རང་གྲུབ་པའི་དོན་དུ་ཚད་མས་གྲུབ་པའི་ཆོས་ཅན་

འཕེན་པ་ཡིན་ནོ་ཞེས་བྱ་བའི་དོན་ཏོ། །བསྟན་བཅོས་འབའ་ཞིག་གིས་གྲུབ་པའི་ཆོས་ཅན་ལ་ནི་མངོན་པར་འདོད་པ་འགྲུབ་པ་མེད་པའི་ཕྱིར་རོ་ཞེས་བརྗོད་པ་ནི། རང་འདོད་བརྟགས་པའི་ཞེས་བྱ་བའོ། །དེའི་རང་བཞིན་ཉིད་ཅེས་བྱ་བ་ནི་རང་བཞིན་གང་གིས་ཆོས་ཅན་ཡིན་པ་གང་ཡིན་པ་དེ་ལ་

เล่ม ๑๘๖ · หน้า 59b

ནི་ཞེས་བྱ་བ་ནི་སྒྲ་ལ་སོགས་པའི་ཆོས་ཅན་ནོ། །དོགས་པ་ནི་འོན་ཏེ་ཞེས་བྱ་བའོ། །དེས་ན་སྒྲའི་རང་བཞིན་ནི་རྣམ་པར་དཔྱད་པ་མ་ཡིན་པ་དེས་ན་དེ་ལ་སྒྲུབ་པར་བྱེད་པ་སྲིད་པའི་ཕྱིར་ནམ་མཁའི་ཡོན་ཏན་ཉིད་གྲུབ་པ་ཁོ་ནའོ་ཞེས་བསམས་པའོ། །ལན་ནི་འོ་ན་ཞེས་བྱ་བའོ། །མ་གྲུབ་པའི་ཁྱད་

པར་ནམ་མཁའི་ཡོན་ཏན་ཉིད་བླངས་པས་ཅི་ཞིག་བྱ། དེ་ལྟ་བུ་ཉིད་ཅེས་བྱ་བ་ནི་ཁྱད་པར་མ་གྲུབ་པའི་སྒྲ་ཉིད་དོ། །དེར་ནི་ནམ་མཁའི་ཡོན་ཏན་གྱི་ཁྱད་པར་ཅན་གྱི་སྒྲ་ལ་མི་རྟག་པ་ཉིད་མེད་པའི་ཕྱིར་ཏེ། དོན་དུ་མི་གཉེར་བའི་ཕྱིར་ནི་རྒོལ་བའི་ཚིག་དོན་མེད་དོ་ཞེས་འབྲེལ་ཏོ། །ཅི་བརྗོད་པ་

སྙམ་ན་ནམ་མཁའི་ཡོན་ཏན་དང་ལྡན་པའོ། །འོན་ཏེ་རྒོལ་བའི་ཚིག་ལས་དེ་འགྲུབ་ན་ཅི་ལྟར་རྒོལ་བའི་ཚིག་དོན་མེད་སྙམ་ན། དེ་ལས་ཞེས་སྨོས་ཏེ་དམ་བཅའ་བ་ཙམ་ལས་སོ། །དེ་ཞེས་བྱ་བ་མངོན་པར་འདོད་པ་མ་ཡིན་པ་ནམ་མཁའི་ཡོན་ཏན་ལྡན་པའི་མི་རྟག་པ་གྲུབ་པ་མིན་པའི་ཕྱིར་རོ། །

ཕྱེད་ཕྱི་མ་འཆད་པ་ནི་རྟོག་པ་ཞེས་བྱ་བའོ། །དེ་ལས་དེ་ཞེས་བྱ་བ་རྣམ་པར་འགྲེལ་པ་ནི། མི་འདོད་པ་ཉིད་ཅེས་བྱ་བའོ། །དམ་བཅའ་བ་ཙམ་གྱིས་འགྲུབ་ན་ཅི་སྐྱོན་སྙམ་ན། དེ་ལྟ་ན་ནི་ཞེས་བྱ་བའོ། །དེ་ལྟ་བུ་ཉིད་དུ་ཞེས་བྱ་བ་ནི་ནམ་མཁའི་ཡོན་ཏན་དང་ལྡན་པའི་མི་རྟག་པ་ཉིད་དོ། །

འདི་ནི་ཞེས་བྱ་བ་གཞུང་གིས་བསྐྱེད་པའི་ཁྱད་པར་ཅན་ཞེས་བྱ་བ་ལ་སོགས་པ་ནི་མ་ཡིན་ནོ། །ཕ་རོལ་པོ་དག་རང་ཉིད་སྨོས་པས་གྲུབ་པ་ཉིད་དུ་བརྗོད་པ་མ་ཡིན་གྱི་འོན་ཀྱང་། ཆོས་ཅན་གྲུབ་པ་ནི་བསྒྲུབ་པར་བྱ་བ་མ་ཡིན་ནོ་ཞེས་སྨྲ་བ་ནི་ཅི་སྟེ་ཞེས་བྱ་བའོ། །གྲུབ་པའི་མཐའ་པ་དེ་ཡང་གྲུབ་

པའི་རང་བཞིན་འགོག་པའི་ཚིག་ཉིད་ཀྱིས་འགྲུབ་བོ་ཞེས་བརྗོད་པ་ནི། རང་གི་ངོ་བོ་ཉིད་བསྟན་པ་ཞེས་བྱ་བའོ། །དེ་ཞེས་བྱ་བ་ནི་ཆོས་ཅན་བསྒྲུབ་བྱ་བ་ཡིན་ཏེ། རྟོགས་ཟིན་པས་རྟོགས་པར་བྱེད་པའི་འབད་པ་ནི་འབྲས་བུ་དང་བཅས་པ་མ་ཡིན་ནོ་ཞེས་བྱ་བའི་དོན་ཏོ། །ཅི་ལྟར་འདིས་རྟོགས་

སྙམ་ན་འདི་ལྟར་ཞེས་བྱ་བའོ། །རྣམ་པར་གཅོད་པར་བྱ་བ་མེད་པར་ནི་ཁྱད་པར་དོན་དང་ལྡན་པ་མ་ཡིན་ནོ། །དེས་ན་གྲུབ་པའི་རང་བཞིན་གྱི་ཆོས་ཅན་དང་སྒྲུབ་པར་བྱེད་པའི་རང་བཞིན་དུ་ཆོས་མིག་གིས་གཟུང་བ་ལ་སོགས་པ་བསྟན་པ་ཡོད་པ་ཡིན་ན་རང་གི་ངོ་བོ་ཁོ་ནར་བསྟན་པ་ཞེས་བྱ་བའི་

เล่ม ๑๘๖ · หน้า 60a

ཚིག་འདི་ནི་དེ་རྣམ་པར་དཔྱོད་པར་བྱེད་པས་འབྲས་བུ་དང་ལྡན་པར་འགྱུར་རོ། །དེའི་ཕྱིར་རང་ཉིད་སྨོས་པ་ནི་ཆོས་ཅན་བསྒྲུབ་པར་བྱ་བ་བྱེད་པ་བཟློག་པའི་དོན་དུ་མ་ཡིན་ཏེ། དེ་ནི་རྣམ་པ་གཞན་ཁོ་ནར་དགག་པ་འགྲུབ་པའི་ཕྱིར་རོ། །འཆད་པ་ནི་ཅི་སྟེ་ཞེས་བྱ་བའོ། །ཅིའི་ཕྱིར་བསྒྲུབ་བྱ་མ་

ཡིན་ཞེ་ན། རང་ཉིད་ཅེས་སྨོས་སོ། །འདི་ནི་རང་ཉིད་སྨོས་པའི་འབྲས་བུ་སྟོན་པའོ། །དེ་ལྟ་མ་ཡིན་ན་ཞེས་རང་གི་ངོ་བོ་ཅན་བསྒྲུབ་པར་བྱ་བ་ཡིན་ནའོ། །འགྲུབ་པའི་ཕྱིར་རོ་ཞེས་བྱ་བ་ནི་ཆོས་ཅན་ཞེས་བྱ་བར་བལྟའོ། །ཆོས་ཅན་མ་གྲུབ་པ་ནི་དཔྱོད་པ་མི་སྲིད་པའི་ཕྱིར་ན་ཆོས་ཅན་གྲུབ་པ་ཉིད་ཅེས་བྱ་བ་ནི་སྐབས་

ཡིན་ནོ། །འདིས་ནི་རྩོད་པའི་ཆ་རྣམ་པར་བཀྲལ་བ་ཡིན་ནོ། །འདི་ལ་ནི་རང་ཉིད་ཀྱིས་འདེབས་པ་ནི་དེ་ཡང་མི་འཐད་དེ་ཞེས་བྱ་བའོ། །དེ་ཉིད་ནི་ཞེས་བྱ་བ་ནི་ཆོས་ཅན་གྲུབ་པའོ། །གང་བཟློག་པས་རང་ཉིད་སྨོས་པ་འབྲས་བུ་དང་བཅས་པར་འགྱུར་བ་ཆོས་ཅན་ལ་ནི་བསྒྲུབ་པར་བྱ་བ་ཉིད་ཡོད་པ་མ་ཡིན་ནོ་ཞེས་བྱ་བའི་

དོན་ཏོ། །དེ་ལྟ་ན་ནི་ཞེས་བྱ་བ་ནི་གཞན་གྱིའོ། །དེ་བཞིན་དུ་རྣམ་པར་དཔྱོད་པའི་ཡང་གྲུབ་པ་རྟེན་མ་ཡིན་ནོ་ཞེས་འབྲེལ་ཏོ། །དེ་བཞིན་དུ་གྲུབ་པ་ཡང་གཏན་ཚིགས་ཀྱི་རྟེན་མ་ཡིན་ནོ་ཞེས་སྦྱར་རོ། །དེ་ལྟ་མ་ཡིན་ནོ་ཞེས་བྱ་བ་ནི་རང་གི་ངོ་བོ་ཞེས་བྱ་བ་ཡང་དགོས་པ་དང་ལྡན་པ་ཡིན་ན་གཉི་ག་ཡང་ཞེས་བྱ་བ་ངེས་

པར་གཟུང་བ་འབའ་ཞིག་ཏུ་ནི་མ་ཟད་ཀྱི་རང་གི་ངོ་བོ་ཞེས་བྱ་བ་འདི་ཡང་ཐ་དད་པར་དགོས་པ་དང་བཅས་པར་བསྟན་པར་བྱ་བར་འགྱུར་བ་བསྟན་པ་ཡང་མ་ཡིན་ཏེ། དེས་ན་རང་གི་ངོ་བོ་ཁོ་ནས་ཞེས་བྱ་བ་འདི་གྲུབ་པ་བསྒྲུབ་པར་བྱ་བ་བཟློག་པའི་དོན་དུ་ནི་མ་ཡིན་གྱི་འོན་ཀྱང་མ་གྲུབ་པའི་སྒྲུབ་པར་བྱེད་པ་མིག་གིས་

གཟུང་བ་ཉིད་ལ་སོགས་པའོ། །གལ་ཏེ་གཉི་ག་དགོས་པ་དང་བཅས་པ་མ་ཡིན་ན། འོ་ན་ཅིའི་ཕྱིར་ཞེས་བྱ་བ་ནི་གཞན་གྱིའོ། །འདིའི་དོན་ནི་འཆད་པ་ནི་མ་གྲུབ་པའི་ཞེས་བྱ་བའོ། །ཆོས་ཞེས་བྱ་བ་ནི་མིག་གིས་གཟུང་བ་ཉིད་ལ་སོགས་པ་མ་གྲུབ་པའོ། །གལ་ཏེ་ཆོས་མ་གྲུབ་པ་ནི་སྒྲུབ་པར་བྱེད་པའི་ངོ་བོར་

བསྟན་པ་གྲུབ་པ་ཡིན་གྱི། ཆོས་ཅན་མ་གྲུབ་པ་ལ་གྲུབ་པའི་རང་བཞིན་དུ་བསྟན་པ་ནི་ཅི་འདྲ་བ་ཞིག་ཡིན་སྙམ་ན། དཔེར་ན་བདག་ནི་ཞེས་བྱ་བའོ། །ཁྱད་པར་དང་བཅས་པ་ཉིད་དུ་མ་གྲུབ་པའོ། །གྲུབ་པའི་རང་བཞིན་དུ་བསྟན་པ་བརྗོད་པ་ནི། དེ་བཞིན་དུ་ཞེས་བྱ་བའོ། །ཆོས་ཅན་གྱི་ཁྱད་པར་ཉིད་དུ་

เล่ม ๑๘๖ · หน้า 60b

ཞེས་བྱ་བ་ནི། མ་གྲུབ་པའི་ཆོས་ཆོས་ཅན་གྱི་ཁྱད་པར་ཉིད་དུ་བསྟན་པ་ཞེས་འབྲེལ་ཏོ། །འོན་ཏེ་ཞེས་བྱ་བ་ནི་གཞན་གྱིའོ། །མི་ཤེས་པའི་རྣམ་པར་བརྗོད་པ་ནི་ཅི་མི་རྟག་པ་ཞེས་བྱ་བའོ། །ལན་ནི་སྒྲ་མཚུངས་ཀྱང་ཞེས་བྱ་བའོ། །ནམ་མཁའི་ཡོན་ཏན་གྱི་སྒྲ་ནི་མི་རྟག་པའོ་ཞེས་བྱ་བའི་སྒྲ་མཚུངས་

ཀྱང་ངོ་། །འདི་ཡང་གཞན་གྱི་ངོར་བརྗོད་པ་ཡིན་གྱི། སངས་རྒྱས་པ་རྣམས་ཀྱི་ལྟར་ན་ནི་ཕྱོགས་བསྟན་པར་བྱ་བ་མ་ཡིན་ནོ། །གལ་ཏེ་རང་གི་ངོ་བོས་ཞེས་བྱ་བ་འདི་ལ་རྣམ་པར་གཅད་པར་བྱ་བ་ཐ་དད་པ་ཁས་མི་ལེན་འོ་ན་ཅི་ལྟར་ཞེས་བྱ་བ་ནི་གཞན་གྱི་སྟེ། འདི་རྣམ་པར་གཅད་པར་བྱ་བ་ཉིད་

དུ་བརྟེན་པར་བྱ་བ་མ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། ངེས་པར་གཟུང་བའི་ཞེས་བྱ་བའོ། །དེ་ནི་རྣམ་པར་གཅད་པར་བྱ་བ་བསྟན་པའོ། །གཞན་གྱི་ཕྱིར་ཞེས་བྱ་བ་ནི། མ་གྲུབ་པའི་སྒྲུབ་པར་བྱེད་པ་བསྟན་པ་བསྒྲུབ་པར་བྱ་བ་ཉིད་དུ་ཡིན་པ་རྣམ་པར་གཅད་པའི་ཕྱིར་བྱས་པས།

གཞན་གྱི་དོན་དུ་ཡང་ཞེས་བྱ་བ་གྲུབ་པ་རྣམ་པར་གཅད་པའི་ཡང་འགྱུར་བ་ཡིན་ནོ། །དེ་སྐད་ཅེས་བྱ་བ་ནི་རང་གི་ངོ་བོ་སྨོས་པའི་རྣམ་པར་གཅད་པར་བྱ་བའོ། །ཁས་བླངས་པ་སྔོན་དུ་སོང་བ་ཅན་གྱི་རྣམ་པར་གཅད་པར་བྱ་བ་བརྗོད་པའི་རྣམ་པ་གསུངས་པ་ནི། ཅི་སྟེ་ཡང་ཞེས་བྱ་བའོ། །གྲུབ་

པ་བསྒྲུབ་བྱར་བྱེད་པའོ། །གཞན་སྨྲས་པ་གང་གིས་མ་བསལ་བའི་ཚིག་གིས་རྣམ་པར་གཅད་པར་བྱ་བར་འགྱུར་བ་བསལ་བ་མཉན་པར་བྱ་བ་མ་ཡིན་པ་ཉིད་ཅི་ལྟར་བསྒྲུབ་པར་བྱ་བ་ཉིད་དུ་ཡིན་པར་ཅི་ལྟར་འཐོབ། འདིར་ཡང་། གང་ཞིག་བསལ་ཀྱང་སྒྲུབ་བྱེད་པའི། །རྟོགས་ལྡན་དེ་ནི་

འགའ་ཡོད་མིན། །མེད་པར་རྟོགས་པ་དེ་ཉིད་ནི། །ཅི་ལྟར་བསྒྲུབ་བྱར་རྟོགས་པར་འགྱུར། །ཞེས་བརྗོད་པར་ནུས་པ་ཉིད་དོ། །དེས་ན་མ་བསལ་བའི་ཚིག་གི་རྣམ་པར་གཅད་པར་བྱ་བ་བཞིན་དུ་རང་གི་དེ་པའི་ཚིག་ལ་ཡང་གཙོ་བོ་ཉིད་དུ་རྣམ་པར་གཅད་པ་བསྟན་པར་རིགས་སོ་ཞེས་སེམས་པའོ། །

འདི་ལ་ལན་ནི་དེ་ལ་ཞེས་བྱ་བ་སྟེ། བསལ་བ་ལ་ནི་རྩོད་པ་མཐོང་བའི་ཕྱིར་རོ། །རྩོད་པ་མཐོང་བ་དེ་ཡང་ཕྱིས་བསྟན་པར་བྱའོ། །དེས་ན་རང་ཉིད་སྨོས་པ་ནི་གྲུབ་པའི་ཆོས་ཅན་བསྒྲུབ་བྱ་ཡིན་པ་དགག་པའི་དོན་དུ་ནི་མ་ཡིན་ཏེ་དེ་ལྟ་མ་ཡིན་པར་ཡང་དེ་བཟློག་པ་འགྲུབ་པའི་ཕྱིར་རོ། །རྣམ་པ་

เล่ม ๑๘๖ · หน้า 61a

གཞན་གྱིས་ཀྱང་ཆོས་ཅན་བསྒྲུབ་པར་བྱ་བ་མ་ཡིན་པར་འགྲུབ་པ་ཁོ་ན་ཏེ། དེའི་ཕྱིར་རང་ཉིད་སྨོས་པ་དེའི་དོན་དུ་ནི་མ་ཡིན་ནོ་ཞེས་བརྗོད་པ་ནི། རྗེས་སུ་དཔག་པ་ཞེས་བྱ་བའོ། །བསྒྲུབ་པར་བྱ་བའི་ཆོས་ཁྱད་པར་དུ་བྱེད་པའི་ཆོས་ཅན་སྒྲ་ལ་སོགས་པ་ནི་ཁྱད་པར་ཡིན་པས་དེའི་

ཡུལ་ཅན་གྱི་རྗེས་སུ་དཔག་པ་ནི་ཡོད་པ་མ་ཡིན་ཏེ། དཔེ་དང་ཐུན་མོང་བའི་སྦྱི་ལ་འཇུག་པར་གསུངས་པའི་ཕྱིར་རོ་ཞེས་བྱ་བའི་དོན་ཏོ། །འོན་ཏེ་རང་ཉིད་སྨོས་པས་ཆོས་བསྒྲུབ་པར་བྱ་བ་མ་ཡིན་པར་བསྟན་པ་མ་ཡིན་ན། མཚན་ཉིད་དང་འགལ་བར་འགྱུར་རོ་སྙམ་ན། འདིར་ནི་འདི་སྐད་ཅེས་གསུངས་སོ། །

ཕྱོགས་ཀྱི་མཚན་ཉིད་འདིར་ནི། ཆོས་ཅན་བསྒྲུབ་པར་བྱ་བ་མ་ཡིན་ནོ་ཞེས་རང་ཉིད་སྨོས་པས་དེ་སྐད་མ་བརྗོད་ཀྱང་འགལ་བ་ཅུང་ཟད་ཀྱང་མེད་དོ། །རྗེས་སུ་དཔག་པ་ནི་སྤྱིའི་ཡུལ་ཅན་ཉིད་ཀྱིས་ཆོས་ཅན་བསྒྲུབ་བྱ་མ་ཡིན་པར་རྟོགས་པའི་ཕྱིར་རོ། །འོན་ཏེ་ཆོས་ཅན་ཡང་སྤྱི་ཁོ་ན་ཡིན་པ་དེས་ན་

བསྒྲུབ་པར་བྱ་བར་ཐལ་ལོ་སྙམ་ན། ཆོས་ཅན་ཞེས་བྱ་བའོ། །དེ་ལས་གཞན་ནི་མ་གྲུབ་པའོ། །ཅིའི་ཕྱིར་སྐྱོན་ཡོད་པ་མ་ཡིན་ཞེ་ན། རང་གི་མཚན་ཉིད་ཅེས་བྱ་བའོ། །གཞན་ཡང་ཆོས་ཅན་བསྒྲུབ་པར་བྱ་བ་ཡིན་ན་གཏན་ཚིགས་ཀྱི་ཉེས་པ་ཉིད་ཡིན་གྱི་ཕྱོགས་ཀྱི་ཉེས་པ་ནི་མ་ཡིན་ཏེ། དེས་ན་དེ་ནི་

ཕྱོགས་ཀྱི་མཚན་ཉིད་ཁོ་ནས་སྤངས་པ་མ་ཡིན་ནོ་ཞེས་བརྗོད་པ་ནི་གཞན་ཡང་ཞེས་བྱ་བའོ། །རྗེས་འགྲོ་མེད་པ་ཉིད་ནི་གཏན་ཚིགས་ཀྱི་སྐྱོན་ཡིན་གྱི་ཕྱོགས་ཀྱི་ནི་མ་ཡིན་ནོ། །དེས་ན་དེའི་སྐྱོན་ནི་དེའི་མཚན་ཉིད་ཁོ་ནས་སྤང་བར་བྱ་བ་ཡིན་ཞེས་བརྗོད་པ་ནི། འདི་ཉིད་ཞེས་སྨོས་སོ། །རྗེས་སུ་འགྲོ་

བ་མེད་པ་དང་། བསྒྲུབ་པར་བྱ་བ་མ་ཚང་བའི་རང་བཞིན་ནི། གཏན་ཚིགས་དང་དཔེ་དག་གིའོ། །གཏན་ཚིགས་ལ་སོགས་ལྟོས་པ་ཞེས་བྱ་བ་ནི་མ་གྲུབ་པ་ལ་སོགས་པའི་མཚན་ཉིད་དོ། །ཧ་ཅང་ཐལ་བ་འདིའི་ལན་གྱི་དགོས་པ་ནི་འོན་ཏེ་དཔེར་ན་ཞེས་བྱ་བའོ། །གཏན་ཚིགས་གཞན་གྱི་

ཞེས་བྱ་བ་ནི་བྱས་པ་ལ་སོགས་པས་སོ། །དེ་ལྟར་གང་ལ་གཏན་ཚིགས་གཞན་ཡོད་པ་དེར་ནི་གཏན་ཚིགས་ཀྱི་སྐྱོན་ཉིད་ཡིན་ནོ་ཞེས་རྣམ་པར་བཞག་ནས་གང་དུ་གཏན་ཚིགས་འགའ་ཡང་མེད་པར་དེར་ནི་ཕྱོགས་ཁོ་ནའི་ཉེས་པ་ཡིན་ནོ་ཞེས་བརྗོད་པ་ནི། གང་དུ་ཞེས་བྱ་བའོ། །ཆོས་ཅན་

เล่ม ๑๘๖ · หน้า 61b

རང་གི་མཚན་ཉིད་བསྒྲུབ་པར་བྱ་བ་ལ་ནི་གཏན་ཚིགས་འགའ་ཡང་ཡོད་པ་མ་ཡིན་ཏེ་རྗེས་སུ་འགྲོ་བ་མེད་པའི་ཕྱིར་རོ། །དེས་ན་འདི་ནི་ཕྱོགས་ཀྱི་ཉེས་པ་ཁོ་ནའོ་ཞེས་ཅི་ལྟར་ཞེ་ན། སྲིད་པའི་རང་གི་ཞེས་བྱ་བའོ། །དེ་ནི་ཞེས་བྱ་བ་ནི་རང་གི་བསམ་པའོ། །དེས་ན་ཞེས་བྱ་བ་ནི་ཆོས་རྗེས་སུ་མི་འགྲོ་བས་ན་

ཐམས་ཅད་དུ་སྒྲུབ་པར་བྱེད་པ་མི་སྲིད་པས་ནའོ། །ཆོས་ཅན་གྱི་རང་བཞིན་ཕྱོགས་ཀྱི་མི་སྲིད་པ་འདི་ཉིད་འདི་ཅི་གཏན་ཚིགས་ལ་ལྟོས་ནས་སམ། འོན་ཏེ་གཞན་ལ་ལྟོས་པ་མེད་པར་རང་ལ་གནས་པ་ཉིད་ཡིན། ཅི་ལྟར་ན་དེ་གཉི་ག་ཡང་མ་ཡིན་སྙམ་ན། གལ་ཏེ་རྟགས་དང་ཞེས་བྱ་བའིའོ། །

རྗེས་སུ་འགྲོ་བ་མེད་པ་ལ་སོགས་པ་དེ་ནི། རྟགས་ཀྱི་སྐྱོན་ཉིད་ཡིན་པའི་ཕྱོགས་ཀྱི་ནི་མ་ཡིན་ནོ། །འོན་ཏེ་ཉེས་པ་གང་ཞིག་གཏན་ཚིགས་ལ་ལྟོས་པ་དེ་ནི་རང་ལ་བརྟེན་པ་ཉིད་ཡིན་ནོ་སྙམ་ན། དེ་ནི་ཞེས་སྨོས་ཏེ། གཏན་ཚིགས་ཀྱི་སྐྱོན་ནིའོ། །ཅིའི་ཕྱིར་ཞེ་ན། མཐོང་བ་ཡིས་ཀྱང་ཞེས་སྨོས་སོ། །ཆོས་

ཅན་དེ་འགྲུབ་པའི་ཕྱིར་རོ། །གཏན་ཚིགས་ཀྱི་ཚིག་འདི་ཉིད་ནི། གལ་ཏེ་རང་གི་རང་བཞིན་གྱི་ཞེས་བྱ་བའོ། །དོགས་པ་ནི་རྗེས་སུ་དཔག་པས་མངོན་སུམ་དུ་གྱུར་པའི་ཕྱོགས་མི་འགྲུབ་པོ་ཞེ་ན། ལན་འོ་ན་ཞེས་བྱ་བའོ། །གལ་ཏེ་མངོན་སུམ་གྱིས་གྲུབ་ཀྱང་། གྲུབ་པ་ལ་སྒྲུབ་པ་ཉིད་ཀྱི་ཕྱོགས་

ཀྱི་སྐྱོན་མ་ཡིན་ནམ་སྙམ་ན། གྲུབ་པ་ལ་ཞེས་བྱ་བའོ། །འོ་ན་ཕྱོགས་ཀྱི་སྐྱོན་གང་ཡིན་སྙམ་ན། དེ་ནི་ཞེས་སྨོས་ཏེ། གྲུབ་པ་ལ་སྒྲུབ་པའི་སྐྱོན་ནི། དེར་ཡང་བདག་ཉིད་ཁོ་ནའི་མངོན་སུམ་གྱིས་གྲུབ་པ་ལ་གཏན་ཚིགས་ཀྱི་སྐྱོན་ཡིན་ཞེས་འབྲེལ་ཏོ། །རྒོལ་བ་དང་ཕྱིར་རྒོལ་བ་གཉི་གའི་

མངོན་སུམ་གྱིས་གྲུབ་པ་ལ་ནི་ཞེས་འབྲེལ་ཏོ། །རྗེས་སུ་དཔག་པ་གྲུབ་པ་བཞིན་དུ་ལུང་གིས་གྲུབ་པ་ཡང་ཕྱོགས་ཡིན་ནོ་སྙམ་ན། ལུང་གིས་ཞེས་བྱ་བའོ། །ཅི་ལྟར་མངོན་སུམ་གྱིས་གྲུབ་པ་ལ་རྗེས་སུ་འགྲོ་བ་མེད་པའི་ཕྱིར་ཕྱོགས་མ་ཡིན་པ་དེ་བཞིན་དུ་ལུང་གིས་གྲུབ་པ་ཡང་ངོ་། །

ཕ་རོལ་པོ་དག་དཔེ་དང་དོན་དག་ཆོས་མི་མཚུངས་པར་བརྗོད་པ་ནི། གལ་ཏེ་ཞེས་བྱ་བའོ། །ཅི་ལྟར་ཞེ་ན། ལུང་གི་ཡུལ་ནི་ཞེས་སྨྲས་སོ། །ལན་ནི་འདི་ཉིད་ཅེས་བྱ་བའོ། །བརྗོད་པའི་རྣམ་པ་གསུངས་པ་ནི། གཏན་ཚིགས་ཀྱི་ཞེས་བྱ་བའོ། །ལུང་ལས་གྲུབ་པ་ལ་ནི་དེ་ཙམ་

เล่ม ๑๘๖ · หน้า 62a

ལས་གྱུར་པ་ཉིད་མེད་པ་ཁོ་ན་ཏེ། དེས་ན་ཅི་ལྟར་ཕྱོགས་ཉིད་མ་ཡིན་སྙམ་ན། འདི་ལ་ཡང་ཞེས་བྱ་བ་སྟེ་ལུང་ལས་གྲུབ་པ་ཡང་ངོ་། །ཕྱོགས་ཙམ་ལས་གྱུར་པ་ཉིད་སྟོན་པ་ནི། འདི་ལྟར་ཞེས་བྱ་བའོ། །དེ་ནི་ཕྱོགས་སོ། །གང་གིས་དེ་སྒྲུབ་པ་ཉིད་ཀྱི་ཕྱོགས་སུ་འགྱུར་བ་གཏན་

ཚིགས་ཀྱིས་ཅི་དགོས། གཞན་ལ་ནི་ཕྱིར་རྒོལ་བའོ། །རང་ཉིད་ཀྱི་རྒོལ་བའོ། །ལུང་ལས་གྲུབ་པ་ཕྱོགས་ཡིན་ནོ་ཞེས་བྱ་བ་སྐབས་ཡིན་ནོ། །གཉི་ག་ལ་ཡང་ཞེས་བྱ་བ་ནི་རྒོལ་བ་དང་ཕྱིར་རྒོལ་བ་ལའོ། །གལ་ཏེ་ལུང་ལས་གྲུབ་པ་ཕྱོགས་མ་ཡིན་ན། འོ་ན་གང་ཕྱོགས་ཡིན་སྙམ་ན་དེའི་

ཕྱིར་ཞེས་སྨོས་སོ། །དེས་ཞེས་བྱ་བ་ནི་ཁྱད་པར་གྱི་རང་བཞིན་གྱིས་སོ། །དེ་ནི་སྤྱིའོ། །གལ་ཏེ་དེ་ལྟར་ན་ཞེས་བྱ་བ་ནས་བརྩམས་ནས་ཞེ་ནའི་བར་ནི་རྩོད་པའོ། །དེས་མ་གྲུབ་པ་ནི་མངོན་སུམ་གྱིས་མ་གྲུབ་པ་ལ་རྗེས་སུ་དཔག་པ་ཤིན་ཏུ་ཡང་མེད་པར་འགྱུར་ཏེ་ཞེས་འབྲེལ་ཏོ། །ཅིའི་ཕྱིར་

ཞེ་ན། རྗེས་སུ་དཔག་པ་ནི་ཞེས་བྱ་བའོ། །དེ་བཞིན་དུ་ཞེས་བྱ་བ་ལ་སོགས་པས་ནི་རྩོད་པ་གཉིས་པ་བརྗོད་པའོ། །ཅི་ལྟར་ཞེ་ན། གནོད་པ་ཞེས་བྱ་བ་སྨོས་སོ། །དེ་ལ་རེ་ཞིག་རྩོད་པ་དང་པོ་སེལ་བ་ནི། རྗེས་སུ་དཔག་པ་ནི་ཞེས་བྱ་བའོ། །འོ་ན་ཅི་ལྟར་མངོན་སུམ་སྔོན་དུ་འགྲོ་བ་ཅན་ཡིན་

སྙམ་ན། འོན་ཀྱང་ཞེས་བྱ་བའོ། །དེའི་ཞེས་བྱ་བ་སྤྱིའི་བསལ་བ་དེའི་ཡུལ་ཅན་གྱི་མངོན་སུམ་གང་ཡིན་པ་དེ་མེད་ན་དེར་རྗེས་སུ་དཔག་པ་འཇུག་པ་མ་ཡིན་ནོ་ཞེས་འབྲེལ་ཏོ། །ཅིའི་ཕྱིར་ཞེ་ན། རྗེས་སུ་དཔག་པ་ནི་ཞེས་བྱ་བའོ། །མེ་ལ་སོགས་པའི་སྤྱི་དེའི་བསལ་བ་སྟེ་རང་གི་མཚན་

ཉིད་གང་ཡིན་པ་དེ་ལ་མངོན་སུམ་འཇུག་པ་སྔོན་དུ་འགྲོ་བ་ཅན་ཡིན་པའི་ཕྱིར་རོ། །སྤྱིའི་མངོན་སུམ་སྔོན་དུ་འགྲོ་བ་ཅན་ཉིད་ལ་ཉེས་པ་ཅི་ཡོད་སྙམ་ན། གལ་ཏེ་ཞེས་བྱ་བའོ། །སྤྱི་དང་རྗེས་སུ་དཔག་པས་ཅི་བྱ་སྟེ་ཁྱད་པར་མེད་པའི་སྤྱི་ནི་མངོན་སུམ་ཁོ་ནས་གྲུབ་པའི་ཕྱིར་རོ། །གང་ལ་

མངོན་སུམ་དུ་མི་འཇུག་པའི་སྤྱིའང་གང་ཡིན་ཞེ་ན། རང་གི་མཚན་ཉིད་ཅེས་སྨོས་སོ། །ཅིའི་ཕྱིར་ཞེ་ན། ཁྱད་པར་དུ་མ་རྟོགས་པའི་ཞེས་བྱ་བའོ། །གང་གི་ཕྱིར་དེ་ལྟ་ཡིན་པ་དེས་ན། མངོན་སུམ་གྱི་ཡུལ་ལ་རྗེས་སུ་དཔག་པ་མ་ཡིན་ནོ་ཞེས་བྱ་བའི་དོན་ཀྱང་འདི་ཉིད་ཡིན་ནོ། །གང་ཡིན་ཞེ་ན།

เล่ม ๑๘๖ · หน้า 62b

རྗེས་སུ་དཔག་པས་ཞེས་བྱ་བའོ། །དེ་ནི་ཞེས་བྱ་བ་བརྗོད་མ་ཐག་པའི་རང་བཞིན་གྱི་སྤྱིའོ། །འོ་ན་ཅི་ལྟར་རང་གི་མཚན་ཉིད་རྟོགས་ཤེ་ན། མེ་ནི་ཞེས་བྱ་བ་སྟེ་རང་གི་མཚན་ཉིད་ཀྱི་བདག་ཉིད་དོ། །གལ་ཏེ་སྤྱི་མངོན་སུམ་གྱིས་མ་བཟུང་ན། ཁྱབ་པ་རྟོགས་པ་མེད་པའི་ཕྱིར་ཅི་ལྟར་རྗེས་སུ་དཔག་

སྙམ་ན། ཀུན་དུ་ཐ་སྙད་པའི་ཞེས་བྱ་བ་ལ་སོགས་པ་སྔར་བརྗོད་ཟིན་པ་ཡིན་ནོ། །འདིས་ནི་རྩོད་པ་དང་པོ་བསལ་ཏེ། གཉིས་པ་སེལ་བ་བརྗོད་པ་ནི། ཕྱོགས་ཞེས་བྱ་བའོ། །འདི་ཉིད་དེ་ཞེས་བྱ་བ་ནི་བརྗོད་མ་ཐག་པའོ། །ཅི་ལྟར་ཞེ་ན། དེ་ལས་བཟློག་པ་ཞེས་བྱ་བ་ལ་སོགས་པའོ། །གལ་ཏེ་

གང་གིས་ཕྱོགས་ལ་མངོན་སུམ་གྱིས་གནོད་པར་འགྱུར་བ། བསལ་བ་གནོད་པས་སྤྱི་གནོད་པར་ཅི་ལྟར་འགྱུར་ཞེ་ན། གང་ལ་ཞེས་བྱ་བའོ། བཀག་པ་ཅི་ལྟར་སེལ་སྙམ་ན། བཀག་པ་བཟློག་པ་ཡང་ཞེས་བྱ་བའོ། །མཉན་བྱ་བཀག་པ་སེལ་བ་ཡང་མཉན་བྱའི་མཚན་ཉིད་ཀྱི་ཡུལ་གང་

བཀག་པ་མཉན་བྱ་མ་ཡིན་པའོ་ཞེས་བྱ་བ་མཉན་པར་བྱ་བ་ཉིད་དེ་ཉིད་ཀྱི་སྒོ་ནས་མཉན་བྱ་མ་ཡིན་པ་བཟློག་པ་ཡིན་གྱི། དགག་པའི་ཡུལ་མཉན་བྱ་ཉིད་ལས་གཞན་གྱིས་ནི་མ་ཡིན་ནོ། །ཅིའི་ཕྱིར་ཞེ་ན། གཞན་ནི་དེ་དང་མི་འགལ་བའི་ཕྱིར་རོ། །གལ་ཏེ་ཞེས་བྱ་བ་ནི་གཞན་གྱིའོ། །

མངོན་སུམ་དུ་གྱུར་པའི་དོན་དེ་ནི་རྗེས་སུ་དཔག་པ་དང་སྒྲ་དག་གི་ཡུལ་མ་ཡིན་པའི་ཕྱིར་རོ་ཞེ་ན། ལན་ནི་དེ་ཉིད་ཀྱི་ཕྱིར་ཞེས་བྱ་བའོ། །གཅིག་ཏུ་ཞེན་པའི་ཕྱིར་མངོན་སུམ་རྗེས་སུ་དཔག་པས་བསལ་བར་དོགས་པར་འགྱུར་རོ། །དེས་ན་འདི་མ་འབྲེལ་པ་བརྗོད་པ་ཉིད་ཀྱིས་ཟློག་པར་བྱེད་པ་

ཡིན་ཏེ། གང་གི་ཕྱིར་རྗེས་སུ་དཔག་པ་ལས་ནི་བསལ་བའི་དོན་གང་དུ་ཡང་བཀག་པ་ཡོད་པ་མ་ཡིན་ནོ། །དེས་ན་ཅི་ལྟར་མངོན་སུམ་རྗེས་སུ་དཔག་པས་བསལ་བར་ཅི་ལྟར་དོགས་ཞེས་བྱ་བའི་སྐྱོན་མེད་དོ། །སྐབས་ཉེ་བར་སྡུད་པ་ནི། དེའི་ཕྱིར་ཆོས་ཅན་ཞེས་བྱ་བའོ། །འོ་ན་ཅི་ལྟར་ཆོས་ཅན་

ཕྱོགས་ཉིད་ཡིན་པ་སེལ་ཞེ་ན། དེ་ནི་ཞེས་སྨོས་ཏེ་གྲུབ་པའི་ཆོས་ཅན་ནོ། །མཚན་ཉིད་གཉི་གས་ཀྱང་སེལ་བར་འགྱུར་རོ་སྙམ་ན། གཏན་ཚིགས་ཀྱི་ཞེས་བྱ་བའོ། །ལྡོག་པ་ནི་ལྷག་མ་སྟེ་ཧ་ཅང་ཁྱབ་པ་ཞེས་བྱ་བའི་དོན་ཏོ། །ཕྱོགས་ཀྱི་མཚན་ཉིད་ལས་གཞན་གཏན་ཚིགས་ཀྱི་

เล่ม ๑๘๖ · หน้า 63a

མཚན་ཉིད་ཀྱིས་སོ། །དེ་ནི་ཞེས་བྱ་བ་སྤངས་ཟིན་པའི་ཉེས་པ་མ་སྤངས་ཀྱང་ངོ་། །དེ་ཙམ་ནི་རང་ཉིད་སྨོས་པ་དང་བྲལ་བ་ཙམ་མོ། །གཞན་རང་ཉིད་སྨོས་པས་ཅི་བྱ། ཅིའི་ཕྱིར་ཞེ་ན། གང་ནི་དོན་དུ་ཞེས་བྱ་བའོ། །གལ་ཏེ་རང་ཉིད་སྨོས་པས་ཧ་ཅང་ཁྱབ་པ་མི་སྤོང་ན་ཞེས་

བྱ་བའོ། །འོ་ན་མ་ཁྱབ་པ་གང་གིས་སེལ་བར་བྱེད་སྙམ་ན། འདོད་སྒྲས་ཞེས་སྨོས་སོ། །གཞན་གྱིས་ཞེས་བྱ་བ་རྣམ་པར་བཅད་ཟིན་པ་རྣམ་པར་གཅོད་པར་བྱེད་པས་སོ། །རྣམ་པར་མ་བཅད་པ་ལ་བརྗོད་པ་གང་ཡིན་པ་དེ་དྲན་པར་བྱེད་པ་ནི་གལ་ཏེ་ཞེས་བྱ་བའོ། །སྒྲུབ་པར་བྱེད་པ་ཉིད་དུ་

བསྟན་པ་བསྒྲུབ་པར་བྱ་བར་ཐལ་བར་འགྱུར་རོ་ཞེས་འབྲེལ་ཏེ། དེའི་དོན་དུ་ཞེས་བྱ་བ་ནི་སྐྱོན་གཞན་སྤང་བའི་དོན་དུའོ། །དེ་ནི་ཞེས་བྱ་བ་ནི་ལྡོག་པའོ། །ཅིའི་ཕྱིར་དེ་ཁྱབ་པར་འདོད་པ་མ་ཡིན་ཞེ་ན། མ་བསལ་བ་ནི་ཞེས་གསུངས་སོ། །དེས་ན་འདོད་པ་སྨོས་པ་ནི་འབྲས་བུ་དང་བཅས་པ་

ཁོ་ནའོ་ཞེས་གསུངས་སོ། །ཁྱབ་པའི་དོན་དུ་འདོད་པའི་སྒྲ་བྱས་པ་ཡིན་ནོ་ཞེས་འབྲེལ་ཏོ། །དེ་ཡང་ཞེས་བྱ་བ་ནི་བསལ་བ་ཡང་ངོ་། །གང་གི་ཚེ་མ་བསལ་བའི་ཚིག་དང་ལྷན་ཅིག་བྱེད་པ་དེའི་ཚེ་ནི། བསལ་བ་ལ་ཡང་ཁྱབ་པ་སྲིད་པ་ག་ལ་འགྱུར་ཏེ་མི་འགྱུར་བ་ཁོ་ནའོ། །སྐབས་ཉེ་བར་སྡུད་པ་ནི་

དེས་ན་ཞེས་བྱ་བའོ། །འོ་ན་ཅི་ལྟར་རིགས་པའི་སྒོར་ལྡོག་པ་ལ་གནོད་པར་འགྱུར་ཏེ། རང་ཉིད་ཅེས་བྱ་བ་ལ་སོགས་པའི་ཚིག་རྣམས་མེད་པའི་ཕྱིར་རོ་ཞེ་ན། དེ་ལ་ཞེས་སྨོས་ཏེ་རིགས་པའི་སྒོར་རོ། །བསྒྲུབ་བྱ་ཁས་བླངས་ཞེས་བྱ་བ་ནི། བསྒྲུབ་བྱ་ཡིན་གྱི། བསྒྲུབ་བྱ་མ་ཡིན་པ་ནི་མ་ཡིན་

ཏེ། །ཚད་མ་དག་གིས་བསལ་བ་ནི་བསྒྲུབ་པར་འོས་པ་མ་ཡིན་པའི་ཕྱིར་རོ། །གྲུབ་པའི་ཆོས་ཅན་ཡང་རང་གི་མཚན་ཉིད་ཀྱིས་རྗེས་སུ་འགྲོ་བ་མེད་པའི་ཕྱིར་དང་། མ་གྲུབ་པ་སྒྲུབ་པར་བྱེད་པ་ཉིད་དུ་བརྗོད་པ་དང་བསྟན་བཅོས་ཀྱི་འདོད་པ་ཡང་ཁས་ལེན་པ་པོས་ཁས་མ་བླངས་པའི་ཕྱིར་ན།

དངོས་པོ་ལ་རྣམ་པར་གཅད་པའི་ཕྱིར་རོ། །དེར་ཁས་བླངས་པ་བསྒྲུབ་པར་བྱ་བ་ཉིད་དུ་འདོད་པ་ཞེས་བྱ་བའི་དོན་ཅན་ནི་ཕྱོགས་ཀྱི་མཚན་ཉིད་ཡིན་ནོ། །དེ་ཉིད་ཀྱི་ཕྱིར་རྣམ་པར་གཅད་པ་དག་ཕྱོགས་ཉིད་མ་ཡིན་ནོ་ཞེས་བརྗོད་པ་ནི། དེ་རྣམས་ལ་ནི་ཞེས་བྱ་བ་སྟེ་བསལ་བ་ལ་སོགས་པ་རྣམས་

เล่ม ๑๘๖ · หน้า 63b

ལའོ། །ཅི་ལྟར་ཞེ་ན་བསལ་བ་ཞེས་གསུངས་ཏེ་འགལ་བའི་དོན་གྱིས་མ་བསལ་བ་ཞེས་གསུངས་པའི་ཕྱིར་རོ། །ལྷག་མ་ལ་ནི་མཚན་ཉིད་དེ་བསྒྲུབ་པར་བྱ་བ་ཉིད་དུ་འདོད་པ་ཞེས་བྱ་བ། བསྒྲུབ་བྱར་ཁས་བླངས་ཞེས་དེ་ལྟར་རྗེས་སུ་བརྗོད་པ་འཇུག་པ་མེད་པའི་ཕྱིར་རོ། །དེས་ན་མདོར་བསྡུས་

པ་ལ་དགའ་བ་ལ་ལྟོས་ནས་རིགས་པའི་སྒོར་བརྗོད་པའི་ཕྱོགས་ཀྱི་མཚན་ཉིད་ཀྱང་ཉེས་པ་མེད་པ་ཁོ་ནའོ་ཞེས་དགོངས་པའོ། །འགྲེལ་པ་སུན་དབྱུང་བའི་ཕྱིར་རྗེས་སུ་བརྗོད་པ་ནི། འདིར་དེ་ཁོ་ནའོ་ཞེས་བྱ་བའོ། །ལྷ་དབང་བློའི་བཤད་པ་དེ་ནི་དེ་ལྟར་མ་ཡིན་ཏེའོ། །གཞན་ནི་འདིར་ཅི་ཞིག་ཅེས་

བྱ་བ་ལ་སོགས་པའོ། །བསྒྲུབ་པ་སྔར་ཅི་ལྟར་བསྟན་ཅེས་དོགས་ན་མ་གྲུབ་ཅེས་གསུངས་སོ། །འོན་ཏེ་བསྟན་ཟིན་པ་ཉིད་མཇུག་སྡུད་པ་ཡིན་ནོ་ཞེ་ན། དེ་ཉིད་ཀྱི་ཞེས་བྱ་བའོ། །ཅིའི་ཕྱིར་ཞེ་ན། གང་ཞིག་ཅེས་བྱ་བ་སྟེ་མཚན་ཉིད་ཀྱི་ངག་གང་ཞིག་གོ། །འདི་ནི་ཚིག་ལའོ། །དེ་ལ་ནི་མཚན་

ཉིད་ཀྱི་ངག་ལའོ། །ཉེས་པ་འདིས་འཇིགས་ནས་གཞན་དག་ནི་འདིའི་དོན་གཞན་དུ་སྨྲའོ། །དེ་དག་ཀྱང་མི་རིགས་པར་སྨྲ་བ་ཡིན་ནོ་ཞེས་བསྟན་པའི་དོན་དུ་དེས་བརྟགས་པའི་དོན་བརྗོད་པ་ནི་གཞན་དག་སྨྲ་བ་ནི་ཞེས་བྱ་བའོ། །འདི་སུན་འབྱིན་པ་ནི་དེ་ཡང་མ་ཡིན་ཏེ་ཞེས་བྱ་བའོ། །ཅིའི་

ཕྱིར་ཞེ་ན། མ་ཁྱབ་པ་དང་ཧ་ཅང་ཁྱབ་པའི་ཉེས་པ་མ་སྤངས་པའི་ཕྱིར་རོ། །དེ་ལ་རེ་ཞིག་ཧ་ཅང་ཁྱབ་པའི་ཉེས་པ་བརྗོད་པ་ནི། བསྒྲུབ་པར་བྱ་བར་ཞེས་བྱ་བའོ་ཞེས་བྱ་བའི་ཕྱོགས་ཀྱི་མཚན་ཉིད་ཀྱིས་ནི། སྒྲུབ་པར་བྱེད་པ་ཉིད་དུ་འདོད་པ་མ་གྲུབ་པ་དང་། བསྟན་བཅོས་བྱེད་པའི་འདོད་

པ་བསྒྲུབ་པར་བྱ་བར་འགྱུར་བར་མ་བཟློག་པ་ཉིད་དོ། །བསྒྲུབ་བྱར་ཁས་བླངས་ཞེས་བྱ་བའི་མཚན་ཉིད་ཡིན་པའི་ཕྱིར་རོ། །སྒྲུབ་པར་བྱེད་པ་ཉིད་དུ་འདོད་པས་བསྒྲུབ་པར་བྱ་བར་ཐལ་བའི་སྤོང་བའི་དོགས་པ་བསུ་བ་ནི། འོན་ཏེ་ཞེས་བྱ་བའོ། །དེ་ལྟ་ན་ཡང་ཧ་ཅང་ཐལ་བ་ཅི་ལྟར་

ལྡོག་སྙམ་ན། སྒྲུབ་པར་བྱེད་པ་ཉིད་དུ་ཞེས་བྱ་བའོ། །དེ་ནི་ཞེས་བྱ་བ་ནི་མ་གྲུབ་པའི་སྒྲུབ་བྱེད་དོ། །རྣམ་པ་གཞན་དུ་ངེས་པར་གཟུང་བའི་དོགས་པ་བསུ་བ་ནི། འོན་ཏེ་ཞེས་བྱ་བའོ། །ལན་ནི་དེ་ལྟ་ཡིན་ན་ཞེས་བྱ་བའོ། །ངེས་པར་གཟུང་བ་སྔ་མ་ལ་ནི་མ་ཁྱབ་པར་འགྱུར་ལ། འདི་ལ་

เล่ม ๑๘๖ · หน้า 64a

ནི་ཧ་ཅང་ཁྱབ་པར་འགྱུར་བ་ཡིན་ནོ་ཞེས་བྱ་བའི་དོན་ཏོ། །འོན་ཏེ་དེའི་ཚེ་སྒྲུབ་པར་བྱེད་པ་ཉིད་དུ་ཁས་བླངས་པའི་ཕྱིར་བསྒྲུབ་པར་བྱ་བ་ཉིད་མ་ཡིན་ནོ་སྙམ་ན། དེ་ནི་ཞེས་བྱ་བའོ། །གཉི་ག་ནི་སྒྲུབ་པར་བྱེད་པ་དང་བསྒྲུབ་པར་བྱ་བའི་མཚན་ཉིད་དོ། །དེའི་ཚེ་ནི་སྒྲུབ་པར་བྱེད་

པ་ཁོ་ན་ཡིན་གྱི་བསྒྲུབ་པར་བྱ་བ་ནི་མ་ཡིན་ནོ་ཞེ་ན། འདི་ཞེས་བྱ་བའོ། །ཕྱོགས་འདི་ལ་སྒྲུབ་པར་བྱེད་པར་འདོད་པ་བསྒྲུབ་བྱར་འགྱུར་བ་འབའ་ཞིག་ཏུ་མ་ཟད་ཀྱི་བསྟན་བཅོས་བྱེད་པའི་འདོད་པ་ཡང་བསྒྲུབ་པར་བྱ་བ་ཉིད་དུ་འགྱུར་རོ། །ཅིའི་ཕྱིར་ཞེ་ན། དེ་ལ་ཡང་བྱ་བ་སྟེ་བསྟན་བཅོས་བྱེད་པའི་

འདོད་པ་ལ་ཡང་བསྟན་བཅོས་བྱེད་པའི་ཁས་བླངས་པ་ཡོད་པའི་ཕྱིར་རོ། །འོན་ཏེ་ཞེས་བྱ་བ་ནི་དོགས་པ་བསུ་བའོ། །གང་ལ་རྒོལ་བ་ཉིད་ཀྱིས་ཁས་བླངས་པ་ཡོད་ཀྱི་བསྟན་བཅོས་བྱེད་པའི་མ་ཡིན་པ་དེ་ལ་ཕྱོགས་ཉིད་དུ་ཡོད་པ་ཡིན་ནོ་ཞེ་ན། ཕྱོགས་འདི་སུན་འབྱིན་པ་ནི། དེ་ནི་མ་

ཡིན་ཏེ་ཞེས་བྱ་བའོ། །རྒོལ་བས་ཞེས་བྱ་བ་ནི་རིགས་པ་ལ་སོགས་པས་སོ། །ཉེ་བ་འབའ་ཞིག་ཏུ་རིགས་པ་མ་ཡིན་གྱི་འོན་ཀྱང་ཁྱབ་པ་ཡང་ཡིན་ནོ་ཞེས་བརྗོད་པ་ནི། གཞན་ཡང་ཞེས་བྱ་བའོ། །ཅི་སྟེ་ཁས་མི་ལེན་ཏེ། དེ་ཉིད་ཁས་བླང་བར་བྱའོ། །དེས་ན་བསྟན་བཅོས་བྱེད་

པའི་འདོད་པ་ཡང་བསྒྲུབ་པར་བྱ་བ་ཉིད་དུ་ཐལ་ཏེ། བསྒྲུབ་བྱར་ཁས་བླངས་ཞེས་བྱ་བ་འདི་ལ་ཁྱད་པར་མེད་པའི་ཕྱིར་རོ། །འོན་ཏེ་རྒོལ་བའི་འདོད་པ་ལ་བློས་བྱས་པའི་ཉེ་བར་འདོད་ན། དེའི་ཚེ་བསྟན་བཅོས་བྱེད་པའི་འདོད་པ་ལ་ཡང་དེ་སྲིད་དོ་ཞེས་བརྗོད་པ་ནི། བློས་བྱེད་པ་

བྱ་བའོ། །སྒྲུབ་བྱེད་དུ་འདོད་པ་དང་། བསྟན་བཅོས་བྱེད་པའི་འདོད་པ་ཕྱོགས་སུ་འགྱུར་བ་འབའ་ཞིག་ཏུ་ནི་མ་ཟད་ཀྱི་བསལ་བ་བསྒྲུབ་པར་བྱ་བར་ཁས་བླངས་ན་ཡང་ཕྱོགས་ཉིད་དུ་འགྱུར་རོ་ཞེས་སྟོན་པ་ནི་བསལ་བ་ཞེས་བྱ་བའོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་ན། གཞན་

གྱི་དེ་ཉིད་མཇུག་བསྡུ་བ་ཡིན་ནོ་ཞེས་བརྗོད་པ་དང་འདི་ནི་རྣམ་འགྲེལ་བྱེད་པ་ཉིད་ཀྱི་ཡིན་ནོ་ཞེས་བྱ་བ་དེ་ནི་མ་ཡིན་ནོ། །དེ་ལྟར་གཞན་གྱི་འདོད་པ་བཟློག་ནས་རང་གི་འདོད་པ་བརྗོད་པ་ནི། དེ་ལྟ་ནི་འོ་ན་ཞེས་བྱ་བའོ། །འདི་ནི་ཞེས་བྱ་བ་ནི་བསྒྲུབ་བྱར་ཁས་བླངས་ཞེས་བྱ་བའོ། །རིགས་

เล่ม ๑๘๖ · หน้า 64b

པའི་སྒོའི་མཚན་ཉིད་དེ་ཡང་གང་ཡིན་ཞེ་ན། བསྒྲུབ་པར་བྱ་བ་ཉིད་དུ་འདོད་པར་གྱུར་བ་ཞེས་བྱ་བའོ། །གལ་ཏེ་དེ་ལྟ་ན་ཡང་རྣམ་འགྲེལ་འདི་ལ་འཇུག་པ་ཅི་ལྟར་ཡིན་སྙམ་ན། དེ་ལྟ་ཞེས་བྱ་བ་སྟེ་རིགས་པའི་སྒོར་བརྗོད་པའི་ཕྱོགས་ཀྱི་མཚན་ཉིད་ལ། འདི་ལྟར་ཞེས་བྱ་བ་ནི་རྗོད་བཞིན་པའོ། །དེ་

ཉིད་བརྗོད་པ་ནི་གལ་ཏེ་ཞེས་བྱ་བའོ། །བསལ་བ་རྣམས་ཅི་ལྟར་བཀག་སྙམ་ན། དེར་ཡང་ཞེས་སྨོས་ཏེ་རིགས་པའི་སྒོར་བརྗོད་པའི་མཚན་ཉིད་ལའོ། །ལྷག་མ་ནི་མ་གྲུབ་པའི་སྒྲུབ་པར་བྱེད་པ་ལ་སོགས་པའོ། །སྐྱོན་ནི་ཧ་ཅང་ཁྱབ་པའི་མཚན་ཉིད་ཅན་ནོ། །བསྟན་བཅོས་བྱེད་པའི་

འདོད་པ་དང་། གྲུབ་པ་དག་ལ་མཚན་ཉིད་མི་འཇུག་པའི་ཕྱིར་ཕྱོགས་ཉིད་མེད་མོད། སྒྲུབ་པར་བྱེད་པ་ཉིད་དུ་འདོད་པ་ལ་གོ་ཅི་ལྟར་ཏེ་དེར་ཚིག་མ་སྨོས་པའི་ཕྱིར་རོ་ཞེ་ན། འདོད་པར་གྱུར་པ་ཞེས་བྱ་བའོ། །བསྒྲུབ་པར་བྱ་བ་ཉིད་དུ་འདོད་པར་འགྱུར་བ་མ་གྲུབ་པའི་སྒྲུབ་པར་བྱེད་པ་

དག་ལ་མི་འཇུག་པས་ན། མི་འཇུག་པ་ཉིད་དེ་ཉིད་ཀྱི་ཕྱིར་མ་གྲུབ་པའི་སྒྲུབ་པར་བྱེད་པ་དེ་བཟློག་པའི་ཕྱིར་རོ། །གལ་ཏེ་ཞེས་བྱ་བ་ནི་གཞན་གྱི་ཏེ། གལ་ཏེ་བརྗོད་པའི་ཚུལ་དུ་རིགས་པའི་སྒོར་སྒྲུབ་པར་བྱེད་པ་མ་གྲུབ་པ་ཕྱོགས་ཡིན་པར་བསལ་བ་ཡིན་ན། དེའི་ཚེ་ཚད་མ་ཀུན་ལས་

བཏུས་པ་འདིར་ཡང་ངོ་། །ལན་འདེབས་པ་ནི། དེ་ནི་བདེན་ཏེ་ཞེས་བྱ་བའོ། །བྱེད་པའི་མཐའ་དང་ཞེས་བྱ་བ་ནི་བསྟན་བྱ་བ་ཞེས་བྱ་བའི་ཚིག་དང་ངོ་། །དུས་གཞན་དུ་འདོད་པས་ཡུལ་དུ་བྱས་པའི་སྒྲུབ་བྱེད་མ་གྲུབ་པའོ། །དེ་ཞེས་བྱ་བ་མ་གྲུབ་པའི་སྒྲུབ་པར་བྱེད་པ་བཟློག་པའི་ཕྱིར་

རོ། །ཚད་མ་ཀུན་ལས་བཏུས་པ་འདིར་ནི་ནིཥྛ་ཡན་ལག་ཅེས་བྱ་བ་ཁྱད་པར་ཏེ་གཙོ་བོ་མ་ཡིན་ཏེ། བྱེད་པའི་རྐྱེན་གྱི་མཐའ་ཅན་གཙོ་བོ་ཡིན་པའི་ཕྱིར་རོ་ཞེས་སྦྱར་རོ། །དེས་ན་དེར་དུས་གཞན་གྱི་དབང་གིས་གཏན་ཚིགས་མ་གྲུབ་པ་བསྒྲུབ་པར་བྱ་བ་ཉིད་དུ་འདོད་པར་འགྱུར་བ་

ཡང་ཁོ་ནའི་སྒྲ་མེད་ན་ཕྱོགས་ཉིད་དུ་ཐལ་བར་འགྱུར་བས་དེ་བཟློག་པའི་དོན་དུ་ངེས་པར་གཟུང་བས་འབྲས་བུ་དང་བཅས་པ་ཁོ་ནའོ། །འདོད་པར་གྱུར་པའི་ཚིག་ལ་ནི། འདོད་རྐྱེན་ཡན་ལག་མ་ཡིན་པ་སྟེ་གཙོ་བོ་ཁོ་ན་ཡིན་ནོ། །དེ་ཡིས་ནི་འདོད་རྐྱེན་གྱིས་སོ། །ཅི་ལྟར་བཟློག་པ་དང་

เล่ม ๑๘๖ · หน้า 65a

འབྲེལ་ཞེ་ན། འདོད་པར་གྱུར་པའི་ཚིག་ལ་ནི་ཞེས་བྱ་བའོ། །བྱུང་བའི་དུས་སྒྲུབ་པར་བྱེད་པའི་ཡན་ལག་སྟེ་རྒྱུ་མ་ཡིན་ནོ། །དེར་ཞེས་བྱ་བ་ནི་རིགས་པའི་སྒོར་བརྗོད་པའི་ཕྱོགས་ཀྱི་མཚན་ཉིད་ལའོ། །འདི་ཐམས་ཅད་ནི་རང་ཉིད་སྨོས་པ་ཆོས་ཅན་བསྒྲུབ་བྱར་བྱེད་པ་

དགག་པ་ལ་སོགས་པའི་རྗོད་བྱེད་དུ་ཁས་བླངས་ནས་བརྗོད་པར་ཟད་དོ། །ད་ནི་མེད་པའི་ཕྱིར་དེ་དོན་ཉིད་མ་ཡིན་ནོ་ཞེས་བརྗོད་པ་ནི་རྗོད་བྱེད་མིན་ཕྱིར་ཞེས་བྱ་བའོ། །དེ་འདོད་པ་ཞེས་བྱ་བ་ནི་རྒོལ་བ་འདོད་པའོ། །དེས་ན་ཞེས་བྱ་བ་ནི་རྒོལ་བའི་འདོད་པ་ཙམ་བསྒྲུབ་པར་བྱ་བ་ཡིན་པས་ནའོ། །མི་འདོད་

པ་ནམ་མཁའི་ཡོན་ཏན་ཉིད་དང་དོན་གཅིག་ལ་འདུ་བས་འབྲེལ་བའི་འདོད་པ་མི་རྟག་པ་ཉིད་ལ་གནོད་པ་ན་ཡང་སྟེ། མི་རྟག་པ་འབའ་ཞིག་གྲུབ་ཀྱང་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། ཅི་ལྟར་བསྒྲུབ་ལ་ཞེས་བྱ་བའོ། །དེ་ལྟ་མ་ཡིན་པའི་ཞེས་བྱ་བ་ནི་རྒོལ་བའི་འདོད་པ་མ་ཡིན་པ་ལའོ། །དེས་

ཞེས་བྱ་བ་མི་རྟག་པ་ཉིད་བསྒྲུབ་པ་ངེས་སོ། །ཅིའི་ཕྱིར་ཞེ་ན་ནུས་པ་ཞེས་བྱ་བའོ། །དེས་ན་བསྟན་བཅོས་ཀྱི་འདོད་པ་དོར་ལ་བསྒྲུབ་པར་བྱ་བ་སྒྲུབ་པ་ནི་མ་ཡིན་ནོ་ཞེས་བྱ་བར་བསམས་པའོ། །གཞན་ཡང་ཞེས་བྱ་བ་ནི་གལ་ཏེ་བསྟན་བཅོས་བྱེད་པའི་འདོད་པ་ཡང་བསྒྲུབ་པར་བྱ་བ་ཡིན་

ན་དེའི་ཚེ་བསྟན་བཅོས་བྱེད་པའི་འདོད་པ་དང་། རང་ཉིད་འདོད་པ་མཐའ་དག་ཀྱང་ཉམས་པར་འགྱུར་ཏེ། དེ་སྒྲུབ་པར་བྱེད་པ་མི་སྲིད་པའི་ཕྱིར་རོ། །དེས་ན་ཐམས་ཅད་བརླག་པ་པས་ནི། རང་གི་འདོད་པའི་བསྒྲུབ་བྱ་ཅུང་ཟད་ཐོབ་པ་ནའོ། །དེ་ལ་ནི་སྒྲུབ་པར་བྱེད་པའི་གཏན་ཚིགས་སྲིད་

པའི་ཕྱིར་རོ། །འོན་ཏེ་བསྟན་བཅོས་བྱེད་པའི་འདོད་པ་མ་གྲུབ་ན་རང་ཉིད་འདོད་པ་གྲུབ་པས་ཅི་ཕན་སྙམ་ན། བུམ་པ་ཞེས་བྱ་བའོ། །བཤད་པའི་དོན་སྐབས་སུ་བབ་པའི་མཇུག་སྡུད་པ་ནི། དེའི་ཕྱིར་ཞེས་བྱ་བའོ། །དེ་ལ་ཏེ་དེ་ལྟར་གནས་པ་ལའོ། །བསྒྲུབ་པར་བྱ་བ་ཉིད་དུ་ཁས་བླངས་

པ་དེ་ལའོ། །ཚད་མ་དག་གིས་བཀག་པ་མེད་པ་ཡིན་པར་འདོད་དོ། །འདི་ལ་ཞེས་བྱ་བ་ནི་ཚད་མ་དག་གིས་མ་བཀག་པ་ཁས་བླང་བར་བྱ་བ་ལ་རིགས་པ་ཅི་ཡོད་ཅེས་དྲིས་པའོ། །ལན་ནི་གཏན་ཚིགས་ཞེས་བྱ་བའོ། །གཞན་དུ་ཡང་ཅི་སྟེ་མ་ཡིན་ཞེ་ན། ཚད་མ་གཅིག་གིས་ཞེས་

เล่ม ๑๘๖ · หน้า 65b

བྱ་བའོ། །ཕྱིན་ཅི་ལོག་ཏུ་ཡོད་པའམ་མེད་པར་སྒྲུབ་པ་ལའོ། །དེ་མེད་ན་སྟེ་བཟློག་པ་མེད་ན་ནིའོ། །དེ་ཙམ་སྟེ་ཕྱོགས་ཙམ་ལས་གྱུར་པ་ཡིན་པའི་ཕྱིར་རོ། །འདི་ཉིད་གསལ་བར་བྱེད་པ་ནི། མངོན་སུམ་དང་ཞེས་བྱ་བའོ། །དེ་ལྟ་ཡིན་དང་ཞེས་བྱ་བ་ནི་བསལ་ཀྱང་སྒྲུབ་པར་བྱེད་པ་ལ་ལྟོས་ནའོ། །

དེའི་ཚེ་ཐམས་ཅད་ལ་ཡིད་མི་ཆེས་པ་ཁོ་ན་སྟེ། ཚད་མས་གནོད་པ་སྲིད་པའི་ཕྱིར་རོ། །དེས་ན་ཞེས་པ་སྒྲུབ་པའི་ཚད་མ་དེ་ལ་ཡང་ཡིད་ཆེས་པ་ཅི་ཡོད། གང་གི་ཕྱིར་དེ་ལྟར་བསལ་བ་གཏན་ཚིགས་ཀྱི་ཡུལ་དང་འཐད་པ་མ་ཡིན་པ་དེའི་ཕྱིར་རོ། །འོ་ན་ཅི་ལྟར་དུ་བ་ལས་གློ་བུར་དུ་མི་རྟོགས་སྙམ་ན།

ཐེ་ཚོམ་གྱིས་ནི་ཞེས་སྨོས་སོ། །འདིར་ཞེས་བྱ་བ་ནི། བསལ་བ་གཏན་ཚིགས་རྟེན་མ་ཡིན་ཞེས་བྱ་བའི་ཚིག་ལའོ། །འོ་ན་སྐད་ཅིག་མ་ཉིད་གཏན་ཚིགས་ཀྱི་ཡུལ་མ་ཡིན་ཏེ། དེ་ཉིད་འདི་ཡིན་ནོ་སྙམ་པའི་ངེས་པ་ཡོད་པའི་ཕྱིར་རོ་ཞེ་ན། ཡང་ན་ཞེས་བྱ་བའོ། །སྐད་ཅིག་མ་ལ་ནི་ཐེ་ཚོམ་

སྐྱེད་པར་ནུས་པ་ཡིན་ཏེ། དེས་ན་གཏན་ཚིགས་ཀྱི་ཡུལ་ཉིད་དོ་ཞེས་དགོངས་པའོ། །སྒྲུབ་པར་བྱེད་པ་དང་གནོད་པར་བྱེད་པའི་ཚད་མ་དག་གིས་ངེས་པ་ལ་ནི་གཏན་ཚིགས་ཀྱི་ཡུལ་ཉིད་ཡིན་པར་མི་འགྱུར་རོ་ཞེས་འབྲེལ་ཏོ། །ཅི་ལྟར་ངེས་པ་ལ་ཞེ་ན། རང་གི་ངོ་བོ་དང་དེ་ལས་བཟློག་པ་དག་

ཏུའོ། །སློབ་དཔོན་ཕྱོགས་ཀྱི་གླང་པོས་སོ། །དེ་ལྟར་མ་ཡིན་ན་ཞེས་བྱ་བ་ནི། གལ་ཏེ་ལུང་དང་གྲགས་པས་གནོད་པ་རྟགས་ལས་ཡིན་པར་མི་འདོད་ན་དེའི་ཚེ་རྗེས་སུ་དཔག་པའི་དབྱེ་བ་མ་ཡིན་པར་འགྱུར་རོ། །གལ་ཏེ་རྗེས་སུ་དཔག་པ་རྣམ་པ་གསུམ་ཅི་ལྟར་སྙམ་ན། འདི་ལྟར་ཞེས་

བྱ་བའོ། །བསལ་བའི་དབྱེ་བས་ནི་རྣམ་པ་གསུམ་མ་ཡིན་གྱི། འོན་ཀྱང་རང་བཞིན་དང་འབྲས་བུ་དང་དེ་དག་བརྙན་མའི་དབྱེ་བས་སོ་ཞེས་བྱ་བའི་དོན་ཏོ། །དེ་ལ་ཞེས་བྱ་བ་ནི་གནོད་པ་རྣམ་པ་བཞི་པོ་དེའི་ནང་ནས་སོ། །ཁས་བླངས་ནི་ཡིད་ཆེས་པའི་ཚིག་གོ། །རིམ་པ་བཏང་ནས་འདི་

གཉིས་དང་པོ་འཆད་པ་ནི་གཞན་གྱིས་ཤེས་པར་འདོད་པའི་ངོར་རམ་བརྗོད་པར་བྱ་བ་མ་ཡིན་པའི་ཕྱིར་རོ། །ཅིའི་ཕྱིར་དངོས་མ་ཡིན་ཞེས་བྱ་བ་ནི། རྟགས་འདི་ནི་དངོས་ཁོ་ན་ཡིན་ཏེ། དེ་ལྟ་མ་ཡིན་ན། གཟུགས་བརྙན་ཡང་གནོད་བྱེད་ཡིན་ན་ནི་ཐུག་པ་མེད་པར་འགྱུར་རོ་ཞེས་བྱ་བ་ནི་ཕྱོགས་

เล่ม ๑๘๖ · หน้า 66a

སྔ་མ་པའི་བསམ་པའོ། །བདག་གཞན་ཞེས་བྱ་བ་ནི། འདི་གནོད་པར་བྱེད་པར་ནི་བརྗོད་པ་མ་ཡིན་གྱི། འོན་ཀྱང་གནོད་པར་བྱེད་པ་ཉིད་དུ་ཁས་ལེན་པའི་ཡུལ་ངེས་པ་ཡིན་ནོ། །འདོད་ཅེས་བྱ་བ་ནི་ཡིད་ཆེས་པར་ཁས་བླངས་པའོ། །ཅི་ལྟར་ཞེ་ན་ཡང་དག་ངེས་ལྡན་ཞེས་

བྱ་བའོ། །གང་གི་ཕྱིར་འདི་ཡང་དག་པའི་དོན་ངེས་པའི་ངག་དང་ལྡན་པའི་བརྗོད་པ་ཅན་ཡིན་པ་དེས་ན། རང་གི་ཚིག་དང་བསྟན་བཅོས་ཚད་མ་ཡིན་པར་གཅིག་ཏུ་ཞེས་བྱ་བ་ཡིད་ཆེས་པ་ཞེས་དེ་ལྟར་སློབ་དཔོན་ཕྱོགས་ཀྱི་གླང་པོས་བཤད་པ་ཡིན་ནོ། །གཉི་ག་ཡང་ཁས་བླངས་པའི་ཚད་

མར་མཚུངས་པའི་ཕྱིར་རོ། །འོ་ན་རྗེས་སུ་དཔག་པ་ལས་ངེས་པར་འགྱུར་རོ་ཞེ་ན། ཐ་སྙད་འཆོལ་བས་ཞེས་བྱ་བའོ། །ལྷན་ཅིག་ཏུ་ཞེས་བྱ་བ་ནི་ཡིད་ཆེས་པ་ཞེས་དེ་ལྟར་རོ། །རང་གི་ཚིག་དང་བསྟན་བཅོས་དག་ཚད་མར་ཁས་མི་ལེན་ན་ནི་དེ་བརྗོད་པ་དང་། དེ་ལ་སྟོན་པའི་དཔྱོད་པ་

དག་མེད་པར་འགྱུར་ཞེས་མཚུངས་པ་ཉིད་སྟོན་པ་ནི། ཅི་ལྟར་བདག་ནི་ཞེས་བྱ་བའོ། །དེར་བསྟེན་མིན་ན་སྟེ་བསྟན་བཅོས་ཁས་མ་བླངས་པར་རོ། །དེས་ཅི་ཞིག་བརྗོད་སྙམ་ན། ཅི་ལྟར་ཞེས་བྱ་བའོ། །སྨྲ་བ་ཀུན་ནི་བརྫུན་ཡིན་ནོ་ཞེས་བྱ་བ་དེ་ནི་འགོག་པ་མ་ཡིན་ནོ། །ཅིའི་ཕྱིར་ཞེ་ན། གལ་ཏེ་

སྨྲ་བ་ཀུན་བརྫུན་ཡིན་ནོ་ཞེས་བྱ་བ་དེ་ཡང་འགོག་ན་ནིའོ། །ཅི་ལྟར་འདི་བསལ་སྙམ་ན། འདི་ལྟར་ཞེས་བྱ་བའོ། །འདི་ག་ལས་སྙམ་ན་ཚིག་ནི་ཞེས་སྨོས་སོ། །གལ་ཏེ་དུས་གསུམ་ན་ཡོད་པ་ཐམས་ཅད་ཚད་མ་མ་ཡིན་ན་དེའི་ཚེ་དེ་དག་བརྗོད་པས་ཅི་བྱ། བརྗོད་ནས་ཚད་མ་མ་ཡིན་པར་བརྗོད་ན།

བཀྲུས་ནས་ཞེས་སྨོས་སོ། །རྐྱག་པའི་ནང་དུ་ལྷུང་བའི་ལ་དུ་ལེན་པ་ལ། ཁྱོད་ཅི་བྱེད་ཅེས་འགའ་ཞིག་གིས་དྲིས་པ་ན། དེས་དེ་ལ་བཀྲུས་ནས་དོར་བར་བྱའོ་ཞེས་ཟེར་བ་དེ་དང་འདྲ་བར་དུས་གསུམ་ན་ཡོད་པའི་བརྗོད་པ་ཡང་ཚད་མར་བརྗོད་ནས་ཕྱིས་ཚིག་དེ་ཚད་མ་མ་ཡིན་པར་བྱས་

ནས་དོར་བར་བྱའོ་ཞེས་བྱ་བར་འགྱུར་རོ། །དོགས་པ་བསུ་བ་ནི་ཕྱིས་འགྱོད་པའི་ཕྱིར་ཏེ་ཚད་མ་མ་ཡིན་པར་བསྒྲུབ་པོ་ཞེ་ན། ལན་ནི་དེ་ལྟ་ན་ཡང་ཞེས་བྱ་བའོ། །ཅི་ལྟར་འགལ་ཞེ་ན། མ་སྨྲས་པ་ཉིད་ཅེས་བྱ་བའོ། །བྱས་པ་ནི་ཚིག་གོ། །འདི་ཉིད་ནི་མ་དཔྱད་པ་ཉིད་དོ། །ཅིའི་ཕྱིར་ཞེ་ན།

เล่ม ๑๘๖ · หน้า 66b

བརྟགས་པ་ལེགས་པས་ཞེས་སྨོས་སོ། །འདིས་ནི་འདས་པའི་ཚིག་ཚད་མ་མ་ཡིན་པ་འགོག་པ་སྤངས་པ་ཡིན་ནོ། །བརྗོད་པ་འདིས་ཅི་བྱ་ཞེས་བྱ་བ་ནི། འདི་ནི་བདག་གིས་བརྫུན་བྱས་པ་ཡིན་ནོ་ཞེས་སྨྲས་པ་འདིས་ཅི་བྱ་སྟེ་འདི་ནི་བརྗོད་པར་མི་བྱ་བ་ཁོ་ནའོ་ཞེས་བྱ་བའི་དོན་ཏོ། །དང་པོ་ཉིད་བརྗོད་པར་མི་

བྱའོ་ཞེས་བྱ་བའི་དོན་ཏོ། །འོ་ན་འབྱུང་བར་འགྱུར་བའི་ཚིག་ཚད་མ་ཡིན་པ་འགོག་གོ་སྙམ་ན། འབྱུང་བར་འགྱུར་བ་ལ་ནི་ཞེས་བྱ་བའོ། །འོན་ཏེ་དེའི་ཚེ་ཉིད་རང་གིས་སྨྲས་ནས་འགོག་གོ་ཞེ་ན། དེའི་ཚེ་ནི་ད་ལྟར་བ་ཉིད་འགོག་པར་འགྱུར་ལ། དེ་ལ་ཡང་ཉེས་པ་སྨྲས་ཟིན་ཏོ། །འབྱུང་བར་འགྱུར་

བའི་ཚིག་ལ་ནི་ཉན་པ་པོ་ཉིད་མེད་དེ་དེས་ན་འདི་ནི་བརྫུན་སྨྲས་པ་ཡིན་ནོ་ཞེས་ཅིའི་དོན་དུ་བརྗོད། ཛབ་མཁན་ནི་གར་བྱེད་པའོ། །དེའི་ཛབ་ཚིག་ནི་གླུའི་ཁྱད་པར་ཏེ། དེ་ལ་ཉན་པ་མེད་ཀྱང་བཞད་གད་གདོན་པའི་ཕྱིར་འཇུག་པ་ཅི་ལྟ་བ་དེ་བཞིན་དུ་ཁོ་བོ་ནི་བརྫུན་སྨྲ་བ་ཡིན་ནོ་ཞེས་བྱ་བའི་ཚིག་ཀྱང་

འཇུག་པས་ཉེས་པ་མེད་དོ་ཞེ་ན། མ་ཡིན་ཏེ་རྩོད་པའི་སྐབས་ཡིན་པའི་ཕྱིར་རོ་ཞེས་སྨོས་སོ། །རྩོད་པ་ནི་ཕྱིར་རྒོལ་བ་མེད་པར་མི་སྨྲ་བ་དེས་ན་ཅི་ལྟར་འདི་དཔེར་རིགས་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། རྩོད་པའོ་ཞེས་བྱ་བའོ། །དེ་ནི་ཞེས་བྱ་བ་ནི་ཚིག་ཚད་མ་མ་ཡིན་པར་སྟོན་པའོ། །འདིར་

དོན་ནི་འདི་ཡིན་ཏེ། གང་ཞིག་རྟོག་པ་དང་ལྡན་པས་གཞན་རྟོགས་པའི་དོན་ཏུ་བརྗོད་པ་དེ་ནི་བདེན་པའི་དོན་ཅན་དུ་ཁས་བླངས་པ་སྔོན་དུ་འགྲོ་བ་ཅན་ཡིན་ཏེ། དཔེར་ན་བདག་གིས་སྨྲས་པ་ཐམས་ཅད་བརྫུན་ཡིན་ནོ་ཞེས་བརྗོད་པ་བཞིན་ནོ། །གཞལ་བྱའི་དོན་ཅན་གྱི་ཚད་མ་དག་མེད་དོ་ཞེས་བྱ་བའི་

ཚིག་ཀྱང་རྟོག་པ་དང་ལྡན་པས་བརྗོད་པ་ཡིན་ནོ། །དེས་ན་ཚད་མ་མ་ཡིན་པར་དམ་བཅའ་བ་ནི་རང་གི་ཚིག་གིས་བསལ་བ་ཡིན་ནོ། །ཅི་ལྟར་བདག་ཉིད་ཚད་མ་མ་ཡིན་ན་ཚིག་མི་འཇུག་པ་ཉིད་ཡིན་པ་དེ་བཞིན་དུ། བསྟན་བཅོས་དེ་ཁས་མ་བླངས་ན། བསྟན་བཅོས་ལས་གྲགས་པའི་དོན་ལ་

ཡང་དཔྱོད་པ་མི་འཇུག་པ་ཉིད་དུ་ཐལ་བར་འགྱུར་རོ་ཞེས་སྦྱར་རོ། །གལ་ཏེ་མཚུངས་པར་བསྟན་པའི་དོན་དུ་ལྷན་ཅིག་བརྗོད་པར་ཡིན་ཡང་ལྷག་པ་བརྗོད་པ་ཅི་ཡོད་སྙམ་ན། མཚུངས་པར་ཞེས་གསུངས་སོ། །མཚུངས་པར་བསྟན་པའི་ཕྱིར་ན་ཏེ་བསྟན་པའི་དོན་དུ་བསྟན་བཅོས་འདི་རང་

เล่ม ๑๘๖ · หน้า 67a

གི་ཚིག་དང་ལྷན་ཅིག་བརྗོད་པ་གང་ཡིན་པ་དེ་ནི་བསྟན་བཅོས་ནི་གང་གི་ཚེ་ཁོ་ན། རྣམ་པར་དཔྱོད་པའི་སྐབས་ཀྱི་ཆོས་ཅན་རྣམ་པར་འཇོག་པའི་སྒོ་ནས། བསྟན་བཅོས་རྟེན་ཉིད་ཡིན་པ་དེའི་ཚེ་ཉིད་ན། དེ་ལས་བཟློག་པའི་ཆོས་ཁས་ལེན་པ་ལ་གནོད་པར་བྱེད་པ་ཡིན་གྱི་གཞན་གྱི་ཚེ་

ནི་མ་ཡིན་ནོ་ཞེས་བྱ་བའི་དོན་འདི་བསྟན་པའི་ཆེད་དུ་བྱས་པ་ཡིན་ནོ། །དེ་ལྟ་མ་ཡིན་ན་བསྟན་བཅོས་རང་གི་ཚིག་པས་ནུས་པ་ལྷག་པ་ཅན་དུ་རྟོགས་པར་འགྱུར་དུ་འོང་བས་སོ། །དེ་ལྟ་ཡིན་དང་གཞན་གྱི་ལུགས་ལྟར་རྣམ་པར་དཔྱོད་པའི་སྐབས་ཀྱི་རྟེན་ཡིན་ན་ཡང་གནོད་པར་བྱེད་པར་ཡིན་པར་འགྱུར་

རོ། །སྔར་ནི་མཚུངས་པར་བསྟན་པ་ཉིད། ལྷན་ཅིག་བཤད་པའི་དོགས་པ་ཡིན་པར་བརྗོད་པ་ཡིན་ལ། ད་ལྟ་ནི་མཚུངས་པར་བསྟན་པའི་དགོས་པ་ཡང་དེའི་སྐབས་ཀྱི་རྟེན་ཉིད་ཡིན་ན་བསྟན་བཅོས་གནོད་པར་བྱེད་པ་ཡིན་གྱི་གཞན་གྱི་ཚེ་མ་ཡིན་ནོ། །ལྷན་ཅིག་བཤད་པའི་དགོས་པའི་དགོས་པ་བརྗོད་པ་

ཡིན་ནོ་ཞེས་བྱ་བ་ནི་ཁྱད་པར་ཡིན་ནོ། །འདི་ཉིད་བཤད་པ་ནི་གལ་ཏེ་ཞེས་བྱ་བའོ། །དེ་ལྟ་མ་ཡིན་ན་ཅི་སྐྱོན་སྙམ་ན། ལྷན་ཅིག་བཤད་པ་མ་ཡིན་ན་ཞེས་བྱ་བའོ། །ཕ་རོལ་པོ་ནི་རིགས་པ་ཅན་ལ་སོགས་པ་དག་གོ། །དེ་ལྟ་བུ་ཉིད་དུ་ཞེས་བྱ་བ་ནུས་པ་ལྷག་པ་ཁོ་ནར་འགྱུར་རོ། །དོགས་པ་

འདི་བཟློག་པའི་དོན་དུ་རང་གི་ཚིག་དང་བསྟན་བཅོས་དག་ཡིད་ཆེས་པའི་ཚིག་གིས་བརྗོད་པར་བྱ་བར་བསྟན་པ་ཡིན་ནོ། །ཁས་བླངས་ནས་དེ་དང་འགལ་བ་ལ་དེ་གནོད་པར་བྱེད་པ་ཡིན་ཏེ། དཔེར་ན་གཞལ་བྱའི་དོན་ཅན་གྱི་ཚད་མ་དག་མེད་དོ་ཞེས་རང་གི་ཚིག་དང་བསྟན་བཅོས་དག་གི་དཔེར་

བརྗོད་པ་མཚུངས་པ་ཡིན་ནོ་ཞེས་བརྗོད་པ་ནི་དེས་ན་ཞེས་བྱ་བ་སྟེ། གྲུབ་པ་དང་བདེ་བ་གཅིག་པ་ཉིད་ཀྱིས་ནའོ། །འདི་ཉིད་ག་ལས་ཞེ་ན། ཚད་མ་རྣམས་ནི་ཞེས་བྱ་བའོ། །གྲུབ་པ་དང་བདེ་བ་གཅིག་པ་དེ་ཉིད་ཀྱི་ཕྱིར་རོ། །གལ་ཏེ་ཚད་མ་འགོག་ན་རང་གི་ཚིག་མི་འཐད་མོད། བསྟན་བཅོས་

གོ་ཅི་ལྟར་ཞེ་ན། ཚད་མ་འགོག་ན་ཞེས་བྱ་བའོ། །རང་གི་ཚིག་འབའ་ཞིག་ཏུ་ནི་མ་ཟད་དེ་བསྟན་བཅོས་ཀྱང་ངོ་། །དེའི་ཕྱིར་བསྟན་བཅོས་ཅི་ཞིག་སྟེ་ཅིའི་ཕྱིར་ཁས་ལེན་མི་བླང་བ་ཁོ་ནའོ། །དེས་ན་ཕན་ཚུན་འགལ་བ་ཙམ་ཁོ་ནར་འགྱུར་གྱི་ཁས་ལེན་པ་ནི་མ་ཡིན་ནོ། །ཁས་ལེན་ན་

เล่ม ๑๘๖ · หน้า 67b

ཡང་ཚད་མ་སྤངས་པ་མ་ཡིན་ཏེ། དེས་ན་བསྟན་བཅོས་ཀྱང་གནོད་པར་བྱེད་པ་ཁོ་ནར་འགྱུར་རོ། །བསྟན་བཅོས་ཀྱི་ངག་དང་རང་གི་ཚིག་འགལ་ན་བསྟན་བཅོས་དང་འགལ་བ་ཡིན་ནོ། །དཔེར་བརྗོད་པ་འདི་ནི་དེ་ལྟ་མ་ཡིན་ནོ་ཞེས་དོགས་པ་ལ་རང་གི་ཚིག་འགལ་བ་བསལ་བའི་ཞེས་སྨོས་

སོ། །དེ་ལ་ནི་བསྟན་བཅོས་དང་འགལ་བ་ལའོ། །བསྟན་བཅོས་དང་འགལ་བ་ལ་ནི་བསལ་བའི་དཔེ་མ་ཡིན་ནོ་ཞེས་སྟོན་པ་ནི། གལ་ཏེ་ཞེས་བྱ་བའོ། །འོ་ན་ཅི་ལྟར་རང་གི་ཚིག་དང་འགལ་སྙམ་ན། གལ་ཏེ་ཚད་མ་འགའ་ཡང་ཞེས་བྱ་བའོ། །ཅི་སྟེ་ཞེས་བྱ་བ་ནི་གཞན་གྱིའོ། །ལན་ནི་

གང་ལས་ཏེ་ཞེས་བྱ་བའོ། །དེ་ལྟ་ན་ཡང་རང་གི་ཚིག་དང་འགལ་ལོ་ཞེས་བྱ་བའི་དོན་ཏོ། །འོན་ཏེ་དེ་ལས་དེ་འགྲུབ་པ་ཙམ་དུ་ཟད་ཀྱི་དེ་ཚད་མ་ནི་མ་ཡིན་ནོ་སྙམ་ན། གཞལ་བྱ་ཞེས་བྱ་བའོ། །འོན་ཏེ་མེད་པ་ཁོ་ནར་འགྱུར་བ་ཡིན་ནོ་སྙམ་ན། ཚད་མ་མེད་ན་ནི་ཞེས་བྱ་བའོ། །འདི་ནི་ཞེས་

བྱ་བ་ནི་གཞལ་བྱའི་དོན་ཅན་གྱི་ཚད་མ་མེད་དོ་ཞེས་བྱ་བའོ། །འོ་ན་གང་གི་ཚེ་འདི་བསྟན་བཅོས་དང་འགལ་བ་ཡིན་སྙམ་ན། གལ་ཏེ་ཞེས་བྱ་བ་སྟེ། བསྟན་བཅོས་ཚད་མར་ཁས་བླངས་ནས་གཞལ་བྱའི་དོན་ཅན་གྱི་ཚད་མ་དག་མེད་དོ་ཞེས་སྨྲ་ན་ནི། དེའི་ཚེ་བསྟན་བཅོས་དང་འགལ་བར་

འགྱུར་བ་ཡིན་པའི་ཕྱིར་ན་བསྟན་བཅོས་དང་འགལ་བར་མི་འགྱུར་རོ་ཞེས་བྱ་བའི་ཉེས་པ་མེད་དོ། །དེ་ཉིད་ཀྱི་ཕྱིར་ཞེས་བྱ་བ་ནི་མི་རྟོགས་པའི་ཕྱིར་རོ། །འདི་ཅི་ལྟར་བསལ་བའི་དཔེ་ཡིན་ཞེ་ན། རྣམ་པ་འདི་ལྟ་བུའི་ཡུལ་ལ་ཞེས་བྱ་བའོ། །འདིར་ནི་བསྟན་བཅོས་སུའོ། །གལ་ཏེ་ཁས་བླངས་

པས་བསྟན་བཅོས་དང་རང་གི་ཚིག་གཉིས་ཚད་མ་ཡིན་ན་དེ་ལྟ་ན་ནི་འོ་ན་ཞེས་པ་རྣམ་འགྲེལ་ལ་འཇུག་པའོ། །ཚད་མ་ཡིན་པའི་ཕྱིར་རོ་ཞེས་བྱ་བ་ནི་ཚད་མར་ཁས་བླངས་པའི་ཕྱིར་རོ། །བྲམ་ཟེ་ན་ནི་ཆོས་ཅན་སྒྲ་ཚད་མས་གྲུབ་པ་ལ། མི་རྟག་པ་ཉིད་དམ་བཅས་པ་ནི་བསྟན་བཅོས་ཀྱིས་གནོད་པ་

ཡིན་ནོ་ཞེས་འདོད་པས་དེའི་བསམ་པའི་དབང་གིས་དེ་སྐད་བརྗོད་དོ། །ཆོས་ཅན་ལ་ཞེས་བྱ་བ་ནི་ཆོས་ཅན་གྱི་མཚན་ཉིད་ལའོ། །ཁས་བླངས་པ་དེ་ཞེས་བྱ་བ་ནི་བདེ་བ་མ་ཡིན་པ་སྒྲུབ་པར་བྱེད་པ་ནི། བསྟན་བཅོས་ལས་བརྗོད་པའི་བདེ་བ་སྒྲུབ་པར་བྱེད་པ་དེའི་གནོད་པར་བྱེད་པར་འགྱུར་རོ། །ཅིའི་

เล่ม ๑๘๖ · หน้า 68a

ཕྱིར་ཞེ་ན། དེ་འགོག་པ་ཉིད་ཀྱིས་ཏེ་དེ་བདེ་བ་སྒྲུབ་པར་བྱེད་པ་ཉིད་དེ་འགོག་པས་སོ། །འདིས་ནི་རྣམ་པར་གནས་པ་ཉིད་ལས་བཟློག་པར་རང་གི་ཚིག་བསྟན་བཅོས་ཀྱིས་གནོད་པར་བྱེད་པ་ཡིན་ནོ་ཞེས་བརྗོད་པ་ཡིན་ནོ། །འདིར་ཞེས་བྱ་བ་རྩོད་པ་གཉིས་པ་ལ་ལན་བཤད་

པའོ། །དེ་ལ་རྟེན་མིན་ནི་བསྟན་བཅོས་ལས་གྲུབ་པ་མ་ཡིན་པ་སྟེ། ཚད་མས་གྲུབ་པ་ལ་ཞེས་བྱ་བའི་དོན་ཏོ། །ཡང་ན་ཚད་མའི་སྤྱོད་ཡུལ་མ་ཡིན་པ་བསྟན་བཅོས་ལས་གྲུབ་པ་ལའོ། །བསྟན་བཅོས་པ་ཞེས་བྱ་བ་ནི་བསྟན་བཅོས་ཁས་བླངས་པ་ལ་ཡང་ངོ་། །འགལ་བརྗོད་ན་ཡང་ཞེས་བྱ་བ་ནི་

རང་གི་ཚིག་དང་བསྟན་བཅོས་དག་གིས་འགལ་བ་བརྗོད་ན་ཡང་གནོད་པར་ནི་མི་འགྱུར་གྱི་གེགས་ཙམ་དུ་འགྱུར་རོ། །གཅིག་གིས་གཞན་བཀག་པ་ཡོད་པ་མ་ཡིན་ནོ། །ཅིའི་ཕྱིར་ཞེ་ན། རང་གི་ཚིག་དང་བསྟན་བཅོས་དག་ནུས་པ་མཚུངས་པའི་ཕྱིར་རོ། །ཅི་དང་འདྲ་བར་ཞེ་ན། དཔེར་རང་

གི་ཚིག་བཞིན་ཏེ་ཞེས་བྱ་བའོ། །དཔེར་ན་ངའི་མ་ཡང་ཡིན་ལ་མོ་གཤམ་ཡང་ཡིན་ནོ་ཞེས་བྱ་བ་གེགས་བྱེད་པ་ཙམ་ཡིན་གྱི། གནོད་བྱེད་ནི་མ་ཡིན་པ་དེ་བཞིན་ནོ། །གལ་ཏེ་བསྟན་བཅོས་རང་གི་ཚིག་མ་ཡིན་པ་དེས་ན་ཅི་ལྟར་འདི་དཔེར་འཐད་སྙམ་ན། དེ་ཡང་ཞེས་བྱ་བ་སྟེ་བསྟན་བཅོས་ཀྱང་

བསྟན་བཅོས་ཁས་ལེན་པའི་དུས་དེའི་ཚེ། རྒོལ་བ་འདིའི་རང་གི་ཚིག་ཡིན་ནོ། །འོ་ན་ཆོས་ཅན་ཚད་མས་གྲུབ་པ་ལ་རྟག་པ་ཉིད་དུ་ཁས་བླངས་པ་དང་འགལ་བའི་མི་རྟག་པ་ཉིད་བསྟན་བཅོས་པ་བཞིན་དུ་གཞན་ལ་ཡང་ཅི་ལྟར་འགྲུབ་སྟེ། དེས་གེགས་བྱས་པའི་ཕྱིར་རོ་ཞེ་ན། དེ་དག་གང་ལ་

ཞེས་བྱ་བ་སྟེ་རྟག་པ་དང་མི་རྟག་པ་དག་ལའོ། །བཟློག་པ་ལ་ནི་སུས་ཀྱང་སུ་ལ་ཡང་གནོད་པ་མེད་དོ་ཞེས་བརྗོད་པ་ནི། དེ་ལྟར་མིན་ན་ཞེས་བྱ་བ་སྟེ་གལ་ཏེ་དེ་ལྟར་ཁས་མི་ལེན་ནའོ། །དེའི་ཚེ་རིགས་པ་དང་བྲལ་བ་རྟོག་པ་ཡིན་ནོ་ཞེས་བྱ་བའི་དམ་བཅའ་བས་ཚད་མ་མེད་པར་ནུས་པ་

མཚུངས་པར་གྱུར་པའི་དམ་བཅའ་བ་མི་རྟག་པའོ་ཞེས་བྱ་བའམ། མི་རྟག་པ་ཉིད་ལ་སོགས་པ་ཅི་ལྟ་བ་བཞིན་གྱི་དོན་གྱི་རྗེས་སུ་དཔག་པ་ལ་ཅི་ལྟར་གནོད། འོན་ཏེ་ཡིད་ཆེས་པས་བྱས་པའི་ལུང་ངམ་སྐྱེས་བུས་མ་བྱས་པ་ནི་ཚད་མ་ཡིན་པའི་ཕྱིར་རྗེས་སུ་དཔག་པ་ལ་གནོད་པ་ཉིད་དོ་སྙམ་ན་

เล่ม ๑๘๖ · หน้า 68b

ལུས་རྣམས་ཞེས་བྱ་བའོ། །འོ་ན་གང་གི་ཚེ་བསྟན་བཅོས་གནོད་པར་བྱེད་པ་ཡིན་སྙམ་ན། དེའི་ཕྱིར་ན་ཞེས་བྱ་བའོ། །བར་སྐབས་ཀྱི་རྩོད་པའི་ཁྱད་པར་གྱི་ཚིགས་སུ་བཅད་པའོ། །གལ་ཏེ་རྗེས་སུ་དཔག་པར་ཁས་བླངས་པ་འདུ་ན་འོ་ན་ཅིའི་ཕྱིར་དེ་རྗེས་སུ་དཔག་པ་ལས་ལོགས་སུ་བསྟན་

སྙམ་ན། དེས་ན་རྗེས་སུ་དཔག་པ་ལས་ཐ་དད་བྱས་པ་ཡིན་ནོ། །ཅི་ལྟར་ཕྱི་རོལ་མ་ཡིན་ཞེ་ན། གནོད་ཕྱིར་ཞེས་བྱ་བའོ། །ཡུལ་གྱི་ཁྱད་པར་ཉིད་བརྗོད་པ་ནི། རྗེས་སུ་དཔག་པ་ནི་ཞེས་བྱ་བའོ། །དེའི་གེགས་བྱེད་པ་ཉིད་ཀྱང་ཐམས་ཅད་ཀྱི་ཚེ་ནི་མ་ཡིན་ནོ་ཞེས་གསུངས་པ་ནི།

གེགས་བྱེད་པ་དེ་ཡང་ཞེས་བྱ་བ་སྟེ་བསྟན་བཅོས་ཀྱང་ངོ་། །གཞན་དུ་ནི་ཞེས་བྱ་བ་ཁས་མ་བླངས་ན་ནི་མ་ཡིན་ནོ། །ཁས་བླངས་པ་ཁོ་ནས་གནོད་པར་བྱེད་པ་ཡིན་ནོ་ཞེས་བྱ་བ་འདི་ག་ལས་སྙམ་ན། དེ་ལྟར་མིན་ན་ཞེས་བྱ་བའོ། །གལ་ཏེ་ཁས་མ་བླངས་པའི་བསྟན་བཅོས་གནོད་པར་བྱེད་པ་

ཡིན་ན། དེའི་ཚེ་བསྟན་བཅོས་ཐམས་ཅད་ཐམས་ཅད་ཀྱི་གནོད་པར་བྱེད་པ་ཡིན་པར་འགྱུར་རོ། །ཡང་ན་ལོགས་ཤིག་ཏུ་བྱས་པ་དོན་མེད་པར་འགྱུར་ཏེ། མངོན་སུམ་དང་རྗེས་སུ་དཔག་པ་བཞིན་དུ་སྐྱེས་བུའི་འདོད་པ་ལ་མ་ལྟོས་པ་ཁོ་ནར་གནོད་པར་བྱེད་པ་ཡིན་པའི་ཕྱིར་རོ། །ཡང་

ན་གལ་ཏེ་ཡུལ་གྱི་ཁྱད་པར་བསྟན་པ་དགོས་པར་མི་འདོད་ན། དེའི་ཚེ་ཐལ་ཆེས་པ་སྟེ། དོན་གྱིས་གོ་བ་ལ་སོགས་པ་ཡང་བརྗོད་པར་འགྱུར་རོ། །བཤད་པའི་དགོས་པ་མེད་པར་ལོགས་ཤིག་ཏུ་བྱས་པ་དགོས་པ་མེད་པར་ཡང་འགྱུར་རོ། །དེ་ལྟ་ན་ཡང་སྨྲ་བ་པོ་མི་གཟོ་བ་ཁོ་ནར་

འགྱུར་རོ། །འོ་ན་ཅི་ལྟར་རང་གི་ཚིག་དང་བསྟན་བཅོས་དག་ཕན་ཚུན་ཐ་དད་པར་བརྗོད་པར་འགྱུར་སྙམ་ན། རང་གི་ཚིག་ཀྱང་ཞེས་བྱ་བའོ། །ལོགས་ཤིག་ཏུ་བྱས་པ་དོན་མེད་པར་འགྱུར་ཞེས་བྱ་བ་རྣམ་པར་འགྲེལ་པ་ནི་གལ་ཏེ་ཞེས་བྱ་བའོ། །ལྷག་མ་བཤད་པའི་དོན་དུ་ཕྱོགས་སྔ་མ་

འགོད་པ་ནི་འོ་ན་ཞེས་བྱ་བའོ། །གཞུང་གང་གིས་ཐ་དད་པར་བྱས་སྙམ་ན། གལ་ཏེ་ཅི་ལྟར་ཞེས་བྱ་བའོ། །གལ་ཏེ་གནོད་ན་དེའི་ཚེ་རང་གི་ཚིག་དང་འགལ་བ་ཡིན་ནོ་ཞེས་བྱ་བའི་དོན་ཏོ། །ཡང་ན་གལ་ཏེ་ཡང་སྔར་ཁས་བླངས་པས་གནོད་པ་མ་ཡིན་ན་ཏེ། དཔེར་ན་བྱེ་བྲག་

เล่ม ๑๘๖ · หน้า 69a

པ་ཆོས་ཅན་སྒྲ་ལ་རྟག་པ་ཉིད་སྒྲུབ་པ་ནི་བསྟན་བཅོས་ཀྱིས་བརྗོད་པའི་མི་རྟག་པ་ཉིད་ཁས་བླངས་པས་གནོད་པ་བཞིན་ནོ། །ཅིའི་ཕྱིར་ལོགས་སུ་མ་བྱས་ཤེ་ན། ཡུལ་ཐ་དད་པ་མེད་ན་ཞེས་བྱ་བའོ། །ལན་འདེབས་པ་ནི་ལུང་དང་རང་གི་ཚིག་དག་ཐ་མི་དད་པ་ནི་བདེན་ནོ། །འོ་ན་

ཅི་ལྟར་ཐ་དད་སྙམ་ན། དེ་ལྟ་མིང་གི་ཞེས་བྱ་བའོ། །ལུང་གི་ཚིག་གིས་སྔར་བཞག་པའི་བདེ་བ་སྒྲུབ་པར་བྱེད་པ་ཉིད། ཕྱིས་བདེ་བ་མ་ཡིན་པ་སྒྲུབ་པར་བྱེད་པ་ཉིད་ཀྱིས་ཉམས་པར་བྱེད་པས་ཁས་བླངས་པ་དང་འགལ་བ་ཡིན་ནོ། །རང་གི་ཚིག་དང་འགལ་བ་གོ་ཅི་ལྟར་འདི་ལས་ཐ་དད་སྙམ་ན།

ངག་དེ་ཉིད་ཀྱིས་ཞེས་བྱ་བའོ། །དེའི་ཕྱིར་འདི་གཉིས་རྗེས་སུ་དཔག་པ་ལས་ལམ་ཕན་ཚུན་ཡང་ཐ་དད་པ་ནི་ཉམས་པ་མེད་པ་ཁོ་ནའོ། །གལ་ཏེ་གེགས་བྱེད་པ་ཡིན་ཡང་ཁས་བླངས་པའི་ཕྱིར་ན་ཅི་ལྟར་གནོད་བྱེད་མ་ཡིན་སྙམ་ན། བཤད་པ་དེ་ཡིས་ཞེས་བྱ་བ་སྟེ་རྒོལ་བས་སོ། །གནོད་བྱེད་

ཅེ་ན་ཞེས་བྱ་བ་ནི་གེགས་བྱེད་པ་མ་ཡིན་པའོ། །དེས་རྗེས་སུ་དཔག་པ་ལས་དེ་ལོགས་སུ་བྱས་པ་ནི་མི་འཐད་དོ་ཞེས་བྱ་བའི་དོན་ཏོ། །གྲུབ་པའི་མཐའ་པ་ཕ་རོལ་ལ་འདྲི་བ་ནི། གལ་ཏེ་རྒོལ་བ་དེ་བསྟན་བཅོས་གནོད་པར་བྱེད་པར་མི་འདོད་པ་ཡིན་ན་དེའི་ཚེ་ཅིར་འགྱུར། གཞན་གྱིས་ལན་རང་

གི་ཚིག་དང་འགལ་བར་འགྱུར་ཞེས་བྱ་བའོ། །ཁས་བླངས་པ་ཐམས་ཅད་ནི་ཕྱིས་གཞན་དུ་བྱ་བ་མ་ཡིན་ཏེ་བྱེད་ན་རང་གི་ཚིག་དང་འགལ་བ་ཡིན་ཏེ། རང་ཉིད་ཀྱིས་ཁས་བླངས་ཟིན་ན་གཞན་དུ་བྱེད་པའི་ཕྱིར་རོ་ཞེ་ན། གྲུབ་པའི་མཐའ་པས་རང་ཚིག་དང་ཞེས་གསུངས་སོ། །དེ་ནི་རྒོལ་བའོ། །

བསྟན་བཅོས་ཚད་མ་མ་ཡིན་པའོ། །སྔར་ཞེས་བྱ་བ་ནི་རྩོད་པའོ། །ལན་ནི་བྱས་ན་ཞེས་བྱ་བའོ། །གཞན་གྱིས་རང་གི་ཚིག་དང་ཞེས་སྨྲས་སོ། །དེ་ལྟ་ན་ཞེས་བྱ་བ་ནི་ལན་ནོ། །ཁས་བླངས་པ་ཙམ་ཡིན་ན་ཡང་། ཚད་མ་མ་ཡིན་པ་ཡང་ཚད་མར་འགྱུར་རོ་ཞེས་བརྗོད་པ་ནི། སྐྱེས་བུའི་ཞེས་

བྱ་བའོ། །འདིས་ནི་བསྟན་བཅོས་ཀྱིའོ། །གཞན་རང་གི་ཚིག་ལས་བསྟན་བཅོས་ཀྱི་ཁྱད་པར་སྨྲ་བ་ནི། ཅི་སྟེ་ཞེས་བྱ་བའོ། །དེས་ན་ཞེས་བྱ་བ་ནི་གཞན་གྱི་དོན་ཡིན་པས་ན་རང་གི་ཚིག་དེ་ཙམ་དུ་ཚད་མ་མ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། གཞན་གྱི་དོན་ལ་ནི་ཞེས་བྱ་

เล่ม ๑๘๖ · หน้า 69b

བའོ། །གལ་ཏེ་ཡོངས་སུ་བརྟགས་པའི་བསྟན་བཅོས་ཁས་བླངས་པ་ཡིན་ན། དེའི་ཚེ་ལུང་གི་དོན་ཚད་མ་ཉིད་ཀྱིས་གྲུབ་པ་ཡིན་ཏེ། དེས་ན་དེ་ལས་བཟློག་པ་དེར་ཚད་མ་གནོད་པར་བྱེད་པ་ཁོ་ན་ཡིན་ནོ། །དེ་སྟེ་བརྟག་པ་མི་འཇུག་ན་ཡང་དེའི་ཚེ་བསྟན་བཅོས་རང་གི་ཚིག་ལས་ཁྱད་པར་མེད་དོ། །

གང་གི་ཕྱིར་དེ་ལྟར་ལུང་ཚད་མ་མ་ཡིན་པ་དེས་ནའོ། །དོན་དེ་དག་ལ་ཞེས་བྱ་བ་ནི་ཆོས་ཅན་སྒྲ་ལ་སོགས་པ་ལའོ། །ལྐོག་ཏུ་གྱུར་པ་དག་ལ་ཡང་དེ་ཁོ་ན་ལྟར་རྣམ་པར་དཔྱོད་པར་འགྱུར་རོ་སྙམ་ན། ལྐོག་གྱུར་དག་ལ་ཞེས་གསུངས་སོ། །འོན་ཏེ་འདི་ཁས་བླངས་པ་ནི་མ་ཡིན་གྱི་འོན་ཀྱང་

བསྟན་བཅོས་དང་འགལ་བ་ཡིན་ནོ་ཞེ་ན། བརྗོད་པ་ཁས་བླངས་པའི་བསྟན་བཅོས་དང་འགལ་བའི་ཕྱིར་རོ། །མ་ཡིན་གྱི་འོན་ཀྱང་ཁས་བླངས་པ་དང་འགལ་བའི་ཡུལ་ཡིན་ནོ་ཞེས་བྱ་བའོ། །འོ་ན་བསྟན་བཅོས་དང་འགལ་བའི་ཡུལ་གསལ་བ་གང་ཡིན་ཞེ་ན། བསྟན་བཅོས་ལས་

ཞེས་བྱ་བའོ། །དེ་ལ་ཞེས་བྱ་བ་ནི་ལུང་ལས་གྲུབ་པའོ། །དེ་གལ་ཏེ་ལུང་མི་འདོད་ན་དེ་ལ་དཔྱོད་པ་མི་འཇུག་ན་དེ་ལྟ་ན། འོ་ན་ཞེས་བྱ་བ་ལ་སོགས་པའོ། །དེས་ན་ཞེས་བྱ་བ་ནི་གནས་པར་བྱེད་པ་དེས་ན་བསྟན་བཅོས་དེ་གནོད་བྱེད་ཡིན་ནོ། །འོ་ན་ཚད་མ་མ་ཡིན་པའི་ཕྱིར་ཞེས་དྲིས་པ་ན།

གཞན་གྱི་ལན་ནི་ཚད་མར་ཞེས་བྱ་བའོ། །གྲུབ་པའི་མཐའ་པས་དེ་ལྟ་ན་རང་གི་འདོད་པ་འགྲུབ་པོ་ཞེས་བརྗོད་པ་ནི། དེ་ལྟ་ན་འོ་ན་ཞེས་བྱ་བའོ། །གལ་ཏེ་བསྟན་བཅོས་ལས་གྲུབ་པའི་ཆོས་ཅན་ལ་དེ་དང་འགལ་བ་ཁས་བླང་བར་མི་བྱ་སྟེ། དེ་ཉིད་ཀྱིས་གནོད་པའི་ཕྱིར་རོ་ཞེ་ན། དེའི་ཚེ་

བསྟན་བཅོས་ཉིད་ཀྱིས་འགལ་བ་བརྗོད་པ་ལ་དཔྱད་པ་ཅི་འདྲ་བ་ཞིག་བྱ་སྙམ་ན། འདི་ལ་བརྟག་པ་ཕལ་ཆེར་ནི་ཞེས་བྱ་བའོ། །བསྟན་བཅོས་ལས་གྲུབ་པའི་ཆོས་ཅན་འདི་ལ་ནི་བསྟན་པ་ཕལ་ཆེར་འགལ་བ་བརྗོད་པ་ཡིན་པར་བསྟན་ཏེ། བསྟན་བཅོས་ཉིད་ཀྱིས་འགལ་བའི་ཆོས་

གཉི་ག་བསྟན་པའི་ཕྱིར་རོ། །བསྟན་བཅོས་ཀྱིས་རབ་ཏུ་གྲུབ་པའི་ཆོས་ཅན་ཆོས་མ་ཡིན་པ་ལ་འདོད་ཆགས་ལ་སོགས་པའི་རྒྱུ་ཅན་དང་། ཁྲུས་ཀྱིས་དག་པར་བྱ་བ་ཉིད་བསྟན་བཅོས་ཀྱིས་བརྗོད་པ་ནི་ཕན་ཚུན་འགལ་བ་ཡིན་ནོ། །རྒྱུ་མཚན་དང་མི་འགལ་བས་རྒྱུ་མཚན་ཅན་

เล่ม ๑๘๖ · หน้า 70a

མི་ལྡོག་པའི་ཕྱིར་རོ། །ཅི་རྣམ་པ་དེ་འདྲ་བ་བསྟན་བཅོས་འགའ་ཞིག་ལས་བརྗོད་པ་ཡོད་དམ་ཞེ་ན། དེ་སྐད་དུ་ཡང་ཞེས་བྱ་བའོ། །སེམས་ཀྱི་ཞེས་བྱ་བ་ལ་སོགས་པས་ནི་ཆོས་མ་ཡིན་པ་ཆགས་པ་ལ་སོགས་པའི་རྒྱུ་ཅན་ཡིན་ལ། ཆགས་པ་ལ་སོགས་པ་ཡང་

འཇུག་ངོགས་ཀྱི་ཁྲུས་ཀྱིས་ལྡོག་པ་མ་ཡིན་ནོ་ཞེས་བརྗོད་པ་ཡིན་ལ། གང་གཱའི་སྒོ་ཞེས་བྱ་བ་ལ་སོགས་པས་ནི། ཆགས་པ་ལ་སོགས་པ་ལ་མི་གནོད་པའི་ཁྲུས་ཉིད་ཀྱིས་ཆོས་མ་ཡིན་པ་དང་བྲལ་བའི་ཕྱིར་ཐར་པ་ཡིན་ནོ་ཞེས་བརྗོད་དེ་དེས་ན་བསྟན་བཅོས་ཉིད་ཕན་ཚུན་འགལ་བ་བརྗོད་པའི་ཕྱིར་

ཕན་ཚུན་འགལ་བ་ཡིན་གྱི། འདིར་ནི་གནོད་པ་འགའ་ཡང་མེད་དོ། །འགལ་བ་ཙམ་དུ་ཞེས་བྱ་བ་ནི་སྤང་བ་དང་བླང་བ་མ་ཡིན་པ་དོན་མེད་པ་ཕན་ཚུན་འགལ་བ་ཙམ་བསམ་པར་ཟད་པ་ཡིན་ན་དེའི་ཚེ་འོ་ན་བསྟན་བཅོས་ཁས་བླངས་པ་དང་འགལ་བ་དེ་ཅིའི་དོན་དུ་སེམས་པ་ཡིན་དགོས་པ་

མེད་པའི་ཕྱིར་བསམ་པར་བྱ་བ་མ་ཡིན་པ་ཁོ་ནའོ་ཞེས་བྱ་བའི་དོན་ཏོ། །འོན་ཏེ་དགོས་པ་ཡོད་པ་ཁོ་ན་ཡིན་པ་དེས་ན་རྣམ་པ་འདི་ལྟ་བུ་ཡང་བསམ་པར་བྱ་བ་ཡིན་ནོ་ཞེས་བརྗོད་པ་ནི་མཐོང་དང་ཞེས་བྱ་བའོ། །དེ་ལྟར་ཡིད་ཆེས་པ་དང་འགལ་བ་བཤད་ནས་གྲགས་པ་དང་འགལ་བ་བཤད་པའི་ཕྱིར་ན།

གྲགས་པས་ཞེས་གསུངས་སོ། །ཕ་རོལ་པོས་གྲགས་པ་གནོད་བྱེད་གཞན་ཡིན་པ་མི་བཟོད་པས། གལ་ཏེ་ཞེས་སྨྲས་སོ། །དེར་ནི་ཡིད་ཆེས་པའི་ཚིག་ལའོ། །དེ་ལ་ཞེས་བྱ་བ་ནི་དེ་ལྟར་གནས་པ་ལའོ། །དངོས་ཉིད་ཅེས་བྱ་བ་ནི་རྗེས་སུ་དཔག་པ་ལས་ཐ་མི་དད་དོ་ཞེས་བྱ་བའི་དོན་ཏོ། །

འོན་ཏེ་བརྒྱ་ལ་འདི་ནི་ཡིད་ཆེས་པས་གནོད་པ་ཡིན་གྱི་རྟོགས་པས་གནོད་པ་ནི་མ་ཡིན་ནོ་ཞེས་དོགས་པ་བསུ་ནས། ལན་འདེབས་པ་ནི། གལ་ཏེ་དེ་ནི་ཞེས་བྱ་བའོ། །སློབ་དཔོན་གྱིས་ཀྱང་ཞེས་བྱ་བ་ནི་ཕྱོགས་ཀྱི་གླང་པོས་སོ། །དཔེར་བརྗོད་པ་ཞེས་བྱ་བ་ནི་རི་བོང་ཅན་ནི་ཟླ་བ་མ་ཡིན་ནོ་

ཞེས་བྱ་བས་སོ་ཞེས་དེ་ལྟར་རྣམ་པ་བཞིར་བསྟན་པ་གང་ཡིན་པ་དེ་གཞུང་མ་བཙུགས་པར་འགྱུར་རོ། །དེས་ན་འདི་ཡིད་ཆེས་པས་གནོད་པ་ཉིད་ནི་མ་ཡིན་པ་དེས་ན་རྟོགས་པ་བསལ་བ་ནི། ཐ་དད་པ་ཁོ་ནའོ། །ཁྱོད་ཀྱིས་བཤད་པའི་ཚུལ་གྱིས་ནི་ཐ་དད་པ་ཡང་མ་ཡིན་ནོ་ཞེ་ན། འདི་ལ་

เล่ม ๑๘๖ · หน้า 70b

ལན་ནི་འདིར་སྨྲས་པ་ཞེས་བྱ་བའོ། །འདི་ནི་ཞེས་བྱ་བ་ནི་གྲགས་པས་བསལ་བའི་མཚན་ཉིད་དོ། །སྔ་མ་ནི་ཡིད་ཆེས་པ་དང་འགལ་བའོ། །ཡང་ན་ཁས་བླངས་པ་ཉིད་རང་བཞིན་དང་འབྲས་བུའི་དབྱེ་བས་ཐ་དད་པ་ཡིན་ནོ་ཞེས་བརྗོད་པ་ནི་ཡང་ན་ཞེས་བྱ་བའོ། །ཅིག་ཤོས་སོ་ཞེས་བྱ་བ་ནི་ཁས་

བླངས་པ་དང་འགལ་བའོ། །ཐ་དད་པའི་སྒྲུབ་བྱེད་ཀྱི་རྣམ་པ་གསུམ་པ་བརྗོད་པ་ནི། ཡང་ན་ཞེས་བྱ་བའོ། །གང་གི་ཕྱིར་ཐམས་ཅད་ཀྱི་ཚེ་སྒྲའི་དོན་གྲགས་པའི་རྗེས་སུ་འབྲང་བར་བྱའི། བསྟན་བཅོས་ཀྱི་རྗེས་སུ་ནི་ཐམས་ཅད་ཀྱི་ཚེ་འབྲང་བར་བྱ་བ་མ་ཡིན་པ་དེས་ན་བསྟན་བཅོས་དེ་

ལས་གྲགས་པ་འདི་ཐ་དད་པའི་ཕྱིར་ལོགས་སུ་བྱས་པ་འཐད་པ་ཁོ་ནའོ། །ཕ་རོལ་པོ་གྲགས་པ་བཞིན་དུ་བསྟན་བཅོས་དང་རང་གི་ཚིག་དག་ཀྱང་གདོན་མི་ཟ་བར་ཚད་མར་ཁས་བླང་པར་བྱ་བ་ཡིན་ཏེ། དེས་ན་དེ་དག་ལས་དེ་ལོགས་སུ་ཅི་ལྟར་བྱེད་ཅེས་བརྗོད་པ་ནི། གལ་ཏེ་ཞེས་བྱ་

བའོ། །གཞན་གྱིས་ཁས་བླངས་པས་བཤད་པའི་བསྟན་བཅོས་དང་རང་གི་ཚིག་དག་གདོན་མི་ཟ་བར་ཚད་མར་ཁས་བླང་བར་བྱ་བ་ཡིན་ནོ། །ཅིའི་ཕྱིར་ཞེ་ན། རྒོལ་བ་ཞེས་བྱ་བ་སྟེ་རིགས་པ་ལ་སོགས་པའོ། །ཆོས་ཅན་གཞན་ལ་ཞེས་བྱ་བ་ནི་བསྟན་བཅོས་ལས་གྲུབ་པའི་

ཆོས་ཅན་ལས་གཞན་སྒྲ་ལ་སོགས་པའི་ཆོས་ཅན་ལ། དེའི་ཆོས་མི་རྟག་པ་ཉིད་ལ་སོགས་པ་ལ་རྩོད་པ་ན་ཡང་ངོ་། །ཅི་ཞིག་བརྗོད་པ་ཡིན་ཞེ་ན། གདོན་མི་ཟ་བར་ཞེས་བྱ་བའོ། །གྲགས་པ་ནི་ཐ་སྙད་པ་དག་གིས་ཐམས་ཅད་ཀྱི་ཚེ་ཡང་ཁས་བླང་བར་བྱ་བ་ཡིན་ནོ་ཞེས་

བསམས་པའོ། །རྣམ་པ་གཞན་གྱི་སྒོ་ནས་ཀྱང་ཐ་དད་པ་བརྗོད་པ་ནི་ཡང་ན་ཞེས་བྱ་བའོ། །དོན་དམ་པའི་ཡུལ་ཅན་ཞེས་བྱ་བ་ནི་ཕྱི་རོལ་གྱི་ཡུལ་ཅན་ནོ། །དེ་ལ་ཞེས་བྱ་བ་ནི་གྲགས་པ་ལའོ། །དེས་ན་གྲགས་པས་གནོད་པ་དེ་གཉིས་ལས་རྣམ་པར་དབྱེ་བ་ཡོད་པའི་ཕྱིར་ཐ་དད་པ་

ཡིན་ནོ། །འདོད་པའི་སྒྲའི་བརྗོད་བྱ་འབའ་ཞིག་ཏུ་མ་ཟད་དེ་རྟག་པ་ཉིད་ལ་སོགས་པ་ཡང་ངོ་། །སངས་རྒྱས་པས་ནི་རྟག་པ་ཉིད་སྤངས་ནས་ནི་ཐ་སྙད་བྱ་བ་ལ་མི་དབང་ངོ་། །དེ་ཞེས་བྱ་བ་རྟག་པ་ཉིད་ལ་སོགས་པ་ཚད་མས་བཀག་པ་ན་ཡང་ངོ་། །ཚད་མ་དང་འགལ་བ་གཞན་སྤྱི་ལ་

เล่ม ๑๘๖ · หน้า 71a

སོགས་པ་དག་ལ་ཚད་མས་བཀག་པ་བྱས་པ་ཡང་གྲགས་པས་གནོད་པར་འགྱུར་རོ་ཞེས་འབྲེལ་ཏོ། །འོན་ཏེ་གྲགས་པའི་སྒྲས་བརྗོད་པའི་བྱ་བའི་དོན་ནི་གཞན་ཁོ་ན་ཡིན་ནོ་ཞེ་ན། གྲགས་པའི་སྒྲས་ཞེས་སྨོས་སོ། །དེ་བཞིན་དུ་མི་མགོའི་ཐོད་པ་མི་གཙང་ངོ་ཞེས་བྱ་བ་ལ་

སོགས་པ་ཡང་འཇིག་རྟེན་ཐམས་ཅད་ལ་གྲགས་པ་ཡིན་ཏེ། དེས་ན་མི་གཙང་བ་ཉིད་ཚད་མས་བཀག་ན་ཡང་འཇིག་རྟེན་པའི་གྲགས་པས་གནོད་པར་འགྱུར་རོ། །ཉི་ཚེ་བའི་ཞེས་བྱ་བའི་རྣམ་པར་རྟོག་པ་གཉིས་པ་ལ་བརྗོད་པ་ནི་འོན་ཏེ་ཞེས་བྱ་བའོ། །ཐམས་ཅད་ཀྱིས་གནོད་པར་བྱེད་པ་ནི་གྲགས་པར་བརྗོད་

པ་ཡིན་ནོ་ཞེས་སྨྲས་པ་ནི། འདོད་པའི་ཞེས་བྱ་བའོ། །འདོད་པའི་སྒྲའི་བརྗོད་པར་བྱ་བ་ཉིད་གཡོ་བ་མེད་པ་གང་ཡིན་པ་དེ་ནི་གྲགས་པ་ཡིན་ནོ། །གལ་ཏེ་གྲགས་པ་འདོད་པའི་སྒྲས་བརྗོད་པར་བྱ་བ་ཅི་ལྟར་ཡིན་ཞེ་ན། གྲགས་པ་ཉིད་ནི་ཞེས་སྨོས་ཏེ། གྲགས་པ་ནི་རྣམ་པར་རྟོག་པའི་ཤེས་པའི་

མཚན་ཉིད་ཀྱི་ཐ་སྙད་ཡིན་གྱི། འདོད་པའི་སྒྲས་བརྗོད་པར་བྱ་བ་ཉིད་ནི་མ་ཡིན་ནོ། །དེ་ལྟ་ན་ཡང་དེས་བསྐྱེད་པའི་ཕྱིར་ཏེ། གྲགས་པས་སྦྱར་བ་ཡིན་པའི་ཕྱིར་ན། འདོད་པའི་སྒྲས་བརྗོད་པར་བྱ་བ་ཡིན་པར་བརྗོད་པ་ཡིན་ནོ། །ཚད་མས་གྲགས་པ་གཞལ་བྱ་འདོད་པའི་སྒྲས་བརྗོད་པར་བྱ་བ་

ཉིད་བརྗོད་པ་ཡིན་ནོ་ཞེས་བྱ་བའི་དོན་ཏོ། །དེ་ཞེས་བྱ་བ་ནི་རྟག་པ་ཉིད་ལ་སོགས་པའོ། །ཅིའི་ཕྱིར་མི་ནུས་སྙམ་ན། ཚད་མས་ཞེས་བྱ་བ་སྟེ། རྟག་པ་ཉིད་ལ་སོགས་པ་གཡོ་བར་གྲུབ་པའོ། །ཅི་ལྟར་དེ་ཚད་མས་གྲུབ་པ་ཡིན་སྙམ་ན། ཚད་མས་ཞེས་བྱ་བའོ། །མི་རྟག་པ་ཉིད་ལ་སོགས་

པ་སྒྲུབ་པར་བྱེད་པའི་ཚད་མས་རྟག་པ་ཉིད་ལ་སོགས་པ་སྒྲུབ་པར་བྱེད་པའི་བསྟན་བཅོས་ལ་གནོད་པའི་ཕྱིར་རོ། །དེ་ལྟར་ཞེས་བྱ་བ་ནི་རྟག་པ་ཉིད་ལ་སོགས་པ་བཞིན་དུའོ། །སྟོན་པར་འགྱུར་རོ་ཞེས་བྱ་བ་ནི། ཐུན་མོང་མིན་པ་ཉིད་མི་འགྱུར་ཞེས་བྱ་བའི་དེར་རོ། །ཅི་ལྟར་སྟོན་པར་འགྱུར་ཞེ་ན། དོན་

ལ་ཞེས་བྱ་བའོ། །གང་གིས་གནོད་པར་བྱེད་པའི་ངག་དང་ལྡན་པས་ན། སྐྱེ་བོ་རྣམས་ཐམས་ཅད་འདོད་པའི་སྒྲའི་བརྗོད་པར་བྱ་བ་འདིར་ཡིད་ཆེས་པ་ཡིན་ནོ། །འདི་ཉིད་ག་ལ་ཞེ་ན། དོན་ལ་འདོད་པའི་སྒྲས་བརྗོད་པར་བྱ་བ་ཉིད་བཀག་པ་མེད་པའི་ཕྱིར་ཏེ། རྗེས་སུ་དཔག་པས་དགག་པར་མི་ནུས་

เล่ม ๑๘๖ · หน้า 71b

པའི་ཕྱིར་རོ། །བཀག་པ་མེད་པ་ཉིད་ཀྱང་རྣམ་པར་རྟོག་པའི་ཡུལ་ཙམ་གྱི་རྒྱུ་མཚན་ཅན་ཉིད་ཀྱིས་འདོད་པ་ལས་བྱུང་བ་ཡིན་པའི་ཞེས་བརྗོད་པ་ནི་སྐྱེས་བུའི་འདོད་པ་དང་ཞེས་བྱ་བའོ། །རྟོག་པའི་ཡུལ་ཡང་བ་ལང་ཉིད་ལ་སོགས་པའི་རང་གི་ངོ་བོ་ཡིན་ལ། འདོད་པའི་སྒྲས་བརྗོད་པར་བྱ་བ་ཉིད་

ནི་དེ་ཉིད་ཡིན་ནོ་ཞེས་བརྗོད་པ་ནི། བ་ལང་ཉིད་ལ་སོགས་པ་ཞེས་བྱ་བའོ། །དེ་བཞིན་དུ་འདི་ཡང་ཡིན་ནོ་ཞེས་བྱ་བ་ནི་འདོད་པའི་སྒྲས་བརྗོད་པར་བྱ་བ་འདི་ཡང་རང་རིག་པ་ཁོ་ན་ཡིན་ནོ། །གལ་ཏེ་ཞེས་བྱ་བ་ནི་གཞན་གྱིའོ། །འདོད་པའི་སྒྲས་བརྗོད་པར་བྱ་བ་ཉིད་ནི་ཚད་མས་གྲུབ་པ་ཡང་མ་

ཡིན་ཏེ། དེས་བརྗོད་བྱ་མ་ཡིན་པའི་གནོད་པར་བྱེད་པ་ཉིད་མ་ཡིན་ནོ་ཞེས་བྱ་བའི་དོན་ཏོ། །ཅི་ལྟར་ན་འདི་དེ་ལ་ཚད་མ་ཡིན་ཞེ་ན། རང་རིག་པ་དེས་བརྗོད་པར་བྱ་བ་ཉིད་གྲུབ་པའི་ཕྱིར་རོ། །ཅི་ལྟ་བུར་གྱུར་པ་ཞིག་ཅེ་ན། སྒྲའི་ཞེས་བྱ་བའོ། །གང་གི་ཚེ་དེ་ལས་སྒྲ་སྐྱེ་བའི་ཚེ་ནི་རྣམ་པར་

རྟོག་པའི་རྣམ་པ་བརྗོད་པ་བྱ་བ་ཉིད་ཉེ་བར་ལེན་པ་ཡིན་ལ། གང་གི་ཚེ་སྒྲ་ལས་དེ་སྐྱེ་བའི་ཚེ་ནི་འབྲས་བུའི་དངོས་པོ་ཡིན་ནོ། །གལ་ཏེ་དེ་ལྟར་ན་ཞེས་བྱ་བ་ནས་ཁས་ལེན་ཅེ་ནའི་བར་ནི་རྩོད་པའོ། །གྲུབ་པའི་མཐའ་སྨྲ་བའི་དོགས་པ་བསུ་བ་ནི། རྒྱུ་དང་ཞེས་བྱ་བའོ། །དེས་ན་ཕྱོགས་

མངོན་སུམ་གྱིས་གནོད་པ་ཉིད་ནི་མ་ཡིན་ནོ་ཞེས་བསམས་པའོ། །དེ་ཙམ་ཉིད་ཅེས་བྱ་བ་ནི་རྒྱུ་དང་འབྲས་བུའི་དངོས་པོ་ཙམ་ཉིད་དོ། །དེས་ན་རྒྱུ་དང་འབྲས་བུའི་དངོས་པོ་མངོན་སུམ་གྱིས་གྲུབ་ན། བརྗོད་བྱ་རྗོད་བྱེད་ཀྱི་དངོས་པོ་ཡང་དེས་གྲུབ་པ་ཁོ་ནའོ། །གཞན་དུ་ཞེས་བྱ་བ་གྲགས་

པས་བསལ་བ་ཉིད་དུའོ། །འདིར་ནི་བསལ་བ་ལའོ། །དེས་ན་ཞེས་བྱ་བ་ནི་ཁྱབ་པ་དང་རྟག་པ་དག་གིས་ནའོ། །དེ་ནི་སྤྱིའོ། །འོ་ན་ཅི་ལྟར་ཁྱབ་པ་ཉིད་དུ་རྟོགས་ཤེ་ན། འོན་ཀྱང་ཞེས་བྱ་བའོ། །དེ་ལྟའི་ཞེས་བྱ་བ་ནི་བ་ལང་ཞེས་བྱ་བ་ལ་སོགས་པར་འདོད་པའི་ཐ་སྙད་ནི་སྟེ་རྣམ་པར་རྟོག་

པ་ནི། ཡོད་ཕྱིར་ཏེ་སྐྱེ་བའི་ཕྱིར་སྤྱི་དང་རྟོག་པ་ཡིན་ནོ། །དེ་ལྟ་བུའི་ཐ་སྙད་ཉིད་ག་ལས་བྱུང་སྙམ་ན། ཐོག་མེད་ཅེས་བྱ་བའོ། །འདི་ག་ལས་སྙམ་ན། དེ་ལྟར་ཡང་ཞེས་སྨོས་སོ། །གལ་ཏེ་དེ་ལྟ་ཡིན་ན་རང་རིག་པ་ཉིད་ཚད་མ་ཡིན་ལ་ཞེས་བརྗོད་པ་འགལ་ལོ། །དེས་བརྗོད་པར་བྱ་བ་

เล่ม ๑๘๖ · หน้า 72a

ཉིད་རྟོགས་པ་དང་། མ་རྟོགས་པར་ཡང་བརྗོད་པའི་ཕྱིར་རོ་ཞེ་ན། དེས་ན་འདི་ཙམ་ཞིག་འདོད་པ་མི་ཤེས་སོ། །ཡང་ན་གལ་ཏེ་འབྱུང་བ་དང་བྱུང་བའི་བརྗོད་པར་བྱ་བ་ཉིད་ཐ་སྙད་ལ་ལྟོས་ནས་རང་རིག་པས་རྟོགས་པ་ཡིན་ཏེ། དཔེར་ན་མེས་དུས་གསུམ་ན་ཡོད་པའི་དུ་བ་ལ་ཁྱབ་

པར་མངོན་སུམ་གྱིས་རྟོགས་པ་ལྟ་བུ་ཡིན་ན། དེའི་ཚེ་འདི་མངོན་སུམ་གྱིས་བསལ་བ་ཉིད་ཡིན་ཏེ། དེས་ན་ཅི་ལྟར་གྲགས་པས་བསལ་བ་བཞིན་ཡིན་པར་འགྱུར་སྙམ་ན། འདི་ནི་བདེན་ཏེ་འོན་ཀྱང་ལོག་པར་རྟོགས་པའི་དབང་དུ་བྱས་ནས་མངོན་སུམ་གྱིས་གྲུབ་པར་ཡང་རྗེས་སུ་དཔག་པས་བསྒྲུབ་པར་བྱ་

བ་ཡིན་ཏེ། དཔེར་ན་ས་ཕྱོགས་ན་བུམ་པ་མེད་པ་བཞིན་ནོ། །དེས་ན་རྣམ་པ་གཞན་ནི་འཐད་པ་ཁོ་ནའོ། །རྣམ་པར་རྟོག་པའི་ཡུལ་སྤྱི་ཡིན་མོད། སྒྲས་བརྗོད་པར་བྱ་བ་གོ་གང་ཞིག་ཡིན་སྙམ་ན། གཞན་སེལ་བའི་ཞེས་བྱ་བའོ། །དེ་ཡང་ནི་སྤྱིའོ། །ཅིའི་ཕྱིར་ཞེ་ན། བག་ཆགས་ཞེས་བྱ་བའོ། །

གལ་ཏེ་བག་ཆགས་སོ་སོར་ངེས་པ་ཡིན་པས་ཅི་ཙམ་ཞིག་སོ་སོར་ངེས་པར་རྣམ་པར་འཇོག་པར་བྱེད་ཀྱི། སྤྱིའི་ཁྱད་པར་ནི་མ་ཡིན་ནོ་སྙམ་ན། བག་ཆགས་དེ་ཞེས་སྨོས་ཏེ། བག་ཆགས་དེ་སད་པས་ཞེས་འབྲེལ་ཏོ། །ཅི་ལྟར་ཞེ་ན། འདོད་པ་ཙམ་གྱིས་ཞེས་བྱ་བའོ། །བྲམ་ཟེ་ལ་སོགས་པའི་

ངེས་པ་ནི་བ་ལང་ཉིད་ཀྱི་སྤྱི་བཞིན་དུ་བསལ་བས་གསལ་བ་མ་ཡིན་ནོ། །འདི་ག་ལས་ཤེ་ན། འདོད་པ་ཡིས་ཞེས་སྨོས་སོ། །དེ་ལས་ཞེས་བྱ་བ་ནི་བྲམ་ཟེ་ལས་གཞན་གཏུམ་པོ་ལ་སོགས་པ་དག་ལས། བྲམ་ཟེ་ཉིད་ལ་སོགས་པ་བཟློག་པའི་ཕྱིར་རོ། །བྲམ་ཟེ་ལ་སོགས་པའི་རིགས་དེ་དག་ནི་བསལ་བ་ལ་ངེས་

པའི་ཀུན་དུ་སྤྱོད་པ་མཚམས་གཅོད་པ་ལ་སོགས་པའི་མཚན་ཉིད་གང་ཡིན་པ་དེས་ཉེ་བར་མཚོན་པའི་བསལ་བ་གང་ཡིན་པ་དེ་ལ་ངེས་པའི་བརྡ་འདི་ནི་བྲམ་ཟེའོ་ཞེས་བྱ་བ་དེའི་སྟོབས་ཀྱིས་སོ། །འདིར་ནི་ཞེས་བྲམ་ཟེ་ལ་སོགས་པ་ལའོ། །བསྟན་པ་ཉིད་ཅེས་བྱ་བ་ནི། ཐེ་ཚོམ་ཟ་ནས་འདི་སུ་ཞིག་

ཅེས་དྲིས་པ་ན་འདི་ནི་བྲམ་ཟེའོ་ཞེས་བྱ་བའི་ཉེ་བར་བསྟན་པ་གང་ཡིན་པ་དེ་ཉིད་བརྡ་ཡིན་པའི་ཕྱིར་རོ། །འོན་ཏེ་ཉེ་བར་བསྟན་པ་འདི་ཡང་བྲམ་ཟེ་ཉིད་ཀྱི་རིགས་མེད་པར་ཅི་ལྟར་ཞེས་དོགས་ན། གཞན་ཡང་ཞེས་གསུངས་སོ། །བྲམ་ཟེ་ལ་སོགས་པའི་ཉེ་བར་བསྟན་པ་འདི་ནི་རིགས་ཀྱི་རྒྱུ་མཚན་ཅན་

เล่ม ๑๘๖ · หน้า 72b

མ་ཡིན་ཏེ་ཁ་དོག་དང་། རྣམ་པ་དང་། ཡི་གེའི་རྣམ་པས་སྟོང་པས་ན་རང་བཞིན་གཅིག་ཡིན་པའི་ཕྱིར་རོ། །འོ་ན་མ་མཐོང་བའི་རྒྱུ་ཉིད་རྒྱུ་མཚན་ཡིན་པར་འགྱུར་རོ་སྙམ་ན། འདིར་ནི་ཞེས་བྲམ་ཟེ་ལ་སོགས་པ་ལའོ། །དེའི་ནི་བྲམ་ཟེ་ཉིད་ལ་སོགས་པའིའོ། །བསྒྲུབ་པར་བྱ་བ་ཡིན་ཏེ་ཞེས་བྱ་བ་

ནི་རྩོད་པའི་གནས་ཡིན་པས་ན་རིགས་སྨྲ་བས་བསྒྲུབ་པར་བྱ་བ་ཡིན་ནོ། །དེ་ལྟ་མ་ཡིན་ནོ་ཞེས་བྱ་བ་མ་མཐོང་བའི་སྒྱུ་མ་བསྒྲུབས་ནའོ། །འདི་ལ་ཞེས་བྱ་བ་ནི་བྲམ་ཟེ་ལ་སོགས་པའི་རིགས་ལའོ། །རིགས་རྣམས་ནི་བསལ་ཟིན་པའི་ཕྱིར་ན་ཕན་ཚུན་རྣམ་པར་དབྱེ་བ་ཡོད་པ་མ་ཡིན་ནོ་ཞེས་བྱ་

བའི་དོན་ཏོ། །འདིས་ནི་ཞེས་བྱ་བ་བྲམ་ཟེ་ལ་སོགས་པའི་རིགས་ཀྱི་རྣམ་པར་དབྱེ་བ་བསལ་བས་ནའོ། །ཅི་ལྟར་ཞེ་ན། དེ་དག་ཀྱང་ཞེས་བྱ་བའོ། །དེའི་ཕྱིར་འདིར་མ་མཐོང་བའི་རྒྱུ་ཉིད་བསྒྲུབ་དགོས་ན་དེ་ནི་བསྒྲུབ་པར་ནུས་པ་ཡང་མ་ཡིན་ནོ། །དེས་ན་ཅི་ལྟར་བྲམ་ཟེ་ལ་སོགས་པའི་ཉེ་

བར་བསྟན་པ་མ་མཐོང་བའི་རྒྱུའི་རྒྱུ་མཚན་ཅན་ཡིན་སྙམ་དུ། མ་མཐོང་བའི་རྒྱུ་ཉིད་ནི་རིགས་རྣམས་ཀྱི་དགོས་པ་མ་ཡིན་ཏེ། བསྒྲུབ་པར་མི་ནུས་པའི་ཕྱིར་རོ། །འོན་ཀྱང་ཉེ་བར་མཚོན་ནས་བསལ་བ་ལ་འཇུག་པའོ། །དེ་ལྟ་མ་ཡིན་ན་ནི་འཇུག་པ་མི་འཐད་པའི་ཕྱིར་རོ་ཞེས་བརྗོད་པ་ནི་ཉེ་བར་མཚན་

ནས་ཞེས་བྱ་བའོ། །ལན་ནི་འདི་ལ་ཞེས་བྱ་བའོ། །དེས་ན་ཞེས་བྱ་བ་ནི་བཞི་པ་དང་རྒལ་བ་ནུས་པ་ཙམ་གྱིས་སོ། །བསལ་བ་དེ་ལ་མིང་ཙམ་འབྲེལ་པ་མི་འགྱུར་བ་མིན་ཏེ་འབྲེལ་པ་ཁོ་ནའོ་ཞེས་བྱ་བའི་དོན་ཏོ། །དེའི་ཕྱིར་ཞེས་བྱ་བ་ནི་རིགས་མེད་པའི་ཕྱིར་རོ། །གྲགས་པ་ཙམ་ལས་ཏེ།

རྣམ་པར་རྟོག་པ་ཙམ་ལས་བདག་གི་དངོས་པོ་ཐོབ་པ་གང་ཡིན་པའོ། །དེའི་དངོས་པོ་ནི་ཉིད་དེ། དེའི་ཕྱིར་རོ། །ཆོས་དེ་ཞེས་བྱ་བ་ནི་འདོད་པའི་སྒྲས་བརྗོད་པའི་མཚན་ཉིད་དོ། །སྒྲ་གང་གིས་བརྗོད་ཅེ་ན། གྲགས་པས་བསལ་བ་ཞེས་བྱ་བ་འདིར་གྲགས་པའི་སྒྲས་བརྗོད་དོ། །གཞན་དུ་ཡང་ཚད་

མས་གཞལ་བྱ་ཉེ་བར་བསྟན་པར་དོགས་པར་བྱའོ་ཞེས་བསྒྲེ་བ་ནི། ཆོས་འདི་འབའ་ཞིག་ཅེས་བྱ་བའོ། །དོན་གཞན་ནི་མཉན་བྱ་མ་ཡིན་པ་ཉིད་ལ་སོགས་པའིའོ། །འདོད་པའི་སྒྲས་བརྗོད་པར་བྱ་བ་དེ་ཉིད་ཀྱིས་འདོད་པའི་སྒྲས་བརྗོད་པར་བྱ་བ་མ་ཡིན་ནོ་ཞེས་འགོག་པ་ལ་གནོད་པ་ཡིན་

เล่ม ๑๘๖ · หน้า 73a

ནོ། །དེ་ཉིད་ཅེས་བྱ་བ་ནི་དགག་པར་མི་ནུས་པ་ཉིད་དོ། །གལ་ཏེ་འདོད་པ་ལས་བྱུང་བ་ཡིན་ཡང་། སྣམ་བུའི་སྒྲ་ཤིང་རྟ་ལ་མེ་བྱས་པ་མ་ཡིན་ནམ། གང་གིས་དགག་པར་མི་ནུས་པར་འགྱུར་བ། ཅི་ལྟར་དེ་བརྗོད་པར་བྱ་བ་ཉིད་ཡིན་ཞེ་ན། དེ་ལ་བརྟེན་ནས་ཞེས་བྱ་བ་སྟེ། རྣམ་པར་

རྟོག་པ་ལ་བརྟེན་ནས་འབྱུང་བ་སྟེ། རྣམ་པར་རྟོག་པའི་ཡུལ་ཞེས་བྱ་བའི་དོན་ཏོ། །བ་ལང་ཉིད་ལ་སོགས་པའི་བརྗོད་པར་བྱ་བ་རང་ཉིད་ཉེ་བར་བརྟག་པར་བྱ་བ། དགག་པར་ནི་བྱ་བ་མ་ཡིན་པ་བྱས་པ་དང་མ་བྱས་པ་རྣམས་སུ་ནི། སྣ་ཚོགས་རུང་བ་ཡིན་ནོ། །ཅིའི་ཕྱིར་ཞེ་ན། འདོད་པས་འཇུག་པའི་ཕྱིར་

ཏེ། ཐམས་ཅད་ལ་མི་མཐུན་པ་མེད་པ་ཅན་ཡིན་པའི་ཕྱིར་རོ། །སྒྲ་མེད་ཀྱང་རུང་བ་ཉིད་ཀྱིས་དེའི་དངོས་པོ་ཡིན་ནོ་ཞེས་བྱ་བའི་དོན་ཏོ། །བྱས་པ་སྟེ་འཇིག་རྟེན་པ་རྣམས་དང་། མ་བྱས་པ་འཇིག་རྟེན་པ་མ་ཡིན་པ་སྟེ་སྐྱེས་བུས་མ་བྱས་པའི་ཕྱིར་རོ་ཞེས་བྱ་བ་ནི་ཛ་ཡནྟའི་བཤད་པའོ། །བརྡ་བྱས་

པ་དང་གཞན་དག་ཅེས་བྱ་བ་ནི་འགྲེལ་པ་མཁན་གྱིའོ། །གལ་ཏེ་རྣམ་པར་རྟོག་པས་སྤྲུལ་པ་ནི་དོན་གྱི་རང་བཞིན་མ་ཡིན་ནོ་ཞེ་ན། ཐམས་ཅད་ནི་ངོ་བོ་ཉིད་ཀྱིས་ཞེས་གསུངས་སོ། །རྣམ་པ་ཡང་དོན་ཉིད་ཡིན་གྱི་བར་མ་དོ་ནི་མ་ཡིན་ཏེ། ལྷག་པར་ཞེན་ནས་རྣམ་པ་དང་དོན་དག་གཅིག་ཏུ་བྱས་ནས་

འཇུག་པའི་ཕྱིར་རོ། །དེས་ན་འཇིག་རྟེན་པ་དང་རིག་བྱེད་པ་ལ་སོགས་པ་རྣམས་སུ་སྒྲ་རྣམས་དོན་ངེས་པ་ལ་འཇུག་པ་ཉིད་ནི་སྐྱེས་བུའི་བློ་ལས་གྱུར་པ་ཐམས་ཅད་ལས་རུང་བ་ཉིད་ཀྱིས་བཀག་པ་ཡིན་ནོ་ཞེས་བརྗོད་པ་ནི། དེས་ན་ཞེས་བྱ་བ་ལ་སོགས་པའོ། །རུང་བ་ཉིད་ཀྱིས་འབྱུང་བ་དང་བྱུང་བར་

གྱུར་པ་ཉིད་ཀྱང་སྒྲ་དེ་ལྟར་གྱུར་པ་ལས་ཡིན་གྱི་རང་ཉིད་ནི་མ་ཡིན་ཏེ། དེ་ནི་དངོས་པོའི་རང་བཞིན་ཡིན་པའི་ཕྱིར་རོ། །རུང་བ་ཉིད་ནི་ཁྱི་ཤ་ཟ་བ་ལ་སོགས་པ་ལ་དགག་པར་མི་ནུས་སོ་ཞེས་འབྲེལ་ཏོ། །དེ་ཅིའི་ཕྱིར་ཞེ་ན། དོན་ཙམ་དང་ཞེས་སྨོས་ཏེ། ཡུལ་ཙམ་དང་རྗེས་སུ་འབྲེལ་པའི་ཕྱིར་རོ། །

ཅི་ལྟར་དོན་ཙམ་དང་རྗེས་སུ་འབྲེལ་པ་ཡིན་སྙམ་ན། དོན་དེར་ཡང་ཞེས་བྱ་བ་སྟེ། ཁྱི་ཤ་ཟ་བ་ལ་སོགས་པར་ཡང་ངོ་། །མཐོང་བ་ནི་ཚད་མས་སོ། །ཉེ་བར་བསྟན་པས་རྟོགས་པའི་ལུང་ལས་གྲུབ་པའོ། །ཅིའི་ཕྱིར་མངོན་སུམ་གྱིས་མི་གནོད་སྙམ་ན། རུང་བ་ཉིད་ནི་ཞེས་གསུངས་སོ། །

เล่ม ๑๘๖ · หน้า 73b

དེ་ཡང་ནི་རྗེས་སུ་དཔག་པའོ། །དེའི་ཕྱིར་དེ་ལ་ཞེས་བྱ་བ་དེར་སྟོན་པར་འགྱུར་རོ། །གལ་ཏེ་ཞེས་བྱ་བ་ལ་སོགས་པས་ནི་རྣམ་འགྲེལ་ལ་འཇུག་པའོ། །འོན་ཏེ་འདོད་པའི་སྒྲས་བརྗོད་པར་བྱ་བ་ཉིད་རུང་བ་ཡིན་པ་དེས་ན། དེས་གནོད་པ་ནི་རུང་བ་ཉིད་ཀྱིས་གནོད་པ་ཡིན་ནོ་ཞེས་དོགས་པ་བསུ་ནས། འདོད་

པའི་ཞེས་སྨྲས་སོ། །འོ་ན་རུང་བར་གྲགས་པ་ཡིན་ནོ་སྙམ་ན། དེ་ལྟ་བུ་ནི་ཞེས་སྨོས་ཏེ་རུང་བ་ཉིད་ནིའོ། །ཅིའི་ཕྱིར་ཞེ་ན། རུང་བ་ཉིད་ནི་ཞེས་སྨོས་སོ། །དེ་བཞིན་དུ་རུང་བ་ཉིད་ནི་འདོད་པའི་སྒྲས་བརྗོད་པར་བྱ་བའི་རྒྱུ་ཡིན་གྱི་འདོད་པའི་སྒྲས་བརྗོད་པར་བྱ་བ་ནི་མ་ཡིན་ནོ་ཞེས་བྱ་བར་རྟོགས་པར་

བྱའོ། །སྣ་ཚོགས་ཀྱི་བརྗོད་པར་བྱ་བ་ལ་ལྟོས་ནས་རུང་བ་ཉིད་གང་ཡིན་པ་དེའི་སྟོབས་ཉིད་ལས་དངོས་སུ་དངོས་པོ་ཐམས་ཅད་ལ་སྒྲ་ཀུན་དུ་འབྲེལ་པ་ཡིན་ནོ། །འོན་ཏེ་རུང་བ་ཉིད་ལ་ལྟོས་ནས་སློབ་དཔོན་ཕྱོགས་ཀྱི་གླང་པོའི་ཚིག་རྗོད་བྱེད་དུ་རྟོགས་པ་མེད་པ་མ་ཡིན་ནམ། དེ་སྐད་ཅི་སྟེ་བརྗོད་

སྙམ་ན། དེས་ཞེས་སྨོས་ཏེ་དངོས་ཉིད་དུ་ན་འབྲེལ་པས་ན་རུང་བ་ཉིད་དེར་སློབ་དཔོན་ཕྱོགས་ཀྱི་གླང་པོའི་ཚིག་དེ་རྗོད་བྱེད་ཉིད་དུ་མ་རྟོགས་ཀྱང་། སྣ་ཚོགས་ཀྱི་བརྗོད་བྱ་ཉིད་ལ་ལྟོས་པའི་རུང་བ་ཉིད་གང་ཡིན་པ་དེ་ནི་གྲུབ་པ་ཉིད་ཡིན་པས། སྒྲ་ལས་བྱུང་བའི་གྲགས་པ་དང་ཞེས་བྱ་བའི་ཚིག་གིས་

སློབ་དཔོན་བཞེད་པ་ཡིན་ནོ། །ཡང་ན་གལ་ཏེ་རྒན་པའི་ཐ་སྙད་ལས་ངེས་པའི་དོན་ཅན་ཉིད་དུ་མངོན་སུམ་གྱིས་རབ་ཏུ་གྲུབ་པ་ལ། སྒྲ་རྣམས་ངེས་པའི་དོན་ཅན་མ་ཡིན་པར་རྗེས་སུ་དཔག་པ་ཅི་ལྟར་གནོད་པར་བྱེད་པ་མ་ཡིན་ཞེ་ན། དེ་རུང་བ་དེ་ཉིད་ཀྱི་སྟོབས་ཉིད་ལས་ཞེས་སྨོས་སོ། །ཞུགས་ཟིན་པ་བཞིན་དུ།

རུང་བ་ཉིད་དེའི་སྟོབས་ལས་བྱུང་བས་སྒྲ་གཞན་ཡང་གྱུར་ཟིན་པ་ཉིད་ཡིན་ནོ། །འོན་ཀྱང་སྨྲ་བ་པོ་ལ་འདོད་པ་མེད་པས་མ་ཞུགས་པར་ཟད་དོ། །དངོས་པོར་འབྲེལ་པ་ཡིན་པ། དེས་ན་རུང་བ་ཉིད་དེར་འབྱུང་བར་འགྱུར་བའི་སྒྲ་རྟོགས་པ་མ་ཡིན་ཡང་། དེ་ནི་གྲུབ་པ་ཉིད་དེ། དེས་རྟོགས་པར་བྱ་བ་

ཉིད་གྲུབ་པ་ཡིན་ཏེ། འདོད་པའི་སྒྲས་བརྗོད་པར་བྱ་བ་ཉིད་གྲུབ་པ་ཡིན་ནོ་ཞེས་བྱ་བའི་དོན་ཏོ། །གལ་ཏེ་སྒྲའི་བརྗོད་པར་བྱ་བའི་དོན་ནི་ངེས་པ་ཁོ་ན་ཡིན་གྱི། ཐམས་ཅད་ནི་མ་ཡིན་པ་མ་ཡིན་ནམ་སྙམ་ན། སྒྲ་ནི་ཞེས་གསུངས་སོ། །དེ་ཞེས་བྱ་བ་འདོད་པ་ཙམ་གྱིས་འཇུག་པའོ། །ཅི་ལྟར་

เล่ม ๑๘๖ · หน้า 74a

འདོད་པས་འཇུག་པ་ཡིན་སྙམ་ན། དངོས་རྣམས་ཞེས་གསུངས་སོ། །དེས་ན་ཕྱོགས་འགའ་ཞིག་ཏུ་དངོས་པོའི་རྣམ་པར་རྟོག་པའི་ཡུལ་རུང་བ་ཉིད་ནི་དངོས་པོ་ཉིད་མ་ཡིན་ནོ་ཞེས་དགོངས་པའོ། །འོ་ན་ཅི་ལྟར་དེ་རུང་བ་ཉིད་ཅེས་བརྗོད་སྙམ་ན། བརྡ་ལ་མི་མཐུན་མེད་པ་ནི་ཞེས་

གསུངས་སོ། །གལ་ཏེ་སྒྲ་འདོད་པ་ཙམ་གྱིས་འཇུག་པ་ཡིན་ནོ། །ཅི་ལྟར་རྗེས་སུ་འབྲེལ་པ་ཡིན་སྙམ་ན། འདོད་པ་ཙམ་གྱིས་ཞེས་བྱ་བ་སྟེ་འདིས་ནི་རྣམ་པར་རྟོག་པར་ཡང་འདོད་པ་ཙམ་ལས་འགྱུར་བ་ཡིན་གྱི་དངོས་པོ་ལས་ངེས་པ་ནི་མ་ཡིན་ནོ་ཞེས་བརྗོད་པ་ཡིན་ནོ། །གལ་ཏེ་དོན་མེད་ཀྱང་འདོད་

པས་སྤྲུལ་པ་སྲིད་པ་ན་ཅི་ལྟར་དེ་ཉིད་དོན་ཙམ་དང་རྗེས་སུ་འབྲེལ་པ་ཡིན་ཞེས་བརྗོད་སྙམ་ན། དོན་ཙམ་ལ་ཡང་ཞེས་སྨོས་སོ། །དོན་གྱི་ཁྱད་པར་དུ་མ་ཟད་དེ་དོན་ཙམ་ལ་ཡང་ལྟོས་པ་མེད་ན་ནི་བརྡ་འདོད་པར་ཅི་ལྟར་འགྱུར་ཏེ། ཡུལ་མེད་པར་འདོད་པ་འཇུག་པ་ནི་མ་ཡིན་ནོ། །དེས་ན་བརྡ་འདོད་པ་ནི་དོན་

ཙམ་དང་རྗེས་སུ་འབྲེལ་པ་ཡིན་ནོ། །དེས་ན་གང་ཞིག་འདོད་པས་སྤྲུལ་པའི་སྒྲ་དང་རྣམ་པར་རྟོག་པ་གང་ཡིན་པ་དེ་དག་ནི་དོན་ཙམ་དང་རྗེས་སུ་འབྲེལ་པ་ཡིན་ནོ་ཞེས་གྲུབ་པོ། །གལ་ཏེ་རི་བོང་ཅན་ནི་ཟླ་བ་མ་ཡིན་ནོ་ཞེས་བྱ་བ་འདི་ཉིད་ལ་གྲགས་པས་གནོད་པ་ཡིན་གྱི། གཞན་ལ་ནི་མ་ཡིན་ནོ་སྙམ་

ན། ཕྱོགས་འདིས་ཞེས་བྱ་བ་སྟེ། རི་བོང་ཅན་ནི་ཟླ་བ་མ་ཡིན་ནོ་ཞེས་བརྗོད་པས་སོ། །དེ་བཞིན་དུ་རུང་བ་ཡང་དེ་ལྟ་ཡིན་ནོ་ཞེས་བྱ་བ་འདི་ག་ལས་ཤེ་ན། ངོ་བོ་ཉིད་ལས་མ་གཏོགས་པ་ཞེས་གསུངས་སོ། །དེ་ལ་ཞེས་བྱ་བ་ནི་དེ་ལྟར་གནས་པ་ནའོ། །རི་བོང་ཅན་ཡང་ཟླ་བའི་སྒྲས་བརྗོད་པར་

འདོད་པ་ཡིན་ནོ་ཞེས་ཕྱོགས་ཀྱི་ཆོས་བསྡུ་བ་ནི་རང་ཉིད་རྟོགས་པར་བྱ་བའོ། །འགའ་ཡང་ནི་སྒྲའོ། །གང་དུ་ཡང་ནི་དངོས་པོ་ལའོ། །དཔེ་ཉིད་ཅེས་བྱ་བ་ནི་དཔེར་ན་ཤིང་གི་སྒྲས་ཞེས་བྱ་བའོ། །དེ་ཡང་ཞེས་བྱ་བ་ནི་ཤིང་གི་སྒྲས་བརྗོད་པར་བྱ་བའོ། །བུམ་པ་ལ་སོགས་པ་ཡང་ངོ་། །སྤོང་བ་

ནི་ཤིང་གི་སྒྲས་བརྗོད་པར་བྱ་བ་མ་ཡིན་ནོ་ཞེས་བྱ་བའོ། །འོན་ཏེ་གཞན་རྗོད་པར་བྱེད་པ་ལས་གཞན་ལ་མི་འཇུག་གོ། །དེས་ན་དེ་བརྗོད་པར་རུང་བ་ཉིད་བསྒྲུབས་པས་ཅི་ཞིག་བྱ་ཞེ་ན། དེས་ན་ཞེས་བྱ་བ་སྟེ་གཞན་རྗོད་པར་བྱེད་པས་སོ། །དེ་ལྟ་ན་ཡང་ནི་འདིའི་རྗོད་པར་བྱེད་པ་ཉིད་མ་ཡིན་

เล่ม ๑๘๖ · หน้า 74b

ནོ་ཞེ་ན། བརྗོད་བྱ་རྗོད་བྱེད་ཀྱི་ཞེས་གསུངས་སོ། །འདིར་ཞེས་བྱ་བ་གྲགས་པས་གནོད་པའི་དཔེ་ལའོ། །རིགས་པ་འདིས་ཞེས་བྱ་བ་ནི། བརྗོད་མ་ཐག་པའི་རྗེས་སུ་དཔག་པས་སོ། །འདི་ལ་ནི་ཞེས་བྱ་བ་ནི་ཐམས་ཅད་ལའོ། །འདི་ཡང་སྔར་བརྗོད་ཟིན་པ་ཉིད་ཡིན་ནོ་ཞེས་གསུངས་པ་ནི། འདི་ནི་

ཞེས་བྱ་བའོ། །གལ་ཏེ་ད་ལྟར་བུམ་པ་འདི་ལ་ཟླ་བའི་སྒྲས་བརྗོད་པར་བྱ་བ་ཉིད་དུ་སྣང་བར་བྱེད་དོ་ཞེས་ཕ་རོལ་པོ་བརྗོད་ན་ནི་དེའི་ཚེ་གྲུབ་པ་ལ་སྒྲུབ་པ་ཡིན་ཏེ། ད་ལྟར་ནི་སྒྲ་དེས་བརྗོད་པར་བྱ་བ་ཉིད་དུ་མི་སྣང་བར་ནི་འདོད་པའི་ཕྱིར་རོ། །གཞན་ལའམ་ད་ལྟར་ཡང་མ་ཡིན་ནོ་ཞེས་འབྲེལ་ཏོ། །

ལན་ནི་བརྗོད་པ་དེ་ཐམས་ཅད་ནི་མ་ཡིན་ནོ། །ཅིའི་ཕྱིར་ཞེ་ན། འདོད་པ་ཙམ་གྱིས་ཞེས་བྱ་བའོ། །ཅི་སྟེ་མི་སྲིད་དེ་སྲིད་པ་ཁོ་ན་སྟེ་གཞན་ལ་ཡང་དེས་བརྗོད་པར་བྱ་བ་ཉིད་དུ་སྣང་ཞིང་། ད་ལྟར་ཡང་རུང་བ་ཉིད་ཡིན་ནོ་ཞེས་བྱ་བར་རོ། །འོན་ཏེ་སྒྲ་རྣམས་དོན་ལ་ངེས་པ་ཡིན་པའི་ཕྱིར་གཞན་དུ་མི་

སྲིད་དོ་སྙམ་ན། ཡུལ་དང་ཞེས་བྱ་བའོ། །ཉེས་པ་མེད་དོ་ཞེས་བྱ་བ་ནི་འདི་ནི་མངོན་སུམ་གྱིས་བསལ་བ་ཡིན་གྱི་གྲགས་པས་བསལ་བ་ནི་མ་ཡིན་ནོ་ཞེས་བྱ་བའོ། །གལ་ཏེ་རིག་བྱེད་པའི་སྒྲ་རྣམས་དོན་ངེས་པ་ལ་འཇུག་པ་ཅན་ཁོ་ན་ཡིན་ནམ། དེས་ན་ཅི་ལྟར་དོན་གཞན་འགོག་པ་གྲགས་

པས་བསལ་བར་འགྱུར་སྙམ་ན། མེ་ལ་སྦྱིན་སྲེག་བྱའོ་ཞེས་བྱ་བའི་ངག་འདིའི་དོན་འདི་ཡིན་པ་དཔྱོད་པ་པ་གང་གིས་འགོག་པར་བྱེད་པའི་དཔྱོད་པ་པ་དེ་དོན་གཞན་དུ་རུང་བ་ཉིད་ཀྱིས་གནོད་དོ། །ཅི་ལྟར་ཞེ་ན། གྲགས་པས་གནོད་པ་ཉིད་ཀྱིས་ཏེ། མངོན་སུམ་མ་ཡིན་པས་གནོད་

པའི་ཕྱིར་རོ། །འོ་ན་གང་གི་ཚེ་མངོན་སུམ་གྱིས་གནོད་སྙམ་ན། གལ་ཏེ་ཞེས་བྱ་བའོ། །མེ་ལ་སྦྱིན་སྲེག་ལ་སོགས་པའི་སྒྲ་ལས་མེ་ལ་སྦྱིན་སྲེག་ལ་སོགས་པའི་དོན་ཡིན་པ་མངོན་སུམ་ཡིན་པའི་ཕྱིར་རོ། །གཞན་དུ་ཞེས་བྱ་བ་ནི་གང་གི་ཚེ་ད་ལྟར་མི་བརྗོད་པ་དེའི་ཚེ་ནི་མངོན་སུམ་གྱིས་གནོད་པ་

ག་ལ་ཡོད་དེ། གྲགས་པས་བསལ་བ་ཁོ་ན་ཡིན་ནོ་ཞེས་བྱ་བའི་དོན་ཏོ། །འདིར་ནི་ཞེས་བྱ་བ་ནི་རུང་བ་ཉིད་ཀྱིས་གནོད་པ་ལའོ། །འོན་ཏེ་བརྡ་ལས་ངེས་པ་མེད་པ་ཡིན་ནོ་སྙམ་ན། ཐ་སྙད་ཀྱི་དོན་ཅན་གྱི་ཞེས་སྨོས་སོ། །མ་མཐོང་བ་ལ་ཅི་སྟེ་མི་རིགས་སྙམ་ན། དབང་པོ་ལས་

เล่ม ๑๘๖ · หน้า 75a

ཞེས་སྨོས་སོ། །ལུང་ལས་དོན་རྟོགས་པར་བྱས་ནས་དེ་ལ་བརྡ་བྱེད་པ་ཡིན་ནོ་སྙམ་ན། ལུང་ཙམ་གཅིག་པུ་ཞེས་བྱ་བའོ། །ལུང་ལས་དོན་རྟོགས་པ་དེ་ལ་བརྡ་བྱེད་ཅིང་། བརྡ་ལས་དོན་དེ་རྟོགས་པའི་ཕྱིར་རོ་ཕན་ཚུན་བརྟེན་པ་ཡིན་ནོ། །གང་གིས་གྲུབ་སྟེ་གང་གིས་ངེས།

རང་བཞིན་གྱིས་དོན་ངེས་པ་ཅན་ཉིད་ལ་ཚད་མ་ཅི་ཡང་མེད་དོ་ཞེས་བྱ་བའི་དོན་ཏོ། །གཞན་དུ་ཡང་བརྡ་བྱེད་པ་སྲེད་པ་ཁོ་ན་ཡིན་ཏེ། དེས་ན་བརྡ་གཞན་དུ་བྱེད་པར་ཡང་ཞེས་ཅི་སྟེ་བརྗོད་སྙམ་ན། དེར་ཡང་ཞེས་སྨོས་ཏེ་དོན་ལ་ཡང་ངོ་། །མི་ཤེས་པ་དག་སྡང་བས་རིག་བྱེད་ཀྱི་ཚིག་ལ་བརྡ་བྱེད་

པའམ་ཉེ་བར་སྟོན་པར་འགྱུར་རོ། །ཡང་ན་ཤེས་པ་དག་ཉིད་སྙིང་རྗེས་སོ། །སོགས་པ་སྨོས་པས་ནི་བདག་ཉིད་ཆེན་པོར་བསྒྲུབ་པར་འདོད་པས། བྱེད་པའམ་ཉེ་བར་སྟོན་པར་འགྱུར་རོ། །དེ་ལྟ་ན་ཡང་ཅི་ལྟར་རིག་བྱེད་ངོ་བོ་ཉིད་ཀྱིས་དོན་དང་ལྡན་པར་ངེས། ངོ་བོ་ཉིད་ཀྱིས་དོན་ཡོད་པ་མ་ཡིན་པ་ཉིད་

བརྗོད་པ་ནི་ཅི་ལྟར་ཞེས་བྱ་བའོ། །གལ་ཏེ་བརྡ་ལས་ཁྱི་ཤ་ཟ་བ་ལ་སོགས་པའི་དོན་དུ་འགྱུར་མོད། ངོ་བོ་ཉིད་ཀྱིས་དེ་ལྟ་བུ་ནི་མ་ཡིན་ནོ་ཞེ་ན། དོན་འདི་ཞེས་གསུངས་སོ། །ཅིའི་ཕྱིར་ཞེ་ན། དོན་དེ་ནི་ཞེས་བྱ་བའོ། །འཇིག་རྟེན་གྱི་རྗེས་སུ་འབྲངས་པ་ཉིད་ཀྱིས་རིག་བྱེད་དོན་ངེས་པ་ཡིན་ནོ་ཞེ་ན།

འཇིག་རྟེན་ན་ནི་ཞེས་གསུངས་སོ། །སྒྲ་རྣམས་ཀྱི་དོན་སྣ་ཚོགས་པར་གྱུར་པར་མཐོང་ངོ་། །ཅི་ལྟར་ཞེ་ན། ཡུལ་དང་ཞེས་ཏེ། ཡུལ་གྱི་དབྱེ་བས་ནི་ཙའུ་རའི་སྒྲ་གཅིག་དུ་མ་ཉིད་དོ། །དུས་ཀྱི་དབྱེ་བས་ནི་གོའི་སྒྲའོ། །སོགས་པའི་སྒྲས་ནི་སེནྡ་པའི་སྒྲ་སྐབས་ཀྱི་དབྱེ་བས་དོན་དུ་མ་ལ་འཇུག་གོ། །

དེས་ན་འཇིག་རྟེན་གྱི་རྗེས་སུ་འབྲངས་ནས་རིག་བྱེད་དོན་ངེས་པར་ཅི་ལྟར་འགྱུར། འོན་ཏེ་ཡུལ་དང་དུས་ཁྱབ་པའི་དོན་ལ་ཡང་སྒྲ་ལས་ངེས་པ་ཡོད་པ་ཉིད་དོ། །རང་གི་ངོ་བོས་དོན་དང་འབྲེལ་པའི་ཕྱིར་རོ་ཞེ་ན། འདིར་ནི་ཞེས་བྱ་བའོ། །ཅིའི་ཕྱིར་ངེས་པ་མེད་སྙམ་པའི་དོགས་པ་སེལ་བས་

ཕྱེད་ཕྱི་མ་རྣམ་པར་འབྲེལ་བ་ནི། ཡུལ་དང་ཞེས་སོ། །ཡུལ་ཁྱབ་པའི་དོན་དེར་ཡང་ངོ་། །འོན་ཏེ་ཉེ་བར་བསྟན་པ་བརྒྱུད་པ་ལས་ངེས་པ་ཡིན་ནོ་ཞེ་ན། ཉེ་བར་བསྟན་པ་ཞེས་བྱ་བའོ། །གང་གི་ཕྱིར་འཇིག་རྟེན་ན་དེ་ལྟར་སྲིད་པའི་རྒྱུ་དེས་ན། གཞན་དུ་དོན་ཕྱིན་ཅི་ལོག་ཏུ་བརྡ་བྱེད་པར་འགྱུར་རོ། །ཅིའི་དོན་

เล่ม ๑๘๖ · หน้า 75b

དུ་སྙམ་ན། དེའི་མིས་ཞེས་བྱ་བ་སྟེ་འདི་ནི་སྡང་བས་ཞེས་བྱ་བ་དེའི་རྣམ་པར་འགྲེལ་པའོ། །ཡང་ན་དབང་པོ་ལས་འདས་པའི་དོན་མཐོང་བ་ཉིད་ཡུལ་དང་དུས་ལ་སོགས་པར་བརྡ་བྱེད་པའམ་ཉེ་བར་སྟོན་པར་འགྱུར་རོ་ཞེས་འབྲེལ་ཏོ། །ཅིའི་དོན་དུ་སྙམ་ན། སྔོན་གྱི་ཞེས་བྱ་བ་སྟེ། སྔར་བརྡའམ་

ཉེ་བར་བསྟན་པ་ལས་དོན་དུ་གྱུར་པ་གང་ཡིན་པ་དེར་འཛིན་པ་དེས་བྱས་པའི་སླུ་བ་དེ་སྤང་བའི་ཕྱིར་རོ། །འདི་ནི་བརྩེ་བས་བྱ་བ་དེའི་རྣམ་པར་འགྲེལ་པའོ། །དེའི་ཕྱིར་དབང་པོ་ལས་འདས་པ་ལ་བརྡ་འགལ་བ་མེད་དོ། །སྔར་ནི་ད་ལྟར་བའི་དུས་སུ་ཁྱི་ཤ་ལ་སོགས་པའི་དོན་དུ་སྣང་བ་མེ་ལ་སྦྱིན་

སྲེག་ལ་སོགས་པའི་འདོད་དོན་ཡིན་པ་མངོན་སུམ་གྱིས་གནོད་པ་ཡིན་ནོ་ཞེས་ཁས་བླངས་ནས་བརྗོད་པ་ཡིན་ནོ། །དེ་ནི་དེ་ལ་མངོན་སུམ་གྱིས་གནོད་པ་མེད་དོ་ཞེས་བརྗོད་པ་ནི། ཡང་ན་ཞེས་བྱ་བའོ། །དེ་ལས་ཏེ་ད་ལྟར་གྱི་དུས་ལ་ཡང་ངོ་། །རྗེས་སུ་དཔག་པ་མེད་པར་ནི་ཟླ་བའི་སྒྲ་ལས་

རྟོགས་པ་མ་ཡིན་ཏེ། དེས་ན་ཟླ་བ་མ་ཡིན་པ་སྤོང་བ་མངོན་སུམ་ལས་འགྱུར་ཞེས་བྱ་བའི་དོན་ཏོ། །ཤེས་པ་གཞན་གྱིས་དམིགས་པས་མངོན་སུམ་ཡིན་ན་ཡང་འདིའི་གཞུང་ལ་གནོད་དོ་ཞེས་རྗེས་སུ་འཇུག་གོ། །ཅི་ལྟར་ན་གཉི་ག་ལྟར་ཡང་གཞུང་ལ་གནོད་སྙམ་ན། བློ་ཞེས་སྨོས་སོ། །

རིག་བྱེད་ལས་སྐྱེས་པའི་རྟོགས་པ་མངོན་སུམ་ཉིད་དུ་ཁས་ལེན་ན་ཡང་གཞན་དུ་ཡང་སྟེ་དུ་བ་ལས་མེ་རྟོགས་པར་ཡང་མངོན་སུམ་ཉིད་དུ་བརྗོད་པར་བྱའོ། །བརྗོད་པའི་རྣམ་པ་ཉིད་བསྟན་པ་ནི། དུ་བ་ལས་ཞེས་བྱ་བའོ། །མེད་པར་འགྱུར་བའི་ཕྱིར་སྒྲ་ལས་བྱུང་བའི་རྟོགས་པ་མངོན་སུམ་ཡིན་

ནོ་ཞེས་སྐབས་ཡིན་ཏེ། དུ་བ་ལས་མེ་རྟོགས་པ་རྗེས་སུ་དཔག་པ་ཁོ་ན་ཡིན་པ་དེ་བས་མངོན་སུམ་མ་ཡིན་ནོ་ཞེས་གཞན་སེམས་པའོ། །ལན་ནི་གློ་བུར་དུ་ཞེས་བྱ་བ་སྟེ་འབྲེལ་པ་འཛིན་པ་མེད་པ་ཁོ་ནར་སྔར་ལྷན་ཅིག་རྒྱུ་བ་མཐོང་བ་ཙམ་ལས་དུ་བ་ལས་མེ་རྟོགས་པའི་སྐྱེས་བུ་ལ་ཡང་རྟོགས་པ་དེ་ལྟར་

འགྱུར་ཏེ། དེས་ན་རྗེས་སུ་དཔག་པའི་རང་བཞིན་མེད་པ་ནི་དུ་བ་ལས་མེ་གློ་བུར་དུ་རྟོགས་པ་ལ་ཡང་ཡོད་པ་ཉིད་དེ། དེས་ན་མངོན་སུམ་ཅི་སྟེ་མ་ཡིན། དེར་ཞེས་བྱ་བ་ནི་དུ་བ་ལས་མེ་རྟོགས་པར་བྱ་བ་ལའོ། །ཤེས་པ་འདི་ནི་སྔར་གྱི་མཚམས་སྦྱོར་བའི་སྟོབས་ལས་སྐྱེས་པའི་ཕྱིར་ན་མངོན་

เล่ม ๑๘๖ · หน้า 76a

སུམ་མ་ཡིན་ནོ་ཞེས་སེམས་པའོ། །ལན་ནི་འདི་ལ་ཡང་ཞེས་བྱ་བ་སྟེ་སྒྲ་ལས་བྱུང་བའི་རྟོགས་པ་བྱ་བ་ལ་ཡང་ངོ་། །བརྡའི་དུས་སུ་མཚམས་སྦྱོར་བ་ཡོད་པར་འགྱུར་བ་ཡིན་ནོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་འདིར་བརྡའི་དུས་ཀྱི་མཚམས་སྦྱོར་བ་མི་འདོད་ན། དེའི་

ཚེ་བཤད་པའི་རྗེས་སུ་མ་འབྲངས་པའི་སྐྱེས་བུ་ལ་ཡང་རིག་བྱེད་ཀྱི་ཚིག་ལས་དོན་རྟོགས་པར་འགྱུར་རོ། །དེའི་ཕྱིར་འདི་ལ་ཡང་བརྡའི་དུས་ན་མཚམས་སྦྱོར་བ་ཡོད་པ་ཁོ་ནའོ། །དེས་ན་རྟོགས་པ་འདི་ཡང་དོན་ལ་མངོན་སུམ་མ་ཡིན་ཏེ་རྗེས་སུ་དཔག་པ་བཞིན་ནོ། །གལ་ཏེ་དེ་ལྟ་ན་ཡང་ཅི་ལྟར་

བརྡའི་དུས་སུ་མཚམས་སྦྱོར་བ་ཡོད་དོ། །དེ་ནི་འཆད་པའི་དུས་ན་ཡོད་པའི་ཕྱིར་རོ་ཞེ་ན། བཤད་པ་ཉིད་ཅེས་སྨོས་སོ། །འོན་ཏེ་ཞེས་བྱ་བ་ནི་དོགས་པའོ། །ལན་ནི་དེ་ནི་ཞེས་བྱ་བའོ། །གཞན་དུ་ཡང་ཞེས་བྱ་བ་ནི་གྲགས་པ་ལས་བཟློག་པར་རོ། །གལ་ཏེ་སྡང་བ་ལ་སོགས་པས་གཞན་དུ་འཆད་པར་

བྱེད་པ་ན་ཉན་པ་པོས་བརྩད་པ་ཅི་ལྟར་སྤང་བར་ནུས་ཤེ་ན། སྡེབ་སྦྱོར་བ་ཞེས་སྨོས་སོ། །དོགས་པ་ནི་སྦྱོར་བ་དམ་པ་ཞེས་བྱ་བའོ། །ལན་ནི་དེ་ལྟར་ཞེས་བྱ་བའོ། །གང་གི་ཕྱིར་དེ་ལྟ་ཡིན་པ་དེས་ན་སྒྲ་ལས་བྱུང་བའི་རྟོགས་པ་ནི་མངོན་སུམ་མ་ཡིན་ཞིང་དངོས་པོའི་སྟོབས་ཀྱིས་ཞུགས་པའི་

རྗེས་སུ་དཔག་པ་ཡང་མ་ཡིན་ཏེ་དེས་ན་འཐད་པ་དཀའ་བ་ཡིན་ཏེ། ཚད་མ་ཅན་མ་ཡིན་པ་དོན་བརྗོད་པ་ནི་ཤིན་ཏུ་དམ་པ་མ་ཡིན་པའི་ཕྱིར་རོ། །དེས་ན་ཞེས་བྱ་བ་ནི་རྟོགས་པ་པོའི་རྗེས་སུ་དཔག་པ་ཡིན་པས་ཏེ། དེ་ལྟ་མ་ཡིན་ན་རྗེས་དཔག་མེད་ཕྱིར་ཞེས་བྱ་བ་འགལ་བར་འགྱུར་རོ། །ཅི་ལྟར་

མངོན་སུམ་ཉིད་མ་ཡིན་ཞེ་ན། དེ་ལྟར་ཡང་ཞེས་བྱ་བའོ། །འོ་ན་རང་རིག་པར་སྨྲ་བའི་ལྟར་ན་མངོན་སུམ་གྱིས་གནོད་པ་ཡིན་ནོ་སྙམ་ན། དེ་ལ་ཞེས་བྱ་བའོ། །དགག་པའི་རྣམ་པ་བརྗོད་པ་ནི་རྟོགས་པ་ཉིད་ཅེས་བྱ་བའོ། །དེ་སྐད་བརྗོད་ན་ཅིར་འགྱུར་སྙམ་ན། དེ་སྐད་ཅེས་སྨོས་ཏེ། གལ་ཏེ་དེ་སྐད་

སྨྲ་ན་ནི་དེའི་མངོན་སུམ་གྱིས་གནོད་པར་འགྱུར་གྱི། གྲགས་པས་བསལ་བ་ནི་མ་ཡིན་ནོ་ཞེས་བྱ་བའི་དོན་ཏོ། །འོ་ན་འདི་ཅི་སྐད་སྨྲ་སྙམ་ན། གལ་ཏེ་ཞེས་བྱ་བ་སྟེ། གལ་ཏེ་ཟླ་བའི་སྒྲ་ལས་ཟླ་བར་རྟོགས་པ་ཡོད་མོད་ཀྱི་དེ་ལྟ་ན་ཡང་འདི་བདེན་པ་ནི་མ་ཡིན་ཏེ། ཟླ་བ་གཉིས་སུ་རྟོགས་པ་བཞིན་ནོ་

เล่ม ๑๘๖ · หน้า 76b

ཞེས་སྨྲ་སྟེ། དེ་སྐད་སྨྲ་བ་དེ་ལ་གྲགས་པས་གནོད་པ་བསྟན་པ་ཡིན་ནོ། །རྟོགས་པ་རྗེས་སུ་དཔག་པ་ཉིད་དུ་བསྟན་པས་བདེན་པ་ཉིད་དུ་བསྟན་པའི་ཕྱིར་རོ། །ཅི་ལྟར་ཞེ་ན། སྔ་མ་སྔ་མ་ཞེས་བྱ་བའོ། །གལ་ཏེ་ཞེས་བྱ་བ་ནས་རྗེས་དཔོག་འགྱུར་ཞེས་བྱ་བའི་བར་ནི་རྩོད་པའོ། །དེ་ཅི་ལྟར་རྗེས་སུ་དཔག་

པ་ཡིན་སྙམ་ན། སྔོན་གྱི་མཐོང་བ་དང་ཞེས་སྨོས་སོ། །ཅི་ལྟར་རང་བཞིན་གྱི་རྟགས་མ་ཡིན་ཞེ་ན། སྒྲ་ནི་དོན་གྱི་ཞེས་བྱ་བའོ། །རྗེས་སུ་དཔག་པ་ཉིད་གསལ་བར་བྱེད་པ་ནི་སྒྲ་དང་ཞེས་བྱ་བའོ། །རྗེས་དཔག་ཅེས་བྱ་བ་ནི་དོན་དམ་པའོ། །ལན་ནི་དེ་ལྟར་ན་ཞེས་བྱ་བའོ། །སྒྲ་རྗེས་སུ་དཔག་པའི་

རྒྱུ་ཡིན་ནའོ། །རྗེས་སུ་དཔག་པ་ལས་རྟོགས་པའི་ཕྱིར་ན། དེ་འབྲེལ་པ་དང་ལྡན་པར་འགྱུར་རོ། །གང་ཞིག་སྒྲ་དང་ལྡན་པའི་འབྲེལ་པ་དེ་ཡང་གང་ཡིན་ཞེ་ན། སྒྲ་དོན་གྱི་ཞེས་གསུངས་ཏེ་དོན་ནི་ཉེ་བར་ལེན་པ་ཡིན་ལ། སྒྲ་ནི་ཉེ་བར་ལེན་པ་ལས་བྱུང་བ་འབྲས་བུ་ཡིན་ནོ། །འོན་ཏེ་སྒྲ་དང་དོན་

དག་གིས་འབྲེལ་པ། རྒྱུ་དང་འབྲས་བུའི་དངོས་པོའི་མཚན་ཉིད་འདི་ལྟ་བུར་གྱུར་པ་ནི་རྟག་པ་མ་ཡིན་པ་ཁོ་ན་ཏེ། དེས་ན་སྒྲ་ལས་རྟོགས་པ་ནི། དངོས་ཁོ་ནར་རྗེས་སུ་དཔག་པ་ཡིན་པར་འགྱུར་རོ་སྙམ་ན། སྒྲ་ནི་ཞེས་བྱ་བའོ། །འོ་ན་ཅི་ལྟར་དེ་གཉིས་འབྲེལ་སྙམ་ན། དེས་ཞེས་སྨོས་ཏེ། བརྗོད་

པར་བྱ་བའི་དོན་གྱིས་མ་བསྐྱེད་པས་ནའོ། །འདིར་ནི་སྒྲ་དང་དོན་དག་ལའོ། །གཞན་དུ་སྟེ་དོན་དམ་པར་ནི་མ་ཡིན་ནོ། །ཅིའི་ཕྱིར་ཞེ་ན། འདོད་པས་ཞེས་གསུངས་སོ། །འོན་ཏེ་འབྲེལ་པ་མེད་མོད། དེ་ལྟ་ན་ཡང་སྒྲ་ལས་དོན་རྟོགས་པ་ནི་གདོན་མི་ཟ་བར་ཡོད་པ་ཡིན་ནོ་ཞེ་ན། གདོན་མི་ཟ་

བར་ཞེས་བྱ་བའོ། །འདི་ཞེས་བྱ་བ་ནི་སྒྲ་ལས་དོན་རྟོགས་པའོ། །འདི་ནི་བརྟགས་པའི་རྗེས་སུ་དཔག་པ་ཡིན་ནོ་ཞེས་བྱ་བའི་དོན་ཏོ། །གལ་ཏེ་འདི་འབྲས་བུའི་རྟགས་ཡིན་ན་འོ་ན་ཅི་ལྟར་ཞེས་བྱ་བ་ནི་འདྲི་བའོ། །ཉེ་བར་ལེན་པར་གྱུར་པའི་ཕྱི་རོལ་གྱི་དོན་གང་ཞིག་བརྡས་གསལ་བར་བྱས་པ་

དེ་ནི་དོན་དམ་པར་རྒྱུ་མ་ཡིན་ཏེ་ཞེས་འབྲེལ་ཏོ། །འོ་ན་ཅི་ལྟར་ཕྱི་དོན་སྒྲའི་ཉེ་བར་ལེན་པ་ཡིན་སྙམ་ན་འདོད་པས་དེ་ལྟར་ཏེ་ཉེ་བར་ལེན་པར་བྱེད་པའོ། །ཅིའི་ཕྱིར་དོན་དམ་པར་རྒྱུ་ཡིན་སྙམ་ན། གཞན་ཞེས་བྱ་བའོ། །མངོན་པར་འདོད་པའི་དོན་དེ་བརྗོད་པར་འདོད་པ་མེད་ཀྱང་སྒྲ་ཡོད་པའི་ཕྱིར་

เล่ม ๑๘๖ · หน้า 77a

རོ། །གང་གི་ཚེ་སྙམ་ན་གཞན་ཞེས་གསུངས་སོ། །བརྗོད་པར་འདོད་པ་མེད་པར་ཞེས་བྱ་བ་ནི་གང་གི་ཚེ་གོམས་པར་འདོད་པ་འབའ་ཞིག་གིས་ཡིན་པ་ནའང་། འདིས་ནི་རྒྱུད་པས་རྒྱུ་ཡིན་པ་སྤངས་པའི་ཕྱིར་ན་དངོས་སུ་རྒྱུ་ཡིན་པ་ནི་རྒྱང་རིང་པོར་བསྲིངས་པ་ཡིན་ནོ་ཞེས་བསྟན་

ཏོ། །འོན་ཏེ་དེ་མེད་པར་འབྱུང་ཡང་དེ་སྒྲའི་རྒྱུ་ནི་ཡིན་ནོ་སྙམ་ན། གང་ཞིག་ཅེས་བྱ་བའོ། །དེ་ལྟ་ན་ནི་ཐམས་ཅད་ཀྱང་ཐམས་ཅད་ཀྱི་རྒྱུར་འགྱུར་རོ་སྙམ་དུ་དགོངས་པའོ། །དེས་ན་འདི་ནི་དོན་དམ་པའི་འབྲས་བུའི་གཏན་ཚིགས་སུ་མི་རུང་ངོ་། །འོ་ན་ཅི་ལྟར་རང་བཞིན་གྱིས་གཏན་ཚིགས་ཡིན་

སྙམ་ན། དེའི་ཕྱིར་ཞེས་བྱ་བའོ། །དོན་འདི་ནིའོ། །བརྗོད་བྱ་ཡིན་པ་ནི་བསྒྲུབ་པར་བྱ་བའོ། །དེ་ཙམ་ལས་ནི་ཞེས་བྱ་བ་ནི། ཉེ་བར་ལེན་པ་ཉིད་དུ་འདོད་པ་ཙམ་ལས་བྱུང་བར་ཐོབ་པར་གྱུར་པའི་རང་བཞིན་ནི་བརྗོད་པར་བྱ་བ་ཉིད་ཡིན་གྱི་གཞན་ནི་མ་ཡིན་ནོ། །འདོད་པས་སྦྱར་བའི་རྒྱུ་ཉིད་

བརྗོད་པར་བྱ་བ་ཉིད་ཡིན་གྱི་གཞན་ནི་མ་ཡིན་ནོ། །དེ་ནི་རང་བཞིན་ཡིན་ནོ་ཞེས་བྱ་བའི་དོན་ཏོ། །ཉེ་བར་ལེན་པ་ཉིད་དུ་ཞེས་བྱ་བ་ནི། དེ་ལྟ་བུ་ཉིད་དུ་རྣམ་པར་གཞག་པ་ཉིད་བརྗོད་པར་བྱ་བ་ཡིན་གྱི། གཞན་ལ་ལྟོས་པ་ནི་མ་ཡིན་ནོ་ཞེས་བྱ་བའི་དོན་ཏོ། །འོ་ན་གྲགས་པ་གང་ཡིན་སྙམ་ན། དེས་ན་ཞེས་སྨོས་

སོ། །གལ་ཏེ་གྲགས་པ་ཐ་སྙད་སྤྱོད་པ་ཡིན་ན་ཅི་ལྟར་ན་འོ་ན་ཉེ་བར་ལེན་པ་ཡང་གྲགས་པ་ཡིན་ཞེ་ན། ཐ་སྙད་ཅེས་གསུངས་སོ། །གང་གི་ཕྱིར་དེ་ལྟར་ཡིན་པ་དེས་ན། བརྗོད་པར་བྱ་བ་ཉིད་ཀྱི་སྒྲུབ་པར་བྱེད་པ་ཉེ་བར་ལེན་པ་ཉིད་དུ་སྣང་བས་སོ། །དེ་ལྟ་མ་ཡིན་ན་བརྗོད་པར་བྱ་བ་མ་ཡིན་པ་གང་

ཞིག་ཡིན་སྙམ་ན། གལ་ཏེ་ཞེས་བྱ་བའོ། །དོན་དེ་མི་སྣང་བའི་ཕྱིར་རོ། །ཉེ་བར་ལེན་པ་དང་འབྲས་བུ་ཉིད་དུ་མི་སྣང་བ་འབའ་ཞིག་བརྗོད་བྱ་མ་ཡིན་པར་ནི་མ་ཟད་ཀྱི། འོན་ཀྱང་སྨྲ་བ་པོའི་རྒྱུད་ལ་ཡོད་པ་ཉེ་བར་ལེན་པའི་རྟོགས་པ་དང་། ཉན་པ་པོའི་རྒྱུད་ལ་ཡོད་པ་འབྲས་བུའི་རྟོགས་པ་གཉིས་

ལ་མི་སྣང་བ་གང་ཡིན་པ་དེ་ཡང་བརྗོད་པར་བྱ་བ་མ་ཡིན་ནོ་ཞེས་བརྗོད་པ་ནི། གལ་ཏེ་ཞེས་བྱ་བའོ། །གལ་ཏེ་ཞེས་བྱ་བ་ནི་གཞན་གྱིའོ། །གལ་ཏེ་འདོད་པ་ཡོད་ཀྱང་ཉེ་བར་ལེན་པ་དང་འབྲས་བུའི་ཤེས་པ་དག་ལ་དོན་མི་སྣང་བ་ཉིད་མ་ཡིན་ནམ་ཞེས་བྱ་བའོ། །ཅིའི་ཕྱིར་ཞེ་ན། ཕྱི་རོལ་

เล่ม ๑๘๖ · หน้า 77b

ཞེས་བྱ་བའོ། །དེ་ནི་ཕྱིའི་དོན་ཏོ། །བརྗོད་ཟིན་པ་ཉིད་དོ་ཞེས་བྱ་བ་ནི་གཞན་བརྗོད་པར་འདོད་པའམ་ཞེས་བྱ་བར་རོ། །ལན་ནི་མི་སྣང་བ་ཉིད་མ་ཡིན་ཏེ་འབྲེལ་ཏེ། །ཅི་ལྟར་ཞེ་ན། འདོད་པ་ཞེས་བྱ་བ་ནི། གང་གི་ཚེ་ཞེ་ན། གང་གི་ཚེ་ཞེས་སྨོས་སོ། །འོན་ཏེ་དེ་ལས་ཞེས་བྱ་བ་ནི། ཉེ་བར་ལེན་པ་དང་

འབྲས་བུའི་རྟོགས་པ་ལས་སྒྲ་ལས་རྟོགས་པ་པོ་ལ་ཕྱིའི་དོན་སྣང་བ་མེད་པའི་ཕྱིར་མི་སྣང་བ་ཉིད་དོ་ཞེས་དེ་ལྟར་བརྗོད་ན་ནི། །དེ་ལྟ་ན་ཞེས་བྱ་བ་ནི་ལན་ནོ། །དེ་ལ་ནི་རྗེས་སུ་དཔག་པ་ལའོ། །རྗེས་སུ་དཔག་པའི་རང་བཞིན་གྱི་རྣམ་པར་རྟོག་པ་དེ་ལས་ཀྱང་ངོ་། །དེ་སྐད་ཅེས་བྱ་བ་ནི་རྗེས་སུ་དཔག་པ་ནི་

ཕྱིའི་དོན་གྱི་ཡུལ་ཅན་ཡིན་ནོ་ཞེས་བརྗོད་ནའོ། །ལན་ནི་དེ་ལྟ་ཡིན་ན་ཞེས་བྱ་བའོ། །དེ་བཞིན་ཉིད་དོ་ཞེས་བྱ་བ་ནི། ཕྱིའི་དོན་ཉེ་བར་ལེན་པ་དང་འབྲས་བུ་ལ་སྣང་བ་ཡང་ངོ་ཞེས་བྱ་བའི་དོན་ཏོ། །དེའི་ཕྱིར་དོན་དམ་པར་མ་བཟུང་ཡང་ཕྱི་རོལ་ནི་ཤེས་པ་གཉིས་ཀྱིས་ངེས་པར་བྱ་བ་ཁོ་ནའོ་ཞེས་དགོངས་པའོ། །

གལ་ཏེ་རྗེས་སུ་དཔག་པ་བཞིན་དུ་ཉེ་བར་ལེན་པ་ལ་སོགས་པའི་ཤེས་པ་ལ་ཡང་ཕྱིའི་དོན་སྣང་ན་ཅིའི་ཕྱིར་དེ་ལས་དོན་མི་འཐོབ་སྙམ་ན། ཕྱི་རོལ་གྱི་ཞེས་བྱ་བའོ། །རྟོགས་པ་ནི་ཞེས་བྱ་བ་ནི་ཉེ་བར་ལེན་པ་དང་འབྲས་བུའི་ཤེས་པའི་རང་བཞིན་དག་གོ། །དེ་ལྟ་ན་འོ་ན་བརྗོད་བྱ་རྗོད་བྱེད་ཀྱི་དངོས་པོ་

མེད་པར་ཐལ་ལོ་སྙམ་ན། ཚད་མ་མ་ཡིན་པ་ཞེས་སྨོས་སོ། །དེ་ལྟ་བུ་ཉིད་དུ་ཞེས་བྱ་བ་ནི་ཚད་མ་མ་ཡིན་པའི་རང་བཞིན་ཉིད་དུ་ཞེས་བྱ་བ་ནི་རྟོགས་པ་ཚད་མའི་རང་བཞིན་མ་ཡིན་པ་ཉིད་དུའོ། །འདི་ཉིད་ཅེས་བྱ་བ་ནི་རུང་བ་ཉིད་སྒྲ་ལས་བྱུང་བའི་གྲགས་པའི་སྒྲར་བཞད་པ་ཡིན་ནོ་ཞེས་བྱ་བ་

འདི་ཉིད་ག་ལས་ཡིན་ཏེ། རུང་བ་ཉིད་སྟན་པར་བྱེད་པ་མེད་པའི་ཕྱིར་རོ་ཞེས་བསམས་པའོ། །བཤད་པ་མཛད་པས་སྨྲས་པའོ། །ཅི་ཞིག་སྨྲས་ཤེ་ན། གལ་ཏེ་མ་ལུས་པ་རུང་བ་ཉིད་ལས་བརྗོད་བྱར་མི་བཞེད་ན། དེའི་ཚེ་སློབ་དཔོན་ཕྱོགས་ཀྱི་གླང་པོ་དེས། གང་ཐུན་མོང་མ་ཡིན་པའི་ཕྱིར་

ཞེས་བྱ་བ་ལ་སོགས་པའི་སྒྲས་ཡོད་པ་ཉིད་ལ་སོགས་པ་བརྗོད་པར་བྱ་བ་ཉིད་ཀྱི་གནོད་བྱེད་ལ་ཐུན་མོང་མ་ཡིན་པ་ཉིད་དུ་བསྟན་པ་གང་ཡིན་པ་དེ་མི་འགྱུར་རོ། །དེའི་ཕྱིར་དོན་གྱིས་རུང་བ་ཉིད་བརྗོད་པར་བྱ་བར་བཞེད་པ་ཡིན་ནོ། །དེ་ཉིད་ཀྱི་ཕྱིར་རྣམ་འགྲེལ་མཛད་པས་བཤད་པ། འདིར་ནི་

เล่ม ๑๘๖ · หน้า 78a

ཞེས་བྱ་བ་ནི་བརྗོད་པར་བྱ་བ་མ་ཡིན་པ་ཉིད་བསྒྲུབ་པར་བྱ་བའོ། །འོ་ན་གང་གི་ཚེ་ཐུན་མོང་མ་ཡིན་པ་ཉིད་དུ་འགྱུར་སྙམ་ན། གང་གི་ཚེ་ཞེས་བྱ་བའོ། །ཐུན་མོང་མ་ཡིན་པ་ཉིད་དུ་འགྱུར་བ་ཉིད་དེ་ཞེས་རྗེས་སུ་འཇུག་གོ། །ཅིའི་ཕྱིར་ཞེ་ན། གང་ལ་ཡང་ཞེས་བྱ་བའོ། །རུང་བ་ཉིད་

ཀྱི་ཐམས་ཅད་ཟླ་བའི་སྒྲས་བརྗོད་པར་བྱ་བ་ཡིན་པའི་ཕྱིར་ཞེས་བྱ་བའི་དོན་ཏོ། །ཅི་ལྟར་ཐུན་མོང་མ་ཡིན་པ་ཉིད་དུ་བསྟན་སྙམ་ན། སློབ་དཔོན་གྱིས་ནི་ཞེས་བྱ་བའོ། །འདིའི་དོན་བརྗོད་པ་ནི་ཡུལ་གང་ལ་ཞེས་བྱ་བ་ནི། བརྗོད་པར་བྱ་བ་མ་ཡིན་པ་ཉིད་ལའོ། །རྗེས་སུ་དཔག་པ་ནི། ཡོད་པའི་ཕྱིར་ཞེས་

བྱ་བ་རྗོད་པར་བྱེད་པ་ཉིད་ལ་གནོད་པར་བྱེད་པའོ། །དེ་ཉིད་ཀྱི་ཕྱིར་ཞེས་བྱ་བ་ནི་ཐུན་མོང་མ་ཡིན་པ་ཉིད་ཀྱི་ཕྱིར་ཟློག་པའི་ཕྱོགས་སུ་གྱུར་པའི་རྗེས་སུ་དཔག་པ་དེ་མེད་དོ། །བརྗོད་པར་བྱ་བ་མེད་པ་གང་ལ་གནོད་པར་བྱེད་པ་ཡོད་པ་དེ་ནི་ཕྱོགས་མ་ཡིན་ནོ་ཞེས་སྦྱོར་རོ། །དེ་སྐད་དུ་ཞེས་བྱ་བ་ནི་རྗེས་སུ་དཔག་པ་

མེད་ལ་ཞེས་སོ། །འདི་ཞེས་བྱ་བ་ནི་སྒྲ་ལས་བྱུང་བའི་གྲགས་པའོ། །དེ་སྐད་དུ་གསུངས་པ་ནི། ངེས་པ་ཉིད་དུ་སྟོན་པ་ཡིན་ནོ་ཞེས་རྗེས་སུ་འཇུག་གོ། །ངེས་པ་ནི་ངེས་པར་བྱེད་པ་ཉིད་དོ། །ཅི་ལྟར་དགག་པར་མི་ནུས་སྙམ་ན། ཚད་མ་ཞེས་གསུངས་སོ། །ངེས་པར་བྱེད་པ་ཉིད་ཅི་ལྟར་ཞེ་ན། ངེས་པར་

བྱེད་པ་ཡིན་ན་ཞེས་བྱ་བའོ། །གལ་ཏེ་ངག་གཅིག་གིས་དུས་གཅིག་ཉིད་དུ་དོན་གཉིས་གཙོར་བརྗོད་པར་ནུས་སྙམ་ན། འདིར་ནི་ཞེས་སྨོས་སོ། །གང་ཡང་ཞེས་བྱ་བ་ལ་སོགས་པའི་ངག་ལའོ། །ཕྱི་མ་ཞེས་བྱ་བ་ནི་སྒྲ་ལས་བྱུང་བའི་གྲགས་པ་དང་ཞེས་བྱ་བ་ནི། སྔ་མ་སྟེ་གང་ལ་ཐུན་མོང་

མ་ཡིན་པའི་ཕྱིར་ཞེས་བྱ་བ་ལ་སོགས་པ་དང་བཅས་པས་ནི་བཟློག་པའི་ཚད་མ་མེད་པས་ངེས་པར་གསུངས་པ་ཡིན་ནོ་ཞེས་སྦྱོར་རོ། །སྔ་མ་གང་ལ་ཞེས་བྱ་བ་ལ་སོགས་པ་ཕྱི་མ་སྒྲ་ལས་བྱུང་བའི་གྲགས་པ་ཞེས་བྱ་བ་ལ་སོགས་པ་དང་ལྷན་ཅིག་པས་ནི་དགག་པར་མི་ནུས་པ་ཉིད་དུ་གསུངས་པ་ཡིན་

ནོ་ཞེས་སྦྱར་རོ། །དེའི་ཕྱིར་ཕྱི་མ་དང་སྔ་མ་འདི་གཉིས་ནི་ཅི་ལྟར་རིགས་པར་ཕྱི་མ་དང་སྔ་མའི་ཆའི་དོན་གང་ཡིན་པ་དགག་པར་མི་ནུས་པ་དང་། བཟློག་པའི་ཚད་མ་མེད་པས་ངེས་པ་ཉིད་ནི་དེ་ལྟར་ཡིན་པ་ལ། སྟོན་པར་བྱེད་པ་ཉིད་ཀྱིས་བྱེད་པ་འཇུག་པ་ཡིན་ནོ། །གང་གིས་འདི་ངག་

เล่ม ๑๘๖ · หน้า 78b

ཉིད་མ་ཡིན་ནོ་ཞེས་བྱ་བའི་ཉེས་པར་འགྱུར་བ་དུས་གཅིག་ཉིད་དུ་དོན་གཉིས་གཙོར་སྟོན་པར་བྱེད་པ་ནི་མ་ཡིན་ནོ། །འཆད་པ་ནི་གང་གི་ཚེ་ཞེས་བྱ་བའོ། །བརྗོད་མ་ཐག་པའི་རྩོད་པ་ཉིད་བསལ་བར་བྱ་བའི་ཕྱིར་ཟློས་པ་ནི། གལ་ཏེ་ཞེས་བྱ་བའོ། །གང་ཞིག་རྣམ་པར་རྟོག་པ་ལ་གནས་པའི་རང་

བཞིན་དེ་ནི་རང་རིག་པས་ན་མངོན་སུམ་ཡིན་ནོ། །དེས་ན་ཞེས་བྱ་བ་ནི་རང་རིག་པའི་མངོན་སུམ་ཡིན་པས་ནའོ། །རྣམ་འགྲེལ་རྣམ་པར་འགྲེལ་པས་ལན་འདེབས་པ་ནི་མ་ཡིན་ཏེ་ཞེས་བྱ་བའོ། །ལྷག་པར་ཞེན་པར་བྱ་བ་ནི་རང་རིག་པར་བྱ་བ་མ་ཡིན་ཏེ། ཕྱི་རོལ་ཉིད་ཡིན་པའི་ཕྱིར་རོ་ཞེས་བྱ་བའི་

དོན་ཏོ། །ཅིའི་ཕྱིར་ཞེ་ན། སྒྲའི་དོན་ནི་ཞེས་བྱ་བའོ། །རུང་བ་ཉིད་ནི་མངོན་སུམ་མ་ཡིན་ཏེ། རྣམ་པར་རྟོག་པའི་ཡུལ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །མངོན་སུམ་གྱི་ཡུལ་མ་ཡིན་པ་ཉིད་གསལ་བར་བྱེད་པ་ནི་སྒྲ་ལས་བྱུང་བའི་ཞེས་བྱ་བའོ། །སྒྲ་ལས་བྱུང་བའི་དོན་གྱི་རུང་བ་ཉིད་

སྒྲའི་དོན་དུ་ངེས་པ་ནི། གལ་ཏེ་སྣང་བ་ཡིན་དུ་ཆུག་ཀྱང་ཞེས་འབྲེལ་ཏོ། །སྣང་བ་ནི་རང་རིག་པས་རིག་པར་བྱ་བའོ། །དེ་གང་ལས་ཤེ་ན། ཐ་སྙད་ཀྱི་རྒྱུ་ཉིད་ལའོ། །འདི་ནི་ཁས་བླངས་ནས་བརྗོད་པ་ཡིན་ནོ། །དེ་ལྟ་ན་ཡང་རང་རིག་པར་བྱ་བའི་རུང་བ་ཉིད་དེ་ལས་ཐ་སྙད་དུ་བྱ་བ་མ་ཡིན་

པ་དེ་བས་ན། མངོན་སུམ་གྱི་ཡུལ་ཉིད་དུ་རུང་བ་ཉིད་བཀག་པ་དང་སྟེ། རུང་བ་ཉིད་མངོན་སུམ་གྱི་ཡུལ་མ་ཡིན་ནོ་ཞེས་བྱ་བའི་དོན་ཏོ། །དཔེར་ན་སྐད་ཅིག་མ་སྣང་བ་ཡིན་ཡང་དེ་ལས་ཐ་སྙད་མི་བྱེད་པའི་ཕྱིར་དེ་མངོན་སུམ་ཉིད་མ་ཡིན་པ་བཞིན་ནོ། །སྣང་བ་སྒྲ་ལས་བྱུང་བའི་གྲགས་པ་དོན་གྱི་

སྒྲ་དང་འབྲེལ་པ་ཅན་ཉིད་ཀྱང་མངོན་སུམ་དུ་བྱ་བར་མི་ནུས་སོ་ཞེས་འབྲེལ་ཏོ། །ཅིའི་ཕྱིར་མངོན་སུམ་དུ་བྱ་བར་མི་ནུས་ཤེ་ན། འབྲེལ་བ་ནི་ཞེས་སྨོས་སོ། །ཅིའི་ཕྱིར་ཞེ་ན། སྒྲ་ནི་ཞེས་བྱ་བའོ། །འདི་ན་རང་གི་མཚན་ཉིད་ཀྱང་བརྗོད་པར་བྱ་བ་དང་རྗོད་པར་བྱེད་པ་ཉིད་དུ་ཁས་བླངས་ནས་བརྗོད་པར་

ཟད་ཀྱི་དོན་དམ་པར་ནི་མ་ཡིན་ནོ། །འདི་ལས་ཅིར་འགྱུར་ཞེ་ན། འདི་དག་ནི་ཞེས་གསུངས་སོ། །ཉན་པའི་ཤེས་པ་དང་རྣམ་པར་རྟོག་པའི་ཤེས་པ་དག་གམ། ཉན་པའི་ཤེས་པ་དང་མིག་གི་ཤེས་པ་དག་གོ། །དེས་ན་འབྲེལ་པ་ནི་མངོན་སུམ་མ་ཡིན་ནོ། །གལ་ཏེ་ཞེས་བྱ་བ་ལ་སོགས་པ་ནི་

เล่ม ๑๘๖ · หน้า 79a

གཞན་གྱིའོ། །དེར་ཞེས་བྱ་བ་ནི་འབྲེལ་པ་འཛིན་པར་རོ། །དྲི་དང་དྲི་དང་ལྡན་པ་ལ་སོགས་པ་ལ་ཡང་དེ་བཞིན་དུ་ཅི་ལྟར་དེ་ལྟར་འགྱུར་ཞེས་རྗེས་སུ་འཇུག་གོ། །ལན་ནི་དེར་ཡང་ཞེས་བྱ་བ་སྟེ་མེ་དང་དུ་བ་ལ་སོགས་པ་ལ་ཡང་མངོན་སུམ་གྱིས་འབྲེལ་པ་མི་རྟོགས་པའི་སྐྱོན་འདིར་རོ། །

དེ་ཞེས་བྱ་བ་མངོན་སུམ་གྱི་སྒྲ་དོན་གྱི་འབྲེལ་པ་མི་རྟོགས་པའོ། །མེ་དང་དུ་བ་ལ་སོགས་པ་ལ་ནི་དབང་པོའི་ཤེས་པས་གཟུང་བ་ཡོད་པའི་ཕྱིར་འབྲེལ་པ་འཛིན་པ་འཐད་པ་ཡིན་ནོ་ཞེས་བརྗོད་པ་ནི། དེ་དག་ནི་ཞེས་བྱ་བའོ། །བརྗོད་པར་བྱ་བ་ཉིད་ལ་སོགས་པ་ལ་ཡང་དེ་བཞིན་དུ་འགྱུར་རོ་སྙམ་ན། འདི་ལ་

ནི་ཞེས་སྨོས་སོ། །མ་བཟུང་བའི་ཕྱིར་སྒྲ་དང་འབྲེལ་པར་ཅི་ལྟར་འཛིན་སྙམ་དུ་དགོངས་པའོ། །འོན་ཏེ་སྒྲ་དང་བུམ་པ་ལ་སོགས་པའི་དོན་དབང་པོའི་ཤེས་པས་འཛིན་པ་ཡིན་ནོ། །དེས་ན་མེ་དང་དུ་བ་བཞིན་དུ་དེ་དག་གི་འབྲེལ་པ་ཡང་མངོན་སུམ་གྱིས་འཛིན་པ་ཡིན་ནོ་སྙམ་ན་མ་ཡིན་ཏེ། ཅི་ལྟར་མེ་

དང་དུ་བ་དག་དོན་དམ་པར་འབྲེལ་བ་མེད་ཀྱང་འཛིན་པ་ལྟར་སྒྲ་དང་དོན་དག་ནི་མ་ཡིན་ཏེ། དེ་ལྟར་ཡང་སྟོན་པར་འགྱུར་རོ། །དོན་དམ་པར་ན་འགར་ཡང་འབྲེལ་པ་འཛིན་པ་ཡོད་པ་མ་ཡིན་ནོ་ཞེས་བརྗོད་པ་ནི་ཁྱབ་པར་འབྲེལ་པ་ཡང་ཞེས་བྱ་བའོ། །འོ་ན་མི་སླུ་བའི་ཐ་སྙད་ཅི་ལྟར་ཞེ་ན། སྒྲའི་ཞེས་སྨོས་

སོ། །དེས་ན་ནི་མི་སྣང་བ་མེད་པས་སོ། །འདི་ནི་ཞེས་བྱ་བ་ནི་འབྲེལ་པའོ། །དེའི་ཕྱིར་སྣང་བའི་སྒྲ་དང་འབྲེལ་པ་ནི་མངོན་སུམ་དུ་བྱ་བ་མི་ནུས། རུང་བ་ཉིད་ཀྱང་མངོན་སུམ་དུ་བྱ་བར་མི་ནུས་སོ་ཞེས་གནས་སོ། །གལ་ཏེ་ཞེས་བྱ་བ་ནི་དོགས་པ་བསུ་བའོ། །གཏན་ཚིགས་མེད་པའི་ཕྱིར་རྗེས་སུ་དཔག་

པ་གཞན་གྱིས་གནོད་པ་ཅི་ལྟར་འགྱུར་ཞེ་ན། གལ་ཏེ་ཡོད་པའི་ཞེས་བྱ་བའོ། །རུང་བ་ཉིད་འགོག་པའི་རྗེས་སུ་དཔག་པ་ཐམས་ཅད་ཐུན་མོང་མ་ཡིན་ནོ་ཞེས་བསྟན་པའི་ཕྱིར་མ་ལུས་པ་ཁྱབ་པའི་ཡོད་པ་ཉིད་ཐུན་མོང་མ་ཡིན་པ་ཡིན་ནོ་ཞེས་བརྗོད་པ་ནི་གང་ལ་ཞེས་བྱ་བའོ། །སྟོབས་དང་ལྡན་

པའི་ཕྱོགས་ནི་ཡོད་པའི་ཕྱིར་ཞེས་བྱ་བའི་གཏན་ཚིགས་ཏེ། དེ་བཟློག་པར་ནུས་པ་སྒྲ་ལས་བྱུང་བའི་གྲགས་པ་གནོད་པར་བྱེད་པའོ། །དེ་དོན་དུ་གཉེར་བ་ནི་བཟློག་པ་དོན་དུ་གཉེར་བ་ནི། དེ་ལས་གཞན་ཁྱབ་པ་མ་ཡིན་པ་ལ་བཟོད་པ་མ་ཡིན་ནོ། །དེ་ཉིད་ཀྱི་ཕྱིར་ཞེས་བྱ་བ་ནི་གཏན་

เล่ม ๑๘๖ · หน้า 79b

ཚིགས་མཐའ་དག་ཐུན་མོང་མ་ཡིན་པར་བསྟན་པའི་དོན་ཡིན་པའི་ཕྱིར་རོ། །དེ་ལྟ་མ་ཡིན་ན་ཞེས་བྱ་བ་ནི་གཏན་ཚིགས་མཐའ་དག་ཐུན་མོང་མ་ཡིན་པ་ཉིད་དུ་མ་བསྟན་ནའོ། །གཞན་དུ་ན་ཞེས་བྱ་བ་ཉེ་བར་འགོད་ནའོ། །ཚད་མས་གནོད་པ་མཉན་བྱ་མ་ཡིན་པ་ཉིད་ལའོ། །ལན་ནི་འདིར་ཡང་ཞེས་བྱ་བ་

སྟེ། ཚད་མས་གནོད་པ་རི་བོང་ཅན་ནི་ཟླ་བ་མ་ཡིན་ནོ་ཞེས་བྱ་བར་ཡང་ངོ་། །དེ་ལྟར་ན་ནི་གཏན་ཚིགས་མི་སྲིད་པའོ། །འདི་ནི་སྒྲ་ལས་བྱུང་བའི་གྲགས་པའོ། །ཐལ་བར་འགྱུར་རོ་ཞེས་བྱ་བ་ནི་གཏན་ཚིགས་ཉེ་བར་འགོད་པ་སྟེ། མཉན་པར་བྱ་བ་ཉིད་ཀྱང་དགག་པར་མི་ནུས་པར་བསྟན་པར་

འོས་པ་ཡིན་ནོ་ཞེས་བསམས་པའོ། །གནོད་པར་བྱེད་པ་མེད་པ་ལ་ལྟོས་པ་ནི་དངོས་པོ་མ་ཡིན་པ་ཉིད་ཡིན་ཏེ། དངོས་པོ་པ་ནི་རང་ཉིད་གནོད་བྱེད་ཡིན་པའི་ཕྱིར་རོ་ཞེས་འཆད་པ་ནི། སྒྲ་ལས་ཞེས་བྱ་བའོ། །དེས་ན་ནི་དངོས་མ་ཡིན་པས་ནའོ། །དེས་ན་དངོས་མ་ཡིན་པ་འདི་ལ་ནི་གཉེན་

པོ་མེད་པར་བསྟན་པ་ཉེས་པ་མེད་པའོ། །དངོས་པོའི་སྟོབས་ཀྱིས་ཞུགས་པའི་རྗེས་སུ་དཔག་པའོ། །རྗེས་སུ་དཔག་པས་གྲུབ་རྣམས་ལ་ཞེས་ཇི་ལྟར་འཆད་པར་འགྱུར་སྙམ་ན། གང་གི་ཕྱིར་དེ་ལྟར་བརྩད་པ་དེའི་ཕྱིར་བཤད་པའོ། །དེ་ཡང་ནི་བརྡའོ། །དོན་འདི་ཉིད་ཅེས་བྱ་བ་ནི་ཐམས་

ཅད་དུ་རྗོད་པར་བྱེད་པ་འཇུག་པར་བསྟན་པའི་དོན་ཏོ། །གཞན་དུ་ཞེས་བྱ་བ་ནི་ཐམས་ཅད་དུ་རྗོད་བྱེད་འཇུག་པར་བསྟན་པ་མེད་པའོ། །ཕན་ཚུན་རྟེན་པའི་སྐྱོན་མེད་དོ་ཞེས་བརྗོད་པ་ནི། སྒྲ་ལས་བྱུང་བའི་གྲགས་པ་འདོད་པ་ཙམ་གྱིས་འཇུག་པ་ནི་མ་གྲུབ་པ་མ་ཡིན་ཏེ། འདོད་པ་ལ་གེགས་མེད་

པའི་ཕྱིར་གྲུབ་པ་ཉིད་དོ། །རང་ཉིད་ལས་ཞེས་བྱ་བ་ནི་རྗེས་སུ་དཔག་པ་མེད་པ་ལ་ལྟོས་པ་མ་ཡིན་པའོ། །ཡོད་པ་ཚད་མ་མ་ཡིན་པ་ཡང་རང་ཉིད་ལ་ཡིན་གྱི། སྒྲ་ལས་བྱུང་བའི་གྲགས་པ་གནོད་པར་མ་བྱས་པ་ཉིད་ལ་ལྟོས་པ་ནི་མ་ཡིན་ནོ། །དེས་ན་ཕན་ཚུན་བརྟེན་པའི་ཉེས་པ་མེད་དོ། །

དེ་ཞེས་བྱ་བ་ནི་སྒྲ་ལས་བྱུང་བའི་གྲགས་པའོ། །ཡོད་པ་སྒྲ་ལས་བྱུང་བའི་གྲགས་པའི་ཅི་སྟེ་འགོག་པར་བྱེད་པ་མ་ཡིན་ཞེ་ན། འདི་ལ་ལན་ནི་མ་ཡིན་ཏེ་ཞེས་བྱ་བའོ། །བརྗོད་པར་བྱ་བ་མ་ཡིན་པ་ཉིད་གནོད་པར་བྱས་པ་ཡང་ངོ་། །དེ་ལས་ཏེ་སྒྲ་ལས་བྱུང་བའི་གྲགས་པ་ལས་བཟློག་པའོ། །

ที่มาและสัญญาอนุญาต

ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ

สัญญาอนุญาต Public Domain · หลักฐาน

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

  • หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
  • ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด