ཡན་ལག་བརྒྱད་པའི་སྙིང་པོ་བསྡུས་པ་ཞེས་བྱ་བ
ชื่อสันสกฤต (อักษรทิเบต ตามตัวบท) ཨཥྚ་ཨཾ་ག་ཧྲྀ་ད་ཡ
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
เล่ม ๑๙๘ · หน้า 310a
ཅེས་བྱ་བར་བཤད། །རླུང་གིས་པགས་པ་གནོད་འགྱུར་ཞིང་། །ནོར་བུ་འབྱར་ཞིང་གཅིན་འགག་འགྱུར། །དེ་ལས་རྒྱུན་ཕྲ་ནད་མེད་འབྱུང་། །ནོར་བུའི་ཁ་ནི་འགགས་གྱུར་པས། །དེ་ནི་ནོར་བུའི་ནད་ཅེས་བྱ། །བད་ཀན་ལས་གྱུར་མཚན་གྱི་ནད། །གྲ་
མས་གང་སྙམ་མདུད་པའི་ནད། །གྲ་མས་གནོད་པའི་ཁྲག་གི་ནད། །ཚོར་བ་ཉམས་པ་དེ་མིང་ཅན། །རླུང་དང་ཁྲག་མཁྲིས་ལས་གྱུར་པ། །བུ་གའི་རྩེ་མོ་ཕྲ་བ་ཡིས། །མཚན་གྱི་ནང་ནི་ཀུན་ཏུ་ཁྱབ། །དེ་ནི་ཁ་བརྒྱ་པ་ཞེས་བྱ། །ཁྲག་མཁྲིས་ལས་གྱུར་པགས་པ་རྣམས། །ཚ་ཞིང་
རིམས་བཅས་པགས་པ་སྨིན། །འདུས་པ་ལས་གྱུར་ཤ་རྣམས་ནི། །ཐམས་ཅད་ངན་པས་སྨིན་པ་ཡིན། །འབྲུམ་བུ་གནག་ཅིང་དམར་བ་ཡི། །འབྲུམ་བུ་དག་གིས་གནོད་འགྱུར་ཤིང་། །ཕོ་མཚན་ཤིན་ཏུ་ན་བ་གང་། །དེ་ནི་ཁྲག་གི་འབྲུམ་བུ་ཡིན། །ཤ་ཡི་མཛེར་པ་སྔར་
བཤད་དོ། །ཁོང་འབྲས་ནད་གཞི་གསུམ་ལས་སྐྱེས། །འདུས་པས་མཚན་ནི་རྣགས་གྱུར་ཅིང་། །ཤ་ནི་ནག་པོར་གྱུར་པ་དང་། །ཀུན་ནས་ཞིག་པར་བྱེད་པ་གང་། །དེ་ནི་ཏིལ་ནག་ཅེས་བརྗོད་བཤད། །ཤ་ལས་གྱུར་པའི་འབྲུམ་བུ་རྣགས། །ཁོང་འབྲས་ཏིལ་ནག་ཅེས་བྱ་བ། །
བཞི་པོ་འདི་དག་སྤང་བར་བྱ། །ལྷག་མ་རྣམས་ནི་མྱུར་དུ་གསོ། །ཁ་ཟས་གནོད་པ་ཟོས་པ་དང་། །མལ་སྟན་མི་བདེར་ཉལ་བ་དང་། །ཉལ་པོ་བསྟེན་ནི་དྲགས་པ་དང་། །ནང་ན་ནད་ཁྲག་སྨན་གནོད་དང་། །ས་བོན་ཉེས་པ་རྣམ་སྨིན་ལས། །མངལ་གྱི་ནད་ནི་
ཉི་ཤུར་འགྱུར། །རླུང་གིས་མངལ་ལ་གནོད་གྱུར་པས། །ན་ཟུག་ཡངས་ཤིང་ཚོར་བ་མེད། །གྲོག་མས་ཁྱབ་པ་སྙམ་དུ་སེམས། །སྲ་ཞིང་རྩུབ་པ་སྒྲ་དང་བཅས། །ཟླ་མཚན་སླ་ཞིང་ཝུ་བ་ཅན། །ཉུང་ཞིང་གནག་པ་འཛག་པར་བྱེད། །ཆུ་སོ་རྩིབ་ལོགས་ལྷོད་པ་དང་། །ན་ཞིང་རིམ་གྱིས་
སྐྲན་བསྐྱེད་ལ། །རང་རང་ཉེས་པ་དེ་དང་དེ། །དེ་ནི་རླུང་ཅན་ཡིན་ཞེས་བཤད། །དེ་ཉིད་ཤས་ཆེར་སྤྱད་ན་སྐྲང་། །བཅས་པ་ཉལ་པོ་དྲགས་ཞེས་བྱ། །ཤིན་ཏུ་གཞོན་ལ་འཁྲིག་པ་སྤྱད། །རྒྱབ་དང་ཆུ་སོ་བྱིན་པར་ནི། །ན་ཞིང་མངལ་ལ་གནོད་བྱེད་པ། །དེ་ནི་སྤྱད་སྔས་པ་ཞེས་བྱ། །
เล่ม ๑๙๘ · หน้า 310b
ཤུགས་འཁྱིལ་བ་ཡི་མངལ་དུ་ནི། །རླུང་གིས་གནོད་པར་གྱུར་པ་ལས། །ཟླ་མཚན་ལྦུ་བ་ཅན་འབྱུང་བ། །འཁྱིལ་བ་ལྟ་བུར་སྣང་གྱུར་པ། །ནད་འདི་འཁྱིལ་པ་ཅན་ཞེས་བྱ། །གང་ཚེ་རླུང་ནི་རྩུབ་པོས་བུ། །སྐྱེ་ཞིང་སྐྱེ་ཞིང་གསོད་བྱེད་པ། །སྐྱེས་ནས་གསོད་པ་ཞེས་
བྱར་བཤད། །འགྲངས་དྲགས་མི་མཉམ་གནས་པར་ནི། །འདོད་པ་སྤྱད་པས་རླུང་འཁྲུགས་ཤིང་། །གཞན་གྱིས་གནོད་པར་གྱུར་པ་ལས། །མཚན་གྱི་བུ་ག་ཤ་རུས་ལ། །གནོད་གྱུར་མངལ་ནི་ཡོན་བོར་འགྱུར། །ན་གྱུར་ནང་དུ་ཁ་བལྟས་ཡིན། །ཁ་ཟས་རླུང་ཅན་བསྟེན་པ་ཡིས། །
ཟླ་མཚན་རླུང་གིས་གནོད་གྱུར་ཞིང་། །བུད་མེད་མོ་མཚན་ཞུམ་གྱུར་པར། །བྱེད་པ་དེ་ནི་ཁབས་མིག་ཡིན། །དུས་སུ་ཤུགས་བཀག་རླུང་འཕེལ་བས། །བཤང་དང་གཅི་བ་འགག་བྱེད་ཅིང་། །མོ་མཚན་སྐམ་པར་བྱེད་པ་དང་། །ཤས་ཆེར་ན་བ་མངལ་སྐམས་ཡིན། །ཞག་དྲུག་
གམ་ནི་ཞག་བདུན་ནས། །རླུང་གིས་མངལ་གནས་ཁུ་བ་འབྱིན། །ནད་བཅས་པའམ་ནད་མེད་པ། །དེ་ནི་ཁུ་བ་སློན་ཞེས་བྱ། །བུད་མེད་མངལ་དང་ས་བོན་གྱི། །ཉེས་པ་རླུང་གིས་གནོད་གྱུར་ཞིང་། །འཁྲིག་པར་མི་དགའ་ནུ་མ་མེད། །མ་ནིང་ཡིན་ཏེ་གསོར་མི་རུང་། །མངལ་གྱི་ནང་
དུ་རླུང་གིས་ནི། །གནོད་གྱུར་མོ་མཚན་ཁོང་ཁར་གནས། །བྱེ་བའམ་ལྷོད་པར་གྱུར་པ་དང་། །རླུང་ཅན་བཞིན་དུ་ན་གྱུར་པ། །ཤ་ནི་མཐོ་བར་གྱུར་པ་སྟེ། །མོ་མཚན་ཆེ་ནད་ཚབས་ཆེ་བྱ། །མཁྲིས་པ་མངལ་ན་གནས་པ་ཡི། །ནང་གི་ནད་གཞིས་གནོད་གྱུར་པ། །ཚ་བའམ་རྣག་
པར་བྱེད་འགྱུར་ཞིང་། །དྲི་མནམ་རིམས་ཀྱིས་འདེབས་པ་དང་། །ཤིན་ཏུ་ཚ་ཞིང་རོ་ལྟར་མནམ། །ཟླ་མཚན་སྔོ་ནག་སེར་པོར་འཛག །ནད་དེ་མཁྲིས་པ་ཅན་ཞེས་བྱ། །ཟླ་མཚན་ཆེར་འཛག་ཁྲག་ཅན་ཡིན། །བད་ཀན་སྐྱེད་པར་བྱེད་པ་ཡིས། །མོ་མཚན་གནོད་གྱུར་ན་བ་མེད། །གྲང་
ཞིང་དཀར་ལ་གཡའ་བ་དང་། །སྤྱིན་བག་ཏུ་ནི་འཛག་པར་བྱེད། །ནད་དེ་བད་ཀན་ལས་གྱུར་ཡིན། །རླུང་མཁྲིས་འཁྲུགས་པས་ཟླ་མཚན་ཟད། །ཚ་ཞིང་ལུས་སྐེམས་མདོག་མི་སྡུག །དེ་ནི་ཁྲག་ཟད་པ་ཞེས་བྱ། །མཁྲིས་པ་ཤས་ཆེ་ཉལ་པོ་བསྟེན། །སྒྲིད་པ་སྦྲེགས་པ་བཀག་པ་
เล่ม ๑๙๘ · หน้า 311a
ལས། །མཁྲིས་པར་བཅས་པའི་རླུང་གིས་ནི། །མངལ་དུ་གནོད་པ་སྐྱེད་པར་འགྱུར། །སྐྲང་ཞིང་ཉམ་ཐག་རེག་མི་བཟོད། །ཟླ་མཚན་སྔོ་དང་སེར་པོར་འབྱུང་། །ཕོ་བའི་ལྟོ་ནི་ལྕི་བ་དང་། །འཁྲུ་ཞིང་ཡི་ག་འཆུས་པར་བྱེད། །ཆུ་སོ་བརླ་ནི་ན་ཞིང་ཟུག །
རིམས་སྐྱེད་ཡོངས་རྒྱས་ནད་ཅེས་བྱ། །རླུང་དང་བད་ཀན་ནད་ཀྱིས་ཁྱབ། །མངལ་ནས་སྐྱེ་ཞིང་སྤྱི་བག་འཛག །ཉེ་བར་འཛག་པ་ཞེས་བྱའོ། །སྲིན་བུ་སྐྱེས་ཤིང་གཡའ་བས་འདོད་པ་ལས། །རབ་གདུངས་དེ་ནི་རྣམ་པར་གཡེང་ཞེས་བྱ། །དུས་མིན་སྤྱོད་པར་གྱུར་པས་རླུང་། །བད་
ཀན་ཁྲག་དང་འདྲེས་གྱུར་ཏེ། །ཟླ་མཚན་ལམ་ནི་འགག་བྱེད་དེ། །མངལ་དུ་ལྟེ་བ་སྐྱེད་པར་བྱེད། །དེ་ནི་པདྨའི་སྙིང་པོ་ཡིན། །ནད་གཞི་གསུམ་ནི་མོ་མཚན་གྱི། །མངལ་ནས་རང་རང་གནོད་པ་སྐྱེད། །འདུས་པ་ལས་གྱུར་ཉེས་པ་ཡིན། །དེ་ལྟར་བུད་མེད་མངལ་ནད་ཀྱིས། །
ཁུ་བ་འཛིན་པར་མི་བྱེད་དེ། །དེས་ན་མངལ་དུ་བུ་མི་ཆགས། །མི་བཟད་ནད་ཀྱང་སྐྱེ་འགྱུར་ཞིང་། །ཁྲག་འབྱུང་གཞང་འབྲུམ་སྐྲན་ལ་སོགས། །རླུང་སོགས་ནད་ནི་ཀུན་སྐྱེད་བྱེད། །ཡན་ལག་བརྒྱད་པའི་སྙིང་པོ་བསྡུས་པ་ལས། །ཕྱི་མའི་གནས་ཀྱི་ལེའུ་སུམ་ཅུ་གསུམ་པའོ།། །།
དེ་ནས་གསང་བའི་གནས་ཀྱི་ནད་གསོ་བའི་ལེའུ་བཤད་པར་བྱའོ། །སོས་འཛིན་འདྲ་བ་གསར་བྱུང་ལ། །ཕོ་མཚན་དབུས་ན་གཏར་ག་གདབ། །བསིལ་བའི་གསོ་བས་སྦྱང་བར་བྱ། །ཁྱད་པར་དུ་ནི་བཀྲུ་སྨན་གཏང་། །སྨིན་ན་ཏིལ་གྱི་ལྡེ་གུ་ནི། །སྦྲང་རྩི་མར་དང་བཅས་པ་བསྐུ། །
འཛམ་བུ་ཨ་མྲ་ཀླུ་ཤིང་དང་། །ནིམ་པ་ཀམ་པོ་ཛའི་མྱུ་གུ། །རྒྱ་ཤུག་བིལ་བ་ས་ལི་ཀ །རྒྱ་སྐྱེགས་ཏིལ་ནི་ཤ་ཡི་ཤུན། །འོ་མ་ཅན་གྱི་ཤིང་གི་ཤུན། །འབྲས་བུ་གསུམ་ནི་ཆུར་བསྐོལ་བའི། །ཁུ་བ་དེས་ནི་བཀྲུ་བ་དང་། །དེ་བསྐོལ་ཏིལ་མར་གྱིས་རྨ་འཚོབ། །སྤངས་མ་སེང་
ཕྲོམ་བཙག་ཡུག་སྣམ། །སུག་སྨེལ་ལྡོང་རོས་བ་བླ་དང་། །ནག་ཚུར་རྒྱ་སྐྱེགས་སྐྱེར་ཁཎྜ། །རྒྱམ་ཚ་ཧ་རེ་ཎུ་ཀ་ཡི། །ཕྱེ་མ་སྦྲང་རྩི་སྦྱར་བས་བསྐུ། །སོས་འཛིན་ལྟ་བུའི་རྨ་འཚོབ་བྱེད། །ཁམ་ཕོར་སྦྱར་བར་འབྲས་བུ་གསུམ། །བསྲེགས་པ་མར་བཅས་རྨ་འཚོབ་བྱེད། །འདི་ནི་སྤྱི་
เล่ม ๑๙๘ · หน้า 311b
ཡི་གསོ་བ་ཡིན། །རེ་རེ་སྐྲང་པ་ལྟ་བུར་གསོ། །སྨན་པས་ཅི་ནས་རྣགས་པར་ནི། །མི་འགྱུར་དེ་ལྟར་འབད་པར་བྱ། །རྣགས་ན་རྒྱུས་པ་རྩ་དང་ཤ། །ཞིག་པས་ཕོ་མཚན་མ་རུངས་འགྱུར། །འབྲུམ་པ་བཅད་དང་བསྲེགས་པ་ཡི། །གསོ་བ་སོ་ས་འཛིན་ལྟ་བུར་བྱ། །བྲུད་ནས་ཡུངས་
ཀར་ཕྱེ་ཞིབ་དང་། །བསྐོལ་སྨན་ཕྱེ་མས་གདབ་པར་བྱ། །ཏིལ་མར་དེ་ཉིད་ཀྱིས་བསྐུ་ཞིང་། །རྨ་འཚོ་བ་པ་ཡི་གསོ་བ་བྱ། །མཉེ་གསོ་བ་ནི་འདི་ཉིད་བྱ། །དེ་དག་གཉི་གར་གཏར་ག་གདབ། །ཁོང་སྟོང་ལ་ནི་གཏར་ག་བྱ། །རྣགས་ལ་རྨ་ནི་དག་པར་བྱ། །ཏིན་དུ་ཀ་དང་འབྲས་བུ་གསུམ། །
སེང་ཕྲོམ་ལྡེ་གུ་ཏིལ་མར་བསྐུ། །འབྲས་བྱེར་ལ་ནི་གཏར་ག་གདབ། །གསོ་བའི་རིམ་པ་འདི་ཉིད་བྱ། །མཆོག་ཅེས་བྱ་བའི་འབྲུམ་བུ་ནི། །བརྟོལ་ཏེ་ལྕགས་ཀྱུས་བླངས་ཏེ་བཅད། །ལྡེ་གུ་ཕྱེ་མ་སྨན་ཁུ་ནི། །སྦྲང་རྩིར་བཅས་པས་གསོ་བར་བྱ། །མཉེ་དང་པདྨ་ཅན་ལ་ནི། །མཁྲིས་
པའི་མེ་དབལ་གསོ་བར་བྱ། །པགས་སྨིན་ཚོར་བ་མེད་པ་ལའང་། །ཕོ་མོའི་གསོ་བ་འདི་ཉིད་བྱ། །མཉེ་ལ་དུགས་ནི་བྱ་བ་དང་། །བ་ལའི་སྨན་མར་དྲོ་འཇམ་བླུགས། །མངར་བའི་སྨན་སྦྱར་དཀྲི་དུགས་བྱ། །གཏུན་ཤིང་འདྲ་ལ་གཏར་ག་གདབ། །བད་ཀན་རྨེན་བུ་ལྟ་བུར་གསོ། །
པགས་པ་ལྡོག་ལ་མར་གྱིས་བསྐུ། །ས་ལྦ་ལ་སོགས་སྣུམ་གྱུར་པས། །ཞག་གསུམ་མམ་ནི་ཞག་ལྔ་རུ། །དཀྲི་བའི་ལས་ནི་སྤྱད་པར་བྱ། །དུགས་བྱ་དེ་ཡི་འོག་ཏུ་ནི། །སྣུམ་གྱུར་པགས་པ་དྲང་བར་བྱ། །ནོར་བུ་རིམ་གྱིས་བཙིར་ནས་ནི། །ཆུད་ནས་ཉེ་བར་དཀྲི་བར་བྱ། །ནོར་བུ་ཡང་ཡང་སྣུམ་ཆོས་བྱ། །
ཁ་ཟས་སྣུམ་ཅན་སྦྱིན་པའང་ཕན། །གས་པ་ལ་ཡང་ཆོ་ག་ཡི། །རིམ་པ་ཇི་བཞིན་བྱས་པའང་ཕན། །འགགས་པ་སྦུ་གུ་ཁ་གཉིས་པ། །རྒྱ་སྐྱེགས་ཀྱིས་ནི་དཀྲིས་པ་ལ། །སྣུམ་བསྐུས་བུ་གར་བཅུག་ནས་ནི། །རླུང་འཇོམས་སྣུམ་ནི་བླུགས་པར་བྱ། །སྦུ་གུ་ཞག་ནི་
གསུམ་གསུམ་ནས། །ལེགས་པར་བསྐྱེད་དེ་སྤང་བར་བྱ། །སྦུ་གུའི་སྦྱོར་བས་མ་གྲུབ་ན། །མཁས་པས་མདོམས་ཀྱི་སྲུབས་ཅན་ནི། །བོར་ཏེ་མཚོན་གྱིས་དྲལ་ནས་ཀྱང་། །དེ་འོག་རྨ་གསར་ཆོ་ག་བྱ། །རྨེན་བུར་སྦུ་གུའི་དུགས་བྱས་ལ། །
เล่ม ๑๙๘ · หน้า 312a
སྣུམ་ཞིང་དྲོ་བས་དཀྲི་བར་བྱ། །ཁ་བརྒྱ་པ་ནི་བཞར་ནས་ཀྱང་། །བསྐ་བ་སྦྲང་རྩི་སྦྱར་བས་བསྐུ། །ཁྲག་གི་འབྲུམ་བུ་ཁྲག་གི་ནི། །ཁོང་འབྲས་བཞིན་དུ་གསོ་བར་བྱ། །ཀུན་ལ་རྨ་ཡི་གསོ་བ་ནི། །གནས་སྐབས་ཇི་བཞིན་སྦྱར་བར་བྱ། །མངལ་གྱི་
ནད་ལ་མང་དུ་ནི། །སྣུམ་ཆོས་དུགས་དང་མས་གཏོང་སོགས། །རླུང་འཇོམས་པ་ཡི་གསོ་བ་བསྔགས། །རླུང་ལས་གྱུར་ལ་མཆོག་ཏུ་སྦྱར། །བུད་མེད་ཀྱི་ནི་མངལ་གྱི་ནད། །རླུང་མ་གཏོགས་པར་འབྱུང་མི་འགྱུར། །དེ་བས་རླུང་ནི་བསལ་བྱས་ལ། །ནད་གཞན་གྱིས་ནི་གསོ་སྨན་
བྱ། །བ་ལའི་ཏིལ་མར་བླུད་བྱ་ཞིང་། །འདྲེན་མ་སྐྱེ་དེའི་འོ་མ་བླུད། །སྣུམ་ཆོས་དུགས་ནི་བྱས་ཏེ་མངལ། །ཉེས་པར་གནས་པ་མཉམ་དུ་གཞག །ཡོན་པོ་ལག་པས་དྲང་པོར་བསྲང་། །ཞུམ་པ་སླར་ནི་བསྐྱེད་པར་བྱ། །བྱུང་བ་སླར་ནི་གཞུག་བྱ་ཞིང་། །གྱེས་པ་ཡོངས་སུ་བཟློག་
པར་བྱ། །མངལ་ནི་གནས་ནས་གཡོས་གྱུར་པ། །བུད་མེད་ཟུག་རྔུར་གྱུར་པར་འདོད། །བུད་མེད་ལ་ནི་སློན་སྨན་སོགས། །འཇམ་པོ་ཡོངས་སུ་སྦྱར་བར་བྱ། །རྣམ་པ་ཀུན་ཏུ་དག་གྱུར་ནས། །འཇམ་རྩི་བསྐུ་བྱུག་སྨན་ཁུ་བླུགས། །བྱུགས་དང་ཡེའུ་གཞུག་ལ་སོགས། །གསོ་
བའི་ལས་ནི་ལྷག་མ་སྤྱད། །རྒུན་འབྲུམ་ཏང་པལ་འབྲས་བུ་གསུམ། །ཀ་ས་མར་ད་སེར་པོ་གཉིས། །སླེ་ཏྲེས་ཉེའུ་ཤིང་ཤེརྱ་ཀ །ཤུ་ཀ་ན་ས་བ་སྤྲུ་བ། །པ་རུ་ཤ་ཀ་ཞོ་གཉིས་གཉིས། །མར་ནི་བྲེ་གང་བཅས་པར་བསྐོལ། །དེ་བླུད་མངལ་གྱི་རླུང་ནད་དང་། །བུ་སྐྱེད་
བྱེད་པའི་མཆོག་ཡིན་ནོ། །ཟི་ར་གོ་སྙོད་པི་པི་ལིང་། །ཤུ་དག་རྒྱམ་ཚ་བ་ཤ་ཀ །ནས་ཚིག་འཁུས་ཐལ་ཏི་མུས། །ཙི་ཏྲ་ཀ་དང་ཁ་རར་བཅས། །བཏགས་ཏེ་ཆང་གི་དངས་མར་སྦྱར། །མར་བརྔོས་དེ་ནི་བྱིན་གྱུར་ན། །མངལ་ནད་རྩིབ་ལོགས་སྙིང་ནད་དང་། །སྐྲངས་དང་གཞང་
འབྲུམ་སེལ་བར་བྱེད། །ཁ་ལུང་ཁུ་བ་ཀ་ཤའི་རྩ་བ། །ཟི་ར་ནག་པོ་གོ་སྙོད་དང་། །སེན་རྩི་རྒྱམ་ཚའི་ཕྱེ་མ་ནི། །ཆང་དང་སྦྱར་ཏེ་བླུད་པར་བྱ། །ར་སྣ་གཟེ་མ་བ་ཤ་ཀ །བསྐོལ་བ་གཟེར་འཇོམས་མཆོག་ཡིན་ནོ། །སླེ་ཏྲེས་དན་དང་འབྲས་བུ་གསུམ། །བསྐོལ་བའི་ཁུ་བའང་
เล่ม ๑๙๘ · หน้า 312b
བླུགས་པར་བྱ། །རྒྱ་སྤོས་ཀཎྜ་ཀ་རི་དང་། །རུ་རྟ་རྒྱམ་ཚ་ཐང་ཤིང་རྣམས། །བསྐོལ་བའི་ཁུ་བ་ཏིལ་མར་བསྐོལ། །སྦངས་པའི་ཡེའུས་མངལ་ནད་སེལ། །མངལ་ནད་མཁྲིས་པ་ལས་གྱུར་པ། །ཆུ་བླུགས་བསྐུ་བྱུག་ཡེའུ་ཡིས། །གསོ་བ་བསིལ་ཞིང་མཁྲིས་འཇོམས་པ། །སྣུམ་
ཆོས་དོན་དུ་མར་གྱིས་བྱ། །ཉེའུ་ཤིང་རྩ་བ་སྲང་བཞི་བརྒྱ། །བརྡུངས་ཏེ་བཙིར་བའི་ཁུ་བ་དང་། །འོ་མ་དེ་མཉམ་མར་བྲེ་ནི། །བཞི་ཡི་ནང་དུ་བསྐོལ་བར་བྱ། །འཚོ་བྱེད་སྡེ་ཚན་ཉེའུ་ཤིང་དང་། །པ་རུ་ཤ་ཀ་རྒུན་འབྲུམ་དང་། །པི་ལ་ཡ་དང་བ་ལ་གཉིས། །ཤིང་མངར་ཞོ་ནི་གཉིས་
གཉིས་ཕྱེ། །བསྐོལ་ཏེ་བསྒྲངས་པར་སྦྲང་རྩི་དང་། །པི་པི་ལིང་ནི་སྲང་བརྒྱད་བརྒྱད། །ཀ་ར་དཀར་པོ་སྲང་བཅུ་གཞུག །དེ་ལས་སྲང་ནི་ཕྱེད་ཕྱེད་སྦྱིན། །མངལ་ཁྲག་ཁུ་བའི་ནད་སེལ་ཞིང་། །རོ་ཙ་བུ་སྐྱེད་བྱེད་མཆོག་ཡིན། །གློ་རྡོལ་ཟང་བྱེད་ཁྲག་མཁྲིས་དང་། །ལུད་པ་དབུགས་
མི་བདེ་བ་དང་། །མིག་སེར་རླུང་དང་ཁྲག་དང་ནི། །མེ་དབལ་དང་ནི་སྙིང་ནད་དང་། །བརྗེད་བྱེད་ཀྱིས་ཉེན་ད་རྒན་དང་། །མྱོས་བྱེད་སྐེམ་བྱེད་འཇོམས་པར་བྱེད། །དེ་བཞིན་འོ་མ་ཞུན་མར་དང་། །འཚོ་བྱེད་སྡེ་ཚན་བསྐོལ་བ་ནི། །བུ་སྐྱེད་མཁྲིས་པ་ལས་གྱུར་པའི། །མངལ་ནད་སེལ་
བའི་དམ་པ་ཡིན། །བ་ལ་བྲེ་ནི་སུམ་ཅུ་གཉིས། །བསྐོལ་བའི་ཏིལ་མར་མར་བྲེ་བཞི། །འོ་མ་བཞི་འགྱུར་པི་པི་ལིང་། །ཀ་ཀ་མ་སི་ཀ་ར་དཀར། །ཛི་བན་ཏི་དང་རམ་ཉེ་བ། །སྠི་ར་ཉེ་ཤིང་ཟི་ར་གཉིས། །མོན་སྲན་གྲེའུ་པ་ཡ་སྱ། །མ་ཤ་པརྞི་སྲ་བ་ནི། །པི་ལུའི་ལོ་མ་ལྷན་
ཅིག་བསྐོལ། །བླུད་ན་རླུང་མཁྲིས་ལས་གྱུར་པའི། །མངལ་ནད་སེལ་ཞིང་བུ་སྐྱེད་བྱེད། །ཁྲག་གི་མངལ་ནད་ཁྲག་མདོག་ལས། །རྗེས་སུ་འབྲེལ་བ་བརྟགས་ནས་ཀྱང་། །ནད་གཞི་བསགས་པའི་ཚུལ་ལས་ནི། །ཁྲག་བཅད་པ་ཡི་སྨན་གཏང་བྱ། །ཤིང་མངར་སྦྲང་རྩི་ཆུ་ཤིང་རྩ། །
ཏ་ལའི་ས་བོན་སྐྱེར་པའི་རྩ། །པྲི་ཡང་ཀུ་དང་འབྲས་དྲུས་ཆུ། །སྦྱར་བ་བླུད་ན་ཁྲག་འཛག་པ། །མདོག་སྐྱ་དམར་པོ་སེལ་བར་བྱེད། །པ་ཐ་འཛམ་བུ་ཨ་མྲ་ཡི། །ཚི་གུ་དང་ནི་བྲག་ཞུན་དང་། །སྐྱེར་པའི་ཁཎྜ་ཨཾ་བཥྚ། །བཙོད་དང་ཤལ་མ་ལིའི་ཐང་ཆུ། །དུག་མོ་ཉུང་གི་ཤུན་
เล่ม ๑๙๘ · หน้า 313a
ལྤགས་དང་། །གུར་གུམ་བིལ་བ་བོང་ང་དཀར། །སེང་ཕྲོམ་གླ་སྒང་བཙག་ཡུག་སྣམ། །ཤིང་མངར་ཙནྡན་དམར་པོ་དང་། །ཀད་པ་ལ་དང་ཙ་མ་ཀ །ཀ་ཊང་ཀ་དང་དུག་མོ་ཉུང་། །བྱི་ཚེར་བ་དང་ད་ཏ་ཀི། །མ་དུ་ཀ་དང་སྟང་ཟིལ་ནི། །སྐར་མ་རྒྱལ་ལ་
བབ་པ་ན། །བཏུས་ཤིང་བཏགས་ཏེ་སྦྲང་རྩི་དང་། །འབྲས་ཀྱི་ཆུར་སྦྱར་བླུད་ན་ནི། །གཞང་འབྲུམ་ཚད་པར་འཁྲུ་བ་དང་། །གང་ཡང་ཁྲག་ཏུ་འཁྲུ་བ་དང་། །གང་ཡང་སྲིན་བུའི་ནད་རྣམས་དང་། །བྱིས་པའི་ནད་གང་ཡིན་པ་འཇོམས། །མངལ་གྱི་ནད་དང་ཟླ་མཚན་ནད། །གནག་ཅིང་
དཀར་དང་དམར་བ་སེལ། །ཕྱེ་མ་རྒྱལ་གྱི་རྗེས་འགྲོ་བ། །ཕན་ཞེས་རྒྱུན་ཤེས་བུ་ཡིས་བཤད། །བད་ཀན་ལས་གྱུར་མངལ་ནད་ལ། །རྩུབ་དང་དྲོ་བའི་སྨན་ཀུན་སྦྱར། །སྐྱུ་རུའི་ལོ་མ་ད་ཏ་ཀི །ཤིང་མངར་ཨུཏྤལ་ལིག་བུ་མིག །འཛམ་བུ་ཨ་མྲའི་ཚི་གུ་དང་། །སེང་ཕྲོམ་ས་ནག་ཀང་
པ་ལ། །སེའུ་འབྲུ་ཤིང་ཚ་ཏིན་དུ་ཀ །ཨུ་དུམ་བཱ་ར་བིལ་བ་གཞོན། །ཞོ་ནི་གཉིས་གཉིས་བཏགས་པའི་ཕྱེ། །ར་གཅིན་འོ་མ་ཉིས་འགྱུར་དང་། །ཏིལ་མར་བྲེ་གང་བསྐོལ་བར་བྱ། །དེ་བསྐུ་བ་དང་འཇམ་རྩི་དང་། །རས་བལ་ཡེའུས་གཞུག་པར་བྱ། །སྐྲང་ཞིང་ཕྱིར་ལོག་མཐོ་ཞིང་
སྲ། །དེ་བཞིན་སྤྱི་བག་འཛག་པ་དང་། །ཕྱིར་འབུར་ནང་དུ་ཞུམ་པ་དང་། །འབྲུམ་བུ་གཟེར་དང་བཅས་ལ་ཕན། །ནས་ཟན་ཨ་རུ་སྦྱར་ཆང་དང་། །བུ་རམ་ཆང་དང་ཏིལ་མར་བསྟེན། །པི་པི་ལིང་དང་ལྕགས་ཕྱེ་དང་། །ཨ་རུར་སྦྱོར་སྦྲང་རྩི་ཕན། །ནག་ཚུར་རྒྱམ་ཚ་འབྲས་བུ་གསུམ། །ཨ་
མྲ་འཛམ་བུའི་ཚི་གུ་བཅས། །ད་ཏ་ཀའི་ཕྱེ་སྦྲང་རྩིར་སྦྱར། །སྤྱི་བག་འཛག་པ་དག་པར་བྱེད། །རྒྱ་སྐྱེགས་འཛམ་བུ་ད་ཏ་ཀི །སོ་མ་ར་ཛ་ལ་མང་གི། །སྲ་རྩི་པོག་གི་ཕྱེ་མ་ཡིས། །དྲི་མི་ཞིམ་དང་སྤྱི་བག་འཛག །རྣགས་ཤིང་སྲ་བ་སེལ་བར་བྱེད། །དོང་ག་ལ་སོགས་སྡེ་ཚན་ནི། །
བསྐོལ་བའི་ཁུ་བ་བླུགས་པར་བྱ། །སྲ་ཞིང་རྩུབ་པར་གྱུར་པ་ལ། །མཉེན་པའི་ཆོ་ག་བྱ་བ་དང་། །ཤ་བརྡུངས་པ་ཡིས་གླན་པ་དང་། །ཀྲི་ས་ར་དང་འོ་ཐུག་གཞུང་། །དྲི་ངར་ཏིལ་མར་དྲི་ཞིམ་པའམ། །ལྡེ་གུ་དྲི་ཞིམ་བསྐུ་བའམ། །དྲི་བཟངས་ཀུན་གྱི་ཕྱེ་མའམ། །རུལ་བའི་དྲི་ནི་སེལ་བྱེད་
เล่ม ๑๙๘ · หน้า 313b
གཞུག །བད་ཀན་ཅན་ལ་ཕལ་ཆེར་སྨན། །ཚ་བ་བ་གཅིན་མས་གཏོང་ཕན། །མཁྲིས་པ་ཤིང་མངར་འོ་མར་བཅས། །རླུང་གྱུར་སྐྱུར་བཅས་ཏིལ་མར་ཕན། །འདུས་པ་ལས་གྱུར་ནད་ལ་ནི། །ཐུན་མོང་གིས་ནི་གསོ་བ་ཕན། །དེ་ལྟར་མངལ་ནི་དག་གྱུར་ན། །ས་བོན་སྐྱོན་མེད་ཐ་མལ་
བར། །རྣམ་པར་ཤེས་པ་འཇུག་པས་ན། །བུད་མེད་ལ་ནི་བུ་ཆགས་འགྱུར། །སྐྱེས་པ་ཡི་ནི་དབང་པོ་ཡང་། །ལས་རྣམ་ལྔ་ཡིས་དག་བྱ་ཞིང་། །མདོག་ལས་ནད་གཞི་བརྟགས་ནས་ནི། །ནད་བཅས་དེ་འཇོམས་སྨན་གྱིས་གསོ། །རུ་རྟ་རྒྱ་སྤོས་ཤུ་དག་བཅོད། །འབྲས་བུ་གསུམ་དང་ཀར་དཀར། །
ཤིང་མངར་མེ་ད་སེར་པོ་གཉིས། །ལ་ལ་ཕུད་དང་པུ་ཙེ་ཤེལ། །ཤིང་མངར་རམ་ཉེ་པ་ཡ་སྱ། །ཨ་ཤྭ་གནྡྷ་ཉེའུ་ཤིང་པ། །ཞོ་ནི་གཉིས་གཉིས་བཏགས་པའི་ཕྱེ། །མར་བྲེ་གང་དང་འོ་མ་ནི། །བཞི་འགྱུར་བཅས་པ་བསྐོལ་བར་བྱ། །བླུད་ན་མངལ་དང་ཁུ་བ་ཡི། །ཉེས་པ་ཐམས་
ཅད་སེལ་བྱེད་ཅིང་། །ཚེ་རིང་ལུས་ནི་རྒྱས་བྱེད་ལ། །ཡིད་གཞུངས་པ་དང་བཀྲ་ཤིས་དང་། །བུ་སྐྱེད་པར་ནི་བྱེད་མཆོག་ཡིན། །འབྲས་བུའི་སྨན་མར་ཞེས་བྱར་བཤད། །ཟླ་མཚན་རྒྱུ་ཚེ་འཐུངས་གྱུར་ན། །བུ་ནི་འཆི་བར་བྱེད་པ་ཡང་། །འཚོ་ཞིང་སྦྲུམ་མ་རྣམས་ལ་བསྔགས། །འདི་ནི་
མཆོག་ཏུ་བྱིས་པ་ཡི། །ལུས་རྒྱས་གདོན་འཇོམས་བྱེད་པ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། །ཕྱི་མའི་གནས་ཀྱི་ལེའུ་སུམ་ཅུ་རྩ་བཞི་པའོ།། །།ཡན་ལག་བརྒྱད་པའི་སྙིང་པོ་བསྡུས་པ་ལས། །མཚོན་སྤྱད་ཀྱིས་གསོ་བའི་ཡན་ལག་རྫོགས་སོ།། །།
དེ་ནས་དུག་ནད་གསོ་བ་བཤད་པར་བྱའོ། །སྔོན་ནི་ལྷ་དང་ལྷ་མ་ཡིན། །བདུད་རྩི་འདོད་པས་བསྲུབས་པ་ན། །བདུད་རྩི་འབྱུང་བའི་སྔོན་རོལ་དུ། །སྐྱེས་བུ་ཤིན་ཏུ་འཇིགས་པའི་གཟུགས། །མཆེ་བ་བཞི་པ་གཟི་བརྗིད་འབར། །སྐྲ་སེར་མིག་ནི་མེ་འབར་བ། །དེ་མཐོང་འགྲོ་བ་སྡུག་བསྔལ་གྱུར། །
དེས་ན་འདི་ནི་དུག་ཅེས་བྱ། །ཚངས་པས་ཧཱུཾ་ཞེས་བརྗོད་པ་དང་། །བསླུ་བའི་བདག་ཉིད་ཅན་སྤངས་ཏེ། །གཟུགས་དེ་རྒྱུ་དང་མི་རྒྱུ་བའི། །གཟུགས་ལ་དེ་ནི་ཞུགས་པར་གྱུར། །བརྟན་དུག་ནུས་པ་མི་བཟད་པར། །སྡོང་བུ་ལ་ནི་གནས་པ་གང་། །ཀ་ལ་ཀུ་ཏ་དབང་པོའི་བུ། །བཙན་དུག་ཧ་ལ་ཧ་
เล่ม ๑๙๘ · หน้า 314a
ལ་སོགས། །རྒྱུ་བའི་དུག་ནི་མི་བཟད་གྱུར། །སྤྲུལ་དང་ཕག་དང་མཆེ་བ་ཅན། །རྒྱུ་བ་དང་ནི་མི་རྒྱུ་བའི། །བཅོས་མ་མ་ཡིན་དུག་ཏུ་བཤད། །བཅོས་མ་སྣ་ཚོགས་སྨན་ལ་ནི། །སྦྱར་བ་སྦྱར་བའི་དུག་ཅེས་བྱ། །དེ་ནི་སྦྱོར་བའི་དབང་ལས་ནི། །ཤིན་ཏུ་རིང་
ནས་གསོད་པའམ། །སྐྲང་དང་སྐྱ་རྦབ་དམུ་རྫིང་དང་། །སྨྱོ་བྱེད་གཞང་འབྲུམ་ལ་སོགས་བསྐྱེད། །རྣོ་དྲོ་རྩུབ་ཅིང་དང་བ་དང་། །ཁྱབ་ཅིང་མྱུར་གསོད་ཡང་བ་དང་། །འདར་ཞིང་བྲ་ལ་རོ་མི་གསལ། །འཇུ་བར་མི་བྱེད་པ་ཡིན་ནོ། །རྣོ་སོགས་ཡོན་ཏན་དང་ལྡན་པས། །དེ་ནི་མདངས་ལས་གོ་
བཟློག་ཡིན། །མི་ནི་རླུང་མཁྲིས་ཤས་ཆེ་བ། །སྲོག་ནི་འཕྲལ་དུ་འཕྲོག་པར་བྱེད། །དུག་གིས་ལུས་སུ་ཕྱིན་པ་དང་། །དང་པོར་ཁྲག་ལ་གནོད་པར་བྱེད། །བད་ཀན་མཁྲིས་པ་རླུང་རྗེས་ལ། །ནད་གཞི་གྲོགས་དང་ལྷན་ཅིག་འབྱུང་། །དེ་ནས་སྙིང་ལ་གནས་ནས་ནི། །ལུས་ལ་གནོད་
པར་བྱེད་པར་འགྱུར། །མི་རྒྱུའི་དུག་ནི་བཏང་གྱུར་ན། །ལྕེ་གནག་ལུས་ནི་རེངས་པ་དང་། །བརྒྱལ་དང་སློན་དང་སྡང་དང་ངལ། །གནས་སྐབས་དང་པོར་འབྱུང་བར་འགྱུར། །གཉིས་པར་འདར་ཞིང་རྔུལ་བ་དང་། །ཚ་ཞིང་ལྐོག་མ་ན་བ་དང་། །དུག་གིས་མ་ཞུའི་གནས་ཕྱིན་ན། །སྙིང་ནི་
ན་བར་བྱེད་པར་འགྱུར། །གསུམ་པར་རྐན་ནི་བསྐམས་པ་དང་། །མ་ཞུའི་གནས་སུ་ཤིན་ཏུ་གཟེར། །དེའི་མིག་ཉམ་ཆུང་སེར་བ་དང་། །སྐྲང་བ་ཉིད་དུ་འགྱུར་བ་དང་། །ཞུ་བའི་གནས་ཕྱིན་ཟུག་པ་དང་། །སྐྱིགས་བུ་ལུད་པ་རྒྱུ་མ་འཁྲུག །དུག་གི་ཤུགས་ནི་བཞི་པ་ལ། །མགོ་བོ་ལྷག་
པར་ལྕི་བར་འགྱུར། །ལྔ་པར་མཆིལ་སྣབས་འཛག་པ་དང་། །ལྷུ་ཚིགས་ན་བ་འབྱུང་འགྱུར་ལ། །མདོག་མི་སྡུག་ཅིང་ནད་ཀུན་འཁྲུག །ཞུ་བའི་གནས་ཀྱི་འོག་ཏུ་ན། །དྲུག་པར་འདུ་ཤེས་ཉམས་པ་དང་། །ཤིན་ཏུ་འཁྲུལ་བར་བྱེད་པར་འགྱུར། །བདུན་པར་ཕྲག་གོང་སྒལ་ཚིགས་དང་། །
དཔྱི་ཚིགས་བྱེ་ན་འཆི་འགྱུར་ཡིན། །དུག་གི་ཤུགས་ནི་དང་པོ་ལ། །སློན་ཞིང་ཆུ་གྲང་དག་གིས་གཏོར། །མར་དང་སྦྲང་རྩིར་བཅས་པ་ཡི། །དུག་གི་སྨན་ནི་མྱུར་དུ་བླུད། །གཉིས་པར་སྐྱུག་སྨན་བཀྲུ་སྨན་གཏང་། །སྔ་མ་བཞིན་དུ་དུག་སྨན་བླུད། །གསུམ་པར་དུག་གི་སྨན་བླུད་ཅིང་། །དེ་
เล่ม ๑๙๘ · หน้า 314b
བཞིན་མིག་སྨན་སྣ་སྨན་གཏང་། །བཞི་པར་སྣུམ་དང་བཅས་པ་ཡི། །དུག་གི་སྨན་ནི་བཏང་ན་ཕན། །ལྔ་པར་ཤིང་མངར་ཁུ་བ་དང་། །སྦྲང་རྩིར་སྦྱར་བ་བླུད་ན་ཕན། །དྲུག་པར་འཁྲུ་བ་ལྟ་བུར་གསོ། །བདུན་པར་སྣ་སྨན་དུད་པ་དང་། །སྤྱི་བོར་རྒྱ་གྲམ་བྱས་ནས་ནི། །ཤའམ་ཁྲག་ནི་གཞུག་
པར་བྱ། །ཀོ་ཤ་ཏ་ཀི་ལང་ག་ལི། །པ་ཐ་ལྕམ་པ་ཨ་རུ་ར། །སཱ་ལུ་སླེ་ཏྲེས་ཤི་རི་ཤ །གི་རི་ཀར་ནི་ཡུང་བ་དང་། །ཧ་ཡང་སྦྲང་རྩི་བ་སྤྲུ་བ། །བྲི་ཧ་ཏི་གཉིས་ཚ་བ་གསུམ། །ཤ་རི་བ་དང་བ་ལ་སྟེ། །འདི་རྣམས་བསྐོལ་བའི་ཁུ་བ་དང་། །བསྐོལ་བའི་ནས་ཐུག་བསྒྲངས་པར་ནི། །སྦྲང་
རྩི་མར་དང་བཅས་པ་གཞུག །གནས་སྐབས་གཞན་ལ་དུག་འཇོམས་པའི། །སྨན་དང་གསོ་བ་ཐམས་ཅད་བྱ། །ཤིང་མངར་ཙནྡན་མ་དུ་ཀ །པདྨ་གེ་སར་དེ་བཞིན་བྱ། །དངུལ་རྡོ་རྒྱ་སྤོས་རུ་རྟ་དང་། །བ་བླ་ལྡོང་རོས་པྲི་ཡང་ཀུ། །ཚ་བ་གསུམ་དང་འབུ་སུ་ཧང་། །ནཱ་ག་པུཥྤ་གེ་སར་
བཅས། །ཤིང་མངར་སྤང་སྤོས་ཧ་རེ་ཎུ། །གི་ཝང་མོན་སྣེའུ་རྨེ་རུ་དང་། །ཤི་རི་བེཥྚ་སྲ་རྩི་པོག །ཤུ་ཏི་གུར་གུམ་བ་ལ་དང་། །བལ་བུ་ཏ་མ་ལའི་ལོ་མ། །སྟག་པ་དང་ནི་པུ་ཤེལ་ཙེ། །སེར་པོ་གཉིས་ནི་སྦྲང་རྩིར་སྦྱར། །བུ་མོ་ཁྲུས་དང་སྨྱུང་བ་བྱས། །གོས་དཀར་བགོས་པ་བྱས་ནས་ནི། །
དགེ་སྦྱོང་བྲམ་ཟེ་མཆོད་བྱས་ཏེ། །དུག་སྨན་མཆོག་ནི་སྦྱར་བར་བྱ། །དེ་ཚེ་སྨན་པས་སྔགས་འདིས་ནི། །བདག་ཉིད་བསྔགས་ཏེ་བརྗོད་པར་བྱ། །སྐྱེས་བུ་སེང་གེར་ཕྱག་འཚལ་ལོ། །སྲེད་མེད་བུ་ལ་ཕྱག་འཚལ་ལོ། །ཇི་ལྟར་ཁྱབ་འཇུག་གཡུལ་ངོར་ནི། །གཞན་གྱིས་ཕམ་པར་མ་མཐོང་སྟེ། །
བདེན་པའི་ཚིག་ནི་འདི་ཡིས་ཀྱང་། །བདག་ལ་དུག་མེད་གྲུབ་པར་ཤོག །ན་མོ་བེེ་ཌཱུརྱ་མ་དེ། །ཧུ་ཊུ་ཧུ་ཊུ་རཀྵ་མཾ། སརྦ་བི་ཥེ་བྷྱཿགཽ་རི། གནྡྷ་རི། ཙཎྜ་ལི། མཏང་གི་སྭཱ་ཧཱ། །འཐག་པའི་སྔགས་གཉིས་པ་ནི། །ཧ་རི་མཱ་ཡེ་སྭ་ཧཱ། །བ་ཧ་མཱ་ཡེ་སྭཱ་ཧཱ། །མ་ལུས་དུག་དང་རོ་ལངས་དང་། །གདོན་གྱི་ལས་དང་སྡིག་པ་
དང་། །གསོད་བྱེད་ནད་དང་མུ་གེ་དང་། །འཐབ་པར་འདོད་དང་འཇིགས་པ་ལ། །སྨན་བཏུང་སྣ་སྨན་མིག་སྨན་བསྐུ། །གདུ་བུ་ལ་སོགས་ལ་སྦྱར་བྱ། །འདི་ནི་ཟླ་ཤར་ཞེས་བྱ་སྟེ། །ཞི་དང་བདེ་ལེགས་བྱེད་མཆོག་ཡིན། །དུག་རྙིང་དུག་སེལ་སྨན་གྱིས་ཟིལ་མནན་པ། །ནགས་མེ་རླུང་དང་ཉི་ཚན་
เล่ม ๑๙๘ · หน้า 315a
གྱིས་བསྐམས་པའམ། །རང་བཞིན་གྱིས་ནི་ཡོན་ཏན་མི་ལྡན་པས། །ཉམས་པའི་དུག་ཅེས་བྱ་བའི་དུག་ཏུ་འགྱུར། །འདི་ནི་ནུས་པ་ཆུང་བས་མི་རྟོགས་ཏེ། །བད་ཀན་དང་འདྲེས་ལོ་ནི་མང་པོར་གནས། །དེས་ཉེན་གྱུར་པ་མདོག་ངན་འཁྲུ་བར་བྱེད། །ནད་ཁྲག་སྐོམ་དད་ཡི་ག་འཆུས་
པས་ཉེན། །བརྒྱལ་ཞིང་སློན་ལ་རྣམ་རྨོངས་སྐད་འཛེར་དང་། །དུག་གིས་དམུ་རྫིང་མཚན་མས་གནོད་པར་འགྱུར། །མ་ཞུའི་གནས་བརྟེན་བད་ཀན་རླུང་ནད་སྐྱེད། །ཞུ་བའི་གནས་བརྟེན་མཁྲིས་དང་རླུང་ནད་སྐྱེད། །མི་ཡི་ཡན་ལག་ཞིག་ཅིང་སྐྲ་འབྱིབས། །ཇི་ལྟར་བྱ་ནི་སྤུ་བཏོགས་ལྟ་བུར་བྱེད། །དངས་མའམ་ཁྲག་ལ་
གནས་པར་བྱེད་ན་ནི། །ལུས་ཟུངས་ལས་བྱུང་ནད་ནི་སྣ་ཚོགས་སྐྱེད། །མདུན་གྱི་རླུང་དང་མ་ཞུ་གྲང་། །ཡུལ་དམུས་གནོད་ཟས་ཉིན་པར་ཉལ། །ལུས་ཟུངས་གནོད་པར་བྱས་པ་ན། །དེ་བས་གནོད་པའི་དུག་ཅེས་བཤད། །གནོད་པའི་དུག་ཉེན་དུགས་བྱས་ལ། །སྟེང་དང་འོག་ནས་
སྦྱང་བར་བྱ། །གནོད་པའི་དུག་ནི་སེལ་བའི་སྨན། །སྦྲང་རྩི་སྦྱར་ཏེ་ལྡེ་གུ་སྦྱིན། །པི་པི་ལིང་དང་བྱ་མ་ཀ །སྤང་སྤོས་སེང་ཕྲོམ་སུག་སྨེལ་དང་། །ཀུ་ཏན་ན་ཏ་སརྫི་ཀ །རུ་རྟ་ཤིང་མངར་ཙནྡན་དང་། །ཡུག་སྣམ་བཙག་དང་སྦྱར་བའི་སྨན། །གནོད་པའི་དུག་སེལ་ཞེས་བྱ་སྟེ། །
གཞན་ཡང་ཟློག་པར་བྱེད་པ་ཡིན། །དུག་མདས་ཕོག་པར་གྱུར་པ་དག །ཡང་དང་ཡང་དུ་མུན་འཐིབས་བྱེད། །མདོག་ནི་མི་སྡུག་གྱུར་པ་དང་། །མྱུར་དུ་ཡིད་འབྱུང་སྡུག་བསྔལ་འཐོབ། །འདིས་ནི་སྲིན་བུས་ཁྱབ་པ་ལྟར། །ལུས་ཚ་ཙག་ཙག་པོར་འགྱུར་རོ། །གདོང་མོ་རྒྱབ་དང་
ཕྲག་པ་མགོ །ལྷུ་ཚིགས་རྣམས་སུ་ན་བར་བྱེད། །ཁྲག་ནི་ནད་ཅན་གནག་པ་འཛག །སྐོམ་དང་བརྒྱལ་ཚ་རིམས་ཀྱིས་འདེབས། །མིག་ནི་གནག་ཅིང་སློན་པ་དང་། །བཏུད་མར་ལུད་པ་དབུགས་མི་བདེ། །རྨ་དམར་མཐའ་མར་སེར་བ་དང་། །དབུས་ནི་གནག་ཅིང་ཤིན་ཏུ་ན། །འཕྲལ་
དུ་སྐྲངས་ཤིང་རྣགས་པ་དང་། །ཤ་ཡང་ནག་པོར་གྱུར་ནས་ནི། །གནག་ཅིང་ཤིན་ཏུ་འདྲུལ་བར་བྱེད། །སྤྱི་བག་ཅན་དུ་འཛག་པར་བྱེད། །གནད་དུ་ཕོག་པར་མ་གྱུར་པ། །མྱུར་དུ་སྙིང་ལ་ཕན་བྱེད་བྱ། །ཟུག་རྔུ་ཕྱུང་ལ་ལྕགས་བསྲེགས་པས། །རྨ་ནི་ལེགས་པར་བསྲེག་པར་
เล่ม ๑๙๘ · หน้า 315b
བྱ། །ཡང་ན་མུ་ཀ་ཀ་དང་ནི། །གི་རི་ཀརྞི་དཀར་པོ་དང་། །ཀད་པ་ལ་ཡི་ཤུན་པ་དང་། །བཙོད་དང་ཤིར་ཤ་བྱ་རྒོད་སེན། །བསྲེགས་པའི་ཐལ་བས་བསྐུ་བར་བྱ། །ཤུ་ཀ་ན་ས་བོང་ང་དཀར། །ཀཎྜ་ཀ་རིའི་རྩ་བས་བསྐུ། །དུག་འཐུང་སོས་བཏབ་གསོ་བ་དག །ཅི་རིགས་པར་ནི་དེ་ལ་
བྱ། །རྨ་ཡི་ཤ་ནི་རྣགས་པ་ལ། །མཁྲིས་པའི་མེ་དབལ་ལྟ་བུར་གསོ། །བདེ་ཕྱིར་ཁྱོ་ལ་བུད་མེད་དང་། །རྒྱལ་པོ་ལ་ནི་དགྲས་བསླབ་སྟེ། །ཟས་དང་སྦྱར་བའི་དུག་བསྲེས་པ། །ཉེ་འཁོར་སྐྱེ་བོར་སྟེར་བར་འགྱུར། །སྣ་ཚོགས་ལུས་ཀྱི་དྲི་མར་བཅས། །མི་མཐུན་སྨན་དང་ཐལ་བ་
དང་། །ནུས་པ་ཆུང་བར་གྱུར་པའི་དུག །སྦྱར་བའི་དུག་ནི་སྦྱར་མ་ཡིན། །དེས་ཉེན་མདོག་སྐྱ་རིད་པ་དང་། །མེ་དྲོད་ཉམས་ཤིང་ལུད་པ་དང་། །དབུགས་མི་བདེ་དང་རིམས་ཀྱིས་ཉེན། །རླུང་ནི་མི་མཐུན་རྒྱུ་བ་དང་། །གཉིད་ཆེ་ཡིད་ནི་ཞུམ་པར་བྱེད། །གཅིན་སྙི་ལྟོ་བ་མཆིན་པ་དང་། །མཆེར་
པ་ན་ཞིང་སྐད་གསང་དམའ། །ཉམ་ཆུང་སྒྱིད་ནི་ཞན་པ་དང་། །སྐྲངས་ཤིང་རྟག་ཏུ་སྦོ་བ་དང་། །རྐང་པ་ལག་པ་སྐམ་ཞིང་ཟད། །རྨི་ལམ་དུ་ནི་ཅེ་སྤྱང་དང་། །བྱི་ལ་སྦྲུལ་དང་ནེེའུ་ལེ་དང་། །སྤྲེའུ་མཐོང་ཞིང་ཕལ་ཆེར་ནི། །ནགས་ཚལ་མཚོ་ནི་སྐམས་པར་མཐོང་། །བདག་ཉིད་ནག་
པོར་མཐོང་འགྱུར་ཞིང་། །སེར་པོ་ནག་པོར་མཐོང་བར་བྱེད། །མིག་སྣ་རྣ་བ་མེད་པ་དང་། །དེ་ཡི་དབང་པོ་ཉམས་པར་མཐོང་། །འདི་དང་གཞན་ཡང་གནོད་པ་ཡི། །བླ་བརྣན་མི་བཟད་མང་པོས་གཙེས། །འགའ་ཞིག་འཕྲལ་དུ་མ་གསོས་ན། །སྦྱར་དུག་གིས་ཉེན་འཆི་བར་འགྱུར། །དབྱིག་
དུག་སློན་བྱས་ཁ་ཟས་ནི། །དེ་ལ་ཕན་པའི་བཟའ་བཏུང་སྦྱིན། །སྦྱངས་ནས་གསེར་ནི་བསྟེན་བྱ་ཞིང་། །མདོ་ནས་བསྟན་པ་བཞིན་དུ་བྱ། །གསེར་དང་ཟངས་ཀྱི་ཕྱེ་མ་ནི། །སྦྲང་རྩི་ཁ་ར་དཀར་པོ་སྦྱར། །ལྡེ་གུས་དུག་ནི་མི་བཟད་དང་། །དབྱིག་དུག་ཐམས་ཅད་སེལ་བར་བྱེད། །མུར་བ་སླེ་ཏྲེས་
པི་པི་ལིང་། །རྒྱ་སྤོས་དབྱི་མོ་པ་ཏོ་ལ། །གླ་སྒང་ཤུ་དག་ཙི་ཏྲ་ཀ །བྱི་དང་ཀ་ནི་དར་བ་དང་། །ཆུ་དྲོན་ཞོ་ག་ཆུར་སྦྱར་བ། །སྐྱུར་ཁུ་དང་སྦྱར་བླུད་ན་ནི། །དབྱིག་དུག་གི་བཅོམ་མེ་དྲོད་སྦྱོང་། །ཟུར་བ་མ་ནུ་ཕུག་རོན་གྱི། །ཤ་བསྐོལ་ཁུ་བ་བསྒྲངས་པ་ནི། །དབྱིག་དུག་སྐོམ་དང་ལུད་པ་ན། །
เล่ม ๑๙๘ · หน้า 316a
སྐྱིགས་བུ་དབུགས་མི་བདེ་རིམས་སེལ། །དུག་གི་རང་བཞིན་དུས་དང་ཟས། །ནད་གཞི་ལུས་ཟུངས་ཚོགས་འདུས་པ། །དུག་གི་ཉམ་ང་ཞེས་བཤད་དེ། །བཀྲེས་སྐོམ་ཉམ་ནི་ཆུང་བ་དང་། །ཁྲོ་དང་མྱ་ངན་འཇིགས་དང་ངལ། །མ་ཞུ་བ་དང་འཁྲུ་བ་དང་། །མཁྲིས་
པ་རླུང་ནི་འཕེལ་བ་དང་། །ཏིལ་གྱི་མེ་ཏོག་འབྲས་བུ་སྣུམ། །ས་ཡི་རླངས་པ་འབྲུག་སྒྲ་དང་། །གླིང་བུ་པི་ཝང་རོལ་མོ་ཡི། །སྒྲ་དང་མདུན་གྱི་སེར་བུ་དང་། །ཨུཏྤལ་དྲི་དང་མྱོས་པ་ཡིས། །དུག་གི་ཉམ་ང་འཕེལ་བར་བྱེད། །དབྱར་ནི་ཆར་གི་དུས་ཡིན་པས། །བུ་རམ་ལྟ་བུར་རླན་ཅན་འགྱུར། །
ལུས་ལ་ཁྱབ་བྱེད་དབྱར་འདས་ནས། །རི་བྱི་འཆར་བས་དེ་མེད་བྱེད། །དེ་བས་སྤྲིན་བྲལ་དུས་སུ་ནི། །ནུས་པ་ཆུང་བ་ཉིད་དུ་འགྱུར། །དེ་ལྟར་རང་བཞིན་གོམས་པ་དང་། །གནས་དུས་ཤུགས་སྟོབས་ཆེ་ཆུང་བ། །བརྟགས་ཏེ་མཁས་པས་ཤེས་བྱས་ལ། །དེ་རྗེས་གསོ་བའི་ལས་སྤྱད་
བྱ། །བད་ཀན་ཅན་ནི་སློན་དང་དྲོ། །རྩུབ་དང་རྣོ་བའི་སྨན་བསྐུ་ཞིང་། །བསྐ་དང་ཁ་དང་ཚ་བ་ཡིས། །ཟས་ཀྱི་དུག་ནི་བསལ་བར་བྱ། །མཁྲིས་ཅན་བཀྲུ་སྨན་སྨན་ཆུ་བླུགས། །ཤིན་ཏུ་བསིལ་བའི་སྨན་བསྐུ་ཞིང་། །བསྐ་དང་ཁ་དང་མངར་བ་དང་། །མར་བཅས་ཁ་ཟས་སྦྱིན་
པས་གསོ། །རླུང་གི་བདག་ཉིད་ཅན་མངར་དང་། །སྐྱུར་དང་ལན་ཚྭ་མར་བཅས་པའི། །བཟའ་བ་མར་བཅས་བསྐུ་བྱུག་དང་། །དེ་བཞིན་ཤ་ནི་བཟའ་བས་གསོ། །བཀྲུ་སྨན་བསྐུ་བྱུག་ཁ་ཟས་སྨན། །མར་མེད་བསྔགས་པ་མ་ཡིན་ནོ། །དུག་ཀུན་གནས་སྐབས་ཐམས་ཅད་དུ། །དུག་
འཇོམས་མར་དང་འདྲ་བ་ཡི། །སྨན་ནི་གཞན་དག་ཡོད་མིན་ཏེ། །མཆོག་ཏུ་རླུང་ཤས་ཆེ་ལ་ཕན། །བད་ཀན་གནས་ཞུགས་གསོ་བར་སླ། །མཁྲིས་པའི་གནས་བརྟེན་འབད་པས་གསོ། །རླུང་གི་གནས་སུ་ཞུགས་པའི་དུག །ཤིན་ཏུ་གསོ་དཀའ་གསོར་མི་རུང་། །ཡན་ལག་བརྒྱད་
པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སུམ་ཅུ་རྩ་ལྔའོ།། །།དེ་ནས་སྦྲུལ་གྱིས་ཟིན་པ་གསོ་བའི་ལེའུ་བཤད་པར་བྱའོ། །མདོར་ནས་ཡི་སྟེང་ན་སྦྲུལ། །གསུམ་སྟེ་གདེངས་ཀ་ཅན་ལུས་འཁྱིལ། །ཁྲ་བོ་ཡིན་ཏེ་དེ་ཡི་ནི། །དབྱེ་བ་མཐའ་ཡས་གྱུར་
เล่ม ๑๙๘ · หน้า 316b
པ་དག །སྐྱེ་གནས་དབྱེ་བས་རྒྱས་པར་ནི། །དགོས་པ་མེད་ཕྱིར་མ་བཤད་དོ། །མཆོག་ཏུ་རྩུབ་དང་ཚ་བ་དང་། །སྐྱུར་དྲོ་མངར་བསིལ་དག་ལས་ནི། །གདེངས་ཀ་ཅན་ལ་སོགས་པའི་དུག །རིམ་གྱིས་རླུང་སོགས་འཁྲུག་པར་བྱེད། །གཞོན་དང་རྒན་པོ་བར་མ་དང་། །དབྱར་དང་
དགུན་དང་སོས་ཀར་ནི། །འདི་དག་དུག་ནི་འཕེལ་འགྱུར་ཞིང་། །གཞན་དག་དུས་ཚིགས་རྣམས་སུ་འགྱུར། །འཁོར་ལོ་གཤོལ་དང་གཡུང་དྲུང་གདུགས། །ལྕགས་ཀྱུའི་མཚན་མར་ལྡན་པ་ཡིན། །གདེངས་ཀ་ཅན་ནི་མྱུར་འགྲོ་བ། །ཐམས་ཅད་གདེངས་ཀ་ཅན་ཞེས་བྱ། །ལུས་
འཁྱིལ་སྣ་ཚོགས་པ་ཡི་ནི། །ཟླུམ་པོར་འདུག་པ་ལུས་འཁྱིལ་ཞིང་། །རིང་ཞིང་འགྲོས་ནི་བུལ་བ་ཡིན། །རི་མོ་སྣ་ཚོགས་ལྡན་པ་དང་། །སྣུམ་ཞིང་ཁ་དོག་སྣ་ཚོགས་པས། །ཆུ་ཞེང་བྲིས་འགྱུར་ཁྲ་བོ་ཡིན། །གོ་དྷའི་བུ་ནི་གོ་དྷ་ཅན། །དུག་ནི་གདེངས་ཀ་ཅན་མཉམ་ལ། །རྐང་བཞི་
པོ་ཡི་སྦྲུལ་གཞན་ནི། །འདི་དག་ཉིད་ནི་འདྲེས་པ་ལས། །འདྲེན་མའི་མཚན་ཉིད་ཅན་ཏེ་དེས། །འདུས་པའི་ནད་ནི་ལྡང་བར་བྱེད། །ཟས་ཀྱི་དོན་དང་འཇིགས་པ་དང་། །རྐང་པས་རེག་ལས་དུག་རབ་འཁྲུགས། །རྐང་གི་རྒྱུ་དང་འདྲེས་པ་དང་། །ལྷ་དང་དྲང་སྲོང་གཤིན་རྗེས་བསྐུལ། །སྦྲུལ་གྱིས་
ཟིན་པར་གང་བཤད་པ། །ཕྱི་མ་བཞིན་དུ་དུག་ཤས་ཆེ། །འཇུག་པའི་རྒྱུ་ནི་ཤེས་བྱས་ནས། །གསོ་བ་ཇི་བཞིན་བྱ་བ་ཡིན། །ཕལ་པ་སྡིག་ཅན་ངང་ཚུལ་བས། །ལམ་བཀག་ནས་ནི་གནས་པ་ཡིན། །གང་དུ་ཁ་ཆུ་གཤེར་བ་ཙམ། །ལུས་ལ་སྣང་བར་བྱེད་འགྱུར་ཞིང་། །མཆེ་བའི་རྨ་ནི་
མི་མངོན་གང་། །དེ་ནི་མཆུས་གནོད་བྱེད་ཅེས་བྱ། །མཆེ་བ་གཅིག་ལས་རྗེས་གཉིས་མངོན། །ཁྲག་མེད་གྱུར་པ་བལྡགས་ཞེས་བྱ། །མཆེ་བའི་རྗེས་ནི་ཁྲག་བཅས་གཉིས། །རྣམ་པར་བཅད་པའོ་དེ་གསུམ་ནི། །ཤ་བཅད་ཤིན་ཏུ་ཕུག་པ་དང་། །ཁྲག་དབྱུང་སོ་ཡིས་ཟིན་ཞེས་བྱ། །མཆེ་
བའི་རྗེས་ནི་བཞི་སྣང་བ། །དེ་བཞིན་སོས་འཛིན་བཙིར་བར་བཤད། །དེ་ལས་དང་པོ་དུག་མེད་གཉིས། །ཕྱི་མ་གཉིས་པོ་གསོར་མི་རུང་། །སྦྲུལ་གྱི་དུག་ནི་ཁྲག་དག་ལ། །མ་བརྟེན་ལུས་ལ་གནོད་མི་བྱེད། །ཁྲག་ནི་ཅུང་ཟད་ལ་བརྟེན་ཡང་། །ཏིལ་མར་ཐིགས་པ་བཞིན་དུ་མཆེད། །སྔར་མ་
เล่ม ๑๙๘ · หน้า 317a
སྦྲུལ་གྱིས་རེག་པ་ལས། །འཇིག་པས་རླུང་ནི་འཁྲུག་པར་བྱེད། །ལན་འགའ་སྐྲང་བར་བྱེད་པ་དེ། །སྦྲུལ་གྱིས་ལུས་ནི་བཅོམ་ཞེས་བྱ། །བགྲོད་དཀའ་མུན་པར་ཟུག་གྱུར་པ། །ལ་ལ་རྟོག་པས་ཟིན་པ་དང་། །དུག་གི་ཤུགས་དང་སློན་དང་རིམས། །བརྒྱལ་
བའམ་ཚ་བ་སྐྱེ་བའམ། །ན་ཞིང་རྨོངས་བག་འཁྲུ་བར་འགྱུར། །དེ་ནི་རྟོག་པའི་དུག་ཅེས་བྱ། །དུག་བཅས་ནད་ཀྱིས་ཟུག་པ་དང་། །སྐྲང་དང་གཡའ་དང་རིམས་བཅས་པ། །ལ་ལ་ཚ་ཞིང་རྨེན་བུར་འགྱུར། །དེ་ལས་བཟློག་པ་དུག་མེད་ཡིན། །གདེངས་ཀ་ཅན་ཤུགས་དང་པོ་ལ། །ནད་
ཁྲག་ནག་པོར་འཛག་པར་འགྱུར། །མིག་དང་གདོང་སོགས་གནག་པ་དང་། །སྲིན་བུ་རྒྱུ་བ་སྙམ་དུ་སེམས། །ཤུགས་གཉིས་པར་ནི་རྨེན་བུ་སྐྱེ། །གསུམ་པར་མགོ་ནི་ལྕི་བར་འགྱུར། །བཞི་པར་མིག་འབྱེད་དཀའ་བ་དང་། །སོ་ས་བཏབ་རྣགས་ཤིང་མཆིལ་མ་སློན། །ལྔ་པར་ཚིགས་
འབྱེ་སྙམ་སེམས་དང་། །རྒྱུད་གཞན་ཚིགས་ནི་འཇིག་པ་དང་། །ལུས་ཚ་སྐྱིགས་བུ་འབྱུང་བ་ཡིན། །དྲུག་པར་སྙིང་ན་ལུས་ལྕི་ཞིང་། །བརྒྱལ་ཞིང་འཁྲུ་ལ་ཟས་མི་འཇུ། །བདུན་པར་ཁུ་བའི་གནས་ཕྱིན་ནས། །ཕྲག་གོང་རྒྱབ་དང་སྒལ་ཚེགས་དང་། །རྐེད་པ་ཞིག་པ་སྙམ་སེམས་
ཞིང་། །སྤྱོད་ལམ་ཐམས་ཅད་ལས་ཉམས་འགྱུར། །དེ་ནས་ལུས་བསྐྱིལ་བས་ཟིན་ན། །ནད་ཁྲག་སེར་པོར་འགྱུར་བ་དང་། །དེ་ཡི་ལུས་སེར་ཚ་བ་སྐྱེད། །གཉིས་པར་སྐྲང་བར་འགྱུར་བ་ཡིན། །གསུམ་པར་སོས་བཏབ་རྣགས་པ་དང་། །རྔུལ་དང་སྐོམ་དང་སྐྱེ་བར་འགྱུར། །བཞི་
པར་ཁོང་ཚ་རིམས་ཀྱིས་འདེབས། །ལྔ་པར་ལུས་ཀུན་ཁྱབ་པར་ཚ། །སྤྲུལ་ནི་ཁྲ་བོས་ཟིན་གྱུར་ན། །ཁྲག་ནི་སྐྱ་བོར་འགྱུར་བ་དང་། །དེས་ནི་ལུས་མདོག་སྐྱ་བོར་འགྱུར། །གཉིས་པར་ལུས་ནི་ལྕི་བར་འགྱུར། །གསུམ་པར་སོས་བཏབ་རྣགས་པ་དང་། །མིག་དང་ཁ་སྣ་ལས་འཛག་
འགྱུར། །བཞི་པར་མགོ་ལྕི་གཉེའུ་རེངས་འགྱུར། །ལྔ་པར་ལུས་ཚིགས་ན་བ་དང་། །གྲང་བའི་རིམས་ཀྱིས་འདེབས་པར་བྱེད། །ལྷག་མ་གཉིས་པོ་སྔ་མར་མཚུངས། །ཤུགས་ནི་ལྔ་པར་གསོ་བ་དག །བྱ་ཡི་དེ་ལས་ཕན་ཆད་མིན། །ཆུ་ཡིས་གཡེང་དང་ཆགས་པས་ཟད། །སྐྲག་
เล่ม ๑๙๘ · หน้า 317b
དང་ནེེའུ་ལེས་འཕེན་པ་དང་། །གྲང་ལྷགས་ཉི་ཚན་རླུང་དང་ནད། །བཀྲེས་སྐོམ་དལ་བས་གཟིར་བ་དང་། །ཕྱོགས་གཞན་ནས་ནི་རིངས་པར་འོངས། །དུག་སྤངས་པགས་པ་བརྗེས་པ་དང་། །འཇག་མ་སྨན་དང་ཚེར་མ་ཅན། །ནགས་ན་རྒྱུ་བ་གང་ཡིན་དང་། །རིག་པ་ལ་སོགས་བརྟེན་
ཕྱོགས་གནས། །སྦྲུལ་དེ་དུག་ནི་ཆུང་བར་འདོད། །དུར་ཁྲོད་བསྟི་གནས་ཤིང་གཅིག་སོགས། །ཚེས་ལྔ་དང་ནི་དུས་ཚིགས་དང་། །ཚེས་བརྒྱད་ཚེས་དགུ་ཐུན་མཚམས་དང་། །ནམ་ཕྱེད་དང་ནི་ཉི་མའི་གུང་། །བྲ་ཉེ་སྨིན་དྲུག་མཆུ་དང་སྐག །ས་ག་ཆུ་སྟོད་ཁྲུམས་སྟོད་དང་། །སྣུབས་
དང་བྲ་ཉེ་ཡུད་ཙམ་ལ། །གནད་དུ་བཟུང་བ་སྤང་བར་བྱ། །ཟིན་པའི་མོད་ལ་བཞིན་སྐྱ་ཞིང་། །སྐྲ་ནི་འབྱི་བར་བྱེད་པ་དང་། །ལྕེ་འཁུམས་ཡང་དང་ཡང་དུ་བརྒྱལ། །དབུགས་གྲང་གང་ཡིན་དེ་མི་འཚོ། །སྐྱིགས་བུ་དབུགས་མི་བདེ་ཞིང་སློན། །ལུས་ཅན་ཟིན་པའི་མོད་ལ་ནི། །སྙིང་ནས་
གཟེར་བར་འགྱུར་བ་དང་། །ཅིག་ཅར་འབྱུང་བ་དེ་མི་འཚོ། །འདུ་ཤེས་སྟོར་ཞིང་ལྦུ་བར་སྐྱུགས། །རྐང་པ་ལག་པ་བཞིན་གནག་ཅིང་། །སྣ་ཞོམ་ཡན་ལག་ཞིག་པ་དང་། །ཚིགས་ལྷོད་བཤང་བ་འཁྲུ་བ་ཡི། །དུག་འཐུངས་པ་དང་སྤྲུལ་གྱིས་ཟིན། །དུག་ཅན་མདའ་ཡིས་ཕོག་གྱུར་
པ། །ཚུལ་ནི་འདི་དག་སྣང་གྱུར་ན། །སྲོག་ཟད་པར་ནི་འགྱུར་བ་ཡིན། །སྣ་སྨན་རྣོན་པོ་མི་ཚོར་ཞིང་། །རྨ་ནས་ཁྲག་ནི་མི་འབྱུང་ལ། །དབྱིག་པས་བསྣུན་ན་རྗེས་མི་མངོན། །གཤིན་རྗེའི་ཐད་དུ་འགྲོ་བ་ཡིན། །དེ་ལས་གཞན་དུ་སྨན་པ་ཡིས། །འབར་བའི་ཁྱིམ་ནས་འབྱུང་བ་བཞིན། །
ལྐོག་མར་ཕྱིན་པའི་སྲོག་བསྲུང་ཞིང་། །དུག་ནི་མྱུར་དུ་བསལ་བར་བྱ། །ལུས་ཅན་དུག་གིས་ཟིན་གྱུར་པ། །གྲངས་བརྒྱའི་བར་དུ་གནས་ནས་ནི། །ལུས་ཟུངས་ཁྲག་སོགས་ལ་གནོད་ཅིང་། །ལུས་ལ་ཁྱབ་པར་བྱེད་པ་ཡིན། །དུས་འདིའི་བར་དུ་གདུག་པ་ཡི། །མཆེ་བས་ཟིན་པ་བཅད་
སོགས་ལས། །བྱ་ཞིང་ཅི་ནས་ལུས་ལ་ནི། །དུག་གི་ཡལ་ག་མ་འཕྲོས་བྱ། །ཟིན་པའི་མོད་ལ་མྱུར་དུ་ནི། །སྦྲུལ་ནི་དེ་ཉིད་ཟ་བའམ། །ས་འམ་བོད་བར་གཅོད་བྱེད་ན། །རིངས་པ་ཁོ་ནར་སྨན་པ་ཡི། །མཆིལ་མས་བྱུག་པར་བྱ་བའམ། །རྣ་སྤབས་ཀྱིས་ནི་སོ་རྗེས་བསྐུ། །མཆེ་བས་བཏབ་
เล่ม ๑๙๘ · หน้า 318a
པའི་གོང་དུ་ནི། །སོར་བཞིར་རས་མ་ལས་བྱས་པ། །གསོ་མའམ་འོད་མ་ལ་སོགས་བཅིང་། །སྔགས་ཤེས་པ་ཡིས་གྲུབ་སྔགས་བཟླ། །ཆུ་ལོན་གྱིས་ནི་ཆུ་ལྟ་བུར། །བཅིངས་པས་དུག་ནི་འཕྲོས་མི་འགྱུར། །དུག་གི་བཅིངས་སོགས་ཉེན་པ་ཡི། །རྩ་ལས་རྒྱུ་བར་
མི་འགྱུར་རོ། །བཙིར་ནས་སོས་བཏབ་དབྱུང་བྱ་ཞིང་། །ཚིགས་དང་གནད་དུ་མ་ཆུད་དེ། །ས་བོན་ཉམས་པའི་མྱུ་གུ་བཞིན། །དུག་ཤུགས་དེ་ནི་འབྱུང་མི་འགྱུར། །ལུས་འཁྱིལ་སོ་རྗེས་མཁྲིས་བསྐྱེད་པས། །དེ་མ་གཏོགས་པ་གཞན་དག་ནི། །ལྕགས་དང་གསེར་ལ་སོགས་པས་སམ། །
མགལ་མེ་ཡིས་ནི་མྱུར་དུ་བསྲེག །མེ་ཡིས་ཐལ་བར་བྱེད་འགྱུར་ན། །ཅི་ཕྱིར་དེ་ནི་འབྱུང་བར་འགྱུར། །ས་དང་ལྕི་བ་སྨན་སོགས་ཀྱིས། །ཁ་བཀང་ནས་ནི་གཞིབ་པར་བྱ། །ཆིངས་མའི་ནང་ནས་ཤ་ཆེའི་ཕྱོགས། །མཆོག་ཏུ་ཞལ་ཞལ་བྱ་བ་དང་། །ཡན་ལག་མཆེ་བས་ཟིན་བཅས་པ། །
དུག་སྨན་གྱིས་ནི་ཡང་ཡང་བསྐུ། །ཙནྡན་པུ་ཤེལ་ཙེ་ལྡན་པའི། །ཆུ་ཡིས་ཀྱང་ནི་བླུགས་པར་བྱ། །དུག་གིས་ཁྱབ་པར་གྱུར་པ་ལ། །གཏར་ག་གདབ་པ་གསོ་མཆོག་སྟེ། །ཁྲག་ནི་ཕྱུང་བར་གྱུར་པ་ན། །མ་ལུས་དུག་ནི་འབྱུང་བར་འགྱུར། །དུག་བཅས་ཁྲག་ནི་དྲི་མི་ཞིམ། །མེར་བསྲེགས་
སྒྲ་ནི་ཙེག་ཙེག་ཟེར། །ནད་གཞི་ཇི་བཞིན་དག་གྱུར་པ། །ཁྲག་ནི་སྔ་མ་བཞིན་ཞེས་བྱ། །རྩ་ནི་སྣང་བར་མ་གྱུར་ན། །རྔབས་རྭ་སྲིན་བུ་པད་པས་གཏར། །ཁྲག་ཕྱུང་བ་ཡི་ལྷག་མ་ནི། །དུག་གི་དྲོད་ཀྱིས་ཞུགས་གྱུར་པ། །ཤིན་ཏུ་བསིལ་བའི་སྨན་བསྐུ་དང་། །བླུགས་པ་ཡིས་ནི་བསལ་
བར་བྱ། །དུག་གི་ཤུགས་ཀྱིས་མ་ཞུ་བས། །བརྒྱལ་དང་མྱོས་དང་སྙིང་འཛག་འབྱུང་། །དེ་ནི་བསིལ་སྨན་བླུགས་པ་དང་། །རླུང་ཡབ་སྤུ་ལྡང་བྱེད་པས་བསལ། །ཁྲག་ན་སླ་བར་གྱུར་ན་དུག །འཕྲལ་དུ་ཤུགས་ནི་ཞི་བར་འགྱུར། །དུག་གི་རྣོ་བས་སྙིང་འདར་བྱེད། །དེ་བསྲུང་ཕྱིར་ནི་ཞུན་མར་དང་། །
མར་དང་བཅས་པའི་སྦྲང་རྩི་འམ། །དུག་སྨན་མར་དང་སྦྲུས་པ་བླུད། །དེ་ཡི་སྙིང་ནི་འགག་བྱེད་པས། །སྙིང་གར་བད་ཀན་སོགས་པར་བྱེད། །ལུས་ལྕི་ནད་ནི་བསླངས་པ་དང་། །སྙིང་འཕར་དེ་ནི་སློན་དུ་གཞུག །གཤེར་རྫས་སྐྱུར་རྩབས་རྒྱ་སྲན་དང་། །ཏིལ་དང་ཆང་སོགས་མ་གཏོགས་པ། །
เล่ม ๑๙๘ · หน้า 318b
དུག་སེལ་བ་ཡི་སློན་སྨན་གཏང་། །དེས་ནི་ལུས་ལ་ཁྱབ་མི་འགྱུར། །སྦྲུལ་དང་ཉེས་པ་རང་བཞིན་དང་། །གནས་དང་ཤུགས་ཀྱི་ཁྱད་པར་ནི། །ཕྲ་མོ་ཡན་ཆད་ལེགས་བརྟགས་ལ། །གསོ་བ་ཁྱད་པར་ཅན་བྱའོ། །སྲིན་བུ་བ་རིའི་རྩ་བ་དང་། །གི་རི་ཀརྞི་དཀར་པོའི་ཆུ། །བཏུང་བ་གདེངས་
ཀ་ཅན་བཞིན་སྦྱར། །སྣ་སྨན་རུ་རྟ་སྦྲང་རྩི་གཏང་། །སྦྲུལ་ནག་གིས་ནི་ཟིན་པ་ལ། །ཁྲག་གཏར་ནས་ནི་བཅའ་བ་དང་། །ན་གོ་ལ་ནི་སྦྱར་བ་བསྐུ། །ཡང་ན་རྩ་རྣོན་དུག་གིས་བསྐུ། །བཏུང་བར་བཙོད་དང་སྦྲང་རྩི་དང་། །ཁང་པའི་དུད་པ་མར་སྦྱར་བླུད། །གདེངས་ཀ་ཅན་དང་རི་མོ་ཅན། །མི་
བཟད་དུག་གིས་ཟིན་པ་ལ། །ཏན་དུ་ལི་ཡ་ཏད་པལ་དང་། །གི་རི་ཀརྞི་རྣམ་གཉིས་དང་། །ཁ་ལུང་ཁཎྜ་སེའུ་འབྲུ་ནི། །བཏུང་དང་སྣ་སྨན་མིག་སྨན་བྱ། །ཨ་ཤྭ་གནྡྷ་རྒུན་འབྲུམ་དང་། །གི་རི་ཀརྞི་ས་ནག་དང་། །ཧ་ཏི་པི་པི་ལིང་དང་ནི། །བྱེའུ་རུག་པའི་ལོ་མ་དང་། །བིལ་བ་སེ་འབྲུ་ཀ་
པིད་ཐ། །ཆ་ནི་ཕྱེད་ཕྱེད་སྦྲང་རྩིར་སྦྱར། །དུག་སྨན་ཡིན་ཏེ་ཁྱད་པར་དུ། །ལུས་འཁྱིལ་སྦྲུལ་གྱི་དུག་ལ་ཕན། །ལོ་མ་ལྔ་དང་འབྲས་བུ་གསུམ། །ཤིང་མངར་ནཱ་ག་པུཥྤ་དང་། །ཨེ་ལ་བ་ལུ་ཛི་བ་ཀ །ཟངས་རྩི་བ་དང་པུ་ཤེལ་ཙེ། །ཁ་ར་ཤུག་པ་ཨུཏྤ་ལ། །སྦྲང་རྩི་དང་སྦྱར་ཁ་བ་ཅན། །
ཞེས་བྱ་ལུས་འཁྱིལ་དུག་འཇོམས་སོ། །བསྐུས་ན་སྐྲང་དང་ཤུ་བ་མཆེད། །འབྲུམ་བུ་རིམས་དང་ལུས་ལྕི་སེལ། །ཏང་པལ་ནྱ་གྲོ་དྷའི་མྱུ་གུ། །ཛི་བ་ཀ་དང་ཟངས་རྩི་བ། །ཀ་ར་དཀར་པོ་ཤིང་མངར་བཙོད། །ཁུ་བ་ལུས་འཁྱིལ་དུག་ལ་བླུད། །འོད་མའི་ཤུན་པ་ས་བོན་དང་། །བཅའ་
སྒ་པ་ཏོ་ལའི་ས་བོན། །ཤིར་ཤའི་ས་བོན་པུ་ཙེ་ཤེལ། །འབྲས་ཀྱི་རྩ་བ་བོང་ང་དཀར། །ཤུ་དག་བ་གཅིན་བཅས་པར་བཏགས། །ཡན་ལག་བརྒྱད་པ་ཞེས་བྱ་སྟེ། །གོ་ནས་ཡི་དུག་འཇོམས་སོ། །རུ་རྟ་བོང་ང་པུ་ཙེ་ཤེལ། །ཧ་རེ་ཎུ་ཀ་ཁྱིམ་དུད་པ། །རྒྱ་སྤོས་སྦྲང་རྩི་ཚ་བ་གསུམ། །
སྦྱར་བས་རི་མོ་ཅན་དུག་སེལ། །འདམ་བུ་ཁྲ་བོ་འདྲས་ཟིན་ན། །ས་བརྐོས་འོག་ཏུ་ཐུན་གཉིས་གཞུག །ཕྱུང་སྟེ་བཞར་ལ་མར་སར་དང་། །འབྲས་དང་ས་ཡི་ལྡེ་གུས་བྱུག །འབྲས་བུ་གསུམ་གྱི་ཕྱེ་བཏབ་པའི། །མར་ནི་རྙིང་པ་བླུད་པར་བྱ། །ཞུ་ཞིང་བཀྲུས་ནས་ནས་ཟན་ནི། །སྲན་ཚོད་དང་ནི་
เล่ม ๑๙๘ · หน้า 319a
བཅས་པ་སྦྱིན། །ཀ་ར་བཱི་ར་ཨརྐ་ཡི། །མེ་ཏོག་ལང་ཀ་ལིའི་རྩ་བ། །པི་པི་ལིང་དང་ན་ལེ་ཤམ། །པ་ཏ་སྐྱུར་རྩབས་ལྡེ་གུར་བྱས། །འདི་ནི་སྦྲུལ་གཞན་གྱིས་ཟིན་པའི། །སྦྲུལ་གྱི་དུག་ཀུན་སེལ་བ་ཡིན། །ཤིར་ཤའི་མེ་ཏོག་ཁུ་བ་དང་། །ན་ལེ་ཤམ་
དཀར་ཞག་བདུན་སྦངས།།བཏུང་དང་སྣ་སྨན་བྱས་གྱུར་ན། །སྦྲུལ་གྱི་མཆེ་བས་ཟིན་པ་སེལ། །རྒྱ་སྤོས་རུ་རྟ་སྲང་གཉིས་གཉིས། །མར་དང་སྦྲང་རྩི་སྲང་བཞི་བཞི། །འདི་བླུད་འཇོག་པོས་ཟིན་པ་ཡང་། །བདེ་བ་སྐྱེད་པར་བྱེད་པ་ཡིན། །དེ་ནས་གདེངས་ཀ་ཅན་གྱི་ཤུགས། །དང་པོར་
ཁྲག་ནི་དབྱུང་བར་བྱ། །དུག་སྨན་སྦྲང་རྩི་ཞུན་མར་དང་། །བཅས་པ་མྱུར་དུ་བླུད་པར་བྱ། །གཉིས་པར་སློན་སྨན་བཏང་ནས་ནི། །དེ་བཞིན་དུག་སྨན་བླུད་པར་བྱ། །གསུམ་པར་དུག་སྨན་སྦྱར་བྱ་ཞིང་། །མིག་སྨན་དང་ནི་སྣ་སྨན་གཏང་། །བཞི་བར་སྐྱུག་སྨན་བཏང་ནས་ནི། །སྔར་བཤད་པ་ཡི་
ནས་ཐུག་བླུད། །ལྔ་པ་དྲུག་པར་བསིལ་སྨན་གྱིས། །བསྐུ་ཞིང་སྨན་ཆུ་ཡང་ཡང་བླུགས། །སློན་སྨན་རྣོན་པོ་གཏང་བྱ་ཞིང་། །དུག་སེལ་ནས་ཐུག་བླུད་པར་བྱ། །བདུན་པར་དུག་སྨན་རྣོན་པོ་ཡི། །མིག་སྨན་དང་ནི་སྣ་སྨན་གཏང་། །དེ་ནས་སྤྱི་བོར་རྒྱ་གྲམ་དུ། །ཟབ་མོའི་མཚོན་གྱིས་བཏྲ་ལ་
ནས་ནི། །དེར་ནི་ཤའམ་ཁྲག་གམ་ནི། །པགས་པ་དག་ནི་གཞུག་པར་བྱ། །ལུས་འཁྱིལ་ཤུགས་ནི་གསུམ་པ་ལ། །སློན་སྨན་བཏང་ལ་ནས་ཐུག་བླུད། །དྲུག་པར་སྨན་ནི་རྟུལ་པོའམ། །ཤུག་པ་ལ་སོགས་སྡེ་ཚན་བླུད། །ཁྲ་བོའི་ཤུགས་ནི་དང་པོ་ལ། །ཞལ་ཞལ་ཟབ་ཏུ་གདང་བྱ་
ཞིང་། །ཀུ་བས་ཁྲག་ནི་བཏོན་ནས་ནི། །སྔ་མ་བཞིན་དུ་དུག་སྨན་བླུད། །དྲུག་པར་མིག་སྨན་རྣོན་པོ་དང་། །སྣ་སྨན་ཕྱེ་མ་བུད་པ་གཏང་། །མ་སྨས་པ་ཡི་ཤུགས་ལས་ནི། །གདེངས་ཀ་ཅན་སྐབས་བཤད་ལྟར་གསོ། །སྦྲུམ་མ་བྱིས་པ་རྒན་པོ་ལ། །གཏར་ག་མི་གདབ་འཇམ་པོས་
གསོ། །ཤིང་ཚ་ལྡོང་རོས་རྒྱ་སྤོས་ཉུང་། །ཀུ་ཤའི་ཁུ་བ་ཆུ་སྲིན་སེན། །ཏ་མ་ལ་ཡི་གེ་སར་དང་། །འབྲས་བུ་ཆུ་གྲང་སྦྱར་བ་བླུད། །འདི་ཡིས་དབང་པོའི་རྡོ་རྗེས་ནི། །ལྷ་མིན་ལྟ་བུར་དུག་འཇོམས་བྱེད། །བིལ་བའི་རྩ་བ་བྱེའུ་རུག་པའི་མེ་ཏོག །རྒྱ་སྤོས་ཐང་ཤིང་ཀ་རཉྫའི་འབྲས་བུ། །
เล่ม ๑๙๘ · หน้า 319b
སེར་པོ་རྣམ་གཉིས་འབྲས་བུ་གསུམ་དང་ནི། །ཚ་བ་གསུམ་པོ་ར་གཅིན་ཞིབ་བཏགས་ལ། །བཏུང་དང་སྣ་སྨན་མིག་སྨན་སྦྱར་བ་ཡིས། །སྦྲུལ་དང་ལུ་དབྱི་བ་སྡིག་པ་སོགས། །དུག་དང་དབྱིག་དུག་མ་ཞུ་གསུད་དང་རིམས། །མི་ནི་གདོན་གྱིས་ཟིན་པ་བདེ་བར་བྱེད། །སོས་བཏབ་བསྐུ་
བ་ལ་སོགས་ཀྱིས། །མ་ལུས་སྟོན་པར་གྱུར་ཀྱང་ནི། །ཉམས་པའི་དུག་ནི་ཇི་བཞིན་དང་། །སླར་ཡང་ཤུགས་ནི་སྐྱེ་བར་བྱེད། །དུག་དང་བྲལ་ནས་རླུང་འཁྲུགས་ན། །སྣུམ་ལ་སོགས་པས་གསོ་བྱ་ཞིང་། །ཏིལ་མར་ཆང་དང་རྒྱ་སྲན་ཆུ། །མ་གཏོགས་རླུང་ནི་སེལ་བ་སྦྱིན། །མཁྲིས་
པར་མཁྲིས་པའི་རིམས་སེལ་བའི། །སྨན་ཁུ་སྨན་མར་འཇམ་རྩིས་གསོ། །བད་ཀན་སྦྲང་རྩིར་བཅས་པ་ཡི། །དོང་ཀ་ལ་སོགས་སྡེ་ཡིས་གསོ། །སྤྲུལ་གྱི་རུས་པས་གནོད་འགྱུར་དང་། །དེ་བཞིན་རྟོག་པའི་དུག་གིས་ཉེན། །ཀ་ར་རྒུན་འབྲུམ་པ་ཡ་སྱ། །ཤིང་མངར་ཁ་ར་སྦྲང་རྩིར་སྦྱར། །
སྔགས་ཀྱིས་བཏབ་པའི་ཆུ་དང་བཅས། །གཏོར་ཞིང་སྤྲོ་བསྲིང་དགའ་བར་བྱ། །ཀེ་ཀེ་རུ་དང་མུ་ཏིག་མརྒད་དང་། །བཻ་ཌཱུརྱ་དང་རྡོ་རྗེ་མཐོན་ཀ་ཆེ། །རས་བལ་ས་བོན་དུག་གིས་གནོད་པའམ། །ཁ་བ་ཅན་གྱི་རི་ལས་སྐྱེས་པ་ཡི། །སོ་མ་ར་ཛ་དང་ནི་བ་སྤྲུ་བ། །དེ་བཞིན་དྲོ་ན་མ་ཧཱ་དྲོ་ན་དང་། །
སྦྲུལ་ལ་ཡོད་པའི་ནོར་བུ་མ་ན་སི། །ནུས་པ་དང་ནི་ལྡན་པར་གྱུར་པ་ཡི། །དུག་ནི་དུག་གཞོམ་བྱ་ཕྱིར་བཅད་པར་བྱ། །ནུབ་མོའི་དུས་སུ་རྒྱུ་ཆེ་ཁྱད་པར་དུ། །གདུགས་དང་ཁར་གསིལ་སྒྲ་དང་བཅས་པ་བཅང་། །དེ་ཡི་གྲིབ་མ་སྒྲ་ཡི་སྐད་ཕྱུང་ན། །སྦྲུལ་གྱི་ཚོགས་ནི་འབྱེར་བར་བྱེད་པར་
འགྱུར། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སུམ་ཅུ་དྲུག་པའོ།། །།དེ་ནས་སྲིན་བུའི་དུག་ནད་གསོ་བའི་ལེའུ་བཤད་པར་བྱའོ། །སྦྲུལ་ཉིད་ཀྱི་ནི་བཤང་གཅི་དང་། །ཁ་ཆུ་སྒོ་ང་ལུས་རུལ་སྐྱེས། །ནད་ནི་རེ་རེ་འདུས་པ་དང་། །ལྡན་པའི་
སྲིན་བུའི་དུག་རྣམ་བཞི། །རླུང་གི་སྲིན་བུས་ཟིན་གྱུར་ན། །ཤས་ཆེར་ན་ཞིང་ཟུག་པར་བྱེད། །མེ་ཡི་སྲིན་བུས་འཛག་པ་ཆུང་། །ཚ་ཞིང་དམར་ལ་ཤུ་བ་མཆེད། །བ་ལུའི་འབྲས་བུ་སྨིན་པའམ། །འབྲ་གོའི་འབྲས་བུ་སྨིན་པ་འདྲ། །བད་ཀན་ཤས་ཆེས་ནད་ཚབས་ཆུང་། །ཨུ་དུམ་
เล่ม ๑๙๘ · หน้า 320a
ཝཱ་ར་སྨིན་པ་འདྲ། །ཤས་ཆེར་འཛག་པའོ་འདུས་པ་ཡི། །མཚན་ཉིད་ཐམས་ཅད་ལྡན་པ་དང་། །ཤུགས་ནི་སྦྲུལ་དང་འདྲ་བ་དང་། །སྐྲང་བ་འཕེལ་ཞིང་ཁྲག་དྲི་མ་མནམ། །མགོ་དང་མིག་ལྕི་བརྒྱལ་མགོ་འཁོར། །དབུགས་མི་བདེ་ན་སྤང་བར་བྱ། །ཀུན་ཏུ་སྐྲང་བ་ལྟེ་བ་
ཅན། །ཚ་བ་གཡོ་ཞིང་ཡི་ག་འཆུས། །སྡིག་པའི་དུག་ནི་རྣོ་བ་སྟེ། །དང་པོར་མེ་ལྟར་སྲེག་པར་བྱེད། །སྟེང་དུ་མྱུར་དུ་མཆེད་བྱེད་ཅིང་། །མཆེ་བ་འོག་ཏུ་འདུག་པ་ཡིན། །ཟིན་མ་ཐག་ནི་རབ་ན་གནག། །གས་པ་སྙམ་དུ་སེམས་ཤིང་ཟུག །དེ་ནི་ལྕི་བ་སོགས་རུལ་དང་། །དུག་གིས་ཕོག་
སོགས་རུལ་བ་དང་། །སྦྲུལ་རུལ་པ་ལས་སྐྱེས་པ་ཡི། །དུག་ཚབས་ཆུང་དང་འབྲིང་དང་ཆེ། །ཚབས་ཆུང་སེར་ཞིང་དཀར་དང་གནག །རྩུབ་དང་ཕྲ་ཞིང་གཟིག་མདོག་ཅན། །སྤུ་དྲང་ཚིགས་ནི་དམར་བ་དང་། །དམར་ཞིང་ལྟོ་བ་དཀར་བ་ཡིན། །བར་མ་ལྟོ་རུ་ཚིགས་གསུམ་པ། །རྐེད་པ་སེར་
སྐྱ་དམར་བ་ཡིན། །དུག་ཆེ་སེར་སྐྱ་ཕྲ་བ་དང་། །རི་མོ་ཅན་ལ་ཁྲག་འདྲ་ཞིང་། །མེ་འདྲ་ཚིགས་ནི་གཉིས་སམ་གཅིག །ལྟོ་བ་དཀར་ཞིང་དམར་རམ་གནག །དེས་ཟིན་ལྕེ་ནི་སྐྲངས་པ་དང་། །ལུས་རེངས་རིམས་ཀྱིས་ཉེན་པ་དང་། །བུ་ག་ལས་ནི་ཁྲག་ནག་སློན། །དབང་པོའི་དོན་ནི་མི་ཤེས་
ཤིང་། །རྡུལ་ཞིང་བརྒྱལ་ལ་ཁ་སྐོམ་དད། །རྨོངས་ཤིང་ནད་ཀྱིས་ཉེན་པ་དང་། །ཤ་ནི་ཞིག་པར་བྱེད་པ་སྟེ། །ཕལ་ཆེར་སྲོག་ནི་འདོར་བར་བྱེད། །མཆུ་སྦོམ་པ་ཡི་ཁ་ཡིས་ནི། །འདེབས་ཤིང་གསོར་རུང་སྡིག་པ་ལས། །ལྷག་པར་ན་བྱེད་ལུས་རེངས་ཤིང་། །མཚན་གྱི་སྦུབས་ནི་ལྡང་བ་
དང་། །ལུས་ནི་རྔུལ་བར་བྱེད་འགྱུར་ཞིང་། །སོས་འདེབས་ཆུ་གྲང་སྙམ་དུ་སེམས། །དེ་ཉིད་རྔ་མོ་དུད་ཀ་དང་། །མཚན་མོ་རྒྱུ་བས་མཚན་མོ་ཅན། །སྲིན་བུ་རླུང་མཁྲིས་ཤས་ཆེ་ཞིང་། །རྔ་མོ་བྱི་བ་བད་ཀན་ཅན། །རྔ་མོ་དུད་པ་ཞེས་བྱ་བ། །ཕལ་ཆེར་རླུང་ཤས་ཆེ་བ་ཡིན། །ནད་ནི་གང་དང་གང་གི་
ནི། །མཚན་མ་ཤས་ཆེ་བ་ལས་བརྟགས། །དེ་དང་དེ་ལས་གསོ་བའི་སྨན། །ཡོན་ཏན་མི་མཐུན་པ་ཡིས་གསོ། །སྙིང་གཟེར་སྟོང་རླུང་གིས་རེངས་ཤིང་། །རྩ་མི་སྣང་ཞིང་རུས་ཚིགས་ན། །མགོ་འཁོར་ལུས་བཅིངས་སྙམ་དུ་སེམས། །མདོག་གནག་རླུང་ལས་གྱུར་པའི་དུག །དྲན་ཉམས་
เล่ม ๑๙๘ · หน้า 320b
དབུགས་ནི་ཚ་བར་བྱེད། །སྙིང་ཚ་ཁ་ནི་ཁ་བྲོ་ལ། །ཤ་འགས་སྐྲང་པར་བྱེད་པ་དང་། །ཁྲག་སེར་བ་ནི་མཁྲིས་པ་ཅན། །སློན་ཞིང་སྙིང་ན་ཡི་ག་འཆུས། །ཁ་ཆུ་འཛག་ཅིང་ཆོམ་པས་འདེབས། །གྲང་བཅས་ཁ་ནི་མངར་བར་བྲོ། །བད་ཀན་ཤས་ཆེའི་དུག་ནད་ཡིན། །འབའ་ཆས་
རྨ་ནི་བསྐུ་བ་དང་། །རླུང་སེལ་ཏིལ་མར་གྱིས་བསྐུ་དང་། །སྦུ་གུ་མ་སྨིན་འབྲུ་དུགས་དང་། །བརྟས་པར་བྱ་བའི་ཆོ་གས་ཕན། །མཁྲིས་པ་ཅན་ལ་སྨན་ཆུ་བླུགས། །ཤིན་ཏུ་གྲང་བའི་ལྡེ་གུས་བསྐུ། །བད་ཀན་ཅན་ལ་བཞར་ཞིང་བཅད། །དུགས་དང་སྐྱུག་སྨན་བཏང་བས་གསོ། །སྲིན་
བུ་རྣམ་པ་གསུམ་པོ་ལ། །གསོ་བ་རྣམ་པ་གསུམ་པོས་ཕན། །དུགས་དང་བསྐུ་དང་སྨན་ཆུ་བླུགས། །ཕལ་ཆེར་དྲོ་འཇམ་གཏང་བར་བྱ། །གཞན་དུ་བརྒྱལ་དང་མཆེ་བ་ཡིས། །རྣག་དང་འདྲུལ་བར་བྱེད་མ་གཏོགས། །མི་སྐྲ་ཡུངས་ཀར་སེར་པོ་དང་། །བུ་རམ་རྙིང་པའི་དུད་པས་
བདུག །དུག་དང་མཆེ་བའི་དུག་ཀུན་ལ། །མཆོག་ཏུ་ཕན་པར་འདྲོབ་སྐྱོང་འཆང་། །དུག་སེལ་སྨན་ནི་ཐམས་ཅད་དང་། །སྦྱང་བའི་ལས་ཀྱང་བྱ་བ་ཡིན། །སྲིན་བུ་སྡིག་པ་མི་བཟད་དུག །འབུས་ཟིན་སྦྲུལ་གྱིས་ཟིན་ལྟར་གསོ། །ཏན་དུ་ལི་ཡ་ཆ་མཉམ་པའི། །དུར་བྱིད་དང་ནི་ཞུན་
མར་བླུད། །འབུ་ཡི་དུག་གིས་གངས་ཅན་ལྟར། །བསྐྱོད་པར་ནུས་པ་མ་ཡིན་ནོ། །འོ་མ་ཅན་ཤིང་ལྡེ་གུས་བསྐུ། །སྦྱངས་བྱས་སྲིན་བུའི་དུག་སེལ་བྱེད། །མུ་ཏིག་ལྡེ་གུས་བསྐུས་ན་ཡང་། །སྐྲང་དང་དུག་དང་ཚ་བ་སེལ། །ཤུ་དག་ཤིང་ཀུན་བྱི་དང་ག །རྒྱམ་ཚ་ཧ་ཏི་པི་པི་ལིང་། །བ་ཐ་
བོང་ང་ཚ་བ་གསུམ། །འདྲོབ་སྐྱོང་གིས་ནི་བཤད་པ་ཡིན། །ཡན་ལག་བཅུ་པའི་དུག་སྨན་ནི། །འདྲོབ་སྐྱོང་གིས་ནི་བཤད་པ་དག །བླུད་ན་སྲིན་བུའི་དུག་ཀྱང་སེལ། །སྡིག་པའི་དུག་གིས་འཕྲལ་ཟིན་ལ། །འཁོར་ལོས་བཙིར་བའི་ཏིལ་མར་བསྐུ། །ས་ལ་པརྞི་བསྐོལ་བ་ཡི། །དྲོ་
འཇམ་ཡང་ན་གཞན་དག་བླུགས། །རྒྱམ་ཚ་དང་ནི་བཅས་པ་ཡི། །ཞུན་མར་ཡང་དང་ཡང་དུ་བླུགས། །ཡང་ན་སྐྱུར་རྩབས་དྲོ་འཇམ་མམ། །རྒྱམ་ཚ་འོ་མར་བཅས་པ་བླུགས། །མར་དང་བརྔོས་པའི་གོ་སྙོད་དང་། །རྒྱམ་ཚར་བཅས་པས་དཀྲི་བར་བྱ། །མཆེ་བས་ཟིན་པ་དུགས་
เล่ม ๑๙๘ · หน้า 321a
བྱས་ལ། །ཞལ་ཞལ་བཏབ་སྟེ་འབྲས་བུ་གསུམ། །སེར་པོ་གཉིས་དང་ཚ་བ་གསུམ། །ཤིར་ཤའི་མེ་ཏོག་བསྐུ་བར་བྱ། །རྒྱམ་ཚ་ཁ་ལུང་བ་གཅིན་སྐྱུར། །བྱེའུ་རུག་པའི་རྩེ་མོ་བཏགས། །འབའ་ཆའམ་ལྕི་བ་དྲོ་འཇམ་ཙམ། །བསྐུས་ནའང་
ཕན་པར་འགྱུར་བ་ཡིན། །བཏུང་བ་ཞུན་མར་སྦྲང་རྩིར་བཅས། །ཡང་ན་འོ་མར་ཁ་ར་བཏབ། །ཕུག་རོན་རྟུག་པ་ཨ་རུ་ར། །རྒྱ་སྤོས་བཅའ་སྒ་ཁ་ལུང་གི །ཁུ་བ་དང་སྦྱར་བླུད་པ་ནི། །སྡིག་པས་ཟིན་པའི་སྨན་མཆོག་ཡིན། །རྔ་མོའི་སོ་ནི་ཆུ་བལ་བཅས། །སྡིག་པའི་
དུག་ནི་འཇོམས་པར་བྱེད། །ཤིང་ཀུན་བ་ལ་ཁ་ལུང་གི །ཁུ་བ་དང་སྦྱར་ལྡེ་གུ་དང་། །མིག་སྨན་རི་ལུར་བྱས་ན་ནི། །སྡིག་པའི་དུག་ནི་སེལ་མཆོག་ཡིན། །ཀ་རཉྫ་དང་ཨརྫུ་ན། །གི་རི་ཀརྞི་སེ་ལུ་དང་། །ཤིར་ཤའི་མེ་ཏོག་དུག་མོ་ཉུང་། །ཞོག་ཆུ་དང་བཏགས་བསྐུས་ན། །སྡིག་
པའི་དུག་ནི་སེལ་བར་བྱེད། །གང་ཞིག་རྨུགས་ཤིང་རྔམ་པ་འཐོན། །བླ་ཞིང་མི་བཟད་ན་གྱུར་པ། །དེ་ལ་ཡུང་དང་ཨ་རུ་ར། །བཙོད་དང་བོང་ང་པི་པི་ལིང་། །བིལ་བ་གཞོན་ནུ་ན་ལེ་ཤམ། །བཱ་ཏ་ཀ་ཡི་ཁུ་བར་བཏགས། །ལྡེ་གུས་བྱུགས་ན་ཕན་པ་ཡིན། །སྦྲང་མ་གདུག་པའི་དུག་
ཀུན་ལ། །ཞོ་དང་མར་ནི་བླུད་བྱ་ཞིང་། །གཏར་ག་གདབ་ཅིང་སྣ་སྨན་དང་། །མིག་སྨན་གྱི་ནི་ཆོ་ག་བྱ། །དྲོ་ཞིང་སྣུམ་དང་སྐྱུར་བ་དང་། །རླུང་འདོམས་ཁ་ཟས་སྦྱིན་པར་བྱ། །དོང་གྲ་བྱི་བའི་རྟུག་པ་དང་། །ཁ་ལུང་ཁུ་བ་སླ་བ་དང་། །རྒྱམ་ཚ་པུ་ཤེལ་ཙེ་སྦྱར་བའི། །ལྡེ་གུས་དང་མའི་དུག་
མྱུར་འཇོམས། །སྡིག་པས་ཟིན་པའི་ཐ་མར་ནི། །དུག་ནི་ཤས་ཆེར་ལངས་གྱུར་པར། །ཟིན་པའི་རྨ་ལ་དུག་གིས་བསྐུ། །ཨུཙྪེ་ཊིཾ་ཀའི་གསོ་བའང་འདི། །གླང་པོ་ཆེ་ཡི་རྟུག་པའི་སྟེང་། །རོ་ཧི་ཤའི་རྩ་སེའུའི་ཆུ། །སྡེ་གུར་བྱས་བཏགས་བསྐུས་ན་ནི། །འདི་ནི་སྦྲང་མའི་དུག་
འཇོམས་མཆོག །ཤིར་ཤའི་ས་བོན་ཨརྒ་ཡི། །འོ་མས་ལན་གསུམ་བསྒོས་པ་ནི། །པི་པི་ལིང་གི་ཕྱེ་མར་བསྲེས། །དུག་སྨན་འདིས་ནི་སྲིན་བུའི་དུག །སྦྲུལ་དང་ལུ་དབྱི་བ་ཡི། །དུག་ནི་སེལ་བར་བྱེད་པ་ཡིན། །ཤིར་ཤ་ཀ་རཉྫ་ཡི་ས་བོན་དང་། །གུར་གུམ་རུ་རྟ་ལྡོང་
เล่ม ๑๙๘ · หน้า 321b
རོས་བཅས་པ་ཡི། །དུག་སྨན་འདིས་ནི་མཚན་རྒྱུའི་སྡིག་པས་ཟིན། །སེལ་བར་བྱེད་པ་ཡིན་པར་རྒྱལ་བས་གསུངས། །སྲིན་བུ་ལས་ནི་རབ་གདུག་པ། །བ་ནི་བཅུ་དྲུག་ཡིན་པར་བཤད། །གཞན་དག་ཉི་ཤུ་རྩ་བརྒྱད་འདོད། །ཁ་ཅིག་དེ་བས་མང་བར་འདོད། །ཉི་མའི་འོད་ཀྱི་རྗེས་འབྲང་བ། །སྟོང་ཕྲག་
ཡོད་ཅེས་གཞན་དག་འཆད། །བླ་བརྣན་གཟུགས་ནི་མང་གྱུར་པ། །དུག་ཅན་པ་ནི་གཅིག་པུར་འདོད། །དེ་ཡི་གཟུགས་དང་མིང་དག་ནི། །ཤིན་ཏུ་འདྲེས་པས་ཤེས་པར་དཀའ། །གནས་ཀྱི་ངེས་པ་ཡོད་མིན་པས། །དེ་ཕྱིར་ནད་ལས་བཤད་པར་བྱ། །ནད་གཞི་སོ་སོའི་གསོ་བ་དཀའ། །འདུས་པ་
ལས་གྱུར་གསོར་མི་རུང་། །དེས་ཟིན་མཁྲིས་གྱུར་ཚ་བ་དང་། །སྐོམ་དད་ཆུ་བུར་རིམས་ཀྱིས་འདེབས། །རྨོངས་བག་རབ་ཚ་དམར་སེར་མདོག །རྣགས་ཤིང་རྒུན་འབྲུའི་འབྲས་བུ་འདྲ། །བད་ཀན་ལས་གྱུར་སྲ་ཞིང་སྐྱ། །བ་རུ་ཤ་ཀའི་འབྲས་བུ་འདྲ། །གཉིད་ཆེ་གྲང་རིམས་ལུད་པ་ལུ། །ཤིན་ཏུ་
གཡའ་བར་བྱེད་པ་ཡིན། །རླུང་གྱུར་རྩུབ་ཅིང་གནག་པ་དང་། །ཚིགས་ན་རིམས་ཀྱིས་འདེབས་པར་བྱེད། །དེ་ཡི་དབྱེ་བ་ནད་ཀྱི་ནི། །རང་གི་མཚན་ཉིད་ལས་ཤེས་བྱ། །གསོར་མི་རུང་བ་སྙིང་ཚ་ཞིང་། །ལུད་པ་སྐྱིགས་བུ་མགོ་ནད་དང་། །འབྲུམ་ཕྲན་དཀར་དང་སེར་དང་གནག །དམར་དང་
སྐྱ་བ་ལས་འབྱུང་འགྱུར། །འདར་ཞིང་སྐྲངས་ལ་ཚ་བ་དང་། །སྐོམ་དད་ལང་ཞིང་སྣ་འཆུས་ལ། །མཆུ་གནག་སོ་ནི་གཡོ་བ་དང་། །རྒྱབ་དང་མིད་པ་བཅོམ་སྙམ་སེམས། །འཛམ་བུའི་འབྲས་བུ་སྨིན་འདྲ་བའི། །ཁྲག་ནི་མཆུས་བལྡགས་རྨ་ལས་འཛག །འདུས་གྱུར་མཚན་ཉིད་ཀུན་
ལྡན་ཞིང་། །མིང་ནི་མང་པོར་གྱུར་པ་ཡི། །དེ་དུག་རྣོན་པོ་བར་མ་དང་། །དམན་པའི་དབྱེ་བ་གསུམ་དུ་འགྱུར། །མ་བཅོས་ཞག་བདུན་ཞག་བཅུ་དང་། །ཟླ་བ་ཕྱེད་ཀྱི་རིམས་ཀྱིས་གསོད། །བ་དང་མཆུ་རིངས་ཐམས་ཅད་ཀྱང་། །གླང་ཤུ་ཀོར་ཀོར་པོར་བྱེད་ཅིང་། །དཀར་དང་གནག་དང་དམར་དང་
སེར། །གནག་པའམ་འཇམ་ཞིང་མཐོ་བ་དང་། །དབུས་སུ་གནག་པའམ་སྔོ་བ་ལ། །མཐའ་མ་དྲ་བ་ལྟ་བུས་ཁེབས། །མཆེད་ཅིང་སྐྲང་བར་བྱེད་པ་དང་། །ཚ་ཞིང་མང་དུ་ན་བ་དང་། །རིམས་འདེབས་མྱུར་དུ་རྣགས་ཤིང་འདྲུལ། །རུལ་ཞིང་གས་པར་བྱེད་པ་དང་། །རྣག་གིས་གང་དུ་རེག་གྱུར་
เล่ม ๑๙๘ · หน้า 322a
པའི། །ཕྱོགས་དེར་ཡང་ནི་རྨ་སྐྱེད་བྱེད། །དབུགས་དང་མཆེ་བ་བཤང་གཅི་དང་། །ཁུ་ཆུ་ཁ་ཆུ་སེན་མོ་ཁྲག །བརྒྱད་པོ་གནོད་བྱེད་ཁྱད་པར་དུ། །དུག་ནི་ཁ་ལ་གནས་པ་ཡིན། །བ་ནི་ལྟེ་བ་ཡན་ཆད་འཛིན། །སྲིན་བུ་སྟོད་སྨད་ཀུན་ཏུ་གནོད། །དེ་གནོད་བྱས་པའི་གོས་ལ་
སོགས། །ལུས་ལ་རེག་ན་ནད་སྐྱེད་བྱེད། །བ་དང་སྲིན་བུ་ལས་གྱུར་དུག །ཉིན་ཕྱེད་བར་དུ་ཚོར་མི་འགྱུར། །དེ་ནས་དང་པོའི་ཉིན་ཞག་ལ། །ཁབ་ཀྱིས་གཙགས་པ་སྙམ་དུ་སེམས། །མདོག་མི་གསལ་ཞིང་གཡོ་བ་དང་། །ཅུང་ཟད་གཡའ་ཞིང་ནད་དང་ལྡན། །གཉིས་པར་མཐའ་མ་ཤིན་
ཏུ་མཐོ། །འབྲུམ་བུ་ཕྲ་མོས་ཁྱབ་པ་འདྲ། །མདོག་གསལ་གྱུར་ན་དབུས་དམའ་ཞིང་། །གཡའ་ཞིང་རྨེན་བུ་ལྟ་བུར་སྣང་། །གསུམ་པར་རིམས་བཅས་སྤུ་ལྡང་ཞིང་། །འཁོར་ལིང་དམར་པོར་སྣང་བ་དང་། །ཁམ་ཕོར་གཟུགས་འདྲ་ཕལ་ཆེར་ནི། །བ་སྤུའི་བུ་ག་འཛག་པར་འགྱུར། །ཉིན་ཞག་
བཞི་པར་ཆེར་སྐྲངས་ཤིང་། །མགོ་འཁོར་ལུས་ཚ་དབུགས་མི་བདེ། །ལྔ་པར་དུག་ལྡང་ལས་གྱུར་པའི། །ནད་ནི་དེ་དང་དེ་དག་བསྐྱེད། །དྲུག་པར་གནད་དུ་ཁྱབ་པར་བྱེད། །བདུན་པར་སྲོག་ནི་འཇོམས་པར་བྱེད། །དེ་ལྟར་དུག་ནི་རྣོན་པོ་དང་། །བར་མ་དམན་པ་དབྱེ་བར་བྱ། །དེ་ནས་ཉིན་ཞག་ཉི་ཤུ་ནི། །གཅིག་
ན་ཡོང་ཡེ་ཞི་བར་འགྱུར། །དེ་འོག་བ་ཡིས་ཟིན་པ་ནི། །མཚོན་གྱིས་རྨ་ནི་གནོད་པར་བྱ། །འཛམ་བུའི་མཆུ་ལ་སོགས་པས་བསྲེག །མཁྲིས་པ་ལས་གྱུར་བསྲེག་མི་བྱ། །རྩུབ་ཅིང་སྤུ་ནི་གྱེས་པ་དང་། །གནད་དང་ཚིགས་ལ་སོགས་ལ་གནས། །ཟིན་ནས་ཀུན་ཏུ་ཁྱབ་གྱུར་པ། །གཅད་པར་མི་བྱ་
བསྲེག་མི་བྱ། །བསྲེག་པ་དུག་སྨན་རྒྱམ་ཚ་དང་། །སྦྲང་རྩིར་སྦྱར་བས་བསྐུ་བར་བྱ། །དེ་རྗེས་འོ་མ་ཅན་ཤིང་བསྐོལ། །སྨན་ཁུ་ཤིན་ཏུ་བསིལ་མོ་བླུགས། །རྔབས་རྭ་སོགས་སམ་གཏར་ག་ཡིས། །ཐམས་ཅད་ལ་ནི་ཁྲག་དབྱུང་བྱ། །དེ་ནས་བསིལ་སྨན་བསྐུ་བླུགས་བྱ། །སླེ་སྨན་ཏ་ཀ་ཨ་
ཤྭདྠ། །བ་རུ་ར་དང་པྲི་ཡང་ཀུ། །ཤུག་པ་སེར་གཉིས་སྦྲང་རྩིར་སྦྱར། །བ་དང་སྲིན་བུ་ལ་སོགས་པའི། །དུག་འཇོམས་ལས་ནི་ཐམས་ཅད་བྱེད། །སེར་པོ་རྣམ་གཉིས་རྨ་ཤིང་བཙོད། །པདྨ་གེ་སར་རྒྱ་སྤོས་ནི། །སྦྲང་རྩི་མར་སྦྱར་ཙམ་པ་ཀ །སྔ་མ་བས་ཀྱང་ཡོན་ཏན་ལྷག །ལྕི་ཁུ་བཙིར་
เล่ม ๑๙๘ · หน้า 322b
དང་ཀར་དཀར། །ཨ་པ་མརྒ་ལྡོང་རོས་དང་། །བ་བླ་སྐྱེར་པ་བྱ་མ་ཀ །ཡུག་སྣམ་སྦྲང་རྩེ་མར་དེ་བཞིན། །རྒྱ་སྤོས་ན་ལེ་ཤམ་སུག་སྨེལ། །རུ་རྟ་ཤིང་མངར་སྦྲང་རྩི་མར། །སྦྱར་བའི་སྨན་ནི་མནྡ་ར། །རྒྱ་སྤོས་སེང་ཕྲོམ་པུ་ཙེ་ཤེལ། །ཤུ་དག་པ་ཐ་སུག་སྨེལ་དང་། །གུར་གུམ་སྤོས་དང་
ལྡང་དེ་བཞིན། །ནད་གཞི་མང་ལ་དུག་འཇོམས་པའི། །སྦྱང་བ་བྱས་པས་གསོ་བར་བྱ། །ཤིང་མངར་དང་ནི་པོ་སོན་ཆ། །ཀོ་ཤ་ཏ་ཀི་ཨང་ཀོ་ལ། །སིན་དུ་བར་འབྲས་ཆུར་སྦྱར། །འཐུངས་ན་བད་ཀན་ལས་གྱུར་དུག །མྱུར་དུ་སློན་པར་བྱེད་པ་ཡིན། །ཤིར་ཤའི་ལོ་མ་མེད་དང་། །རྩ་
བ་འབྲས་བུ་ཨང་ཀོ་ལའི། །རྩ་བར་བཅས་པའང་དེ་བཞིན་ནོ། །འབྲས་བུ་གསུམ་དང་ནི་ལི་ནི། །དུར་བྱིད་ལ་སོགས་བཀྲུ་སྨན་གཏང་། །སྐྲང་དང་ཚ་སོགས་ཞི་གྱུར་ན། །རྨ་ཡི་ལྟེ་བ་དབོག་པར་བྱ། །བ་བླ་ལེ་བརྒན་རྩིའི་མེ་ཏོག །ཁྲོན་བུ་བྱི་བའི་རྟུག་པ་དང་། །དུར་བྱིད་རྒྱམ་ཚ་དན་དང་
སྦྱང་། །ལྟེ་བ་འབྱིན་པར་བྱེད་པ་ཡིན། །དེ་བཞིན་ཨུ་ཏ་མ་ཀ་རའི། །རྩ་བ་སྨིན་པའི་ཤུན་བཅས་པའི། །རྒྱམ་ཚ་རུ་རྟ་པུ་ཙེ་ཤེལ། །དན་ད་པ་ཡ་སྱ་སྦྱར་བའམ། །ར་ཛ་ཀོ་ཏ་ཀའི་རྩར། །དར་བའི་ཚིགས་མའང་སྦྱར་བར་བྱ། །ལྟེ་བ་བཅད་པའི་དུས་སུ་ནི། །དུག་སེལ་བ་ཡིས་བརྟ་བར་བྱ། །
སྣུམ་ཆོས་མ་ལུས་བྱ་བ་ནི། །ཞུན་མར་ཉིད་ཀྱིས་བྱ་བ་ཡིན། །ཏིལ་མར་གྱིས་ནི་རྩྭ་སོགས་ལ། །མེ་མཆེད་ལྟ་བུར་དུག་འཕེལ་བྱེད། །བེ་ཀང་ཀ་ཏ་བ་ལི་ཀ །ཐལ་ཏྲེས་གླ་སྒང་སྤྲི་ཀ་དང་། །ཙནྡན་ཉ་ལྕིབས་སོན་ཀ །ཨུཏྤལ་རྒྱ་སྤོས་ཤིང་མངར་དང་། །ཤིང་ཚ་ཤུག་པ་ན་གུ་ལི། །པོ་སོན་
ཆའི་རྐང་ལྷན་ཅིག་སྦྱར། །སྐྱེར་པ་གླ་སྒང་སར་པཀྵི། །བཅའ་སྒ་པི་པི་ལིང་རྩ་བ། །པི་པི་ལིང་དང་ཙི་ཏྲ་ཀ །བ་རུ་ན་དང་ཨ་ཀ་རུ། །བིལ་བ་ནིམ་པ་པ་ཏ་ལི། །རུ་རྟ་ནཱ་ག་གེ་སར་དང་། །སེའུ་ལུ་ལྷན་ཅིག་སྦྱར་བ་དང་། །བིལ་བ་ཙནྡན་ཨུཏྤལ། །རྒྱ་སྤོས་བཅའ་སྒ་པི་པི་ལིང་། །ལྕམ་
པ་ནིམ་པ་རུ་རྟ་དང་། །ཆུ་སྲིན་སྡེར་མོ་ཛི་བན་ཏི། །ག་བྲའི་རྩ་བ་པ་ཏ་ལི། །ཛི་བན་ཏི་དང་པོ་སོན་ཆ། །ཤིང་ཚ་སྦྱར་བ་དེ་དག་ནི། །མིག་སྨན་སྣར་བླུགས་བྱུག་པ་དང་། །སྨན་ཆུ་བླུགས་པའི་སྦྱོར་བ་ཡིས། །མཁྲིས་པ་བད་ཀན་རླུང་གྱུར་པའི། །ལུ་ཏའི་དུག་ནི་ཇི་སྙེད་པ། །ཚུལ་
เล่ม ๑๙๘ · หน้า 323a
ཁྲིམས་ལ་གནས་ངན་འགྲོ་བཞིན། །འདི་ཡིས་དུག་ནད་ཀུན་འཇོམས་བྱེད། །སེང་ཕྲོམ་ཤུག་པ་པདྨ་གེ་སར་དང་། །ཙནྡན་དམར་སེར་པྲི་ཡང་ཀུའི་མེ་ཏོག །པདྨ་པུ་ཤེལ་ཙེ་དང་པ་ཡ་སྱའི། །སྦྱོར་བ་ཀུན་གྱིས་བ་ཡི་དུག་ཀུན་འཇོམས། །ཡན་ལག་བརྒྱད་པའི་སྙིང་
པོ་བསྡུས་པ་ལས། ཕྱི་མའི་གནས་ཀྱི་ལེའུ་སུམ་ཅུ་བདུན་པའོ།། །།དེ་ནས་བྱི་བ་དང་ཨ་ལཾ་ཀའི་དུག་གསོ་བའི་ལེའུ་བཤད་པར་བྱའོ། །ཁུ་ཆུ་ཅན་དང་མི་བརྟན་བུ། །རྒོད་དང་སྒྲ་ཅན་པགས་པ་དང་། །རྙིང་པའི་སོ་དང་ཁུ་བྱུག་དང་། །སེར་སྐྱ་དང་ནི་ནག་པོ་དང་། །དམར་
སེར་ཁྲ་བོ་དཀར་པོ་དང་། །ཐིབ་སྐྲ་དཀར་ཕྱི་བ་དང་། །ཕུས་པ་དང་ནི་བྲ་བྱི་སྟེ། །བྱི་བའི་དབྱེ་བ་བཅོ་བརྒྱད་ཡིན། །གང་དུ་འདི་ཡི་ཁུ་ཆུས་ཕོག །ཁུ་བས་ཕོག་དང་རེག་པ་ནི། །ལུས་ཀྱི་ལུས་ལ་རེག་པ་དེར། །ཁྲག་ལ་གནོད་ཅིང་མདོག་སྐྱ་ལ། །ཐོར་བུ་རྨེན་བུ་དྲི་མནམ་དང་། །ཤུ་
བ་ཀོར་ལིང་ཡི་ག་འཆུས། །མགོ་འཁོར་སྐྲངས་རིམས་རབ་ཏུ་ན། །ཉམ་ཆུང་འདར་ཞིང་ལྷུ་ཚིགས་ན། །སྤུ་ལྡང་དྲན་ཉམས་ཁྲག་འཛག་དང་། །ཡུན་རིང་དུ་ནི་གནས་པར་བྱེད། །བད་ཀན་ཅན་གྱི་བྱི་བ་ཡི། །ཕྲུ་གུ་མང་རེག་སྐོམ་སློན་འགྱུར། །བྱི་བ་འཁྲིག་སྤྱོད་དུག་གསོ་དཀའ། །ཡང་
དང་ཡང་དུ་ལྡང་བར་བྱེད། །ཡན་ལག་ཀུན་སྐྲངས་མདོག་མི་སྡུག །རྣགས་ཤིང་འོན་ལ་རིམས་ཀྱིས་འདེབས། །མགོ་ལྕི་ཁ་ཆུ་ཁྲག་འབྱུང་ཞིང་། །སློན་པ་གསོ་དཀའི་མཚན་ཉིད་ཡིན། །ཕུས་པས་ཟིན་པ་དེ་དྲི་བྲོ། །ལྒང་པ་སྐྲངས་ཤིང་ཆུ་མདོག་ཉམས། །སྦྲང་རྩི་འདྲ་བའི་རྨེན་བུས་
ཁྱབ། །ཁྱེའི་དུག་བད་ཀན་ཤས་ཆེར་འཁྲུགས། །འདུ་ཤེས་རྒྱུ་བའི་རྩ་མང་གནས། །གནོད་ཅིང་འཁྲུག་པར་བྱེད་པ་དང་། །ལུས་ཟུངས་ལ་ནི་མི་བཟད་གནོད། །ཁ་ཆུ་འཛག་དང་ལོང་དང་འོན། །ཀུན་ཏུ་རྒྱུག་པར་བྱེད་པ་དང་། །མཇུག་མ་འགྲམ་པ་ཕྲག་གོང་ལྷོད། །མགོན་གདོང་ནི་དུད་པ་
ཡིན། །དེ་ཡི་སོ་ཡིས་ཟིན་ན་རྨ། །ཚོར་བ་ཆུང་ཞིང་ཁྲག་རྣག་འཛག །མགོ་སྙིང་ན་ཞིང་རིམས་འདེབས་རེངས། །དེ་རྗེས་སྐོམ་དང་བརྒྱལ་བར་འགྱུར། །འདི་ཡིས་གདུག་ཅིང་མཆེ་བ་ཅན། །ཅེ་སྤྱང་དོམ་དང་དྲེད་དང་གུང་། །སྟག་དང་སྤྱང་ཀི་ལ་སོགས་པ། །གཞན་དག་ཀྱང་ནི་ཤེས་པར་བྱ། །
เล่ม ๑๙๘ · หน้า 323b
གཡའ་ཞིང་ཟུག་ལ་མདོག་མི་སྡུག །ཚོར་བ་མེད་གནས་རིམས་མགོ་འཁོར། །ཚ་ཞིང་དམར་ལན་ཞིང་གནག །སྐྲང་ཞིང་རྨེན་བུ་སྐྱེ་ཟུག་འཁུམས། །རྨ་ནི་འགགས་ཤིང་འབྲུམ་བུ་འབྱུང་། །ལྟེ་བ་ཅན་དུ་ཟླུམ་པོར་འགྱུར། །ཀུན་ཏུ་དུག་བཅས་མཚན་མ་འདི། །དུག་མེད་དེ་ལས་
བཟློག་པ་ཡིན། །གང་གིས་བཟུང་བ་དེའི་སྤྱོད་ཚུལ། །སྒྲ་སྒྲོགས་རྒྱུ་མེད་པར་དེའི་གཟུགས། །ཆུ་དང་མེ་ལོང་སོགས་མཐོང་འཆི། །མ་བཟུང་བར་ཡང་སྒྲ་དང་ནི། །མཐོང་བས་སྡང་བར་བྱེད་པ་ནི། །ཆུ་ཡིས་སྐྲག་ཅེས་བྱ་བ་སྟེ། །ཟིན་པས་དེ་ཡང་སྤང་བར་བྱ། །བྱི་བའི་དུག་གིས་ཟིན་མ་
ཐག །རྨ་ནི་མདེའུ་བསྲེགས་པས་བསྲེག །ཡང་ན་མེ་ལོང་དག་གིས་བྱ། །གཞན་དུ་ལྟེ་བར་མི་བཟོད་ན། །བསྲེགས་ནས་རྨ་ལས་ཁྲག་དབྱུང་ཞིང་། །ཞལ་ཞལ་བྱས་ལ་ཤིར་ཤ་དང་། །ཡུང་བ་རྒྱ་སྤོས་གུར་གུམ་དང་། །སླེ་ཏྲེས་ཀྱི་ནི་ལྡེ་གུས་བསྐུ། །ཁྱིམ་གྱི་དུད་པ་སྐྱེར་པ་དང་། །
རྒྱམ་ཚ་དང་ནི་བཙོད་དག་གི། །ལྡེ་གུས་བྱི་བའི་དུག་སེལ་ཞིང་། །ལྟེ་བ་འབུར་བའང་འཇོམས་པར་བྱེད། །དེ་ནས་སྐྱུར་བས་བཀྲུས་ནས་ནི། །གི་རི་ཀར་ཎི་པ་ལིན་དི། །བིལ་བའི་རྩ་བ་སླེ་ཏྲེས་དང་། །ཆུ་དང་བཏགས་པའི་ལྡེ་གུས་བསྐུ། །དུག་དང་སྐྲང་སེལ་སྨན་གཞན་དང་། །ཡང་ན་གཏར་ག་
མྱུར་དུ་གདབ། །ནི་ལི་ནི་བསྐོལ་ཤི་རི་ཤ།།ཨང་ཀོ་ལ་ཡི་ཁུ་བས་སློན། །ཀོ་ཤ་ཏ་ཀི་ཤིར་ཤ་དང་། །ཛི་མུ་ཏ་ཀའི་འབྲས་བུ་དང་། །པོ་སོན་ཆ་ནི་ཕྱེ་མར་བཏགས། །ཞོ་སྦྱར་བླུད་ལ་དུག་སློན་གཞུག །ཤུ་དག་རུ་རྟ་པོ་སོན་ཆའམ། །ཛི་བན་ཏི་ནི་བ་གཅིན་བཏགས། །ཆོ་ག་སྔ་མ་བཞིན་
བླུད་ན། །དུག་གི་ནད་ནི་ཐམས་ཅད་སེལ། །དུར་བྱིད་ནི་ལི་ནི་དང་ནི། །འབྲས་བུ་གསུམ་གྱི་བཀྲུ་སྨན་བསྔགས། །ཤིར་ཤའི་སྙིང་པོའི་འབྲས་བུ་ཡིས། །མགོ་བོའི་བཀྲུ་སྨན་དག་ཀྱང་ཕན། །བ་ལྕིའི་ཁུ་བ་ཚ་བ་གསུམ། །ཕྱེ་མ་ཞིབ་བཏགས་ལྡེ་གུས་ཕན། །བ་ལང་ལྕི་བ་ཀ་པིད་ཏའི། །ཕྱེ་མ་སྦྲང་
རྩིའི་ལྡེ་གུ་བཟའ། །ཏཎྜུ་ལི་ཡི་རྩ་བ་དང་། །བསྐོལ་བའི་མར་ནི་བླུད་ནའང་ཕན། །གི་རི་ཀར་ཎི་སེར་པོ་གཉིས། །ཤིང་མངར་བཙོད་དང་སླེ་ཏྲས་ཕན། །ཐལ་ཏྲེས་རྩ་པ་མར་བསྐོལ་བ། །ཀ་པིང་ཏ་ཡི་རྣམ་ལྔའང་ཕན། །སིན་དུ་བ་ར་རྒྱ་སྤོས་དང་། །ཤི་ཀྲུ་བིལ་བའི་རྩ་བ་དང་། །ཤུ་དག་གཟེ་མ་
เล่ม ๑๙๘ · หน้า 324a
བ་སྤྲུ་བ། །ཛི་མུ་ཏ་དང་བཅས་པ་སྟེ། །དེ་རྣམས་ཁུ་བ་སྦྲང་རྩིར་བཅས། །བླུད་ནས་འབྲས་ཆན་སཱ་ལུ་ཞོ། །བྱིན་ན་བྱི་བའི་དུག་ནད་སེལ། །ཤར་པུང་གའི་ཕྱེ་མ་ནི། །དར་བར་སྦྱར་བ་བླུད་པའང་ཕན། །ཨཾ་ཀོ་ལ་ཡི་རྩ་བ་ནི། །ར་ཐུག་གཅིན་སྦྱར་ལྡེ་གུས་ནི། །བཏུང་
དང་བསྐུ་བ་ལ་སྦྱར་ན། །བྱི་བའི་དུག་ཀུན་སེལ་བར་བྱེད། །ཀ་པིད་ཏ་ཡི་སྙིང་པོ་དང་། །ཏིལ་ཀ་དང་ཏིལ་དང་ནི། །ཨཾ་ཀོ་ལ་ཡི་རྩ་བ་ནི། །བ་ཡི་འོ་མའམ་གཅིན་སྦྱར་བླུད། །ཏིལ་ཀའི་གདོང་ཡལ་ག་ཡི། །བ་ཡི་འོ་མ་སྦྱར་བ་བླུད། །ཡང་ན་ཤེརྱ་ཀའི་རྩ་བ། །སྦྲང་རྩི་འབྲས་བུ་སྦྱར་
བ་བླུད། །ཀུ་བ་ཁ་བོ་ཞག་གཅིག་ནི། །ཆུ་ལ་སྦངས་པའང་བླུད་པར་བྱ། །སིན་དུ་བ་རའི་རྩ་བ་དང་། །བྱི་བའི་རུས་པ་བོང་ང་དཀར། །རྒྱ་སྤོས་ཆུར་བཏགས་སྣ་སྨན་སོགས། །སྦྱར་བས་བྱི་བའི་དུག་སེལ་བྱེད། །བྱི་བའི་དུག་ནི་ལྷག་ལུས་པ། །སྤྲིན་མཐོང་བས་ནི་ལྡང་བྱེད་པའམ། །ནད་ནི་
འཕེལ་བར་བྱེད་པའི་རྒྱུ། །ཇི་ལྟ་བར་ནི་འཕེལ་བར་བྱེད། །དེ་ལ་གནས་སྐབས་ཐམས་ཅད་དུ། །གསོ་བ་ཐམས་ཅད་སྦྱར་བྱ་ཞིང་། །རང་གི་གསོ་བར་གང་བཤད་དང་། །དེ་བཞིན་ཉམས་པའི་དུག་སེལ་སྦྱོར། །ཨ་ལང་ག་ཡི་སོ་ཡིས་ཟིན། །མར་བསྐོལ་བ་ཡིས་བསྲེག་པར་བྱ། །དུག་སྨན་
དེ་དང་དེ་བསྐུ་ཞིང་། །མར་གྱི་སྙིང་པོ་བླུད་པར་བྱ། །འདི་ལ་ཨརྐའི་འོ་མར་བཅས། །བཀྲུ་སྨན་དག་ཀྱང་མྱུར་དུ་གཏང་། །ཨཾ་ཀོ་ལའི་རྩ་བྱང་ཕྱོགས་ཆུ། །སྲང་གསུམ་མར་ནི་སྲང་གཅིག་བླུད། །དྷ་དུ་ར་ཡི་འབྲས་བུ་དང་། །གི་རི་ཀར་ཎི་བ་སྤྲུ་བ། །བསྐོལ་བའི་ཁུ་བ་བླུད་པར་བྱ། །ཏིལ་བཏགས་
ལྡེ་གུ་ཨརྐ་ལྕགས། །འོ་མ་བུ་རམ་བསྲེས་བྱིན་ན། །སྤྲིན་སོགས་རླུང་གིས་གཏོར་བ་བཞིན། །ཨ་ལཾ་ཀ་ཡི་དུག་འཇོམས་བྱེད། །སྔགས་བཅས་སྨན་དང་རིན་ཆེན་བཅས། །ཞི་བར་བྱེད་པ་དག་ཀྱང་སྦྱར། །རྐང་བཞི་པ་དང་རྐང་གཉིས་པའི། །སོ་འམ་སེན་མོས་སྣད་གྱུར་པ། །སྐྲང་ཞིང་
རྣགས་ལ་མདོག་དམར་ཞིང་། །ཚན་ཆུ་སེར་འཛག་པ་ལ། །ཨ་ཤྭ་ཀརྞ་ཀད་ཕ་ལ། །ཧན་ས་པ་ཏི་གོ་ཇི་ཧ། །ཡུག་སྣམ་སེར་པོ་གཉིས་ཀྱིས་བསྐུ། །སོ་དང་སེན་མོའི་དུག་འཇོམས་བྱེད། །ཡན་ལག་བརྒྱད་པའི་སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སྟེ་སུམ་ཅུ་བརྒྱད་པའོ།། །།
เล่ม ๑๙๘ · หน้า 324b
ཡན་ལག་བརྒྱད་པའི་སྙིང་པོ་བསྡུས་པ་ལས། །མཆེ་བ་གསོ་བའི་ཡན་ལག་རྫོགས་སོ།། །།དེ་ནས་བཅུད་ཀྱིས་ལེན་གྱི་ལེའུ་བཤད་པར་བྱའོ། །ཚེ་རིང་དྲན་དང་ཡིད་གཞུངས་དང་། །ནད་མེད་གཞོན་དང་ལང་ཚོ་དང་། །གཟུགས་བཟང་མདོག་དང་སྐད་གསལ་དང་། །ལུས་དང་དབང་
པོའི་སྟོབས་སྐྱེད་ཅིང་། །ཚིག་གྲུབ་རོ་ཙ་མདངས་ལྡན་པ། །བཅུད་ཀྱིས་ལེན་གྱིས་འཐོབ་པར་འགྱུར། །དངས་མ་ལ་སོགས་ཡོན་ཏན་ཅན། །ཐོབ་གནས་ཡིན་ཕྱིར་བཅུད་ཀྱིས་ལེན། །ན་ཚོད་དང་པོའམ་བར་མའི་ཚེ། །དབང་པོ་ཐུལ་བས་དེ་སྦྱར་ཏེ། །སྣུམ་ཆོས་བྱ་ཞིང་གཏར་ག་གདབ། །
རྣམ་པ་ཀུན་ཏུ་སྦྱངས་བྱས་གཏང་། །མ་སྦྱངས་པ་ཡི་ལུས་ལ་ནི། །བཅུད་ཀྱིས་ལེན་དང་རོ་ཙ་བའི། །སྦྱོར་བ་དྲི་མ་ཅན་གྱི་ནི། །གོས་ཀྱི་ཚོན་ལྟར་དོན་མེད་འགྱུར། །བཅུད་ཀྱིས་ལེན་གྱི་སྦྱོར་བ་ནི། །རྣམ་པ་གཉིས་སུ་དྲང་སྲོང་འདོད། །སྤྱིལ་བོར་འདུག་པ་གཙོ་བོ་སྟེ། །རླུང་དང་ཐན་པས་ཉེན་
ཅིག་ཤོས། །ཁང་པ་རླུང་མེད་འཇིགས་པ་མེད། །ཆོས་ལྡན་ཡོ་བྱད་འབྱོར་པའི་གྲོང་། །ས་ཕྱོགས་ཤིས་པའི་བྱང་ཕྱོགས་སུ། །ཁང་པ་སུམ་རིམ་སྐར་ཁུང་ཆུང་། །དུད་པ་ཉི་ཚན་སྦྲུལ་དང་རྡུལ། །བུད་མེད་གླེན་མས་མ་བགྲོད་པར། །ཡོ་བྱད་སྨན་པ་སྟ་གོན་བྱས། །ཁང་པ་ལེགས་པར་བྱི་དོར་
བྱའོ། །དེ་ནས་ཚེས་གྲངས་བཟང་ཁྲུས་བྱས། །མཆོད་འོས་མཆོད་ལ་འཇུག་པར་བྱ། །དེར་ནི་སྦྱང་བྱས་དག་གྱུར་ནས། །བདེ་ཞིང་སྟོབས་ནི་སྐྱེད་པ་དང་། །ཚངས་པར་སྤྱོད་དང་བརྟན་པར་ལྡན། །དད་པར་ལྡན་ཞིང་དབང་པོ་ཐུལ། །སྦྱིན་དང་ཚུལ་ཁྲིམས་བདེ་བ་དང་། །བརྟུལ་ཞུགས་ཆོས་ལ་
མཆོག་ཏུ་གཞོལ། །ལྷ་ནི་རྗེས་སུ་དྲན་པར་ལྡན། །རིགས་པས་གཉིད་ལོག་གཉིད་མི་ལོག །སྨན་ལ་དགའ་ཞིང་ཚིག་འཇམ་པས། །བཅུད་ཀྱིས་ལེན་ནི་བརྩམ་པར་བྱ། །དེ་ཉིད་སྣུམ་ཆོས་དུགས་བྱས་ནས། །ཨ་རུ་ར་དང་སྐྱུ་རུ་ར། །རྒྱམ་ཚ་བཅའ་སྒ་པི་པི་ལིང་། །ཤུ་དག་ཡུང་བ་བྱི་དང་ག །
བུ་རམ་ཆུ་དྲོན་སྦྱར་བ་ནི། །བླུད་ན་ལེགས་པར་འཁྲུ་བར་འགྱུར། །དེ་ནས་ལུས་ནི་དག་འགྱུར་ཞིང་། །ཐུག་སོགས་རིམ་པར་སྤྱད་ནས་ཀྱང་། །ཞག་གསུམ་མམ་ནི་ཞག་ལྔའམ། །ཞག་བདུན་བར་དུ་ཞུན་མར་བཅས། །ནས་ཐུག་དག་པར་གྱུར་གྱི་བར། །སྦྱིན་ཞིང་བཤང་རྙིང་དག་པར་བྱ། །
เล่ม ๑๙๘ · หน้า 325a
དེ་ལྟར་ལྟོ་ནི་སྦྱངས་བྱས་ནས། །གོམས་པར་ཤེས་པས་གང་ཞིག་ལ། །གང་ཞིག་འཚམ་པ་དེ་ཀུན་བརྟགས། །བཅུད་ཀྱིས་ལེན་ནི་སྦྱིན་པར་བྱ། །ཨ་རུ་ར་སྟོང་དེའི་སུམ་འགྱུར། །སྐྱུ་རུ་ར་དང་བཅས་པ་དང་། །རྩ་བ་ལྔ་བོ་ལྔ་རྣམས་ནི། །སྲང་ནི་ཉིས་བརྒྱ་ལྔ་བཅུ་
དག །ཆུ་ནི་བཅུ་འགྱུར་ནང་དུ་བསྐོལ། །ཁུ་བ་བཅུ་ཆ་ལུས་པ་རུ། །ཨ་རུ་རྣམ་རྒྱལ་སྐྱུ་རུ་ར། །བརྡུངས་ལ་རུས་པ་ཕྱུང་ནས་ནི། །ཁུ་བ་དེ་ཡི་ནང་དུ་ནི། །ཤིང་ཚ་སུག་སྨེལ་པི་པི་ལིང་། །ག་དུར་སྐྱེར་པ་ཨ་རུ་ར། །ཙནྡན་མ་དུ་ཀ་པར་ཎི། །ཤཾ་ཀ་པུཥྤ་ཀ་ན་ཡ། །ཤུ་དག་གླ་བ་ཤིང་མངར་
དང་། །བྱི་དང་ག་ནི་ཕུལ་རེའི་ཚད། །ཁར་དཀར་སྲང་སྟོང་ཆིག་བརྒྱ། །ཞུན་མར་བྲེ་ནི་བཅུ་གཉིས་དང་། །ཏིལ་མར་བྲེ་ནི་བརྒྱད་བཅས་པ། །ལྡེ་གུར་གྱུར་གྱི་བར་དུ་བསྐོལ། །ཕབ་ལ་བསྒྲངས་པར་སྦྲང་རྩི་ནི། །སྲང་ནི་སུམ་བརྒྱ་ཉི་ཤུ་གཞུག །དེ་ནས་གཟར་བུས་དཀྲུགས་ནས་ནི། །མར་
གྱི་སྣོད་དུ་གཞུག་པར་བྱ། །གང་ཞིག་ཟས་གཅིག་ལ་མི་གནོད། །དེ་ནི་འདི་ཡི་ཚད་དུ་བཤད། །ཞུ་བའི་ཚེ་ན་དྲུག་ཅུ་པ། །འོ་མར་བཅས་པའི་ཁ་ཟས་སྦྱིན། །བཅུད་ཀྱིས་ལེན་འདི་ཚངས་པས་བཤད། །དགེ་ཞིང་དཔལ་ཡོན་ཅན་ཡིན་ཞིང་། །མཁའ་ལ་གནས་དང་བྱིས་པ་རྩེ། །དེ་བཞིན་
དཀའ་ཐུབ་པས་བསྟེན་བྱས། །ལུས་སྙོམ་ངལ་དང་སྐྲ་དཀར་དང་། །གཉེར་མའི་སྐྱོན་ནི་སྤང་འགྱུར་ཞིང་། །ཡིད་གཞུངས་དྲན་དང་སྟོབས་ལྡན་ཞིང་། །ཚེ་རིང་བར་ཡང་འགྱུར་བ་ཡིན། །སྐྱོན་མེད་ཨ་རུ་ར་དང་སྐྱུ་རུ་ར། །སྟོང་དང་པི་པི་ལིང་ནི་སྟོང་དང་བཅས། །རྒྱ་སྐྱེགས་ཤིང་གཞོན་ཐལ་བའི་ཆུ་
སྦྱར་བ། །སྣོད་དུ་བཞག་སྟེ་ལེགས་པར་སྦངས་ནས་ནི། །སླར་ཕྱུང་གྲིབ་མར་བསྐམས་ཏེ་ཕྱེ་མར་བྱས། །ཁ་ར་དཀར་པོ་བཞི་ཆ་མར་དང་ནི། །སྦྲང་རྩི་བཞི་འགྱུར་བཅས་པ་མར་གྱི་ནི། །བུམ་པར་བཅུག་སྟེ་ས་བརྐོས་པར་བཞག་ལ། །ཟླ་བ་དྲུག་ལོན་ནས་ནི་སླར་ཕྱུང་སྟེ། །སྔ་དྲོའི་དུས་སུ་མེ་
དྲོད་ཇི་བཞིན་བཟའ། །རྟག་ཏུ་མཐུན་པའི་ཟས་ནི་བཟའ་བར་བྱ། །དེ་ལྟར་མ་ལུས་ཟོས་ན་ལོ་བརྒྱ་འཚོ། །ནད་མེད་པ་དང་སྐྲ་དཀར་གཉེར་མ་མེད། །ལུས་ཀྱི་སྟོབས་འཕེལ་རྒྱས་པར་འགྱུར་བ་དང་། །མཆོག་ཏུ་དྲན་གསལ་ཡིད་ནི་གཞུངས་པར་འགྱུར། །སྐྱོན་མེད་རྒྱ་སྐྱེགས་ཤིང་རློན་པ། །
เล่ม ๑๙๘ · หน้า 325b
ཐོར་ཏོ་བཅད་ལ་གཞོག་པ་ཡི། །སྡོང་བུ་ཁྲུ་གཉིས་བརྐོས་པའི་ནང་། །སྐྱུ་རུ་ར་ནི་སར་པས་དགང་། །རྩ་བའི་བར་དུ་འཇག་མས་དཀྲི། །པདྨ་སྐྱེས་པའི་འདམ་གྱིས་བསྐུ། །དེ་ནས་རླུང་མེད་གནས་སུ་ནི། །ལྕི་བ་སར་པ་གཙང་མས་བཙོ། །ཚོས་ཤིང་སྐྱུ་རུ་ར་སྤངས་ནས། །སྦྲང་རྩི་མར་
བཅས་མི་ཡིས་བཟའ། །དེ་རྗེས་འོ་མ་མར་བཅས་པ། །ཅི་འདོད་པར་ནི་བཏུང་བར་བྱ། །དེ་ཉིད་ཀྱིས་ནི་ཟླ་གཅིག་བར། །བསྟེན་ཞིང་སྤང་བར་བྱ་བ་རྣམས། །དེ་ནི་འབད་དེ་སྤང་བར་བྱ། །ཆུ་ནི་གྲང་མོ་ལག་པ་ཡིས། །རེག་པ་ཙམ་ཡང་མི་བྱའོ། །དེ་ལྟར་ཞག་ནི་བཅུ་གཅིག་འདས། །སྐྲ་
སོ་སེན་མོ་ལྷགས་པར་འགྱུར། །དེ་ནས་ཉིན་ཞག་ཅུང་ཟད་ནས། །གཟུགས་བཟང་བུད་མེད་ལ་ཕོད་ཅིང་། །སྟོབས་ནི་གླང་པོ་དང་འདྲར་འགྱུར། །མཆོག་ཏུ་ཡིད་གཞུངས་སྙིང་སྟོབས་དང་། །བློ་ལྡན་ལོ་སྟོང་འཚོ་བར་འགྱུར། །རྩ་བ་བཅུ་པ་བ་བླ་དང་། །གླ་སྒང་ཐལ་ཏྲེས་ཛི་བ་ཀ །ཨུཏྤལ་
དང་པརྞི་གཉིས། །ཀརྐ་ཏ་སྲིང་པི་པི་ལིང་། །མེད་སུག་སྨེལ་ཏ་མ་ལ། །འཚོ་བྱེད་རྒུན་འབྲུམ་ཨ་ཀ་རུ། །མ་ནུ་ཟུར་བ་བ་སྤྲུ་བ། །རམ་ཉེ་བ་གཉིས་སླེ་ཏྲེས་དང་། །ཀ་ཀ་ན་ས་ཨ་རུ་ར། །བ་ཤ་ཀའི་རྩ་བིད་རི། །སྲང་རེ་གཅིག་ཏུ་བསྲེས་ནས་ནི། །སྐྱུ་རུ་རའི་འབྲུ་ལྔ་བརྒྱ་ནི། །
ཆུ་བྲེ་བཅུ་དྲུག་ནང་དུ་བསྐོལ། །དེ་ཡི་ཁུ་བ་བཞི་ཆ་ལུས། །སྐྱུ་རུ་ར་ཡི་རུས་པ་བསལ། །མར་དང་ཏིལ་མར་སྲང་བཅུ་གཉིས། །ནང་དུ་ལེགས་པར་བརྔོས་ནས་ནི། །ཀ་ར་དཀར་པོ་སྲང་ལྔ་བཅུ། །བཏགས་ཏེ་ལྡེ་གུའི་ཚུལ་དུ་བསྐོལ། །སྣུམ་ཕྱེད་ཀྱིས་ནི་སྦྲང་རྩི་གཞུག །སྨིག་རྐང་
སྲང་ནི་བཞི་དག་དང་། །པི་པི་ལིང་ནི་སྲང་གཉིས་དང་། །དྲི་བཟང་བཞི་ནི་སྲང་གཅིག་གཞུག །དེ་ལ་ཚད་ཙམ་བཟའ་བྱ་ཞིང་། །ཁང་པར་གནས་ཤིང་འཕྲོད་ཟས་བསྟེན། །འདི་ནི་དྲང་སྲོང་འཕོ་བས་བསྟན། །དྲང་སྲོང་འཕོ་བས་གང་ཟོས་པ། །རྒས་པས་ཉེན་པར་གྱུར་པ་ཡང་། །བུད་མེད་ཀྱིས་
ནི་མིག་ཏུ་སྡུག །ཆོ་ག་བཞིན་དུ་བསྟེན་གྱུར་ན། །ལུད་པ་དབུགས་མི་བདེ་རིམས་དང་། །སྐེམས་དང་སྙིང་ནད་དྲེག་ནད་དང་། །གཅིན་དང་ཁུ་ཆུ་ལ་གནས་དང་། །སྐད་འགགས་པ་ཡང་སེལ་བར་བྱེད། །བྱིས་པ་རྒན་དང་གློ་འགྲམ་གཅོང་། །རེད་པའི་ཉམས་སྟོབས་འཕེལ་བར་བྱེད། །
เล่ม ๑๙๘ · หน้า 326a
ཡིད་གཞུངས་དྲན་དང་མདངས་ལྡན་དང་། །ནད་མེད་ཉིད་དང་ཚེ་འཕེལ་དང་། །རླུང་ནི་བདེ་བར་རྒྱུ་བྱེད་ཅིང་། །བུད་མེད་ལ་ཕོད་སྟོབས་དང་ནི། །དབང་པོ་གསལ་ཞིང་མེ་དྲོད་སྐྱེད། །ཤིང་མངར་སྨིག་རྐང་པི་པི་ལིང་། །ལྕེ་མྱང་ཚ་དང་བཅས་པ་དང་། །ལྕགས་ནི་སྣ་རེ་
གསེར་དང་ནི། །ཤུ་དག་སྦྲང་རྩི་ཞུན་མར་རམ། །ཁ་ར་དཀར་པོ་འབྲས་བུ་གསུམ། །ལོ་གཅིག་བསྟེན་ན་བཅུད་ལེན་འགྱུར། །ནད་ཀུན་འཇོམས་ཤིང་དྲན་པ་དང་། །ཡིད་གཞུངས་བློ་ནི་སྐྱེད་པར་བྱེད། །མ་དུ་ཀ་པརྞི་ཡི་ཁུ་བ་འམ། །ཤིང་མངར་ཕྱེ་མ་འོ་མར་བཅས་པ་ནི། །ལྷན་ཅིག་
སྦྱར་བ་མེ་དྲོད་ཇི་བཞིན་སྦྱིན། །སླེ་ཏྲེས་ཤང་ཀ་པུཥྤའི་མེ་ཏོག་བཅས། །ལྡེ་གུར་སྦྱར་བ་མེ་དྲོད་ཇི་བཞིན་དུ། །བསྟེན་ན་ཚེ་ནི་སྦྱིན་པར་བྱེད་པ་དང་། །ནད་འཇིག་སྟོབས་སྐྱེད་མདོག་ནི་གསལ་བྱེད་ཅིང་། །མེ་དྲོད་སྐང་གསལ་ཡིད་གཞུངས་སྐྱེད་པར་བྱེད། །བཅུད་ཀྱིས་ལེན་གྱི་སྦྱོར་བ་འདི་དག་
ལས། །ཤངྐ་པུཥྤའི་སྦྱོར་འདི་ཡིད་གཞུངས་མཆོག །སྤངས་མ་པུ་ཙེ་ཤེལ་དང་པ་ཡ་སྱ། །ཤིང་མངར་ཐལ་ཏྲེས་ཙནྡན་འབྲས་བུ་གསུམ། །ཤུ་དག་ཚ་བ་གསུམ་དང་སེར་པོ་གཉིས། །པ་ཏོ་ལའི་རྩ་རྒྱམ་ཚ་ཞིབ་ཏུ་བཏགས། །མར་དང་འོ་མ་བྲེ་ནི་བཅུ་དྲུག་དང་། །ཤངྐ་པུཥྤའི་
ཁུ་བ་སུམ་འགྱུར་བསྐོལ། །བླུད་ན་གླེན་པའང་ཚིག་ལ་དབང་འགྱུར་ཞིང་། །ཐོས་འཛིན་སྤོབས་པ་ཆེ་ཞིང་ནད་མེད་འགྱུར། །པདྨའི་རྩ་བ་སྡོང་བུ་དང་། །གེ་སར་ནང་གི་ས་བོན་རྣམས། །གསེར་བཅས་མར་དང་འོ་མ་ནི། །བྲེ་ནི་བཅུ་དྲུག་ནང་དུ་བསྐོལ། །པདྨ་ལྔ་ཡི་ཐིག་ལེ་ཞེས། །ས་
སྟེང་དག་ཏུ་གྲགས་པ་ཡིན། །ཚུལ་བཞིན་བསྟེན་ན་སྐྱེས་བུ་ནི། །ཉམས་སྟོབས་ཟད་པ་འཕེལ་བར་བྱེད། །གང་ཞིག་ཨུཏྤལ་སྡོང་བུ་ལོ། །རྩ་བ་གེ་སར་ལྡན་བསྐོལ་བ། །ཨུཏྤལ་བཞི་པར་གྲགས་པ་ཡིན། །གསེར་དང་བཅས་པའི་བཅུད་ལེན་གྱི། །སྦྱོར་བ་བསྟེན་ན་བ་ལང་ཡང་། །
ཡིད་གཞུངས་འགྱུར་ན་མིར་ཅི་སྨོས། །བྲམྷི་ཤུ་དག་ཤང་ཀ་པུཥྤ་དང་། །རྒྱམ་ཚ་མང་ཚ་ཀྵ་ར་བི་ཤ་ལ། །བྲམྷི་སོ་བར་ཙལ་པི་པི་ལིང་། །རེ་རེ་ནས་ནི་གསུམ་གསུམ་ཙམ་ཚད་དང་། །གསེར་ནི་ནས་གཉིས་དུག་ནི་ཏིལ་འབྲུ་ཙམ། །ཞུན་མར་སྲང་གཅིག་འདི་དག་ཞིབ་ཏུ་སྦྱར། །
เล่ม ๑๙๘ · หน้า 326b
ལེགས་པར་བཏང་སྟེ་ཞུ་བར་གྱུར་ནས་ནི། །མར་བཅས་ཁ་ཟས་ལོ་གཅིག་བར་དུ་བསྟེན། །དྲན་དང་ཡིད་གཞུངས་བློ་ནི་འཕེལ་འགྱུར་ཞིང་། །ནད་དང་རྒས་པ་དག་ལས་འདས་པ་དང་། །སྙོམ་དང་ངལ་དུབ་སེལ་བྱེད་ལོ་བརྒྱར་འཚོ། །དཔལ་དང་གཟི་བརྗིད་མདངས་དང་ལྡན་པར་
འགྱུར། །ཁྱད་པར་དུ་ནི་མཛེ་ནད་ཤ་བཀྲ་སྐྲན། །དུག་དང་དབྱིག་དུག་རིམས་དང་སྨྱོ་བྱེད་དང་། །སྲིད་སྲུང་རིག་བྱེད་སྔགས་བྱས་གཤེད་བྱེད་དང་། །རླུང་ནད་སྟོབས་ཆེན་འདིས་ནི་ཞི་བར་བྱེད། །ན་ག་བ་ལ་སྟོན་གྱི་ཚེ། །སྐར་མ་རྒྱལ་ལ་བབ་པར་བཏུ། །དེ་ཡི་རྩ་བ་ཞོ་གཉིས་
ཙམ། །ཕྱེར་བཏགས་འོ་མ་སྦྱར་ཏེ་བཏུང་། །ཡང་ན་མར་དང་སྦྲང་རྩིར་སྦྱར། །བལྡག་ཅིང་ཟས་མེད་འོ་མས་འཚོ། །དེ་ལྟར་ལོ་གཅིག་ཟོས་གྱུར་ན། །ལོ་བརྒྱར་འཚོ་ཞིང་སྟོབས་ལྡན་འགྱུར། །གཟེ་མ་འབྲས་བུ་སྐྱེས་པ་རྩ་བར་བཅས། །གྲིབ་མར་བསྐམས་ཏེ་ཞིབ་ཏུ་བཏགས་
ནས་ནི། །རང་གི་ཁུ་བར་སྦངས་པ་དེ་ལས་ནི། །ཆེ་ཚད་ཁྱོར་གང་ཙམ་དུ་བྱས་གྱུར་གང་། །དེ་དང་འོ་མར་སྦྱར་ནས་བཟའ་བྱ་ཞིང་། །ཞུ་ནས་འོ་མ་སྲང་ནི་ཉིས་བརྒྱ་ཟོས། །གཟུགས་བཟང་སྐལ་ལྡན་ལོ་བརྒྱ་ཐུབ་པ་དང་། །འདོད་སྤྱོད་ཁྱུ་མཆོག་པ་ལང་ཚོགས་གནས་འདྲ།
བར་ཧི་ཡི་སྡོང་བུ་རློན་པ་ནི། །འོ་མར་སྦྱར་བཟོས་ཤིང་འོ་མ་བཏུང་། །ཟླ་གཅིག་བར་དུ་ཁ་ཟས་འོ་མས་འཚོ། །རྒས་པའི་ཚོགས་ལས་ངེས་པར་རྒྱལ་བར་འགྱུར། །ཡང་ན་དེ་ཡི་སྡོང་བུའི་ཕྱེ་ཞིབ་མོ། །རང་གི་ཁུ་བ་དང་ནི་ལེགས་སྦྱར་བ། །མར་དང་སྦྲང་རྩིར་སྦྱར་བའི་ལྡེ་གུ་བཟའ། །
ཡང་ན་དེ་བསྐོལ་མར་ནི་བཏུང་བར་བྱ། །དེ་བཞིན་ཨ་ཏི་བ་ལ་བིད་རི། །ཤིང་མངར་དང་ནི་མོན་སྣེའུ་དམེ་རུ་དང་། །ཛི་བན་ཏི་དང་ར་སྣ་ཨ་རུ་ར། །ས་ལ་པརྞི་སླེ་ཏྲེས་སྐྱུ་རུ་ར། །ཤང་ཀ་པུཥྤ་མན་དུ་ཀ་པརྞི། །ཨ་ཤྲ་གནྡྷ་དང་ནི་ཉེའུ་ཤིང་རྣམས། །སྦྱར་བ་བཏང་ན་ཡིད་
གཞུངས་བློ་དང་ནི། །རྒས་སྲ་ན་ཚོད་བརྟན་ཞིང་སྟོབས་སྐྱེད་བྱེད། །ཙི་ཏྲ་ཀ་ཡི་མེ་ཏོག་ནི། །སེར་པོ་དཀར་ནག་ལས་ཤེས་བྱ། །ཆོ་ག་བཞིན་དུ་བཅུད་ལེན་སྦྱར། །གོ་རིམས་བཞིན་དུ་ཡོན་ཏན་ཆེ། །དེ་ཡི་རྩ་བ་གྲིབ་མར་སྐམ། །ཕྱེ་མར་བཏགས་པ་སྦྲང་རྩི་མར། །འོ་མ་
เล่ม ๑๙๘ · หน้า 327a
ཆུ་དང་ཟླ་གཅིག་བར། །བརྟུལ་ཞུགས་ཅན་གྱིས་བསྟེན་བྱས་ལ། །ཕན་པའི་ཟས་ནི་ཟ་བྱེད་ན། །ལོ་བརྒྱར་འཚོ་ཞིང་ནད་མེད་ལ། །ཡིད་གཞུངས་སྟོབས་དང་མདངས་ལྡན་ཞིང་། །ལུས་རྒྱས་མེ་དྲོད་འབར་བར་འགྱུར། །ཏིལ་མར་ལྡེ་གུ་ཟླ་གཅིག་
བར། །བསྟེན་ན་རླུང་ནད་གསོ་དཀའ་འཇོམས། །གཅིན་སྦྱར་ཤ་བཀྲ་མཛེ་ནད་འཇོམས། །དར་བར་སྦྱར་བས་གཞང་འབྲུམ་སེལ། །གོ་བྱེ་ལེགས་པར་སྨིན་པ་ནི། །འབྲས་ཀྱི་ཕུང་པོའི་ནང་དུ་གཞུག །སོས་ཀའི་ཚེ་བཏུས་དགུན་ཚེ་ཕྱུང་། །མངར་ཞིང་སྣུམ་དང་བསིལ་བ་ཡི། །
སྨན་སྦྱར་དེ་ཡི་རྡོག་མ་བརྒྱད། །བརྒྱད་འགྱུར་ཆུར་ནི་བསྐོལ་ནས་ནི། །ཁུ་བ་དེ་ཡི་བརྒྱད་ཆ་ལུས། །འོ་མ་དང་སྦྱར་གྲང་མོ་བཏུང་། །དེ་རྗེས་ཉི་མ་རེ་རེ་ཞིང་། །གོ་བྱེ་རྡོག་མ་རེ་རེས་བསྐྱེད། །ཉི་ཤུ་རྩ་གཅིག་བར་དུ་ནི། །གསུམ་གསུམ་གྱིས་བསྐྱེད་དེ་ཕན་ཆད། །བཞི་བཅུའི་
བར་བསྐྱེད་དེ་འོག་ཏུ། །བསྐྱེད་པ་བཞིན་དུ་དབྲི་བར་བྱ། །བདུན་ཕྲག་བདུན་གྱི་བར་དུ་ནི། །སྟོང་གི་བར་དུ་གཏང་བར་བྱ། །བདག་ཉིད་བསྡམས་ཤིང་འོ་མ་མར། །སཱ་ལུ་དྲུག་ཅུའི་འབྲས་ཆན་བཟའ། །དེ་བཞིན་དུས་ནི་སུམ་འགྱུར་བྱ། །སྦྱོར་བའི་མཐའ་ཡང་སྤྱད་པར་བྱ། །སྔོན་
གྱི་ལེགས་སྨོན་འཐོབ་འགྱུར་ཞིང་། །ཁྱད་པར་དུ་ནི་མེ་དྲོད་སྐྱེད། །གཅིན་སྙི་སྲིན་བུ་གཞང་འབྲུམ་མཛེ། །ཚིལ་ལས་གྱུར་པའི་གཞང་འབྲུམ་འཇོམས། །གོ་བྱེའི་འབྲས་བུ་སྐྱོན་མེད་པ། །བརྡུངས་ཤིང་ཞིབ་ཏུ་བཏགས་པ་ནི། །བུམ་པར་བཅུག་སྟེང་ས་ནག་བསྐུས། །ས་བརྐོས་
པ་ཡི་ནང་དུ་གཞུག །ཀུན་ནས་བ་ཡི་ལྕི་བས་བསྐོར། །དེ་སྦྱར་མེ་ལ་བཙོས་ནས་ནི། །དེ་ལས་འཛག་པའི་ཁུ་བ་གང་། །བླངས་པ་ཉིན་ཞག་གཞན་ལ་ནི། །དེ་ཡི་བརྒྱད་འགྱུར་སྦྲང་རྩི་དང་། །ཉིས་འགྱུར་མར་དང་སྦྱར་བ་ནི། །ཆོ་ག་སྔ་མ་བཞིན་བསྡམས་ཏེ། །བསྟེན་ན་ཡོན་ཏན་
དེ་ཉིད་ཐོབ། །གོ་བྱེའི་འབྲས་བུ་སྨིན་ཏེ་ལྷུང་གྱུར་པ། །བྲེ་བཞིའི་ཚད་ཙམ་དང་ནི་སོ་ཕག་དང་། །བདར་བའི་ཕྱེ་མ་དག་དང་ཆུ་དང་མཉེ། །བཀྲུས་ཏེ་རླུང་ལ་ལེགས་པར་བསྐམས་ནས་ནི། །བརྡུངས་ཏེ་ཆུ་བྲེ་བཅུ་དྲུག་ནང་དུ་བསྐོལ། །བཞི་ཆ་ལུས་པ་བཙགས་ཏེ་བསྒྲངས་པ་ཡི། །ཁུ་བ་
เล่ม ๑๙๘ · หน้า 327b
དེ་དང་འོ་མ་བྲེ་བཅུ་དྲུག །བསྐོལ་ཏེ་བཞི་ཆ་ལུས་པར་གྱུར་པ་དང་། །དེ་དང་མཉམ་པའི་ཞུན་མར་བཅས་པར་བསྐོལ། །དེའི་ནང་ཁ་རའི་ཕྱེ་མ་ཅི་རན་གཞུག །དེ་ནི་གཟར་བུས་དཀྲུགས་པས་གཅིག་ཏུ་གྱུར། །འབྲས་ཀྱི་ཕུང་པོར་ཞག་བདུན་ལེགས་པར་སྦ། །བདུད་རྩི་འདྲ་བ་དེ་བསྟེན་སྐྱེས་
བུ་གང་། །ཆུ་འམ་འོ་མ་ཤ་ཁུ་འཐུངས་གྱུར་ན། །དྲན་དང་ཡིད་གཞུངས་བློ་གྲོས་སྟོབས་དང་ལྡན། །སྙིང་སྟོབས་དང་ལྡན་གསེར་གྱི་མདོག་དང་འདྲ། །ཚེ་རིང་བ་ཡང་དེས་ནི་ཐོབ་པར་འགྱུར། །ཆུ་བྲེ་བཅུ་དྲུག་ནང་དུ་གོ་བྱེ་ནི། །སུམ་བརྒྱ་བསྐོལ་ཏེ་བཞི་ཆ་ལུས་པ་རུ། །ཏིལ་མར་བྲེ་བཞི་
དེར་ནི་བཅུག་ནས་ཀྱང་། །ཏིག་ཏ་བོང་ང་གཉིས་དང་འབྲས་བུ་གསུམ། །བྲག་ཞུན་སྐྱེར་ཤུན་ད་ལིས་ཕྱེ་མ་གདབ། །བསྐོལ་ན་མཛེ་ནད་མ་ལུས་འཇོམས་པར་བྱེད། །གོ་བྱེ་སྐྱུ་རུ་ར་འམ་ཚ་འམ་ནི། །ཞོ་ཡི་སྤྲིས་མ་ཏིལ་མར་འོ་མ་འམ། །བུ་རམ་འོ་ཐུག་མར་རམ་སྦྲང་རྩིའམ། །
ནས་ཟན་ངག་གམ་ཏིལ་བཏགས་ལྡེ་གུར་བྱས། །སྲན་ཚོད་དག་དང་ལྷན་ཅིག་སྦྱར་བ་ནི། །ལུས་རྒྱས་ཡིད་གཞུངས་ཚེ་རིང་བྱེད་མཆོག་ཡིན། །གོ་བྱེའི་འབྲས་བུ་རྣོན་པོ་ནི། །སྨིན་པ་མེ་དང་འདྲར་གྱུར་པ། །ཆོ་ག་བཞིན་དུ་སྦྱར་བ་ནི། །བདུད་རྩི་དང་ནི་འདྲ་བར་འགྱུར། །བསེ་
ཤིང་འབྲས་བུ་མ་བཅོས་པའི། །བད་ཀན་ནད་དང་ནད་རྙིང་ནི། །འབྲེལ་པ་གང་ཡིན་དེ་མེད་ཅིང་། །མེ་ཡི་དྲོད་ཀྱང་མྱུར་དུ་སྐྱེད། །རླུང་དང་ཚ་བར་འདུག་པ་ནི། །ཁྱད་པར་དུ་ནི་སྤང་བྱ་ཞིང་། །རྒྱ་སྲན་ཞོ་དང་ཚ་དང་ནི། །ཏིལ་མར་བསྐུ་དང་མེ་བསྟེན་སྤངས། །དུ་བ་རི་ཡི་ཤིང་ཞེས་
བྱ། །ནུབ་ཕྱོགས་རྒྱ་མཚོའི་ངོས་ནས་སྐྱེ། །ཆུ་རླབས་གཡོ་བས་བསྐྱོད་པ་དང་། །རླུང་གིས་ལོ་མ་གཡེངས་པ་ཡིན། །དེ་ཡི་འབྲས་བུ་དབྱར་གྱི་ཚེ། །ལེགས་པར་སྨིན་པ་བཏུ་བར་བྱ། །འབྲས་བུ་དེ་ལས་རྐང་ཕྱུང་ནས། །བསྐམས་ཏེ་ཕྱེ་མར་བཏགས་ནས་ནི། །ཏིལ་
བཞིན་བཙིར་བར་བྱ་བའམ། །ལེ་བརྒན་མེ་ཏོག་བཞིན་དུ་བསྐོལ། །དེ་ཡི་མར་བསགས་གྱུར་པ་ནི། །ཆུང་ཟད་པ་ཡི་བར་དུ་བསྐོལ། །ཕབ་སྟེ་བ་ཡི་ལྕི་བ་ཡི། །ནང་དུ་ཟླ་ཕྱེད་ཙམ་དུ་གཞུག །དེ་འོག་དེ་ལས་ཕྱུང་ནས་ནི། །སྣུམ་ཞིང་དུགས་བྱས་དྲི་མ་བསལ། །ཟས་
เล่ม ๑๙๘ · หน้า 328a
ཀྱི་དུས་ནི་བཞིས་ཆོད་པར། །ནང་པར་ཞོ་གཉིས་ཙམ་ཞིག་བཏུང་། །མར་དེ་ཉི་མ་ཤིས་པ་ལ། །སྔགས་འདི་ཡིས་ནི་དག་པར་བྱ། །རྐང་པ་གཉིས་པོ་བརྩོན་པ་ཆེ། །ལུས་ཟུངས་ཐམས་ཅད་སྐྱོང་བྱེད་པར། །འཁོར་ལོ་དབྱིག་པ་དུང་ཐོགས་ལ། །མི་འཕོ་བས་ནི་
ཁྱོད་ལ་བསྒོ། །དེ་གང་འདི་ཡི་ནད་སྟེང་དང་། །འོག་གི་ནད་ནི་དུ་མ་སེལ། །དགོངས་ཀ་སྣུམ་དང་ལན་ཚྭར་བཅས། །ནས་ཐུག་གྲང་མོ་བཏུང་བར་བྱ། །མར་དེ་ཞག་ལྔའི་བར་དུ་བཏུང་། །སྤང་བར་བྱ་བ་ཐམས་ཅད་སྤང་། །ཟླ་ཕྱེད་མུད་གའི་ཁུ་བ་བཏུང་། །མཛེ་ནད་ཀུན་ལས་
ཐར་བར་འགྱུར། །དེ་ཉིད་སེང་ལྡེང་ཁུ་བ་ནི། །སུམ་འགྱུར་དང་ནི་ལེགས་པར་བསྐོལ། །སྔ་མ་བཞིན་དུ་ཟླ་ཕྱེད་གཞག །ལེགས་པར་བསྡམས་ཏེ་ཟླ་གཅིག་བཏུང་། །དེ་ཡིས་ལུས་ནི་བསྐུ་བ་དང་། །ཇི་སྐད་བཤད་པའི་ཟས་ཟོས་པའི། །སྦྱོར་བ་འདི་ཡིས་མྱུར་དུ་ནི། །མཛེ་ཅན་མི་ནི་
གསོ་བར་བྱ། །དེ་ཉིད་སེང་ལྡེང་མེད་པར་ནི། །ཞུན་མར་སྦྲང་རྩི་ལྡན་པར་བཏུང་། །ཟླ་ཕྱེད་བར་དུ་ཤ་ཁུ་བཏུང་། །ལོ་ནི་ཉིས་བརྒྱར་འཚོ་བར་འགྱུར། །དེ་ཉིད་ཞག་ནི་ལྔ་བཅུའི་བར། །སྣ་སྨན་དུ་ནི་བཏང་གྱུར་ན། །ལུས་རྒྱས་ཐོས་པ་འཛིན་པ་དང་། །ལོ་ནི་སུམ་བརྒྱར་འཚོ་བར་འགྱུར། །
པི་པི་ལིང་ནི་པ་ལ་ཤའི། །ཐལ་ཆུར་སྦངས་ཤིང་མར་དང་བརྔོས། །རྡོག་མ་གསུམ་གསུམ་སྔ་དྲོ་དང་། །ཟས་ཀྱི་སྔོན་དུ་བཟའ་བར་བྱ། །བཅུད་ལེན་ཡོན་ཏན་འདོད་པ་ཡིས། །སྦྲང་རྩི་དང་ནི་སྦྱར་ཏེ་བཟའ། །པི་པི་ལིང་བཅུ་ཉིན་རེ་ཞིང་། །རིམ་གྱིས་བསྐྱེད་པར་གྱུར་པ་དག །དེ་བཞིན་
འོ་མར་སྦྱར་ཏེ་བཟའ། །དེ་བཞིན་དུ་ནི་དབྲི་བར་བྱ། །སྨན་ཞུ་ནས་ནི་དྲུག་ཅུ་པའི། །འབྲས་ཆན་འོ་མ་མར་བཅས་བཟའ། །པི་པི་ལིང་ནི་སྟོང་གི་བར། །བཏང་ན་འདི་ནི་བཅུད་ལེན་འགྱུར། །སྟོབས་དང་ལྡན་ལ་དེ་བཏགས་སྦྱིན། །སྟོབས་དབྲི་བ་ལ་བསྐོལ་ཏེ་བླུད། །དེ་བཞིན་ར་ཡི་འོ་
མ་དང་། །ཉིས་སྟོང་གི་ནི་བར་དུ་གཏང་། །པི་པི་ལིང་གི་སྦྱོར་བ་འདིས། །ལུད་པ་དབུགས་མི་བདེ་མགུལ་ནད། །གཅོང་ཆེན་གཞང་འབྲུམ་ཕོ་བའི་ནད། །གཅིན་སྙི་སྐྱ་རྦབ་མི་བཟད་རིམས། །འོར་ནད་སློན་དང་སྐྱིགས་བུ་དང་། །མཛེར་པ་དྲེག་ནད་འཇོམས་པར་བྱེད། །
เล่ม ๑๙๘ · หน้า 328b
པི་པི་ལིང་ནི་སྲང་ཕྱེད་ལྡེ་གུར་བྱས། །ལྕགས་ཀྱི་སྣོད་བསྐུས་ནས་ནི་ནུབ་གཅིག་བཞག །དེ་དང་ཆུ་ནི་སྙིམ་གང་ནང་པར་བཏུང་། །ལོ་གཅིག་བཟའ་བཏུང་སྤྱོད་པ་ཅི་འདོད་བསྟེན། །བཅའ་སྒ་སླེ་ཏྲེས་ཤིང་མངར་བྱི་དང་ཀ །བ་ལ་ཨ་ཏི་བ་ལ་འབྲས་བུ་གསུམ། །གླ་སྒང་ཐང་ཤིང་
ཡུང་བ་ཨ་ཀ་རུ། །མུ་ཟི་པདྨ་ཨུཏྤལ་ཀྲུ་ཏྲུག་ཏྲེས། །ད་ཏ་ཨ་ཤྭ་ཀར་ཎ་ཨ་ས་ན། །བ་ལའི་ལོ་མའམ་སྙིང་པོ་དེ་བཞིན་དུ། །པི་པི་ལིང་བཞིན་ལྕགས་སྣོད་བསྐུ་སོགས་བྱ། །ལོ་བརྒྱ་འཚོ་ཞིང་རྒས་དང་ན་ལས་ཐར། །འོ་མ་སྙིམ་གང་གི་ནི་བཅུད་ལེན་སྨན། །སྦྱར་བ་འདི་
ཡིས་ལྕགས་སྣོད་བསྐུས་པས་ནི། །སྔར་བཤད་ཡོན་ཏན་བས་ཀྱང་ལྷག་བསྐྱེད་ཅིང་། །ཚེ་ཡང་དེ་ལས་ཉིས་འགྱུར་སྐྱེད་པར་བྱེད། །ཨ་ས་ན་དང་སེང་ལྡེང་གི། །ཁུ་བར་སོ་མ་ར་ཛ་སྦངས། །སྦྲང་རྩི་རུ་རྟ་མར་དང་ནི། །ཨ་རུ་ར་དང་ལྕགས་ཕྱེར་བཅས། །ལྡེ་གུ་ལོ་གཅིག་བར་
ཟོས་ན། །རྒས་དང་མི་འཕྲོད་ཟོས་པ་ལས། །ནད་ནི་ཡོངས་སུ་འདོར་བར་བྱེད། །མཛེ་ནད་མི་བཟད་པ་ཡིས་ནི། །ལུས་ནི་ཉེན་གྱུར་གང་ཡིན་པས། །སོ་མ་ར་ཛ་ཏིལ་ནག་གཉིས། །ལོ་གཅིག་བར་དུ་བསྟེན་ན་ནི། །དེ་ནི་ཟླ་རྒྱས་ལྟ་བུར་འགྱུར། །གང་གི་སོ་མ་ར་ཛ་སྦུན་པ་
མེད། །བཏགས་པ་འོ་མ་ལྷན་ཅིག་ཞོར་མནན་པའི། །སྙིང་པོ་ཕྱུང་ལ་སྦྲང་རྩིའི་ལྡེ་གུ་བལྡག །དེ་རྗེས་དེ་ཉིད་ཀྱི་ནི་དར་བ་བཏུང་། །མཛེ་ཡི་ནད་ཀྱིས་ཡན་ལག་ཉམས་པ་དང་། །སྣ་ཆད་སོར་མོ་བྲུལ་བ་ལ་སོགས་པ། །ཤིང་བཅད་རྗེས་ལ་ལྗོན་ཤིང་སྐྱེ་བ་ལྟར། །དེ་ནི་ངེས་པར་
སྐྱེ་བར་འགྱུར་བ་ཡིན། །སྒྲ་གཅན་བདུད་རྩི་བརྐུས་པ་ན། །རྐེ་བཅད་པ་ལས་འཛག་གྱུར་པའི། །བདུད་རྩིའི་ཐིགས་པ་སར་ལྷུང་བ། །སྒོག་སྐྱ་ཉིད་དུ་གྱུར་པ་ཡིན། །ལྷ་མིན་ལུས་ལས་བྱུང་བས་ན། །དེ་ཕྱིར་བྲམ་ཟེས་དེ་མི་བཟའ། །མངོན་དུ་བདུད་རྩི་ལས་བྱུང་བས། །
དེ་ནི་བཅུད་ཀྱིས་ལེན་མཆོག་ཡིན། །གྲང་བའི་དུས་ནའང་སྒོག་སྐྱ་བསྟེན། །དཔྱིད་དུས་བད་ཀན་ཤས་ཆེར་བཟའ། །སོས་ཀའི་དུས་སུའང་སྤྱད་བྱ་ཞིང་། །དབྱར་ནི་རླུང་གིས་གཟིར་ཚེ་བཟའ། །དགུན་ནི་སྣུམ་ཞིང་བསིལ་བ་དང་། །མངར་བས་ཉེ་བར་བསྲེས་པ་དང་། །
เล่ม ๑๙๘ · หน้า 329a
དེ་ནི་ཕྲེང་བ་རྒྱན་དག་དང་། །འཁོར་དང་ལྷན་ཅིག་བསྟེན་པར་བྱ། །དེ་ཡི་ལྡེ་གུ་དཔྱིད་ཀྱི་ཚེ། །ཁ་བ་ཅན་གྱི་ཡུལ་སྐྱེས་པ། །ཤུན་པ་བཤུས་ནས་མཚན་མོ་ནི། །ཆང་སོགས་ལ་ནི་སྤང་བར་བྱ། །དེ་ཡི་ཁུ་བ་ནང་པར་ནི། །རས་ནི་གཙང་མས་བཙགས་
ནས་ཀྱང་། །ཆང་ནི་ལེགས་པར་ལངས་གྱུར་པ། །ཆ་གསུམ་དང་ནི་སྦྱར་བའམ། །ཆང་གཞན་དག་གམ་ཏིལ་མར་རམ། །རང་སྐྱུར་རམ་ནི་ཞོ་ག་ཆུ། །དེ་ཚེ་ཉིད་སྦྱར་ནད་པར་ནི། །ཚད་དང་ལྡན་པར་སྦྱིན་བྱ་ཞིང་། །འོ་མ་ཞུན་མར་ཞག་དང་རྐང་། །སྐམ་སའི་ཤ་ཁུ་
སོ་སོར་ནི། །བསྐོལ་བ་ནད་གཞི་ཇི་བཞིན་བླུད། །ཡང་ན་སྨན་ཁུ་འབའ་ཞིག་བླུད། །དང་པོར་མཁུར་གང་ཙམ་འཐུངས་ན། །མིད་པའི་སྦུབས་ནི་དག་པར་བྱེད། །རྒྱུན་ཏུ་བླུགས་པའི་དུགས་བྱས་ན། །ན་ཞིང་ཟུག་པ་དག་ལ་ཕན། །སྐྱུག་ཅིང་བརྒྱལ་བའི་ནད་ལ་ནི། །འཕྲལ་
དུ་ཆུ་གྲང་དག་ཀྱང་བླུད། །ངལ་བ་མེད་ཅིང་ལུས་ཀྱི་ནི། །གཟི་མདངས་བརྟན་པས་ལྷག་མ་སྦྱིན། །ཚ་བ་བསལ་བར་བྱ་བའི་ཕྱིར། །ཤིན་ཏུ་བསིལ་བས་བསྐུ་བྱ་ཞིང་། །མུ་ཏིག་ག་བུར་ཕྲེང་བ་ཅན། །ཆུ་ཐིགས་ཕྲེའུ་བསྟེན་པར་བྱ། །འདི་ཡི་ཚད་ཆེན་ཕུལ་གང་སྟེ། །ཉི་
ཚེ་ལ་ནི་དེ་ཡི་ཕྱེད། །སྒོག་སྐྱ་སྲང་གཅིག་བཏགས་པ་ནི། །ཟས་དང་བཅས་པའང་བསྟེན་པར་བྱ། །ཞུ་ནས་སཱ་ལུ་རྙིང་པའི་ཆན། །དུང་དང་ཀུནྡ་ལྟར་དཀར་བ། །ཡུ་ཤ་འོ་མ་སྐམ་ས་ཡི། །ཤ་ཁུ་དང་ནི་ལྷན་ཅིག་བཟའ། །སྐམས་པར་གྱུར་ན་ཆང་དང་ནི། །ཆུར་སྦྱར་བ་ནི་
བླུད་པར་བྱ། །ཆང་མི་བཏུང་ན་རང་སྐྱུར་རམ། །རྒུན་འབྲུམ་ཆུ་ནི་བླུད་པར་བྱ། །དེ་ཡི་ལྡེ་གུ་མར་དང་བཅས། །མར་ནི་སྣོད་དུ་གཟར་བུས་དཀྲུགས། །ཞག་བཅུ་གཞག་གམ་དེ་བཞིན་དུ། །ཞག་དང་མཉམ་སྦྱར་སྤྱད་པར་བྱ། །སྒོག་སྐྱ་ཤུན་པ་བཤུས་པའི་སྙིང་པོ་ནི། །བསྲེགས་
ཤ་དག་གམ་བཟའ་བ་སྣ་ཚོགས་སམ། །ཤ་བཏུབས་པའམ་མར་དང་ཚར་བཅས་བཟའ། །ཁ་ཟས་ཉུང་བ་ཅི་འདོད་སྤྱད་པར་བྱ། །ཁྲག་དང་མཁྲིས་པའི་ནད་ནི་མ་གཏོགས་པ། །ནད་གཞི་མ་ལུས་ལྡན་པར་འགྱུར་བའམ། །རླུང་ནད་ཉི་ཚེ་དང་ནི་ལྡན་གྱུར་ལ། །སྒོག་པ་ལས་ལྷག་
เล่ม ๑๙๘ · หน้า 329b
གཞན་སྨན་ཡོད་མ་ཡིན། །ཆུ་དང་བུ་རམ་འོ་མ་སྲེད། །ཤ་ཆང་སྐྱུར་ལ་མི་དགའ་ཞིང་། །མ་ཞུ་བ་ནི་སྤོང་མི་ནུས། །སྒོག་སྐྱ་ངེས་པར་གནོད་པ་སྐྱེད། །མཁྲིས་པ་ལྡང་བའི་འཇིགས་པ་ཡི། །ཐ་མར་བཀྲུ་སྨན་འཇམ་པོ་གཏང་། །དེ་ལྟར་བཅུད་ལེན་ཡོན་ཏན་ནི། །ཡོངས་
སུ་རྫོགས་པ་འཐོབ་པར་འགྱུར། །སོས་ཀའི་ཚ་བས་གདུངས་དྲགས་ལས། །རྒྱ་སྐྱེགས་ཁུ་བ་ལྟར་འཛག་གང་། །གསེར་སོགས་འབྱུང་ཁུངས་དྲུག་གི་བཅུད། །དེ་ནི་བྲག་ཞུན་ཞེས་བྱར་བཤད། །དེ་ནི་ཀུན་ཀྱང་ཁ་ཞིང་ཚ། །ཤས་ཆེར་མེ་དྲོད་ཞུ་རྗེས་ཚ། །གཅོད་པར་བྱེད་དེ་དེ་
ལས་ནི། །ལྕགས་ལས་བྱུང་བ་རབ་ཏུ་བསྔགས། །བ་གཅིན་དྲི་བྲོ་གནག་པ་དང་། །གུ་གུལ་འདྲ་ཞིང་གསེག་མ་མེད། །སྤྱི་བག་སྣུམ་ཞིང་སྐྱུར་བ་དང་། །བསྐ་ཞིང་འཇམ་ལ་ལྕི་བ་ཡི། །བྲག་ཞུན་དེ་ནི་མཆོག་ཡིན་ནོ། །ནད་དང་ནད་པ་རྗེས་མཐུན་པར། །སྨན་དང་བྲག་ཞུན་
ཆ་མཉམ་བྱས། །ལྕགས་ཀྱི་སྣོད་དུ་སྦྱར་བར་བྱ། །དང་པོར་ཆུ་ནི་ཉི་ཚེས་བཀྲུ། །དེ་འོག་བསྐམས་ལ་བསྐོལ་དང་བསྲེ། །བྲག་ཞུན་སྨན་དང་མཉམ་བྱས་ལ། །བརྒྱད་ཆའི་ནང་དུ་བསྐོལ་བར་བྱ། །ཁུ་བ་བརྒྱད་ཆ་ལུས་བཙགས་པ། །དྲོ་འཇམ་ནང་དུ་བྲག་ཞུན་གཞུག །དེ་དང་འདྲེས་
གྱུར་བསྐམས་ནས་ནི། །སྨན་ཆུའི་ནང་དུ་སླར་ཡང་གཞུག །དེ་ལྟར་རང་རང་སྨན་འཕྲོད་ནི། །བསྐོལ་བའི་ཁུ་བར་ལན་བདུན་སྦངས། །དེ་ནས་ཏིག་ཏའི་སྨན་མར་གྱིས། །སྣུམ་ཆོས་བྱས་ནས་སྦྱར་བྱས་ཏེ། །འབྲས་བུ་གསུམ་གྱི་ཁུ་བ་དང་། །ཤིང་མངར་པ་ཏོ་ལའི་ཁུ་བ། །བྲག་
ཞུན་དག་ནི་རེ་རེ་ཡང་། །ཞག་གསུམ་བར་དུ་བླུད་པར་བྱ། །དེ་ནས་དེ་ལ་སྦྱོར་བ་ནི། །དུས་དང་སྦྱར་ཏེ་བླུད་པར་བྱ། །དེ་ལྟར་བྲག་ཞུན་མི་རྣམས་ལ། །ཤིན་ཏུ་ཕན་པར་བྱེད་པ་ཡིན། །ཡོན་ཏན་མ་ལུས་སྐྱེད་བྱེད་ཅིང་། །འཕྲལ་དུ་གནོད་པར་མི་བྱེད་དོ། །ཞག་བདུན་ཕྲག་གཅིག་
ཕྲག་གསུམ་དང་། །ཕྲག་བདུན་ཞོ་གཉིས་སྲང་ཕྱེད་གཅིག །དམན་དང་བར་མ་ཆེན་པོ་ཡི། །བྲག་ཞུན་གོ་རིམས་བཞིན་དུ་སྦྱར། །ལུས་ནི་ཤིན་ཏུ་སྦྱངས་བྱས་ལ། །བྲག་ཞུན་སྦྱང་བ་གཏང་བར་བྱ། །ཟངས་དང་ལྕགས་དང་དངུལ་དང་གསེར། །ཀུན་དང་ཡང་ན་རེ་རེར་སྦྱར། །འོ་མ་དང་ནི་
เล่ม ๑๙๘ · หน้า 330a
ནི་ལྷན་ཅིག་གཏང་། །བཅུད་ལེན་འབྲས་བུ་མྱུར་དུ་འགྲུབ། །རྒྱ་སྲན་མོན་སྣེའུ་དམེ་རུ་དང་། །ཕུག་རོན་ཤ་ནི་རྟག་ཏུ་སྤང་། །གང་ཞིག་བྲག་ཞུན་གྱིས་ནི་མངོན་སུམ་དུ། །མ་བསལ་ནད་ནི་ས་སྟེང་ཡོད་མ་ཡིན། །དུས་སུ་ཆོ་ག་བཞིན་དུ་བསྟེན་གྱུར་ན། །ནད་མེད་
ཉམས་སྟོབས་རྒྱ་ཆེན་སྐྱེད་པར་བྱེད། །ཁང་པར་གནས་པའི་ཁོམ་ལྡན་ཅན། །ཕུན་སུམ་ཚོགས་དང་ལྡན་ལ་ཕན། །དེ་ལས་གཞན་དུ་དེ་རྣམས་ལ། །ཉི་མ་རླུང་གི་ཚེ་ན་བསྟེན། །རླུང་དང་ཉི་ཚན་བཅས་སྦྱོར་བ། །བདེ་བའི་ལོངས་སྤྱོད་མེད་ན་ཡང་། །གང་ཞིག་ལུས་ལ་མི་གནོད་པ། །
མཆོག་ཏུ་དེ་ནི་བཤད་པར་བྱ། །ཆུ་གྲང་འོ་མ་སྦྲང་རྩི་དང་། །མར་ནི་རེ་རེ་གཉིས་གཉིས་དང་། །གསུམ་མམ་ཡང་ན་ཐམས་ཅད་ནི། །ཟས་སྔར་འཐུངས་ན་རྒས་སྲ་བྱེད། །བུ་རམ་སྦྲང་རྩི་བཅའ་སྒ་དང་། །པི་པི་ལིང་ངམ་རྒྱམ་ཚ་དང་། །ཨ་རུ་ར་ནི་གཉིས་གཉིས་དག །རྟག་
ཟོས་བདེ་ཞིང་ལོ་བརྒྱར་འཚོ། །ཨ་རུ་ར་ནི་མར་ནང་བསྲེས། །བཟའ་ཞིང་མར་དེ་འཐུངས་ན་ནི། །རྒས་སྲ་ལུས་ནི་ཡུན་རིང་གནས། །སྟོབས་ནི་འཕེལ་བར་བྱེད་འགྱུར་ཏེ། །ཇི་ལྟར་དམ་པ་བྱས་གཟོ་བ། །ལན་ཅིག་ཕན་འདོགས་ཇི་ལྟ་བཞིན། །སྐྱུ་རུ་ར་ཁུ་སྦྲང་རྩི་དང་། །ཁ་ར་མར་
དང་ལྡེ་གུ་བྱས། །བསྟེན་ཞིང་འཕྲོད་པ་ཟ་བའི་མི། །རྒས་པའི་གནོད་པ་འཇིག་འགྱུར་ཏེ། །ཉིས་བསྲུང་བསྟན་བཅོས་རྒྱ་ཆེན་མཚུངས། །སྐྱུ་རུ་ར་དང་བྱི་དང་ཀ །ཨ་ས་ན་ཡི་སྙིང་པོའི་ཕྱེ། །ལྕགས་ཕྱེ་ཏིལ་མར་སྦྲང་རྩི་ཡི། །མར་བཅས་ལྡེ་གུ་བསྟེན་ན་ནི། །ན་ཚོད་མཛེས་པ་མ་ཉམས་
འགྱུར། །ལྕགས་ཕྱེ་བྱི་དང་ཀ་ཡི་ཕྱེ་མ་དང་། །མར་དང་སྦྲང་རྩི་བསྲེས་ལ་ལོ་གཅིག་ཙམ། །ཨ་ས་ན་ཡི་ཟ་མ་ཏོག་ནང་གཞུག །བསྟེན་ན་སྟོབས་ལྡན་ཚེ་རིང་སྐྲ་གནག་འགྱུར། །བྱི་དང་ག་དང་གོ་བྱེ་བཅའ་སྒ་རྣམས། །མར་དང་སྦྲང་རྩིར་བཅས་པ་གང་གིས་ཟོས། །རྒས་པའི་ཆུ་བོ་ནད་
ཀྱི་རྦ་རླབས་ཅན། །ན་ཚོད་ལྡན་པའི་སྐྱེས་བུ་དེ་བརྒལ་འགྱུར། །སེང་ལྡེང་ཨ་ས་ན་ཡི་ཁུ་བ་དང་། །འབྲས་བུ་གསུམ་དང་སྦྲང་རྩི་མར་སྦྱར་བ། །ཆོ་ག་བཞིན་དུ་བསྟེན་པའི་མི་རྣམས་ནི། །ཚེ་རིང་འགྱུར་བ་འདི་ལས་ངོ་མཚར་མེད། །ཛི་བ་ཀ་ཡི་ཁུ་བ་སོར་མོར་ཆགས། །ཁ་ར་སྦྲང་
เล่ม ๑๙๘ · หน้า 330b
རྩི་མར་དང་འབྲས་བུ་གསུམ། །སྐྱེས་བུ་དམ་པས་བསྟེན་པར་གྱུར་ན་ནི། །རྒས་དང་ནད་ནི་ངེས་པར་བཟློག་པར་འགྱུར། །བ་སྤྲུ་བ་ནི་སར་བ་སྲང་ཕྱེད་དང་། །འོ་མར་བཏགས་པ་ཟླ་ཕྱེད་ཟླ་བ་གཉིས། །ཟླ་དྲུག་ལོ་གཅིག་བར་དུ་འཐུངས་ན་ནི། །རྒས་ཤིང་རྙིང་པའང་སླར་ནི་གཞོན་པར་
འགྱུར། །མུར་བ་ཨང་ཤུ་མ་ཏི་བྲི་ཧ་ཏི། །བ་ལ་པུ་ཤེལ་ཙེ་དང་པ་ཏ་དང་། །ཨ་ས་ན་དང་ཐལ་ཏྲེས་ཨ་ཀ་རུ། །པྲི་ཡང་ཀུ་དང་ཙནྡན་རེ་རེ་ཡིས། །ཆོ་གའང་བ་སྤྲུ་བ་དང་མཚུངས་པ་ཡིན། །ཉེའུ་ཤིང་ལྡེ་གུ་ཁུ་བར་བསྐོལ་བ་དང་། །ཞུན་མར་ཁ་རར་བཅས་པ་ཟ་བྱེད་པ། །དེ་ནི་འཚོ་བའི་
ལམ་དུ་ཞུགས་གྱུར་ཚེ། །ནད་ཀྱི་རྐུན་པོས་ཆོམས་པར་མི་འགྱུར་རོ། །ཨ་ཤྭ་གནྡྷ་འོ་མར་བཅས་པ་ནི། །མར་རམ་ཏིལ་མར་ཆུ་དྲོན་སྦྱར་བ་དང་། །ཟླ་ཕྱེད་བསྟེན་ན་ཉམ་ཆུང་ལུས་རྒྱས་ཤིང་། །ཇི་ལྟར་ལོ་ཏོག་གཞོན་ལ་ཆར་བབ་མཚུངས། །ཉིན་རེ་ཏིལ་ནག་སྲང་ནི་རེ་རེ་དག །ཟོས་པའི་
རྗེས་ལ་ཆུ་གྲང་འཐུངས་གྱུར་ན། །ལུས་ནི་ཤས་ཆེར་རྒྱས་པ་ཉིད་འགྱུར་ཞིང་། །འཆི་བའི་བར་དུ་སོ་ནི་བརྟན་པར་འགྱུར། །གཟེ་མ་སླེ་ཏྲེས་སྐྱུ་རུ་རའི་ཕྱེ་མ། །མར་དང་སྦྲང་རྩི་ཆ་མཉམ་ལྡེ་གུ་ཟོས། །རོ་ཙ་ལུས་བརྟན་ནད་ཀྱི་སྡུག་བསྔལ་ཞི། །ལོ་བརྒྱ་འཚོ་ཞིང་སྐྲ་ནི་ནག་པོར་འགྱུར། །ཏིལ་
ནག་ཨ་རུ་ར་དང་སྐྱུ་རུ་ར། །བ་རུ་ར་དང་བཅས་པ་བརྡུངས་ནས་བསྟེན། །མི་དེ་རྨ་བྱ་བཞིན་དུ་མདངས་ལྡན་ཞིང་། །ཡིད་དུ་འོང་བའི་བདེ་བ་ཐོབ་པར་འགྱུར། །བྲག་ཞུན་མར་དང་སྦྲང་རྩི་བྱི་དང་ག །ཨ་རུ་ར་དང་ལྕགས་ཕྱེ་དངུལ་ཆུ་དང་། །ཏ་བྱ་བསྟེན་ན་ལུས་ཟུངས་རྫོགས་འགྱུར་ཏེ། །ཡར་
ངོ་ཟླ་ཕྱེད་རྫོགས་པའི་ཟླ་བ་འདྲ། །གང་ཞིག་བྲིང་ག་ར་ཛའི་ཁུ་བ་ཟླ་བ་གཅིག །ཉིན་རེ་རྒྱུན་དུ་བསྟེན་པར་བྱེད་པ་དང་། །འོ་མ་འཐུངས་ཏེ་སྟོབས་དང་བརྩོན་འགྲུས་ལྡན། །ལོ་བརྒྱར་འཚོ་བ་དག་ཀྱང་ཐོབ་པར་འགྱུར། །ཤུ་དག་ཀྱང་ནི་ཟླ་བ་གཅིག་བསྟེན་ཞིང་། །འོ་མའམ་མར་རམ་ཏིལ་
མར་བཅས་པ་བསྟེན། །གདོན་གྱིས་མི་ཚུགས་པ་ཡི་ལུས་འགྱུར་ཞིང་། །ཡིད་གཞུངས་ཚིག་ནི་ཤིན་ཏུ་གསལ་བར་འགྱུར། །མ་དུ་ཀ་པ་རྞི་ཡི་མར་དང་བརྔོས། །ཟླ་གཅིག་བར་དུ་ཟས་མ་ཟོས་པར་བསྟེན། །གཟུགས་ནི་རྒྱ་ཆེར་འཚོ་ཞིང་སྤོབས་པ་ཆེ། །གཞོན་ཞིང་མདངས་ལྡན་ཡོན་
เล่ม ๑๙๘ · หน้า 331a
ཏན་ལྡན་པར་འགྱུར། །འབྲས་བུ་གསུམ་དང་ཙང་གི་རི་དང་ནི། །ལྕགས་ཕྱེ་སྲང་ནི་ལྔ་བཅུ་ལས་བྱས་ཤིང་། །ཀོ་ཤ་ད་ཀའི་ཁུ་བའི་ནང་དུ་བཏགས། །རི་ལུ་སུམ་བརྒྱ་བྱས་ནས་རི་ལུ་དེ། །གྲིབ་མར་བསྐམས་ཏེ་རིམ་གྱིས་མ་ལུས་པར། །བཀྲུ་སྨན་བྱ་ཞིང་
ཐུག་སླའི་རིམ་པ་དང་། །ཐུག་སྐ་གར་པོ་ཤ་ཁུ་འབྲས་ཆན་དང་། །མར་ལ་བསྟེན་ཞིང་ཟླ་གཅིག་ལུས་བསྡམས་ལ། །ཟླ་གཅིག་འདས་ནས་རང་དགའ་ཉིད་དུ་སྤྱད། །འབད་པས་དུས་ཀུན་ཏུ་ནི་མ་ཞུ་སྤང་། །ལོ་གཅིག་བར་དུ་སྦྱོར་བ་འདི་བསྟེན་ན། །གང་ཞིག་གསོ་དཀའི་ནད་ཀྱིས་ཉེན་པའང་། །
ཤིན་ཏུ་སྟོབས་ཆེ་སྐྱེས་བུའི་བྱ་བ་རྫོགས། །ལུས་རྒྱས་འཇམ་ཞིང་མིག་དང་རྣ་བ་གསལ། །གཞོན་པ་ཉིད་དང་ལོ་ནི་ལྔ་བརྒྱར་འཚོ། །སེང་ལྡེང་ཤིར་ཤ་བ་དང་ཨ་ས་ན། །རྨ་བྱ་ཨ་རུ་ར་དང་སྐྱུ་རུ་ར། །གོ་བྱེ་བྱི་དང་ག་བཏགས་ཆུ་འགྱུར་ནི། །བཅོ་བརྒྱད་ནང་བསྐོལ་ལྕགས་ཀྱི་དུམ་བུ་གཞུག །
ལྕགས་ཀྱི་སྣོད་དུ་ཞག་གསུམ་ཉི་མ་ཡི། །འོད་ཀྱིས་བསྲོས་ལ་དེ་རྗེས་མེ་ལ་ནི། །ལྕགས་ཀྱི་ཕྱེ་མ་ཞིང་པར་བྱས་ཏེ་བསྐོལ། །དེ་བཙགས་ཁུ་བ་ཆ་གཅིག་འོ་མ་ནི། །ཆ་གཅིག་དེ་བཞིན་གསོ་མའི་ཁུ་བ་གཅིག །ཉེའུ་ཤིང་བསྐོལ་བའི་ཁུ་བ་ཆ་གསུམ་དང་། །འདིར་ནི་མར་སར་ཆ་ནི་བཞི་
དང་སྦྱར། །འདི་དག་གཅིག་ཏུ་ལྕགས་ནག་སྣོད་དུ་བསྐོལ། །ཁར་རྡུལ་མེད་དེ་བཞིན་སྦྲང་རྩི་དང་། །དེ་བཞིན་མར་དང་བསྲེས་པར་གྱུར་པ་དང་། །འཕྲོད་པའི་ཟས་དང་སྐོམ་དང་སྤྱོད་ལམ་བཅས། །སྲང་རེ་རྟག་ཏུ་བསྟེན་པར་གྱུར་ན་ནི། །དཔལ་དང་ལྡན་ཞིང་ཉེས་པ་བསལ་བ་དང་། །
ནགས་ཀྱི་མ་ཧེ་ལྟ་བུའི་སྟོབས་ལྡན་ཞིང་། །རྟ་ལྟར་ན་མགྱོགས་ལ་ལུས་ནི་བརྟན་པ་དང་། །སྐྲ་ནི་བུང་བའི་མདོག་ལྟར་གནག་པ་དང་། །ཁ་ནི་དྲི་ཞིམ་བུད་མེད་མང་བསྟེན་ནུས། །ཚིག་གསལ་ཡིད་གཞུངས་ཕུན་སུམ་ཚོགས་པ་དང་། །ཟླ་གཅིག་བསྟེན་ན་མེ་དྲོད་ཆེ་བ་ཡིན། །དེ་ནི་མི་
ཡི་སེང་གེའམ་མེའམ་ནི། །བཙོ་མ་གསེར་གྱི་མདོག་འདྲའི་ལུས་འཛིན་འགྱུར། །མི་ཡི་སེང་གེའི་སྦྱོར་བ་འདི། །ཟོས་ན་ནད་ཀྱིས་མི་ཉེན་ཏེ། །འཁོར་ལོ་འབར་བའི་ལག་པ་ཡིས། །ལྷ་མིན་ཚོགས་ནི་འཇིགས་དང་འདྲ། །བྲིང་ག་ར་ཛའི་མྱུ་གུའི་ཆོ་ག་འདིས། །བརྡོས་ཤིང་མར་
เล่ม ๑๙๘ · หน้า 331b
བཅས་ཟོས་ལ་བསྡམས་དང་བཅས། །ལྟོ་སྦྱངས་པ་ལ་ཨ་ས་ནའི་ཁུ་བ། །འོ་མ་འཐུངས་ཤིང་ཟས་ཀྱི་བྱ་བ་བྱེད། །ཟླ་གཅིག་བར་དུ་བསྟེན་པར་གྱུར་ན་ནི། །བདེ་ཞིང་ལོ་ནི་ཉིས་བརྒྱའི་བར་དུ་འཚོ། །ལན་ཅིག་སྨྲས་པའི་ཚིག་ཀྱང་ཟིན་གྱུར་ཞིང་། །དྲན་དང་དབང་པོ་ཉམས་པ་མེད་
པར་འགྱུར། །གང་ཞིག་སྦྱོར་བ་འདི་ཡིས་ནི། །ཏིལ་མར་བསྟེན་པར་བྱེད་པ་དག །དེ་ཡིས་ཡོན་ཏན་དེ་ཐོབ་ཅིང་། །ལུས་ནི་ནག་པོ་ཉིད་དུ་འགྱུར། །བཅུད་ཀྱིས་ལེན་ནི་དུས་དང་རྗེས་མཐུན་ཞིང་། །བསྟེན་ནུས་འབྲས་བུར་བཅས་པ་བཤད་པ་ཡིན། །གཞན་དག་ཕན་ཡོན་བཅས་
པ་ཡོད་མོད་ཀྱིས། །རྙེད་པར་དཀའ་བས་བདག་གིས་མ་བཤད་དོ། །བཅུད་ཀྱིས་ལེན་གྱི་ཆོ་ག་ལས། །ཉམས་པས་གལ་ཏེ་ནད་སྐྱེ་ན། །བཅུད་ཀྱིས་ལེན་དེ་སྤངས་ནས་ནི། །དེ་ཡི་སྨན་ནི་ཇི་བཞིན་བྱ། །བདེན་པར་སྨྲ་ཞིང་ཁྲོ་བ་མེད། །དབང་པོ་བསྡམས་ཤིང་བདག་ཉིད་ཐུལ། །
ཞི་ཞིང་དམ་པའི་སྤྱོད་ལ་དགའ། །རྟག་ཏུ་བཅུད་ལེན་ཡིན་ཞེས་བྱ། །ཡོན་ཏན་འདི་དག་ལྡན་གྱུར་པས། །གང་ཞིག་བཅུད་ལེན་བསྟེན་གྱུར་པ། །དེ་ནི་དགའ་ཞིང་ཚེ་རིང་ལ། །འཇིག་རྟེན་འདི་དང་གཞན་དུ་བདེ། །སྤྱོད་པ་བསྟན་བཅོས་རྗེས་འཇུག་ཅིང་། །གམ་ན་གནས་
པའི་སེམས་དང་མཐུན། །དོན་ལ་བློ་ནི་མ་འཁྲུགས་པ། །བཅུད་ཀྱིས་ལེན་ནི་རྫོགས་པ་ཡིན། །ཡན་ལག་བརྒྱད་པའི་སྙིང་པོ་བསྡུས་པ་ལས། །ཕྱི་མའི་གནས་ཀྱི་ལེའུ་སུམ་ཅུ་རྩ་དགུ་པའོ།། །།ཡན་ལག་བརྒྱད་པའི་སྙིང་པོ་བསྡུས་པ་ལས། །རྒས་པ་གསོ་བའི་ཡན་ལག་
རྫོགས་སོ།། །།དེ་ནས་རོ་ཙ་གསོ་བའི་ལེའུ་བཤད་པར་བྱའོ། །སྐྱེས་བུས་རྟག་ཏུ་ཡུལ་བསྟེན་པས། །རོ་ཙ་བར་ནི་འདོད་བྱ་སྟེ། །དགའ་དང་བརྟ་དང་བུ་རྒྱུད་ནི། །ཡོན་ཏན་ལྡན་པས་དེ་ལ་གནས། །བུ་ཚའི་རྒྱུད་ནི་སྐྱེད་བྱེད་ཅིང་། །འཕྲལ་དུ་ཡང་དག་དཀའ་བྱེད་
གང་། །གང་གིས་རྟ་ལྟར་རབ་སྟོབས་ལྡན། །བུད་མེད་ལ་ནི་ཐོགས་མེད་འགྲོ། །བུད་མེད་ལ་རབ་ཆགས་འགྱུར་བ། །གང་དང་གང་གིས་འཕེལ་འགྱུར་བ། །དེ་ནི་རོ་ཙ་བྱེད་པ་སྟེ། །ལུས་ཀྱི་སྟོབས་ཀྱང་སྐྱེད་པའི་མཆོག །ཆོས་དང་གྲགས་དང་ཚེ་རིང་དང་། །འཇིག་རྟེན་གཉིས་ཀའི་
เล่ม ๑๙๘ · หน้า 332a
བཅུད་ལེན་འགྱུར། །གཅིག་ཏུ་སྐྱོན་ནི་མེད་པ་ཡི། །ཚངས་པར་སྤྱོ་ལ་བདག་ཡི་རང་། །སྙིང་སྟོབས་ཆུང་བ་ཉོན་མོངས་པས། །གནོད་པར་གྱུར་པའི་ནད་བུ་ཅན། །ལུས་མི་ཟད་པ་བསྲུང་བའི་ཕྱིར། །རོ་ཙའི་ཆོ་ག་བརྗོད་པ་ཡིན། །ནད་མེད་ལང་ཚོ་ལྡན་པ་
དག །རོ་ཙ་བ་ནི་སྟེན་བྱེད་པ། །དུས་ཚིགས་ཀུན་ལ་ཉིན་རེ་ཞིང་། །ཉལ་པོ་བྱ་བ་དགག་པ་མེད། །དེ་ནས་སྣུམ་གྱུར་སྦྱང་བྱས་པ། །ནི་རུ་ཧ་དང་འཇམ་རྩིར་བཅས། །མར་དང་ཏིལ་མར་སྦྲང་རྩི་དང་། །ཤ་ཁུ་འོ་མ་ཁ་རར་བཅས། །འོ་མ་ཤ་དང་ཤ་ཁུ་བཟའ། །སྦྱོར་བ་ཤེས་པས་
དང་པོར་གཏད། །དེ་ནས་རོ་ཙ་བྱེད་སྦྱོར་བ། །ཁུ་བ་བུ་ཚ་འཕེལ་བྱེད་བྱ། །མེ་ཏོག་དྲི་མནམ་གྲིབ་མ་མེད། །འབྲས་བུ་མེད་པར་གྱུར་པའི་ཤིང་། །ཡལ་ག་གཅིག་པའི་ཤིང་གཅིག་བཞིན། །བུད་མེད་མེད་མི་དེ་དང་འདྲ། །གོམ་འགྲོས་འཁྱོར་ཞིང་ཚིག་མི་གསལ། །
རྡུལ་གྱིས་གཡོགས་པ་ལྟར་སྣང་ཞིང་། །བཞིན་རས་སྣབས་ཀྱིས་གོས་པ་ཡང་། །སྙིང་ནི་དགའ་བར་བྱེད་པ་ཡིན། །རེག་པ་དང་ནི་མཐོང་སྩོགས་ལ། །བུ་མཉམ་བདེ་བ་ཡོད་མིན་ན། །གང་ཞིག་ཆོས་དང་གྲགས་པར་ལྡན། །ང་རྒྱལ་རིགས་འཕེལ་སྨོས་ཅི་དགོས། །ལུས་སྦྱང་བྱས་ཏེ་ཅི་ནུས་པར། །
རོ་ཙའི་སྦྱོར་བ་བརྩམ་པར་བྱ། །འདམ་བུ་གུང་ཤིང་འཇག་མ་སོགས། །པུ་ཤེལ་ཙེ་དང་བི་ད་རི། །ཀཎྜ་ཀ་རིའི་རྩ་བ་དང་། །བ་ལ་འཚོ་བྱེད་ཟངས་རྩིབ། །རམ་ཉེ་བ་གཉིས་མེད་གཉིས། །ཉེའུ་ཤིང་པརྞ་རྣམ་གཉིས་དང་། །ཨ་ཤྭ་གནྡྷ་ཁ་སྲལ་ཕྲེའུ། །ཨ་ཏི་བ་ལ་བ་སྤྲུ་བ། །བི་
ད་རི་ཏི་བ་ཡ་སྱེ། །ར་སྣ་གཟེ་མ་ཛི་བན་ཏི། །ཤིང་མངར་ས་ལ་པརྞི་རྣམས། །རེ་རེའང་སྲང་ནི་གསུམ་གསུམ་ཆ། །མོན་སྲན་གྲེའུ་བྲེ་བཞི་དང་། །ཆུ་བྲེ་སུམ་ཅུ་གཉིས་ནང་བསྐོལ། །ཁུ་བ་བྲེ་བཞི་ལུས་པ་རུ། །མར་བྲེ་བཞི་དང་བིད་རི། །སྐྱུ་རུ་ར་དང་བུ་རམ་ཤིང་། །བྲེ་ནི་བཞི་བཞི་གཞུག་
པར་བྱ། །འོ་མ་མར་གྱི་བཞི་འགྱུར་དང་། །བིར་ཁ་སྲལ་རམ་ཉེ་གཉིས། །ཤིང་མངར་ཕལ་གུ་པི་པི་ལིང་། །རྒུན་འབྲུམ་འབྲ་གོ་བི་ད་རི། །མ་དུ་ཀ་དང་ཉེའུ་ཤིང་པ། །འདི་དག་བཏགས་ཏེ་བཅུག་ནས་ནི། །དེ་བསྐོལ་བཙགས་པའི་ནང་དུ་ནི། །ཀ་ར་དཀར་པོ་སྨིག་རྐང་ནི། །སྨན་ནི་བྲེ་རེ་གཞུག་པ་
เล่ม ๑๙๘ · หน้า 332b
དང་། །པི་པི་ལིང་ནི་སྲང་བཞི་དང་། །ན་ལེ་ཤམ་ནི་སྲང་གཅིག་དང་། །ཤིང་ཚ་སུག་སྨེལ་གེ་སར་རྣམས། །རེ་རེ་སྲད་ནི་ཕྱེད་ཕྱེད་ཕྱེ། །སྦྲང་རྩི་སྲད་ནི་བཅུ་དྲུག་སྦྱར། །དེ་ལས་ཉིན་རེ་སྲང་རེ་བཟའ། །འོ་མ་དང་ནི་ཤ་ཁུ་བཏུང་། །དེས་ནི་རྟ་ལྟར་སྤྱོད་གྱུར་ཅིང་། །མཆིལ་པ་ལྟ་བུར་འདོད་
པ་སྤྱོད། །བིད་རི་དང་པི་པི་ལིང་། །ཤ་ལི་འབྲས་རྩ་པི་ཡ་ལི། །ཁ་སྲལ་ཕྱེ་མ་ཕུལ་རེ་དང་། །དེ་བཞིན་སྦྲང་རྩི་སྲང་བརྒྱད་དང་། །ཁ་རའི་ཕྱེ་མ་སྲང་ལྔ་བཅུ། །མར་སར་སྲང་ནི་བཅུ་དྲུག་སྦྱར། །དེ་ལས་ཞོ་ནི་གཉིས་གཉིས་བཟའ། །བུད་མེད་བརྒྱ་ལ་སྤྱོད་པར་ནུས། །ཁྲ་སྲལ་ཕྲེའུ་ཞོ་
འམ་ནི། །མ་ཤ་འོ་མར་བསྐོལ་ཏེ་བསྒྲངས། །མར་དང་སྦྲང་རྩིར་བཅས་པ་དག །ཟོས་ལ་བ་སར་འོ་མ་བཏུང་། །མཚན་མོ་ཐོག་ཐག་གཉིད་མ་ལོག །དུབ་པ་མེད་པར་ཉལ་པོ་སྤྱོད། །ར་ཐུག་རླིག་པ་འོ་མར་བཙོས། །ཏིལ་དང་ལན་མང་བསྲེས་པ་དང་། །ཁ་རར་བཅས་ཟོས་གང་ཡིན་དེ། །བུད་མེད་
བརྒྱ་ལའང་གསར་སྙམ་སེམས། །བིད་རི་ཡི་ཕྱེ་མ་ནི། །རང་གི་ཁུ་བར་ལན་མང་སྦངས། །ཞུན་མར་སྦྲང་རྩི་བཅས་བལྡགས་ན། །བུད་མེད་བཅུ་ལ་སྤྱོད་པར་ནུས། །པི་ལིང་སྐྱུ་རུ་ར་ཡི་ཕྱེ། །རང་གི་ཁུ་བར་ལེགས་པར་སྦངས། །ཤ་ཁ་མར་དང་སྦྲང་རྩིར་བཅས། །ཟོས་རྗེས་འོ་མ་འཐུངས་པ་གང་། །མི་དེ་
བརྒྱད་ཅུ་ལོན་ན་ཡང་། །ལང་ཚོར་གནས་ཤིང་འདོད་སྤྱོད་ནུས། །ཤིང་མདར་ཕྱེ་མ་ཞོ་གཉིས་དང་། །མར་དང་སྦྲང་རྩི་དེ་མཉམ་པ། །ཟོས་རྗེས་འོ་མ་འཐུངས་གྱུར་ན། །མི་དེ་རྟག་ཏུ་འདོད་སྤྱོད་ནུས། །ཀར་ཀ་ཏ་ཡི་སྲིང་གི་ཕྱེ། །འོ་མར་སྦྱར་ཏེ་འཐུངས་པ་དང་། །ཁ་ར་འོ་མ་མར་བཅས་པའི། །ཟས་ཟོས་བུད་མེད་
ལ་ཕོད་འགྱུར། །པ་ཡ་སྱ་དང་འོ་མ་བསྐོལ། །མར་དང་སྦྲང་རྩི་བཅས་ཟ་ཞིང་། །བ་ནི་ཡར་མའི་འོ་མ་འཐུང་། །དེ་ཡི་ས་བོན་ཟད་མི་ཤེས། །ཁ་སྲལ་ཕྲེའུ་བུ་རམ་གྱི། །ས་བོན་ཕྱེ་མ་ཁ་རར་བཅས། །འོ་མ་བཞོས་མ་ཐག་བཏུང་ན། །ལུག་བོང་ལྟ་བུར་སྤྱོད་པར་འགྱུར། །ཨུ་ཙ་ད་ཡི་ཕྱེ་མ་
དང་། །ཉེའུ་ཤིང་སྦྱར་བའང་དེ་བཞིན་ནོ། །ཞོ་སྤྲིས་ཟླ་བ་ལྟར་དཀར་བའི། །ཚགས་ཀྱིས་བཙགས་པ་ཟོས་ནས་ནི། །ཁ་ར་དྲུག་ཅུའི་འབྲས་ཆན་ཟོས། །རྒན་པོའང་གཞོན་ནུ་བཞིན་དུ་སྤྱོད། །གཟེ་མ་མ་ཤ་ཨ་རུ་ར། །ཁ་སྲལ་ས་བོན་ཉེའུ་ཤིང་པ། །འོ་མ་བཅས་འཐུང་རྒས་པ་ཡང་། །བུད་མེད་
เล่ม ๑๙๘ · หน้า 333a
བརྒྱ་ལ་སྤྱོད་པར་ནུས། །གང་ཡང་སྣུམ་ཞིང་མངར་བ་དང་། །སྟོབས་འཕེལ་ཉམས་ནི་བརྟས་བྱེད་དང་། །ཡིད་ནི་དགའ་བར་བྱེད་པ་གང་། །དེ་དག་ཐམས་ཅད་རོ་ཙར་བཤད། །དེ་བས་རྫས་ནི་འདི་ལྟ་བུས། །བརྟས་བྱས་བུད་མེད་ལ་འཇུག་བྱ། །རང་གི་ཤུགས་ཀྱིས་སྤྱོད་པ་དང་། །
བུད་མེད་ཡོན་ཏན་གྱིས་དགའ་སྤྱད། །ཆོས་ཀྱི་དཔག་བསམ་ཤིང་མྱུ་གུ། །དབང་པོའི་བདེ་བ་ཀུན་བསྟེན་བྱ། །ཡུལ་ནི་ཡིད་དུ་འོང་བ་ལྔ། །འདོད་པའི་ལྷ་ཡི་མདའ་ཡིན་ནོ། །ཡིད་འོང་ཡུལ་ནི་རེ་རེས་ཀྱང་། །ཚིམ་ཞིང་དགའ་བྱེད་མཆོག་ཡིན་ནོ། །བུད་མེད་ལུས་ལ་འདུས་ནས་གང་། །གནས་པ་དེ་ནི་སྨོས་ཅི་
དགོས། །གང་གི་མིང་ཐོས་ན་ཡང་སྙིང་དགའ་ཞིང་། །མཐོང་ན་ངོམས་པར་འགྱུར་བ་མེད་པ་དང་། །དབང་པོ་ཀུན་འདྲེན་ལྕགས་ཀྱུར་འགྱུར་བ་ཡིན། །བུད་མེད་ཁྱོ་ཡི་རྗེས་འཇུག་འཕྱོན་མ་མིན། །སྒྱུ་རྩལ་འཇོ་སྒེག་ན་ཚོད་ལུས་ཀྱིས་བརྒྱན། །དགའ་བའི་ཕྱིར་ནི་ངོ་ཚ་དབེན་པར་སྤྱོད། །ཚིག་སྙན་སྨྲ་ཞིང་
མཚུངས་པར་མངོན་དགའ་བཅས། །བུད་མེད་དེ་ནི་རོ་ཙའི་དོན་མཆོག་བྱེད། །འདོད་པའི་བསྟན་བཅོས་ལས་བཤད་སྐྱོན་མེད་པའི། །ཡུལ་དང་དུས་དང་ཉམས་སྟོབས་རྗེས་མཐུན་ཞིང་། །སྨན་དཔྱད་བསྟན་བཅོས་སྦྱོར་དང་མི་འགལ་བ། །འདོད་པའི་སྤྱོད་པ་མ་ལུས་སྤྱད་པར་བྱ། །བསྐུ་བྱུག་ལུས་
དྲིལ་སྨན་ཆུ་བླུགས་དང་དྲིལ། །མེ་ཏོག་ཕྲེང་བ་སྣ་ཚོགས་རྒྱན་དང་ལྡན། །གླུ་དང་སྙན་དངགས་ལ་སོགས་གཏམ་ལ་མཁས། །རང་བཞིན་ན་ཚོད་མཚུངས་ཤིང་དབང་གྱུར་གྲོགས། །རང་གི་ཁང་པའི་ཉེ་འཁོར་ཁྲུས་རྫིང་བུ། །པདྨའི་གེ་སར་སྦྲང་རྩིས་མྱོས་པ་ཡིས། །སྦྲང་མ་བྱ་དང་བཅས་པས་
གྱུར་པ་ནི། །སྔོ་ཞིང་གཞི་མཉམ་རི་ཡི་འདབ་ན་ནི། །ནགས་ཚལ་ཁྱིམ་དང་ཉེ་བར་འགྱུར་བ་དང་། །མཐོང་ན་དགའ་བའི་ཤིང་ནི་སྣ་ཚོགས་སྐྱེ། །མཉན་ན་བདེ་བའི་ཁུ་བྱུག་སྒྲ་སྙན་སྒྲོགས། །ལུས་བདེ་བུད་མེད་རྒྱན་ལྡན་དུས་དབང་འགྱུར། །སེམས་བདེ་མ་ལུས་འཁོར་གྱིས་བསྐོར་བ་དང་། །
སོ་རྩི་དང་ནི་ཆང་དང་ཆུང་མ་ནི། །ཡིད་འོང་མཚན་མོ་ཟླ་ཟེར་བཅས་པར་འདུག །ཡིད་ནི་དགའ་བར་བྱེད་པ་གང་དང་གང་། །དེ་དང་དེ་ནི་རོ་ཙར་བྱེད་པ་ཡིན། །ཆུང་མའི་ཁ་ནི་ཨུཏྤལ་ལྟར་དྲི་ཞིམ། །པི་ཝང་སྙན་པའི་སྒྲ་ནི་ཉན་བྱེད་དང་། །མལ་སྟན་ཡིད་འོང་མེ་ཏོག་གཅལ་བཀྲམ་པ། །
เล่ม ๑๙๘ · หน้า 333b
ལྕུག་མ་མེ་ཏོག་མྱུ་གུས་བརྒྱན་པ་འདྲ། །ཡུལ་དང་དུས་ལ་གནོད་པ་གང་ཡང་མེད། །ཡུལ་གྱི་ཡིད་ལ་གནོད་པ་ཆུང་ངུའང་མེད། །རོ་ཙའི་སྦྱོར་བ་ཉེ་བར་ལྡན་གྱུར་པ། །འདོད་པའི་འདོད་པ་ཡོངས་སུ་རྫོགས་པར་བྱེད། །གླ་སྒང་པར་པ་ཏ་ནི་རིམས་ལ་ཕན། །སྐོམ་དད་ཆེ་ལ་བོང་པ་
བསྲེགས་པ་ནི། །ཆུ་ཡི་ནང་དུ་གསུར་པའི་དངས་མ་ཕན། །སློན་ལ་འབྲས་ཡོས་ཆུ་སོའི་ནང་བྲག་ཞུན། །གཅིན་སྙི་སྐྱུ་རུ་ར་དང་སེར་པོ་གཉིས། །སྐྱ་རྦབ་ནད་ལ་ལྕགས་ཀྱི་ཕྱེ་མ་མཆོག །རླུང་དང་བད་ཀན་ལ་ནི་ཨ་རུ་ར། །མཆེར་པའི་ནད་ལ་པི་པི་ལིང་མཆོག་ཡིན། །གློ་རྡོལ་བ་ལ་
རྒྱ་སྐྱེགས་ཁུ་བ་བསྔགས། །དུག་གི་ནད་ལ་ཤིར་ཤ་རབ་ཏུ་བསྔགས། །ཚིལ་དང་རླུང་ནད་ལ་ནི་གུ་གུལ་ཕན། །ཁྲག་མཁྲིས་ལ་ནི་བ་ཤ་ཀ་རབ་བསྔགས། །འཁྲུ་བའི་ནད་ལ་དུག་མོ་ཉུང་ཕན་ཞིང་། །གཞང་འབྲུམ་གོ་བྱེ་དབྱིག་དུག་ལ་གསེར་ཕན། །ཚོ་ཆེས་པ་ལ་སྐྱེར་ཁཎྜ་བསྔགས་
ཤིང་། །སྲིན་བུའི་ནད་ནི་བྱི་དང་ག་ཡིས་འཇོམས། །གཅོང་ཆེན་ལ་ཆང་ར་ཤའམ་འོ་མ་ཕན། །མིག་གི་ནད་ལ་འབྲས་བུ་གསུམ་རབ་ཕན། །དྲེག་ནད་ལ་ནི་སླེ་ཏྲེས་རབ་བསྔགས་ཤིང་། །ཕོ་བའི་ནད་ལ་དར་བ་གསར་པ་མཆོག །མཛེ་ལ་སེང་ལྡེང་སྙིང་པོ་བསྟེན་པས་མཆོག །ནད་ཀུན་ལ་ནི་བྲག་
ཞུན་རབ་ཏུ་བསྔགས། །སྨྱོ་བྱེད་ནད་ལ་མར་ནི་རྙིང་པ་ཕན། །བརྗེད་བྱེད་ནད་ལ་བྲམྷིའི་རྩ་བ་ཕན། །མྱ་ངན་ལ་ནི་ཆང་ནི་བླུད་པས་ཕན། །གཉིད་མེད་པ་ཡི་ནད་ནི་འོ་མས་སེལ། །ཆམ་པ་ཞོ་ནི་སྦྱར་མ་དག་གིས་སེལ། །རིད་པའི་ནད་ལ་ཤ་ནི་སྦྱིན་པར་བྱ། །རླུང་གི་ནད་ལ་སྒོག་སྐྱ་རབ་ཏུ་བསྔགས། །ཡན་
ལག་རེངས་པའི་ནད་ནི་དུགས་ཀྱིས་སེལ། །ཕྲག་པ་ཕྲག་གོང་ལག་ངར་ན་བ་ལ། །ཐང་ཆུ་ཁ་བོར་ཡི་སྣ་སྨན་གཏང་། །གླད་པའི་ནད་ལ་མར་སར་ཧྭགས་ཀྱིས་སེལ། །དམུ་རྫིང་རྔ་མོའི་གཅིན་དང་འོ་མས་སེལ། །མགོ་བའི་ནད་ཀུན་ལ་ནི་སྣ་སྨན་བསྔགས། །ཁོང་འབྲས་གསར་དུ་བྱུང་ལ་གཏར་ག་གདབ། །
ཁ་ཡི་ནད་ཀུན་ལ་ནི་མཁུར་བཀང་ཕན། །མིག་ནད་སྣ་སྨན་མིག་སྨན་བརྟབས་སེལ། །རྒས་པ་ལ་ནི་འོ་མ་ཞུན་མར་ཕན། །བརྒྱལ་ལ་ཆུ་གང་བླུགས་དང་གྲིབ་མ་ཕན། །དྲོད་ཆུང་ངལ་དང་སྒེའུ་གཤེར་ཚ་རན་ཕན། །དུབ་ལ་ཆང་འཐུངས་ལུས་ནི་ཁྲུས་བྱས་ཕན། །སྡུག་བསྔལ་བཟོད་དང་བརྟན་ལ་རྩོལ་
เล่ม ๑๙๘ · หน้า 334a
པ་ཕན། །གཅིན་སྲི་བ་ལ་གཟེ་མ་ཕན་པ་ཡིན། །ལུད་པ་ལུ་ལ་ཀཎྜ་ཀ་རི་ཕན། །རྩིབ་ལོགས་གཟེར་ལ་པུཥྐར་མཱུ་ལ་ཕན། །རྒས་སྲ་བ་ལ་སྐྱུ་རུ་ར་ཕན་ཞིང་། །རྨ་ལ་འབྲས་བུ་གསུམ་དང་གུ་གུལ་ཕན། །དེ་ལྟར་ནད་རྣམས་ཀྱི་ནི་སྨན་གྱི་མཆོག །བཤད་པས་ནད་
རྣམས་ཞི་བར་ནུས་པ་ཡིན། །དེ་ནི་ཡུལ་དང་དུས་ཀྱི་སྟོབས་ལས་ནི། །ཅི་རིགས་པར་ནི་བརྟགས་ཏེ་སྦྱར་བར་བྱ། །དེ་ལྟར་རྒྱུན་ཤེས་བུ་ལས་གཞུང་གི་མདོ། །ལེགས་པར་བཤད་པ་དེས་ནི་མ་ངོམས་པས། །མེ་བཞིན་འཇུག་སོགས་བློ་མཐུན་དད་པས་འདུད། །ཐེ་ཚོམ་འདི་ནི་མེ་བཞིན་འཇུག་གིས་དྲིས། །
སྐལ་ལྡན་ཁ་ཅིག་བདག་ཉིད་མཁས། །སྨན་དང་ནད་གཡོག་ཕུན་སུམ་ཚོགས། །སྨན་པ་རྒན་པོའི་ལུང་གིས་ནི། །རྗེས་སུ་འཇུག་ཀྱང་ནད་བཅས་ཤིང་། །ནད་ཀྱིས་སྲོག་ནི་ཟད་པར་སྣང་། །གཞན་དག་དེ་ལས་གོ་བཟློག་སྣང་། །དེ་ཕྱིར་ཕན་དང་གནོད་པ་ཡི། །འབྲས་བུ་ངེས་པ་མ་མཆིས་
ན། །འདིར་ནི་བསྟན་བཅོས་ཀྱིས་ཅི་བསྟན། །དེ་ལྟར་མེ་བཞིན་འཇུག་སོགས་སློབ་མའི་ཚོགས། །རྟོག་པ་སྐྱེས་ལ་རྒྱུན་ཤེས་བུ་ཡིས་ནི། །དེ་ཉིད་མ་ལུས་རྣམ་པར་བཤད་གྱུར་པ། །གསོ་བྱས་མ་བྱས་མཉམ་པོར་བྱ་མི་རིགས། །ཡན་ལག་དྲུག་ཅུ་ལྡན་པ་ཡི། །གསོ་བྱེད་བདེ་
འགྱུར་ཡོད་མོད་ཀྱི། །ནད་ཀྱི་འདམ་དུ་བྱིང་བ་ལ། །ལག་ནས་འདྲེན་ཐབས་སྨན་ཡིན་ནོ། །འཚོ་དང་འཆི་བར་འགྱུར་བ་ལ། །ཀུན་ལ་སྨན་ཡོད་མ་ཡིན་ཞིང་། །ཐབས་ལ་ལྟོས་པ་མ་ཡིན་ལ། །གཞན་དུ་ཐབས་ལ་ལྟོས་པའི་ནད། །ཐབས་ཀྱིས་བསྒྲུབས་ན་འགྲུབ་འགྱུར་བས། །རྒྱུ་
མེད་པར་ནི་གཏན་ཚིགས་མིན། །གང་ཡང་ཁྱེད་ཀྱི་ཕུན་ཚོགས་ནི། །ཀུན་དང་ལྡན་པས་གསོས་ན་ཡང་། །འཆི་འགྱུར་ཞེས་སྨྲ་དེ་མ་ཡིན། །ཐབས་ནི་ཐབས་མིན་འགྱུར་ཡོད་མིན། །གལ་ཏེ་དེ་ལྟའི་ཐབས་ལྡན་ཞིང་། །བློ་ལྡན་གསོ་བ་བྱས་གྱུར་ཀྱང་། །སྔོན་ལས་ཉེས་པ་མ་གྲུབ་པས། །
ཡན་ལག་བཅུ་དྲུག་ལྡན་མེད་ཡིན། །མེ་དང་ཆུ་སོགས་དུགས་དང་ནི། །རེངས་སོགས་མི་འགྲུབ་སུ་ཞིག་ཟེར། །བརྟ་དང་ཉམས་སྨད་འོ་མ་དང་། །འབྲས་ངན་མི་བྱེད་སུ་ཞིག་འདོད། །མ་ཤ་ཁ་སྲལ་ལ་སོགས་ལ། །རོ་ཙ་མི་ནུས་སུ་ཞིག་ཟེར། །བཤང་གཅི་བསྐྱེད་དང་མང་བར་ནི། །ནད་ལ་ཐེ་ཚོམ་སུ་ཞིག་
เล่ม ๑๙๘ · หน้า 334b
ཟེར། །སྔགས་དང་རྒྱུད་ནི་མེད་པ་རུ། །གང་གིས་དུག་ནི་འཇུག་པར་འགྱུར། །གག་པ་ལ་སོགས་གསོ་བ་ནི། །མེད་པར་གང་ཞིག་བདེ་བར་འགྱུར། །འོན་ཀྱང་དུས་མིན་འཆི་ལ་སོགས། །གྲུབ་མཐའ་ཀུན་ཏུ་ངེས་པར་གྲགས། །འབད་པ་ཆེན་པོ་དག་གིས་ནི། །ཇི་ལྟར་གཞན་གྱིས་བཟློག་
པར་ནུས། །ཙནྡན་ལ་སོགས་ཚ་སོགས་པ། །ལུང་ལས་གྲགས་པ་བཞིན་དུ་སེལ། །རིམས་ལ་སྨྱུང་དང་བརྟ་བ་དག །བསྟན་བཅོས་ཉིད་ལས་གྲགས་པ་ཡིན། །ཡན་ལག་བཞི་པའི་ཡོན་ཏན་འབྱོར། །ལེགས་པར་བརྟགས་ནས་སྦྱར་བྱ་ཞིང་། །གཞན་དུ་ནད་ཀྱི་ཚོགས་འཇོམས་
པ། །གསོ་བ་ཐེ་ཚོམ་བཅས་མི་བྱ། །འདི་ནི་དུས་མིན་འཆི་ཞགས་པ། །བརྟན་པོ་བཅོམ་པར་བྱེད་པ་ཡིན། །ནད་ཀྱིས་སྐྲག་ཅིང་འཇིགས་པ་ལ། །སྔགས་མེད་པ་ཡི་སྲུང་སྐུད་ཡིན། །འདི་ནི་འགྲོ་བའི་སྡུག་བསྔལ་རྣམས། །སེལ་བྱེད་བདུད་རྩི་མངོན་སུམ་ཡིན། །སྣད་ངན་
གནས་ན་འཕྲལ་དུ་ནི། །ཧ་ལ་ཧ་ལར་འགྱུར་བ་ཡིན། །བསྟན་བཅོས་ངེས་པ་མི་ཤེས་ཤིང་། །ཚིག་ཙམ་ལ་ནི་རྗེས་གཞོལ་བའི། །གཤིན་རྗེའི་ཞགས་པ་ཐོགས་པ་བཞིན། །སྨན་པ་ངན་པ་རིང་དུ་སྤང་། །སྨན་པ་གཞུང་ལ་ལེགས་མཁས་ཤིང་། །ལུང་ལ་མཁས་པའི་བཟང་པོ་དང་། །
ལས་ལ་གོམས་ཤིང་དགེ་བ་ནི། །བཟང་པོར་འདོད་པ་དམ་པ་ཡིན། །དེ་ལྟར་རྒྱུད་ཀྱི་ཡོན་ཏན་ལྡན། །རྒྱུད་ཀྱི་སྐྱོན་ནི་སྤངས་གྱུར་པ། །གསོ་བའི་བསྟན་བཅོས་མ་ལུས་པ། །ཁྱབ་སྟེ་ཡོངས་སུ་གནས་པ་ཡིན། །དྲང་སྲོང་ཆེན་པོའི་གཞུང་རྗེས་འཇུག །རྒྱ་ཆེའི་དྲི་མ་མེད་པའི་གནས། །རྒྱ་མཚོ་
ཆེན་པོ་ལྟར་ཟབ་ཅིང་། །བསྡུས་དོན་ཉེ་བར་མཚོན་བྱེད་ཡིན། །སྨན་དཔྱད་ཡན་ལག་བརྒྱད་པའི་རྒྱ་མཚོ་བསྲུབས་པ་ལས། །ཡན་ལག་བརྒྱད་བསྡུས་བདུད་རྩིའི་ཚོགས་ཐོབ་གང་། །དེ་ལས་དོན་ཆེན་རྩོལ་བ་ཞན་པ་རྣམས། །དགའ་བར་བྱ་ཕྱིར་རྒྱུད་འདི་ལོགས་ཤིག་བྱས། །འདི་ནི་ལུད་ཆེན་ལས་
གྲགས་ཤིང་། །འབྲས་བུ་མངོན་དུ་སྟོན་བྱེད་པས། །སྔགས་དང་འདྲ་བར་ལེགས་སྦྱར་གྱི། །ལོག་དཔྱོད་ནམ་ཡང་མི་བྱའོ། །འདི་བཀླགས་རྟོགས་དང་ཉམས་བླངས་པས། །ཚེ་རིང་བ་དང་ནད་མེད་དང་། །ཆོས་དང་ནོར་དང་བདེ་དང་གྲགས། །ངེས་པར་འཐོབ་པར་འགྱུར་བ་ཡིན། །འདི་
เล่ม ๑๙๘ · หน้า 335a
ནི་བལྟས་ན་བསྡུས་དོན་རྟོགས་ནུས་པས། །རང་གི་གོམས་ལས་སྨན་པས་བསྐྱོད་མི་ནུས། །རྒྱ་ཆེན་རྒྱུད་གཞན་དག་ལས་གོམས་གྱུར་པས། །མི་བསྐྱོད་གྱུར་གང་དེ་ནི་ངོ་མཚར་མེད། །གལ་ཏེ་ཙ་ར་ཀ་ནི་བསླབས་གྱུར་དེས་ནི་ལེགས་ཐོས་སོགས། །ལས་བཤད་
ནད་ཀྱི་མིང་ཙམ་ཡང་ནི་ཤེས་པར་འགྱུར་མ་ཡིན། །ཙ་ར་ཀ་ལ་མ་བསླབས་གསོ་བ་དག་ནི་མ་གོམས་པའི། །ཉོན་མོངས་དེས་ནི་ནད་པ་རྣམས་ཀྱི་གསོ་བ་ཇི་ལྟར་བྱ། །མངོན་པར་ཞེན་པའི་དབང་གིས་ལེགས་པར་བཤད་པར་གྱུར་པའང་། །ཤིན་ཏུ་རྨོངས་པས་མངོན་པར་སྤྱད་པར་མི་
བྱེད་གང་ཡིན་དེ། །དེ་ནི་དང་པོར་སྨན་དཔྱད་བསྟན་བཅོས་སྐྱོན་མེད་བཀླགས་གྱུར་ཞིང་། །སྐྱེས་བུ་ཚེ་ཡིས་ཇི་སྲིད་ཐུབ་ཀྱི་བར་དུ་བསླབ་པར་བྱེད། །རླུང་དང་མཁྲིས་པ་བད་ཀན་ཞི་བྱའི་ཕྱིར། །ཏིལ་མར་མར་སར་སྦྲང་རྩི་རིམ་བཞིན་བསྟེན། །དེ་ལྟར་ཚངས་པའམ་ཚངས་པའི་
བུ་ཡིས་བཤད། །ཚིག་གི་དབྱེ་བས་བཤད་ཀྱང་ཁྱད་འཕགས་མེད། །སྟོན་པ་པོ་ཡི་དབང་གིས་ནི། །སྨན་གྱི་ནུས་པ་ཁྱད་འཕགས་ཡིན། །དེ་བས་ཕྲག་དོག་སྤངས་ནས་ནི། །བར་མ་ཉིད་ལ་བསྟེན་པར་བྱ། །དྲང་སྲོང་གིས་བཤད་ཕྱིར་དགའ་ན། །ལེགས་ཐོས་ཙ་ར་ཀར་
མ་ཟད། །ལུག་སྩོགས་ཀྱིས་བྱས་ཅི་མི་སློབ། །དེ་བས་ལེགས་བཤད་གཟུང་བར་བྱ། །འདི་ནི་ཚེ་ཡི་རིག་བྱེད་རྒྱ་མཚོ་ཡི། །སྙིང་པོ་ལས་ནི་སྙིང་པོ་བླངས་ནས་སུ། །རྣམ་པར་སྦྱར་ལས་དགེ་བ་གང་ཐོབ་པ། །དེ་ཡིས་འགྲོ་བས་དེ་ཉིད་མཐོང་བར་ཤོག །ཡན་ལག་བརྒྱད་པའི་
སྙིང་པོ་བསྡུས་པ་ལས། ཕྱི་མའི་གནས་ཀྱི་ལེའུ་སྟེ་བཞི་བཅུ་ཐམ་པའོ།། །།སྨན་པའི་བདག་པོ་དགེ་འདུན་གསང་བ་ཞེས་བྱ་བའི་བུ་སྨན་པ་ཆེན་པོ་ཕ་ཁོལ་ཞེས་བྱ་བས་ཡན་ལག་བརྒྱད་པའི་སྙིང་པོ་མཛད་པ་ལས། རྒྱུད་ཕྱི་མའི་གནས་ཏེ་དྲུག་པའོ།། །།སྨན་དཔྱད་ཡན་ལག་བརྒྱད་པའི་
སྙིང་པོ་བསྡུས་པ་ཞེས་བྱ་བ་ཇི་སྙེད་པ་རྫོགས་སོ།། །།རྒྱ་གར་གྱི་མཁན་པོ་ཛཱ་རན་དྷ་ར་དང་། ཞུ་ཆེན་གྱི་ལོཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།
ที่มาและสัญญาอนุญาต
ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ
สัญญาอนุญาต Public Domain · หลักฐาน
README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md
ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)
- หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
- ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด