ཚད་མ་རྣམ་འགྲེལ་རྒྱན་གྱི་འགྲེལ་བཤད་ཤིན་ཏུ་ཡོངས་སུ་དག་པ་ཞེས་བྱ་བ

ชื่อสันสกฤต (อักษรทิเบต ตามตัวบท) པྲ་མཱ་ཎ་བཱརྟི་ཀཱ་ལང་ཀ་ར་ཊཱི་ཀཱ་སུ་པ་རི་ཤུདྡྷ་ནཱ་མ

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

เล่ม ๑๘๖ · หน้า 80a

དེས་ན་ཞེས་བྱ་བ་ནི་གཉེན་པོ་མེད་པའི་དེས་ནའོ། །དེ་ནི་ཞེས་བྱ་བ་ནི་འདི་དགག་པར་མི་ནུས་པ་ཉིད་དམ་ཞེས་བྱ་བ་ལ་སོགས་པས་སོ། །ཅི་ལྟར་ན་གཞན་གང་གཉེན་པོ་མེད་པ་ཉིད་དུ་བསྟན་པས་གཞན་ལ་དེ་ལྟར་རྟོགས་པར་ཅི་ལྟར་འགྱུར་ཞེ་ན། རྟོགས་པ་ཞེས་བྱ་བའོ། །ཅི་ཞིག་བསྟན་

པ་ཡིན་ཞེ་ན། ཅི་ལྟར་ཞེས་བྱ་བའོ། །འདི་ནི་སྒྲ་ལས་བྱུང་བའི་གྲགས་པའོ། །གཞན་ཡང་ཞེས་བྱ་བ་ནི་དངོས་པོའི་སྟོབས་ཀྱིས་ཞུགས་པའི་རྗེས་སུ་དཔག་པའོ། །གཞན་གཉེན་པོ་མེད་པར་བསྟན་པས་ཅི་བྱ་ཞེ་ན། གཉེན་པོ་སྲིད་ན་ཞེས་བྱ་བའོ། །དེ་ཡང་ནི་དོན་དམ་པར་གནོད་པ་མ་ཡིན་པ་

ཡང་ངོ་། །དེས་ན་དངོས་པོའི་སྟོབས་ཀྱིས་ཞུགས་པའི་རྗེས་སུ་དཔག་པ་ཡང་སྒྲུབ་པར་བྱེད་པ་ཉིད་ཡིན་ཏེ་ཞེས་འབྲེལ་ཏོ། །ཅིའི་ཕྱིར་ཞེ་ན། མི་མཐུན་པའི་ཕྱོགས་ཡོད་པ་ཡིན་པའི་ཕྱིར་ཞེས་བྱ་བའི་གཏན་ཚིགས་ཐུན་མོང་མ་ཡིན་པ་ཉིད་ཀྱི་ཕྱིར་རོ། །འདི་ཉིད་གསལ་བར་བྱེད་པ་ནི་དཔེར་ན་ཞེས་བྱ་

བའོ། །སྒྲ་ལས་བྱུང་བའི་གྲགས་པས་གནོད་པའི་ཡོད་པ་ཉིད་ནི་ཟླ་བ་མ་ཡིན་པའི་སྒྲུབ་པར་བྱེད་པ་མ་ཡིན་ཏེ། དེ་བཞིན་དུ་འབྲས་བུ་དུ་བས་གནོད་པ་ཡང་མེ་མེད་པའི་སྒྲུབ་པར་བྱེད་པ་མ་ཡིན་ནོ་ཞེས་བརྗོད་པ་ནི་སྒྲ་ལས་བྱུང་བའི་ཞེས་བྱ་བའོ། །འདིར་ཡང་ནི་མེ་མེད་པར་བསྒྲུབ་པར་ཡང་ངོ་། །གནོད་ཅི་

སྟེ་མིན་ཞེས་བྱ་བ་ནི་ཡོད་པའོ། །ཅི་ལྟར་གནོད་སྙམ་ན། དུ་བ་དང་ལྡན་ཞེས་བྱ་བའོ། །དེ་ནི་མེའོ། །འོན་ཏེ་མི་མཐུན་པའི་ཕྱོགས་ལ་དུ་བའི་གནོད་པར་བྱེད་པ་དོགས་པ་ཡིན་ཏེ། དེས་ན་གང་གིས་མེ་འགོག་པ་ལ་གནོད་པར་འགྱུར་བ་དུ་བ་དང་ལྡན་པའི་ས་ཕྱོགས་སུ་མེ་ཅི་ལྟར་འགྲུབ་སྙམ་ན། མི་

མཐུན་ཕྱོགས་ལས་གནོད་པར་ནི་ཞེས་བྱ་བའོ། །མི་མཐུན་པའི་ཕྱོགས་མེ་མེད་པ་ལས་དུ་བའི་གནོད་པར་བྱེད་པར་དོགས་པ་ཡོད་དམ་འོན་ཏེ་མེད་ཅེས་བྱ་བ་དེ་ལྟ་བུའི་རྣམ་པ་ཅན་དེ་ནི། སྔར་ཁྱབ་པར་རྟོགས་པའི་དུས་ཉིད་དུ་བཟློག་ཟིན་ཏོ། །ཐམས་ཅད་ལ་ནི་མངོན་སུམ་ལ་སོགས་པ་ལའོ། །

དེ་ལྟ་མ་ཡིན་ཏེ་ཞེས་བྱ་བ་ནི་འགལ་བ་མི་འཁྲུལ་པ་ཅན་མེད་པར་མ་བསྟན་ནའོ། །འདིས་ནི་ཞེས་བྱ་བ་ནི་འགལ་བ་མི་འཁྲུལ་པ་ཅན་བསལ་བས་ནིའོ། །དེ་ཡང་ཞེས་བྱ་བ་ནི་བརྗོད་པར་འདོད་པའི་གྲངས་གཅིག་པ་ཅན་ཡང་ངོ་། །དེའི་ཚེ་འདི་དངོས་པོའི་སྟོབས་ཀྱིས་ཞུགས་པའི་རྗེས་སུ་དཔག་

เล่ม ๑๘๖ · หน้า 80b

པ་ཉིད་ལ་ཅི་སྟེ་མི་བརྗོད་དེ་བརྗོད་པར་བྱའོ་ཞེས་འབྲེལ་ཏོ། །གང་ཞིག་བརྗོད་པར་བྱ་ཞེ་ན། འགལ་ལ་ཞེས་བྱ་བ་ལ་སོགས་པའོ། །འགལ་བའི་དོན་མེ་ལ་སོགས་པས་སོ། །དེ་ཡང་ནི་མེ་མེད་པ་ལ་སོགས་པའོ། །དེ་བཞིན་དུ་མངོན་སུམ་ལ་ཡང་ངོ་ཞེས་བྱ་བ་ནི་གང་ལ་ཐུན་མོང་མ་ཡིན་པའི་ཕྱིར་རྗེས་སུ་

དཔག་པ་མེད་ལ། མངོན་སུམ་དང་འགལ་བའི་དོན་གྱིས་བསལ་བ་དེ་ཡང་ཕྱོགས་མ་ཡིན་ནོ་ཞེས་སོ། །དེའི་ཕྱོགས་མངོན་སུམ་གྱིས་བསལ་བའམ་རྗེས་སུ་དཔག་པས་བསལ་བ་ལ་ཡང་། གང་ལ་ཡང་ཞེས་བྱ་བ་ལ་སོགས་པར་སློབ་དཔོན་གསུང་བར་རིགས་ཏེ། དེ་ཉིད་དུ་འགལ་བ་མི་

འཁྲུལ་པ་ཅན་མེད་པར་སྟོན་པར་བྱེད་པའི་ཕྱིར་རོ་ཞེ་ན། འདི་ཉིད་ཀྱིས་ཞེས་སྨོས་ཏེ། གྲགས་པས་བསལ་བ་ལ་མི་མཐུན་པའི་ཕྱོགས་མེད་པར་བསྟན་པས་སོ། །མངོན་སུམ་དང་རྗེས་སུ་དཔག་པ་ལ་ཡང་མི་མཐུན་པའི་ཕྱོགས་མེད་པར་བརྗོད་པ་ཡིན་ནོ། །དེ་ལ་རྗེས་སུ་དཔག་པ་ལ་ནི་མི་མཐུན་

པའི་ཕྱོགས་མེད་དོ་ཞེས་བསྟན་ཟིན་ཏོ། །མངོན་སུམ་ལ་མི་མཐུན་པའི་ཕྱོགས་མེད་པར་བསྟན་པའི་ཕྱིར་བརྗོད་པ་ནི། གང་ཞིག་ཅེས་བྱ་བ་ལ་སོགས་པའོ། །འབྲེལ་པ་གྲུབ་པའི་དངོས་པོ་གང་ཡིན་པ་དེ་མངོན་སུམ་གྱི་མཚན་ཉིད་ཀྱི་དངོས་པོ་དེས་ནི། རང་ཉིད་མེད་པ་ལ་གནོད་པར་བྱེད་པ་ཡིན་ནོ། །གཞན་

དུ་ནི་མེད་པར་རོ། །བཟློག་པ་ལ་ནི་འབྲེལ་པ་དང་བྲལ་བ་ལའོ། །ཐམས་ཅད་ལ་ནི་འབྲེལ་པ་དང་ལྡན་པའི་མངོན་སུམ་ལ་སོགས་པ་ལའོ། །བཟློག་པའི་ཕྱོགས་ཞེས་བྱ་བ་ནི་རྟོགས་པ་ཡིན་པའི་ཕྱིར་ཞེས་བྱ་བའི་གཏན་ཚིགས་སོ། །རང་གི་ངོ་བོ་མི་མཐུན་པའི་ཕྱོགས་མེད་པ་ཡིན་ན་ནི་ཚད་མ་དང་

ཚད་མ་མ་ཡིན་པའི་རྣམ་པར་དབྱེ་བ་མེད་པར་འགྱུར་རོ་ཞེས་བསྟན་པའི་དོན་དུ། གལ་ཏེ་ཞེས་བྱ་བ་ནས་ཞེ་ནའི་བར་གྱིས་ནི་རྩོད་པའོ། །དེ་ནི་མངོན་སུམ་མོ། །མངོན་དུ་བྱས་པ་ཐམས་ཅད་ནི། ཚད་མ་གཞན་གྱི་གེགས་མ་ཡིན་ནོ་ཞེས་གསུངས་པ་ནི། མངོན་དུ་ཞེས་བྱ་བའོ། །ཐམས་ཅད་ཅེས་བྱ་

བ་ནི་འཁྲུལ་པ་ཡང་ངོ་། །འདིས་ནི་ཞེས་བྱ་བ་ནི་མངོན་དུ་བྱེད་པ་ཙམ་གྱིས་ཚད་མ་ཡིན་པ་བཟློག་པས་སོ། །རང་གི་ངོ་བོ་ལ་གནོད་པར་བྱེད་པ་མེད་པ་ཉིད་ཀྱང་བསལ་བ་ཡིན་ནོ། །ཅི་ལྟར་སྙམ་ན། མངོན་དུ་ཞེས་བྱ་བའོ། །རང་གི་ངོ་བོ་ལ་མངོན་དུ་བྱེད་པ་བཞིན་དུ། གནོད་པ་མེད་པ་ཡང་

เล่ม ๑๘๖ · หน้า 81a

ཧ་ཅང་ཁྱབ་པ་ཡིན་ནོ་ཞེས་བྱ་བའི་དོན་ཏོ། །ཧ་ཅང་ཁྱབ་པ་སྤོང་བའི་དོགས་པ་བསུ་བ་ནི། མི་སླུ་བ་ཅན་ཞེས་བྱ་བའོ། །བཞད་གད་ཀྱིས་ལན་ལྡོན་པ་ནི་དེ་ནི་ཞེས་བྱ་བའོ། །ཨ་རུ་རའི་དད་པ་ནི་མི་སླུ་བ་ཡིན་ལ། གནོད་པ་བྱེད་པ་ནི་ལྷ་དང་མཚུངས་པ་ཡིན་ནོ། །འདི་ཉིད་ནི་རྗོད་པ་

ནི་གལ་ཏེ་ཞེས་བྱ་བའོ། །འདི་སྙམ་དུ་གང་གིས་མངོན་དུ་བྱས་པ་བཞིན་དུ་ཧ་ཅང་ཐལ་བར་འགྱུར་བ། གནོད་པ་མེད་པ་ཉིད་རང་གི་ངོ་བོའི་ཡུལ་ལ་ནི་མ་ཡིན་ནོ། །འོ་ན་ཅི་ཞེ་ན། གནོད་པ་མེད་པ་ནི་དོན་བྱ་བའི་ཡུལ་ཅན་ཡིན་པར་བཟུང་ངོ་ཞེ་ན། བརྗོད་པ་ནི་འོན་ཏེ་ཞེས་བྱ་བའོ། །དེ་ཞེས་བྱ་བ་

ནི་གནོད་པ་མེད་པ་ཉིད་དོ། །དེས་ན་མངོན་སུམ་ལ་འབྲེལ་པ་ཉིད་ཚད་མའི་རྒྱུ་མཚན་ཡིན་ནོ་ཞེས་དགོངས་པའོ། །རྒྱུན་མི་འཆད་པར་དོན་བྱེད་པར་དམིགས་ནས་དེ་དང་འདྲ་བ་ལ་དེ་ཉིད་དོ་ཞེས་ངེས་པར་བྱེད་པའི་མངོན་སུམ་ནི་འཇུག་པར་བྱེད་པ་ཡིན་གྱི། འབྱུང་བར་འགྱུར་བའི་དོན་བྱེད་པའམ། དེར་

རུང་བ་ནི་འདིའི་ཡུལ་མ་ཡིན་ནོ་ཞེས་བརྗོད་པ་ནི། མི་སླུ་བ་དེ་ཡང་ཞེས་བྱ་བའོ། །གལ་ཏེ་ཧ་ཅང་ཁྱབ་པའི་ཉེས་པ་ཡོད་པའི་ཕྱིར་རང་གི་ངོ་བོ་ཚད་མའི་ཡུལ་མ་ཡིན་ན། འོ་ན་ཚད་མས་གོ་བར་བྱ་བ་གང་ཞིག་ཡིན་སྙམ་ན། མི་སྣང་ཡང་རྟོགས་པར་བྱ་བ་ཡིན་ནོ་ཞེས་སྨོས་སོ། །འོ་ན་མི་སྣང་བར་

ཁྱད་པར་མེད་པས་འཇིག་རྟེན་གསུམ་པོ་ཐམས་ཅད་རྟོགས་པར་བྱ་བར་འགྱུར་ཞེ་ན། སྣང་བའི་ཞེས་སྨོས་སོ། །དེ་སྐད་དུ་ཡང་དེ་བདག་དེ་ལས་བྱུང་བའི་མཐུ་ཡིས་ཞེས་སྔར་བཤད་ཟིན་ཏོ། །དེ་ལྟར་མངོན་སུམ་མི་མཐུན་པའི་ཕྱོགས་མེད་པ་ཡིན་མོད། རྗེས་སུ་དཔག་པ་གོ་ཅི་ལྟར་མི་མཐུན་

པའི་ཕྱོགས་མེད་པ་ཡིན་སྙམ་ན། འབྲེལ་པ་དེ་ནི་ཞེས་གསུངས་སོ། །ཅི་ལྟར་གཉི་ག་མཚུངས་སྙམ་ན། །འབྲེལ་པ་ཉིད་ཅེས་སྨོས་སོ། །གཞན་དག་རིམ་པ་ལས་བརྒལ་ནས་མི་མཐུན་པའི་ཕྱོགས་མེད་པར་སྒྲུབ་པ་ལ་དགོས་པ་མཐོང་ནས་གལ་ཏེ་ཞེས་སྨོས་སོ། །གལ་ཏེ་མངོན་སུམ་དང་རྗེས་སུ་

དཔག་པ་དག་ལ་གཉེན་པོ་མེད་པར་བསྟན་པའི་དགོས་པ་འདི་ཙམ་དུ་ཟད་ནའོ། །འོན་ཏེ་རྣམ་པར་གཞན་དུ་ཡང་དེ་ལྟར་བརྗོད་ན་ཅི་སྐྱོན་སྙམ་ན། རིམ་གྱིས་ཞེས་སྨོས་སོ། །སྒྲ་ལས་བྱུང་བའི་གྲགས་པ་འདི་ཉིད་དུའོ། །དོན་འདིས་ཞེས་བྱ་བ་ནི་ནུས་པ་གེགས་བྱེད་པ་མེད་པར་བསྟན་པའི་དོན་དུའོ། །

เล่ม ๑๘๖ · หน้า 81b

མི་བསྟན་པའི་རྗེས་སུ་དཔག་པ་ནི་སྒྲ་ལས་འབྱུང་བའི་གྲགས་པའི་རྗེས་སུ་དཔག་པ་ལའོ། །དེ་ཞེས་བྱ་བ་ནི་བཟློག་པའི་རྗེས་དཔག་གོ། །འདིར་ནི་རུང་བ་ཉིད་ལའོ། །དེ་ལྟར་ཞེས་བྱ་བ་ནི་མི་མཐུན་པ་མེད་པར་རོ། །འབྲེལ་པའི་སྟོབས་ལས་བྱུང་བ་ལ་གནོད་པ་ཡོད་པར་འགྱུར་རམ། ཅི་ཞེས་འབྲེལ་

ཏོ། །འདིར་ནི་སྒྲ་ལས་བྱུང་བའི་གྲགས་པ་ལའོ། །གལ་ཏེ་སྟོབས་ཆུང་བ་ལ་བཟློག་པའི་རྗེས་སུ་དཔག་པ་མེད་པར་བརྗོད་པ་ན་སྟོབས་དང་ལྡན་པ་གཞན་སྒྲུབ་པར་བྱེད་པ་ཡིན་ནོ་ཞེས་བྱ་བ་ནི་མི་རིགས་ཏེ། འདི་ཉིད་འདོད་པས་འབྱུང་བའི་ཕྱིར་སྟོབས་དང་ལྡན་པས་སོ་ཞེས་དགོས་པ་ནི་གལ་

ཏེ་ཞེས་བྱ་བའོ། །དེ་ནི་ཞེས་བྱ་བ་ནི་འདོད་པ་ཙམ་གྱིས་གཞན་གྱི་དྲིང་འཇོག་པའོ། །དངོས་པོའི་ཞེས་བྱ་བ་ནི་མེ་ལ་སོགས་པའི་རྗེས་སུ་དཔག་པའོ། །དེ་ཉིད་དུ་ཞེས་བྱ་བ་ནི་དངོས་པོའི་སྟོབས་ཀྱིས་འཇུག་པའི་རྗེས་སུ་དཔག་པ་ལའོ། །སྣུམ་ཁུར་དང་དབྱིག་པ་ཞེས་བྱ་བ་ནི། དབྱིག་པས་སྣུམ་

ཁུར་བརྗོད་པ་སྟེ། དབྱིག་པ་བྱི་བས་ཟོས་ན་སྣུམ་ཁུར་སྨོས་ཅི་དགོས་པའི་ཚུལ་གང་ཡིན་པ་དེ་ནི་སྟེ་སྒྲ་ལས་བྱུང་བའི་གྲགས་པ་ལ་གནོད་པར་བྱེད་པ་མེད་ན་དངོས་པོའི་སྟོབས་ཀྱིས་ཞུགས་པ་ལ་སྨོས་སུ་ཅི་ཡོད་ཅེས་བྱ་བ་དེ་ནི་ཡོད་པ་མིན་ནོ། །ཁྱབ་པ་ཉིད་ཀྱིས་སྒྲ་ལས་བྱུང་བའི་གྲགས་

པ་ཉིད་སྟོབས་དང་ལྡན་པའི་ཕྱིར་རོ། །ཁྱབ་པ་ཉིད་ནི་དངོས་པོ་རང་མ་ཡིན་པའི་ཕྱིར་ན། མེད་པ་དང་འདྲ་བ་ཡིན་ནོ་ཞེས་བརྗོད་པ་ནི། དངོས་པོ་འཇུག་མིན་པ་ཞེས་བྱ་བའོ། །རྗེས་དཔག་ནི་གྲགས་པའིའོ། །གཞན་ལ་ནི་དངོས་པོ་སྟོབས་ཀྱིས་འཇུག་པ་ལའོ། །དོན་འདི་ཞེས་བྱ་བ་ནི་བརྗོད་

མ་ཐག་པའོ། །དེ་སྤངས་ཞེས་བྱ་བ་ནི་འདོད་པ་སྤངས་པའོ། །འཐོབ་པ་བཞིན་དུ་འདོར་བ་ཡང་སླ་བ་ཡིན་ནོ་ཞེས་བྱ་བའི་དོན་ཏོ། །འདི་ག་ལས་ཤེ་ན། བདེ་བླག་ཅེས་བྱ་བའོ། །གལ་ཏེ་དེ་ལྟར་ཞེས་བྱ་བ་ནི་དེ་ལྟར་ཐུབ་པ་མཆོག་རྣམས་ཀྱི་ཚུལ་འདི་མཐའ་དག་ལམ་ངན་པར་ཞུགས་

པ་ཉིད་དུ་གདོན་མི་ཟ་བར་གྱུར་ན། དེའི་ཚེ་འདི་ལ་བློ་ངན་ཅིང་གང་གི་མིག་ཉམས་པ་མེད་པ་རྣམས་ཀྱི་ལྟ་བར་ཅི་ལྟར་ཕྱི་རོལ་མ་ཡིན་ཏེ། ཕྱི་རོལ་དུ་གྱུར་པ་ཉིད་དོ་ཞེས་བྱ་བའི་དོན་ཏོ། །ཡང་ན་ཐུབ་པ་མཆོག་རྣམས་ཀྱི་ལྟ་བ་གསལ་བ་ཉིད་ཅི་ལྟར་མ་ཡིན་ཞེས་འབྲེལ་ཏོ། །འདི་ཉིད་དུ་ཞེས་བྱ་བ་

เล่ม ๑๘๖ · หน้า 82a

ནི་གྲགས་པ་ཉིད་དུ་སྟེ་མངོན་སུམ་དུ་ནི་མ་ཡིན་པའོ། །རི་བོང་ཅན་ཟླ་བ་ཉིད་ལ་ནི་སྒྲ་ལས་བྱུང་བའི་གྲགས་པ་ལས་གཞན་པའི་རྗེས་སུ་དཔག་པ་འགའ་ཡང་མེད་དོ་ཞེས་བསྟན་པ་ནི། ཡང་ན་ཞེས་བྱ་བའོ། །རི་བོང་ཅན་ནི་ཟླ་བའོ་ཞེས་བྱ་བ་འཇིག་རྟེན་གྱིས་བརྗོད་པ་ལ། རྗེས་དཔག་

མེད་པར་གང་ལ་ཐུན་མོང་མ་ཡིན་པའི་ཕྱིར་ཞེས་བྱ་བ་ལ་སོགས་པས་བརྗོད་པ་ཡིན་ནོ། །རྗེས་སུ་དཔག་པ་མེད་པར་བརྗོད་པས་དེ་ཅི་བྱ་ཞེས་བྱ་བ་ནི་དྲི་བའོ། །ལན་ནི་རྗེས་སུ་དཔག་པ་ལས་ཞེས་བྱ་བའོ། །གང་གིས་རྗེས་སུ་དཔག་པ་མེད་པར་བརྗོད་སྙམ་ན། གང་ལ་ཞེས་བྱ་བའོ། །ཅི་ལྟར་རྗེས་སུ་དཔག་པ་

མེད་སྙམ་ན། ཟླ་བའི་ཞེས་བྱ་བའོ། །ཟླ་བ་ཉིད་དངོས་པོར་སྒྲུབ་པ་ལ་སྟོན་པའོ། །སྒྲུབ་པར་བྱེད་པ་ནི་ཟླ་བ་ཉིད་ཀྱིའོ། །བཟློག་པ་ཞེས་བྱ་བ་ཟླ་བ་མེད་པ་ཟླ་བ་མ་ཡིན་པ་ལའོ། །ལན་ནི་མེད་པ་ནི་ཞེས་བྱ་བ་སྟེ་རྗེས་སུ་དཔག་པ་ནའོ། །བསལ་བ་ཡིན་ན་ཞེས་བྱ་བ་ནི་བཟློག་པ་མེད་པའོ། །གལ་ཏེ་

གཅིག་ཉིད་ལ་རྗེས་སུ་དཔག་པ་ཡོད་པ་དང་མེད་པ་ཅི་ལྟར་ཞེ་ན། རྗེས་སུ་དཔག་པ་ཞེས་བྱ་བའོ། །འདི་ནི་གྲགས་པའོ། །དེ་ལྟ་མ་ཡིན་ན་ནི་འགལ་ལོ་ཞེས་བརྗོད་པ་ནི་གལ་ཏེ་ཞེས་འདི་ནི་གྲགས་པའི་རྗེས་དཔག་གོ། །དངོས་པོའི་སྟོབས་ཀྱིས་ཞུགས་པའི་རྗེས་སུ་དཔག་པ་ཡིན་ནའོ། །དེའི་ཚེ་སྒྲུབ་པར་

བྱེད་པ་ཞེས་བྱ་བ་དང་འབྲེལ་ཏོ་ཞེས་བྱ་བའི་བར་གྱིས་བརྗོད་པའི་རྗེས་སུ་དཔག་པ་འགོག་པ་ནི། འགལ་བས་ཏེ། སྒྲ་ལས་བྱུང་བའི་གྲགས་པས་ཞེས་བྱ་བ་འདིས་ནི་ཟློག་པར་འགྱུར་རོ་ཞེས་སྦྱར་རོ། །འོན་ཏེ་འདི་ནི་རྗེས་སུ་དཔག་པར་འདོད་པ་མ་ཡིན་པ་ཁོ་ནའོ་སྙམ་ན། རྗེས་སུ་དཔག་པར་ཞེས་བྱ་བའོ། །

འདི་ལ་ནི་ཟླ་བ་མ་ཡིན་པ་ཉིད་ལའོ། །ཅིའི་ཕྱིར་རྗེས་སུ་དཔག་པ་གནོད་པར་བྱེད་པ་མ་ཡིན་ཞེ་ན། རུང་བ་ཙམ་ཞེས་བྱ་བའོ། །དེ་ལ་ནི་མངོན་སུམ་ལའོ། །དེས་ན་རྟགས་བརྗོད་པར་བྱ་བ་ཉིད་དང་། འབྲེལ་པ་མ་བཟུང་བའི་ཕྱིར་ན། རྗེས་སུ་དཔག་པ་ནི་གནོད་པར་བྱེད་པ་མ་ཡིན་ནོ་ཞེས་དགོངས་པའོ། །

གཞན་དག་རྒྱུ་དང་འབྲས་བུའི་དངོས་པོ་བཞིན་དུ། བརྗོད་བྱ་རྗོད་བྱེད་ཀྱི་དངོས་པོ་ཡང་མངོན་སུམ་ལ་སྣང་བ་ཡིན་ནོ་ཞེས་སྟོན་པ་ནི་འོན་ཏེ་ཞེས་བྱ་བའོ། །གལ་ཏེ་ཡང་རྒྱུ་དང་འབྲས་བུའི་དངོས་པོ་མངོན་སུམ་ལ་སྣང་བ་མ་ཡིན་པ་དེ་ལྟ་ན་ཡང་ཞེས་བྱ་བ་ལ་སོགས་པར་སྦྱར་རོ། །དེས་ན་ཞེས་བྱ་བ་ནི་

เล่ม ๑๘๖ · หน้า 82b

འཁྲུལ་པས་ནའོ། །དེ་ལ་ནི་བརྗོད་བྱ་རྗོད་བྱེད་ཀྱི་དངོས་པོ་ལའོ། །གཞན་དུ་སྟེ་གལ་ཏེ་མ་མཐོང་ན་དེའི་ཚེ་མེའི་རྒྱུ་ཅན་གྱི་དུ་བ་དེ་ཉིད་འདི་ཡིན་ནོ་སྙམ་པའི་ཤེས་པ་སྐྱེ་བར་ཅི་ལྟར་འགྱུར་ཏེ། མི་འགྱུར་བ་ཁོ་ནའོ་ཞེས་བྱ་བའི་དོན་ཏོ། །རྣམ་པར་རྟོག་པ་དེ་ནི་འབྲས་བུ་ཉིད་ཀྱི་རྒྱུ་མཚན་ཡིན་གྱི་བརྗོད་བྱ་ཉིད་ཀྱི་མ་ཡིན་

ནོ་ཞེས་བྱ་བའི་དོན་སྟོན་པ་ནི། གལ་ཏེ་སྔར་ཞེས་བྱ་བའོ། །གལ་ཏེ་དེ་ཉིད་ཡིན་ནོ་སྙམ་དུ་ཤེས་པ་ལས། མངོན་སུམ་དོན་སྟོན་པར་བྱེད་པ་ཡིན་ན་འོ་ན་མངོན་སུམ་ཞེས་སྦྱར་རོ། །དུས་བཞིན་དུ་འབྱུང་བ་ཉིད་ཀྱིས་རྣམ་པར་རྟོག་པ་དང་བཅས་པ་ཡིན་ནོ་ཞེ་ན། དུས་གཞན་དུ་ཞེས་གསུངས་སོ། །ཅིའི་ཕྱིར་

ཞེ་ན། དེ་དང་ཞེས་བྱ་བའོ། །རྒྱུ་དང་འབྲས་བུའི་དངོས་པོ་ཡིན་པས་ནི་དེའི་རྒྱུ་ཡིན་པར་འགྱུར་གྱི་རྣམ་པར་རྟོག་པ་དང་བཅས་པར་མ་ཡིན་ནོ། །དེ་ལྟ་མ་ཡིན་ན་རྣམ་པར་རྟོག་པ་ཡང་རྣམ་པར་རྟོག་པ་མེད་པར་འགྱུར་ཏེ། རྣམ་པར་རྟོག་པ་མེད་པའི་རྒྱུ་ཡིན་པའི་ཕྱིར་རོ། །དེ་བས་ན་གང་ལས་རྣམ་པར་

རྟོག་པ་དང་བཅས་པར་འགྱུར་བ་སྔར་ཡོད་པའི་མངོན་སུམ་ནི་དེ་དང་འདྲ་བའི་འབྲེལ་པ་ཡོད་པ་མ་ཡིན་ནོ། །གཞན་ནི་ཡོད་ཀྱང་ཆད་པ་འགའ་ཡང་མེད་དོ་ཞེས་བྱ་བར་དགོངས་པའོ། །གཞན་དག་རྣམ་པར་རྟོག་པར་བྱེད་པ་ཉིད་ན་ངས་མཐོང་ངོ་ཞེས་རྟོགས་པའི་ཕྱིར་རྣམ་པར་རྟོག་པ་མེད་པ་ཉིད་དུ་རྣམ་

པར་འཇོག་པ་མི་འཐད་དོ་ཞེས་བརྗོད་པ་ནི། གལ་ཏེ་ཞེས་བྱ་བའོ། །འོ་ན་མངོན་སུམ་གྱིས་དེར་འཛིན་ནོ་སྙམ་ན། འདས་པའི་ཞེས་བྱ་བའོ། །ལན་ནི་མ་ཡིན་ཏེ་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་བརྗོད་པའི་ཚུལ་མི་འདོད་ནའོ། །བརྗོད་པར་བྱ་བ་དང་རྗོད་པར་བྱེད་པའི་དངོས་པོ་ཡང་དེ་ཁོ་

ན་ལྟར་གྲུབ་པོ་ཞེ་ན། བརྗོད་པར་བྱ་བ་དང་ཞེས་བྱ་བའོ། །འོ་ན་ཉེ་བར་བསྟན་པ་བརྗོད་བྱ་རྗོད་བྱེད་ཀྱི་དངོས་པོ་རྟོགས་པར་བྱེད་པ་ཡིན་ནོ་ཞེ་ན། དེ་ཡང་ཞེས་བྱ་བ་སྟེ་ཉེ་བར་བསྟན་ཡང་དེ་ལྟར་ཏེ། བརྗོད་བྱ་རྗོད་བྱེད་ཀྱི་དངོས་པོ་རྟོགས་པར་བྱེད་པ་ཉིད་དུ་མཐོང་བ་མེད་དོ། །ཡང་རྣམ་པ་གཞན་དུ་

ཉེ་བར་བསྟན་ན་དེ་འདོད་པའི་ཕྱིར་རོ། །འོ་ན་ནི་དེ་ལས་དེར་རྟོགས་པ་སྲིད་པའི་ཕྱིར་ན། ཉེ་བར་བསྟན་པ་དེ་སྟོན་པར་བྱེད་པར་འགྱུར་རོ་ཞེ་ན། ཉེ་བར་བསྟན་ཡང་ཞེས་བྱ་བའོ། །གཞན་ཞེས་བྱ་བ་ནི་སྔར་ཉེ་བར་བསྟན་པ་ལས་བཟློག་པར་རོ། །གཞན་དུ་ན་ཞེས་བྱ་བ་མི་འདོད་ནའོ། །གལ་ཏེ་བརྗོད་བྱ་

เล่ม ๑๘๖ · หน้า 83a

རྗོད་བྱེད་ཀྱི་དངོས་པོ་བཞིན་དུ། རྒྱུ་དང་འབྲས་བུའི་དངོས་པོ་ཡང་གཞན་དུ་བྱ་བར་ནུས་པ་ཉིད་མ་ཡིན་ནམ་ཞེ་ན། རྒྱུ་དང་ཞེས་བྱ་བའོ། །གཞན་དག་རྒྱུ་དང་འབྲས་བུ་བཞིན་དུ་བརྗོད་བྱ་རྗོད་བྱེད་ཀྱང་གཞན་དུ་བྱ་བར་མི་ནུས་སོ་ཞེས་བརྗོད་པ་ནི། གལ་ཏེ་ཞེས་བྱ་བའོ། །དངོས་པོ་ནི་

ལྷས་བྱིན་ནོ། །ཐོས་པ་ནི་ལྷས་བྱིན་གྱི་མིང་ངོ་། །དེ་དག་བརྡའི་དུས་ན་མངོན་སུམ་གྱིས་མཐོང་བར་གྱུར་ན་དེ་བཞིན་དུ་ཞེས་བྱ་བ་འདིའི་མིང་འདི་ཡིན་ནོ་ཞེས་རྟོགས་པར་འགྱུར་རོ། །འཆད་པ་ནི་བརྡ་བྱེད་པའི་དུས་ན་ཞེས་བྱ་བའོ། །རྒན་པོའི་ཐ་སྙད་ལས་ཀྱང་འབྲེལ་པ་ཉིད་དུ་ཤེས་པ་གང་

ཡིན་པ་དེ་ཡང་དོན་དམ་པར་ན་འབྲེལ་པར་ཤེས་པེ་ནི་མ་ཡིན་ནོ་ཞེས་བརྗོད་པ་ནི་འདི་ལྟར་ཞེས་བྱ་བའོ། །གཞན་ཡང་རུང་སྟེ་ཞེས་བྱ་བའི་འབྲས་བུ་ཉིད་ལ་སོགས་པའོ། །འོན་ཏེ་ཡུལ་གཞན་ལ་སོགས་པར་མིང་དང་མིང་ཅན་གྱི་འབྲེལ་བར་རྟོགས་ཀྱི་གཞན་དུ་ནི་མ་ཡིན་ནོ་སྙམ་ན། དེ་བཞིན་

དུ་ཞེས་བྱ་བའོ། །གཞན་ཉིད་དུ་ནི་མིང་ངོ་། །བདག་ཀྱང་ནི་རྟོགས་པའོ། །འདིས་ནི་ཤེས་པ་ཐ་དད་པའི་ཡུལ་དག་ཀྱང་འབྲེལ་པར་རྟོགས་པར་འགྱུར་གྱི་སྒྲ་དོན་དག་ནི་མ་ཡིན་ནོ་ཞེས་བསྟན་པ་ཡིན་ནོ། །དང་པོ་དང་ཐ་མར་མཐར་གནས་ཏེ། ཡ་ར་ལ་གང་རུང་ཡོད་པའོ། །ཐུང་དུས་ཞེས་བྱ་

བ་ནི། ཨ་བྲྀདྡྷ་སྟེ་རྒན་པོ་ལ་མེད་པའོ། །དགྲ་བོ་ལ་མེད་པ་སྟེ་དགྲའི་མིང་ཡང་ངོ་ཞེས་བྱ་བའི་དོན་ཏོ། །ཅི་སྐད་བརྗོད་མ་ཐག་པའི་མཚན་ཉིད་དང་ལྡན་པའི་མིང་རྣམས་མཐའ་ཡས་པས་ན། གང་འདོད་པ་དེ་གདགས་པར་བྱ་བ་ཡིན་པའི་ཕྱིར་ཅི་ལྟར་འདོད་པ་ལྡོག་སྟེ་མི་ལྡོག་པ་ཁོ་ནའོ། །

གཞན་དང་པོ་དང་ཐ་མར་ཞེས་བྱ་བ་འདི་ཡང་ཉེ་བར་བསྟན་པ་ཉིད་དོ། །ཉེ་བར་བསྟན་པ་ཡང་གཞན་དུ་མི་འགྱུར་བ་ཉིད་མ་ཡིན་ནོ་ཞེས་བརྗོད་པ་ནི། འདི་ལས་ཞེས་བྱ་བའོ། །སྐབས་ཀྱི་མཇུག་སྡུད་པ་ནི་དེས་ན་ཞེས་བྱ་བའོ། །གང་གི་ཕྱིར་དེ་ལྟར་གྲགས་པ་དངོས་པོའི་དབང་གིས་མ་

ཡིན་པའི་གཏན་ཚིགས་དེས་ན། དངོས་པོ་ཡོད་པ་དང་མེད་པའི་རྗེས་སུ་འཇུག་པའི་རྗེས་སུ་དཔག་པ་ལས་ཐ་དད་པའི་གྲགས་པ་ནི། དངོས་པོ་དེའི་དབང་གིས་མི་འཇུག་པ། དངོས་པོ་དེའི་འདོད་པ་ལས་སྐྱེས་པ་ཡིན་ནོ་ཞེས་བསྟན་པ་ཡིན་ནོ། །ཅིའི་ཕྱིར་གོ་བར་མི་བྱེད་སྙམ་ན། མེ་ལ་ཞེས་

เล่ม ๑๘๖ · หน้า 83b

བྱ་བ་ལ་སོགས་པ་ལའོ། །འོན་ཏེ་ཞེས་བྱ་བ་ནི་གཞན་གྱིའོ། །མི་རྟོག་སྟེ་ཞེས་བྱ་བ་ནི་ཁྱི་ཤ་ལ་སོགས་པའི་དོན་ཏོ། །ཅིའི་ཕྱིར་སྙམ་ན་གཞན་ཡང་ཞེས་བྱ་བའོ། །འདི་ཉིད་ག་ལས་ཤེ་ན། གང་དུ་ཡང་ཞེས་བྱ་བའོ། །དེ་ལྟ་མིན་ན་ཞེས་བྱ་བ་ནི་རང་གིས་བརྟགས་པས་མངོན་པར་འདོད་པའི་འབྲས་

བུ་འཐོབ་པར་ཁས་ལེན་ནའོ། །འདི་ལ་ལན་ནི་དེ་ནི་བདེན་ཏེ་ཞེས་བྱ་བའོ། །ཁྱེད་ཅག་ཉིད་ནི་བྲམ་ཟེའོ། །འདི་ཞེས་བྱ་བ་ནི་སྒྲ་ལས་གྲུབ་པ་ཞེས་བྱ་བ་འདིའོ། །ཅི་ལྟར་དོན་མེད་པ་གཞན་པ་ལ་འཇུག་ཅེ་ན། འདི་ལྟར་ཞེས་བྱ་བའོ། །གལ་ཏེ་མི་ལ་སོགས་པའི་དོན་ངེས་པའི་དོན་དུ་ཉེ་བར་བསྟན་པ་བརྒྱུད་

པ་ལ་སྡོད་ན་དེའི་ཚེ་དེ་ཉིད་ལོང་བ་བརྒྱུད་པར་འགྱུར་ཏེ། ཚད་མ་མེད་པའི་ཕྱིར་རོ། །དེ་ཉིད་ཀྱི་ཕྱིར་དོན་མེད་པ་ཡིན་ཏེ། སྒྲ་འདིའི་དོན་ནི་འདི་ཡིན་ནོ་ཞེས་ངེས་པར་མི་བྱེད་པའི་ཕྱིར་རོ། །འོན་ཏེ་དབང་པོ་ལས་འདས་པའི་དོན་མཐོང་བ་ནི། མངོན་པར་འདོད་པའི་དོན་ཤེས་པར་བྱེད་པ་ཡོད་

དོ་ཞེ་ན། གལ་ཏེ་ཞེས་བྱ་བའོ། །དོན་ནི་མེ་ལ་སྦྱིན་སྲེག་ལ་སོགས་པ་ལའོ། །དེ་ལྟ་ཡིན་ན་ཞེས་བྱ་བ་ནི་དབང་པོ་ལས་འདས་པ་ཁས་ལེན་ནའོ། །དབང་པོ་ལས་འདས་པའི་དོན་མཐོང་བ་རྣམས་ཕན་ཚུན་འགལ་བ་འཇུག་པར་འགྱུར་རོ། །འོན་ཏེ་རྒྱལ་དཔོག་པ་གཅིག་པུ་དབང་པོ་ལས་

འདས་པ་མཐོང་བ་མ་ཡིན་གྱི། གཞན་གྱི་མ་ཡིན་ནོ་ཞེ་ན། ཁྱེད་ལ་ཞེས་སྨོས་ཏེ་བྲམ་ཟེ་ལའོ། །དེས་ན་དབང་པོ་ལས་འདས་པ་མཐོང་བས་ནི་མངོན་པར་འདོད་པའི་དོན་རིག་པར་བྱེད་པ་ཡིན་ནོ་ཞེས་མི་འགྲུབ་པོ། །གང་གི་ཕྱིར་དེ་ལྟར་དོན་ངེས་པ་གཏན་ལ་ཕེབས་པ་མེད་པ་དེས་ན། མེ་

ལ་སྦྱིན་སྲེག་ལ་སོགས་པའི་དོན་འདི་ཡང་འགའ་ཞིག་གིས་རྣམ་པ་དེ་ལྟར་བརྟགས་པ་ཡིན་ནོ། །བརྟགས་པའི་དོན་དེ་ཉིད་ཀྱིས་འདི་ཁོ་ན་ཡིན་ནོ་ཞེས་ཡིད་ཆེས་པ་མ་ཡིན་པ་དེས་ན་ཁྱི་ཤ་ལ་སོགས་པ་གཞན་ཡང་བརྟག་པར་བྱ་བ་ཡིན་ནོ། །རང་ཉིད་ཤེས་པའི་རྟོག་པ་པོའི་སྐྱེས་བུས་

དོན་དེ་མི་ཤེས་པར། ཅི་ལྟར་དོན་གཞན་དེ་བརྟག་པར་བྱ་ཞེ་ན་ཞེས་དྲི་བའོ། །ལན་ནི་དེ་ཉིད་ཅེས་བྱ་བ་སྟེ། རྟོག་པར་བྱེད་པ་ཉིད་དོ། །ཅི་ལྟར་དོན་གཞན་བརྟག་པར་བྱ་བ་ལྟར་ཤེས་པར་འགྱུར་མོད། ཁྱོད་ལ་དཔྱད་པས་ཅི་བྱ། དོན་གཞན་རྟོག་པར་བྱེད་པའི་སྐྱེས་བུ་དེ་མ་དཔྱད་པར་ང་ལ་

เล่ม ๑๘๖ · หน้า 84a

སླུ་བར་བྱེད་པས་ཏེ། རིག་བྱེད་ཀྱི་དོན་མ་དཔྱད་པར་ང་ལ་སླུ་བར་བྱེད་དོ། །དེས་ན་སླུ་བས་འཇིགས་པས་སེམས་སོ་ཞེ་ན། འོ་ན་ཞེས་བྱ་བ་ནི་ལན་ནོ། །གལ་ཏེ་དཔྱོད་པ་ལ་སྒྲིམ་བུ་འདོན་ན་ཉེ་བར་བསྟན་པས་ཅི་བྱ་ཞེས་བྱ་བའི་དོན་ཏོ། །འདི་སྙམ་དུ་མེ་ལ་སོགས་པའི་དོན་ནི་རང་བཞིན་དང་

རྐྱེན་གྱི་རྗེས་སུ་མཐུན་པ་དེས་ན་བརྟག་པར་འཐད་དོ། །ཁྱི་ཤ་ལ་སོགས་པའི་དོན་ནི་དེ་གཉིས་དང་མཐུན་པ་མ་ཡིན་ཏེ་དེས་དེ་ནི་མི་རྟོག་གོ་ཞེས་བརྗོད་པ་ནི་རང་བཞིན་དང་ཞེས་བྱ་བའོ། །ལན་ནི་རང་བཞིན་དང་ཞེས་བྱ་བའོ། །དེ་ལྟར་གྱུར་ན་ཅི་སྐྱོན་སྙམ་ན། དེས་ན་ཞེས་བྱ་བའོ། །དེ་ཡང་ནི་ཉེ་བར་བསྟན་

པའོ། །དོགས་པ་ནི་དེ་ལྟར་ན་ཞེས་བྱ་བ་སྟེ་ཁྱི་ཤ་ལ་སོགས་པ་དོན་ཡིན་ནོ། །ལན་ནི་འདི་ལ་ཞེས་བྱ་བ་སྟེ། ཆོས་སུ་སྒྲུབ་པ་ལ་ཚད་མ་ཅི་ཡང་མེད་དོ་ཞེས་སོ། །ཉེ་བར་བསྟན་པས་རྟོགས་པ་ལ་ཡང་ཁྱད་པར་འགའ་ཡང་མེད་དོ་ཞེས་བརྗོད་པ་ནི། གཞན་ཡང་ཞེས་བྱ་བའོ། །དེ་ལྟར་ན་ཞེས་བྱ་བ་ནི་མེ་ལ་

སྦྱིན་སྲེག་ལ་སོགས་པའི་དོན་གྱིས་སོ། །དེ་བས་ན་གྲགས་པ་ནི་དངོས་པོའི་སྟོབས་ཀྱིས་ཞུགས་པ་མ་ཡིན་ནོ། །རི་བོང་ཅན་ནི་ཟླ་བ་མ་ཡིན་ནོ་ཞེས་སྨྲ་བ་ལ། འཇིག་རྟེན་ཟླ་བ་ཉིད་དུ་བསྒྲུབ་པའི་དོན་དུ་བརྗོད་པ་ནི་གལ་ཏེ་ཞེས་བྱ་བའོ། །གྲུབ་པའི་བརྗོད་བྱ་བུམ་པ་ཞེས་བྱ་བ་ལ་སོགས་པ་བཞིན་ནོ། །

ཉེས་པ་གཞན་ཡང་བརྗོད་པ་ནི། རི་བོང་ཅན་ཞེས་བྱ་བའོ། །གྲགས་པ་ཐམས་ཅད་ལ་བསྙོན་འདེབས་པ་ལ་དཔེ་མེད་ཀྱི། འདོད་པའི་སྒྲའི་བརྗོད་བྱ་ཉིད་དུ་སྨྲ་བ་ལ་ནི། མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཁོ་ན་ཐུན་མོང་མ་ཡིན་པ་མ་ཡིན་ནམ། གཏན་ཚིགས་གཞན་ཡང་དེ་ལྟར་ཅི་སྟེ་འགྱུར་

ཞེ་ན། དེ་ལ་ཞེས་སྨོས་སོ། །འདིས་ནི་ཞེས་བྱ་བ་ནི་ཡོད་པ་ཉིད་ལ་སོགས་པས་སོ། །གལ་ཏེ་འདིས་བསྒྲུབ་པར་ནུས་པ་མ་ཡིན་ན། འོ་ན་གང་གིས་ཞེས་བྱ་བའོ། །ཟླ་བ་ཉིད་མ་བསྒྲུབས་ན་ཡང་ཟླ་བ་མ་ཡིན་པ་ཉིད་ཀྱི་གནོད་བྱེད་དུ་ཅི་ལྟར་འགྱུར་ཞེ་ན། ལན་ནི་སྒྲ་ལས་ཞེས་བྱ་བའོ། །གཞན་དག་

གཞན་དུ་ཡང་ཐུན་མོང་མ་ཡིན་པ་ཉིད་ཡིན་ནོ་ཞེས་བརྗོད་པ་ནི། གལ་ཏེ་ཞེས་བྱ་བའོ། །ཅི་ལྟར་རྙེད་དེ་མི་རྙེད་པ་ཁོ་ནའོ་ཞེས་བྱ་བའི་དོན་ཏོ། །ཅི་ཞིག་མི་རྙེད་སྙམ་ན། གྲགས་པ་མཐའ་དག་ཅེས་བྱ་བའོ། །འདི་ཉིད་ཞེས་བྱ་བ་ནི་ཡོད་པའི་ཕྱིར་ཞེས་བྱ་བ་འདིའོ། །དེ་སྐད་ཅེས་བྱ་བ་ནི་གང་ལ་ཞེས་

เล่ม ๑๘๖ · หน้า 84b

བྱ་བ་ལ་སོགས་པའོ། །ཅིའི་ཕྱིར་ཞེ་ན། མཚན་ཉིད་ཕྱིར་ཞེས་བྱ་བའོ་མཚན་ཉིད་ནི་མ་ཁྱབ་པའི་ཉེས་པ་དང་བྲལ་བ་བསྟན་པར་བྱ་དགོས་ན་འདི་ནི་ད་ལྟར་མ་གྱུར་ཏོ་ཞེས་བྱ་བའི་དོན་ཏོ། །ཅི་ལྟར་ན་འདི་གཞན་དག་གི་ཡང་དག་ཏུ་བྱས་ཏེ་བརྗོད་སྙམ་ན། དེ་བཞིན་ཞེས་བྱ་སྟེ་རི་བོང་ཅན་ཟླ་བ་མ་ཡིན་ཏེ་མེད་པའི་

ཕྱིར་ཞེས་བྱ་བ་དེ་བཞིན་དུ་དཱ་ཏྲི་ཤིང་མ་ཡིན་ཏེ་ཞེས་བྱ་བ་ལ་ཡང་གནོད་པའི་ཕྱིར་གཞན་གྱི་ཡང་དབང་དུ་བྱས་ནས་དེ་སྐད་བརྗོད་པ་ཡིན་ནོ། །དེ་ལྟ་མ་ཡིན་ན་མཚན་ཉིད་མ་ཁྱབ་པར་འགྱུར་རོ་ཞེས་བྱ་བའི་དོན་ཏོ། །འོན་ཏེ་དཱ་ཏྲི་ནི་ཤིང་མ་ཡིན་ནོ་ཞེས་བྱ་བ་ལ་ཡང་ཤིང་གཅིག་ཡིན་པའི་ཕྱིར་ཐུན་མོང་མ་

ཡིན་པར་འགྱུར་རོ་ཞེས་བྱ་བའི་ལན་དུ་འགྱུར་རོ་སྙམ་ན། ཤ་པ་ཞེས་བྱ་བའོ། །ལན་གྱི་རྣམ་པ་བརྗོད་པ་ནི་ཤིང་གཅིག་ཅེས་བྱ་བའོ། །གལ་ཏེ་རི་བོང་ཅན་ཟླ་བ་མ་ཡིན་ཏེ་ཡོད་པའི་ཕྱིར་ཞེས་བྱ་བ་འདི་ལ་ནི་རེ་ཞིག་འདི་ལན་དུ་འགྱུར་བ་ཁོ་ནའོ། །གཞན་ལ་ནི་ཡིན་དུ་རུང་ཡང་མ་ཡིན་རུང་སྙམ་ན།

དང་པོ་གཅིག་ཉིད་ཀྱི་ཞེས་བྱ་བའོ། །དཔེ་ནི་རི་བོང་ཅན་ཟླ་བ་མ་ཡིན་ནོ་ཞེས་བྱ་བའོ། །མཚན་ཉིད་ནི་གང་ལ་ཞེས་བྱ་བ་ལ་སོགས་པའོ། །གལ་ཏེ་ཞེས་བྱ་བ་ནས་འདིར་བཤད་པའི་ལྟག་ཡན་ཆད་ནི་རྩོད་པའོ། །དེ་སྟེ་ཞེས་བྱ་བ་ནི་དོགས་པ་བསུ་བའོ། །ཅིའི་ཕྱིར་ཞེ་ན། དེ་ལྟར་ཞེས་བྱ་བའོ། །

མི་འཇུག་པ་ཁོ་ནའོ་ཞེ་ན། འདི་ལྟར་ཞེས་བྱ་བའོ། །དེའི་ཕྱིར་ཞེས་བྱ་བ་ནི་རེ་རེའི་རང་བཞིན་ཡིན་པའི་ཕྱིར་རོ། །དཔེ་གཅིག་གི་དབང་དུ་བྱས་ནས་ཀྱང་མཚན་ཉིད་བྱ་བ་ཡིན་ཏེ། འདི་ལ་ནི་ལོག་པར་རྟོག་པ་མེད་མོད་ཀྱི་འོན་ཀྱང་མ་ཁྱབ་པ་ལ་སོགས་པའི་ཉེས་པ་དང་བྲལ་བ་ཉིད་བྱ་བ་མ་ཡིན་

ནོ་ཞེས་བཤད་པ་ནི། འདིར་བཤད་པ་ཞེས་བྱ་བའོ། །འདི་ནི་ཞེས་བྱ་བ་གང་ལ་ཞེས་བྱ་བ་ལ་སོགས་པའི་མཚན་ཉིད་ནི་མ་ཁྱབ་པར་འགྱུར་རོ། །ཅི་ལྟར་ཞེ་ན། གཞན་གྱིས་ནི་བརྗོད་པས་སོ། །སློབ་དཔོན་ཕྱོགས་ཀྱི་གླང་པོའི་གཞུང་འཆད་པ་གཞན་དག་ནི་ཟླ་བ་གཅིག་ཡིན་པའི་ཕྱིར་ན། ཡོད་

པའི་ཕྱིར་ཞེས་བྱ་བ་འདི་ཐུན་མོང་མ་ཡིན་པར་བརྗོད་ནས། གྲགས་པས་གནོད་པར་འཛེར་ཏོ། །དེ་ལྟ་ན་ནི་རི་བོང་ཅན་ནི་ཟླ་བ་མ་ཡིན་ནོ་ཞེས་བྱ་བ་འདིར་གྲགས་པས་བསལ་བར་འགྱུར་གྱི། ཤ་པ་ནི་ཤིང་མ་ཡིན་ཏེ་ཡོད་པའི་ཕྱིར་ཞེས་བྱ་བ་འདིར་ནི་མ་ཡིན་པར་འགྱུར། འདིར་གྲགས་པས་

เล่ม ๑๘๖ · หน้า 85a

བསལ་བ་མེད་དོ་ཞེས་ནི་བརྗོད་པར་མི་ནུས་སོ། །དེས་གཞན་གྱིས་བརྗོད་པས་ནི་གཞན་གྱིས་གྲགས་པས་གནོད་པའི་མཚན་ཉིད་ལ་མ་ཁྱབ་པའི་ཉེས་པས་ཉེས་པ་དང་བཅས་པར་འགྱུར་རོ། །མ་ཁྱབ་པ་ཉིད་བརྗོད་པ་ནི། འདི་ལྟར་ཞེས་བྱ་བའོ། །གཞན་གྱིས་བརྗོད་པའི་རིགས་པ་ཟླ་བ་

གཅིག་ཡིན་པའི་ཕྱིར་ཞེས་བྱ་བ་ལས་སོ། །གལ་ཏེ་རིགས་པ་འདི་གཞན་ལ་ཡང་འགྱུར་རོ་སྙམ་ན། སྨྲས་པ་ཤིང་ཞེས་བྱ་བའོ། །འོན་ཏེ་ཞེས་བྱ་བ་ལ་སོགས་པས་ནི་འདི་སྙམ་དུ་ཤ་པ་ནི་ཤིང་མ་ཡིན་ཏེ་ཡོད་པའི་ཕྱིར་ཞེས་བྱ་བ་ནི་གྲགས་པས་བསལ་བ་མ་ཡིན་ནོ། །འོ་ན་ཅི་ཞེ་ན། ཐུན་མོང་བ་ཉིད་ཀྱིས་

འདི་ནི་ཤིང་ཡིན་ཏེ། ཡོད་པའི་ཕྱིར་ཤིང་གཞན་བཞིན་ནོ་ཞེས་བྱ་བའི་རྗེས་སུ་དཔག་པ་ཡོད་པ་ཉིད་དོ། །དེས་ན་ཤིང་མ་ཡིན་པ་ཉིད་ནི་རྗེས་སུ་དཔག་པ་དེས་གནོད་པར་འགྱུར་རོ་སྙམ་དུ་བསམས་པའོ། །རྩོད་པ་འདི་ལ་བརྗོད་པ་ནི། འདིར་ཡང་ཞེས་བྱ་བ་སྟེ། ཤིང་མ་ཡིན་ནོ་ཞེས་བྱ་བ་འབའ་ཞིག་

ཏུ་ནི་མ་ཟད་དེ། རི་བོང་ཅན་ནི་ཟླ་བ་མ་ཡིན་ཏེ་ཡོད་པའི་ཕྱིར་ཞེས་བྱ་བ་འདིར་ཡང་ཐུན་མོང་བ་ཉིད་ཀྱིས་རྗེས་སུ་དཔག་པས་གནོད་པ་ཡོད་པ་ཡིན་ནོ། །ཅི་ལྟར་ཞེ་ན། ག་པུར་དང་དངུལ་ལ་སོགས་པ་ལ། ཟླ་བའི་སྒྲས་བརྗོད་པར་བྱ་བ་ཉིད་མཐོང་བའི་ཕྱིར་རོ། །དེས་ན་ཐུན་མོང་བ་ཉིད་ཀྱིས་ཡོད་པ་ཟླ་བ་མ་ཡིན་

པ་ལ་གནོད་པར་བྱེད་པ་མ་ཡིན་ཏེ་དེས་ན་གྲགས་པས་བསལ་བས་ཅི་ཡང་བྱར་མེད་དོ་ཞེས་དགོངས་པའོ། །གཞན་ཡང་ཟླ་བའི་སྒྲའི་རྗོད་པར་བྱེད་པ་ཉིད་བརྡ་ལས་འཇུག་པ་ལ་ཐུན་མོང་མ་ཡིན་ཡང་ཅི་ཞིག་ཡིན་ན། གང་གིས་ཡོད་པའི་ཕྱིར་ཞེས་བྱ་བའི་རྗེས་སུ་དཔག་པ་ཐུན་མོང་མ་ཡིན་པར་

འགྱུར། ཕྱེད་སྔ་མ་བཤད་ནས་ཕྱེད་ཕྱི་མ་འཆད་པ་ནི། བརྡ་ལས་ཞེས་བྱ་བའོ། །དེ་ལྟར་གྱུར་ན་ཅི་སྐྱོན་སྙམ་ན། དེས་ན་ཞེས་བྱ་བའོ། །ཟླ་བའི་སྒྲ་ཐུན་མོང་མ་ཡིན་པ་ཉིད་རྗེས་སུ་དཔག་པ་ཐུན་མོང་མ་ཡིན་པའི་རྒྱུ་མཚན་དུ་དོགས་པ་བསུ་བ་ནི། འོན་ཏེ་ཞེས་བྱ་བའོ། །ཟླ་བའི་སྒྲས་བརྗོད་

པར་བྱ་བ་ཉིད་དེའོ། །དེས་ནི་ཡོད་པ་ཉིད་ནི་ཐུན་མོང་མ་ཡིན་པ་ཉིད་ཀྱིས་ཟླ་བ་མ་ཡིན་པ་ལ་གནོད་པར་བྱེད་པ་མ་ཡིན་ནོ། །དེས་ན་གྲགས་པ་བསལ་བ་ཡིན་ནོ་ཞེས་སེམས་པའོ། །གལ་ཏེ་ལ་ལར་ཏེ་རི་བོང་ཅན་ཉིད་ནི་ཟླ་བ་ཉིད་དོ། །ཟླ་བ་ལ་བསྙོན་པ་དེ་ལ་གྲུབ་ཀྱི་རྡུལ་ལ་སོགས་པ་ལ་ནི་མ་

เล่ม ๑๘๖ · หน้า 85b

ཡིན་ན། དེའི་ཚེ་ངེས་པའི་ཡུལ་ཅན་དངོས་པོ་པ་ཉིད་ཡིན་པ་དགག་ཏུ་མེད་དོ། །གྲགས་པས་གྲུབ་པ་ནི་མ་ངེས་པའི་ཡུལ་ཅན་ཡིན་པས་ན། རི་བོང་ཅན་མ་ཡིན་པ་དངུལ་ལ་སོགས་པ་ལ་ཡང་འགྱུར་རོ། །དེས་ན་གང་ལས་གྲགས་པས་གནོད་པའི་གོ་སྐབས་སུ་འགྱུར་བ་ཐུན་མོང་མ་ཡིན་པ་ཉིད་དུ་ཅི་ལྟར་

འགྱུར་ཏེ། འདི་ནི་བཤད་པར་གསལ་ལོ། །ཛ་ཡནྟས་ཀྱང་བཤད་པ་གཞན་བྱས་པ་ནི། གལ་ཏེ་བུམ་པ་ལ་སོགས་པ་འགའ་ཞིག་ལ་ཟླ་བ་མ་ཡིན་པ་ཉིད་དངོས་པོའི་སྟོབས་ཀྱིས་ཟླ་བ་ཉིད་བསྙོན་པ་དེ་ལ་གྲུབ་ན། དེའི་ཚེ་ཟླ་བ་ཉིད་དེ་ཡང་རི་བོང་ཅན་ལ་དེ་ཁོ་ན་བཞིན་འགྲུབ་པར་འགྱུར་རོ། །

ཅིའི་ཕྱིར་ཞེ་ན། བུམ་པ་ལ་སོགས་པ་ལ་གྲགས་པས་གྲུབ་པའི་ཟླ་བ་མ་ཡིན་པ་ཉིད་ཁས་ལེན་ན་རི་བོང་ཅན་ལ་ཟླ་བ་ཉིད་བཟློག་པ་མེད་པའི་ཕྱིར་ཏེ། རིགས་པ་མཚུངས་པའི་ཕྱིར་རོ་ཞེས་སོ། །འགྲེལ་བྱེད་པའི་བཤད་པ་ཡང་གཞན་ཡིན་ཏེ། གལ་ཏེ་དངུལ་ལ་སོགས་པ་ལ་ལ་ཁོ་ན་ལ་ཟླ་བ་ཉིད་

གྲུབ་ན། དེའི་ཚེ་ངེས་པའི་ཡུལ་ཅན་དེ་ནི་དངོས་པོ་པ་ཁོ་ནར་གྲུབ་པ་ཡིན་པ། ཅི་ལྟར་དངོས་པོ་མ་ཡིན་པའམ། དེ་དགག་པར་ཡང་འགྱུར། འོན་ཏེ་གྲགས་པས་གྲུབ་པའི་ཕྱིར་དངོས་པོ་མ་ཡིན་ན། དེའི་ཚེ་གྲགས་པར་ཁྱད་པར་མེད་པའི་ཕྱིར་རི་བོང་ཅན་ལ་ཡང་བཟློག་ཏུ་མེད་དོ་

ཞེས་སོ། །དེ་ལྟར་འཆད་པ་འདི་གཉི་ག་ཡང་སྐབས་དང་རྗེས་སུ་མཐུན་པ་མ་ཡིན་ནོ་ཞེས་ཆེན་པོ་རྣམས་ཉིད་ཀྱིས་དཔྱད་པར་བྱའོ། །དེ་དངོས་པོ་ལ་ཞེས་བྱ་བ་ནི་ཟླ་བའི་སྒྲས་བརྗོད་པར་བྱ་བ་ཉིད་དེའོ། །གྲགས་པས་གྲུབ་པའི་དཔེར་ཞེས་བྱ་བ་ནི་རི་བོང་ཅན་ནི་ཟླ་བ་མ་ཡིན་ཏེ་དེ་ཡོད་པའི་ཕྱིར་

ཞེས་བྱ་བ་ཅི་ལྟར་འགྱུར། དངོས་པོ་ལ་གྲུབ་པའི་ཟླ་བ་ཉིད་ཀྱིས་གནོད་པའི་ཕྱིར་མི་འགྱུར་བ་ཁོ་ནའོ་ཞེས་བྱ་བའི་དོན་ཏོ། །དེས་ན་ཞེས་བྱ་བ་ནི་གྲགས་པས་གྲུབ་པ་ཉིད་ཀྱིས་ནའོ། །བཟློག་པ་མེད་པ་ཁོ་ནའོ་ཞེས་བྱ་བ་ནི་ཟླ་བའི་སྒྲས་བརྗོད་པར་བྱ་བ་ཉིད་དོ། །ཅིའི་ཕྱིར་ཞེ་ན། འདི་ལྟར་ཞེས་

བྱ་བའོ། །ག་པུར་ལ་སོགས་པ་དེ་ཡང་ངོ་། །དེས་ན་ཞེས་བྱ་བ་ནི། བཟློག་པ་མེད་པ་ནའོ། །འདིས་ནི་གྲགས་པས་བསལ་བ་ཞེས་བྱ་བ་མེད་པར་འགྱུར་རོ་ཞེས་གང་བརྗོད་པ་དེ་གཞུང་བཙུགས་པ་ཡིན་ནོ། །ཡང་རྣམ་པ་གཞན་གྱི་སྒོ་ནས་གྲགས་པས་བསལ་བའི་ཡུལ་མེད་དོ་ཞེས་

เล่ม ๑๘๖ · หน้า 86a

དོགས་པ་བསུ་བ་ནི། འོན་ཏེ་ཞེས་བྱ་བའོ། །ག་པུར་ལ་སོགས་པ་ལ་ཟླ་བའི་སྒྲས་བརྗོད་པར་བྱ་བ་ཉིད་རྣམ་པ་ཅི་ལྟར་ཡང་རུང་བར་བརྟགས་པ་ནི་མ་ཡིན་གྱི་འོན་ཀྱང་ཚིམ་པར་བྱེད་པ་ལ་སོགས་པའི་རྒྱུ་མཚན་གྱིས་ཡིན་ནོ། །དེས་ན་ཞེས་བྱ་བ་ནི་ཚིམ་པར་བྱེད་པ་ལ་སོགས་པའི་རྒྱུ་

མཚན་གྱིས་འཇུག་པ་ནའོ། །ག་པུར་ལ་སོགས་པ་དེའི་དཔེ་ཞེས་བྱ་བ་ཡོད་པས་ཟླ་བའི་སྒྲ་བསྒྲུབ་པའི་དཔེ་མ་ཡིན་ནོ། །དཔེ་མེད་པ་དེས་ན་ཐུན་མོང་མ་ཡིན་ནོ། །ཟླ་བའི་སྒྲས་བརྗོད་པར་བྱ་བ་ནི་ག་པུར་ལ་སོགས་པ་ལ་ཐུན་མོང་དུ་ཡོད་པ་མ་ཡིན་ཏེ། དེས་ན་ཡོད་པ་ཡང་ཟླ་བ་ཉིད་སྒྲུབ་པའི་དོན་དུ་བཀོད་

པ་ཐུན་མོང་མ་ཡིན་པ་ཉིད་ཡིན་པས་གང་གིས་གྲགས་པས་བསལ་བའི་གོ་སྐབས་མེད་པར་འགྱུར་བ་ཅི་ལྟར་ཟླ་བ་མ་ཡིན་པ་ཉིད་ལ་གནོད་པར་བྱེད་པར་འགྱུར་ཞེས་སེམས་པའོ། །ལན་ནི་དངོས་པོ་ལ་ནི་ཞེས་བྱ་བ་སྟེ། གལ་ཏེ་ག་པུར་ལ་སོགས་པ་ལ་ཟླ་བའི་སྒྲས་བརྗོད་པར་བྱ་བ་ཉིད་རྒྱུ་མཚན་གྱི་

དངོས་པོ་ཡོད་པ་ལ་གྲུབ་པ་ཡིན་ན་དེའི་ཚེ་རི་བོང་ཅན་ལའང་བཟློག་པ་མེད་དེ་རྒྱུ་མཚན་ཡོད་པའི་ཕྱིར་རོ། །འོན་ཏེ་རྒྱུ་མཚན་མེད་པའི་ཕྱིར་ཟློག་པ་ཡིན་ནོ་ཞེ་ན། བརྗོད་པ་རྒྱུ་མཚན་གྱི་དངོས་པོ་དེ་མེད་ན་རི་བོང་ཅན་ལ་ཟླ་བའི་སྒྲས་བརྗོད་པར་བྱ་བ་ཉིད་བཟློག་ཀྱང་། ཟློག་པར་བྱེད་པ་ལ་གྲགས་པས་བསལ་

བའི་ཉེས་པ་ཡོད་པ་མ་ཡིན་ཏེ། མེ་མེད་པས་དུ་བ་མེད་པར་སྟོན་པ་ལ་ནི་གྲགས་པས་གནོད་པའི་ཉེས་པ་ཡོད་པ་མ་ཡིན་ནོ། །བཟློག་པ་མེད་དོ་ཞེས་བྱ་བ་ནི་ཟླ་བའི་སྒྲས་བརྗོད་པར་བྱ་བའོ། །དེས་ན་ཐུན་མོང་བ་ཉིད་ཀྱིས་རྗེས་སུ་དཔག་པས་གནོད་པ་ཉིད་ཡིན་གྱི། གྲགས་པས་གནོད་པ་ནི་མ་ཡིན་ནོ་

ཞེས་བྱ་བའི་དོན་ཏོ། །སྐྱོན་ཡོད་པ་མ་ཡིན་ཏེ་ཞེས་བྱ་བ་ནི་གྲགས་པས་གནོད་པའི་མཚན་ཉིད་དོ། །འོ་ན་ཅི་ལྟར་གྲགས་པས་གནོད་པའི་མཚན་ཉིད་ཀྱི་ཉེས་པར་འགྱུར་སྙམ་ན། དེ་ཕྱིར་ཞེས་གསུངས་སོ། །དངོས་པོ་ལ་ངེས་པ་མ་ཡིན་པའི་བརྡ་དང་སྒྲ་དེ་དག་ལས་བྱུང་བའི་ངང་ཚུལ་གང་ལ་

ཡོད་པའི་ཆོས། ཟླ་བའི་སྒྲས་བརྗོད་པར་བྱ་བ་ཉིད་ལ་སོགས་པ་དེ་རྣམས་སུ་དོན་རྣམས་རུང་བ་ཉིད་ཡིན་ནོ། །ཅིའི་ཕྱིར་ཞེ་ན། འདོད་པ་ཡོད་ན་བཀག་པ་མེད་པའི་ཕྱིར་རོ། །དེས་ན་དེ་ལ་གནོད་ན་གྲགས་པས་བསལ་བ་ཡིན་གྱི་གཞན་དུ་ནི་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཡོད་པའི་

เล่ม ๑๘๖ · หน้า 86b

རྒྱུ་མཚན་ཉིད་ལ་སྒྲ་འཇུག་པ་ཡིན་གྱི། འདོད་པ་ཙམ་གྱིས་ནི་མ་ཡིན་ནོ། །དེས་ན་དོན་རྣམས་རུང་བ་ཉིད་ཅི་ལྟར་ཡིན་ཞེ་ན། བརྗོད་པ་ནི་གལ་ཏེ་ཞེས་བྱ་བའོ། །གང་ལ་ཚད་མ་མེད་སྙམ་ན། སྒྲ་རྣམས་ཞེས་བྱ་བ་ནས་བྱ་བ་ལ་ཞེས་བྱ་བའི་བར་གྱི་དོན་ལའོ། །གལ་ཏེ་རྒྱུ་མཚན་ལ་བརྟེན་ནས་རྒྱུ་

མཚན་ཅན་ལ་སྒྲ་འཇུག་པ་ཡིན་ན། དེའི་ཚེ་རྒྱུ་མཚན་ལ་ཡང་རྒྱུ་མཚན་གཞན་ལ་ལྟོས་ནས་སྒྲ་འཇུག་པས་ན་ཐུག་པ་མེད་དོ་ཞེས་སྦྱར་རོ། །ཅིའི་ཕྱིར་འདི་ལ་ཚད་མ་མེད་སྙམ་ན། འདི་ལྟར་ཞེས་བྱ་བའོ། །གལ་ཏེ་རིགས་ལ་སོགས་པའི་རྒྱུ་མཚན་ལ་ལས་རྒྱུ་མཚན་ལས་སྒྲ་འཇུག་པར་སྨྲ་བ་དེ་ལ། རྒྱུ་མཚན་

གཞན་ལ་མི་ལྟོས་པ་ཁོ་ནར་ངོ་བོ་ཉིད་ཀྱིས་རྗོད་པར་བྱེད་པ་གྲུབ་ན། དེའི་ཚེ་རྗོད་པ་དེ་ནི་དངོས་པོའི་སྟོབས་ཉིད་ལས་རྒྱུ་མཚན་དང་ལྡན་པའི་ཟླ་བ་ལ་གྲུབ་པ་ཡིན་ནོ་ཞེས་སྦྱར་རོ། །འོན་ཏེ་རྒྱུ་མཚན་ལ་རྗོད་པར་བྱེད་པ་གྲགས་པ་ཙམ་གྱིས་གྲུབ་པ་ཡིན་གྱི། རྒྱུ་མཚན་ཅན་ལ་ནི་མ་ཡིན་ནོ་སྙམ་ན།

གྲགས་གྲུབ་ཅེས་སྨོས་སོ། །རིགས་ལ་སོགས་པ་ལ་རྗོད་པར་བྱེད་པ་གྲགས་པས་གྲུབ་པར་ཁས་ལེན་ན་རི་བོང་ཅན་ལ་ཡང་། ཟླ་བའི་རྗོད་པར་བྱེད་པ་བཟློག་པ་མེད་པའི་ཕྱིར་རོ། །སྔར་གྱི་དགག་པར་ཕྱུང་བ་ཡིན་ལ་འདིར་མ་ཡིན་ནོ་ཞེས་བྱ་བ་ནི་ཁྱད་པར་རོ། །རེ་ཞིག་ཕྱེད་ཕྱི་མ་འཆད་པ་

ནི། གྲགས་པ་ཙམ་ལས་ཞེས་བྱ་བའོ། །འོན་ཏེ་རྒྱུ་མཚན་དང་ལྡན་པ་ལ་གྲགས་པ་ཙམ་གྱིས་མི་འཇུག་གིས། འོན་ཀྱང་རྒྱུ་མཚན་ཉིད་ལ་ཡིན་པ་དེས་ན། རི་བོང་ཅན་ལའང་བཟློག་མེད་ཕྱིར། །ཞེས་ཅི་ལྟར་རྗོད་སྙམ་ན། གང་ཡང་རུང་བ་ལ་ཞེས་བྱ་བའོ། །དེ་ལ་ཞེས་བྱ་བ་ནི་དེ་ལྟར་རྣམ་པར་གནས་པ་

ནའོ། །ཅིའི་ཕྱིར་ཞེ་ན། རྒྱུ་མཚན་ལ་ཡང་ཞེས་བྱ་བ་སྟེ། རྒྱུ་མཚན་དང་ལྡན་པ་འབའ་ཞིག་ཏུ་ནི་མ་ཟད་པའོ། །ཕྱེད་ཕྱི་མ་བཤད་ནས་ཕྱེད་སྔ་མ་བཤད་པའི་ཕྱིར་དོགས་པ་བསུ་བ་ནི་འོན་ཏེ་ཞེས་བྱ་བའོ། །དེ་ལ་ནི་རྒྱུ་མཚན་ལའོ་གཞན་དུ་ཡང་ཞེས་བྱ་བ་ནི་ལན་ཏེ། རྒྱུ་མཚན་ཅན་ལ་ལ་

ཡང་ངོ་། །འོན་ཏེ་ཞེས་བྱ་བ་ནི་གཞན་ལ་དེ་དང་ནི་རིགས་པ་ལ་སོགས་པ་དང་ངོ་། །སྒྲ་འབྲེལ་པ་ཡོད་པས་ལན་ནི་འདི་ཞེས་བྱ་བའོ། །ཅིའི་ཕྱིར་ཞེ་ན། སྒྲ་ནི་ཞེས་བྱ་བའོ། །གཞན་ལ་ནི་རྒྱུ་མཚན་ལའོ། །རྣམ་པ་གཞན་དུ་ཞེས་བྱ་བ་དོན་དམ་པར་འབྲེལ་པ་ཉིད་ཀྱིས་འཇུག་ནའོ། །གཞན་གྱིས་

เล่ม ๑๘๖ · หน้า 87a

སྨྲས་པ་དོན་དམ་པར་འབྲེལ་པ་ཉིད་དུ་རྒྱུ་མཚན་ལ་སྒྲ་འཇུག་བཞིན་པར་མཐོང་བ་དེས་ན་འཇུག་གོ་ཞེས་བརྗོད་པ་ཡིན་ནོ་ཞེ་ན། ལན་དུ་དོན་དམ་པར་འབྲེལ་པ་ཉིད་ཀྱིས་འཇུག་བཞིན་པར་ནི་མཐོང་བ་མེད་དོ། །ཅིའི་ཕྱིར་ཞེ་ན། འདོད་པ་ཙམ་གྱིས་ཞེས་བྱ་བའོ། །འོན་ཏེ་འདོད་པ་

ཙམ་ཞུགས་པ་ནི་རྒྱུ་མཚན་ལ་ཞུགས་པ་ལས་གཞན་ཡིན་ཏེ། དེས་ན་རྣམ་པར་དབྱེ་བ་ཡོད་དོ་ཞེ་ན། རྗོད་པར་འདོད་པ་ཙམ་གྱིས་ཞུགས་པའི་སྒྲ་དང་གཞན་རྒྱུ་མཚན་གྱིས་རབ་ཏུ་སྦྱར་བ་ལ་ཁྱད་པར་མཐོང་བ་ནི་མེད་དོ། །འདོད་པ་ཞེས་བྱ་བ་ནི་འདི་སྙམ་དུ་འདོད་པས་ཞུགས་པ་དང་གཞན་ལ་རང་གི་

ངོ་བོས་ནི་ཁྱད་པར་ཡོད་པ་མ་ཡིན་གྱི་འོན་ཀྱང་འདོད་པ་ཡོད་པ་དང་མེད་པ་དག་གིས་ཁྱད་པར་དུ་གྱུར་པ་ཡིན་ལ། འདོད་པ་དེ་མ་དམིགས་པ་ཡང་མེད་པ་ཡིན་ཏེ་ཁྱད་པར་ཡིན་ནོ་ཞེ་ན། ལན་ནི་མ་དམིགས་པ་ཞེས་བྱ་བའོ། །འདས་པའི་འདོད་པ་གཞན་གྱི་རྒྱུད་ལ་ཡོད་པ་རྟགས་ལས་རང་

ཡོད་པའི་དུས་ན་མ་རྟོགས་པ་ལ་ཡང་ངོ་། །ཡང་གི་སྒྲས་ནི་མེད་པ་འབའ་ཞིག་ལ་ཡིན་པར་ནི་མ་ཟད་པའོ། །གལ་ཏེ་ཡོད་ན་ཅི་ལྟར་འོ་ན་འདོད་པའི་གནོད་བྱེད་མ་ཡིན་ཞེ་ན། བརྗོད་པ་མ་དམིགས་པ་ནི་ཞེས་བྱ་བའོ། །འཇིག་རྟེན་ཐམས་ཅད་ཀྱི་འདོད་པ་ལ་ནི་གནོད་པ་མ་ཡིན་ནོ། །འདི་ག་ལས་

ཤེ་ན། ད་ལྟར་ཞེས་བྱ་བའོ། །གང་གི་ཕྱིར་ཡུལ་དང་དུས་དང་རང་བཞིན་གྱིས་མ་བསྐལ་པ་ཁོ་ན་ལ་མི་དམིགས་པ་གནོད་པར་བྱེད་པ་ཡིན་གྱི། གཞན་ལ་ནི་མ་ཡིན་ཏེ། དེས་ན་འདོད་པ་ཐམས་ཅད་ཀྱིས་གནོད་པ་བྱེད་པ་ནི་མ་ཡིན་ཏེ། དམིགས་པའི་མཚན་ཉིད་ཀྱིས་གྱུར་པ་མ་ཡིན་པའི་ཕྱིར་རོ། །

གང་གི་ཕྱིར་དེ་ལྟར་ཐམས་ཅད་ཀྱི་འདོད་པ་མེད་པ་མ་ཡིན་པ་དེའི་ཕྱིར་རོ། །འདིར་ཞེས་བྱ་བ་ནི་ཟླ་བ་ལ་སོགས་པའི་སྒྲ་ལའོ། །དེའི་སྟེ་རྒན་པོ་འདས་ནས་ཡུན་རིང་དུ་ལོན་པའི་ཉེ་བར་བསྟན་པས་སོ། །དེའི་ཚེ་འགལ་བ་ཅི་ཡོད་དེ་ཅི་ཡང་མེད་དོ་ཞེས་བྱ་བའི་དོན་ཏོ། །ཅི་ལྟར་རྒྱུ་མཚན་ལ་འཇུག་པ་

དེ་བཞིན་དུ་རྒྱུ་ཅན་ལ་ཡང་སྒྲ་འཇུག་པ་ཡིན་ནོ་ཞེས་བརྗོད་པ་དེ་བསྒྲུབས་ནས་མཇུག་སྡུད་པ་ནི། དེས་ན་ཞེས་བྱ་བའོ། །དེས་ན་སྒྲ་རྣམས་ནི་འདོད་པ་ལ་རེག་པས་འཇུག་པ་ཉིད་དོ་ཞེས་གནས་སོ། །དེ་ལྟར་སྒྲ་རྒྱུ་མཚན་གྱིས་རབ་ཏུ་སྦྱར་བར་སྨྲ་བ་རྣམས་བསལ་ནས། སྒྲ་རྫས་ཀྱིས་རབ་ཏུ་སྦྱར་བར་

เล่ม ๑๘๖ · หน้า 87b

སྨྲ་བ་རྣམས་བསལ་བའི་ཕྱིར་ཉེ་བར་འགོད་པ་ནི་གཞན་དག་ཅེས་བྱ་བའོ། །ཅི་སྨྲ་ཞེ་ན་སྔར་ཞེས་བྱ་བ་ནས་འདི་ལ་ཚད་མ་འགའ་ཡང་མེད་དོ་ཞེས་བྱ་བའི་མཐར་ཐུག་པའོ། །ཅིའི་ཕྱིར་དེ་ལྟར་མི་འཇུག་སྙམ་ན། རིམ་གྱིས་ཞེས་བྱ་བའོ། །དེས་ན་རྒྱུ་མཚན་ཅན་ཉིད་ལ་སྒྲ་འཇུག་གི་རྒྱུ་མཚན་ལ་མ་ཡིན་ཞིང་། དེའི་

སྒོ་ནས་རྒྱུ་མཚན་ཅན་ལ་འཇུག་པ་ཡང་མ་ཡིན་ནོ། །དེས་ན་ཐུག་པ་མེད་པ་མ་ཡིན་ནོ་ཞེས་བྱ་བའི་དོན་ཏོ། །དེ་ཉིད་སྒྲ་རྒྱུ་མཚན་ཅན་གྱིས་རབ་ཏུ་སྦྱར་བར་སྨྲ་བའི་དོགས་པ་བསུ་བ་ནི། འོན་ཏེ་ཞེས་བྱ་བའོ། །རྒྱུ་མཚན་འགའ་ཞིག་ལ་ཡང་སྒྲ་འཇུག་པར་མཐོང་ངོ་། །རྒྱུ་མཚན་དེ་གང་ཞེ་ན། དངོས་

པོ་ཉིད་དང་ཞེས་བྱ་བའོ། །ལན་ནི་དངོས་པོ་ཞེའམ་བ་ལང་ཞེས་བྱ་བའི་སྒྲ་ནི་རྒྱུ་མཚན་ལ་མཐོང་བ་མ་ཡིན་ནོ། །ཅིའི་ཕྱིར་ཞེ་ན། དངོས་པོ་ཉིད་ལ་སོགས་པའི་སྒྲ་དེ་ནིའོ། །གལ་ཏེ་ཡང་དངོས་པོ་ཉིད་ལ་སོགས་པའི་སྒྲ་རྒྱུ་མཚན་ལ་མཐོང་བ་དེ་ལྟ་ན་ཡང་དངོས་པོ་དང་བ་ལང་གི་སྒྲས་དང་པོ་རྒྱུ་

མཚན་བརྗོད་ནས། རྒྱུ་མཚན་དང་ལྡན་པ་ལ་འཇུག་པ་ནི་མ་ཡིན་ནོ་ཞེས་བྱ་བའི་དོན་ཏོ། །ཅི་ལྟར་དེ་སྒྲ་གཞན་ཡིན་ཞེ་ན། གང་ཞིག་ཅེས་བྱ་བའོ། །དངོས་པོ་ལ་སོགས་པའི་སྒྲ་ནི་དངོས་པོ་ཉིད་ལ་སོགས་པ་ལ་རབ་ཏུ་སྦྱར་བ་མ་ཡིན་ནོ་ཞེས་བསམས་པའོ། །འདི་ག་ལས་སྙམ་ན། བརྗོད་བྱ་

ཞེས་བྱ་བའོ། །དངོས་པོ་ཉིད་ལ་སོགས་པའི་སྒྲ་དག་དེ་ལྟར་སྒྲ་གཞན་ཡིན་མོད། དེ་ལྟ་ན་ཡང་ཅི་ལྟར་རྒྱུ་མཚན་ལ་འཇུག་པ་མ་ཡིན་ཞེ་ན། རྗེས་སུ་འགྲོ་བ་དང་ཞེས་བྱ་བའོ། །ཅིའི་ཕྱིར་ཞེ་ན། དངོས་པོའི་རྐྱེན་དང་ཞེས་བྱ་བའོ། །སྒྲ་རྒྱུ་མཚན་གྱིས་རབ་ཏུ་སྦྱར་བར་སྨྲ་བ་དག་གིས་བརྒལ་

བ་ནི་ཅི་སྟེ་ཞེས་བྱ་བ་ལ་སོགས་པའོ། །འོ་ན་ཅི་ལྟར་ན་རྒྱུ་མཚན་རྗོད་པར་བྱེད་པ་ཡིན་ཞེ་ན། གང་གི་ཚེ་ཞེས་བྱ་བའོ། །དེ་ཉིད་ཅེས་བྱ་བ་ནི་རྒྱུ་མཚན་གྱི་མཚན་ཉིད་དོ། །ཅི་ལྟར་དེས་དེ་གསལ་སྙམ་ན། དངོས་པོའི་ཞེས་སྨྲས་སོ། །སྒྲ་རྫས་ཀྱིས་རབ་ཏུ་སྦྱར་བས་སྨྲ་བ་དག་

གིས་ལན་བཏབ་པ་ནི། དེ་ནི་མ་ཡིན་ཏེ་ཞེས་བྱ་བའོ། །རྫས་ལ་འཇུག་པའི་སྒྲ་ལའོ། །དེའི་ཁྱད་པར་ནི་རྫས་ཀྱི་ཁྱད་པར་རོ། །འདི་ཡང་ཁས་བླངས་ནས་བརྗོད་པར་ཟད་དོ་ཞེས་སྨྲས་པ་ནི། རང་བཞིན་དང་ཞེས་བྱ་བའོ། །དེས་ན་སྒྲ་ཐམས་ཅད་ནི་རྫས་ལ་འཇུག་པ་ཁོ་ནའོ་ཞེས་ཡིད་ལ་

เล่ม ๑๘๖ · หน้า 88a

མནོས་པའོ། །ཡང་སྒྲ་རྫས་ཀྱིས་རབ་ཏུ་སྦྱར་བ་སྨྲ་བ་གཞན་འགོད་པ་ནི། གཞན་དག་ནི་ཞེས་བྱ་བའོ། །ཉིད་ལ་ཞེས་བྱ་བ་ནི་རྒྱུ་མཚན་ལ་མ་ཡིན་པའོ། །འོ་ན་ཅི་ལྟར་ན་རིགས་མི་མཐུན་པ་ལས་རྣམ་པར་གཅོད་པར་བྱེད་པ་ཡིན་ཞེ་ན། རྒྱུ་མཚན་ནི་ཞེས་བྱ་བའོ། །སྔ་མ་ནི་སྒྲ་ལས་མ་

རྟོགས་པའི་རྒྱུ་མཚན་ཉིད་རྣམ་པར་གཅོད་པར་བྱེད་པ་ཡིན་ནོ་ཞེས་བརྗོད་པ་ཡིན་ན། འདི་ནི་མ་བརྗོད་པར་ཟད་ཀྱི་རྣམ་པར་གཅོད་པར་བྱེད་པ་མ་རྟོགས་པ་ནི་མ་ཡིན་ནོ་ཞེས་བརྗོད་པའོ་ཞེས་བྱ་བ་ནི་འདི་ཉིད་ཀྱི་ཁྱད་པར་རོ། །ད་ནི་གྲུབ་པའི་མཐའ་གསུངས་པ་ནི། དེ་ནི་ཞེས་བྱ་བ་སྟེ། ལུགས་གཉི་ག་ཡང་

ངོ་། །གལ་ཏེ་རྒྱུ་མཚན་འགའ་ཞིག་ལ་སྒྲ་སྟེ་འཇུག་པར་གྲུབ་ན། དེའི་ཚེ་རྒྱུ་མཚན་དང་ལྡན་པ་ལ་ཡང་། འཇུག་པ་དེ་ནི་དངོས་སྟོབས་ལས་གྲུབ་པ་ཡིན་གྱི་གཞན་དུ་ནི་མ་ཡིན་ཏེ། རྒྱུ་མཚན་མ་བརྗོད་པ་ནི། དེས་རྣམ་པར་གཅོད་པ་རྟོགས་པ་མ་ཡིན་ནོ། །འོན་ཏེ་རྒྱུ་མཚན་ནི་སྒྲ་ལས་རྟོགས་པ་ཁོ་

ནར་ཟད་ཀྱི་བརྗོད་པར་བྱ་བ་ནི་མ་ཡིན་ནོ་ཞེ་ན། གལ་ཏེ་རྟོགས་པས་གྲུབ་པར་ཁས་ལེན་པ་ན་རྒྱུ་མཚན་བརྗོད་པར་བྱ་བ་ཉིད་མ་ཡིན་ན། དེའི་ཚེ་བརྗོད་པར་བྱ་བ་མ་ཡིན་པ་ཉིད་ནི་རི་བོང་ཅན་ལའང་བཟློག་མེད་ཕྱིར་རོ། །རིགས་པ་མཚུངས་པའི་ཕྱིར་རོ། །འཆད་པ་ནི་གལ་ཏེ་ཞེས་བྱ་བའོ། །རྒྱུ་མཚན་

མ་རྟོགས་ན་ནི་རྒྱུ་མཚན་དང་ལྡན་པ་ལ་ཡང་སྒྲ་འཇུག་པ་མ་ཡིན་ནོ་ཞེས་བརྗོད་པ་ནི། སྒྲ་ཞེས་བྱ་བའོ། །ཁྱད་པར་ཅན་རྟོགས་པ་ནི་ཁྱད་པར་རྟོགས་པར་མེད་པར་མི་འགྱུར་བའི་ཕྱིར་དེ་མེད་ན་ཅི་ལྟར་སྲིད། སྲིད་ན་ཡང་རྒྱུ་མཚན་བརྗོད་བྱ་མ་ཡིན་པར་ཅི་ལྟར་འགྱུར་ཞེས་སྨྲ་བ་ནི། གལ་ཏེ་ཞེས་བྱ་བའོ། །

གལ་ཏེ་རྒྱུ་མཚན་གྱིས་རྣམ་པར་གཅད་པ་སྒྲ་ལས་རྟོགས་ན། དེའི་ཚེ་རྒྱུ་མཚན་དེ་ཡང་བློ་ལ་གནས་པས་ཅི་ལྟར་བརྗོད་པར་བྱ་བ་མ་ཡིན་ཏེ་ཡིན་པ་ཁོ་ནའོ། །འདི་ག་ལས་ཤེ་ན། རྒྱུ་མཚན་ཅན་ཞེས་བྱ་བ་སྟེ་རྫས་ལའོ། །དེ་ཞེས་བྱ་བ་ནི་སྒྲས་རྟོགས་པའོ། །དེས་ན་རྒྱུ་མཚན་ཡང་བརྗོད་པར་

བྱ་བ་ཉིད་དོ་ཞེས་དགོངས་པའོ། །དེས་ན་སྒྲ་རྣམས་ནི་རྫས་ལ་འཇུག་པ་ཉིད་མ་ཡིན་ནོ། །འོན་ཀྱང་ཞེས་བྱ་བ་ནི་གལ་ཏེ་ཡང་སྒྲས་རྒྱུ་མཚན་དང་རྒྱུ་མཚན་ཅན་གཉི་ག་རྟོགས་པ་དེ་ལྟ་ན་ཡང་རྒྱུ་མཚན་དང་ལྡན་པའི་རྫས་ཉིད་གཙོ་བོར་རྟོགས་པ་ཡིན་ཏེ། འཇིག་རྟེན་ནི་དེ་དོན་དུ་གཉེར་གྱི་དར་བ་

เล่ม ๑๘๖ · หน้า 88b

ལ་སོགས་པ་ནི་མ་ཡིན་པའི་ཕྱིར་རོ། །གལ་ཏེ་ཡོན་ཏན་བརྗོད་བྱ་མ་ཡིན་ན། འོ་ན་ཅི་ལྟར་རྟོགས་སྙམ་ན། མེད་ན་མི་འབྱུང་བ་ཉིད་ཀྱིས་ཞེས་གསུངས་སོ། །འོ་ན་ནི་གང་གིས་དེ་ཉིད་ནི་གཙོ་བོ་མ་ཡིན་ན། གང་གིས་དེ་ཉིད་རྟོགས་པར་འགྱུར། ཅིའི་ཕྱིར་ཞེ་ན། གཙོ་བོ་ཕལ་པ་ཞེས་སྨོས་སོ། །གང་གིས་ཞེས་བྱ་བ་རྒྱུ་མཚན་ནམ་རྫས་

ཀྱི་དབང་དུ་བྱས་པའོ། །དེ་ཉིད་ནི་རྒྱུ་མཚན་ནམ་རྫས་ཉིད་དོ། །དེའི་དོན་ཅན་ནི་ནད་མེད་པར་བྱེད་པའི་དོན་དུའོ། །དེའི་དོན་དུ་ནི་ལྟོ་ལ་ངན་གྱི་དོན་དུའོ། །འོ་ན་གང་གི་ཚེ་རྫས་གཙོ་བོར་རྟོགས་པར་བྱེད་ཅེ་ན། གང་གི་ཚེ་ཞེས་བྱ་བའོ། །གཉི་ག་ཡང་ཞེས་བྱ་བ་ནི་རྫས་དང་ཡོན་ཏན་ཚོགས་པའོ། །

གལ་ཏེ་དེ་ལྟར་སྒྲ་རྣམ་པ་གཉི་ག་ལྟར་ཡང་འཇུག་ན་འོ་ན་ཅི་ལྟར་འདོད་པ་ཙམ་གྱིས་འཇུག་པ་ཡིན་སྙམ་ན། དེ་ལ་ཞེས་བྱ་བའོ། །འདིས་ན་གྲགས་པ་ཙམ་ནི་སྒྲ་ཙམ་གྱི་རྒྱུ་མཚན་མ་ཡིན་ནོ་ཞེས་གང་བརྗོད་པ་དེ་བསལ་བ་ཡིན་ནོ། །གཞན་དག་བརྗོད་པར་བྱ་བ་མ་ཡིན་ཡང་རྣམ་པར་གཅོད་པར་

བྱེད་པ་ཉིད་དུ་འགྱུར་རོ་ཞེས་བརྗོད་པ་ནི། ཅི་སྟེ་ཡང་ཞེས་བྱ་བ་ནས། རྣམ་པར་གཅོད་པར་བྱེད་པ་ཡིན་ནོ་ཞེ་ན་ཞེས་བྱ་བའི་བར་རོ། །དེ་ཞེས་བྱ་བ་ནི་རྒྱུ་མཚན་ནོ། །ཅི་ལྟར་བརྗོད་པར་བྱ་བ་མ་ཡིན་ཞེ་ན་དཔེར་ན་ཞེས་བྱ་བའོ། །བྱ་རོག་དེ་ངེས་པ་མེད་པའི་ཕྱིར་ཡང་ཁྱིམ་གྱི་ཚིག་གིས་བརྗོད་

པར་བྱ་བ་མ་ཡིན་ནོ་ཞེས་བརྗོད་པ་ནི་ཅི་ལྟར་ཞེས་བྱ་བའོ། །དེ་མེད་ཀྱང་ཞེས་བྱ་བ་ནི་བྱ་རོག་མེད་ཀྱང་ངོ་། །གཏན་ཚིགས་དེས་ན་བྱ་རོག་དེ་ནི་བླང་བར་བྱ་བ་མ་ཡིན་ཏེ་ཁྱིམ་གྱི་སྒྲས་བརྗོད་པ་ཉིད་ཀྱིས་འཛིན་པ་མ་ཡིན་ནོ། །མི་ལ་སོགས་པ་སྟོན་པར་བྱེད་པ་ནི་བླང་བར་བྱ་བ་མ་ཡིན་ནོ་ཞེས་འབྲེལ་

ཏོ། །བྲམ་ཟེ་ལ་སོགས་པའི་སྒྲ་ནི་མི་ལ་སོགས་པ་བརྗོད་པའི་དོན་དུ་ཉེ་བར་ལེན་པ་མ་ཡིན་ཏེ། དེ་དག་ནི་བྲམ་ཟེ་ལ་སོགས་པ་རྗོད་པར་བྱེད་པ་ཡིན་པའི་ཕྱིར་རོ། །ཉེ་བར་མཚོན་པར་བྱེད་པ་ཉིད་དུ་ཁས་བླངས་ནས་རྗོད་པར་བྱེད་པ་མ་ཡིན་པ་ཉིད་དུ་བརྗོད་པ་མ་ཡིན་གྱི་ཉེ་བར་མཚོན་པར་བྱེད་པ་

ཉིད་དུ་མི་རིགས་པའི་ཕྱིར་ཡང་བརྗོད་པར་བྱ་བ་མ་ཡིན་པ་ཉིད་དོ་ཞེས་བརྗོད་པ་ནི། བྱ་རོག་གིས་ཞེས་བྱ་བའོ། །དེ་ནི་ཁང་བཟངས་སོ། །ཅིའི་ཕྱིར་ཞེ་ན། དེ་ནི་ཞེས་བྱ་བ་སྟེ་བྱ་རོག་དེ་ནིའོ། །འོ་ན་དེ་གང་གི་ཉེ་བར་མཚོན་བྱེད་ཡིན་སྙམ་ན། རྟོག་པ་མངོན་དུ་ཞེས་བྱ་བའོ། །དེ་ལྟ་མ་

เล่ม ๑๘๖ · หน้า 89a

ཡིན་ན་ཞེས་བྱ་བ་ནི་ལྷ་གང་གི་རྒྱུ་མཚན་མེད་ནའོ། །དེས་ན་བྱ་རོག་བརྗོད་བྱ་མ་ཡིན་པ་དེ་བཞིན་དུ་རྒྱུ་མཚན་ཡང་ཡིན་ནོ་ཞེས་གནས་སོ། །གལ་ཏེ་བྱ་རོག་ཁྱིམ་གྱི་སྒྲའི་བརྗོད་བྱ་མ་ཡིན་ན། འོ་ན་ཅི་ལྟར་ཞེས་འདྲི་བའོ། །ལན་ནི་མངོན་སུམ་གྱིས་ཞེས་བྱ་བའོ། །དེ་ཉིད་ཀྱིས་ཞེས་བྱ་

བ་ནི་མངོན་སུམ་གྱིས་གྲུབ་པ་ཉིད་ཀྱིས་སོ། །འདི་ནི་བྱ་རོག་གོ། །བྱ་རོག་བཞིན་དུ་རིགས་ལ་སོགས་པ་ཡང་གཞན་བརྗོད་པས་སྟོན་པ་ཡིན་ནོ་ཞེ་ན། རིགས་ལ་སོགས་པ་ཞེས་བྱ་བའོ། །དེའི་ཕྱིར་རིགས་ལ་སོགས་པ་བརྗོད་པར་བྱ་བ་མ་ཡིན་པ་ཡང་དེ་དང་རིགས་མི་མཐུན་པ་ལས་རྣམ་པར་

གཅོད་པར་བྱེད་པ་འགྱུར་བ་ཡིན་ནོ་ཞེ་ན། འདི་ལ་ལན་བརྗོད་པ་ནི། རྒྱུ་མཚན་གང་ཞིག་ལོགས་སུ་རྟོགས་པར་འགྱུར་བ་དེ་ནི་བརྗོད་པར་བྱ་བ་མ་ཡིན་ཡང་རྣམ་པར་གཅོད་པར་བྱེད་པར་འགྱུར་བ་ཞེས་བྱ་བ་དེ་ལ་ནི་ལོག་པར་རྟོགས་པ་མེད་པ་ཁོ་ན་སྟེ་བྱ་རོག་བཞིན་ནོ་ཞེས་བལྟ་བར་བྱའོ། །བ་ལང་

ལ་སོགས་པའི་རྒྱུ་མཚན་གང་ཞིག་སྒྲ་དེ་ཉིད་ལས་རྟོགས་ཀྱི། སྒྲ་གཞན་ལས་ནི་མ་ཡིན་པའི་རྒྱུ་མཚན་དེ་ནི་བརྗོད་པར་བྱ་བ་ཉིད་དོ། །ཅིའི་ཕྱིར་ཞེ་ན། སྒྲས་ཞེས་བྱ་བ་ལ་སོགས་པའོ། །དེ་ལྟར་ཕྱེད་སྔ་མ་བཤད་ནས་ཕྱེད་ཕྱི་མ་བཤད་པའི་དོན་དུ་དོགས་པ་བསུ་བ་ནི་དེ་ལ་ཞེས་བྱ་བའོ། །རྒྱུ་

མཚན་དང་ལྡན་པ་ཁོ་ན་བརྗོད་པར་བྱ་བ་ཡིན་ནོ་ཞེས་བྱ་བའི་དོན་ཏོ། །ལན་ནི་རྟོགས་པ་ཞེས་བྱ་བའོ། །གལ་ཏེ་སྒྲ་ལས་རྟོགས་པར་གྲུབ་ཀྱི། དེའི་བརྗོད་པར་བྱ་བ་ཉིད་མ་ཡིན་ནོ། །དེའི་ཚེ་བརྗོད་པར་བྱ་བ་མ་ཡིན་པ་ཉིད་རྒྱུ་མཚན་དང་ལྡན་པ་རི་བོང་ཅན་ལའང་བཟློག་པ་མེད་པ་ཉིད་དོ། །འདི་ཉིད་

གསལ་བར་བྱེད་པ་ནི། རྒྱུ་མཚན་བཞིན་དུ་ཞེས་བྱ་བའོ། །གཉི་ག་ཡང་བརྗོད་པར་བྱ་བ་མ་ཡིན་པ་ཉིད་དུ་ཐལ་བར་འགྱུར་རོ་ཞེས་བྱ་བའི་དོན་ཏོ། །འོན་ཏེ་སྒྲ་ལས་རྟོགས་པ་ཉིད་ཀྱིས་རྒྱུ་མཚན་དང་ལྡན་པ་བརྗོད་པར་བྱ་བ་ཡིན་ནོ་ཞེ་ན། རྟོགས་པ་ཉིད་ལས་རྒྱུ་མཚན་དང་ལྡན་པའི་བརྗོད་པར་བྱ་

བ་ཉིད་དུ་ཁས་ལེན་པ་ཡིན་ན་ནི། རྒྱུ་མཚན་ལ་ཡང་བརྗོད་པར་བྱ་བ་ཉིད་མཚུངས་སོ། །དེ་བས་ན་རྒྱུ་མཚན་དང་ལྡན་པ་ཉིད་ལ་ནི་སྒྲ་འཇུག་པ་མ་ཡིན་ནོ་ཞེས་གནས་སོ། །ཡང་རྣམ་པ་གཞན་གྱིས་སྒྲ་ལས་རྟོགས་པ་ཡང་བརྗོད་པར་བྱ་བ་མ་ཡིན་ནོ་ཞེས་སྟོན་པ་ནི། གལ་ཏེ་ཞེས་བྱ་བའོ། །ལན་ནི་སྣོད་

เล่ม ๑๘๖ · หน้า 89b

རྟོགས་པ་ནི་མ་ཡིན་ཏེའོ། །ཅིའི་ཕྱིར་ཞེ་ན། སྣོད་དེའོ། །ཅིའི་ཕྱིར་མི་རྟོགས་ཤེ་ན། རང་གིས་ཞེས་བྱ་བའོ། །དེའི་ཕྱིར་ཞེས་བྱ་བའོ། །བརྗོད་པར་བྱ་བ་མ་ཡིན་པ་ནི་རྒྱུ་མཚན་ནོ། །མ་རྟོགས་པས་མཚོན་ན་ཧ་ཅང་ཐལ་བར་འགྱུར་རོ་ཞེས་བརྗོད་པ་ནི། མཚོན་པར་གྱུར་པས་ནི་ཞེས་བྱ་བའོ། །ཉེ་བར་

མཚོན་པའི་ཕྱིར་ཞེས་བྱ་བ་ནི་རྒྱུ་མཚན་ནོ། །ཕྱོགས་ནི་དུས་ཕྱིས་སོ། །དེས་རྣམ་པར་བཅད་པ་ནི་རྒྱུ་མཚན་གྱིས་རྣམ་པར་བཅད་པ་ཉིད་ཀྱི་རིགས་མཐུན་པ་ལའོ། །ལན་ནི་དེ་ལྟ་ན་འོ་ན་ཞེས་བྱ་བའོ། །གལ་ཏེ་ཤིན་ཏུ་གོམས་པ་ལས་རྒྱུ་མཚན་རྟོགས་པ་མེད་བཞིན་དུ་སྒྲ་འཇུག་ན། དེ་ལྟ་ན་འོ་ན་

ཞེས་བྱ་བའོ། །ཡང་ཞེས་བྱ་བ་ནི་མེ་ལ་སོགས་པ་འབའ་ཞིག་ལ་ཡིན་པར་མ་ཟད་པའོ། །ཅིའི་ཕྱིར་ཞེ་ན། བྱ་རོག་བཞིན་དུ་ཞེས་བྱ་བའོ། །ཁྱི་ཤ་དེ་ལ་མེ་ལ་སྦྱིན་སྲེག་ལ་སོགས་པའི་སྒྲའི་རྒྱུ་མཚན་ཞུགས་པའི་ཕྱིར་རོ། །དཔེར་ན་བྱ་རོག་ཁྱི་ཤ་ལ་ཞུགས་པ་དེ་བཞིན་དུ་མེ་ལ་སྦྱིན་སྲེག་ལ་

སོགས་པའི་སྒྲའི་རྒྱུ་མཚན་ཡང་ཡིན་ནོ། །དེས་ན་མེ་ལ་སྦྱིན་སྲེག་ལ་སོགས་པའི་སྒྲ་ནི། རྒྱུ་མཚན་ཡོད་པས་ན་དེ་རྟོགས་པ་མེད་ཀྱང་ཤིན་ཏུ་གོམས་པ་ལས་འཇུག་པར་བྱ་བ་ཡིན་ནོ། །འོན་ཏེ་རྒྱུ་མཚན་དག་ནི་ངེས་པ་ལ་འཇུག་པ་དག་ཡིན་ནོ། །དེས་ན་ཉེས་པ་འདི་མེད་དོ་ཞེ་ན། དེ་ལྟ་

མ་ཡིན་ན་ཞེས་བྱ་བའོ། །དེས་ན་སྒྲ་འཇུག་པའི་རྒྱུ་མཚན་ནི་ཡུལ་ངེས་པ་ཅན་མ་ཡིན་ནོ། །དེ་ཉིད་ཀྱི་ཕྱིར་ཁྱི་ཤ་ལ་ཡང་དང་པོ་རྒྱུ་མཚན་ཡོད་པས། དུས་ཕྱིས་ཤིན་ཏུ་གོམས་པ་ལས་རྒྱུ་མཚན་རྟོགས་པ་མེད་ཀྱང་མེ་ལ་སྦྱིན་སྲེག་ལ་སོགས་པའི་སྒྲ་འཇུག་པ་མི་བཟློག་པ་ཁོ་ནའོ་ཞེས་དགོངས་པའོ། །

དོགས་པ་ནི་དེ་ནི་ཞེས་བྱ་བ་སྟེ། བ་ལང་གི་སྒྲ་ནི་དོན་དགུ་པོ་དག་ལའོ། །ལན་ནི་ཁྱི་ཤ་ལ་ཡང་ཞེས་བྱ་བའོ། །སྐབས་ཀྱི་མཇུག་སྡུད་པ་ནི། དེའི་ཕྱིར་ཞེས་བྱ་བའོ། །ཉེས་པ་དང་ལྡན་པ་མི་བཟློག་པ་ཅིའི་ཕྱིར་ཞེ་ན། རྟོགས་པར་བྱ་བ་ཐམས་ཅད་ལའོ། །ཅི་ལྟར་བཟློག་པ་མེད་སྙམ་ན། རུང་བ་ཉིད་

ཅེས་བྱ་བའོ། །རུང་བ་ཉིད་དེ་འགོག་པའི་སྤྱོད་པ་ལ་རྗེས་སུ་དཔག་པ་གང་ལ་རུང་བ་ཉིད་ཀྱིས་ཡུལ་ཡོད་པ་གྲགས་པ་ཞེས་བྱ་བ་དེས་གནོད་དོ་ཞེས་སྦྱར་རོ། །ཅི་ལྟ་བུ་ཞིག་གིས་ཤེ་ན། འདོད་པ་ཙམ་དང་འབྲེལ་པས་ན་བརྡ་འགོག་པ་མེད་པ་དེ་ལས་སྐྱེས་པའོ། །ཅི་ལྟར་གནོད་པར་བྱེད་པ་

เล่ม ๑๘๖ · หน้า 90a

ཡིན་ཞེ་ན། བརྡ་རྗེས་འཇུག་པའི་སྒྲ་རྣམས་ལ་ནི་གང་གི་ཕྱིར་དོན་ངེས་པ་ཡོད་པ་མ་ཡིན་ཏེ། དེས་ན་བརྗོད་པར་བྱ་བ་གཅིག་ཁོ་ན་ཡོད་དགོས་སོ་ཞེས་བྱ་བའི་ངེས་པ་ག་ལ་ཡོད། འོན་ཏེ་ཁྱི་ཤ་ཟ་བར་རྟོགས་པ་ནི་གྲགས་པས་གནོད་པ་དེས་ན། དེ་འགོག་གི་ཞེ་ན། འདིས་ནི་

ཞེས་བྱ་བ་སྟེ། སྒྲ་རྣམས་དོན་ངེས་པ་ཡོད་པ་མ་ཡིན་པར་བསྟན་པ་འདིས་ནི། སྤྱོད་པ་པ་དེ་རྣམས་ཁྱི་ཤ་ཟ་བར་རྟོག་པ་དེར། ཁྱི་ཤ་ཟ་བར་རྟོག་པ་ནི་གྲགས་པས་བསལ་བ་ཡིན་ནོ་ཞེས་འགོག་པ་འགལ་བ་ཡིན་ནོ། །གལ་ཏེ་འདི་གྲགས་པས་གནོད་པ་ཡིན་ན། རིག་བྱེད་སྐྱེས་བུས་མ་བྱས་པ། །ཞེས་

བྱ་བ་ཡང་གྲགས་པས་གནོད་པར་འགྱུར་ཏེ། རིག་བྱེད་ནི་སྐྱེས་བུས་བྱས་པ་ཉིད་དུ་གྲགས་པའི་ཕྱིར་རོ། །འཆད་པ་ནི་གང་ཞིག་ཅེས་བྱ་བ་སྟེ་དཔྱོད་པའོ། །དེ་ལ་ནི་དཔྱོད་པ་པ་ལའོ། །ཅི་ལྟར་འདི་ལ་གནོད་སྙམ་ན། །འདི་ལྟར་ཞེས་བྱ་བ་ལ་སོགས་པའོ། །འདིས་ནི་ཞེས་བྱ་བ་རྣམ་པར་འགྲེལ་པ་ནི།

དེ་ལ་ཞེས་བྱ་བ་སྟེ། སྒྲ་རྣམས་དོན་ངེས་པ་མེད་པར་བསྟན་པ་ནའོ། །བརྒལ་ཞིང་བརྟག་པའི་རྣམ་པ་བརྗོད་པ་ནི་རིག་བྱེད་ཅེས་བྱ་བའོ། །ཅི་ལྟར་གྲགས་པས་གནོད་སྙམ་ན། གང་གི་ཕྱིར་ཞེས་བྱ་བའོ། །འོན་ཏེ་ཞེས་བྱ་བ་ནི་གཞན་ནོ། །བསྒྲུབས་པ་ལས་གཞན་པའི་དོན་མཐོང་བ་ཡོད་དམ་ཞེ་ན།

འདི་ལྟར་ཞེས་བྱ་བའོ། །མ་ཡིན་ཏེ་ཞེས་བྱ་བ་ནི་ལན་ནོ། །འདིར་ཞེས་བྱ་བ་ནི་རྐང་པར་གྱིས་ཤིག་ཅེས་བྱ་བ་ལ་སོགས་པ་ལ་གཞན་དུ་ཞེས་བྱ་བ་བསྒྲུབས་པ་མི་སྲིད་པའི་ཕྱིར་དེ་ལྟར་ལེགས་པར་བྱས་པའི་ཡུལ་ཅན་དུ་རྟོགས་པ་ཡིན་ནོ། །འོན་ཏེ་དེ་ལྟར་མ་ཡིན་ཏེ། ལེགས་པར་བྱས་པ་མེད་ན། སྒྲ་

ཚད་མར་མེད་པའི་ཕྱིར་ལོག་པར་བྱས་པའི་དོན་དུ་རྟོགས་པ་ཡིན་ནོ་ཞེ་ན། ལན་ནི་ལུང་ཐམས་ཅད་ཅེས་བྱ་བའོ། །ཅིའི་ཕྱིར་ཞེ་ན། དེར་ཏེ་ཚད་མར་བརྟག་པའི་རྒྱུ་མཚན་དེ་ལྟ་མ་ཡིན་ན་ཚད་མར་མི་འགྱུར་རོ་ཞེས་བྱ་བ་ཡོད་པའི་ཕྱིར་རོ། །གང་གི་ཕྱིར་དེ་ལྟར་སྒྲ་རྣམས་ལ་དོན་ངེས་པ་ཡོད་པ་མ་ཡིན་

པ་དེ་ཉིད་ཀྱི་ཕྱིར་ན། བདེ་བར་གཤེགས་པ་པ་དཔྱོད་པ་པ་དེས་ནི་གནོད་པ་མེད་པར་བསྟན་པ་ཡིན་ཞེས་འབྲེལ་ཏོ། །ཅི་ཞིག་བྱེད་པ་ལ་མི་གནོད་ཅེ་ན། རྒྱུ་མཚན་ཅན་གྱི་སྒྲ་ཡི་དོན། །གལ་ཏེ་ལ་ལར་དེ་གྲུབ་ན། །ཞེས་བྱ་བ་ལ་སོགས་པས་འགོག་པ་ལའམ། ཡང་ན་སྒྲ་རྣམས་ཀྱི་དོན་དམ་པ་

เล่ม ๑๘๖ · หน้า 90b

ལ་འབྲེལ་པའི་མཚན་ཉིད་འགོག་པ་ལའོ། །གནོད་པ་མེད་པར་རོ། །འཆད་པ་ནི་རྒྱུ་མཚན་ལས་ཞེས་བྱ་བའོ། །གལ་ཏེ་སངས་རྒྱས་པ་བརྗོད་ན་དེའི་ཚེ་དེ་ལ་གྲགས་པས་གནོད་པའི་སྐྱོན་མེད་དོ། །གལ་ཏེ་དོན་དམ་པར་འབྲེལ་པའི་སྟོབས་ཀྱིས་དོན་སྟོན་པར་བྱེད་པའི་སྒྲ་འགའ་ཡང་མེད་དོ་ཞེས་བརྗོད་

ན། ཡང་དེའི་ཚེ་སངས་རྒྱས་པ་དེ་ལ་གནོད་པ་མེད་པ་ཁོ་ནའོ། །འོ་ན་གང་ལ་གནོད་སྙམ་ན། དཔྱོད་པ་པ་ལ་ཞེས་བྱ་བའོ། །གང་གི་ཕྱིར་དེ་ལྟར་སངས་རྒྱས་པ་ལ་གནོད་པ་མེད་པ་དེས་ན། ཁྱི་ཤ་ཟ་བར་རྟོག་པ་གྲགས་པས་གནོད་པ་ཡིན་པར་དཔྱོད་པ་པས་བརྗོད་པ་ནི་རིགས་པ་མ་ཡིན་ནོ་ཞེས་སྦྱར་

རོ། །དེ་ལྟར་གྲགས་པས་གནོད་པའི་མཚན་ཉིད་རྣམ་པ་གཉིས་བཤད་ནས། མཇུག་བསྡུ་བའི་སྒོ་ནས་ལོགས་སུ་བརྗོད་པའི་དགོས་པ་བརྗོད་པ་ནི། དེས་ན་ཞེས་བྱ་བའོ། །ཅི་ལྟར་བསྟན་བཅོས་དང་རང་གི་ཚིག་རྗེས་སུ་དཔག་པ་ལས་ཕྱི་རོལ་ཏུ་གྱུར་པ་མ་ཡིན་ཡང་། ཡུལ་གྱི་དབྱེ་བ་བསྟན་པའི་

དོན་དུ་ལོགས་སུ་བྱས་པ་དེ་བཞིན་དུ་གྲགས་པ་ཡང་ཡིན་ནོ། །དེ་ལྟ་མ་ཡིན་ན་ནི་འདི་ཡང་ངེས་པའི་ཡུལ་ཅན་དུ་རྟོགས་པར་འགྱུར་རོ་ཞེས་བྱ་བའི་དོན་ཏོ། །གལ་ཏེ་རྗེས་སུ་དཔག་པ་བཞིན་དུ་ཁས་མ་བླངས་པར་ཡང་གནོད་པར་བྱེད་པ་ཡིན་ནམ་ཞེ་ན། དམ་བཅས་པའི་ཞེས་སྨོས་སོ། །ཕྱིན་ཅི་ལོག་

གི་དངོས་པོའི་རང་བཞིན་ནོ། །གཉིས་ནི་དམ་བཅས་པ་དང་བཟློག་པ་དག་ཚད་མ་མ་ཡིན་པ་ཉིད་དུ་སྟོབས་མཚུངས་པའི་ཕྱིར་རོ། །འོ་ན་གང་གིས་གནོད་པར་བྱེད་པ་ཡིན་ཞེ་ན། འོན་ཀྱང་ཞེས་བྱ་བའོ། །གལ་ཏེ་བདག་བསྟན་བཅོས་ཚད་མར་ཁས་བླངས་པ་དེས་གནོད་པ་མ་ཡིན་ལ་བརྡ་ལས་

བྱུང་བའི་རུང་བ་ཉིད་ཀྱིས་གནོད་པར་ཡང་གྲགས་པས་བསལ་བ་ཡིན་ནོ་ཞེས་ལོགས་སུ་བྱས་པའི་དགོས་པ་ཡིན་ནོ་ཞེས་ཅི་ལྟར་རྟོགས་ཞེས་དོགས་ན། གྲུབ་པ་ཞེས་གསུངས་ཏེ། བཤད་ཟིན་པའི་ཚུལ་དུ་གྲུབ་པ་ལུང་དང་གྲགས་པས་གནོད་པ་དག་ཐ་དད་པར་བཤད་པ་ལ་ཡུལ་གྱི་དབྱེ་བ་

བསྟན་པའི་མཚན་ཉིད་ཀྱི་དགོས་པ་བསྟན་པའི་ཕྱིར་ན་ལུང་དང་གྲགས་པས་གནོད་པ་རྒྱུ་དང་བཅས་པར་རབ་ཏུ་བརྗོད་དོ། །དམ་བཅས་པ་ཙམ་གྱིས་ཞེས་བྱ་བ་དང་། སྒྲ་ལས་བྱུང་བའི་གྲགས་པས་ཞེས་བྱ་བར་རོ། །མངོན་སུམ་དང་རྗེས་སུ་དཔག་པས་གནོད་པ་ལ་ནི་རྒྱུ་དང་བཅས་པར་

เล่ม ๑๘๖ · หน้า 91a

གསུངས་པ་མ་ཡིན་ནོ། །དེ་ལ་ནི་ཚད་མ་ཀུན་ལ་བཏུས་པར་རོ། །ཅི་ལྟར་འདིའི་དགོངས་པ་འདི་ཁོ་ན་ཡིན་ཞེ་ན། གསུང་བ་ལ་མཁས་པ་ནི་མི་སྲིད་དོ་ཞེས་འབྲེལ་ཏོ། །ཅི་ལྟར་འགྱུར་བ་མི་སྲིད་སྙམ་ན། དགོས་པ་དེ་དང་བྲལ་ཏེ་མེད་པ་སྟེ། དེ་ལ་ཐུགས་གཞོལ་བ་གང་ཡིན་པ་

དང་། །ཡོངས་སུ་རྒྱས་པ་ལས་གཞན་མ་རྒྱས་པའི་དགོས་པ་ཅན་གང་ཡིན་པ་དེ་གསུང་མི་སྲིད་དོ་ཞེས་ཚིག་སྦྱར་རོ། །གསུང་བ་ལ་མཁས་པ་ཞེས་བྱ་བ་ནི་ངག་དང་ཡིད་ཀྱི་ཉེས་པ་དང་བྲལ་བ་ཞེས་བྱ་བའི་དོན་ཏོ། །ཅི་ལྟར་ན་འདི་འདི་འདྲ་བའི་ཡོན་ཏན་དང་ལྡན་པ་ཡིན་ཞེ་ན། འདི་ལྟར་ཞེས་བྱ་བའོ། །

འབིགས་བྱེད་ཀྱི་ནང་ན་གནས་པ་ནི་གདུག་པ་ཅན་ནོ། །དེ་མི་བཟད་པའི་མུན་པ་ཆེན་པོ་ཡིན་ཏེ། གདུལ་བྱ་རྣམས་ལ་དོན་ཕྱིན་ཅི་མ་ལོག་པར་གསལ་བར་བྱེད་པ་མ་ཡིན་པའི་ཕྱིར་རོ། །དེའི་རྒྱ་ཆེན་པོ་ནི་རྒོད་པ་ཡིན་ཏེ། དེ་འཇོམས་པའི་ཐུགས་སློབ་དཔོན་གང་ལ་མངའ་བའོ། །ཉི་མ་ནི་འབིགས་བྱེད་ཀྱི་

ནང་ན་གནས་པའི་མུན་པ་ཆེན་པོ་དེའི་རྒྱ་ཆེ་བ་གང་ཡིན་པ་འཇོམས་པ་མ་ཡིན་ཏེ། དེས་ན་སློབ་དཔོན་ནི་སྔོན་མེད་པའི་ཉི་མ་ཡིན་ནོ། །དགེ་ལེགས་ཀྱི་རི་ནི་ཐར་པའི་ལམ་འཕགས་པའི་བདེན་པ་བཞིའོ། །རང་དང་གཞན་གྱི་དོན་ཕུན་སུམ་ཚོགས་པ་ནི་དེ་ལས་འཆད་པའི་ཕྱིར་དང་། ཁྱབ་འཇུག་

དང་། དབང་ཕྱུག་དང་། ཚངས་པ་ལ་སོགས་པས་བསྐུལ་པར་མི་ནུས་པའི་ཕྱིར་རོ། །དགེ་ལེགས་ཀྱི་རི་གང་ཡིན་པ་ལ་ཤིན་ཏུ་མཐོན་པ་ཡང་ཡིན་པས་ན་རི་མཐོན་ཏེ། འཕགས་པའི་བདེན་པ་བཞི་ལས་གཞན་པའི་ཐར་པའི་ལམ་ནི་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །དེར་གསུང་གི་

འོད་ཟེར་གྱི་ཚོགས་ཆེན་རྟག་ཏུ་ཕྱིན་ཅི་མ་ལོག་པར་འགྱེད་པར་མཛད་པ་དེ་ལ་དེ་སྐད་ཅེས་བྱའོ། །ཉི་མ་ནི་ཤར་གྱི་རི་ཙམ་ལ་འོད་ཀྱི་ཚོགས་འགྱེད་པ་ཡིན་གྱི། སློབ་དཔོན་ནི་ཤིན་ཏུ་མཐོ་བའི་དགེ་ལེགས་ཀྱི་རི་ལ་འོད་ཟེར་གྱི་ཚོགས་ཆེན་པོ་འགྱེད་པ་ཡིན་ནོ། །དེས་ན་སྔ་ན་མེད་པའི་ཉི་མ་ཡིན་

ནོ། །ཉི་མ་ནི་ལམ་བྲལ་ཞེས་བྱ་བ་བྱ་རྣམས་ཀྱི་ལམ་ནམ་མཁའ་གང་ཡིན་པ་དེར་འགྲོ་ལ། སློབ་དཔོན་ནི་དམ་པའི་ལམ་ལ་གནས་པའི་ཕྱིར་ལམ་དང་བྲལ་བ་ཕྱིན་ཅི་ལོག་གི་ལམ་དུ་མི་གཤེགས་སོ། །སློབ་དཔོན་ནི་གཞན་མུ་སྟེགས་པས་ཐོགས་པ་མེད་དེ་བཟློག་ཏུ་མེད་ཀྱི། ཉི་མ་ནི་སྤྲིན་ལ་

เล่ม ๑๘๖ · หน้า 91b

སོགས་པ་གཞན་གྱིས་ཐོགས་པ་ཡོད་པ་ཡིན་ནོ། །ནུབ་རི་ནི་ནུབ་ཀྱི་རི་ལྟ་བུ་ཡང་དག་པར་རྫོགས་པའི་སངས་རྒྱས་ཏེ། ཉེས་པ་ཐམས་ཅད་ནུབ་པའི་ཕྱིར་དང་། ཉེས་པའི་རླུང་གིས་མི་བསྒུལ་བའི་ཕྱིར་རོ། །དེར་འོད་ཟེར་གྱིས་ནི་ལག་པ་བཞག་པ་ནི་བཅས་པའོ། །སྡུག་བསྔལ་དང་སྡུག་བསྔལ་གྱི་རྒྱུ་

ལས་བསྒྲལ་བར་འདོད་པའི་མཚན་ཉིད་ཀྱི་ཐུགས་རྗེའི་ནི་འོད་ཟེར་ཏེ། ཕྱིན་ཅི་མ་ལོག་པའི་དོན་སྟོན་པའི་རྒྱུ་ཡིན་པའི་ཕྱིར་རོ། །དེ་ཉིད་ལག་པ་ཡིན་ཏེ་དེ་ཉིད་ཀྱིས་རྫོགས་པའི་བྱང་ཆུབ་ཏུ་འཛིན་པའི་ཕྱིར་རོ། །དེའི་རྩོམ་པ་རྫོགས་པའི་བྱང་ཆུབ་ཀྱི་འབྲས་བུས་འབྲས་བུ་དང་བྲལ་བ་གང་ཡིན་པ་

ཉན་ཐོས་ཀྱི་བྱང་ཆུབ་མངོན་དུ་བྱེད་པའི་མཚན་ཉིད་དེར་འགྱུར་བ་ནི་སློབ་དཔོན་སྲིད་པ་མ་ཡིན་ཏེ། འཇམ་དཔལ་རང་ཉིད་ཀྱིས་དེ་སྐད་ཅིག་ཉིད་ལ་ཉན་ཐོས་ཀྱི་བྱང་ཆུབ་མངོན་དུ་བྱེད་པ་ལས་བཟློག་པའི་ཕྱིར་རོ། །ཉི་མ་ནི་རིམ་གྱིས་ནུབ་ཀྱི་རི་བོའི་ཐད་དུ་ཕྱིན་ཏེ། ནུབ་ཀྱི་རྒྱ་མཚོ་ཆེན་པོར་བདག་ཉིད་

ཕྱིན་པར་རྟོགས་ནས་བདག་འདིར་ལྷུང་དུ་འོང་ངོ་སྙམ་དུ་སྙིང་ཕྱུང་བས་ནུབ་ཀྱི་རི་བོ་ལ་བརྟེན་ནས་གནས་པའི་དོན་དུ་འོད་ཟེར་སྟོང་དེར་བཞག་པར་གྱུར་ཏོ། །དེས་ན་ནུབ་ཀྱི་རི་ལ་འོད་ཟེར་གྱི་ལག་པ་བཞག་པ་གང་ཡིན་པ་དེ་དག་གི་རྩོམ་པ་ནི་འབྲས་བུ་མེད་པར་འགྱུར་ཏེ། ནུབ་ཀྱི་རི་ལ་རྟེན་མ་

བཅས་ནས་རྒྱ་མཚོ་ཆེན་པོར་ལྷུང་བའི་ཕྱིར་རོ་ཞེས་མུ་སྟེགས་པའི་ལུང་ལས་མ་གྷས་གསལ་བར་བྱས་སོ། །དེས་ན་དེ་ལྟར་སྲིད་པ་ཡིན་ནོ། །དེའི་ཕྱིར་སློབ་དཔོན་ནི་སྔོན་མེད་པའི་ཉི་མ་ཡིན་པའི་ཕྱིར་སྔར་བཤད་པའི་ཡོན་ཏན་དང་ལྡན་པར་ངེས་པ་ཡིན་ནོ། །བརྗོད་མ་ཐག་པའི་ཡོན་ཏན་གཞན་

དག་ལ་ནི་སྲིད་པ་མ་ཡིན་ནོ། །དེའི་ཕྱིར་ཞེས་བྱ་བ་ནི་སྐབས་ཀྱི་མཇུག་སྡུད་པའོ། །ཅི་ལྟར་འདི་གཉིས་ཚད་མ་མ་ཡིན་པའི་ཕྱིར་ན་གནོད་བྱེད་ཡིན་སྙམ་ན། ལྷག་མ་ནི་ཞེས་སྨོས་སོ། །དེ་ལ་ཁས་བླངས་འབྲས་རྟགས་དང་། །ཞེས་བྱ་བ་ལ་སོགས་པས་བཤད་ཟིན་ཏོ། །ཡང་ན་གལ་ཏེ་རང་གི་ཚིག་

དང་གྲགས་པ་དག་མངོན་སུམ་དང་རྗེས་སུ་དཔག་པ་ལས་ཡུལ་ལ་བརྟེན་ནས་ཐ་དད་པ་ཡིན་ན། དེ་ལྟ་ཡང་རང་གི་ཚིག་དང་བསྟན་བཅོས་དང་འགལ་བ་གཉིས་གོ་ཅི་ལྟར་ཐ་དད་སྙམ་ན། ལྷག་མ་ནི་ཞེས་བྱ་བའོ། །ངག་གཅིག་ལ་རང་གི་ཚིག་དང་འགལ་བ་དང་། ངག་ཐ་དད་པ་ལ་ནི་བསྟན་

เล่ม ๑๘๖ · หน้า 92a

བཅོས་དང་འགལ་བ་ཡིན་ནོ་ཞེས་ཡུལ་གྱི་དབྱེ་བ་བྱས་པ་ཡིན་ནོ། །དེ་ལྟར་བརྗོད་པར་བྱ་བ་མང་བས་གོ་རིམས་ལས་བརྒལ་ཏེ། རང་གི་ཚིག་དང་གྲགས་པས་གནོད་པ་བཤད་ནས། མངོན་སུམ་གྱིས་གནོད་པ་བརྗོད་པ་ནི། མངོན་སུམ་གྱིས་ཞེས་བྱ་བའོ། །ངོ་བོ་ཉིད་གང་ཞིག་

གཉིས་མེད་པར་སྣང་བར་གྱུར་པ་དེ་ཉིད་ཡོད་ན་མངོན་སུམ་གྱིས་གནོད་པ་ཡིན་ནོ་ཞེས་འབྲེལ་ཏོ། །ཅི་ལྟར་གཉིས་མེད་པར་ཞེ་ན། སྣ་ཚོགས་སུ་ནི་ཞེས་བྱ་བའོ། །བརྗོད་པར་བྱ་བ་དེ་ཡང་གང་ཡིན་ཞེ་ན། དེར་ཡང་ཞེས་བྱ་བའོ། །དེས་ན་གསལ་བྱེད་ཀྱིས་ཅི་སྐད་དུ་སྒྲ་མཉན་པར་བྱ་བ་མ་ཡིན་ནོ་ཞེས་བྱ་བས་ནི་

དབང་པོ་དང་སྒྲ་དག་ནི་འབྲེལ་པ་དག་གི་འབྲེལ་པ་འགོག་པ་མིན་ལ། དེ་ཡང་མངོན་སུམ་གྱིས་མ་ཡིན་ཏེ། དབང་པོ་ལས་འདས་པའི་ཕྱིར་རོ་དེས་ན་འདི་མངོན་སུམ་གྱིས་བསལ་བའི་དཔེ་ཅི་ལྟར་ཡིན་ཞེས་བརྗོད་པ་དེས་བསལ་བ་ཡིན་ནོ། །འབྲེལ་བ་འགོག་པར་ཁས་མི་ལེན་པའི་ཕྱིར་རོ། །འོ་ན་

ཅི་ཞིག་གོ་སྙམ་ན། འོ་ན་ཞེ་ན་ཞེས་བྱ་བས་སྟོན་ཏོ། །ཅི་ལྟར་གཉིས་མེད་སྙམ་ན། སྣ་ཚོགས་སུ་སྣང་བའི་ཞེས་སྨོས་སོ། །ཅི་ལྟར་ཉམས་སུ་མ་མྱོང་ཞེ་ན། རིགས་ཞེས་གསུངས་སོ། །འདི་ཡང་ཞེས་བྱ་བ་ནི་མངོན་སུམ་མ་ཡིན་པ་སྤོང་བ་ལ་གནོད་པར་མི་འགྱུར་རོ་ཞེས་བྱ་བ་ནི། དེས་ན་སྤྱིའི་ཆོས་རྣམས་ནི། །

ཞེས་བྱ་བ་ལ་སོགས་པས་སྟོན་པར་འགྱུར་རོ། །ཅི་ལྟར་དོན་འདི་སློབ་དཔོན་ཕྱོགས་ཀྱི་གླང་པོའི་གཞུང་ལས་རྙེད་སྙམ་ན་དེ་དོན་ཞེས་བྱ་བ་གཉིས་སུ་མེད་པར་བསྟན་པའི་དོན་དུ། མངོན་སུམ་དོན་དང་རྗེས་དཔག་དང་། །ཞེས་བྱ་བའི་གཞུང་འདིར་དོན་བཤད་པ་ཡིན་ནོ། །དེ་ཉིད་ཅེས་བྱ་བ་ནི་མངོན་སུམ་

ལ་སྣང་བ་ཉིད་དོ། །ལྡོག་པ་བརྗོད་པ་ནི་སྤྱི་ལ་སོགས་པ་ནི་ཞེས་བྱ་བའོ། །ཅིའི་ཕྱིར་ཞེ་ན། མངོན་སུམ་ལ་ཞེས་བྱ་བ་བྱ་བའི་སྤྱི་ལ་སོགས་པ་མངོན་སུམ་ལ་སྣང་བར་ནུས་པ་ནི་མ་ཡིན་ཏེ། ཁ་དོག་དང་དབྱིབས་དང་ཡི་གེའི་རྣམ་པས་སྟོང་པའི་ཕྱིར་རོ། །གལ་ཏེ་དེ་ལྟ་ན་ཡང་དེ་མངོན་སུམ་ཡིན་པས་དེ་སྤོང་

བ་ནི་མངོན་སུམ་གྱིས་གནོད་པ་ཡིན་ནོ་ཞེ་ན། གང་ལ་ཞེས་བྱ་བ་སྟེ། ཤེས་པ་གང་ལ་རིགས་ལ་སོགས་པ་སྣང་བ་དེ་ནི་མངོན་སུམ་ཡིན་ནོ། །ཡང་ན་གཞལ་བྱ་གང་ལ་སྣང་བ་དེ་རྟོགས་པ་མེད་པ་དེ་ནི་མངོན་སུམ་གྱི་གཞལ་བྱ་མ་ཡིན་ནོ། །རིགས་ལ་སོགས་པ་སྤོང་བ་ནི་མངོན་སུམ་གྱིས་གནོད་པ་མ་ཡིན་

เล่ม ๑๘๖ · หน้า 92b

ཏེ། རིགས་ལ་སོགས་པ་མེད་དོ་ཞེས་དམ་བཅའ་བ་ཡང་དག་པ་ཁོ་ན་ཡིན་ནོ་ཞེས་བྱ་བའི་དོན་ཏོ། །ངོ་བོ་ཉིད་ཅེས་བྱ་བ་ནི་མངོན་སུམ་ལ་སྣང་བ་ཉིད་དོ། །དེས་ན་ཞེས་བྱ་བ་ནི་དབང་པོའི་སྤྱོད་ཡུལ་མ་ཡིན་པས་ནའོ། །རང་བཞིན་གཉིས་པ་ལྟར་ཞེས་བྱ་བ་ནི། མཆོད་པའི་དོན་གྱི་འབྱུང་པོའི་མགུལ་ཆིངས་

ལྟར་རོ། །གལ་ཏེ་ཞེས་བྱ་བ་ལ་སོགས་པས་ནི་གཞན་དག་སྤྱི་མ་དམིགས་པ་མ་ངེས་པ་ཉིད་དུ་སྟོན་པར་བྱེད་དོ། །འདིའི་དོན་ནི་འདི་ཡིན་ཏེ། གལ་ཏེ་སྤྱི་མེད་ན་འགར་ཡང་སྤྱིའི་ཐ་སྙད་མེད་པར་འགྱུར་ཏེ། རིགས་མཐུན་པར་འདོད་པའི་གསལ་བ་རྣམས་ཀྱང་ཕན་ཚུན་མི་འདྲ་བའི་ཕྱིར་རོ་ཞེས་བྱ་བའོ། །

མི་འདྲ་བ་དེས་ན་རིགས་མཐུན་པ་དང་མི་མཐུན་པ་དང་འབྲེལ་པའི་ཐ་སྙད་འདི་དག་ནི་རིགས་མཐུན་པའོ་འདི་དག་རིགས་མི་མཐུན་པ་ཞེས་བྱ་བའི་ཐ་སྙད་དུ་ཅི་ལྟར་འགྱུར་ཏེ། བ་ལང་མ་ཡིན་པ་ལས་ལྡོག་པ་ཡང་གཅིག་པར་འཐད་པ་མ་ཡིན་ནོ་ཞེས་བརྗོད་པ་ནི། ཅི་ལྟར་ཞེས་བྱ་བ་སྟེ་དཔེར་ན་བ་

ལང་མ་ཡིན་པ་ལས་ལྡོག་པའི་ཁྲ་བོ་དང་སེར་ཁྲ་དག་བཞིན་དུ་བ་ལང་དང་རྟ་དག་ལ་ཡང་གཞན་ལས་ལྡོག་པ་ཡོད་པ་ཡིན་ནོ། །དེ་ལྟ་ཡིན་དང་ཅི་ལྟར་བ་རྟ་རྣམས་སྡེ་ཚན་གཅིག་ཏུ་བྱེད་པ་དེ་བཞིན་དུ་བ་ལང་དང་རྟ་དག་ཀྱང་འགྱུར་རོ། །འདིས་ནི་ཁྲ་བོ་དང་རྟ་དག་སེར་སྐྱ་ལས་ཐ་དད་པར་མཚུངས་པར་

བསྟན་ཏོ། །བ་རྟ་རིགས་མི་མཐུན་གཞན་ལས་ཞེས་བྱ་བ་ནི། མངོན་པར་འདོད་པའི་ཁྲ་བོ་ལས་གཞན་སེར་སྐྱ་གང་ཡིན་པ་དེ་ལས་བ་ལང་ཉིད་ལྡོག་པ་མཐོང་བ་ཡིན་ལ། ངང་པ་དང་མི་འདྲ་བའི་རྟ་གཞན་ལས་ལྡོག་པར་མཐོང་བ་ཡིན་ནོ། །དེས་ན་རིགས་མཐུན་པའི་ཐ་སྙད་དུ་ཅི་ལྟར་འགྱུར། གང་

གི་ཕྱིར་དེ་ལྟ་ཡིན་པ་དེས་ན། རིགས་ལ་མི་ལྟོས་པའི་ལྡོག་པ་ཙམ་གྱིས་ནི། འཆོལ་བ་མེད་པར་མི་འགྲུབ་སྟེ་འོན་ཀྱང་འཆོལ་བ་ཁོ་ནའོ། །དོན་འདི་ཡིན་ཏེ། བ་ལང་མ་ཡིན་པ་ལས་ལྡོག་པའི་དབང་གིས་བ་ལང་རྣམས་ངང་པ་ལ་སོགས་པའི་གསལ་བ་དང་མ་འཆོལ་བར་བརྗོད་པ་ཡིན་ན་དེ་ཡང་མི་

འགྲུབ་སྟེ། རིགས་མཐུན་པའི་གསལ་བ་རྣམས་ཀྱང་ཕན་ཚུན་རིགས་མི་འདྲ་བས་ལྡོག་པར་སྲིད་པའི་ཕྱིར་དང་། རིགས་མཐུན་པ་དང་རིགས་མི་མཐུན་པའི་གསལ་བ་རྣམས་ཀྱང་གཞན་ལས་ལྡོག་པར་སྲིད་པའི་ཕྱིར་རོ། །འོ་ན་ཅི་ལྟར་ཐ་སྙད་འཆོལ་བར་བྱེད་པར་འགྱུར་སྙམ་ན་དངོས་པོའི་

เล่ม ๑๘๖ · หน้า 93a

ཞེས་སྨོས་སོ། །དེ་དོན་གཉེར་ནི་ཐ་སྙད་དོན་དུ་གཉེར་བས་སོ། །སྤྱི་ཉིད་ཅི་ལྟར་མི་འཆོལ་སྙམ་ན། རང་གི་ངོ་བོས་ཞེས་བྱ་བའོ། །དེའི་ཕྱིར་སྤྱི་རང་བཞིན་གཉིས་པ་ལྟར་སྤྱི་མི་སྣང་བའི་ཕྱིར་རོ་ཞེས་བྱ་བ་ནི་མི་འཐད་དོ་ཞེ་ན། དེ་ནི་དེ་ལྟར་མ་ཡིན་ཏེ་ཞེས་བྱ་བའོ། །གལ་ཏེ་རེས་འགའ་སྤྱི་ལ་སོགས་

པ་རང་གི་ངོ་བོས་རྟོགས་པ་ཡིན་ན། དེའི་ཚེ་རང་གི་ངོ་བོས་རྟོགས་པ་ལ། འཆོལ་བར་ཐལ། མེད་པ་ཉིད་ཡིན་ན། འོན་ཀྱང་འདི་ཉིད་མི་འཐད་དོ། །རང་གི་ངོ་བོས་མ་རྟོགས་པའི་ཕྱིར་རོ། །འདིས་ནི་སྣང་བ་མི་དམིགས་པ་མ་ངེས་པ་ཉིད་མ་ཡིན་ནོ་ཞེས་བསྟན་པ་ཡིན་ནོ། །མི་སྣང་བའི་སྤྱི་ཉིད་ཐ་སྙད་མ་

འཆོལ་བར་བྱེད་པའི་རྒྱུ་ཡིན་ནོ་ཞེ་ན། རང་གི་ངོ་བོས་ཞེས་བྱ་བའོ། །གང་དུ་བ་ལང་ལ་སོགས་པའི་དོན་རྣམ་པར་དབྱེ་བས་ངེས་པར་བྱར་མེད་པ་མུན་པར་མཐོང་བ་རྣམས་ལ་ཡང་མ་འཆོལ་བར་རྟོགས་པར་འགྱུར་རོ་ཞེས་བྱ་བ་ནི་ཐལ་བའོ། །དེ་ལྟ་ཡིན་མོད་ཅི་སྐྱོན་སྙམ་ན། སྤྱི་ནི་ཞེས་བྱ་བའོ། །

མུན་པར་གནས་པས་གསལ་བའི་རང་བཞིན་མ་རྟོགས་པའོ། །དེས་ན་སྤྱི་རྣམ་པར་ཕྱེ་བས་གསལ་བར་བྱེད་པ་མ་ཡིན་ནོ། །དེས་ན་ཞེས་བྱ་བ་སྤྱི་ལས་རྣམ་པར་ཕྱེ་ནས་རྟོགས་པ་མེད་པས་ནའོ། །འཆད་པ་ནི་ཇི་སྲིད་ཅེས་བྱ་བའོ། །ཕན་ཚུན་ཞེས་བྱ་བ་ནི། ཁྲ་བོ་འདི་ནི་བ་ལང་ཡིན་ནོ་ཞེས་བྱ་བ་

འདིར་ནི་སྤྱི་ཁྱད་པར་ཡིན་ལ། བ་ལང་རྣམས་ཀྱི་བ་ལང་ཉིད་ཅེས་བྱ་བ་འདིར་ནི། སྤྱི་ཁྱད་པར་ཉིད་ཡིན་ནོ། །གལ་ཏེ་ཐམས་ཅད་ཀྱི་ཚེ་སྤྱི་ཁྱད་པར་ཉིད་ཡིན་ན་དེའི་ཚེ་གོང་བུ་རྒྱང་རིང་པོ་ན་འདུག་ཀྱང་། ཐམས་ཅད་ཀྱི་ཚེ་འདིར་ནི་བ་ལང་ངོ་སྙམ་པའི་རྟོགས་པ་སྐྱེད་པར་འགྱུར་རོ་ཞེས་སྟོན་

པ་ནི། དུས་ཐམས་ཅད་དུ་ཞེས་བྱ་བའོ། །ཁྱད་པར་ཉིད་ཡིན་ན་ཞེས་བྱ་བ་ནི་རང་གི་རྣམ་པའི་རྗེས་སུ་བྱེད་པའི་བློའི་རྒྱུ་ཡིན་ནའོ། །ཅི་སྟེ་མི་རྟོགས་ཞེས་བྱ་བ་ནི། གསལ་བ་ཅི་སྟེ་མི་ངེས། འོན་ཏེ་ཁྱད་པར་ཡིན་ཡང་གསལ་བའི་ཡུལ་ལ་ཐེ་ཚོམ་ཟ་ཟློག་པར་བྱེད་པ་མ་ཡིན་ནོ་ཞེས་དོགས་པ་བསུ་ནས་

བརྗོད་པ་ནི། གང་ཞིག་ཅེས་བྱ་བའོ། །ཐག་རིང་པོ་ནས་སྤྱི་མཐོང་བ་ན་ཡང་འདི་ནི་ངང་པའི་གསལ་བ་དང་མི་མཐུན་པ་བ་ལང་གི་གསལ་བ་ཡིན་ནོ་ཞེས་རྟོགས་པར་འགྱུར་གྱི་ཐེ་ཚོམ་ཟ་བར་ནི་མི་འགྱུར་རོ། །རྒྱང་རིང་པོ་ན་ནི་དེ་མ་བཟུང་བ་ཡིན་ནོ་ཞེས་ཀྱང་བརྗོད་པར་མི་བྱ་སྟེ། སྤྱི་མེད་པར་

เล่ม ๑๘๖ · หน้า 93b

ཐལ་བའི་ཕྱིར་རོ། །རྣམ་པར་གཅོད་པར་བྱེད་པ་ཉིད་ཡིན་ཡང་། ཐེ་ཚོམ་ཟློག་པར་བྱེད་པ་ཅི་ལྟར་ཡིན་ཞེ་ན། རྣམ་པར་གཅོད་པར་ཞེས་བྱ་བའོ། །སྤྱི་ལ་སོགས་པར་ནི་དེ་ལྟ་མ་ཡིན་ནོ། །ཅི་ལྟར་ཞེ་ན། འདི་ལྟར་ཞེས་བྱ་བའོ། །ཡོད་པའི་དོན་གྱི་བདག་ཉིད་ནི། །རང་གི་ངོ་བོ་ལས་མི་ལྡོག །ཅེས་བྱ་བ་

ལ། དོན་གྱི་བདག་ཉིད་སྤྱི་ནི་རང་གི་ངོ་བོ་ལས་མི་ལྡོག་སྟེ། རིགས་མཐུན་པ་དང་མི་མཐུན་པའི་གསལ་བ་ཐ་དད་པའི་ཕྱིར་རོ། །རང་བཞིན་ཡོད་པ་མིན་པ་ནི། །ཞེས་བྱ་བ་ནི། ཁྱབ་པ་མ་ཡིན་པ་ཉིད་ཀྱིས་དེར་ཡོད་པ་མ་ཡིན་པའོ། །ཡང་ན་དེ་ལྟ་ན་ཡང་ཐེ་ཚོམ་ལྡོག་པར་ཅི་ལྟར་འགྱུར་སྙམ་ན། གང་

ཞིག་རྣམ་པར་གཅོད་པར་བྱེད་པ་ཞེས་སྨོས་སོ། །སྤྱི་ལ་སོགས་པ་ནི་རྣམ་པར་གཅོད་པར་བྱེད་པ་མ་ཡིན་ནོ། །ཅི་ལྟར་རྣམ་པར་གཅོད་པར་བྱེད་པ་མ་ཡིན་ཞེ་ན། འདི་ལྟར་ཞེས་བྱ་བའོ། །གཞན་ཡོད་པ་ཞིག་སྤྱིས་ལྡོག་པར་བྱེད་དམ། ཡང་ན་མེད་པ་ཞིག་དེ་ལ་གལ་ཏེ་ཡོད་པ་ཡིན་ན། དེའི་ཚེ་སྤྱི་

ཡོད་ཀྱང་དོན་གྱི་བདག་ཉིད་རང་གི་ངོ་བོ་ལྡོག་པ་མ་ཡིན་ཏེ། དེས་ན་གང་གིས་ཐེ་ཚོམ་ཟློག་པར་ནུས་པར་འགྱུར་པ་ཅི་ལྟར་སྤྱི་རྣམ་པར་གཅོད་པར་བྱེད་པ་ཡིན། འོན་ཏེ་མེད་པ་ཡིན་ན་དེའི་ཚེ་རང་གི་ཡོད་པ་མིན་ན་ཡང་ཞེས་བྱ་བ་ལ་སོགས་པའོ། །དེས་ན་མི་ནུས་པ་དང་མི་དགོས་པས་ན་དོན་གྱི་བདག་

ཉིད་ནི་སྤྱི་ལ་སོགས་པའི་སྟོབས་ཀྱིས་ལྡོག་པ་མ་ཡིན་ནོ། །འོན་ཏེ་གཞན་ལས་ཡོད་པ་ཁྱད་པར་གྱི་སྟོབས་ཀྱིས་ལྡོག་པར་བྱེད་དེ་དེས་ན་ཁྱད་པར་ནི་རྣམ་པར་གཅོད་པར་བྱེད་པ་ཁོ་ན་ཡིན་ནོ་སྙམ་ནས། ཁྱད་པར་སྟོང་ཕྲག་ཅིས་བྱ་བའོ། །སྔ་མ་ནི་གཞན་ལ་ཡོད་པའོ། །རང་གི་ངོ་བོ་ནི་གཞན་དུ་མི་

འགྱུར་བའི་ཕྱིར་རོ་ཞེས་བྱ་བར་དགོངས་པའོ། །གལ་ཏེ་ཕན་ཚུན་བརྟེན་པའི་ཉེས་པས་སྤྱི་མི་ངེས་ན། འོ་ན་ཅི་ལྟར་དེ་ངེས་ཤེ་ན། གསལ་བ་ཞེས་བྱ་བའོ། །གལ་ཏེ་དེ་ལྟར་དེ་སྤྱི་ངེས་པ་ཡིན་ན། འོ་ན་སྤྱི་གང་ཡིན་སྙམ་ན། སྤྱི་ནི་ཞེས་བྱ་བའོ། །དེ་ཡང་ཞེས་བྱ་བ་ནི་ལྐོག་ཤལ་ལ་སོགས་

པའོ། །གཞན་གྱིས་ན་ཞེས་སྨྲས་ཏེ། ལྐོག་ཤལ་ལ་སོགས་པ་རྣམས་ནང་ངོ་། །ལན་ནི་སྤྱི་སྨྲ་བ་ལ་ཡང་ཞེས་བྱ་བའོ། །ཁྲ་བོ་ལ་སོགས་པའི་གསལ་བ་ཕན་ཚུན་ཐ་དད་པ་དག་གིས་ཅི་ལྟར་སྤྱི་མངོན་པར་གསལ་བ་བྱེད་པ་ཡིན། དོགས་པ་བསུ་བ་ནི། མི་འདྲ་བ་ཉིད་ཀྱིས་ཞེས་བྱ་བ་སྟེ། གསལ་བ་

เล่ม ๑๘๖ · หน้า 94a

ཐ་དད་པ་དག་ཁོ་ནས་སྤྱི་མངོན་པར་གསལ་བར་བྱེད་དོ་ཞེ་ན། རྟ་ཞེས་བྱ་བ་ནི་གྲུབ་པའི་མཐའོ། །གཞན་གྱིས་སྨྲས་པ་ངང་པ་ལ་སོགས་པ་དེ་དག་ལ་བ་ལང་གི་སྤྱི་མངོན་པར་གསལ་བར་བྱེད་པའི་ནུས་པ་མེད་པའི་ཕྱིར་རོ་ཞེ་ན། ལན་ནི་འདི་དག་ཅེས་བྱ་བ་སྟེ། ཁྲ་བོ་ལ་སོགས་པ་

རྣམས་ཕན་ཚུན་མི་འདྲ་ན། ཅི་ལྟར་སྤྱི་མངོན་པར་གསལ་བར་ནུས་པ་ཡོད་པ་ཡིན། དངོས་པོའི་རང་བཞིན་ཞེས་བྱ་བ་ནི་གཞན་གྱིའོ། །ལན་ནི་རྐང་པ་ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་རྐང་པ་བརྐྱང་བ་ཙམ་སྐྱབས་ཡིན་ནའོ། །རྩོད་པ་བྱེད་པ་ཁྱོད་ཀྱིས་བརྗོད་པར་མི་བྱའོ། །རྗོད་པ་ནི་རྣམ་པ་སྨྲས་པ་

ནི། སྤྱི་མེད་ན་ཞེས་བྱ་བའོ། །ཅི་སྟེ་བརྗོད་པར་མི་བྱ་སྙམ་ན། འདིར་ཡང་ཞེས་སྨོས་ཏེ། ལྐོག་ཤལ་ལ་སོགས་པར་རོ། །འོན་ཏེ་འཆོལ་བའི་ཕྱིར་འདི་སྤྱི་མ་ཡིན་ནོ་ཞེ་ན། ལྐོག་ཤལ་ལ་སོགས་པའི་ཞེས་བྱ་བའོ། །འོ་ན་ཅི་ལྟར་ན་བྲམ་ཟེ་ལ་སོགས་པ་ལ་ཐ་སྙད་སོ་སོར་ངེས་ཤེ་ན། བྲམ་ཟེ་ཞེས་བྱ་བའོ། །འོན་ཏེ་

བྲམ་ཟེ་ཉིད་མེད་ན་སྤྱོད་པ་བཟང་པོ་དང་ལྡན་པར་མི་འགྱུར་རོ་སྙམ་ན། ཆང་ཞེས་བྱ་བའོ། །སྒྲེ་བོའི་བརྡ་ཙམ་ཞིག་ཡིན་ཏེ་ཆང་མི་འཐུང་བ་ལ་སོགས་པས་ཀུན་ཏུ་སྤྱོད་པ་བཟང་པ་ཙམ་ཞིག་སྐབས་ཡིན་ནོ་ཞེས་འགྲེལ་པར་ཁ་ཅིག་འཆད་དོ། །ཡང་ན་ཆང་མི་འཐུང་བ་ལ་སོགས་པས་ནི་ཀུན་ཏུ་སྤྱོད་པ་བཟང་བ་ཙམ་

ཞིག་འཇུག་པར་ཟད་ཀྱི། བྲམ་ཟེ་ཉིད་ལ་སོགས་པའི་སྤྱི་ནི་མ་ཡིན་ནོ་ཞེས་ཁོང་ནས་འབྱུང་ངོ་། །གཞན་ནི་མ་ཡིན་ནོ་ཞེས་བྱ་བ་ནི་ཕ་རོལ་གྱིས་བརྟགས་པའི་སྤྱི་ནི་སྤྱི་རྣམ་པར་དབྱེ་བའི་རྒྱུ་མ་ཡིན་ནོ། །དོན་ནི་འདི་ཡིན་ཏེ། བ་ལང་ཉིད་ནི་ངང་པ་ལ་སོགས་པའི་གསལ་བ་ལས་རྣམ་པར་ཕྱེ་ནས་ཁྲ་བོ་ཉིད་ལ་

སོགས་པ་ལ་གནས་པ་ཡིན་ནོ་ཞེས་བྱ་བའི་ངེས་པ་གང་ཡིན་པ་དེ་ནི། གསལ་བ་རྣམས་ལྡོག་པའི་རྒྱུ་མཚན་ཅན་ཉིད་ཡིན་ནོ། །གལ་ཏེ་སྤྱི་གཞན་དང་ལྡན་པས། མངོན་པར་མི་འདོད་པའི་གསལ་བ་རྣམ་པར་གཅད་ནས་འཇུག་པ་ཡིན་ན་ནི། དེའི་ཚེ་ཐུག་པ་མེད་པར་འགྱུར་རོ། །དེ་བས་ན་གསལ་བ་རྣམས་ལ་

ལྡོག་པའི་རང་བཞིན་འདོད་པར་བྱ་དགོས་ལ། དེ་ལྟ་ན་ཡང་སྤྱི་དོན་མེད་པ་ཡིན་ནོ། །གལ་ཏེ་བྲམ་ཟེ་ལ་སོགས་པ་མེད་ན་བྲམ་ཟེ་བསད་པ་ལ་སོགས་པའི་རྣམ་པར་གཞག་པ་མེད་པར་འགྱུར་བ་ཞིག་ན་ཡོད་པ་ཡང་ཡིན་ཏེ། དེས་ན་བྲམ་ཟེ་ཉིད་ལ་སོགས་པའི་སྤྱི་ནི་ཡོད་པ་ཡིན་ནོ། །དེས་ན་དེ་མེད་དོ་

เล่ม ๑๘๖ · หน้า 94b

ཞེས་བྱ་བ་ནི་རྟོགས་པས་གནོད་པ་ཡིན་ནོ་ཞེ་ན། གཞན་ཡང་ཞེས་བྱ་བ་ལ་སོགས་པའོ། །བྲམ་ཟེ་བསད་པས་སྡིག་པ་དང་སྦྱིན་པ་ལ་སོགས་པས་བསོད་ནམས་ཞེས་གོ་རིམས་ཅི་ལྟ་བར་རོ། །བྲམ་ཟེ་ལ་སོགས་པས་ནི་མི་གུས་པ་ལ་སོགས་པ་བཟུང་ལ་གཉིས་པ་ལ་ནི་གུས་པ་ལ་སོགས་པ་གཟུང་ངོ་། །བསྟན་

བཅོས་ཉིད་ལས་ཞེས་ངེས་པར་བཟུང་བས་ནི། ཚད་མ་རྣམ་པར་གཅོད་པ་ཡིན་ནོ། །ཚད་མ་སྤྱི་དཔྱད་པ་ནི་དོན་མེད་པར་འགྱུར་རོ། །དེས་ན་ཞེས་བྱ་བ་ནི། བཤད་ཟིན་པའི་གཏན་ཚིགས་ཀྱིས་ནའོ། །དེ་ཡོད་པ་ལ་ཞེས་བྱ་བ་ནི་སྤྱི་ཡོད་པ་ལའོ། །སློབ་དཔོན་ཕྱོགས་ཀྱི་གླང་པོ་ལ་འདི་ཅི་ལྟར་རྟོགས་

པར་བྱ་ཞེ་ན། འདི་ནི་ཞེས་བྱ་བའོ། །ཅིའི་ཕྱིར་ཞེ་ན། དེ་དག་ཅེས་བྱ་བ་སྟེ། སྤྱིའི་ཆོས་རྣམས་སོ། །འོ་ན་རྗེས་སུ་དཔག་པས་གནོད་པར་འགྱུར་རོ་ཞེ་ན། རྗེས་སུ་ཞེས་བྱ་བའོ། །སྤྱི་ལ་གནོད་པར་བྱེད་པ་ནི། རྗེས་སུ་དཔག་པས་གནོད་པར་བྱེད་པ་མ་ཡིན་ཏེ་དེ་མེད་པའི་ཕྱིར་རོ་ཞེས་སྤྱིའི་རྗེས་སུ་དཔག་པ་སུན་འབྱིན་

པའི་སྐབས་སུ་བསྟན་པ་ཡིན་ནོ། །གཞན་གྱིས་གལ་ཏེ་ཞེས་སྨྲས་སོ། །རང་བཞིན་དེ་ཞེས་བྱ་བ་ནི་རང་གི་མཚན་ཉིད་གནོད་ན་སྐྱོན་ཡིན་གྱི་སྤྱི་གནོད་ན་མ་ཡིན་པའོ་ཞེས་བྱ་བ་འདི་གལ་ཏེ་བསྟན་པར་འདོད་པ་ཡིན་ན་དེའི་ཚེ་སྒྲ་རང་གི་མཚན་ཉིད་ཅེས་བྱ་བའོ། །དོན་འདི་ཡིན་ཏེ། གལ་ཏེ་སྒྲ་མཉན་པར་

བྱ་བ་མ་ཡིན་ནོ་ཞེས་བྱ་བ་འདིས་འབྲེལ་པ་འགོག་པར་མི་འདོད་ཀྱི་འོན་ཀྱང་རང་གི་མཚན་ཉིད་འགོག་པ་ཉིད་ཡིན་ན། དེའི་ཚེ་སྒྲ་རང་གི་མཚན་ཉིད་མེད་དོ་ཞེས་བྱ་བ་ཉིད་བརྗོད་མོད་ཅེས་བྱ་བའོ། །དེ་ལ་ཕན་པའི་མཐའ་ཅན་ཞེས་བྱ་བ་ནི་མཉན་བྱ་བའི་སྒྲ་ཨན་གྱི་མཐའ་ཅན་དང་ངོ་། །འབྲེལ་པའི་

རྒྱུ་མཚན་ཅན་ཞེས་བྱ་བ་ནི། གཟུང་བ་དང་འཛིན་པའི་མཚན་ཉིད་ཀྱི་འབྲེལ་པ་འཇུག་པའི་རྒྱུ་མཚན་གང་ལ་ཡོད་པའོ། །དེ་ཉིད་ཀྱི་ཕྱིར་ཉན་པས་གཟུང་བ་ཞེས་བྱ་བའི་དོན་འདི་ཉིད་ལ་མཉན་པར་བྱ་བ་ཞེས་བྱས་པ་ཡིན་ནོ། །དེ་ལྟར་བརྗོད་ན་ཉེས་པ་ཅི་ཡོད་སྙམ་ན། དེ་ལྟར་ཞེས་བྱ་བ་སྟེ། འབྲེལ་

པའི་རྒྱུ་མཚན་ཅན་གྱི་སྒྲ་སྦྱར་བ་ནིའོ། །འབྲེལ་པར་བཟློག་པར་འགྱུར་མོད། ཅི་སྐྱོན་སྙམ་ན། དེ་ཡང་ཞེས་བྱ་བ་སྟེ། འབྲེལ་པ་ཡང་ངོ་། །རྗེས་སུ་འགྲོ་བ་དང་ལྡོག་པ་ཉིད་ལས་ཞེས་བྱ་བ་འདིས་ནི། རྗེས་སུ་དཔག་པ་ཚད་མར་བརྗོད་པ་ཡིན་ནོ། །གལ་ཏེ་གཟུང་བ་དང་འཛིན་པའི་འབྲེལ་པར་

เล่ม ๑๘๖ · หน้า 95a

མ་གྱུར་ན། དེའི་ཚེ་དབང་པོ་དང་དོན་དག་གཟུང་བ་དང་འཛིན་པར་མི་འགྱུར་རོ། །གཟུང་བ་དང་འཛིན་པར་ནི་འགྱུར་བའང་ཡིན་ཏེ། དེས་ན་དེ་དག་ལ་འབྲེལ་པ་ཡོད་པ་མིན་ནོ། །དེས་ན་རྗེས་སུ་དཔག་པས་གྲུབ་པ་ཡིན་པའི་ཕྱིར་སྒྲ་མཉན་པར་བྱ་བ་མ་ཡིན་ནོ་ཞེས་དམ་བཅས་པ་ནི།

རྗེས་སུ་དཔག་པས་གནོད་པ་ཡིན་གྱི་མངོན་སུམ་གྱིས་བསལ་བ་ནི་མ་ཡིན་པའི་ཕྱིར་དེ་ལྟར་ཇི་ལྟར་ན་འདི་མངོན་སུམ་གྱིས་གནོད་པར་བརྗོད། བསམ་པ་འདི་ཉིད་ཀྱི་བརྗོད་པ་ནི། དེ་ཅི་ལྟར་ཞེས་བྱ་བའོ། །འདི་ནི་རྗེས་སུ་དཔག་པས་གནོད་པའི་དཔེར་བརྗོད་པར་འགྱུར་བ་ཡིན་ནོ་ཞེས་བྱ་བའི་དོན་ཏོ། །གྲུབ་པའི་མཐའ་

སྨྲ་བས་བརྗོད་པ་ནི། སྒྲ་འདིས་ཀྱང་ཞེས་བྱ་བ་སྟེ་མཉན་བྱའི་སྒྲས་ཀྱང་ངོ་། །མངོན་པར་བསམས་པའི་ཞེས་བྱ་བ་ནི་འབྲེལ་པ་ལས་གཞན་རང་གི་མཚན་ཉིད་དོ། །རྗོད་པར་བྱེད་པ་རང་གི་མཚན་ཉིད་ཀྱིས་སོ། །སྒྲ་རང་གི་མཚན་ཉིད་མེད་དོ་ཞེས་བྱ་བར་དམ་བཅས་པར་འགྱུར་རོ་ཞེས་བྱ་བའི་དོན་ཏོ། །རྣམ་

ཀུན་ཞེས་བྱ་བ་ནི་མཉན་བྱའི་སྒྲ་འམ་རང་གི་མཚན་ཉིད་ཀྱི་སྒྲས་ཀྱང་རུང་སྟེ། སྒྲ་རང་གི་མཚན་ཉིད་བརྗོད་པར་བྱ་བ་མ་ཡིན་པའི་ཕྱིར་རོ། །མཉན་བྱའི་སྒྲས་དབང་པོའི་སྤྱོད་ཡུལ་བརྗོད་དོ། །གལ་ཏེ་གཉི་གས་ཀྱང་དངོས་པོའི་རང་བཞིན་མི་བརྗོད་ན། དེའི་ཚེ་གཉིས་ལས་གང་ཡང་རུང་བ་ཞིག་གིས་བརྗོད་དོ་ཅོག་འདི་ལ་

འཆོལ་བར་བྱ་བ་མ་ཡིན་ནོ། །གཞན་ཡང་དབང་པོའི་སྤྱོད་ཡུལ་མཉན་བྱའི་སྒྲས་བརྗོད་པ་ན། དགོས་པ་ཡང་ཡོད་དོ་ཞེས་བརྗོད་པ་ནི། གྲུབ་པ་ཞེས་བྱ་བས་ཏེ། གནོད་པར་བྱེད་པ་སྒྲའི་མཚན་ཉིད་ཚད་མས་གྲུབ་པ་དེ་ལ་སྒྲ་མེད་པར་དམ་འཆའ་ལ་ལྟོས་ནས་བརྟེན་པའི་ཕྱིར་རོ། །ཅིའི་ཕྱིར་ཞེ་ན། ཚད་མས་

གྲུབ་པའི་གནོད་པར་བྱེད་པ་མེད་པ་དེའི་སྟོབས་ཀྱིས་གནོད་པའི་ཕྱིར་རོ། །དེས་ན་མཉན་བྱའི་སྒྲས་དབང་པོའི་སྤྱོད་ཡུལ་བཤད་པ་ཡིན་ནོ། །འཆད་པ་ནི་སྒྲ་རང་གི་མཚན་ཉིད་ཀྱི་ཞེས་བྱ་བའོ། །རང་གི་མཚན་ཉིད་དེར་རོ། །གལ་ཏེ་སྔོ་བསངས་ཉིད་ལ་སོགས་པ་ཡང་། རང་གི་མཚན་ཉིད་མ་ཡིན་ནམ།

དེ་ཅི་ལྟར་མཉན་བྱའི་སྒྲས་བསྡུས་ཤེ་ན། དེ་ལྟ་ན་ནི་འོ་ན་ཞེས་བྱ་བའོ། །གལ་ཏེ་དབང་པོས་གཟུང་བར་བྱ་བ་ཡིན་ཡང་ཅི་ལྟར་རང་གི་མཚན་ཉིད་ཡིན་ཞེ་ན། རང་གི་མཚན་ཉིད་ཀྱི་མཚན་ཉིད་ནི་ཞེས་བྱ་བའོ། །གལ་ཏེ་དབང་པོས་གཟུང་བ་ཉིད་ནི་རང་གི་མཚན་ཉིད་ཁོ་ན་མ་ཡིན་ཏེ། སྤྱི་ཡང་དབང་པོས་

เล่ม ๑๘๖ · หน้า 95b

གཟུང་བའི་ཕྱིར་རོ་ཞེ་ན། དབང་པོའི་ཞེས་གསུངས་སོ། །དབང་པོའི་གཟུང་བར་བྱ་བ་ཉིད་ལས་ཞེས་བྱ་བ་ནི་གཏན་ཚིགས་ཀྱི་ལྔ་པ་སྟེ། དབང་པོས་གཟུང་བར་བྱ་བ་ཡིན་པའི་གཏན་ཚིགས་ཀྱིས་ན། རང་གི་མཚན་ཉིད་ལས་གཞན་པའི་སྤྱི་ཡང་གྲུབ་པ་ནི་མ་ཡིན་ནོ། །རང་གི་མཚན་ཉིད་ཁོ་ན་དབང་པོས་གཟུང་

བར་བྱ་བ་ཉིད་དུ་གྲུབ་ཀྱི། སྤྱི་ནི་མ་ཡིན་ནོ་ཞེས་བྱ་བའི་དོན་ཏོ། །འདི་ཡན་ཆད་ཀྱིས་ནི། རྣམ་ཀུན་བརྗོད་བྱའི་དངོས་མིན་ཕྱིར། །ཞེས་བྱ་བ་བཤད་པ་ཡིན་ནོ། །ཚད་མས་ཞེས་བྱ་བ་ལ་སོགས་པས་ནི། གྲུབ་པ་དེ་ལ་བརྟེན་པའི་ཕྱིར། །ཞེས་བྱ་བ་ལ་སོགས་པ་བཤད་པའི་དོན་དུ་རྨེང་འབྲེ་བའོ། །དེས་ན་སྔ་མས་ནི་དོགས་

པ་མེད་པར་ཡང་མཉན་བྱའི་སྒྲ་འཇུག་པར་བསྟན་པ་ཡིན་ལ། ད་ལྟ་ན་མཉན་བྱའི་སྒྲའི་དགོས་པ་འཆད་པ་ཡིན་ནོ། །དགོས་པའི་ཚུལ་བརྗོད་པ་ནི། ཚད་མས་གྲུབ་པ་ཉིད་དུ་ཞེས་བྱ་བའོ། །ཚད་མས་གྲུབ་པའི་མཉན་བྱ་ཉིད་ཀྱིས་མཉན་བྱ་མ་ཡིན་པ་ལ་གནོད་ཀྱི། གཞན་དུ་ནི་མ་ཡིན་ནོ་ཞེས་བསྟན་པའི་དོན་

དུ་ཚད་མ་འཕེན་པར་བྱེད་པ་མཉན་བྱའི་སྒྲ་སྦྱར་བ་ཡིན་ནོ་ཞེས་བྱ་བའི་དོན་ཏོ། །གང་གིས་འདི་འདིའི་དོགས་པར་འགྱུར་བ། ཅི་ལྟར་ན་ཚད་མས་གྲུབ་པའི་གནོད་པར་བྱེད་པ་བསྟན་པ་ཡིན་སྙམ་ན་ཚད་མས་ཞེས་བྱ་བའོ། །མཉན་པར་བྱ་བ་ཉིད་ཀྱིས་ཚད་མས་གྲུབ་པ་ཉིད་ཀྱིས་གནོད་པར་བྱེད་པར་འགྱུར་

བ་ཡིན་ནོ་ཞེས་བྱ་བའི་དོན་ཏོ། །གལ་ཏེ་དོན་ཉིད་ཀྱིས་དོན་ལ་གནོད་པ་ཡིན་ཏེ། དཔེར་ན་མེས་ཁ་བ་ལ་གནོད་པ་བཞིན་ནོ། །ཚད་མས་ནི་མ་ཡིན་ནོ། །དེས་ན་ཅི་ལྟར་ཚད་མས་གྲུབ་པའི་མཉན་བྱ་ཉིད་ཉེ་བར་སྟོན་པར་བྱེད་ཅེ་ན། དེ་ཡི་སྟོབས་ཀྱིས་གནོད་པའི་ཕྱིར། །ཞེས་བྱ་བ་རྣམ་པར་འགྲེལ་པ་ནི་དེའི་

ཞེས་བྱ་བའོ། །ཚད་མའི་སྟོབས་ཉིད་ཀྱིས་མཉན་བྱ་ཉིད་ཀྱིས་མཉན་བྱ་མ་ཡིན་པ་ལ་གནོད་པའི་ཕྱིར་རོ། །འདི་ག་ལས་ཤེ་ན་ཚད་མས་ཞེས་བྱ་བའོ། །དོན་ནི་མཉན་བྱའོ། །གཞན་ནི་མཉན་བྱ་མ་ཡིན་པའོ། །གལ་ཏེ་བུམ་པ་དང་སྣམ་བུ་བཞིན་དུ་མཉན་བྱ་དང་མཉན་བྱ་མ་ཡིན་པ་དག་ཀྱང་གནོད་པར་བྱ་བ་

དང་གནོད་པར་བྱེད་པ་མ་ཡིན་ནོ་ཞེ་ན། དེ་ནི་ཞེས་བྱ་བ་སྟེ། ཚད་མས་གྲུབ་པའི་དོན་མཉན་བྱ་ཉིད་ནིའོ། །གཞན་མཉན་བྱ་མ་ཡིན་པ་མེད་པར་རོ། །ཅི་ལྟར་ཞེ་ན། འགལ་བར་ཞེས་བྱ་བའོ། །གལ་ཏེ་གནོད་བྱེད་དུ་རྟོགས་ཀྱང་གནོད་བྱེད་མ་ཡིན་པ་མ་ཡིན་ནམ། རང་གི་ངོ་བོ་འཇོམས་པར་བྱེད་པ་ཉིད་གནོད་བྱེད་

เล่ม ๑๘๖ · หน้า 96a

ཡིན་པའི་ཕྱིར་རོ་ཞེ་ན། དེ་མེད་པར་ཞེས་བྱ་བའོ། །འཇོམས་བྱ་འཇོམས་བྱེད་ཀྱི་དངོས་པོ་ནི་མ་ཡིན་ནོ་ཞེས་བྱ་བ་ནི། ཡུལ་འཕྲོག་པའི་མཚན་ཉིད་དོ། །དེས་ན་ཞེས་བྱ་བ་ནི་གནོད་བྱེད་ཡིན་པས་ནའོ། །ཚད་མ་ཡིན་ནོ་ཞེས་བྱ་བ་ནི་སྒྲ་རང་གི་མཚན་ཉིད་འཛིན་པའི་ཤེས་པའོ། །གལ་ཏེ་དོན་

གཉིས་ཁོ་ན་གནོད་བྱ་གནོད་བྱེད་ཀྱི་དངོས་པོར་བསྟན་པ་མ་ཡིན་ནམ། མཉན་བྱའི་སྒྲས་ཚད་མས་གྲུབ་པ་ཉིད་བསྟན་པས་ཅི་བྱ་ཞེ་ན། བརྗོད་ཟིན་པ་ཉིད་མཇུག་བསྡུ་བའི་སྒོ་ནས་གསལ་འདེབས་པ་ནི་ཡན་ལག་དང་བཅས་པ་ཞེས་བྱ་བའོ། །གནོད་པར་བྱེད་པར་མཉན་པར་བྱ་བ་ཉིད་ཀྱི་ཚད་མ་དང་ཚད་མས་གྲུབ་

པ་ཉིད་ཀྱིས་ཡིན་ཏེ། གནོད་པར་བྱེད་པ་ཡན་ལག་དང་བཅས་པ་བསྟན་པ་ནི་དགོས་པ་ཡིན་ནོ། །གལ་ཏེ་ཡན་ལག་དང་བཅས་པ་བསྟན་པ་ལ་ཡང་དགོས་པ་ཅི་ཡོད་སྙམ་ན། བསལ་བར་ཞེས་བྱ་བའོ། །ནི་ཞེས་བྱ་བ་ནི་གང་ཕྱིར་གྱི་དོན་ཏོ། །འདི་ཙམ་གྱིས་ནི། མངོན་སུམ་གྱིས་བསལ་བའི་ཕྱོགས་

རྣམ་པར་ཕྱེ་བ་ཡིན་ནོ།། །།རྗེས་སུ་དཔག་པས་བསལ་བ་འཆད་པ་ནི་རྗེས་སུ་དཔག་པས་བསལ་བ་ལ་ཡང་། གལ་ཏེ་སློབ་དཔོན་གྱིས་གོ་བས་མ་བཤད་པ་དེ་ལྟ་ན་ཡང་བརྗོད་པར་བྱ་བ་ནི་ཡོད་པ་ཉིད་དོ་ཞེས་འབྲེལ་ཏོ། །རྗེས་སུ་དཔག་པས་བསལ་བའི་ཡུལ་གྱི་ཕྱོགས་དེ་གང་ཡིན་ཞེ་ན། བུམ་

པ་རྟག་ན་ཞེས་བྱ་བ་སྟེ། དཔེར་བརྗོད་པ་འདི་ནི་གྲངས་ཅན་གྱི་བསལ་བས་ཡིན་ནོ། །རྟག་པ་ཉིད་དུ་ཁས་ལེན་པའི་ས་བོན་བརྗོད་པ་ནི། གང་གིས་སྣང་བ་མི་དམིགས་པ་མེད་པའི་དེ་ཁོ་ན་མཚོན་པ་མེད་པའི་གྲངས་ཅན། བུམ་པ་ལ་སོགས་པའི་དངོས་པོ་ཡོད་པ་ཉིད་དེ། འཇིམ་གོང་ལ་སོགས་པ་ལ་

གནས་པ་ཉིད་མངོན་པར་གསལ་བར་མཐོང་ནས་སོ། །ཅི་ལྟར་རྗེས་སུ་དཔག་པས་གནོད་པ་ཡིན་སྙམ་ན། ཡོད་པ་མངོན་པར་གསལ་བར་ཁས་ལེན་པ་ཡིན་ན། རྒྱུ་རྣམས་རྒྱུ་ནུས་པ་མེད་པ་ཁོ་ནར་འགྱུར་རོ། །དེས་ན་ཞེས་བྱ་བ་ནི་ནུས་པ་མེད་པས་སོ། །རྒྱུ་ཉིད་མེད་ན་རྒྱུ་ཚོལ་བ་དོན་མེད་དོ། །རྒྱུ་ཚོལ་བ་ནི་རྒྱུ་

ཉིད་ཀྱིས་ཁྱབ་པ་ཡིན་པས་དེ་མེད་ན་མི་འགྱུར་རོ་ཞེས་བྱ་བའི་དོན་ཏོ། །འཆད་པའི་རྒྱུ་ཞེས་བྱ་བའོ། །རྒྱུ་ཉིད་ཅི་ལྟར་མེད་སྙམ་ན། རྒྱུ་དེས་བྱ་རྒྱུ་བུམ་པ་ལ་སོགས་པ་བྱ་བ་ཉིད་དུ་གྱུར་པ་མེད་པས་སོ། །གཞན་གྱིས་འབྲས་བུ་བུམ་པ་ལ་སོགས་པ་གསལ་བར་བྱེད་དོ་ཞེ་ན་ཞེས་སྨྲས་སོ། །ལན་ནི་

เล่ม ๑๘๖ · หน้า 96b

གསལ་བ་ཡང་ཞེས་བྱ་བའོ། །འོན་ཏེ་ཞེས་བྱ་བ་ནི་གཞན་ནོ། །འོ་ན་ཞེས་བྱ་བ་ནི་ལན་ནོ། །ཐ་དད་པ་མེད་ན་ཅི་སྐྱོན་སྙམ་ན། སྨྲས་པ་དོན་ལས་མངོན་པར་གསལ་བ་ཐ་དད་པ་མེད་ནའོ། །དེས་ན་རྒྱུ་རྣམས་ལ་ནུས་པ་མེད་པས་ན་དེ་ཚོལ་བ་དོན་མེད་དོ། །རྒྱུའི་བདག་ཉིད་ལ་འབྲས་བུ་ཡོད་པར་ཁས་བླངས་ནས་བརྗོད་

པ་ཡིན་གྱི་འདི་ནི་འཐད་པ་ཡང་མ་ཡིན་ཏེ་ཚད་མ་མེད་པའི་ཕྱིར་ཞེས་བརྗོད་པ་ནི་བུམ་སོགས་ཞེས་བྱ་བའོ། །དོགས་པ་བསུ་བ་ནི། འབྲས་བུ་ཡིན་པའི་ཕྱིར་འཇིམ་གོང་ལ་སོགས་པ་དེར་ཡོད་དོ་ཞེ་ན། ལན་ནི་འབྲས་བུ་ཞེས་བྱ་བའོ། །གསལ་བ་ཞེས་བྱ་བ་ནི་རྩོད་པའོ། །གསལ་བ་ནི་ཡོད་པ་ཡིན་ན་འགྱུར་ཏེ།

མེད་པ་ལ་གསལ་བ་མི་རུང་བའི་ཕྱིར་རོ། །བུམ་པ་མེད་པར་ནི་སྒྲོན་མས་གསལ་བར་བྱ་བ་མ་ཡིན་ནོ། །དེས་ན་རྟགས་མངོན་པར་གསལ་བ་ཉིད་ལས་རྒྱུའི་བདག་ཉིད་ལ་འབྲས་བུ་ཡོད་དོ་ཞེས་ཤེས་སོ། །ཡོད་པར་ཞེས་བྱ་བ་ནི་རྒྱུའི་བདག་ཉིད་ལ་འབྲས་བུ་ཡོད་པར་འགྱུར་རོ། །དཔེ་བརྗོད་པ་ནི་སྒྲོན་

སོགས་ཞེས་བྱ་བའོ། །ཐམས་ཅད་ནི་རྫ་མཁན་ལ་སོགས་པ་ལས་ཀྱང་ངོ་། །འདོད་ན་ནི་གྲངས་ཅན་ནོ། །རྫ་མཁན་ཞེས་བྱ་བ་ལ་སོགས་པ་ནི་ལེན་ནོ། །འབྲས་བུ་ཡོད་པར་སྨྲ་བའི་ཕྱོགས་ལ་བྱ་རྒྱུ་མེད་པའི་ཕྱིར་ན། གལ་ཏེ་འགའ་ཞིག་འགའ་ཞིག་ལས་སྐྱེ་ན་དེའི་ཚེ་ཐམས་ཅད་ལས་སྐྱེ་བར་

འགྱུར་བའམ། ཡང་ན་རྫ་མཁན་སོགས་བཞིན་ཞེས་བྱ་བ་ནི་རྩོད་པ་ཁོ་ནའོ། །གལ་ཏེ་འབྲས་བུ་རྒྱུའི་བདག་ཉིད་ལ་ཡོད་པ་མ་ཡིན་ན། ཐམས་ཅད་ལས་སྐྱེ་བར་འགྱུར་ཏེ། མེད་པར་ཁྱད་པར་མེད་པའི་ཕྱིར་རོ། །དེས་ན་འབྲས་བུ་ནི་རྒྱུའི་བདག་ཉིད་ལ་མེད་པ་ཁོ་ནའོ། །འཇིམ་གོང་ཞེས་བྱ་བ་ལ་

སོགས་པ་ནི་ལན་ནོ། །དེ་ནི་ཞེས་བྱ་བ་འབྲས་བུ་བུམ་པ་ཞེས་བྱ་བ། འཇིམ་གོང་དེར་ཡོད་ན་རི་བོང་གི་རྭ་ཡང་དེར་འགྱུར་ཏེ། ཡོད་པ་ཉིད་དུ་འགྱུར་རོ། །གལ་ཏེ་མི་སྣང་ཡང་འཇིམ་གོང་ལ་བུམ་པ་ཡོད་ན་དེའི་ཚེ་རི་བོང་གི་རྭ་ཡང་ཡོད་པར་འགྱུར་ཏེ། མ་མཐོང་བའི་གཉི་ག་ལ་ཡང་མཚུངས་པའི་ཕྱིར་རོ། །

དེས་ནི་རི་བོང་གི་རྭ་ཡང་སྐྱེད་པར་འགྱུར་རོ། །ཕྱིས་རྫ་མཁན་ལ་སོགས་པའི་བྱེད་པའི་དེ་མ་ཐག་པའི་རི་བོང་གི་རྭ་དེའོ། །ཕྱིས་མཐོང་ཞེས་བྱ་བ་ནི་ལན་ཏེ། དེ་ལྟ་ན་འོ་ན་གང་ཕྱིས་མཐོང་བ་དེ་ནི་ཕྱིས་ཁོ་ན་ཡོད་པར་འགྱུར་གྱི་དེ་སྔར་ཡང་ཡོད་པ་ནི་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཞེས་བྱ་བ་ནི་རྣམ་

เล่ม ๑๘๖ · หน้า 97a

པར་འགྲེལ་པའོ། །གཞན་དུ་ཞེས་བྱ་བ་ནི་འབྲས་བུ་སྔར་ཡོད་པ་མ་ཡིན་ནའོ། །འདི་ཞེས་བྱ་བ་ལ་སོགས་པ་ནི་ལན་ནོ། །གལ་ཏེ་ཞེས་བྱ་བ་ནི་དོགས་པའོ། །དམིགས་པ་སྟེ་ཤེས་པ་མེད་པ་ཡིན་གྱི། འབྲས་བུ་ནི་མ་ཡིན་ཏེ། བལྟར་མི་རུང་བའི་ཕྱིར་རོ། །དོན་བུམ་པ་ཞེས་བྱ་བ་

རྒྱུའི་བདག་ཉིད་ལ་མེད་པར་ཅི་ལྟར་འགྱུར་ཏེ། ཡོད་པ་ཁོ་ནའོ་ཞེས་བྱ་བའི་དོན་ཏོ། །གལ་ཏེ་ཞེས་བྱ་བ་ནི་ལན་ནོ། །གལ་ཏེ་དམིགས་པ་ཉིད་མེད་པ་ཡིན་གྱི་མི་མཐོང་བའི་དོན་ནི་མ་ཡིན་ན། དེའི་ཚེ་རི་བོང་གི་རྭ་ཡང་བལྟར་མི་རུང་བས་དེ་ཡང་འགག་པར་མི་འགྱུར་རོ། །དེས་ན་བསྐལ་པའི་བུམ་པ་

བཞིན་དུ་རི་བོང་གི་རྭ་ཡང་འཇིམ་གོང་ལ་ཡོད་པ་ཉིད་དོ། །དེ་ཡང་ཡོད་ལ་རག་གོ་སྙམ་ན། དེས་ན་ཞེས་བྱ་བ་སྟེ། གང་གི་ཕྱིར་རི་བོང་གི་རྭ་མེད་པ་ཉིད་དུ་མ་གྲུབ་པ་དེས་ན། མེད་པ་མི་བྱེད་པའི་ཕྱིར་རོ་ཞེས་གཏན་ཚིགས་སུ་མི་འགྱུར་རོ། །གལ་ཏེ་འགའ་ཞིག་མེད་པར་གྲུབ་ན་དེའི་ཚེ་མེད་པ་ནི་བྱེད་པ་མེད་

པའི་ཕྱིར་རོ་ཞེས་བྱ་བ་འཐད་པ་ཡིན་ནོ། །དེས་ན་ཞེས་བྱ་བ་ནི་མེད་ན་མི་བྱེད་དོ་ཞེས་བྱ་བའི་གཏན་ཚིགས་མ་ཡིན་པས་ནའོ། །རི་བོང་གི་རྭ་དོན་དུ་གཉེར་བའི་སྐྱེས་བུ་ཡང་ཉེ་བར་ལེན་པ་འཇིམ་གོང་ལེན་པར་འགྱུར་རོ། །དཔེར་ན་བུམ་པ་དོན་དུ་གཉེར་བ་འཇིམ་གོང་ཚོལ་བ་དེ་བཞིན་དུ་རི་བོང་རྭ་དོན་དུ་

གཉེར་བ་ཡང་འགྱུར་ཏེ། གཉི་ག་དེ་ལ་ཡོད་པའི་ཕྱིར་རོ། །ཅི་དེ་དོན་དུ་གཉེར་བས་དེ་བླང་བར་བྱ་ཞེ་ན། འདི་ལྟར་ཞེས་བྱ་བའོ། །རི་བོང་གི་རྭ་དེ་འཇིམ་གོང་ལ་ཡོད་པ་དེས་ན་འཇིམ་གོང་འདི་རི་བོང་གི་རྭ་དེའི་རྒྱུ་ཉིད་དུ་འཛིན་པའོ། །གང་གི་ཕྱིར་རི་བོང་གི་རྭ་འཇིམ་གོང་ལ་ཡོད་པ་དེས་ན་དེ་དོན་དུ་

གཉེར་བས་དེ་རྒྱུ་ཉིད་དུ་འཛིན་པར་འགྱུར་རོ། །དེར་སྐྱེད་ཅེས་བྱ་བ་ནི་རྩོད་པ་སྟེ། འཇིམ་གོང་དེར་སྐྱེ་བ་པ་དེ་དང་བྲལ་བ་མ་ཡིན་པའི་རི་བོང་གི་རྭ་ལ་སོགས་པ་དེ་མེད་པའི་ཕྱིར་འཇིམ་གོང་ལ་རི་བོང་གི་རྭ་མེད་པར་གྲངས་ཅན་འདོད་ནའོ། །དོན་ནི་འདི་ཡིན་ཏེ་གལ་ཏེ་ཡང་འཇིམ་གོང་ལ་བུམ་པ་ཡོད་པ་དེ་ལྟ་

ཡང་འཇིམ་གོང་ལ་སྐྱེ་བའི་ཁྱད་པར་ཅན་གྱི་རི་བོང་གི་རྭ་ནི་མེད་དེ། འཇིམ་གོང་ལ་ནི་སྐྱེད་པའི་ནུས་པ་མེད་པའི་ཕྱིར་ཞེས་བྱ་བའོ། །དེ་སྐྱེད་པའི་ཞེས་བྱ་བ་ནི་ལན་ནོ། །ཡོད་པ་ཙམ་ཉིད་ལས་དེ་སྐྱེད་པའི་ནུས་པ་ཉིད་རྣམ་པར་གནས་པར་འགྱུར་རོ། །ཡོད་པ་ཙམ་དུ་ནི་འཇིམ་གོང་ལ་རི་བོང་གི་རྭ་

เล่ม ๑๘๖ · หน้า 97b

ཁྱོད་ཀྱིས་ཁས་བླངས་ཏེ། དེས་ན་དེ་ཙམ་གྱི་རྒྱུ་མཚན་གྱིས་ཀྱང་དེ་སྐྱེད་པའི་ནུས་པར་འགྱུར་བ་ཡིན་ནོ། །དེས་ན་འཇིམ་གོང་ཡང་རི་བོང་གིས་བསྐྱེད་པར་འགྱུར་རོ། །ཅི་ལྟར་ན་ཡོད་པ་ཉིད་དེ་སྐྱེད་པའི་ནུས་པ་གོ་བར་བྱེད་པ་ཡིན་སྙམ་ན། འདི་གཉིས་ཀྱི་ཁྱབ་པ་སྟོན་པ་ནི། དེ་ལྟ་མིན་ན་ཞེས་བྱ་བ་སྟེ།

འཇིམ་གོང་ལ་རི་བོང་གི་རྭ་ཡོད་པ་ཡིན་ཡང་གལ་ཏེ་དེ་སྐྱེད་པའི་ནུས་པ་ཉིད་དུ་མི་འགྱུར་རོ། །དེའི་ཚེ་འཇིམ་གོང་དེ་ལ་དེ་སྐྱེད་པའི་ནུས་པ་མེད་པ་ཉིད་རྟོགས་པས་རི་བོང་གི་རྭ་དེ་ཡོད་པར་རྟོགས་པར་མི་འགྱུར་རོ། །དེ་སྐྱེད་པའི་ནུས་པས་ནི་ཡོད་པ་ཉིད་ལ་ཁྱབ་པ་ཡིན་ཏེ། དེ་མེད་ན་དེ་ཡོད་པ་

ཉིད་དུ་མི་འགྱུར་རོ། །སྐབས་ཀྱིས་ནི་ཡོད་པ་ཉིད་དུ་ཁས་བླངས་ཏེ། དེ་ལྟ་མ་ཡིན་ན་འཇིམ་གོང་ལ་བུམ་པ་ཡང་ཡོད་པར་འགྱུར་རོ། །འོན་ཏེ་ཞེས་བྱ་བ་ནི་གྲངས་ཅན་པ་རི་བོང་གི་རྭ་ལས་བུམ་པའི་ཁྱད་པར་སྟོན་པའོ། །རྒྱུ་གང་ལས་འབྲས་བུ་བུམ་པ་ལ་སོགས་པ་གང་སྐྱེས་པའི་རྒྱུ་དེ་ལ་འབྲས་

བུ་དེ་ཡོད་དོ་ཞེས་རྟོགས་ཀྱི་རི་བོང་གི་རྭ་ནི་དེ་ལྟ་མ་ཡིན་ནོ་ཞེས་བསམས་པའོ། །སྐྱེས་པའི་ཞེས་བྱ་བ་ལ་སོགས་པ་ནི་ལན་ནོ། །རྟགས་སྐྱེས་པས་བུམ་པ་ཡོད་པ་ཉིད་དུ་རྟོགས་པ་ཡིན་ན། སྐྱེས་པའི་སྔོན་རོལ་འཇིམ་གོང་གི་གནས་སྐབས་ན་ནི་བུམ་པ་ལ་སོགས་པའི་འབྲས་བུ་ཤེས་པ་མེད་དེ་དེས་ན་

འབྲེལ་པ་མ་ཤེས་པའི་རྟགས་ལས་ཡོད་པར་ཅི་ལྟར་རྟོགས། སྔོན་རོལ་ཏེ་འཇིམ་པའི་གནས་སྐབས་ན། ཡོད་པར་ཤེས་པ་མེད་པའོ། །དེ་ལས་ཞེས་བྱ་བ་ནི་རྟགས་སུ་གྱུར་པའི་སྐྱེ་བ་ལས་དེ་ཞེས་བྱ་བ་འབྲས་བུ་ཡོད་པ་ཉིད་དོ། །ཅི་སྟེ་མི་རྟོགས་སྙམ་ན། དེ་ལྟར་ཞེས་བྱ་བ་སྟེ། གང་གི་ཕྱིར་

དེ་ལྟར་ཞེས་བྱ་བ་མ་ཤེས་པའི་འབྲས་བུ་ཡོད་པ་དང་སྐྱེ་བ་འབྲེལ་པ་རབ་ཏུ་གྲུབ་པ་མ་ཡིན་ནོ། །གལ་ཏེ་རྒྱུ་ལས་ཅི་ལྟ་བ་བཞིན་དུ་འབྲས་བུ་ཡོད་པ་ལས་ཀྱང་འབྲས་བུའི་འབྲེལ་པ་འགྲུབ་པ་ཉིད་མ་ཡིན་ནམ་ཞེས་རྩོད་པ། གྲངས་ཅན་གྱི་ལུགས་ཀྱིས་སྨྲས་པ་ནི། ཅི་ལྟར་ཞེས་བྱ་བའོ། །དེ་ཡོད་

ལས་ཀྱང་ཞེས་བྱ་བ་ནི་འབྲས་བུ་འཇིམ་གོང་ལ་ཡོད་པ་ལས་ཀྱང་། འབྲས་བུ་དེ་འབྱུང་བར་འགྱུར་རོ། །འདི་ལ་ལན་ནི་འབྲས་གང་ཞེས་བྱ་བའོ། །རྒྱུ་དང་འབྲས་བུ་དག་གི་ཡོད་པ་ཉིད་གང་ཡིན་པ་དེ་སྔོན་དུ་འགྲོ་བ་ཅན་གྱི་འབྲས་བུ་གང་ཡིན་པ་དེ། ཅི་ལྟར་འབྲས་བུ་ཡོད་པ་དེ་ཉིད་ཡིན་པར་

เล่ม ๑๘๖ · หน้า 98a

འགྱུར་ཏེ་རྒྱུའི་ཡང་ཡིན་པར་འགྱུར་རོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། འབྲས་གང་གང་ཞིག་ཅེས་བྱ་བའོ། །དེས་ན་འབྲས་བུ་མ་ངེས་པས་ནི་རང་གི་ཡོད་པ་བསྒྲུབ་པར་མི་ནུས་སོ་ཞེས་བྱ་བའི་དོན་ཏོ། །གྲངས་ཅན་གྱི་བསམ་པ་ཉིད་ཀྱིས་མ་ངེས་པའི་ལན་རྒོལ་བར་

བྱེད་པ་ནི། གཞན་བཞིན་ཞེས་བྱ་བ་ནས་ནུས་འབྱུང་འགྱུར་ཞེས་བྱ་བའི་བར་རོ། །ཞེ་ནའི་སྒྲ་ནི་འགྱུར་གྱི་སྒྲའི་འོག་ཏུ་སྤོ་བར་བྱའོ། །ནུས་ལས་ཞེས་བྱ་བ་ནི་འཇིམ་གོང་གི་ནུས་པ་ལས་སོ། །འབྲས་བུ་མངོན་པར་མི་གསལ་བའི་མཚན་ཉིད་དེ་ལས་འབྲས་བུ་ཐམས་ཅད་འབྱུང་བ་ཡིན་ནོ། །གང་

གི་ནུས་པ་དང་འདྲ་བར་ཞེ་ན་གཞན་བཞིན་ཞེས་སྨོས་ཏེ། དཔེར་ན་འཇིམ་གོང་ལས་གཞན་རྫ་མཁན་ལ་སོགས་པའི་ནུས་པ་བཞིན་ནོ། །དེ་ལྟ་ན་ཡང་ཅི་ལྟར་གཅིག་ཏུ་ངེས་པ་ཡིན་ཞེ་ན། ནུས་པ་ཉིད་ལས་ཞེས་བྱ་བའོ། །མངོན་པར་མི་གསལ་བའི་མཚན་ཉིད་ཀྱི་ནུས་པ་ཉིད་ལས་ནུས་པ་ཞེས་བྱ་

བ་མངོན་པར་གསལ་བའི་འབྲས་བུ་འབྱུང་བར་འགྱུར་ཞེས་བྱ་བའི་དོན་ཏོ། །ལན་ནི་ཐ་དད་མེད་ན་ཞེས་བྱ་བའོ། །རྒྱུ་དང་འབྲས་བུར་གྱུར་པའི་ནུས་པ་དག་ཐ་མི་དད་པར་གྱུར་པ་ཡིན་ན། ཅི་ལྟར་ནུས་པ་ལས་ནུས་པ་འབྱུང་སྟེ། རང་ཉིད་ལ་བྱེད་པ་འགལ་བའི་ཕྱིར་རོ། །དོགས་པ་ནི་གལ་ཏེ་ཞེས་བྱ་བའོ། །

གལ་ཏེ་ནུས་པ་ལས་མངོན་པར་གསལ་བ་སྐྱེ་ནའོ། །དེ་ཉིད་ཀྱི་ཕྱིར་རང་ཉིད་ལ་བྱེད་པ་འགལ་བ་མ་ཡིན་ནོ་ཞེ་ན། ལན་ནི་ནུས་ཞེས་བྱ་བའོ། །གལ་ཏེ་ནུས་པ་ལས་གསལ་བ་སྐྱེ་ན། དེའི་ཚེ་གསལ་བ་དེ་ཅི་ནུས་པ་ལས་གཞན་ཡིན་པར་ཁས་ལེན་ནམ། དེ་ལྟའོ་ཞེ་ན། དེའི་ཚེ་རྒྱུའི་བདག་ཉིད་

ལ་གསལ་བ་མེད་དོ། །དེ་ལྟ་ཡིན་དང་ཁྱོད་ཀྱི་ལུགས་ཀྱིས་བསྐྱེད་བྱ་མ་ཡིན་པར་འགྱུར་ཏེ། མེད་པ་ལས་སྐྱེ་བར་ཁས་མི་ལེན་པའི་ཕྱིར་རོ། །འོན་ཏེ་རྒྱུའི་བདག་ཉིད་ལ་གསལ་བ་ཡོད་ན་དེའི་ཚེ་ཅི་ལྟར་བསྐྱེད་དེ་བསྐྱེད་པར་མི་འགྱུར་ཏེ་སྐྱེ་བའི་དོན་མི་འགྲིག་པའི་ཕྱིར་རོ། །འོན་ཏེ་གལ་ཏེ་

ཕྱིའི་བུམ་པ་གསལ་བ་ཡིན་ན། དེའི་ཚེ་ཡོད་པ་དེ་བསྐྱེད་པར་བྱ་བར་མི་འགྱུར་རོ། །འོན་ཀྱང་གཙོ་བོའི་ཡོངས་སུ་འགྱུར་བའི་རང་བཞིན་གྱི་བློ་གསལ་བ་ཡིན་ལ་དེ་ཡང་བསྐྱེད་པར་བྱ་བ་ཁོ་ནའོ་སྙམ་ན། གསལ་བ་ཞེས་གསུངས་སོ། །དེ་ཡང་ནི་བློའོ། །ཁྱེད་ཅག་ནི་འབྲས་བུ་ཡོད་པར་སྨྲ་

เล่ม ๑๘๖ · หน้า 98b

བ་ཡིན་པའི་ཕྱིར་འབྲས་བུ་མཐའ་དག་ཡིན་པ་ཁོ་ནའོ། །དེས་ན་ཞེས་བྱ་བ་ནི་ཡོད་པའི་ཕྱིར་རོ། །དེ་ནི་བློའོ། །མིང་ཡིན་ན་ཞེས་བྱ་བ་ནི་བདག་ཡིན་ནའོ། །རྟག་པའི་ཕྱིར་བསྐྱེད་པར་བྱ་བ་མ་ཡིན་པའི་བདག་དེ་ཅི་ལྟར་སྐྱེ། དེས་ན་ཞེས་བྱ་བ་ནི་གསལ་བ་བསྐྱེད་བྱ་མ་ཡིན་པས་ན་རང་གི་རྒྱུ་རྣམས་ཀྱི་འབྲས་བུ་ཚད་

མ་དང་ལྡན་པ་དེ་ནི་གསལ་བ་མ་ཡིན་ནོ། །གལ་ཏེ་ཡོད་པ་མངོན་པར་མི་གསལ་བ་ཉིད་མངོན་པར་གསལ་བ་གཞན་གྱིས་ཀྱང་ཁས་བླང་བར་བྱ་བ་མ་ཡིན་ནམ། དེ་ལྟ་མ་ཡིན་ན། མུན་ཁུང་ན་བུམ་པ་མེད་པའི་ཕྱིར་ཅི་ཞིག་མངོན་པར་གསལ་སྙམ་ན། མུན་པ་ཞེས་བྱ་བའོ། །རིག་པ་ནི་ཤེས་པ་སྟེ། རྗེས་སུ་

དཔག་པའམ་རྟགས་ཀྱི་རིགས་ཀྱིས་རིག་པ་ཡིན་ནོ། །མུན་ཁུང་ན་ནི་བུམ་པ་ཡོད་དོ་ཞེས་རེག་པའི་དབང་པོ་ལས་སྐྱེས་པའི་ཤེས་པ་ཉེ་བར་བསྟན་པའི་རེག་པ། གཟུགས་ལ་མི་འཁྲུལ་པའི་རྟོགས་པ་ཡོད་པའི་ཕྱིར་རོ། །གལ་ཏེ་ཅི་ལྟར་མུན་ཁུང་ན་གནས་པའི་བུམ་པ་རྗེས་སུ་དཔག་པར་བྱ་བ་དེ་

བཞིན་དུ་འཇིམ་གོང་ལ་ཡང་མངོན་པར་མི་གསལ་བའི་བུམ་པ་ཡོད་པར་རྗེས་སུ་དཔག་པར་བྱ་བ་མ་ཡིན་ནམ་སྙམ་ན། བུམ་སོགས་ཞེས་བྱ་བའོ། །བུམ་པ་ལ་སོགས་པ་མངོན་པར་མི་གསལ་བའོ། །གང་གི་ཕྱིར་གསལ་བར་མི་རིགས་པ་དེས་ན། ཐམས་ཅད་མི་རྟག་པ་ཉིད་ཅེས་བྱ་བ་

ནི་རྗེས་སུ་དཔག་པའི་སྦྱོར་བ་སྟོན་པ་སྟེ། གང་བྱས་པ་དེ་ནི་མི་རྟག་སྟེ། དཔེར་ན་གསལ་བ་བཞིན་ནོ། །བུམ་པ་ཡང་བྱས་པ་ཡིན་ནོ་ཞེས་བྱ་བའོ། །དེས་ན་ནི་མི་རྟག་པས་ནའོ། །དེ་ལྟར་ཕྱོགས་ཀྱི་གནོད་པ་རྣམ་པ་བཞི་བཤད་ནས། རང་གི་ཆོས་ཅན་ལ་ཞེས་སློབ་དཔོན་གྱི་ཐུགས་ལ་གནས་པ་ལ་བརྩད་པ་

བརྗོད་པ་ནི་འོ་ན་ཞེས་བྱ་བའོ། །ཅི་ལྟར་དོན་མེད་སྙམ་ན། འདི་ལྟར་ཞེས་བྱ་བའོ། །དོན་འདི་ཡིན་ཏེ། གང་ཞིག་ཚད་མས་གནོད་པ་དེ་ནི་ཕྱོགས་མ་ཡིན་ནོ་ཞེས་བྱ་བ་འདི་ཙམ་ཞིག་བསྟན་པར་བྱ་བ་ཡིན་གྱི། ཚད་མས་གནོད་པ་ནི་རང་གི་ཆོས་ཅན་ནམ། རང་གི་ཆོས་ཅན་ལས་གཞན་ལ་ཞེས་བྱ་བ་འདི་ནི་གང་

དུ་ཉེ་བར་མཁོ་སྟེ། གནོད་དོ་ཅོག་ཐམས་ཅད་ནི་ཕྱོགས་ལྟར་སྣང་བ་ཡིན་པའི་ཕྱིར་རོ། །དེས་ན་རང་གི་ཆོས་ཅན་ཞེས་ཁྱད་པར་ཉེ་བར་བཟུང་བ་ནི་དོན་མེད་དེ་རྣམ་པར་གཅད་པར་བྱ་བ་མེད་པའི་ཕྱིར་རོ་ཞེས་བྱ་བ་ཡིན་ནོ། །དེ་འགྱུར་རོ་ཞེས་བྱ་བ་ནི་མི་རྟག་པ་ཉིད་དང་ལྡན་པ་བསྒྲུབ་པར་བྱ་བའི་ཆོས་

เล่ม ๑๘๖ · หน้า 99a

ཅན་ལའོ། །གཞན་ལ་ཞེས་བྱ་བ་ནི་ནམ་མཁའི་ཡོན་ཏན་གྱི་ཁྱད་པར་ཅན་ལའོ། །དེ་ལྟར་རང་གི་ཆོས་ཅན་སྨོས་པ་ལ་རྒོལ་བ་བཀོད་ནས། བསྒྲུབ་པར་བྱ་བ་ཉིད་དུ་འདོད་པ་མི་རྟག་པ་ཉིད་ཆོས་དང་ལྡན་པ་ལ་གནོད་ན་ཕྱོགས་ཀྱི་ཉེས་པ་ཡིན་གྱི། ནམ་མཁའི་ཡོན་ཏན་གྱི་ཁྱད་པར་དང་

ལྡན་པའི་ཆོས་ཅན་ལ་ནི་གནོད་ཀྱང་ཕྱོགས་ཀྱི་ཉེས་པ་མ་ཡིན་ནོ་ཞེས་ལན་བརྗོད་པ་ནི། ཀུན་དུ་ཞེས་བྱ་བའོ། །ཀུན་དུ་ཞེས་བྱ་བའི་བཤད་པ་ནི། ཐམས་ཅད་དུ་ཞེས་བྱ་བ་ནས་ཡོད་པ་ཉིད་ཡིན་པས་ཞེས་བྱ་བའི་བར་རོ། །རང་དང་གཞན་སངས་རྒྱས་པ་དང་བྱེ་བྲག་ཏུ་སྨྲ་བའི་འདོད་པས་ནམ་མཁའི་ཡོན་ཏན་གྱི་ཁྱད་

པར་ཅན་གྱི་ཆོས་ཅན་དང་དེ་དང་བྲལ་བ་ཐམས་ཅད་ལ་མི་རྟག་པ་ཉིད་ཀྱི་ཆོས་དེ་ཡོད་པ་ཉིད་ཡིན་པའོ། །གནོད་པ་ཡིན་ན་ཞེས་བྱ་བ་ནི་བསྒྲུབ་པར་བྱ་བ་ལའོ། །སྐྱོན་དུ་ཞེས་བྱ་བ་ནི་ཕྱོགས་ལ་གནོད་པའི་མཚན་ཉིད་དུའོ། །གནོད་པས་ནི་བསྒྲུབ་པར་འདོད་པའི་ཆོས་ལ་གནོད་པ་མ་ཡིན་ནོ་ཞེས་བྱ་བ་འདི་སྟོན་

པའི་དོན་དུ་རང་གི་ཆོས་ཅན་སྨོས་སོ་ཞེས་སྦྱར་རོ། །གཞན་དུ་ཞེས་བྱ་བ་ནི་གལ་ཏེ་དོན་འདི་ལྟར་མ་ཡིན་ན། ནམ་མཁའི་ཡོན་ཏན་དང་ལྡན་པའི་ཆོས་ཅན་གཞན་ལ་གནོད་ཀྱང་བསྒྲུབ་པར་འདོད་པ་འདི་ལ་གནོད་པ་ཅི་ཞིག་ཡོད་དེ་ཅི་ཡང་མེད་པ་ཉིད་དོ། །འོ་ན་ཅི་ལྟར་གནོད་སྙམ་ན། འདི་ལ་ཞེས་བྱ་བའོ། །

ཆོས་དེ་དང་དེ་ཞེས་བྱ་བ་ནི་འདོད་པའི་བསྒྲུབ་པར་བྱ་བ་དང་ལྡན་པ་ཉིད་ལའོ། །གནོད་ན་ཞེས་བྱ་བ་ནི་བསྒྲུབ་པར་འདོད་པའི་ཆོས་ལའོ། །གལ་ཏེ་དོན་འདི་མཚན་ཉིད་ཀྱིས་དོན་གོ་བ་མ་ཡིན་ནམ། དེས་ན་འདིའི་དོན་དུ་རང་གི་ཆོས་ཅན་སྨོས་པས་ཅི་བྱ་ཞེ་ན། དོན་འདི་ཞེས་བྱ་བའོ། །ཅི་ལྟར་ཆོས་

ཅན་ལ་གནོད་པས་འདོད་པའི་བསྒྲུབ་བྱ་ལ་གནོད་སྙམ་ན། རྟེན་ནི་ཞེས་བྱ་བའོ། །རང་གི་ངོ་བོ་ཞེས་བྱ་བ་ནས་ཞེ་ནའི་བར་གྱིས་ནི། དོན་འདི་ཞེས་བྱ་བ་ལ་སོགས་པ་བཀྲལ་བ་ཡིན་ནོ། །རང་གི་ཆོས་དང་ལྡན་པ་ཞེས་བྱ་བ་ནི་བསྒྲུབ་པར་འདོད་པའི་ཆོས་དང་ལྡན་པའོ། །དེ་ལྟ་ཡིན་དང་ཞེས་བྱ་བ་

ནི་རང་གི་ཆོས་དང་ལྡན་པའི་ཆོས་ཅན་བསྒྲུབ་པར་བྱ་བ་ཡིན་དང་ངོ་། །དེ་དང་རྗེས་སུ་མཐུན་པ་ཞེས་བྱ་བ་ནི་བསྒྲུབ་པར་བྱ་བ་ཉིད་དུ་འདོད་པ་མི་རྟག་པ་ཉིད་ཀྱི་ཆོས་དང་ལྡན་པའི་ཆོས་ཅན་དང་རྗེས་སུ་མཐུན་པ་གནོད་པ་ཉིད་ཀྱི་ཡིན་གྱི། ཆོས་གཞན་དང་ལྡན་པའི་ཆོས་ཅན་ལ་གནོད་པས་ནི་མ་ཡིན་ནོ། །

เล่ม ๑๘๖ · หน้า 99b

དེ་ཉིད་ཀྱི་ཕྱིར་ཆོས་བྱ་བ་ནི་མི་རྟག་པ་ཉིད་ཀྱི་ཆོས་ལྡན་པའི་ཆོས་ཅན་ཉིད་ཡིན་གྱི་ཆོས་གཞན་དང་ལྡན་པའི་ཆོས་ཅན་གྱིས་ནི་མ་ཡིན་ནོ། །སྐྱོན་ནི་ཕྱོགས་ལ་གནོད་པར་ཐལ་བའི་མཚན་ཉིད་དེ། ངེས་པར་གཟུང་བར་རྙེད་པའི་དོན་ཉིད་བརྗོད་པ་ནི། གཞན་དུ་ཞེས་བྱ་བ་སྟེ། ནམ་མཁའི་ཡོན་ཏན་གྱི་ཁྱད་པར་ཅན་གྱི་ཆོས་

ཅན་ལ་གནོད་པས་ནི་ཉེས་པར་འགྱུར་སྲིད་པ་ནི་མ་ཡིན་ནོ། །དེས་ན་རང་གི་ཆོས་ཅན་སྨོས་པས་ཅི་བྱ་ཞེས་དགོངས་པའོ། །དེ་ནི་མ་ཡིན་ཏེ་ཞེས་བྱ་བ་ལ་སོགས་པས་ནི་ཆོས་ཅན་ལ་ནི་ཞེས་བྱ་བ་ལ་སོགས་པ་རྣམ་པར་འགྲེལ་པ་ཡིན་ནོ། །གཞན་དུ་ཞེས་བྱ་བ་ནི་རང་གི་ཆོས་ཅན་སྨོས་པ་མེད་པ་ན། དེ་གནོད་ཅེས་

བྱ་བ་ནི་བརྗོད་པའི་ཆོས་གནོད་པ་ཉིད་ཡིན་གྱི་ཆོས་ཅན་གནོད་པས་ནི་མ་ཡིན་པའོ། །འདི་ཡང་ཞེས་བྱ་བ་ནི་རྩོད་པའོ། །བདེན་ཏེ་ཞེས་བྱ་བ་ནི་གྲུབ་པའི་མཐའོ། །ཅི་ལྟར་འདིའི་དོན་གྱིས་འགྲུབ་སྙམ་ན། གལ་ཏེ་ཞེས་བྱ་བའོ། །རྩ་བའི་ཆ་བཤད་ནས་གྲུབ་པའི་མཐའ་འཆད་པ་ནི་འདི་ནི་ཞེས་

བྱ་བའོ། །ལོག་པར་རྟོགས་པ་དེ་ཡང་གང་ཞེ་ན། འདི་ལྟར་ཞེས་བྱ་བའོ། །རྒོལ་བས་ཅི་ཞིག་བརྗོད་པ་ལ། ཕྱིར་རྒོལ་བས་སྐྱོན་བརྗོད་ཅེ་ན། དཔེར་ན་ཞེས་བྱ་བའོ། །བཤད་པ་ལ་ཞེས་བྱ་བ་ནི་རྒོལ་བས་སོ། །ཅི་ལྟར་འདི་ལ་སུན་འབྱིན་པར་བྱེད་པ་ཕྱིར་རྒོལ་བས་སྨྲས་ཤེ་ན། དེ་བཞིན་

ཞེས་བྱ་བའོ། །དཔེར་ན་སྔོན་མེད་པའི་རང་བཞིན་བསྐྱེད་པར་བྱར་མེད་པ་ཉིད་མ་ཡིན་པ། མེད་པར་དགག་པའི་རང་བཞིན་ཉིད། །ཅིག་ཅར་སྒྲ་སོགས་རྒྱུ་མིན་ཕྱིར། །ཞེས་བྱ་བ་ཁྱབ་པར་བྱེད་པ་མི་དམིགས་པས་སྒྲུབ་པར་བྱེད་པ་དེ་བཞིན་དུ་ནམ་མཁའ་ལ་སོགས་པའི་ཆོས་ཅན་དངོས་པོའི་ངོ་བོ་མེད་པར་

ཞེས་བྱ་བར་ཡང་སྒྲུབ་པར་བྱེད་དོ་ཞེ་ན། འདི་ལ་རྒོལ་བ་སངས་རྒྱས་པས་ལེན་འདེབས་པ་ནི། དེ་ལྟར་ཞེས་བྱ་བ་སྟེ། ཆོས་ཅན་དངོས་པོའི་ངོ་བོ་ཉིད་ཡིན་པ་ལ་གནོད་ཀྱང་། འདོད་པའི་བསྒྲུབ་པར་བྱ་བ་སྔར་མེད་པའི་རང་བཞིན་བསྐྱེད་པར་བྱར་མེད་པ་ཉིད་དགག་པ་ལ་ནི་གནོད་པ་འགའ་

ཡང་མེད་པ་ཉིད་དོ། །གཏན་ཚིགས་ཁྱབ་པར་བྱེད་པ་མི་དམིགས་པ་ཉིད་ལ་གནོད་པ་ཡང་མ་ཡིན་ནོ་ཞེས་ཀྱང་བལྟ་བར་བྱའོ། །ཆོས་ཅན་ལ་འབའ་ཞིག་ལ་ཞེས་བྱ་བ་ལ་སོགས་པ་ནི། དེ་ལྟར་འདོད་པའི་བསྒྲུབ་བྱ་ལ། །ཞེས་བྱ་བ་ལ་སོགས་པ་རྣམ་པར་འགྲེལ་པའོ། །འདི་ལྟ་བུ་ནི་ཞེས་བྱ་བ་

เล่ม ๑๘๖ · หน้า 100a

ནི་ཆོས་ཅན་འབའ་ཞིག་ལ་གནོད་པ་ནིའོ། །དེས་ན་ཞེས་བྱ་བ་ནི་འདོད་པས་ནའོ། །གཞི་མ་གྲུབ་པའི་ཉེས་པ་ཅི་ལྟར་མ་ཡིན་ཞེ་ན། རྣམ་པར་རྟོག་པ་ལ་གནས་པའི་ཞེས་བྱ་བའོ། །དེའི་ཞེས་བྱ་བ་ནི་སྒྲུབ་པར་བྱེད་པའིའམ། བསྒྲུབ་པར་བྱ་བའམ། རྒོལ་བའིའོ། །གང་གི་

ཕྱིར་དངོས་པོར་གྱུར་པ་ཆོས་ཅན་མ་ཡིན་པ་དེས་ནའོ། །ཆོས་ཅན་དེ་བསྒྲུབ་པར་བྱ་བ་དང་བྲལ་བ་འབའ་ཞིག་ལའོ། །གནོད་པའི་ཉེས་པ་ཡོད་པ་མ་ཡིན་ནོ་ཞེས་བསྟན་པའི་དོན་དུ་རང་གི་ཆོས་ཅན་སྨོས་སོ། །ཆོས་ཅན་འབའ་ཞིག་ལ་གནོད་པས་ཀྱང་ཅིའི་ཕྱིར་ཉེས་པར་མི་འགྱུར་སྙམ་ན། ཆོས་ཅན་

ཞེས་བྱ་བའོ། །ཆོས་ཅན་གཞན་ནི་ནམ་མཁའ་ལ་སོགས་པ་དངོས་པོར་གྱུར་པའི་ཆོས་ཅན་ལ་གནོད་ན་སྔོན་མེད་པའི་རང་བཞིན་བསྐྱེད་པར་བྱར་མེད་པ་ཡིན་པ་བཀག་པའི་རང་བཞིན་གྱི་ཆོས་དེ་མི་འགྲུབ་པ་མ་ཡིན་ཏེ། འགྲུབ་པ་ཁོ་ནའོ་ཞེས་བྱ་བའི་དོན་ཏོ། །ཉེས་པ་མ་ཡིན་པ་ནི་ཆོས་ཅན་འབའ་ཞིག་

ལ་གནོད་པའོ། །དེ་ལྟར་རྣམ་པར་རྟོག་པའི་རྣམ་པ་ཆོས་ཅན་དུ་ཉེ་བར་བསྟན་ནས། ད་ནི་རྣམ་འགྲེལ་གཉིས་པ་དེ་ཉིད་རྣམ་པར་འགྲེལ་པས་དངོས་པོར་གྱུར་པའི་ཆོས་ཅན་སྟོན་པར་བྱེད་པ་ནི་ཡང་ན་ཞེས་བྱ་བའོ། །ནམ་མཁའ་མི་རྟག་པ་ཡིན་ཏེ། །ཞེས་བྱ་བ་ནི་སངས་རྒྱས་པའིའོ། །གནོད་མོད་

ཅེས་བྱ་བ་ལ་སོགས་པས་ནི་གྲུབ་པའི་མཐའོ། །དེ་ལྟར་ན་ཡང་ཞེས་བྱ་བ་ནི་ནམ་མཁའ་རྟག་པ་ཉིད་ལ་གནོད་ཀྱང་ངོ་། །ཅི་ལྟར་རྟག་པ་ཆོས་ཅན་མ་ཡིན་ཞེ་ན། གཏན་ཚིགས་ཀྱིས་ནི་ཞེས་བྱ་བའོ། །བསྒྲུབ་པར་བྱ་བ་ལས་བཟློག་པ་ནི་རྟག་པ་ཉིད་དོ། །ཅི་ལྟར་བཟློག་པ་ལ་གནོད་སྙམ་ན།

ཆོས་ཅན་ཞེས་བྱ་བའོ། །དེ་ལ་ནི་ཆོས་ཅན་རྟག་པ་ལའོ། །འོ་ན་གང་གི་ཚེ་སྐྱོན་ཡོད་སྙམ་ན། གལ་ཏེ་དེ་ལ་ཞེས་བྱ་བ་སྟེ། ཆོས་ཅན་ནམ་མཁའ་རྟག་པ་ལའོ། །འདི་ཞེས་བྱ་བ་ནི་ཆོས་མི་རྟག་པ་ཉིད་མི་འགྲུབ་ན་དེའི་ཚེ་ཕྱོགས་ལ་གནོད་པའི་མཚན་ཉིད་འདི་སྐྱོན་དུ་འགྱུར་རོ། །ཅི་ལྟར་ནམ་

མཁའ་རྟག་པ་ཡིན་སྙམ་ན། ཅིག་ཅར་སྒྲ་སོགས་རྒྱུ་མིན་ཕྱིར། །ཞེས་བྱ་བའི་གཏན་ཚིགས་རྣམ་པར་འགྲེལ་པས་ལན་འདེབས་པ་ནི། འདི་ལྟར་ཞེས་བྱ་བའོ། །དབྱངས་ཀྱི་དབྱེ་བ་ཅི་ལྟར་སྲིད་པ་ཡིན་ཞེ་ན། བད་ཀན་ཞེས་བྱ་བའོ། །འདི་ཉིད་བརྗོད་པ་ནི། མགྲིན་པའི་ཞེས་བྱ་བའོ། །ཅི་ལྟར་

เล่ม ๑๘๖ · หน้า 100b

མགྲིན་པའི་སྦུབས་ཀྱི་ནམ་མཁའ་ཉིད་ཅེ་ན། འདི་ལྟར་ཞེས་བྱ་བའོ། །དེ་ལྟ་ན་ཡང་ཅི་ལྟར་མི་རྟག་སྙམ་ན། དེའི་གནས་སྐབས་མ་ཡིན་པ་ཞེས་བྱ་བའོ། །འོན་ཏེ་ཞེས་བྱ་བ་ནི། འདིར་ནི་མགྲིན་པའི་སྦུབས་ཀྱི་བདག་ཉིད་ཀྱི་ནམ་མཁར་རོ། །དངོས་པོ་གཞན་བད་ཀན་ལ་སོགས་པ་ཡོད་པ་ཉིད་དོ། །དེ་ཉིད་ཡིན་ནོ་ཞེས་

བྱ་བ་ནི་དངོས་པོ་གཞན་མེད་པའི་དུས་ན་ཡོད་པ་གང་ཡིན་པ་ཉིད་དོ། །ལན་ནི་སྔ་མ་ཞེས་བྱ་བ་ལ་སོགས་པའོ། །དོགས་པ་ནི་བད་ཀན་ལ་སོགས་པའི་གེགས་ཡོད་པའི་ཕྱིར་རོ། །ལན་ནི་རྟག་པ་ཞེས་བྱ་བའོ། །གལ་ཏེ་ཅི་ལྟར་ཡན་ལག་ཅན་ཡན་ལག་དུ་མ་ལ་ཁྱབ་པ་གཅིག་ཡིན་པ་དེ་བཞིན་དུ་ནམ་མཁའ་ཡང་

དངོས་པོ་དུ་མ་ལ་ཁྱབ་པ་གཅིག་ཡིན་ནོ། །གལ་ཏེ་ཡང་ཡན་ལག་ཅན་ལ་འབྲས་བུ་ཉིད་དང་མི་རྟག་པ་ཉིད་ཡོད་པ་ཡིན་ལ། ནམ་མཁའ་ནི་རྟག་པ་དང་འབྲས་བུ་མ་ཡིན་པ་དེ་ལྟ་ན་ཡང་ཁྱབ་པ་ཙམ་གྱིས་ཡན་ལག་ཅན་དཔེ་ཉིད་ཡིན་ནོ་ཞེས་དོགས་པ་བསུ་ནས། ཡན་ལག་ཅན་ཡང་མེད་པ་ཁོ་ན་ཡིན་ཏེ།

ཅི་ལྟར་དཔེ་དེ་ལ་བརྟེན་ནས་ནམ་མཁའ་ཡང་དེ་ལྟར་འགྱུར་ཞེས་བརྗོད་པ་ནི། གཞན་ཡང་ཞེས་བྱ་བའོ། །གལ་ཏེ་ཡན་ལག་ཅན་མེད་ན་དེའི་ཚེ་ཡན་ལག་གཅིག་དྲངས་པས་ཐམས་ཅད་འོང་བར་མི་འགྱུར་བ་ཞིག་ནས་འགྱུར་བ་ཡང་ཡིན་ཏེ། དེས་ན་ཡན་ལག་ཅན་ནི་ཡོད་པ་ཁོ་ནའོ་ཞེས་དོགས་པ་བསུ་བ་ནི་ཅིའི་

ཕྱིར་ཞེས་བྱ་བའོ། །མགྲིན་པའི་སྦུབས་ཞེས་བྱ་བ་ལ་སོགས་པའི་དོན་ནི་འདི་ཡིན་ཏེ། གཅིག་དྲངས་པས་ཐམས་ཅད་འོང་བ་ནི་ཡན་ལག་ཅན་དང་འབྲེལ་པ་མ་ཡིན་ཏེ། ཡན་ལག་ཅན་མེད་ཀྱང་མཐོང་བའི་ཕྱིར་རོ། །མགྲིན་པའི་སྦུབས་ཀྱིས་ནི་ལུས་བརྩམས་པ་ཡིན་མོད་ཀྱི། མགྲིན་པའི་སྦུབས་

དྲངས་པ་ན་ཡང་ལུས་འོང་བ་ནི་ཡོད་པ་ཉིད་དོ། །ཁྱོད་ཀྱིས་འདོད་པས་ནི་མགྲིན་པའི་སྦུབས་དང་ལུས་གཉིས་རིགས་མི་མཐུན་པས་ན། རྩོམ་པར་བྱེད་པ་དང་བརྩམ་པར་བྱ་བ་མེད་པས་ཡན་ལག་ཅན་མེད་པའི་ཕྱིར་རོ། །མགྲིན་པའི་སྦུབས་ནས་དྲངས་པ་ན་ལུས་ལོགས་སུ་ལུས་པར་འགྱུར་རོ། །ཡང་

ན་ལུས་དྲངས་པ་ན་མགྲིན་པའི་སྦུབས་ཅིའི་ཕྱིར་ལོགས་སུ་མི་འགྱུར་ཞེས་ཚིག་རྐང་བསྒོར་ལ་སྦྲེལ་བར་བྱའོ། །འགྱུར་བ་ཡང་མ་ཡིན་ཏེ། དེས་ན་གཅིག་དྲངས་པ་ན་ཐམས་ཅད་འོང་བ་ནི་ཡན་ལག་ཅན་དང་འབྲེལ་པ་མ་ཡིན་པའི་ཕྱིར་དེ་ལས་ནི་ཡན་ལག་ཅན་མི་འགྲུབ་པོ། །དེས་ན་དེའི་དཔེས་ནམ་

เล่ม ๑๘๖ · หน้า 101a

མཁའ་དེ་བཞིན་དུ་འགྲུབ་པར་ཅི་ལྟར་འགྱུར་ཞེས་དགོངས་པའོ། །དེས་ན་ཡན་ལག་ཅན་གྱི་དཔེ་འདི་ནི་གྱི་ན་ཡིན་ཏེ། མེད་པའི་ཕྱིར་རོ། །དེའི་ཕྱིར་ཞེས་བྱ་བ་ལ་སོགས་པས་ནི་མཇུག་སྡུད་པའོ། །གཞན་གྱི་འདོད་པ་ཅན་ནི་སངས་རྒྱས་པའི་གྲུབ་པའི་མཐའོ། །དེའི་འདོད་པ་གང་ཡིན་ཞེ་

ན། ནམ་མཁའ་ནི་ཞེས་བྱ་བའོ། །མི་རྟག་པ་ཉིད་ཀྱང་འདི་ལྟར་གསེང་དག་རྟོག་པ་དང་ཞེས་བྱ་བ་ལ་སོགས་པས་བསྟན་ཟིན་ཏོ། །སངས་རྒྱས་པའི་འདོད་པས་ནམ་མཁའ་མི་རྟག་པར་འདོད་པ་འབའ་ཞིག་ཏུ་ནི་མ་ཟད་ཀྱི་དངོས་པོ་མེད་པར་ཡང་ཡིན་ནོ། །དངོས་པོ་མེད་པ་ཡང་རྟག་པས་རིམ་དང་ཅིག་ཅར་དོན་བྱེད་པ་

འགལ་བའི་ཕྱིར་རོ། །ཡང་ན་མགྲིན་པའི་སྦུབས་ཀྱི་བདག་ཉིད་ཀྱི་ནམ་མཁའི་ནི་མི་རྟག་པ་ཡིན་ནོ་ཞེས་བརྗོད་མ་ཐག་པ་ཉིད་ཀྱི་མཇུག་བསྡུ་བ་ཡིན་ནོ། །གཞན་བྱེ་བྲག་པ་ལ་སོགས་པས་འདོད་པའི་ནམ་མཁའ་ནི་ཡང་ན་དངོས་པོ་མེད་པ་ཡིན་ནོ་ཞེས་སྔར་བརྗོད་པ་མཇུག་སྡུད་པའོ། །འདིས་ནི་སྣང་བ་ལ་སོགས་པ་

ལས་དབེན་པའི་རང་བཞིན་དག་པ་དང་ཡངས་པ་ལ་སོགས་པའི་རང་བཞིན་གྱི་གསེང་ནམ་མཁའ་ཡིན་པར་བསྟན་པ་ཡིན་ནོ། །ཡང་ན་ཞེས་བྱ་བ་ལ་སོགས་པས་ནི་ནམ་མཁའ་སྣང་བའི་རང་བཞིན་ཡིན་པར་སྟོན་པ་ཡིན་ནོ། །ཀ་བ་ལ་ཐོགས་པ་དང་བཅས་པ་དང་མ་འདྲེས་པ་དེའི་བདག་ཉིད་དུ་མ་གྱུར་པའི་སྣང་བ་

ལ་སོགས་པ་ནི་ནམ་མཁའ་ཞེས་བྱ་བར་བརྗོད་པ་ཡིན་ནོ། །དེ་ལྟ་བུར་གྱུར་པའི་ནམ་མཁའ་ཡང་མི་རྟག་པ་ཁོ་ན་ཡིན་ནོ་ཞེས་བརྗོད་པ་ནི། ཀ་བ་ལ་སོགས་པ་ཐོགས་པ་དང་བཅས་པའི་དངོས་པོ་གཞན་དང་མ་འབྲེལ་པའི་དོན་གཞན་སྣང་བ་ལ་སོགས་པ་གང་ཡིན་པ་དེ་ནི་མི་རྟག་པ་ཉིད་ཀྱི་ནམ་མཁའ་ཡིན་ནོ། །

གནས་པའི་ཕྱོགས་སོ་ཞེས་བྱ་བ་ནི། སྣང་བ་ལ་སོགས་པ་ནི་རང་བཞིན་གྱི་ནམ་མཁའ་ཡིན་ནོ་ཞེས་བྱ་བའི་ཕྱོགས་འདི་ནི་རྣམ་པར་གནས་པ་ཡིན་ཏེ། རིགས་པ་དང་ལྡན་པ་ཉིད་ཀྱིས་མདོ་སྡེ་པས་ཁས་བླངས་པའི་ཕྱིར་རོ། །ཕྱོགས་དང་པོ་ནི་མ་ཡིན་ཏེ་དེ་ལས་ཟློག་པའི་ཕྱིར་རོ། །དེ་ལྟ་བུར་གྱུར་པའི་ཞེས་

བྱ་བ་ནི། བསྟན་མ་ཐག་པའི་ཕྱོགས་གཉིས་པོའི་ནམ་མཁའ་ཆོས་ཅན་ནི། མི་རྟག་པ་ཉིད་ཀྱིས་ཆོས་ཀྱི་ཁྱད་པར་དང་ལྡན་པར་བསྒྲུབ་པ་ཡིན་ནོ། །དེ་ལས་གཞན་ཞེས་བྱ་བ་ནི་རྟག་པ་ཉིད་ཀྱི་ཁྱད་པར་ཅན་གྱི་ཆོས་ཅན་ལ་གནོད་པ་ལ་ཕྱོགས་ལ་གནོད་པའི་མཚན་ཉིད་ཀྱི་སྐྱོན་ཡོད་པ་མ་ཡིན་ནོ། །ཅིའི་ཕྱིར་གཞན་

เล่ม ๑๘๖ · หน้า 101b

པའི་ཆོས་ཅན་ལ་གནོད་པ་སྐྱོན་མ་ཡིན་ཞེ་ན། འདི་ལྟར་ཞེས་གསུངས་སོ། །རྣམ་པར་གཅོད་པར་བྱ་བ་བརྗོད་པ་ནི་དེ་དང་འབྲེལ་པ་མེད་པ་ཞེས་བྱ་བའོ། །བསྒྲུབ་པར་བྱ་བ་མི་རྟག་པ་ཉིད་དང་མ་འབྲེལ་བ་གཞན་གྱིས་ཀུན་བརྟགས་པའི་ཆོས་ཅན་ནམ་མཁའ་ལ་གནོད་ཀྱང་སྐྱོན་ཡོད་པ་མ་ཡིན་ནོ་ཞེས་འབྲེལ་ཏོ། །

ཆོས་ཅན་འབའ་ཞིག་ལ་གནོད་པ་ན་ཉེས་པ་མེད་པ་ཅིའི་ཕྱིར་ཞེ་ན། འདི་ལྟར་ཞེས་བྱ་བའོ། །དེ་ལྟར་ཉིད་དུ་ཞེས་བྱ་བ་ནི་སྐབས་ཀྱི་བསྒྲུབ་པར་བྱ་བའི་ཁྱད་པར་ཅན་ཉིད་དུའོ། །ཆོས་ཅན་འབའ་ཞིག་ནི་བསྒྲུབ་པར་བྱ་བ་མ་ཡིན་ནོ། །དེའི་ཕྱིར་འབའ་ཞིག་བཀག་པ་ལ་ནི་ཉེས་པ་མེད་དོ། །གྲུབ་པ་ཉིད་དོ་ཞེས་བྱ་བ་

ག་ལས་ཤེ་ན། མ་གྲུབ་པ་ནི་ཞེས་སྨོས་སོ། །ཉེ་བར་མཁོ་བ་མེད་པའི་ཕྱིར་རོ་ཞེས་བྱ་བ་ནི་མ་གྲུབ་པའི་ཆོས་ཅན་གྱིས་བྱ་བ་མེད་པའི་ཕྱིར་ཏེ། མ་གྲུབ་པའི་ཆོས་ཅན་གྱིས་ནི་བསྒྲུབ་བྱ་འགྲུབ་པར་བྱེད་པ་མ་ཡིན་ནོ། །གང་གི་ཕྱིར་གྲུབ་པ་ཉིད་ཆོས་ཅན་ཡིན་པའི་གཏན་ཚིགས་དེས་ན། བསྒྲུབ་པར་བྱ་

བའི་ཆོས་ཀྱི་ཁྱད་པར་ཅན་ཉིད་དུ་གྲུབ་པའི་ཆོས་ཅན་དེ་སྒྲུབ་པར་འདོད་པ་ཡིན་གྱི། རང་གི་ངོ་བོས་ནི་མ་ཡིན་ཏེ་གྲུབ་ཟིན་པའི་ཕྱིར་རོ། །གང་གི་ཕྱིར་དེ་ལྟ་ཡིན་པ་དེས་ན་ཆོས་ཅན་འབའ་ཞིག་བཀག་པ་ལ་ནི་སྐྱོན་མེད་དོ། །གལ་ཏེ་ཞེས་བྱ་བ་ནི་རྩོད་པའོ། །གང་གིས་ཞེས་བྱ་བ་ནི་རྟག་པས་སོ། །དེའི་ནི་མངོན་

པར་འདོད་པའི་བསྒྲུབ་པར་བྱ་བའི་གཞི་ཉིད་དུའོ། །དེའི་རང་བཞིན་ལ་ནི་རྟག་པའི་རང་བཞིན་ལའོ། །ལན་ནི་མ་ཡིན་ཏེ་ཞེས་བྱ་བའོ། །རྟག་པ་དང་དངོས་པོའི་རང་བཞིན་གྱི་ནམ་མཁའ་ནི་མངོན་པར་འདོད་པ་མ་ཡིན་ནོ། །གལ་ཏེ་ཞེས་བྱ་བ་ལ་སོགས་པའི་དོན་ནི་འདི་ཡིན་ཏེ། བསྒྲུབ་པར་བྱ་བར་

སྔར་མེད་པའི་རང་བཞིན་བསྐྱེད་པར་བྱ་བ་མེད་པའམ་ཡིན་པའམ། གཏན་ཚིགས་ཅིག་ཅར་སྒྲ་ལ་སོགས་པའི་རྒྱུ་མ་ཡིན་པའི་མཚན་ཉིད་ཀྱི་ཤུགས་ཀྱིས་ཏེ་གཞན་དུ་མི་འཐད་པའི་གནད་ཀས་ཆོས་ཅན་རྟག་པའི་རང་བཞིན་ལ། རང་བཞིན་གཞན་དུ་འགྱུར་བར་གྲུབ་ན་དེའི་ཚེ། ཆོས་ཅན་རང་བཞིན་

གཞན་དུ་གྲུབ་པ་བཀག་པས་ཅི་ཞིག་བྱ་སྟེ། གང་གི་ཕྱིར་བདག་ཅག་ནི་དངོས་པོ་དཔྱོད་པ་ལྷུར་ལེན་པ་ཡིན་ནོ། །ཅིའི་ཕྱིར་ཁྱེད་མི་འགོག་སྙམ་ན། དངོས་པོའི་ཞེས་བྱ་བའོ། །འདི་ག་ལས་སྙམ་ན་ཚད་མས་ཞེས་བྱ་བའོ། །གལ་ཏེ་ནམ་མཁའ་ལ་སོགས་པ་མེད་པར་གྲུབ་ཀྱང་ཉེས་པ་

เล่ม ๑๘๖ · หน้า 102a

འགའ་ཡང་མེད་ན་དེའི་ཚེ་བདེ་བ་ལ་སོགས་པ་མེད་པར་གྲུབ་པ་ལ་ཡང་ཉེས་པ་མེད་པར་འགྱུར་རོ་ཞེས་དོགས་པ་བསུ་བ་ནི། གལ་ཏེ་ཞེས་བྱ་བའོ། །བརྗོད་པའི་ཚུལ་དུ་གལ་ཏེ་རྩ་རིག་གིས་ཀུན་བརྟགས་པའི་ཆོས་ཅན་ནམ་མཁའ་ལ་གནོད་ཀྱང་ཉེས་པ་མེད་ན་དེའི་ཚེའོ། །སྔ་

མ་བཞིན་ཞེས་བྱ་བ་ནི་དཔེར་ན་ནམ་མཁའ་ཅི་ལྟ་བ་དེ་བཞིན་དུའོ། །བདེ་བ་ལ་སོགས་པ་ནི་གཞན་གྱིས་བསྐྱེད་པར་བྱ་བ་མ་ཡིན་པའི་ནུས་པ་གང་ལ་ཡོད་པ་དེ་ལྟར་མ་ཡིན་པ་སྟེ། རྟག་པ་མ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། ཅིག་ཅར་སྒྲ་ལ་སོགས་པའི་རྒྱུ་ཡིན་པའི་ཕྱིར་རོ་ཞེས་བྱ་བ་འདིར་གནོད་

པར་འགྱུར་ཏེ། བདེ་བ་ལ་སོགས་པ་མེད་པར་བསྒྲུབ་པའི་ཕྱིར་རོ། །ཅི་ལྟར་ན་ཡོད་པའི་བདེ་བ་ལ་སོགས་པའི་མེད་པར་འགྱུར་སྙམ་ན། བདེ་བ་དང་ཞེས་བྱ་བ་ལ་སོགས་པའོ། །སྒྲ་ལ་སོགས་པ་གསལ་བའི་དོན་གཙོ་བོའི་ཡོངས་སུ་འགྱུར་པ་རྣམས་ཀྱི་རྒྱུ་ནི། རྩ་བའི་རང་བཞིན་དུ་གྱུར་པའི་གཙོ་བོ་ཡིན་པར་

གྲངས་ཅན་པ་དག་འདོད་དེ། གཙོ་བོའི་རང་བཞིན་ཞེས་བྱ་བ་ནི་བདེ་བ་ལ་སོགས་པ་ནི་གཙོ་བོའི་ངོ་བོ་ཉིད་ཡིན་ནོ། །གཙོ་བོ་རྟག་པ་གནོད་ན་ནི་བདེ་བ་ལ་སོགས་པ་ཡང་གནོད་པར་འགྱུར་བ་ཡིན་ཏེ། དེས་ན་བདེ་བ་ལ་སོགས་པ་ནི་མེད་པར་འགྱུར་རོ། །གལ་ཏེ་བདེ་བ་ལ་སོགས་པ་གཞན་གྱིས་ཞེས་བྱ་བའི་སྦྱོར་བ་

འདི་ལ། ཅིག་ཅར་སྒྲ་སོགས་རྒྱུ་མིན་ཕྱིར། །ཞེས་བྱ་བའི་གཏན་ཚིགས་བསྒྲུབ་པར་བྱ་བ་མེད་པ་ཉིད་ལ་ངེས་པ་ཡིན་ན་ནི། རྟག་པའི་བདེ་བ་ལ་སོགས་པ་ལྟར། མི་རྟག་པའི་བདེ་བ་ལ་སོགས་པ་ཡང་མེད་པར་བསྒྲུབ་པའི་ཕྱིར་རོ། །འགལ་བ་གནོད་པར་བྱེད་པ་ཉིད་ཡིན་པར་འགྱུར་བ་ཞིག་ན་གཏན་ཚིགས་ངེས་པ་ཡང་

མ་ཡིན་ནོ། །ཅིའི་ཕྱིར་ཞེ་ན། གང་གི་ཕྱིར་གཏན་ཚིགས་འདི་ནི་ལྷག་ལྡན་ཏེ་མ་ངེས་པའི་ཁྱད་པར་མི་མཐུན་པའི་ཕྱོགས་ལ་ལྡོག་པ་ལ་ཐེ་ཚོམ་ཟ་བར་འདོད་པ་ཡིན་ནོ། །ཅིའི་ཕྱིར་ཞེ་ན། མི་མཐུན་པའི་ཕྱོགས་མི་རྟག་པའི་རང་བཞིན་གྱི་ཡོད་པ་ལས་ལྡོག་པ་ལ་ཐེ་ཚོམ་ཟ་བས་ནའོ། །དེ་ཉིད་ཅི་ལྟར་ཞེ་ན། བརྗོད་

པ་རིམ་གྱིས་བྱེད་པ་ཅིག་ཅར་རྒྱུ་མ་ཡིན་པ་ཉིད་དང་། མི་རྟག་པ་ཉིད་གཉིས་པོ་འདི་ལ་འགལ་པ་མེད་པའི་ཕྱིར་རོ། །དེས་ན་བདེ་བ་ལ་སོགས་པ་ཅིག་ཅར་རྒྱུ་མ་ཡིན་པར་ཡང་འགྱུར་ལ། མེད་པ་ཡང་མ་ཡིན་པའི་ཕྱིར་ཆོས་ཅན་ལ་གནོད་པར་ཅི་ལྟར་འགྱུར། རིམ་བཞིན་བྱེད་དང་ཞེས་བྱ་བ་རྣམ་པར་འགྲེལ་

เล่ม ๑๘๖ · หน้า 102b

པ་ནི་འདིར་ཞེས་བྱ་བའོ། །ཅིག་ཅར་རྒྱུ་མིན་ཕྱིར་ཞེས་བྱ་བ་ནི། རིམ་མ་ཡིན་པར་བྱེད་པ་བཀག་པ་བརྗོད་པ་ཡིན་ལ། དེ་བཀག་པས་ན་རིམ་གྱིས་བྱེད་པ་གང་ཡིན་པ་ནི་ཆོས་ཅན་བདེ་བ་ལ་སོགས་པ་གཞན་གྱིས་སྔར་མེད་པའི་ནུས་པ་བསྐྱེད་པར་བྱ་བ་ཉིད་མ་ཡིན་པ། རྟག་པ་ཉིད་མེད་པའི་བདག་ཉིད་ཀྱིས་བསྒྲུབ་

པར་བྱ་བ་ལ་གཏན་ཚིགས་ཡིན་ནོ། །གལ་ཏེ་གཏན་ཚིགས་འདི་ནི་རྟག་པ་ཉིད་མེད་པ་བཞིན་དུ་མི་རྟག་པ་ཉིད་མེད་པ་ཡང་གོ་བར་བྱེད་པ་མ་ཡིན་ནམ་ཞེས་པ་དོགས་ན། རིམ་བཞིན་བྱེད་པ་དང་ཞེས་བྱ་བའོ། །དེས་ན་ནི་འགལ་བ་མེད་པས་སོ། །རིམ་གྱིས་བྱེད་པ་ཉིད་ཀྱིས་མི་རྟག་པར་ཉིད་མེད་པ་གོ་བར་བྱེད་པ་

མ་ཡིན་ནོ། །དེས་ན་ཅི་ལྟར་ཆོས་ཅན་བདེ་བ་ལ་སོགས་པ་ལ་གནོད་པ་ཡིན། དེ་ལྟ་ན་ཡང་ཆོས་ལ་ཅི་ལྟར་མི་གནོད་ཅེ་ན། དེ་ལ་ཞེས་སྨོས་སོ། །དེས་ན་ཆོས་ཅན་གང་ལ་གནོད་པ་ན། སྐབས་ཀྱི་ཆོས་ཀྱི་གེགས་སུ་འགྱུར་བ་དེ་ལ་ཉེས་པ་ཡིན་ནོ་ཞེས་བསྟན་པའི་དོན་དུ་རང་གི་ཆོས་ཅན་སྨོས་སོ་ཞེས་

མཇུག་སྡུད་པ་ནི། དེས་ན་ཞེས་བྱ་བའོ། །གལ་ཏེ་འདི་མཚན་ཉིད་ཀྱི་བསྟན་པ་ཡོད་དམ་ཅིག་སྙམ་ན། བསྟན་པ་ཁོ་ནའོ་ཞེས་གསུངས་པ་ནི། གང་ཕྱིར་ཞེས་བྱ་བ་སྟེ། གང་གི་ཕྱིར་རང་གི་འདོད་པའི་ཆོས་བསྒྲུབ་པར་བྱ་བ་ཡིན་ནོ་ཞེས་བརྗོད་པ་དེའི་ཕྱིར་གང་གིས་ཚེ་བསྒྲུབ་པར་བྱ་བ་དེའི་རྟེན་ལ་གནོད་པ་ཡིན་ན་དེའི་ཚེ་

ཉེས་པར་འགྱུར་གྱི། བསྒྲུབ་པར་བྱ་བའི་ཆོས་ཀྱི་རྟེན་མ་ཡིན་པ་འབའ་ཞིག་པ་ཉིད་དམ། ཆོས་གཞན་གྱི་རྟེན་ལ་གནོད་པ་དེའི་ཚེ་ནི་ཉེས་པ་ཡོད་པ་མིན་ཏེ་ཞེས་བསྟན་ཏོ། །འདི་ག་ལས་ཤེ་ན། འབའ་ཞིག་ལ་ཞེས་བྱ་བའོ། །འོ་ན་ཅི་ལྟར་ཉེས་པར་འགྱུར་སྙམ་ན་དེས་ན་ཞེས་བྱ་བའོ། །བསྟན་ཟིན་པ་ཡིན་ཡང་ལོག་པར་

རྟོག་པ་བསལ་བའི་དོན་དུ་རང་གི་ཆོས་ཅན་གྱི་ཚིག་གིས་སྟོན་པ་ཡིན་ནོ་ཞེས་གསུངས་པ་ནི་དེའི་ཕྱིར་ཞེས་བྱ་བ་སྟེ་བསྟན་ཟིན་པ་ཡིན་པའི་ཕྱིར་རོ། །ཆོས་ཅན་གཞན་ནམ་མཁའི་ཡོན་ཏན་ཉིད་ལ་སོགས་པ་ལའོ། །འདོད་པར་འགྱུར་བའི་ཚིག་གིས་སྐབས་མ་ཡིན་པའི་ཆོས་ལ་གནོད་པས་གནོད་པ་མ་ཡིན་ནོ་ཞེས་བསྟན་

ཟིན་པ་ཡིན་ཡང་ལོག་པར་རྟོག་པ་བསལ་བའི་དོན་དུ་རང་ཉིད་ཀྱི་ཚིག་གིས་སྟོན་པ་དེ་བཞིན་དུ། མཚན་ཉིད་ཀྱི་ཚིག་གི་ཆོས་ཅན་གཞན་ལ་གནོད་པས་གནོད་པ་མ་ཡིན་ནོ་ཞེས་བསྟན་ཟིན་པ་ཡིན་ཡང་། རང་གི་ཆོས་ཅན་གྱི་ཚིག་གིས་ལོག་པར་རྟོག་པ་བསལ་བའི་དོན་དུ་སྟོན་པ་ཡིན་ནོ། །དེ་ཉིད་ཀྱི་ཕྱིར་ཞེས་བྱ་བ་

เล่ม ๑๘๖ · หน้า 103a

ནི་བསྒྲུབ་པར་བྱ་བའི་ཆོས་ལ་མཁོ་བའི་ཆོས་ཅན་ལ་གནོད་ན་ཉེས་པར་འགྱུར་བ་ཉིད་ཀྱི་ཕྱིར། སློབ་དཔོན་ཕྱོགས་ཀྱི་གླང་པོས་གསུངས་པ་ཡིན་ནོ། །ཅི་གསུངས་ཤེ་ན། གལ་ཏེ་ཞེས་བྱ་བའོ། །དེ་ལ་ནི་ཆོས་ཅན་ལའོ། །གཞན་དུ་ཞེས་བྱ་བ་ནི་གནོད་པ་ཡིན་ནོ། །དེའི་ཞེས་བྱ་བ་ནི་

གཏན་ཚིགས་ཀྱི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པའི་ཕྱིར་རོ། །དེ་ཉིད་ཀྱི་ཕྱིར་ཞེས་བྱ་བ་ནི་སྒྲ་ལ་མ་གྲུབ་པ་ཉིད་ཀྱི་ཕྱིར་རོ། །གཞན་དུ་ན་ཞེས་བྱ་བ་ནི་སྒྲ་ལ་གྲུབ་ནའོ། །བཟློག་པར་ཞེས་བྱ་བ་ནི་མི་རྟག་པ་ཉིད་གྲུབ་པས་ན་ཁྱད་པར་དུ་གྱུར་པའི་དོན་མི་རྟག་པ་ཉིད་མ་གྲུབ་པར་རོ། །རྨོངས་པ་ལ་ནི་གྲངས་ཅན་ལའོ། །

འོན་ཏེ་རྟག་པ་ཉིད་ཚད་མས་གྲུབ་པ་ཉིད་ཡིན་པ་དེའི་ཚེ་ཚད་མས་གནོད་པའི་ཕྱོགས་ལྟར་སྣང་བ་ལས་ཁྱད་པར་རབ་ཏུ་མ་གྲུབ་པ་ཞེས་བྱ་བ་འདི་ཕྱོགས་ལྟར་སྣང་བ་གཞན་དུ་མི་འགྱུར་རོ་ཞེས་གསུངས་པ་ནི། གལ་ཏེ་ཞེས་བྱ་བའོ། །དེ་ཉིད་ཀྱི་ཞེས་བྱ་བའི་དཔེ་ཉིད་ཀྱིའོ། །ཕྱོགས་ལྟར་སྣང་བ་གསུམ་པ་སུན་འབྱིན་པ་ནི།

གཉི་ག་ཞེས་བྱ་བའོ། །འོན་ཏེ་ཞེས་བྱ་བ་ལ་སོགས་པ་ནི་རྩོད་པའོ། །ལན་ནི་ད་ལྟར་ན་ནི་ཞེས་བྱ་བའོ། །ཅིའི་ཕྱིར་ཞེ་ན། གང་གི་ཕྱིར་ཞེས་བྱ་བའོ། །དེ་ལྟ་ན་ཡང་ཞེས་བྱ་བ་ནི་སྒྲུབ་བྱེད་ཀྱི་སྐྱོན་ཐམས་ཅད་ཀྱི་ཕྱོགས་ཉིད་ལ་གནོད་པ་ཡིན་ཡང་ངོ་། །དེ་ལ་ཞེས་བྱ་བ་ཕྱོགས་ལ་གནོད་པ་ཙམ་གྱིས་སོ། །མ་ཡིན་ཏེ་

ཞེས་བྱ་བ་འདི་ཅིའི་ཕྱིར་སྙམ་ན། སྒྲུབ་པར་བྱེད་པའི་ཞེས་བྱ་བའོ། །དེ་ལ་ཞེས་བྱ་བ་ཕྱོགས་ལ་གནོད་པ་ཡིན་ཡང་ངོ་། །གཞན་གྱིས་བསམ་པས་རིགས་པ་ཡོད་པར་དོགས་པ་བསུ་བ་ནི། འོན་ཏེ་ཞེས་བྱ་བའོ། །སྒྲུབ་པར་བྱེད་པའི་སྐྱོན་ནི་ཕྱོགས་ཀྱི་སྐྱོན་མ་ཡིན་གྱི་ཞེས་བྱ་བ་ནི་སྐབས་སོ། །ཅིའི་ཕྱིར་ཞེ་ན།

བསྒྲུབ་པར་བྱ་བའི་ཕྱོགས་ལས་ཐ་དད་པའི་སྒྲུབ་པར་བྱེད་པ་གང་ཡིན་པ་དེའི་དུས་དང་རང་གི་ངོ་བོ་དེར་ཞུགས་པར་གྱུར་པའི་ཕྱིར་རོ། །དེ་ཉིད་གང་ལས་ཤེ་ན། ཕྱོགས་ནི་ཞེས་བྱ་བའོ། །འོ་ན་ཉེས་པ་འདི་གང་གི་ཡིན་ཞེ་ན། འོན་ཀྱང་ཞེས་བྱ་བའོ། །དེ་ནི་ཞེས་བྱ་བ་ནི་ལན་ནོ། །མཚུངས་པའི་ཕྱིར་ཞེས་བྱ་བ་

ནི་ཕྱོགས་དང་སྒྲུབ་པར་བྱེད་པ་ལ་རྗེས་སུ་འགྲོ་བ་མེད་པ་ཉིད་མཚུངས་པའོ། །ཅི་ལྟར་མཚུངས་ཤེ་ན། རྗེས་སུ་ཞེས་བྱ་བའོ། །དེ་ཡང་བྱ་བ་ནི་མ་འབྲེལ་བའོ། །གལ་ཏེ་འབྲེལ་པ་ཉིད་གཉིས་ལ་བརྟེན་པ་མ་ཡིན་ནམ། དེ་ཅི་ལྟར་མ་འབྲེལ་པ་ཡང་དེ་ལྟར་བརྗོད་སྙམ་ན། མ་ཡིན་ཏེ། རྗེས་སུ་འགྲོ་བ་མེད་པ་ཡང་

เล่ม ๑๘๖ · หน้า 103b

གཉིས་ལ་ལྟོས་ནས་རྣམ་པར་འཇོག་པ་ཡིན་ཏེ། འདི་ལྟར་དུ་བ་ནི་དུ་བ་མེ་དང་རྗེས་སུ་འགྲོ་བ་ཡིན་ལ། བོང་བུ་དང་ནི་རྗེས་སུ་འགྲོ་བ་མེད་པ་ཡིན་ནོ། །ཞེས་དེ་ཡང་གཉིས་ལ་གནས་པ་མ་ཡིན་ནོ། །གཉི་ག་ཡང་ཞེས་བྱ་བའི་ནི་ཕྱོགས་དང་སྒྲུབ་པར་བྱེད་པ་དག་གིའོ། །སྒྲུབ་པར་བྱེད་པ་ལ་ལྟོས་ཏེ་མ་གྲུབ་པ་ནི་མ་ཡིན་ནོ་ཞེས་

འབྲེལ་ཏོ། །སྒྲུབ་པར་བྱེད་པ་ལ་ཞེས་བྱ་བ་ནི་སྒྲུབ་པར་བྱེད་པ་ལ་ལྟོས་པའི་མ་གྲུབ་པ་རང་གི་ངོ་བོ་མ་གྲུབ་པའི་མཚན་ཉིད་གང་ཡིན་པ་དེ་ནི་སྒྲུབ་པར་བྱེད་པ་ཉིད་ཀྱི་སྐྱོན་ཡིན་ནོ་ཞེ་ན། འདི་ལ་ཞེས་བྱ་བ་ནི་གྲུབ་པའི་མཐའོ། །འདི་ལྟར་དེ་ལ་བདག་ནི་ཁྱབ་པ་ཡིན་ནོ། །ཞེས་གལ་ཏེ་འགའ་ཞིག་ཁྱབ་པ་དང་ལྡན་པའི་བདག་

བསྒྲུབ་བྱར་བྱེད་ན་ཞེས་བྱ་བ་ལ་སོགས་པས་སྔར་བཤད་ཟིན་ཏོ། །གཉི་ག་ཞེས་བྱ་བ་ནི་བསྒྲུབ་པར་བྱ་བའི་ཆོས་དང་ཆོས་ཕན་ཚུན་ཁྱད་པར་དུ་བྱ་བ་དང་ཁྱད་པར་དུ་བྱེད་པའི་དངོས་པོར་ལྟོས་ནས་གཏན་ཚིགས་སྒྲུབ་པར་བྱེད་པ་ཡིན་ན་དེའི་ཚེ་ཅི་ལྟར་ཕྱོགས་ཀྱི་སྐྱོན་ཡིན་ཏེ། ཕྱོགས་ཡང་དག་པ་ཉིད་ཡིན་ནོ། །དེས་ན་བདག་

ཁྱབ་པ་ཡིན་ནོ་ཞེས་བྱ་བ་ནི་ཡང་དག་པའི་ཕྱོགས་ཉིད་ཡིན་གྱི། ཕྱོགས་ལྟར་སྣང་བ་ནི་མ་ཡིན་ནོ། །འོན་ཏེ་ཆོས་ཅན་བདག་མེད་པས་གཏན་ཚིགས་གཞི་མ་གྲུབ་པ་ཉིད་ཡིན་ན། དེ་ལྟ་ན་འོ་ན་གཏན་ཚིགས་ཀྱི་ཉེས་པ་ཉིད་དུ་འགྱུར་གྱི་ཕྱོགས་ཀྱི་ནི་མ་ཡིན་ནོ། །གལ་ཏེ་ཆོས་ཅན་གྲུབ་པ་ཁོ་ན་ལ་བསྒྲུབ་བྱ་སྒྲུབ་པར་

བྱེད་པ་ཡིན་ན་ཞེས་བྱ་བའི་ངེས་པ་ནི་མེད་པ་མ་ཡིན་ཏེ། དེས་ན་གྲུབ་པའི་ཆོས་ཅན་དང་ལྡན་པའི་བསྒྲུབ་པར་བྱ་བའི་ཆོས་ནི་ཕྱོགས་ཡིན་ལ། མ་གྲུབ་པའི་ཆོས་ཅན་དང་ལྡན་པའི་ནི་ཕྱོགས་ལྟར་སྣང་བ་ཡིན་ནོ། །དེས་ན་བདག་ཁྱབ་པ་ཡིན་ནོ་ཞེས་བྱ་བ་ནི་ཕྱོགས་ཀྱི་ཉེས་པ་ཁོ་ན་ཡིན་གྱི། གཏན་ཚིགས་ཀྱི་ཉེས་

པ་ནི་མ་ཡིན་ནོ་ཞེས་དོགས་པ་བསུ་ནས་བརྗོད་པ་ནི་ཆོས་ཅན་ཞེས་བྱ་བ་ལ་སོགས་པའོ་ཞེས་བྱ་བ་ཞེས་པ་ནི་ངེས་པའི་རྣམ་པའོ། །གྲུབ་པའི་ཆོས་ཅན་ཁོ་ན་ལ་བསྒྲུབ་པར་བྱ་བ་དང་འབྲེལ་བསྒྲུབ་པོ་ཞེས་བྱ་བའི་ངེས་པ་ནི་ཡོད་པ་མ་ཡིན་གྱི། འོན་ཀྱང་ཆོས་མ་གྲུབ་པ་ཡང་བསྒྲུབ་པར་བྱ་བ་དང་འབྲེལ་པར་སྒྲུབ་

པ་ཡིན་ནོ། །དེས་ན་གྲུབ་པ་དང་མ་གྲུབ་པའི་ཆོས་ཅན་ལ་ཡང་བསྒྲུབ་བྱའི་ཆོས་དང་ལྡན་པ་བསྒྲུབ་པར་བྱ་བ་ཡིན་ནོ། །མ་གྲུབ་པའི་ཆོས་དང་ཆོས་ཅན་གྱི་ཚོགས་པ་ཡང་དག་པའི་ཕྱོགས་ཡིན་ནོ་ཞེས་བྱ་བར་ག་ལ་ངེས་ཤེ་ན། རང་གི་ངོ་བོ་ཁོ་ནར་ཞེས་བྱ་བའོ། །བདག་ཁྱབ་པ་ཡིན་ནོ་ཞེས་བྱ་བ་ནི་བསྒྲུབ་པར་

เล่ม ๑๘๖ · หน้า 104a

བྱ་བ་ཁོ་ནར་བསྟན་པ་ཡིན་པ་དེས་ན་ཕྱོགས་ཉིད་ཡིན་གྱི་ཕྱོགས་ལྟར་སྣང་བ་ནི་མ་ཡིན་ཏེ། དེས་ན་ཅི་ལྟར་ཕྱོགས་ལྟར་སྣང་བར་བརྗོད། དེས་ན་འདི་ནི་གཞན་གྱིས་ཀྱང་གཏན་ཚིགས་ཀྱི་སྐྱོན་ཉིད་དོ་ཞེས་བརྗོད་པར་བྱའོ། །གལ་ཏེ་མ་གྲུབ་པའི་ཆོས་དང་ཆོས་ཅན་གྱི་ཚོགས་པ་ཡང་བསྒྲུབ་

པར་བྱ་བ་ཁོ་ན་ཡིན་ན་འོ་ན་སྔར་ཆོས་ཅན་མེད་པས་གཏན་ཚིགས་གཞི་མ་གྲུབ་པའི་ཕྱིར་རོ་ཞེས་ཅི་ལྟར་བརྗོད། དེས་ན་གང་དུ་ཆོས་ཅན་མ་གྲུབ་པ་དེ་ནི་ཕྱོགས་ལྟར་སྣང་བ་ཁོ་ན་ཡིན་ནོ་ཞེས་མནོས་ནས་གཞན་དག་དོགས་པར་བྱེད་པ་ནི་འོ་ན་ཅི་ལྟར་ཞེས་བྱ་བའོ། །གཞི་མ་གྲུབ་པས་ཞེས་བྱ་བ་ནི་གྲུབ་པའི་

མཐའོ། །གང་གི་ཚེ་ཆོས་དང་ཆོས་ཅན་གྱི་ཚོགས་པ་མ་གྲུབ་པ་དེའི་ཚེ་གཏན་ཚིགས་ཉིད་མ་གྲུབ་པ་ཡིན་ཏེ། དེས་ན་འདི་ནི་གཏན་ཚིགས་ཀྱི་ཉེས་པ་ཉིད་ཡིན་གྱི། ཕྱོགས་ཀྱི་ནི་མ་ཡིན་ནོ། །དེས་ན་ཞེས་བྱ་བ་ནི་ངེས་པ་མེད་པས་ནའོ། །མ་གྲུབ་པའི་ཆོས་དང་ཆོས་ཅན་གྱི་སྤྱི་ཞེས་བྱ་བ་ནི་བདག་ནི་ཁྱབ་པ་ཡིན་ནོ་ཞེས་

བྱ་བའོ། །དེས་ན་ཁྱད་པར་རབ་ཏུ་མ་གྲུབ་པ་ལ་སོགས་པ་ཕྱོགས་ཀྱི་ཉེས་པ་གཞན་དུ་ཅི་ལྟར་འགྱུར། ཕྱོགས་ཉིད་ཡིན་ལ་གཏན་ཚིགས་གཞི་མ་གྲུབ་པ་ཉིད་ཀྱིས་སྐྱོན་ཆགས་པའི་ཕྱིར་ཕྱོགས་དེ་སྒྲུབ་པར་བྱེད་པ་མ་ཡིན་ནོ། །དེས་ན་གྲུབ་པའི་ཆོས་ཅན་གྱི་ཁྱད་པར་ཅན་གྱི་བསྒྲུབ་པར་བྱ་བའི་ཆོས་ནི་ཕྱོགས་ཡིན་

ལ། མ་གྲུབ་པའི་ཆོས་དང་ཆོས་ཅན་གྱི་སྤྱི་ནི་ཕྱོགས་ལྟར་སྣང་བ་ཡིན་ནོ་ཞེས་གཞན་གྱིས་བརྗོད་པར་མི་བྱ་སྟེ། མ་གྲུབ་པའི་སྤྱི་ཡང་ཕྱོགས་ཡིན་པའི་ཕྱིར་རོ། །དེས་ན་ཁྱད་པར་མ་གྲུབ་པ་ལ་སོགས་པ་ནི། གཏན་ཚིགས་ཀྱི་སྐྱོན་ཉིད་ཡིན་གྱི་ཕྱོགས་ཀྱི་མ་ཡིན་ནོ། །དེས་ན་ཞེས་བྱ་བ་ནི་མ་གྲུབ་པའི་སྤྱི་ཡང་

ཕྱོགས་ཡིན་པའི་ཕྱིར་རོ། །དེས་ན་ཞེས་བྱ་བ་ནི་གཏན་ཚིགས་ལ་མི་ལྟོས་པས་སོ། །ཡན་ལག་ཕྱི་མ་ལ་ལྟོས་པའི་སྐྱོན་ཡིན་པ་དེ་ནི་ཡན་ལག་ཕྱི་མའི་དེ་ཉིད་དང་རྗེས་སུ་འབྲེལ་པ་ཡིན་གྱི། ཕྱོགས་སུ་གྱུར་པའི་ཡན་ལག་སྔ་མ་དང་ནི་མ་ཡིན་ནོ། །དེའི་ཕྱིར་ཞེས་བྱ་བ་ནི་བཤད་པའི་ཕྱིར་རོ། །གལ་ཏེ་ཞེས་བྱ་བ་ནི་སྒྲ་

མཉན་པར་བྱ་བ་མ་ཡིན་ནོ་ཞེས་བྱ་བ་ལ་སོགས་པ་དཔེར་བརྗོད་པ་རྣམ་པ་བཞིས་ནི། ཆོས་ཀྱི་རང་གི་ངོ་བོ་ཕྱིན་ཅི་ལོག་གི་གནོད་པ་བརྗོད་ཀྱི། ཆོས་ཅན་གྱི་ཁྱད་པར་དང་། ཆོས་ཀྱི་ཁྱད་པར་དང་། ཆོས་ཅན་གྱི་རང་གི་ངོ་བོ་ལ་གནོད་པ་ནི་མ་ཡིན་ནོ། །ཆོས་དང་ཆོས་ཅན་གྱི་ཁྱད་པར་ཞེས་བྱ་བའི་ཁྱད་པར་གྱི་

เล่ม ๑๘๖ · หน้า 104b

སྒྲ་ནི་གཉིས་ཀ་དང་སྦྱར་རོ། །བསྒྲུབ་བྱར་ཡན་ལག་གྱུར་པའི་ཞེས་བྱ་བ་ནི། བསྒྲུབ་པར་བྱ་བ་མེད་ན་མེད་པ་ཅན་ནོ་ཞེས་བྱ་བ་ནི་ལྷ་དབང་བློའིའོ། །བསྒྲུབ་བྱའི་ནང་དུ་རྟོགས་པ་ཞེས་བྱ་བ་ནི་རྣམ་བཤད་མཛད་པའིའོ། །དེ་སྐད་དུ་ཡང་བསྒྲུབ་པར་བྱ་བ་ཉིད་ཁྱད་པར་མེད་པའི་ཕྱིར་ཞེས་འཆད་པར་འགྱུར་རོ། །དཔེ་

འདི་ཉིད་ཀྱིས་ཞེས་བྱ་བ་ནི་སྒྲ་ནི་མཉན་པར་བྱ་བ་མ་ཡིན་ནོ་ཞེས་བྱ་བ་ལ་སོགས་པ་དཔེར་བརྗོད་པས་སོ། །རང་གི་ངོ་བོ་དང་ཁྱད་པར་ཐམས་ཅད་ཀྱི་ཞེས་བྱ་བ་ནི། ཆོས་ཅན་གྱི་རང་གི་ངོ་བོ་དང་དེའི་ཁྱད་པར་དང་ཆོས་ཀྱི་ཁྱད་པར་དང་གཉི་གའི་ཁྱད་པར་རྣམས་ཀྱིའོ། །བསྒྲུབ་བྱ་ཉིད་དུ་ཁྱད་པར་མེད་པའི་ཕྱིར་རོ་

ཞེས་བྱ་བ་འདིས་ནི་འདི་བསྒྲུབ་བྱའི་ཡན་ལག་གྱུར་པའི་ཞེས་བྱ་བ་རྣམ་པར་བསྐལ་པ་ཡིན་ནོ། །འོ་ན་རང་གི་ངོ་བོ་དང་ཁྱད་པར་གནོད་པ་ཐམས་ཅད་ཀྱི་དཔེར་བརྗོད་པ་བསྟན་པར་བྱ་བར་འགྱུར་རོ་ཞེ་ན། དེ་ལ་ཞེས་གསུངས་སོ། །དགོས་པ་མེད་པའི་ཕྱིར་ཡང་བསྟན་པར་བྱ་བ་མ་ཡིན་ནོ་ཞེས་བརྗོད་པ་ནི། དེ་ལྟར་

ཞེས་བྱ་བའོ། །ཡོངས་སུ་ཤེས་པ་དགོས་པ་ཡིན་ནོ་ཞེ་ན། དཔེར་བརྗོད་པ་ཞེས་བྱ་བའོ། །དེའི་ཆོས་ཅན་ཞེས་བྱ་བ་ནི་གང་ལ་བསྒྲུབ་པར་བྱ་བའི་ཆོས་ཡོད་པའི་ཆོས་ཅན་གྱི་རང་གི་ངོ་བོ་ལ་སོགས་པ་གསུམ་མོ། །གལ་ཏེ་ཆོས་དང་ཞེས་བྱ་བ་ལ་སོགས་པའི་དོན་ནི་འདི་ཡིན་ཏེ། གལ་ཏེ་ཁྱད་པར་ཡིན་ན།

དེ་ན་བསྒྲུབ་པར་བྱ་བ་མ་ཡིན་ཏེ། རྗེས་འགྲོ་མེད་པའི་ཕྱིར་རོ། །དེ་སྟེ་བསྒྲུབ་བྱ་ཡིན་ན། འོ་ན་ཁྱད་པར་མ་ཡིན་ཏེ་རྗེས་འགྲོ་ཡོད་པའི་ཕྱིར་རོ་ཞེས་བྱ་བའོ། །དེའི་ཆོས་སུ་ཞེས་བྱ་བ་ནི། བསྒྲུབ་པར་བྱ་བའི་ཆོས་ཀྱི་རང་གི་ངོ་བོའི་རིགས་ཅན་དུའོ། །དེ་ནི་ཞེས་བྱ་བ་ནི་རྩོད་པའི་ལན་ནོ། །སྨྲས་པ་ནི་གཞན་

ཙམ་གྱི་སྤྱི་ཡིན་པས་དེ་ལ་ལྟོས་ནས་ཁྱད་པར་ཡིན་ནོ། །རང་གི་ངོ་བོ་ལ་ལྟོས་ནས་ནི་སྤྱི་ཉིད་ཡིན་ནོ་ཞེས་བྱ་བའི་དོན་ཏོ། །ཡོད་པའི་སྤྱི་ལ་བ་ལང་ཉིད་ཁྱད་པར་ཡིན་ཡང་སྤྱིའི་རང་བཞིན་མི་ཉམས་པ་ནི་ཉམས་སོ། །གལ་ཏེ་སྨྲས་པ་ཁོ་ན་བསྒྲུབ་པར་བྱ་བ་ཡིན་གྱི་གཞན་མ་ཡིན་པ་མ་ཡིན་ནམ། དེ་ཅི་ལྟར་ན་

སྤྱིའི་རང་བཞིན་ཡིན་ཡང་དེ་ལ་གནོད་པས་ཕྱོགས་ལ་གནོད་པར་ཅི་ལྟར་འགྱུར་ཞེ་ན། བསྒྲུབ་པར་བྱ་བ་ནི་དེ་ཉིད་དེ་ཞེས་བྱ་བ་སྟེ། ཁྱད་པར་གྱི་རང་བཞིན་ཉིད་དོ། །གཞན་དུ་ཞེས་བྱ་བ་ནི་ཁྱད་པར་བསྒྲུབ་པར་བྱ་བ་མ་ཡིན་ནའོ། །འདིས་ནི་ཆོས་ཅན་དང་ཆོས་ཀྱི་ཁྱད་པར་ཉིད་ཡིན་ཡང་བསྒྲུབ་པར་བྱ་བ་ཡིན་

เล่ม ๑๘๖ · หน้า 105a

ནོ་ཞེས་བརྗོད་པ་ཡིན་ནོ། །དེ་ལ་ཞེས་བྱ་བ་ནི་གནོད་པ་གསུམ་པ་རྣམས་ལས་སོ། །ཕྱོགས་ཙམ་ཞེས་བྱ་བ་ནི་ཆོས་ཀྱི་ཁྱད་པར་གྱི་དཔེར་བརྗོད་པས་གཞན་ཉེ་བར་མཚོན་པའི་ཕྱིར་རོ། །དེ་ཉིད་ཀྱི་ཕྱིར་བཤད་པ་དོན་དཔེར་བརྗོད་པ་ལྷག་མ་གཉིས་བསྟན་པའི་དོན་དུའོ། །ཆོས་ཀྱི་ཁྱད་པར་གྱི་དཔེར་བརྗོད་པ་

དེ་ཉིད་གསུངས་པ་ནི། ལྡན་དོན་ཞེས་བྱ་བའོ། །ཡན་ལག་རྣམས་ལས་གཞན་པའི་ཡན་ལག་ཅན་ཡོད་དོ་ཞེས་གཞན་ཉིད་ནི་ཆོས་ཡིན་ནོ། །དེའི་ཁྱད་པར་ནི་བྱ་བ་དང་ལྡན་པ་ཞེས་བྱ་བ་ལ་སོགས་པ་རྫས་ཀྱི་མཚན་ཉིད་དང་ལྡན་པའི་ཕྱིར་ཡོན་ཏན་ལྕི་བ་ཉིད་དང་། བྱ་བའི་འོག་ཏུ་འགྲོ་བའི་འདུ་བ་ཅན་གྱི་རྒྱུ་ཡིན་པ་

ཉིད་དོ། །འདི་སྐད་བརྗོད་པ་ཡིན་ཏེ། གལ་ཏེ་ཡན་ལག་རྣམས་ལས་གཞན་པའི་ཡན་ལག་ཅན་རྣམས་ཡོད་པ་ཙམ་བསྒྲུབས་ན་ནི་དེའི་ཚེ་སངས་རྒྱས་པ་ལ་གྲུབ་པ་ལ་སྒྲུབ་པར་འགྱུར་ཏེ། བརྟགས་པའི་ཡན་ལག་ཅན་ནི་སངས་རྒྱས་པས་ཀྱང་འདོད་པའི་ཕྱིར་རོ། །དེའི་ཕྱིར་གཞན་ཙམ་ནི་བསྒྲུབ་པར་བྱ་བ་མ་ཡིན་

གྱི། འོན་ཀྱང་གཞན་ཁྱད་པར་ཅན་བསྒྲུབ་པར་བྱ་བ་ཡིན་ནོ། །ཁྱད་པར་དེ་ཡང་བསྟན་ཟིན་པ་ཁོ་ནའོ། །དབང་པོ་དང་ལྡན་པ་ན་མཐོང་བ་ལ་སྟོན་པའི་དོན་ཡན་ལག་ཅན་གཞན་ནོ། །མཐོང་བ་ལ་བརྟེན་པའི་ཁྱད་པར་ཡང་བསྒྲུབ་པར་བྱ་བ་ཡིན་ནོ། །དེ་ལྟ་མ་ཡིན་པར་བསྒྲུབས་ན་ཉེས་པ་ཅི་ཡོད་སྙམ་ན། མ་

མཐོང་ཞེས་བྱ་བའོ། །རྫས་ཀྱི་མཚན་ཉིད་དང་ལྡན་པ་ལ་ལྟོས་ཏེ་ལྡོག་པ་བརྗོད་པ་ནི། ཁྱད་པར་ཅན་མིན་ཞེས་བྱ་བའོ། །གལ་ཏེ་གང་གིས་ཕྱོགས་ཙམ་ཞེས་བརྗོད་པ་དཔེར་བརྗོད་པ་གཞན་ཡང་ཡོད་དམ་ཅི་སྙམ་དུ་དོགས་པ་སེལ་བས་བརྗོད་པ་དང་མ་བརྗོད་པ་གསུངས་པ་ནི། དཔེར་བརྗོད་པ་ནི་

ཞེས་བྱ་བའོ། །དང་པོ་ཆོས་ཀྱི་ཁྱད་པར་བསལ་བ་དཔེར་བརྗོད་པ་ནི་ཡིན་ལ། གཉིས་པ་ནི་ཆོས་ཅན་གྱི་ཁྱད་པར་སེལ་བས། གསུམ་པ་ནི་ཆོས་ཅན་གྱི་རང་གི་ངོ་བོ་སེལ་བས་ཡིན་ནོ། །དེ་ལ་དང་པོའི་དོན་ནི་འདི་ཡིན་ཏེ། ལྕི་བ་ཉིད་ལ་སོགས་པའི་ཁྱད་པར་དུ་བྱས་པའི་གཞན་ཉིད་ཀྱིས། ཡན་ལག་ཅན་ནི་

ཡན་ལག་རྣམས་ལས་གཞན་ཡིན་ནོ་ཞེས་བྱ་བ་ནི་མུ་སྟེགས་པའི་སངས་རྒྱས་པས་བརྗོད་པ་ནི། ཡན་ལག་ཅན་ནི་ཞེས་བྱ་བའོ། །གལ་ཏེ་ཡན་ལག་ཅན་གཞན་ཡིན་ན་དེའི་ཚེ་ལྗི་བ་ཉིད་ལ་སོགས་པའི་ཁྱད་པར་ཅན་གྱི་གཞན་ཉིད་རྟོགས་པར་འགྱུར་བ་ཞིག་ན། ལྗི་བ་ཉིད་ལ་སོགས་པ་ནི་རྟོགས་པ་ཡང་མ་ཡིན་ཏེ།

ที่มาและสัญญาอนุญาต

ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ

สัญญาอนุญาต Public Domain · หลักฐาน

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

  • หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
  • ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด