ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པའི་ཚིག་གི་དོན་གྱི་ཟླ་ཟེར་ཞེས་བྱ་བ

ชื่อสันสกฤต (อักษรทิเบต ตามตัวบท) པ་དཱརྠ་ཙནྡྲ་ཀ་པྲ་བྷཱ་བ་ཏི་ནཱ་མ་ཨཥྚཱཾ་ག་ཧྲྀ་ད་ཡ་བྲྀཏྟི

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

เล่ม ๒๐๒ · หน้า 57a

དང་། །སྦྱོར་བ་སྨན་དང་རྩི་དང་ནི། །ཞི་བར་བྱེད་དང་སྔགས་བྱ་སྟེ། །དེ་དག་སྨན་མིང་རྣམ་གྲངས་ཡིན། །ཞེས་བྱ་བ་ལ། སྨན་ནི་གསོ་བ་དང་ཕན་པ་ཞེས་བྱ་བ་ལ་སོགས་པའི་མིང་གི་རྣམ་གྲངས་ཀྱི་ཚེའི་རིག་བྱེད་ལ་མཁས་པའི་དྲང་སྲོང་

རྣམས་ཀྱིས་བསྟན་ཅིང་བཤད་པ་ཡིན་ནོ། །ཡན་ལག་བརྒྱད་པའི་སྙིང་བོའི་རྣམ་པར་འགྲེལ་བ་ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་པས་ངེས་པར་སྦྱར་བ་ལས། གསོ་བའི་གནས་ལེའུ་ཉི་ཤུ་རྩ་གཉིས་པའི་རྣམ་པར་འགྲེལ་པའོ།། །།ཡན་ལག་

བརྒྱད་པའི་སྙིང་པོའི་གནས་ཞེས་བྱ་བ་གནས་བཞི་བའི་འགྲེལ་པ་རྫོགས་སོ།། །།དེ་ནས་སྐྱུག་སྨན་གྱི་ཆོ་ག་བཤད་བར་བྱའོ། །ཞེས་བྱ་བ་ལ། གསོ་བའི་གནས་ཀྱི་འོག་ཏུ་ཆོ་ག་གྲུབ་བའི་གནས་བཤད་པ་ནི་ཤིན་ཏུ་རིགས་པ་ཁོ་ན་ཡིན་ཏེ། གསོ་བ་ནི་ཆོ་གའི་གནས་ལ་

ལྟོས་པར་བྱ་དགོས་པ་ཡིན་པའི་ཕྱིར་རོ། །དེ་ཡང་། དུས་སྟོབས་བྱ་བ་ཤེས་པ་ཡིས། །སྐྱོ་མ་ཤ་ཁུ་བུ་རམ་ཤིང་། །ཁུ་བ་འམ་ཆོ་ག་ལས་བཤད་ཆང་། །སྐྱུག་སྨན་དོན་དུ་སྦྱར་བར་བྱ། །ཞེས་བྱ་བ་ལ་སོགས་པ་སྨོས་པའི་རིགས་པས་གསོ་བ་ནི་ཕལ་ཆེར་ཆོ་གའི་གནས་ལ་ལྟོས་

དགོས་པ་ཉིད་ཡིན་པའི་ཕྱིར་རོ། །སྐྱུག་པར་བྱེད་པའི་སྨན་རྣམས་བྱ་བའི་སྦྱོར་བ་ནི་ཆོ་ག་སྟེ་ལས་སུ་བྱའོ། །དེ་ལ་ནད་འབྱིན་པར་བྱེད་པ་ནི་སྐྱུག་པའི་སྨན་ཏེ། དེ་ལྟར་སྐྱུག་སྨན་སྔོན་དུ་བཏང་བས་བཀྲུ་སྨན་ལ་སོགས་པ་ལས་རྣམ་པ་ལྔའི་ནང་ན་སྐྱུག་སྨན་མཆོག་ཉིད་ཡིན་པར་བཤད་པ་ཡིན་ནོ། །

རྒྱུན་ཤེས་ཀྱི་བུ་ལ་སོགས་པ་དྲང་སྲོང་ཆེན་པོ་རྣམས་ཀྱིས་འདི་ལྟར་བཤད་དེ་ཞེས་བྱ་བ་ལ་ནི་སྔ་མ་བཞིན་དུ་བཤད་པར་བྱའོ། །སྐྱུག་སྨན་མཆོག་ནི་པོ་སོན་ཆ། །དུར་བྱེད་རྩ་བ་བཀྲུ་སྨན་མཆོག །གཞན་དག་ནད་ཀྱི་དབང་ལས་ནི། །ཁྱད་པར་དུ་ནི་གྱུར་པ་ཡིན། །ཞེས་བྱ་བ་ལ། །

སྐྱུག་སྨན་དུ་བཏང་བའི་སྨན་རྣམས་ཀྱི་མཆོག་ནི་པོ་སོན་ཆ་ཞེས་བྱ་བ་མ་ད་ན་ཕ་ལ་མཆོག་དམ་པ་ཡིན་ཏེ། དེ་ནི་སྐྱོན་མེད་པ་ཡིན་ལ། དེ་བས་ན་སྨན་དེ་ནི་དུས་ཐམས་ཅད་དུ་ནད་ཐམས་ཅད་ལ་ཕན་པ་ཡིན་པའི་ཕྱིར་རོ། །བཀྲུ་སྨན་རྣམས་ཀྱི་ནང་ན་དུར་བྱིད་ཀྱི་རྩ་བ་མཆོག་དམ་པ་ཡིན་ཏེ། རྟག་པར་

เล่ม ๒๐๒ · หน้า 57b

ནད་ཐམས་ཅད་བདེ་བར་འཁྲུ་བར་བྱེད་ཅིང་གནོད་པ་མི་སྐྱེད་པ་ཡིན་བའི་ཕྱིར་རོ། །ཛི་མུ་ཏ་ལ་སོགས་པའི་སྨན་གཞན་རྣམས་ནི་ནད་རེ་རེའི་དབང་དུ་བྱས་པའི་ཁྱད་པར་ལ་ལྟོས་ནས་ཁྱད་པར་དུ་འཕགས་ཤིང་མཆོག་ཏུ་གྱུར་པ་ཡིན་གྱི། པོ་སོན་ཆའི་འབྲས་བུ་དང་། དུར་བྱིད་ཀྱི་རྩ་བ་ལྟར་དུས་

ཐམས་ཅད་ལ་ཕན་ཞིང་མཆོག་ཏུ་གྱུར་པ་མ་ཡིན་ནོ། །པོ་སོན་ཆ་དེ་མདོག་སྐྱ་ཞིང་། །ཤིན་དུ་སྔོ་བ་འམ་མ་ཡིན་པ། །ཉིན་ཞག་ཚེས་གྲངས་ཤེས་པ་ལ། །སོས་ཀ་དཔྱིད་ཀྱི་མཚམས་སུ་བཏུ། །ཕྱིས་ནས་འཇག་མའི་སྣོད་དུ་ནི། །བཅུག་སྟེ་བཅིངས་ལ་བ་ལང་གི །ལྕི་བས་སྣོད་

དེ་བྱུགས་ནས་ནི། །འབྲུ་ཡི་ནང་དུ་གཞག་པར་བྱ། །ཞེས་བྱ་བ་ལ། པོ་སོན་ཆ་དེ་བཏུ་བ་ཡང་མདོག་སྐྱ་བ་སྟེ་སྨིན་པ་ལས་ཤིན་ཏུ་ཐལ་བའི་མདོག་ཧ་ཅང་སྐྱ་བ་མ་ཡིན་པ་དང་། དེ་བཞིན་དུ་ཤིན་ཏུ་སྔོ་བ་ཡང་མ་སྨིན་པ་ཡིན་པས་དེ་ལྟ་བུ་ཡང་མ་ཡིན་ཏེ། དེ་ལྟར་སྨིན་ནས་ཐལ་ཆེས་པ་དང་། མ་

སྨིན་པ་གཉིས་ཀ་མ་ཡིན་པ་དེ་ཉིན་ཞག་དང་ཚེས་གྲངས་ཤིས་ཤིང་བཟང་བ་ལ་སོགས་པའི་དུས་ཚིགས་དང་། དཔྱིད་ཀྱི་དུས་ཀྱི་བར་མཚམས་སུ་ལེགས་པར་བཏུ་ཞིང་བླངས་ནས་ཕྱིས་ཤིང་སྦྱངས་ནས་འཇག་མའི་སྣོད་དུ་བྱས་བའི་ནང་དུ་བཅུག་སྟེ། སྟེང་ནས་སྲད་བུ་ལ་སོགས་པས་

བཅིངས་ལ་དེའི་འོག་ཏུ་བ་ལང་གི་ལྕི་བས་སྣོད་དེའི་ཕྱི་རོལ་ནས་བསྐུ་ཞིང་བྱུག་པར་བྱའོ། །དེ་ལྟར་བསྡུས་བའི་རྗེས་ལ་འཇག་མའི་ཐུམ་བུ་དེ་ཞག་བརྒྱད་ཀྱི་པར་དུ་འབྲས་ཀྱི་ཕུང་པོའི་ནང་དུ་བཅུག་ལ་གཞག་པར་བྱའོ། །འཇག་མས་དཀྲིས་པས་འཇམ་པ་དང་། །སྦྲང་རྩི་ལྟ་བུར་དྲི་ཞིམ་

ལ། །ཞག་བརྒྱད་འདས་པར་གྱུར་པ་དང་། །ཕྱུང་སྟེ་དེ་ནི་ཉི་མར་བསྐམ། །ཞེས་བྱ་བ་ལ། པོ་སོན་ཆ་དེ་འཇག་མས་དཀྲིས་པའི་དབང་གིས་གང་གི་ཚེ་འཇམ་པོར་གྱུར་ཅིང་སྦྲང་རྩི་ལྟ་བུར་དྲི་ཅུང་ཟད་ཞིམ་པར་གྱུར་བ་དང་། ཞག་བརྒྱད་འདས་པ་དེའི་ཚེ་འཇག་མའི་སྣོད་ཀྱི་ནང་ནས་

ཕྱུང་ལ་ཉི་མ་ལ་སྐམ་པར་བྱའོ། །དེ་འོག་པགས་པར་བསྐམས་པ་དང་། །ནང་གི་འབྲས་བུ་ཕྱུང་ནས་ནི། །ཞོ་དང་ཞི་ག་ཆུ་མར་གྱི། །ལྡེ་གུར་མཉེས་ལ་སླར་ཡང་བསྐམ། །ཞེས་བྱ་བ་ལ། །པོ་སོན་ཆ་དེ་ལེགས་པར་བསྐམས་པར་གྱུར་པ་དང་། །ནང་གི་འབྲས་བུ་གང་ཡིན་པ་དེ་ཕྱུང་

เล่ม ๒๐๒ · หน้า 58a

ལ་དེ་ཞོ་ལ་སོགས་པ་དང་མཉེས་ལ། །ལྡེ་གུ་དེ་ཡང་བསྐམ་པར་བྱའོ། །དེ་ནས་ལེགས་པར་སྐམ་ཏེ་བཞག །དགོས་བའི་དུས་སུ་སྦྱར་བར་བྱ། །ཞེས་བྱ་བ་ལ། དེའི་འོག་ཏུ་ནང་གི་འབྲས་བུ་བསྐམས་པ་དེས་རྫའི་བུམ་པ་སར་པ་མགྲིན་པའི་བར་དུ་བཀང་སྟེ།

ལེགས་པར་སྲས་ལ་དེ་ནས་ནམ་སྦྱོར་བ་ལ་དགོས་པའི་དུས་སུ་དེ་སྦྱར་ཞིང་གཏང་བར་བྱའོ། །དེ་ནས་དེ་ལ་ཚད་ཙམ་དུ། །བླངས་ནས་ཆམ་ཆོམ་བརྡུངས་ནས་ནི། །ཤིང་མངར་གོ་བྱེ་བི་ད་ར་འམ། བིམ་པ་ལྕང་མ་སླེ་སྨན་ཏ། །བུ་ཏི་ཨ་པ་མརྒ་དང་། །ཨརྒ་གང་ཡང་རུང་པ་ནི། །

བསྐོལ་བའི་ཆུ་ཡི་ནང་དུ་ནི། །ནུབ་གཅིག་ལེགས་པར་སྦང་བར་བྱ། །ཞེས་བྱ་བ་ལ། དེ་ནས་དེའི་འོག་ཏུ་པོ་སོན་ཆའི་འབྲས་བུ་དེ་ལས་ཅི་ཙམ་གྱི་སློབ་པར་གྱུར་པའི་ཚད་ཙམ་བླངས་ལ། གཏུན་གྱི་ནང་དུ་ཆམ་ཆོམ་བརྡུངས་ཏེ་བཏགས་པ་ཤིང་མངར་ལ་སོགས་པ་གང་ཡང་རུང་བ་བསྐོལ་

བའི་ཆུའི་ནང་དུ་ནུབ་གཅིག་གི་བར་དུ་སྤང་བར་བྱའོ། །དེ་ནས་སྨན་གྱི་ཁུ་བ་དེ། །མཉེས་ཤིང་བཙགས་ལ་ནང་པར་ནི། །མདོ་ནས་བསྟན་པའི་ཆོ་ག་བཞིན། །ལེགས་པར་བླུད་ལ་སྐྱུག་ཏུ་གཞག །ཅེས་བྱ་བ་ལ། དེ་ལྟར་ནུབ་གཅིག་སྦངས་ནས་སྨན་གྱི་ཁུ་བ་དེ་ལེགས་པར་མཉེས་

ལ། ཚགས་ཀྱིས་བཙགས་ཏེ། །ནང་པར་གྱི་དུས་སུ་བླུད་པ་ལ་སྔར་མདོའི་གནས་སུ་ཇི་སྐད་བསྟན་པའི་ཆོ་ག་བཞིན་དུ་ལེགས་པར་བྱས་ཏེ། །སློན་ཞིང་སྐྱུག་ཏུ་གཞུག་པར་བྱའོ། །བད་ཀན་ལས་གྱུར་རིམས་ཆམ་པ། །སྐྲན་དང་ཁོང་འབྲས་རྣམས་ལ་ནི། །ཇི་སྲིད་མཁྲིས་པ་

སྣང་གི་བར། །ཁྱད་པར་དུ་ནི་སྐྱུག་ཏུ་གཞུག །ཅེས་བྱ་བ་ལ། །བད་ཀན་ལས་གྱུར་པའི་རིམས་ལ་སོགས་པའི་ནད་ལ་སྐྱུག་སྨན་བྱིན་ཏེ། དུས་ཇི་སྲིད་དུ་མཁྲིས་པ་སྣང་བར་གྱུར་པ་དེ་སྲིད་ཀྱི་བར་དུ་སྐྱུག་ཏུ་གཞུག་གོ། །པོ་སོན་ཆ་ཡི་འབྲས་བུ་ཡི། །ཕྱེ་མ་བསྐོལ་བའི་ཁུ་བར་ནི། །

འབྲས་བུ་གསུམ་ཕྱེ་ཆ་གསུམ་བཏབ། །ཀོ་བི་ད་ར་སོགས་ཁུར་བཅས། །བླུན་ན་རིམས་དང་དམུ་རྫིང་དང་། །རྨེན་བུ་འབྲས་དང་འབྲུམ་ཆེན་དང་། །གཏུན་འདྲའི་རླུང་ནད་སེལ་བར་བྱེད། །ཅེས་བྱ་བ་ལ། །པོ་སོན་ཆའི་ནང་གི་འབྲས་བུའི་ཕྱེ་མ་འམ། དེ་བསྐོལ་བའི་རང་གི་ཁུ་བ་

เล่ม ๒๐๒ · หน้า 58b

དང་དེའི་སུམ་ཆའི་འབྲས་བུ་གསུམ་གྱི་ཕྱེ་མ་བསྲེས་ལ། ཀོ་པི་དར་ལ་སོགས་པའི་ཁུ་བ་དང་བཅས་པར་བླུད་ན་རིམས་ལ་སོགས་པའི་ནད་སེལ་བར་བྱེད་དོ། །མཁྲིས་པ་བད་ཀན་གནས་ཞུགས་ལ། །ཛི་མུ་ཏ་སོགས་ཁུ་བར་བླུད། །ཅེས་བྱ་བ་ལ། པོ་སོན་ཆའི་ནང་གི་

འབྲས་བུའི་ཕྱེ་མ་དེ་ཛི་མུ་ཏ་ལ་སོགས་པ་སྟེ། །ཛི་མུ་ཏ་ཀ་དང་ཨི་ཀྵ་ཀུ་དང་། ཀ་ཤ་ཏ་ཀི་རྣམ་གཉིས་དང་། །དུག་མོ་ཡུངས་ཀྱི་ས་བོན་བསྐོལ་བའི་ཁུ་བ་དང་སྦྱར་བ་བླུད་ན་མཁྲིས་བ་བད་ཀན་གྱི་གནས་སུ་ཞུགས་པའི་ནད་ལ་ཕན་ནོ། །སྙིང་ཚ་ཁྲག་མཁྲིས་དག་ལ་ནི། །དེ་འབྲས་འོ་མར་

བསྐོལ་བ་ཡི། །འོ་ཐུག་བཅས་པ་བླུད་པར་བྱ། །ཞེས་བྱ་བ་ལ། །པོ་སོན་ཆ་དེའི་ནང་གི་འབྲས་བུ་འོ་མར་བསྐོལ་བ་དང་སྦྱར་ཏེ་བླུད་པའམ། འོ་ཐུག་གི་ནང་དུ་པོ་སོན་ཆའི་ནང་གི་འབྲས་བུ་བཏབ་པ་བླུད་ན་སྙིང་ཚ་བ་ལ་སོགས་པའི་ནད་སེལ་བར་བྱེད་དོ། །བད་ཀན་ལས་གྱུར་པའི་སློན་བྲོ་དང་། །

ཆམ་པ་མུན་ཐིབས་བྱེད་པ་ལ། །དེ་བསྐོལ་འོ་མ་ལས་བྱུང་བའི། །ཞོ་ཡི་སྤྲིས་མ་འམ་ཞོ་བླུད་བྱ། །པོ་སོན་ཆ་སོགས་ལྡེ་གུ་དང་། །བསྐོལ་བའི་འོ་མ་ལས་བྱུང་བའི། །མར་སར་བད་ཀན་གྱིས་དྲོད་ཉམས། །ལུས་སྐམ་པ་ལ་སྐྱུག་སྨན་བྱ། །ཞེས་བྱ་བ་ལ། བད་ཀན་ལས་གྱུར་པའི་སློན་བྲོ་

བ་ལ་སོགས་པའི་ནད་ལ་ནི་པོ་སོན་ཆའི་ནང་གི་འབྲས་བུ་འོ་མ་དང་བསྐོལ་བ་མནན་པ་ལས་གྱུར་པའི་ཞོའི་སྤྲིས་མའམ། །མནན་པའི་ཞོ་དེ་ཉིད་བླུད་ལ་སློན་དུ་གཞུག་པར་བྱའོ། །ཆམ་པའི་ནད་བད་ཀན་གྱི་ལྗན་ལྗིན་མང་དུ་འབྱུང་བར་བྱེད་པའོ། །མུན་ཐིབས་ཞེས་བྱ་བ་ནི། །དབུགས་

མི་བདེ་བའི་ནད་ཀྱིས་མུན་པར་ཞུགས་པ་སྙམ་དུ་སེམས་པའོ། །པོ་སོན་ཆ་ལ་སོགས་བའི་ལྡེ་གུ་དང་བསྐོལ་བའི་འོ་མ་བླུགས་པ་ལས་བྱུང་བའི་མར་སར་བླུད་ན། །བད་ཀན་གྱིས་དྲོད་ཉམས་པར་བྱས་པ་དང་། དེ་བཞིན་དུ་ལུས་བསྐམས་ཤིང་སྦེགས་པར་གྱུར་པ་ལ་སྐྱུག་སྨན་དུ་བྱའོ། །པོ་སོན་ཆ་

སོགས་ཞེས་བྱ་བའི་སོགས་པའི་སྒྲས་ནི། །ཛི་མུ་ཏ་ཀ་དང་། ཨི་ཀྵ་ཀུ་དང་ཀོ་ཤ་ཏ་ཀི་དང་། ར་ཛ་ཀོ་ཤ་ཏ་ཀི་དང་། དུག་མོ་ཡུངས་ཀྱི་ས་བོན་བསྡུས་ཏེ་སྐྱུག་སྨན་གྱི་མཆོག་དྲུག་པ་དེ་དག་བསྐོལ་བའི་ཁུ་བའམ་བཏགས་པའི་ལྡེ་གུ་དང་འོ་མར་བསྲེས་པ་ལས་བྱུང་བའི་མར་སར་རོ། །

เล่ม ๒๐๒ · หน้า 59a

པོ་སོན་ཆ་ཡི་ཁུ་བ་ནི། །བསེ་ཤིང་ཆོ་གས་བཙགས་ནས་ནི། །གཟར་བུར་ཆགས་པའི་བར་དུ་བསྐོལ། །བྱིན་ལ་བདེ་བར་སྐྱུག་ཏུ་གཞུག །ཅེས་བྱ་བ་ལ། པོ་སོན་ཆའི་ནང་གི་འབྲས་བུ་བསྐོལ་བའི་ཁུ་བ་ནི་བསེ་ཤིང་གི་འབྲས་བུའི་ཆོ་ག་ཇི་སྐད་

སྨོས་བ་ལྟར་བཙགས་ཏེ། གཟར་བུ་ལ་ཆགས་ཀྱི་བར་དུ་བསྐོལ། དེའི་འོག་དུ་ལྡེ་གུ་དེ་བྱིན་ལ། བདེ་ཞིང་ཉམ་ང་བ་མེད་པར་སྐྱུག་ཏུ་གཞུག་པར་བྱའོ། །ལྡེ་གུ་དེའམ་དེའི་ཁུ་བ། །བཟའ་དང་བཏུང་བར་སྦྱར་ཏེ་གཏང་། །ཞེས་བྱ་བ་ལ་བཤད་མ་ཐག་པའི་ལྡེ་གུ་དེ་བཟའ་

པ་དང་བཏུང་བ་བསྲེས་ཏེ་བཏང་བ་འམ། །པོ་སོན་ཆའི་ནང་གི་འབྲས་བུ་བསྐོལ་བའི་ཁུ་བ་བཟའ་བ་དང་བཏུང་པ་ལ་སོགས་པ་དང་སྦྱར་ཏེ་བྱིན་ལ་སློན་དུ་གཞུག་པར་བྱའོ། །པོ་སོན་ཆའི་འབྲས་བུའི་ཁུ་བ། །དུག་མོ་ཡུངས་སོགས་སྡེ་ཚན་བཏབ། །ནིམ་པ་ཨརྒ་གང་ཡང་རུང་། །

བསྐོལ་བའི་ཁུ་བར་བཅས་པ་ནི། །བླུད་ན་ཉམས་བརྟས་ལས་བྱུང་ནད། །གཏིང་ཟུག་ཀུན་ཀྱང་སེལ་བར་བྱེད། །ཅེས་བྱ་བ་ལ། པོ་སོན་ཆའི་ནང་གི་འབྲས་བུ་བསྐོལ་བའི་ཁུ་བའི་ནང་དུ་དུག་མོ་ཡུངས་ལ་སོགས་པའི་སྨན་གྱི་སྡེ་ཚན་གྱི་ཕྱེ་མ་བཏབ་ལ། ནིམ་པ་འམ་ཨརྒ་

བསྐོལ་བའི་ཁུ་བ་དང་སྦྱར་ཏེ་བླུད་ན། ཉམས་བརྟས་པ་ལས་བྱུང་བའི་ནད་གཏིང་ཟུག་ཅིང་ནང་དུ་ཞེན་པར་གྱུར་པ་ཐམས་ཅད་ཀྱང་སེལ་ཞིང་འཇོམས་པར་བྱེད་དོ། །པོ་སོན་ཆ་ཡི་མེ་ཏོག་ནི། །ཞིབ་བཏགས་ཕྲེང་བསྒོས་མནམས་ནས་ནི། །ཐུག་ཤ་ཁུ་སོགས་ངོམས་པ་བླུད། །

སྐྱིད་དེ་བ་ནི་བདེར་སློན་གཞུག །ཅེས་བྱ་བ་ལ། །པོ་སོན་ཆ་ནི་མ་ད་ན་ཕ་ལ་སྟེ། དེའི་མེ་ཏོག་ཞིབ་ཏུ་བཏགས་པ་མེ་ཏོག་གི་གེ་སར་གྱི་རྡུལ་འདྲ་བར་བྱས་ལ། ཕྱེ་མ་དེས་མེ་ཏོག་གི་ཕྲེང་བ་ལ་ལེགས་པར་བསྒོས་པ་དེ་ལྟ་བུའི་དྲི་ཕུན་སུམ་ཚོགས་པ་མནམས་པས་བད་ཀན་དང་

མཁྲིས་པ་ལེགས་པར་བསླངས་ཤིང་གཡོས་པར་བྱས་ནས་ཐུག་པ་དང་། །ཤ་ཁུ་དང་ཀྲིས་ར་དང་། ནས་ཐུག་ལ་སོགས་པ་གང་ཡང་རུང་བ་ངོམས་པར་བླུད་དེ། དྲི་དེ་མནམ་ལ་དེ་ལྟ་བུས་སྡུག་མ་མྱོང་ཞིང་། སྐྱིད་དེ་བར་གནས་པའམ། བྱིས་པ་གཞོན་ནུ་ངག་བདེ་ཞིང་ཉམ་

เล่ม ๒๐๒ · หน้า 59b

ང་བ་མེད་བར་སློན་དུ་གཞུག་བར་བྱའོ། པོ་སོན་ཆ་མེད་མེ་ཏོག་དང་། །འབྲས་བུ་གཞོན་ནུ་དེ་བཞིན་སྦྱར། །ཞེས་བྱ་བ་ལ། །གལ་ཏེ་པོ་སོན་ཆའི་འབྲས་བུ་མེད་ཅིང་མ་རྙེད་པར་གྱུར་ན་དེ་བཞིན་དུ་པོ་སོན་ཆའི་མེ་ཏོག་གམ། པོ་སོན་ཆའི་འབྲས་བུ་མ་སྨིན་པ་གཞོན་ནུ་

བཏགས་ལ་ཤིང་མངར་ལ་སོགས་པ་བསྐོལ་བའི་ཆུའི་ནང་དུ་ནུབ་གཅིག་སྦངས་ལ། སླར་བཙགས་པའི་ཁུ་བ་མདོའི་གནས་ལས་སྨོས་པའི་ཆོ་གས་བཏུང་བར་བྱ་བ་ལ་སོགས་པ་ནས། དེའི་ཕྱེ་མ་ཞི་བ་མོས་བསྐོལ་པའི་ཕྲེང་བ་མནམས་པས་བདེ་བར་སློན་དུ་གཞུག་བའི་བར་ཇི་སྐད་

སྨོས་པ་བཞིན་དུ་བྱའོ། །དེ་ཡན་ཆད་ནི་པོ་སོན་ཆའི་ཆོ་ག་ཇི་ལྟར་བྱ་བ་བསྟན་པ་ཡིན་ནོ། །ཛི་མུ་ཏ་སོགས་དེ་དང་འདྲ། །ཞེས་བྱ་བ་ལ། ཛི་མུ་ཏ་ཀ་དང་། ཨ་ཀྵ་ཀུ་དང་ཀོ་ཤ་ཏ་ཀི་རྣམ་གཉིས་དང་། དུག་མོ་ཡུངས་ཀྱི་ས་བོན་གྱི་བར་དེ་དག་ཀྱང་པོ་སོན་ཆ་དང་འདྲ་བར་གཏང་

བར་བྱ་ཞིང་། །ཆོ་ག་ཡང་དེ་དང་མཐུན་པར་སྦྱར་བར་བྱའོ། །ཛི་མུ་ཏ་ནི་ཁྱད་པར་དུ། །རིམས་དང་ལུད་པ་དབུགས་མི་བདེ། །སྐྱིགས་བུ་ལ་སོགས་ནད་ལ་གཏང་། །ཞེས་བྱ་བ་ལ། །ཛི་མུ་ཏ་ནི་དེ་བ་ཏ་ལི་དང་ཀར་ཀོ་ཊི་དང་། བི་ནི་དང་། ཛི་མུ་ཏ་ཀ་ཞེས་མིང་གི་རྣམ་གྲངས་

ཀྱིས་བཤད་པ་ཡིན་ཏེ། ཛི་མུ་ཏ་དེ་ཁྱད་པར་དུ་རིམས་ལ་སོགས་བའི་ནད་ཀྱིས་བཏབ་པ་ལ་གཏང་བར་བྱའོ། །འདི་ཡི་མེ་ཏོག་འོ་མར་བཙོས། །འབྲས་བུ་སྨིན་པ་འོ་ཐུག་བཅས། །སྤུ་བཅས་འོ་མའི་སྤྲིས་མར་སྦྱར། །སྤུ་མེད་ཞོ་ཡི་སྤྲིས་མར་སྦྱར། །ཞེས་བྱ་བ་ལ། ཛ་ིམུ་ཏའི་མེ་ཏོག་སྐྱེས་པ་

རྫོགས་པར་གྱུར་པ་དེ་འོ་མའི་ནང་དུ་བཙོས་པ་བླུད་ལ་སྐྱུག་ཏུ་གཞུག་བར་བྱ་བ་འམ། ཛི་མུ་ཏ་འདི་འབྲས་བུ་སྨིན་པར་གྱུར་བ་དེ་འོ་ཐུག་གི་ནང་དུ་བཏབ་སྟེ། བླུད་ལ་སྐྱུག་ཏུ་གཞུག་པར་བྱའོ། །ཡང་འདིའི་འབྲས་བུ་སྤུ་དང་བཅས་པ་འགྱུར་པ་ནི་འོ་མའི་སྟེང་གི་སྤྲིས་མ་དང་སྦྱར་ཏེ་སྐྱུག་སྨན་དུ་གཏང་བར་བྱ་ལ་

འབྲས་བུ་སྤུ་མེད་པ་ནི་ཞོའི་སྤྲིས་མ་དང་སྦྱར་ཏེ་སྐྱུག་སྨན་དུ་གཏང་བར་བྱའོ། །སྐྱ་བ་འམ་སྔོན་འགྱུར་འོ་མར་བཅུག །ཞོ་ནི་སྐྱུར་བར་གྱུར་པ་འམ། །ཞེས་བྱ་བ་ལ། ཛི་མུ་ཏའི་འབྲས་བུ་སྐྱ་བ་འམ་སྔོ་བར་གྱུར་པ་འོ་མའི་ནང་དུ་བཅུག་ལ། དེ་མནན་པས་ཞོ་སྐྱུར་པོར་གྱུར་པ་དེ་སྐྱུག་

เล่ม ๒๐๒ · หน้า 60a

སྨན་གྱི་དོན་དུ་སྦྱིན་པར་བྱ་བའམ། ཡང་ན། མནན་པའི་ཆང་གི་དངས་མར་ནི། །མཉེས་ཏེ་ཞུ་བར་འགྱུར་པ་བླུད། །ཅེས་བྱ་བ་ལ། ཛི་མུ་ཏ་དེ་མནན་པའི་ཆང་ཨ་རུ་ར་ཞེས་བྱ་བའི་དངས་མར་དང་པོར་མཉེས་ཏེ་ཞུ་བར་གྱུར་ནས་བཙགས་ཏེ་བླུད་པར་བྱའོ། །བད་ཀན་ལུད་

པ་ཡི་ག་འཆུས། །སྐྱ་རྦབ་གཅོང་ཆེན་ནད་ལ་གཏང་། །ཞེས་བྱ་བ་ལ། །ཛི་མུ་ཏའི་སྦྱོར་བ་འདི་དག་ནི་བད་ཀན་ལས་གྱུར་པའི་ལུད་པ་ལ་སོགས་པའི་ནད་ལ་གཏང་བར་བྱའོ། །ཀུ་བ་ཀོ་ཤ་ཏ་ཀི་ཡང་། །སྦྱོར་བའི་ཆོ་ག་འདི་ཉིད་བྱ། །ཞེས་བྱ་བ་ལ། ཀུ་བ་ནི་ཀུ་བ་ཁ་པོ་སྟེ། །ཀཌྜ་ཀ་ལ་པུ་ཞེས་བྱའོ། །

ཀོ་ཤ་ཏ་ཀི་ནི་ར་ཛ་ཀོ་ཤ་ཏ་ཀི་ཞེས་བྱ་བ་ཀོ་ཤ་པ་ལ་ཞེས་བྱ་བ་དང་། ཀོ་རྡ་ཀོ་ཤ་ཏ་ཀི་ཞེས་བྱ་བ་ཀོ་ཤ་ཏ་ཀི་རོ་ཁ་བ་སྟེ། དེ་ལྟར་ཀོ་ཤ་ཏ་ཀི་རྣམ་གཉིས་དང་ཀུ་བ་ཁ་བོ་སྟེ། སྨན་གསུམ་པོ་འདི་དག་ལ་ཡང་འདིའི་མེ་ཏོག་འོ་མར་བཙོས་ཞེས་བྱ་བ་ནས་མཉེས་ཏེ་ཞུ་བར་གྱུར་པ་བླུད་ཅེས་བྱ་བའི་བར་

དུ་སྦྱོར་བ་སྔ་མ་དང་མཐུན་པ་ཁོ་ནར་བྱའོ། །སྨིན་ཅིང་བསྐམས་པར་གྱུར་པ་ཡི། །ཛི་མུ་ཏ་ཡི་འབྲས་བུ་དག །ཕྱེ་མ་སྲང་ཕྱེད་འོ་མར་བསྲེས། །རླུང་མཁྲིས་ནད་ཀྱིས་ཉེན་ལ་བླུད། །ཅེས་བྱ་བ་ལ། ཛི་མུ་ཏའི་འབྲས་སྨིན་ཅིང་བསྐམས་ལ་རྙིང་བར་གྱུར་པའི་ཕྱེ་མ་སྲང་ཕྱེད་འོ་མ་དང་བསྲེས་པ་རླུང་

དང་མཁྲིས་པས་ཉེན་པའི་ནད་པ་ལ་བླུད་ཅིང་སྐྱུག་ཏུ་གཞུག་པར་བྱའོ། །ཛི་མ་ཏ་འབྲས་གཉིས་སམ་གསུམ། །བརྡུངས་བ་དེ་ཡི་ཁུ་བ་ནི། །དོང་ག་ལ་སོགས་དགུ་པ་ནི། །གང་ཡང་རུང་བ་ལ་སྦངས་ཏེ། །མཉེས་ལ་བཙགས་པར་གྱུར་པ་དག །བད་ཀན་མཁྲིས་རིམས་ཅན་ལ་བླུད། །ཅེས་

བྱ་བ་ལ། ཛི་མུ་ཏའི་འབྲས་བུ་གཉིས་སམ་གསུམ་ཆམ་ཆོམ་བརྡུངས་པ་པ་ཏོ་ལ་བསྐོལ་བའི་ཁུ་བའི་ནང་དུ་སྦངས་པའམ། ཡང་ན་དོང་ག་ལ་སོགས་པའི་སྨན་གྱི་སྡེ་ཚན་ཏེ། དོང་ག་དང་། དུག་མོ་ཡུངས་དང་། ཀ་ཀ་ཏིག་ཏ་དང་། ཕ་ཊ་ལི་དང་། ནིམ་པ་དང་། སླེ་ཏྲེས་དང་། མུར་བ་

དང་། དཱུར་བ་དང་། །བྱི་དང་ག་དང་། པ་ཐའི་བར་གྱི་སྨན་གང་ཡང་རུང་བ་གཅིག་བསྐོལ་བའི་ཁུ་བའི་ནང་དུ་སྦངས་ཏེ། ནང་པར་མཉེས་ལ་ཚགས་ཀྱིས་བཙགས་པའི་ཁུ་བ་དེ་བད་ཀན་དང་མཁྲིས་པར་ལྡན་པའི་རིམས་ཀྱིས་བཏབ་པའི་མི་ལ་བླུད་པར་བྱའོ། །ཛི་མུ་ཏ་ཡི་ཕྱེ་མ་འམ། །ལྡེ་གུ་ཆུ་གྲང་སྦྱར་

เล่ม ๒๐๒ · หน้า 60b

བ་དག །མཁྲིས་རིམས་ཅན་བླུད་བད་ཀན་དང་། །རླུང་འདྲེས་རིམས་ལ་ཆུ་དྲོན་བླུད། །ཅེས་བྱ་བ་ལ། ཛི་མུ་ཏའི་ཕྱེ་མ་འམ། ལྡེ་གུར་བྱས་པ་དག་མཁྲིས་པ་ལས་གྱུར་པའི་རིམས་ལ་ནི་ཆུ་གྲང་དང་སྦྱར་ཏེ་བླུད་ལ་བད་ཀན་རླུང་འདྲེས་པ་འམ། བད་ཀན་འབའ་ཞིག་ལས་གྱུར་

པའི་རིམས་ལ་ནི་ཆུ་ཅུང་ཟད་དྲོད་དང་སྦྱར་ཏེ་བླུད་པར་བྱའོ། །ལུད་པ་དབུགས་མི་བདེ་དང་དུག །སློན་རིམས་བད་ཀན་གྱིས་ཉེན་དང་། །མུན་ཐིབས་བྱེད་བའི་ནད་ལྡན་ལ། །ཀུ་བ་ཁ་བོའི་སྐྱུག་སྨན་བསྔགས། །ཞེས་བྱ་བ་ལ། །ཀུ་བ་ཁ་བོ་ནི་ཨི་ཀྵ་ཀུ་སྟེ། དེ་ནི་ཁྱད་པར་དུ་ལུད་པ་ལ་སོགས་

པའི་ནད་ཀྱིས་བཏབ་པའི་སྐྱུག་སྨན་དུ་བསྔགས་སོ། །དེ་བཞིན་དུ་མུན་པའི་ནང་དུ་ཞུགས་པ་སྙམ་བྱེད་པའི་ནད་ལ་ཡང་བསྔགས་སོ། །དེ་ནི་མེ་ཏོག་འབྲས་བུ་མེད། །མྱུ་གུ་གཞོན་ནུ་འོ་མར་བཙོས། །བད་ཀན་མཁྲིས་པ་ལས་གྱུར་རིམས། །མཁྲིས་པ་ཤས་ཆེར་གྱུར་ལ་བླུད། །ཅེས་བྱ་བ་ལ། ཀུ་བ་

ཁ་བོ་དེ་མེ་ཏོག་འབྲས་བུ་མེད་བར་གྱུར་པའི་སྐབས་ཀྱི་མྱུ་གུ་འདབ་མ་འཇམ་པོ་ཡོད་པ་དང་བསྐོལ་བའི་འོ་མ་ནི་བད་ཀན་དང་མཁྲིས་པ་ལས་གྱུར་པའི་རིམས་མཁྲིས་པའི་ཤས་ཆེ་བ་ལ་བླུད་ཅིང་སློན་དུ་གཞུག་བར་བྱའོ། །འབྲས་བུ་སྨིན་པའི་ནང་གི་ནི། །འབྲས་བུ་ཕྱུང་སྟེ་འོ་མ་བཅུག །ཞོར་གྱུར་ལུད་པ་དབུགས་

མི་བདེ། །བླུད་དེ་སློན་དུ་གཞུག་པར་བྱ། །ཞེས་བྱ་བ་ལ། ཀུ་བ་ཁ་བོའི་འབྲས་བུ་ལགས་པར་སྨིན་པར་གྱུར་པ་དང་། ཀུ་བའི་ནང་ནས་འབྲས་བུ་ཕྱུང་ལ། ཀུ་བའི་ནང་དུ་འོ་མ་བཅུག་སྟེ། མནན་ལ་ཞོར་གྱུར་པ་དང་། ལུད་པ་དང་དབུགས་མི་བདེ་བའི་ནད་པ་ལ་བླུད་ལ་སློན་དུ་གཞུག་གོ །འབྲས་བུའི་

ནང་མ་ཞོ་ག་ཆུ། །མཛེ་དུག་སྐྱ་རྦབ་ཉིད་ལ་བླུད། །ཅེས་བྱ་བ་ལ། ཀུ་བ་ཁ་བོའི་ནང་གི་འབྲས་བུ་ཞོ་ག་ཆུ་དང་སྦྱར་ཏེ། མཛེ་ནད་ལ་སོགས་པས་བཏབ་པ་ལ་བླུད་དེ་སློན་དུ་གཞུག་པར་བྱའོ། །དེ་དང་དར་བ་བསྐོལ་བ་ནི། །རྒྱམ་ཚ་སྦྲང་རྩི་བཅས་པ་འང་བླུད། །ཅེས་བྱ་བ་ལ། ཡང་ན་ཀུ་བ་ཁ་བོ་

དང་། དར་བ་བསྐོལ་བའི་ནང་དུ་རྒྱམ་ཚ་དང་སྦྲང་རྩི་བཏབ་སྟེ་བླུད་ལ། མཛེ་དང་དུག་དང་སྐྱ་རྦབ་ཀྱིས་ཉེན་བའི་ནད་པ་སློན་དུ་གཞུག་པར་བྱའོ། །ཡང་ན་དེ་ཡི་ས་བོན་ནི། །ར་ཡི་འོ་མར་བཅས་བ་དག །དུག་སྐྲན་དམུ་རྫིང་རྨེན་བུ་དང་། །འབྲས་དང་རྐང་བམ་ནད་ལ་བླུད། །ཅེས་བྱ་བ་ལ། ཀུ་བ་ཁ་བོའི་ས་

เล่ม ๒๐๒ · หน้า 61a

བོན་རའི་འོ་མ་དང་སྦྱར་བ་རའི་འོ་མ་དེ་ཉིད་དང་བཅས་པ་དུག་ལ་སོགས་པའི་ནད་ཀྱིས་བཏབ་པ་ལ་བླུད་ལ་སློན་དུ་གཞུག་གོ། །བད་ཀན་ལས་གྱུར་ལུད་པའི་རིམས། །ལྐོག་མའི་ནད་དང་མ་ཞུ་ལ། །ཀུ་བ་ཁ་བོའི་ཁུ་བ་ནི། །ཕྱེ་དང་སྦྱར་བའི་སྐྱོ་མ་བླུད། །ཅེས་བྱ་བ་ལ། བད་ཀན་ལས་

གྱུར་པའི་ལུད་པ་ལ་སོགས་པའི་ནད་ལ། ཀུ་བ་ཁ་བོ་བསྐོལ་པའི་ཁུ་བ་ཕྱེ་དང་སྦྱར་བའི་སྐྱོ་མ་བླུད་ལ་སློན་དུ་གཞུག་གོ། །སྐྲན་དང་རིམས་རྙིང་བྱིང་བ་ལ། །ལྡེ་གུ་ཤ་ཁུར་སྦྱར་བླུད་ན། །ལེགས་པ་ཁོ་ནར་སློན་འགྱུར་ཞིང་། །ཉམ་ཆུང་བར་ཡང་འགྱུར་མ་ཡིན། །ཞེས་བྱ་བ་ལ། །ཡང་ཀུ་བ་ཁ་བོའི་ལྡེ་གུ་ཤ་

ཁུ་དང་སྦྱར་བ་བླུད་ན་སྐྲན་དང་རིམས་བྱིང་བ་ཡུན་རིང་དུ་ལོན་པ་རྙིང་པ་སེལ་ཞིང་སྦྱོར་བ་དེ་ལྟ་བུས་ཉམ་ང་བ་མེད་པར་ལེགས་པར་སློན་པར་འགྱུར་ཞིང་ནད་པ་དེ་ཉམ་ཆུང་བས་ཉེན་བར་མི་འགྱུར་རོ། །ཀུ་བ་ཁ་བོའི་མེ་ཏོག་དང་། །འབྲས་བུའི་ཕྱེ་མས་བསྒོས་པ་ཡི། །མེ་ཏོག་ཕྲེང་བ་བསྣམས་པ་ནི། སྐྱིད་དེ་བ་

ཡི་སྐྱུག་སྨན་ཡིན། །ཞེས་བྱ་བ་ལ། ཀུ་བ་ཁ་བོའི་མེ་ཏོག་དང་འབྲས་བུ་བསྐམས་པ་ཞིབ་ཏུ་བཏགས་པས་མེ་ཏོག་གི་ཕྲེང་བ་ལ་བསྒོས་ཏེ། དེའི་དྲི་མ་མནམས་པས་སྐྱིད་དེ་བ། །བདེ་བ་ལ་བརྟེན་པ་དག་སྐྱུག་ཏུ་བཞུག་གོ། །སྐྲན་ལུད་དམུ་རྫིང་ལྐོག་མའི་ནད། །བད་ཀན་གནས་ལ་བརྟེན་པའི་རླུང་། །བད་

ཀན་ཁ་དང་མགྲིན་པར་གནས། །བད་ཀན་འཕེལ་བར་གྱུར་པ་དང་། །བརྟན་ཞིང་དཀྱིལ་ནི་སྐྱེས་པ་ལ། ཀོ་ཤ་ཏ་ཀའི་སྐྱུག་སྨན་བསྔགས། །ཞེས་བྱ་བ་ལ། སྐྲན་ལ་སོགས་པའི་ནད་དང་བད་ཀན་གྱི་གནས་ལ་བརྟེན་པའི་རླུང་ནད་ལ། ཁ་དང་ལྐོག་མར་གནས་པའི་བད་ཀན་དང་། བད་ཀན་འཕེལ་

ཞིང་རྒྱས་པར་གྱུར་བ་དང་བརྟན་ཅིང་དཀྱེལ་ཆེ་བར་གྱུར་པ་ལ་ནི་ར་ཛ་ཀོ་ཤ་ཏ་ཀི་ཞེས་བྱ་བ་མརྒའི་སྐྱུག་སྨན་བཏང་བ་བསྔགས་པ་ཡིན་ནོ། །འཚོ་བྱེད་ཉེའུ་ཤིང་ཟངས་རྩི་བ། །ཁ་སྲལ་ཕྲེའུ་རམ་ཉེ་གཉིས། །ཤྲ་བ་ནི་དང་མེ་ད་དང་། །མ་ཧཱ་མེ་ད་མུ་ངྷུ་ལི། །འདི་དག་རེ་རེའི་ཕྱེ་མ་དང་། །ཀོ་ཤ་ཏ་ཀིའི་

ཕྱེ་མར་བཅས། །སྦྲང་རྩི་ཁ་རར་སྦྱར་བ་ནི། །ལུད་པ་སྙིང་ནི་ཚ་ལ་བསྔགས། །ཞེས་བྱ་བ་ལ། །འཚོ་བྱེད་དང་། ཉེའུ་ཤིང་ལ་སོགས་པ་གང་ཡང་རུང་བའི་ཕྱེ་མ་ར་ཛ་ཀོ་ཤ་ཏ་ཀིའི་ཕྱེ་མ་དང་བཅས་པ་སྦྲང་རྩི་དང་སྦྱར་བའི་ལྡེ་གུ་བྱིན་ཏེ་སློན་དུ་བཅུག་ན་ལུད་པ་ལ་སོགས་པའི་ནད་ལ་ཕན་ནོ། །དེ་རྗེས་ཆུ་དྲོན་བླུད་

เล่ม ๒๐๒ · หน้า 61b

པ་ནི། །བད་ཀན་མཁྲིས་ཚ་ལྡན་ལ་བསྔགས། །ཞེས་བྱ་བ་ལ། །ལྡེ་གུ་དེ་བྱིན་པའི་རྗེས་ལ་ཆུ་དྲོན་བླུད་པ་ནི་མཁྲིས་པ་ཚ་བ་དང་ལྡན་པའི་བད་ཀན་ལ་སྐྱུག་སྨན་དུ་བསྔགས་སོ། །འུ་སུ་གཡེར་མའི་ཁུ་བ་དང་། །དེ་ཡི་ཁུ་བས་དུག་འཇོམས་སོ། །ཞེས་བྱ་བ་ལ། འུ་སུའི་འབྲས་བུ་དང་། གཡེར་

ན་བསྐོལ་བའི་ཁུ་བར་ཛ་ཀོ་ཤ་ཏ་དེའི་ལྡེ་གུ་དང་སྦྱར་བའི་སྐྱུག་སྨན་བླུད་ན་དུག་འཇོམས་པར་བྱེད་པར་འགྱུར་རོ། །བིམ་པ་ཀ་ས་མར་ད་འམ། །བ་སྤྲུ་བ་ཡི་ཁུ་བར་ནི། །ར་ཛ་ཀོ་ཤ་ཏ་ཀི་ནི། །རྡོག་མ་གཅིག་གམ་གཉིས་མཉེས་པའི། །དངས་མ་སྙིང་གི་ནད་ལ་བླུད། །ཅེས་བྱ་བ་ལ། །ར་ཛ་ཀོ་ཤ་

ཏ་ཀིའི་རྡོག་མ་གཅིག་གམ་གཉིས་བིམ་པ་བསྐོལ་བའི་ཁུ་བ་འམ། ཀ་ས་མར་ད་བསྐོལ་བའི་ཁུ་བའམ། །བ་སྤྲུ་བ་བ་སྐོལ་བའི་ཁུ་བའི་ནང་དུ་མཉེས་ལ་བཙགས་པའི་དངས་མ་བླུད་དེ་སློན་དུ་བཅུག་ན་མཆོག་ཏུ་སྙིང་གི་ནད་སེལ་ཞིང་འཇོམས་པར་བྱེད་པའི་དམ་པ་ཡིན་ནོ། །དེ་བསྐོལ་འོ་མ་ལས་བྱུང་

མར། །པོ་སོན་ཆ་སོགས་བསྐོལ་བ་བླུད། །ཅེས་བྱ་བ་ལ། །ཡང་ན་ར་ཛ་ཀོ་ཤ་ཏ་དེ་དང་བསྐོལ་བའི་འོ་མ་ལས་བྱུང་བའི་མར་སར་དང་པོ་སོན་ཆ་ལ་སོགས་པ་སྟེ་པོ་སོན་ཆ་དང་། ཛི་མུ་ཏ་ཀ་དང་། ཀུ་བ་ཁ་བོ་དང་། ཀོ་ཤ་ཏ་ཀི་དང་། དུག་མོ་ཡུངས་ཀྱི་ས་བོན་དང་། ཀྲི་ད་བེ་ད་ཞེས་བྱ་བ་

ཀོ་ཤ་ཏ་ཀི་གཉིས་པ་བསྐོལ་བའི་ཁུ་བ་དང་བཅས་པའི་སྐྱུག་སྨན་བླུད་ན་སྙིང་གི་ནད་ལ་ཕན་ནོ། །ཀོ་ཤ་ཏ་སོགས་ཁ་དང་ཚ། །མཛེ་དང་སྐྱ་རྦབ་མཆེར་པའི་ནད། །འོར་ནད་སྐྲན་ནད་སྦྱར་དུག་སོགས། །གཏིང་ཟུག་པ་ལ་བསྔགས་པ་ཡིན། །ཞེས་བྱ་བ་ལ། ཀོ་ཤ་ཏ་ཀ་ལ་སོགས་པའི་སྨན་རོ་ཁ་

བ་དང་། ཚ་བའི་སྐྱུག་སྨན་བཏང་ན། མཛེ་ལ་སོགས་པའི་ནད་སེལ་བར་འགྱུར་རོ། །པོ་སོན་ཆ་སོགས་དྲུག་སོ་སོར། བསྐོལ་བ་དང་ནི་རླན་ཅན་ཤ །ཀོ་ཤ་ཏ་ཀ་ཆ་མཉམ་བསྐོལ། །ཁུ་བ་རྒྱམ་ཚར་བཅས་པ་བླུད། །ཅེས་བྱ་བ་ལ། པོ་སོན་ཆ་ལ་སོགས་པ་གོང་དུ་སྨོས་པའི་སྐྱུག་སྨན་དྲུག་

པོ་སོ་སོར་བསྐོལ་བའི་ཁུ་བ་དང་། རླན་ཅན་གྱི་སྲོག་ཆགས་ཀྱི་ཤ་ཀོ་ཤ་ཏ་ཀ་དང་ཆ་མཉམ་པ་བསྐོལ་ལ། བསྐོལ་བའི་ཁུ་བ་དེ་རྒྱམ་ཚ་དང་བཅས་པ་བླུད་ནས་སློན་དུ་བཅུག་ན་ཡང་མཛེ་ལ་སོགས་པའི་ནད་ལ་ཕན་ནོ། །པོ་སོན་ཆ་སོགས་པི་པི་ལིང་། །ཆ་མཉམ་ཀོ་ཤ་ཏ་ཀར་སྦྱར། །ཡང་ན་ཀོ་ཤ་ཏ་

เล่ม ๒๐๒ · หน้า 62a

ཀ་ཡི། །ཁུ་བ་བུ་རམ་ཤིང་ཁུ་བླུད། །ཅེ་བྱ་བ་ལ། པོ་སོན་ཆ་ལ་སོགས་པའི་སྐྱུག་སྨན་དྲུག་པོ་པི་པི་ལིང་དང་ཆ་མཉམ་པ་ཀོ་ཤ་ཏ་ཀའི་ཁུ་བ་དང་སྦྱར་བའི་སྐྱུག་སྨན་བླུད་པ་འམ། ཡང་ན་ཀོ་ཤ་ཏ་ཀ་བླུད་བའི་ཁུ་བ་བུ་རམ་ཤིང་གི་ཁུ་བ་དང་སྦྱར་ཏེ། བླུད་དེ་སློན་དུ་བཅུག་ན་

ཡང་མཛེ་ནད་ལ་སོགས་པའི་ནད་ལ་ཕན་ནོ། །དུག་མོ་ཡུངས་ནི་སྐྱིད་དེ་བ། །བད་ཀན་མཁྲིས་པ་ཁྲག་བཅས་དང་། །རིམས་ནད་ཤུ་བ་སྙིང་ནད་དང་། །དྲེག་ནད་ཀྱིས་འཐེར་མཛེ་ལ་བསྔགས། །ཞེས་བྱ་བ་ལ། །དུག་མོ་ཡུངས་ཀྱི་ས་བོན་བསྐོལ་བའི་ཁུ་བ་ནི་སྐྱིད་དེ་བའམ། བྱིས་པ་གཞོན་ནུ་བད་

ཀན་དང་། མཁྲིས་པ་ལ་སོགས་པའི་ནད་དང་བཅས་པའི་སྐྱུག་སྨན་དུ་གཏང་བ་བསྔགས་སོ། །དུག་མོ་ཡུངས་ཀྱི་ས་བོན་ཏེ། །ཡུངས་ཀར་རམ་ནི་མ་དུ་ཀ །བསྐོལ་བའི་ཆུའམ་རྒྱམ་ཚའི་ཆུ། །ཡང་ན་ཀྲི་ས་ར་ལྡན་བླུད། །ཅེས་བྱ་བ་ལ། ཡང་ན་དུག་མོ་ཡུངས་ཀྱི་ས་བོན་ཡུངས་ཀར་བསྐོལ་བའི་

ཆུ་འམ་མ་དུ་ཀ་བསྐོལ་བའི་ཆུ་འམ། རྒྱམ་ཚའི་ཆུ་གང་ཡང་རུང་བ་དང་སྦྱར་ཏེ་སྐྱུག་སྨན་དུ་བཏང་བ་འམ། ཡང་ན་དུག་མོ་ཡུངས་ཀྱི་ས་བོན་ཀྲི་ས་ར་ཞེས་བྱ་བའི་ཏིལ་གྱི་སྦྱར་ཐུག་དང་ལྡན་པ་བླུད་ལ་སློན་དུ་གཞུག་གོ། །དེ་ཡི་ས་བོན་ཨརྒ་ཡི། །འོ་མར་ཞག་བདུན་སྦངས་པ་ནི། །པོ་སོན་ཆ་དང་ཛི་མུ་ཏ། །

ཀུ་བ་ཁ་བོ་ཛི་བན་ཏི། །ཛི་བ་ཀ་ནི་བསྐོལ་བ་ཡི། །ཁུ་བ་གང་ཡང་རུང་བ་བླུད། །ཅེས་བྱ་བ་ལ། །དུག་མོ་ཡུངས་དེའི་ས་བོན་ཀྱི་ཕྱེ་མ་ཨརྒའི་འོ་མ་ནང་དུ་ཞག་བདུན་གྱི་བར་དུ་སྦངས་པ་པོ་སོན་ཆ་ལ་སོགས་པ་གང་ཡང་རུང་བ་བསྐོལ་བའི་ཁུ་བ་དང་སྦྱར་ཏེ། སྐྱུག་སྨན་དུ་བླུད་པར་བྱའོ། །སྐྱུག་སྨན་གྱི་

ནི་གཙོ་བོ་ཡི། །ཆོ་ག་ཕྱོགས་ཙམ་བཤད་པ་ཡིན། །བློ་དང་ལྡན་པས་ཚུལ་འདི་ཡིས། །གཞན་ཡང་ཅི་རིགས་སྦྱར་བར་བྱ། །ཞེས་བྱ་བ་ལ། དེ་ལྟར་ཚུལ་འདིས་སྐྱུག་སྨན་གྱི་གཙོ་བོ་པོ་སོན་ཆ་ལ་སོགས་པའི་ཆོ་ག་བྱ་བའི་ཐབས་མ་སྨོས་པར་དེའི་ཕྱོགས་ཙམ་ཞིག་བཤད་ཅིང་བསྟན་པ་ཡིན་པས་

བློ་དང་ལྡན་པའི་སྨན་པས་ས་བོན་ཙམ་དུ་སྨོས་པའི་ཚུལ་འདིས་སྐྱུག་སྨན་གྱི་རྣམ་པ་གཞན་དག་ལ་ཡང་ཅི་རིགས་པར་རྗེས་སུ་དཔགས་ཏེ་སྦྱར་ཞིང་གཏང་བར་བྱའོ། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པའི་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་

เล่ม ๒๐๒ · หน้า 62b

བ་ལས། ཆོ་ག་གྲུབ་པའི་གནས་ཀྱི་ལེའུ་དང་པོའི་འགྲེལ་པའོ།། །།དེ་ནས་བཀྲུ་སྨན་བྱ་བའི་ཆོ་ག་བཤད་པར་བྱའོ། །ཞེས་བྱ་བ་ལ། རོ་སྟོད་ཀྱི་སྦྱང་བ་བཤད་པའི་རྗེས་ལ། རོ་སྨན་ཀྱི་སྦྱང་བ་བསྟན་པར་བྱ་བའི་ཕྱིར་ལེའུ་འདི་བརྩམས་པ་ཡིན་ནོ། །དེ་ལས་ཀྱང་དུར་བྱིད་ནི་བཀྲུ་སྨན་གྱི་གཙོ་

བོ་ཡིན་པས་དང་པོར་བཤད་པ་ཡིན་ཏེ། དེའི་ཕྱིར་སྨོས་པ་ནི། །དུར་བྱིད་བསྐ་ཞིང་མངར་ལ་རྩུབ། །ཞུ་རྗེས་ཚ་བར་གྱུར་པ་ཡིན། །བད་ཀན་མཁྲིས་པ་ཞི་བྱེད་དེ། །རྩུབ་པས་རླུང་ནི་འཁྲུགས་པར་བྱེད། །ཅེས་བྱ་བ་ལ་སོགས་པ་ཡིན་ཏེ། དུར་བྱིད་ནི་ཤ་མ་དང་། །ཏྲི་བྱིད་དང་། མ་ཀ་ཏི་ཀ་ཞེས་

བྱ་བ་ལ་སོགས་པའི་མིང་གི་རྣམ་གྲངས་ཀྱིས་བཤད་པ་ཡིན་ནོ། །དེ་ནི་རོ་བསྐ་བ་དང་མངར་བ་ཡིན་ལ། །རང་བཞིན་ནི་རྩུབ་པའི་ཡོན་ཏན་དང་ལྡན་པ་ཡིན་ལ། །ཞུ་བར་གྱུར་པ་ནི་ཞུ་རྗེས་ཀྱི་རོ་ཚ་བ་ཡིན་ནོ། །དེ་བཞིན་དུ་བསྐ་བ་ལ་སོགས་པའི་རྒྱུས་བད་ཀན་དང་མཁྲིས་པ་ནི་ཞི་ཞིང་སེལ་བར་བྱེད་པ་ཡིན་ལ།

རྩུབ་པའི་རྒྱུས་རླུང་ནི་འཁྲུགས་ཤིང་ལྡང་བར་བྱེད་བ་ཡིན་ནོ། །དེ་འདིར་སྨན་གྱི་སྦྱོར་བ་ཡིས། །རླུང་དང་བད་ཀན་མཁྲིས་པ་སེལ། །ཆོ་གའི་ཁྱད་པར་ལ་བརྟེན་ནས། །ནད་ཀུན་འཇོམས་པར་བྱེད་པ་ཡིན། །ཞེས་བྱ་བ་ལ། ཡང་དུར་བྱིད་དེ་ནི་རླུང་དང་མཁྲིས་པ་དང་། བད་ཀན་སེལ་བར་བྱེད་པའི་སྨན་

གྱི་སྦྱོར་བ་དང་། བསྲེལ་ཤིང་ཆོ་གའི་ལས་ཀྱི་རིམ་པ་ལ་བརྟེན་ཅིང་གནས་ན། །ནད་ཐམས་ཅད་ཀྱང་སེལ་ཅིང་འཇོམས་པར་བྱེད་པ་ཡིན་ནོ། །དུར་བྱིད་རྣམ་པ་གཉིས་སུ་བཤད། །དེ་རྩ་དམར་ནག་དཀར་བ་ཡི། །རྣམ་པ་གཉིས་སུ་བཤད་པ་ཡིན། །ཞེས་བྱ་བ་ལ། །དུར་བྱིད་དེའི་རྩ་བ་རྣམ་པ་

གཉིས་སུ་བཤད་དེ། ཤ་མ་ཞེས་བྱ་བ་རྩ་བ་དམར་ནག་ཏུ་འདུག་པ་ནི་གཅིག་ཡིན་ལ། །དྲི་བྱིད་ཅེས་བྱ་བ་རྩ་བ་དཀར་པོ་ཡོད་པ་ནི་གཉིས་པ་ཡིན་ནོ། །དེ་ལ་ཏྲི་བྱིད་མཆོག་ཏུ་བཤད། །ཉེས་པ་མེད་ཅིང་བདེ་བར་འཁྲུ། །ཞེས་བྱ་བ་ལ། རྩ་བ་རྣམ་པ་གཉིས་སུ་ཡོད་པ་དེའི་ནང་ནས་ཏྲི་བྱིད་ཅེས་བྱ་བ་དུར་

བྱིད་དཀར་པོ་ནི་ཤིན་ཏུ་མཆོག་ཡིན་པར་བཤད་དེ། དེ་ཅིའི་ཕྱིར་ཞེ་ན། ཉེས་པའི་སྐྱོན་མེད་པར་ནད་སེལ་ཞིང་བདེ་བླག་ཏུ་འཁྲུ་བར་བྱེད་པས་མཆོག་ཡིན་ལ། །དེ་ནི་བྱིས་པ་དང་། །རྒན་པོ་དང་། མི་སྐྱིད་དེ་བར་གནས་པ་དག་ལྟོ་སྙི་བའི་ནད་པའི་བཀྲུ་སྨན་དུ་མཆོག་ཏུ་བསྔགས་པ་ཡིན་ནོ། །བརྒྱལ་རྨོངས་

เล่ม ๒๐๒ · หน้า 63a

བྱེད་ཅིང་ལྐོག་མ་ནི། །རྩུབ་ཅིང་གནོད་པར་བྱེད་པ་དང་། །རྣོ་ཞིང་མྱུར་དུ་འཁྲུ་བྱེད་པ། །ལྟོ་སྲ་ནད་གཞི་ཤས་ཆེ་དང་། །སྡུག་བསྔལ་གྱིས་ཉེན་ནད་པ་ལ། །ཤ་མ་དུར་བྱིད་བསྔགས་པ་ཡིན། །ཞེས་བྱ་བ་ལ། དུར་བྱིད་དམར་ནག་ཏུ་འདུག་པ་ཤ་མ་ཞེས་བྱ་བའི་སྒྲས་བཤད་

པ་དེ་ནི་ཤིན་ཏུ་རྣོ་ཞིང་མྱུར་དུ་འཁྲུ་བར་བྱེད་པ་ཡིན་པས། བརྒྱལ་བ་དང་སེམས་རྨོངས་པར་བྱེད་པ་དང་། ལྐོག་མ་ཤས་ཆེར་རྩུབ་ཅིང་འདར་བ་སྙམ་སེམས་ལ་ཉམས་ཤིང་གནོད་པར་བྱེད་པ་ཡིན་ནོ། །དེ་བས་ན་རྩ་བ་དམར་ནག་ཏུ་འདུག་པའི་དུར་བྱིད་དེ་ནི་ནད་པ་ལྟོ་སྲ་བ་དང་། ནད་གཞི་སོགས་པའི་ཤས་

ཆེ་བ་དང་། ནད་ཀྱི་སྡུག་བསྔལ་གྱིས་ལུས་ཉེན་ཅིང་གཟིར་བ་དག་ལ་དེ་བསྔགས་ཤིང་ནད་ཀྱི་གཏིང་འབྱིན་པ་ཡིན་ནོ། །དེ་ནི་ཟབས་སུ་ཟུག་ཅིང་འཇམ། །ཐད་ཀར་འཕྲོས་པ་མ་ཡིན་པ། །བཏུས་ལ་སྙིང་པོ་བོར་ནས་ནི། །ཤུན་བ་བསྐམས་ཏེ་སྦ་བར་བྱ། །ཞེས་བྱ་བ་ལ། རྩ་བ་དེ་གཉིས་ཀྱང་ཟབས་སུ་

ཟུག་ཅིང་སའི་གཏིང་རིང་པོར་ནུས་པར་གྱུར་པ་དང་། འཇམ་ཞིང་མཉེན་པ་དང་། རྩ་བ་ཡན་མན་དུ་མ་འཕྲོས་བར་ཐུར་དུ་དྲང་པོར་ཟུག་པ་བཏུས་ཤིང་བཏོན་ལ། ནང་གི་སྙིང་པོ་ཤིང་བུ་ལྟར་སྲ་བ་དེ་བོར་ནས་ཤུན་པ་ལེགས་པར་བསྐམས་ཏེ། སྣོད་བཟང་པོའི་ནང་དུ་སྦ་བར་བའོ། །དེ་ནས་དེའི་འོག་དེའི་

ཕྱེ་མ། །རྒྱམ་ཚ་དོང་ག་ཅུང་ཟད་བཏབ། །རླུང་ནད་ལ་ནི་སྐྱུར་ལས་བླུད། །ཅེས་བྱ་བ་ལ། དེ་ནས་དེའི་འོག་ཏུ་བཀྲུ་སྨན་གཏོང་བའི་དུས་སུ་རླུང་གི་ནད་ལ་ནི། དུར་བྱིད་ཀྱི་ཕྱེ་མ་རྒྱམ་ཚ་དང་དོང་གའི་ཕྱེ་མ་ཅུང་ཟད་ཙམ་དང་བསྲེས་ཏེ། །རང་སྐྱུར་ཀན་ཛིའམ། རྩ་བ་མོའི་དངས་མ་ལ་སོགས་བ་བཏུང་བ་

སྐྱུར་བག་དང་སྦྱར་ཏེ་བླུད་པར་བྱའོ། །མཁྲིས་པར་སྦྲང་རྩི་ཁ་ར་མར། །འོ་མ་རྒུན་འབྲུམ་བུ་རམ་ཤིང་། །ཁུ་བ་ཏང་པལ་མངར་བ་ཡི། །སྨན་དེ་འབྲས་བུ་གསུམ་གྱི་ནི། །ཁུ་བར་བཅས་པ་བླུད་པར་བྱ། །ཞེས་བྱ་བ་ལ། མཁྲིས་པའི་ནད་ལ་ནི་དུར་བྱིད་ཀྱི་ཕྱེ་མ་དེ་སྦྲང་རྩི་དང་ཁ་ར་དང་མར་དང་

སྦྱར་ཞིང་བསྲེས་བའི་འོ་མ་འམ། །རྒུན་ཆུ་འམ། བུ་རམ་ཤིང་གི་ཁུ་བ་འམ། །ཏང་པ་ལ་བསྐོལ་བའི་ཁུ་བ་འམ། མངར་བའི་སྨན་གྱི་སྡེ་ཚན་བསྐོལ་བའི་ཁུ་བ་འམ། འབྲས་བུ་གསུམ་བསྐོལ་པའི་ཁུ་བ་གང་ཡང་རུང་བ་དང་ཅི་རིགས་པར་སྦྱར་ཏེ་བླུད་པར་བྱའོ། །བད་ཀན་ལ་པི་ལུ་ཡི། །

เล่ม ๒๐๒ · หน้า 63b

ཁུ་བ་བ་གཅིན་ཆང་སྐྱུར་རྩབས། །ཚ་བ་ལྔ་སོགས་ཕྱེ་མ་ནི། །བད་ཀན་འཇོམས་དང་ཅི་རིགས་སྦྱར། །ཞེས་བྱ་བ་ལ། བད་ཀན་གྱི་ནད་ལ་དུར་བྱིད་ཀྱི་ཕྱེ་མ་པུ་ལུ་བསྐོལ་བའི་ཁུ་བ་འམ། བ་གཅིན་ནམ། ཆང་ངམ། སྐྱུ་རྩབས་ཀན་ཛི་ཞེས་བྱ་བ་གང་ཡང་རུང་བ་དང་སྦྱར་ཏེ་ཚ་བ་ལྔའི་ཕྱེ་མ་ལ་

སོགས་པ་བད་ཀན་འཇོམས་པར་བྱེད་པའི་སྨན་གྱི་ཕྱེ་མ་བཏབ་སྟེ་ཅི་རིགས་པར་བླུད་པར་བྱའོ། །དུར་བྱིད་ལྡི་གུ་ཁུ་བ་དང་། །བསྐོལ་པའི་ཁུ་བ་བསྒྲངས་ཁ་ར། སྦྲང་རྩི་དྲི་བཟངས་གསུམ་དང་བཅས། །ལྡེ་གུ་ཡིད་འོང་བཀྲུ་སྨན་ཡིན། །ཞེས་བྱ་བ་ལ། དུར་བྱིད་ལྡེ་གུར་བཏགས་པ་འམ། །བསྐོལ་

བའི་ཁུ་བ་བསྒྲངས་བའི་ནང་དུ་སྦྲང་རྩི་དང་ཁ་ར་དང་། ཤིང་ཚ་ལ་སོགས་པ་དྲི་བཟངས་གསུམ་གྱི་ཕྱེ་མ་བཏབ་པའི་ལྡེ་གུ་ནི་བཀྲུ་སྨན་ཤིན་ཏུ་ཡི་གར་འོང་བ་ཡིན་ནོ། །ཨ་རྫ་གནྡྷ་སྨིག་རྐང་དང་། །ཁ་ར་དུར་བྱིད་བི་ད་རི། །ཕྱེར་བཏགས་སྦྲང་རྩི་མར་དང་ནི། །ལྡེ་གུ་བྱིན་ན་འདུས་པ་དང་། །རིམས་དང་ལུས་

རེངས་ཚ་བ་དང་། །སྐོམ་དད་ཀྱིས་གཟིར་ལེགས་པར་འཁྲུ། །ཞེས་བྱ་བ་ལ། །ཨརྫ་གནྡྷ་ལ་སོགས་པའི་སྨན་བཏགས་པའི་ཕྱེ་མ་དང་། སྦྲང་རྩི་དང་། མར་དུ་སྦྱར་བའི་ལྡེ་གུ་བྱིན་ན་འདུས་པའི་ནད་ལ་སོགས་པས་གཟིར་བ་ལེགས་པར་འཁྲུ་ཞིང་བདེ་བར་བྱེད་པར་འགྱུར་རོ། །བུ་རམ་ཤིང་ནི་ཚལ་

པར་བཀས། །ནང་ངོས་དུར་བྱིད་ལྡེ་གུས་བསྐུས། །གཅིག་ཏུ་སྦྱར་ཏེ་ཕུར་མ་ཡིས། བཙོ་བའི་ཚུལ་བྱས་དེ་བཟའ་བྱ། །ཞེས་བྱ་བ་ལ། བུ་རམ་ཤིང་གི་དུམ་བུ་ཚལ་པ་གཉིས་སུ་བཀས་ལ། དེའི་ནང་ངོས་དུར་བྱིད་ཀྱི་ལྡེ་གུས་བསྐུས་ལ། སླར་གཅིག་ཏུ་སྦྱར་ཏེ་སྨན་གྱི་ཕུར་མ་བཙོས་བའི་ཚུལ་དུ་བཙོས་

པ་དེ་ཟོས་ན། འདུས་པ་དང་རིམས་ལ་སོགས་པས་གཟིར་བའི་ནད་ལེགས་པར་འཁྲུ་བར་འགྱུར་རོ། །ཤིང་ཚ་སུག་སྨེལ་མཉམ་ནི་ལི། །དེ་མཉམ་དུར་བྱིད་ཤ་ཁ་ར། །ཕྱེ་མ་རྒུན་ཆུ་སྦྲང་རྩི་དང་། །ཕྱེ་དང་སྐྱོ་མར་སྦྱར་ཏེ་བླུད། །རླུང་མཁྲིས་བད་ཀན་ལས་གྱུར་དང་། །མེ་དྲོད་ཆུང་བའི་

ནད་དང་ནི། །སྐྱིད་དེ་བ་ཡི་མི་རྣམས་ལ། །གནོད་པ་མེད་པའི་བཀྲུ་སྨན་ཡིན། །ཞེས་བྱ་བ་ལ། ཤིང་ཚ་སུག་སྨེལ་སྤྱིར་ཆ་གཅིག་དང་། དེ་གཉིས་ཀྱི་ཆ་ཇི་ཙམ་ཡོད་པ་དང་། ནི་ལི་ཞེས་བྱ་བ་སྨན་ནི་ལི་ནི་ཆ་མཉམ་དུ་བྱ། སྨན་དེ་གསུམ་ཇི་སྙེད་ཡོད་པའི་ཆ་དང་། དུར་བྱིད་ཆ་མཉམ་དུ་བྱ། །དུར་

เล่ม ๒๐๒ · หน้า 64a

བྱིད་ཡན་ཆད་ཀྱི་སྨན་བཞི་པོ་དང་། ཁ་ར་ཆ་མཉམ་དུ་བྱ། དེ་ལྟ་བུའི་སྨན་གྱི་ཕྱེ་མ་དེ་རྒུན་ཆུ་དང་སྦྲང་རྩི་དང་ཕྱེ་དང་ལྷན་ཅིག་སྐྱོ་མར་བྱས་ཏེ་བླུད་ན། རླུང་དང་མཁྲིས་པ་དང་བད་ཀན་ལས་གྱུར་བའི་ནད་དང་། །ཕོ་བའི་མེ་དྲོད་ཉམས་པ་དང་། སྐྱིད་དེ་བར་གནས་པའི་

མི་རྣམས་ལ་བཀྲུ་སྨན་འདི་ནི་སྡུག་བསྔལ་སྐྱེས་པའི་གནོད་པའི་འཚེ་བ་མེད་ཅིང་དམ་པར་གྱུར་པ་ཡིན་ནོ། །བྱི་དང་ག་ཡི་སྙིང་པོ་དང་། །འབྲས་བུ་གསུམ་ཞེས་བྱ་བ་དང་། །ཡ་བཀྵར་པི་པི་ལིང་། །དུར་བྱིད་ཀུན་གྱི་ཆ་བྱེད་བཅས། །སྦྲང་རྩི་མར་རམ་བུ་རམ་གྱིས། །ལྡེ་གུར་བྱས་པ་བྱིན་ན་ནི། །

སྐྲན་དང་མཚེར་པ་དམུ་རྫིང་དང་། །གཟུགས་འཁུམས་ལུད་པ་ཡི་ག་མཚུས། །རླུང་དང་བད་ཀན་ལས་གྱུར་ནད། །མང་པོ་གཞན་དག་སྦྱོར་བར་བྱེད། །ཅེས་བྱ་བ་ལ། །བྱི་དང་གའི་སྤུན་པ་བསལ་བའི་སྙིང་པོ་དང་། འབྲས་བུ་གསུམ་དང་ཡ་བཀྵར་ཞེས་བྱ་བ་ནས་ཚིག་འཁུས་པའི་ཐལ་བ་དང་

པི་པི་ལིང་ཆ་མཉམ་པོ་བྱ། བྱི་དང་ག་ལ་སོགས་པའི་སྨན་དེ་དག་ཀུན་གྱི་ཆ་ཕྱེད་ཕྱེད་དུ་བྱས་ཏེ། ཕྱེ་མར་བཏགས་པ་དེ་སྦྲང་རྩི་དང་མར་གྱི་ལྡེ་གུར་བཅས་པ་བྱིན་ན་སྐྲན་ལ་སོགས་པའི་ནད་སྦྱོང་ཞིང་དག་པར་བྱེད་དོ། །དེ་བཞིན་དུ་རླུང་དང་བད་ཀན་ལས་གྱུར་པའི་ནད་འདིར་མ་སྨོས་པ་གཞན་དག་ཀྱང་སྦྱོང་

པར་བྱེད་དོ། །པི་པི་ལིང་རྩ་བྱི་དང་ག །འབྲས་བུ་གསུམ་དང་འུ་སུ་དང་། །ཙི་ཏྲ་ཀ་དང་མ་ལེ་ཤམ། །པི་པི་ལིང་དང་དུག་མོ་ཡུངས། །ཟི་ར་ཧ་ཏི་པི་པི་ལིང་། །ཏི་མུ་ས་དང་ལན་ཚྭ་ལྔ། །ཞོ་ནི་གཉིས་གཉིས་ཕྱེ་མར་བྱས། །དུར་བྱིད་དང་ནི་ཏིལ་མར་གཉིས། །སྲང་ནི་བརྒྱད་བརྒྱད་ཆར་བསྲེས་དང་། །སྐྱུ་

རུ་རའི་ཁུ་བྲེ་གསུམ་དང་། །བུ་རམ་སྲང་ནི་ལྔ་བཅུ་མེ། །ཆུང་བསྐོལ་དེ་ལས་རན་ཙམ་ནི། །ཟོས་ན་མཛེ་དང་གཞང་འབྲུམ་དང་། །མིག་སེར་ཟ་ཁུ་སྐྲན་དང་ནི། །དམུ་རྫིང་མཚན་པར་རྡོལ་བ་དང་། །ཕོ་བའི་ནད་དང་སྐྱ་རྦབ་རྣམས། །འཇོམས་ཤིང་ཆོ་ག་བསྲུང་མི་དགོས། །བུ་སྐྱེད་པར་ཡང་དེ་

ཡིས་བྱེད། །བུ་རམ་དགེ་བ་ཅན་ཞེས་བྱ། །དུས་ཀུན་དུ་ནི་འཕྲོད་པ་ཡིན། །ཞེས་བྱ་བ་ལ། པི་པི་ལིང་གི་རྩ་བ་ལ་སོགས་པ་སྨན་སྣ་རེ་རེ་ཞིང་ཞོ་གཉིས་གཉིས་ཚད་དུ་བྱས་པའི་ཕྱེ་མ་དང་། །ཏིལ་མར་དང་དུར་བྱིད་ཀྱི་ཕྱེ་མ་གཉིས་སྲང་བརྒྱད་བརྒྱད་ཀྱི་ཚད་དུ་བྱས་པ་དང་བསྲེས་ལ། །སྐྱུ་རུ་རའི་འབྲས་བུ་

เล่ม ๒๐๒ · หน้า 64b

བསྐོལ་བའི་ཁུ་བ་བྲེ་གསུམ་དང་། བུ་རམ་སྲང་ལྔ་བཅུ་གཅིག་ཏུ་བསྲེས་དེ་ཐམས་ཅད་མེ་ཆུང་ངུ་ལ་བསྐོལ་ལ། །དགེ་བའི་བུ་རམ་ཞེས་བྱ་བ་དེ་ལས་ཇི་ཙམ་རན་པའི་ཚད་ཙམ་ཟོས་ན་དེས་མཛེ་ལ་སོགས་པའི་ནད་འཇོམས་པར་འགྱུར་བ་དང་། བུ་སྐྱེད་པར་བྱེད་པ་དང་། དུས་དྲུག་ཆར་དུ་ཡང་

འཕྲོད་ཅིང་བསྔགས་པ་ཡིན་ནོ། །ཚ་བ་གསུམ་དང་དྲི་སྣ་གསུམ། །གླ་སྒང་དང་ནི་བྱི་དང་ག །སྐྱུ་རུ་ར་དེ་ཐམས་ཅད་ནི། །མཉམ་བའི་དུར་བྱིད་ཁ་ར་དང་། །སྦྲང་རྩིའི་རི་ལུར་བྱས་ཟོས་ན། །གཅིན་སྲི་རིམས་དང་སློན་བྲོ་དང་། །ལུད་པ་ཤ་སྐེམས་མགོ་འཁོར་དང་། །ཟད་བྱེད་ལུས་

ཚ་སྐྱ་རྦབ་དང་། །མེ་དྲོད་ཆུང་དང་དུག་ནད་སྦྱོང་། །ཞེས་བྱ་བ་ལ། ཚ་བ་གསུམ་ལ་སོགས་པའི་སྨན་ཆ་མཉམ་པོར་བྱས་པ་སྤྱིར་ཇི་སྙེད་པ་ཡོད་པ་དང་། དུར་བྱིད་ཆ་མཉམ་པར་བྱས་ལ། །ཁ་ར་ཡང་དུར་བྱིད་ཆ་མཉམ་པར་བྱས་ཏེ། དེས་ཚ་བ་གསུམ་ལ་སོགས་པའི་སྨན་སྤྱིར་ཆ་གཅིག་དུར་

བྱིད་ཆ་གཉིས་ཁ་ར་ཆ་གསུམ་པར་སྦྱར་ལ་དེ་ཐམས་ཅད་སྦྲང་རྩི་དང་ལྷན་ཅིག་རི་ལུར་བྱས་ན། གཅིན་སྲི་བའི་ནད་ལ་སོགས་པ་སྦྱོང་བར་བྱེད་ཅིང་བསྔགས་པ་ཡིན་ནོ། །དུར་བྱེད་དུག་མོ་ཡུངས་ས་བོན། །པི་པི་ལིང་དང་བཅའ་སྒ་རྣམས། །སྦྲང་རྩི་རྒུན་འབྲུའི་ཆུར་སྦྱར་བ། །དབྱར་གྱི་དུས་

ཀྱི་བཀྲུ་སྨན་ཡིན། །ཞེས་བྱ་བ་ལ། དུར་བྱེད་ལ་སོགས་པའི་སྨན་གྱི་ཕྱེ་མ་སྦྲང་རྩི་དང་རྒུན་འབྲུའི་ཆུ་དང་སྦྱར་བ་ནི། དབྱར་གྱི་དུས་ཀྱི་བཀྲུ་སྨན་དུ་བསྔགས་སོ། །དུར་བྱིད་གླ་སྒང་བྱི་ཚེར་དང་། །ཁ་ར་ཙནྡན་བ་ལེ་ཀ །ཤིང་མངར་བ་ཏ་ལ་ཕྱེ་མ། །རྒུན་ཆུ་དང་སྦྱར་སྟོན་གྱི་ཡིན། །ཞེས་

བྱ་བ་ལ། དུར་བྱིད་ལ་སོགས་བའི་སྨན་གྱི་ཕྱེ་མ་རྒུན་ཆུ་དང་སྦྱར་བ་སྟོན་གྱི་དུས་སུ་བཀྲུ་སྨན་བཏང་བར་བསྔགས་སོ། །དུར་བྱིད་པ་ཏ་ཀྲུ་ཏྲག་ཏྲེས །ཟིར་ཤུ་དག་ས་ར་ལ། ཁྲོན་བུའི་ཕྱེ་མ་ཆུ་དྲོན་སྦྱང་། །དགུན་གྱི་དུས་སུ་བླུད་པར་བྱ། །ཞེས་བྱ་བ་ལ། །དུར་བྱིད་ལ་སོགས་པའི་སྨན་ཆ་

མཉམ་སྟེ་ཕྱེ་མར་བཏགས་པ་ཆུ་དྲོན་མོ་དང་སྦྱར་བ་ནི་དགུན་གྱི་དུས་སུ་བཀྲུ་སྨན་དུ་བྱ་བར་བསྔགས་པ་ཡིན་ནོ། །དུར་བྱིད་ཁ་ར་ཆ་མཉམ་པ། །སོས་ཀའི་དུས་ཀྱི་བཀྲུ་སྨན་ཡིན། །ཞེས་བྱ་བ་ལ། དུར་བྱིད་དང་ཁ་ར་ཆ་མཉམ་པ་ནི་སོས་ཀ་ཚ་བའི་དུས་སུ་བཀྲུ་སྨན་དུ་བླུད་བར་བྱའོ། །དུར་བྱིད་སྦ་

เล่ม ๒๐๒ · หน้า 65a

འབྲས་ཀྱི་ལྕེ་བ། །པ་ཏ་ལ་དང་པུ་ཙེ་ཤེལ། །ཁྲོན་བུ་ལེགས་པར་བཏགས་ནས་ནི། །བ་གཅིན་ནང་དུ་ཞག་གསུམ་སྦངས། །འདི་ནི་དུས་ཀུན་སྦྱོར་བ་སྟེ། །སྣུམ་ཞེན་དྲི་མ་ནད་རྣམས་འབྱིན། །ཞེས་བྱ་བ་ལ། དུར་བྱིད་ལ་སོགས་པའི་སྨན་ཕྱེ་མར་བཏགས་པ་བ་

གཅིན་གྱི་ནང་དུ་ཞག་གསུམ་སྦངས་པ། འདི་ནི་དུས་ཀུན་དུ་བཏང་བའི་སྦྱོར་བ་ཡིན་ཏེ། སྣུམ་གྱིས་ཞེན་པར་བྱས་པའི་ལུས་ལས་དྲི་མ་ཞེས་བཤད་པ་དང་ནད་རྣམས་འབྱིན་པར་བྱེད་པ་ཡིན་ནོ། །ཤ་མ་དུར་བྱིན་བྱི་ཚེར་བ། །གླ་སྒང་ཧ་ཏི་པི་པི་ལིང་། །དུག་མོ་ཡུངས་དང་ནི་ལི་ནི། །འབྲས་བུ་གསུམ་དང་བུ་

ཙེ་ཤེལ། །ཕྱེ་མ་ཤ་ཁུ་འམ་མར་རམ་ནི། །ཆུ་དྲོན་དང་སྦྱར་ཐམས་ཅད་དུ། །ཁོང་རྩུབ་ལ་ཡང་གཏང་བར་བྱ། །ཞེས་བྱ་བ་ལ། ཤ་མ་དུར་བྱིད་ལ་སོགས་པའི་སྨན་ཆ་སྙོམས་ཏེ་ཕྱེ་མར་བཏགས་ལ། ཤ་ཁུ་འམ་མར་རམ་ཆུ་དྲོན་དང་སྦྱར་ཏེ་དུས་ཐམས་ཅད་དུ་སྐྱེས་བུ་ཁོང་རྩུབ་པ་དག་ལ་ཡང་གཏང་

བར་བྱ་བ་ཡིན་ནོ། །རིམས་དང་སྙིང་ནད་དྲེག་ནད་དང་། །རྟུག་སྐམ་ལ་སོགས་ནད་རྣམས་ལ། །དོང་གའི་བཀྲུ་སྨན་ལྷག་པར་ནི། །འཇམ་མངར་བསིལ་ལ་ཕན་པ་ཡིན། །ཞེས་བྱ་བ་ལ། རིམས་ལ་སོགས་པའི་ནད་ལ་ནི་ལྷག་པར་ཡང་དོང་གའི་བཀྲུ་སྨན་ཕན་པ་ཡིན་ཏེ། དེ་ནི་འཇམ་པར་འཁྲུ་ལ་རོ་མངར་

ཞིང་བསིལ་པའི་ནུས་པ་དང་ལྡན་པ་ཡིན་ནོ། །བྱིས་པ་རྒན་པོ་གློ་རྡོལ་དང་། །སྐྱིད་དེ་བ་ཡི་མི་རྣམས་ལ། །འཇམ་ཞིང་སྐྱོན་ནི་མེད་པའི་ཕྱིར། །མཆོག་དུ་དོང་གའི་བཀྲུ་སྨན་གཏང་། །ཞེས་བྱ་བ་ལ། ཁྱད་པར་དུ་བྱིས་པ་ལ་སོགས་པའི་ནད་རྣམས་ལ་ལྷག་པར་འཇམ་པར་འཁྲུ་ཞིང་འཚེ་

བའི་སྐྱོན་མེད་པའི་ཕྱིར་དོང་གའི་བཀྲུ་སྨན་གཏང་བ་ལྷག་པར་ཡང་བསྔགས་པ་ཡིན་ནོ། །འབྲུས་བུའི་དུས་སུ་ལེགས་སྨིན་པའི། །དེ་ཡི་འབྲས་བུ་བཏུས་ནས་ནི། །ཞེས་བྱ་བ་ལ། །དོང་ག་དེའི་འབྲས་བུ་འབྱུང་བའི་དུས་སུ་སྐྱེས་བ་ཤིང་དུས་མ་ཡིན་པར་སྐྱེས་པ་མ་ཡིན་ལ། །ལེགས་པར་སྨིན་

ཅིང་ཚོས་པ་དེ་བཏུ་ཞིང་བླང་བར་བྱའོ། །དེ་ནི་ཡོན་ཏན་ལྡན་གྱུར་པས། །ཁུར་གཅིག་ཕྱེ་མའི་ནང་དུ་གཞུག །ཅེས་བྱ་བ་ལ། དོང་གའི་འབྲས་བུ་དེ་འབུས་ཟོས་བ་ལ་སོགས་པའི་སྐྱོན་མེད་པ་དེ་ཁུར་གཅིག་ཙམ་ཞིག་གཞུག་པར་བྱའོ། །ཞག་བདུན་ལོན་ནས་བྱུང་ནས་ནི། །ཉི་མ་ལ་ནི་

เล่ม ๒๐๒ · หน้า 65b

བསྐམ་པར་བྱ། །ཞེས་བྱ་བ་ལ། འབྲས་བུ་དེ་ཕྱེ་མར་སྦས་པའི་འོག་ཏུ་ཞག་བདུན་ནས་ཕྱུང་ལ་ཉི་མ་ལ་བསྐམ་པར་བྱའོ། །དེ་ནས་རྐང་ནི་ཕྱུང་ནས་སུ། །སྣོད་ནི་གཙང་མར་གཞག་པར་བྱ། ཞེས་བྱ་བ་ལ། དེ་ལྟར་བསྐམས་པའི་འོག་ཏུ་འབྲས་བུ་དེའི་ནང་གི་རྐང་ཕྱུང་ལ།

རྫ་སྣོད་ལ་སོགས་པའི་སྣོད་གཙང་མའི་ནང་དུ་གཞག་པར་བྱའོ། །བྱིས་པ་ལོ་བཞི་ལོན་པ་ནས། །ལོ་ནི་བཅུ་གཉིས་ལོན་གྱི་བར། ལུས་ཚ་རྟུག་འགགས་ཀྱིས་གཟིར་ལ། །རྒུན་ཆུར་སྦྱར་ཏེ་བླུད་པར་བྱ། །ཞེས་བྱ་བ་ལ། དོང་གའི་རྐང་དེ་ལུས་ཚ་བ་དང་། རྟུག་བ་འགགས་

པའི་ནད་ཀྱིས་གཟིར་བར་བྱེད་པའི་བྱིས་པ་ལོ་བཞི་ནས་ལོ་བཅུ་གཉིས་ལོན་བའི་བར་དག་ལ་རྒུན་ཆུ་དང་སྦྱར་ཏེ་བླུད་ན་བདེ་བར་འཁྲུ་པར་བྱེད་དོ། །དོང་གའི་རྐང་ནི་མཉེས་པ་དང་། །བསྐོལ་བའི་ཆུ་ནི་གྲང་མོ་བླུད། །ཅེས་བྱ་བ་ལ། ཡང་དེ་ལ་དོང་གའི་རྐང་མཉེས་པ་བསྐོལ་བའི་ཆུ་བསྒྲངས་

བ་བླུད་ན་ཡང་བདེ་བར་འཁྲུ་བར་བྱེད་པ་ཡིན་ནོ། །ཡང་ན་ཆང་དངས་ཞོ་ག་ཆུ། །སྐྱུ་རུ་ར་ཡི་ཁུ་བ་འམ། །རང་སྐྱུར་དག་དང་བཅས་པ་འམ། །དུར་བྱིད་ལྡེ་གུར་སྦྱར་བ་སྤྱིན། །ཞེས་བྱ་བ་ལ། །ཡང་ན་དོང་གའི་རྐང་མཉེས་པའི་ཁུ་བ་ཆང་གི་དངས་མ་འམ། ཞོ་ག་ཆུ་ལ་སོགས་པའམ། །དུར་

བྱིད་ཀྱི་ལྡེ་གུ་ཡང་བླུད་པར་བྱའོ། །དན་དའི་ཁུ་བར་དེ་ཡི་རྐང་། །བུ་རམ་རྙིང་པ་བཅུག་ནས་ནི། །ཟླ་བ་གཅིག་གམ་ཟླ་ཕྱེད་བར། །མནན་པའི་ཆང་ནི་བླུད་པར་བྱ། །ཞེས་བྱ་བ་ལ། དོང་གའི་རྐང་དང་བུ་རམ་རྙིང་བ་དན་ད་བསྐོལ་བའི་ཁུ་བའི་ནང་དུ་བཅུག་ལ་དེ་ཟླ་བ་གཅིག་གམ་ཟླ་བ་ཕྱེད་ཀྱི་

བར་དུ་མནན་ཏེ་བླུད་ན་ཡང་བདེ་བར་འཁྲུ་བར་བྱེད་དོ། །སེང་ཕྲོམ་རྩ་བའི་ཤུན་པ་ནི། །ནང་གི་ཤུན་ལྤགས་པོར་ནས་ནི། །བསྐམས་ཏེ་ཕྱེ་མར་བྱས་ནས་ནི། དེ་ལ་ཆ་གཉིས་བསྐོལ་ཏེ་གཟགས། །སེང་ཕྲོམ་ཆ་ནི་གསུམ་པ་སྦངས། །རྩ་བ་བཅུ་ཡི་ཁུ་བ་དང་། །ཆ་དེ་སླར་ཡང་སྦང་བར་བྱ། །

སླར་ཡང་སྐམས་ཏེ་ཕྱེ་མར་བྱས། །དེ་ལས་ཞོ་གཉིས་བ་གཅིན་ནམ། །ཆང་གི་དངས་མ་འམ་ཞོ་ག་ཆུ། །རྒྱ་ཤུག་སྐྱུ་རུ་རའི་ཁུ་བ། །གང་ཡང་རུང་བར་སྦྱར་ཏེ་བླུད། །ཅེས་བྱ་བ་ལ། སེང་ཕྲོམ་ནི་རོ་ཏྲ་དང་། བི་ཧང་པ་ཏྲ་ཞེས་བྱ་བ་སྟེ། དེའི་རྩ་བ་དང་ཤུན་པགས་ཀྱི་ནང་རིམ་བོར་ཏེ།

เล่ม ๒๐๒ · หน้า 66a

ལེགས་པར་བསྐམས་ནས་ཕྱེ་མར་བྱས་ལ་དེའི་འོག་ཏུ་ཕྱེ་མ་དེ་ཆ་གསུམ་དུ་བྱས་ལ་ཆ་གཉིས་བསྐོལ་བའི་ཁུ་བ་དེ་བཙགས་ནས། ཁུ་བ་དེ་དང་སེང་ཕྲོམ་ཆ་གསུམ་པ་བསྲེས་ལ། སྤང་བར་བྱ་བ་དང་། རྩ་བ་བཅུའི་ཁུ་བ་དང་ཡང་ཆ་དེ་སྦང་བར་བྱའོ། །དེ་ནས་སླར་ཕྱུང་ལ་བསྐམས་ཏེ་

ཕྱེ་མར་བྱས་ནས་ཕྱེ་མ་དེ་ལ་ཞོ་གཉིས་ཀྱི་ཚད་བ་གཅིན་ནམ་ཆང་གི་དངས་མ་འམ། ཞོ་ག་ཆུ་ལ་སོགས་པ་གང་ཡང་རུང་བ་དང་སྦྱར་ཏེ། ཅི་རིགས་པར་བླུད་པར་བྱའོ། །སེང་ཕྲོམ་བསྐོལ་བའི་ཁུ་བ་དང་། །ལྡེ་གུར་བྱས་ཏེ་ཁ་ར་དང་། །མར་དང་བསྐོལ་བའི་ལྡེ་གུ་དེ། །བཀྲུ་སྨན་གྱི་ནི་དམ་པ་ཡིན། །ཞེས་

བྱ་བ་ལ། སེང་ཕྲོམ་ཞེས་བྱ་བ་རོ་ཏྲ་བསྐོལ་བའི་ཁུ་བ་ཁ་ར་དང་བསྐོལ་བའི་ལྡེ་གུ་དེ་བྱིན་ན་ཡང་བཀྲུ་སྨན་གྱི་མཆོག་ཡིན་ནོ། །ཤྲཱི་ཁཎྜས་ནད་ཀྱི་ཚོགས། །ཤས་ཆེར་སོགས་བ་འང་འཇིག་བྱེད་དེ། །མྱུར་དུ་འཁྲུ་ཞིང་གྲགས་པས་ན། །ལྟོ་སྙི་ཉམ་ཆུང་བྱིས་པ་དང་། །རྒན་པོ་ནད་པ་ཡུན་རིངས་ལ། །དེ་ནི་

གཏང་བར་མི་བྱའོ། །ཞེས་བྱ་བ་ལ། ཤྲཱི་ཁཎྜ་ཞེས་བྱ་བ་ཤིང་སུ་ཏའི་འོ་མ་བསྐོལ་བས་ནད་ཀྱི་ཚོགས་ཤས་ཆེར་ཚོགས་ཤིང་དཀྱེལ་སྐྱེས་པ་ཡང་མྱུར་དུ་འཁྲུ་བར་བྱེད་ཅིང་སྐྲག་ཅིང་སྡུག་བསྔལ་བས་སེམས་མྱོས་པར་བྱེད་པ་ཡིན་པས་ན་དེའི་ཕྱིར་ལྟོ་སྙི་བ་ལ་སོགས་པར་བཀྲུ་སྨན་དུ་གཏང་པར་མི་བྱའོ། །

སྐྲན་དང་དམུ་རྫིང་སྦྱར་བའི་དུག །ལྤགས་ནད་གཅིན་ནད་སྦྲང་རྩི་འདྲ། །སྐྱ་རྦབ་སྐྲན་དང་དུག་གིས་ཕོག །ནད་ཀྱིས་སེམས་དཀྲུགས་གྱུར་ལ་གཏང་། །ཞེས་བྱ་བ་ལ། ཡང་ཤྲཱི་ཁཎྜ་དེ་སྐྲན་ལ་སོགས་པའི་ནད་ཀྱིས་བཏབ་པ་ལ་བཀྲུ་སྨན་དུ་གཏང་བར་བྱའོ། །དེ་ནི་ཚེར་མ་རྣོན་པོ་ནི། །མང་པོས་

ཁྱབ་པར་གྱུར་པ་མཆོག །ཅེས་བྱ་བ་ལ། ཤིང་སུ་ཏ་དེ་ཡང་ཚེར་མ་རྣོན་པོ་མང་པོས་ཁྱབ་ཅིང་གཡོགས་པར་གྱུར་པ་དེ་ཐམས་ཅད་ཀྱི་མཆོག་ཡིན་ནོ། །ལོ་གཉིས་པ་འམ་ལོ་གསུམ་པ། །ཁྱད་པར་དུ་ནི་དགུན་གྱི་མཐར། །དེ་ནི་མཚོན་གྱིས་རྣམ་བཅད་ལ། དེ་ལས་འོ་མ་བླང་བར་བྱ། །ཞེས་

བྱ་བ་ལ། ཡང་ཤིང་སུ་ཏ་དེ་ལོ་གཉིས་སམ་ལོ་གསུམ་ལོན་པའི་གཞོན་ནུ་རྩ་བ་ལེགས་པར་ཟུག་པ། དཔྱིད་ཟླ་ར་བའི་ཚེ་མཚོན་གྱིས་བཅད་ལ། དེ་ལས་འོ་མ་གཟགས་ཤིང་བླང་བར་བྱའོ། །བིལ་བ་ལ་སོགས་རྩ་བ་ལྔ། བྲི་ཧ་ཏི་ནི་རྣམ་གཉིས་དང་། །བསྐོལ་བའི་ཁུ་བ་དང་མཉམ་པའི། །དུ་ཏའི་འོ་

เล่ม ๒๐๒ · หน้า 66b

མ་དང་བསྲེས་ལ། །དེ་འོག་མེ་ཡི་མདག་མར་བསྐམ། །རི་ལུར་བྱས་པ་ཞོ་ག་ཆུ་འམ། །ཆང་ངམ་བ་གཅིན་སོགས་སྦྱར་བླུད། །ཅེས་བྱ་བ་ལ། བིལ་བ་ལ་སོགས་པ་རྩ་བ་ཆེན་པོ་ལྔ་དང་། བྲི་ཧ་ཏི་ནི་རྣམ་པ་གཉིས་ཏེ་ཀཎྜ་ཀ་རི་དང་། བྲི་ཧ་ཏི་གཉིས་པོ་ལས་སྨན་སྣ་རེ་རེ་ཞིང་བསྐོལ་བའི་ཁུ་

བ་དང་། ཤིང་སུ་ཏའི་འོ་མ་བསྲེས་ཏེ་ཆ་མཉམ་དུ་བྱས་ལ། དེ་ནས་དེའི་འོག་ཏུ་དེ་གཉིས་ཀ་མེའི་མདག་མ་ལ་བསྐོམས་ཏེ། དེ་ནས་རི་ལུར་ཆ་མཉམ་པར་བྱས་ལ། ཞོ་ག་ཆུ་འམ་ཆང་ངམ་རྩ་བ་མོའི་དངས་མ་བ་གཅིན་ནམ། རྒྱ་ཤུག་གི་ཁུ་བ་འམ། སྐྱུ་རུ་རའི་ཁུ་བ་འམ། སྐྱུར་རྩབས་ཀན་ཛི་

གང་ཡང་རུང་བ་དང་སྦྱར་ཏེ་བླུད་པར་བྱའོ། །དུར་བྱིད་སོགས་དགུ་འབྲས་བུ་གསུམ། ཁྲོན་བུས་བ་ཏ་ལ་དང་བཅས། །སུ་ཏའི་འོ་མས་ཞག་བདུན་སྦངས། །ཤ་ཁུ་འམ་མར་དང་སྦྱར་ཏེ་བླུད། །ཅེས་བྱ་བ་ལ། དུར་བྱིད་ལ་སོགས་པ་དགུ་སྟེ། ཏྲི་བྱིད་ཅེས་བྱ་བ་དུར་བྱིད་དཀར་པོ་དང་། ཤ་

མ་དུར་བྱིད་དང་། དོང་ག་དང་། །སེང་ཕྲོམ་དང་། སུ་ཏ་ཞེས་བྱ་བ་ཤྲཱ་ིཁཎྜ་དང་ཤང་ཁི་ནི་དང་། དན་ད་དང་། །ཏྲ་བན་ཏི་དང་། །ས་ཏ་ལ་ཞེས་བྱ་བ་དང་བཅས་པ་སྟེ་དགུ་པོ་དང་། འབྲས་བུ་གསུམ་གྱི་ཕྱེ་མ་དང་། རྩང་སྨན་ཁྲོན་བུ་དང་བཅས་པ་ཤིང་སུ་ཏ་ཞེས་བྱ་བ་སྣུ་ཧའི་འོ་མའི་ནད་དུ་ཞག་བདུན་སྦངས་པ་

ཤ་ཁུ་འམ་མར་དང་སྦྱར་ཏེ་བླུད་ན་ཡང་བདེ་བར་འཁྲུ་བར་བྱེད་དོ། །ཚ་བ་གསུམ་དང་འབྲས་བུ་གསུམ། །དུར་བྱིད་དན་ད་ཙི་ཏྲ་ཀ །དེ་བཞིན་བུ་རམ་ཆུས་སྦྱར་བླུད། །ཅེས་བྱ་བ་ལ། ཚ་བ་གསུམ་དང་། འབྲས་བུ་གསུམ་དང་། །དུར་བྱིད་དང་དན་ད་དང་། ཙི་ཏྲ་ཀའི་ཕྱེ་མ་སྔ་མ་བཞིན་དུ་སུ་ཏའི་འོ་མའི་

ནང་དུ་སྦངས་པ་བླུད་ན་ཡང་ངེས་པར་འཁྲུ་བར་བྱེད་དོ། །ཤང་ཁི་ནི་ཡི་འབྲས་བུ་ནི། །ཕུབ་མ་མེད་ཅིང་མ་བསྐམས་བཏུ། །དེ་བཞིན་ས་བ་ཏ་ལའི་རྩ་བ། །དེ་དག་རྣོན་པོར་འཁྲུ་བྱེད་ཡིན། །བད་ཀན་དམུ་རྫིང་སྦྱར་བའི་དུག །སྐྲན་སོགས་ནད་ལ་གཏང་བར་བྱ། །ཞེས་བྱ་བ་ལ། ཤང་ཁི་ནི་

ནི་ཏུ་ལ་དང་། ཡ་བ་ཏིག་ཏ་ཞེས་བྱ་བའི་སྨན་དེ་དེའི་འབྲས་བུའོ། །ཕུབ་མ་མེད་པར་གྱུར་པ་དང་། །ཤས་ཆེར་མ་བསྐམས་བཏུ་བ་དང་། །དེ་བཞིན་དུ་ས་བ་ཏ་ལའི་རྩ་བ་སྦྱར་ཏེ། དེ་དག་གིས་རྣོ་བར་འཁྲུ་བར་བྱེད་པ་ཡིན་པས་བད་ཀན་གྱི་ནད་ལ་སོགས་པ་ལ་གཏང་བར་བྱའོ། །དེ་གཉིས་རི་ལུ་ཞོ་གཉིས་

เล่ม ๒๐๒ · หน้า 67a

ཙམ། །ཆང་དང་རྒྱམ་ཚར་སྦྱར་བ་ནི། །བད་རླུང་ལས་གྱུར་སྙིང་ནད་དང་། །དེ་བཞིན་སྐྲན་གྱི་ནད་ལ་གཏང་། །ཞེས་བྱ་བ་ལ། ཤང་ཁི་ནིའི་འབྲས་བུ་དང་། སབ་ཏ་ལའི་རྩ་བ་དེ་གཉིས་ཕྱེ་མར་བཏགས་ཏེ། །རི་ལུར་བསྒོངས་བ་ཞོ་གཉིས་ཙམ་ཆང་དང་རྒྱམ་ཚ་

དང་སྦྱར་བ་ནི་བད་ཀན་དང་རླུང་ལས་གྱུར་པའི་སྙིང་ནད་དང་སྐྲན་གྱི་ནད་ལ་གཏང་བར་བྱའོ། །དན་ད་དྲ་བན་ཏིའི་རྩ་བ། །གླང་པོའི་སོ་ལྟར་བརྟན་ཞིང་སྦོམ། །དམར་ཞིང་གནག་ལ་རྣོ་ཞིང་དྲོ། །མྱུར་དུ་འཁྲུ་བར་བྱེད་པ་ཡིན། །ལྕི་ཞིང་རླུང་ནི་འཁྲུ་བྱེད་ཅིང་། །མཁྲིས་པ་བད་ཀན་འཇུ་བར་བྱེད། །

ཅེས་བྱ་བ་ལ། དན་ད་ནི་ཀུམ་པ་སྟེ་དེ་དང་དྲ་བན་ཏི་ཞེས་བྱ་བའི་རྩ་བ་གླང་པོ་ཆེའི་སོ་ལྟར་བརྟན་ཞིང་སྦོམ་པར་གནས་པ་དམར་གནག་ཏུ་འདུག་པ་རང་བཞིན་རྣོ་ཞིང་དྲོ་བ། མྱུར་དུ་འཁྲུ་ཞིང་སྦྱོང་བར་བྱེད་པ་ལྕི་བའི་ནུས་པ་དང་ལྡན་པ། །རླུང་གི་ནད་འཁྲུ་པར་བྱེད་པ། མཁྲིས་པ་དང་བད་ཀན་གྱི་ནད་

འཇུ་བར་བྱེད་པ་ཡིན་ནོ། །དེ་ནི་སྦྲང་རྩི་པི་པི་ལིང་། །ལྡེ་གུས་བསྐུས་ལ་འཇག་མ་དང་། །འཇིམ་པས་བསྐུས་ཤིང་མེས་བསྲེགས་ལ། །ཉི་མ་ཆུང་ཟད་དྲོ་བསྐོམས་པས། །དེ་ཡི་རྣོ་བས་བསལ་བར་བྱ། །ཞེས་བྱ་བ་ལ། དན་ད་དང་དྲ་བ་ན་ཏིའི་རྩ་བ་དེ་སྦྲང་རྩི་དང་པི་པི་ལིང་གཉིས་ཀྱི་ལྡེ་

གུས་བསྐུས་ལ་འཇག་མ་དང་འཇིམ་པས་ཀྱང་བསྐུས་ཏེ་སྨན་གྱི་དུར་བུའི་ཚུལ་དུ་བསྲེགས་ལ་ཚོས་པར་གྱུར་པ་དང་། ཉི་མའི་ཚ་བ་ཧ་ཅང་མི་ཆེ་བ་ལ་ཡང་བསྐམ་པར་མི་བྱ་སྟེ། ཅིའི་ཕྱིར་ཞེ་ན། དེ་དག་ནི་རྣོ་བ་ལུས་ཟུངས་ལ་གནོད་པར་བྱེད་པ་མེད་པ་དང་། ཉི་མའི་ཚ་བས་བསལ་ཞིང་གཞིག་པར་

བྱའོ། །དེ་ནི་ཆང་དངས་ཞོ་ག་ཆུ། །དར་བ་མནན་ཆང་པི་ལུ་ཡི། །ཁུ་བ་གང་ཡང་རུང་སྦྱར་བླུད། །ཉམ་ཆུང་སྐྲན་དང་གཅིན་སྙི་དང་། །དམུ་རྫིང་སྦྱར་བའི་དུག་རྣམས་སེལ། །ཞེས་བྱ་བ་ལ། དེ་ལྟར་བྱས་པའི་རྩ་བ་དེ། ལྡེ་གུར་བྱས་པ་ལ་ཆང་གི་དངས་མ་ལ་སོགས་པ་གང་ཡང་རུང་བ་དང་

སྦྱར་ཏེ་བླུད་ན་ལུས་ནད་ཀྱིས་ཉམས་སྨད་པའི་སྐྲན་ལ་སོགས་བའི་ནད་རྣམས་སྦྱོང་བར་བྱེད་དོ། །བ་གླང་རི་དགས་ར་ཤ་ཡི། །ཁུ་བར་སྦྱར་བས་སྐྱ་རྦབ་དང་། །ལྟོ་སྲིན་མཚན་བར་རྡོལ་ནད་སེལ། །ཞེས་བྱ་བ་ལ། དན་ད་དང་དྲ་བན་ཏིའི་རྩ་བའི་ཕྱེ་མ་བ་གླང་ངམ་རི་དགས་སམ་ར་ཤའི་ཁུ་བ་དང་

เล่ม ๒๐๒ · หน้า 67b

སྦྱར་ཏེ་བླུད་ན་སྐྱ་རྦབ་དང་ལྟོ་ན་སྲིན་བུ་ཡོད་པ་དང་། མཚན་པར་རྡོལ་བའི་ནད་སེལ་ཅིང་སྦྱོང་བར་བྱེད་དོ། །དེ་བསྐོལ་ཁུ་བ་ལྡེ་གུ་དང་། །རྩ་བ་བཅུ་ཡི་ཁུ་བར་བསྐོལ། །རྩ་བ་བཅུ་ཡི་ཁུ་བར་བསྐོལ། །མར་གྱིས་མེ་དང་ལ་ཁོང་འབྲས་དང་། །འབྲུམ་ཕྲན་མཚན་ཁུང་ཚ་བ་སེལ། །ཞེས་བྱ་བ་ལ། དན་ད་དང་དྲ་བན་ཏིའི་

རྩ་བ་བཏགས་བའི་ལྡེ་གུ་རྩ་བ་བཅུ་བསྐོལ་བའི་ཁུ་བ་དང་། བསྐོལ་བའི་མར་བླུད་ན་མེ་དབལ་གྱི་ནད་ལ་སོགས་པ་སེལ་བར་བྱེད་དོ། །ཏིལ་མར་བཅས་པས་སྐྲན་ཟ་ཁུ། །གཞང་འབྲུམ་རྟུག་འགགས་བད་རླུང་སེལ། །ཞེས་བྱ་བ་ལ། བཤད་མ་ཐག་པའི་ཆོ་ག་འདི་ཉིད་ཀྱིས་ཏིལ་མར་བསྐོལ་

ཏེ་བསྐུས་ན་སྐྲན་ལ་སོགས་པའི་ནད་སེལ་བར་བྱེད་དོ། །སྣུམ་ཆེན་སྦྱར་པས་ཁུ་ཆུ་བཤང་། །འཕྱེན་འགགས་རླུང་གི་ནད་རྣམས་སྦྱོང་། །ཞེས་བྱ་བ་ལ། ཆོ་ག་འདིས་སྣུམ་ཆེན་པོ་སྟེ་ཞུན་མར་དང་རྐང་དང་ཚིལ་དང་ཏིལ་མར་བསྐོལ་བ་བླུད་ན་ཁུ་ཆུ་འགགས་པ་ལ་སོགས་པའི་ནད་དང་རླུང་གི་

ནད་གཞན་དག་ཀྱང་སྦྱོང་བར་བྱེད་དོ། །དུར་བྱིད་ལ་སོགས་དགུ་པོ་འདི། །བཀྲུ་སྨན་གྱི་ནི་རབ་མཆོག་ཡིན། །ཞེས་བྱ་བ་ལ། དུར་བྱིད་རྣམ་གཉིས་དང་། དོང་ག་ལ་སོགས་པ་སྨན་དགུ་པོ་འདི་དག་ནི་བཀྲུ་སྨན་རྣམས་ཀྱི་ནང་ན་མཆོག་ཏུ་གྱུར་པ་ཡིན་ནོ། །ཨ་རུ་ར་ཡང་དུར་བྱིད་ཀྱི། །ཆོ་ག་བཞིན་

དུ་སྦྱར་བར་བྱ། །ཞེས་བྱ་བ་ལ། ཨ་རུ་ར་ཡང་གོང་དུ་བཤད་པའི་དུར་བྱིད་ཀྱི་ཆོ་ག་བཞིན་དུ་བཤད་པར་བྱ་སྟེ། དེ་ནས་དུས་སུ་དེའི་ཕྱེ་མ། །རྒྱམ་ཚ་དོང་ག་ཅུང་ཟད་གདབ། །རླུང་ནད་ལ་ནི་སྐྱུར་ལས་བླུད། །ཅེས་བྱ་བ་ལ་སོགས་པ་སྦྱར་པའི་བར་ཇི་སྙེད་སྨོས་པ་རྣམས་ལ་དུར་བྱིད་ཀྱི་གོང་

ཨ་རུ་ར་བཅུག་ལ་སྨན་གྱིས་སྦྱང་བར་བྱའོ། །བུ་རམ་སྲང་བརྒྱད་ཨ་རུ་ར། །ཉི་ཤུ་དན་ད་ཙི་ཏྲ་ཀ །སྲང་རེ་པི་པི་ལིང་དུར་བྱིད། །ཞོ་ནི་གཉིས་གཉིས་ལྷན་ཅིག་སྦྱར། །རི་ལུ་བཅུ་བྱས་ཞག་བཅུ་བར། །རི་ལུ་རེ་རེ་ཟོས་རྗེས་ལ། །ཆུ་དྲོན་བླུད་ཅིང་ཆོ་ག་འདིས། །

དེ་དག་ཐམས་ཅད་ཟོས་གྱུར་ན། །ཀུན་ཟོས་བསྲུང་བ་འང་མི་དགོས་པར། །འདིས་ནི་ཐམས་ཅད་སེལ་བར་བྱེད། །མཆོག་ཏུ་སྐྱ་རྦབ་ཕོ་བའི་ནད། །ལྤགས་ནད་ཟླུམ་པོ་གཞང་འབྲུམ་དང་། །གཡན་པའི་ནད་རྣམས་སེལ་བ་ཡིན། །ཞེས་བྱ་བ་ལ། བུ་རམ་སྲང་

เล่ม ๒๐๒ · หน้า 68a

བརྒྱད་དང་། །ཨ་རུ་ར་རྡོག་མ་ཉི་ཤུ། དན་ད་དང་ཙི་ཏྲ་ཀ་སྲང་རེ་རེ། །པི་པི་ལིང་དང་དུར་བྱིད་གཉིས་ཞོ་གཉིས་གཉིས་སྦྱར་ལ་དེ་དག་ལས་རི་ལུ་ཆ་མཉམ་པ་བཅུར་བྱས་ཏེ། རི་ལུ་རེ་རེ་ཞག་བཅུ་བཅུའི་བར་དུ་ཟོས་ལ། དེའི་རྗེས་ལ་ཆུ་དྲོན་བླུད་དེ་ཆོ་ག་འདིས་རི་ལུ་

དེ་ཐམས་ཅད་ཟོས་པར་གྱུར་ན་རི་ལུ་འདིས་ཆོ་ག་བསྲུང་ཞིང་བསྡམས་མི་དགོས་པར་ནད་ཐམས་ཅད་སེལ་ཅིང་འཇོམས་པར་བྱེད་པ་ཡིན་ལ། དེ་ལས་ཀྱང་ཁྱད་པར་དུ་སྐྱ་རྦབ་ལ་སོགས་པའི་ནད་སེལ་ཞིང་འཇོམས་པར་བྱེད་པ་ཡིན་ནོ། །ཆུང་ངུ་འང་དོན་ནི་ཆེན་པོ་དང་། །ཆེན་པོ་འང་ལས་ནི་ཉུང་ཟད་

དང་། །འདྲེ་དང་དབྱེ་བ་བྱས་པ་དང་། །དུས་དང་སྦྱོར་བ་ལྡན་པར་བྱེད། །ཅེས་བྱ་བ་ལ། །ཆུང་བ་སྟེ་ནུས་པ་ཆུང་ངུ་ཡང་ཚད་ཆེན་པོ་དང་ལྡན་པས་དོན་ཆེན་པོ་སྟེ། ལས་སུ་བྱ་བ་ཆེན་པོ་བྱེད་པར་འགྱུར་བ་དང་། ནུས་པ་ཆེན་པོ་དང་ལྡན་པ་དག་ཀྱང་ཚད་ཆུང་ངུར་བཏང་བས། ལས་ཀྱི་བྱ་བ་

ཉུང་ཟད་བྱེད་ཅིང་ནུས་པ་ཞན་པར་འགྱུར་ཏེ། ཇི་ལྟ་ཞེ་ན། འདྲེས་པ་ལ་སོགས་པས་བྱ་བ་དེ་དག་བྱེད་དེ། དེ་ལ་སྨན་རྣོན་པོ་དང་སྦྱར་བ་ཆུང་ངུས་ཀྱང་དོན་ཆེན་པོ་བྱེད་པར་འགྱུར་ལ། །མང་པོ་ཡང་སྨན་རྣོན་པོ་དང་། དབྱེ་ཞིང་དེ་དང་མི་ལྡན་ན་ལས་ཉུང་ཟད་བྱེད་པར་འགྱུར་རོ། །དེ་བཞིན་དུས་

ཀྱིས་ཀྱང་སྨན་བཏུལ་ཞིང་འཇམ་པ་དེ་ཉིད་སོས་ཀའི་ཚེ་བཏང་ན་དོན་ཆེན་པོ་བྱེད་པར་འགྱུར་ལ། སྨན་རྣོན་པོ་ཡང་དགུན་གྱི་དུས་སུ་བཏང་ན་ལས་ཉུང་ཟད་བྱེད་པར་འགྱུར་རོ། །སྦྱོར་བ་ནི་ནུས་པ་སྐྱེད་པར་བྱེད་པ་སྟེ། སྦྱོར་བ་དེས་ན་སྨན་འཇམ་པོ་རྣོན་པོ་དང་སྦྱར་བས་ཀྱང་དོན་ཆེན་པོ་བྱེད་པར་འགྱུར་

ལ། སྨན་རྣོན་པོ་ཡང་སྨན་རྟུལ་པོ་དང་སྦྱར་ན་ཡང་ལས་ཉུང་ཟད་བྱེད་པར་འགྱུར་རོ། །ཡང་དེ་བཞིན་དུ་རིགས་པའི་སྦྱོར་བས་ནུས་པ་ཞན་པའི་སྨན་དེ་ཉིད་སྨན་རྣོན་པོ་དང་ཅི་རིགས་པར་སྦྱར་ན་རྣོན་པོར་འགྱུར་ལ། དེ་བཞིན་དུ་སྨན་རྣོན་པོ་ཡང་ནུས་པ་ཞན་པའི་སྨན་དང་སྦྱར་ན་རྟུལ་པོར་འགྱུར་རོ།

དེ་ཡང་དྲང་སྲོང་ཙ་ར་ཀས། །སྨན་ནི་འདྲེ་བས་ཆུང་ངུ་ཡང་། །ལས་ནི་མང་པོ་བྱེད་པར་འགྱུར། །དེ་བས་སྨན་ནི་ནུས་པ་དག །མཚུངས་པས་ཉེ་བར་སྦྱར་བར་བྱ། །ཆུ་མེད་སྲིན་བུས་གནོད་མ་བྱས། །ཡུལ་དང་དུས་ཀྱི་ཡོན་ཏན་ལྡན། །ཚད་ནི་ཆུང་དང་ལྷག་པར་ལྡན། །ནུས་པ་མཚུངས་

เล่ม ๒๐๒ · หน้า 68b

ཤིང་ལེགས་སྦྱར་ལ། །སྣུམ་དང་དུགས་ཀྱི་ཆོ་ག་བྱས། །སྨན་ནི་རྣོ་བ་ཉིད་དུ་འགྱུར། །ཡོན་ཏན་འདི་དག་ཆུང་ཟད་སྨན། །སྔར་བཤད་ཚད་ཀྱིས་མཉམ་འགྱུར་ལ། །སྣུམ་དུགས་ལེགས་པར་མ་བྱས་ལ། །སྨན་གྱི་ནུས་པ་འབྲིང་པོར་འགྱུར། །སྨན་མཐུ་ཆུང་ཞིང་རྩུབ་

པ་དང་། །ཚད་ནི་ཆུང་བར་གྱུར་པ་དང་། །མཐུ་ནི་མི་མཚུངས་སྦྱར་གྱུར་པས། །ཤུགས་དལ་ལྟ་བུར་ནུས་ཞན་འགྱུར། །ཞེས་བྱ་བ་བཤད་པ་ཡིན་ནོ། །ཤིང་ཚ་ནཱ་ག་གེ་སར་དང་། །ཨ་མྲ་ཏ་ཀ་སེའུ་འབྲུ་དང་། །སུག་སྨེལ་ཁ་ར་སྦྲང་རྩི་དང་། །ཁ་ལུང་ཆང་སོགས་དེ་དང་

དེ། །ཡིད་དང་རྗེས་སུ་མཐུན་པ་ཡི། །རིགས་པས་བཀྲུ་སྨན་གཏང་བར་བྱ། །ཞེས་བྱ་བ་ལ། ཤིང་ཚ་ལ་སོགས་དང་ལྡན་པའི་བཀྲུ་སྨན་དེ་དང་དེ་ནད་པ་སོ་སོའི་ཡིད་དང་རྗེས་སུ་མཐུན་པ་འདིར་མ་བཤད་པར་གཞན་དག་ཀྱང་ཅི་རིགས་པར་སྦྱར་ཞིང་བཀྲུ་སྨན་དུ་གཏང་བར་མི་བྱ་སྟེ། གང་གི་

ཕྱིར་ཡིད་དང་རྗེས་སུ་མི་མཐུན་ཞིང་ཞེ་འགྲས་པ་ཡིད་དུ་མི་འོང་བ་དག་བྱིན་ན་སློན་པ་ལ་སོགས་པ་འབྱུང་བར་འགྱུར་བའི་སྐྱོན་ཡོད་པའི་ཕྱིར་རོ། །ཡན་ལག་བརྒྱད་པའི་སྙིང་བོའི་རྣམ་པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས།

ཆོ་ག་གྲུབ་བའི་གནས་ཀྱི་ལེའུ་གཉིས་བའི་འགྲེལ་པའོ།། །།དེ་ནས་སྐྱུག་སྨན་དང་བཀྲུ་སྨན་གྱི་ཉེས་པ་གྲུབ་པར་བྱ་བའི་ཆོ་ག་བཤད་བར་བྱའོ། །ཞེས་བྱ་བ་ལ། སྐྱུག་སྨན་དང་བཀྲུ་སྨན་གྱི་ཆོ་ག་བཤད་ནས་དེ་དག་ཉིད་ཀྱི་ཆོ་གའི་སྦྱོར་བ་ཕྱིན་ཅི་ལོག་ཏུ་གྱུར་པ་དེ་གྲུབ་པར་བྱ་ཞིང་

གསོ་བར་བྱ་བ་དང་། བཅོས་པར་བྱ་བའི་སྦྱོར་བ་བཤད་པར་བྱ་བའི་ཕྱིར་ལེ་འུ་འདི་བརྩམས་པ་ཡིན་ནོ། །སྐྱུག་སྨན་ལྟོ་ནི་སྙི་པ་འམ། །ལྟོགས་པ་འམ་བད་ཀན་ཤས་ཆུང་བ་འམ། །ཤིན་ཏུ་རྣོ་བ་འམ་གྲང་བའང་ཆུང་། །མ་ཞུ་བ་འམ་ཉམ་ཆུང་ལ། །བླུད་ན་ནད་འབྱུང་རེ་བ་ཉམས། །

དེ་ཚེ་ཐུར་འབྱུང་ནད་སློང་འགྱུར། །དེ་ལ་སླར་ཡང་སྣུམ་ཆོས་བྱ། །སྔར་གྱི་སྐྱོན་བྲལ་སྐྱུག་སྨན་གཏང་། །ཞེས་བྱ་བ་ལ། གལ་ཏེ་སྐྱུག་སྨན་ནད་པ་ལྟོ་སྙི་བར་གྱུར་བ་འམ། །ལྟོགས་ཤིང་བཀྲེས་པར་གྱུར་པ་འམ། བད་ཀན་གྱི་ཤས་ཆུང་བ་འམ། ཤིན་ཏུ་རྣོ་བ་ལ་སོགས་པ་ལ་བླུད་

เล่ม ๒๐๒ · หน้า 69a

པར་གྱུར་ན། ནད་གྱེན་དུ་འབྱུང་བའི་རེ་བ་དེས་ཉམས་པར་འགྱུར་ཞིང་འདོད་པའི་དོན་ཐོབ་པར་མི་འགྱུར་ལ། སྨན་ཡང་ཐུར་དུ་འབྱུང་བར་འགྱུར་ཞིང་སླར་ཡང་ནད་བསླངས་ཤིང་སྐྱེད་པར་འགྱུར་རོ། །ཉེས་པ་དེ་ལ་སླར་ཡང་སྣུམ་ཆོས་བྱ་ལ་སླར་སྐྱོན་གང་གིས་

ཉེས་པར་གྱུར་པ་དེ་རན་པར་བྱས་ལ་ཚད་དང་དུས་ལ་སོགས་པར་ལྟོས་པའི་སྨན་གྱིས་དེ་སྐྱུགས་ཤིང་སློན་དུ་གཞུག་པར་བྱའོ། །བཀྲུ་སྨན་མ་ཞུ་བད་ཀན་དང་། །ལྡན་པ་འམ་ཤིན་ཏུ་རྣོ་ཆེས་པ། །དྲོ་བ་འམ་ལན་ཚྭ་ཤས་ཆེ་བ། །ཡི་གར་མི་འོང་མངས་པ་ཡིས། །གྱེན་དུ་རྒལ་བར་

གྱུར་པ་དག །སྔར་བཤད་ཉེས་པ་དེ་ལ་ནི། །གྲུབ་པའི་སྦྱོར་བ་དེ་བཞིན་བྱ། །ཞེས་བྱ་བ་ལ། བཀྲུ་སྨན་དེ་ནད་པ་མ་ཞུ་བ་དང་ལྡན་པ་འམ། བད་ཀན་དང་ལྡན་པ་ལ་ནི་ཤིན་ཏུ་རྣོ་ཆེས་བ་འམ་ལན་ཚྭ་ཤས་ཆེ་བའི་ཡི་གར་མི་འོང་ཞིང་ཡིད་དང་མི་འཐད་པ་འམ། སྨན་ཤིན་ཏུ་མང་པོ་

འཐུངས་པས་ཚད་ལས་ཆེས་བར་གྱུར་པ་ལ་སོགས་པས་གྱེན་དུ་རྒལ་ཞིང་ཁའི་སྒྲོ་ལས་བྱུང་བར་གྱུར་པས་སྔར་བཤད་པའི་ཉེས་པ་ནད་འབྱུང་བའི་རེ་བ་ཉམས་པ་དང་། ནད་སླར་ལ་གློངས་པར་གྱུར་པ་དག་ལ་གྲུབ་པའི་སྦྱོར་བ་ཡང་སྔར་བཤད་པ་དང་འདྲ་བར་ནད་པ་དེ་སྣུམ་ཆོས་བྱ་ཞིང་སྔར་

གྱི་སྐྱོན་གང་ཡིན་པ་ཡང་ངོས་ཟིན་པར་བྱས་ལ། ཚད་དང་དུས་ལ་སོགས་པ་ལ་ལྟོས་པའི་བཀྲུ་སྨན་བཏང་ཞིང་སྔར་སྐྱོན་དུ་གྱུར་པའི་ཉེས་པ་དག་ཀྱང་སྤང་བར་བྱའོ། །དེ་ཡང་སྣོད་དུ་མ་ཆགས་ན། །གསུམ་པོ་དེ་ལ་བླུད་མི་བྱ། །གཞན་དུ་གོམས་པ་འམ་ཞིམ་པ་ཡི། །སྨན་ནི་གནོད་པ་

མེད་པ་གཏང་། །ཞེས་བྱ་བ་ལ། དེ་ལྟར་གསོ་བ་ལོག་པར་གྱུར་པའི་ཚུལ་གྱིས་བླུད་པས་སྨན་དེ་ཡང་ཁོང་པའི་སྣོད་ཀྱི་ནང་དུ་ཆགས་པར་མ་གྱུར་ཅིང་ཡང་གྱེན་དུ་རྒལ་བར་གྱུར་ན། དེའི་འོག་དུ་སྨན་གསུམ་པོ་དེ་ལ་བླུད་པར་མི་བྱ་ཞེས་གཞན་དུ་སྔར་གོམས་པར་གྱུར་པ་དང་། ཞིམ་ཞིང་ཡི་

གར་འོང་བའི་སྨན་གནོད་པ་མེད་པའི་ལྡེ་གུ་ལ་སོགས་པ་སྐྱིན་པ་ནི་མ་གཏོགས་ཏེ། ཡོན་ཏན་དེ་ལྟ་བུ་དང་ལྡན་པ་ནི་གསུམ་པ་ཡིན་ཡང་གཏང་བར་བྱའོ། །སྣུམ་ཆོས་དུགས་ནི་མ་བྱས་ལ། །སྨན་ནི་རྙིང་ཞིང་རྩུབ་པ་ཡིས། །ནད་སློང་ཕྱིན་པར་མ་གྱུར་པས། །མགོ་འཁོར་སྐྲན་དང་སྐྱིགས་བུ་དང་། །

เล่ม ๒๐๒ · หน้า 69b

མུན་པར་མཐོང་དང་སྐོམ་དད་ཆེ། །བྱིན་སྙིང་ན་ཞིང་ལུས་གཡའ་དང་། །བརླ་ན་ཁ་དོག་མི་སྡུག་པའི། །ནད་ནི་སྐྱེད་པར་བྱེད་པ་ཡིན། །ཞེས་བྱ་བ་ལ། ནད་པ་སྣུམ་ཆོས་དང་དུགས་མ་བྱས་པའི་ལུས་ལ་སྨན་རྙིང་པ་དང་རྩུབ་པ་དག་གིས་ནང་གློངས་ཤིང་གནས་ལས་བསྐྱོད་ནས་ཕྱིར་འབྱིན་

ཅིང་བསྐྱོད་པར་མ་ནུས་པས་མགོ་འཁོར་བ་ལ་སོགས་པའི་ནད་སྐྱེད་པར་བྱེད་པ་ཡིན་ནོ། །སྣུམ་ཆོས་དུགས་བྱས་སྨན་ཉུང་ཞིང་། །མེ་དྲོད་ཆེ་བས་ཞུ་གྱུར་པ་འམ། །གྲང་བས་རེངས་པ་འམ་མ་ཞུ་བས། །ནད་གློངས་པས་ནི་མ་ཕྱིན་པས། །ནད་ནི་དེ་དག་ཉིད་སྐྱེད་ཅིང་། །དེ་ཉིད་སྦྱོར་ཉེས་ཐམས་

ཅད་ཡིན། །ཞེས་བྱ་བ་ལ། སྣུམ་ཆོས་དང་དུགས་ལེགས་པར་བྱས་པའི་ནད་པ་ལ་སྨན་ཤིན་ཏུ་ཐུན་ཆུང་ཞིང་ཉུང་བ་བྱིན་པ་འམ། ཕོ་བའི་མེ་དྲོད་ཆེ་བས་སྨན་ཚད་ཆུང་ངུ་དེ་ཞུ་བར་བྱས་བ་འམ། གྲང་བས་རེངས་ཤིང་འཐས་པར་གྱུར་པ་འམ། མ་ཞུ་བ་དང་ལྡན་པས་ནད་གློངས་ནས་ཕྱིར་

འབྱིན་པར་མ་ནུས་པ་དག་གིས་སྔར་བཤད་མ་ཐག་པའི་ནད་མགོ་འཁོར་བ་དང་སྐྲངས་པ་ལ་སོགས་པ་དེ་དག་ཉིད་སྐྱེད་པར་བྱེད་དེ། དེ་དག་ཉིད་ནི་སྦྱོར་བ་ཉེས་པ་ཞེས་བྱ་བ་ཐམས་ཅད་ཡིན་ནོ། །དེ་ལ་ཏིལ་མར་རྒྱམ་ཚས་བསྐུས། །གཤག་མ་རྡོ་བས་དུགས་བྱས་ཤིང་། །མས་གཏོང་དྲག་

བྱས་སྐམ་སའི་ཤ །ཁ་ཟས་བྱིན་ལ་འཇམ་རྩི་ནི། །པོ་སོན་ཆ་དང་པི་པི་ལིང་། །ཐང་ཤིང་ཏིལ་མར་བསྐོལ་བ་གཏང་། །ཞེས་བྱ་བ་ལ། དེ་ལྟ་བུའི་ཉེས་བ་དང་ལྡན་པའི་མི་དེ་ལ་ཏིལ་མར་དང་རྒྱམ་ཚས་ལུས་བསྐུས་ལ། གཤག་མ་རྡོ་ཡིས་དུགས་བྱ་ཞིང་མས་གཏོར་བ་དྲག་པོ་ནི་རུ་ཧ་བྱས་ལ་སྐམ་

སའི་ཤ་ཁུ་དང་ཟས་བྱིན་པ་པོ་སོན་ཆ་ལ་སོགས་པ་དང་བསྐོལ་བའི་ཏིལ་མར་གྱི་འཇམ་རྩི་མས་གཏོང་བ་ཆད་དང་ལྡན་པར་བྱས་པ་ནད་གཞི་དང་ལུས་ཟུངས་ལ་སོགས་པའི་ཚུལ་ལ་བརྟགས་ཏེ་གཏང་བར་བྱའོ། །རླུང་འཇོམས་སྣུམ་གྱིས་སྣུམ་ཆོས་བྱ། །སླར་ཡང་བཀྲུ་སྨན་རྣོན་པོས་སྦྱང་། །ཞེས་བྱ་བ་ལ།

ཡང་དེ་ལ་རླུང་འཇོམས་པར་བྱེད་པའི་སྣུམ་གྱི་སྦྱོར་བས་སྣུམ་ཆོས་བྱས་ལ། བཀྲུ་སྨན་སྔ་མ་བས་རྣོ་བ་བཏང་ལ་སྦྱང་བར་བྱའོ། །ནད་གཞི་ཆེ་ཞིང་ཁོང་རྩུབ་ལ། །མེ་དྲོད་ཆུང་དང་སྨན་ཆུང་བ། །རྟུག་སྐམ་བཅས་པས་གློངས་པ་དང་། །ནད་ཀྱིས་ལམ་ནི་འགགས་པར་འགྱུར། །མི་བཟད་སྦོ་དང་ལྟེ་བ་དང་། །

เล่ม ๒๐๒ · หน้า 70a

རྒྱབ་དང་རྩིབ་ལོགས་མགོ་བོ་ན། །ཕྱི་ས་གཅིན་འགགས་དབུགས་མི་བདེ། །མི་བཟད་པ་ནི་སྐྱེད་པར་བྱེད། །ཅེས་བྱ་བ་ལ། ནད་གཞི་ཤས་ཆེ་བ་དང་། ཁོང་རྩུབ་པ་ལ་སོགས་པ་དང་ལྡན་པ་དང་། རྟུག་སྐམ་དང་བཅས་པས་གྱེན་དུ་འཁྱིལ་ཞིང་ནད་གློངས་པ་དང་།

ནད་དེས་རྩ་སྦུབས་ཀྱི་ལམ་འགགས་པར་བྱས་ནས་མི་བཟད་པར་སྦོ་བ་དང་། ལྟེ་བ་ལ་སོགས་པར་ན་བ་དང་། ཕྱི་ས་འགགས་པ་ལ་སོགས་པ་བརྣག་པར་དཀའ་བ་སྐྱེད་པར་བྱེད་པར་འགྱུར་རོ། །བསྐུ་དང་དུགས་དང་རེང་བུ་སོགས། །མས་གཏོང་དྲག་པོ་འཇམ་རྩི་བྱ། །རྟུག་སྐམ་སེལ་བའི་གསོ་

དཔྱད་ལས། །ཐམས་ཅད་སྦོ་བ་དག་ལ་ཕན། །ཞེས་བྱ་བ་ལ། སྦོ་བ་ལ་སོགས་པའི་ནད་དང་ལྡན་པའི་མི་དེ་ལ་སོགས་པའི་ནད་རྣམས་དང་། རྟུག་སྐམ་སེལ་བའི་གསོ་དཔྱད་ཀྱི་ལས་གཞང་འབྲུམ་གསོ་བའི་སྐབས་སུ་བཤད་པ་ཐམས་ཅད་ཕན་ནོ། རྩ་བ་ལྔ་པ་ནས་ཚིག་འཁུས། ཤུ་དག་

པི་ཏི་ཀ་རཉྫ། །རྒྱམ་ཚ་ནས་ཐུག་ལེགས་སྦྱར་བས། །གཟེར་ནད་རྟུག་སྐམ་ལྟོ་སྦོས་འཇོམས། །ཞེས་བྱ་བ་ལ། །རྩ་བ་ལྔ་པོ་ལ་སོགས་པའི་སྨན་དང་། ནས་ཐུག་ལེགས་པར་གཡོས་པས་ནི་གཟེར་ལ་སོགས་པའི་ནད་རྣམས་སེལ་བར་འགྱུར་རོ། །ཐལ་སྨན་སེའུ་འབྲུ་པི་པི་ལིང་། །

ཤིང་ཀུན་བཅའ་སྒ་སྟར་བུ་དང་། །རྒྱམ་ཚ་བཅས་པའི་ཆང་ངམ་ནི། །མར་རམ་ཆུ་དྲོན་སྦྱར་བ་བླུད། །མཁྲེགས་ཤིང་ཡོངས་སུ་འཛག་པ་དང་། །ན་ཞིང་བཅད་སྙམ་སེམས་པ་སེལ། །ཞེས་བྱ་བ་ལ། ཐལ་སྨན་ཡ་བཀྵ་ར་དང་སེའུ་འབྲུ་ལ་སོགས་པ་ཆང་ལ་སོགས་པ་གང་ཡང་རུང་པ་དང་

སྦྱར་ཏེ་བླུག་ན་མཁྲེགས་ཤིང་འཁྲུ་བ་ལ་སོགས་པའི་ནད་སེལ་བར་བྱེད་དོ། །སྨན་འཐུངས་གྱུར་པའི་ཤུགས་བཀག་ནི། །རླུང་ལ་སོགས་པའི་ནད་རྣམས་ནི། །འཁྲུགས་ཏེ་སྙིང་གི་ཕྱོགས་སོང་ནས། །སྙིང་ནད་མི་བཟད་སྐྱེད་པར་བྱེད། །སྐྱིགས་བུ་ལུད་པ་རྩིབ་ལོགས་ན། །རྨྱ་ཞིང་མིག་

འགུལ་ཁ་ཆུ་འཛག །དྲན་པ་ཉམས་ཤིང་ལྕེ་འཆའ་ལ། །སོ་ནི་ཁྲིག་ཁྲིག་འཆའ་བར་བྱེད། །ཅེས་བྱ་བ་ལ། ནད་པས་སྨན་འཐུངས་པར་གྱུར་ནས། འབྱུང་བར་འགྱུར་པའི་ཤུགས་བཀག་ཅིང་བརྣགས་ཏེ་འབྱུང་དུ་མ་སྟེར་ན་རླུང་ལ་སོགས་པའི་ནད་འཁྲུགས་ཤིང་ལྡང་བར་འགྱུར་ཏེ། སྙིང་

เล่ม ๒๐๒ · หน้า 70b

གི་ཕྱོགས་སུ་སོང་ནས་སྙིང་གི་ནད་བཙིར་བ་སྙམ་སེམས་པ་ལ་སོགས་པ་མི་བཟད་ཅིང་བརྣག་པར་དཀའ་བ་སྐྱེད་པ་དང་། སྐྱིགས་བུ་ལ་སོགས་པའི་ནད་འབྱུང་བར་འགྱུར་རོ། །དེ་ལ་སྨན་པ་མ་རྨོངས་པས། །མཁྲིས་པས་ཉེན་ལ་མངར་བ་དང་། །བད་ཀན་གྱིས་ཉེན་ཁ་བ་ཡི། །སྐྱུག་

སྨན་དག་ནི་མྱུར་དུ་གཏང་། །ཞེས་བྱ་བ་ལ། དེ་ལྟ་བུའི་གནས་སྐབས་སུ་གྱུར་པའི་ནད་པ་དེ་ལ་སྨན་པ་རྨོངས་ཤིང་འཁྲུལ་བར་མ་གྱུར་པས་གལ་ཏེ་ནད་དེ་མཁྲིས་པས་བརྒྱལ་བར་གྱུར་པ་ཡིན་ན། སྨན་མངར་བའི་སྐྱུག་སྨན་བླུད་དེ་མྱུར་དུ་སྐྱུག་ཏུ་གཞུག་ལ། བད་ཀན་གྱིས་བརྒྱལ་

བ་ཡིན་ན། སྨན་ཁ་བའི་སྐྱུག་སྨན་བླུད་དེ་སྐྱུག་ཏུ་གཞུག་པར་བྱའོ། །དེ་ནས་དེ་ལ་སྨིན་བྱེད་པའི། །ནད་ཀྱི་ལྷག་མ་སྨིན་པར་བྱ། །ཞེས་བྱ་བ་ལ། དེ་ནས་ནད་པ་དེ་སྨིན་པར་བྱེད་པའི་སྨན་གྱིས་ནད་ལྷག་མ་རྣམས་སྨིན་ཅིང་ཟད་པར་བྱའོ། །དེ་ཡི་མེ་དྲོད་ལུས་ཀྱི་སྟོབས། །རིམ་གྱིས་

མངོན་པར་འཕེལ་བར་བྱེད། །ཅེས་བྱ་བ་ལ། ཡང་ནད་པ་དེའི་ཕོ་བའི་མེ་དྲོད་དང་ལུས་ཀྱི་སྟོབས་རྗེས་སུ་མཐུན་པའི་སྨན་དང་། །ཟས་དང་སྐོམ་གྱིས་རིམ་གྱིས་མངོན་པར་འཕེལ་བར་བྱ་ཞིང་བསྐྱེད་པར་བྱའོ། །ཤས་ཆེར་སློན་གྱུར་རླུང་གིས་ནི། །གང་གི་སྙིང་ནི་གཟིར་གྱུར་པ། །

དེ་ལ་སྣུམ་འགྱུར་ལན་ཚྭ་སྦྱིན། མཁྲིས་པ་བད་ཀན་དེ་ལས་གཞན། །ཞེས་བྱ་བ་ལ། གང་ཞིག་ཤས་ཆེར་སློན་པར་གྱུར་པས་རླུང་གིས་སྙིང་གཟེར་ཞིང་ན་བར་གྱུར་པ་དེ་ལ། སྨན་དང་། ཟས་དང་། སྐོམསྣུམ་པ་དང་། སྐྱུར་བ་དང་། ལན་ཚྭའི་ཤས་ཆེ་བ་སྦྱིན་པར་བྱའོ། །

མཁྲིས་པ་དང་བད་ཀན་གྱི་ཤས་ཆེ་བ་སློན་པའི་ནང་ནི་དེ་ལས་གཞན་པ་སྟེ། རྩུབ་པ་དང་ཁ་བ་དང་བསྐ་བའི་ཟས་སྐོམ་དང་སྨན་སྦྱིན་པར་བྱའོ། །སྨན་ནི་འཐུངས་པར་གྱུར་ནས་ཤུགས། །བཀག་པར་གྱུར་པ་འམ་བད་ཀན་གྱིས། །འགགས་པ་འམ་ཤིན་ཏུ་སྦྱངས་གྱུར་པའི། །

ལུས་ལ་རླུང་ནི་འཇུག་གྱུར་ནས། །རེངས་དང་འདར་དང་ཟུག་པ་དང་། །ལུས་སྙོམ་དཀྲིས་སྙམ་སེམས་ཤིང་ཟུག །ཅེས་བྱ་བ་ལ། སྐྱེས་བུ་སྨན་འཐུངས་པར་གྱུར་ནས་ཤུགས་འབྱུང་བ་བཀག་པས་རླུང་གིས་ལམ་སྲང་འགགས་པར་བྱས་པ་དང་། བད་ཀན་གྱིས་འགགས་

เล่ม ๒๐๒ · หน้า 71a

པར་བྱས་པ་འམ། ཡང་ན་ཤིན་ཏུ་སྦྱངས་ཤིང་སློན་ཁྲུས་དྲགས་པར་གྱུར་པས་ལུས་ལ་རླུང་འཇུག་པར་འགྱུར་ཏེ། དེས་རླུང་རེངས་པ་ལ་སོགས་པའི་ནད་འབྱུང་བར་འགྱུར་རོ། །དེ་ལ་རླུང་ནི་འཇོམས་པ་ཡི། །སྣུམ་ཆོས་དུགས་སོགས་ཐམས་ཅད་བསྔགས། །

ཞེས་བྱ་བ་ལ། སྦྱོར་བ་ཉེས་པ་དེ་ལ་ནི་རླུང་འཇོམས་པར་བྱེད་པའི་གསོ་བ་དང་སྣུམ་ཆོས་ལ་སོགས་པ་ཐམས་ཅད་ཕན་ནོ། །སོགས་པ་སྨོས་པས་ནི་འཇམ་རྩི་དང་། བཀྲུ་བ་དང་སྨན་ཆུ་བླུགས་པ་དང་། ལུས་བྱིང་བ་དང་། ཁ་ཟས་དང་། སྐོམ་དང་། སྨན་རླུང་འཇོམས་པར་བྱེད་པ་དག་

བསྡུའོ། །སྨན་ཐུན་ཆེ་ལ་རྣོ་བ་ནི། །བཀྲེས་ཉེན་ལྟོ་སྙི་ལ་བླུད་ན། །བད་ཀན་མཁྲིས་པ་བཤང་བ་ནི། །བསལ་ནས་ལུས་ཟུངས་འཛག་པར་བྱེད། །ཅེས་བྱ་བ་ལ། བཀྲེས་པས་ཉེན་པ་དང་། ལྟོ་སྙི་བའི་ནད་པ་ལ་སྨན་ཐུན་ཆེ་ཞིང་མང་བར་བཏང་བར་གྱུར་ན། བད་ཀན་ལ་སོགས་པ་

མྱུར་དུ་བསལ་ཞིང་ཕྱུང་ནས་དངས་མ་ལ་སོགས་པའི་ལུས་ཟུངས་རྣམས་འཇག་ཅིང་འབྱུང་བར་བྱེད་དོ། །དེ་ལ་སྦྱོར་དྲགས་མངར་བ་ཡི། །སྨན་གྱིས་ལྷག་མ་སློན་དུ་གཞུག །ཅེས་བྱ་བ་ལ། སྦྱོར་བ་དྲགས་བའི་ཉེས་བ་བྱུང་བ་དེ་ལ་མངར་བའི་སྨན་གྱིས་མ་ཞུ་བའི་སྨན་ལྷག་མ་སློན་དུ་

གཞུག་ཅིང་སྦྱར་བར་བྱའོ། །སྐྱུག་སྨན་དྲགས་ལ་བཀྲུ་སྨན་གཏང་། །འཁྲུས་དྲགས་སྐྱུག་སྨན་འཇམ་པོ་གཏང་། །ཞེས་བྱ་བ་ལ། སྐྱུག་སྨན་གྱི་སྦྱོར་བ་དྲགས་པ་ལ་ནི་བཀྲུ་སྨན་གཏང་བར་བྱའོ། །བཀྲུ་སྨན་དྲགས་པར་གྱུར་པ་ལ་ནི་སྐྱུག་སྨན་འཇམ་པོ་གཏང་བར་བྱའོ། །དེ་ལ་ཆུ་གྲང་

བླུད་པ་དང་། རོ་སྨད་བཅིངས་པས་གཅད་པར་བྱ། །ཞེས་བྱ་བ་ལ། སྦྱོར་བ་དྲགས་པའི་ནད་པ་དེ་ལ་ཆུ་གྲང་བླུད་པར་བྱའོ། །རོ་སྨད་མན་ཆད་བཅིངས་པ་དང་ཟས་དང་སྐོམ་ཤིན་ཏུ་བསིལ་བས་དེ་གཅད་པར་བྱའོ། །སྟང་ཟིལ་ཙནྡན་པུ་ཤེལ་དང་། །ར་ཁྲག་ཁ་རའི་ཆུ་དང་ནི། །འབྲས་ཡོས་ཕྱེ་

མའི་སྐྱོ་མ་ནི། །སྦྱོར་དྲགས་སེལ་བའི་དམ་པ་ཡིན། །ཞེས་བྱ་བ་ལ། སྟང་ཟིལ་དེ་དངུལ་རྡོ་ལ་སོགས་པ་དང་སྦྱར་བའི་ཆུ་དང་འབྲས་ཡོས་སྐྱོ་མར་བྱས་པ་ནི་སྦྱོར་བ་དྲགས་པ་སེལ་བའི་མཆོག་ཡིན་པས་དེ་བླུད་པར་བྱའོ། །སློན་སྨན་སྦྱོར་བ་དྲགས་པ་ལ། །ཆུ་གྲང་དག་ནི་བླུགས་

เล่ม ๒๐๒ · หน้า 71b

པར་བྱ། །རྒུན་འབྲུ་ལ་སོགས་ཁུ་བ་མར། །སྦྲང་རྩི་ཁ་རའི་སྐྱོ་མ་བླུད། །ཅེས་བྱ་བ་ལ། སྐྱུག་སྨན་གྱི་སྦྱོར་བ་དྲགས་པ་ལ་ཆུ་གྲང་གིས་ལུས་ལ་བླུགས་པར་བྱ་ཞིང་རྒུན་འབྲུ་ལ་སོགས་པའི་སྐྱོ་མ་བླུད་པར་བྱའོ། །སྒྲེགས་པར་བཅས་པ་ཤིན་ཏུ་སྐྱུགས། །མུར་བ་འུ་སུ་གླ་སྒང་

དང་། སྟང་ཟིལ་མ་དུ་ཀའི་ཕྱེ་མ། །སྦྲང་རྩིར་བཅས་པའི་ལྡེ་གུ་སྦྱིན། །ཞེས་བྱ་བ་ལ། སྒྲེགས་པར་བཅས་པར་དྲག་ཏུ་སྐྱུག་པ་ལ་མུར་བ་ལ་སོགས་པའི་ཕྱེ་མ་སྦྲང་རྩི་དང་ལྡེ་གུར་སྦྱར་བ་སྦྱིན་ཞིང་བལྡག་ཏུ་གཞུག་པར་བྱའོ། །སློན་མཐར་ལྕེ་ནི་འཁུམས་པ་ལ། །སྣུམ་དང་སྐྱུར་དང་ལན་ཚྭ་དང་། །

ལྡན་པས་མཁུར་བ་བཀང་བ་དང་། །ཡིད་འོང་ཡུ་ཤ་ཤ་ཁུ་ཕན། །ཞེས་བྱ་བ་ལ། མི་སློན་དྲགས་པས་ལྕེ་འཁུམས་ཤིང་། ནང་དུ་ཞུགས་པར་གྱུར་པ་ལ་སྣུམ་ལ་སོགས་པ་དང་ལྡན་པས་མཁུར་བ་བཀང་བ་དང་། དེ་བཞིན་དུ། ཡིད་དུ་འོང་བའི་ཡུ་ཤ་དང་ཤ་ཁུ་བླུད་ན་ཕན་ནོ། །དེ་ཡི་

མདུན་དུ་མི་གཞན་ནི། །འབྲས་བུ་སྐྱུར་པ་ཟ་རུ་གཞུག །ཅེས་བྱ་བ་ལ། ལྕེ་འཁུམས་པའི་ནད་པ་དེའི་མདུན་དུ་སྐྱེས་བུ་གཞན་འབྲས་བུ་སྐྱུར་པ་ཟར་བཅུག་ན་ཕན་ནོ། །ལྕེ་ཕྱིར་བྱུང་ལ་ཏིལ་དང་ནི། །རྒུན་འབྲུའི་ལྡེ་གུ་བསྐུས་ནས་གཞུག །ཅེས་བྱ་བ་ལ། །སློན་དྲགས་པས་ལྕེ་ཕྱིར་

བྱུང་ཞིང་སྡུད་མི་ཤེས་པ་ལ་ནི་ཏིལ་དང་རྒུན་འབུམ་བཏགས་པའི་ལྡེ་གུས་བསྐུས་ལ་ནང་དུ་གཞུག་པར་བྱའོ། །ཚིག་ལྐུགས་རླུང་གི་ནད་ལ་ནི། །མར་དང་ཤ་དང་གཡོས་པ་ཡི། །ནས་ཐུག་སླ་བ་སྦྱིན་བྱ་ཞིང་། །སྣུམ་དང་དུགས་ཀྱི་སྦྱོར་བ་བྱ། །ཞེས་བྱ་བ་ལ། ཚིག་ལྐུགས་ཤིང་ཐོགས་པ་དང་།

དེ་བཞིན་དུ་རླུང་གི་ནད་ལྡང་བ་ལ་ནི་དུས་ཤེས་པའི་སྨན་པས་མར་དང་ཤ་དང་གཡོས་སུ་བྱས་པ་ནས་ཐུག་སླ་བ་སྦྱིན་པར་བྱ་ཞིང་། དེ་བཞིན་དུ་སྣུམ་དང་དུགས་ཀྱི་སྦྱོར་བ་དང་ལྡན་པར་བྱའོ། །སྨན་གྱི་སྦྱོར་བ་དྲགས་པ་ཡིས། །སྲོག་ཅེས་བྱ་བའི་ཁྲག་ཕྱུང་བས། །གང་ཕྱིར་དེ་ནི་སྲོག་འཕྲོག་པས། །

སྲོག་ལེན་པ་ནི་ཡིན་པར་བཤད། །ཅེས་བྱ་བ་ལ། སྨན་གྱི་སྦྱོར་བ་དྲགས་པས་ཤས་ཆེར་འཁྲུས་པ་ན། སྲོག་ཅེས་བྱ་བའི་ཁྲག་འབྱུང་བར་འགྱུར་ལ། དེས་ནི་མི་རྣམས་ཀྱི་སྲོག་འཕྲོག་ཅིང་གསོད་པར་བྱེད་པས་དེའི་ཕྱིར་དེ་ལ་ནི་སྲོག་ལེན་པ་ཞེས་སློབ་དཔོན་གྱིས་བཤད་དོ། །ཁྲག་

เล่ม ๒๐๒ · หน้า 72a

དེ་དང་ནི་ཟས་བཅས་པ། །ཁྱི་འམ་བྱ་རོག་ལ་བྱིན་ལ། ཟོས་ན་སྲོག་ཅེས་བརྗོད་པར་བྱ། །མ་ཟོས་མཁྲིས་པ་ཡིན་པར་བཤད། །ཅེས་བྱ་བ་ལ། སྲོག་ཅེས་བྱ་བའི་ཁྲག་འཁྲུས་པ་དེ་དང་ཟས་སུ་སྦྱར་ལ། ཁྱི་འམ་བྱ་རོག་ལ་བྱིན་ན། གལ་ཏེ་ཟ་བར་

གྱུར་ན་ནི། སྲོག་ཅེས་བྱ་བའི་ཁྲག་ཡིན་པར་བརྗོད་པར་བྱ་ལ། གལ་ཏེ་ཟ་བར་མ་གྱུར་ན་སྲོག་མ་ཡིན་གྱི་མཁྲིས་པ་ཡིན་པར་ཤེས་པར་བྱའོ། །ཡང་ན་རས་དཀར་ལ་བསྒོས་ཏེ། །བསྐམས་ལ་ཆུ་དྲོན་གྱིས་བཀྲུས་ལ། །བཀྲུས་ཀྱང་དག་པར་མ་གྱུར་ན། །མཁྲིས་པའོ་དག་ན་

ཁྲག་ཡིན་ནོ། །ཞེས་བྱ་བ་ལ། ཡང་ན་འཁྲུས་པའི་ཁྲག་དེ་རས་དཀར་པོ་ལ་བསྒོས་ཏེ། དེའི་འོག་ཏུ་ཉི་མ་ལ་བསྐམས་ལ། དེ་ནས་ཆུ་དྲོན་གྱིས་བཀྲུ་སྟེ་མ་དག་པར་གྱུར་ན་ནི་མཁྲིས་པ་ཡིན་ལ། གལ་ཏེ་དེ་དག་པར་གྱུར་ན་ནི་སྲོག་ཅེས་བྱ་བའི་ཁྲག་ཡིན་པར་ཤེས་པར་བྱའོ། །

སྐོམ་དད་བརྒྱལ་དང་མྱོས་པས་ཉེན། དེ་ལ་སྲོག་ནི་མྱུར་བསྲུང་ཕྱིར། །ཁྲག་དང་མཁྲིས་པ་སེལ་པ་ཡི། །གསོ་བ་འཚོ་བའི་བར་དུ་བྱ། །ཞེས་བྱ་བ་ལ། སྐོམ་དད་ལ་སོགས་པས་ཉེན་པའི་ནད་པ་ལ་སྲོག་བསྲུང་བར་བྱ་བའི་ཕྱིར་ཁྲག་དང་མཁྲིས་པ་སེལ་བའི་གསོ་བ་ཇི་

སྐད་བཤད་པ་དག་ཤིས་པར་གྱུར་གྱི་བར་དུ་རྒྱུན་དུ་བྱའོ། །རི་དགས་བ་གླང་མ་ཧེ་ར། །གསོན་པོའི་ཁྲག་ནི་ཕྱུང་མ་ཐག །སྲོག་ནི་འབྱོར་བར་བྱེད་པ་བླུད། །དེ་ནི་མྱུར་དུ་སྲོག་ཏུ་འགྱུར། །ཞེས་བྱ་བ་ལ། རི་དགས་ལ་སོགས་པ་གསོན་པོའི་ཁྲག་ཕྱུང་མ་ཐག་མིའི་སྲོག་ཅེས་

བྱ་བའི་ཁྲག་འབྱོར་ཅིང་འཛིན་པར་བྱེད་པ་ཡིན་པས་དེ་བླུད་པར་བྱ་སྟེ། དེས་ནི་དེའི་སྲོག་མྱུར་དུ་འཛིན་པར་བྱེད་ཅིང་ཚིམ་པར་བྱེད་པར་འགྱུར་རོ། །དེ་ཉིད་འཇག་མ་དང་མཉེས་པའི། །ཁྲག་ནི་འཇམ་རྩིར་གཏང་བར་བྱ། །ཞེས་བྱ་བ་ལ། ཁྲག་དེ་ཉིད་འཇག་མ་དང་མཉེས་ཏེ་

བཙགས་པའི་འཇམ་རྩི་མས་གཏོང་བར་བྱའོ། །དུར་བྱིད་ཏང་པལ་ཤིང་མངར་དང་། །དཱུར་བ་པུ་ཤེལ་ཙེ་འོ་མ། །བསྐོལ་བ་མར་གྱི་སྙིང་པོ་དང་། །སྟང་ཟིལ་དང་ནི་བཅས་པ་ཡི། །འཇམ་རྩི་གྲང་མོ་གཏང་བར་བྱ། །ཞེས་བྱ་བ་ལ། དུར་བྱིད་ལ་སོགས་པའི་སྨན་དང་འོ་མ་བསྐོལ་བ་དང་།

เล่ม ๒๐๒ · หน้า 72b

མར་གྱི་སྙིང་པོ་དང་། སྟང་ཟིལ་དང་བཅས་པའི་འཇམ་རྩི་གྲང་མོ་བཏང་ན་ཡང་ཕན་ནོ། །སྤྱི་བག་འཇམ་རྩི་རབ་གྲང་བ་འམ། །མར་གྱི་སྙིང་པོ་འཇམ་རྩི་གཏང་། །ཞེས་བྱ་བ་ལ། ཡང་ན་སྤྱི་བག་གི་འཇམ་རྩི་རབ་ཏུ་གྲང་མོ་འཁྲུ་བ་གསོ་བའི་སྐབས་སུ་བཤད་པ་གཏང་བར་བྱ་བ་འམ།

དེ་བཞིན་དུ་མར་གྱི་ཉིང་ཁུའི་འཇམ་རྩི་གཏང་བར་བྱའོ། །གཞང་ཕྱིར་བྱུང་ལ་སྨན་ཁུ་ཡིས། །འཁྲུ་བ་བཅད་ལ་གཞུག་པར་བྱ། །ཞེས་བྱ་བ་ལ། གཞང་ཕྱིར་བྱུང་བ་ལ་ནི་སྦྱོར་བ་དང་འཕྲོད་པའི་སྨན་གྱི་ཁུ་བས་འཁྲུ་བ་བཅད་ལ། ནང་དུ་ལེགས་པར་གཞུག་པར་བྱའོ། །དྲན་པ་

སྟོར་ལ་རིག་བྱེད་ཚིག །གླིང་བུ་གླུ་དབྱངས་ཉན་དུ་གཞུག །ཅེས་བྱ་བ་ལ། སྨན་གྱི་སྦྱོར་བ་དྲགས་པས་དྲན་པ་སྟོར་བར་གྱུར་པ་ལ་ནི་སྙན་ཚིག་གི་རིག་བྱེད་དང་། གླིང་བུ་དང་། གླུ་དབྱངས་སྙན་པ་ཉན་དུ་གཞུག་ཅིང་ཡིད་གསོ་བར་བྱའོ། །ཡན་ལག་བརྒྱད་པའི་སྙིང་པོའི་རྣམ་

པར་འགྲེལ་པ་ཚིག་གི་དོན་གྱི་ཟླ་ཟེར་ཞེས་བྱ་བ། སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཆོ་ག་གྲུབ་པའི་གནས་ཀྱི་ལེའུ་གསུམ་པའི་འགྲེལ་པའོ།། །།དེ་ནས་སྨན་མས་གཏོང་བའི་ཆོ་ག་བཤད་པར་བྱའོ། །ཞེས་བྱ་བ་ལ། སྔར་བྱས་ཟིན་པའི་འོག་ཏུ་

འཇམ་རྩི་མས་གཏོང་བར་བྱ་བ་ཡང་རིགས་པ་ཡིན་པས་སྐྱུག་སྨན་དང་། བཀྲུ་སྨན་གཏང་བའི་ཆོ་གའི་འོག་ཏུ་ལེའུ་འདི་བརྩམས་པ་ཡིན་ནོ། །བ་ལ་སླེ་ཏྲེས་ར་སྣ་འབྲས་བུ་གསུམ། །རྩ་བ་ལྔ་པ་རྣམ་གཉིས་སྲང་རེའི་ཚད། །པོ་སོན་ཆ་བརྒྱད་ར་ཤ་སྲང་ལྔ་བཅུ། །ཆུ་ནང་བསྐོལ་ཏེ་བཞི་ཆ་ལུས་གྱུར་པ། །

བཙགས་པར་ལ་ལ་ཕུད་དང་པོ་སོན་ཆ། །བིལ་བ་རུ་རྟ་ཤ་ཏ་པུཥྤ་དང་། །ཤུ་དག་གླ་སྒང་པི་པི་ལིང་རྣམས་ཀྱི། །ལྡེ་གུ་བུ་རམ་སྦྲང་རྩི་མར་དང་ནི། །ཏིལ་མར་རྒྱམ་ཚ་དག་དང་ལྡན་གྱུར་པ། །དྲོ་འཇམ་ཆོ་ག་བཞིན་དུ་བཏང་གྱུར་པ། །མས་གཏོང་མཆོག་སྟེ་ནད་ཀུན་འཇོམས་བྱེད་ཡིན། །ནད་

མེད་ལ་ཕན་ཚེ་རིང་ཉམས་བརྟས་བྱེད། །འཇམ་རྩི་གང་དུ་ལྡེ་གུ་མ་སྨོས་པ། །དེར་ནི་ཀུན་ལ་འདི་ཉིད་གཞུག་པར་བྱ། །ཞེས་བྱ་བ་ལ། བ་ལ་ནས་རྩ་བ་བཅུ་པའི་བར་སྨན་སྣ་རེ་ཞིང་སྲང་རེའི་ཚད་དུ་བྱས་པ་དང་། པོ་སོན་ཆ་རྡོག་མ་བརྒྱད་སྲང་གཅིག་ཙམ་ཡོད་པ་དང་། ར་ཤ་སྲང་ལྔ་བཅུ་

เล่ม ๒๐๒ · หน้า 73a

ཆུ་ཚད་བཞིན་དུ་བྱས་པའི་ནད་དུ་བསྐོལ་ལ། དེའི་ཁུ་བ་བཞི་ཆ་ལུས་པ་བྱས་ཏེ། དེ་ཡང་འདིར་བ་ལ་ལ་སོགས་པ་སྨན་སྣ་བཅུ་དྲུག་པོ་དེ་དག་གི་ཆུ་བཅུ་དྲུག་འགྱུར་ཏེ། ཆུ་སྲང་ཉིས་བརྒྱ་ལྔ་བཅུ་རྩ་དྲུག་ཡོད་དོ། །དེ་ཙམ་དང་དེ་དག་བསྐོལ་ལ། དེའི་བཞི་ཆ་སྟེ།

ཆུ་སྲང་དྲུག་ཅུ་རྩ་བཞི་ལུས་པ་དང་དབབ་པར་བྱ་སྟེ། འདིར་སྨན་ལ་ལྟོས་ནས་ཆུ་སྲང་བཅུ་དྲུག་འགྱུར་གཞུག་པར་བའོ། །ཤ་ལ་ལྟོས་ན་ནི་ཆུ་ཤིན་ཏུ་བསྐོལ་བ་མང་བས་བསྐོལ་བ་ཐལ་ཆེས་པར་འགྱུར་བའི་ཕྱིར་དང་། དགོས་པ་མེད་པའི་ཕྱིར་སྨན་པ་རྒན་པོ་དེ་དག་དེ་ལྟར་ཉེ་

བར་སྦྱོད་པར་མི་བྱེད་དོ། །འདིར་དཔེར་བརྗོད་པ་ནི་ར་སྣ་ལ་སོགས་པའི་སྨན་མར་ལུད་པ་གསོ་བའི་སྐབས་སུ་བཤད་པ་ལྟ་བུ་ཡིན་ནོ། །དེ་ལྟར་བཞི་ཆ་ལུས་པའི་སྨན་གྱི་ཁུ་བ་དེ་བཙགས་ལ། དེའི་ནང་དུ་ལ་ལ་ཕུད་ལ་སོགས་པ་བཏགས་པའི་ལྡེ་གུ་དང་བུ་རམ་དང་སྦྲང་རྩི་ལ་

སོགས་པ་དང་ལྡན་པར་བྱས་པ་དྲོ་འཇམ་ཙམ་སྔར་བཤད་པ་བཞིན་དུ་མས་གཏོང་བར་གྱུར་པ་ནི་འཇམ་རྩིའི་མཆོག་ཡིན་ཏེ། ནད་ཐམས་ཅད་འཇོམས་པར་བྱེད་ཅིང་ནད་མེད་པ་ལ་ཡང་ཕན་ཞིང་ཚེ་རིང་བར་བྱེད་པ་ཡིན་ནོ། །འདིར་ལྡེ་གུ་ལ་སོགས་པའི་ཚད་མས་གཏོང་བའི་ཆོ་ག་

ལས་བཤད་པ་ལྟར་ཤེས་པར་བྱ་སྟེ། དེ་བདེ་བླག་ཏུ་དྲན་པར་བྱ་བའི་ཕྱིར་ཡང་དེ་ཉིད་བསྟན་པར་བྱ་སྟེ། ལྡེ་གུ་ནི་བསྐོལ་བའི་སྨན་གྱི་བརྒྱད་ཆ་གཞུག་པར་བྱ་བ་འམ། ཤིན་ཏུ་སླ་བ་འམ་ཤིན་ཏུ་སྐ་བར་མ་གྱུར་པ་དེ་ཙམ་དུ་གཞུག་ལ། བུ་རམ་ནི་སྲང་གཅིག་གཞུག་པར་བྱ་ཞིང་

སྦྲང་རྩི་དང་རྒྱམ་ཚ་ནི་ཅི་རིགས་པ་གཞུག་པར་བྱའོ། །འདིར་སྣུམ་ནི་བསྐོལ་བའི་སྨན་ཁུའི་བཞི་ཆ་དང་ཆ་མཉམ་པར་གཞུག་པར་བྱའོ། །དེ་ཡང་གང་གི་ཕྱིར་སྦྲང་རྩི་རྒྱམ་ཚ་ལ་སོགས་པ་ཅི་རིགས་པ་ཞེས་བཤད་པ་ཡིན་ལ། རིགས་པ་དེ་ཡང་བཀྲུ་སྨན་དྲུག་པོ་མས་གཏོང་བ་བཤད་པའི་ཚིག་

གཞན་དག་ལ་བཤད་པར་བྱ་སྟེ། དེ་ཡང་སྤྲང་རྩ་དང་ཏིལ་མར་ནི་ཁྱོར་བཞི་གཞུག་པར་བྱ་ལ། རྒྱམ་ཚ་ནི་ཞོ་གཉིས་གཞུག་པར་བྱའོ། །ཞེས་ཇི་སྐད་བཤད་པ་དང་། དེ་བཞིན་དུ་སྙིང་པོ་ལས། སྣུམ་དང་སྦྲང་རྩི་རེ་རེ་ཞིང་། །སྲང་ནི་གསུམ་གསུམ་ཚད་དུ་བྱ། །ཞེས་བྱ་བ་ལ་སོགས་པ་

เล่ม ๒๐๒ · หน้า 73b

སྨྲས་པ་ཡིན་ནོ། །མས་གཏོང་བའི་འཇམ་རྩིའི་སྐབས་གང་དུ་ལྡེ་གུའི་སྨན་མ་སྨོས་པ་དེ་འཇམ་རྩི་ཀུན་ལ་ཡང་ལ་ལ་ཕུད་ལ་སོགས་པའི་ལྡེ་གུ་འདི་ཉིད་གཞུག་པར་བྱའོ། །རྩ་བ་བཅུ་པའི་ཁུ་བ་སྐྱུར་དང་ནི། །ར་ཤ་བཅས་པ་སྔ་མ་བཏགས་པ་དང་། །སྣུམ་ཆེན་གསུམ་ལྡན་མས་གཏོང་མཆོག་

ཡིན་ཏེ། །རླང་གི་ནད་ཀུན་རབ་ཏུ་འཇོམས་པར་བཤད། །ཅེས་བྱ་བ་ལ། སྨན་རྩ་བ་ལྔ་པ་ཆེ་ཆུང་གཉིས་དང་། ར་ཤ་དང་བཅས་པའི་ཁུ་བ་བསྐོལ་བ་ཆོ་ག་བཞིན་དུ་བསྐོལ་བའི་སྨན་གྱི་ཁུ་བ་སྦྱོར་བ་དང་འཚམ་པའི་སྐྱུར་དང་ལྡན་པ་དང་སྔར་བཤད་པའི་ལ་ལ་ཕུད་ལ་སོགས་པའི་སྨན་བཏགས་པ་

གཞུག་པ་དང་། སྣུམ་ཆེན་པོ་གསུམ་པོ་ཏིལ་མར་དང་ཞུན་མར་ཞག་དང་ལྡན་པ་འམ། ནད་གཞིའི་ཚུལ་ལས་དཔག་ཏེ། སྣུམ་གསུམ་པོ་དེ་དག་ལས་གང་ཡང་རུང་བ་དང་སྦྱར་ཏེ་མས་གཏོང་བ་ནི་མས་གཏོང་བའི་དམ་པ་ཡིན་ཏེ། རླུང་གི་ནད་ཐམས་ཅད་འཇོམས་པར་བྱེད་པ་ཡིན་ནོ། །ཞེས་དྲང་སྲོང་རྣམས་

ཀྱིས་བཤད་དོ། །པ་ལ་པ་ཏོལ་རྩ་བ་ཆུང་ངུ་ལྔ། །ཀྱི་ལྕེ་བ་དང་ཨེ་རཎྜ་དང་ནས། །བསྐོལ་བའི་ཁུ་བ་བྲེ་གང་ར་ཤའི་ཁུ། །དེ་ཡི་ཕྱེད་བཅུག་ལ་བསྐོལ་བྲེ་གང་ལུས། །པྲི་ཡང་ཀུ་དང་གླ་སྒང་པི་པི་ལིང་། །ལྡེ་གུར་བྱས་ཤིང་ཏིལ་མར་ཞུན་མར་དང་། །སྦྲང་རྩི་རྒྱམ་ཚ་དང་ནི་ལྡན་གྱུར་པའི། །

འཇམ་རྩི་བཏང་ན་མེ་དྲོད་འཕེལ་བ་དང་། །ཉམས་སྟོབས་བསྐྱེད་ཅིང་ཤ་ནི་རྒྱས་པ་དང་། །མིག་གི་གསལ་སྟོབས་འཕྲལ་དུ་སྐྱེད་པར་བྱེད། །ཅེས་བྱ་བ་ལ་སོགས་པའི་སྨན་གྱི་ཚོགས་བསྐོལ་བའི་ཆོ་ག་བཞིན་དུ་ལེགས་པར་བསྐོལ་བ་བྲེ་གང་དང་ར་ཤའི་ཁུ་བ་བྲེ་ཕྱེད་བཅུག་ལ་ཡང་

དེ་བྲེ་གང་ལུས་ཀྱི་བར་དུ་བསྐོལ་ལ། པྲི་ཡང་ཀུ་དང་གླ་སྒང་དང་། །པི་པི་ལིང་གི་ལྡེ་གུ་བརྒྱད་ཆ་ཆ་མཉམ་པ་དང་ལྡན་པ་ཏིལ་མར་དང་སྦྲང་རྩི་དང་རྒྱམ་ཚ་དང་ལྡན་པར་བྱས་པའི་འཇམ་རྩི་དེས་ནི་ཕོ་བའི་མེ་དྲོད་འཕེལ་བར་བྱེད་པ་ལ་སོགས་པ་སྐྱེད་པར་བྱེད་པ་ཡིན་ནོ། །ཨེ་རཎྜའི་རྩ་སྲང་

གསུམ་པ་ལ་ཤ །སྲང་གསུམ་རྩ་བ་ལྔ་པ་ཆུང་ངུ་དང་། །ར་སྣ་པ་ལ་སླེ་ཏྲེས་བ་སྤྲུ་བ། །ཨ་ཤྭ་གནྡྷ་དོང་ག་ཐང་ཤིང་རྣམས། པོ་སོན་ཆ་བརྒྱད་ཆུ་བྲེ་བརྒྱད་དུ་བསྐོལ། །བརྒྱད་ཆ་ལུས་པར་གྱུར་པ་དེ་ཡི་ནང་། །ཤུ་དག་ཤུ་ཏི་སྦ་མའི་འབྲས་བུ་དང་། །པྲི་ཡང་ཀུ་དང་ཤིང་མངར་པི་པི་

เล่ม ๒๐๒ · หน้า 74a

ལིང་། །དུག་མོ་ཡུངས་ཀྱི་ས་བོན་གླ་སྒང་དང་། །སྐྱེར་པའི་ཁཎྜར་བཅས་བ་ཞིབ་ཏུ་བཏགས། །ཞོ་གཉིས་ཚད་ཀྱིས་རྒྱམ་ཚར་བཅས་པ་དང་། །སྦྲང་རྩི་ཏིལ་མར་བ་གཅིན་དང་སྦྱར་བའི། །མས་གཏོང་སྐྱུགས་བྱེད་མེ་དྲོད་སྐྱེད་པ་དང་། །རྐང་པ་བྱིན་པ་བརླ་

དང་འཇུག་ཏོ་དང་། །ལྟོ་བ་སྙི་དང་ཕོ་མཚན་ན་བ་དང་། །ལུས་ལྕི་རླུང་དང་བཤང་གཅི་འགགས་དང་སྐྲན། །རྡེའུ་ཆགས་རྒྱུ་རླུགས་གཞང་འབྲུམ་ཕོ་བའི་ནད། །བད་ཀན་རླུགས་ནད་དེ་དང་དེ་དག་འཇོམས། །ཞེས་བྱ་བ་ལ། ཨེ་རཎྜའི་རྩ་བ་དང་པ་ལ་ཤ་སྲང་གསུམ་

གསུམ། རྩ་བ་ལྔ་པ་ཆུང་ངུ་ལ་སོགས་བའི་སྨན་སྣ་རེ་ཞིང་སྲང་རེ། །པོ་སོན་ཆ་རྡོག་མ་བརྒྱད་ཆུ་བྲེ་བརྒྱད་དེ། །སྲང་ཉིས་བརྒྱ་ལྔ་བཅུ་རྩ་དྲུག་གི་ནང་དུ་དེ་ཐམས་ཅད་བསྐོལ་ཏེ། བསྐོལ་བ་དེ་ལས་བརྒྱད་ཆ་སྟེ་བྲེ་གང་ལུས་པར་གྱུར་པ་དང་། སྨན་གྱི་ཁུ་བ་དེའི་ནད་དུ་ཤུ་དག་ལ་

སོགས་པ་ནས་སྐྱེར་པའི་ཁཎྜ་དང་བཅས་པར་ཞིབ་ཏུ་བཏགས་བའི་ལྡེ་གུ་དང་། རྒྱམ་ཚ་ཞོ་གཉིས་སམ། ནད་གཞིའི་ཚུལ་ལས་དཔགས་པའི་ཚད་དང་ལྡན་པའི་སྦྲང་རྩི་ལ་སོགས་པ་སྦྱར་བས་མས་གཏོང་བས་ནི་བད་ཀན་དང་ཚིགས་ལ་སོགས་པའི་ནད་ལ་སོགས་པ་སྐྱུགས་

པར་བྱེད་པ་དང་། རྐང་པའི་ནད་ལ་སོགས་པ་བད་ཀན་དང་རླུང་ལས་གྱུར་པའི་ནད་གང་དག་ཡིན་པ་དེ་དང་དེ་དག་ཐམས་ཅད་འཇོམས་ཤིང་སེལ་བར་བྱེད་དོ། །ཤིང་མངར་སེང་ཕྲོམ་ཙནྡན་ཨུཏྤལ་ཨ་རུ་ར། །ཙནྡན་ཨུཏྤལ་བ་ཡི་འོ་མར་བསྐོལ། །འཚོ་བྱེད་ཁ་ར་མར་དང་བཅས་པ་ཡི། །

འཇམ་རྩིས་མཁྲིས་པའི་ནད་རྣམས་སེལ་བར་བྱེད། །ཅེས་བྱ་བ་ལ། ཤིང་མངར་ལ་སོགས་པའི་སྨན་པའི་འོ་མར་བསྐོལ་བའི་ནང་དུ་འཚོ་བྱེད་ཀྱི་སྡེ་ཚན་གྱི་ལྡེ་གུ་དང་ཁ་ར་དང་མར་དང་བཅས་པར་སྦྱར་བའི་འཇམ་རྩི་མས་གཏོང་བས་ནི་མཁྲིས་པ་ལ་སོགས་བའི་ནད་འཇོམས་ཤིང་སེལ་བར་

བྱེད་དོ། །ར་སྣ་བ་ཤ་ཀ་འཚོད་བྱི་ཚེར་བ། །བ་ལ་རྩ་བ་ཆུང་ལྔ་རྩྭ་ཡི་ལྔ། །ཐལ་ཏྲེས་ཙནྡན་ཤུག་པ་རྣམ་གཉིས་དང་། །ཤིང་མངར་སེང་ཕྲོམ་སྲང་ནི་ཕྱེད་ཕྱེད་དང་། །ཆུ་དང་བསྐོལ་བའི་ཁུ་བ་དེ་དང་ནི། །འོ་མ་བྲེ་བཞི་བསྐོལ་ཏེ་ཆུ་ངུའི་བར། །ཛི་བན་ཏི་དང་མེ་ད་རྣམ་

เล่ม ๒๐๒ · หน้า 74b

གཉིས་དང་། །ཉེའུ་ཤིང་རམ་ཉེ་བ་གཉིས་བི་ད་རི། །ཀ་ཤེ་རུ་དང་ཁ་ར་དཀར་པོ་དང་། །ཛི་བ་ཀ་དང་པདྨ་གེ་སར་དང་། །སྟག་ཚེར་ཨུཏྤལ་དང་པདྨ་དཀར། །སེང་ཕྲོམ་ཁ་སྲལ་ཕྲེའུ་ཤིང་མངར་དང་། །ནཱ་ག་གེ་སར་མུན་ཛ་ཏ་ཀ་དང་། །ཙནྡན་རྣམ་གཉིས་བཏགས་

པ་མར་དང་ནི། །སྦྲང་རྩི་རྒྱམ་ཚ་དང་ནི་ལྡན་བྱས་པ། །བསྒྲངས་པའི་ནི་རུ་ཧ་ནི་གཏང་བར་བྱ། །སླར་ཕྱུང་སྐམ་སའི་ཤ་ཁུ་འམ་འོ་མ་དང་། །འབྲས་ཆེན་བྱིན་ལ་ལུས་ལ་ཆུ་བླུགས་བྱ། །ལུས་ཚ་ཚད་འཁྲུ་མངལ་ནད་ཁྲག་མཁྲིས་དང་། །སྙིང་ནད་སྐྱ་རྦབ་མི་བཟོད་རིམས་དང་

ནི། །སྐྲན་བཅས་གཅིན་འགགས་མིག་སེར་ལ་སོགས་པ། །མཁྲིས་པ་ལས་གྱུར་ནད་ནི་ཐམས་ཅད་འཇོམས། །ཞེས་བྱ་བ་ལ། བ་ཤ་ཀ་ནི་བྲི་ཤའོ། །རྩ་བ་ཆུང་ངུ་ལྔ་ནི་བྲི་ཧ་ཏི་ལ་སོགས་པའོ། །རྩྭའི་རྩ་བ་ལྔ་ནི་དཱུར་བ་དང་། འཇག་མ་དང་། བུ་རམ་ཤིང་དང་།

འདམ་བུ་དང་། འབྲས་ཀྱི་རྩ་བའོ། །ཐལ་ཏྲེས་ནི་ཤ་རི་པ་སྟེ། གོ་སང་གནྡྷ་ཞེས་བྱའོ། །ར་སྣ་ལ་སོགས་པ་འདི་དག་སྨན་སྣ་རེ་རེ་ཞིང་སྲང་ཕྱེད་ཕྱེད་སྨན་གྱི་ཁུ་བ་བསྐོལ་བའི་ཆོ་གས་ཆུའི་ནང་དུ་བསྐོལ་ལ། དེ་དང་འོ་མ་བྲེ་བཞི་བསྐོལ་ལ་ཆུ་དུ་བར་གྱུར་ཅིང་འོ་མ་ལུས་ཀྱི་བར་

དུ་བསྐོལ་ནས་དེའི་ནད་དུ་ཛི་བན་ཏི་ལ་སོགས་པ་ལྡེ་གུའི་ཆོ་ག་བཞིན་དུ་བཏགས་ཏེ་སྦྱར་བའི་ལྡེ་གུ་དང་། མར་ལ་སོགས་པ་དང་ལྡན་པའི་ནི་རུ་ཧ་གཏང་བར་བྱའོ། །མས་གཏོང་བ་དེ་སླར་བྱུང་བར་གྱུར་ན་སྐམ་སའི་སྲོག་ཆགས་ཀྱི་ཤ་ཁུ་འམ་འོ་མ་དང་སྦགས་ཏེ། འབྲས་ཆེན་སྦྱིན་པར་

བྱའོ། །དེ་བཞིན་དུ་ལུས་ལ་ཆུ་བླུགས་ཤིང་ཁྲུས་བྱས་ཏེ་དེ་ལྟར་བཏང་བའི་འཇམ་རྩི་དེས་ནི་ལུས་ཀྱི་ཁོང་ཚ་བ་ལ་སོགས་པའི་ནད་དང་། མཁྲིས་པ་ལས་གྱུར་པའི་ནད་ཐམས་ཅད་འཇོམས་པར་བྱེད་དོ། །ཀོ་ཤ་ཏ་ཀ་དོང་ག་ཐང་ཤིང་དང་། །མུར་བ་གཟེ་མ་ཨརྐ་དུག་མོ་ཡུངས། །པ་ཐ་

རྒྱ་སྲན་བྲི་ཧ་ཏི་ཆུར་བསྐོལ། །ཁུ་བ་སྲང་ནི་ཉི་ཤུ་ལུས་པ་དང་། །དེས་ནི་ཡུངས་ཀར་སུག་སྨེལ་པོ་སོན་ཆ། རུ་རྟ་ཞོ་ནི་གཉིས་གཉིས་ཚད་དང་ནི། །སྦྲང་རྩི་པོ་སོན་ཆ་ཡི་མར་དང་ནི། །ཐལ་སྨན་ཡུངས་མར་སྲང་ནི་གཉིས་བཅས་པ། །མས་གཏོང་མེ་དྲོད་ཆུང་དང་ཡི་ག་འཆིས། །བད་

เล่ม ๒๐๒ · หน้า 75a

ཀན་ལས་གྱུར་ནད་ནི་ཀུན་ལ་ཕན། །ཞེས་བྱ་བ་ལ། ཀོ་ཤ་ཏ་ཀ་ལ་སོགས་པའི་སྨན་གྱི་ཁུ་བ་བསྐོལ་བའི་ཆོ་གས་བསྐོལ་ལ་དེའི་ཁུ་བ་སྲང་ཉི་ཤུ་སྟེ། ཁྱོར་བཅུ་ལུས་པར་གྱུར་ཏེ། དེ་ནས་ཀོ་ཤ་ཏ་ཀ་ནས་བྲི་ཧ་ཏིའི་བར་གྱི་སྨན་སྲང་ལྔ་བཅུ་ཆུ་དྲུག་འགྱུར་གྱི་ནང་

དུ་བསྐོལ་ལ། ཁུ་བ་སྲང་ནི་ཉི་ཤུ་ལུས་པར་བྱས་ལ་ཁུ་བ་སྲང་ཉི་ཤུ་པོ་དེར་ཡུངས་ཀར་ལ་སོགས་པའི་སྨན་བཞི་པོ་ཞོ་གཉིས་དང་བཅས་ཤིང་སྦྲང་རྩི་དང་། །པོ་སོན་ཆའི་མར་དང་། ཐལ་སྨན་དང་། ཡུངས་མར་སྣ་རེ་རེ་ཞིང་སྲང་གཉིས་དང་ལྡན་པར་བྱས་ལ། མས་གཏོང་

བ་དྲག་པོ་ནི་རུ་ཧ་ཞེས་བྱ་བ་བཏང་ན་མེ་དྲོད་ཆུང་བ་ལ་སོགས་པའི་ནད་ཐམས་ཅད་ལ་ཕན་ནོ། །དེ་ནས་ནི་རུ་ཧ་དེ་ནི། །སྣུམ་འཇམ་སྐྱིད་དེ་བ་དང་ནི། །ལས་ཀྱི་ལུས་སྙོམ་གྱུར་པའི་སྨན་། །སྲང་ནི་གཉིས་གཉིས་སོ་སོར་བཤད། །ཅེས་བྱ་བ་ལ། དེ་ནས་དེའི་འོག་ཏུ་མས་གཏོང་བ་

ནི་རུ་ཧ་སྣུམ་ཞིང་སྣུམ་པར་བྱེད་ནུས་པ་འཇམ་ཞིང་རྩུབ་པ་མ་ཡིན་པ་སྐྱིད་དེ་བའི་མི་རྣམས་དང་། སྐྱུག་སྨན་ལ་སོགས་པའི་ལས་ཀྱི་ལུས་སྙོམ་ཞིང་རབ་ཏུ་ཞིག་པར་གྱུར་པའི་མས་གཏོང་བའི་སྨན་སྲང་གཉིས་གཉིས་མཚོན་པ་སོ་སོར་བཤད་པར་བྱའོ། འོ་མ་ལས་ནི་སྲང་བཞིར་བྱ།

སྦྲང་རྩི་ཏིལ་མར་མར་ཁྱོར་རེ། །གཟར་བུས་དཀྲུགས་པའི་མས་གཏོང་བས། །རླུང་འཇོམས་སྟོབས་དང་ཁ་དོག་སྐྱེད། །ཅེས་བྱ་བ་ལ། འོ་མ་ལས་སྲང་བཞི་སྟེ། ཁྱོར་དོ། །སྦྲང་རྩི་དང་། ཏིལ་མར་དང་། མར་ལས་སྲང་གཉིས་གཉིས་ཏེ་ཁྱོར་རེ་བསྡུས་ལ་གཟར་བུས་

དཀྲུགས་པའི་མས་གཏོང་བས་ནི་རླུང་གི་ནད་རྣམས་འཇོམས་པར་བྱེད་ཅིང་། སྟོབས་དང་ཁ་དོག་རྣམས་སྐྱེད་ཅིང་འཕེལ་བར་བྱེད་དོ། །ཏིལ་མར་ཆང་དང་སྦྲང་རྩི་མར། །ཁྱོར་ནི་རེ་རེའི་ཚད་དུ་བྱས། བིལ་བ་ལ་སོགས་རྩ་བ་ནི། །ཁྱོར་གཉིས་རྒྱ་སྲན་ཁུ་བ་ནི། །ཁྱོར་

དོ་བཅས་པས་རླུང་ནད་སེལ། །ཞེས་བྱ་བ་ལ། ཏིལ་མར་ལ་སོགས་པ་སྣ་རེ་ཁྱོར་རེ་སྟེ་སྲང་གཉིས་གཉིས། །བིལ་བ་ལ་སོགས་པའི་རྩ་བ་ལྔའི་སྨན་ཁྱོར་གཉིས་གཉིས། །རྒྱ་སྲན་གྱི་ཁུ་བ་ཁྱོར་དོ་སྟེ་སྲང་བཞི་དང་བཅས་པའི་འཇམ་རྩི་མས་གཏང་བས་ནི་རླུང་གི་ནད་རྣམས་སེལ་བར་བྱེད་

เล่ม ๒๐๒ · หน้า 75b

དོ། །པ་ཏོ་ལ་དང་ནིམ་པ་དང་། །ལོ་མ་བདུན་པ་པུ་ཏི་ཀ །ར་སྣའི་ཁུ་བ་སྲང་གཉིས་གཉིས། །མར་སྲང་གཉིས་དང་ཡུངས་ཀར་གྱི། །ལྡེ་གུར་བྱས་པ་ཁ་བ་ལྔ། །བད་ཀན་མང་དང་སྲིན་ནད་དང་། །མཛེ་དང་ཟ་ཁའི་ནད་རྣམས་འཇོམས། །ཞེས་བྱ་བ་ལ། །པ་ཏོལ་

ལ་སོགས་པའི་སྨན་སྣ་ལྔ་པོ་སྲང་གཉིས་གཉིས་ཏེ། ཁྱོར་རེ་དང་མར་སྲང་གཉིས་ཏེ་དེ་ཁྱོར་དྲུག་དང་། ཡུངས་ཀར་གྱི་ལྡེ་གུ་དང་བཅས་པའི་ཁ་བ་ལྔ་པ་ཞེས་བྱ་བའི་འཇམ་རྩི་ཡིན་ཏེ། དེས་ནི་བད་ཀན་མང་བ་ལ་སོགས་པའི་ནད་རྣམས་འཇོམས་པར་བྱེད་དོ། །ཏིལ་མར་བ་གཅིན་

ཞོ་ག་ཆུ། །སྐྱུར་རྩབས་ཁྱོར་ནི་རེ་རེ་དག །ཡུངས་ཀར་བཏགས་པའི་ལྡེ་གུར་སྦྱར། །རྟུག་འགགས་ལྟོ་སྦོས་སེལ་བྱེད་ཡིན། །ཞེས་བྱ་བ་ལ། ཏིལ་མར་ལ་སོགས་པ་ཁྱོར་རེ་རེ་སྟེ་ཁྱོར་བཞི་དང་ཡུངས་ཀར་བཏགས་པའི་ལྡེ་གུས་ནི་རྟུག་པ་འགགས་པ་ལ་སོགས་པ་སེལ་ཞིང་

འཇོམས་པར་བྱེད་དོ། །པ་ཡས་སྱ་དང་བུ་རམ་ཤིང་། །ས་ལ་པ་རྞི་བི་ད་རི། །ར་སྣ་ཁྱོར་རེ་པི་པི་ལིང་། །ལྡེ་གུ་སྦྲང་རྩི་མར་སྦྱར་བའི། །མས་གཏོང་ཁུ་བ་འཕེལ་བར་བྱེད། །ཅེས་བྱ་བ་ལ། པ་ཡས་སྱ་ལ་སོགས་པ་ལྔ་པོ་ཁྱོར་རེ་རེ་བསྐོལ་བའི་ནང་དུ་པི་པི་ལིང་གི་ལྡེ་གུ་

དང་། སྦྲང་རྩི་དང་མར་སྦྱར་བའི་མས་གཏོང་བས་ནི་ཁུ་བ་འཕེལ་ཞིང་རོ་ཙ་བར་བྱེད་དོ། །དེ་ནས་གྲུབ་པའི་འཇམ་རྩི་ནི། །ཉེས་པ་མེད་ཅིང་འབྲས་བུ་ཆེ། །སྟོབས་སྐྱེད་ལུས་འཕེལ་བདེ་བར་བྱེད། །ཀུན་དུ་སྦྱར་བྱ་བཤད་པར་བྱ། །ཞེས་བྱ་བ་ལ། དེ་ནས་དེའི་འོག་ཏུ་གྲུབ་པའི་འཇམ་

རྩི་སྟེ་འབྲས་བུ་དག་གིས་མངོན་སུམ་དུ་མཐོང་བ་ཉེས་པ་མེད་ཅིང་གནོད་པར་འགྱུར་བའི་སྐྱོན་དང་བྲལ་བར་འབྲས་བུ་ཆེ་ཞིང་ཡོན་ཏན་མང་བ་ཉམས་སྟོབས་བསྐྱེད་ཅིང་ལུས་འཕེལ་ཞིང་རྒྱས་པར་བྱེད་པ་དང་། དུས་ཀུན་ཏུ་སྦྱར་ཞིང་གཏང་བར་བྱ་བ་གང་ཡིན་པ་དེ་བཤད་པར་བྱའོ། །སྦྲང་རྩི་ཏིལ་

མར་ཆ་མཉམ་ལ། །རྒྱམ་ཚ་ཞོ་གཉིས་ཤུ་ཏི་བཞི། །ཨེ་རཎྜ་ཡི་རྩ་བ་བསྐོལ། །མས་གཏོང་སྦྲང་རྩི་ཏིལ་མར་ཅན། །བཅུད་ཀྱིས་ལེན་ཏེ་གཅིན་སྙི་དང་། །གཞང་འབྲུམ་སྲིན་བུ་སྐྲན་ནད་དང་། །རྒྱུ་མ་རླུགས་པའི་ནད་རྣམས་སེལ། །ཞེས་བྱ་བ་ལ། སྦྲང་རྩི་དང་ཏིལ་མར་གཉིས་ཆ་

เล่ม ๒๐๒ · หน้า 76a

མཉམ་པོར་བྱས་པ་དང་། རྒྱམ་ཚ་འམ། ལྕེ་མྱང་ཚ་ཞོ་གཉིས། ཤུ་ཏི་ཞོ་བཞི། ཨེ་རཎྜའི་རྩ་བ་བསྐོལ་བ་དང་། སྦྲང་རྩི་དང་ཏིལ་མར་བསྐོལ་བ་གཙོ་བོར་གྱུར་པའི་འཇམ་རྩི་ནི་བཅུད་ཀྱིས་ལེན་དུ་འགྱུར་ཞིང་གཅིན་སྙི་བ་ལ་སོགས་པའི་ནད་

སེལ་བར་འགྱུར་རོ། །འདི་ནི་ཤིང་མངར་ཕྱེ་མར་བཅས། །མིག་ལ་ཕན་ཞིང་ཁྲག་མཁྲིས་སེལ། །ཞེས་བྱ་བ་ལ། བཤད་མ་ཐག་པའི་སྨན་འདི་ཉིད་ཤིང་མངར་གྱི་ཕྱེ་མ་དང་བཅས་པའི་འཇམ་རྩི་ནི་མིག་ལ་ཕན་པར་བྱེད་པ་དང་། ཁྲག་དང་མཁྲིས་པའི་ནད་སེལ་བར་བྱེད་དོ།

གླ་སྒང་ལྡེ་གུ་སྦྲང་རྩི་དང་། །ཏིལ་མར་ཤ་ཁུ་མར་བཅས་པ། །འཚོ་བར་བྱེད་པ་ཞེས་བྱ་སྟེ། །གཞང་གི་ནད་དང་བརླ་ནད་དང་། །ཆུ་སོ་དང་ནི་རླིག་པ་དང་། །ཕོ་མཚན་ཟུག་པའི་ནད་རྣམས་སེལ། །ཞེས་བྱ་བ་ལ། གླ་སྒང་གི་ལྡེ་གུ་དང་གོང་དུ་སྨོས་པའི་འཇམ་རྩི་འདི་ཉིད་

སྦྲང་རྩི་དང་ཏིལ་མར་དང་ཤ་ཁུ་དང་ལྡན་པ་ནི་མིང་འཚོ་བར་བྱེད་པ་ཞེས་བྱ་སྟེ། གཞང་གི་ནད་ལ་སོགས་པ་སེལ་བར་བྱེད་དོ། །སྦྲང་རྩི་མར་དང་ཞག་དང་ནི། །ཏིལ་མར་ཁྱོར་ནི་རེ་རེའི་ཚད་། །རྒྱམ་ཚ་ཞོ་གཅིག་སྦ་མ་ཡི། །འབྲས་བུ་སྲང་ཕྱེད་བཅས་པ་དང་། །དེ་ཡང་འཚོ་བ་ཡིན་

པར་བཤད། །ཅེས་བྱ་བ་ལ། སྦྲང་རྩི་ལ་སོགས་པ་སྣ་རེ་ཞིང་ཁྱོར་རེའི་ཚད་དང་། རྒྱམ་ཚ་ཞོ་གཅིག་སྦ་མའི་འབྲས་བུ་སྲང་ཕྱེད་དང་སྦྱར་བ་དེ་ཡང་འཚོ་བར་བྱེད་པ་ཞེས་བྱ་བའི་འཇམ་རྩི་ཡིན་ཏེ། དེས་ཀྱང་གཞང་གི་ནད་ལ་སོགས་པ་སེལ་བར་བྱེད་དོ། །ཨེ་རནྜའི་རྩ་བསྐོལ་

བ་ཡི། །ཁུ་བ་ཤུ་དག་པི་པི་ལིང་། །པོ་སོན་ཆ་ཡི་ཕྱེ་མར་བཅས། །སྦྲང་རྩི་ཏིལ་མར་རྒྱམ་ཚར་བཅས། །འདི་ནི་ཤིང་རྟ་ཅན་ཞེས་བྱ། །ཞེས་བྱ་བ་ལ། །ཨེ་རཎྜའི་རྩ་བ་བསྐོལ་བའི་ཁུ་བ་ལ་སོགས་པ་དང་ཚུལ་བཞིན་དུ་སྦྱར་བའི་འཇམ་རྩི་འདི་ནི་མིང་ཤིང་རྟ་ཅན་ཞེས་

བྱ་སྟེ། དེས་ཀྱང་གཞང་གི་ནད་ལ་སོགས་པ་སེལ་བར་བྱེད་དོ། །དེ་བསྐོལ་ཤུ་དག་ཤུ་ཏི་དང་། །ཤིང་ཀུན་རྒྱམ་ཚ་ཐང་ཤིང་དང་། །ར་སྣ་སྦྲང་རྩི་སྦྱར་བ་ཡི། །འཇམ་རྩིས་ནད་སེལ་ཞེས་བྱ་དགེ །ཞེས་བྱ་བ་ལ། ཨེ་རཎྜའི་རྩ་བ་དེ་བསྐོལ་བའི་ཁུ་བ་ཤུ་དག་ལ་

เล่ม ๒๐๒ · หน้า 76b

སོགས་པ་དང་ལྡན་པའི་འཇམ་རྩི་ནི་མིང་ནད་སེལ་ཞེས་བྱ་སྟེ་དགེ་ཞིང་མཆོག་ཏུ་གྱུར་པ་ཡིན་ནོ། །རྩ་བ་ལྔ་ཡི་ཁུ་བ་དང་། །པི་པི་ལིང་དང་རྒྱམ་ཚ་དང་། །ཤིང་མངར་སྦྲང་རྩི་བཅས་པ་ཡི། །ཏིལ་མར་གྲུབ་པའི་འཇམ་རྩིར་བཤད། །ཅེས་བྱ་བ་ལ། རྩ་བ་ལྔ་པ་

བསྐོལ་བའི་ཁུ་བ་དང་པི་པི་ལིང་ལ་སོགས་པ་སྦྱར་བའི་འཇམ་རྩི་ནི་མིང་གྲུབ་པའི་འཇམ་རྩི་ཞེས་བྱ་བ་ཡིན་ནོ། །རྩ་བ་བཅུ་པ་འབྲས་བུ་གསུམ། །པོ་སོན་ཆ་ནི་བིལ་བར་བསྐོལ། །བ་གཅིན་དང་ནི་དེ་བཏགས་ཤིང་། །པ་ཐ་གླ་སྒང་དུག་མོ་ཡུངས། །ལན་ཚྭ་པོ་སོན་

ཆ་ཏིལ་མར། །ཐལ་སྨན་ལན་ཚྭར་བཅས་པ་ནི། །རིག་པའི་འཇམ་རྩི་བད་ཀན་ནད། །སྐྱ་རྦབ་གསུད་པའི་ནད་རྣམས་དང་། །ཁུ་བ་རླུང་ནི་འགགས་པ་དང་། །རླུང་འཁྲུགས་པ་ལ་བསྔགས་པ་ཡིན། །ཞེས་བྱ་བ་ལ། རྩ་བ་བཅུ་བ་ལ་སོགས་པའི་སྨན་ཚུལ་བཞིན་དུ་

བསྐོལ་བ་ནི་རིགས་པའི་འཇམ་རྩི་ཞེས་བྱ་སྟེ། དེས་ནི་བད་ཀན་གྱི་ནད་ལ་སོགས་པ་སེལ་བར་བྱེད་པ་ཡིན་ནོ། །གླ་སྒང་པ་ཏ་ཨེ་རཎྜ། །སླེ་ཏྲེས་བ་ལ་བ་སྤྲུ་བ། །ར་སྣ་བཙོད་དང་དོང་ག་དང་། །བུ་ཤེལ་ཙེ་དང་ཀྱི་ལྕེ་བ། །བ་རུ་ར་དང་པུ་ཙེ་ཤེལ། །རྩ་བ་ལྔ་པ་ཆུང་ངུ་རྣམས། །

སྲང་རེ་པོ་སོན་ཆ་རྡོག་བརྒྱད། །དེ་ནི་ཆུ་བྲེ་བཞི་ནང་བསྐོལ། །བཞི་ཆ་ལུས་པ་བཙགས་ནས་ནི། །འོ་མ་བྲེ་དྲོ་དང་བསྲེས་ལ། །འོ་མ་ལུས་པ་སླར་ཡང་བསྐོལ། །སྐམ་སའི་ཤ་ཁུ་བཞི་ཆ་དང་། །སྦྲང་རྩི་རྒྱམ་ཚ་ཤིང་མངར་དང་། །ཤུ་ཏི་དུར་བྱིད་པི་པི་ལིང་། །དུག་མོ་ཡུངས་

དང་སྐྱེར་ཁཎྜ། །བཏགས་པ་དང་ནི་བསྲེས་པ་ཡི། །འཇམ་རྩི་དྲོ་འཇམ་བཏང་ན་ནི། །ཤ་དང་མེ་དྲོད་ལུས་ཀྱི་སྟོབས། །ཁུ་བ་འཕེལ་བར་བྱེད་པ་ཡིན། །དྲེག་ནད་རྨོངས་བག་གཅིན་སྙི་དང་། །གཞང་འབྲུམ་སྐྲན་དང་བཤང་གཅི་འགགས། །མི་བཟད་རིམས་དང་མེ་དབལ་དང་། །

རྒྱུ་རླུགས་ལྟོ་སྤོས་མཁྲེགས་ཤིང་འཁྲུ། །ཆུ་སོ་རྐེད་པ་བརླ་དཀུ་ན། །གཉེའུ་རེངས་རྣ་བ་མགོ་ཡི་ནད། །ཟླ་མཚན་ནད་དང་སྨྱོ་བྱེད་དང་། །འོར་ནད་ལུད་པ་རྡེའུ་ཆགས་དང་། །གཅིན་འཁྱིལ་པ་ཡི་ནད་རྣམས་འཇོམས། །དབང་པོ་ཉམས་ཤིང་ཞུམ་པ་དང་། །མིག་ལ་

เล่ม ๒๐๒ · หน้า 77a

ཕན་ཞིང་བུ་སྐྱེད་བྱེད། །འཚོ་བྱེད་རྒྱལ་པོ་བཅུད་ལེན་ཡིན། །ཞེས་བྱ་བ་ལ། །གླ་སྒང་ནས་རྩ་བ་ལྔ་པ་ཆུང་ངུའི་བར་སྨན་རེ་རེ་ཞིང་སྲང་རེ་རེ་དང་། པོ་སོན་ཆ་བརྒྱད་ཆུ་བྲེ་བཞིའི་ནང་དུ་བསྐོལ་ལ། དེ་ལས་བཞི་ཆ་སྟེ། བྲེ་གང་ལུས་པ་བཙགས་ནས་སྨན་

གྱི་ཁུ་བ་དང་འོ་མ་བྲེ་དོ་བསྲེས་ལ། ཡང་འོ་མ་ལུས་ནས་ཆུ་དུ་བར་གྱུར་གྱི་བར་དུ་བསྐོལ་ལ། དེའི་ནང་དུ་སྐམ་སའི་སྲོག་ཆགས་ཀྱི་ཤ་ཁུ་བཞི་ཆ་དང་སྦྲང་རྩི་དང་རྒྱམ་ཚ་ལ་སོགས་པ་དང་བསྲེས་པའི་འཇམ་རྩི་དྲོ་འཇམ་ཙམ་བཏང་བས་ནི་ཤ་ལ་སོགས་པ་འཕེལ་བར་བྱེད་པ་དང་། དྲེག་ནད་

ལ་སོགས་པ་འཇོམས་པར་བྱེད་པ་དང་། མིག་ལ་ཕན་ཞིང་བདེ་བར་བྱེད་པ་དང་། བུ་སྐྱེད་ཅིང་མངལ་འཆགས་བར་བྱེད་དེ་འཚོ་བྱེད་ཀྱི་འཇམ་རྩི་རྣམས་ཀྱི་རྒྱལ་པོ་ཡིན་ཞིང་ཡོན་ཏན་གྱིས་ཁྱད་པར་འཕགས་པར་བྱེད་པ་དང་། བཅུད་ཀྱིས་ལེན་དུ་འགྱུར་བ་ཡིན་ནོ། རི་དགས་ཕྲ་

མོ་མགོ་ཆུང་བ། །རྩ་བ་བཅུ་པ་བསྐོལ་བའི་ཆུ། །སྦ་མའི་འབྲས་བུ་ཤུ་ཏི་དང་། །གླ་སྒང་ལྡེ་གུ་སྣུམ་ཆེན་བཅས། །མས་གཏོང་རླུང་ནི་སེལ་བའི་མཆོག །ཤིན་ཏུ་རོ་ཙར་བྱེད་པ་ཡིན། །ཞེས་བྱ་བ་ལ། ར་དགས་ཕྲ་མོ་རི་བོང་ལ་སོགས་པ་དང་། མགོ་བོ་ཆུང་བ་ཕག་

རྒོད་ལ་སོགས་པའི་ཆུ་དང་། སྦ་མའི་འབྲས་བུ་ལ་སོགས་པའི་ལྡེ་གུ་དང་། སྣུམ་ཆེན་པོ་ཞུན་མར་དང་། ཏིལ་མར་དང་། རྐང་དང་། ཚིལ་གཅིག་ཏུ་སྦྱར་བ་མས་གཏོང་བ་ནི་རླུང་གི་ནད་སེལ་བར་བྱེད་པའི་མཆོག་ཡིན་ཞིང་དེ་བཞིན་དུ་རོ་ཙ་བར་བྱེད་པ་ཡིན་ནོ། །རྨ་བྱའི་མཁྲིས་

པ་གཤོག་པ་དང་། །རྒྱུ་མ་རྐང་བ་མཆུ་རྟུག་པ། །བོར་བའི་ཤ་ནི་འབའ་ཞིག་དང་། །རྩ་བ་ལྔ་པ་ཆུང་ངུ་ནི། །སྲང་རེ་དང་ནི་ལྡན་གྱུར་པ། །ཆུ་དང་འོ་མར་བསྐོལ་ནས་ནི། །འོ་མ་ལུས་པར་སྦྲང་རྩི་མར། །བཅས་དང་དེ་བཞིན་བི་ད་རི། །ཤིང་མངར་ཤུ་ཏི་པི་པི་ལིང་། །པོ་སོན་

ཆ་ཡིས་ལྡེ་གུར་བསྲེས། །རྒྱམ་ཚ་ཅུང་ཟད་བཏབ་པ་ཡི། །འཇམ་རྩི་སྟོབས་འཕེལ་རོ་ཙའི་མཆོག །ཅེས་བྱ་བ་ལ། རྨ་བྱའི་གཤོག་པ་ལ་སོགས་པ་བོར་བའི་ཤ་འབའ་ཞིག་དང་། རྩ་བ་ལྔ་པ་ཆུང་ངུ་སྲང་རེ་ཆུ་དང་འོ་མ་བརྒྱད་འགྱུར་གྱི་ནང་དུ་བསྐོལ་ལ། ཆུ་དུ་སྟེ་འོ་མ་ལུས་

เล่ม ๒๐๒ · หน้า 77b

པ་སྦྲང་རྩི་དེ་མར་དང་བཅས་པར་བྱས་པ་དང་། པི་ད་རི་ལ་སོགས་པའི་ལྡེ་གུ་བཅུག་ལ། རྒྱམ་ཚ་ཅུང་ཟད་བཏབ་པའི་འཇམ་རྩི་ནི་ཤིན་ཏུ་སྟོབས་སྐྱེད་བར་བྱེད་པ་དང་། རོ་ཙ་བར་བྱེད་པའི་མཆོག་ཡིན་ནོ། །གོང་མ་སྲེག་ལ་སོགས་པ་ཡང་། །ཆོ་ག་འདིས་ནི་སོ་སོར་

བྱ། །ཁྲོན་གྱིས་གཟས་ཚོལ་ཐམས་ཅད་དང་། །མཐུ་རྩལ་མཆུ་ཡིས་གཟས་ཚོལ་བ། །ཆུ་ལ་གནས་པའང་དེ་བཞིན་ཏེ། །ཉ་ལ་འོ་མ་སྤང་བར་བྱ། །ཞེས་བྱ་བ་ལ། བཤད་མ་ཐག་པའི་རྨ་བྱའི་ཤའི་སྐབས་ཀྱི་ཆོ་ག་འདི་ནི་གོང་མ་སྲེག་ལ་སོགས་པ་དང་། ཁྲོན་གྱིས་

གཟས་ཚོལ་བ་ལ་སོགས་པའི་ཤ་རེ་རེ་ལ་ཡང་དེ་ཆོ་ག་བཞིན་དུ་བྱ་ལ། ཆུ་ལ་གནས་པའི་སྲོག་ཆགས་ངང་པ་ལ་ཡང་དེ་བཞིན་དུ་བྱ་ཞིང་། རོ་ཧི་ཏ་ལ་སོགས་པའི་ཉ་ལ་ཡང་ཆོ་ག་དེ་བཞིན་དུ་བྱས་ལ་ཉའི་སྐབས་སུ་སྔར་གྱི་འོ་མ་སྨོས་པ་དེ་སྤང་བར་བྱའོ། །སྲམ་དང་ནེའུ་ལེ་བྱི་ལ་དང་། །

རེག་འཇམ་བྱི་བ་རྣམས་ཀྱི་ཤ། །རེ་རེ་སྲང་བཅུ་རྩ་བ་ལྔ། །འོ་མའི་ནང་དུ་བསྐོལ་བ་ལ། །འོ་མ་དེར་ནི་པོ་སོན་ཆ། །པི་པི་ལིང་དང་ལན་ཚྭ་གཉིས། །ཁ་ར་ཏིལ་མར་སྦྲང་རྩི་མར། །འཇམ་རྩི་བཏང་བ་བཅུད་ལེན་ཡིན། །རྩོལ་བས་དཀྲུགས་ནས་གློ་འགྲམས་དང་། །དབང་

པོ་ཉམས་དང་གཟི་མདངས་སྟོབས། །ཁུ་ཆུ་བཤང་གཅི་འགགས་པ་དང་། །དྲེག་ནད་ཀྱིས་འཐེང་ནད་རྣམས་དང་། །རྟ་དང་གླང་པོ་ཤིང་རྟས་གཡེངས། །རྐང་ལག་ཆག་གྲུགས་གྱུར་པ་ལ། །སླར་ནི་བདེ་བར་འཚོ་བྱེད་ཅིང་། །རོ་ཙ་བྱེད་པའི་མཆོག་ཡིན་ནོ། །ཁ་སྲལ་བུ་རམ་

ཤིང་ཕྲན་ལས། །གཡོས་སུ་བྱས་པའི་འོ་ཐུག་བླུད། །ཅེས་བྱ་བ་ལ། སྲམ་ལ་སོགས་པའི་ཤ་སྲོག་ཆགས་རེ་རེའི་སྲང་བཅུ་བཅུ་དང་། རྩ་བ་ཆེན་པོ་ལྔ་ལས་སྣ་རེ་རེ་ཞིང་སྲང་བཅུ་བཅུ་འོ་མ་བཅུ་འགྱུར་གྱི་ནང་དུ་བསྐོལ་ལ་འོ་མ་དེའི་ནང་དུ་པོ་སོན་ཆ་དང་པི་པི་ལིང་གི་ལྡེ་གུ་ལན་ཚྭ་གཉིས་

ལ་སོགས་པ་དང་ལྡན་བའི་འཇམ་རྩི་བཅུད་ཀྱིས་ལེན་གྱི་དམ་པར་འགྱུར་ཞིང་། རྩོལ་བས་ལུས་དཀྲུགས་ཤིང་བསྐྱོད་དེ་གློ་འགྲམས་པར་གྱུར་པའི་མི་དང་དབང་པོ་ཉམས་ཤིང་ཞུམ་པར་གྱུར་པ་ལ་སོགས་པ་རྣམས་སླར་ཡང་བདེ་བར་འཚོ་བར་བྱེད་ཅིང་། སྐྱོན་དེ་དག་སེལ་བར་བྱེད་པ་

เล่ม ๒๐๒ · หน้า 78a

དང་རོ་ཙ་བར་བྱེད་པའི་སྦྱོར་བ་རྣམས་ཀྱི་ནང་ན་མཆོག་དམ་པ་ཡིན་ནོ། །སྨན་གྱི་སྦྱོར་བ་འདི་ལ་ནི། ཁ་སྲལ་པདྨ་ཀུན་ད་དང་། བུ་རམ་ཤིང་ནི་ཕྲ་མོ་ལས་གཡོས་སུ་སྦྱར་བའི་འོ་ཐུག་ཏུ་སྦྱར་བ་བླུད་པར་བྱའོ། །སྣུམ་ཞིང་བསྡམ་

པ་མི་དགོས་པའི། །གྲུབ་པའི་སྨན་ནི་སྦྱར་བར་བྱ། །ཞེས་བྱ་བ་ལ། གྲུབ་པའི་སྨན་གོང་དུ་བཤད་མ་ཐག་པའི་སྦྲང་རྩི་ཏིལ་མར་ཆ་མཉམ་ལ། །རྒྱམ་ཚ་ཞོ་གཉིས་ཤུ་ཏི་བཞི། །ཨེ་རཎྜ་ཡི་རྩ་བ་བསྐོལ། །མས་གཏོང་འཇམ་རྩི་ཏིལ་མར་ཅན། །ཞེས་བྱ་བ་ལ་

སོགས་པ་སྨོས་པའི་སྣུམ་གྱི་མས་གཏོང་བ་བསྡམས་ཤིང་བསྲུང་བར་བྱ་མི་དགོས་པ་གྲུབ་པའི་སྨན་གྱི་སྦྱོར་བ་ནི་རུ་ཧ་གཏང་བར་བྱའོ། །ནད་འཇོམས་བསྲུང་དང་བཅས་པ་ཡི། །སྣུམ་གྱི་འཇམ་རྩི་བཤད་བྱ་སྟེ། །ཞེས་བྱ་བ་ལ། འདི་མན་ཆད་ཀྱི་སྣུམ་གྱི་མས་གཏོང་

འཇམ་རྩི་ཞེས་བྱ་བ་ནད་ཀྱི་ཚོགས་འཇོམས་པར་བྱེད་ཅིང་བསྲུང་ཞིང་བསྡམས་པ་དང་བཅས་པ་ཁྱད་པར་དུ་རླུང་ནད་འཇོམས་པར་བྱེད་པ་གང་ཡིན་པ་དེ་བཤད་པ་ཡིན་ནོ། །རྩ་བ་བཅུ་པ་བ་ལ་དང་། །ར་སྣ་ཨ་ཤྭ་གནྡྷ་དང་། །བ་སྤྲུ་བ་དང་ཨེ་རཎ་དང་། །སླེ་ཏྲེས་ག་

བྲའི་རྩ་བ་དང་། །བ་ཤ་ཀ་དང་པུ་ཏི་ཀ །ས་ཧ་ར་ཛ་ཉེའུ་ཤིང་པ། །ཀ་ཀ་ན་སེ་སྲང་རེ་དང་། །ནས་དང་མ་ཤ་ཟར་མ་དང་། །རྒྱ་ཤུག་རྒྱ་སྲན་ཁྱོར་རེའི་ཚད། །ཆུ་བྲེ་དྲུག་ཅུ་རྩ་བཞིར་བསྐོལ། །དེ་ལས་བྲེ་ནི་བཅུ་དྲུག་ལུས། །འཚོ་བྱེད་སྡེ་ནི་སྲང་རེ་བཅུག །

ཏིལ་མར་བྲེ་ནི་བཞི་དང་བསྐོལ། །འདི་ནི་འཇམ་རྩིར་བཏང་གྱུར་ན། །རླུང་ནད་ཐམས་ཅད་སེལ་བར་བྱེད། །ཅེས་བྱ་བ་ལ། རྩ་བ་བཅུ་པ་ལ་སོགས་པའི་སྨན་སྣ་རེ་རེ་ཞིང་སྔར་རེ་དང་། །ནས་ལ་སོགས་པའི་ཁྱོར་རེ་ལ་སྲང་གཉིས་གཉིས། ཆུ་བྲེ་དྲུག་ཅུ་རྩ་བཞི་སྟེ། །

དྲོ་ན་བཞིའི་ནང་དུ་བསྐོལ་ལ། དེ་ལས་བཅུ་དྲུག་སྟེ། དྲོ་ན་གཅིག་ལུས་པ་དང་། འཚོ་བྱེད་ཀྱི་སྨན་ཀྱི་སྡེ་ཚན་སྲང་རེ་བཅུག་ལ། ཏིལ་མར་བྲེ་བཞི་དང་བསྐོལ་ཏེ་འཇམ་རྩི་འདི་བཏང་ན་རླུང་ལས་གྱུར་བའི་ནད་ཐམས་ཅད་སེལ་ཞིང་འཇོམས་པར་བྱེད་པ་ཡིན་ནོ། །དེ་

เล่ม ๒๐๒ · หน้า 78b

བཞིན་སྐམ་སའི་སྲོག་ཆགས་ཤ། །འཚོ་བྱེད་སྡེ་དང་བཅས་པར་བསྐོལ། །ཞེས་བྱ་བ་ལ། སྐམ་སའི་སྲོག་ཆགས་ཀྱི་ཤའི་ཞག་འཚོ་བྱེད་སྣ་བཅུ་དང་བསྐོལ་བའི་འཇམ་རྩི་བཏང་ན་ཡང་རླུང་ལས་གྱུར་པའི་ནད་ཐམས་ཅད་སེལ་བར་བྱེད་དོ། །ཤུ་ཏི་ནས་དང་བིལ་བ་

སྐྱུར། །ཏིལ་མར་བསྐོལ་བས་རླུང་ནད་སེལ། །ཞེས་བྱ་བ་ལ། ཤུ་ཏི་ལ་སོགས་པའི་སྨན་ཀན་ཛི་རང་སྐྱུར་ལ་སོགས་པ་དང་། ཏིལ་མར་བསྐོལ་བའི་འཇམ་རྩི་བཏང་ན་ཡང་རླུང་ལས་གྱུར་པའི་ནད་ཐམས་ཅད་སེལ་བར་བྱེད་དོ། །རྒྱམ་ཚ་མདོག་དམར་གྱུར་

གྱི་བར། །མེར་བསྲེགས་མར་གསུར་རླུང་ནད་འཇོམས། །ཞེས་བྱ་བ་ལ། རྒྱམ་ཚ་འམ་ལྕེ་མྱང་ཚ་མདོག་དམར་པོར་གྱུར་གྱི་བར་དུ་མེར་བསྲེགས་ལ། དེ་མར་གྱི་ནང་དུ་གསུར་བའི་ནད་འཇམ་རྩི་བཏང་ན་ཡང་རླུང་ནད་འཇོམས་པར་བྱེད་དོ། །ཛི་བན་ཏི་དང་པོ་སོན་

ཆ། །མེ་ད་རྣམ་གཉིས་སྲ་བ་ནི། །ཤིང་མངར་བ་ལ་ཤུ་ཏི་དང་། །ཟངས་རྩི་བ་དང་པི་པི་ལིང་། །ཀ་ཀ་ན་སི་ཉེའུ་ཤིང་པ། །ཁ་སྲལ་ཀྵཾ་ར་ཀ་ཀ་རི། །ཟུར་བ་ཀར་ཀ་ཏ་སྲིང་གི །ཤུ་དག་བཏགས་པའི་ལྡེ་གུ་དང་། །མར་དང་ཏིལ་མར་འོ་མ་ནི། །བཞི་འགྱུར་གྱི་

ནི་ནང་དུ་བསྐོལ། །འཇམ་རྩི་ཉམས་བརྟས་རླུང་མཁྲིས་འཇོམས། །སྟོབས་དང་ཁུ་བ་མེ་དྲོད་འཕེལ། །ཁྲག་དང་ཁུ་བའི་ནད་སེལ་བྱེད། །བུ་སྐྱེད་པར་ཡང་བྱེད་པ་ཡིན། །ཞེས་བྱ་བ་ལ། ཛི་བན་ཏི་ལ་སོགས་པའི་སྨན་བཏགས་ཏེ་ལྡེ་གུར་བྱས་པ་དང་། མར་དང་ཏིལ་

མར་ཆ་མཉམ་པར་བྱས་པ་འོ་མ་བཞི་འགྱུར་དང་བསྲེས་ཏེ། ཚུལ་བཞིན་དུ་བསྐོལ་བའི་འཇམ་རྩི་བཏང་ན་ཉམས་བརྟས་པར་བྱེད་པ་དང་། རླུང་དང་མཁྲིས་པ་འཇོམས་པ་ལ་སོགས་པའི་ཡོན་ཏན་སྐྱེད་པར་བྱེད་དོ། །རྒྱམ་ཚ་རུ་རྟ་པོ་སོན་ཆ། །ཤུ་ཏི་ལྕང་མ་ཤུ་དག་དང་། །བ་ལ་ཀ་

དང་ཤིང་མངར་དང་། །ག་བྲའི་རྩ་བ་ཀད་ཕལ། །ཐང་ཤིང་དོང་གྲ་མ་ནུ་དང་། །མེ་ད་དབྱི་མོ་ཙི་ཏྲ་ཀ །ཟུར་པ་བོང་ང་བྱི་དང་ག །ཤ་མ་དུར་བྱིད་ཧ་རེ་ཎུ། །སྠི་ར་བིལ་བ་ནི་ལི་ནི། །ཏི་མུ་ས་དང་པི་པི་ལིང་། །དན་ད་ར་སྣ་ཆ་མཉམ་པ། །ཨེ་རཎྜ་ཡི་མར་རམ་ནི། །ཏིལ་

เล่ม ๒๐๒ · หน้า 79a

མར་བསྐོལ་བའི་འཇམ་རྩི་ཡིས། །བད་ཀན་ནད་འཇོམས་རྒྱུ་རླུགས་དང་། །རྟུག་སྐམ་སྐྲན་དང་གཞང་འབྲུམ་དང་། །མཆེར་པའི་ནད་དང་གཅིན་སྙི་དང་། །རླུང་ནད་འཁྱིལ་དང་ལྟོ་སྤོས་དང་། །རྔེའུ་ཆགས་ནད་ནི་མྱུར་དུ་སེལ། །ཞེས་བྱ་བ་ལ།

རྒྱམ་ཚ་ལ་སོགས་པ་ཆ་མཉམ་པར་བྱས་པ་ལྡེ་གུར་བཏབ་ལ། ཨེ་རཎྜའི་འབྲས་བུ་བཙིར་བའི་མར་དང་བསྐོལ་བའི་འཇམ་རྩིས་ནི་བད་ཀན་གྱི་ནད་འཇོམས་ཤིང་རྒྱུ་རླུགས་ལ་སོགས་པའི་ནད་སེལ་བར་བྱེད་དོ། །ཡང་ན་བིལ་བ་ལ་སོགས་པའི། །རྩ་བ་ལྔ་དང་ཏིལ་

མར་བསྐོལ། །ཞེས་བྱ་བ་ལ། ཡང་ན་བིལ་བ་ལ་སོགས་པའམ། རྩ་བ་ལྔ་དང་ཏིལ་མར་བསྐོལ་བའི་འཇམ་རྩི་བཏང་ན་ཡང་རླུང་གི་ནད་འཇོམས་པར་བྱེད་དོ། །ཡང་ན་བད་ཀན་སེལ་སྨན་སྦྱར། །ཏིལ་མར་དང་བཏང་བད་ཀན་འཇོམས། །ཞེས་བྱ་བ་ལ། ཡང་ན་

བད་ཀན་སེལ་བའི་སྨན་ཚ་བ་ལྔ་ལ་སོགས་པ་དང་སྦྱར་བའི་ཏིལ་མར་གྱི་འཇམ་རྩི་བཏང་ན་བད་ཀན་འཇོམས་པར་བྱེད་དོ། །ཡང་ན་པོ་སོན་ཆ་བརྒྱད་འགྱུར། །སྐྱུར་བསྐོལ་འཇམ་རྩི་བད་ཀན་སེལ། །ཞེས་བྱ་བ་ལ། ཡང་ན་རང་སྐྱར་ལ་སོགས་པ་ཁུ་བ་སྐྱུར་པོ་ཏིལ་མར་

གྱི་བརྒྱད་འགྱུར་དང་། །པོ་སོན་ཆའི་ལྡེ་གུ་བསྐོལ་བའི་འཇམ་རྩི་བཏང་ན་ཡང་བད་ཀན་སེལ་བར་བྱེད་དོ། །འཇམ་རྩི་འཇམ་པས་རྨོངས་གྱུར་པ། །རྣོན་པོས་ཉེ་བར་སྦྱར་བར་བྱ། །རྣོ་བས་གནོད་ལ་སྣུམ་པ་དང་། །མངར་ཞིང་བསིལ་ལ་འཇམ་པ་གཏང་། །ཞེས་བྱ་བ་ལ།

འཇམ་རྩི་འཇམ་ཞིང་རྟུལ་བ་བཏང་བས་སྐྱེས་བུ་རྨོངས་བག་ཏུ་གྱུར་པ་འཇམ་རྩི་རྣོན་པོས་སྦྱང་ཞིང་དག་པར་བྱ་བ་དང་། དེ་བཞིན་དུ་འཇམ་རྩི་རྣོན་པོས་གནོད་པར་གྱུར་པ་ལ། སྣུམ་པ་དང་མངར་བ་དང་། བསིལ་བ་དང་། འཇམ་པའི་འཇམ་རྩི་གཏང་བར་བྱའོ། །རྣོན་པོ་

བ་གཅིན་པི་ལུ་དང་། །ཙི་ཏྲ་ཀ་དང་ལན་ཚྭ་དང་། །ཐལ་སྨན་དང་ནི་ཡུངས་ཀར་རྣམས། །དུས་ལ་བབ་པར་གཏང་བར་བྱ། །འོ་མ་མར་སོགས་འཇམ་པོ་ཡིས། །ཞེས་བྱ་བ་ལ། འཇམ་རྩི་འཇམ་པོ་ལས་ཉེས་པར་གྱུར་པ་ལ་ནི་བ་གཅིན་ལ་སོགས་པ་མས་གཏོང་བ་

เล่ม ๒๐๒ · หน้า 79b

རྣོན་པོ་དུས་ལ་བབ་པའི་ཚེ་གཏང་བར་བྱ་ལ། རྣོན་པོས་ཉེས་པར་གྱུར་པ་ལ་ནི་འོ་མ་དང་མར་ལ་སོགས་པ་རྫས་འཇམ་པོའི་མས་གཏོང་བ་དག་གིས་གསོ་བར་བྱའོ། །ཉམས་སྟོབས་དུས་དང་ནད་གཞི་རང་བཞིན་དག །རྣམ་པར་ཕྱེ་སྟེ་འཇམ་རྩི་གཏང་བྱ་བ། །རང་རང་

གི་ནི་སྨན་གྱི་སྡེ་ཚན་གྱིས། །རང་རང་གི་ནི་ནད་རྣམས་བསལ་བར་བྱ། །ཞེས་བྱ་བ་ལ། བློ་དང་ལྡན་པའི་སྨན་པས་ནད་པའི་ཉམས་སྟོབས་ལ་སོགས་པ་རྣམ་པར་ཕྱེ་ཞིང་བརྟགས་ཏེ་རང་རང་གི་སྨན་གྱི་སྡེ་ཚན་མངར་བ་ལ་སོགས་པའི་སྨན་གྱི་ཚོགས་རྣམས་ཀྱིས་རླུང་ལ་སོགས་

པ་རང་རང་གི་ནད་བསལ་བའི་ཕྱིར་འཇམ་རྩི་གཏང་བར་བྱའོ། །ཚ་བས་ཉམ་ཐག་ལ་བསིལ་བ། །བསིལ་བས་ཉེན་ལ་དྲོ་འཇམ་སྦྱར། །དེ་དང་འཚམ་པའི་སྨན་ལྡན་པར། །འཇམ་རྩི་བརྟགས་ཏེ་གཏང་བར་བྱ། །ཞེས་བྱ་བ་ལ། ཟས་དང་སྤྱོད་ལམ་ལ་སོགས་པ་

མཁྲིས་པ་སྐྱེད་པར་བྱེད་པས། ཉམ་ཐག་ཅིང་གཟིར་བར་གྱུར་པ་ལ་ནི་བསིལ་པའི་སྨན་དང་འཇམ་རྩི་གཏང་བར་བྱ་ལ། དེ་བཞིན་དུ་ཟས་དང་སྤྱོད་ལམ་ལ་སོགས་པའི་གྲང་བའི་དབང་གིས་རླུང་དང་བད་ཀན་གྱིས་ཉེན་པའི་ནད་ལ་ནི། དེ་དང་འཚམ་པའི་སྨན་དང་སྦྱར་བའི་འཇམ་

རྩི་ཙམ་གང་ཡིན་པ་གཏང་བར་བྱ་སྟེ། དེ་དག་ཀྱང་སྨན་དང་ནད་ཀྱི་མཚན་ཉིད་བརྟགས་ཏེ། ཇི་ལྟར་འཚམ་པ་བཞིན་དུ་གཏང་བར་བྱའོ། །སྦྱང་བར་བྱ་བའི་ནད་རྣམས་ལ། །བརྟ་བྱེད་འཇམ་རྩི་མི་གཏང་ཞིང་། །མི་གང་མཛེ་གཅིན་ནད་ཀྱིས་ཉེན། །ཚིལ་རྒྱས་ནད་

ལ་གཏང་མི་བྱ། །ཞེས་བྱ་བ་ལ། སྦྱང་བར་བྱ་བ་སྐྱུག་སྨན་དང་བཀྲུ་སྨན་གཏང་བར་རིགས་པའི་ནད་རྣམས་ལ་བརྟ་བར་བྱེད་པའི་འཇམ་རྩི་གཏང་བར་མི་བྱ་ཞིང་། ཡང་མི་གང་མཛེ་ནད་དང་གཅིན་ནད་ཀྱིས་ཉེན་པ་ལ་སོགས་པ་ལ་འཇམ་རྩི་གཏང་བར་མི་བྱའོ། །ཉམ་

ཆུང་གློ་འགྲམས་པ་དང་བརྒྱལ་བ་དང་། །ལུས་སྐེམ་རིད་དང་སྦྱངས་པའི་ལུས་ཅན་དང་། །གང་ཡང་དྲི་མས་ཚེ་ནི་བཟུང་གྱུར་ལ། །སྦྱོང་བར་བྱེད་པའི་མས་གཏོང་གཏང་མི་བྱ། ཞེས་བྱ་བ་ལ། ཉམ་ཆུང་བ་དང་། གློ་འགྲམས་པ་དང་། བརྒྱལ་

เล่ม ๒๐๒ · หน้า 80a

བར་གྱུར་པ་དང་། ལུས་ཟུངས་ཟད་པས་ཤས་ཆེར་རིད་ཅིང་སྐེམ་པ་དང་། བཀྲུ་སྨན་ལ་སོགས་པས་ལུས་སྦྱངས་ཟིན་པའི་ལུས་ཅན་གང་དང་གང་དྲི་མ་སྟེ་བཤང་བས་ཚེ་བཟུང་ཞིང་སྲོག་གི་རྟེན་བྱས་པས་དེ་དག་ལ་སྦྱོང་ཞིང་བཀྲུ་བར་བྱེད་

པའི་མས་གཏོང་པ་གང་ཡིན་པ་དེ་གཏང་ཞིང་སྦྱང་དུ་མི་རུང་ངོ་། །ཡན་ལག་བརྒྱད་པའི་སྙིང་པོའི་རྣམ་པར་འགྲེལ་པ། ཚིག་གི་དོན་གྱི་ཟླ་ཟེར་ཞེས་བྱ་བ་སློབ་དཔོན་ཟླ་བ་ལ་དགའ་བས་ངེས་པར་སྦྱར་བ་ལས། ཆོ་ག་གྲུབ་པའི་གནས་ཀྱི་ལེའུ་བཞི་པའི་འགྲེལ་པའོ།། །།

དེ་ནས་མས་གཏོང་བའི་ཆོ་གའི་ཉེས་པ་གྲུབ་པ་བཤད་པར་བྱའོ། །ཞེས་བྱ་བ་ལ། མས་གཏོང་བ་ཕྱིན་ཅི་ལོག་ཏུ་ཉེ་བར་སྦྱར་བ་ལས་ཉེས་པ་གང་ཞིག་འབྱུང་བ་དེ་བསལ་ཞིང་གསོ་བར་བྱ་བའི་ཕྱིར་དེ་གྲུབ་པར་བྱ་བའི་ཆོ་གའི་ལེའུ་བརྩམས་པ་ཡིན་ནོ། །སྣུམ་ཆོས་དུགས་ནི་མ་བྱས་དང་། །

ལྟོ་ལྕི་བ་ལ་སྨན་གྲང་སྣུམ། །ཚ་ཉུང་སྨན་ཚད་ཆུངས་པ་འམ། །སྨན་ནི་སྐ་བ་བཏང་གྱུར་ན། །དེ་ཡིས་ནད་ནི་གློངས་གྱུར་དང་། །སྟོབས་ཆུང་བ་ཡིས་ནད་མ་ཕྱིན། །སྦྱོར་བ་ཉེས་པ་བསྐྱེད་གྱུར་ཅིང་། །འཕྱེན་དང་ཕྱི་ས་གཅིན་སྲི་དང་། །ལྟེ་བ་ཆུ་སོ་ན་ཞིང་ཚ། །དང་གར་ཆགས་ཤིང་གཞང་

སྐྲངས་དང་། །གཡན་པ་ཐོར་བུ་མདོག་མི་སྡུག །མི་དགའ་མེ་དྲོད་ཆུང་བར་འགྱུར། །ཞེས་བྱ་བ་ལ། དང་པོར་སྣུམ་ཆོས་ཀྱི་སྦྱོར་བ་དང་། དུགས་མ་བྱས་ཤིང་ལྟོ་ལྕི་བར་གྱུར་པ་ལ། །འཇམ་རྩིའི་སྨན་གྲང་བ་དང་སྣུམ་ཉུང་བ་དང་ལན་ཚྭ་ཉུང་བ་དང་སྨན་གྱི་ཚད་ཆུངས་པར་གྱུར་པ་

ལ། ཡང་ན་སྨན་སྐ་ཞིང་འཇུག་པ་བུལ་བ་བཏང་བར་གྱུར་ན། སྨན་དེས་ནད་གློངས་ཤིང་དཀྲུགས་པར་གྱུར་ནས་མི་བདེ་བར་བྱེད་ལ། སྟོབས་ཆུང་བས་ནད་ཕྱིན་ཅིང་སེལ་བར་མི་ནུས་ཏེ། སྦྱོར་བ་ཉེས་པའི་མཚན་མ་རྣམས་བསྐྱེད་པར་འགྱུར་ལ། སྦྱོར་བ་ཉེས་པ་དེ་དག་འཕྱེན་དང་

ཕྱི་ས་ལ་སོགས་པ་འགགས་པར་བྱེད་ཅིང་སྲི་བ་དང་། ལྟེ་བ་དང་ཆུ་སོར་ཟུག་ཅིང་ན་བ་དང་། ལུས་ཁོང་ཚ་བ་དང་། དང་གར་འདམ་གྱིས་བསྡུས་པ་སྙམ་སེམས་ཤིང་མེར་མེར་པོར་བྱེད་པ་དང་། གཞང་ཁ་སྐྲངས་པ་དང་། གཡན་པ་ལ་སོགས་པ་འབྱུང་བར་འགྱུར་རོ། །ཚད་

เล่ม ๒๐๒ · หน้า 80b

འཁྲུའི་ཉེས་པ་བར་མ་ལ། །སྔར་བཤད་སྨན་གྱི་ཁུ་བ་གཉིས། །དེ་ལས་གཅིག་ནི་དྲོ་བ་ཡི། །བཏུང་བར་བླུགས་པ་བསྔགས་པ་ཡིན། །ཞེས་བྱ་བ་ལ། དེ་ལ་མས་གཏོང་བ་ལ་ཉེས་པར་གྱུར་པའི་ནད་ལ། ཚད་པས་འཁྲུ་བའི་ཉེས་པ་བར་མ་ལ། ཕམ་པའི་སྐབས་

སུ་སྔར་བཤད་པའི་སྨན་གྱི་ཁུ་བ་གཉིས་པོ། །པུ་ཏི་ཀ་དང་། པི་པི་ལིང་དང་། བཅའ་སྒ་དང་། ཤུ་དག་དང་། འུ་སུ་དང་། ཨ་རུ་ར་བསྐོལ་བའི་ཁུ་བ་དང་། ཡང་ན་བིལ་བ་དང་། འུ་སུའི་འབྲས་བུ་དང་། གླ་སྒང་དང་། དོང་གྲ་དང་། བ་ལ་ཀ་བསྐོལ་བ་སྟེ།

སྨན་གྱི་ཁུ་བ་དེ་གཉིས་ལས་གང་ཡང་རུང་བ་གཅིག་བླུད་ན་གོང་དུ་སྨོས་པའི་ནད་རྣམས་བསྟོད་ཅིང་བསྔགས་པ་ཡིན་ནོ། །པོ་སོན་ཆ་ཡི་རེང་བུའི་དུགས། །དུས་ཤེས་པ་ཡིས་བཀྲུ་སྨན་གཏང་། །ཞེས་བྱ་བ་ལ། འདིར་ལྟེ་བར་ཟུག་པ་དང་། རླུང་དང་བཤང་བ་ལ་སོགས་པ་

འགགས་པ་ལ་པོ་སོན་ཆ་བཏགས་པའི་རེང་བུ་མས་གཏོང་བ་དང་། དུས་ཚོད་ཤེས་པར་བྱས་ནས་བཀྲུ་སྨན་བཏང་བ་ཡང་ཕན་ཞིང་བསྔགས་པ་ཡིན་ནོ། །བིལ་བའི་རྩ་བ་དུར་བྱིད་དང་། །ཐང་ཤིང་ནས་དང་རྒྱ་ཤུག་དང་། །རྒྱ་སྲན་ཆང་དང་བ་གཅིན་བཅས། །མས་གཏོང་འགགས་

པ་སེལ་བར་བྱེད། །ཅེས་བྱ་བ་ལ། ཡང་མས་གཏོང་བ་འགགས་པར་གྱུར་པ་དེ་ལ་བིལ་བའི་རྩ་བ་ལ་སོགས་པ་བཏགས་པའི་ལྡེ་གུ་དང་། ཆང་དང་བ་གཅིན་སྦྱར་བ་མས་གཏོང་བས་ཀྱང་སེལ་ཅིང་སྦྱོང་བར་བྱེད་དོ། །ནད་གཞི་ཤས་ཆེ་ལུས་རྩུབ་དང་། །ལྟོ་སྲ་ནུས་པ་ཆུང་བཏང་ན། །

མས་གཏོང་ནད་གཞི་གློངས་ནས་ནི། །རླུང་གི་ལམ་ནི་འགག་པར་བྱེད། །རླུང་ནི་ལམ་ལོག་ཞུགས་པ་དེས། །ལྟོ་སྦོས་ནད་རྣམས་གཟིར་བར་བྱེད། །གཞང་དང་ལྟོ་བ་ཚ་བ་དང་། །རླིག་པ་ཆུ་སོ་ན་བྱེད་ཅིང་། །སྙིང་གར་འགགས་པས་གཟེར་བ་དང་། །ཕན་ཚུན་དུ་

ནི་འགྲོ་བར་བྱེད། །ཅེས་བྱ་བ་ལ། ནད་གཞི་ཤས་ཆེ་སྐྱེལ་དུས་སོགས་ཤིང་ཆེ་བ་དང་། ཁོང་རྩུབ་ཅིང་སྣུམ་གྱིས་མ་ཞེན་བ་དང་། ལྟོ་སྲ་བར་གྱུར་པ་ལ་མས་གཏོང་བའི་སྨན་ནུས་པ་ཆུང་བས་མས་གཏོང་བ་དེ་དང་དེ་རླུང་འདྲེས་པར་གྱུར་ནས་རླུང་རྒྱུ་བའི་ལམ་འགགས་

เล่ม ๒๐๒ · หน้า 81a

པར་གྱུར་ལ། དེ་ལྟར་ལམ་འགགས་པས་རླུང་རང་གི་རྒྱུ་བའི་ལམ་སྤངས་ནས་ལམ་ལོག་པར་ཞུགས་པར་གྱུར་ནས། །དེས་ལྟོ་སྦོས་པ་ལ་སོགས་པའི་ནད་སྐྱེད་པར་བྱེད་ཅིང་སྙིང་གར་རླུང་གིས་འགགས་ཤིང་རྒྱས་པས་གཟིར་བར་བྱེད་པ་དང་།

རླུང་དེ་གཟེར་དང་བཅས་པར་ལུས་ཕན་ཚུན་དུ་འགྲོ་ཞིང་ཁྱབ་པར་བྱེད་པར་འགྱུར་རོ། །དེ་ལ་ལུས་བསྐུ་དུགས་བྱས་པའི། །ལུས་ལ་རེང་བུ་གཞུག་པར་བྱ། །ཞེས་བྱ་བ་ལ། ལྟོ་སྦོས་ལ་སོགས་པའི་ནད་ཀྱི་ཉེས་པ་བྱུང་བར་གྱུར་པ་དེ་ལ་དང་པོར་ལུས་བསྐུ་ཞིང་

དུགས་བྱས་ལ་པོ་སོན་ཆ་བཏགས་བའི་ལྡེ་གུ་མས་གཞུག་པར་བྱའོ། །བིལ་བ་སོགས་དང་པི་ལུ་དང་། །ཡུངས་ཀར་བ་གཅིན་བཅས་མས་གཏོང་། །ཞེས་བྱ་བ་ལ། ཡང་དེ་ལ་བིལ་བའི་རྩ་བ་དུར་བྱིད་དང་ཞེས་བྱ་བ་ལ་སོགས་པ་བཤད་མ་ཐག་པ་ནི་རུ་ཧ་འམ།

ཡང་ན་པི་ལུའི་འབྲས་བུ་དང་། ཡུངས་ཀར་དང་བ་གཅིན་སྦྱར་བའི་མས་གཏོང་བའི་བཀྲུ་སྨན་དྲག་པོ་བྱའོ། །ཙི་ཏྲ་ཐང་ཤིང་ཏིལ་མར་ནི། །བསྐོལ་བའི་འཇམ་རྩི་གཏང་བྱའོ། །ཞེས་བྱ་བ་ལ། ཙི་ཏྲ་ཞེས་བྱ་བ་ཤི་པེ་ཏའི་ཤིང་དང་ཐང་ཤིང་གཉིས་བསྐོལ་བའི་འཇམ་རྩི་བཏང་ན་དེ་

ལ་ཕན་ནོ། །ཤུགས་ནི་བཀག་པར་གྱུར་པའམ། །བཙིར་དྲགས་པར་ནི་བྱས་པའམ། །ལན་ཚྭ་སྣུམ་ཤས་ཆུང་ལ་ཚ། །སྨན་ཆུང་བ་ཡི་མས་གཏོང་བ། །འཇམ་པས་རླུང་གིས་གྱེན་དུ་འཕུལ། །ཁ་དང་སྣ་ནས་འབྱུང་བར་འགྱུར། །དེ་ཡིས་བརྒྱལ་དང་སྙིང་ནད་དང་། །

སྐོམ་དང་ཚ་བ་ལ་སོགས་འབྱུང་། །ཞེས་བྱ་བ་ལ། འཇམ་རྩི་བཏང་བས་ཤུགས་བཀག་པར་གྱུར་པའམ། ལྒང་པ་ཤས་ཆེར་བཙིར་དྲགས་པའམ། ལན་ཚྭ་དང་སྣུམ་ཤས་ཆུང་ཞིང་ཚ་དྲགས་པའམ། སྨན་ཉུང་ཤིས་བཏང་བའམ། འཇམ་པོ་བཏང་བས་སྨན་དེ་རླུང་གིས་གྱེན་དུ་

ཕུལ་ནས་ཁ་དང་སྣའི་སྒོ་ནས་འབྱུང་བར་འགྱུར་ལ། དེ་ལྟར་གྱེན་དུ་འབྱུང་བ་དེས་བརྒྱལ་བ་ལ་སོགས་པའི་ནས་སྐྱེ་བར་བྱེད་དོ། །བརྒྱལ་བའི་ནད་ནི་མཐོང་གྱུར་ན། །དེ་ཡི་གདོང་ལ་ཆུ་གྲང་གཏོར། །ངལ་སོས་བར་དུ་གཡོབ་པ་དང་། །དབུགས་རྔུབ་འབྱུང་བར་བྱེད་དུ་གཞུག །ཁ་སྦུབ་བཞག་

เล่ม ๒๐๒ · หน้า 81b

སྟེ་རྒྱབ་རྩིབ་ལོག་ས། །ལྟོ་བ་ལག་པ་དྲོན་པོས་མཉེ། །སྐྲ་ནས་བཏེག་སྟེ་སྤྲུགས་པ་དང་། །སྦྲུལ་དང་མཆེ་བ་ཅན་འཇིགས་བསྟན། །མཚོན་དང་ཐོག་འབབ་རྒྱལ་པོའི་མིས། །སྐྲག་བྱས་མས་གཏོང་ཐུར་དུ་འབྱུང་། །ཞེས་བྱ་བ་ལ། དེ་ལྟར་ནད་པ་བརྒྱལ་བར་གྱུར་པར་

སྣང་ན། དེའི་གདོང་ལ་ཆུ་གྲང་གིས་འཕྲལ་དུ་གཏོར་བ་དང་། ཇི་སྲིད་ངལ་སོས་པར་གྱུར་པ་དེ་སྲིད་ཀྱི་བར་དུ། རླུང་ཡབ་ཀྱིས་གཡོབ་ཅིང་དུབ་པ་བསང་བ་དང་། དེའི་དབུགས་རྔུབ་པ་དང་། འབྱུང་བ་ལ་ཤས་ཆེར་རྔུབ་ཅིང་ནང་དུ་དགག་པ་བྱེད་དུ་གཞུག་པ་དང་། ནད་པ་ཁ་བུབ་ཏུ་གཞུག་

སྟེ། རྒྱལ་ལ་སོགས་པ་ལག་པ་དྲོན་པོས་མཉེ་བར་བྱ་དེའི་སྐྲ་ནས་བཟུང་སྟེ། གྱེན་དུ་བཏེག་ལ་སྤྲུགས་པ་དང་། དེ་བཞིན་དུ་སྦྲུལ་ལ་སོགས་པ་དང་འཇིགས་ཤིང་སྐྲག་ཏུ་གཞུག་པ་དང་། མཚོན་དང་རྒྱལ་པོའི་སྐྱེས་བུ་མི་སྲུན་པ་དང་། ཐོག་འབབ་པ་ལ་སོགས་པས་ཀྱང་འཇིགས་ཤིང་

སྐྲག་ཏུ་གཞུག་པར་བྱ་སྟེ། དེ་ལྟར་བྱས་ན་འཇམ་རྩི་ནང་དུ་འཁྱིལ་པ་དེ་ཐུར་དུ་འབྱུང་ཞིང་བཤང་བའི་སྒོ་ནས་འཛག་པར་འགྱུར་རོ། །ལག་པ་གོས་ཀྱིས་མགུལ་པར་བསྡམས། །ཅི་ནས་འཆི་བར་མི་འགྱུར་བྱ། །སྲོག་དང་གྱེན་རྒྱུ་རླུང་བཀག་པས། །ཐུར་སེལ་ཤིན་ཏུ་བདེ་རྒྱུ་

བ། །གྲུབ་པ་ཡིས་ནི་མས་གཏོང་བ། །མྱུར་དུ་འདྲེན་པར་བྱེད་པ་ཡིན། །ཞེས་བྱ་བ་ལ། ཡང་ནད་པ་དེའི་ལག་པ་གཉིས་སམ་གོས་ཀྱིས་མགུལ་པ་བསྡམས་ཤིང་བཅིང་བར་བྱ་ལ། བསྡམས་པའི་ཚེ་ན་ཡང་དེ་འགེམས་ཏེ་འཆི་བར་མི་འགྱུར་བ་དེ་ལྟར་སྨན་པས་བསྲུང་ཞིང་

ཚོད་ཟིན་པར་བྱས་ལ་དེ་ལྟར་བྱས་པས་སྲོག་ཅེས་བྱ་བ་དང་། གྱེན་དུ་རྒྱུ་བ་ཞེས་བྱ་བའི་རླུང་བཀག་པར་གྱུར་པས་གྱུར་པས་ཐུར་དུ་སེལ་བ་ཞེས་བྱ་བའི་རླུང་ཤིན་ཏུ་བདེ་བར་རྒྱུ་བ་གྲུབ་པ་ཡིན་སྟེ། དེས་ན་མས་གཏོང་བ་དེ་མྱུར་བ་ཁོ་ནར་ཐུར་དུ་འདྲེན་ཅིང་བཤང་སྒོ་ནས་འབྱིན་པར་བྱེད་དོ། །རུ་རྟ་

གླ་གོར་ཞོ་ཤ་ཡི། །ལྡེ་གུ་སྐྱུར་རྩབས་སྦྱར་ཏེ་བླུད། །དྲོ་དང་རྣོ་དང་འཁྲུ་བ་ཡི། །མས་གཏོང་ལུགས་བཞིན་འབྱུང་བར་བྱེད། །ཅེས་བྱ་བ་ལ། རུ་རྟ་དང་གླ་གོར་ཞོ་ཤ་བཏགས་པའི་ལྡེ་གུ་སྐྱུར་རྩབས་ཀན་ཛི་དང་སྦྱར་ཏེ་ནད་པ་དེ་ལ་བླུད་ན། ལྡེ་གུ་དེ་ནི་རྣོ་བ་དང་། དྲོ་བ་དང་། འཁྲུ་བར་

เล่ม ๒๐๒ · หน้า 82a

བྱེད་པའི་ཡོན་ཏན་གྱིས་མས་གཏོང་བ་གྱེན་དུ་འབྱུང་བ་དེ་ལུགས་བཞིན་དུ་ཐུར་དུ་འབྱུང་བར་བྱེད་དོ། །དུར་བྱིད་ཨ་རུ་ར་བ་གཅིན། །སྦྱར་བླུད་ལུགས་བཞིན་འབྱུང་བར་བྱེད། །ཅེས་བྱ་བ་ལ། ཡང་དུར་བྱིད་དང་། ཨ་རུ་རའི་ལྡེ་གུ་བ་གཅིན་དང་སྦྱར་ཏེ་བླུད་

ན་ཡང་གྱེན་དུ་བྱུང་བ་དེ་ཐུར་དུ་འབྱུང་བར་བྱེད་དོ། །ཞུ་བའི་གནས་འདུག་དུགས་བྱས་ལ། །རྩ་བ་བཅུ་བ་རྒྱ་ཤུག་ནས། །རྒྱ་སྲན་བ་གཅིན་བསྐོལ་བ་ཡིས། །མས་གཏོང་དྲག་པོ་སྦྱར་བར་བྱ། །ཞེས་བྱ་བ་ལ། མས་གཏོང་བ་ཞུ་བའི་གནས་ན་འཁྱིལ་ཞིང་འདུག་པར་གྱུར་ན།

ནད་པ་དེ་དུགས་བྱ་ཞིང་རྩ་བ་བཅུ་པ་ལ་སོགས་པའི་སྨན་བ་གཅིན་དང་བསྐོལ་བའི་ནི་རུ་ཧ་མས་གཏོང་བར་བྱའོ། །སླེ་ཏྲེས་སྨྱུག་མའི་ལོ་མ་དང་། །བུ་ཏི་ཀ་རཉྫ་ཤུན་པ། །འོ་མ་ཟུར་པ་ཐང་ཤིང་དང་། །བུ་ཏི་ཀ་ནི་བ་གཅིན་བསྐོལ། །ཏིལ་མར་བུ་རམ་རྒྱམ་ཚར་བཅས། །

བཀྲུ་སྨན་ལྡེ་གུར་བཅས་པ་གཏང་། །ཞེས་བྱ་བ་ལ། ཡང་ན་མ་ཞུ་བའི་གནས་ན་འཁྱིལ་པ་དེ་ལ་སླེ་ཏྲེས་དང་སྨྱུག་མའི་ལོ་མ་དང་། པུ་ཏི་ཀར་ཉྫའི་ཤུན་པ་དང་འོ་མ་བ་གཅིན་དང་བསྐོལ་བའི་ནང་དུ་ཏིལ་མར་ལ་སོགས་པ་བཏབ་སྟེ། བཀྲུ་སྨན་གང་ཡང་རུང་བའི་ལྡེ་གུ་

བཅུག་པ་གཏང་བར་བྱའོ། །མས་གཏོང་བྲང་ན་གནས་པ་ལ། །བིལ་བ་ལ་སོགས་ལྔ་བསྐོལ་གཏང་། །ཞེས་བྱ་བ་ལ། མས་གཏོང་པའི་སྨན་བྲང་ངམ། སྙིང་གར་འཁྱིལ་པ་ནི་བིལ་བ་ལ་སོགས་པ་རྩ་བ་ལྔ་བསྐོལ་བའི་སྨན་མས་གཏོང་བར་བྱའོ། །མགོར་གནས་སྣར་

བླུགས་དུད་པ་བརྔུབ། །ཡུངས་ཀར་ལྡེ་གུས་མགོ་བོ་བསྐུ། །ཞེས་བྱ་བ་ལ། མས་གཏོང་བ་མགོ་བོར་གནས་ཤིང་འཁྱིལ་པ་ལ་ནི་སྣ་ནས་སྨན་བླུགས་པ་དང་། དུད་པ་སྔོན་པོ་བརྔུབ་པ་དང་། །ཡུངས་ཀར་བཏགས་བའི་ལྡེ་གུས་མགོ་བོ་བསྐུ་བར་བྱའོ། །མས་གཏོང་

དྲོ་ཆེས་རྣོ་སྐྱུར་དྲགས། །སྐ་ཆེས་དུགས་ནི་དྲགས་པ་དང་། །ནད་གཞི་ཆུང་ཞིང་ལྟོ་སྙི་ལ། །ཡང་དང་ཡང་དུ་བཏང་བ་ཡི། །སྦྱོར་བ་དྲགས་པས་ཉེས་གྱུར་པས། །ལྟོ་བའི་ནད་ནི་སྐྱེད་པར་བྱེད། །དེ་ལ་བཀྲུ་སྨན་སྦྱར་དྲགས་དང་། །གསོ་བ་མཚུངས་པ་ཉིད་དུ་བྱ། །

เล่ม ๒๐๒ · หน้า 82b

ཞེས་བྱ་བ་ལ། གལ་ཏེ་སྨན་མས་གཏོང་བ་དེ་དྲོད་ཆེས་པའམ། རྣོ་དྲགས་པའམ། སྐྱུར་དྲགས་པའམ། ཤིན་ཏུ་སྐ་དྲགས་པའམ། དུགས་ཀྱི་སྦྱོར་བ་དྲགས་པའམ། ནད་ཀྱི་གཞི་ཆུང་ཞིང་ལྟོ་སྙི་བ་ལ་ཡང་དང་ཡང་དུ་བསྟུད་མར་བཏང་པར་གྱུར་ན།

དེ་ནི་སྦྱོར་བ་དྲགས་པའི་ཉེས་པར་གྱུར་ཅིང་ལྟོ་བའི་ནད་རྣམས་སྐྱེད་པར་འགྱུར་རོ། །དེ་ལྟ་བུའི་སྦྱོར་བ་དྲགས་པའི་ནད་དུ་གྱུར་པ་དེ་ལ་ནི་བཀྲུ་སྨན་གྱི་སྦྱོར་བ་དྲགས་པའི་གསོ་བ་སྔར་ཇི་སྐད་བཤད་པ་དང་། གསོ་བ་མཚུངས་པ་ཁོ་ནར་བྱའོ། །དེས་ན་བཀྲུ་སྨན་གྱི་སྦྱོར་བ་དྲགས་

བའི་མཚན་ཉིད་ཅི་ལྟར་ཤེས་པར་བྱ་ཞིང་གསོ་བའི་ཚུལ་ཡང་དེ་ཉིད་ལས་བཤད་པའི་ཚུལ་ཡང་ཤེས་པར་བྱའོ། །མས་གཏོང་ཐལ་སྨན་སྐྱུར་རྣོ་དྲོ། །ལན་ཚྭ་ཅན་ནམ་མཁྲིས་ཅན་ལ། །གཞང་ཚ་འབྲུད་ཅིང་གནོད་པ་དང་། །ཡོངས་སུ་འཛག་པར་བྱེད་པར་འགྱུར། །ཁྲག་ནི་ཚོས་

པ་ལྟ་བུར་འབྱུང་། །མཁྲིས་པ་འམ་མདོག་མང་འབྱུང་བར་བྱེད། །ལན་མང་ཤུགས་དྲག་འབྱུང་བ་དང་། །ཡང་དང་ཡང་དུ་བརྒྱལ་བར་འགྱུ། །ཞེས་བྱ་བ་ལ། མས་གཏོང་བའི་སྨན་ལ་སོགས་པ་ཤས་ཆེ་བར་སྦྱར་ཅིང་བཏང་བའམ། མཁྲིས་པ་ཅན་གྱི་མི་ལ་དེ་ལྟ་བུ་དག་

བཏང་ན། མས་གཏོང་བ་དེས་གཞང་ཁ་ཚ་བ་ལ་སོགས་པ་འབྱུང་བར་གྱུར་ལ། མི་དེ་ལས་ཁྲག་བཙོས་ཤིང་སྨིན་པར་བྱས་པ་ལྟ་བུ་འབྱུང་བ་དང་། དེ་བཞིན་དུ་མཁྲིས་པ་ཡང་ཁ་དོག་སྣ་ཚོགས་པ་འབྱུང་བར་བྱེད་ཅིང་། ལན་མང་དུ་ཤུགས་དྲག་ཏུ་འབྱུང་བར་བྱེད་ལ། ཡང་དང་

ཡང་དུ་བརྒྱལ་ཞིང་མི་དྲན་པ་ཉིད་དུ་འགྱུར་རོ། །དེ་ལ་ཁྲག་མཁྲིས་འཁྲུ་བ་སེལ། །གསོ་བ་རབ་ཏུ་བསྔགས་པ་ཡིན། །ཞེས་བྱ་བ་ལ། གཞང་ཁ་ཚ་བ་ལ་སོགས་པའི་མཁྲིས་པའི་ནད་དེ་ལ་ཁྲག་དང་མཁྲིས་བ་འཁྲུ་བ་སེལ་བར་བྱེད་པའི་གསོ་བ་སྔར་བཤད་པ་དེ་བསྔགས་ཤིང་

བཤད་པ་ཡིན་ནོ། །ཚ་བ་སོགས་ལ་དུར་བྱིད་ཀྱི། །ལྡེ་གུ་རྒུན་ཆུར་སྦྱར་བ་བླུད། །དེ་ཡིས་བཤང་རླུང་མཁྲིས་པ་ནི། །བསལ་ནས་ཚ་བ་ལ་སོགས་འཇོམས། །ཞེས་བྱ་བ་ལ། གལ་ཏེ་ཚ་བ་ལ་སོགས་པ་དང་ལྡན་པར་གྱུར་ན། དུར་བྱིད་ཀྱི་ལྡེ་གུ་དང་རྒུན་ཆུ་དང་སྦྱར་བ་

เล่ม ๒๐๒ · หน้า 83a

བླུད་པར་བྱ་སྟེ། དེས་ནི་བཤང་བ་ལ་སོགས་པ་བསལ་ཞིང་ཕྱུང་ནས་ཚ་བ་ལ་སོགས་པའི་བླ་བརྣན་འཇོམས་པར་བྱེད་དོ། །དག་གྱུར་ནས་ཐུག་གྲང་མོ་ནི། །ཁ་ར་དང་ནི་བཅས་པ་བླུད། །ཅེས་བྱ་བ་ལ། སྐྱེས་བུ་དེའི་ནད་དག་ཅིང་སྦྱང་བར་གྱུར་ནས་

ཐུག་པ་གྲང་མོའི་ནང་དུ་ཁ་ར་བཏབ་པ་བླུད་པར་བྱའོ། །འཁྲུ་བ་དྲགས་པར་གྱུར་པ་ཡིས། །བཤང་བ་ཟད་ལ་ཁ་ཟས་ནི། །མ་ཤའི་ཁུ་བ་ཟན་དྲོན་སྦྱིན། །ཞོ་དང་ཆང་ནི་བླུད་པར་བྱ། །ཞེས་བྱ་བ་ལ། འཁྲུ་བ་དྲགས་པར་གྱུར་ཅིང་བཤང་བ་ཟད་པར་གྱུར་པ་ལ་མ་ཤའི་

ཁུ་བ་ཡུ་ཤ་དང་ཟན་དྲོན་ནམ་ཤ་བཙོས་པ་སྦྱིན་པར་བྱ་ཞིང་། བཏུང་བར་ཞོ་ཆང་བླུད་པར་བྱའོ། །དེ་ལྟར་གྲུབ་པའི་མས་གཏོང་ཉེས། །བཤད་ནས་སྣུམ་གྱི་མས་གཏོང་བཤད། །ཅེས་བྱ་བ་ལ། དེ་ལྟར་ཆུ་ལ་འདིས་གྲུབ་པའི་མས་གཏོང་བའི་ཉེས་པའི་གསོ་བ་བཤད་

ཟིན་ནས། དེའི་འོག་ཏུ་སྣུམ་གྱི་འཇམ་རྩི་མས་གཏོང་པའི་ཉེས་པའི་གསོ་བ་བཤད་པའི་ཕྱིར་སྣུམ་གྱི་མས་གཏོང་བ་བཤད་ཅེས་སྨོས་པ་ཡིན་ཏེ། དེ་ནི་སྣུམ་གྱི་འཇམ་རྩི་མས་གཏོང་བའི་ཉེས་པ་གང་ཡིན་པ་དེའི་གསོ་བ་བཤད་པར་བྱའོ་ཞེས་བྱ་བའི་དོན་ཏོ། །རླུང་ཅན་གྲང་ཞིང་ཆུང་

བ་དང་། །མཁྲིས་པ་རབ་ཚ་བད་ཀན་འཇམ། །འགྲངས་ཆེས་པ་ལ་ལྕི་བ་དང་། །བཤང་བ་སོགས་ལ་སྟོབས་ཆུང་གཏང་། །དེ་ནི་སྣུམ་རླུང་འདྲེས་གྱུར་པ། །ཟིལ་གྱིས་མནན་པར་འབྱུང་མི་འགྱུར། །ཞེས་བྱ་བ་ལ། རླུང་གི་ནད་ཤས་ཆེ་བ་ལ་སྣུམ་གྱི་འཇམ་རྩི་གྲང་བ་འམ།

ཆུང་བ་བཏང་བའམ། ཁྲག་དང་མཁྲིས་པ་ཤས་ཆེ་བའི་ནད་ལ་སྣུམ་གྱི་འཇམ་རྩི་ཤིན་ཏུ་ཚ་བ་བཏང་བ་དང་། བད་ཀན་ཤས་ཆེ་བའི་ནད་ལ་སྣུམ་གྱི་འཇམ་རྩི་འཇམ་པོར་བཏང་བ་དང་། ཤིན་ཏུ་འགྲངས་ཆེས་པ་ལ་སྣུམ་གྱི་འཇམ་རྩི་ལྕི་བར་བཏང་པ་དང་། བཤང་བ་སོགས་ཤིང་ནང་

དུ་འཕེལ་བར་གྱུར་པ་ལ། སྣུམ་གྱི་འཇམ་རྩི་ནུས་པ་ཆུང་བར་བཏང་བར་གྱུར་ན། རླུང་ལ་སོགས་པའི་ནད་དེ་དག་སྣུམ་དུ་འདྲེས་པར་གྱུར་ཅིང་། ནད་ཀྱིས་ཟིལ་གྱིས་མནན་པས་ཐུར་དུ་འབྱུང་བར་མི་འགྱུར་རོ། །རེངས་དང་བརླ་ན་སྦོ་བ་དང་། །རིམས་དང་གཟེར་དང་ཡན་ལག་ན། །རྩིབ་

เล่ม ๒๐๒ · หน้า 83b

ལོགས་ན་དང་འདར་བ་ནི། །རླུང་སྣུམ་འདྲེས་ལས་འབྱུང་ཞེས་བྱ། །ཞེས་བྱ་བ་ལ། རླུང་དང་སྣུམ་འདྲེས་པར་གྱུར་པ་ལས་ནི་རེངས་པ་ལ་སོགས་པའི་ནད་འབྱུང་བར་འགྱུར་བར་ཤེས་པར་བྱའོ། །དེ་སྣུམ་ལན་ཚྭ་དྲོ་དང་སྐྱུར། །ར་སྣ་བི་ད་དྲོ་ཡི་མར། །རང་སྐྱུར་ཆང་

དང་རྒྱ་ཤུག་དང་། །རྒྱ་སྲན་ནས་དང་བསྐོལ་བའམ། །རྩ་བ་ལྔ་པ་བ་གཅིན་བཅས། །མས་གཏོང་དྲག་པོས་ལེགས་བསལ་བྱ། །ཞེས་བྱ་བ་ལ། སྣུམ་པ་དང་ལན་ཚྭ་དང་དྲོ་བ་དང་སྐྱུར་པའི་བག་དང་ར་སྣ་དང་བི་ད་དྲོ་བཙིར་བའི་མར་དང་རང་སྐྱུར་ལ་སོགས་པ་བསྐོལ་བའི་

ནི་རུ་ཧ་མས་གཏོང་བས་ལེགས་པར་བསལ་བར་བྱ་བའམ། རྩ་བ་ལྔ་པ་དང་བ་གཅིན་བཅས་བའི་ནི་རུ་ཧ་མས་གཏོང་བས་ལེགས་པར་བསལ་བར་བྱའོ། །དེ་དག་ཉིད་ཀྱི་ཏིལ་མར་དང་། །དགོངས་ཀར་ཟན་ཟོས་འཇམ་རྩི་གཏང་། །ཞེས་བྱ་བ་ལ། བཤད་མ་ཐག་པའི་ནི་རུ་ཧའི་

སྨན་འཕྲོད་པ་གཉིས་པོ་གང་ཡང་རུང་བ་དང་། ཏིལ་མར་བསྐོལ་ལ། དགོངས་ཀ་ཟས་ཟོས་བའི་རྗེས་ལ་ཏིལ་མར་དེའི་འཇམ་རྩི་མས་གཏོང་ན་ཡང་ནད་དེ་ལ་ཕན་ནོ། །སྐོམ་དད་ལུས་ཚ་རྨོངས་བག་དམར། །མདོག་ཉམས་རིམས་འདེབས་མུན་པར་མཐོང་། །འཁྲིས་པ་དང་འདྲེས་ཡིན་

ཞེས་བྱ། །ཞེས་བྱ་བ་ལ། སྐོམ་དང་ལ་སོགས་པའི་བླ་བརྣན་དང་བཅས་པའི་འཇམ་རྩིའི་སྣུམ་མཁྲིས་པ་དང་འདྲེས་ཤིང་དེས་གནོད་པ་ཡིན་པར་ཤེས་པར་བྱའོ། །ཁ་མངར་མས་གཏོང་བས་དེ་སྦྱང་། །ཞེས་བྱ་བ་ལ། སྣུམ་དང་མཁྲིས་པ་འདྲེས་པ་དེ་སྨན་ཁ་བ་དང་མངར་བའི་མས་གཏོང་བས་སྦྱང་ཞིང་

ཐུར་དུ་འབྱུང་བར་བྱའོ། །ལུས་སྙོམ་སྦྱིད་ཞན་རིམས་དྲག་འདེབས། །ཆམ་པ་ལུས་ལྕི་ཡི་ག་འཆུས། །བརྒྱལ་བཅས་ན་བས་བད་ཀན་དང་། །འཇམ་རྩི་སྣུམ་ནི་འདྲེས་ཤེས་བྱ། །ཞེས་བྱ་བ་ལ། ལུས་སྙོམ་པ་ལ་སོགས་བླ་བརྣན་དང་བཅས་ན་ནི་འཇམ་རྩིའི་སྣུམ་དེ་བད་ཀན་དང་བཅས་པ་

ཡིན་པར་ཤེས་པར་བྱའོ། །དེ་ལ་བསྐ་དང་ཁ་དང་ཚ། །ཆང་དང་བ་གཅིན་ལ་བསྐོལ་བ། །པོ་སོན་ཆ་དང་ཏིལ་མར་དང་། །སྐྱུར་བཅས་མས་གཏོང་བ་ཡིས་བསལ། །ཞེས་བྱ་བ་ལ། བད་ཀན་དང་འདྲེས་པའི་ནད་དེ་ལ་བསྐ་བ་ལ་སོགས་པའི་སྨན་གྱི་སྦྱོར་བ་བྱས་པའི་ཏིལ་མར་རང་

เล่ม ๒๐๒ · หน้า 84a

སྐྱུར་ལ་སོགས་པ་སྐྱུར་བག་དང་བཅས་པའི་མས་གཏོང་བས་བསལ་ཞིང་ཐུར་དུ་དབྱུང་བར་བྱའོ། །སློན་དང་བརྒྱལ་དང་ཡི་ག་འཆུས། །སྙོམ་གཟེར་གཉིད་ཆེས་ཡན་ལག་ན། །མ་ཞུའི་མཚན་མར་ལུས་ཚར་བཅས། །དེ་ནི་འགྲངས་ཆེས་འདྲེས་ཤེས་བྱ། །

ཞེས་བྱ་བ་ལ། འགྲངས་ཆེས་པ་དང་འདྲེས་བའི་བླ་བརྣན་ལ་ནི་སློན་པ་ལ་སོགས་པའི་ཡིན་པར་ཤེས་པར་བྱ་ཞིང་། མ་ཞུ་བའི་མཚན་མ་གཞན་དག་ཀྱང་དེ་ལས་འབྱུང་བར་ཤེས་པར་བྱའོ། །དེ་ལ་ཚ་དང་ལན་ཚྭའི་ཕྱེ། །བསྐོལ་བའི་སྨིན་ཆེས་སྨན་དང་ནི། །བཀྲུ་སྨན་འཇམ་པོ་བཏང་

བ་དང་། །མ་ཞུ་ལ་ཕན་ཐམས་ཅད་ཕན། །ཞེས་བྱ་བ་ལ། འགྲངས་ཆེས་པ་དང་འདྲེས་པའི་སྣུམ་དེ་ལ་ནི་སྨན་ཚ་བ་དང་ལན་ཚྭ་རྣམས་ཀྱི་ཕྱེ་མ་དང་བསྐོལ་བའི་ཁུ་བ་སྨིན་ཅིང་འཇུ་བར་བྱེད་པ་སྦྱིན་པ་དང་། བཀྲུ་སྨན་འཇམ་པོས་འཁྲུར་གཞུག་པ་དང་། མ་ཞུ་བ་ལ་ཕན་པའི་ཟས་

དང་སྤྱོད་ལམ་གང་དག་ཡིན་པ་ཐམས་ཅད་ཀྱང་ཕན་ནོ། །གཅིན་རྟུག་འཕྱེན་ནི་འགགས་པས་ཉེན། །ལུས་ལྕི་ལྟོ་སྦོས་སྙིང་ག་ན། །སྣུམ་དང་བཤང་འདྲེས་ཡིན་ཞེས་བྱ། །དེ་ལ་སྣུམ་དུགས་རེང་བུར་བཅས། །དུར་བྱིད་བིལ་བ་སོགས་བསྐོལ་བ། །མས་གཏོང་དྲག་དང་འཇམ་རྩོ་

གཏང་། །རྟུག་པ་འགགས་པ་སེལ་བས་ཀྱང་། །ཆོ་ག་བཞིན་དུ་ལེགས་པར་བསལ། །ཞེས་བྱ་བ་ལ། །གཅིན་དང་རྟུག་པ་དང་འཕྱེན་འགགས་པས་ཉེན་པ་ལ་སོགས་པའི་བླ་བརྣན་ལས་ནི་སྣུམ་དེ་བཤད་པ་ལ་སོགས་པ་དང་འདྲེས་པ་ཡིན་པར་ཤེས་པར་བྱ་སྟེ། ནད་དེ་ལ་

ནི་སྣུམ་དང་དུགས་ཀྱི་ཆོ་ག་བྱ་བ་དང་། པོ་སོན་ཆའི་རེང་བུ་གཞུག་པ་དང་། ཤ་མ་དུར་བྱིད་ལ་སོགས་པ་བསྐོལ་བའི་སྦྱོར་བ་བཏང་བ་དང་། རྟུག་པ་འགགས་བ་སེལ་པའི་ཆོ་གས་ཀྱང་ལེགས་པར་བསལ་ཞིང་ཐུར་དུ་དབྱུང་བར་བྱའོ། །ལྟོགས་པ་འམ་གཞང་ནི་སྐྲངས་པའམ། །ཐུག་

པ་རིན་པར་འཐུངས་པ་ཡིས། །རྐུབ་ཏུ་སྣུམ་ནི་བཏང་གྱུར་པ། །སྡོད་པ་མེད་པར་ཤུགས་ཀྱིས་རྒྱུ། །དེ་ནས་རོ་སྟོད་མགྲིན་པ་དང་། །སྟོད་ཀྱི་བུ་ག་དག་ཏུ་འབྱུང་། །ཞེས་བྱ་བ་ལ། ལྟོགས་ཤིང་ཁ་ཟས་ཅི་ཡང་མ་ཟོས་པའམ། ཡང་ན་གཞང་སྐྲངས་པར་གྱུར་པའམ། ཐུག་པ་

เล่ม ๒๐๒ · หน้า 84b

འཐུངས་པར་གྱུར་པ་ནི་སྡོད་པ་མེད་པར་རྒྱུ་ཞིང་རོ་སྟོད་དུ་སོང་ཞིང་། སྟོད་ཀྱི་བུ་ག་མིག་དང་རྣ་བ་དང་། སྣ་ལ་སོགས་པ་ལས་འབྱུང་བར་འགྱུར་རོ། །དེ་ལ་དུར་བྱིད་རྒྱ་ཤུག་ནས། །རྒྱ་སྲན་བ་གཅིན་བསྐོལ་བ་དང་། །དེ་དང་བསྐོལ་བའི་ཏིལ་མར་ནི། །མས་གཏོང་

འཇམ་རྩིར་བཅས་པ་གཏང་། །ཞེས་བྱ་བ་ལ། །ཉེས་པ་དེ་ལ་དུར་བྱིད་ལ་སོགས་པ་དང་བ་གཅིན་བསྐོལ་བའི་མས་གཏོང་བ་བྱས་ལ། ཡང་དུར་བྱིད་ལ་སོགས་པ་དང་བསྐོལ་པའི་ཏིལ་མར་གྱི་འཇམ་རྩི་གཏང་བར་བྱའོ། །ལྐོག་མར་བྱུང་ལ་དགག་པ་དང་། །ལྐོག་མ་

བསྡམས་ཤིང་སྐྱུག་སྨན་དང་། །སློན་བྲོ་སེལ་བའི་གསོ་བས་ཀྱང་། །བཟློག་པ་དང་ནི་དེ་ལ་བྱ། །ཞེས་བྱ་བ་ལ། སྣུམ་དེ་ལྐོག་མར་བྱུང་བར་གྱུར་བ་ལ་ནན་གྱིས་དགག་པ་དང་། ལྐོག་མ་བསྡམས་པ་ལ་སོགས་པས་གྱེན་དུ་འབྱུང་བའི་སྣུམ་དེས་གཟློག་པར་བྱའོ། །སྣུམ་

ཆོས་མ་གྱུར་མི་བཏང་སྟེ། །དེས་ནི་གཞང་ཁར་ཆགས་གྱུར་ཅིང་། །དེ་ལས་ནད་བཅས་རྨོངས་བག་དང་། །གཡའ་དང་སྐྲངས་པ་འང་སྐྱེད་པར་བྱེད། །ཅེས་བྱ་བ་ལ། འཇམ་རྩིའི་སྣུམ་ཚོས་པར་ན་གྱུར་པ་ལ་ནི་བཤང་བའི་སྒོ་ནས་གཏང་བར་མི་བྱ་སྟེ། །ཅིའི་ཕྱིར་ཞེ་ན། མ་ཚོས་

པའི་སྣུམ་ནི་གཞང་གི་ཁར་ཆགས་ལ་གོས་པར་གྱུར་ལ། དེ་ལས་ནི་རྨོངས་བག་ལ་སོགས་པའི་ནད་སྐྱེད་པར་འགྱུར་རོ། །དེ་ལ་མས་གཏོང་རྣོན་པོ་དང་། །ཨརྒའི་ལོར་བསྐོལ་ཏིལ་མར་གཏང་། །ཞེས་བྱ་བ་ལ། །དེ་ལྟ་བུའི་ནད་དེ་ལ་གསོ་བ་ནི་མས་གཏོང་ལ་རྣོན་པོ་དང་། ཤིང་

ཨརྒའི་ལོ་མ་དང་བསྐོལ་བའི་ཏིལ་མར་གཏོང་བར་བྱའོ། །དབུགས་མ་ཕྱུང་བར་བཅིངས་པའམ། །མ་ལུས་པར་ནི་བཏང་བ་ཡིས། །རླུང་ཞུགས་ནས་ནི་འཁྲུགས་བྱེད་ཅིང་། །གཟེར་དང་ན་བ་སྐྱེད་པར་བྱེད། །ཅེས་བྱ་བ་ལ། འཇམ་རྩི་ལྒང་པའི་ཁའི་དབུགས་མ་ཕྱུང་བར་བཅིངས་

པའམ། ཡང་ན་དེར་བླུགས་པའི་སྣུམ་མ་ལུས་བར་བཙིར་ཏེ་བཏང་བར་གྱུར་ན། རླུང་ཁོང་པའི་ནང་དུ་ཞུགས་ནས་འཁྲུགས་པར་བྱེད་ཅིང་གཟེར་བ་ལ་སོགས་པའི་ནད་སྐྱེད་བར་བྱེད་དོ། །དེ་ལ་གཞང་ཁ་བསྐུ་དུགས་བྱ། །རླུང་འཛོམས་པ་ཡི་ཁ་ཟས་གཏང་། །ཞེས་བྱ་བ་ལ།

ที่มาและสัญญาอนุญาต

ตัวบท: e-text เตนยูร์ฉบับเดเกของ Esukhia (Esukhia/derge-tengyur · commit 17465313) · สาธารณสมบัติ

สัญญาอนุญาต Public Domain · หลักฐาน

README ของ Esukhia/derge-tengyur ที่ commit 174653137d62 ส่วน "License" (เปิดอ่านแล้ว ๔ ต.ค. ๒๕๖๙): "This work is a mechanical reproduction of a Public domain work, and as such is also in the Public domain." · GitHub license = null (ไม่มีไฟล์ LICENSE) · สำเนาคำต่อคำ: data/tengyur-src/SOURCE-README.md

ไม่มีคำแปล — ตัวบทเป็นภาษาทิเบตอย่างเดียว เพราะยังไม่มีคำแปลที่เราได้รับอนุญาตให้เผยแพร่ (คำแปลของ 84000 ห้ามดัดแปลงและห้ามใช้เชิงพาณิชย์)

  • หน้านี้แสดงคำอ่านตามแผ่นไม้ — เครื่องหมายบรรณาธิการของ Esukhia ({เดิม,ปรับ} · (ผิด?,เสนอ) · […] · #) เก็บครบอยู่ในข้อมูล
  • ตัวบทภาษาทิเบตยังไม่อยู่ในการค้นหาของคลัง — ตัวตัดคำที่มีตัดสระของอักษรทิเบตทิ้ง จึงให้ผลที่ผิด